Luk

Ntirə̀ nə̀ Bə̀boŋ nə̀

LUK

Luk, ŋwə̀ nə̀ yi à còm ŋwàk Luk nè’nə, à ka ŋwə̀ə Jus yeŋ, megu də yi à ye ŋgà bɛ’ mandzə̀ Jisos Krɛst. Yi à ka Ŋgà Ntum Jisòs sə̀’ yeŋ, yi à sə gìhigə̀ bə Pol mvə̀’nə̀ Pol à sə tsòho lòNtirə̀ Nə̀ Bə̀boŋ mvwe’ lak mok yà’a. Yi à ye ŋgà ncə̀p. Yi à còm ŋwàk Ŋgàa Ntum Jisòs nà’a sə̀’ yi.

Luk à còm də Jisòos Mo Ŋwè. Yi à sə koksə manziŋ bohòbʉ̀ ŋgàa jìŋ nə sə tɛsə yà’. Luk à còm bə maŋgəŋgèeŋ sə̀ Jisòs à sə gʉ̀hʉ sə. Yi à còm bə ŋgàa fàak sə̀ nà’ à swèkfis yà’a sə̀’. Yi à còm mʉmvə̀’nə̀ Jisòs à sə fi’gə̀ dʉk bə bʉ̀ʉ sə̀ wo à sə bɛ̀ŋgə̀ yi fana yi sə tipsə bwìŋ də wo ye fə̀fʉhʉ̀ bʉ̀ʉsə̀ nzeŋgòŋ nə nə̀ kə̀ mè ntsə’mòk. Yi à còm sə̀’ mʉmvə̀’nə̀ Jisòs à sə sə̀gə̀ bwìŋ ntu’ bə nza’ ghàk. Yi à sə yə’rə wo bə nza’ gaŋ ŋkum sə̀ Nwì sə sə̀’.

Luk à còm ya ŋga yi tsok rɛŋsə fa bʉ̀ʉ sə̀ wo à ka Jisòs bə lis ye yà’a mʉmvə̀’nə̀ Ntirə̀ Nə̀ Bə̀boŋ nə à yèe, ŋga bwìiŋ kà də wo sə jip yusə mok bə liŋ Jisos Krɛst sə dʉk. A yà’a də yi à còm bə nzak Jisos Krɛst ye jəŋ mvə̀’nə̀ wo à dzə yi tè kə dzeŋ mvə̀’nə̀ yi à lòmʉbu.

Ncèp Jisòs nə̀ Luk à còm nə co a benə nà’ də, <<Mʉ̀ʉ Mo Ŋwè, mʉ̀ a və̀ ŋgòkə̀ làp nə luŋsə bʉ̀ʉ sə̀ wo à bisə.>> (19:10).

¹Ŋge’ àm Tìyofilò, bwìŋ ŋkʉ̀ʉŋ a mùmsə ja’a ŋgòcòm bum sə̀ Tà Jisòs à gʉ̀ mʉtsətsə’rə̀ə vès. ²Wo ànə com bə ncèp nə̀ vès ànə yuk bohòbʉ̀ʉ sə̀ wo à yə bum yè’sə mvəsə̀ yà’ ànə yeto, fana wo tsoho fa bwìŋ. ³Fana Tìyofilòtà, mvə̀k nə̀ mʉ̀ a lap ja’a bum yè’sə bə ŋkərə̀ nə̀ njàm bə̀boŋ mvə̀’nə̀ yà’ à yèto, mʉ̀ dzəm ŋgòcòm fa wu mvə̀’nə̀ yà’ ànə ye sə bə mandzə̀ nə̀ yà’ ànə ye sə mò’fis mò’fis. ⁴Mʉ̀ sə com yè’sə ya wu riŋ tse’ də bum sə̀ wo ànə yə’rə fa wu yà’sə zìnə.

Masinjà Nwì Tsə̀’ Də Wo Nə Dzə Jon Ŋgà Bàptɛsə̀ Bwìŋ

⁵Mvə̀’nə̀ Heròànə ye ŋkum mvwe’ lak Jùdiyà fana ŋwə̀ nəmòk à ye mvwe’ lak yà’sə nə̀ liŋ ye à ye də Sàkàriyà. Yi à ye ŋgà fa Nwì satikà’, nə sə fak bə bòp bʉ̀ ŋgàa fa satikà’ sə̀ wo togə̀ wo də Àbijà. Fana liŋ ŋgwe ye à ye Àlisabè. Ŋwà ènə à ye sə̀’ ŋgwì bʉ̀ Aròŋ wèŋ. ⁶Sàkàriyà bə Àlisabè à ye kə̀kʉrə̀ mantombìi Nwì, nə sə noŋsə lʉ̀k mvəsə̀ Tà Nwì à fa sə zìnə. ⁷Wo ànə ka bwe tse’ bʉ̀ʉsə̀ Àlisabè nə à ye nzeŋ fana wo reŋ ŋkʉ̀ʉŋntɛ̀ŋ, co wo kà mwe mok dzə.

⁸Nùmbu mòk à ye mvə̀k kʉrə bohòbòp bʉ̀ʉ Sàkàriyà ŋgòsə fàk mʉmvwe’ ndap Nwì nə̀ ghaŋ nə fana Sàkàriyà sə gʉ fàak ye co ŋgà fa satikà’. ⁹Ànə geŋ wo təm bèŋ mʉmvə̀’nə̀ wo gʉ̀gə̀ yàwo, fana yà’ zʉ də Sàkàriyàa ni lo mʉmvwe’ ndap Tà Nwì nə̀ ghaŋ nə yi, nə tɛŋ rəmsə làmindà. ¹⁰Yi ànə ni lo mʉ ndap Nwì anə ŋgòtɛ̀ŋ làmindà sə fana bwìŋ pwe’ sə lɛŋ Nwì ma sə mbi mvə̀’ nə̀ wo gʉ̀gə̀ə.

¹¹Fana masinjà Nwì kurə tesə və, nə kə təəŋ kok bo mamàk mvwe’ kàm nə̀ Sàkàriyà à sə tɛ̀ŋ fa Nwì làmindà nə.¹²Sàkàriyà ànə ye masinjà Nwì nə fana yi mərə, nə sə kaŋ bə wʉə. ¹³Fana masinjà Nwì nə dʉk fa Sàkàriyà də nà’a kà wəp. Nə tsok fa nà’ də, <<Nwì a yuk pìriyà yòlaŋ. Nə yeè nə də ŋgwe yo Àlisabèe nə dzə fa wu mombam. Yi dzə nà’, wù to liŋ ye də Jon. ¹⁴Mo ènə nə gʉ wu, wù kwa wùriŋ. Nə ye də bwìŋ ŋkʉ̀ʉŋ nə kwa bʉ̀ʉsə̀ wo dzə yi sə̀’. ¹⁵Jon nə nə ye ŋwə̀ nə̀ ŋkʉ̀ʉŋ bohòTà Nwì. Yi nə kà rùuk sə̀ gʉgʉŋ no. Yi nə rwiŋ bə Yòŋsə̀ nə̀ Rərɛŋ, ye jəŋ mvə̀k nə̀ wo dzə yi, nə lo mantombì. ¹⁶Yi nə gʉ ya bʉ̀ʉ Izùrɛ wèeŋ bʉ̀ʉŋ və̀ bohòTà Nwì àwo. ¹⁷Tà Nwìi nə tum lo yi mantombìi yi bə nsàp yòŋsə̀ nə ye ŋàaŋ sə̀ yi ànə fa Àlajà. Jon nə nə gʉ tɛ̀’ wèŋ ŋgòdzəm bwe awo. Yi nə gʉ bʉ̀ ŋgàa loho ntu’ wèŋ tsərə ŋgògʉ̀ bə̀boŋ bə ŋkərə̀ nə̀ co bʉ̀ʉ sə̀ wo kə̀kʉrə̀ mʉ lisə̀ Nwì wèeŋ tsərəgə̀ə. Yà’a mvə̀’nə̀ yi gʉ fʉhʉ noŋsə fa Tà Nwì bʉ̀ʉ ye wèŋ.>>

¹⁸Ànə geŋ, Sàkàriyà fek masinjà Nwì nə dʉk də, <<Aco mʉ̀ dzəm ncèp ènə yè’sə va? Bʉsə̀ ves ŋgwe am a rèŋ wes ba fo’ laŋ.>> ¹⁹Masinjà Nwì nə dʉk fa Sàkàriyà də, <<A mʉ̀ʉ Gabriyà nə̀ mʉ təəŋgə̀ mantombìi Tà Nwì. Tà Nwì tum mʉ yi, də mʉ və, nə tsok fa wu ntirə̀ nə̀ bə̀boŋ ènə. ²⁰Nə ye də, cùu nə loho wu, wù kà cèp to, tè kə wɛs mvə̀k nə̀ Àlisabèe nə dzə mo ànə, bʉ̀ʉsə̀ mʉ̀ tsə̀’ wu ntirə̀ nə̀ Tà Nwì nə fana wù kà nà’ də a vɛ’nə zìnə dzəm, ŋga yà’a nə ye vɛ’nə ŋga mvə̀k nə dzèeŋ.>>

²¹Mvə̀’nə̀ masinjà Nwì ànə sə tsok fa Sàkàriyà ntirə̀ ènə fana bwìŋ sə tək yi sə ntòmbi, nə sə mərə də yi ka nə̀nàk tesə və bʉ̀ʉ yà lɛ. ²²Yi ànə tesə və fana yi kà bohòbwìŋ mok cèp to fe’lə̀. Fana wo riŋ də Nwì nì tsə̀’ fa yi yumok mʉmvwe’ ndap ye nə̀ ghaŋ nə laŋ. Mvə̀’nə̀ yi ànə sə ka cù mok cep to fana yi də yi cep yumok, yi sə ni megu mok bo.

²³Yi ànə gʉ wes fàha ye mʉmvwe’ ndap Nwì nə̀ ghaŋ nə fana yi bwi foho lo nda’à yi. ²⁴Ànə ca megu mvə̀k momjo fana ŋgwe ye Àlisabè nə zʉʉŋ, nə sə cum swihi megu mok mʉ nda’à tə̀tè ŋwʉ tàŋ. ²⁵Àlisabè nə sə dʉk də, <<Mvə̀k kʉ̀rə, fana Tà Nwì nə tɛsə̀ nə mʉ, nə jəŋ fis gɛsə lo marè’tu àm nə̀ mʉ̀ tse’gə̀ mʉtsətsə’rə bwìŋ nə.>>

Masinjà Nwì Tsə̀’ Mèri Də Nà’a Nə Zʉʉŋ

²⁶Bum yè’sə ànə ye ŋga zʉm Àlisabèe ŋwʉ ntùŋfu, fana Nwì tumsə masinjà ye Gabriyà mvwe’ mʉntòlak mòk mvwe’ nzeŋgòGalìli nə̀ wo togə̀ fo’ də Nazàrɛ. ²⁷Də nà’a kə tsok fa mʉwà’ŋgwɛ̀ŋ nə̀ nà’a nə ye ŋgwe Jòsep nà’a yumok. Jòsep nə à ye njàŋ bə ŋgwì bʉ̀ ŋkum Devìd. Liŋ wà’ŋgwɛ̀ŋ nə à ye də Mèri. ²⁸Masinjà Nwì nə à və̀ bohòmo ŋwà nə, nə cepsə nà’ dʉk də, <<Fifi ye bohòwù. Tà Nwì cu wèŋ nə, yi nə se wu ŋkʉ̀ʉŋntɛ̀ŋ.>> ²⁹Ntʉm à tesə bisə Mèri vɛ’ɛ pwe’. Yi tsərə dʉk də ncèp ènə yè’sə dalɛ. ³⁰Masinjà Nwì nə dʉk fa fe’lə yi də, <<Mèri, kà də wu wəp dʉk, Nwì a ye bə̀boŋ bohòwù ŋkʉ̀ʉŋntɛ̀ŋ. ³¹Yeè, wu nə zʉʉŋ, nə dzə mo ŋwə̀mbam. Wo nə to liŋ ye də Jisòs. ³²Yi nə ye ŋwə̀ nə̀ ghaŋ, fana liŋ ye nə ye də Nwì nə̀ ghaŋ. Tà Nwìi nə gʉ yi kok gaŋ tàcici ye Devìd. ³³Fana yi nə ye ŋkum bʉ̀ʉ Jàkop, sə̀ wo sə̀’ bʉ̀ʉ Izùrɛ wèŋ wo. Dzə̀’ ŋkum ye nə, nə kà kə̀ lə̀ yuk.>> ³⁴Mèri fek masinjà Nwì nə dʉk də, <<Mʉ nə zʉʉŋ yè’sə va, ŋga mʉ̀ ka ŋwə̀mbam rì nɛ?>> ³⁵Masinjà nə dʉk fa Mèri də, <<Yòŋsə̀ nə̀ Rərɛŋ nə və bohòwù, fana ŋàaŋ sə̀ Nwì nə̀ ghaŋ nə nə ye bohòwù. Ye də wo nə to mo nə̀ rərɛŋ nè’nə də, mo Nwì. ³⁶Tsərə na yòo mo tɛ̀’ yo Àlisabè, nə̀ wo togə̀ yi də yi nzeŋ. Yi tse’ zʉm ŋga’a ŋwʉ ntùŋfu, ŋga yi a rèeŋ. ³⁷Bʉsə̀ yusə̀ co Nwì kà gʉ̀ too bʉ̀ə̀.>> ³⁸Mèri dʉk də, <<Yumok ka bʉp. Mʉ yè’sə mo fàk Tà Nwì. Nwìi gʉ bohòmʉ̀ mvəsə̀ wù dʉk yà’sə.>> Fana masinjà Nwì nə me’rə Mèri, nə lo.

Mèri Kɛ’ LòŊgòKə̀ Cèpsə Àlisabè

³⁹A cu momjo fana Mèri fʉhʉ, nə lokok lo nə̀nàk mvwe’ lak mok sə̀ yà’a mvwe’ nzeŋgòŋ Jùdiyà, nə̀ a fo’ bə nda wùriŋ. ⁴⁰À kə̀ dzèŋ fo’ fana yi lo mʉmvwe’ ndap Sàkàriyà, nə kə cepsə Àlisabè. ⁴¹Mèri ànə cepsə Àlisabè nə fana mo nə̀ ndzə və̀ə Àlisabè nə gì tsoho nja. Mo nə à tsoho vɛ’nə fana Àlisabè nə rwiŋ bə Yòŋsə̀ nə̀ Rərɛŋ nə ŋkʉ̀ʉŋntɛ̀ŋ. ⁴²Yi cep fa Mèri bə ŋàŋ də, <<Mèri, wu yè’e ŋwà nə̀ Tà Nwì a sè wu mʉtsətsə’rə bə̀ba pwe’. Yi nə se mo nə̀ ndzə və̀ə wù ànə sə̀’.>> ⁴³Yi dʉk mali mok sə̀’ də, <<Nè’nə yè’sə nsàp yu yà, nə̀ də ma Tà Nwì àm və̀ ŋgòkɛ’ yə mʉ ɛ? ⁴⁴Mèri, mvə̀’nə̀ wù cèpsə mʉ fana mo nə̀ ndzə və̀ə mʉ̀ nə tsoho bə kwəkwa. ⁴⁵Nə ye də a rɛŋsi bohòwù bʉ̀ʉsə̀ wù a dzəm də ntirə̀ nə̀ Tà Nwì à tsə̀’ fa wu nə, nə ye zìnə.>>

⁴⁶Mèri yəm fəsə fa nà’ ndzənə ŋkì də,

<<Ntʉm am sə kuksə Tà Nwì ŋkʉ̀ʉŋntɛ̀ŋ.

⁴⁷Mʉ̀ sə kwa, bʉ̀ʉsə̀ yi a lùŋsə mʉ.

⁴⁸Nwì a ka mʉ swi, nə tsəm tse’ mʉ ŋgà fàk ye nə̀ jo,

Fana ye jəŋ ŋga’a bwìŋ pwe’ nə sə to mʉ də, ŋgà rɛŋsi.

⁴⁹A vɛ’nə bʉ̀ʉ bum maŋgəŋgèeŋ sə̀ Tà Nwì nə̀ ghaŋ nə a gʉ̀ bohòmʉ̀.

Fana mʉ̀ sə dʉk də, liŋ yee ye rərɛŋ.

⁵⁰Yi koksəgə̀ manziŋ bohòbʉ̀ʉ sə̀ wo wəpgə̀ yi, nə ye bə ŋgwì bʉ̀ awo pwe’.

⁵¹Nwì a sà bo ye sə̀ yà’ tse’ ŋàŋ,

nə bɛ’ samsə bʉ̀ ŋgàa nɛ̀ ni’ wèŋ bə bum awo sə̀ wo sə tsəm də wo nə gʉ.

⁵²Yi a susə ŋkəŋkum sə̀ ghaŋ mʉmvwe’ kapràak awo,

nə te’ lokoksə bʉ̀ʉ sə̀ wo jəgə̀ ni’ àwo sə nze.

⁵³Yi a fa bʉ̀ʉ sə̀ njè sə ya wo bum sə̀ bə̀boŋ wùriŋ,

nə jum gɛsə lo ŋgàa ghàk wèŋ botu.

⁵⁴Yi a nəmsə yusə̀ yi à kà’ bohòtàcicii avès wèŋ,

nə tɛsə ŋgàa fàak ye sə̀ wo bʉ̀ʉ Izùrɛ.

⁵⁵Yi à sə nìtsə̀’ kosə̀manziŋ ye bohòAbràham,

nə ye bohòŋgwì bʉ̀ ye sə̀’ nə̀ mvèsə̀.>>

⁵⁶Mèri à cu bə Àlisabè co ŋwʉ tɛ’, fana yi bwi foho lo la’à yi.

Wo Dzə Jon

⁵⁷Mvə̀k ànə kʉrə bohòÀlisabè ŋgòdzə fana yi dzə mombam. ⁵⁸Ŋge’ ye bə njə̀njàaŋ ye wèŋ à yuk mvə̀’nə̀ Tà Nwì à gʉ̀ yi bə̀boŋ fana wo kwa yàwo sə̀’. ⁵⁹Mo nə ànə dzeŋ ntɛŋ mò’fis fana wo jəŋ və yi ŋgòkom fa yi tu mbəmbam. Wo də wo nə to fa mo nə liŋ tɛ̀’ ye də Sàkàriyà. ⁶⁰Ma ye kà vɛ’nə dzəm, nə dʉk də, <<Liŋ mo nə də Jon.>> ⁶¹Wo dʉk fa yi də, <<Hàva’, liŋ njàŋ yòmòk ka vɛ’nə yeŋ yuk.>> ⁶²Ànə geŋ, wo gʉ bo ŋgòfek tɛ̀’ ye də nà’ dzəm də liŋ mo nə nə ye də ndà lɛ. ⁶³Sàkàriyà dʉk də wo fa yi ŋwàk. Fana yi com nja də, <<Liŋ mo nə Jon.>> Wo à mərə wes pwe’. ⁶⁴Ye jəŋ sə̀ ghà nà’nə, fana Sàkàriyà ye ŋgòcèp fe’lə cù sə̀mok, nə sə kwasə Nwì. ⁶⁵Wʉə à ko ŋge’ ye wèŋ pwe’, fana bʉ̀ʉ sə̀ wo à cu mvwe’ nda sə̀ mvwe’ nzeŋgòŋ Jùdiyà pwe’ à yuk bum yè’sə. ⁶⁶Ndàaŋwè pwe’ nə̀ yi yuk bum yè’sə à sə tsərə, nə sə muu və̀m də, <<Mo ènə nə ye nsàp ŋwə̀ nə̀ fòlɛ?>> Yà’ à sə yəəŋ jəja də, ŋàaŋ Tà Nwìi bohòmo ènə.

⁶⁷Sàkàriyà tɛ̀’ɛ Jon à rwiŋ bə Yòŋsə̀ nə̀ Rərɛŋ nə fana yi cep yusə̀ Nwì fa yi də yi cep. Yi à cèp də,

⁶⁸<<Vesùwèeŋ kwasə Tà nə̀ yi Nwì bʉ̀ʉ Izùrɛ wèŋ.

Yi a və̀ ŋgòtɛsə bʉ̀ʉ ye wèŋ, nə fiŋ me’rə fis wo sənə ŋgə’.

⁶⁹Yi a fa vesùwèŋ ŋgà gèm bwìŋ nə̀ ghaŋ nə̀ yi ŋgwì bʉ̀ ŋgà fàk ye Devìd.

⁷⁰Yi ànə cep yè’sə taaŋ ntɛ̀ŋ mʉ cùhù ŋgàa tsòhòbum ye sə̀ wo bʉ̀ʉ sə̀ rərɛŋ.

⁷¹Yi à kàk də yi nə fis ves bohòbʉ̀ʉ sə̀ wo bɛ̀ŋgə̀ ves,

nə kak də yi nə fis ves ndzə bohòbʉ̀ʉ sə̀ wo dzèeŋgə̀ vesùwèŋ.

⁷²Yi à kàk fa tàcici avès wèŋ də yi nə koksə manziŋ bohòwo,

fana yi noŋsə rʉ̀k ye nə̀ rərɛŋ nə̀ yi à zʉ nə.

^73-74Yi à kɛ̀ŋ bohòTàcici àvès Abràham gʉgʉŋ dʉk də yi nə fis vesùwèŋ ndzə bohòbʉ̀ʉ sə̀ wo bɛ̀ŋgə̀ vesùwèŋ,

ya vesùwèeŋ kuksə yi nə kà wəp,

⁷⁵nə sə fak bohòyi bə ntʉm nə̀ rərɛŋ nə ye kə̀kʉrə̀ mʉ lisə̀ yi nùumbu pwe’ sə̀ a cu.

⁷⁶Wù mo àm, wo nə to wu də ŋgà tsòhòbum Nwì nə̀ yi Nwì nə̀ ghaŋ nə.

Wu nə sə lo mantombìi Tà ŋgògʉ̀ tsə’rə fa yi mandzə̀ ye nə.

⁷⁷Wu nə tsoho fa bʉ̀ʉ ye wèŋ də yi nə swifa wo bʉp awo, ya ŋga wo nə tse’ lùŋ.

⁷⁸Bʉsə̀ Nwì àvèes ŋgà koksə̀manziŋ nə ye ntʉm fə̀fwèŋ.

Yi nə gʉ ves ŋgòyə lù nə̀ nje nə ŋga nà’ to tsə və̀ mʉ ni’ì vès co nùm,

⁷⁹nə rɛŋ tsoŋ mʉ tuhù bʉ̀ʉ sə̀ wo cu mvwe’ tsə̀tsèŋ kpʉ,

ŋga yi sə gʉ̀msə kɛ’ ves mvwe’ mandzə̀ nə̀ nà’ tse’ fifi.>>

⁸⁰Mo nə à kuk, nə sə gʉŋ bə ŋgùpni’ nə ye bə yòŋsə̀. Yi à sə cugə̀ ŋgəà. Yi à cu mvwe’ ànə tə̀tè kə wɛs nùmbu nə̀ yi kʉ̀rə ŋgòtesə və̀ jəja bohòbʉ̀ʉ Izùrɛ wèŋ.

Wo Dzə Jisòs

(Mat. 1:18-25)

¹Mvə̀k ànə à ye ŋga ŋkum Kaisà Àgostònə̀ mvwe’ nze Rumà dʉk də wo taŋ bʉ̀ʉ ye pwe’. ²Mvə̀’nə̀ wo à ta yèto bwìŋ vɛ’nə yè’sə, à ye ŋga govənònə̀ mvwe’ nze Sìriyà à ye Kwìrinòs. ³A ye vɛ’nə, fana ndàaŋwè pwe’ sə lo ŋgòkə̀ còm liŋ ye mvwe’ lak ye sə̀ yi à tesə fo’. ⁴Jòsep à ye’e mè’rə ye lak Nazàrɛ mvwe’ nzeŋgòŋ Galìli, ŋgòlòJùdiyà mvwe’ buk lak Betèrèhem, mvwe’ sə̀ wo à dzə ŋkum Devìd. Jòsep à sə lòfo’ bʉ̀ʉsə̀ yi à ye njàŋ bə ŋgwì bʉ̀ ŋkum Devìd nə. ⁵Yi à lòbə Mèri nə̀ yi à sak nà’ gù, də bə nà’a kə com liŋ awo. À ye ŋga Mèri nə bə zʉm. ⁶À kə̀ dzèŋ fo’, fana mvə̀k kʉrə bohòMèri ŋgòdzə. ⁷Mèri dzə mo ŋgwɛ̀ŋ ye, mo ŋwə̀mbam. Yi lim gesə nà’ ndzənə cə̀k, nə noŋsə nà’ sənə ŋgwes nə̀ wo fagə̀ nàamŋgòŋ wèŋ zʉzʉ ca. Bʉsə̀ mvwe’ nòoŋ à ka bohòwo mʉmvwe’ ndap nə̀ ŋkʉ̀ìŋ wèeŋ kə nòoŋgə̀ mbwa nə yeŋ.

Ganakù’ Wèŋ Və̀ ŊgòCèpsə Jisòs Mvə̀’nə̀ Wo Dzə Yi

⁸Ganakùu’ mok wèŋ à ye mvwe’ lak yà’sə, sə̀ wo à cu nòoŋ ŋgòkʉ̀k nsùŋgaaŋ awo nə̀ ndzəmə̀. ⁹Mvəsə̀ wo à cu fo’ fana masinjà Tà Nwì kurə tesə və bohòwo, marɛŋ Tà Nwì nə rɛŋ mvwe’ sə̀ wo à ye sə nə̀bʉp. Wo a yə vɛ’nə, wʉə ko wo wùriŋ. ¹⁰Masinjà Nwì nə dʉk fa wo dʉk də, <<Yeè, wèeŋ kà wəp. Mʉ̀ jə və̀ fa weŋ yè’sə Ntirə̀ nə̀ Bə̀boŋ nə̀ nà’a ye bohòndàaŋwè pwe’fo’. Ntirə̀ nə nà’ tse’ kwəkwa wùriŋ. ¹¹Bʉsə̀ nùmbu nə̀ ntinə ènə, wo dzə ŋgà lùŋsə̀ bwìŋ àwèŋ mvwe’ lak Devìd. A yi nə̀ yi Ŋkum ŋgà gèm bwìŋ nə ye Tà sə̀’. ¹²Wèeŋ nə kə ye ŋga wo lim mo nəmòk bə cə̀k, nə noŋsə yi sənə ŋgwes, fana wèŋ riŋ də nà’a yi.>> ¹³Wo ànə geŋ də wo kʉk à, wo ye masinjàa Nwì vɛ’ɛ nduk, ŋga wo sə yəm kùksə liŋ Nwì bə ŋkì. ¹⁴Wo sə dʉk də,

<<Kə̀kùksə̀ə ye bohòNwì nə̀ yi cu mvwe’ sə̀ ghaŋ mʉ ntòbu.

Fifi ye sə nzeŋgòŋ bohòbʉ̀ʉ sə̀ yi dzəm yà’wèŋ.>>

¹⁵Masinjàa Nwì sə à lògɛsə lòmʉbu. Fana ganakùu’ sə wèŋ dʉk də, <<A bə̀boŋ də vesùwèeŋ lo-ɛ mvwe’ lak Betèrèhem anə ɛ̀, nə kə ja’a na yusə̀ yà’a fo’, sə̀ Tà Nwì tsə̀’ fa ves yè’sə.>> ¹⁶Wo à lòvɛ’ɛ nə̀nàk. À kə̀ dzèeŋ, wo ye Mèri bə Jòsep nə ye mo nə ŋga yi nòsə ŋgwesə̀. ¹⁷Ganakuu’ sə à yə nà’ fana wo ye ŋga’a ŋgòtsòho fa bwìŋ yusə̀ wo anə yuk bə liŋ mo nə pwe’fo’. ¹⁸Bʉ̀ʉ sə̀ wo ànə yuk yusə̀ ganakùu’ sə à tsə̀’ə sə à mərə wes pwe’ nə̀ pwe’. ¹⁹Mèri à ko nòŋsə bum yè’sə pwe’fo’ sə və̀ə yi, nə sə tsərə bə zeŋ ghà yà lòoŋ. ²⁰Ganakùu’ sə à bwìŋ foho lòo, wo sə kwasə, nə sə kuksə lo liŋ Nwì, bʉ̀ʉ yusə̀ wo yuk nə ye sə. Yà’ ànə ye megu sə̀’ mʉmvə̀’nə̀ masinjà Nwì anə tsok wo sə.

Wo To Fa Jisòs Liŋ

²¹À kə̀ dzèŋ ntɛŋ mò’fis, mvə̀k kʉ̀rə də wo kom fa mo nə tu fana wo to fa yi liŋ də Jisòs. Yè’sə liŋ sə̀ masinjà Nwì ànə to fa yi yà’ ŋga wo ka yi ntòzʉʉŋ.

²²Mvə̀k à kʉrə bohòMèri bə Jòsep də wo gʉ yusə̀ lʉ̀ʉk Musì sə dʉk, ya ŋga wo ye yàwo mok sə̀’ rərɛŋ. Anə geŋ, wo jə lo mo nə mvwe’ lak Jòrosalèm ŋgòkə̀ nì fa yi bohòTà Nwì. ²³Wo ànə com noŋsə ndzənə ŋwàk lʉ̀k Tà Nwì dʉk də, <<Wo nə cok noŋsə fa Tà mo tu nə̀ yi ŋwə̀mbam.>> ²⁴Wo à lòŋgòfa satikà’ nə̀ lʉ̀ʉk Tà Nwì sə dʉk vɛ’nə. Yà’a yè’sə də, <<Wo fa kəkəbʉ̀ŋ kè nsàp swi mòk co kəkəbʉ̀ŋ nà’a ba.>>

²⁵Ŋwə̀ nəmòk ànə ye mvwe’ lak Jòrosalèm anə nə̀ liŋ ye à ye də Saimʉ̀. Yi à ye ŋwə̀ nə̀ yi kə̀kʉrə̀ mʉ lisə̀ Nwì, nə fa ntʉm ye bohòNwì pwe’ nə̀ pwe’. Yi à sə tək ŋgòyə ghà nə̀ Nwìi nə mesə fa bʉ̀ʉ Izùrɛ wèŋ ŋgə’ àwo, fana Yòŋsə̀ nə̀ Rərɛŋ sə ye bohòyi sə̀’. ²⁶Yòŋsə̀ nə̀ Rərɛŋ nə ànə tsok fa yi də, yi nə kà ntòkpʉ tè yi ye Ŋkum ŋgà gèm bwìŋ nə̀ Tà Nwì ànə kak də yi nə tum vesə nə. ²⁷Yòŋsə̀ nə ànə gʉ Saimʉ̀, fana yi lokok lo mʉmvwe’ ndap Nwì nə̀ ghaŋ nə. Mvə̀’nə̀ ma bə tɛ̀’ɛ mo nə à jə və̀ Jisòs mʉmvwe’ ndap Nwì nə̀ ghaŋ ŋgògʉ̀ yusə̀ lʉ̀k sə dʉk, ²⁸fana Saimʉ̀ kə le’ tse’ mo nə ndzə bohòyi, nə kwasə Nwì. ²⁹Yi à cèp də,

<<Tà, wù a gʉ̀ yusə̀ wù à cèep fana me’rə a mofàk yoo lo gɛsə bə fifi.

³⁰Bʉsə̀ nə̀ ŋga’a nè’e mʉ̀ yə lù nə̀ njònə laŋ,

³¹nə̀ wù à fʉ̀hʉ nòŋsə nà’ mantombìi bwìŋ pwe’ nə.

³²Nà’a marɛŋ nə̀ ŋgònì fa bʉ̀ lakmvum wèŋ mandzə̀ nə̀ njònə,

Nə ye ŋgògʉ̀ ya bwìiŋ wəp bʉ̀ʉ Izùrɛ wèŋ co bʉ̀ʉ sə̀ bwìŋ.>>

³³Bum sə̀ Saimʉ̀ à cèp sə yà’ à gʉ̀ ma mo nə bə tɛ̀’ɛ mo nə wo mərə wùriŋ. ³⁴Anə geŋ Saimʉ̀ sè wo, nə dʉk fa Mèri dʉk də, <<Nwì a cok fis mo ènə ŋgògʉ̀ bʉ̀ʉ Izùrɛ wèŋ ŋkʉ̀ʉŋ də wo gbʉ̀, mok lokok. Yi nə ye co yumòk nə̀ ŋgònìtsə̀’ bwìŋ mʉmvə̀’nə̀ Nwìi fagə̀ bwìŋ lùŋ. Megu də bwìiŋ nə sə cep bʉp bə zeŋ. ³⁵Fana tsətsərə̀ə sə̀ yà’ cu swìhi sə ntʉʉ̀ bwìŋ ŋkʉ̀ʉŋ nə tesə və jəja. Ntʉm yòo nə yaaŋ co ŋwè sòp nà’ bə fèk bʉ̀ʉ mo nə sə̀’.>>

³⁶Ŋwà nəmòk ànə ye nə̀ liŋ ye à ye də Àna. Yi ye ŋgà tsòhòbum Nwì. Liŋ tɛ̀’ ye à ye də Fanuel. Liŋ bòp lak àwo à ye də Asè. Yi à ye ŋwà nə̀ yi à rèŋ wùriŋ ŋga yi à cu bə ndu ye lùumŋgòŋ sàmba. ³⁷Yi à cu co ŋwà ŋgwemfə lùumŋgòŋ hum fwame’-ncòp-kwè. Yi kà ndap Nwì nə̀ ghaŋ nə me’rə yuk. Yi sə dzə̀ zʉzʉ, nə sə lɛŋ pìriyà, nə sə kuksə Nwì nùm bə ndzəm. ³⁸Yi à və̀ fo’ sə̀ ghà nà’nə, nə kwasə Nwì. Yi sə cep bə nzak mo ènə bohòbʉ̀ʉ sə̀ wo à sə tək ŋgòyə də Nwìi nə fiŋ me’rə bʉ̀ʉ Jòrosalèm yà’a.

³⁹Mʉmvə̀’nə̀ wo ànə gʉ wɛs bum sə̀ lʉ̀ʉk Tà Nwì sə dzəm fana wo bwi foho lo mvwe’ nzeŋgòŋ Galìli, nə̀ lak awo à ye fo’, wo to yà’ də Nazàrɛ. ⁴⁰Mo nə à kùk, nə tse’ ŋàŋ. Yi à tse’ ŋkərə̀, fana Nwì sə sè yi sə̀’ wùriŋ.

Jisòs LòŊgòKùksə Nwì Mʉ Ndap Nwì Nə̀ Ghaŋ

⁴¹Jòsep bə Mèri à sə cugə̀ mvwe’ lak Nazàrɛ anə fana wo sə loho Jòrosalèm lùm bə lùm. Wo à sə lòŋgòkə̀ zʉ ŋkà’a pasobà. ⁴²Jisòs à dzèŋ lùumŋgòŋ hum-ncòp-ba fana yi yuŋ Mèri bə Jòsep, wo lo mvwe’ ŋkàk nə sə̀mok. ⁴³Nùmbu ŋkàk nə à càa fana, wo ye ŋgòbwì foho lòla’à wo. Jisòs cum mam ye Jòrosalèm anə. Fana tɛ̀’ ye bə ma ye kà bə zeŋ rì. ⁴⁴Wo à sə tsəm yàwo də Jisòos mʉŋgorə̀ bʉ̀ʉ sə̀ wo sə bwì lòo sə. Fana wo gi yiskok tə̀tè nùm co. Wo ye ŋga’a ŋgòlàp yi mʉŋgorə̀ njə̀njàaŋ awo bə ŋge’ awo wèŋ. ⁴⁵Wo kà yi yə, fana wo bwi foho lo Jòrosalèm anə ŋgòlàp yi. ⁴⁶Wo lap yi tə̀tè nùmbu nə̀ tɛ’ à ye fana wo ye yi ŋga yi cu mʉ ndap Nwì nə̀ ghaŋ nə. A ye ŋga yi cu mʉtsətsə’rə̀ə cicàa bʉ̀ʉ Jus wèŋ. Yi sə yu’rə yusə̀ wo sə cèp sə, nə sə fek yà’wèŋ bum ye sə̀’. ⁴⁷Bʉ̀ʉ sə̀ wo à yuk yusə̀ yi sə cèp sə à mərə wes pwe’ bə nsàp ŋkərə̀ nə̀ yi à tse’ ŋgòcèp bʉ̀sə fa bʉ̀ʉ sə wèŋ. ⁴⁸Jòsep bə Mèri à yə yi fana wo mərə wùriŋ. Fana Mèri fek yi də, <<Mo àm, wu gʉ ves yè’e yà vɛ’nə ɛ? Ves tɛ̀’ yo lap wu tə̀tè ntʉm tesə lòbisə ves pwe’.>> ⁴⁹Jisòs fek yà’wèŋ də, <<Wèŋ nə sə lap mʉ də yà? Wèŋ nə ka riŋ də mʉ tse’ ŋgòcu mʉmvwe’ ndap Tɛ̀’ am riŋ à?>> ⁵⁰Wo kà ncèp nə̀ yi cèp fa wo nà’nə rɛɛ̀ŋ. ⁵¹Anə geŋ bə Jisòs wèŋ bwi foho lo Nazàrɛ anə, yi sə yuk dʉk awo. Ma ye à ko nə̀msə bum yè’sə pwe’ sə ntʉʉ̀ yi. ⁵²Jisòs à sə kuk bə ni’ nə ye bə ŋkərə̀. Bwìŋ à sə dzəm yi, Nwì dzəm yi sə̀’.

Tsə̀tsòhòNə̀ Jon Ŋgà Bàptɛsə̀ Bwìŋ

(Mat. 3:1-17, 14:3-12; Mak 1:1-11, 6:17-21; Jon 1:19-28)

¹Bum yè’e à ye ŋga Tìberiyùu ŋkum mvwe’ nze Rumà yi lùumŋgòŋ hum-ncòp-tàŋ. Poŋtiyòs Palè ye ye govənòmvwe’ nze Jùdiyà, fana Heròye ye ŋgà sak nze Galìli. Moma Herònə̀ liŋ yee Filìp à sə sak ye nze Ìturiyà bə Tràkònitì. Lìsaniyà à sə sak ye nze Abilin. ²Anàs bə Kayofàs à ye yàwo ŋkum ŋgàa fa satikà’ wèŋ. Ànə geŋ Nwì cèp bohòJon mo Sàkàriyà ŋga yi cu ŋgəà. ³Jon ànə yuk fana yi lokok nə gi kɛ’ mvwe’ lak sə̀ yà’ kʉəp ŋgʉ ndzəp Jòridàŋ yà’a. Yi à sə tsòho fa bwìŋ dʉk də, <<Wèeŋ kupsə, nə bwi fa bʉp awèŋ ŋkwɛ̀ŋ, nə baptɛsə, ya Nwìi swi fa weŋ bʉp awèŋ.>>

⁴Ìzayà ŋgà tsòhòbum Nwì ànə com bum yè’sə ndzənə ŋwàk ye də,

<<Ŋgì ŋwə̀ nəmòk sə cèp torə və̀ sə ŋgəà, nə sə yuhu də,

<Gʉ tsə’rə fa Tà Nwì mandzə̀ ye, rəŋsə tsə’rə fa yi bwe cwèe mandzə̀ ŋgògì cà ca.> >>

⁵Wo rwisə tsə’rə ntòŋ pwe’, nə fak laŋsə tsə’rə nda sə̀’ pwe’.

Gʉ mandzə̀ə sə̀ yà’a gəgorə̀ pwe’ yà’a ye rərəŋ, nə laŋsə cwèe mandzə̀ə sə̀ yà’ ka làaŋ yeŋ.

⁶Fana bwìŋ pwe’fo’ nə ye lù nə̀ Nwìi nə fa bwìŋ.

⁷Mandzə̀ ànə loho vɛ’ɛ bə bʉ̀ʉ sə̀ wo ànə sə və də Jon bàptɛsə wo. Fana Jon dʉk fa wo də, <<Wèŋ ŋgwì bʉ̀ no, tsə̀’ weŋ ŋga’a ndà də wèeŋ caŋ, nə swirə ŋgə’ nə̀ Nwìi nə̀ fa bwìŋ nə ɛ? ⁸Wèeŋ gʉ yusə̀ aco yà’ ni tsok də wèŋ bwì fa bʉp awèŋ ŋkwɛ̀ŋ laŋ. Wèeŋ kà də wèeŋ sə tsərə də aco wèŋ swirə ŋga wèŋ sə dʉhʉ na də, <Tàcici àvès à ye Abràham> dʉk. Bʉsə̀ mʉ tsok fa weŋ də, aco Nwì jəŋ lìis yè’e, nə gʉ fa Abràham bwe bə zeŋ sə̀’. ⁹Yuk-a. Njàm nə nòsə kʉ̀k ŋgògwɛ̀’ màk tʉ sə mbwè. Tʉ nə̀ fòpwe’ nə̀ nà’ ka-a nto’o sə̀ bə̀boŋ zəm, wo gwɛ’ mak nà’ sə nze, nə te’ tɛŋ gesə nà’ sə misə̀.>>

¹⁰Bʉ̀ʉ sə̀ wo ànə yuk ncèp ènə fek yi dʉk də, <<Aco vès gʉ ŋga’a yè’sə va?>> ¹¹Jon tsok fa wo də, <<Ŋwə̀ nə̀ wù tse’ cə̀ək nini ba, wù fa ŋwə̀ nə̀ yi ka mò’fis tse’ mòk. Ŋwə̀ nə̀ wù tse’ zʉzʉ, wù gapsə weŋ ŋwə̀ nə̀ yi ka tse’.>>

¹²Bʉ̀ʉ sə̀ wo à ye ŋgàa ko mbàam tas mok à və̀, dʉk də Jon bàptɛsə wo. Wo fek Jon nə də, <<Cicà, vèes gʉ va?>> ¹³Yi tsok fa yà’wèŋ də, <<Kà də wèeŋ jəŋ casə fe’lə mbàam ŋwə̀ nəmòk bə mfìp dʉk.>>

¹⁴Sojàa mok wèŋ à və̀ə, nə fek yi sə̀’ dʉk də, <<Vès yàvès ɛ? Vèes nə gʉ va?>> Jon tsok fa yà’wèŋ dʉk də, <<Kà mbàm ŋwə̀ nəmòk bə ŋàŋ fep jə, nə kà ŋwə̀ nəmòk wà na’tse’. Mbàam ŋwʉ àwèeŋ kə̀kʉrə̀ bohòwèŋ>>

¹⁵Bwìŋ ànə sə kʉk Ŋkum ŋgà gèm bwìŋ nə̀ Nwì à kàk də yi nə tum nə, fana wo à yə Jon, wo ye ŋgòtsərə də kàmòk a yi nə àlɛ. ¹⁶Yi dʉk fa yà’wèŋ dʉk də, <<Mʉ̀ sə baptɛsə mègù weŋ yàm bə ndzəp, nə yeè nə də, ŋwə̀ nəmòk nə̀ yi yam càsə mʉ nə və, nə̀ mʉ̀ ka kə̀kʉrə̀ ŋgòfìrə fa yi kùuŋgùup ye yeŋ. Yi nə baptɛsə weŋ bə Yòŋsə̀ nə̀ Rərɛŋ, nə ye bə mis. ¹⁷Yi tse’ wàam nzaŋ ye ndzə bohòyi ŋgòcìs nzaŋ bə zeŋ. Yi nə cis wes nzaŋ sə, nə nəmsə yà’ mʉ tapə, nə tɛŋ dzə̀dzə̀ə sə sə mvwe’ mis nə̀ nà’a kà liìgə̀.>>

¹⁸Jon à sə tip kɛ’ bwìŋ bə mandzə̀ zəzok mʉmvə̀’nə̀ yi sə tsòho fa wo Ntirə̀ nə̀ Bə̀boŋ nə. ¹⁹Yi à cèp bohòŋkum Heròsə̀’ də nà’ gʉ̀ bʉp wùriŋ bʉ̀ʉsə̀ nà’ ànə jəŋ Hèrodiyà nə̀ yi à ye ŋgwe moma ye Filìp. Herònə à gʉ̀ bum mok sə̀ yà’ à bʉp sə̀’. ²⁰Yi ànə gʉ fe’lə yumòk nə̀ nà’ bʉp càsə cù sə̀’. Yu nə̀ yi ànə gʉ nə, à ye də yi à ko lok Jon mʉ ndapndzəmə̀.

