Gàlesiyà

Ŋwàk nə̀ Pol à Còm Fa Bʉ̀ʉ

sə̀ Mvwe’ Nzeŋgòŋ

GÀLESIYÀ

Mʉmvə̀’nə̀ wo à sə tsòhòlòNtirə̀ nə̀ Bə̀boŋ nə̀ nà’a bə liŋ Jisòs nə bohòbʉ̀ lakmvum wèŋ, wo yuk nə yeto ŋgòdzəm nà’. Bwìŋ yeto ŋga’a ŋgòcèp kɛ’cà də, tse’ŋga bʉ̀ʉ yè’sə nòŋsə lʉ̀ʉk Musì, nə kom tu mbəmbam ŋkuŋ wo ye Krətèeŋ sə̀ zìnə. Pol à tsə̀’ rɛŋsə də ka də ŋwè tse’ ŋgònòŋsə lʉ̀ʉk sə ŋkuŋ yeŋ. Yi sə tsok rɛŋsə də lʉ̀ʉk Musì sə sə nìŋtsə̀’ fa ŋwè də yi ŋgà gʉ̀ bʉp. Nà’ à sə koho tse’ bwìŋ vɛ’nə tə̀tè kə wɛs bə mvə̀k nə̀ Jisòs ŋgà lùŋsə bwìŋ à və̀ nà’a. Yi də yusə̀ yà’ tse’ ŋgògʉ̀ ŋwè ŋgòye kə̀kʉrə̀ mʉlìsə̀ Nwì mègù dzədzəm mò’fis. A ye-a ŋga wù tse’ dzədzəm bohòJisòs fana Nwì gʉ bʉsə wu ŋga wu sə yəəŋ bohòyi mok co wù ka bʉp tse’ lok. Ŋwə̀ nə̀ yi sə naaŋ mègù-a ye tu bə lʉ̀ʉk sə fana ye də yi cu mali yà’sə ŋkwɛ̀ŋ. Wu bɛ’lò-a Jisòs fana wù kà ŋkwɛ̀ŋ mok ye.

¹Còm ŋwàk nè’e mʉ̀ʉ Pol nə̀ mʉ ŋgà ntum Jisòs Krɛst. Ŋwè a ka mʉ yi cokfis, ŋwè kà mʉ yi də mʉ kə gʉ fàak yè’sə sə̀ tum. A tumsə mʉ Jisòs Krɛst bə tu ye, nə ye Tɛ̀’ àvès Nwì nə̀ yi ànə lokoksə nà’ mvwe’ kpʉ nə. ²Bwema sə̀ ndzə nì’ì Jisòs sə̀ vesiwèŋ cu fɛŋ pwe’ sə cepsə wèŋ bʉ̀ʉ cos sə̀ mvwe’ nzeŋgòŋ Gàlesiyà pwe’. ³Mʉ̀ lɛŋ də Tɛ̀’ àvès Nwì nə ye Tà Jisòs Krɛɛst gʉ weŋ bə̀boŋ, nə fa weŋ fifi. ⁴À ye Jisòs Krɛst bə tu ye nə̀ yi ànə jəŋ ni’ ye, nə fa nà’ bʉ̀ʉ tu avès ya vesùwèeŋ tesə gɛsə mvwe’ bʉp nə̀ nà’a sənə nzeŋgòŋ nə. Yi ànə gʉ yè’sə fana yà’ ye megu sə̀’ mvə̀’nə̀ Tɛ̀’ àvès Nwì à sə tsərə sə̀’ vɛ’nə anə. ⁵Mʉ̀ lɛŋ də kə̀kuk ye bohòNwì anə mvèsə̀ nə̀ mvèsə̀.

Jəŋ Ŋkərə̀ Də Wèeŋ Kà Ntirə̀ Nə̀ Bə̀boŋ Nə Mè’rə̀

⁶Nwì a to weŋ casə bə bòvə̀m nə̀ Krɛst də wèeŋ ye bʉ̀ʉ ye, wèŋ kurə bʉʉŋ tsoŋ cəcuŋ vɛ’nə, nə yuŋ lo bwi ncèp mòk nə̀ zok yè’sə va? Hàva’, wèeŋ gʉ̀ yè’sə yà vɛ’nə ɛ? ⁷Ntirə̀ nə̀ Bə̀boŋ mòk nə̀ zok ka mok cum fe’lə. Mʉ̀ rì də bʉ̀ʉ mok wèŋ sə làp mandzə̀ nə̀ ŋgòcwi bʉ̀sə ncèp nə̀ bə liŋ Krɛst nə, ya wo jipsə weŋ. ⁸A ye-a ŋga ŋwə̀ nəmòk kə̀ tsə̀’ fa weŋ ncèp mòk nə̀ zok nə noŋsə nə̀ vès à tsòho to fa weŋ nà’a fana ndòbɛ’ ŋgə̀ŋgàŋ. Mʉ̀ sə dʉk yè’sə də a dzəm ye vès də vès kə̀ kupsə ncèp ànə kè masinjà Nwì àlɛ’ pwe’ ndòbɛ’ megu yi bɛ’lə. ⁹Mʉ̀ sə cèp fe’lə sə̀mok mvə̀’nə̀ vès cèp to fa’ mantombì də, A ye-a ŋga ŋwə̀ nəmòk kə̀ tsə̀’ fa weŋ ncèp mòk nə̀ zok nə noŋsə nə̀ vès à tsòho to fa weŋ, wèŋ yuk, nə dzəm nà’a fana ndòbɛ’ ŋgə̀ŋgàŋ.

¹⁰Mʉ̀ cèp vɛ’nə ya kà də mʉ̀ sə lap mandzə̀ də mʉ cep vɛ’ bə vɛ’ ya bwìiŋ kwa bohòmʉ̀, nə jəŋ mʉ co ŋwè yeŋ. Mʉ̀ sə làp yàm-e yusə̀ yà’a nə gʉ Nwì kwa bə zeŋ. A ye-a də mʉ̀ sə làp mandzə̀ ŋgògʉ̀ də ya bwìiŋ kwa bohòmʉ̀ wo fana mʉ̀ kà yà’sə ŋgà fàk Krɛst nə̀ zìnə ye.

Pol Tsə̀’ Rɛŋsə Mvə̀’nə̀ Yi À Bʉ̀ʉŋ Ŋgà Ntum Jisòs

¹¹Bwema am wèŋ, mʉ̀ dzəm də wèeŋ riŋ tse’ də ncèp nə̀ mʉ̀ ànə tsoho fa weŋ ànə, nà’ ka yu nə̀ à tsərə kok nà’ ŋwè yeŋ. ¹²Mʉ̀ à ka nà’ bohòŋwè jəŋ, ŋwè ànə ka mʉ nà’ yi sə̀ yə’rə fa. Jisòs Krɛst à nì tsə̀’ fa mʉ nà’ yi bə tu ye.

