Jon

Ntirə̀ nə̀ Bə̀boŋ nə̀

JON

Ŋwàk Jon tsə̀’gə̀ sə̀ ye də Jisòos ncèp nə̀ Nwì. Ncèp nə ànə bʉʉŋ ŋwè, nə kə cum be’lə bə bwìŋ. Ŋwàk nə tsə̀’gə̀ sə̀’ də wo à còm nà’ də ya ŋga bwìiŋ ta nà’, wo dzəm də Jisòs nə Mo Nwì, nə ye ŋgà tətɛsə̀ nə̀ Nwì ànə kak bwìŋ də yi nə̀ və̀ə nə, fana a ye-a ŋga bwìŋ dzəm vɛ’nə, wo tse’ lùŋ bə zeŋ. (Taŋ mbʉ̀p 20:31.)

Ŋwàk nə yèto ntɛ̀ŋ, nà’ tsoho fa bwìŋ maŋgəŋgèeŋ sə̀ Jisòs ànə gʉ sə̀ yà’ sə nìtsə̀’ də Jisòs nə Mo Nwì nə ye ŋgà tətɛsə̀ nə. Ŋwàk nə sə lo mantombì ŋgòtsə̀’ rɛɛŋsə yusə̀ maŋgəŋgèeŋ sə sə təəŋ bə zeŋ sə. Ŋwàk nə tsə̀’gə̀ sə̀’ mʉmvə̀’nə̀ bʉ̀ʉ mok wèŋ à dzəm bohòJisòs, nə bʉʉŋ ŋgàa fàak ye, fana bʉ̀ʉ mok wèŋ à bɛ̀ŋ yi, nə kà yusə̀ yi à sə tsə̀’ sə dzəm.

Mbʉ̀p 13 kə dzeŋ mbʉ̀p 17 sə tsə̀’ nja mʉmvə̀’nə̀ Jisòs bə ŋgàa fàak ye wèŋ à ye mvwe’ mò’fis bə ndzəm nə̀ wo à ye ŋgòko yi nə, fana yi sə tip wo, nə sə fisə wo ntʉm. Ŋwàk nə cu ŋgòmè lòo fana nà’ sə tsok mʉmvə̀’nə̀ wo ko Jisòs, nə zə yi fana yi lokok mvwe’ kpʉ sə̀mok. Mvəsə̀ Jisòs ànə lokok mvwe’ kpʉ fana yi yəəŋ bohòŋgàa fàak ye wèŋ.

Ncèp Nwì À Bʉ̀ʉŋ Ŋwè

¹Ŋkuŋ Nwì sə gʉ nzeŋgòŋ nə ŋga ŋwə̀ nə̀ wo to liŋ ye də Ncèp nà’a cu ye yo. Ncèp nə ànə sə ye bə Nwì mvwe’ mò’fis. Yi ànə ye megu Nwì bə tu ye. ²Mvə̀’nə̀ ànə yeto, yi à ye mègù ye sə bə Nwì. ³Nwì à gʉ̀ bum pwe’ ndzə bohòyi. Yumòk nə̀ yi à ka nà’ yi gʉʉ bʉ̀ə̀. ⁴Lùŋ pwe’fo’ à tesə və̀ bohòNcèp ènə. Lùŋ nə̀ yi à fa nə, à ye marɛŋ bohòbwìŋ. ⁵Marɛŋ nə rɛŋgə̀ mvwe’ ndzəm nùumbu pwe’, ndzəm nə ka marɛŋ nə ghak yuk.1:5 Aco a dʉk sə̀’ də <<Ndzəm nə kà marɛŋ nə rɛɛ̀ŋ.>>

⁶Ŋwə̀ nəmòk à ye, nə̀ Nwì ànə tumsə və yi nə̀ liŋ ye à ye də Jon. ⁷Yi ànə və ye ŋgòkə̀ tsə̀’ rɛŋsə fa bwìŋ marɛŋ nə, ya ndàaŋwè pwe’ yuk yusə̀ yi sə cèp sə, nə dzəm bohòmarɛŋ nə. ⁸Yi ànə ka marɛŋ nə yi yeŋ. Yi à və̀ ye ŋgòtsə̀’ fa bwìŋ bə marɛŋ nə.

⁹Marɛŋ nə̀ zìnə, nə̀ nà’a fagə̀ ndàaŋwè pwe’ marɛŋ nə à ye ŋgòtesə və̀ sə nzeŋgòŋ anə ghà ànə. ¹⁰Yi ànə cum sənə nzeŋgòŋ nə̀ yi à gʉ̀ nə, fana bʉ̀ʉ sə̀ wo cu sənə nzeŋgòŋ nə wèŋ kà yi yu awo rì. ¹¹Yi à və̀ mvwe’ lak ye, bʉ̀ʉ lak ye wèŋ sə kà yi dzəm. ¹²Ma nə̀ bohòbòp bʉ̀ nə̀ wo à jə yi, nə dzəm bohòyi sə fana, yi à fa yà’wèŋ mandzə̀ ŋgòbʉ̀ʉŋ bwe sə̀ Nwì. ¹³Wo à bʉ̀ʉŋ bwe ye wèŋ vɛ’nə ŋga ànə gʉ megu Nwì. Ànə ka bʉ̀ʉsə̀ wo à dzə yi mvə̀’nə̀ bwìiŋ dzəgə̀ bwe yà’a yeŋ. Ka də ŋwè à tsərə kok yi sə̀’ yeŋ.

¹⁴Ncèp nə à bʉ̀ʉŋ ŋwè sə nze fɛn, nə kə cum mʉtsətsə’rəə vès vɛ’nə fana vès ye yi co ŋwə̀ nə̀ ghaŋ nə̀ Tɛ̀’ ye Nwì ànə fa bohòmo ye nə̀ mò’fis nə. Yi a nìtsə̀’ fa ves mvə̀’nə̀ Nwì cu sə də yi tse’ bòvə̀m wùriŋ, nə tse’ zìnə sə̀’.

¹⁵Jon ànə tsok rɛŋsə fa bwìŋ bə ŋwə̀ ènə yi. Yi à cèp də, <<Nè’e ŋwə̀ nə̀ mʉ̀ ànə tsok fa weŋ fa’ də ŋwə̀ nə̀ yi sə və̀ ma ŋkwɛ̀ɛŋ mʉ̀ nə yam casə mʉ bʉ̀ʉsə̀ yi ànə ye fo’ ŋga wo kà mʉ ntòdzə lok.>>

¹⁶Mvə̀’nə̀ yi rwiŋ mègù bə bòvə̀m bohòvès fana yi a sè ves pwe’ kə̀kɛ̀’. ¹⁷Musì à jə və̀ fa ves lʉ̀ʉk sə̀ Nwì sə yi fana Jisòs Krɛst jəŋ və fa ves ye bòvə̀m nə̀ Nwì nə ye zìnə nə̀ Nwì nə sə̀’. ¹⁸Ŋwə̀ nəmòk ka Nwì bə lis ntòye yuk. Mègù mo ye Jisòs Krɛst nə̀ yi co ntʉm Tɛ̀’ ye nə, nə̀ yi a rɛŋsə fa ves mvə̀’nə̀ Nwì cu.

Jon Tsə̀’ Rɛŋsə Fa Bwìŋ Nsàp Ŋwə̀ Nə̀ Jisòos Nə

(Mat. 3:1-17; Mak 1:1-11; Luk 3:1-22)

¹⁹Nùmbu mòk à ye, ŋkwàha bʉ̀ʉ Jus sə̀ mvwe’ lak Jòrosalèm wèŋ tumsə lo ŋgàa fa Nwì satikà’a mok mʉmvwe’ Ndap Nwì nə̀ ghaŋ, bə bʉ̀ʉ Levì wèŋ mok, də yà’a kə fek Jon də nà’a nsàp ŋwə̀ nə̀ fòlɛ? ²⁰Jon nə dʉk fəsə fa yà’wèŋ də, <<Mʉ̀ ka Ŋkum ŋgà gèm bwìŋ nə̀ Nwì à də yi nə tumsə və̀ ŋgòkə̀ tɛsə bʉ̀ avès nə yeŋ.>> Yi à ka dzeeŋ, yi à cèp fis bum yè’sə yuye jəja mvwe’ bwìŋ. ²¹Wo fek fe’lə yi sə̀mok də, <<Ye də wu ndà lɛ, wu Àlajà à?>> Yi dʉk fe’lə sə̀’ də, <<Hai’, mʉ̀ ka Àlajà sə̀’ yeŋ.>> Wo fek mali yi sə̀’ ŋkuŋ də, <<Ye də wu ŋgà tsə̀’ bum Nwì nə̀ ŋwàk Nwì sə tsə̀’ də nà’a nə̀ və̀ə nə à?>> Jon dʉk mali sə̀’ də, <<Na’à mʉ̀ yàm. Mʉ̀ ka yi ànə yeŋ.>> ²²Fana wo fek mali yi sə̀ ŋkuŋ də, <<Ye də wu yè’sə ndà lɛ? Bʉsə̀ kaco vès lo ŋga wù ka ves tsok fa yeŋ, ya vèes kə tsok bʉ̀ʉ sə̀ wo tum ves sə. Wù dʉk yòbə tu yòdə wu ndà lɛ?>> ²³Yi dʉk də, <<Ŋgà tsòhòbum Nwì nə̀ njamòk nə̀ liŋ yee Ìzayà nà’a ànə cep fa’ də,

<Ŋgì ŋwə̀ nəmòk sə cèp torə və̀ sə ŋgəà də,

<<Tà àvès sə və̀ə.

Wèeŋ gʉhʉ tsə’rə fa yi mandzə̀ ŋgògì cà ca.>> >

Ŋwə̀ nə̀ Ìzayà à sə də ŋgì nà’ sə cèp ànə mʉ̀ nə.>>

²⁴Bʉ̀ʉ Faràsi mok wèŋ à ye mʉŋgorə̀ bʉ̀ʉ sə̀ wo à kə̀ yə Jon sə. ²⁵Fana wo fek Jon nə də, <<A ye-a ŋga wù ka ŋgà gèm bwìŋ nə yeŋ, kà Àlajà sə̀’ ye, nə kà ŋgà tsə̀’ bum Nwì nə sə̀’ ye, ye də wù sə bàptɛsə bwìŋ bʉ̀ʉ yà?>> ²⁶Jon dʉk fa yà’ də, <<Mʉ̀ sə bàptɛsə mègù yàm bə ndzəp. Ŋwə̀ nəmòk cu mʉtsətsə’rə wèŋ nə̀ wèŋ sə kà yi rì, anə kà sàp ŋga yi yèto fàak ye laŋ. ²⁷Ŋwə̀ nə̀ yi sə və̀ ma ŋkwɛ̀ɛŋ mʉ̀ ànə, yi yam càsə mʉ yi. Mʉ̀ ka ŋwə̀ nə̀ co mʉ̀ firə fa yi kʉ̀ʉ kùuŋgùup ye kʉrə.>>

²⁸Yè’sə à ye mvwe’ lak Betanì. Lak Betanì sə à ye ma ntonùum ndzəp Jòridàŋ. Yà’a mvwe’ sə̀ Jon à sə bàptɛsə bwìŋ fo’ sə.

²⁹Tsok à rɛŋ, Jon ye ŋga Jisòs sə və̀ mvwe’ ye sə fana yi cep də, <<Wèeŋ yeè, nè’e ŋwə̀ nə̀ yi mo nsùŋga Nwì nə. Nè’e yi nə̀ Nwìi nə jəŋ yi co ndzə cop, nə yisə fis gɛsə bʉp bwìŋ sə nzeŋgòŋ bə zeŋ nə. ³⁰Nè’e yi nə̀ mʉ̀ cèp də ŋwə̀ nəmòk sə və̀ ma ŋkwɛ̀ɛŋ mʉ̀, nə̀ yi yam càsə mʉ nə, bʉ̀ʉsə̀ yi ànə ye fo’ ŋga wo ka mʉ ntòdzə. ³¹Mʉ̀ à sə kà yi yàm də nè’e yi nə sə̀ rìgə̀. Ànə ye-a sə̀ vɛ’nə fana njo njàm nə̀ mʉ̀ à sə bàptɛsə bwìŋ nə, à ye də ya bʉ̀ʉ Izùrɛ wèeŋ riŋ yi.>>

³²Jon nə à cèp fe’lə sə̀mok dʉk də, <<Mʉ̀ a yə Yòŋsə̀ Nwì ŋga nà’ tsə tesə mʉbu co kəkəbʉ̀ŋ, nə kə naaŋ mʉtuhù Jisòs. ³³À sə kə̀ dzèŋ mvə̀k ànə ŋga mʉ̀ à ka yi yàm də yi ŋwə̀ ànə ntòriŋ. Megu də Nwì nə̀ yi à tum mʉ də mʉ bàptɛsə bwìŋ bə ndzəp nə à tsə̀’ mʉ də, a ye ŋga mʉ̀ yə ŋwə̀ nə̀ yòŋsə̀ ye tsoŋ və̀, nə kə naaŋ nà’ mʉtuhù àlɛ, mʉ̀ riŋ də nà’a ŋwə̀ nə̀ yi nə baptɛsə bwìŋ bə Yòŋsə̀ nə̀ Rərɛŋ nə. ³⁴Mʉ̀ nə sə tsə̀’ nə weŋ zìnə àm pwe’fo’ də mʉ̀ a yə bum yè’sə laŋ, fana mʉ̀ nə sə tsə̀’ nə weŋ jəja də ŋwə̀ ènə, yi mo Nwì nə.>>

Bʉ̀ʉ Sə̀ Wo À Rì To Jisòs, Nə Bɛ’ Lo Yi

³⁵Tsok à rɛŋ fe’lə sə̀mok ŋga Jon tə bə ŋgàa fàak ye wèŋ ba. ³⁶Yi ye ŋga Jisòs sə càa fana yi cep də, <<Wèeŋ ye, nà’a mo nsùŋgaŋ Nwì nə.>> ³⁷Ŋgàa fàak sə̀ ba sə à yuk yusə̀ Jon à cèp sə fana wo lokok, nə bɛ’ lo Jisòs nə. ³⁸Jisòs à bʉ̀ʉŋ kʉ̀ʉk, nə ye ŋga yà’wèŋ sə yù və̀ yi fana yi fek yà’ də, <<Wèŋ sə lòfò?>> Wo dʉk bwi fa nà’ yàwo də, <<Cicà, wu cugə̀ ma fò?>> Cicà nə bə ncèep lak awo yà’sə də Rabì. ³⁹Jisòs nə dʉk fa wo də, <<Wèeŋ və-a kə ja’a.>> Wo à lòo, nə kə ye mvwe’ sə̀ yi cugə̀ sə. Bə yà’wèŋ cum mam fo’ ŋga nùm na lòvɛ’ɛ tə̀tè ndzəm kə seŋ tasə cù.

⁴⁰Bʉ̀ʉ sə̀ ba sə̀ wo ànə yuk ŋga Jon cèp fana wo bɛ’ lo Jisòs sə, mòk ànə ye Andrù. Andrù nə à ye moma Saimʉ̀ Pità. ⁴¹Yi à ca lòo, nə kə ye tə̀tà ye Saimʉ̀, nə tsok nà’ də, <<Vès yə Mèzayà nə bə lis laŋ.>> (Mèzayà nə yà’sə də Krɛst. A yà’sə də, Ŋkum ŋgà gèm bwìŋ nə.) ⁴²Fana yi jəŋ və Saimʉ̀ nə, bə nà’ kə̀ ye Jisòs. Jisòs kʉk ja’a Saimʉ̀, nə dʉk fa nà’ də, <<Wùu Saimʉ̀ mo Jon, wo nə sə to wu mok sə̀’ də Kefàs.>> Liŋ sə̀ də Kefàs yà’sə mègù sə̀’ co liŋ sə̀ də Pità yà’a. Yà’a də Lìs.

Nàtaniyà Yə Rɛɛŋ Də Jisòos Mo Nwì

⁴³Tsok à rɛŋ sə̀mok fana Jisòs də yi lo yuye mvwe’ nzeŋgòGalìli. Ànə geŋ yi ye Filìp, nə dʉk fa nà’ də, <<Bɛ’ və mʉ.>> ⁴⁴Filìp nə à ye mo lak mvwe’ lak Bèsadà, Andrù bə Pità ye sə̀’ bwe lak fo’. ⁴⁵Filìp à kə̀ yə Nàtaniyà, nə tsok nà’ də, <<Vès yə ŋwə̀ nə̀ Musì à còm bə liŋ ye ndzənə ŋwàk lʉ̀k, ŋgàa tsòhòbum Nwì sə̀ njamòk wèŋ ànə com bə liŋ ye sə̀’ nà’a laŋ. A yi Jisòs nə̀ yi tesə və̀ mvwe’ lak Nazàrɛ, nə̀ yi mo Jòsep.>> ⁴⁶Nàtaniyà nə dʉk fa nà’ də, <<Me’rə mʉ fɛn, wù tsəm də aco yusəmok sə̀ yà’ tse’ fàk tesə yuk mvwe’ lak Nazàrɛ à?>> Filìp də, <<Və̀ kə̀ ja’a bə lis yo.>> ⁴⁷Jisòs à yə Nàtaniyà ŋga nà’ sə gì və̀ə fana yi cep də, <<Nè’e mo Izùrɛ nə̀ yi zìnə nə, yi ka mʉzə̀p limŋgòŋ tse’ lok.>> ⁴⁸Nàtaniyà nə də, <<Hàva’, wù riŋ mʉ fò?>> Jisòs dʉk də, <<Ghà nə̀ wù anə sə cum sə mbwè tʉ nə̀ wo togə̀ nà’ də fik nà’a, ŋga mʉ̀ yə wu yàm laŋ ŋkuŋ Filìp sə kə to wu.>> ⁴⁹Nàtaniyà dʉk megu mok də, <<Cicà, wu mo Nwì, wu Mèzayà nə̀ yi ŋkum bʉ̀ʉ Izùrɛ wèŋ nə.>> ⁵⁰Jisòs dʉk fa nà’ də, <<Wù dzəm yè’sə bʉ̀ʉsə̀ mʉ̀ tsə̀’ wu də, mʉ̀ anə ye wu ŋga wù cu sə mbwè tʉ fik sə à? Nà’nə ka yumok yeŋ. Mʉ̀ sə tsə̀’ fa wu zìnə də, wu nə ye bum sə̀ yà’ yam càsə nà’nə.>> ⁵¹Yi dʉk fa mali nà’ də, <<Wu nə ye ŋga ntòbu mùhu nòto fana masinjàa Nwì wèŋ sə lo kəkok, nə sə tsoŋ tsətsoŋ mʉ tuhù mʉ̀ʉ mo ŋwè.1:51 Liŋ sə̀ də mo ŋwè yè’sə mʉ liŋ fòbə ncèep Àramì nə̀ ŋwè à sə to fagə̀ ni’ ye. Jisòs à jə liŋ yè’sə mvə̀’nə̀ wo à còm ndzənə ŋwàk Danà 7:13-14.>>

Jisòs Gʉ̀ Ndzəp Yà’ Bʉ̀ʉŋ Rùk

¹À cà nùumbu ba fana bʉ̀ʉ mok də wo gʉ gù mvwe’ lak Kanà nə̀ nà’a mvwe’ nze Galìli. Ma Jisòs à ye sə̀’ fo’. ²Wo à to lòJisòs bə ŋgàa fàak ye wèŋ sə̀’ fo’. ³Mvə̀’nə̀ wo ànə sə no rùk fo’ fana rùuk sə me tiŋ. Ma Jisòs kə dʉk fa nà’ də, <<Wo ka rùk mok tse’.>> ⁴Jisòs nə dʉk fa fəsə nà’ də, <<Nà’a nzak njòma àm a, mvə̀k njàm ka ntòkʉrə.>> ⁵Ma ye nə kə dʉk fa ŋgàa fàak sə̀ fo’ sə wèŋ də, <<Yusə̀ yi tsə̀’-a weŋ lòoŋ, wèŋ gʉ yà’.>> ⁶Ànə ye ŋga bèe mok tə fo’ ntùŋfu, sə̀ wo à gʉ̀ yà’ bə lìs. Ànə ye bèe ndzəp sə̀ bʉ̀ʉ Jus wèeŋ cùk rɛŋsəgə̀ bo awo bə zeŋ ya wo ye rərɛŋ mʉ lisə̀ Nwì. Bè nə̀ mò’fis à sə rwiŋ ŋga ndzəp ca co jok kwè kè ntùŋfu àlɛ’. ⁷Jisòs dʉk fa wo də, <<Wèeŋ tuk rwiŋsə bèe sə bə ndzəp pwe’fo’.>> Wo tuk rwiŋsə yà’ bə ndzəp vɛ’ɛ leer. ⁸Yi dʉk fa fe’lə yà’wèŋ də, <<Wèeŋ səp fis-a yà’ ŋga’a, nə fa ŋwə̀ nə̀ yi gàp fa bwìŋ nə.>> Fana wo səp, nə fa lo yi. ⁹Ndìgàp nə à no ja’a ndzəp sə̀ yi bʉ̀sə yà’ rùk sə. Yi kà mvwe’ sə̀ yà’ və̀ə rì. Ŋgàa fàak sə̀ wo ànə tuk ndzəp sə wo riŋ megu wo. Ndìgàp nə to bwi ye ndugù nə. ¹⁰Nà’ ànə və̀ə, yi dʉk fa nà’ də, <<Wo fa togə̀ bwìŋ ntòrùuk sə̀ bə̀boŋ tə̀tè a ye ŋga bwìŋ no ze’ ŋkuŋ wo fis və sə̀ yà’ ka ŋkʉ̀ʉŋ boŋ. Wù jəə̀ nə yòrùuk sə̀ bə̀boŋ sə, nə tes loksə tə̀tè kə wɛs ŋga’a nà?>> ¹¹Nè’e maŋgəŋgèŋ nə̀ Jisòs à gʉ̀ to tsə cap. Yi à gʉ̀ nà’ mvwe’ lak Kanà nə̀ mvwe’ nze Galìli. Yi à nìtsə̀’ ŋàaŋ ye bə zeŋ fana ŋgàa fàak ye wèŋ dzəm tsə’rə wesə bohòyi. ¹²Yè’sə ànə me fana Jisòs nə yè’e fa’nə, nə tsooŋ lo mvwe’ lak Kàpanùm. Yi à lòfo’ bə ma ye, nə ye bwema ye, bə ŋgàa fàak ye wèŋ sə̀’. Wo à kə̀ cu yòŋsə fo’ nùumbu mok jo.

Jisòs Bɛ’fis Ŋgàa Sèŋ Bum Mʉ Ndap Nwì Nə̀ Ghaŋ Nə

(Mat. 21:12-13; Mak 11:15-17; Luk 19:45-46)

¹³Ànə ye ŋga ŋkàk bʉ̀ʉ Jus wèŋ nə̀ wo togə̀ nà’ də Pasobà nà’a kəp və̀ə fana Jisòs yè’e, nə kok lo mʉ Jòrosalèm. ¹⁴À kə̀ dzèŋ mʉmvwe’ ndap Nwì nə̀ ghaŋ nə fana, yi ye bwìŋ ŋga wo sə sèŋ mbòŋ bə nsùŋgaŋ nə ye kəkəbʉ̀ŋ wèŋ mbwa. Yi ye bʉ̀ ŋgàa kup mbàm wèŋ ŋga wo sə kupsə nsàp mbàm nə̀ co wo fa Nwì fəfa bə zeŋ. ¹⁵Yi fʉəp kʉ̀ mòk co ŋkwɛ̀s, nə bɛ’ tosə fis bʉ̀ʉ sə wèŋ sə mbiŋ pwe’fo’. Yi bɛ’ fis mbòoŋ sə bə nsùŋgaaŋ sə wèŋ mʉmvwe’ ntòmbi ndap Nwì nə̀ ghaŋ anə. Yi le’ bʉsə mak teberə̀ə kupsə̀ mbàam sə wèŋ tu tsətsoŋ, nə kɛ’ sɛsə mbàam awo sə sə nze. ¹⁶Nə dʉk fa ŋgàa sèŋ kəkəbʉ̀ʉŋ sə wèŋ də, <<Wèeŋ tesə bə yu yè’e sə mbiŋ. Wèŋ ka tse’ ŋgòbʉ̀sə ndap Tɛ̀’ am də a ndap ntɛŋ.>> ¹⁷Mvə̀’nə̀ yi à cèp vɛ’nə fana ŋgàa fàak ye wèŋ tsərə kok yusə̀ wo à còm yà’ ndzənə ŋwàk Nwì də, <<Nsàp mandzə̀ nə̀ mʉ̀ dzəm ndap yònə gʉ vɛ’ɛ co nà’a nə ləsə mʉ.>>

¹⁸Bʉ̀ ŋkwàha bʉ̀ʉ Jus wèŋ fek yi də, <<Nsàp yu nə̀ aco wù gʉ tsok fa vees yè’sə yà, ya vèes riŋ də wù tse’ ŋàaŋ sə̀ ŋgògʉ̀ bum sə̀ wù sə gʉ̀ yè’sə ɛ̀?>> ¹⁹Jisòs dʉk fəsə fa wo də, <<Wèeŋ kʉəmsə mak ndap Nwì nə̀ ghaŋ nè’e, ya mʉ nə ci wes nà’ mʉnə nùumbu tɛ’.>> ²⁰Bʉ̀ʉ Jus wèŋ sə dʉk də, <<Kwɛ’fò, vès à jə lùumŋgòŋ hum kwè-ncòp-ntùŋfu ŋgòci wes ndap nè’e, wù də wu nə ci wes nà’ yòmʉnə nùumbu tɛ’ ɛ̀?>> ²¹Ànə ye ŋga yi à sə cèp bə gbʉ’, nə sə to də ndap yà’sə ni’ ye. ²²Ghà nə̀ yi ànə lokok mvwe’ kpʉ fana ŋgàa fàak ye wèŋ tsərə fe’lə yusə̀ yi à cèp sə fana wo dzəm ncèp nə̀ nà’a ndzənə ŋwàk Nwì nə, nə ye bə ncèp nə̀ Jisòs à cèp nə sə̀’ də yà’a zìnə.

²³Ghà nə̀ yi à ye mvwe’ lak Jòrosalèm mvə̀k ŋkà’a pasobà sə, bwìŋ à dzəm bohòyi vɛ’ɛ wùriŋ bʉ̀ʉsə̀ wo à yə maŋgəŋgèeŋ sə̀ yi à sə gʉ̀ʉ. ²⁴Megu də Jisòs kà wo ntʉm ye pap fa, bʉ̀ʉsə̀ yi rì wes bwìŋ pwe’fo’ yi. ²⁵Yi à ka njo mòk də ŋwèe tsok fa yi də ŋwə̀ nè’e vɛ’ bə vɛ’ tse’, bʉ̀ʉsə̀ yi rì wes yusə̀ yà’ cu sə ntʉʉ̀ ŋwè pwe’.

Jisòs Yə’rə Fa Nìkòdemù Bə Nzak Dzədzə Nə̀ Kɛ̀’ Ba

¹Ŋwə̀ə Faràsi mòk à ye, wo to liŋ ye də Nìkòdemù. Yi à ye ŋkwà’ŋwè bohòbʉ̀ʉ Jus wèŋ. ²Ŋwə̀ ènə à və̀ nòoŋ bohòJisòs nə̀ ndzəmə̀, nə dʉk fa nà’ də, <<Cicà, vès rì tse’ də wu yè’e cicà nə̀ wù a və̀ bohòNwì. Bʉsə̀ kaco ŋwè gʉ to nsàap bum maŋgəŋgèeŋ sə̀ wù sə gʉ̀ yè’e yeŋ, tse’ŋga Nwìi bə ŋgə̀ŋgàŋ.>> ³Jisòs cep bʉsə fa nà’ də, <<Mʉ̀ sə tsə̀’ wu yè’e zìnə nə̀ nà’a ŋkèm dʉk də, tse’ŋga wo dzə fe’lə ŋwè sə̀mok, ŋkuŋ yi nə kə ye mvwe’ gaŋ ŋkum Nwì.>>

⁴Nìkòdemù nə fek fe’lə yi sə̀mok də, <<Aco wo dzə fe’lə ŋwə̀ nə̀ yi gʉ laŋ yè’sə va? Aco yi ni fe’lə lo ndzə və̀ə ma ye, ya wo dzə fe’lə yi nə̀ kɛ̀’ ba à?>> ⁵Jisòs dʉk fəsə fa yi də, <<Mʉ̀ sə tsə̀’ wu zìnə nə̀ nà’a ŋkèm dʉk də, tse’ŋga wo dzə ŋwè bə ndzəp nə ye bə Yòŋsə̀ nə̀ Rərɛŋ nə ŋkuŋ yi kə ni mvwe’ gaŋ ŋkum Nwì. ⁶Ŋwə̀ nə̀ wo a dzə yi bə ŋgùpni’, a sə̀’ nə̀ bə ŋgùpni’. Ŋwə̀ nə̀ wo a dzə yi bə yòŋsə̀ə, a sə̀’ nə bə yòŋsə̀. ⁷Kà də wu mərə bʉ̀ʉsə̀ mʉ̀ dʉk wu də, tse’ŋga wo dzə fe’lə ŋwè nə̀ kɛ̀’ ba dʉk. ⁸Fə̀fə̀ə càgə̀ mvə̀’nə̀ yi dzəm, wèŋ sə yuk, nə kà mvwe’ sə̀ yi sə yèto və̀ə kè mvwe’ nə̀ yi sə lòo ŋgòkə̀ lə̀ə rì. Ŋwə̀ nə̀ wo dzə-a yi bə yòŋsə̀ nə fana yà’ ye megu bohòyi sə̀’ vɛ’nə.>>

⁹Nìkòdemù nə fek mali nà’ də, <<Aco yè’sə ye vɛ’nə yè’sə valɛ?>> ¹⁰Jisòs dʉk fa fe’lə nà’ də, <<Wu yè’e cicà nə̀ ghaŋ mvwe’ lak Izùrɛ, nə kà bum yè’e rì vɛ’nə va? ¹¹Mʉ̀ tsə̀’ fa wu zìnə nə̀ nà’a ŋkèm dʉk də, vès sə tsə̀’ fa weŋ bum sə̀ vès rì yà’, nə ye yà’ bə lis avès fana wèŋ kà ves yà’ dzəm fa. ¹²Mʉ tsə̀’ fa weŋ bum sə̀ yà’a ma sə nze fɛn, wèŋ kà mʉ yà’ dzəm fa, ye də mʉ tsə̀’-a weŋ bum sə̀ ma mʉbu wèŋ dzəm fa mʉ à? ¹³Ŋwə̀ nəmòk nə̀ mò’fis ka mʉbu ntòkok lo yuk. Mègù mʉ̀ʉ mo ŋwè nə̀ mʉ̀ à tesə tsooŋ mbwa. ¹⁴Yumook də wo nə fis gesə tsoŋ mʉ̀ʉ mo ŋwè mʉtsə̀, mvə̀’nə̀ Musì ànə fis kok no mʉtsə̀ ghà nə̀ wo ànə ye ŋgəà yà’a ŋkuŋ. ¹⁵Də ya ŋga a ye-a sə̀ ndà, ŋga nà’ dzəm bohòyi fana nà’ tse’ lùŋ nə̀ nà’a nə̀ kà kə̀ mè yuk.

¹⁶<<Nwì ànə dzəm bʉ̀ʉ sə̀ sənə nzeŋgòŋ nə vɛ’ɛ wù kà fʉ̀k, nə tumsə vesə kwə’rə̀ mo ye də a ye-a sə̀ ndà ŋga nà’ dzəm bohòmo ye nə, ŋgə̀ŋgàaŋ nə kà bisə̀, yi nə tse’ lùŋ nə̀ nà’a nə̀ kà mè yuk. ¹⁷Njo nə̀ Nwì ànə ka mo ye nə də nà’a və nə kə sak bʉp nzeŋgòŋ nə tum və. Yi à tum nà’ də ya nzeŋgòŋ nə pwe’ nə luŋ bohònà’. ¹⁸Ŋwə̀ nə̀ yi dzəm-a bohònà’, ye də yi ka nzak tse’. Ŋwə̀ nə̀ yi kà-a bohònà’ dzəm ye də yi gbʉ̀ nzak tèè, bʉ̀ʉsə̀ yi ka bə liŋ mo Nwì nə̀ yi mègù mò’fis nə dzəm. ¹⁹Mvə̀’nə̀ wo sak lə̀sə tes nzak nə də vɛ’. Də marɛŋ a və̀ sənə nzeŋgòŋ nə, bwìŋ dzəm megu ndzəm nə noŋsə marɛŋ nə. Wo gʉ̀ vɛ’nə bʉ̀ʉsə̀ bum sə̀ wo sə gʉ̀ʉ sə bʉp. ²⁰Bʉsə̀ ŋwə̀ nə̀ yi gʉ̀gə̀-a ye bʉp, yi kà ŋge’ bə marɛŋ yegə̀. Yi sə caŋ marɛŋ caa. Njo nə̀ yi sə wəp də aco bwìŋ ye yusə̀ yi sə gʉ̀ʉ sə. ²¹Ŋwə̀ nə̀ yi gʉ̀gə̀ ye yusə̀ yà’a zìnə tesə və̀gə̀ ye sə mvwe’ marɛŋ. Yi tesə və̀gə̀ vɛ’nə də ya bwìŋ ye jəja kwaraŋgaŋ də yusə̀ yi gʉ̀ yà’sə, a bə mandzə̀ Nwì.>>

Jon Dʉk Də Yam Gha’ Jisòs Nə Noŋsə Yi

²²Yè’sə ànə ca fana Jisòs bə ŋgàa fàak ye wèŋ lo mok mvwe’ lak Jùdiyà. Yi bə yà’wèŋ à kə̀ cu mam fo’, nə sə baptɛsə bwìŋ fo’. ²³Jon à sə bàptɛsə bwìŋ ye sə̀’ mvwe’ mok sə̀ wo to fo’ də Anòn, mvwe’ sə kʉəp lòlak Salèm. Yi à sə bàptɛsə fo’ bʉ̀ʉsə̀ ndzəp à ye fo’ ŋkʉ̀ʉŋntɛ̀ŋ. Bwìŋ à sə və̀ə, nə sə kə baptɛsə fo’. ²⁴Yè’sə ànə ye ŋga wo ka Jon nə ndapndzəm ntòko nisə.

²⁵Ànə geŋ, ŋgàa fàak Jon bə ŋwə̀ə Jus mòk wèŋ yèto ŋgòsə fenə bə mandzə̀ nə̀ wo cùk rɛŋsəgə̀ ni’ ŋgòbɛ’ mandzə̀ Nwì. ²⁶Fana wo və bohòJon, nə kə dʉk fa nà’ də, <<Cicà, wù sə tsərə tse’ malì ŋwə̀ nə̀ weŋnə à ye mvwe’ ŋgʉ ndzəp Jòridàŋ fa’ nà’a nà? Yi nə̀ wù sə tsòho fa bwìŋ bə liŋ ye nà’a, yi sə bàptɛsə sə̀’ fana bwìŋ sə kpəəŋ lòwes mok bohòyi.>> ²⁷Jon nə cep fəsə fa yà’wèŋ də, <<Kaco ŋwè tse’ to yumok bə bo ye yeŋ. Tse’ŋga Nwì mʉbu fa yi yà’ yi ŋkuŋ yi tse’ yà’. ²⁸Wèŋ à yuk fa mʉ bə ntu’u awèŋ laŋ mvə̀’nə̀ mʉ̀ à sə dʉk də, mʉ̀ ka yè’sə Ŋkum ŋgà gèm bwìŋ nə mʉ̀ yeŋ. Mʉ̀ mègù yàm ŋwə̀ nə̀ wo a tumsə lòmʉ yàm də mʉ lo tse’ mantombìi Krɛst nə. ²⁹Wèŋ rì də ŋwə̀ nə̀ yi tse’ ŋgwegù a ndugù nə. Ŋge’e ndugù nə təəŋ kok ŋgʉ ni’ì nà’, nə sə kwa wùriŋ mvə̀’nə̀ yi sə yuk ŋgì ndugù nə sə. Yà’a sə̀’ mvə̀’nə̀ kwəkwa nə̀ njàm rwiŋ wesə mʉ ŋga’a sə̀’ dak. ³⁰A kə̀kʉrə̀ də yi nə sə lo tsoŋ mantombì, mantombì, fana mʉ̀ sə foho lo tsoŋ yàm ma ŋkwɛ̀ŋ, ma ŋkwɛ̀ŋ.>>

Ŋwə̀ Nə̀ Yi Tsə Ma Mʉbuu Mo Nwì

³¹Yà’ mègù sə̀’ də yi nə̀ yi tsə ma mʉtsə̀ə ŋwə̀ nə̀ ghaŋ nə yi. Yi nə̀ yi ŋwə̀ə nzeŋgòoŋ, nzeŋgòŋ nə tse’ yi yi, fana yi sə cep megu bə bum sə̀ sə nzeŋgòŋ fɛŋ. Yi nə̀ yi və̀ ye mʉbu nə gha’ ndàaŋwè pwe’fo’. ³²Yi cèpgə̀ bum sə̀ yi a yə yà’ bə lis ye, nə yuk bə ntu’u ye, ŋwə̀ nə̀ mò’fis kà ncèp ye nə dzəm lo’ fʉ̀’. ³³Ŋwə̀ nə̀ yi dzəm-a ncèp ye nə fana yi sə nìtsə̀’ fa bwìŋ bə zeŋ yà’sə də Nwìi zìnə. ³⁴A vɛ’nə bʉ̀ʉsə̀ ŋwə̀ nə̀ Nwì a tumsə və̀ yi nə sə tsòho ncèp nə̀ Nwì. Nwìi fagə̀ yi Yòŋsə̀ nə co wù kà fʉ̀’ to. ³⁵Tɛ̀’ nə dzəm mo ye nə, nə fa wes bum pwe’ ndzə bohònà’. ³⁶Ŋwə̀ nə̀ yi dzəm-a bohòmo ye nə fana ye də ŋgə̀ŋgàŋ tse’ lùŋ nə̀ nà’a nə̀ kà kə̀ mè yuk. Ŋwə̀ nə̀ yi kà-a mo ye nə yuk, yi nə kà lùŋ bə lis yə yuk. Ma nə̀ nje də, jə̀jòk nə̀ nà’ cu sə ntʉʉ̀ Nwì naaŋ mʉtuhù ŋwə̀ ànə.

