2 Timatì

Ŋwàk nə̀ Ba,

nə̀ Pol à Còm Fa

TIMATÌ

Pol à còm ŋwàk ènə ŋga yi cu mʉ ndapndzəmə̀ yiìyi fana yi dzəm ŋgòyə Timatì. À ye ŋga yi rì də mvə̀’nə̀ yi nə kpʉ kʉ̀rə laŋ. Yi à sə cèp ghak bə ntip sə̀ ŋgòtsòho ncèp nə̀ Nwì nə. Tu ncèp nə̀ gʉgʉŋ nə nja də, ŋwə̀ nə̀ yi dzəm-a ŋgòye mofàk Jisòs nə̀ zìnə nə, yi tse’ ŋgòye co sojà nə̀ yi sə yu’ dʉk. Yi ka tse’ ŋgòkosə lo’ marè’tu bohòŋkwà’ŋwə̀ ye nə̀ nà’a Jisos Krɛst nə. Yi tse’ ŋgòye fə̀fʉhʉ̀ ŋgòyə ŋgə’ bʉ̀ʉ fàak ye sə (ye ŋgoo 1:8, 2:3, 2:12, 2:15, 3:11, 4:5).

¹Còm ŋwàk nè’e mʉ̀ʉ Pol nə̀ mʉ ŋgà ntum Jisòs Krɛst. Nwì a fʉ̀hʉ nòŋsə yi də mʉ ye ŋgà ntum ye. Fàk am yè’sə də mʉ sə tsoho fa bwìŋ bə nzak lùŋ nə̀ nà’ sə və̀ bohòJisos Krɛst nə. ²Mʉ̀ sə còm fa ŋwàk nè’e bohòwùu Timatì mo àm nə̀ sə ntʉʉ̀ mʉ̀. Nwì nə̀ yi tɛ̀’ nə ye Jisòs Krɛst nə̀ yi Tà àvèes gʉ wu bə̀boŋ, nə koksə manziŋ bohòwù, nə fa wu fifi sə ntʉʉ̀.

Pol Kwɛ’sə Timatì ŊgòFàk Gʉgʉŋ, Nə Kà Wəp

³Mʉ kwasəgə̀ Nwì bʉ̀ʉ wùu Timatì. Mʉ̀ sə fàk bohòyi bə ntʉm nə̀ rərɛŋ mvə̀’nə̀ tɛ̀’ am wèŋ à fàak. Mʉ lɛŋgə̀ bohòyi maràŋ bə ndzəmə̀ lòoŋ də yi se wu ŋkʉ̀ʉŋntɛ̀ŋ. ⁴Mʉ tsərə ndzəplis yo sə̀ wù a wa ghà nə̀ vesù à gà’a yà’a, ntʉm àm sə gʉ mʉ co mʉ ye fe’lə wù sə̀mok ya mʉ kwa. ⁵Mʉ tsərə fe’ləgə̀ mok sə̀’ mvə̀’nə̀ wù a fa ntʉm yòbohòJisòs bə nə̀ zìnə. Macici yòLuwìs ànə fa to ntʉm vɛ’nə yi, nə ye də ma yòYunìs fa sə̀’. Mʉ̀ rì də wu sə̀’ vɛ’nə. ⁶Mvə̀’nə̀ mʉ̀ rì də wu vɛ’nə fana mʉ̀ dzəm də mʉ tsok fa wu yumok. Wu lumsə ŋkərə̀ nə̀ Nwì a fa wu ŋgòfàk bə zeŋ ghà nə̀ mʉ̀ ànə naaŋ fa wu bo nà’a. ⁷Rìŋtse’ də Nwì a fa vesùwèŋ Yòŋsə̀ ye nə̀ Rərɛŋ nə̀ nà’ gʉ̀ ves a kà wʉə tse’. Nà’ a fa ves ŋàŋ, nə gʉ a dzəm bwìŋ, nə sə ko ni’.