¹³Wèŋ rì nsàp ŋwə̀ nə̀ mʉ̀ ànə ye ghà nə̀ mʉ̀ à sə bɛ’ to mègù mandzə̀ bʉ̀ʉ Jus wèŋ nà’a laŋ. Mvə̀k ànə à ye, mʉ̀ à sə tʉ̀ksəgə̀ bʉ̀ʉ cos nə̀ Nwì nə vɛ’ɛ wùriŋ. Mʉ̀ sə gʉ̀ tsoŋ megu də mʉ ləsə nà’ lə̀sə. ¹⁴Bʉ̀ʉ sə̀ vesi wèŋ à ye wàk pwe’, mòk à ka mʉ kʉəp lok, bə mandzə̀ nə̀ mʉ̀ ànə sə bɛ’ bum sə̀ bʉ̀ʉ Jus wèeŋ gʉ̀gə̀ə. Mʉ̀ à sə bɛ’ mandzə̀ bum sə̀ tàcici avès wèŋ à sə gʉ̀ʉ bə ntʉm àm pwe’ nə̀ pwe’. ¹⁵Yà’ kə tesə və kə də, Nwì ànə cokfis noŋsə mʉ zok ŋga wo ka mʉ ntòdzə. Yi a to mʉ bə bòvə̀m ye də mʉ ye ŋwə̀ nə̀ nje. ¹⁶Yà’ ànə boŋ kok yi fana yi niŋtsok fa mʉ mo ye nə də ya mʉ tsoho fa bʉ̀ lakmvum wèŋ Ntirə̀ nə̀ Bə̀boŋ nə̀ nà’a bə liŋ ye nə. Yi ànə nitsok fa mʉ mo ye nə fana, ves ŋwə̀ nə̀ mò’fis à ka bə zeŋ taaŋ lok. ¹⁷Mʉ̀ à ka də mʉ lo kə ye bʉ̀ʉ sə̀ Nwì ànə to to ntòwo co ŋgàa ntum Jisòs wo sə̀ wo cu Jòrosalèm yà’a sə̀ lò. Mʉ̀ à lòkok yàm, nə lo mvwe’ nzeŋgòŋ Àràbiyà. Mʉ̀ à kə̀ cu fo’, mʉ̀ bwìŋ foho və̀ mvwe’ lak Dàmaskù. ¹⁸À cà lùumŋgòŋ tɛ’, mʉ̀ lo Jòrosalèm də mʉ kə ye Pità ya vesi riiŋ ni’ avès. Vesi à cu fo’ nùumbu hum-ncòp-tàŋ. ¹⁹Mʉ̀ à ka ŋwə̀ nəmòk nə̀ yi ŋgà ntum Jisòs ye lok. Mʉ̀ à yə mègù Jem nə̀ yi moma Tà Jisòs nà’a yiìyi. ²⁰Yusə̀ mʉ̀ sə còm fa weŋ yè’e zìnə. Nwì rì tse’ sə̀’ də mʉ̀ sə kà yè’sə mvwès cì’. ²¹Yà’sə à mèe, mʉ̀ kɛ’ lo mvwe’ nzeŋgòŋ Sìriyà bə Sìlisiyà. ²²Mvə̀k ànə à ye ŋga bwema sə̀ wo cu mvwe’ coos sə̀ mvwe’ nzeŋgòŋ Jùdiyà wèŋ ka mʉ mʉlisə̀ ntòye ja’a lok. ²³Wo à yuk mègù mvə̀’nə̀ bwìŋ a sə cèp kɛ’cà bə liŋ àm də, <<Ŋwə̀ nə̀ yi à sə tʉ̀ksəgə̀ vesùwèŋ, nə sə lap mandzə̀ də yi ləsə Ntirə̀ nə̀ Bə̀boŋ nə nà’a sə tsòho fa bwìŋ ŋga’a də yà’a dzəmtse’ bohòKrɛst.>> ²⁴Fana wo sə gɛ̀ŋ Nwì bʉ̀ʉ tu àm.

Pol Kə̀ Tsèŋ Ŋgàa Ntum Jisòs Sə̀ Mvwe’ Lak Jòrosalèm

¹Lùumŋgòŋ hum-ncòp-kwè à càa fana mʉ̀ bwi foho lo fe’lə mʉ Jòrosalèm anə sə̀mok. À lòcà ves Bànabà fana Taitòs lo sə̀’ vesi wèŋ. ²Mʉ̀ à kok lòmbwa bʉ̀ʉsə̀ Nwì à nìtsə̀’ fa mʉ də mʉ geŋ mbwa. Mʉ̀ à kə̀ dzèeŋ, mʉ̀ ye to ntòbʉ̀ʉ sə̀ bwìŋ à sə jəgə̀ wo co bʉ̀ʉ sə̀ mantombì mʉ cos nə̀ fo’ nə wèŋ. Vesiwèŋ cum ntsə̀m, mʉ̀ tsok rɛŋsə fa wo yusə̀ mʉ̀ sə tsoho fa kɛ’cà bʉ̀ lakmvum wèŋ sə. Mʉ̀ à tsə̀’ vɛ’nə bʉ̀ʉsə̀ mʉ̀ à ka dzəm də fàak sə̀ mʉ̀ à gʉ̀ to bə sə̀ mʉ̀ sə gʉ̀ ŋga’a wèeŋ maha wà dzəm. ³Anə geŋ wo dzəm ncèp àm nə. À ye-a sə̀ də Taitòs nə̀ vesi wèŋ à ye nə mo lak Gris fana wo à ka yi də yi nə kom tsoŋ tu mbəmbam ŋkuŋ ŋga yi ye krətèŋ dʉk fa. ⁴Wo ànə taaŋ bə ncèp ènə bʉ̀ʉsə̀ bʉ̀ʉ səmok sə̀ wo à sə bòrə də wo krətèŋ wèŋ à wooŋ ni və̀ sə̀’ fo’, nə sə dzəm də wo kom fa Taitòs tu mbəmbam. Wo ànə wooŋ ni və ŋgòkə̀ ja’a ya wo riŋtse’ mvə̀’nə̀ wo jipsə ncu àvès nə̀ Jisos Krɛst a fì mè’rə ves laŋ nə. Wo à sə dzəm yàwo də vèes cum mali co ŋkwɛ̀ŋ bohòlʉ̀ʉk bʉ̀ʉ Jus wèŋ sə. ⁵Ànə geŋ vès kà wo mandzə̀ ko momjo vɛ’ɛ fa lok, ya vèes noŋsə bum sə̀ yà’ cu bə Ntirə̀ nə Bə̀boŋ nə rərəŋ, ya wèeŋ nə kə tse’ yà’ ŋga yà’ cu mègù sə̀’ rərəŋ mvə̀’nə.

⁶Bohòbòp bʉ̀ nə̀ bwìŋ à sə jə wo co bʉ̀ʉ sə̀ mantombì yà’a, ghà nə̀ mʉ̀ ànə tsoho rɛŋsə wes fa wo Ntirə̀ nə Bə̀boŋ nə̀ mʉ̀ sə tsòho fa bwìŋ nə, fana wo à ka mʉ də yumok cu sə̀ mʉ nə gʉ ŋkuŋ dʉk lok fa. (Wèŋ riŋ à? Bʉ̀ʉ yà’sə wèŋ ànə ye-a sə̀ bʉ̀ʉ sə̀ mantombì vɛ’nə fana mʉ̀ à ka yàm yà’sə co yumok jəŋ bʉ̀ʉsə̀ bwìŋ mègù mʉlisə̀ Nwì yəyərə̀ pwe’.) ⁷Bʉ̀ʉ sə̀ mantombì wèŋ sə à yə də Nwì a fa mʉ ncèp nə laŋ zìnə. Wo riŋ də yi tum mʉ ŋgòkə̀ tsòho fa Ntirə̀ nə̀ Bə̀boŋ nə bohòbʉ̀ lakmvum, mvə̀’nə̀ yi ànə tumsə Pità fa’ sə̀’ bə ncèp nə̀ ŋgòkə̀ tsòho fa bʉ̀ʉ Jus wèŋ yà’a. ⁸Wo à yə də Nwì nə̀ yi à fa Pità ŋàŋ, nə tumsə nà’ ŋgòye ŋgà ntum ye bohòbʉ̀ʉ Jus wèŋ nə, mègù sə̀’ yi nə, nə̀ yi a fa mʉ ŋàŋ də ya mʉ ye ŋgà ntum bohòlakmvum wèŋ. ⁹Jem bə Pità nə ye Jon sə̀ Krətèeŋ sə̀ fo’ jəgə̀ wo co bʉ̀ʉ awo sə̀ mantombì wèŋ à rɛɛŋ yàwo sə̀’ də Nwì a fa mʉ nsàp fàk ènə laŋ zìnə. Fana wo fa ves Bànabà bo ŋgònìtsə̀’ də vesi wèeŋ mok mvwe’ mò’fis. Vesi wèŋ cep, nə dzəmtes mvwe’ mò’fis də ves Bànabàa lo yàvès bohòbʉ̀ lakmvum ya wo lo yàwo bohòbʉ̀ʉ Jus wèŋ. ¹⁰Wo à fa mègù ves ntip nə̀ mò’fis də vèes kà nà’ swì. Nà’ à ye də, vèes lòo, vès kà ŋgàa jìŋ sə̀ mʉŋgorə̀ wo wèŋ swì. Wo à sə cèp yè’sə ŋga mʉ̀ à sə tsərə sə ntʉʉ̀ mʉ̀ sə̀’ wùriŋ də mʉ nə sə tɛsə ŋgàa jìŋ wèŋ sə.

