Mak

Ntirə̀ nə̀ Bə̀boŋ nə̀

MAK

Ŋwàk Mak sə tsə̀’ yumok bə liŋ Jisos Krɛst nə̀ yi Mo Nwì nə. Nà’ sə nìtsə̀’ Jisòs nja co ŋwə̀ nə̀ yi tse’ ŋàŋ, nə sə gʉ fàk bə zeŋ.

Jisòs nə sə to liŋ ye də yi Mo Ŋwè. A yà’sə də yi ŋwə̀ nə̀ yi tse’ ŋàŋ bohòNwì ŋgòtsòho bum. Liŋ yè’sə sə nìtsə̀’ sə̀’ də yi ŋwè bə ni’ nə̀ zìnə. Liŋ sə̀ də Mo Ŋwè yè’sə, a liŋ sə̀ wo à còm yà’ ndzənə Ŋwàk Danà taaŋntɛ̀ŋ. (Taŋ Danà 7:13, 14.) Kàmòk Jisòs à to liŋ ye vɛ’nə bʉ̀ʉsə̀ yi dzəm ŋgònìtsə̀’ fa bwìŋ də yi ŋkum ŋgà gèm bwìŋ nə̀ Nwì à kà’ də yi nə̀ tum vesə nə.

Tsə̀tsòhòNə̀ Jon Ŋgà Bàptɛsə̀ Bwìŋ

(Mat. 3:1-12; Luk 3:1-18; Jon 1:19-28)

¹Yè’e mʉmvə̀’nə̀ Ntirə̀ nə̀ Bə̀boŋ nə̀ Jisòs Krɛst mo Nwì à yèto. ²Nà’ à yèto ŋga Jon tesə və̀ sə ŋgəà. Yi ànə tesə və mvəsə̀ ŋgà tsòhòbum Nwì Ìzayà à còm də,

Nwì à dʉk də, <<Yèè, nè’e masinjà àm, mʉ nə tumsə gesə lo yi mantombìi wù ŋgògʉ̀ fʉ̀hʉ fa wu mandzə̀.>>

³Yi à còm mok sə̀’ də,

Ŋgì ŋwə̀ nəmòk sə cèp torə və̀ sə ŋgəà, nə sə yuhu də, <<Gʉ̀ tsə’rə fa Tà mandzə̀ ye, rəŋsə tsə’rə fa yi bwe cwèe mandzə̀ ŋgògì cà ca.>>

⁴À ye vɛ’nə, Jon ŋgà bàptɛsə̀ bwìŋ tesə və sə ŋgəà, nə sə tsoho fa bwìŋ ncèp nə də, <<Wèeŋ kupsə, nə bwi fa bʉp awèŋ ŋkwɛ̀ŋ, nə baptɛsə, ya ŋga Nwìi swifa weŋ bʉp awèŋ.>> ⁵Fana bwìŋ à tesə və̀ mvwe’ nzeŋgòŋ Jùdiyà bə ntòlak Jòrosalèm pwe’fo’ ŋgòkə̀ yuk yusə̀ Jon sə cèp sə. Wo à kəà cù bə bʉp awo sə̀ wo gʉ̀gə̀ə, fana Jon bàptɛsə wo sənə ndzəp Jòridàŋ.

⁶Jon à sə ni nsàap cə̀ək sə̀ ŋgàa tsòhòbum Nwì wèŋ. Wo à gʉ̀ yà’ bə nwɛ̀ɛs nàm nəmòk nə̀ wo togə̀ nà’ də kàme. Yi swi’ tse’ bə korə ŋgùp sə mbwèe yi. Zʉzʉʉ ye à ye ŋgwim bə nu. ⁷Yi à tsə̀’ fa bwìŋ dʉk də, <<Ŋwə̀ nəmòok nə və ma ŋkwɛ̀ɛŋ mʉ̀ nə̀ yi yam càsə mʉ̀ yi. Mʉ̀ ka kə̀kʉrə̀ co mʉ̀ bʉhʉ tsoŋ sə nze ŋgòfìrə kʉ̀ʉ kùuŋgùp ye yeŋ. ⁸Mʉ̀ bàptɛsə mègù weŋ yàm bə ndzəp, fana yi nə baptɛsə weŋ ye bə Yòŋsə̀ nə̀ Rərɛŋ.>>

Satà À Mùmsə Jisòs Ghà Nə̀ Wo À Bàptɛsə Yi

(Mat. 3:13-4:11; Luk 3:21-22, 4:1-13)

⁹À ka sap Jisòs mè’rə lak Nazàrɛ nə̀ nà’a mvwe’ nzeŋgòGalìli, fana Jon bàptɛsə yi sənə ndzəp Jòridàŋ. ¹⁰Mvə̀’nə̀ Jisòs à tesə kok sə ndzəpə̀ anə ntɛ̀ŋ, yi ye ŋga ntòbu mùhu fana Yòŋsə̀ Nwì sə tsoŋ və bohòyi co kəkəbʉ̀ŋ. ¹¹Ŋgì mòk sə yuhu tsooŋ mʉbu anə dʉk də, <<Wu mo àm nə̀ mʉ̀ dzəm wu sə ntʉʉ̀ mʉ̀ ŋkʉ̀ʉŋntɛ̀ŋ. Mʉ̀ sə kwa bohòwù wùriŋ.>>

¹²Yòŋsə̀ nə gʉ yi sə̀’ ntɛ̀ŋ ŋgòlòmvwe’ səmok sə ŋgəà. ¹³Yi à cu fo’ nùumbu hum kwè, Satà sə mumsə yi. Yi à ye fo’ bə nàam ŋgòŋ wèŋ fana masinjàa Nwì sə jəŋ ŋkərə̀ bohòyi.

Jisòs To Ŋgàa Ko Fuk

(Mat. 4:18-22; Luk 4:14-15; 5:1-11)

¹⁴A ye ŋga wo nisə Jon ndapndzəm, fana Jisòs lòmvwe’ nzeŋgòGalìli, nə sə tsòho Ntirə̀ nə̀ Bə̀boŋ nə̀ nà’ və̀ bohòNwì. ¹⁵Yi sə dʉk də, <<Mvə̀k kʉ̀rə laŋ nə̀ gaŋ ŋkum Nwì kʉəp ŋgòye sə nzeŋgòfɛŋ laŋ. Wèeŋ kupsə, nə bwi fa bʉp awèŋ ŋkwɛ̀ŋ, nə dzəm Ntirə̀ nə̀ Bə̀boŋ nə.>>

¹⁶Nùmbu mòk à ye ŋga Jisòs sə gìhi ŋgʉ ndzəp Galìli, yi ye bʉ̀ ŋgàa fu’fuk ba, Saimʉ̀ bə moma ye Andrù ŋga wo sə fu’fuk bə ram. ¹⁷Jisòs dʉk fa wo də, <<Wèeŋ bɛ’ və mʉ ya mʉ yə’rə weŋ ŋgòko bwìŋ.>> ¹⁸Wo ànə yuk vɛ’nə ntɛ̀ŋ, wo me’rə mak noŋsə ram awo sə fo’, nə yuŋ lo yi.

¹⁹Yi à gì lòjo, yi ye fe’lə bwe ŋgà’ nəmòk nə̀ wo togə̀ yi də Zebèdi ŋga wo bwìŋ ba, Jem bə moma ye Jon. Yi à kə̀ tsèŋ wo ŋga wo cu sənə ŋgwes, nə sə gʉhʉ tsə’rə ram awo. ²⁰Yi à to yà’ sə̀’, wo bɛ’ lòyi, nə me’rə tɛ̀’ awo Zebèdi bə ŋgàa fàak awo sə ŋgwesə̀ anə, nə lo bə Jisòs.

Jisòs Bɛ’ Fis Yòŋsə̀ Ze’ Ndzə Ni’ì Ŋwə̀ Nəmòk

(Luk 4:31-37)

²¹Wo à gì lòmvwe’ mò’fis, nə kə dzeŋ lak mok sə̀ wo togə̀ fo’ də Kàpanùm. Fana nùmbu dzə̀ awo à wɛ̀ɛs, Jisòs lo mvwe’ ndap pìriyà bʉ̀ʉ Jus, nə ye ŋgòyə’rə wo ncèp Nwì mbwa. ²²Bʉsə̀ yi à cèp nsàp nje zok bə ŋàŋ, fana bwìŋ mərə bʉ̀ʉsə̀ wo rì də cicàa sə̀ wo à sə yə’rə lʉ̀k à sə kà vɛ’nə cèpgə̀. ²³Ŋwə̀ nəmòk à ye mbwa nə̀ yi à tse’ yòŋsə̀ ze’ ndzə ni’ì yi. Yi ye ŋgòwa torə fis də, ²⁴<<Jisòs nə̀ mvwe’ lak Nazàrɛ, wù tse’ yà vesùwèŋ nɛ? Mʉ̀ rì wu bə̀boŋni, wu ŋwə̀ nə̀ rərɛŋ nə̀ wù və̀ bohòNwì. Wù və̀ yè’sə ŋgòzə ves à?>> ²⁵Jisòs à ghamsə yòŋsə̀ nə, nə dʉk fa yi də, <<Lok cùu yo, nə ca tesə ndzə ni’ì ŋwə̀ ènə.>> ²⁶Yòŋsə̀ nə à yuk vɛ’nə ntɛ̀ŋ, yi tsə’rə ŋgà’ nə nə̀bʉp, nə waŋ torə vɛ’ɛ, nə tesə ndzə ni’ì ŋgà’ nə. ²⁷Bwìŋ à mərə vɛ’ɛ nə̀bʉp, nə sə dʉk də, <<Hàva’! Yè’sə yà vɛ’nə ɛ? Nsàp yəyə’rə̀ nə̀ fi və̀ yè’ laŋ. Ŋwə̀ nè’e tse’ to ŋàŋ ŋgòcèp bohòyòŋsə̀ə ze’ wèŋ fana wo yuk cùu ye.>> ²⁸Ghàr vɛ’ɛ ŋga liŋ Jisòs ca yuhu mvwe’ nzeŋgòGalìli pwe’fo’ laŋ.

Jisòs Gʉŋsə Ŋgàa Yiyaŋ Ŋkʉ̀ʉŋ

(Mat. 8:14-17; Luk 4:38-41)

²⁹Jisòs bə yà’wèŋ à tesə tsə mʉnə ndap pìriyà nə, fana yi Jisòs nə bə Saimʉ̀ nə ye Andrù, Jem bə Jon wèŋ à lòmvwe’ ndap Saimʉ̀ bə Andrù. ³⁰Wo à dzèeŋ ŋga malii Saimʉ̀ nòbə yiyaŋ. Wo tsok fa Jisòs vɛ’nə. ³¹Yi lo, nə kə ko bo nà’, nə lokoksə nà’ mʉtsə̀, yiya nə me fana yi lokok təəŋ, nə kə lap fa wo zʉzʉ.

³²Nùmbu ànə à ye ŋga nùm sə co tsə lòo, wo jə və̀ fa Jisòs ŋgàa yiyaŋ pwe’, nə jə və fe’lə bʉ̀ʉ sə̀ wo à tse’ yòŋsə̀ə ze’ ndzə ni’ì wo. ³³Bwìŋ à tesə bə lak yà’sə pwe’, nə kə maŋ mvwe’ ntòmbi ànə bìkìkìkì. ³⁴Jisòs à gʉ̀ bʉ̀ʉ sə̀ wo à tse’ nsàap yiyaŋ zok zok wo gʉŋ ŋkʉ̀ʉŋntɛ̀ŋ, nə bɛ’ fis ze’ ndzə ni’ì wo maŋgəŋgèŋ. Bʉsə̀ ze’ sə à rì yi bə̀boŋ fana yi kà yà’ mandzə̀ ŋgòtsə̀’ fa bwìŋ vɛ’nə fa.

Jisòs Tsòho Ncèp Nwì Mvwe’ Nzeŋgòŋ Galìli Pwe’

(Luk 4:42-44)

³⁵Tsok à kʉəp, ŋga cu ntòbə ndzəm, Jisòs lokok, nə tesə lo mʉmvwe’ nəmòk, nə kə gʉ pìriyà fo’ yiìyi. ³⁶À cu ghàr wo kà yi yə, fana Saimʉ̀ bə bʉ̀ʉ səmok sə lap kɛ’ ca yi. ³⁷Wo à yə yi, wo tsok yi də, <<Bwìŋ sə làp wu maŋgəŋgèŋ.>> ³⁸Yi dʉk fa yà’ də, <<Yusə̀ yà’ a jə və̀ mʉ fɛɛŋ, a ŋgòtsòho ncèp Nwì. Vesùwèeŋ lo lɛ mvwe’ lak mok sə̀ yà’ kʉəp fɛɛŋ yè’e, nə tsoho fo’ sə̀’.>> ³⁹Yi à gì dzòoŋ nzeŋgòŋ Galìli pwe’, nə sə tsoho kɛ’ ncèp Nwì mvwe’ ndaap pìriyà, nə sə bɛ’ɛ fis yòŋsə̀ə ze’ wèŋ ndzə ni’ì bwìŋ.

Jisòs Mèsə Fa Ŋgà Kuturu Yiya Ye Nə

(Mat. 8:1-4; Luk 5:12-16)

⁴⁰Nùmbu mòk à ye, ŋgà kuturu nəmòk à və̀ə, nə kə təəŋ mantombìi yi bə tumfərə, nə lɛŋ nà’ də nà’a tɛsə yi. Yi dʉk fa Jisòs də, <<Tà, a bò-a wu co wù tɛsə mʉ na, wù gʉ fa mʉ yiya àm nè’e me.>> ⁴¹Jisòs ànə yuk vɛ’nə, ntʉm ye rwiŋ bə manziŋ, fana yi fis bo, nə jwɛŋ nà’ bə zeŋ, nə dʉk də, <<Mʉ̀ dzəm laŋ, yiya yònə nà’a me.>> ⁴²Yiya nə à mè gù sə̀ ghà ànə fo’, yi gʉŋ lo yuye. ⁴³Jisòs à tipsə yi gʉgʉŋ, nə me’rə yi lo. ⁴⁴Yi dʉk fa nà’ də, <<Dù, nə kà ŋwə̀ nəmòk tsə̀’ fa swì. Cà lògù bohòŋgà fa satikà’, nə kə ni fa yi ni’ yò, ya yi kʉk ja’a də yiya yòmè laŋ àlɛ. Yi kʉ̀’ mèsə, wù fa fəfa nə̀ Musì à dʉk nə, ŋgònìŋtsə̀’ fa bwìŋ də yiya yònə a mè laŋ.>> ⁴⁵Ŋwə̀ ènə à lòyuye, nə tsoho lo bwìŋ pwe’, nə tsoho wesə nsàp nə̀ co Jisòs kà mʉ ntòlak jəja mok gì fe’lə̀. Yi sə cum kɛ’ mok mvwe’ sə̀ bwìŋ ka fo’ yeŋ. Bwìŋ sə və ma nə̀ fòlòoŋ, nə sə kə tseŋ yi fo’.

Jisòs Gʉŋsə Ŋwə̀ Nə̀ Yi À Bù’rə

(Mat. 9:1-8; Luk 5:17-26)

¹À cà nùumbu jo, Jisòs foho lo mvwe’ lak Kàpanùm. Fana bwìŋ yuk lo də yi cu mʉ ntòlak anə. ²Bwìŋ və ŋkʉ̀ʉŋ. Ncù à loho mègù bə bwìŋ, fana mandzə̀ kà ŋgòtsèŋ Jisòs ye. Jisòs à sə tsòho fa wo ncèp Nwì. ³Bwìŋ kwè və, nə bək və ŋwə̀ nəmòk ŋga ŋgə̀ŋgàŋ à bù’rə bù’rə, ŋgòkə̀ fa Jisòs. ⁴Bʉsə̀ bwìŋ à ye ŋkʉ̀ʉŋ fana wo kà mandzə̀ ŋgòjə lòŋwə̀ nə ŋgʉ ni’ì Jisòs tse’. Fana wo kok mʉ ndùndap, nə cok tosə mvwe’ sə̀ Jisòs tə sə.2:4 Ye Màtiyò24:17 Wo à cok tosə, wo le’ gesə ŋwə̀ nə ca bohòJisòs mʉnə kəà.⁵Jisòs à yə də wo tse’ dzədzəm də aco yi gʉ yiyaŋ ŋwə̀ nə me. Yi dʉk bohòŋwə̀ nə̀ yi kà gìgə̀ nə də, <<Mo àm, mʉ̀ swìfa wu bʉp yo laŋ.>>

⁶Bʉ̀ ŋgàa yə’rə̀ fa bwìŋ lʉ̀k mok à cu fo’. Wo ànə yuk yusə̀ Jisòs à dʉk, nə tsərə də, ⁷<<Aco yi duk vɛ’nə va? Yi sə gʉ̀ bʉpsə liŋ Nwì wà. Mègù Nwì nə̀ aco yi swì fa ŋwè bʉp ye.>> ⁸Jisòs riŋ yusə̀ wo sə tsəm sə sə̀ ntɛ̀ŋ, fana yi dʉk fa wo də, <<Wèŋ sə tsəm sə ntʉʉ̀ wèŋ vɛ’nə bʉ̀ʉ yà? ⁹Co joho gha’ yè’e nə̀ ŋgòdʉk bohòyi də, <Mʉ̀ swì fa wu bʉp yo laŋ,> kè nə̀ ŋgòdʉk də, <Lòkok mʉtsə̀, nə bək jə kəà yò, nə gi lo yuyo> ɛ? ¹⁰Fana mʉ nə niŋ fa weŋ də mʉ̀ʉ mo ŋwè, mʉ̀ tse’ ŋàŋ sə nzeŋgòŋ ènə ŋgòswì fa bwìŋ bʉp awo.>> ¹¹Fana yi dʉk fa ŋgà’ nə̀ yi kà gìgə̀ nə də, <<Mʉ̀ dʉk wu də lòkok, te’ kəà yò, nə lo la’à wù.>> ¹²Mvə̀’nə̀ wo à təəŋ nə sə ja’a mali, fana ŋwə̀ nə te’ kəà ye, nə gi lo yuye. Wo mərə pwe’, nə kwasə Nwì də, <<Vès ka nsàp yu nè’e ye yuk.>>

Jisòs To Levì

(Mat. 9:9-13; Luk 5:27-32)

¹³Jisòs à foho lòsə ŋgʉ ndzəp Galìli. Bwìŋ ŋkʉ̀ʉŋ bɛ’ lòyi, fana yi ye ŋgòkə̀ yə’rə yà’wèŋ. ¹⁴Mvə̀’nə̀ yi à sə gì lòo yi ye ŋwə̀ nə̀ yi kogə̀ mbàam tas, ŋga yi cu mvwe’ sə̀ yi fàkgə̀ fàk. Ŋwə̀ ànə à ye Levì mo Alfòs. Jisòs dʉk fa yi də, <<Bɛ’ və mʉ.>> Yi lòkok, nə yuŋ lo nà’.

¹⁵À ye ghàr fana Jisòs sə zʉ zʉzʉ mʉmvwe’ ndap Levì nə. Bʉ̀ ŋgàa ko tas nə ye bʉ̀ ŋgàa gʉ̀ bʉp ŋkʉ̀ʉŋntɛ̀ŋ à be’lə yi bə ŋgàa fak ye ŋgòzʉ zʉzʉ mvwe’ mò’fis. Bʉ̀ʉ sə̀ wo à ye ŋkʉ̀ʉŋ yè’sə wo à sə yù kɛ’ yi. ¹⁶Bʉ̀ ŋgàa yə’rə̀ lʉ̀k mok à ye fo’, sə̀ wo à ye bòp bʉ̀ Faràsi wèŋ. Wo à yə ŋga Jisòs sə zʉ bɛŋ bə ŋgàa gʉ̀ bʉp nə ye ŋgàa ko tas. Wo fek bʉ̀ ŋgàa fàak ye də, <<Yi sə zʉ be’lə ye bə ŋgàa gʉ̀ bʉp nə ye ŋgàa ko tas wèŋ bʉ̀ʉ ya?>> ¹⁷Jisòs yuk, nə bʉsə də, <<Bʉ̀ʉ sə̀ wo ka yiyaŋ tse’, wo kà doktà làpgə̀, a lap megu doktà ŋwə̀ nə̀ yi sə yaya. Fana bohòmʉ̀ yàm, mʉ̀ à ka njo bʉ̀ʉ sə̀ wo kə̀kʉrə̀ bohòNwì wèŋ və, mʉ̀ à və̀ ŋgòto bʉ̀ ŋgàa gʉ̀ bʉp wèŋ.>>

Nzak Dzə̀ Zʉzʉ ŊgòKùksə Nwì

(Mat. 9:14-17; Luk 5:33-39)

¹⁸À ye mvə̀k mòk, bʉ̀ʉ sə̀ wo à sə bɛ’ Jon ŋgà bàptɛsə̀ bwìŋ bə bʉ̀ʉ Faràsi wèŋ sə dzə zʉzʉ ya wo kuksə Nwì. Bʉ̀ʉ mok və bohòJisòs, nə fek yi də, <<Bʉ̀ʉ sə̀ wo sə bɛ’ Jon ŋgà bàptɛsə̀ bwìŋ nə ye bʉ̀ʉ Faràsi wèŋ sə dzə̀gə̀ zʉzʉ nùumbu mok, bwe yo kà yàwo dzə̀gə̀ bʉ̀ʉ yà lɛ?>> ¹⁹Jisòs cep fəsə fa wo də, <<Aco wo dʉk fa bʉ̀ʉ sə̀ wo və̀ mvwe’ sə̀ wo sə zʉ bum gù də wo dzə zʉzʉ anə va? Ka vɛ’nə yeŋ. Mvə̀k nə̀ ndugù nə cu malì bə yà’wèŋ, fana wo nə kà vɛ’nə cu. ²⁰Fana nùmbu nə sə və̀ə nə̀ wo nə jəŋ gɛsə lo ndugù nə, fana wo nə dzə zʉzʉ mvə̀k ànə.

²¹<<Yusə də, kaco ŋwè jəŋ cə̀k nə̀ fi, nə te’ lok nə̀ nà’ və̀p laŋ bə zeŋ yeŋ. Bʉsə̀ nə̀ fi nə nə saha tesə ndzənə nə̀ zəm nə fana yam ghak wesə ŋga’a mvwe’ sə̀ nà’ saha maŋkwɛ̀ŋ sə. ²²Yumook sə̀’ də wo kà dzə̀ rùk sənə bɛ̀s nə̀ zəm kep gèsə̀gə̀, bʉ̀ʉsə̀ yà’a nə duk, nə vok bɛ̀s nə. Fana rùuk sə nə bʉp bə bɛ̀s nə mwè. Bògha’ lɛ də wo gesə dzə̀ rùk sənə bɛ̀s nə̀ fi.>>

Jisòs Cep Bə Nzak Nùmbu Dzə̀

(Mat. 12:1-8; Luk 6:1-5)

²³Nùmbu dzə̀ mòk à ye, Jisòs gi cà mvwe’ nzum nzaŋ mok. Mvə̀’nə̀ ŋgàa fàak ye à sə bɛ’ yi fana wo sə kʉp jəŋ tu nzaŋ. ²⁴Fana bʉ̀ʉ Faràsi dʉk fa Jisòs də, <<Yeè, lʉ̀k avès ka dzəm də wo gʉ vɛ’nə nùmbu dzə̀ dzəm.>> ²⁵Jisòs cep fəsə fa wo dʉk də, <<Wèŋ à ka yusə̀ Devìd à gʉ̀ taŋ yà’a yuk à? Mvəsə̀ yi à dzəm yumok ŋgòzʉ ŋga njè à ya yi bə bwe ye wèŋ, ²⁶fana yi lo kə ni mʉ nda’à Nwì, nə kə jəŋ zʉ ntuk brɛd nə̀ wo à nòŋsə ŋgòkùksə Nwì fo’. Àbiyadà à ye ŋkum bʉ̀ ŋgàa fa satikà’ ghà nà’nə yi. Ŋga lʉ̀k avès sə tsə̀’ də aco zʉ megu yà’ ŋgàa fa satikà’ wèŋ fana Devìd zʉ yà’, nə fa bʉ̀ʉ ye sə̀’.>> ²⁷Jisòs à cèp mèsə ncèp nə dʉk də, <<Nwì à gʉ̀ nùmbu dzə̀ ŋgòtɛsə ŋwè, ka də wo à gʉ̀ ŋwè bʉ̀ʉ nùmbu dzə̀ yeŋ. ²⁸Ye də mʉ̀ʉ mo ŋwè, mʉ Tà nə̀ mʉ̀ tse’ ŋàŋ bə nùmbu dzə̀ nə mʉ̀.>>

Ŋwə̀ Nə̀ Yi À Kpʉ Bo Ma Mò’fis

(Mat. 12:9-14; Luk 6:6-11)

¹Nùmbu mòk à ye Jisòs gì bʉ̀ʉŋ və̀ mʉmvwe’ ndap pìriyà mòk ŋga ŋwə̀ nəmòok mbwa nə̀ bo ye mok à kpʉ. ²Bʉ̀ʉ səmok à ye mʉ ndà’à anə sə̀ wo à dzəm ŋgòlàp Jisòs bə nzak. Fana wo sə kʉk tse’ yi də kè yi gʉ̀ bòŋsə-a ŋwə̀ ènə nùmbu dzə̀ àlɛ’. Də ya wo ko yi bə nzak də yi gʉ̀ fàk nùmbu dzə̀. ³Yi dʉk fa ŋgà bo bʉp nə də, <<Lòkok və kə̀ təəŋ kù mantombìi mʉ̀ fɛn.>> ⁴Ŋgà’ nə à və̀ə, Jisòs fek bʉ̀ʉ mok sə də, <<Yusə̀ lʉ̀k dzəm də aco a gʉ yà’ nùmbu dzə̀ə yà? A bə̀boŋ ŋgòtɛsə bwìŋ kè ŋgògʉ̀ bʉp ɛ, a bə̀boŋ ŋgòtɛsə yòŋsə̀ ŋwè kè ŋgòzə nà’ ɛ?>> Wo à cu gù dədok, nə kà cù mùk. ⁵À bʉp Jisòs. Yi jok bohòwo bʉ̀ʉ nsàap ntʉm sə̀ bʉp sə̀ wo tse’ yà’, nə dʉk fa ŋwə̀ nə̀ kpʉkpʉ bo nə də, <<Nɛ̀p fis yak a bo yo sə ɛ̀.>> Yi à nɛ̀p fis yà’ ntɛ̀ŋ, fana yà’ gʉŋ. ⁶Bʉ̀ʉ Faràsi à yə vɛ’nə, fana wo à lòo, nə kə to bʉ̀ʉ mok sə̀ wo ma nə̀ ŋkum Herò, fana bə yà’wèŋ cum kwe’ mʉ tuhù yi mvə̀’nə̀ wo nə zə yi.

