Taitòs

Ŋwàk nə̀ Pol à Còm Fa

TAITÒS

Taitòs à ka ŋwə̀ə Jus yeŋ. Mvə̀’nə̀ yi à bʉ̀ʉŋ krətèŋ fana yi tɛsə Pol bə fàak sə̀ nà’ à sə gʉ̀ lòo sə. Pol à còm fa ŋwàk ènə bohòyi ŋga yi sə cu mvwe’ lak Krit. Pol nòŋsə Taitòs nə mvwe’ lak Krit anə ya nà’a sə jəŋ ŋkərə̀ bə fàha sə̀ mʉmvwe’ cos nə̀ fo’ nə.

Ŋwàk nə tse’ bum tɛ’ sə̀ ŋgòcèp bə zeŋ. Nə̀ mò’fis də nà’ sə fa Taitòs ntip bə nsàp ncu nə̀ aco bʉ̀ʉ sə̀ mantombì mʉ cos sə cum mʉtsətsə’rə̀ə bʉ̀ʉ lak Krit, sə̀ wo wɛ’ nə ye mfìp. Ntip nə̀ ba nə̀ yi sə fa Taitòs nə də nà’a riŋ yusə̀ ŋgòyə’rə bòop bʉ̀ʉ sə̀ zəzok mʉ cos sə. Ntip nə̀ tɛ’ nə də krətèŋ wèŋ tse’ ŋgòye lɛ fʉ̀ə̀, nə sə ye bohòbwìŋ pwe’ sə̀’ bə̀boŋ. Wo kà liŋ ŋwə̀ nəmòk bʉp to, nə kà də wo sə kʉəm sə̀’ dʉk.

¹Còm ŋwàk nè’e mʉ̀ʉ Pol nə̀ mʉ ŋgà fàk Nwì nə ye ŋgà ntum Jisòs Krɛst. Krɛst nə a cokfis mʉ də ya mʉ tɛsə bʉ̀ʉ sə̀ Nwì a cokfis yà’wèŋ sə, ya ŋga wo fa ntʉm awo bohòyi, nə ye sə̀’ də ya wo riŋ wesə zìnə nə̀ nà’a gʉ̀gə̀ ŋwè ŋgòwəp Nwì bə ntʉm nə̀ mò’fis nə. ²Mvə̀’nə̀ mʉ̀ sə fàk bohòyi fana mʉ̀ sə naaŋ tu ŋgòkə̀ tse’ lùŋ nə̀ nà’a nə̀ kà mè nə. Nwì ànə kak bwìŋ njamòk laŋ də yi nə̀ fa bwìŋ lùŋ ànə. Yi kà mvwès cì’gə̀. ³Mvə̀k nə à wɛ̀s fana yi fis və lùŋ nə. Yi à fis nì fa bwìŋ nà’ bə ncèp nə̀ yi a fa ndzə bohòmʉ̀ nə. Yà’a yusə̀ yà’ a gʉ̀ʉ ŋkuŋ mʉ̀ sə tsòho fa bwìŋ ncèp ènə ŋga a dʉk mʉ vɛ’nə Nwì nə̀ yi ŋgà lùŋsə̀ ves nə.

⁴Mʉ̀ sə còm fa ŋwàk nè’e wùu Taitòs. Wu co mo àm nə̀ zìnə bʉ̀ʉsə̀ vesù tse’ dzədzəm nə̀ mò’fis. Mʉ̀ lɛŋ Nwì nə̀ yi Tɛ̀’ àvès bə Jisòs Krɛst nə̀ yi ŋgà lùŋsə̀ ves nə də wo gʉ wu bə̀boŋ, nə fa wu fifi.

