Efesò

Ŋwàk nə̀ Pol à Còm Fa Bʉ̀ʉ

sə̀ Mvwe’ Lak

EFESÒ

Ŋwàk nə̀ Pol à còm fa bʉ̀ʉ Efesòènə yi à dzəm də bwìiŋ riŋ yusə̀ Nwì sə fʉ̀hʉ nòŋsə. Yi də Nwì sə dzəm ŋgòjəŋ benə və̀ bum pwe’fo’ sə̀ yi à gʉ̀ yà’ sə mvwe’ mò’fis, bum sə̀ mʉbu bə sə̀ sə nzeŋgòŋ pwe’fo’, də ya Jisos Krɛɛst ye ŋwə̀ nə̀ mantombì bə zeŋ yi (Taŋ mbʉ̀p 1:10). Ŋwà’ nə sə cèp sə̀’ də bwìŋ pwe’ cum ncu nə̀ cù mò’fis ènə bʉ̀ʉ yusə̀ Jisos Krɛst à gʉ̀ʉ sə.

Ncèep gbʉ’ sə̀ ndzənə ŋwàk ènə sə rɛŋsə fa bwìŋ nsàp ncu nə̀ bʉ̀ʉ Nwì wèŋ tse’ nà’ mvwe’ mò’fis bə Jisos Krɛst wèŋ nə. Mòok də cos nə co ni’ ŋwè fana Jisòs ye ye tu. Kè co ndap nə̀ wo ci nà’ fana Jisòs ye lìs tò’ndap nə, bʉ̀ʉ cos ye yàwo co mbàandap nə. Mòok də cos nə co ŋgwe ŋwè fana Jisòs ye bwi ye ndum. Ncèp nə̀ yi tip lə̀sə wo bə zeŋ nə də, wo jəŋ bum mà’ dzèe’ sə̀ Nwì a fa wo sə nə ni tse’ yà’ pwe’, ya ŋga wo ye gʉgʉŋ. Woo ye gʉgʉŋ fana maze’ nə kà wo bə ŋkərə̀ ye nə bòrə̀ mà’ (taŋ mbʉ̀p 6:11).

Sə̀sè Nə̀ Nwì À Fa Ves Nə Və BohòJisos Krɛst

¹Còm ŋwàk nè’e mʉ̀ʉ Pol nə̀ Nwì a dʉk yi də mʉ ye ŋgà ntum Jisòs Krɛst nə. Mʉ̀ sə còm fa nà’ bohòbʉ̀ʉ Nwì sə̀ wo cu mvwe’ lak Efesòwèŋ, wèŋ sə̀ wèŋ sə bɛ’ Jisos Krɛst bə zìnə nə ye wenə wèeŋ mvwe’ mò’fis sə. ²Mʉ̀ lɛŋ də Nwì nə̀ yi tɛ̀’ àvès nə ye Tà Jisòs Krɛɛst ye bə̀boŋ bohòwèŋ, nə fa weŋ fifi.

³Vesùwèeŋ kwasə Nwì. Yi Nwì nə ye Tɛ̀’ɛ Jisòs Krɛst nə̀ yi Tà àvès nə. A kwasə yi bʉ̀ʉsə̀ yi a sè ves, nə be’lə ves Krɛst wèŋ mvwe’ mò’fis, fana nə fa wes vesùwèŋ bum sə̀ bə̀boŋ sə̀ yà’a mvwe’ gaŋ ŋkum ye sə pwe’. ⁴Nwì ànə cokfis vesùwèŋ də a nə ye bʉ̀ʉ ye bə Krɛst mvwe’ mò’fis, ŋga wo ka nzeŋgòŋ nə ntògʉ. Yi ànə gʉ vɛ’nə də ya vesùwèeŋ ye bʉ̀ʉ sə̀ rərɛŋ sə̀ a ka nzak mantombìi yi tse’. Yi ànə gʉ yè’sə bʉ̀ʉ dzədzəm nə̀ nje nə. ⁵Nwì ànə dʉk noŋsə me sə və̀ə yi laŋ də yi nə jəŋ vesùwèŋ ŋgòye bwe ye. Yi à dʉk də yi nə gʉ ves vɛ’nə ndzə bohòJisòs Krɛst bʉ̀ʉsə̀ yà’a mvə̀’nə̀ yà’ à bòkʉ̀rə yi vɛ’nə. ⁶Yi ànə niŋ fa ves bòvə̀m ye nə ndzə bohòmo ye nə̀ yi dzəm nà’ wùriŋ nə fana bwìŋ pwe’fo’ kuksə liŋ ye sə bʉ̀ʉ nsàp bòvə̀m ye ènə.

⁷Mo ye nə à làk tiŋ fis tu avès bə ndʉəm ye, də ya Nwìi swi fa ves bʉp avès. Yà’a mvə̀’nə̀ bòvə̀m nə̀ Nwì nə yam vɛ’ɛ wùriŋ sə. ⁸Yi a sɛ̀s fa ves bòvə̀m ye nə vɛ’nə, nə fa ves bə ŋkərə̀ nə̀ ŋgòrì bum sə̀ ye sə fo’. ⁹Nwì ànə fʉhʉ noŋsə me yusə̀ yi nə gʉ yà’ ndzə bohòKrɛst sə, sə və̀ə yi laŋ, fana yi niŋtsok fa ves yà’, ŋga ŋwè à ka yà’ riŋ yuk. ¹⁰Yusə̀ Nwì à sə dzəm də mvə̀ək kʉ̀rə yi gʉ yà’ sə, à ye də yi nə jəŋ benə və bum sə̀ yi à gʉ̀ sə pwe’fo’ mvwe’ mò’fis. Yi nə jəŋ benə və bum, sə̀ yà’ cu sə nze bə mʉbu pwe’ mvwe’ mò’fis fana Krɛst ye ŋwə̀ nə̀ mantombì bə zeŋ pwe’ yi.

¹¹Vesùwèŋ a bʉ̀ʉŋ mok sə̀’ bʉ̀ʉ Nwì njo Jisòs Krɛst nə. Nwì ànə fʉhʉ noŋsə laŋ də anə ye vɛ’nə, fana bum pwe’ bʉ̀ʉŋ və megu mvə̀’nə̀ yi dzəm kok gù vɛ’nə yi. ¹²Yi a cokfis ves sə̀ ànə naaŋ to tu bohòKrɛst yè’sə, də ya a gʉ bwìŋ wo kuksə liŋ Nwì sə. ¹³Yà’ ànə ye bohòwèŋ sə̀’ vɛ’nə də, ghà nə̀ wèŋ ànə yuk ncèp nə̀ zìnə nə̀ nà’ à sə tsə̀’ weŋ mvə̀’nə̀ Nwìi nə fa weŋ lùŋ nə dzəm fana Nwì a fa weŋ Yòŋsə̀ nə̀ Rərɛŋ nə̀ yi ànə kak ŋgòfa bʉ̀ʉ ye wèŋ nə. Yòŋsə̀ ye ènə ànə ye bohòwèŋ anə co ŋgwè ŋgònìŋtsə̀’ də wèeŋ yè’sə bʉ̀ʉ ye. ¹⁴Yu nə̀ mantombì nə̀ Nwì à fa to bʉ̀ʉ ye sə mvwe’ bum sə̀ yi à kàk wo sə, à ye Yòŋsə̀ nə̀ Rərɛŋ nə. Njo Yòŋsə̀ nə̀ Rərɛŋ ènə fana a rì də ghà nə̀ Nwìi nə̀ fìŋ mè’rə wes ves bohòbʉp fana yi nə fa mali ves bwees bum mok sə̀ yi à kàk ves sə sə̀’. Yè’sə nə gʉ fana bwìŋ kuksə liŋ Nwì bə zeŋ sə̀’.

