Fìlipiyà

Ŋwàk nə̀ Pol à Còm Fa Bʉ̀ʉ

sə̀ Mvwe’ Lak

FÌLIPIYÀ

Ŋwàk nə̀ Pol à còm fa bʉ̀ʉ Fìlipiyà ènə, yi à còm fa nà’ yà’sə bohòcos nə̀ yi à muk to tsə cip mvwe’ nze Màsìdoniyà nə. Yi ànə còm ŋgòkwɛ’sə nà’ ŋga yi cu ndapndzəm. Pol à kwɛ’sə wo də wo sə cum ncu nə̀ krətèŋ tse’ ŋgòcu nə. Mvəsə̀ yi à sə kwɛ’sə wo, yi sə cep bə nza’ kwəkwa kə̀kɛ’, kə̀kɛ’.

Yi à còm sə̀’ ŋgòkwasə bʉ̀ʉ Fìlipiyà wèŋ sə bə bum sə̀ wo à tumsə fa yi ŋgòtɛsə yi ŋga yi cu bə ŋgə’. Yi à jə mvə̀k ènə sə̀’ ŋgòcèp də yà’wèeŋ ko ntʉm bə ŋgə’ nə̀ yi sə yə, nə ye bə ŋgə’ə sə̀ yà’wèŋ sə yə sə sə̀’.

Pol à cèp ncèep mok sə̀ gʉgʉŋ də, <<Ŋgòcu ŋwʉm a ŋgòsə naaŋ tu bohòKrɛst, nə ye də ŋgòkpʉ a sə̀’ swe’>> (ye ŋgo 1:21). Yi à cèp sə̀’ də bum sə̀ yi à sə kùmgə̀ ŋgùŋ bə zeŋ sə yà’a bohòyi ŋga’a mok co bèp (ye ŋgo 3:4-11). Yi cep mʉmvə̀’nə̀ yi sə lʉ̀ gʉgʉŋ də ŋga yi nə kə ghak nə tse’ lə̀là’ nə (3:12-14). Yi yəm ŋkì mok ŋgòkùksə Jisòs bə zeŋ (ye ŋgo 2:5-11). Nè’nə ŋkì mòk nə̀ mantombì nə̀ nà’ fom wùriŋ nə̀ wo à còm nòŋsə nà’. Nà’ sə cèp bum ba bə liŋ Jisòs: yi à jə ni’ ye sə nze fana Nwì bʉsə yi ŋwə̀ nə̀ ghaŋ.

¹Còm ŋwàk nè’e mʉ̀ʉ Pol ves Timatì. A ves sə̀ vèes ŋgàa fàk bohòJisòs Krɛst. Vès com fa nà’ bohòwèŋ sə̀ wèeŋ bʉ̀ʉ Nwì pwe’ sə̀ wèŋ cu mvwe’ lak Fìlipiyà, nə ye bʉ̀ʉ awèŋ sə̀ mantombì bə sə̀ wo tɛsəgə̀ mʉ cos. ²Nwì nə̀ yi tɛ̀’ àvès bə Tà Jisòs Krɛst gʉ weŋ bə̀boŋ, nə fa weŋ fifi.

Pol Kwasə Nwì Nə Kwɛ’sə Krətèeŋ Sə̀ Fìlipiyà

³Ghà yà lòoŋ nə̀ mʉ tsərəgə̀ weŋ fana, mʉ̀ kwasə Nwì àm. ⁴Nə ye sə̀’ dʉk də, ghà yà pwe’ nə̀ mʉ lɛŋ fagə̀ weŋ pìriyà fana, mʉ̀ lɛŋ bə kwəkwa sə ntʉʉ̀ mʉ̀. ⁵A vɛ’nə bʉ̀ʉ nsàp tətɛsə̀ nə̀ wèŋ à fa mʉ bə fàak Ntirə̀ nə̀ Bə̀boŋ nə. Wèŋ à tɛsə yèto mʉ nùmbu nə̀ wèŋ à yuk to Ntirə̀ nə̀ Bə̀boŋ nə tə̀tè kə dzeŋ ŋga’a. ⁶Mʉ̀ rì bə nə̀ zìnə dʉk də, yi Nwì nə̀ yi à yèto nsàp fàk nə̀ bə̀boŋ ènə sə ntʉʉ̀ wèeŋ nə gʉ mali yà’ tə̀tè nùmbu nə̀ Jisòs Krɛst nə və sə̀mok. ⁷Mʉ tsərəgə̀ weŋ vɛ’nə bʉsə wèŋ cu sə ntʉʉ̀ mʉ̀. Wèŋ à be’lə mʉ sənə bòvə̀m nə̀ Nwì a fa mʉ. Yà’ à yè jə taaŋ ghà nə̀ mʉ̀ à sə lʉ̀ ŋgòdə Ntirə̀ nə̀ Bə̀boŋ nə̀ Krɛst nə zìnə, tè kə dzeŋ ŋga’a nə̀ mʉ̀ sə cu mʉ ndapndzəmə̀. ⁸Mvəsə̀ mʉ̀ dʉk də dzədzəm àm nə̀ ghaŋ nə̀ mʉ̀ tse’ nà’ bohòwèŋ sə və̀ bohòJisòs Krɛst bə tu ye fana, Nwì sə rì ye sə̀’ də mʉ̀ sə cèp zìnə.