Jisòs Gʉ̀ʉ Ŋwà Sàmàriyà Rɛɛŋ Yi

¹Tà Jisòs à rì də bʉ̀ʉ Faràsi wèŋ yuk də yi bàptɛsə ghak bwìŋ yi nə noŋsə Jon. ²(Jisòs à sə kà yi bə bo ye bàptɛsə̀. À sə bàptɛsə ŋgàa fàak ye wèŋ.) ³À ye vɛ’nə, yi ye’e me’rə Jùdiyà anə, nə bwi lo mvwe’ nzeŋgòŋ Galìli. ⁴Yi à cu ŋgòlòo, yà’ ye də yi nə bɛ’ tsoŋ li lɛ mandzə̀ nə̀ nà’a càgə̀ mvwe’ nzeŋgòŋ Sàmàriyà nà’a. ⁵Ànə geŋ yi gi ca mvwe’ nze Sàmàriyà anə fana yi kə dzeŋ mvwe’ mʉbuk lak mòk. Wo to fo’ də Sekà. Mʉmvwe’ ànə à kʉəp mvwe’ nzum sə̀ Jàkop ànə fa fo’ bohòmo ye Jòsep njamòk, njamòk. ⁶Ndzəp nə̀ Jàkop nə à tu nà’ sə nze, nə sə tuk, à ye sə̀’ mʉmvwe’ ànə. Jisòs à kə̀ dzèŋ fo’ ŋga yi wòbə gì. Yi cum tsoŋ fo’ sə nze ŋgʉ ndzəp anə. Ànə ye ŋga nùum co maràŋ.⁷Ŋwà Sàmàriyà mòk tesə və də yi kə tuk ndzəp. Jisòs dʉk fa nà’ də nà’a fa yi ndzəp yi no. ⁸Ànə ye yè’sə ŋga ŋgàa fàak ye sə wèŋ à lòwes ndzə ntòlak ŋgòkə̀ ywi və̀ zʉzʉ. Yi sə cum yòŋsə fo’ yiìyi.

⁹Ŋwà Sàmàriyà nə vehe də wete, nə də, <<Ye va ŋkuŋ wù ye yòŋwə̀ə Jus, nə sə fek mʉ ŋwà Sàmàriyà də mʉ fa wu ndzəp-ɛ?>> Yi à sə fek vɛ’nə bʉ̀ʉsə̀ bʉ̀ʉ Jus wèeŋ kà ŋge’ bə bʉ̀ʉ Sàmàriyà wèŋ yegə̀. ¹⁰Jisòs dʉk fa ŋwà nə də, <<Anə ye-a də wù riŋ yusə̀ aco Nwì fa yà’, nə riŋ ŋwə̀ nə̀ yi sə lɛŋ ndzəp bohòwù ènə, bwɛ̀rɛ wù fek yi də yi fa wu ndzəp. Ya yi fa wu ndzəp nə̀ nà’ tse’ lùŋ.>>

¹¹Ŋwà nə dʉk fa nà’ də, <<Tɛ̀’mòk, wù ka yu tuk ndzəp fa’nə tse’. Ndzəp nə nə yeè nə ca sə̀’ cəco mwè, ye də wu nə jəŋ ndzəp nə̀ nà’ tse’ lùŋ ènə ma fò? ¹²Wù sə də, wu dʉk də wù gha’ tàcici àvès Jàkop nə̀ yi à fa ves ndzəp ènə, nə no ye nà’ sə̀’ nà’a nà? Bwe ye bə mbòoŋ ye wèŋ pwe’ à sə no sə̀’ ndzəp ènə.>> ¹³Jisòs nə dʉk fəsə fa nà’ də, <<Ŋwə̀ nə̀ yi no-a ndzəp ènə pwe’fo’, njè ndzəp nə sə yaŋ fe’lə mali yi sə̀mok. ¹⁴Ŋwə̀ nə̀ yi no-a ye ndzəp nə̀ mʉ̀ fa yi nà’ mʉ̀ fana njè ndzəp nə kà yi mok ya yuk fe’lə̀. Ndzəp nə̀ mʉ̀ fa yi nə nə bʉʉŋ ndzə ni’ì yi co ndzəp nə̀ nà’ sə to tesə kok sə nze. Nà’a sə tesə vɛ’nə, nà’ ye mok lùŋ nə̀ nà’a nə̀ kà mè yuk.>>

¹⁵Ŋwà nə də, <<Tɛ̀’mòk fa mʉ-a nsàp ndzəp ànə mʉ no, ya njè ndzəp kà mʉ mok ya yuk, nə ye sə̀’ də ya kà də mʉ sə ye ŋgə’ də mʉ̀ sə və̀hə fɛŋ ŋgòkə̀ tuk fe’lə ndzəp mok sə̀’ dʉk.>> ¹⁶Jisòs dʉk fa fe’lə nà’ də, <<Dù kə̀ to ndu yò, ya wenə və.>> ¹⁷Ŋwà nə də, <<Mʉ̀ ka ndum tse’.>> Jisòs də, <<A zìnə mvə̀’nə̀ wù cèp də wù ka ndum tse’ yà’sə. ¹⁸Mʉ̀ dʉk vɛ’nə bʉ̀ʉsə̀ wù ànə tse’ to me ndum tàŋ laŋ. Nə̀ wenə cu ŋga’a nè’e ka ndu yòsə̀’ yeŋ. Ye də yusə̀ wù cèp sə a zìnə.>>

¹⁹Ŋwà nə dʉk də, <<Tɛ̀’mòk, mʉ̀ yə co də wu yè’sə ŋgà tsòhòbum Nwì. ²⁰Tàcicii avès wèŋ à sə kùksəgə̀ Nwì mʉmvwe’ nda nè’e fana wèŋ bʉ̀ʉ Jus wèŋ sə dʉk yàwèŋ də anə ye co bwìŋ kuksə Nwì mvwe’ lak Jòrosalèm ɛ?>> ²¹Jisòs dʉk fa fe’lə nà’ də, <<Njɛ̀’gù, mʉ tsok fa wu yusə̀ zìnə də, mvə̀k sə və̀ə nə̀ bwìiŋ nə kà Tɛ̀’ nə mʉ ndahà fɛŋ kè mvwe’ lak Jòrosalèm àlɛ’ mok sə kùksə̀ fe’lə̀. ²²Wèeŋ kùksəgə̀ yusə̀ wèŋ ka bə zeŋ rɛɛŋ. Vès sə kùksə yàvès yusə̀ vès rɛɛŋ bə zeŋ laŋ bʉ̀ʉsə̀ Nwìi nə tɛsə bwìŋ sə nzeŋgòŋ fɛɛŋ ndzə bohòvès bʉ̀ʉ Jus wèŋ. ²³Mvə̀k sə və̀ə, aco mʉ̀ dʉk də mvə̀k nə kə̀ dzèŋ laŋ, nə̀ bwìiŋ nə sə kuksə Tɛ̀’ nə bə zìnə, nə sə kuksə yi ndzənə yòŋsə̀ sə̀’. Tɛ̀’ nə dzəm də nsàp bʉ̀ ànə wèeŋ kùksə yi. ²⁴Nwì nə, yi yè’sə yòŋsə̀. Yi fagə̀ bwìŋ yòŋsə̀ yi. Ye də bʉ̀ʉ sə̀ wo dzəm-a ŋgòkùksə yi, wo kuksə yi ndzənə yòŋsə̀ nə ye bə zìnə àwo pwe’.>>

²⁵Ŋwà nə dʉk də, <<Mʉ̀ rì də Ŋkum ŋgà gèm bwìŋ nə̀ Nwì à dʉk də yi nə̀ tum və̀ nà’ nə, nə və ntsə’mòk. Mʉ̀ sə dʉk yi nə̀ wo togə̀ yi mok sə̀’ də Krɛst nà’a. Yi və̀ə, yi nə niŋtsok fa ves bum lòoŋ fo’.>> ²⁶Jisòs dʉk fa ŋwà nə də, <<Mʉ̀ nə̀ mʉ̀ sə cèp bohòwù ènə, mʉ yi nə.>>

²⁷Ŋgàa fàak Jisòs sə wèŋ à bwìŋ foho və̀ sə̀’ ghà nà’nə. Wo mərə vɛ’ɛ wùriŋ də nà’ sə cèp bə ŋwàŋwè. Nə̀ mò’fis kà ŋwà nə də, nà’ dzəm fɛɛŋ yàlɛ sə fek. Nə kà Jisòs də yi sə cèp bə ŋwà ènə bʉ̀ʉ yàlɛ sə̀’ fek lok. ²⁸Ànə geŋ, ŋwà nə me’rə tes kʉ̀ʉŋ ndzəp ye sə fo’, nə lo ndzə ntòlak. Yi à kə̀ dzèeŋ, yi tsoho fa bwìŋ də, ²⁹<<Wèeŋ və, nə kə ye yàwèeŋ ŋwə̀ nəmòk nə̀ yi taŋsə tsə̀’ wes fa mʉ bum sə̀ wo à dzə mʉ dzəə, mʉ̀ gʉ vɛ’ɛ pwe’ nə̀ pwe’ ɛ̀. Kàmòk yi ŋgwàaŋ Ŋkum ŋgà gèm bwìŋ nə̀ wo dʉkgə̀ də yi nə̀ və̀ə nə àlɛ’.>> ³⁰Wo à yuk vɛ’nə, wo tesə mʉ ntòlak anə, nə kə ye Jisòs.

³¹Ànə ye sə̀’ ŋga ŋgàa fàak ye sə wèŋ sə dʉk fa yi də, <<Cicà, zʉ-a yumok le.>> ³²Yi dʉk fa yà’ ye də, <<Mʉ̀ tse’ bɛŋ yàm sə̀ ŋgòzʉ yo sə̀ wèŋ ka bə zeŋ riŋ.>> ³³Ŋgàa fàak ye wèŋ sə ye ŋgòfe’rə mʉtsətsə’rəə wo də, <<Ŋwə̀ nəmòk jə və̀ fa yi bɛŋ à?>> ³⁴Jisòs nə dʉk fa wo də, <<Bɛŋ aam ŋgògʉ̀ fàak sə̀ ŋwə̀ nə̀ yi à tum mʉ nə dzəm də mʉ gʉ. Nə gʉ wes fàak yà’sə. ³⁵Wèeŋ cèpgə̀ ncèp mòk də, <Bwehe cu ŋwʉ kwè ya bum sə̀ wo bì mʉ nzuù yà’a kʉrə ŋgòkʉp.> Mʉ̀ sə tsə̀’ weŋ yàm də wèeŋ bʉʉŋ kʉk ja’a yàwèeŋ, nzum sə ŋga’a yè’sə mvə̀k kəkʉp. ³⁶Ŋwə̀ nə̀ yi kʉpgə̀ə wo lak yi yèto fàak ye laŋ. Yi sə benə ŋgwìi bum sə̀ yà’a bwìŋ ya wo nə kə tse’ lùŋ nə̀ nà’a nə̀ kà mè yuk nə. Ya ŋga ŋwə̀ nə̀ yi à bìi bə nə̀ yi à kʉp ye kʉpə ba fo’ nə kwa mvwe’ mò’fis. ³⁷Yà’sə sə nìtsə̀’ də ncèp nə̀ wo cèpgə̀ nà’ də, Mòok bìgə̀ ye bìi, mòk kə kʉp ye kʉpə, nà’a zìnə. ³⁸Mʉ̀ a tumsə lòweŋ ŋgòkə̀ kʉp bum sə̀ wèŋ à ka fàk. À fàk bʉ̀ʉ sə̀ zok, wèŋ nə kə̀ kʉʉ̀p nə yàwèŋ kʉpə. Wèŋ zʉ yà’sə swek mʉtuhù bʉ̀ʉ mok.>>

³⁹Bʉ̀ʉ Sàmàriyà sə̀ mvwe’ ntòlak ànə à dzəm bohòyi vɛ’ɛ wùriŋ njo ncèp nə̀ ŋwà nà’a ànə cep fa’ də, <<Yi taŋsə tsə̀’ wes fa mʉ bum sə̀ wo à dzə mʉ dzəə, mʉ̀ gʉ pwe’ nə̀ pwe’>> nà’a. ⁴⁰Bʉ̀ʉ Sàmàriyà sə wèŋ à kə̀ tsèŋ yi, wo ŋwɛ’ tse’ yi cʉ̀k də nà’a kà ntòlò, də bə yà’wèeŋ cum la’à wo anə ŋkuŋ. Anə geŋ, Jisòs nə cum fo’ nùumbu ba. ⁴¹Mok à dzəm fe’lə bohòyi ŋkʉ̀ʉŋ sə̀mok bʉ̀ʉ bum sə̀ yi sə cèep. ⁴²Wo dʉk fa ŋwà nə də, <<Vès sə kà yè’sə mok bʉ̀ʉ ncèp nə̀ wù tsə̀’ ves wù nə dzəm mègù. A yè’sə mok bʉ̀ʉsə̀ vès yuk bə ntu’u yàvès, vès nə rì nə də nè’e gù tsə gù yi nə̀ ŋgà lùŋsə̀ nzeŋgòŋ nə.>>

Jisòs À Gʉ̀ Mo Ŋkwà’ Ŋwə̀ Mòk Yi Lokok Yiyaŋ

⁴³Nùumbu sə̀ ba sə à càa, yi lo yuye mvwe’ nzeŋgòŋ Galìli nə̀ a fo’ lak ye. ⁴⁴Jisòs nə bə tu ye à sə cèp fis də wo kà ŋgà tsòhòbum Nwì mvwe’ lak ye sə̀ wo à dzə yi fo’ co ŋwə̀ nə̀ ghaŋ jəgə̀. ⁴⁵Yi à rì vɛ’nə, nə sə lo mali fo’. À kə̀ dzèŋ Galìli anə, bʉ̀ʉ sə̀ fo’ sə wèŋ kwa ŋgòyə yi vɛ’ɛ wùriŋ. Wo à gʉ̀ vɛ’nə bʉ̀ʉsə̀ wo ànə lo mvwe’ ŋkà’ Pasobà nə̀ nà’ à ye mvwe’ lak Jòrosalèm, nə ye bum sə̀ Jisòs nə à sə gʉ̀ fo’ bə lis awo.

⁴⁶Ànə geŋ Jisòs bwi foho lo fe’lə mvwe’ lak Kanà nə̀ mvwe’ nzeŋgòŋ Galìli, sə̀ mvwe’ sə̀ yi à gʉ̀ ndzəp yà’ bʉʉŋ rùk sə. Ŋgà fàk gomè mòk à ye fo’ nə̀ ghaŋ, ŋga yi cugə̀ mvwe’ lak Kàpanùm. Ghà ànə à ye ŋga mo ye nə̀ ŋwə̀mbam nòbə yiyaŋ nə̀bʉp. ⁴⁷Yi ànə yuk də Jisòs mè’rə və̀ Jùdiyà, nə və̀ nə mvwe’ nze Galìli fana yi lo, nə kə tseŋ Jisòs nə. Yi sə lɛŋ nà’ də bə nà’a lo Kàpanùm mvwe’ sə̀ yi cugə̀ə, ya nà’a kə gʉŋsə fa yi mo ye. Ànə ye ŋga mo ye nòvɛ’ɛ mvə̀k kpʉkpʉ. ⁴⁸Jisòs dʉk fa nà’ də, <<Wèeŋ kà-a yàwèŋ maŋgəŋgèŋ bə lis yə, kaco wèŋ dzəm bohòmʉ̀ yeŋ. Ka vɛ’nə yeŋ à?>> ⁴⁹Ŋgà fàk nə dʉk ye də, <<Tɛ̀’mòk, a lo-a ntɛ̀ŋ na, bwɛ̀rɛ mo àm nə nə kpʉ.>> ⁵⁰Jisòs dʉk fa nà’ də, <<Dù lo yuyo. Mo yònə gʉ laŋ.>> Ŋgà’ nə à dzəm ncèp nə̀ Jisòs cèp fa yi nə, nə bɛ’ mandzə̀ ye lo. ⁵¹Yi à sə lòmandzə̀, yi kʉrə bə ŋgàa fàak sə̀ wo fàkgə̀ bohòyi. Wo tsok fa yi də mo ye nə gʉ laŋ. ⁵²Yi fek yà’ də, mo nə a lòkok yiya nə ŋga nùum ma fòlɛ. Wo dʉk fa yi də, <<A ye ŋkwìs ŋga nùum maràŋ kaŋ.>> ⁵³Tɛ̀’ nə tsərə fəsə, nə riŋ də mvə̀k nə̀ wo tsə̀’ yi ànə, mègù sə̀’ mvə̀k nə̀ Jisòs a dʉk fa yi də, <<Dù lo yuyo. Mo yònə gʉ laŋ>> nə. Ànə geŋ yi dzəm bohòJisòs bə ndap ye pwe’fo’. ⁵⁴Nè’e ŋga’a maŋgəŋgèŋ nə̀ ba, nə̀ Jisòs à gʉ̀ʉ mvə̀’nə̀ yi ànə me’rə Jùdiyà, nə və mvwe’ nzeŋgòŋ Galìli.

Jisòs Gʉŋsə Ŋgà Yiya Mòk Mvwe’ Ŋgʉ Tə̀m Bèzatà

¹Yà’sə ànə me wes fana mvə̀k kʉrə fe’lə nə̀ bʉ̀ʉ Jus wèŋ à tse’ ŋkà’ mòk Jòrosalèm anə sə̀mok. Jisòs à kok lòmʉ Jòrosalèm anə ye sə̀’. ²Wo à tu nòŋsə tə̀m mòk fo’ mvwe’ ncùu ŋka’ sə̀ nsùŋgaaŋ càgə̀ fo’. Bʉ̀ʉ Hibrù wèeŋ togə̀ tə̀m nə bə ncèep lak awo də, Bèzatà. Wo à ci tes mvwe’ mok co mbàndap bòp tàŋ ya bwìiŋ sə caŋ cum nùm fo’. ³Ŋgàa yiyaŋ wèŋ à sə nòoŋ fo’. Mok à ye ŋgàa jì lis, mok sə̀ kaco wo gi to yeŋ nə ye bə sə̀ wo à kpʉ yum bo wèŋ. (Wo à sə nòoŋ fo’ ŋgòtək ghà nə̀ tə̀m nə nə tsoho. ⁴Bʉsə̀ masinjà Tà Nwì à sə və̀gə̀ fo’ ŋga mvə̀k kʉ̀rə, nə gʉ ndzəp nə nà’ tsoho. Ghà nə̀ yi tsə̀’rə wes nà’ vɛ’nə fana ŋwə̀ nə̀ yi ni lòto-a ca yi, a dzəm ŋga yi tse’ nsàp yiya nə̀ fòpwe’fo’, nà’ me.) ⁵Ŋwə̀ nəmòk à ye fo’ nə̀ yi à ye bə yiyaŋ mʉnə lùumŋgòŋ hum tɛ’-ncòp-fwame’. ⁶Fana Jisòs à dzèŋ fo’, yi ye ŋga nà’ nòo. Yi riŋ sə̀’ də nà’ à yə ŋgə’ bə yiya nə lùumŋgòŋ wùriŋ fana yi fek nà’ də, <<Wù sə dzəm də yiya yòènə me à?>> ⁷Ŋgà’ nə dʉk də, <<Tɛ̀’mòk, mʉ̀ ka ŋwə̀ nə̀ co ndzəp nə tsòho wes fana yi le’ so gesə mʉ ca tse’. Mʉ dʉkgə̀ də mʉ dap lokok kə ni ca ŋga ŋwə̀ nəmòk kə ni to ca laŋ.>> ⁸Jisòs dʉk fa nà’ də, <<Lòkok mʉtsə̀, nə lim kəà yò, nə lo.>> ⁹Jisòs ànə cep vɛ’nə ntɛ̀ŋ, ŋgà’ nə gʉŋ sə̀’ ghà ànə. Yi à lòkok, nə te’ lim kəà ye, nə bɛ’ mandzə̀ lo yuye.

Nùmbu nə̀ Jisòs ànə gʉŋsə ŋwə̀ ànə bə yiyaŋ ènə ànə ye nùmbu dzə̀. ¹⁰Fana ŋkwàha bʉ̀ʉ Jus wèŋ à gèŋ də wo ye ŋwə̀ ènə ŋga yi kotse’ kəà ye, nə sə gi bə zeŋ fana wo vehe. Wo fek dʉk də, <<Wù ka riŋ də a ntinə nùmbu dzə̀ à? Nsàp yu nə̀ wù gʉ̀ʉ ŋgòbə̀’ tse’ kɛ’ kəà ntinə ènə, lʉ̀k ka bə zeŋ dzəm lok.>> ¹¹Ŋwə̀ nə̀ yiya ye à mè nə dʉk fa wo də, <<Ŋwə̀ nə̀ yi anə gʉ ŋkuŋ mʉ̀ gʉŋ nə, nə dʉk fa mʉ yi də mʉ lim jəŋ kəà àm, nə lo bə zeŋ.>> ¹²Wo fek fe’lə nà’ sə̀mok də, <<Cèp nsàp ŋgwì yu ànə ndà, də wu lim gi bə kəà ntinə-ɛ?>> ¹³Ŋgà’ nə kà ŋwə̀ nə̀ nà’ ànə gʉ ŋkuŋ yiya ye me nə rì bʉ̀ʉsə̀ Jisòs nə à ni bisə lòmʉtsətsə’rəə bʉ̀ʉ sə̀ wo mà fo’ wùriŋ sə laŋ.

¹⁴Ànə sap kok fana Jisòs tseŋ ŋwə̀ nə̀ yi ànə gʉŋsə nà’ nə mʉmvwe’ ndap Nwì nə̀ ghaŋ nə. Yi to nà’, nə dʉk fa nà’ də, <<Yeè, yiya yònə mè laŋ fana mʉ̀ də mʉ tsok wu də wu jəŋ ŋkərə̀ də wu kà bʉp mok gʉ̀ fe’lə̀, ya ŋgə’ nə̀ nà’ yam càsə yiya yòànə kà wu mok kə̀ tsèŋ.>> ¹⁵Ŋgà’ nə à bwì foho lò, nə kə tseŋ bʉ̀ ŋkwàha bʉ̀ʉ Jus sə wèŋ, nə tsok wo də liŋ ŋwə̀ nə̀ nà’ anə gʉŋsə yi nə də Jisòs. ¹⁶Yà’a bum sə̀ yà’ à gʉ̀ ŋkuŋ bʉ̀ ŋkwàha bʉ̀ʉ Jus sə wèŋ ye ŋga’a ŋgòsə fa kɛ’ cà Jisòs ŋgə’ də nà’ sə gʉŋsə kɛ’ bwìŋ nùumbu dzə̀. ¹⁷Yusə̀ Jisòs à tsə̀’ fa bʉ̀ʉ Jus sə wèŋ bə ncèp ènə à ye də, <<Tɛ̀’ am fàkgə̀, nə kà dzə̀ jə fana mʉ̀ tse’ ŋgòfàk yàm sə̀’ vɛ’nə.>> ¹⁸Wo ànə yuk mvə̀’nə̀ Jisòs dʉk vɛ’nə fana bʉ̀ ŋkwàha bʉ̀ʉ Jus sə wèŋ lap ghaha wesə mandzə̀ nə̀ ŋgòzə yi nə ghaha. Wo à gʉ̀ vɛ’nə bʉ̀ʉsə̀ wo à dʉk də, nà’ gʉ̀ bʉpsə lʉ̀ʉk awo sə̀ ŋgònòŋsə nùmbu dzə̀, nə ye sə̀’ də nà’ to Nwì də Tɛ̀’ɛ nà’. Ye də nà’ sə fʉhʉ ni’ nà’ bə Nwì də bə nà’a yəyərə̀.

Jisòs Nì Tsə̀’ Fa Bʉ̀ʉ Jus Wèŋ Də Ŋàaŋ Ye Və̀ BohòNwì

¹⁹Jisòs ànə cep fəsə fa bʉ̀ʉ yè’sə wèŋ də, <<Mʉ̀ sə tsə̀’ weŋ yè’e zìnə nə̀ nà’a ŋkèm ncèp də, kaco Mo Nwì nə gʉ yumok bə tu ye yeŋ. Yi gʉ̀ mègù yusə̀ yi yə ŋga Tɛ̀’ ye nə sə gʉʉ. Bʉsə̀ yusə̀ Tɛ̀’ sə gʉ̀ pwe’fo’, Mo ye nə nə gʉ sə̀’ zeŋ. ²⁰Tɛ̀’ nə dzəm Mo ye nə, nə sə niŋ fa nà’ bum sə̀ yi Tɛ̀’ nə sə gʉ̀ yà’ lòoŋ fo’. Yi nə tsoho fa mali nà’ bum sə̀ ghaŋ sə̀ yà’ yam càsə sə̀ wèŋ yə laŋ sə. Bum yà’sə nə ye nsàp nə̀ wèeŋ nə sɛɛŋ yà’ tə̀tè, nə wo. ²¹Mvə̀’nə̀ Tɛ̀’ nə lòkoksəgə̀ bwìŋ mvwe’ kpʉ, nə fa wo lùŋ nə̀ zìnə nə fana Mo ye nə mègù sə̀’ vɛ’nə. Yi fagə̀ lùŋ nə̀ zìnə nə bohòndàaŋwè pwe’ nə̀ yà’ bòyi də yi fa nà’. ²²Nə ye sə̀’ də bə ma nə̀ ŋgòsak bwìŋ, Tɛ̀’ nə kà yi sakgə̀. Yi a fa ŋàaŋ sə ndzə bohòMo ye nə, də anə sak bwi nà’ ŋgòrì də ŋwə̀ nè’e nə cum, nè’e nə kpʉ. ²³Yi ànə gʉ vɛ’nə də ya bwìŋ pwe’ wəp Mwe nə sə̀’ mʉmvə̀’nə̀ wo wəpgə̀ Tɛ̀’ nə yà’a. A ye-a ŋga ŋwə̀ nəmòk sə kà Mwe nə wəp, ye də yi sə kà wəp yà’sə Tɛ̀’ nə̀ yi ànə tumsə vesə Mo ye sə nzeŋgòŋ nə.

²⁴<<Mʉ̀ sə tsə̀’ weŋ yè’e ŋkèm ncèp nə̀ nà’a zìnə də, a ye-a ŋga ŋwè yuk yusə̀ mʉ̀ sə cèep, nə dzəm bohòŋwə̀ nə̀ yi a tum mʉ nə fana ye də ŋgə̀ŋgàŋ tse’ lùŋ nə̀ nà’a nə̀ kà kə̀ mè yuk. Wo nə kà yi mok kə̀ sak, bʉ̀ʉsə̀ yi a càsə mvwe’ kpʉ, nə to tesə və mvwe’ lùŋ laŋ. ²⁵Mʉ̀ sə tsə̀’ weŋ yè’e sə̀’ ŋkèm ncèp mòk də mvə̀k sə vəə, aco mʉ̀ dʉk də mvə̀k nə kə dzeŋ laŋ, nə̀ bʉ̀ kpʉkpʉ wèeŋ nə yuk ŋgì Mo Nwì. Bʉ̀ʉ sə̀ wo yuk ŋgì ànə, nə tse’ lùŋ. ²⁶Mvə̀’nə̀ Tɛ̀’ nə tse’ lùŋ ŋgòfa bwìŋ fana yi a fa mʉ̀ʉ Mo ye nə ŋàaŋ sə̀ ŋgòfa bwìŋ lùŋ sə̀’. ²⁷Yi a fa ŋàaŋ sə̀ ŋgòsak bwìŋ sə̀’ ndzə bohòMo ye nə, bʉ̀ʉsə̀ a yi ŋwə̀ nə̀ wo togə̀ liŋ ye də Mo ŋwè nə. ²⁸Kà də wèeŋ mərə bə bum yè’sə dʉk. Mvə̀k sə kʉəp və̀ə nə̀ bʉ̀ kpʉkpʉ wèeŋ nə yuk ŋgì ye nə. ²⁹Wo yuk nà’, wo tesə kok sə mvwe’ sè awo sə. Bʉ̀ʉ sə̀ wo ànə gʉ bə̀boŋ wèŋ lokok ŋgòtse’ lùŋ nə̀ zìnə nə, sə̀ wo à gʉ̀ yàwo bʉp wèŋ lokok və ya wo sak wo bə bʉp awo sə fana wo ye ŋgə’.>>

³⁰Jisòs nə à sə cèp malì mok sə̀’ də, <<Kaco mʉ̀ gʉ fʉk yumok bə tu am yeŋ lok, mʉ gʉ mègù yusə̀ ŋwə̀ nə̀ yi à tum mʉ nə dʉk mʉ vɛ’nə. Mʉ sakgə̀ yàm mvə̀’nə̀ yi dʉk yi. Ye də mʉ̀ kà bə jòŋ sə sak bʉ̀ʉsə̀ mʉ̀ sə kà yusə̀ də ya yà’a ye bə̀boŋ bohòmʉ̀ gʉ̀. Mʉ̀ sə gʉ̀ yàm yusə̀ yà’a ye bə̀boŋ bohòŋwə̀ nə yi a tumsə və̀ mʉ nə.

³¹<<A ye-a də mʉ̀ sə təəŋ fa ni’ àm gèm fana bwìŋ kà də yusə̀ mʉ̀ sə cèp sə zìnə tsərə̀. ³²Yusə də ŋwə̀ nəmòk nə̀ zook yo nə̀ yi sə cèp bə tu am sə yi. Mʉ̀ rì sə̀’ də yusə̀ yi sə cèp bə tu am sə zìnə. ³³Ma nə̀ bohòwèŋ yàwèŋ, wèŋ ànə tumsə lo bwìŋ fa’ bohòŋwə̀ nə̀ wo à sə to yi də Jon nà’a, də yi rɛŋsə weŋ bə liŋ am yè’sə. Ànə geŋ yi tsok rɛŋsə fa weŋ zìnə nə sə̀’ laŋ. ³⁴Bohòmʉ̀ yàm, mʉ̀ sə kà ŋwè də yi təəŋ fa mʉ ŋgònìtsə̀’ də mʉ ŋwə̀ nə̀ zìnə làp. Mʉ̀ sə cèp, nə sə kum gesə lo bə bum sə̀ Jon ànə cep bə liŋ am də ya wèeŋ tse’ lùŋ. ³⁵Jon à ye laàm nə̀ nà’ sə kʉə rɛɛŋ vɛ’ɛ njàaŋ. Wèŋ à dzəm ncèp ye nə mʉnə mvə̀k momjo vɛ’ɛ, nə sə kwa bə marɛŋ nə̀ yi ànə fa weŋ nə sə̀’. ³⁶Bum mok cu sə̀ yà’ sə nìtsə̀’ fa bwìŋ nsàp ŋwə̀ nə̀ mʉ̀ cu nə, sə̀ yà’ gʉ ghak bum sə̀ Jon ànə cep bə tu am. Fàak sə̀ Tɛ̀’ am a fa mʉ ŋàŋ də mʉ gʉ yà’ sə, yà’ sə nìtsə̀’ fa bwìŋ vɛ’ɛ jəja kwaraŋgaŋ də Tɛ̀’ am nə a tumsə və̀ mʉ yi. ³⁷Tɛ̀’ am nə̀ yi à tum mʉ nə a cèp bum mok bə liŋ am, nə̀ mʉ Mo ye nə̀ yi à tum nə. Wèŋ ka ŋgì ye bə ntu’ awèŋ yuk yuk, nə kà si ye bə lis sə̀’ yə yuk. ³⁸Fana mòk ye sə̀’ də wèŋ kà ncèp ye nə sə ntʉʉ̀ wèŋ sə̀’ ko nòŋsə̀. Mʉ̀ sə dʉk vɛ’nə bʉ̀ʉsə̀ wèŋ ka bohòMo ye nə̀ yi tum və̀ nà’ nə dzəm. ³⁹Wèeŋ ta ja’agə̀ ŋwàk Nwì nə nùumbu pwe’fo’ bʉ̀ʉsə̀ wèŋ rì də aco ŋwàk ènə niŋtsok fa weŋ mandzə̀ nə̀ ŋgòkə̀ tse’ lùŋ nə̀ zìnə nə̀ nà’a nə̀ kà mè yuk nə. Mègù sə̀’ ŋwàk nə̀ wèeŋ tagə̀ ènə, nə̀ nà’ sə cèp bə liŋ am. ⁴⁰Nə ye də wèŋ a bɛ̀ŋ ŋgòvə̀ bohòmʉ̀ ya wèeŋ tse’ lùŋ.

⁴¹<<Bohòmʉ̀ yàm, a ye-a ŋga ŋwè kuksə mʉ, mʉ̀ kà fàk bə zeŋ tse’. ⁴²Mʉ̀ rì weŋ bə̀boŋ. Mʉ̀ rì də wèŋ ka Nwì sə ntʉʉ̀ wèŋ dzəm. ⁴³Mʉ̀ dʉk vɛ’nə bʉ̀ʉsə̀ mʉ̀ a və̀ bohòwèŋ mʉnə liŋ Tɛ̀’ am fana wèŋ bɛŋ mʉ̀ nə̀ Tɛ̀’ am a tum mʉ yi nə. Nə ye də a ye-a ŋga ŋwə̀ nəmòk və̀-a bohòwèŋ bə liŋ sə̀ ye fana wèŋ ko wumsə gesə nà’nə ndzə ŋgùu wèŋ. ⁴⁴Wèŋ sə làp mègù mandzə̀ nə̀ də ya bwìiŋ kuksə weŋ. Wèŋ ka mvə̀k nə̀ co də Nwì nə̀ yi mò’fis nə kwa bohòwèŋ yi lap. A ye-a də bum yè’sə vɛ’nə, ye də aco wèŋ dzəm mʉ yè’sə va pip!

⁴⁵<<Kà də wèeŋ tsərə də mʉ nə kə jəŋ və nzak mʉ tuhù wèŋ mantombìi Nwì mʉ̀ dʉk. Anə ye bum sə̀ Musì nə̀ wèŋ a fa wes ni’ awèŋ bohòyi nə à còom sə. ⁴⁶Wèŋ ànə dzəm-a bohòMusì bə zìnə də bwɛ̀rɛ wèŋ a dzəm bohòmʉ̀ yàm sə̀’, bʉ̀ʉsə̀ Musì nə bə tu ye ànə com bum mok bə liŋ am sə̀’. ⁴⁷A ye-a də wèŋ ka bum sə̀ Musì ànə com noŋsə lo me mantombì dzəm, ye də aco wèŋ dzəm ncèp nə̀ njàm ŋga’a va?>>

Jisòs Fa Bwìŋ Ncùhù Tàŋ Zʉzʉ

(Mat. 14:13-21; Mak 6:30-44; Luk 9:10-17)

¹Bum yè’sə ànə ca gesə wes me fana Jisòs nə lokok, nə bwi lo mvwe’ nzeŋgòŋ Galìli. Yi à kə̀ dzèŋ fo’, yi to ca lo tə̀m Galìli nə mamòk. Wo à sə to tə̀m ènə sə̀’ də tə̀m Tìberiyà. ²Bwìŋ à sə bɛ’ kɛ’ cà yi vɛ’ɛ wùriŋ, bʉ̀ʉsə̀ wo yə nsàap maŋgəŋgèeŋ sə̀ yi à sə gʉ̀ bə mandzə̀ nə̀ də yi à sə gʉŋsə bwìŋ bə yiyaŋ awo. ³Ànə gèŋ Jisòs bə ŋgàa fàak ye wèŋ kok lo mʉmvwe’ nda mòk fo’, nə kə cum tsoŋ mbwa nze. ⁴Ànə ye yè’sə ŋga ŋkà’ bʉ̀ʉ Jus wèŋ nə̀ wo togə̀ nà’ də Pasobà nà’a à kʉəp sə̀’ laŋ. ⁵Jisòs à kʉ̀ksə, nə ye ŋga bwìŋ sə kok və̀ ŋgòkə̀ tsèŋ yi vɛ’ɛ wùriŋ. Fana yi bʉʉŋ fek Filìp də, <<Vesùwèeŋ nə ywiŋ bɛŋ fò, co a fa bʉ̀ʉ yè’e wèŋ pwe’ wo zʉ ze’ ɛ?>> ⁶Jisòs nə à fek yè’sə ŋgòfʉ̀ksə Filìp bwɛ̀rɛ yi à rì yusə̀ aco yi gʉ sə laŋ. ⁷Filìp cep fəsə fa nà’ də, <<A ywiŋ-a bɛŋ sə̀ bàam mbàm ba, yà’ kà yumok bohòbʉ̀ʉ yè’e səsə̀ lok.>> ⁸Ŋgà fàk Jisòs mòk à ye fo’ nə̀ liŋ ye à ye də Andrù. Yi à ye moma Saimʉ̀ Pità. Yi à dʉk fa Jisòs ye də, ⁹<<Mʉ mombam mòok fɛɛŋ nə̀ yi tse’ ntuhu brɛd tàŋ bə fuk ba. Megu də aco yà’sə ye yà bohòbʉ̀ʉ yè’e pwe’ ɛ?>> ¹⁰À ye ŋga bʉ̀ʉ sə wèŋ kə̀ dzèŋ laŋ fana Jisòs dʉk fa ŋgàa fàak ye wèŋ də yà’a dʉk bʉ̀ʉ sə pwe’ cum nze. Ŋgaŋ ànə ye fo’ co bwìŋ cum mbwa. Mbəmbaam sə̀ wo à ye mʉmvwe’ kwe’ ènə à ye co bwìŋ ncùhù tàŋ. ¹¹Jisòs à jə ntuhu brɛd sə, nə kwasə Nwì bə zeŋ. Fana yi gapsə fa bʉ̀ʉ sə̀ wo à cu nze sə. Yi à gʉ̀ bə fuk sə sə̀’ vɛ’nə fana ndàaŋwè pwe’ à zʉ tə̀tè nə ze’. ¹²Wo ànə zʉ wes fana Jisòs nə tsok fa ŋgàa fàak ye wèŋ də, <<Wèeŋ benə bwees sə̀ yà’ bwehe cu sə mvwe’ mò’fis, ya kà də yà’a bʉp wà dʉk.>> ¹³Fana ŋgàa fàak ye sə wèŋ à benə bwees sə, yà’ rwiŋ kwès hum-ncòp-ba.