Bwìŋ Kpəəŋ Və̀ ŊgòYə Jisòs

⁷Jisòs bə ŋgàa fàak ye à ye’e lòŋgʉ ndzəp Galìli. Bwìŋ kə tsèŋ wo fo’ ŋkʉ̀ʉŋntɛ̀ŋ. Bʉ̀ʉ yè’sə à tesə və̀ mvwe’ nzeŋgòGalìli bə Jùdiyà. ⁸Bʉ̀ʉ mok wèŋ à tesə mvwe’ lak Jòrosalèm, mok və mvwe’ nzeŋgòIdumiyà bə nzeŋgònə̀ ma ndzə nto ndzəp Jòridàŋ. Mok tesə mvwe’ sə̀ yà’ kʉəp lak Tayà bə Sidòŋ sə̀’. Bʉ̀ʉ yè’sə à və̀ ŋgòyə Jisòs bʉ̀ʉsə̀ wo à yuk yusə̀ yi à sə gʉ̀ʉ. ⁹Bʉ̀ʉ sə à ye wùriŋ, fana yi dʉk ŋgàa fàak ye də wo lap fa yi ŋgwes yi ni ca ŋga wo kà yi sə nze bwì’ màk. ¹⁰A ye vɛ’nə bʉ̀ʉsə̀ yi à gʉŋsə ŋgàa yiyaŋ nùmbu ànə ŋkʉ̀ʉŋntɛ̀ŋ. Fana ŋgàa yiyaŋ mok wèŋ sə nik lo gu va’ də wo kə jwɛŋ gesə gu yi bə bo. ¹¹À ye fo’ də, bʉ̀ʉ sə̀ wo à tse’ yòŋsə̀ə sə̀ bʉp ndzə ni’ì wo yə yi fana wo gbʉ̀ mantombìi yi sə nze, nə sə dʉk də, <<Wùu mo Nwì.>> ¹²Yi sa’rə yòŋsə̀ə ze’ sə gʉgʉŋ də wo cum gəe’, nə kà də wo tsok bwìŋ də yi mo Nwì wo dʉ’.

Jisòs Swè’fis Bʉ̀ʉ Ye Mok Hum-ncòp-ba ŊgòYe Ŋgàa Ntum Ye

(Mat. 10:1-4; Luk 6:12-16)

¹³Jisòs à kok lòmʉ ndahà, nə to benə bʉ̀ʉ sə̀ yi sə dzəm də bə yà’wèeŋ lo, fana wo yuŋ lo yi. ¹⁴Ànə geŋ, yi swekfis bwìŋ hum-ncòp-ba mʉtsətsə’rəə wo də wo ye ŋgàa ntum ye. Yi dʉk fa yà’wèŋ də yi nə sə cum bə yà’wèŋ, nə tum wo ŋgòtsòho lòncèp nə̀ nje. ¹⁵Fana yi fa wo ŋàŋ ŋgòbɛ’fis fa bwìŋ yòŋsə̀ə ze’ ndzə ni’ì.

¹⁶Liŋ bʉ̀ʉ sə̀ hum-ncòp-ba sə à ye Saimʉ̀ nə̀ yi à to fa nà’ liŋ mòk də Pità. ¹⁷Jem bə moma ye Jon wo à ye bwe Zebèdi. Jisòs à to wo də Bwànàjis. Liŋ ŋge’ yà’sə dʉk də, Mbʉ̀ŋ saha. ¹⁸Nə ye Andrù, Filìp, Bàtòlomì, Màtiyò, Tomos, Jem mo Alfòs, Tàdiyòs, Saimʉ̀ nə̀ yi à ye mòk bə bòp bʉ̀ nə̀ wo to wo də Kenènat, ¹⁹nə ye fe’lə Judàs Iskarəyà nə̀ yi à sèŋ Jisòs.

Wo Dʉk Də Jisòs Tse’ Ŋàaŋ Ze’

(Mat. 12:22-32; Luk 11:14-23, 12:10)

²⁰Jisòs bə bwe ye à kə̀ ni mʉnə ndap nəmòk, fana bwìŋ yuŋ wo nsàp nə̀ wo làp mandzə̀ ŋgòkə̀ zʉ bɛŋ bʉ̀ə̀. ²¹Mʉmvə̀’nə̀ yà’ à ye vɛ’nə, fana ma ye nə ye bwema ye wèŋ yuk, nə sə və ŋgòkə̀ jə lòyi. Bʉsə̀ bwìŋ à sə dʉhʉ də, <<Ŋkərə̀ nà’ sə də a bʉp.>> ²²Bʉ̀ ŋgàa yə’rə̀ lʉ̀k sə̀ wo à tsə və̀ Jòrosalèm dʉk yàwo də yi tse’ ze’ Bezebù ndzə ni’ì yi, nə̀ nà’a ŋkum ze’ wèŋ. Nà’ a fagə̀ yi ŋàŋ fana yi sə bɛ’fis ze’ bə zeŋ. ²³À ye vɛ’nə fana Jisòs to benə bʉ̀ʉ sə ŋgʉ ni’ì yi, nə fek yà’ gbʉ’ mòk də, <<Aco Satà bɛ’fis ni’ ye yè’sə va? ²⁴Ŋga wo gàpsə-a lak mòk bə bòp də wo lʉ̀, fana ye də lak yà’sə nə gbʉ. ²⁵Ŋga wo gàpsə-a ndap ŋwə̀ nəmòk bə bop zəzok də wo sə lʉ̀, fana ye də ndap ànə nə gbʉ nze sə̀’. ²⁶Megu yà’a sə̀’ vɛ’nə də a ye-a ŋga Satà kʉ̀ə̀m bə ndap ye kaco nà’ təəŋ yeŋ, nà’a nə gbʉ, nə lə.

²⁷<<Kaco ŋwə̀ nəmòk ni to mʉnda’à ŋgà ŋàŋ, nə fis jəŋ lo yumok mbwa yeŋ. Tse’ŋga yi ko kì nòŋsə to ŋgà ŋàŋ nə bə kʉ̀ ŋkuŋ yi ni mʉ ndà’à nà’ anə.

²⁸<<Mʉ̀ sə tsə̀’ fa weŋ nè’e ŋkèm ncèp dʉk də, nsàap bʉp sə̀ bwìŋ gʉ̀gə̀-a lòoŋ, wo nə tse’ sə̀swìfa bə zeŋ, nə ye bə bum sə̀ bʉp sə̀ wo cèpgə̀ə. ²⁹Fana ŋwə̀ nə̀ yi bʉpsə liŋ Yòŋsə̀ nə̀ Rərɛŋ, fana yi nə kà sə̀swìfa tse’ yuk, bʉ̀ʉsə̀ yi gʉ̀ yà’sə bʉp nə̀ nà’a nə̀ kà mè yuk.>> ³⁰Jisòs à dʉk vɛ’nə bʉ̀ʉsə̀ bʉ̀ʉ səmok à dʉk də yi tse’ yòŋsə̀ nə̀ bʉp ndzə ni’ì yi.

Jisòs Bə Ma Ye Nə Ye Bwema Ye

(Mat. 12:46-50; Luk 8:19-21)

³¹Ma Jisòs bə bwema ye wèŋ à və̀ə, nə kə təəŋ sə ntòmbi, nə dʉk də wo to Jisòs də yi və. ³²À ye ŋga bwìŋ rwiŋ mʉ nda’à anə wùriŋ, fana bʉ̀ʉ yè’sə tsok fa yi də ma ye bə bwema ye wèŋ sə to yi sə ntòmbi. ³³Mvə̀’nə̀ Jisòs à yuk vɛ’nə, fana yi fek bʉ̀ʉ sə dʉk də, <<Ma am bə bwema am wèeŋ ndà wèŋ?>> ³⁴Fana yi fəsə lis, nə kʉk yak bʉ̀ʉ sə̀ wo curə ya’ ŋgʉ ni’ì yi, nə dʉk fa wo də, <<Curə ya’ yè’e ma am bə bwema am sə.>> ³⁵Nə dʉk fe’lə dʉk də, <<Ŋwə̀ nə̀ fòpwe’ nə̀ yi gʉ̀gə̀-a yusə̀ Nwì sə dʉk də yi gʉ̀, fana ye də yi mo tɛ̀’ am nə ye njɛ̀’ am nə ye ma am sə̀’.>>

Gbʉ’ Ŋgà Bì Ŋgwìi Bum

(Mat. 13:1-9; Luk 8:4-8)

¹À ye nùmbu mòk Jisòs lo ŋgòyə’rə fe’lə bwìŋ ŋgʉ ndzəp Galìli, fana bwìŋ kə benə fo’ maŋgəŋgèŋ. Yi ni cum sənə ŋgwes mʉ ndzəpə̀. Bwìŋ təəŋ yàwo mʉ mfèŋ. ²Mvə̀’nə̀ yi à sə yə’rə yà’, yi sə tsoho fa yà’wèŋ bum ŋkʉ̀ʉŋntɛ̀ŋ. Yi cep yà’ bə gbʉ’. Fana yi tsok wo dʉk də, ³<<Wèeŋ yu’rə bə̀boŋ. Ŋwə̀ nəmòk à lòŋgòŋwə̀ ŋgwìi bum mʉ nzuù. ⁴Ŋgwìi mok gbʉhʉ nooŋ sə mandzə̀. Swiŋ və, nə kə te’ zʉ lo yà’. ⁵Mok gbʉ mvwe’ lìs ŋga nze ka fo’ ŋkʉ̀ʉŋ yeŋ, nə to ca jwaŋ, bʉ̀ʉsə̀ nze à ye fo’ jo. ⁶Nùm to, yà’ yum, nə kpʉ wes pwe’ bʉ̀ʉsə̀ yà’ à ka ŋgàŋ sə̀sap so. ⁷Mok gbʉ mvwe’ ndik sə̀ bə njàk, ndik sə kuk, nə ram te’lə bʉpsə yà’, yà’ kà zəm. ⁸Mok à gbʉ̀ mvwe’ nze nə̀ bə̀boŋ, nə kuk nə zəm, mok hum tɛ’, mok hum ntùŋfu wèŋ, mok zəm ŋkʉ̀ mò’fis.>> ⁹Yi lə̀sə ŋgòcèp də, <<Ŋwə̀ nə̀ wù tse’-a ntu’ ŋgòyuk yusə̀ mʉ̀ cèp yè’sə, wù yuk.>>

Jisòs Tsə̀’ Rɛŋsə Gbʉ’ Nə

(Mat. 13:10-23; Luk 8:9-15)

¹⁰Jisòs à kə̀ cu mègù mok bə bwe ye sə̀ hum-ncòp-ba nə ye bʉ̀ʉ mok sə̀’, fana wo ye ŋgòfek yi dʉk də, <<Tsok rɛŋsə fa ves gbʉ’ nə̀ wù cèp màk taaŋ nà’a nɛ̀.>> ¹¹Yi dʉk fa yà’ də, <<Nwì à gʉ̀ weŋ yàwèŋ ŋgòrì yu səmok bə gaŋ ŋkum ye sə̀ yà’a sə̀swihì bohòbʉ̀ʉ səmok. Fana bʉ̀ʉ sə̀ wo yàwo sə mbi, wo yuk gù yàwo gbʉ’ nə. ¹²Fana wo sə kʉk nə kʉk, nə kà yə rì. Wo sə yuk nə kà rɛɛŋ. Bwɛ̀rɛ wo bʉʉŋ və bohòNwì yi swifa wo.>>

¹³Jisòs yèto ŋgòdʉk fa wo də, <<Wèŋ ka gbʉ’ nè’e rɛŋ yè’e də wèeŋ nə rɛŋ yuk gbʉ’ mok sə̀’ laŋ à? ¹⁴Ŋgà ŋwə̀ŋwə̀ à ŋwə̀ ncèp Nwì sə ntʉʉ̀ bwìŋ. ¹⁵Ntʉm bʉ̀ʉ mook co mandzə̀, wo yuk ncèp Nwì ntɛ̀ŋ, Satà və, nə kə jəŋ gɛsə ncèp nə sə ntʉʉ̀ wo anə. ¹⁶Bʉ̀ʉ səmok yàwo co ŋgwìi sə̀ yà’ à gbʉ̀ mvwe’ nze nə̀ bə lìs. Yà’a wo sə̀ wo yuk ncèp Nwì, wo kwa bə zeŋ wùriŋ. ¹⁷Mègù də ncèp nə kà sə ntʉʉ̀ wo cəco lò, fana ŋgə’ və̀ bohòwo bʉ̀ʉ ncèp Nwì àlaa, wo təəŋ moòm ghàr nə yamak, nə gbʉ gɛsə lo fo’. ¹⁸Bʉ̀ʉ mok yàwo yè’e co ŋgwìi sə̀ yà’ à gbʉ̀ mvwe’ ndik. Yè’e bʉ̀ʉ sə̀ wo yuk ncèp Nwì fana, ¹⁹bum nzeŋgòŋ kə jipsə tes wo, fana wo swi ncèp nə, nà’ kà ŋgwì zəm. Bum sə̀ co ghàk bə bum mok sə̀ bwìŋ sə dzəm yà’ sə nzeŋgòŋ anə ŋkʉ̀ʉŋntɛ̀ŋ, yà’ kə jipsə ncèp nə. ²⁰Ŋgwìi sə̀ yà’ à zəm mok hum tɛ’, mok hum ntùŋfu, bə ŋkʉ̀ mò’fis wèŋ yà’a, yà’sə ntʉm bʉ̀ʉ səmok sə̀ wo yuk ncèp Nwì, nə dzəm nà’ fana nà’ ye co wo bì yumok mvwe’ nze nə̀ bə̀boŋ fana yà’ zəm vɛ’nə.>>

Gbʉ’ Laàm

(Luk 8:16-18)

²¹Jisòs dʉk malì dʉk də, <<Wo bwe’gə̀ laàm, wo tes gesə ma sə ŋkò’o, kè wo tes gesə ma sə mbwè kè ɛ? Hai’, ka vɛ’nə yeŋ. Wo tesgə̀ nà’ mʉmvwe’ dzòk. ²²Yumok sə̀ yà’a sə̀swihì, də yà’a nə̀ kà kə̀ yəəŋ ka yeŋ. Yè’sə də yusə̀ yà’ cu mvwe’ ndzəm nə̀ kə̀ və̀ mvwe’ marɛŋ.>> ²³Yi sə dʉk fe’lə mali də, <<Ŋwə̀ nə̀ yi tse’-a ntu’ ŋgòyuk bum bə zeŋ, yi yuk.>> ²⁴Yi tsok fa malì wo də, <<Njo nə̀ wo nə fʉk fəsə fa wu sə̀’ bə nsàp yu nə̀ wu fʉ̀k fagə̀ bwìŋ ca, ghàmòk casə njo nə, fana yu’rə yusə̀ wù yuk bə̀boŋ. ²⁵Wo nə fa ŋwə̀ nə̀ yi tse’ ŋkʉ̀ʉŋ sə̀mok, fana ŋwə̀ nə̀ yi ka ye tse’, wo nə jəŋ gɛsə bwe bè’lə̀ə sə̀ yi tse’ sə pwe’.>>

Gbʉ’ Nə̀ Mvə̀’nə̀ Ŋgwìi Bum Kùkgə̀ə

²⁶Jisòs à dʉk fe’lə mok sə̀’ dʉk də, <<Gaŋ ŋkum Nwì sə co nzum ŋwə̀ nə̀ yi à ŋwə̀ nzaŋ mʉ nzuù yi. ²⁷Yi nə dzəm lo, nə sə yəəŋ, nə dzəm lo, nə sə yəəŋ. Ŋgwìi nzaŋ sə to, nə sə kuk. Yi kà yuye yusə̀ yà’ gʉ̀ yà’ kuk rì. ²⁸Nze nə bə tu ye gʉ ntseŋ nə ŋgòkùuk, nə kə tse’ mvə̀m. A yəəŋ to ntòntseŋ nə, ghàr tu nə yəəŋ, fana ŋgwì zəm nə gʉŋ. ²⁹Yà’ gʉŋ ntɛ̀ŋ, yi jəŋ fɛ̀cɛ̀s, nə kə ci’, bʉ̀ʉsə̀ mvə̀k nə̀ ŋgòkʉp kʉ̀rə laŋ.>>

Gbʉ’ Ŋgwì Mostà

(Mat. 13:31-32; Luk 13:18-19)

³⁰Jisòs jə və fe’lə ncèp mòk də, <<Aco a fʉ̀hʉ kok gaŋ Nwì sə yè’sə bə yà, kènə aco a fʉhʉ nà’ yè’sə bə nsàp gbʉ’ nə̀ fò? ³¹A co mʉŋgwì tʉ nəmòk nə̀ wo togə̀ nà’ də mostà. Wo bìgə̀ nà’, nà’ jə’rə casə ŋgwìi bum sə nzeŋgòŋ pwe’ zeŋ. ³²Ghàr ŋga nà’ kùuk, fana nà’ yam casə tʉ pwe’ sə̀’ yi. Yi fis ma nsàap ntaŋ mok sə̀ ghaŋ. Swiŋ sə kə ci ndap awo mbwa, mvwe’ fifi.>>

³³Jisòs à tsòho fa bwìŋ ncèp nə bə nsàap gbʉ’ yè’sə ŋkʉ̀ʉŋntɛ̀ŋ ya wo yuk, nə rɛɛŋ bə̀boŋni. ³⁴Ghà yà lòoŋ fo’ nə̀ yi à sə cèp bohòwo, yi sə cèp megu bə gbʉ’. Fana yi kə̀ cu mègù mok bə ŋgàa fàak ye, yi tsòho rɛŋsə fa wo bum sə làaŋ.

Jisòs Gʉ̀ Fə̀fə̀ Nà’ Teŋsə

(Mat. 8:23-27; Luk 8:22-25)

³⁵À mègù nùmbu ànə ŋga nùm co tsə lòo, Jisòs dʉk fa ŋgàa fàak ye sə dʉk də bə yà’wèeŋ to lo nto ndzəp ma nja. ³⁶Bwe ye à ni ŋgwes nə̀ yi ànə ye ca nə. Ŋgwes mok à ye bə nə̀ Jisòs wèŋ nə mʉ ndzəpə̀ anə mvwe’ mò’fis. Wo à lòo, nə me’rə bʉ̀ʉ sə̀ wo à ye fo’ wùriŋ sə maŋkwɛ̀ŋ. ³⁷Fə̀fə̀ nə̀ bʉp à yèto ŋgòcàa, nə sə bwi’lə ŋgwes nə mʉ ndzəpə̀ anə nsàp nə̀ bə jòŋ. Ndzəp ni ca, tə̀tè nà’ kʉəp də nà’a rwiŋ. ³⁸À ye ŋga Jisòs naaŋ tu ye bə pilù, nə sə dzəm yuye lo mà ŋkwɛ̀ɛŋ bʉ̀ʉ sə̀ wo à cu sənə ŋgwes nə. Bwe ye sə yəmsə yi, nə fek yi dʉk də, <<Cicà, wù sə kà mbɛŋ kom yè’e də vèes kpʉ ntɛ̀ŋ à?>> ³⁹Yi à lòkok mʉtsə̀, nə dʉk fa fə̀fə̀ nə də, <<Teŋsə, kà mok cà fe’lə̀>>, nə dʉk bohòndzəp nə sə̀’ də, <<Naaŋ yòsə̀’ gəe’!>> Fə̀fə̀ à dʉk gù dok, fana ci’i təəŋ fo’ mok wʉmm. ⁴⁰A mèe, yi fek bwe ye sə də, <<Wèŋ sə wəp yè’sə yà? Kaco wèŋ fa ntʉm awèŋ bohòmʉ̀ yeŋ à?>> ⁴¹Və̀m à kok wo kiŋ, wo mərə, nə sə dʉk də, <<Nè’e nsàp ŋwə̀ nə̀ fò? Fə̀fə̀ bə ndzəp sə yuk yi ɛ?>>

Ŋwə̀ Nə̀ Yi Cugə̀ Mvwe’ Sè Nə Tse’ Yòŋsə̀ Nə̀bʉp

(Mat. 8:28-34; Luk 8:26-39)

¹Nùmbu ànə à ye Jisòs bə bwe ye wèŋ to tesə lo nto ndzəp Galìli ma nja, nə tesə və ma ndzə nzeŋgòŋ Gerasàn. ²Mʉmvə̀’nə̀ Jisòs à tesə sə ŋgwesə̀ anə ntɛ̀ŋ, ŋwə̀ nəmòk nə̀ yi nòoŋ kɛ’gə̀ mvwe’ sè və kə tseŋ yi. ³Ŋwə̀ ènə à tse’ yòŋsə̀ nə̀ bʉp ndzə ni’ì yi, nə sə nòoŋ kɛ’cà mvwe’ sə̀ wo tuuŋgə̀ bwìŋ. Mandzə̀ nə̀ co wo ko kiŋ noŋsə yi bə kwaŋ kà mok ye. ⁴Wo à sə kì yi bo bə kù lòoŋfo’ kɛ̀’ ŋkʉ̀ʉŋntɛ̀ŋ bə kwaŋ, fana yi sə sòoŋ tirə yà’ pwe’. Yi à gʉ vɛ’ɛ nsàp nə̀ ŋwè kà yi ko to. ⁵Nə̀ maràŋ bə nə̀ ndzəmə̀ pwe’ yi sə jàm kɛ’ dzòoŋ mvwe’ sè nə ye mʉ ndahà wèŋ. Yi sə waŋ kɛ’, nə sə dzəp swɛ’lə ni’ ye bə lìs.

⁶Yi à təəŋ, nə ye gesə lo Jisòs, fana yi caŋ lo, nə kə gbʉ təəŋ kù mantombìi nà’ bə tumfərə. ⁷Yi waŋ torə fis bə ŋàŋ dʉk də, <<Jisòs mo Nwì nə̀ ghaŋ, wù sə làp bohòmʉ̀ yà? Mʉ̀ lɛŋ wu mʉnə liŋ Nwì də wu kà mʉ ŋgə’ fa.>> ⁸Yi ànə dʉk vɛ’nə bʉ̀ʉsə̀ Jisòs à dʉk fa yi də, <<Wùu yòŋsə̀ nə̀ bʉp, tesə ndzə ni’ì ŋwə̀ ènə.>> ⁹Jisòs fek nà’ də, <<Liŋ yoo ndà?>> Yi dʉk də, <<Liŋ aam Bòp, bʉ̀ʉsə̀ vèes ndzə ni’ì ŋwə̀ ènə wùriŋ.>> ¹⁰Yi lɛŋ Jisòs vɛ’ɛ wùriŋ də nà’a kà yòŋsə̀ə sə̀ bʉp sə mvwe’ lak yà’sə bɛ’fis gɛsə̀.

¹¹À ye ŋga bòp ŋgùnaaŋ mòk nə̀ ghaŋ à sə zʉ mvwe’ nda nəmòk fo’ wùriŋ. ¹²Fana yòŋsə̀ə sə̀ bʉp sə lɛŋ Jisòs də, nà’a dʉk fa wo də wo kə ni ndzə ni’ì ŋgùnaaŋ sə. ¹³Jisòs à dzəm, nə də wo geŋ, fana yòŋsə̀ə sə tesə ndzə ni’ì ŋgà’ nə, nə kə ni ndzə ni’ì ŋgùnaaŋ sə. Ŋgùnaaŋ sə à ye fo’ co ncùhù ba. Fana wo caŋ durə tsoŋ ndzə baàŋ anə, nə kə gbʉ kpʉ lo wes sənə ndzəp Galìli nə. ¹⁴Bʉ̀ʉ sə̀ wo à sə gʉmsə ŋgùnaaŋ sə à carə lòo, nə kə tsoho fa bʉ̀ʉ sə̀ mvwe’ lak yà’sə pwe’. Fana bwìŋ tesə və ŋgòkə̀ ja’a nsàp yu nə̀ nà’ gʉ̀ nə. ¹⁵Wo à və̀ bohòJisòs, nə ye ŋga ŋwə̀ nə̀ yi anə tse’ yòŋsə̀ə sə̀ bʉp ndzə ni’ì yi nə ni tse’ cə̀k, nə cum fe’lə bə ŋkərə̀ ye làaŋ. Fana wʉə ko wo nə̀bʉp. ¹⁶Bʉ̀ʉ sə̀ wo à kə̀ yə, à sə tsòho lòbwìŋ yusə̀ yà’ ye bohòŋwə̀ nə̀ yi tse’gə̀ yòŋsə̀ə sə̀ bʉp nə, nə sə tsoho fa bwìŋ yusə̀ yà’ gʉ̀ ŋgùnaaŋ sə sə̀’. ¹⁷À ye vɛ’nə, fana bʉ̀ʉ sə̀ mvwe’ lak yà’sə ye ŋgòlɛŋ Jisòs də nà’a me’rə lak awo sə, nə lo.