⁹Pìriyà njàm nə̀ mʉ̀ sə lɛŋ fa weeŋ dʉk də, dzədzəm awèeŋ sə kuk ghaha lo mantombì, nə ye bə ŋkərə̀ nə̀ bə̀boŋ sə̀’. Də wèeŋ tse’ nsàp ŋkərə̀ nə̀ ŋgògàpsə rì yusə̀ yà’a bə̀boŋ bə sə̀ yà’a bʉp. ¹⁰Yà’a ye vɛ’nə ŋga wèeŋ riŋ mvəsə̀ ŋgòcokfis jə yusə̀ yà’ bògha’ càsə pwe’. A sə̀’ zeŋ sə̀ yà’a nə tɛsə tè Krɛst kə bwi və nùu ŋga wèeŋ bʉ̀ʉ sə̀ rərɛŋ, wèŋ kà nzak tse’. ¹¹Ncum awèŋ sə̀ wèŋ cu, ye megu bə̀boŋ, bə̀boŋ nə̀ nà’ və̀ bohòJisòs Krɛst yiìyi. Bʉ̀ʉ sə̀ wo yə bum yè’sə, wo nə kwasə Nwì, nə kuksə yi.

ŊgòCu Ŋwʉm Yè’sə Yà? BohòMʉ̀ A Krɛst

¹²Bwema am wèŋ, yusə̀ mʉ̀ sə dzəm də wèeŋ riŋ tse’ də, nsàp ŋgə’ nə̀ nà’ a tsèŋ mʉ nà’a, nà’ a tɛsə Ntirə̀ nə̀ Bə̀boŋ nə ŋgòlòmantombì. ¹³Dògarìi sə̀ wo kʉ̀kgə̀ nto’ ŋkum, bə bʉ̀ʉ mok fɛŋ pwe’ a rìŋ də mʉ ŋgà ndapndzəm bʉ̀ʉsə̀ mʉ mo ŋgà fàk Krɛst. ¹⁴Mok sə̀’ dʉk də, ndapndzəm nə̀ mʉ̀ a ni nə, a gʉŋsə bwema ŋkʉ̀ʉŋ ma nə̀ Tà gʉŋsə. Wo sə gʉŋ ghaha nùumbu pwe’ ŋgòtsòho ncèp Nwì, nə kà wʉə tse’. ¹⁵A lɛ də mok sə tsoho liŋ Jisos Krɛst bə njo nə̀ də wo sə wa fàk am, nə sə làp ŋgòjə kù am. Mok sə tsoho yàwo bə ntʉm nə̀ rərɛŋ làaŋ. ¹⁶Wo yè’sə sə gʉ̀ vɛ’nə bə dzədzəm bʉ̀ʉsə̀ wo rì pap də Nwì a fa mʉ fàak sə̀ ŋgòtəəŋ gèem Ntirə̀ nə̀ Bə̀boŋ nə. ¹⁷Mok sə sə kà liŋ Krɛst nə bə nə̀ zìnə tsòhò. Wo sə tsoho bə yòŋsə̀ wi’ nə sə və̀ə wo. Wo sə dʉk ŋgwàaŋ də aco wo yamsə ŋgə’ àm mvəsə̀ mʉ̀ cu mʉ ndapndzəmə̀.

¹⁸A ye-a sə̀’ vɛ’nə, yumok kà bʉp. A ye-a də a sə və̀ə wo bʉp kè bə̀boŋ àlɛ, yà’ ka mʉ yaaŋ, mʉ̀ sə kwa yam-e bə zeŋ kwa. Yusə̀ gʉgʉŋ sə dʉk də bwìŋ sə yuk mali liŋ Krɛst. Yà’a mbwè njo nə̀ mʉ̀ sə kwa nə. ¹⁹Mʉ nə sə kwa sə̀’ bʉ̀ʉsə̀ mʉ̀ rì dʉk də mʉ nə tɛsə li bʉ̀ʉ pìriyàa awèŋ nə ye bə tətɛsə̀ nə̀ nà’a və bohòYòŋsə̀ Jisòs Krɛst. ²⁰Bə nə̀ zìnə, ntʉm àm tə gù dʉk də mʉ kà co marè’tu ko mʉ gʉ̀. A ye lɛ də ye jəŋ ŋga’a nə lo mantombì pwe’, mʉ baŋ ntʉm ya mʉ kuksə Krɛst bə ni’ àm pwe’fo’. A dzəm ye kpʉ kè lùŋ-è, mʉ̀ dzəm ŋgòkùksə liŋ Krɛst. ²¹Mʉ̀ dʉk vɛ’nə bʉ̀ʉsə̀ ŋgòcu ŋwəm nə yè’sə ya? Bohòmʉ̀ yàm, a ŋgòrìŋ Krɛst, nə ye də ŋgòkpʉ, a sə̀’ swe’. ²²A sə̀’ dʉk də ŋga mʉ̀ cu mali-a ŋwəm, aco fàak sə̀ mʉ gʉ tɛsə li bwìŋ sə̀’. Mʉ̀ ka ma nə̀ mʉ lo riŋ. ²³Mʉ̀ tə yè’sə mʉtsətsə’rə ndzəp. Mʉ̀ dzəm də mʉ lo yu am kə cum ves Jisòs. Bògha’ ca zeŋ nə nəm ŋgòcu sə nzeŋgòo fɛn. ²⁴Yumok sə̀ yà’ gʉ càsə sə̀’ dʉk də, mʉ cum mali ŋwəm bʉ̀ʉ tu awèŋ. ²⁵Mʉ̀ rì pap də yè’sə zìnə. Fana mʉ̀ rì də mʉ nə cum mali ŋkuŋ ŋgògʉŋsə weŋ bʉ̀ʉ yusə̀ wèŋ a dzəm, ya wèeŋ tse’ kwəkwa ŋkʉ̀ʉŋntɛ̀ŋ sə̀’. ²⁶Ya ŋga mʉ və̀ kə̀ tsècŋ weŋ sə̀mok fana vesùwèŋ kwa mvwe’ mò’fis bohòJisòs Krɛst bʉ̀ʉ tu am.