Fàak Sə̀ Taitòs Tse’ ŊgòGʉ̀ Mʉ Coòs Sə̀ Mvwe’ Lak Krit

⁵Njo nə̀ mʉ̀ ànə me’rə noŋsə wu mvwe’ lak Krit à ye də ya wu gʉhʉ tsə’rə bum sə̀ yà’ ka mʉ cos anə mvə̀’nə yeŋ yà’a. Mok ye sə̀’ də ya wu cok noŋsə lo bʉ̀ ŋkwàha bʉ̀ʉ sə̀ mʉmvwe’ cos nə̀ mvwe’ buk lak nə̀ fòpwe’. Sə tsəm tse’ də mʉ̀ à dʉk wu də, ⁶ŋwə̀ nə̀ wu cokfis yi də nè’e ŋwə̀ nə̀ mantombì fana ŋga yi ŋwə̀ nə̀ bwìŋ rì yi də yi ŋwə̀ nə̀ yi tse’ zìnə, nə tse’ megu ŋwàŋwè mò’fis. Bwe ye tse’ ŋgòye bwe sə̀ wo dzəm bohòJisòs Krɛst fana kùugì awo ye nsàp nə̀ kaco bwìŋ dʉk fa wo də wo ŋgàa lohòntu’ yeŋ, nə kà gʉgʉtu sə̀’ ye. ⁷Ŋwə̀ nə̀ yi mantombì co tu mʉ cos, nə sə fàk yà’sə fàak Nwì fana ye də kùugìi ye nə ye nsàp nə̀ bwìŋ riŋ yi də yi ŋwə̀ nə̀ yi tse’ zìnə. Yi kà ni’ sə nɛ̀, nə kà bum nə̀nàk sə jòk. Yi kà rùk ləlà dzəm, nə kà ŋgà lʉ̀lʉ̀ ye, nə kà mbàm ləlà dzəm. ⁸Yi ye lɛ nsàp ŋwə̀ nə̀ yi dzəmgə̀ də bwìŋ və̀ nda’à yi, nə sə dzəm yusə̀ yà’a bə̀boŋ. Yi ye ŋwə̀ nə̀ yi tse’ ŋkərə̀, nə sə gʉ yusə̀ yà’a kə̀kʉrə̀. Yi ye ŋwə̀ nə̀ yi sə fàk bohòNwì bə ntʉm mò’fis, nə ye ŋwə̀ nə̀ yi kogə̀ ni’. ⁹Yi nə ye tsooŋ nsàp ŋwə̀ nə̀ yi sə kotse’ bum sə̀ vès à yə’rə fa weŋ sə cʉ̀k, ya ŋga yi tip riŋ bʉ̀ʉ mok wèŋ bə ncèp nə̀ rərəŋ sə̀’, ya yi niŋtsok fa to bʉ̀ʉ sə̀ wo sə fenə yi wèŋ də yà’wèeŋ bə jòŋ.

Pol Dʉk Də Taitòos Sa’rə Ŋgàa Gʉtu

¹⁰Gʉgʉʉŋ tu bwìŋ cu wùriŋ, nə kà nsàp nə̀ co wo sə yə’rə də bwìŋ kom tsooŋ tu mbəmbam yà’a ye wesə̀. Wo sə cèp ncèep ləm, nə sə borə bʉ̀ʉ mok wèŋ. ¹¹Gʉ̀ wo ŋga wo lok cùu awo sə, bʉ̀ʉsə̀ wo sə yə’rə fa bwìŋ bum sə̀ yà’ ka zeŋ yeŋ, də ya wo tse’ megu mbàm bə zeŋ. Yà’a yu marè’tu. Wo sə bòrə màk bwìŋ bə ndap awo pwe’ bə nsàap ncèep awo yà’sə. ¹²Ŋwə̀ nəmòk nə̀ yi la’à wo fa’nə, nə̀ yi tsòhogə̀ bum sə̀ yà’ ka ntòye nə, a dʉk də, <<Bʉ̀ʉ lak Krit wèeŋ ŋgàa cì’ mvwès, də yà’wèeŋ co nàamŋgòŋ, nə ye ŋgàa wɛ’, nə sə dzəm megu ŋgòzʉ bum cùdak.>> ¹³Yusə̀ yi à cèp sə yà’a zìnə. Ye də wù tse’ ŋgòcèp sa’rə wo gʉgʉŋ, ya wo dzəm megu yusə̀ yà’a zìnə sə. ¹⁴Kà də wo sə yu’rə ŋgàam sə̀ ŋgwàŋ sə̀ bʉ̀ʉ Jus wèŋ sə tsòho kɛ’ yà’a nə ye bə lʉ̀ʉk sə̀ bʉ̀ʉ sə̀ wo a bwì fa zìnə nə ŋkwɛ̀ŋ laŋ wèŋ a gʉ̀ yà’a dʉk. ¹⁵Ŋwèe ye-a ŋwə̀ nə̀ ntʉm rərɛŋ, ye də bum pwe’ nə ye bohòyi sə̀’ rərɛŋ. Ŋwə̀ nə̀ ntʉm nje a bʉp laŋ, nə̀ də yi ka dzədzəm tse’ fana yumok ka bohòyi rərɛŋ yeŋ. A vɛ’nə bʉ̀ʉsə̀ ŋkərə̀ə awo bə tsətsərə̀ə awo pwe’ a bʉp wes laŋ. ¹⁶Wo sə jəŋ ni’ awo co bʉ̀ʉ sə̀ wo rì Nwì, nə sə gʉ bum sə̀ yà’ sə nìŋtsə̀’ də wo bɛ̀ŋ Nwì nə. Wo yà’sə bʉ̀ʉ sə̀ bʉp, nə ye gʉgʉtu, kaco wo gʉ yumok sə̀ yà’a bə̀boŋ yeŋ.

