Efesios

Yetsi‑ni udhelha Pabluha ge ka benne ria leke Jesucristuha seꞌeke lheꞌesi Éfeso

¹ Neti Pablo ankaa apóstol ge Jesucristuha. Tata Do Yebáha‑ba bedá lebie kini akaa apóstol. Naa ridhelhaa yetsi‑ni gele, lebiꞌi ka benne chi ankale ge Tata Do Yebáha lhe anágaba chi rudo tsitsile tisa ge Jesucristuha, delába lebiꞌi ka benne seꞌele lheꞌesi Éfeso‑na. ² Xxudiriꞌi do yebáha lhe Jesucristu benne anke Xxanariꞌiha lhe, lake edá leke aka lenke le lhe useꞌeke le xen su lasi lhe.

Tata Do Yebáha rutebie elha tse ge ka benne chi ria leke Cristuha

³ Xxeniba ra le Tata Do Yebáha Xxudi Jesucristu benne anke Xxanariꞌiha. Benneha chi benie kini saría tsena riꞌi, betebie iyába elha tse daa yebáha geriꞌi de chi babariꞌi len Jesucristuha. ⁴ De chi babariꞌi len benneha, de nuha nna attili lani kwe yiesi lo yu‑niha chi bekwe Tata Do Yebáha riꞌi kini akariꞌi nari xú lhe itá su arlobie lhe. ⁵ De ukanie geriꞌi, de nuha nna ttuha‑li chi gaꞌananie edíbie riꞌi kini eyakariꞌi xiꞌinie de nu gwate Jesucristuha, kumu aníha‑ba chi bedá lebie unie. ⁶ Aníha ben Tata Do Yebáha kini riꞌi uinriꞌi ki inná xxeni lebie de nu tse bedá lebie betebie geriꞌi de chi babariꞌi len Xiꞌinieha, delába benne raka xxattanie geeha. ⁷ Kumu reni belali benneha utixe geriꞌi kini beseꞌe lhaariꞌi lhe bixú elha xen lasi ge ka tulha geriꞌi lhe. ¡Gwaluyúruga, análi xxeni anka elha tse bete Tata Do Yebáha geriꞌi, ⁸ bete tame iyá looba elha yuu lhe elha rieni geriꞌi lhe! ⁹ Aníha benie kini tte denriꞌi nu chi gaꞌananie unie, delába nu labí chi yuriꞌi ttuha. benbe attiba chi bedá lebie unie. ¹⁰ Nu chi gaꞌananie unie, uinbe nuha atti chi tadona sá akana. Laꞌania nna ottupe iyá tteba nu seꞌe yebáha lhe nu seꞌe yiesi lo yu‑ni lhe, nianna utebie kana lasi ná Cristuha kini benneha nna innabie kana.

¹¹ Riꞌi de babariꞌi len Cristuha nna ralhariꞌi dhiriꞌi nu ute Tata Do Yebaa benne runie iyá tte attiba rakaba lebie, kumu ttu gaꞌanalanie gaxie riꞌi kini akariꞌi gebie. ¹² Aní ben Tata Do Yebáha kini riꞌitu, ka nu sisiꞌa tte bexxen letu ge Cristuha, uintu kini inná xxeni lebie. ¹³ Anágaba lebiꞌi chi biyieninle ge nu anka gwalí, delába biyieninle ka tisa tse, ka nu rigixxiꞌakana gasina uinle kini lhaale. Nianna lebiꞌi ugía lele ge Cristuha. De nu gwate benneha nna bisia Espíritu ge Tata Do Yebáha latile, delába Espíritu chi ree utebie gele. Benneha bisiabie beyaꞌane latile kini aníha nna uleꞌe deki chi ankale ge Tata Do Yebáha. ¹⁴ Espírituha nuha runna liibie deki gwalíba dhiriꞌi nu tse chi ralhariꞌi dhiriꞌi. Dhiriꞌi nuha ganna chi bisia sá ulhuxa Tata Do Yebáha odilábie riꞌi, delába riꞌi ka benne chi ankariꞌi gebie. Aníha kini riꞌi uinriꞌi ki inná xxeni lebie.

