Jem

Ŋwàk JEM

Ŋwàk nə̀ Jem à còm ènə nà’ rwiŋ mègù bə ntip sə̀ yà’a bə bum sə̀ yà’a yegə̀ nùumbu pwe’. Yi sə cep bum sə bə gbʉ’ mok sə̀ yà’ nòjəja. Yi sə jə yà’ ŋgòtip bwìŋ bə nsàp ŋkərə̀ nə̀ a bə̀boŋ də ŋwèe tse’ nà’, nə ye bə ncu nə̀ bohòKrətèŋ wèŋ. Ŋwàk ènə cèpgə̀ gʉgʉŋ də ŋwə̀ nə̀ yi dzəmtse’ Krɛst fana yà’ tse’ ŋgòyəəŋ bə fàha sə̀ ŋgə̀ŋgàŋ sə gʉ̀ yà’.

¹Còm ŋwàk nè’e mʉ̀ Jem, nə̀ mʉ mo ŋgà fàk Nwì, nə ye Tà Jisòs Krɛst. Mʉ̀ cèpsə bwe Izùrɛ sə̀ bòp hum-ncòp-ba sə̀ wo sam cu lo mʉnə nzeŋgòŋ nə pwe’ bə̀boŋ.

Mə̀mumsə̀ə Yu Nə̀ Aco Nà’ Gʉŋsə Wù

²Bwe tɛ̀’lam wèŋ, ŋga nsàap mə̀mumsə̀ zəzok sə tesə və-a bohòwèŋ, wèŋ tse’ ŋgòkwa cɛ̀bʉ̀ə̀, ³bʉ̀ʉsə̀ wèŋ rì dʉk də bum yè’sə mùmsə weŋ də wèŋ sə fa malì ntʉm awèŋ bohòNwì àlɛ, fana yà’ gʉŋsə weŋ. ⁴Təəŋ bə nsàp ntʉm nə̀ nà’a gʉgʉŋ tè ya wu ye kə̀kʉrə̀ bə bum pwe’, nə kà yumok jamə̀.

⁵A ye-a ŋga ŋwə̀ nəmòk mʉtsətsə’rə wèŋ ka ŋkərə̀ nə̀ co yi gʉ riŋ yumok bə zeŋ tse’, yi lɛŋ bohòNwì, Nwìi nə fa yi. Yi fagə̀ ndàaŋwè pwe’ bo to bə kwəkwa. ⁶A ye-a ŋga ŋwè sə lɛŋ yumok bohòNwì, yi dzəmtse’ sə ntʉʉ̀ yi də yi nə tse’ yà’, yi kà də yi sə mərə sə ntʉʉ̀ yi dʉk. Bʉsə̀ ŋwə̀ nə̀ yi mərə-a, ye də yi co ndzəp nə̀ fə̀fə̀ bwì’ lògə̀ nà’ ma si bə ma ŋkwɛ̀ŋ. ⁷Nsàp ŋwə̀ nə̀ yi mərəgə̀ bum nà’nə kà tsəm də yi nə tse’ yumok bohòTà Nwì tsəm. ⁸Bʉsə̀ yi tse’ tsətsərə̀ ba, nə kà yusə̀ yi dzəm rì.

⁹Krətèŋ nə̀ yi ŋgà jìŋ, yi tse’ ŋgòkwa, bʉ̀ʉsə̀ Nwì a kùksə yi. ¹⁰Fana moma nə̀ yi ye ŋgà ghàk, yi tse’ ŋgòkwa sə̀’, bʉ̀ʉsə̀ Nwì a bʉ̀sə yi ŋwə̀ nə̀ jo, bʉ̀ʉsə̀ yi nə ca gesə lo co mvə̀’nə̀ nzàam ŋgaŋ yɛ’gə̀ yè’e. ¹¹Nùum togə̀ə, a curə ntɛ̀ŋ, nzàam ŋgaŋ yɛ’ gbʉ sə nze, fana mvəsə̀ yà’ anə sə fom sə me nə̀ mvèsə̀. Yà’a sə̀’ mʉmvə̀’nə̀ ŋgà ghàak nə kpʉ mak noŋsə bum ghàak ye sə vɛ’nə.

¹²A rɛŋsi bohòŋwə̀ nə̀ mə̀mumsə̀ sə və̀ bohòwù, fana wù sə təəŋ mali gʉgʉŋ; bʉ̀ʉsə̀ wù gha’-a mə̀mumsə̀ nə, fana wu nə kə tse’ lə̀làk nə̀ nà’a lùŋ nə̀ Nwì a kàk də yi nə fa ndà lòoŋ nə̀ nà’ dzəm yi nə. ¹³Nsàp mə̀mumsə̀ nà’nə və̀ə, fana kà də ŋgə̀ŋgàaŋ dʉk də Nwì sə lap mandzə̀ də yi gbʉ dʉk. Bʉsə̀ kaco wo mumsə Nwì bə bʉp yeŋ, fana Nwìi kà ye ŋwè bə bʉp sə mùmsə̀gə̀. ¹⁴Mə̀mumsə̀ və̀gə̀ bohòŋwè ŋga yi tsərə kok bum sə̀ bʉp sə ntʉʉ̀ yi. ¹⁵Ŋwèe tsərə bum sə̀ bʉp yè’sə fana yi gʉ bʉp. A ye ŋga bʉp kùu’ nà’ jəŋ və kpʉ.