⁸Ye də kà də wu koksə marè’tu ŋgòtsòho fa bwìŋ liŋ sə̀ Tà sə dʉk. Nə ye sə̀’ də kà də wu koksə marè’tu bohòmʉ̀ də bʉ̀ʉsə̀ mʉ ŋgà ndapndzəm sə̀’ dʉk. Yusə də wu tse’ lɛ nsàp ntʉm nə̀ ŋgòkə̀ ye ŋgə’ bʉ̀ʉ Ntirə̀ nə̀ Bə̀boŋ nə sə̀’. Aco wù gʉ to yè’sə bə ŋàaŋ sə̀ Nwìi fa wu yà’ yi. ⁹A yi Nwì nə nə̀ yi a lùŋsə ves, nə dʉk ves də a cum ncu nə̀ nà’a rərɛŋ. Yi à gʉ̀ yè’sə, ka də a bʉ̀ʉ yumok sə̀ bə̀boŋ sə̀ vesùwèŋ a gʉ̀ yeŋ. Yi à gʉ̀ fa ves yè’sə ndzə bohòJisòs Krɛst ŋga yi tsəm kok gu sə və̀ə yi bə bòvə̀m ye ŋga nzeŋgòŋ ka ntòyeto. ¹⁰Nə̀ niè’ nè’e mvə̀’nə̀ Jisòs Krɛst ŋgà lùŋsə̀ bwìŋ a və̀ fana vesùwèŋ a rì mok bum sə̀ Nwì a sə tsərə də yi nə gʉ sə. Yusə̀ yi à və̀ə nə gʉ sə də yi à ghak ŋàaŋ kpʉ, nə jəŋ və lùŋ nə̀ nà’a nə̀ kà mè yuk mvwe’ jəja. Mandzə̀ nə̀ yi à jə və̀ nà’ à ye bə Ntirə̀ nə̀ Bə̀boŋ nə.

¹¹Nwì a naaŋ fa mʉ bo mʉ tuhù də mʉ tsoho sə̀’ Ntirə̀ nə̀ Bə̀boŋ ènə. Mʉ sə̀’ ŋgà ntum zeŋ, nə sə yə’rə fa bwìŋ sə̀’ zeŋ. ¹²Nà’a njo nə̀ mʉ̀ sə yə ŋgə’ nə. Megu də marè’tu sə kà mʉ ko bʉ̀ʉsə̀ mʉ̀ rì ŋwə̀ nə̀ mʉ̀ a dzəm bohòyi nə bə̀boŋni. Mʉ̀ rì tse’ sə̀’ pap də yi tse’ ŋàaŋ sə̀ ŋgònòŋsə bum sə̀ mʉ̀ a fa yà’ ndzə bohòyi sə tə̀tè kə dzeŋ nùmbu ànə nə̀ yi nə bwi və. 1:12 Aco ncèp ènə sə dʉk də, <<Yi tse’ ŋàaŋ sə̀ ŋgònòŋsə bum sə̀ yi a fa yà’ ndzə bohòmʉ̀ sə.>>

¹³Wù à yuk ncèp nə̀ zìnə nə̀ nà’a bə liŋ Jisòs Krɛst nə bohòmʉ̀ laŋ. Jəŋ ŋkərə̀ də wu sə yuŋ megu zeŋ. Wu sə gʉ̀ vɛ’nə, wù sə fa ntʉm bohòNwì, nə sə dzəm bwìŋ bʉ̀ʉsə̀ wu ŋwə̀ə Jisòs Krɛst. ¹⁴Ncèp nə̀ Nwì a fa ndzə bohòwù ènə gʉ ntɛŋ wù kà fʉ̀k. Fana ye də wu jəŋ ŋkərə̀ də ŋwə̀ nəmòok kà nà’ kupsə̀ bʉpsə̀. Yòŋsə̀ nə̀ Rərɛŋ nə̀ nà’ cu ndzə ni’ì vès nə nə tɛsə wu ŋgògʉ̀ vɛ’nə.