Pabluha rinnabe len Tata Do Yebáha ge ka benne chi ria leke Cristuha

¹⁵ De nuha nna neti tti binaa deki chi ria lele ge Jesús benne anke Xxanariꞌiha lhe binaa deki gwa rakabinle ge iyá tte ka benne chi ankake ge Tata Do Yebáha, ¹⁶ debá laꞌania nna kua rexxaba lasia le, labí rudú siia rugwea bie ixkixaru gele atti rilhapia tisa lenie. ¹⁷ Rinnabaa kini Diosi ge Jesucristu benne anke Xxanariꞌiha, delába Xxudiriꞌi benne ra xxeni leeha, rinnabaa lenie ki utebie Espíritu geeha lenle kini benneha nna utebie elha yuu gele lhe unie kini tte denle lhe. Aníha kini lebiꞌi uinbia tselee. ¹⁸ Rinnabagabaa lenie idhalie ikile kini tte denle ge nu chi xen lele dhile de uxie le lo neda geeha, lhe anágaba kini tte denle deki yalhá xxeni anka nu tse utebie len ka benne chi ankake gebie. ¹⁹ Anágaba rinnabagabaa lenie kini tte denle gasina ra tsitsi xxatta lebie lhe gasina rixúnie nu ra tsitsi leeha kini raka lenie riꞌi, delába riꞌi ka benne chi ria leriꞌe. Nu ra tsitsi xxatta leha‑gaba nuha, ²⁰ beleꞌebie lhe bixúnie tti belhidhe Cristuha lo elhuttiha, nna bedobie benneha daka ná banie ata doe yebáha. ²¹ Bedúbie benneha kini innabie iyá xea ka nu ra xxeni lekani lhe ka nu ra tsitsi lekani lhe. Anágaba innabiagabe iyá ka nu loni lhe iyá ka nu rapakana lo neda lhe nuxaba attu nu ra xxeni leni lhe, sila seꞌekana gwetsáha lhe sila seꞌekana yiesi lo yu‑ni lhe. Laa suna ka nu seꞌe nnannaga innabie, anágaba innabiagabe ka nu si daa lhe. ²² Iyába nu seꞌe betebie kana lasi ná Cristuha kini benneha innabie kana lhe bedúgabe benneha kini ake nu loni ge ka benne chi ria leke bie. Attiba ikiriꞌi‑ni rinnabiana itúba latiriꞌi, aníha‑gaba ruin Cristuha. ²³ Cristuha anke iki ka benne ria leke bie; ka benneha nna ankake attiba latie. Labie nuha runie kini ka benneha rakake idaꞌa kumu labie runie kini iyá tte nu seꞌe rakana idaꞌa.

Tata Do Yebáha redába lebie rodilábie riꞌi

¹ Lebiꞌi ttiba ttu nu yatti ankale tti rekile ruinle tulha lhe tti rekile ruinle iyába nu satsa lhe. ² Nuníba benle ugwekile itú ttuha. Benbale attiba ruin ka benne seꞌe yiesi lo yu‑ni. Benbale nu raba nu xxegwi rinnabiana adí ka espíritu satsa, ka nu labí rilenriꞌi rekikana lo be, delába nu xxegwi ruinna sina lheꞌe lasto ka nu abittu rudokana tisa ge Tata Do Yebáha. ³ Aníha‑gaba ben iyáriꞌi itú ttuha; benbariꞌi nu satsa retaba leriꞌi. Bedobariꞌi tisa ge nu rakaba le bela latiriꞌi‑ni uinna lhe nu resiaba lheꞌe ikiriꞌi lhe. De nuha nna laꞌania chiba gaꞌanani Tata Do Yebáha dhiriꞌi elha disa tsitsi utebie attigaba luesi elha disa dhi adí ka benne seꞌe yiesi lo yu‑ni. ⁴ Ttaka Tata Do Yebáha anke benne ratua xxatta lebie nna yalhá ukanie geriꞌi. ⁵ Laxkala atti sa rekiriꞌi ankariꞌi attiba ttu nu yatti de ruinriꞌi tulha, laꞌania nuha beyoin banie riꞌi itupa len Cristuha, tti beyaka ben benneha lo elhuttiha. Laxkala lebiꞌi de bedába le Tata Do Yebáha nna gwa bodilábie le. ⁶ Anágaba atti belhidha Tata Do Yebáha Cristuha lo elhuttiha, attisidigaba itupa lenriꞌi benneha nuha beyadhariꞌi lo elhuttiha nna benie kini tseꞌeriꞌi len benneha yebáha. ⁷ Aní benie kini uleꞌenie ka nu si daa nu tse redá lebie rute tame geriꞌi de chi babariꞌi len Cristuha. ⁸ Kumu lebiꞌi, de bedába le Tata Do Yebáha nna gwa bodilábie le. Bodilábie le de ugía lele gebie, laa kwinaga lebiꞌi benle ttu bixa ki lhaale. ¡Koꞌo! Tata Do Yebáha kwentaba bodilábie le. ⁹ Laa de ruingariꞌi bixa ttu nu tse nna rodilábie riꞌi. ¡Koꞌo! Sinuki de redába lebie nna rodilábie riꞌi. Aníha kini abittu tseꞌeriꞌi innáriꞌi deki de ruin tsebariꞌi nna gwa rodilábie riꞌi. ¹⁰ Kumu labe benie riꞌi lhe chiba ankanie riꞌi ki uinriꞌi nu anka tse de babariꞌi len Jesucristuha, delába nu tse chi bedhaꞌane ttuha uinriꞌi.

Ka benne Israel lhe ka benne abittu ankake nu Israel lhe, boseꞌe tse Cristuha ke len Tata Do Yebáha

