Bum Nwì à Nìtsə̀’ Fa

Ŋwàk Bum sə̀ Nwì à Nìtsə̀’ Fa Jon

Ŋwàk nə̀ Jon à còm ènə nà’ sə tsə̀’ bum ŋkʉ̀ʉŋntɛ̀ŋ sə̀ yi à sə yə yà’ co yi sə yə lo, ŋga Nwì sə nìtsə̀’ fa yi yà’ yi. Jon nə dʉ’ nja də Nwì a nìŋ fa yi bum yè’sə, də anə kà sàp ŋga yà’ bʉ̀ʉŋ və̀ zìnə laŋ. (Taŋ mbʉ̀p 1:1). Ncèep gbʉ’ ndzənə ŋwàk ènə wùriŋ. Bum mok sə̀ yi à yə sə, a sə̀ wo à còm yà’ ndzənə ŋwàk Nwì ma nə̀ Rʉ̀k nə̀ zəm nə sə̀’. Bwìiŋ jəgə̀ gbʉ’ sə, nə sə tsok rɛŋsə lo yà’ bə mandzə̀ zəzok wùriŋ. Megu də tu ncèp nə̀ ŋwàk nə tse’ ŋgòtsə̀’ fa bwìŋ nə nòye sə jəja də Nwìi nə ghak bʉ̀ʉ sə̀ wo sə bɛ̀ŋ yi bə Satà pwe’fo’ ndzə bohòJisòs Krɛst. Fana yi nə sə cum bə bʉ̀ʉ sə̀ wo à còm liŋ awo ndzənə ŋwàk lùŋ sə. Wo nə ye bʉ̀ʉ ye, yi ye Nwì yà’wèŋ sə̀’.

A ye-a sə̀’ də bum sə̀ nja sə ka pwe’ pap rɛɛŋ wes fana ŋgà còm ŋwàk nə sə tsə̀’ fa vesùwèŋ də bʉ̀ʉ sə̀ wo ta-a, nə sə yu’rə bum sə̀ ndzənə ŋwàk ènə fana Nwìi nə se wo (taŋ mbʉ̀p 1:3).

Bum Sə̀ Wo À Còm Ndzənə Ŋwàk Nə

¹Nè’e ŋwàk bum sə̀ Nwì à nìtsə̀’ fa Jisòs Krɛst də nà’a tsok fa ŋgàa fàha nà’ wèŋ, də yà’a nə ye vɛ’nə ghàr. Ànə geŋ, Jisòs tumsə masinjà ye də nà’a kə tsok fa ŋgà fàk ye Jon bum yè’sə. ²Fana Jon nə bə tu ye à còm ncèp Nwì nə̀ Jisòs à nìtsə̀’ fa yi nə pwe’. Yi à còom, nə niŋtsok fa bwì jəja kwaraŋgaŋ. ³Rɛŋsi bohòndàaŋwè pwe’ nə̀ yi jə ncèp nə̀ nà’a və̀ bohòNwì ènə, nə taŋ fis nà’ mʉtsə̀. Rɛŋsi sə̀’ bohòbʉ̀ʉ sə̀ wo yuk ncèp ènə, nə gʉ mvə̀’nə̀ nà’ sə dʉk sə̀’, bʉ̀ʉsə̀ mvə̀k nə̀ bum yè’sə nə ye sə kʉəp laŋ.

Jon Cèpsə Coòs Sə̀ Sàmba Sə̀ Nze Esiyà Sə

⁴Mʉ̀ Jon ŋgà còm ŋwàk nè’e, mʉ̀ sə cèpsə weŋ coos sə̀ sàmba sə̀ mvwe’ nzeŋgòŋ Ɛsiyà yà’a bə̀boŋ. Mʉ̀ lɛŋ də Nwìi gʉ weŋ bə̀boŋ, nə fa weŋ fifi sə̀’. Yi Nwì nə̀ yi cu ŋga’a, nə ye nə̀ yi à ye to mantombì, nə ye fe’lə sə̀’ yi nə̀ yi nə̀ kə̀ və̀ fe’lə nə. Bə̀boŋ bə fifi ènə nə̀ nà’ və̀ bohòyòŋsə̀ə sə̀ sàmba sə̀ wo tə mvwe’ kapràak ye sə, yà’a ye bohòwèŋ sə̀’. ⁵Bə̀bo ènə və bohòJisòs Krɛst sə̀’, nə̀ yi ŋwə̀ nə̀ aco a naaŋtu bohòyi co ŋgà tsə̀’ zìnə bə bum Nwì. A sə̀’ yi nə̀ Nwì à lòkoksə to mvwe’ kpʉ fana yi ye ŋkum bohòŋkum sə̀ sə nze pwe’ yi. A kwasə yi bʉ̀ʉsə̀ yi à dzəm ves, nə kpʉ bohòvès sə̀’ də ya yi fiŋ me’rə fis ves mvwe’ bʉp avès bə ndʉəm ye. ⁶Yi a gʉ̀ ves ŋgòye bʉ̀ʉ sə̀ mvwe’ gaŋ ye. Nə gʉ ves sə̀’ ŋgòye co ŋgàa fa satikà’, nə sə fa gùrə̀ ŋgòkùksə liŋ tɛ̀’ ye Nwì. Bwìŋ kuksə Jisòs nə, ŋàaŋ pwe’ bohòyi nə mvèsə̀ nə̀ mvèsə̀. Yà’a ye vɛ’nə. ⁷Wèeŋ ye, yi sə və̀ ndzənə mbàk fana, lis bwì pwe’ nə ye yi. Bʉ̀ʉ sə̀ wo à sòp yi nə ye yi sə̀’. Bʉ̀ʉ sə̀ sənə nzeŋgònə pwe’ nə warə də, <<À jap mʉ̀ yà?>> bʉ̀ʉ və̀və̀ ye nə. Yà’a mvə̀’nə̀ a nə̀ ye lì vɛ’nə. Yà’a ye vɛ’nə. ⁸Tà Nwì àvès sə cèp də, <<Ŋgòyèto a mʉ̀, ŋgòlə̀sə a sə̀’ mʉ̀.>>1:8 Wo à còm to ŋwàk nè’e, mvwe’ sə̀ Yamba sə cep də ŋgòyèto à ye də Alfà bə ncèep Grik. Mvwe’ sə̀ Yamba sə cep də ŋgòlə̀sə à ye də Òmegà bə ncèep Grik. Alfà ye ncòm nə̀ nà’ yèto ncòom Grik sə, Òmegà ye nə̀ nà’ lə̀sə̀. Yi Nwì nə̀ yi cu ŋga’a nə ye nə̀ yi à ye to mantombì, nə ye fe’lə sə̀’ yi nə̀ yi nə̀ kə̀ və̀ fe’lə nə. Yi tse’ ŋàŋ pwe’ yi, ŋàaŋ mok ka sə̀ yà’ càsə yi mok cum fe’lə.

Jon Yə Jisòs Bə Lis

⁹Mʉ̀ Jon nə̀ mʉ̀ sə còm ŋwàk nè’e, mʉ moma àwèŋ nə̀ vesùwèŋ a be’lə mvwe’ mò’fis bə Jisòs. Vesùwèŋ sə yə lòŋgə’ bəbɛ’, nə sə təəŋ gʉgʉŋ bʉ̀ʉsə̀ a tse’ lo’ Jisòs co ŋkum àvès. Nùmbu mòk à ye ŋga mʉ̀ cu mvwe’ mʉlak mòk nə̀ wo to nà’ də Patmòs. Mʉlak ènə à ye ndzə tsətsə’rə ndzəp. Wo à bɛ’ gesə lòmʉ fo’ də bʉ̀ʉsə̀ mʉ̀ à sə tsòho ncèp Nwì nə ye bum sə̀ Jisòs à nìtsə̀’ də yà’a zìnə sə. ¹⁰Mʉ̀ à ye fo’, ŋga a nùmbu dzə̀ə bʉ̀ʉ Nwì wèŋ. Yòŋsə̀ nə̀ Nwì à və̀ə, nə kotse’ mʉ ghà ànə. Mʉ̀ yuk ŋga ŋgì mòk sə cep fʉ ŋkwɛ̀ɛŋ mʉ̀ co wo sə fʉəp ntàŋ vɛ’ɛ. ¹¹Ŋgì nə dʉk fa mʉ də, <<Jəŋ ŋwàk, nə com bum sə̀ wù sə yə yè’e, nə tum fa lo coos sə̀ sàmba. Coos sə̀ mvwe’ lak Efesò, Sìminà, Pègamùm, Tìyatirà, Sadìs, Fìlàdefiyà nə ye Làòdisiyà.>>

¹²Ànə geŋ mʉ̀ bʉʉŋ də ya mʉ ye ŋwə̀ nə̀ yi sə cèp bohòmʉ̀ ènə. Mʉ̀ à bʉ̀ʉŋ, mʉ̀ ye yumok sàmba co bəbwe dzòok sə̀ wo à gʉ̀ yà’ bə nsàp ntɛŋ nə̀ wo togə̀ nà’ də guù nà’a, sə̀ co wù tes kàk mbwa.¹³Mʉ̀ ye ŋwə̀ nəmòk ŋga yi səsə co mo ŋwè, ŋga yi tə mʉtsətsə’rəə bəbwe dzòok tes kàk sə. Yi à ni tse’ cə̀k nə̀ nà’ sap co sàro. Yi swi’ tiŋ yak nà’ mʉŋgùu bə korə nə̀ wo à gʉ̀ nà’ sə̀’ bə guù. ¹⁴Nʉ̀əmtu ye sə fop pup pup co mbàk. Lis ye sə kʉə co lʉm mis. ¹⁵Kùu ye à sə rɛŋ daàŋ daàŋ co ntɛŋ nə̀ wo tè kə̀ vòho. Ŋgì ye ye co sə gbʉ̀ cəcwà ndzəp nə̀ ghaŋ. ¹⁶Yi à kotse’ ŋkə̀ŋkàŋ sàmba ndzənə bo ma zʉʉ ye. Fèk mòk nə̀ nà’ à tse’ ncʉəp ma ba à tesə tsə kə̀ cùhu yi sə̀’. Si ye à sə rɛŋ co nùm sə to nə̀ maràŋ.

¹⁷Mʉ̀ à yə yi, mʉ̀ coho gbʉ nooŋ tsoŋ mvwe’ kùu ye, co ŋwə̀ nə̀ yi kpʉ laŋ vɛ’ɛ. Fana yi naaŋ fa mʉ bo ma zʉ ye mʉ ni’ì, nə dʉk fa mʉ dʉk də, <<Kà wəp. A mʉ̀ nə̀ mʉ mantombì nə ye maŋkwɛ̀ŋ sə̀’ mʉ̀. ¹⁸A mʉ̀ nə̀ mʉ̀ cu ŋwəm nə. Mʉ̀ à kpʉ, nə lokok fe’lə sə̀mok. Mʉ nə cum mok mvèsə̀ nə̀ mvèsə̀. Ki ncùu kpʉ nə ye nzeŋgòŋ yòŋsə̀ə bʉ̀ kpʉkpʉ pwe’ cu ndzə bohòmʉ̀. ¹⁹Còm-a bum sə̀ wù yə ŋga’a yè’e pwe’ ndzə ŋwà’à. Còm sə̀ yà’a nə ye ŋga’a nə ye sə̀ yà’a nə̀ kə̀ ye ntsə’mòk sə̀’. ²⁰Mʉ rɛŋsə wu bə bum sə̀ wù yə sə. Ŋkə̀ŋkàaŋ sə̀ sàmba sə̀ wù yə ndzə bohòmʉ̀ yà’a, a masinjàa am sə̀ wo kʉ̀kgə̀ coos sə̀ sàmba sə. Bəbwe teberə̀ə kàak sə̀ sàmba sə yàwo coos sə̀ sàmba sə.>>

Ŋwàk Cos Nə̀ Mvwe’ Lak Efesò

¹Ŋwə̀ nə̀ mʉ̀ à yə nə à dʉk fa malì mʉ sə̀’ dʉk də, <<Còm fa masinjà àm nə̀ yi kʉ̀kgə̀ cos nə̀ mvwe’ lak Efesònà’a dʉk də, nè’e ncèp nə̀ nà’ və̀ bohòŋwə̀ nə̀ yi kotse’ ŋkə̀ŋkàaŋ sə̀ sàmba sə ndzə bohòyi. Nə ye sə̀’ yi nə̀ yi gìkɛ’gə̀ mʉtsətsə’rəə bwe dzòok sə̀ kàak təəŋgə̀ mbwa sə. ²Mʉ̀ rì wes ncu àwèŋ pwe’fo’. Mʉ̀ rì mvə̀’nə̀ wèeŋ fàkgə̀ bə ŋàŋ, nə ye mvə̀’nə̀ wèŋ sə ko ntʉm, nə sə təəŋ mali gʉgʉŋ. Mʉ̀ rì mvə̀’nə̀ wèŋ sə jùm fis bʉ̀ʉ sə̀ bʉp mʉŋgorə̀ wèŋ yà’a sə̀’. Nə riŋ fe’lə mvə̀’nə̀ wèŋ a mùmsə ja’a bʉ̀ʉ sə̀ wo sə dʉk bòrə basə də wo ŋgàa ntum am ŋga wo ŋgàa mvwès yà’a sə̀’. ³Wèŋ sə ko ntʉm, wèŋ a yə ŋgə’ bʉ̀ʉ mʉ̀ cɛ̀bʉ̀ə̀, nə kà teŋsə̀. ⁴Megu də yumook nè’ nə̀ nà’ sə kà mʉ vesùwèŋ bò. Yu nə də wèŋ sə kà mʉ mok mvə̀’nə̀ wèŋ à sə dzəm to mʉ mantombì yà’a mok dzəm fe’lə̀. ⁵Ye də wèeŋ tsərə fəsə mvə̀’nə̀ wèŋ à sə dzəm to mʉ yà’a, nə bwi fa bʉp awèŋ ŋkwɛ̀ŋ, nə sə gʉ̀ mʉmvə̀’nə̀ wèŋ à sə gʉ̀ to mantombì. Wèeŋ kà-a vɛ’nə gʉ̀, mʉ̀ və, nə kə cok fis gɛsə teberə̀ àwèŋ nə̀ kàak təəŋgə̀ mbwa nà’a. ⁶A ye-a sə̀ vɛ’nə fana yumòok nè’ nə̀ sə bòmʉ vesùwèŋ bʉ̀ʉ zeŋ. A də wèŋ sə bɛ̀ŋ bum sə̀ bʉ̀ʉ Nikolà wèŋ sə gʉ̀ yà’a nə̀ bʉp sə̀’ co mvə̀’nə̀ mʉ̀ sə bɛ̀ŋ yà’. ⁷Ŋwə̀ nə̀ yi tse’-a ntu’ ŋgòyuk bum bə zeŋ, yi yuk-a yusə̀ Yòŋsə̀ Nwì sə cèp bohòcoos sə. Ŋwə̀ nə̀ yi təəŋ-a gʉgʉŋ tə̀tè nə ghak mə̀mumsə̀ fana nà’a yi nə̀ Nwìi nə̀ fa yi mandzə̀ də yi ni lo nə kə zʉ nto’ tʉ lùŋ nə̀ yi à bì nà’ mvwe’ nzum ye nə.

Ŋwàk Cos Nə̀ Mvwe’ Lak Sìminà

⁸<<Còm fa masinjà àm nə̀ yi kʉ̀kgə̀ cos nə̀ mvwe’ lak Sìminà nà’a dʉk də, nè’e ncèp nə̀ nà’ və̀ bohòyi nə̀ yi mantombì sə̀’ yi, nə ye maŋkwɛ̀ŋ sə̀’ yi nə. Yi nə̀ yi à kpʉ, nə lokok fe’lə sə̀mok nə. ⁹Mʉ̀ rì ŋgə’ nə̀ wèŋ sə yə. Mʉ̀ rì də wèeŋ ŋgàa jìŋ. Ŋga zìnə nə də wèeŋ ŋgàa ghàk bə mandzə̀ mòk. Mʉ̀ rì nsàap mvwèes sə̀ bʉ̀ʉ sə̀ wo sə to borə ni’ awo də wo bʉ̀ʉ Jus yà’a sə cì’ fa weŋ yà’a sə̀’. Bʉ̀ʉ yà’sə wo ka bʉ̀ʉ Jus yeŋ lok, wo yà’sə bòp bʉ̀ Satà wèŋ. ¹⁰Ŋga sə də a və-a bohòwèŋ sə̀ nsàp ŋgə’ nə̀ fòpwe’, kà də wèeŋ wəp dʉk. Yèè, Satàa nə mumsə weŋ, nə gesə mok sə̀ mʉtsətsə’rəə wèŋ anə mʉ ndapndzəmə̀. Nsàp ŋgə’ ànə nə cum dzeŋ megu nùumbu hum. A ye-a sə̀ də wu nə kpʉ bʉ̀ʉ mʉ̀, wù təəŋ mali bohòmʉ̀ gʉgʉŋ, ya mʉ nə lak wu bə tàm nə̀ nà’a lùŋ nə.¹¹Ŋwə̀ nə̀ yi tse’-a ntu’, yi yu’rə-a yusə̀ Yòŋsə̀ Nwì sə cep bohòcoos wèŋ. Ŋwə̀ nə̀ yi təəŋ-a gʉgʉŋ, nə ghak mə̀mumsə̀ fana ye də kpʉ nə̀ nà’ sə və̀ maŋkwɛ̀ɛŋ nə kà yi jwɛ̀ŋ lok.

Ŋwàk Cos Nə̀ Mvwe’ Lak Pegamùm

¹²<<Còm fa masinjà àm nə̀ yi kʉ̀kgə̀ cos nə̀ mvwe’ lak Pegamùm nà’a dʉk də, nè’e ncèp nə̀ nà’ tesə və̀ mʉ cùhu ŋwə̀ nə̀ yi tse’ fèk nə̀ bə ncəp ma ba nə. ¹³Mʉ̀ rì mvwe’ sə̀ wèŋ cu yà’sə bə̀boŋ də a fo’ mvwe’ ntʉm lak Satà. Mʉ̀ rì də wèŋ sə dʉk mègù də wèeŋ bʉ̀ʉ am. Wo a zə Antipà nə̀ yi à sə ye zìnə bohòmʉ̀ fa’nə, də bʉ̀ʉsə̀ yi à cèp fis jəja də yi ŋwə̀ àm. Wo à zə yi vɛ’nə, wèŋ kà mʉ sə̀’ bɛ̀ŋ. ¹⁴Megu də bum mok cu sə̀ wèŋ sə gʉ̀ʉ sə̀ yà’ sə kà mʉ bò. Bʉ̀ʉ mok cu mʉtsətsə’rəə wèŋ sə̀ wo sə gʉ̀ nsàap bum lak sə̀ co rùm wèŋ, co sə̀ Balàm à sə yə’rə fa bwì yà’a. A yi nə̀ yi à tipsə Balàk ŋgòjə lòbʉ̀ʉ Izùrɛ wèŋ mvwe’ gʉ̀ bʉp nə. Yi à gʉ̀ vɛ’nə ŋkuŋ wo sə zʉ bum sə̀ bʉp sə̀ co bum rùm, nə sə koho sàhà sə̀’. ¹⁵Bʉ̀ʉ mok cu mʉŋgorə̀ wèŋ sə̀’ sə̀ wo sə bɛ’ mandzə̀ Nikolà. Wo sə gʉ̀ nsàap bʉp sə̀ Balàm à yə’rə yà’a. ¹⁶Ye də wèeŋ kupsə-a wàp, bwɛ̀rɛ mʉ nə və vɛ’ɛ nə̀nàk, nə lʉ ves bʉ̀ʉ yà’sə wèŋ bə fèk nə̀ mʉ cùhu mʉ̀ nə. ¹⁷Ŋwə̀ nə̀ yi tse’-a ntu’ ŋgòyuk bum fo’, yi yuk-a bum yè’sə sə̀ Yòŋsə̀ Nwì sə cèp bohòcoos sə. Ŋwə̀ nə̀ yi təəŋ-a gʉgʉŋ tə̀tè nə ghak mə̀mumsə̀ fana, mʉ nə fa yi bɛŋ Nwì sə̀ kaco lis ye yà’ yeŋ sə. Mʉ nə fa fe’lə yi lìs nə̀ fəfop nə̀ wo còm naaŋ lìŋ sə̀ fi mbwa. Ŋwə̀ nəmòok nə kà liŋ sə rì lok. A nə riŋ megu yà’ ŋwə̀ nə̀ mʉ̀ fa yi yà’ nə.

Ŋwàk Cos Nə̀ Mvwe’ Lak Tìyàtirà

¹⁸<<Còm fa masinjà àm nə̀ yi kʉ̀kgə̀ cos àm nə̀ mvwe’ lak Tìyatirà nà’a dʉk də, nè’e ncèp nə̀ nà’ tesə və̀ mʉ cùhu mo Nwì. Yi nə̀ lis ye sə kʉə co lʉm mis, kùu ye sə rɛŋ daàŋ daàŋ co ntɛŋ nə̀ wo tɛ̀ŋ kə̀ misə̀ nə. ¹⁹Mʉ̀ rì ncu àwèŋ bə̀boŋ. Mʉ̀ rì də wèŋ tse’ ntʉm nə̀ ŋgòdzəm mòk bə mòk. Mʉ̀ rì sə̀’ mvə̀’nə̀ wèŋ tə bə mandzə̀ nə̀ zìnə bohòmʉ̀, mʉ̀ rì də wèeŋ fàkgə̀ gʉgʉŋ, nə sə ko ntʉm sə̀’. Mʉ̀ rì sə̀’ laŋ də bum sə̀ wèŋ sə fàk ŋga’a pwe’fo’, bòghak zeŋ nə noŋsə mvə̀’nə̀ à ye to mantombì. ²⁰Mègù də yumòk cu mò’fis nə̀ wèŋ sə gʉ̀ nə̀ mʉ̀ ka nà’ dzəm. Yu nə də, wèŋ sə mè’rə ŋwà nə̀ wo to yi də Jesebè nà’a ŋgòcu mʉtsətsə’rəə wèŋ. Yi sə dʉk də yi sə tsòho ncèp Nwì, ŋga a mvwès wà. Yi sə gʉ̀ bʉ̀ʉ am wèŋ ŋgòkoho sàhà, nə sə zʉ kɛ’ca bum rùm wèŋ nduk. ²¹Mʉ̀ a fa yi mʉmvə̀k momjo də ya yi teŋsə ŋgògʉ̀ bʉp ye sə, fana yi kà dzəm ŋgòmè’rə ko sàhà dzəm. ²²Ye də mʉ nə gʉ yi, yi kok kèe yiyaŋ maràŋ ya bə bʉ̀ʉ sə̀ bə yà’wèeŋ kogə̀ nto sə wèeŋ nə ye ŋgə’ bə̀boŋni. Mʉ nə gʉ li vɛ’nə tse’ŋga wo mè’rə mandzə̀ àwo ànə. ²³Mʉ nə zə bwe ye sə pwe’fo’. Mʉ nə gʉ vɛ’nə ya cos pwe’ riŋ də mʉ̀ rì tse’ və̀əm bwì pwe’fo’. Mʉ nə lak ndàaŋwè pwe’fo’ mvə̀’nə̀ yi à gʉ̀ fàak ye.