¹⁵Wù rì də bʉ̀ʉ sə̀ mvwe’ lak Ɛsiyà pwe’ a mè’rə tes mʉ mʉmʉ̀. Fùgelòbə Emoginìs a mè’rə mʉ sə̀’. ¹⁶Ŋwə̀ nə̀ yi vesi mègù Ònesiforòyiìyi. Yi gʉ̀gə̀ ntʉm àm sə ye fəfup. Yi kà marè’tu bə kwaŋ am yè’e sə̀’ koksəgə̀. Mʉ̀ tsəm də Tàa nə se ndap ye bə nsàp nə̀ yi sə gʉ̀ ànə. ¹⁷Yi à kə̀ dzèŋ mvwe’ lak Rumà, yi lap fok kɛ’ca mʉ vɛ’ɛ tə̀tè yi ye mvwe’ sə̀ mʉ̀ cu. ¹⁸Mʉ̀ sə lɛŋ də Tà Nwìi gʉ Tà Jisòs ŋgòkoksə manziŋ bohòyi nùmbu ànə nə̀ yi nə̀ bwìŋ və̀ə. Wù rì mvə̀’nə̀ yi à sə tɛsə mʉ ghà nə̀ mʉ̀ à ye mvwe’ lak Efesòyà’a-e bə̀boŋni.

Ŋgə’ Nə̀ Ŋgà Fàk Nwìi Nə Ye

¹Wùu Timatì mo àm, təəŋ gʉgʉŋ bə ŋàaŋ sə̀ Jisòs Krɛst fagə̀ bʉ̀ʉ ye wèŋ. ²Wù à yuk bum sə̀ mʉ̀ a sə yə’rə kɛ’ mvwe’ bwìŋ yà’a; jəŋ yà’, nə yə’rə bwi fa bʉ̀ʉ sə̀ wo zìnə nə ye kə̀kʉrə̀. Bʉ̀ʉ yè’sə wèeŋ nə jəŋ yà’, nə yə’rə bwi fa bʉ̀ʉ mok wèŋ sə̀’. ³Ye ŋgə’ ma njòco sojà nə̀ bə̀boŋ bohòJisòs Krɛst. ⁴Wù rì də ŋwə̀ nə̀ yi sojàa kà ncu ye co ŋwə̀ nə̀ la’à mok cugə̀. Yi cugə̀ ncu nje ŋgògʉ̀ də ŋkwà’ŋwə̀ ye sə kwa. ⁵Tsərə fe’lə-a mòk co ŋgà cacaŋ-è. Aco wo də yi gha’ bwìŋ yi, ŋga yi ka lʉ̀ʉk sə̀ wo nòŋsəgə̀ də ŋwèe caŋ vɛ’ bə vɛ’ sə pwe’ noŋsə à? ⁶Ŋgà fàk nzum nə̀ yi fàkgə̀ vɛ’ɛ bə ŋàaŋ tse’ togə̀ bum sə̀ yà’ tesə mʉnzùù fi yi. ⁷Tsərə bum sə̀ mʉ̀ tsə̀’ fa wu yè’sə bə̀boŋ. Tàa nə gʉ wu wù rɛɛŋ bə zeŋ pwe’fo’.

⁸Kà swì də Jisòs Krɛst nə̀ yi à tesə bohòbʉ̀ʉ Devìd à lòkok mvwe’ kpʉ. Nà’a Ntirə̀ nə̀ Bə̀boŋ nə̀ mʉ̀ sə tsòho fa bwìŋ nə. ⁹Yà’a yusə̀ mʉ̀ sə yəə̀ nə ŋgə’ bʉ̀ʉ zeŋ sə. Wo tasə mʉ yè’ bə kwaŋ co ŋwə̀ nə̀ yi bʉpsə yumok. Megu də kaco wo tasə to Ntirə̀ nə̀ Bə̀boŋ nə yeŋ. ¹⁰Fana mʉ̀ sə ye lo yàm ŋgə’ mantombì bʉ̀ʉsə̀ bʉ̀ʉ sə̀ Nwì a cokfis wo yè’sə sə̀ ntɛ̀ŋ. Mʉ gʉ vɛ’nə ya wo dzəm bohòJisòs Krɛst fana Nwì fa wo lùŋ nə̀ nà’a nə̀ kà kə̀ mè yuk nə. Fana wo nə̀ kə̀ tse’ bum sə̀ bə̀boŋ sə̀ yà’a nə̀ kà mè yuk, sə̀ Nwì a nòŋsə fa bʉ̀ʉ Jisòs wèŋ sə. ¹¹Ncèp mòok nè’, nə̀ nà’ a zìnə, aco wù riŋ yòsə̀’ də a vɛ’nə, də,

A kpʉ-a ves Krɛst,

A nə lokok be’lə sə̀’ vesiwèŋ.

¹²A təəŋ be’lə-a venəwèŋ cʉ̀k,

A sak gaŋ ye sə̀’ venəwèŋ.