¹⁶Bwema am wèŋ, kà də wèeŋ jipsə tu awèŋ dʉk. ¹⁷Yusə̀ yà’a bə̀boŋ pwe’ tsəgə̀ mʉbu bohòNwì, yi nə̀ yi a gʉ̀ marɛŋ. Nwì bə tu ye kà kupsə̀gə̀. Kaco yi bʉʉŋ lo, nə me’rə noŋsə ves sə ndzəmə̀ yeŋ. ¹⁸Nwì à dzəm ko’ yi də yi cok fis ves, nə gʉ ves a bʉʉŋ bwe ye bə ncèp cù nje nə̀ zìnə nə, də ya vesùwèeŋ ye bʉ̀ʉ ye sə̀ mantombì bə bum sə̀ yi a gʉ̀ sənə nze nə pwe’.

Yuk Nə Gʉ

¹⁹Bwema am wèŋ, wèeŋ kà yè’e swì yuk. A ye-a sə̀ ndà lòoŋ, yi noŋsə ntu’ to ŋgòyuk bum, nə jəŋ mvə̀k fʉ̀ə̀ ŋkuŋ nə cep, nə ye sə̀’ fʉ̀ə̀ ŋkuŋ yi jok. ²⁰Bʉsə̀ ŋwèe jok-a, kaco yi gʉ riŋ to yusə̀ bə̀boŋ sə̀ co Nwì kwa bə zeŋ yeŋ. ²¹Fana nà’a njo nə̀ mʉ̀ sə tsə̀’ weŋ də, wèeŋ fis ŋkʉ̀ì’ sə ntʉʉ̀ wèŋ sə, nə kà jòŋ sə gʉ̀ kɛ’cà. Fa ni’ awèŋ ndzə bohòNwì, nə dzəm tse’ megu ncèp ye nə̀ wèŋ ànə yuk to mvəsə̀ yi a gesə nà’ sə ntʉʉ̀ wèŋ. Mègù ncèp nà’nə nə̀ aco nà’ fis weŋ mvwe’ kpʉ.

²²Bo bohòwèŋ cɛ̀bʉ̀ə̀ də ŋga wèeŋ yuk-a ncèp ye nə, wèŋ sə gʉ yà’. Bʉsə̀ ŋwə̀ nə̀ yi yuk megu-a yà’ bə ntu’, nə kà sə gʉ̀, fana ye də yi sə bòrə ni’ ye. ²³Yi co ŋwə̀ nəmòk nə̀ yi kʉk ja’a si ye ndzənə darəgà’, nə ye mvə̀’nə̀ yi cu. ²⁴Yi yə tsərə mè si ye bə̀boŋ, fana yi lo ntɛ̀ŋ, yi swi bisə mvəsə̀ yi anə ye sə jwaŋ. ²⁵Wu kʉk ja’a-na lʉ̀ʉk Nwì sə̀ yà’a yəyərə̀, sə̀ yà’a fi mè’rəgə̀ bwìŋ mvwe’ bʉp sə, fana nə sə gʉ mʉmvə̀’nə̀ yà’ sə tsə̀’ wu, fana Nwìi nə se wu bə bum yo sə̀ wù sə gʉ̀ lòoŋfo’. Bʉsə̀ wù sə gʉ̀ yà’, nə kà də wù sə yu’rə mègù bə ntu’, nə swi bisə dʉk.

²⁶Ŋwə̀ nəmòk tsərə-a ye də yi ye ŋwə̀ nə̀ yi sə bɛ’ mandzə̀ Nwì, nə kà lʉm ye bɛŋ, fana ye də mandzə̀ Nwì nə̀ yi sə yùu nə, nà’a wà. Yi sə bòrə yà’sə ni’ ye. ²⁷Bum sə̀ Tà Nwìi kʉ̀k ja’agə̀ ye də yà’a mandzə̀ nə̀ zìnə nə ye rərɛŋ, a ŋga ŋwè sə tɛsə bwe njìŋ bə bàa yepmfə sə̀ wo sə yə ŋgə’, nə sə jəŋ ŋkərə̀ bə ni’ ye də ya bum nzeŋgòoŋ kà yi ŋgògʉ̀ yusə̀ bʉp bòrə̀.