Pol Lɛŋ Fa Krətèeŋ Sə̀ Mvwe’ Lak EfesòWèŋ Pìriyà

¹⁵Nà’a njo nə̀ ghà nə̀ mʉ̀ à yuk mvə̀’nə̀ wèŋ fa ntʉm bohòTà Jisòs, nə ye mvə̀’nə̀ wèŋ dzəm bʉ̀ʉ Nwì wèŋ fana, ¹⁶mʉ̀ sə lɛŋ fa weŋ pìriyà nùumbu pwe’. Mʉ̀ ka ŋgòkwasə Nwì bʉ̀ʉ tu awèŋ teŋsə yuk. ¹⁷Mʉ lɛŋgə̀ Nwì Tà Jisòs Krɛst àvès nə̀ yi Tɛ̀’ nə̀ yi tse’ fònə. Mʉ lɛŋ yi, mʉ̀ sə dʉk də yi fa weŋ yòŋsə̀ nə̀ nà’a gʉ weŋ ŋgòtse’ ŋkərə̀ nə̀ də ya wèeŋ sə riŋ tsə’rə Nwì. ¹⁸Mʉ lɛŋgə̀ də yi muk tosə ŋkərə̀ə awèŋ ŋgòyə rì marɛŋ nə̀ nje nə, ya wèeŋ rɛɛŋ bə bum sə̀ yi a to weŋ də wèeŋ naaŋ tu bə zeŋ sə. Mok ye sə̀’ də ya wèeŋ rɛɛŋ bə mvə̀’nə̀ bum sə̀ yi a kàk fa bʉ̀ʉ ye wèŋ yam, nə boŋ, ¹⁹nə ye mvə̀’nə̀ ŋàaŋ ye sə̀ yi sə fàk bə zeŋ ndzə ni’ì vès sə̀ vès à dzəm bohòyi sə, a yam co wù kà fʉ̀k to sə sə̀’. Ŋàaŋ sə̀ yi gʉ̀gə̀ fàk bə zeŋ ndzə ni’ì vès sə yà’ mègù sə̀’ ŋàaŋ sə̀ ghaŋ, ²⁰sə̀ yi à lòkoksə Jisòs Krɛst bə zeŋ mvwe’ kpʉ, nə cumsə nà’ bo ma mà’a yi mʉbu sə, ²¹fana Jisòs Krɛst tse’ ŋàŋ fo’ nə casə nsàp yòŋsə̀ nə̀ fòpwe’ nə̀ nà’ tse’ ŋàŋ mbwa yi. Yi yam ghak nsàp liŋ nə̀ fòpwe’ nə̀ də nà’ tse’ ŋàŋ sə nze fɛŋ nə ye bə nzeŋgòŋ nə̀ nà’ ye mantombì pwe’fo’ sə̀’ yi. ²²Nwì a benə bum pwe’fo’, nə noŋsə fa Krɛst yi nəŋtes kù mbwa. Yi ŋga’a mok ŋkum bə bum pwe’fo’ yi, Nwì a gʉ̀ yi ŋgòye tu bohòcos nə sə̀’. ²³Cos nə ŋgùpni’ Krɛst. A zeŋ nə̀ nà’ gʉ̀ yi ŋgòye wesə dak nə̀ dak, sə̀’ mvə̀’nə̀ a yi nə̀ yi gʉ̀ wesəgə̀ bum pwe’ ma nə̀ fòpwe’fo’ dak yi nə.

Wèŋ Ànə Ye Bʉ̀ Kpʉkpʉ Ŋkuŋ Nə Luŋ

¹Bohòwèŋ yàwèŋ, wèŋ ànə ye to co bʉ̀ʉ sə̀ kpʉkpʉ bʉ̀ʉsə̀ wèŋ ànə kà dʉk Nwì yuk, nə sə gʉ bʉp. ²Ghà ànə à ye, wèŋ à sə bɛ’ lòmègù bum sə̀ nzeŋgòŋ nə sə dzəm sə. Wèŋ sə yuk dʉk yòŋsə̀ nə̀ yi tse’ yòŋsə̀ə ze’, nə̀ yi sə fak sə ntʉʉ̀ bʉ̀ʉ sə̀ wo à gʉtu bohòNwì bə mvə̀’nə̀ ŋga’a yi nə. ³Vesùwèŋ à ye mègù sə̀’ co wo. Vesùwèŋ à sə cu ncu nə̀ ŋgùupni’ avès à sə dzəm zeŋ. Vesùwèŋ sə gʉ bum sə̀ yà’ sə bòni’ avès sə, nə ye yusə̀ ŋkərə̀ avès dʉk də yà’a bə̀boŋ bohòvès anə. Vesùwèŋ à ye mègù sə̀’ co mvə̀’nə̀ ndàaŋwè pwe’ à ye sə, də a nə ye ŋgə’ bʉ̀ʉsə̀ a tse’ nsàp ntʉm nə̀ aco Nwì jòk bə zeŋ. ⁴Vesùwèŋ ànə ye-a sə̀’ vɛ’nə fana Nwì ye ŋwə̀ nə̀ yi tse’ koksə̀manziŋ vɛ’ɛ, nə tse’ dzədzəm bohòvès sə̀’ wùriŋ. ⁵Fana mvə̀’nə̀ vesùwèŋ ànə ye mok co bʉ̀ kpʉkpʉ njo bʉp avès sə fana yi luŋsə be’lə ves bə Jisòs Krɛst. Wèŋ a tse’ lùŋ yà’sə bʉ̀ʉ bòvə̀m Nwì. ⁶Mvəsə̀ ves Krɛst wèŋ à ye mok mvwe’ mò’fis fana yi lòkoksə venə wèŋ, ŋgòcu venə wèŋ mʉnə dzə̀’ nə̀ ghaŋ ma mʉbu. ⁷Nwì ànə gʉ vɛ’nə də ya a kə̀ dzèŋ nùu, bwìŋ ye nsàp bə̀bo nə̀ yi ànə fa ves bohòJisòs Krɛst nə, nə riŋ mvə̀’nə̀ də bòvə̀m nə̀ nje nə yam vɛ’ɛ wùriŋ sə. ⁸Nwì à lùŋsə weŋ bə bòvə̀m nə̀ nje mvə̀’nə̀ wèŋ a fa ntʉm awèŋ bohòKrɛst. Ka yumok sə̀ wèŋ à gʉ̀ʉ yeŋ, Nwì a fa weŋ wà. ⁹Yà’ ka bʉ̀ʉ nsàp fàk mòk nə̀ wèŋ a gʉ̀ʉ yeŋ, ye də kaco ŋwè kumŋgùŋ bʉ̀ʉ zeŋ yeŋ. ¹⁰Vesùwèeŋ bo fàak Nwì. Yi à fʉ̀’ càsə ves ndzə bohòKrɛst ya vesùwèeŋ sə gʉ bə̀boŋ, mvəsə̀ yi ànə fʉ̀hʉ nòŋsə də vesùwèeŋ nə gʉ sə.