²¹À ye ŋga Jon bàptɛsə mè bwìŋ pwe’, fana Jisòs və, Jon baptɛsə yi sə̀’. Jisòs ànə sə gʉ pìriyà fana ntòbu muhu to. ²²Fana Yòŋsə̀ nə̀ Rərɛŋ tsoŋ mʉbu co kəkəbʉ̀ŋ. Nwì cep vesə mʉbu dʉk də, <<Wù mo àm nə̀ mʉ̀ dzəm wu sə ntʉʉ̀ mʉ̀. Mʉ̀ kwa bohòwù wùriŋ.>>

Tàcicii Jisòs

(Mat. 1:1-17)

²³Jisòs à yèto fàak ye ŋga yi co lùumŋgòŋ hum tɛ’. Tàcicii ye à ye mʉmvə̀’ nè’e.3:23 Wo-à be’lə ŋgo sə̀ 24 kə dzeŋ 38 yè’e mvwe’ mò’fis bʉ̀ʉsə̀ yà’ sə taŋsə tàcici wèŋ bə mandzə̀ nə̀ bʉ̀ Yamba wèŋ. Ghà nə̀ wo à còm to ŋwàk nè’e à ye ŋga bwìŋ sə taŋsə liŋ tàcicii awo nə sə yeto bə nə̀ yi cu ntòŋwʉm, nə sə taŋ foho lo maŋkwɛ̀ŋ tèè kə dzeŋ mʉ nì’ì tàcici nə̀ yi-à yèto. Bʉ̀ Yamba wèeŋ ta yètogə̀ yàwo bə nə̀ mantombì nə kə ləsə bə nə̀ yi cu ŋwʉm mvə̀’nə̀ vès a com yè’e.

^24-38Adàm nə ye mo Nwì. Sɛt ye mo Adàm.

Enos ye mo Sɛt. Kàyinàn ye mo Enos.

Màhalalì ye mo Kàyinàn. Jarè ye mo Màhalalì.

Enòk ye mo Jarè. Mɛ̀tuselà ye mo Enòk.

Lamɛ̀k ye mo Mɛ̀tuselà. Nuà ye mo Lamɛ̀k.

Shem ye mo Nuà. Àrfasà ye mo Shem.

Kàyinàn ye mo Àrfasà. Shelà ye mo Kàyinàn.

Ebà ye mo Shelà. Pelɛ̀k ye mo Ebà.

Ru ye mo Pelɛ̀k. Serù ye mo Ru.

Nahòye mo Serù. Terà ye mo Nahò.

Abràham ye mo Terà. Azìk ye mo Abràham.

Jàkop ye mo Azìk. Judà ye mo Jàkop.

Perè ye mo Judà. Hɛsròŋ ye mo Perè.

Arnì ye mo Hɛsròŋ. Adimìn ye mo Arnì.

Àminadàp ye mo Adimìn. Nasòŋ ye mo Àminadàp.

Samòŋ ye mo Nasòŋ. Bowàs ye mo Samòŋ.

Obè ye mo Bowàs. Jesì ye mo Obè.

Devìd ye mo Jesì. Natàŋ ye mo Devìd.

Matatà ye mo Natàŋ. Menà ye mo Matatà.

Meleyà ye mo Menà. Èliyakìm ye mo Meleyà.

Jonàm ye mo Èliyakìm. Jòsep ye mo Jonàm.

Judà ye mo Jòsep. Simiyòŋ ye mo Judà.

Levì ye mo Simiyòŋ. Màtat ye mo Levì.

Jorìm ye mo Màtat. Èlìyezè ye mo Jorìm.

Josuwà ye mo Èlìyezè. Er ye mo Josuwà.

Èlmadàm ye mo Er. Kosàm ye mo Èlmadàm.

Adì ye mo Kasàm. Melkì ye mo Adì.

Nerì ye mo Melkì. Shèyatiyè ye mo Nerì.

Zèrubabè ye mo Shèyatiyè. Resà ye mo Zèrubabè.

Joanàŋ ye mo Resà. Jodà ye mo Joanàŋ.

Josèk ye mo Jodà. Semèŋ ye mo Josèk.

Màtàtiyà ye mo Semèŋ. Maàt ye mo Màtàtiyà.

Nagè ye mo Maàt. Eslì ye mo Nagè.

Nahùm ye mo Eslì. Emòs ye mo Nahùm.

Màtàtiyà ye mo Emòs. Jòsep ye mo Màtàtiyà.

Janè ye mo Jòsep. Melkì ye mo Janè.

Levì ye mo Melkì. Màtat ye mo Levì.

Helì ye mo Màtat. Jòsep nə̀ yi à ye mo Helì, yi à ye ŋwə̀ nə̀ bwìŋ sə tsərə də yi tɛ̀’ɛ Jisòs.

Satà Mùmsə Jisòs

(Mat. 4:1-17; Mak 1:12-15)

¹Jisòs à bwì foho və̀ mvwe’ ndzəp Jòridàŋ ŋga yi rwi bə Yòŋsə̀ nə̀ Rərɛŋ. Fana Yòŋsə̀ nə jə lo yi mvwe’ səmok sə ŋgəà. ²Satà nə̀ yi ŋkum ze’ nə ànə mumsə yi mvwe’ yà’sə nùumbu hum kwè. Mvə̀k ànə à ye, yi kà yumok momjo zʉ lok, fana njè yaŋ yi ŋga nùumbu sə̀ hum kwè sə mèe. ³Satà nə cep bohòyi dʉk də, <<A ye-a ŋga wu mo Nwì, wù cep-a bohòlìs nè’e ŋga nà’a bʉʉŋ bɛŋ ŋga wu zʉ.>> ⁴Jisòs dʉk fa nà’ də, <<Wo à còm nòŋsə ndzənə ŋwàk Nwì dʉk də, <Kaco ŋwè cum megu bʉ̀ʉ ŋàaŋ zʉzʉ yeŋ.> >> ⁵Satà jə lo yi mʉ tu nda nəmòk, nə niŋ fa yi lak sə̀ sə nzeŋgòŋ pwe’ kɛ̀’ mò’fis. ⁶Yi dʉk də, <<Mʉ nə fa wu ŋàŋ bə lak yè’sə nə ye ghàak sə̀ fòpwe’. Nwì ànə fa yà’ pwe’ ndzə bòhòmʉ̀ yi, nə yeè nə də, mʉ̀ tse’ ŋàaŋ sə̀ ŋgòfa yà’ bohòŋwə̀ nə̀ ntʉm àm dzəm. ⁷Bum yè’sə pwe’ nə ye yò, ŋga wu kuksə-a mʉ.>> ⁸Jisòs dʉk də, <<Cu ndzənə ŋwàk Nwì nə də, <Ŋwè tse’ ŋgòkùksə Tà nə̀ yi Nwì ye, nə fak megu sə̀’ bohòyi yiìyi.> >> ⁹Satà jə lo Jisòs mʉ Jòrosalèm, nə kə tes yi mʉ ndùndap Nwì nə̀ ghaŋ nə mvwe’ sə̀ yà’ sap càsə. Yi dʉk fa Jisòs də, <<A ye-a də wu mo Nwì, wù li gbʉ tsooŋ mʉ ndùndap fɛɛŋ. ¹⁰Yà’ cu ndzənə ŋwàk Nwì də, <Nwìi nə fa masinjàa ye ŋàŋ ŋgòjə ŋkərə̀ bohòwù.> ¹¹Yà’ cu nja sə̀’ də, <Wo nə kotse’ wu mʉtsə̀ bə bo awo, ya wu nə kà kù nə̀ kù ta.> >> ¹²Jisòs dʉk fa nà’ də, <<Wo də, <Wù ka tse’ ŋgòbʉə ja’a Tà nə̀ yi Nwì yòtse’.> >>

¹³Satà nə ànə mumsə wes Jisòs vɛ’nə, fana yi me’rə tse’ nà’ ghàr. ¹⁴Fana Jisòs bwi foho lo mvwe’ nzeŋgòŋ Galìli. Ŋàaŋ Yòŋsə̀ nə̀ Rərɛŋ à ye bohòyi. Bwìŋ anə yuk wes nzu Jisòs mvwe’ tò’o lak yà’sə pwe’. ¹⁵Yi a sə yə’rə bʉ̀ʉ sə mʉmvwe’ ndap pìriyà bʉ̀ʉ Jus wèŋ, fana bwìŋ pwe’ sə kuksə yi.

Bʉ̀ʉ Sə̀ Mvwe’ Lak Nazàrɛ Bɛ̀ŋ Jisòs

(Mat. 13:53-58; Mak 6:1-6)

¹⁶Jisòs ànə bwi foho lo mʉ Nazàrɛ, lak sə̀ yi ànə kuk fo’. À ye nùmbu dzə̀ bʉ̀ʉ Jus, yi lo mʉ ndap pìriyà, sə̀’ mvə̀’nə̀ yi ànə sə lo mantombì. Yi lokok təəŋ mʉtsə̀, nə taŋ ndzənə ŋwàk Nwì.¹⁷Wo ànə fa yi ŋwàk Ìzayà, nə̀ yi ànə ye ŋgà tsòhòbum Nwì. Yi fiŋ, nə muk ŋwàk nə, nə ye mvwe’ sə̀ wo ànə com nja də,

¹⁸<<Tà Nwì a fa mʉ yòŋsə̀ ye,

bʉ̀ʉsə̀ yi a cok fis mʉ də mʉ tsoho fa Ntirə̀ nə̀ Bə̀boŋ bohòbʉ̀ ŋgàa jìŋ wèŋ.

Yi a tum mʉ də mʉ kə tsoho fa bʉ̀ʉ sə̀ wo cu ndapndzəm də wo nə fis me’rə wo.

Mʉ tsok fa bʉ̀ ŋgàa ntwìlis wèŋ də wo nə ye bum sə̀mok.

Mʉ fiŋ me’rə bʉ̀ʉ sə̀ wo cu bə ŋgə’.

¹⁹Nə tsok fa bwìŋ də lùmŋgòŋ nə̀ Tà Nwìi nə kə luŋsə bʉ̀ʉ ye wèŋ nə və̀ laŋ.>>

²⁰Yi ànə taŋ mesə vɛ’nə fana yi lok nà’, nə fa nà’ bohòŋwə̀ nə̀ yi tɛsəgə̀ mʉmvwe’ ndap pìriyà nə, nə cum tsoŋ nze, nə ye ŋgòtsòho. Bʉ̀ʉ sə̀ wo ànə ye mʉmvwe’ ndap pìriyà nə wèŋ à sə kʉ̀k tse’ mègù mok yi. ²¹Yi ye ŋgòtsə̀’ fa bʉ̀ʉ sə də, <<Yusə̀ yà’a ndzənə ŋwàk Nwì sə bʉ̀ʉŋ və̀ ntinə zìnə mʉmvə̀’nə̀ wèŋ yuk ŋga mʉ̀ ta yè’sə.>>

²²Bwìŋ à kwa bohòyi, bə lə̀lʉm ncèep sə̀ yà’ à sə tesə kə̀ cùhù yi. Wo sə fe’rə də, <<Nè’e ka mo Jòsep ye àlɛ?>> ²³Jisòs dʉk fa wo də, <<Mʉ̀ riŋ də wèeŋ nə mak fa mʉ gbʉ’ nè’e də, <Ŋgà ncə̀p, gʉŋsə-a ni’ yò.> A yà’a də, <Wu gʉ̀ bum sə̀ vès a yuk də wù a sə gʉ̀ yà’ mvwe’ lak Kàpanùm yà’a, mʉ ntòla’à wù fɛɛŋ sə̀’.> >> ²⁴Yi dʉk fa fe’lə wo də, <<Mʉ̀ sə tsə̀’ fa weŋ nə̀ zìnə də, bʉ̀ʉ sə̀ mʉ ntòlak kà ŋgà tsòhòbum Nwì nə̀ yi tesə sə̀’ mvwe’ ntòlak ànə co yumok jəgə̀. ²⁵Mʉ̀ sə tsə̀’ fa weŋ zìnə də, ghà nə̀ Àlajà à cu fo’ nà’a, bàa yepmfə à ye mvwe’ lak Izùrɛ ŋkʉ̀ʉŋntɛ̀ŋ. Mvə̀k nə̀ mbʉ̀ŋ à sə kà ligə̀ mʉnə lùumŋgòŋ tɛ’ bə bwes fana, njè ko nzeŋgòŋ nə pwe’. ²⁶Nwì ànə ka Àlajà bohòbàa yepmfə avès ŋgòfa yi zʉzʉ sə̀’ tum, yi à tum lònà’ bohòŋwà ŋgwemfə nə̀ mvwe’ lak Zarefà nə̀ mvwe’ nzeŋgòSidòŋ. ²⁷Ŋgàa kuturu ànə ye mvwe’ lak Izùrɛ sə̀’ ŋkʉ̀ʉŋntɛ̀ŋ mʉmvə̀k nə̀ Àlasà ànə cum fo’ nà’a. Fana yi ànə ka ŋwə̀ àvès nə̀ mò’fis gʉŋsə, yi à gʉŋsə mègù Namàn nə̀ yi ŋwə̀ Sìriyà.>>

²⁸Bʉ̀ʉ sə̀ wo ànə ye mʉmvwe’ ndap pìriyà anə, à yuk bum sə̀ Jisòs à cèep fana ntʉm cəp wo nə̀bʉp. ²⁹Wo lokok, nə soŋ dapsə fis mʉntòlak anə, nə jəŋ lo yi mʉ tu nda nə̀ wo a ci lak awo mbwa, ya wo dusə mak tsoŋ lo yi sə bamə̀ anə. ³⁰Fana yi swɛ’ɛ tesə ndzə bohòwo anə, nə gi ca mʉtsətsə’rəə wo anə nə lo yuye.

Jisòs Bɛ’fis Yòŋsə̀ Ze’ Ndzə Nì’ì Ŋwə̀ Nəmòk

(Mak 1:21-28)

³¹Jisòs à lòmvwe’ lak Kàpanùm nə̀ mvwe’ nzeŋgòGalìli, fana yi sə yə’rə bwìŋ fo’ nùmbu dzə̀. ³²Wo à mərə pwe’, bʉ̀ʉsə̀ ncèp nə̀ yi à sə cèp nə, à ye nsàp nə̀ nje zok bə ŋàŋ.

³³Ŋwə̀ nəmòk ànə ye mʉ ndap pìriyà anə, nə̀ yi à tse’ yòŋsə̀ ze’ ndzə ni’ì yi. Yi cep torə fis bə ŋàŋ dʉk də, ³⁴<<Hàva’, Jisòs nə̀ mvwe’ lak Nazàrɛ, wù tse’ yà vesùwèŋ nɛ? Wù və̀ yè’sə ŋgòzə ves à? Mʉ̀ riŋ wu bə̀boŋni, wu mo Nwì nə̀ wu rərɛŋ nə.>> ³⁵Jisòs ghamsə yòŋsə̀ nə, nə dʉk fa yi də, <<Lok cùu yò, nə ca tesə ndzə ni’ì ŋwə̀ ènə.>> Ze’ nə bwi’ mak ŋwə̀ nə sə nze, nə tesə gɛsə lo, nə kà yi yumok gʉ̀. ³⁶Bwìŋ à mərə ŋkʉ̀ʉŋntɛ̀ŋ, nə sə fe’rə kɛ’ca də, <<Hàva’, yè’sə yà vɛ’nə ɛ? Ŋwə̀ nè’e sə cep bə ncèep sə̀ yà’ tse’ ŋàŋ, fana yòŋsə̀ ze’ sə tesə ndzə ni’ì bwìŋ.>> ³⁷Fana nzu bum sə̀ Jisòs à gʉ̀ yè’sə yuhu lo mvwe’ nzeŋgòànə pwe’.

Jisòs Gʉŋsə Ŋgàa Yiyaŋ Ŋkʉ̀ʉŋntɛ̀ŋ

(Mat. 8:14-17; Mak 1:29-34)

³⁸Jisòs à mè’rə mʉ ndap pìriyà anə, nə lo mʉ nda’à Saimʉ̀. À ye ŋga mali Saimʉ̀ nə sə ya yiyaŋ wùriŋ. Fana wo tsok fa Jisòs bə zeŋ. ³⁹Yi lo kə təəŋ ŋgʉ kèe nà’, nə cep bohòyiya nə. Yiya nə à mè’rə yi ghà nà’nə. Yi lokok, nə lap fa wo zʉzʉ.

⁴⁰Nùm à co, fana bʉ̀ʉ sə̀ wo à tse’ ŋge’ awo sə̀ wo à tse’ yiyaŋ zok zok jə və yà’wèŋ bohòJisòs. Yi jwɛŋ wo bə bo ye, fana yiyaŋ awo me. ⁴¹Yòŋsə̀ə ze’ wèŋ à sə tesə ndzə ni’ì bwìŋ ŋkʉ̀ʉŋntɛ̀ŋ, nə sə cep sa’rə də, <<Wu mo Nwì.>> Jisòs ghamsə yà’wèŋ də yà’wèeŋ kà cèp, bʉ̀ʉsə̀ wo ànə riŋ də a yi Ŋkum ŋgà gèm bwìŋ nə̀ Nwì ànə kak də yi nə tum və nə.

Jisòs Tsòho LòNzak Nwì Mvwe’ Nzeŋgòŋ Galìli Pwe’

(Mak 1:35-39)

⁴²Tsok à rɛŋ, Jisòs me’rə ntòlak nə, nə lo mvwe’ səmok yiìyi. Bʉ̀ʉ sə wèŋ ye ŋgòlàp yi. Wo ànə ye yi fana wo lap mandzə̀ ŋgògʉ̀ də yi kà lò. ⁴³Yi dʉk fa yà’wèŋ də, <<Mʉ̀ tse’ ŋgòtsòho lòNtirə̀ nə̀ Bə̀boŋ nə̀ nà’a bə gaŋ ŋkum Nwì nə mvwe’ buhu lak mok sə̀’. Bʉsə̀ yà’a yusə̀ Nwì a tum mʉ də mʉ gʉ sə.>> ⁴⁴Fana yi sə tsoho kɛ’ lo mʉnə ndap pìriyà wèŋ mvwe’ nzeŋgòŋ Jùdiyà nə pwe’.

Jisòs To Bʉ̀ Ŋgàa Fàak Ye Sə̀ Mantombì Kwè

(Mat. 4:18-22; Mak 1:16-20)

¹A ye nùmbu mòk ŋga Jisòs tə ŋgʉ tə̀m Jènesarè fana bwìŋ kə rwiŋ fo’ vɛ’ɛ fak fak. Bwìŋ sə nik kʉəp lo ŋgʉ ni’ì yi, ŋgòyuk ncèp Nwì. ²Jisòs ye ŋga ŋgwes tə ŋgʉ tə̀m anə ba ŋga ŋgàa ko fuk wèŋ ànə tes yà’, nə lo ŋgòcùk ram awo. ³Yi ni lo sənə ŋgwes nə̀ Saimʉ̀ ànə tse’ nà’ yi, nə dʉk nà’ də nà’a bwi’ gɛsə ŋgwes nə mvwe’ ŋgʉ ndzəp nə momjo. Fana yi cum ca, nə sə yə’rə bʉ̀ʉ sə.

⁴Yi à mèsə yəyə’rə̀ nə fana yi dʉk fa Saimʉ̀ də, <<Bwi’ lo ŋgwes nə mvwe’ sə̀ ndzəp nə cəco ya weŋ ŋge’ yòo gesə ram sə ndzəpə̀, nə ko fuk.>> ⁵Saimʉ̀ dʉk fa yi də, <<Tɛ̀’, vès fuk nòoŋ tè tsok rɛŋ vès kà fuk nə̀ mò’fis ko. Fana bʉ̀ʉsə̀ wù cèp vɛ’nə, mʉ nə mak gesə ram nə sə ndzəpə̀ anə.>> ⁶Wo ànə mak gesə ram nə sə ndzəpə̀ anə, nə ko fuk vɛ’ɛ nə̀bʉp, ram nə ye ŋgòtiŋ. ⁷Fana wo bak gesə lo fa ŋge’ awo sə̀ bə ŋgwes mòk nə bo, də yà’a və kə tɛsə wo. Wo və, nə rusə ŋgwes awo sə bə fuk fana yà’ ye ŋgòcəəŋ lòsə ndzəpə̀. ⁸Saimʉ̀ ànə yeŋ nsàp fuk nə̀ wo anə ko fana yi gbʉ təəŋ bə tumfərə kù mantombìi Jisòs, nə dʉk fa nà’ dʉk də, <<Dù lo yuyo, Tà, bʉ̀ʉsə̀ mʉ ŋwə̀ nə̀ mʉ̀ rwiŋ bə bʉp.>> ⁹Saimʉ̀ bə bʉ̀ʉ sə̀ wo ànə ko nsàp fuk nè’nə ànə mərə vɛ’ɛ nə̀bʉp. ¹⁰Fana ŋge’ ye wèŋ Jem bə Jon, bwe Zebèdi ànə mərə sə̀’. Jisòs tsok fa Saimʉ̀ dʉk də, <<Kà wəp, ye jəŋ ŋga’a wu nə kà fuk mok ko, wu nə sə ko jə və fa mʉ bwìŋ.>> ¹¹Bʉ̀ʉ sə bwi’ lo ŋgwes sə ndzə ŋgʉ ndzəp anə, nə mak noŋsə yà’ mʉmvwe’ anə, nə bɛ’lo Jisòs.

Jisòs Mèsə Fa Ŋgà Kuturu Yiya Ye

(Mat. 8:1-4; Mak 1:40-45)

¹²Jisòs ànə cum bə lak mok fana ŋwə̀ ŋgà kuturu ye yi ŋga yiyaŋ nə à wes yi vɛ’ɛ pwe’ nə̀ pwe’. Yi ye Jisòs, fana yi gbʉ bu’rə kù mantombìi nà’, nə lɛŋ nà’ də, <<Tà, a bò-a wu co wù tɛsə mʉ na, wù gʉ fa mʉ yiya àm nè’e me.>> ¹³Jisòs fis bo, nə jwɛŋ nà’ bə zeŋ, nə dʉk də, <<Mʉ̀ dzəm laŋ, yiya yònə nà’a me.>> Yiya ye nə à mè mègù fo’ sə̀’ ghà ànə. ¹⁴Jisòs tipsə yi də, <<Nə kà ŋwə̀ nəmòk tsə̀’ fa, du mvwe’ ŋgà fa satikà’ ya yi nə kʉk ja’a wu, fana wù fa fəfa mvə̀’nə̀ Musì ànə dʉk ŋgònì də yiya nə mè laŋ.>> ¹⁵Fana nzu nə̀ də Jisòs gʉ̀ yu yè’sə yuhu lo ŋkʉ̀ʉŋntɛ̀ŋ, maŋgòŋ tesə və ŋgòyuk bum sə̀ Jisòs à sə tsòho, nə ye ŋgòfek yi də nà’a mesə fa wo yiyaŋ awo. ¹⁶Fana yi sə loho yuye ŋgəà kə̀kɛ̀’ ŋgòlɛŋ pìriyà.

Jisòs Gʉŋsə Ŋwə̀ Nə̀ Yi À Bù’rə

(Mat. 9:1-8; Mak 2:1-12)

¹⁷A ye nùmbu mòk ŋga Jisòs sə yə’rə fa bwìŋ ncèp Nwì, fana bʉ̀ʉ Faràsi bə bʉ̀ʉ sə̀ wo yə’rə fagə̀ bwìŋ lʉ̀ʉk Nwì à ye mʉtsətsə’rə̀ə wo. Wo ànə tesə və pwe’ mvwe’ nzeŋgòŋ Galìli, Jùdiyà, bə ntòlak Jòrosalèm. Ŋàaŋ Tà Nwì à ye bohòJisòs ŋgòmèsə yiyaŋ. ¹⁸Bʉ̀ʉ səmok bək və ŋwə̀ nəmòk mʉnə dak, nə̀ yi à tse’ yiya nə̀ nà’a bù’rəgə̀ bwìŋ. Wo lap mandzə̀ ŋgònisə lo yi mʉ nda’à anə mantombìi Jisòs. ¹⁹Bʉsə̀ maŋgo bwìŋ à ye wùriŋ fana wo kà mandzə̀ ŋgòjə lòyi mbwa tse’. Wo bək kok lo ŋgà yiya nə mʉ ndùndap, nə cok tosə mvwe’ sə̀ Jisòs tə sə, nə le’ gesə tsoŋ ŋwə̀ nə kù mantombìi Jisòs mʉtsətsə’rə̀ə bwìŋ anə.5:19 Ye Màtiyò24:17²⁰Jisòs à yə də wo tse’ dzədzəm nə̀ də aco yi gʉ yiya ŋwə̀ nə me. Yi dʉk bohòŋwə̀ nə̀ yi kà gìgə̀ nə də, <<Mo àm, mʉ̀ swìfa wu bʉp yo laŋ.>> ²¹Bʉ̀ ŋgàa yə’rə̀ lʉ̀ʉk Nwì wèŋ bə bʉ̀ʉ Faràsi wèŋ à yu’ vɛ’nə wo ye ŋgòŋwʉ̀rə kɛ’cà də, <<Nè’nə ndà nə̀ yi sə bʉpsə liŋ Nwì ɛ? Kaco ŋwè swifa ŋwè bʉp yeŋ, mègù Nwì yiìyi.>> ²²Jisòs à rì bum sə̀ wo ànə sə tsərə sə ntʉʉ̀ wo vɛ’ɛ pwe’, nə fek wo dʉk də, <<Wèŋ sə tsərə bum yè’sə sə ntʉʉ̀ wèŋ vɛ’nə bʉ̀ʉ yà? ²³Co joho gha’ yè’e nə̀ ŋgòdʉk də, <mʉ̀ swì fa wu bʉp yòlaŋ>, kè nə̀ ŋgòdʉk də, <Lòkok mʉtsə̀, nə gi lo yuyo> ɛ? ²⁴Fana mʉ nə ni fa weŋ də mʉ̀ʉ mo ŋwè, mʉ̀ tse’ ŋàŋ sə nze ŋgòswìfa bwìŋ bʉp awo.>> Fana yi dʉk fa ŋgà’ nə̀ yi kà gìgə̀ nə də, <<Mʉ̀ dʉk wu də lòkok, nə te’ kà yò, nə lo la’à wù.>> ²⁵Yi à cèp vɛ’nə fana ŋwə̀ nə lokok təəŋ kù mantombìi wo ghà ànə. Yi te’ lim bək kà ye, nə lo yuye mʉ nda’à yi, nə sə kuksə lo Nwì. ²⁶Bwìŋ ànə mərə vɛ’ɛ ŋkʉ̀ʉŋntɛ̀ŋ, nə wəp nə̀bʉp, nə kuksə Nwì dʉk də, <<Vès yə nsàp maŋgəŋgèŋ mòk ntinə.>>

Jisòs To Levì

(Mat. 9:9-13; Mak 2:13-17)

²⁷Yè’sə a mè fana Jisòs tesə lo, nə kə ye Levì ŋgà ko mbàm tas mvwe’ sə̀ yi fàkgə̀ fo’. Jisòs dʉk fa yi də, <<Bɛ’ və mʉ.>> ²⁸Levì nə lokok, nə me’rə bum fàak ye pwe’, nə bɛ’ lo Jisòs.

²⁹Fana Levì nə à kə̀ gʉ̀ fa Jisòs dinà nə̀ ghaŋ mʉ nda’à yi. Ŋgàa ko tas wèŋ ànə və, bə bwìŋ ŋkʉ̀ʉŋntɛ̀ŋ, nə sə zʉ zʉzʉ fo’. ³⁰Bʉ̀ʉ Faràsi bə bʉ̀ awo mok sə̀ wo bʉ̀ ŋgàa yə’rə̀ lʉ̀ʉk Nwì wèŋ ànə ye vɛ’nə wo fek ŋgàa fàak Jisòs də, <<Wèŋ sə zʉ be’lə weŋ ŋgàa ko tas nə ye bə bʉ̀ ŋgàa gʉ̀ bʉp wèŋ bʉ̀ʉ yà?>> ³¹Jisòs dʉk fəsə fa wo də, <<Bʉ̀ʉ sə̀ wo ka yiyaŋ tse’, wo kà doktà làpgə̀, a làpgə̀ doktà ŋwə̀ nə̀ yi sə yaya. ³²Fana mʉ̀ a ka njo bʉ̀ʉ sə̀ kə̀kʉrə̀ wèŋ və̀, mʉ̀ a və̀ ŋgòto bʉ̀ ŋgàa gʉ̀ bʉp wèŋ, ya wo nə kupsə ntʉm awo, nə bwi fa bʉp awo ŋkwɛ̀ŋ.>>

Nzak Dzə̀ Zʉzʉ ŊgòKùksə Nwì

(Mat. 9:14-17; Mak 2:18-22)

³³Bʉ̀ʉ səmok à fek Jisòs də, <<Ŋgàa fàak Jon dzə̀gə̀ zʉzʉ kə̀kɛ’, nə sə gʉ pìriyà, nə ye də ŋgàa fàak bʉ̀ʉ Faràsi wèeŋ gʉ̀gə̀ sə̀’ vɛ’nə, ŋgàa fàak yòsə zʉ nə sə no nùumbu pwe’ bʉ̀ʉ yà lɛ?>> ³⁴Jisòs fek wo də, <<Aco wo dʉk fa bʉ̀ʉ sə̀ wo və̀ mvwe’ sə̀ wo sə zʉ gù də yà’wèeŋ dzə zʉzʉ ŋga ndugù nə cu fo’ nùumbu yà’sə à? Ka vɛ’nə sə̀ yeŋ. ³⁵Nə yeè nə də, mvə̀k nəmòk cu nə̀ wo nə jəŋ gɛsə lo ndugù nə, fana bʉ̀ʉ sə nə dzə zʉzʉ mvə̀k ànə.>>

³⁶Jisòs mak fa wo gbʉ’ nè’e də, <<Kaco ŋwè sa jəŋ cə̀k nini nə̀ fi, nə te’ lok cə̀k nə̀ zəm bə zeŋ yeŋ. A ye-a vɛ’nə, cə̀k nə̀ fi nə nə sarə ghasə cə̀k nə̀ zəm nə, fana yà’ kà kʉ̀rə̀. ³⁷Kaco ŋwə̀ nəmòk kep gesə dzə̀ rùk sənə bɛ̀s nə̀ zəm yeŋ. A ye-a ŋga yi gʉ̀ vɛ’nə, dzə̀ rùk nə nə duk, nə vok bɛ̀s nə, rùuk sə maha wà, bɛ̀s nə bʉp sə̀’ wà. ³⁸Hai’, ka vɛ’nə yeŋ, gèsə rùuk sə̀ fi sənə bɛ̀s nə̀ fi.>> ³⁹Jisòs dʉk fe’lə sə̀’ də, <<Ŋwèe no-a rùuk sə̀ zəm, fana yi nə kà ŋgòno rùuk sə̀ fi dzəm. Anə boŋ ghak gu yi mok rùuk sə̀ zəm sə.>>

Jisòs Cèp Bə Nzak Nùmbu Dzə̀

(Mat. 12:1-8; Mak 2:23-28)

¹Jisòs à gì cà mvwe’ nzum nzaŋ mok ŋga a nùmbu dzə̀. Ŋgàa fàak ye kʉp tu nzaŋ mok, nə sə nuk yà’ ndzə bohòwo, nə sə zʉ mvə̀əm nzaŋ sə. ²Bʉ̀ʉ Faràsi səmok fek wo də, <<Lʉ̀k avès ka də ŋwèe fak nùmbu dzə̀ dzəm, wèŋ sə kʉp nzaŋ ŋga a yà’sə fàk bʉ̀ʉ yà?>> ³Jisòs fek wo dʉk də, <<Wèŋ ànə ka yusə̀ Devìd bə bʉ̀ʉ ye wèŋ ànə gʉ taaŋ ŋga njè sə ya wo yuk à? ⁴Yi à ni lòmʉ nda’à Nwì, nə jəŋ zʉzʉʉ sə̀ wo à jə və̀ ŋgòkwasə Nwì bə zeŋ, nə zʉ yà’, nə fa bʉ̀ʉ ye wèŋ yà’ sə̀’. Wo à zʉ vɛ’nə ŋga lʉ̀k sə bɛ̀ŋ də kaco ŋwè zʉ yeŋ, tse’ŋga wu ŋgà fa satikà’ ŋkuŋ.>> ⁵Jisòs cep ləsə ncèp nə də, <<Mʉ̀ʉ mo ŋwè, mʉ Tà bə nùmbu dzə̀ nə mʉ̀.>>

Ŋwə̀ Nə̀ Yi À Kpʉ Bo Ma Mò’fis

(Mat. 12:9-14; Mak 3:1-6)

⁶À ye nùmbu dzə̀ nəmòk sə̀’, Jisòs lo mʉ ndap pìriyà ŋgòtsòho fa bwìŋ ncèp Nwì. Ŋwə̀ nəmòk à ye mʉtsətsə’rə wo anə nə̀ bo ye ànə kpʉ ma màk. ⁷Ànə ye mvə̀k ànə bʉ̀ ŋgàa yə’rə̀ lʉ̀k Nwì bə bʉ̀ʉ Faràsi sə̀ wo à ye fo’ sə kʉk gosə kɛ’ Jisòs. Wo à sə kʉ̀’ ŋgòko yi bə nzak də yi gʉ̀ fàk nùmbu dzə̀. ⁸Fana Jisòs riŋ yusə̀ wo à sə tsərə sə ntʉʉ̀ wo sə, nə dʉk fa ŋwə̀ nə̀ bo à kpʉ yi nə də, <<Lokok təəŋ və mantombì fɛɛŋ.>> Ŋwə̀ nə lokok təə megu sə̀ vɛ’nə. ⁹Jisòs dʉk fa wo də, <<Mʉ̀ sə fek yè’e wèŋ dʉk də, lʉ̀k àvès sə dzəm də vesùwèeŋ gʉ nùmbu dzə̀ yà? Nà’ sə dʉk də vesùwèeŋ tɛsə ŋwè kè a yeŋsə yi ŋgə’ ɛ? Nà’ sə dʉk də vesùwèeŋ gem yòŋsə̀ ŋwè kè a mesə nà’ ɛ?>> ¹⁰Fana yi kʉk dzooŋ yak wo pwe’, nə dʉk fa ŋgà yiya nə də, <<Nèp fis yak kwiŋ yo sə.>> Ŋwə̀ nə à gʉ̀ sə̀ vɛ’nə fana bo ye sə gʉŋ. ¹¹Bʉ̀ʉ sə ànə jok vɛ’ɛ wùriŋ, nə sə cep kɛ’ ca mʉtsətsə’rə wo yusə̀ aco wo ko Jisòs bə zeŋ.

Jisòs Swè’fis Bʉ̀ʉ Ye Mok Hum-ncòp-ba ŊgòYe Ŋgàa Ntum

(Mat. 10:1-4; Mak 3:13-19)

¹²Ànə ye mvə̀k ànə fana Jisòs kok lo mʉ tu nda nəmòk, nə lɛŋ Nwì. Yi lɛŋ vɛ’ɛ, tè tsok rɛŋ, yi kà lo dzəm. ¹³Tsok à rɛɛŋ fana, yi to benə ŋgàa fàak ye sə wèŋ mvwe’ mò’fis, nə cok fis jəŋ bwìŋ hum-ncòp-ba, nə to yà’wèŋ də ŋgàa ntum. ¹⁴Liŋ bʉ̀ʉ sə̀ yi à cokfis sə, à ye Saimʉ̀ nə̀ yi à fa nà’ liŋ də Pità bə moma ye Andrù, Jem bə Jon, Filìp bə Bàtòlomì, ¹⁵Màtiyò, bə Tomos, Jem mo Alfòs bə Saimʉ̀ nə̀ wo ànə to yi də Zilò, ¹⁶Judàs mo Jem bə Judàs Iskarəyà nə̀ yi ànə seŋ Jisòs.

Jisòs Tsòho Nza’ Nwì

(Mat. 4:23-5:12)

¹⁷A ye ŋga Jisòs tsoŋ tesə və mʉ tu nda nə, fana yi kə təəŋ mvwe’ nəmòk nə̀ à ye fo’ rə̀əm. Yi à ye fo’ bə ŋgàa fàak ye wèŋ ŋkʉ̀ʉŋntɛ̀ŋ. Fana bwìŋ tesə və mvwe’ nzeŋgòŋ Jùdiyà bə ntòlak Jòrosalèm, nə ye ntòlak Tayà bə Sidòŋ sə̀ yà’a ŋgʉ ndzəp, nə kə maŋ fo’. ¹⁸Wo ànə və ŋgòyuk yusə̀ Jisòs anə sə yə’rə, nə ye ŋgòlɛŋ Jisòs də nà’a mesə fa wo yiyaŋ awo zok zok sə̀ yà’ sə ya wo. Bʉ̀ʉ mok à ye fo’ sə̀ wo à tse’ yòŋsə̀ə ze’ sə̀ yà’ sə fa wo ŋgə’ fana Jisòs bɛ’fis fa wo yà’. ¹⁹Fana bʉ̀ʉ sə pwe’ sə lap mandzə̀ ŋgòjwɛ̀ yi, bʉ̀ʉsə̀ ŋàŋ ànə sə tesə ndzə ni’ì yi, nə sə mesə fa wo yiyaŋ awo.

²⁰Jisòs à kʉ̀k ŋgàa fàak ye, nə dʉk də, <<A rɛŋsi bohòŋgàa jìŋ wèŋ, bʉ̀ʉsə̀ tse’ gaŋ sə̀ Nwì nsàap bʉ̀ʉ yè’sə. ²¹A rɛŋsi bohòbʉ̀ʉ sə̀ njè sə ya weŋ ŋga’a, bʉ̀ʉsə̀ wèeŋ nə ze’ ntsə’mòk. A rɛŋsi bohòwèŋ sə̀ wèŋ sə wa ŋga’a bʉ̀ʉsə̀ wèeŋ nə̀ ywì ntsə’mòk. ²²A rɛŋsi bohòwèŋ sə̀ bwìiŋ nə bɛŋ weŋ, nə sə bɛ’ weŋ, nə yak weŋ, nə cep bum sə̀ bʉp bohòwèŋ bʉ̀ʉ mʉ̀ nə̀ mʉ mo ŋwè. ²³A ye ŋga wo gʉ̀ weŋ vɛ’nə, weŋ kwa, nə sə kaŋ dzeŋ, bʉ̀ʉsə̀ wèeŋ nə tse’ lə̀là’ mʉbu ŋkʉ̀ʉŋntɛ̀ŋ. Wèeŋ riŋ sə̀’ də, tàcicii bʉ̀ʉ yè’sə wèŋ ànə gʉ ŋgàa tsòhòbum Nwì wèŋ sə̀’ vɛ’nə.

²⁴<<Fana anə bʉp wesə bohòwèŋ ŋgàa ghàk vɛ’ɛ wùriŋ, bʉ̀ʉsə̀ wèŋ a yuk wes lʉ̀m ma njàwèŋ laŋ. ²⁵Anə bʉp bohòwèŋ sə̀ wèŋ cu ŋga’a zəze’, bʉ̀ʉsə̀ njèe nə yaŋ weŋ ntsə’mòk. Anə bʉp bohòwèŋ sə̀ wèŋ sə ywì ŋga’a, bʉ̀ʉsə̀ wèeŋ nə tɛ’ nə waŋ nùmbu mòk. ²⁶Anə bʉp bohòwèŋ sə̀ bwìŋ pwe’ sə gɛ̀ŋ to liŋ awèŋ bə̀boŋ, bʉ̀ʉsə̀ yà’a sə̀’ mʉmvə̀’nə̀ tàcici awo wèŋ à sə gɛ̀ŋ liŋ bʉ̀ ŋgàa mvwès sə̀ wo à dʉk də wo ŋgàa tsòhòbum Nwì sə̀’ vɛ’nə.

Dzəm Bʉ̀ʉ Sə̀ Wo Bɛ̀ŋgə̀ Wu

(Mat. 5:43-48, 7:1-5, 12)

²⁷<<Nə yeè nə də, mʉ̀ sə cèp bohòwèŋ sə̀ wèŋ sə yuk yusə̀ mʉ̀ sə cèp yè’e də, dzəm bʉ̀ʉ sə̀ wo sə bɛ̀ŋ weŋ, nə sə gʉ bə̀boŋ bohòbʉ̀ʉ sə̀ wo sə dzèeŋ weŋ. ²⁸Wèeŋ se bʉ̀ʉ sə̀ wo sə yak weŋ, nə lɛŋ fa bʉ̀ʉ sə̀ wo sə fa weŋ ŋgə’ pìriyà. ²⁹A ye-a ŋga ŋwə̀ nəmòk sam wu mbumbuk, wù tse’ fa yi mamòk yi ləp sə̀’. A ye-a ŋga ŋwə̀ nəmòk fep jə cə̀k yò, wù me’rə yi fep jəŋ cə̀k yònə̀ ndzə tsətsə’rə̀ sə̀’. ³⁰Fa ndàaŋwè pwe’ nə̀ yi lɛŋ yumok bohòwù. A ye-a ŋga ŋwə̀ nəmòk jə yumok sə̀ yà’a sə̀ yò, wù kà də wu fek yi ŋgòfa fəsə wu yà’ dʉk. ³¹Mʉmvə̀’nə̀ wù dzəm də bwìiŋ gʉ fa wu fana wù gʉ fa wo sə̀’ vɛ’nə.

³²<<A ye-a ŋga wù dzəm bʉ̀ʉ sə̀ wo sə dzəm wu, Nwìi nə kwasə wu bʉ̀ʉ yà? Bʉ̀ʉ sə̀ bʉp wèeŋ dzəmgə̀ sə̀’ bʉ̀ʉ sə̀ yà’ dzəm wo. ³³A ye-a ŋga wù gʉ̀ bə̀boŋ bohòŋwə̀ nə̀ yi gʉ̀gə̀ wu bə̀boŋ, Nwì se wu bʉ̀ʉ yà? Bʉ̀ʉ sə̀ bʉp gʉ̀gə̀ sə̀’ vɛ’nə. ³⁴A ye-a ŋga wù fòsə fa mègù bʉ̀ʉ sə̀ wo nə fòsə fa wu, Nwìi nə kwasə wu bʉ̀ʉ ya? Bʉ̀ʉ sə̀ bʉp wèeŋ fòsə fagə̀ bʉ̀ʉ sə̀ bʉp mok sə̀’, də ya wo nə tse’ fe’lə yà’ maŋkwɛ̀ŋ. ³⁵Wèeŋ dzəm lɛ bʉ̀ʉ sə̀ wo sə bɛ̀ŋ weŋ, nə gʉ wo bə̀boŋ. Fosə fa wo, nə kà yà’ fek fəsə̀. Ya wu nə tse’ lə̀là’ mʉbu ŋkʉ̀ʉŋntɛ̀ŋ, wù ye sə̀’ mo Tà Nwì nə̀ yi Nwì nə̀ ghaŋ nə. Nwìi gʉ̀gə̀ ye bə̀boŋ bohòbʉ̀ʉ sə̀ wo kà yi kwasəgə̀ nə ye bʉ̀ ŋgàa ŋkʉ̀ì’ wèŋ sə̀’. ³⁶Wèeŋ sə koksə manziŋ bohòbwìŋ mʉmvə̀’nə̀ Tɛ̀’ awèeŋ koksəgə̀ manziŋ sə̀’. ³⁷Fana kà də wèeŋ sak ŋwə̀ nəmòk dʉk, ya Nwìi kà weŋ sə̀’ sak. Wèeŋ kà ŋwə̀ nəmòk gʉ̀ bʉpsə̀ ya Nwìi kà weŋ bʉpsə̀. Swifa bwìŋ ya Nwì nə swifa weŋ sə̀’. ³⁸Fa, ya ŋga Nwìi nə fa wu sə̀’. Wo nə fa wu bo dak, ŋga wo bɛŋ yà’, nə tsərə be’lə mvwe’ mò’fis, mamòk kɛ’ɛ lo nze, wù kà mvwe’ nə̀ ŋgònə̀msə tse’. Mvə̀’nə̀ wù fʉk fa bwìŋ fana wo nə fʉk fa wu yòsə̀’ vɛ’nə.>>

³⁹Ànə geŋ fana Jisòs mak fa wo gbʉ’ mòk də, <<Kaco ŋgà ntwìlis niŋ fa ŋgà ntwìlis mok mandzə̀ yeŋ. A ye-a ŋga ŋgà ntwìlis nə gʉ vɛ’nə, wo nə gbʉ ni sə wʉrə̀ wo ba fo’. ⁴⁰Kaco mo nə̀ yi sə yə’rə fàk riŋ casə ŋwə̀ nə̀ nà’ sə yə’rə yi nə yeŋ. Yusə də, a ye-a ŋga ŋwə̀ nə̀ yi sə yə’rə fàk mèsə, yi nə riŋ kʉrə megu co ŋwə̀ nə̀ nà’ à yə’rə yi nə. ⁴¹Njo nə̀ wu kʉ̀kgə̀ mʉjep nə̀ jo nə̀ nà’ cu mʉ lisə̀ moma yo, nə swi də bɛ̀s tʉ nə̀ ghaŋ cu mʉ lisə̀ wùu yè’e bʉ̀ʉ yà? ⁴²Kènə aco wù dʉk fa to moma yo mòk də, <Tse’ vèsə lis ya mʉ fis fa wu mʉjep nə̀ mʉ lisə̀ wù> nà’a, ŋga wù sə kà ŋkwʉ̀ŋkwʉ̀ bɛ̀s tʉ nə̀ mʉ lisə̀ wù nà’a yə anə va? Wù ŋgà tè’èŋkup, fis to lɛ ntòjep nə̀ ghaŋ mʉ lisə̀ wù nà’a ŋkuŋ ya wu nə tse’ mandzə̀ nə̀ ŋgòyə rì nə̀ jo nə̀ nà’ cu mʉ lisə̀ moma yo nə.