Təəŋ Gʉgʉŋ Mvə̀’nə̀ Wèŋ Sə Naaŋtu Bə Ntirə̀ Nə̀ Bə̀boŋ Nə

²⁷Yusə̀ gʉgʉŋ sə də, ncu awèeŋ ye kə̀kʉrə̀ bohòbwìŋ co bʉ̀ʉ sə̀ wo a dzəm Ntirə̀ nə̀ Bə̀boŋ nə̀ nà’a nə̀ Krɛst nə. A ye-a vɛ’nə fana ŋga mʉ̀ və̀ bə nə̀ mʉ̀ ka və pwe’, mʉ̀ sə yuk də wèŋ tə gʉgʉŋ bə yusə̀ mò’fis, nə tse’ cù mò’fis, nə sə lʉ mvwe’ mò’fis bʉ̀ʉ Ntirə̀ nə̀ Bə̀boŋ nə̀ wèŋ a dzəm nə. ²⁸Nə ye sə̀’ də wèŋ sə kà bʉ̀ʉ sə̀ wo bɛ̀ŋgə̀ weŋ wəp lok. Yà’sə nə gʉ wo riŋ də wo nə kpʉ bisə wà, wèŋ tse’ yàwèŋ lùŋ nə̀ nà’a nə̀ kà mè. Nwìi nə niŋ tsok fa wo sə̀’ vɛ’nə. ²⁹A də Nwì a fa weŋ mandzə̀ ŋgòdzəm bohòKrɛst, nə kà vɛ’nə mègù, wèŋ tse’ ŋgòyə ŋgə’ bʉ̀ʉ yi sə̀’. ³⁰Nə̀ ŋga’a nè’e vesùwèŋ sə lʉ̀ bə yusə̀ mò’fis. Cu malì lʉ̀ nə̀ wèŋ nà yə taaŋ ŋga mʉ̀ sə lʉ̀ nà’a, haŋ ŋga’a wèŋ sə yuk də mʉ̀ sə lʉ̀ malì ntòzeŋ.

Tse’ Nsàp Ntʉm Nə̀ Jisòs Krɛst Nà’a

¹Ncu awèŋ nə̀ wèŋ cu nà’ co bʉ̀ʉ Krɛst, kwɛ’səgə̀ weŋ à? Dzədzəm ye fisəgə̀ weŋ ntʉm à? Wèŋ tse’ kwəkwa nə̀ mvwe’ mò’fis weŋ yòŋsə̀ ye nə wèŋ à? Nə ye də wèeŋ tse’gə̀ ntʉm nə̀ bə̀boŋ nə ye koksə̀manziŋ bohòmòk bə mòk à? A vɛ’nə. ²A ye-a vɛ’nə fana, mʉ̀ dzəm də wèeŋ tse’ nsàp tsətsərə̀ nə̀ mò’fis, nə sə dzəm mòk bə mòk, nə ye cù mò’fis, ya mʉ kwa wesə. ³Kà də wèeŋ me’rə wi’ bə nɛ̀ni’ sə ntʉʉ̀ wèŋ dʉk. Wèeŋ jəŋ ni’ awèŋ sə nze, nə kà bʉ̀ʉ mok co wèŋ gha’ wo weŋ sə kʉ̀k. ⁴Ndàaŋwè pwe’ lap mandzə̀ nə̀ ŋgògʉ̀ yusə̀ co yà’ tɛsə ŋwə̀ nəmòk sə̀’, yi kà bə ni’ nə̀ nje tsərə̀ mègù. ⁵Wèeŋ tse’ nsàp ntʉm nə̀ Jisòs Krɛst à tse’ nà’a.

⁶Yi à ye Nwì bə tu ye sə̀’,

fana yi kà nsàp ntʉm nə̀ də yi nə mam tsooŋ bə Nwì yəyərə̀ tse’.

⁷Yi me’rə mvwe’ sə̀ ghaŋ yà’sə,

nə jə tsooŋ ni’ ye sə nze, nə ye co ŋkwɛ̀ŋ,

wo dzə yi mok co ŋwè vɛ’.

