2 Tètàlonikà

Ŋwàk nə̀ Ba,

nə̀ Pol à Còm Fa Bʉ̀ʉ sə̀ Mvwe’ Lak

TÈTÀLONIKÀ

Jijipsə̀ à cu malì mʉmvwe’ cos nə̀ mvwe’ lak Tètàlonikà nə, bə nza’ mʉmvə̀’nə̀ Jisòos nə̀ bwì və̀ə nə. Bʉ̀ʉ mok à sə cèp də nùmbu nə̀ Jisòos nə̀ bwì və̀ nə à cà lòlaŋ. Fana Pol com ŋwàk nə̀ ba ènə ŋgòtsə̀’ rɛŋsə fa wo bə zeŋ də ŋkuŋ Jisos Krɛst sə bwi və ŋga ŋkʉ̀ì’ ghaha sə nzeŋgòŋ anə vɛ’ɛ kə dzeŋ nsàp nə̀ co wù kà fʉ̀k. Yi nə ye ŋkum sə nzeŋgòŋ ghà ànə yi. Yi nə bɛŋ wes nwì pwe’, nə gʉ ni’ ye co də yi Nwì yi ŋkuŋ fana Jisòs sə kə və.

¹Còm ŋwàk nè’e mʉ̀ʉ Pol ves Sìlvanù nə ye Timatì wèŋ bəbɛ’. Vès còm fa nà’ bohòbʉ̀ʉ cos nə̀ mvwe’ lak Tètàlonikà wèŋ. Wo sə̀ tse’ wo Nwì nə̀ yi Tɛ̀’ avès nə ye Tà Jisòs Krɛst. ²Vès lɛŋ də Nwì nə̀ yi Tɛ̀’ bə Tà Jisòs Krɛɛst gʉ weŋ bə̀boŋ, nə fa weŋ fifi.

Mvə̀’nə̀ Jisòos Nə̀ Kə̀ Sak Nzeŋgòŋ

³Vès tse’ ŋgòkwasə Nwì ghà nə̀ fòlòoŋ bʉ̀ʉ wèŋ, bwema avès a. Vès tse’ ŋgòkwasə yi vɛ’nə bʉ̀ʉsə̀ nsàp nə̀ wèŋ sə fa ntʉm bohòNwì nə sə kùk lòmantombì. Nə ye sə̀’ də dzədzəm àwèŋ nə̀ wèŋ tse’ bohòmòk bə mòk sə ghaha sə̀’ ghaha. ⁴Nà’a njo nə̀ vèes kùmgə̀ ŋgùŋ mvwe’ kwe’ bʉ̀ʉ cos wèŋ bʉ̀ʉ wèŋ sə. Vèes kùmgə̀ ŋgùŋ bʉ̀ʉsə̀ wèeŋ kìgə̀ ntʉm, nə sə dzəm ghaha bohòJisòs nə ghaha, ŋga wo sə tʉ̀ksə weŋ, wèŋ sə ye ŋgə’ sə̀’. ⁵Yà’sə sə nìtsə̀’ də Nwìi nə sak bə zìnə. Bʉsə̀ a ye vɛ’nə fana wèŋ ye kə̀kʉrə̀ ŋgòkə̀ ye mok mvwe’ gaŋ ŋkum ye sə̀ wèŋ sə yə ŋgə’ bʉ̀ʉ zeŋ sə. ⁶Nwìi nə gʉ yusə̀ yà’a kə̀kʉrə̀. Bʉ̀ʉ sə̀ wo sə yeŋsə weŋ ŋgə’ yà’a, yi nə̀ yeŋsə fəsə wo ŋgə’ sə̀’. ⁷Yi nə gʉ wèŋ sə̀ wèŋ sə yə ŋgə’ yà’sə ŋgòyòŋsə nə ye vès yàvès sə̀’. Yi nə̀ gʉ̀ vɛ’nə ghà nə̀ Tà Jisòs tesə tsə və̀ mʉbu bə masinjàa ye wèŋ sə̀ wo tse’ ŋàŋ. Yi nə və ndzənə ləm-mis, ⁸nə yeŋsə bʉ̀ʉ sə̀ wo ka Nwì riŋ ŋgə’, nə yeŋsə sə̀ wo à ka yusə̀ Ntirə̀ nə̀ Bə̀boŋ nə̀ Tà Jisòs à sə tsə̀’ nə bɛ’ ŋgə’ sə̀’. ⁹Ŋgə’ nə̀ wo nə ye nə də wo nə maha wà nə̀ kɛ̀’ mò’fis. Wo nə kà mvwe’ sə̀ Tà cu bə bòoŋ ŋàaŋ ye sə sə̀’ kə̀ dzèŋ yuk. ¹⁰Yè’sə nə̀ ye nùmbu nə̀ yi nə̀ və̀ ŋgòkə̀ jə kə̀kuksə̀ bohòbʉ̀ʉ ye wèŋ, fana bʉ̀ʉ sə̀ wo ànə dzəm bohòyi nə sə mərə, nə sə kwa vɛ’ɛ wùriŋ. Wèeŋ nə ye sə̀’ mʉŋgorə̀ wo anə bʉ̀ʉsə̀ wèŋ a dzəm ncèp nə̀ vès à tsə̀’ fa weŋ nə. ¹¹Nà’a njo nə̀ vèes lɛŋ fagə̀ weŋ riŋriŋ nə. Vèes lɛŋgə̀ Nwì də yi gʉ weŋ ŋgòye kə̀kʉrə̀ bə ncu nə̀ yi à to fis weŋ də wèeŋ cum nà’ nə. Vès lɛŋ də yi gʉ ntʉʉm awèŋ sə̀ wèŋ tse’ ŋgògʉ̀ bə̀boŋ yà’a təəŋ megu vɛ’nə. Yi gʉ fàak awèŋ sə̀ wèŋ sə gʉ̀ bʉ̀ʉsə̀ wèŋ a fa ntʉm awèŋ bohòyi sə kə lə kə̀kʉrə̀ bə ŋàaŋ ye. ¹²Bum yè’sə ye-a vɛ’nə fana liŋ sə̀ Tà Jisòs Krɛɛst nə boŋ bʉ̀ʉ wèŋ, wèŋ boŋ bwi bʉ̀ʉ yi sə̀’. Yè’sə vɛ’nə bə bòvə̀m nə̀ Nwì àvès nə ye Tà Jisòs Krɛst.