Pol Sa’rə Pità

¹¹Ghà nə̀ Pità à kə̀ tsèŋ ves mvwe’ lak Antiyòk fana mʉ̀ à sa’rə yi jəja bʉ̀ʉsə̀ yumok sə̀ yi à gʉ̀ʉ à ye jəja kwaraŋgaŋ də yà’ ka rərəŋ yeŋ. ¹²Yusə də Pità à və̀ to, yi sə zʉ be’lə zʉzʉ bə bʉ̀ lakmvum wèŋ mvwe’ mò’fis, yumok kà fo’ bʉp. Ànə geŋ Jem tum vesə bʉ̀ʉ səmok wèŋ. Wo à kə̀ dzèeŋ, Pità kà mok ŋgòzʉ be’lə bə bʉ̀ʉ sə̀ bə yà’wèeŋ zʉgə̀ə sə mok dzəm. Yi à gʉ̀ vɛ’nə bʉ̀ʉsə̀ yi ànə wəp bòp bʉ̀ nə̀ wo dʉkgə̀ də tse’ŋga wo kom fa ŋwè tu mbəmbam ŋkuŋ wo riŋ ŋgə̀ŋgàŋ co krətèŋ yà’a wèŋ. ¹³À ye vɛ’nə fana Krətèeŋ mok sə̀ wo cugə̀ fɛŋ ŋga wo bʉ̀ʉ Jus wèŋ ye ŋgògorə yàwo sə̀’. Wo à gʉ̀ tè Bànabà bə tu ye bɛ’ mok sə̀’ nsàp mandzə̀ àwo nə. ¹⁴Mʉ̀ ànə geŋ də mʉ ye də wo sə kà mandzə̀ Ntirə̀ nə̀ Bə̀boŋ nə rərəŋ sə bɛ’ fana mʉ̀ cep bohòPità jəja də, <<Wù rì də wu ŋwə̀ə Jus, nə sə gʉ bum co ŋwè lakmvum. Fana njo nə̀ wù sə làp mandzə̀ ŋgòbwi’ bʉ̀ lakmvum wèŋ də wo sə gʉ bum yàwo mvə̀’nə̀ bʉ̀ʉ Jus wèeŋ gʉ̀gə̀ bum yè’sə bʉ̀ʉ yà?>>

Mandzə̀ Lùŋ Megu Mò’fis:Dzəm BohòJisòs Krɛst

¹⁵Yusə də, vesi wèeŋ bʉ̀ʉ Jus sə̀ bwe nze, vès ka pegè yeŋ. Vès ka bʉ̀ʉ sə̀ də wo ka mandzə̀ nə̀ Nwì dzəm nà’nə riŋ yà’a yeŋ. ¹⁶Vès rì sə̀’ də mandzə̀ nə̀ co ŋwè noŋsə lʉ̀ʉk bʉ̀ʉ Jus wèŋ sə, də ya Nwìi dʉk də yi ka jòŋ tse’ bʉ̀ə̀. Megu ŋga ŋwè fa ntʉm ye bohòJisòs Krɛst yiìyi ŋkuŋ fana Nwì dʉk də ŋgə̀ŋgàŋ ka nzak tse’. Ye də vès yàvès sə̀’, vès a fa ntʉm avès bohòJisòs Krɛst nə, ya Nwìi dʉk də vès ka nzak bohòyi tse’ bʉ̀ʉ Jisòs nə. Ka bʉ̀ʉsə̀ də vès nòŋsə lʉ̀ʉk bʉ̀ʉ Jus wèŋ yeŋ. Bʉsə̀ ŋwèe nòŋsə kpʉ-a lʉ̀k co yà, kaco Nwì dʉk də nà’ ka nzak tse’ yeŋ lok.

¹⁷Kàmòk aco ŋwə̀ nəmòk sə tsərə də vès sə̀ vès sə làp ŋgòye kə̀kʉrə̀ bohòNwì bə mandzə̀ nə̀ ŋgòdzəm bohòKrɛst nə də, vèes sə̀’ ŋgàa gʉ̀ bʉp bʉ̀ʉsə̀ vès sə kà lʉ̀ʉk bʉ̀ʉ Jus wèŋ nə̀msə̀ àlɛ’. A ye-a vɛ’nə zìnə ye də Krɛst sə gʉ̀ ves ŋgògʉ̀ bʉp. A ye-a ŋga nsàp tsətsərə̀ mòk cu vɛ’nə zìnə, ye də nà’a bə jòŋ, bʉ̀ʉsə̀ aco Krɛst gʉ ŋwè ŋgògʉ̀ bʉp anə yè’sə va? ¹⁸Yusə lɛ də, a ye-a ŋga ŋwè mè’rə màk lʉ̀ʉk bʉ̀ʉ Jus wèŋ, nə və kə te’ lokoksə fe’lə yà’ sə̀mok, ye də ŋgə̀ŋgàŋ sə gʉ̀ yà’sə yusə̀ Nwì ka bə zeŋ kwa. Kè ka vɛ’nə yeŋ-ɛ? ¹⁹À gʉ̀ mʉ sə̀ lʉ̀ʉk yà’sə ŋkuŋ mʉ̀ riŋ də mandzə̀ nə̀ co də mʉ̀ noŋsə yà’, nə kə ye mantombìi Nwì co ŋwə̀ nə̀ bə̀boŋ bʉ̀ʉ zeŋ bʉ̀ə̀. Yà’a mvwe’ sə̀ mʉ̀ yəəŋ yàm mok bohòlʉ̀ʉk sə co ŋwə̀ nə̀ mʉ̀ a kpʉ lòyàm laŋ, co lʉ̀k kà mʉ yumok gʉ̀ fe’lə̀; a vɛ’nə ya mʉ cum megu mok ncu nə̀ də Nwì tse’ mʉ yi. ²⁰Aco mʉ̀ dʉk də ghà nə̀ wo à tɛ’lə Krɛst mʉntə̀əŋ nà’a, wo à tɛ’lə be’lə vesi bəbɛ’. Nà’a njo nə̀ mʉ̀ cèp də ncu nə̀ mʉ̀ sə cu nà’ ŋga’a nè’e ka nə̀ njàm mok yeŋ fe’lə, a ncu nə̀ Krɛst sə cu nà’ ndzə ni’ì mʉ̀ anə yi. Ncu nə̀ mʉ̀ cu sə nzeŋgòŋ fɛɛŋ ŋga’a, a mok nə̀ də mʉ̀ fa ntʉm àm bohòmo Nwì nə̀ yi à dzəm mʉ, nə fa ni’ ye co satikà’ bʉ̀ʉ tu am. ²¹A ye-a də ŋwèe noŋsə lʉ̀k ŋkuŋ Nwì dʉk də ŋgə̀ŋgàŋ ka nzak tse’ fana ye də kpʉ nə̀ Krɛst ànə kpʉ nə nà’ ka fàk tse’. Bohòmʉ̀ yàm mʉ nə kà bə̀bo nə̀ Nwì nə co yu nə̀ nà’ ka fàk tse’ vɛ’nə jə yuk.

Dzədzəm Lə̀gə̀ Bə Sə̀sè, Lʉ̀k Lə Ye Bə Ndò

¹Wèeŋ ləm à bʉ̀ʉ Gàlesiyà wèŋ? A bʉ̀sə weŋ ləm ndà? Vès à tsə̀’ rɛŋsə fa weŋ jəja bə kpʉ Jisòs Krɛst mvə̀’nə̀ wo à tɛ’lə yi mʉntə̀əŋ yà’a laŋ. Ka vɛ’nə yeŋ-à? ²Mʉ fek megu-a weŋ ncèp nə̀ mò’fis nè’e nɛ̀. Ghà nə̀ Yòŋsə̀ Nwì ànə ni sə ntʉʉ̀ wèŋ fa’ nà’a, ànə ye bʉ̀ʉsə̀ də wèŋ sə nòŋsə lʉ̀ʉk bʉ̀ʉ Jus wèŋ à? Ka vɛ’nə yeŋ. Ànə ye bʉ̀ʉsə̀ wèŋ anə yuk Ntirə̀ nə Bə̀boŋ nə, nə dzəm nà’. ³Wèeŋ jʉ̀’rə vɛ’nə yè’sə bʉ̀ʉ yà? Wèŋ à yèto, wèŋ sə naaŋ tu bohòYòŋsə̀ Nwì ŋgògʉ̀ weŋ ya wèeŋ ye yəyərə̀. Nə gʉ kok bwi ŋga’a yà ŋkuŋ wèŋ li bʉʉŋ, nə sə gi mok bə ŋàaŋ sə̀ yàwèŋ nɛ? ⁴Wèŋ à rɛɛŋ mè bum sə̀ yà’a gʉgʉŋ vɛ’ɛ wùriŋ laŋ. Ye də wèŋ jə bum yà’sə pwe’ ŋga yà’a ca wà à? Mʉ̀ tsəm də yà’a nə kà wà lɛ cà. ⁵Wèŋ a yə mvə̀’nə̀ Nwì a fa weŋ Yòŋsə̀ ye nə, nə sə gʉ fàak sə̀ gʉgʉŋ mʉtsətsə’rəə wèŋ sə̀’ bə yòŋsə̀ ye nə sə̀ laŋ. Ye də wèŋ sə dʉk yè’e də yi a sə gʉ̀ nsàp fàk ènə bʉ̀ʉsə̀ wèŋ sə nòŋsə lʉ̀ʉk sə à? Ka vɛ’nə yeŋ lok fʉk. À ye bʉ̀ʉsə̀ wèŋ à yuk Ntirə̀ nə Bə̀boŋ nə, nə dzəm nà’.