⁸Mvəsə̀ yi à ye co ŋwè vɛ’nə fana,

yi jəŋ tsooŋ ni’ ye sə nze sə̀mok,

nə yuk yusə̀ Nwì à də yi gʉ, nə kə kpʉ mʉ ntə̀əŋ.

Nsàp kpʉ nə̀ a kpʉgə̀ vɛ’nə bʉ̀ʉ sə̀ bʉp.

⁹Bʉ̀ʉ nsàp nə̀ yi à gʉ̀ ènə fana,

Nwì a yamsə yi nsàp nə̀ wù kà fʉ̀k.

Nwì a fa yi liŋ sə̀ yà’ yam gha’ liŋ pwe’.

¹⁰Ye də, bwìŋ pwe’ nə kə təəŋ bə tumfərə mantombìi Jisòs ŋgòkùksə yi.

A nə̀ ye bʉ̀ʉ sə̀ wo mʉbu bə sə̀ sə nzeŋgòo fɛŋ,

nə ye bə sə̀ wo cu ma sə mbwè nze pwe’ nə kuksə yi.

¹¹Wo nə̀ cep fis bə cùu awo jəja mvwe’ bwìŋ dʉk də Jisòs Krɛɛst Tà.

Yà’sə nə kuksə tɛ̀’ ye Tà Nwì sə̀’.

Wèeŋ Rɛŋ Co Marɛŋ

¹²A ye-a vɛ’nə fana, bwema am wèŋ, mvə̀’nə̀ wèŋ à sə yuk nə kotse’ ntirə̀ nə̀ bə̀boŋ nə ghà nə̀ mʉ̀ à ye vesùwèŋ yà’a fana, mʉ̀ sə dʉk də gʉ gha’ də wèeŋ kotse’ ŋga’a nə̀ mʉ̀ ka vesùwèŋ yeŋ nè’e. Wèeŋ fak bə wʉə, nə sə jik ŋgògʉ̀ də lù nə̀ Nwì a fa weŋ nə sə fak sə ntʉʉ̀ wèŋ. ¹³Bʉsə̀ Nwìi fàkgə̀ mʉtsətsə’rə wèŋ ŋgògʉ̀ weŋ də wèeŋ dzəm nə gʉ yusə̀ yi dzəm yà’.

¹⁴Bə yà pwe’fo’ sə̀ wèŋ sə gʉ̀ʉ nə sə cep ŋkʉ̀ə̀m kà fo’ sə tesə̀. ¹⁵A ye vɛ’nə ya wèeŋ ye bʉ̀ʉ sə̀ wèeŋ rərɛŋ, nə ye jì njo. Ya wèeŋ ye bwe Nwì sə̀ ntʉm rərɛŋ sə̀ wèŋ cu sənə nzeŋgònə̀ bʉ̀ʉ sə̀ ca ka rərəŋ yeŋ, wo ŋgàa tè’èŋkup. Wèŋ tse’ ŋgòsə rɛɛŋ yàwèŋ mʉtsətsə’rə wo co ŋkə̀ŋkàŋ sə rɛɛŋ mʉbu, ¹⁶mvəsə̀ wèŋ sə tsə̀’ fa wo ncèp nə̀ nà’ tse’ lùŋ nə. Wèeŋ gʉ-a vɛ’nə fana, nùmbu nə̀ Krɛst və̀ sə̀mok, mʉ̀ sə kum ŋgù àm bʉ̀ʉ wèŋ fana yà’ kà ŋgwàŋ ye. Yà’a nə sə niŋ dʉk də fàk am sə̀ mʉ̀ à gʉ̀, nə yis ndùrə̀, yà’ ka wà ca. ¹⁷Dzədzəm awèŋ nə̀ wèŋ à tse’ nà’ bohòNtirə̀ nə̀ Bə̀boŋ nə, nà’a co satikà’ bohòNwì. A ye-a də yòŋsə̀ am kə ye rùk nə̀ wo jə-a nà’, nə se gesə mʉnə satikà’ ànə, mʉ nə kwa, nə kwa vesùwèŋ lòoŋ mvwe’ mò’fis sə̀’. ¹⁸Gù sə̀’ mʉmvə̀’ànə dʉk də wèeŋ kwa tsooŋ yàwèŋ sə̀’. Vesùwèeŋ kwa mvwe’ mò’fis.