Bʉ̀ʉ Jus Bə Bʉ̀ Lakmvum Wèeŋ Mok Mò’fis Bʉ̀ʉ Krɛst

¹¹Wèŋ sə̀ ma bə tɛ̀’ awèŋ à ye bʉ̀ lakmvum, wèŋ sə riŋ də wèŋ ànə ka bʉ̀ʉ Nwì yeŋ. Bʉ̀ʉ Jus sə̀ wo à sə kom yàwo tu ànə ye bʉ̀ʉ Nwì wo fana wo sə to wèŋ yàwèŋ də bòp bʉ̀ nə̀ wèeŋ kà tu komgə̀. Kom tu nə mègù yumok sə̀ bwìŋ gʉ̀gə̀ yà’ ma mʉnə ŋgùpni’. ¹²Wèeŋ sə tsərə tse’ də mvə̀k ànə à ye ŋga wèŋ Krɛst wèŋ à ka njàŋ ye lok fʉk. Wèŋ ànə ka ŋgwì bʉ̀ Izùrɛ nə̀ Nwì à cokfis də wo bʉ̀ʉ ye wèŋ sə yeŋ. Wèŋ ànə ye yàwèŋ ŋkʉ̀ìŋ fana, nə kà bo sənə rʉ̀k Nwì nə̀ yi à kàk ŋgòfa bʉ̀ʉ ye wèŋ bum fo’ nə tse’. Wèŋ ànə ye yàwèŋ sə nzeŋgòŋ anə nsàp bʉ̀ nə̀ wèŋ à ka tsətsərə̀ mòk nə̀ co wèŋ sə naaŋ tu fo’ tse’ lok. Wèŋ ànə ka Nwì rì lok. ¹³Yà’a ŋga’a yè’e mok də, bʉ̀ʉsə̀ weŋ Krɛst wèeŋ mok mò’fis fana wèŋ sə̀ wèŋ ànə ye to fa’ sə̀sap sə a sòoŋ kʉəp və̀ mok laŋ bʉ̀ʉ ndʉəm Krɛst sə. ¹⁴Jisòs Krɛst nə à jə və̀ fa ves fifi yi bə tu ye. Yi a jə be’lə və̀ bʉ̀ lakmvum wèŋ ŋgòye mok mò’fis bə bʉ̀ʉ Jus wèŋ. Yi à jə ŋgùpni’ ye, nə fis mak gɛsə bə̀bɛ̀ŋ nə̀ nà’ ànə sə təəŋ lok mʉtsətsə’rə̀ə wo co mbàndap nə bə zeŋ. ¹⁵A yà’sə də yi à kə̀ teŋsə lʉ̀ʉk bʉ̀ʉ Jus wèŋ bə bum lak awo sə̀ wo à sə gʉ̀gə̀ yà’ sə̀’ pwe’. Yi à gʉ̀ vɛ’nə də ya yi jəŋ be’lə və bòop bʉ̀ʉ sə̀ ba sə mvwe’ mò’fis. Fana wo ye mok ŋgwì bʉ̀ nə̀ mò’fis nə̀ fi. Yà’a mʉmvə̀’nə̀ yi à jə və̀ fifi sə. ¹⁶Ghà nə̀ Krɛst ànə kpʉ mʉntə̀əŋ fana yi fis gɛsə bə̀bɛ̀ŋ nə̀ nà’ à sə yegə̀ mʉtsətsə’rəə bòop bʉ̀ʉ sə̀ ba sə. Yi à gʉ̀ vɛ’nə də ya yi jəŋ və bòop bʉ̀ʉ sə̀ ba sə bohòNwì co ŋgwì bʉ̀ nə̀ mò’fis. ¹⁷Yà’a mvə̀’nə̀ Krɛst à jə və̀ ntirə̀ nə̀ nà’ tse’ fifi, nə tsoho fa wèŋ sə̀ wèŋ cu sə̀sap bə sə̀ wo kʉəp və̀ Nwì wèŋ sə̀’. ¹⁸Vesùwèŋ pwe’fo’ tse’ yòŋsə̀ nə̀ mò’fis ndzə bohòKrɛst nə. Fana vesùwèŋ tse’ mandzə̀ nə̀ ŋgòvə̀ mvwe’ sə̀ Tɛ̀’ cu sə sə̀’.

¹⁹Ye də, wèŋ sə̀ wèeŋ bʉ̀ lakmvum sə, wèŋ ka ŋga’a mok ŋkʉ̀ìŋ yeŋ. Wèeŋ ŋga’a mok weŋ bʉ̀ʉ Nwì wèŋ pwe’ bwe nze. Wèeŋ mok bwe sə̀ mʉ nda’à Nwì. ²⁰Kùumndap nə̀ ŋgàa ntum Nwì bə ŋgàa tsòhòbum Nwì wèŋ ànə ye to zeŋ wo nə fana, wèeŋ yàwèŋ ŋga’a sə̀’ ndap ànə mamòk. Lìs nə̀ nà’a lìs tò’ndap nə, a Jisòs Krɛst bə tu ye. ²¹A yi nə̀ yi kotse’ ndap nə pwe’ mvwe’ mò’fis. Yi gʉ̀gə̀ nà’ ŋgòkuk, nə ye ndap nə̀ nà’a zok nə̀ tse’ nà’ Tà Nwì. ²²Krɛst gʉ̀gə̀ wèŋ sə̀ wenə wèeŋ mvwe’ mò’fis sə ŋgòye sə̀’ ndap ànə mamòk. Nwìi cugə̀ mʉmvwe’ ndap ànə bə yòŋsə̀ ye.

Pol Tsə̀’ Rɛŋsə Bum Sə̀ Yà’ Cu Sə̀swihì BohòNwì

¹Bum yè’sə nə yeè nə vɛ’nə fana mʉ̀ Pol nə̀ mʉ̀ cu ndapndzəm nè’nə, mʉ̀ sə lɛŋ fa weŋ Nwì. Mʉ̀ cu ndapndzəm nə bʉ̀ʉ tu Jisòs Krɛst, də mʉ̀ sə tsòho fa liŋ ye sə bohòbʉ̀ lakmvum. ²Mʉ̀ tsəm də wèŋ a yuk mvə̀’nə̀ Nwì a fa mʉ fàak yè’e bə bòvə̀m nə̀ nje də mʉ fak fa weŋ sə laŋ. ³Nwì bə tu ye à nìtsə̀’ fa mʉ yusə̀ yà’ à cu sə̀swihì bohòyi sə̀ ŋwə̀ nəmòk ka bə zeŋ riŋ yuk. (Mʉ̀ a còm fa weŋ bə zeŋ momjo vɛ’ɛ laŋ. ⁴A ye-a ŋga wèŋ ta-a yusə̀ mʉ̀ a còm sə fana aco wèŋ rɛɛŋ bə yusə̀ sə̀swihì sə̀ mʉ̀ rì yà’ bə liŋ Krɛst sə.) ⁵Ŋwè ànə ka bə zeŋ mantombì ntòriŋ yuk. Nwì niŋ fa yà’ ŋga’a bohòŋgàa ntum ye bə ŋgàa tsòhòbum ye wèŋ, sə̀ wo bʉ̀ʉ sə̀ Nwì a nòŋsə wo zok sə. Nwì a nìfa yà’ bə yòŋsə̀ ye nə. ⁶Yu nə̀ sə̀swihì nə nè’ də: mvə̀’nə̀ bʉ̀ lakmvum wèeŋ yuk Ntirə̀ nə̀ Bə̀boŋ nə, nə dzəm nà’ fana wo tse’ yàwo bum sə̀ bwe nze tse’ yà’ wo sə sə̀’. Wo mok mamòk bə ŋgùpni’ nə̀ mò’fis nə fana wo tse’ ma njàwo sənə bum sə̀ Nwì a kàk fa bʉ̀ʉ ye sə sə̀’.

