Иоанн

Иоанн’ падвы Маймбабцо Юн

Вада+ 1:1* Иисус. ненэцяӈэ хэ”мя

¹ Сямянхат ӈули” нюрте”э’ Вада танявы, Вада Нумгана мэвы, Пыда Нум’ ӈэвы. ² Вада нюрте”эхэд Нумгана мэвы. ³ Хусувэй ӈамгэ Няданда ӈадимы. Хусувэй ӈадимы ӈамгэ Пыдасиципой” ӈадимзь нивэда пирас”. ⁴ Вадахана ил’ танявы, тикы ил’ ненэцие” яляӈэ таравы. ⁵ Тикы Яля пэвдяхартахана ялэмды, пэвдя Сита пирда”ле ни пирас”. ⁶ Нум’ ӈэдаравы ӈопой хасава танявы, нюмда Иоанн ӈэвы. ⁷ Пыда Яля’ нямна ненэсям’ ваде”манзь товы. Тиканда хусувэй хибя сита намд”махаданда Ялян’ пунраӈгу”ни”им’. ⁸ Пыдахавада Яля нивы ӈа”, хуркавна ӈо” пыда Яля’ нямна ненэсям’ ваде”манзь Нум’ ӈэдаравэда. ⁹ Яляхав, ненэся Яляхав, хусувэй ненэцям’ ялэмдамбада, мале та’ мальӈгана я’ тир’ ни’ ӈадимдавы. ¹⁰ Пыда я’ тиркана танявы, я’ тир” Няданда ӈадимы ӈэбта ӈод”, я’ тир’ тер” Сита ни” хамэда”. ¹¹ Пыда Харта ӈамгэхэта то. Харта ненэциеда Сита сейхато’ ня”маван’ ни” харва”. ¹² Сита сейхато’ ня”амвэхэв” Нянда+ 1:12* Тид” тарем’ пады: «Нюмганда». пунрэяд”. Тикы ненэцяӈг” Пыда Нум’ ню” ӈэсь ватодамдо’ ми”ӈа. ¹³ Пыдо’ ненэця’ паӈгхад, пыхыд’ харвабцоход, ненэця’ ватоход соявы” ни” ӈа”, Нумгад соявы”. ¹⁴ Вада ненэцяӈэ хая, поӈгана” илелъй”. Пыда тиханда сянавасавэй, ненэсясавэй. Маня” Юнанда танявам’ манэ”ӈаваць. Тикы Юнда ӈопой Ню ӈэванда е”эмня Нисянда ми”мы. ¹⁵ Иоанн Пыда нямнанда ненэсям’ ваде”ӈась, ненэцяӈг” сёнда ӈардан’ лахана: «Ваде”мэми – Тикы, Ти Мэна. Мань тарем’ мадамзь: ‹Пудни Тованда нядни ва”ӈа, соявани нерня мале ӈаха”на танясь›». ¹⁶ Маня” малмбой’ Няданда ӈэда сянавам’ етри’ панаць ня”марпива”. ¹⁷ Моисей’ сер’ Ватом’ ня”маваць, Иисус Христос’ сер’ сянавам’, ненэсям’ ня”мава”. ¹⁸ Сяхаӈгарт’ хибяхарт Нувм’ нивэда манэс”. Нисянда сейхана мэна ӈопой Нюрида – Нум’ няна” Нум’ хурка ӈэвамда ӈадимдеда.

Хэхэдаӈгода Иоанн’ сыро”ма

(Мт 3:1-12; Мк 1:2-8; Лк 3:15-17)

¹⁹ Иудей”+ 1:19* Иоанн’ падвы Маймбабцо Юнхана, тикы” – иудей” ӈэвахана мэна”. Иерусалим маркад ханондани, левит*+ 1:19* Левий’ паӈгхад ӈэда ненэця”. Хэбидя Хардахана нядаӈгода ханонданаӈэ манзарана”. хибя ӈэвамда хонраванзь ӈэдарабто’, Иоанн’ сыро”мида тарцяць. ²⁰ Иоанн хуркари таялци”, тидпой” вахалъй”: «Мань Христосадм’ нидм’ ӈа”». ²¹ Пыдо’ сита хонра”: «Тиканда хибян? Илиян ӈэдакэн?» Пыда ма: «Нидм’ ӈа”». Ӈани’ хонрадо’: «Тикы Нум’ Вади вадетан?»+ 1:21* Иудей” Христос’ това’ нерцюна хуркари Нум’ Вади вадети” товам’ ӈатець. Ханяӈы” иудей” Иоаннм’ пон’ ӈатевы Нум’ Вади вадетаӈэ пэрмэдо’ (Мк 6:15). Пыда ӈани’ ма: «Нидм’ ӈа”». ²² Пыдо’ нянда вахалъяд”: «Тиканда хибян? Сидна” ӈэдаравэхэ”на” ӈамгэм’ хэтаӈгува”? Харт нямнанд ӈамгэм’ вадетан?» ²³ Нум’ Вади вадета Исайя’ вади”мана Иоанн тарем’ вахалъй”: «Мань вэӈго яхана тюрыта вабцадм’: ‹Нум’ Ерв’ сехэрым’ тидхалера”›»+ 1:23* Исайя 40:3. . ²⁴ Тикы товы” ненэцие” поӈгана фарисей” танявы”. ²⁵ Пыдо’ сита хонра”: «Христосан ниб”нанд ӈа”, Илиян ниб”нанд ӈа”, Тикы Нум’ Вади вадетан ниб”нанд ӈа”, ӈамгэ хэхэдаӈгурӈан?» ²⁶ Иоанн няндо’ вахалъй”: «Маньзяван икана хэхэдаӈгурӈадм’. Поӈгананда” хибяхав ну, пыдара” ехэрара”. ²⁷ Пыдахавада пудни Тованда, маньзяв нянани Те”мехэртада ека ни серос”». ²⁸ Тикы” сер” Иордан яха’ тяхана ӈэда Вифанияхана ӈэвы”. Тикы яхахана сяхари’ Иоанн хэхэдаӈгурмы.

Нум’ Ху’+ 1:29* Ханяӈы ненэй ненэцие” илесь’ яхана «ӈовцяӈэ» нюмдебидо’. Сую

²⁹ Нябимдей яляхана Иоанн нянда миндя Иисусм’ манэць вахалъй”: «Нум’ Ху’ Сую, Ти Мэна! Я’ тир’ хэбяхам’ Пыда ха”авраванда. ³⁰ Пыда Нямнанда мань тарем’ лаханадамзь: ‹Пудни Тованда нядни ва”ӈа, Пыда соявани нерня мале ӈаха”на танясь›. ³¹ Мань Сита ехэрадамзь, Израиль’ тер” Сита хамэдавандо’ е”эмня ӈадьбя”ни икана хэхэдаӈгованзь тодамзь». ³² Иоанн манэ”мыда вадець лахана: «Хэбидя Индад’ голубьм’ нюбета нув’ сармикадрев’ нув’ няд Ниндя ха”мавам’, тадтикахад Нинянда хаёвам’ манэ”ӈадамзь. ³³ Мань Сита ехэрадамзь. Си”ми икана хэхэдаӈго Ӈэдаравы няни тарем’ мась: ‹Хэбидя Индад’ хибя ни’ ха”мавам’, тадтикахад Нинянда хаёвам’ пыдар манэтар, Тикы, Хэбидя Индкана хэхэдаӈгода›. ³⁴ Мань манэ”ӈавась, ӈадьбя”ни тидпой” мадм’: Тикы – Нум’ Ню».

Нюрте”э Иисус’ тохоламбада”

³⁵ Тад нябимдей яляхана Иоанн ӈани’ сидя тохоламбадамда няць ну. ³⁶ Иисус хэвувнанда ядвы. Сита манэ”манда сер’ Иоанн ма: «Нум’ Ху’ Сую, Ти Мэна!» ³⁷ Тикы вадида намда, сидя тохоламбадахаюда Иисус’ пумна ялъяха’. ³⁸ Иисус пуня’ сылы”, Пумнанда яднаха” манэць хонарку: «Ӈамгэн’ харвади’?» Пыди’ маӈаха’: «Равви (хамэдита – ‹сидна” тохоламбадава”›), Пыдар ханяна илен?» ³⁹ Иисус ма: «Тоди’, манэтари’». Пыдо’ ӈобкана хая”, ханяна Илевамда пыди’ манэ”ӈади’, тикы яля’ Иисусхана мэӈаха’. Та’ мальӈгана ялей тет час ӈэвы. ⁴⁰ Нябиюм’ Иоанн’ вади намдавы, тадтикахад Иисус’ пумна ял”мы” – Андрей. Пыда Симон Пётр’ папа ӈэвы. ⁴¹ нюрте”э’ Андрей хасава нямда – Симонм’ хо, нянда ма: «Мани’ Мессиям’+ 1:41* Еврей’ вада, хамэдита – «юритевы». хони’». (Тикы грек’ вадавна «Христос».) ⁴² Андрей хасава нямда Иисусан’ тэврада. Иисус нянда сылаванда сер’ ма: «Пыдар Симонан, Иоанн’ хасава нюн. Тад нерня’ нюмл Кифа+ 1:42* Арам’ вада, хамэдита – «пэ». ӈэӈгу». (Тикы грек’ вадавна «Пётр»*+ 1:42* Хамэдита – «пэ». .)

Иисус Филиппаха’ Нафанаилаха’ хаӈа

⁴³ Нябимдей яляхана Иисус Галилея ян’ хэсь таслада. Филиппам’ хованда сер’ нянда ма: «Пумнани ту”». ⁴⁴ Филиппхав Вифсаида хардахад ӈэвы. Андрейха’ Пётарк’ ӈани’ таняд ӈэвэхэ’. ⁴⁵ Филипп Нафанаилм’ хо”махаданда ма: «Маня” Моисей Ватохонанда падвым’, Нум’ Вади вадети” падвым’ хова”. Пыда Иисус – Иосиф’ хасава ню, Назаретхад ӈа». ⁴⁶ Нафанаил ма: «Назаретхад+ 1:46* Назарет ӈули” нюдякоця харад ӈэвы. Иисус’ я’ ни’ това’ нерцюна ӈобкарт’ Нум’ Падар’ пеляхана тикы харад’ нямна падда падар” яӈгувы. ӈамгэ сава таняӈгу?» Филипп нянда ма: «Ту”, манэтарава». ⁴⁷ Иисус Нянда миндя Нафанаилм’ манэць, нямнанда вахалъй”: «Ненэся Израиль’ терхав ти, пыда хэдта яӈгу». ⁴⁸ Нафанаил Нянда ма: «Ханяд си”ми теневан?» Иисус ма”нив’: «Филипп’ сит хаё”мя’ нерня, смоковницам’ нюбета ӈодя’ пя’ ӈылна мэнаханд сит манэ”ӈадамзь». ⁴⁹ Нафанаил Нянда ма: «Равви! Пыдар Нум’ Нюн, Пыдар Израиль’ Параӈодан». ⁵⁰ Иисус тикы вади намда, тарем’ вахалъй”: «Смоковницам’ нюбета пя’ ӈылна мэ”мамд нянд вадесо”махадани Няни пунрэйн? Ненэй манэ”мандахабид тамна неры”». ⁵¹ Иисус тамна тяха’ лахана: «Ненэся, ненэся нянда” мадм’, пыдара” нув’ няра’ сидя’ ня’ няӈгармам’ манэтада”. Ненэця’ Нюӈэ нюмдебада’ ни’ Нум’ юне ядэлани” тю”уд ха”мормам’, танаӈгавам’ манэтада”».

Канахана ӈэвы тюва яля

¹ Няхаромдэй яляхана Галилея яхана ӈэда Кана хардахана тюва яля ӈэвы. Таняна Иисус’ небя мэвы. ² Иисус ӈо” тохоламбадита ня’ ӈобтарем’ таня’ хамы” ӈэвы”. ³ Няръяна сяркандо’ сусава’ сер’, Иисус’ небя Иисусан’ вахалъй”: «Сяркадо’ суса». ⁴ Иисус нянда ма: «Неӈэй, мани’ тикахана ӈамгэ серони’ таня”? Мань ёльцями тамна товдавэй». ⁵ Небяда манзаранаха” ма: «Пыда ханзер” ма, пыдара” тарем’ ӈада”». ⁶ Таняна мат” ӈарка”я пэ ид’ ед танявы. Иудей” тикы ед’ тер’ икана нибтарасетвы”. Хусувэй ед юр’ мян’ литрам’ тер”мы+ 2:6* Еврей” тарця серто’ танявы: ӈавормандо’ нерня ӈудидо’, хыдидо’ халтамба таравы. Тарем’ мэта ито’ яӈга пэхэд сертавы ӈарка хыдя’ мюня сюрсетвы, тарцяри хыдя’ мюня и” няроӈэ хаюрсетвы. . ⁷ Иисус манзаранаха” ма”нив’: «Ед икана панаць тердейда”». Пыдо’ икана тю”уй варандо’ ӈэсонд’ пандэйдо’. ⁸ Тикы’ пуд Иисус няндо’ ма: «Тедахав’ таняд идм’ сахалӈада”, тадтикахад тюва яля’ серм’ пэртан’ ханара”». Тадтикахад пыдо’ тикы ненэцянд’ идм’ хана”. ⁹ Тюва яля’ серм’ пэрта няръяна сяркаӈэ хэвы идм’ ӈэрӈада. Пыда тикы сярка ханяд ӈэвахад ехэрась, идм’ сахалмыри” теневаць. Тюва яля’ серм’ пэрта нелебада хасавам’ хаӈа, ¹⁰ тадтикад ма: «Хусувэй ненэць’ нерде сава сяркам’ ӈадимдесеты, ненэцие” ябело”махад вэва сяркамда ӈабтасеты, пыдахавар сава сяркам’ тев’ ёльцянд’ лэтмбавэранё”». ¹¹ Тикы сер” Иисус’ Галилея яхана ӈэда Кана хардахана сертавы нюртей ненадо сер” ӈэвы. Таняна Юнамда ӈадимдеда, тиканда тохоламбадида Нянда пунрэяд”. ¹² Тикы’ пуд Небямда няць, Нида няць, Тохоламбадида няць Капернауман’ хая. Сянхав яля’ таняна мэ”.

Хэбидя Харадм’ нярумда”ма

(Мт 21:12-13; Мк 11:15-17; Лк 19:45-46)

¹³ Иудей” Пасха’ хахаялма’ сер’, Иисус Иерусалиман’ то. ¹⁴ Хэбидя Хардахана хороби, хуво, голубьм’ нюбета нув’ сармик мирдапади манэ”ӈа. Тикы” хавна таняна ӈамдёвы есь тадабади манэ”ӈа. ¹⁵ Иисус иняхад садкосям’ серта, Хэбидя Хардахад мирдатини хоробисавэй’, хувосавэй’ мал’ ӈокхандо’ питаръяда, есь тадабади” есьдо’ вабтъяда, тольдо’ пынделабтэйда. ¹⁶ Голубь мирдападаха” тарем’ ма: «Тюку мал’ хэвня’ ханэйда”! Нисяни мядм’ ӈавори мирдапалава мя”ӈэ нёра” сертабю”!» ¹⁷ Тохоламбадида Хэбидя Падаркана падвы тюку вади тензибте”: «Мят ялыба харвобтавами сёнзяни мюд Си”ми ӈаворӈа»+ 2:17* Нумд’ ӈэда сё 68:10. . ¹⁸ Тиканда иудей” Иисусан’ ма”: «Тарем’ ӈэсь Ватомд ӈамгэ ненадо серка”на манэ”лабта пиртар?». ¹⁹ Иисус няндо’ ма: «Тюку Хэбидя Харадм’ тахабтара”, Маньзяван няхар” яля’ пирка”на яӈор’ ӈабтаӈгув!» ²⁰ Иудей” тикы вадаха” тарем’ ма”: «Тет юкад вата мат” по’ тюку Хэбидя Харадм’ сертабидонзь, Пыдахавар няхарли” яля’ яӈор’ ӈабтаванзь пэрӈар?» ²¹ Иисусхав Хэбидя Харадм’ вадець, Харта Пыхыданда нямна лаханась. ²² Иисус’ ха”махаданда илелманда сер’, Тохоламбадида тикы Вадида тензибтевы”. Тикы’ пуд Хэбидя Падарт’, Иисус’ ваде”мы вадаха” пунрэяд”.

Иисус хусувэй ненэцям’ тенева

²³ Пасха хэбидя ялэ” ямбхана Иисус’ Иерусалимхана мэванда мальӈгана ӈока ненэць’ ненадо серо Сертавамда манэ”ӈаць, тадтикахад Нянда+ 2:23* Тид” тарем’ пады: «Нюмганда». пунрэйдаць. ²⁴ Иисусхав хусувэй ненэцям’ тенева, няндо’ нись ен”. ²⁵ Пыда ненэця’ сёнзя’ мюй’ ӈамгэ’ хадкэӈгавахад теневавы. Ӈадьбята ненэця’ нямна ӈэда манэ”лабт” Нянанда нивы тара”.

Иисус няби Никодим

¹ Фарисей” поӈгана Никодимам’ нюбета, иудей” ӈоб” ӈарктадо’ танявы. ² Ӈобӈгуна пи’ пыда Иисусан’ то, Нянда тарем’ вахалъй”: «Равви, маня” тенева, Пыдар Нум’ ӈэдаравы сидна” тохоламбадава”. Нумзяда ненэць’ Пыдар сертабада ненадо серод серта нида пирас”». ³ Иисус ма: «Мань ненэся, ненэся нянд мадм’, хибя яӈор’ нибта соя”, тикы Нум’ Параӈодадавам’ манэць нида пирас”». ⁴ Никодим Нянда ма: «Ӈармы ненэць’ ханзер” яӈор’ сояӈгу? Ненэць’ яӈор’ ню’ ӈэся’ мю’ пакалць пир”ӈада? Тикы’ пуд нябимдей’ соябта серо”ӈа?» ⁵ Иисус ма: «Ненэся, ненэся нянд мадм’, хибя икад, Хэбидя Индкад нибта соя”, тикы Нум’ Параӈодадаван’ тюсь нида пирас”. ⁶ Ӈаяхад соявы – ӈая, Индкад соявы – инд”. ⁷ Мань ваде”мэхэ”ни нён пысаӈг”: ‹Пыдара” тю”уд соябта” тара›. ⁸ Мерця ханяд харва, таняд пупида. Мунда намдорпат ӈо”, пыдар ханяд ӈэвахаданда, ханя’ хэвахаданда ехэран. Хусувэй Хэбидя Индкад соявы ӈани’ тарця». ⁹ Никодим Сита хонра: «Ханзер” тарця ӈэсь пир”ӈада?» ¹⁰ Иисус тикы вадахата ма: «Пыдар Израильм’ тохоламбадананё”, ханзер” тарцям’ нир хамэдамбю”? ¹¹ Мань ненэся, ненэся нянд мадм’: маня” ӈамгэм’ теневава”, тикым’ ваде”ӈава”, ӈамгэм’ манэцава”, тикым’ манэ”лабтамбива”. Пыдахавара” манэ”лабтма” сёнзяханда” нида” пэмбю”. ¹² Я’ ила’ нямна ӈэда Лахарёхортаха”ни нида”нё” пунрю”, ханзер” нув’ нямна ӈэда Лахарёхо”ни пунраӈгуда”? ¹³ Нумгад ӈэда Ненэця’ Нюӈэ нюмдебада’ хавна, хибяхарт нув’ няю’ хэвы ненэць’ яӈгу. ¹⁴ Ханзер” вэӈго яхана Моисей ӈабтацавэй халым’+ 3:14* Невхы Нум’ Ватоход самляӈг падармана таслаб” (Толыр” 21:4-6) Моисей Израиль’ тер Египетхад вэӈго явна минреванда мальӈгана, пыдо’ Нумд’ вадебярць пэвыд”. Тиканда Нум’ ненэцие танараванда е”эмня ӈабтацавэй ямб халы ӈэдара. Израиль’ тер” вэва ӈэвамдо’ хамэда, вадебярць ӈэвадэяд”. Нум’ Моисейм’ няравахад ямб халым’ серта табэда. Тикы’ пуд няравахад сертавы халын’ сырта хусувэй сято”лавы Израиль’ тер мал’ сензӈэ хан”мы. тю”у’ иласа, тарем’ Ненэця’ Нюӈэ нюмдебада тю”у’ илавы ӈэӈгу. ¹⁵ Ӈадьбята хусувэй Нянда пунрёда [ни хаӈгу”,]+ 3:15,* 20 Ханяӈы ӈудахана падвы падарка”на пады. Няданда малсяда илам’ ня”маӈгу. ¹⁶ Нум’ тюку я’ тир’ терм’ саць мэневанда нид, Ӈопой Нюримда ми”мы. Нюхунда пунрёда хусувэй хибя ни хаӈгу”, малсяда илам’ ня”маӈгу. ¹⁷ Нум’ Нюмда я’ тир’ терм’ судева’ е”эмня ӈэдаравэда ни ӈа”, Нюнда сер’ я’ тир’ терм’ ӈэдаванзь ӈэдаравэда. ¹⁸ Нюхунда пунрёда судевы ни ӈэӈгу”. Нянда ниня пунрёдахав мале судевы. Пыда Нум’ Ӈопой Нюнда нюмд’ ниць пунра”. ¹⁹ Яля я’ тир’ теран’ ӈадимясь. Ненэцяӈгав” яляхад пэвдям’ саць мэневандо’ нид, мале танаравы”. Пыдо’ сертабада серодо’ вэнзукабтыць. ²⁰ Вэвам’ сертабада хусувэй хибя ялям’ волтамби, харта серода нива ӈадима’ е”эмня ялян’ ни мий”. [Пыдо’ вэнзу”.] ²¹ Ненэсявна иленахав ялян’ минд”нив’. Сертавы серода Нувм’ няд”мяць ӈэвандо’ е”эмня серода ӈадяӈгу”ни”им’».

Иисус няби хэхэдаӈгода Иоанн

²² Тикы’ пуд Иисус тохоламбадида няць Иудея ян’ хая. Таняна нянандо’ иле, ненэцие хэхэдамби. ²³ Та’ мальӈгана ӈо”, Салимахад хахаяда Енон яхана Иоанн ненэцие хэхэдамбись. Таняна и” ӈока ӈэвы. Ненэця” нянда хэхэдаӈгурманзь турмы”. ²⁴ Та’ мальӈгана Иоаннм’ тамна нивэдо’ сяр”. ²⁵ Иоанн’ тохоламбада” иудей’ тэнзм’ мэта ненэця’ ня’ нярумдава’ нямна тасалкурць пэяд”. ²⁶ Иоаннан’ тэввандо’ сер’ хонрадо’: «Равви, ти, Иордан яха’ тяханяна нянанд мэвы Ненэцял – ненэцяӈг” ваде”мэр, ненэцие хэхэдамби. Тиканда хусувэй хибя Нянда миӈа». ²⁷ Иоанн няндо’ ма: «Нум’ тарем’ таслаб”, ненэць’ ӈамгэхэртм’ ни ня”маӈгу”. ²⁸ Ӈамгэм’ вадесо”махани пыдара” харта” инзеледаци”, вадини тарцяци”: ‹Мань Христосадм’ нидм’ ӈа”, Пыда Тованда нерцюна, Нум’ си”ми ӈэдарась›. ²⁹ Нем’ мэмбадахав – нелевнда хасава. Нелевнда хасава’ сава няхав тэри тиканда нухуя, нянда инзеле. Вабцамда намдванда сер’ маймбаӈгу. Мань ӈо” теда’ сёнзяни мюй маймбабцохона пан”ӈа. ³⁰ Пыдахавада теда’ тю”у’ мимбата тара”нив’, маньзяван таси’ мимба”ни тара. ³¹ Тю”уд ха”амвэхэв сямянхат ва”ӈа. Я’ ниня иленахав яхад пере, вадетида я’ ила’ няримна ӈа”. Нув’ няд ха”амвэхэв сямянхат ва”ӈа. ³² Манэ”мыда, намдвыда вадепата ӈо”, Манэ”лабтата хибяхарт сейханда нида ня”ам”. ³³ Манэ”лабтата сейханда ня”амвэхэв Нум’ ненэся ӈэвам’ тид” манэ”лабтамби. ³⁴ Нум’ Ӈэдаравым’ Нум’ Хэбидя Индкана пандамбида, ӈадьбята Пыда Нум’ Вади мэ”ӈа. ³⁵ Нисяюм’ Нюмда ёльце мэневанда нид, Ӈудахата хусувэй ӈамгэм’ мал’ ми”мыда. ³⁶ Хибя Нум’ Нюн’ пунры, тикы малсяда илӈгана иле. Нум’ Ню’ мунд’ ниня намданахав илам’ нида манэт”, Нум’ няданда пили” нензюмда».