¹⁴Bʉ̀ʉ sə wèŋ à yə nsàp maŋgəŋgèŋ nə̀ Jisòs à gʉ̀ʉ nə fana wo dʉk də, <<Nè’e gù tsə mègù ŋgà tsə̀’ bum Nwì nə̀ wo à dʉk fa’ də Nwìi nə kə tumsə və̀ nà’ sə nzeŋgòŋ nə.>> ¹⁵Jisòs riŋ də wo sə làp də wo ko koksə yi ŋkum bə ŋàŋ fana yi kok lo bisə yuye mʉ ndahà anə yiìyi.

Jisòs Gì Mʉ Ndzəpə̀

(Mat. 14:22-33; Mak 6:45-52)

¹⁶Nùm à co fana ŋgàa fàak Jisòs sə wèŋ tsooŋ lo sə ŋgʉ ndzəp. ¹⁷Wo ni ŋgwes, nə ye ŋgòlòo də wo to tesə lo ŋgʉ ndzəp ma mòk mvwe’ lak Kàpanùm. Wo à lòtə̀tè ndzəm kə seŋ wo ŋga wo cu ntòmʉtsətsə’rəə ndzəp nə. Yè’sə ànə ye ŋga Jisòs ka ye ntòvə. ¹⁸Fə̀fə̀ nə̀ bʉp à yè ŋgòcàa. Fə̀fə̀ nə sə bwi’lə ndzəp nə vɛ’ɛ sə̀’ nsàp nə̀ bə jòŋ. ¹⁹Yè’sə ànə ye ŋga wo mok ndzə tsətsə’rəə ndzəp anə sə̀sap co kìlometà tàŋ kè ntùŋfu àlɛ’ fana wo ye ŋga Jisòs sə gì və̀ mʉ ndzəpə̀. Wo à yə vɛ’nə, wʉə ko wo vɛ’ɛ wùriŋ. ²⁰Jisòs nə dʉk fa wo də, <<Wèeŋ kà wəp, a mʉ̀.>> ²¹Wo à yuk vɛ’nə, wo dzəm də wo jəŋ nisə yi sə ŋgwesə̀ anə. Ànə ye vɛ’nə fana wo geŋ də wo kʉk à, ŋga wo dzèŋ ndzə ŋgʉ ndzəp nə mvwe’ sə̀ wo anə sə lo sə tè.

Bwìŋ Sə Làp Jisòs

²²Tsok à rɛŋ ŋga bʉ̀ʉ sə̀ wo à ye wùriŋ sə wèŋ cu malì ŋgʉ ndzəp nə mamòk anə mvwe’ sə̀ Jisòs bə ŋgàa fàak ye wèŋ a mè’rə və̀ sə. Bʉ̀ʉ sə wèŋ riŋ də ŋgwes a ye mègù fo’ ŋkwìs mò’fis. Wo tsərə sə̀’ də ŋgàa fàak Jisòs wèŋ a lòbə ŋgwes ànə woòwo, a ka bə Jisòs wèŋ lo. ²³Ŋgwes mok sə̀ zok à tesə və̀ mvwe’ lak Tìberiyà. Wo à və̀ə nə kʉəp və mvwe’ sə̀ Tà Jisòs ànə fa bwìŋ zʉzʉ ŋga yi kwasə wes Nwì bə zeŋ yà’a. ²⁴Fana bʉ̀ʉ sə wèŋ à yə də Jisòs bə ŋgàa fàak ye wèŋ ka fa’nə mok yeŋ fana wo kpəəŋ ni ŋgwes sə̀ fo’ sə, nə sə lo mvwe’ lak Kàpanùm. Wo à sə lòfo’ də ya ŋga wo kə ye Jisòs.

Jisòs Dʉk Də Yi Bɛŋ Nə̀ Nà’a Fagə̀ Bwìŋ Lùŋ Nə

²⁵Wo à kə̀ dzèŋ ŋgʉ ndzəp mamòk anə fana wo ye Jisòs nə fo’. Wo fek yi də, <<Wù və̀ yòfɛɛŋ sèŋ, Cicà?>> ²⁶Jisòs dʉk fa wo də, <<Mʉ̀ sə tsə̀’ weŋ yè’e zìnə nə̀ nà’a ŋkèm ncèp də, wèŋ sə làp mègù mʉ yè’sə njo nə̀ wèŋ a zʉ brɛd yà’a ŋkwìs tə̀tè nə ze’. Njo nə̀ wèŋ sə làp mʉ nə, ka bʉ̀ʉsə̀ də wèŋ a yə nsàap maŋgəŋgèeŋ sə̀ mʉ̀ a gʉ̀ nìtsə̀’ fa weŋ fana wèŋ nə rɛɛŋ bə zeŋ yeŋ. ²⁷Kà də wèeŋ sə fàk ŋgòtse’ nsàp bɛŋ nə̀ nà’a nə ca gɛsə wà nè’e dʉk. Wèeŋ fak lɛ bə nsàp bɛŋ nə̀ nà’a nə kà wà kə̀ cà bʉp, nə̀ aco nà’ fa ŋwè lùŋ nə̀ zìnə nə̀ nà’a nə̀ kà mè yuk nə. Nà’a bɛŋ nə̀ aco mʉ̀ʉ mo ŋwè, mʉ̀ fa weŋ nà’, a mʉ̀ nə̀ Tɛ̀’ am Nwì a fa mvə̀k nə̀ ŋgònìtsə̀’ fa kɛ’ bwìŋ bə zeŋ də mʉ mo ye nə.>>

²⁸Wo fek Jisòs nə də, <<Nsàap fàak sə̀ aco vès gʉ yà’ ya Nwìi kwa bohòvèes yè’sə yà?>> ²⁹Jisòs dʉk fa wo də, <<Nsàp fàk nə̀ aco wèŋ gʉ nə də, wèeŋ dzəm bohòŋwə̀ nə̀ Nwì à tum və̀ə nə.>> ³⁰Wo dʉk fa yi də, <<A ye-a vɛ’nə, ye də nsàp yu nə̀ aco wù gʉ, wù bə tu yo, ya vèes ye nə dzəm bohòwùu yè’sə yà? Yusə̀ aco wù gʉ niŋ fa ves sə yà? ³¹Ànə ye njamòk ŋga tàcicii avès wèŋ à sə gì ŋgəà yà’a fana wo sə fa wo nsàp bɛŋ mòk nə̀ wo to nà’ də Manà. Yà’ mègù mvə̀’nə̀ wo à còm ndzənə ŋwàk Nwì də, <Yi ànə fa wo bɛŋ sə̀ yà’ à tsə ma mʉbu də wo sə zʉ.> Ye də aco wù gʉ niŋ fa ves yumook yòvɛ’nə sə̀’ à?>> ³²Ànə geŋ Jisòs dʉk fa wo də, <<Mʉ̀ sə tsə̀’ weŋ yè’e zìnə nə̀ nà’a ŋkèm ncèp də, bɛŋ sə̀ Musì ànə fa tàcicii awèŋ yà’ ŋgəà sə ànə ka wo yà’ yi fa. Tɛ̀’ am fagə̀ bwìŋ bɛŋ nə̀ zìnə nə̀ nà’ tsə ma mʉbu nə yi. ³³Bɛŋ nə̀ Nwìi fagə̀ bwìŋ nə, a nə̀ nà’a tsəgə̀ ma mʉbu, nə fa bwìŋ sə nzeŋgòŋ anə lùŋ nə̀ zìnə nə.>>

³⁴Wo dʉk fa yi də, <<Tà, fa ves nsàp bɛŋ ànə, nə kà ntsə’mòk càsə̀ yuk.>> ³⁵Jisòs dʉk fa wo də, <<Mʉ yè’e sə̀’ bɛŋ nə̀ nà’a fagə̀ bwìŋ lùŋ nə. Ŋwə̀ nə̀ yi və-a bohòmʉ̀, njè kà ŋgə̀ŋgàŋ mok sə̀’ ya fe’lə̀. Ŋwə̀ nə̀ yi dzəm-a bohòmʉ̀ njè ndzəp nə kà yi mok ya yu’ fe’lə̀. ³⁶Bohòwèŋ yàwèŋ, yà’ mègù mvə̀’nə̀ mʉ̀ à tsə̀’ weŋ fa’ mantombì yà’a də, wèŋ a yə mʉ bə lis awèŋ laŋ fana nə kà bohòmʉ̀ anə dzəm. ³⁷Bʉ̀ʉ sə̀ Tɛ̀’ am fa mʉ wo də wo ye bʉ̀ʉ am pwe’ nə və bohòmʉ̀ anə. Ŋwə̀ nə̀ yi və-a bohòmʉ̀ fana gʉ kpʉ yà, kaco mʉ̀ bɛ’ fəsə yuk yi maŋkwɛ̀ŋ yeŋ. ³⁸Bʉsə̀ mʉ̀ à tsə mʉbu ŋgòkə̀ gʉ̀ yusə̀ ŋwə̀ nə̀ yi à tum mʉ nə dzəm vɛ’nə. Mʉ̀ à ka ŋgòkə̀ gʉ̀ yusə̀ mʉ̀ dzəm yà’ mʉ̀ və. ³⁹Yusə̀ ŋwə̀ nə̀ yi à tum mʉ sə dzəm sə də, yòŋsə̀ ŋwə̀ nə̀ mò’fis kà mʉtsətsə’rəə bʉ̀ʉ sə̀ yi fa ndzə bohòmʉ̀ sə bisə̀. Yi dzəm də mʉ gʉ lɛ co wo pwe’ lokok və mvwe’ lùŋ nùmbu nə̀ nzeŋgòŋ nə mèe. ⁴⁰Yusə̀ yà’ bòTɛ̀’ am sə də, ŋwə̀ nə̀ yi yə-a nə riŋ mo ye nə, nə dzəm bohònà’ fana ŋgə̀ŋgàaŋ nə tse’ lùŋ nə̀ nà’a nə̀ kà mè nə. Ye də nùmbu nə̀ nzeŋgòŋ nə mèe, mʉ̀ gʉ ŋwə̀ ànə yi lokok ŋwʉm.>>

⁴¹Bʉ̀ʉ Jus wèŋ à yè ŋgòcèp ŋwə̀m kɛ’cà bə liŋ Jisòs sə də bʉ̀ʉsə̀ nà’ dʉk də, <<Mʉ bɛŋ nə̀ mʉ̀ tsə ma mʉbu.>> ⁴²Wo sə cèp də, nè’e ka Jisòs mo Jòsep yeŋ ɛ̀? Mʉ̀ də a rì ma bə tɛ̀’ lòoŋ fo’ àlaa. Ye də yè va ŋkuŋ yi sə cep də, <<Mʉ̀ tsə ma mʉbu>> ɛ? ⁴³Jisòs nə dʉk fa wo də, <<Wèeŋ kà də wèeŋ sə cep ŋwəm kɛ’ca mʉtsətsə’rəə wèŋ dʉk. ⁴⁴Kaco ŋwə̀ nəmòk və to bohòmʉ̀ anə yeŋ tse’ŋga Tɛ̀’ am nə̀ yi a tumsə və̀ mʉ nə gʉ̀ nà’ yi ŋkuŋ yi və bohòmʉ̀ anə. Ŋwə̀ nə̀ yi və-a bohòmʉ̀ fana nùmbu nə̀ nzeŋgòoŋ mee, mʉ̀ lòkoksə yi ŋwəm. ⁴⁵Ŋgàa tsòhòbum Nwì sə̀ njamòk wèŋ ànə com noŋsə njamòk də, <Nwìi nə yə’rə fa bwìŋ bum pwe’fo’ yi.> Ye də ŋwə̀ nə̀ yi yuk-a ncèp Tɛ̀’ am ènə, nə kotse’ nà’ sə ntʉʉ̀ yi, fana ŋgə̀ŋgàaŋ nə və bohòmʉ̀. ⁴⁶Mʉ̀ sə kà yè’sə də ŋwə̀ nəmòk a yə yuk Tɛ̀’ am nə bə lis laŋ dʉk. À yə yuk mègù yi mʉ̀, nə̀ mʉ̀ à tsooŋ mbwa nə. ⁴⁷Mʉ̀ sə tsə̀’ weŋ yè’e zìnə nə̀ nà’a ŋkèm ncèp də ŋwə̀ nə̀ yi dzəm-a bohòmʉ̀ ye də ŋgə̀ŋgàŋ tse’ lùŋ nə̀ zìnə nə laŋ. ⁴⁸Mʉ bɛŋ nə̀ mʉ fagə̀ bwìŋ lùŋ nə̀ zìnə nə mʉ̀. ⁴⁹Ŋgòcèp bə nsàp bɛŋ nə̀ wo to nà’ də manà, nə̀ tɛ̀’ɛ awèŋ ànə zʉ nà’ ŋgəà nə fana, wo ànə zʉ yà’ vɛ’nə, nə kpʉ mali gu sə̀’ kpʉ. ⁵⁰Bohòma nə̀ bɛŋ nə̀ zìnə nə̀ nà’a tsə ma mʉbu ye də, ŋwə̀ nə̀ yi zʉ-a nà’, yi nə kà kpʉ yuk. ⁵¹Mʉ yàm bɛŋ nə̀ nà’a fagə̀ bwìŋ lùŋ ànə, nə̀ nà’ tsə ma mʉbu. A ye-a ŋga ŋwə̀ nəmòk zʉ-a bɛŋ ènə, ye də yi nə cum mamgeŋ fo’ mvèsə̀. Bɛŋ nə̀ mʉ̀ sə fa bwìŋ pwe’ nà’ də wo zʉ ya wo tse’ lùŋ nə, a ŋgùpni’ àm.>>

⁵²Ncèp nə̀ Jisòs à cèp ènə à gʉ̀ bʉ̀ʉ Jus wèŋ sə joho, nə tse’ mok mamfenə̀ mʉtsətsə’rəə wo. Wo sə cep də, <<Aco ŋkwà’kʉ̀ nè’e fa ves ŋgùpni’ ye də a zʉ nà’ yè’sə va?>> ⁵³Fana Jisòs dʉk wo də, <<Mʉ̀ sə tsə̀’ weŋ yè’e ŋkèm ncèp dʉk də, a ye-a ŋga ŋwè ka ŋgùpni’ àm, nə̀ a mʉ̀ʉ mo ŋwè nə zʉ, nə kà ndʉəm am sə̀’ no fana ye də ŋgə̀ŋgàŋ ka lùŋ nə̀ zìnə nə tse’. ⁵⁴Nə ye də bohòŋwə̀ nə̀ yi zʉ ŋgùpni’ àm, nə no ndʉəm am sə fana ye də yi tse’ lùŋ nə̀ nà’a nə̀ kà mè. Nùmbu nə̀ nzeŋgòoŋ mèe, mʉ̀ lokoksə nsàp ŋwə̀ ànə ŋwəm. ⁵⁵Ŋgùpni’ àam bɛŋ nə̀ zìnə nə, ndʉəm am ye sə̀’ nəno nə̀ zìnə nə. ⁵⁶Ŋwə̀ nə̀ yi zʉ-a ŋgùpni’ àm, nə no ndʉəm am fana ye də ŋgə̀ŋgàaŋ mam mok ndzə ni’ì mʉ̀, mʉ̀ mam ndzə ni’ì ŋgə̀ŋgàŋ sə̀’. ⁵⁷Tɛ̀’ am nə̀ yi tse’ lùŋ nə a tum və̀ mʉ yi. Lùŋ nə̀ njàm nə̀ mʉ̀ tse’ nə a və̀ bohòyi. Ye də ŋwə̀ nə̀ yi zʉ-a ŋgùpni’ àm fana ŋgə̀ŋgàaŋ nə tse’ jəŋ lùŋ nə bohòmʉ̀ ye sə̀’. ⁵⁸Mʉ tsok fa weŋ sə̀mok də, ŋgùpni’ àm nə nà’a bɛŋ nə̀ zìnə nə̀ nà’ tsə ma mʉbu. Nà’ ka nsàp bɛŋ nə̀ tàcicii avès wèŋ à zʉ nà’ ŋgəà nà’a yeŋ. Bʉsə̀ wo ànə zʉ bɛŋ ànə vɛ’nə fana nə kpʉ mali. Ŋwə̀ nə̀ yi zʉ-a ye bɛŋ nə̀ mʉ̀ sə fa yi nà’ nə, ye də yi nə kà mok kpʉ fe’lə̀.>>

⁵⁹Jisòs à cèp ncèp ènə ŋga yi sə yə’rə bwìŋ mʉmvwe’ ndap pìriyà mvwe’ lak Kàpanùm.

Ŋgàa Fàak Jisòs Wèŋ Bɛ̀ŋ Yi Bwìŋ Ŋkʉ̀ʉŋntɛ̀ŋ

⁶⁰Ŋgàa fàak Jisòs wèŋ ànə yuk ncèp ènə fana wo dʉk də, <<Kàcò, ncèp ènə gʉ wesə vɛ’ɛ wùriŋ, aco gʉ to mʉmvə̀’ ànə yè’sə ndà pip?>> ⁶¹Jisòs nə riŋ ye sə̀’ də ŋgàa fàak ye sə wèŋ sə cèp ŋwə̀m kɛ’cà bʉ̀ʉ ncèp ye nə fana yi fek wo də, <<Ncèp ènə gʉ̀ weŋ co wèeŋ me’rə mʉ, nə bwi foho lo yu awèŋ à? ⁶²A ye-a vɛ’nə, ye də a ye-a ŋga wèŋ yə mʉ̀ʉ mo ŋwè ŋga mʉ̀ sə kok lòfe’lə mʉtsə̀ mvwe’ sə̀ mʉ̀ ànə ye to sə, wèŋ dʉk wesə mok də yà? ⁶³Yòŋsə̀ nə gʉ̀gə̀ yi ŋkuŋ ŋwè cum ŋwəm, ŋgùpni’ ka ye yumok ŋgògʉ̀ʉ tse’. Aco wèŋ tse’ bum yòŋsə̀ bə bum lùŋ bə ncèp nə̀ mʉ̀ tsə̀’ fa weŋ ènə. ⁶⁴Megu də bʉ̀ʉ mok cu mʉtsətsə’rəə wèŋ sə̀ wo sə kà ncèp ànə dzəm.>> Jisòs à sə cèp bum yè’sə ŋga yi à rì ye bʉ̀ʉ sə̀ wo à ka dzəm, nə riŋ bə ŋwə̀ nə̀ nà’a nə̀ sèŋ yi nə wèŋ mantombì laŋ. ⁶⁵Yi à cèp fe’lə mok sə̀’ də, <<Nà’a njo nə̀ mʉ̀ a dʉk weŋ də, kaco ŋwè və bohòmʉ̀ bə tu ye yeŋ, tse’ ŋga Tɛ̀’ am gʉ̀ yi yi ŋkuŋ nə.>>

⁶⁶Ye jəŋ fa’nə, bʉ̀ʉ sə̀ wo à sə yù Jisòs sə à mè’rə yi, nə bwi foho lo yu awo vɛ’ɛ ŋkʉ̀ʉŋntɛ̀ŋ. ⁶⁷Fana Jisòs bʉʉŋ fek ŋgàa fàak ye sə̀ yi à cok fis wo hum-ncòp-ba sə wèŋ də, <<Wèŋ yàwèŋ ɛ, wèeŋ bwi foho lo sə̀’ à?>> ⁶⁸Saimʉ̀ Pità dʉk fa fəsə nà’ də, <<Tà, wù tse’ ncèp nə̀ nà’ tse’ lùŋ nə̀ nà’a nə̀ kà mè nə wù. Wù sə fek ves vɛ’nə yè’sə də aco vès yuŋ fe’lə lo ŋga’a mok ndà? ⁶⁹Vès a dzəm bohòwù, nə riŋ sə̀’ də wu ŋwə̀ nə̀ rərɛŋ nə̀ wù a və̀ bohòNwì.>> ⁷⁰Jisòs dʉk fa fe’lə wo də, <<Wèŋ sə dʉk vɛ’nə, wèŋ ka riŋ də wèŋ sə̀ mʉ̀ a to fis weŋ hum-ncòp-ba yè’e, mòok ca nə̀ yi ye maze’ riŋ à?>> ⁷¹Yi à sə cèp yè’sə bohòJudàs mo Saimʉ̀ Iskarəyà. Yi à rì də Judàs nə̀ nà’a mòk sə mvwe’ ŋgàa fàak ye sə̀ hum-ncòp-ba sə nə seŋ yi nà’.

Bwema Jisòs Bə Bʉ̀ʉ Jus Wèŋ Mok Mərə Yi

¹Bum yè’sə ànə ca wes fana Jisòs sə gihi kɛ’ mvwe’ nze Galìli. Yi ànə ka ŋgòlòmvwe’ nze Jùdiyà dzəm bʉ̀ʉsə̀ bʉ̀ ŋkwàha bʉ̀ʉ Jus wèŋ à sə làp mandzə̀ də wo zə yi.

²Mvə̀k ànə à ye ŋga ŋkà’a bʉ̀ʉ Jus sə̀ wo togə̀ yà’ də ŋkà’a Duŋ yà’a kʉəp və̀ sə̀’ laŋ. ³Fana bwema Jisòs sə dʉk fa yi də nà’a lokok, nə lo mvwe’ nze Jùdiyà, nə kə gʉ nsàap bum maŋgəŋgèeŋ sə̀ yi sə gʉ̀ sə fo’, ya bʉ̀ʉ sə̀ wo sə yù mandzə̀ nà’ sə̀ wo cu ma nà’nə ye jəŋ yàwo sə̀’. ⁴Wo dʉk fa mali yi sə̀’ də, <<Ŋwèe dzəm-a də bwìiŋ riŋ yi, kaco yi sə gʉ swihi kɛ’ bum swihi yeŋ. Wù sə gʉ̀ bum yè’sə fana bòdə wu sə gʉ yà’ mvwe’ jəja ya bwìiŋ ye.>> ⁵Bwema ye wèŋ ma, à sə kà yi sə̀’ dzəm. ⁶Jisòs nə dʉk fa wo də, <<Mvə̀k nə̀ ŋgòlònə ka bohòmʉ̀ yàm ntòkʉrə. Bohòwèŋ yàwèŋ, mvə̀k nə̀ fòlòoŋ kə̀kʉrə̀. ⁷Bʉ̀ʉ sə̀ sə nzeŋgòŋ sə ka njo mòk ŋgòbɛ̀ŋ weŋ bʉ̀ʉ zeŋ tse’. Bohòmʉ̀ yàm, wo sə bɛ̀ŋ mʉ bʉ̀ʉsə̀ mʉ tsə̀’ fagə̀ wo riŋriŋ də wo sə gʉ̀ bʉp. ⁸Wèeŋ du lo yàwèŋ mvwe’ ŋkà’ nə ntɛ̀ŋ. Mʉ nə kà yàm ntòkok lòbʉ̀ʉsə̀ mvə̀k njàm nə ka ntòkʉrə.>> ⁹Yi à dʉk vɛ’nə, nə cum mam yuye Galìli anə.

¹⁰Bwema ye sə wèŋ à lòwes fana yi bɛ’ lo yà’wèŋ sə̀’. Yi à sə gì swìhi gorə lòye sə fʉ̀ə̀ fʉ̀ə̀, yi à ka jəja lo. ¹¹Bʉ̀ ŋkwàha bʉ̀ʉ Jus wèŋ à sə làp yi mvwe’ sə̀ wo à tse’ ŋkàk sə. Wo sə fe’rə kɛ’cà də, <<Ŋwə̀ ànə yè’sə fòlɛ-ò?>> ¹²Bwìŋ à sə cèp làrə kɛ’cà bə liŋ Jisòs sə wùriŋ. Mok sə dʉk də yi ŋwə̀ nə̀ bə̀boŋ. Mok bɛŋ də a mvwès, də nà’ sə jə lòbwìŋ ma nə̀ bə jòŋ wèŋ. ¹³Ŋwè à sə kà bə liŋ ye sə jəja taàŋ bʉ̀ʉsə̀ wo à sə wəp bʉ̀ ŋkwàha bʉ̀ʉ Jus wèŋ.

¹⁴Ŋkàk nə à kə̀ dzèŋ mok co mʉtsətsə’rə̀ fana Jisòs nə lo ye sə mʉmvwe’ ndap Nwì nə̀ ghaŋ nə, nə sə yə’rə bwìŋ mbwa. ¹⁵Bʉ̀ ŋkwàha bʉ̀ʉ Jus wèŋ à yuk, nə mərə vɛ’ɛ wùriŋ. Wo sə cep də, <<Ŋwə̀ ènə a ka ŋwàak lʉ̀k yə’rə, nə sə rì nə bum vɛ’ɛ valɛ?>> ¹⁶Ànə geŋ Jisòs cep fəsə fa wo də, <<Bum sə̀ mʉ̀ sə yə’rə sə ka sə̀ yàm yeŋ, a sə̀ Nwì nə̀ yi a tum və̀ mʉ nə. ¹⁷A ye-a ŋga ŋwè dzəm də yi gʉ yusə̀ co Nwì kwa bə zeŋ fana aco yi riŋ sə̀’ də yusə̀ mʉ̀ sə yə’rə sə və̀ bohòNwì, yà’ ka yàm bə ŋàaŋ yàm yeŋ. ¹⁸Ŋgòcèp bə nsàp ŋwə̀ nə̀ də mʉ yè’e ndàlɛ fana, a ye-a ŋga ŋwè sə cèp-a yumok bə ŋàaŋ sə̀ ye, vesùwèŋ riŋ də yi sə làp yà’sə mandzə̀ də bwìiŋ jəŋ yi co ŋwə̀ nə̀ ghaŋ. Nə ye sə̀’ də a ye-a ŋga ŋgə̀ŋgàŋ sə dzəm də wo kuksə ŋwə̀ nə̀ nà’ tum yi fana vesùwèŋ riŋ sə̀’ də yi ŋwə̀ nə̀ zìnə, yi sə kà bwìŋ yà’sə bəbòrə̀. ¹⁹Wèeŋ ja’a-na yàwèŋ sə̀’ ɛ̀. Musì ànə fa weŋ lʉ̀k, ka yi yeŋ nɛ̀? Nə ye də ŋwə̀ nə̀ mò’fis mʉtsətsə’rə wèŋ nə̀ yi nòŋsəgə̀ yà’ lòoŋ bʉ̀ə̀. Njo nə̀ wèŋ sə làp mandzə̀ də wèeŋ zə mʉ kə bʉ̀ʉ yà?>>

²⁰Fana bʉ̀ʉ sə̀ wo à mà tə fo’ sə wèŋ də, <<Hàva’, yòŋsə̀ ze’ mòk cu ndzə tuhù ŋgà’ nè’e tà. Wù sə ŋaŋa kènə, wù yə ŋga sə làp mandzə̀ ŋgòzə wu ndà?>> ²¹Jisòs dʉk fa wo də, <<Wèŋ pwe’ sə mərə də bʉ̀ʉsə̀ mʉ̀ a gʉ̀ yu maŋgəŋgèŋ nùmbu dzə̀. ²²Wèeŋ tsərə-a bə nzak kom fa bwe mbəmbam wèŋ tu ɛ̀. Wèŋ rì də Musì à tsə̀’ də wu dzə mombam, nùmbu nə̀ fwame’ dzèeŋ, wù kom fa yi tu nùmbu ànə. A zìnə də à ka yè’sə Musì dʉk to. Ànə gʉ to bum yè’sə tàcicii avès sə̀ mantombì ŋkuŋ Musì sə və ye sə. Nə yeè nə də njo nə̀ Musì ànə cep vɛ’nə fana wèŋ sə kom fa wo tu sə bə sə̀ yà’ kə̀ kʉ̀rə nùmbu dzə̀ wèŋ pwe’, nə kà càsə̀. ²³A ye-a də wèŋ sə kom fa bwe awèŋ tu bə nùumbu dzə̀ wèŋ lòoŋ də ya wèeŋ kà lʉ̀k Musì gʉ̀ bʉpsə̀, ye də mʉ̀ lùŋsə yàm ŋwə̀ nə̀ mim bə tu nùmbu dzə̀, wèŋ jok bohòmʉ̀-ɛ bʉ̀ʉ yà? ²⁴A bə̀boŋ də wèeŋ dzəm-a ŋgòsak nzak, wèŋ kà ma mò’fis kʉ̀k mègù. Wèŋ lap ja’a yusə̀ gʉgʉŋ sə̀ yà’ cu sə tsətsə’rə̀ ànə pwe’ ŋkuŋ nə cep.>>

Bwìŋ Sə Mərə Də Jisòos Ŋkum Ŋgà Gèm Bwìŋ Nə Àlɛ

²⁵Bʉ̀ʉ lak Jòrosalèm wèŋ mok à dʉk də, <<Nè’e ka ŋwə̀ nə̀ wo sə làp yi də wo zə yi nə yeŋ à? ²⁶Wèeŋ ja’a na yàwèeŋ mvə̀’nə̀ yi tə nè’, nə sə cèp nə jəja, ŋwə̀ nəmòk kà yi yumok sə̀ fek lok ɛ̀. Ye də bʉ̀ ŋkwàha bʉ̀ʉ avès wèŋ dzəm mok laŋ də yi yè’sə Ŋkum ŋgà gèm bwìŋ nə kènə va? ²⁷Megu ŋga’a kə də vesùwèŋ rì lak ŋwə̀ ènə mvwe’ sə̀ yi və̀ə, ŋga yusə lɛ də Ŋkum nə və-a ye, ŋwè kà mvwe’ sə̀ yi a və̀ə sə rì yuk fʉ̀’.>>

²⁸Jisòs ànə sə yə’rə mʉmvwe’ ndap Nwì nə̀ ghaŋ nə fana yi cep torə fis də, <<Wèŋ də wèŋ rì mʉ, nə riŋ bə mvwe’ lak am mwè pwe’ ɛ̀? Ye də wèeŋ riŋ də mʉ̀ ka fɛɛŋ bə ŋàaŋ yàm və, mʉ̀ və̀ bə liŋ ŋwə̀ nə̀ yi ŋwə̀ nə̀ zìnə nə. Wèŋ ka yi lɛ riŋ. ²⁹Bohòmʉ̀ yàm, mʉ̀ rì yi bʉ̀ʉsə̀ mʉ̀ a tesə və̀ bohòyi, ŋga yi a tum və̀ mʉ sə̀’ yi nə.>> ³⁰Bwìŋ à yuk bum sə̀ yi à cèp yè’sə, ntʉm yaaŋ mok vɛ’ɛ fana wo lap mandzə̀ də wo ko yi. Mandzə̀ nə̀ co ŋwè kə jwɛŋ gesə fʉk yi bə bo kà ye bʉ̀ʉsə̀ à ye ŋga mvə̀k nə̀ nje nə à ka ntòkʉrə. ³¹Ànə geŋ bwìŋ ŋkʉ̀ʉŋntɛ̀ŋ dzəm bohòyi. Bʉ̀ʉ sə wèŋ sə dʉhʉ də, <<Nè’e gù tsə gù lɛ Ŋkum nə bwɛ̀rɛ nsàp maŋgəŋgèŋ mòk cu fe’lə nə̀ yi ka nà’ ntògʉ à?>>

³²Bʉ̀ʉ Faràsi wèŋ à yuk də bwìŋ sə cèp làrə kɛ’ bə liŋ Jisòs nə bə nsàp mandzə̀ ànə fana wo lo kə kiŋ cù bə ŋgàa fa satikà’ sə̀ ghaŋ wèŋ mvwe’ mò’fis. Bə yà’wèŋ tumsə lo ŋgàa kʉ̀k ndap Nwì wèŋ də yà’a kə ko və Jisòs nə. ³³Ànə geŋ Jisòs nə dʉk fa wo də, <<Mʉ nə cum kok vesùwèŋ mvə̀k momjo fana mʉ̀ bwi foho lo fe’lə bohòŋwə̀ nə̀ yi a tum və̀ mʉ nə. ³⁴Wèeŋ nə lap mʉ, wèŋ kà mʉ yə bʉ̀ʉsə̀ mʉ nə ye mvwe’ sə̀ co wèŋ kà fo’ kə̀ dzèŋ to.>> ³⁵Bʉ̀ʉ Jus wèŋ à sə cèp kɛ’cà mʉtsətsə’rə wo də, <<Ŋkwa’kʉ̀ nè’e də yi nə lo bisə mvwe’ sə̀ co vesùwèŋ kà yi yə yè’e ŋga a ma fò? A yè’sə də yi nə lo lakmvum nə kə cum bə bʉ̀ʉ avès sə̀ wo curə kɛ’ fo’, nə sə yə’rə bʉ̀ lakmvum sə wèŋ nà? ³⁶Yi cep mok sə̀’ də vèes nə lap yi, nə kà yi yə. A nə kà mvwe’ sə̀ yi cu sə sə̀’ kə̀ dzèŋ to wèŋ, ŋga yi sə cu yà’sə fò? Bum sə̀ yi sə cèp yà’ yà’sə dalɛ?>>

³⁷Nùmbu cok mbwè ŋkàk à dzèeŋ, nə̀ nà’a nùmbu nə̀ ghaŋ nə. Jisòs lokok nùmbu ànə, nə cep torə də, <<A ye-a ŋga ntʉm sə sə ŋwə̀ nəmòk, ŋgə̀ŋgàŋ və bohòmʉ̀, nə kə no. ³⁸Yà’a nə̀ ye mvə̀’nə̀ wo à còm nòŋsə yà’ ndzənə ŋwàk Nwì də, <A ye-a ŋga ŋwè dzəm-a bohòmʉ̀, ndzəp nə̀ nà’ tse’ lùŋ nə nə sə ki tesə ndzə ni’ì ŋgə̀ŋgàŋ nduk yà’a.> >> ³⁹Yi ànə sə cep yè’sə bə yòŋsə̀ nə̀ Nwìi fagə̀ ŋwè nà’ ŋga ŋwè dzəm bohòyi Jisòs nə. Ghà ànə à ye ŋga bwìŋ ka yòŋsə̀ nə ntòtse’ bʉ̀ʉsə̀ Jisòs ànə ka ŋàaŋ ye sə̀ bohòTɛ̀’ ye nə ntòjəŋ.

⁴⁰Mʉmvə̀’nə̀ wo à yuk bum sə̀ Jisòs a cèp sə fana bʉ̀ʉ mok mʉtsətsə’rəə ŋgo bʉ̀ nə̀ wo ye fo’ nə dʉk yàwo də, <<Zìnə, ŋwə̀ ènə lɛ ŋgà tsə̀’ bum Nwì nə̀ yi ànə ye ŋgòkə̀ və̀ə nə.>> ⁴¹Bòp ma mòk dʉk yàwo sə̀’ də, <<Ŋwə̀ ènə Ŋkum ŋgà gèm bwìŋ nə.>> Bòp mòk dʉk yàwo sə̀’ də, <<Hai’ nà’a ka yi nə yeŋ, bʉ̀ʉsə̀ Ŋkum nə à ka ŋgòtesə mvwe’ nze Galìli yeŋ. ⁴²Ŋwàk Nwì sə tsə̀’ də Ŋkum nə nə tesə mvwe’ ŋgwì bʉ̀ Devìd mvwe’ lak Betèrèhem. Betèrèhem nə mvwe’ sə̀ Devìd nə à sə cugə̀ fo’.>> ⁴³Ànə ye vɛ’nə fana bwìŋ ga’a cù ba bʉ̀ʉ Jisòs. ⁴⁴Bʉ̀ʉ mok wèŋ lap mandzə̀ də wo ko yi fana wo kà yi bə bo nə̀ bo jwɛ̀ŋ lok.

⁴⁵Dògarìi sə wèŋ à bwì foho lòbohòbʉ̀ʉ Faràsi bə ŋgàa fa satikà’ sə̀ ghaŋ sə wèŋ bo tu. Fana bʉ̀ ŋkwàha bʉ̀ʉ sə wèŋ fek wo də, <<Wèŋ ka yi ko jə və bʉ̀ʉ yà?>> ⁴⁶Dògarìi sə wèŋ dʉk də, <<Vès ka ŋga ŋwə̀ nəmòk sə cèp nsàap bum mok co ŋgà’ ànə yuk yuk.>> ⁴⁷Bʉ̀ʉ Faràsi sə wèŋ dʉk fa yà’ də, <<Wotoo, ye də yi bòrə weŋ yàwèŋ sə̀’ laŋ à? ⁴⁸Wèŋ yə də ŋwə̀ nə̀ mò’fis mʉtsətsə’rəə bʉ̀ʉ sə̀ mantombì bə bʉ̀ʉ Faràsi wèŋ nə̀ də yi dzəm bohònà’ cu yo à? Hai’, ka yeŋ. ⁴⁹Dzəm megu bohòyi anə kwe’ bʉ̀ nə̀ wo ka lʉ̀ʉk Musì riŋ yà’a. Wo pwe’ cu bohòNwì bʉp.>>

⁵⁰Ŋwə̀ nəmòk nə̀ yi ànə ye mʉtsətsə’rəə bʉ̀ʉ Faràsi sə wèŋ à ye Nìkòdemù nə̀ yi à kə̀ tsèŋ nòoŋ Jisòs ndzəmə̀ fa’ nà’a. Nìkòdemù nə cep ye dʉk də, ⁵¹<<A dʉk-a də a bɛ’ tse’ lʉ̀ʉk avès rərəŋ fana ye də kaco a sak nzak ŋwè ŋga ŋgə̀ŋgàŋ ka fo’ sə nze ŋgòcèp ye sə sə̀’ yeŋ.>> ⁵²Wo à yuk vɛ’nə wo də, <<Wu cep vɛ’ɛ va co wu sə̀’ ŋkwa’kʉ̀ nə̀ mvwe’ nze Galìli mòk nə̀ a lak ŋwə̀ nə̀ a sə dʉk ènə ɛ? Dù kə̀ taŋ ja’a tsə’rə ŋwàk Nwì sə̀mok. Yumok ka nja də ŋgà tsə̀’ bum Nwìi nə kə̀ tesə mvwe’ nzeŋgòŋ Galìli ye yuk.>>

[ ⁵³Ànə geŋ ndàaŋwè pwe’ lo la’à yi.

