Hibrù

Ŋwàk nə̀ Wo à Còm Fa

Bʉ̀ʉ HIBRÙ wèŋ

Wo à còm fa ŋwàk ènə bohòbòop Krətèeŋ sə̀ wo bʉ̀ʉ Hibrù wèŋ sə̀ ŋgə’ à sə və̀ bohòwo wùriŋ. (Wo togə̀ bʉ̀ʉ Hibrù sə də bʉ̀ʉ Jus sə̀’.) Yà’a sə yəəŋ co də wo nə yamak dzədzəm nə̀ Krətèŋ wèŋ tse’ nà’ bohòJisòs nə. Ŋwə̀ nə̀ yi à còm ŋwàk nə à sə kwɛ’sə wo, nə sə tip wo də yà’wèeŋ təəŋ gʉgʉŋ bə dzədzəm nə̀ yà’ tse’ nə.

Yi dʉk fa yà’wèŋ də Jisos Krɛɛst ŋwə̀ nə̀ Nwì à tum və̀ yi ŋgònìtsə̀’ fa bwìŋ mʉmvə̀’nə̀ Nwì cu sə. Mʉmvə̀’nə̀ yi mo Nwì fana ye də fàak ye sə̀ yi à sə gʉ̀ʉ yam càsə bum pwe’ sə̀ wo à sə gʉ̀ yà’ ŋga cu ntòmvə̀k nə̀ bwìŋ à sə yù lʉ̀ʉk sə̀ zəm sə. A yà’sə də yi yam càsə ŋgàa tsòhòbum Nwì bə masinjàa Nwì, nə ye ŋgàa fa satikà’ kè Musì àlɛ’ sə̀’. Nà’a njo nə̀ wo tse’ ŋgòlòmantombì bə dzədzəm awo ŋga wo sə naaŋ tu bohòJisòs nə.

Mbʉ̀p nə̀ hum-ncòp-mò’fis ndzə mvwe’ ŋwàk Hibrù ènə sə cèp də, mandzə̀ nə̀ co ŋwè gʉ Nwì kwa mègù ŋgòtse’ dzədzəm nə sə naaŋ tu bohòyi. Nà’ sə taŋsə bwìŋ ŋkʉ̀ʉŋ sə̀ wo à tse’ nsàp dzədzəm nə̀ Nwìi kwagə̀ bə zeŋ nə. Mbʉ̀ʉp sə̀ ba sə̀ yà’ lə̀sə ŋwà’ ènə sə cèp mvəsə̀ bʉ̀ʉ sə̀ wo sə yù mandzə̀ Nwì tse’ ŋgòcu ncu àwo sə nze fɛnə.

Nwì Tsə̀’ Lə̀sə Fa Bwìŋ Ncèp Ye Cùhu Mo Ye Nə

¹Nwì ànə cep to mantombì fa’a bohòtàcicii avès bə nsàap mandzə̀ zok zok. Yi à cèp bohòwo vɛ’nə kɛ̀’ ŋkʉ̀ʉŋntɛ̀ŋ. Yi à sə tsə̀’ bwì ncèp ye nə cùhu ŋgàa tsòhòbum Nwì wèŋ. ²Nə ye də bə nùumbu sə̀ yà’ sə lə̀sə lòyè’e yi a cèp bohòvès mok cùhu mo ye nə̀ yi a tum və̀ nə. Yi gʉ mo ye nə ŋgòtse’ ŋàŋ bə bum ye pwe’fo’. Yi à gʉ̀ bum pwe’ sə̀’ ndzə bohònà’. ³Bə̀bo nə̀ Nwì nə sə rɛɛŋ yəəŋ mʉ lisə̀ bwì bohòyi nə. Bwì yə yi, fana wo rìŋtse’ nsàp ŋwə̀ nə̀ Nwì cu nə vɛ’ɛ pwe’ nə̀ pwe’. Nzeŋgònə cu malì fo’ yè’sə sə̀’ bʉ̀ʉ ncèp mo ye nə, nə̀ nà’ tse’ ŋàŋ nə. Ghà nə̀ yi à gʉ̀ rɛŋsə fis wes fa bwì bʉp awo fana yi lo kə cum yuye mʉbu bo ma mà’a Nwì nə̀ yi maŋgəŋgèŋ, nə sə sak tsoŋ gaŋ ye mbwa.

Mo Nwì Gha’ Masinjàa Nwì Wèŋ

⁴Mvə̀’nə̀ yi cu bo ma mà’a Nwì yà’sə fana yi yam càsə masinjàa Nwì pwe’ yi. Vès rì vɛ’nə bʉ̀ʉsə̀ liŋ sə̀ Nwì a fa yi sə yà’ yam ghak liŋ masinjàa Nwì sə wèŋ pwe’fo’. ⁵Nwì bə tu ye à ka bohòmasinjà ye mòk nùmbu mòk dʉk yuk fa də,

<<Wu yè’e mo àm. Ye jəŋ ntinə, nə lo mantombì, mʉ yè’e tɛ̀’ yo.

Mvə̀’nə̀ yi à dʉk də,

Mʉ nə ye tɛ̀’ ye, yi ye bwi mo àm>>

nə, yi ka bohòmasinjà mòk vɛ’nə dʉk. Mègù Jisòs yiìyi nə̀ yi a cèp yuk fa nà’ nsàp ncèp ènə. ⁶Yumok ye fe’lə sə̀’ də, ghà nə̀ Nwì à də yi nə tum vesə motu ye nə sə nzeŋgòŋ fana yi cep də,

<<Masinjàa Nwì pwe’ kuksə mo ye nə.>>

⁷Yusə̀ ghaŋ sə̀ yi à cèp yuk bə liŋ masinjàa Nwìi də,

<<Yi gʉ̀ masinjàa ye co fə̀fə̀, nə gʉ bwe fàak ye yè’sə wèŋ co lʉm-mis.>>

⁸Nə ye də ma nə̀ mo ye nə fana Nwì à to nà’ bə liŋ sə̀ ye mvə̀’nə̀ yi à cèp də,

<<Nwì, wu nə cum mam mʉnə kapràak ŋkum mvèsə̀ nə̀ mvèsə̀.

Wu nə sə sak gaŋ yo sə bə mandzə̀ nə̀ nà’a zìnə.

⁹Wù dzəm mègù bum sə̀ yà’a kə̀kʉrə̀ mandzə̀ nə̀ Nwì,

Nə bɛŋ yusə̀ aco yà’ gʉ bʉpsə lʉ̀k nə̀ Nwì nə pwe’fo’.

Nà’a njo nə̀ Nwì nə̀ yi Nwì yònə a gʉ̀ wu də wu yam,

Nə tse’ kwəkwa nə̀ nà’ càsə sə̀ ŋge’ yo mok sə wèŋ pwe’fo’.>>

¹⁰Yumok sə̀ yi à cèp fe’lə bə liŋ mo ye sə də,

<<Tà, a wù nə̀ wù ànə gʉ nzeŋgòŋ,

ntòbu sə̀’ bo fàha yo.

¹¹Wo nə̀ bisə ŋgwàŋ, wù cum mali yòfo’.

Wo nə vəp co cə̀k nə̀ nà’ rèŋ laŋ.

¹²Wu nə lim benə wo co cə̀k.

Wo nə kupsə, wù mam yòmvə̀’nə̀ wù cu.

Lùumŋgòoŋ yo nə kà ye kə̀ mè yuk.>>

¹³Ncèp mòk nə̀ Nwì ka nà’ bohòmasinjà ye mòk cep yuk fa sə̀’ də,

<<Cum bo ma mà’a mʉ̀ fɛɛŋ

Tə̀tè mʉ nə gʉ bʉ̀ʉ sə̀ wo sə bɛ̀ŋ wu,

Wù nəŋ tes kù mʉ tuhù wo.>>

¹⁴A ye-a vɛ’nə fana ye də masinjàa Nwìi yè’sə ndà wèŋ? Wo mègù yòŋsə̀ə sə̀ wo gʉ̀gə̀ fàak Nwì. Wo tɛsəgə̀ bʉ̀ʉ sə̀ wo nə̀ tse’ lùŋ.

Yu’rə, Nə Kiŋtse’ Ntirə̀ Nə̀ Bə̀boŋ Nə Cʉ̀k

¹Nə ye də a rìŋtse’ də mo ye nə yam càsə masinjàa Nwì wèŋ vɛ’nə fana nà’a njo nə̀ a kə’ə ntu’ bə ncèp nə̀ a yuk nà’ nə, ya kà də a yeto ŋgòmərə nə sə me’rə kok nà’ dʉk. ²A rì də ncèp nə̀ masinjàa Nwì wèŋ à jə və̀ fa bwì nə tse’ ŋàŋ. Ŋwə̀ nə̀ yi à ka ncèp ènə noŋsə pwe’ à tse’ ŋgə’ kə̀kʉrə̀. ³Vesùwèŋ nə rì nə vɛ’nə fana ye də ncèp nə̀ co a nə swirə fʉk ŋgə’ə bʉ̀ə̀, ŋga a yuk-a ncèp lùŋ nə̀ Nwì nə, nə kà mbɛŋ kòm na. Tà Jisòs ànə tsòho to ncèp ènə yi bə tu ye. Bʉ̀ʉ sə̀ wo ànə yuk ncèp nə à nìtsə̀’ sə̀’ də ncèp nə nà’a zìnə. ⁴Nwì à sə nìtsə̀’ ye sə̀’ də ncèp nə zìnə bə mandzə̀ nə̀ yi à sə gʉ̀ nsàap maŋgəŋgèŋ zok zok. Nə ye də yi à gàpsə fa bwìŋ ŋkərə̀ nə̀ nà’ à və̀ bohòYòŋsə̀ nə̀ Rərɛŋ sə̀’ mvə̀’nə̀ yi dzəm.

Jisòs À Bʉ̀ʉŋ Ŋwè Ya Yi Tsok Fa Bwìŋ Mandzə̀ Lùŋ

⁵Nzeŋgònə̀ nà’ cu ŋgòvə̀ə, nə̀ vès sə cèp bə zeŋ nè’nə, Nwì à ka nà’ də masinjàa Nwìi tse’ ŋàŋ fo’ wo fa. ⁶Yi à fa yà’ lɛ bohòŋwè. Yà’a mvə̀’nə̀ wo à còm yà’ ndzənə ŋwàk Nwì də,

<<O Nwì, mo ŋwèe yè’sə yu yà nə̀ co wù sə tsərə də wu kə tɛsə yi ɛ?

⁷Wù à fəsə lòŋàaŋ ye fa’ maŋkwɛ̀ŋ,

Nə gʉ yi yi jə’rə casə masinjàa Nwì wèŋ mʉnə mvə̀k momjo vɛ’ɛ.

Mʉmvə̀k nə̀ jo ànə à cà fana wù gʉ fe’lə yi,

Yi yam co ŋkum nə̀ ghaŋ nə̀ bwìŋ sə gɛ̀ŋ yi.

⁸Wù gʉ yi də yi tse’ ŋàŋ bə bum pwe’ sə̀’ yi nə.>>

Wo à còm vɛ’nə də Nwìi gʉ ŋwè ŋgòtse’ ŋàŋ bə bum pwe’ yi. A yà’sə də yumòk nə̀ co də ŋwè ka nà’ ghak ka mok cum fe’lə. Megu də vès ka ŋga ŋwè sə nìtsə̀’ nsàp ŋàŋ ènə mʉnə bum pwe’ mʉlisə̀ bwì ŋga’a ntòye. ⁹Vès sə yə lɛ Jisòs nə̀ yi tse’ ŋàŋ mʉnə bum pwe’ co ŋkum yi. Nwì ànə gʉ yi mantombì fa’ ghàr də yi jə’rə casə tsoŋ masinjàa Nwì wèŋ. Ànə ye vɛ’nə bə bòvə̀m nə̀ Nwì, də ya ŋga yi kpʉ njo tu bwìŋ. Fana Nwì à fa yi dzòk nə̀ ghaŋ nə̀ co wo wəp yi ènə bʉ̀ʉsə̀ yi à yə ŋgə’, nə kpʉ.

¹⁰À gʉ̀ bum pwe’fo’ Nwì, yà’ cu fo’ yà’sə ŋgògʉ̀ ya yi yəəŋ ŋkʉ̀ʉŋ. Fana yà’ ànə ye kə̀kʉrə̀ də Nwì à gʉ̀ Jisòs ŋgòye kə̀kʉrə̀ ma lòoŋfo’ bə nsàp ŋgə’ nə̀ nà’ à yə, ya bwìiŋ bʉʉŋ və bwe ye, nə kə tse’ bum sə̀ bə̀boŋ sə̀ bə bòoŋ Nwì sə. Jisòs nə ŋwə̀ nə̀ mantombì yi nə̀ ŋgònìtsə̀’ fa bwì mandzə̀ lùŋ. ¹¹Yi Jisòs nə̀ yi gʉ̀gə̀ bwì wo yəəŋ rərɛŋ mantombìi Nwì, nə ye bə bʉ̀ʉ sə̀ yi rɛŋsə fisgə̀ fa wo bʉp awo sə pwe’fo’ tse’ mègù tɛ̀’ nə̀ mò’fis. Nà’a njo nə̀ Jisòs nə togə̀ wo də bwema, nə kà marè’tu ŋgòto yà’wèŋ vɛ’nə koksə̀ nə. ¹²Ghà nəmòk à ye, Jisòs nə cep bohòNwì də,

<<O Nwì, mʉ nə gʉ bwema am wèŋ, wo riŋ liŋ yo.

Mʉ nə lokok təəŋ mvwe’ kwe’ bʉ̀ʉ yo wèŋ,

Nə sə yəm gɛŋ liŋ yo sə.>>

¹³Yi à cèp mòk sə̀’ də,

<<Mʉ nə fa ntʉm àm bohòNwì.>>

Nə dʉk fe’lə mvə̀k mòk sə̀’ də,

<<Wèeŋ ye mʉ nè’, ves bwe sə̀ Nwì a fa mʉ.>>

¹⁴Bwe ye sə wèŋ mègù sə̀’ co bwìŋ, wo tse’ bo bə kù sə̀’. Fana Jisòs bə tu ye və ye sə̀’ co wo, ya yi kpʉ ŋgògʉ̀ bʉpsə Satà. A vɛ’nə bʉ̀ʉsə̀ Satà nə ŋwə̀ nə̀ yi tse’ ŋàŋ bə kpʉ yi. ¹⁵Njo nə̀ wo ànə sə wəp kpʉ fana ncu àwo megu co wo ŋkwɛ̀ŋ vɛ’ɛ. Yi à və̀ə, yà’ kə gʉ wo, wo swɛ’ɛ tesə mvwe’ nsàp wʉə ànə. ¹⁶Yà’ nòjəja də yi ànə ka ŋgòkə̀ tɛsə masinjàa Nwì wèŋ və. Yi à və̀ də yi kə tɛsə ŋgwì bʉ̀ Abràham wèŋ. ¹⁷Ye də ànə ye kə̀kʉrə̀ də yi bʉʉŋ co bwema ye sə wèŋ bə nsàp mandzə̀ nə̀ fòlòoŋ, ya yi ye co ŋkum ŋgà fa satikà’ àwo ŋgòfàk bohòNwì bə zìnə, nə tse’ koksə̀manziŋ bohòbwì, ya yi kwes fis fa bwì fɛ̀ŋ awo. ¹⁸Aco yi tɛsə riŋ to bʉ̀ʉ sə̀ wo sə yə ŋgə’ bə mə̀mumsə̀ vɛ’nə, bʉ̀ʉsə̀ yi bə tu ye ànə ye to ŋgə’ bə mə̀mumsə̀ mantombì sə̀’ vɛ’nə.