⁶Wèeŋ kʉk ja’a na yàwèeŋ Abràham ɛ̀. Wo à còm ndzənə ŋwàk Nwì mvə̀’nə̀ yi ànə fa ntʉm ye bohòNwì fana Nwì jəŋ yi co ŋwə̀ nə̀ yi kə̀kʉrə̀. ⁷Yà’sə sə nìtsə̀’ fa vesùwèŋ də bʉ̀ʉ sə̀ wo fa-a ntʉʉm awo bohòNwì fana a wo sə̀ wo bwe Abràham sə. ⁸Aco vès taŋ yumok ndzənə ŋwàk də, Nwìi nə̀ kə̀ jə bʉ̀ lakmvum wèŋ co wo jì jòŋ bʉ̀ʉsə̀ wo fa ntʉm awo bohòyi Nwì. Yà’a mvə̀’nə̀ Nwì-à fa ntirə̀ nə̀ bə̀boŋ nə bohòAbràham njamòk. Nwì tsok fa Abràham nə də, <<Mʉ nə se nzeŋgòŋ nə pwe’fo’ bʉ̀ʉ wù nə̀ mò’fis.>> ⁹Ye də yà’ mègù sə̀’ mvə̀k ànə də Nwì ànə se Abràham bʉ̀ʉsə̀ nà’ à dzəm tse’ ncèp ye, fana yi sègə̀ ndàaŋwè pwe’ nə̀ nà’ dzəm ncèp ye nə sə̀’.

¹⁰Bʉ̀ʉ sə̀ wo sə naaŋ yàwo tu ŋgònòŋsə lʉ̀k pwe’fo’ ndòo nə yuŋ wo. Wo à còm nòŋsə yà’ ndzənə ŋwàk Nwì laŋ də, <<Ŋwə̀ nə̀ yi kà-a də yi bɛ’ fi tse’ lʉ̀ʉk sə̀ wo à còm ndzənə ŋwàk lʉ̀k sə làaŋ, nə sə gʉ mvə̀’nə̀ yà’ sə də ŋwè tse’ ŋgògʉ̀ʉ sə pwe’ nə̀ pwe’ gʉ̀ fana ye də ndòyù ŋgə̀ŋgàŋ laŋ.>> ¹¹Vesùwèŋ rì də kaco lʉ̀ʉk sə gʉ ŋwè yi yəəŋ mʉlisə̀ Nwì co yi ka nzak tse’ yeŋ. Bʉsə̀ yà’ cu mvə̀’nə̀ wo à còm yà’ ndzənə ŋwàk Nwì də, <<Ŋwə̀ nə̀ yi kə̀kʉrə̀ mʉlisə̀ Nwìi nə̀ cu fo’ bʉ̀ʉsə̀ yi fa ntʉm ye bohòNwì.>> ¹²Ŋgòfa ntʉm bohòNwì ka yumok ŋgògʉ̀ bə lʉ̀k tse’ lok, bʉ̀ʉsə̀ lʉ̀k sə dzəm ye də ŋwèe noŋsə yà’ nòŋsə. Bʉsə̀ yà’ mègù mvə̀’nə̀ wo à còm yà’ ndzənə ŋwàk Nwì də, <<A ye-a ŋga ŋwè nòŋsə wes lʉ̀ʉk sə làaŋ, fana ye də yi nə cum fo’ bʉ̀ʉ lʉ̀ʉk sə.>> ¹³Ye də ndòyù vesùwèŋ laŋ bʉ̀ʉsə̀ a ka lʉ̀ʉk sə làaŋ noŋsə wes. Krɛst à kə̀ ləksə fis ves yi, nə jəŋ ndònə̀ nà’a nə̀ njàvès nə, nə naaŋ mʉtuhù yi, nə kpʉ mʉntə̀əŋ. Yà’a mvə̀’nə̀ wo a còm yà’ ndzənə ŋwàk Nwì də, <<Ŋwə̀ nə̀ wo kə’ə yi mʉ tʉhʉ̀ pwe’, ye də yi bə̀k ndòbohòNwì laŋ.>> ¹⁴Ye də Jisòs Krɛst à kə̀ jə ndònə̀ njàvès nə, də ya bʉ̀ lakmvum wèeŋ nə kə tse’ sə̀sè nə̀ Nwì-a kà’ Abràham də yi nə se nà’ bə zeŋ nə sə̀’. Ya vesùwèeŋ tse’ Yòŋsə̀ Nwì nə̀ yi a kàk də yi nə fa ves nə sə̀’ bʉ̀ʉ Jisòs nə.

Kaco Lʉ̀k Kupsə Yusə̀ Nwì Kàk Yà’ Yeŋ

¹⁵Bwema am wèŋ, mʉ nə jəŋ yumok sə̀ vesùwèŋ rìŋ bə zeŋ pwe’ nə tsok rɛŋsə fa weŋ nza’ rʉ̀k nə ye ntirə̀ nə̀ bə̀boŋ nə. Wèeŋ tsərə-a mvə̀’nə̀ bwìŋ ba zʉ rʉ̀k bə yumok. A yegə̀ də a ye-a ŋga wo dzəm tes bə zeŋ mvwe’ mò’fis laŋ, ŋwə̀ nəmòk kà nà’ mok kə̀ kùm fe’lə̀. Wo gʉ̀ wes nà’, kaco ŋwə̀ nəmòk kə yamsə naaŋ gesə fe’lə yumok mbwa mok yeŋ. ¹⁶Yà’ mègù yà’sə sə̀’ vɛ’nə bə rʉ̀k nə̀ Nwì ànə zʉ bə Abràham, nə kak fa nà’ bə ŋgwì bʉ̀ ye mòk wèŋ yà’a. Wo ànə com bum yè’sə, yà’ kà də Nwì ànə kak Abràham bə ŋgwìi bʉ̀ʉ ye sə pwe’ ye. Yà’ à ye də mègù ŋgwì ye nə̀ mò’fis, nə̀ a Jisòs Krɛst nə. ¹⁷Yusə̀ mʉ̀ sə cèp sə də vɛ’ɛ. Nwì ànə zʉ rʉ̀k bə Abràham. Ye jəŋ mʉmvə̀’ànə, à cà lùumŋgòŋ ŋkʉ̀ kwè bə hum tɛ’ ŋkuŋ Nwì kə fa bʉ̀ʉ Jus wèŋ lʉ̀ʉk sə̀ yàwo sə. Ye də lʉ̀ʉk yà’sə ka ŋàaŋ sə̀ ŋgògʉ̀ bʉpsə to yusə̀ Nwì à kàk, bə Abràham nə cep tes me sə tse’. ¹⁸A tse’ a bum sə̀ Nwì à fa bwe ye wèŋ bʉ̀ʉsə̀ a nòŋsə lʉ̀k, ye də a ka yà’ bʉ̀ʉsə̀ yi à kà’ kà’a tse’. Vesùwèŋ rì tse’ zìnə lɛ də Abràham à tse’ bum sə̀ bə̀boŋ yè’sə bohòNwì bʉ̀ʉsə̀ Nwì ànə kàk nà’ də yi nə gʉ fa nà’ vɛ’nə wà.

Njo Nə̀ Nwì Ànə Fa Bwìŋ Lʉ̀k Bʉ̀ʉ Zeŋ Nə

¹⁹A ye-a vɛ’nə, ye də njo nə̀ Nwì ànə fa bwìŋ lʉ̀ʉk yà? Nwì ànə fa lʉ̀ʉk sə də ya vesùwèeŋ riŋ bʉp bə zeŋ. Yi ànə fa lʉ̀ʉk sə də yà’a sə niŋ tsok fa ves mandzə̀ mʉnə mvə̀k momjo vɛ’ɛ, ŋkuŋ ŋgwì mo Abràham nə̀ Nwì à kàk də yi nə fa bum sə̀ bə̀boŋ bohònà’ nə kə dzeŋ. Nwì ànə fa lʉ̀ʉk ye sə ndzə bohòmasinjàa ye də yà’wèeŋ kə casə fa ndzə bohòŋwə̀ nəmòk nə̀ yi tə mʉtsətsə’rəə ŋwè nə ye yi, Nwì. ²⁰A ye-a də ŋwə̀ nəmòk tə mʉtsətsə’rə, ye də ŋgə̀ŋgàŋ tə yà’sə mʉnə tu bwìŋ ba. Bə ma nə̀ də Nwì ànə kak Abràham fana Nwì mègù fa’nə yiìyi bə tu ye.