Tʉ Bə Nto’o Ye

(Mat. 7:16-27; 12:33-35)

⁴³<<Kaco tʉ nə̀ bə̀boŋ zəm nto’ nə̀bʉp yeŋ, nə ye sə̀’ də, kaco tʉ nə̀ bʉp zəm nto’ nə̀ bə̀boŋ sə̀’ yeŋ. ⁴⁴Bwìiŋ nə riŋ tʉ bə nsàp nto’ nə̀ tʉ nə sə zəm. Kaco wù kwiŋ lèmu’ mʉnə ntwìnə̀nɛ’ yeŋ, nə ye də, kaco wù kwiŋ pià mʉnə tʉ nàk sə̀’ yeŋ. ⁴⁵Ŋwə̀ nə̀ bə̀boŋ cep fis kokgə̀ ncèp nə̀ bə̀boŋ bʉ̀ʉsə̀ ntʉm ye bə̀boŋ. Ŋwə̀ nə̀ bʉp cèp fis kokgə̀ ncèp nə̀ bʉp bʉ̀ʉsə̀ ntʉm ye bʉp. A vɛ’nə bʉ̀ʉsə̀ cùu ŋwèe cep fis mègù yusə̀ yà’ rwiŋ cu sə ntʉʉ̀ ŋgə̀ŋgàŋ.

⁴⁶<<Wèeŋ togə̀ mʉ də Tà, Tà, nə kà bum sə̀ mʉ̀ sə dʉk də wèeŋ gʉ gʉ̀ bʉ̀ʉ yà? ⁴⁷Ŋwə̀ nə̀ yi və̀-a bohòmʉ̀, nə yuk yusə̀ mʉ̀ sə cèep, nə noŋsə yà’, fana mʉ tsok fa weŋ nsàp ŋwə̀ nə̀ yi ye nə. ⁴⁸Yi co ŋwə̀ nə̀ yi dzəm ŋgòci ndap, yi tuŋ lo sə nze cəco, nə kə yeto kùmndap sə mʉnə lìs. Fana ndzəp rwiŋ, nə bwi’ ndap nə, nà’ kà tsòhò, bʉ̀ʉsə̀ yi a ci kùmndap nə bə̀boŋ. ⁴⁹Fana ŋwə̀ nə̀ yi yuk-a ncèp àm, nə kà yà’ nòŋsə̀, ye də yi co ŋwə̀ nə̀ yi à ci ndap ye sə nze wà, nə kà kùmndap bom. Fana ndzəp à rwi, nə bwi’ ndap nə, nà’ gbʉ ghà ànə. Ndap nə à gbʉ̀ nsàp nə̀ co wù kà cèp to.>>

Jisòs Bə Ŋkum Sojà Nə̀ Ŋwè Lakmvum

(Mat. 8:5-13)

¹À ye ŋga Jisòs cèp mèsə bum sə̀ yi à tse’ ŋgòcèep ŋga bʉ̀ʉ sə sə yuk fana yi lo mvwe’ lak Kàpanùm. ²Ŋkwà’ ŋwə̀ sojà mòk nə̀ mvwe’ lak Rumà à ye fo’ nə̀ yi à tse’ ŋkwɛ̀ŋ ye mòk nə̀ yi à dzəm nà’ vɛ’ɛ wùriŋ. Moŋkwɛ̀ŋ ye nə à sə ya vɛ’ɛ co yi kpʉ li. ³Ànə geŋ yi yuk nzu bum sə̀ Jisòs à sə gʉ̀ʉ, fana yi tum lo ŋkwàha bʉ̀ʉ Jus mok wèŋ də yà’a kə dʉk Jisòos və kə gʉŋsə ŋkwɛ̀ŋ ye nə. ⁴Wo à lòo, nə kə lɛŋ gbərə Jisòs. Wo dʉk fa yi də, <<Ŋwə̀ ènə kʉ̀rə̀ co wù tɛsə yi, ⁵bʉ̀ʉsə̀ yi dzəm bʉ̀ʉ lak avès ŋkʉ̀ʉŋntɛ̀ŋ, nə ci fa ves ndap pìriyà àvès sə̀’.>> ⁶Fana Jisòs bə yà’wèŋ lo. À kə̀ kʉəp və̀ mvwe’ ndap sojà nə, fana nà’ tumsə ŋge’ ye mok wèŋ də yà’a kə dʉk fa Jisòs də, <<Tà, kà də wu ye ŋgə’ ŋgwàŋ dʉk. Mʉ̀ ka kə̀kʉrə̀ co wù kə ni mʉ nda’à mʉ̀ yeŋ. ⁷Yà’a yusə̀ yà’ gʉ̀ ŋkuŋ mʉ̀ kà bohòwù mʉ̀ bə tu am və sə. Cèp mègù lɛ bə cù fana ya mofàk àm nə nə luŋ. ⁸Mʉ̀ rì vɛ’nə bʉ̀ʉsə̀ mʉ yè’sə ŋwə̀ nə̀ mʉ̀ tse’ ŋkwàha bʉ̀ʉ mok mantombìi mʉ̀ sə̀ mʉ̀ sə yuk bohòwo sə̀’. Sojàa mok cu sə̀ wo yukgə̀ bohòmʉ̀ sə̀’ yo. Aco mʉ̀ to mòk dʉk də, Və̀ə, yi və. Mʉ̀ dʉk fa mòk də, Lòfa’, yi geŋ. Nə dʉk fa mali mòk də, Gʉ yu yè’e, yi gʉ yà’.>> ⁹Jisòs à yuk vɛ’nə, fana yi mərə bohòŋkwà’ ŋwə̀ nə, nə dʉk fa bohòbʉ̀ʉ sə̀ wo à yù və̀ yi fo’ sə də, <<Mʉ̀ sə tsə̀’ fa weŋ də, a mègù-a sə̀ mʉtsətsə’rəə bʉ̀ʉ Izùrɛ ma, mʉ̀ ka ŋwə̀ nəmòk fo’ nə̀ yi tse’ nsàp dzədzəm nə̀ ŋkʉ̀ʉŋ ènə vɛ’nə ye yuk.>> ¹⁰Bʉ̀ʉ sə̀ ŋkwà’ŋwè sojà à tum sə à bwìŋ foho lòo, nə kə ye ŋga mo ye nə cu mok bə̀boŋ.

Jisòs Lòkoksə Mo Ŋwà Ŋgwemfə Mòk Mvwe’ Kpʉ

¹¹À ka sap fana Jisòs kə ni mvwe’ ntòlak mòk nə̀ wo to nà’ də Neèn. Ŋgàa fàk ye nə ye bʉ̀ʉ mok wèŋ ŋkʉ̀ʉŋ sə bɛ’ lòyi. ¹²Yi à kʉəp və̀ mvwe’ ncùu ŋka’ lak sə, fana yi ye ŋga wo sə bə̀k və̀ vèŋ ŋwə̀ nəmòk nə̀ ma ye à ye ŋwà ŋgwemfə. Ŋwà nè’nə à tse’ mègù mo nə̀ mò’fis ènə ŋga nà’a ŋwə̀mbam. Bwìŋ ŋkʉ̀ʉŋ à və̀ ŋgòtsəpsə yi. ¹³Tà Jisòs à yə ŋwà nə, nə koksə manziŋ bohònà’ nə dʉk fa nà’ də, <<Tsəp, kà wa.>> ¹⁴Yi lo, nə kə jwɛŋ ŋkùp nə̀ vèŋ ŋwə̀ nə cu ca nə. Bʉ̀ʉ sə̀ wo à sə bə̀k tse’ ŋkùp nə wèŋ à foho təəŋ, fana yi dʉk də, <<Wà’ŋwè, mʉ̀ sə cèp bohòwù də, yə̀ə nə lokok.>> ¹⁵Ŋwə̀ nə à lòkok cu mʉtsə̀, nə ye ŋgòcèp cù. Jisòs jəŋ yi, nə fa yi bohòma ye. ¹⁶Wʉə à ko bwìŋ pwe’ fana wo kuksə Nwì. Wo sə dʉk də, <<Ŋgà tsòhòbum Nwì mòk nə̀ ghaŋ tesə mʉtsətsə’rə vesùwèŋ laŋ. A yè’sə də Nwì a və̀ ŋgòtɛsə bʉ̀ʉ ye wèŋ.>> ¹⁷Nzu bum sə̀ Jisòs à gʉ̀ yè’sə à yuhu mvwe’ nzeŋgòŋ Jùdiyà nə ye lak sə̀ yà’ kʉəp Jùdiyà pwe’fo’.

Jon Tumsə Ŋgàa Fàak Ye ŊgòFek Jisòs Yumok

(Mat. 11:2-19)

¹⁸Ŋgàa fàak Jon wèŋ ànə yuk bum sə̀ Jisòs à sə gʉ̀ʉ fana wo və, nə tsok fa Jon. Jon to ŋgàa fàak ye mok ba, ¹⁹nə tum wo bohòTà Jisòs də wo kə fek nà’ də, <<Wu yà’sə ŋwə̀ nə̀ wo à dʉk də yi nə̀ və̀ə nə, kè vèes sə kʉk də yi cu ntòzok ɛ?>> ²⁰Wo kə̀ dzèŋ bohòJisòs, fana wo dʉk fa yi də, <<Jon ŋgà bàptɛsə̀ bwìŋ tum və̀ ves də vèes kə fek wu də, wu yè’sə ŋwə̀ nə̀ wo à dʉk də yi nə̀ və̀ə nə, kè vèes kʉk də yi cu ntòzok ɛ?>> ²¹À ye mègù sə̀’ mvə̀k ànə fana Jisòs gʉŋsə bʉ̀ ŋgàa yiyaŋ wèŋ ŋkʉ̀ʉŋntɛ̀ŋ, nə bɛ’fis ze’ ndzə ni’ì bwìŋ, nə muk lis bʉ̀ʉ sə̀ yà’ ànə loho sə̀’. ²²À kə̀ dzèeŋ fana Jisòs dʉk fa wo də, <<Wèeŋ du, nə kə tsok fa Jon yusə̀ wèŋ yuk, nə ye sə̀ wèŋ yə bə lis awèŋ. Bʉ̀ʉ sə̀ wo à loho lis wèŋ sə yə fe’lə bum sə̀mok, bʉ̀ʉ sə̀ wo ànə sə kà gìgə̀ sə gìi, ŋgàa kuturu wèŋ sə gʉŋ. Bʉ̀ʉ sə̀ wo à loho ntu’ wèŋ sə yuk fe’lə bum, mʉ̀ sə lòkoksə bwìŋ mvwe’ kpʉ, nə sə tsoho fa ŋgàa jìŋ wèŋ Ntirə̀ nə̀ Bə̀boŋ nə sə̀’. ²³Nə tsok ləsə fa yi də mʉ̀ dʉk də, rɛŋsi bohòŋwə̀ nə̀ yi ka məmərə̀ sə ntʉʉ̀ yi bʉ̀ʉ mʉ̀ tse’ lok.>>

²⁴Ghà nə̀ ŋgàa fàak Jon sə à bwì foho lòfana Jisòs ye ŋgòtsòho fa bʉ̀ʉ sə̀ fo’ bə liŋ Jon nə. Yi sə cep də, <<Wèŋ ànə lo ŋgəà fa’ ŋgòkə̀ ja’a yà? À ye ŋgòkə̀ ja’a ŋwə̀ nəmòk nə̀ yusə̀ bwìŋ cèep, yi sə dzəm kɛ’ gu yusə̀ wo sə cèep sə nduk à? Ka lɛ vɛ’nə yeŋ. ²⁵Ye də wèŋ ànə lo ŋgòkə̀ ye yè’sə yu yà lɛ? Ànə ye də wèeŋ kə ye ŋwə̀ nəmòk nə̀ yi à ni tse’ cə̀ək sə̀ bə̀boŋ à? Nə yeè nə sə̀’ də nsàp bʉ̀ʉ sə̀ wo nigə̀ cə̀ək sə̀ bə̀boŋ, nə sə zʉ ghàk awo yè’sə kà ŋgəà cugə̀. Wo cugə̀ ma mʉmvwe’ nto’o ŋkum wèŋ. ²⁶Ye də wèŋ ànə tesə lo yè’sə ŋgòyə yà? À ye ŋgòkə̀ yə ŋgà tsòhòbum Nwì à? Ŋ̀, a vɛ’nə zìnə, yi yam gha’ ŋgàa tsòhòbum Nwì nsàp nə̀ wèŋ rì yàwèŋ ànə laŋ. ²⁷Nà’a yi nə̀ wo à còm nòŋsə bum mok ndzənə ŋwàk Nwì bə liŋ ye nə. Wo à còm yusə̀ Nwì à cèp də,

<Nè’e masinjà àm,

mʉ nə tum gesə lo yi mantombìi wù

ŋgògʉ̀ fʉ̀hʉ tsə’rə fa wu mandzə̀.> >>

²⁸Fana Jisòs nə cep mali sə̀mok də, <<Mʉ̀ sə tsə̀’ weŋ də, bwe sə̀ wo à dzə wo sə nzeŋgòoŋ fɛŋ pwe’fo’, wo ka mòk nə̀ yi càsə Jon ntòdzə. Yi ye-a sə̀’ vɛ’nə fana ŋwə̀ nə̀ də yi jə’rə càsə gha’ mvwe’ gaŋ ŋkum Nwì yi nə yam ghak Jon nə.>>

²⁹Bʉ̀ ŋgàa ko tas bə bʉ̀ʉ sə̀ wo à ye fo’ pwe’ ànə rɛɛŋ bum yè’sə fana wo kwasə Nwì. Wo ànə kwasə Nwì də fàak sə̀ Jon à gʉ̀ʉ sə yà’a bə̀boŋ. Wo ànə ye bʉ̀ʉ sə̀ wo ànə baptɛsə bohòJon. ³⁰Fana bʉ̀ʉ Faràsi bə bʉ̀ ŋgàa yə’rə̀ fa bwìŋ lʉ̀k Nwì wèŋ à bɛ̀ŋ yusə̀ Nwì à fʉ̀hʉ noŋsə fa wo sə, bə mandzə̀ nə̀ də Jon kà wo baptɛsə.

³¹Jisòs dʉk də, <<Aco mʉ̀ fʉhʉ kok ŋgwì bʉ̀ʉ sə̀ niè’ yè’sə bə yà lɛ-o? Wo səsə yè’sə yà? ³²Wo yè’sə co bwe mok sə̀ wo tə mʉ ntɛɛ̀ŋ, nə sə dʉk fa ŋge’ awo də, <Vès yəm ŋkìi sə̀ wo fisgə̀ ŋwàŋwè fo’, wèŋ kà dzèŋ nə kà. Vès yəm ŋkìi kpʉ, wèŋ kà mbɛŋ sə̀’ kom lok.> ³³Mʉ̀ dʉk vɛ’nə bʉ̀ʉsə̀ Jon nə ànə və ye, yi kà rùk sə no, nə sə dzə zʉzʉ. Wèŋ à yə vɛ’nə, wèŋ də yi tse’ yòŋsə̀ ze’ ndzə ni’ì yi anə. ³⁴Mʉ̀ʉ Mo Ŋwè, mʉ̀ a və̀ yàm, mʉ̀ sə zʉ bɛŋ, nə sə no rùk sə̀’. Bwìŋ à yə vɛ’nə, wo dʉk də, <Wèeŋ ye ŋgà no jʉhʉ rùk bə tà zʉ bum, kà ze’ mòok nè’.> Wo to mʉ də ŋge’ ŋgàa gʉ̀ bʉp bə ŋgàa ko mbàam tas wèŋ. ³⁵Mègù də yumok kə̀ lə̀gə̀ ŋkuŋ bwìŋ riŋ də a bə̀boŋ kè bʉp àlɛ’.>>

Ŋwà Nəmòk Fè’lə Fa Jisòs Làmindà

³⁶Ŋwə̀ə Faràsi nəmòk à to Jisòs də nà’a və bə nà’a kə zʉ zʉzʉ mʉ nda’à yi, fana Jisòs lo mʉ nda’à yi anə, nə cum nze də bə yà’wèeŋ zʉ. ³⁷Ŋwà nəmòk nə̀ yi à ye ŋwà sàhà mvwe’ lak yà’sə yuk də Jisòs sə zʉ zʉzʉ mvwe’ ndap ŋwə̀ Faràsi anə. Yi jəŋ və ndo làmindà nə̀ wo ywigə̀ nà’ mbàm ŋkʉ̀ʉŋ, ³⁸nə kə təəŋ kok fʉ ŋkwɛ̀ŋ Jisòs mvwe’ kùu ye. Yi ye ŋgòwa, nə sə tsəp kùu Jisòs bə ndzəplis ye sə, nə sə yisə yà’ bə nʉ̀əmtu ye. Yi sə kum kùu Jisòs sə bə ŋgùpcù ye, ŋgònìtsə̀’ də yi sə wəp nà’, nə sə yok yà’ bə làmindàa sə.

³⁹Ŋwə̀ Faràsi nə̀ yi à to Jisòs nə ànə ye vɛ’nə fana yi dʉk sə və̀ə yi də, <<Ŋwə̀ ènə nə ye-a ŋgà tsòhòbum Nwì, bwɛ̀rɛ yi rì də ŋwà nə̀ nà’ sə jwɛ̀ŋ yi ènə ŋwà sàhà laŋ.>> ⁴⁰Jisòs to yi də, <<Saimʉ̀, mʉ̀ tse’ yumok ŋgòtsə̀’ fa wu.>> Saimʉ̀ fek bwi ye də, <<Cicà, yusə də yà?>> ⁴¹Jisòs də, <<Ŋgà samsə fa bwìŋ mbàm mòk à tse’ ŋgàa kəa ba. Yi sə bɛ’ ŋgà kəa mòk bàam mbàm tàŋ, nə bɛ’ megu mòk nə ncùhù hum tàŋ. ⁴²Wo kà yà’ là’ to, fana yi swi fa yà’ ba fo’. Bohòbʉ̀ʉ sə̀ ba yè’sə, anə dzəm ghak yi nə̀ fò?>> ⁴³Yi də, <<Mʉ̀ tsəm də, a ŋwə̀ nə̀ wo swifa yi mbàm ŋkʉ̀ʉŋ nà’a.>> Jisòs də, <<A zìnə.>> ⁴⁴Yi bʉʉŋ kʉk ŋwà nə, nə dʉk fa Saimʉ̀ də, <<Wù sə yə ŋwà nè’e nà? Mʉ̀ və̀ mʉ nda’à wù fɛn, wù kà mʉ ndzəp sə̀ wo cùkgə̀ kù bə zeŋ fa. Fana ŋwà nè’e cùk fa mʉ kùu sə bə ndzəplis ye, nə yisə fa mʉ yà’ bə nʉ̀əmtu ye. ⁴⁵Mvəsə̀ wo cèpsəgə̀ ŋwè, nə jwɛŋ yi bə ŋgùpcù yà’a, wù kà mʉ vɛ’nə sə̀’ cèpsə̀. Mvə̀’nə̀ yà’ yè yèe, yi ka ŋgòjwɛ̀ŋ kùu am bə ŋgùpcù ye teŋsə. ⁴⁶Wù ka tu am bə mve’ yok fana ŋwà nè’e yok kùu am bə làmindà. ⁴⁷Ye də mʉ̀ sə tsə̀’ wu də, bʉp sə̀ ŋwà nè’e à gʉ̀ yà’ ŋkʉ̀ʉŋ sə, wo swìfa yi yà’ laŋ. Yè’sə rɛɛŋ də a vɛ’nə bʉ̀ʉ nsàp dzədzəm nə̀ ŋkʉ̀ʉŋ nə̀ yi nìtsə̀’ ènə. Fana ŋwə̀ nə̀ wo swìfagə̀ yi momjo, nìtsə̀’gə̀ sə̀’ dzədzəm nə̀ momjo.>>

⁴⁸Fana Jisòs bʉʉŋ dʉk fa ŋwà nə də, <<Mʉ̀ swìfa wu bʉp yo laŋ.>> ⁴⁹Bʉ̀ʉ mok sə̀ wo à ye bə Jisòs wèŋ sə à yuk vɛ’nə fana wo sə cèp də, <<Nè’nə yè’sə ndà, nə̀ aco yi swifa ŋwè bʉp ye-ɛ?>> ⁵⁰Jisòs tsok fa ŋwà nə də, <<Mvə̀’nə̀ wù fa ntʉm yòbohòmʉ̀ fana yà’ fa wù lùŋ. Gèŋ bə̀boŋ.>>

Bə̀ba Sə̀ Wo À Sə Tɛsə Jisòs

¹À cu momjo fana Jisòs bə ŋgàa fàak ye sə̀ hum-ncòp-ba sə wèŋ à gìhi kɛ’ mʉmvwe’ buhu lak sə̀ yà’ à ye fo’ sə. Jisòs sə tsoho Ntirə̀ nə̀ Bə̀boŋ nə̀ nà’a bə gaŋ ŋkum Nwì. ²Fana bə̀ba səmok à sə gì bə Jisòs nə. Bə̀ba yè’sə, Jisòs ànə bɛ’fis fa wo yòŋsə̀ə ze’ ndzə ni’ì wo, nə mesə fa wo yiyaŋ awo sə̀’. Mòk à ye fo’ Mèri Màdàlinà nə̀ ze’ sàmba à tesə ndzə ni’ì yi nà’a. ³Mòk à ye Jòanà nə̀ yi à ye ŋgwe Cuzà, mofàk ŋkum Herò, nə̀ yi à sə kʉ̀kgə̀ lis bə ndap Herò. Sùsanà à ye sə̀’ fo’, bə bə̀ba səmok ŋkʉ̀ʉŋ. Wo à sə jə bum awo sə̀ wo tse’, nə sə tɛsə Jisòs bə ŋgàa fàak ye wèŋ bə zeŋ.

Gbʉ’ Ŋgà Bì Ŋgwìi Bum

(Mat. 13:1-23; Mak 4:1-20)

⁴Bwìŋ à sə və̀ bohòJisòs mvwe’ bòop lak zəzok, fana wo à kə̀ màa, Jisòs cèp bohòwo bə gbʉ’. ⁵Yi à cèp də, <<Ŋgà bì ŋgwìi bum mòk à lòŋgòkə̀ ŋwə̀ ŋgwìi bum ye. Mvə̀’nə̀ yi à sə ŋwə̀ yà’ fana ŋgwìi bum mok gbʉ sə mandzə̀. Bwìŋ sə nərə yà’ bə kù, fana swiŋ dzooŋ və, nə kə te’ zʉ lo yà’. ⁶Mok gbʉ mvwe’ lìs, nə to. Mvəsə̀ yà’ à sə kùu’, fana yà’ yum, bʉ̀ʉ jì ndzəp. ⁷Mok gbʉ mvwe’ ndik, nə kuk. Yà’ kuk bə ndik sə, fana ndik sə lim zə yà’, yà’ kpʉ. ⁸Mok gbʉ mvwe’ nze nə̀ bə̀boŋ, nə kuk, nə zəm ŋgwì co ŋkʉ̀ mò’fis.>> Jisòs ànə dʉk wes vɛ’nə fana yi cep torə fis bə ŋàŋ də, <<Ŋwə̀ nə̀ wù tse’-a ntu’ ŋgòyuk yusə̀ mʉ̀ cèp yè’sə, wù yuk.>>

Jisòs Tsə̀’ Rɛŋsə Gbʉ’ Nə

⁹Ànə geŋ ŋgàa fàak ye wèŋ fek yi də gbʉ’ ènə yè’sə dalɛ? ¹⁰Yi dʉk fa yà’ də, <<Nwì à gʉ̀ weŋ yàwèŋ ŋgòrì bum səmok bə gaŋ ye sə̀ yà’a sə̀swihì bohòbʉ̀ʉ səmok. Fana bʉ̀ʉ sə̀ wo yàwo sə mbiŋ, wo sə kʉk nə kʉk, nə kà bum sə yə, wo sə yuk nə kà rɛɛŋ.

¹¹<<Mbwè gbʉ’ nə nè’. Ŋgwìi bum sə ncèp nə̀ Nwì. ¹²Ŋgwìi bum sə̀ yà’ à gbʉ sə mandzə̀, a bʉ̀ʉ sə̀ wo a yuk ncèp Nwì, Satà və, nə kə jəŋ gɛsə ncèp nə sə ntʉʉ̀ wo, ya kà də wo dzəm ncèp nə, nə tse’ lùŋ dʉk. ¹³Mok sə̀ yà’ à gbʉ̀ mvwe’ lìs, a bʉ̀ʉ sə̀ wo yuk ncèp nə̀ Nwì, nə dzəm bə kwəkwa, fana nà’ kà ŋgàŋ sə ntʉʉ̀ wo sò. Yè’e bʉ̀ʉ sə̀ wo dzəmgə̀ mvə̀k momjo, ŋga mə̀mumsə̀ və̀ə fana wo gbʉ gɛsə lo fo’. ¹⁴Ŋgwìi bum mok sə̀ yà’ à gbʉ̀ mvwe’ ndik yà’a, a bʉ̀ʉ sə̀ wo yuk, wo cu fana bum nzeŋgòŋ lim te’lə tse’ ncèp nə. Bum nzeŋgòŋ sə, a bum sə̀ ŋwè sə tsərə ŋgògʉ̀ yà’ nùumbu pwe’, bə ntʉm nə̀ ŋgòtse’ ghàk, nə ye ntʉm nə̀ ŋgòyu’ lʉ̀ʉm sə̀ sənə nzeŋgònə. Yà’a bum sə̀ yà’ lim tè’lə tse’ ncèp nə fana nà’ kà kùk. ¹⁵Nə ye də, ŋgwìi bum sə̀ yà’ à gbʉ̀ yàwo mvwe’ nze nə̀ bə̀boŋ, a ntʉʉm bʉ̀ʉ sə̀ wo yuk ncèp Nwì, fana wo ko ntʉm, nə kotse’ yà’ cʉ̀k bə ntʉm nə̀ zìnə, nə zəm nto’.

Gbʉ’ Laàm

(Mak 4:21-25)

¹⁶<<Kaco ŋwè bwe’ lam, nə fə’ə lok nà’ sənə yumok yeŋ. Kaco yi tes nà’ sə mbwè kè sə̀’ yeŋ. Yi nə tes nà’ mʉnə dak, ya ŋga bwìŋ ni və̀ə, nà’ sə rɛɛŋ bohòwo. ¹⁷Yà’ cu sə̀’ də yumok sə̀ yà’a sə̀swihì, də yà’a nə kà kə̀ yəə̀ŋ ka yeŋ. Yumok sə̀ də wo fə’ə lok yà’ də bwìŋ nə kà yà’ jəja yəə bʉ̀ə̀. ¹⁸Ye də wèeŋ sə jəŋ ŋkərə̀ mvəsə̀ wèŋ sə yuk bum, bʉ̀ʉsə̀ ŋwə̀ nə̀ yi tse’-a yumok, Nwìi nə jo naaŋ fa fe’lə yi mok sə̀’ ya yi tse’ ŋkʉ̀ʉŋntɛ̀ŋ. Nə ye də ŋwə̀ nə̀ yi ka ye yumok tse’ fana Nwìi nə jəŋ gɛsə nə̀ momjo nə̀ yi tsəm də yi tse’ nə.>>

Jisòs Bə Ma Ye Nə Ye Bwema Ye

(Mat. 12:46-50; Mak 3:31-35)

¹⁹Ma Jisòs bə bwema ye wèŋ à və̀ ŋgòkə̀ yə yi, fana wo kà yi yə, bʉ̀ʉsə̀ bwìŋ à ye fo’ ŋkʉ̀ʉŋ. ²⁰Wo tsok fa Jisòs də, <<Ma yo bə bwema yo wèŋ tə sə mbiŋ, wo sə dzəm ŋgòyə wu.>> ²¹Jisòs dʉk fa wo də, <<Ma am bə bwema am wèeŋ bʉ̀ʉ sə̀ wo yuk ncèp Nwì, nə gʉ sə̀’ vɛ’nə.>>

Jisòs Gʉ̀ Fə̀fə̀ Nà’ Teŋsə

(Mat. 8:23-27; Mak 4:35-41)

²²Nùmbu mòk à ye Jisòs bə ŋgàa fàak ye ni sənə ŋgwes. Yi tsok fa yà’ də, <<Vesùwèeŋ to lo ndzə ŋgʉ ndzəp mamòk.>> Mvə̀’nə̀ wo à sə lòo, fana yi dzəm lo. ²³Wo à sə lòsə ŋgwesə̀ anə fana, fə̀fə̀ nə̀ bʉp tseŋ wo, nə sə ci rwiŋsə ŋgwes nə bə ndzəp, fana nà’ ye co nà’a nə cəəŋ. ²⁴Wo lo kə to yəmsə Jisòs, nə dʉk fa yi də, <<Tà, vesùwèŋ sə kpʉ yè’e kpʉ.>> Jisòs à lòkok mʉtsə̀, nə dʉk fa fə̀fə̀ nə dʉk də, <<Teŋsə, kà mok cà fe’lə̀,>> nə dʉk bohòndzəp sə̀’ dʉk də, <<Naaŋ yòsə̀’ gəe’.>> Fə̀fə̀ à dʉk gù dok, fana cì’i təəŋ fo’ mok wʉmm. ²⁵Fana yi fek yà’ də, <<Kaco wèŋ dzəmtse’ bohòmʉ̀ yeŋ yè’sə bʉ̀ʉ yà?>> Ŋgàa fàak ye wèŋ wəp, nə mərə də, <<Nè’e nsàp ŋwə̀ nə̀ fònə̀ yi cèep, fə̀fə̀ bə ndzəp pwe’ sə yuk yi-ɛ?>>

Jisòs Gʉŋsə Ŋwə̀ Nə̀ Yi Tse’ Yòŋsə̀ə Ze’

(Mat. 8:28-34; Mak 5:1-20)

²⁶Wo à to tesə lònto ndzəp ma nja, nə kə tesə və mvwe’ lak Gerasàn. Lak yè’sə yà’a ma ndzə nto ndzəp mvwe’ nze Galìli. ²⁷Jisòs tesə sənə ŋgwes nə, fana yi kʉrə bə ŋwə̀ nəmòk nə̀ yi tesə mvwe’ lak yà’sə ŋga nà’ tse’ yòŋsə̀ə ze’ ndzə ni’ì yi. À sàp ŋkʉ̀ʉŋntɛ̀ŋ ŋga ŋwə̀ ènə sə gì ni’ to, nə kà nda’à sə cu. Yi sə nooŋ kɛ’lo mvwe’ sə̀ wo tuuŋgə̀ bwìŋ. ²⁸Yi ànə ye Jisòs fana yi gbʉ tsoŋ sə nze ŋgʉ ni’ì nà’, nə sə waŋ furə fis də, <<Jisòs mo Nwì nə̀ ghaŋ, wù sə làp bohòmʉ̀ yà? Mʉ̀ lɛŋ wu də wu kà mʉ ŋgə’ fa.>> ²⁹Yi à dʉk vɛ’nə bʉ̀ʉsə̀ Jisòs à dʉk fa yòŋsə̀ ze’ nə də nà’a tesə ndzə ni’ì yi anə. Ze’ nə ànə sə ci’ kotse’ ŋwə̀ nà’nə kɛ̀’ ŋkʉ̀ʉŋntɛ̀ŋ fana wo à sə kì yi bo bə kù lòoŋfo’ bə kwaŋ nə sə kʉk yi, fana yi sə sòoŋ tirə yà’ pwe’ ze’ nə sə jamsə lo yi ŋgəà. ³⁰Jisòs fek yi də, <<Liŋ yoo ndà?>> Yi dʉk də, <<Liŋ aam Bòp.>> Yi dʉk vɛ’nə bʉ̀ʉsə̀ ze’ sə à ye ndzə ni’ì yi anə ŋkʉ̀ʉŋ. ³¹Ze’ sə lɛŋ Jisòs də nà’a kà wo sə mvwe’ wʉ sə̀ cəco8:31 Yè’e mvwe’ sə̀ yòŋsə̀ə ze’ nə̀ kə̀ lə̀ə. A mvwe’ sə̀ Tà Nwìi nə̀ kə̀ tʉ̀ksə wo. yà’a gèsə̀ lò. ³²Ŋgùnaaŋ mok à ye fo’ ŋkʉ̀ʉŋntɛ̀ŋ ŋga wo sə zʉ mvwe’ mbwè nda mòk fo’. Fana ze’ sə lɛŋ Jisòs də nà’a me’rə wo, wo kə ni ndzə ni’ì ŋgùnaaŋ sə. Jisòs dzəm fa wo. ³³Ze’ sə tesə ndzə ni’ì ŋgà’ nə, nə kə ni ndzə ni’ì ŋgùnaaŋ sə. Ŋgùnaaŋ sə à ca du’rə tsoŋ ndzə baàŋ anə, nə kə gbʉ kpʉ lo wes sənə ndzəp Galìli.

³⁴Bʉ̀ʉ sə̀ wo à sə gʉ̀msə ŋgùnaaŋ sə à carə lòo, nə kə tsoho fa bʉ̀ʉ sə̀ mvwe’ lak yà’sə pwe’. ³⁵Fana bwìŋ tesə və ŋgòkə̀ ja’a nsàp yu nə̀ nà’ gʉ̀ nə. Wo à və̀ bohòJisòs, nə ye ŋga ŋwə̀ nə̀ yi ànə tse’ yòŋsə̀ ze’ ndzə ni’ì yi nə ŋga yi cu kok ŋgʉ ŋki’ì Jisòs, nə ni tse’ cə̀k, nə cum fe’lə bə ŋkərə̀ ye bə̀boŋ làaŋ vɛ’. Fana wʉə ko wo nə̀bʉp. ³⁶Bʉ̀ʉ sə̀ wo à yə bum yè’sə à tsòho fa bʉ̀ʉ sə̀ wo à və̀ə yusə̀ Jisòs gʉ̀ bohòŋgà’ ànə. ³⁷Bʉ̀ʉ sə̀ mvwe’ ntòlak Gerasàn wèŋ à wəp vɛ’ɛ, nə dʉk fa Jisòs də nà’a lo gɛsə fo’. Yi ni ŋgwes, nə bwi foho lo yuye. ³⁸Ŋwə̀ nə̀ ze’ à tesə ndzə ni’ì yi nə à lɛŋ Jisòs də bə nà’a lo. ³⁹Jisòs à tum fəsə yi maŋkwɛ̀ŋ, nə tsok fa nà’ də, <<Dù la’à wù, nə kə tsok fa bwìŋ yusə̀ Nwì gʉ̀ bohòwù.>> Yi à lòo, nə kə tsok fa bwìŋ mʉ ntòlak pwe’ yusə̀ Jisòs gʉ̀ bohòyi sə.

Jisòs Gʉŋsə Ŋwà Nə̀ Nà’ Jwɛ̀ŋ Yi Cə̀k Nə Luŋsə Mo Jairòs

(Mat. 9:18-26; Mak 5:21-43)

⁴⁰Jisòs à to tə̀m nə, nə bwi foho və fana, bòp bʉ̀ nə̀ wo à ye fo’ nə à kwa ŋgòyə yi wùriŋ, bʉ̀ʉsə̀ wo à sə tək yi. ⁴¹Ŋwə̀ nəmòk à və̀ fo’ nə̀ wo to yi də Jairòs. Ŋwə̀ ànə ànə ye ŋkwà’ ŋwə̀ nəmòk mʉnə ndap pìriyà. Yi à yə Jisòs ntɛ̀ŋ, yi kə gbʉ nooŋ mantombìi nà’, nə lɛŋ nà’ də nà’a və mʉ ndà’à yi, ⁴²bʉ̀ʉsə̀ mo ye à ye mvə̀k kpʉkpʉ. Yi à tse’ mègù mo nə̀ mò’fis ànə ŋga nà’a ŋwàŋwè. Mo nə à ye lùumŋgòŋ hum-ncòp-ba. Jisòs à lòbə Jairòs nə fana bwìŋ yuŋ yi, nə sə bwi’lə yi nsàp nə̀ co ndùrə̀ to yi.

⁴³Ŋwà nəmòk à ye fo’ nə̀ ndʉəm à sə ca yi ndzə ni’ì mʉnə lùumŋgòŋ hum-ncòp-ba. Ŋwə̀ nə̀ ŋgòfa yi ncə̀p ŋga yà’a me kà ye. ⁴⁴Yi à nɛɛ və̀ fʉ ŋkwɛ̀ɛŋ Jisòs, nə jwɛŋ gesə cù cə̀k nà’ bə bo. Mvə̀’nə̀ yi à jwɛ̀ŋ gèsə nà’ ntɛ̀ŋ, ndʉəm sə teŋsə ŋgòca. ⁴⁵Jisòs fek də, <<Jwɛ̀ŋ mʉ ndà?>> Bwìŋ pwe’ à bɛ̀ɛŋ, fana Pità dʉk də, <<Masà, bwìŋ sə bwi’lə wu ma nə̀ fòpwe’.>> ⁴⁶Jisòs dʉk də, <<Ŋwə̀ nəmòk jwɛ̀ŋ mʉ laŋ. Mʉ̀ yuk ŋga ŋàŋ tesə ndzə ni’ì mʉ̀.>> ⁴⁷Ŋwà nə riŋ də kaco yi swihi yeŋ. Yi və, nə sə kaŋ, nə bʉhʉ mantombìi Jisòs, nə cep fis mvwe’ bwìŋ. Yi tsok fa nà’ njo nə̀ yi anə jwɛŋ cə̀k nà’ nə, də ndʉəm ye sə cì’i sə̀’. ⁴⁸Jisòs dʉk bohòmoŋwà nə də, <<Njɛ̀’gù, dzədzəm yònə̀ wù tse’ nə gʉŋsə wu laŋ. Dù, gèŋ bə̀boŋ.>>

⁴⁹Jisòs à sə dʉk də yi cep mesə bə ŋwà ènə ntɛ̀ŋ, ŋwə̀ nəmòk caŋ və ŋgòtsə̀’ fa Jairòs də mo nà’ nə kpʉ laŋ. Də nà’a kà cicà nə ŋgə’ mok ŋgwàŋ fa yiskok. ⁵⁰Jisòs ànə yuk vɛ’nə, yi dʉk də, <<Kà yumok wəp, tse’ megu yòdzədzəm fana mo ŋwà nə nə luŋ.>> ⁵¹Jisòs à kə̀ dzèŋ mvwe’ ndap nə, yi kà dzəm də ŋwə̀ nəmòok ni yuŋ lo yi mʉ nda’à anə dzəm. Yi à dzəm də a ni megu Pità bə Jon bə Jem, nə ye ma bə tɛ̀’ɛ mo nə. ⁵²Bwìŋ pwe’ à sə wa gùrə kpʉ mo nə. Jisòs dʉk fa wo də, <<Wèeŋ kà wa. Mo nə ka kpʉ, yi sə dzəmlo.>> ⁵³Bʉ̀ʉ sə à ywì’lə yi swee, bʉ̀ʉsə̀ wo à rì də mo nə kpʉ laŋ. ⁵⁴Jisòs ko mo ŋwà nə bo, nə dʉk də, <<Mweŋ, lòkok.>> ⁵⁵Yòŋsə̀ mo nə à bwìŋ foho və̀ sə̀mok, fana yi lokok kɛ̀’ mò’fis. Jisòs dʉk də wo fa mo nə bɛŋ ya yi zʉ. ⁵⁶Ma bə tɛ̀’ɛ mo nə à mərə wùriŋ. Jisòs dʉk fa wo də wo kà ŋwə̀ nəmòk tsə̀’ fa.

Jisòs Tum Bwe Fàak Ye Hum-ncòp-ba

(Mat. 10:5-15, 14:1-12; Mak 6:7-29)

¹Jisòs to benə ŋgàa fàak ye sə̀ hum-ncòp-ba, nə fa wo ŋàŋ ŋgòjùm fis yòŋsə̀ə ze’ pwe’ ndzə ni’ì bwìŋ, nə mesə fa bwìŋ yiyaŋ zəzok. ²Fana yi tum lo wo ŋgòtsòho lògaŋ ŋkum Nwì, nə mesə fa bwìŋ yiyaŋ. ³Yi tip wo dʉk də, <<Kà yumok bə gì nè’nə jə lo’: ntʉmbàŋ-è’, bàm-è’, zʉzʉ-è’, mbàm-è’, nə kà cə̀ək nini ba sə̀’ jə tse’. ⁴A ye-a ŋga ŋwə̀ nəmòk jəŋ weŋ co ŋkʉ̀ìŋ mʉ nda’à yi, fana wèŋ cum megu bə ndap ànə tè wèŋ me’rə ntòlak anə. ⁵A ye-a ŋga bʉ̀ʉ sə̀ bə ntòlak ànə ka weŋ mvwe’ ndap awo dzəm, mvə̀k nə̀ wèeŋ nə me’rə mvwe’ ànə, wèŋ kɛ’sə mak nəm mfə̀mfəə kùu awèŋ fo’ ŋgònì tsə̀’ də wo à ka weŋ fo’ dzəm.>>

⁶Fana ŋgàa fàak Jisòs sə à gì kɛ’cà bohòbwe buhu lak sə̀ fo’ sə pwe’, nə sə tsoho lo Ntirə̀ nə̀ Bə̀boŋ nə, nə sə gʉ mesə fa bwìŋ yiyaŋ awo pwe’.

⁷Ànə geŋ, Herònə̀ yi à sə sak Galìli yuk bum sə̀ Jisòs bə ŋgàa fàak ye à sə gʉ̀ yè’sə. Fana ŋkərə̀ jip yi vɛ’ɛ, bʉ̀ʉsə̀ bʉ̀ʉ səmok à sə cèp də, Jon ŋgà bàptɛsə̀ bwìŋ a tesə və̀ fe’lə mvwe’ kpʉ. ⁸Fana bʉ̀ʉ səmok sə dʉk kɛ’cà yàwo də yi Àlajà. Mok sə dʉk yàwo də ŋgà tsòhòbum Nwì mòk nə̀ taŋ a lòkok və̀ mvwe’ kpʉ. ⁹Ànə geŋ Heròdʉk də, <<Mʉ̀ ànə gwɛ’ cokfis tu Jon sə laŋ, ŋwə̀ nə̀ mʉ̀ sə yuk fe’lə nzu ye yè’sə ndà lɛ?>> Fana yi sə lap mandzə̀ ŋgòyə Jisòs nə.

Jisòs Fa Bwìŋ Ncùhù Tàŋ Zʉzʉ

(Mat. 14:13-21; Mak 6:30-44; Jon 6:1-14)

¹⁰Ŋgàa ntum Jisòs à bwìŋ və̀, nə kə tsoho fa Jisòs yusə̀ wo gʉ̀ʉ. Fana yi jəŋ wo, nə lo mvwe’ buk lak mòk nə̀ wo to fo’ də Bèsadà. ¹¹Mvə̀’nə̀ bwìŋ à rì də wo à sə lòsə, wo tesə mvwe’ buhu lak sə̀ yà’ kʉəp fo’, nə yuŋ lo wo bə kù. Yi dʉk fa wo də wo və bə̀boŋ, nə ye ŋgòyə’rə wo bum bə gaŋ ŋkum Nwì. Yi sə mesə fa bʉ̀ʉ sə̀ wo tse’ yiyaŋ yiyaŋ awo sə̀’.