Jisòs Yam Gha’ Musì

¹Bwema am wèŋ, Nwì a to fis nòŋsə weŋ zok ŋgòye bʉ̀ʉ ye. Ye də wèeŋ sə tsərə Jisòs nə̀ a yi nə̀ yi tə mvwe’ kùu Nwì. Yi ŋgà fa satikà’ nə̀ ghaŋ bohòvès bə bum sə̀ vesùwèŋ sə fa ntʉm fo’ sə. ²Nwì ànə cokfis yi yi də yi gʉ fàak yà’sə. Yi à sə gʉ̀ fàak sə̀ Nwì à fa yi sə fana yi gʉ yà’ bə zìnə ye pwe’fo’. Yà’ mègù sə̀’ mvə̀’nə̀ Musì ànə gʉ fàak ye bohòbʉ̀ʉ Nwì wèŋ bə zìnə ye pwe’fo’ yà’a. ³Jisòs yam gha’ Musì yi, sə̀’ co mvə̀’nə̀ ŋwə̀ nə̀ yi a ci ndap yam gha’ ndap nə yi yà’a. ⁴Wu yə-a ŋga ndap tə, wù rì də à ci nà’ ŋwè. Yà’ mègù sə̀’ zìnə də bum sə̀ vesùwèŋ sə yə yà’ pwe’fo’, à gʉ̀ yà’ Nwì. ⁵A zìnə də Musì ànə gʉ fàak ye bohòbʉ̀ʉ Nwì wèŋ bə zìnə, sə̀ wo yà’sə co ndap Nwì nə. Yi à gʉ̀ vɛ’nə ŋga yi mègù mofàk. Fàak ye sə à sə nìtsə̀’ gèsə lo yà’sə bə sə̀ wo nə̀ kə̀ cèp bə zeŋ mantombì. ⁶Ma nə̀ Jisòs Krɛst ye, yi à gʉ̀ fàak ye bohòbʉ̀ʉ Nwì wèŋ sə co mo Nwì nə nə̀ mwe bə tu. Bum pwe’ à ye ndzə bohòyi fana yi gʉ yà’ bə zìnə ye pwe’. Vesùwèeŋ yè’e sə̀’ ndap ye nə, ŋga a ye-a də a sə naaŋ tu bə bum sə̀ Nwì à kàk ves sə nə kà sə mərə̀ na. Ŋga a sə kwa, nə sə tsərə də nùmbu ànə kə wɛs tsoŋ.

Jəŋ Ŋkərə̀ Ya Wu Kà Mvwe’ Ncum BohòNwì Bʉə

⁷Yòŋsə̀ nə̀ Rərɛŋ nə sə cèp də,

<<A ye-a ŋga wèŋ yuk ŋgì nə̀ Nwì nə ntinə,

⁸Wèŋ kà də wèeŋ gʉŋ ntʉm dʉk.

Kà də wèeŋ gʉŋ tu mvə̀’nə̀ bʉ̀ʉ awèŋ ànə gʉŋ fa’ ghà nə̀ wo à sə gìhi ŋgəà,

Fana wo gʉŋ tu bohòNwì, nə mumsə ja’a yi yà’a dʉk.

⁹Ànə geŋ Nwì cep də,

<Tàcicii awèŋ ànə gʉŋ tu bohòmʉ̀,

Nə mumsə mʉ lùm mòk fa’,

Ŋga wo à yə mè yusə̀ mʉ̀ ànə fak bohòwo mʉnə lùumŋgòŋ hum kwè vɛ’ɛ bə̀boŋni.

¹⁰Nà’a njo nə̀ ntʉm à bʉp mʉ bohòwo ŋkuŋ mʉ̀ cep də,

Wo ka ŋgògì sənə mandzə̀ àm dzəm fana nə sə jam megu jàmə. Wo à bɛ̀ŋ ŋgòrìŋ mandzə̀ nə.>

¹¹Ànə geŋ mʉ̀ jok, nə kɛŋ də, wo nə kà ŋgòkə̀ cu yòŋsə mvwe’ yàm və̀ yuk.>>

¹²Bwema am wèŋ, wèeŋ jəŋ ŋkərə̀ ya kà də ŋwə̀ nəmòk mʉŋgorə̀ wèeŋ kə tse’ nsàp ntʉm nə̀ bʉp nə̀ aco nà’ gʉ yi, yi kà Nwì dzəm, nə me’rə mak mandzə̀ Nwì nə̀ yi cu fo’ ŋwəm nə dʉk. ¹³Yusə̀ wèeŋ sə gʉ sə lɛ də wèeŋ sə tipsə bwìŋ ŋgòtse’ ntʉm nə̀ ŋgòlòmantombì nùumbu pwe’. Wèeŋ sə gʉ vɛ’nə ya ŋga lʉ̀ʉm sə̀ bʉp bòrəgə̀ bwìŋ bə zeŋ yà’a kà weŋ bòrə̀. Yà’a bòrə-a weŋ fana wèŋ gʉŋ bʉp lo tu bohòNwì. Ye də wèeŋ gʉ yè’sə niè’ nə̀ a tse’ malì mvə̀k mòk co ntinə nè’e fo’. ¹⁴Wèeŋ riŋ də vesùwèeŋ ŋga’a ves Jisòs wèŋ mvwe’ mò’fis. Yè’sə zìnə ŋga a kotse’-a bum sə̀ vesùwèŋ ànə yuk yà’ mantombì yà’a cʉ̀k tə̀tè kə ləsə na. ¹⁵Ncèp nə cu malì ndzənə ŋwàk Nwì də,

<<A ye-a ŋga wèŋ yuk ŋgì nə̀ Nwì nə ntinə,

Wèŋ kà də wèeŋ gʉŋ ntʉm dʉk.

Kà də wèeŋ gʉŋ tu mvə̀’nə̀ bʉ̀ʉ awèŋ ànə gʉŋ fa’ ghà nə̀ wo à sə gìhi ŋgəà

Fana wo gʉŋ tu bohòNwì yà’a dʉk.>>

¹⁶Bʉ̀ʉ sə̀ wo ànə yuk, nə sə gʉŋ tu à ye ndà wèŋ? Ka bʉ̀ʉ sə̀ Musì à kə̀ fis və̀ wo mvwe’ nzeŋgòŋ Ijìp yà’a yeŋ nà? ¹⁷Bʉ̀ʉ sə̀ wo ànə joksə yi ntʉm mʉnə lùumŋgòŋ hum kwè à ye ndà wèŋ? Ka bʉ̀ʉ sə̀ wo à gʉ̀ bʉp nə kpʉ, ni’ awo nòoŋ mam ŋgəà yà’a yeŋ nà? ¹⁸Nə ye sə̀’ də bʉ̀ʉ sə̀ yi ànə kɛŋ də wo nə kà mvwe’ ye ŋgòyòŋsə fo’ kə̀ ni yuk ndà wèŋ? Ka bʉ̀ʉ sə̀ wo à ka dʉk ye yuk yeŋ nà? ¹⁹Vesùwèŋ yə jəja də wo ànə ka fo’ kə ni to njo nə̀ wo ànə ka tu bohòNwì naàŋ.

Mʉmvwe’ Nə̀ ŊgòCu Yòŋsə Fo’

¹Nwì a kàk ves də anə lo kə cum yoŋsə mvwe’ ye. Ye də a bə̀boŋ də a jəŋ ŋkərə̀ də kà də ŋwə̀ nəmòok kə tesə mʉŋgorə̀ vès nə̀ də yi ka ye fo’ kə ni dʉk. ²Vesùwèŋ a yuk Ntirə̀ Nwì nə̀ nà’a bə̀boŋ nə, sə̀’ mʉ mvə̀’nə̀ wo ànə tsok fa tàcici avès wèŋ ghà nə̀ wo à ye ŋgəà yà’a sə̀’. Megu də vesùwèŋ yə də ncèp nə̀ wo ànə yuk nə à ka wo yumok tɛsə. Nà’ ànə ka wo tɛsə bʉ̀ʉsə̀ wo ànə yuk, wo kà yà’ sə ntʉʉ̀ wo dzəm. ³A nə ni fo’, nə cum yoŋsə mvwe’ ye sə vesùwèŋ sə̀ a dzəm ncèp nə̀ nje nə sə ntʉʉ̀ vès sə. Nwì à cèp ma nə̀ bʉ̀ʉ sə̀ wo à ka ncèp ye nə dzəm də,

<<Ànə geŋ mʉ̀ jok, nə kɛŋ də

Wo nə kà ŋgòkə̀ cu yòŋsə mvwe’ yàm və̀ yuk.>>

À ka də mvwe’ sə̀ ŋgòcu yòŋsə fo’ ànə ye bʉ̀ə̀ yeŋ. Bʉsə̀ yi ànə cep yè’sə ŋga yi gʉ̀ wes mè nzeŋgònə laŋ, nə yoŋsə yu ye. ⁴Njo nə̀ yà’ cu mʉmvwe’ mòk ndzənə ŋwàk Nwì anə də, nùmbu nə̀ sàmba à dzèeŋ, ŋga Nwì gʉ̀ wes fàak ye fana yi cum yoŋsə yuye.

⁵Mvwe’ sə̀ ŋgòcu yòŋsə sə ànə ye fo’ yo vɛ’nə fana yi cep mali də, <<Wo nə kà mvwe’ yàm sə kə̀ cu yòŋsə yuk.>> ⁶A rì də mvwe’ sə̀ ŋgòkə̀ cu yòŋsə fo’ sə cu yo. Nə riŋ sə̀’ də bʉ̀ʉ sə̀ wo ànə yuk nə kà sə ntʉʉ̀ wo dzəm, wo ànə ka fo’ ni lo. ⁷Fana Nwì a fa malì mʉmvə̀k mòk sə̀mok nə̀ yi sə to nà’ də ntinə, nà’a ŋga’a. Ye jəŋ mvə̀’nə̀ bʉ̀ʉ yà’sə wèŋ à ka fo’ kə ni yà’sə fana, lùumŋgòŋ ànə ca ma ŋkwɛ̀ŋ anə wùriŋ fana Nwì cep casə yumok cùhu Devìd. Yusə̀ yi à cèp sə, a sə̀’ ncèp nə̀ wèŋ a yuk nà’ sə̀’ laŋ. Nà’a də,

<<A ye-a ŋga wèŋ yuk ŋgì nə̀ Nwì nə ntinə,

Wèŋ kà də wèeŋ gʉŋ ntʉm dʉk.>>

⁸A rì də mvwe’ sə̀ ŋgòyòŋsə fo’ nə̀ yi à cep ènə ka nzeŋgònə̀ Josùwà ànə jə lo bwe Izùrɛ fo’ nà’a yeŋ. Bʉsə̀ ànə ye-na də a zeŋ bwɛ̀rɛ də yi à ka maŋkwɛ̀ŋ bə mvə̀k nəmòk nə̀ zok mok cep fe’lə. ⁹Ncèp ye ènə sə nìtsə̀’ də bʉ̀ʉ Nwì wèŋ tse’ lì yə̀yòŋsə̀ mòk yo. Nà’ mègù co nsàp nə̀ Nwì ànə cum yoŋsə nùmbu nə̀ sàmba nà’a. ¹⁰Ŋwə̀ nə̀ yi cu yòŋsə nsàp yə̀yòŋsə̀ ènə, yi mè’rə fàak ye pwe’fo’, nə yoŋsə mvə̀’nə̀ Nwì ànə yoŋsə ye.

¹¹Ye də a lʉ gʉgʉŋ də ya a kə cum yoŋsə mʉmvwe’ ànə. Kà də mook ye ŋgà gʉtu co tàcici avès wèŋ ànə gʉŋ tu, nə kà kə̀ dzèŋ yà’a dʉk. ¹²A rì də ncèp nə̀ Nwì cu ŋwəm nə tse’ ŋàŋ vɛ’ɛ wù kà fʉ̀k. Nà’ cəp càsə fèk nə̀ nà’ tse’ ncəp ma ba. Nà’a lògə̀, nə kə ni dzeŋ haaŋ mvwe’ sə̀ ntʉm ŋwè bə yòŋsə̀ ye kə̀ tɛs. Nà’a kə̀ dzèŋgə̀ mvwe’ ntʉ̀k, nə casə vəp, nə lo ndzə tsətsə’rə̀ anə. Nà’a lòvɛ’nə, nà’ kə fis və yusə̀ ŋgə̀ŋgàŋ sə tsərə bə yusə̀ ntʉm ye sə fàk pwe’fo’ mvwe’ jəja. ¹³Yumok ka bohòNwì sə̀swihì yeŋ lok. Bum pwe’fo’ nòmʉlisə̀ yi jəja kwaraŋgaŋ. Vesùwèeŋ nə̀ kə̀ təəŋ ntsə’mòk mantombìi yi, nə sə tsok bə cùu avès yusə̀ vès à gʉ̀ʉ.

Jisòos Yəyərə̀ ŊgòYe Ŋkum Ŋgà Fa Satikà’ Àvès Nə̀ Ghaŋ

¹⁴Vesùwèeŋ kotse’ bum sə̀ a yuk yà’, nə dzəm yà’ sə cʉ̀k. A gʉ vɛ’nə njo nə̀ a tse’ ŋgà fa satikà’ nə̀ ghaŋ nə̀ yi tə mantombìi Nwì bʉ̀ʉ tu avès. Ŋgà fa satikà’ ènə Jisòs nə̀ yi mo Nwì, nə̀ yi a lòmʉbu mvwe’ sə̀ Nwì cu. ¹⁵Ŋgà fa satikà’ àvès nə, yi ka ŋwə̀ nə̀ də a sə yə-a ŋgə’, yi kà bə zeŋ rɛɛ̀ŋ yeŋ. A vɛ’nə bʉ̀ʉsə̀ yi sə̀’ co vès. Nsàp mə̀mumsə̀ nə̀ fòpwe’fo’ à və̀ yuk bohòyi laŋ, megu də yi kà nə̀ mò’fis gbʉ̀. ¹⁶Ye də vesùwèeŋ nə və mvwe’ kapràak Nwì nə̀ yi ŋgà bòvə̀m bohòbwì nə, nə kà wəp. Yà’a mvwe’ sə̀ Nwìi nə koksə manziŋ bohòvès, nə gʉ ves bə̀boŋ, nə tɛsə ves ghà nə̀ à sə làp də ŋwèe tɛsə ves.

¹A rì də wo cokfisgə̀ ŋgà fa satikà’ mʉŋgorə̀ bʉ̀ʉ ye wèŋ. Wo nòŋsəgə̀ yi də nà’a təəŋ fa wo bohòNwì, nə sə fa satikà’ nə ye fəfaa mok bohòNwì bə bʉp awo sə̀ wo gʉ̀ʉ.²Njo nə̀ yi sə̀’ ŋwè co vès, nə tse’ sə̀’ nsàp ntʉm nə̀ aco nà’ gʉ yi, yi gʉ bʉp fana yi nə riŋ ŋgòkotse’ bʉ̀ʉ sə̀ wo sə jam mandzə̀ njo nə̀ wo ka bə̀boŋ kè bʉp àlɛ riŋ. ³Mʉmvə̀’nə̀ yi tse’ nsàp ntʉm ànə fana nà’a njo nə̀ yi tse’ ŋgòfa satikà’ bə tu sə̀ ye sə̀’ mvə̀’nə̀ yi sə fa bə tu bʉ̀ʉ mok wèŋ sə. ⁴Yumòk nə̀ vès rì nà’a sə̀’ də, kaco ŋwè tsərə kok megu sə ntʉʉ̀ yi, nə dʉk də yi bʉʉŋ ŋgà fa satikà’ ya bwìiŋ jəŋ yi co ŋwə̀ nə̀ ghaŋ yeŋ. Ŋwèe bʉ̀ʉŋgə̀ ŋgà fa satikà’ ŋga Nwì to yi yi, mvə̀’nə̀ yi ànə to Aròŋ lùm mòk fa’ yà’a. ⁵Krɛst à ye sə̀’ nsàp ŋwə̀ ànə. Yi ànə ka ni’ ye yi, də yi ye ŋgà fa satikà’ koksə. Nwì à cokfis yi yi. Yi nə̀ yi ànə dʉk fa Krɛst nə də,

<<Wu yè’e mo àm. Ye jəŋ ntinə nə lo mantombì, mʉ ye tɛ̀’ yònə.>>

⁶Yi à dʉk fe’lə fa nà’ mvwe’ mok sə̀’ də,

<<Mʉ̀ koksə wu ŋgà fa satikà’ nə̀ mvèsə̀, kɛ̀’ mò’fis,

nsàp nə̀ Màcisidèk à ye nà’a.>>

⁷Ghà nə̀ Jisòs à cu malì mʉ nzeŋgòŋ fɛɛŋ fo’ fana yi lɛŋ pìriyà mòk bohòNwì nə̀ yi tse’ ŋàaŋ sə̀ aco yi fis to Jisòs nə mvwe’ kpʉ nə. Yi lɛŋ torə fis pìriyà ènə bə ŋàŋ, nə sə waŋ bə ndzəplis. Ànə geŋ Nwì yuk yi bʉ̀ʉsə̀ yi ànə jəŋ lo ni’ ye sə nze bohònà’ anə. ⁸Yi ànə ye mo Nwì sə̀ yo, yi yə’rə riŋ wesə mali mandzə̀ nə̀ ŋgòyuk dʉk Nwì bə nsàp ŋgə’ nə̀ yi ànə ye maŋkwɛ̀ŋ. ⁹Nwì ànə gʉ wes yi də nà’a ye kə̀kʉrə̀ ma lòoŋfo’ vɛ’nə fana Jisòs nə à ye mok ŋwə̀ nə̀ ndàaŋwè pwe’ nə̀ nà’ yuk-a dʉk ye, yi tse’ lùŋ fo’. ¹⁰Ànə geŋ Nwì fa yi nsàp ŋàŋ nə̀ ŋgòye ŋgà fa satikà’ nsàp nə̀ Màcisidèk à ye nà’a.