Wo Jə Və̀ Ŋwà Mòk BohòJisòs Də Nà’ Ko Nto

¹Jisòs lo ye mvwe’ nda mòk nə̀ wo togə̀ nà’ də nda Olìp. ²Tsok à rɛŋ, ŋga cu ntònə̀ zəzòŋ fana Jisòs nə bwi foho lo fe’lə mʉ ndap Nwì nə̀ ghaŋ nə sə̀mok. Bwìŋ pwe’ à yù lòyi mbwa. Yi cum tsoŋ nze, nə sə yə’rə wo mʉmvwe’ ndap Nwì nə.

³Ànə geŋ wo ko jəŋ və ŋwà mòk fo’, də wo ko nà’ ŋga nà’ sə ko nto. Wo fis tes gesə lo yi mantombì mvwe’ jəja. Ànə ko jəŋ və yi yè’sə bʉ̀ʉ Faràsi bə ŋgàa yə’rə̀ bwìŋ lʉ̀k wèŋ. ⁴Bʉ̀ʉ sə dʉk fa Jisòs də, <<Cicà, wo ko ŋwà nè’e ŋga yi sə ko nto. ⁵Nə ye də ŋwàk lʉ̀ʉk Musì sə tsə̀’ də a ye-a ŋga wo ko ŋwè bə sàhà, wo tərə yi bə lìs tə̀tè ŋgə̀ŋgàŋ kpʉ. A ye-a wù yò, wù dʉk yòbə nsàp ènə da?>> ⁶Wo à sə cèp yè’sə ŋgòyu’rə Jisòs cù. Jisòs à bʉhʉ tsə yuye sə nze, nə sə com sɛsə sənə mfə̀mfə bə ndubo. ⁷Wo sə fek mali yi fo’ tə̀tè Jisòs nə cum kok mʉtsə̀, nə dʉk yà’ də, <<Ŋwə̀ nəmòok ye-a mʉtsətsə’rə wèŋ fa’nə, nə̀ yi rì də yi ka bʉp tse’ fana ŋgə̀ŋgàŋ mak to vesə ŋwà ènə bə lìs yi.>> ⁸Yi dʉk wes vɛ’nə, yi bʉhʉ tsoŋ sə̀’ sə nze anə, nə sə com sə̀mok. ⁹Wo ànə yuk ncèp ènə fana wo ye ŋgòcoho fo’ təəŋ, təəŋ mò’fis, mò’fis, nə sə lo. À yè ŋgòtesə lòto ntòsə̀ wo ŋkwàha bwìŋ tə̀tè Jisòs à bwehe cu mègù mok fo’ yiìyi bə ŋwà nə mvə̀’nə̀ yi tə kok fo’. ¹⁰Jisòs à lòkok cu kok mʉtsə̀ sə̀mok, nə fek ŋwà nə də, <<Njɛ̀’gù, wo fò? Ŋwə̀ nəmòk ka wu yumok gʉ à?>> ¹¹Ŋwà nə dʉk də, <<Tà, ŋwə̀ nə̀ mò’fis ka mʉ yumok gʉ lok.>> Jisòs dʉk fa fe’lə nà’ də, <<Mʉ nə kà wu yàm yumok sə̀’ gʉ̀. Dù lòyuyo, nə kəa cù bə ŋgògʉ̀ bʉp.>>]

Jisòs Də Yi Marɛŋ Nə̀ Sə Nzeŋgòŋ Nə

¹²Jisòs à cèp fe’lə ncèp mòk sə̀’ də, <<Mʉ marɛŋ nə̀ sə nzeŋgòŋ nə mʉ̀. A ye-a ŋga ŋwə̀ nəmòk yù və̀ mʉ, ŋgə̀ŋgàaŋ nə tse’ marɛŋ nə̀ nà’a lùŋ nə̀ zìnə nə. Yi nə kà sənə mandzəm gì.>> ¹³Bʉ̀ʉ Faràsi wèŋ kə dʉk fa yi də, <<Wù sə ko fa ni’ yògèm sə̀’ wù. Ye də yusə̀ wù sə cèp yà’sə yà’ ka fàk tse’.>> ¹⁴Jisòs nə cep ye də, <<A ye-a sə̀ də mʉ̀ sə ko fa ni’ àm gèm sə̀ mʉ̀ fana mʉ̀ riŋ də yusə̀ yà’ sə tesə kə̀ cùhu mʉ̀ʉ zìnə. Mʉ̀ dʉk vɛ’nə bʉ̀ʉsə̀ mʉ̀ rì mvwe’ sə̀ mʉ̀ a və̀ə, nə riŋ mvwe’ sə̀ mʉ̀ sə lòo. Bohòwèŋ yàwèŋ, wèŋ ka fo’ riŋ. ¹⁵Wèŋ bʉ̀ʉ sə̀ sə nzeŋgòŋ fɛɛŋ, wèŋ sə fʉ̀hʉ ja’a bwìŋ mʉmvə̀’nə̀ nzeŋgòŋ nə fʉ̀hʉgə̀ bum yàwo. Bohòmʉ̀ yàm, fàak am ka ŋgòfʉ̀hʉ bwìŋ yeŋ. ¹⁶A də mʉ̀ anə dzəm-a ŋgòfʉ̀hʉ ŋwè, yusə̀ mʉ̀ cèp bə liŋ ŋgə̀ŋgàŋ sə ye kə̀kʉrə̀ kap. Yà’a vɛ’nə bʉ̀ʉsə̀ mʉ̀ sə kà mʉmʉ̀ gʉ̀ mègù, mʉ̀ sə gʉ̀ ves ŋàaŋ Tɛ̀’ am nə̀ yi à tum mʉ nə. ¹⁷Yà’ cu ndzənə ŋwàk lʉ̀ʉk awèŋ də, a ye-a ŋga bwìŋ ba sə cèp cù mò’fis bə yumok fana ye də yu yà’sə zìnə. ¹⁸Ye də mʉ̀ tə gèm àm, Tɛ̀’ am nə̀ yi à tum mʉ nə tə sə̀’ gèem am.>> ¹⁹Wo fek yi də, <<Tɛ̀’ yònə fò?>> Jisòs dʉk fa wo də, <<Wèŋ ka mʉ riŋ, nə kà Tɛ̀’ am sə̀’ rì. Wèŋ ànə riŋ-a mʉ, bwɛ̀rɛ də wèŋ rì Tɛ̀’ am nə sə̀’.>>

²⁰Jisòs à cèp bum yè’sə ŋga yi cu mʉmvwe’ ndap Nwì nə̀ ghaŋ, mvwe’ rum nə̀ wo kə̀ fagə̀ mbàam Nwì fo’ nə. Yi ànə sə yə’rə bwìŋ vɛ’nə, ŋwə̀ nəmòk à ka yi ko bʉ̀ʉsə̀ mvə̀k nə̀ nje nə à ka ntòkʉrə.

Jisòs Də Kaco Ŋwè Lo To Mvwe’ Sə̀ Yi Sə Lòo Sə Yeŋ

²¹Jisòs à cèp fe’lə mok sə̀’ də, <<Mʉ nə bisə yu am. Mʉ lòwes fana wèŋ lap mʉ, nə kà mʉ yə. Wèŋ kà mʉ yə vɛ’nə, wèŋ kpʉ maha mok sənə bʉp awèŋ. Wèeŋ nə kà mandzə̀ co wèŋ kə dzeŋ mvwe’ sə̀ mʉ̀ lòo sə tse’ to.>> ²²Ŋkwàha bʉ̀ʉ Jus wèŋ sə fek bwi yàwo də, <<Yi də mvwe’ sə̀ yi lòo, kaco vès kə dzeŋ to fo’ yeŋ, ncèp ànə yà’sə da? A yà’sə də yi nə zə ni’ ye à?>> ²³Jisòs dʉk fa wo də, <<Wèeŋ yàwèŋ bʉ̀ʉ sə̀ sə nzeŋgòŋ fɛn, Mʉ yàm ŋwə̀ nə̀ ma mʉbu. ²⁴Mʉ̀ tsə̀’ weŋ də wèeŋ nə kpʉ maha bʉp sənə bʉp awèŋ. A zìnə də wèeŋ nə kpʉ li sənə bʉp awèŋ anə, ŋga a ye-a də wèŋ ka mʉ də mʉ nsàp ŋwə̀ nə̀ mʉ̀ cu nə jəŋ na.>> ²⁵Wo fek fe’lə yi də, <<Wu yè’sə ndà?>> Jisòs dʉk də, <<Mʉ ŋwə̀ nə̀ mʉ tsə̀’ fagə̀ weŋ səsa də mʉ yi nə. ²⁶Bum cu wùriŋ sə̀ aco mʉ̀ tsok weŋ də wèŋ gbʉ̀ nzak bə zeŋ. Tɛ̀’ am nə̀ yi a tum mʉ nə, yi ŋwə̀ nə̀ zìnə. Bum sə̀ mʉ̀ sə tsòho fa kɛ’ bwìŋ yè’e, a bum sə̀ yi a nìtsə̀’ fa mʉ yà’ yi.>> ²⁷Jisòs à sə cèp bohòwo, nə sə dʉk də, <<Ŋwə̀ nə̀ nà’ à tum mʉ>> fana wo kà yàwo də nà’ sə dʉk yà’sə Tɛ̀’ɛ nà’ Nwì rɛɛ̀ŋ. ²⁸Fana Jisòs dʉk fe’lə də, <<Ghà nə̀ wèeŋ fis gesə lòmʉ̀ʉ Mo Ŋwè mʉtsə̀ ŋkuŋ fana wèŋ riŋ də a mʉ̀ nə. Wèeŋ nə riŋ sə̀’ də mʉ kà yumok bə liŋ yàm gʉ̀gə̀. Bum sə̀ mʉ̀ cèp yà’ pwe’fo’, a sə̀ Tɛ̀’ am nìtsə̀’ fa mʉ yà’ yi ŋkuŋ mʉ̀ cep. ²⁹Ŋwə̀ nə̀ yi a tum və̀ mʉ nə, yi cu venə, yi ka mʉ mʉmʉ̀ me’rə mak bʉ̀ʉsə̀ mʉ gʉ̀ mègù yusə̀ yà’ sə gʉ yi sə kwa.>> ³⁰Yi ànə cep vɛ’nə fana bwìŋ ŋkʉ̀ʉŋntɛ̀ŋ bʉʉŋ dzəm bohòyi.

Mofàk Jisòs Rìŋ Zìnə Nə

³¹Ànə geŋ Jisòs nə cep bohòbʉ̀ʉ sə̀ yà’wèŋ dzəm bohòyi sə wèŋ də, <<A ye-a ŋga wèŋ sə bɛ’ tse’ gù ncèp àm nə fana ye də wèeŋ bwe fàha am zìnə zìnə. ³²A ye vɛ’nə fana wèŋ riŋ zìnə nə, zìnə nə nà’ fiŋ me’rə weŋ sə̀’.>> ³³Bʉ̀ʉ sə wèŋ cep də, <<Vèes ŋgwì bʉ̀ Abràham, vès ka yàvès ŋkwɛ̀ŋ bohòŋwə̀ nəmòk cum yuk. Njo nə̀ wù sə dʉk də wo nə fiŋ me’rə vèes yè’sə nsàp nə̀ fò?>> ³⁴Jisòs dʉk də, <<Mʉ̀ sə tsə̀’ weŋ nè’e ŋkèm ncèp dʉk də, a ye-a ŋga ŋwè gʉ̀gə̀-a bʉp, ye də yi cu yà’sə ŋkwɛ̀ŋ bohòbʉp. ³⁵Kaco mo ŋkwɛ̀ŋ cum mamgeŋ mʉ nda’à ŋkwà’ŋwə̀ ye nə̀ mvèsə̀ yeŋ. Ŋwə̀ nə̀ yi nə cum mbwa mvèsəə mo ye. ³⁶Ye də a ye-a ŋga mo ye nə fiŋ me’rə wu, ye də wo fìŋ me’rə wu yà’sə laŋ bə nə̀ zìnə. ³⁷Mʉ̀ rì laŋ də wèeŋ ŋgwì bʉ̀ Abràham. Megu kə də wèŋ sə làp mandzə̀ də wèeŋ zə mʉ, bʉ̀ʉsə̀ yusə̀ mʉ̀ sə cèep sə sə kà fʉ ntu’ù wèŋ ni lok. ³⁸Mʉ̀ sə tsə̀’ fa weŋ yusə̀ mʉ̀ a yə yà’ bə lis bohòTɛ̀’ am, wèŋ sə gʉ yàwèŋ sə̀’ bum sə̀ wèŋ a yə’rə jə sə̀’ bohòtɛ̀’ɛ àwèŋ.>>

³⁹Wo dʉk fa yi də, <<Tàcici àvèes Abràham.>> Jisòs dʉk də, <<Anə ye-a də wèeŋ ŋgwì bʉ̀ Abràham zìnə bwɛ̀rɛ də wèŋ sə gʉ bum sə̀’ mvə̀’nə̀ Abràham nə à sə gʉ̀ʉ. ⁴⁰Mʉ̀ sə tsə̀’ fa weŋ bum sə̀ zìnə sə̀ Nwì a nìtsə̀’ fa mʉ fana wèŋ sə lap kə mandzə̀ də wèeŋ zə mʉ wà ŋga mʉ̀ ka weŋ yumok sə̀ bʉp gʉ. Wèŋ à yuk yuk də Abràham à gʉ̀ yuk nsàp yumòk vɛ’nə à? ⁴¹Mʉ tsok fa weŋ də yusə̀ wèŋ sə gʉ̀ yà’sə, a nsàp yu nə̀ Tɛ̀’ awèŋ nə̀ zìnə nə gʉ̀gə̀ vɛ’nə.>>

Wo dʉk fa yi də, <<Vès ka bwe sàhà yeŋ, Tɛ̀’ avèes Nwì yiìyi.>> ⁴²Jisòs dʉk sə̀’ də, <<Ka vɛ’nə yeŋ, bʉ̀ʉsə̀ Nwì anə ye-a Tɛ̀’ àwèŋ bwɛ̀rɛ də wèŋ dzəm mʉ yàm sə̀’. Bʉsə̀ mʉ̀ a tesə və̀ bohòNwì. Mʉ̀ a ka bə liŋ yàm və, a bə liŋ ŋwə̀ nə̀ yi a tum və̀ mʉ nə. ⁴³Mʉ̀ sə cèp bum, wèŋ kà yà’ sə yuk bʉ̀ʉ yà? Wèŋ sə kà yuk bʉ̀ʉsə̀ wèŋ ka wabə ŋgòrɛɛŋ bum sə̀ mʉ̀ sə tsə̀’ weŋ bə nsàp ŋwə̀ nə̀ mʉ̀ cu nə. ⁴⁴Wèeŋ yàwèŋ bwe tɛ̀’ àwèŋ nə̀ yi Satà nə. Wèŋ sə dzəm mègù ŋgògʉ̀ bum sə̀ yà’ sə bòtɛ̀’ àwèŋ nə. Mvə̀’nə̀ à yè yèe, tɛ̀’ àwèŋ nə cu mègù ye ŋgà zə bwìŋ haaŋ kə wɛs ntinə. Yi kà yusə̀ zìnə gʉ̀gə̀ bʉ̀ʉsə̀ yi ka zìnə tse’ lok fʉk nə̀ mvèsə̀. Yi cu ŋgòcèp sə̀ yumok, yà’ megu mvwès pwe’ sə̀ mʉmvə̀’nə̀ nsàp ŋwə̀ nə̀ yi cu nə. A yi nə̀ yi à cì’ yèto kok mvwès cap yi. ⁴⁵Mʉ̀ sə cèp yàm ŋga’a zìnə fana wèŋ kà mʉ mok dzəm fa. ⁴⁶Aco ŋwə̀ nəmòk mʉtsətsə’rə wèŋ fa’nə niŋtsok fa mʉ bʉp mòk nə̀ mʉ̀ a gʉ̀ʉ à? Nə yeè nə vɛ’nə, mʉ̀ sə tsə̀’ fa weŋ zìnə nə, wèŋ kà mʉ kə dzəm fa bʉ̀ʉ yà? ⁴⁷A ye-a ŋga ŋwèe ŋwə̀ə Nwì, ŋgə̀ŋgàaŋ nə yuk ncèp nə̀ Nwì nə. Njo nə̀ wèŋ sə kà mʉ yuk nə, bʉ̀ʉsə̀ də wèŋ ka bwe Nwì yeŋ.>>

Jisòs Də Yi Gha’ Abràham

⁴⁸Bʉ̀ ŋkwàha bʉ̀ʉ Jus wèŋ sə dʉk fa Jisòs də, <<Nà’a nsàp ncèp nə̀ wù cèp ŋkuŋ vès riŋ də, vèes to-a wu də wu ŋwə̀ə Sàmàriyà, nə dʉk də yòŋsə̀ ze’ mòk sə ŋaŋsə wu fana ye də vès ka bə jòŋ cep sə.>> ⁴⁹Jisòs nə də, <<Ze’ mòk sə kà mʉ ŋaŋsə̀ lok. Mʉ̀ sə wəp yàm Tɛ̀’ àm fana wèŋ sə kà mʉ yàwèŋ wəp lok. ⁵⁰Mʉ̀ sə kà mʉ̀ də bwìŋ jəŋ mʉ co ŋwə̀ nə̀ ŋkʉ̀ʉŋ làp. Tɛ̀’ am nə sə dzəm yi də bwìiŋ jəŋ mʉ vɛ’nə. Ncèp ènə, anə kə̀ sak rɛŋsə nà’ ntsə’mòk Tɛ̀’ am nə. ⁵¹Mʉ tsok fa weŋ ŋkèm ncèp dʉk də, a ye-a ŋga ŋwè noŋsə-a ncèp nə̀ njàm nə fana ŋgə̀ŋgàŋ kà kpʉ bə lis yə yuk.>>

⁵²Bʉ̀ʉ Jus sə wèŋ dʉk fa fe’lə yi də, <<Ncèep cùu yo sə gʉ̀ yi ŋkuŋ vès riŋ zìnə də, sə ŋaŋsə wu ze’. Abràham à kpʉ, ŋgàa tsòhòbum Nwì wèŋ nə kpʉ lo yàwo sə̀’. Ye də ncèp nə̀ wù cèp də ŋwèe noŋsə-a ncèp yò, ŋgə̀ŋgàŋ kà kpʉ yuk nà’a yà’sə da? ⁵³Co wù gʉ ghak Abràham nə̀ yi à kpʉ nə à? Ŋgàa tsòhòbum Nwì wèŋ à kpʉ yàwo sə̀’, wù tsəm də wu yè’sə yu yà?>> ⁵⁴Jisòs cep fəsə mok sə̀’ də, <<Wèŋ sə tsəm də mʉ̀ sə làp mʉ̀ də bwìiŋ kuksə mʉ co ŋwə̀ nə̀ ŋkʉ̀ʉŋ. A ye-a də mʉ̀ sə dzəm vɛ’nə mʉ̀ anə zìnə, ye də yà’ ye yusə̀ wà. A Tɛ̀’ am, nə̀ wèŋ sə to yi də yi Nwì àwèŋ nə, yi sə làp də bwìiŋ jəŋ mʉ vɛ’nə yi. ⁵⁵Nə ye də wèŋ sə to-a yi sə̀’ də Tɛ̀’ awèŋ fana wèŋ ka yi yà’sə riŋ. Mʉ̀ rì yi mʉ̀. A ye-a ŋga mʉ̀ dʉk də mʉ̀ ka yi riŋ fana mʉ̀ ye sə̀’ ŋgà cì’ mvwès co wèŋ. Mʉ̀ sə tsə̀’ weŋ də mʉ̀ riŋ yi, nə sə noŋsə ncèp nə̀ nje nə. ⁵⁶Tàcici awèŋ Abràham ànə kwa də yi nə ye mvə̀k nə̀ njàm nə. Yi ànə ye nà’, nə kwa bə zeŋ vɛ’ɛ maŋgəŋgèŋ.>>

⁵⁷Bʉ̀ʉ Jus sə wèŋ dʉk də, <<Wùu mʉmo nè’e, wù ka lùumŋgòŋ hum tàŋ ntòdzeŋ, nə ye va ŋkuŋ wù dʉk də wù à yə Abràham ɛ?>> ⁵⁸Jisòs dʉk də, <<Mʉ tsok fa weŋ zìnə nə̀ nà’a ŋkèm ncèp dʉk də, ŋkuŋ wo sə dzə Abràham ŋga <Mʉ̀ nə> mʉ yo.>>8:58 Liŋ sə̀ də <<Mʉ̀ nə>> yè’sə liŋ sə̀ Nwì à tsə̀’ Musì də a liŋ ye (Taŋ Esodò3:14).⁵⁹Mvə̀’nə̀ bwìŋ à yuk ŋga yi to liŋ ye də <Mʉ̀ nə> wo te’e lìs də wo təm zə yi bə zeŋ. Yi bisə fo’ wà, nə kə yəəŋ mʉmvwe’ ndap Nwì nə̀ ghaŋ nə, nə lo yuye.

Jisòs Gʉŋsə Ŋgà LohòLis

¹Nùmbu mòk à ye ŋga Jisòs sə kɛ’kɛ’ càa fana yi kə tseŋ ŋwə̀ nəmòk nə̀ wo à dzə yi ŋga yi lohòlis. ²Ŋgàa fàak Jisòs ànə ye ŋgà’ nə fana wo to Jisòs də, <<Cicà>>, nə fek nà’ də, <<Ànə gʉ bʉp yè’sə ndà ŋkuŋ lis ŋwə̀ nè’e loho nɛ? À gʉ̀ bʉp ma ye kè tɛ̀’ ye kè yi bə tu ye ɛ?>> ³Jisòs nə dʉk fa wo də, <<Yiya ènə ka bʉ̀ʉ bʉp nə̀ ŋwə̀ mòk a gʉ̀ yi yeŋ. Lis ŋwə̀ ènə à loho vɛ’nə də ya ŋga bwìiŋ ye ŋàaŋ sə̀ Nwì mʉ ni’ì ŋwə̀ ènə. ⁴Vesùwèeŋ gʉ tsoŋ fàak ŋwə̀ nə̀ yi tum mʉ nə ŋga cu tse’ ntòmarɛŋ. Ndzəm sə və̀ə, nà’a seŋ-na fana, ŋwè kà yumok mok gʉ̀ to. ⁵Mvə̀’nə̀ mʉ̀ cu tse’ sənə nzeŋgòŋ nə fana mʉ marɛŋ bohònzeŋgòŋ nə mʉ̀.>> ⁶Yi ànə cep wes vɛ’nə fana yi te gesə nte sə nze, nə top ncàk mvwe’ sə̀ yi te nte sə bə ndubo. Yi jwɛŋ jəŋ ncàak sə, nə yok gesə fa ŋgà’ nə̀ jì lis nə mʉlisə̀. ⁷Yi ànə yok wes fana yi dʉk fa nà’ də, <<Dù lo sə mvwe’ ndzəp Silòm, nə kə kwak si ca.>> (Liŋ sə̀ də Silòm yà’sə də Tumsə.) Ànə geŋ ŋgà’ nə lo kə kwak si ye sə ca anə. Yi à kwak, nə bwi foho və ŋga lis mùhu yi laŋ, yi sə ye mok bum.

⁸Bʉ̀ʉ sə̀ wo cu kʉəp mvwe’ sə̀ yi cugə̀ bə bʉ̀ʉ sə̀ wo rì yi də yi lɛɛŋgə̀ bum bʉ̀ʉsə̀ yi jì lis wèŋ à yə yi, nə mərə vɛ’ɛ wù kà fʉ̀’. Wo dʉk də, <<Hàva’, nè’e ka ŋgà’ nə̀ yi cuuŋ mègù mvwe’ mò’fis, nə sə lɛɛŋ bum bohòbwìŋ nə yeŋ ɛ̀?>> ⁹Bʉ̀ʉ mok wèŋ də, <<Ŋ̀, a yi;>> mok də, <<Hai’ ka yi yeŋ. A ŋwə̀ nəmòk nə̀ yi səsə nà’ səsə.>> Wo à sə dʉhʉ vɛ’nə fana ŋgà’ nə cep ye sə̀’. Yi dʉk də, <<Mʉ̀ ka sə səsə, mègù mʉ̀ nə.>> ¹⁰Wo fek yi də, <<Wù gʉ̀ va ŋkuŋ lis yo muhu ɛ?>> ¹¹Yi də, <<Ŋwə̀ nə̀ wo togə̀ yi də Jisòs nà’a mùk fa mʉ yà’ yi. Yi top ncàk, nə yok fa mʉ yà’ fo’, nə dʉk mʉ də mʉ kə kwak si am sə sə mvwe’ ndzəp Silòm. Mʉ̀ lo, nə kə kwak si sə ca fana lis am sə muhu.>> ¹²Wo fek yi sə̀mok də, <<Ŋwə̀ ànə fò?>> Yi də, <<Mʉ̀ ka riŋ.>>

Bʉ̀ʉ Faràsi Bə Ŋgà’ Nə̀ Jisòs À Mùk Fa Yi Lis Nə

¹³Ànə geŋ wo ko jəŋ ŋgà’ nə̀ wo mùk fa yi lis nə, nə jəŋ lo yi bohòbʉ̀ʉ Faràsi wèŋ. ¹⁴Yu səmook də, nùmbu nə̀ Jisòs ànə top ncàk, nə muk fa ŋgà’ ànə lis bə zeŋ nə à ye nùmbu dzə̀. ¹⁵Bʉ̀ʉ Faràsi sə wèŋ fek ŋgà’ nə yàwo sə̀’ də nà’ gʉ̀ va ŋkuŋ lis nà’ muhu ɛ? Ŋgà’ nə də, <<Yi yok fa mʉ lis sə bə ncàk. Mʉ̀ lo, nə kə kwak si fana lis am sə muhu.>> ¹⁶Bʉ̀ʉ Faràsi mok wèŋ dʉk də, <<Ŋwə̀ nə̀ yi gʉ̀ nsàp yu ènə, ka yi Nwì tumsə, bwɛ̀rɛ yi kà nsàp fàk nə̀ ŋgòkə̀ gʉŋsə ŋwè nùmbu dzə̀ ènə gʉ̀; bʉ̀ʉsə̀ lʉ̀k sə kà vɛ’nə dzəm.>> Bòp bʉ̀ ma mòk dʉk yàwo də, <<Ŋwə̀ ènə ye-a ŋgà gʉ̀ bʉp bwɛ̀rɛ yi gʉ to nsàp maŋgəŋgèŋ ènə ŋga yè va?>> Ànə ye vɛ’nə, bʉ̀ʉ sə wèŋ ga’a mok bòp ba. ¹⁷Wo fek ŋwə̀ nə̀ yi mùhu lis nə də, <<Wo mùk lis-e sə̀ yò, wù tsərə yòbə ŋwə̀ nə̀ yi mùk fa wu lis ànə da?>> Yi dʉk də, <<Mʉ̀ rì yàm də ŋwə̀ ànə, yi ŋgà tsə̀’ bum Nwì.>>

¹⁸Bʉ̀ʉ Jus yè’sə wèŋ à ka də ŋwə̀ ènə ànə ye to mantombì ŋgà jì lis dzəm. Fana wo kə to və ma bə tɛ̀’ɛ ŋgà’ nə. ¹⁹Ma bə tɛ̀’ ye nə à kə̀ dzèeŋ fana wo fek yà’ də, <<Nè’e mo àwèŋ à? A zìnə də mvə̀’nə̀ wèŋ à dzə yi, yi kà bum yəgə̀ à? Ye də yà’ mùhu ŋga’a va?>> ²⁰Tɛ̀’ bə ma nə dʉk də, <<Vès rì də nè’e mo àvès. Vès rì sə̀’ də mvə̀’nə̀ vès à dzə yi, yi kà yumok yəgə̀. ²¹Megu də vès ka ŋga’a mvə̀’nə̀ yi gʉ̀ ŋkuŋ nə sə yəə̀ nə bum yè’e riŋ. Vès ka ŋwə̀ nə̀ yi mùk fa yi lis sə sə̀’ riŋ. Yi ŋwə̀ rìŋsə, aco wèŋ fek yi, yi cep bə cùu ye yi.>> ²²Ma bə tɛ̀’ ye nə à dʉk vɛ’nə bʉ̀ʉsə̀ wo à sə wəp ŋkwàha bʉ̀ʉ Jus wèŋ. Bʉsə̀ ànə ye ŋga bʉ̀ʉ Jus sə wèŋ a cèp tes laŋ də a ye-a ŋga ŋwə̀ nəmòk cèp fis jəja də Jisòos Ŋkum ŋgà gèm bwìŋ nə fana wo bɛ’ fis gɛsə ŋgə̀ŋgàŋ mʉmvwe’ ndap pìriyà àwo nə. ²³Nà’a njo nə̀ tɛ̀’ ye wèŋ à dʉk də, <<Yi ŋwə̀ nə̀ yi gʉ laŋ, fek yi, yi cep bə cùu ye>> nə.

²⁴Ànə geŋ wo to və ŋgà’ nə sə̀mok, ŋga’a nə̀ kɛ̀’ ba. Wo fek yi də, <<Kuksə Nwì, nə cep zìnə yò. Vès rì yàvès də ŋwə̀ nə̀ wù də yi mùk fa wu lis ànə, yi ŋgà gʉ̀ bʉp.>> ²⁵Yi dʉk fa yà’ də, <<Kè yi ŋgà gʉ̀ bʉp è, mʉ̀ ka yàm riŋ. Mʉ̀ rì mègù yàm yu nə̀ mò’fis dʉk də, mʉ̀ ànə ye to mantombì ŋgà lohòlis fana ŋga’a nè’e, mʉ̀ sə yə yu am mok bum.>> ²⁶Wo fek mali yi sə̀’ ŋkuŋ də, <<Yi gʉ̀ fa wu lis sə va ŋkuŋ yà’ muhu ɛ?>> ²⁷Yi dʉk fa yà’ də, <<Mʉ̀ tsə̀’ weŋ mvə̀’nə̀ yi gʉ̀ nə fa’ laŋ, wèŋ bɛŋ ŋgòdzəm. Wèŋ də mʉ sə tsoho fa mali weŋ sə̀mok bʉ̀ʉ yà? Kàmòk wèeŋ nə sə lap sə̀’ mandzə̀ ŋgòbʉ̀ʉŋ bwe ye wèŋ àlɛ’.>> ²⁸Yi ànə dʉk wo vɛ’nə fana wo yak yi də, <<Ŋyàm, wu mo ŋgà fàk ye wù, vèes yàvès bwe fàak Musì. ²⁹Vès rì də Nwì ànə cep yuk bə Musì, vès ka mvwe’ sə̀ ŋkwa’kʉ̀ ànə tesə və̀ ye yà’sə riŋ.>> ³⁰Ŋgà’ nə̀ lis mùhu nə à yuk vɛ’nə yi də, <<Kwɛ’fòŋgʉrì! Co ŋwè muk fa mʉ lis vɛ’ɛ, wèŋ dʉk də wèŋ ka mvwe’ sə̀ yi tesə və̀ə riŋ ɛ̀? ³¹Vesùwèŋ rì də kaco Nwì fa ŋàaŋ ye bohòŋwə̀ nə̀ yi ŋgà gʉ̀ bʉp yeŋ. Yi fa mègù ŋàaŋ ye bohòbʉ̀ʉ sə̀ wo kùksəgə̀ yi, nə sə gʉ yi kwa wèŋ. ³²Nzeŋgòŋ nə à yè yèe, ŋwè ka də wo à dzə ŋwə̀ nəmòk ŋga yi sə kà bum yə fana ŋwə̀ nəmòk kə muk fa yi lis yuk yuk. ³³Yà’ nòjəja də ŋwə̀ ènə tesə və̀ bohòNwì. Anə ka-a vɛ’nə yeŋ bwɛ̀rɛ yi gʉ to nsàp yu nə̀ yi gʉ̀ ènə ŋga yi yè va ŋkuŋ?>> ³⁴Bʉ̀ʉ sə wèŋ də, <<Kàcò, wùu mo nə̀ wo à dzə wu sənə bʉp wà, wù sə dʉk də wu yə’rə ves yumok kènə.>> Fana wo bɛ’ fis gɛsə yi mʉmvwe’ ndap pìriyà àwo nə.

Bʉ̀ʉ Sə̀ Wo Bɛ̀ŋ-a Ncèp Nwì, Ye Də Wo Ŋgàa Jì Lis

³⁵Ànə geŋ Jisòs yuk də wo bɛ’ fis nà’ mʉmvwe’ ndap pìriyà àwo nə laŋ. Yi lap kɛ’cà nà’ tə̀tè yi kə tseŋ nà’, nə fek nà’ də, <<Wù dzəm bohòyi Mo Ŋwè à?>> ³⁶Ŋgà’ nə dʉk də, <<Tà, Mo Ŋwè nə yè’sə ndà ya mʉ dzəm bohòyi ɛ.>> ³⁷Jisòs dʉk fa fəsə yi də, <<Wù yə yi laŋ. Wù sə cèp yè’sə sə̀’ wenə.>> ³⁸Yi à yuk mvə̀’nə̀ Jisòs dʉk vɛ’nə fana yi dʉk də, <<Tà, mʉ̀ dzəm bohòwù.>> Yi à dʉk vɛ’nə, nə təəŋ sə nze kə̀ mantombìi Jisòs anə bə tumfərə.

³⁹Jisòs nə cep də, <<Mʉ̀ à və̀ sə nzeŋgòŋ fɛŋ ŋgòsak gàpsə bʉ̀ʉ sə̀ wo dzəm bohòNwì bə sə̀ wo ka bohòyi dzəm. Mʉ̀ à və̀ ŋgògʉ̀ bʉ̀ʉ sə̀ wo ləlohòlis wèeŋ ye bum, nə gʉ sə̀ wo tsəm də wo sə yə bum wèeŋ loho lis.>>

⁴⁰Bʉ̀ʉ Faràsi mok wèŋ sə̀ wo à ye fo’ ànə yuk ncèp ènə fana wo fek Jisòs nə də, <<Ye də wù sə dʉk yè’e də vèes ləlohòlis à?>> ⁴¹Jisòs dʉk fəsə fa wo də, <<Anə ye-a də wèeŋ ləlohòlis bwɛ̀rɛ də wèŋ ka nzak tse’. Wèŋ nə sə dʉk nə də lis awèŋ cu fo’, də wèŋ sə yə bum bə zeŋ fana ye də wèŋ cu bə nzak mʉ tuhù wèŋ.

Ganakù’ Nə̀ Bə̀boŋ Nə

¹<<Mʉ̀ sə tsə̀’ weŋ zìnə nə̀ nà’a ŋkèm ncèp də, a ye-a ŋga ŋwè dzəm ŋgòni mʉmvwe’ ŋka’ nsùŋgaŋ, yi me’rə noŋsə ncùu sə, nə kə kok ca mvwe’ sə̀ zok fana ye də ŋgə̀ŋgàaŋ ŋgà yə̀. ²Ŋwə̀ nə̀ yi ni ye mvwe’ ncùu ŋka’ sə, yi ganakù’ nə yi. ³Ŋwə̀ nə̀ yi sə sòŋka’ sə nə muk fa ŋwə̀ ànə ncùu ŋka’ sə. Nsùŋgaaŋ sə̀ ye sə riŋ ŋgì ye mvə̀’nə̀ yi sə to yà’ bə liŋ fana yà’ sə yuŋ lo yi mvwe’ sə̀ yi sə lòo. ⁴Yi fis və̀ wes yà’ sə mbiŋ fana yi to mantombì, nsùŋgaaŋ sə yuŋ yi bʉ̀ʉsə̀ wo rì ŋgì ye nə. ⁵Kaco wo yuŋ lo ŋwə̀ nə̀ yi ŋkʉ̀ìŋ yeŋ. Wo nə caŋ nsàp ŋwə̀ ànə caa bʉ̀ʉsə̀ wo ka ŋgì ye nə riŋ.>>

⁶Jisòs ànə mak fa wo gbʉ’ ènə fana wo kà bə zeŋ rɛɛ̀ŋ lok. ⁷Ànə geŋ fana Jisòs nə dʉk fa wo də, <<Mʉ̀ sə tsə̀’ weŋ zìnə nə̀ nà’a ŋkèm ncèp dʉk də mʉ yè’e ncùu ŋka’ nsùŋgaaŋ sə. ⁸Bʉ̀ʉ mok sə̀ wo à və̀ to mantombìi mʉ̀ yà’a pwe’fo’ ŋgàa yə̀ wèŋ, nsùŋgaaŋ sə wèŋ kà wo sə̀ yuk təp. ⁹Mʉ ncùu sə mʉ̀. Ŋwə̀ nə̀ yi ni cà-a bohòmʉ̀ fana ŋgə̀ŋgàŋ kà ŋgə’ mok yə. Yi nə sə nikok, nə sə tesə mvə̀’nə̀ yi dzəm. Yi nə ye ŋgaŋ co yi zʉ, nə zʉ, nə ze’. ¹⁰Ŋgà yə̀ə və̀gə̀ ye ŋgòyə̀ə, nə zə, nə ye ŋgògʉ̀ bʉpsə bʉpsə. Bohòmʉ̀ yàm, mʉ̀ a və̀ də ya bwìiŋ tse’ lùŋ, də ya wo tse’ lùŋ ènə nduk nə̀ nduk.

