Kòlosì

Ŋwàk nə̀ Pol à Còm Fa Bʉ̀ʉ

sə̀ Mvwe’ Lak

KÒLOSÌ

Lak Kòlosì sə à ye mvwe’ nzeŋgòŋ Esiyà. Pol a fa ntʉm ye bə nza’ cos fana yi sə tumsə lo kɛ’ ŋgàa fàk wèŋ mvwe’ coos sə wùriŋ. Yi ànə yuk də cicàa mok à kə̀ dzèŋ mvwe’ cos Kòlosì nə, nə sə yə’rə fa bwìŋ də, a ye-a ŋga ŋwè dzəm də yi riŋ Nwì, nə tse’ lùŋ nə dak àlɛ, ŋgə̀ŋgàŋ tse’ ŋgòkùksə ŋàaŋ mok sə̀ yà’a yòŋsə̀. Wo sə yə’rə sə̀’ də ŋwè tse’ ŋgòdzə̀ nsàap zʉzʉʉ mok nə gʉ tsooŋ bum mok co ŋgòkom tu mbəmbam sə̀’.

Pol à còm ŋgòrɛŋsə fa wo də Jisòos mo Nwì nə̀ yi tse’ liŋ nə casə bum sə̀ Nwì à gʉ̀ lòoŋ. Yi tse’ ŋàaŋ sə̀ ŋgòlùŋsə ŋwè sə yi, də bum mok sə̀ wo sə yə’rə fa wo yà’a jə gɛsə lògə̀ ŋwè sə̀sap bohòJisòs nə. Nwì ànə gʉ nzeŋgòŋ nə ndzə bohòJisòs fana mvə̀’nə̀ bum sə ànə sam bʉp fana yi sə gʉ̀ bòŋsə fəsə yà’ sə̀’ ndzə bohòJisòs nə. A ye-a də ŋwèe nə tse’ lùŋ fana, yà’ mègù bə liŋ Jisòs.

¹Sə còm ŋwàk nè’e mʉ̀ʉ Pol nə̀ Nwì a cokfis mʉ ŋgòye ŋgà ntum Jisòs Krɛst, ves moma àvès Timatì. ²Vès sə còm fa nà’ bohòbʉ̀ʉ Nwì sə̀ mvwe’ lak Kòlosì sə̀ wo sə bɛ’ Jisòs Krɛst bə nə̀ zìnə. Tà Nwìi fa weŋ fifi, nə gʉ weŋ bə̀boŋ

Pol Kwasə Bʉ̀ʉ Kòlosì Nə Lɛŋ Fa Wo Pìriyà Sə̀’

³Ghà nə̀ vèes lɛŋgə̀ Nwì nə̀ yi Tɛ̀’ɛ Tà Jisòs Krɛst àvès bʉ̀ʉ wèŋ pwe’, vès sə kwasə yi. ⁴Vèes kwasəgə̀ yi vɛ’nə bʉ̀ʉsə̀ vès a yuk mvə̀’nə̀ wèŋ a fa ntʉm awèŋ bohòJisòs Krɛst, nə ye mvə̀’nə̀ wèŋ sə dzəm bʉ̀ʉ Nwì wèŋ pwe’. ⁵Vès rì də wèŋ tse’ nsàp ntʉm ànə bʉ̀ʉsə̀ wèŋ riŋ bum sə̀ Nwì a nòŋsə fa weŋ mʉbu bə̀boŋni. Wèŋ ànə yuk bum yè’sə ndzənə Ntirə̀ nə̀ Bə̀boŋ nə̀ nà’a zìnə nə. ⁶Ntirə̀ ènə sə yuhu lòsənə ŋgònə lòoŋ. Bwìŋ yuk nà’ fana nà’ sə kupsə ntʉm awo. Nà’ sə gʉ bwìŋ wùriŋ ŋgòdzəm bohòJisòs Krɛst. A sə̀’ zeŋ nə̀ nà’ à dzèŋ bohòwèŋ, nə kupsə ntʉm awèŋ sə̀’. Yè’sə ànə yeto ghà nə̀ wèŋ ànə yuk bə̀bo nə̀ Nwì, nə rɛɛŋ zìnə nə̀ yi sə gʉ̀ bohòŋgàa gʉ̀ bʉp wèŋ. ⁷Ànə tsok to fa weŋ ntirə̀ ènə Ìpafràs. Vès dzəm yi vɛ’ɛ wùriŋ. Venə wèeŋ fàkgə̀ bohòJisòs Krɛst bəbɛ’. Yi tə mʉŋgorə̀ wèŋ fa’nə mvwe’ kùu avès, nə sə fak bohòJisòs Krɛst bə ntʉm nə̀ mò’fis. ⁸Yi a tsə̀’ ves yi də wèŋ tse’ dzədzəm bohòbwìŋ, nsàp nə̀ nà’ və̀ bohòYòŋsə̀ Nwì.