Иисус няби Самария я’ тер не

¹ Иисус’ тохоламбадида, хэхэдамбада ненэциеда Иоаннхад ӈока ӈэва юн фарисейха” тэввы”. ² Ӈабцакаванда Иисус нивы хэхэдаӈгу”, Тохоламбадида хэхэдаӈговы”. ³ Иисус тарця мунм’ намда, Иудея яхад хая, ӈани’ Галилея ян’ нэкалӈада. ⁴ Самария явна хэбта таравы. ⁵ Самария яхана ӈэда Сихарьм’ нюбета хардавна ӈадимя. Тикы харад лата я’ хэвхана ӈэвы. Тюку я ӈавнанда Иаков хасава нюхунда – Иосифан’ ми”мэда+ 4:5* Невхы Нум’ Ватоход самляӈг падармана таслаб” (Ила’ ӈадиво”ма 33:19), Иаков – еврей” тэнз’ нисянато’ нися Авраам’ ню’ ню. Пыда ёндаванда мальӈгана тюку ям’ тэмдавы. Тад пуна тикы яхана хасава нюмда – Иосифам’ яӈгуво”махаданда сюрмэдо’. . ⁶ Таняна Иаков’ нелава танявы. Иисус пэдёмда ӈэдабтамба, нелава’ хэван’ ӈамды”. Яля’ ер’ ёльць’ ӈэвы. ⁷ Таня’ Самария я’ тер ӈоб” не нерманзь то. Иисус хонрада: «Итами та”ма». ⁸ Та’ мальӈгана Иисус’ тохоламбадида ӈаврадамдо’ тэмдаванзь хардан’ хэвы”. ⁹ Самария я’ тер не Иисусан’ ма: «Пыдар Иудея я’ тернанё”, ханзер” нядни – Самария я’ терхад идм’ хаӈан?» Иудей” Самария я’ тер” ня’ поёдо’ вэва” ӈэвы”. ¹⁰ Иисус нянда вахалъй”: «Пыдар Нум’ тамбада ӈамгэ’ нямна теневавы ӈэб”нанд, Хибя няданд идм’ хамам’ теневавы ӈэб”нанд, пыдар харт Няданда ханаӈгунась, тадтикахад Пыда Харта нянд иленя идм’ татась». ¹¹ Не ма: «Мань ервав! Нелава та’ пирувнанда ёрява, Пыдар сахалкосяӈгартар яӈгунё”. Тиканда ханяд иленя идм’ ханаӈгур? ¹² Иаков нисяхадана” ӈаркаӈэ Пыхыдамд тосар? Пыда няна” тюку нелавам’ тавы. Пыда, хасава нюда, тадтикахад харта вадавы сармикада тюку нелавахад идарӈаць». ¹³ Иисус нянда вахалъй”: «Хусувэй хибя тюку идм’ ӈэрта яӈор’ идарман’ харбилаӈгу. ¹⁴ Мань мипада икавахадани хибяри-хибя ит’ харвабцоходанда юраӈгу. Мань ми”манда икавами нянанда малсяда илан’ сита минрена лохорта и”ӈэ ханда». ¹⁵ Не Нянда ма: «Ервэй! Тарця итами та”ма, тиканда мань ит’ харвабцоми яӈгод”нив’, нерманзь тюкон’ вунидм’ турт”». ¹⁶ Иисус нянда ма: «Хань”, вэсул хай”, тадтикахад ӈани’ туин». ¹⁷ Не ма”нив’: «Мань вэсу”ми яӈгу». Иисус нянда ма: «Пыдар ненэсян, вэсул ненэся яӈгу. ¹⁸ Пыдар самляӈг вэсулась, теда’ нятахавар вэсул вуни ӈа”. Вадид ненэся”». ¹⁹ Не Нянда ма: «Нум’ Ерв! Мань сырпа”ни, Пыдар Нум’ Вади вадетан. ²⁰ Нисянана” тюку хой’ ниня туёцеты”, пыдахавара” мада”нё”: ‹Туёць’ я Иерусалимхана ӈа›». ²¹ Иисус нянда ма: «Неӈэй, Няни пунрю”, ёльцянда тоб”, Нисяхани туё”мара” тюку хойхана ни ӈэӈгу”, Иерусалимхана ни ӈэӈгу”. ²² Пыдара” ехэрана ӈамгэн’ туё”ӈада”, маньзявана” хибян’ туё”махадана” теневава”. Ӈэдаӈгова иудейхат ӈа. ²³ Ёльцянда тоб”, ӈабцакаванда мале тэвы”ма, ненэсявна туёта” Индадм’ няд”мяць, ненэсям’ няд”мяць Нисяхани туёта”. Нисями ӈо”, Нянда тарем’ туёти пюрӈа. ²⁴ Нум’ – Инд” ӈэ”нив’. Нянда туёта” Индадм’ няд”мяць, ненэсям’ няд”мяць туёпато’ тара». ²⁵ Не Нянда ма: «Христосм’ нюбета Мессия’ товахад мань теневадм’. Пыдахавада то”махаданда, няна” хусувэй ӈамгэм’ вадета». ²⁶ Тикы’ пуд Иисус нянда ма: «Мань тидамнё”, нянанд теда’ лаханакурӈадамнё”».

²⁷ Та’ ёльцьӈгана Иисус’ тохоламбада” то”. Иисус’ нехэна лаханакурмам’ манэ”мандо’ сер’ пысэйд”. Иисус’ ӈамгэн’ харвава’ нямна, ӈамгэ не’ ня’ лаханава’ нямна ӈобкартадо’ Сита ни хонра”. ²⁸ Тикы не ита ӈэсям’ хае, харад’ няна хая. Ненэцяӈг” ма: ²⁹ «Хаяда”, техэ малханда хурка ӈэвами явнанда ваде”мы Ненэцям’ манэ”ӈара”! Христосхав ниб”нандав’ ӈа”?» ³⁰ Хардахад ненэця” Иисусан’ хая”.

³¹ Тикы ёльцьӈгана Тохоламбадида Сита хонрамби”: «Равви, ӈамгэкодар ӈав”ма». ³² Пыдахавада няндо’ тарем’ ма: «Маньзяван пыдара” ехэрана ӈаврами таня». ³³ Ӈадьбято’ тохоламбадида помнандо’ нидо’ хонрамба пя”: «Нянда хибяхав ӈаварм’ тэврамбавэкы?» ³⁴ Иисус няндо’ ма: «Си”ми Ӈэдаравэни ватом’ сертабавами, тадтикахад Серта малевами – Ӈаврахаюни, тихи’. ³⁵ Пыдара” тарем’ нисяда” лахан”?: ‹Тет иры’ хэ”мяхад нянь’ ӈуво” сэв ма”ламбава’ ёльць’ тута›+ 4:35* Палестина яхана нянь’ ӈуво” сэв моёсо”махад тет иры’ хэ”мяхад нянь’ ӈуво” сэв вадё”ми ма”ламбасетыдо’. . Нянда” мадм’, сыркарӈада”, нянь’ ӈуво” сэв” вадюлава я” ялмыд”, мале малкова’ ёльць’ то. ³⁶ Нянь’ ӈуво” сэв ма”ламбада недбям’ ня”ма, малсяда илан’ тэвва’ е”эмня таром’ сертаби. Нянь’ ӈуво” сэв моёпадаха’, нянь’ ӈуво” сэв ма”ламбадаха’ ӈобкана маймбаӈгуху’. ³⁷ Тюку вада’ хара явнанда ӈа, тарця: ‹Нюрте”эюм’ нянь’ ӈуво” сэв моёпи, нябиюм’ нянь’ ӈуво” сэв ма”ламби›. ³⁸ Мань ӈани нита” манзара”мавна малкурманзь сидда” ӈэдарадм’. Ӈабцакаванда нида” варемдо’ мэць манзараць, пыдахавара” нита” манзара”маха” таркэйда”».

³⁹ Самария я’ тер нехэв манэ”мыда-намдавыда ханяримна-таняримна ваде”яда: «Пыда ӈахат иле”мями ӈарханда ваде”ӈадась». Тикым’ намдвандо’ сер’ тикы хардахад ӈэда ӈока Самария я’ тер Иисусан’ пунрэяд”. ⁴⁰ Иисусан’ тэв”махадандо’, Самария я’ тер” Сита нянандо’ мэсь хонрамби”. Пыда таняна сидя яля’ мэ. ⁴¹ Нянда инзеле”мяхадандо’ тамна ӈока ненэць’ Нянда пунрэяд”. ⁴² Пыдо’ нен’ ма”: «Тедахав’ пыдар ваде”мэрихатат вунива” пунрю”, хар”на” Нянда инзеле”мяхадана” пунрыва”. Тедахав’ маня” теневава”, Пыда ненэся я’ тир’ тер” Ӈэдаӈгода».

Параӈода’ марцьхы’ хасава нюм’ савумда”ма

(Мт 8:5-13; Лк 7:1-10)

⁴³ Сидя яля’ хэ”мяхад, тикы яхад Иисус Галилея ян’ хая. ⁴⁴ Тад ӈо” Пыда Харта явнанда лаханась: «Харта яхананда Нум’ Вади вадетам’ нидо’ таро”ла”». ⁴⁵ Иисус Иерусалимхана мэванда мальӈгана, хэбидя яляхана хуркари ненадо серо сертабавы. Ӈока Галилея я’ тер хэбидя ялян’ товы”, тикан’ сырмы”. Ӈадьбято’ Галилея ян’ товы Иисусм’ манэ”мандо’ сер’, пыдо’ маймба ядабтадо’. ⁴⁶ Тикы’ пуд Иисус Галилея яхана ӈэда Кана хардакон’ ӈани’ тэвы”. Сяхаӈгав’ тикы хардахана идм’ няръяна сяркаӈэ сертадась. Та’ мальӈгана таняна ӈопой параӈода’ марцьхы мэвы. Капернаум хардакохона хасава нюда хаӈгурць юседавы. ⁴⁷ Иисус’ Иудеяхад Галилеян’ товам’ намда, пыда Иисусан’ то, хынумба пяда: «Капернауман’ нянани ту”ма. Хаван’ харвана хасава нюми савумдадва». ⁴⁸ Иисус нянда ма: «Хибяхартара” ненадо серо, и’ хэбиле”мя серо манэ”мадавэй’ пунра нида пирас”». ⁴⁹ Параӈода’ марцьхы Нянда ма: «Нум’ Ервами, нюни хава’ нерня ту”ма». ⁵⁰ Иисус нянда ма: «Мяканд хань”, нюр илеӈгу». Тикы ненэць’ Иисус’ вадаха” пунрэй”, тадтикахад хая. ⁵¹ Ядаванда сер’ хабида сита хо”, ма”: «Нюр иле». ⁵² Ӈацекы’ нися сяха’ нюнда савуво”мам’ хонра. Хабида ма”: «Теняна яля’ ер’ ӈопой часхана ӈаянда ядё ха”мыць». ⁵³ Ӈацекы’ нися нюнда сяха’ едясялмам’ хамэдада. Иисус’ нянда тарем’ мама’ мальӈгана: «Мяканд хань”, нюр илеӈгу», та’ мальӈгана нюда едясялмы. Тиканда пыда мяд’ терсавэй’ Иисусан’ пунрэяд”. ⁵⁴ Тикы сер” Иисус’ Иудеяхад Галилеян’ тэв”махаданда нябимдей ненадо сертавы Серта ӈэвы.

Вифезда меӈгахана хаӈгуртам’ савумда”ма

¹ Тикы’ пуд Иисус иудей” хэбидя яля’ ёльцьӈгана Иерусалиман’ хая. ² Таняна Хуво” Вад’ хэвхана меӈга танявы, тикы меӈга’ нюм’ еврей’ вадавна «Вифезда»+ 5:2* Хамэдита – «Сянась’ мя”». . Самляӈг синдёда тюӈгалавада танявы. ³ Мюнянда хуркари” хаӈгурта”, сэвсяда”, мэдна”, хэвдо’ хабэй” юседа”. [Пыдо’ ид’ манзадавам’ ӈатевы”. ⁴ Нум’ Ерв’ юне ядэлана ханяӈэхэ”на ит’ ха”махая, идм’ манзабтамбасеты. Нюрте”э’ манзарана ит’ ха”мавы хибяри, сата хабцяӈгана хаӈгурпата ӈо”, сензувормы.]+ 5:4* Ханяӈы ӈудахана падвы невхы падарка”на пады. ⁵ Таняна тет юд’ няю’ сидндет по’+ 5:5* Няхар” ю” сидндет по’. хаӈгурта ненэць’ танявы. ⁶ Иисус, юседана ненэцям’ манэ”манда сер’, таминда пон’ хаӈгурмамда хамэдада, ма: «Савуман’ харван?» ⁷ Хаӈгурта ненэць’ Нянда ма: «Ервами, ид’ манзадава’ ёльцьӈгана, ит’ си”ми тэвравндами харта яӈгу. Хар”н таня’ сыӈгтаб”нани, хибяхав мале си”ми нертесеты». ⁸ Иисус нянда ма: «Юркад”, пэӈар ня”ам”, тадтикахад ядэр”». ⁹ Таминда савума, пэӈамда ня”махая хая. Тикы яля еврей” ныланава яля ӈэвы. ¹⁰ Ӈадьбято’ иудей” хаӈгурмы ненэцянд’ тарем’ лахана”: «Тюку яля еврей” ныланава яля, пэӈамд тюку яля’ вунир минарт”». ¹¹ Пыдахавада тарем’ няндо’ ма: «Си”ми Савумдавыми няни тарем’ мась: ‹Пэӈар ня”мад, ядэр”›». ¹² Иудей” сита хонра”: «Тарем’ нянд лаханавы Тикы Хибя: ‹Пэӈар ня”мад, ядэр”›?» ¹³ Сензумы ненэць’ нянда тарем’ Лаханавым’ ехэравэда, тад ӈо” ӈэсь ӈо” Иисус таняна мэвы ненэцие” помна сэявы. ¹⁴ Тад пуна Иисус сензумы ненэцям’ Хэбидя Харад’ мюня хода, нянда ма: «Ти, тедахав’ савуман, тамна вэвако ӈамгэ нянанд хадкэвоӈгад, тад нерня’ сяхаӈгарт’ нён хэбяхамдю”». ¹⁵ Тикы ненэць’ хэ”мяхаданда, иудейха” ма: «Си”ми савумдавы – Иисус». ¹⁶ Иудей”, еврей” ныланава яляхана Иисус’ тарця серо сертабаванда нид, Сита таӈылмдамба пя”. ¹⁷ Иисусхав няндо’ ма: «Мань Нисями теда’ лахана манзара, ӈадьбя”ни Мань ӈани’ манзарадм’». ¹⁸ Тикы вади намд”махадандо’ иудей” ханяцей’ саць Иисусм’ хадаван’ харбиладо’. Еврей” ныланава яляри’ ватом’ мадаванда нид ни ӈа”, неноховавна Нувм’ Харта Нисяданда нюмдебава’ сер’, Пыхыдамда Нум’ ӈарӈэ пэрма’ е”эмня.

Нум’ Ню’ вато

¹⁹ Иисус няндо’ ма: «Ненэся, ненэся нянда” мадм’, Нисянда манзаям’ манэ”мадавэй’, Хасава Нююмгав’ Харта няданда ӈамгэхэртм’ серта ни пирас”. Тад ӈо” Нисяюм’ ӈамгэм’ сертаби, тикым’ Нююм’ ӈани’ сертаби. ²⁰ Тад ӈо” Нисяюм’ Нюмда мэневанда нид, хусувэй ӈамгэм’ Харта сертабадамда Нюхунда манэ”лабтамбида. Тикы’ хавна тамна ваць ӈарка серо Нюхунда манэ”лабтаӈгуда. Пыдара” пысаӈгуда”. ²¹ Ханзер” Нисяюм’ хальмерӈэ хэвым’ юркабтахая илебтемби, тарем’ Нююм’ ӈо” хибям’ илебтеван’ харва, тикым’ илебтеӈгу. ²² Хусувэй ненэць’ Хасава Нюмда Нисянда пирувна ӈарцу”манда е”эмня, Нисяюм’ хибяхартм’ ни судебю”, судеӈговам’ мал’ Нюхунда ми”мэда. Нюмда ниня ӈарцута, Нюмда ӈэдаравы Нисяюм’ ӈани’ нида ӈарцус”. ²⁴ Ненэся, ненэся нянда” мадм’, Вадахани инзелена, Си”ми ӈэдаравы Нисяхани пунрёда малсяда илӈгана мэ, судевы ни ӈэӈгу”. Пыда хавахад иланд’ тэвы”. ²⁵ Ненэся, ненэся нянда” мадм’, ёльцянда тома, мале тэвы”. Хавы ненэця” Нум’ Ню’ вабцам’ намдвандо’ сер’ илелтыд”. ²⁶ Ханзер” Нисянда ил’ Харта Нянанда ӈа, тарем’ ила’ Хасава Нюхунанда ӈэва’ е”эмня, Нянда ӈани’ илам’ ми”мы. ²⁷ Ненэця’ Ню ӈэванда е”эмня, Нянда судеӈгова ныхым’ ми”мы. ²⁸ Нёда” пысаӈг”! Пэмбад’ мюня мэна хусувэй хальмер’ Ненэця’ Ню’ вабцам’ намдва’ ёльць’ хахаялма. ²⁹ Пыдо’ пэмбдото’ мюд тарпаӈгуд”. Сава серо сертавы” ила’ е”эмня юркаӈгуд”. Вэва серо сертабавэхэв” сиддо’ судева’ е”эмня юркаӈгуд”. ³⁰ Харкван хар”н нядни ӈамгэхэртм’ серта нидм’ пирас”. Намдормани сер’ судеӈгудм’. Мань судми ненэся. Хар”н ватоми нидм’ нёракус”, Си”ми Ӈэдаравэни ватом’ нёраку”ӈадм’».

Иисус’ нямна ӈэда манэ”лабтяр”

³¹ «Мань Хар”н Пыхыдами вадепа”ни, Вадини ныхыси”. ³² Ӈани Хибяри Мань нямнани тид” лаханана таня. Мань теневадм’, Мань нямнани ӈэда Вадида ненэся”. ³³ Пыдара” Иоаннан’ ненэцие ӈэдараванда” мальӈгана, пыда ненэся’ нямна явнанда лаханась. ³⁴ Тикы Вадини ненэця’ Нямнани лаханава’ е”эмня нин хэтыбю”, ӈэдаӈговам’ ня”маванда” е”эмня хэтыбин. ³⁵ Иоаннхав лэёмбада, яберена серекабт” ӈэвы. Ӈамгэ’ пират’ пыдара” яляхаданда маймбаван’ харвадаць. ³⁶ Маньзяв манэ”лабтавндами Иоанн’ манэ”лабтяркад ва”ӈа. Нисяни тавы серо Мань малебидм’. Тикы Серони Нисяни Мань Си”ми ӈэдаравам’ манэ”лабтамби”. ³⁷ Мань Си”ми ӈэдаравэми – Нисями, мале Мань нямнани явнанда лаханась. Пыдахавара” Пыда Ӈэдаравэхэнда нида” пунрю”. Ӈадьбята” пыдара” Нисяни вабцам’ намд”мара” яӈгу, Пыхыдамда манэсо”мара” яӈгу, Пыда Вадида нянанда” ни” иле”. ³⁹ Пыдара” ихивахананда”, малсяда ил’ Хэбидя Падаркана ӈэ”нив’. Ӈадьбята” тяхасовна Хэбидя Падарм’ тохоламбира”. Хэбидя Падаркав Мань хибя ӈэвами манэ”лабтамби. ⁴⁰ Пыдахавара” илам’ ня”маванда” е”эмня Няни тован’ нида” харва”. ⁴¹ Мань ненэцяӈгат юндами нидм’ ня”марпю”. ⁴² Мань сидда” теневадм’, пыдара” сейхананда” Нувм’ мэнебцора” яӈгу. ⁴³ Мань Нисяни нювм’ няд”мяць тодамзь. Пыдара” сейханда” Си”ми нида” пэй”. Ӈани хибяри харта нюмда ныхым’ мэць тоб”нанда, тикахавм’ сейханда” пэндара”. ⁴⁴ Харта” няхатата” юнм’ ня”марпида”. Ӈопой, Нумгад ӈэда юнхавм’ нира” пюр”. Тиканда ханзер” пунрё пиртара”? ⁴⁵ Нисяни сякана Мань сидда” нидм’ вомдартамбаӈгу”. Танямна ибеда” нёя” ядэр”. Сидда” вомдартавандахав пыдара” енанара” – Моисей. ⁴⁶ Моисей Мань нямнани паднась. Ӈадьбята” ненэсявна Моисеян’ пунрёвы ӈэб”нанда”, Няни ӈани’ пунраӈгудаць. ⁴⁷ Тад Моисей’ падвэхэ” ниб”нанда” пунрю”, ханзер” Мань вадаха”ни пунраӈгуда”?»

Самляӈг ёнарм’ малебте”мя

(Мт 14:13-21; Мк 6:30-44; Лк 9:10-17)

¹ Тикы’ пуд, Иисус Галилея то’ тяха’ хая. Няби нюмда Тивериада то ӈэвы. ² Хуркари ненадо серо Иисус’ хаӈгуртаха” сертабавам’ манэсо”махадандо’, ӈока ненэць’ Пумнанда хаяць. ³ Иисус хой’ ни’ тана”махаданда, Тохоламбадита ня’ таня’ ӈамдыд”. ⁴ Иудей” хэбидя яля – Пасха хахаялмы. ⁵ Иисус саӈомда ӈэдараванда сер’ Нянда миндя ӈока ненэцям’ манэ”ӈа. Филиппан’ ма: «Сиддо’ ӈавлава’ е”эмня ханяд нянё тэмдаӈгува”?» ⁶ Иисусхав ӈамгэм’ Харта сертавахаданда теневась. Сюри сита хорпа, тарем’ хонрамбида. ⁷ Филипп Нянда вахалъй”: «Сидя юр” динарийхана+ 6:7* Рим параӈода я’ ненэй еся. Ӈопой динарий – яля’ недбя. тэмдавы няняхад хусувэмдо’ тянёмбовна ӈавлахарта ни томд”». ⁸ Иисус’ ӈопой тохоламбадада – Симон Пётр’ папа, Андрей Иисусан’ ма: ⁹ «Тюкохона ӈопой хасава ӈацекы’ ячменьхад сертавы самляӈг нянькоцяда, сидя халякоцяда таня”. Тикыкое таӈок ненэцие ӈавла нена” тянёнё”!» ¹⁰ Иисус ма: «Ненэця” таня ӈамдыдамд”». Таняна ӈув” ӈока” ӈэвы”. Ненэця” тикан’ ӈамдыд”. Тикахана мэни” поӈгана хасавари” самляӈг ёнар” ӈэвы”. ¹¹ Тадтикахад Иисус няньм’ ня”махая, Нумд’ сава вади хэт”махаданда няньм’ ӈамдёдаха” ми”ӈада. Халям’ ӈани’ тарем’ мэда. Ӈаворман’ харванаха” харвабцондо’ пирувна ми”ӈа. ¹² Ӈаворць ёльце”мяхадандо’, Иисус тохоламбадахата ма: «Хаёда ӈавар” ма”лэйда”, ӈамгэхэрт тэри нёя хаю”». ¹³ Ӈавар’ хаё”ми ма”лэйдо’, ячменьхад сертавы самляӈг мардавы няньхад юкад вата сидя паӈгалмы едм’ терде”. ¹⁴ Иисус’ сертавы тикы ненадо серм’ манэ”мандо’ сер’, ненэця” тарем’ ма”: «Пыда ненэсянда я’ тир’ ни’ товандаӈэ ваде”мы – Тикы Нум’ Вади Вадета». ¹⁵ Иисусхав хамэдада, пыдо’ ныхыри’ Сита параӈодадандо’ сертаван’ харва”. Ӈадьбята Пыда ӈани’ ӈопой ялнда пэхэ” хая.