¹¹<<Mʉ ganakù’ nə̀ bə̀boŋ nə. A ye-a də ŋwèe ganakù’ nə̀ bə̀boŋ fana yi nə dzəm də yi kpʉ mʉ tuhù nsùŋgaaŋ ye sə. ¹²Ŋwə̀ nə̀ yi sə fàk ye də ya wo lak yi mbàm, yi ka ganakù’ nə yi yeŋ, nə kà ŋgà nsùŋgaaŋ sə sə̀’ ye fana yi sə fàk mègù ye mbàam ye. Nsàp ŋwə̀ ànə yə-a ŋga nàm nə̀ bʉp sə və̀ə, yi so bo bə caŋ, nə me’rə tes nsùŋgaaŋ sə fo’. Nàm nə̀ bʉp nə nə ko zʉ nsùŋgaaŋ mok, nə bɛ’ samsə mok. ¹³Ŋwə̀ nə̀ wo sə làk yi ye mbàm ènə ca vɛ’nə bʉ̀ʉsə̀ ka yi bə nsùŋgaaŋ sə yaaŋ, yà’ ka sə̀ ye ndzə bohòyi yeŋ. ¹⁴Mʉ ganakù’ nə̀ bə̀boŋ nə. Mʉ̀ rì nsùŋgaaŋ am, wo riŋ mʉ yàwo sə̀’. ¹⁵Yà’ mègù co mvə̀’nə̀ Tɛ̀’ am rì mʉ, mʉ̀ riŋ yi sə̀’. Mʉ yàm yəyərə̀ ŋgòkpʉ mʉ tuhù nsùŋgaaŋ sə wèŋ. ¹⁶Mʉ̀ tse’ nsùŋgaaŋ am mok sə̀ wo ka bə bòp nè’e mvwe’ mò’fis cum. A bə̀boŋ də mʉ jəŋ benə və tsoŋ wo mvwe’ mò’fis. Wo nə yuk ŋgì àm fana wo benə mvwe’ mò’fis, nə tse’ sə̀’ ganakù’ nə̀ mò’fis.

¹⁷<<Tɛ̀’ am dzəm mʉ bʉ̀ʉsə̀ mʉ̀ sə dzəm də yòŋsə̀ àm nə lo gɛsə ntɛ̀ŋ ya a kə̀ lə̀sə nùu, mʉ tse’ fe’lə nà’ sə̀mok. ¹⁸Ka də ŋwə̀ nəmòk sə fèp jə nà’ ndzə bohòmʉ̀ anə bə ŋàŋ yeŋ. Mʉ̀ mè’rə nà’ mʉ̀ bə bo am. Mʉ̀ tse’ ŋàaŋ sə̀ co mʉ̀ fis me’rə yòŋsə̀ àm nə, nə tse’ ŋàaŋ sə̀ aco mʉ te’ lokoksə fe’lə nà’ sə̀’. Tɛ̀’ am nə a fa ŋàŋ yi də mʉ gʉ vɛ’nə.>>

¹⁹Yi ànə cep vɛ’nə fana bʉ̀ʉ Jus wèŋ sə̀ wo à yuk ncèp ènə wèŋ à gà’a bòp ba. ²⁰Bòp ma mòk à sə dʉk də, <<Ŋgà’ ànə ŋgà ŋaŋ, yi tse’ yòŋsə̀ ze’ ndzə ni’ì yi. Vesùwèŋ sə yu’rə yiskok bohòyi yè’sə yà?>> ²¹Bʉ̀ʉ mok sə dʉk yàwo də, <<A ye-a ŋga ŋwè tse’ yòŋsə̀ ze’ ndzə ni’ì yi, kaco yi cep to nsàap bum sə̀ ŋwə̀ nè’e sə cèp yè’e lɛ yeŋ. Aco yòŋsə̀ maze’ muk to fa bwìŋ lis yè’sə va?>>

Bwìŋ Bɛ̀ŋ Jisòs Njo Nə̀ Yi Də Yi Mo Nwì

²²Mvə̀k ànə dzeŋ nə̀ ŋgògʉ̀ ŋkà’a sə̀ bʉ̀ʉ Jus wèeŋ togə̀ yà’ də Hànukà10:22 À ye ŋkà’a sə̀ wo à sə tsərə mvə̀’nə̀ wo à rɛŋsə fəsə ndap Nwì nə̀ ghaŋ nə bʉ̀ʉsə̀ ŋkum bʉ̀ lakmvum wèŋ mòk ànə gʉ bʉpsə nà’ mvə̀’nə̀ yi à sʉə ŋgùnaŋ mbwa.. Ànə ye mvə̀k mbʉ̀ŋ. ²³Mvə̀k ànə à ye nùmbu mòk ŋga Jisòs sə gìhi kɛ’cà sə mandap Nwì nə̀ ghaŋ nə. Wo à sə to mʉmvwe’ nə̀ yi à sə gìhi fo’ nə də, <<Mbandap nə̀ Sòlomù.>> ²⁴Bʉ̀ʉ Jus wèŋ ànə kə maŋ fo’ sə̀’. Wo fek yi də, <<Wù dzəm də vèes cum mam kəko’ və̀m vɛ’nə tə̀tè kə dzeŋ sè ŋkuŋ ɛ? A ye-a də wu Ŋkum ŋgà gèm bwìŋ nə, wù tsok rɛŋsə fa-a ves le.>> ²⁵Jisòs dʉk fa wo də, <<Mʉ̀ a tsə̀’ weŋ laŋ, megu də wèŋ kà mʉ dzəm fa. Fàak sə̀ mʉ̀ sə gʉ̀ yà’ bə liŋ Tɛ̀’ am sə, sə nìtsə̀’ fa weŋ nsàp ŋwə̀ nə̀ mʉ̀ cu nə sə̀’. ²⁶Bə yà’sə pwe’, wèŋ sə kà mʉ də mʉ Ŋkum nə dzəm fa bʉ̀ʉsə̀ wèŋ ka nsùŋgaaŋ am yeŋ. ²⁷Nsùŋgaaŋ sə̀ yàm rì ŋgì àm. Mʉ̀ riŋ wo sə̀’, fana wo sə bɛ’ və mʉ. ²⁸Wo bɛ’ və̀ mʉ vɛ’nə, mʉ̀ fa wo lùŋ nə̀ nà’a nə̀ kà mè yuk. Wo nə kà sə̀ kpʉ yuk. Kaco ŋwə̀ nəmòk fep fis to wo ndzə bohòmʉ̀ anə sə̀’ yeŋ. ²⁹Tɛ̀’ am nə̀ yi a fa yà’ ndzə bohòmʉ̀ nə, yi yam càsə ndàaŋwè pwe’ yi. Ye də kaco ŋwə̀ nəmòk fep fis to wo ndzə bohòTɛ̀’ am nə yeŋ. ³⁰A vɛ’nə bʉ̀ʉsə̀ mʉ̀, ves Tɛ̀’ am nə, vès mègù mò’fis.>>

³¹Bʉ̀ ŋkwàha bʉ̀ʉ Jus wèŋ sə à yuk mvə̀’nə̀ yi cèp vɛ’nə fana wo te’ lìs sə̀mok də wo təm zə yi fo’. ³²Jisòs a yə vɛ’nə, yi dʉk fa wo də, <<Wèŋ a yə fàak sə̀ bə̀boŋ sə̀ mʉ̀ a gʉ̀ yà’ bə liŋ Tɛ̀’ am laŋ. Bum sə̀ mʉ̀ a gʉ̀ yà’sə pwe’, nə̀ nà’a bʉp nə̀ wèŋ sə də wèeŋ təm zə mʉ bʉ̀ʉ zeŋ nə yè’e nə̀ fò?>> ³³Bʉ̀ʉ sə wèŋ də, <<Vès sə kà wu bʉ̀ʉ bum sə̀ bə̀boŋ sə̀ wù a gʉ̀ʉ təm zə. Vès də vèes zə wu njo nə̀ wù sə gʉ̀ bʉpsə liŋ Nwì. Wù mègù ŋwè nə̀ ŋwè wà, wù sə lap də wu gʉ ni’ yòdə wu Nwì bʉ̀ʉ yà?>> ³⁴Jisòs dʉk fa wo də, <<Wo à còm nòŋsə yà’ ndzənə ŋwàk lʉ̀ʉk awèŋ də, <Mʉ̀ʉ Nwì, mʉ̀ dʉk də wèeŋ nwì wèŋ.> ³⁵Vesùwèŋ rì sə̀’ də ŋwàk Nwì nə nà’a zìnə, nà’a kà kupsə̀gə̀. Ye də a ye-a ŋga Nwì dʉk də bʉ̀ʉ sə̀ wo yuk ncèp ye nə wèeŋ sə̀’ co yi, ³⁶njo nə̀ mʉ dʉk yàm də mʉ̀ʉ mo Nwì, wèŋ sə də mʉ̀ gʉ̀ bʉpsə liŋ Nwì nə bʉ̀ʉ yà? Mʉ̀ nə̀ Tɛ̀’ am nə a cok noŋsə mʉ, nə tumsə vesə sə nzeŋgòoŋ fɛŋ nə. ³⁷A ye-a də mʉ̀ sə kà nsàap fàak Tɛ̀’ am sə gʉ̀, wèŋ kà mʉ dzəm fa anə ntɛ̀ŋ. ³⁸A ye-a ŋga wèŋ yə də mʉ̀ sə gʉ̀ fàak sə̀ Tɛ̀’ am sə fana ye də wèeŋ sə dzəm bohòmʉ̀ bʉ̀ʉ fàak sə, ŋga wèŋ sə dzèeŋ-a yusə̀ mʉ̀ sə cèep sə na. Yà’a ye vɛ’nə fana wèŋ rɛɛŋ də Tɛ̀’ nə bə Mo ye nə mò’fis, Mo nə ye bwi bə Tɛ̀’ nə sə̀’ mò’fis.>> ³⁹Bʉ̀ʉ sə wèŋ lap də wo ko yi fana Jisòs swɛ’ɛ tesə ndzə bohòwo wà.

⁴⁰Ànə geŋ Jisòs bwi foho lo, nə kə to fe’lə ndzəp Jòridàŋ. Yi lo, nə kə cum mvwe’ sə̀ Jon à sə bàptɛsə to bwìŋ fo’ yà’a. ⁴¹Bwìŋ à kə̀ tsèŋ yi fo’ vɛ’ɛ wùriŋ. Bʉ̀ʉ sə wèŋ sə dʉhʉ də, <<Jon à ka maŋgəŋgèŋ mòk co nà’ gʉ ves a tsəm də a tumsə və̀ yi Nwì gʉ yuk. Megu kə də bum sə̀ yi Jon nə à cèp yà’ bə liŋ ŋwə̀ nè’e pwe’fo’ a bʉ̀ʉŋ və̀ zìnə laŋ.>> ⁴²Ànə geŋ bwìŋ dzəm bohòJisòs fa’nə ŋkʉ̀ʉŋntɛ̀ŋ.

Jisòs Tse’ Ŋàaŋ Sə̀ ŊgòLòkoksə Ŋwè Mvwe’ Kpʉ

¹Ŋwə̀ nəmòk à ye mvwe’ lak Betanì nə̀ liŋ ye à ye də Lasorò. À ye nùmbu mòk yiyaŋ ko yi. À ye ŋga yi tse’ njɛ̀’ɛ ye ba. Liŋ awo à ye də Matà bə Mèri. Njɛ̀’ɛ ye sə à sə cugə̀ sə̀’ mvwe’ lak Betanì anə. ²Mèri nə̀ moma ye Lasoròà sə ya ènə, a yi nə̀ yi à yok Tà Jisòs bə làmindà, nə sə yisə fa nà’ kù bə nʉ̀əmtu ye nà’a. ³Bʉsə̀ Lasoròà sə ya fana Mèri bə Matà tirə gesə lo Jisòs də, <<Tà, ŋge’ ntʉm yòLasorònòyiya nə̀ bʉp.>> ⁴Jisòs nə ànə yuk ntirə̀ ènə fana yi dʉk də, <<Yiya ènə nə kà bə kpʉ kə̀ lə̀. Yiya ènə və̀ də ya bwìiŋ nə ye ŋàaŋ Nwì bə zeŋ fana nə ye ŋàaŋ Mo Nwì nə sə̀’ bə zeŋ.>> ⁵Jisòs à dzəm Matà bə moma ye Mèri, nə ye Lasoròsə̀’. ⁶Mvə̀’nə̀ yi à yuk ntirə̀ nə̀ də Lasorònòyiyaŋ fana yi cum mam mali mvwe’ sə̀ yi à ye sə mʉnə nùumbu ba sə̀ ŋkuŋ. ⁷Nùumbu sə̀ ba sə à càa fana yi dʉk fa ŋgàa fàak ye sə wèŋ də, <<Vesùwèeŋ bwi foho lo fe’lə mvwe’ nze Jùdiyà sə̀mok.>> ⁸Ŋgàa fàak ye sə wèŋ mərə. Wo də, <<A ndòmòk kènə Cicà, bʉ̀ʉ Jus wèŋ a də wo təm zə wu fa’nə bə lìs, wù də a bwi foho lo fo’ sə̀ ŋkuŋ ŋgòlàp yà?>> ⁹Jisòs dʉk də, <<Tsok rɛŋgə̀ nə̀ zəzòŋ haaŋ nùm kə ca co. Ŋwə̀ nə̀ yi gì-a ŋga cu lì ntòmarɛŋ, yi nə kà nduk gbʉ̀, bʉ̀ʉsə̀ marɛŋ nə̀ sə nzeŋgòŋ nə nà’a bohòyi yo. ¹⁰Ŋwə̀ nə̀ yi gì ye ndzəmə̀ fana yi nə gbʉ bʉ̀ʉsə̀ yi ka marɛŋ tse’.>>

¹¹Yi ànə cep wes vɛ’nə fana yi naaŋ gesə fe’lə mòk sə̀’ də, <<Ŋge’ àvès Lasoròsə dzəm lo. Mʉ nə geŋ fo’ ŋgòyə̀msə yi.>> ¹²Ŋgàa fàak ye sə wèŋ dʉk də, <<Tà, a ye-a də lo ko yi laŋ, ye də yiya ye nə nə me.>> ¹³Wo à sə dʉk vɛ’nə ŋga wo sə tsəm yàwo ŋgwàaŋ də Jisòs də Lasoròsə dzəm lo nə̀ bwìiŋ dzəmgə̀ nà’a. Kàmfirə Jisòs dʉk ye’e də Lasoròkpʉ ciŋ nə̀ ciŋ. ¹⁴Ànə geŋ Jisòs tsok rɛŋsə fa wo mok jəja də, <<Lasoròkpʉ laŋ.>> ¹⁵Yi dʉk fe’lə sə̀’ də, <<Mʉ̀ sə kwa də mʉ̀ a ka fo’ ye bʉ̀ʉsə̀ bum yè’sə rɛŋsi bohòwèŋ bʉ̀ʉsə̀ yà’a nə gʉ weŋ ŋgònaaŋ tu bohòmʉ̀.>> Fana yi dʉk ləsə də, <<Wèeŋ lokok, a lo kə ye yi.>> ¹⁶Tomos nə̀ wo à sə togə̀ yi də, <<Mofɛs>>, nə̀ yi sə̀’ mo fàk Jisòs nə dʉk fa mok sə wèŋ də, <<Wèeŋ ca, a bɛ’ lo yi ya a kə kpʉ vesi wèŋ bəbɛ’.>>

¹⁷Jisòs à kə̀ dzèŋ Betanì anə fana wo tsok yi də a ntinə nùumbu kwè mvə̀’nə̀ wo a tuuŋ Lasorò. ^18-19Bʉ̀ʉ Jus wèŋ à ye’e Jòrosalèm, nə və Betanì anə vɛ’ɛ ŋkʉ̀ʉŋntɛ̀ŋ ŋgòkə̀ cèpsə Matà bə Mèri kpʉ moma awo nə. Ŋgòyè’e Jòrosalèm, nə lo Betanì ka sə̀sap yeŋ. Yà’ mègù co kìlometà tɛ’ vɛ’ɛ.

²⁰Matà à yuk də Jisòs sə və̀ə fana yi tesə, nə kə tseŋ nà’ mandzə̀. Mèri à cu mam ye mʉ nda’à. ²¹Matà ànə ye Jisòs fana yi dʉk fa nà’ də, <<Tà, a ye-a də wù a ye-a fɛn, də bwɛ̀rɛ moma am a ka kpʉ. ²²Fana mʉ̀ rì sə̀’ də, a mègù-a sə̀ ŋga’a nè’e aco Nwìi nə fa wu yusə̀ wù fek yi yà’ pwe’fo’.>> ²³Jisòs dʉk fa nà’ də, <<Moma yo Lasoròo nə lokok mvwe’ kpʉ sə.>> ²⁴Matà nə dʉk də, <<Mʉ̀ rì də nùmbu nə̀ nzeŋgòŋ nə nə me ŋga ndàaŋwè pwe’ sə lokok mvwe’ kpʉ fana yi nə lokok ye sə sə̀’.>> ²⁵Jisòs dʉk də, <<Mʉ ŋwə̀ nə̀ mʉ lòkoksəgə̀ bwìŋ mvwe’ kpʉ, nə ye də mʉ gʉ̀gə̀ də bwìiŋ cum ŋwʉm sə̀’ mʉ̀. Ŋwə̀ nə̀ yi dzəm-a bohòmʉ̀, a ye-a sə̀ də yi kpʉ laŋ fana yi nə̀ cum malì fo’ ŋwʉm. ²⁶Ŋwə̀ nə̀ yi cu-a ŋwəm, nə dzəm bohòmʉ̀ fana ŋgə̀ŋgàaŋ nə kà kpʉ yuk. Wù dzəm laŋ də ncèp ènə zìnə à?>> ²⁷Yi dʉk fa Jisòs nə də, <<A zìnə Tà. Mʉ̀ dzəm laŋ də wu Ŋkum ŋgà gèm bwìŋ nə ye Mo Nwì, nə̀ Nwì à dʉk də yi nə̀ tum vèsə sə nzeŋgòŋ nə.>>

²⁸Matà nə ànə cep wes vɛ’nə fana yi lo, nə kə to moma ye Mèri. Yi larə fa Mèri nə də, <<Cicà və̀ laŋ, yi sə to wu.>> ²⁹Mèri ànə yuk vɛ’nə fana yi kurə lokok nə̀nàk, nə kə tseŋ Jisòs nə. ³⁰Ànə ye yà’sə ŋga Jisòs ka mʉ ntòlak anə ntòkə ni. Yi à cu ntòmvwe’ sə̀ Matà anə kə tseŋ yi sə. ³¹Bʉ̀ʉ Jus sə̀ bə yà’wèŋ à cu mʉ nda’à, sə̀ wo à və̀ ŋgòcèpsə wo kpʉ sə à yə mvə̀’nə̀ Mèri à kurə tesə fana wo yuŋ yi. Wo à bɛ’ lòyi bʉ̀ʉsə̀ wo à sə tsəm də kàmòk yi sə lòŋgòkə̀ wa mvwe’ sèe Lasoròsə. ³²Mèri nə à lò, nə kə dzeŋ mvwe’ sə̀ Jisòs cu sə. Yi à yə Jisòs nə fana yi gbʉ tsoŋ sə ŋgʉ kùu nà’ anə sə nze, nə sə cep də, <<Tà, wù anə ye-a fɛŋ bwɛ̀rɛ moma am a ka kpʉ.>> ³³Jisòs ye mvə̀’nə̀ Mèri sə wa. Bʉ̀ʉ mok sə̀ wo à ye fo’ bə Mèri nə wèŋ sə waŋ kɛ’ sə̀’ ŋgùŋ fana ntʉm bʉp yi vɛ’ɛ wùriŋ co wù kà fʉ̀’. ³⁴Yi fek yà’ də, <<Wèŋ a tuuŋ yi ma fò?>> Wo dʉk də, <<Tà, və̀ə kə̀ ja’a yòo mvwe’ sə ɛ̀.>> ³⁵Jisòs waŋ. ³⁶Bʉ̀ʉ sə̀ wo à ye fo’ sə wèŋ à yə vɛ’nə fana wo dʉk də, <<Wèeŋ ja’a na yàwèeŋ mvə̀’nə̀ yi a dzəm Lasorònə ɛ̀.>> ³⁷Bòp bʉ̀ mòk sə dʉk yàwo də, <<Nè’e ka yi nə̀ yi a mùk fa ŋgà’ nà’a lis nə yeŋ à? Anə ye co yi kà də Lasorònə kà kpʉ gʉ̀ à?>>

³⁸Ntʉm à bʉp malì Jisòs nə wùriŋ sə̀mok fana yi lo mvwe’ sə̀ wo a tuuŋ Lasoròsə. Sèe sə à ye co mvòk, wo jəŋ lìs, nə dzərə lok ncùu sə bə zeŋ. ³⁹À wɛ̀s fo’ Jisòs dʉk fa wo də, <<Wèeŋ dzərə fis gɛsə lìs ànə fo’.>> Matà nə̀ yi njɛ̀’ɛ Lasorònə̀ yi a kpʉ nə dʉk də, <<Anə rəm nə̀ bʉp Tà. Wù rì də a ntinə nùumbu kwè mvə̀’nə̀ wo a tuuŋ yi.>> ⁴⁰Jisòs dʉk fa yi də, <<Mʉ̀ anə tsok fa wu fa’ də wu dzəm-a bohòmʉ̀, wù ye ŋàaŋ Nwì bə lis àlaa.>> ⁴¹Wo dzərə fis lìs nə. Jisòs bʉʉŋ kʉk gesə lo mʉbu, nə dʉk də, <<Mʉ̀ kwasə wu Tɛ̀’, bʉ̀ʉsə̀ wù yuk mʉ laŋ. ⁴²Mʉ̀ rì sə̀’ də wu yukgə̀ mʉ ghà nə̀ fòlòoŋ. Megu də mʉ̀ sə cèp nə̀ ŋga’a nè’e njo tu bʉ̀ʉ sə̀ wo tərə yè’e, də ya wo dzəm zìnə də wù a tum və̀ mʉ tsenə anə wù.>> ⁴³Yi ànə cep wes me vɛ’nə fana yi cep fe’lə mok bə ŋàŋ də, <<Lasorò, lòkok tesə və.>> ⁴⁴Lasorònə̀ yi à kpʉ nə lokok tesə və sə̀ ghà ànə. À ye ŋga wo kì bo ye bə kùu ye wèŋ bə cə̀k. Wo à kì lok si ye bə cə̀k sə̀’. Jisòs nə dʉk fa bʉ̀ʉ sə̀ wo ye fo’ sə wèŋ də, <<Wèeŋ fiŋ me’rə yi lo.>>

Wo To Làm Mʉtùhù Jisòs

(Mat. 26:1-5; Mak 14:1-2; Luk 22:1-2)

⁴⁵Bʉ̀ʉ sə̀ wo à bɛ’ lòMèri sə pwe’fo’ à ye bum sə̀ Jisòs à gʉ̀ sə fana bwìŋ ŋkʉ̀ʉŋ dzəm bohòJisòs nə. ⁴⁶Ànə geŋ bʉ̀ʉ mok wèŋ ye’e jəŋ fo’, nə kə tseŋ bʉ̀ʉ Faràsi wèŋ, nə tsoho fa yà’ bum sə̀ Jisòs gʉ̀ʉ sə làaŋ. ⁴⁷Wo à yuk yà’ fana bʉ̀ʉ Faràsi sə bə ŋgàa fa satikà’ sə̀ ghaŋ wèŋ to benə bʉ̀ ŋkwàha bʉ̀ʉ Jus sə fo’, bə yà’wèŋ kə cum yiskok kaŋsurù. Wo à kə̀ cu fana wo dʉk də, <<Vesùwèeŋ nə gʉ va? Bʉsə̀ wèŋ rì də ŋgà’ ànə sə gʉ̀hʉ bum maŋgəŋgèŋ vɛ’ɛ wùriŋ. ⁴⁸À ye-a ŋga a mè’rə yi də yi sə gʉ mali vɛ’nə fana anə kà tə̀tè ye ŋga bwìŋ pwe’fo’ bʉʉŋ dzəm wes bohòyi də yi Ŋkum ŋgà gèm bwìŋ nə zìnə laŋ. A kə̀ ye-a vɛ’nə fana a riŋ də ŋgə’ kə̀ tsèŋ ves laŋ bʉ̀ʉsə̀ bʉ̀ʉ lak Rumà wèeŋ nə və kə kʉəmsə mak ndap Nwì àvès nə, nə bʉpsə lak avès sə sə̀’.>> ⁴⁹Ŋwə̀ nəmòk à ye fo’ nə̀ liŋ ye à ye də Kayofàs. Yi ànə ye ŋkum ŋgà fa satikà’ ghà ànə yi. Yi à lòkok ye, nə cep də, <<Bʉ̀ʉ am, wèŋ ka yusə̀ yà’ cu sə tsətsə’rə̀ fɛɛŋ riŋ! ⁵⁰A ye-a bə ŋkərə̀ nə̀ njàwèŋ, wèŋ tsəm də ka bə̀boŋ də ŋwə̀ nə̀ mò’fis kpʉ lɛ yi nə noŋsə bwìŋ pwe’ tsəm à? Kè bòghak weŋ yàwèŋ də wo zə wes lak àvès sə pwe’ ɛ?>> ⁵¹Bum sə̀ yi à cèp yè’sə, yi à ka yà’ yi tsərə kok, à ye ŋga yà’ à və̀ mʉ cùhù yi anə bohòNwì, yi sə cep, nə kà sə rì. Yè’sə ànə sə ye vɛ’nə ŋga Kayofàs cu ŋkum ŋgàa fa satikà’ bə mvə̀k ànə yi. Yi à tsə̀’ bwìŋ yà’sə yumok sə̀ yà’a nə̀ ye ntsə’mòk. Yusə də Jisòos nə̀ kpʉ mʉ tuhù bʉ̀ʉ Jus wèŋ pwe’. ⁵²Yi nə̀ kà bʉ̀ʉ tu bʉ̀ʉ Jus wèŋ woòwo kpʉ mègù. Yi nə kpʉ bʉ̀ʉ tu bwe Nwì sə̀ wo cu lòma nə̀ fòpwe’, də ya yi jəŋ benə və yà’ mvwe’ mò’fis.

⁵³Ncèp Kayofàs ènə à gʉ̀ fana ye jəŋ nùmbu ànə, bʉ̀ ŋkwàha bʉ̀ʉ Jus wèŋ sə lap mandzə̀ ŋgòzə Jisòs. ⁵⁴Ànə ye vɛ’nə, Jisòs kà mvwe’ nze Jùdiyà anə mok jəja sə gì fe’lə̀. Yi à mè’rə fa’nə, nə lo mvwe’ lak mok sə̀ wo to fo’ də Efə̀rèm. Lak yè’sə fo’ ŋgəà fana Jisòs bə ŋgàa fàak ye wèŋ sə cum mok fo’.

⁵⁵Bum yè’sə à ye ŋga mvə̀k ŋkàha Pasobà bʉ̀ʉ Jus wèŋ à sə kʉəp və̀ə. Bʉ̀ʉ Jus sə wèŋ sə kpəəŋ tesə mvwe’ buhu lak awo, nə sə kok lo Jòrosalèm anə. Wo à sə lòŋgòkə̀ gʉ̀ rɛŋsə ni’ awo mvə̀’nə̀ wo gʉ̀gə̀ə ŋkuŋ ŋkàha sə kə dzeŋ. ⁵⁶À ye yè’sə ŋga wo à sə làp Jisòs gʉgʉŋ. Wo à kə̀ kʉ̀rə mʉmvwe’ ndap Nwì nə̀ ghaŋ nə fana wo sə mərə də, <<Wèŋ yə va? Sə yəəŋ co yi nə kà mvwe’ ŋkàk ènə və̀ kènə da?>> ⁵⁷Mvə̀k ànə à ye ŋga ŋgàa fa satikà’ sə̀ ghaŋ bə bʉ̀ʉ Faràsi wèŋ à fa ŋàŋ laŋ də a ye-a ŋga ŋwə̀ nəmòk riŋ mvwe’ sə̀ Jisòs cu, nà’ kə tsok ya wo kə ko nà’ fo’.

Wo Yo’ Fa Jisòs Kù Bə Làmindà Mvwe’ Lak Betanì

(Mat. 26:6-13; Mak 14:3-9)

¹À bwehe cu mègù mok nùumbu ntùŋfu ya ŋkàha Pasobà sə kʉrə fana Jisòs ye’e lo fe’lə mvwe’ lak Betanì sə̀mok, sə̀ a fo’ lak Lasorònə̀ Jisòs à lòkoksə yi mvwe’ kpʉ nə. ²À kə̀ dzèŋ fo’ fana wo gʉ fa Jisòs bə ŋgàa fàak ye wèŋ dinà. Matà à ye fo’, nə sə casə zʉzʉʉ sə. Lasoròà ye sə̀’ mòk nə̀ bə Jisòs wèŋ à zʉ fo’ bəbɛ’ bə bʉ̀ʉ mok wèŋ sə̀’.

³Mvə̀’nə̀ wo ànə sə zʉ fana Mèri wɛhɛ və ye sə̀’. Yi à tse’ və̀ bə làmindà mok sə̀ yà’a rə̀m bòŋsəgə̀ vɛ’ɛ wùriŋ. Wo à gʉ̀ nsàp làmindà anə bə nsàp nzàamŋgaŋ mòk nə̀ wo togə̀ nà’ də, <<Nad.>> Yi à tse’ və̀ yà’ co botòròmò’fis vɛ’ɛ ŋga yà’ gʉ ntɛŋ vɛ’ɛ sə̀’ wùriŋ. Yi jəŋ yà’, nə fe’ fa Jisòs mʉ kùhu, nə sə yisə kùu nà’ sə bə nʉ̀əmtu ye. Ndap nə pwe’ à rə̀m sàaŋ tə mègù mok làmindàa sə. ⁴Ànə geŋ mo fàk Jisòs mòk nə̀ liŋ yee Judàs Iskarəyà, sə̀ yi nə̀ yi nə seŋ Jisòs nə à dʉk də, ⁵<<Kàcò, làmindàa yè’sə co bàam mbàm tɛ’. Anə boŋ ghak co wo seŋ yà’, nə fa ŋgàa jìŋ wèŋ mbàam sə.>> ⁶Yi ànə cep yè’sə, ka də bʉ̀ʉsə̀ də yi tse’ ntʉm nə̀ bə̀boŋ bohòŋgàa jìŋ wèŋ yeŋ. À ye bʉ̀ʉsə̀ yi ŋgà yə̀. Yi à sə lòksəgə̀ mbàam awo yi fana yi sə yə fis zʉ swihi mok ca. ⁷Jisòs dʉk ye də, <<Wèeŋ mè’rə yi. Yi nòŋsə làmindàa yè’sə ŋgòyok fa mʉ bə mvə̀k nə̀ wo nə tuuŋ mʉ. ⁸Weŋ ŋgàa jìŋ wèeŋ nə sə yenə mali riŋ, riŋ, fana mʉ̀ kà yàm vesùwèŋ nùumbu pwe’ sə yiskok.>>

⁹Bwìŋ à yuk də Jisòs cu Betanì fana bʉ̀ʉ sə̀ wo à kə̀ benə Jòrosalèm sə wèŋ kpəəŋ və fo’. Ka də wo à və̀ mègù yè’sə də wo dzəm ŋgòyə mègù Jisòs yeŋ. Wo à sə dzəm də wo ye ja’a Lasorònə̀ Jisòs à lòkoksə yi mvwe’ kpʉ nə. ¹⁰Mvə̀’nə̀ yà’ à ye vɛ’nə fana ŋgàa fa satikà’ sə̀ ghaŋ wèŋ sə làp mandzə̀ də wo zə Lasorònə. ¹¹Wo də wo zə yi bʉ̀ʉsə̀ bwìŋ à sə mè’rə ma njàwo, nə sə dzəm mok bohòJisòs bʉ̀ʉ tu Lasorònə.

Jisòs Ni Lak Jòrosalèm Co Ŋkum

(Mat. 21:1-11; Mak 11:1-11; Luk 19:28-40)

¹²Tsok à rɛŋ, bʉ̀ʉ sə̀ wo anə maŋ mvwe’ lak Jòrosalèm, ŋga wo à və̀ mvwe’ ŋkàk sə wèŋ yuk də Jisòs sə və̀ sə̀’ Jòrosalèm anə. ¹³Fana wo gbɛ’ jəŋ maŋteŋ, nə lo kə tseŋ yi mandzə̀. Wo sə yəm fuŋ də, <<Hòsanà; wèeŋ ja’a ŋwə̀ nə̀ yi sə və̀ mʉnə liŋ Tà Nwì, Nwìi gʉ yi bə̀boŋ. Wèeŋ ja’a ŋkum bʉ̀ʉ Jus wèŋ, vesùwèeŋ kuksə yi.>> ¹⁴Yè’sə ànə sə ye ŋga Jisòs anə lap ye mvomndè’ mòk, nə kok cum və yuye mbwa. Yà’ à mègù mvə̀’nə̀ wo à còm nòŋsə yà’ ndzənə ŋwàk Nwì də,

¹⁵<<Ntòlak Zayòŋ, wèeŋ kà wəp.

Ŋkum awèŋ sə və̀ə.

Yi sə kok cu və̀ mʉnə mvomndè’.>>

¹⁶Ghà nə̀ bum yè’sə à sə ye sə lòoŋ, ŋgàa fàak ye sə wèŋ kà bə zeŋ sə rɛɛŋ lok. Yà’ à kə̀ rɛɛŋ mègù bohòwo ghà nə̀ Jisòs à lòkok mvwe’ kpʉ nə kə ye ŋwə̀ nə̀ ghaŋ nə. Yà’a mvə̀k nə̀ wo à tsərə fəsə də wo à còm nòŋsə yà’ ndzənə ŋwàk Nwì də bum yè’sə nə kə ye vɛ’nə fana yà’ nə yeè nə sə̀’ vɛ’nə anə.

¹⁷Bʉ̀ʉ sə̀ wo à ye sə nze mvwe’ sə̀ Jisòs à lòkoksə Lasoròmvwe’ kpʉ sə wèŋ à lò, nə sə tsoho lo fa kɛ’ bwìŋ yusə̀ wo a yə sə. ¹⁸Nà’a njo nə̀ bwìŋ à və̀ ŋgòkə̀ tsèŋ Jisòs nə vɛ’ɛ wùriŋ bʉ̀ʉsə̀ wo à yuk nsàp maŋgəŋgèŋ nə̀ nà’ à gʉ̀ʉ nə. ¹⁹Bʉ̀ʉ Faràsi wèŋ à yə mvə̀’nə̀ bwìŋ sə kpəəŋ yù lòJisòs nə fana wo də, <<Vesùwèŋ sə càsə mvə̀k fɛɛŋ wà a ŋgàk, wèeŋ ja’a-a yàwèeŋ mvə̀’nə̀ maŋgòŋ sə yù yi ɛ̀.>>

Jisòs Tsə̀’ Mvə̀’nə̀ Yi Nə Kpʉ, Nə Tse’ Ŋàŋ Sə̀’

²⁰Mvə̀k ŋkàk ànə à ye, bʉ̀ lakmvum mok wèŋ à və̀ Jòrosalèm ŋgòkə̀ kùksə Nwì mbwa. ²¹Bʉ̀ʉ yè’sə wèŋ à kə̀ tsèŋ ŋgà fàk Jisòs mòk nə̀ wo to yi də Filìp nà’a. Lak Filìp nə à ye Bèsadà nə̀ nà’a mvwe’ nzeŋgòŋ Galìli. Wo dʉk fa nà’ də, <<Tɛ̀’mòk, vès dzəm də vèes ye Jisòs ya vesi wèeŋ taaŋ gesə mweè jo.>> ²²Filìp à lò, nə kə tsok fa Andrù, fana bə nà’ ye’e ŋga’a bwìŋ ba fo’, nə kə tsok fa Jisòs nə. ²³Jisòs à yè ŋgòtsòho fa wo də, <<Mvə̀k nə kə̀ dzèŋ laŋ nə̀ Nwìi nə niŋtsok fa bwìŋ də mʉ̀ʉ mo ŋwè, mʉ ŋwə̀ nə̀ ghaŋ. ²⁴Mʉ̀ sə tsə̀’ weŋ nè’e ŋkèm ncèp dʉk də, A ye-a ŋga mvə̀m gòmbì ka sə nze co nà’ kpʉ kpʉ nooŋ, ye də nà’a nə cum mam megu mvə̀m nə̀ mò’fis nə. Nə ye də a ye-a ŋga nà’ nòoŋ sə nze co nà’ kpʉ laŋ, nə to fana nà’a nə tse’ fe’lə mvə̀əm mok ŋkʉ̀ʉŋntɛ̀ŋ. ²⁵Yusə də, ŋwə̀ nə̀ yi dzəm-a yòŋsə̀ ye, ye də yi nə bisə bə zeŋ wà. Fana ŋwə̀ nə̀ yi bɛ̀ŋ-a yòŋsə̀ ye sə nzeŋgòŋ fɛɛŋ fana ye də yi nə tse’ mam yòŋsə̀ ye nə fo’ nə̀ mvèsə̀. ²⁶Ye də, ŋwə̀ nə̀ yi dzəm-a ŋgògʉ̀ fàak am fana yi yuŋ və mʉ. Mvwe’ sə̀ mʉ̀ lòpwe’, ŋgə̀ŋgàaŋ nə ye fo’ vesi. Ŋwə̀ nə̀ yi dzəm-a ŋgòyù və̀ mʉ də ya yi gʉ fàak am fana Tɛ̀’ am nə yamsə yi, yi kuk.>>

²⁷Jisòs à dʉk mok sə̀’ də, <<Ntʉm àm sə fa mʉ ŋgə’ ŋga’a vɛ’ɛ wùriŋ. Aco mʉ̀ cèp yè’sə də yà? Aco mʉ dʉk fa Tɛ̀’ am də yi yep fis ŋgə’ nə̀ nà’a ŋga’a mʉ tuhù mʉ̀ ènə fo’ à? Megu ŋga’a kə də mʉ̀ ànə və tsenə fɛɛŋ ŋgòyə ŋgə’ ènə. ²⁸A bə̀boŋ co mʉ nə dʉk fa Tɛ̀’ am nə də, <Gʉ̀ lɛ yusə̀ co yà’a nə gʉ də bwìiŋ kuksə liŋ yo.> >> Yi ànə dʉk vɛ’nə fana ŋgì mòk cep vesə mʉbu. Ŋgì nə sə cep də, <<Mʉ̀ a gʉ̀ ya bwìŋ kuksə liŋ am sə laŋ, fana mʉ nə gʉ mali yà’ sə̀mok.>> ²⁹Bʉ̀ʉ sə̀ wo à mà tə fo’ sə à yuk ŋgì nə sə̀’. Mok dʉk də, mbʉ̀ŋ kùm yi. Mok dʉk yàwo də, hai’, cèp bohòyi masinjà Nwì.