A kà-a yi də yi nə̀ njàvès jə,

Yi kà ves də vesùwèeŋ sə̀ ye sə̀’ jə.

¹³Vesùwèeŋ kà-a zìnə bohòyi ye,

Yi mègù ye ŋwə̀ nə̀ yi yegə̀ ye zìnə.

Kaco yi dzeeŋ yuk ni’ ye yeŋ.

Fàk Co Nwì Dzəm Də, <<Ŋ̀, Wù Sə Fàak>>

¹⁴Gʉ̀ bʉ̀ʉ yo wèŋ ŋgòtsərə tse’ bum yà’sə, nə kà swì. Cèp bohòwo, nə soŋ wo ntu’ bə̀boŋ mʉnə liŋ Nwì də wo kà mvə̀k bə ncèep cùu sə̀ də ŋwə̀ nè’e rìŋ ghak yi kè nà’a àlɛ’ sə càsə̀. Nsàp ànə ka fàk tse’, nà’a bʉpsəgə̀ bʉ̀ʉ sə̀ wo yuk yà’ bʉpsə. ¹⁵Jihi nzòŋ, nə gʉ fàak yo bə̀boŋ ya Nwìi dzəm də <<Ŋ̀, wù sə fàk mʉmvə̀’nə.>> Ye nsàp ŋwə̀ nə̀ kaco marè’tu tesə sənə fàak yo yeŋ, nə ye ŋwə̀ nə̀ wù rì ŋgòkotse’ ncèp nə̀ Nwì nə bə mandzə̀ nə̀ bə̀boŋ. ¹⁶Yusə də, kà də wu tse’ bo sənə nsàp taaŋgàam ləm sə̀ yà’ ka fàk bohòNwì tse’ yà’a dʉk. Mʉ dʉk vɛ’nə bʉ̀ʉsə̀ yà’a jə fəsə lògə̀ bwìŋ mvwe’ mandzə̀ Nwì maŋkwɛ̀ŋ, maŋkwɛ̀ŋ. ¹⁷Ŋgàam awo yà’sə yegə̀ co nsàp mvwe’ nə̀ nà’a kà mègə̀, nə sə jək logə mantombì nà’a. Hìminiyàs bə Fìlitù sə yə’rə bwìŋ nsàap bum yà’sə. ¹⁸Wo a jàm mè’rə mandzə̀ nə̀ zìnə nə laŋ. Wo sə dʉk kɛ’cà də ŋgòlòkok mvwe’ kpʉ à cà lòmè laŋ. Wo gʉ vɛ’nə fana bʉ̀ʉ mok wèŋ ye ŋgòmərə də zìnə nə ŋga’a nə̀ fòlɛ. ¹⁹Bwìŋ sə mərə-a sə̀ vɛ’nə fana bʉ̀ʉ Nwì wèŋ nə təəŋ gʉgʉŋ co kùumndap, yà’a nə̀ kà kupsə̀ yuk. Ŋgì ncèp nə̀ wo còm naaŋ mbwa nə də, <<Tà rì bʉ̀ʉ sə̀ yà’wèeŋ sə̀ ye. Ŋwə̀ nə̀ yi də yi bɛ’ mandzə̀ Tà Jisòs lòoŋ, yi cokfis ni’ ye sənə bʉp.>>