Timatì Bə Ìpàfoditò

¹⁹A ye-a ŋga Tà Jisòs fa-a ŋàŋ, mʉ̀ tsəm də mvə̀k momjo mʉ nə tumsə lo Timatì ŋgòkə̀ ye weŋ. Mʉ nə tum yi ya yi bwì və̀ə, yi tsok fa mʉ mvə̀’nə̀ wèŋ cu, ya ntʉm am sə lʉm sə̀’. ²⁰Mègù yi Timatì nə nə̀ tsətsərə̀ vesi yegə̀ nsàp nə̀ mò’fis. Yi tse’gə̀ weŋ sə ntʉʉ̀ yi vɛ’ɛ wùriŋ. ²¹Bʉ̀ʉ mok pwe’ sə tsərə gu bə fàak awo, wo sə kà ma nə̀ Jisòs Krɛst tsərə̀. ²²Wèŋ rì yàwèŋ sə̀’ laŋ də, Timatì ènə ŋwə̀ nə̀ bə̀boŋ. Vesi a tsòho Ntirə̀ nə̀ Bə̀boŋ nə mvwe’ mò’fis co mwe bə tɛ̀’ sə fàk wo. ²³Mʉ̀ sə tsəm də ghà nə̀ mʉ riŋ də anə ye bohòmʉ̀ valɛ àlɛ ŋkuŋ mʉ tum yi laŋ. ²⁴Mʉ̀ rì tse’ sə̀’ zìnə dʉk də, mvə̀k momjo, Tàa nə gʉ co mʉ və bə tu am, nə kə tseŋ weŋ sə̀’.

²⁵Mʉ̀ a tsərə də a bə̀boŋ ŋgòtum fəsə fa weŋ moma avès Ìpàfoditò, nə̀ yi a ye masinjà àwèŋ, nə tɛsə mʉ. Yi a fàk, nə jihi nzòŋ vesi bəbɛ’, ŋgòtɛsə mʉ bə fàha am. ²⁶Ntʉm ye sə fa yi ŋgə’ ŋgòyə wèŋ wùriŋ. Yi sə kà kwa lok də bʉ̀ʉsə̀ wèŋ na yuk dʉk də yi a ya. ²⁷A lɛ zìnə də yi a ya laŋ anə. A gù jo də yi a kpʉ. Megu də Nwì a koksə manziŋ bohòvesi ba fo’, yi kà kpʉ, ya ŋgə’ mook kà mʉnə ŋgə’ nə̀ mʉ̀ cu bə zeŋ nè’e naàŋ fe’lə lò. ²⁸Fana mʉ̀ sə dzəm wùriŋ də mʉ tum yi kə ye weŋ, ya wèeŋ yə yi, ntʉʉm awèŋ fi, ntʉm nə̀ njàm kà mok sə̀’ rwi’ fe’lə̀. ²⁹Yi və̀ə, wèŋ wumsə yi bə kwəkwa co moma nə̀ ndzənə Tà. Wèeŋ yə nsàap bʉ̀ʉ sə̀ co yi ànə, wèŋ wəp wo bə̀boŋ. ³⁰Bʉsə̀ yi jə yòŋsə̀ ye nsàp mok, nə swirə kpʉ bʉ̀ʉ fàak Krɛst, nə fa mʉ tətɛsə̀ nə̀ à ye co wèŋ kà mʉ bə tu awèŋ kə̀ fa.