Pol Tsə̀’ Fa Taitòs Yusə̀ Nà’a Yə’rə Fa Bwìŋ

¹Bohòwù yòfana wu yə’rə fa bwìŋ ncu nə̀ nà’a kə̀kʉrə̀ bʉ̀ʉ bum Nwì sə̀ zìnə sə. ²Tsok fa bʉ̀ ŋkwàha bwìŋ wèŋ də wo jəŋ bum pwe’ fʉ̀ə̀, wo ye nsàp nə̀ co bwìŋ wəp to wo, fana wo sə tse’ tu sə̀’. Wo dzəmtse’ bohòKrɛst nə bə nsàp nə̀ bə̀boŋ, wo sə dzəm bwìŋ, nə təəŋ gʉgʉŋ sə̀’ nsàp nə̀ bə̀boŋ ànə. ³Tsok fa bàa ŋkwàha bwìŋ wèŋ də wo sə gʉ bum co bʉ̀ʉ sə̀ wo rì Nwì. Wo kà bwìŋ sə yò, nə kà rùk sə no jʉ̀hʉ̀. Wo sə yə’rə fa bwìŋ yusə̀ yà’a bə̀boŋ, ⁴ya ŋga wo tip riŋ bwi wàhaŋgwɛ̀ŋ wèŋ ŋgòdzəm ndum awo, nə dzəm bwe awo sə̀’. ⁵Wo yə’rə wo sə̀’ ŋgòtse’ ŋkərə̀, nə ye ŋgòye zìnə bohòndum awo sə̀ rərɛŋ, nə kotse’ riŋ ndap awo bə̀boŋ. Wo ye bə̀boŋ, nə sə yuk ndum awo ya ŋga ŋwèe kà mandzə̀ mòk ŋgòcèp yumok sə̀ bʉp bə ncèp nə̀ Nwì nə bʉ̀ʉ wo tse’.

⁶Tsok fa bwe wàhanzùm wèŋ də wo jəŋ ŋkərə̀ bə ni’ awo. ⁷Yusə̀ wù sə gʉ̀ yà’ sə̀’ pwe’fo’, wù gʉ yà’ bə nsàp mandzə̀ nə̀ co wo sə ye jəŋ fàak bə̀boŋ sə bohòwù. Bum sə̀ wù sə yə’rə fa bwìŋ fana wù yə’rə yà’ bə zìnə, nə kà jap ŋàhà. ⁸A sə tesə kə̀ cùhu wù anə ncèep sə̀ bə̀boŋ sə̀ kaco ŋwè cepto yumok sə̀ bʉp bə zeŋ yeŋ. A ye vɛ’nə ya ŋga marè’tu ko bʉ̀ʉ sə̀ wo sə bɛ̀ŋ yusə̀ vesùwèŋ sə yə’rə sə, bʉ̀ʉsə̀ wo ka yumok sə̀ bʉp ŋgòcèp bə liŋ avès sə tse’.