²⁴<<Nə ye də bohòwèŋ bwes bʉ̀ʉ sə̀ mvwe’ lak Tìyatirà, wèŋ a ka mandzə̀ Jesebè nə yuŋ. Wèŋ na ka bum ŋwʉŋwa sə̀ Satà sə rì. Ye də bohòwèŋ yàwèŋ, mʉ̀ ka yumok zok sə̀ mʉ̀ sə dʉk wèeŋ gʉ tse’. ²⁵Megu də wèeŋ kotse’ bum sə̀ wèŋ a yə’rə yà’a cʉ̀k tə̀tè mʉ̀ bwi və. ²⁶Nə ye də bohòbòp bʉ̀ nə̀ wo tə gʉgʉŋ tə̀tè nə kə ghak mə̀mumsə̀, nə sə gʉ yusə̀ mʉ̀ sə dzəm, fana mʉ nə fa wo ŋàŋ bə bòop lak sə̀ zəzok sə pwe’fo’. ²⁷Mʉ nə fa wo ŋàaŋ sə sə̀’ mvə̀’nə̀ tɛ̀’ am a fa mʉ. Wo nə sə sak gaŋ mʉtuhù bòop lak yè’sə bə ntò’ ŋkum nə̀ wo à gʉ̀ nà’ bə ntɛŋ. Wo nə ləp və’rə yà’ co mvə̀’nə̀ ŋwèe ləp və’rəgə̀ kʉ̀ʉŋ ncàk yà’a. ²⁸Bʉ̀ʉ sə̀ wo ghak mə̀mumsə̀ yè’sə, mʉ nə̀ fa wo sɛ̀ŋtsok sə̀’. ²⁹Ŋwə̀ nə̀ yi tse’-a ntu’ ŋgòyuk bum fo’ fana yi yu’rə-a bum sə̀ Yòŋsə̀ Nwì sə tsə̀’ fa coos sə.

Ŋwàk Cos Nə̀ Mvwe’ Lak Sadìs

¹<<Còm fa masinjà àm nə̀ yi kʉ̀kgə̀ cos nə̀ mvwe’ lak Sadìs nà’a dʉk də, nè’e ncèp nə̀ nà’ tesə və̀ bohòyi nə̀ yi tse’ yòŋsə̀ə Nwì sə̀ sàmba, nə tse’ ŋkə̀ŋkàaŋ sə̀ sàmba sə. Mʉ̀ rì ncu àwèŋ nə̀ wèŋ cu nə. Bwìiŋ tsərəgə̀ də wèŋ cu ŋwəm, ŋga wèŋ a kpʉ laŋ. ²Wèeŋ lokok mvwe’ lo wàp, nə lumsə fe’lə mʉyòŋsə̀ nə̀ nà’ sə kàha malì nà’a, ya kà də nà’a kpʉ liiŋ wesə dʉk. Mʉ̀ yə də ncu àwèŋ ka kə̀kʉrə̀ pap mantombìi Nwì yeŋ. ³Ye də bòghak də wèeŋ tsərə fəsə maŋkwɛ̀ŋ bə bum sə̀ wèŋ ànə yuk to yà’, nə jəŋ yà’ yà’a. Wèeŋ sə gʉ yà’, nə bwi fa bʉp awèŋ ŋkwɛ̀ŋ. A ye-a ŋga wèŋ ka lokok, ye də mʉ nə və nə kə tseŋ weŋ co ŋgà yə̀ və̀ yi, wèŋ kà mvə̀k nə̀ yi vəə nə rì.

⁴<<Megu də wèŋ bʉ̀ʉ Sadìs mok sə̀ wèŋ ka ŋkʉ̀ʉŋ yeŋ, wèŋ a nòŋsə ni’ awèŋ rərɛŋ. Bʉ̀ʉ yà’sə nə nitse’ cə̀ək sə̀ fəfop, nə gi venə wèŋ bʉ̀ʉsə̀ wo kə̀kʉrə̀ ŋgògì venə wèŋ vɛ’nə. ⁵Bʉ̀ʉ sə̀ wo təəŋ gʉgʉŋ tə̀tè nə ghak mə̀mumsə̀ fana wo nə̀ ni cə̀ək fəfop sə̀’ vɛ’nə. Nə ye sə̀’ də mʉ nə kà liŋ awo ndzənə ŋwàk lùŋ yìsə̀ fis. Mʉ nə̀ təəŋ mantombìi Tɛ̀’ am nə ye masinjàa ye wèŋ, nə tsok jəja də wo bʉ̀ʉ am. ⁶Ŋwə̀ nə̀ yi tse’-a ntu’ ŋgòyuk bum bə zeŋ, yi yu’rə-a bum sə̀ Yòŋsə̀ Nwì sə tsə̀’ fa coos sə.

Ŋwàk Cos Nə̀ Mvwe’ Lak Fìlàdefiyà

⁷<<Còm fa masinjà àm nə̀ yi kʉ̀kgə̀ cos nə̀ mvwe’ lak Fìlàdefiyà nà’a dʉk də, nè’e ncèp nə̀ nà’ tesə və̀ bohòmo Nwì nə̀ rərɛŋ, nə ye sə̀’ yi nə̀ yi zìnə nə. Yi tse’ ki ncùu ŋkum Devìd ndzə bohòyi. Yi lok-a ncùu sə, ŋwə̀ nəmòk kà mùk, yi mùk-a yà’, ŋwè kà sə̀’ lok fe’lə̀. ⁸Mʉ̀ rì ncu àwèŋ. Mʉ̀ rì də wèŋ a ye-a sə̀ jì ŋàŋ, wèŋ sə yuk dʉk àm laŋ. Wèŋ a ka də wèŋ ka bʉ̀ʉ am yeŋ sə̀’ bɛŋ yuk. Ye də mʉ̀ a mùk nòŋsə fa weŋ ncùu sə̀ kaco ŋwə̀ nəmòk lok yà’ yeŋ. ⁹Wèeŋ ja’a àwèŋ mvə̀’nə̀ mʉ nə gʉ bʉ̀ʉ sə̀ wo bòp bʉ̀ Satà, nə sə ci’ mvwès də wo bʉ̀ʉ Jus yà’a nè. Mʉ nə gʉ wo ŋgòkə̀ təəŋ bə tumfərə sə ŋki’ì wèŋ, nə wup fa weŋ bo, ya wo riŋ də mʉ̀ dzəm weŋ. ¹⁰Wèŋ a yuk dʉk àm, nə təəŋ bə kontʉm laŋ. Mvə̀’nə̀ wèŋ a yuk mʉ vɛ’nə, mʉ nə noŋsə weŋ bə̀boŋ, ghà nə̀ ŋgə’ə nə̀ və̀ sənə nzeŋgònə pwe’ ŋgòmùmsə bwì.

¹¹<<Anə kà sàp ŋga mʉ̀ və̀ laŋ. Wèeŋ kotse’ bum sə̀ wèŋ tse’ yà’sə cʉ̀k. Wèeŋ kotse’ cʉ̀k ya ŋwə̀ nəmòok kà lə̀làk awèŋ nə kə̀ fèp jə lò. ¹²Bʉ̀ʉ sə̀ wo təəŋ-a gʉgʉŋ tə̀tè nə ghak mə̀mumsə̀ fana mʉ̀ gʉ wo co tàaŋ-ndap Nwì àm, wo nə mam fo’ tə̀tè nə kà cohòyuk. Mʉ nə com naaŋ liŋ Nwì àm mʉni’ì wo. Mʉ̀ com naaŋ fe’lə fa wo liŋ lak Nwì àm nə̀ nà’a də, Jòrosalèm nə̀ Fi, nə̀ nà’ sə tesə tsooŋ mʉbu bohòNwì àm nə. Mʉ nə com naaŋ fa wo liŋ am sə̀ fi mʉni’ì wo anə sə̀’. ¹³Ŋwə̀ nə̀ yi tse’-a ntu’ ŋgòyuk bum bə zeŋ fana yi yu’rə-a bum sə̀ Yòŋsə̀ Nwì sə tsə̀’ fa coos sə.

Ŋwàk Cos Nə̀ Mvwe’ Lak Làòdisiyà

¹⁴<<Còm fa masinjà àm nə̀ yi kʉ̀kgə̀ cos àm nə̀ mvwe’ lak Làòdisiyà nà’a dʉk də, nè’e ncèp nə̀ nà’ tesə və̀ bohòŋwə̀ nə̀ liŋ yee də, <Yà’a ye vɛ’nə.> Yi zìnə, nə ye ŋwə̀ nə̀ aco a naaŋ tu bohòyi. Nwì à gʉ̀ bum pwe’ də yà’a yeto və bohòyi nə. ¹⁵Mʉ̀ rì ncu àwèŋ bə̀boŋ. Wèŋ ka bohòmʉ̀ fifi yeŋ, nə kà cəcuŋ sə̀’ ye. A nə boŋ ghak də wèeŋ ye lɛ mòk mʉtsətsə’rəə bòop bum sə̀ ba yè’sə. ¹⁶Nə yeè nə də wèŋ mègù yəyarə̀ fana mʉ nə te fis mak weŋ mʉ cùhu mʉ̀ fo’. ¹⁷Wèŋ sə dʉk də wèeŋ ŋgàa rɛŋsi nə ye ŋgàa ghàk də wèŋ sə kà yumok jamə̀. Wèŋ sə dʉk vɛ’nə, nə kà rì də wèeŋ co bwìŋ koksə manziŋ bohòwèŋ rì. Wèeŋ ŋgàa jìŋ, sə gi mbwè to, nə ye ŋgàa ntwì lis. ¹⁸Ye də mʉ̀ sə tip weŋ dʉk də, wèeŋ və kə ywiŋ guù sə̀ wo a tɛ̀ rɛŋsə yà’ daàŋ, daàŋ bohòmʉ̀, ya ŋga wèeŋ tse’ ghàk. Wèeŋ kə ywiŋ jəŋ cə̀ək fəfop sə̀’ bohòmʉ̀ ya ŋga wèeŋ lok marè’tu awèŋ fo’, nə ywiŋ ncə̀p sə ya ŋga wèeŋ gesə mʉlisə̀ wèŋ ya wèeŋ ye bum. ¹⁹Mʉ jwagə̀ ŋwə̀ nə̀ mʉ̀ dzəm yi, nə tʉksə sə̀’ yi nə, ya ŋga yi tse’ ŋkərə̀. Ye də wèeŋ ye cəcuŋ, nə bwi fa-a bʉp awèŋ ŋkwɛ̀ŋ. ²⁰Wèeŋ ye, mʉ̀ tə sə ncùhu, nə sə kum; a ye-a ŋga ŋwə̀ nə̀ yi yuk ŋgì àm nə muk fa mʉ ncùu sə fana, mʉ nə ni lo mʉnda’à yi anə. Mʉ ni lòmbwa, vesi zʉ be’lə bɛŋ mvwe’ mò’fis. ²¹Ŋwə̀ nə̀ yi təəŋ-a gʉgʉŋ tə̀tè nə kə ghak mə̀mumsə̀ fana mʉ nə̀ fa yi mandzə̀ ŋgòcu vesə mʉmvwe’ kapràk àm. Yi nə cum be’lə venə mvə̀’nə̀ mʉ̀ ànə ghak yàm sə̀’, nə kə cum be’lə ves Tɛ̀’ àm mʉnə kapràk ye. ²²Ŋwə̀ nə̀ yi tse’-a ntu’ ŋgòyuk bum bə zeŋ, yi yu’rə-a bum sə̀ Yòŋsə̀ Nwì sə tsə̀’ fa coos sə.>>

Jon Yə Kapràk Nwì Mʉbu

¹Yà’sə ànə ca wes me fana mʉ̀ ye fe’lə yumok sə̀mok. Mʉ̀ à yə ŋga ncùu sə̀ mʉbu mùhu nòto. Mʉ̀ yuk fe’lə ŋgì nə̀ nà’ à cèp co ntàŋ nə̀ mʉ̀ à yuk to nà’ fa’ mantombì nà’a. Yi to mʉ, nə dʉk də, <<Kok və fɛŋ ya mʉ niŋtsok fa wu bum sə̀ yà’a nə̀ kə̀ ye ntsə’mòk.>> ²Ànə geŋ Yòŋsə̀ Nwì kə kotse’ mʉ vɛ’ɛ ghà ànə. Mʉ̀ ye kapràk mʉbu anə ŋga ŋwè cu mbwa. ³Si ŋwə̀ nə̀ yi à cu mʉmvwe’ kapràk nə à sə bà’a rɛŋ kɛ’ ncòm bə̀baŋ bə fəfop wèŋ, co nsàap lìis mok sə̀ wo togə̀ yà’ də Damùn nə ye Rubì. Mvəmvòk à gʉ̀m dzòoŋ kapràk nə. Nà’ à tse’ ncòom lìs nə̀ wo togə̀ nà’ də emerà, yà’a co ncòom ŋgaŋ sə̀ fi. ⁴Mʉ̀ à yə fe’lə kapràak mok hum ba-ncòp-kwè. Yà’ à təəŋ gʉ̀m dzòoŋ gèsə lòkapràk mòk nə̀ ghaŋ nə mʉtsətsə’rə̀. Mʉ̀ ye bʉ̀ ŋkwàha bwì sə̀’ hum ba-ncòp-kwè ŋga wo nitse’ cə̀ək sə̀ fəfəp, nə cum yak mʉnə kapràak yè’sə. Wo à ta tse’ tàam ŋkum mʉtuhù wo. Tàam sə à ye sə̀ wo à gʉ̀ yà’ bə guù lòoŋ. ⁵Mbʉ̀ŋ à sə bà’a, nə sə cwiŋ və mvwe’ kapràk nə vɛ’ɛ nə̀bʉp. Mʉ̀ ye kàk sàmba ŋga yà’ sə kʉə rɛŋ mvwe’ kapràk nə vɛ’ɛ bʉ̀əmm. Kàak yè’sə à tə bə tu yòŋsə̀ə Nwì sə̀ sàmba sə. ⁶Mʉ̀ ye tə̀m mòk mantombìi kapràk nə. Tə̀m nə à sə rɛŋ vɛ’ɛ njàaŋ.

Mʉ̀ à yə fe’lə yusəmok kwè ŋga yà’ tse’ yòŋsə̀. Wo təəŋ dzooŋ kapràk nə. Wo à tse’ lis ŋkʉ̀ʉŋntɛ̀ŋ. Lis sə à ye mʉni’ì wo, ma si bə maŋkwɛ̀ŋ wèŋ pwe’. ⁷Nə̀ mantombì nə à səsə co gwim. Nə̀ ba səsə ye co ndu-mbòŋ. Nə̀ tɛ’ à tse’ si sə̀ yà’ səsə si ŋwè. Nə̀ kwè nə à səsə ye co mpì nə̀ yi sə dzòoŋ dzòoŋ. ⁸Nə̀ fòpwe’ à tse’ bàp ntùŋfu. Ni’ awo sə à ye gù liìs-lis, bə sə ŋkwɛ̀ŋ bàp mwè pwe’. Wo sə yəm ŋkì nùm bə ndzəm, nə kà teŋsə̀ lok. Wo sə yəm dʉk də,

<<Nwì, wu rərɛŋ, wu rərɛŋ, wu rərɛŋ.

Wù à ye to wù, cu ŋga’a sə̀’ wù,

Anə̀ kə̀ və̀ ntsə’mòk sə̀’ wù.

Tà mayumòk, Tà mayumòk wu Tà, Nwì nə̀ ghaŋ nə.>>

⁹Bum sə̀ kwè sə̀ wo à tse’ yòŋsə̀ sə à sə yəm ŋkì ŋgòkùksə nə sə kwasə liŋ ŋwə̀ nə̀ yi à cu mʉnə kapràk nə. Yi nə̀ yi cu mvèsə̀ nə̀ mvèsə̀. ¹⁰Wo yəm vɛ’nə fana bʉ̀ ŋkwàha bʉ̀ʉ sə̀ hum ba-ncòp-kwè sə wèŋ gbʉ sə nze, nə kuksə yi sə̀’. Wo cok noŋsə tàam awo sə mantombìi kapràk ye nə, nə sə dʉk də,

¹¹<<Mbè, Tà, nə ye Nwì,

wu kə̀kʉrə̀ bohòbwì ŋgòkùksə wu, wəp wu nə fa wu ŋàŋ.

Bʉsə̀ wù à gʉ̀ bum pwe’ wù.

Wù à tsərə kok sə̀’ wù də bum pwe’ ye.>>

Wo Sə Kùksə Mo Nsùŋgaŋ Nə̀ Yi À Lòkok Mvwe’ Kpʉ

¹Ànə geŋ, mʉ̀ ye ŋga ŋwə̀ nə̀ yi cu mʉnə kapràk nə kotse’ ŋwàk mòk bo ma zʉ. Ŋwàk nə à ye nsàp nə̀ co wù lim nà’. Wo à còm nà’ ma mʉŋkwɛ̀ŋ bə ndzə ntòpwe’fo’. Wo jəŋ lìŋ, nə lem lok nà’ bə zeŋ bòp sàmba. ²Mʉ̀ ye masinjà Nwì mòk nə̀ yi tse’ ŋàŋ, yi sə fuŋ bə ŋàŋ də, <<Ŋwə̀ nə̀ yi kʉ̀rə co yi yep fis to lìiŋ yè’e, nə firə to ŋwàk nè’e ndà?>> ³Ŋwè à ka nə̀ mò’fis mʉbu kè sə nzeŋgòŋ kè mvwe’ bʉ̀ kpʉkpʉ àlɛ nə̀ co yi muk nà’ yeŋ. ⁴Mʉ̀ à yə vɛ’nə, waŋ ko mʉ bʉ̀ʉsə̀ ŋwə̀ nə̀ mò’fis co yi muk nà’ à ka yeŋ. ⁵Fana ŋkwà’ŋwè mòk mʉtsətsə’rəə sə̀ hum ba-ncòp-kwè sə à dʉk mʉ də, <<Tsəp; kà wa bʉ̀ʉsə̀ ŋwə̀ nəmòok yo nə̀ co yi muk. Yèè, ŋwə̀ nə̀ wo to yi də Gwim nə̀ yi tesə mvwe’ bòp lak Judà, nə̀ yi ŋgwì ŋkum Devìd nà’a kə̀kʉrə̀ ŋgòyep fis lìiŋ sə, nə muk ŋwàk nə. Yi à ghak bum pwe’ yi.>>

⁶Fana mʉ̀ ye Mo Nsùŋgaŋ mòk ŋga yi tə mʉtsətsə’rə̀ə kapràk nə bə bum sə̀ kwè sə̀ wo tse’ yòŋsə̀ sə. Bʉ̀ ŋkwàha bʉ̀ʉ sə̀ hum ba-ncòp-kwè sə wèŋ təəŋ gʉm gesə lo yi mʉtsətsə’rə̀. Nsùŋga nə à sə yəəŋ co wo à zə yuk yi mantombì laŋ. Yi à tse’ ndoŋ sàmba, nə tse’ lis sə̀’ sàmba. Lis sə̀ sàmba yè’sə à sə təəŋ mʉnə tu yòŋsə̀ə Nwì sə̀ sàmba sə̀ yi à tumsə vesə yà’ sənə nzeŋgònə ma nə̀ fòpwe’ sə. ⁷Fana Mo Nsùŋgaŋ nə və, nə kə jəŋ ŋwàk nə̀ nà’ ye ndzənə bo ma zʉʉ ŋwə̀ nə̀ yi cu mʉnə kapràk nə. ⁸Yi ànə jəŋ ŋwàk nə vɛ’nə fana bum sə̀ ŋwəm kwè sə bə bʉ̀ ŋkwàha bʉ̀ʉ sə̀ hum ba-ncòp-kwè sə wèŋ bʉhʉ mantombìi yi anə sə nze. Ndàaŋwè à tse’ luŋ, nə tse’ ŋgàp nə̀ wo à gʉ̀ bə guù bə làmindà ca. Làmindàa sə à təəŋ mʉnə tu pìriyàa bʉ̀ʉ Nwì pwe’fo’. ⁹Wo à yəm ŋkì nə̀ fi. Wo sə yəm də,

<<Wu kə̀kʉrə̀ ŋgòjə ŋwàk nə, nə yep fis lìiŋ sə.

Bʉsə̀ wo à zə wu fana wù ywiŋ fa Nwì bwì sənə nzeŋgònə pwe’ nə̀ pwe’ bə kpʉ yònə.

Wù à ywiŋ və̀ wo mvwe’ bòop lak pwe’, mvwe’ ncèep lak pwe’ nə ye mvwe’ ŋgwìi bwì pwe’fo’ sə̀’.

¹⁰Wù a gʉ̀ wo ŋgòye mok mvwe’ gaŋ ŋkum Nwì, nə gʉ wo ŋgòsə fa gùrə̀ co ŋgàa fa satikà’a sə̀ ŋgòkùksə Nwì.

A sə̀’ wo sə̀ wo nə kok ŋkum sə nzeŋgòŋ anə.>>

¹¹Mʉ̀ à kʉ̀k fe’lə mok fana mʉ̀ ye masinjàa Nwì, nə yuk ŋgìi awo. Wo à ye vɛ’ɛ ncùhù malà’ co wù kà ta to. Wo à təəŋ dzòoŋ kapràk nə bə bum sə̀ ŋwəm kwè bə bʉ̀ ŋkwàha bʉ̀ʉ sə̀ hum ba-ncòp-kwè sə wèŋ pwe’ mʉtsətsə’rə̀. ¹²Wo sə yəm fuŋ fis dʉk də,

<<Oòwùu Mo Nsùŋgaŋ nə̀ wo à zə,

Wu kə̀kʉrə̀ ŋgòtse’ ŋàŋ.

Wu kə̀kʉrə̀ ŋgòtse’ ghàk

Wu kə̀kʉrə̀ ŋgòtse’ ŋkərə̀ pwe’.

Wu kə̀kʉrə̀ ŋgòtse’ yòŋ.

Wu kə̀kʉrə̀ wù co bwì pwe’ kuksə wu.

Wu kə̀kʉrə̀ co bwì kwasə wu.

Wu kə̀kʉrə̀ co liŋ yoo yam lo mantombì.>>

¹³Ànə geŋ mʉ̀ yuk ŋgìi bum sə̀ mʉbu bə sə nze nə ye sə̀ wo cu ma sə mbwè nzeŋgònə wèŋ pwe’. Mʉ̀ yuk ŋgìi bum sə̀ ma sə ndzəpə̀ bə ŋgìi bum sə̀ yà’ tse’ yòŋsə̀ ŋga wo cu-a sə̀ ma fòkè fòpwe’ nə̀ pwe’, ŋga wo sə yəm ŋkì. Wo sə yəm dʉk də,

Vès kwasə wù nə̀ wù cu mʉnə kapràk,

Nə kwasə Mo Nsùŋgaŋ nə sə̀’.