¹⁸Mvə̀’nə̀ Jisòs à sə də yi ni lo sə ŋgwesə̀, fana ŋgà’ nə̀ yi ànə tse’ yòŋsə̀ə sə̀ bʉp nə dʉk fa nà’ də bə nà’a lo. ¹⁹Jisòs à dzèeŋ. Yi dʉk fa nà’ də, nà’a lo la’à nà’, nə kə tsok fa bwema nà’ wèŋ mvəsə̀ Tà Nwì koksə manziŋ bohònà’, nə tɛsə̀ nə nà’ sə. ²⁰Ŋgà’ nə à lòmvwe’ nze Dìkàpolìs, nə tsoho fa bwìŋ yusə̀ Jisòs gʉ̀ bohòyi. Bʉ̀ʉ sə̀ wo à yuk à mərə nə̀bʉp.

Jisòs Gʉŋsə Ŋwà Nə̀ Nà’ À Jwɛ̀ŋ Yi Cə̀k Bə Mo Jairòs

(Mat. 9:18-26; Luk 8:40-56)

²¹Fana Jisòs ànə to fe’lə sənə ŋgwes, nə tesə lo ma mòk. À kə̀ dzèŋ fo’, bwìŋ à kə̀ tsèŋ yi ŋgʉ ndzəp anə maŋgəŋgèŋ. ²²Ŋwə̀ nəmòk à və̀ fo’ nə̀ wo à sə to yi də Jairòs. Yi ànə ye ŋwə̀ nə̀ mantombì mʉnə ndap pìriyà. Yi à yə Jisòs ntɛ̀ŋ, yi kə gbʉ nooŋ kù mantombìi nà’, ²³nə lɛŋ yi vɛ’ɛ bə zìnə ye pwe’fo’ də, mo ye nə̀ ŋwàŋwè sə də yi kpʉ. Yi dʉk fa nà’ də, <<Və̀ə kə̀ jwɛ̀ŋ mo àm nə bə bo yo ya yi gʉŋ.>> ²⁴Fana bə nà’ à lòo. Bwìŋ yuŋ fɛ’lə wo sə̀’ nduk nsàp nə̀ co wo kà Jisòs yə gèsə lò.

²⁵Mvə̀’nə̀ wo à sə lòo, ŋwà mòk à ye nə̀ ndʉəm à sə ca ndzə ni’ì yi mʉnə lùumŋgòŋ hum-ncòp-ba. ²⁶Yi à yə ŋgə’ cɛ̀bʉ̀ə̀, nə bʉpsə wes mbàam ye bohòŋgàa ncə̀p pwe’, nə kà bə̀boŋ tse’ lok. Yiyaŋ sə lo megu mantombì nùumbu pwe’. ²⁷Njo à ye də yi ànə yuk nsàp fàk nə̀ Jisòs à sə gʉ̀ʉ, fana yi nik ca mʉtsətsə’rə bwìŋ, nə kə jwɛŋ gesə cə̀k nà’. ²⁸Yi à gʉ̀ vɛ’nə bʉ̀ʉsə̀ yi à sə tsərə də, <<Mʉ jwɛŋ mègù-a cə̀k ye bə bo am, yiya àm nə me.>> ²⁹Mvə̀’nə̀ yi à jwɛ̀ŋ gèsə nà’ ntɛ̀ŋ, ndʉəm sə teŋsə ŋgòca, yi riŋ ndzə ni’ì yi sə̀’ də yiyaŋ nə mè laŋ. ³⁰Jisòs riŋ ye sə̀’ də ŋàaŋ sə̀ yi lùŋsəgə̀ bwìŋ bə zeŋ sə mamòk tesə ndzə ni’ì yi anə. Fana yi bʉʉŋ mʉtsətsə’rə bʉ̀ʉ sə, nə fek wo dʉk də, <<Jwɛ̀ŋ cə̀k àm ndà?>> ³¹Ŋgàa fàak ye dʉk fa yi də, <<Aco wù sə ye mvə̀’nə̀ bwìŋ sə fɛ’lə kɛ’cà vɛ’ɛ, wù sə fek də, jwɛ̀ŋ wu ndà yè’e nsàp nə̀ fò?>> ³²Jisòs sə kʉksə malì mʉtsətsə’rə bʉ̀ʉ sə də yi ye riŋ tsoŋ ŋwə̀ nə̀ nà’ jwɛ̀ŋ yi nə ŋkuŋ. ³³Ŋwà nə riŋ yusə̀ yà’ ànə gʉ bohòyi, fana yi wəp, nə tesə və mantombìi Jisòs, nə sə kaŋ, fana nə gbʉ nooŋ sə nze, nə tsoho fa nà’ yusə̀ yi gʉ̀ sə pwe’fo’. ³⁴Yi ànə yuk vɛ’nə, yi dʉk fa ŋwà nə dʉk də, <<Mʉmvə̀’nə̀ wù dzəmtse’ sə ntʉʉ̀ wù bohòmʉ̀ yà’sə, gʉŋsə wu zeŋ. Lòkok mʉtsə̀, nə lo bə fifi sə ntʉʉ̀ wù. Yiya yònə mè sə̀’ laŋ, mo àm.>>

³⁵Jisòs à sə dʉk də yi cèp mèsə bohòŋwà ènə ntɛ̀ŋ, bwìŋ caŋ və ŋgòtsə̀’ fa Jairòs də, mo nà’ nə kpʉ laŋ. Nà’a kà cicà nə ŋgə’ mok ŋgwàŋ fa yisko’. ³⁶Jisòs kà yuye yusə̀ wo sə tsə̀’ fa Jairòs sə co yumòk jə, nə dʉk fa nà’ də, <<Kà yumok wəp, tse’ megu yòdzədzəm.>> ³⁷À ye vɛ’nə, yi kà mok dzəm də bwìŋ ŋkʉ̀ʉŋ yuŋ lo yi mvwe’ ndap Jairòs nə dzəm. Yi jəŋ megu bwìŋ tɛ’, Pità bə Jem nə ye Jon moma Jem nə.

³⁸Wo à kə̀ dzèŋ mvwe’ ndap nə, wo ye ŋga bwìŋ sə warə nə sə kɛ’ ŋgùŋ nə̀bʉp, nə jip yusə̀ co wo gʉ̀. ³⁹Yi à ni lòmʉ nda’à anə, nə fek yà’wèŋ dʉk də, <<Wèŋ sə kɛ̀’ dʉksə ŋgù yà? Mo nə ka kpʉ, yi sə dzəm lo.>> ⁴⁰Wo à ywì’lə swee bʉ̀ʉsə̀ yi à dʉk də mo nə sə dzəmlo. Yi bɛ’ yà’ fo’ pwe’, nə to ma bə tɛ̀’ɛ mo nə, nə ye bwe ye sə̀ tɛ’ sə̀ yi anə və bə yà’wèŋ sə. Wo ni lo mvwe’ sə̀ mo nə nòsə. ⁴¹Yi kotse’ bo nà’, nə dʉk fa nà’ bə ncèep lak nà’ də, <<Talità, kumì.>> A yà’a də, <<Njɛ̀’gù, lòkok mʉtsə̀.>> ⁴²Mʉŋgwɛŋ nə à lòkok wap kɛ̀’ mò’fis, nə gi yuye. À ye ŋga mʉŋgwɛŋ nə lùumŋgòŋ hum-ncòp-ba. Və̀m à ko’ bwìŋ vɛ’ɛ kùŋ bə məmərə̀. ⁴³Jisòs à cèp vɛ’ɛ, nə soŋ wo ntu’ də ŋwèe kà ŋwə̀ nəmòk tsə̀’ fa swì, nə dʉk də yà’a lap fa nà’ yu zʉzʉ.

Bʉ̀ʉ Lak Jisòs Wèŋ Bɛ̀ŋ Yi

(Mat. 13:53-58; Luk 4:16-30)

¹Jisòs à ye’e mè’rə fa’nə, nə lo la’à yi. Bwe ye yuŋ lo yi sə̀’. ²Nùmbu dzə̀ à ye, yi sə yə’rə bwìŋ mʉ ndap pìriyà. Bwìŋ à ye mbwa wùriŋ. Mvəsə̀ wo à yuk yusə̀ yi à sə cèep, fana wo mərə nə̀bʉp, nə sə dʉk də, <<Hàva’, yi a jə nsàp nè’nə yè’e ma fò? Wo a fa yi yè’e nsàp ŋkərə̀ nə̀ fòvɛ’nə ɛ? Yi sə gʉ̀ bə bum maŋgəŋgèŋ mwè. ³Nè’e ka kapindà, mo Mèri yeŋ nɛ̀, tə̀tàa Jem bə Josìs bə Judàs nə ye Saimʉ̀ yeŋ ɛ̀? Cu fɛŋ yè’e ka njɛ̀’ɛ ye yeŋ à?>> Fana wo bɛŋ yi. ⁴Jisòs dʉk fa wo də, <<A yegə̀ də wo jəgə̀ ŋgà tsòhòbum Nwì ma nə̀ yi lòfòpwe’ co ŋwè. A kə̀ dzèŋ mvwe’ lak ye, nə ye mʉ nda’à yi fana wo kà yi co yumok jə. Bwe tɛ̀’ nə ye bə bwema ye wèŋ kà yi co yumòk sə̀’ jə.>> ⁵Yi à ka mandzə̀ nə̀ co yi gʉ maŋgəŋgèŋ fa’nə tse’ lok, megu də yi à bɛŋ naaŋ fa ŋgàa yiyaŋ mok wèŋ bo, fana wo gʉŋ yu awo. Wo à ye mègù moòm jo. ⁶Mʉmvə̀’nə̀ bʉ̀ʉ sə̀ fo’ sə à ka dzədzəm bohòJisòs tse’, fana yi mərə nə̀bʉp. Fana yi sə yə’rə lòkɛ’ bwìŋ mok mvwe’ buhu lak sə̀ yà’ à ye fo’ sə.

Jisòs Tumsə Bwìŋ Hum-ncòp-ba

(Mat. 10:5-15; Luk 9:1-6)

⁷Jisòs à to be’lə bwe ye sə̀ hum-ncòp-ba sə mvwe’ mò’fis, nə tumsə lo wo ba ba, nə fa wo ŋàaŋ sə̀ ŋgògha’ yòŋsə̀ə sə̀ bʉp. ⁸Yi dʉk fa yà’ dʉk də, <<Wèeŋ cu ŋgòlòo, wèŋ kà yumòk jə tse’ lò. Wèŋ jəŋ mègù ntʉmbàŋ, nə kà bɛŋ kè bàm kè mbàm sə bàam cə̀’ə wèŋ jə tse’. ⁹Wèeŋ so megu kùuŋgùp, nə kà cə̀k nə̀ nini mòk jə tse’.>> ¹⁰Yi tsok fe’lə wo mok sə̀’ dʉk də, <<Mvwe’ ndap nə̀ wèŋ nòoŋ fo’ wèŋ cum megu mvwe’ ndap nà’nə tèè wèŋ mè’rə lak yà’sə. ¹¹Ŋga wèŋ lò-a mvwe’ səmok, bʉ̀ʉ sə̀ fo’ kà weŋ mvwe’ ndap awo dzəm, kènə də wo kà yusə̀ wèŋ sə cèep yuk àlɛ’, wèŋ me’rə fo’, nə kɛ’sə mak mfə̀mfəə kùu awèŋ fo’. Yà’a nə ye yumok ŋgònì tsə̀’ də wo à ka weŋ fo’ dzəm.>>

¹²Yi ànə dʉk wo vɛ’nə, fana wo lo, nə sə tsoho lo fa bwìŋ də wo kupsə, nə bwi fa bʉp awo ŋkwɛ̀ŋ. ¹³Wo à bɛ’fis yòŋsə̀ə ze’ ŋkʉ̀ʉŋntɛ̀ŋ, nə yok ŋgàa yiyaŋ ŋkʉ̀ʉŋ bə mve’, wo sə gʉŋ.

Kpʉ Jon Ŋgà Bàptɛsə̀ Bwìŋ

(Mat. 14:1-12; Luk 9:7-9)

¹⁴Ŋkum Heròà yuk bum yè’sə sə̀’, bʉ̀ʉsə̀ liŋ Jisòs à yuhu mʉmvwe’ ànə pwe’fo’. Bʉ̀ʉ səmok à sə dʉk də Jon ŋgà bàptɛsə̀ bwìŋ a tesə və̀ fe’lə mvwe’ kpʉ laŋ. Nà’a njo nə̀ yi sə gʉ̀ to bum maŋgəŋgèeŋ yè’sə. ¹⁵Mok dʉk yàwo də, yi Àlajà. Mok sə dʉk yàwo sə̀’ də yi ŋgà tsòhòbum Nwì co sə̀ wo à ye taaŋ mantombì yà’a. ¹⁶Heròànə yuk, fana yi dʉk də, a lù Jon nə̀ yi à gwɛ̀’ tiŋ nà’ tu nà’nə. ¹⁷Bʉsə̀ Heròbə tu ye à fa ŋàŋ, fana wo ko Jon, nə kiŋ yi bə kʉ̀, nə kə nisə yi ndapndzəm. Heròà gʉ̀ vɛ’nə njo nə̀ Jon nə à ka dzəm də nà’a fep jəŋ Hèrodiyà ŋgwe moma ye Filìp dzəm. ¹⁸Jon à yuk vɛ’nə, yi sə tsoho Heròsəsa də, a bʉp bohònà’ ŋgòkə̀ jə ŋgwe moma ye. ¹⁹A ye vɛ’nə, fana Hèrodiyà jok, nə sə rom də yi nə zə Jon. Yi kà mandzə̀ nə sə̀’ tse’ njo Herò. ²⁰Heròà sə wəp Jon wəpə bʉ̀ʉsə̀ yi à rì də Jon ŋwə̀ nə̀ kə̀kʉrə̀ nə ye rərɛŋ. Fana yi sə nòŋsə Jon nə bə̀boŋ. Yusə̀ Jon cèep, yà’ yaaŋ Heròsə ntʉʉ̀ nə̀bʉp. Yi sə dzəm mali co yi yu’rə mali yusə̀ nà’ sə cèp sə fo’.

²¹Hèrodiyà à tse’ mandzə̀ ye nùmbu nə̀ wo à tse’ ŋkàk də nùmbu nə̀ wo à dzə Heròkə̀ dzèeŋ. Heròà gʉ̀ dinà, nə to bʉ̀ ŋgàa fàak gomè sə̀ ghaŋ, bə ŋkum sojà wèŋ, nə ye bʉ̀ʉ sə̀ ghaŋ sə̀ mvwe’ nzeŋgòŋ Galìli pwe’fo’. ²²Mo Hèrodiyà mòk nə̀ ŋgwə̀ŋgwɛ̀ŋ à kà dzeŋ, boŋ Heròbə bʉ̀ʉ sə̀ yi à to yà’ sə pwe’. Fana Heròdʉk fa mo ŋwà nə də yi nə fa nà’ nsàp yu nə̀ nà’ dzəm lòoŋ. ²³Yi à kɛ̀ŋ vɛ’ɛ nə̀ zìnə də, yusə̀ nà’ dzəm pwe’, yi nə fa nà’, də a ye-a sə̀’ də yi gàpsə nze ye mʉtsətsə’rə̀, nə fa nà’ ma mok, yi nə fa nà’. ²⁴Mo nə yuk vɛ’nə, yi lo, nə kə fek ma ye də, yi kə dʉk də wo fa yi yè’sə yà lɛ. Ma ye nə dʉk də, <<Dù kə̀ dʉk də, tu Jon ŋgà bàptɛsə̀ bwìŋ.>> ²⁵Mo nə caŋ foho lo, nə kə dʉk fa Heròdə, <<Mʉ̀ sə dzəm ŋga’a də wu fa mʉ tu Jon ŋgà bàptɛsə̀ bwìŋ mʉnə tasà.>> ²⁶Ŋkum nə à yuk vɛ’nə, ŋgùp cù gbʉ̀ yi yə̀k, manziŋ ko yi nə̀bʉp. Mandzə̀ nə̀ co yi bɛ̀ŋ ye sə̀’ bʉ̀ə̀ bʉ̀ʉsə̀ yi anə kɛ̀ŋ, bʉ̀ʉ sə̀ yi a to sə pwe’ sə yuk. ²⁷Fana ŋkum nə tumsə sojà nə̀ nà’a kʉ̀kgə̀ yi də nà’a kə̀ gwɛ̀’ cok və̀ tu Jon jwè. Sojà nə à lòmʉ ndapndzəmə̀ anə, nə kə gwɛ’ cok fis və tu Jon sə. ²⁸Yi à jə və̀ yà’ mʉnə tasà, nə kə fa mʉŋwà nə. Yi jəŋ, nə kə fa ma ye. ²⁹Ŋgàa fàak Jon wèŋ à yuk də wo zə Jon laŋ, wo və, nə kə bək jəŋ lo ve ni’ Jon nə, nə kə tuuŋ.

Jisòs Fa Bwìŋ Ncùhù Tàŋ Zʉzʉ

(Mat. 14:13-21; Luk 9:10-17; Jon 6:1-14)

³⁰Ŋgàa ntum Jisòs à bwìŋ və̀ə, nə kə tseŋ Jisòs, nə tsoho fa yi yusə̀ wo gʉ̀ʉ nə yə’rə fa bwìŋ. ³¹Bwìŋ à sə və̀ ŋkʉ̀ʉŋ, nə sə lo ŋkʉ̀ʉŋ nsàp nə̀ Jisòs bə ŋgàa ntum ye à ka mvə̀k ŋgòyòŋsə̀ tse’. Fana yi dʉk fa wo də, <<A lo mvwe’ sə̀sap sə̀ anə ye megu fo’ vesùwèŋ, ya ŋga a yoŋsə.>> ³²Fana wo à mè’rə, nə ni sənə ŋgwes woòwo ŋgòlòmvwe’ sə̀ bwìiŋ fo’ bʉ̀ə̀. ³³Mvəsə̀ wo à sə lòo, bwìŋ sə ye tasə tse’ wo, nə sə carə lo sə̀’ mvwe’ sə̀ wo sə lòo sə, nə kə dzeŋ to fo’ ntòwo. Bʉ̀ʉ yè’sə à sə tesə və̀ mvwe’ bòop lak zəzok. ³⁴Jisòs à dʉk də yi tesə sənə ŋgwes, yi ye ŋga bwìŋ təm tə yè’ ŋkʉ̀ʉŋ. Fana ntʉm ye rwiŋ bə manziŋ bʉ̀ʉsə̀ wo co nsùŋgaaŋ sə̀ jì ganakù’. Fana yi ye ŋgòyə’rə wo bum ŋkʉ̀ʉŋ.

³⁵Mvə̀k à càa, ŋgàa fàak ye wèŋ və bohòyi, nə kə dʉk fa yi də, <<Nùm lòlaŋ, fana ka fɛɛŋ la’à ye. ³⁶Tumsə bʉ̀ʉ yè’sə wo lo mvwe’ nzum nə ye buhu lak sə̀ yà’ tərə yà’a ŋgòlàp ywiŋ yumok ŋgòzʉ.>> ³⁷Yi dʉk fa wo dʉk də, <<Wèeŋ kʉk fa wo yumok wo zʉ.>> Wo fek yi də, <<Wù dzəm də vèes lo kə bʉpsə bàm mbàm mò’fis, nə ywiŋ bɛŋ ŋgòfa wo à?>> ³⁸Yi fek fe’lə wo dʉk də, wo tse’ ntuk brɛd sʉ̀ nɛ? Dù nə kə kʉk ɛ. Wo à foho və̀ə, wo dʉk fa yi də, <<Vès tse’ ntuk brɛd tàŋ, nə ye fuk ba.>> ³⁹Jisòs dʉk fa wo də, <<Cumsə bʉ̀ʉ sə mʉnə nʉ̀əm ŋgaŋ fa’a bə bòp zəzok.>> ⁴⁰Fana bʉ̀ʉ sə à cu bə bòp zəzok, mok ŋkʉ̀ mò’fis, mok hum tàŋ wèŋ. ⁴¹Fana Jisòs jəŋ ntuk brɛd sə̀ tàŋ, nə ye fuk sə̀ ba sə. Yi kʉ̀k gesə lis mʉbu, nə kwasə Nwì, nə bək brɛd sə, nə fa ŋgàa fàak ye də yà’a gap fa bʉ̀ʉ sə. Yi à gàpsə fuk sə̀ ba sə sə̀’, nə fa wo lòoŋ. ⁴²Wo à zʉ wo pwe’, nə ze’ bə̀boŋ. ⁴³Ŋgàa fàak ye à te’e benə sə̀ bwehe sə kwès hum-ncòp-ba. ⁴⁴Bʉ̀ʉ sə̀ wo à zʉ sə à ye mbəmbam ncùhù tàŋ.

Jisòs Gì Mʉ Ndzəpə̀

(Mat. 14:22-36; Jon 6:16-21)

⁴⁵Ànə geŋ, Jisòs gʉ̀ də bwe yee ni ŋgwes, nə lo mantombì ŋgòto lòma ndzə mvwe’ lak sə̀ wo togə̀ fo’ də Bèsadà. Yi nə cum ye maŋkwɛ̀ŋ, nə cepsə bwìŋ ya wo lo la’à wo. ⁴⁶Yi ànə cepsə wo, wo lo. Fana yi lo ye mʉmvwe’ nda mòk ŋgòkə̀ gʉ̀ pìriyà mbwa.

⁴⁷Nùm à co ŋga ndzəm sə seŋ və̀ə, ŋgwes nə ye mok mʉtsətsə’rə ndzəp ŋga Jisòs cu malì mvwe’ sə̀ yi anə lo sə yiìyi. ⁴⁸Yi ànə riŋ ye də yà’ sə yə ŋgə’ bə ŋgwes nə nə̀bʉp, bʉ̀ʉsə̀ fə̀fə̀ à sə və̀ ma nə̀ wo à sə dzəm ŋgòlòo nə. À kə̀ dzèŋ mvə̀’nə̀ mvəp à yè ŋgòtorə ndzəmə̀ anə fana Jisòs və bohòwo ŋga yi sə gì və mʉ ndzəpə̀, nə sə ca lo càa. ⁴⁹Bwe ye sə ànə ye yi mvə̀’nə̀ yi sə gì mʉ ndzəpə̀, fana wʉə ko wo vɛ’ɛ nə̀bʉp. Wo dʉk ŋgwàaŋ də, a maze’ mòk, nə kɛ̀’ nooŋ ŋgùŋ. ⁵⁰Bʉsə̀ wo ànə ye yi, wʉə ko wo lòoŋ fo’. Ànə geŋ yi to yà’wèŋ sə̀’ ntɛ̀ŋ, nə dʉk fa wo də, <<A mʉ̀, wèeŋ kà wəp.>> ⁵¹Yi à ni lòsənə ŋgwes nə, fana fə̀fə̀ nə teŋsə. Bwe ye sə mərə bʉ̀ə̀. ⁵²Bʉsə̀ wo ànə ka nzak ntuhu brɛd sə̀ tàŋ sə riŋ, fana wo kà yè’sə rɛɛ̀ŋ. Ntʉm awo à ye malì gʉgʉŋ.

⁵³Wo à to tesə lòmʉmfèŋ fana wo tesə və mvwe’ lak Jènesarè, fana wo me’rə tes ŋgwes awo sə ŋgʉ ndzəp anə. ⁵⁴Mvə̀’nə̀ wo à tesə sənə ŋgwes nə ntɛ̀ŋ, bwìŋ ye riŋ Jisòs sə̀ ntɛ̀ŋ. ⁵⁵Fana wo yeto ŋgòcarə lòla’à wo, nə bək jəŋ və ŋgàa yiyaŋ awo pwe’ mʉ ntə̀əŋ, nə sə yuŋ lo kɛ’ Jisòs bə zeŋ mʉmvwe’ nə̀ wo yuk də yi fo’. ⁵⁶Mvwe’ sə̀ Jisòs à sə kɛ’ lòpwe’, mvwe’ mʉbuk lak kè lak sə̀ ghaŋ ɛ̀’, wo bəhə noŋsə ŋgàa yiyaŋ awo mvwe’ jəja. Mvə̀’nə̀ Jisòs à càa, wo sə lɛŋ yi də nà’a me’rə ŋgàa yiyaŋ sə wèeŋ jwɛŋ megu cù cə̀k ye ya wo gʉŋ. Bʉ̀ʉ sə̀ wo à jwɛ̀ŋ pwe’fo’, à gʉ yu awo.

Bum Lak Bʉ̀ʉ Jus Wèŋ

(Mat. 15:1-9)

¹Bʉ̀ʉ Faràsi, nə ye bʉ̀ ŋgàa yə’rə̀ lʉ̀k à tesə mvwe’ lak Jòrosalèm, nə kə tseŋ Jisòs, ²nə ye də ŋgàa fàak Jisòs mok sə zʉ bɛŋ nə kà bo bə mandzə̀ nə̀ bʉ̀ʉ Faràsi dzəmgə̀ə nə cùk. ³Bʉsə̀ bʉ̀ʉ Faràsi bə bʉ̀ʉ Jus pwe’ cùkgə̀ bo awo bə nsàp mandzə̀ nə̀ tɛ̀’ awo sə̀ mantombì à tsə̀’ wo ŋkuŋ nə zʉ yumok. ⁴Wo bwi və ntɛŋ, wo kà yumok zʉ tè ŋga wo cùk bo ŋkuŋ. Bum mok sə̀’ ŋkʉ̀ʉŋntɛ̀ŋ sə̀ wo à sə yùu, co ŋgòcùk ŋgàp bə kʉ̀ŋ, tasà nə ye dzòho ncum sə̀’. ⁵À ye vɛ’nə bʉ̀ʉ Faràsi bə bʉ̀ ŋgàa yə’rə̀ lʉ̀k wèŋ sə fek Jisòs də, ŋgàa fàak nà’ sə kà bum lak sə̀ ŋkwàha bwìŋ wèŋ à nòŋsə yù, nə sə zʉ bɛŋ bə bo jep bʉ̀ʉ yà? ⁶Jisòs dʉk wo də, <<Yusə̀ Ìzayà ànə cep mantombì sə kum weŋ ŋgàa tè’èŋkup à ye zìnə. Yi à còm də,

<Bʉ̀ʉ yè’e wəpgə̀ mʉ bə cù, fana ntʉm awo ye mvwe’ sə̀sap bohòmʉ̀.