Иисус’ ид’ нимня ядэро”ма

¹⁶ Нумда пэвсюмзь, Иисус’ тохоламбада” то’ няю’ хая”. ¹⁷ Ӈано’ мю’ тихия, то’ тяхана ӈэда Капернауман’ нэкалӈадо’. Нумда пэвсюмб” ӈод”, Иисус няндо’ тамна ни ту”. ¹⁸ Мерцяда сахама, ита манзада. ¹⁹ Пыдо’ мат’, самляӈг’ мян’ километр’ пирувна ӈанута”, та’ ёльцьӈгана ид’ нимня миндям’ – ӈаномдо’ хахаялтембада Иисусм’ манэць сейдо’ хая”. ²⁰ Пыдахавада няндо’ вахалъй”: «Манней! Сейда” нёя пин”». ²¹ Пыдо’ ӈанондо’ мю’ тибтеван’ харвадонзь. Лакри’ ӈанодо’ мале минханда яндо’ варан’ тэввы”.

Илам’ тамбада Нянь – Иисус

²² Тад нябимдей яляхана то’ няби вархана нувы” ненэця” ӈопойри ӈано’ хавна ӈани ӈаном’ манэ”мэдо’ яӈгу. Ӈано’ мю’ Иисус тохоламбадаха”ната ниць ти”. Тохоламбадида харто’ ӈанута хаяць. ²³ Тивериадахад ӈани” ӈано” тоць. Нум’ Ерв’ тикы я’ хэвхана Нумд’ сава вади вадесо”махаданда, ненэця” нянё ӈавормыць. ²⁴ Ненэця” Иисусм’ тохоламбадита ня’ таняна нидо’ ху”. Пыдо’ ӈану” мю’ тияд”, Капернауман’ Иисусм’ пюрць нэкалӈадо’. ²⁵ Няби то’ вархана Иисусм’ хо”махадандо’, хонрамба пядо’: «Равви, Пыдар сяха’ тюкон’ тэвын?» ²⁶ Иисус няндо’ ма: «Ненэся, ненэся нянда” мадм’, пыдара” ненадо серо манэ”манда” нид Си”ми вунида” пюр”, нянё ӈаво”махаданда” малеванда” нид Си”ми пюрӈада”. ²⁷ Тиманда ӈавар’ е”эмня нида” манзара”, та’ екававна малсяда илам’ минрена ӈавар’ е”эмня манзарада”. Ненэця’ Нюӈэ вадета тикы ӈаварм’ нянда” тата. Нум’ Нися тикы’ е”эмня Нянда Пидте”мямда ӈабтась». ²⁸ Тадтикахад ненэця” Иисусм’ хонра”: «Нум’ сякана сава ӈэда серм’ сертавана” е”эмня ханзер” ӈэб”на” сава?» ²⁹ Иисус няндо’ ма: «Пыда Ӈэдаравэхэнда пунрёбта”, тикахана Нум’ сякана сава серм’ сертабида”». ³⁰ Ненэця” тиканда Нянда ма”: «Нянд пунравана” е”эмня, ӈамгэ ненадо серм’ манэ”лабтаӈгун? Ӈамгэм’ сертаӈгун? ³¹ Нисянана” вэӈго яхана маннам’+ 6:31* Израиль’ тер” вэӈго явна ёндормандо’ мальӈгана, Нум’ няндо’ ӈэдаравы мутра ӈавар. ӈаворӈаць. Тикы’ нямна Хэбидя Падаркана тарем’ пады: ‹Пыда няндо’ ӈавараӈэ нумгад ӈэда няньм’ ми”ӈа›»*+ 6:31* Египетхад хэ”мя 16:4, 15. . ³² Иисус няндо’ маси”: «Ненэся, ненэся нянда” мадм’, Моисей нумгад ӈэда няньм’ нянда” нись та”, Нисями нумгад ӈэда ненэся няньм’ нянда” тамби. ³³ Нум’ тамбада няньхав – нув’ няд ха”морта, я’ тирк” илам’ мипи». ³⁴ Пыдо’ Нянда ма”: «Нум’ Ервава”, хусувэхэ”на тарця няньдава” мипю”». ³⁵ Иисусхав няндо’ ма”нив’: «Маньзяван ила’ нянядм’! Няни турта ни ӈорцяӈгу”. Тад ӈани’ Няни пунрёда сяхаӈгарт’ ит’ харвабцода яӈгуда. ³⁶ Мань нянда” маӈгава мадамзи”, Си”ми манэкава манэ”ӈадаци”, хуркавна ӈод” Няни нида”нё” пунрю”. ³⁷ Нисяни Няни тамбада хусувэй ненэць’ Няни тута, Няни турта ханяӈэхэртамдо’ Мань нидм’ питарт”. ³⁸ Хар”н Ини сер’ ӈэвани е”эмня Мань нув’ няд вунисядм’ ха”ам”. Си”ми Ӈэдаравэни ватом’ сертаванзь тодамзь. ³⁹ Си”ми Ӈэдаравэни ватода тарця: Тавэхэданда Мань ӈамгэхэртм’ ёпа”ни ни тара”, пудана яляхана Мань мал’ яӈор’ илебтеб”ни тара. ⁴⁰ Нисяни вато тарця: хусувэй хибя Нюмда мание Нянда пунрёда, малсяда илам’ ня”маӈгу. Пудана яляхана Мань сита яӈор’ илебтеӈгудм’». ⁴¹ Иисус’ тарця вади хэт”махад: «Мань нумгад ха”амвы нянядм’», иудей” помнандо’ Пыда нямнанда лаханорць пэяд”. ⁴² Пыдо’ ма”: «Тюкохова Иосиф’ хасава ню – Иисуснё”, Небяхаюда-Нисяхаюда маня” теневаӈахаюна”нё”. Пыда ханзер” тарем’ лахана: ‹Мань нумгад ха”мыдамзь›?» ⁴³ Иисус няндо’ вахалъй”: «Помнанда” хараси” нёда” лаханор”. ⁴⁴ Си”ми ӈэдаравэни – Нисяни хахаялтева’ хавна, Няни хибяхарт тось нида пирас”. Няни тонахавм’ Мань пудана яляхана илебтеӈгув. ⁴⁵ Нум’ Вади вадети” падарка”на тарем’ падыси”: ‹Пыдо’ сиддо’ мал’ Нум’ тохолаӈгу›. Хусувэй хибя Нисями намдорта, Няданда тохолковы Няни турӈа. ⁴⁶ Нумгад ӈэда Ненэця’ хавна хибяхарт Нисям’+ 6:46* Нум’ Нисям’. нивэда манэс”. Пыдарида Нисям’** манэ”мэда. ⁴⁷ Ненэся, ненэся нянда” мадм’, Няни пунрёдахана малсяда ил’ таня. ⁴⁸ Мань ила’ нянядм’. ⁴⁹ Нисянада” вэӈго яхана маннам’ ӈавормы” ӈэбто’ ӈо”, хуркавна ӈо”, пыдо’ хаць. ⁵⁰ Тикы няньхав нумгад ха”морта нянь. Тикы нянё ӈаворта ни хаӈгу”. ⁵¹ Тикы иленя няньхав нумгад ха”амвы Мань ӈэ”нидам’. Хусувэй хибя тикы няньм’ ӈаворта иланда малсяӈгу. Нянда” мипада Няньми – Мань Пыхыдами! Тикы нянь хусувэй я’ тер’ илева’ е”эмня ӈадьбя”ни мипадами». ⁵² Тикы Вадита пуд, иудей” помнандо’ няхато’ пэбтэйд”, тарем’ лаханорӈа”: «Пыда ханзер” Харта Пыхыдамда няна” ӈамзь тась пир”ӈада?» ⁵³ Тикы вадахато’ Иисус тарем’ ма: «Ненэся, ненэся нянда” мадм’, Ненэця’ Нюӈэ вадета’ Пыхыдм’ нибта” ӈав”, Вэямда нибта” ӈэр”, нянанда” ил’ яӈгу. ⁵⁴ Мань Пыхыдами ӈавортахана, Мань Вэями ӈэрпадахана малсяда ил’ таня. Тикым’ пудана яляхана Мань илебтеӈгув. ⁵⁵ Мань Пыхыдами ненэся ӈавар, Мань Вэями ненэся ӈэрпада ӈамгэ. ⁵⁶ Мань Пыхыдами ӈаворта, Мань Вэями ӈэрпада Мюняни мэ, Мань ӈо” нянанда мэдм’. ⁵⁷ Ханзер” иленя Нисями Си”ми ӈэдараса, ханзер” Мань Нисяхадани иледм’, тарем’ Си”ми ӈавараӈэ мэта Нядни илеӈгу. ⁵⁸ Тюку нянь нумгад ха”мыць, Нисяната” ӈавормы’ то”лаха ни ӈа”. Тикым’ ӈаворпато’ ӈод”, пыдо’ хуркавна ӈо” хаць. Тюку няньм’ ӈавортахав ӈоб’ илеӈгу». ⁵⁹ Тикы вадида Иисус Капернаумхана ӈэда ма”люӈгалава мякана, ненэцие тохоламбаванда сер’ ваде”ядась.

Малсяда ила’ вада”

⁶⁰ Тарця вади намда, Тохоламбадита ӈокаюм’ пелядо’ тарем’ лаханаць: «Тикы вадета Вадида намдорма’ то”лаха ни” ӈа”. Теда’ хибя тикы Вадахата инзелеӈгу?» ⁶¹ Иисусхав нибта ӈо” намдор”, тохоламбадита ӈамгэм’ ваде”мэхэт теневась. Пыда няндо’ тарем’ ма: «Сёнзяхата” вэваковна тэвыд”? ⁶² Ненэця’ Нюӈэ вадетам’ ӈахат мэ”маханда тананаӈэ манэпата”, тикахана ханзер” ӈэӈгуда”? ⁶³ Илам’ тамбада, тикы Инд” ӈэ”нив’. Пыхыдахав ӈамгэхэрт ни ӈа”. Нянда” хэтвы Вадини Инд” ӈэ”нив’, ил’ ӈэ”нив’. ⁶⁴ Ӈабцакавата поӈгананда” ниня пунрёдида” таня”». Иисус ӈули” нюрте”эхэд хибя Нянда ниня пунрёдахад, Сита хусаравандахад теневась. ⁶⁵ Иисус ма: «Ӈадьбя”ни Мань нянда” тарем’ мадамзь: Нисяни тарем’ табековдавэй’ хибяхарт Няни тось нида пирас”». ⁶⁶ Тикы’ пуд Тохоламбадита поӈгад ӈокаюм’ пелядо’ Сита хае”, сян’ Нянанда ни” ядэр”. ⁶⁷ Иисус юкад вата сидямда хонра: «Пыдара” ӈани’ хэван’ нида” харва”?» ⁶⁸ Симон Пётр вахалъй”: «Нум’ Ервава”, маня” хибян’ хандава”? Малсяда ила’ вада” Пыдар нянанд ӈа”нё”. ⁶⁹ Маня” Пыдар Хэбидя ӈэваханд, Нумгад товахаданд+ 6:69* Ханяӈы ӈудахана падвы падарка”на тарем’ пады: «Маня” Пыдар Христос ӈэваханд, Нум’ Ню ӈэваханд». пунрэйна”, хамэдава”». ⁷⁰ Иисус няндо’ ма: «Юкад вата сидяӈэ мал’ Мань сидда” нисядам’ тэра”? Хуркавна ӈо” ӈопойра” ӈа». ⁷¹ Пыда Кариот’ тер Симон’ хасава ню – Иуда’ нямна лаханась. Иуда юкад вата сидяхад ӈопойдонзь, пыда Иисусм’ хусараванзь хамекусь.

Иисус’ харта хасава нита Нянда нива пунрё”ма

¹ Тад пуна Иисус Галилея явна ядэрӈась. Иудея яхана иудей” Сита хадаван’ харваць, ӈадьбята Пыда танямна ядэрман’ нись харва”. ² Иудей” Ӈум’ Мя” хэбидя яля+ 7:2* Тикы хэбидя яляха”на еврей” харто’ мято’ хаехэя, мято’ хэвхана пя’ таркахат ӈум’ мятамдо’ мярасеты”. Хэбидя ялэ” си”ив яля’ ямбан’ ӈаха”на Египетхад тарп”махадандо’ вэӈго яхана ханзер” иле”мямдо’ тензибтехэя тикы ӈум’ мяка”нато’ илесеты”. хахаялмась. ³ Иисус’ хасава нида Нянда ма”: «Тюкоход хэбат тара, Иудея ян’ хэбат сава. Таняна тохоламбадид сертабада серод манэт”ни”им’. ⁴ Хусувэй ненэць’ харта пыхыдамда манэ”лабтава’ е”эмня сертабадида ниданё” такалпю”. Тарця серо сертабадаӈэ, я’ тир’ ненэцяӈг” Пыхыдамд манэ”лабтамбадава». ⁵ Харта хасава нихиртада Нянда ниць пунрю”. ⁶ Иисус няндо’ тарем’ ма: «Маньзяв Ёльцями тамна товдавэй. Пыдахавара” ӈоб’ ёльцяра” таня. ⁷ Пыдара” сидда” я’ тир’ ненэця” волтамба ни” пирас”. Маньзяв Си”ми, серото’ вэнзу” ӈэвам’ Ваде”мани нид, сэхэда”. ⁸ Пыдара” хэбидя ялян’ хаяда”. Маньзяв тюку хэбидя ялян’ нидм’ тут”, Ёльцями тамна товдавэй». ⁹ Тикы Вадида хэт”махаданда Галилеяхана хаи.

Иисус’ хэбидя ялян’ хэ”мя

¹⁰ Хасев” нита хэбидя ялян’ хэ”мяхад, Иисус хуркавна ӈо” талерка хэбидя ялям’ манэ”манзь хая. ¹¹ Иудей”, хэбидя яляхана, Иисусм’ пюрӈа”, тарем’ хонарку”: «Пыда ханяна мэ?» ¹² Ненэцие” помна Пыда нямнанда ӈэда хуркари” лахарё” ядэрӈа”. Ханяӈы” ненэця” тарем’ лахана”: «Пыда сава ненэць’». Ханяӈыдо’ тарем’ лаханорӈа”: «Ниӈо”, ненэцие хараси” сиякаха” тэво”ла». ¹³ Иудейха” сейто’ пинава’ нид, хибяхарт ӈарковна Нямнанда нись лахан”. ¹⁴ Хэбидя яля’ няби пеляхана Иисус Хэбидя Хардавна ӈадимя, ненэцие тохоламба пя. ¹⁵ Иудей” тэри пысаӈга”, ма”: «Тохолко”мада яӈгуси”, ханяд Хэбидя Падарм’+ 7:15* Тид” тарем’ пады: «падарм’». теневада?» ¹⁶ Тикы вадахато’ Иисус тарем’ вахалъй”: «Тохолир”ми Нядни ни” ӈа”, Си”ми Ӈэдаравэхэдни ӈа”. ¹⁷ Нум’ вато’ сер’ ӈэван’ харванахав Мань тохолир”ми Нумгад ӈэвамда, ӈули” ӈэбта, Мань хар”н нядни ӈэда вади ӈэвам’ хамэдаӈгуда. ¹⁸ Харта няданда лахананахав харта юндамда пюрӈа. Сита Ӈэдаравы’ юнм’ пюртахав ненэся, сиякада яӈгу. ¹⁹ Нянда” Моисей Ватом’ нися та”? Хуркавна ӈо” хибяхартара” тикы Вато’ сер’ ниню” иле”. Ӈамгэ Си”ми хадаван’ харвада”?» ²⁰ Ненэця” Нянда ма”: «Нянанд ӈылека ни мы”? Хибя Сит хадаван’ харва?» ²¹ Иисус тикы вадахато’ тарем’ ма: «Ӈопой сертавы Серкадани пыдара” мал’ пысаӈгада”нё”. ²² Моисей нянда” матнава мэсыдм’+ 7:22* Еврей” тарця мэсыто’ танявы: ӈаябэй хасава ӈацекы’ соя”махаданда, сидндетимдей яляхана лэ”морта мал’ ниня ӈэда хобам’ мадабавэдо’. тась (ӈабцакаванда тикы мэсы” Моисейхартахад ни ӈа”. Нисянато’ нися-нисяхат ӈа), пыдахавара” еврей” ныланава яляхартахана матнада”нё”. ²³ Пыдара” Моисей’ Ватом’ мадавоӈгаданда” еврей” ныланава яляхана ненэця”мана матнада”нё”. Ӈамгэ еврей” ныланава яляхана хаӈгуртам’ ӈарханда савумдавани е”эмня Мань няни я”авлыда”? ²⁴ Тю”уримна ӈавори’ нямна судеӈго ӈэвадэйда”, тадхав ненэся судвана судеӈго пэйда”».

Иисус – Христосхарт ӈэбтав’?

²⁵ Ханяӈы” Иерусалим’ тер” тарем’ ма”: «Тикы хадаван’ харванадо’ ни ӈа”? ²⁶ Ти, Пыда тид” лахана. Пыдо’ ӈамгэхэртм’ Нянда ни” хэтыбю”. Сита ерв” ненэся Христосӈэ таславэкы”? ²⁷ Пыда ханяд ӈэвахаданда маня” теневава”нё”. Христос’ тоб”нанда, ханяд Товахаданда хибяхарт ехэраӈгу». ²⁸ Иисус, Хэбидя Хардахана ненэцие тохоламбаванда сер’, ӈарковна тарем’ лахана: «Си”ми теневавэда”нё”, ханяд Товахадани теневавэда”нё”. Ӈабцакаванда Мань Хар”н ини сер’ товэдм’ нидм’ ӈа”, Си”ми Ӈэдаравэми ненэся. Пыдахавара” Сита ехэрада”. ²⁹ Маньзяв ханяв тенев”, Мань Няданда ӈэ”нидам’, Пыда Си”ми ӈэдарась». ³⁰ Тиканда ненэця” Иисусм’ ня”маван’ харвадонзь, ӈопой, ӈобкартадо’ ӈудамда Нянда ила я”мась. Тад ӈо” ӈэсь ӈо” Ёльцянда тамна товдавэйсь. ³¹ Ненэцие” мандалкад ӈокаюм’ пелядо’ Нянда пунрэйдаць. Пыдо’ тарем’ лаханаць: «Христос’ тоб”нанда, тюку ненэця’ сертавы серкад тамна ӈока ненадо серо сертаӈгудакы?» ³² Иисус’ нямна ӈэда ненэцие” лахарё” фарисей” хаха” тэвыд”. Ӈарка ханондана”, Фарисей” Иисусм’ ня”маванзь манзаранидо’ ӈэдара”. ³³ Иисус няндо’ тарем’ ма: «Нянанда” Мэвани ёльць’ тянёмя. Тадри’ Си”ми Ӈэдаравэхэни хандадм’. ³⁴ Си”ми иб” пюрп”нанда”, Си”ми нида” хоӈгу”. Мэсь Яхани тось нира” пират”». ³⁵ Тадтикахад иудей” помнандо’ тарем’ ма”: «Пыда ханя’ хэванзь пэрпата? Маня” Сита ховоӈгадна” тарем’ лахананакы? Еллин+ 7:35* Иудейхад яӈгня ненэцие” тэнз”, грек’ вадавна лаханана”, поӈганандо’ грек” таня”. ненэцие” поӈгана иленя няха”на” ханданакы? Еллин ненэцие тохоламбаӈгудакы? ³⁶ Пыда тарем’ лаханабта: ‹Си”ми пюрп”нанда”, Си”ми нида” хоӈгу”. Мэсь Яхани тось нира” пират”›, тикы Вадида ханзер” хамэдаб” сава”?»

Иленя и” – Иисус

³⁷ Хэбидя яля’ пудана яляхана – сямян ӈарка яляхана, Иисус нулкая, ӈарка”явана вахалъй”: «Хибя идарман’ харва, Няни тоя, идарӈая! ³⁸ Хэбидя Падаркана падвы вади” сер’, Няни пунрёда сёнзяхаданда иленя ид’ яха” хурнаӈгу”». ³⁹ Иисус Нянда пунравы” ненэцие” Хэбидя Индадм’ ня”мава’ нямна лаханась. Иисус’ юн тамна ӈармадавэйсь, ӈадьбята Хэбидя Инд” ненэцяӈг” ниць тэв”.

Иисус’ нямна тасалкурма

⁴⁰ Ненэцие” мандал’ поӈгана мэни” ханяӈыдо’ Иисус’ вади намда, тарем’ ма”: «Пыда ненэся тикы Нум’ Вади вадета!»+ 7:40* Ин 1:21. ⁴¹ Ханяӈэхэв” тамна тарем’ лахана”: «Тюкохов Христос!» Тамна ӈани ханяӈэхэв” тарем’ лаханорӈа”: «Галилея яхавахад Христос тось пиртада? ⁴² Хэбидя Падаркана тарем’ нися паду”?: ‹Христосхав Давид’ паӈгхад ни ӈэӈгу”? Вифлеем хардахад – Давид’ иле мэ”мы яхад ни тут”?›»+ 7:42* Нябимдей параӈоди” иле”мя 7:12. ⁴³ Та’ ёльцьӈгана ненэцие” мандал” Иисус’ нямна тасалкодахандо’ вадидо’ тодо’ я”мана хая”. ⁴⁴ Ханяӈы” ненэцяӈгав” Сита ня”маван’ харва”, ӈопой, ӈобкартадо’ Нянда ӈудамда ила я”ма.

Иудей” ерво” нива пунрёва

⁴⁵ Манзаранидо’ ӈарка ханонданаха”, фарисейха” то”махадандо’, няби” сиддо’ хонрамба пя”: «Ӈамгэ нира” тэвра”?» ⁴⁶ Манзаранидо’ ма”: «Тикы Ненэця’ тотрев’ хуна сяхаӈгарт’ ӈобкарт хибяхарт тарем’ нись лахан”». ⁴⁷ Фарисей” няндо’ тарем’ ма”: «Пыдахартара” ӈани’ нельтерейда”? ⁴⁸ Ненэцие” ӈарктахат, фарисейхат Нянда пунрана таня? ⁴⁹ Тикы ненэцие” мандалкав” ӈамгэхэртм’ Ватохона ни” хамэдамбю”, пыдо’ мэтравы”». ⁵⁰ Фарисей” поӈгана Никодимам’ нюбета ненэць’ танявы, пыда ӈахат Иисусан’ ханцеты. Пыда фарисейха” тарем’ ма: ⁵¹ «Ненэцям’ тасалковдавэй’, Ватохонана” судеба серо”ӈа? Нюрте”э’, няданда вадида намд”махад, ӈамгэм’ серта”мамда тасла ни тара”?» ⁵² Пыдо’ нянда ма”: «Пыдар ӈани’ Галилеяхад нин ӈа”? Хэбидя Падарм’ сомбовна манэт, тикахана манэтар, Нум’ Вади вадета Галилеяхад ни тут”». ⁵³ Тикы вади” пуд мал’ мядо”манато’ хая”.

Саена не

¹ Иисусхав Елеон хоян’ хая. ² Ӈодь’ ялэмгава, Иисус ӈани’ Хэбидя Хардан’ то. Хэвханда ненэця” мал’ ма”лыд”. Тиканда ӈамдахая, тохоламба пяйда. ³ Моисей’ Ватом’ теневана”, фарисей” ӈоб” нем’ тэвра”. Тикы нем’ ӈани несэй хасавахана хонёдаханда ня”мавэдо’. Тикы нем’ ненэцие” сяк” нултадо’, ⁴ Иисусан’ тарем’ ма”: «Сидна” тохоламбадава”, тюку нем’ ӈани несэй хасавахана хонёдаханда ня”мава”. ⁵ Моисейхав Ватохонанда тикы’ то”лаха не манябэхэна ладорпа сидна” табэдась. Пыдар ха”мандан?»+ 8:5* Левит 20:10. ⁶ Пыдо’ сюри тарем’ Нянда лаханавы”. Хэтувнда Вадахананда Сита вомдартаван’ харвавы”. Иисус таси’ нибклэй”, ӈуданда таркахана явна ӈамгэхэвм’ падыба пя. ⁷ Пыдахавадо’ тамна Сита хонрамби”. Тадтикахад Пыда нуло”махаданда вахалъй”: «Ханяӈэра” хэбяхаси”, тикара” нерде нен’ манябэм’ моя». ⁸ Иисус ӈани’ таси’ нибклэй”, явна падна пэй”. ⁹ Тарця вади намда, ненэця” ӈоб”лад’ тодо’ яха” хая”, сямянхат ӈаркыдо’ нито’ нерня’ хая”. Та’ ёльцьӈгана Иисус не’ ня’ харти’ хаихи’. Нехэв нер” ханяна нуса, тикахана тамна ну. ¹⁰ Иисус нулъй”, [не’ хавна хибяхартм’ нись мание”,]+ 8:10* Ханяӈы ӈудахана падвы падарка”на пады. нен’ вахалъй”: «Неӈэй, нид ханяна хая”? Хибяхарт сит ни вомдарта”?» ¹¹ Не ма: «Мань Ервав, хибяхарт си”ми ни вомдарта”». Иисус нянда ма: «Мань ӈо” сит ӈани’ нидм’ вомдартамбю”. Мяканд хань”, тад нерня’ ӈани’ сяхаӈгарт’ нён хэбяхамдю”».