²⁰A yegə̀ mʉnda’à ŋgà ghàk wù ye bum sə̀ ŋgògèsə zʉzʉ mbwa zəzok. Mok sə yà’ gʉ ntɛŋ. Mok sə̀ ka ntɛŋ gʉgʉŋ yeŋ co kʉ̀ʉŋ ncàk vɛ’ɛ. Sə̀ yà’ gʉ ntɛŋ sə, wo fis mègù ya’ nùmbu nzu. Mok sə ye sə̀ wo zʉ bum ca ghà nə̀ fòlòoŋ nzak kà ye. ²¹Ye də a ye-a ŋga ŋwè cokfis gɛsə ni’ sənə bʉp yè’sə pwe’ fana yi nə ye mok co yu gèsə̀ zʉzʉ nə̀ nà’ gʉ ntɛŋ. A vɛ’nə bʉ̀ʉsə̀ yi mok rərɛŋ. Yi tse’ mok fàk. Yi mok kə̀kʉrə̀ co də ŋgà ndap nə gʉ fàk bə zeŋ nùmbu nə̀ sə bà bàa pwe’. ²²Ye də wu caŋ gɛsə mvwe’ ŋgʉ̀ʉ wàhabwìŋ sə̀ yà’a jə lògə̀ wo ŋgògʉ̀ bʉp yà’a. Jihi nzòŋ ŋgòkə̀ gʉ̀ mègù yusə̀ yà’a kə̀kʉrə̀, nə sə naaŋ tu bohòJisòs gʉgʉŋ, nə tse’ dzədzəm bohòbwìŋ, nə ye bə fifi. Wu gʉ̀ vɛ’nə ye də wù sə gʉ̀ sə̀ mvə̀’nə̀ bʉ̀ʉ sə̀ wo yù Tà bə ntʉm nə̀ mò’fis sə gʉ̀ʉ. ²³Kà də wu gesə cùu yo sənə bum ləm sə̀ jì ŋkərə̀ sə̀ bwìŋ sə cèep dʉk. Wù rì yòsə̀’ də nsàap bum yà’sə jə və̀ mègù ŋkʉ̀ə̀m. ²⁴Ŋgà fàk Tà Nwì ka tse’ ŋgòye ŋwə̀ nə̀ yi sə li ni kɛ’ sənə ŋkʉ̀ə̀m yeŋ. Yi nə ye tsoŋ ŋwə̀ nə̀ fʉ̀ə̀ bohòbwìŋ pwe’. Yi tse’ ŋgòye sə̀’ ŋwə̀ nə̀ yi rì ŋgòyə’rə bwìŋ bə̀boŋ, nə ye fe’lə sə̀’ ŋgà kontʉm. ²⁵Yi ye nsàp ŋwə̀ nə̀ bwìŋ bɛ̀ŋ-a yusə̀ yi cèep, yi rɛŋsə yà’wèŋ bə fʉ̀ə̀. Yi gʉ vɛ’nə, bʉ̀ʉsə̀ kàmòk aco Nwì kupsə ntʉʉm bʉ̀ʉ yà’sə wèŋ wo riŋ zìnə nə. ²⁶Ya ŋga ŋkərə̀ awo bwìŋ və̀ə, wo caŋ tesə sənə tam Satà nə̀ yi ŋgà bòrə̀ bwìŋ. Tam nə̀ yi anə kotse’ yà’ ca də yà’a sə yuk bohòyi nə.

Bum Sə̀ Bwìŋ Nə Sə Gʉ Ŋga Jisòs Kʉəp ŊgòVə̀ə

¹Mʉ̀ dzəm də wu rɛɛŋ də ghà nə̀ Jisòs kʉəp ŋgòbwìŋ və̀ə, ŋgə’ə nə ye vɛ’ɛ wùriŋ. ²Bʉsə̀ bwìŋ nə sə gʉ bʉp wùriŋ. Bwìŋ nə sə dzəm megu ni’ awo, nə sə dzəm mbàm; wo nə sə dzəm ŋgòtsòho kɛ’ də mʉ vɛ’ɛ bə vɛ’ɛ, nə sə nɛ ni’. Wo nə sə yak kɛ’cà bwìŋ. Bweŋke’ wèeŋ nə kà ma bə tɛ̀’ mok sə̀’ yuk. Bwìŋ kà ntʉm nə̀ ŋgòkwasə ŋwə̀ mok sə̀ tse’, nə kà Nwì sə̀’ wəp. ³Bwìiŋ nə kà bʉ̀ʉ awo sə̀ mʉnda’à wo sə̀’ sə dzəm. Bwìiŋ nə sə tse’ ntʉm sə̀ gʉgʉŋ. Bwìiŋ nə sə ci’ fa bʉ̀ʉ mok wèŋ mvwès. Bwìiŋ nə sə gʉ lo bum mvə̀’nə̀ wo dzəm nduk. Bwìiŋ nə sə ye ŋgàa ŋgwap, nə kà yumok sə̀ yà’a bə̀boŋ dzəm lok. ⁴Bwìiŋ nə sə borə bwìŋ. Bwìiŋ nə kà dʉk sə yuk, nə ye ŋgàa koksə̀-ŋkwɛ̀ŋ. Wo zʉ nzeŋgòŋ, nə kà mvə̀k bə yusə̀ yà’a bə̀boŋ bohòNwì tse’. ⁵Wo nə sə gʉ megu bum Nwì ma mʉŋgùp ni’ì, fana nə sə bɛŋ bwi ŋàaŋ sə̀ yà’ cu nja sə. Kà ŋge’ weŋ nsàp bʉ̀ ànə ko lok. ⁶Yà’a nsàp bʉ̀ nə̀ wo gorə ni mʉnda’à bwìŋ bə ŋkərə̀. Wo ni vɛ’nə, nə ci’ ko bàa sə̀ wo lo’. Bàa yè’sə wèŋ bə̀’ ku’ tse’ bʉp bə marè’tu ndzə nì’ì wo nə sə jip kɛ’ bə zeŋ. ⁷Wo sə dzəm ŋgòyə’rə rì bum, nə kà zìnə nə rì yuk. ⁸Nsàap mbəmbaam sə̀ vɛ’nə yè’e ka zìnə tse’. Wo yà’sə co bʉ̀ʉ sə̀ liŋ awo də Janè bə Jambrì, sə̀ wo à sə dzèeŋ dʉk Musì. Ŋkərə̀ə awo a bʉp yà’sə laŋ fana wo tse’ dzədzəm nə̀ nà’ a jabu. ⁹Yusə də wo nə kà sə̀sap lòŋga bwìŋ ko mbwèe awo laŋ. Yà’a sə̀’ mvə̀’nə̀ bʉ̀ʉ sə̀ ba yà’a à ye fana bwìŋ ko mbwèe awo.