⁷Wo sə kùksə basə mʉ ŋgwàŋ, bʉ̀ʉsə̀ wo sə yə’rə yusə̀ bwìŋ à cèp wo co yà’a lʉ̀ʉk Nwì.>

⁸Wèŋ mè’rə lʉ̀ʉk sə̀ Nwì sə maŋkwɛ̀ŋ, ŋgòyù bum sə̀ bwìŋ sə dʉk wo gʉgʉŋ.>> ⁹Jisòs dʉk malì də, <<Wèŋ tse’ nsàp ŋkərə̀ nə̀ ŋgòmè’rə lʉ̀ʉk Nwì, nə kotse’ bum lak awèŋ. ¹⁰Musì à dʉk də, <Wəp ma yo bə tɛ̀’ yo. Ŋwə̀ nə̀ yi yò-a ma kè tɛ̀’ ye àlɛ, wo zə megu yi zə.> ¹¹Fana wèŋ cwiŋ bʉsə yàwèŋ dʉk də, a ye-a ŋga ŋwè tse’ yumok sə̀ co yi tɛsə ma ye bə tɛ̀’ ye bə zeŋ, nə kà yà’ tɛsə̀, nə dʉk fa yà’wèŋ də, <Yusə̀ mʉ̀ tse’ sə Korbàn> (a yà’a dʉk də, yà’a sə̀ Nwì), ¹²nə kà-a ma bə tɛ̀’ mòk sə̀ tɛsə̀, wèŋ sə dʉk də, yi ka nzak tse’. ¹³Nà’a mandzə̀ nə̀ wèŋ sə jəŋ ncèp nə̀ Nwì co yusə̀ ŋgwàŋ bʉ̀ʉ bumlak sə̀ wèŋ yuk jəŋ bohòtɛ̀’ awèŋ sə. Bum mok cu sə̀’ ŋkʉ̀ʉŋ sə̀ co nè’nə sə̀ wèŋ sə yù tse’ yà’.>>

Yusə̀ Aco Yà’ Bʉpsə Ŋwè

(Mat. 15:10-20)

¹⁴Ànə geŋ Jisòs to benə və bʉ̀ʉ sə wèŋ pwe’fo’ ŋgʉ ni’ì yi, nə dʉk fa yà’wèŋ də, <<Wèeŋ yu’rə, nə rɛɛŋ yusə̀ mʉ̀ sə də mʉ tsok weŋ yè’e bə̀boŋ. ¹⁵Wèeŋ riŋ tse’ bə̀boŋ də, yusə̀ yà’a ni lògə̀ ma ndzə ni’ì ŋwè, nə gʉ bʉpsə ŋgə̀ŋgàaŋ bʉ̀ə̀. A bʉpsəgə̀ ŋwè yusə̀ yà’ tesə ya’ ndzə ni’ì yi tesə. ( ¹⁶Ŋwə̀ nə̀ yi tse’-a ntu’ ŋgòyuk bum fo’, yi yuk.)>>

¹⁷À kə̀ dzèŋ ghà nə̀ yi à mè’rə bʉ̀ʉ sə, nə lo mʉ nda’à, fana ŋgàa fàak ye wèŋ və, nə kə fek yi yumok bə gbʉ’ nə̀ yi nə cep nə. ¹⁸Jisòs dʉk fa wo də, <<Wèŋ ka sə̀’ rɛŋ co bʉ̀ʉ mok à? Wèŋ ka riŋ də yusə̀ yà’a ni lògə̀ ma ndzə ni’ì ŋwè, yà’ ka ŋgògʉ̀ bʉpsə yi yeŋ riŋ à? ¹⁹Njo nə də yà’a kà ma sə ntʉʉ̀ yi lògə̀. Yà’a lògə̀ ma sə və̀ə, nə ca tesə lo.>> Yi à cèp yè’sə ŋgòtsə̀’ də nsàp zʉzʉ nə̀ fòlòoŋ bə̀boŋ co ŋwè zʉ yà’. ²⁰Yi sə cèp malì sə̀mok də, <<À gʉ̀ bʉpsəgə̀ ŋwè yusə̀ yà’ tesə ya’ ndzə ni’ì yi tesə. ²¹Bʉsə̀ bʉp yètogə̀ ma sə ntʉʉ̀ ŋwè. Yi tsərə ŋgònòoŋ ŋwàŋwè, yə̀yə̀, zə ŋwè, nòoŋ ŋgwe ŋwè, ²²waŋ bum ŋwə̀ mòk, ŋkʉ̀ì’, ci’ mvwès, jì marè’tu, gʉ̀ bʉpsə liŋ ŋwè, nɛ̀ ni’, nə ye bum ləm. ²³Bum sə̀ bʉp yè’e pwe’fo’ tesə yakgə̀ ndzə ni’ì ŋwè, nə bʉpsə ŋwə̀ nə.>>

Ŋwà Lakmvum Nə̀ Yi À Naaŋ Tu BohòJisòs

(Mat. 15:21-28)

²⁴Jisòs à mè’rə Galìli, nə lo mvwe’ nzeŋgòTayà, nə kə ni cum mʉmvwe’ ndap nəmòk də ya bwìiŋ kà rì də yi fo’ rì. Fana mandzə̀ kà bohòyi ŋgòswìhi ye. ^25-26Mʉŋwà nəmòk nə̀ yi à tse’ yòŋsə̀ nə̀ bʉp à ye mvwe’ lak yà’sə. Fana ma ye yuk də Jisòs və̀ ntɛ̀ŋ, yi və bohònà’, nə kə gbʉ sə nze, nə sə lɛŋ nà’ də nà’a kə bɛ’fis fa yi yòŋsə̀ nə̀bʉp ndzə ni’ì mwe. Yi à sə lɛŋ nà’ vɛ’nə ŋga yi ŋwà lakmvum. Yi à ye ŋwà Fònisiyà mvwe’ nzeŋgòŋ Siriyà. ²⁷Fana yi dʉk fa ŋwà nə də, <<Ka bə̀boŋ ŋgòjə bɛŋ mwe, nə mak fa ŋgbʉ yeŋ. Bòdə a fa bwe zʉzʉ ŋkuŋ>>7:27 Ye Màtiyò15:26²⁸Ŋwà nə dʉk də, <<Tà, wù rì yòsə̀’ də wo fagə̀ bwe bɛŋ, ŋgbʉ sə te’e sə̀ yà’ sə gbʉ̀ tsoŋ sə nze sə̀’.>> ²⁹Yi dʉk fa fe’lə ŋwà nə dʉk də, <<Dù-a, yòŋsə̀ nə̀ bʉp nə mè’rə mo yònə laŋ, bʉ̀ʉsə̀ wù cèp ncèp nə̀ bə̀boŋ.>> ³⁰Yi bwi foho lo, nə kə tseŋ mo ye nə ŋga nà’ nòmʉ kèhe ŋga yòŋsə̀ ze’ nə lòlòye kwà’kə̀.

Jisòs Gʉ̀ Ŋwə̀ Nəmòk Yi Yuk Bum, Nə Cep Cù

³¹Jisòs à ye’e Tayà fa’nə, nə lo mvwe’ lak Sidòŋ, nə ca lo mvwe’ ndzəp Galìli, nə ca mvwe’ nzeŋgòDìkàpolìs. ³²À kə̀ dzèŋ fo’, wo jəŋ və fa yi ŋwə̀ nəmòk nə̀ yi kà cù bə̀boŋ cèpgə̀ nə kà bum sə̀’ sə yuk. Nə lɛŋ yi də yi jwɛŋ nà’ bə bo. ³³Jisòs à jə gɛsə lònà’ yiìyi, nə kə so gesə fa yi ndubo fə ntu’ù, nə te nte, nə jwɛŋ lʉm nà’ bə zeŋ, ³⁴nə kʉk gesə lo lis mʉbu, nə som cɛ̀bʉ̀ə̀, nə dʉk bə ŋàŋ də, <<Mùhu.>> A bə ncèep lak sə̀ yi à cèep sə də, <<Efatà.>> ³⁵Ntu’u sə à mùhu, lʉm fìiŋ yi, fana yi cep bum làaŋ. ³⁶Jisòs cep soŋ bʉ̀ʉ sə̀ fo’ sə ntu’ də wo kà bwìŋ tsə̀’ fa. Yi dʉkgə̀ vɛ’nə, wo kà mbɛŋ nə̀ mbɛŋ kom lok, wo sə tsoho lo gù mantombì. ³⁷Bwìŋ à mərə cɛ̀bʉ̀ə̀, nə sə dʉhʉ də, <<Yi gʉ̀ bòŋsə bum mbà, yi gʉ ŋgàa jì ntu’ yuk bum, nə gʉ ŋgàa jì cù ŋgòcèp cù.>>

Jisòs Fa Bwìŋ Ncùhù Kwè Zʉzʉ

(Mat. 15:32-39)

¹Nùmbu mòk à ye sə̀’, bwìŋ à baaŋ və̀ mvwe’ mò’fis ŋkʉ̀ʉŋntɛ̀ŋ ŋgòyuk Jisòs, fana nə kà yusə̀ ŋgòzʉ tse’. Jisòs to benə ŋgàa fàak ye ŋgʉ ni’ì yi, nə dʉk fa wo də, ²<<Manziŋ sə ko mʉ bohòbʉ̀ʉ yè’e cɛ̀bʉ̀ə̀ bʉ̀ʉsə̀ wo cu vesiwèŋ ntinə nùumbu tɛ’, nə kà yumok zʉ. ³Mʉ dʉk-a də wo bwi foho lo ŋga wo ka yumòk zʉ, aco mok kə̀ gbʉ̀ njè mandzə̀ bʉ̀ʉsə̀ mok və̀ mvwe’ sə̀sap.>> ⁴Bwe ye sə fek yi də, <<Aco ŋwè jəŋ zʉzʉ ŋgəà fɛɛŋ fòŋkuŋ nə fa bʉ̀ʉ yè’e lòoŋ ɛ?>> ⁵Yi fek fe’lə wo də, yà’wèŋ tse’ ntuhu brɛd fɛɛŋ sʉ̀ nɛ? Wo dʉk də, mègù sàmba. ⁶Yi jəŋ ntuhu brɛd sə̀ sàmba sə, nə dʉk bwìŋ pwe’ cum nze. Yi à kwasə wes Nwì, yi bə’rə yà’, nə fa ŋgàa fàak ye də yà’a fa ndàaŋwè pwe’fo’ zʉ. ⁷Bwe fuk mok à ye fo’ jo sə̀’. Yi jəŋ yà’, nə kwasə Nwì, nə dʉk bwe fàak ye də wo fa bʉ̀ʉ sə wo zʉ. ⁸Wo zʉ, nə ze’ bə̀boŋni. Fana wo te’e fe’lə sə̀ yà’a nə bwehe sə kwès sàmba. ⁹Bwìŋ à ye co ncùhù kwè sə̀ wo ànə zʉ, fana Jisòs dʉk wo lo. ¹⁰Bə ŋgàa fàak ye à ni yàwo ŋgwes, nə lo nzeŋgòŋ Dàmànutà.

Wo Də Jisòos Gʉ Niŋtsok Fa Wo Maŋgəŋgèŋ

(Mat. 16:1-12; Luk 12:54-56)

¹¹Bʉ̀ʉ Faràsi mok à və̀ bohòJisòs ŋgòfi’dʉk bə nà’. Fana wo dʉk yi də, yi gʉ maŋgəŋgèŋ mòk nə̀ aco nà’ ni tsok fa wo də yi tse’ ŋàaŋ Nwì ŋkuŋ ya wo dzəm bohòyi. Bʉsə̀ wo à dzəm ŋgòmùmsə yi. ¹²À bʉp Jisòs, fana yi som, nə dʉk də, <<Bʉ sə̀ niè’ wèeŋ dzəmgə̀ yàwo də wo ye tsoŋ yumok bə lis ŋkuŋ nə dzəm yè’sə bʉ̀ʉ yà?>> Nə dʉk fe’lə də, <<Bə zìnə àm pwe’, mʉ nə kà yumok ŋgònì fa bʉ̀ʉ yè’e gʉ̀.>> ¹³Fana yi me’rə wo fo’, nə ni sənə ŋgwes ŋgòto lòŋgʉ ndzəp mamòk.

Jisòs Yə’rə Bwe Ye Wèŋ ŊgòRɛɛŋ Yi

¹⁴Bwe Jisòs à ye sə ŋgwesə̀ anə, nə tse’ megu ntu’ brɛd mò’fis bʉ̀ʉsə̀ wo ànə swì ŋgòjə tse’ brɛd mok. ¹⁵Yi dʉk fa wo dʉk də, <<Wèeŋ jəŋ ŋkərə̀ bə nsàap yis bʉ̀ʉ Faràsi nə ye nsàap yis sə̀ ŋkum Herò.>> ¹⁶Wo sə cep kɛ’ mʉtsətsə’rəə wo anə dʉk də yi dʉk vɛ’nə bʉ̀ʉsə̀ wo swì ŋgòjə və̀ brɛd. ¹⁷Jisòs riŋ yusə̀ wo sə cèp sə, nə dʉk fa yà’wèŋ də, <<Wèŋ sə sa’ də wèŋ swì ŋgòjə tse’ brɛd yè’sə bʉ̀ʉ yà? Wèŋ ka rɛɛŋ mali à? Ntʉm awèŋ cu malì ntògʉgʉŋ à? ¹⁸Wèŋ tse’ lis, nə kà sə yə, tse’ ntu’, nə kà bum sə yuk à? Kaco wèŋ tsəmtse’ yumok yeŋ à? ¹⁹Mvə̀’nə̀ mʉ̀ ànə bə’rə fa bwìŋ ncùhù tàŋ ntuhu brɛd sə̀ tàŋ yà’a, bʉ̀ʉ yè’sə à zʉ mèsə, wèŋ te’e sə̀ yà’ à bwehe kwès sʉ̀?>> Wo dʉk də, ànə ye kwès hum-ncòp-ba. ²⁰Yi fek fe’lə wo də, <<Mvə̀’nə̀ mʉ̀ a bə’rə fa bwìŋ ncùhù kwè ntuhu brɛd sàmba yà’a na, wèŋ te’e kwès sʉ̀ nɛ?>> Wo dʉk də, à ye kwès sàmba. ²¹Fana yi fek yà’ dʉk də, <<Wèŋ ka sə̀’ rɛɛŋ mali à?>>

Jisòs Gʉ̀ Ŋwə̀ Nəmòk Yi Ye Bum

²²À kə̀ dzèŋ mvwe’ lak Bèsadà, wo jəŋ və ŋwə̀ nəmòk nə̀ yi kà yəgə̀, nə sə lɛŋ Jisòs də yi jwɛŋ ŋwə̀ ènə bə bo. ²³Jisòs à kotse’ nà’ bə bo, nə jəŋ fis gɛsə lo nà’ mvwe’ mʉbuk lak nà’nə. À kə̀ dzèeŋ, yi te gesə fa nà’ nte mʉ lisə̀ anə, nə naaŋ fa nà’ bo, nə fek nà’ də, <<Wù sə yə bum à?>> ²⁴Ŋwə̀ nə à dʉk də, <<Ŋ̀, mʉ̀ sə yə bùrə bwìŋ wo co tʉ, nə sə gihi kɛ’.>> ²⁵Yi naaŋ fe’lə bo mʉ lisə̀ nà’ anə sə̀mok, fana ŋgà’ nə kʉk swɛ’lə lis mok bə ŋàŋ. Yà’ muhu, yi ye bum mok làaŋ. ²⁶Jisòs dʉk yi də, <<Dù nda’à wù, nə kà fə ntòlak fa’nə mok ni lo fe’lə̀.>>

Pità Dʉk Də Jisòos Ŋkum Ŋgà Gèm Bwìŋ

(Mat. 16:13-20; Luk 9:18-21)

²⁷Jisòs bə bwe ye wèŋ à yè’e lòmvwe’ buhu lak mok ŋgʉ lak Sìsàriyà Filìpi. Fana à kə̀ dzèŋ mandzə̀ yi fek yà’wèŋ dʉk də, <<Bwìiŋ dʉkgə̀ də mʉ yè’sə ndà?>> ²⁸Mòk dʉk də, <<Bʉ̀ʉ mok dʉkgə̀ də wu Jon ŋgà bàptɛsə̀ bwìŋ, mok dʉkgə̀ də wu Àlajà, fana mok sə dʉk sə̀’ də wu ŋgà tsòhòbum Nwì mòk nə̀ yi à ye fa’ àlɛ.>> ²⁹<<Wèŋ yàwèŋ ɛ, wèeŋ dʉkgə̀ yàwèŋ də mʉ ndà?>> Pità dʉk də, <<Wu Ŋkum ŋgà gèm bwìŋ nə̀ wo sə kʉ̀k nə.>> ³⁰Jisòs à yuk vɛ’nə, yi tipsə wo də wo kà ŋwə̀ nəmòk tsə̀’ fa.

Jisòs Cèp Mvə̀’nə̀ Kpʉ Ye Nə Ye

(Mat. 16:21-28; Luk 9:22-27)

³¹Jisòs à yè ŋga’a ŋgòyə’rə ŋgàa fàak ye, nə sə tsoho fa yà’ dʉk də, <<Mʉ̀ʉ mo ŋwè, mʉ̀ tse’ ŋgòye ŋgə’ nə̀bʉp, bʉ̀ʉ sə̀ mantombì bə bʉ̀ ŋgàa fa satikà’ nə ye ŋgàa yə’rə̀ lʉ̀k wèeŋ nə bɛŋ mʉ. Wo nə zə mʉ, fana anə ca nùumbu tɛ’, mʉ̀ lokok mvwe’ kpʉ sə̀mok.>> ³²Yi à cèp yu yè’sə kwarəŋgaŋ. Fana Pità ko lo gɛsə nà’ fo’, nə sə jwa nà’. ³³Jisòs bʉ̀ʉŋ kʉ̀k vèsə ŋgàa fàak ye, nə jwa Pità də, <<Coho gɛsə ŋgʉ ni’ì mʉ̀ wùu Satà. Yusə̀ wù sə cèp yà’sə, a tsətsərə̀ nə̀ bwìŋ tse’ nà’ wo, ka nə̀ Nwì yeŋ.>>

³⁴Yi to benə bʉ̀ʉ sə nə ye ŋgàa fàak ye wèŋ, nə tsok wo də, <<A ye-a ŋga ŋwə̀ nəmòk dzəm-a ŋgòyù mʉ, yi nə me’rə yusə̀ ni’ ye sə dzəm maŋkwɛ̀ŋ, nə bək jəŋ ntə̀əŋ ye, nə yuŋ və mʉ. ³⁵Bʉsə̀ ŋwə̀ nə̀ yi gəhə tse’-a yòŋsə̀ ye yi, fana nà’a nə bisə wà. Fana ŋwə̀ nə̀ yi jə yòŋsə̀ yi co yusə̀ wà bʉ̀ʉ mʉ̀ nə ye ncèp àm, fana yi nə tse’ yòŋsə̀ ye nə. ³⁶Swe’ nə̀ aco ŋwè tse’ yà’sə yà ŋga yi tse’-a nzeŋgòŋ nə pwe’, nə bisə yòŋsə̀ ye ŋgwàŋ ɛ? ³⁷Yusə̀ aco ŋwè kupsə yà’ kʉrə bə yòŋsə̀ ye yà? Yumook bʉ̀ə̀. ³⁸Ŋwə̀ nə̀ yi koksə-a marè’tu bohòmʉ̀ nə ye ncèp àm ŋga’a sənə nzeŋgòŋ nə̀ nà’ rwiŋ bə ŋkʉ̀ì’ nè’e fana ghà nə̀ mʉ̀ʉ mo ŋwè mʉ bwìŋ və̀ bə masinjàa sə̀ rərɛŋ, nə tse’ ŋàaŋ sə̀ Tɛ̀’ am fa mʉ fana, mʉ̀ koksə marè’tu bohòyi sə̀’.>>

¹Fana Jisòs à tsə̀’ fa wo dʉk də, <<Mʉ̀ sə tsə̀’ weŋ yè’e zìnə də, bʉ̀ʉ mok tə fɛɛŋ sə̀ wo nə kà kpʉ tə̀tè wo ye gaŋ sə̀ Nwì ŋga yà’ və̀ bə ŋàŋ.>>

Jisòs Kupsə Nsəsə̀ Mʉ Ndahà

(Mat. 17:1-13; Luk 9:28-36)

²À cà nùumbu ntùŋfu, fana Jisòs to jəŋ Pità bə Jem nə ye Jon, bə yà’wèŋ kok lo mʉmvwe’ nda mok nə̀ sə̀sap. Fana wo ye ŋga nsəsə̀ə Jisòs kupsə bʉ̀sə nsàp mòk nə̀ zok. ³Cə̀ək sə̀ yi ni tse’ mʉ ni’ì yi à bʉ̀ʉŋ fəfop tap tap. Yumok kà sə nze vɛ’nə fopgə̀. ⁴Wo ye Àlajà bə Musì ŋga wo tesə və̀ mʉbu. Bə Jisòs wèŋ sə taaŋ ŋgàm. ⁵Pità tiŋ wo cù, nə dʉk fa Jisòs dʉk də, <<Cicà, yà’ bòvɛ’ɛ wùriŋ mvə̀’nə̀ vesùwèeŋ fɛŋ yè’sə. A ci ba’rə tes bwe duŋ fɛɛŋ nə tɛ’, mò’fis nə̀ njò, mòk nə̀ Musì, mòk nə̀ Àlajà.>> ⁶Yi ànə cep tsoŋ gù yè’sə də ncèp kà cù gha’gə̀, bwɛ̀rɛ wʉə ànə ko wo vɛ’ɛ, wo kà yusə̀ ŋgòcèep rì. ⁷Mbàk à və̀ə nə kə̀ təhə lok wo, fana wo yuk ŋga ŋgì mòk cèp vèsə ndzənə mbàk nə dʉk də, <<Nè’e mo àm nə̀ mʉ̀ dzəm yi sə ntʉʉ̀ mʉ̀. Yusə̀ yi cèp pwe’, wèeŋ yuk fa yi.>> ⁸Wo à yuk ŋgì ènə vɛ’nə, wo kʉksə kɛ’, nə kà ŋwə̀ nəmòk nə̀ zok yə, wo ye megu Jisòs yiìyi.

⁹Mvə̀’nə̀ wo à sə tsooŋ mʉ ndahà, yi tipsə yà’ də, yà’a nə kà ŋwə̀ nəmòk yusə̀ yà’ yə tsə̀’ fa, tè tse’ŋga yi mo ŋwè mʉ̀ lòkok mvwe’ kpʉ ŋkuŋ. ¹⁰Wo à ka ŋwə̀ nəmòk sə tsok fa anə, wo sə cèp ŋwʉ̀rə kɛ’ gù woòwo, də yusə̀ yi cèp də ŋgòlòkok mvwe’ kpʉ yè’sə da lɛ. ¹¹Wo fek Jisòs də, <<Njo nə̀ ŋgàa yə’rə̀ lʉ̀k wèŋ sə dʉk də Àlajàa nə və to tsoŋ yi ŋkuŋ Krɛst və ŋgòtɛsə ves ɛ bʉ̀ʉ yà?>> ¹²Yi dʉk fa yà’ də, <<Àlajàa nə və ŋgòkə̀ gʉ̀hʉ tsə’rə fəsə bum pwe’.>> Fana yi fek bwi yà’ də njo nə̀ ŋwàk Nwì sə dʉk də mo ŋwèe nə ye ŋgə’ nə̀bʉp, wo bɛ̀ŋ yi sə̀’ bʉ̀ʉ yà? ¹³<<Mʉ̀ sə tsə̀’ weŋ də, Àlajà nə və̀ laŋ, fana wo ànə jəŋ yi, nə gʉ yi mvə̀’nə̀ wo dzəm sə̀’ mvə̀’nə̀ yà’ cu ndzənə ŋwàk Nwì.>>

Jisòs Tɛsə Mo Nəmòk Nə̀ Yi Tse’ Yòŋsə̀ Ze’

(Mat. 17:14-21; Luk 9:37-43)

¹⁴Wo ànə lo, nə kə be’lə bə ŋgàa fàak mok sə lòoŋ, fana wo ye bʉ̀ʉ mok fo’ sə̀’ wùriŋ. Ŋgàa yə’rə̀ lʉ̀ʉk mok à ye fo’, nə sə fi’dʉk bə ŋgàa fàak sə. ¹⁵Bʉ̀ʉ sə à ye Jisòs ntɛ̀ŋ, fana wo mərə wùriŋ, nə carə lo kə̀ cèpsə nà’. ¹⁶Jisòs fek wo dʉk də, <<Wèŋ anə sə fi’dʉk fɛɛŋ də yà-ɛ?>> ¹⁷Ŋwə̀ nəmòk cep vesə mʉtsətsə’rə bʉ̀ʉ sə də, <<Cicà, mʉ̀ jə və̀ mo àm bohòwù bʉ̀ʉsə̀ yi tse’ yòŋsə̀ ze’ ndzə ni’ì yi, nə̀ nà’a gʉ̀gə̀ yi yi kà cù sə cèp. ¹⁸Ghà nə̀ yòŋsə̀ ze’ nə yèto ŋgòfa yi ŋgə’, fana yi coho gbʉ̀ sə nze, sə sə dùk yi kə̀ cùhu, yi sə zʉ nzòŋ, fana ni’ gʉrə yi njək njək. Mʉ̀ dʉk ŋgàa fàak yòdə wo bɛ’ fis fa nà’, fana wo kà nà’ bɛ’ fis to.>> ¹⁹Jisòs dʉk fa wo də, <<Ja’a na mvəsə̀ wèŋ mègù sə̀’ co bʉ̀ʉ sə̀ wo ka dzədzəm tse’ yè’e ɛ. Mʉ nə cum geŋ vesùwèŋ, nə sə ko ntʉm vɛ’nə tə̀tè kə dzeŋ sèŋ? Wèeŋ jəŋ və fa mʉ mo nə fɛn.>> ²⁰Fana wo jə və̀ fa Jisòs mo nə. Ze’ nə̀ ndzə ni’ì mo nə à yə Jisòs ntɛ̀ŋ, nà’ gʉ yi gbʉ, nə gʉrə. Mo nə coho gbʉ sə nze, nə sə dzərə kɛ’ cà sə nze anə, sə sə duk yi kə̀ cùhù. ²¹Jisòs fek tɛ̀’ɛ mo nə də nà’ à yè ŋgògʉ̀ vɛ’nə sə nɛ? Tɛ̀’ nə dʉk də, <<Yà’ à yè yi ŋga yi cu ntòmʉmweŋke’. ²²A kɛ̀’ ŋkʉ̀ʉŋntɛ̀ŋ nə̀ nà’a də nà’a zə yi, nə sə mak gesə yi sə misə̀, nə ye sə ndzəpə̀ sə̀’. Ŋga wù tse’-a mandzə̀ nə, wù koksə manziŋ, nə tɛsə ves.>> ²³Jisòs dʉk də, <<Wù fek mʉ də ŋga mʉ̀ tse’-a mandzə̀ bʉ̀ʉ? Bum pwe’ tse’ mandzə̀ yo bohòŋwə̀ nə̀ yi tse’ dzədzəm.>> ²⁴Tɛ̀’ ye nə cep fis ye sə̀’ mvèsə̀ də, <<Mʉ̀ tse’ dzədzəm. Tɛsə mʉ ya ŋga dzədzəm àm nə kuk.>> ²⁵Jisòs à yə də bwìŋ sə və̀ ghaha ghaha, fana yi jwa yòŋsə̀ ze’ nə də, <<Yòŋsə̀ ləm nə ye jì ntu’, tesə ndzə ni’ì mo ènə, nə kà ndzə ni’ì yi mok ni yuk fe’lə̀. Mʉ̀ dʉk vɛ’nə mʉ̀.>> ²⁶Yòŋsə̀ nə à wa, nə gʉ mo nə kpʉ swirə nə̀bʉp, nə tesə lo. Mo nə à nòoŋ mègù mok co vèŋ ŋwè, nsàp nə̀ ndàaŋwè pwe’ à dʉk də, nà’ kpʉ laŋ. ²⁷Jisòs à kə̀ kotse’ yi bo ŋgòlòkoksə nà’, fana yi lòkok mʉtsə̀.