Иисус – я’ тир’ яля

¹² Иисус ӈани’ ненэцяӈг” вахалъй”: «Мань я’ тир’ ялядм’! Пумнани ялтахав сяхаӈгарт’ пэвдявна ни ядэрт”, ила’ яля нянанда ӈэӈгу». ¹³ Тиканда фарисей” Нянда ма”: «Пыдар Харт Пыхыдамд ваде”ӈан. Пыдар ваде”мыд ненэся” вуни” ӈа”». ¹⁴ Иисус няндо’ ма: «Хар”н Пыхыдани нямна лаханаб”ни ӈод”, Лахана”мини ненэся”. Тад ӈо” ӈэсь ӈо” ханяд то”махадани, ханя’ хэвахадани теневадм’, пыдахавара” Мань ханяд то”махадани, ханя’ хэвахадани ехэрада”. ¹⁵ Пыдара” хибярим’ я’ тир’ судебава’ пирувна+ 8:15* Тид” тарем’ пады: «пыхыдавнанда”». судебира”. Маньзяв хибяхартм’ нидм’ судебю”. ¹⁶ Судеб”ни ӈод”, Мань судми ненэся, тад ӈо” Мань ӈопойдм’ нидм’ ӈа”. Нянани Си”ми ӈэдаравы Нисями мэ. ¹⁷ Пыдара” Ватохонанда” тарем’ падынё”: ‹Сидя сырмэхэ’ вадити’ ӈобт’ ха”морпато’, пыди’ вадиди’ ныхы”ӈа”›+ 8:17* Нябимдей Нум’ Вато 19:15, 17:6. . ¹⁸ Мань Хар”н нямнани лаханадм’, тикахад Мань нямнани Си”ми ӈэдаравы Нисями лахана». ¹⁹ Тиканда пыдо’ Иисусан’ ма”: «Пыдар Нисяр ханяна мэ?» Тикы вадахато’ Иисус ма: «Пыдара” Си”ми ехэрада”, Нисями ӈани’ ехэрара”. Тиканда Си”ми теневавы” ӈэб”нанда”, Нисями ӈани’ теневаӈгураць». ²⁰ Тикы Вадида, Хэбидя Харад’ мюня ненэцие тохоламбаванда ёльцьӈгана, есь” ларас’ хэвхана хэтыдась. Сита хибяхарт ни ня”ам”, тад ӈо” Ёльцянда тэвувдавэйсь.

Хэсь Яхани тось нира” пирас”

²¹ Иисус ӈани’ няндо’ ма: «Мань хандадм’, Си”ми пюртада”, хуркавна ӈод” хэбяхахананда” хаӈгуда”. Мань хэсь яхани тось нира” пирас”». ²² Иудей” Вадахата тарем’ ма”: «Ненэся Харта Пыхыдамда маядаванзь пэртакы? Тарем’ манё”: ‹Мань хэсь яхани тось нира” пирас”›». ²³ Иисус няндо’ ма: «Пыдара” тасид ӈада”, Маньзяв тю”уд ӈадм’. Пыдара” тюку я’ тиркад ӈада”, Маньзяв тюку я’ тиркад нидм’ ӈа”. ²⁴ Мань нянда” тарем’ мадамзь: ‹Пыдара” хэбяхаха”ната” хаӈгуда”›. Хибя Ӈэвахани ниб”нанда” пунрю”, пыдара” хэбяхасавэйӈэ хаӈгуда”». ²⁵ Тадтикахад Сита хонра”: «Тиканда, Пыдар хибян?» Иисус няндо’ ма: «Сямян нюрте”эхэд Хибя Ӈэвани нямна нянда” лахан”нидам’. ²⁶ Пыдара” нямнанда” Ваде”мандами ӈока”, Судевандами ӈока”. Си”ми Ӈэдаравэми ненэся. Няданда намдвыни я’ тир’ терха” ваде”ян». ²⁷ Пыдо’ Иисус’ Нисянда нямна лаханавам’ нидо’ хамэда”. ²⁸ Тиканда Иисус няндо’ ма: «Ненэця’ Нюӈэ вадетам’ сяха’ тю”у’ илаӈгура”, пыдара” тикырихина Тикы Мань ӈэвами хамэдаӈгура”. Мань Хар”н нядни ӈамгэхэртм’ нидм’ сертабю”. Нисями ӈамгэн’ Си”ми тохоласа, Мань тикыри ваде”ӈадм’. Тикым’ ӈани’ хамэдаӈгура”. ²⁹ Си”ми Ӈэдаравы Нянани мэ, ӈопойӈэ Си”ми нись хае”. Тад ӈо” Сёнзяхананда ӈамгэ пои, Мань тикым’ ӈоб’ сертабив». ³⁰ Тикы Вадида хэт”махаданда ӈока иудей Нянда пунрэйдаць.

Ненэся сидда” ӈэдаӈгу

³¹ Нянда пунравы иудейха” Иисус тарем’ ма: «Пыдара” Мань вади”ни сер’ ӈоб’ ӈэбта”, тикахана ненэся Мань тохоламбадини. ³² Тадтикахад ненэсям’ хамэдаӈгура”, ненэся сидда” ӈэдаӈгу». ³³ Пыдо’ Нянда ма”: «Маня” Авраамхад перенава”, хуна сяхаӈгарт’ хибяхарт’ хабива” ниваць ӈа”. Пыдар ханзер” тарем’ лаханан: ‹Пыдара” ӈэдавы ӈэӈгуда”›?» ³⁴ Иисус няндо’ ма: «Ненэся, ненэся нянда” мадм’, хибяри-хибя хэбяхам’ сертабада – хэбяха’ хаби. ³⁵ Хаби пили” мякананда ни хаёд”, хасава нюхув пили” мякананда хаёда. ³⁶ Тадхав Хасава Ню сидда” ӈэдабата, тикахана ненэсявна ӈэдавы ӈэӈгуда”. ³⁷ Авраамхад переня” ӈэвахаданда” Мань теневадм’. Тарем’ ӈод” Вадини сёнзянда” мю’ пэмбаван’ нида” харва”. Ӈадьбята” Си”ми хадаван’ харвада”. ³⁸ Маньзяв нянда” Нисяхадани манэ”мыни вадес”нидам’, пыдахавара” харта” нисяхаданда” намдавыда”+ 8:38* Ханяӈы ӈудахана падвы падарка”на тарем’ пады: «манэ”мыда”». сертабида”».

Ӈа’ ню”

³⁹ Пыдо’ Иисусан’ ма”: «Маня” нисява” – Авраам». Иисус тикы вадахато’ тарем’ ма: «Ненэся Авраам’ ню” ню” ӈэвы ӈэбта”, пыдара” Авраам’ серо сертабаӈгудаць. ⁴⁰ Тедахав’ Нумгад намдавы ненэсям’ нянда” хэтвэӈэ, Си”ми хадаван’ харвада”нё”, Авраамхав тарця нись ӈа”. ⁴¹ Харта” нисяра” ханзер” ӈэса, пыдара” тарем’ ӈада”нё”». Тикы Вадахата пыдо’ тарем’ ма”: «Маня” тэри ховы нюва” нива” ӈа”! Маня” ӈопой Нисява”, Пыда Нум’». ⁴² Иисус няндо’ ма: «Пыдара” Нисяра” Нум’ ӈэвы ӈэбта, пыдара” Си”ми мэнеӈгудаць. Тад ӈо” ӈэсь ӈо” Мань Нумгад тодамзь, теда’ Мань тюкохона мэдм’. Хар”н ини сер’ нидамзь ту”, Пыда Си”ми ӈэдарась. ⁴³ Пыдара” хэтыбада Вадини ӈамгэ нида” хамэдамбю”? Ӈабцата” пыдара” Вадини намда нида” пирас”. ⁴⁴ Пыдара” ӈахад ӈада”, пыдара” нисяра” – ӈа. Пыдара” нисянда” харвабцу сертабаван’ харвада”. Нюрте”эхэд пыда хавыдик ӈэвы, ненэсям’ няд”мяць нидась пирас”, ӈабцата пыда нянанда ненэся яӈгу. Сиякавна лаханабта пыда явнанда пэрӈада, ӈабцата пыда ӈарханда сияк. Сияк’ нися – пыда ти. ⁴⁵ Мань ненэсям’ хэтыбидм’, ӈадьбята” пыдара” Няни нида” пунрю”. ⁴⁶ Ханяӈэра” теда’ Си”ми хэбяхам’ сертанаӈэ манэць пирта? Ненэсям’ хэтыбаб”нани ӈамгэ Няни нида” пунрю”? ⁴⁷ Нумгад ӈэдахав Нум’ вадаха” инзеле. Пыдахавара” Нумгад нида” ӈа”, ӈадьбята” Нум’ вадаха” нида” инзеле”».

Авраам’ нерня Мань танядамзь

⁴⁸ Иудей” Иисусан’ ма”: «Пыдар Сит Самария я’ терӈэ вадепа”на”, тадтикахад Нянанд ӈылека мэвам’ вадепа”на”, ненэсявна нива” лахан”?» ⁴⁹ Иисус няндо’ ма: «Мань нянани ӈылека яӈгу. Мань Хар”н Нисями ӈарк”ӈадм’, пыдахавара” Си”ми сяцялмдембида”. ⁵⁰ Мань Юндами нидм’ пюр”. Тикым’ Пюрта таня, Пыда Судеӈгода. ⁵¹ Ненэся, ненэся нянда” мадм’, Мань вадини нёракута сяхаӈгарт’ ни хаӈгу”+ 8:51* Тид” тарем’ пады: «сяхаӈгарт’ хавам’ нида манэт”». ». ⁵² Иудей” Нянда ма”: «Тедахав’ маня” таслава”, ӈылека Нянанд мэ. Авраам хась, Нум’ Вади вадета” ӈани’ хаць. Пыдар тарем’ лаханананё”: ‹Мань вадини нёракута сяхаӈгарт’ ни хаӈгу”›. ⁵³ Тиканда Авраам нисяхадана” Пыхыдамд ӈаркаӈэ тосар? Авраам хась, Нум’ Вади вадета” ӈани’ хаць. Хибяӈэ Пыхыдамд толабир?» ⁵⁴ Тикы вадахато’ Иисус тарем’ ма: «Хар”н юнами ӈармдамбавы ӈэб”нани, тиканда Мань юнами тароси. Пыдара” Нумданда” вадетара” – Нисями, Мань юнами ӈармдамбида. ⁵⁵ Пыдара” Сита ехэрада”, Маньзяв теневав. Мамб”нани ‹Ехэрав›, тикахана сидта” тотрев’ сиякадм’ ӈэӈгудм’. Ӈабцани Сита теневадм’, Ваданда сер’ ӈадм’. ⁵⁶ Авраам нисяра” Мань ялями манэ”манданда няю’ маймбись. Хуркавна ӈод”, тикы ялям’ манэ”ӈада, тадтикахад маи”». ⁵⁷ Тикы Вадахата иудей” тарем’ ма”: «Самляӈг ю” похортар яӈгунё”, тарем’ ӈо” Авраамам’ манэцан?» ⁵⁸ Иисус няндо’ ма: «Ненэся, ненэся нянда” мадм’, Авраам тамна соявдавэй’, Маньзяв мале танядамзь, теда’ ӈо” танядм’». ⁵⁹ Тиканда, ладормандо’ е”эмня ненэця” манябэ ня”ма”. Иисусхав тэмзы”, Хэбидя Хардахад тарпы”. [Ненэцие” помна хая, тэри нялкара.]+ 8:59* Ханяӈы ӈудахана падвы падарка”на пады.

Сэвсядаӈэ соявым’ савумда”ма

¹ Иисус миманда сер’, соя”манда мальӈгэхэд сэвсядам’ манэ”ӈа. ² Тохоламбадида Сита хонра”: «Равви, тюку ненэць’ ӈамгэ сэвси” соявы? Ханяӈэдо’ хэбяхам’ сертавы? Пыда? Ӈули”, нисяхаюда-небяхаюда ӈэдакэхэ’?» ³ Иисус ма: «Тарця ӈэвада тикы хасава’ хэбяхахад ни ӈа”, нисяхаюта-небяхаюта хэбяхахад ӈани’ ни ӈа”. Нум’ сертабада манзая нянанда ӈадимя’ е”эмня тарця. ⁴ Ялянда ныклавдавэй’ Си”ми ӈэдаравы Нум’ серо сертаб”на” тара. Пиӈэ хэ”мяхаданда хибяхарт ӈамгэхэртм’ серта ни пирас”. ⁵ Я’ тиркана Мэвахани Мань я’ тир’ ялядм’». ⁶ Тикы Вадида хэт”махаданда ян’ сабци”. Сабцямда я’ сибякохона хулцо”ӈада, тадтикахад тикахананда сэвсяда сэв масарӈа. ⁷ Тадтикахад Иисус нянда ма: «Силоамам’ нюбета халтаӈгось’ ян’ хань”, сэвад халта”». Силоам хамэдита – «ӈэдаравы». Тиканда пыда хая, сэвда халта. Таняд сэвсавэйӈэ пуня’ то. ⁸ Тёняӈы нида, ӈахат сита ӈэванаӈэ+ 9:8* Ӈули” маӈгбада, ненэцяӈгат ӈамгэдамда ханана. Ханяӈы ӈудахана падвы падарка”на «сэвсядаӈэ» пады. манэ”мы” тарем’ лахана”: «Тикава” ӈахат ӈамдё мындамда хынумбавы ни ӈа”?» ⁹ Ханяӈыдо’ тарем’ ма”: «Пыданё”». Ӈани ханяӈыдо’ тарем’ лахана”: «Ниӈо”, тэри сита то”лаханё”». Пыда ӈо” маси”: «Мань ӈэ”нидам’». ¹⁰ Тадтикахад ненэця” сита хонра”: «Ханзер” сэвад сылыд”?» ¹¹ Пыда няндо’ ма: «Иисусм’ нюбета ненэць’ я’ сибякохона хулцо”мы сабцяхананда сэвни масарӈась, тадтикахад няни тарем’ мась: ‹Силоам халтаӈгось’ ян’ хань”, сэвад халта”›. Тадтикахад таня’ хаядамзь, сэвни халтадамзь. Тикы’ пуд сэвни сылыд”». ¹² Ненэця” нянда ма”: «Тикы ненэць’ ханяна мэ?» Пыда ма: «Ехэрадм’».

Фарисей” сэвсяда’ саву”мам’ хонрамби”

¹³ Тадтикахад ненэця” ӈахат сэвсявым’ фарисейха” ханадо’. ¹⁴ Иисус’ я’ сибякохона хулцо”мы сабцяхананда сэвсяда’ сэв сылабта”ма яля, еврей” ныланава яля ӈэвы. ¹⁵ Ӈадьбято’ фарисей” сэвсявым’ ханзер” сэвта сылавам’ ӈани’ хонрамбавы”. Пыда няндо’ ма: «Я’ сибякохона сабцямда хулцосо”мам’ Пыда сэвхани масарӈадась, тикы’ пуд сэвни халтадамзь, тадтикахад сэвни сылыд”». ¹⁶ Фарисей” поӈгат ханяӈыдо’ тарем’ лахана”: «Тикы Ненэць’ Нумгад ни ӈа”, Пыда еврей” ныланава ялям’ нида нёда”». Ханяӈэхэбидо’ тарем’ ма”: «Ханзер” хэбяхасавэй ненэць’ тарця ненадо серо серта пиртыда?» Тадтикахад пыдо’ помнандо’ поёма”. ¹⁷ Сэвсявы ненэцям’ ӈани’ хонрамба пядо’: «Тикы Ненэць’ сэвад сылабтаси”, Нямнанда ӈамгэм’ хэтаӈгун?» Пыда ма: «Тикы Ненэць’ Нум’ Вади вадета». ¹⁸ Небяхаюда-нисяхаюда хамдавэй’ иудей” ӈахат сэвсяваханда, тадтикахад савуво”маханда нид” пунра”. ¹⁹ Тадтикахад небяхаюда-нисяхаюда хонрамба пя”: «Ӈыхы соя”махаданда сэвсядаӈэ вадетари’ пыдари’ нюри’? Теда’ ханзер” пыда сылы”?» ²⁰ Небяхаюда-нисяхаюда няндо’ маӈаха’: «Мани’ тенева, тюку мани’ нюми’, пыда сэвсядаӈэ соясь. ²¹ Ханзер” теда’ сэвта сыла”махад, хибя сэвда сылабта”махад мани’ ехэрани’. Пыда мале ӈарка, сита хонрада”, харта нямнанда пыда харта лаханаӈгу». ²² Иудейха” сейти’ пинава’ нид небяхаюда-нисяхаюда тарем’ лаханаӈаханзь. Иудей” мале помнандо’ тарем’ тасалкурӈаць: «Хибя Иисусм’ Христосӈэ вадетада, тикы ма”люӈгалава мякад питармы ӈэӈгу». ²³ Ӈадьбяти’ небяхаюда-нисяхаюда тарем’ лаханавэхэ’: «Пыда мале ӈарка, сита хонрада”». ²⁴ Тиканда фарисей” сэвсявы ненэцям’ нябимдей’ няндо’ хаӈгая ма”: «Нувм’ савус”+ 9:24* Ненэся хамэдита тарця: «Нум’ сякана ненэсям’ ваде”манзь ватор”». , маня” теневава”, Тикы Ненэць’ хэбяхасавэй». ²⁵ Сэвсявы няндо’ ма: «Хэбяхасавэй Ӈэвахаданда мань ехэрадм’. Ӈопой, сэвсявы ӈэвахадани, теда’ сырмахадани теневадм’». ²⁶ Тикы’ пуд ӈани’ хонрамба пядо’: «Ханзер” сит пэрца? Ханзер” сэвад сылабтэйда?» ²⁷ Пыда няндо’ ма: «Мань нянда” ваде”ӈаваси”, пыдара” няни нида”нё” инзеле”. Ӈамгэ’ е”эмня ӈани’ яӈор’ тикым’ намдаван’ харвада”? Пыдара” ӈани’ Пыда тохоламбададанда хэван’ харванакэда”?» ²⁸ Пыдахавадо’ сита тэдорпа пя”, тарем’ ма”: «Пыдар харт Пыда тохоламбадада, маньзявана” Моисей’ тохоламбадава”. ²⁹ Маня” тенева, Моисейхана Нум’ лаханакурӈась. Ӈари” Тикы Ненэць’ ханяд ӈэвахаданда маня” ехэрава”». ³⁰ Сэвда сылавы ненэць’ няндо’ ма: «Тарси” мэкаданё”! Ханяд Ӈэвахаданда ехэравэда”нё”. Маньзяв сэвни Пыда сылабтэйдась. ³¹ Маня” тенева, Нум’ хэбяхасавэйха” ни инзеле”. Нувм’ ӈарктахаби, Ватонда сер’ ӈэдахаби Пыда намдоръяда. ³² Хуна сяхаӈгарт’ хибяхарт сэвсядаӈэ соявы’ сэв сылабта”мам’ намд”мада яӈгу. ³³ Пыда Нумгад нивы ӈэбта ӈа”, ӈамгэхэртм’ серта я”маӈгусь». ³⁴ Пыдо’ вадахата тарем’ ма”: «Пыдар хэбяхы” поӈгана соянаси”, тамна ӈо” сидна” тохоламбин?» Тикы вадито’ пуд хэвня’ питарӈадо’.

Индкана сэвсява

³⁵ Иисусхав фарисей” сэвсявым’ хэвня’ питар”мам’ намд”махаданда сэвсявым’ хода, нянда ма: «Пыдар Ненэця’ Нюн’+ 9:35* Ханяӈы ӈудахана падвы падарка”на «Нум’ Нюӈэ» пады. пунрын?» ³⁶ Сэвсявы ма: «Ервами, Пыда хибя ӈэвамда няни хэтад, тиканда мань Нянда пунраӈгудм’». ³⁷ Иисус нянда ма: «Пыдар Сита манэ”ӈанаси”. Теда’ Пыда нянанд лаханакурӈа». ³⁸ Тиканда сэвсявы Нянда ма: «Нум’ Ервами, пунрыдм’!» Тадтикахад Иисусан’ нибклэй”. ³⁹ Иисус ма: «Тюку я’ тир’ ни’ Мань судеӈгованзь тодамзь, сэвсяда” сылавандо’ е”эмня, сэвсавэй” сэвсялмандо’ е”эмня тодамзь». ⁴⁰ Иисус’ хэвхана мэвы” ханяӈы” фарисей” тикы Вадида намдавы”, Нянда ма”: «Маня” ӈани’ сэвсядакэва”?» ⁴¹ Иисус няндо’ ма: «Сэвсявы ӈэвы ӈэб”нанда”, хэбяхасяӈгудаць. Тедахав’ мада”нё”: ‹Сэвсавэйва”›. Тиканда хэбяха нянанда” хаи».

Малкода, ху”

¹ «Ненэся, ненэся нянда” мадм’, хибяхав хуво” мэсь’ ян’ нё’ сивна нибта мятю”, ӈанинзер’ пакалтахав – талей, мартик. ² Нё’ сивна мятюнахав – хуво” малкода. ³ Нё’ сим’ ерамбада е”эмнянда нё’ сим’ нэмбида. Хухув” муӈганда намдорӈа”. Пыда ӈод” хусувэй хумда нюмнанда хаӈгая тарпо”лада. ⁴ Хувода мал’ пин’ хана”махаданда, харта нерандо’ няна миӈа. Хухув”, вабцамда тенева, пумнанда яда”. ⁵ Ӈани несэй ненэця’ пумна сяхаӈгарт’ нид” ялт”. Вабцамда ехэравандо’ нид няданда хунаӈгуд”». ⁶ Иисус тикы хара явна ӈэда лахарём’ няндо’ ваде”ӈада. Тарем’ ӈо” пыдо’ Ваде”мэхэданда ӈамгэхэртм’ ни” хамэда”.

Сава малкода – Иисус

⁷ Иисус няндо’ ӈани’ вахалъй”: «Ненэся, ненэся нянда” мадм’, Мань хуво” тюӈгалавадм’. ⁸ Нер”ни няна сянри ӈока турмы” ӈэбто’ ӈо”, пыдо’ мал’ талей”, мартик”. Ху” няндо’ ниць намдор”. ⁹ Мань – тюӈгалавадм’. Си”ни сер’ мятюна ӈэдавы ӈэӈгу. Пыда мятюӈгу, тарпаӈгу”, хадырць ядамда хоӈгу. ¹⁰ Талейхав талэрманда е”ливна, хавыдаванда е”ливна, яӈгумдаванда е”ливна нив’ тур”. Маньзяв иландо’ танява’ е”эмня, иламдо’ панаць ня”мава’ е”эмня тодамзь. ¹¹ Мань сава малкодадм’. Сава малкода хувота ила’ е”эмня иламда миць хамэды. ¹² Недва”лембадахав малкода вуни ӈа”. Ху” пыда ӈавэда вуни” ӈа”. Ӈадьбята пивна ядэртам’ манэпата, хуво хае хунаӈгу”. Тиканда пивна ядэрта хуво пябта, тодо’ яха” лядтыда. ¹³ Недва”лембадахав хуво” нямна серта яӈгу. Недва”лембада ӈэванда нид хунаӈгу”ни”им’. ¹⁴ Мань сава малкодадм’. Мань хар”н ӈавэни теневын, пыдо’ ӈо” ӈобтарем’ Си”ми тенева”. ¹⁵ Ханзер” Нисями Си”ми тенева, Мань тарем’ Нисяв теневав. Хар”н илми хуво”ни е”эмня митав. ¹⁶ Тюку хуво” мэсь’ яхад ниня ӈэда ӈани” Хувони таня”. Сиддо’ ӈани’ Няни тэвраб”ни тара. Пыдо’ Вабцами намдаӈгудо’, тадтикахад ӈопой ӈысыӈэ ханда”, ӈопой Малкодадо’ ӈэӈгу. ¹⁷ Илми яӈор’ пуня’ ня”мавани е”эмня Илми мипидм’, тикы’ е”эмня Нисями Си”ми мэне. ¹⁸ Хибяхарт Илми Нядни нида март”, ӈопой, Мань Хар”н мипив. Илми миць, илми пуня’ ня”ма Ныхыми таня. Тикы табеком’ Мань Нисяхадани ня”мавась». ¹⁹ Иудей” тикы Вадида намд”махадандо’ помнандо’ ӈани’ поёма”. ²⁰ Ӈокаюм’ пелядо’ тарем’ лахана”: «Пыда нянанда ӈылека таня, ханзосяламби. Ӈамгэ Нянда инзеледа”?» ²¹ Ханяӈыдо’ тарем’ ма”: «Тюку мэта Вадахабида ня”маравы’ вада” ниню” ӈа”. Сэвсяда ненэцие” сэв ӈылека сылабта пиртыда?»