⁹Ye jəŋ mvə̀’nə̀ vès à yuk bum yè’sə fana vès sə lɛŋ fa weŋ Nwì nùumbu pwe’. Vès sə lɛŋ yi də yi gʉ weŋ ŋgòrì bum sə̀ yi dzəm yà’ pwe’fo’ jəja paam. Yà’ a ye vɛ’nə, wèŋ tse’ nsàp ŋkərə̀ nə̀ nà’ və̀ bohòYòŋsə̀ ye, fana wèŋ rɛɛŋ bum ye pwe’ nə̀ pwe’. ¹⁰Ŋkərə̀ ànə nə gʉ weŋ ŋgòcu nsàp nə̀ kə̀kʉrə̀ co bʉ̀ʉ Nwì, nə gʉ bum nsàp nə̀ yà’a sə boŋ yi, nə sə riŋ ghaha lo bum Tà Nwì mantombì. ¹¹Nwìi gʉ weŋ bə ŋàaŋ ye sə̀ yà’ ghak yà pwe’, ŋgòko ntʉm, nə təəŋ gʉgʉŋ ya a ye-a sə̀ yà pwe’, wèŋ sə lo mali mantombì bə kwəkwa. ¹²Wèeŋ sə gʉ̀ vɛ’nə wèŋ sə kwasə Tà Nwì àvès ghà yà lòoŋ bʉ̀ʉsə̀ a yi nə̀ yi a gʉ̀ weŋ ŋgòye kə̀kʉrə̀ ya wèeŋ kə tse’ ma njàwèŋ sənə bum sə̀ yi a fʉ̀hʉ nòŋsə fa bʉ̀ʉ ye wèŋ yà’ mvwe’ marɛŋ sə. ¹³Yi a jə fis gɛsə ves mvwe’ ndzəm, nə noŋsə ves mvwe’ marɛŋ nə̀ mo ye nə̀ yi dzəm nà’ cu ŋkum fo’ yi. ¹⁴Mo ye ànə swifa ves bʉp avès, nə ywiŋ tiŋ fəsə ves bohòbʉp.

Jisòs Tse’ Ŋàŋ Pwe’ Yi

¹⁵Ŋwə̀ nəmòk ka Nwì bə lis ye yuk. Mo ye nə̀ bwìŋ à yə yuk yi a nìtsə̀’ fa ves mvə̀’nə̀ Nwì cu yi. Yi mo Nwì nə̀ yi tse’ liŋ nə casə bum sə̀ Nwì à gʉ̀ lòoŋ. ¹⁶Nwì à gʉ̀ bum pwe’fo’ ndzə bohòyi mo ye nə. Bum sə̀ yà’ cu sə nze co lis ye yà’, bə sə̀ yà’ cu mʉbu co lis kà yə wèŋ, co ze’ bə masinjàa Nwì, nə ye nsàp ŋàŋ nə̀ fòpwe’ nə̀ nà’ cu. Bum yè’sə pwe’, Nwì à gʉ̀ yà’ ndzə bohòyi, fana gʉ yà’ də yà’a sə yuk bohòyi. ¹⁷Mook sə̀’ də Jisòs Krɛst à ye to mantombì yi. Bum pwe’ cu làaŋ mvə̀’nə̀ yà’a yè’sə sə̀’ bʉ̀ʉ Jisòs Krɛst nə. ¹⁸Nə ye fe’lə sə̀’ də, yi tu bohòcos nə̀ nà’a ni’ ye nə sə̀’ yi. Yi à yèto cos yi, bʉ̀ʉsə̀ yi à lòkok to mvwe’ kpʉ yi. Yi mantombì bə bum yè’sə pwe’ vɛ’nə, də ya a ye-a sə̀ yà lòoŋ, yi megu ye ŋwə̀ nə̀ mantombì. ¹⁹Bum yè’sə vɛ’nə bʉ̀ʉsə̀ ànə boŋ kok Nwì də mo ye ye sə̀’ ŋgàŋ mvə̀’nə̀ yi Nwì yi cu bə tu ye pwe’ nə̀ pwe’. ²⁰Fana yi jəŋ mo ye nə, nə tɛs ŋkɛ̀ŋ bə zeŋ, ya bum pwe’ ye fe’lə cù mò’fis sə̀mok. Yi à be’lə bum sə̀ sə nze bə sə̀ mʉbu ŋgòye cù mò’fis ndzə ni’ì yi vɛ’nə bə kpʉ mo ye nə̀ yi à kpʉ mʉntə̀əŋ nə.