Vès kùksə wu, nə yamsə liŋ yo.

Vès sə dʉk də kapràk yònə ye gaŋ yoo mam gəgeŋ fo’ mvèsə nə̀ mvèsə̀.

¹⁴À nə ye vɛ’nə, yum sə̀ kwè sə wèŋ kwi’ də, <<A ye vɛ’nə.>> Fana bʉ̀ ŋkwàha bʉ̀ʉ sə wèŋ bʉhʉ sə nze, nə kuksə yi.

Mo Nsùŋga Nə Ye ŊgòYep Fis Lìiŋ Sə̀ Sàmba Sə

¹Ànə geŋ, mʉ̀ ye ŋga Mo Nsùŋga nə yep fis to lìŋ nə̀ mò’fis mvwe’ lìiŋ sə̀ sàmba sə. Yi à yep ntɛ̀ŋ, mʉ̀ yuk ŋgì yum sə̀ wo kwè sə mòk. Ŋgì nə à cèp bə ŋàŋ co mbʉ̀ŋ sak yi vɛ’ɛ. Nà’ cep də, <<Tesə və̀ə.>> ²Mʉ̀ ye fe’lə nàmbà’rə̀ nə̀ fəfop ŋga nà’ tesə vəə. Mʉ̀ ye ŋga ŋwə̀ nəmòk yi kok cu mʉnə nàmbà’rə̀, nə kotse’ wòmŋgiŋ ndzə bohòyi. Wo à fa yi tàm ŋwə̀ nə̀ ghaŋ mòk. Yi à lòsə̀ ŋgòghak lòmok sə̀ ŋkuŋ.

³Mo Nsùŋga nə yep fis lìŋ nə̀ ba, ŋgì yu nə̀ ba cep sə̀’. Ŋgì nə dʉk də, <<Tesə və̀ə.>> ⁴Nàmbà’rə̀ nə̀ bə̀baŋ tesə və ŋga wo fa ŋwə̀ nə̀ yi kok cu mbwa nə ŋàŋ ŋgòkə̀ jə fis lògɛsə fifi sənə nzeŋgòŋ nə ya bwìiŋ lʉlʉ̀, nə zə ni’. Yi à kotse’ fèk nə̀ ghaŋ ndzə bohòyi sə̀’.

⁵Yi yep fis nə̀ tɛ’, yu nə̀ tɛ’ cep sə̀’ də, <<Tesə və̀ə.>> Mʉ̀ ye ŋga nàmbà’rə̀ nə̀ səseŋ tesə və̀ə. Mʉ̀ ye ŋga ŋwə̀ nə̀ yi kok cu mbwa nə kotse’ kilù ndzə bohòyi. ⁶Mʉ̀ yuk gʉ̀ co ŋgì mòk cèp vèsə mvwe’ bum sə̀ kwè sə dʉk də, <<Ŋwèe nə jə mbàam sə̀ yi fàk yiskok nùmbu mò’fis, nə ywiŋ ndooŋ rɛɛ̀s tɛ’, nə jə fe’lə sə̀’ mbàam ntsə’ fàk mòk, nə ywiŋ ndooŋ gòmbì ntùŋfu.>> Yi dʉk fe’lə sə̀’ də, <<Wèeŋ kà mve’ nə ye rùk gʉ̀ bʉpsə̀.>>

⁷Fana Mo Nsùŋga nə yep fis fe’lə lìŋ nə̀ kwè. Mʉ̀ yuk ŋga yum sə̀ ŋwəm sə nə̀ kwè cèp də, <<Tesə və̀ə.>> ⁸Mʉ̀ ye nàmbà’rə̀ mòk nə̀ yi kpʉ ncòm də̀mm vɛ’. Liŋ ŋwə̀ nə̀ yi à kok cu mʉnə nàmbà’rə̀ ènə à ye də Kpʉ. Nzeŋgòŋ yòŋsə̀ə bʉ̀ kpʉkpʉ à sə bɛ’ lòŋwə̀ ènə sə̀’ maŋkwɛ̀ŋ. Wo à fa wo ŋàŋ də wo zə bwìŋ bòp mò’fis sənə bòp kwè bə bʉ̀ʉ sə̀ sə nzeŋgòŋ sə pwe’. Də wo zə wo bə fèk, nə jəŋ və njè bə yiyaŋ nə ye fe’lə bə nàam sə̀ bʉp sə̀ co yà’ ko bwìŋ.

⁹Yi yep fe’lə lìŋ nə̀ tàŋ nə. Mʉ̀ ye yòŋsə̀ə bʉ̀ʉ sə̀ wo à zə wo də bʉ̀ʉsə̀ wo à dzəm Nwì bə zìnə, nə sə tsoho ncèp ye nə wèŋ. Yòŋsə̀ə bʉ̀ʉ yè’sə à ye ma sənə mbwè kàm nə̀ wo fagə̀ satikà’ bohòNwì fo’. ¹⁰Wo à wa furə fis bə ŋàŋ də, <<Oò, wùu Nwì Tà nə̀ wù tse’ bwìŋ pwe’ wù. Wu rərɛŋ nə ye zìnə. Wù sə dʉk də vèes nə cum mali fɛn, nə kə dzeŋ sèŋ ŋkuŋ ya ŋga wu nə sak bʉ̀ʉ sə̀ sə nzeŋgòŋ sə̀ wo à zə ves yà’a, nə tʉksə wo-ɛ?>> ¹¹Ànə geŋ, wo fa cə̀k nə̀ fəfop bohòndàaŋwè pwe’ bə tu. Wo tsok fa fe’lə yà’ sə̀’ də, yà’a cum yoŋsə tse’ ntòvɛ’nə bʉ̀ʉsə̀ wo ka pwe’fo’ ntòme wes. Wo də bwema yà’wèŋ mok sə̀ wo sə fàk lo’ bohòNwì cu lì sə̀ nzeŋgònə nə zə wo sə̀’ ŋkuŋ.

¹²Mʉ̀ ye fe’lə ŋga Mo Nsùŋga nə yep fis lìŋ nə̀ ntùŋfu nə. Mʉ kʉk à, ŋga nzeŋgòŋ sə tsòho vɛ’ɛ bə ŋàŋ wù kà fʉ̀k. Nùm seŋ bʉʉŋ bìp, bìp, bìp co gàcə̀k nə̀ səseŋ. Ŋwə baŋ bʉʉŋ ye co ndʉəm jwaàŋ. ¹³Ŋkə̀ŋkàŋ sə coho gbʉ tsoŋ mʉbu co bwe ŋgwìi piàa sə yè’ wo. ¹⁴Ŋgùp ntòbu à nòm bisə vɛ’ɛ ywep kɛ̀’ mò’fis, co wo lim gɛsə kəà. Nda pwe’fo’ nə ye bə nze sə̀ yà’ à ye mʉtsətsə’rəə ndzəp pwe’, à coho gɛsə fo’. ¹⁵Bwìŋ pwe’ à sòbo bə caŋ ŋgòkə̀ swìhi. Ŋkəŋkum wèŋ, bʉ̀ ŋkwàha bwìŋ wèŋ, ŋkum sojà wèŋ, ŋgàa ghàk nə ye bə bʉ̀ʉ sə̀ wo tse’ liŋ wèŋ, ŋkwɛ̀ŋ bə bwe nze wèŋ pwe’ à ca swìhi. Mok à ca ni sənə mvòk, mok swìhi nooŋ kɛ’ bə mbwèe lìs wèŋ nduk. ¹⁶Wo waŋ to nda bə lìs wèŋ də yà’a kə kəəŋ gbʉ mʉ ni’ì wo ya ŋwə̀ nə̀ nà’ cu mʉnə kapràk nà’a kà wo yə, ya wo caŋ gɛsə mvwe’ ŋgə’ nə̀ Mo Nsùŋga də yi fa wo nə sə̀’. ¹⁷Bʉsə̀ mvə̀k awo ŋgòjòok və̀ laŋ, ŋgà mù’ cùu nə kà ye.

Wo Naaŋ Fa Bʉ̀ʉ Izùrɛ Wèŋ Mok Ncòom Nwì

¹Yà’sə ànə me fana mʉ̀ ye masinjàa Nwì kwè ŋga wo tə mvwe’ tò’o nzeŋgòŋ kwè fo’. Wo à sə təəŋ fo’, nə sə kotse’ fəsə fə̀fə̀ə sə̀ bə tò’o nzeŋgòŋ sə̀ kwè sə də ya yà’a kà cà. Fə̀fə̀ à sə kà mʉmvwe’ nze nə cà, kà mʉ ndzəpə̀ sə̀’ cà, nə kà mʉ tʉhʉ̀ sə̀’ cà lok. ²Fana mʉ̀ ye fe’lə masinjà Nwì mòk nə̀ yi ànə tesə və ma ntonùm. Yi à kotse’ yu nə̀ ŋgòbɛ̀ŋbo bə zeŋ ndzə bohòyi. À ye yu bɛŋbo nə̀ Nwì nə̀ yi cu ŋwəm nə. Masinjà Nwì nə à to fuŋ masinjàa mok sə̀ kwè, sə̀ Nwì anə fa wo ŋàŋ ŋgòbʉpsə nzeŋgòŋ, nə ye ŋgòbʉpsə ndzəp sə̀’. ³Yi tsok fa yà’wèŋ də yà’a kà nzeŋgòŋ kè ndzəp àlɛ ntòbʉpsə̀. Yi də yà’a yuk tə̀tè tse’ŋga wo còm naaŋ fa wes ŋgàa fàak Nwì wèŋ ncòm mʉ nzà sihì ŋkuŋ. ⁴Ànə geŋ mʉ̀ yuk mvə̀’nə̀ wo tsə̀’ də a bwì sʉ̀nɛ sə̀ wo tse’ ncòom yè’sə mʉsihì wo sə. Wo à dʉk də a bwì ncùhù ŋkʉ̀ mò’fis bə ncùhù hum kwè-ncòp-kwè, sə̀ wo à tesə mvwe’ buhu lak Izùrɛ mò’fis, mò’fis. ⁵Bʉ̀ʉ sə̀ wo à naaŋ fa wo ncòm mvwe’ buk lak Judà à ye bwì ncùhù hum-ncòp-ba. Buk lak Rubè à ye ncùhù hum-ncòp-ba. Buk lak Gaàd à ye ncùhù hum-ncòp-ba. ⁶Buk lak Asà à ye ncùhù hum-ncòp-ba. Buk lak Naptalè à ye ncùhù hum-ncòp-ba. Buk lak Manasà à ye ncùhù hum-ncòp-ba. ⁷Buk lak Saimʉ̀ à ye ncùhù hum-ncòp-ba. Buk lak Levì à ye ncùhù hum-ncòp-ba. Buk lak Ìzakà à ye ncùhù hum-ncòp-ba. ⁸Buk lak Zebulòà ye ncùhù hum-ncòp-ba. Buk lak Jòsep à ye ncùhù hum-ncòp-ba, nə ye mvwe’ buk lak Benjamè sə̀’ bwì ncùhù hum-ncòp-ba.

Bwì Co Wù Kà Ta To Sə Kùksə Nwì

⁹Yà’sə à mèe, mʉ̀ ye fe’lə bwì vɛ’ɛ nduk nə̀ nduk co ŋwè kà ta to. Bʉ̀ʉ yè’sə wèŋ à tesə və̀ mvwe’ bòop lak pwe’, mvwe’ ncèep lak zəzok nə ye mvwe’ ŋgwìi bwì pwe’fo’ sə̀’. Wo à sə təəŋ mantombìi kapràk Nwì nə ŋga nsùŋgaŋ nə sə̀’ fo’. Wo à nitse’ cə̀ək sə̀ fəfəp, nə kotse’ maŋ ndzə bohòwo lòoŋ. ¹⁰Wo à sə fu torə fis mʉtsə̀ dʉk də,

<<Nwì àvès nə̀ yi cu mʉnə kapràk ye nə a fa ves lùŋ yi.

Yi fa càsə ves nà’ ndzə bohòMo Nsùŋgaŋ nə.>>

¹¹Masinjàa Nwì pwe’ à təəŋ dzòoŋ gèsə lòkapràk nə, bə yum sə̀ kwè sə wèŋ nə ye bʉ̀ ŋkwàha bwì sə wèŋ mʉtsətsə’rə̀. Fana masinjàa sə pwe’ bʉhʉ sə nze, nə kuksə Nwì. ¹²Wo sə dʉk də,

<<A ye vɛ’nə.

A yi Nwì àvès nə nə̀ yi kə̀kuk.

A kwasə yi, yi tse’ ŋkərə̀ pwe’ yi.

A gurə kuksə yi, yi tse’ ŋàŋ pwe’.

Liŋ yee yam lo mantombì, gaŋ ye kà lə̀ yuk.

Yà’a ye vɛ’nə.>>

¹³Ŋkwà’ ŋwə̀ mòk mò’fis à fek mʉ dʉk də, <<Wù rì nsàp bʉ̀ nə̀ wo nitse’ cə̀ək sə̀ fəfəp yè’e, nə riŋ mvwe’ sə̀ wo və̀ə à?>> ¹⁴Mʉ̀ dʉk fa yi də, <<Pàpa mʉ̀ ka riŋ, tsok fa mʉ.>> Yi dʉk mʉ dʉk də, <<Bʉ̀ʉ sə̀ wù sə yə wo yà’a, a wo sə̀ wo à təəŋ, nə ca tesə bə mvə̀k ŋgə’ nə̀ bʉp nà’a. Wo à cùk fopsə cə̀ək awo yà’a bə ndʉəm Mo Nsùŋgaŋ nə. ¹⁵Nà’a njo nə̀ wo tə mantombìi kapràk Nwì nùm bə ndzəm, nə sə kuksə yi mʉnda’à yi sə. Ŋwə̀ nə̀ yi cu mʉ kapràak nà’a, yi nə ye bə yà’wèŋ nùumbu pwe’, yumok kà wo gʉ̀. ¹⁶Njè bɛŋ bə njè ndzəp nə kà wo mok ya yuk fe’lə̀, nùm kà wo mok sə̀’ to tɛ̀ŋ barə̀ yuk. ¹⁷A nə ye vɛ’nə bʉ̀ʉsə̀ Mo Nsùŋgaŋ nə̀ yi mʉtsətsə’rə mvwe’ kapràk nà’a, yi nə ye co ganakù’ àwo yi. Yi nə gʉmsə lo yà’wèŋ mvwe’ ndzəp nə̀ nà’ tse’ lùŋ, wo no. Nwìi nə yisə fis fa wo ndzəplis awo mʉ lisə̀ wo pwe’.>>

Mo Nsùŋgaŋ Nə Yep Fis Lìŋ Nə̀ Sàmba Nə

¹Yà’sə à cà gɛsə, mʉ̀ ye ŋga Mo Nsùŋga nə yep fis lìŋ nə̀ sàmba nə. Yi à yep nà’ fana bum pwe’ dʉk dok. Ŋwè kà kwis, kwis lok tə̀tè kə dzeŋ mvə̀k mom sə̀sap ntɛ̀ŋ. ²Fana mʉ̀ ye ŋga’a masinjàa Nwì sə̀ sàmba sə ŋga wo tə mantombìi Nwì. Wo à fa wo pwe’fo’ ntàŋ mò’fis, mò’fis. ³Masinjà Nwì mòk à və̀ kə̀ təəŋ mvwe’ kàm nə̀ wo fagə̀ Nwì satikà’ fo’. Yi à kotse’ tasà nə̀ wo à gʉ̀ nà’ bə guù ndzə bohòyi. Wo à fa yi làmindà ŋkʉ̀ʉŋ də yi tɛŋ torə be’lə yà’ bə pìriyàa bʉ̀ʉ Nwì wèŋ, mʉmvwe’ kàm nə̀ wo fagə̀ Nwì satikà’ mbwa nə. Wo à gʉ̀ kàm nə̀ nà’ tə kə̀ mantombìi Nwì nə bə guù. ⁴Ndindi làmindàa sə à lòkok be’lə lòmʉtsə̀ bohòNwì bə pìriyàa bʉ̀ʉ sə wèŋ, ndzə bohòmasinjà Nwì nə. ⁵Fana masinjà Nwì nə cup jəŋ mis mvwe’ kàm nə. Yi naaŋ mis sə mʉnə tasà nə, nə mak tsooŋ vesə yà’ sə nzeŋgòŋ. Mvə̀’nə̀ yi à màk tsoŋ yà’ ntɛ̀ŋ mbʉ̀ŋ ba’a lìɛŋ, nə sa’rə nə̀ bʉp fana nzeŋgòŋ nə tsoho.

Ntàaŋ Sə̀ Kwè Sə̀ Mantombì Sə

⁶Yà’sə à càa, masinjàa Nwì sə̀ wo sàmba sə wèŋ à fʉ̀hʉ ŋgòfʉəp ntàaŋ sə̀ wo kotse’ sə.⁷Masinjà nə̀ mantombì à fʉəp nə̀ nje. Mʉ̀ ye ŋga ŋgwìŋ sə̀ wo tòrə yà’ bə mis nə ye ndʉəm gbʉ̀ tsoŋ sə nze. Nzeŋgònə sə, co wo à gàpsə-a nà’ bòp tɛ’, ye də sə fis bòp mò’fis. Tʉ sə̀ nzeŋgònə à sə wes sə̀’ co bòp mò’fis sənə bòp tɛ’ sə̀’. Ŋgaŋ sə̀ sə nzeŋgòŋ nə pwe’ à sə sə̀’ vɛ’nə.

⁸Ànə geŋ, masinjà nə̀ ba fʉəp ntàŋ nə̀ nje nə sə̀’. Mʉ̀ ye yumòk co nda vɛ’ɛ ŋga nà’ sə kʉə bə mis. Wo jəŋ nà’, nə kə mak gesə sə ndzəpə̀ pwòò. ⁹Mʉ̀ ye ŋga wo à gàpsə-a ndzəp pwe’fo’ bòp tɛ’, ye də bòp mò’fis à bʉ̀ʉŋ wes ndʉəm pwe’. Bum sə̀ yà’ tse’ yòŋsə̀ sə ndzəpə̀ pwe’, bòp mò’fis sənə sə̀ tɛ’ à kpʉ wes sə̀’. Fana bòp ŋgwes tosə̀ ndzəp mò’fis sənə sə̀ tɛ’ à bʉp wes sə̀’.

¹⁰Masinjà nə̀ tɛ’ à fʉəp nə̀ nje. Ŋkə̀ŋkàŋ mòk nə̀ ghaŋ nə̀ nà’ à sə kʉə co kàk à yəəŋ mʉbu. Nà’ à tsə mbwa, nə kə gbʉ mʉ ndzəpə̀, nə ye mvwe’ bwe ndzəp tesəgə̀ sə̀’. Wo à gàpsə-a ndzəp pwe’ bòp tɛ’, ye də yi à gbʉ̀ mʉnə bòp nə̀ mò’fis. ¹¹Liŋ ŋkə̀ŋkàŋ nə à ye də Cʉcʉk. Nà’ à gbʉ̀ʉ, bòp ndzəp nə̀ mò’fis sənə bòp tɛ’ à cʉk bʉp wes pwe’. Bʉ̀ʉ sə̀ wo à no ndzəp nə à kpʉ vɛ’ɛ wùriŋ.

¹²Masinjà nə̀ kwè fʉəp ntàŋ nje. Yi à fʉəp, yà’ ko tiŋ fis nùm ma bòp mò’fis sənə bòp tɛ’, nə ye ŋwə sə̀’ vɛ’nə. Yà’ à ko ŋkə̀ŋkàŋ sə̀’ bòp mò’fis sənə bòp tɛ’. À nə ye vɛ’nə fana bòp marɛŋ àwo sənə sə̀ tɛ’ à liiŋ. Maràŋ bə nə̀ ndzəmə̀ pwe’, marɛŋ à ka yeŋ mvwe’ bòp mò’fis sənə tɛ’. ¹³Mʉ̀ à kʉ̀k fe’lə, mʉ̀ ye ŋga mpì mòk sə dzòoŋ mʉbu sə̀sap. Yi kɛ’ dʉksə ŋgùŋ dʉk də, <<Ghʉghi’, ghʉghi’, ŋgə’ èè. A nə ye ŋgə’ nə̀bʉp bohòbʉ̀ʉ sə̀ wo cu sə nzeŋgòŋ, ghà nə̀ ŋga wo yuk mvə̀’nə̀ masinjàa sə̀ wo bwehe cu tɛ’ yà’a fʉəp ntàaŋ awo.>>

Ntàŋ Nə̀ Tàŋ Nə

¹Ànə geŋ, masinjà nə̀ tàŋ fʉəp ntàŋ nje. Mʉ̀ ye ŋga ŋkə̀ŋkàŋ mòk gbʉ̀ tsoŋ mʉbu. Wo à fa ki sə̀ ŋgòmùk ncùu wʉ sə̀ yà’a kà lə̀gə̀ yà’a bohòyi. ²Ŋkə̀ŋkàŋ nə à mùk ncùu sə fana ndindi kok ca sik, sik, sik co wo tɛ̀ kòp nə̀ ghaŋ. Ndindi sə à sə lòmʉbu, nə kə lok nùm bə ntòbu nə pwe’ mpaaŋ. Maràŋ bʉʉŋ co a ndzəmə̀. ³Ŋgwim à tesə tsoŋ mʉmvwe’ ndindi sə vɛ’ɛ wùriŋ, nə kə lok nzeŋgòŋ pwe’. Wo gʉŋ bə nsàp ŋàŋ mòk vɛ’ɛ co nsàp ŋgam mòk nə̀ wo togə̀ nà’ də sə̀kopiyònà’a. ⁴Wo à tipsə ŋgwim sə də, yà’a kà bum sə̀ yà’ to tesə kok ma sə nze nə̀ mò’fis zʉ bʉpsə̀ lok. Wo də yà’a tʉksə megu bʉ̀ʉ sə̀ yà’wèŋ ka ncòom Nwì mʉ nzà sihì wo tse’. ⁵Ka də ŋgwim sə zə bʉ̀ʉ yè’sə wèŋ sə̀’ yeŋ. Wo tʉksə yà’wèŋ, nə fa wo ŋgə’ mʉnə ŋwə tàŋ. Ŋgə’ nə̀ wo yeŋsə fa bʉ̀ʉ yè’sə nə, aco sə ta wo sə̀kopiyòvɛ’ɛ. Sə̀kopiyòo nə ta-a ŋwè, nà’ yaaŋ cep casə mvə̀’nə̀ nu tagə̀ ŋwè. ⁶Mʉnə ŋwə sə̀ tàŋ yà’sə, bwìiŋ nə lap kpʉ bʉ̀ə̀. Bwìŋ nə dzəm vɛ’ɛ wùriŋ də kpʉ ko gɛsə lo wo, kpʉ kà wo sə̀’ ko.