Иудей” Иисусан’ нива пунрёва

²² Иерусалимхана Несэймдаӈго”ма хэбидя яля+ 10:22* Хэбидя Харадм’ Несэймда”ма хэбидя яля «Ханукаӈэ» нюмдебидо’. ӈэвы. Сырэй” ӈэвы”. ²³ Хэбидя Хардахана ӈэда Соломонм’ нюбета синдёда тюӈгалававна Иисус ядэрӈа. ²⁴ Иудей” Сита сюртехэя ма”: «Пон’ сидна” ерменяӈэ пэрмандан? Христос’ ӈэб”нанд тидпой” няна” ман”». ²⁵ Иисус няндо’ ма: «Мань нянда” мадамзи”, хуркавна ӈод” пыдара” Мань Няни нида”нё” пунрю”. Серони Нисяни нювм’ няд”мяць сертабин, тикы серони Мань хибя ӈэвами манэ”лабтамби”. ²⁶ Пыдара” Мань хувони нида” ӈа”. Ӈадьбята” Няни нида” пунрю”. ²⁷ Маньзяван хувони Муӈгани инзеле”. Мань теневын, пыдо’ Пумнани яда”. ²⁸ Мань няндо’ малсяда илам’ мипидм’, пыдо’ сяхаӈгарт’ ни” хаӈгу”, хибяхарт Ӈудахатани нида март”. ²⁹ Сиддо’ Няни тавы Мань Нисями сямянхат ӈарка, Мань Нисяни ӈудахат хибяхарт сиддо’ марць ни пирас”. ³⁰ Мань, Нисяни ня’ ӈопой ӈамгэни’». ³¹ Иудей” Сита ладормандо’ е”эмня ӈани’ манябэ ня”марӈа”. ³² Иисус няндо’ ма: «Нисяхадани ӈэда ӈока сава ӈамгэм’ нянда” манэ”лабтадамзь. Ханяӈэндо’ е”эмня Си”ми пэхэ”на ладорман’ харвада”?» ³³ Иудей” Нянда ма”: «Сава Серот е”эмня Сит пэхэ”на ладорман’ нива” харва”. Пыдар Нувм’ вомдартамбин. Ненэцянданё”, тарем’ ӈо” Пыхыдамд Нумӈэ толабир! Тикы е”эмня Сит ладорман’ харвава”». ³⁴ Иисус няндо’ ма: «Пыдара” Ватохонанда” тарем’ ни паду”?: ‹Мань мадм’, пыдара” хэхэда”?›+ 10:34* Нумд’ ӈэда сё 81:6. ³⁵ Нум’ Вадам’ ня”мавы Нум’ хэхэӈэ вадепата, тикахана Хэбидя Падар” таросяламзь нида пирас”. ³⁶ Нисяни нярумдавэӈэ, я’ тирт’ ӈэдаравэӈэ Мань тарем’ лаханаб”нани: ‹Мань Нум’ Нюдм’›, пыдара” ӈамгэ тарем’ мада”? : ‹Пыдар Нувм’ вомдартамбин›. ³⁷ Нисяни серо ниб”ни сертабю”, Няни нёда” пунрю”. ³⁸ Серо сертабаб”нани Няни нибта” ӈо” пунрю”, Мань сертабада серка”ни пунрыда”. Тиканда Нисяни Нянани мэвам’, Мань Нисяханани мэвами теневаӈгура”, хамэдаӈгура”+ 10:38* Ханяӈы ӈудахана падвы падарка”на тарем’ пады: «пунраӈгуда”». ». ³⁹ Тиканда иудей” Иисусм’ ӈани’ ня”маван’ харвадонзь, Пыдахавада ӈудахатато’ тэри нялкара. ⁴⁰ Иисус Иордан яха’ тяханя’ пырдари’ хая, таняна хаи. Сяхаӈгав’ таняна Иоанн ненэцие хэхэдамбись. ⁴¹ Ӈока ненэця” Иисусан’ тоць. Пыдо’ тарем’ лаханаць: «Иоаннхав ненадо серо сертавэда яӈгубата ӈод”, хуркавна ӈо” Тюку Ненэця’ нямна ӈэда вадахабида мал’ ненэся”». ⁴² Таняӈы яхана ӈока ненэць’ Иисусан’ пунрэйць.

Лазарь’ яӈгуво”ма

¹ Лазарьм’ нюбета ӈоб” ненэць’ хаӈгурмы. Пыда Вифания’ тер ӈэвы, Мария Марфа ненянда ня’ ӈани’ тикы хардакоход ӈэвэхэ’. ² Марияхав сяхаӈгав’ Нум’ Ервм’ ё”йда юркана масармэда, тадтикахад Ӈэда ӈэванда тарка”на тэ”мыда+ 11:2* Ин 12:3. . Пыда хаӈгурта Лазарь’ неня ӈэвы. ³ Не нясха’ Иисусан’ тарця вади ӈэдараӈаха’: «Нум’ Ервава”! Пыдар мэненар хаӈгурӈанё”». ⁴ Иисусхав тарця вади намда, тарем’ ма: «Тикы хабцянда хаванда няю’ ни ӈа”, Нувм’ ӈарка”ма’ няю’ ӈа, тикы хабця’ сер’ Нум’ Ню’ юнда ӈарамда». ⁵ Иисусхав Марфам’, тадтикахад ненямда, Лазарьм’ мэневыда. ⁶ Лазарь’ хаӈгурмам’ намдбата ӈод”, Иисус тамна сидя яля’, мэсь’ Яхананда мэсь. ⁷ Тикы’ пуд Тохоламбадахата ма: «Иудея ян’ ӈани’ хэхэва”». ⁸ Тохоламбадида Нянда ма”: «Равви, тандая’ иудей” Сит пэхэ”на ладорман’ харваци”, таня’ ӈани’ хэван’ харван?» ⁹ Иисус ма: «Ялей яля юкад вата сидя час ни ӈа”? Яля’ ядэрта тюку я’ тир’ ялям’ мание, ни тапхалаӈг”. ¹⁰ Пи’ ядэртахав нянанда яляда яӈгу, ӈадьбята тапхалаӈга». ¹¹ Тикы Вадида хэт”махаданда няндо’ ма: «Лазарь нява” хонарэй”. Маньзяван сита сидеванзь хандадм’». ¹² Тохоламбадида ма”: «Нум’ Ервава”, хонарахавабта савумд”нив’». ¹³ Иисусхав Лазарь’ хава’ нямна лаханась, Тохоламбадахабида Лазарь’ хонёва’ нямна Лахананаӈэ пэрӈадонзь. ¹⁴ Тиканда Иисус няндо’ тидпой” ма: «Лазарь вэ’ хая, ¹⁵ таняна нива Мэвахани е”эмнянда” маймбидм’. Тиканда пыдара” пунраӈгу”нида”ам’. Тадхава нянда хэхэва”». ¹⁶ Тиканда Фома, няби нюмда Яхас, няхата ма: «Хэхэва”, маня” ӈо” ӈани’ нянанда хаӈгува”ма».

Иисус – илело”ма, ил’

¹⁷ Иисус тэв”махаданда, мале тет яля’ Лазарь’ пэмбкана мэвам’ намда. ¹⁸ Вифания Иерусалимхад хубта ни ӈа”, няхарпой” километр. ¹⁹ Хасава нянди’ яӈгуво”махад Марфаха’, Марияха’ сейди’ таӈгумдаванзь ӈока иудей” нянди’ турӈаць. ²⁰ Иисус’ товам’ намда Марфа Неранда няд ялъй”, Марияхав мякананда ӈамды. ²¹ Марфа Иисусан’ ма: «Нум’ Ервав, Пыдар тюкохона мэвы ӈэбат, хасава нями вунзя яӈгумд”. ²² Теда’ ӈо” теневадм’, Пыдар ӈамгэм’ Нумгад хаӈан, Нум’ Нянд тарцям’ тата». ²³ Иисус нянда ма: «Хасава няр илелты”». ²⁴ Марфа Нянда вахалъй”: «Теневадм’, ӈули” пудана яляхана, яӈгумы” илело”ма’ ёльцьӈгана яӈор’ илелты”». ²⁵ Иисус нянда ма: «Мань илело”мадм’, иландм’. Няни пунрёда хабта ӈо”, илеӈгу. ²⁶ Хусувэй иленя Няни пунрёда сяхаӈгарт’ ни хаӈгу”. Тикан’ пунрын?» ²⁷ Пыда ма: «Ӈаха”, Нум’ Ервав, я’ тирт’ тованда Христос ӈэваханд, Нум’ Ню ӈэваханд пунрыдм’».

Иисус’ сэвта хаял” хая”

²⁸ Тикы вадида хэт”махаданда Марфа хая, тале Мариям’ – ненямда ханзь ма: «Сидна” тохоламбадава” тюкохона мэ, сит хаӈа». ²⁹ Мария тикы вади намдванда сер’ мер’ санэй”, Иисусан’ хая. ³⁰ Иисусхав хардан’ тэвувдавэй’ Марфа’ Сита хо”ма яхана тамна ну. ³¹ Мариям’ сеймлембада иудей” мякананда мэць. Пыдо’ санана Мариям’ манэць, пэмбад’ ня’ ярманзь хэвандаӈэ пэрӈадонзь. Ӈадьбято’ пумнанда хая”. ³² Марияхав Иисус’ мэсь’ ян’ тэвы”, Иисусм’ манэ”манда сер’ Ӈэта хэван’ пулыта ни’ мо”нахая, вахалъй”: «Нум’ Ервав, тюкохона мэвы ӈэбат, хасава нями вунзя яӈгумд”». ³³ Иисус ярта Мариям’, нянанда товы ярти иудей манэ”манда сер’, Харта ӈо” Инда вома’ нид Сейда нерцилы”. ³⁴ Пыда хонарку: «Ханя’ сюрцара”?» Пыдо’ ма”: «Нум’ Ерваӈэ, хань”ма, манэтава». ³⁵ Иисус’ сэвта хаял” хая”. ³⁶ Тиканда иудей” тарем’ ма”: «Манэкарӈара”, тарси” саць Пыда Лазарьм’ мэневэда!» ³⁷ Ханяӈы” ненэцяӈгав” тарем’ лахана”: «Ханзер” сэвсяда’ сэв сылабтавы тюку ненэцям’ яӈгумзь ӈэдарада?»

Иисус’ Лазарьм’ илебте”мя

³⁸ Иисус ӈани’ инда вэва ӈэсь, сюрась’ ян’ то. Тикы сюрась’ я пэ хоркадё ӈэвы, тюӈгалавада ӈарка”я пэхэна талы”. ³⁹ Иисус ма: «Пэм’ хэвня’ мэра”!» Яӈгумы’ неня – Марфа Нянда вахалъй”: «Нум’ Ервав, мале тет яля’ пэмбкана юседа, ӈабтада я”авлы». ⁴⁰ Иисус нянда ма: «Няни пунрёб”нанд Нум’ юнм’ манэтан. Мань нянд тарем’ нисядам’ ман”?» ⁴¹ Тиканда ненэця” пэм’ манрыла хэвня’ мэдо’. Иисус саӈомда нув’ няран’ ӈэдара, тарем’ ма: «Нисёв”, Си”ми Намдванд няю’ ӈарка вада. ⁴² Мань теневадм’, Си”ми ӈоб’ намдорӈан. Тюку Вадахабини тюкохона нуна ненэцие” е”эмня, Си”ми Ӈэдараваханд пунравандо’ е”эмня хэтыбадани». ⁴³ Тикы Вадида хэт”махаданда ӈарка”явана тёрей”: «Лазарь, тарпад”!» ⁴⁴ Яӈгумы ненэць’ ӈэта, ӈудита сыхыдё, сята ӈоксяӈгана синдё тикавна ӈадимя. Иисус няндо’ ма: «Сыхыда”мида екайда”, таня ядая».

Иисусм’ маядамбава’ нямна тасалко”ма

(Мт 26:1-5; Мк 14:1-2; Лк 22:1-2)

⁴⁵ Тикы’ пуд Мариян’ товы” ӈока иудей” Иисус’ ӈадимдевы серо манэсо”махадандо’ Иисусан’ пунрэяд”. ⁴⁶ Ханяӈэхэбидо’ фарисейха” хая”, Иисус’ сертавы серо няндо’ ваде”ядо’. ⁴⁷ Тадтикахад ӈарка ханондана”, фарисей” серо тасламбада мандалм’ ма”ла”, тарем’ ма”: «Ханзер” ӈэӈгува”? Тикы ненэць’ ӈока ненадо серо сертабинё”. ⁴⁸ Сита тарем’ хаеба”на”, Нянда хусувэй ненэць’ пунраӈгу”, тадтикахад Рим’ тер” тута”, ява” марта”+ 11:48* Ӈани хамэдита тарця: «Хэбидя Хардава” тахабтаӈгудо’». , ненэциена” ханаӈгудо’». ⁴⁹ Серо тасламбада мандалкад ӈопойдо’ – Каиафам’ нюбета хасава тикы похона ӈарка ханонданаӈэ таравы. Пыда тарем’ няхата ма: «Пыдара” ӈамгэхэртм’ ехэрада”, ⁵⁰ Ибеда” ядэркарӈая”, ненэцие” тэнз” мал’ хава’ екававна, ӈопой ненэця’ ӈани ненэӈие” е”эмня хава пыдара” нянанда”+ 11:50* Ханяӈы ӈудахана падвы падарка”на тарем’ пады: «маня” нянана”». сава ни ӈа”?» ⁵¹ Тикы вадида Каиафа харта няданда хэтвыда ни ӈа”, тикы по’ ӈарка ханондана ӈэсь, ненэцие” е”эмня Иисус’ хавам’ неранда ня’ ваде”ӈадась. ⁵² Тикы ненэцие” е”ливна Иисус’ хавам’ нись вадес”, тикы’ хавна тодо’ яха”на иленя Нум’ ню ӈобт’ Ма”лаванда е”эмня Хавамда ваде”ӈась. ⁵³ Тикы яляхад Иисусм’ хадаван’ харбиладо’. ⁵⁴ Ӈадьбята Иисус иудей” помна ӈадя ядэрць ӈэвадэй”. Пыда таняхад вэӈго я’ хэвхы Ефраимам’ нюбета хардан’ хая, Тохоламбадида няць таняна хаи. ⁵⁵ Иудей” хэбидя яля – Пасха хахаяламзь, ӈока ненэця” тодо’ яхад пыхыдадо’ нярумдаванзь Пасха’ нерня Иерусалиман’ хая”. ⁵⁶ Пыдо’ Иисусм’ пюрӈа”, Хэбидя Хардахана нухуя, нидо’ хонрамби”: «Ханзер” ибеда” ядэрӈа”, хэбидя ялян’ Пыда тутнакы?» ⁵⁷ Ӈарка ханонданахав” фарисей” ня’ Иисусм’ ня”мавандо’ е”эмня тарем’ табекурмыць: «Хибя Иисусм’ манэта, ханяна Мэвамда вадепата тара».

Мария ё”йда юркана Иисус’ ӈэ масарпи

(Мт 26:6-13; Мк 14:3-9)

¹ Пасха’ мат” яля’ нерцюна Иисус Вифаниян’ то. Таняна Иисус’ илебтевы Лазарь илевы. ² Таняна Иисус’ е”эмня лата тольм’ хамэдавы”. Марфа ненэцие манзая”ӈа. Иисус’ хэвхана мэна ненэцие” поӈгана мэвы ӈобто’ Лазарь ӈэвы. ³ Марияхав тацьда, мирета нардм’ нюбета юрм’ литр’ пелям’ Иисус’ ӈэхэ” масарӈада, тадтикахад харта ӈэбтхананда тэ”йда. Тикы’ пуд мята мюй ё”йда юр’ ӈабтхана паны”. ⁴ Ӈоб” Тохоламбадада Кариот’ тер Иуда – вад’ Иисусм’ хусараванда, тарем’ ма: ⁵ «Тюку юрм’ няхар” юр” динарийхана+ 12:5* Рим параӈода я’ ненэй еся. Ӈопой динарий – манзарана’ яля’ недбя. мирдаць савасянё”, недва”мы есь маӈгбадаха” митертыдаць». ⁶ Тикы вадида маӈгбади сянзь хэтвыда ни ӈа”. Пыда талей ӈэвы. Нянанда ма”ламбади” есь” ларасаком’ минармы. Таня’ пэрти” есяхат есь талебавы. ⁷ Иисусхав маси”: «Нёр пэр”! Пыдахавада ё”йда юре Мань Си”ми сюрпава яля’ е”эмня лэтмбавыда. ⁸ Маӈгбадахав” ӈоб’ нянанда” мэӈгу”, Маньзяв нянанда” пили” нидм’ мэӈгу”».

Ӈарка ханондана” Лазарьм’ хадаван’ харва”

⁹ Иудей” поӈгад ӈока ненэця” Иисус’ тикахана мэвам’ намда”. Пыдо’ Иисусрин’ ни” ту”, яӈор’ Илебтевэхэнда – Лазарян’ сырманзь ӈани’ то”. ¹⁰ Лазарь’ илело”мам’ манэсо”махадандо’ иудей” поӈгад ӈока ненэця” Иисусан’ турӈа”, тадтикахад Нянда пунраӈга”. Ӈадьбято’ ӈарка ханондана” Лазарьм’ ӈани’ хадаван’ харбиладо’.

Иисус’ Иерусалиман’ то”ма

(Мт 21:1-11; Мк 11:1-11; Лк 19:28-40)

¹² Нябимдей яляхана, хэбидя ялян’ товы” ӈарка”я ненэцие” мандал” Иисус’ Иерусалиман’ товам’ намда”. ¹³ Пыдо’ пальмам’ нюбета пи” мали ханахая, Иисус’ нерняд ялъяд”, тарем’ тюры”ӈа”: «Осанна+ 12:13* Арам’ вада. Тид” ӈэда хамэдита тарця: «Сидна” ӈэда”!» Нувм’ савуць мэта вадаӈэ хая. ! Нум’ Ерв’ нюмгана вад’ тованда ялэда сава” ӈэя”, Израиль’ Параӈода’ ялэда сава” ӈэя”». ¹⁴ Хэбидя Падаркана тарем’ пады: «Сион’ не ню+ 12:14-15* Иерусалим марад’ тер тарем’ нюмдеби. Сион мар” – Иерусалим. , сеяр нёя пин”! Параӈодар – ти, нянд миндя, илебей ха ямб юно’ ниня Пыда ӈамды»+ 12:15* Захария 9:9. . Тикы вади” сер’ Иисус илебей ха ямб юном’ хо, ниндя ӈамды”. ¹⁶ Тохоламбадида нюрте”э’ тикым’ нидо’ хамэда”. Иисус’ юнда ӈарво”марихид, тикы Нямнанда падвы ӈэвам’, тадтикахад тикы вади” сер’ ханзер” ненэцие” Сита пэрмам’ тензибте”. ¹⁷ Иисус’ Лазарьм’ пэмбкад ханзь илебтева’ мальӈгана, тикахана Нянанда мэвы ненэця” манэ”мэмдо’ ӈани ненэцяӈг” ваде”ӈадо’. ¹⁸ Иисус’ ненадо серм’ сертавам’ намдвандо’ сер’, ӈока ненэця” ӈадьбято’ Сита неранда няд ядабтаць. ¹⁹ Фарисейхав” помнандо’ тарем’ лаханорӈа”: «Манэ”ӈара”, ӈамгэхэртм’ нива” сапдамбю”. Хусувэй я’ тир’ ненэць’ Пумнанда яда!»

Ханяӈы” Еллин ненэця” Иисусм’ манэ”ман’ харва”

²⁰ Хэбидя яляхана Нумд’ туё”манзь товы” поӈгана ханяӈыдо’ Еллин ненэця” ӈэвы”. ²¹ Пыдо’ Галилея яхана ӈэда Вифсаида’ тер Филиппан’ то”, сита хынумба ма”: «Ервэй, маня” Иисусм’ манэ”ман’ харвава”». ²² Филиппхав Андреян’ хая, тикым’ нянда ваде”ӈада, тикы’ пуд Андрейха’ Филиппха’ тикы вади Иисусан’ ваде”яди’. ²³ Иисусхав нянди’ ма”нив’: «Ненэця’ Нюӈэ нюмдебада’ юнда ӈарк”ма’ ёльць’ то. ²⁴ Ненэся, ненэся нянда” мадм’, нянь’ ӈув’ сэв’ ян’ мантэ”махаданда ниб”нанда ха”, ялнда ӈопой ӈэӈгу. Хахаваб”нанда ӈока нянь’ ӈуво” сэв тэвраӈгу. ²⁵ Харта иламда сяндахав харта иламда ёта, тюку я’ тиркана харта иламда сэхэданахав малсяда иланд’ тэвванда ӈэсонд’ иламда лэтмбаӈгуда. ²⁶ Хибяхав Е”эмняни манзарана Пумнани тобта тара. Мэсь’ яханани Мань манзаранами ӈани’ мэӈгу. Хибя Мань е”эмняни манзара, тикым’ Нисями тю”у’ мэӈгуда».

Ненэця’ Ню тю”у’ илаванда

²⁷ «Сёнзяни мюй хэӈгосялма, Мань ха”мандадм’? Мань Нисяв, ёльцянда таль’ Си”ми ӈэдара”! Тарем’ ӈо”, тикы’ е”эмня тикы ёльцянд’ Мань тодамзь. ²⁸ Мань Нисяв, Нюмл ӈаркамда”!» Тадтикахад нув’ нярахад вабц со: «Ӈаркамдавась, ӈани’ ӈаркамдаӈгув». ²⁹ Тикахана нувы” ненэця” тарця вади намд”махадандо’ тарем’ ма”: «Тикы хэхэ’ мун”». Ханяӈэхэбидо’ тарем’ лахана”: «Нув’ юне ядэлана Нянда лаханась». ³⁰ Иисус тикы вадаха” тарем’ ма: «Тикы вабц Мань е”эмняни нись су”, пыдара” е”эмнянда” сось. ³¹ Тедахав’ тюку я’ тирм’ судева’ ёльць’. Теда’ я’ тир’ ерв хэвня’ питармы ӈэӈгу. ³² Мань’ яхад тю”у’ пее”раб”нани, ненэцие мал’ Няни хахаялтеӈгун». ³³ Тикы Вадида Иисус’ ханзер” хаванда нямна ӈаць. ³⁴ Ненэця” Нянда ма”: «Маня” Ватоход тарця вади намдава”: ‹Христос ӈоб’ иле›. Пыдар ханзер” Нум’ Нюӈэ нюмдебадам’ тю”у’ илавандаӈэ ваде”ӈар? Нум’ Нюӈэ нюмдебада хибя?» ³⁵ Тиканда Иисус няндо’ ма: «Яля’ нянанда” танява ӈули” тянё. Пэвдя сидда” талмадавоӈгад яля’ таняван’ ядэрӈада”. Тиканда пэвдяхана ядэртахав ханя’ ядвахаданда ехэра”нив’. ³⁶ Яля’ нянанда” таняван’ ялян’ пунрыда”, яля’ нюда” ӈада”». Тикы вадида хэт”махаданда Иисус хэвняку’ хая, тэри нядандо’ юху.