²¹Mvə̀k mòk à ye fa’ sə̀’ nə̀ weŋ Nwì wèŋ à ka ŋge’ yeŋ. Yà’ à ye vɛ’nə bʉ̀ʉsə̀ wèŋ à sə tsərə bʉp, nə sə gʉ sə̀’ bum sə̀ bʉp. ²²Nə ye də nə̀ ŋga’a nè’e, Nwì a gʉ̀ də wenə wèeŋ ye fe’lə ŋge’ sə̀mok. Yi a gʉ̀ yè’sə bə kpʉ mo ye mʉntə̀əŋ, nə̀ yi a kpʉ bə ŋgùpni’ co ŋwè. Yi à kpʉ də ya wèeŋ tse’ ntʉm sə̀ rərɛŋ; ya wèeŋ kə təəŋ mantombìi Nwì ŋga wèeŋ rərɛŋ nə ye jì jòŋ zìnə bə zìnə. ²³Wèeŋ nə təəŋ mantombìi Nwì rərɛŋ vɛ’nə ŋga wèŋ nòŋsə mali-a ntʉm bə ncèp nə̀ Jisòs nə, ŋga wèŋ tə gʉgʉŋ, nə kà tsòhò, nə sə naaŋ tu bə bum sə̀ Ntirə̀ nə̀ Bə̀boŋ nə à tsə̀’ to weŋ də wèeŋ nə̀ tse’ sə. Nà’ mègù sə̀’ Ntirə̀ nə̀ Bə̀boŋ nə̀ wo à tsòho fa bwìŋ ma nə̀ fòlòoŋ nə. A zeŋ nə̀ mʉ̀ʉ Pol, mʉ̀ sə tsòho fa bwìŋ.

Pol Sə Jihi Nzòŋ ŊgòFàk Gʉgʉŋ

²⁴Mvə̀’nə̀ mʉ̀ sə yə ŋgə’ bʉ̀ʉ tu awèŋ, mʉ̀ sə kwa kwa. Mʉ̀ sə kwa vɛ’nə bʉ̀ʉsə̀ mʉ̀ sə yə ŋgə’ sə̀’ mvə̀’nə̀ Jisòs Krɛst ànə ye ŋgə’ sə̀’ bʉ̀ʉ cos nə̀ nà’a ni’ ye, də ya ŋgə’ nə̀ yi sə yə nə kə gʉ mesə fàak ye. ²⁵Mʉ ŋgà fàk bʉ̀ʉ cos wèŋ. À gèsə fa mʉ fàak yè’sə ndzə bohòmʉ̀ Nwì, də ya mʉ tɛsə weŋ. Fàak sə dʉk də, mʉ tsoho fa bwìŋ yusə̀ yà’ cu ndzənə Ntirə̀ nə̀ Bə̀boŋ lòoŋ fo’. ²⁶Ncèp nə̀ mʉ̀ sə tsə̀’ fa bwìŋ ènə, a cà lùumŋgòŋ cɛ̀bʉ̀ə̀ ŋga nà’ cu sə̀swihì, bwìŋ kà rì. Nə̀ ŋga’a nè’e yi a fis və̀ nà’ mok jəja bohòbʉ̀ʉ ye wèŋ. ²⁷Yà’ à bòNwì də yi jəŋ ncèp nə̀ nà’ à ye sə̀swihì ènə, nə niŋtsok fa bʉ̀ʉ ye wèŋ nà’ mvə̀’nə̀ nà’ yam bòo, nə niŋtsok fe’lə nsàp maŋgəŋgèŋ swe’ nə̀ nà’ tse’ bohònzeŋgònə pwe’. Ncèp nə̀ nà’a rɛɛŋ və̀ ènə, nà’a də, Jisòs Krɛst cu sə ntʉʉ̀ wèŋ, fana aco wèŋ naaŋ tu də wèeŋ nə̀ kə̀ tse’ ma njàwèŋ sənə bòoŋ Nwì sə. ²⁸Nà’a njo nə̀ vès sə tsòho fa bwìŋ Jisòs Krɛst nùumbu pwe’ nə. Vès sə cep soŋ bwìŋ ntu’, nə sə yə’rə wo bə ŋkərə̀ sə̀’, də ya ndàaŋwè pwe’ nə̀ yi ŋwə̀ə Jisòs Krɛst kə dzeŋ mvə̀’nə̀ Nwì sə dzəm. ²⁹Mʉ̀ sə fàk gʉgʉŋ bə bum yè’sə lòoŋ, nə sə jihi nzòŋ də mʉ gʉ mesə fàak ye sə bə ŋàaŋ sə̀ Nwì gèsə fa mʉ.

Pol Tsərə Krətèeŋ Mok Yà’a Sə̀’

¹Mʉ̀ dzəm ŋgòtsə̀’ fa weŋ də wèŋ cu sə ntʉʉ̀ mʉ̀ vɛ’ɛ gʉgʉŋ wùriŋ. Krətèeŋ sə̀ mvwe’ lak Làòdisiyà bə mok sə̀ vesi wèŋ ka si bə si ntòyenə yuk yà’a pwe’, wo cu sə̀’ sə ntʉʉ̀ mʉ̀. ²Mʉ lɛŋgə̀ Nwì mʉ tuhù wèŋ vɛ’nə də ya ŋga wèeŋ sə tse’ dzədzəm bohòmòk bə mòk. Ya dzədzəm ènə jəŋ be’lə və weŋ mvwe’ mò’fis nə sə kwɛ’sə weŋ. Mʉ̀ sə lɛŋ sə̀’ də Nwìi rɛŋsə fa weŋ yu nə̀ nà’ cu sə̀swihì nə̀ nà’a Jisòs Krɛst, ya wèeŋ riŋtse’ bə zeŋ bə̀boŋni. ³Jisòs Krɛst mègù yi nə̀ mò’fis nə̀ yi co ki ncù sə̀ aco yi muk fa bwìŋ mandzə̀ nə̀ ŋgòrì ŋkərə̀ nə̀ ma nə̀ Nwì. Nsàp ŋkərə̀ ènə nà’ tse’ swe’ bohòŋwə̀ nə̀ yi rì nà’ nə wùriŋ.