Yusə̀ Yà’a Nə Ye Ŋkuŋ Krɛst Bwi Və

¹Bə nzak nə̀ Tà àvès Jisòs Krɛst ŋgòbwì və̀ə də ya vesiwèeŋ be’lə yi, nə kə cum mok bəbɛ’ fana bwema am wèŋ, mʉ̀ lɛŋ weŋ, ²də kà də wèeŋ sə tsərə jʉ’rə kɛ’ca bə zeŋ vɛ’nə dʉk. Kà də wèeŋ sə saha ntʉʉm awèŋ bə ncèp nə̀ wo sə cèp də nùmbu nə̀ Tàa nə̀ bwì və̀ nə à cà lòlaŋ nà’a sə dʉk. Kàmòk à cèp vɛ’nə ŋgà tsòhòbum Nwì mòk ŋga yi də yi tse’ yumòk sə̀ Nwì à tsə̀’ yi, kè ŋwə̀ nəmòk ŋga yi sə tsòho-a nzak Nwì àlɛ’. Kàmòk bʉ̀ʉ mok wèŋ dʉk də vès à còm tumsə ŋwàk vɛ’nə vès àlɛ’. ³Kà də wèeŋ me’rə ŋwə̀ nəmòok borə fʉk weŋ dʉk. Bʉsə̀ nùmbu ànə nə kà ntòvə̀ tə̀tè tse’ ghà nə̀ bwìiŋ nə sə gʉŋtu bohòNwì wù kà fʉ̀k nà’a kə̀ dzèŋ ŋkuŋ. Anə ye sə̀’ ŋga ŋwə̀ nə̀ ŋgà ŋgwap nə yəəŋ sə̀’ ŋkuŋ. A sə̀’ yi nə̀ yi nə̀ kə̀ bisə ye ŋgwàŋ nə. ⁴Ŋgà ŋgwap ènə nə kà ŋge’ bə bum sə̀ bwìŋ kùksəgə̀ yà’ co nwì ye fʉ̀k. Yi nə bɛŋ bum sə̀ yà’a co nwì pwe’fo’. Yi nə jəŋ ni’ ye mʉbu, də yi ghak yà’ pwe’ yi. Yi nə kə ni cum mʉnə ndap Nwì nə̀ ghaŋ nə, nə sə tsok də yi Nwì yi.

⁵Mʉ̀ à tsə̀’ weŋ bum yè’sə ghà nə̀ vesùwèŋ à ye nà’a pwe’ laŋ. Wèŋ a swì laŋ à? ⁶Megu də yumok cu sə̀ yà’ sə gʉ̀ də bum yè’sə kà ŋga’a ntòye. Wèŋ rì yu ànə sə laŋ. Mvə̀k nə kʉ̀rə nùu fana ŋgà gʉ̀ ŋgwap nə nə yəəŋ. ⁷Fàak ŋgwap sə sə fàk ŋga’a yè’e ntòsə̀swihì megu də yusə̀ yà’a nə̀ ye sə nə kà nto ye tə̀tè wo fis gɛsə ŋwə̀ nə̀ yi sə təəŋ lok yà’ nə fo’ ŋkuŋ. ⁸Ŋgà ŋgwap nə yəəŋ ghà ànə, fana Tà Jisòos nə kə zə nà’ bə yòŋsə̀ nə̀ nje nə̀ yi yòŋsə fis tsə kə̀ cùhu yi. Ghà nə̀ Jisòos nə və̀ nə, yi nə gʉ bʉpsə nà’ bə ŋàaŋ ye sə̀ yi yəəŋ və̀ bə zeŋ sə.