BòŊgòKùu’, Nə Zʉ Bɛŋ Sə̀ Bɛŋ Bwɛ̀rɛ Jə’rə̀ Ko Wu

¹¹Vès tse’ bum wùriŋ ŋgòtsə̀’ fa weŋ bə nzak ŋgà fa satikà’ ènə. Megu də a gʉgʉŋ ŋgòtsə̀’ fa weŋ bʉ̀ʉsə̀ wo tsə̀’gə̀ weŋ yumok, wèŋ kà bə zeŋ ntə̀ntɛ̀ŋ rɛɛŋ tohò. ¹²Vès sə kwà’ yàvès də anə ye co ŋga’a ŋga wèŋ sə yə’rə fa bʉ̀ʉ mok wèŋ bum sə̀ ma nə̀ Nwì. Yà’ sə yəəŋ bwì fe’lə də wèŋ cu malì co ŋwə̀ nəmòk kə yə’rə fa fe’lə weŋ bwe bum sə̀ wo yə’rə yètogə̀ yà’ ma nə̀ Nwì anə ntòyèto yà’a. Anə ye co wèŋ sə zʉ ŋga’a bɛŋ sə̀ bɛŋ co bʉ̀ʉ sə̀ wo gʉ vəp laŋ. Wèŋ nə sə nòmalì nə ntòmbwi. Nè’e nsàp nə̀ fòvɛ’nə-ɛ? ¹³Ŋwə̀ nə̀ yi nogə̀ ye mbwi, ye də ŋgə̀ŋgàaŋ molə. Yi ka yusə̀ wo sə yə’rə bə mandzə̀ nə̀ kə̀kʉrə̀ nə ntòriŋ. ¹⁴Ŋwə̀ nə̀ yi zʉgə̀ ye bɛŋ sə̀ bɛŋ, a ŋwə̀ nə̀ aco yi tsərə to bə tu ye. Yi a yə’rə, nə riŋ ŋgògàpsə rì bʉp bə bə̀boŋ laŋ.

¹Nə yeè nə vɛ’nə fana a bə̀boŋ də a lo lɛ mantombì ŋgòyə’rə bum sə̀ gʉgʉŋ ma nə̀ Krɛst nə co bʉ̀ʉ sə̀ gʉgʉŋ wèŋ. Kà də a cum mam mali bə bum sə̀ jə̀jə̀p sə̀ wo a yə’rə to fa ves yà’a dʉk. A kà də a sə yə’rə yiskok megu nə̀ də, bwìiŋ bwi fa bʉp awo ŋkwɛ̀ŋ nə̀ aco nà’ jəŋ və fa wo kpʉ, nə dzəmtse’ bohòNwì nà’a mok sə dʉhʉ̀. ²Vesùwèŋ a yə’rə rì wes bə nzak bàptɛ nə ye bə nzak nə̀ ŋgònaaŋ fa ŋwè bo mʉtuhù wèŋ laŋ. A yə’rə mok sə̀’ də bwìiŋ nə̀ kə̀ lòkok mvwe’ kpʉ, nə riŋ mvə̀’nə̀ wo nə̀ kə̀ sak lə̀sə nzak nùu sə. ³Vesùwèŋ a yə’rə rì wes bum yà’sə pwe’ laŋ, Nwìi tɛsə-a fana a lo mok mantombì. ⁴A tse’ ŋgòlòmantombì bʉ̀ʉsə̀ mandzə̀ə bʉ̀ə̀ nə̀ co wù gʉ ya bʉ̀ʉ sə̀ wo a rìŋ bum yè’sə nə kə foho dzeeŋ fe’lə yà’ yà’a foho və̀ sə̀mok. Nsàp bʉ̀ ènə ànə ye to me marɛŋ nə̀ Nwì nə, nə riŋ bə̀bo nə̀ Nwì nə sə̀’. Wo à tse’ yuk mè Yòŋsə̀ nə̀ Rərɛŋ nə yàwo sə̀’ laŋ. ⁵Wo à mùm ja’a, nə riŋ də ncèp nə̀ Nwì nə nà’a bə̀boŋ. Wo à mùm ja’a ŋàaŋ sə̀ yà’ cu bə nzeŋgòmòk nə̀ nà’a nə̀ kə̀ və̀ ntsə’mòk nə sə̀’. ⁶A ye-a ŋga bʉ̀ʉ sə̀ wo à rì bum yè’sə pwe’, kə̀ foho dzèeŋ fe’lə yà’ sə̀’ wo sə, ye də mandzə̀ nə̀ ŋgòfəsə və̀ wo bʉ̀ə̀. Bʉsə̀ anə ye co wo sə tɛ’lə fe’lə mo Nwì mʉntə̀əŋ nə̀ kɛ̀’ ba, nə sə fa-à nə yi marè’tu mʉtsətsə’rəə bwìŋ. ⁷Mvwe’ nze nə̀ mbʉ̀ʉŋ ligə̀ fo’ bə̀boŋ, zʉzʉ sə tesə bohòbʉ̀ʉ sə̀ wo sə fàk nà’ sə fana Nwì gʉ̀ boŋsə mvwe’ nze ànə. ⁸A ye-a də ŋgaŋ sə̀ bʉp sə kùk mègù mvwe’ yà’sə wo, fana ye də nze nə ka fàk tse’. Nwì kʉəp ŋgòyàk mʉmvwe’ ànə. Wo nə və kə tɛŋ vəpsə bʉpsə mʉmvwe’ ànə fo’ wà.

Wèeŋ Təəŋ Gʉgʉŋ Ma Nə̀ Nwì

⁹Ŋge’ am wèŋ, vès sə cèp-a sə̀ vɛ’nə fana ŋga vès rì weŋ yàwèŋ rìi. Vès rì də wèŋ sə yù mandzə̀ nə̀ bə̀boŋ nə tse’è nə lùŋ fo’. ¹⁰Nwìi gʉ̀gə̀ bum ye bə mandzə̀ nə̀ nà’a zìnə. Kaco yi nə swi fàak sə̀ wèŋ à gʉ̀ yà’ yeŋ. Mvə̀’nə̀ wèŋ à tɛsə bʉ̀ʉ ye wèŋ, nə sə tɛsə̀ malì nə ŋga’a yè’e, yi nə kà yà’ sə̀’ swì. Bum sə̀ wèŋ sə gʉ̀ yà’sə pwe’ sə nìtsə̀’ də wèŋ dzəm yi. ¹¹Yusə̀ yà’ cu sə ntʉʉ̀ vèes də wèŋ pwe’fo’ wèeŋ jihi nzòŋ, nə təəŋ gʉgʉŋ tè kə ləsə. Wèeŋ gʉ vɛ’nə ya wèeŋ nə kə tse’ bum sə̀ wèŋ sə naaŋ tu də wèeŋ nə̀ kə̀ tse’ sə. ¹²Kà də ŋwèe koksə wɛ’ dʉk. Wèeŋ bɛ’ lɛ kùu bʉ̀ʉ sə̀ wo sə dzəm mandzə̀ nə̀ zìnə nə yà’a, nə sə təəŋ gʉgʉŋ. Nà’a nsàp bʉ̀ nə̀ wo nə̀ kə̀ tse’ bum sə̀ Nwì a kàk wo sə.

Nwìi Kà Bwì Bòrə̀gə̀

¹³Mvə̀’nə̀ Nwì ànə sə kak fa Abràham yumok fana yi à kɛ̀ŋ bə liŋ sə̀ ye, ŋgònìtsə̀’ də yi nə gʉ tsoŋ li yusə̀ yi kàk nà’ sə. Yi ànə kɛŋ bə liŋ ye vɛ’nə bʉsə ŋwə̀ nəmòk nə̀ nà’ càsə fe’lə yi co yi kɛŋ bə liŋ nà’ à ye bʉ̀ə̀. ¹⁴Nwì ànə kak fa Abràham nə də, <<Gʉ kpʉ tsoŋ yà, mʉ nə se wu, Abràham. Mʉ nə gʉ ŋgwì bʉ̀ yòyam vɛ’ɛ sə̀’ wùriŋ.>> ¹⁵Ànə geŋ Abràham ko ntʉm, nə təəŋ gʉgʉŋ tə̀tè yi à kə̀ tse’ yusə̀ Nwì à kàk yi sə. ¹⁶A rì də ŋwèe kɛ̀ŋgə̀ kɛ̀ŋ, yi kɛŋ bə liŋ ŋwə̀ nəmòk nə̀ nà’ yam càsə yi. Bwìŋ kɛ̀ŋgə̀ kɛ̀ŋ vɛ’nə fana ye də nzak mèe. ¹⁷Ye də Nwì ànə dzəm ŋgònì fa bʉ̀ʉ sə̀ yi ànə kak yà’wèŋ yumok sə wèŋ də yi nə kà cùu ye kupsə̀ yuk. Fana yi kɛŋ bə liŋ ye ŋgònìtsə̀’ də yi nə gʉ yusə̀ yi dʉk sə. ¹⁸Kə̀kà’ nə ye ŋgòkɛ̀ɛŋ yà’sə bum sə̀ ba sə̀ kaco mòk kupsə yeŋ, Nwì ka mvwès bə zeŋ sə̀’ ci’ yuk. Bum sə̀ ba yà’sə gʉ̀gə̀ vès sə̀ a ca təhə tu avès bohòNwì sə ŋgòko ntʉm, nə sə naaŋ tu ŋgòkə̀ tse’ yusə̀ Nwì à kàk də a nə̀ kə̀ tse’ ntsə’mòk sə. ¹⁹Kaco ntʉʉm avès saha yeŋ bʉ̀ʉsə̀ a rì də Nwìi kakgə̀ yumok, yà’ kà wà cà. Naaŋ tu nə̀ a tse’ bə bum sə̀ Nwì a kàk ves yè’sə gʉ̀gə̀ ves fana vès nɛŋ tosə ndàa sə̀ ŋgòni lòmvwe’ dzoŋ sə̀ rərɛŋ sə̀ mʉ ndap Nwì nə̀ ghaŋ sə. ²⁰A vɛ’nə bʉ̀ʉsə̀ Jisòs bə tu ye a kə̀ nìŋ to fa ves fo’ yi. Jisòs nə yi ŋgà fa satikà’ nə̀ ghaŋ, nsàp nə̀ Màcisidèk à ye nà’a.

Màcisidèek Ŋgà Fa Satikà’ Nə̀ Yi Ghak Aròŋ

¹Ŋwə̀ nə̀ wo to liŋ ye də Màcisidèk ènə à ye ŋkum mvwe’ lak mok sə̀ wo to fo’ də Salèm. Yi à ye sə̀’ ŋgà fa satikà’ Nwì, yi Nwì nə̀ yi yam càsə pwe’ nə. Mvə̀k nəmòk à ye Abràham lo mvwe’ mà’ dzè’ nə kə zə bʉ̀ ŋkəŋkum mok. Yi ànə sə bwi foho və fo’ fana Màcisidèk nə kə tseŋ yi mandzə̀, nə se yi. ²Yi ànə kə tseŋ Abràham nə vɛ’nə fana Abràham nə gapsə bum sə̀ yi jə və̀ mvwe’ dzè’ sə pwe’ bòp hum, nə fa nà’ bòp mò’fis. Liŋ Màcisidèk nə yà’sə də, Ŋkum nə̀ yi gʉ̀gə̀ bum kə̀kʉrə̀. Liŋ ye mook sə̀’ də, Ŋkum Salèm. A yà’sə də, Ŋkum ŋgà fifi. ³Ŋwə̀ nəmòk ka ŋgwì bʉ̀ ye riŋ lok. Wo ka ghà nə̀ wo à dzə yi kè ghà nə̀ yi anə kpʉ sə̀’ riŋ. Yi ye yà’sə co mʉmvə̀’nə̀ mo Nwì cu, bʉ̀ʉsə̀ yi mam ye ŋgà fa satikà’ nə̀ mvèsə̀. ⁴Ye-na yònsàp ŋwə̀ nə̀ Màcisidèk yam ɛ̀. Abràham nə̀ yi à ye tɛ̀’, nə̀ yi à yèto ŋgwì bʉ̀ Izùrɛ yi nə à gàpsə bum sə̀ yi à fɛ̀s jə və̀ mvwe’ dzè’ sə bòp hum, nə fa Màcisidèk nə bòp mò’fis. ⁵Lʉ̀k Musì sə tsə̀’ də bwe Izùrɛ pwe’ nə gapsə bum awo sə̀ wo tse’ sə bòp hum, nə cokfis noŋsə bòp mò’fis ca. Wo cokfis vɛ’nə, wo fa yà’ bohòŋgàa fa satikà’ sə̀ wo tesə mʉmvwe’ ndap Levì. A rì də ŋgàa fa satikà’ yè’sə wèŋ à sə tse’ bum yè’sə ŋga sə fa wo yà’ bwema awo sə̀ wo pwe’ ŋgwì bʉ̀ Abràham. ⁶Nə̀ Màcisidèk nə ye zok. Yi à ka ŋwə̀ə Levì sə̀ yeŋ, fana Abràham fa mali yi bòp nə̀ mò’fis nə. Ànə geŋ yi se Abràham nə sə̀’, Abràham nə̀ Nwì à nə zʉ rʉ̀k bə nà’ nə. ⁷A riŋ jəja də ŋwə̀ nə̀ yi sègə̀ mòk, ye də yi yam càsə ŋwə̀ nə̀ yi sè nà’ nə yi. ⁸Bwe Levì sə̀ wo à sə jə bòp nə̀ mò’fis sənə sə̀ hum yè’sə wèŋ à ye bʉ̀ʉ sə̀ wo kpʉgə̀ə. Ŋwàk Nwì sə tsə̀’ də Màcisidèk nə̀ yi à jə ye nə, cu fo’ ŋwəm. ⁹Mvə̀’nə̀ Abràham ànə jəŋ bum yè’sə, nə kə fa Màcisidèk yè’sə fana aco a dʉk də, à fa Màcisidèk nə yà’ Levì, yi nə̀ bwe ye wèŋ sə jə nsàap bum yà’sə niè’ wo sə. ¹⁰Aco a dʉk vɛ’nə bʉ̀ʉsə̀ ghà nə̀ Abràham à kə̀ fa Màcisidèk nə bum yè’sə, à ye ŋga yi ka tàcicii Levì nə ntòdzə.

¹¹A cep-a bə fàak ŋgàa fa satikà’ sə̀ wo à ye bwe Levì sə. Nwì ànə fa bwe Izùrɛ wèŋ lʉ̀ʉk Musì fana yà’ à ye bə nsàp mandzə̀ nə̀ ŋgàa fa satikà’ sə̀ wo à ye bwe Levì à sə gʉ̀ fàak awo. À ye-a də fàak sə̀ ŋgàa fa satikà’a yè’sə wèŋ à sə gʉ̀ʉ sə à ye kə̀kʉrə̀ ya bwìiŋ ye jì njo mantombìi Nwì, bwɛ̀rɛ njo mòk à ka yeŋ nə̀ də ŋgà fa satikà’ mòok və fe’lə sə̀mok. Ŋgà fa satikà’ nə̀ wo də yi ye nsàp nə̀ co Màcisidèk à ye nə, yi kà mok nsàp nə̀ Aròŋ ye fe’lə̀. ¹²A zìnə də a ye-a ŋga ŋgà fa satikà’ mòk və̀ nə̀ nsàp mandzə̀ nje zok fana lʉ̀ʉk nə kupsə tsoŋ yàwo sə̀’. ¹³Tà Jisòs àvès nə̀ a sə cèp bə liŋ ye nè’nə, yi a tesə və̀ ye bə bòp lak nə̀ zok. Ŋgà fa satikà’ nə̀ mò’fis à ka mvwe’ bòp lak ànə tesə yuk. ¹⁴A rì bə̀boŋ làaŋ də Tà àvèes ŋgwì bʉ̀ Judà. Ghà nə̀ Musì à sə cèp bə mandzə̀ ŋgàa fa satikà’ wèŋ, yi à ka lak yà’sə fʉ ntu’ù ŋwə̀ nə̀ mò’fis tèŋ yuk.