⁴Mʉ̀ sə tsə̀’ weŋ yè’sə də ya ŋga ŋwə̀ nəmòok kà weŋ bə cù kə̀ bòrə̀. ⁵Mʉ̀ sə cèp yè’sə bʉ̀ʉsə̀ a sə kà-a si bə si sə̀ yenə, mʉ̀ sə tsərə weŋ də vesùwèeŋ bəbɛ’. Mʉ nə sə kwa ŋga bum pwe’ sə lòlàaŋ, wèŋ sə təəŋ mali gʉgʉŋ ŋgòfa ntʉm awèŋ bohòJisòs Krɛst.

Ŋwèe Kà Weŋ Bə Ŋkərə̀ Nzeŋgòŋ Bòrə̀

⁶Yusə̀ gʉgʉŋ sə də, wèŋ a jə Jisòs Krɛst co Tà àwèŋ laŋ fana, wèeŋ gi-a mok co bʉ̀ʉ ye sə̀ zìnə. ⁷Wèeŋ sə jəŋ ŋàaŋ awèŋ bohòyi, nə sə kuk lo mantombì. Wèeŋ fa mam mali ntʉm awèŋ bohòyi mvə̀’nə̀ wo à yə’rə to weŋ, nə sə kwasə Nwì ghà yà lòoŋ.

⁸Wèeŋ jəŋ ŋkərə̀ də ya ŋwə̀ nəmòok kà weŋ bə ŋkərə̀ nzeŋgòŋ nə̀ nà’ ka fàk tse’ nè’e bòrə̀. Nsàp ŋkərə̀ ànə tesə kokgə̀ sə və̀ə bwìŋ, nə ye bə yòŋsə̀ə ze’ wèŋ. Nà’a kà bohòJisòs Krɛst tesə və̀gə̀. ⁹Zìnə nə̀ nà’ a ca nə də, Jisòs Krɛst nə cu bə tu ye pwe’ nə̀ pwe’ mvə̀’nə̀ yi Nwì yi cu sə. ¹⁰Wèeŋ tse’-a Jisòs Krɛst, ye də wèŋ sə kà yumok sə̀ yà’a ma nə̀ Nwì mok jamə̀. Yi ŋkum, nə tse’ ŋàŋ mʉtuhù yòŋsə̀ə ze’ wèŋ pwe’ yi. ¹¹A yà’sə sə̀’ də, wèŋ ànə be’lə weŋ Jisòs Krɛst mvwe’ mò’fis, fana yi à gwè fa weŋ ŋgwè nə̀ ŋgònìtsə̀’ bwìŋ də wèeŋ bʉ̀ʉ ye wèŋ. À ye mantombì fa’, Nwì à fa bʉ̀ʉ Jus wèŋ ŋgwè nə̀ njàwo ŋgònìtsə̀’ fa bwìŋ, à ye də wo kom fa wo tu mbəmbam. Nə̀ ŋga’a ŋgwè nə̀ njàwèŋ ka yusə̀ wo gʉ̀gə̀ yà’ bə bo bwìŋ yeŋ. Njàwèeŋ nə̀ nà’ və̀ bohòJisòs Krɛst, mvə̀’nə̀ yi ànə fis mak gɛsə ntʉm awèŋ sə̀ bʉp sə̀ wèŋ à tse’ to mantombì yà’a. ¹²Ghà nə̀ wo ànə baptɛsə weŋ, yà’ à ye yà’sə co wo tuuŋ be’lə weŋ Jisòs Krɛst, nə lokok be’lə mvwe’ kpʉ sə̀’ wenə wèŋ bəbɛ’. Yè’sə vɛ’nə bʉ̀ʉsə̀ wèŋ ànə dzəmtse’ bə ŋàaŋ Nwì sə̀ yi ànə lokoksə Jisòs Krɛst mvwe’ kpʉ bə zeŋ. ¹³Wèŋ ànə ye co bʉ̀ʉ sə̀ wo à kpʉ laŋ bʉ̀ʉsə̀ wèŋ à gʉ̀ bʉp, nə ye fe’lə bʉ̀ʉsə̀ wèŋ à ka ŋgwè nə̀ ŋgònìtsə̀’ də wèeŋ bʉ̀ʉ Nwì tse’. Fana Nwì swi fa vesùwèŋ bʉp avès, nə lokoksə ves Jisòs wèŋ mvwe’ kpʉ bəbɛ’. ¹⁴Vesùwèŋ ànə gbʉ nzak laŋ bʉ̀ʉsə̀ vès ànə ka lʉ̀ʉk Nwì noŋsə. Nwì yis fis fa vesùwèŋ nzak nə pwe’, nə naaŋ gesə lo mʉtuhù Jisòs Krɛst ghà nə̀ yi à kpʉ mʉntə̀əŋ nà’a. ¹⁵Yi à jə gɛsə ŋàaŋ yòŋsə̀ə ze’ bə kpʉ ye nə̀ mʉntə̀əŋ ànə fana nə niŋtsok fa bwìŋ jəja kwaraŋgaŋ də ŋàaŋ ye gha’ ŋàaŋ yòŋsə̀ə sə̀ bʉp lòoŋ fo’.