¹²Mvə̀k à càa, ŋgàa fàak ye və bohòyi, nə dʉk də, <<Tà, tumsə bʉ̀ʉ yè’sə wo lo mvwe’ buhu lak nə ye nzum yà’a, ya wo lap yumok ŋgòzʉ, nə lap mvwe’ nòòŋ sə̀’. Bʉsə̀ ka fɛɛŋ la’à yeŋ.>> ¹³Yi dʉk fa wo dʉk də, <<Wèeŋ kʉk fa wo yumok wo zʉ.>> Wo də, <<Vès tse’ mègù ntuhu brɛd tàŋ, nə ye fuk ba. Wù dzəm də vèes lo kə bʉpsə mbàm ŋkʉ̀ʉŋ, nə ywiŋ bɛŋ ŋgòfa wo à?>>¹⁴À ye ŋga bʉ̀ʉ sə̀ wo cu fo’ à ye mbəmbam ncùhù tàŋ. Jisòs dʉk fa ŋgàa fàak ye də, <<Cumsə bʉ̀ʉ sə sə nze bə bòp zəzok hum tàŋ, hum tàŋ.>> ¹⁵Fana wo cumsə bʉ̀ʉ sə sə nze bə bòp vɛ’nə. ¹⁶Fana Jisòs jəŋ ntuhu brɛd sə̀ tàŋ, nə ye fuk sə̀ ba sə. Yi kʉk gesə lis mʉbu, nə kwasə Nwì, nə bə’rə brɛɛd sə, nə fa ŋgàa fàak ye də yà’a gap fa bʉ̀ʉ sə. ¹⁷Wo à zʉ wo pwe’, nə ze’ bə̀boŋ. Wo te’e benə sə̀ yà’ à bwehe cu sə kwès hum-ncòp-ba.

Jisòs Tsə̀’ Fa Bwe Ye Bum Sə̀ Yà’a Nə Gʉ Yi

(Mat. 16:13-28; Mak 8:27-9:1)

¹⁸Ànə ye mvə̀k nəmòk ŋga Jisòs cu mègù bə ŋgàa fàak ye fana yi sə gʉ pìriyà. Yi fek wo də, <<Bwìŋ dʉkgə̀ də mʉ yè’sə ndà?>> ¹⁹Wo dʉk fəsə fa yi də, <<Bʉ̀ʉ mok dʉkgə̀ də, wu Jon ŋgà bàptɛsə̀ bwìŋ. Mok dʉk də wu Àlajà, mok dʉk də wu ŋgà tsòhòbum Nwì mòk nə̀ yi à lòkok və̀ mvwe’ kpʉ.>> ²⁰Fana Jisòs fek wo də, <<Wèŋ yàwèŋ nɛ? Wèeŋ dʉkgə̀ yàwèŋ də mʉ yè’sə ndà?>> Fana Pità cep fəsə fa yi də, <<Wu Ŋkum ŋgà gèm bwìŋ nə̀ Nwì ànə dʉk də yi nə tum vèsə nə.>>

²¹Fana Jisòs tipsə wo bə ŋàŋ də wo kà ŋwə̀ nəmòk tsə̀’ fa lok. ²²Nə tsok fa yà’wèŋ də, <<Mʉ̀ nə̀ mʉ mo ŋwè, mʉ nə ye ŋgə’ ŋkʉ̀ʉŋntɛ̀ŋ. Fana ŋkwàha bwìŋ bə ŋgàa fa satikà’ sə̀ ghaŋ, nə ye bə bʉ̀ʉ sə̀ wo yə’rəgə̀ lʉ̀ʉk Nwìi nə bɛŋ mʉ. Wo nə zə mʉ, fana nùmbu nə̀ tɛ’ ye, mʉ lokok mvwe’ kpʉ.>>

²³Fana yi dʉk fa bwìŋ də, <<A ye-a ŋga ŋwə̀ nəmòk dzəm-a ŋgòyù lòmʉ, fana yi nə bɛŋ to ntòbum sə̀ ni’ ye sə dzəm yà’, nə bək jəŋ ntə̀əŋ ye nùumbu pwe’ ŋkuŋ nə bɛ’ və mʉ. ²⁴Bʉsə̀ ŋwə̀ nə̀ yi gəhə tse’-a yòŋsə̀ ye fana nà’a nə bisə wà. Nə ye də ŋwə̀ nə̀ yi jə yòŋsə̀ ye co yusə̀ wà bʉ̀ʉ mʉ̀ fana yi nə kə tse’ nà’. ²⁵Swe’e sə̀ ŋwèe nə tse’ yà, ŋga yi tse’-a nzeŋgòŋ nə pwe’fo’, nə kə bisə tu ye ɛ? ²⁶Ŋwə̀ nə̀ yi koksə-a marè’tu bohòmʉ̀ nə ye ncèp àm, mʉ̀ nə̀ mʉ mo ŋwè fana ghà nə̀ mʉ bwì və̀ bə ŋàaŋ sə̀ tɛ̀’ am fa mʉ, nə ye bə ŋàaŋ sə̀ Tɛ̀’ nə, bə ŋàaŋ masinjàa Nwì sə̀ rərɛŋ fana, mʉ̀ koksə marè’tu bohòyi sə̀’. ²⁷Nə yeè nə də, mʉ̀ sə tsə̀’ fa weŋ ŋkèm dʉk də, bʉ̀ʉ mok tə fɛɛŋ sə̀ wo nə kà kpʉ tə̀tè wo ye gaŋ sə̀ Nwì ŋga yà’ sə sak sənə nzeŋgòŋ nə.>>

Jisòs Kupsə Nsəsə̀ Mʉ Ndahà

(Mat. 17:1-8; Mak 9:2-8)

²⁸À cà co nùumbu fwame’, fana Jisòs to jəŋ Pità, bə Jem nə ye Jon, bə yà’wèŋ kok lo mʉmvwe’ nda mòk ŋgògʉ̀ pìriyà. ²⁹Mvə̀’nə̀ yi à sə lɛŋ Nwì fana nsəsə̀ ye kupsə bʉ̀ʉ nsàp mok nə̀ zok, fana cə̀ək sə̀ yi ni tse’ mʉ ni’ì yi à bʉ̀ʉŋ fəfop tap tap. ³⁰Wo ye Àlajà bə Musì ŋga wo tesə və̀ mʉbu, bə Jisòs wèŋ sə taaŋ ŋgàm. ³¹Bʉ̀ʉ yè’sə à tse’ nsàap nsəsə̀ə sə̀ co marɛŋ. Wo à sə cèp bə mvə̀’nə̀ yi kʉəp ŋgògʉ̀ yusə̀ Nwì ànə dzəm, də yi nə lo mvwe’ lak Jòrosalèm, nə kpʉ. ³²À ye ŋga Pità wèŋ sə dzəmlo. Ànə geŋ, wo lokok, nə ye Jisòs bə bʉ̀ʉ sə̀ ba yè’sə ŋga wo tə fo’, ŋga nsəsə̀ ye kupsə vɛ’nə. ³³Bʉ̀ʉ sə̀ ba yè’sə à yè ŋgòlòo, Pità dʉk fa Jisòs dʉk də, <<Cicà, yà’ bòvɛ’ɛ wùriŋ mvə̀’nə̀ vesùwèeŋ fɛnə yè’sə. A ci ba’rə tes bwe duŋ fɛɛŋ tɛ’, mò’fis nə̀ njò, mòk nə̀ Musì, mòk nə̀ Àlajà.>> Yi ànə cep tsoŋ gù yè’sə, nə kà yusə̀ yi sə cèp rì. ³⁴Mvə̀’nə̀ yi à sə cèep, mbàk və kə təhə lok wo, fana wʉə ko wo. ³⁵Fana wo yuk ŋga ŋgì mòk cèp vesə ndzənə mbàk nə dʉk də, <<Nè’e mo àm, mʉ̀ a cok fis yi. Yusə̀ yi cèp pwe’, wèeŋ yuk yi.>> ³⁶Wo à yuk ŋgì ènə vɛ’nə, wo kʉ̀ksə kɛ’, nə kà ŋwə̀ nəmòk nə̀ zok yə, wo ye megu Jisòs yiìyi. Wo à sə kà bwìŋ yusə̀ wo à yə yà’sə ghà ànə tsòhòfa.

Jisòs Tɛsə Mo Nəmòk Nə̀ Yi Tse’ Yòŋsə̀ Ze’

(Mat. 17:14-23; Mak 9:14-32)

³⁷Tsok à rɛŋ, wo à bwi və̀ə, bwìŋ wùriŋ kə̀ tseŋ yi. ³⁸Ŋwə̀ nəmòk cèp vèsə mʉtsətsə’rə bʉ̀ʉ sə də, <<Cicà, kwəkwè’, kə kʉk mo àm nə̀ mʉ̀ tse’ mègù yi. ³⁹Yi tse’ yòŋsə̀ ze’ ndzə ni’ì yi, nə̀ nà’a kogə̀ yi. Nà’a ko yi, yi sə waŋ nə̀bʉp, fana ni’ gʉrə yi njʉk njʉk tè sə dùk yi kə̀ cùhu. Nà’ sə sərə yi nə kà ŋgòmè’rə yi dzəm. ⁴⁰Mʉ̀ dʉk ŋgàa fàak yo də wo bɛ’ fis nà’, fana wo ka nà’ bɛ’ fis to.>> ⁴¹Jisòs dʉk fa wo də, <<Ja’a na mvəsə̀ wèeŋ yè’sə gʉgʉtu, wèŋ ka dzədzəm sə ntʉʉ̀ wèŋ nə̀ co wèŋ gʉŋsə ŋwè fo’ tse’ ɛ̀. Mʉ nə cum geŋ vesùwèŋ, nə sə ko ntʉm vɛ’nə kə dzeŋ sèŋ? Jəŋ və fa mʉ mo yònə fɛn.>> ⁴²Mvə̀’nə̀ wo à sə jə və̀ mo nə, yòŋsə̀ ze’ nə ko yi, fana ni’ gʉrə wes yi njək njək. Jisòs jwa yòŋsə̀ ànə, nə gʉŋsə mo nə, nə fa nà’ bohòtɛ̀’ ye nə. ⁴³Bwìŋ pwe’ à mərə bə ŋàaŋ Nwì sə̀ wo à yə sə.

Mvə̀’nə̀ wo à sə mərə vɛ’nə, Jisòs dʉk fa ŋgàa fàak ye wèŋ də, ⁴⁴<<Yuk yusə̀ mʉ nə tsok fa weŋ bə̀boŋ. Wo nə fa mʉ̀ʉ mo ŋwè ndzə bohòbʉ̀ʉ mok.>> ⁴⁵Bwe sə à ka bə yusə̀ yi à cèp yè’sə rɛɛŋ. Yà’ ànə ye bohòwo sə̀swihì ya wo kà bə zeŋ rɛɛ̀ŋ, fana wo sə koksə wʉə ŋgòfek rɛŋsə.

Ŋwə̀ Nə̀ Ghaŋ Ndà?

(Mat. 18:1-5; Mak 9:33-40)

⁴⁶À ye ŋga’a ŋga wo yè ŋgòfenə də ŋwə̀ nə̀ ghaŋ mʉtsətsə’rə wo ndà lɛ. ⁴⁷Jisòs à rì yusə̀ wo à sə tsərə sə ntʉʉ̀ wo bə ncèp ènə, fana yi ko lòkoksə tes mo nəmòk də nà’a kə təəŋ ŋgʉ ni’ì yi. ⁴⁸Fana yi dʉk fa wo də, <<Ŋwə̀ nə̀ yi jə-a nsàp mo nè’nə mʉnə liŋ am, fana ye də yi jə yà’sə mʉ̀. Ŋwə̀ nə̀ yi jə-a mʉ, nə dʉk <Və̀ bə̀boŋ>, fana ye də yi sə dʉk bohòŋwə̀ nə̀ yi à tum mʉ nə sə̀’. Mʉ̀ sə dʉk yè’sə də ŋwə̀ nə̀ yi maŋkwɛ̀ŋ bohòwèŋ pwe’, yi ŋwə̀ nə̀ yi nə̀ mantombì yi.>>

⁴⁹Jon à cèp bohòJisòs də, <<Cicà, vès yə ŋwə̀ nəmòk ŋga yi bɛ’ fis ze’ mʉnə liŋ yò. Fana vès dʉk yi də yi teŋsə, bʉ̀ʉsə̀ yi ka mòk mʉtsətsə’rə̀ə vès yeŋ.>> ⁵⁰Jisòs dʉk ye də, <<Kà də wu gʉ co yi teŋsə dʉk, bʉ̀ʉsə̀ ŋwə̀ nə̀ yi ka weŋ bɛŋ, ye də yi cu venəwèŋ.>>

Bʉ̀ʉ Sə̀ Mvwe’ Lak Sàmàriyà Mok à Bɛ̀ŋ Jisòs

⁵¹Mvə̀k ànə kʉrə də Jisòs nə kpʉ ya yi lo mʉbu, yi ko ntʉm, nə lokok bɛ’ lo mandzə̀ nə̀ nà’ lo Jòrosalèm. ⁵²Yi tum lo masinjàa mok mantombì də wo lo mvwe’ ntòlak Sàmariyà, nə kə gʉ tsə’rə fa yi bum pwe’ ŋkuŋ yi və. ⁵³Bʉ̀ʉ Sàmàriyà wèŋ bɛŋ də nà’a kà fo’ nooŋ, bʉ̀ʉsə̀ wo à yə də yi sə cà lòJòrosalèm.9:53 Bʉ̀ʉ Sàmariyà wèŋ à sə tsəm də mvwe’ sə̀ zìnə sə̀ ŋgòkùksə Nwì fo’ sə mvwe’ nda mòk nə̀ wo togə̀ nà’ də Gerazìm. Bʉ̀ʉ Jus wèŋ dʉk yàwo də a Jòrosalèm, fana yà’a yusə̀ yà’ gʉ ŋkuŋ wo kà ŋwə̀ nə̀ yi sə cà lòye Jòrosalèm tɛsə̀ sə.⁵⁴Jon bə Jem à yə vɛ’nə, fana wo dʉk də, <<Tà, wù dzəm də vèes lɛŋ pìriyà ya ŋga Nwìi tumsə tsoŋ mis mʉbu ŋgòkə̀ tɛ̀ŋ səsə bʉ̀ʉ yè’sə à?>> ⁵⁵Jisòs bʉʉŋ kʉk ja’a wo, nə jwa wo, nə dʉk də, <<Wèŋ ka nsàp yòŋsə̀ nə̀ wèŋ sə cèp bə zeŋ ànə riŋ. Mʉ̀ nə̀ mʉ mo ŋwè, mʉ̀ a ka ŋgòbʉpsə yòŋsə̀ ŋwè və, mʉ̀ a və̀ ŋgòlùŋsə wo lùŋsə.9:55 Ŋwàak mok sə̀ zəm cu sə̀ wo à ka ŋgo ncèp ènə nja gesə: nə dʉk də, <<Wèŋ ka nsàp yòŋsə̀ nə̀ wèŋ sə cèp bə zeŋ ànə riŋ. Mʉ̀ nə̀ mʉ mo ŋwè, mʉ̀ a ka ŋgòbʉpsə yòŋsə̀ ŋwè və, mʉ̀ a və̀ ŋgòlùŋsə wo lùŋsə.>>>> ⁵⁶Ànə geŋ, wo lokok, nə lo mvwe’ ntòlak nəmòk.

ŊgòBɛ’ LòJisòos Gʉgʉŋ

(Mat. 8:19-22)

⁵⁷Wo à sə lòmandzə̀ fana, ŋwə̀ nəmòk cep bohòJisòs də, <<Mʉ̀ dzəm də mʉ nə bɛ’lo wu ma nə̀ fòpwe’ nə̀ wù sə lòo.>> ⁵⁸Jisòs tsok fa yi də, <<Còp wèŋ tse’ mvòk co wo cum ca, swiŋ wèŋ tse’ ndap awo, fana mʉ̀ʉ mo ŋwè mʉ̀ ka mvwe’ sə̀ co mʉ noŋsə tsoŋ tu am, nə nooŋ yoŋsə tse’.>>

⁵⁹Jisòs dʉk bohòŋwə̀ nəmòk də, <<Mʉ̀ dzəm də vesùwèeŋ lo, nə fak mvwe’ mò’fis.>> Ŋwə̀ ènə dʉk də, <<Tà, mʉ foho lo-a maŋkwɛ̀ŋ, nə kə tuuŋ tɛ̀’làm ŋkuŋ-ɛ̀.>> ⁶⁰Jisòs tsok fa yi də, <<Me’rə bʉ̀ʉ sə̀ wo kpʉ laŋ tuuŋ bʉ̀ kpʉkpʉ awo. Bohòwù yò, dù nə kə tsok ncèp nə də ŋkum Nwì nə yè ŋgòsak sə nzeŋgòŋ laŋ.>>

⁶¹Ŋwə̀ nəmòk à yə Jisòs, yi dʉk də, <<Mʉ nə bɛ’ wu Tà, fana mʉ̀ sə fek wu də mʉ lo, nə tsok fa bʉ̀ʉ am də wo cum bə̀boŋ.>> ⁶²Jisòs tsok fa ŋwə̀ ènə də, <<A ye-a ŋga ŋwè yèto ŋgòfàk bohòNwì, nə sə kʉk lis maŋkwɛ̀ŋ, ye də yi ka kə̀kʉrə̀ ŋgòcu mvwe’ gaŋ ŋkum Nwì yeŋ.>>

Jisòs Tumsə LòBwìŋ Hum Sàmba-Ncòp-Ba

¹Yà’sə ànə ca wes fana Tà Jisòs cokfis bwìŋ hum sàmba-ncòp-ba, nə tumsə lo yà’wèŋ ba, ba. Yi à tumsə lòwo ŋgòlòmvwe’ buhu lak, nə ye bə mvwe’ sə̀ yi nə sə və fo’ sə pwe’fo’. ²Yi dʉk fa yà’wèŋ dʉk də, <<Nzum sə̀ ŋgòkʉp sə ŋkʉ̀ʉŋntɛ̀ŋ fana bʉ̀ʉ sə̀ ŋgòfàk fo’ sə momjo wùriŋ. Ye də wèeŋ lɛŋ bohòTà ŋgà nzum nə də ya yi tumsə ŋgàa fàk wèŋ, ŋgòkə̀ kʉp nzum ye sə. ³Yeè, wèeŋ du, mʉ̀ tumsə lòweŋ co nsùŋgaŋ mʉtsətsə’rəə furùk wèŋ. ⁴Ŋwèe kà posà jə, kà bàm jə, kà kùuŋgùp sə̀’ jə; nə kà ŋwè mandzə̀ sə̀’ cèpsə̀ lok. ⁵Ndap nə̀ wèŋ ni mbwa pwe’fo’, wèŋ cepsə wo də, <Fifi ye bohòndap ènə!> ⁶Wèeŋ dʉk vɛ’nə fana a ye-a ŋga ŋwə̀ ŋgà fifi mbwa fana fifi àwèŋ nə, nə ye bohòyi. A ye-a ŋga ŋwə̀ nə̀ vɛ’nə nə mbwa bʉ̀ə̀ fana fifi àwèŋ nə bwi foho və bohòwèŋ. ⁷Cum megu mʉmvwe’ ndap ànə, nə sə zʉ, nə sə no yusə̀ wo fa weŋ, bʉ̀ʉsə̀ ŋwèe fak laŋ, wo lak yi. Kà dʉk də wèeŋ coho nooŋ kupsə kɛ’ca ndap dʉk. ⁸A ye ŋga wèŋ kə̀ ni mvwe’ ntòlak mòk, wo jəŋ weŋ fo’ co bwìŋ fana wèŋ zʉ nsàp yu nə̀ wo fa weŋ lòoŋ fo’. ⁹Wèeŋ gʉŋsə ŋgàa yiyaŋ sə̀ wo cu mvwe’ lak yà’sə wèŋ, nə dʉk fa bʉ̀ʉ sə̀ fo’ sə wèŋ dʉk də, <Gaŋ ŋkum sə̀ Nwì sə yà’ kʉəp və̀ bohòwèŋ laŋ.> ¹⁰A ye-a ŋga wèŋ kə̀ ni mvwe’ ntòlak nə̀ wo ka wèŋ də wèeŋ və bə̀boŋ dʉk fa fana wèŋ sə gihi kɛ’ mvwe’ mandzə̀ə sə̀ mʉ ntòlak anə sə, nə sə cep dʉk də, ¹¹<A megu-a sə̀ mfə̀mfəə sə̀ yà’ ko kùu avès mvwe’ lak awèŋ yà’sə fana vès kɛ̀’sə nòŋsə yà’, yà’ sə kʉk weŋ. Wèeŋ riŋtse’ də gaŋ ŋkum sə̀ Nwì sə yà’ kʉəp və̀ weŋ laŋ.> ¹²Mʉ tsok fa weŋ də, nùmbu nə̀ wo sak nzeŋgònə fana anə boŋ ghak bohòlak Sodòm nə noŋsə nsàp lak ànə.

¹³<<Wèŋ bʉ̀ʉ Corazì, wèŋ cu bʉp! Wèŋ bʉ̀ʉ Bèsadà, wèŋ cu sə̀’ bʉp! A vɛ’nə bʉ̀ʉsə̀ nsàap bum maŋgəŋgèeŋ sə̀ wo a gʉ̀ tsə̀’ fa weŋ yà’a, wo ànə gʉ tsok fa-a yà’ bohòbʉ̀ʉ Tayà bə Sidòŋ wèŋ bwɛ̀rɛ də wo a kupsə, nə bwi fa bʉp awo ŋkwɛ̀ŋ tè, nə ni tse’ gàa cə̀k, nə yok və. ¹⁴Nùmbu nə̀ wo nə sak nzeŋgòŋ fana anə boŋ ghak bohòbʉ̀ʉ Tayà bə Sidòŋ nə noŋsə weŋ. ¹⁵Wèŋ bʉ̀ʉ Kàpanùm, wèŋ a sə nɛ̀ni’ co wèŋ də wèeŋ kok lo mʉbu à? Wèeŋ nə lo tsətsoŋ mvwe’ ŋgə’ vɛ’ɛ bòŋ.

¹⁶<<Ŋwə̀ nə̀ yi yuk-a weŋ, ye də yi yuk mʉ. Ŋwə̀ nə̀ yi dzeeŋ-a weŋ, ye də yi dzèeŋ mʉ; nə ye də ŋwə̀ nə̀ yi dzeeŋ-a mʉ, ye də ŋgə̀ŋgàŋ dzèeŋ ŋwə̀ nə̀ yi a tum və̀ mʉ nə.>>

Bʉ̀ʉ Sə̀ Hum Sàmba-Ncòp-Ba Sə Wèŋ Bwìŋ Və̀ə

(Mat. 11:25-27; 13:16-17)

¹⁷Bʉ̀ʉ sə̀ hum sàmba-ncòp-ba sə wèŋ à bwìŋ və̀ bə kwəkwa. Wo à dʉk də, <<Tà, yòŋsə̀ə ze’ wèŋ ye bohòvès yusə̀ wà bʉ̀ʉ liŋ yo.>> ¹⁸Yi dʉk fa yà’wèŋ dʉk də, <<Mʉ̀ yə Satà ŋga yi sə gbʉ̀ tsə mʉbu co mbʉ̀ŋ sə ba’a tsə yi. ¹⁹Yeè, mʉ̀ a fa weŋ ŋàŋ ŋgògì cà mʉnə no bə ŋgam wèŋ, nə ye ŋàŋ ŋgògha’ ŋàaŋ sə̀ bʉ̀ʉ sə̀ wo bɛ̀ŋgə̀ weŋ tse’ yà’ pwe’fo’. Kaco yumok gʉ lok weŋ yeŋ.²⁰Nə yeè nə də kà də wèeŋ sə kwa də bʉ̀ʉsə̀ ze’ wèŋ sə wəp weŋ dʉk, wèeŋ kwa lɛ bʉ̀ʉsə̀ də wo còm nòŋsə liŋ awèŋ mʉbu.>>

²¹Ghà ànə à ye, Yòŋsə̀ nə̀ Rərɛŋ nə gʉ Jisòs yi rwiŋ bə kwəkwa fana yi cep dʉk də, <<Mʉ̀ kwasə wu tɛ̀’, nə̀ wu Tà mʉbu bə sə nze nə, bʉ̀ʉsə̀ wù a swìhi gɛsə bum yè’sə bohòŋgàa ŋkərə̀ wèŋ, nə niŋ fa yà’ bohòbwe sə̀ lʉə wèŋ. A zìnə Tɛ̀’, wù a gʉ̀ yè’sə mʉmvə̀’nə̀ yà’ a bòkok wu sə və̀ə wù vɛ’nə. ²²Tɛ̀’ am a fa wes mʉ bum pwe’fo’. Ŋwə̀ nəmòk ka mwe nə riŋ, rì mègù yi Tɛ̀’ nə. Ŋwə̀ nəmòk ka Tɛ̀’ nə sə̀’ riŋ, rì mègù yi mwe nə, nə ye bʉ̀ʉ sə̀ mwe nə dzəm də yi niŋ tsok fa yà’wèŋ sə.>>

²³Ànə geŋ yi bʉʉŋ dʉk swihi fa ŋgàa fàak ye sə wèŋ dʉk də, <<A rɛŋsi bohòŋwə̀ nə̀ yi yə bum sə̀ wèŋ sə yə yè’sə! ²⁴Mʉ tsok weŋ də ŋgàa tsòhòbum Nwì wèŋ, nə ye bə bʉ̀ ŋkəŋkum wèeŋ ŋkʉ̀ʉŋntɛ̀ŋ sə̀ wo a dzəm ŋgòyə bum sə̀ wèŋ yə yè’sə, nə kà mandzə̀ nə tse’. Wo dzəm ŋgòyuk bum sə̀ wèŋ sə yuk yè’sə, nə kà yà’ sə̀’ yuk.>>

Gbʉ’ Ŋwə̀ə Sàmàriyà Nə̀ Bə̀boŋ Nə

²⁵Ŋgà yə’rə̀ fa bwìŋ lʉ̀k mòk à lòkok də yi bʉə ja’a Jisòs nə fana yi fek nà’ də, <<Cicà, yusə̀ aco mʉ̀ gʉ yè’sə yà, ya mʉ kə tse’ lùŋ nə̀ nà’a nə̀ kà mè yuk nə ɛ?>> ²⁶Jisòs fek bʉsə bwi nà’ də, <<Wo à còm nòŋsə ndzənə lʉ̀k də yà? Wu tagə̀ nja da?>> ²⁷Ŋgà’ nə dʉk də, <<Wù tse’ ŋgòdzəm Tà Nwì yòbə ntʉm yòpwe’fo’, dzəm yi bə yòŋsə̀ yòpwe’fo’, nə ye bə ŋàaŋ yo pwe’, nə ye bə ŋkərə̀ yòsə̀’ pwe’fo’, fana nə dzəm moma yo co mvə̀’nə̀ wù dzəm ni’ yò.>> ²⁸Jisòs dʉk fa nà’ də, <<Wù cèp bə̀boŋ laŋ; gʉ̀ vɛ’nə ya wu nə tse’ lùŋ.>>

²⁹Ŋgà’ nə à dzəm də yi niŋ tsok də yi ŋwə̀ nə̀ bə̀boŋ, fana yi fek fe’lə Jisòs nə də, <<Moma am nə yè’sə ndà?>> ³⁰Jisòs tsok bʉsə fa yi gbʉ’ mòk də, <<Ŋwə̀ nəmòk à tsə mʉ Jòrosalèm ŋgòlòJèrikù. À kə̀ wɛ̀s mandzə̀, ŋgàa yə̀ wèŋ ko fweŋ fis yi cə̀k pwe’, nə ləp yi. Wo me’rə mak noŋsə yi ŋga yi sə tʉ̀hʉ mègù mok ŋgwàŋ, nə lo yu awo. ³¹Mvə̀k à càa, ŋgà fa satikà’ mòk à sə yù tsə lòsə̀’ mandzə̀ ànə. Yi ànə ye nà’ ŋga nà’ nòo fana yi lək ca yuye ndzə ŋgʉ mandzə̀. ³²Ŋwə̀ə Levì mòk à gʉ̀ sə̀’ vɛ’nə. Yi à kə̀ dzèŋ fo’, nə ye ŋgà’ nə mvə̀’nə̀ nà’ nòo fana yi ca yuye ndzə ŋgʉʉ̀ŋ. ³³Ŋwə̀ Sàmàriyà mòk à və̀ ye fo’, nə ye nà’, fana nə koksə manziŋ bohònà’.10:33 Bʉ̀ʉ Sàmariyà bə bʉ̀ʉ Jus wèŋ à sə bàrəgə̀ wùriŋ.³⁴Yi geŋ fo’, nə gesə fa nà’ mve’ bə rùk ndzənə mvwe’ nà’ sə, nə kiŋ lok fa nà’.10:34 Bʉ̀ʉ lak yà’sə wèŋ à sə jəgə̀ mve’ bə rùk co ncə̀p. Yi le’ koksə naaŋ nà’ mʉnə nàmbà’rə̀ ye, nə jəŋ lo nà’ mvwe’ ndap nəmòk nə̀ ŋwèe nòoŋ mbwa yi lak, nə sə jəŋ ŋkərə̀ bohònà’ fo’. ³⁵Tsok à rɛŋ, yi fis mbàm ncùhù ba, nə fa ŋgà ndap nə. Yi dʉk fa ŋgà ndap nə dʉk də, <Sə kʉk fa mʉ yi bə̀boŋ. Mʉ bwìŋ foho və̀ fana mʉ̀ lak fəsə fa wu mbàam sə̀ wù bʉpsə yà’ bʉ̀ʉ yi pwe’.> ³⁶Bohòbʉ̀ʉ sə̀ tɛ’ yè’sə, wù tsəm də ŋwə̀ nə̀ yi à nìtsə̀’ də yi moma bə ŋwə̀ nə̀ ŋgàa yə̀ wèŋ à lə̀p yi nə yè’e nə̀ fò?>> ³⁷Yi dʉk də, <<A ŋwə̀ nə̀ yi à tse’ koksə̀manziŋ bohònà’ nà’a.>> Fana Jisòs dʉk fa nà’ dʉk də, <<Dù a, nə kə gʉ yòsə̀’ vɛ’nə.>>

Jisòs Kə̀ Kɛ’ Yə Mèri Bə Matà

³⁸Jisòs bə bwe ye wèŋ à sə lòo fana wo kə dzeŋ mvwe’ lak mok. Ŋwà mòk à ye fo’ nə̀ wo to liŋ ye də Matà. Ŋwà ènə à fa Jisòs mvwe’ nòòŋ mʉnda’à yi. ³⁹Yi ànə tse’ moma ye mòk nə̀ wo to yi də Mèri. Mèri nə à kə̀ cu ŋgʉ ni’ì Tà ànə, nə sə yu’rə yusə̀ nà’ sə yə’rə fa bwìŋ sə. ⁴⁰Matà ye də fàk yam bohòyi wùriŋ fana yi kə dʉk fa Jisòs də, <<Tà, wù yə də moma àm me’rə mʉ mʉmʉ̀, fàk sə ghak mʉ, wù kà mbɛŋ kom à? Tsok fa yi də yi kə tɛsə mʉ.>>

⁴¹Tà nə dʉk fa nà’ də, <<Matà, Matà, wù sə jìk, nə sə ye ŋgə’ bə bum ŋkʉ̀ʉŋntɛ̀ŋ. ⁴²Yu nə̀ nà’ tse’ gha’ fàk, a yu nə̀ mò’fis. Mèri cok jə fis ma nə̀ bə̀boŋ nə laŋ. Kaco mʉ̀ dzəm də ŋwèe fep fis yuk nà’ bohòyi yeŋ.>>

Jisòs Yə’rə Bə Nzak Pìriyà

(Mat. 6:9-15; 7:7-11)

¹Nùmbu mòk à ye ŋga yi sə lɛŋ pìriyà mʉmvwe’ nəmòk, yi ànə mesə fana mo fàk ye mòk və bohòyi, nə dʉk fa yi də, <<Tà, yə’rə fa ves ŋgòlɛŋ pìriyà mʉmvə̀’nə̀ Jon ànə yə’rə fa ŋgàa fàak ye yà’a.>> ²Yi dʉk fa wo də, <<Wèeŋ cu ŋgòlɛŋ, wèŋ cep dʉk də:

<Tɛ̀’, kə̀kùksə̀ə ye bə liŋ yo.

Gaŋ ŋkum yo sə və.

³Fa ves bɛŋ sə̀ co vès zʉ nùumbu pwe’.

⁴Swì fa ves bʉp avès, bʉ̀ʉsə̀ vès swì fagə̀ ndàaŋwè pwe’ nə̀ yi gʉ̀gə̀ ves bʉp sə̀’.

Kà ves mvwe’ sə̀ co mə̀mumsə̀ kə tseŋ ves jə lò.> >>

⁵Jisòs dʉk fa bwe ye sə wèŋ də, <<A dʉk-a də ŋwə̀ nəmòok mʉŋgorə̀ wèŋ nə̀ aco yi lokok nə̀ tsətsə’rə̀ə tsok, nə kə dʉk fa ŋge’ ye mòk də, <Ŋge’ àm, samsə fa mʉ ntuk brɛd tɛ’, ⁶bʉ̀ʉsə̀ ŋge’ àm mòk tesə və̀ gì fana mʉ̀ ka yumok co mʉ̀ fa yi zʉ tse’.> ⁷Yi dʉk vesə mʉnda’à anə də, <Kà mʉ ŋgə’ fa nòòŋ, mʉ̀ lok ncù laŋ, ves bwe am wèŋ nònze, kaco mʉ̀ lokok ŋgòfa wu yumok ŋga’a yeŋ.> ⁸Mʉ tsok weŋ də a ye-a sə̀ də yi nə kà ŋgòfa nà’ yumok bʉ̀ʉsə̀ nà’a ŋge’ ye lòkok fana bʉ̀ʉsə̀ nà’ sə lɛŋ malì gʉgʉŋ, yi nə lokok kə fa nà’ yusə̀ nà’ dzəm sə pwe’. ⁹Mʉ tsok weŋ də, lɛŋ Nwì ya yi nə fa wu, làap ya wu nə tse’, kùum ya wo nə muk fa wu. ¹⁰Bʉsə̀ ŋwə̀ nə̀ yi lɛŋ-a, ŋgə̀ŋgàaŋ nə tse’, ŋwə̀ nə̀ yi làp-a, yi nə ye, ŋwə̀ nə̀ yi kum-a, wo nə muk fa ŋwə̀ ànə. ¹¹A nsàp tɛ̀’ nə̀ fònə̀ də a ye-a ŋga mo ye lɛŋ fuk bohòyi, yi kà nà’ fuk fa, nə fa nà’ no ɛ? ¹²Kènə də yi lɛŋ-a mbùmvəp nà’ fa yi ŋgam ɛ? ¹³A ye-a ŋga wèŋ sə̀ wèeŋ bʉp yè’e riŋ ŋgòfa bwe awèŋ bum sə̀ bə̀boŋ, ye də aco Tɛ̀’ nə̀ mʉbu nə, nə fa Yòŋsə̀ nə̀ Rərɛŋ nə bohòbʉ̀ʉ sə̀ wo lɛŋ yi sə wèŋ wùriŋ!>>

Jisòs Bə Bezebù

(Mat. 12:22-30, 43-45; Mak 3:20-27)

¹⁴Jisòs à sə bɛ’ fis yòŋsə̀ ze’ mòk nə̀ yi gʉ̀gə̀ ŋwè yi kà cù cèp fana ze’ nə ànə tesə lòo fana ŋgà’ nə ye ŋgòcèp cù, bwìŋ mərə. ¹⁵Bʉ̀ʉ mok wèŋ dʉk yàwo də, <<Yi bɛ’ fisgə̀ ze’ sə bə ŋàaŋ Bezebù nə̀ yi ŋkum ze’ wèŋ yi nə.>> ¹⁶Bʉ̀ʉ mok wèŋ sə lap mandzə̀ ŋgòbʉə yi fana wo sə lap də nà’a niŋ tsok fa wo maŋgəŋgèŋ mòk nə̀ nà’ tesə ma mʉbu. ¹⁷Yi riŋ yusə̀ wo sə tsərə sə fana yi dʉk fa wo dʉk də, <<A ye-a ŋga lak mok ga’a-a ba fana ye də yà’ kà fàk tse’. Nə ye sə̀’ də ndap nə̀ nà’ ga’a-a ba, ye də nà’a nə gbʉ. ¹⁸Ye də a ye-a də Satà gapsə ni’ ye bòp ba fana aco gaŋ sə̀ ye sə təəŋ yè’sə va? Bʉsə̀ wèŋ sə dʉk də mʉ̀ sə bɛ’fis ze’ bə ŋàaŋ Bezebù. ¹⁹A ye-a də mʉ̀ sə bɛ’ fis ze’ bə ŋàaŋ Bezebù fana bʉ̀ʉ awèŋ wèeŋ bɛ’ fisgə̀ yàwo bə ŋàaŋ sə̀ ndà? Nsàp fàk bʉ̀ʉ awèŋ sə, sə nìtsə̀’ dʉk də wèeŋ bə jòŋ. ²⁰Mvə̀’nə̀ mʉ̀ sə bɛ’fis yà’ bə ŋàaŋ sə̀ Nwì fana ye də gaŋ ŋkum sə̀ Nwì sə yà’ kʉəp və̀ bohòwèŋ laŋ.

²¹<<A ye-a ŋga ŋgà ŋàŋ nə̀ yi tse’ bum dzè’ ŋap sə sònto’ ye yi fana ye də bum ye pwe’ cu bə̀boŋ. ²²Fana a ye-a ŋga ŋwə̀ nəmòk nə̀ nà’ gʉ ghak yi və-a, nə lʉ bə nà’, nə ghak yi fana yi nə fep jəŋ bum dzè’e ye sə̀ yi anə sə naaŋ tu bə zeŋ sə, nə gapsə bum ye sə̀ yi tse’ sə bə ŋge’ ye wèŋ.

²³<<Ŋwə̀ nə̀ yi ka-a vesi yeŋ, ye də yi sə bɛ̀ŋ mʉ. Ŋwə̀ nə̀ yi sə kà-a vesi te’e benə̀ ye də yi sə sɛ̀sə ye sɛ̀sə.

²⁴<<A ye ŋga yòŋsə̀ ze’ tesə ndzə ni’ì ŋwè fana yi gihi ca mvwe’ nze jì ndzəp, ŋgòlàp mvwe’ sə̀ yi yoŋsə fo’. Yi kà mvwe’ sə̀ co yi yoŋsə yə fana yi dʉk də, <Mʉ nə bwi foho lo fe’lə mvwe’ ndap àm nə̀ mʉ̀ a tesə fo’ nə.> ²⁵Yi bwì foho və̀-a, nə ye ŋga wo kùrə nà’ nə gʉhʉ tsə’rə nà’ bə̀boŋ, ²⁶fana yi lo, nə kə to jəŋ və yòŋsə̀ə mok sàmba, sə̀ wo bʉp càsə yi wo. Wo nə ni cum mʉmvwe’ ndap nə. A ye vɛ’nə fana ncu ŋwə̀ ànə nə̀ maŋkwɛ̀ŋ nə, nə bʉp casə nə̀ ànə ye to mantombì nə.>>

²⁷Jisòs ànə cep bum yè’sə fana ŋwà nəmòk nə̀ yi ànə ye mʉŋgorə̀ bwìŋ fo’ cep fis də, <<A rɛŋsi bohòvə̀əm sə̀ yà’ à dzə wu, nə ye mbwi sə̀ wù à no!>> ²⁸Yi dʉk bwi ye də, <<Rɛŋsi nə lɛ bohòŋwə̀ nə̀ yi yuk ncèp Nwì, nə noŋsə nà’.>>

Bwìŋ Dzəm ŊgòYə Maŋgəŋgèŋ

(Mat. 5:15, 6:22-23, 12:38-42; Mak 8:11-12)

²⁹Bwìŋ ànə sə yam ghaha fo’ ghaha fana Jisòs ye ŋgòcèp də, <<Bʉ̀ʉ sə̀ niè’ yè’e wo bʉ̀ʉ sə̀ bʉp, wo sə dzəm ŋgòyə yumok sə̀ maŋgəŋgèŋ. Mʉ nə kà wo maŋgəŋgèŋ gʉ̀ nì tsə̀’ fa, anə megu maŋgəŋgèŋ nə̀ Jonà nà’a. ³⁰Bʉsə̀ mvə̀’nə̀ Jonà nə ànə ye co maŋgəŋgèŋ mòk ŋgònìŋtsə̀’ fa bʉ̀ʉ Nenevì yà’a fana mʉ̀ʉ mo ŋwè, mʉ nə ye sə̀’ vɛ’nə bohòbʉ̀ʉ yè’sə. ³¹Nùmbu nzak nə ye, ŋkum nə̀ yi ŋwàŋwè nə̀ yi à tesə və̀ mvwe’ lak Sibà nà’a nə cep bʉp bohòbʉ̀ʉ sə̀ ŋga’a yè’sə də wo gbʉ̀ nzak. Bʉsə̀ yi à tesə və̀ mvwe’ sə̀ nzeŋgòŋ nə lə̀sə, ŋgòkə̀ yuk nsàp ŋkərə̀ nə̀ Sòlomù à tse’ fana yeè, yumok sə̀ yà’ ghak Sòlomù nə ŋga’a yè’. ³²Nùmbu sak nzak ye fana bʉ̀ʉ Nenevì wèeŋ nə lokok dʉk fa bʉ̀ʉ sə̀ niè’ yè’sə wèŋ də wo gbʉ̀ nzak. Bʉsə̀ Jonà ànə tsoho, wo kupsə ntʉm; fana yumok sə̀ yà’ ghak càsə Jonà nə ŋga’a yè’.

³³<<Wo bwe’-a laàm, kaco wo swihi nà’ swìhi kè wo jəŋ nà’, nə tes gesə sənə kʉ̀ŋ yeŋ. Wo nə tes nà’ mvwe’ sə̀ jəja ya bwìŋ sə ni və̀ə wo sə ye marɛŋ nə. ³⁴Lis yo marɛŋ nə̀ ndzə ni’ì wù yi. A ye-a ŋga lis yo bə̀boŋ fana ye də ni’ yònə, nə̀ rwiŋ bə marɛŋ. Yà’a sə̀’ də a ye-a ŋga lis yo ka bə̀boŋ yeŋ fana ye də ni’ yòrwiŋ bə mandzəm. ³⁵Ye də wèeŋ jəŋ ŋkərə̀, bwɛ̀rɛ marɛŋ nə̀ ndzə ni’ì wèeŋ nə bʉʉŋ mandzəm. ³⁶Fana ye də a ye-a ŋga ni’ yòpwe’fo’ rwiŋ mègù bə marɛŋ, də mandzəm nja mvwe’ mok bʉ̀ə̀, fana ye də nà’a nə ye pwe’ marɛŋ anə, co mvə̀’nə̀ marɛŋ laàm rɛŋgə̀ yà’a.>>

Jisòs Dʉk Fa Bʉ̀ʉ Faràsi Nə Ye Ŋgàa Yə’rə̀ Lʉ̀k Də Wo Ŋgàa Tè’èŋkup

(Mat. 23:1-36; Mak 12:38-40; Luk 20:45-47)

³⁷Jisòs anə sə cep fana ŋwə̀ə Faràsi mòk dʉk nà’ də bə nà’a kə zʉ bɛŋ. Fana yi lo kə cum tsoŋ də ya bə nà’a zʉ. ³⁸Ŋwə̀ə Faràsi nə à mərə vɛ’ɛ mvəsə̀ yi à yə də Jisòs ànə zʉ ŋga yi ka mvə̀’nə̀ wo cùkgə̀ ŋkuŋ nə sə zʉ yumok sə cuk. ³⁹Ànə geŋ Tà Jisòs dʉk fa nà’ də, <<Wèŋ bʉ̀ʉ Faràsi, wèeŋ cùkgə̀ yàwèŋ ŋkwɛ̀ɛŋ ŋgàp bə ŋkwɛ̀ɛŋ tasà, fana rwiŋ cum ma sə tsətsə’rə̀ wèŋ anə ŋgwap bə wa bum bwìŋ. ⁴⁰Wèeŋ ləm! Ŋwə̀ nə̀ yi ànə gʉ̀ ŋkwɛ̀ŋ nə à ka ma sə tsətsə’rə̀ sə̀’ yi gʉ à? ⁴¹Wèeŋ fa-a ŋgàa jìŋ wèŋ mbo sənə ŋgàp nə fana ye də yusə̀ yà’a ma nə̀ njàwèŋ pwe’ mok rərɛŋ.