Jisòos Ŋgà Fa Satikà’ Mòk Co Màcisidèk

¹⁵Bə nzak ŋgàa fa satikà’ wèŋ fana a rɛɛŋ bòŋsə gha’ fe’lə bə zeŋ bʉ̀ʉsə̀ ŋgà fa satikà’ mòk a tesə və̀ nə̀ yi co Màcisidèk. Jisòos ŋgà fa satikà’ mòk co Màcisidèk. ¹⁶Yi ànə ye ŋgà fa satikà’ ka də a mvə̀’nə̀ lʉ̀k sə dzəm də wo jəŋ yi yeŋ. Yi ŋgà fa satikà’ bʉ̀ʉsə̀ yi tse’ ŋàaŋ sə̀ ŋgòfa ŋwè lùŋ nə̀ ka co nà’ me yuk yeŋ. ¹⁷Vès riŋ yè’sə bʉ̀ʉsə̀ yà’ cu ndzənə ŋwàk Nwì də,

<<Wù, wu nə ye ŋgà fa satikà’, nsàp nə̀ Màcisidèk à ye nà’a nə̀ mvèsə̀.>>

¹⁸Vès sə yə də lʉ̀k nə̀ nà’ à ye mantombì à kupsə bʉ̀ʉsə̀ nà’ ànə ka ŋàŋ tse’ nə kà fàk bohòbwìŋ sə̀’ tse’. ¹⁹Yà’a lʉ̀ʉk Musì yà’sə ànə kaco yà’ gʉ ŋwè yi ye kə̀kʉrə̀ mʉ lisə̀ Nwì yeŋ. Nwì a jə və̀ yumòk nə̀ bògha’ lɛ zeŋ. Fana a yə də lʉ̀k mòk nə̀ nà’ bòghak lɛ zeŋ sə və̀ə. Nà’ sə və̀ə ŋgòfa ves naàŋ tu nə̀ bə̀boŋ, nə̀ aco nà’ gʉ ves a kʉəp və ŋgʉ ni’ì yi.

²⁰Yu nəmòok sə̀’ də, ghà nə̀ Nwì ànə dʉk də Jisòos nə̀ ye ŋgà fa satikà’ nə̀ mvèsə̀ fana yi kɛŋ be’lə bə kɛ̀ŋ. Ghà nə̀ ŋgwì bʉ̀ Levì wèŋ ànə sə kok gaŋ ŋgàa fa satikà’ yà’sə fana ŋwə̀ nəmòk à sə kà kɛ̀ŋ fo’ kɛ̀ŋgə̀. ²¹Ma nə̀ Jisòos ye də ghà nə̀ Tà Nwì à koksə yi ŋgà fa satikà’ fana yi kɛŋ bə kɛ̀ŋ. Tà Nwì à kɛ̀ŋ də,

<<Wu nə ye ŋgà fa satikà’ nə̀ mvèsə̀.

Yusə̀ mʉ̀ cèp yè’e nə kà kə̀ kupsə̀ yuk.>>

²²Njo kɛ̀ŋ nə̀ Nwì à kɛ̀ŋ nè’nə fana Jisòs tə bohòvesùwèŋ co ŋwə̀ nəmòk nə̀ a yə yi, a sə riŋ tse’ də rʉ̀k nə̀ a zʉ nà’ ves Nwì wèŋ nə, nà’a gʉgʉŋ zìnə.

²³Yu nəmòok sə̀’ də, ŋgàa fa satikà’ sə̀ wo à ye ŋgwì bwe Levì wèŋ sə ànə ye yàwo wùriŋ bʉ̀ʉsə̀ mòok kpʉ, mòk kok. ²⁴Nə̀ Jisòos ye zok. Yi nə̀ kà ye kpʉ yuk. Ŋwə̀ nəmòk nə̀ zook nə kà mvwe’ ye sə co ŋgà fa satikà’ mòk kə̀ cu yuk. ²⁵Nà’a njo nə̀ yi tse’ ŋàŋ pwe’ nə̀ pwe’ ŋgòfa lùŋ bohòŋwə̀ nə̀ yi cà-a bohòyi ŋgòvə̀ bohòNwì. Yè’sə vɛ’nə bʉ̀ʉsə̀ yi cu fo’ ghà yà lòoŋ, nə sə lɛŋ pìriyà mʉtuhù vesùwèŋ bohòNwì.

²⁶Ye də Jisòs nə ŋgà fa satikà’ nə̀ yi kʉ̀rə bohòvès vɛ’ɛ kap. A vɛ’nə bʉ̀ʉsə̀ yi rərɛŋ, yi ka bʉp tse’, nə kà jòŋ sə̀’ tse’ lok. Yi ye zok bohòŋgàa gʉ̀ bʉp wèŋ, yi ye mʉbu sə̀sapni. ²⁷Ŋgàa fa satikà’a mok yà’a wèŋ à sə fàha satikà’ nùumbu pwe’, nùumbu pwe’. Wo à sə fa to satikà’ bə bʉp sə̀ yàwo bə tu awo ŋkuŋ nə sə fa sə̀ bʉ̀ʉ bʉp sə̀ bʉ̀ʉ mok wèŋ. BohòJisòs ye, yi à sə kà nsàp satikà’ anə fa bʉ̀ʉsə̀ yi ànə fa satikà’ nje kɛ̀’ mò’fis nà’ kʉrə vɛ’nə nə̀ mvèsə̀. Satikà’ ènə, a nə̀ yi à fa ni’ ye bohòNwì, nə kpʉ nà’a. ²⁸Bohòlʉ̀ʉk Musì, bʉ̀ʉ sə̀ bwìŋ, sə̀ wo tse’ jòŋ ànə sə ye ŋgàa fa satikà’ wo. Bə nza’ kɛ̀ŋ nə̀ Nwì à kɛ̀ɛŋ, nə̀ nà’a jə mvwe’ kùu lʉ̀ʉk Musì sə fana Nwì a koksə mok mo ye nə̀ yi kə̀kʉrə̀ nə̀ mvèsə̀.

Jisòos Ŋgà Fa Satikà’ Àvès Nə̀ Bə Rʉ̀k Nə̀ Fi

¹Yusə̀ vès sə cèp sə də, a tse’ nsàp ŋgà fa satikà’ nə̀ ghaŋ ànə nə̀ yi tə bə tu avès. Yi cu bo ma mà’a Nwì nə̀ yi maŋgəŋgèŋ nə̀ yi sə sak ŋkum mʉbu nə. ²A yi nə̀ yi tə fa bwìŋ mʉ nda’à Nwì mvwe’ nə̀ rərɛŋ nà’a. A fo’ mvwe’ sə̀ zìnə sə̀ à gʉ̀ Tà Nwì, ka ŋwè yeŋ. ³Fàak sə̀ ŋgàa fa satikà’ wèeŋ gʉ̀gə̀ə də, wo sə faha nsàap satikà’ zəzok bohòNwì. Ye də a kə̀kʉrə̀ də ŋgà fa satikà’ nə̀ yi tə mvwe’ tu avès nə fa Nwì ye sə̀’. ⁴Yumòok sə̀’ də, yi ànə sə cum-a sə nze fɛɛŋ, yi kà ŋgà fa satikà’ ye, bʉ̀ʉsə̀ ŋgàa fa satikà’ wèŋ cu fɛnə yo, sə̀ wo sə gʉ̀ yàwo mvə̀’nə̀ lʉ̀ʉk Musì sə dzəm sə. ⁵Fàak sə̀ ŋgàa fa satikà’ sə wèŋ sə gʉ̀ sə, yà’ mègù yà’sə co tsə̀tsèŋ wà. Yusə̀ zìnə sə, a yusə̀ wo sə gʉ̀ yà’ mʉbu. Tàap sə̀ wo à gʉ̀ yà’ bə nsàp cə̀k mòk nə̀ ŋgòkùksə Nwì mbwa nà’a mègù sə̀’ tsə̀tsèŋ. Nà’ sə nìtsə̀’ mvə̀’nə̀ mvwe’ sə̀ wo kùksəgə̀ Nwì cu mʉbu. Nà’a njo nə̀ Nwì ànə cep bohòMusì ghà nə̀ yi ànə də yi gʉ ndap nə də, <<Jəŋ ŋkərə̀ də bum pwe’ ye megu mʉmvə̀’nə̀ mʉ̀ a tsə̀’ fa wu mʉmvwe’ nda Sinà yà’a.>> ⁶A ŋgà’a də a yə də Nwì a fa Jisòs Krɛst fàk sə̀ yà’ yam càsə fàak ŋgàa fa satikà’a mok wèŋ sə. Nə ye sə̀’ də rʉ̀k nə̀ yi sə càsə fa ves nà’ nə bògha’ sə̀’ zeŋ, bʉ̀ʉsə̀ Nwì a kàk ves bum sə̀ yà’ bògha’ sə̀ mantombì sə̀’ bʉ̀ʉ zeŋ. ⁷Rʉ̀k nə̀ wo à zʉ to nà’ mantombì nə ànə ye-na kʉ̀kʉrə̀ ŋgòtɛsə bwìŋ bwɛ̀rɛ Nwì à ka nə̀ ba mok jəŋ və.

⁸A yə də Nwì à yə də bʉ̀ʉ ye wèŋ à ka nà’ noŋsə bʉ̀ʉsə̀ yi ànə dʉk də,

<<Mvə̀k sə vəə nə̀ mʉ nə zʉ rʉ̀k nə̀ fi ves bʉ̀ʉ Izùrɛ nə ye bʉ̀ʉ Judà wèŋ.

Sə cep vɛ’nə Tà Nwì.

⁹Nè’nə nə kà mok co rʉ̀k nə̀ mʉ̀ à zʉ nà’ ves tàcicii awo wèŋ,

Ghà nə̀ mʉ̀ ànə kotse’ wo bə bo am,

Nə fis wo mvwe’ nzeŋgòIjìp nà’a mok ye.

Wo à ka rʉ̀k nə̀ vesiwèŋ à zʉ nə noŋsə.

Fana mʉ̀ bwì fa wo ŋkwɛ̀ŋ, nə co’krə fis bo am bohòwo.

Sə cèp vɛ’nə Tà Nwì.

¹⁰Rʉ̀k nə̀ mʉ̀ʉ Tà nə̀ mʉ̀ sə cèp nə nə̀ zʉ nà’ ves bʉ̀ʉ Izùrɛ wèŋ nə vɛ’ɛ:

Nùmbu ànə kə̀ dzèŋ nùu,

Mʉ̀ gʉ ya lʉ̀ʉk am ni sə ntʉʉ̀ wo,

Fana wo sə tsərə megu mok zeŋ nùumbu pwe’.

Mʉ nə ye Nwì àwo, wo ye bʉ̀ʉ am.

Sə cèp vɛ’nə Tà Nwì.

¹¹Njo mòok nə kà ye nə̀ co wo sə kə dʉk ŋwə̀ mòk kè moma awo àlɛ də,

<A bə̀boŋ də wu riŋ Tà Nwì> mok ye,

Bʉsə̀ wo pwe’fo’, nə̀ ŋkwà’ŋwè bə nə̀ mweŋke’ pwe’,

Wo rì mʉ.

¹²Anə ye vɛ’nə bʉ̀ʉsə̀ mʉ nə koksə manziŋ bohòwo bə bum sə̀ bʉp sə̀ wo à gʉ̀ pwe’.

Mʉ nə swi bisə bʉp awo sə sə̀’.>>

¹³Mvə̀’nə̀ Nwì cèep, nə to liŋ rʉ̀k nə̀ fi fana ye də rʉ̀k nə̀ mantombì nə rèŋ bʉp laŋ. A riŋ də a ye-a ŋga yumok rèŋ laŋ, nà’a nə bisə wà.

Satikà’ Nə̀ Jisòs Nə, Casə Yà Lòoŋ

¹Rʉ̀k nə̀ wo à zʉ to mantombì nə, nà’ à tse’ lʉ̀ʉk sə̀ ŋgònì fa bwìŋ mvə̀’nə̀ wo tse’ ŋgòkùksə Nwì. Mvwe’ mok à ye sə̀ wo ànə gʉ noŋsə də ya bwìiŋ nə sə kə kuksə Nwì fo’. ^2-3Mʉmvwe’ nə̀ wo à sə gʉ̀m dzòoŋ fo’ bə cə̀k ènə, ànə ye mvwe’ sə̀ wo à sə to fo’ də Tàbanikə̀. Wo à sə fa satikà’ mbwa. Wo à sə gʉ̀m dzòoŋ nà’ pwe’, wo kə ci mʉndap mòk mbwa nə̀ rum ba. Wo à kə’ə lok ncùu rum nə̀ mà mbwèndap nə bə cə̀k. Wo to fo’ də mvwe’ sə̀ yà’ rɛŋ càsə. Bum sə̀ wo à nə̀msə mvwe’ rum nə̀ mò’fis nə à ye laàm bə teberə̀ nə ye brɛd nə̀ wo à nòŋsə ŋgòkùksə Nwì fo’. Wo à sə to rum nə̀ bum yè’sə fo’ nə də mvwe’ sə̀ rərɛŋ sə.⁴Kàm nə̀ wo à sə tɛ̀ŋ rə̀msəgə̀ bum fo’ ŋgòkùksə Nwì bə zeŋ à ye sə̀’ mʉmvwe’ nə̀ nà’ rɛŋ càsə ènə. Wo à gʉ̀ nà’, nə yok laŋsə wes nà’ bə guù pwe’fo’. Ŋkùp nə̀ nà’ tə bə tu rʉ̀k nə̀ Nwì à zʉ bə bʉ̀ʉ Izùrɛ wèŋ nə à ye fo’. Wo à yok ŋkùp ànə sə̀’ bə guù. Wo à nòŋsə nsàp bɛŋ nə̀ də manà nà’a sə̀’ sənə ŋkùp nà’nə. Wo à gèsə yà’ sənə to’kʉ̀ŋ mòk nə̀ wo à gʉ̀ nà’ sə̀’ bə guù. Ntʉmbàŋ Aròŋ nə̀ nà’ à to mvù nà’a à ye sə̀’ ca. Yusə̀ yà’ ànə ye ləsə ca à ye lìs ba sə̀ Nwì ànə com naaŋ lʉ̀ʉk ye mbwa. ⁵Yumok à ye mʉ tu ŋkùp anə ba. Wo sə to yà’ də ceròbim. Mòk cum ŋgʉ ŋkùp ma mòk, mòk cum ma mòk. Wo saŋ və bàap awo kə be’lə mʉtsətsə’rə̀ mvwe’ bù’rə̀ nə̀ Nwìi swìsə fagə̀ bwìŋ bʉp awo fo’. Yà’ ànə ye fo’ ŋgònìtsə̀’ fa bwì də Nwìi fa’nə. A nə kà bum yà’sə ŋga’a pwe’fo’ cèp rɛŋsə̀ wes.

⁶Mvə̀’nə̀ wo ànə gʉhʉ tsə’rə wes mʉmvwe’ ànə fana, ŋgàa fa satikà’ wèŋ sə ni mʉmvwe’ ndap nə nùumbu pwe’. Wo sə ni mvwe’ rum nə̀ kə̀ ncùhu ŋgògʉ̀ fàha awo fo’. ⁷À sə ni mègù mvwe’ rum nə̀ màmbwè ndap nə ŋkum ŋgàa fa satikà’ nə yiìyi. Yi à sə ni mègù mbàa nùmbu nə̀ mò’fis sənə lùmŋgòŋ. Mvə̀k ànə ye, yi lo mbàa bə ndʉəm nàm ŋgòkə̀ mìs fa Nwì njo bʉp ye sə̀ yi a gʉ̀ yi bə tu ye. Yi kə mis fe’lə mok sə̀’ bə bʉp sə̀ bʉ̀ʉ Nwì wèŋ a gʉ̀ʉ ŋga wo ka riŋ sə̀’. ⁸Mʉmvə̀’nə̀ à ye, fana Yòŋsə̀ nə̀ Rərɛŋ nə jə bum yè’sə ŋgòyə’rə fa vesùwèŋ də, a ye-a ŋga ndap Nwì tə mali fo’ vɛ’nə, ŋwè kà mvwe’ rum nə̀ rɛŋ càsə, nə̀ Nwìi fo’ ànə kə ni lòyuk. ⁹Nà’nə yà’sə nsàp yumòk nə̀ nà’ sə nìtsə̀’ fa vesùwèŋ mvə̀’nə̀ bum sə̀ niè’ sə cu. Yà’ sə nì fa ves də kaco satikà’ nə̀ ŋwè fa bohòNwì gʉ də yi riŋ də yi rərɛŋ yeŋ. ¹⁰Bum sə̀ ŋgòkuksə Nwì fo’ yè’sə yà’ mègù bum sə̀ a yəgə̀ yà’ bə lis yè’e. Yà’ mègù bum sə̀ co bɛŋ bə nəno nə ye mandzə̀ nə̀ ŋgòcùhu rɛŋsə ni’. Yà’sə bum sə̀ ŋgògʉ̀ ŋwè ŋgòyəəŋ rərɛŋ mʉlisə̀ Nwì. Bum nzeŋgòŋ yè’sə ànə tse’ fàak mvə̀k momjo wà kə dzeŋ ghà nə̀ Nwì à kupsə bum mok bə mandzə̀ nə̀ fi.