²⁸Mvə̀’nə̀ Jisòs à kə̀ ni cu mʉ nda’à, fana ŋgàa fàak ye və, nə sə fek yi də wo fis fʉk nà’ yàwo bʉ̀ə̀ yè’sə bʉ̀ʉ yà lɛ? ²⁹Jisòs dʉk fa wo də, <<Aco bɛ’ fis megu nsàp nè’e pìriyà, bwɛ̀rɛ nsàp yumòk ka mok ye fe’lə.>>

Jisòs Cèp Fe’lə Mvə̀’nə̀ Kpʉ Ye Nə Ye

(Mat. 17:22-23; Luk 9:43-45)

³⁰Wo à mè’rə mʉmvwe’ ànə, nə ca mandzə̀ nə̀ mvwe’ nzeŋgòŋ Galìli. Jisòs à ka dzəm də bwìiŋ riŋ mvwe’ sə̀ yi cu dzəm. ³¹Bʉsə̀ yi à sə yə’rə ŋgàa fàak ye. Yi à sə yə’rə wo də, <<Wo nə jəŋ mʉ̀ʉ mo ŋwè, nə fa ndzə bohòbʉ̀ʉ sə̀ wo nə zə mʉ, fana nùumbu tɛ’ càa, mʉ̀ lokok mvwe’ kpʉ.>> ³²Bwe sə à ka bə yusə̀ yi à cèp yè’sə rɛŋ, nə sə koksə wʉə ŋgòfek rɛŋsə yi.

Ŋwə̀ Nə̀ Ghaŋ Ndà?

(Mat. 18:1-5; Luk 9:46-48)

³³Jisòs wèŋ à kə̀ dzèŋ mvwe’ lak Kàpanùm. Fana wo ni lo mʉ nda’à. Jisòs à cu mbwa, nə sə fek yà’wèŋ də, <<Wèŋ anə sə fenə və fa’ mandzə̀ yà’a də yà?>> ³⁴Wo cum dədok, nə kà cèp fəsə̀, bʉ̀ʉsə̀ wo anə sə fenə və mandzə̀ anə də ŋwə̀ nə̀ ghaŋ ndà lɛ. ³⁵Fana yi à cu tsoŋ nze, nə to benə bwe ye sə, nə tsok wo dʉk də, <<Ŋwə̀ nə̀ yi dzəm-a ŋgòye mantombì, fana yi tse’ ŋgòjə lòni’ ye maŋkwɛ̀ŋ, nə sə fak bohòbwìŋ pwe’.>> ³⁶Fana yi ko lòkoksə tes mo nəmòk mʉtsətsə’rə wo, nə sə tsok fa wo ŋga yi le’ kotse’ mo nə duk də, ³⁷<<Ŋwə̀ nə̀ yi jə-a nsàp mo nə̀ jo nè’e nə dʉk fa nà’ də, <və̀ bə̀boŋ> mʉnə liŋ am, fana ye də yi jə yà’sə mʉ̀. Ŋwə̀ nə̀ yi jə-a mʉ, nə dʉk <Və̀ bə̀boŋ>, fana ye də yi sə kà bohòmʉ̀ dʉk mègù, a bohòŋwə̀ nə̀ yi à tum mʉ nə sə̀’.>>

Ŋwə̀ə Njàvès

(Mat. 18:6-9; Luk 9:49-50, 17:1-2)

³⁸Jon à to Jisòs də, <<Cicà,>> nə tsok nà’ dʉk də, <<Vès yə ŋwə̀ nəmòk ŋga yi bɛ’ fis yòŋsə̀ ze’ mʉnə liŋ yò. Fana vès dʉk yi də yi teŋsə, bʉ̀ʉsə̀ yi ka mòk mʉtsətsə’rə vès yeŋ.>> ³⁹Jisòs dʉk ye də, <<Kà də wu gʉ co yi teŋsə dʉk, bʉ̀ʉsə̀ ŋwə̀ nə̀ yi sə gʉ̀-a fàak sə̀ bə ŋàaŋ sə̀ Nwì mʉnə liŋ am, fana ka co ghàr yi bʉʉŋ cep fe’lə yusə̀ bʉp bə liŋ am yeŋ. ⁴⁰Bʉsə̀ ŋwə̀ nə̀ yi sə kà-a ves bɛ̀ŋ, ye də yi vesiwèŋ. ⁴¹Zìnə nə də, ŋga ŋwə̀ nəmòk səp fa-a wu ndzəp bʉ̀ʉsə̀ də wu ŋwə̀ə Ŋkum ŋgà gèm bwìŋ, ye də yi nə kə tse’ tsoŋ lə̀làk bə zeŋ.

Nza’ Sə̀swìfa Bə Nza’ Dzədzəm

⁴²<<Nə ye sə̀’ də a ye-a ŋga ŋwə̀ mòk gʉ̀ bəbwe sə̀ wo dzəm bohòmʉ̀ yè’sə mòk də yi gʉ bʉp fana bòŋ ghak co wo jəŋ ŋgòk, nə swi’ kə’ə fa ŋwə̀ ànə kə̀ mìhi, nə mak gesə lo yi sə mvwe’ ndzəp nə̀ cəco. ⁴³Ye də a ye-a ŋga bo yo sə gʉ̀ wu ŋgògʉ̀ bʉp, fana bòŋ də wu gbɛ’ tiŋ mak yà’. Bògha’ də wu kə ni lak lùŋ bə bo ma mò’fis, nə noŋsə ŋgòkə̀ ni mvwe’ ŋgə’ nə̀ sənə mis sə̀ yà’a kà liìŋgə̀ bə bo ma ba fo’. ( ⁴⁴Mʉmvwe’ ànə ndwiŋ sə̀ yà’a nə sə zʉ bwìŋ fo’ kà kpʉgə̀. Fana mis sə kà sə liìŋ.) ⁴⁵Kèe a ye-a ŋga kùu yo sə gʉ̀ wu ŋgògʉ̀ bʉp, fana boŋ də wu gbɛ’ tiŋ mak yà’. Bògha’ də wu kə̀ ni mvwe’ lak lùŋ kù ma mò’fis, nə noŋsə ŋgòkə̀ ni mvwe’ ŋgə’ nə̀ sə misə̀ nə bə kù ma ba fo’. ⁴⁶(Mʉmvwe’ ànə ndwiŋ sə̀ yà’a nə sə zʉ bwìŋ fo’ kà kpʉgə̀, fana mis nə kà sə̀’ liìgə̀.) ⁴⁷Mok ye sə̀’ də a ye-a ŋga lis yo sə gʉ̀ wu ŋgògʉ̀ bʉp, fana boŋ də wù so’rə fis mak ma nà’nə. Bògha’ də wu kə ni mvwe’ gaŋ Nwì bə lis ma mò’fis, nə noŋsə ŋgòtse’ lis ba lòoŋ, nə kə ni bə zeŋ mvwe’ ŋgə’ nə̀ sə misə̀ nə. ⁴⁸Mʉmvwe’ anə ndwiŋ sə̀ yà’a nə sə zʉ bwìŋ fo’ kà kpʉgə̀, fana mis sə kà sə̀’ liì. ⁴⁹Mis nə lʉmsə ndàaŋwè pwe’ co ci’. ⁵⁰Ci’ bə̀boŋ. Fana yà’a cwɛ̀’lə-a, aco yà’ lʉ̀m fe’lə va? Wèeŋ lʉm co ci’, nə cum bə fifi weŋ bwìŋ pwe’.>>

Nzak Mè’rə Ŋgwe

(Mat. 19:1-12; Luk 16:18)

¹Jisòs à mè’rə mʉmvwe’ ànə, nə lo mvwe’ nzeŋgòŋ Jùdiyà, nə ye ma ndzə nto ndzəp Jòridàŋ nə mamòk. Mvə̀’nə̀ yi ànə ye fo’ fana bwìŋ və, nə kə maŋ fo’ wùriŋ. Yi yèto ŋgòyə’rə wo mʉmvə̀’nə̀ yi gʉ̀gə̀ səsa. ²Bʉ̀ʉ Faràsi mok à və̀ ŋgòkə̀ bʉə yi bə dʉk. Fana wo sə fek yi də, <<Lʉ̀k avès sə tsə̀’ də, a bə̀boŋ bohòŋwè ŋgòmè’rə ŋgwe ye àlɛ?>> ³Yi fek wo sə̀’ də, <<Musì à tsə̀’ weŋ də yà?>> ⁴Wo à dʉk də, <<Musì ànə dʉk də, aco ŋwè com fa ŋwà nə ŋwàk nə̀ ŋgònìtsə̀’ də yi mè’rə nà’ laŋ, nə me’rə nà’.>> ⁵Jisòs dʉk fe’lə də, <<Musì à còm vɛ’nə bʉ̀ʉsə̀ ntʉm awèŋ gʉ nə̀bʉp, ⁶bwɛ̀rɛ mvə̀’nə̀ Nwì à gʉ̀ to ŋwè, yi gʉ ŋwə̀mbam bə ŋwàŋwè. ⁷Nè’e njo nə̀ ŋwèe nə me’rə tɛ̀’ ye bə ma ye, nə kə be’lə bə ŋgwe ye, ⁸fana wo sə̀ ba yè’sə nə ye mok ŋgùpni’ nə̀ mò’fis. A yà’sə də wo nə kà ba mok ye, wo mok mò’fis. ⁹Ye də yusə̀ Nwì à be’lə yà’ mvwe’ mò’fis fana ŋwə̀ nəmòk kà də yi gapsə yà’ dʉk.>>

¹⁰À kə̀ dzèŋ nda’à, ŋgàa fàak Jisòs sə fek mali yi bə ncèp nə. ¹¹Yi dʉk fa yà’ dʉk də, <<Ŋwə̀ nə̀ yi mè’rə-a ŋgwe ye, nə jəŋ fe’lə mòk sə̀mok, ye də ŋwə̀ ànə ŋgà ko nto. ¹²Yà’ mègù sə̀’ yəyərə̀ bohòŋwàŋwè, də a ye-a ŋga yi mè’rə-a ndu ye, nə kə jəŋ fe’lə mòk, ye də ŋwà ànə ko sə̀’ nto.>>

Jisòs Sè Bəbweŋke’ Wèŋ

(Mat. 19:13-15; Luk 18:15-17)

¹³Bʉ̀ʉ səmok à sə jə və̀ bweŋke’ də Jisòs jwɛŋ yà’wèŋ, nə se yà’wèŋ. Ŋgàa fàak Jisòs wèŋ ànə ye vɛ’nə, wo jwa sa’rə bʉ̀ʉ sə də yà’a kà vɛ’nə gʉ̀. ¹⁴Jisòs à yə vɛ’nə, fana yi jok, nə dʉk fa bwe ye wèŋ sə də, <<Wèeŋ me’rə bəbweŋke’ wèeŋ və bohòmʉ̀, nə kà wo mandzə̀ lok. Bʉsə̀ gaŋ ŋkum Nwì sə, tse’ yà’ nsàap sə̀ co wo yè’sə.>> ¹⁵Yi dʉk fe’lə də, <<Mʉ̀ sə tsə̀’ weŋ yè’e yusə̀ zìnə də, ŋwə̀ nə̀ yi kà-a gaŋ ŋkum Nwì co mʉmweŋke’ fa, ye də yi nə kà fo’ kə̀ ni yuk.>> ¹⁶Yi à dʉk vɛ’nə fana yi jəŋ bwe sə, nə naaŋ fa yà’ bo ye, nə se yà’.

Ŋgə’ Nə̀ Bə Ghàk

(Mat. 19:16-30; Luk 18:18-30)

¹⁷À ye ŋga Jisòs sə dʉk də yi lo gì, ŋwə̀ nəmòk caŋ və̀, nə kə bʉhʉ kə̀ mantombìi yi, nə dʉk fa Jisòs nə də, <<Cicà nə̀ bə̀boŋ, yusə̀ aco mʉ̀ gʉ yà’, ya mʉ nə kə tse’ lùŋ nə̀ nà’a nə̀ kà mèe yà?>> ¹⁸Jisòs fek nà’ də, <<Wù to mʉ də ŋwə̀ nə̀ bə̀boŋ bʉ̀ʉ yà? Ŋwə̀ nə̀ bə̀boŋ bʉ̀ə̀, mègù Nwì yiìyi. ¹⁹Wù rì yòlʉ̀ʉk sə laŋ. <Kà ŋwè zə, kà sàhà ko, kà yə̀yə̀, kà gèem mvwès ko, kà yu ŋwè limzʉ, wəp ma yo bə tɛ̀’ yo.> >> ²⁰Ŋwə̀ ènə dʉk fe’lə də, <<Cicà, mʉ̀ à gʉ̀ yè bum sə̀ wù taŋsə yè’sə ŋga mʉ̀ cu ntòmʉwà’ŋwè.>> ²¹Jisòs à kʉ̀’ nà’ jwaaŋ, nə dzəm nà’, nə dʉk fa nà’ dʉk də, <<Yumok cu malì mò’fis. Dù kə̀ sèŋ bum sə̀ wù tse’, nə fa ŋgàa jìŋ wèŋ mbàam sə, ya wu nə tse’ ghàk mʉbu, fana nə bɛ’ mandzə̀ nə yuŋ və mʉ.>> ²²Ŋwə̀ ènə à yuk vɛ’nə, fana ŋgùp cù gbʉ̀ yi yə̀k, yi coho lo, bʉ̀ʉsə̀ yi à tse’ bum nduk nə̀ nduk.

²³Jisòs à bʉ̀ʉŋ kʉ̀k ŋgàa fàak ye wèŋ, nə dʉk də, <<A gʉgʉŋ bohòŋgà ghàk ŋgòkə̀ ni mvwe’ gaŋ ŋkum Nwì.>> ²⁴Və̀m à kok ŋgàa fàak Jisòs bə ncèp ènə kiŋ. Yi sə cep mali də, <<Bwe am, a gʉgʉŋ bohòŋwè ŋgòni mvwe’ gaŋ ŋkum Nwì. ²⁵Joho cà bohònàm nə̀ yi yam co nàmbà’rə̀ nà’a ŋgòcà torə tesə ndzənə wʉ patà’, nə noŋsə bohòŋgà ghàk ŋgòni mvwe’ gaŋ ŋkum Nwì sə.>> ²⁶Mvə̀’nə̀ wo à yuk vɛ’nə, və̀m kok wo, wo muu və̀m bʉ̀ə̀, nə sə fehe mok də, <<Ye də ŋwə̀ nə̀ yi tse’ to lùuŋ yè’sə ndà?>> ²⁷Yi kʉ̀k nà’ jwaaŋ, nə dʉk də, <<A ye-a bohòŋwè yà’ ye gʉgʉŋ, ka bohòNwì vɛ’nə yeŋ, bʉ̀ʉsə̀ yumok ka Nwì-e gʉŋ ghak yuk.>>

²⁸Pità à cèp də, <<Ja’a na yòo, mʉmvə̀’nə̀ vès a mè’rə bum pwe’, nə yù lònə wu.>> ^29-30Jisòs dʉk də, <<Mʉ̀ sə tsə̀’ wu nə̀ zìnə nə, ŋwèe mè’rə-a ndap, bwe tɛ̀’, njɛ̀’ɛgù, ma, tɛ̀’, bwe, kè nzum ɛ̀, bʉ̀ʉ mʉ̀, nə ye bʉ̀ʉ ncèp Nwì, yi nə ye ŋgə’ sə̀’ fana mvə̀ək kʉ̀rə nùu yi kə̀ tse’ fe’lə yà’ vɛ’nə sə̀mok kɛ̀’ ŋkʉ̀ mò’fis. Ŋga’a nè’e yi nə tse’ ndap, bwe tɛ̀’, njɛ̀’gù, ma, tɛ̀’, bwe, bə nzum fak, fana mvə̀ək kʉrə nùu, yi tse’ lùŋ nə̀ nà’a nə̀ kà mè nə sə̀’. ³¹Mvə̀k ànə nə ye, bwìŋ ŋkʉ̀ʉŋ sə̀ wo ŋga’a mantombìi nə ye maŋkwɛ̀ŋ. Fana ŋkʉ̀ʉŋ sə̀ wo ŋga’a maŋkwɛ̀ɛŋ nə ye mantombì.>>

Jisòs Cèp Mvə̀’nə̀ Kpʉ Ye Nə Ye Sə̀mok

(Mat. 20:17-19; Luk 18:31-34)

³²Wo à sə gì sə mandzə̀ ŋgòlòmvwe’ lak Jòrosalèm, fana Jisòs to mantombì. Bwe ye wèŋ saha ntʉm nə̀bʉp. Wʉə à sə ko bʉ̀ʉ sə̀ wo à sə yù və̀ yi maŋkwɛ̀ŋ sə sə̀’. Fana yi to benə bwe ye sə̀ hum-ncòp-ba sə mvwe’ mò’fis, nə sə tsoho fe’lə wo yusə̀ yà’a nə gʉ yi. ³³Yi dʉk də, <<Wèeŋ yeè, mvə̀’nə̀ a sə lòmʉ Jòrosalèm yè’e, wo nə fa mʉ̀ʉ mo ŋwè ndzə bohòŋgàa fa satikà’ sə̀ ghaŋ bə ŋgàa yə’rə̀ fa bwìŋ lʉ̀k wèŋ. Wo nə sak mʉ, nə dzəm tes də mʉ mègù ŋgà kpʉ. Wo nə fa mʉ ndzə bohòbʉ̀ lakmvum wèŋ. ³⁴Wo nə ywi’lə mʉ, nə te mʉ bə nte, ləp mʉ, nə zə mʉ. Fana nùmbu nə̀ tɛ’ dzeeŋ, mʉ̀ lokok fe’lə mvwe’ kpʉ sə̀mok.>>

Yusə̀ Bwe Zebèdi À Lɛŋ

(Mat. 20:20-28)

³⁵Bwe Zebèdi Jem bə Jon à kə̀ tsèŋ Jisòs, nə dʉk fa nà’ də, <<Cicà, vès dzəm də wu gʉ fa ves yumok.>> ³⁶Fana yi fek yà’ də, <<Yusə̀ wèŋ dzəm də mʉ gʉ fa weŋ sə yà?>> ³⁷<<Vès dzəm də ghà nə̀ wu cu mʉnə kapràak yo, wù gʉ ves mòk cum wu mamàk, mòk maŋkwìp.>> ³⁸Jisòs dʉk də, <<Wèŋ ka yusə̀ wèŋ sə fek yè’sə riŋ. Aco wèŋ ye to ŋgə’ nə̀ mʉ nə ye nə à? Kènə aco wèŋ bàptɛsə to bə nsàp mandzə̀ nə̀ wo nə baptɛsə mʉ nə ɛ?>> ³⁹Wo dʉk də, <<Ŋ̀, aco vès ye to.>> Jisòs dʉk fe’lə də, <<A zìnə wèeŋ nə ye, nə baptɛsə nsàp bàptɛ nə̀ mʉ nə bàptɛsə nə zìnə. ⁴⁰Yusə mègù də, mʉ̀ ka ŋàaŋ sə̀ ŋgòswè’ bʉ̀ʉ sə̀ wo nə cum mʉ mamàk bə maŋkwìp mʉ̀ tse’. Mvwe’ ncum yà’sə sə̀ bʉ̀ʉ sə̀ Nwì a cok nòŋsə wo yi.>>

⁴¹Bwe ye mok sə̀ hum à yuk yu yè’sə, fana wo jok bohòJem bə Jon. ⁴²À ye vɛ’nə, Jisòs to benə wo mvwe’ mò’fis, nə dʉk də, <<Wèŋ rì tse’ yàwèŋ sə̀’ də, bʉ̀ʉ sə̀ wo tse’ dzòk sə nzeŋgòŋ fɛɛŋ gʉ̀gə̀ bwìŋ ŋkʉ̀ì’. Bʉ̀ʉ sə̀ ŋkwàha bʉ̀ awo sə niŋtsok fa wo ŋàŋ sə̀’. ⁴³Yè’sə ka tse’ ŋgòye bohòwèŋ vɛ’nə ye. Ŋwə̀ nə̀ yi dzəm-a ŋgòye ŋwə̀ nə̀ ŋkʉ̀ʉŋ mʉtsətsə’rə wèŋ, fana yi tse’ ŋgòfàk co mweŋke’ bohòmok sə lòoŋ fo’. ⁴⁴Nə ye sə̀’ də ŋwə̀ nə̀ yi dzəm-a ŋgòye mantombì yi, yi tse’ ŋgòye co ŋkwɛ̀ŋ bohòwèŋ pwe’. ⁴⁵Bʉsə̀ mʉ̀ʉ mo ŋwè bə tu am, mʉ̀ a ka də bwìŋ fak bohòmʉ̀ və. Mʉ̀ à və̀ ŋgòfà’ fà’a, nə fa yòŋsə̀ àm ŋgòywiŋ fəsə jə yòŋsə̀ə bwìŋ ŋkʉ̀ʉŋntɛ̀ŋ.>>

Jisòs Gʉ̀ Batimù ŊgòYe Bum

(Mat. 20:29-34; Luk 18:35-43)

⁴⁶À kə̀ dzèŋ mvwe’ lak Jèrikù ŋga wo sə mè’rə fo’ ŋgòlòmantombì ŋga bwìŋ ŋkʉ̀ʉŋ sə bɛ’ lòmalì yi fana ŋwə̀ nəmòk nə̀ wo togə̀ yi də Batimù mo Timayù cu ŋgʉ mandzə̀, nə sə lɛŋ bum ŋga yi kà bum yəgə̀. ⁴⁷Yi à yuk də sə və̀ Jisòs nə̀ mvwe’ lak Nazàrɛ ntɛ̀ŋ, yi yèto ŋgòtorə də, <<Jisòs mo ŋkum Devìd, koksə manziŋ bohòmʉ̀-ɛ̀.>> ⁴⁸Bʉ̀ʉ sə̀ wo à ye fo’ sə wèŋ ghamsə yi də yi cum gəe’. Yi ghaha wesə ghaha, nə sə cep mok bə ŋàŋ də, <<Mo ŋkum Devìd, koksə manziŋ bohòmʉ̀.>> ⁴⁹Fana Jisòs təəŋ, nə dʉk də, <<Wèeŋ to fa mʉ yi.>> Wo kə̀ dʉk fa yi də, <<Marɛŋ si yò, yi sə to wu də wu və.>> ⁵⁰Yi ku fweŋ mak cə̀k nə̀ yi anə təhə tse’ mʉ ni’ì yi, nə kurə lòkok kə̀ ye Jisòs. ⁵¹Jisòs fek yi də, <<Yusə̀ wù dzəm də mʉ gʉ fa wu yè’sə yà?>> Yi də <<Cicà, muk fa mègù mʉ lis, ya mʉ ye bum sə̀mok.>> ⁵²Jisòs dʉk fe’lə fa yi də, <<Mʉmvə̀’nə̀ wù dzəmtse’ bohòmʉ̀ sə ntʉʉ̀ wù yà’a, gʉŋsə wu zeŋ. Dù yuyo.>> Lis à mùhu yi fo’ ghà ànə, yi sə gi yuŋ lo Jisòs sə mandzə̀.