Bwìŋ Pwe’ Yəyərə̀ BohòNwì

¹Bwema am wèŋ, wèŋ sə̀ wèŋ à fa ntʉm awèŋ bohòTà Jisòs Krɛst, nə̀ ŋwə̀ nəmòk kaco yi mok kuk dzeŋ, wèŋ tse’ ŋgòjəŋ bwìŋ pwe’ yəyərə̀. ²Yusə̀ mʉ̀ sə dʉk sə vɛ’; A dʉk-a də bwìŋ və̀ mvwe’ kwe’ bʉ̀ʉ cos bwìŋ ba, ŋgà ghàk bə ŋgà jìŋ. Ŋgà ghàk nə ni tse’ cə̀k nə tasə mviŋ sə̀ yà’ gʉ ntɛŋ nə̀ bʉp ndzə bohòyi, nə̀ ŋgà jìŋ nə ni ye bwe gàa cə̀k. ³Wo və̀ə, wèŋ lap dzə̀’ nə̀ bə̀boŋ, nə dʉk fa ŋgà ghàk nə də, <<Hooyo’ və̀ bə̀boŋ, kə̀ cà cum fɛn.>> Nə dʉk fa ŋgà jìŋ nə ye dʉk də, <<Təəŋ tse’ yòfa’ nə,>> kè də, <<Kə̀ cum yòsə nze ŋgʉ kùhu mʉ̀ fɛn.>> ⁴Wèeŋ gʉ-a vɛ’nə, ye də wèŋ kʉk wo ka mʉ lisə̀, nə dʉk sə və̀ə wèŋ də mok bògha’ mok yeŋ à? Wèeŋ gʉ-a vɛ’nə, ye də wèŋ sə sak bwìŋ, nə sa’a nə bə jòŋ. ⁵Bwema am wèŋ-a, yè; Nwì a ghàksə ŋgàa jìŋ yà’sə bə dzədzəm nə̀ yà’wèŋ tse’ bohòyi, nə dʉk də wo nə kə tse’ mvwe’ ncum mvwe’ lak sə̀ yi a kà’ nòŋsə fa bʉ̀ʉ sə̀ wo dzəm yi. ⁶Fana wèŋ jə ŋgàa jìŋ co bʉ̀ʉ sə̀ wà. Ŋga a sə̀ dàpsə lògə̀ weŋ mʉ kot mvwe’ nzak ndà wèŋ? A yegə̀ sə̀ ŋgàa ghàak sə. ⁷A soho bʉpsəgə̀ liŋ Jisòs sə̀ bə̀boŋ sə̀ wèŋ tse’ yà’a ka sə̀ wo yeŋ à? ⁸A bə̀boŋ də wèeŋ noŋsə lʉ̀k nə̀ Nwì nə̀ yi ŋkum à còm nòŋsə ndzənə ŋwàk ye də,

<<Dzəm moma yo mvə̀’nə̀ wu dzəmgə̀ ni’ yò.>>

⁹A ye-a ŋga wèŋ sə jə bwìŋ də mok ghak mok, fana ye də wèŋ gʉ̀ bʉp, nə gbʉ̀ʉ̀ nə lʉ̀k Nwì laŋ, bʉ̀ʉsə̀ wèŋ ka lʉ̀k nje nə noŋsə.

¹⁰Yusə də, ŋwèe nòŋsə-a lʉ̀ʉk sə lòoŋ, nə gʉ bʉpsə megu nə̀ mò’fis, ye də yi yəyərə̀ bə ŋwə̀ nə̀ yi gʉ̀ bʉpsə ye yà’ lòoŋ. ¹¹Bʉsə̀ Nwì nə̀ yi à dʉk də, <<Ŋwèe kà nto ko>>, à dʉk sə̀’ də, <<Kà ŋwè zə.>> Ye də wu ka-a nto kogə̀, nə zə ŋwè, wu gu sə ŋgà gbʉ̀ lʉ̀k co ŋwə̀ nə̀ yi à gbʉ̀ yà’ pwe’, bʉ̀ʉsə̀ wù zə ŋwè. ¹²Ye də wèeŋ sə cep bum, nə sə gʉ bum co bʉ̀ʉ sə̀ wèŋ rì də Nwìi nə̀ kə̀ sak weŋ bə lʉ̀k nə̀ yi a nòŋsə. Lʉ̀k ye nə tse’ ŋàŋ sə̀ ŋgòfis me’rə bwìŋ mvwe’ bʉp. ¹³Nwìi nə sak ŋwə̀ nə̀ yi kà manziŋ koksə̀gə̀ sə̀’ jì manziŋ, fana bʉ̀ʉ sə̀ wo koksəgə̀ manziŋ ka ŋgòwəp nzak yeŋ.