²¹Ye də yà’ sə nìtsə̀’ yà’sə də lʉ̀k bə yusə̀ Nwì à kàk sə, sə ka mvwe’ mò’fis gi à? Hai’ ka vɛ’nə yeŋ. Ànə ye-a də lʉ̀ʉk sə tse’ ŋàaŋ sə̀ co yà’ fa to ŋwè lùŋ bwɛ̀rɛ yà’ à gʉ̀ to bwìŋ ŋgòyəəŋ bohòNwì co wo ka nzak tse’ sə̀’. Yusə mègù kə də nsàp lʉ̀k mòok vɛ’nə bʉ̀ə̀. ²²Wo à còm yà’ ndzənə ŋwàk Nwì də, ŋàaŋ bʉp kotse’ nzeŋgòŋ nə pwe’ yi. Yè’sə ye vɛ’nə ya ŋga bʉ̀ʉ sə̀ wo a fa ntʉm àwo bohòJisòs Krɛst wèŋ, a wo sə̀ wo nə caŋ gɛsə bʉp, nə kə tse’ bum sə̀ Nwì ànə kak də yi nə fa bʉ̀ʉ sə̀ wo tse’ dzədzəm bohòKrɛst wèŋ sə. ²³À ye mantombì ŋga mandzə̀ nə̀ də bwìiŋ dzəm bohòJisòs nè’e à ka ntòmuhu to fana yà’ sə səsə co lʉ̀k ànə jəŋ bwìŋ pwe’, nə lok tes wo co ŋgàa ndapndzəm wèŋ, tə̀tè mandzə̀ nə à kə̀ muhu bohòvès anə. ²⁴Lʉ̀ʉk sə ànə sə gʉ̀msə tse’ bwìŋ ŋgònìtsə̀’ fa bwìŋ mandzə̀ nə tə̀tè kə wɛs bə mvə̀k nə̀ Jisòs Krɛst à və̀ə. Yà’ à ye vɛ’nə tè ghà nə̀ yi à və̀ nə fana ye mok də vès sə̀ a fa ntʉm avès bohòyi, vesùwèeŋ nə̀ kə̀ ye mʉlisə̀ Nwì co bʉ̀ʉ sə̀ wo ka nzak tse’. ²⁵Nə̀ ŋga’a nə̀ mandzə̀ nə a nɛ̀ɛŋ to laŋ də vesùwèeŋ fa ntʉm bohòJisòs fana vesùwèŋ ka yumok ŋgògʉ̀msə bwìŋ mok tse’ fe’lə. ²⁶Wèŋ sə̀ wèŋ a be’lə mok weŋ Jisòs wèŋ mvwe’ mò’fis pwe’fo’ wèeŋ mok bwe sə̀ Nwì bʉ̀ʉsə̀ wèŋ a fa ntʉm bohòyi. ²⁷Ndàaŋwè pwe’ nə̀ yi a bàptɛsə laŋ, nə ye bə Jisòs mok mvwe’ mò’fis, fana ye də ŋgə̀ŋgàŋ a te’ jə tse’ yà’sə mok mandzə̀ nə̀ Krɛst nə mvə̀’nə̀ yi cugə̀ ncu nje. ²⁸Ye də a ye-a ŋga wu ŋwə̀ə Jus kè wu ŋwè lakmvum àlɛ, zəzok ka fo’ yeŋ. Wu ye-a moŋkwɛ̀ŋ kè mo nze àlɛ, zəzok ka fo’ yeŋ. Wu ye-a ŋwə̀mbam kè ŋwàŋwè àlɛ, zəzok ka fo’ sə̀’ yeŋ. A vɛ’nə bʉ̀ʉsə̀ wèŋ a be’lə pwe’ ndzə ni’ì Jisòs, nə ye mok mò’fis. ²⁹A ye-a də wèŋ cu sə bàa Jisòs fana ye də wèeŋ ŋgwì bʉ̀ Abràham, wèeŋ nə̀ kə̀ tse’ bum sə̀ Nwì à kàk yi sə.

Wèŋ Ka Mok Ŋkwɛ̀ŋ Yeŋ, Wèeŋ Mok Bwe Nze

¹Mʉ̀ dzəm ŋgòtsə̀’ rɛŋsə fe’lə fa weŋ bum yè’sə sə̀mok. Yà’ mègù co mo lʉə mòk nə̀ yi nə̀ kə̀ tse’ bum tɛ̀’ ye ntsə’mòk pwe’ yi. A ye-a sə̀ də bum tɛ̀’ ye sə cu sə̀ ye vɛ’nə fana ghà nə̀ yi cu ntòlʉə, yi megu co ŋwə̀ nə̀ yi ŋkwɛ̀ŋ. ²Ghà nə̀ yi cu mo lʉə ànə fana bʉ̀ʉ mok wèeŋ nə sə kʉk yi, mok sə jəŋ fa yi ŋkərə̀ bə bum ye sə tə̀tè tɛ̀’ ye nə kə dʉk ntsə’mòk də nà’ gʉŋ kʉ̀rə laŋ. ³Yà’ mègù bohòvesùwèŋ sə̀’ yəyərə̀ mʉmvə̀k ànə. À ye to mantombì ŋga vesùwèŋ ka bum sə̀ Nwì sə pwe’ làaŋ ntòriŋ wes yà’a, vesùwèŋ ànə ye megu co ŋkwɛ̀ŋ bə lʉ̀ʉk sə̀ bʉ̀ʉ sə̀ sə nzeŋgòŋ wèŋ à sə yù yà’ də wo sə bɛ’ mandzə̀ Nwì sə. ⁴Mvə̀k à kə̀ kʉ̀rə vɛ’ɛ kap fana Nwì tumsə vesə mo ye sə nzeŋgòŋ anə. Ŋwàŋwè dzə mo Nwì nə yi. Mo nə à ye ŋwə̀ə Jus nə sə bɛ’ mandzə̀ lʉ̀ʉk Musì sə sə̀’. ⁵À ye vɛ’nə də ya yi fis bʉ̀ʉ sə̀ wo cu sə bàa lʉ̀k wèŋ də ya ŋga wo bʉʉŋ lo mok bwe Nwì wèŋ. ⁶Ŋga’a nə̀ wèeŋ bwe Nwì wèŋ yè’sə, Nwì a tumsə yòŋsə̀ mo ye nə də nà’a ni sə ntʉʉ̀ vès. Yòŋsə̀ ye nə sə gʉ ves ŋgòto yi də <<Pàpa, tɛ̀’.>> ⁷Ye də wèŋ ka ŋga’a mok ŋkwɛ̀ŋ yeŋ, wèeŋ mok bwe nze. Mvə̀’nə̀ Nwì a jə weŋ mok co bwe ye fana wèŋ tse’ bum sə̀ yi nòŋsə fa yà’ bohòbwe ye wèŋ sə̀’ pwe’fo’.

Wèeŋ Bwi Foho Və Lɛ Mvwe’ Mandzə̀ Nə̀ Zìnə

⁸À ye to mantombì ŋga wèŋ ka Nwì ntòriŋ fana wèŋ megu co ŋkwɛ̀ŋ bohòbum sə̀ yà’ ka Nwì yeŋ. ⁹Ŋga’a nè’e wèŋ a rì Nwì mok laŋ; kènə mʉ dʉk lɛ də Nwì a rì weŋ mok co bwe ye wèŋ laŋ, fana wèŋ sə lap ŋgòfoho lòfe’lə mvwe’ bum sə̀ yà’a jì ŋàŋ wà, sə̀ bʉ̀ʉ sə̀ sə nzeŋgòŋ wèŋ sə gʉ̀ də wo sə bɛ’ mandzə̀ Nwì fo’ yè’e bʉ̀ʉ yà? Wèŋ dzəm ŋgòfoho ye fe’lə co ŋkwɛ̀ŋ sə̀mok à? ¹⁰Njo nə̀ wèŋ sə nòŋsə kɛ’cà də nùmbu nè’e nə̀ ghaŋ, ŋwə nè’e zok, mvə̀k nè’e zok nə ye bə lùumŋgòŋ wèeŋ yè’sə bʉ̀ʉ yà? ¹¹Wʉə sə ko mʉ bə nsàap bum sə̀ wèŋ sə gʉ̀ yà’sə wùriŋ. Mʉ̀ sə tsərə də kàmòk fàak am sə̀ mʉ̀ à gʉ̀ mʉtsətsə’rə̀ə wèŋ yà’a nə maha bʉp fa’ ŋgwàŋ àlɛ.