¹¹Nə̀ ŋga’a nè’e Krɛst a və̀ laŋ. Yi ŋgà fa satikà’ bə nsàp mandzə̀ nə̀ fi nə̀ nà’a jəŋ və bum sə̀ bə̀boŋ. Yi gʉ̀gə̀ fàak ye mvwe’ Tàbanikə̀ nə̀ nà’ yam gha’, nə boŋ ghak nə̀ sə nze fɛɛŋ nè’e. Wo à ka mʉmvwe’ ànə bə bo ŋwè gʉ, nà’ kà ma sə nze sə̀’ ye. ¹²Ghà nə̀ Krɛst à kə̀ cà ni lòmvwe’ sə̀ yà’ rɛŋ càsə sə fana yi ànə ni megu fo’ kɛ̀’ mò’fis, nə lə təəŋ vɛ’nə. Yi ànə ni fo’ bə ndʉəm sə̀ ye. Ànə ka bə ndʉəm mbòŋ kè ndzə àlɛ yeŋ. Yi à jə ndʉəm ye sə, nə kə fiŋ me’rə fis ves bə zeŋ mvwe’ ŋgə’ nə̀ vès à tse’ njo bʉp sə̀ vès à gʉ̀ʉ sə mok mvèsə̀. ¹³Wo à cì bwìŋ bə ndʉəm mbòŋ bə ndzə, nə kɛ’ wo bə və mombòŋ nə̀ wo tɛ̀ŋ və̀psə mʉni’ì, ya ŋgùupni’ awo yəəŋ mʉlisə̀ Nwì rərɛŋ. ¹⁴A ye-a də ndʉəm nàm tse’ ŋgòrɛŋsə bwì nsàp ànə, ye də aco ndʉəm sə̀ Krɛst rɛŋsə ntʉm ŋwè nə casə yà lòoŋ. Yi à jə ni’ ye nə̀ nà’ ka bʉp tse’, nə fa nà’ co satikà’ mʉtuhù vès. Yi à gʉ̀ vɛ’nə bə ŋàaŋ Yòŋsə̀ Nwì nə̀ yi kà mè yukgə̀ nə. Ndʉəm ye yà’sə gʉ̀gə̀ ntʉʉm avès ŋgòye rərɛŋ. Ya a kà bʉp sə̀ co yà’ jəŋ və fa ves kpʉ sə gʉ̀hʉ̀ malì, vesùwèŋ sə bɛ’ lɛ mandzə̀ Nwì nə̀ yi cu ŋwəm nə.

Kpʉ Nə̀ Jisòs Nə A Fa Yi Ŋàŋ ŊgòGʉ̀ Rʉ̀k Nə̀ Fi

¹⁵Nə yeè nə vɛ’nə fana Krɛst nə tə mʉtsətsə’rə̀ə bwìŋ bə Nwì yi njo kpʉ ye nə̀ yi à kpʉ nə. Yi sə gʉ̀hʉ tsə’rə rʉ̀k nə̀ fi ya ŋga bʉ̀ʉ sə̀ Nwì ànə cokfis wo ŋgòye bʉ̀ʉ ye sə wèeŋ nə kə tse’ bum sə̀ Nwì à kàk wo sə. Wo tse’ yà’, wo tse’ yà’ mok nə̀ mvèsə̀ kɛ̀’ mò’fis. Kpʉ ye nə fiŋ me’rə bwìŋ mvwe’ ŋgə’ nə̀ wo tse’ njo bʉp sə̀ wo ànə gʉ, ghà nə̀ rʉ̀k nə̀ zəm nə ànə tse’ mali ŋàŋ ntòfo’ nà’a. ¹⁶Ta kpʉ co wo zʉ rʉ̀k. Ŋwèe tagə̀ kpʉ fana tse’ŋga yi kpʉ ŋkuŋ wo gʉ yusə̀ yi à cèp nòŋsə lòsə. ¹⁷Ghà nə̀ yi cu-a ntòfo’ fana kpʉ nə̀ yi ta nə nə kà fàk tse’. ¹⁸Nà’a njo nə̀ rʉ̀k nə̀ Nwì ànə zʉ to bə bwìŋ wèŋ mantombì nə à tse’ ŋàŋ ŋga ndʉəm à ye fo’ sə̀’ ŋkuŋ. ¹⁹Ghà nə̀ Musì à tsə̀’ fa bwìŋ lʉ̀ʉk sə̀ Nwì à fa də wo nə sə bɛ’ zeŋ sə fana yi tsoho wes fa yà’wèŋ, nə jəŋ mvùu ŋgaŋ mok nə̀ wo to nà’ də hisòp, nə be’lə nà’ bə ndàp nə̀ bə̀baŋ, nə gesə yà’ sənə ndʉəm mombòŋ sə̀ yi tòrə yà’ bə ndzəp, nə mis ŋwàk rʉ̀k nə fo’. Yi mis wes ŋwàk nə, yi jəŋ yà’, nə mis fa bʉ̀ʉ sə̀ wo fo’ sə pwe’fo’. ²⁰Yi ànə mis wes fa yà’ vɛ’nə fana yi sə kəa də, <<Yè’e ndʉəm sə̀ yà’a ŋgòkì ŋge’ ndzənə rʉ̀k nə̀ Nwì a dʉk də wèeŋ noŋsə nà’.>> ²¹Fana Musì nə jə ndʉəm sə, nə mis tàbanikə̀ nə, nə ye bum sə̀ wo kùksəgə̀ Nwì bə zeŋ sə sə̀’ pwe’. ²²A zìnə də mandzə̀ nə̀ lʉ̀ʉk Musì à ye də, à ye ŋga wo dzəm-a də wo gʉ yumok ya yà’a ye rərɛŋ fana tse’ŋga ndʉəm kə dzeŋ tsoŋ lì fo’ ŋkuŋ. Bum sə̀ wo à sə gʉ̀gə̀ jì ndʉəm à ye mègù momjo. Fana mandzə̀ nə̀ aco wo swifa ŋwè bʉp yè’sə bʉ̀ə̀, tse’ŋga ndʉəm cʉəm sə nze.

²³Ànə ye to mantombì anə kə̀kʉrə̀ də wo gʉ vɛ’nə ya wo gʉ bum sə̀ yà’ à ye co tsə̀tsèŋ ŋgònìtsə̀’ bum sə̀ yà’a ma mʉbu yà’sə ye rərɛŋ. Nə ye fe’lə sə̀’ də, a bə̀boŋ ŋgòfa satikà’ nə̀ nà’ bògha’ zeŋ mʉ tùhù bum sə̀ yà’a nsàp nə̀ ma mʉbu nə, nə noŋsə satikà’ nə̀ bə nàm wà. ²⁴Ŋgàa fa satikà’ mok yà’a à ni lòyàwo mʉmvwe’ ndap nə̀ ànə gʉ nà’ bo bwìŋ. Yè’sə à ye mègù co tsə̀tsèŋ wà ŋgònìtsə̀’ mvə̀’nə̀ mvwe’ sə̀ Nwìi cugə̀ə cu. Krɛst à ni lòye mvwe’ sə̀ Nwì cu mʉbu anə bə tu. Yi tə mantombìi Nwì anə bʉ̀ʉ tu avès. ²⁵Yumòok sə̀’ də, ŋkum ŋgàa fa satikà’ bʉ̀ʉ Jus wèŋ nə à sə nigə̀ mà mvwe’ rum ndap tàbanikə̀ nə lùum ŋgòŋ bə lùumŋgòŋ pwe’. Yi à sə nigə̀ ye sə, kà bə ndʉəm ye sə̀ ndzə ni’ì yi ye. Jisòs à ni ye kɛ̀’ mò’fis, nə fa Nwì ni’ ye sə̀’ kɛ̀’ mò’fis anə. ²⁶Ànə ye-a də yi tse’ ŋgòni càsə kɛ̀’ mò’fis də bwɛ̀rɛ yi à yə ŋgə’ kɛ̀’ ŋkʉ̀ʉŋ, ye jəŋ mvə̀’nə̀ wo à gʉ̀ nzeŋgònə sə. Yusə à ye də, yi à və̀ sə nzeŋgòŋ kɛ̀’ mò’fis me vɛ’nə. Yi à və̀ yè’sə bə mvə̀k njàvès nə̀ niè’ nə̀ nzeŋgòŋ nə sə kʉəp ŋgòmè nè’e. Yi à və̀ə, nə fa ni’ ye nə satikà’ ŋgòyis fis fa bwìŋ bʉp awo sə̀ wo à gʉ̀ʉ pwe’, mvèsə̀ nə̀ mvèsə̀. ²⁷Ma nə̀ bwìiŋ yàwo də ndàaŋwè pwe’ nə̀ kpʉ kɛ̀’ mò’fis. Yi kpʉ wes, yi kə sak nzak bohòNwì. ²⁸Ma nə̀ Jisòs ye də yi à kpʉ sə̀’ kɛ̀’ mò’fis. Yi kpʉ mʉnə tu bwì, ŋgòjə fis lòbʉp awo. Yi nə̀ bwì və̀ fe’lə sə nzeŋgòŋ fɛɛŋ sə̀mok. Yi və̀ nà’nə, kà mok ŋgòkə̀ jə lòfis bʉp bwì mok ye. Yi nə və ŋgòkə̀ fa lùŋ bohòbʉ̀ʉ sə̀ wo sə tək yi wèŋ.

Satikà’ Jisòs Nə, À Ye Kɛ̀’ Mò’fis, Nə Ye Mvèsə̀

¹Lʉ̀ʉk bʉ̀ʉ Jus wèŋ mègù co tsə̀tsèŋ ŋgònìtsə̀’ nsəsə̀ə bum sə̀ bə̀boŋ sə̀ yà’a nə̀ kə̀ ye ntsə’mòk. Kaco yà’ niŋtsok riŋ pap nə̀ pap mvə̀’nə̀ bum yà’sə nə̀ kə̀ ye sə sə̀’ yeŋ. Ŋgàa fa satikà’ wèŋ à sə fagə̀ satikà’a sə lùumŋgòŋ pwe’. Nsàap satikà’a yà’sə à ka ŋàaŋ sə̀ ŋgògʉ̀ ŋwə̀ nə̀ yi dzəm ŋgòvə̀ bohòNwì ye rərɛŋ tse’.²Yà’ ànə tse’-a nsàp ŋàŋ ànə bwɛ̀rɛ bwìŋ kà satikà’ nùumbu lòoŋ vɛ’nə sə fahà. A vɛ’nə bʉ̀ʉsə̀ ànə ye-a də satikà’a sə à gʉ̀-a wo ŋgòye bə̀boŋ bwɛ̀rɛ ntʉʉm awo kà mok də wo tse’ malì nzak mok sə sahà fe’lə̀. ³Mvə̀’nə̀ wo ànə sə gʉhʉ yà’ lùumŋgòŋ pwe’fo’ fana satikà’a sə sə gʉ wo ŋgòtsərə malì bʉp awo sə sə̀mok. ⁴A vɛ’nə njo nə̀ a yə nə riŋ də kaco ndʉəm mbòŋ kè ndzə tse’ to ŋàaŋ sə̀ ŋgòyìs fis bʉp ŋwè yeŋ.

⁵Nà’a njo nə̀ Jisòs à ye ŋgòvə̀ sə nzeŋgòŋ, yi cep bohòNwì də vɛ’ɛ.

<<Wù ka satikà’ nə̀ wo fa nà’ bə bum sə̀ co nàm dzəm.

Wù a gʉ̀ fa mʉ lɛ ŋgùpni’ nə̀ mʉ nə fa wu satikà’ fo’.

⁶Wo jəgə̀ yà’, nə tɛŋ vəpsə də wo sə fa satikà’, kè sə̀ wo fagə̀ yà’ də ya yà’a yis fis gɛsə fa wo bʉp awo nà’a,

Wu kà bə zeŋ sə̀’ kwagə̀.

⁷Ye də mʉ̀ cèp yàm də,

<Nwì, mʉ nè’.

Mʉ̀ və̀ ŋgòkə̀ gʉ̀ yusə̀ wu nə kwa bə zeŋ,

Mvə̀’nə̀ wo à com nòŋsə ndzənə ŋwàk yònə.> >>

⁸Yi à cèp ncèp ànə, yi dʉk yà’sə də satikà’a sə̀ bwìiŋ fagə̀ yà’sə, Nwìi kà bə zeŋ kwagə̀. Satikà’a sə̀ wo à sə fa yà’sə yusə̀ lʉ̀ʉk bʉ̀ʉ Jus wèŋ à sə dzəm zeŋ. ⁹Fana yi cep fe’lə sə̀’ də, <<Mʉ nè’, mʉ̀ və̀ ŋgòkə̀ gʉ̀ yusə̀ wu nə kwa bə zeŋ.>> Sə nìtsə̀’ jəja də yi sə jə fis gɛsə lʉ̀k nə̀ zəm nə ŋgòjə və̀ mok lʉ̀k nə̀ fi. ¹⁰Vesùwèeŋ ŋga’a mok rərɛŋ bʉ̀ʉsə̀ Jisòs a gʉ̀ yusə̀ Nwì dzəm sə. Yi à jə ni’ ye, nə fa nà’ co satikà’ kɛ̀’ mò’fis, nə kʉrə təəŋ vɛ’nə. ¹¹Ŋgàa fa satikà’a sə̀ mantombì wèŋ à sə təəŋ ŋgògʉ̀hʉ fàak awo bohòNwì nùumbu pwe’. Ghà nə̀ wo sə fàk pwe’ wo sə fa megu sə̀’ nsàp satikà’ nə̀ mò’fis nə̀ wo fagə̀ səsa nə. Yusə də, kaco nsàp satikà’ ànə yis fis to bʉp sə̀ bwìŋ a gʉ̀ sə yeŋ. ¹²Ma nə̀ bohòJisòs Krɛst ye, yi à fa satikà’ nje kɛ̀’ mò’fis nə̀ nà’ tse’ ŋàŋ ŋgòyìs fis fa bwì bʉp awo mvèsə̀. Yi à gʉ̀ wes vɛ’nə, yi lo, nə kə cum yuye nze bo ma mà’a Nwì. ¹³Yà’a mvwe’ ncum ye sə̀ yi cu ŋga’a fo’, nə sə tək nùmbu nə̀ Nwì nə̀ gʉ̀ʉ, yi nəŋ tes kùu ye mʉtuhù bʉ̀ʉ sə̀ wo bɛ̀ŋgə̀ yi pwe’. ¹⁴Yà’a mvə̀’nə̀ yi ànə jəŋ megu satikà’ nə̀ mò’fis, nə gʉ bʉ̀ʉ sə̀ yi à rɛŋsə wes wo sə də wo mam mok kə̀kʉrə̀ vɛ’nə mvèsə̀. ¹⁵Yòŋsə̀ nə̀ Rərɛŋ nə sə nìtsə̀’ fa vesùwèŋ jəja sə̀’ də satikà’ nə̀ Jisòs ànə fa kɛ̀’ mò’fis nə, nà’ kʉrə sə̀’ vɛ’nə. Yi ànə dʉk to də,

¹⁶Tà nə à dʉk də,

<<Nè’e rʉ̀k nə̀ mʉ nə̀ zʉ nà’ Vesiwèŋ ŋga nùmbu nə kə̀ dzèeŋ.

Mʉ nə gʉ lʉ̀ʉk am ni sə ntʉʉ̀ wo,

Fana wo sə tsərə megu mok zeŋ nùumbu pwe’.>>

¹⁷Yòŋsə̀ nə̀ Rərɛŋ sə cep malì sə̀mok də,

<<Mʉ nə swisə fa wo bum bʉp awo sə̀ wo à gʉ̀ pwe’fo’.>>

¹⁸A ye-a də Nwì a swì wes fa bwì bʉp awo laŋ, ye də bwìiŋ teŋsə ŋgòsə faha satikà’ bʉ̀ʉsə̀ yà’ ka fàk mok tse’.