ŊgòTse’ Dzədzəm Nə Ye ŊgòGʉ̀ Fàk

¹⁴Bwema am wèŋ, a ye-a ŋga ŋwè dʉk-a də yi dzəm bohòJisos Krɛst, wù kà yà’ bə fàak sə̀ yi sə gʉ̀ʉ yə, ye də dzədzəm nè’nə nsàp nə̀ fòlɛ? Aco nsàp dzədzəm nà’nə tɛsə yi à? A bʉ̀ə̀. ¹⁵A dʉk-a də moma yònə̀ ŋwə̀mbam kè nə̀ ŋwàŋwè ka cə̀k tse’, nə kà zʉzʉ sə̀’ tse’, ¹⁶yi və bohòwù, wù dʉk fa gu yi bə cù də, <<Gèŋ bə̀boŋ, Nwìi se wu, mbʉəp kà wu ko, ye zəze’, njèe kà wu ya mbà,>> nə kà yi yusə̀ co yi tɛsə ni’ ye bə zeŋ fa, ye də yu bə̀boŋ sə̀ wù gʉ̀ sə yà? ¹⁷Dzədzəm bohòncèp Nwì mègù sə̀’ vɛ’nə də, nà’ kà-a fàk sə gʉ, ye də dzədzəm ànə kpʉ laŋ, nà’ ka fàk tse’.

¹⁸Kàmòk aco ŋwə̀ nəmòk dʉk də, <<Aco ŋwə̀ nəmòk tse’ ye dzədzəm, mòk sə gʉ ye fàk.>> Ŋwèe dʉk-a vɛ’nə, mʉ fek ŋgə̀ŋgàŋ dʉk də, yi niŋ tsok fa-a mʉ dzədzəm ye nə jì fàk, ya mʉ niŋ tsok fa yi dzədzəm am bə fàak sə̀ mʉ̀ sə gʉ̀ʉ. ¹⁹Wù dzəm nə̀ zìnə də Nwì mègù yi nə̀ mò’fis à? A vɛ’nə bə̀boŋ. Wù rì sə̀’ də yòŋsə̀ə ze’ wèeŋ dzəmgə̀ sə̀’ vɛ’nə nə sə wəp, nə sə kaŋ. Nsàp dzədzəm nà’nə ka fàk tse’. ²⁰Ho’ò, wù ləm! Wù sə dʉk yè’e də wo tsok wu tsə̀’ə də, wù tse’-a dzədzəm nə̀ nà’a kà fàkgə̀, ye də nà’a wà à? ²¹Wèeŋ kʉk ja’a na. Wèŋ rì də tàcici àvès Abràham a bʉ̀ʉŋ ŋwə̀ nə̀ kə̀kʉrə̀ bohòNwì bʉ̀ʉ nsàp fàk nə̀ yi a gʉ̀ də yi fa mo ye Azìk co satikà’, ka vɛ’nə yeŋ à? ²²Aco wèŋ ye yàwèŋ sə̀’ də dzədzəm ye à sə gì yùrə be’lə mvwe’ mò’fis bə fàak ye, fana fàak ye sə gʉ boŋsə wesə dzədzəm ye nə. ²³Yà’a mvwe’ sə̀ yà’ à yəəŋ də yusə̀ wo à còm ndzənə ŋwàk Nwìi zìnə. A nja də,

<<Abràham à dzəm yusə̀ Nwì à cèep, fana Nwì jəŋ yi co ŋwə̀ nə̀ kə̀kʉrə̀.>>

Wo to fa yi liŋ mok də, Ŋge’e Nwì. ²⁴Wèŋ yə yàwèŋ sə̀’ dʉk də ŋwèe yegə̀ bə̀boŋ bohòNwì bə nsàp fàk nə̀ yi gʉ̀ʉ, ka bʉ̀ʉ dzədzəm yiìyi megu. ²⁵Ŋwà sàhà nə̀ wo à to liŋ ye də Rahàp nà’a à ye bohòyi sə̀’ vɛ’nə. Yi à ye ŋwə̀ nə̀ bə̀boŋ bohòNwì sə̀’ njo fàk. À ye ŋga yi à ko swìhi ŋgàa mfʉəp bʉ̀ʉ Izùrɛ, nə casə wo mvwe’ mandzə̀ nə̀ zok. ²⁶Mègù sə̀’ mʉmvə̀’nə̀ ni’ ŋwèe ye-a jì yòŋsə̀, ye də nà’ kpʉ laŋ yà’a, dzədzəm nə̀ jì fàak sə̀’ dzədzəm nə̀ nà’a kpʉkpʉ.