Bum Sə̀ Yà’ Ka Fàk BohòŊwə̀ə Jisòs Tse’

¹⁶Bə bum yè’sə pwe’fo’, kà də wèeŋ fa mandzə̀ də ŋwə̀ nəmòok noŋsə fa weŋ nsàp lʉ̀k mòk də wèŋ tse’ ŋgògʉ̀ yà’ co də zʉ nə no megu nsàp yu nè’e, nə kà nsàp nè’e ye dʉk. Ŋwèe kà də yi gʉ fa weŋ lʉ̀k bə nsàp yu nə̀ wèŋ tse’ ŋgògʉ̀ bə ŋkàak lùmŋgòŋ, ŋwʉ-fi nə ye co nùumbu dzə̀ wèŋ sə̀’ dʉk. ¹⁷Bum yà’sə pwe’ co tsə̀tsèŋ. Yà’ sə nì gèsə lòmantombì bə yu nə̀ nà’a nə̀ kə̀ ye nə. Yu nə̀ tsə̀tsèeŋ yè’sə sə nì gesə lòzeŋ nə, Jisòs Krɛst bə tu ye. ¹⁸Kà də wèeŋ yu’rə bohòbʉ̀ʉ sə̀ wo sə làp mandzə̀ ŋgògʉ̀ bʉpsə weŋ bʉpsə yà’a dʉk. Mʉ̀ sə dʉk bə nsàp bʉ̀ nə̀ co sə̀ wo dʉkgə̀ də wèeŋ jəŋ tsoŋ ni’ awèŋ sə nze, nə kuksə masinjàa Nwì wèŋ yà’a. Nsàap bʉ̀ʉ yà’sə wèeŋ dʉkgə̀ də Nwì tsə̀’ wo bum yè’sə co ndzənə lo vɛ’ɛ, ŋga wo sə nɛ̀ mègù yà’sə ni’ wà nə̀ wà. Nsàap tsətsərə̀ awo yà’sə mègù sə nzeŋgòoŋ fɛn. ¹⁹Fana wo sə kà bə Jisòs Krɛst nə̀ yi tu bohòvesùwèŋ nə mok be’lə̀. Bʉ̀ʉ sə̀ wo sə be’lə mvwe’ mò’fis bə Jisòs Krɛst wèŋ yà’a mègù wo sə̀ wo jəgə̀ ŋàaŋ awo bohòyi, də ya wo sə kuk mvə̀’nə̀ Nwì sə dzəm də wo kuk. Jisòs Krɛst a gʉ̀ cos nə ŋgòye mvwe’ mò’fis, mvə̀’nə̀ nzèhe ni’ kotse’gə̀ ŋgùpni’ nə mvwe’ mò’fis yè’e.

²⁰Mʉ̀ də wèŋ à kpʉ weŋ Jisòs Krɛst wèŋ, yòŋsə̀ə sə̀ ze’ sə̀ sə nze fɛɛŋ ka ŋàŋ mok mʉtuhù wèŋ tse’ àlaa. Njo nə̀ wèŋ sə gʉ bwi bum co bòp bʉ̀ nə̀ nzeŋgònə tse’ wo yi-e bʉ̀ʉ yà? Njo nə̀ wèŋ sə wəp mali nsàap lʉ̀ʉk sə̀ co də, ²¹<<Kà yu yè’e jwɛ̀ŋ, kà yè’e zʉ ja’a, nə kà yà’a kùm>> wèŋ bʉ̀ʉ yà? ²²Nsàap lʉ̀ʉk sə̀ vɛ’nə yè’e yà’ mègù bə bum sə̀ co ŋwèe zʉ-a yà’, yà’ me bisə wà. Nsàp yəyə’rə̀ nà’nə, nà’a və̀ mègù bohòtsətsərə̀ nə̀ bwìŋ. ²³Bwìiŋ tsərəgə̀ də nsàap lʉ̀ʉk yà’sə bum ŋkərə̀ bohòNwì, bʉ̀ʉsə̀ yà’a gʉ̀gə̀ ŋwè bə ŋàŋ ŋgògʉ̀ bum sə̀ ŋgòkùksə Nwì, nə sə jə lòni’ awo sə nze, nə sə fa ni’ awo sə ŋgə’ wèŋ. Bum yè’sə pwe’fo’ yà’a wà nə̀ wà. Yà’ ka ŋàaŋ mok sə̀ co yà’ tɛsə ŋwè də ya njè yu nə̀ ŋgùpni’ ye sə dzəm zeŋ kà yi ya tse’.