⁷Nwì a gʉ̀ mʉ yi də mʉ ye ŋgà fàk nə̀ Ntirə̀ nə̀ Bə̀boŋ nə. Yi a fàk sə ntʉʉ̀ mʉ̀ bə ŋàaŋ sə̀ ye sə fana yi nə fa mʉ fàak yè’sə bə bòvə̀m nə̀ nje də mʉ gʉ. ⁸A ye-a sə̀ də mʉ̀ jə’rə càsə bʉ̀ʉ Nwì wèŋ sə pwe’ mʉ̀ fana Nwì a fa mali mʉ fàak yè’sə bə bòvə̀m nə̀ nje. Fàak sə̀ yi a fa mʉ sə, a də mʉ tsoho lo fa bʉ̀ lakmvum wèŋ ma nsàp ghàk nə̀ Jisòs Krɛst tse’, nə̀ kaco ŋwè cepto yeŋ nə. ⁹Fàak am mook ŋgònìfa bwìŋ mvə̀’nə̀ bum sə̀ yà’ cu sə̀swihì bohòNwì, sə̀ yi ànə gʉ yà’a nə̀ kə̀ ye nùu. Nwì nə̀ yi ànə gʉ bum pwe’ yi nə à lòksə swìhi bum yè’sə mvə̀’nə̀ à yè yèe. ¹⁰Yi à swìhi yà’ vɛ’nə də ya a kə̀ dzèŋ niè’ nè’e fana yi jəŋ cos nə, nə niŋtsok nsàp ŋkərə̀ nə̀ yi tse’ nə bə bum pwe’. Yi nə niŋtsok fa nà’ bohòyòŋsə̀ə sə̀ wo tse’ ŋàŋ ma mʉbu wo sə. ¹¹Yà’a mvə̀’nə̀ Nwì ànə gʉ bum sə̀ yi ànə dʉk ntinə bʉ̀ə̀ də yi nə gʉ sə. Yi à gʉ̀ yà’ ndzə bohòKrɛst nə̀ yi Tà àvès nə. ¹²Vesùwèŋ sə̀ vès Krɛst wèeŋ mok mvwe’ mò’fis sə, aco a və to mantombìi Nwì, nə kà wəp, bʉ̀ʉsə̀ vès a dzəm bohòTà Jisòs nə. ¹³Ye də mʉ̀ lɛŋ weŋ wùriŋ də kà də wèeŋ bʉpsə ntʉm awèŋ də bʉ̀ʉsə̀ mʉ̀ sə yə ŋgə’ bʉ̀ʉ wèŋ dʉk. Ŋgə’ nə̀ mʉ̀ sə yə nə, wèeŋ nə tse’ swe’ fo’.

Pìriyà Nə̀ Pol À Lɛŋ Fa Bʉ̀ʉ EfesòWèŋ

¹⁴Ye də nà’a njo nə̀ mʉ təəŋgə̀ bə tumfərə mantombìi Tɛ̀’, ¹⁵nə̀ ŋgwì bʉ̀ nə̀ ma mʉbu bə sə̀ sə nze pwe’ tse’gə̀ liŋ awo bohòyi nə. ¹⁶Mʉ lɛŋgə̀ Nwì də yi fa weŋ yòŋsə̀ ye ŋgògʉ̀ ntʉʉm awèeŋ tse’ ŋàŋ. Nwì nə, yi tse’ kə̀kuk vɛ’ɛ wùriŋ co yi gʉ fa weŋ vɛ’nə. ¹⁷Mʉ lɛŋgə̀ sə̀’ də Krɛst kə cum sə ntʉʉ̀ wèŋ mvə̀’nə̀ wèŋ a dzəm bohòyi sə. Mʉ lɛŋ də dzədzəm nə̀ wèŋ tse’ bohòmòk bə mòk nə co ŋgàaŋ-tʉ, nə gʉŋ co kùumndap, nə kà tsòhò. ¹⁸Ya ŋga wèŋ, nə ye bə bʉ̀ʉ Nwì wèŋ pwe’fo’, nə rɛɛŋ riŋ mvə̀’nə̀ Krɛst dzəm ves maŋgəŋgèŋ sə. Dzədzəm nə̀ nje nə nà’a wə̀wə̀ŋ nə ye sə̀sap nə ye cəco nə tse’ ntuəmtu sə̀’. ¹⁹A ye-a sə̀ də dzədzəm nə̀ nje nə nà’ yam vɛ’ɛ nsàp nə̀ kaco ŋwè riŋ wes to nà’ ye fana mʉ̀ lɛŋ də wèeŋ riŋ nà’, ya ŋga nsàp ntʉm àwèŋ nə bʉʉŋ co nə̀ Nwì dak nə̀ dak.

²⁰Vesùwèeŋ kwasə Nwì nə̀ yi tse’ ŋàaŋ sə̀ yi fàkgə̀ bə zeŋ sə ntʉʉ̀ vès nə. Aco yi gʉ riŋ ghak, nə casə mvə̀’nə̀ a sə fek yi, nə ye bə mvə̀’nə̀ a sə tsərə. ²¹Nwìi tse’ kə̀kuk bʉ̀ʉ bʉ̀ʉ cos nə, nə ye bʉ̀ʉ tu Jisòs Krɛst bə ghà nə̀ fòlòoŋ, nə kà mè yuk. Yà’ ye vɛ’nə.