Ŋgə’ Nə̀ Aco Lʉm Ŋwè Jəŋ Və

¹Bwema am wèŋ, ka bə̀boŋ co wèŋ ŋkʉ̀ʉŋntɛ̀ŋ lap mandzə̀ ŋgòye ŋgàa yə’rə̀ bwìŋ bum yeŋ, bʉ̀ʉsə̀ səsak njàvès nə̀ vèes yə’rəgə̀ bwìŋ bum nə̀ kə̀ gʉ nduk. ²Vès pwe’fo’ gʉ̀gə̀ jòŋ nə̀bʉp. Ŋwə̀ nəmòk ye-a yo nə̀ yi kà cù bə jòŋ cèpgə̀, ye də yi ka jòŋ tse’ lok. Ye də aco yi riŋ ŋgòkotse’ ni’ ye bə nsàp mandzə̀ nə̀ fòlòoŋ. ³A gèsə fagə̀ nàambà’rə̀ kwaŋ mʉ cùhu də ya wo yuk dʉk, yà’ gʉ wo ŋgògì lòmvwe’ sə̀ a dzəm pwe’fo’.⁴Ja’a na ŋgwes sə̀ ghaŋ, sə̀ yà’a gìgə̀ mʉ ndzəpə̀ yè’e nɛ̀. Yà’ yam maŋgəŋgèŋ, nə sə gi bə ŋàaŋ sə̀ fə̀fə̀ sə bwì’ lòyà’ yi. Nà’ yam-a sə̀ vɛ’nə fana ŋwə̀ nə̀ yi cu ca sə bʉsə kɛ’ nà’ bə mʉ bɛ̀s tʉ mòk, nà’ sə lo mvwe’ sə̀ yi sə dzəm sə. ⁵Yà’a mvəsə̀ lʉm ŋwè mègù sə̀’ mʉmvə̀’ anə. Nà’ gù mwejo, nə sə cep bum sə̀ ghaŋ. Ja’a na yòo mvəsə̀ aco mʉ ŋà’ mis nə̀ jo vɛ’ɛ tɛŋ wes mfèŋ nda ɛ̀.

⁶Lʉm nə gù sə̀’ co mis. Nà’ tse’ nsàap bʉp sə̀ sə nzeŋgòŋ fɛɛŋ pwe’ mbwa. Yi cu ndzə ni’ì vès, nə sə gʉ bʉp ye ŋgòsam kɛ’ lo bə ni’ nə lòoŋfo’. Lʉm nə bwe’gə̀ mis nə̀ co nà’ tɛŋ səsə wes yòŋsə̀ ŋwè lòoŋ nə̀ lòoŋ, ye jəŋ mvə̀’nə̀ wo à dzə yi, nə kə dzeŋ mvə̀’nə̀ yi kpʉ. Nsàp mis nà’nə tesə və̀gə̀ mvwe’ tə̀m mis nə bə tu. ⁷Bwìŋ tse’ ŋkərə̀ə sə̀ ŋgògʉ̀ nàamŋgòŋ bə swiŋ sə̀ mʉbu nə ye bə nàamndzəp wèŋ lòoŋ yuk dʉk. Nsàap yè’sə lòoŋ bwìŋ a gʉ̀ mè yà’, yà’ yuk dʉk sə̀’ laŋ. ⁸Yu nə̀ mò’fis də ŋwè ka lʉm də ya nà’a yuk dʉk ntògʉ yuk. Bʉp rwiŋ mbwa nə̀bʉp, nə kà mvə̀k ŋgòcu yòŋsə̀ jə. Nà’ tse’ lik sə̀’. ⁹A kwasəgə̀ Tà Nwì nə̀ yi tɛ̀’ avès sə̀’ bə zeŋ, nə sə yak bwìŋ sə̀ Nwì a gʉ̀ wo ŋgòsəsə yi sə̀’ bə zeŋ. ¹⁰Ŋgòkwasə nə ye ŋgòyàk bwìiŋ tesə və̀gə̀ sə̀’ mvwe’ cùu sə̀ mò’fis. A nə ye co bum yè’sə kà vɛ’nə ye, bwema am wèŋ na. ¹¹Kaco mvwe’ sə̀ ndzəəp tesə kokgə̀ sə nze, ndzəp nə ye lə̀lʉm nə ye fe’lə sə̀’ cʉcʉk yeŋ. ¹²Kaco tʉ lèmu’ zəm pià yeŋ. Kaco ndi’ mèŋgù zəm lèmu’ sə̀’ yeŋ. Nə ye sə̀’ də, kaco ndzəp nə̀ nà’ sə tesə nə ye cəcəp ye fe’lə sə̀’ bə̀boŋ yeŋ.

Nsàap Ŋkərə̀ Ba

¹³Ŋgà ŋkərə̀ ye-a mʉtsətsə’rə wèŋ yo, yi sə gʉ-a bum bə̀boŋ ya bwìiŋ riŋ də yi ŋgà ŋkərə̀. Yi sə gʉ yà’ bə fʉ̀ə̀ ŋgònì də yi tse’ nsàp ŋkərə̀ nə̀ bə̀boŋ nə. ¹⁴Fana wu tse’-a cəpntʉm, nə ye ŋgà wa bum bwìŋ, nə ye wi’, kà də wu sə kum kɛ’ca ŋgùŋ də wù tse’ ŋkərə̀ dʉk. Wu yà’sə ŋwə̀ nə̀ wù təhə lok zìnə bə mvwès. ¹⁵A vɛ’nə bʉ̀ʉsə̀ ŋkərə̀ nə̀ nà’ tsə mʉbu bohòNwìi kà nsàp nà’nə yegə̀. Nà’a ŋkərə̀ nə̀ sə nze fɛn, nà’ ka yòŋsə̀ Nwì tse’, nà’a və̀gə̀ bohòSatà. ¹⁶Mvwe’ sə̀ bwìŋ sə wa bum bʉ̀ʉ mok, nə sə ye wi’, fana bum kà fo’ yəyərə̀ bə cù mò’fis gì. Nsàap bʉp sə̀ fòlòoŋ nə ye fa’nə sə̀’.