Mandzə̀ Nə̀ Zìnə ŊgòYe Rərəŋ BohòNwì

¹Bwema am, ncèp àm nə̀ ŋgòlə̀sə bə zeŋ dʉk də, wèeŋ sə kwa bə bum sə̀ ma nə̀ Tà Jisòs. A ye-a sə̀’ də mʉ̀ sə com fe’lə sə̀ yusə̀ mʉ̀ ànə com yà’ mantombì laŋ fana mʉ̀ sə kà bə zeŋ wò. Yà’a nə tɛsə weŋ ya wèeŋ kà mandzə̀ jàm. ²Wèeŋ kərə bə nsàp bʉ̀ nə̀ wo co ŋgbʉ, sə̀ wo sə dʉk dɛɛ, ŋwè tse’ ŋgòsʉə tsə ŋgùpni’ yà’a. ³Bʉ̀ʉ sə̀ wo a kom fa wo tu sə̀ zìnə, co bʉ̀ʉ Nwì sə a vesùwèŋ. Bʉsə̀ vesùwèŋ kùksəgə̀ Nwì bə ŋàaŋ yòŋsə̀ ye, nə sə kwa bə ncu avès nə̀ ndzə ni’ì Jisòs Krɛst, vesùwèŋ ka tu bə bum sə̀ ma mʉ ŋgùpni’ naaŋ. ⁴A ye-a də bum sə̀ mʉ ŋgùpni’ì yà’sə yumok co Nwì jəŋ ŋwè bə zeŋ, də mʉ̀ dʉk də mʉ̀ a dzèŋ mvwe’ sə̀ mʉ̀ gha’ bʉ̀ʉ sə̀ wo sə jə yà’ co yumok yà’sə pwe’ mʉ̀. ⁵Wo à kom fa mʉ tu mbəmbaam yàm ŋga mʉ nùumbu fwame’. Mvəsə̀ wo à dzə mʉ, mʉ ŋwə̀ə Izùrɛ bə bòp lak Benjamè. Mʉ yè’sə mʉ ŋwə̀ə Hibrù làaŋ vɛ’. A ye-a bə mandzə̀ nə̀ ŋgònòŋsə lʉ̀ʉk bʉ̀ʉ Jus wèŋ fana, mʉ̀ à ye ves bòp bʉ̀ nə̀ wo togə̀ wo dʉk də bʉ̀ʉ Faràsi nà’a. ⁶À sə ye ma nə̀ ŋgòfa bʉ̀ʉ cos wèŋ ŋgə’, fana mʉ̀ təəŋ mantombì bə zeŋ mʉ̀. Lʉ̀ʉk avès bʉ̀ʉ Jus pwe’fo’, mʉ̀ ka nə̀ mò’fis gbʉ yuk, ŋga ye-a də aco yà’ gʉ ŋwè ye kə̀kʉrə̀ na. ⁷Bum yè’sə pwe’, anə ye co mʉ̀ sə tsərə də yà’a swe’ bohòmʉ̀, mʉ̀ a mè’rə màk yà’ pwe’ nə̀ pwe’ co yusə̀ wà bʉ̀ʉ tu Krɛst. ⁸Bə nə̀ zìnə am pwe’, mʉ̀ jə yà’ pwe’ mok co yusə wà ya ŋga mʉ riŋ Jisòs Krɛst nə̀ yi Tà nə̀ njàm nə bʉ̀ʉsə̀ ŋgòrìŋ yi a yusə̀ yà’ càsə bum pwe’. Mʉ̀ a mè’rə bum mok pwe’ də yà’a bisə ntɛ̀ŋ bʉ̀ʉ yi. Bum pwe’ mok bohòmʉ̀ co bèp də ya mʉ tse’ Jisòs Krɛst, ⁹ya mʉ ye vesi mvwe’ mò’fis co ŋwə̀ ye. Mʉ̀ ka kə̀kʉrə̀ mʉ lisə̀ Nwì bə ŋàaŋ sə̀ yàm mok ye fe’lə, a bʉ̀ʉsə̀ mʉ̀ a fa ntʉm àm bohòJisòs. Ka bʉ̀ʉsə̀ də mʉ̀ a nòŋsə lʉ̀ʉk bʉ̀ʉ Jus sə̀’ yeŋ. Mʉ kə̀kʉrə̀ bʉ̀ʉsə̀ Nwì a gʉ mʉ ŋgòye kə̀kʉrə̀ anə yi. Ŋgòye kə̀kʉrə̀ə və̀ mègù bə ntʉm nə̀ ŋwè fa nà’ bohòKrɛst. ¹⁰Yusə̀ mʉ̀ sə dzəm, a ŋgòrì yi, nə tse’ ja’a nsàp ŋàŋ ye nə̀ yi à lòkok bə zeŋ mvwe’ kpʉ nà’a. Mʉ̀ dzəm sə̀’ dʉk də mʉ ye nsàp ŋgə’ nə̀ yi à yə nə kpʉ, ya mʉ ye sə̀’ co yi. ¹¹Yà’a mvə̀’nə̀ mʉ̀ tse’ tsətsərə̀ də mʉ nə ye sə̀’ mòk ŋgòlòkok mvwe’ kpʉ sə.

Jihi Nzòŋ, Nə Kə Ləsə Fo’

¹²Mʉ̀ sə kà dʉk də bum sə̀ mʉ̀ sə dzəm də mʉ tse’ yè’sə, mʉ̀ tse’ wes yà’ laŋ dʉk. Ka sə̀’ dʉk də mʉ yè’e, mʉ̀ ka jòŋ nə̀ mò’fis tse’ sə̀’ yeŋ. Yusə də mʉ̀ sə jihi nzòŋ ŋgònìk lòmantombì, ya mʉ kə tse’ lə̀làk nə̀ Jisòs Krɛst a jə mʉ co ŋwə̀ ye bʉ̀ʉ zeŋ nə. ¹³Bwema am wèŋ, mʉ̀ tsəm də mʉ̀ ka mvwe’ sə̀ də mʉ̀ tse’ yà’ laŋ sə ntòkə dzeŋ. Yusə̀ mò’fis də mʉ̀ sə lʉ̀ bə ŋàaŋ am pwe’fo’ ŋgòkə̀ dzèŋ mvwe’ bum sə̀ ya’ cu mantombì, nə swi mak bum sə̀ yà’a maŋkwɛ̀ŋ fo’. ¹⁴Fana mʉ̀ sə lògù mantombì də ya mʉ kə dzeŋ mvwe’ ndʉ̀ʉ sə, ya mʉ tse’ lə̀làk nə̀ Nwì à to mʉ ŋgòkə tse’ nà’ bʉ̀ʉsə̀ mʉ ŋwə̀ə Jisòs Krɛst nə. Nà’a də mʉ kə cum mʉbu. ¹⁵A bə̀boŋ bohòvesùwèŋ sə̀ a gʉ bə ma nə̀ Jisòs laŋ pwe’fo’ ŋgòtse’ sə̀’ nsàp tsətsərə̀ nè’nə. Ŋwə̀ nəmòok ye-a yo nə̀ yi sə tsəm yumok ca zok fana, Nwì gʉ yi rɛɛŋ bə zeŋ. ¹⁶Yusə̀ gʉgʉŋ sə dʉk də vesùwèeŋ sə bɛ’ lo mali yusə̀ vesùwèŋ nà sə yùu sə.