Wèeŋ Fak Mvwe’ Mò’fis, Co Ŋwə̀ Nə̀ Mò’fis

¹Mʉ̀ nə̀ mʉ̀ cu ndapndzəm bʉ̀ʉsə̀ də mʉ̀ sə fàk bohòTà nə, mʉ̀ lɛŋ weŋ vɛ’ɛ wùriŋ də wèeŋ cum ncu nə̀ aco nà’ kʉrə bə mvə̀’nə̀ Nwì ànə to weŋ ŋgòcu sə. ²Wèeŋ jəŋ ni’ awèŋ sə nze, nə sə ye fʉ̀ə̀, nə ye də a ye-a ŋga ŋwè gʉ̀ yumok sə̀ yà’ ka wu boŋ, wù kà bə zeŋ nə̀nàk jòk bʉ̀ʉsə̀ wèŋ tse’ dzədzəm. ³Wèeŋ lap mandzə̀ nə̀ ŋgòcu ncu nə̀ mvwe’ mò’fis, nə̀ Yòŋsə̀ Nwì a to weŋ ŋgòcu nə, ya ŋga wèeŋ cum bə fifi. ⁴Vesùwèŋ tse’ ni’ nə̀ mò’fis, nə tse’ yòŋsə̀ sə̀’ nə̀ mò’fis. Yà’ mègù sə̀’ mvə̀’nə̀ yu sə̀ Nwì à to weŋ ŋgònaaŋ tu bə zeŋ mantombì nə gù sə̀’ mò’fis. ⁵Vesùwèŋ tse’ Tà nə̀ mò’fis, a dzəmtse’ sə̀’ yusə̀ mò’fis, nə ye sə̀’ bàptɛ nə̀ mò’fis. ⁶Nwì mègù mò’fis nə̀ yi Tɛ̀’ɛ bwìŋ pwe’. Yi tu bə bum pwe’ yi. Yi jəgə̀ bum pwe’, nə sə gʉ fàak ye bə zeŋ. Yi kotse’ bum pwe’fo’ yi.

⁷Fana Jisòs Krɛst a fa vesùwèŋ nsàap ŋkərə̀ə zəzok. Yi fa ndàaŋwè pwe’fo’ ma nje mvə̀’nə̀ yi dzəm ŋgòfʉ̀k fa nà’. ⁸Yà’a yusə̀ ŋwàk Nwì sə cèp də,

<<Ghà nə̀ yi ànə kok lo mʉbu sə̀sap fana,

Yi à jə lòbʉ̀ʉ sə̀ yi ànə ghak wo bə dzè’ ŋkʉ̀ʉŋntɛ̀ŋ;

Yi fa maŋgòŋ fəfa.>>

⁹Ncèp nə̀ də, <<yi ànə kok lo mʉtsə̀ sə̀sap>> nà’a yà’sə da? Nà’a yà’sə də yi ànə tsoŋ lo to ntòtsətsoŋ, ma nə̀ sə mbwè nze. ¹⁰Ye də ŋwə̀ nə̀ yi à tsə tsətsoŋ nə, a sə̀’ yi nə̀ yi à kok lòkəkok, mʉ ntòbu nə. Yi à kok lòvɛ’nə ya yi ye ma nə̀ fòpwe’fo’ yi. ¹¹A yi nə̀ yi à fa maŋgòŋ wèŋ fəfa nə. Nsàap fəfaa sə̀ yi à fa yà’wèŋ sə à ye də, yi à nòŋsə bʉ̀ʉ mok ŋgòye ŋgàa gə̀ ntum ye, mok ŋgàa tsòhòbum ye, mok fàŋgəri, mok pastònə ye mok cicà wèŋ. ¹²Yà’a mvə̀’nə̀ yi ànə gʉ vɛ’nə ŋgògʉ̀ fʉ̀hʉ nòŋsə bʉ̀ʉ Nwì wèŋ də ya wo fak bohòyi Krɛst: ya wo ci lokoksə tes ni’ nə. ¹³Fana ya vesùwèŋ pwe’ nə kə dzeŋ mok mvwe’ sə̀ də a tse’ tsətsərə̀ nə̀ mò’fis bə yusə̀ a dzəmtse’ sə, nə ye bə yusə̀ a rì yà’ bə ma nə̀ mo Nwì nə. A ye vɛ’nə fana yà’ gʉ ves mok ŋgòbʉ̀ʉŋ bʉ̀ʉ sə̀ vesùwèŋ a gʉ vəp laŋ, a ye mok co Krɛst nə bə tu ye dak nə̀ dak. ¹⁴Fana vesùwèŋ kà mok co bweŋke’ ye fe’lə̀ ŋgòsə yu’rə kɛ’cà bum sə̀ bwìŋ sə yə’rə nə sə kupsə kɛ’cà ntʉm avès bə yusə̀ vesùwèŋ a dzəm sə; kè də ŋwə̀ mòk cì’ mvwès fana nà’ yuhu fʉ ntu’ù vès co də nà’a zìnə yà’a mok sə gʉ̀ fe’lə̀. ¹⁵A ye lɛ də, vesùwèeŋ dzəm mòk bə mòk, ya a sə cep zìnə, ya vesùwèeŋ kuk ŋgòye kə̀kʉrə̀ co ni’ Krɛst, nə̀ yi tu yi nə. ¹⁶Yi tu yi fana ni’ nə pwe’ sə yuk bohòyi, fana ni’ nə pwe’ cu mò’fis mvə̀’nə̀ nzèhe ni’ sə sə kohotse’ nà’ mvwe’ mò’fis anə. Fana a ye-a ŋga ma ni’ nə̀ fòpwe’ sə gʉ̀ fàk ma nə̀ nje nə kə̀kʉrə̀ fana ni’ nə pwe’ kuk, nə gʉŋ bə dzədzəm.

Wèeŋ Cum Nsàp Ncu Nə̀ Fi

¹⁷Mʉ̀ tə yàm bə ncèp nè’e, nə sə tip weŋ bə liŋ Tà də wèeŋ kà nsàp ncu nə̀ bʉ̀ pegè wèeŋ cugə̀ nà’a mok cu. Nsàp mandzə̀ nə̀ wo tsərəgə̀ bum yàwo nə̀ nà’ ka fàk tse’. ¹⁸Ŋkərə̀ àwo cu sənə mandzəm. Wo ka mvwe’ ncu nə̀ Nwì nə̀ riŋ bʉ̀ʉsə̀ wo gʉgʉtu, nə kà yumok rì. ¹⁹Marè’tu a mè mʉtuhù wo laŋ. Wo fa mègù ni’ awo mok bə ŋgògʉ̀ jòŋ. Wo sə gʉ nsàap bum sə̀ bʉp nduk, nə kà mvə̀k kʉp.

²⁰Bohòwèŋ yàwèŋ, wèŋ à ka yumok mʉmvə̀’ànə bə liŋ Krɛst yə’rə. ²¹Wèŋ à yuk lì liŋ ye lɛ laŋ, ka vɛ’nə yeŋ à? Wo à yə’rə fa wèŋ zìnə nə̀ nà’a bə liŋ Jisòs nə laŋ. ²²Ye də wèeŋ fweŋ mak gɛsə ni’ àwèŋ nə̀ zəm nà’a fo’, nà’ à kʉ̀rə ye bə ncu àwèŋ nə̀ wèŋ ànə sə cum to mantombì nà’a. Bum sə̀ bʉp sə̀ yà’ à sə bòweŋ sə à bòrə weŋ nə gʉ̀ bʉpsə wes ni’ nə̀ zəm nə laŋ. ²³Wèeŋ tse’ lɛ tsətsərə̀ nə̀ fi ya wèeŋ rɛɛŋ bum mok bə mandzə̀ nə̀ fi. ²⁴Wèeŋ ni tse’ mok ni’ nə̀ fi, nə̀ wo a gʉ̀ nà’, nà’ tse’ nsəsə̀ə Nwì. Ni’ nə̀ fi nə ncu nə̀ nà’a zìnə, rərəŋ bə rərɛŋ sə̀’.