¹⁷Nsàp ŋkərə̀ nə̀ nà’ tsə ma mʉbu bohòNwìi yegə̀ ye rərɛŋ, nə ye fifi bə fʉ̀ə̀. Nsàp ŋkərə̀ ànə ka gʉgʉtu tse’, nà’a koksəgə̀ manziŋ bohòbwìŋ, nə sə gʉ tse’ megu bə̀boŋ ghà yà lòoŋ. Ŋwə̀ nə̀ yi tse’ nsàp ntʉm ànə kà kupsəgə̀, yi kà bwìŋ sə̀’ sə bòrə̀. ¹⁸Yà’ kə̀ lə̀sə də, bʉ̀ʉ sə̀ wo fagə̀ bwìŋ fifi sə bì ŋgwìi fifi, yà’a kùu’, nə gʉŋ, fana wo kə kʉp megu fo’ gʉ̀bòŋ.

Wu Ko Bum Nzeŋgòŋ Ŋge’ Wù Kà Ŋge’e Nwì Ye

¹Nsàp nə̀ wèŋ sə lʉ̀lʉ̀, nə sə kʉəm kɛ’ sə və̀ bohòwèŋ yè’sə fò? Yà’ sə tesə və̀ bohònsàp ntʉm jòŋ nə̀ wèŋ tse’. Nsàp ènə sə lʉ̀ ndzə ni’ì wèŋ nùumbu pwe’. ²Wèŋ sə dzəm bum, nə kà yà’ tse’, fana wèŋ ye ŋga’a də wèeŋ zə bʉ̀ʉ mok wèŋ. Wèŋ sə dzəm bum co wèŋ bɛ’ ko yà’ bə ŋàŋ, nə kà yà’ tse’, fana wèŋ sə kʉ̀ə̀m, nə sə lʉlʉ̀. Njo nə̀ wèŋ sə kà bum yè’sə tse’, a bʉ̀ʉsə̀ wèŋ sə kà Nwì də yi fa weŋ lɛŋ. ³Wèŋ sə lɛŋ, wèŋ kà sə tse’ bʉ̀ʉsə̀ yusə̀ wèŋ sə tsərə ŋgògʉ̀ bə zeŋ sə bʉp. Wèŋ sə lɛŋ mègù bum yè’sə də wèeŋ tse’ yà’ ŋgògʉ̀ ntʉʉm awèeŋ sə kwa.

⁴Wèeŋ ŋgàa ko nto wèŋ, co wèŋ ka riŋ də ŋwə̀ nə̀ yi ye-a ŋge’ bə bum sə̀ sə nze fɛɛŋ, kaco yi ye to ŋge’ bə Nwì yeŋ riŋ à? A ye-a sə̀ ndà, ŋga yi də yi ko ŋge’ bə bum nzeŋgòŋ, ye də yi gʉ̀ ni’ ye ŋgà bɛ̀ŋ Nwì. ⁵Yusə̀ yà’a ndzənə ŋwàk Nwìi dʉk də, <<Yòŋsə̀ nə̀ Nwì a nòŋsə nà’ ndzə ni’ì vèes dzəmgə̀ də a ye bʉ̀ʉ ye nə̀bʉp>>, yà’a ka ŋgàm yeŋ. ⁶A gʉgʉŋ ŋgòyù mandzə̀ Nwì, nə ye də bòvə̀m nə̀ yi tse’ ŋgòfa ves, tse’ gha’ ŋàŋ yi nə noŋsə bum sə̀ bʉp sə̀ ntʉʉm avès sə dzəm. Ŋwàk Nwì nə sə tsə̀’ də,

<<Nwì bɛ̀ŋ bʉ̀ʉ sə̀ wo nɛ̀gə̀ ni’,

Nə sə fa ŋàŋ bohòbʉ̀ʉ sə̀ wo kà ni’ nɛ̀gə̀.>>

⁷Nà’a njo nə̀ mʉ̀ sə tsə̀’ weŋ də, wèeŋ fa ni’ awèŋ bohòTà Nwì, nə bɛŋ Satà, ya yi caŋ me’rə weŋ. ⁸Wèeŋ sooŋ kʉəp və Nwì ya yi kʉəp və weŋ. Wèŋ ŋgàa gʉ̀ bʉp, wèeŋ və kə cuk bo awèŋ, nə ye wèŋ bʉ̀ʉ sə̀ wèŋ ka tsətsərə̀ rərəŋ tse’, gʉ ntʉʉm awèeŋ ye rərɛŋ. ⁹Wèeŋ tsərə bʉp sə̀ wèeŋ gʉ̀gə̀ə, nə kɛ’ ŋgùŋ bə waŋ. Wèeŋ teŋsə ywì, nə waŋ wa, si awèŋ sə̀ yà’ sə rɛɛŋ yà’a kupsə, yà’a kpʉ də̀mm. ¹⁰Wèeŋ jəŋ ni’ awèŋ sə nze bohòTà Nwì ya yi nə le’ lokoksə weŋ mʉtsə̀.