⁷Ŋgwim sə à səsə co nàambà’rə̀ sə̀ wo fʉ̀hʉ yà’ ŋgòkə̀ màk dzè’ fo’. Yumok ye mʉtuhù wo co tàm ŋkum nə̀ wo gʉ̀ bə guù. Si awo à səsə si ŋwè. ⁸Nʉ̀əmtu awo à ye co nʉ̀əmtu bə̀ba; nzòŋ awo cəp co nzòoŋ gwim. ⁹Wo à təhə lok ŋgùuŋ awo bə bap yumok co ntɛŋ, fana mvə̀’nə̀ wo à sə dzòoŋ, bàap awo sə cwiŋ co bòp nàambàrə̀ sə sə̀ lòyu nə̀ wo togə̀ nà’ də cariyònà’a mvwe’ dzè’. ¹⁰Wo à tse’ ntə̀ŋsə̀ sə̀sap co ntə̀ŋsə̀ sə̀kopiyò. Wo à sə ta tʉksə bwì mʉnə ŋwə sə̀ tàŋ sə bə ntə̀ŋsə̀ə yè’sə. ¹¹Ŋkum awo nə̀ yi tse’ wo nə, a masinjà nə̀ yi tse’ ŋàŋ bə wʉ sə̀ yà’a kà lə̀gə̀ sə. Bʉ̀ʉ Jus wèeŋ to yi bə ncèep lak awo də Abadòŋ fana bʉ̀ʉ Gris wèŋ to yi yàwo də Àpoliyòŋ. Liŋ ye yè’sə dʉk də, Ŋgà bʉpsə̀ bum. ¹²Yà’a mvə̀’nə̀ ŋgə’ nə̀ mò’fis lə̀ tə vɛ’nə. Cu malì ŋgə’ ba sə̀ yà’a nə və ŋkuŋ.

Ntàŋ Nə̀ Ntùŋfu Nə

¹³Ànə geŋ, masinjà Nwì nə̀ ntùŋfu nə fʉəp ntàŋ nə̀ nje. Yi à fʉəp, mʉ̀ yuk ŋga ŋgì mòk sə tesə və̀ mvwe’ njoŋ gʉəp sə̀ kwè, sə̀ kàm nə̀ wo à gʉ̀ nà’ bə guù nə; kàm nə təəŋgə̀ mantombìi Nwì. ¹⁴Ŋgì nə dʉk fa masinjà nə̀ ntùŋfu nə̀ yi tse’ ntàŋ ndzə bohòyi nə də, <<Fìŋ mè’rə masinjàa mok sə̀ kwè sə̀ wo à kì nòŋsə wo mvwe’ ndzəp Yufèretìs yà’a.>> ¹⁵Wo fiŋ me’rə wo ya wo lo kə zə wes bòp bwì mò’fis sənə bòp tɛ’. Wo à kì nòŋsə wo ŋgòtək mvə̀k ànə, sənə nùmbu ànə, bə ŋwə ànə sənə ŋkà’ŋgòŋ ànə. ¹⁶Bʉ̀ʉ mok à ye ŋgàa ko’ nàambà’rə̀ sə̀’. Wo tsok mʉ də bʉ̀ʉ sə̀ wo kok yàwo nàambà’rə̀ pwe’ à ye malà’ ŋkʉ̀ ba. ¹⁷Sə̀’ mvə̀k ànə mʉ̀ ye mali nàambà’rə̀ə sə bə bʉ̀ʉ sə̀ wo a kok yà’ sə sə̀’. Wo à nitse’ ntɛŋ mok mʉŋgùu wo, yà’ sə baŋ co mis, nə sə seŋ co nswɛŋbʉ, nə sə barə co ni’ ndu tə̀tàm sə̀’. Nàambà’rə̀ sə à tse’ tu awo co tu gwim. Wo nɛ̀ cù, mis bə ndindi nə ye zok ŋkàŋ sə rəm duk tesə kwàa nə̀bʉp. ¹⁸Bum sə̀ tɛ’ sə̀ yà’ à sə tesə kə cùhu yè’sə, a zeŋ sə̀ yà’ à zə wes bòp bʉ̀ nə̀ mò’fis sənə bòp tɛ’ sə. ¹⁹Ŋàaŋ nàambà’rə̀ sə à ye kə̀ cùhu bə mà ntə̀ŋsə̀ə wo. Ntə̀ŋsə̀ə awo sə à ye co tu no vɛ’ɛ. Wo à sə tʉ̀ksə bwì bə nsàp ntə̀ŋsə̀ ànə vɛ’nə.

²⁰Bʉ̀ʉ sə̀ wo à ka yàwo sənə ŋgə’ ènə kpʉ, à ka ntʉm awo kupsə. Wo à sə kùksə malì yòŋsə̀ə ze’ nə ye bum lak co rùm sə̀’. Wo à jə ntɛŋ co guù, bə sivà nə ye bron wèŋ, nə gʉ rùum sə fo’. Bʉ̀ʉ mok gʉ yàwo bə lìs, mok gʉ bə tʉ sə̀’. Wo à sə kùksə bum sə̀ wà yè’sə vɛ’nə ŋga kaco yà’ ye bum yeŋ, nə kà bum sə̀’ yuk, nə kà sə̀’ gì. ²¹Wo à ka də wo kupsə ntʉm awo nə kà bwì mok zə sə̀’ dʉk. Wo à sə tesə malì rʉ̀m fo’, sə ko sàhà, nə sə yəyə̀.

Masinjà Nwì Mòk Jə Və̀ Mʉŋwàk Mòk

¹Mʉ̀ à yə fe’lə ma ŋkʉ̀ŋkʉ̀m masinjà Nwì mòk ŋga yi tsə mʉbu. Cə̀k nə̀ yi à nitse’ mʉ ni’ì yi, à ye mbàk, fana mvəmvòk naaŋ dzooŋ yak mʉ tuhù yi. Si ye sə kʉə co nùm, kùu ye ye co a ntseŋ mis nə̀ ghaŋ. ²Yi à mùk tse’ mʉŋwàk mòk nə̀ jo vɛ’ɛ ndzə bohòyi sə̀’. Yi à təəŋ, yi tes kùu ye sə̀ ma màk mʉ ndzəpə̀, nə tes sə̀ ma ŋkwìp mʉ ŋkà’a. ³Yi à to fuŋ bə ŋgì nə̀ ghaŋ co gwim sə cwì yi vɛ’ɛ. Mvə̀k nə̀ yi à to vɛ’nə, mbʉ̀ŋ sak kɛ̀’ sàmba ŋgòdzəm fəsə fa yi. ⁴Ŋgìi mbʉ̀ŋ sə̀ sàmba sə à sa’ vɛ’nə fana mʉ̀ də mʉ com bum sə̀ wo cèp sə. Ŋgì mòk cep vesə bohòmʉ̀ mʉbu də, <<Kà yà’ còm, ya ŋwèe kà yà’ rì. Yà’a cum swihi vɛ’nə.>>

⁵Ànə geŋ, masinjà nə̀ yi nə tes kù ma mòk sə ndzəpə̀, nə tes mòk mʉ ŋkà’a nə fis tse’ kok bo ye sə̀ ma màk mʉtsə̀, ⁶nə kɛŋ bə liŋ Nwì nə̀ yi cu ŋwəm nə. Yi à kɛ̀ŋ Nwì nə̀ yi à gʉ̀ ntòbu, gʉ nzeŋgòŋ nə gʉ ndzəp, nə ye bə bum sə̀ yà’ cu sənə bum yè’sə pwe’fo’. Yi də, <<Mvə̀k ka ŋgòcàsə mok yeŋ. ⁷Mvə̀k nə̀ masinjà nə̀ sàmba nə fʉəp ntàŋ nje, fana bum sə̀ Nwì à sə fʉ̀hʉ swìhi yà’a nə tesə və jəja fana yi gʉ wesə yusə̀ yi à sə dzəm ŋgògʉ̀ʉ sə. Yà’a nə ye megu mvə̀’nə̀ yi tsə̀’ fa ŋgàa tsòhòbum Nwì wèŋ sə.>>

⁸Mʉ̀ yuk fe’lə ŋga’a ŋga ŋgì nə̀ nà’a nə cep to mantombì fa’ mʉbu cèp bohòmʉ̀ də, <<Dù, nə kə jəŋ mʉŋwàk nə̀ ndzə bohòmasinjà Nwì, nə̀ yi mùk tse’ nà’, nə tes kù ma mòk sə ndzəpə̀ ma mok mʉ̀ ŋkà’a nà’a.>> ⁹Fana mʉ̀ kə dʉk fa masinjà nə də yi fa mʉ ŋwàk nə. Yi dʉk mʉ də, <<Kòzʉ. Nà’a nə ye kə cùhu wù lʉ̀lʉm co nu, nə ye sə və̀ə wù bʉp.>> ¹⁰Mʉ̀ à jə ŋwàk nə, nə zʉ nà’. Nà’ ye kə̀ cùhu mʉ̀ anə lʉ̀lʉm. Mʉ̀ à mì gèsə nà’ sə və̀ə, nà’ kə ye ca bʉp. ¹¹Wo à tsə̀’ fa fe’lə mʉ də, <<Nwìi nə gʉ mali wu ŋgòrì bum ye mok ŋga wu tsoho yà’. Bum sə nə ye bə liŋ tò’o lak wùriŋ, nə ye bə bòop bʉ̀ʉ sə̀ wo tse’ ncèp zəzok, nə ye ŋgwìi bwì sə̀’ wùriŋ bə ŋkəŋkum awo sə̀’.>>

Bwì Ba Sə Tsòho Ncèp Nwì

¹Ànə geŋ, wo fa mʉ rə̀rəŋ mòk nə̀ wo fʉ̀kgə̀ bum bə zeŋ, nə dʉk mʉ də, <<Dù, nə kə fʉk ja’a ndap Nwì nə̀ ghaŋ nə bə zeŋ, nə fʉk kàm nə̀ wo fagə̀ Nwì satikà’ mbwa nà’a sə̀’.>> Wo à tsə̀’ mʉ sə̀’ də mʉ fʉk wes, mʉ̀ taŋ bʉ̀ʉ sə̀ wo cu mbwa ŋgòkùksə Nwì sə̀’ pwe’. ²Nə kà mvwe’ sə̀ yà’a ma sə mbiŋ yà’a fʉ̀k. Wo də mʉ me’rə yà’sə vɛ’nə bʉ̀ʉsə̀ yà’a mvwe’ sə̀ wo à mè’rə fa fo’ bohòbʉ̀ lakmvum. Wo nə gi nəŋ ntʉm lak nə̀ rərɛŋ anə mʉnə ŋwə hum kwè-ncòp-ba. ³<<Mʉ nə tumsə bʉ̀ʉ am bwìŋ ba, wo nə nitse’ gàa cə̀ək sə̀ wo wagə̀ kpʉ bə zeŋ yà’a. Mʉ nə fa wo ŋàŋ ŋgòtsòho ncèp Nwì mʉnə nùumbu ncùhù mò’fis bə ŋkʉ̀ ba, bə hum ntùŋfu.>>

⁴Bʉ̀ʉ sə̀ ba yè’sə, wo yà’sə co nsàp tʉ nə̀ yi zəmgə̀ ŋgwì wo sə to nà’ də Olìp nà’a. Wo ye fe’lə sə̀’ bwe teberə̀ə laàm sə̀ ba sə̀ yà’ tə mantombìi Tà nə̀ yi tse’ nzeŋgòŋ yi nə. ⁵A ye-a ŋga ŋwə̀ nəmòok dʉk-a də yi gʉ wo bʉp, mis tesə kə̀ cùhu wo, nə tɛŋ vəpsə bʉ̀ʉ sə̀ wo də wo gʉ bʉp sə. A nə ye yà’sə mok vɛ’nə də ŋwə̀ nə̀ yi dʉk-a də yi gʉ wo bʉp pwe’, ŋgə̀ŋgàŋ kpʉ megu kpʉ. ⁶Mvə̀’nə̀ wo nə sə tsoho ncèp nə̀ Nwì nə fana, wo nə tse’ ŋàaŋ sə̀ aco wo lok ntòbu, mbʉ̀ŋ kà li. Wo nə tse’ ŋàaŋ sə̀ ŋgògʉ̀ ya ndzəp pwe’ bʉʉŋ wes ndʉəm sə̀’. Wo nə tse’ ŋàaŋ sə̀ aco wo to və nsàp ndònə̀ wo dzəm pwe’ sə nzeŋgòŋ anə. ⁷Wo tsòho wes ncèp nə fana nàm ŋgaŋ nə̀ bʉp nə̀ yi cu sənə wʉ sə̀ yà’ kà lə̀gə̀ nə nə tesə və, bə yà’wèŋ lʉ. Nàm ènə nə ghak wo, nə zə wo. ⁸Vèeŋ ni’ awo sə nə nooŋ sə ntòmandzə̀ lak sə̀ wo tɛ’lə Tà àwo fo’ mʉntə̀əŋ sə. Wo a to fa lak yà’sə liŋ ŋgònìtsə̀’ mvə̀’nə̀ yà’ cu dʉk də lak Sodòm bə lak Ijìp. ⁹Bwìŋ nə tesə və mvwe’ bòop lak sə̀ sənə nzeŋgòŋ nə pwe’ nə̀ pwe’, lak nə̀ mò’fis nə kà bwehè cu. Wo nə və, nə kə kʉk ja’a vèeŋ ni’ bʉ̀ʉ yè’sə mʉnə nùumbu tɛ’ bə bwes, nə kà dzəm də ŋwèe tuuŋ yà’ dzəm. ¹⁰Bwe nzeŋgòoŋ nə kwa kpʉ bʉ̀ʉ sə̀ ba yè’sə vɛ’ɛ wùriŋ. Wo nə kaŋ kpʉ sə, nə sə fa kɛ’ bwì bum wà nduk nə̀ nduk. Wo nə sə kwa vɛ’nə də bʉ̀ʉsə̀ yà’ à sə tsòho ncèp Nwì, ncèp nə sə jə və fa wo ŋgə’ wùriŋ.

¹¹Nùumbu sə̀ tɛ’ bə bwes sə à càa, Nwì yoŋsə gesə fa wo yòŋsə̀, wo yəəŋ fəsə sə̀mok. Mvə̀’nə̀ wo à lòkok, wʉə ko bʉ̀ʉ sə̀ wo à yə wo sə vɛ’ɛ nə̀bʉp. ¹²Ànə geŋ, bʉ̀ʉ sə̀ ba yè’sə yuk ŋga ŋgì ŋwə̀ mòk sə to vèsə wo mʉbu bə ŋàŋ dʉk də, <<Wèeŋ kok və mbwinə.>> Bʉ̀ʉ sə̀ ba sə wèŋ à lòkok lòmʉbu ndzənə mbàk ŋga bʉ̀ʉ sə̀ wo sə bɛ̀ŋ yà’ sə wèŋ sə yə bə lis. ¹³Mvə̀k ànə à ye ntɛ̀ŋ fana nzeŋgòŋ tsoho bə ŋàŋ wùriŋ. Lak sə̀ wo à ye fo’ sə, bòp nə̀ mò’fis sənə bòp hum à kə̀əŋ gbʉ̀ bʉp wes pwe’. Nà’a kə̀əŋ vɛ’nə, nə zə bwì ncùhù sàmba. Bwees bʉ̀ʉ mok sə̀ wo à bwehe cu sə à wəp vɛ’ɛ wùriŋ fana wo kuksə nə yamsə liŋ Nwì nə̀ mʉbu nə. ¹⁴Yà’a mvə̀’nə̀ ŋgə’ nə̀ ba nə lə̀ tə vɛ’nə. Ŋgə’ nə̀ tɛ’ nə və mali mvə̀k ghàr.

Ntàŋ Nə̀ Sàmba Nə

¹⁵Masinjà nə̀ sàmba à fʉəp ntàŋ nə̀ nje nə fana mʉ̀ yuk ŋga ŋgìi bwì sə cèp vèsə mʉbu. Ŋgìi sə sə cep bə ŋàŋ dʉk də,

<<Mvə̀k kə̀ dzèŋ laŋ nə̀ Tà Nwì àvès bə Krɛst nə̀ yi ànə tumsə lo nà’ sə nzeŋgòŋ nə kok gaŋ nzeŋgòŋ nə laŋ.

Wo nə cum maligeŋ ŋkum mok wo mvèsə̀ nə̀ mvèsə̀.>>

¹⁶Ànə ye vɛ’nə fana, bʉ̀ ŋkwàha bʉ̀ʉ sə̀ hum ba-ncòp-kwè, sə̀ wo cu mʉnə kapràk sə wèŋ gbʉ sə nze mantombìi Nwì, nə kuksə yi. ¹⁷Wo dʉk də,

<<Wùu Nwì Tà, nə̀ wù tse’ ŋàŋ pwe’,

Wù à ye to mantombì wù, cu malì ŋga’a sə̀’ wù.

Vès kwasə wùriŋ mvə̀’nə̀ wù a jə ŋàaŋ yo sə̀ yà’ yam vɛ’ɛ sə, nə kotse’e nə nzeŋgòŋ nə bə zeŋ.

¹⁸Bwe nzeŋgòŋ a sə jòk bohòwù,

Fana mvə̀k njòŋgòjòok kʉ̀rə̀ə nə sə̀’ nə̀ wu nə sak bʉ̀ kpʉkpʉ.

A sə̀’ mvə̀k nə̀ wu nə lak ŋgàa fàha yo sə̀ wo à sə tsòho ncèp yònə.

Wu nə lak bʉ̀ʉ yo pwe’fo’, ŋkwàha bwì nə ye bweŋke’ sə̀’.

Nè’e sə̀’ mvə̀k nə̀ wu nə bʉpsə bʉ̀ʉ sə̀ wo à sə bʉpsə nzeŋgòŋ nə.>>

¹⁹Wo à cèp wes vɛ’nə fana ndap Nwì muhu nooŋ mʉ ntòbu to. Mʉ̀ ye casə gèsə lo ŋkùp nə̀ nà’ tə mʉnə tu rʉ̀k nə̀ Nwì à zʉ bə bʉ̀ʉ ye nə mbwa. Fana mbʉ̀ŋ sə ba’a, nə sə cwiŋ. Nzeŋgòŋ à tsòho, ŋgwìŋ sə gbʉ yɛ’ tsooŋ sə̀’ nə̀bʉp.

Jon Yə Ŋwà Nəmòk Nə Ye Bə Ŋòroŋ

¹Ànə geŋ nsàp yumòk yəəŋ mʉbu nə̀ nà’ ghak mʉ mʉtuhù. Ŋwà nəmòk, ŋga yi nitse’ nùm mʉ ni’ì yi, nə nəŋ tes kùu ye mʉ nə ŋwʉ. Yi ta tse’ tàm ŋkum bə ŋkə̀ŋkàŋ mbwa hum-ncòp-ba. ²Mvə̀k à kʉ̀rə yi də yi dzə mwe, fana yi sə waŋ torə fis ŋga mo nə sə lum yi.

³Yumòk nə̀ nà’ à ghak mʉ à yəəŋ fe’lə mʉbu anə sə̀mok. Mʉ̀ à yə ma ŋkʉ̀ŋkʉ̀m ŋòroŋ mòk nə̀ bə̀baŋ ŋga yi tse’ tu sàmba bə ndoŋ hum. Yi à ta tse’ tàam ŋkum bə tu ye sə mò’fis, mò’fis lòoŋ fo’. ⁴Yi à lə̀p kùrə màk tsoŋ ŋkə̀ŋkàŋ sə nze, bòp mò’fis sənə bòp tɛ’ bə ntə̀ŋsə̀ ye. Yi à təəŋ kə̀ mantombìi ŋwà nə̀ yi sə ghà mwe nə də ya yi ko zʉ mo nə ghà nə̀ wo dzə nà’. ⁵À ka sap, ŋwà nə dzə mombam. Yi nə ye ŋkum bohòlak sə̀ sə nze pwe’, nə sə sak bə ntò’ ntɛŋ ndzə bohòyi. Wo à dzə fis mo nə ntɛ̀ŋ, wo le’ jəŋ yi, nə caŋsə gɛsə lo yi mvwe’ kapràk Nwì nə. ⁶Ŋwà nə̀ yi à dzə mo nə à ca lòye ŋgəà mvwe’ sə̀ Nwì à fʉ̀hʉ nòŋsə fa yi. Wo nə sə jəŋ ŋkərə̀ bohòyi fo’ mʉnə nùumbu ncùhù mò’fis bə ŋkʉ̀ ba bə nùumbu hum ntùŋfu.

⁷À nə gèŋ, dzè’ tesə mʉbu. Masinjà Nwì mòk nə̀ ghaŋ nə̀ liŋ yee Makè nà’a bə masinjàa ye wèŋ à təəŋ ŋgòlʉ̀ ŋòroŋ nə bə masinjàa ye sə̀’. ⁸Makè wèŋ à ghak wo fana wo kà mok dzəm də yà’a cum fe’lə mʉbu mok dzəm. ⁹Fana wo à jə ŋòroŋ nə, nə mak tsoŋ vesə yi sə nze bə masinjàa ye sə wèŋ pwe’. Ŋkʉ̀ŋkʉ̀m ŋòroŋ ànə, a rə̀rèŋ no nə̀ liŋ yee Satà, ŋkum ze’ sə̀ bʉp wèŋ. Yi à sə bòrə bwì sə nzeŋgòŋ pwe’ sə̀’ yi.