Pol Tipsə Timatì ŊgòTəəŋ Cʉ̀k Bə Zìnə Nə

¹⁰Bohòwù yòTimatì, wù à rì zìnə nə bohòmʉ̀. Wù rì yusə̀ mʉ̀ sə yə’rə fa bwìŋ, nə riŋ ncu àm, nə riŋ fe’lə yusə̀ mʉ̀ sə dzəm ŋgògʉ̀ʉ. Wù à yə mvə̀’nə̀ mʉ̀ à fa ntʉm àm bohòNwì, nə ye mvə̀’nə̀ mʉ fʉ̀ə̀, nə sə dzəm bwìŋ, nə ye mʉmvə̀’nə̀ ŋgə’ à sə və̀ bohòmʉ̀, mʉ̀ təəŋ mali gʉgʉŋ. ¹¹Wù rì sə̀’ mvə̀’nə̀ bwìŋ a yeŋsə mʉ ŋgə’ mvwe’ bòop lak sə̀ co Antiyòk bə lak Àkonòm bə lak Listà. Ŋgə’ə sə̀ yà’ à və̀ bohòmʉ̀ pwe’ mʉ̀ à təəŋ gʉgʉŋ fana Tà Jisòs nə fis gɛsə mʉ ca lòoŋ. ¹²A zìnə də, ŋwə̀ nə̀ yi dzəm-a ŋgòbɛ’ mandzə̀ Jisòs bə zìnə ye pwe’, yi nə tse’ tsoŋ ŋgə’ bohòbwìŋ. ¹³Bʉ̀ʉ sə̀ bʉp sə̀ wo dʉk bòrəgə̀ də wo dzəm Nwì yà’a nə sə bʉp ghaha lo ghaha. Wo nə sə borə bwìŋ ŋga wo sə bòrə wo yàwo sə̀’ bòrə. ¹⁴Nə ye də wùu Timatì, dù mali mantombì bə zìnə nə̀ wo à yə’rə wu, wù dzəmtse’ cʉ̀k nə. Tsərə tse’ bʉ̀ʉ sə̀ wo à yə’rə wu. ¹⁵Tsərə tse’ sə̀’ də wù à rì yè jə ŋwàk Nwì ŋga wù cu ntòmʉmweŋke’. Ŋwàk Nwì ènə zeŋ nə̀ aco nà’ jə lo to wu ŋgòrì ŋkərə̀, nə kə tse’ lùŋ nə̀ nà’a nə̀ kà mè. Nà’ tse’ ŋgòjə lo wu vɛ’nə ŋga wù fa ntʉm yòbohòJisòs Krɛst. ¹⁶Bum sə̀ wo à còm yà’ ndzənə ŋwàk Nwì lòoŋ fo’, à tesə və̀ bohòNwì. Yà’ tse’ fàk ŋgòyə’rə fa bwìŋ zìnə. Nə tse’ fàk ŋgònì fa bwìŋ yusə̀ yà’a jòŋ. Nə tse’ fàk ŋgònìtsə̀’ fa bwìŋ ŋgòtesə sənə jòŋ, nə təəŋ fe’lə rərəŋ sə̀mok. Nə tse’ fe’lə fàk ŋgòyə’rə fa bwìŋ mandzə̀ ncu nə̀ nà’a kə̀kʉrə̀. ¹⁷Fana yà’ gʉ ŋwə̀ nə̀ yi fàk bohòNwì pwe’ kà yusə̀ yi tse’ ŋgòrìi jamə̀. Fana yi ye kə̀kʉrə̀ ŋgògʉ̀ nsàp fàk nə̀ fòpwe’fo’ nə̀ nà’a bə̀boŋ.