Kà Ŋwè Yò

¹¹Bwema am wèŋ, ka bə̀boŋ co wèŋ sə yoŋ ŋwə̀ mòk yeŋ. Ŋwə̀ nə̀ yi yo-a moma ye, kè də yi sak nà’ àlɛ’, ye də yi sə gʉ̀ yà’sə bohòlʉ̀k Nwì. A ye-a ŋga wù sak lʉ̀k nə, ye də wù ka ŋwə̀ nə̀ wù sə gʉ̀ yusə̀ lʉ̀k nə sə dʉk yeŋ, wu ŋwə̀ nə̀ wù sə tsərə də wù gha’ ŋàaŋ lʉ̀k nə. ¹²Ŋgà fa lʉ̀k, nə ye ŋgà səsak mègù mò’fis, yi Nwì, a sə̀ yi nə̀ yi tse’ ŋàaŋ sə̀ ŋgòlùŋsə ŋwè, nə ye ŋgòzə nà’. Fana wu yè’sə ndà nə̀ co wù sak bwe tɛ̀’ɛ yo ɛ?

Ŋwè Ka Zòŋ Riŋ

¹³Wèeŋ yu’rə na jo ɛ̀, wèŋ sə̀ wèŋ sə dʉk də, <<Ntinə kè zòŋ ɛ̀’ a nə lo mvwe’ lak yà’a bə yà’a, nə kə cum fo’ lùmŋgòŋ mò’fis, nə seŋ bum fo’, nə tse’ swe’.>> ¹⁴Ŋga wèŋ ka yusə̀ yà’a nə gʉ yòŋsə̀ə awèŋ sə zòŋ anə riŋ. Yòŋsə̀ə awèŋ sə yè’sə yu yà? Yà’ megu co mʉmbà’ nə̀ wu yàaŋ yəgə̀ nà’ nə̀ zəzòŋ, ghàr nà’ sam bisə nà’a. ¹⁵Bògha’ co wèŋ dʉk lɛ də, <<A ye-a ŋga Tà Nwì dzəm-a vɛ’nə, ŋga a cu ŋwəm, vesùwèeŋ nə gʉ yu yè’e bə yu yà’a.>> ¹⁶A ŋga’a də wèŋ sə kùmŋgùŋ, nə sə tse’ cù nə̀bʉp. Nsàp cèp cù nə bə làŋgàŋ nà’nə bʉp.

¹⁷Ye də ŋwə̀ nə̀ yi rì də yè’e yusə̀ bə̀boŋ sə̀ co yi gʉ yà’, nə kà yà’ gʉ̀, ye də yi gʉ̀ bʉp.

Ntip Nə̀ BohòBʉ̀ Ŋgàa Ghàk

¹Ŋgàa ghàk wèŋ, wèeŋ yu’rə fa mʉ-a momjo ɛ̀. Wèeŋ waŋ kɛ’ torə ŋgùŋ bʉ̀ʉ nsàp ŋgə’ nə̀ nà’ sə və̀ bohòwèŋ mvə̀k momjo. ²Ghàak awèŋ sə bì bʉp lòo, nzək zʉ və̀psə wes bə̀bòoŋ cə̀ək awèŋ laŋ. ³Ndu a ta wes mbàam awèŋ, ndu sə tə ŋgònitsə̀’ də wèŋ tse’ njo, yà’a nə ta ŋgùup ni’ awèŋ co mis tɛ̀ŋ yà’ yi. Wèŋ sə lòsə nòŋsə mbàam awèŋ, nə kà rì də nze nə kʉəp ŋgòmè laŋ rì à? ⁴Wèŋ a ka bʉ̀ʉ sə̀ wo a fàk mʉ nzuù wèŋ mbàam awo lak fa. Yuk-a mvə̀’nə̀ wo sə wa ɛ̀. Nwì Tà nə̀ ghaŋ a yuk wa bʉ̀ʉ yè’sə laŋ. ⁵Wèŋ a zʉ jə nze nè’nə tè nə sə gʉ bum mvəsə̀ yà’ bòweŋ. Wèŋ a zʉ, nə fʉə co mbòŋ nə̀ yi sə tək nùmbu nə̀ wo nə sʉə yi. ⁶Wèŋ a sak bʉ̀ʉ sə̀ bə̀boŋ co wo bʉ̀ʉ sə̀ bʉp, nə zə wo. Wo cum megu gəe’.