¹⁰Fana mʉ̀ yuk ŋgì mòk nə̀ ghaŋ ŋga nà’ sə cèp vèsə mʉbu dʉk də, <<Lùŋ nə̀ nà’ tesə və̀ bohòNwì àvès kə̀ tsèŋ ves laŋ. Ŋàaŋ ye bə gaŋ ŋkum ye nə ye ŋàaŋ sə̀ Krɛst nə̀ yi à tum nə wèŋ pwe’ yè’ mok mvwe’ jəja kwaraŋgaŋ. A vɛ’nə bʉ̀ʉsə̀ ŋwə̀ nə̀ yi à sə təəŋgə̀ mʉtuhù bwema avès, nə sə lap wo nzak nùm bə ndzəm nà’a, wo a fis màk gɛsə yi mʉbu laŋ. ¹¹Bwema avès sə wèŋ à ghak yi bə ŋàaŋ ndʉəm Mo Nsùŋgaŋ, nə ye bʉ̀ʉsə̀ wo à sə tsòho də ncèp ye nə zìnə sə̀’. Wo à gʉ̀ ntʉʉm awo sə̀’ də a ye-a sə̀’ də wo kpʉ kpʉ, nzak kà fo’ ye. ¹²Ye də kwəkwa ye mʉbu. Bʉ̀ʉ sə̀ mʉbu pwe’ wèeŋ ŋak yàwèŋ sə̀’. A bʉp bohònzeŋgòŋ, nə ye bə ndzəp sə̀’, bʉ̀ʉsə̀ Satà tsooŋ lòca. Yi sə jòk vɛ’ɛ bʉ̀ʉsə̀ yi rì də mvə̀k ye nə, nà’a lə̀m.>>

¹³Ŋòroŋ nə à rì də wo bɛ’ màk tsoŋ yi sə nze laŋ fana yi ye ŋgòjùm ŋwà nə̀ nà’ dzə mombam nə də yi bɛ’ ko nà’. ¹⁴À ye vɛ’nə fana wo fa ŋwà nə bàp co bàap mpì nə̀ ghaŋ, də ya yi dzooŋ caŋ lo gɛsə mvwe’ no nə bə zeŋ. Yi nə dzooŋ lo ŋgəà mvwe’ sə̀ wo fʉ̀hʉ nòŋsə fa yi fo’ fʉ̀hʉ. Wo nə sə jəŋ ŋkərə̀ bohòyi fo’ mʉnə lùumŋgòŋ tɛ’ bə bwes. ¹⁵Ànə geŋ, no nə lu fis ndzəp kə̀ cùhu yi co ndzəp nə̀ ghaŋ, də ya ndzəp nə bək kurə lo ŋwà nə. ¹⁶Ncàk à tɛsə ŋwà nə wùriŋ. Ncàk à nɛ̀ cùu ye, nə no wes ndzəp sə̀ ŋòroŋ nə lu fis sə. ¹⁷À ye vɛ’nə fana ŋòroŋ nə jok bohòŋwà nə vɛ’ɛ nsàp nə̀ bʉp. Yi lokok lo də yi lo kə mak dzè’ bə bwe ŋwà ènə mok wèŋ. Bwe ŋwà ènə mok sə, a bʉ̀ʉ sə̀ wo yukgə̀ dʉk Nwì, nə dzəm ncèp Jisòs. ¹⁸Ŋòroŋ nə à kə̀ tesə təəŋ ndzə ŋgʉ ndzəp mòk nə̀ ghaŋ.

Nàam Sə̀ Bʉp Ba

¹Ŋòroŋ nə ànə təəŋ vɛ’nə fana, mʉ̀ ye nàmŋgòmòk nə̀ bʉp ŋga yi sə tesə kok sə ndzəpə̀ anə. Nàmŋgònə à tse’ tu sàmba, nə tse’ ndoŋ hum. Yi à ta tse’ tàam ŋkum mʉnə ndoŋ sə mò’fis mò’fis lòoŋ. Wo à còm naaŋ fa yi nsàap liŋ sə̀ bʉp zəzok mʉnə tu ye sə sə̀’ lòoŋ. Liŋ nə̀ fòpwe’ à sə yàk Nwì yàak. ²Nàm nə̀ mʉ̀ à yə nə, yi à ye co mba, nə tse’ bo wə̀wə̀ŋ bə ŋkurə sə̀sap co bo nsàp nàm mòk nə̀ wo togə̀ nà’ də bɛɛ̀, nə ye bə cùu ye co gwim. Ŋòroŋ nə à jə nsàp ŋàŋ ye bə ŋàaŋ ŋkum ye pwe’fo’, nə fa nàm nə̀ bʉp ènə.³Tu nàm ànə mòk à tse’ bap mvwe’ nəmòk mbwa nə̀ co nà’ zə yi, megu də mvwe’ nə à mè laŋ. Nàm ènə à gʉ̀ nzeŋgòŋ pwe’ mərə yi bʉ̀ə̀ fana bwì pwe’ bɛ’ lo mok mandzə̀ ye. ⁴Bwì pwe’ à sə kùksə ŋòroŋ nə də bʉ̀ʉsə̀ nà’ fa ŋàaŋ nà’ bohònàm nə. Wo à sə kùksə nàm nə sə̀’, nə sə dʉk də, <<Ŋwə̀ nəmòk kaco nàm nè’e dzeŋ, kaco ŋwə̀ nəmòk lʉ to bə nàm ènə sə̀’ yeŋ.>>

⁵Ŋòroŋ nə à fa nàm ènə ŋàaŋ sə̀ ŋgònɛŋni’ nə sə ci’ mvwès bə liŋ Nwì. Wo à fa yi ŋàŋ ŋgògʉ̀ yusə̀ yi dzəm pwe’fo’ mʉnə ŋwʉ hum kwè-ncòp-ba. ⁶Ànə geŋ, yi yeto ŋgòcì’ fa Nwì mvwès, nə sə gʉ bʉpsə liŋ Nwì sə bə mvwe’ ncum Nwì sə wèŋ pwe’. Yi à gʉ̀ vɛ’nə bohòbʉ̀ʉ sə̀ wo cu mʉbu pwe’ sə̀’. ⁷Wo à mè’rə yi sə̀’ də yi lʉ bə bʉ̀ʉ Nwì wèŋ, nə ghak yà’wèŋ. Wo à fa ŋàŋ sə̀’ də yi ye co ŋkum bohòbʉ̀ʉ sə̀ sənə nzeŋgòŋ nə pwe’ nə̀ pwe’, nə̀ mò’fis kà bwehè cu fʉ̀’. ⁸Bʉ̀ʉ sə̀ sə nzeŋgòŋ pwe’ nə kuksə yi. Bʉ̀ʉ sə̀ wo və̀ mvwe’ bòop lak pwe’, mvwe’ ncèep lak pwe’, nə ye mvwe’ ŋgwìi bwì pwe’fo’ sə̀’. Bʉ̀ʉ sə̀ wo nə kà yi kùksə, megu bʉ̀ʉ sə̀ wo à còm nòŋsə liŋ awo ndzənə ŋwàk lùŋ nə̀ Mo Nsùŋgaŋ nə̀ wo à zə yi tse’ nə. Liŋ yè’sə, wo à còm nòŋsə yà’ ŋga nzeŋgòŋ nə ka ntòyeto. ⁹Ŋwə̀ nə̀ yi tse’-a ntu’ ŋgòyuk bum fo’ ye də yi yu’rə na. ¹⁰Ŋwə̀ nə̀ wo à dʉk də wo nə̀ ko lok yi ntsə’mòk fana ncə̀əp bʉ̀ə̀, wo nə̀ ko lì yi korə. Ŋwə̀ nə̀ wo à gʉ̀ yi də wo nə̀ zə yi bə fèk fana wo nə̀ zə lì yi bə fèk anə. Nə yeè nə vɛ’nə fana a bə̀boŋ də bʉ̀ʉ Nwìi wèeŋ təəŋ gʉgʉŋ, nə sə fa ntʉʉm awo bohòTà.

¹¹Ànə geŋ, mʉ̀ ye fe’lə nàm ŋgòŋ mòk nə̀ bʉp sə̀mok ŋga yi tesə və̀ ma mʉ ŋkà’a. Yi à tse’ ndoŋ ba co mʉfwɛ̀’ nsùŋgaŋ, nə sə cep bə ŋgì co ŋòroŋ. ¹²Yi à sə gʉ̀ bum wùriŋ mʉnə tu nàm mòk nə̀ mantombì nə. Yi à gʉ̀ bʉ̀ʉ sə̀ sənə nzeŋgòŋ nə pwe’ ŋgòkùksə liŋ nàm mòk nə̀ mantombì nə. Nàm nə̀ mantombì nə a yi nə̀ yi tse’ bap mvwe’ mòk mʉnə tu ye mòk co nà’ zə yi nə. ¹³Nàm nə̀ maŋkwɛ̀ŋ ènə à gʉ̀ bum maŋgəŋgèŋ vɛ’ɛ wùriŋ. Yi à gʉ̀ mis tsoŋ mʉbu, nə və sə nze mʉ lisə̀ bwì jəja kwaraŋgaŋ. ¹⁴Yi à gʉ̀ maŋgəŋgèŋ wùriŋ mʉnə tu nàm mòk nə̀ mantombì nə fana yi borə wes bwì sənə nzeŋgòŋ nə pwe’fo’ bə zeŋ sə̀’. Nàm ènə à tsə̀’ fa bwì dʉk də, yà’wèeŋ ci tes yumok nə̀ nà’a nə təəŋ mʉnə tu nàm nə̀ mantombì nə ŋgògʉ̀ də ya liŋ nàm ànə yam lo mantombì. Nàm nə̀ yi à də wo kuksə liŋ ye nə, a nə̀ yi à tse’ mvwe’ fèk mʉ tuhù co nà’ zə yi fana yi kà kpʉ nə. ¹⁵Wo à dzəm də nàm nə̀ maŋkwɛ̀ŋ nə yoŋsə gesə fa yu nə̀ wo ci nə yòŋsə̀, ya nà’a tse’ ŋàaŋ sə̀ ŋgòcèp cù, nə tse’ ŋàaŋ sə̀ ŋgòzə ndàaŋwè pwe’ nə̀ nà’ sə kà yi kùksə̀. ¹⁶Nàm nə̀ ba ènə à gʉ̀ sə̀’ də wo naaŋ fa ndàaŋwè pwe’fo’ ncòm mʉ nzà sihì kè ndzənə bo ma màk àlɛ. Ŋkwà’ŋwè bə mweŋke’ nə ye ŋwə̀mbam bə ŋwàŋwè pwe’ à tse’ tsoŋ ncòm ènə, ŋwə̀ nə̀ mò’fis nə kà bwehè cu. ¹⁷Ŋwə̀ nə̀ yi kà-a ncòm ànə tse’, kaco yi ywiŋ yumok yeŋ, nə kà yumok sə̀’ sèŋ. Ncòm ènə à ye liŋ nàm ŋgòŋ nə, nə ye sə̀’ nombà nə̀ nà’ təəŋgə̀ mʉnə liŋ ye sə. ¹⁸Bwìŋ tse’ ŋkərə̀, nə riŋ nombà ènə. Ŋwə̀ nə̀ yi tse’-a ŋkərə̀ fana yi nə riŋ li yusə̀ nombà ènə tə fo’ sə. Nà’a nombà ŋwè, nà’a ŋkʉ̀ ntùŋfu bə hum ntùŋfu-ncòp-ntùŋfu.

Bʉ̀ʉ Mo Nsùŋgaŋ Nə Wèŋ Sə Yəm Ŋkì

¹Mʉ̀ à yə Mo Nsùŋgaŋ nə ŋga yi tə mʉmvwe’ nda mòk nə̀ wo to nà’ də Zayòŋ. Yi à təəŋ fo’ bə bwì ncùhù ŋkʉ̀ mò’fis bə ncùhù hum kwè-ncòp-kwè. Wo à còm naaŋ liŋ ye bə liŋ tɛ̀’ ye mʉ nzà sihì bʉ̀ʉ yè’sə pwe’fo’. ²Mʉ̀ yuk ŋgì mòk ŋga nà’ sə cèp vèsə mʉbu co sə gbʉ cəcwà ndzəp. Ŋgì nə sə cwiŋ sə̀’ co mbʉ̀ŋ sə kùm yi, nə sə boŋ lo co wo sə buk luŋ vɛ’ɛ. ³Bʉ̀ʉ yà’sə pwe’, a təəŋ kə̀ mantombìi kapràk nə, bə mantombìi yum sə̀ kwè sə̀ wo cu ŋwəm sə, nə ye kə mantombìi bʉ̀ ŋkwàha bwì sə̀ hum ba-ncòp-kwè sə wèŋ. Wo à təəŋ vɛ’nə, nə sə yəm ŋkì nə̀ fi. Ŋkì ènə kaco ŋwə̀ nəmòk yə’rə riŋ to nà’ yeŋ. À rì mègù nà’ bʉ̀ʉ sə̀ ncùhù ŋkʉ̀ mò’fis bə ŋkʉ̀ hum kwè-ncòp-kwè sə, sə̀ Jisòs à làk tiŋ fis wo mʉŋgorə̀ bʉ̀ʉ sə̀ sə nzeŋgòŋ sə. ⁴Yà’a wo sə̀ wo à ka ni’ awo bə bə̀ba gʉ̀ bʉpsə yuk, wo cu mvə̀’nə̀ wo à dzə wo. Wo sə yuŋ bɛ’ kɛ’ lo Mo Nsùŋgaŋ nə mvwe’ sə̀ yi sə lòpwe’. Yi a ywiŋ fis wo mʉŋgorə̀ bwì, nə noŋsə wo zok ŋgòye bʉ̀ʉ Nwì nə ye sə̀ ye sə̀’. ⁵Wo ka mvwès ci’ yu’ nə kà mʉ zə̀p jòŋ sə̀’ tse’ yuk.

Masinjàa Nwì Sə̀ Tɛ’

⁶Mʉ̀ à yə fe’lə masinjà Nwì mòk sə̀mok ŋga yi sə dzòoŋ mʉbu sə̀sap ntɛ̀ŋ. Yi à sə jə və̀ Ntirə̀ nə̀ Bə̀boŋ nə̀ nà’a nə̀ kà mè yuk ŋgòtsə̀’ fa nzeŋgòŋ nə lòoŋ. Yi nə tsok fa bohòbuhu lak pwe’ nə ye bə sə̀ wo tse’ ncèep lak zəzok pwe’fo’, nə̀ mò’fis nə kà bwehè cu. ⁷Yi cep fis bə ŋàŋ də, <<Wèeŋ wəp Nwì, nə kuksə yi, bʉ̀ʉsə̀ mvə̀k kʉ̀rə laŋ nə̀ yi nə sak nzak ndàaŋwè pwe’. Ye də wèeŋ kuksə yi. Yi nə̀ yi a gʉ̀ ntòbu bə nzeŋgòŋ, nə gʉ ndzəp sə̀ ghaŋ bə sə̀ jo wèŋ pwe’.>>

⁸Masinjà Nwì mòk à bɛ’ɛ nə̀ mantombì nə, nə sə cep də, <<Yi gbʉ̀ laŋ. Lak sə̀ ghaŋ sə̀ wo to yà’ də Babilòŋ sə gbʉ̀ laŋ. Lak sə̀ yi à sə gʉ̀ bwì sənə nzeŋgòŋ nə lòoŋ ŋgòno rùk ye, rùuk sə gʉ wo, wo sə yuŋ lo ko sàhà sə̀’.>>

⁹Masinjà nə̀ tɛ’ à və̀ə, nə sə cep fis bə ŋàŋ dʉk də, <<Ndàaŋwè pwe’ nə̀ yi sə kùksə nàm nə, nə sə kùksə yu nə̀ wo à ci nà’ bʉ̀ʉ liŋ nàm nə, nə dzəm sə̀’ də wo naaŋ fa yi ncòom nàm nə mʉ nzà sihì yi kè ndzə bohòàlɛ pwe’, ¹⁰wo nə̀ yə mvə̀’nə̀ Nwìi jòkgə̀ə. Nwìi nə jok bohòyi, yà’ ye co a rùuk sə̀ yà’ cəp gʉ bʉp vɛ’ɛ wùriŋ. Ŋgə̀ŋgàaŋ nə no wes yà’ pwe’ ŋga yi ka kù cok. Yi nə ye ŋgə’ nə̀ co wù kà fʉ̀k sə misə̀. Mis sə nə sə kʉə co wo gèsə ca ŋkàŋ, fana yi sə ye ŋgə’ ca ŋga masinjàa Nwì sə̀ rərɛŋ bə Mo Nsùŋgaŋ nə wèŋ sə yə. ¹¹Ndindi mis sə̀ wo nə sə ye ŋgə’ ca sə nə sə kok, nə kà tiìŋ yuk. Bʉ̀ʉ sə̀ wo à sə kùksə nàm bə yu nə̀ wo ci tes nà’ ŋgòyamsə liŋ ye, nə ye bə bʉ̀ʉ sə̀ wo à naaŋ ncòom liŋ ye wèŋ pwe’fo’ nə kà lo mʉ lisə̀ gèsə yuk nə̀ mvèsə̀, maràŋ bə ndzəmə̀ pwe’.>>

¹²Ye də bʉ̀ʉ Nwì sə̀ wo sə bɛ’ yusə̀ Nwì sə dʉk, nə sə dzəmtse’ mali Jisòs sə̀’ wèeŋ nəŋ tes-a kù gʉgʉŋ.

¹³Fana mʉ̀ yuk fe’lə ŋgì mòk ŋga nà’ sə cèp tsə və̀ mʉbu anə sə̀’ də, <<Còm bum yè’e còmə; rɛŋsi bohòbʉ̀ʉ sə̀ wo a kpʉ ŋga wo a dzəm bohòTà laŋ.>> Yòŋsə̀ Nwì nə sə dzəm də, <<A vɛ’nə. Ye jəŋ ŋga’a lo mantombì, fàha sə̀ wo à sə gʉ̀ʉ mè laŋ. Wo nə cum yoŋsə, nə sə kwa, bʉ̀ʉsə̀ wo yə lə̀là’ àwo nə̀ wo tse’ bə fàha sə̀ wo à gʉ̀ʉ sə.>>

Mvə̀k Nə̀ ŊgòKʉp Kʉ̀rə

¹⁴Mʉ̀ kʉk fe’lə sə̀mok, mʉ̀ ye mbàk nə̀ fəfop. Ŋwə̀ nə̀ yi à cu mʉnə mbàk anə à səsə co Mo Ŋwè. Yi ta tse’ tàm ŋkum nə̀ wo à gʉ̀ nà’ bə guù, nə kotse’ fɛ̀cɛ̀s nə̀ cəcəp ndzə bohòyi. ¹⁵Fana masinjà Nwì mòk tesə tsoŋ mʉ ndap Nwì nə̀ ghaŋ nə. Yi fuŋ gesə fa lo ŋwə̀ nə̀ yi cu mʉnə mbàk nə də, <<Mvə̀k kʉ̀rə ŋgòkə̀ kʉp bum sə̀ mʉ nzuù sə laŋ. Bum sə̀ wo à bì yà’ sənə nzeŋgòŋ nə a gʉ laŋ. Jə fɛ̀cɛ̀s yònə, nə ye ŋgòkə̀ kʉp yà’.>> ¹⁶Yi à dʉk vɛ’nə fana, ŋwə̀ nə̀ yi à cu mʉnə mbàk nə wʉŋsə yak fɛ̀cɛ̀s ye nə vɛ’ɛ, nə kʉp wes bum sə̀ sə nzeŋgòanə pwe’.

¹⁷Mʉ̀ ye fe’lə masinjà Nwì mòk sə̀mok ŋga yi tesə tsə və̀ mʉ ndap Nwì nə̀ mʉbu nə. Yi à tse’ fɛ̀cɛ̀s nə̀ cəcəp ndzə bohòyi sə̀’. ¹⁸Fana mʉ̀ ye fe’lə masinjà mòk sə̀mok. À ye yi nə̀ yi kumsəgə̀ mis sə̀ mvwe’ kàm nə̀ wo fagə̀ Nwì satikà’ fo’. Yi à tesə və̀ fo’, nə sə cep fuŋ fa masinjà mòk nə̀ yi anə tse’ fɛ̀cɛ̀s nə̀ cəcəp nə də, <<Yeè, nto’o ndik tʉ nə̀ wo togə̀ nà’ də grep nà’a bà laŋ. Jəŋ fɛ̀cɛ̀s yò, nə ci’ yà’ fo’.>> ¹⁹Yi à dʉk vɛ’nə, masinjà nə wʉŋsə yak fɛ̀cɛ̀s nə, nə ci’ mak gesə lo yà’ mvwe’ sə̀ wo kə ŋamgə̀ yà’ fo’ sə. Wo ŋam yà’ vɛ’nə, yà’ ye yà’a gbʉ̀’ nə̀ nà’ təə mʉnə tu yusə̀ Nwìi nə gʉ bʉ̀ʉsə̀ yi jòk bə bwìŋ ŋkʉ̀ʉŋ. ²⁰Mvwe’ sə̀ wo ŋamgə̀ yà’ fo’ sə ka ma mʉ ntòlak yeŋ. Wo à ŋam ŋgwìi grep sə də ya ndzəp sə tesə. Ndʉəm tesə nja co ndzəp. Ndʉəm sə caŋ vɛ’ɛ tə̀tè lo kìlometà ŋkʉ̀ tɛ’, nə ye bə cəco sə kʉəp lo kwiŋ mò’fis.

Masinjàa Nwì Sàmba Sə̀ Wo Jə Və̀ Ŋgə’ Sàmba

¹Yà’sə à mèe, mʉ̀ ye fe’lə yu maŋgəŋgèŋ mòk mʉbu sə̀mok nə̀ ŋkərə̀ bisə mʉ bʉ̀ʉ zeŋ pwe’. Mʉ̀ à yə masinjàa Nwì sàmba ŋga wo kotse’ nsàap ŋgə’ zəzok sə̀’ sàmba. Yè’sə ànə ye mok lə̀sə̀ mbwè ŋgə’, sə̀ Nwìi nə jəŋ və yà’ ŋgònìtsə̀’ wes jə̀jòk ye. ²Mʉ̀ à yə yumok sə̀’ nə̀ nà’ à ye co ndzəp nə̀ ghaŋ. Ndzəp nə gʉ co wo tòrə be’lə mis bə gə̀las. Mʉ̀ à yə bʉ̀ʉ sə̀ wo à ghak nàm nə, nə ye bə yu nə̀ wo à ci fa yi, nə bɛŋ nombà liŋ ye sə wèŋ ŋga wo tə ŋgʉ ndzəp anə. Wo pwe’ à kotse’ luŋ sə̀ Nwì a fa wo. ³Wo à sə yəm ŋkì Musì nə̀ yi à ye ŋgà fàk Nwì, nə ye bə ŋkì Mo Nsùŋgaŋ nə wèŋ. Wo à sə yəm dʉk də,

<<Nwì àvès Tà, wù tse’ ŋàŋ pwe’ wù.

Bo fàha yo yam càsə cù, bwì pwe’ mərə yà’.

Tse’ lak sə̀ sə nzeŋgòŋ pwe’ wù.

Yusə̀ wu gʉ̀ pwe’fo’ rərəŋ nə ye zìnə.

⁴Wùu Tà, ŋwə̀ nə̀ mò’fis nə̀ co yi kà wu wəp ka yeŋ.

Bwì pwe’ nə kuksə megu liŋ yo.

Ŋwə̀ nə̀ Rərɛŋ mègù wù.