⁴²<<Wèŋ bʉ̀ʉ Faràsi, wèŋ cu bʉp. Wèeŋ jəgə̀ ŋkərə̀ ŋgògàpsə fa Nwì bwe mvùu bum sə̀ jo yè’e pwe’fo’ ma nje, nə me’rə noŋsə ŋgòfàk bə zìnə, nə ye ŋgòdzəm Nwì vɛ’nə. Anə ye co wèŋ sə gʉ yà’sə, nə kà mok sə̀’ mè’rə̀ màk. ⁴³Wèŋ bʉ̀ʉ Faràsi, wèŋ cu bʉp! Wèeŋ dzèŋ mʉmvwe’ ndap pìriyà fana wèŋ sə dzəm dzòok sə̀ bə̀boŋ, wèŋ sə dzəm sə̀’ də bwìŋ sə cepsə weŋ mʉntɛɛ̀ŋ bə wəwəp wùriŋ. ⁴⁴Wèŋ cu bʉp bʉ̀ʉsə̀ wèeŋ co sèe sə̀ bwìŋ sə kà yà’ yə fana wo sə gi ca mbwa, nə kà rì.>>

⁴⁵Ànə geŋ ŋgà yə’rə̀ fa bwìŋ lʉ̀k mòk dʉk də, <<Cicà, wu cèp vɛ’nə, ye də wù sə yà’ vès sə̀’.>> ⁴⁶Jisòs dʉk bwi fa nà’ də, <<Wèŋ ŋgàa yə’rə̀ lʉ̀k, wèŋ cu sə̀’ bʉp bʉ̀ʉsə̀ wèeŋ jə bum sə̀ yà’ rwì’ vɛ’ɛ co ŋwè kà bə̀k to, nə sə naaŋ fa bwìŋ. Wèŋ kà yàwèŋ bum sə bə ndubo àwèŋ nə̀ mò’fis jwɛ̀ŋ ja’a lok. ⁴⁷Wèŋ cu bʉp, bʉ̀ʉsə̀ wèŋ sə ci tsə’rə sèe ŋgàa tsòhòbum Nwì sə̀ ànə zə wo sə̀’ tɛ̀’ awèŋ. ⁴⁸Ye də wèŋ dzəm də yusə̀ tɛ̀’ awèŋ ànə gʉ sə bə̀boŋ bʉ̀ʉsə̀ wo à zə wo fana wèŋ ci yàwèŋ sèe sə. ⁴⁹Ye də nà’a njo nə̀ ŋkərə̀ Nwì sə cèp də, <Mʉ nə tumsə fa wo ŋgàa tsòhòbum Nwì bə ŋgàa ntum wèŋ. Wo nə zə mok, nə yeŋsə mok wèŋ ŋgə’.> ⁵⁰Ya ndʉəm ŋgàa tsòhòbum Nwì wèŋ sə̀ yà’ ànə fe’e mvə̀’nə̀ nzeŋgòŋ à yè yèe pwe’fo’ nə ye ndzə bohòbʉ̀ʉ sə̀ niè’ yè’sə. ⁵¹Ye jəŋ bə ndʉəm Abè kə dzeŋ mʉ ni’ì Sàkàriyà nə̀ wo à zə yi mʉtsətsə’rə̀ə kàm nə̀ wo tɛ̀ŋgə̀ satikà’ mbwa bə mvwe’ sə̀ rərɛŋ sə̀ mʉ ndap Nwì nə̀ ghaŋ sə. A zìnə də wo nə fek ndʉəm awo sə bohòbʉ̀ʉ sə̀ niè’ yè’sə.

⁵²<<Ŋgàa yə’rə̀ lʉ̀k, wèŋ cu bʉp, njo nə̀ wèŋ a jə lòksə ki sə̀ ŋgòmùk ncùu ŋkərə̀ bə zeŋ sə. Wèŋ bə tu awèŋ, wèŋ a ka ni, fana nə lok bwi fa bʉ̀ʉ sə̀ wo à sə ni sə mandzə̀.>>

⁵³Jisòs ànə me’rə fa’nə fana ŋgàa yə’rə̀ lʉ̀k bə bʉ̀ʉ Faràsi sə wèŋ sə sa’rə yi nə nɛ’ tse’ yi bə cù cʉ̀k, də ya nà’a cep bum ŋkʉ̀ʉŋ. ⁵⁴Wo sə bʉə yi vɛ’ɛ də ya wo ko yi bə yumok sə̀ bʉp sə̀ yi cèp-a na.

Ka Bə̀boŋ ŊgòGʉ̀ Basə Yumok Basə Yeŋ

(Mat. 10:19-20, 26-33, 12:32)

¹Ghà ànə à ye ŋga bwìŋ kə̀ benə vɛ’ɛ ncùhù ŋkʉ̀ʉŋntɛ̀ŋ, nə sə nəŋ ca mok mʉ ni’ì bə kù fana Jisòs ye ŋgòtsə̀’ to fa ŋgàa fàak ye wèŋ də, <<Wèeŋ jəŋ ŋkərə̀ bə yis bʉ̀ʉ Faràsi wèŋ. Mʉ̀ sə dʉk yè’sə mʉmvə̀’nə̀ wo gʉ̀ basə kɛ’gə̀ bum awo yà’a. ²Yumok ka sə̀ də bwìŋ à sè’lə lok yà’ də wo nə kà yà’ yə yeŋ. Yumok ka sə̀ wo a swìhi yà’ də bwìiŋ nə kà yà’ rìŋ yuk sə̀’ yeŋ. ³Ye də yusə̀ wu cèp-a yà’ ndzə ndzəmə̀, yà’a nə̀ kə̀ yuhu mvwe’ marɛŋ. Yusə̀ ŋwè làrə swìhi yà’ mà mbwèndap fana wo nə̀ fu yà’ ma mʉ ndùndap.

⁴<<Ŋge’ am wèŋ, mʉ tsok weŋ də kà də wèeŋ wəp bʉ̀ʉ sə̀ wo zə-a ŋgùpni’ fana wo kà yumok ŋgògʉ̀ fe’lə bohòwù tse’ yà’a dʉk. ⁵Mʉ tsok fa weŋ ŋwə̀ nə̀ aco wèŋ wəp yi nə. Wəp Nwì nə̀ yi zə wes fana yi tse’ mali ŋàŋ ŋgògèsə wu mvwe’ ŋgə’ nə̀ sə misə̀ nà’a. Mʉ̀ sə tsə̀’ weŋ zìnə də wəp yi ànə. ⁶Wo kà ləŋbu tàŋ dolà ba sèŋgə̀ à? Nwìi kà nə̀ mò’fis swìgə̀. ⁷Nʉ̀əmtu sə̀ mʉ tuhù wèŋ yè’e, yi a ta yà’ ta. Ye də wu kà yumok wəp, bʉ̀ʉsə̀ wù yam ghak ləŋbu kɛ̀’ ŋkʉ̀ʉŋntɛ̀ŋ laŋ.

⁸<<Mʉ tsok fa weŋ də ŋwə̀ nə̀ yi cèp fis-a jəja mvwe’ bwìŋ də yi ŋwə̀ àm fana mʉ̀ mo ŋwè, mʉ nə̀ kə̀ dʉk fa yi sə̀’ vɛ’nə mantombì masinjàa Nwì wèŋ. ⁹Ŋwə̀ nə̀ yi bɛ̀ŋ-a mʉ mantombìi bwìŋ fana mʉ nə̀ kə̀ bɛ̀ŋ yi sə̀’ mantombì masinjàa Nwì wèŋ. ¹⁰Ŋwə̀ nə̀ yi bʉpsə liŋ am, nə̀ mʉ mo ŋwè fana wo nə̀ swì fa yi yà’; ŋwə̀ nə̀ yi bʉpsə-a liŋ Yòŋsə̀ nə̀ Rərɛŋ nə fana kaco wo nə̀ swì fa yuk yi yeŋ. ¹¹A ye-a ŋga wo jə lo wu mʉmvwe’ ndap pìriyà, nə ye bohòbʉ̀ ŋkəŋkum nə ye bə bʉ̀ʉ sə̀ wo sakgə̀ bum wo fana wù kà də wu sə jik də wu nə cep fəsə yàlɛ, kè də wu nə dʉk yè’sə dalɛ dʉk. ¹²Bʉsə̀ Yòŋsə̀ nə̀ Rərɛŋ nə, nə tsok fa wu yusə̀ wu cep sə sə̀ ghà nà’nə.>>

Gbʉ’ Ŋgà Ghàk Nə̀ Yi À Ye Ləm

¹³Ŋwə̀ nəmòk à ye mʉtsətsə’rəə bʉ̀ʉ sə̀ wo à benə wùriŋ sə, nə dʉk vesə fa nà’ də, <<Cicà, dʉk fa moma am də yi gapsə bum mfə tɛ̀’ am vesi.>> ¹⁴Jisòs dʉk fəsə fa nà’ də, <<Ŋgàta, ŋwə̀ nə̀ yi a gʉ̀ mʉ də mʉ sak fa weŋ nzak kè mʉ gapsə fa weŋ bum yè’sə ndà?>> ¹⁵Ànə geŋ yi dʉk fa bʉ̀ʉ sə̀ fo’ sə wèŋ də, <<Wèeŋ jəŋ ŋkərə̀ ŋgòwa bum bwìŋ, bʉ̀ʉsə̀ yòŋsə̀ ŋwè ka bʉ̀ʉ bum sə̀ də yi tse’ yà’ ŋkʉ̀ʉŋntɛ̀ŋ yeŋ.>> ¹⁶Fana yi mak fa wo gbʉ’ nè’e də, <<Ŋgà ghàk mòk ànə tse’ nzum sə̀ bum ànə tesə mbwa wùriŋ. ¹⁷Yi ye ŋgòtsərə də, <Mʉ̀ ka mvwe’ sə̀ co mʉ noŋsə wes zʉzʉʉ am yè’e tse’. Mʉ nə gʉ kok yè’sə valɛ-ò?> ¹⁸Yi dʉk də, <Mʉ nə gʉ lɛ vɛ’: mʉ nə kʉəmsə mak tàap am, nə ci sə̀ ghaŋ, ya mʉ gesə zʉzʉʉ am bə bum am pwe’ mbwa. ¹⁹Fana mʉ nə dʉk fa ni’ àm dʉk də, mʉ̀ tse’ zʉzʉ nduk co mʉ̀ zʉ yà’ lùumŋgòŋ ŋkʉ̀ʉŋntɛ̀ŋ; cum yoŋsə yuyo, zʉ, no, nə sə roŋ.> ²⁰Ànə geŋ Nwì dʉk fa yi də, <Ləm yu ènə, yòŋsə̀ yòo nə me bə ndzəm nə̀ ntinə nè’e. Bum sə̀ wù fʉ̀hʉ yà’sə nə ye mok sə̀ ndà?> >> ²¹Jisòs dʉk ləsə də, <<Yà’a mʉmvə̀’nə̀ yà’ cu vɛ’nə bohòŋwə̀ nə̀ yi kotse’ bum ghàk, nə kà ŋgà ghàk bohòma nə̀ Nwì ye.>>

Fa Ntʉm BohòNwì, Nə Kà Bʉ̀ʉ Yusəmok Sə Jìk

(Mat. 6:25-34)

²²Jisòs à dʉk fa bwe ye wèŋ dʉk də, <<Kà də wèeŋ sə jik bə yòŋsə̀ə awèŋ də mʉ nə zʉ kok yàlɛ, kènə bə ni’ yòdə wu nə ni kok yàlɛ-òdʉk. ²³Bʉsə̀ yòŋsə̀ ghak bɛŋ fana ŋgùpni’ ghak cə̀k sə̀’. ²⁴Wèeŋ kʉk ja’a na ŋwə̀ŋwɛ’, wo kà bìgə̀ nə kà sə̀’ kʉp loksə̀. Wo ka tàp tse’, nə kà zok sə̀’ tse’, fana Nwì sə fa wo zʉzʉ. Ghak yè’sə wèŋ kè swiŋ ɛ? ²⁵A mʉŋgorə̀ wèŋ ndà, nə̀ də aco yi naaŋ gesə nùumbu mok mʉnə nùumbu ye də bʉ̀ʉsə̀ yi jìk ɛ? ²⁶A ye-a də kaco wù gʉ to yumok bə nə̀ nà’a jo nà’nə yeŋ, ye də wù sə jik bə mok bʉ̀ʉ yà? ²⁷Tsərə-a bə nzàamŋgaŋ sə̀ yà’a fomgə̀ yè’e mʉmvə̀’nə̀ yà’a kùkgə̀ ɛ̀. Wo kà ndàp caŋsə̀gə̀, nə kà cə̀k sə̀’ ba’. Mʉ tsok fa weŋ də a mègù-a sə̀ Sòlomù, nə̀ yi à tse’ bum maŋgəŋgèŋ nà’a, yi à ka cə̀k co mòk nə̀ mò’fis vɛ’nə ni yuk. ²⁸A ye-a ŋga Nwìi ni fagə̀ ŋgaŋ sə̀ yà’a təəŋ fə ŋgəà ntinə, a ye zòŋ ŋga wo tɛ̀ŋ səsə yà’ laŋ sə vɛ’nə, ye də aco yi ni fa wesə weŋ cə̀ək yàwèŋ yè’sə nsàp nə̀ fò? Bʉ̀ am a, dzədzəm àwèeŋ momjo! ²⁹Kà də wèeŋ sə tsərə də mʉ nə zʉ yà, mʉ nə no yà? Kà də wu sə jik dʉk. ³⁰Bʉ̀ʉ sə̀ sə nzeŋgònə làpgə̀ yàwo nsàap bum yà’sə; fana Tɛ̀’ awèŋ rìŋ dʉk də wèŋ tse’ ŋgòtse’ bum yè’sə sə̀’. ³¹Yusə də wèeŋ lap lɛ gaŋ ye sə, ya bum yè’sə nə ye sə̀’ sə̀ yàwèŋ.

Tse’ Ghàk Ma Mʉbu

(Mat. 6:19-21)

³²<<Bwe sə̀ mʉ gʉ̀msəgə̀ weŋ, wèeŋ kà wəp bʉ̀ʉsə̀ Tɛ̀’ àwèŋ nə sə dzəm bòŋsə wùriŋ ŋgòfa weŋ gaŋ ŋkum sə̀ ye sə. ³³Wèeŋ seŋ bum awèŋ, nə fa mbàam sə bohòŋgàa jìŋ wèŋ. Wèeŋ tse’ posàa sə̀ kaco yà’ reŋ yuk yeŋ, nə loksə ghàak awèŋ mʉbu mvwe’ sə̀ kaco yumok gʉ yà’ yeŋ; mvwe’ sə̀ kaco ŋgà yə̀ kə dzeŋ to fo’ yeŋ, nzək kà yà’ sə̀’ zʉ bʉpsə̀. ³⁴Bʉsə̀ mʉmvwe’ nə̀ ghàak yo cu fana ntʉm yòo nə ye sə̀’ fo’.

Ye Mofàk Nə̀ Ŋgà Kà Lo Dzəm

(Mat. 24:45-51)

³⁵<<Wèeŋ cum fə̀fʉhʉ̀, swi’ cə̀ək awèŋ sə gamə̀ bə̀boŋ, nə bwe’ tse’ laàm awèŋ. ³⁶Wèeŋ ye co bʉ̀ʉ sə̀ masà àwo nə lo mvwe’ ŋkàha gù ŋgòbwìŋ və̀ə, fana wo sə tək nà’ də ya nà’a kùm ncù ntɛ̀ŋ, wo muk fa yi mvèsə̀. ³⁷A rɛŋsi bohòbwe fàak sə̀ masà nə bwìŋ və̀ə, fana yi tseŋ yà’wèŋ ŋga wo cu nca. Mʉ tsok fa weŋ zìnə də masà nə nə kiŋ tsə’rə cə̀k ye, yà’wèŋ cum nze fana yi fa wo zʉzʉ. ³⁸A rɛŋsi bohòŋgàa fàak sə̀ yi və-a sə̀ ndzəmə̀ kè tsətsə’rəə tsok àlɛ’, nə tseŋ wo ŋga wo cu fə̀fʉhʉ̀. ³⁹Wèeŋ riŋtse’ yumòk nè’ sə̀’ də, a ye-a ŋga tà ŋgà ndàp nə riŋ-a ghà nə̀ ŋgà yə̀ə nə və, bwɛ̀rɛ yi kà ndap ye də nà’a ni mbwa mè’rə̀ nòŋsə̀. ⁴⁰Wèeŋ nə sə kʉk yàwèŋ sə̀’ kʉ̀’ʉ, bʉ̀ʉsə̀ mʉ̀ʉ mo ŋwè, mʉ nə və ghà nə̀ wèŋ ka vɛ’nə tsərə.>>

⁴¹Pità à fek də, <<Tà, wù sə màk fa gbʉ’ nè’e yè’sə bohòvès kè bohòbwìŋ pwe’ ɛ?>> ⁴²Fana Tà cep də, <<Mofàk nə̀ yi zìnə nə tse’ ŋkərə̀ə yè’sə nə̀ fò? A nə̀ masà ye nə a fa bum sə̀ mʉ nda’à yi pwe’ bohònà’, nə dʉk də, nà’a nə sə fa bwe fàak mok wèŋ bum zʉzʉ bə mvə̀k nə̀ kə̀kʉrə̀. ⁴³A rɛŋsi bohòmofàk nə̀ masà ye bwìŋ və̀ə, nà’ tseŋ yi ŋga yi sə gʉ̀ mvə̀’nə̀ nà’ anə dʉk noŋsə lo yi sə. ⁴⁴Mʉ tsok weŋ zìnə də, masà nə nə fa nsàp mofàk ànə ŋàŋ ŋgòkotse’ bum ye sə̀ yi tse’ pwe’fo’ nà’. ⁴⁵A ye-a ŋga mofàk nə dʉk-a də, <Masà àm nə nə kà ntə̀ntɛ̀ŋ bwìŋ fohòvə̀,> nə yeto ŋgòlə̀p bwe fàak sə̀ mbəmbam bə sə̀ bə̀ba sə wèŋ, nə zʉ, nə no jʉhʉ rùk, ⁴⁶fana masà ye nə bwìŋ foho və̀ nùmbu mòk nə̀ mofàk nə nə sə ka tsərə fʉk, nə ye bə mvə̀k nə̀ yi ka sə̀’ riŋ, fana masà nə nə gbɛ’ ci’lə nà’ ba, nə noŋsə be’lə yi bə bʉ̀ʉ sə̀ wo ka zìnə tse’. ⁴⁷Mofàk nə̀ yi riŋ yusə̀ masà ye dzəm də yi gʉ yà’, nə kà də yi yeto ŋgògʉ̀ yà’ dʉk fana wo nə ləp yi cùu ŋkwɛ̀s ŋkʉ̀ʉŋntɛ̀ŋ. ⁴⁸Ŋwə̀ nə̀ yi anə ka ye riŋ, nə gʉ yumok sə̀ co wo ləp yi bʉ̀ʉ zeŋ nə̀ bʉp fana wo nə ləp ghasə yi ye ŋgwàŋ. Ŋwə̀ nə̀ Nwì a fa bohòyi ŋkʉ̀ʉŋ fana Nwìi nə dzəm bohòyi sə̀’ ŋkʉ̀ʉŋ. Ŋwə̀ nə̀ Nwì a nòŋsə ndzə bohòyi ŋkʉ̀ʉŋntɛ̀ŋ fana Nwìi nə kʉk bohòyi sə̀’ ŋkʉ̀ʉŋntɛ̀ŋ anə.

Jisòos Nə Gʉ Bwìŋ Wo Ga’a

(Mat. 10:34-36, 16:1-4)

⁴⁹<<Mʉ̀ a və̀ ŋgòkə̀ tɛ̀ŋ gèsə mis sənə nzeŋgònə. Yà’ sə bòmʉ də anə ye co mis nə kʉə ŋga’a laŋ. ⁵⁰Mʉ̀ tse’ bàptɛ nə̀ ŋgòbàptɛsə nà’, tse’ŋga mʉ bàptɛsə wes nà’ ŋkuŋ ntʉm fi mʉ! ⁵¹Wèŋ tsəm də mʉ̀ a və̀ sə nzeŋgòŋ anə ŋgòjə və̀ fifi à? Hai’ ka vɛ’nə yeŋ, mʉ tsok weŋ də mʉ̀ a jə və̀ gə̀gàpsə̀. ⁵²Bʉsə̀ ye jəŋ ŋga’a nə lo mantombì, bwìŋ tàŋ sə̀ wo cugə̀ ndap mò’fis nə ga’a. Bwìŋ tɛ’ nə tse’ cùu sə̀ zok bə bʉ̀ʉ sə̀ ba, sə̀ ba tse’ bwi yàwo zok bə sə̀ tɛ’. ⁵³Wo nə ga’a, tɛ̀’ wèŋ sə dzeeŋ yusə̀ bwe mbəmbaam awo wèŋ sə tsərə fana bwe mbəmbam sə, sə dzeeŋ sə̀ tɛ̀’ wèŋ. Ma sə dzeeŋ sə̀ mo ye nə̀ ŋwàŋwè, mo ŋwàŋwè sə dzeeŋ sə̀ ma. Maligù sə dzeeŋ sə̀ ŋgwegù, ŋgwegù sə dzeeŋ maligù nə sə̀’.>>

⁵⁴Jisòs à dʉk fa bwìŋ dʉk də, <<Wèeŋ yəgə̀ ŋga mbàk yəəŋ ma nconùm fana wèŋ də, <Mbʉ̀ʉŋ nə li>, nà’ li sə̀’. ⁵⁵Wèeŋ yuk ŋga fə̀fə̀ bwìŋ nə̀ kəkok fana wèŋ dʉk də, <Lùm lòo>, lùm nə lo sə̀’. ⁵⁶Wèŋ ŋgàa tè’èŋkup! Wèŋ rìŋ mègù ŋgòkʉ̀k gèsə mʉbu, nə ye nzeŋgònə, nə sə cep də anə ye ŋga’a vɛ’ɛ, nə kà bum sə̀ yà’a niè’ yè’e rɛɛŋ bʉ̀ʉ yà?

Kà Də Wu Tək Tə̀tè Wo Sak Nzak YòSa’a Dʉk

(Mat. 5:25-26)

⁵⁷<<Kaco wèŋ bə tu awèŋ sak yusə̀ yà’a kə̀kʉrə̀ yeŋ yè’sə bʉ̀ʉ yà? ⁵⁸A ye-a ŋga ŋwə̀ nəmòk somsə wu mʉ kot fana wù lap mandzə̀ gʉgʉŋ də wenə mesə nzak nə ŋga wèŋ cu ntòmandzə̀. Ya ŋga yi kà wu bohòŋgà sak nzak jə lò. Bʉsə̀ ŋgà sak nzak nə fa wu bohòŋgàa tàm wèŋ, fana ŋgàa tàam sə nisə wu ndapndzəm. ⁵⁹Mʉ tsok fa weŋ də kaco wù tesə yeŋ, tse’ŋga wù làk wes mbàm nə̀ wo tiŋ fa wu nə pwe’fo’.>>

Me’rə ŊgòGʉ̀ Bʉp Bwɛ̀rɛ Wèŋ Kpʉ Sə̀’

¹Ghà ànə à ye fana bʉ̀ʉ mok wèŋ à ye fo’ sə̀ wo à tsə̀’ fa Jisòs bə nzak bʉ̀ʉ Galìli mok sə̀ Palè à zə yà’, ndʉəm awo torə bə ndʉəm nàam sə̀ wo à sʉə yà’ ŋgòfa Nwì satikà’ bə zeŋ. ²Ànə geŋ Jisòs fek wo də, <<Wèŋ tsəm də bʉ̀ʉsə̀ bʉ̀ʉ Galìlii yà’sə wèŋ kpʉ nsàp kpʉ ŋgə’ ànə vɛ’nə ye də wo gʉ̀ ghakgə̀ bʉp wo, nə noŋsə bʉ̀ʉ Galìlii mok sə wèŋ pwe’ à? ³Hai’ ka vɛ’nə yeŋ. Mʉ tsok weŋ də tse’ŋga wèŋ kupsə, nə bwi fa bʉp awèŋ ŋkwɛ̀ŋ bwɛ̀rɛ wèeŋ nə kpʉ sə̀’. ⁴Bʉ̀ʉ sə̀ hum-ncòp-fwame’ sə̀ ndap nə̀ nà’ à sàp lòmʉbu wùriŋ à kəəŋ zə wo Silòm yà’a, wèŋ tsəm də wo à sə gʉ̀ bʉp wo, nə ghak casə bʉ̀ʉ sə̀ wo cu mvwe’ lak Jòrosalèm pwe’ wo à? ⁵Mʉ tsok weŋ də ka vɛ’nə yeŋ. Tse’ŋga wèŋ kupsə, nə bwi fa bʉp awèŋ ŋkwɛ̀ŋ bwɛ̀rɛ wèŋ kpʉ sə̀’.>>

Gbʉ’ Tʉ Nə̀ Nà’ À Ka Zəm Nə

⁶Ànə geŋ Jisòs tsok fa wo gbʉ’ nè’e də, <<Ŋwə̀ nəmòk à bì tes tʉ fik mʉ nzuù yi. Yi sə və fo’ də yi kə kwiŋ jəŋ ŋgwìi fik nə fana yi kà nə̀ mò’fis kwì yuk. ⁷Ànə geŋ yi dʉk fa bohòŋwə̀ nə̀ nà’a kʉ̀k fagə̀ yi nzum ye sə də, <A ŋga’a lùumŋgòŋ tɛ’ mvə̀’nə̀ mʉ làpgə̀ fik mʉ tʉhʉ̀ fɛɛŋ, nə kà mò’fis yə yuk. Gbɛ̀’ màk nà’, nà’ sə gʉ̀ bʉpsə nze nə fo’ wà vɛ’nə bʉ̀ʉ yà?> ⁸Ŋgà kʉ̀k nzum nə dʉk fa nà’ də, <Ŋkwà’ŋwè, mè’rə tes nà’ lùmŋgòŋ nè’e vɛ’nə ntɛ̀ŋ. Mʉ nə tuŋ mbwè nə, nə gesə gə̀p ca. ⁹Lùmŋgòŋ nə̀ nà’ tsə nà’a, a ye-a ŋga nà’ zəm fana ye də a bə̀boŋ; nà’a kà-a zəm ŋkuŋ wù gbɛ’ mak nà’.> >>

Jisòs Gʉŋsə Ŋwà Nə̀ Yi Kà Gìgə̀ Nùmbu Dzə̀

¹⁰Jisòs à sə yə’rə bwìŋ nùmbu dzə̀ mòk mʉmvwe’ ndap pìriyà. ¹¹Ŋwà nəmòk à ye fo’ nə̀ yi à tse’ yòŋsə̀ nə̀ bʉp, nə̀ nà’ à sə gʉ̀ yi, yi sə yaaŋ mʉnə lùumŋgòŋ hum-ncòp-fwame’. Ŋwà nə à zòoŋ nsàp nə̀ co yi kà mʉtsə̀ rərəŋ təəŋ lok fʉ̀k. ¹²Jisòs ànə ye gesə ŋwà nə fana yi to nà’, nə dʉk fa nà’ də, <<Mamwe, wù ga’a weŋ yiya yònà’a laŋ.>> ¹³Fana yi naaŋ fa nà’ bo, ŋwà nə təəŋ kok mok rərəŋ ghà ànə, nə kwasə Nwì.

¹⁴Ŋkwà’ ŋwə̀ nə̀ mʉmvwe’ ndap pìriyà nə à jòk vɛ’ɛ də Jisòs gʉŋsə ŋwè nùmbu dzə̀, nə dʉk fa bʉ̀ʉ sə̀ fo’ sə wèŋ də, <<A tse’ nùumbu ntùŋfu sə̀ aco a gʉ fàk ca. Wèeŋ sə və nùumbu yà’sə ŋga wo sə gʉŋsə weŋ, kà nùmbu dzə̀ ye.>> ¹⁵Ànə geŋ Tà Jisòs cep fəsə fa nà’ də, <<Wèŋ ŋgàa tè’èŋkup wèŋ! Yè’e ka sə̀ wèŋ sə̀ a yegə̀ nùmbu dzə̀, wèŋ sə fiŋ fis mbòŋ kè mvomdè’e awèŋ mvwe’ sə̀ wo tsòoŋ tes yà’, nə sə jə lo wo ŋgòno ndzəp sə yeŋ à? ¹⁶Ye də ŋwà nè’e, nə̀ yi mo Abràham, nə̀ Satà a kìiŋ tse’ yi lùumŋgòŋ hum-ncòp-fwame’ ènə, kaco wo fiŋ fis yi ye nùmbu dzə̀ yeŋ à?>> ¹⁷Yi à cèp vɛ’nə fana marè’tu ko bʉ̀ʉ sə̀ wo à sə bɛ̀ŋ yi sə wèŋ pwe’fo’. Bʉ̀ʉ sə̀ wo à ye fo’ sə wèŋ à kwa bə nsàap bum maŋgəŋgèeŋ sə̀ yi à gʉ̀ʉ sə pwe’.

Jisòs Fʉ̀hʉ Ja’a Gaŋ Ŋkum Sə̀ Nwì Bə Bum Mok

(Mat. 13:31-33; Mak 4:30-32)

¹⁸Jisòs à dʉk mok sə̀’ də, <<Gaŋ ŋkum sə̀ Nwì sə yè’sə co yàlɛ-ò? Aco mʉ̀ fʉhʉ kok yà’ yè’sə bə yà? ¹⁹Yà’a co mʉ ŋgwì tʉ mostà nà’a, nə̀ ŋwə̀ nəmòk à jə, nə bi mʉnzuù yi. Nà’ kuk bʉʉŋ tʉ nə̀ ghaŋ fana swiŋ wèŋ və kə ci ndap awo mbwa.>> ²⁰Jisòs nə dʉk sə̀mok də, <<Aco mʉ̀ fʉhʉ kok gaŋ sə̀ Nwì sə yè’sə bə yàlɛ-ò? ²¹Yà’ mègù co yis sə̀ ŋwàŋwèe jəgə̀ yà’, nə gesə sənə kwèes mfòŋ tɛ’, nə top yà’ tə̀tè yà’ kok pwe’ yè’e.>>

Mandzə̀ Nə̀ Nà’a Fəferə̀ Nə

(Mat. 7:13-14, 21-23)

²²Jisòs à gì, nə sə ca kɛ’ mvwe’ buhu lak sə̀ jo bə sə̀ ghaŋ wèŋ ŋgòlòJòrosalèm, fana yi sə yə’rə lo bwìŋ fo’ sə̀’. ²³Ŋwə̀ nəmòk fek yi də, <<Tà, bʉ̀ʉ sə̀ wo nə tse’ lùŋ nə̀ nà’a nə̀ kà mè yuk nə, nə ye megu bwìŋ jo à?>> Jisòs nə dʉk fa wo də, ²⁴<<Nikok mvwe’ ncùu ŋka’ sə̀ fəferə̀ yà’a, bʉ̀ʉsə̀ bwìŋ ŋkʉ̀ʉŋ nə lap mandzə̀ ŋgòni lòfo’, fana wo kà ni to. ²⁵Tà ŋgà ndap nə lok ncùu ye fana wèeŋ nə təəŋ sə mbiŋ, nə sə kum ncùu sə. Wèŋ kum yà’, nə sə cep də, <Tà mùk fa ves ncù.> Yi nə dʉk fa weŋ də, <Mʉ̀ ka mvwe’ sə̀ wèŋ və̀ə riŋ.> ²⁶Wèŋ ye ŋga’a ŋgòcèp də, <Vesùwèŋ à sə zʉgə̀, nə sə no sə̀’ mvwe’ mò’fis; wù à sə yə’rə bwìŋ mvwe’ mandzə̀ə sə̀ ntòla’à vès.> ²⁷Yi nə cep ye də, <Mʉ̀ tsok fa weŋ də mʉ̀ ka yàm mvwe’ sə̀ wèŋ və̀ə riŋ. Wèeŋ coho gɛsə lo ŋgʉ ni’ì mʉ̀ fo’, wèŋ ŋgàa gʉ̀ bʉp wèŋ.> ²⁸Yà’a mvwe’ sə̀ wèeŋ nə waŋ, nə zʉ nzòŋ, ŋga wèŋ yə Abràham bə Azìk bə Jàkop, nə ye ŋgàa tsòhòbum Nwì wèŋ pwe’ ŋga wo cu mʉla’à Nwì, fana wèŋ mam yàwèŋ sə mbiŋ. ²⁹Bwìiŋ nə tesə və mvwe’ ŋkùup nzeŋgòŋ ma kwè fo’, nə cum sə zʉ roŋ mʉla’à Nwì anə. ³⁰A kə̀ dzèŋ mvə̀’ ànə bʉ̀ʉ mok sə̀ wo ŋga’a maŋkwɛ̀ɛŋ nə kə ye mantombì; mok sə̀ wo ŋga’a mantombìi nə ye mok maŋkwɛ̀ŋ.>>

Mvə̀’nə̀ Jisòs Dzəm Lak Jòrosalèm

(Mat. 23:37-39)

³¹Mvə̀k ànə à ye, bʉ̀ʉ Faràsi mok wèŋ və kə dʉk fa Jisòs də, <<Lògɛsə fɛnə fo’, bʉ̀ʉsə̀ ŋkum Heròsə làp mandzə̀ ŋgòzə wu.>> ³²Yi dʉk fa yà’wèŋ də, <<Dù kə̀ tsok fa kəkərə̀ còp ànə də mʉ̀ sə bɛ’fis yòŋsə̀ə ze’, nə sə luŋsə bwìŋ ntinə bə zòŋ, nùmbu nə̀ tɛ’ dzèeŋ fana mʉ̀ mesə fàak am sə. ³³Fana mʉ nə sə geŋ mali mantombì ntinə bə zòŋ, nə ye bə nùmbu nə̀ nà’ bɛ’ɛ nə sə̀’; bʉ̀ʉsə̀ ka bə̀boŋ ŋgòzə ŋgà tsòhòbum Nwì mvwe’ mok sə̀ zok nə casə Jòrosalèm yeŋ. ³⁴Webee, lak Jòrosalèm, lak Jòrosalèm. Wèeŋ zəgə̀ ŋgàa tsòhòbum Nwì wèŋ, nə sə tərə ŋgàa gə̀ ntum Nwì wèŋ bə lìs. A yè’sə ghɛ̀’ sʉ̀ mvə̀’nə̀ mʉ̀ sə làp də mʉ ko wumsə gesə weŋ ndzə ni’ì mʉ̀ co məma mvəp sə wumsə bwe ye, wèŋ kà dzəm ɛ? ³⁵Bo am ka mok bə lak àwèŋ yà’sə yeŋ. Mʉ tsok weŋ də, ye jəŋ ŋga’a lo mantombì, wèeŋ nə kà mʉ mok yə fe’lə̀ tə̀tè nùmbu nə̀ wèeŋ yə fe’lə mʉ, ye mok ŋga wèŋ sə dʉk də, <Nwìi se ŋwə̀ nə̀ yi və̀ mʉnə liŋ sə̀ Tà nə> ŋkuŋ.>>

Jisòs Gʉŋsə Ŋgà Yiya Mòk

¹Nùmbu dzə̀ mòk à ye, Jisòs lo ŋgòkə̀ zʉ zʉzʉ mʉmvwe’ ndap ŋkwà’ ŋwə̀ə Faràsi mòk. Fana bwìŋ sə kʉk tse’ yi vɛ’ɛ pap. ²Ŋwə̀ nəmòk à ye fo’ nə̀ yi à tse’ yiya kəko’rə̀. ³Ànə geŋ Jisòs fek ŋgàa yə’rə̀ lʉ̀k bə bʉ̀ʉ Faràsi wèŋ dʉk də, <<Lʉ̀k dzəm də aco wo gʉŋsə ŋwè nùmbu dzə̀ kè njo-ɛ?>> ⁴Bʉ̀ʉ sə wèŋ kà cù mùk. Fana yi gʉŋsə ŋgà’ nə, nə me’rə nà’ lo. ⁵Yi fek wo də, <<A fɛɛŋ ndà nə̀ a ye-a ŋga mo ye kè mbòye gbʉ̀ ni-a sənə wʉ ndzəp nùmbu dzə̀, yi kà nà’ mvèsə̀ fis-ɛ?>> ⁶Wo à ka yusə̀ co wo cep fəsə fa yi tse’ lok.

⁷Jisòs à yə mʉmvə̀’nə̀ bʉ̀ʉ sə̀ wo à to wo mvwe’ dinà nə sə swè’ mègù mvwe’ ncum sə̀ bə̀boŋ fana yi tsok fa yà’wèŋ ncèp nè’e. ⁸Yi də, <<A ye-a ŋga ŋwè to wu də wu və mvwe’ zʉ gùu ye fana kà də wu kʉk mvwe’ sə̀ bòghak fo’ pwe’ zeŋ, nə kə cum fo’ dʉk. Bʉsə̀ kàmòk wo to ŋwə̀ nəmòk nə̀ yi ghak wu ye sə̀’. ⁹Yi və̀ə fana ŋwə̀ nə̀ yi to weŋ ba fo’ yi nə, nə kə dʉk fa wu də, <Lòkok, nə fa mvwe’ yà’sə bohòŋwə̀ nè’e.> Fana marè’tu nə ko wu, wù kə cum mok bə dzòk nə̀ nà’ ka bə̀boŋ yeŋ. ¹⁰A bə̀boŋ də wo to-a wu, wù kə cum lɛ bə dzòk nə̀ nà’ ka bə̀boŋ wùriŋ yeŋ, ya ŋga ŋwə̀ nə̀ yi to weŋ nə və̀ə fana yi dʉk fa wu də, <Ŋge’ àm, lòkok cum lo mʉmvwe’ dzə̀’ nə̀ bə̀boŋ nè’e.> Yà’sə nə gʉ wu, wù ye co ŋwə̀ nə̀ ghaŋ mʉ lisə̀ bʉ̀ʉ sə̀ wenə wèŋ cu fo’ sə. ¹¹Bʉsə̀ ŋwə̀ nə̀ yi jə kok lò-a ni’ ye mʉbu, wo jəŋ tsoŋ yi sə nze; ŋwə̀ nə̀ yi jə tsoŋ lòni’ nje sə nze fana wo jə fis kok yi mʉbu.>>

¹²Jisòs dʉk fa ŋwə̀ nə̀ yi to bwìŋ dinà nə ye də, <<A ye-a ŋga wù də wu to bwìŋ mvwe’ dinà kè mvwe’ ŋkàk àlɛ’, kà də wu to ŋge’ yo wèŋ kè bwema yo, kè njàaŋ yo wèŋ kè ŋgàa ghàk sə̀ wenə wèŋ nòkʉəp fo’ dʉk. Bʉsə̀ wo nə to fəsə wu sə̀’ fana ye də wo làk fəsə wu yà’sə laŋ. ¹³Yusə də wu to bwìŋ mvwe’ dinà fana wù to ŋgàa jìŋ, ŋgàa jì bo bə sə̀ jì kù, nə ye sə̀ jì lis wèŋ. ¹⁴Ya Nwìi nə se wu. Bʉsə̀ kaco nsàp bʉ̀ ènə lak fəsə to wu yeŋ. Nwìi nə lak wu ghà nə̀ bʉ̀ʉ sə̀ bə̀boŋ wèŋ lòkok mvwe’ kpʉ.>>

Gbʉ’ Nə̀ Wo À To Kɛ’cà Bwìŋ ŊgòKə̀ Zʉ Bum Ŋkàk

(Mat. 22:1-10)

¹⁵Ŋwə̀ nəmòk nə̀ bə yà’wèŋ ànə cum, nə sə zʉ mvwe’ mò’fis ànə yuk ncèp ènə fana yi dʉk də, <<A rɛŋsi cɛ̀bʉ̀ə̀ bohòŋwə̀ nə̀ yi nə zʉ ŋkàk nə̀ mʉ la’à Nwì.>> ¹⁶Jisòs nə dʉk fa fe’lə nà’ bə gbʉ’ də, <<Nùmbu mòk à ye, ŋwə̀ nəmòk to ŋkàk nə̀ ghaŋ, nə to bwìŋ vɛ’ɛ ŋkʉ̀ʉŋntɛ̀ŋ. ¹⁷Mvə̀k ŋkàk nə à kʉ̀rə fana yi tumsə lo mofàk nə̀ nà’a fàkgə̀ bohòyi də nà’a kə tsok fa bʉ̀ʉ sə̀ yi to yà’ sə də wo və bʉ̀ʉsə̀ wo fʉ̀hʉ wes bum pwe’ laŋ. ¹⁸Bʉ̀ʉ sə̀ wo à to wo sə pwe’ sə dʉhʉ lo də wo nə kà və̀ bʉ̀ʉ vɛ’ bə vɛ’. Ŋwə̀ nə̀ wo à to to ntòyi nə à dʉk fa nà’ də, <Mʉ̀ ywiŋ nzum am, mʉ̀ də mʉ lo kə kʉk ja’a zeŋ. Mʉ̀ lɛŋ wu, kà jòk.> ¹⁹Mòk dʉk ye də, <Mʉ̀ ywiŋ ndum mbòŋ hum fana mʉ̀ də mʉ kə kʉk ja’a yà’ ŋkuŋ. Kwəkwè’ nə kà jòk.> ²⁰Mòk dʉk ye də, <Mʉ̀ a bə̀’ ŋwàŋwè, fana ye də kaco mʉ̀ geŋ to yà’sə yeŋ.> ²¹Ànə geŋ mofàk ye nə bwi və kə tsok fa masà ye nə. Ŋgà ndap nə jok, nə dʉk fa mofàk ye nə də, <Dù mvwe’ mandzə̀ə sə̀ sə ntòlak vɛ’ɛ wàp, nə to və ŋgàa jìŋ bə sə̀ jì bo bə sə̀ jì lis, nə ye sə̀ jì kù wèŋ.> ²²Mofàk ye nə à və̀, nə dʉk də, <Mʉ̀ gʉ̀ mʉmvə̀’nə̀ wù dʉk sə laŋ fana mvwe’ ncum bwehe cu malìi.> ²³Masà nə dʉk fa yi də, <Yeè, dù lo sə mandzə̀, nə kʉk bəbwe mandzə̀ə sə̀ ŋgəà pwe’, nə to ŋwə̀ nə̀ wu yə pwe’ də yi və, ya ndap àm nə rwiŋ.> ²⁴Mʉ tsok weŋ də bʉ̀ʉ sə̀ mʉ̀ anə to to wo yà’a, nə̀ mò’fis nə kà zʉzʉʉ am sə zʉ ja’à.>>

ŊgòYe Ŋwə̀ Àm, Wù Bɛŋ Bum Sə̀ Yà’ Sə BòWu

²⁵Bwìŋ à gì bə Jisòs wùriŋ fana yi tsok fa yà’wèŋ də, ²⁶<<A ye-a ŋga ŋwè dzəm ŋgòbɛ’ və̀ mʉ, fana ŋgə̀ŋgàŋ sə dzəm tɛ̀’ ye kè ma ye, kè ŋgwe ye, kè bwe ye, kè bwe tɛ̀’ ye, kè njɛ̀’, nə ghak casə mʉmvə̀’nə̀ yi dzəm mʉ fana ye də kaco ŋwə̀ ànə ye to mo fàk àm yeŋ. Ŋwèe dzəm-a mʉ fana yi tse’ ŋgòdzəm mʉ nə casə mvə̀’nə̀ yi dzəm ni’ ye. ²⁷A ye-a ŋga kaco ŋwè bək jəŋ ntə̀əŋ ye, nə bɛ’ və mʉ yeŋ, ye də kaco ŋwə̀ ànə ye to mofàk àm yeŋ. ²⁸A ye-a ŋga ŋwè dzəm ŋgòci ndap, yi nə cum to ntòsə nze, nə kʉk ja’a də ndap nə nə jəŋ yi mbàm sʉ̀ nɛ ŋkuŋ. Yi nə ja’a də yi tse’ mbàam sə̀ aco yi ci wes to ndap nə bə zeŋ àlɛ. ²⁹A ye-a ŋga wù ka vɛ’nə gʉ fana kàmòk aco wù yeto fàak sə, nə kà yà’ mèsə̀. A ye-a ŋga wù yèto fàak sə nə kà mèsə̀ fana bʉ̀ʉ sə̀ wo yə wu pwe’ nə ywi wu. ³⁰Wo nə sə cep kɛ’ də, <Ŋwə̀ nè’e a yèto ndap, nə kà nà’ ci wes to.>

³¹<<A ye-a ŋga ŋkum mòk dzəm ŋgòkə̀ lʉ̀ bə mòk fana yi nə cum to ntònze, nə tsərə bə̀boŋ. A ye-a ŋga ŋkum nə tse’ mègù bwìŋ ncùhù hum fana yi nə kʉk ja’a də aco yi kə ghak to ŋkum mòk nə̀ nà’ tse’ sə̀ nà’ bwìŋ ncùhù hum ba nə àlɛ? ³²A ye-a ŋga kaco yi ghak to ŋkum mòk nə yeŋ fana yi nə tumsə bʉ̀ʉ ye mok wèŋ ŋga nà’ cu ntòmvwe’ sə̀sap də wo kə tsok fa nà’ də yi sə dzəm ye mok fifi. ³³Yà’a bohòwèŋ pwe’fo’ sə̀’ mʉmvə̀’ànə də, wèŋ tse’ ŋgòtsərə to bə̀boŋ ŋkuŋ. Wèŋ tse’ ŋgòme’rə bum sə̀ wèŋ tse’ yà’ pwe’fo’ ŋkuŋ wèŋ bɛ’ və mʉ. A ye-a ŋga wèŋ ka vɛ’nə gʉ kaco wèŋ ye to ŋgàa fàk am yeŋ.