Иудей” нива пунра”ма

³⁷ Иисус’ сяӈокари ненадо серо няндо’ манэ”лабтаб” ӈод”, пыдо’ хуркавна ӈо” Нянда ни” пунрю”. ³⁸ Нум’ Вади вадета Исайя тарем’ мамы: «Нум’ Ервав, хибя маня” нядана” намдвэхэ” пунраса? Хибян’ Нум’ Ерв’ ӈуда ӈадимза?»+ 12:38* Исайя 53:1. Тюку мэ”мы вадида явнандо’ хэбто’ тара. ³⁹ Пыдо’ Иисусан’ пунра нидонзь пирас”, тад ӈо” Исайя ӈани’ тарем’ мась: ⁴⁰ «Нум’ ненэцие сэвсялмдевыда, сейдо’ пэӈэ сертавыда. Сэвханандо’ маниенадо’ яӈгу, сейханандо’ хамэдамбададо’ яӈгу. Сиддо’ Савумдавани е”эмня Няни ни” лаханаӈгу”»+ 12:40* Исайя 6:10. . ⁴¹ Тюку вадида Исайя Иисус’ юнм’ манэсо”махаданда Иисус’ нямна ваде”мыда. ⁴² Ерво” поӈгад ӈока ненэць’ Иисусан’ пунрабто’ ӈод”, фарисейха” сейто’ пинава’ нид, ма”люӈгалава мякад сиддо’ питармоӈгад, тид” нивы” лахан”. ⁴³ Тад ӈо” пыдо’ ненэця’ юнм’ Нум’ юнхад саць мэневэдо’.

Пудана яляхана Иисус судеӈгода

⁴⁴ Иисусхав ӈарковна вахалъй”: «Няни пунрёда Няни ни пунрю”, Си”ми Ӈэдаравэхэни пунры. ⁴⁵ Си”ми маниена Мань Си”ми Ӈэдаравэми мание. ⁴⁶ Хусувэй Няни пунрёда пэвдяхана хаёвоӈгад, Мань я’ тирт’ яляӈэ тодамзь. ⁴⁷ Мань вадини намдавы Вадини нибта ӈо” лэтмбю”, Мань нив судеӈгу”, Маньди я’ тирм’ судеванзь нидамзь ту”, я’ тирм’ ӈэдаванзь тодамзь. ⁴⁸ Си”ми волтамбадахав, Вадини сейханда ниня ня”марпадахав, харта сита судевндада таня: Мань тюку хэтвы вадами, пудана яляхана, сита судеӈгу. ⁴⁹ Тад ӈо”, тюку Вадини Хар”н нядни нин хэтыбю”, Си”ми ӈэдаравы Нисяхадани хэтыбадани. Пыда Няни ӈамгэм’ хэтвани нямна, ӈамгэм’ ваде”мани нямна табеком’ тась. ⁵⁰ Мань тенева, Пыда табекода – малсяда ил’. Тадхав ханзер” Нисями Няни лаханаса, Мань тарем’ нянда” лаханадм’».

Иисус’ тохоламбадита ӈэ халтамба”ма.

¹ Пасха хэбидя яля хахаялмась. Иисус тюку я’ тиркад Нисяханда хэванда ёльця’ товам’ тенева, я’ тиркана мэна Харта ненэциеда мэнейда, техэ’ малханда мэнейда. ² Пэвсюмняӈы ӈаворма’ ёльцьӈгана, ӈа Кариот’ тер Симон’ хасава нюн’ – Иудан’ Иисусм’ хусараванзь иӈудм’ мале ми”ӈа. ³ Иисусхав тенева, Нисяда Пыда ӈудахата хусувэй ӈамгэм’ мал’ ми”мыда. Нумгад Ӈэвахаданда, Нум’ ня’ Хэвахаданда ӈани’ тенева. ⁴ Пэвсюмняӈы ӈаворма’ ёльцьӈгана толь’ тяхад юркы”, тю”уй Паныда ека, тэцям’ ня”ма Ёнэнда тяха’ сярада. ⁵ Тадтикахад халтаӈго хыдям’ икана тердехэя Тохоламбадита ӈэ халтамба пя. Ӈэдо’ Ёнэнда тяхана ӈэвы тэцяӈгана тэ”яда. ⁶ Симон Пётарт’ Иисус хахая тэвва’ сер’, Пётр Нянда ма: «Нум’ Ервав, ханзер” Пыдар ӈэни халтамбаӈгуд?» ⁷ Иисус нянда ма: «Теда’ Мань сертабадини пыдар нид хамэдамбю”, пуна хамэдаӈгуд». ⁸ Пётр ӈани’ Нянда ма: «Ӈэни хуна сяхаӈгарт’ нид халтаӈгу”». Иисус нянда ма: «Ӈэд ниб”ни халта”, Нядни перенар ӈоб’ яӈгу». ⁹ Симон Пётр Нянда ма: «Нум’ Ервав, ӈэрини нён халта”, ӈудини, ӈэвами ӈани’ халтан». ¹⁰ Иисус нянда ма: «Халтавэхэв ӈэрида халта тара, пыхыдахавада ӈарханда хабто. Пыдара” ӈо” варцида”. Ӈопой, мал’ тарцяда” нида” ӈа”». ¹¹ Сита хусаравандамда тенева, ӈадьбята Иисус тарем’ мамы: «Мал’ нида” варцю”». ¹² Ӈэдо’ халта”махаданда Паныда сера, юсибтэй”, няндо’ ма: «Ӈамгэм’ нянда” Сертавами пыдара” хамэдара”? ¹³ Пыдара” Си”ми сидда” тохоламбадаӈэ, Нум’ Ерваӈэ нюмдебида”. Тикы вадида” ненэся”. Мань тарцядм’. ¹⁴ Тадхав Мань Нум’ Ерваӈэ, сидда” Тохоламбадаӈэ пыдара” ӈэда” халтэйнанё”, пыдара” ӈо” ӈани нита” ӈэ халтабта” тара. ¹⁵ Ханзер” ӈэвамда” Мань нянда” манэ”лабтавась. Мань нянанда” ханзер” ӈэсадм’, пыдара” ӈани’ тарем’ ӈада”. ¹⁶ Ненэся, ненэся нянда” мадм’, хаби ервахаданда ӈарка ни ӈа”, ӈэдаравы сита ӈэдаравэхэданда ӈарка ни ӈа”. ¹⁷ Тикым’ теневахая, тикы’ сер’ ӈэб”нанда”, ябда илеӈгуда”. ¹⁸ Хусувэнда” нямна Мань нидм’ лахан”. Мань хибям’ тэравахадани теневадм’. Хэбидя Падаркана тарем’ пады: ‹Няньми+ 13:18* Ханяӈы ӈудахана падвы падарка”на тарем’ пады: «Нянани няньм’». ӈаворта Няни енядамда ила›*+ 13:18* Нумд’ ӈэда сё 40:10. . Тикы вада” явнандо’ хэбто’ тара. ¹⁹ Тюку вади” хадкэва’ нерня теда’ нянда” мадм’, тикы сер’ хадкэва’ ёльцьӈгана пыдара” Мань Танявахани пунраӈгу”нида”ам’. ²⁰ Ненэся, ненэся нянда” мадм’, Мань ӈэдаравэми сейханда ня”мана Мань си”ми сейханда ня”ма. Мань си”ми сейханда ня”мана Си”ми Ӈэдаравэми сейханда ня”ма».

Иисус хибя Сита хусаравам’ ваде”ӈа

(Мт 26:20-25; Мк 14:17-21; Лк 22:21-23)

²¹ Тикы Вадида хэт”махаданда Иисус сёнзянда мюй нерцькабтире тидпой” ма: «Ненэся, ненэся нянда” мадм’, ӈобла” Си”ми хусараӈгу». ²² Тохоламбадида хибя’ нямна Лаханавамда нись хамэда”, индо’ хэбиле няхато’ сырӈа”. ²³ Иисус’ мэнена ӈоб” тохоламбадада Иисус’ лэмбаран’ тильтё ӈамды. ²⁴ Симон Пётр хурка мунзипой” Иисус’ хэвхана ӈамдёдан’ тарем’ мандараха: «Хибям’ Ваде”мамда хонрад». ²⁵ Пётр’ хонрамбада Иисус’ лэмбаран’ ӈани’ тильтей”, тадтикахад хонрада: «Нум’ Ервав! Пыдар вадетар хибя?». ²⁶ Иисус ма: «Хибян’ палабтавы няньни ютекм’ митав, тикы – ти мэна». Иисус нянянда ютекм’ палабтахая, Кариот’ тер Симон’ хасава нюн’ – Иудан’ ми”ӈада. ²⁷ Иуда’ нянь’ ютекм’ ня”ма”махаданда, сёнзянда мю’ Сатана пакалъй”. Тадтикахад Иисус нянда ма: «Сертавндар мер’ сертад». ²⁸ Тикахана мэвэхэт ӈобкартадо’ ӈамгэ тарем’ нянда Лаханавамда нида хамэда”. ²⁹ Есьто’ ларас пили” Иудахана ӈэсетвы. Ӈадьбято’ пыдо’ ибедо’ тарем’ ядэрӈа”: «Иисус Иудан’ хэбидя яля’ ед’ тарана ӈамгэм’ тэмдавнзь лахананакы, тикахавахад харвобта маӈгбадаха” ӈавори ми”манзь лахананакы». ³⁰ Иуда нянь’ ютекм’ ня”махая, таминда тарпы”. Мале пиӈэ хэвы.

Едэй табеко

³¹ Иуда’ тарп”махад, Иисус вахалъй”: «Тадхав Ненэця’ Нюӈэ нюмдебада юнда ӈарамда, Нум’ юн Нянанда ӈани’ ӈарамда. ³² Нум’ юн Нянанда ӈарамб”, тиканда Нум’ Сита Нянанда ӈаркта, тадри’ Сита ӈаркта. ³³ Ӈацекые”, нянанда” Мэвами ӈули” тянёмя. Иудейха” ваде”мы Вадавнани Си”ми иб” пюртада”, Мань минзь яхани тось нира” пират”. Тика Вадини ӈани’ теда’ нянда” хэтыбин. ³⁴ Нянда” едэй табеком’ тадм’: нида” мэнейда”. Мань ханзер” сидда” мэнесадм’, тарем’ нида” мэнейда”. ³⁵ Нида” мэнебата”, тикахана Мань тохоламбадини ӈэвамда” ненэця” мал’ тумдабаӈгудо’».

Пётр таялманзь мэ

(Мт 26:31-35; Мк 14:27-31; Лк 22:31-34)

³⁶ Симон Пётр Иисусан’ ма: «Нум’ Ервав, Пыдар ханя’ хандан?» Иисус нянда ма: «Мань минзь яхани пыдар тось теда’ нир пирас”. Вад’ Пумнани ханян ту”». ³⁷ Пётр Нянда ма: «Нум’ Ервав, ӈамгэ теда’ Пумнанд тось нив пирас”? Пыдар е”эмнянд илми митадм’». ³⁸ Иисус нянда ма: «Иламд Е”эмняни митан? Ненэся, ненэся нянд мадм’, харад’ хоркы’ тёревдавэй’ Нядни няхар” мэва’ таялтын!»

Иисус – минзь’, ненэся, ил’

¹ «Сейда” нёя няркан”, Нумд’ пунрыда”, Няни ӈани’ пунрыда”. ² Нисяни мякана таӈга мэсь я ӈока. Тарця нивы ӈэбта ӈа”, Мань нянда” тарем’ мандадамзь: ‹Мань мэсь ядамда” хамэдаванзь хаядм’. ³ Таня’ хэ”мяхадани, ядамда” хамэдаб”нани, нянда” ӈани’ тутадм’. Мэсь Яханани мэванда” е”эмня сидда” Няни ханаӈгудм’›. ⁴ Ханя’ Мимахадани теневада”, сехэрым’ вунира” ехэра”». ⁵ Фома Иисусан’ ма: «Нум’ Ервава”, ханя’ Мимахаданд маня” ехэрава”, тиканда маня” ханзер” сехэрым’ теневаӈгува”?» ⁶ Иисус нянда ма: «Мань сехэрэдм’, ненэсядм’, иландм’. Нисяхани хибяхарт тось нида пирас”, ӈопой, Мань Си”ни серли’ тось пиртада. ⁷ Си”ми теневавы ӈэб”нанда”, Нисями ӈани’ теневаӈгураць. Тад нерня’ Сита теневада”, Сита манэ”ӈадаць». ⁸ Филипп Нянда ма: «Нум’ Ервава”, Нисямд няна” манэ”лабтавар нянана” та’ мась ӈэӈгу». ⁹ Иисус нянда ма: «Филиппэ! Нянанда” понхав’ мэдамнё”, пыдар тамна Си”ми ехэран? Си”ми манэ”мы, Нисями манэ”ӈась. Ханзер” теда’ пыдар тарем’ лаханан: ‹Нисямд няна” манэ”лабтад›? ¹⁰ Нисяханани Мань мэвахани, Нисяни Нянани мэван’ нин пунрю”? Нянда” хэтыбада Вадини Хар”н нядни хэтыбадани ни ӈа”. Тикы” сер” – Нянани мэна Нисяни сертабада” сер”. ¹¹ Няни пунрыда”, Мань Нисяханани мэдм’, Нисями Нянани мэ. Тарцян’ ниб”нанда” ӈо” пунрю”, сертабада серо”ни сер’ пунрыда”. ¹² Ненэся, ненэся нянда” мадм’: Маньзяв Нисяхани миӈадм’. Ӈадьбята, Няни пунрёда Мань сертабада серони сертаӈгу, тамна тикахат ӈарка серо сертаӈгу. ¹³ Мань нюмми няд”мяць Нисяхадани ӈамгэ тикым’ хамбата”, Нисяни юн Нюнда сер’ ӈарма’ е”эмня Мань сертаӈгув. ¹⁴ Ӈамгэрим’ Нюмми няд”мяць хамбата”, Мань сертаӈгув».

Сёнзямда Таӈгумдамбада – Хэбидя Инд”

¹⁵ «Си”ми мэнебата”, Мань табеку”ни сер’ ӈэӈгуда”. ¹⁶ Мань’ Нисями хынумдаӈгув, тиканда Пыда ӈани несэй Сёнзям’ Таӈгумдамбадам’ нянда” тата. Пыда нянанда” ӈоб’ мэӈгу. ¹⁷ Пыда – ненэся’ Инд”. Я’ тир’ тер” нидо’ мание”, ехэрадо’, ӈадьбято’ пыдо’ Сита сейхандо’ ня”ма я”ма”. Пыдахавара” теневара”, Пыда нянанда” мэ, нянанда” мэӈгу. ¹⁸ Евакоӈэ Мань сидда” нидм’ хаеӈгу”, нянда” тутадм’. ¹⁹ Я’ тир’ тер” Си”ми маниева ӈавыды ни ӈа”, пыдахавара” Си”ми манэтада”. Маньди иледм’, пыдара” ӈани’ илеӈгуда”. ²⁰ Тикы яляхана Мань Нисяханани мэвами, пыдара” Нянани мэвамда”, Мань нянанда” мэвами хамэдаӈгура”. ²¹ Хибя Табекуни ня”махая Табэку”ни сер’ иле, тикы Си”ми мэне. Хибя Си”ми мэне, тикым’ Нисями мэнеӈгуда. Мань ӈани’ тикым’ мэнеӈгув, нянда Хар”н Пыхыдами манэ”лабтаӈгув». ²² Кариот’ тер ниня ӈэдаюм’ – Иуда Иисусан’ ма: «Нум’ Ервава”, Пыдар Харт Пыхыдамд няна” манэ”лабтаван’ харваранё”, ӈамгэ я’ тир’ терха” манэ”лабтаван’ нир харва”?» ²³ Иисус нянда ма: «Хибя Си”ми мэне, тикы Вадини нёракута. Нисями сита мэнеӈгу, тадтикахад Мани’ нянда тутани’, нянанда Илеӈгуни’. ²⁴ Си”ми ниня мэненахав Вадини нида нёракут”. Хахата” тэворта вадахав” Мань нядни ӈэда ни” ӈа”, Си”ми ӈэдаравы Нисяхадани ӈа”. ²⁵ Нянанда” Мэвахани тикы Вадини хэтыбин. ²⁶ Сёнзямда” Таӈгумдамбадахав – Хэбидя Инд”, Нисяни Мань нюмми няд”мяць ӈэдараванда. Сидда” хусувэй ӈамгэн’ тохолаӈгу, нянда” ваде”мы Вадини мал’ тензибте сидда” нядаӈгу. ²⁷ Таӈгабцом’ нянда” хаебидм’, Мань таӈгабцоми нянда” тамбидм’, я’ тир’ тер” тотрев’ тикым’ нянда” нив тамбю”. Сейда” нёя” няркан”, нёя” пин”. ²⁸ Пыдара” намдадаци”, Мань мадамзи”: ‹Мань няданда” хаядм’, тадтикахад нянда” ӈани’ тутадм’›. Си”ми мэневы ӈэбта”, Нисяхани Хэвахани маймбаӈгудаць. Ӈабцата Нисями Мань нядни ва”ӈа. ²⁹ Теда’ Вади”ни серӈэ хэвандо’ нерня, нянда” хэтын. Тиканда, тарем’ ӈэб”нанда, Няни пунраӈгуда”. ³⁰ Нянанда” Лаханавани ёльць’ тянёмя, я’ тир’ ерв мале сехэрэмда тальня’ нэкалӈада. Тарем’ ӈод” пыда Мань нянани ӈамгэхэртада яӈгу. ³¹ Я’ терхав” теневабато’ тара: Мань Нисями мэнев, ханзер” Мань Нисями Няни табекоса, Мань тарем’ ӈадм’. Юркыда”, тюкоход хэхэва”».

Иисус – ненэся виноград пя

¹ «Мань ненэся виноград пядм’, Нисяхавами виноград пи вадабада. ² Мань нядни переня, хусувэй ӈодясяда пя’ таркам’ Пыда маторпида. Ӈодям’ вадабадахав, тамна ӈока ӈодянда ӈэва’ е”эмня, хусувэй пя’ таркам’ нярумдамбида. ³ Пыдара” нянда” ваде”мы Вадаха”нани мале нярумдавэда”. ⁴ Нянани мэда”, Мань ӈо” нянанда” мэӈгудм’. Ӈодя’ пя’ таркада виноград пяхана ниб”нанда ӈа”, харта ӈодям’ ӈадимде нида пирас”. Нянани ниб”нанда” мы”, пыдара” ӈани’ тарцяда” ӈэӈгуда”. ⁵ Мань виноград пядм’, пыдахавара” пя’ таркада”. Хибя Нянани мэ, Мань тикахана мэдм’. Нянани мэнахав ӈока ӈодям’ тамби. Тад ӈо” пыдара” Маньсиципой” ӈамгэхэртм’ серта нида” пирас”. ⁶ Нянани ниня мэнахав, хэвня’ мовы пя’ таркадарев’, сэбэймда. Тарця пи” таркахаби ненэця” ма”лахая, тун’ моёпасетыдо’, тухуна параӈга”. ⁷ Пыдара” Мань нянани мэбта”, Вадини нянанда” ӈэбто’, тикахана ӈамгэн’ харвада”, тикым’ хаӈада”, тарцядамда” ня”маӈгуда”. ⁸ Ӈока ӈодям’ тэврана ӈэбта”, тадтикахад Мань тохоламбади”ни ӈэб”нанда”, тикахана Нисяни юнм’ ӈармдаӈгура”. ⁹ Ханзер” Нисями Мань Си”ми мэне, Мань тарем’ сидда” мэнедм’. Пыдара” Мань мэнебцохонани мэда”. ¹⁰ Нисяни табеку нёракуць Мэнебцохонанда мэдм’. Пыдара” ӈо” Мань табекони нёракуп”нанда”, Мань мэнебцохонани мэӈгуда”. ¹¹ Маймбабцоми нянанда” ӈэва’ е”эмня, сейда” маймбабцохона пан”ма’ е”эмня тюку Вадини хэтыбин. ¹² Мань табекоми тарця: Мань сидда” ханзер” мэнедм’, нида” тарем’ мэнейда”. ¹³ Ӈани нита е”эмня иламда митя’ мэнебцоход ӈарка мэнебцо яӈгу. ¹⁴ Мань нянда” табэдамбада Табекуни нёракуквабта”, сава Нини ӈэ”нида”ам’. ¹⁵ Сидда” Мань мале хабиӈэ нидм’ нюмдебю”. Тад ӈо” хабихав ерванда ӈамгэм’ пэрмахад ерме. Нисяхадани намдавы сямян ӈамгэм’ нянда” мале ваде”ян. Ӈадьбя”ни сидда” сава Нядни ваде”ӈадм’. ¹⁶ Пыдара” Си”ми нидаць тэра”, Мань сидда” тэрадамзь. Я’ тирмна хэсь ӈоди тамбаванда” е”эмня, ӈодита” ӈоб’ танява’ е”эмня сидда” ӈабтадамзь. Тиканда Нисяхадани Мань нюмми няд”мяць ӈамгэ-тикым’ хамбата”, Нисями нянда” тата. ¹⁷ Нянда” тарем’ табекудм’: нида” мэнейда”».

Я’ тир’ тер” Иисусан’ пунрёди ӈани’ питарпаӈгу”

¹⁸ «Я’ тир’ тер” сидда” сэхэдабто’, теневабата” сава, неранда” няд Мань Си”ми сэхэда пяць. ¹⁹ Пыдара” я’ тиркад ӈэвы ӈэбта”, я’ тиркав харта ӈамгэмда мэнеӈгудась. Пыдахавара” я’ тиркад нида” ӈа”. Мань я’ тир’ терхат сидда” тэрадамзь, ӈадьбято’ я’ тир’ тер” сидда” сэхэда”. ²⁰ Нянда” хэтвы Вадини тенейда”: ‹Хаби ервахаданда ӈарка ни ӈа”›. Ненэця” Мань си”ми питарпиць, пыдара” сидда” ӈани’ питарпаӈгу”. Пыдо’ Мань вадини нёраку”мы” ӈэбто’, тиканда пыдара” вадида” ӈани’ нёракутыдо’. ²¹ Пыдонди’, Мань нюмни е”эмня тикы ӈамгэ мал’ нянда” сертаӈгудо’, ӈабцакавандо’ пыдо’ Си”ми Ӈэдаравэми ехэра”. ²² Мань я’ тирт’ нивы ӈэб”ни ту”, няндо’ Вадини нивы ӈэб”ни вадес”, хэбяхадо’ нянандо’ яӈгудась, тедахав’ хэбяхамдо’ таялць нидо’ пирас”. ²³ Си”ми сэхэдана Нисями ӈани’ сэхэдада. ²⁴ Ӈобкарт ненэць’ нивы сертабавы серо поӈганандо’ нивы ӈэб”ни сертабю”, хэбяха нянандо’ яӈгудась. Тедахав’ харто’ сырмы ӈэбто’ ӈод”, Си”ми сэхэда”, Нисями сэхэда”. ²⁵ Ӈабцакавандо’ пыдо’ ватохонандо’ падвы тюку вада” – ‹Хуркаси”-хараси” Си”ми сэхэдалӈа”›+ 15:25* Нумд’ ӈэда сё 34:19, 68:5. мал’ ӈадимбато’ тара. ²⁶ Сёнзям’ Таӈгумдамбадам’ Нисяхадани нянда” ӈэдараӈгудм’. Пыда ненэся’ Инд”, Нисяхадани ӈэда Инд”. Пыда тоб”нанда, Мань нямнани явнанда лаханаӈгу. ²⁷ Сямян нюрте”эхэд Нянани мэдаци”, ӈадьбята” пыдара” ӈобтарем’ Мань нямнани явнанда лаханаӈгуда”».

¹ «Няни пунрёбцомда” ё”моӈгад тюку Вадини нянда” хэтыбин. ² Ненэця” сидда” ма”люӈгалава мякад питарта”. Тадтикахад тарця по миӈа, сидда” хадабада” сидда” хадабто’, Нум’ ед’ сертабадаӈэ тикы серодо’ пэртыдо’. ³ Нисями ехэравандо’ нид, Си”ми ехэравандо’ нид, пыдо’ тарця ӈэӈгу”ни”им’. ⁴ Тюку Вадини, ёльцяндо’ тэваб”, тензибтеванда” е”эмня хэтыбин. Тюку Вадини нерня нинась хэтыбю”, тарси” нянанда” нисядам’ мы”».