Jisòs Ni Lak Jòrosalèm Co Ŋkum

(Mat. 21:1-11; Luk 19:28-40; Jon 12:12-19)

¹Wo ànə sə kʉəp lo Jòrosalèm anə fana wo wɛs mvwe’ lak Befà bə Betanì. A fo’ mvwe’ nda Olìp. Fana Jisòs tumsə lo ŋgàa fàak ye ba. ²Nə tsok wo də, <<Wèeŋ du mvwe’ lak sə̀ ndzə yà’a. Mvə̀’nə̀ wèeŋ ni kok lòfo’ ntɛ̀ŋ, wèeŋ nə ye ŋga wo tsòoŋ tes mʉmo mvomndè’ mòk fo’ nə̀ ŋwè ka mbwa kok yuk. Wèeŋ fiŋ jəŋ və nà’. ³Ŋwə̀ nəmòok fek-a weŋ də wèŋ fì nà’ bʉ̀ʉ yà, wèŋ tsok yi də, Tà sə dzəm nà’, nə ye də, wo nə jəŋ fəsə və nà’ mvə̀k momjo ŋga yi mèsə bə zeŋ.>> ⁴Wo à lòo, nə kə ye mʉmo mvomndè’ nə ŋga wo tsòoŋ tes yi bə tàaŋ ncù. Fana wo yèto ŋgòfìrə nà’. À ye ŋgʉ mandzə̀. ⁵Bʉ̀ʉ səmok sə̀ wo à ye fo’ fek wo də yà’ sə fìrə mvomndè’ nə bʉ̀ʉ yà lɛ? ⁶Wo à cèp mègù yusə̀ Jisòs à dʉk də wo cep sə, bʉ̀ʉ sə me’rə wo lo. ⁷Wo à jə və̀ fa Jisòs mvomndè’ nə, nə fweŋ saŋ cə̀ək awo mok mʉ ŋkwɛ̀ɛŋ mvomndè’ nə. Yi kok cum mbwa. ⁸Bwìŋ à fweŋ nòŋsə lòcə̀k sə mandzə̀ sə̀’. Bʉ̀ʉ səmok sə kə ci’ və mvùu bum, nə sə noŋsə lo sə mandzə̀ anə ŋgòkùksə yi bə zeŋ. ⁹Bʉ̀ʉ sə̀ wo à ye mantombì bə sə̀ maŋkwɛ̀ŋ lòoŋ ye ŋgòfa gùrə sə dʉk də, <<Hòsanà, Nwìi se yi nə̀ yi və̀ mʉnə liŋ Tà Nwì. ¹⁰Nwìi se yi nə̀ yi sə və̀ ŋgòkok gaŋ tɛ̀’ avès Devìd.>>

Jisòs Yak Tʉ Mòk

(Mat. 21:18-19)

¹¹Jisòs à və̀ Jòrosalèm, nə lo kə ni mʉ nda’à Nwì. Yi kʉksə ja’a bum sə̀ mbwa pwe’. À ye ŋga nùm lòlaŋ, fana bə ŋgàa fàak ye sə̀ hum-ncòp-ba à tesə, nə foho lo yu awo mvwe’ lak Betanì. ¹²Tsok à rɛŋ ŋga wo sə bwìŋ foho lòJòrosalèm anə, fana ye mok ŋga njè sə ya Jisòs. ¹³Mvə̀’nə̀ wo à sə və̀ mandzə̀ fana yi ye gesə lo tʉ nəmòk nə̀ wo togə̀ nà’ də fik, ŋga nà’ təəŋ vesə sə̀sap, nə sə fom bòŋsə nə̀bʉp. Yi geŋ fo’ də kè yi nə kə̀ ye ŋga nà’ zəm-a àlɛ. Yi a kə̀ dzèŋ fo’, yi tsèŋ mègù mvù, bʉ̀ʉsə̀ à ka mvə̀k nə̀ tʉ ànə zəmgə̀ yeŋ.¹⁴Yi təəŋ fo’, nə dʉk fa tʉ nə də, <<Ŋwə̀ nəmòk nə kà ntò’o yo mok zʉ yuk.>> Ncèp nè’nə cʉəm ni fə ntu’ù ŋgàa fàak ye wèŋ sə.

Jisòs Bɛ’fis Ŋgàa Sèŋ Bum Mʉnə Ndap Nwì Nə̀ Ghaŋ Nə

(Mat. 21:12-17; Luk 19:45-48; Jon 2:13-22)

¹⁵Wo à kə̀ dzèŋ Jòrosalèm, fana Jisòs ca lo mʉmvwe’ ntòmbi ndap Nwì nə̀ ghaŋ nə, nə sə bɛ’ fis bʉ̀ʉ sə̀ wo à sə sèeŋ nə sə ywiiŋ bum mbwa pwe’. Yi bwi’ mà’rə teberə̀ə bʉ̀ ŋgàa kupsə̀ mbàm wèŋ, nə ye dzòho bʉ̀ʉ sə̀ wo à sə sèŋ kəkəbʉ̀ŋ. Kəkəbʉ̀ʉŋ yà’sə a sə̀ wo à sə fa satikà’ bə zeŋ. ¹⁶Yi kà mandzə̀ də ŋwə̀ nəmòok bək ca yumok mʉ ndap Nwì nə̀ ghaŋ nə fa lok fʉ̀k. ¹⁷Yi yèto ŋga’a ŋgòyə’rə bʉ̀ʉ sə də, <<Wo à còm nòŋsə ndzənə ŋwàk Nwì sə kum ndap Nwì nə̀ ghaŋ ènə də, <Liŋ ndap àam də, ndap pìriyà bohòlak pwe’fo’.> Fana wèŋ jə bʉsə nà’ ndap ŋgàa yə̀ wèŋ.>> ¹⁸Mvə̀’nə̀ ŋgàa fa satikà’ bə ŋgàa yə’rə̀ lʉ̀k wèŋ à yuk vɛ’nə, fana wo sə lap mandzə̀ də wo zə yi. Wʉə à sə ko wo fana wo də wo zə nà’ vɛ’nə, bʉ̀ʉsə̀ bwìŋ maŋgəŋgèŋ à sə kwa bə nsàp ncèp nə̀ yi à sə cèep nə. ¹⁹Nùm à co, yi bə bwe fàak ye wèŋ mè’rə mvwe’ lak yà’sə, nə lo.

Gbʉ’ Tʉ Fik Nə

(Mat. 21:20-22)

²⁰Tsok à rɛŋ nə̀ zəzòŋ ŋga wo sə gì cà sə mandzə̀, wo ye fe’lə tʉ fik nə sə̀mok ŋga nà’ kpʉ wes bə ŋgàŋ pwe’fo’. ²¹Pità tsərə fəsə yusə̀ yà’ a ye ŋkwìs sə, nə dʉk fa Jisòs də, <<Cicà, kʉk ja’a na tʉ nə̀ wù a yàk nà’ ŋkwìs nə mvəsə̀ nà’ kpʉ è.>> ²²Jisòs dʉk bwe ye də, <<A ye-a ŋga wù tse’ dzədzəm bə ŋàaŋ Nwì nə̀ zìnə, ²³fana aco wù dʉk bohònda nè’e də, nà’a coho kə gbʉ lòsə ndzəpə̀. Ŋga wù ka məmərə̀ sə ntʉʉ̀ wù tse’, nə tse’ dzədzəm də yusə̀ wù cèp yè’sə nə fak, yà’ fak. ²⁴Yà’a yusə̀ ŋga wù sə lɛŋ-a pìriyà, fana wù dzəm tse’ də wù tse’ yà’ laŋ, yusə̀ wù fek pwe’ wu nə tse’ yà’. ²⁵Ye sə̀’ də ŋga wù cu-a ŋgòlɛŋ pìriyà, wù swìfa ndàaŋwè pwe’ yusə̀ bʉp sə̀ yi a gʉ̀ bohòwù, ya tɛ̀’ yo nə̀ mʉbu nə swifa wu bʉp yo sə̀’. ( ²⁶Ye sə̀’ də wù kà-a bʉ̀ʉ mok swìfa, ye də tɛ̀’ yo nə̀ yi cu mʉbu nə kà wu bʉp yo sə̀’ swìfa.)>>

Fa Jisòs Ŋàŋ Ndà?

(Mat. 21:23-27; Luk 20:1-8)

²⁷Wo à bwì və̀ fe’lə Jòrosalèm, fana mvəsə̀ Jisòs à sə gì cà mʉmvwe’ ntòmbi ndap Nwì nə̀ ghaŋ nə, ŋgàa fa satikà’ sə̀ ghaŋ bə ŋgàa yə’rə̀ lʉ̀k nə ye bʉ̀ʉ sə̀ kə̀ mantombì wèŋ kə tseŋ yi, ²⁸nə fek yi də, <<Wù sə gʉ̀ bum yè’sə bə ŋàaŋ sə̀ fò? Kènə fa wu ŋàŋ ndà də wu gʉ yà’ ɛ?>> ²⁹Jisòs dʉk fa fəsə yà’wèŋ də, <<Mʉ nə fek weŋ yu səmok yàm sə̀’. A ye ŋga wèŋ tsə̀’ fa-a mʉ yusə̀ mʉ̀ fek sə, mʉ̀ tsok weŋ ŋàaŋ sə̀ mʉ̀ tse’ ŋgòkə̀ gʉ̀ bum yè’sə bə zeŋ sə sə̀’. ³⁰Wèeŋ tsok fa a mʉ mvwe’ sə̀ Jon ànə jəŋ ŋàaŋ sə̀ ŋgòbàptɛsə bwìŋ. Yi à jə bohòNwì kè bohòbwìŋ ɛ?>> ³¹Wo à yèto ŋgòcèp bə zeŋ mʉtsətsə’rə wo də, <<A tsok fa yi yè’sə da? Bʉsə̀ a dʉk-a də ŋàaŋ sə à və̀ bohòNwì, fana yi nə fek fe’lə ves dʉk də, anə geŋ vesùwèŋ kà yusə̀ Jon à sə cèp dzəm bʉ̀ʉ yà lɛ. ³²A dʉk-a sə̀’ də yà’ à və̀ bohòbwìŋ, fana wo nə dʉk da?>> Wo à sə wəp bʉ̀ʉ sə̀ fo’ sə bʉ̀ʉsə̀ bwìŋ pwe’ à dzəm zìnə də Jòon ŋgà tsòhòbum Nwì. ³³Fana wo dʉk fa Jisòs mok də wo ka riŋ. Jisòs dʉk bwìŋ fa wo ye sə̀’ də, <<Ye də mʉ nə kà weŋ nsàp ŋàŋ nə̀ mʉ̀ tse’ ŋgògʉ̀ bum yè’sə bə zeŋ nə sə̀’ tsə̀’.>>

Gbʉ’ Ŋgàa Kʉ̀k Nzum Sə̀ Wo À Ye Bʉp

(Mat. 21:33-46; Luk 20:9-19)

¹Jisòs à tsə̀’ fa ŋgàa fàak ye ncèp mòk bə gbʉ’ də, <<Ŋwə̀ nəmòk à fàk nzum ŋgwì tʉ nəmòk nə̀ wo togə̀ nà’ də grep. Nə gʉm yà’ bə ŋka’, nə tuŋ tsə’rə mvwe’ sə̀ wo kwì nto’o grep sə, wo kə ŋam fis rùk fo’, nə ci tes yumok fo’ co wu kok cum mbwa, nə sə tək nzum sə. Yi jəŋ nzum sə, nə tes fa bʉ̀ʉ səmok, nə ye’e lo gì mvwe’ səmok. ²Mvə̀k nə̀ ŋgòkwì grep à kʉ̀rə, fana yi tum gesə ŋgà fàk ye mòk də nà’a geŋ kə jəŋ və ma nje.³Bʉ̀ʉ sə̀ wo à sə fàk nzum sə ko ŋwə̀ nə̀ wo tum yi nə, nə ləp nà’, nə tum fəsə nà’ botu. ⁴Ŋgà nzum nə tum gesə fe’lə ŋgà fàk ye mòk nə̀ kɛ̀’ ba. Wo ko nà’, nə ləp to nà’ tu, nə yak yi wùriŋ. ⁵Yi tumsə fe’lə mòk sə̀mok. Wo ko zə nà’nə. Wo à gʉ̀ vɛ’nə bohòŋgàa fàak ye mok sə̀ yi à tum sə̀’ ŋkʉ̀ʉŋntɛ̀ŋ. Wo à lə̀p mok, nə zə mok. ⁶À kə̀ bwehe cu mègù mok mo ntʉm ye nə̀ yi à dzə nà’ yi. Yi à tum gèsə mo ye nə sə̀’, nə sə tsəm ye də wo nə wəp tsoŋ li nà’. ⁷Wo à yə mo ye nə, wo dʉk fa ŋge’ awo mok də, <Nè’e ŋga’a mo ye nə̀ ndzə və̀ə yi. Wèeŋ və a zə yi, ya bum yee nə ye mok sə̀ yàvès.> ⁸À ye vɛ’nə, fana wo zə yi, nə bək fis vèŋ ye nə mʉ nzuù anə, nə kə mak.>> ⁹Jisòs fek də, <<Aco ŋgà nzum nə gʉ yè’sə ŋga’a va? Yi tse’ ŋgòkə̀ zə bʉ̀ʉ yà’sə, nə fa nzum sə bohòbʉ̀ʉ mok sə̀ zok. ¹⁰Wèŋ à ka yusə̀ wo à còm ndzənə ŋwàk Nwì taŋ yuk à? Wo à còm nja də,

<Lìs nə̀ ŋgàa ci ndap wèŋ à dzèeŋ nòŋsə nà’ də nà’a bʉp nə kə̀ tse’ gha’ fàk mok sə̀’ zeŋ.12:10 Ye Màtiyò21:42

¹¹À gʉ̀ yè’sə Tà Nwì, fana yà’ ye maŋgəŋgèŋ mʉ lisə̀ vesùwèŋ nə̀bʉp.> >>

¹²Bʉ̀ʉ Jus sə̀ mantombì à rì də Jisòs màk gbʉ’ nè’e bʉ̀ʉ wo, nə lap mandzə̀ də wo ko yi. Fana wo wəp bʉ̀ʉ sə̀ wo à ye fo’ maŋgəŋgèŋ sə, fana wo me’rə yi yi lo.

Fa Nwì Yu Ye Nə Fa Ŋkum Kaisà Yu Sə̀ Ye

(Mat. 22:15-22; Luk 20:20-26)

¹³Mvə̀k nəmòk à ye, wo tum vesə bʉ̀ʉ Faràsi bə bʉ̀ʉ ŋkum Heròmok də wo kə̀ tam Jisòs bə dʉk. ¹⁴Wo kə dʉk fa Jisòs dʉk də, <<Cicà, vès rì də wu cèpgə̀ zìnə, nə kà bwìŋ sə wəp. Wu yə’rəgə̀ yònə̀ zìnə nə̀ Nwì, nə kà də wu wəp də nè’e ŋwə̀ nə̀ ŋkʉ̀ʉŋ dʉk. Vès dzəm də wu tsok a ves, lʉ̀ʉk vesùwèŋ sə tsə̀’ də, a bə̀boŋ ŋgòlàk fa ŋkum Kaisà nə̀ mvwe’ lak Rumà mbàam tas, kè ka’ ɛ?>> ¹⁵Jisòs riŋ də yà’wèŋ sə dʉk də wo yu’rə yi cù, fana yi fek yà’wèŋ dʉk də, <<Wèŋ sə də wèeŋ mumsə mʉ bʉ̀ʉ yà? Jəŋ və fa mʉ mbàm mòk, mʉ kʉk bʉrə nà’.>> ¹⁶Wo jəŋ və fa yi mbàm mòk. Yi kotse’ nà’, nə fek wo də, <<Wo còm naaŋ mʉnə mbàm nə yè’e liŋ ndà, nə ye mbwa yè’e sə̀’ si ndà?>> Wo dʉk də, a sə̀ ŋkum Kaisà. ¹⁷Fana Jisòs dʉk də, <<Ŋ̀hŋ̀. Lak fa Kaisà yusə̀ yà’a sə̀ ye, nə lak fa Nwì yusə̀ yà’a sə̀ Nwì.>> Wo ànə yuk vɛ’nə, wo mərə wùriŋ.

Nza’ Nə̀ ŊgòLòkok Mvwe’ Kpʉ

(Mat. 22:23-33; Luk 20:27-40)

¹⁸Bʉ̀ʉ Sadusì mok wèŋ və bohòJisòs. Wo bòp bʉ̀ nə̀ wo dʉkgə̀ yàwo də kaco ŋwè lokok mvwe’ kpʉ yeŋ nà’a. Wo à sə fek Jisòs nə bum mok də, ¹⁹<<Cicà, Musì à còm nə̀m fa ves lʉ̀k mòk də, a ye-a ŋga tə̀tàa ŋwə̀ nəmòk kpʉ me’rə-a ŋgwe ye ŋga bə nà’ ka mwe tse’, moma yee nə jəŋ tsooŋ ŋwà nə, ya bə nà’a dzə fa tə̀tà ye nə̀ yi a kpʉ nə bwe. ²⁰Yumook yè’ də bwema mok wèŋ à ye tu awo bwembam sàmba. Fana nə̀ mantombì nə jəŋ ŋwàŋwè, nə kpʉ me’rə nà’ ŋga bə nà’ ka mwe tse’. ²¹Nə̀ mʉ ŋkwɛ̀ɛŋ yi jəŋ ŋwà nə, nə kpʉ me’rə ŋwà nə jì mwe sə̀’. Moma nə̀ tɛ’ ye sə̀’ vɛ’nə, ²²nə ye bə mok sə lòoŋ fo’. Bwema sə̀ sàmba pwe’ jəŋ ŋwà nə, nə kpʉ me’rə nà’ jì mweŋ, wo pwe’. Ànə geŋ ŋwà nə kpʉ ye sə̀’. ²³Yusə̀ vès dzəm ŋgòrìi sə də, nùmbu nə̀ ŋgòlòkok mvwe’ kpʉ dzèŋ nùu, ŋwà nə nə ye ŋgwe ndàlɛ? Bʉsə̀ wo à jə yi wo sàmba pwe’fo’.>> ²⁴Jisòs dʉk fa wo də, <<Nà’a njo nə̀ wèeŋ jòŋ sə. Wèŋ ka yusə̀ yà’ cu ndzənə Ŋwàk Nwì riŋ, nə kà ŋàaŋ Nwì sə̀’ rì. ²⁵Bʉsə̀ mvə̀’nə̀ bʉ̀ʉ kpʉkpʉʉ nə lokok mvwe’ kpʉ, wo nə ye co masinjàa Nwì mʉbu, ŋwə̀mbam bə ŋwàŋwèe nə kà gù mok cu fe’lə̀. ²⁶Bə nzak nə̀ ŋgòlòkok mvwe’ kpʉ, wèŋ à ka ndzənə ŋwàk Musì sə̀’ taŋ à? Mvə̀’nə̀ Nwì à cèp bohòyi ŋga tʉ à sə sə də, <Mʉ̀ʉ Nwì Abràham nə ye Nwì Azìk, nə ye Nwì Jàkop>. Nwì à cèp vɛ’nə ŋga wo à kpʉ lòlaŋ. ²⁷Yà’a sə nì tsə̀’ də bʉ̀ʉ yè’sə cu fe’lə ŋwəm, njo nə̀ yi Nwì bʉ̀ʉ sə̀ wo cu ŋwəm, yi ka Nwì bʉ̀ kpʉkpʉ yeŋ.>>

Lʉ̀k Nə̀ Nà’ Gʉ Càsə Mok

(Mat. 22:34-40)

²⁸Ŋwə̀ ŋgà yə’rə̀ lʉ̀k mòk à ye fo’, nə sə yuk mvəsə̀ wo sə cèep. Yi ye də Jisòs bwìŋ fa bʉ̀ʉ Sadùsì sə ncèp nə bə̀boŋ, fana yi fek nà’ gbʉ’ nje sə̀’ də, <<Lʉ̀k nə̀ nà’ yam càsə mok pwe’fo’ nə̀ fò?>> ²⁹Jisòs dʉk də, <<Nə̀ ghaŋ nè’e,

<Wèŋ bʉ̀ʉ Izùrɛ, yu’rə.

Tà Nwì àvès nə mègù Nwì yi nə̀ mò’fis.

³⁰Wù tse’ ŋgòdzəm Tà Nwì yòbə ntʉm yòpwe’fo’.

Dzəm yi bə yòŋsə̀ yòpwe’fo’, nə dzəm yi bə ŋkərə̀ yòsə̀’ pwe’fo’, nə ye bə ŋàaŋ yò.>

³¹Lʉ̀k nə̀ nà’ naaŋ yù lònà’nə nè’e də,

<Wù tse’ ŋgòdzəm moma yo co mvə̀’nə̀ wù dzəm ni’ yò.>

Lʉ̀k mòk ka sə̀ ba yè’e mok ghak fe’lə.>> ³²Ŋgà yə’rə̀ lʉ̀k nə dʉk fa Jisòs dʉk də, <<A bə̀boŋ, cicà, a zìnə mvəsə̀ wù dʉk də, Nwì mègù Nwì yi nə̀ mò’fis, mòk ka ye fe’lə, mègù yi. ³³Nə ye də, a bə̀boŋ bohòŋwè ŋgòdzəm tsə Nwì bə ntʉm ye pwe’, nə kuksə yi bə ŋkərə̀ ye pwe’, nə ye bə ŋàaŋ ye pwe’, nə dzəm moma ye mvəsə̀ yi dzəm ni’ ye. Lʉ̀ʉk sə̀ ba yè’sə yam gha’ cà zeŋ, nə nəm bum pwe’ sə̀ ŋgòtɛ̀ŋ fa Nwì co satikà’.>> ³⁴Mvəsə̀ Jisòs à ye də nà’ cèp ncèp ŋkərə̀, fana yi dʉk fa nà’ dʉk də, <<Ka sə̀sap bohòwù də ya Nwìi ye ŋkum yòye.>>

Yè’sə à mèe, ŋwè kà co yi fek fe’lə yi yumok mok ghʉ̀sə̀ ja’a lo’ fʉ̀’.

Nzak Nə̀ Bə Liŋ Krɛst

(Mat. 22:41-23:36; Luk 11:37-54, 20:41-47)

³⁵Mvəsə̀ Jisòs à sə yə’rə mʉ ndap Nwì nə̀ ghaŋ nə, fana yi cep də, <<Ŋgàa yə’rə̀ lʉ̀k wèŋ dʉk də, ŋwə̀ nə̀ wo to liŋ ye də ŋkum ŋgà gèm bwìŋ nə, nə ye megu ŋgwì ŋwə̀ nə̀ yi tesə mvwe’ ŋgwì bʉ̀ ŋkum Devìd. ³⁶Aco yà’ ye vɛ’nə va, bʉ̀ʉsə̀ Devìd à cèp bə liŋ ŋwə̀ ènə mvə̀’nə̀ Yòŋsə̀ nə̀ Rərɛŋ à gʉ̀ yi də,

<Tà Nwì à dʉk fa Tà àm də, <<Cum fɛɛŋ bo ma mà’a mʉ̀,

tə̀tè mʉ nə gʉ bʉ̀ʉ sə̀ wo bɛ̀ŋgə̀ wu, wo ye sə mvə̀’kùu wù.>> >

³⁷Devìd nə to nà’ də Tà, ye də aco yi ye bwi bohòDevìd anə mwe yè’sə valɛ?>> Bʉ̀ʉ sə̀ wo à ye fo’ maŋgəŋgèŋ sə à yuk yusə̀ Jisòs à cèp sə bə kwəkwa.