Jisòs Krɛst Bʉ̀sə Weŋ Bʉ̀ʉ Sə̀ Fi

¹Nə̀ wèŋ a lòkok mvwe’ kpʉ weŋ Jisòs Krɛst wèŋ laŋ fana wèeŋ noŋsə gu ntʉm awèŋ bə bum sə̀ yà’a ma mʉbu. Wèeŋ fa ntʉm awèŋ lɛ fa’nə, bʉ̀ʉsə̀ yà’a mvwe’ sə̀ Jisòs Krɛst cu fo’ bo ma mà’a Nwì. ²Wèeŋ sə tsərə megu bum sə̀ yà’a mbwa yà’sə, nə kà sə̀ sə nze fɛɛŋ sə tsərə̀. ³Bʉsə̀ bə bum sə̀ ma sə nzeŋgòoŋ fɛɛŋ, wèeŋ yàwèŋ bə zeŋ mok co bʉ̀ʉ sə̀ wo a kpʉ laŋ. Yòŋsə̀ awèŋ mègù mok nə̀ nà’ cu bohòJisòs Krɛst ndzə bohòNwì, yi sə lòksə fa weŋ nà’. ⁴Jisòs Krɛst nə̀ yi tse’ yòŋsə̀ awèŋ nə̀ wèŋ cu ŋga’a ŋwəm bʉ̀ʉ yi nə kə yəəŋ ntsə’mòk fana wèŋ yəəŋ be’lə wenə wèŋ bəbɛ’. Wenə wèeŋ nə yəəŋ ntsə’ ànə bə ŋàŋ vɛ’ɛ wùriŋ. ⁵Ye də wèeŋ zə gɛsə bum sə̀ yà’ cu ndzə ni’ì wèŋ sə̀ yà’a bum nzeŋgòŋ co: ko sàhà, fwɛ’, ŋgòdzəm bum sə̀ yà’a bʉp, nə ye ŋgòwa kɛ’cà bum wèŋ. Bʉsə̀ ŋgòwa kɛ’cà bum vɛ’nə ye də wèŋ sə kuksə yà’ co Nwì. ⁶Yà’a nsàap bum sə̀ yà’a nə gʉ ŋkuŋ Nwì jok bohòbwìŋ, ŋgə’ və.

⁷Wèŋ à sə gì tə̀p to mantombì fa’ sənə nsàap bum yà’sə, ghà nə̀ wèŋ à cu ntòca nà’a. ⁸Nə̀ ŋga’a nè’e mʉ̀ sə tsə̀’ weŋ də wèeŋ teŋsə nsàap bum yà’sə pwe’. Ŋwèe kà sə jòk, kà ntʉm cep, kà ŋwè ròm, kà liŋ ŋwə̀ nəmòk bʉpsə̀, nə ye sə̀’ də ncèep sə̀ bʉp kà kə̀ cùhu wèŋ sə tesə̀. ⁹Kà ŋwè mvwès sə̀’ cì’ fa, bʉ̀ʉsə̀ wèŋ a mè’rə màk ncu ŋwə̀ nə̀ zəm nə bə fàak ye laŋ. ¹⁰Wèŋ tse’ ŋga’a mok ncu ŋwə̀ nə̀ fi. Ŋwə̀ nə̀ fi nə̀ Nwì a gʉ̀ ènə, yi gʉ̀gə̀ nà’ nùumbu pwe’ ŋgòbòghaha lòmantombì ŋgòkə̀ ye sə̀’ co yi Nwì, ya wèeŋ sə riŋ ghaha lo yi mantombì sə̀’. ¹¹Bʉsə̀ wèeŋ mok bʉ̀ʉ sə̀ fi fana ŋwə̀ nəmòk ka bohòwèŋ zok mok ye. Mòk ka mòk də nè’e ŋwə̀ə Jus, nà’a ŋwə̀ lakmvum, jàmŋgaŋ bə ŋwə̀ nə̀ sə ŋgəà ka mok sə̀’ yeŋ. Mòk ka mok də nè’e ŋwə̀ nə̀ wo kom fa yi tu ŋwə̀mbam, nè’e ŋwə̀ nə̀ wo ka yi kom fa yeŋ, ŋkwɛ̀ŋ bə molak wèeŋ mok bʉ̀ə̀. Bwìŋ pwe’ mègù mok mò’fis bʉ̀ʉsə̀ Jisòs Krɛst mègù sə̀’ mò’fis nə̀ yi tse’ bwìŋ ma nə̀ fòpwe’ yi.