Buhu lak sə̀ sənə nzeŋgòŋ nə pwe’fo’ nə kuksə megu wu,

Bʉsə̀ wo yə də bum yo pwe’ rərəŋ.>>

⁵Mʉ̀ à kʉ̀k fəsə sə̀mok fana mʉ̀ ye ŋga ndap Nwì mʉbu nòto. A yè’sə tàap cə̀k nə̀ nà’ sə nì tsə̀’ də Nwìi fo’. ⁶Fana masinjàa Nwì sə̀ sàmba sə̀ wo à jə və̀ ŋgə’ sə̀’ sàmba sə tesə mbwa. Wo à nitse’ cə̀ək sə̀ fəfop pup, pup. Wo swi’ ci’ yak yà’ mʉ ŋgùu bə korə guù. ⁷Fana yum sə̀ kwè sə̀ wo cu ŋwəm sə, mòk à lòkok, nə fa yak masinjàa sə wèŋ ŋgàp mò’fis, mò’fis bə tu awo lòoŋ fo’. Wo à gʉ̀ ŋgàap sə bə guù fana ŋga cu ca jòho ntʉm Nwì nə̀ yi cu ŋwəm mvèsə nə̀ mvèsə̀ nə. ⁸Ndindi à tesə və̀ mvwe’ yòoŋ Nwì bə ŋàaŋ ye, nə kə loho mʉmvwe’ ndap nə vɛ’ɛ mpaaŋ. Ŋwə̀ nə̀ co yi ni mʉmvwe’ ndap nə à ka yeŋ lok tə̀tè ŋgə’ə sə̀ masinjà sàmba a jə və̀ sə à mè wes ŋkuŋ.

Masinjàa Sə Jə Və̀ Ŋgə’ Sə̀ Sàmba Sə

¹Mʉ̀ yuk sə̀’ ŋga ŋgì mòk sə cèp vèsə sə̀’ mvwe’ yà’sə. Ŋgì nə à sə cèp fuŋ fa masinjàa Nwì sə̀ sàmba sə wèŋ də, <<Wèeŋ jə ŋgàap jòho ntʉm Nwì sə̀ sàmba sə, nə kə kɛ’ mak gesə lo sə nzeŋgòŋ.>> ²Fana masinjà mòk lokok to, nə kə kɛ’ mak gesə tsoŋ lo yusə̀ sənə ŋgàp nje nə sə nzehè. Yi à kɛ̀’ màk ntɛ̀ŋ, ywɛ̀’ to bwìŋ ni’ pwe’, nə sə yaaŋ wo vɛ’ɛ. Bʉ̀ʉ sə̀ ywɛ̀’ à to wo yè’sə à ye bʉ̀ʉ sə̀ wo à tse’ ncòom nàm nə, nə sə kuksə yu nə̀ wo à ci nà’ mʉnə liŋ ye nə.

³Masinjà nə̀ ba à kə̀ kɛ̀’ gèsə ye sə mvwe’ ndzəp nə̀ ghaŋ nə. Ndzəp pwe’ gweŋ bʉʉŋ co ndʉəm ŋwə̀ nə̀ kpʉkpʉ. Bum sə̀ yà’a cugə̀ sə ndzəpə̀ anə pwe’ à kpʉ wes pwe’ nə̀ pwe’.

⁴Ànə geŋ masinjà nə̀ tɛ’ à kə̀ kɛ̀’ màk gèsə ŋgàp nə̀ nje sə mvwe’ mantùŋ bə bwe ntak ndzəp wèŋ. Ndzəp sə bʉʉŋ lo sə̀’ co ndʉəm. ⁵Mʉ̀ yuk ŋga masinjà nə̀ yi kʉ̀kgə̀ ndzəp, yi sə cèp də, <<Wù Nwì àvès nə̀ wù cu, ŋga wù à ye to mantombì sə̀’, wu rərɛŋ. Bum sə̀ wu sakgə̀ pwe’, yà’a rərəŋ mvə̀’nə. ⁶Bʉ̀ʉ sə̀ wo à zə bʉ̀ʉ Nwì nə ye bə ŋgàa tsòhòbum Nwì wèŋ, wù fa wo ndʉəm də wo no. A vɛ’nə kə̀kʉrə̀, yà’ kʉ̀rə bə fàha awo sə bòŋ.>> ⁷Fana mʉ̀ yuk fe’lə ŋga ŋgì mòk sə cèp vèsə mvwe’ kàm nə̀ wo fagə̀ Nwì satikà’ mbwa nə sə̀’. Ŋgì nə sə cep də, <<Nwì, Tà nə̀ ghaŋ nə. Yusə̀ wu sakgə̀ pwe’, yà’a rərəŋ nə ye zìnə.>>

⁸Masinjà nə̀ kwè à jə ŋgàp nje, nə kə fe’ mak gesə mʉnə nùm. Nùm tse’ bwi ŋàŋ ŋgòtɛ̀ bwì co mis. ⁹Nùm nə à tɛ̀ bwì vɛ’ɛ wùriŋ. Bohòwo ŋgòkupsə ntʉm awo, nə kuksə Nwì nə̀ yi tse’ ŋàŋ bə bum yè’sə fana wo kà dzəm. Wo à bʉ̀ʉŋ yàk Nwì vɛ’ɛ bə̀boŋ.

¹⁰Masinjà nə̀ tàŋ à kə̀ fè’ màk gèsə ŋgàp nə̀ nje mʉmvwe’ kapràk nàm nə̀ yi à tesə kok sə ndzəpə̀ nə. Ndzəm dʉk mvwe’ lak sə̀ nàm nə cu ŋkum fo’ sə pwe’ jìk. Bwì sə lum lʉm awo mvə̀’nə̀ sə yaaŋ wo vɛ’ɛ kpʉ bwì. ¹¹Wo yak Nwì nə̀ mʉbu bʉ̀ʉ ŋgə’ nə̀ wo sə yə nə ye sə̀’ bʉ̀ʉ ywɛ̀’ɛ sə̀ yà’a sə yaaŋ wo sə. Wo kà dzəm ŋgòmè’rə bʉp awo sə̀ wo sə gʉ̀ sə dzəm lok.

¹²Masinjà nə̀ ntùŋfu à kə̀ fè’ gèsə ŋgàp nje sənə ndzəp nə̀ ghaŋ nə̀ wo togə̀ nà’ də Yufèretìs nà’a. Ndzəp nə zərə wes pwe’, də ya ŋkəŋkum sə̀ wo və̀ ma nùm wèeŋ tse’ mandzə̀ ŋgòto càa. ¹³Fana mʉ̀ ye yòŋsə̀ə sə̀ bʉp tɛ’, ŋga wo səsə co mbòtòk vɛ’ɛ. Wo à tesə tsoŋ kə̀ cùhu ŋòroŋ nə bə kə̀ cùhu nàm ŋgòŋ nə ye kə̀ cùhu ŋwə̀ nə̀ ŋgà bòrə̀ bwì də yi ŋgà tsòhòbum Nwì. ¹⁴Yòŋsə̀ə yè’sə a yòŋsə̀ə ze’. Wo tse’ ŋàŋ ŋgògʉ̀ bum mok vɛ’ɛ sə̀ co wù kʉk tə̀tè nə sɛɛŋ mam. Wo lo, nə sə to benə ŋkəŋkum sə̀ sənə nzeŋgòŋ nə pwe’ də yà’wèeŋ fʉhʉ ŋgòmàk dzè’ nùmbu ànə, nə̀ Nwìi nə̀ nìtsə̀’ fa bwì ŋàaŋ ye də yi jòk ntinə nə. ¹⁵(Yeè, wèeŋ kà swì də, <<Mʉ nə və ŋga wèŋ ka riŋ, co ŋgà yə̀ və̀ yi. Anə ye bə̀boŋ bohòŋwə̀ nə̀ wo nə tseŋ yi ŋga yi cu nca. Ya kà də wo jəŋ lo gɛsə cə̀ək ye, yi gi mvwe’ bwì nswɛ̀’mbwè marè’tu ko yi dʉk.>>) ¹⁶Fana yòŋsə̀ə ze’ sə wèŋ à gʉ̀ ŋkəŋkum sə̀ sə nzeŋgòŋ sə ŋgòkə̀ tɛstu mvwe’ sə̀ wo togə̀ fo’ bə ncèep Hibrù wèŋ də Àmajidòŋ yà’a.

¹⁷Ànə geŋ, masinjà nə̀ sàmba nə fe’ mak gesə lo ŋgàp nje nə mʉtsə̀. Fana ŋgì mòk cep vesə mʉnda’à Nwì mvwe’ kapràk ye nə. Nà’ cep fis bə ŋàŋ də, <<Yà’ mè wes mok laŋ.>> ¹⁸Ŋgì ànə à cèp wes vɛ’nə fana mbʉ̀ŋ ba’a, nə sə cwiŋ, nzeŋgòŋ nə tsoho sə̀’ pwe’fo’. Nà’ à tsòho nsàp nə̀ nzeŋgòŋ nə à yè yèe, nà’ à ka ntsə’mòk vɛ’nə tsoho yuk. ¹⁹Ntʉm lak nə̀ ghaŋ nə à saha gà’a bòp tɛ’. Bwe bòop lak sə̀ sə nzeŋgòŋ pwe’, à kə̀əŋ gbʉ̀ wes pwe’. Yà’a mvə̀’nə̀ Nwì à tsərə tse’ lak sə̀ ghaŋ sə̀ wo to yà’ də Babilòŋ yà’a, nə gʉ də wo ye ŋgə’ bʉ̀ʉsə̀ yi jòk bohòyà’wèŋ. Yi à gʉ̀ yà’ wo ye ŋgə’ bə̀boŋni co ŋgàp rùk nə̀ cəcəp nə̀ wo kotse’ wu də wu nə no wes tsoŋ nà’ bə ŋàŋ. ²⁰Lak sə̀ yà’ à ye mʉtsətsə’rəə ndzəp pwe’ à kə̀əŋ gbʉ̀ʉ nə cəəŋ bisə lòsə ndzəpə̀ anə. Nda à kə̀əŋ gbʉ̀ wes sə̀’ pwe’fo’. ²¹Ŋgwìiŋ sə̀ ghaŋ à sə gbʉ̀hʉ tsə mʉbu, nə sə gbʉ bwìŋ mʉni’ì. Ŋgwìŋ nə̀ mò’fis à sə rwì’ co bàm rɛɛ̀s bə tu. Ŋgə’ ànə à bʉp vɛ’ɛ kpʉ bwì. Bwì yak Nwì bʉ̀ʉ ŋgə’ nə̀ bʉp nə̀ wo yə nə.

Ŋwà Sàhà Nə̀ Nje Cà Cù

¹Yà’sə à mè wes fana masinjà mòk mʉtsətsə’rəə sə̀ sàmba sə̀ wo anə tse’ ŋgàp sə à və̀, nə kə dʉk mʉ dʉk də, <<Və̀ə, ya mʉ niŋ tsok fa wu mvə̀’nə̀ ŋwà sàhà nə̀ sàha ye ghak ŋàŋ nà’a nə ye ŋgə’. Ŋwà sàhà nə̀ wù yə ànə, yi tə yà’sə co bə tu lak mok sə̀ wo ci yà’ mvwe’ ndzəp fo’ wùriŋ. ²Ŋkəŋkum sə̀ sə nzeŋgòŋ a ko wes sàhà bə ŋwà sàhà ènə pwe’fo’. Bʉ̀ʉ sə̀ sənə nzeŋgòŋ nə pwe’ a no rùuk sàha ŋwà ènə sə̀ yi sə fa wo sə tə̀tè nə gbʉ mbum, nə sə yuŋ megu nsàp nə̀ nje nə.>>

³Mʉ̀ à ye ndzə bohòyòŋsə̀ Nwì fana masinjà Nwì jəŋ lo mʉ ŋgəà. À kə̀ dzèŋ fo’, mʉ̀ ye ŋwà nəmòk ŋga yi kok cu mʉnə nàm ŋgòŋ mòk nə̀ bə̀baŋ. Wo à jə liŋ sə̀ ànə ye co tse’ megu yà’ Nwì, nə com ramsə naaŋ fa nàm nə yà’ mʉ ni’ì yi pwe’fo’. Nàm nə à tse’ tu sàmba bə ndoŋ mbwa hum. ⁴Ŋwà nə à nitse’ cə̀ək sə̀ bə̀baŋ sə̀ yà’ gʉ ntɛŋ vɛ’ɛ wùriŋ. Yi à jə guù bə bum mok sə̀ yà’a ba’agə̀ ba’a, bə ntəntuŋ wèŋ, nə fʉhʉ ni’ ye bə zeŋ vɛ’ɛ pap. Yi kotse’ ŋgàp mòk ndzə bohòyi nə̀ wo à gʉ̀ nà’ bə guù. Ŋgàp nə à rwiŋ mègù ca bə bum jòoŋ sə̀ bʉp sə̀ yà’ à tesə və̀ bə sàha sə̀ yi kogə̀ sə. ⁵Wo à còm naaŋ fa yi liŋ mok mʉ nzà sihì yi bə gbʉ’ də,

Lak Sə̀ Ghaŋ Sə̀ Də Babilòŋ

Ma Bʉ̀ Ŋgàa Ko Sàhà

Nə Ye Bʉ̀ Ŋgàa Gʉ̀ Bʉp

Jì Marè’tu Sənə Nzeŋgòŋ

⁶Mʉ̀ yə sə̀’ də ŋwà nə à jʉ̀hʉ mbum ndʉəm bʉ̀ʉ Nwì sə̀ wo à zə wo də bʉ̀ʉsə̀ wo sə bɛ’ mandzə̀ Jisòs.

Mʉ̀ à yə ŋwà ènə fana mʉ̀ mərə wùriŋ. ⁷Fana masinjà Nwì nə fek mʉ də, <<Wù sə mərə yà? Yuk, mʉ tsok rɛŋsə fa wu gbʉ’ nə̀ nà’ cu bə ŋwà ènə. Mʉ nə rɛŋsə fa wu bə nàm ŋgòŋ nə̀ yi tse’ tu sàmba bə ndoŋ hum, nə̀ yi bə̀k tse’ ŋwà ènə nə sə̀’. ⁸Nàm ànə à ye to mantombì fa’ ŋwəm, ŋga’a nè’e yi ka ŋwəm mok yeŋ fe’lə. Yi nə tesə kok sənə wʉ sə̀ yà’a kà lə̀gə̀ sə fana yi lo mvwe’ sə̀ yi nə kpʉ bisə mok kɛ̀’ mò’fis. Bʉ̀ʉ sə̀ wo cu sə nzeŋgòoŋ nə mərə wùriŋ ŋga wo yə nàm nə. Wo nə mərə bʉ̀ʉsə̀ nà’ à ye to ŋwəm, nə kà ŋwəm mok sə̀ ye fe’lə, nə dʉk də yi nə̀ kə̀ və̀ malì sə̀mok. Yè’sə bʉ̀ʉ sə̀ wo à ka liŋ awo ndzənə ŋwàk lùŋ com gesə fa yuk mvə̀’nə̀ nzeŋgòŋ nə à yè yèe.

⁹<<Bwìŋ jəŋ ŋkərə̀, nə riŋ bum yè’sə. Tu sə̀ sàmba yà’a a nda sə̀ sàmba sə̀ ŋwà nà’a kok cu mbwa sə. ¹⁰Yà’ tə yà’sə sə̀’ mʉnə tu ŋkəŋkum sàmba. Ŋkəŋkum yè’sə, sə̀ tàŋ à gbʉ̀ cà gɛsə lòyàwo laŋ. Sə sak gaŋ sə ŋga’a nə̀ mò’fis fana mòk cum fe’lə mò’fis nə̀ yi nə sə və ye maŋkwɛ̀ŋ. Nà’a nə vəə, yi nə sak megu gaŋ ye sə sə̀’ mvə̀k momjo wà, kà tə̀tè ye. ¹¹Nàm ŋgòŋ nə̀ yi à ye to fa’ ŋwəm, nə kà nə ŋwəm ŋga’a yeŋ nə, yi ye ŋkum nə̀ fwame’. Yi lo’ gù sə̀’ bə bòp ŋkəŋkum sə̀ wo sàmba sə. A nə lə də wo nə gʉ bʉpsə yi.

¹²<<Ma nə̀ ndoŋ sə̀ hum sə̀ wù yə yà’a, a yà’a ŋkəŋkum sə̀ wo ka gaŋ yàwo ntòkok. Wo nə koksə wo gaŋ, wo ye lok bə nàm nə wèŋ bəbɛ’. Wo nə kà mvwe’ gaŋ sə tə̀tè cu. Anə megu mvə̀k ghàr vɛ’ɛ sənə nùmbu nə̀ mò’fis. ¹³Ŋkəŋkum sə̀ hum yè’sə, wo nə tse’ megu cùu sə̀ mò’fis də nàm nə ŋkum nə̀ ghaŋ bohòwo pwe’ yi. ¹⁴Wo nə mak dzè’ bə Mo Nsùŋgaŋ Nwì fana Mo Nsùŋgaŋ nə nə ghak wo yi. Yi nə ghak yà’ bʉ̀ʉsə̀ yi ŋkum nə̀ yi tse’ ŋkəŋkum pwe’ yi nə ye Tà nə̀ yi tse’ tà wèŋ pwe’ sə̀’ yi. Ŋkum nə̀ fòpwe’ nə wup fa tsoŋ yi bo, nə dʉk də <Tà.> Bʉ̀ʉ yee nə ghak bə yà’wèŋ bəbɛ’. Bʉ̀ʉ yee sə̀ yi to nə cokfis yà’wèŋ fana wo sə bɛ’ mandzə̀ nje bə zìnə.>>

¹⁵Masinjà Nwì nə dʉk mʉ də, <<Ndzəp nə̀ wù yə nà’ ŋga ŋwà sàhà nə cu fo’ nà’a, nà’ tə yà’sə mʉnə tu bwì wùriŋ bə lak sə̀ sənə nzeŋgòŋ nə lòoŋ fo’, sə̀ wo sə cèp ncèep lak pwe’. ¹⁶Ndoŋ sə̀ hum sə̀ wù yə yà’a bə nàm ŋgòŋ, wo nə bʉʉŋ bɛŋ ŋwà sàhà nə. Wo nə fep wes lo cə̀ək ye pwe’, nə me’rə yi nswɛ̀’mbwè. Wo nə zʉ tiŋ ye sə, nə tɛŋ yi bə mis sə̀’. ¹⁷Nwì a gʉ̀ wo yi də wo tse’ cùu sə̀ mò’fis, ya yà’wèeŋ gʉ yusə̀ yi à dzəm də yà’a nə ye vɛ’nə sə, nə fa ŋàaŋ awo bohònàm ŋgòŋ nə sə̀’. Yà’a nə cum mam vɛ’nə tə̀tè bum sə̀ yi à cèp sə nə yeŋ mvə̀’nə̀ yi à cèp sə. ¹⁸Ŋwà nə̀ wù yə yi ànə, a yà’sə ntʉm lak nə̀ ghaŋ nə̀ yi tse’ ŋkəŋkum sə̀ sənə nzeŋgòŋ nə pwe’fo’ yi nà’a.>>

Lak Babilòŋ Gbʉ̀ Laŋ

¹Yà’sə à mèe, mʉ̀ ye fe’lə masinjà Nwì mòk sə̀mok ŋga yi tsə və̀ mʉbu. Yi à tse’ ŋàŋ vɛ’ɛ wùriŋ. Mvə̀’nə̀ yi à və̀ə, marɛŋ ye rɛŋ wes nzeŋgòŋ nə pwe’. ²Yi sə fuŋ fis bə ŋàŋ dʉk də, <<Lak Babilòŋ, sə̀ yà’a lak sə̀ ghaŋ sə, yà’ gbʉ̀ laŋ. Nà’ gbʉ vɛ’ɛ nsàp nə̀bʉp, nə̀ bʉp nə. Ŋwə̀ nəmòok fo’ mok bʉ̀ə̀, megu mok fo’ ze’ bə yòŋsə̀ə sə̀ bʉp wèŋ. Jìgawà’ bə nsàap swiŋ sə̀ bʉp pwe’ sə kə yiskok gù fo’ mok wo. ³Yi gbʉ̀ vɛ’nə bʉ̀ʉsə̀ bʉ̀ʉ sə̀ sə nzeŋgòŋ wèŋ à sə noho rùuk ye, yà’ ye yà’a də bə yà’wèŋ sə koho sàhà fana yà’ bʉpsə wo. Njo nə̀ yi à tse’ ghàk ləlà bʉ̀ʉ sàhà nə fana yà’ gʉ̀ ŋgàa sèŋ bum ntɛŋ wèŋ bʉʉŋ wes ŋgàa ghàk pwe’.>>

⁴Ànə geŋ, mʉ̀ yuk fe’lə ŋgì mòk sə̀’ ŋga nà’ sə cèp tsə və̀ mʉbu anə sə̀’ ŋkuŋ. Ŋgì nə sə dʉk də, <<Bʉ̀ʉ am wèŋ, wèeŋ tesə gɛsə mvwe’ lak yà’sə fo’. Wèeŋ tesə ya wèeŋ kà bʉp wenə wèŋ sə gʉ̀ be’lə̀, ya wèeŋ kà ŋgə’ nə̀ yi nə ye nə wenə wèŋ yə be’lə̀. ⁵Wèeŋ riŋ sə̀’ də bʉp sə̀ yi sə̀ gʉ̀ tə̀tè yà’ kùk təəŋ lo mʉtsə̀ co nda yà’a, Nwì a ka yà’ swi. ⁶Bʉp sə̀ yi a gʉ̀ fa bwìiŋ foho və fe’lə mʉtuhù yi. Nsàp ŋgə’ nə̀ yi a fa bwìiŋ foho və mʉtuhù yi sə̀’ mvə̀k ànə kɛ̀’ ba. Rùuk ye sə̀ cəcəp sə̀ yi sə fa bwì yà’a, wo fa fəsə yi sə̀ yà’ cəp càsə ye sə kɛ̀’ ba, yi no yà’. ⁷Mvə̀’nə̀ yi à sə cu to fa’, nə sə dʉk də yi ŋwà nə̀ ghaŋ, nə sə yuk lʉ̀m nə̀ bʉp yà’a, ŋgə’ nə ye bə manziŋ və̀ bohòyi sə̀’ vɛ’nə. Bʉsə̀ yi à sə nɛ̀ni’ də, <Mʉ ŋkum, mʉ̀ ka ŋwà ŋgwemfə yeŋ, fana mʉ nə kà kpʉ sə̀ wa yuk.> ⁸Njo nə̀ yi a sə cèp nsàap bum yè’e vɛ’nə fana ŋgə’ə nə ko yi nùmbu mòk. Nùmbu ànə ye, yi nə yaŋ, manziŋ ko yi, njè yaŋ yi fana mis tɛŋ yi sə̀’. A nə̀ ye vɛ’nə bʉsə Nwì nə̀ yi Tà àvès nə, yi tse’ ŋàŋ nə ghak bum pwe’, nə sak cì’ nzak ye nə yi.>>