¹⁷Bwema am wèŋ, wèeŋ sə bɛ’ kù am, nə sə kʉk lis bohòbʉ̀ʉ sə̀ wo sə yù yà’, bʉ̀ʉsə̀ vèes ŋgàa nì fa weŋ mandzə̀ nə̀ nà’a bə̀boŋ. ¹⁸Mʉ̀ à tsə̀’ weŋ bum yè’e mantombì kɛ̀’ ŋkʉ̀ʉŋntɛ̀ŋ laŋ. Nə̀ ŋga’a nè’e, mʉ̀ sə cèp fe’lə yà’ sə̀mok mok bə ndzəplis, dʉk də bwìŋ mʉŋgorə̀ wèŋ ŋkʉ̀ʉŋ sə̀ mandzə̀ awo sə nìtsə̀’ də wo sə bɛ̀ŋ fàak sə̀ Jisòs à kpʉ mʉ ntə̀əŋ ŋgògʉ̀ʉ sə. ¹⁹Wo kə̀ lə̀ nùu də bʉ̀ʉ yè’sə nə tse’ ŋgə’, bum sə̀ wo sə dzəm yà’ bə ŋgùpni’, yà’a bohòwo nwìi awo. Wo sə nɛ̀ ni’ bə bum sə̀ anə ye co wo koksə marè’tu bə zeŋ. Tsətsərə̀ə awo cu mègù bə bum sə̀ sə nzeŋgòoŋ fɛn. ²⁰Fana vesùwèeŋ yàvès ŋgàa lak sə̀ mʉbu. Vesùwèŋ sə kʉ̀k mègù bohòŋgà lùŋsə̀ ves, Tà Jisòs Krɛst ŋgòtsə mʉbu. ²¹Ghà nə̀ yi və̀ə, fana yi nə kupsə ŋgùpni’ avès nə̀ bʉp nə̀ nà’ ka ŋàŋ tse’ nè’e, nə gʉ nà’ ye co ni’ nje nə̀ nà’ tse’ ŋàŋ. Yi nə gʉ vɛ’nə bə ŋàaŋ sə̀ yi tse’ ŋgògʉ̀ bum pwe’ yà’ ye sə və̀mnzə’ə̀ yi sə.

Ntip Nə̀ Pol À Fa

¹Bwema am wèŋ, mʉ̀ dzəm weŋ, nə sə boŋ mʉ co mʉ̀ ye weŋ wù kà fʉ̀k. Wèeŋ gʉ̀gə̀ ntʉm àm sə kwa, wèeŋ ŋguk àm nə̀ mʉ̀ a sòp tes mʉ tuhù mʉ̀. Wèeŋ bʉ̀ʉ Tà Jisòs, wèeŋ təəŋ mali gʉgʉŋ. ²Mʉ̀ sə cèp bohòYùdiyà də kwəkwè’, bə Sintekèe mesə yusə̀ mʉtsətsə’rə̀ə wo, nə cum mvwe’ mò’fis co njɛ̀’ɛgù ndzə ni’ì Tà. ³Mʉ̀ lɛŋ wu Sizigù, nə̀ vesù tse’ fàak sə̀ mò’fis də, wu tɛsə bàa yè’sə wèŋ. Wo bə Kìlimè, nə ye bʉ̀ʉ mok sə̀ vesiwèeŋ fàkgə̀ mvwe’ mò’fis yà’a pwe’ a fàk gʉgʉŋ ŋgògʉ̀ də Ntirə̀ nə̀ Bə̀boŋ nə nà’a lo mantombì. Liŋ awo cu ndzənə ŋwàk lùŋ.

⁴Mvə̀’nə̀ wèŋ cu ncu àwèŋ nùumbu pwe’, wèeŋ sə kwa bə bum sə̀ ma nə̀ Tà Jisòs. Mʉ̀ sə cèp li sə̀mok dʉk də wèeŋ kwa! ⁵Wèeŋ ye fʉ̀ə̀ weŋ bwìŋ wèŋ. Tà ka sə̀sap mok cum. ⁶Kà də wèeŋ sə fa ntʉʉm awèŋ ŋgə’ bʉ̀ʉ yumok dʉk. Yusə̀ wèŋ sə jamə lòoŋ, wèŋ sə lɛŋ bohòNwì. Ghà nə̀ wèeŋ lɛŋ yi lòoŋ, wèŋ lɛŋ bə ntʉm nə̀ kwəkwa. ⁷Fana fifi Nwì nə̀ nà’ yam càsə mvəsə̀ co ŋwè tsərə pwe’ nə ye sə ntʉʉ̀ wèŋ bə tsətsərə̀ awèŋ co yumok kà yà’ gʉ̀. A vɛ’nə ŋga wèŋ sə nəmsə ntʉm awèŋ bohòJisòs.

⁸Nə̀ ŋgòlə̀sə bə zeŋ, bwema am wèŋ, wèeŋ sə tsərə megu bum sə̀ yà’a zìnə sə̀ co bwìŋ kwasə yà’. Yà’a ye bum sə̀ ya’ tse’ bə̀boŋ nja, yusə̀ yà’a rərəŋ, sə̀ ya’ tse’ dzədzəm nə ye sə̀ bwìiŋ yə-a yà’, wo jəŋ yà’ co yumok. ⁹Wèeŋ sə gʉhʉ bum sə̀ mʉ̀ à yə’rə weŋ, wèŋ nə dzəm yà’, a bum sə̀ wèŋ à yuk mvəsə̀ mʉ̀ à sə cèp, nə sə gʉ. Yi Nwì nə̀ yi fagə̀ ves fifi, yi nə ye wenə wèŋ.