Pol Ta Fa Timatì Kpʉ

¹Timatì, so’rə ntu’ bə̀boŋ, nə yuk ncèp nè’e. Mʉ̀ sə cèp bohòwù gʉgʉŋ mantombìi Nwì nə ye Jisòs Krɛst nə̀ yi nə̀ sak ndàaŋwè pwe’. Yi nə sak bʉ̀ kpʉkpʉ bə bʉ̀ʉ sə̀ wo cu ŋwəm. Njo nə̀ yi nə̀ və̀ ŋgòkə̀ sak gaŋ ye fana mʉ̀ dʉk wu də, ²Tsoho ncèp Nwì nə ghà nə̀ fòlòoŋ, ŋga mvə̀’nə̀ sə bòo nə ye mvə̀’nə̀ sə bʉp mwè pwe’ wù tsòho. Sa’rə bʉ̀ʉ yo wèŋ ya wo teŋsə bʉp awo sə̀ wo sə gʉ̀ʉ. Kwɛ’sə wo ya wo gʉ bum bə mandzə̀ nə̀ nà’ a ye bə̀boŋ. Ko ntʉm nə kà teŋsə̀, nə sə yə’rə wo sə̀’. ³Bʉsə̀ mvə̀k sə və̀ə nə̀ bwìŋ nə kà yəyə’rə̀ nə̀ nà’a zìnə yu’rə̀. Wo nə sə yuŋ lo gu yusə̀ yà’ sə bòwo. Wo nə sə to benə cicàa sə̀ wo dzəm, də ya yà’wèeŋ yə’rə fa wo nsàap bum sə̀ sə bòwo co wo yuk zeŋ. ⁴Wo nə̀ kà ŋgòyu’rə yusə̀ yà’a zìnə mok dzəm. Wo nə dzəm ŋgòyu’rə kɛ’cà maŋgəŋgèeŋ sə̀ wà. ⁵Nə ye də bohòwù yò, ko ni’ yò, nə təəŋ bə ŋkərə̀ ghà nə̀ fòlòoŋ. Ŋgə’ və̀-a bohòwù, wù ko ntʉm. Sə gʉ fàha yo co fàŋgəri nə. Gʉ̀ fàha sə̀ Nwì fa wu ŋgògʉ̀ lòoŋ sə̀’.

⁶Bohòmʉ̀ yàm, mvə̀k njàm nə̀ ŋgòkpʉ kʉ̀rə laŋ. Kpʉ àm nə nà’a co mʉ̀ sə fè’ mà’ fa Nwì dzə̀ rùk nə̀ fi. ⁷Mʉ̀ a lʉ̀ ma njàm bə̀boŋ laŋ, mʉ̀ a ca ca àm nə kə mesə sə̀’ bə̀boŋ. Mʉ̀ tə malì bə zìnə àm nə. ⁸Nə̀ ŋga’a nè’e, lə̀làk àm cu yo bʉ̀ʉsə̀ mʉ̀ a gʉ̀ mvə̀’nə̀ Nwì sə dzəm sə. Tà Jisòs Krɛst nə̀ yi sakgə̀ bum kə̀kʉrə̀ nə nə̀ fa mʉ nà’ nùmbu nə̀ yi nə̀ və̀ə. Yi nə kà nsàp ènə bohòmʉ̀ fa mègù, yi nə fa ndàaŋwè pwe’ nə̀ yi tes lis mandzə̀ bə kwəkwa ŋgòkʉ̀k nùmbu nə̀ yi nə̀ bwìŋ və̀ə ànə.