³⁴<<Ci’ yusə̀ bə̀boŋ fana, a ye-a ŋga ci’ cwɛ̀’lə bʉp, mandzə̀ nə̀ ŋgògʉ̀ yà’ lʉm fe’lə kà mok ye. ³⁵Kaco yà’ boŋsə ncàk, kè yà’ gəpsə yumok sə̀ wù a bì yà’ sə̀’ yeŋ. Bwìŋ mak megu yà’ mà’a. Bʉ̀ʉ sə̀ wèŋ sə yu’rə yusə̀ mʉ̀ sə cèp yè’e, wèŋ yuk nə rɛɛŋ.>>

Kwəkwa Nə̀ Nà’ Cu Mʉbu Ŋga Ŋwə̀ Nə̀ Bʉp Kupsə

(Mat. 18:10-14)

¹Ŋgàa ko mbàam tas bə ŋgàa gʉ̀ bʉp mok wèŋ à və̀ ŋgòyu’rə yusə̀ Jisòs à sə cèep sə. ²Fana bʉ̀ʉ Faràsi bə ŋgàa yə’rə̀ bwìŋ lʉ̀k wèŋ sə cep ŋwəm kɛ’ca. Wo sə dʉk də <<Ŋwə̀ nè’e sə dzəm ŋgàa gʉ̀ bʉp, nə sə zʉ be’lə bɛŋ bə yà’wèŋ.>>

³Ànə geŋ Jisòs mak fa wo gbʉ’ nè’e də, ⁴<<A mʉŋgorə̀ wèŋ fɛɛŋ ndà nə̀ də yi tse’-a nsùŋgaŋ ŋkʉ̀ mò’fis, nə̀ mò’fis bisə ca, kaco yi me’rə noŋsə sə̀ hum və̀ke’-ncòp-və̀ke’ sə ŋgəà, nə lap lo nə̀ mò’fis nə tə̀tè tse’ŋga yi yə nà’ ŋkuŋ yeŋ ndà?⁵Yi yə nà’ fana yi bək naaŋ nà’ mʉ ŋkambə̀hə yi, nə sə kwa. ⁶Yi kə̀ dzèŋ lak fana yi to benə ŋge’ ye bə bʉ̀ʉ sə̀ wo nòkʉəp yi wèŋ. Yi dʉk fa yà’ də, <Vesùwèeŋ kwa bʉ̀ʉsə̀ mʉ̀ a yə nsùŋgaŋ àm nə̀ nà’ a bisə nə.> ⁷Mʉ tsok fa weŋ də a ye-a ŋga ŋgà gʉ̀ bʉp nə̀ mò’fis kupsə, nə bwi fa bʉp ŋkwɛ̀ŋ fana kwəkwaa nə ye mʉbu ŋkʉ̀ʉŋntɛ̀ŋ mʉtuhù yi, nə casə bʉ̀ʉ sə̀ hum və̀ke’-ncòp-və̀ke’ sə̀ wo yàwo bʉ̀ʉ sə̀ wo kə̀kʉrə̀.

Gbʉ’ Mbàm Nə̀ Nà’ À Bisə Nə

⁸<<Kè a dʉk-a də ŋwà nəmòk a tse’ mbàam ye hum, fana nə̀ mò’fis bisə ca. Yi nə bwe’ laàm ŋgòlàp bə zeŋ, nə kurə ndap nə, nə lap se tə̀tè yi ye nà’ ŋkuŋ, ka vɛ’nə yeŋ à? ⁹Yi yə nà’ fana yi to benə ŋge’ ye bə bʉ̀ʉ sə̀ wo nòkʉəp kok fo’ wèŋ. Yi dʉk fa yà’wèŋ də, <Vesùwèeŋ kwa bʉ̀ʉsə̀ mbàm àm nə̀ nà’ a bisə nə, mʉ̀ a yə fe’lə nà’ laŋ.> ¹⁰Mʉ tsok fa weŋ də yà’ mègù sə̀’ vɛ’nə də kwəkwa cu mʉtsətsə’rəə masinjàa Nwì wèŋ ŋga ŋgà gʉ̀ bʉp nə̀ mò’fis kupsə a ntʉm ye na.>>

Gbʉ’ Mo Nə̀ Yi Ànə Bisə Nə

¹¹Jisòs à cèp malì gbʉ’ mòk sə̀’ də, <<Ŋwə̀ nəmòk à tse’ bwe ye ba, ŋga wo pwe’ mbəmbam. ¹²Nə̀ mweŋke’ nə dʉk fa tɛ̀’ awo nə də, <Pàpa, fa fis mʉ bum yàm sə̀ yà’a nə̀ kə̀ ye yàm sə ŋga’a.> Ànə geŋ yi gapsə fa yà’wèŋ bum ye sə̀ yi tse’ sə. ¹³À ka nùumbu ŋkʉ̀ʉŋ sap fana nə̀ mweŋke’ nə te’e benə bum sə̀ ye sə pwe’, nə bɛ’ mandzə̀ nə lo mvwe’ lak mok sə̀ sə̀sap. À dzèŋ fo’ yi sə zʉ sɛsə bum ye sə bə mandzə̀ njɛsə̀. ¹⁴Mvə̀’nə̀ yi à wes bum ye sə fana njè nə̀ bʉp ko mvwe’ lak yà’sə fana yi ye ŋga’a ŋgòjamə. ¹⁵Yi lo, nə sə cum mok bə ŋwə̀ nəmòk nə̀ mvwe’ yà’sə. Ŋgà’ nə à sə tumsə lòyi ŋgòsə fa ŋgùnaaŋ ye wèŋ zʉzʉ. ¹⁶Njè sə yaŋ yi vɛ’ɛ co yi zʉ zʉzʉʉ ŋgùnaaŋ sə fana ŋwə̀ nəmòk kà yi yumok fa lok. ¹⁷Ŋkərə̀ ye ànə foho və fana yi dʉk də, <Bwe sə̀ wo sə fàk bohòtɛ̀’ am tse’ bɛŋ co wo kà zʉ wes to, mʉ̀ sə də mʉ kpʉ yàm njè. ¹⁸Mʉ nə lokok lo kə tseŋ tɛ̀’ am, ya mʉ nə dʉk fa yi də, <<Pàpa, mʉ̀ a gʉ̀ bʉp bohòNwì nə ye bohòwù sə̀’ laŋ. ¹⁹Mʉ̀ ka mok kə̀kʉrə̀ co wo to fe’lə mʉ də mo yòyeŋ; jəŋ tse’ mʉ mok co mo ŋgà fàk yòmòk.> ²⁰Ànə geŋ yi lokok lo bohòtɛ̀’ ye nə.

<<À ye ŋga yi sə və̀ mandzə̀ mweè sə̀sap, ŋga yi ka ntòwɛs fana tɛ̀’ ye nə ye gesə lo yi, nə koksə manziŋ bohònà’. Yi caŋ lo, nə kə ko wumsə gesə lo nà’ ndzə ni’ì yi, nə cepsə nà’ bə̀boŋ. ²¹Mo ye nə dʉk fa yi də, <Pàpa, mʉ̀ a gʉ̀ bʉp bohòNwì, nə ye bohòwù sə̀’ laŋ. Mʉ̀ ka mok kə̀kʉrə̀ co wo to fe’lə mʉ də mo yòyeŋ.> ²²Tɛ̀’ ye nə dʉk fa ye bohòŋgàa fàak ye wèŋ də, <Wèeŋ jəŋ və cə̀k nə̀ nà’ bògha’ pwe’ wàp, nə ni gesə fa yi mʉ ni’ì. Wèeŋ gesə fa yi kwàŋ ndzə bohòyi sə̀’, nə so fa yi kùuŋgùp sə̀’. ²³Ya wèeŋ kə jəŋ və mbònə̀ nà’ fʉ̀ə̀ càsə pwe’ nà’a, nə sʉə ya vesùwèeŋ zʉ nə kwa. ²⁴Bʉsə̀ mo àm ènə à kpʉ yè’sə laŋ, nə lùŋ fe’lə̀ nə sə̀mok; yi à bisə laŋ, nə yəə̀ŋ nə sə̀mok.> Wo à yè ŋga’a ŋgòsə kwa.

²⁵<<Bum yè’sə ànə sə ye vɛ’nə ŋga mo tu ye nə cu ŋgòŋ. Yi ànə və, nə kʉəp və nda’à wo fana yi yuk ŋga bwìŋ sə yəm ŋkì, nə sə kaŋ dzeŋ. ²⁶Yi to mo ŋgà fàk tɛ̀’ ye nəmòk, nə fek nà’ də bʉp yiskok yàlɛ? ²⁷Nà’ tsok fa yi də, <Moma yo bwìŋ foho və̀ yi, fana tɛ̀’ yo sʉə mbònə̀ nà’ fʉ̀ə̀ gha’ pwe’ nə də bʉ̀ʉsə̀ mo ye nə kə̀ tsèŋ yi bə̀boŋ ŋga yumok ka bʉp.> ²⁸Yi à yuk vɛ’nə, yi jok, nə də yi kà mʉ nda’à mok ni. Tɛ̀’ ye nə tesə və sə mbiŋ, nə sə kə lɛŋ mo tu ye nə. ²⁹Mo nə dʉk fa tɛ̀’ ye nə də, <Ja’a na yòo lùumŋgòŋ sə̀ mʉ̀ a fàk turə bohòwù, mʉ̀ ka dʉk yo bɛŋ yuk; wù nə kà mʉ mo ndzə mòk də ves ŋge’ am wèeŋ kwa bə zeŋ fa yuk. ³⁰Fana mo yònè’e və̀ə, yi a bʉpsə wes mbàm bə bàa sàhà pwe’, fana wù sʉə fa yi mbònə̀ nà’ fʉ̀ə̀ càsə pwe’!> ³¹Tɛ̀’ nə dʉk fa yi də, <Mo àm, wu cugə̀ yòvesù fɛn, fana bum sə̀ mʉ̀ tse’ yà’ pwe’fo’, a sə̀ yò. ³²A kə̀kʉrə̀ co a kaŋ, nə kwa anə, bʉ̀ʉsə̀ moma yònè’e à kpʉ, nə lù nə sə̀mok, yi à bisə mè laŋ nə yəə̀ŋ nə sə̀mok!> >>

Ŋgà Fàk Nə̀ Ŋgà Limŋgòŋ Nə Ye Ŋgà Fàk Nə̀ Zìnə

¹Jisòs à mà’ fa bwe ye wèŋ gbʉ’ mòk sə̀mok də, <<Ŋgà ghàk mòk à ye, nə̀ yi à tse’ ŋwə̀ nəmòk nə̀ yi à fa bum ye sə̀ yi à tse’ pwe’ ndzə bohònà’. Bwìŋ sə kə tsoho fa yi də mo fàk ye nə sə njɛsə bum ye sə. ²Ŋgà ghàk nə to nà’, nə fek nà’ də, <Mʉ̀ yuk də wù sə gʉ̀ yà ɛ? Tsok rɛŋsə fa mʉ bə fàak sə̀ wù a gʉ̀ pwe’, bʉ̀ʉsə̀ wu nə kà ŋgà fàk àm mok ye fe’lə̀.> ³Ŋgà fàk nə tsərə sə ntʉʉ̀ yi də, <Masà àm jə fis-a fàak yè’sə ndzə bohòmʉ̀, mʉ̀ gʉ yè’sə va? Mʉ̀ ka gʉgʉŋ co mʉ̀ tuŋ to nze yeŋ, mʉ dʉk-a də mʉ lɛŋ, yà’ ye sə̀’ marè’tu. ⁴Mʉ̀ rì yusə̀ mʉ nə gʉ sə laŋ, ya bwìiŋ nə ko mʉ ŋge’ ghà nə̀ mʉ̀ mè’rə fàak sə.> ⁵Fana yi to benə bʉ̀ʉ sə̀ wo tse’ masà ye nə kəa pwe’fo’. Yi dʉk fa nə̀ mantombì nə də, <Wù tse’ masà àm kəa mbàm sʉ̀?> ⁶Ŋgà’ nə dʉk də, <A bʉhʉ mve’ ŋkʉ̀ mò’fis.> Ŋgà fàk nə dʉk fa fe’lə nà’ də, <Cum nze, nə kòjəŋ ŋwàk nè’e com də a hum tàŋ.> ⁷Fana yi dʉk fa fe’lə mòk də, <Kəa yò-ɛ sʉ̀?> Nà’ də, <A tasàa gòmbì ŋkʉ̀ mò’fis.> Ŋgà fàk nə dʉk fa nà’ də, <Kòŋwàk nə̀ njò, nə com gesə nja də a hum fwame’.> ⁸Masà ye nə à kʉ̀k ja’a mo fàk ye nə, nə kwasə nà’ bə nsàp ŋkərə̀ nə̀ nà’ tse’ nə. Bʉsə̀ wèŋ rì də bʉ̀ʉ sə̀ wo bɛ’ megu mandzə̀ nzeŋgòŋ wèŋ rì ŋgòkərə bə bʉ̀ʉ awo nə casə bwe sə̀ wo mvwe’ marɛŋ Nwì.>> ⁹Fana Jisòs dʉk də, <<Wèeŋ sə ko fa ni’ awèŋ ŋge’ bə ghàha nzeŋgòŋ sə̀ ntɛ̀ŋ, ya ŋga yà’a kà fàk mok kə tse’ fana wo ko jəŋ nisə lo weŋ mvwe’ lak sə̀ wèeŋ nə cum mam fo’ mvèsə̀.

¹⁰<<Ŋwə̀ nə̀ yi ye-a zìnə bə yusə̀ yà’a jo fana yi nə ye zìnə bə yusə̀ yà’a sə̀ ghaŋ sə̀’. Ŋwə̀ nə̀ yi ye-a ye ŋgà mvwès bə yusə̀ jo fana yi nə ye mali ŋgà mvwès bə yusə̀ yà’a sə̀ ghaŋ. ¹¹A ye-a də wù ka ŋwə̀ nə̀ zìnə bə ghàk nə̀ wà nə̀ sə nzeŋgòŋ nè’e yeŋ, ye də aco fa ghàk nə̀ zìnə nə ndzə bohòwù yè’sə ndà? ¹²A sə̀’ də, a ye-a ŋga wù ka zìnə bə yusə̀ yà’a sə̀ ŋwə̀ nəmòk yeŋ, ŋwə̀ nə̀ yi nə fa wu sə̀ yà’a nə ye sə̀ yò-ɛ ndà? ¹³Kaco ŋwə̀ nə̀ mò’fis fak ŋkwɛ̀ŋ bohòmasà ba yeŋ; yi nə dzəm fis mòk, nə bɛŋ mòk, kènə aco yi sə fàk bohòmòk nə̀ zìnə, nə kà mòk nə co yumok jə. Kaco wù fak bohòNwì, nə fak bohòmbàm yeŋ.>>

¹⁴Bʉ̀ʉ Faràsi sə̀ wo à dzəm mbàm wèŋ à yuk bum yè’sə fana wo ywi’lə yi. ¹⁵Jisòs nə dʉk fa ye yà’wèŋ də, <<Yà’a wèŋ sə̀ wèeŋ gʉ̀gə̀ də wèeŋ yəəŋ mʉ lisə̀ bwìŋ co bʉ̀ʉ sə̀ bə̀boŋ, ŋga Nwì rì wes yusə̀ yà’ cu sə ntʉʉ̀ wèŋ laŋ; bum sə̀ bwìiŋ tsərə də yà’ tse’ fàk wùriŋ fana yà’a yusə̀ Nwì bɛ̀ŋ yà’. ¹⁶Lʉ̀ʉk Musì bə bum sə̀ ŋgàa tsòhòbum Nwì wèŋ à còom sə à tse’ ŋàŋ kə wɛs mvə̀k nə̀ Jon ŋgà bàptɛsə̀ bwìŋ à yèto ye; ye jəŋ mvə̀k ànə fana wo sə tsòho mok Ntirə̀ nə̀ Bə̀boŋ, nə̀ nà’a bə nzak gaŋ ŋkum Nwì fana ndàaŋwè pwe’ sə kurə ni fo’ bə ŋàŋ. ¹⁷A ye-a sə̀’ vɛ’nə fana a jəjo bohòntòbu bə nzeŋgòŋ ŋgòcà gɛsə lòfo’, nə noŋsə mvə̀m lʉ̀k nə̀ mò’fis ŋgòbʉ̀ʉŋ yusə̀ wà.

Nzak Mè’rə̀ Ŋgwe

¹⁸<<Ŋwə̀ nə̀ yi mè’rə-a ŋgwe ye, nə jəŋ mòk fana ye də ŋgə̀ŋgàŋ ko nto; ŋwə̀ nə̀ yi jə-a ŋwà nə̀ ndum a mè’rə yi fana ye də ŋwə̀ ànə ko sə̀’ nto.>>

Ŋgà Ghàk Bə Lasorò

¹⁹Jisòs à mà’ fe’lə gbʉ mòk sə̀’ də, <<Ŋgà ghàk nəmòk à ye, yi sə ni megu cə̀ək sə̀ yà’ gʉ ntɛŋ, nə sə zʉ megu zʉzʉʉ sə̀ bə̀boŋ nùumbu pwe’. ²⁰Ŋgà jìŋ mòk à sə kə̀ nòoŋ mvwe’ ncùu ŋka’ ye. Ni’ ŋgà jìŋ nə à mègù mvwe’è mvwe’. ²¹Yi à sə dzəm də yi sə te’e zʉ zʉzʉʉ sə̀ ŋgà ghàk nə sə zʉ fana yà’ sə bəhə gbʉ tsoŋ sə nze sə. Ŋgbʉ à sə və̀ə kə̀ bə̀rə mvwe’ ye sə. ²²Ŋgà jìŋ nə à kpʉ fana masinjàa Nwì wèŋ bək lo yi bohòAbràham. Ŋgà ghàk nə à kpʉ sə̀’, wo tuuŋ yi. ²³Yi a cu mvwe’ ŋgə’ nə̀ sə misə̀, nə sə ye ŋgə’ fo’ wùriŋ. Fana yi fəsə kok lis, nə ye gesə lo Abràham mvwe’ sə̀sap, bə Lasoròŋgʉ ni’ì nà’. ²⁴Yi to fis də, <Tɛ̀’ am Abràham, koksə-a manziŋ bohòmʉ̀, nə tum Lasoròyi so gesə ndubo ye sə ndzəpə̀, nə kə fisə fa mʉ lʉm àm bə zeŋ, bʉ̀ʉsə̀ lʉm mis ènə sə tɛŋ barə mʉ wùriŋ.> ²⁵Abràham nə dʉk fa nà’ də, <Mo àm, wù riŋ də wù à sə tse’gə̀ bum sə̀ bə̀boŋ yo ghà nə̀ wù à cu ntòŋwəm, fana Lasoròsə tse’ ye bum sə̀ bʉp. Yi cu ye ŋga’a nè’, sə yuk lʉ̀m fana wù sə ye bwi yòmok ŋgə’ nə̀ bʉp. ²⁶A mè’rə-a yà’sə sə̀ vɛ’nə fana wo gʉ̀ maŋkì mòk nə̀ cəco wùriŋ mʉtsətsə’rəə wù bə vès. Wo à gʉ̀ nà’ də ya ŋwèe kà ma ndzə̀ bohòwù to lòto, ŋwə̀ nə̀ ma nja kà bohòvès fɛɛŋ sə̀’ to ya’ və̀ to.> ²⁷Ànə geŋ ŋgà’ nə dʉk fe’lə də, <Ye də tɛ̀’ am, mʉ̀ lɛŋ wu də wu tum gesə lo yi nda’à tɛ̀’ am. ²⁸Bwema am sə̀ mbəmbam cu mbwa tu awo tàŋ. Yi tipsə yà’wèŋ bwɛ̀rɛ aco wo kə ni sə̀’ mvwe’ ŋgə’ə yè’sə.> ²⁹Abràham dʉk fa nà’ də, <Ŋwàak Musì bə ŋgàa tsòhòbum Nwì wèŋ sə̀ njamòk cu ca, wo yuk bohòyà’.> ³⁰Yi dʉk də, <Tɛ̀’ am Abràham, ka vɛ’nə yeŋ, bʉ̀ʉsə̀ ŋwə̀ nə̀ yi tesə mvwe’ kpʉ kə̀ tsèŋ-a wo yi fana wo nə kupsə li.> ³¹Abràham dʉk də, <A ye-a ŋga wo ka bohòMusì bə ŋgàa tsòhòbum Nwì wèŋ yuk fana ye də ŋwèe lòkok-a sə̀ mvwe’ kpʉ, nə geŋ fana kaco wo kupsə wo yeŋ.> >>

Nzak Sə̀swìfa Bə Nzak Dzədzəm

¹Jisòs à dʉk fa bwe ye wèŋ də, <<Mə̀mùmsə̀ə nə və tsoŋ li bohòbwìŋ yo; nə ye də a ŋgə’ nə̀ bʉp bohòŋwə̀ nə̀ yi sə jə və mə̀mumsə̀ nə. ²Anə boŋ bohònsàp ŋwə̀ ànə co wo swi’ fa yi ŋgòk mòk kə̀ mìhi, nə mak gesə lo yi bə zeŋ sə mvwe’ ndzəp mòk nə̀ cəco, nə noŋsə nə̀ də yi gʉ bwe yè’e də mòok gʉ bʉp. ³Wèeŋ sə jəŋ ŋkərə̀ bə tu awèŋ; a ye-a ŋga moma yo gʉ̀ wu bʉp wù sa’rə yi; a ye-a ŋga yi kupsə ntʉm fana wù swifa yi. ⁴A ye-a ŋga yi gʉ̀ bʉp bohòwù kɛ̀’ sàmba nùmbu nə̀ mò’fis, nə bʉʉŋ dʉk sə̀’ kɛ̀’ sàmba pwe’ də <Swìfa mʉ> fana, wu nə swifa tsoŋ yi.>>

⁵Ŋgàa ntum Jisòs sə wèŋ à dʉk fa Tà də, <<Kùksə fa ves dzədzəm avès co ves naaŋ tu bohòwù.>> ⁶Tà dʉk fa wo də, <<A ye-a ŋga wù tse’ mègù-a dzədzəm momjo co mʉ ŋgwì tʉ nə̀ wo togə̀ nà’ də mostà nà’a, fana aco wù dʉk fa ntseŋ tʉ càŋ nè’e də, <Coho mvwe’ yè’e, nə kə təəŋ ndzə tsətsə’rəə ndzəp nà’a> fana, tʉ nə nə yuk dʉk yònə.

Mandzə̀ Nə̀ Mofàk Tse’ ŊgòFàak

⁷<<A dʉk-a də mòk mʉŋgorə̀ wèŋ tse’ mofàk ye, nə̀ nà’ sə wom fa yi fàk kè də nà’ sə gʉ̀msə fa yi nsùŋgaaŋ ye àlɛ. A ye-a ŋga yi bwì foho və̀ ŋgòŋ anə, aco wu nə dʉk fa yi də, <Cà cum nze nə̀nàk, nə zʉ zʉzʉ> à? ⁸Wu nə kà vɛ’nə dʉk. Wu nə dʉk lɛ də, <Lam fa mʉ zʉzʉ am, nə fʉhʉ ŋgòcàsə fa mʉ yà’ fana wu nə yoŋsə mʉ̀ zʉ nə no wes yàm ŋkuŋ, wù zʉ nə no yò.> ⁹Yi nə kwasə mofàk nə də bʉ̀ʉsə̀ nà’ gʉ̀ mvəsə̀ yi dʉk də nà’a gʉ sə à? Hai’ ka ye lok! ¹⁰Yà’ mègù bohòwèŋ yàwèŋ sə̀’ vɛ’nə, a ye-a ŋga wèŋ gʉ̀ wes yusə̀ wo dʉk weŋ də wèeŋ gʉ fana wèŋ dʉk megu də, <Vèes yè’sə bwe fàk wà, vès gʉ̀ mègù fàak avès, sə̀ vès tse’ ŋgògʉ̀ yà’ co bwe fàk.> >>

Jisòs Gʉŋsə Ŋgàa Kuturu Hum

¹¹Mʉmvə̀’nə̀ Jisòs à sə cà ŋgòlòJòrosalèm fana yi ca mʉtsətsə’rəə nzeŋgòŋ Sàmàriyà bə Galìli. ¹²Yi ànə sə ni lo mvwe’ mʉbuk lak mòk fana yi kʉrə bə ŋgàa kuturu mok wèŋ bwìŋ hum. Wo ànə sə təəŋ vèsə mvwe’ mok mweè sə̀sap, ¹³nə sə fuŋ torə fis də, <<Masà, Jisòs, koksə-a manziŋ bohòvès-ɛ̀.>> ¹⁴Yi ànə ye yà’ fana yi dʉk fa wo də, <<Wèeŋ du kə niŋ tsok fa ni’ awèŋ sə bohòŋgà fa satikà’ ya yi ye weŋ də ni’ awèŋ rɛŋ mok laŋ.>> Wo à sə lòo, yiya àwo nə me. ¹⁵Mòk mʉŋgorə̀ wo anə mò’fis à yə də yiya ye nə mèe fana yi bwi foho və maŋkwɛ̀ŋ, nə sə fuŋ kwasə və Nwì. ¹⁶Yi kə gbʉ nooŋ sə kùhu Jisòs sə nze, nə sə kwasə nà’. Ŋwə̀ ènə ànə ye ŋwə̀ə Sàmàriyà. ¹⁷Ànə geŋ Jisòs nə fek də, <<Mʉ̀ gʉŋsə ka bwìŋ hum yeŋ à? Sə̀ və̀ke’ fò? ¹⁸Ye də ŋwə̀ nəmòk ka nə̀ co yi kə kùksə Nwì yeŋ, mègù ŋkʉ̀ìŋ nè’e à?>> ¹⁹Fana yi bʉʉŋ dʉk fa ŋgà’ nə də, <<Lòkok mʉtsə̀, nə lo yuyo, dzədzəm yògʉŋsə wu laŋ.>>

Mʉmvə̀’nə̀ Gaŋ Ŋkum Nwìi Nə̀ Və̀ə Sə

(Mat. 24:23-28, 36-41)

²⁰Bʉ̀ʉ Faràsi mok wèŋ à fek Jisòs də gaŋ ŋkum Nwì sə nə̀ kə̀ və̀ yè’sə sèŋ-nɛ? Fana yi dʉk fa yà’wèŋ də, <<Gaŋ sə̀ Nwì sə və̀ə, ŋwè kà yà’ bə lis jəja yə. ²¹Kaco bwìiŋ nə dʉk də, <Wèeŋ ye yà’a yè’> kè də, <Wèeŋ ye yà’a yà’> sə̀’ yeŋ, bʉ̀ʉsə̀ gaŋ sə̀ Nwì sə yà’a mʉŋgorə̀ wèŋ.>>17:21 Aco ncèp ènə ye sə̀’ də, <<Gaŋ sə̀ Nwì sə yà’a sənə ntʉm awèŋ.>>

²²Ànə geŋ Jisòs nə dʉk fa bwe ye wèŋ dʉk də, <<Mvə̀k mòk sə və̀ə nə̀ wèeŋ nə dzəm vɛ’ɛ co wèŋ ye nùmbu mòk nə̀ Mo Ŋwèe nə ye fo’ fana wèŋ kà nà’ yə. ²³Bwìiŋ nə sə dʉk fa weŋ də, <Kʉ̀k gèsə ndzə fa’, yi nà’>, kè də, <Kʉ̀k gèsə ndzə fɛn, yi nè’> fana wù kà gə̀, nə kà wo sə̀’ yù. ²⁴Mvə̀’nə̀ mbʉ̀ʉŋ ba’agə̀ mʉbu, nə rɛŋ jəŋ mamòk kə dzeŋ mamòk yà’a fana, nùmbu njàam ye, mʉ̀ʉ mo ŋwè, mʉ nə ye sə̀’ vɛ’nə. ²⁵Megu də mʉ nə ye tsoŋ ŋgə’ ŋkʉ̀ʉŋntɛ̀ŋ, bʉ̀ʉ sə̀ niè’ wèŋ bɛŋ mʉ sə̀’ ŋkuŋ. ²⁶Mvə̀’nə̀ yà’ ànə ye mʉnə nùumbu sə̀ Nuà yà’a fana nùumbu sə̀ yàm, mo ŋwèe nə̀ ye sə̀’ vɛ’nə. ²⁷Wo à sə zʉ, sə no, wo sə caŋ gù, nə sə geŋ gù tə̀tè kə wɛs nùmbu nə̀ Nuà ànə ni ŋgwes fana ndzəp rwiŋ və kə zə wes wo pwe’. ²⁸Yà’a sə̀’ mʉmvə̀’nə̀ Lot ànə ye yà’a. Bwìŋ à sə zʉ, nə sə no, wo sə ywiŋ bum, nə sə seeŋ bum, nə sə bi bum, nə sə ci ndap; ²⁹fana nùmbu nə̀ Lot ànə tesə gɛsə lo mvwe’ lak Sodòm fana mis tsooŋ mʉbu bə nsàp lìs mòk nə̀ nà’a kʉəgə̀ mis maŋgəŋgèŋ, nə kə tɛŋ zə wes wo pwe’. ³⁰Nùmbu nə̀ mʉ̀ʉ mo ŋwè mʉ nə yəəŋ fana yà’a nə̀ ye sə̀’ vɛ’nə.

³¹<<Nùmbu ànə ye, ŋwə̀ nə̀ yi cu yòŋsə mʉ ndùndap, ŋga yi tse’ bum mʉ nda’à, kà ŋgòkə̀ jə yà’ suhù tsə. Ŋwə̀ nə̀ yi mʉnə nzum fàak nə kà maŋkwɛ̀ŋ də yi kə jəŋ bum mʉ nda’à sə̀ fohòlò. ³²Wèeŋ sə tsərə tse’ yusə̀ yà’ ànə ye bohòŋgwe Lot. ³³Ŋwə̀ nə̀ yi làp-a də yi noŋsə yòŋsə̀ ye fana yi nə bisə nà’, fana ŋwə̀ nə̀ yi dzəm-a də yi bisə yòŋsə̀ ye fana yi nə tse’ nà’. ³⁴Mʉ tsok fa weŋ də nə̀ ndzəmə̀ ànə nə̀ ye ŋga bwìŋ nòbə kè mò’fis ba, wo nə jəŋ fis lo mò’fis, nə me’rə noŋsə mòk fo’. ³⁵Bə̀ba nə sə gok bɛŋ mvwe’ mò’fis wo ba; wo nə jəŋ fis lo nə̀ mò’fis fana, nə me’rə noŋsə mòk fo’. ( ³⁶Mbəmbam baa nə sə fak nzum, wo jəŋ fis lo mòk, nə me’rə mòk.)>> ³⁷Ànə geŋ ŋgàa fàak ye sə wèŋ fek yi də, <<Anə ye ma fòTà?>> Yi dʉk fa yà’ də, <<Mvwe’ sə̀ vè ni’ nòoŋ, jìgawà’ wèeŋ nə kə benə fo’.>>

Gbʉ’ Ŋwà Ŋgwemfə Bə Ŋgà Sak Nzak

¹Jisòs à tsə̀’ fa bwe ye wèŋ gbʉ’ nè’e də ya yà’a sə lɛŋ pìriyà, nə kà wò. ²<<Ŋgà sak nzak mòk à ye mvwe’ lak mok, nə̀ yi à sə kà Nwì wəpgə̀, nə kà bwìŋ sə̀’ wəp. ³Ŋwà ŋgwemfə mòk ye mvwe’ lak yà’sə sə̀’, nə̀ yi à sə və̀gə̀ bohòŋgà sak nzak nə riŋriŋ. Ŋwà nə à sə və̀, nə sə dʉhʉ fa ŋgà’ nə dʉk də, <Sak gapsə-a mʉ ves ŋwə̀ nə̀ yi bɛ̀ŋgə̀ mʉ nè’e-nɛ̀.> ⁴Ŋgà’ nə à sə bɛ̀ŋ togə̀ ntòbɛ̀ŋnə fana ànə cum kok ghàr ŋgà’ nə dʉk sə və̀ə yi də, <A ye-a sə̀ də mʉ kà Nwì wəpgə̀, nə kà bwìŋ sə̀’ wəp fana ⁵megu bʉ̀ʉsə̀ ŋwà nè’e sə kə̀ fa mʉ ŋgə’ wùriŋ, fana mʉ nə sak fa yi nzak ye nə, bwɛ̀rɛ yi sə vəhə mali ŋgòloksə mʉ ntu’.> >> ⁶Fana Tà Jisòs dʉk fa wo də, <<Wèeŋ yuk-ɛ yàwèeŋ yusə̀ ŋgà sak nzak nə̀ yi ka zìnə tse’ nə cèep-ɛ̀. ⁷Ye də kaco Nwì tɛsə bʉ̀ʉ sə̀ yi à co’fis, sə̀ wo sə lɛŋ bohòyi nùm bə ndzəm sə yeŋ àlɛ? Aco yi cum casə mvə̀k ŋga yi ka yà’ ntòyuk fa à? ⁸Hai’, mʉ tsok fa weŋ də yi nə təəŋ fa yà’ gèm nə sak nzak nə nə̀nàk nə ye kə̀kʉrə̀. A ye-a sə̀ vɛ’nə fana ghà nə̀ mʉ̀ʉ mo ŋwèe nə̀ bwìŋ və̀ə, mʉ nə̀ yə bwìŋ ŋga wo tse’ dzədzəm ŋgòlɛŋ Nwì, nə kà wòyo àlɛ-ò?>>

Gbʉ’ Ŋwə̀ə Faràsi Bə Ŋgà Ko Mbàam Tas

⁹Jisòs à mà’ gbʉ’ nè’e bohòbʉ̀ʉ mok sə̀ wo à sə tsərə də wo bʉ̀ʉ sə̀ kə̀kʉrə̀ mʉ lisə̀ Nwì fana wo sə jəŋ bʉ̀ʉ mok wèŋ co yusə̀ wà. ¹⁰<<Bwìŋ ba à lòmʉmvwe’ ndap Nwì nə̀ ghaŋ ŋgòkə̀ lɛŋ pìriyà. Mòk à ye ŋwə̀ə Faràsi fana mòk ye sə̀ ye ŋgà ko mbàam tas. ¹¹Ŋwə̀ə Faràsi nə à təəŋ, nə lɛŋ pìriyà nə̀ nje də, <Mʉ̀ kwasə wu Nwì, bʉ̀ʉsə̀ mʉ̀ ka yàm co bʉ̀ʉ mok wèŋ yà’a yeŋ. Bʉ̀ʉ mok yàwo ŋgàa limzʉ bum bwìŋ, ŋgàa cì’ mvwès nə ye ŋgàa kohònto. Mʉ̀ kwasə wu də mʉ̀ ka co ŋgà ko mbàam tas nə̀ yi nè’e sə̀’ yeŋ. ¹²Mʉ jəgə̀ sənə ntɛŋ nə̀ mò’fis nùumbu ba, nə dzə zʉzʉ ŋgòlɛŋ wu. Yusə̀ mʉ̀ tse’ pwe’, mʉ cokfisgə̀ mamòk ca ŋgòfa wu.> ¹³Ŋgà ko mbàam tas nə ànə təəŋ ye mvwe’ sə̀sap. Yi kà lis mʉbu sə̀ kʉ̀k ja’à gèsə̀, yi wa’a tse’ bo, nə lɛŋ də, <Nwì, koksə manziŋ bohòmʉ̀ nə̀ mʉ ŋgà gʉ̀ bʉp!> ¹⁴Mʉ tsok weŋ də ŋwə̀ ènə ànə bwìŋ foho lo la’à yi co ŋwə̀ nə̀ kə̀kʉrə̀ mʉlisə̀ Nwì nə noŋsə mòk nà’a. Bʉsə̀ ŋwə̀ nə̀ yi jə fis kok lò-a ni’ ye mʉbu fana wo nə jəŋ tsoŋ lo yi tsətsoŋ; ŋwə̀ nə̀ yi jə tsoŋ lò-a ni’ nje sə nze fana wo nə jəŋ fis kok lo yi mʉbu.>>

Jisòs Sè Bəbweŋke’ Wèŋ

(Mat. 19:13-15; Mak 10:13-16)

¹⁵Wo à sə jə və̀ fa Jisòs bəbweŋke’ də ya yi jwɛŋ yà’ bə bo nə se yà’ fana ŋgàa fàak ye wèŋ ànə ye vɛ’nə, wo jwa sa’rə bʉ̀ʉ sə də yà’a kà vɛ’nə gʉ̀. ¹⁶Jisòs ànə ye vɛ’nə, yi to bwe sə, nə dʉk də, <<Wèeŋ me’rə bəbweŋke’ wèeŋ və bohòmʉ̀, nə kà wo mandzə̀ lok; bʉ̀ʉsə̀ gaŋ ŋkum sə̀ Nwì sə, tse’ yà’ nsàap sə̀ co wo yè’sə. ¹⁷Mʉ tsok fa weŋ ŋkèm dʉk də, ŋwə̀ nə̀ yi ka-a gaŋ sə̀ Nwì sə co mvə̀’nə̀ bweŋke’ jəgə̀ bum jə ye də kaco ŋgə̀ŋgàŋ kə ni fo’ yeŋ.>>

Ŋgə’ Nə̀ Bə Ghàk

(Mat. 19:16-30; Mak 10:17-31)

¹⁸Ŋkwà’ ŋwə̀ bʉ̀ʉ Jus mòk à və̀ kə̀ fek Jisòs də, <<Cicà nə̀ bə̀boŋ, yusə̀ aco mʉ̀ gʉʉ yè’sə yà, ya mʉ nə kə tse’ lùŋ nə̀ nà’a nə̀ kà mè-ɛ?>> ¹⁹Jisòs dʉk fa nà’ dʉk də, <<Wù to mʉ də ŋwə̀ nə̀ bə̀boŋ bʉ̀ʉ yà? Ŋwə̀ nə̀ bə̀boŋ bʉ̀ə̀, mègù Nwì yiìyi. ²⁰Wù rì lʉ̀ʉk sə laŋ də, <Kà sàhà ko, kà ŋwè zə, kà yə̀yə̀, kà gèem mvwès ko, nə wəp tɛ̀’ yo bə ma yo.> >> ²¹Ŋgà’ nə dʉk də, <<Mʉ̀ à gʉ̀ yè bum sə̀ wù taŋsə yè’sə ŋga mʉ̀ cu ntòmʉwà’ŋwè.>> ²²Jisòs ànə yuk vɛ’nə fana yi dʉk fa nà’ də, <<Wù sə jamə mok yu nə̀ mò’fis. Lòkə̀ sèŋ bum sə̀ wù tse’, nə gapsə fa ŋgàa jìŋ wèŋ mbàam sə, ya wu nə tse’ ghàk mʉbu; nə bɛ’ mandzə̀ yuŋ və mʉ.>> ²³Yi ànə yuk vɛ’nə fana ŋgùpcù gbʉ yi yə̀k, bʉ̀ʉsə̀ yi à ye ŋgà ghàk nə̀ wù kà fʉ̀k.

²⁴Jisòs à kʉ̀k ja’a nà’, nə dʉk də, <<Yà’ gʉ vɛ’ɛ wùriŋ bohòŋgàa ghàk ŋgòkə̀ ni mvwe’ gaŋ Nwì sə! ²⁵Joho cà bohònàm nə̀ yi yam co nàmbà’rə̀ nà’a ŋgòcà torə tesə ndzənə wʉ patà’, nə noŋsə bohòŋgà ghàk ŋgòkə̀ ni mvwe’ gaŋ sə̀ Nwì sə.>> ²⁶Bʉ̀ʉ sə̀ wo à yuk ncèp ènə à dʉk də, <<Ye də aco ŋwə̀ nə̀ yi tse’ to lùuŋ yè’sə ndà?>> ²⁷Jisòs dʉk fəsə də, <<Yusə̀ yà’ gʉ bohòŋwè ŋgògʉ̀ to fana aco Nwì gʉ ye yà’ yo.>> ²⁸Ànə geŋ Pità dʉk də, <<Ja’a na, vès a mè’rə wes ndap avès pwe’, nə bɛ’ və̀ nə wu.>> ²⁹Jisòs dʉk də, <<Mʉ̀ sə tsə̀’ fa weŋ zìnə də, ŋwə̀ nə̀ yi me’rə-a ndap ye kè ŋgwe ye kè bwema kè tɛ̀’ bə ma, kè bwe ye də a njo gaŋ ŋkum sə̀ Nwì sə fana, ³⁰ŋgə̀ŋgàaŋ nə tse’ sə̀ yà’ càsə yà’sə nie’, nə tse’ lùŋ nə̀ nà’a nə̀ kà mè nə ntsə’mòk sə̀’.>>

Jisòs Cèp Mvə̀’nə̀ Kpʉ Ye Nə Ye Sə̀mok

(Mat. 20:17-19; Mak 10:32-34)

³¹Jisòs ànə jəŋ fəsə gɛsə ŋgàa fàak ye sə̀ hum-ncòp-ba sə wèŋ, nə tsok fa wo də, <<Wèeŋ yeè, vesùwèŋ sə kok lòyè’e mʉ Jòrosalèm, fana bum sə̀ ŋgàa tsòhòbum Nwì wèŋ ànə com bə liŋ am Mo Ŋwèe nə bʉʉŋ və zìnə. ³²Wo nə fa mʉ bohòbʉ̀ lakmvum, fana wo ywi’lə mʉ, nə gʉ fa mʉ bum marè’tu wùriŋ, nə te mʉ bə nte. ³³Wo nə ləp mʉ, nə zə mʉ, mʉ kpʉ fana a kə̀ dzèŋ nùmbu nə̀ tɛ’, mʉ luŋ lokok sə̀mok.>> ³⁴Ànə geŋ wo kà yusə̀ yi cèp yè’sə rɛɛŋ lok. Ànə ye ŋga ŋkərə̀ awo nsàp nə̀ co wo kà bə ncèp ènə rɛɛ̀ŋ, fana yà’ ye bohòwo anə sə̀swihì ŋgòrɛɛŋ yà’.

Jisòs Gʉŋsə Ŋgà Jì Lis Nə̀ Yi Ŋgà Lɛɛŋ Bum

(Mat. 20:29-34; Mak 10:46-52)

³⁵Jisòs nə ànə kʉəp və mvwe’ lak Jèrikù fana ŋga ŋgà jì lis mòk cu ŋgʉ mandzə̀ anə, nə sə lɛɛŋ bum. ³⁶Yi ànə yuk ŋga bwìŋ sə cà fo’ wùriŋ fana yi fek də sə gʉ̀ yàlɛ. ³⁷Fana wo tsok yi də, <<Jisòs nə̀ mvwe’ lak Nazàrɛ sə cà yi.>> ³⁸Fana yi waŋ torə fis də, <<Jisòs mo ŋkum Devìd, koksə-a manziŋ bohòmʉ̀-ɛ̀.>> ³⁹Bʉ̀ʉ sə̀ wo ànə ye fo’ sə wèŋ gham yi də yi cum gəe’. Yi ghaha wesə ye ghaha də, <<Mo Devìd, koksə manziŋ bohòmʉ̀!>> ⁴⁰Ànə geŋ Jisòs foho təəŋ, nə də wo jəŋ və nà’. Nà’ ànə kʉəp və fana yi fek ŋgà’ nə də, ⁴¹<<Yusə̀ wù dzəm də mʉ gʉ fa wu yè’sə yà?>> Ŋgà’ nə dʉk də, <<Tà, mùk fa mègù mʉ lis ya mʉ ye bum sə̀mok.>> ⁴²Jisòs nə dʉk fa nà’ də, <<Lis yo sə muhu, ntʉm yònə̀ wù fa bohòmʉ̀ gʉŋsə wu laŋ.>> ⁴³Ànə geŋ lis ye sə muhu sə̀ ghà nə fo’ fana yi gi yuŋ lo Jisòs nə, nə sə kuksə Nwì. Bʉ̀ʉ sə̀ wo ànə ye nsàp yu ènə pwe’ à kùksə Nwì sə̀’.