¹¹ De nuha nna lebiꞌi ka benne dittu, gwalodhú lele attili ulileha labí ruu lo bela latile. Ka nu Israel‑ni nna de ruu lo bela latikani, de nuha nna tekinna lále ka nu labí ruu lo bela latikani, kumu de lakana richú lo bela latikani. ¹² Lebiꞌi labí ankabienle Cristuha laꞌania lhe labí babale len ka nu Israel‑ni lhe. Anágaba labí len lebiꞌi bodhaꞌan Tata Do Yebáha tisa deki unie kini saría tsena le. Laꞌania sun tteba aná seꞌele yiesi lo yu‑ni, labí bixa ge ruxxen lele, nigaba lanú Diosi gele do laꞌania. ¹³ Ttaka nnanna de chi babale Jesucristuha, de nuha nna lebiꞌi ka nu seꞌele idittu len Tata Do Yebáha laꞌania, nnanna chiba bibigale gaxxa lenie de reni belali Jesucristuha tti uttieha. ¹⁴ Cristuha benie kini beseꞌe tse len luesiriꞌi. Benie kini riꞌitu ka nu Israel lhe lebiꞌi ka nu abittu ankale ka nu Israel, benie kini beyakariꞌi attisidiba ttúba benne. Utuabie nu risin luesiriꞌiha kumu nuha rilhaꞌana lheꞌe luesiriꞌi. ¹⁵ Len elhutti gwate benneha lo ya kurusiha, len nuha ulhida gaabie bia bennabi bodhaꞌan Moisés‑ni, delába nu ra loni bipaxa daa lo ka benne uinke. Aníha benie ki boseꞌe tsebie len luesiriꞌi, kini delo chupa dhi nna suna ttu dhiba benne kubi beyonie riꞌi de chi babariꞌi lenie, ¹⁶ lhe lo ya kurusiha boseꞌe tsebie ixpa dhiriꞌi len Tata Do Yebáha nna beyonie riꞌi attisidiba ttúba benne, nna lo ya kurusiha belhuxa loe nu seꞌe tilhariꞌiha. ¹⁷ Bitee utixxiꞌanie le lebiꞌi ka nu abittu useꞌele gaxxa len Tata Do Yebáha laꞌania lhe anágaba len riꞌitu ka nu useꞌetu gaxxa lenie, utixxiꞌagabanie riꞌitu gaxasina eseꞌe tse len luesiriꞌi. ¹⁸ Kumu de Cristuha nna lebiꞌi lhe riꞌitu lhe chiba yali lo neda geriꞌi ki ibigariꞌi len Tataha, kumu de ttúba Espíritu geeha chi do lheꞌe lastoriꞌi.

¹⁹ Laxkala lebiꞌi, arlo Tata Do Yebáha labíru ankale benne dittu, nigaba benne subi. Lebiꞌi nnanna chi ankale benne babale len ka benne chi ankake ge Tata Do Yebáha lhe anágaba chigaba ankale benne gebie lhe, ttiba benne lheꞌe yoꞌo chi ankale lenie. ²⁰ Attiba ttu yoꞌo diana rikuana iki íyya cimientu, aníha‑gaba lebiꞌi diale rideti chiettirule nu bodhaꞌan ka apóstoal lhe ka profetaha lhe. La kwinaba Jesucristuha nuha anke attiba íyya cimientu nu rugwena xilatti yoꞌoha, delába ge benneha nuha beleꞌeni ka apóstoal le. ²¹ De Cristuha nna itúba yoꞌoha tseba rikuana nna diana radhana axtaliba isinna akana ttu yotu leꞌa ge Benne anke Xxanariꞌiha. ²² Anágaba lebiꞌi, de benneha nna itupa lenle ka nu Israel‑ni, chiba bisinle akale attiba lisi Tata Do Yebáha ata dho Espíritu geeha.

Pabluha rigixxiꞌanie ka benne abittu ankake nu Israel ka tisa ge Jesucristuha

¹ Delo niꞌa ge nuní nna neti Pablo tea lisiyya de rekia rigixxiꞌania le ka tisa ge Jesucristuha, delába lebiꞌi ka benne abittu ankale nu Israel. ² Rudhaka lasia chiba yule, Tata Do Yebáha‑ba bedá lebie bedhaꞌane sina‑ni len neti, kini anáchu kixxiꞌania le ka tisa geeha. ³ Labe beleꞌenie neti nu chi gaꞌananie unie, nu labí chi yuriꞌi ttuha, delába nu chi daya rigixxiꞌania le ttu latti lo yetsi‑ni. ⁴ Atti ulabale nu dia lo nuní, laꞌania nna tte denle deki neti chiba yua nu chi gaꞌanani Cristuha unie, delába ge nu labí chi yu ka benne itú ttuha. ⁵ Nuní labí chi utixxiꞌani Tata Do Yebáha ka benne useꞌe itú ttuha. Labí utixxiꞌanie ke attiba runie nnanna rixúnie Espíritu geeha kini rigixxiꞌanie ka benne ankake apóstol lhe ka profeta lhe, delába ka benne chi ulesie ki uinke sina gebie. ⁶ Utixxiꞌe ree deki ka nu labí ankakana ka nu Israel, de ibababakana len Jesucristuha lhe de tsiaba lekani ge ka tisa geeha lhe, de nuha nna chiba iselakana dhíkana nu ralha ka benne Israel‑ni dhike lhe chigaba ankakana attisidiba ttúba benne len ka benne Israel‑ni, lhe anágaba chigaba selakana kini edí baakana nu chi ra Tata Do Yebáha utebie ge ka benneha. ⁷ De ka tisa ge Jesucristuha nna Tata Do Yebáha bedá lebie betebie len neti kini tsekia kixxiꞌaya ka tisa‑ni. Aní benie kini beleꞌebie nu tsitsi ra leeha.