Pol Kwasə Bʉ̀ʉ Fìlipiyà Bə Tətɛsə̀

¹⁰Mʉ̀ sə kwa, nə sə kwasə Tà Nwì wùriŋ bʉ̀ʉsə̀ a sap wùriŋ, wèŋ nə yètoònə ŋgòtɛsə fe’lə mʉ sə̀mok. Mʉ̀ sə kà dʉk də wèŋ à swì mʉ swìi dʉk, yusə də wèŋ à ka mvə̀k mantombì anə tse’. ¹¹Ka də mʉ̀ sə cèp bʉ̀ʉsə̀ mʉ̀ sə tsərə dʉk də mʉ̀ a sə dzəm yumok yeŋ. Bʉsə̀ mʉ̀ rì mvəsə̀ ŋgòcu yu am bə kwəkwa ŋga mʉ̀ ka-a yumok tse’ nà’. ¹²Mʉ̀ rì ncu jìŋ bə ncu ghàk ba fo’ mʉ̀. Mʉ̀ a rì nsàp nè’nə, nə ləəŋ bə zeŋ, ya ŋga mvwe’ sə̀ mʉ cu, ghà yà pwe’, ŋga mʉ zəze’ bə nə̀ mʉ̀ cu njè, nə̀ mʉ̀ tse’ ŋkʉ̀ʉŋ kè də mʉ̀ tse’ gù moòm ntilip pwe’fo’, mʉ̀ rì mvəsə̀ mʉ̀ cum yu am kə̀kʉrə̀. ¹³A ye-a sə̀’ bə nsàp nə̀ fòlòoŋ, aco mʉ̀ cum riŋ bə zeŋ. Jisòs Krɛst fagə̀ mʉ nsàp ŋàŋ nà’nə yi.

¹⁴A ye-a sə̀ vɛ’nə, bòwùriŋ mvəsə̀ wèŋ à tɛsə mʉ ghà nə̀ mʉ̀ a cu bə ŋgə’ nà’nə. ¹⁵Wèŋ bʉ̀ʉ Fìlipiyà, wèŋ rì yàwèŋ sə̀’ dʉk də ghà nə̀ mʉ̀ à yè’e mè’rə lak Màsìdoniyà ŋga mʉ̀ à sə tsòho to Ntirə̀ nə̀ Bə̀boŋ nə, à tɛsə gù mʉ wèŋ. A sə fa kurə gù mbo vesùwèŋ, cos mòk nə̀ zok a ka mʉ tɛsə. ¹⁶Fana mʉ̀ à cu mvwe’ lak Tètàlonikà, ghà nə̀ ŋga mʉ̀ ka yumok tse’, wèŋ tum fa mʉ sə̀’. Yè’sə à ka kɛ̀’ mò’fis mègù. ¹⁷Ka də mʉ̀ tes gha’ ntʉm àm bə bum sə̀ wèŋ na tum fa mʉ yeŋ. Mʉ̀ sə kwa gha’ yàm bə swe’ nə̀ wèeŋ nə tse’ bohòNwì bʉ̀ʉ bum sə̀ wèŋ sə tum fa mʉ yè’sə. ¹⁸Yusə̀ mʉ̀ a sə jamə yà’ pwe’, wèŋ a fa mʉ, nə fa casə cù. Mʉ̀ a yə bum sə̀ wèŋ a tum fa mʉ bohòÌpàfoditòlaŋ. Yà’ a gʉ̀ mʉ, mʉ̀ sə kà yumok mok jamə̀ fe’lə̀. Bum yè’sə co mve’ làmindàa sə̀ wo kɛ’ fagə̀ Nwì co satikà’ yà’ sə rəm saaŋ bòŋsə Nwì wùriŋ yà’a. ¹⁹Nwì àm nə̀ yi ŋgà ghàk maŋgəŋgèeŋ nə fa wèŋ yusə̀ wèŋ sə jamə pwe’fo’ ndzə bohòJisòs Krɛst. ²⁰Kə̀kùksə̀ə ye bohòNwì nə̀ yi Tɛ̀’ àvès, nə kà mè yuk. Yà’ ye vɛ’nə.

Cə̀cèpsə̀ Nə̀ Nà’ Lə̀sə

²¹Cepsə fa mʉ bʉ̀ʉ Nwì sə̀ wo sə̀’ bʉ̀ʉ Jisòs Krɛst yà’a pwe’fo’. Bwema sə̀ vesiwèŋ cu fɛɛŋ cepsə weŋ sə̀’ bə̀boŋ. ²²Bʉ̀ʉ Nwì sə̀ wo fɛɛŋ cepsə weŋ sə̀’, nə kà co sə̀ wo mʉ nto’ Sizà yà’a ye wesə. ²³Bə̀bo nə̀ Tà Jisòs Krɛst nə ye wenə wèŋ.