Vesùwèeŋ Sooŋ Kʉəp Və BohòNwì Nə Kà Wəp

¹⁹Bwema am wèŋ, ndʉəm sə̀ Jisòs sə a nɛ̀ tosə fa vesùwèŋ mandzə̀ nə̀ ŋgòcà ni lòmvwe’ sə̀ Nwì cu sə nə kà wəwəp tse’ laŋ. ²⁰Jisòs a nɛ̀ tosə mandzə̀ nə̀ fi nə̀ nà’ tse’ lùŋ nə laŋ. Yi a nɛ̀ tosə nà’ bə ŋgùpni’ ye. Yà’ gʉ̀ co yi a nɛ̀ tosə ndàa sə̀ ŋgòni lòmvwe’ dzoŋ sə̀ mʉ mvwe’ ndap Nwì sə̀ yà’ rɛŋ càsə pwe’ yà’a. ²¹A tse’ bə ŋgà fa satikà’ nə̀ yi yam wùriŋ sə̀’. A yi nə̀ yi sə kʉ̀k ndap Nwì nə̀ nà’a bʉ̀ʉ ye wèŋ pwe’ yi. ²²Ye də vesùwèeŋ fa ntʉm avès bohòyi, nə kà sə mərə̀ lok. A sooŋ kʉəp və bohòNwì bə ntʉʉm avès pwe’fo’. Ndʉəm sə̀ Jisòs sə a wɛ̀ŋsə fa ves ntʉʉm avès laŋ, a ka nzak mok tse’ fe’lə. Yu səmook sə̀’ də, vesùwèeŋ mok bʉ̀ʉ sə̀ wo a cùk rɛŋsə ni’ awo bə ndzəp sə̀ rərɛŋ. ²³Vesùwèeŋ təəŋ mali gʉgʉŋ, nə sə naaŋ megu tu avès bə bum sə̀ ànə dʉk to də a dzəm də yà’a nə̀ kə̀ və̀ə sə. A kà də a sə mərə fe’lə sə ntʉʉ̀ vès mok dʉk, bʉ̀ʉsə̀ Nwì a kàk ves laŋ, a rì sə̀’ də yusə̀ Nwì kàk yà’, kaco yà’ ca wà yeŋ. ²⁴Vesùwèeŋ lap mandzə̀ nə̀ ŋgògʉ̀ bwìŋ də wo tse’ ntʉʉm sə̀ bə̀boŋ ŋgòtse’ dzədzəm bohòmòk bə mòk, nə sə gʉ fàak sə̀ bə̀boŋ. ²⁵Vesùwèeŋ kà də a teŋsə ŋgòsə və̀ mvwe’ mò’fis ŋgòkùksə Nwì mvə̀’nə̀ bʉ̀ʉ mok wèŋ a teŋsə yà’a dʉk. A sə gʉ ghaha lɛ nsàp nə̀ aco bwì tse’ ntʉʉm sə̀ ŋgòlòmantombì. Vesùwèeŋ gʉ vɛ’nə bʉ̀ʉsə̀ a rì də nùmbu nə̀ Tà Jisòos nə bwi foho və nə kʉəp laŋ.

Jəŋ Ŋkərə̀, Kà Də Wu Mè’rə̀ Zìnə Nə Gʉ Bʉp Dʉk

²⁶Vesùwèŋ riŋ mandzə̀ nə̀ zìnə nə laŋ. A ye-a ŋga a rì nà’ vɛ’nə nə me’rə noŋsə nà’, nə sə gʉ bʉp fana ye də satikà’ mòk nə̀ wo nə fa fe’lə ŋgòyìs fis nsàp bʉp ànə ka mok cum fe’lə. ²⁷Ye də ŋgə̀ŋgàaŋ riŋ də yi cu bʉp bʉ̀ʉsə̀ yi rì də Nwìi nə sak yi, yi gbʉ nzak. Nsàp lʉm mis mòk nə̀ nà’a bə jòoŋ nə kə te’ bərə fis bʉ̀ʉ sə̀ wo bɛ̀ŋgə̀ Nwì wèŋ liɛp. ²⁸Ma nə̀ bə lʉ̀ʉk Musì ye də, a ye-a ŋga ŋwè gʉ̀ bʉpsə-a lʉ̀k ye, bwì ba kè tɛ’ ye yi bə lis fana wo zə megu yi zəə, wo nə kà manziŋ bohòyi koksə̀ lok fʉk. ²⁹A ye-a də a mʉmvə̀’ ànə ye də anə ye yè’sə va bohòŋwə̀ nə̀ yi jə mo Nwì co yu ywì’lə nzòŋ-ɛ? Bʉsə̀ a yà’sə də ŋwə̀ ànə jə ndʉəm Krɛst sə̀ wo à zʉ rʉ̀k fo’, yà’ nə yis fis fa yi bʉp ye sə̀’ sə co yusə̀ wà. Yi yàk Yòŋsə̀ Nwì nə̀ nà’a sègə̀ bwìŋ nə sə̀’ laŋ. ³⁰Vesùwèŋ rì ŋwə̀ nə̀ yi a cèp də, <<Mʉ nə lak fəsə riŋ fòo bʉp mʉ̀. Mʉ nə lak kəa sə̀’ mʉ̀.>> Yi à dʉk sə̀’ də, <<Tà Nwìi sakgə̀ bʉ̀ʉ ye wèŋ yi.>> ³¹A ndònə̀ bʉp bohòŋwè ŋgògbʉ̀ sənə tam Nwì nə̀ yi cu ŋwʉm nə.

³²Wèeŋ tsərə fəsə-a maŋkwɛ̀ŋ ghà nə̀ wèŋ ànə rɛɛŋ to bə bum sə̀ ma nə̀ Nwì nà’a nɛ̀. Ghà ànə à ye, wèŋ sə ye ŋgə’ vɛ’ɛ wùriŋ, wèŋ kà teŋsə̀. Wèŋ à ko ntʉm, nə təəŋ mali gʉgʉŋ. ³³Bwìŋ à sə yà’rə kɛ’cà weŋ mvwe’ bwìŋ, nə sə gʉ weŋ ŋgwap. Ghà nəmòk a ye sə̀’ nə̀ wèŋ ànə sə be’lə kɛ’cà wenə wèŋ ŋga wo sə yə ŋgə’. ³⁴Wèŋ à sə koksə manziŋ bohòŋgàa ndapndzəm wèŋ. Wo fep jəŋ bum awèŋ, wèŋ kà yà’ co yumok jə, bʉ̀ʉsə̀ wèŋ à sə rì də wèŋ tse’ yumòk nə̀ nà’ cu mantombì nə̀ nà’a nə̀ kà bʉp yuk, nə boŋ ghak sə̀ zeŋ. ³⁵Ye də kà də wèeŋ sə sooŋ foho lo maŋkwɛ̀ŋ dʉk, bʉ̀ʉsə̀ ŋwə̀ nə̀ yi ko-a ntʉm, nə təəŋ gʉgʉŋ tè kə lə fana yi nə̀ tse’ lə̀làk nə̀ ghaŋ wùriŋ. ³⁶A bə̀boŋ də wèeŋ kontʉm, nə təəŋ mali gʉgʉŋ. Ya ŋga wèeŋ gʉ̀ mvə̀’nə̀ Nwì dzəm vɛ’nə fana wèŋ kə tse’ bum sə̀ yi à kàk də yi nə̀ fa bwìŋ sə yàwèŋ sə̀’. ³⁷Yà’ cu ndzənə ŋwàk Nwì də,

<<Mvə̀k momjo fana ŋwə̀ nə̀ yi nə və nə sə və̀ə.

Yi nə kà tə̀tè mok cu fe’lə̀.

³⁸Bʉ̀ʉ am sə̀ wo gʉ̀gə̀ yusə̀ Nwì dzəm wèeŋ nə cum fo’,

Bʉsə̀ wo fa ntʉm awo bohòNwì.

A ye-a ŋga ŋwə̀ nəmòk foho maŋkwɛ̀ŋ,

Ye də ntʉm àam nə kà bohòŋwə̀ ànə kwa lok.>>

³⁹Bohòvès yàvès, vès ka nsàp bʉ̀ nə̀ vèes nə foho maŋkwɛ̀ŋ ya vèes nə bisə nà’nə yeŋ. Vèes nə fa ntʉm avès lɛ bohòNwì ya vèes nə kə tse’ lùŋ nə̀ nà’a nə̀ kà mè yuk nə.

Yusə̀ Aco Dzədzəm Gʉ To

¹A ye-a ŋga ŋwè tse’ dzədzəm sə ntʉʉ̀ yi, ye yè’sə va? Yà’ ye də yi rì pap də yusə̀ yi sə naaŋ tu fo’ yà’sə yi nə tse’ yà’. Yi riŋ sə̀’ də yusə̀ yi ka yà’ bə lis jəja vɛ’ɛ ye sə yà’ cu tsə lì fo’. ²Nwì ànə kwa bohòbʉ̀ njamòk wèŋ bʉ̀ʉsə̀ wo ànə tse’ nsàp dzədzəm ànə sə ntʉʉ̀ wo bohòyi. ³Mvə̀’nə̀ vesùwèŋ tse’ nsàp dzədzəm ànə fana a gʉ̀ zeŋ ŋkuŋ a rɛɛŋ də Nwì à cèp mègù mʉ cùhu, nə gʉ nzeŋgòŋ nè’e fo’. A yà’sə də bum sə̀ a sə yə yà’ ŋga’a sə nze fɛŋ bə lis yè’e, à tesə və̀ mvwe’ bum sə̀ kaco lis ye to yeŋ.

Abè

⁴Abè ànə tse’ nsàp dzədzəm ànə ŋkuŋ nə fa Nwì fəfa nə̀ nà’ à bògha’ nə̀ tə̀tà ye Ken. Nwì à jə yi sə̀’ co ŋwə̀ nə̀ kə̀kʉrə̀ bʉ̀ʉsə̀ yi ànə fa ntʉm bohònà’ vɛ’nə. Nwì a nìtsə̀’ fa ves də yè’sə vɛ’nə bʉ̀ʉsə̀ yi à jə bum sə̀ Abè ànə fa yi sə. Abè nə à kpʉ lò-a sə̀ ntinə bʉ̀ə̀ fana a sə yə’rə jə malì yumok bohòyi bʉ̀ʉsə̀ yi ànə tse’ nsàp dzədzəm ènə.

Enòk

⁵Enòk ànə tse’ sə̀’ nsàp dzədzəm ènə fana Nwì nə jəŋ bisə lo yi mʉbu ŋwəm, də ya nà’a kà kpʉ yə. Nwì à jə lòyi, ŋwè kà yi mok yə fe’lə̀. Yà’ cu ndzənə ŋwàk Nwì də ghà nə̀ yi ànə cum ntòfo’, yi à sə cugə̀ ncu nə̀ Nwì à kwa bə zeŋ. ⁶A ye-a ŋga ŋwè ka nsàp dzədzəm ànə tse’ fana kaco yi gʉ fʉk Nwì kwa yeŋ lok. Bʉsə̀ a ye-a ŋga ŋwə̀ nəmòk dzəm-a də yi və bohòNwì, yi nə fa tsoŋ ntʉm də Nwì cu fo’ yo, nə dzəm sə̀’ də Nwìi làkgə̀ ndàaŋwè pwe’ nə̀ nà’ làp və̀ yi.

Nuà

⁷Nuà ànə tse’ sə̀’ nsàp dzədzəm ènə ŋkuŋ nə yu’rə mvə̀’nə̀ Nwì à tsə̀’ yi də ndzəp nə̀ kə̀ rwiŋ ntsə’mòk yà’a. Yi ànə ka bə lis ntòye fana yi dzəm yusə̀ Nwì cèp sə, nə gʉ ŋgwes mòk nə̀ ghaŋ. Yi à gʉ̀ nà’ də ya yi bə bʉ̀ʉ ye wèeŋ nə ni cum ca ghà nə̀ ndzəp və-a fana wo luŋ. Yi ànə gʉ vɛ’nə fana bʉ̀ʉ sə̀ sə nzeŋgòŋ sə à gbʉ̀ nzak bohòNwì. Ànə geŋ Nwì jəŋ yi co ŋwə̀ nə̀ bə̀boŋ bʉ̀ʉsə̀ yi à tse’ nsàp dzədzəm ànə.

Abràham

⁸Abràham ànə tse’ sə̀’ dzədzəm ènə ŋkuŋ yi nə yuk Nwì mvə̀’nə̀ nà’ à tsə̀’ yi ŋgòmè’rə lak ye, nə lo mvwe’ mok sə̀ yi nə fa nà’ sə. Yi à ye’e mè’rə lak ye, nə lo, ŋga yi ka mvwe’ sə̀ yi sə lòo sə sə̀ riŋ. ⁹A sə̀’ bʉ̀ʉsə̀ yi ànə naaŋ tu bohòNwì vɛ’nə ŋkuŋ fana yi sə cum co ŋkʉ̀ìŋ mvwe’ nze nə̀ Nwì à kàk yi nə. Yi à sə nòoŋ kɛ’cà fo’ mʉmvwe’ duŋ. Yi ànə ye megu fo’ bə mo ye Azìk nə ye Jàkop mo Azìk sə̀ ànə geŋ Nwì kak fa wo yàwo sə̀’.¹⁰Abràham à sə kʉ̀k gèsə lòye mantombì mvwe’ lak sə̀ Nwì. Yà’ tə mʉnə kùum sə̀ gʉgʉŋ sə̀ yà’a nə kà kə̀ə̀ŋ gbʉ̀ yuk.

Sàra

¹¹Sàra ànə tse’ dzədzəm sə̀’ nsàp ànə ŋkuŋ Nwì gʉ, yi zʉʉŋ, nə dzə fa Abràham mwe ŋga yi rèŋ fop mvə nə càsə mvə̀k. Yè’sə à ye vɛ’nə bʉ̀ʉsə̀ yi ànə tse’ nsàp dzədzəm nə̀ də kaco Nwì kak yumok, nə kà yà’ gʉ̀ yeŋ. ¹²Bum yè’sə ànə ye ŋga Abràham nə rèŋ fop mvə sə̀’ bə̀boŋni. Yi ànə reŋ-a sə̀’ vɛ’nə fana ŋgwì bʉ̀ ye nə à kə̀ ye co ŋkə̀ŋkàaŋ sə̀ mʉbu, nə ye ŋgwansa co ŋwè kà ta to.

¹³Bʉ̀ʉ sə̀ njamòk yà’sə pwe’fo’ à kpʉ ŋga bum sə̀ Nwì ànə kak bwìŋ sə à ka wo kə tseŋ fana wo sə naaŋ mali tu bohòNwì. Wo à yə gèsə lòyà’ sə̀sap, nə kwa bə zeŋ. Wo ànə sə cep fis mʉ cùhu wo jəja də wo sə nzeŋgòŋ fɛŋ ŋkʉ̀ìŋ wèŋ. ¹⁴Ŋwèe cèp fis vɛ’nə fana ye də yi sə tsə̀’ yà’sə də yi sə tsərə də lak ye sə̀ lak sə̀ cu mantombì mvwe’ səmok. ¹⁵Wo à swì bisə mvwe’ sə̀ wo ànə ye’e və to mantombì sə. Wo ànə sə tsərə mali-a yà’, bwɛ̀rɛ də wo à bwì foho lòlaŋ. ¹⁶Yusə̀ wo ànə gʉ yàwo à ye də, wo à sə kʉ̀k gèsə lòlis awo mantombì mvwe’ lak mok sə̀ bògha’ zeŋ, sə̀ lak yà’sə ma mʉbu. Nà’a njo nə̀ wo à sə togə̀ Nwì də Nwì nə̀ njàwo fana yà’ kà Nwì bʉp nə. A rì də yè’sə vɛ’nə bʉ̀ʉsə̀ yi a gʉ̀ tsə’rə nòŋsə fa wo mvwe’ ncum awo yo.

¹⁷Mvə̀’nə̀ Abràham ànə tse’ nsàp dzədzəm ènə fana Nwì à mùmsə yi, yi dzəm də yi nə fa nà’ mo ye Azìk nə̀ mò’fis nə co satikà’ anə ntɛ̀ŋ. Yè’sə ànə ye ŋga Nwì ànə tsok Abràham nə sə̀ laŋ də nà’a nə̀ kə̀ tse’ ŋgwì bwìŋ wùriŋ. Yi sə dzəm mali ŋgòfa mo ye co satikà’ anə. ¹⁸Yi sə dzəm yè’sə ŋga Nwì à tsə̀’ yi sə̀’ laŋ də ŋgwì bʉ̀ nə̀ yi nə̀ kə̀ tse’ nə, nə̀ tesə bohòAzìk nə. ¹⁹Abràham à dzəm sə ntʉʉ̀ yi də aco Nwì lokoksə to ŋwè mvwe’ kpʉ. Aco a dʉk də Azìk nə ŋwə̀ nə̀ yi à kpʉ mè yè’sə laŋ, nə tesə və kə tseŋ tɛ̀’ ye Abràham nə sə̀mok.