Pol Fa Lə̀sə Timatì Ntip

⁹Làp mandzə̀, nə və kə ye mʉ jəjo yè’sə. ¹⁰Dimà a mè’rə nòŋsə mʉ nè’ mʉmʉ̀. Yi dzəm ŋgòbɛ’ lòmègù mok bum sə̀ bə̀boŋ sə̀ sə nze fɛn. Yi a lòyuye mvwe’ lak Tètàlonikà. Kresèŋ a lòye mvwe’ lak Gàlesiyà fana Taitòs lo ye mvwe’ nzeŋgòŋ Dàlmasiyà. ¹¹Luk cu mègù vesi mok yiìyi. Wu cu ŋgòvə̀ə, wù jə və Mak, bʉ̀ʉsə̀ aco yi tɛsə mʉ bə fàk. ¹²Mʉ̀ a tum lòTìkikòs mvwe’ lak Efesò. ¹³Wu və̀ə, wù jə və fa mʉ cə̀k àm nə̀ mʉ̀ à mè’rə nà’ mvwe’ lak Truwà bohòKapònà’a. Jə və fa mʉ ŋwàak am sə̀’. Nə jə və fa mʉ ŋwàak fàk am sə̀ ya’ tse’ liŋ yà’a ntɛ̀ŋ. ¹⁴Àlèsandà ŋgà tɛŋlàm nà’a a gʉ̀ mʉ bʉp nsàp nə̀ wù kà fʉ̀k. Nwìi nə̀ làk fəsə yi sə̀’ mvə̀’nə̀ yi a gʉ̀ mʉ. ¹⁵Sə gi yòbohòyi sə̀’ bə ŋkərə̀. Bʉsə̀ yi a cèp ŋgògʉ̀ bʉpsə Ntirə̀ nə̀ Bə̀boŋ nə vɛ’ɛ bə ŋàŋ.

¹⁶Mvə̀’nə̀ mʉ̀ à təəŋ to mʉ kot mantombì fa’ ŋgòfì’lə ncù am yà’a, wo pwe’ à mè’rə tes mʉ mʉmʉ̀. Mʉ̀ lɛŋ Nwì də yi kà wo yumok bʉ̀ʉ zeŋ gʉ̀! ¹⁷Tà Jisòs à ye gù fo’ vesi yi. Yi à sə fa mʉ ŋàŋ fana mʉ̀ tsòho rì to ncèp nə pwe’fo’, ya bʉ̀ lakmvum wèeŋ yuk nà’. Yi a caŋsə gɛsə mʉ mvwe’ cùu gwim. ¹⁸Tà Jisòos nə caŋsə gɛsə mʉ mvwe’ bʉp pwe’, nə jəŋ lo mʉ bə̀boŋ mvwe’ lak ye sə̀ mʉbu mvwe’ dzə̀’ ŋkum ye. Kə̀kùksə̀ə ye bohòyi, nə kà mè yuk. Yà’a ye vɛ’nə.

Cə̀cèpsə̀ Nə̀ Nà’ Lə̀sə Mbwè

¹⁹Cèpsə fa mʉ Prìsiliyà bə Àkwilà. Cèpsə fa mʉ bʉ̀ʉ mʉnda’à Ònesiforòlòoŋ. ²⁰Ɛ̀ratòs cu malìgə̀ ye yà’ mvwe’ lak Korè. Mʉ̀ a mè’rə Tròfimù mvwe’ lak Mìlitù ŋga yi nòyiyaŋ. ²¹Jihi nzòŋ nə və ŋga mvə̀k mbʉ̀ŋ ka ntòvə. Ɛ̀bulòbə Pudèn bə Linùs nə ye Klaodiyà wèŋ cèpsə wu bə̀boŋ. Bwema sə̀ fɛŋ sə pwe’ cèpsə wu sə̀’. ²²Tà Jisòs sə kʉ̀k yòŋsə̀ yò. Bòvə̀m nə̀ Tà nə ye bohòwù sə̀’.