¹²Wèeŋ sə tsərə tse’ də wèeŋ bʉ̀ʉ sə̀ Nwì a cokfis weŋ ŋgòye bʉ̀ʉ ye, yi dzəm weŋ. Wèeŋ tse’ koksə̀manziŋ bohòbwìŋ, nə sə gʉ bə̀boŋ. Wèeŋ jəŋ ni’ awèŋ sə nze, nə ye fʉ̀ə̀, nə sə ko ntʉm sə̀’. ¹³Kà də wèeŋ sə jok kɛ’ca bum nə̀nàk dʉk. A ye-a ŋga ŋwə̀ nəmòk gʉ-a wu bʉp, wù swifa yi. A vɛ’nə bʉ̀ʉsə̀ Tà Jisòs Krɛst ànə swifa weŋ, wèŋ tse’ ŋgòswìfa bwìŋ yàwo sə̀’. ¹⁴Bə bum yè’sə pwe’, nə̀ nà’ gʉ gha’ ca nə də, wèeŋ tse’ dzədzəm bohòbwìŋ. Nà’a zeŋ nə̀ nà’a kì be’lə tse’gə̀ bum pwe’ mvwe’ mò’fis mpaaŋ nə̀ mpaaŋ. ¹⁵Yusə̀ wèŋ sə gʉ-a pwe’, yà’a ye bə fifi nə̀ Jisòs Krɛst a fa weŋ. Bʉsə̀ Nwì a to benə və̀ weŋ co ni’ nə̀ mò’fis də ya wèeŋ cum bə nsàp fifi ànə. Wèeŋ cu wèŋ sə kwasə Nwì ghà nə̀ fòlòoŋ. ¹⁶Wèeŋ gʉ də ncèp Jisòs Krɛst cum sə ntʉʉ̀ wèŋ nùumbu pwe’. Wèeŋ sə yə’rə, nə sə tip bwìŋ bə ŋkərə̀. Yəm nsàap ŋkì zəzok ŋgòkùksə Nwì bə zeŋ. Wèeŋ yəm, wèŋ sə kwasə Nwì sə ntʉʉ̀ wèŋ. ¹⁷Fana a ye-a ŋga wèŋ sə gʉ-a sə̀ yà kè wèeŋ cep-a sə̀ yumok pwe’, yà’ ye megu bə liŋ Tà Jisòs Krɛst. Wèeŋ sə kwasə Nwì nə̀ yi tɛ̀’ avès sə̀’ bə liŋ ye sə.

Ncu Nə̀ Bə Dzədzəm Mʉnda’à

¹⁸Ŋgwe yuk bohòndum bʉ̀ʉsə̀ a kə̀kʉrə̀ bohòTà də yà’a ye vɛ’nə. ¹⁹Ndum dzəm ŋgwe yo, nə kà də wù sə gʉ yi co yi yu nə̀ wà dʉk. ²⁰Bweŋke’ wèeŋ yuk dʉk ma bə tɛ̀’ awèŋ, bʉ̀ʉsə̀ wèeŋ gʉ̀ vɛ’nə, Tà sə kwa bohòwèŋ. ²¹Tɛ̀’ bə ma, kà də wèeŋ sə gʉ bwe awèŋ nsàp nə̀ co wo sə tɛ’ kɛ’cà tɛ’lə dʉk.

²²Wèŋ sə̀ wèeŋ fàkgə̀ ŋkwɛ̀ŋ bohòŋwè sə nze fɛn, wèeŋ yuk dʉk masàa awèŋ sə bə yusə̀ wo sə tsə̀’ weŋ lòoŋ. Kà də wu fàk mègù ŋga masà yònə fo’ ŋga yi kwasə wu dʉk. Fàak, nə kà lis maŋkwɛ̀ŋ kʉ̀k, co ŋwə̀ nə̀ yi sə wəp Tà Nwì. ²³Bə yusə̀ wù sə gʉ̀ lòoŋ, wù gʉ yà’ bə ntʉm nə̀ mò’fis, bʉ̀ʉsə̀ wù sə kà yà’ bohòŋwè gʉ̀ fa mègù. Wù sə gʉ̀ fa yà’ bohòTà Jisòs Krɛst. ²⁴Tà Jisòs Krɛɛst masà awèŋ yi. Wèŋ rì sə̀’ də yi nə nə̀ kə̀ làk weŋ bə bum sə̀ bə̀boŋ sə̀ yi gʉ̀ nòŋsə fa bʉ̀ʉ ye wèŋ. ²⁵Ŋwə̀ nə̀ yi sə gʉ-a bʉp, wo nə̀ kə̀ làk yi sə̀’ bə bʉp. Nwìi kà ŋwə̀ nəmòk gèm ko fagə̀.

¹Wèŋ sə̀ wèeŋ yàwèŋ masà, wèeŋ kotse’ bʉ̀ʉ sə̀ wo sə fàk ŋkwɛ̀ŋ bohòwèŋ zìnə, nə sə gʉ wo bə̀boŋ. Wèŋ rì də wèŋ tse’ ŋwə̀ nəmòk nə̀ yi masà bohòwèŋ sə̀’, yi cu mʉbu.

Pol Sə Tip Fe’lə Bʉ̀ʉ Kòlosì Wèŋ

²Wèeŋ sə lɛŋ pìriyà ghà yà lòoŋ. Wèeŋ nə̀m lis awèŋ to, nə sə kwasə Nwì. ³Wèeŋ sə lɛŋ fa ves sə̀’ də Nwìi nɛ̀ fa ves mandzə̀ nə̀ co vèes tsoho fa bwìŋ yusə̀ sə̀swihì sə̀ Nwì a tsə̀’ fa ves bə liŋ Jisòs Krɛst sə. Mʉ̀ cu yè’ mʉ ndapndzəmə̀ sə̀’ bʉ̀ʉ ncèp ènə. ⁴Wèeŋ lɛŋ Nwì sə̀’ də yi gʉ mʉ ya mʉ tsoho rɛŋsə fa bwìŋ yà’ mvə̀’nə̀ mʉ̀ tse’ ŋgòtsə̀’ fa wo sə.