Jisòs Bə Sàkiyò

¹Jisòs ànə kə ni mvwe’ lak Jèrikù, fana nə sə gi ŋgòcà lòo. ²Ŋwə̀ nəmòk ànə ye fo’ nə̀ liŋ yee də Sàkiyò. Yi ànə ye ŋkum ŋgàa ko mbàam tas mòk nə̀ ghaŋ yi, nə ye sə̀’ ŋgà ghàk. ³Yi lap co yi ye Jisòs, mandzə̀ kà ye bʉ̀ʉsə̀ bwìŋ à ye fo’ wùriŋ fana yi ye bwi ye ŋwə̀ nə̀ lə̀m. ⁴Ànə geŋ yi caŋ lo mantombì, nə kə kok tʉ mòk nə̀ wo to nà’ də Sikamòdə ya yi ye nà’, bʉ̀ʉsə̀ Jisòs nə ànə ye ŋgòcà ma nà’nə. ⁵Jisòs ànə kə wɛs mvwe’ sə fana yi kʉk kok gesə lo mbwa, nə dʉk fa nà’ də, <<Sàkiyò, suhu tsoŋ mbwa nə̀nàk bʉ̀ʉsə̀ mʉ nə nooŋ ntinə nè’e mʉ nda’à wù.>> ⁶Ànə geŋ yi suhu tsoŋ nə̀nàk, nə kə jəŋ nà’ bə kwəkwa. ⁷Bwìŋ ànə ye vɛ’nə fana wo ŋwəm wes wo pwe’ də, <<Yi lòŋgòkə̀ nòoŋ bə ŋwə̀ nə̀ yi ŋgà gʉ̀ bʉp.>> ⁸Sàkiyònə lokok dʉk fa Tà nə də, <<Yeè Tà, mʉ nə gapsə bum am mʉtsətsə’rə̀ bə tsətsə’rə̀, nə fa mamòk bohòŋgàa jìŋ wèŋ. A ye-a ŋga mʉ̀ a limzʉ yu ŋwə̀ nəmòk fana mʉ nə lak fəsə fa yi yà’ kɛ̀’ kwè.>> ⁹Jisòs dʉk fa nà’ də, <<Lùŋ və̀ mʉmvwe’ ndap nè’e ntinə, bʉ̀ʉsə̀ wu mo Abràham sə̀’. ¹⁰A yè’sə də mʉ̀ʉ mo ŋwè, mʉ̀ a və̀ ŋgòkə̀ làp nə luŋsə bʉ̀ʉ sə̀ wo à bisə.>>

Gbʉ’ Bwìŋ Tɛ’ Sə̀ Wo À Gàp Fa Wo Mbàm

(Mat. 25:14-30)

¹¹Mʉmvə̀’nə̀ bʉ̀ʉ sə wèŋ à sə yu’rə bum yè’sə fana yi tsok fa mali wo gbʉ’ mòk. Ànə ye ŋga yi kʉəp lòJòrosalèm fana bʉ̀ʉ sə̀ bə yà’wèŋ à ye sə, à sə tsəm yàwo də gaŋ ŋkum sə̀ Nwì sə nə yəəŋ ghà nà’nə. ¹²Fana yi dʉk də, <<Ŋwə̀ nəmòk à ye nə̀ yi à tesə mʉ ntòmbii ŋkum. Yi lòmvwe’ lak mok sə̀ sə̀sap19:12 Mvə̀k ànə à ye, wo koksə ŋwè də yi ŋkum fana yi lo lak Rumà ya ŋga ŋkum nə̀ ghaŋ nə̀ fo’ nə cumsə yi mʉ dzə̀’ə. də wo kə koksə yi gaŋ ya yi bwi və la’à yi. ¹³Yi benə bwe fàak ye wèŋ bwìŋ hum, nə fa wo mbàm ncùhù hum. Yi dʉk fa yà’ də yà’a sə ywiŋ seŋ bum bə zeŋ tè yi bwi foho və. ¹⁴Ànə geŋ bʉ̀ʉ lak ŋkwà’ ŋwə̀ nə wèŋ bɛŋ yi. Wo tum lo bʉ̀ʉ mok wèŋ maŋkwɛ̀ɛŋ yi bə ntirə̀ də, <Vès ka dzəm də ŋwə̀ ànə ye ŋkum àvès dzəm.>

¹⁵<<Ànə geŋ wo koksə yi gaŋ sə, yi bwi foho və. Yi to benə bwe fàak sə̀ yi ànə fa wo mbàm sə, də ya yi ja’a də yà’ a tse’ swe’ mbàm sʉ̀ nɛ. ¹⁶Ŋwə̀ nə̀ mantombì à və̀ə, nə dʉk də, <Tà, mbàm nə̀ wù a fa mʉ mò’fis nə a bʉ̀ʉŋ mok hum.> ¹⁷Ŋkwà’ ŋwə̀ nə kwasə nà’ də, <Wusùkù’, mo àm-a’, wù gʉ̀ bə̀boŋ. Wù nìtsə̀’ zìnə yòbə mʉyu nə̀ nà’a momjo laŋ, fana mʉ gʉ wu ŋga’a ŋgòkotse’ buhu lak hum.> ¹⁸Ŋwə̀ nə̀ ba à və̀ə, nə dʉk də, <Tà, mbàm nə̀ mò’fis nə, a bʉ̀ʉŋ mok tàŋ.> ¹⁹Yi dʉk fa nà’ də, <Wù tse’ yòsə̀’ buhu lak tàŋ.> ²⁰Mòk à və̀ sə̀’, nə dʉk ye də, <Tà, mbàm yònə nè’, mʉ̀ a kì lòksə nà’ ndzənə gàcə̀k. ²¹Bʉsə̀ mʉ̀ a sə wəp də wu nsàp ŋwə̀ nə̀ wù gʉ wùriŋ. Wu te’e jəgə̀ yusə̀ wù anə ka noŋsə, nə sə kʉp jəŋ yusə̀ wù à ka wù bi.> ²²Yi dʉk fəsə fa nà’ də, <Mʉmvə̀’nə̀ wù cèp də mʉ nsàp ŋwə̀ nə̀ vɛ’nə yà’sə, mʉ nə sak wu sə̀’ vɛ’nə. Wu mo nə̀ bʉp! Wù rìŋ də mʉ ŋwə̀ nə̀ mʉ̀ gʉ wùriŋ, nə̀ mʉ te’e jəgə̀ yusə̀ mʉ̀ à ka noŋsə; mʉ̀ sə kʉp mvwe’ sə̀ mʉ̀ à ka bi àlaa? ²³Nə gʉ va bwɛ̀rɛ wù à kə̀ gèsə fa mʉ mbàm am sə mvwe’ ŋgwa’ mòk, də ya mʉ və̀ ŋgòjə yà’, ŋga mʉ swe’ na mbwa-ɛ?> ²⁴Yi bʉʉŋ dʉk fa bʉ̀ʉ sə̀ wo à ye fo’ sə wèŋ də, <Wèeŋ fep fis jəŋ ncùhù nə̀ bohòyi nə, nə fa nà’ bohòŋwə̀ nə̀ yi nə tse’ fa’ ncùhù hum nà’a.> ²⁵Wo dʉk fa yi də, <Tà, yi tse’ ncùhù hum ye laŋ!> ²⁶Ŋkwà’ ŋwə̀ nə də, <Mʉ tsok fa weŋ də ŋwə̀ nə̀ yi tse’-a yo fana wo nə naaŋ yamsə fa yi mok. Nə ye də bohòŋwə̀ nə̀ yi ka ye yumok tse’ nə, a megu-a sə̀ mʉyu nə̀ jo nə̀ yi tse’ nà’ nə, wo nə jəŋ fis gɛsə nà’ ndzə bohòyi anə fo’. ²⁷A ŋga’a mok bohòbʉ̀ʉ sə̀ wo sə bɛ̀ŋ mʉ də mʉ nə kà ŋkum awo ye yè’e wèŋ. Wèeŋ jəŋ və wo fɛn, nə sʉə wo mʉlisə̀ mʉ̀.> >>

Jisòs Ni Lak Jòrosalèm Co Ŋkum

(Mat. 21:1-11; Mak 11:1-11; Jon 12:12-19)

²⁸Jisòs ànə cep wes yè’sə fana yi sə lo mantombì ŋgòkok lòmʉ Jòrosalèm. ²⁹Yi à kʉəp və̀ mvwe’ lak Befà bə Betanì fana wo wɛsə və mvwe’ nda Olìp. Yi tumsə gesə ŋgàa fàak ye ba. ³⁰Yi dʉk fa yà’wèŋ də, <<Wèeŋ du mvwe’ lak sə̀ ndzə yà’a, wèeŋ sə nikok lòntɛ̀ŋ, wèŋ ye mvomndè’ mòk nə̀ ŋwè ka nà’ kok yuk; wèŋ fiŋ jəŋ və nà’ fɛn. ³¹A ye-a ŋga ŋwə̀ mòk fek weŋ də wèŋ sə fì nà’ bʉ̀ʉ yàlɛ fana wèŋ dʉk fa yi də, <Tà tse’ fàk bə zeŋ.> >> ³²Bʉ̀ʉ sə̀ yi à tum sə à lòo, nə kə ye megu sə̀’ mvə̀’nə̀ yi dʉk wo sə. ³³Mvə̀’nə̀ wo à sə fìrə mvomndè’ nə fana ŋwə̀ nə̀ yi tse’ nà’ nə fek wo də, <<Wèŋ sə fìrə mvomndè’ nə bʉ̀ʉ yà?>> ³⁴Wo dʉk fa yi də, <<Tà tse’ fàk bə zeŋ.>> ³⁵Ànə geŋ wo jəŋ və fa Jisòs nà’. Wo fweŋ cə̀ək awo, nə naaŋ fa mvomndè’ nə mʉŋkwɛɛ̀ŋ, nə cumsə Jisòs mbwa. ³⁶Mʉmvə̀’nə̀ yi à sə kok lònà’ fana wo fweŋ noŋsə lo cə̀ək awo sə mandzə̀ anə. ³⁷Wo ànə kʉəp və Jòrosalèm, ŋga wo sə suhu tsə mok nda Olìp nə fana maŋgo bʉ̀ nə̀ wo à sə yù yi nə wèŋ ye ŋgòkwa, nə sə fuŋ kuksə Nwì bə nsàap bum maŋgəŋgèeŋ sə̀ wo yə sə. ³⁸Wo sə dʉk də, <<Nwìi se ŋkum nə̀ yi və̀ mʉnə liŋ Tà! Fifi ye mʉbu, kə̀kʉ̀ksə̀ə ye bohòNwì nə̀ yi yam càsə yà lòoŋ fo’.>> ³⁹Ànə geŋ bʉ̀ʉ Faràsi mok sə̀ wo à ye sə̀’ mʉŋgorə̀ anə dʉk fa Jisòs də, <<Cicà, jwa bwe yo yè’e də wo cum gəe’.>> ⁴⁰Jisòs dʉk fa wo də, <<Mʉ tsok fa weŋ də wo cu-a gəe’, lìis yè’e cep cù.>>

Jisòs Wa Fa Lak Jòrosalèm

⁴¹Yi ànə kʉəp və, nə ye ntʉm lak nə fana yi yeto ŋgòwa fa nà’ də, ⁴²<<Anə ye-a ŋga’a də wù riŋ yusə̀ aco yà’ jəŋ və fifi bwɛ̀rà. Megu də kaco lis yo ye yà’ ŋga’a yeŋ. ⁴³Nùmbu mòk sə və̀ bohòwù, nə̀ bʉ̀ʉ sə̀ wo sə bɛ̀ŋ wuu nə və dzè’ bohòwù, nə gʉm dzooŋ wu ŋgʉŋ ma nə̀ fòpwe’. ⁴⁴Wo kʉəmsə mak mbàandap yo sə nze, nə le’ mak bʉ̀ʉ yo bə bwe yo sə̀ wo cu mʉmvwe’ və̀əm ndap yo sə pwe’. Wo nə kà lìs nə̀ mò’fis mʉnə mòk mè’rə naaŋ bʉ̀ʉsə̀ wù à ka ghà nə̀ Nwì à kə̀ kɛ’ yə weŋ nə riŋ.>>

Jisòs Bɛ’fis Ŋgàa Sèŋ Bum Mʉ Ndap Nwì Nə̀ Ghaŋ Nə

(Mat. 21:12-17; Mak 11:15-19; Jon 2:13-22)

⁴⁵Ànə geŋ yi kə ni lo mʉmvwe’ ndap Nwì nə̀ ghaŋ nə, nə sə bɛ’fis bʉ̀ʉ sə̀ wo sə sèeŋ bum mbwa. ⁴⁶Yi sə cep də, <<Wo à còm nòŋsə ndzənə ŋwàk Nwì, sə kum ndap Nwì nə̀ ghaŋ ènə də, <Ndap nə̀ njàm nə, nə ye ndap nə̀ ŋgòlɛŋ mbwa pìriyà;> fana wèŋ jə bʉ̀sə nà’ ndap ŋgàa yə̀ wèŋ.>>

⁴⁷Yi à sə yə’rə bwìŋ mʉmvwe’ ndap Nwì nə̀ ghaŋ nə nùumbu pwe’. Ŋgàa fa satikà’ bə ŋgàa yə’rə̀ fa bwìŋ lʉ̀k bə bʉ̀ʉ sə̀ ghaŋ sə wèŋ sə lap ŋgòzə yi. ⁴⁸Wo kà yusə̀ co wo gʉ sə rì bʉ̀ʉsə̀ bwìŋ pwe’ à dzəm tse’ mègù ncèp nə̀ nje nə.

Fa Jisòs Ŋàaŋ Ndà?

(Mat. 21:23-27; Mak 11:27-33)

¹Nùmbu mòk à ye ŋga Jisòs sə yə’rə bwìŋ, nə sə tsoho fa wo Ntirə̀ nə̀ Bə̀boŋ nə mʉmvwe’ ntòmbi ndap Nwì nə̀ ghaŋ nə fana ŋgàa fa satikà’ sə̀ ghaŋ bə ŋgàa yə’rə̀ fa bwìŋ lʉ̀k nə ye bʉ̀ ŋkwàha bʉ̀ʉ Jus wèŋ kə tseŋ yi. ²Wo à və̀ə, wo fek yi də, <<Vès dzəm ŋgòrì də wù gʉ̀ bum yè’sə bə ŋàaŋ sə̀ fò? Kènə fa wu ŋàŋ ndà də wu gʉ yà’ ɛ?>> ³Yi dʉk fa fəsə yà’wèŋ də, <<Mʉ tse’ ŋgòfek weŋ yusəmok yàm sə̀’, wèeŋ tsok fa mʉ-a də, ⁴mvwe’ sə̀ Jon ànə jəŋ ŋàaŋ sə̀ ŋgòbàptɛsə bwìŋ fo’ yà’a ànə və bohòNwì kè yà’ ànə tesə bohòbwìŋ-ɛ?>> ⁵Wo à yèto ŋgòcèp bə zeŋ, nə sə fe’rə ni’ awo də, <<A tsok fa yi yè’sə da? Bʉsə̀ a dʉk-a də, ŋàaŋ sə à sə və̀ bohòNwì fana yi nə fek fe’lə ves də, ànə geŋ vesùwèŋ kà yusə̀ Jon à sə cèep dzəm bʉ̀ʉ yà lɛ. ⁶Nə ye sə̀’ də a ye-a ŋga a dʉk də, ŋàaŋ sə à tesə bohòbwìŋ fana bwìiŋ nə təm ves bə lìs, bʉ̀ʉsə̀ wo à dzəm yàwo zìnə də Jon à ye ŋgà tsòhòbum Nwì.>> ⁷Fana wo dʉk fa nà’ də wo ka mvwe’ sə̀ yà’ ànə və sə riŋ. ⁸Jisòs dʉk bwi fa wo ye sə̀’ də, <<Ye də mʉ nə kà weŋ nsàp ŋàŋ nə̀ mʉ̀ tse’ ŋgògʉ̀ bum yè’sə bə zeŋ nə sə̀’ tsə̀’.>>

Gbʉ’ Ŋgàa Kʉ̀k Nzum Sə̀ Wo À Ye Bʉp

(Mat. 21:33-44; Mak 12:1-12)

⁹Ànə geŋ Jisòs ye ŋgòtsə̀’ fa bʉ̀ʉ sə wèŋ gbʉ’ nè’e də, <<Ŋwə̀ nəmòk à bì nzum ye, nə tes yà’ bohòbʉ̀ʉ səmok də ya yà’wèeŋ nə sə lak yi. Yi ànə fa wo fana yi ye’e lo mvwe’ lak mok, nə kə cum mam fo’ mvə̀k sə̀sap. ¹⁰Mvə̀k nə̀ ŋgòkʉp bum sə̀ mʉnzuù sə ànə kʉrə fana ŋgà nzum nə tum ŋgà fàk ye mòk də nà’a lo bohòbʉ̀ʉ sə̀ mʉnzuù yi sə, də yà’a fa yi ma nje. Bʉ̀ʉ sə wèŋ ləp yi, nə tum fəsə lo yi botu. ¹¹Yi tumsə fe’lə ŋgà fàk ye mòk. Wo ləp nà’nə sə̀’, nə koksə nà’ marè’tu vɛ’ɛ, nə tum fəsə lo nà’ sə̀’ botu. ¹²Yi tum ŋgà fàk ye mòk sə̀’ nə̀ tɛ’. Wo fa nà’nə mvwe’, nə bɛ’ fis gɛsə yi fo’. ¹³Fana ŋgà nzum nə dʉk də, <Mʉ gʉ kok yè’sə va? Mʉ tum lɛ mo àm nə̀ mʉ̀ dzəm yi wùriŋ nè’e, kàmòk wo yə-a də a yi, wo nə wəp li tsoŋ yi!> ¹⁴Bʉ̀ʉ sə̀ mʉnzuù sə wèŋ ànə ye nà’ fana wo dʉk mʉŋgorə̀ àwo anə də, <Nè’e ŋga’a monə̀ ndzə və̀ə yi nə̀ ŋkwà’ ŋwə̀ nə kà-a ye, yi nə cum mvwe’ kùu nà’ yi nə. Vesùwèeŋ zə yi, ya bum ye sə ye mok sə̀ yàvès.> ¹⁵Ànə geŋ wo kə ko fis yi mʉnzuù anə, nə zə yi. Ye də ŋgà nzum nə nə gʉ bohòbʉ̀ʉ yè’sə wèŋ va? ¹⁶Yi nə və kə zə bʉ̀ʉ sə̀ wo tse’ nzum ye sə wèŋ, nə jəŋ fa nzum sə bohòbʉ̀ʉ mok sə̀ zok.>>

Bʉ̀ʉ sə wèŋ ànə yuk wes vɛ’nə fana wo dʉk də, <<Nwìi gʉ co yumook kà vɛ’nə ye yuk.>> ¹⁷Fana Jisòs kʉk ja’a wo jwaaŋ, nə fek wo də, <<Ye də yusə̀ wo à còm nòŋsə yà’ ndzənə ŋwàk Nwì yè’e də yà? Də,

<Lìs nə̀ ŋgàa ci ndap wèŋ à dzèeŋ màk nòŋsə nà’ də nà’a bʉp nə kə̀ tse’ ghak fe’lə fàk mok sə̀’ zeŋ.20:17 Ye Màtiyò21:42>

¹⁸Ŋwə̀ nə̀ yi kə̀ gbʉ̀-a mʉnə lìs ànə, ŋgə̀ŋgàŋ tiiŋ sam zəzok, nə ye də a ye-a ŋga nà’ gbʉ̀ ŋwə̀ nəmòk mʉni’ì fana nà’ gok fam ŋgə̀ŋgàŋ.>>

¹⁹Ŋgàa yə’rə̀ lʉ̀k bə ŋgàa fa satikà’ sə̀ ghaŋ wèŋ sə lap mandzə̀ də wo ko yi ghà nà’nə bʉ̀ʉsə̀ wo à rì də nà’ màk fa gbʉ’ ànə bohòwo. Fana megu də wo sə wəp də bwìiŋ nə jok.

Fa Nwì Yu Ye Nə Fa Kaisà Yu Sə̀ Ye

(Mat. 22:15-22; Mak 12:13-17)

²⁰Ànə geŋ wo sə kʉk yi, nə tum fa yi mfʉəp sə̀ wo sə gʉ borə co wo bʉ̀ʉ sə̀ zìnə. Wo sə gʉ vɛ’nə də ya wo ko yi bə yumok sə̀ yi nə cep, ya wo fa yi bohòŋgàa fàak sə̀ wo tse’ ŋàŋ mvwe’ nze govənònə̀ fo’ nə. ²¹Wo fek yi də, <<Cicà, vès rì tse’ də wù sə cèp, nə sə yə’rə fa bwìŋ yusə̀ yà’a zìnə; nə ye sə̀’ də wu kà ŋwè gèm ko fagə̀, nə sə yə’rə fa bwìŋ bum sə̀ yà’a bə mandzə̀ Nwì bə zìnə. ²²Vès dzəm də wu tsok-a ves, lʉ̀ʉk vesùwèŋ sə tsə̀’ də, a bə̀boŋ co vès sə lak fa ŋkum Kaisà nə̀ mvwe’ lak Rumà tas kè ka’ ɛ?>> ²³Yi riŋ də yà’ sə bʉə yi fana yi dʉk fa yà’ də, ²⁴<<Wèeŋ jəŋ və fa mʉ-a mbàm mòk ɛ̀. Wo còm naaŋ mʉnə mbàm nə yè’e liŋ ndà, nə ye mbwa yè’e sə̀’ si ndà?>> Wo də, <<A sə̀ ŋkum Kaisà.>> ²⁵Fana Jisòs dʉk də, <<Ŋ̀hŋ̀. Làk fa Kaisà yusə̀ yà’a sə̀ ye, nə fa Nwì yusə̀ yà’a sə̀ Nwì.>> ²⁶Fana wo kà yumok sə̀ co wo ko yi bə zeŋ mvwe’ bwìŋ də yi cèp vɛ’ɛ tse’. Megu də wo ànə yuk mvə̀’nə̀ nà’ cèp fəsə fa wo sə fana wo mərə, cù loho wo.

Nzak Nə̀ ŊgòLòkok Mvwe’ Kpʉ

(Mat. 22:23-33; Mak 12:18-27)

²⁷Bʉ̀ʉ mok sə̀ wo à sə to wo də bʉ̀ʉ Sadusì wèŋ à və̀ kə̀ tsèŋ yi. Bʉ̀ʉ yè’sə wèeŋ bʉ̀ʉ sə̀ wo dʉkgə̀ yàwo də kaco ŋwè lokok fe’lə mvwe’ kpʉ yeŋ. ²⁸Wo à və̀, nə fek yi də, <<Cicà, Musì à còm nə̀m fa ves lʉ̀k mòk də, a ye-a ŋga tə̀tàa ŋwə̀ nəmòk kpʉ me’rə-a ŋgwe ye ŋga bə nà’ ka mwe tse’ fana moma yee nə jə tsoŋ ŋwà nə, ya bə nà’a dzə fa tə̀tà ye nə̀ yi kpʉ nə bwe. ²⁹Yumook yè’ də bwema mok wèŋ à ye tu awo sàmba. Fana nə̀ mwè nə jəŋ ŋwàŋwè, nə kpʉ me’rə nà’ ŋga bə nà’ ka mwe tse’. ³⁰Ŋwə̀ nə̀ ba jəŋ ŋwà nə, nə kpʉ me’rə nà’ sə̀’ vɛ’nə. ³¹Ŋwə̀ nə̀ tɛ’ jəŋ bwi ŋwà nə sə̀’. Yà’ à mègù vɛ’nə tə̀tè wo sə̀ sàmba sə pwe’ à kpʉ wes ŋga nə̀ mò’fis ka mwe bə ŋwà nə dzə. ³²À cu, ŋwà nə kpʉ ye sə sə̀’. ³³Ye də nùmbu nə̀ bwìiŋ nə̀ lòkok mvwe’ kpʉ nə ye nùu, ŋwà ènə nə̀ ye ŋgwe ndà. Bʉsə̀ wo a jə yi wo sàmba pwe’fo’.>>

³⁴Jisòs dʉk fa wo də, <<Mbəmbam bə bə̀ba sə̀ niè’ cugə̀ co ŋgwe bə ndum. ³⁵Megu də bʉ̀ʉ sə̀ wo kə̀kʉrə̀ ŋgòlòkok mvwe’ kpʉ ghà ànə sə nə̀ kà gù mok cu fe’lə̀. ³⁶Bʉsə̀ wo mok co masinjàa Nwì nə ye fe’lə bwe Nwì sə̀’, njo nə̀ wo a lòkok mvwe’ kpʉ. ³⁷Musì nə à nìtsə̀’ bə tu ye jəja də bwìiŋ nə̀ lòkok mvwe’ kpʉ. Mvwe’ sə̀ yi à còm bə nzak tʉ nə̀ mis à sə kʉə mbwa nà’a fana yi sə to Tà də nà’a Nwì Abràham, nə ye Nwì Azìk nə ye Nwì Jàkop. Nwì à cèp vɛ’nə ŋga wo à kpʉ lòlaŋ. ³⁸Yà’a sə nìtsə̀’ də bʉ̀ʉ yè’sə cu fe’lə ŋwəm, njo nə̀ yi ka Nwì bʉ̀ kpʉkpʉ yeŋ, yi Nwì bʉ̀ʉ sə̀ wo cu ŋwəm. Bʉsə̀ bə tsətsərə̀ nə̀ Nwìi də, ndàaŋwè pwe’ cu ŋwəm.>> ³⁹Ànə geŋ ŋgàa yə’rə̀ fa bwìŋ lʉ̀k mok wèŋ dʉk fa yi də, <<Cicà, yusə̀ wù cèp yà’sə bòwùriŋ.>> ⁴⁰Bʉsə̀ ŋwè à ka nə̀ co nà’ fek yi yumok mok ghʉ̀sə ja’a lok fʉ̀k.

Nzak Nə̀ Bə Liŋ Krɛst

(Mat. 22:41-23:36; Mak 12:35-40; Luk. 11:37-54)

⁴¹Ànə geŋ Jisòs fek wo də, <<Aco wo dʉk də ŋwə̀ nə̀ wo togə̀ yi də <Ŋkum ŋgà gèm bwìŋ> nə ye ŋgwì bʉ̀ Devìd yè’sə va? ⁴²Bʉsə̀ Devìd nə bə tu ye à cèp bə liŋ ŋwə̀ ènə ndzənə ŋwàk Sàam dʉk də,

<Tà Nwì à dʉk fa Tà àm də, <<Cum fɛɛŋ bo ma mà’a mʉ̀,

⁴³tə̀tè mʉ nə gʉ bʉ̀ʉ sə̀ wo bɛ̀ŋgə̀ wu, wù nəŋ tes kù mʉ ni’ì wo ànə.>> >

⁴⁴A ye-a də Devìd nə sə to nà’ də Tà, ye də aco yi ye bwi bohòDevìd anə mwe yè’sə valɛ?>>

Jisòs Də Bwìiŋ Jəŋ Ŋkərə̀ Bə Yusə̀ Ŋgàa Yə’rə̀ Lʉ̀k Sə Gʉ̀ʉ

⁴⁵Fana yi à cèp fa ŋgàa fàak ye wèŋ ŋga bwìŋ pwe’fo’ sə yuk də, ⁴⁶<<Wèeŋ jəŋ ŋkərə̀ bə ŋgàa yə’rə̀ lʉ̀k sə̀ wo dzəm ŋgòni tse’ cə̀ək sə̀ sə̀sap, nə dzəm də bwìŋ cepsə kɛ’ca wo mʉntɛɛ̀ŋ, nə dzəm mvwe’ ncum sə̀ bə̀boŋ mʉmvwe’ ndap pìriyà, nə dzəm də a dzèŋ mvwe’ ŋkàk, wo cum megu mvwe’ sə̀ ya bwìiŋ wəp wo co bʉ̀ʉ sə̀ ghaŋ. ⁴⁷Wo lim zə bum bàa yepmfə wèŋ, nə sə gʉ bʉpsə ndap awo, nə sə gʉ basə pìriyàa sə̀ sə̀sap ŋgwàŋ. Ŋgə’ nə̀ njàwo nə kə yam gha’ pwe’fo’ njo bum yè’sə.>>

Fəfa Ŋwà Ŋgwemfə Nəmòk

(Mak 12:41-44)

¹Jisòs à cu mʉmvwe’ ntòmbi ndap Nwì nə̀ ghaŋ, nə kʉk kok mvəsə̀ ŋgàa ghàk wèŋ sə gèsə tsoŋ fəfa awo sənə ŋkùp nə̀ wo gèsəgə̀ ca nə. ²Yi ye ŋga ŋwà ŋgwemfə mòk nə̀ yi ŋgà jìŋ gèsə tsə mànini ba. ³Fana yi dʉk də, <<Mʉ tsok weŋ yusə̀ yà’a zìnə də ŋwà ŋgwemfə nə̀ yi ŋgà jìŋ nè’e fa càsə ghak wo pwe’ yi. ⁴Bʉsə̀ wo sə fa yàwo ŋga wo tse’ ŋkʉ̀ʉŋ, fana ŋwà ŋgà jìŋ nè’e fa wes ye mʉmbàm zʉ nje nə̀ yi tse’ nə pwe’ nə̀ pwe’.>>

Jisòs Tsə̀’ Bum Sə̀ Yà’a Nə̀ Ye Ŋga Yi Kəp ŊgòVə̀

(Mat. 24:1-14; Mak 13:1-13)

⁵Bʉ̀ʉ mok wèŋ à sə cèp fo’ mvə̀’nə̀ də ndap Nwì nə̀ ghaŋ nə bòvɛ’ɛ bə lìis sə̀ wo à ci nà’ fo’, nə ye bə bum sə̀ wo à fa Nwì ŋgògʉ̀ bòŋsə ndap ye nə fo’. Jisòs dʉk fa wo ye də,⁶<<Bum sə̀ wèŋ sə yə yà’ yè’e pwe’, nùmbu mòk sə və̀ə nə̀ lìs nə̀ mò’fis nə kà mʉnə mòk fa’nə naaŋ mam. Wo nə kʉəmsə wes yà’ pwe’.>> ⁷Fana wo fek yi də, <<Cicà, tsok fa a ves ghà nə̀ bum yè’sə nə ye-ɛ̀, nə ye sə̀’ də yusə̀ yà’a nə niŋtsok də bum yè’sə kʉəp laŋ sə yè’sə yà?>> ⁸Jisòs dʉk fa wo də, <<Wèeŋ jəŋ ŋkərə̀ ya ŋwə̀ nəmòok kà weŋ bòrə̀, bʉ̀ʉsə̀ bwìiŋ nə və ŋkʉ̀ʉŋ sə̀ wo nə sə ci’ mvwès də, <Mʉ yi nə̀ Nwì à dʉk də yi nə tum nə, mvə̀k nə kʉəp laŋ.> Wèŋ kà wo bɛ’ lòswì. ⁹Nə ye də wèeŋ yuk nzak dzè’ nə ye bə mvə̀’nə̀ bwìŋ sə kʉ̀əm kɛ’ fana wèŋ kà wəp, bʉ̀ʉsə̀ bum yè’sə nə ye to tsoŋ ntòvɛ’nə ŋkuŋ. Bum yè’sə ye-a sə̀’ vɛ’nə fana mvə̀’nə̀ bum nə lə nə, nə kà sə̀ ntòkə̀ dzèŋ.>>

¹⁰Ànə geŋ yi sə tsoho fa mali wo də, <<Bòp lak mook nə lʉ bə bòp lak mok, ŋkum mok lʉ bə ŋkum mok sə̀’. ¹¹Nze nə nə sə tsoho vɛ’ɛ wùriŋ fana njè bə ŋgə’ ye kɛ’ lo mvwe’ bòop lak mok zok zok nduk. Fana bum sə̀ co yà’ koksə ŋwè wʉə bə bum mok sə̀ yà’ sə nìtsə̀’ mvə̀k nə̀ də nzeŋgòoŋ nə me wèeŋ nə sə yəəŋ mʉbu wùriŋ. ¹²Ŋkuŋ bum yè’sə nə sə ye fana wo nə ko to ntòwèŋ ŋkuŋ. Wo nə ko weŋ, nə yeŋsə weŋ ŋgə’, nə jəŋ lo weŋ mʉmvwe’ ndap pìriyà ŋgòsak weŋ, nə jəŋ lo weŋ mʉmvwe’ ndapndzəm wèŋ sə̀’. Wo nə kə jəŋ lo weŋ bohòŋkum bə govənòwèŋ pwe’fo’ bʉ̀ʉ liŋ am. ¹³Nà’nə nə ye yà’sə sə̀’ mandzə̀ bohòwèŋ ŋgòtəəŋ, nə tsoho fa bwìŋ ncèp nə̀ njàm. ¹⁴Wèeŋ riŋtse’ yè’e sə ntʉʉ̀ wèŋ də ŋwèe kà də yi sə tsərə də wu nə sə cep fəsə fa wo yè’sə də yà dʉk. ¹⁵Bʉsə̀ mʉ nə fa weŋ cù bə ŋkərə̀ nsàp nə̀ wù cèp fana cù loho bʉ̀ʉ sə̀ wo sə bɛ̀ŋ weŋ sə, wo kà yusə̀ ŋgòcèp fe’lə mok rì. ¹⁶Anə sə seŋ weŋ bʉ̀ʉ awèŋ co bʉ̀ʉ sə̀ wo dzə wu wo, bə moma yo, nə ye bwe tɛ̀’ yo bə ŋge’ yo wèŋ. Mook sə̀ wo nə zə weŋ zəə. ¹⁷Bwìŋ pwe’ nə bɛŋ weŋ njo liŋ am sə. ¹⁸Megu də, nʉ̀ə̀mtu àwèŋ nə̀ mò’fis nə kà bisə̀. ¹⁹Wèeŋ təəŋ-a gʉgʉŋ, yà’a mvə̀’nə̀ wèeŋ nə tɛsə yòŋsə̀ə awèŋ sə.

Ŋgə’ Nə̀ Nà’a Nə Ye Ŋkuŋ Nzeŋgòŋ Me

(Mat. 24:15-31; Mak 13:14-27)

²⁰<<Ghà nə̀ wèeŋ yə ŋga sojà wèŋ kə̀ gʉm lak Jòrosalèm fana wèŋ riŋ də wo nə kʉəmsə mak yà’ mvə̀k momjo. ²¹Fana bʉ̀ʉ sə̀ wo cu mvwe’ lak Jùdiyà wèeŋ caŋ kok lo mʉndahà, bʉ̀ʉ sə̀ wo cu mʉntòlak wèeŋ tesə lo, bʉ̀ʉ sə̀ wo ka mʉntòlak anə yeŋ wèeŋ kà də wo mumsə ŋgòni foho lòmbwa dʉk. ²²Bʉsə̀ a yà’sə nùumbu là’ fəsə fò, ya bum sə̀ wo à còm yà’ ndzənə ŋwàk Nwì lòoŋ fo’ bʉʉŋ və zìnə. ²³Ho’m̀, megu də anə ye ŋgə’ wùriŋ bohòbàa sə̀ bə zʉm, nə ye sə̀ wo sə fa bwe sə̀ lə mbwi bə nùumbu yà’sə. Ŋgə’ nə̀ co wù kà cèep nə ye sə nzeŋgòŋ anə ŋga Nwì jòk bohòbʉ̀ʉ yè’sə wèŋ sə̀’. ²⁴Wo nə gbɛ’ zə mok wèŋ bə fèk, nə jəŋ lo mok co ŋkwɛ̀ŋ mvwe’ bòop lak lòoŋ. Fana bʉ̀ lakmvum wèeŋ nə nəŋrə lak Jòrosalèm bə kù tə̀tè mvə̀k nə̀ Nwì a fa wo kə wɛs.

²⁵<<Bum mok sə̀ yà’ sə nìtsə̀’ mvə̀ək nə yəəŋ mʉ nùmə bə ŋwʉ nə ye mʉnə ŋkə̀ŋkàŋ sə̀’. Ma nə̀ sə nze fana bòop lak wèeŋ nə jip, nə wəp mvə̀’nə̀ ndzəp nə̀ ghaŋ cwì, nə sə kɛ’lə li gbʉ. ²⁶Bwìiŋ nə sə kpʉ sɛɛŋ bə wʉə mvə̀’nə̀ wo sə tək ŋgòyə yusə̀ yà’a nə ye sə nzeŋgòŋ anə sə, bʉ̀ʉsə̀ ŋàaŋ sə̀ ma mʉbu sə pwe’fo’ nə tsoho. ²⁷Fana wo nə ye mʉ̀ʉ mo ŋwè, mvəsə̀ mʉ̀ sə və̀ ndzənə mbàk bə ŋàŋ, nə sə fom rɛŋ boŋsə nə̀bʉp. ²⁸Bum yè’sə yè ŋgòkə̀ ye vɛ’nə, fana wèŋ fis kok tu awèŋ mʉtsə̀, nə sə kʉk, bʉ̀ʉsə̀ mvə̀k nə̀ Nwìi nə fiŋ me’rə weŋ mvwe’ ŋgə’ nə kʉəp yà’sə laŋ.>>

Yə’rə Jəŋ Yumok BohòTʉ

(Mat. 24:32-44; Mak 13:28-37)

²⁹Ànə geŋ Jisòs tsok fa wo ncèp nè’e bə gbʉ’ də, <<Wèeŋ kʉk ja’a yàwèeŋ tʉ nə̀ wo togə̀ nà’ də fik nà’a, nə ye tʉ mok wèŋ lòoŋ-ɛ̀. ³⁰Ghà nə̀ wèeŋ yə ŋga yà’ yè ŋgòtse’ mvù fana wèŋ riŋ də mbʉ̀ŋ kʉəp laŋ. ³¹Yà’ mègù sə̀’ vɛ’nə də ghà nə̀ wèeŋ yə bum yè’sə ŋga yà’ sə ye vɛ’nə fana wèŋ riŋ də gaŋ ŋkum Nwì sə yà’ kʉəp və̀ laŋ.

³²<<Mʉ̀ sə tsə̀’ weŋ yè’e ŋkèm ncèp də ŋgwì bʉ̀ nə̀ niè’ nè’e nə kà kə̀ lə̀ wes ŋga bum yè’sə yà’ fà’ laŋ. ³³Ntòbu bə nzeŋgòoŋ nə̀ cà gɛsə lòfo’, ncèp nə̀ njàm kà ye cà yuk.

³⁴<<Wèeŋ sə jəŋ ŋkərə̀ bə tu awèŋ. Kà də wèeŋ me’rə fa ni’ awèŋ bohòdinà bə jʉ̀hʉ̀ rùk nə ye bum sə̀ sə nze sə dʉk, bwɛ̀rɛ nùmbu ànə nə kə tseŋ weŋ vak ŋga wèŋ ka riŋ. ³⁵Nùmbu ànə nə kə tseŋ ŋwè vak co tam ko wu yi. Bʉsə̀ nùmbu ànə nə və bohònzeŋgòŋ nə lòoŋ fo’. ³⁶Wèeŋ sə so bə ghà nə̀ fòpwe’fo’, nə sə gʉ pìriyà də wèeŋ tse’ ŋàŋ ŋgòca swìrə to bum sə̀ yà’a nə̀ kə̀ ye yè’sə, nə kə təəŋ to mantombìi Mo Ŋwè nə sə̀’.>>

³⁷Jisòs à sə yə’rə bwìŋ mʉmvwe’ ndap Nwì nə̀ ghaŋ nə nùumbu pwe’ fana ndzəm seŋ, yi kok lo kə nooŋ mʉmvwe’ nda Olìp nə. ³⁸Tsok à sə rɛŋ fana bwìŋ pwe’ sə kə tseeŋ yi mʉmvwe’ ndap Nwì nə̀ ghaŋ nə ŋgòsə yu’rə yusə̀ yi sə tsòho sə.

Wo To Làm Mʉtuhù Jisòs

(Mat. 26:1-5, 14-16; Mak 14:1-2, 10-11; Jon 11:45-53)

¹Ŋkàha Pasobà, sə̀ wo zʉgə̀ fo’ brɛd sə̀ jì yis yà’a ànə kʉəp və ŋga’a mok laŋ. ²Fana ŋgàa fa satikà’ sə̀ ghaŋ bə ŋgàa yə’rə̀ fa bwìŋ lʉ̀k wèŋ sə lap mandzə̀ mok ŋgòzə swìhi Jisòs bʉ̀ʉsə̀ wo ànə sə wəp bwìŋ də yà’a nə jok.

³Ànə geŋ Satà ni sə ntʉʉ̀ Judàs nə̀ liŋ ye mook də Iskarəyà. Judàs nə à ye sə̀’ mòk mʉŋgorə̀ ŋgàa fàak Jisòs sə̀ wo à ye hum-ncòp-ba sə. ⁴Judàs nə à lò, nə kə cep bə ŋgàa fa satikà’ sə̀ ghaŋ nə ye bʉ̀ʉ sə̀ mantombì bohòŋgàa tək mʉmvwe’ ndap Nwì sə wèŋ mvə̀’nə̀ yi nə seŋ fa wo nà’. ⁵Wo à kwa, nə dʉk də wo fa yi mbàm. ⁶Judàs nə à dzəm, fana nə sə lap mok mandzə̀ nə̀ co yi seŋ Jisòs ŋga bwìŋ ka fo’ yeŋ.

Jisòs Fʉ̀hʉ ŊgòZʉ Ŋkàha Pasobà

(Mat. 26:17-25; Mak 14:12-21; Jon 13:21-30)

⁷Nùmbu nə̀ wo à yèto ŋkàk nə̀ wo zʉgə̀ brɛd sə̀ jì yis nə à dzèeŋ, à ye sə̀’ nùmbu nə̀ wo sʉəgə̀ nsùŋgaaŋ ŋkàha Pasobà ŋgòfa Nwì sə. ⁸Ànə geŋ Jisòs tumsə lo Pità bə Jon ŋga yi tipsə wo də, <<Wèeŋ du kə fʉhʉ fa ves ŋkàha Pasobà sə ya vesùwèeŋ kə zʉ yà’.>> ⁹Wo fek yi də, <<Wù dzəm də vèes kə fʉhʉ yè’sə ma fòlɛ?>> ¹⁰Yi dʉk fa wo də, <<Wèeŋ yu’rə bə̀boŋ. Wèeŋ kə̀ ni lòmʉntòlak anə fana wèŋ ŋwə̀mbam mòok nə kʉrə ŋga yi bə̀k tse’ kʉ̀ʉŋ ndzəp; wèŋ bɛ’ lo yi mvwe’ ndap nə̀ yi nə kə ni fo’ nə. ¹¹A kə̀ dzèŋ fo’ fana wèŋ tsok fa ŋgà ndap nə də, <Cicà nə də vèes kə fek wu də rum ndap nə̀ bə bwe ye wèeŋ nə zʉ ŋkàha pasobà mbwa nə fòlɛ?> ¹²Yi nə niŋ fa weŋ rum ndap mòk nə̀ ghaŋ ma mʉtùhù, nə̀ bum pwe’ mbwa, fana wèŋ gʉhʉ tsə’rə bum pwe’fo’.>> ¹³Ànə geŋ wo lo, nə kə ye bum sə pwe’ mvə̀’nə̀ Jisòs ànə dʉk sə. Wo fʉhʉ zʉzʉ Pasobà sə̀ fo’.