Pol Wa Də Bʉ̀ʉ Gàlesiyà Ka Yi Co Ŋge’ Jəŋ Fe’lə

¹²Bwema am wèŋ, mʉ̀ wup fa weŋ bo wùriŋ də wèeŋ ye co mʉ̀, sə̀’ mʉmvə̀’nə̀ mʉ̀ a bʉ̀ʉŋ mok sə̀’ co wèŋ yè’e. Wèŋ a ka mʉ bʉp gʉ yuk. ¹³Wèŋ rì də, ghà nə̀ mʉ̀ à və̀ to ŋgòtsòho fa weŋ Ntirə̀ nə̀ Bə̀boŋ nə nà’a, mʉ̀ ànə sə cum vesùwèŋ bʉ̀ʉsə̀ mʉ̀ à sə yayaa. ¹⁴Yiya àm nə ànə ye nsàp nə̀ co wèŋ caŋ mʉ fana wèŋ kà mʉ co ŋwə̀ nə̀ wà sə̀ ca màk. Wèŋ à kotse’ mʉ bə̀boŋ co wèŋ sə kotse’ masinjà Nwì. Aco mʉ̀ dʉk də wèŋ à kotse’ mʉ co wèŋ sə kotse’ Jisòs Krɛst bə tu ye. ¹⁵Mvə̀k ànə à ye, wèŋ sə kwa bohòmʉ̀ vɛ’ɛ wùriŋ. A bʉp kok ŋga’a yà? Mvə̀k ànə à ye, wèŋ ye vɛ’ɛ kə̀kʉrə̀ ŋgògʉ̀ fa mʉ yu yà pwe’fo’. À nə ye-a sə̀ də ŋwèe cokfis mvə̀mlis ye, nə fa mʉ də bwɛ̀rɛ yi à fa vɛ’ɛ nàk. ¹⁶Wèŋ ka mʉ ŋga’a mok co ŋge’ dzəm bʉ̀ʉsə̀ mʉ̀ sə tsə̀’ fa weŋ zìnə sə à? ¹⁷Bʉ̀ʉ sə̀ wo sə jipsə weŋ yà’sə wèŋ sə là ŋgàŋ də ya wèeŋ dzəm wo. Megu kə dʉk də, njo nə̀ wo sə gʉ̀ vɛ’nə bʉ̀ʉ zeŋ nə ka bə̀boŋ yeŋ. Wo sə làp də vesùwèeŋ ga’a ya wèeŋ dzəm mok wo. ¹⁸A lɛ bə̀boŋ ŋgòlʉəp ŋga a ye-a də njo nə̀ wù sə gʉ̀ yi vɛ’nə nə nə̀ bə̀boŋ na. Yè’sə zìnə nə̀ ghà yà pwe’fo’, a dzəm ye ŋga mʉ vesùwèŋ kè ŋga mʉ̀ ka fo’ yeŋ pwe’. ¹⁹Bwe am sə̀ mʉ̀ tse’ weŋ sə ntʉʉ̀ mʉ̀ vɛ’ɛ bə̀boŋni. Mʉ̀ sə yə fe’lə fa weŋ ŋgə’ sə̀mok co ŋwà nə̀ yi sə ghà mwe. Mʉ nə sə ye ŋgə’ vɛ’nə tə̀tè tse’ŋga mʉ̀ yə bə lis am də wèŋ tse’ nsàp kù gì nə̀ Krɛst nə ŋkuŋ. ²⁰Mʉ̀ anə ye-a vesùwèŋ bwɛ̀rɛ də mʉ̀ riŋ ŋgòtsə̀’ tsə’rə fa weŋ bum yè’sə làaŋ. Ŋkərə̀ àm jip wes bʉ̀ʉ wèŋ pwe’.

Gbʉ’ Nə̀ Bə Liŋ Sàra Nə Ye Hagà

²¹Wèŋ sə̀ wèŋ sə dzəm də wèeŋ bɛ’ mandzə̀ lʉ̀k yà’a, wèŋ tsok mʉ də wèŋ sə rɛɛŋ yusə̀ lʉ̀ʉk sə sə dzəm də wèeŋ gʉ sə sə̀ pap à? ²²Wo à còm ndzənə ŋwàk lʉ̀k nə də, Abràham ànə tse’ bwe ba. Yi ànə dzə mòk bə ŋwà nə̀ yi mo ŋkwɛ̀ŋ, nə dzə mòk bə ŋwà nə̀ yi ye mo nze. ²³Mo nə̀ ŋwà ŋkwɛ̀ŋ ànə dzə nə, wo à dzə yi ye mvə̀’nə̀ ndàaŋwè pwe’ dzəgə̀ mwe yè’e. Mo nə̀ ŋwà nə̀ yi mo nze à dzə nə à ye ye mvə̀’nə̀ Nwì ànə kak Abràham vɛ’nə. ²⁴Ncèp ènə nja yè’sə bə gbʉ’ mwè. Bə̀ba sə̀ ba, Hagà bə Sàra, wo tə yà’sə bə tu nsàap rʉ̀k ba sə̀ Nwì a zʉ yà’ yi. Hagà nə̀ yi ŋwà ŋkwɛ̀ŋ nə tə bə tu rʉ̀k nə̀ Nwì à zʉ nà’ mʉnə nda Sinà ghà nə̀ yi à sə fa Musì lʉ̀k nà’a. Bwe ŋwà ènə pwe’fo’ wo à dzə wo co bwe ŋkwɛ̀ŋ wèŋ. ²⁵Mvə̀’nə̀ Hagà tə bə tu lʉ̀k nə̀ Nwì ànə gʉ mʉnə nda Sinà nə̀ mvwe’ nzeŋgòŋ Àràbiyà nə, fana yi tə fe’lə sə̀’ bə tu lak Jòrosalèm nə̀ niè’ nè’e sə̀’. Bʉsə̀ Jòrosalèm nə bə bwe ye wèŋ pwe’ cu sə̀’ ŋkwɛ̀ŋ bohòlʉ̀ʉk sə̀ Nwì ànə fa wo sə. ²⁶Jòrosalèm nə̀ mʉbu nə ka ye ŋkwɛ̀ŋ yeŋ. Vèes yàvès bwe Jòrosalèm nà’nə. ²⁷Mvə̀’nə̀ yi ma avès vɛ’nə fana a zìnə də yi tse’ bwe ŋkʉ̀ʉŋ mvə̀’nə̀ wo à còm bə lak yè’sə ndzənə ŋwàk Nwì də,

<<Wù ŋwà nə̀ wù ka mwe dzə nə, kwa yu yo.

Wù ŋwà nə̀ wù ka mwe gha yuk, gùrə yu yo.

Bʉsə̀ ŋwà nə̀ yi cu jì mwe ànə nə̀ kə̀ tse’ nə casə ŋwà nə̀ yi à lògù nə tse’ bwe.>>

²⁸Bwema am wèŋ, wèŋ a bʉ̀ʉŋ yàwèŋ bwe Nwì bʉ̀ʉsə̀ Nwì ànə kak vɛ’nə. Yà’ mègù sə̀’ mvə̀’nə̀ Nwì ànə kak Abràham ŋkuŋ fana Sàra nə dzə Azìk yà’a. ²⁹Mo nə̀ Hagà à dzə nà’ mvə̀’nə̀ ndàaŋwè pwe’ dzəgə̀ mwe nə, à sə tʉ̀ksəgə̀ mo nə̀ wo à dzə yi ye bə ŋàaŋ Yòŋsə̀ Nwì nə. Yà’ mègù niè’ sə̀’ vɛ’nə. ³⁰Wo à còm ndzənə ŋwàk Nwì də, <<Bɛ’ fis gɛsə ŋwà ŋkwɛ̀ŋ bə mo ye fo’. Ka bə̀boŋ də mo ŋwà ŋkwɛ̀ɛŋ nə kə tse’ bum tɛ̀’ ye yi yeŋ. A kə tse’ yà’ lɛ mo nə̀ ma yee mo nze nà’a.>> ³¹Bwema am wèŋ, yè’sə sə nìtsə̀’ fa vesùwèŋ də, vesùwèŋ ka bwe ŋwà ŋkwɛ̀ŋ nə yeŋ. Vesùwèeŋ bwe ŋwà nə̀ yi ye mo nze nà’a.