³⁰Jisòs dʉk fa wo ye də, <<Ŋgì nə̀ wèŋ yuk ànə, nà’ ka bʉ̀ʉ tu am cep, nà’ cèp bʉ̀ʉ tu awèŋ. ³¹Mvə̀k kʉ̀rə nə̀ wo nə sak nzeŋgòŋ nə laŋ. Mvə̀k kʉ̀rə nə̀ wo nə bwi’ mak gɛsə ŋwə̀ nə̀ yi ŋkum sə nzeŋgòŋ fɛŋ yi nə sə̀’ laŋ. ³²Bohòmʉ̀ yàm, wo fis gesə mʉ mʉtsə̀ fana mʉ̀ soŋ və bwìŋ pwe’fo’ bohòmʉ̀.>> ³³Jisòs à cèp ncèp ènə ŋgònìtsə̀’ fa bwìŋ nsàp kpʉ nə̀ yi nə kpʉ nà’ nə.

³⁴Bʉ̀ʉ sə̀ wo à ye fo’ wùriŋ sə wèŋ à dʉk fa yi də, <<Wo à còm nòŋsə yà’ ndzənə ŋwàk lʉ̀ʉk avès də Ŋkum ŋgà gèm bwìŋ nə, yi nə cum mam nə̀ mvèsə̀. Wù nə sə dʉhʉ̀ nə sə̀ yòdə wo nə fis kok gesə mo ŋwè mʉtsə̀, ŋga mo ŋwə̀ nə̀ wù sə dʉk ènə ndà?>> ³⁵Jisòs dʉk də, <<Marɛŋ nə nə cum tse’ wenə wèŋ mvə̀k momjo wà. Ghà nə̀ marɛŋ nə cu wenə wèŋ ènə fana a bə̀boŋ də wèeŋ gi sooŋ lo mantombì ya ndzəm kà weŋ kə̀ cì’. Bʉsə̀ ŋwə̀ nə̀ yi gìgə̀ ye sənə mandzəm kà mvwe’ sə̀ yi sə nə̀ŋ lòkù sə rìgə̀. ³⁶Wèeŋ dzəm bohòmarɛŋ nə ŋga’a nə̀ nà’ cu tse’ wenə wèŋ ènə, ya wèeŋ ye bʉ̀ʉ marɛŋ nə wèŋ.>>

Jisòs ànə cep wes ncèp ènə fana yi lo gɛsə yuye fo’. ³⁷Yi ànə gʉ bum maŋgəŋgèŋ ŋga wo sə yə vɛ’ɛ wùriŋ fana wo kà bohòyi anə sə̀ dzəm malì. ³⁸Bum yè’sə à kə̀ ye mègù mvə̀’nə̀ ŋgà tsòhòbum Nwì nə̀ liŋ yee Ìzayà ànə cep mantombì fa’ yà’a. Yi ànə cep də,

<<Tà, ŋwə̀ nə̀ mò’fis a dzəm fʉ̀’ ncèp àvès nə ɛ̀?

Yà’a sə̀’ də ŋwə̀ nə̀ mò’fis ka ŋàaŋ yo sə sə̀’ riŋ lok ɛ̀?>>

³⁹Bʉ̀ʉ yà’sə wèŋ à ka bohòJisòs dzəm lok sə̀’ mvə̀’nə̀ Ìzayà nə ànə com sə̀’ də,

⁴⁰<<Nwì a lok lis awo sə, ya wo kà bum yə, nə gʉŋsə wo tu sə̀’, ya wo kà marɛŋ yə.

Wo kà bum yè’sə rɛɛ̀ŋ, fana nə kà mʉ̀ʉ Nwì də ya mʉ luŋsə wo yù və̀.>>

⁴¹Ìzayà nə à sə cèp yè’sə ŋga yi sə dʉk yè’sə Jisòs, bʉ̀ʉsə̀ yi ànə ye ye də Ŋkum ŋgà gèm bwìŋ nə ŋwə̀ nə̀ ghaŋ. ⁴²Bum yè’sə ànə ye-a sə̀ vɛ’nə fana, bwìŋ à ye malì mʉŋgorə̀ bʉ̀ ŋkwàha bʉ̀ʉ Jus sə wèŋ yo, sə̀ wo à dzəm bohòJisòs nə. Megu də wo à sə wəp bʉ̀ʉ Faràsi wèŋ fana wo kà jəja də wo dzəm bohònà’ cèp fis. Wo à gʉ̀ vɛ’nə də ya bʉ̀ʉ Faràsi sə wèeŋ kà wo mʉmvwe’ ndap pìriyà awo bɛ’ fis. ⁴³Wo à dzəm ghak yàwo nə̀ də bwìiŋ kwasə wo nə noŋsə nə̀ də Nwìi kwasə wo yi.

Jisòs Dʉk Də Ncèp Ye Nə Sak Bwìŋ

⁴⁴Jisòs à cèp fis fe’lə bə ŋàŋ sə̀mok dʉk də, <<Ŋwə̀ nə̀ yi dzəm-a bohòmʉ̀, ye də ŋgə̀ŋgàŋ ka yà’sə bohòmʉ̀ dzəm mègù. Yi dzəm yà’sə bohòŋwə̀ nə yi a tum və̀ mʉ tsenə nə sə̀’. ⁴⁵Ŋwə̀ nə̀ yi yə-a mʉ, ye də yi yə ŋwə̀ nə̀ yi tumsə və̀ mʉ nə sə̀’ laŋ. ⁴⁶Mʉ̀ a və̀ yàm sə nzeŋgòŋ anə co marɛŋ. Ya ŋwə̀ nə̀ yi dzəm-a bohòmʉ̀, ye də yi nə kà sənə mandzəm mok cu malì. ⁴⁷A ye-a ŋga ŋwè yuk ncèp àm nə, nə dzeeŋ ŋgòyù nà’ fana ye də a nə kà yi mʉ̀ kə̀ sak. Mʉ̀ à ka tsenə ŋgòkə̀ sak bwìŋ və. Mʉ̀ à və̀ yàm də ya bwìiŋ tse’ lùŋ. ⁴⁸Ye də ŋwə̀ nə̀ yi dzeeŋ-a mʉ, nə bɛŋ ncèp àm nə fana, yi tse’ yusə̀ yà’a nə sak yi nùmbu nə̀ nzeŋgòoŋ nə me. Wo nə jəŋ mègù sə̀ ncèp nə̀ mʉ̀ à cèp nə, nə sak nsàp ŋwə̀ ànə fo’. ⁴⁹Bʉsə̀ yusə̀ mʉ̀ sə cèp sə, mʉ̀ sə kà yà’ sə ntʉʉ̀ mʉ̀ bə dzədzəm njàm tsərə̀ kok. Ŋwə̀ nə̀ yi sə tsə̀’ mʉ yusə̀ mʉ cep sə, a Tɛ̀’ am nə̀ yi a tum və̀ mʉ tsenə nə. ⁵⁰Mʉ̀ rì tse’ də lùŋ nə̀ nà’a kà mègə̀ nə tesə və̀gə̀ bohòncèp nə̀ nje nə. Yà’a njo nə̀ mʉ̀ sə tsə̀’ fa mègù weŋ yusə̀ Tɛ̀’ am a dʉk fa mʉ yi sə.>>

Jisòs Yə’rə Fa Bwe Ye Wèŋ Də Yà’a Fak BohòMòk Bə Mòk

¹À sə kʉəp wesə lòmok nùmbu ŋkàk pasobà nə fana Jisòs riŋ də mvə̀k nje kʉ̀rə ŋgòbwìŋ foho lòbohòTɛ̀’ ye nə laŋ. Jisòs ànə dzəm bʉ̀ʉ sə̀ sə nzeŋgòŋ sə̀ wo sə̀ ye wèŋ fana yi dzəm yà’ tə̀tè kə ləsə pwe’ nə̀ pwe’.

²Nconùm à dzèeŋ fana Jisòs bə ŋgàa fàak ye wèŋ kə cum be’lə mvwe’ mò’fis, nə sə zʉ zʉzʉ. Yè’sə à ye ŋga Satà ni sə ntʉʉ̀ Judàs mo Saimʉ̀ nə̀ mvwe’ lak Iskarəyà nə laŋ, də nà’a seŋ Jisòs. ³Jisòs à rì sə̀’ də Tɛ̀’ ye a fa bum pwe’fo’ ndzə bohòyi. Yi à rì sə̀’ də yi à tesə və̀ bohòNwì, fana yi nə bwi foho lo sə̀’ bohòNwì anə. ⁴Yi ànə riŋ vɛ’nə fana mvə̀’nə̀ wo à mà cu fo’ fana Jisòs lokok, nə fweŋ fis cə̀ək ye sə̀ mʉ ŋkwɛ̀ŋ. Yi jəŋ tawùrə̀, nə swi’ yak nà’ sə gamə̀ yi. ⁵Yi jəŋ ndzəp, nə gesə sənə ŋgàp mòk, nə ye ŋgòsə cùhu fa ŋgàa fàak ye wèŋ ŋki’ awo bə zeŋ. Yi jəŋ tawùrə̀ nə̀ yi ànə swi’ sə gamə̀ nə, nə sə yisə fa yà’ ŋki’ sə bə zeŋ. ⁶Yi kə wɛs mʉ ni’ì Saimʉ̀ Pità fana Pità nə dʉk də, <<Wù də wu cuk fa mʉ kù ya a gʉ va Tà?>> ⁷Jisòs dʉk fa nà’ də, <<Wù ka yusə̀ mʉ̀ sə gʉ̀ fa weŋ yè’sə ntòrɛɛŋ. Megu də mvə̀ək nə və nə̀ wèeŋ nə rɛɛŋ bə zeŋ.>> ⁸Pità nə dʉk fa nà’ də, <<Kaco mʉ̀ dzəm yuk də wu cuk fa mʉ kù yeŋ.>> Jisòs də, <<A ye-a ŋga mʉ̀ ka wu cuk fa, ye də wù ka yà’sə mok vesù ye.>> ⁹Fana Pità nə dʉk fa nà’ mok kə də, <<A ye-a bìim vɛ’nə, Tà, wù kà mʉ kù cùk mègù fa. Wu cuk fa mʉ bo am bə tu am pwe’fo’.>> ¹⁰Jisòs dʉk fa yi də, <<Ŋwə̀ nə̀ yi cuk-a ni’ ye laŋ, ye də yi mok rərɛŋ. Wo nə cuk fa megu ŋwə̀ ànə mok kù. Wèŋ pwe’fo’ wèeŋ rərɛŋ, mègù ŋwə̀ nə̀ mò’fis nə̀ yi ka rərɛŋ yeŋ.>> ¹¹Jisòs ànə riŋ me ye ŋwə̀ nə̀ nà’a nə seŋ yi nə laŋ. Nà’a njo nə̀ yi à dʉk də wèŋ ka rərɛŋ pwe’ yeŋ nə.

¹²Yi ànə cuk wes fa wo kùu awo sə fana yi kə te’ ni fe’lə cə̀ək ye sə, nə kə foho cum nze. Fana yi ye ŋgòcèp bohòwo dʉk də, <<Wèŋ rɛɛŋ bə yusə̀ mʉ̀ gʉ̀ fa weŋ yà’sə à? ¹³Wèeŋ togə̀ mʉ də cicà nə ye də Tà. A bə̀boŋ mvə̀’nə̀ wèeŋ togə̀ mʉ vɛ’nə yà’sə bʉ̀ʉsə̀ mʉ bohòwèŋ mvə̀’nə̀ wèŋ sə to yà’sə anə zìnə. ¹⁴Mʉ̀ nə̀ mʉ yàm cicà nə ye Tà àwèŋ nə cùk fa-a weŋ kù, ye də wèŋ tse’ ŋgòcùhu fa mòk bə mòk kùu yàwo sə̀’. ¹⁵Mʉ̀ nìtsə̀’ fa weŋ yà’sə mandzə̀ mòk nə̀ də wèeŋ gʉ fa mòk bə mòk sə̀’ mvə̀’nə̀ mʉ̀ gʉ̀ fa weŋ yà’sə. ¹⁶Mʉ̀ sə tsə̀’ fa weŋ ŋkèm ncèp dʉk də, kaco mo fàk yam ghak ŋwə̀ nə̀ yi sə fàk bohònà’ nə yeŋ. Kaco masinjà mòk yam ghak ŋwə̀ nə̀ nà’ tum yi nə sə̀’ yeŋ. ¹⁷Mvə̀’nə̀ wèŋ rì bum yè’sə fana kwəkwaa nə ye bohòwèŋ, ŋga wèŋ sə gʉ̀-a yà’ na.>> ¹⁸Yi à cèp fe’lə ncèp mòk sə̀’ də, <<Bum sə̀ mʉ̀ sə cèp yè’sə, mʉ̀ sə kà bohòwèŋ pwe’fo’ cèp. Mʉ̀ rì nsàap bʉ̀ʉ yàm sə̀ mʉ̀ a cokfis wo sə mʉ̀. A zìnə də ncèp nə̀ nà’ cu ndzənə ŋwàk Nwì nə, nə̀ ye mègù sə̀’ mvə̀’nə̀ wo à còm sə də, <Ŋwə̀ nə̀ vesi zʉ be’lə zʉzʉ mvwe’ mò’fis nə, nə̀ nə̀ŋ tes fa mʉ kù mʉ tuhù sə̀’ yi nə.> ¹⁹Mʉ̀ sə tsə̀’ nòŋsə fa weŋ bum yè’sə ŋga cu ntòcuu, də ya yà’a kə̀ ye sə̀’ mvə̀’nə̀ mʉ̀ à tsə̀’ weŋ sə fana weŋ riŋ də mʉ ŋwə̀ nə̀ mʉ̀ cu nə. ²⁰Mʉ̀ sə tsə̀’ weŋ nè’e ŋkèm ncèp dʉk də, ŋwə̀ nə̀ yi jə-a masinjà àm co ŋwè, ye də ŋgə̀ŋgàŋ jə yà’sə mʉ̀. Ŋwə̀ nə̀ yi jə-a mʉ, ye də yi jə yà’sə ŋwə̀ nə̀ yi a tumsə və̀ mʉ sə nzeŋgòŋ fɛŋ nə.>>

Jisòs Də Ŋgà Fàk Ye Mòok Nə Seŋ Yi

(Mat. 26:20-25; Mak 14:17-21; Luk 22:21-23)

²¹Jisòs ànə cep wes ncèp ènə fana ntʉm ye fa ghaha wesə yi ŋgə’ vɛ’ɛ wùriŋ. Yi cep fis mok jəja kwaraŋgaŋ də, <<Mʉ̀ sə tsə̀’ weŋ nè’e ŋkèm ncèp də, ŋwè cu mʉŋgorə̀ wèŋ mò’fis nə̀ yi nə seŋ mʉ.>> ²²Ŋgàa fàak ye sə wèŋ à kʉ̀ksə kɛ’ca, nə mərə fʉk ŋwə̀ nə̀ yi də nà’a nə seŋ yi nə bʉ̀ə̀. ²³Ànə ye ŋga mo fàk ye nə̀ yi à sə dzəmgə̀ nà’ wùriŋ nə yəhə na kok lòŋgʉ ni’ì yi anə. ²⁴Saimʉ̀ Pità sə gʉ gesə fa nà’ bə si də nà’a fek Jisòs nə də ŋwə̀ nə̀ nà’ dʉk ànə ndàlɛ. ²⁵Fana ŋgà fàk ye nà’nə sooŋ kʉəp wesə lo ŋgʉ ni’ì Jisòs anə, nə fek nà’ də, <<Tà, ŋwə̀ nə̀ wù dʉk ànə ndà lɛ?>> ²⁶Jisòs dʉk də, <<A ŋwə̀ nə̀ mʉ nə bək jəŋ zʉzʉ, nə tsəp gesə sənə ndzəpnjàp, nə fa yi.>> Fana yi bək jəŋ zʉzʉ, nə tsəp gesə sənə ndzəpnjàp, nə fa Judàs Iskarəyà mo Saimʉ̀. ²⁷Judàs à jə yà’ ntɛ̀ŋ, Satà ca ni yi sə ntʉʉ̀. Jisòs dʉk fa nà’ də, <<Yusə̀ wù sə də wu gʉ sə, gʉ̀ yà’ nə̀nàk.>> ²⁸Bwe ye sə̀ wo à ye fo’ sə pwe’ à yuk, nə kà njo nə̀ Jisòs dʉk fa nà’ vɛ’nə nə rɛɛ̀ŋ. ²⁹Judàs nə à ye ŋgà lòksə̀ mbàam awo yi. Mok wèŋ tsəm də kàmòk Jisòs dʉk də nà’a kə ywiŋ və bum sə̀ wo nə zʉ ŋkàk bə zeŋ. Bòp mòk tsərə yàwo də kàmòk Jisòs sə dʉk də nà’a kə gap fa ŋgàa jìŋ wèŋ mbàm. ³⁰Ghà nə̀ Judàs nə ànə jəŋ zʉzʉʉ sə̀ Jisòs fa yi sə ntɛ̀ŋ fana yi tesə lo yuye sə mbiŋ. À ye yè’sə ŋga ndzəm seŋ tasə cù laŋ.

Jisòs Fa Lʉ̀k Nə̀ Fi

³¹Ghà nə̀ Judàs nə ànə tesə lo ye sə fana Jisòs dʉk fa ŋgàa fàak ye wèŋ də, <<Mvə̀k kʉ̀rə ŋga’a mok laŋ nə̀ bwìiŋ nə ye də mo ŋwè nə ŋwə̀ nə̀ ghaŋ. Wo nə ye nsàp ŋwə̀ nə̀ ghaŋ nə̀ Nwì cu sə̀’ ndzə ni’ì Mo ŋwè anə. ³²Mvə̀’nə̀ wo nə ye nsàp ŋwə̀ nə̀ ghaŋ nə̀ Nwì cu ndzə ni’ì mʉ̀ʉ Mo Ŋwè fana Nwìi nə niŋ tsok fa bwìŋ nsàp ŋwə̀ nə̀ ghaŋ nə̀ Mo ye nə cu, Yi nə kà mvə̀k càsə̀.

³³<<Bwe am wèŋ, mvə̀k nə̀ vesùwèeŋ nə cum mvwe’ mò’fis ka mok ŋkʉ̀ʉŋ bwehe cum fe’lə. Wèeŋ nə lap mʉ fana yà’ megu mvə̀’nə̀ mʉ̀ ànə tsok fa bʉ̀ʉ Jus wèŋ fa’ yà’a də, kaco wèŋ kə dzeŋ to mvwe’ sə̀ mʉ̀ sə lòo sə yeŋ. ³⁴Mʉ fa weŋ lʉ̀k nə̀ fi də, wèeŋ dzəm mòk bə mòk. Nsàp mandzə̀ nə̀ mʉ̀ a dzəm weŋ nà’a, wèeŋ nə dzəm tsoŋ mòk bə mòk sə̀’ vɛ’nə. ³⁵Nsàp dzədzəm ènə nə gʉ yi ŋkuŋ bwìŋ riŋ də wèeŋ bʉ̀ʉ sə̀ wèŋ sə yù mandzə̀ àm.>>

Jisòs Də Pitàa Nə Dzeeŋ Yi

(Mat. 26:30-35; Mak 14:26-31; Luk 22:31-34)

³⁶Saimʉ̀ Pità à fek yi də, <<Tà, mvwe’ sə̀ wù sə lòo sə ma fò?>> Jisòs dʉk də, <<Mvwe’ sə̀ mʉ̀ sə lòo sə, kaco wù lo to fo’ ŋga’a yeŋ. Mvə̀ək nə və nə̀ wu nə yuŋ və mʉ fo’.>> ³⁷Pità dʉk də, <<Wù də kaco mʉ̀ yuŋ lo to wu ŋga’a yeŋ ŋga kotse’ mʉ yà ŋkuŋ ɛ Tà? Mʉ yàm kə̀kʉrə̀ ŋgòkpʉ bʉ̀ʉ tu yò.>> ³⁸Jisòs dʉk fa yi də, <<Wù dʉk də aco wù kpʉ bʉ̀ʉ mʉ̀ ɛ̀? Mʉ tsok wu ŋkèm dʉk də, mvəp nə sə kə to kàmòk, ŋga wù nè’e, wù bɛ̀ŋ fis mʉ kɛ̀’ tɛ’ laŋ də wù ka mʉ riŋ.>>

Jisòos Mandzə̀ Nə̀ ŊgòKə̀ Yə Nwì

¹Ànə geŋ Jisòs nə dʉk fa ŋgàa fàak ye sə wèŋ də, <<Kà də wèeŋ gʉ də ntʉʉm awèeŋ sə bʉp weŋ dʉk. Wèeŋ fa ntʉʉm awèŋ bohòNwì, nə fa yà’ bohòmʉ̀ sə̀’. ²Rum ndap mʉ la’à Tɛ̀’ am àwo ŋkʉ̀ʉŋntɛ̀ŋ. Yà’ ànə ka-a vɛ’nə yeŋ bwɛ̀rɛ mʉ̀ a tsə̀’ fa weŋ. Mʉ̀ sə lòdə ya mʉ kə gʉhʉ tsə’rə noŋsə fa weŋ mvwe’ ncum mbwa. ³Mʉ lo-a, nə kə gʉhʉ tsə’rə wes fana mʉ̀ foho və, nə kə jəŋ lo weŋ, də ya mvwe’ sə̀ mʉ̀ cu sə, wèŋ ye yàwèŋ sə̀’ fo’. ⁴Wèŋ rì mandzə̀ nə̀ ŋgòlòmvwe’ sə̀ mʉ̀ sə lòo sə laŋ.>>

⁵Tomos dʉk fa yi də, <<Vès ka mvwe’ sə̀ wù sə lòo sə riŋ, Tà. Ye də vèes nə riŋ mandzə̀ nə̀ ŋgòkə̀ dzèŋ fo’ nə bə yà?>> ⁶Jisòs dʉk wo də, <<Mʉ mandzə̀ nə mʉ̀, mʉ zìnə nə sə̀’ mʉ̀, nə ye lùŋ nə sə̀’ mʉ̀. Kaco ŋwè ca, nə kə ye to si Tɛ̀’ am yeŋ, tse’ŋga ŋgə̀ŋgàŋ cà bohòmʉ̀. ⁷A ye-a də wèŋ anə riŋ-a mʉ, bwɛ̀rɛ də wèŋ a rì Tɛ̀’ am sə̀’ laŋ. Ye jəŋ ŋga’a nə lo mantombì, wèŋ rì yi, nə yəə̀ nə yi bə lis sə̀’ laŋ.>> ⁸Filìp fek yi də, <<Tà, niŋ fa-a ves Tɛ̀’ yo nə ɛ̀? Nà’a mègù yu nə̀ mò’fis nə̀ vèes yə-a yi, yà’ kʉrə ves.>> ⁹Jisòs dʉk də, <<Nùumbu sə̀ mʉ̀ a cu vesùwèŋ yè’e pwe’, wù ka mʉ ntòriŋ à, Filìp? Ŋwə̀ nə̀ yi yə-a mʉ, ye də yi a yə Tɛ̀’ am nə laŋ. Ye də wù sə dʉk fe’lə də mʉ niŋ fa weŋ Tɛ̀’ am nə-e ŋga’a va? ¹⁰Co wù ka sə ntʉʉ̀ wù dzəm də mʉ mo ye nə, mʉ mò’fis bə Tɛ̀’ nə, Tɛ̀’ nə ye sə̀’ mò’fis bə mo ye nə yè’e dzəm à? Ncèp nə̀ mʉ̀ sə cèp fa wèŋ ènə sə kà sə və̀ə mʉ̀ bə tu am tesə kok. Sə gʉ̀ Tɛ̀’ am nə̀ yi sə fàk ndzə ni’ì mʉ̀ nə. ¹¹Wèeŋ dzəm ncèp àm nə̀ də mʉ ves Tɛ̀’ am mò’fis, Tɛ̀’ am ye bwi vesi sə̀’ mò’fis nè’e. A ye-a də wèŋ sə kà dzəm də bʉ̀ʉsə̀ mʉ̀ sə cèp yà’ sə̀’ mʉ̀ bə cùu am fana aco wèŋ dzəm yà’ bʉ̀ʉsə̀ wèŋ yə nsàap fàak sə̀ mʉ̀ sə gʉ̀ʉ sə.

¹²<<Mʉ tsok fa weŋ ŋkèm ncèp dʉk də, ŋwə̀ nə̀ yi dzəm-a bohòmʉ̀, yi nə gʉ sə̀’ nsàap bum sə̀ mʉ̀ sə gʉ̀ʉ. Yi nə gʉ bum sə̀ yà’ yam càsə yà’sə sə̀’, bʉ̀ʉsə̀ mʉ̀ sə bwìŋ lòyàm bohòTɛ̀’ am. ¹³A ye-a sə̀ yà, ŋga wèŋ fek yà’ bə liŋ am fana mʉ nə gʉ yà’. Mʉ nə gʉ yà’ ya ŋga bwìiŋ ye ŋàaŋ sə̀ Tɛ̀’ tse’ sə ndzənə fàak am sə. ¹⁴A ye-a sə̀ yà, ŋga wèŋ fek mʉ yà’ bə liŋ am fana mʉ nə gʉ yà’.>>

Jisòs Kà’ ŊgòTum Vèsə Ŋgà Ntip

¹⁵Jisòs nə dʉk fe’lə mok sə̀’ də, <<A ye-a də wèŋ dzəm mʉ, wèŋ noŋsə lʉ̀ʉk am. ^16-17Fana mʉ nə fek Tɛ̀’ am yi tum fa weŋ ŋgà ntip mòk. Ŋgà ntip ènə, a Yòŋsə̀ nə̀ Nwì nə, nà’a yi nə̀ yi nìtsə̀’ fagə̀ bwìŋ zìnə nə. Yi nə cum mam wenə wèŋ sə ntʉʉ̀ wèŋ nə̀ mvèsə̀. Kaco bʉ̀ʉ sə̀ sə nzeŋgòŋ fɛɛŋ tse’ to yi yeŋ, bʉ̀ʉsə̀ kaco wo ye nà’ yeŋ, nə kà yi sə̀’ rì. Wèŋ riŋ yi yàwèŋ rìiŋ bʉ̀ʉsə̀ yi cu wenə wèŋ, nə ye də yi nə kə cum mam wenə wèŋ.

¹⁸<<Ye də wèeŋ riŋ tse’ də kaco mʉ lo, nə me’rə mak noŋsə weŋ co bwe njìŋ yeŋ. Mʉ nə bwi foho və mali ŋgòkə̀ yə weŋ. ¹⁹Yusə də, cu mvə̀k momjo ya bʉ̀ʉ sə̀ sənə nzeŋgòŋ nə kà mʉ mok sə yə fe’lə̀. Wèeŋ nə sə ye mali mʉ yàwèŋ yo, bʉ̀ʉsə̀ mʉ̀ cu fo’ ŋwəm fana wèeŋ nə cum yàwèŋ sə̀’ ŋwəm anə. ²⁰Mvə̀k ànə kə̀ dzèŋ nùu fana wèŋ riŋ də mʉ ves Tɛ̀’ am mò’fis, wèŋ ye yàwèŋ vesùwèŋ sə̀’ mò’fis fana mʉ̀ ye yàm vesùwèŋ sə̀’ mò’fis. ²¹Ŋwə̀ nə̀ yi yuk-a lʉ̀ʉk am sə, nə noŋsə yà’ fana ye də nà’a yi nə̀ yi dzəm mʉ nə. A ye-a ŋga ŋwè dzəm mʉ, ye də Tɛ̀’ aam nə dzəm ŋgə̀ŋgàŋ, mʉ̀ dzəm yi yàm sə̀’, nə niŋtsok fa yi ni’ àm mvə̀’nə̀ mʉ̀ cu.>>

²²Ànə geŋ Judàs fek yi də, <<Aco wù yəəŋ megu bohòvès, bʉ̀ʉ sə̀ sə nzeŋgòŋ sə kà wu yàwo yə anə va Tà?>> Ànə cep yè’sə Judàs nə̀ zok, ka Judàs Iskarəyà yeŋ. ²³Jisòs cep fəsə də, <<Ŋwə̀ nə̀ yi dzəm-a mʉ, yi nə noŋsə ncèp àm. Tɛ̀’ am nə dzəm yi fana ves Tɛ̀’ am nə nə və kə gʉ mvwe’ ncum avès ves ŋwə̀ ànə wèŋ bəbɛ’. ²⁴Ŋwə̀ nə̀ yi kà mʉ dzəmgə̀ə kà ncèp àm nə sə̀’ nòŋsə̀gə̀. Wèeŋ tsərə tse’ də ncèp nə̀ mʉ̀ sə tsə̀’ weŋ ènə nà’ sə kà sə və̀ə mʉ̀ bə tu am tesə kok. A ncèp Tɛ̀’ am nə̀ yi a tum və̀ mʉ nə. ²⁵Mʉ̀ tsə̀’ fa weŋ bum yè’sə ŋga mʉ̀ cu ntòvesùwèŋ. ²⁶Anə ye maŋkwɛ̀ŋ fana Tɛ̀’ am nə nə tumsə vesə fa weŋ ŋgà ntip nə ŋgòkə̀ jə mvwe’ kùu am. Ŋgà ntip nə, a Yòŋsə̀ nə̀ Rərɛŋ nə. Ghà nə̀ yi və̀ nə, yi nə yə’rə fa weŋ bum, nə gʉ wèŋ tsərə riŋ fəsə bum sə̀ mʉ̀ à tsə̀’ weŋ sə pwe’fo’.

²⁷<<Mvə̀’nə̀ mʉ̀ sə lòŋga’a yè’e fana mʉ̀ fa nòŋsə weŋ fifi. Nsàp fifi nə̀ njàm nə̀ mʉ̀ sə fa weŋ ènə, kaco wèŋ tse’ to nà’ bohònzeŋgòŋ nè’e yeŋ lok. Wèeŋ kà də wèeŋ sə mərə dʉk. Wèeŋ kà wʉə sə ntʉʉ̀ wèŋ sə̀’ tse’. ²⁸Wèŋ yuk mvə̀’nə̀ mʉ̀ tsə̀’ fa weŋ də mʉ̀ sə lòo fana nə bwi və kə tseŋ weŋ sə̀mok yà’a laŋ. A ye-a də wèŋ dzəm mʉ, wèŋ kwa də mʉ̀ sə lòŋgòkə̀ yə Tɛ̀’ am, bʉ̀ʉsə̀ Tɛ̀’ am nə yi yam gha’ mʉ yi. ²⁹Mʉ̀ sə tsòho fa weŋ bum yè’sə ŋga cu ntòcu, də ya ŋga yà’a kə̀ ye mvə̀’nə̀ mʉ̀ tsə̀’ weŋ sə fana wèŋ dzəm də mʉ ŋwə̀ nə̀ zìnə. ³⁰Mʉ nə kà vesùwèŋ tə̀tè mok cèp yiskok, bʉ̀ʉsə̀ ŋwə̀ nə̀ yi ŋkum sə nze fɛɛŋ yi nə sə də yi və. Megu də yi ka ŋàŋ bohòmʉ̀ tse’. ³¹Yusə̀ mʉ̀ sə gʉʉ, a bə ŋàaŋ sə̀ Tɛ̀’ am a dʉk fa mʉ yi də mʉ gʉ, ya ŋga bwìŋ nə riŋ də mʉ̀ dzəm Tɛ̀’ nə. Lòkok, vesùwèeŋ lo mvwe’ sə̀ zok.>>

Jisòs Də Yi Co Mantseŋ Tʉ

¹Jisòs à tsə̀’ fa ŋgàa fàak ye wèŋ ncèp mòk sə̀’ dʉk də, <<Mʉ yè’e tʉ grep nə̀ nà’a nə̀ zìnə, Tɛ̀’ am ye bwi ye co ŋwə̀ nə̀ yi sə jə ŋkərə̀ bə zeŋ yi.²A ye-a ŋga ntaŋ àm mòk sə kà zəm fana yi gbɛ’ ci’ mak fis nà’. A ye-a nta nə̀ nà’ sə zəm fana yi gʉhʉ tsə’rə nà’ bə̀boŋ də ya nà’a zəm ghaha wesə ŋkʉ̀ʉŋntɛ̀ŋ. ³Wèeŋ yàwèŋ mok rərɛŋ co ntaŋ tʉ nə̀ wo gʉhʉ tsə’rə nà’ gʉhʉ tsə’rə. Wèŋ rɛŋ vɛ’nə bʉ̀ʉ ncèp am nə̀ mʉ̀ cèp fa wèŋ nə. ⁴Wèeŋ cum mam ndzə ni’ì mʉ̀ ya mʉ cum mam ndzə ni’ì wèŋ sə̀’. A ye-a ŋga ntaŋ ka ndzə ni’ì mantseŋ tʉ nə yeŋ, kaco yi zəm ŋgwì yeŋ. A bohòwèŋ sə̀’ vɛ’nə də, a ye-a ŋga wèŋ ka ndzə ni’ì mʉ̀ cum mam, ye də wèeŋ wà.

⁵<<Mʉ yàm mantseŋ tʉ nə, wèŋ ye yàwèŋ ntaŋ sə. Ŋwə̀ nə̀ yi cu mam-a ndzə ni’ì mʉ̀, mʉ̀ cum ndzə ni’ì yi sə̀’ fana yi nə ye co ntaŋ tʉ nə̀ yi sə zəm ŋgwì wùriŋ. Yumook sə̀’ də, a ye-a ŋga mʉ̀ ka ye, kaco wèŋ gʉ to lok fʉ̀k yumok yeŋ. ⁶Ŋwə̀ nə̀ yi kà-a ndzə ni’ì mʉ̀ cu mam fana yi ye co ntaŋ tʉ nə̀ wo màk nà’ mà’a. Ntaŋ tʉ nə yum fana wo te’e benə nsàap yà’sə, nə kə tɛŋ sə misə̀, fana yà’ sə. ⁷Wèeŋ cu mam-a ndzə ni’ì mʉ̀, ncèp àm cum sə̀’ sə ntʉʉ̀ wèŋ fana yusə̀ wèŋ fek mʉ yà’ pwe’fo’, wèeŋ nə tse’ yà’. ⁸Yusə̀ yà’a gʉ̀gə̀ ŋkuŋ bwìŋ jəŋ Tɛ̀’ am də yi kə̀kuk, a ŋga wèeŋ co ntaaŋ tʉ sə̀ wèŋ sə zəm ŋgwì ŋkʉ̀ʉŋ. Yà’sə nə niŋtsok sə̀’ jəja də wèeŋ bwe am.

⁹<<Mʉ̀ a dzəm weŋ nsàp nə̀ co Tɛ̀’ am dzəmgə̀ mʉ. Wèeŋ sə lo mantombì bə nsàp mandzə̀ nə̀ co mʉ̀ sə dzəm mali weŋ. ¹⁰A ye-a ŋga wèŋ sə nòŋsə lʉ̀ʉk am sə fana mʉ nə sə dzəm mali weŋ fo’. Yà’ mègù sə̀’ mvə̀’nə̀ mʉ̀ a nòŋsə lʉ̀ʉk Tɛ̀’ am fana yi sə dzəm mali mʉ sə̀’ yè’e. ¹¹Mʉ̀ tsə̀’ nòŋsə fa weŋ bum yè’e mantombì ya ŋga kwəkwa nə̀ mʉ̀ tse’ nə, wèeŋ tse’ nà’ yàwèŋ sə̀’, ya kwəkwa nə̀ njàwèŋ nə nà’a rwiŋ wesə dak nə̀ dak. ¹²Lʉ̀k àm nə̀ mʉ̀ sə fa weŋ nə nè’ də, Wèeŋ sə dzəm mòk bə mòk sə̀’ mvə̀’nə̀ mʉ̀ a dzəm weŋ.