Ko Ntʉm Nə Sə Lɛŋ Nwì

⁷Ko ntʉm bwema am, tə̀tè Tà kə və. Kʉk ja’a mvəsə̀ ŋga nzum təkgə̀ də zʉzʉʉ kʉrə mʉ nzuù yi e. Yi kogə̀ ntʉm mvə̀k lùm tè mbʉ̀ŋ kə li. ⁸Wèŋ tse’ ŋgòtək sə̀’ vɛ’nə tə̀tè Tà nə və. Və̀və̀ ye nə kʉəp yè’sə laŋ. ⁹Wèeŋ kà də wèeŋ ŋwʉrə kɛ’ca də ŋwə̀ nəmòk sə kà mvəsə̀ wèŋ dzəm sə gʉ̀ ŋwʉ̀rə̀, bwema am wèŋ na. Njo nə də ya Nwìi kà weŋ kə̀ sak. Ŋgà sak nzak nə kʉəp ŋgòvə̀ laŋ. ¹⁰Tsərə na ŋgàa tsòhòbum Tà Nwì sə̀ wo anə ye to mantombì yà’a nɛ̀. Wo yà’a nsàap ŋgàa yə ŋgə’, nə sə ko ntʉm. ¹¹Vès dʉk də wo cu bə kwəkwa bʉ̀ʉsə̀ wo ànə sə ye ŋgə’ vɛ’nə, fana wo kiŋ ntʉm, nə təəŋ mali gʉgʉŋ, nə kà mè’rə̀. Mʉ̀ rì də wèŋ à yuk mvəsə̀ Jup à kì ntʉm ghà nə̀ mə̀mumsə̀ a və̀ bohòyi, fana Tà Nwì kə se yi maŋkwɛ̀ŋ yà’a laŋ. Bə nə̀ zìnə, Tà tse’ koksə̀manziŋ bohòvès cɛ̀bʉ̀ə̀.

¹²Yumòk sə̀ yà’ gʉ càsə də, wèeŋ cu ŋgòcèp yumok, wèŋ kà kɛ̀ŋ, bwema am wèŋ a. Kà də wèeŋ kɛŋ ntòbu kè nzeŋgòŋ, kènə də wèeŋ kɛŋ to liŋ yumok dʉk. Bòdə wèeŋ dʉk megu də <<Ŋ̀>> ŋga wèŋ dzəm, nə dʉk də <<Hai’>> ŋga wèŋ ka dzəm.

¹³A ye-a ŋga ŋwə̀ nəmòk sə yə ŋgə’, boŋ də yi lɛŋ Nwì, fana a ye-a ŋga mòk sə kwa ye kwa, yi yəm kuksə liŋ Nwì bə ŋkì. ¹⁴Ŋgà yiyaŋ ye-a mʉtsətsə’rə wèŋ yo, yi to bʉ̀ ŋkwàha bʉ̀ʉ sə̀ mʉ cos, wo kə lɛŋ fa yi pìriyà. Wo lɛŋ, wo yok yi bə mve’ mʉnə liŋ Tà Jisòs. ¹⁵Pìriyà nə̀ wo lɛŋ nà’ bə dzədzəm nə, nà’a nə gʉ yiya nə me. Tà Jisòos nə gʉ yi gʉŋ fe’lə sə̀mok. A ye-a ŋga yi à gʉ̀ bʉp, Nwì swifa yi yà’ sə̀’. ¹⁶Fana bòbohòwèŋ də, mòok tsoho fa mòk bʉp ye sə̀ yi gʉ̀ʉ, mòk tsoho fa mòk sə̀’ vɛ’nə, ya mòok lɛŋ fa mòk, mòk lɛŋ fa mòk nə sə̀’, ya yiyaŋ kà weŋ ya, ya Nwìi luŋsə weŋ. Nsàp pìriyà ŋwə̀ nə̀ yi kə̀kʉrə̀ tse’ ŋàŋ nja ŋgògʉ̀ bum nə̀bʉp. ¹⁷Àlajà à ye sə̀’ ŋwè co vesùwèŋ vɛ’ɛ, nə lɛŋ Nwì nə zìnə də mbʉ̀ʉŋ kà li. Mbʉ̀ŋ à ci’i, nə kà sə nze cʉəm mʉnə lùumŋgòŋ tɛ’ bə bwes. ¹⁸Ànə geŋ, yi lɛŋ fe’lə sə̀mok, mbʉ̀ŋ li tsoŋ mʉbu nə̀bʉp, fana bum to.

¹⁹Bwema am wèŋ, a ye-a ŋga mòk mʉtsətsə’rə wèŋ jàm me’rə-a mandzə̀ Nwì nə̀ zìnə nə, fana mòk kə jəŋ fəsə və yi sə̀mok. ²⁰Rìŋtse’ də a ye-a sə̀ ndà pwe’ nə̀ yi fis fəsə və̀ ŋgà gʉ̀ bʉp mvwe’ bʉp ye, ŋwə̀ ànə bwi və mvwe’ mandzə̀ nə̀ bə̀boŋ, fana ye də yi fèp fis fa ŋgà gʉ̀ bʉp ànə yòŋsə̀ ye mvwe’ kpʉ, nə swihi bʉp sə̀ co wù kà fʉ̀k.