²⁵Ye də wèeŋ kà mvwès mok sə cì’. Ŋwèe cep-a yumok bohòmoma ye, yà’ ye megu yusə̀ yà’a zìnə, bʉ̀ʉsə̀ vesùwèeŋ pwe’ ni’ nə̀ mò’fis. ²⁶A ye-a ŋga wù jòok, wù kà də jə̀jòk nə gʉ wu ŋgògʉ̀ bʉp dʉk. Kà də wu yiskok bə və̀əm jə̀jòk tè nùm kə ca co dʉk, ²⁷ya wu kà maze’ nə mandzə̀ fa. ²⁸Ŋwə̀ nə̀ yi à sə yə̀gə̀-a yə̀, yi teŋsə. Yi fak mok bə bo ye zìnə, ya yi tɛsə to bʉ̀ʉ sə̀ wo ŋgàa jìŋ wèŋ. ²⁹Kà də ncèep sə̀ bʉp tesə kə̀ cùhu wèŋ dʉk. Wèeŋ cep megu lɛ ncèep sə̀ co yà’ tɛsə bwìŋ fana yà’ ye kə̀kʉrə̀ bohòŋwə̀ nə̀ wù sə cèp bohòyi nə. A ye vɛ’nə ya yà’a tse’ swe’ bohòbwìŋ. ³⁰Mòok sə̀’ də kà də wèeŋ gʉ də ntʉm Yòŋsə̀ nə̀ Nwì nə yaaŋ dʉk. Wèeŋ riŋtse’ də Yòŋsə̀ nə mʉni’ì wèŋ nə co ŋgwè ŋgònìŋtsə̀’ də Nwì tse’ weŋ yi, fana yi nə̀ kə̀ fìŋ mè’rə weŋ ŋga nùmbu nə kə̀ dzèeŋ. ³¹Wèeŋ mè’rə mak gɛsə cʉcʉk, kà ntʉm ko, nə ye jə̀jòk wèŋ pwe’fo’. Ŋwèe kà də yi sə cep furə kɛ’ca, nə sə yak kɛ’ca bwìŋ dʉk. Ŋwèe kà mʉzə̀p tsətsərə̀ nə̀ bə jòŋ bohòŋwə̀ mòk sə və̀ə yi tse’ lok fʉk. ³²Wèeŋ sə gʉ fa mòk bə mòk lɛ bə̀boŋ, nə sə tse’ ntʉm nə̀ fə̀fwèŋ. Wèeŋ sə swifa mòk bə mòk mvə̀’nə̀ Nwì à swìfa weŋ mvə̀’nə̀ wèŋ à dzəm bohòKrɛst yà’a.

Wèeŋ Cum Ncu Nə̀ Nà’a Ncu Marɛŋ

¹Wèeŋ bwe Nwì sə̀ yi dzəm weŋ vɛ’ɛ wùriŋ, fana ye də wèeŋ sə gʉ bum sə̀’ co yi. ²Ncu àwèŋ nə̀ wèŋ sə cu nə, nà’a ye bə dzədzəm mvə̀’nə̀ Krɛst ànə dzəm ves sə̀’, nə fa yòŋsə̀ ye bʉ̀ʉ vès yà’a. Yi fa yòŋsə̀ ye nə co fəfa mòk nə̀ nà’ à rə̀m sàaŋ bòŋsə bohòNwì nà’ ye sə̀’ co satikà’ bohòyi nə vɛ’. ³Wèeŋ bʉ̀ʉ Nwì fana kà də wèeŋ gʉ co wo teŋ lok fʉk nzak sàhà bə liŋ awèŋ dʉk. Nzak sàhà bə bum sə̀ yà’ ka rərɛŋ yeŋ pwe’ nə ye ntʉm nə̀ ŋgòtsərə də wu tse’ bum ŋkʉ̀ʉŋ wuwù nà’a kà bohòwèŋ yuhù yuk. ⁴Ka bə̀boŋ co wèŋ sə cep kɛ’ca ncèep jòŋ bə ncèep ləm nə ye mansohòwèŋ yeŋ. Wèeŋ sə kwasə lɛ Nwì. ⁵Wèeŋ riŋtse’ də ŋwèe nə̀ kà bè’lə̀ yumok mvwe’ gaŋ ŋkum Krɛst bə Nwì kə̀ tse’ lok, ŋga a ye-a də yi sə ko sàhà, sə gʉ bum jòŋ nə ye nsàp ŋwə̀ nə̀ yi sə dzəm ŋgòtse’ bum ŋkʉ̀ʉŋ na. Ŋgà dzəm bum ŋkʉ̀ʉŋ ànə sə jə bum yà’sə co Nwì bohòyi. ⁶Kà də ŋwə̀ nəmòok kə borə weŋ bə ncèep sə̀ wà bə bum sə̀ mʉ̀ tsə̀’ weŋ yè’sə dʉk. Bum yà’sə, a zeŋ sə̀ yà’a gʉ̀gə̀ ŋkuŋ Nwì jok bohòbʉ̀ʉ sə̀ wo kà dʉk ye yukgə̀ sə. ⁷Ye də wèeŋ kà bə nsàp bʉ̀ ànə wèŋ sə be’lə̀ lok. ⁸Wèŋ ànə ye to yàwèŋ fa’ sə̀’ ŋgàa cu sənə mandzəm. Ŋga’a nè’e wèŋ a bʉ̀ʉŋ və̀ mok bʉ̀ʉ Tà Jisòs fana ye də wèŋ cu mok mvwe’ marɛŋ. Ye da wèeŋ cum mok ncu nə̀ aco nà’ niŋtsok fa bwìŋ də wèeŋ ŋgàa marɛŋ anə. ⁹Bʉsə̀ marɛŋ nə jə və̀gə̀ nto’o sə̀ bə̀boŋ co gʉ̀bòŋ bə kə̀kʉrə̀ nə ye zìnə sə̀’. ¹⁰Wèeŋ lap mandzə̀ nə̀ ŋgòyə’rə lɛ yusə̀ aco yà’ gʉ Tà yi kwa. ¹¹Kà də wèeŋ fa gesə bo awèŋ sənə bum sə̀ wà sə̀ yà’a bum ndzəm yà’sə dʉk. Wèeŋ yə nsàap bum yà’sə, wèŋ fis vesə yà’ lɛ mvwe’ marɛŋ. ¹²Ŋgòcèp bə nsàap bum sə̀ wo gʉ̀gə̀ yà’ mvwe’ sə̀swihì sə a marè’tu wùriŋ. ¹³Fana a ye-a ŋga bum pwe’ tesə və̀ mvwe’ marɛŋ fana yà’ rɛɛŋ yəəŋ mvə̀’nə̀ yà’ cu sə nə̀ zìnə. ¹⁴Bʉsə̀ yusə̀ yà’a rɛɛŋ yəəŋ bə̀boŋ laŋ fana yà’ bʉ̀ʉŋ mok marɛŋ. Nà’a njo nə̀ wo dʉkgə̀ də,

<<Wù ŋgà dzəmlo, yə̀əŋ lokok mvwe’ kpʉ!