⁸ Meskila neti labí dakaa, tuttíruba gwexxa dua delo iyá ka benne chi biriesike ki akake ge Tata Do Yebáha, ttaka len netila bedá lebie betebie elha tse kia kini kixxiꞌania ka benne abittu ankake nu Israel, delába kixxiꞌania ke ge nu anka xxatta tse rute Cristuha geriꞌi, ⁹ lhe anágaba iyá tte ka benne kixxiꞌania ke ge Tata Do Yebáha, delába benne benie iyá tte nu seꞌe. Kixxiꞌania ke gasina anka nu chi gaꞌananie unie nu labí chi yu ka benne geni, delába nu tenie gatsi attili lani kwe yiesi lo yu‑niha, ¹⁰ kini anáchu ka benne ria leke Cristuha uinke ki iláni ka nu rinnabia lhe ka nu ra tsitsi lekani seꞌe gwetsáha deki xxeniba anka elha yuu ge Tata Do Yebáha. ¹¹ Atti lanila kwe yiesi lo yu‑ni chila gaꞌanani Tata Do Yebáha aka nuní, nna Jesucristu benne anke Xxanariꞌiha, benneha bixúnie kini uka nuní. ¹² De benneha nna labí rasinriꞌi, xen suba leriꞌi deki gwa yaliba lo neda geriꞌi kini ibigariꞌi arlo Tata Do Yebáha de ria leriꞌi Cristuha. ¹³ De nuha nna rinnabaa len lebiꞌi abittu eyadi gaale lo neda ge Tata Do Yebáha de ratea ruyúa elha disa de lebiꞌi, kumu elha disa ratea‑ni ixúlana kini saría tsena le.

Pabluha rinnabe len Tata Do Yebáha ge ka benne . seꞌe lheꞌesi Éfeso

¹⁴ De nuha nna neti rudachu xibia arlo Tata Do Yebáha, delába Xxudi Jesucristu benne anke Xxanariꞌiha. ¹⁵ Labie nuha benie iyá tte nu seꞌe yebáha lhe nu seꞌe yiesi lo yu‑ni lhe. ¹⁶ Rinnabaa lenie kini attiba ra xxeni xxatta lebie, aníha‑gaba unie kini Espíritu geeha kweki tsitsie lele, ¹⁷ kini dho Cristuha lheꞌe lastole de tsia lele gebie. Rinnabagabaa lenie kini lebiꞌi, de chi seꞌe tsitsile rakin ge luesile, ¹⁸ de nuha nna, itupa lenle adí ka benne chi ankake ge Tata Do Yebáha, dhaale tte denle deki yalhá raka xxattani Cristuha gele. ¹⁹ Rinnabaa lenie kini tte denle elha siꞌi lasi geeha, delába elha siꞌi lasi nu labí ridaariꞌi tte denriꞌi gasina ankana. Ganna chi ute denle elha siꞌi lasi geeha, laꞌania nna iyába nu anka elha ruin ge Tata Do Yebáha chi dho lheꞌe lastole.

²⁰ Tata Do Yebáha ra tsitsi lebie runie sina lheꞌe lastoriꞌi. Benneha xxenirula anka nu raka gebie runie attichula nu rinnabariꞌi lenie, lhe attichula nu rulaba leriꞌi aka lhe. ²¹ De babariꞌi len Jesucristuha, de nuha nna iyábariꞌi ka benne chi ria leriꞌe, satíaba uinriꞌi kini inná xxeni le Tata Do Yebáha ttu dia lii. Amén.

Ttu dhiba ankariꞌi de chi babariꞌi Cristuha

¹ De rekia rigixxiꞌaya ka tisa ge Jesús benne anke Xxanariꞌiha, de nuha nna tea lisiyya nna rinnaba ditia len lebiꞌi gwaltseꞌe gwaluni attiba dika uinle de chi biyaxile ki akale ge Tata Do Yebáha. ² Gwaluni ge benne abittu ra xxeni lebie lhe latsiru gwalikweki lele, lhe anágaba gwalikweki besi lele lhe. Len elha siꞌi lasi gwalutto gwaluchía ge luesile. ³ Espíritu ge Tata Do Yebáha unie kini ttúba dhu lele. De nuha nna abittu lhaꞌa lheꞌe luesile. Latsiru tseꞌe len luesile abittu ttilhale. ⁴ Kumu suna ttu dhiba ankale lhe ttúba Espíritu ge Tata Do Yebáha do lheꞌe lastole lhe. Anágaba biyaxile kini ge ttúba nu uxxen lele geni ⁵ lhe ttúba benne anke Xxanale lhe ttúba ria lele, lhe anágaba ttúgaba radile inda lhe. ⁶ Anágaba ttúgaba Diosi do anke Xxudi iyá tteriꞌi lhe. Benneha due iki iyá tteriꞌi, nu rabe raka lhe anágaba rixúnie iyá tteriꞌi kini uinriꞌi sina gebie, lhe dogabe lheꞌe lasto iyá tteriꞌi lhe.

⁷ Ttaka ttu tturiꞌi, kua bedába le Cristuha betebie elha tse geriꞌi ki aka geriꞌi uinriꞌi sina gebie. ⁸ De nuha nna lo ka yetsi ge Tata Do Yebáha rigixxiꞌa ge nu ben Cristuha, lo ka nuha dia ra:

Tti beyapie gwetsáha

dechebie ka benne bedaxxueha

lhe anágaba betebie elha tse ge adí ka benne lhe.+ 4:8 Salmo 68:18

⁹ (Nianna, ¿bí diani tti ra: “beyapie gwetsáha”? ¿Laaba ganna dienna innána, ladeꞌaxa ugwadi Cristuha axtaru lhiꞌu yuha, nianna tti beyapie gwetsáha‑li? ¹⁰ Benne ugwadie axtaru lhiꞌu yuha, benneha‑gaba nuha beyapie axtaru gwetsáha kini labie unie ki aka iyá tte ka nu seꞌe idaꞌa.) ¹¹ Lagabe nuha betebie elha tse ge ttu chupa ka benne kini akake apóstol, adíke nna akake profeta, adíke nna akake ka benne tsekike kixxiꞌake ka tisa geeha, lhe anágaba betegabe elha tse ge ka benne kini akake ka nu uyú tsitsike ka benne chi ria leke gebie, lhe udhetikanie ka benneha ka tisa geeha lhe, ¹² kini ka benne chi ankake geeha akake nu ixú ki uinke sina gebie, kini anáchu nna useꞌe tsitsike iyá ka benne chi ria leke Cristuha. ¹³ Aníha kini isin iyá tteriꞌi akariꞌi attisidiba ttúba benne de ttúba ria leriꞌi lhe anágaba kini isinriꞌi uinbiariꞌi Xiꞌin Tata Do Yebáha. Aníha kini akariꞌi itá su attiba anka Cristuha. ¹⁴ kini abitturu akariꞌi attiba ka nuto‑na. Ka nuná, naa lhe niiba radhákana de abittu chi riseꞌe tsitsikana. Aníha‑gaba riꞌi, abittu jeru tteba tsia leriꞌi ge ka nu nnelaba rotsiꞌinu lekani ge bixaba elha rieni nu abittu ixú rugaꞌakana ikiriꞌi. Ka nuná, naa lhe niiba rukannakana ikiriꞌi len nu ruleꞌekinna riꞌiha. ¹⁵ Ttaka riꞌi nu uinlariꞌi, len elha siꞌi lasila tseꞌeriꞌi udoriꞌi tisa ge nu anka gwalí, kini anáchu nna delo iyá nu uinriꞌiha tseꞌe tsitsiruriꞌi kini isinriꞌi akariꞌi attiba Cristuha. Benneha anke ttiba ikiriꞌi, delába lee nuha due loriꞌi. ¹⁶ Ttiba ka sitta latiriꞌi, ganna iyábakana tseba yieti roꞌo luesikani, laꞌania nna tsitsiba anka itúba latiriꞌi. Aníha‑ba nuha Cristuha, benneha runie kini tseba seꞌe len luesiriꞌi lhe tutupaba ankariꞌi lhe rute ná len luesiriꞌi lhe. Kua ttu tturiꞌi ruinbariꞌi nu rakaba geriꞌi. Aníha nuha nna diariꞌi riseꞌe tsitsiruriꞌi lo neda geeha de rakin ge luesiriꞌi.

Lebiꞌi eyakale attiba ttu benne kubi

¹⁷ Neti de babaa len Jesús benne anke Xxanariꞌiha, de nuha nna rulisaa le lhe rinnabaa len lebiꞌi, abitturu tsekile uinle tti runi ka nu labí ankabiakinna Tata Do Yebáha. Ka nuná rekibakana ruinkana nu abittu dika ixú, nu resiaba lheꞌe ikikani ruinkana. ¹⁸ Ttiba nu chulha ikini anka ka nuná, labí redí baakana elha nabani rute Tata Do Yebáha, de labí elha rieni do ikikani lhe de ruin tsitsi lastokani labí ria lekani. ¹⁹ Ka nuná labí elhittu yuꞌu lokani. Gwexunniba ruinkana iyá looba nu satsa; suna nunába do lekani ruinkana. ²⁰ Ttaka lebiꞌi laa anága bidetile ge Cristuha, ²¹ ganna ttixka gwalíginle chi biyieninle gebie lhe chi bidetile ka tisa ka nu anka gwalí, delába ka tisa ka nu rigixxiꞌakana ge Jesús‑ni. ²² De nuha nna nu uka elha ruin gele ttuha, chinka gwalikua nuha, kumu nu satsa udá lele benle ttuha, bennittiba nuha le. ²³ Gwalotsea elha rulaba lee gele. ²⁴ Gwaleyaka attiba ttu benne kubi. Gwaluni deki lebiꞌi ben Tata Do Yebáha le atti tteba ankeha. Aníha ki akale benne gwalíga uinle nu dika ixú lhe uinle latsiru attiba ttu benne chi biriesie kini ake gebie.

²⁵ De nuha nna abitturu uin lele. Kua ttu ttule gwalinneba nu ankaba gwalí len ka betsi to geriꞌi, kumu iyábariꞌi ttú dhiba chi ankariꞌi, de chi baba len luesiriꞌi.

²⁶ Ttixka riseꞌenle, abittu ixegwile uinle ttu bixa nu satsa;+ 4:26 Salmo 4:4 abittu ni galhaba sá sa risaꞌabinle. ²⁷ Abittu dhielhale ge nu xxegwiha.

²⁸ Nu runi ubanaha, bitturu lhanana; kwenlana sina len niꞌa náni. Uinna ttu nu dika ixú kini anáchu tee nu utena len ka benne riyasakanie.

²⁹ Abittu innele tisa satsa. Gwalinneba suna nu dika ixúba kini useꞌe tsitsile ka benne lhe kini udú tsena le ke tti iyienkanie nu inneleha. ³⁰ Abittu udú siꞌile le Espíritu ge Tata Do Yebáha. Benneha bisiabie latile nna beyaꞌane kini uleꞌe deki chi ankale gebie ganna chi bisia sá ulhuxa loo Tata Do Yebáha odilábie riꞌi.