⁵Wèeŋ cu weŋ bʉ̀ʉ sə̀ wo ka bʉ̀ʉ cos yeŋ, wèŋ cum ncu ŋkərə̀. Ghà nə̀ wèŋ tse’-a mʉmandzə̀ pwe’, wèŋ sə gʉ wo bə̀boŋ. ⁶Ncèep cùu awèeŋ ye bəbwe’, nə sə lʉm co ci’. Ŋwə̀ nəmòok fek-a weŋ yumok, wèŋ riŋ ŋgòcèp fəsə fa yi bə mandzə̀ nə̀ bə̀boŋ.

Pol Sə Cèpsə Lə̀sə Wo

⁷Tìkikòs nə̀ yi moma avès nə̀ vès dzəm yi nə, yi nə kə tsoho fa weŋ mvə̀’nə̀ mʉ̀ cu pwe’ yi. Yi fàkgə̀ vesiwèŋ bohòTà Jisòs bə zìnə ye pwe’. ⁸Mʉ̀ tumsə tsə gù yi bʉ̀ʉ njo nə̀ də ya wèeŋ riŋ mvə̀’nə̀ ves cu fɛn. Nə ye sə̀’ də ya yi gʉ ntʉm awèeŋ sə kwa sə̀’. ⁹Tìkikòs nə, yi bə molak àwèŋ nə̀ liŋ yee Ònisimù nà’a bəbɛ’. Yi sə̀’ moma àvès nə̀ vès dzəm yi. Yi fàkgə̀ bohòJisòs sə̀’ bə zìnə ye pwe’. A wo sə̀ wo nə tsoho fa weŋ bum sə̀ yà’ a ye fɛɛŋ pwe’.

¹⁰Àritakònə̀ vesi cu ndapndzəm cèpsə weŋ pwe’. Mak nə̀ yi motɛ̀’ɛ Bànabà nà’a cepsə weŋ sə̀’. Mʉ̀ à tip weŋ laŋ də Mak nə kə̀ tsèŋ-a weŋ, wèŋ gʉ yi bə̀boŋ. ¹¹Jisòs nə̀ liŋ ye mòok Jostòs nà’a sə cèpsə weŋ sə̀’ bə̀boŋ. Bʉ̀ʉ Jus sə̀ vesiwèŋ sə fàk bəbɛ’ mègù wo sə̀ tɛ’ yà’sə. Vesiwèŋ sə fàk ŋgògʉ̀ co bwìŋ riŋ gaŋ ŋkum Nwì sə ntʉʉ̀ wo. Wo a tɛsə jə mʉ vɛ’ɛ nsàp nə̀ ntʉm boŋ mʉ.

¹²Epafəràs nə̀ yi sə̀’ molak àwèŋ cèpsə weŋ bə̀boŋ. Yi sə̀’ ŋgà fàk Jisòs Krɛst. Yi lɛŋgə̀ Nwì mʉ tuhù wèŋ bə ŋàŋ də wèeŋ kuk bə bum sə̀ ma nə̀ Nwì pwe’. Də wèeŋ riŋ bum sə̀ Nwì sə dzəm, nə sə yuk dʉk ye. ¹³Mʉ̀ a yə bə lis am mvə̀’nə̀ yi a fàk gʉgʉŋ bʉ̀ʉ wèŋ, wèŋ bʉ̀ʉ lak Kòlosì bə sə̀ Làòdisiyà nə ye lak Hìràpolìs. ¹⁴Luk nə̀ yi doktà àvès, nə̀ a dzəm yi wùriŋ, nə ye Dimà wèŋ cèpsə weŋ bə̀boŋ.

¹⁵Cèpsə fa mʉ bwema sə̀ mvwe’ lak Làòdisiyà bə̀boŋ. Cèpsə Nimfà bə cos nə̀ mʉnda’à yi nà’a sə̀’. ¹⁶Wèeŋ ta ŋwàk nè’e, wèŋ tum fa cos nə̀ mvwe’ lak Làòdisiyà ya wo taŋ nà’ sə̀’. Wèeŋ taŋ ŋwàk nə̀ Làòdisiyàa nə tumsə fa weŋ nà’a sə̀’. ¹⁷Wèeŋ tsok fa Akipòdə mʉ̀ dʉk də, yi fak wes fàak sə̀ Tà a fa ndzə bohòyi yà’a. ¹⁸Mʉ̀ʉ Pol, mʉ̀ còm fa weŋ cə̀cèpsə̀ nè’e mok bə bo yàm. Wèeŋ sə tsərə kwaŋ sə̀ mʉ̀ cu bə zeŋ yè’e. Bə̀bo nə̀ Nwìi ye bohòwèŋ lòoŋ.