Ya ŋga Krɛst fa wu marɛŋ.>>

¹⁵Ye də wèeŋ jəŋ ŋkərə̀ bə̀boŋ bə nsàp ncu àwèŋ nə̀ wèŋ sə cu nə. Wèeŋ cum co bʉ̀ʉ sə̀ wo tse’ ŋkərə̀, nə kà co ləm cu. ¹⁶Bʉp cu niè’ wùriŋ fana mvə̀k nə̀ wèŋ tse’ pwe’fo’, wèŋ lap ŋgògʉ̀ bə̀boŋ. ¹⁷Kà də wèeŋ bʉ̀ʉŋ ləm dʉk, wèeŋ lap nə riŋ yusə̀ Tà dzəm də wèeŋ gʉ. ¹⁸Kà də wèeŋ no jʉhʉ rùk, yà’sə gʉ bʉpsəgə̀ mègù weŋ wà. Wèeŋ fa ntʉʉm awèŋ lɛ bohòYòŋsə̀ nə̀ Rərɛŋ nə ŋgòrwiŋ cu ca. ¹⁹Wèeŋ sə cep bohòmòk bə mòk ndzənə ŋkìi sə̀ wo sə yəm nja ncèep Nwì, nə ye sə̀ co yà’ kuksə liŋ Nwì bə sə̀ Yòŋsə̀ nə̀ Rərɛŋ nə sə nìtsə̀’ fa weŋ sə. Wèeŋ sə yəm fa Tà nsàap ŋkìi yà’sə sə̀’ bə kwəkwa sə ntʉʉ̀ wèŋ anə. ²⁰Ghà nə̀ fòpwe’ wèeŋ sə kwasə Nwì nə̀ yi Tɛ̀’ nə, bə yu yà pwe’fo’. Wèeŋ sə kwasə yi mʉnə liŋ Jisòs Krɛst nə̀ yi Tà àvès nə.

Nzak Ŋgwe Bə Ndum

²¹Mvə̀’nə̀ wèeŋ yukgə̀ Jisòs Krɛst fana wèeŋ yuk mòk bə mòk sə̀’ vɛ’nə. ²²Bə̀ba wèeŋ yuk bohòndum awo, co wèŋ sə yuk bohòTà Jisòs. ²³Bʉsə̀ ndum tse’ ŋàŋ mʉtuhù ŋgwe ye yi co mʉmvə̀’nə̀ Krɛst tse’ ŋàŋ mʉtuhù cos yi yè’e. Krɛst nə sə̀’ ŋgà lùŋsə̀ cos nə, nə̀ nà’a ni’ ye nə sə̀’ yi. ²⁴Ye də bə̀ba wèŋ tse’ ŋgòyuk bohòndum awèŋ co mvə̀’nə̀ cos nə yukgə̀ bohòKrɛst sə. ²⁵Ma nə̀ bohòmbəmbam wèeŋ yàwo də, dzəm ŋgwe yo sə ntʉʉ̀ wù co mvə̀’nə̀ Krɛst ànə dzəm cos nə, nə kpʉ bʉ̀ʉ zeŋ yà’a. ²⁶Yi à gʉ̀ vɛ’nə də ya nà’a ye rərɛŋ ŋga yi cùk rɛŋsə nà’ bə ndzəp nə ye ncèp nə̀ Nwì nə. ²⁷Ànə ye sə̀’ də ya yi jəŋ gesə lo cos nə sə ntʉʉ̀ yi ŋga nà’ sə fom ŋgwɛ̀ŋ vɛ’ɛ ŋap. Ya nà’a ye rərɛŋ, nə kà jòŋ tse’ lok. Nà’a kà kə̀kàk sə̀’ ye lok fʉ̀k, nə kà yumok nə̀ də yi gbʉ̀ bə zeŋ lə̀m tse’ fʉk. ²⁸Yà’a mvə̀’nə̀ ndum wèŋ tse’ ŋgòdzəm ŋgwe awo, co mʉmvə̀’nə̀ wo dzəmgə̀ ni’ yawo. Ŋwə̀ nə̀ yi dzəm-a ŋgwe ye, ye də yi sə dzəm yà’sə ni’ nə̀ nje. ²⁹Ŋwə̀ nəmòk ka ni’ nə̀ nje bɛ̀ŋ yuk. Yusə̀ yi gʉ̀gə̀ bə zeŋ sə də yi fagə̀ nà’ zʉzʉ, nə sə jəŋ ŋkərə̀ bə zeŋ vɛ’ɛ bə̀boŋ, co Krɛst gʉ̀gə̀ bohòcos sə, ³⁰bʉ̀ʉsə̀ vesùwèeŋ ŋgùpni’ ye nə mamòk. ³¹A mvə̀’nə̀ ŋwàk Nwì sə cep də, <<Nà’a njo nə̀ ŋwèe nə me’rə tɛ̀’ ye bə ma ye, nə kə be’lə bə ŋgwe ye, bʉ̀ʉ sə̀ ba sə bʉʉŋ mok ŋwə̀ nə̀ mò’fis.>>

³²Ncèp ènə co ca vɛ’ɛ wùriŋ. Mʉ̀ sə̀ dʉk də nà’ sə tsə̀’ fa ves yumok bə mvə̀’nə̀ Krɛst bə cos nə cu sə. ³³A bohòwèŋ yàwèŋ sə̀’ də, ndu ŋwà nə̀ fòpwe’ dzəm ŋgwe ye co ni’ nə̀ nje fana ŋwà nə̀ fòpwe’ tse’ ŋgòwəp ndu ye.

Nzak Ma Bə Tɛ̀’ Nə Ye Bwe Awo

¹Ma nə̀ bweŋke’ wèeŋ yàwo də, wèeŋ yuk ma awèŋ bə tɛ̀’ awèŋ co bʉ̀ʉ sə̀ wo yùgə̀ Tà Jisòs, bʉ̀ʉsə̀ a vɛ’nə bə̀boŋ. ²Rʉ̀k nə̀ nà’a mantombì nə̀ wo kak be’lə yumok bə zeŋ nə, a nə̀ də, <<Wəp ma yòbə tɛ̀’ yò.>> ³Kə̀kàk nə̀ nà’a fo’ nə də, <<Ya ŋga bum pwe’fo’ ye bohòwù anə bə̀boŋ, yòŋsə̀ yòye sə nzeŋgòŋ anə sə̀’ sə̀sap.>> ⁴A bohòtɛ̀’ sə̀’ də, kà də wèeŋ sə gʉ bwe awèŋ sə nsàp nə̀ co wo jok dʉk. Wèeŋ sə yə’rə kok, nə sə tip kok wo lɛ bə mandzə̀ nə̀ Tà nə.