Azìk Bə Jàkop Nə Ye Jòsep

²⁰Azìk ànə tse’ sə̀’ nsàp dzədzəm nà’nə ŋkuŋ yi se Jàkop bə Esò. Yi à tsòho fa yà’wèŋ bum sə̀ bə̀boŋ sə̀ Nwì nə̀ fa wo yà’ ntsə’mòk sə. ²¹Ànə ye sə̀’ bʉ̀ʉ nsàp dzədzəm ènə ŋkuŋ Jàkop se bwe Jòsep ba. Yi ànə se yà’wèŋ ŋga yi kʉəp ŋgòkpʉ. Yi ànə sə gʉ̀ yè’sə ŋga yi yəhə naaŋ mʉnə ntʉmbà ye, nə sə kuksə Nwì. ²²À ye sə̀’ bʉ̀ʉ nsàp dzədzəm ànə ŋkuŋ fana mvə̀’nə̀ Jòsep ànə kʉəp ŋgòkpʉ fana yi cep bə mvə̀’nə̀ bwe Izùrɛ wèeŋ nə̀ kə̀ tesə ntsə’mòk mvwe’ lak Ijìp. Yi à tsə̀’ fa yà’ sə̀’ də yi kpʉ, ŋga yà’ cu ŋgòlòo, yà’ jəŋ lo vəp ye sə̀’.

Musì

²³Ànə ye bʉ̀ʉ nsàp dzədzəm ènə ŋkuŋ ma bə tɛ̀’ɛ Musì dzeeŋ yusə̀ ŋkum Ijìp à cèep, nə kà wəp. À ye ŋga ŋkum nə à fa ŋàŋ də a ye-a ŋga bʉ̀ʉ Izùrɛ dzə-a bwembam, wo zə yà’ pwe’fo’. Wo ànə ye ŋga mo nə bòwùriŋ fana wo swihi nà’ mʉnda’à ŋwʉ tɛ’. ²⁴À ye bʉ̀ʉsə̀ Musì ànə tse’ nsàp dzədzəm ènə ŋkuŋ fana mvə̀’nə̀ yi à gʉ, yi dzeeŋ də wo kà yi də à tək yi mo ŋkum Feròsə jə. ²⁵Yi à dzəm də bògha’ bohòyi ŋgòyə ŋgə’ bə bʉ̀ʉ Nwì bəbɛ’, nə noŋsə ŋgòyuk lʉ̀m sənə bʉp nə̀ nà’a nə̀ cà bisə ntsə’mòk wà. ²⁶Yi à dzəm də a ye-a ŋga bwìŋ yà’ yi njo Ŋkum ŋgà gèm bwìŋ fana boŋ ghak yi lɛ zeŋ, nə noŋsə ŋgòtse’ ghàha sə̀ yà’ cu mvwe’ nze Ijìp pwe’. Yi à sə gʉ̀ yè’sə vɛ’nə pwe’fo’ bʉ̀ʉsə̀ yi à sə kʉ̀k gèsə lòlis ye mantombì bə lə̀làk nə̀ nà’a nə̀ kə̀ ye ntsə’mòk. ²⁷Musì ànə ye’e me’rə nze Ijìp sə̀’ bʉ̀ʉsə̀ yi à tse’ nsàp dzədzəm ànə. Yi à ka də aco ŋkum nə jok, nə gʉ yi yumok wəp. Yi à təəŋ gʉgʉŋ, nə sə lo mantombì co yi sə yə Nwì nə̀ bwìiŋ kà yi mʉlisə̀ yəgə̀ nə bə lis. ²⁸Yi ànə tse’ nsàp dzədzəm ènə bohòNwì ŋkuŋ fana yi yeto ŋkà’ Pasobà nə̀ wo kàgə̀ nà’ də bʉ̀ʉsə̀ masinjà Nwì à cà la’à wo nà’a. Yi à tsə̀’ fa bʉ̀ʉ Izùrɛ wèŋ də yà’a mis ŋgʉ ncùu awo bə ndʉəm ya masinjà Nwì nə̀ ŋgà jə və̀ kpʉ və̀ə, nà’ kà də nà’a zə bwe mbəmbam sə̀ wo bwe tu bʉ̀ʉ Izùrɛ wèŋ dʉk. ²⁹Bʉ̀ʉ Izùrɛ wèŋ à tse’ sə̀’ nsàp dzədzəm ènə ŋkuŋ nə kə to ndzəp nə̀ bə̀baŋ nà’a sə kùhu co wo sə gì mʉmfèŋ. Bʉ̀ʉ Ijìp wèŋ à də wo to yuŋ yà’ fana ndzəp nə bək kurə lo wes wo wis.

Rahàp

³⁰Ànə ye sə̀’ bʉ̀ʉ nsàp dzədzəm ènə ŋkuŋ fana ŋka’ sə̀ wo à bom dzòoŋ lak Jèrikù bə zeŋ kəəŋ gbʉ. Yà’ à kə̀əŋ gbʉ̀ ŋga bʉ̀ʉ Izùrɛ wèŋ sə gì dzòoŋ yà’ mʉnə nùumbu sàmba. ³¹Rahàp nə̀ yi à ye ŋwà sàhà nà’a ànə tse’ sə̀’ nsàp dzədzəm ànə ŋkuŋ kpʉ nə kà yi tsèŋ. Yi a jə bʉ̀ʉ Izùrɛ sə̀ wo à və̀ co mfʉəp ŋgòkə̀ kʉ̀k ja’a lak sə̀ fo’ sə, nə swihi yà’wèŋ mʉnda’à yi. Ghà nə̀ bʉ̀ʉ sə̀ wo à ka Nwì yuk à sə kpʉ fana Rahàp nə kà ye kpʉ.

Bʉ̀ʉ Mok Sə̀ Wo À Tse’ Dzədzəm Sə̀’

³²Mʉ ta-a wo bə liŋ mò’fis mò’fis wo kà kə̀ mè. Mvə̀k nə̀ co mʉ̀ tsoho fa weŋ bə liŋ bwìŋ co Gidiyòbə Baràk, bə Samsì bə Jeptà, bə Devìd bə Samwè nə ye ŋgàa tsòhòbum Nwì wèŋ yè’e bʉ̀ə̀. ³³Wo à màk dzè’ bə lak mok wèŋ, nə ghak wo bʉ̀ʉsə̀ wo ànə tse’ dzədzəm bohòNwì. Mok wèŋ à sak gaŋ bə mandzə̀ nə̀ bə̀boŋ. Bum sə̀ Nwì à kàk wo pwe’, wo à tse’ yà’. Gwim wèŋ à lòho cù sə̀’ bʉ̀ʉ wo. ³⁴Mok wèŋ à ni sə misə̀, mis kà wo jwɛ̀ŋ. Bwìŋ lap də wo mak dzè’ nə zə yà’wèŋ ca, wo swirə. Wo sə yəəŋ co wo jì ŋàŋ, nə sə gʉ fàak ŋàŋ vɛ’ɛ wù kà fʉ̀k. Mok wèŋ à tse’ ŋàŋ, nə bɛ’ bʉ̀ ŋgàa màk dzè’ sə̀ wo və̀ mvwe’ lak mok wèŋ, wo caŋ. ³⁵Bə̀ba mok wèŋ à tse’ dzədzəm ènə sə̀’ nə jəŋ fe’lə bʉ̀ʉ awo sə̀ wo ànə kpʉ mvə̀’nə̀ wo lòkok mvwe’ kpʉ sə̀mok. Wo ànə yeŋsə mok wèŋ ŋgə’ vɛ’ɛ nsàp nə̀ wo à lə̀p kʉrə mok wèŋ vəp bə ntòk tə̀tè wo kpʉ. Wo à sə yə ŋgə’ vɛ’nə, wo kà də wo dzeeŋ Nwì ya wo kà ŋgə’ yə dʉk. Ànə ye vɛ’nə bʉ̀ʉsə̀ wo ànə sə tsərə də wo nə̀ kə̀ lòkok mvwe’ kpʉ nə kə cum ncu nə̀ bògha’ zeŋ. ³⁶Wo à sə ywì’lə mok, nə sə ləp mok wèŋ. Wo tasə mok bə kwaŋ, nə nisə wo ndapndzəm. ³⁷Wo à təm zə mok wèŋ bə lìs, gwɛ’ tirə mok ba, nə gwɛ’ zə mok wèŋ bə fèk. Nsàp bʉ̀ ànə wèŋ à ye ŋgàa jìŋ. Wo à sə nihi tse’ ŋgùup nàm co cə̀ək awo, bwìŋ sə yeŋsə wo ŋgə’ vɛ’ɛ wùriŋ nə sə tʉksə wo. ³⁸Wo à sə jàm kɛ’cà ŋgəà bə ndahà wèŋ. Wo sə nooŋ kɛ’ mvwe’ mbwèe lìs bə sə mvə̀’ə wèŋ. Nzeŋgòènə à ka kə̀kʉrə̀ bohònsàp bʉ̀ ànə ŋgòcu ca yeŋ.

³⁹Bʉ̀ʉ yà’sə pwe’ à tse’ nsàap liŋ sə̀ yà’ sə yuhu malì fo’ yè’sə bʉ̀ʉsə̀ wo ànə tse’ dzədzəm bohòNwì. Ànə ye-a sə̀ vɛ’nə fana wo à ka bum sə̀ Nwì à kàk bʉ̀ʉ ye sə tse’. ⁴⁰Nwì ànə sə fʉhʉ noŋsə bum mok sə̀ bògha’ zeŋ də yà’a ye niè’ nə̀ vesùwèeŋ sə̀’ fo’ ènə. Yi gʉ vɛ’nə ya yi be’lə vesiwèŋ ŋkuŋ nə gʉ də a ye kə̀kʉrə̀ bəbɛ’.

A Kʉ̀k Tse’ Megu Lis Avès BohòJisòs

¹Mvə̀’nə̀ a yə də bwìiŋ vɛ’ɛ wùriŋ sə̀ wo a nì fa ves mandzə̀ nə, nə sə kʉ̀k nə ves fana a bə̀boŋ də a mak gɛsə bum sə̀ aco yà’ jipsə ves pwe’fo’. A me’rə bʉp sə̀ yà’ lèm tse’ ves co ndàm, nə təəŋ gʉgʉŋ ŋgòca ca nə̀ nà’ nòsə kʉ̀k ves də a caŋ ènə. ²Vesùwèeŋ kʉk tse’ megu lis avès mʉni’ì Jisòs. A yi nə̀ yi ànə muk fa ves mandzə̀ də a tse’ dzədzəm nə yi, nà’a nə̀ kə̀ mè ntsə’mòk sə̀’ ndzə bohòyi anə. Yi à mè’rə fa ni’ ye də yi kpʉ kpʉ marè’tu mʉ ntə̀əŋ, nə kà marè’tu nə co yumok jə. Yi ànə gʉ vɛ’nə də ya yi kə tse’ kwəkwa nə̀ nà’ cu mantombìi yi nə. Yà’a mvə̀’nə̀ yi cu mvwe’ gaŋ Nwì sə mʉnə kapràk bo ma zʉ. ³Wèeŋ tsərə megu Jisòs nə̀ ŋgàa gʉ̀ bʉp wèŋ à sə bɛ̀ŋ yi fana yi ko ntʉm ye nà’a. Wèeŋ tsərə yi vɛ’nə ya kà də wèeŋ wo ŋga ntʉʉm awèeŋ fi lo maŋkwɛ̀ŋ dʉk. ⁴Lʉ̀ nə̀ wèŋ sə lʉ̀ nà’ weŋ bʉp nə, nà’ ka nsàp nə̀ gʉgʉŋ nə̀ co də wèŋ kpʉ bʉ̀ʉ zeŋ nà’a ntòkə dzeŋ. ⁵Mʉ̀ tsəm də wèŋ na swì bisə ncèp Tà Nwì nə̀ nà’a gʉ̀gə̀ bwìŋ wo sə ko ntʉm, nə̀ də yi sə to weŋ də bwe ye nà’a laŋ. Yi sə cèp də,

<<Mo àm, a ye-a ŋga Nwì gʉ̀ də wu ye ŋgə’ bʉ̀ʉ yumok sə̀ wù gʉ̀ fana wù kà jap bə zeŋ ŋàhà.

A ye-a ŋga yi sa’rə wu, wù kà də wu jok jò’o dʉk.

⁶Wèeŋ tsərə tse’ də ŋwə̀ nə̀ Tà Nwì dzəm yi nə, a sə̀’ yi nə̀ yi yeŋsəgə̀ nà’ ŋgə’.

Yi lə̀p mègù ŋwə̀ nə̀ yi jə nà’ co mo ye.>>

⁷Ye də ŋgə’ nə̀ wèŋ sə yə nə yà’sə yəyə’rə̀ nə̀ Nwì sə fa weŋ. Yà’ sə nìtsə̀’ də Nwì sə kotse’ weŋ yà’sə co bwe ye. Wèŋ à yə yuk mo nə̀ yi gʉ̀ bʉp, tɛ̀’ nə kà yi lə̀p yo-à? ⁸A ye-a də wèŋ sə gʉ̀ bʉp, nə kà ŋgə’ bʉ̀ʉ zeŋ mvə̀’nə̀ bwe ye wèeŋ yəgə̀ə yə fana ye də wèŋ ka yà’sə bwe ye sə̀ zìnə yeŋ. Wèeŋ yà’sə bwe sàhà, sə̀ wo ka tɛ̀’ tse’. ⁹Tɛ̀’ avès sə̀ wo à dzə ves lə̀pgə̀ vesùwèŋ də a gʉ̀ bʉp, vesùwèŋ sə dzəm fa wo də tɛ̀’ avès wèŋ sə gʉ̀ mvə̀’nə. Ye də kaco a dzəm fa ghak tɛ̀’ àvès nə̀ mʉbu ya a tse’ lùŋ yeŋ nà? ¹⁰Ŋgə’ə sə̀ tɛ̀’ avès wèeŋ yeŋsəgə̀ ves mom ghàr yà’sə yegə̀ mvə̀’nə̀ wo rì də a vɛ’nə bə̀boŋ bohòwo. BohòNwì ye, yi yeŋsəgə̀ vesùwèŋ ŋgə’ bə mandzə̀ nə̀ nà’a nə tɛsə ves ŋgòye rərɛŋ sə̀’ co yi. ¹¹Ghà nə̀ wo yeŋsəgə̀ ves ŋgə’ də a gʉ̀ yusə̀ bʉp fana a kà bə zeŋ kwa. A kə̀ dzèŋ maŋkwɛ̀ŋ, ŋgə’ nə̀ wo à yeŋsə ves nə jə və yusə̀ bə̀boŋ. A vɛ’nə bʉ̀ʉsə̀ bʉ̀ʉ sə̀ wo yə-a nsàp ŋgə’ ènə, nə jəŋ nà’ co yusə̀ bə̀boŋ fana nà’a nə gʉ wo ŋgòye kə̀kʉrə̀, nə cum yu awo bə ntʉm nə̀ fifi. ¹²Ye də wèeŋ nɛp tsə’rə bo bə kùu awèŋ bə̀boŋ, nə kà wò. ¹³Wèeŋ gi sənə mandzə̀ nə̀ nà’a rərəŋ nə, ya kà də bʉ̀ʉ sə̀ wo sə cəhə cəhə wèeŋ foho cum lo wesə mok sə nze dʉk, a bə̀boŋ də wo gʉŋ lɛ gʉʉ.