¹³<<Nsàp dzədzəm mòk ka nsàp nè’e mok gʉŋ casə fe’lə nə̀ də ŋwè dzəm ŋge’ ye wèŋ vɛ’ɛ tə̀tè nə kə fa ni’ ye də yi kpʉ bʉ̀ʉ tu yà’wèŋ. ¹⁴A ye-a ŋga wèŋ sə nòŋsə lʉ̀ʉk am sə fana ye də wèeŋ ŋge’ am. ¹⁵Mʉ nə kà weŋ də ŋkwɛ̀ŋ mok sə to, bʉ̀ʉsə̀ kaco moŋkwɛ̀ŋ riŋ wes yusə̀ ŋkwà’ ŋwə̀ ye nə sə gʉ̀ pwe’fo’ yeŋ. Mʉ nə to weŋ lɛ də ŋge’, bʉ̀ʉsə̀ mʉ̀ a tsòho wes fa weŋ bum sə̀ Tɛ̀’ am a tsə̀’ mʉ sə pwe’ nə̀ pwe’. ¹⁶Wèŋ a ka mʉ wèŋ cokfis jəŋ, mʉ̀ a cokfis jə weŋ mʉ̀, nə tumsə lo weŋ də wèeŋ lo, nə kə zəm fa mʉ nto’ ŋkʉ̀ʉŋ ya nto’o sə cum mali fo’. Wèeŋ gʉ̀ vɛ’nə fana yusə̀ wèŋ fek Tɛ̀’ am yà’ mʉnə liŋ am pwe’fo’, yi nə fa weŋ yà’. ¹⁷Lʉ̀k àm nə̀ mʉ̀ sə fa weeŋ nè’e də, wèeŋ dzəm mòk bə mòk.>>

Jisòs Dʉk Də, Nzeŋgòŋ Nə Nə Bɛŋ Weŋ

¹⁸Jisòs nə à sə cèp lòmalì mantombì də, <<A ye-a ŋga bʉ̀ʉ sə̀ sənə nzeŋgòŋ nə bɛ̀ŋ weŋ, wèŋ riŋ də wo à bɛ̀ŋ to ntòmʉ̀ ŋkuŋ nə sə bɛŋ weŋ. ¹⁹Wèŋ ànə ye-a bʉ̀ʉ nzeŋgòŋ sə wèŋ bwɛ̀rɛ bʉ̀ʉ sə̀ sənə nzeŋgòŋ sə wèŋ dzəm weŋ bʉ̀ʉsə̀ də wèeŋ bʉ̀ʉ awo. Megu kə də mʉ̀ a cokfis weŋ mʉtsətsə’rə̀ə bʉ̀ʉ sə̀ sə nzeŋgòŋ sə fana wèŋ ka mok bʉ̀ʉ awo yeŋ. Nà’a njo nə̀ wo sə bɛ̀ŋ weŋ nə. ²⁰Wèeŋ kà də wèeŋ swi ncèp nə̀ mʉ̀ à tsə̀’ weŋ fa’ nà’a dʉk. Də, kaco mo ŋkwɛ̀ŋ yam ghak ŋwə̀ nə̀ yi sə fàk bohònà’ yeŋ. Bʉ̀ʉ sə̀ wo à bɛ̀ŋ mʉʉ nə bɛŋ li weŋ sə̀’. Bʉ̀ʉ sə̀ wo à dzəm ncèp àam, nə dzəm li ncèp awèŋ sə̀’. ²¹Wo nə gʉ weŋ nsàap bʉp yà’sə pwe’ bʉ̀ʉsə̀ də wèeŋ bʉ̀ʉ am, nə ye sə̀’ bʉ̀ʉsə̀ də wo ka ŋwə̀ nə̀ yi tumsə və̀ mʉ tsenə nə riŋ. ²²Ànə ye-a də mʉ̀ a ka yumok bohòwo kə cep bwɛ̀rɛ də bʉp awo kà mʉ tuhù wo ye. Nə ye də nə̀ mʉ̀ a və̀, nə kə tsok wo laŋ fana mandzə̀ nə̀ co wo swihi nə mok bʉ̀ə̀. ²³Ŋwə̀ nə̀ yi bɛ̀ŋ-a mʉ, ye də yi bɛ̀ŋ Tɛ̀’ am sə̀’. ²⁴Ànə ye-a də mʉ̀ à ka nsàap maŋgəŋgèeŋ sə̀ ŋwə̀ nəmòk ka gʉ yuk mʉ lisə̀ wo gʉ, bwɛ̀rɛ də bʉp awo kà mʉ tuhù wo ye. Nə ye də ŋga’a yè’e, wo a yə yà’ bə lis awo laŋ, nə sə bɛŋ mali mʉ ves Tɛ̀’ am ba fo’. ²⁵Me’rə yà’a ye vɛ’nə ntɛ̀ŋ, ya yà’a kə kʉrə təəŋ mvə̀’nə̀ wo à còm nòŋsə ndzənə ŋwàk Nwì də, <Wo à bɛ̀ŋ mʉ wà jì njo yà’a.>

²⁶<<Wèeŋ kà swì də ŋgà ntip nə sə və̀ə swì. Ghà nə̀ mʉ̀ lòbohòTɛ̀’ am fana mʉ nə tumsə vesə fa weŋ yi. Yi yòŋsə̀ nə̀ yi tesə və̀ bohòTɛ̀’ am. Yi nìtsə̀’ fagə̀ bwìŋ zìnə nə yi. Yi nə kə təəŋ ma nə̀ njàm, nə sə tsoho fa bwìŋ nsàp ŋwə̀ nə̀ mʉ̀ cu nə. ²⁷Wèeŋ yàwèŋ sə̀’ bʉ̀ʉ sə̀ aco wèŋ tsoho fa bwìŋ bə liŋ am sə̀’, bʉ̀ʉsə̀ à yè yèe, a sə cu vesùwèŋ mvwe’ mò’fis.

¹<<Mʉ̀ tsə̀’ fa weŋ bum yè’sə ya ŋga bwìiŋ yè ŋgòfa weŋ ŋgə’ fana wèŋ kà maŋkwɛ̀ŋ sòòŋ fohòlò. ²Wo nə jum fis weŋ mʉmvwe’ ndap pìriyà. Mvə̀k sə və̀ə nə̀ wo nə zə weŋ bə zə mwè nə sə tsəm də wo sə gʉ̀ fàha Nwì. ³Wo nə gʉ weŋ nsàap bum yè’sə bʉ̀ʉsə̀ wo ka mʉ ves Tɛ̀’ am ba fo’ riŋ. ⁴Megu də mʉ̀ sə tsòho fa weŋ bum yè’sə ŋga cu nto cuu ya ŋga yà’a kə ye nùu, wèŋ tsərə tse’ də mʉ̀ ànə tsok weŋ laŋ də a nə̀ ye vɛ’nə. Mʉ̀ à ka weŋ bum yè’e mantombì tsok fa bʉ̀ʉsə̀ mʉ̀ a sə cugə̀ vesùwèŋ.

Fàak Sə̀ Ŋgà Ntip Nə Nə Gʉ

⁵<<Mʉ̀ sə tsə̀’ weŋ yà’ ŋga’a bʉ̀ʉsə̀ mʉ̀ tə mok ŋgòbwì foho lòyu am bohòŋwə̀ nə̀ yi à tum və̀ mʉ tsenə nə. Mègù kə də wèŋ pwe’fo’, ŋwə̀ nə̀ mò’fis sə kà mʉ də mʉ̀ sə lòyè’sə fòlɛ sə̀’ fek lok. ⁶Yàwèŋ mègù də bum sə̀ mʉ̀ sə tsə̀’ weŋ yè’sə sə gʉ̀ ntʉʉm awèŋ kà kwa. ⁷Mʉ̀ sə tsə̀’ weŋ lɛ zìnə də bòghak də mʉ me’rə weŋ nə lo, bʉ̀ʉsə̀ mʉ kà-a lòfana Ŋgà Ntip nə nə kà ŋgòkə cu wenə wèŋ və̀. A ye-a ŋga mʉ̀ lòkə̀ dzèŋ mbwa fana mʉ nə tumsə tsoŋ və yi ŋgòkə̀ cu wenə wèŋ. ⁸Ghà nə̀ yi və̀ə fana yi nə gʉ nzeŋgòŋ nə ŋgòrì ncu nə̀ bʉp nə ye ncu nə̀ kə̀kʉrə̀, nə ye mandzə̀ nə̀ Nwìi nə kə sak nzeŋgòŋ nə. ⁹Yi nə niŋtsok rɛŋsə fa wo də yà’wèeŋ ŋgàa gʉ̀ bʉp bʉ̀ʉsə̀ wo à ka bohòmʉ̀ dzəm. ¹⁰Yi nə rɛŋsə wo də mʉ ŋwə̀ nə̀ kə̀kʉrə̀. Yi nə tsok rɛŋsə fa wo yè’sə bə mandzə̀ nə̀ də mʉ nə me’rə fɛɛŋ, nə lo bohòTɛ̀’ am fana wèŋ kà mʉ mok sə yə fe’lə̀. ¹¹Yi nə rɛŋsə fa bwìŋ jòŋ awo bə ma nə̀ sak nzak sə̀’ bʉ̀ʉsə̀ bwìiŋ nə ye də nzak ko ŋkum nə̀ yi tse’ nzeŋgòŋ yi nə.

¹²<<Bum cu wùriŋ sə̀ mʉ̀ ka weŋ ntòtsoho fa, megu də mʉ tsoho fa-a weŋ yà’ ŋga’a pwe’, yà’ ghak weŋ ŋàŋ. ¹³Megu də ghà nə̀ Yòŋsə̀ nə̀ yi rɛŋsə fagə̀ bwìŋ zìnə nə və̀ə fana yi nə sə gʉmsə lo weŋ mvwe’ sə̀ ŋgòrì zìnə nə pwe’. Yi nə kà bum bə tu ye sə cèp, yi nə sə cep bum sə̀ yi yuk və̀ ye yà’ sə̀’ yu’u. Yi nə tsoho rɛŋsə fa weŋ bum mok sə̀ yà’a nə̀ kə̀ ye ntsə’mòk mantombì sə̀’. ¹⁴Yòŋsə̀ ànə nə gʉ mʉ, mʉ̀ ye ŋwə̀ nə̀ ghaŋ bʉ̀ʉsə̀ bum sə̀ yi nə niŋ tsoho fa weŋ yà’ sə nə tesə bohòmʉ̀. ¹⁵Bum sə̀ Tɛ̀’ am tse’ pwe’ a sə̀’ yàm, fana nà’a njo nə̀ mʉ̀ dʉk weŋ də Ŋgà Ntip nə nə sə tsoho fa weŋ bum sə̀ yà’ tesə və̀ bohòmʉ̀ sə.>>

Jisòos Ŋwə̀ Nə̀ Yi Gha’ Nzeŋgòŋ Nə Yi

¹⁶Jisòs à dʉk fa bwe ye wèŋ dʉk də, <<Anə ca mvə̀k momjo wèŋ kà mʉ mok sə yə fe’lə̀. A cà fe’lə mvə̀k momjo sə̀mok fana wèŋ ye fe’lə mʉ.>> ¹⁷Ŋgàa fàak ye mok wèŋ a fe’rə kɛ’cà mʉŋgorə̀ wo anə də, <<Yi sə cèp yè’sə də yà vɛ’nə ɛ? Yi sə dʉhʉ yusə də, <Mvə̀k momjo wèeŋ nə kà mʉ yə, a kə̀ cà fe’lə mvə̀k momjo sə̀mok fana wèŋ ye mʉ.> Yi cèp vɛ’nə, nə sə dʉk də, <A bʉ̀ʉsə̀ mʉ̀ sə lòbohòTɛ̀’ am> wèŋ yè’sə bʉ̀ʉ yà? ¹⁸Ncèp nə̀ yi sə cèp nà’ də mvə̀k momjo nə yè’sə dalɛ? Mvə̀k momjo ànə vès ka yàvès bə zeŋ rɛɛŋ.>> ¹⁹Ànə geŋ Jisòs riŋ də wo sə dzəm ŋgòfek yi yumok fana yi dʉk fa wo də, <<Wèŋ sə mərə yè’e ncèp nə̀ mʉ̀ dʉk fa weŋ də mvə̀k momjo wèeŋ nə kà mʉ mok yə, a cà mvə̀k momjo wèŋ ye fe’lə mʉ sə̀mok nə à? ²⁰Mʉ tsok fa weŋ ŋkèm ncèp də, wèeŋ nə waŋ vɛ’ɛ manziìŋ manziŋ, fana bʉ̀ʉ sə̀ sə nzeŋgòŋ sə wèŋ sə kwa ma njàwo kwaa. Ntʉʉm awèeŋ nə bʉp weŋ wùriŋ fana ntʉʉm awèŋ sə̀ yà’ bʉp weŋ vɛ’ɛ sə nə bʉʉŋ kwa fe’lə sə̀’. ²¹Anə ye co ŋwà nə̀ yi sə ghà mwe. A yèto, ntʉm bʉp yi də mvə̀k ŋgə’ ye və̀ laŋ. Ghà nə̀ yi dzə wes mo nə fana yi kà ŋgə’ nə̀ yi anə ye nə mok tsərə̀. Yi nə sə kwa mok kə kwaa də yi dzə mwe sə nzeŋgòŋ. ²²Anə ye bohòwèŋ sə̀’ vɛ’nə. Ŋga’a yè’e ntʉʉm awèŋ sə bʉp weŋ, megu kə də ghà nə̀ mʉ nə kə̀ ye fe’lə vesùwèŋ sə̀mok fana wèeŋ nə kwa mvə̀k ànə wùriŋ. Mandzə̀ nə̀ co də ŋwə̀ nəmòk gʉ to də ya wèeŋ kà mok kwa fe’lə̀, kà mok sə̀’ ye.

²³<<A kə̀ dzèŋ nùmbu ànə fana yà’a nə rɛɛŋ bohòwèŋ, wèŋ kà mʉ yumok mok fek fe’lə̀. Mʉ tsok fa weŋ ŋkèm ncèp dʉk də, yusə̀ wèeŋ fek-a Tɛ̀’ am yà’ mʉnə liŋ am pwe’, yi nə fa weŋ yà’. ²⁴Yà’ kə̀ dzèŋ tə̀tè ntinə ŋga wèŋ ka yumok mʉnə liŋ am lɛŋ yuk. Wèeŋ lɛŋ bum bohòTɛ̀’ am, ya yi fa weŋ yà’, wèŋ kwa tsə’rə boŋsə riŋ.>>

²⁵Yi à cèp fe’lə fa ŋgàa fàak ye sə wèŋ də, <<Mʉ̀ sə màk fa mègù weŋ bum bə gbʉ’ bə gbʉ’. Mvə̀k sə və̀ə nə̀ mʉ nə kà gbʉ’ mok màk fe’lə̀. Mʉ nə tsok rɛŋsə fa weŋ bum sə̀ yà’ cu bə liŋ Tɛ̀’ am sə mok jəja. ²⁶Ghà ànə ye fana wèeŋ nə sə lɛŋ bum bohòTɛ̀’ am mok bə cùu awèŋ mʉnə liŋ am. Anə kà mok də mʉ kə lɛŋ fa weŋ mʉ̀ mok ye yiskok. ²⁷Tɛ̀’ am bə tu ye yi dzəm weŋ bʉ̀ʉsə̀ wèŋ a dzəm mʉ, nə dzəm tse’ sə̀’ də mʉ̀ à tesə bohòyi. ²⁸A zìnə, mʉ̀ à tesə və̀ bohòyi ŋkuŋ nə və sə nzeŋgòŋ fɛn; nə̀ ŋga’a nè’e mʉ̀ sə də mʉ me’rə ŋgòŋ nə, nə bwi foho lo fe’lə bohòTɛ̀’ am nə.>>

²⁹Ànə geŋ fana ŋgàa fàak ye sə wèŋ dzəm fa yi də, <<A vɛ’nə àlaa. Wù cèp nə ŋga’a mok rərɛŋ, wù sə kà gbʉ’ mok màk. ³⁰Fana vès rɛɛŋ nə nə̀ ŋga’a də wù riŋ bum pwe’fo’. Njo mòk nə̀ də ŋwèe fek wu yusə̀ yà’ cu sə və̀ə yi ŋkuŋ ya wu riŋ yà’a bʉ̀ə̀. Yà’sə gʉ̀ fana vès dzəm zìnə də wù a tesə və̀ bohòNwì.>> ³¹Jisòs nə fek wo də, <<Co yà’sə gʉ̀ weŋ ŋkuŋ wèŋ dzəm à? ³²Wèeŋ yeè, mvə̀k sə və̀ə, aco mʉ̀ dʉk də mvə̀k nə kʉ̀rə laŋ, nə̀ wo nə bɛ’ samsə weŋ zəzok fana ndàaŋwè pwe’ caŋ lo nda’à yi, wèŋ me’rə tes mʉ mʉmʉ̀. Megu də mʉ nə kà mʉmʉ̀ sə̀ ye bʉ̀ʉsə̀ Tɛ̀’ aam nə ye vesi. ³³Mʉ̀ cèp bum yè’sə bohòwèŋ ya wèeŋ cum mam vesùwèŋ nə tse’ fifi. Sənə nzeŋgòŋ nè’e, wèeŋ nə sə tse’ megu ca ŋgə’. Megu də wèeŋ ko ntʉm. Mʉ̀ a ghak nzeŋgòŋ nə laŋ.>>

Jisòs Sə Lɛŋ Fa Bwe Ye Wèŋ Pìriyà

¹Jisòs ànə cep wes bum yè’sə fana yi kʉk gesə lo mʉbu, nə dʉk də, <<Tɛ̀’, mvə̀k nə̀ wù à gʉ̀ fʉ̀hʉ nòŋsə nə kə̀ dzèŋ laŋ. Gʉ-a də ya mo yònə tse’ kə̀kuksə̀. Mʉ nə gʉ yàm sə̀’ co bwìŋ ye ŋàaŋ yo. ²Wù a fa mo yònə ŋàŋ mʉtuhù bwìŋ pwe’fo’, ya yi fa lùŋ nə̀ nà’a nə̀ kà mè nə bohòbʉ̀ʉ sə̀ wù a cokfis, nə fa ndzə bohòyi sə. ³Lùŋ nə̀ nà’a nə̀ kà mè yuk nə, a ŋgòrì wu, nə̀ wu Nwì nə̀ wù mègù mò’fis nə ye zìnə nə, nə ye sə̀’ ŋgòrì mʉ̀ʉ Jisòs Krɛst nə̀ wù à tum vèsə sə nzeŋgòŋ nə. ⁴Mʉ̀ a kùksə wu sə nzeŋgòŋ fɛɛŋ. Mʉ̀ a gʉ̀ wes fàak sə̀ wù a tum tsə mʉ də mʉ kə gʉ sə laŋ. ⁵Ye də Tɛ̀’, jəŋ lo-a mʉ, ya mʉ kə cum vesù. Gʉ mʉ ya mʉ kə tse’ kə̀kuksə̀ mvwe’ mò’fis mvə̀’nə̀ vesù ànə tse’ to nà’ ŋga wù ka nzeŋgòŋ nə ntògʉ lok yà’a.

⁶<<Bʉ̀ʉ yo sə̀ wù a cokfis wo sə nzeŋgòŋ, nə fa ndzə bohòmʉ̀ sə, mʉ̀ a gʉ̀ wo ŋgòrì wu sə̀ bòŋ. Wo à ye bʉ̀ʉ sə̀ yò, wù nə jəŋ wo, nə fa ndzə bohòmʉ̀. Wo cu sə nòŋsə ncèp nə̀ njònə sə̀’. ⁷Wo a rì tse’ mok ŋga’a zìnə laŋ də bum sə̀ mʉ̀ tse’ yà’ pwe’fo’ a tesə və̀ bohòwù. ⁸Mʉ̀ a càsə fa wo ncèp nə̀ wù a fa nà’ ndzə bohòmʉ̀ nə fana wo a ko jə nà’ laŋ nə riŋ zìnə də mʉ̀ a və̀ bohòwù. Wo a dzəm tse’ sə̀’ də wù a tum vèsə mʉ sə nzeŋgòŋ anə.

⁹<<Mʉ̀ sə lɛŋ fa wo. Mʉ̀ sə kà bohòbʉ̀ʉ sə̀ sənə nzeŋgòŋ anə nduk pwe’ lɛŋ fa. Mʉ̀ sə lɛŋ fa bʉ̀ʉ sə̀ wù a fa wo ndzə bohòmʉ̀ yè’sə, bʉ̀ʉsə̀ wo bʉ̀ʉ yo wèŋ. ¹⁰Yàm pwe’fo’ sə̀ yò, Yòye bwi pwe’fo’ sə̀’ sə̀ yàm. Bwìŋ sə yə də mʉ tse’ kə̀kuksə̀ bʉ̀ʉ tu awo sə. ¹¹Mvə̀k kʉ̀rə ŋga’a nə̀ də mʉ nə bwi foho lo bohòwù laŋ. Mʉ nə me’rə nzeŋgòŋ nə fana wo cum mali yàwo ntòca. Tɛ̀’ nə̀ wu rərɛŋ, sə jəŋ ŋkərə̀ bohòwo bə nsàp ŋàŋ yònə̀ wù ànə fa mʉ nə, ya wo cum cù mò’fis sə̀’ mvə̀’nə̀ vesùu cù mò’fis yè’e. ¹²Ghà nə̀ mʉ̀ a cu ntòvesi wèŋ, mʉ̀ sə jəŋ ŋkərə̀ bohòwo bə ŋàaŋ yo sə̀ wù à fa ndzə bohòmʉ̀ sə. Mʉ̀ a jə ŋkərə̀ bohòwo bə̀boŋ fana yumok kà wo gʉ̀. Nà’a njo nə̀ mòk a ka mʉtsətsə’rə wo bisə nə. A bisə mègù yi nə̀ yi à ye ŋgòbisə tsə nə. Yi a bisə vɛ’nə ya yusə̀ wo à còm nòŋsə yà’ ndzənə ŋwàk Nwì də yà’a nə̀ ye sə kʉrə vɛ’nə.

¹³<<Mʉ̀ sə də mʉ bwi foho lo ŋga’a mok bohòwù. Megu kə də mʉ̀ sə cèp bum yè’e ŋga mʉ̀ cu ntòsə nzeŋgòŋ anə, ya wo kwa sə̀’ dak nə̀ dak mvə̀’nə̀ mʉ kwagə̀ yàm. ¹⁴Mʉ̀ a càsə fa wo ncèp nə̀ njònə laŋ, fana nzeŋgòŋ nə a bɛ̀ŋ wo bʉ̀ʉsə̀ wo ka yàwo mok bʉ̀ʉ nzeŋgòŋ nə yeŋ, sə̀’ mvə̀’nə̀ mʉ̀ ka yàm ŋwə̀ə nzeŋgòŋ nə sə̀ ye yè’e. ¹⁵Ka də mʉ̀ sə lɛŋ yè’sə də wu fis gɛsə wo sə nzeŋgòŋ anə yeŋ. Mʉ̀ sə lɛŋ də wu sə jəŋ ŋkərə̀ bohòwo ya ŋwə̀ nə̀ yi ŋwə̀ nə̀ bʉp nə kà wo yumok bʉp gʉ̀. ¹⁶Wo ka bʉ̀ʉ nzeŋgòŋ nə yeŋ, sə̀’ mʉmvə̀’nə̀ mʉ̀ ka ŋwə̀ə nzeŋgòŋ nə yeŋ yè’e. ¹⁷Niŋtsok fa wo zìnə yònə ya wo ye gɛsə yàwo zok co bʉ̀ʉ yo. Ncèp nə̀ njòo zìnə nə. ¹⁸Mvə̀’nə̀ wù ànə tum gesə lo mʉ sənə nzeŋgòŋ nə fana mʉ̀ sə tum lòwo ca sə̀’ vɛ’nə. ¹⁹Mʉ̀ sə nòŋsə ni’ àm zok bohòwù bʉ̀ʉ wo ya ŋga wo ye yàwo zok bə ncèp nə̀ njònə̀ zìnə nə.

²⁰<<Mʉ̀ sə kà bə tu bʉ̀ʉ sə̀ wo fɛɛŋ yè’e lɛŋ mègù, mʉ̀ sə lɛŋ bə tu mok sə̀ wo nə yuk ncèp nə bohòyè’sə wèŋ, nə dzəm bohòmʉ̀ sə̀’. ²¹Mʉ̀ lɛŋ də wo ye pwe’ cù mò’fis. Tɛ̀’, mʉ̀ lɛŋ də mvə̀’nə̀ vesùu mò’fis yè’e fana wo ye vesùwèŋ sə̀’ vɛ’nə. Wo ye vɛ’nə ya bʉ̀ʉ sə̀ sənə nzeŋgòŋ nə riŋ də wù a tum və̀ mʉ sə nze anə. ²²Mʉ̀ a fa wo sə̀ nsàp kə̀kuk nə̀ wù à fa mʉ nə, də ya wo ye cù mò’fis sə̀’ co vesù. ²³Mʉ nə ye sə ntʉʉ̀ wo, wù ye bwi yòsə ntʉʉ̀ mʉ̀ ya wo pwe’ ye cù mò’fis nə̀ mò’fis. A ye vɛ’nə fana nzeŋgòŋ nə riŋ də wù a tum mʉ, nə riŋ sə̀’ də wù dzəm bʉ̀ʉ am yè’sə wèŋ sə̀’ mvə̀’nə̀ wù dzəm mʉ. ²⁴Tɛ̀’, bʉ̀ʉ sə̀ wù a fa mʉ yè’sə, mʉ̀ dzəm də wo ye vesi wèŋ mvwe’ sə̀ mʉ̀ cu, ya ŋga wo ye kə̀kuk nə̀ wù ànə fa mʉ ŋga wù ka nzeŋgòŋ nə ntògʉ nə. Wù à fa mʉ nsàp kə̀kuk ènə bʉ̀ʉsə̀ wù à dzəm mʉ. ²⁵Tɛ̀’ nə̀ wu rərəŋ bə mandzə̀ə yo pwe’, nzeŋgòŋ nə ka wu riŋ, mʉ̀ rì wu yàm laŋ. Bʉ̀ʉ yo yè’e wèŋ rì sə̀’ də wù a tum və̀ mʉ tsenə. ²⁶Mʉ̀ a gʉ̀ wo, wo riŋ wu. Mʉ nə sə gʉ mali vɛ’nə ya wo tse’ sə̀’ nsàp dzədzəm nə̀ wù a tse’ bohòmʉ̀ nə, ya ŋga mʉ nə ye sə ntʉʉ̀ wo anə sə̀’.>>

Wo Ko Jisòs

(Mat. 26:47-56; Mak 14:43-50; Luk 22:47-53)

¹Jisòs ànə lɛŋ wes me pìriyà ye nə fana yi jəŋ ŋgàa fàak ye wèŋ bə yà’wèŋ to ndzəp mòk nə̀ wo togə̀ nà’ də Kidròŋ, nə tesə lo mvwe’ gadì mòk fa’nə. ²Judàs nə̀ yi ànə seŋ Jisòs nə à rì mʉmvwe’ ànə sə̀’ bʉ̀ʉsə̀ Jisòs bə ŋgàa fàak ye wèŋ à sə kə̀ be’ləgə̀ fo’. ³Fana Judàs nə jəŋ ŋgo sojàa bʉ̀ʉ Rumà wèŋ nə ye bə ŋgàa kʉ̀k ndap Nwì nə̀ ghaŋ sə̀ bʉ̀ʉ Faràsi wèŋ à tum wo sə. Bʉ̀ʉ yè’sə wèŋ à bwe’ tse’ laàm bə kàk wèŋ nduk, nə bəhə tse’ lo bum dzè’ sə̀’.

⁴Wo à kə̀ dzèŋ mvwe’ sə̀ Jisòs à ye sə fana ŋga yi riŋ yusə̀ yà’a nə gʉ bohòyi sə laŋ. Ànə geŋ yi tesə təəŋ və mantombìi yà’wèŋ, nə fek yà’ də, <<Wèŋ sə làp ndà?>> ⁵Wo cep fəsə də, <<Vès sə làp Jisòs nə̀ mvwe’ lak Nazàrɛ nà’a.>> Jisòs dʉk fa wo də, <<A mʉ̀.>> Ànə ye yè’sə ŋga Judàs nə̀ yi à sèŋ Jisòs nə tə kok sə̀’ fo’ bə yà’wèŋ. ⁶Mvə̀’nə̀ Jisòs à dʉk fa wo də, <<A mʉ̀>> sə fana bʉ̀ʉ sə wèŋ sooŋ lo ma ŋkwə̀ŋkwɛ̀ŋ, nə coho gbʉ sə nze. ⁷Yi fek fe’lə yà’ sə̀mok də, <<Wèŋ sə làp ndàlɛ?>> Bʉ̀ʉ sə wèŋ cep sə̀’ ŋkuŋ də, <<Vès sə làp Jisòs nə̀ mvwe’ lak Nazàrɛ.>> ⁸Jisòs dʉk də, <<Mʉ̀ tsə̀’ weŋ fa’ laŋ də a mʉ̀ nə. A ye-a də wèŋ sə làp mʉ fana wèŋ kà-a bʉ̀ʉ yè’e wèŋ yumok gʉ̀, wèŋ me’rə wo lo yàwo sə.>> ⁹Yi à cèp vɛ’nə ya yà’a ye megu sə̀’ mvə̀’nə̀ yi ànə cep də, <<Bʉ̀ʉ sə̀ wù a fa wo ndzə bohòmʉ̀ yè’e pwe’, nə̀ mò’fis nə kà bisə̀ ja’à.>>

¹⁰Ànə ye vɛ’nə fana Saimʉ̀ Pità cok fis fèk ye mà mba’à, nə gbɛ’ ci’ mak fa moŋkwɛ̀ŋ ŋkum ŋgà fa satikà’ ntu’u ma zʉ sə nze. Liŋ moŋkwɛ̀ŋ ànə à ye Malekù. ¹¹Jisòs à yə vɛ’nə fana yi dʉk fa Pità nə də, <<Sòfəsə gesə fèk nə mà mba’à. Wù sə də mʉ kà ŋgə’ nə̀ Tɛ̀’ am a fa mʉ də mʉ ye nà’ nə yə à?>>

Wo Sak Jisòs Mʉ Kaŋsurù

(Mat. 26:57-65; Mak 14:53-72; Luk 22:54-71)

¹²Ànə geŋ ŋkwà’ ŋwə̀ sojà nə kə jəŋ ŋgo sojà ye wèŋ, bə yà’wèŋ kə ko kiŋ Jisòs nə. Ŋgàa tək mok sə̀ mʉmvwe’ ndap Nwì nə̀ ghaŋ nə à tɛsə wo sə̀’. ¹³Wo à ko yi, nə jəŋ lo to yi ntòbohòAnàs. Anàs ènə à ye tɛ̀’ɛ ŋgwe Kayofàs. Kayofàs nə ànə ye ŋkum ŋgà fa satikà’ bə lùmŋgòŋ ànə yi. ¹⁴Ŋwə̀ nə̀ yi à dʉk fa bʉ̀ ŋkwàha bʉ̀ʉ Jus wèŋ də, a bə̀boŋ co ŋwə̀ nə̀ mò’fis kpʉ mʉnə tu bwìŋ pwe’ nə, à ye sə̀’ Kayofàs ènə.

Pità Bɛ̀ŋ Jisòs

(Mat 26:69-70; Mak 14:66-68; Luk 22:55-57)

¹⁵Mvə̀k ànə à ye, Saimʉ̀ Pità bə mofàk Jisòs nəmòk à yù lòJisòs nə. Ŋkum ŋgàa fa satikà’ nə à rì mofàk Jisòs mòk nə fana yi me’rə nà’, nà’ ni lo mʉmvwe’ ntòmbi ye nə. ¹⁶Pità à təəŋ mam ye mvwe’ ncùu ŋka’ sə, nə kà fwa ni lò. Ànə geŋ mofàk Jisòs nə̀ ŋgà fa satikà’ ànə riŋ nà’ nə kə ye mʉŋwà nə̀ yi sə kʉ̀k ncùu sə, bə nà’ cep fana wo to nisə lo Pità sə̀’ mbwa. ¹⁷Mvə̀’nə̀ wo à sə də wo ni lo fana mʉŋwà nə̀ yi sə kʉk ncùu sə yi nə dʉk fa Pità də, <<Mʉ̀ kwà’ də wu mofàk ŋgà’ ànə mòk, kè ka’-ɛ?>> Pità cep fəsə fa nà’ də, <<Hai’, mʉ̀ ka mòk yeŋ.>>

¹⁸Ànə ye ndzəm ànə ŋga mbʉəp sə ko fana bwe fàak ŋgà fa satikà’ bə ŋgàa kʉ̀k ndap Nwì nə̀ ghaŋ nə mok wèŋ fimsə mis, nə təəŋ fo’ sə yuk. Fana Pità lo kə təəŋ sə̀’ bə yà’wèŋ, nə sə yuk ye sə̀’.

¹⁹Ŋkum ŋgà fa satikà’ nə̀ liŋ yee Anàs nà’a à fek Jisòs bum mok bə liŋ ŋgàa fàak nà’ nə ye bə yusə̀ nà’ sə yə’rə fa bwìŋ sə. ²⁰Jisòs də, <<Mʉ yə’rəgə̀ bwìŋ jəja mʉmvwe’ ndap pìriyà nə ye mʉmvwe’ ndap Nwì nə̀ ghaŋ nə, mvwe’ sə̀ bʉ̀ʉ Jus wèeŋ kə̀ tɛsgə̀ tu. Mʉ̀ kà yàm yumok mvwe’ sə̀swihì cèp yuk. ²¹Ye də wù sə fek fe’lə mʉ yè’sə bʉ̀ʉ yà? To fek lɛ bʉ̀ʉ sə̀ wo à yuk bum sə̀ mʉ cèpgə̀ sə, ya wo tsok fa wu wo. Wo riŋ wes bum sə̀ mʉ cèpgə̀ sə vɛ’ɛ làaŋ.>> ²²Jisòs ànə cep vɛ’nə fana dògarì mòk nə̀ yi à ye fo’ ləp sam yi bə bo mpaaŋ. Yi də, <<Kàcò, yà’a mvə̀’nə̀ wo cèpgə̀ bohòŋkum ŋgà fa satikà’ vɛ’nə à?>> ²³Jisòs dʉk fa nà’ də, <<A ye-a də mʉ̀ cèp bə jòŋ bwɛ̀rɛ də wù dʉk sə̀ də mʉ̀ sə cèp bə jòŋ. A ye-a ŋga yusə̀ mʉ̀ cèp sə mvə̀k nə, wù ləp mʉ kə bʉ̀ʉ yà?>> ²⁴Ànə geŋ Anàs tumsə lo Jisòs nə mvə̀’nə̀ wo tasə tse’ yi bə kwaŋ bohòKayofàs nə̀ yi sə̀’ ŋkum ŋgà fa satikà’ mòk.

²⁵Saimʉ̀ Pità nə à təəŋ, nə sə yuk mali mis sə fana wo dʉk fa yi də, <<Vès kwà’ də wu lɛ mo ŋgà fàk ŋgà’ ànə mòk kè ka’-ɛ?>> Pità dzeeŋ də, <<Hai’ kà mʉ yàm to.>> ²⁶Mo ŋkwɛ̀ŋ ŋkum ŋgà fa satikà’ mòk, nə̀ yi à ye moma ŋwə̀ nə̀ Pità anə gbɛ̀’ tiŋ mak yi ntu’ nə cep ye sə̀’. Yi dʉk də, <<Mʉ̀ tsəm də mʉ̀ anə ye wu mʉ gadì bə lis am.>> ²⁷Pità nə dzeeŋ fe’lə sə̀mok fana ntomvəp to sə̀’ ghà ànə.

Jisòs Tə Mantombìi Palè

(Mat. 27:1-2, 11-14; Mak 15:1-5; Luk 23:1-5)

²⁸Mvəp à sə to nə̀ zəzòŋ fana wo jəŋ fis Jisòs mvwe’ ndap Kayofàs, bə yà’wèŋ lo mvwe’ nto’ Govənònə yi mo lak Rumà. Bʉ̀ʉ Jus wèŋ à ka yàwo mbwa ni bʉ̀ʉsə̀ wo à sə dzəm ŋgònòŋsə ni’ awo rərɛŋ ya wo kə zʉ ŋkàk pasobà àwo18:28 Bʉ̀ʉ Jus wèŋ à tse’ lʉ̀ʉk mok sə̀ ŋgòjə ni’ awo də wo rərɛŋ mantombìi Nwì fana wo kà mʉmvwe’ ndaap bʉ̀ lakmvum sə ni bwɛ̀rɛ wo gʉ bʉpsə ni’ awo sə, nə kà mandzə̀ nə̀ ŋgòkùksə Nwì tse’. Nà’a njo nə̀ wo à ka mʉ nto’ Palè ni nə.. ²⁹Ànə geŋ GovənòPalè nə kə tseŋ wo sə mbi, nə fek yà’wèŋ də, <<Wèŋ ko və̀ ŋwə̀ nè’e bʉ̀ʉ yà?>> ³⁰Wo dʉk fa nà’ də, <<Anə ye-a də ŋwə̀ ènə kà ŋwə̀ nə̀ bʉp yeŋ bwɛ̀rɛ də vès kà yi bohòwù fɛɛŋ jə və̀.>> ³¹Palè nə dʉk fa wo də, <<Wenə wèeŋ foho lo, wèeŋ kə sak yi mvə̀’nə̀ lʉ̀ʉk awèŋ sə dʉk weŋ.>> Wo dʉk fa yi də, <<Vès ka ŋàaŋ sə̀ ŋgòsak nzak kpʉ bwìŋ tse’.>> ³²Mvə̀’nə̀ wo à gʉ̀ vɛ’nə fana yà’ gʉ də Jisòos kpʉ nsàp kpʉ nə̀ yi à tsə̀’ fa bwìŋ də yi nə kpʉ nà’ nə.