Хэбидя Индад’ манзая

⁵ «Тедахав’ Си”ми Ӈэдаравэхэни хандадм’. Хибяхартара” Си”ми ниню” хонрамбю”: ‹Ханя’ миӈан?› ⁶ Нянда” хэтвы Вадахатани ида” воманё”. ⁷ Мань ненэсям’ нянда” хэтыбидм’, Мань хэвами ханяцей’ нянанда” сава. Ниб”нани хань”, нянда” Сёнзям’ Таӈгумдамбада ни тут”, хэб”нани Мань нянда” ӈэдараӈгув. ⁸ Тоб”нанда, я’ тир’ тер” хэбяха’ нямна, ненэся’ нямна, Нум’ суд’ нямна вэнзер’ хамэдабцомдо’ тид” манэ”лабтаӈгуда. ⁹ Хэбяха’ нямна мамб”нанда, Няни нива пунрёвадо’ – хэбяха. ¹⁰ Ненэся’ нямна мамб”нанда, Нисяхани Мимами – ненэся, пыдара” Си”ми тад нерня’ нида” манэт”. ¹¹ Судеӈгова’ нямна мамб”нанда, тюку я’ тир’ ерв мале судевы. ¹² Иб” нянда” Хэтувндахавами тамна ӈока ӈэбта ӈод”, тедахав’ пыдара” нянанда” хамэдава’ техэ. ¹³ Ненэся’ Индад’ тоб”, сидда” хуркари ненэсян’ тидхалеӈгу. Тад ӈо” Пыда харта няданда ни лаханаӈгу”, намдорта вадири хэтыбаӈгу, нерняӈы хурка ӈэвам’ нянда” вадета. ¹⁴ Нядни вади ня”махая нянда” вадетыда, тиканда, тикы’ сер’ Юнами ӈармдаӈгуда. ¹⁵ Нисяни хусувэй ӈамгэ – Мань ӈамгэми. Ӈадьбя”ни тарем’ мадм’: ‹Инд” Нядни ханавндамда нянда” вадетада›».

Маяндормы” и’ вэва ӈэбцо” маймбабцоӈэ ханда”

¹⁶ «Тадри’ пыдара” Си”ми нида” манэт”, пон’ нись мы”, Си”ми яӈор’ манэтада”, [тад ӈо” Мань Нисяхани миӈадм’]+ 16:16* Ханяӈы ӈудахана падвы падарка”на пады. ». ¹⁷ Ӈадьбято’ ханяӈы Тохоламбадида нидо’ хонрамба пя”: «Пыда ӈавэда няна” ваде”ӈа? Тюку Вадида ханзер” хамэдаб” сава: ‹Тадри’ пыдара” Си”ми нида” манэт”, пон’ нись мы”, Си”ми яӈор’ манэтада”, тад ӈо” Мань Нисяхани миӈадм’›?» ¹⁸ Пыдо’ тарем’ лаханорӈа”: «Ӈамгэм’ тикахананда Пыда ваде”ӈа: ‹Тадри’›? Ӈамгэ Ваде”мамда нива” хамэдамбю”». ¹⁹ Иисусхав ӈамгэм’ Няданда хонраван’ харвавам’ хамэда, няндо’ ма: «Нида” нянда” хэтвы Вади”ни нямна хонрамбида”? Вадини тарцяцинё”: ‹Тадри’ пыдара” Си”ми нида” манэт”, пон’ нись мы”, Си”ми яӈор’ манэтада”›. ²⁰ Ненэся, ненэся нянда” мадм’, пыдара” яртада”, ярм’ ӈасилпаӈгуда”, я’ тир’ терхав” маймбаӈгу”. Ибеда” вэва ӈэӈгу”, ибета” вэва ӈэбцо маймбабцоӈэ ханда. ²¹ Ӈацекым’ хомба ёльцянда тось, не маяндорӈа. Ӈацекэмда хо”махавахаданда майванда нид, неры маяндор”мида юрыбида, тад ӈо” я’ тир’ ни’ ненэць’ соя”нив’. ²² Пыдара” ӈо” теда’ ибеда” вэва”, хуркавна ӈо” Мань сидда” ӈани’ манэтадм’, сейда” майӈгуд”. Маябцомда” хибяхарт няданда” нида март”. ²³ Тикы яляхана Си”ми ӈамгэхэрт’ нямна нида” хонрамбаӈгу”. Ненэся, ненэся нянда” мадм’, ӈамгэри-тикым’ Нисяхадани Мань нюмми няд”мяць хамбата”, Нисями нянда” тикым’ тата. ²⁴ Нерцюбта’ Мань нюмми няд”мяць ӈамгэхэртм’ нидаць хай”. Хаӈада”, ня”маӈгуда”, маймбабцора” ӈарка ӈэӈгу».

Христос я’ тирм’ пирда”левы

²⁵ «Нянда” вади” хари мэць лаханасетыдм’, тедахав’ тарця по то, нянда” вади” хари мэць нидм’ лаханаӈгу”. Тидпой” нянда” Нисяни нямна лаханаӈгудм’. ²⁶ Тикы яля’ пыдара” Мань нюмми няд”мяць ханаӈгуда”. Мань нянда” тарем’ нидм’ ман”: ‹Мань пыдара” е”эмнянда” Нисяхадани ханаӈгудм’›. ²⁷ Си”ми мэневанда” е”эмня, Нумгад Ӈэвахани пунрёванда” е”эмня Нисями сидда” мэне. ²⁸ Мань Нисяхадани я’ тирт’ тодамзь. Тедахав’ я’ тирм’ хае, Нисяхани хандадм’». ²⁹ Тохоламбадида ма”: «Ти, тедахав’ тидпой” лаханан, хара явна нин лахан”. ³⁰ Тедахав’ маня” теневава”, Пыдар хусувэй ӈамгэм’ теневан, Сит хонрана ненэць’ Нянанд ни тара”. Ӈадьбя”на” Пыдар Нумгад Товахаданд пунрыва”». ³¹ Иисус няндо’ ма: «Тедахав’ пунрыда”? ³² Ти, ёльцянда миӈа, ӈабцакаванда тодо’ яха” хэвара” хусувэнда” харта яханда хэва’ ёльць’ мале то. Мань Си”ми ӈопойӈэ хаеӈгуда”. Хуркавна ӈод” Мань ӈопойдм’ нидм’ ӈа”, Нисями Нянани мэ. ³³ Нядни таӈгабцом’ хованда” е”эмня тюку Вадини нянда” хэтыбин. Тюку я’ тиркана сидда” мая” ӈате”, хуркавна ӈо” пыхыдада” мэйрамбида”! Маньди я’ тирм’ пирда”левась».

Иисус’ туё”ма

¹ Тикы Вадида хэт”махаданда Иисус нув’ няю’ саӈомда ӈэдара, вахалъй”: «Нисёв”, ёльцянда то”ма. Хасава Нюнд юнм’ ӈармдад, Хасава Нюр ӈод” Юнамд ӈармдаӈгу”нив’. ² Тад ӈо” ӈэсь ӈо”, Пыдар хусувэй хибям’ Ӈудахата ми”йдаси”, Нянда ми”мэхэта Пыда малсяда илам’ мит”нив’. ³ Малсяда илӈгав, тикахав Пыдар Сит – ялнда ӈопой ненэся Нувм’ теневава, тадтикахад Пыдар ӈэдаравэмд – Иисус Христосм’ теневава нив’ ӈа”. ⁴ Няни табэдавы Манзаямд Ёльцевани сер’ Мань я’ ниня Пыдар Юнамд ӈармдав. ⁵ Нисёв”, тедахав’, невхы я’ мидеро”ма’ нерцюна Пыдар Сит ня’ мэ”мы Юнханани’ Сякананд Юнами ӈармда”ма.

⁶ Пыдар я’ тиркад Няни тавы ненэцяӈг” Нюмд хурка ӈэвам’ ӈадимдев. Тикы ненэця” Пыдар ненэциедась, тедахав’ Мань Няни тайд. Пыдо’ Пыдар ваданд сер’ ӈа”. ⁷ Тедахав’, Пыдар Няни тавы хусувэй ӈамгэ’ Няданд ӈэвахад пыдо’ тенева”. ⁸ Няни тавы Вадид няндо’ хэтын, пыдо’ тикы вади сёнзяндо’ мю’ пэмбидо’. Мань Няданд товами ненэсявна хамэдадо’. Пыдар Си”ми ӈэдараваханд пунрэяд”. ⁹ Мань пыдо’ е”эмняндо’ хынумдадм’. Я’ тир’ е”эмня нидм’ хынумд”. Ӈопой, Пыдар Няни тавырит е”эмня хынумдадм’, тад ӈо” ӈэсь ӈо” пыдо’ Пыдар ӈавэд. ¹⁰ Хусувэй Мань ӈамгэми – Пыдар ӈамгэр, Пыдар ӈамгэр – Мань ӈамгэми. Тадтикахад Мань юнами сидто’ сер’ ӈарма. ¹¹ Маньзяв мале я’ тиркана вунидм’ мы”, пыдъедо’ я’ тиркана ни”им’ мы”. Ӈари” Маньзяв Нянд мий”нидам’. Нисёв”, Пыдар Хэбидян! Няни тавыд Пыдар нюмд няд”мяць лэтамбан”. Мани’ сидни’ тотрев’ пыдо’ ӈобнзер’ ӈэя”. ¹² Нянандо’ Мэвани мальӈгана, Пыдар Няни тавы Нюмд няд”мяць сиддо’ ерамбидамзь, Мань лэтрэйн. Хэбидя Падар’ вада’ мал’ ӈадима’ е”эмня ханяӈэхэртадо’ ни яӈгув”, ӈопой, хавндаӈэ таславыридо’ яӈгума”. ¹³ Тедахав’ Мань Нянд миӈадм’. Я’ тиркана тедари’ Мэвахани тюку вадетини ваде”ян, тикандо’ пыдо’ техэ малханда Маймбабцоми манэтадо’. ¹⁴ Пыдар Вадамд Мань няндо’ тэврав, я’ тир’ тер” сиддо’ сэхэда пя”. Пыдо’ ӈо” Мань Си”ни тотрев’ я’ тиркад вуни” ӈа”. ¹⁵ Сиддо’ я’ тиркад Ханаванд е”эмня нидм’ хынумд”, сямян вэвакоход сиддо’ Лэтрамбаванд е”эмня хынумдадм’. ¹⁶ Пыдо’ ӈод” Мань Си”ни тотрев’ я’ тиркад вуни” ӈа”. ¹⁷ Ненэсяхана нярумдан”. Ненэсяхав Пыдар вадар ӈэ”нив’. ¹⁸ Пыдар ханзер” Си”ми я’ тирт’ ӈэдарасан, Мань ӈо” тарем’ сиддо’ я’ тирт’ ӈэдарадм’. ¹⁹ Пыдо’ е”эмняндо’ Хар”н Пыхыдами нярумдадм’, тиканда пыдо’ ӈани’ ненэсяхана нярумы” ӈэӈгу”. ²⁰ Пыдридо’ е”эмняндо’ нидм’ хынумд”. Вадито’ сер’ Няни пунрёди” е”эмня ӈани’ хынумдадм’. ²¹ Нисёв”, ханзер” Пыдар Нянани мэн, Мань ӈо” тарем’ Нянанд мэдм’, пыдо’ ӈо” ӈобнзер’ ӈэя”. Пыдо’ ӈо” ӈобтарем’ Мани’ нянани’ мэя”, тиканда я’ тир’ тер” Си”ми Пыдар няндо’ ӈэдара”ман’ пунраӈгуд”. ²² Пыдар Няни тавы юнм’ Мань няндо’ ми”ӈавась, тикандо’ Мани’ Сидни’ тотрев’ пыдо’ ӈобнзер’ ӈэӈгу”ни”им’. ²³ Мань нянандо’ мэдм’, Пыдар Нянани мэн. Тиканда пыдо’ ӈули” ӈобнзер’ ӈэӈгу”, я’ тир’ терхав” Пыдар Си”ми ӈэдаравамд хамэдаӈгудо’, ханзер” сиддо’ Мань Си”ни тотрев’ Мэневамд хамэдаӈгудо’. ²⁴ Нисёв”, Мань харвабцоми тарця: Няни тавыд Мань мэсь яханани мэб”нандо’ саванё”. Си”ми я’ мидеро”ма’ нерня мэнелӈанаси”, тиканда Нянани мэбто’, Пыдар Няни тавы Юнами манэт”ни”им’. ²⁵ Нисёв”, Пыдар Ненэсян! Я’ тир’ тер” Сит тамна ехэраб” ӈо”, Маньзяв Сит теневадм’, пыдо’ ӈо” Пыдар Си”ми ӈэдара”махаданд ӈани’ тенева”. ²⁶ Мань няндо’ Нюмд хурка ӈэвам’ ӈадимдевась, тамна тяха’ ӈадимдеӈгув. Хурка мэнебцохона Си”ми Мэневар нянандо’ ӈэӈгу, Мань ӈани’ нянандо’ мэӈгудм’».

Иисусм’ ня”ма”

(Мт 26:47-56; Мк 14:43-50; Лк 22:47-53)

¹ Вадида хэт”махаданда, Иисус тохоламбадида няць Кедронм’ нюбета тэл’ тяха’ хая. Таняна ӈоди” пи” вадюлава танявы, Пыда тохоламбадита ня’ таня’ пакалъяд”. ² Тикы яхана Иисус тохоламбадита ня’ ӈоб’ ма”люрцеты”, ӈадьбята ӈо” Сита хусаравы Иуда тикы ям’ ӈани’ теневадась. ³ Иуда, саю” мандалм’, ӈарка ханондани”, фарисей” манзарани няць тикы ян’ то. Пыдо’ серекабт, ту’ лэё, мирв ня”амба то”. ⁴ Иисусхав, хусувэй ӈамгэ Нямнанда хадкэвахад тенева тарпы”, няндо’ ма: «Хибям’ пюрӈада”?» ⁵ Пыдо’ Нянда ма”: «Назарет’ тер Иисусм’ пюрӈава”». Иисус няндо’ ма: «Мань Тидм’». Лаханани” поӈгана Сита хусаравы Иуда ӈобтарем’ ну. ⁶ Иисус няндо’ мано”махад: «Мань Тидм’», пыдо’ пуня’ мэдо’, пулыто’ ни’ ха”мыд”. ⁷ Иисус ӈани’ хонрэйда: «Хибям’ пюрӈада”?» Пыдо’ ма”: «Назарет’ тер Иисусм’ пюрӈава”». ⁸ Иисус няндо’ ма: «Мань нянда” мадамзи”: ‹Мань Тидм’›. Си”ми пюркавабта”, нини таня хэя”». ⁹ Хэтвы Вадита ӈадима’ е”эмня Пыда тарем’ мась. Вадада тарцясь: «Няни тавэхэтат ӈобкартамдо’ нидамзь ёс”». ¹⁰ Симон Пётркав’ палыда танявы. Палымда нэкалкая ӈарка ханондана’ хабим’ лада, тика вэняӈы хамда сапа. Тикы хаби нюмда Малх ӈэвы. ¹¹ Иисус Пётарт’ ма: «Палыр сеӈганда паклед, Нисяни тавы хыдяхад ӈэрмандами ӈэрпа”ни вэвав’?»

Иисус’ ӈарка ханондана’ сякана ну”ма

(Мт 26:57-58; Мк 14:53-54; Лк 22:54)

¹² Тадтикахад саю” мандал”, ёнар” саю’ ерв, иудей” манзарана” Иисусм’ ня”мадо’, сярадо’. ¹³ Нюрте”э’ Сита Аннан’ хана”. Тикы ненэць’ Каиафа’ пухуця’ нися ӈэвы. Каиафахав тикы по’ ӈарка ханонданаӈэ таравы. ¹⁴ Каиафа иудейха” тарця и’ ӈудм’ хэтвы: «Ӈока ненэцие” екававна, ӈопой ненэць’ хабта сава».

Пётр’ Иисусхад таяло”ма

(Мт 26:69-70; Мк 14:66-68; Лк 22:55-57)

¹⁵ Иисус’ пумна Симон Пётр ялъй”, тадтикахад ӈани ӈопой тохоламбадада ӈани’ Пумнанда хая. Тикы Иисус’ тохоламбадахавм’ ӈарка ханондана теневавэда. Пыда Иисус’ сер’ ӈарка ханондана’ маряд’ мю’ тю. ¹⁶ Пётркав нё’ пи’ няна нусь хаи. Тикы’ пуд ӈарка ханонданам’ теневана Иисус’ тохоламбада тарпы”. Нё’ сим’ лэтмбада не хабихина лаханакуро”махаданда Пётарм’ тюледа. ¹⁷ Нё’ сим’ лэтмбада не хаби Пётарт’ вахалъй”: «Такы Ненэця’ ӈоб” тохоламбадада нин ӈа”?» Пётр тарем’ ма: «Нидм’ ӈа”». ¹⁸ Тецьванда нид манзарана”, хаби” тум’ пятавы”, ту’ хэвхана нусь пыхыдадо’ юдаби”. Пётр ӈани’ хэвханандо’ нусь пыхыдамда юдабида.

Ӈарка ханондана’ Иисусм’ хонрамба”ма

(Мт 26:59-66; Мк 14:55-64; Лк 22:66-71)

¹⁹ Ӈарка ханонданахав Иисусм’ Тохоламбадита нямна, тадтикахад ӈамгэ’ нямна сиддо’ Тохоламбавамда хонрамби. ²⁰ Иисус нянда тарем’ ма: «Мань тидпой” я’ тир’ терк” лаханадамзь. Иудей” ӈобт’ ма”люрма’ яха”на – ма”люӈгалава мяд’ мюня, Хэбидя Хардахана ӈоб’ тохоламбасетын. Талехэва няндо’ ӈамгэхэртм’ нидм’ вадецету”. ²¹ Ӈамгэ Си”ми хонрамбин? Ӈамгэм’ Вадесо”мами намдормэхэт хонрад. Ӈамгэм’ Вадесо”махадани пыдо’ тенева”». ²² Тикы Вадида хэт”махаданда, хахая Хэвхананда нувы ӈопой манзаранадо’ Иисусм’ Падухунда питарӈада, тадтикахад тарем’ ма: «Ӈамгэ тарем’ ӈарка ханонданан’ лаханан?» ²³ Иисус нянда ма: «Вэнзер’ лаханавы ӈэб”нани, вэнзер’ Лахана”мами хэтдава. Сававна лаханавы ӈэб”нани, ӈамгэ’ е”эмня Си”ми ладыбин?» ²⁴ Анна сяро”мы Иисусм’ Каиафам’ нюбета ӈарка ханонданан’ ӈэдарада.

Пётр’ Иисусхад яӈор’ таяло”ма

(Мт 26:71-75; Мк 14:69-72; Лк 22:58-62)

²⁵ Симон Пётркав тамна ту’ хэвхана нусь, пыхыдамда юдаби. Ненэця” сита хонра”: «Пыдар ӈоб” Пыда тохоламбадада нин ӈа”?» Пётр пыхыдамда пуня’ таялпа вахалъй”: «Нидм’ ӈа”». ²⁶ Ӈарка ханондана’ ӈоб” хабида Пётарт’ ма: «Ӈоди” пи” вадюлава яхана Иисус’ хэвхана мань сит нисядм’ манэс”?» Тикы лаханана хаби’ ня’ хам’ Пётр палыхына сападась. ²⁷ Пётркав ӈани’ таялы. Таминда ӈо”, тикы’ пуд харад’ хоркы тёрей”.

Иисус’ Пилат’ сякана ну”ма

(Мт 26:1-2, 11-14; Мк 15:1-5; Лк 23:1-5)

²⁸ Иудей” Каиафахад Иисусм’ Рим’ ерв’ ервода марят’ ханадо’. Хубтыхы ӈэвы. Пыхыдадо’ сяблавоӈгад, Пасха хэбидя яля’ ӈаварм’ ӈамандо’ е”эмня пыдо’ маряд’ мю’ ни” тю”. ²⁹ Пилат няндо’ тарпы”, тарем’ хонарку: «Тюку ненэцям’ ӈамгэ’ е”эмня вомдартамбира”?» ³⁰ Пыдо’ нянда ма”: «Вэвако ненэць’ нивы ӈэбта ӈа”, нянд вунзява” тэвраӈгу”». ³¹ Пилат няндо’ ма: «Нянанда” ханара”, харта” серота” сер’ судера”». Иудей” вахалъяд”: «Маня” нянана” хибяхартм’ хада ни серос”». ³² Иисус ханзер” хавамда вадеца, хэтвы Вадита сер’ ӈэванда е”эмня, пыдо’ ӈадьбято’ тарем’ маць. ³³ Тикы’ пуд Пилат марьта мю’ ӈани’ тю, Иисусм’ нянда хаӈада, хонрада: «Пыдар иудей” параӈодан?» ³⁴ Иисус нянда ма: «Тикы вадид харт няданд хэтыбадид ни” ӈа”? Ӈули”, ӈани” хибяри” Мань нямнани нянд лаханавэкы”?» ³⁵ Пилат тикы вадахата тарем’ вахалъй”: «Мань иудейдм’? Пыдар янд тер” ӈарка ханондани няць няни Сит таць. Ӈамгэм’ хадкэпясан?» ³⁶ Иисус ма: «Мань Параӈодадавами тюку я’ тиркад ни ӈа”. Тюку я’ тиркад ӈэвы ӈэбта, Манзаранини Мань си”ми иудей” ервха” ми”моӈгадандо’ нися”ам’ пёдаӈгу”. Тедари’ Мань Параӈодадавами тюкоход ни пере”». ³⁷ Пилат Нянда ма: «Пыдар параӈоданава!» Иисус ма: «Пыдар тарем’ мананё”, Мань параӈодадм’. Маньзяв ненэсям’ ӈадимдеванзь соядамзь, я’ тирт’ тодамзь. Ненэсяхад ӈэда хусувэй хибя Мань вабцами намдорӈа». ³⁸ Пилат Нянда ма: «Ненэся, тикы ӈамгэ?»

Иисусм’ хаванзь ми”ма

(Мт 27:15-31; Мк 15:6-20; Лк 23:13-25)

Тикы вадида хэт”махаданда иудейха” ӈани’ тарпаванда сер’ вахалъй”: «Маньзяв тюку Ненэцяӈгана ӈамгэхэрт вэвам’ нидм’ манэс”. ³⁹ Пасха хэбидя яляхана пыдара” нянда” мань ӈоб” ненэцям’ сярвахад ӈэдарамбасетыдамнё”. Тарем’ харвабата”, иудей” параӈодам’ нянда” ӈэдараӈгув?» ⁴⁰ Тиканда ненэця” ӈани’ тёреяд”: «Пыда нёя ӈа”, Вараввам’ ӈэда”». Вараввахав вэвако мандалёди” ненэцие” поӈгад ӈобто’ ӈэвы.

¹ Тикахавахад Пилат Иисусм’ ханада, садаванзь табэдада. ² Саю” ӈэтторта пя’ таркахад ӈэва’ ниня мэта сюртяв ӈамгэм’ паӈгалӈа”, тикым’ Ӈэванда ни’ серибтедо’, нярморте”э ембдярм’ Ниндя серибте”. ³ Тадтикахад Някунда хэхэя тарем’ лаханорӈа”: «Иудей” параӈода, ӈари” тяха’ мэд!» Тикы” ямбха”на Сяканда ладорпидо’. ⁴ Пилат ӈани’ тарп”махаданда ненэцяӈг” ма: «Теда’ мань нянда” тарпраӈгув. Теневаванда” няюмна Нямнанда мань вэвам’ нидм’ хомбю”». ⁵ Тикы’ пуд, Иисус ӈэтторта пя’ таркахад сюртявӈэ паӈгалмы ӈамгэм’ Ӈэванда ниня мэць, нярморте”э паным’ мэць, тарпы”. Пилат ненэцяӈг” ма: «Ти, Тикы Ненэць’». ⁶ Ӈарка ханондана”, манзаранидо’ Иисусм’ манэ”мандо’ сер’ тарем’ тюрыць пэяд”: «Лярць’ пян’ тебарт! Лярць’ пян’ тебарт!» Пилат няндо’ ма: «Ханара”, харта” лярць’ пян’ тебарӈара”. Ӈари” маньзяван Вэвамда нидм’ ху”». ⁷ Иудей” Пилатан’ тарем’ ма”: «Маня” ватова” таня. Тикы ватохонана” Пыда хабта тара. Тад ӈо” Пыда Харта Пыхыдамда Нум’ Нюӈэ сертабида». ⁸ Пилат тарця вади намдванда сер’ тамна ханяцей’ сейда хая. ⁹ Пилат марьта мю’ ӈани’ тю, Иисусм’ хонра: «Ханяд ӈан?» Тикы вадахата Иисус ӈамгэхэртм’ ни хэт”. ¹⁰ Пилат Нянда ма: «Мань няни ӈамгэ нин лахан”? Пыдар ехэранакэн, ӈабцакаванда Сит лярць’ пян’ тебарць ватоми таня, тадтикахад Сит ӈэдара ӈани’ ватоми таня». ¹¹ Иисус тикы вадахата тарем’ ма: «Тю”уд тарця ватом’ нивы ӈэб”нанд ня”ам”, Мань нянани ватор таросяӈгусь. Ӈадьбята ӈарка хэбяхахав Си”ми нянд ми”мэхэна ӈа». ¹² Тикы Иисус’ вади” пуд, Пилат Иисусм’ ӈэдаван’ харбилада. Тарем’ ӈэбта ӈод”, иудей” нянда тарем’ тюрылыд”: «Ӈэдараб”нанд пыдар Рим’ параӈода’+ 19:12* Тид” кесарьӈэ пады. Рим’ параӈодам’ кесарьӈэ нюмдебидо’. сава нян нин ӈэӈгу”. Хусувэй хибя пыхыдамда параӈодаӈэ сертабада, Рим’ параӈода’ тяха’ няю’ нятна». ¹³ Пилат, тарця вади намд”махаданда, Иисусм’ пин’ тарпрада, харта судеӈголава ян’ ӈамды”. Тикы я нюмда «Пэ Сехэры» ӈэвы, еврей’ вадавна «Габбадам’» нюбе”мы. ¹⁴ Тикы яля Пасха’ нерцюна хамекова яля ӈэвы. Яля’ ер” ӈэвы. Пилат иудейха” тарем’ ма: «Параӈодара” ти». ¹⁵ Ненэцяӈгав” тарем’ тюрыӈа”: «Ханад, ханад, лярць’ пян’ тебарт!» Пилат няндо’ хонарку: «Параӈодамда” лярць’ пян’ тебартав?» Ӈарка ханондана” ма”: «Рим’ параӈода’ хавна маня” ӈани несэй параӈодава” яӈгу». ¹⁶ Тадтикахад Пилат Иисусм’ лярць’ пян’ тебарманзь саюху” ми”ӈада.