Nzak Masà Bə Bʉ̀ʉ Sə̀ Wo Sə Fàk Ŋkwɛ̀ŋ BohòYi

⁵Bʉ̀ʉ sə̀ wo sə fàk ŋkwɛ̀ŋ wèeŋ yuk dʉk masàa awo sə̀ yà’ tse’ wo sə nze fɛŋ sə. Wèeŋ wəp wo vɛ’ɛ tu no bə ntʉm nə̀ mò’fis co wèŋ sə fàk bohòKrɛst. ⁶Kà də wèeŋ fak megu vɛ’nə ŋga ŋwè sə kʉ̀k weŋ də ya wo kwasə weŋ dʉk. Wèeŋ gʉ yusə̀ aco Nwì kwa bə zeŋ bə ntʉʉm awèŋ pwe’fo’ co bʉ̀ʉ sə̀ wèeŋ ŋkwɛ̀ŋ bohòKrɛst. ⁷Wèeŋ fak fàak ŋkwɛ̀ɛŋ awèŋ bə ntʉm nə̀ bə̀boŋ co wèŋ sə fàk fa bohòTà; kà co bohòŋwè nə̀ yi mègù ŋwè wà nè’e ye. ⁸Wèeŋ riŋtse’ də Tàa nə̀ kə̀ làk ndàaŋwè pwe’ bə fàak sə̀ bə̀boŋ sə̀ ŋgə̀ŋgàŋ a gʉ̀ʉ. A dzəm ŋgə̀ŋgàŋ ye ŋkwɛ̀ŋ bə nə̀ yi ka ŋkwɛ̀ŋ yeŋ pwe’, yi nə̀ làk yà’ vɛ’nə. ⁹Bohòwèŋ masàa sə wèŋ, wèeŋ kotse’ ŋkwɛ̀ɛŋ awèŋ sə sə̀’ bə̀boŋ, nə kà wo ntʉm sə sàksə̀. Wèeŋ riŋtse’ də weŋ ŋkwɛ̀ɛŋ awèŋ sə wèŋ tse’ masà nə̀ mò’fis mʉbu. Masà àwèŋ nə̀ mʉbu nə, yi kà ŋwə̀ nəmòk gèm ko fagə̀.

Mandzə̀ Nə̀ Mo Jisòs Krɛst Tse’ ŊgòMàk Dzè’

¹⁰Ncèp nə̀ mʉ̀ sə tip lə̀sə weŋ bə zeŋ nə də, wèeŋ jəŋ ŋàŋ bohòTà Jisòs ya ntʉʉm awèeŋ ye gʉgʉŋ, bʉ̀ʉsə̀ ŋàaŋ ye sə yam vɛ’ɛ wùriŋ. ¹¹Nwì a fa weŋ bum màk dzè’, ŋgòmàk dzè’ weŋ maze’ nə wèŋ fo’. Wèeŋ nitse’ yà’ pwe’, ya ŋga wèeŋ ye gʉgʉŋ, maze’ nə kà weŋ bə ŋkərə̀ ye nə bòrə̀ màk.¹²Dzè’ nə̀ a sə màk nə, vesùwèŋ sə kà nà’ ves bwìŋ màk. A sə màk nà’ ves yòŋsə̀ə sə̀ wo tse’ ŋkʉ̀ì’, sə̀ wo cu ma mʉbu. A wo sə̀ wo ŋkum nə ye mantombì bohòyòŋsə̀ə ze’ wèŋ sə̀ wo tse’ nzeŋgòŋ ndzəm nè’e wo.

¹³Ye də jəŋ bum dzè’e sə̀ Nwì a fa sə ŋga’a, ya ŋga ghà nə̀ dzè’ nə kə̀ bà mok jwàŋ fana wèŋ təəŋ to mali gʉgʉŋ tə̀tè kə lə, ya ŋwə̀ nə̀ yi sə bɛ̀ŋ weŋ nə kà weŋ ghak. ¹⁴Wèeŋ təəŋ-na cʉ̀k, nə swi’tse’ zìnə co korə sə gamə̀ wèŋ. Wèeŋ jəŋ ncu nə̀ rərɛŋ nə, nə nitse’ nà’ co cə̀k nə̀ ŋgòmàk dzè’ nə̀ mʉ ŋgùu nà’a. ¹⁵Kùuŋgùp sə̀ wèeŋ nə so tse’, a ŋgòye fə̀fʉhʉ̀ ŋgòtsòho fa bwìŋ Ntirə̀ nə̀ Bə̀boŋ nə̀ nà’ tse’ fifi nə. ¹⁶Mòok sə̀’ də mʉmvə̀’nə̀ wèŋ fa ntʉm awèŋ bohòKrɛst yà’a, nà’a ye bohòwèŋ co ŋkə̀. Wèeŋ bək tse’ nà’, bʉ̀ʉsə̀ nà’a zeŋ nə̀ aco wèŋ limsə to ŋgiŋ sə̀ maze’ nə mak vèsə yà’, yà’ sə kʉə co mis sə bə zeŋ. ¹⁷Wèeŋ jəŋ lùŋ nə̀ Nwì a fa weŋ nə, nə ta tse’ nà’ co tàm dzè’ nə. Wèeŋ jəŋ bwi ncèp nə̀ Nwì nə, nə kotse’ nà’ co fèk nə̀ yòŋsə̀ nə a fa weŋ. ¹⁸Wèeŋ sə lɛŋ pìriyà, nə sə fek Nwì də yi tɛsə weŋ. Wèeŋ sə lɛŋ bə mvə̀k nə̀ fòpwe’ mʉmvə̀’nə̀ yòŋsə̀ nə sə gʉ̀ weŋ ŋgòlɛŋ sə. Ye də wèeŋ cum nca, nə kà wò. Wèeŋ sə lɛŋ fa bʉ̀ʉ Nwì wèŋ nùumbu pwe’fo’. ¹⁹Wèeŋ lɛŋ fa mʉ yàm sə̀’, də ghà nə̀ mʉ dzəm ŋgòcèep fana Nwì fa mʉ ncèp nə̀ ŋgòcèep nə, ya ŋga mʉ cu ŋgòtsòho yusə̀ sə̀swihì sə̀ Ntirə̀ nə̀ Bə̀boŋ nə sə tsə̀’ rɛŋsə fa mʉ̀ kà wʉə tse’. ²⁰A ye-a sə̀ də mʉ̀ cu ndapndzəm fana mʉ̀ tə mvwe’ kùu Krɛst njo nə̀ ŋgòtsòho Ntirə̀ nə̀ Bə̀boŋ nə. Ye də wèeŋ lɛŋ fa mʉ də mʉ tsoho nà’ bə ŋàŋ mvə̀’nə̀ mʉ̀ tse’ ŋgòtsòho nà’ sə.

Cə̀cèpsə̀

²¹Moma àvès Tìkikòs nə̀ a dzəm yi wùriŋ, nə̀ yi fàkgə̀ bohòTà bə zìnə ye nə, nə tsok fa weŋ mvə̀’nə̀ mʉ̀ cu ya wèeŋ riŋtse’ bə zeŋ. ²²Nà’a njo nə̀ mʉ̀ tum yi də yi kə ye weŋ nə, də ya wèeŋ riŋtse’ mvə̀’nə̀ vès cu fana yi gʉ ntʉʉm awèŋ ŋgòye cəcuŋ sə̀’.

²³Mʉ̀ lɛŋ də Nwì nə̀ yi Tɛ̀’ bə Tà Jisòs Krɛst fa fifi bohòbwema sə pwe’. Wo gʉ yà’wèŋ ŋgòdzəm mòk bə mòk, nə fa ntʉm awo bohòKrɛst sə̀’. ²⁴Mʉ̀ lɛŋ də bə̀bo nə̀ Nwì nə ye bohòbʉ̀ʉ sə̀ wo dzəm Tà Jisòs Krɛst àvès nə bə nsàp dzədzəm nə̀ nà’a nə̀ kà mè yuk nə.