Wu Dzèeŋ-a Nwì Wù Kà Kə̀ Swìrə̀

¹⁴Wèeŋ jihi nzòŋ ŋgòlàp mandzə̀ nə̀ də weŋ bwìŋ pwe’fo’ cum bə fifi. Wèeŋ jihi nzòŋ sə̀’ ŋgòcu ncu nə̀ nà’a rərɛŋ, bʉsə ŋwèe kà-a ncu nə̀ rərɛŋ cu, yi kà Nwì kə̀ yə yuk. ¹⁵Wèeŋ jəŋ ŋkərə̀ ya kà də mòok mam maŋkwɛ̀ŋ, nə kà bòvə̀m nə̀ Nwì nə kə̀ tse’ dʉk. Wèeŋ jəŋ ŋkərə̀ sə̀’ də kà də ŋwə̀ nəmòok bʉʉŋ bohòwèŋ co lìcʉk, nə̀ wu jwɛ̀ŋ nà’, wu kə̀ jwɛ̀ŋ fe’lə-a yà pwe’, yà’ sə cʉk megu mok cʉ’ʉ nà’a dʉk. Nsàp bʉ̀ ànə fagə̀ ŋgə’, nə sə gʉ bʉpsə ncu bʉ̀ʉ mok wèŋ. ¹⁶Wèeŋ jəŋ ŋkərə̀ ya kà də ŋwə̀ nəmòok ko sàhà, nə kà mvə̀k bə bum sə̀ ma nə̀ Nwì tse’ dʉk. Esòànə ye nsàp ŋwə̀ ànə fana yi seŋ mwè ye njo zʉzʉ. ¹⁷Wèŋ rì də à kə̀ dzèŋ maŋkwɛ̀ŋ Esònə lap mandzə̀ də tɛ̀’ yee se yi fana yà’ kà fàk. Yi à wa fis ndzəplis, mandzə̀ kà mok ŋgòkupsə yusə̀ yi à gʉ̀ʉ sə ye fe’lə̀.

¹⁸Wèeŋ riŋ mvwe’ sə̀ wèŋ tə yà’sə. Wèŋ ka mvwe’ sə̀ bʉ̀ʉ Izùrɛ wèŋ ànə təəŋ ghà nəmòk fa’ yà’a təəŋ. Wo à təəŋ mvwe’ nda nə̀ wo to nà’ də Sinà. Aco ŋwè jwɛŋ nà’ bə bo. Mvə̀k ànə à ye, mis à kʉə, ndzəm seŋ, marɛŋ kà mok rɛŋ fana fə̀fə̀ sə ca nə̀bʉp. ¹⁹Bʉ̀ʉ sə̀ wo ànə ye fo’ sə wèŋ à yuk ŋga ntàŋ sə cèep, nə yuk ŋga ŋgì ŋwè cèp sə̀’, fana wo lɛŋ dʉk də wo kà ŋgì mòk mok yuk fe’lə̀. ²⁰Bʉ̀ʉ sə wèŋ à cèp də yusə̀ ŋgì ànə cep sə yà’ gʉ gha’ ŋàŋ. Ànə ye ŋga ŋgì nə cèp də, <<A ye-a ŋga ŋwè jwɛ̀ŋ nda nè’e, a dzəm ye megu nàmŋgòŋ, wo təm zə yi bə lìs.>> ²¹Bum sə̀ wo à yə yà’ fo’ à ye co wù caŋ bisə, fana Musì kə cep fis də, <<Wʉə ko mʉ, ni’ ghə’rə mʉ sə̀’.>>

²²Bohòwèŋ yàwèŋ, wèŋ kə̀ dzèŋ mvwe’ nda nə̀ wo togə̀ nà’ də nda Zayòŋ nà’a laŋ. Wèŋ kə̀ dzèŋ mvwe’ lak Nwì nə̀ yi cu ŋwəm nə. Wo togə̀ mvwe’ lak ye də Jòrosalèm nə̀ mʉbu. Masinjàa Nwì wèŋ kə̀ benə fo’ nsàp nə̀ co ŋwè kà ta to, nə sə sam kɛ’ca yu awo fo’. ²³Wèŋ cu yàwèŋ mʉŋgorə̀ bʉ̀ʉ Nwì sə̀ wo bwe tu bohòyi. Bwe sə̀ yi ànə com noŋsə liŋ awo mʉbu anə laŋ. Wèŋ tə mantombìi Nwì nə̀ yi sakgə̀ bwì pwe’ yi nə. Wèeŋ yàwèŋ bə bʉ̀ʉ sə̀ wo a sə gì bə mandzə̀ nə̀ Nwì fana Nwì nə gʉ wo ŋgòye kə̀kʉrə̀ sə̀’ yà’a. ²⁴Wèŋ a və̀ kə̀ dzèŋ ŋgʉ ni’ì Jisòs nə̀ yi ànə təəŋ mʉtsətsə’rəə ŋwè bə Nwì yi ghà nə̀ wo ànə zʉ rʉ̀k nə. Wèŋ sə kʉ̀k gesə lo lis awèŋ mantombì mvwe’ ndʉəm ye sə̀ yà’ sə nìtsə̀’ yumok sə̀ bòghak zeŋ, nə noŋsə yusə̀ ndʉəm Abè à sə nìtsə̀’ sə.

²⁵Ye də wèeŋ jəŋ ŋkərə̀, nə kà ŋgì ŋwə̀ nə̀ yi sə cèp bohòwèŋ niè’ dzèèŋ. Bʉ̀ njamòk wèŋ ànə dzeeŋ yusə̀ ŋwə̀ nə̀ yi à sə tsòho fa wo ncèp nə̀ Nwì à sə tsə̀’ wo, nə kà kə̀ swìrə̀. Mvə̀’nə̀ wo ànə ka swìrə̀ yà’sə, ye də, a ye-a vesùwèŋ sə̀ a sə yuk ŋgì ŋwə̀ nə̀ yi sə cèp vèsə ma mʉbu nə, nə dzeeŋ nà’ sə̀’, a kə swirə yàvès ŋga a gʉ̀ va? ²⁶Ghà ànə à ye, ŋgì Nwì gʉ nzeŋgòpwe’ tsoho. Nə̀ ŋga’a nè’e yi kà’ də, <<Mʉ nə tsə’rə nzeŋgòŋ nə kɛ̀’ mò’fis sə̀mok ŋkuŋ. Mʉ nə tsə’rə nà’ mok bə ntòbu ba fo’.>> ²⁷Ncèp nə̀ də, <<kɛ̀’ mò’fis sə̀mok,>> nà’a sə nìtsə̀’ ves də Nwìi nə fis gesə bum sə̀ yi ànə gʉ yà’ sə̀ aco yà’ tsoho pwe’fo’, ya ŋga a cum megu mok bum sə̀ yà’ kà tsòhòto.

²⁸Vesùwèeŋ kwasə Nwì bʉ̀ʉsə̀ yi a nòŋsə ves mvwe’ gaŋ sə̀ kaco yumok tsərə to yà’ yeŋ. Vesùwèeŋ kwasə yi, nə kuksə nə wəp yi sə̀’ nsàp nə̀ co yi kwa bohòvès sə̀’. ²⁹A gʉ vɛ’nə bʉ̀ʉsə̀ Nwì àvès nə yi co nsàp mis mòk nə̀ nà’a tɛ̀ŋ səsəgə̀ bum pwe’, nə kà yumok mè’rə̀ lok fʉ̀k.

Yusə̀ Aco Yà’ Gʉ Nwì Yi Kwa

¹Mʉ̀ dzəm ŋgòtsə̀’ fa weŋ də, wèeŋ yà’sə bwema mvwe’ mò’fis, wèeŋ sə dzəm mòk bə mòk sə̀’. ²Wèeŋ muk noŋsə ncùu awèŋ to bohòŋkʉ̀ìŋ wèŋ. Bʉ̀ʉ mok wèŋ ànə gʉ to me vɛ’nə laŋ, nə nisə masinjàa Nwì mʉnda’à wo anə ŋga wo ka riŋ. ³Wèeŋ kà bʉ̀ʉ sə̀ wo cu mʉ ndapndzəmə̀ swì. Wèeŋ sə koksə manziŋ bohòwo co wenə wèŋ cu be’lə mʉ ndapndzəmə̀ anə bəbɛ’. Wèeŋ sə tsərə bʉ̀ʉ sə̀ wo sə yə ŋgə’ sə̀’, bʉ̀ʉsə̀ wèŋ tse’ yàwèŋ ŋgùpni’ sə̀’ co wo.

⁴A bə̀boŋ də ndàaŋwè pwe’ noŋsə lʉ̀ʉk sə̀ yà’ cu mʉtsətsə’rəə ŋgwe bə ndum. Ŋgwe ye zìnə bohòndu ye, ndum ye bohòŋgwe ye sə̀’ vɛ’nə. Wèeŋ rɛɛŋ də Nwìi nə̀ kə̀ sak ŋgàa koho sàhà bə ŋgàa ko nto wèŋ.

⁵Wèeŋ jəŋ ŋkərə̀ də wèeŋ kà mbàm ləlà dzəm ti’. Wèeŋ tse’ lɛ ntʉm nə̀ də yusə̀ wèŋ tse’, yà’a kə̀kʉrə̀ bohòwèŋ. Yà’a ye vɛ’nə bʉ̀ʉsə̀ Nwì a cèp də,

<<Ncə̀p nə̀ co mʉ nə swi yuk weŋ ka yeŋ lok fʉk.>>

⁶Ye də a baŋ ntʉm nə cep də,

<<Tà Nwìi ŋgà ko fa ves gèm àvès yi, mʉ nə kà yumok wəp,

Bʉsə̀ kaco ŋwè gʉ mʉ yumok yeŋ saam.>>

⁷Wèeŋ tsərə bʉ̀ʉ sə̀ wo à nì fa to weŋ mandzə̀, nə tsoho fa weŋ ncèp Nwì yà’a. Wèeŋ tsərə ncu nə̀ wo à cu, nə dzəmtse’ bohòNwì sə̀’ mvə̀’nə̀ wo à dzəmtse’ yàwo yà’a. ⁸Jisòs Krɛst kà kupsə̀gə̀, ntinə bə zòŋ bə luwa pwe’, yi mègù mvə̀’nə̀ mò’fis. ⁹Wèeŋ jəŋ ŋkərə̀, kà də bum sə̀ bwìŋ sə yə’rə və̀ yà’ fi kupsə ntʉʉm awèŋ, wèŋ me’rə mandzə̀ nə̀ zìnə nə dʉk. Bòvə̀m nə̀ Nwìi nə gʉŋsə ntʉʉm awèŋ yi. Lʉ̀ʉk sə̀ ŋgònòŋsə yà’ bə nzak zʉzʉ ka fàk tse’. Yà’a kà bʉ̀ʉ sə̀ wo nòŋsəgə̀ yà’ bə yumok tɛsəgə̀.

¹⁰Mvwe’ mok cu sə̀ wo a fa satikà’ bʉ̀ʉ vès fo’. Ŋgàa fa satikà’ sə̀ wo sə fàk mvwe’ tàap cə̀k sə̀ wo sə kùksə Nwì mbwa wèŋ ka mandzə̀ nə̀ co wo kə zʉ bum satikà’ avès tse’. ¹¹Ŋkum ŋgà fa satikà’ wèeŋ fagə̀ Nwì satikà’ njo bʉp yi. Yi cu ŋgògʉ̀ yà’, yusə̀ yi jəŋ nisə və mʉmvwe’ ndap Nwì nə̀ ghaŋ nə, mègù ndʉəm nàam sə. Bwìŋ bək fis gɛsə lo nàam sə mʉntòlak anə fo’, nə kə tɛŋ səsə yà’, ŋwè kà zʉ. ¹²Yà’a mvə̀’nə̀ Jisòs bə tu ye à kə̀ kpʉ ma sə mbi sə, ya yi rɛŋsə fis fa bwìŋ bʉp awo bə ndʉəm ye sə. ¹³Ye də vesùwèeŋ tesə yàvès mʉntòlak anə sə̀’, nə kə tseŋ yi, ya bwìiŋ yàk jamsə yi, vesi wèŋ ye lok ca bəbɛ’. ¹⁴A vɛ’nə bʉ̀ʉsə̀ a ka lak sə̀ yà’a nə̀ cu mam malì fo’ sə nzeŋgòoŋ fɛŋ tse’. A sə kʉ̀k gèsə lo lis avès mantombì mvwe’ lak sə̀ anə kə̀ cu fo’ ntsə’mòk sə.

¹⁵Vesùwèeŋ sə kwasə Nwì nùumbu pwe’fo’. Kwəkwasə̀ àvès nə nə ye co satikà’ nə̀ a sə fa nà’ bohòKrɛst ŋgòcàsə fa bohòNwì. Satikà’ nə nə̀ cù sə fa nà’ yi, cùu sə̀ yà’a dʉkgə̀ də Jisòos Tà. ¹⁶Kà də wèeŋ swi ŋgògʉ̀ fa bwì bə̀boŋ dʉk. Bum sə̀ wèŋ tse’, wèŋ fa bʉ̀ʉ sə̀ wo ka tse’ yàwo sə̀’, bʉ̀ʉsə̀ yà’sə nsàap satikà’a sə̀ Nwìi kwagə̀ bə zeŋ sə.

¹⁷Wèeŋ yuk dʉk bʉ̀ ŋkwàha bʉ̀ʉ awèŋ, nə jəŋ lo ni’ awèŋ sə nze bohòwo. Wo sə kʉ̀k weŋ wo co bʉ̀ʉ sə̀ wo nə̀ kə̀ təəŋ ntsə’mòk kə̀ mantombìi Nwì, nə tsoho fa nà’ fàha yàwo sə̀ wo à gʉ̀ʉ. Wèeŋ yuk wo ya ŋga wo tse’ ntʉʉm sə̀ kwəkwa mvə̀’nə̀ wo sə gʉ̀ fàak sə. Wèeŋ kà-a vɛ’nə gʉ̀, ye də wo nə sə fak manziìŋ manziŋ, fàak awo sə̀ wo sə gʉ̀u sə kà weŋ bə yumok sə̀’ tɛsə̀.

¹⁸Wèeŋ sə lɛŋ fa ves nùumbu pwe’fo’. Vès rì tse’ də ntʉʉm avèes rərɛŋ. Vèes dzəmgə̀ yàvès ŋgògʉ̀ bum pwe’ bə mandzə̀ nə̀ nà’a rərəŋ nə. ¹⁹Mʉ̀ lɛŋ weŋ vɛ’ɛ wùriŋ də wèeŋ sə lɛŋ fa ves, ya mʉ tse’ mandzə̀ nə̀ co mʉ̀ və kə ye fe’lə weŋ sə̀mok jəjo yè’sə.

Pìriyà Nə̀ Ŋgà Còm Ŋwàk Nè’e À Gʉ̀ʉ

²⁰Nwì nə̀ yi fagə̀ bwìŋ fifi sə ntʉʉ̀ a lòkoksə Tà Jisòs mvwe’ kpʉ. Ndʉəm Jisòs a gʉ̀ rʉ̀k nə̀ à zʉ ves Nwì wèŋ nə ŋgòtəəŋ mam gʉgʉŋ nə̀ mvèsə̀. Jisòs nə co ganakù’ nə̀ ghaŋ nə̀ yi sə kʉ̀k vesùwèŋ sə̀ a bʉ̀ʉ ye sə. ²¹Ye də mʉ̀ lɛŋ də yi nə gʉ wèŋ ŋgòye kə̀kʉrə̀, nə kà yumok jamə̀. Wèeŋ gʉ bum sə̀ yi sə dzəm də wèeŋ gʉ yà’. Mʉ̀ lɛŋ sə̀’ də Nwìi fak sə ntʉʉ̀ wèŋ casə ndzə bohòJisòs Krɛst, ya ŋga a cum nsàp ncu nə̀ aco nà’ gʉ yi kwa bə zeŋ. Kə̀kùksə̀ə ye bohòyi Jisòs Krɛst nə mvèsə̀ nə̀ mvèsə̀. Yà’a ye vɛ’nə.

Ncèp Nə̀ Nà’ Lə̀sə Mbwè

²²Bwema am wèŋ, mʉ̀ lɛŋ weŋ də wèeŋ ko ntʉm, nə yu’rə ncèp àm ènə. Ŋwàk nə̀ mʉ̀ com fa weŋ nə ka sə̀sap yeŋ. ²³Mʉ̀ dzəm də wèeŋ riŋ də moma avès Timatì a tesə ndapndzəm ŋga’a mok laŋ. Yi kə̀ tsèŋ-a mʉ nə̀nàk, vesi və kə ye weŋ bəbɛ’.

²⁴Wèeŋ cepsə fa mʉ bʉ̀ʉ awèŋ sə̀ mantombì bə mok sə̀ wo bʉ̀ʉ Nwì wèŋ pwe’fo’. Bwema sə̀ mvwe’ nzeŋgòŋ Italì yà’a wèŋ cèpsə weŋ bə̀boŋ. ²⁵Bə̀bo nə̀ Nwìi ye bohòwèŋ lòoŋ fo’. Yà’ a ye vɛ’nə.