Vesùwèeŋ Kà Ŋkwɛ̀ŋ Mok Bʉ̀ʉŋ Fe’lə̀

¹Krɛst ànə fiŋ me’rə vesùwèeŋ mvwe’ lʉ̀ʉk sə̀ yà’ à sə kohotse’ ves. Ye də wèeŋ təəŋ gʉgʉŋ co bʉ̀ʉ sə̀ wo à swɛ̀’ɛ tesə laŋ anə. Kà də wèeŋ gʉ co wèeŋ kə cum fe’lə co ŋkwɛ̀ŋ sə̀mok dʉk.

²Wèeŋ yu’rə ncèp àm nè’e bə̀boŋ. Mʉ̀ sə tsə̀’ fa weŋ mʉ̀ʉ Pol də, a ye-a ŋga wèŋ dzəm də bʉ̀ʉ yà’a wèeŋ kom fa weŋ tu mbəmbam ŋkuŋ ya wèeŋ bʉʉŋ Krətèeŋ sə̀ zìnə fana ye də wèŋ sə jə yusə̀ Krɛst à gʉ̀ bʉ̀ʉ wèŋ yà’a co yà’ ka fàk bohòwèŋ anə tse’. ³Mʉ̀ sə tsə̀’ weŋ sə̀ mok də a ye-a ŋga ŋwè kə kom tu vɛ’nə fana ye də ŋgə̀ŋgàŋ ni cu yà’sə mok sə bàa lʉ̀k, ŋgògʉ̀ yusə̀ lʉ̀k sə dʉk pwe’. ⁴Wèŋ sə̀ wèŋ sə làp mandzə̀ də wèeŋ nə̀ yəəŋ mʉlisə̀ Nwì co bʉ̀ʉ sə̀ bə̀boŋ njo nə̀ də wèŋ sə nòŋsə lʉ̀k yà’a, mʉ tsok weŋ də wèŋ a ga’a tesə bohòKrɛst laŋ. Wèŋ a gèsə ni’ awèŋ mvwe’ sə̀ co bòvə̀m nə̀ Nwì nə kà weŋ tɛsə̀. ⁵Bohòvesùwèŋ sə̀ a sə kà tu bə yà’sə naaŋ fana a sə kʉ̀k lis yàvès də Nwìi nə̀ kə̀ jə ves co bʉ̀ʉ sə̀ wo kə̀kʉrə̀ mʉ lìsə̀ yi. A sə naaŋ yàvès tu bohòKrɛst bə ŋàaŋ Yòŋsə̀ nə̀ Rərɛŋ nə də anə̀ kə̀ ye lì vɛ’nə. ⁶A ye-a də ves Krɛst wèeŋ mvwe’ mò’fis fana ŋwə̀ nə̀ yi à kom tu bə nə̀ yi a ka kom pwe’, zəzok kà fo’ ye. Yu nə̀ gʉgʉŋ nə də, a fa ntʉm avès bohòJisòs Krɛst, nə sə niŋtsok fa bwìŋ də a dzəm yi bə mandzə̀ nə̀ a sə dzəm mòk bə mòk.

⁷Wèŋ a sə lòto fa’ mantombì rərəŋ vɛ’ɛ njʉ̀ʉŋ. Wèŋ sə kà zìnə nə ŋga’a mok bɛ’ fe’lə ŋga a bòrə weŋ ndà? ⁸Mʉ̀ rì də ŋwə̀ nə̀ yi a sə̀ lòweŋ ma nà’nə, ka Nwì nə̀ yi ànə to weŋ nə yeŋ. ⁹A ŋgwàaŋ zìnə mvə̀’nə̀ wo dʉkgə̀ də, <<Ku’ nə̀ mò’fis gʉ̀ bʉpsəgə̀ mok>> yà’a, kènə mʉ riŋ fò? ¹⁰Vesùwèŋ bə Tà Jisòs Krɛɛst mvwe’ mò’fis fana yà’sə sə gʉ̀ mʉ ŋgòrìŋtse’ də wèeŋ nə tsərə megu sə̀’ mvə̀’nə̀ mʉ̀ sə tsərə yàm. Ŋwə̀ nə̀ yi sə làp mandzə̀ də yi cwiŋ bʉsə weŋ ànə, a dzəm yi ye co ndà pwe’, Nwìi nə kà yi mè’rə̀. ¹¹Bwema am wèŋ, bohòmʉ̀ yàm yà’ nòjəja də mʉ̀ sə kà də ndàaŋwè pwe’ kom tsoŋ li tu ŋkuŋ tsòhò. Anə ye-a də mʉ̀ sə tsòho fa bwìŋ vɛ’nə, ye də njo nə̀ wo sə tʉ̀ksə mʉ ye kə bʉ̀ʉ yà? A ye-a də mʉ̀ sə tsòho vɛ’nə bwɛ̀rɛ ntʉm kà ŋwə̀ nəmòk bʉ̀ʉ ntə̀əŋ Krɛst sə̀ mʉ̀ sə tsòho sə yaaŋ lok. ¹²Aco mʉ̀ dʉk də bʉ̀ʉ sə̀ wo sə jipsə kɛ’cà wèŋ yà’sə, wo kə yak ni’ awo sə co wo yak nàm.

Mè’rə Yòŋsə̀ Nwì Nə Niŋtsok Fa Wu Mvə̀’nə̀ Wu Gʉ Bum

¹³Bwema am wèŋ, Nwì a to fis weŋ də ya wèeŋ kà co ŋkwɛ̀ŋ bohòyumok sə cu malì. Ŋga’a nə̀ yi fiŋ mè’rə weŋ vɛ’nə fana kà də wèeŋ dʉk də wo nɛ̀ tosə fa weŋ yà’sə mandzə̀ mòk də ya wèeŋ gʉ mok yusə̀ yà’ bòweŋ pwe’ dʉk. Wèeŋ sə dzəm lɛ mòk bə mòk, nə sə fak bohòmòk bə mòk anə sə̀’. ¹⁴Bʉsə̀ lʉ̀ʉk sə pwe’fo’ a kì be’lə ni’ ndzənə mʉncèp nə̀ mò’fis nè’e də, <<Dzəm moma yo mvə̀’nə̀ wù dzəm ni’ yò.>> ¹⁵A ye-a də wèŋ sə gʉ̀ bum co nàamŋgòŋ sə̀ wo lum swɛ̀’lə kɛ’gə̀ mok yà’a fana wèŋ kərə pap. Bʉsə̀ yà’a mʉmvə̀’nə̀ wèeŋ nə gʉ bʉpsə wes ni’ awèŋ pwe’fo’.

¹⁶Yusə̀ mʉ̀ sə tsə̀’ fa weŋ sə də wèeŋ me’rə Yòŋsə̀ Nwì nə niŋtsok fa weŋ mandzə̀ nə̀ co də wèŋ gʉ bum yi, ya wèeŋ kà yusə̀ ŋgùupni’ awèŋ sə dzəm gʉ̀. ¹⁷Yusə̀ ŋgùpni’ ŋwèe dzəmgə̀ə, kaco yà’ ye cù mò’fis bə yusə̀ Yòŋsə̀ Nwì dzəmgə̀ə yeŋ. Wo ba fo’, mòk ka ŋge’ bə mòk yeŋ lok. Yà’ sə nìtsə̀’ yà’sə sə̀’ də ye də kaco wù gʉ̀ to yusə̀ wù dzəm ŋgògʉ̀ yà’ yeŋ. ¹⁸A ye-a ŋga Yòŋsə̀ Nwì nə sə nì fa weŋ mandzə̀ yi fana lʉ̀k kà yumok ŋgògʉ̀ bohòwèŋ tse’.

¹⁹Kaco ŋwè mərə yiskok bum sə̀ ntʉm ŋwè dzəmgə̀ yà’ yeŋ. Bum yà’sə co: sàhà, ŋgòtsərə mègù nzak ŋwàŋwè bə ŋwə̀mbam, gʉ bum jì marè’tu, ²⁰kuksə kɛ’ bum sə̀ wà co yà’a Nwì, rʉ̀m, sə bɛ̀ŋ bwìŋ, ŋkʉ̀ə̀m, kok ndù, bʉp ntʉm, wi’, gə̀gà’à, sə dzəm megu bòp bʉ̀ njò, ²¹sə tsərə megu bum bʉ̀ʉ mok, no jʉhʉ rùk, ŋgàa sʉə nə ye nsàap bum sə̀ co yà’sə pwe’fo’. Mʉ̀ sə sə̀ weŋ ntu’ mvə̀’nə̀ mʉ̀ ànə tsok to weŋ mantombì fa’ laŋ də bʉ̀ʉ sə̀ wo gʉ̀gə̀ nsàap bum yà’sə pwe’fo’ nə̀ kà mvwe’ gaŋ ŋkum sə̀ Nwì sə bə lis kə yə lok.