Bwìŋ Sə Wa Kpʉ Babilòŋ

⁹Ŋkəŋkum sə̀ sə nzeŋgòŋ sə̀ bə yà’wèŋ à sə koho sàhà nə sə cum ncu lʉ̀m sə, nə ye ndindi sə̀ mis sə tɛ̀ŋ səsə lak yà’sə, fana wo nə bək bo awo mʉ tuhù, nə waŋ. ¹⁰Wʉə nə ko wo fana wo kə təəŋ mvwe’ sə̀sap, nə sə kɛ’ŋgùŋ də, <<Hàva’ èè, wʉrək. Tà wèŋ na. Wù lak Babilòŋ nə̀ wù a tse’ ŋàŋ vɛ’ɛ wùriŋ nə, ŋgə’ və, nə kə ləsə gesə wu moòm ghà nə nàk vɛ’nə èè?>> ¹¹Ŋgàa sèŋ bum wèŋ pwe’ nə waŋ sə̀’ bʉ̀ʉsə̀ ŋwə̀ nə̀ ŋgòywiŋ bum awo ka mok yeŋ fe’lə. ¹²Lak yà’sə à sə ywiŋ bum sə̀ wo nihi yà’ mʉ ni’ì wo sə̀ wo à gʉ̀ bə nsàap ntɛŋ mok sə̀ bə̀boŋ co guù bə sivà. Bə nsàap lìis mok sə̀ yà’a bà’a bòŋsəgə̀ wùriŋ. Wo à sə sèŋ nsàap cə̀k zəzok bə cə̀ək tu wèŋ sə̀ yà’ kosə mbàm. Wo sə seŋ nsàap tʉ sə̀ wo gʉ̀ bum sə̀ mʉ nda’à bə zeŋ, bum sə̀ wo gʉ̀ bə ntɛŋ nə ye lìis sə̀ yà’ sə kʉə rɛŋ bòŋsə vɛ’ɛ wùriŋ wèŋ. ¹³Mok ye bum sə̀ yà’ rəm bòco làmindà, mfòoŋ sə̀ bə̀boŋ, mbòŋ bə nsùŋgaŋ nə ye bə nàambàrə̀ sə̀ yà’a sə̀gə̀ cariyòwèŋ sə̀’. Wo à sə ywiŋ bum yè’sə tə̀tè nə ywiŋ bə bwì co ŋkwɛ̀ŋ sə̀’. ¹⁴Ŋgàa sèŋ bum sə wèeŋ nə dʉk də, <<Bum sə̀ wù a sə tes ntʉm fo’ sə cà lòwes pwe’fo’. Ghàha yo bə bum sə̀ wù à sə tse’gə̀ yà’, nə sə yuk lʉ̀m fo’ sə pwe’, wu nə kà yà’ mok rə̀msə̀ yuk.>> ¹⁵Wʉə nə ko ŋgàa sèŋ bum wèŋ sə̀ wo à tse’ bum bohòyi sə bʉ̀ʉsə̀ wo yə mvə̀’nə̀ lak yà’sə sə yə ŋgə’. Wo nə kə təəŋ mvwe’ sə̀sap, nə bək naaŋ bo awo mʉ tuhù, nə sə waŋ də, ¹⁶<<Hàva’-èè, wʉrək. Yè’sə ndòmòk bohòlak yà’sə vɛ’nə àlɛ-òò. Yi a sə ye to fɛŋ co ŋwà nəmòk nə̀ yi fom ŋgwɛ̀ŋ vɛ’ɛ wùriŋ, sə ni cə̀ək sə̀ fəfop bə sə̀ bə̀baŋ wèŋ. Nə sə ye sə̀’ co ŋwà nə̀ yi sə fʉ̀hʉ ni’ bə bum sə̀ yà’ sə bà’a vɛ’ɛ sə̀ wo à gʉ̀ yà’ bə guù liis sə̀ yà’ kosə mbàm. ¹⁷Ja’a na yàwèeŋ mvə̀’nə̀ ghàha ye sə dʉk gù vɛ’ɛ ncuk kɛ’ mò’fis, nə ca gɛsə lo.>>

Bʉ̀ ŋkwàha bʉ̀ʉ sə̀ wo tse’ ŋgwes bə bʉ̀ʉ sə̀ wo fàkgə̀ ca, nə ye bʉ̀ʉ sə̀ wo tse’gə̀ mbàam yàwo bə fàha sə̀ ma sə ndzəpə̀ pwe’fo’ à təəŋ sə̀’ mvwe’ sə̀sap. ¹⁸Wo təəŋ fo’, nə sə fuŋ mvə̀’nə̀ wo yə ŋga ndindi mis sə lòkok mʉtsə̀ ŋga lak sə sə sə. Wo sə cep də, <<À yè yèe, lak mok ka co yè’e ntòyam dzeŋ yuk.>> ¹⁹Wo à gbʉ̀ dzərə sə nze, nə sə kɛ’ŋgùŋ də, <<Ghʉghi’, a ndòbohòlak yè’sə. Bʉ̀ ŋgàa tse’ ŋgwes mʉ ndzəpə̀ pwe’ a bʉ̀ʉŋ ŋgàa ghàk bʉ̀ʉ ghàha lak yè’sə. Wèeŋ ja’a na mvə̀’nə̀ yà’ mè gɛsə gù vɛ’ɛ kɛ̀’ mò’fis è.>>

Lak Babilòŋ Tse’ ŊgòYə Ŋgə’ Vɛ’ɛ Bòŋ

²⁰Bwe mʉbu wèeŋ sam, nə kwa bʉ̀ʉ lak Babilòŋ gbʉ̀ laŋ. Ŋgàa ntum Jisòs bə ŋgàa tsòhòbum Nwì wèeŋ ŋak sə̀’. Bʉ̀ʉ Nwì pwe’ kwa ŋak vɛ’nə bʉ̀ʉsə̀ Nwì a làk fəsə fa lak yà’sə fòo sə̀ yi à yeŋsə weŋ ŋgə’ sə laŋ.

²¹Fana masinjà Nwì mòk à və̀ə, nə kə le’ ma ŋkʉ̀ŋkʉ̀m lìs mòk co ŋgòk, nə mak bisə gesə lo nà’ sənə ndzəp nə̀ ghaŋ nə, nə cep də, <<Yà’a mvə̀’nə̀ wo nə kʉəmsə mak lak sə̀ ghaŋ sə̀ wo to yà’ də Babilòŋ yà’a vɛ’nə fana ŋwè kà yà’ mok yə fe’lə̀. ²²Bwìŋ nə kà ŋga ŋwè sə buk luŋ, kè ŋga wo sə fʉəp ndìŋgòm, kè fʉəp ntàŋ nə ye ŋga bwì sə yəm ŋkì fo’ mok yuk fe’lə̀. Ŋgà gʉ̀ tsərə̀ bum bə bo nə kà mok mvwe’ lak yà’sə sə̀’ ye. Wo nə kà ŋga ŋgòk cèp də ŋwè sə gòk bɛŋ fo’ mok sə̀’ yuk fe’lə̀. ²³Kàak nə kà fo’ mok sə̀’ kʉə yuk. Wo nə kà gùrə̀ fo’ də wo bə̀k ŋwàŋwè mok sə̀’ fa yuk. Bʉ̀ ŋgàa sèŋ bum sə̀ mvwe’ lak awèŋ à ye bʉ̀ʉ sə̀ bwì sə nzeŋgòŋ wo. Wèŋ à sə bòrə wes bwì pwe’ bə rə̀əm awèŋ sə̀’, yà’a ŋga’a mok bʉ̀ə̀. ²⁴Lak yà’sə yə ŋgə’ vɛ’nə bʉ̀ʉsə̀ wo yə ndʉəm ŋgàa tsòhòbum Nwì bə bʉ̀ʉ Nwì mok weŋ nə ye bʉ̀ʉ sə̀ wo à zə wo sə nzeŋgòoŋ fɛŋ pwe’fo’ mvwe’ lak yà’sə.>>

Wo Yəm Ŋkì Mʉbu ŊgòKùksə Nwì

¹Yà’sə à mèe, mʉ̀ yuk ŋga ŋgìi bwì sə ywɛ̀’ mʉbu vɛ’ɛ ŋkʉ̀ʉŋntɛ̀ŋ. Wo à sə yəm ŋkì, nə sə gurə bə ŋàŋ dʉk də,

<<Hàlìluyà, kwasə Nwì.

A yi nə̀ yi gʉ̀ tə̀tè a tse’è nə lùŋ nə.

Kə̀kuk bə ŋàŋ pwe’ ye bohòyi.

²Yi ŋwə̀ nə̀ yi tse’ zìnə,

Yi sakgə̀ nzak nje bə mandzə̀ nə̀ nà’a kə̀kʉrə̀.

Yi sak nzak ŋwà sàhà nə̀ sàhà ye sə à sə bʉpsəgə̀ nzeŋgòŋ nə nà’a,

Nə lak fəsə fa nà’ fòo sə̀ ŋwà nə à zə bwe ŋgàa fàha ye sə.>>

³Wo à dʉk fe’lə də <<Hàlìluyà>> sə̀mok. Wo də,

<<Ndindi sə̀ yà’ sə lòkok mvwe’ lak yà’sə mvə̀’nə̀ yà’ sə sə,

Nə kà teŋsə̀ yuk.>>

⁴Fana bʉ̀ ŋkwàha bʉ̀ʉ sə̀ hum ba-ncòp-kwè, bə yum sə̀ kwè sə̀ wo cu ŋwəm sə à bʉhʉ sə nze, nə kuksə Nwì nə̀ yi cu mʉnə kapràk nə. Wo à sə kùksə yi, wo sə cep də,

<<Hàlìluyà, a ye vɛ’nə.>>

⁵Mʉ̀ yuk ŋga ŋgì mòk sə cèp tesə və̀ mvwe’ kapràk Nwì. Nà’ sə cep də,

<<Wèŋ bʉ̀ ŋkwàha bwì bə bweŋke’ pwe’fo’ sə̀ wèŋ fàk bohòNwì, nə sə wəp yi,

Wèeŋ kuksə Nwì àvès nə.>>

⁶Mʉ̀ yuk fe’lə yumok co a ŋgìi bwì vɛ’ɛ nduk nə̀ nduk. Ŋgìi sə yuhu co sə gbʉ̀ cəcwà nə ye co mbʉ̀ŋ sə kùm yi sə̀’. Ŋgì nə sə cep fis də,

<<Halìluyà, Nwì àvès nə̀ yi sə̀’ Tà àvès,

Yi tse’ bum pwe’ mok ndzə bohòyi.

Yi yèto gaŋ ŋkum ye laŋ.

⁷Vesùwèeŋ ŋak, nə kwa bə̀boŋ,

Nə kuksə liŋ ye sə̀ ghaŋ sə.

A vɛ’nə bʉ̀ʉsə̀ mvə̀k kʉ̀rə laŋ nə̀ Mo Nsùŋgaŋ Nwì nə nə gʉ gù.

Ŋgwegù nə fʉ̀hʉ ni’ ye ŋgòlògùu sə sə̀’ laŋ.

⁸Nwì fa yi cə̀ək sə̀ fəfop ŋgòni,

Yà’ rɛŋ vɛ’ɛ, nə sə ba’a sə̀’.>>

Cə̀ək sə̀ fəfop yà’sə tə mʉnə tu bum sə̀ bə̀boŋ sə̀ bʉ̀ʉ Nwì wèŋ à gʉ̀ʉ.

⁹Fana masinjà nə̀ yi à cèp to bohòmʉ̀ mantombì fa’ nà’a dʉk fe’lə mʉ də, <<Còm bum yè’e: A rɛŋsi bohòŋwə̀ nə̀ wo to yi də yi və mvwe’ gùu Mo Nsùŋgaŋ nə.>> Yi à cèp wes vɛ’nə fana yi dʉk fe’lə mʉ sə̀’ də, <<Cep yè’sə Nwì bə tu ye.>> ¹⁰Ànə geŋ mʉ̀ gbʉ tsooŋ sə nze də ya mʉ kuksə masinjà Nwì nə fana yi dʉk mʉ də, <<Kà vɛ’nə gʉ̀. Mʉ̀ mègù sə̀’ ŋgà fàk Nwì co wù, nə ye sə̀’ co moma nə̀ fòpwe’ nə̀ yi jə ncèp nə̀ zìnə nə̀ Jisòs à nìtsə̀’ fa bwì nà’ nə. Wù tse’ ŋgòkùksə mègù Nwì yiìyi.>> Zìnə nə̀ Jisòs à nìtsə̀’ fa bwì nə, a ntʉm ncèp nə̀ ŋgàa tsòhòbum Nwì wèŋ à sə tsòho fa bwì nə.

Ŋwə̀ Nə̀ Yi À Kok Nàmbà’rə̀ Nə̀ Fəfop

¹¹Fana mʉ̀ ye ŋga ntòbu mùhu nòto. Mʉ̀ ye gesə nàmbà’rə̀ nə̀ fəfop mbwa. Liŋ ŋwə̀ nə̀ yi à kok cu mʉnə nàmbà’rə̀ nə à ye də, <<Ŋwə̀ nə̀ zìnə nə̀ aco a naaŋ tu bohòyi.>> Yi kə̀kʉrə̀ bə mandzə̀ nə̀ yi sakgə̀ nzak, nə ye bə mvə̀’nə̀ yi màkgə̀ dzè’e ye sə̀’. ¹²Lis ŋwə̀ ènə à ye co sə kʉə lʉm mis. Yi à ta tse’ tàam ŋkum mʉtuhù yi vɛ’ɛ ŋkʉ̀ʉŋntɛ̀ŋ. Wo à còm naaŋ fa yi liŋ mòk mʉ ni’ì yi nə̀ yi rì mègù nà’ yi yiìyi. ¹³Yi nitse’ cə̀k mòk ŋga wo à cì nà’ bə ndʉəm. Wo to liŋ ye mok sə̀’ də, <<Ncèp nə̀ Nwì.>> ¹⁴Bʉ̀ʉ sə̀ mʉbu pwe’ à sə bɛ’ lòyi co də a ŋgàa mà’ dzè’. Wo à nitse’ cə̀ək sə̀ yà’a rərɛŋ nə ye fəfəp. Wo pwe’ à kok cu mʉnə nàambà’rə̀ə sə̀ fəfəp. ¹⁵Fèk mòk à tesə tsoŋ kə̀ cùhu yi. Nà’a fèk nə̀ yi nə ləsə lak sə̀ fòpwe’ bə zeŋ, nə ghak yà’wèŋ, wo sə̀ wo kà yi dzəmgə̀. Yi nə kok gaŋ sə̀ gʉgʉŋ mʉtuhù wo nə sə sak bə ntò’ ntɛŋ, nə kə ŋam fis ndzəp nto’o grep mvwe’ sə̀ wo ŋamgə̀ sə. Yè’sə nə sə niŋ tsok mvə̀’nə̀ də Nwì yi tse’ ŋàŋ pwe’ yi, nə sə jok vɛ’ɛ wù kà fʉ̀k. ¹⁶Wo à còm naaŋ fa yi liŋ ye mʉ cə̀’ə yi bə mʉ bù’u yi sə̀’. Liŋ sə̀ wo à còm sə à ye də, <<Ŋkum nə̀ yi tse’ ŋkəŋkum pwe’ yi, nə ye Tà nə̀ yi tse’ tà pwe’ yi.>>

¹⁷Mʉ̀ yə fe’lə sə̀’ ŋga masinjà Nwì mòk tə mʉnə nùm nə̀ nà’a togə̀ nè’e. Yi sə to fuŋ swiŋ sə̀ yà’ a zʉgə̀ vèeŋ bum də, <<Wèeŋ və, nə kə zʉ ŋkà’ nə̀ ghaŋ nə̀ Nwì to nə. ¹⁸Wèeŋ kə zʉ vèeŋ ŋkəŋkum bə vèe ŋkum sojà nə ye bʉ̀ʉ awo sə̀ wo tse’ ŋàŋ sə wèŋ. Wèeŋ kə zʉ vèe nàambà’rə̀ nə ye vèeŋ bʉ̀ʉ sə̀ wo kokgə̀ yà’ sə̀’. Wèeŋ kə zʉ vèeŋ bwì pwe’fo’, vèe ŋkwɛ̀ŋ bə bwe lak nə ye vèeŋ ŋkwàha bwì bə bweŋke’ wèŋ pwe’.>>

¹⁹Ànə geŋ, mʉ̀ ye nàm ŋgòŋ nə bə ŋkəŋkum sə̀ sə nzeŋgòŋ anə bə sojàa awo wèŋ. Wo à benə ŋgòdə wo mak dzè’ bə ŋwə̀ nə̀ yi ànə kok cum mʉnə nàmbà’rə̀ nə̀ fəfop nə bə sojàa sə̀ nà’ wèŋ pwe’fo’. ²⁰Wo à gha’ yà’wèŋ, nə ko nàm ŋgòŋ nə, nə ko bə ŋwə̀ nə̀ yi à sə bòrə bwì də yi sə tsòho bum Nwì nà’a wèŋ. Yi nə̀ yi à sə gʉ̀ maŋgəŋgèŋ mantombì fa’ mʉnə tu nàm nə nà’a. Yi ànə borə bʉ̀ʉ sə̀ wo tse’ ncòom nàm nə, nə ye sə̀ wo à sə kùksə yu nə̀ wo à bom nà’ ŋgòyamsə liŋ nàm nə sə̀’ bə nsàap maŋgəŋgèeŋ yà’sə. Wo à ko jə nàm nə bə ŋgà bòrə̀ bwì nə pwe’ ŋwəm, nə kə mak gesə lo wo sənə mis mòk nə̀ ghaŋ co tə̀m. Mis nə sə kʉə fo’ bə ŋàŋ co wo gèsə ca ŋkàŋ. ²¹Ŋwə̀ nə̀ yi à kok cu mʉnə nàmbà’rə̀ nə̀ fəfəp nə à jə fèk nə̀ nà’ à tesə tsə kə cùhu yi nə, nə zə wes ŋgàa màk dzè’e mok sə bə zeŋ lòoŋ fo’. Ànə geŋ swiŋ wèŋ pwe’ baaŋ və, nə kə zʉ vèeŋ awo sə tə̀tè wo ze’ mpʉʉŋ mpʉʉŋ.

Jisòos Nə Sak Gaŋ Lùumŋgòŋ Ncùhù Mò’fis

¹Mʉ̀ à yə masinjà mòk sə̀’ ŋga yi tsə tesə mʉbu. Yi à kotse’ ki wʉ sə̀ yà’a kà lə̀gə̀ sə ndzə bohòyi. Yi kotse’ kwaŋ mòk nə̀ ghaŋ vɛ’ɛ ndzə bohòyi anə sə̀’. ²Yi à ko ŋòroŋ nə, nə kiŋ nà’ bə kwaŋ nə vɛ’ɛ mpaaŋ, də nà’a nə cum vɛ’nə mʉnə lùumŋgòŋ ncùhù mò’fis. Ŋòroŋ ànə, yi no nə̀ yi à ye to mantombì fa’ ntinə bə ntinə bʉ̀ə̀ nà’a. A sə̀’ yi nə, nə̀ liŋ ye mook də Satà, nə̀ yi sə̀’ ze’ nə. ³Masinjà Nwì nə à jə yi, nə kə mak gesə lo sənə wʉ sə̀ yà’a kà lə̀gə̀ sə. Yi mak gesə nà’ ca, nə lok bə ki, nə lem boŋsə ncùu wʉ sə bə̀boŋ də ya nà’a kà tesə̀ kok. Yi də nà’a nə cum ca vɛ’nə mʉnə lùumŋgòŋ ncùhù mò’fis, nə kà ŋgò kə̀ bòrə kɛ’ bwì sənə nzeŋgòŋ mok cu. Lùumŋgòoŋ sə̀ ncùhù yè’sə me wes ntsə’ nə ŋkuŋ wo fiŋ me’rə tsoŋ yi mʉnə mvə̀k moòm ghàr vɛ’ɛ.

⁴Mʉ̀ à yə kapràak mok ŋkʉ̀ʉŋntɛ̀ŋ, ŋga bwì cu mbwa. Bʉ̀ʉ sə̀ wo à cu mbwa sə à ye bʉ̀ʉ sə̀ wo a fa wo ŋàŋ ŋgòsak fa bwì nzak. Mʉ̀ à yə yòŋsə̀ə bʉ̀ʉ sə̀ wo à zə wo də yà’wèŋ cèp fis kə̀ cùhu wo də wo dzəm bohòJisòs, nə sə tsoho fa bwì ncèp Nwì yà’a sə̀’. Yè’sə bʉ̀ʉ sə̀ wo à ka nàmŋgòŋ nə kè yu nə̀ wo à ci ŋgòyamsə liŋ ye nə nà’a co Nwì kuksə. Wo à ka sə̀’ dzəm də wo naaŋ fa wo ncòom nàm nə mʉ nzà sihì kè ndzə bohòwo àlɛ sə̀’ dzəm. Bʉ̀ʉ sə̀ wo à kpʉ sə, à lòkok və̀ mvwe’ kpʉ ŋwəm, nə sə kə sak gaŋ bə Krɛst. Wo à sak vɛ’nə tə̀tè lùumŋgòŋ ncùhù mò’fis. ⁵Yà’a mvə̀’nə̀ bwì a lòkok to mvwe’ kpʉ, ntò nə̀ kɛ̀’ mò’fis. Bʉ̀ kpʉkpʉʉ mok sə pwe’ à ka yàwo lòkok tə̀tè lùumŋgòoŋ sə̀ ncùhù mò’fis à cà ŋkuŋ. ⁶A rɛŋsi bohòbòp bʉ̀ nə̀ wo lòkok mvwe’ kpʉ nə̀ mantombì ènə. Nwì a sè fis wo yà’sə zok. Kaco kpʉ nə̀ kɛ̀’ ba nə jwɛŋ fe’lə wo mok yeŋ. Wo nə sə gʉ bum sə̀ ŋgòkùksə Nwì nə ye Krɛst sə̀’ co ŋgàa fa satikà’ bohòNwì, fana bə yà’wèŋ kok gaŋ sə mʉnə lùumŋgòŋ ncùhù mò’fis.

Wo Gha’ Satà Laŋ

⁷Lùumŋgòoŋ sə̀ ncùhù sə cà fana wo nə fiŋ me’rə Satà mvwe’ sə̀ yi cu ndapndzəm sə. ⁸Yi nə gi kɛ’ wes lak nzeŋgòŋ nə ma nə̀ fòpwe’fo’ ŋgòbòrə bwì. Liŋ lak yè’sə wo togə̀ yà’ də Gòg bə Magòg. Yi nə to benə yà’wèŋ mvwe’ mò’fis də bə yà’wèeŋ təm dzè’ bə Nwì wèŋ. Wo nə ye vɛ’ɛ wùriŋ co ŋgwansaa sə̀ sə ŋgʉ ndzəp yè’e. ⁹Wo maŋ lo mvwe’ nzeŋgòŋ nə fo’ pwe’fo’. Wo kə kʉrə lok mvwe’ sə̀ bʉ̀ʉ Nwì wèŋ cu sə sə̀’, mvwe’ lak sə̀ a fo’ ntʉm lak nə̀ Nwì dzəm nə. Wo təəŋ dzooŋ vɛ’nə, mis tsooŋ mʉbu, nə ləsə wo fo’ lòoŋ. ¹⁰Fana wo à jə ze’ nə̀ yi à sə bòrəgə̀ wo nə, nə mak gesə lo nà’ sənə mis nə̀ nà’a co tə̀m, nə sə kʉə co wo gèsə ca ŋkàŋ nə. Yà’a sə̀’ mvwe’ sə̀ nàm nə bə ŋgà bòrə̀ bwì də yi sə̀’ ŋgà tsòhòbum Nwì nə, cu sə̀’ ca. Wo nə cum ca, nə sə ye ŋgə’ nə̀ maràŋ bə nə̀ ndzəmə̀ pwe’fo’ mvèsə nə̀ mvèsə̀.