Ŋkàha Pasobà Sə̀ Wo À Zʉ To Losopà Fo’

(Mat. 26:26-29; Mak 14:22-25; 1 Korè 11:23-26)

¹⁴Mvə̀k nə à kʉ̀rə fana Jisòs cum mvwe’ ye mʉ teberə̀ ŋgòzʉ bɛŋ bə ŋgàa fàak ye sə̀ wo ŋgàa ntum ye sə wèŋ. ¹⁵Yi dʉk fa wo də, <<Mʉ̀ anə dzəm vɛ’ɛ wùriŋ də vesùwèeŋ zʉ be’lə tsoŋ zʉzʉ ŋkàha pasobà yè’sə bəbɛ’ ŋkuŋ ya mʉ ye ŋgə’. ¹⁶Bʉsə̀ mʉ tsok weŋ də mʉ nə kà yà’ mok zʉ fe’lə tə̀tè tse’ŋga yusə̀ zʉzʉʉ yè’sə tə bə tu zeŋ sə kə̀ rɛɛŋ nùmbu nə mvwe’ gaŋ ŋkum sə̀ Nwì sə ŋkuŋ.>>

¹⁷Ànə geŋ yi jəŋ ŋgàp, nə kwasə Nwì, fana yi dʉk fa wo də, <<Wèeŋ ko jəŋ, nə gapsə mʉtsətsə’rəə wèŋ. ¹⁸Bʉsə̀ mʉ tsok weŋ də, ye jəŋ nə̀ ŋga’a nè’e mʉ nə kà rùuk yè’sə mok no fe’lə̀ tə̀tè gaŋ Nwì sə kə wɛs.>>

¹⁹Fana yi jəŋ fe’lə brɛd; yi ànə kwasə wes Nwì sə̀mok fana yi fa yà’wèŋ, nə dʉk də, <<Nè’e ŋgùpni’ àm nə̀ wo a fa nà’ bʉ̀ʉ wèŋ. Wèeŋ sə gʉhʉ vɛ’nə ŋgòsə tsərə tse’ mʉ.>> ²⁰Yi ànə gʉ megu sə̀’ mʉmvə̀’ ànə bə ŋgàp nə. Ghà nə̀ wo à zʉ wes zʉzʉ sə fana yi fa wo ŋgàp nə, nə sə cep də, <<Ŋgàp nè’e rʉ̀k nə̀ fi nə̀ nà’ kì ŋge’ ndzənə ndʉəm am, nə̀ nà’a nə fe’e bʉ̀ʉ wèŋ. ²¹Megu də wèeŋ kʉk ja’a yàwèeŋ, ŋwə̀ nə̀ yi sèŋ mʉ nə cu be’lə venəwèŋ yè’ mʉ teberə̀ anə. ²²Mʉ̀ʉ Mo Ŋwè, mʉ nə kpʉ lo mvə̀’nə̀ wo ànə dʉk noŋsə sə, megu də ŋwə̀ nə̀ yi sèŋ mʉ nə cu bə ŋgə’.>> ²³Fana wo ye ŋgòfe’rə ya’ mʉŋgorə̀ wo də ŋwə̀ nə̀ yi nə seŋ nà’ nə yè’sə ndàlɛ?

Ŋwə̀ Nə̀ Yi Yam Ghak Mok Yi Yè’sə Ndà?

²⁴Mʉncèp mòk à tesə mʉŋgorə̀ wo anə sə̀’ də ŋwə̀ nə̀ nà’ yam càsə mok sə pwe’fo’ ndàlɛ? ²⁵Fana Jisòs dʉk fa wo də, <<Ŋkum sə̀ sə nzeŋgòŋ fɛŋ gʉ̀ fagə̀ bʉ̀ʉ awo sə co də wo yàwo bʉ̀ʉ sə̀ ghaŋ. Wo sə dzəm də bwìiŋ sə to wo də ŋgàa fa bwìŋ mbo. ²⁶Yà’a kà bohòwèŋ yàwèŋ vɛ’nə ye. Yusə lɛ də ŋwə̀ nə̀ yi ŋwə̀ nə̀ ghaŋ nə ye co mo nə̀ lʉə, fana ŋwə̀ nə̀ yi mantombì yi nə ye co ŋgà fàk bohòmok sə wèŋ. ²⁷Yèè, ŋwə̀ nə̀ ghaŋ yè’sə nə̀ fò, ŋwə̀ nə̀ yi cu ye mʉ teberə̀ kè ŋwə̀ nə̀ yi sə fàk ŋgòcàsə və̀ zʉzʉ mʉ teberə̀ anə-ɛ? A lɛ ŋwə̀ nə̀ yi cu mʉ teberə̀ nə. Fana mʉ yàm bohòwèŋ co ŋwə̀ nə̀ yi sə càsə zʉzʉʉ sə càsə nə.

²⁸<<Nùumbu sə̀ mʉ̀ a sə tse’ ŋgə’ sə pwe’, wèŋ sə dzəm ŋgòcu malì vesùwèŋ. ²⁹Fana mʉ̀ sə koksə weŋ gaŋ sə̀’ mvə̀’nə̀ tɛ̀’ am ànə koksə mʉ. ³⁰Wèeŋ nə zʉ mʉ teberə̀ mʉ̀ mvwe’ gaŋ am sə. Wèeŋ nə cum mʉmvwe’ kapràk, nə sə sak bòop lak Izùrɛ sə̀ yà’a hum-ncòp-ba sə.>>

Jisòs Də Pitàa Nə Dzeeŋ Yi

(Mat. 26:31-35; Mak 14:27-31; Jon 13:36-38)

³¹Fana Jisòs dʉk fa Pità də <<Saimʉ̀, Saimʉ̀ yu’rə! Satà lɛŋ də yi dzəm ŋgòjə weŋ, nə swek weŋ co wo sə swek gòmbì. ³²Megu də mʉ̀ lɛŋ fa wu pìriyà laŋ də ntʉm nə̀ wù tse’ ŋgòdzəm tse’ bohòmʉ̀ nà’a kà maŋkwɛ̀ŋ bwì foho lò. Nə ye sə̀’ də wu bwì və̀ bohòmʉ̀ fana wù gʉ ya bwema yo ye yàwo gʉgʉŋ sə̀’.>> ³³Pità nə dʉk fa yi də, <<Tà, a dzəm ye mvwe’ ndapndzəm bə mvwe’ kpʉ pwe’, mʉ nə lo yàm vesù.>> ³⁴Yi dʉk fa nà’ də, <<Pità, mʉ tsok wu ŋkèm dʉk də, ŋkuŋ mvəp to ntinə ŋga wù dʉk fis kɛ̀’ tɛ’ laŋ də wù ka mʉ riŋ.>>

Mvə̀k Ŋgə’ Nə Kʉ̀rə Laŋ

³⁵Ànə geŋ Jisòs fek wo də, <<Mvə̀’nə̀ mʉ̀ ànə tumsə lo weŋ fa’, nə dʉk də wèeŋ nə kà posà mbàm jə, kà bàm jə, nə kà kùuŋgùp sə̀’ jə tse’ lòyà’a, wèŋ ànə lo, nə kə jamə yumok à?>> Wo à dʉk də, <<Vès à ka yumok jamə.>> ³⁶Fana Jisòs nə dʉk fa wo mok də, <<Ŋwə̀ nə̀ yi tse’-a pùp ye kè bàm àlɛ, yi jəŋ tse’ nà’ ŋga’a. Ŋwə̀ nə̀ yi ka-a kafà’ tse’, ŋgə̀ŋgàŋ seŋ cə̀k ye, nə ywiŋ tse’ mòk bə zeŋ. ³⁷Mʉ tsok fa weŋ də yusə̀ wo à còm yà’ ndzənə ŋwàk Nwì bə liŋ am də, <Wo à ta be’lə yi bə ŋgàa gʉ̀ bʉp wèŋ> yà’a nə bʉʉŋ və tsoŋ zìnə. Njo nə̀ bum sə̀ wo à còm yà’ bə liŋ am sə, sə bʉʉŋ və̀ zìnə pwe’fo’.>> ³⁸Wo dʉk fa yi də, <<Tà, vès tse’ fèk ba.>> Yi dʉk fəsə fa yà’ də, <<Yà’sə kə̀kʉrə̀.>>

Jisòs Sə Gʉ̀ Pìriyà Gèsemanì

(Mat. 26:36-46; Mak 14:32-42)

³⁹Ànə geŋ yi lokok ŋgòlòmvwe’ nda Olìp sə̀ mvə̀’nə̀ yi lòhogə̀ səsa sə fana bwe ye sə wèŋ sə bɛ’ lòyi sə̀’. ⁴⁰À kə̀ dzèŋ fo’ fana yi tsok yà’ də yà’wèeŋ lɛŋ Nwì də ya mə̀mumsə̀ə kà yà’ gha’. ⁴¹Fana yi sooŋ gɛsə lo ŋgʉ ni’ì yà’wèŋ anə fo’ co wù mak lìs kə dzeŋ, nə təəŋ bə tumfərə sə lɛŋ pìriyà. ⁴²Yi lɛŋ dʉk də, <<Tɛ̀’, a ye-a ŋga bò-a wu fana wù jəŋ gɛsə lo ŋgàp ŋgə’ ènə fo’; mʉ̀ dʉk-a sə̀’ vɛ’nə, wù gʉ lɛ mʉmvə̀’nə̀ wù dzəm wù, kà mʉmvə̀’nə̀ mʉ̀ dzəm mʉ̀ gʉ̀.>> ⁴³Ànə geŋ masinjà Nwì mòk tesə və mʉbu, nə kə fa yi ŋàŋ. ⁴⁴Ànə ye ŋga ntʉm sə bʉp yi vɛ’ɛ nsàp nə̀ yi à lɛŋ vɛ’ɛ tə̀tè ndùrə̀ sə cərə yi co sə cərə tsə ndʉəm. ⁴⁵Ànə geŋ yi lokok, nə kə tseŋ bwe ye sə wèŋ ŋga wo wòbə manziŋ wùriŋ, fana nə sə dzəm mok lo. ⁴⁶Yi fek yà’wèŋ də, <<Wèŋ sə dzəm lo yà? Wèeŋ lokok, nə lɛŋ də ya mə̀mumsə̀ə kà weŋ gha’.>>

Wo Ko Jisòs

(Mat. 26:47-56; Mak 14:43-50; Jon 18:2-11)

⁴⁷Jisòs ànə sə cep mali ntòfo’ fana ma ŋgo bʉ̀ mok tesə və, ŋga Judàs nə̀ yi sə̀’ mòk mʉŋgorə̀ bwe ye sə̀ hum-ncòp-ba nə to mantombì yi. Judàs nə lo kə cepsə Jisòs nə co ŋge’ vɛ’. ⁴⁸Jisòs fek nà’ də, <<Judàs, wù də wu seŋ mʉ̀ʉ mo ŋwè bə cə̀cèpsə̀ à?>> ⁴⁹Bwe Jisòs sə̀ wo ànə ye fo’ sə à yə mvə̀’nə̀ bum sə à ye fana wo fek Jisòs də, <<Tà, aco vès gbɛ’ bə fèk à?>> ⁵⁰Mòk mʉŋgorə̀ wo anə à gbɛ’ cì’ màk ntu’u mo ŋgà fàk ŋkum ŋgà fa satikà’ mòk. Yi à gbɛ’ cì’ ntu’u nà’ sə̀ bo ma zʉ. ⁵¹Fana Jisòs dʉk də, <<Yà’ kʉ̀rə vɛ’nə,>> nə jwɛŋ gesə ntu’u sə, fana yà’ me. ⁵²Ànə geŋ Jisòs cep bohòŋgàa fa satikà’ sə̀ ghaŋ sə bə ŋgàa fàak sə̀ wo kʉ̀kgə̀ ndap Nwì nə̀ ghaŋ nə, nə ye bə ŋkwàha bʉ̀ʉ sə̀ wo à tesə və̀ ŋgòko yi sə wèŋ də, <<Wèŋ tesə co wèŋ sə lòmvwe’ bɛ’ ŋgà yə̀ bə fèk nə ye ntòk yè’e bʉ̀ʉ mʉ̀ à? ⁵³Vesùwèeŋ yiskokgə̀ mʉmvwe’ ndap Nwì nə̀ ghaŋ səsa, wèŋ kà mʉ ko. Nə ye də nè’e mok ŋga’a mvə̀k nə̀ njàwèŋ, nə̀ ŋàaŋ ndzəm tse’ ŋàŋ.>>

Pità À Bɛ̀ŋ Jisòs

(Mat. 26:57-58, 67-75; Mak 14:53-54, 65-72; Jon 18:12-18, 25-27)

⁵⁴Ànə geŋ wo ko yi, nə jəŋ lo yi mvwe’ ndap ŋkum ŋgà fa satikà’. Pità sə yuŋ və wo maŋkwɛ̀ŋ mweè sə̀sap. ⁵⁵Wo à kə̀ fimsə mis mʉ ntòmbi anə, nə cum sə yuk fana Pità nə və kə cum kok ye fo’ sə̀’. ⁵⁶Mvə̀’nə̀ mis à sə kʉə rɛɛŋ fana mʉŋwà nəmòk ye yi, nə kʉk kok nà’ jwaaŋ, nə dʉk də, <<Ŋwə̀ nè’e yegə̀ sə̀’ bə ŋgà’ ànə.>> ⁵⁷Fana Pità nə bɛŋ də, <<Njɛ̀’gù, mʉ̀ ka yi riŋ.>> ⁵⁸À cu kok ghàr ŋgà’ nəmòk ye yi sə̀’, nə dʉk sə̀’ də, <<Wu sə̀’ ŋwə̀ àwo mòk.>> Pità nə bɛŋ sə̀mok də, <<Hai’ mʉ̀ ka mòk yeŋ ŋgàta.>> ⁵⁹À sàp kok mok bə̀boŋ ntɛ̀ŋ fana ŋwə̀ nəmòk dʉk fe’lə sə̀mok dʉk də, <<Mʉ̀ rì ŋwə̀ nè’e bə̀boŋ, yi ŋwə̀ə Galìli, yi yegə̀ bə nà’.>> ⁶⁰Pità nə dʉk fe’lə sə̀mok də, <<Ŋgàta, mʉ̀ ka yusə̀ wù sə cèp yà’sə riŋ.>> À ye sə̀’ ghà ànə, ŋga yi ka ntòcep wes ntɛ̀ŋ, ntomvəp to. ⁶¹Fana Tà Jisòs bʉʉŋ kʉk gesə lo Pità. Pità tsəm kok mvə̀’nə̀ Tà anə dʉk fa yi də, <<Ntomvəp nə sə kə to ntinə ŋga wù bɛ̀ŋ mʉ kɛ̀’ tɛ’ də wù ka mʉ riŋ sə.>> ⁶²Yi tesə lo sə ntòmbiŋ, nə kə waŋ vɛ’ɛ nə̀bʉp.

⁶³Ànə ye vɛ’nə fana bʉ̀ʉ sə̀ wo à sə kotse’ Jisòs sə wèŋ à sə ywì’lə yi, nə sə ləp yi sə̀’. ⁶⁴Wo lok yi lis, nə sə fek yi də, <<Lə̀p wu ndà, riŋ-a ŋgə̀ŋgàŋ-ɛ̀?>> ⁶⁵Wo à cèp fa yi bum ŋkʉ̀ʉŋntɛ̀ŋ, nə sə yak yi.

Wo Sak Jisòs Mʉ Kaŋnsurù

(Mat. 26:59-66; Mak 14:55-64; Jon 18:19-24)

⁶⁶Nə̀ zəzòŋ à dzèeŋ fana bʉ̀ ŋkwàha bʉ̀ʉ Jus wèŋ kə benə ni’ mvwe’ mò’fis bə ŋgàa fa satikà’ sə̀ ghaŋ bə ŋgàa yə’rə̀ bwìŋ lʉ̀k wèŋ pwe’. Fana wo jəŋ lo yi mʉ kaŋsurù wo anə, nə sə cep də, ⁶⁷<<A ye-a ŋga wu Ŋkum ŋgà gèm bwìŋ nə wù, wù tsok fa ves.>> Yi dʉk fa yà’wèŋ dʉk də, <<A ye-a ŋga mʉ̀ tsə̀’ fa weŋ, kaco wèŋ dzəm yeŋ; ⁶⁸nə ye sə̀’ də a ye-a ŋga mʉ̀ fek weŋ yumok, kaco wèŋ cep fəsə fa mʉ sə̀ yeŋ. ⁶⁹Megu də ye jəŋ ŋga’a nə lo mantombì fana mʉ̀ʉ mo ŋwè, mʉ nə cum bo ma mà’a Nwì nə̀ yi tse’ ŋàŋ.>> ⁷⁰Fana wo pwe’fo’ fek yi də, <<Ye də wu mo Nwì à?>> Yi dʉk fa yà’ də, <<Wèŋ cèp mè laŋ.>> ⁷¹Fana wo dʉk ŋga’a də, <<A sə làp də a yuk fe’lə yè’sə yà? Vesùwèŋ yuk ncèp jòŋ nə kə̀ cùhu yi bə ntu’u avès laŋ.>>

Jisòs Tə Mantombìi Palè

(Mat. 27:1-2, 11-14; Mak 15:1-5; Jon 18:28-38)

¹Ànə geŋ ma ŋgo bʉ̀ nə pwe’fo’ lokok, nə jəŋ lo yi mantombìi Palè. ²Wo yeto ŋgòto fa yi njo də, <<Vès ko ŋwə̀ nè’e ŋga yi sə jipsə bʉ̀ avès, nə sə dʉk də bwìiŋ kà tas bohòKaisà làk, nə dʉk də yi Ŋkum nə̀ yi ŋgà gèm bwìŋ.>> ³Fana Palè nə fek nà’ də, <<Wu ŋkum bʉ̀ʉ Jus wèŋ wù à?>> Jisòs nə cep fəsə fa nà’ də, <<Wù dʉk yà’a mvə̀’nə.>> ⁴Palè bʉʉŋ dʉk fa ŋgàa fa satikà’a sə̀ ghaŋ sə bə bʉ̀ʉ sə̀ fo’ sə pwe’fo’ də, <<Mʉ̀ ka yàm yusə̀ bʉp sə̀ ŋwə̀ ènə gʉ̀ʉ sə ye.>> ⁵Bʉ̀ʉ sə wèŋ gʉŋ təəŋ mpaaŋ dʉk də, <<Yi sə kʉ̀ə̀msə bwìŋ mvwe’ nzeŋgòŋ Jùdiyà nə pwe’fo’ bə nsàp mandzə̀ nə̀ yi sə yə’rə wo nə. Yi a yè jə Galìli, nə kə wɛs Jòrosalèm fɛŋ pwe’.>>

Jisòs Tə Mantombìi Ŋkum Herò

⁶Palè ànə yuk bum yè’sə fana yi fek də, <<Ŋwə̀ ènə yi ŋwə̀ə Galìli àlɛ?>> ⁷Yi ànə rɛɛŋ də Jisòs tesə və̀ mvwe’ nze nə̀ tse’ fo’ ŋkum Heròfana yi tumsə lo nà’ bohòHeròanə. Ghà ànə à ye ŋga Herònə cu sə̀’ mvwe’ lak Jòrosalèm anə. ⁸Heròà yə Jisòs fana yi kwa vɛ’ɛ wùriŋ, bʉ̀ʉsə̀ yà’ à sàap mʉmvə̀’nə̀ yi à yuk liŋ nà’, nə sə dzəm də yi ye nà’. Yi ànə sə tsəm də Jisòos nə gʉ niŋ fa yi maŋgəŋgèŋ mòk. ⁹Herònə à fek Jisòs bum mok ŋkʉ̀ʉŋntɛ̀ŋ, Jisòs nə kà cù mùk lok. ¹⁰Ŋgàa fa satikà’a sə̀ ghaŋ bə ŋgàa yə’rə̀ bwìŋ lʉ̀k wèŋ gʉŋ təəŋ megu fo’ ŋgòto fa yi njo. ¹¹Heròbə sojàa ye wèŋ à bʉ̀sə yi co ləm awo, nə sə ywi’lə yi. Fana wo à nisə fa yi cə̀k mòk nə̀ co cə̀k ŋkum vɛ’ɛ, nə tum fəsə lo yi bohòPalè. ¹²Heròbə Palè à yè ko jə ŋge’ nùmbu ànə; ŋga bə nà’ à sə kà ŋge’ mantombì yegə̀.

Wo Dʉk Də Wo Nə Zə Jisòs

(Mat. 27:15-26; Mak 15:6-15; Jon 18:39-19:16)

¹³Ànə geŋ Palè nə to benə ŋgàa fa satikà’ sə̀ ghaŋ bə njì njìi sə̀ fo’, nə ye bə bʉ̀ʉ sə̀ fo’ sə wèŋ pwe’fo’. ¹⁴Yi dʉk fa yà’wèŋ də, <<Wèŋ a jə və̀ fa mʉ ŋwə̀ nè’e dʉk də yi sə jə lòwes bwìŋ ma nə̀ bə jòŋ. Mʉmvə̀’nə̀ mʉ̀ kʉ̀k ja’a yi yàm, ŋga wèŋ sə yə sə̀’ fana mʉ̀ ka yàm də yi a gʉ̀ bum sə̀ wèŋ sə dʉk yà’sə riŋ. ¹⁵Heròa ka yumok bʉp bohònà’ sə̀’ ye bʉ̀ʉsə̀ yi a tumsə fəsə vèsə nà’ bohòvès sə̀mok. Yà’ nòjəja də ŋwə̀ ènə ka yumok sə̀ bʉp sə̀ co wo zə yi bʉ̀ʉ zeŋ gʉ. ¹⁶Mʉ nə fa ŋàŋ də wo ləp yi, fana nə me’rə yi.>> ( ¹⁷Yi sə dʉk vɛ’nə ŋga à ye də nùmbu ŋkàha pasobà sə kə̀ dzèŋgə̀ə fana Palè nə fis me’rə tsoŋ fa wo ŋgà ndapndzəm mò’fis.) ¹⁸Bʉ̀ʉ sə wèŋ kɛ’ tosə ŋgùŋ cù mò’fis də, <<Wèeŋ zə gɛsə lo ŋwə̀ ènə fo’, nə fis me’rə fa ves lɛ Bàrabà.>> ¹⁹(Bàrabà nə à ye ŋwə̀ nəmòk nə̀ wo à nisə yi ndapndzəm bʉ̀ʉsə̀ yi à lʉ̀lʉ̀ bə bʉ̀ʉ gomè nə zə bwìŋ.) ²⁰Palè à cèp bohòwo sə̀mok ŋga yi sə làp mandzə̀ co yi me’rə Jisòs nə. ²¹Bʉ̀ʉ sə wèŋ sə kɛ’ŋgùŋ də, <<Wèeŋ tɛ’lə yi, wèeŋ tɛ’lə yi mʉntə̀əŋ!>> ²²Yi fek fis yà’wèŋ nə̀ kɛ̀’ tɛ’ dʉk də, <<Bʉ̀ʉ yà? Ŋwə̀ ènə gʉ̀ bʉpsə yà? Mʉ̀ ka yàm yumok sə̀ co wo zə yi bʉ̀ʉ zeŋ ye. Mʉ nə ləp yi, nə me’rə yi lo.>> ²³Bʉ̀ʉ sə wèŋ gʉŋ təəŋ vɛ’ɛ mpaaŋ nə̀ mpaaŋ nə sə kɛ’ŋgùŋ də wo tɛ’lə megu nà’ mʉntə̀əŋ. Wo à gʉ̀ vɛ’nə tə̀tè ma nə̀ njàwo nə zʉ. ²⁴Ànə geŋ Palè nə cep, nə fa ŋàŋ bə yusə̀ bʉ̀ʉ sə wèŋ à sə dzəm sə. ²⁵Yi fis me’rə ŋwə̀ nə̀ wo à nisə yi ndapndzəm njo ndàŋ, nə ye bʉ̀ʉsə̀ yi ànə zə ŋwè nə. Nà’a ŋwə̀ nə̀ wo ànə sə dzəm də nà’a fis me’rə nə, fana nə jəŋ Jisòs, nə fa yà’wèŋ də yà’a gʉ bohònà’ mvə̀’nə̀ yà’wèŋ dzəm.

Wo Tɛ’lə Jisòs Mʉntə̀əŋ

(Mat. 27:32-44; Mak 15:21-32; Jon 19:17-27)

²⁶Mʉmvə̀’nə̀ wo à sə jə lòJisòs fana wo kʉrə bə ŋwə̀ nəmòk nə̀ wo to yi də Saimʉ̀, nə̀ mvwe’ lak Sìrinì ŋga yi à sə və̀ la’à yi. Wo naaŋ fa yi ntə̀əŋ sə də nà’a bək bɛ’ Jisòs bə zeŋ maŋkwɛ̀ŋ. ²⁷Bwìŋ à sə bɛ’ və̀ yi maŋkwɛ̀ŋ anə wùriŋ. Bə̀ba mok à ye fo’ sə̀’, sə̀ wo à sə koksə manziŋ, nə sə waŋ fa Jisòs nə. ²⁸Ànə geŋ Jisòs nə bʉʉŋ kʉk wo, nə dʉk də, <<Wèŋ njɛ̀’ɛ gùu Jòrosalèm, wèeŋ kà mʉ wa fa, wèeŋ waŋ fa tu awèŋ bə tu bwe awèŋ. ²⁹Bʉsə̀ mʉ tsok weŋ də mvə̀k mòk sə və̀ nə̀ wo nə dʉk də, <Rɛŋsi bohòbàa sə̀ wo nzeŋ, nə ye və̀əm sə̀ yà’ ka mwe dzə yuk, nə ye fe’lə mbwi sə̀ mwe ka yà’ no yuk!> ³⁰Nà’a ghà nə̀ bwìiŋ nə dʉk fa nda də, <Kəəŋ gbʉ̀ və̀ mʉ ni’ì vès,> nə dʉk fa nzès də <Kə̀ kəəŋ tsə̀ lok ves.> ³¹Bʉsə̀ a ye-a ŋga bwìŋ sə gʉ̀ bum sə̀ wèŋ sə yə yè’e ŋga tʉ cu lì ntòcə̀còŋ ye də nà’a yum-a, ye wesə yè’sə ŋga’a nsàp nə̀ fò?>>

³²Bʉ̀ ŋgàa gʉ̀ bʉp mok à ye bwìŋ ba sə̀ wo à sə jə be’lə lòwo də wo kə zə be’lə wo bə Jisòs nə. ³³Wo à kə̀ dzèŋ mvwe’ sə̀ wo togə̀ fo’ Nzʉ̀ə̀ Tu Bwìŋ àwo fana wo tɛ’lə yi mʉ ntə̀əŋ anə fo’, bə ŋgàa gʉ̀ bʉp sə wèŋ. Wo à tɛ’lə ŋgà gʉ̀ bʉp mòk bo ma zʉ, mòk bo ma ŋkwìp. ³⁴Fana Jisòs dʉk də, <<Tɛ̀’ am, swì fa wo bʉ̀ʉsə̀ wo ka yusə̀ wo sə gʉ̀ sə riŋ.>> Wo sə təm bèŋ də ya wo gapsə cə̀ək ye sə.

³⁵Bʉ̀ʉ səmok à təəŋ fo’, nə sə kʉk. Bʉ̀ ŋkwàha bʉ̀ʉ Jus wèŋ à sə ywì’lə yi. Wo sə dʉk də, <<Yi tɛsə riŋ boŋsə megu bʉ̀ʉ mok wèŋ, yi tɛsə-a ni’ ye, ŋga a ye-a də yi Ŋkum ŋgà gèm bwìŋ nə̀ Nwì à cok fis, nə tumsə fa ves na!>> ³⁶Sojàa sə̀ wo à ye fo’ sə à ywì’lə yi sə̀’. Wo sə kə fa yi nsàp rùk mòk nə̀ cəcəp. ³⁷Wo sə cep də, <<A ye-a ŋga wu ŋkum bʉ̀ʉ Jus wèŋ nə, wù tɛsə-a ni’ yò!>> ³⁸Wo à còm naaŋ yumok ma mʉ tu ntə̀ŋ anə də, Nè’e ŋkum bʉ̀ʉ Jus wèŋ nə.

³⁹Ŋgà gʉ̀ bʉp mòk nə̀ yi à kə̀’ə sə̀’ mʉntə̀əŋ anə, à yàk yi də, <<Ŋkum ŋgà gèm bwìŋ ka wù nè’e yeŋ à? Tɛsə ni’ yò, nə tɛsə ves sə̀’!>> ⁴⁰Mòk nə cep jwa nà’ də, <<Wu kà Nwì wəpgə̀ à? Vesùwèŋ pwe’fo’ cu sə mvwe’ kʉ̀ʉŋ sə̀ mò’fis. ⁴¹Vesù sə yə yàvès ŋgə’ bə yusə̀ a gʉ̀ yà’ laŋ, ŋgà’ ènə ka ye yumok gʉ bʉpsə lok.>> ⁴²Yi dʉk fa Jisòs nə də, <<Wu kə̀ dzèŋ mvwe’ gaŋ ŋkum yo, wù kà mʉ swì.>> ⁴³Jisòs dʉk fa nà’ də, <<Mʉ tsok fa wu ŋkèm dʉk də, wu nə ye vesù ntinə mʉ Pàràde.>>

Jisòs Kpʉ

(Mat. 27:45-56; Mak 15:33-41; Jon 19:28-30)

⁴⁴Ànə ye ŋga nùum mok maràŋ fana ndzəm seŋ mvwe’ nzeŋgòŋ nə pwe’ tə̀tè kə dzeŋ co nùm sə̀m. ⁴⁵Fana cə̀k nə̀ nà’ à sə gàpsə mbwè ndap mòk mʉmvwe’ ndap Nwì nə̀ ghaŋ nə à sàha gà’a tsə ba.⁴⁶Fana Jisòs waŋ torə fis mʉtsə̀ də, <<Tɛ̀’, mʉ̀ fa yòŋsə̀ àm ndzə bohòwù!>> Yi ànə cep vɛ’nə fana yòŋsə̀ ye me. ⁴⁷Ŋkum sojà mòk ànə ye bum sə̀ yà’ ye sə fana yi kwasə Nwì, nə cep də, <<A zìnə də ŋwə̀ ènə nə ka yumok riŋ!>> ⁴⁸Ma ŋgo bʉ̀ nə̀ wo à ye fo’ nə, ànə ye yusə̀ yà’ ye sə pwe’ fana wo bwi foho lo la’à wo, ŋga wo wa’a tse’ lòbo ndzə ŋgùu wo. ⁴⁹Bʉ̀ʉ sə̀ wo à rì Jisòs nə, bə bə̀ba sə̀ wo à bɛ’ və̀ yi mvwe’ nzeŋgòGalìli sə wèŋ à kə̀ təəŋ mvwe’ mok sə̀sap, nə sə ja’a bum yè’sə.

Wo Tuuŋ Jisòs

(Mat. 27:57-61; Mak 15:42-47; Jon 19:38-42)

^50-51Ŋwə̀ nəmòk à ye nə̀ liŋ ye à ye də Jòsep, yi à tesə və̀ lak Àrìmàtayà mvwe’ nze Jùdiyà. Yi à ye mòk mʉmvwe’ kwe’ kaŋsurù nə̀ bʉ̀ʉ Jus wèŋ nə, nə ye sə̀’ ŋwə̀ nə̀ kə̀kʉrə̀ mʉ lisə̀ Nwì. Yi à sə tək ye gaŋ ŋkum sə̀ Nwì sə. Yi à ka ye bə bum sə̀ wo a cèptes, nə sə gʉ yà’ sə dzəm. ⁵²Ŋwə̀ ènə à lòbohòPalè, nə kə lɛŋ vèŋ ni’ Jisòs nə. ⁵³Fana yi kə ki tsoŋ nà’, nə lim gesə ndzənə cə̀k, nə kə tuuŋ nà’ ndzənə sèe sə̀ wo à tu yà’ ndzənə lìs. À ye ŋga wo ka ŋwè nja ntòtuuŋ yuk. ⁵⁴Ànə ye nùmbu nə̀ wo à sə fʉ̀hʉ, ya ŋga nùmbu dzə̀ə yeto. ⁵⁵Bə̀ba sə̀ wo à bɛ’ və̀ yi mvwe’ nze Galìli sə à yù lòo, nə kə ye sèe sə, nə ye mvəsə̀ wo tuuŋ vèŋ ye nə sə̀’. ⁵⁶Wo à bwìŋ lòo, nə kə fʉhʉ làmindà bə mve’ sə̀ wo nə kə yok vèŋ ni’ Jisòs bə zeŋ. Nùmbu dzə̀ à ye, wo yoŋsə yiskok mʉmvə̀’nə̀ lʉ̀k sə dʉk vɛ’nə ŋkuŋ nə lo kə̀ yo’ yi.

Jisòs Lòkok Mvwe’ Kpʉ

(Mat. 28:1-10; Mak 16:1-8; Jon 20:1-10)

¹Nù Sondè à ye, bàa sə lo mvwe’ sèe sə nə̀ zəzòŋ, ŋga wo kotse’ lòmve’ sə̀ wo à fʉ̀hʉ yà’ sə. ²Wo ye ŋga wo dzərə fis lìs nə̀ wo ànə lok ncùu sè sə bə zeŋ nə laŋ. ³Wo ànə ni lo sənə sèe sə fana wo kà vèŋ ni’ Tà Jisòs nə ca yə. ⁴Mʉmvə̀’nə̀ ŋkərə̀ awo à jip fo’ fana wo ye bʉ̀ʉ mok fo’ ba ŋga wo ni tse’ cə̀ək sə̀ fəfəp, yà’ sə ba’a vɛ’ɛ. ⁵Wʉə à ko wo, wo gbʉ fə’ə gesə lo si awo sə nze. Fana bʉ̀ʉ sə dʉk fa wo də, <<Wèŋ sə làp ŋwə̀ nə̀ yi cu ye ŋwəm mʉtsətsə’rəə bʉ̀ kpʉkpʉ bʉ̀ʉ yà? ⁶Yi ka fɛŋ yeŋ, yi lòkok laŋ. Wèeŋ tsərə yusə̀ yi ànə tsok weŋ ŋga yi cu ntòmvwe’ nzeŋgòGalìli yà’a. ⁷Yi ànə dʉk də, <Wo nə fa tsooŋ mʉ̀ʉ mo ŋwè ndzə bohòŋgàa gʉ̀ bʉp wèŋ, wo tɛ’lə mʉ mʉntə̀əŋ; nùmbu tɛ’ ye, mʉ̀ lokok sə̀mok.> >> ⁸Ànə geŋ wo tsərə ncèp ye nə. ⁹Wo à bwìŋ foho və̀ mvwe’ sèe sə, wo kə tsok fa bum yè’sə bohòbwe ye sə̀ hum-ncòp-mò’fis sə, bə bʉ̀ʉ mok wèŋ pwe’fo’ sə̀’. ¹⁰Ànə kə tsok fa ŋgàa ntum sə wèŋ bum yè’sə Mèri Màdàlinà bə Jòanà bə Mèri nə̀ ma Jem, nə ye bàa mok wèŋ. ¹¹Wo à tsəm də bàa yè’sə sə cèp yusə̀ yà’ ka fàk tse’ fana wo kà yà’wèŋ dzəm fa. ¹²Pità à lòkok mʉtsə̀, nə caŋ lo mvwe’ sèe sə. À kə̀ dzèŋ fo’, yi bʉhʉ tsoŋ nze, nə ye megu cə̀ək sə̀ wo à tuuŋ yi bə zeŋ sə, nə kà yumok sə̀ zok yə. Fana yi bwi foho lo lak, nə sə jip bə nsàp yu nə̀ nà’ ye ènə wùriŋ.

Yusə̀ Yà’ À Ye Mvwe’ Mandzə̀ Nə̀ ŊgòLòLak Emawùs

(Mak 16:12-13)

¹³Nùmbu ànə à ye, bʉ̀ʉ səmok à sə lòmvwe’ lak mok sə̀ wo to yà’ də Emàwùs, ŋga wo bwìŋ ba. Lak Emàwùs sə à ye co kìlometà hum-ncòp-mò’fis ŋgòlòJòrosalèm. ¹⁴Wo à sə taaŋ lòbə bum sə̀ yà’ ye yè’sə pwe’. ¹⁵Wo ànə sə taaŋ ncèp ènə mvwe’ mò’fis fana Jisòs à sòoŋ və̀ fo’ sə̀’ bə tu ye, bə yà’wèŋ sə lo ca. ¹⁶Wo ye yi, fana yumok gʉ də wo kà yi rì. ¹⁷Yi fek yà’wèŋ də, <<Wèŋ sə gì, nə sə taaŋ lo yè’sə yu yà?>> Wo foho təəŋ, nə sə kʉk bə manziŋ. ¹⁸Mòk nə̀ liŋ ye à ye də Klipàs dʉk fa nà’ də, <<Co wu yè’e ŋkʉ̀ìŋ mvwe’ lak Jòrosalèm, də mègù wù nə̀ wù ka yusə̀ yà’ a ye nùumbu yè’e riŋ à?>>

¹⁹Yi fek fe’lə yà’ də, <<A yu yà?>> Wo dʉk fa yi də, <<Bum sə̀ yà’ a ye bə liŋ Jisòs nə̀ mvwe’ lak Nazàrɛ. Yi à ye ŋgà tsòhòbum Nwì, yi à sə gʉ̀, nə sə cep bum sə̀ yà’a gʉgʉŋ wùriŋ mantombìi Nwì nə ye bwìŋ. ²⁰Ŋgàa fa satikà’ bə bʉ̀ ŋkwàha bʉ̀ avès wèŋ a cèp wo ŋkuŋ wo tɛ’lə zə yi mʉ ntə̀əŋ. ²¹Vès à sə naaŋ yàvès tu də nà’a yi nə̀ yi nə lak tiŋ fis bʉ̀ʉ Izùrɛ. Yà’sə ye-a sə̀’ vɛ’nə, a ntinə nùumbu tɛ’ nə̀ bum yè’sə a ye. ²²Fana bàa səmok sə̀ mʉŋgorə̀ vès kə̀ vèsə nòoŋ ves zooŋ, də wo anə yaaŋ lo nooŋ mvwe’ sèe ye sə, ²³nə kà vèŋ ni’ ye nə yə. Wo bwìŋ və̀, nə sə dʉk də wo ye masinjàa Nwì. Masinjàa Nwì sə tsə̀’ fa wo də nà’ cu ŋwəm. ²⁴Bʉ̀ʉ mok sə̀ anə ye vesi wèŋ lòmvwe’ sèe sə, nə ye ŋga yà’ mègù mvə̀’nə̀ bàa sə nə cep sə zìnə, fana wo kà yi ye bə lis yə.>>

²⁵Jisòs dʉk bʉsə fa yà’wèŋ də, <<Hò! Ləm bʉ̀ʉ yè’e wèŋ; wèŋ tse’ ntʉm nə̀ nà’ fi bʉp ŋgòdzəm tse’ bum sə̀ ŋgàa tsòhòbum Nwì à cèep. ²⁶Yà’ ànə ka yeŋ də Ŋkum ŋgà gèm bwìŋ nə nə ye nsàap ŋgə’ yè’sə ŋkuŋ nə ca ni mvwe’ bòoŋ ye yeŋ à?>> ²⁷Fana yi ye jəŋ mʉ ni’ì Musì bə ŋgàa tsòhòbum Nwì wèŋ, nə tsoho rɛŋsə fa wo bum sə̀ ŋwàk Nwì à sə cèp yà’ bə liŋ ye sə pwe’fo’.

²⁸Ànə geŋ wo sə kʉəp lo mvwe’ lak sə̀ wo à sə lòfo’ sə. Yi sə gʉ ye sə co də yi sə cà lòmalì mantombì vɛ’ɛ. ²⁹Fana wo sə lɛŋ nà’ də, <<Vesùwèeŋ nooŋ fɛn, bʉ̀ʉsə̀ nùm co wes laŋ, ndzəm sə və̀ə.>> Fana bə yà’wèŋ lo ŋgòkə̀ nòoŋ. ³⁰Ghà nə̀ bə yà’wèŋ ànə sə zʉ zʉzʉ fana yi jəŋ brɛd sə, nə kwasə Nwì, nə bə’rə fa yà’wèŋ. ³¹Fana lis awo muhu, wo riŋ yi; yi nom bisə mʉlisə̀ wo mvwe’ sə̀ yi anə ye sə wà. ³²Mòk ye ŋga’a ŋgòfek mòk də, <<Ghà nə̀ yi anə sə cep bohòvesù mandzə̀, nə sə tsoho rɛŋsə fa ves bum sə̀ ndzənə ŋwàk Nwì yà’a, mʉ̀ də ntʉm nə kaŋ ves vɛ’ɛ wùriŋ àlaa?>> ³³Wo à lòkok mègù sə̀’ mvə̀k ànə, nə bwi lo Jòrosalèm. Wo kə tseŋ bwe ye sə̀ hum-ncòp-mò’fis sə wèŋ, ŋga wo cu mvwe’ mò’fis bə bʉ̀ʉ mok wèŋ. ³⁴Bə yà’wèŋ sə cep də, <<Tà a lòkok laŋ nə̀ zìnə, Saimʉ̀ yə yi bə lis!>> ³⁵Fana wo tsok bwi ŋga’a yusə̀ yà’ anə ye mandzə̀, nə ye mvə̀’nə̀ wo anə riŋ nà’ ghà nə̀ nà’ anə bə’rə brɛd sə.

Jisòs Yəəŋ BohòBwe Ye Wèŋ

(Mat. 28:16-20; Mak 16:14-20; Jon 20:19-23; Ŋgàa Ntum Jisòs 1:6-11)

³⁶Mʉmvə̀’nə̀ wo ànə sə cep vɛ’nə fana Jisòs nə bə tu ye tesə təəŋ və mʉtsətsə’rə̀ə wo anə nə dʉk də, <<Fifi ye bohòwèŋ.>> ³⁷Wo à vèhe, nə wəp vɛ’ɛ; wo à tsəm də kàmòk wo yə ze’. ³⁸Yi dʉk fa yà’ də, <<Wèŋ sə wəp yà? Wèŋ sə mərə kɛ’ sə ntʉʉ̀ wèŋ bʉ̀ʉ yà? ³⁹Wèeŋ kʉk ja’a bo am bə kùu am, ya wèeŋ riŋ də a mʉ̀ nə. Wèeŋ jwɛŋ ja’a mʉ bə bo, bʉ̀ʉsə̀ ze’ kà njàp bə vəp mvəsə̀ wèŋ yə də mʉ̀ tse’ yè’e tse’gə̀.>> ⁴⁰Yi ànə cep vɛ’nə fana yi niŋ fa wo bo ye bə kùu ye wèŋ. ⁴¹Mvə̀’nə̀ wo à ka sə ntʉʉ̀ wo pap ntòdzəm wes bʉ̀ʉsə̀ wo à kwa ti’ ləlà, nə sə mərə, fana yi fek yà’wèŋ də, <<Wèŋ tse’ yumok fɛɛŋ sə̀ co ŋwè zʉ à?>> ⁴²Wo fa yi fuk nə̀ ləla, ⁴³yi jəŋ nà’, nə zʉ mʉlisə̀ wo.

⁴⁴Ànə geŋ yi dʉk fa wo də, <<Yè’e yusə̀ mʉ̀ ànə tsok fa weŋ ŋga mʉ̀ cu ntòvesùwèŋ sə, də yusə̀ wo à còm yà’ bə liŋ am ndzənə ŋwàk lʉ̀ʉk Musì, nə ye sə̀ ŋgàa tsòhòbum Nwì bə ŋwàk Sàam wèŋ pwe’ nə̀ bʉ̀ʉŋ və̀ tsoŋ zìnə.>> ⁴⁵Fana yi rɛŋsə ŋkərə̀ə awo ŋgòrì yusə̀ yà’ cu ndzənə ŋwàk Nwì. ⁴⁶Yi dʉk də, <<Yè’e mvə̀’nə̀ wo à còm də, Ŋkum ŋgà gèm bwi nə nə ye ŋgə’, fana nùmbu nə̀ tɛ’ kə̀ dzèŋ fana yi lokok mvwe’ kpʉ sə̀mok. ⁴⁷Nə ye sə̀’ də, wo nə sə tsoho lo sənə nzeŋgòŋ nə pwe’fo’ bə liŋ am ŋga wo yèto ntòmvwe’ lak Jòrosalèm. Wo nə sə tsoho lo ncèp nə̀ ŋgòkupsə, nə bwi fa bʉp ŋkwɛ̀ŋ, fana Nwì swi fa ŋwè bʉp ye. ⁴⁸A wèŋ sə̀ wèeŋ nə tsok lo bʉ̀ʉ mok, bʉ̀ʉsə̀ wèŋ yə bə lis awèŋ. ⁴⁹Wèeŋ ye, mʉ nə tumsə fa weŋ yusə̀ Tɛ̀’ am a kàk mʉ yà’ sə; fana wèeŋ cum tse’ mʉntòlak fa’nə tə̀tè ŋàaŋ sə̀ yà’a nə tsoŋ ma mʉbu sə və bohòwèŋ ŋkuŋ.>>

⁵⁰Ànə geŋ yi jəŋ fis lo yà’wèŋ mʉntòlak anə, bə yà’wèŋ lo tə̀tè kə dzeŋ mvwe’ lak Betanì. À kə̀ dzèŋ fo’, yi fis kok bo ye mʉtsə̀, nə se wo. ⁵¹Yi à sə sè wes wo ntɛ̀ŋ fana yi me’rə yà’wèŋ, nə kok lo mʉbu. ⁵²Wo à kuksə yi, nə bwi foho lo Jòrosalèm anə bə kwəkwa vɛ’ɛ wùriŋ. ⁵³Wo cum mamgeŋ mʉmvwe’ ndap Nwì nə̀ ghaŋ nə, nə sə kuksə Nwì mbwa.