³¹ Gwalikua nu satsa re lele lhe gwalikua iyá elha riseꞌiki gele lhe. Anágaba bittu rilaꞌaba tsuꞌule ttixka ridaka len luesile lhe bitturu inne satsa ge luesile lhe, gwalikua iyá nu satsa rulha lele lhe. ³² Latsirula gwaluyú luesile. Gwasatua le luesile lhe gwalidhí elha xen lasi ge luesile lhe. Gwaluni attigaba ben Tata Do Yebáha, benneha, de nu gwate Cristuha nna uxíe elha xen lasi gele.

Gwaluni latsiru atti galába ruin ttu benne chi du lheꞌe xiani

¹ De nuha nna gwaluni atti tte ruin Tata Do Yebáha, kumu lebiꞌi ankale xiꞌinie nna rakanie gele, ² lhe anágaba akinle ge ka benne attiba ukani Cristuha geriꞌi nna bedá lebie betebie elha nabani geeha kini uttie utixe geriꞌi. Benneha uke attiba ttu nimala ruttikana ki rutekana úna, delába úna nu rure tsena tti risinna arlo Tata Do Yebáha.

³ Gwaluni atti galába ka benne chi ankake ge Tata Do Yebáha. Abittu dhaa tisa gele innákana deki nu subi subiba reki lenle, lhe innákana deki ruinle iyába nu satsa o si innákana deki rudona lele gatta xxatta belhiu gele. ⁴ Anágaba bittu innele tisa satsa o tisa abittu ixú, kumu labí anka tse innele aní. Lebiꞌi gwalugwela Tata Do Yebáha ixkixaru. ⁵ Kumu lebiꞌi gwa yu xeabale, niru ttú ka nu risákana nu subi subi lhe ka nu ruinkana nu satsa lhe, ka nuná labí ralhakana dhíkana nu tse dhi ka benne chi rinnabia Cristuha ke lhe chi rinnabia Tata Do Yebáha lhe, nigaba ka nu raka xxatta lekani gatta belhiu gekani lhe. Kumu ka nuná de rudo xxattana lekani belhiu, de nuha nna ttiba ttu diosi reyaka belhuha gekani. ⁶ Bittu ixú yiele tsia lele ge ka nu rinnekana ka tisa abittu ixú. Kumu iyá nuní ruinna ki riseꞌiki Tata Do Yebáha nna ridhelhe elha disa ge ka nu abittu rudokana tisa gebie. ⁷ De nuha nna abittu iyietile uinle tti ruin ka nuná.

⁸ Kumu lebiꞌi itú ttuha attiba nu reki ata chulha ankale de benle nu satsa, ttaka nnanna de chi babale len Jesús benne anke Xxanariꞌiha, de nuha nna chiba rekile lheꞌe xiani. Laxkala gwaltseꞌe gwaluni latsiru atti galába runi ttu benne chi due lheꞌe xiani. ⁹ Gwalutte daa gasina anka nu ruꞌu le Jesús benne anke Xxanariꞌiha. Kumu ka benne rekike lheꞌe xianiha, ankake benne tse lhe ankake benne runi attiba ankaba geni lhe. Anágaba rinnegabake nu ankaba gwalí. ¹¹ Abittu iyietile uinle nu abittu dika ixú, bittu uinle luesi nu ruin ka nu reki ata anka chulha. Ka nuná, gwaligála kana deki satsaba anka nu ruinkana. ¹² Kumu nu satsa ruinkana gatsiha, axtaba rettuinriꞌi kixxiꞌariꞌi geni. ¹³ Ttaka iyába nu raka gatsiha, ganna chi rilá loo geni, laꞌania nna runaba benne geni, kumu xianiha nuha ruinna kini rilá iyá nu raka. ¹⁴ De nuha nna ra ka benne:

Lu nu ankalu ttiba ttu nu teꞌadhi, bebani,

lhe beyadha lagwi ge ka nu ankakana ttiba nu yatti,

nna Cristuha udanie gelu.

¹⁵ De nuha nna gwaluyú tsitsi gasina anka elha ruin gele. Bittu uinle tti runi ttu nu abí yuu, gwaluinla tti runi ttu nu yuu. ¹⁶ Ttiru nnanna tee lo neda gele, gwaltseꞌe gwaluni nu anka tse, kumu ka sá chi seꞌeriꞌi nnanna, satsaba chi anka ka nuní. ¹⁷ De nuha nna bittu uinle tti ruin ka nu akaa elha rieni ikikani. Gwalutte dala nu raka le Jesús benne anke Xxanariꞌiha uinle. ¹⁸ Bittu dhusinle kumu elha riꞌa‑na runnittiba nuná le, ruinbale nu rakaba leni. Lebiꞌi gwalugwelhala tsuꞌu Espíritu ge Tata Do Yebáha itú latile kini uinle nu raka lebie. ¹⁹ Len tisa tsagwi gwalulisa luesile lhe gwalulha ka leꞌa to lhe. Itú iki itú lele gwalulha ge Jesús benne anke Xxanariꞌiha, ²⁰ lhe satía gwalugwe Tata Do Yebaa benne anke Xxudiriꞌiha ixkixaru ge iyá tte, de nu ben Jesús benne anke Xxanariꞌiha.