Sak Nzak Nə̀ Nà’a Mok Nə̀ Lə̀sə̀ Mbwè

¹¹Mʉ̀ à ye fe’lə kapràk mòk nə̀ ghaŋ nə̀ nà’a fəfəp, ŋga ŋwə̀ nəmòk kok cu mbwa. Yi tesə və ntɛ̀ŋ, ntòbu bə nzeŋgòŋ nom bisə wes fo’ pwe’ wà. ¹²Mʉ̀ ye bweŋke’ bə ŋkwàha bwì wèŋ sə̀ wo ànə kpʉ taaŋntɛ̀ŋ ŋga wo tə kə mantombìi kapràk nə. Wo à jə və̀ ŋwàha mok, nə muk yà’. Wo muk fe’lə ŋwàk mòk sə̀’ nə̀ nà’a ŋwàk lùŋ. Ŋwə̀ nə̀ yi à cu mʉnə kapràk nə à sə sak nzak bwì yi. Yi à sə sak wo bə yusə̀ wo à còm nòŋsə ndzənə ŋwàak sə də yà’wèŋ à gʉ̀ʉ. ¹³Bwì pwe’ à ye fo’, nə̀ mò’fis kà bwehè. Bʉ̀ʉ sə̀ wo à kpʉ ma sə ndzəpə̀, à tesə foho və̀ fe’lə sə̀’. Kpʉ bə nzeŋgòŋ yòŋsə̀ə bʉ̀ kpʉkpʉ pwe’ à tum fəsə vèsə bʉ̀ʉ awo maŋkwɛ̀ŋ, ya wo sak yà’wèŋ bə bum sə̀ wo à gʉ̀ʉ. ¹⁴Fana wo à ko jə kpʉ bə nzeŋgòŋ yòŋsə̀ə bʉ̀ kpʉkpʉ pwe’, nə mak gesə lo wo sənə tə̀m mis nə. Tə̀m mis ànə kpʉ nə̀ ba nə. ¹⁵Ŋwə̀ nə̀ wo à ka liŋ ye ndzənə ŋwàk lùŋ nə ye pwe’, wo ko mak gesə lo yi sənə tə̀m mis nə.

Jòrosalèm Nə̀ Fi

¹Ànə geŋ mʉ̀ ye ntòbu nə̀ fi bə nzeŋgòŋ nə̀ fi sə̀’. Ntòbu bə nzeŋgòŋ nə̀ mantombì nə à cà wes lòlaŋ. Ndzəp nə̀ ghaŋ nə à ka mok sə̀ yeŋ fe’lə. ²Mʉ̀ ye ŋga’a lak sə̀ rərɛŋ sə̀ wo to yà’ də Jòrosalèm nə̀ fi nə, ŋga nà’ tesə tsoŋ mʉbu. Nà’ à sə tesə tsoŋ və̀ yà’sə bohòNwì. À ye ŋga wo fʉ̀hʉ tsərə nà’ co wo fʉ̀hʉ wà’ŋgwɛ̀ŋ ŋgòfa lòndu ye. ³Mʉ̀ yuk ŋga ŋgì mòk sə cèp vèsə mvwe’ kapràk nə bə ŋàŋ də, <<Yeè, Nwì və̀ ŋgòcu mok bə bwì wèŋ mvwe’ mò’fis. Yi nə sə cum bə yà’wèŋ, wo nə ye bʉ̀ʉ ye, yi ye Nwì yà’wèŋ sə̀’. ⁴Yi nə yisə fis fa wo ndzəplis awo pwe’fo’. Kpʉ nə kà mok ye yuk, manziŋ kà sə̀ ye fe’lə̀, waŋ kà mok sə̀ ye, yaàŋni’ kà sə̀ ye yuk fe’lə̀. A nə ye vɛ’nə bʉ̀ʉsə̀ bum sə̀ zəm a cà lòwes laŋ.>>

⁵Ŋwə̀ nə̀ yi à cu mʉnə kapràk nə cep fe’lə də, <<Yeè, mʉ̀ sə gʉ̀ bum pwe’ mok fi nə̀ fi.>> Nə dʉk mʉ sə̀’ də, <<Còm bum yè’sə, bʉ̀ʉsə̀ ncèp ènə nə kà wà cà, nà’a zìnə.>> ⁶Yi dʉk fa mali mʉ də, <<Fàak am mè wes mok laŋ. A mʉ̀ nə̀ mʉ Alfà nə ye Omegà, nə̀ mʉ̀ yèto nə ye nə̀ mʉ̀ lə̀sə. Mʉ nə fa ndzəp nə̀ nà’ sə kì tesə və̀ mvwe’ ndzəp nə̀ nà’a mantùŋ lùŋ nə bohòndàaŋwè pwe’ nə̀ ntʉm sə sə yi. Mʉ nə fa yi yà’ wà. ⁷Ŋwə̀ nə̀ yi gha’-a pwe’fo’, mʉ̀ fa yi bum yè’sə sə̀’ pwe’. Mʉ nə ye Nwì ye, yi ye mo àm. ⁸Nə ye də bohòbòp bʉ̀ nə̀ wo ŋgàa wʉə, ŋgàa kà zìnə tse’ wèŋ, ŋgàa gʉ̀ bʉp sə̀ cà cù wèŋ, ŋgàa zə bwì, nə ye ŋgàa kohòsàhà wèŋ pwe’, wo nə̀ yə ŋgə’ nə̀ wù kà fʉ̀k. Bʉ̀ʉ sə̀ wo ŋgàa fe ŋgam wèŋ, ŋgàa gʉ̀ rùm bə ŋgàa cì’ mvwès wèŋ pwe’fo’ wo nə̀ yə ŋgə’ sə̀’ wù kà fʉ̀k. Nsàap bʉ̀ʉ sə̀ wo gʉ̀ bum sə̀ bʉp yè’sə pwe’, wo nə ko wo, nə mak gesə lo wo sənə tə̀m mis nə̀ nà’ sə kʉə co wo gèsə ca ŋkàŋ. Nà’a yà’a kpʉ nə̀ ba nə.>>

⁹Masinjà Nwì mòk mʉŋgorə̀ masinjàa sə̀ sàmba sə̀ wo à tse’ ŋgàap ŋgə’ sàmba sə, à dʉk mʉ də, <<Və̀ə ya mʉ niŋtsok fa wu wà’ŋgwɛ̀ŋ nə̀ yi ŋgwe Mo Nsùŋgaŋ nə.>> ¹⁰Ànə gèŋ, Yòŋsə Nwì ko wumsə mʉ, fana masinjà nə jəŋ lo mʉ mvwe’ nda mòk nə̀ nà’ sàp vɛ’ɛ wùriŋ. À kə̀ dzèŋ fo’, yi niŋtsok fa mʉ lak Nwì sə̀ yà’a rərɛŋ sə̀ wo to yà’ də Jòrosalèm ŋga yà’ sə tesə tsə mʉbu bohòNwì. ¹¹Marɛŋ Nwì à sə rɛŋ fo’ vɛ’ɛ, lak sə sə ba’a co nsàp lìs mòk nə̀ wo togə̀ nà’ də jaspà. Yà’ sə rɛŋ vɛ’ɛ daàŋ daàŋ. ¹²Wo bom dzoŋ yà’ bə ŋka’ sə̀ yà’ à sàp lòmʉtsə̀ vɛ’ɛ wùriŋ. Ŋka’ sə à tse’ ncù hum-ncòp-ba. Masinjàa ye fo’ sə̀’ hum-ncòp-ba sə̀ wo sə jə ŋkərə̀ bə ncùu ŋka’ sə mò’fis, mò’fis. Wo à còm naaŋ liŋ bòp bwe Izùrɛ wèŋ sə̀ hum-ncòp-ba mʉnə tu ncùu ŋka’ sə mò’fis mò’fis lòoŋfo’. ¹³Ŋka’ sə à tse’ ncù tɛ’ tɛ’ ma mò’fis. Ncù à ye ma ntonùm tɛ’, ma nconùm sə̀’ tɛ’, ma kəkok sə̀’ tɛ’ nə ye ma tsətsoŋ sə̀’ tɛ’. ¹⁴Wo à ci kùum ŋka’ sə mʉnə lìs hum-ncòp-ba. Wo à còm naaŋ liŋ bwe ŋgàa ntum Mo Nsùŋgaŋ sə̀ wo à ye hum-ncòp-ba sə mʉnə lìis sə mò’fis, mò’fis.

¹⁵Masinjà nə̀ yi à cèp bohòmʉ̀ nə à tse’ ntɛŋ mòk nə̀ wo fʉ̀kgə̀ bum bə zeŋ, ŋga wo à gʉ̀ nà’ bə guù. Yi à jə və̀ nà’ ŋgòfʉ̀k lak sə bə zeŋ, nə fʉk ncùu ŋka’ sə bə mbàaŋ sə sə̀’. ¹⁶Masinjà nə à fʉ̀k lak sə, nə ye də yà’a yəyərə̀, ma mòk à ka ma mòk sap ghak. Ma nə̀ mò’fis à ye co kìlometà ncùhù ba bə ŋkʉ̀ ba. Yà’ à ye vɛ’nə ma kwè fo’ bə kəkok wèŋ pwe’. ¹⁷Masinjà nə à fʉ̀k mbàaŋ ŋka’ sə sə̀’, yà’ tesə mità hum sàmba. Yi à sə fʉ̀k yà’ sə̀’ mvə̀’nə̀ bwìiŋ fʉ̀kgə̀ bum. ¹⁸Wo à ci mbàaŋ sə bə lìs nə̀ wo to nà’ də jaspà nà’a. Wo à ci lak sə yàwo bə guù sə̀ yà’ sə rɛŋ vɛ’ɛ wùriŋ co gə̀las.

¹⁹Kùum ŋka’ sə̀ yà’ à təəŋ dzooŋ lak sə, wo à gʉ̀ yà’ bə nsàap lìs hum-ncòp-ba də ya ŋga yà’a fom boŋ wùriŋ. Lìis sə à tse’ ncòom sə̀ bə̀boŋ wùriŋ. Mòk à ye fəfəp, mòk bə̀baŋ, mòk səseŋ wèŋ nduk nə̀ nduk. Liŋ lìs mòk à ye də, jaspà, nə̀ ba də safì, nə̀ tɛ’ àgàte, nə̀ kwè emerà; ²⁰nə̀ tàŋ onèk, nə̀ ntùŋfu də kàniliyà, nə̀ sàmba kwaas, nə̀ fwame’ berì, nə̀ və̀ke’ topà, nə̀ hum krìsopàràs, nə̀ ncòp-mò’fis də jàsiŋ fana nə̀ ncòp-ba nə də ametìs. ²¹Wo à gʉ̀ ncùu ŋka’ sə bə lìs nə̀ bə̀boŋ nə̀ wo to də perèl nà’a. Wo à gʉ̀ ncù fòpwe’ bə lìs mò’fis, mò’fis. Mandzə̀ə sə̀ mvwe’ lak yà’sə, wo à gʉ̀ yà’ bə guù, yà’ sə rɛŋ daàŋ daàŋ daàŋ.

²²Mʉ̀ à ka ndap Nwì mvwe’ lak yà’sə ye bʉ̀ʉsə̀ Nwì nə̀ yi Tà àvès, nə tse’ ŋàŋ pwe’ yi nə, bə Mo Nsùŋgaŋ nə à ye fo’. ²³Bʉ̀ʉ sə̀ fo’ sə à ka fàk bə nùm kè ŋwə àlɛ tse’, bʉ̀ʉsə̀ marɛŋ Nwì à sə rɛŋ fo’. Mo Nsùŋgaŋ nə à sə rɛŋ mvwe’ lak yà’sə sə̀’ co laàm. ²⁴Bʉ̀ʉ sə̀ sə nzeŋgòŋ nə sə gi ye jəŋ sə̀’ bə marɛŋ ènə. Ŋkəŋkum sə̀ sənə nzeŋgòŋ nə pwe’ nə jə və ghàha awo sə̀ fo’. ²⁵Ncùu ŋka’ sə nə sə nooŋ megu to ghà nə̀ fòlòoŋ, ŋwè kà yà’ lok bʉ̀ʉsə̀ ndzəm nə kà fo’ seŋ yuk. ²⁶Wo nə̀ jə və̀ ghàk bə bòoŋ nzeŋgòŋ pwe’fo’ fo’. ²⁷Megu də yumok sə̀ yà’a bʉp nə̀ kà mandzə̀ ŋgòkə̀ ni fo’ tse’ lok. Ŋgàa gʉ̀ bum marè’tu bə ŋgàa cì’ mvwès wèeŋ nə̀ kà fo’ sə̀’ kə̀ ni yuk. Bʉ̀ʉ sə̀ wo nə̀ ni fo’, mègù wo sə̀ wo à còm nòŋsə liŋ awo ndzənə ŋwàk lùŋ nə̀ Mo Nsùŋgaŋ nə.

Ndzəp Nə Ye Tʉ Sə̀ Yà’a Fagə̀ Bwìŋ Lùŋ

¹Masinjà nə à jə lòmʉ, nə kə niŋ tsok fa mʉ mantùŋ nə̀ nà’a fagə̀ bwì lùŋ nə. Ndzəp nə à sə bà’a, nə sə rɛŋ vɛ’ɛ njàaŋ. Ndzəp nə à sə tesə və̀ mvwe’ kapràk Nwì bə Mo Nsùŋgaŋ nə. ²Nà’à sə kì cà mʉtsətsə’rəə ndu mandzə̀ nə̀ mvwe’ lak yà’sə. Tʉ sə̀ ŋgwìi sə fagə̀ bwì lùŋ à təəŋ tsoŋ lòŋgʉ mantùŋ anə ma ba fo’. Tʉ sə zəmgə̀ nsàap ŋgwì hum-ncòp-ba sənə lùmŋgòŋ nə̀ mò’fis. Yà’a zəmgə̀ nsàp nto’ nə̀ zok bə ŋwʉ nə̀ fòpwe’. Wo sə jəŋ mvùu tʉ sə, nə sə gʉ mesə fa bwì mvwe’ lak pwe’ yiyaŋ awo bə zeŋ. ³Mʉ zə̀p yu nəmòk nə̀ co Nwì kà bə zeŋ kwa kà fo’ ye yuk nə̀ kɛ̀’ mò’fis. Yu nə̀ nà’a nə ye fo’ mègù kapràk nə̀ tse’ nà’ Nwì nə ye bə Mo Nsùŋgaŋ nə. Bʉ̀ʉ ye wèeŋ nə sə kuksə yi sə̀’ fo’. ⁴Wo nə ye si ye, fana wo com naaŋ fa wo liŋ ye sə mʉ nzà sihì wo. ⁵Ndzəm nə kà mok sə̀ ye, bwì kà fàk bə laàm kè nùm àlɛ sə̀’ tse’ fe’lə̀, bʉ̀ʉsə̀ Tà Nwì, yi bə tu yee nə ye marɛŋ àwo. Wo nə̀ kok gaŋ mok mvèsə̀ nə̀ mvèsə̀.

⁶Ànə geŋ, masinjà Nwì ànə dʉk fa mʉ də, <<Ncèep yè’sə zìnə, co ŋwè dzəm tse’ yà’. Tà Nwì àvès nə̀ yi fagə̀ ŋgàa tsòhòbum ye yòŋsə̀ ye də wo tsoho ncèp ye nə, tumsə vèsə masinjà ye nə yi. Yi tumsə nà’ də nà’a kə tsok fa bʉ̀ʉ sə̀ wo sə bɛ’ mandzə̀ ye wèŋ bum sə̀ yà’a nə ye mvə̀k ghàr.>> ⁷Jisòs də, <<Kà swì də mʉ nə bwi və mvə̀k ghàr swì. A nə ye rɛŋsi wùriŋ bohòŋwə̀ nə̀ yi nòŋsə bum sə̀ yi yuk yà’ ndzənə ŋwàk ènə, bʉsə Nwì nìtsə̀’ fa bwìŋ yà’ yi bə tu ye.>>

Jisòs Kʉəp ŊgòBwì Və̀ə

⁸Mʉ̀ Jon, mʉ̀ a yuk bum yè’sə bə ntu’u am, nə ye yà’ sə̀’ bə lis am. Mʉ̀ à yuk nə ye wes yà’ vɛ’nə fana, mʉ̀ bʉhʉ tsoŋ mantombìi masinjà nə sə nze də mʉ kuksə yi. ⁹Fana yi dʉk mʉ də, <<Kà vɛ’nə gʉ̀, mʉ̀ mègù sə̀’ ŋgà fàk Nwì co wù bə bwe ma yo sə̀ wo ŋgàa tsòhòbum Nwì. Mʉ̀ megu sə̀’ co ndàaŋwè pwe’ nə̀ yi sə nòŋsə ncèp nə̀ nà’ cu ndzənə ŋwàk ènə. Ŋwə̀ nə̀ co wo kuksə yi mègù Nwì yiìyi.>>

¹⁰Yi à dʉk fa fe’lə mʉ sə̀’ də, <<Bum sə̀ Nwì nìtsə̀’ yà’ ndzənə ŋwàk nè’e yè’e, kà də wu swihi yà’ dʉk. Gʉ̀ də ndàaŋwè pwe’fo’ riŋ bə zeŋ, bʉ̀ʉsə̀ mvə̀k bohòbum yè’sə ŋgòye, kʉəp laŋ. ¹¹Mvə̀ək mok bʉ̀ə̀ fana mè’rə ŋwə̀ nə̀ yi sə gʉ̀ ye bʉp sə gʉ̀ ntɛ̀ŋ. Ŋgà gʉ̀ bum sə̀ jì marè’tu sə gʉ ye sə̀’ ntɛ̀ŋ. Nə ye də ŋwə̀ nə̀ yi sə gʉ̀ ye yusə̀ yà’a kə̀kʉrə̀ sə gʉ ye sə̀’. Ŋwə̀ nə̀ yi sə bɛ’ ye mandzə̀ nə̀ Nwìi sə bɛ’ lo ye sə̀’ ntɛ̀ŋ.>>

¹²Jisòs sə dʉk də, <<Yu’rə na yè, mʉ̀ sə foho və̀ mvə̀k momjo. Mʉ və̀ə, mʉ̀ tse’ və bə yusə̀ mʉ nə lak ndàaŋwè pwe’ bə zeŋ. Mʉ nə lak ndàaŋwè pwe’fo’ mvə̀’nə̀ fàak ye sə̀ yi à gʉ̀ʉ. ¹³Mʉ Alfà nə ye Òmegà22:13 Alfà nə a liŋ ncòm nə̀ nà’ yèto bə ncòom sə̀ ŋgòcòm ncèep lak bʉ̀ʉ Gris wèŋ fo’. Wo togə̀ liŋ ncòm nə̀ nà’ lə̀sə nə də Òmegà., nə̀ mʉ̀ à yèto, nə ye nə̀ mʉ̀ lə̀sə sə̀’ mʉ̀, mʉ ŋwə̀ nə̀ mantombì nə ye nə̀ maŋkwɛ̀ŋ. Bum pwe’ à yèto və̀ bohòmʉ̀, bum pwe’ nə̀ kə̀ mè sə̀’ bohòmʉ̀.>>

¹⁴Rɛŋsi bohòbʉ̀ʉ sə̀ wo à cùk cə̀ək awo rərɛŋ. Yà’a wo sə̀ wo nə tse’ mandzə̀ nə̀ ŋgòni lòmʉmvwe’ lak yà’sə, nə zʉ nto’o tʉ nə̀ nà’a fagə̀ bwì lùŋ nə. ¹⁵Bʉ̀ʉ sə̀ wo nə kà kùu awo mvwe’ lak yà’sə kə̀ nə̀ŋ yùu’ a bʉ̀ʉ sə̀ wo co ŋgbʉ, bʉ̀ ŋgàa rʉ̀m, ŋgàa kohòsàhà, ŋgàa zə bwì, ŋgàa gʉ̀ rùm, nə ye ŋgàa cì’ mvwès nə sə kwa bə zeŋ kwaa.

¹⁶<<Mʉ̀ Jisòs, mʉ̀ tum fa weŋ masinjà àm də ya yi tsok fa weŋ bum yè’e pwe’ bʉ̀ʉ cos àm lòoŋ fo’. A mʉ̀ ŋgwì bwì ŋkum Devìd nə ye sə̀’ mʉ̀ nə̀ mʉ sɛ̀ŋtsok nə.>>

¹⁷Yòŋsə̀ Nwì bə ŋgwegù Mo Nsùŋgaŋ nə wèŋ, bə nà’ sə dʉk də, <<Və̀ə.>> Ndàaŋwè nə̀ yi yuk ncèp ènə, wo dʉk sə̀’ dʉk də, <<Və̀ə.>> Ndàaŋwè nə̀ njè ndzəp nə̀ nà’a fagə̀ bwì lùŋ nə sə ya-a yi, yi və sə̀’, nə kə no. Yi və, nə kə no wà.

¹⁸Mʉ̀ sə sə̀ ntu’u ndàaŋwè pwe’ nə̀ yi yuk ncèp nə̀ nà’ tesə və̀ bohòYòŋsə̀ Nwì, sə̀ wo com yà’ ndzənə ŋwàk nè’e dʉk də, a ye-a ŋga ŋwə̀ nəmòk yamsə naaŋ gèsə lòyumok mʉnə ncèp ènə, Nwìi nə yamsə naaŋ gesə lo fa yi ŋgə’ sə̀ wo còm yà’ ndzənə ŋwàk ènə sə̀’. ¹⁹Nə ye sə̀’ də, a ye-a ŋga ŋwə̀ nəmòk cok fis-a ncèp mòk nja sə̀’, Nwìi nə cok fis gesə ma nje sə̀’. Yi nə̀ kà bo sənə tʉ nə̀ nà’a fagə̀ bwì lùŋ nə tse’, nə kà mvwe’ lak nə̀ rərɛŋ sə̀ wo còm yà’ ndzənə ŋwàk nè’e sə̀ kə̀ ni.

²⁰Yi nə̀ yi sə də bum yè’sə zìnə nə sə dʉk də, <<Zìnə, mʉ̀ sə bwì və̀ mvə̀k momjo.>> A kwi’ də, <<Mè’rə yà’a ye vɛ’nə, Və̀ə Tà Jisòs.>>

²¹Bə̀bo nə̀ Tà Jisòos ye bohòbʉ̀ʉ Nwì wèŋ pwe’fo’. Yà’a ye vɛ’nə.