²²Bum sə̀ yà’ və̀ yàwo bohòYòŋsə̀ Nwìi vɛ’ɛ: dzədzəm, kwəkwa, fifi, kontʉm, kosə̀manziŋ, gʉ̀ bə̀boŋ bohòbwìŋ, ŋgòye zìnə bə bum pwe’fo’, ²³fʉ̀ə̀, nə sə ko fəsə ni’. Bum yè’sə pwe’, lʉ̀k mòk ka nə̀ nà’ sə dʉk də kà yà’ gʉ̀ yeŋ. ²⁴Bʉ̀ʉ sə̀ wo bʉ̀ʉ Jisòs Krɛst wèŋ a fweŋ màk gɛsə ntʉʉm awo sə̀ yà’a gʉ̀gə̀ wo, wo sə gʉ bʉp yà’a laŋ. Yà’ mègù co də wo à jə yà’, nə tɛ’lə zə yà’ mʉnə ntə̀əŋ Jisòs Krɛst. ²⁵Yòŋsə̀ Nwì a fa ves lùŋ yi, ye də a bə̀boŋ də a dzəm ŋgòfa ni’ avès pwe’fo’ ndzə bohòyi, ya yi niŋtsok fa vesùwèŋ mandzə̀ nə̀ a cum ncu àvès yi. ²⁶Vesùwèeŋ kà ni’ sə nɛ̀, vesùwèeŋ kà ŋwə̀ nəmòk ntʉm jòksə̀, vesùwèeŋ kà yu ŋwə̀ mòk sə̀ wa.

Tɛsə Moma Yo, Nə Gʉ Fàha Yo Bə̀boŋ

¹Bwema am wèŋ, a ye-a ŋga wèŋ yə ŋwə̀ nəmòk nə̀ yi gbʉ̀ ni sənə bʉp fana wèŋ sə̀ wèŋ tə gʉgʉŋ bə bum sə̀ ma nə̀ Nwì yà’a, wèŋ tɛsə yi ya yi tesə kok və ca. Wèŋ kà bə nɛ̀ni’ sə gʉ̀. Wèeŋ sə jəŋ ŋkərə̀ sə̀’ də ya wèeŋ kà ca sə̀’ gbʉ̀ ni lò. ²Wèeŋ bək tɛsə fa ndàaŋwè pwe’ ŋgə’ ye. Wèeŋ gʉ-a vɛ’nə, ye də wèŋ sə nòŋsə lʉ̀k nə̀ Krɛst nə.

³A ye-a ŋga ŋwə̀ nəmòk sə jə ni’ ye co yi yumok ŋga yi ka yumok yeŋ fana ye də ŋgə̀ŋgàŋ sə bòrə ni’ ye. ⁴Ndàaŋwè pwe’ mumsə ja’a fàha ye sə̀ yi sə gʉ̀ yà’ pwe’fo’ bə̀boŋ; a ye-a ŋga yà’a bə̀boŋ fana yi kwa bə yusə̀ yi a gʉ̀ yà’ bə tu ye, ka də bʉ̀ʉsə̀ yi gha’ ŋwə̀ nəmòk dʉk. ⁵Njo nə̀ ndàaŋwè pwe’ nə̀ bə̀k tsə lì bum ye yi.

⁶Ŋwə̀ nə̀ yi sə yə’rə jə ncèp nə̀ Nwìi gapsə bum ye sə bə̀boŋ mamòk bə cicà nə̀ nà’ sə yə’rə yi nə.

⁷Kà də ŋwèe jʉ’rə dʉk, kaco ŋwè bʉsə Nwì ləm yeŋ. Yusə̀ ŋwè bì gèsə lòsə nze pwe’fo’, yi nə̀ kə̀ kʉp mègù ntsə’mòk sə̀’ zeŋ. ⁸A ye-a ŋga ŋwè sə bì mègù bum sə̀ ŋgùpni’ ye sə dzəm yà’, ye də yi nə̀ kə̀ tse’ fo’ bum sə̀ bʉp nə ye kpʉ. Ŋwə̀ nə̀ yi sə bì ye bum sə̀ Yòŋsə̀ Nwì sə dzəm fana yi nə̀ kə̀ tse’ ye lùŋ nə̀ nà’a nə̀ mamgə̀ fo’, nə̀ yòŋsə̀ nə fa yi. ⁹Vesùwèeŋ gʉ tse’ mam bə̀boŋ fo’. Vesùwèeŋ kà wò, bʉ̀ʉsə̀ a kà-a teŋsə fana mvə̀ək nə̀ kə̀ dzèŋ nùu nə̀ anə kʉp zʉ bum sə̀ vesùwèŋ à bì yà’ sə. ¹⁰Ye də vesùwèeŋ tse’-a mandzə̀ ghà yà lòoŋ, a sə gʉ bə̀boŋ bohòbwìŋ; nə ye ghak lɛ bohòbwema avès sə̀ vesùwèŋ tse’ dzədzəm Jisòs Krɛst yà’a ntɛ̀ŋ.

Ncèp Nə̀ Nà’ Lə̀sə

¹¹Wèeŋ ja’a na yàwèeŋ mvə̀’nə̀ mʉ̀ sə còm bə bo yàm yà’ sə kùk ŋkpoho nɛ̀. ¹²Mʉ̀ tsok fa weŋ də bʉ̀ʉ sə̀ wo sə dzəm də wo yəəŋ mʉ lisə̀ bwìŋ co də wo bə̀boŋ yà’a, a wo sə̀ wo sə bwi’ lo weŋ də ya wèeŋ kom tu mbəmbam sə. Wo sə gʉ̀ vɛ’nə mègù də ya bwìiŋ kà wo njo ncèp nə̀ nà’a bə kpʉ Krɛst mʉntə̀əŋ nə tʉ̀ksə̀. ¹³Bʉ̀ʉ sə̀ wo sə dʉk də bwìiŋ komtu yà’sə, wo sə kà yàwo lʉ̀ʉk bʉ̀ʉ Jus sə wèŋ sə sə̀’ nòŋsə̀ wes. Wo sə làp mègù mandzə̀ nə̀ də wèeŋ kom vɛ’nə ya wo kumŋgùŋ də wèŋ dzəm ma nə̀ njàwo nə laŋ. ¹⁴Bohòmʉ̀ yàm, kaco mʉ̀ kumŋgùŋ bʉ̀ʉ yumok yeŋ, ka ntə̀əŋ Tà Jisòs Krɛst àvès nə casə. Kpʉ ye nə a gʉ̀ nzeŋgòŋ nə ye bohòmʉ̀ mok co yusə̀ wà. Yà’ mègù co bum sə̀ sə nzeŋgòŋ sə a kpʉ wes bohòmʉ̀ laŋ, fana mʉ̀ kpʉ yàm bohòwo anə sə̀’. ¹⁵Ŋwə̀ nə̀ yi kom tu bə nə̀ yi a ka kom pwe’fo’ zəzok ka yeŋ, ŋga wo tse’-a dzədzəm àwo laŋ na. Yu nə̀ gʉgʉŋ nə də Nwì a gʉ̀ bʉ̀sə vesùwèŋ mok bʉ̀ʉ sə̀ fi. ¹⁶Bʉ̀ʉ sə̀ wo sə bɛ’ mandzə̀ ncu nə̀ fi ènə, wo bʉ̀ʉ Izùrɛ sə̀ zìnə, sə̀ Nwì tse’ wo yi, Nwìi fa wo fifi, nə koksə manziŋ bohòwo sə̀’. ¹⁷Mʉ̀ sə cèp lə̀sə də, ye jəŋ ŋga’a lo mantombì, ŋwə̀ nəmòok kà mʉ ntʉm jòksə̀. Ləloo mvwe’ sə̀ mʉni’ì mʉ̀ yè’e sə nìtsə̀’ də mʉ ŋkwɛ̀ŋ Jisòs. ¹⁸Bwema am wèŋ, mʉ̀ lɛŋ də Tà àvès nə̀ yi Jisòs Krɛɛst gʉ weŋ pwe’ bə̀boŋ. Yà’ a ye vɛ’nə.