Pabluha rigixxiꞌabie gasina tseꞌe len ka benne biyú‑na ka nuila geke

²¹ Lebiꞌi de tee elha rasi ge Tata Do Yebáha lheꞌe lastole, de nuha nna gwaludo tisa ge luesile. ²² Lebiꞌi ka benne nuila, udole tisa ge nu inná ka benne biyú gele‑na attiba rudole tisa ge Jesús benne anke Xxanariꞌiha, ²³ kumu ka benne biyú‑na nuná seꞌeke iki ka benne nuila‑na, delába lake nuná rinnabiake ka benne‑na attiba Cristuha, labie nuha anke ttiba iki ka benne ria leke bie, lake nna ankake ttiba latie. Kumu ttiba ikiriꞌi‑ni, lana rinnabiana itúba latiriꞌi, aníha‑gaba benneha, lee nuha rinnabie ke lhe rodilábie ke lhe. ²⁴ De nuha nna attiba ka benne ria leke Cristuha rudoke tisa ge nu rabie, anágaba ka benne nuila‑na, ge iyába nu inná ka benne biyú geke‑na, udoke tisa geni.

²⁵ Lebiꞌi nna ka benne biyú, akinle ge ka benne nuila gele‑na attiba Cristuha ukanie ge ka benne ria leke bie, nna de lake nna betebie elha nabani geeha kini uttie utixe geke. ²⁶ Aníha benie kini ulesie ke ki ukake gebie de bocharie ke len indaha lhe len ka tisa geeha lhe, ²⁷ kini anáchu rapi edha linníbake otso dubie ke arlo la kwinaba labie, abittu tsiga akake arloe lhe bittu ruinke nu satsa lhe, sinuki akalake nari xú lhe itá su lhe. ²⁸ Aníha‑gaba nuha ka benne biyú‑na teeki akakanie ge ka benne nuila geke‑na attiba rakabakanie ge latike, kumu ttu nu rakinna ge nuila geni, la gebani nuha rakinna. ²⁹ Kumu lanú ttu benne do abittu rakanie ge latie, sinuki rugo tselee na lhe ruyú tsitsilee na lhe, ruinbe attiba ruin Cristuha ruyú tsitsie ka benne chi ria leke bie, ³⁰ kumu riꞌi chi ankariꞌi benne selariꞌe, ankabariꞌi attiba sitta latie lhe bela latie lhe.

³¹ “De nuha nna nubiyúha udhanbana ka xxudi ixnániha nna utsá náni len nuila geniha nna eyakakana attisidiba ttúba benne.”+ 5:31 Génesis 2:24³² Xxeniba anka nu rigixxiꞌaya‑ni, labí rite daa tsenriꞌi nuní, delába rigixxiꞌaya ge Cristuha lhe ge ka benne ria leke bie lhe. ³³ Laxkala lebiꞌi ka benne biyú, kua ttu ttule akinle ge ka benne nuila gele‑na attiba rakabin gele. Lebiꞌi nna ka benne nuila tsia lele ka benne biyú gele‑na.

Pabluha rigixxiꞌabie gasina dika uyú ka xxudi ixná ka xiꞌinkani

¹ Lebiꞌi nna xa xiꞌini to, de chi babale len Jesús benne anke Xxanariꞌiha, de nuha nna gwaludo tisa ge ka xxudi ixnále‑na, kumu aná dika uinle. ² Kumu lo ka yetsi ge Tata Do Yebáha ree: “Tsia lelu ka xxudi ixnálu kini saría tsena lu lhe kini itienlu dholu yiesi lo yu‑ni lhe.”+ 6:2‑3 Éxodo 20:12 Tisa nu ra: “Tsia lelu ka xxudi ixnálu”, tisa‑ni nuha nu sisiꞌa tte bodhaꞌane ree deki tseba saríana riꞌi ganna uinriꞌi nu ra tisa‑ni.

⁴ Lebiꞌi nna ka xxudi ixná, bittu utseꞌenle ka xiꞌinle‑na. Gwaluyúla kana lhe gwaludhetila kinna, lhe gwaluleꞌela kinna uinkana tti raka le Jesús benne anke Xxanariꞌiha.

Pabluha rigixxiꞌabie gasina dika uin ka benne toꞌoke lo sina ge ka xxanake

⁵ Lebiꞌi ka nu toꞌole lo sina ge ka nu ankakana xxanale yiesi lo yu‑ni, bittu a udole tisa gekani; len elha rasi gwaluin nu innákana. Itú iki itú lele gwaludo tisa gekani, bittu delo tisaba uinle ttu bixa. Gwaluni attisidiba ge Cristuha‑ba nuha rudole tisa. ⁶ Abittu suna ttiruba du xxanaleha rulannina gele nna jeru tteba ribenle sina kini eyaꞌan tsele lenna. Koꞌo. Lebiꞌi gwaluinla attisidiba toꞌobale lo sina ge Cristuha. Itú iki itú lele uinle nu raka le Tata Do Yebáha. ⁷ Itú lele gwalikwen sina. Gwaluni attisidiba lo sina ge Jesús benne anke Xxanariꞌiha‑ba nuha renle, bittu akinle deki lo sina ge ka benne seꞌe yiesi lo yu‑niba nuha renle. ⁸ Lebiꞌi gwa yúbale, sila ankariꞌi nu toꞌoriꞌi lo sina ge ka xxanariꞌi o sila ankariꞌi nu abittu toꞌoriꞌi lo sina gekani, bixaba nu tse ruinriꞌi, Jesús benne anke Xxanariꞌiha gotebe geriꞌi kua nu tse benba ttu tturiꞌi.