³³Palè à bwì foho ni lòmʉ nto’, nə to Jisòs də nà’a və. Jisòs à və̀ə, yi fek nà’ də, <<Wù də wu ŋkum bʉ̀ʉ Jus ɛ̀?>> ³⁴Jisòs də, <<Yusə̀ wù sə fek mʉ yè’sə tesə kok sə və̀ə wù kè a cùu bʉ̀ʉ mok wèŋ nɛ̀?>> ³⁵Palè dʉk fəsə fa nà’ də, <<Wù yə mʉ co də mʉ ŋwə̀ə Jus à? Ŋgàa fa satikà’ sə̀ ghaŋ bə bʉ̀ʉ yo wèŋ jə və̀ wu bohòmʉ̀ fɛŋ wo. Wù gʉ̀ bʉpsə yà, tsok fa mʉ.>> ³⁶Jisòs də, <<Gaŋ ŋkum sə̀ yàm sə ka sə̀ sə nzeŋgòoŋ fɛŋ yeŋ. Gaŋ yàm sə nə ye-a sə̀ sə nze fɛŋ, bwɛ̀rɛ də bwe fàak am wèŋ lʉ̀ fa mʉ bʉ̀ʉ Jus sə wèŋ də ya wo kà mʉ yumok gʉ̀.>> ³⁷Palè nə fek nà’ də, <<Wù sə də wu ŋkum è kèe yàlɛ?>> Jisòs dʉk də, <<Njo nə̀ mʉ̀ à və̀ sə nzeŋgòŋ fɛŋ bʉ̀ʉ zeŋ nə mègù mò’fis də mʉ niŋtsok fa bwìŋ zìnə nə. Nà’a njo nə̀ wo à dzə mʉ nə. Ŋwə̀ nə̀ yi təəŋ-a ma nə̀ zìnə nə fana yi nə yu’rə bohòmʉ̀ mvə̀’nə̀ mʉ̀ sə cèep.>> ³⁸Palè də, <<Zìnəə yu yà?>> Yi à dʉk wes vɛ’nə fana yi lokok, nə tesə lo sə mbi, nə kə tseŋ bʉ̀ʉ Jus sə̀ wo ca sə. Yi dʉk fa yà’wèŋ də, <<Mʉ̀ ka yàm jòŋ nə̀ ŋgà’ ènə gʉ̀ʉ ye.>> ³⁹Yi cep fe’lə mok sə̀’ də, <<A bum lak awèŋ də ŋkàha pasobàa kə̀ dzèŋgə̀ə, mʉ̀ fis me’rə fa weŋ ŋgà ndapndzəm mòk mò’fis. Ye də wèŋ dzəm də mʉ fis me’rə fa weŋ ŋkum bʉ̀ʉ Jus nə à?>> ⁴⁰Wo à yuk vɛ’nə, wo kɛ’ŋgùŋ dʉk nə̀ bʉp də, <<Vès ka ŋwə̀ ànə dzəm. Fis me’rə fa ves lɛ Bàrabà.>> Bàrabà ènə à ye ncoro’ njə̀ nə̀ kpʉ bwìŋ.

Wo Sak Də Wo Zə Jisòs

(Mat. 27:15-31; Mak 15:6-20; Luk 23:13-25)

¹Ànə ye vɛ’nə fana Palè gʉ wo jəŋ Jisòs nə, nə ləp nà’. ²Sojà wèŋ kə jəŋ ndik sə̀ yà’a njə̀njàk, nə bak yà’, nə tes fa Jisòs nə nà’ mʉ tuhù co tàm ŋkum. Wo jəŋ cə̀k mòk nə̀ bə̀baŋ, nə ni fa yi nà’ co cə̀k ŋkum. ³Wo ye ŋgòvə̀hə bohòyi, nə sə cepsə nà’ co ŋkum. Wo sə dʉhʉ də, <<Mbè ŋkum bʉ̀ʉ Jus wèŋ.>> Wo ywi’lə yi, nə sə ləp yi bə bo.

⁴Palè nə à tesə və̀ sə mbi mvwe’ sə̀ bʉ̀ʉ Jus wèŋ cu sə sə̀mok. Yi dʉk fa yà’ də, <<Wèeŋ yeè, mʉ nə fis və ŋwə̀ ènə sə mbi ya wèeŋ riŋ tse’ də mʉ̀ ka yàm yusə̀ yi bʉpsə sə riŋ.>> ⁵Ànə geŋ Jisòs nə tesə tsoŋ ŋga yi ta tse’ mali tàm njə̀njàk nə mʉ tuhù yi, nə ni tse’ cə̀k ŋkum nə sə̀’. Fana Palè nə dʉk fa wo də, <<Wèeŋ yeè, yi nè’.>> ⁶Ŋgàa fa satikà’ sə̀ ghaŋ bə dògarìi sə̀ mʉmvwe’ ndap Nwì sə wèŋ à yə yi fana wo kɛ’ŋgùŋ, nə sə dʉk də, <<Wèeŋ tɛ’lə yi mʉ ntə̀əŋ. Wèeŋ tɛ’lə yi mʉ ntə̀əŋ.>> Palè nə dʉk fa wo də, <<Wèeŋ jəŋ lo-a, nə kə tɛ’lə yi wèŋ. Bohòmʉ̀ yàm, mʉ̀ ka yàm bʉp nə̀ yi gʉ̀ʉ ye lok.>> ⁷Bʉ̀ʉ Jus sə wèŋ dʉk də, <<A ye-a bə mandzə̀ lʉ̀ʉk avès fana ŋwə̀ ènə nə kpʉ megu kpʉʉ bʉ̀ʉsə̀ yi sə jə ni’ ye də yi mo Nwì.>> ⁸Palè nə à yuk vɛ’nə fana wʉə ko yi vɛ’ɛ wùriŋ. ⁹Yi bwi foho və kə ni lo fe’lə mʉ nto’ anə bə Jisòs sə̀mok, nə fek nà’ də, <<Wù və̀ yè’sə ma fò?>> Jisòs nə kà cù mùk. ¹⁰Palè nə fek nà’ də, <<Mʉ̀ sə cèep, wù kà cèp à? Wù ka riŋ də mʉ̀ tse’ ŋàaŋ sə̀ ŋgòmè’rə wu, wù lo, nə tse’ bwi ŋàaŋ sə̀ co mʉ̀ tɛ’lə wu mʉ ntə̀əŋ sə̀’ riŋ à?>> ¹¹Jisòs dʉk fa nà’ də, <<Fa wu ŋàaŋ yà’sə Nwì. Anə ka-a vɛ’nə yeŋ bwɛ̀rɛ də wù kà ŋàŋ mʉ tuhù mʉ̀ tse’ to. Ŋwə̀ nə̀ yi jə və̀ mʉ, nə kə fa ndzə bohòwù nə gʉ̀ ghak bʉp yi.>>

¹²Palè ànə yuk ncèp ènə fana yi lap mandzə̀ co yi me’rə Jisòs nə lo. Megu kə də bʉ̀ʉ Jus sə wèŋ sə fuŋ mali fo’ də, <<A ye-a ŋga wù me’rə ŋwə̀ ènə fana ye də wù ka mok ŋge’ Kaisà, ŋkum nə̀ ghaŋ nə̀ yi tse’ vesùwèŋ yi mvwe’ lak Rumà nà’a yeŋ. Bʉsə̀ wù riŋ də ŋwə̀ nə̀ yi sə jə-a ni’ ye co ŋkum fana ye də yi sə nə̀ŋ fa ŋkum Kaisà kù mʉ tuhù.>> ¹³Palè nə ànə yuk ncèp ènə fana yi kə fis və Jisòs nə sə mbi, nə ca kok cum mʉmvwe’ kapràak ye. Wo à sə to mvwe’ kapràak sə də, <<Mbàndap lìs.>> Wo to fo’ bə ncèep lak bʉ̀ʉ Hibrù wèŋ də, Gàbàtà. ¹⁴Bum yè’sə ànə sə ye yè’sə ŋga a nùmbu nə̀ ŋga ndzəm seŋ tsoŋ fana ye dzə̀. Mvə̀k ànə a ye sə̀’ ŋga a mvə̀k ŋkàha Pasobà. À sə kʉəp lòco maràŋ fana Palè nə dʉk fa bʉ̀ʉ sə wèŋ də, <<Wèeŋ ja’a ŋkum awèŋ nə nè’.>> ¹⁵Wo kɛ’ŋgùŋ də, <<Jəŋ gɛsə lo yi fo’. Yi kpʉ megu kpʉʉ. Wèeŋ kə tɛ’lə yi mʉ ntə̀əŋ.>> Palè nə fek wo də, <<Mʉ tɛ’lə ŋkum awèŋ nə mʉ ntə̀əŋ nà?>> Ŋgàa fa satikà’ sə̀ ghaŋ wèŋ sə à dʉk yàwo də, <<Vès rì mègù yàvès ŋkum Kaisà yiìyi.>> ¹⁶Yà’a yusə̀ yà’ à gʉ̀ʉ fana Palè me’rə fa wo Jisòs də wo tɛ’lə nà’ mʉ ntə̀əŋ.

Wo Tɛ’lə Jisòs Mʉ Ntə̀əŋ

(Mat. 27:32-44; Mak 15:21-32; Luk 23:26-43)

Fana sojàa sə wèŋ jəŋ lo Jisòs nə. ¹⁷Yi à bə̀k tse’ ntə̀əŋ ye yi mʉ ŋkambə̀hə yi bə tu ye fana bə sojàa sə wèŋ tesə mʉ ntòlak anə, nə lo kə dzeŋ mvwe’ mok sə̀ wo togə̀ fo’ də, Nzʉ̀ə̀ tu bwìŋ. Wo to fo’ bə ncèep lak bʉ̀ʉ Hibrù wèŋ də, <<Gòrìgotà.>> ¹⁸Yà’a mvwe’ sə̀ sojàa sə wèŋ à tɛ’lə yi sə. Wo à tɛ’lə yi bə bʉ̀ʉ mok wèŋ bwìŋ ba. Mòk ye bo ma màk, mòk ye ye bo ma ŋkwìp, Jisòs nə təəŋ ye mʉtsətsə’rə̀.¹⁹Palè ànə com naaŋ yak yumok mʉ tu ntə̀ŋ anə. Yi à còm də, Jisòs nə̀ mvwe’ lak Nazàrɛ, ŋkum bʉ̀ʉ Jus wèŋ. ²⁰Wo à còm yà’ bə ncèep lak zəzok tɛ’. Mòk à ye ncèep lak Hibrù, mòk Rumà nə ye Gris. Bʉ̀ʉ Jus wèŋ a ta yusə̀ wo à còm naaŋ sə vɛ’ɛ bwìŋ ŋkʉ̀ʉŋntɛ̀ŋ, bʉ̀ʉsə̀ mvwe’ sə̀ wo ànə tɛ’lə yi sə à kʉəp lòmʉ ntòlak. ²¹Ŋgàa fa satikà’a bʉ̀ʉ Jus sə wèŋ à yə fana wo kə dʉk fa Palè nə də nà’a kà də <<Nè’e Ŋkum bʉ̀ʉ Jus wèŋ>> còm. Wo də nà’a com lɛ də, <<Ŋwə̀ ènə dʉk yi də yi ŋkum bʉ̀ʉ Jus wèŋ.>> ²²Palè nə dʉk wo də, <<Yusə̀ mʉ̀ còm yà’ laŋ, ye də yà’ mè vɛ’nə.>>

²³Ghà nə̀ sojàa sə wèŋ à tɛ’lə wes yi mʉ ntə̀əŋ anə fana wo jəŋ cə̀ək ye sə, nə gapsə yà’ bòp kwè, sojàa sə jəŋ mò’fis, mò’fis. À bwehe cu mègù mok sàro ye, nə̀ nà’ à ye lòŋtòŋ, nə kà cù mvwe’ sə̀ wo à tè’ tè’lə tse’. ²⁴Ànə geŋ wo dʉk də, <<Vesùwèeŋ kà nà’ sàrə̀ bʉpsə̀. A təm bèŋ fo’ ya a riŋ ŋwə̀ nə̀ yi nə zʉ nà’.>> Yè’sə ànə sə ye vɛ’nə fana yà’ megu mvə̀’nə̀ wo ànə com yà’ ndzənə ŋwàk Nwì sə. Wo ànə com nja də,

Wo a jə cə̀ək am, nə gapsə jəŋ yà’, nə sə təm bèŋ

də ya wo ye ŋwə̀ nə̀ yi nə jəŋ cə̀k àm mòk.

Yà’a mvə̀’nə̀ sojàa sə wèŋ à gʉ̀ sə.

²⁵Bʉ̀ʉ sə̀ wo à təəŋ kʉəp lòmvwe’ ntə̀əŋ sə̀ wo à tɛ’lə Jisòs mbwa sə à ye ma Jisòs nə bə moma ma ye nə nə̀ ŋwàŋwè. Mòk à ye fe’lə fo’ Mèri nə̀ yi ŋgwe Klopà bə Mèri nə̀ mvwe’ lak Màdàlinà nà’a. ²⁶Jisòs ànə ye ma ye bə mofàk ye nə̀ yi à sə dzəmgə̀ nà’ wùriŋ nə mvə̀’nə̀ wo tə kok fo’ fana yi dʉk fa ma ye nə də, <<Màmi, kʉ̀k mo yòo nà’.>> ²⁷Nə bʉʉŋ dʉk fa mofàk ye nə sə̀’ də, <<Kʉ̀k ma yoo nà’.>> Ye jəŋ mvə̀k ànə, mofàk ye nə à jə lòma Jisòs, nə sə kə cum mok bə nà’.

Jisòs Kpʉ

(Mat. 27:45-56; Mak 15:33-41; Luk 23:44-49)

²⁸Yà’sə à mèe, Jisòs riŋ də fàak ye mè mok sə̀ laŋ fana yi dʉk də, <<Njè ndzəp sə ya mʉ.>> Yi ànə cep yè’sə də ya yusə̀ wo à còm nòŋsə yà’ ndzənə Ŋwàk Nwì sə bʉʉŋ və zìnə. ²⁹Ànə ye ŋga ŋgàp mòk à ye fo’ bə rùuk sə̀ cəcəp ca. Fana wo jəŋ kùsa, nə tsəp gesə sənə rùuk sə, nə tse’ gesə nà’ bə ntatʉ kə̀ cùhu Jisòs anə. ³⁰Jisòs à no yà’ fana yi dʉk də, <<Yà’ mè mok laŋ.>> Fana yi zəm tsoŋ tu ye sə nze, nə fis me’rə yòŋsə̀ ye.

³¹Nùmbu ànə à ye nùmbu nə̀ wo à sə fʉ̀hʉ də ndzəm seŋ tsə fana ye dzə̀. Wo à ka dzəm də nùmbu dzə̀ə ye ŋga vèeŋ bwìŋ kə̀ mʉ ntə̀əŋ dzəm. Dzə̀ ànə à ye sə̀’ nə̀ ghaŋ wùriŋ. Fana bʉ̀ʉ Jus sə wèŋ kə fek Palè də nà’a fa wo mandzə̀ ya wo kə dzəp kʉ’rə vəp bʉ̀ʉ sə̀ wo tɛ’lə yà’wèŋ sə ya yà’wèeŋ kpʉ toho ŋga wo kə tuuŋ. ³²Ànə geŋ sojàa sə wèŋ lo kə dzəp kʉ’rə nə̀ mò’fis, nə kə kʉ’rə nə̀ ba, wo sə̀ wo à tɛ’lə wo bə Jisòs wèŋ sə. ³³Wo à kə̀ dzèŋ bohòJisòs fana wo ye ŋga yi kpʉ ye sə laŋ, wo me’rə yi, nə kà kùu ye sə mok dzə̀p kʉ’rə̀. ³⁴Sojà mòk à jə kòoŋ ye, nə sop Jisòs bə zeŋ fʉ nca mvàa vàap. Ndʉəm bə ndzəp caŋ tesə tsoŋ fo’.

³⁵Ŋwə̀ nə̀ yi à yə bum yè’sə bə lis mvə̀’nə̀ yà’ ànə ye nə, sə tsə̀’ yè’sə yi. Yi sə cèp zìnə, nə riŋ də yi sə cep yusə̀ yà’ ànə ye vɛ’nə. Yi sə tsòho fa weŋ bum yè’sə də ya wèeŋ dzəm yàwèŋ sə̀’. ³⁶Bum yè’sə à sə ye vɛ’nə ya yà’a kə bʉʉŋ və megu mvə̀’nə̀ wo ànə com ndzənə ŋwàk Nwì sə. Wo à còm də, <<Wo nə kà vəp ye nə̀ mò’fis kʉp.>> ³⁷Wo à còm mok mvwe’ mòk nja sə̀’ də, <<Bwìiŋ nə ye ŋwə̀ nə̀ wo à sòp yi nə.>>

Wo Tuuŋ Jisòs

(Mat. 27:57-61; Mak 15:42-47; Luk 23:50-56)

³⁸Yà’sə à mèe, fana ŋwə̀ nəmòk nə̀ wo à sə togə̀ yi də Jòsep à və̀ kə̀ ye Palè, nə lɛŋ nà’ də yi kə jəŋ vèŋ Jisòs nə. Palè à dzəm, fana yi lo, nə kə jəŋ nà’. Liŋ lak Jòsep ènə à ye də Àrìmàtayà. Yi ànə ye sə̀’ ŋwə̀ nə̀ yi à yù mandzə̀ Jisòs, nə sə swihi, swihi bʉ̀ʉsə̀ yi à sə wəp bʉ̀ʉ Jus wèŋ. ³⁹Nìkòdemù nə̀ yi ànə kə tseŋ nooŋ Jisòs fa’ ndzəmə̀ nà’a à ye sə̀’ bə Jòsep nə bəbɛ’. Yi à kə̀ jə və̀ nsàap ncə̀əp mok sə̀ wo to yà’ də, <<Me>> bə mòk də, <<Alò>> wèŋ nduk. Ncə̀əp sə à rwì’ dzèŋ co kilù hum tàŋ vɛ’ɛ. ⁴⁰Wo à jə vèŋ ni’ Jisòs nə, nə lim gesə ndzənə cə̀k bə ncə̀əp sə wèŋ, bʉ̀ʉsə̀ yà’a mvə̀’nə̀ bʉ̀ʉ Jus wèeŋ tuuŋgə̀ bwìŋ vɛ’nə. ⁴¹Mvwe’ sə̀ wo à tɛ’lə Jisòs mʉ ntə̀əŋ sə, gadì mòk à kʉəp kok fo’. Sè à ye mʉ gadì anə sə̀ wo à ka ŋwə̀ nəmòk ca ntòtuuŋ yuk. ⁴²Ànə ye də nùmbu ànə à ye nùmbu nə̀ wo sə fʉ̀hʉ də ndzəm seŋ tsoŋ fana ye dzə̀ fana wo caŋ tuuŋ gesə Jisòs nə mok fa’nə bʉ̀ʉsə̀ mvwe’ sə à ye mvwe’ jəjo.

Jisòs Lòkok Mvwe’ Kpʉ

(Mat. 28:1-10; Mak 16:1-11; Luk 24:1-12)

¹Nùmbu nə̀ tɛ’ à ye ŋga a nù Sondè, nə̀ zəzòŋ ŋga cu ntòjàrə jàrə fana Mèri nə̀ mvwe’ lak Màdalà à lòkok, nə lo mvwe’ sèe sə. À kə̀ dzèŋ fo’, yi ye ŋga wo dzərə fis gɛsə ma lìs nə̀ wo à lok ncùu sèe sə bə zeŋ nə laŋ. ²Yi caŋ bwi foho lo, nə kə tseŋ Saimʉ̀ Pità bə mo fàk Jisòs nə̀ Jisòs à sə dzəmgə̀ yi wùriŋ nə, fana yi tsok yà’ də, <<Wo fis gɛsə lòvèŋ ni’ Tà nə sə mvwe’ sèe sə̀ wo a tuuŋ yi ca sə laŋ. Vès ka mvwe’ sə̀ wo jə lòyi sə mok riŋ.>> ³Pità bə mo fàk mòk nə caŋ lo mvwe’ sèe sə. ⁴Mo fàk mòk nə caŋ ghak Pità, nə lo ye mantombì kə dzeŋ mvwe’ sèe sə. ⁵Yi à kə̀ bʉhʉ, nə kʉk gesə sənə sèe sə. Yi ye megu cə̀ək sə̀ wo à lim vèŋ Jisòs bə zeŋ sə, nə kà ca ni lò. ⁶Ànə geŋ Saimʉ̀ Pità nə̀ yi à sə bɛ’ və̀ nà’ nə à kə̀ dzèŋ ye. Yi ca ni lo sə mvwe’ sèe sə jwaŋ. Yi ye cə̀ək sə̀ wo à tuuŋ nà’ bə zeŋ sə ŋga yà’ nòca. ⁷Yi ye cə̀k nə̀ wo à lim tu Jisòs bə zeŋ nə ŋga wo lim benə nà’ pwe’, nà’ nooŋ ca zok. ⁸Fana mo fàk mòk nə̀ yi à kə̀ dzèŋ to fo’ yi nə ni lo ca sə̀’. Yi ye, nə dzəm də Jisòs nə lòkok laŋ. ⁹À kə̀ dzèŋ haaŋ mvə̀k ànə ŋga wo ka bə ncèp nə̀ wo à còm nà’ ndzənə ŋwàk Nwì də Jisòos nə kpʉ, nə lokok nà’a ntòrɛɛŋ.

¹⁰Ànə geŋ ŋgàa fàak Jisòs yà’sə wèŋ bwi foho lo lak. ¹¹Mèri à bwì və̀ mvwe’ sèe sə, nə kə təəŋ fo’ sə mbiŋ, nə sə waŋ. Yi ànə sə waŋ fana yi bʉhʉ tsoŋ, nə kʉk gesə lo sənə sèe sə. ¹²Yi ye masinjàa Nwì ba ŋga wo nitse’ cə̀ək sə̀ fəfop pup pup. Wo à cu mvwe’ sə̀ wo ànə noŋsə vèŋ ni’ Jisòs fo’ sə. Mòk à cu mvwe’ sə̀ tu Jisòs à ye fana mòk cum mvwe’ sə̀ kùu ye ànə ye sə. ¹³Wo fek yi də, <<Wù sə wa yà, màmi?>> Yi dʉk fa yà’ də, <<Wo jə lòTà àm. Mʉ̀ ka mvwe’ sə̀ wo kə̀ nòŋsə yi sə riŋ.>>

¹⁴Yi ànə cep wes vɛ’nə fana yi bʉʉŋ, nə ye Jisòs ŋga nà’ tə kok fo’ fana yi kà nà’ rì. ¹⁵Jisòs nə fek yi sə̀’ də, <<Wù sə wa yà màmi? Wù sə làp ndà?>> À gʉ̀ bohòMèri nə co nà’nə ŋwə̀ nə̀ yi sə kʉ̀k gadì nə̀ fo’ nə yi fana Mèri nə dʉk fa nà’ də, <<Tɛ̀’mòk, a ye-a ŋga wù jə lòyi wù fana wù kə niŋ fa mʉ mvwe’ sə, ya mʉ kə jəŋ yi.>> ¹⁶Jisòs nə to nà’ bə liŋ də, <<Mèri.>> Mèri bʉʉŋ, nə cep fa nà’ bə ncèep lak Hibrù wèŋ dʉk də, <<Ràbonì.>> Ncèp nə̀ də Ràbonì ànə yà’sə də, <<Cicà àm.>> ¹⁷Jisòs dʉk fa nà’ də, <<Kà mʉ koho tse’ bʉ̀ʉsə̀ mʉ̀ ka mʉ bohòTɛ̀’ am ntòlo. Dù lo, nə kə tsok fa bwema am wèŋ də mʉ̀ tə lə̀lòmʉ la’à Tɛ̀’ am, nə̀ yi sə̀’ Tɛ̀’ àwèŋ nə. A yi nə̀ yi Nwì àm, yi sə̀’ Nwì àwèŋ pwe’.>>

¹⁸Mèri nə à lòo, nə kə tsok fa ŋgàa fàak nà’ sə wèŋ də yi yə Tà Jisòs laŋ. Yi à tsòho fa wo yusə̀ nà’ à cèp bohòyi sə pwe’fo’.

Jisòs Nìtsə̀’ Fa Ŋgàa Fàak Ye Wèŋ Ni’ Ye

(Mat. 28:16-20; Mak 16:14-18; Luk 24:36-49)

¹⁹À kə̀ dzèŋ nùmbu ànə, nə̀ ntɛŋ à yèto ànə ŋga a nconùm, ŋgàa fàak Jisòs sə wèŋ kə be’lə cum mʉmvwe’ ndap mòk mvwe’ mò’fis. Wo ànə lok ncù bʉ̀ʉsə̀ wo à sə wəp bʉ̀ʉ Jus wèŋ. Wo də wo kʉk à, ŋga Jisòs nə tə nè’ mʉtsətsə’rə wo anə. Yi cepsə yà’ də, <<Fifi ye bohòwèŋ lòoŋ.>> ²⁰Jisòs ànə cep wes vɛ’nə fana yi niŋtsok fa wo bo ye bə ncanmvàaŋ ye. Ŋgàa fàak ye sə à yə Tà nə, wo kwa vɛ’ɛ wù kà fʉ̀’. ²¹Jisòs nə dʉk fe’lə fa yà’ sə̀mok də, <<Fifi ye bohòwèŋ.>> Nə dʉk mok sə̀’ də, <<Mvə̀’nə̀ Tɛ̀’ am à tum mʉ, mʉ̀ sə tumsə lòweŋ sə̀’ vɛ’nə.>> ²²Ànə geŋ yi yoŋsə fa yà’wèŋ yòŋsə̀, nə dʉk də, <<Wèeŋ jəŋ, mʉ̀ yòŋsə̀ fa weŋ Yòŋsə̀ nə̀ Rərɛŋ. ²³Ye də a ye-a ŋga wèŋ swì fa ŋwə̀ nəmòk bʉp ye fana Nwìi nə swi fa ŋgə̀ŋgàŋ sə̀’. A ye-a ŋga wèŋ ka də wèŋ swì fa yi bʉp ye nə dʉk, fana Nwìi nə kà ŋgə̀ŋgàŋ sə̀’ swì fa.>>

Jisòs Yəəŋ BohòTomos

²⁴Ghà nə̀ Jisòs ànə kə tseŋ me ŋgàa fàak ye wèŋ fa’ yà’a à ye ŋga Tomos nə̀ wo togə̀ yi mok də mofɛs nà’a ka ye fo’ yeŋ. Yi ànə ye mòk mʉŋgorə̀ wo sə̀ hum-ncòp-ba sə. ²⁵Tomos nə à və̀ maŋkwɛ̀ŋ fana wo tsok fa yi də, <<Vès yə Tà àvès nə laŋ.>> Tomos nə dʉk ye də, <<A ye-a ŋga mʉ̀ ka mvwe’ mbɛŋ sə̀ wo à ta yi luwa yà’a ye nə kà bə ndubo àm jwɛŋ, nə kà bo am mvwe’ sə̀ wo à sòp yi fʉ ncanvàa yà’a sògèsə̀, ye də mʉ nə kà yàm də a zìnə dzəm yuk.>> ²⁶À kə̀ cà nùumbu fwame’ fana ŋgàa fàak Jisòs sə kə benə fe’lə mʉ nda’à sə̀mok. À ye mok ŋga Tomos nə fo’ bə yà’wèŋ. Wo ànə lok ncùu sə lo’o fana wo ye ŋga Jisòs nə tə cà mʉtsətsə’rəə wo sə̀mok. Yi cepsə yà’ də, <<Fifi ye bohòwèŋ.>> ²⁷Yi dʉk fa Tomos də, <<Jwɛŋ ja’a yòo bo am ɛ̀. Jəŋ bo yo, nə jwɛŋ ja’a mvwe’ nə̀ fʉ ncanmvàaŋ mʉ̀ nə ɛ̀. Kà də wu sə mərə fe’lə mok dʉk, dzəm lɛ mok dzəmə.>> ²⁸Tomos dʉk fa nà’ də, <<Tà àm, nə ye Nwì àm.>> ²⁹Jisòs dʉk fa nà’ də, <<Wù dzəə̀m nə ŋga’a bʉ̀ʉsə̀ wù yə mʉ bə lis yo. Anə ye rɛŋsi bohòbʉ̀ʉ sə̀ wo ka bə lis ntòye, nə dzəm yà’.>>

Njo Nə̀ Wo à Còm Ŋwàk Ènə Bʉ̀ʉ Zeŋ Nə

³⁰Jisòs à gʉ̀hʉ maŋgəŋgèeŋ mok mʉ lisə̀ ŋgàa fàak ye sə wèŋ wùriŋ. Wo à ka yà’sə ndzənə ŋwàk nè’e com gesə. ³¹Bum sə̀ wo a còm yà’ yè’e, wo à còm də ya wèeŋ dzəm də Jisòos Ŋkum ŋgà gèm bwìŋ nə̀ yi mo Nwì nə. Wèeŋ dzəm bohòyi vɛ’nə fana wèŋ tse’ lùŋ nə̀ zìnə nə̀ nà’a bə liŋ ye nə.

Jisòs Nìtsə̀’ Ni’ Ye BohòŊgàa Fàak Ye Wèŋ Bwìŋ Sàmba

¹Mvə̀k nəmòk à ye sə̀’ nə̀ Jisòs ànə niŋ ni’ ye bohòŋgàa fàak ye mok wèŋ ŋga wo mvwe’ tə̀m Tìberiyà. Yè’e mvə̀’nə̀ yà’ ànə ye sə. ²Nùmbu mòk à ye ŋga Saimʉ̀ Pità cu mvwe’ mò’fis bə Tomos nə̀ wo togə̀ yi mok də mofɛs, bə Nàtaniyà nə̀ yi à və̀ mvwe’ lak Kanà nə̀ mvwe’ nzeŋgòŋ Galìli. Bwe Zebèdi à ye fo’ ba, nə ye mok wèŋ sə̀’ bwìŋ ba. ³Saimʉ̀ Pità à dʉk fa wo də, <<Mʉ̀ sə lòyu am mvwe’ fu’fuk.>> Wo dʉk bwi yàwo sə̀’ də, <<Vès dzəm ŋgòlòvesùwèŋ bəbɛ’.>> Fana wo tesə lo kə ni ŋgwes mok, nə lo. Wo à fuk nòoŋ tsə ciŋ, ciŋ, nə kà yumok ko.

⁴Tsok à rɛŋ ŋga nùm sə də yi bap kok fana Jisòs nə tesə təəŋ ndzə ŋgʉ ndzəp anə. Wo kà rì də a yi nə rì. ⁵Jisòs nə fek gesə yà’ də, <<Ŋgàta, wèŋ ko yumok à?>> Wo də, <<Hai’.>> ⁶Yi dʉk fa yà’ də, <<Wèeŋ jəŋ-a ram sə nə mak tsoŋ gesə-a yà’ bo ma zʉ, ŋgʉ ŋgwes nə fa’a ɛ̀. Wèeŋ nə ko fuk fo’.>> Fana wo mak gesə ma nə̀ yi dʉk nə. Fuk ni ca nsàp nə̀ à ghak wo ŋgòsə̀ fəsə və̀ ram sə sə ŋgwesə̀ anə.⁷Mofàk Jisòs nə̀ yi à sə dzəmgə̀ nà’ wùriŋ nə à dʉk fa Pità də, <<Nà’nə Tà.>> Pità ànə yuk vɛ’nə fana yi te’ ni cə̀ək ye bʉ̀ʉsə̀ à ye ŋga yi a fweŋ cə̀ək ye sə də ya yi gʉ fàk. Ànə geŋ yi li ni sə ndzəpə̀ anə, nə lo kə ye Jisòs. ⁸Bwe ye mok sə wèŋ à cu malì sə ŋgwesə̀ anə. Wo sə və sə̀’, nə sə soŋ və ram nə ŋga nà’ rwiŋ bə fuk ca wùriŋ. Mvwe’ sə̀ wo à ye sə, ŋgòkə̀ dzèŋ mʉ mfèŋ à ka sə̀sap sə̀’ yeŋ. Yà’ à ye megu co mità ŋkʉ̀ mò’fis.

⁹Wo à kə̀ tesə mʉ mfèŋ fana wo ye ŋga mis sə kə bə fuk ca nə ye bə brɛd sə̀’. ¹⁰Jisòs dʉk fa wo də, <<Wèeŋ fis jə və fuk mok sə̀ wèŋ ko sə fɛn.>> ¹¹Saimʉ̀ Pità à bwì lòmvwe’ ŋgwes nə sə̀mok. Yi soŋ fis və ram nə mʉ mfèŋ. Fuk sə̀ ghaŋ à rwiŋ ca vɛ’ɛ hip. Yà’ à ye pwe’ ŋkʉ̀ mò’fis bə fuk hum tàŋ-ncòp-tɛ’. Fuk sə à ye ca ŋkʉ̀ʉŋ vɛ’nə, ram nə kà sə̀’ sàhà. ¹²Jisòs dʉk fa wo də, <<Wèeŋ və kə zʉ.>> Fana wo və. Mʉtsətsə’rəə bwe ye sə pwe’, ŋwə̀ nə̀ mò’fis co yi baŋ ntʉm, nə fek-a nà’ də, <<Wu yè’sə ndà?>> à ka ye lok. Wo à rì də a Tà nə. ¹³Jisòs à kə̀ jə brɛd nə, nə bə’rə gapsə fa wo bə fuk sə sə̀’. ¹⁴Ghà nə̀ Jisòs à lòkok mvwe’ kpʉ fana nè’e nə̀ kɛ̀’ tɛ’ mvə̀’nə̀ yi à niŋ fa ni’ ye bohòŋgàa fàak ye wèŋ.

Jisòs Cèp BohòPità

¹⁵Wo ànə zʉ wes fana Jisòs nə fek Pità də, <<Saimʉ̀ mo Jon, wù dzəm mʉ bə ntʉm yòpwe’ nə casə yè’e pwe’ à?>> Pità də, <<Ŋ̀, Tà, wù rì də mʉ̀ dzəm wu.>> Yi dʉk fa nà’ də, <<A ye-a də wù dzəm mʉ fana wu sə kʉk fa mʉ lis bə bwe nsùŋgaaŋ am.>> ¹⁶Jisòs cep fe’lə bohòPità nə, nə̀ kɛ̀’ ba də, <<Saimʉ̀ mo Jon, wù dzəm mʉ bə ntʉm yòpwe’ à?>> Yi dʉk fəsə fa nà’ sə̀mok də, <<Ŋ̀, Tà, wù rì də mʉ̀ dzəm wu.>> Yi dʉk fa nà’ sə̀mok də, <<Sə gʉ̀msə fa-a mʉ nsùŋgaaŋ am.>> ¹⁷Mok nə̀ kɛ̀’ tɛ’, yi fek nà’ sə̀mok də, <<Saimʉ̀ mo Jon, wù dzəm mʉ à?>> Ntʉm bʉp Pità, bʉ̀ʉsə̀ nà’ fek fis yi nə̀ kɛ̀’ tɛ’ də, <<Wù dzəm mʉ àlɛ?>> Pità nə dʉk fa nà’ də, <<Tà, wù rì bum pwe’. Wù rì də mʉ̀ dzəm wu.>> Jisòs dʉk fa nà’ də, <<Kʉk fa-a mʉ lis bə nsùŋgaaŋ am.>> ¹⁸Yi cep fe’lə fa nà’ sə̀’ də, <<Mʉ tsok fa wu ŋkèm ncèp dʉk də, à ye to ŋga wu ntòwà’ŋwè, wù sə kiŋsə ni’ yò, nə sə lo yuyo mvwe’ sə̀ wù dzəm. Wu rèŋ ntsə’mòk fana wù saŋ bo yo, ŋwə̀ nə̀ zok kiŋsə wu, nə bək jə lo wu mvwe’ sə̀ wù ka dzəm.>> ¹⁹Jisòs à cèp yè’sə ŋgòni’tsə̀’ fa Pità nsàp kpʉ nə̀ nà’a nə kə kpʉ ŋgògʉ̀ liŋ Nwìi ye kə̀kuk. Yi à cèp wes vɛ’nə fana yi dʉk fa nà’ də, <<Yuŋ və mʉ.>>

²⁰Pità à bʉ̀ʉŋ kʉ̀k, nə ye mo fàk Jisòs nə̀ Jisòs à sə dzəm nà’ wùriŋ nə ŋga nà’ sə bɛ’ və̀ wo sə̀’. À ye sə̀’ yi nə̀ yi ànə yəhə naaŋ lo Jisòs fa’ mʉ ni’ì ŋga wo sə zʉ bɛŋ, nə fek nà’ də, <<Tà, ŋwə̀ nə̀ yi nə seŋ wu nə ndà lɛ>> nà’a. ²¹Pità ànə ye nà’ fana yi fek Jisòs də, <<Tà, ŋwə̀ nè’e ye-ɛ?>> ²²Jisòs dʉk fa fəsə nà’ də, <<A ye-a ŋga mʉ̀ də yi cum fo’ ŋwəm tə̀tè mʉ̀ bwi və nùu, nzak njòye fo’ yà? Bɛ’ və̀ mʉ yòfɛŋ ntɛ̀ŋ.>> ²³Ànə geŋ bʉ̀ʉ ye wèŋ ye ŋgòcèp lòkɛ’ də Jisòs dʉk də ŋgà fàk ye nè’e nə kà kpʉ yuk. Megu də Jisòs à ka də nà’a nə kà kpʉ dʉk. Yi à dʉk də, ŋga ni’ ye bò-a yi də nà’a cum fo’ ŋwəm tə̀tè yi kə bwi və, nzak nà’ ye fo’ yà lɛ?

Ncèp Nə̀ Nà’ Lə̀sə

²⁴Vès rì də mo fàk nə̀ Jisòs à cèp bum yè’sə bə liŋ ye nə sə tsə̀’ faà nə weŋ yà’ yi. Yi à còm ŋwàk ènə sə̀’ yi. Vès rì sə̀’ də yusə̀ yi cèp sə zìnə. ²⁵Bum mok cu sə̀ Jisòs à gʉ̀ yà’, yà’a vɛ’ɛ wùriŋ. Wo à còm gèsə-a yà’ ndzənə ŋwàk mò’fis, mò’fis làaŋ, bwɛ̀rɛ kàmòk ŋwàha sə yam casə nzeŋgòŋ nè’e pwe’.