Иисусм’ лярць’ пян’ тебаро”ма

(Мт 27:32-44; Мк 15:21-32; Лк 23:26-43)

Саю” Иисусм’ ня”махая, ханадо’. ¹⁷ Иисус Харта лярць’ пям’ мине, «Ӈэвэйця’ Лым’» нюбета ян’ хая. Тикы я еврей’ вадавна «Голгофам’» нюбе”ӈа. ¹⁸ Тикы яхана Сита лярць’ пян’ тебарӈа”, Нянанда тамна сидя ненэцям’ тодо’ Хэвувнанда тебарӈа”. Иисусхавм’ еркы лярць’ пян’ тебарӈадо’. ¹⁹ Пилат Иисус’ нямна ӈэда вади пада, тадтикахад лярць’ пян’ падвэмда ӈыдада. Вада” тарця ӈэвы”: «Назарет’ тер Иисус – Иудей” Параӈода». ²⁰ Иисус’ ӈыдёсь’ я маркад ӈаха”на нивы ӈа”, тиканда, ӈока иудей” тикы вади толабавыдо’. Тикы еврей’ вадавна падвы, Рим’ тер’ вадавна падвы, грек’ вадавна падвы. ²¹ Иудей” ӈарка ханондана” Пилатан’ тарем’ ма”: «Иудей” параӈодаӈэ нёр падыбю”. Пыда Харта пыхыдамда иудей” параӈодаӈэ нюмдебавамда пад”». ²² Пилат няндо’ ма: «Мале ханзер” падав, тарем’ ӈэӈгу”нив’». ²³ Саю” Иисусм’ лярць’ пян’ тебаро”махадандо’ Ембдярода ханэйдо’, тет ян’ помнандо’ тяръядо’, хусувэдо’ ембдяро” пелям’ хана. Пыдо’ мюй Имбытата ӈани’ ханадо’. Тикы имбыткав сэдонзяда, тю”уд паӈгалмы ямб ӈэвы. ²⁴ Помнадо’ тарем’ лахана”: «Тюку ӈамгэрихивм’ нёхова” ӈадас”, ханяӈэ”на” ӈамгэӈэ ха”мава’ е”эмня матокава”». Хэбидя Падаркана падада вада” тюковна ӈадимя”: «Ембдярони помнандо’ тяръядо’, Имбытани е”эмня помнандо’ матота”»+ 19:24* Нумд’ ӈэда сё 21:19. . Саю” тикы вади” сер’ ӈа”. ²⁵ Иисус’ ӈыдёсь’ лярць’ пя’ хэвхана Небяда, Небянда неня, Клопа’ пухуця – Мария, Магдала’ тер Мария нувы”. ²⁶ Иисус’ саӈон’ Небяда ха”мы”, хэвхананда нуна мэнена Тохоламбадамда ӈани’ манэ”манда сер’ Небяханда вахалъй”: «Неӈэй, пыдар хасава нюр тикы, ти». ²⁷ Тикы’ пуд, Тохоламбадаханда ма: «Небяр ти мэна». Тикыринда ӈо” Тохоламбадада Иисус’ небям’ нянанда ханада.

Иисус’ лярць’ пя’ ниня яӈгуво”ма

²⁸ Сер” серото’ сер’ хая”, Иисус тикахад тенева, тамна тяха’ Хэбидя Падаркана падада вади” тикавна ӈэвам’ тарця вадаха”на ёльцеда: «Ит’ харвадм’»+ 19:28* Нумд’ ӈэда сё 68:22. . ²⁹ Уксусхана+ 19:29* Тикы мирцяда уксусӈэ хэвы няръяна ябе и” ӈэвы. панта хыдя тикахана нувы. Губкам’ уксусхана санибтедо’, иссопам’ нюбета пякоця’ таркан’ сярахая+ 19:29* Мк 15:36. , Иисус’ ня’ варан’ тебребтедо’. ³⁰ Уксусм’ Ӈаманда сер’ вахалъй”: «Явнанда хая». Тикы’ пуд Ӈэвада таси’ ха”мы”, индцялма. ³¹ Тикы яля – Хамекова яля+ 19:31* Тикы еврей” си”ив яля’ толырка”на матдомдэй яля, луца’ си”ив яля’ толырка”на самлянзимдей яля. ӈэвы. Тиканда иудей” ервота” еврей” ныланава яляхана вэ’ хэвы” лярць’ пя’ ниня ӈыдё волтамбавыдо’. Тад ӈо” тикы еврей” ныланава яля ӈарка хэбидя яля ӈэвы. Ӈэдо’ малява’ е”эмня, тадтикахад лярць’ пяхад сиддо’ ха”аврава’ е”эмня Пилатм’ хонра”. ³² Саю” то”, нюрте”э’ Иисус’ хэвхана ӈыдёда ӈоб” ненэця’ ӈэ маля”, тикы’ пуд нябиюм’ ӈэ ӈани’ малядо’. ³³ Иисус’ хэван’ тэвыд”, тарем’ сырпато’ Пыда яӈгумы, тиканда Ӈэда нидо’ маль”. ³⁴ Ӈоб” саю наряхана Хэвдыда си”йда. Хэвдэхэтата вэя хамдумава, и” хамдумава. ³⁵ Тикы серо тикахана сырмы ненэць’ ненэсявна ваде”ядась. Пыда тенева, манэ”мыда, ваде”мы вадида ненэся”, пыдара” пунраванда” е”эмня ӈо” ваде”мы” ӈэ”ни”им’. ³⁶ Хэбидя Падаркана тарем’ пады: «Ӈобкарт Лэхэртада ни мардод”»+ 19:36* Египетхад хэ”мя 12:36; Толыр” 9:12; Нумд’ ӈэда сё 33:21. . Тикы вада” явнандо’ хая”. ³⁷ Хэбидя Падаркана ӈэда ӈани” вада” тарця”: «Пыдо’ Сидермэхэндо’ сырта”»+ 19:37* Захария 12:10. .

Иисусм’ сюро”ма

(Мт 27:57-61; Мк 15:42-47; Лк 23:50-56)

³⁸ Тикы” серо” пуд, Аримафея’ тер – Иосиф Иисус’ пыхыдм’ ханава’ нямна Пилатм’ хонра. Иосиф Иисус’ тохоламбада ӈэбта ӈо”, иудейха” сейнда пинава’ нид тале Иисусхана тохолковы. Пилат пуня’ ни ӈа”. Иосиф хая, Иисус’ пыхыдм’ ханада. ³⁹ Никодим ӈобтарем’ ё”йда смирнам’, алоэм’ ӈобт’ тахара”ми няхар” юд’ мян’ килограмам’ сода то. Сяхаӈгав’ Никодим Иисусан’ пи’ турмы. ⁴⁰ Иисус’ пыхыдм’ ханади’. Пыди’ иудей” сюрва’ мэсы”мана Пыхыдамда ё”йда тахара”махана подадавы тохоцяха”на юйдади’. ⁴¹ Иисус’ ӈыдёсь’ яхана ӈоди” пи” вадюлава я танявы. Ӈоди” пи” вадюлава яхана едэйвана сертавы пэ хой’ хоркадё’ пэмб” танявы. Тикы яхана хибяхарт нивы сюру”. ⁴² Тикы яля иудей” ныланава яля’ хамекова яля ӈэвы, тикы пэ хой’ хоркадё’ пэмб” хахая ӈэвы. Ӈадьбяти’ Иисус’ пыхыдм’ тикан’ мэди’.

Яӈор’ илел”мы Иисус

(Мт 28:1-10; Мк 16:1-8; Лк 24:1-12)

¹ Еврей” си”ив яля’ толырка”на нюртей яля+ 20:1* Луци” си”ив яля’ толырка”на сибимдей яля – воскресенье. ӈэвы. Мария ӈули” хубтакохона тамна тид ӈэсь, пэмбад’ ӈэсь’ ян’ хая. Тарем’ сырпата, пэмбад’ ӈэсь’ я’ сихид ӈарка”я пэ хэвня’ мэвы ӈэвы. ² Тикыринда ӈо”, Симон Пётарк’, Иисус’ мэнена тохоламбадаха’ няю’ сюрмба хая, нянди’ вахалъй”: «Нум’ Ервава” пэмбад’ ӈэсь’ яхад ханавэдо’, ханя’ мэвахандо’ маня” ехэрава”». ³ Тикы вадита пуд, Пётр, няби Тохоламбадада пэмбад’ ӈэсь’ ян’ хаяха’. ⁴ Пыди’ ӈобкана сюрбыхы’, нябиюм’ Тохоламбадахав Пётркад мерець сюрмби, пыда нянда нерня’ пэмбад’ ӈэсь’ ян’ тэвы”. ⁵ Таси’ вэдерманда сер’ яхана юседани – хальмерм’ пэбта”ми манэ”ӈа. Пэмбад’ ӈэсь’ я’ мюхув’ ни тю”. ⁶ Пуданда Симон Пётр то, пэмбад’ ӈэсь’ я’ мю’ тю. Тарем’ сырпата, яхана юседани – хальмерм’ пэбта”ми манэ”ӈа. ⁷ Тикы’ хавна пэбта”ми” хэвнякуна Иисус’ ӈэва’ ниня ӈэвы ӈокасям’ манэ”ӈа, тикы ӈокась’ харта яхана яӈга тамдалавы. ⁸ Тиканда нерде тэввыюм’ Тохоламбадада пэмбад’ ӈэсь’ я’ мю’ ӈани’ тю. Тикы серо манэсо”махаданда пунрэй”. ⁹ Тад ӈо” пыди’ Хэбидя Падаркана падда вади тамна нидинзь хамэда”. Хэбидя Падаркана Иисус ха”махаданда яӈор’ илелпата тарась. ¹⁰ Тадтикахад Иисус’ тохоламбадаха’ ӈани’ пырдари’ мэсь’ яханди’ салъяха’.

Иисус’ Магдала’ тер Мариян’ ӈадиво”ма

(Мк 16:9-11)

¹¹ Марияхав пэмбад’ ӈэсь’ я’ хэвхы пиняна нусь ярӈа. Ярманда сер’ таси’ пэмбад’ ӈэсь’ ян’ вэдерӈа. ¹² Тарем’ сырпата, сэр” паны мэта сидя нув’ юне ядэлана, Иисус’ пыхыд’ юседа”ма яхана ӈамдыхы’. Ӈобъюм’ Иисус’ ӈэва’ ӈэ”мя’ няюна мэ, нябиюм’ Ӈэта ӈэ”мя’ няюна мэ. ¹³ Пыди’ нянда вахалъяха’: «Неӈэй, ӈамгэ ярӈан?» Пыда нянди’ ма: «Нум’ Ервани пыхыдм’ ханавы”. Ӈули” нив хамэдамбю”, екар” ханя’ мэдо’». ¹⁴ Тикы вадида хэт”махаданда маха’ ня’ сылы”, маханда няна Иисус нувы. Тарем’ ӈо”, Тикы Иисус ӈэвам’ нида хамэда”. ¹⁵ Иисус нянда ма: «Неӈэй, ӈамгэ ярӈан? Хибямд пюрӈан?» Мария ихинянда Сита ӈоди” пи” вадюлава’ манзаранаӈэ пэрӈа. Ӈадьбята Нянда тарем’ вахалъй”: «Ервэй, пэмбад’ ӈэсь’ яхад пыдар Иисус’ пыхыдм’ хэвня’ ханавы ӈэбат, ман”ма, ханя’ мэсар? Мань ханаӈгув». ¹⁶ Иисус нянда ма: «Мария!» Мария пуня’ Нянда сыло”махаданда еврей’ вадавна вахалъй”: «Раввуни!» Тикы ваданда хамэди” тарця: «Си”ми тохоламбадами». ¹⁷ Иисус нянда ма: «Си”ми нён ня”амбю”. Маньди тамна Нисяхани тэвувдавэйдм’. Няха”ни хань”, тарем’ ман”, Мань Нисяхани танаӈгув”, пыдара” Нисяханда” танаӈгув”, Мань Нумгани танаӈгув”, пыдара” Нумганда” танаӈгув”». ¹⁸ Магдала’ тер Мария хая, Иисус’ тохоламбадаха” Нум’ Ервм’ манэсо”мамда ваде”ӈа. Иисус’ нянда ваде”мы вади няндо’ хэтыда.

Иисус’ тохоламбадахата ӈадиво”ма

¹⁹ Тикыри си”ив яля’ нюрте”э яля’ пэвсюмя’ няна, Иисус’ тохоламбада” иудейха” сейто’ пинава’ нид нёндо’ си пакалмыдо’. Иисус таня’ то, поӈгандо’ нулъй”, тадтикахад вахалъй”: «Таӈгабцоми нянанда” ӈэя!» ²⁰ Тикы Вадида хэт”махаданда Ӈудида, Ӈэда, Хэвдыда, няндо’ манэ”лабтэйда. Тохоламбадида Нум’ Ервамдо’ манэ”мандо’ сер’ маид”. ²¹ Иисус ӈани’ няндо’ ма: «Таӈгабцоми нянанда” ӈэя. Ханзер” Нисями Си”ми ӈэдараса, Мань ӈани’ сидда” ӈэдарамбидм’». ²² Тикы Вадида хэт”махаданда Индта няндо’ пуць ма: «Хэбидя Индадм’ ня”мара”. ²³ Хибяри’ хэбяхы ха”аврамбабата”, тикы” хэбяха” ха”маӈгуд”. Хибяри’ хэбяхы хаебта”, тикахана тикы” хэбяха” хаевы” ӈэӈгу”».

Фома’ нива пунрёва

²⁴ Юкад вата сидяхад ӈобто’ Фома, пэрабцада Яхас ӈэвы. Иисус’ турма’ мальӈгана пыда нянандо’ нивы мы”. ²⁵ Тад пуна Иисус’ тохоламбада” нянда ма”: «Маня” Нум’ Ервава” манэ”ӈаваць». Пыда няндо’ тарем’ ма: «Ӈудаха”ната ӈэда еся теби” мерю манэ”мадавэй’, тикы мерёхо” ӈудани тарка’ тебувдавэй’, Хэвдэхэнда ӈудани тебувдавэй’ нидм’ пунраӈгу”». ²⁶ Сидндет яля’ хэ”мяхад, Иисус’ тохоламбада” ӈани’ мяд’ мюня мэвы”, Фома нянандо’ мэвы. Нё’ си” паклёб” ӈо”, Иисус таня’ то, поӈгандо’ нулъй”, тадтикахад вахалъй”: «Таӈгабцоми нянанда” ӈэя!» ²⁷ Тикы’ пуд Фоман’ ма: «Ӈуданд таркам’ тальняку’ тад, Ӈудини манэс”. Ӈудар тад, Хэвдэхэни тебдед. Тад нерня’ ниня пунрёдан нён ӈа”, пунрёдан ӈа”». ²⁸ Фома Нянда ма: «Нум’ Ервами, мань Нумми». ²⁹ Иисус нянда ма: «Си”ми манэ”манд сер’ Няни пунрэйн? Си”ми манэ”мадавэй’ Няни пунравэхэв ненэсянда ябда». ³⁰ Иисус Тохоламбадита сыртан’ ӈока хуркари ненадо серо серта. Ханяӈы” сер” тюку падаркана падувдавэй”. ³¹ Иисус’ Христос’ ӈэваханда пунраванда” е”эмня, Нум’ Ню’ ӈэваханда пунраванда” е”эмня тарця” сер” пады”. Тикан’ пунрабта” Пыда нюмда няд”мяць илам’ ня”маӈгуда”.

Иисус’ си”ив тохоламбадаханда ӈадиво”ма

¹ Тад пуна Иисус Тивериадам’ нюбета то’+ 21:1* Галилея то. хэвхана тохоламбадахата ӈани’ ӈадимя. Иисус’ ӈадиво”ма тарця ӈэвы. ² Таняна ма”лёвыдо’ ти”: Симон Пётр, Яхасм’ нюбета Фома, Галилеяхад переня Кана’ тер – Нафанаил, Зеведей’ хасава нюху’+ 21:2* Иаковха’ Иоаннха’ (Мк 1:19; 3:17). , тадтикахад тамна сидя Иисус’ тохоламбадаха’. ³ Симон Пётр няндо’ ма: «Мань ёрманзь хаядм’». Пыдо’ нянда тарем’ ма”: «Маня” ӈо” нянанд ӈобтарем’ тутава”». Тадтикахад хая”, таминдо’ ӈо” ӈано’ мю’ тияд”. Тикы пи’ ӈамгэхэртм’ ни” хада”. ⁴ Хубтаӈэ хэ”мяхаданда, Иисус то’ вархана нувы. Тохоламбадида Иисус ӈэвамда нидо’ тумда”. ⁵ Иисус няндо’ ма: «Ӈацекые”, халя таня?» Пыдо’ Нянда ма”: «Яӈгу». ⁶ Пыдахавада няндо’ тарем’ вахалъй”: «Поӈгамда” ӈанонда” маханяӈы хэван’ мора”, тиканда халям’ хадаӈгуда”». Пыдо’ поӈгамдо’ модо’. Халя’ ӈока” ӈэва’ нид поӈгамдо’ тюхулць я”мадо’. ⁷ Тадтикахад Иисус’ мэнена тохоламбада Пётарт’ тарем’ ма: «Тюкоховава” Нум’ Ервава”нё”». Симон Пётркав, Нум’ Ерв ӈэвамда намдванда сер’, тю”уй панымда ёнэнда тяха’ сярахая, ит’ санэй”. Пыда тю”уй панэсявысь. ⁸ Тад ӈани тохоламбадахав” панта поӈгамдо’ и”мня нюдерць я’ няю’ ӈанута хая”. Тад ӈо” пыдо’ ид’ вар’ няд ӈаха”на нивы” мы”, юр’ мян’ метр’ пиркана мэвы”. ⁹ Я’ ни’ тана”махадандо’ есабарта ту’ ясо манэ”ӈа”, ту’ ясо” ниня халя юседавы, тикы’ хавна нянь’ танявы. ¹⁰ Иисус няндо’ ма: «Тандая’ хадавы халэда” тэврэйда”». ¹¹ Симон Пётр ӈано’ ни’ тий”, тадтикахад ӈарка халяха”на панта поӈгам’ ян’ нюхуледа. Ӈокаханда поӈга’ мюня юркад вата самляӈг ю” няхар” халя ӈэвы. Таӈок халяхана пан”пата ӈо”, поӈгадо’ нивы ӈадду”. ¹² Иисус вахалъй”: «Таля’ ӈадов”, ӈорӈада”». Ӈобкарт Тохоламбадада Сита хонра я”ма, ханяӈэхэртадо’ ни ман”: «Пыдар хибян?» Пыдо’ Нум’ Ерв Ӈэвахаданда тенева”. ¹³ Иисус няндо’ то, няньм’ ня”махая няндо’ ми”ӈада, халям’ ӈо” ӈани’ няндо’ ми”ӈада. ¹⁴ Иисус’ ха”махаданда яӈор’ илело”манда пуд, тохоламбадахата теда’ Ӈадиво”мада няхаромдэй Ӈадиво”мада ӈэвы.

Хувони ӈавламбю”

¹⁵ Ӈаворо”махадандо’ Иисус Симон Пётарм’ хонра: «Иоанн’ хасава ню – Пётарм’ нюбета, пыдар няхатат ӈарковна Си”ми мэнен?» Пётр тарем’ ма: «Нум’ Ервав, тарем’ ӈэ”нив’, Пыдар Сит мэневахадани теневананё”». Иисус нянда ма: «Хуво”ни сую” ӈавламбан”». ¹⁶ Нябимдей’ Иисус Пётарм’ ӈани’ хонрада: «Иоанн’ хасава ню – Пётарм’ нюбета, Си”ми мэнен?» Пётр Нянда ма: «Нум’ Ервав, тарем’ ӈэ”нив’, Пыдар Сит мэневахадани теневананё”». Иисус нянда ма: «Хувони ерамбан”». ¹⁷ Няхаромдэй’ Пыда ӈани’ хонрада: «Иоанн’ хасава ню – Пётарм’ нюбета, Си”ми мэнен?» Пётркав няхаромдэй’ Иисус’ хонаркован’: «Си”ми мэнен?» – ида вома. Тиканда тарем’ вахалъй”: «Нум’ Ервав, Пыдар хусувэй ӈамгэхэд теневананё”, Сит мэневахадани теневананё”». Иисус нянда ма: «Хувони ӈавламбан”. ¹⁸ Ненэся, ненэся нянд мадм’, ӈацекы ненэць’ ӈэванд мальӈгана, нимд харт сярахая ханя’ харвасетын, таня’ минзетын. Вэсеймгавабат ӈудид вэӈгалаӈгун, ӈани несэй ненэць’ нимд сяраӈгу, ханя’ нин харва”, таня’ сит ханаӈгу». ¹⁹ Тикы Вадита хараха”на Иисус Пётр’ ханзер” хавам’ ваде”ӈа. Пётр тикы хавахананда Нум’ юнм’ ӈармдаӈгу. Тикы Вадида хэт”махаданда, Иисус Пётарт’ ма: «Пумнани яд”!»

Иисус’ мэнена тохоламбада

²⁰ Пётр пуня’ сылы”. Тарем’ сырпата, Иисус’ мэнена тохоламбада пумнанди’ ялмы”. Сяхаӈгав’ пэвсюмя’ няна ӈавормандо’ ёльцьӈгана, тикы тохоламбада Иисус’ лэмбаран’ ӈэвамда тильтехэя Иисусм’ хонрамбись: «Нум’ Ервава”, хибя Сит хусараӈгу?» ²¹ Пётр сита манэ”манда сер’, Иисусм’ хонра: «Нум’ Ервава”, тюку нями ханзер” ӈэӈгу?». ²² Иисус Пётарт’ ма: «Мань тарем’ харваб”нани, Товани ӈэсонд’ иле хаёд”нив’. Пыдар тикахана ӈамгэ сел таня? Пыдахавар Пумнани яд”». ²³ Некас”+ 21:23* Нумд’ пунрёда” хасава” помнандо’ нидо’ тарем’ нюмдебавы”. помна тарця вада” нялкара”: «Тикы тохоламбада ни хаӈгу”». Иисусхав тарем’ вунзя ман”: «Пыда ни хаӈгу”». Пыдахавада тарем’ ма”нисяв’: «Мань тарем’ харваб”нани, Товани ӈэсонд’ иле хаёд”нив’. Пыдар тикахана ӈамгэ сел таня?»

²⁴ Тикы тохоламбада тикы иле”ми ӈадимде”нидав’, тикы’ нямна нив’ падан”. Маня” тенева, манэ”лабтамбадида ненэся”. ²⁵ Тикы’ хавна Иисус’ ӈани сертавэда ӈока. Тикы’ нямна серото’ сер’ паднаб”, мань ини ядэрабцохона тарця, таӈок падвы падаркат тюку я’ тиркана таӈго я яӈгудась.