⁹ Lebiꞌi ata ankale xxana ka sina, anágaba gwaluin len ka nu toꞌokana lo sina gele‑na; latsiru gwaluyú kana. Abittu gwedhaka disabakana uinle. Lebiꞌi gwa yu xeabale, ka nuná lhe lebiꞌi lhe, yebáha‑la do benne anke Xxanale. Arlo benneha turoꞌoba daka iyáriꞌi.

Tsitsi gwaltseꞌe lo neda ge Tata Do Yebáha

¹⁰ Nnanna xa betsi to, gwaltseꞌe tsitsi lo neda ge Tata Do Yebáha de chi babale len Jesús benne anke Xxanariꞌiha. Gwaludaxxu nu ra tsitsi leeha. ¹¹ Gwaluni attiba ttu soldadu duna nukuna xo iyya geni kini abittu aka gwe latini tti ritilhana, aníha‑gaba lebiꞌi gwaludaxxu itú nu ra tsitsi le Tata Do Yebáha kini anáchu dhaale eseꞌele lo nu satsa rulha le nu xxegwiha udhakana le. ¹² Kumu laa len ka bennega nuní ritilhariꞌi. Riꞌi ritilhariꞌi len ka espíritu xxegwi reki lo be, delába ka nu rinnabiakana ata anka chulhaha lhe ra tsitsi lekani lhe nu rábakana raka lhe, len ka nuha‑la nuní ritilhariꞌi. ¹³ De nuha nna gwaludaxxu itú nu tsitsi ra le Tata Do Yebáha kini dhaale tseꞌe tsitsile ganna chi bisia sá satele ttu bixa nu satsa nna ganna chi udaale lo iyá nu sateleha, laꞌania nna tseꞌe tsitsirule. ¹⁴ Tsitsi gwaltseꞌe, gwalinneba nu ankaba gwalí. Gwaluni attiba runi soldaduha chi duna di tsitsi lheꞌeni ki tsiana itilhana. Anágaba lebiꞌi gwaltseꞌe gwaluni latsiru attiba ankaba geni, gwaluni attiba runi soldaduha duna taa iyya itúba roꞌo lastoni kini abittu akana gwe tti itilhana. ¹⁵ Gaxaba diale gwaludo lele gwalikixxiꞌa ka tisa ge Jesucristuha, delába ka tisa runi kini riꞌi riseꞌe tse lenriꞌi Tata Do Yebáha. ¹⁶ Aná nna tsitsi gwaltsia lele ge Tata Do Yebáha, kini abittu ixú yiele ge nu rulha le nu xxegwiha udhakana le. Gwaluni attiba ruin soldaduha taa xitsini ttu iyya bata kini nuha rudagana espada ge nu ritilha lennaha, ¹⁷ lhe anágaba gwaludo ikile deki Tata Do Yebáha‑ba odilábie le. Gwaluni ttiba soldaduha duna yuꞌu cascu ikini kini abittu aka gwe ikini tti itilhana lhe anágaba, tti uin nu xxegwiha dhi yiena le, laꞌania ixuinle ka tisa ge Tata Do Yebáha ki ekabile geni, kumu ka tisaha ankake ttiba espada ge Espírituha. ¹⁸ Satía gwalilhapi tisa len Tata Do Yebáha. Espíritu geeha‑ba aka lenie le tti innabale lhe tti utso dule iyá tte arloe. Gwaltseꞌe ubeda lhe bittu udú siile a innabale len Tata Do Yebáha ge iyá ka benne chi ankake gebie. ¹⁹ Anágaba neti gwalinnaba kia len Tata Do Yebáha kini lee utebie tisa kia, kini tti innea nna abittu gasiti kixxiꞌaya nu labí chi yu ka benne geni itú ttuha, delába kixxiꞌaya ka tisa tse ka nu rigixxiꞌa ge Jesucristuha. ²⁰ Kumu Tata Do Yebáha udhelhe neti kini kixxiꞌaya ka tisaha, de nuha nna tea lisiyya. Laxkala gwalinnaba kia arloe kini abittu gasiti tti kixxiꞌaya ka tisaha, gwanka aníha nna innebaa attiba chi daa loa innea.

Pabluha richú tise ka benne seꞌe lheꞌesi Éfeso

²¹ Betsi to geriꞌi Tíquico‑ni, benne‑ni rakinriꞌi gebie. Labie nuní anke ttu nu rudo tisa rixúe lo sina ge Jesús benne anke Xxanariꞌiha. Labie kixxiꞌanie le iyá nu ratea lhe iyá nu runia lhe. ²² De nuha nna bedhelhe kini kixxiꞌanie le bixa ratetu lhe kini odú itte lele lhe.

²³ Xa betsi to kia, Xxudiriꞌi do yebáha lhe Jesucristu benne anke Xxanariꞌiha lhe, lake useꞌeke le xen su lasi lhe uinke kini akin ge luesile lhe anágaba uinke kini tsia tsitsi lele ke lhe. ²⁴ Lake edá leke aka lenke iyá ka benne, delába ka benne satía rakakanie ge Jesucristu benne anke Xxanariꞌiha. Amén.