³⁸Mvə̀’nə̀ yi à sə yə’rə yà’wèŋ, yi dʉk də, <<Jəŋ ŋkərə̀ bə ŋgàa yə’rə̀ lʉ̀k sə̀ wo dzəmgə̀ ŋgògì dzòoŋ bə cə̀ək sə̀ sə̀sap ya bwìiŋ cepsə wo mʉ ntɛɛ̀ŋ. ³⁹Wo dzəm dzòok bʉ̀ʉ sə̀ ghaŋ mʉmvwe’ ndap pìriyà, nə kə cum megu mvwe’ sə̀ ya bwìiŋ wəp wo co bʉ̀ʉ sə̀ ghaŋ mvwe’ dinà. ⁴⁰Wo lim zʉgə̀ bàa yepmfə wèŋ, nə sə gʉ bʉpsə ndap awo, nə sə gʉ basə pìriyàa sə̀ sə̀sap ŋgwàŋ. Ŋgə’ nə̀ njàwo nə kə yam gha’ pwe’fo’ yi njo bum yè’sə.>>

Fəfa Ŋwà Ŋgwemfə Nəmòk

(Luk 21:1-4)

⁴¹Jisòs à lò, nə kə cum, nə sə kʉk ja’a mʉmvə̀’nə̀ wo sə fa fəfa mʉ nda’à Nwì. Ŋgàa ghàk wèŋ à sə kə̀ gèsə mbàm sənə ŋkùp nə̀ wo à tes nə ŋkʉ̀ʉŋntɛ̀ŋ. ⁴²Fana ŋwà ŋgwemfə nəmòk və, nə kə mak gesə ye ca mànini ba. Wu benə-a yà’ ba lòoŋ, yà’ ye co penə nə̀ mò’fis. ⁴³Wo à mèsə, Jisòs to benə bwe ye mvwe’ mò’fis, nə tsok wo dʉk də, <<Mʉ̀ sə tsə̀’ fa weŋ nə̀ zìnə də, ŋwà ŋgwemfə nè’e gèsə mbàm sənə ŋkùp nə, nə ghak bʉ̀ʉ mok sə̀ wo fa pwe’. ⁴⁴Bʉsə̀ bʉ̀ʉ mok yà’a fa mbàam awo, nə tse’ malì ghàak mok ŋkʉ̀ʉŋntɛ̀ŋ, nə ye də ŋwà ènə cu bə jìŋ, nə fa wes mʉmbàm zʉ ye pwe’.>>

Jisòs Tsə̀’ Bum Sə̀ Yà’a Nə̀ Ye Ŋga Yi Kəp ŊgòVə̀ə

(Mat. 24:1-28; Luk 21:5-24)

¹Jisòs bə ŋgàa fàak ye wèŋ à sə tesə tsə mʉ ndap Nwì nə̀ ghaŋ nə vɛ’ɛ ntɛ̀ŋ, fana, ŋgà fàk ye mòk bʉʉŋ kʉk ndap nə, nə dʉk də, <<Yebe mʉ-e, cicà, kʉk ja’a yòo ma nsàap lìis mok ndzənə mbàandap Nwì nə̀ ghaŋ nə mvə̀’nə̀ yà’ bòo-ɛ̀.>> ²Jisòs dʉk fa nà’ də, <<Wù yə ndap sə̀ ghaŋ yè’e à? Lìs nə̀ mò’fis nə kà mʉnə mok fa’nə naàŋ mam. Wo nə kʉəmsə wes yà’ pwe’.>>

³Mvə̀k à cà jo fana Jisòs lo kə cum mʉnə nda nə̀ wo togə̀ nà’ də nda Olìp, nə sə kʉk gesə lo ndap Nwì nə̀ ghaŋ nə ndzə Jòrosalèm ma nja vɛ’ɛ. Fana Pità, Jem, Jon bə Andrù wèŋ à və̀ woòwo, nə kə tseŋ yi fo’. ⁴Wo dʉk fa yi də, nà’a tsok fa wo ghà nə̀ bum yè’sə nə ye nə. <<Nə tsok fa-a ves yusə̀ yà’a nə niŋ tsok də mvə̀k nə̀ bum yè’sə nə ye sə kʉ̀rə laŋ sə.>> ⁵Jisòs dʉk wo də, <<Wèeŋ jəŋ ŋkərə̀ ya ŋwə̀ nəmòok kà weŋ bòrə̀. ⁶Bwìiŋ nə və ŋkʉ̀ʉŋ sə̀ wo nə sə ci’ mvwès də, wo ŋkum ŋgà gèm bwìŋ nə̀ bwìŋ sə kʉ̀k də yi nə və nə. Wo nə borə bwìŋ ŋkʉ̀ʉŋntɛ̀ŋ. ⁷Ŋga wèŋ yuk-a dzè’ mvwe’ jəjo, nə yuk dzè’ mvwe’ sə̀sap, wèŋ kà wəp, bʉ̀ʉsə̀ yè’sə nə ye tsoŋ vɛ’nə. Yà’a ye vɛ’nə, kà yà’sə də nze nə mè yà’sə laŋ sə̀’ ntòye. ⁸Ŋkuŋ nzeŋgòŋ nə sə me, bòp lak nə lʉ bə bòp lak mok. Ŋkum mòk lʉ bə ŋkum mòk sə̀’. Nze nə nə sə tsoho kɛ’ca fa’ bə fa’. Njèe nə ko kɛ’ca sə̀’ nə̀bʉp. Yè’sə pwe’fo’ mègù ntòco ŋwàŋwèe ghà to ko’gə̀ mwe ntòghàa yè’e.

⁹<<Wèŋ tse’ ŋgòjə ŋkərə̀ sə̀’ bʉ̀ʉsə̀ mvə̀k ànə ye fana wo nə ko lo weŋ mʉ kaŋsurù, nə ləp weŋ mvwe’ ndap pìriyà wèŋ. Fana wèeŋ nə kə təəŋ kù mantombìi ŋkwàha bʉ̀ʉ gomè nə ye ŋkum wèŋ bʉ̀ʉ mʉ̀. Anə ye vɛ’nə ya ŋga wèeŋ tse’ mandzə̀ nə̀ ŋgòtsə̀’ fa wo ncèp nə̀ njàm nə. ¹⁰Lak sə̀ sə nzeŋgòŋ anə lòoŋ nə yuk to tsooŋ ntòntirə̀ nə̀ bə̀boŋ nə ŋkuŋ nze nə me. ¹¹A ye ŋga wo ko lòwèŋ mvwe’ nzak, fana wèŋ kà də wèeŋ jik də mʉ nə kə cep yè’sə yà dʉk. Mvə̀k nə kʉ̀rə, wù cèp yusə̀ yà’ və̀ kə̀ cùhù wù ghà ànə. Bʉsə̀ yusə̀ wu nə cep sə ka yòyeŋ. Yà’a nə və bohòYòŋsə̀ nə̀ Rərɛŋ nə. ¹²Bwìiŋ nə fa bwema awo də wo zə yà’ mvə̀k ànə sə̀’. Tɛ̀’ awo nə gʉ bwe awo sə̀’ vɛ’nə. Bwe nə sə lap mandzə̀ ŋgòzə tɛ̀’ awo sə̀’. ¹³Bwìŋ pwe’fo’ nə bɛŋ weŋ njo liŋ àm. Megu də ŋwə̀ nə̀ yi təəŋ-a gʉgʉŋ tə̀tè, nə kə ləsə, fana yi nə tse’ lùŋ.

¹⁴<<Fana wèeŋ nə ye bʉp nə̀ nà’a bə jòŋ, ŋga nà’ ni lòmvwe’ sə̀ ànə ye co nà’ kà fo’ gə̀.13:14 Taŋ Danà 9:27 (Ŋwə̀ nə̀ yi sə ta, yi rɛɛŋ bə zeŋ.) Fana bʉ̀ʉ sə̀ wo cu mvwe’ nzeŋgòŋ Jùdiyà wèŋ caŋ kok lo mʉ ndahà. ¹⁵Ŋwə̀ nə̀ yi sə cu yòŋsə mʉ ndùndap, kà mvə̀k ŋgòni mʉ nda’à yi ŋgòte’ jə yumok mbwa ŋkuŋ nə caŋ tse’. ¹⁶Ŋwə̀ nə̀ yi mʉnə nzum fàak nə kà maŋkwɛ̀ŋ də yi kə jə cə̀k fohòlò. ¹⁷Ho’m, megu də anə ye ŋgə’ wùriŋ bohòbàa sə̀ bə zʉm, nə ye sə̀ wo sə fa bwe sə̀ lə mbwi bə nùumbu yà’sə. ¹⁸Wèeŋ lɛŋ Nwì də bum yè’sə kà mvə̀k mbʉ̀ŋ nə̀ bə mbʉəp ye, ¹⁹bʉ̀ʉsə̀ ŋgə’ nə̀ nà’a nə ye mvə̀k ànə nə bʉp vɛ’ɛ nsàp nə̀ nzeŋgòŋ à yè yèe, à ka vɛ’nə ye yuk, nə kə dzeŋ nə̀ ŋga’a nè’e, nə ye sə̀’ də yumok nə kà vɛ’nə mok sə̀’ kə̀ ye yuk. ²⁰Tà Nwì a ka-a nùumbu yà’sə lə̀m cì’ fəsə də bwɛ̀rɛ ŋwə̀ nə̀ mò’fis kà bwehè cu lok. Megu də yi nə ci’ fəsə yà’ lə̀m bʉ̀ʉ tu bʉ̀ʉ ye sə̀ yi a swè’ nòŋsə wo sə.

²¹<<A ye-a ŋga ŋwə̀ nəmòk dʉk-a wu də, <Yeè, ŋkum ŋgà gèm bwìiŋ nɛ̀> kè də <yi fə nà’> à lɛ’, kà də wu dzəm swi dʉ’. ²²Bwìiŋ nə sə borə kɛ’ də wo Krɛst, nə sə dʉk də wo ŋgàa tsòhòbum Nwì. Wo nə sə gʉ nsàap bum maŋgəŋgèeŋ mok də co wo borə bʉ̀ʉ sə̀ Nwì à cok fis nòŋsə sə bə zeŋ ŋga wo tse’-a mandzə̀ nə na. ²³Jəŋ ŋkərə̀, bʉ̀ʉsə̀ mʉ̀ tsə̀’ nòŋsə weŋ bum yè’sə ŋga cu ntòcu.

Bum Sə̀ Yà’a Nə̀ Nìŋtsə̀’ Və̀və̀ Nə̀ Jisos Krɛst

(Mat. 24:29-35; Luk 21:25-33)

²⁴<<Nùumbu sə̀ yà’a nə sə və ŋga ŋgə’ nə̀ bʉp nə a càa fana nùum nə kɛŋ ndzəm. Ŋwʉ nə kà sa. ²⁵Ŋkə̀ŋkàaŋ nə gbʉhʉ tsooŋ mʉbu, nsàap ŋàaŋ mok wèŋ sə̀ mʉbu pwe’ nə tsoho. ²⁶Fana mʉ̀ʉ mo ŋwè mʉ nə tesə və ndzənə mbàk bə ŋàaŋ sə̀ ghaŋ, nə sə fom rɛŋ boŋsə nə̀bʉp. ²⁷Mʉ nə tumsə gesə masinjàa Nwì mvwe’ ŋkùup nzeŋgòŋ sə̀ kwè sə pwe’, ŋgòjə benə və̀ bʉ̀ àm mvwe’ mò’fis. Wo nə lo mvwe’ sə̀ nzeŋgòŋ nə yèto nə ye mvwe’ sə̀ nà’ kə̀ lə̀sə.

²⁸<<Mʉ̀ dzəm də wèeŋ yə’rə jəŋ ŋkərə̀ bohòtʉ fik nà’a. Wù yə ghà nə̀ nà’ yè ŋgòfom, nə sə top, fana wù riŋ də mvə̀k mbʉ̀ŋ kʉəp laŋ. ²⁹Yà’ mègù sə̀’ vɛ’nə də wu ye-a bum yè’sə vɛ’nə, fana wù riŋ də mo ŋwè kʉəp ŋgòvə̀ laŋ, yi megu mok ŋgʉ ncù. ³⁰Mʉ tsə̀’ weŋ zìnə də bʉ̀ʉ sə̀ wo cu ŋga’a yè’e wèeŋ nə kà ntòkpʉ wes ŋga bum yè’sə yà’ fà’ laŋ. ³¹Ntòbu bə nzeŋgòoŋ nə ca gɛsə lo fo’, ncèp àm kà ye cà yuk.

Ŋwè Ka Nùmbu Nə Kè Mvə̀k Nə Riŋ

(Mat. 24:36-44; Luk 21:34-36)

³²<<Ŋwə̀ nəmòk ka mvə̀k nə kè nùmbu nə̀ bum yè’sə nə ye riŋ. Masinjà Nwì bə mo Nwì pwe’ ka riŋ, mègù tɛ̀’ yiìyi nə̀ yi rìi. ³³Jəŋ ŋkərə̀, nə so bə̀boŋ, bʉ̀ʉsə̀ wù ka mvə̀k nə̀ yà’a nə ye nə riŋ. ³⁴Anə ye co mʉmvə̀’nə̀ ŋwə̀ nəmòok mè’rəgə̀ ndap ye, nə lo gì, nə me’rə fa bum pwe’ bohòbʉ̀ ŋgàa fàak ye, nə tsok fa ndàaŋwè pwe’ yusə̀ nà’a nə sə gʉ. Fana yi tsok fa ŋgà kʉ̀k ncù də, nà’a sə so bə̀boŋ. ³⁵Sò-a, njo nə̀ wèŋ ka ghà nə̀ tà ŋgà ndap nə nə və riŋ. Aco yi və nə̀ nconùm, kè nə̀ ntəntʉmtsok, kè ŋga tsok sə kʉəp ŋgòrɛŋ, kè ŋga nùm sə rɛŋ ko’. ³⁶Bwɛ̀rɛ yi vəm tesə və̀-a vak, fana yi tseŋ wu ŋga wù sə dzəmlo. ³⁷Sòo. Yusə̀ mʉ̀ cèp bohòwèŋ, a sə̀’ yusə̀ mʉ̀ cèp bohòndàaŋwè pwe’.>>

Wo To Làm Mʉ Tuhù Jisòs

(Mat. 26:1-16; Luk 22:1-6; Jon 11:45-53)

¹À bwehe mègù nùumbu ba ya ŋga ŋkà’a Pasobàa dzeŋ. Mvə̀k ànə dzèŋgə̀ə, wo sə zʉ megu brɛd sə̀ wo ka yiìs nja gesə. Fana ŋgàa fa satikà’ bə bʉ̀ ŋgàa yə’rə̀ lʉ̀k wèŋ sə lap mandzə̀ də wo borə ko Jisòs, nə kə zə yi. ²Wo dʉk fe’lə sə̀’ bə tu awo də, <<Kaco vesùwèŋ ko yi nùmbu satikà’ ye, bʉ̀ʉsə̀ bwìiŋ nə gham vesùwèŋ ŋga’a.>>

Wo Yok Fa Jisòs Kù Bə Làmindà Mvwe’ Lak Betanì

(Mat. 26:6-13; Jon 12:1-8)

³À ye sə̀’ ghà nà’nə mvwe’ lak Betanì, fana Jisòs sə zʉ zʉzʉ mʉ nda’à Saimʉ̀ nə̀ yi ànə ye to ŋgà kuturu nà’a. Fana ŋwà nəmòk jəŋ və ndo mve’ làmindà sə̀ yà’ gʉ ntɛŋ cɛ̀bʉ̀ə̀, nə vok cùu ndo nə, nə sə kɛ’ tsoŋ fa Jisòs mʉ tuhù yi. ⁴Bʉ̀ʉ mok jòk, nə sə ŋwərə kɛ’ca də, <<Wo gʉ̀ bʉpsə làmindà sə vɛ’nə bʉ̀ʉ yà lɛ? ⁵Anə boŋ co wo seŋ yà’ lɛ ncùhù tɛ’, nə gap fa ŋgàa jìŋ wèŋ mbàam sə, nə noŋsə ŋgògʉ̀ bʉpsə yà’ vɛ’nə.>> Wo kʉk tʉsə ŋwà nə, nə jwa yi. ⁶Jisòs dʉk bwi ye də, <<Wèeŋ me’rə ŋwà nə, nə kà yi ŋgə’ fa. Yi gʉ̀ fa mʉ yusə̀ yà’ bòvɛ’ɛ maŋgəŋgèŋ. ⁷Wèeŋ nə sə ye maligèŋ ŋgàa jìŋ fo’ co wèŋ tɛsə wo ghà yà lòoŋ. Mʉ nə kà yàm vesùwèŋ cu malì. ⁸Ŋwà ènə gʉ̀ yà’sə sə̀’ mvə̀k ŋàaŋ ye, ŋgòyok fʉ̀hʉ nòŋsə ni’ àm mvə̀’nə̀ wo nə tuuŋ nà’. ⁹Mʉ tsok fa weŋ ncèp nə̀ nà’a ŋkèm dʉk də, mvwe’ sə̀ fòpwe’ sə̀ wo nə tsoho Ntirə̀ nə̀ Bə̀boŋ nə sənə nzeŋgòŋ nə fana yusə̀ yi gʉ̀ yè’sə wo nə sə tsərə maligə̀ yi bʉ̀ʉ zeŋ.>>

¹⁰Fana mòk mʉtsətsə’rə̀ ŋgàa fàak ye sə̀ hum-ncòp-ba sə nə̀ liŋ yee Judàs Iskarəyà nà’a à tesə lòŋgòkə̀ sèŋ Jisòs bohòŋgàa fa satikà’ wèŋ. ¹¹Wo à kwa ŋgòyuk yusə̀ Judàs ànə tsok wo sə nə̀ bʉp, nə kak yi də wo nə fa yi mbàm. Fana Judàs ye ŋga’a ŋgòlàp mandzə̀ nə̀ ŋgòsèŋ Jisòs nə.

Ŋkà’a Pasobà

(Mat. 26:17-25; Luk 22:7-13, 21-23; Jon 13:21-30)

¹²À kə̀ dzèŋ nùmbu nə̀ wo à yèto ŋkàk nə̀ wo nə zʉ brɛd sə̀ wo ka yis nja gesə, yè’sə nùmbu nə̀ wo à sə səhə nsùŋgaaŋ ŋkàk pasobà sə̀’. Fana ŋgàa fàak Jisòs kə fek yi də, yi nə dzəm ŋgòzʉ ŋkàk nə ye ma fòlɛ, ya ŋga wo lo kə fʉhʉ tsə’rə mvwe’ sə. ¹³Jisòs cok fis ŋgàa fàak ye ba, nə tsok fa wo də, wo lo sə ntòlak. Wo ye ŋwə̀mbam nəmòk ŋga yi bə̀k kʉ̀ʉŋ ndzəp, wo yuŋ lo nà’. ¹⁴Mvwe’ ndap nə̀ yi kə̀ ni mbwa pwe’, wo fek ŋgà ndap nə də, Cicà dʉk də wo fek nà’ də, rum ndap nə̀ yi bə ŋgàa fàak yee nə zʉ ŋkàk pasobà mbwa fòlɛ? ¹⁵Fana yi nə niŋ fa wo rum mòk nə̀ ghaŋ ma mʉ tuhù, nə̀ bə̀boŋ, nə̀ bum mbwa pwe’. Wo fʉhʉ tsə’rə nà’. ¹⁶Ŋgàa fàak ye sə à lòo, nə kə tseŋ bum pwe’ mʉmvə̀’nə̀ Jisòs ànə dʉk sə. Wo fʉhʉ zʉzʉ pasobà sə̀ fo’. ¹⁷Nùm à co, yi və fo’ bə bwe ye sə̀ hum-ncòp-ba sə lòoŋ.

¹⁸Mvəsə̀ wo à zʉ zʉzʉ, fana Jisòs dʉk də, <<Mʉ̀ sə tsə̀’ weŋ də, ŋwə̀ nə̀ mò’fis mʉtsətsə’rə wèŋ fɛɛŋ nə seŋ mʉ, a mòk nə̀ yi sə zʉ be’lə vèsə.>> ¹⁹Bwe ye sə à yè ŋgòkoksə manziŋ, nə sə dʉhʉ fa yi mò’fis mò’fis dʉk də, <<Anə kà wu lɛ mʉ̀ sèŋ.>> ²⁰Jisòs dʉk fa wo də, <<A mòk mʉtsətsə’rə wèŋ sə̀ hum-ncòp-ba yè’sə, a yi nə̀ yi sə fa kʉ̀rə tsə lòbo sənə ŋgàp vesi nà’a. ²¹Mʉ̀ʉ mo ŋwè, mʉ nə kpʉ lo mvə̀’nə̀ wo à còm nòŋsə ndzənə ŋwàk Nwì sə. Fana ŋgə’ nə̀ bʉp cu bohòŋwə̀ nə̀ yi sèŋ mʉ ànə. Ànə boŋ ghak bohòŋwə̀ ànə co wo kà yi dzə lok.>>

Zʉzʉ Nə̀ Nà’ À Lə̀sə Mbwè: Losopà

(Mat. 26:26-29; Luk 22:14-23; 1 Korè 11:23-26)

²²Mvə̀’nə̀ wo à sə zʉ fana Jisòs jəŋ brɛd, nə kwasə Nwì, nə bə’rə fa bwe ye sə. Yi dʉk də, <<Wèeŋ jəŋ, nə zʉ. Nè’e ŋgùpni’ àm.>> ²³Yi à jə ŋgàp, nə kwasə Nwì, nə fa wo. Wo no sənə ŋgàp nə̀ mò’fis wo pwe’. ²⁴Yi dʉk də, <<Yè’e ndʉəm am sə̀ yà’ fè’e bʉ̀ʉ bwìŋ ŋkʉ̀ʉŋ, a zeŋ sə̀ yà’ kì ŋge’ ndzənə rʉ̀k njàm. ²⁵Mʉ̀ sə tsə̀’ weŋ də, mʉ nə kà rùk nè’e vesùwèŋ mok no fe’lə̀ tè kə dzeŋ nùmbu nə̀ mʉ nə kə̀ no nà’ mok nsàp nə̀ fi mvwe’ gaŋ Nwì.>> ²⁶Wo à yəm ŋkì, nə tesə lo mvwe’ nda Olìp.

Jisòs Də Pitàa Nə Dzeeŋ Yi

(Mat. 26:30-35; Luk 22:31-34; Jon 13:36-38)

²⁷À kə̀ dzèŋ fo’, Jisòs tsok fa bwe ye sə wèŋ dʉk də, <<Wèeŋ nə caŋ me’rə mʉ mʉmʉ̀. Mʉ̀ rì vɛ’nə bʉ̀ʉsə̀ Ŋwàk Nwì sə dʉk sə̀’ vɛ’nə də, <Mʉ̀ʉ Nwì, mʉ nə ləp ganakù’ nə, fana nsùŋgaaŋ sə nə caŋ sam.> ²⁸Anə ye sə̀’ də ghà nə̀ mʉ nə lokok mvwe’ kpʉ, fana mʉ nə lo mantombìi wèŋ mvwe’ nzeŋgòŋ Galìli.>> ²⁹Pità cep fəsə fa yi də, <<A ye-a ŋga bwìŋ pwe’ ca mè’rə-a wu sə̀ ca, mʉ nə kà wu yàam ca mè’rə̀.>> ³⁰Jisòs dʉk fa Pità də, <<Mʉ tsok wu ŋkèm ncèp də, ŋkuŋ mvəp sə to bə ndzəm nə̀ ntinə nè’e kɛ̀’ ba, ŋga wù dʉk də wù ka mʉ riŋ kɛ̀’ tɛ’.>> ³¹Pità cep fe’lə bə ŋàŋ də, <<À mègù-a sə̀ ŋgòkpʉ vesù, kaco mʉ̀ bɛŋ wu yeŋ.>> Bwe ye mok sə dʉk sə̀’ vɛ’nə pwe’fo’.

Jisòs Sə Gʉ̀ Pìriyà Gèsemanì

(Mat. 26:36-46; Luk 22:39-46)

³²Wo à kə̀ dzèŋ mvwe’ səmok sə̀ wo togə̀ fo’ də Gèsemanì, fana Jisòs dʉk fa ŋgàa fàak ye wèŋ sə dʉk də, <<Wèeŋ cum fɛɛŋ ya mʉ kə gʉ pìriyà.>> ³³Yi jəŋ bwìŋ tɛ’, Pità, Jem nə ye Jon də wo yuŋ yi. Tsətsərə̀ nə̀ bʉp yèto ŋgòvə̀ bohòyi, yi kà kwəkwa mok tse’ lok, ³⁴fana yi dʉk fa yà’wèŋ də, <<Tsətsərə̀ nə̀ bə manziŋ sə ntʉʉ̀ mʉ̀ nə̀ bʉp co mʉ̀ coho gbʉ kpʉ. Wèeŋ cum fɛn, nə sə so, nə kà lo dzəm.>> ³⁵Yi sooŋ lo mantombì, nə gbʉ sə nze, nə sə lɛŋ pìriyà dʉk də, mandzə̀ mok ye-a yo, yi kà ŋgə’ nsàp nà’nə yə. ³⁶Yi lɛŋ də, <<Pàpa tɛ̀’ àm, yumok kà wu gha’gə̀. Jəŋ gɛsə ŋgàp ŋgə’ nə̀ mʉ tuhù mʉ̀ nè’e fo’. Mʉ dʉk-a sə̀ vɛ’nə, wù gʉ lɛ mʉmvə̀’nə̀ wù dzəm wù, kà mʉmvə̀’nə̀ mʉ̀ dzəm mʉ̀ gʉ̀.>> ³⁷Anə geŋ, yi lo, nə kə tseŋ bwe ye sə̀ yi ànə jəŋ tɛ’ sə ŋga wo sə dzəm lo. Yi yəmsə wo, nə dʉk fa Pità də, <<Wù sə dzəm lo à, Saimʉ̀? Kaco wù cum nca mvə̀k mwejo yeŋ à?>> ³⁸Yi dʉk fe’lə fa yà’wèŋ də, <<Wèeŋ so, nə sə gʉ pìriyà sə̀’ ya mə̀mumsə̀ə kà weŋ gha’. Ntʉm yo, megu də ŋàŋ ka yeŋ.>> ³⁹Yi lo, nə sə kə gʉ malì pìriyà sə̀mok, nə sə cep megu sə̀’ yusə̀ yi anə cep mantombì sə. ⁴⁰Ànə geŋ yi bwi foho və fe’lə, nə kə tseŋ yà’ ŋga yà’ sə dzəm fe’lə sə̀ lo sə. Wo kà yusə̀ co wo cep tse’, bʉ̀ʉsə̀ lo ànə sə ko zəm tse’ wo lis vɛ’ɛ nsàp nə̀ bə jòŋ. ⁴¹Yi ànə bwi və nə̀ kɛ̀’ tɛ’, fana yi dʉk fa wo də, <<Wèŋ sə nòoŋ yòŋsə malì yu awèŋ fo’ à? Yà’ kʉ̀rə laŋ, mvə̀k nə kə dzèŋ laŋ, wo sèŋ fa mʉ̀ʉ mo ŋwè bohòŋgàa gʉ̀ bʉp wèŋ. ⁴²Wèeŋ lokok a lo, yeè, ŋwə̀ nə̀ yi seŋ mʉ̀ nə nè’.>>

Wo Ko Jisòs

(Mat. 26:47-56; Luk 22:47-53; Jon 18:2-12)

⁴³À ye ŋga Jisòs sə cèp mali ntòfo’, fana Judàs nə̀ yi mo fàk ye mòk tesə və bə bʉ̀ʉ səmok ŋga wo rìp fèk, nə tse’ ntòk. Ànə tumsə wo ŋgàa fa satikà’ sə̀ ghaŋ bə ŋgàa yə’rə̀ lʉ̀k, nə ye bʉ̀ʉ sə̀ mantombì. ⁴⁴Ŋga Judàs ànə tsok nəm wo də wo yə-a ŋga yi kə̀ cepsə ŋwə̀ nəmòk bə̀boŋ co ŋge’ àlɛ, wo riŋ də nà’a yi nə. Wo ko lo yi, nə kotse’ lo yi cʉ̀k. ⁴⁵Mvə̀’nə̀ Judàs ànə wɛsə və ntɛ̀ŋ, yi ye gesə Jisòs, nə lo kə cepsə nà’ co ŋge’, nə də, <<Cicà.>> ⁴⁶Fana wo kə̀ kotse’ Jisòs cʉ̀k. ⁴⁷Ŋwə̀ nəmòk nə̀ yi à ye fo’ à sə̀ cok fis fèk ye, nə gbɛ’ tiŋ mak ntu’u mo ŋkwɛ̀ŋ ŋkum ŋgà fa satikà’ mòk sə nze. ⁴⁸Jisòs cèp ye dʉk də, <<Wèŋ tesə co wèŋ sə lo mvwe’ bɛ’ ŋgà yə̀ bə fèk nə ye ntòk yè’e ŋgòko mʉ̀ à? ⁴⁹Vesùwèŋ yiskokgə̀ mʉmvwe’ ndap Nwì nə̀ ghaŋ nə səsa, mʉ̀ sə yə’rə bwìŋ, wèŋ kà mʉ ko. Yè’e ŋgògʉ̀ də yusə̀ ŋwàk Nwì à cèep ye vɛ’nə.>> ⁵⁰Yà’a ŋga’a mvə̀k nə̀ ŋgàa fàak ye sə wèŋ à mè’rə yi, nə caŋ lo wes pwe’. ⁵¹Mʉ wà’nzùm nəmòk à sə yù Jisòs wèŋ maŋkwɛ̀ŋ ŋga yi lim tse’ mègù làba’ ye. Wo də wo ko yi ye sə̀’ korə. ⁵²Mvə̀’nə̀ wo à ko làba’ nə, yi swɛ̀’ɛ tesə ye sə, nə caŋ lo nswɛ̀’mbwè.