⁹Tsok fa bʉ̀ʉ sə̀ wo cu ŋkwɛ̀ŋ wèŋ pwe’ də wo sə yuk masàa awo sə, nə sə gʉ co masàa awo sə sə kwa bohòwo bə yusə̀ wo sə gʉ̀ sə lòoŋ. Wo kà dʉk sə fi’, ¹⁰nə kà bo sə sòhò. Wo sə fak lɛ bə mandzə̀ nə̀ aco bwìŋ naaŋ tu bohòwo, ya ŋga bwìŋ yə yusə̀ wo sə gʉ̀ sə fana wo kwasə ncèp nə̀ a sə tsòho nà’ bə liŋ Nwì nə̀ yi ŋgà lùŋsə̀ ves nə.

¹¹Ja’a yòo mvə̀’nə̀ Nwì a nìtsə̀’ bòvə̀m nə̀ nje nə də ya ndàaŋwè pwe’ tse’ lùŋ-ɛ̀. ¹²A gʉ̀ bòvə̀m ye nə ŋkuŋ vesùwèŋ rì ŋga’a də a me’rə bum sə̀ yà’ ka bə mandzə̀ Nwì yeŋ, nə ye bum sə̀ yà’ sə bòvesùwèŋ sə nze fɛɛŋ sə. Ya vesùwèeŋ cum lɛ ncu nə̀ bə ŋkərə̀, nə̀ nà’a rərəŋ mvə̀’nə̀ Nwì dzəm də a cum sə nzeŋgòŋ fɛŋ sə. ¹³Vesùwèeŋ cum vɛ’nə, nə sə tək nùmbu nə̀ ghaŋ nə̀ a sə naaŋ tu bə zeŋ nə, ghà nə̀ Jisòs Krɛst nə̀ nìtsə̀’ fa bwìŋ ŋàaŋ ye sə. Yi Jisòs Krɛst nə, yi Nwì àvès nə̀ ghaŋ, nə ye sə̀’ ŋgà lùŋsə̀ ves. ¹⁴Yi à fa yòŋsə̀ ye bʉ̀ʉ tu avès də ya yi fiŋ me’rə fis vesùwèŋ bohòbʉp. À ye sə̀’ də ya yi gʉ ves ŋgòye bʉ̀ʉ sə̀ bə ntʉm rərɛŋ, ya a fa ntʉm ŋgògʉ̀ mègù yusə̀ yà’a bə̀boŋ.

¹⁵Tsòho fa bwìŋ bum yà’sə. Cèp bohòwo bə ŋgì nə̀ co ŋwə̀ nə̀ wo a fa yi ŋàŋ ŋgòcèp, nə tip wo ya ntʉʉm awo boŋ, nə jwa sa’rə wo sə̀’, ŋwèe kà wu co yusə̀ wà jə.

Ntip Bə Ncu Krətèŋ Mʉtsətsə’rə̀ə Bʉ̀ʉ Mok Wèŋ

¹Sə tsoho malì fa bwìŋ də wo sə jəŋ ni’ awo sə nze bohòŋkwàha bʉ̀ʉ sə̀ wo tse’ lak sə wo. Wo sə wəp yà’wèŋ, nə sə fʉhʉ ŋgògʉ̀ nsàp fàk nə̀ fòpwe’ nə̀ nà’a bə̀boŋ. ²Wo kà liŋ ŋwə̀ nəmòk bʉp to, nə kà də wo sə kʉəm sə̀’ dʉk. Wo ye lɛ fʉ̀ə̀, nə sə ye bohòbwìŋ pwe’ sə̀’ bə̀boŋ.