Wo Sak Jisòs Mʉ Kaŋsurù

(Mat. 26:57-68; Luk 22:54-55, 63-71; Jon 18:13-14, 19-24)

⁵³Wo à jə lòJisòs mvwe’ ndap ŋkum ŋgàa fa satikà’ ŋga ŋgàa fa satikà’a sə̀ ghaŋ pwe’ bə bʉ̀ʉ sə̀ mantombì nə ye ŋgàa yə’rə̀ lʉ̀k wèŋ à kə̀ benə fo’. ⁵⁴Ànə ye ŋga Pità sə yù və̀ maŋkwɛ̀ŋ mwe sə̀sap, nə kə ni sə̀’ mʉ ntòmbiì ŋkum ŋgà fa satikà’ nə. Yi à kə̀ cu fo’, nə sə yuk mis bə bʉ̀ʉ sə̀ wo à sə kʉ̀k ndap Nwì wèŋ.

⁵⁵Ŋgàa fa satikà’ sə̀ ghaŋ bə ŋgàa kaŋsurù sə pwe’ à sə làp yumok co wo ko Jisòs bə zeŋ ya wo zə yi. Fana wo kà yumok yə. ⁵⁶Bwìŋ à yè ŋgòcì’ fa Jisòs mvwès, wo pwe’ cep cù zəzok. ⁵⁷Mok lokok, nə ci’ fa yi mvwès dʉk də, ⁵⁸<<Vès à yuk ŋga yi sə dʉk dɛɛ, yi nə kʉəmsə mak ndap Nwì, nə̀ bwìŋ à ci nè’e, a ca nùumbu tɛ’, yi ci mok fo’ sə̀’ nə̀ bwìŋ ka nà’ mok bə bo ci.>> ⁵⁹Wo à cèp-a sə̀ vɛ’nə, yusə̀ wo sə cèp sə ka mvwe’ mò’fis ye.

⁶⁰Ŋkum ŋgà fa satikà’ nə à lòkok təəŋ mʉtsə̀ kə̀ mantombì wo pwe’, nə fek Jisòs də, <<Wù ka yumok ŋgòcèp tse’ à? Bʉ̀ʉ yè’e sə dʉk də wù a dʉk da ɛ?>> ⁶¹Jisòs cum megu dədok. Yi fek fe’lə Jisòs sə̀mok dʉk də, <<Wu ŋkum ŋgà gèm bwìŋ nə ye mo Nwì nə̀ vès sə kʉ̀ksə yi nə àlɛ?>> ⁶²Jisòs à dzəm də, <<Ŋ̀, a mʉ̀. Wèeŋ nə ye mʉ̀ʉ mo ŋwè ŋga mʉ̀ cu bo mamà’a Nwì nə̀ yi tse’ ŋàŋ nə, nə ye fe’lə mʉ ŋga mʉ̀ sə tsə mʉbu ndzənə mbàk.>> ⁶³Yi ànə dʉk wes vɛ’nə, fana ŋkum nə jok, nə soŋ sarə cə̀k nə̀ mʉ ni’ì yi, nə dʉk də, <<Njo nə̀ a lap yis fe’lə ŋwə̀ nəmòk ŋgòkə̀ rɛŋsə fe’lə yumok ka mok ye. ⁶⁴Wèŋ yuk nsàp nə̀ yi bʉpsə liŋ Nwì sə laŋ. Wèŋ dʉk yàwèŋ də yà?>> Wo pwe’ kiŋ cù də wo zə megu yi zəə. ⁶⁵Mok yèto ŋgòte Jisòs bə nte, nə ləp yi ŋga wo lok tse’ yi lis, nə sə fek yi dʉk də, yi riŋ-a ŋwə̀ nə̀ nà’ ləp yi nə. Ŋgàa fàk sə̀ wo à sə fàk bohòŋkum ŋgàa fa satikà’ à sə lə̀p yi sə̀’.

Pità Bɛ̀ŋ Jisòs

(Mat. 26:69-75; Luk 22:56-62; Jon 18:15-18, 25-27)

⁶⁶À ye ŋga Pità à cu mali ntòmvwe’ ntòmbi nə, fana mʉŋwà nəmòk nə̀ yi fàkgə̀ bohòŋkum ŋgà fa satikà’ nə à və̀ fo’ ⁶⁷ŋga Pità sə yuk mis. Yi kʉk ja’a nà’ jwaŋ, nə dʉk də, <<Wu yegə̀ sə̀’ weŋ Jisòs nə̀ mvwe’ lak Nazàrɛ nə.>> ⁶⁸Pità bɛŋ də, <<Mʉ̀ ka yusə̀ wù sə cèp yà’sə riŋ. Yà’ sə ka fə ntu’ù mʉ̀ sə̀’ rɛɛŋ.>> Yi tesə tsooŋ lo mvwe’ ncùu ŋka’ ntɛ̀ŋ, [fana mvəp to]. ⁶⁹Mʉŋwà nə kə ye yi, nə sə tsoho mali fa bʉ̀ʉ sə̀ wo tərə fo’ də Pità gù tsə gù mòk. ⁷⁰Yi à bɛ̀ŋ sə̀mok. À sàp ko’ jo bʉ̀ʉ sə̀ wo à tərə fo’ sə à dʉk fa yi də, <<Kaco wù bɛŋ də wù ka wenə wèŋ ye yeŋ, bʉ̀ʉsə̀ vès rì də wu ŋwə̀ə Galìli.>> ⁷¹Yà’ à bàa Pità yak ni’ ye, nə kɛŋ mok Nwì də, <<Nwìi riŋ yi, mʉ̀ ka ŋwə̀ nə̀ wèŋ sə dʉk nà’nə riŋ lok kɛ̀’ mò’fis.>> ⁷²Ntomvəp to sə̀mok. Fana Pità tsərə mvə̀’nə̀ Jisòs anə dʉk yi də, <<Mvəp nə to kɛ̀’ ba ŋga wu bɛŋ mʉ kɛ̀’ tɛ’ də wù ka mʉ riŋ.>> Fana yi vehe waŋ nə̀bʉp.

Jisòs Tə Mantombìi Palè

(Mat. 27:1-2, 11-14; Luk 23:1-5; Jon 18:28-38)

¹Ŋgàa fa satikà’ wèŋ bə bʉ̀ʉ sə̀ mantombì nə ye bʉ̀ ŋgàa yə’rə̀ lʉ̀k nə ye fe’lə bʉ̀ʉ sə̀ wo sakgə̀ kaŋsurù wèŋ pwe’ à yàaŋ kʉ̀rə nə̀ zəzòŋ, nə cep tes mvwe’ mò’fis mvəsə̀ wo nə gʉ bohòJisòs. Fana wo kiŋ Jisòs, nə jəŋ lo yi kə̀ fa bohògovənòPalè. ²Palè à fek yi də, <<Wu ŋkum bʉ̀ʉ Jus wèŋ wu à?>> Jisòs dʉk fa nà’ də, <<Wù dʉk yà’a mvə̀’nə.>> ³Ŋgàa fa satikà’ sə ye ŋgòlàp Jisòs bə nzak cɛ̀bʉ̀ə̀. ⁴Palè dʉk fe’lə də, <<Wù sə kà cèp à, yuk a yòo bum sə̀ wo sə cèp bə liŋ yo pwe’ ɛ̀?>> ⁵Jisòs à cu mègù dədok. Yà’ à ghak Palè mʉ tuhù.

Jisòos Ŋgà Kpʉ

(Mat. 27:15-26; Luk 23:13-25; Jon 18:38-19:16)

⁶À yegə̀ lə̀lùm mvə̀k ŋkà’a Pasobà, fana Palè fis me’rəgə̀ ŋgà ndapndzəm mò’fis nə̀ bwìŋ dzəm də yi me’rə nà’. ⁷Mvə̀k nà’nə à ye ŋga ŋwə̀ nəmòk nə̀ wo togə̀ yi də Bàrabà à ye mʉ ndapndzəmə̀ bə bʉ̀ʉ səmok sə̀ wo à lʉ̀lʉ̀ bə bʉ̀ʉ gomè, nə zə bwìŋ. ⁸Bwìŋ à və̀, nə sə fek Palè də nà’a fis me’rə ŋgà ndapndzəm mòk mvəsə̀ yi gʉ̀gə̀ lə̀lùm sə. ⁹Fana Palè fek wo də, <<Wèŋ dzəm də mʉ me’rə fa weŋ Jisòs ŋkum bʉ̀ʉ Jus à?>> ¹⁰Yi fek vɛ’nə bʉ̀ʉsə̀ yi à rì sə ntʉʉ̀ yi də ŋgàa fa satikà’ wèŋ ko Jisòs yè’sə ŋga wo à sə ko’ mègù ndù. ¹¹Ŋgàa fa satikà’ sə à yuk vɛ’nə, fana wo fimsə mis dʉk də bʉ̀ʉ sə dʉk Palè fis me’rə fa wo lɛ Bàrabà. ¹²Palè fek fe’lə bʉ̀ʉ sə də, <<Wèŋ dzəm də mʉ gʉ bə ŋwə̀ nə̀ wèŋ sə to yi də ŋkum bʉ̀ʉ Jus nà’a ye va?>> ¹³Wo kɛ̀’ fis bə ŋgùŋ də, <<Tɛ’lə yi mʉ ntə̀əŋ.>> ¹⁴Palè fek fe’lə wo də, <<Bʉ̀ʉ yà? Ŋwə̀ ènə gʉ̀ bʉpsə yà?>> Kàyà’, wo fuŋ ghaha fuŋ də, <<Tɛ’lə mègù yi mʉ ntə̀əŋ.>> ¹⁵Yi à dzəm ŋgògʉ̀ ya bʉ̀ʉ sə kwa. Fana yi me’rə Bàrabà, nə ləp Jisòs bə ŋkwɛ̀s, nə fa wo də wo kə tɛ’lə nà’ mʉ ntə̀əŋ anə.

Sojà Wèŋ Sə Ywì’lə Jisòs

(Mat. 27:27-31; Jon 19:2-3)

¹⁶Sojàa sə wèŋ jəŋ lo Jisòs mʉnə ntòmbi ntò’ Palè nə, nə to benə sojàa mok sə fo’ lòoŋ.¹⁷Wo nisə fa yi nsàp cə̀k nəmòk sə̀sap bə ncòm bə̀baŋ, nə lim ndik nəmòk nə̀ bə njàk, nə ta fa yi mʉ tuhù co tàm ŋkum. ¹⁸Wo ye ŋga’a ŋgòcèpsə kɛ’ yi co ŋkum, nə sə cep də, <<Ŋgə̀ə̀ ŋkum bʉ̀ʉ Jus.>> ¹⁹Wo ləp yi bə ntatʉ mʉ tuhù, te’lə fa yi nte mʉ ni’ì, nə sə təəŋ mantombìi yi bə tumfərə də wo sə kùksə yi. ²⁰Wo ànə ywi’lə kʉrə yi fana wo fweŋ fis ma sə̀sap cə̀k nə̀ wo anə ni fa yi nə, nə ni fəsə fa yi cə̀ək ye sə sə̀mok, nə jəŋ fis lo yi ŋgòkə̀ tɛ’lə yi mʉ ntə̀əŋ. ²¹À kə̀ dzèŋ mandzə̀, wo kʉrə bə ŋgà’ nəmòk nə̀ liŋ yee Saimʉ̀ ŋga yi sə və̀ ye mvwe’ lak sə və̀ə. Fana wo tap ko yi bə ŋàŋ də nà’a bək ntə̀əŋ Jisòs sə. À ye Saimʉ̀ nə̀ mvwe’ lak Sìrinì, tɛ̀’ɛ Àlèsandà bə Rufù.

Wo Tɛ’lə Jisòs Mʉ Ntə̀əŋ

(Mat. 27:32-44; Luk 23:26-43; Jon 19:17-27)

²²Wo jəŋ lo Jisòs mvwe’ sə̀ wo togə̀ fo’ də Gòrìgotà (a yà’a də nzʉ̀ə̀ tu bwìŋ). ²³Wo lap mandzə̀ də wo fa yi rùk sə̀ wo tòrə yà’ bə nsàp ncə̀p nəmòk sə̀ wo togə̀ yà’ də meè. ²⁴Yà’a ŋga’a mok mvə̀k nə̀ wo à tɛ’lə yi mʉ ntə̀əŋ anə, fana wo jəŋ cə̀ək ye, nə sə təm gàpsə yà’ bə bèŋ. ²⁵Wo à tɛ’lə yi ŋga a co nùm bɛŋ. ²⁶Wo à còm naaŋ njo kpʉ ye də, Ŋkum bʉ̀ʉ Jus. ²⁷Wo à tɛ’lə yi nùmbu anə bə ŋgàa yə̀ə mok bwìŋ ba. Mòk mazʉ, mòk maŋkwìp. [ ²⁸Yè’sə à gʉ̀ ncèp nəmòk nə̀ nà’ à ye ndzənə ŋwàk Nwì ŋgòkə̀ ye zìnə də,

<<Wo à be’lə yi bə bʉ̀ ŋgàa gʉ̀ bʉp wèŋ.>>]

²⁹Bʉ̀ʉ sə̀ wo à sə cà fo’ wèŋ à sə yà’rə yi, nə sə mək tu awo dʉk də, <<Ŋ̀hŋ̀, a bə̀boŋ, nà’a wù nə̀ wù à dʉk də aco wù kʉəmsə mak ndap Nwì, nə ci wes fe’lə nà’ mʉnə nùumbu tɛ’ nə. ³⁰Suhu tsoŋ na mʉ ntə̀əŋ fa’ nə, nə tɛsə-a ni’ yòɛ̀.>> ³¹Ŋgàa fa satikà’ sə̀ ghaŋ bə ŋgàa yə’rə̀ lʉ̀k wèŋ à sə ywi’lə yi sə̀’. Wo sə dʉhʉ kɛ’ ca də, <<Yi tɛsə rì bòŋsə mègù bʉ̀ʉ mok wèŋ, nə kà ni’ nə̀ nje tɛsə̀ rì. ³²Yi dʉkgə̀ də yi Ŋgà gèm bwìŋ nə̀ Nwì à dʉk də yi nə tum vesə nə, də yi ŋkum bʉ̀ʉ Izùrɛ. A ye-a vɛ’nə, wù suhu tsooŋ mʉ ntə̀əŋ ya vèes ye, nə dzəm bohòwù.>> Bʉ̀ʉ sə̀ wo à tɛ’lə be’lə yi bə yà’wèŋ sə, wo à yàk yi sə̀’.

Jisòs Kpʉ

(Mat. 27:45-56; Luk 23:44-49; Jon 19:28-30)

³³Ànə ye ŋga nùum mok maràŋ kaŋ fana ndzəm seŋ mvwe’ nzeŋgòŋ nə pwe’ tə̀tè kə̀ dzeŋ co nùm sə̀m. ³⁴À kə̀ dzèŋ nùm sə̀m, Jisòs waŋ fis bə ŋgì nə̀ ghaŋ də, <<Eloi, Eloi, làma sabatàni?>> A yà’a dʉk də, <<Nwì àm, Nwì àm, wù swì mà’ mʉ bʉ̀ʉ yà?>> ³⁵Bʉ̀ʉ mok sə̀ wo à ye fo’ à yuk, nə dʉk də, <<Wèeŋ yu’rə àwèŋ mvəsə̀ yi sə to Àlajà.>> ³⁶Ŋwə̀ nəmòk nə̀ yi à ye sə̀’ fo’ caŋ kə̀ tsə̀p gesə yumok co kùsa vɛ’ɛ sənə rùuk sə̀ cʉcʉk, nə kə tse’ gesə lo mʉ cùhù Jisòs bə ntatʉ. Yi dʉk də, <<Wèeŋ yuk, a ja’a na kèe Àlajàa nə kə jəŋ tsooŋ yi mʉ ntə̀əŋ fa’nə àlɛ’.>> ³⁷Jisòs waŋ fe’lə bə ŋàŋ sə̀mok, fana yòŋsə̀ ye me.

³⁸Ghà nə̀ yi ànə kpʉ à ye fana cə̀k nə̀ nà’ à sə gàpsə rum ndap mòk mʉmvwe’ ndap Nwì nə̀ ghaŋ nə à sàha jəŋ mʉ tuhù wàrr, kə̀ dzèŋ sə mbwè. ³⁹Ŋkum sojà nə̀ yi à təəŋ fo’ mantombìi Jisòs à yə mvəsə̀ nà’ wa nə kpʉ, fana yi dʉk də, <<Kɛ’, ŋwə̀ ènə nə ye mo Nwì nə̀ zìnə.>> ⁴⁰Bàa səmok à tə fo’ mvwe’ sə̀sap, nə sə ja’a. À ye mok fo’ Mèri Màdàlinà, Sàlomì bə Mèri ma Jem nə̀ mweŋke’ bə Josìs. ⁴¹Bàa yè’sə à yèto ŋgòyù jə Jisòs mvwe’ nzeŋgòŋ Galìli, nə sə tɛsə nà’. Bàa səmok à ye fo’ sə̀’ ŋkʉ̀ʉŋntɛ̀ŋ sə̀ wo à və̀ Jòrosalèm bə yà’wèŋ.

Wo Tuuŋ Jisòs

(Mat. 27:57-61; Luk 23:50-56; Jon 19:38-42)

⁴²Nconùm nùmbu nə̀ wo à sə fʉ̀hʉ dzə̀ à kə̀ dzèeŋ, ⁴³fana Jòsep nə̀ mvwe’ lak Àrìmàtayà à ko ntʉm, nə kə ye Palè də nà’a fa yi vèŋ Jisòs ya yi kə̀ tuuŋ. Yi à ye ŋwə̀ nə̀ zìnə mvwe’ kwe’ kaŋsurù awo nə, yi sə tək ŋgòyə mvəsə̀ gaŋ ŋkum Nwìi nə̀ ye. ⁴⁴Palè vehe ŋgòyuk də Jisòs nə kpʉ laŋ, nə to fek ŋkum sojà də Jisòs nə kpʉ laŋ àlɛ. ⁴⁵Mvə̀’nə̀ yi à yuk wes yusə̀ ŋkum sojà nə à tsə̀’ fa yi, fana yi dʉk fa Jòsep də nà’a jəŋ vèŋ ni’ Jisòs nə ntɛ̀ŋ. ⁴⁶Jòsep à lò, nə kə ki tsoŋ fis Jisòs mʉ ntə̀əŋ anə, nə lim gesə nà’ ndzənə cə̀k fəfop nə̀ yi ànə ywi, nə tuuŋ nà’ ndzənə nsàp sè nə̀ wo ànə tuŋ ndzənə lìs, nə bwi’ lok yà’ bə ŋkə̀ŋkʉ̀m lìs nəmòk. ⁴⁷Bə̀ba səmok à ye fo’, a ye Mèri Màdàlinà bə Mèri ma Jisòs. Bàa yè’sə à yə mvwe’ sə̀ wo à tuuŋ Jisòs sə.

Jisòs Lòkok Mvwe’ Kpʉ

(Mat. 28:1-8; Luk 24:1-12; Jon 20:1-10)

¹Nùmbu dzə̀ à càa, Mèri Màdàlinà bə Mèri ma Jem nə ye Sàlomì wèŋ à ywi ncə̀əp mok də wo kə yok vèŋ ni’ Jisòs bə zeŋ. ²Tsok à rɛŋ ye Sondè ŋga cu ntòzəzòŋ ŋga nùm sə bà tesə ko’ sə cùu ndahà, fana wo lo mvwe’ sèe sə. ³Wo sə dʉhʉ lo mandzə̀ də, ŋwə̀ nə̀ yi nə kə dzərə fis fa wo lìs mvwe’ ncùu sèe sə nə ye yè’sə ndà lɛ. ⁴Wo ànə geŋ à, wo ye ŋga wo dzərə gɛsə ma ŋkə̀kʉ̀m lìs nə mvwe’ ncùu sèe sə laŋ. Lìs nə à yam vɛ’ɛ nə̀bʉp.⁵Wo ni lo ca, nə ye wà’ŋwə̀ nəmòk ŋga yi cu mamàk, nə ni tse’ cə̀k nə̀ fəfop mʉ ni’ì yi. Fana ntʉm tiŋ wo nə̀bʉp. ⁶Yi dʉk fa bàa sə də, <<Wèeŋ kà wəp, mʉ̀ rì də wèŋ sə làp Jisòs nə̀ mvwe’ lak Nazàrɛ nə̀ wo anə tɛ’lə yi mʉ ntə̀əŋ nà’a. Yi ka fɛŋ yeŋ. Yi lòkok mvwe’ kpʉ laŋ. Kə̀ kʉ̀k ja’a na yòo mvwe’ sə̀ wo a nòŋsə yi sə. ⁷Nə yeè nə vɛ’nə fana wèeŋ du lo kə tsok fa ŋgàa fàak ye bə Pità sə̀’ vɛ’nə. Yi gə̀ cà nà’ mantombìi wèŋ ŋgòlòmvwe’ nzeŋgòŋ Galìli, wèeŋ nə kə ye gu yi fo’ mvə̀’nə̀ yi ànə tsok me wèŋ sə.>> ⁸Yi à cèp wes mè vɛ’nə ntɛ̀ŋ, wo carə tesə sənə sèe sə ŋga wo sə kà bə wʉə jìk jìk. Mvə̀’nə̀ wo à sə wəp, fana wo carə lo, nə kà ŋwə̀ nəmòk yumok tsə̀’ fa.

Bwìŋ Yə Jisòs

(Mat. 28:9-20; Luk 24:13-53; Jon 20:11-23; Ŋgàa Ntum Jisòs 1:6-11)

[ ⁹Jisòs ànə lòkok nùmbu Sondè anə fana ye to yi Mèri Màdàlinà nə̀ yi à jùm fis fa nà’ yòŋsə̀ə ze’ sàmba ndzə ni’ì nà’a. ¹⁰Mèri lo kə tsok fa bʉ̀ʉ sə̀ Jisòs à sə ye bə yà’wèŋ ŋga wo sə tɛ’, nə sə waŋ nə̀bʉp. ¹¹Mvə̀’nə̀ wo à yuk də yi dʉk də Jisòs lòkok mvwe’ kpʉ nə də yi yə nà’ bə lis, wo kà yi dzəm fa.

¹²Yà’sə à càa, yi yəəŋ fe’lə bə nsàp mòk bohòbʉ̀ ŋgàa fàak ye bwìŋ ba, ŋga wo sə mè’rə ntòlak Jòrosalèm nə. ¹³Wo bwi lo, nə kə tsok fa mok sə, fana wo kà sə dzəm malì.

Jisòs Nìŋtsə̀’fa Bwe Ye Wèŋ Ni’ Ye

¹⁴À ye maŋkwɛ̀ŋ, yi kə niŋ fe’lə ni’ ye mok bohòŋgàa fàak ye sə̀ hum-ncòp-mò’fis ŋga wo sə zʉ zʉzʉ, nə jwa wo bʉ̀ʉsə̀ wo à gʉŋsə ntʉm awo nə kà yusə̀ bʉ̀ʉ sə̀ wo à yə yi tsə̀’ fa wo sə dzəm. ¹⁵Fana yi tsok fa yà’ də, <<Wèeŋ du sənə ŋgòŋ nə lòoŋ fo’, nə tsoho lo ncèp àm nə bohòndàaŋwè pwe’. ¹⁶Ndàaŋwè lòoŋ nə̀ yi dzəm-a, nə baptɛsə, yi tse’ lùŋ. Ŋwə̀ nə̀ yi kà-a dzəm, ye də Nwìi nə sak yi. ¹⁷Bʉ̀ʉ sə̀ wo dzəm, wo nə tse’ nsàp ŋàŋ nə̀ ŋgògʉ̀ bum ye’e: wo nə bɛ’ fis yòŋsə̀ə ze’ bə liŋ am. Wo nə cep riŋ ncèep sə̀ fi. ¹⁸Wo te’ tse’ a no, kè wo no-a nsàp lik nə̀ fòpwe’, yà’ kà wo yumok gʉ̀. Wo nə naaŋ fa ŋgàa yiyaŋ bo, wo gʉŋ.>>

¹⁹Tà Jisòs à cèp wes mè bə yà’wèŋ, fana yi kok lo yuye mʉbu, nə kə cum bo mamà’a Nwì. ²⁰Ŋgàa fàak ye à lòo, nə tsoho lo fòpwe’. Tà Jisòs sə fa wo ŋàŋ ŋgògʉ̀ maŋgəŋgèŋ, ya bwìiŋ riŋ də yusə̀ wo sə tsoho sə zìnə.]