³Wèeŋ riŋ də vesùwèŋ ànə ye to yàvès sə̀’ ləm, vesùwèŋ kà dʉk sə yuk, nə sə jam mandzə̀. Vesùwèŋ à ye co ŋkwɛ̀ŋ bohòbum sə̀ yà’ à sə bòves sə. Ntʉʉm avès à rwiŋ mègù ca bə bʉp, a sə waŋ bum bwìŋ, bwìŋ sə bɛŋ ves fana vesùwèŋ sə bɛŋ mòk bə mòk. ⁴Ànə kə dzeŋ ŋga’a ghà nə̀ Nwì nə̀ yi ŋgà lùŋsə̀ ves nə à nìtsə̀’ fa ves bòvə̀m nə̀ nje bə dzədzəm nə̀ nje nə fana, ⁵yi luŋsə vesùwèŋ. Yi ànə ka vesùwèŋ də bʉ̀ʉsə̀ a gʉ̀ yumok sə̀ yà’a bə̀boŋ luŋsə, ànə ye bʉ̀ʉ koksə̀manziŋ nə̀ nje nə. Fana yi cuk rɛŋsə ntʉʉm avès, nə fa ves lùŋ nə̀ fi, nə gʉ ves bə Yòŋsə̀ nə̀ Rərɛŋ nə ŋgòye mok bʉ̀ʉ sə̀ fi. ⁶Yi à kɛ̀’ sɛ̀s fa ves yòŋsə̀ ye nə vɛ’ɛ cɛ̀bʉ̀ə̀. Yi fa ves nà’ vɛ’nə ndzə bohòJisòs Krɛst nə̀ yi ŋgà lùŋsə̀ ves nə. ⁷Yi ànə gʉ vɛ’nə ya ŋga vesùwèeŋ ye kə̀kʉrə̀ bʉ̀ʉ bòvə̀m nə̀ nje nə, ya vesùwèeŋ nə kə tse’ lùŋ nə̀ nà’a nə̀ kà mè, nə̀ a sə naaŋ tu fo’ nə.

⁸Ncèp ènə ncèp nə̀ zìnə co a naaŋ tu fo’. Mʉ̀ dzəm də wu sə cep mali bə bum yè’sə gʉgʉŋ, nə kà teŋsə̀, ya bʉ̀ʉ sə̀ wo à dzəm bohòNwì yà’a wèeŋ sə tsərə nùumbu pwe’ ŋgògʉ̀ yusə̀ yà’a bə̀boŋ. Yà’a ye kə̀kʉrə̀ nə tse’ swe’ bohòbwìŋ pwe’. ⁹Fana wù kà də wu sə fi’dʉk bə bum sə̀ yà’a bum ləm sə dʉk. Kà də wu sə fi’dʉk bə nzak ŋgàam sə̀ ŋgòta bə liŋ tàcici weŋ sə̀ njamòk dʉk, nə kà sə kʉ̀ə̀m, nə kà mamfenə̀ bə lʉ̀ʉk bʉ̀ʉ Jus wèŋ sə̀’ gʉ̀. Nsàap bum yà’sə ka fàk tse’, kaco yà’ jəŋ lo ŋwè mantombì yeŋ. ¹⁰A ye-a ŋga ŋwə̀ nəmòk fenə wu bə bum sə̀ wù sə yə’rə fa bwìŋ sə fana wù tip to yi nə̀ kɛ̀’ mò’fis, nə tip yi nə̀ ba. A ye-a ŋga yi ka sə̀ yuk fana wù co’rə fis bo ndzə ni’ì yi. ¹¹Riŋtse’ də nsàp ŋkərə̀ ŋwə̀ ànə tətəŋ. Yi yà’sə ŋgà gʉ̀ bʉp, yi bʉpsə tu ye laŋ.

Ncèp Nə̀ ŊgòLə̀sə Lòo

¹²Ghà nə̀ mʉ tum fa-a wu Àtimàs kè Tìkikòs də yi kə cum fo’ àlɛ’ wù caŋ və kə tseŋ mʉ mvwe’ lak Nìkàpolìs, bʉ̀ʉsə̀ mʉ nə cum fo’ tə̀tè mbʉ̀ŋ ta ŋkuŋ. ¹³Jihi nzòŋ gʉgʉŋ ŋgòtɛsə Zenàs ŋgà sak nzak bə Àpolòmvə̀’nə̀ wo nə sə gi sə, ya wo kà yumok jamə̀. ¹⁴Gʉ̀ bʉ̀ʉ avès ya wo riŋ ŋgògʉ̀ bə̀boŋ, ya wo tɛsə ni’ awo, nə sə tɛsə bʉ̀ʉ mok wèŋ sə̀’. Kà də wo sə casə bʉpsə mvə̀k wà dʉk.

¹⁵Bʉ̀ʉ sə̀ vesi wèŋ cu fɛɛŋ pwe’ cèpsə wu bə̀boŋ. Cèpsə bʉ̀ʉ sə̀ wo sə dzəm ves bʉ̀ʉsə̀ də wo a fa ntʉm awo bohòKrɛst yà’a. Bə̀bo nə̀ Nwì nə ye bohòwèŋ lòoŋ.