⁹Ŋgà ŋgwap nə nə və bə ŋàaŋ Satà, nə sə gʉ kɛ’ca nsàap maŋgəŋgèeŋ mok ŋgòbòrə bwìŋ fo’ vɛ’ɛ nduk nə̀ nduk. Yi nə sə gʉ niŋ kɛ’ca fa bwìŋ nsàap bum mok sə̀ co wu kʉk yà’ tu jip wu. ¹⁰Yi nə borə bʉ̀ʉ sə̀ wo nə̀ bisə wà sə wèŋ bə jòŋ. Bʉ̀ʉ yè’sə wèeŋ nə̀ bisə njo nə̀ wo à ka ncèp nə̀ zìnə nə ya wo tse’ lùŋ bʉ̀ʉ zeŋ nə dzəm. ¹¹Bʉsə̀ wo a gʉ̀ vɛ’nə fana Nwìi nə̀ gʉ wo ŋgòtsərə mègù bum bə jòŋ, nə sə dzəm sə̀’ zeŋ, ya wo sə dzəm megu mok bum sə̀ yà’a mvwès. ¹²Nwìi nə̀ gʉ̀ vɛ’nə ya bʉ̀ʉ sə̀ wo à ka zìnə nə dzəm, nə sə kwa yàwo ŋgògʉ̀ bʉp yà’a wèeŋ nə gbʉ nzak bohòyi.

Pol Kwɛ’sə Bʉ̀ʉ Tètàlonikà Də Wo Təəŋ Gʉgʉŋ

¹³Vès tse’ ŋgòkwasə tsə Nwì nə ghà yà lòoŋ bʉ̀ʉ wèŋ, bwema avès a. Vès sə dʉk wèŋ sə̀ Tà nə dzəm weŋ yà’a. Nwì ànə yeto, yi cok fis weŋ də wèeŋ nə tse’ lùŋ. Yi à gʉ̀ vɛ’nə bə ŋàaŋ yòŋsə̀ nə̀ nje nə də ya wèeŋ ye bʉ̀ʉ ye wèŋ sə̀ wèeŋ rərɛŋ. Yi à gʉ̀ vɛ’nə sə̀’ bə mandzə̀ nə̀ də wèŋ à dzəm ncèp nə̀ nà’a zìnə nə sə̀’. ¹⁴Nwì ànə to və weŋ yè’sə bə mandzə̀ Ntirə̀ nə̀ Bə̀boŋ nə̀ vès à tsòho fa weŋ nə. Yi à to weŋ yà’sə də ya wèeŋ tse’ fis ma njàwèŋ sənə kə̀kuksə̀ nə̀ Tà Jisòs Krɛst àvès nə sə̀’. ¹⁵Ye də bwema àvès, wèeŋ təəŋ gʉgʉŋ, nə kotse’ bum sə̀ vès à tsə̀’ wèŋ yà’ sə̀ bə cù kè vès à còm fa-a weŋ bə ŋwàk àlɛ’ pwe’fo’ cʉ̀k. ^16-17Tà Jisòs Krɛst àvès, nə ye tɛ̀’ àvès Nwì a dzəm ves nə fisə fa ves ntʉʉm avès, nə fa ves ŋàŋ ŋgòcèep nə gʉ megu yusə̀ yà’a bə̀boŋ. Nwì a nìtsə̀’ fa ves dzədzəm ye ya a sə lo mantombì, nə kà kə̀ mèsə̀ yuk. Yi à gʉ̀ ves ŋgònaaŋ tu də a nə̀ kə̀ tse’ bum sə̀ bə̀boŋ. Wo a gʉ̀ vɛ’nə bə bòvə̀m njàwo nə.

Wèeŋ Sə Lɛŋ Fa Ves

¹Ŋgòlə̀sə lòo fana bwema avès, vès də wèeŋ sə lɛŋ fa ves. Wèeŋ sə lɛŋ fa ves də ncèp nə̀ Tà nə, nà’a sə lo mantombì nə̀nàk nə̀nàk, nə sə fom mvə̀’nə̀ ànə ye bohòwèŋ yà’a. ²Wèeŋ sə lɛŋ fa ves mok sə̀’ də Nwìi caŋsə fis ves ndzə bohòŋgàa gʉ̀ ŋgwap bə bʉ̀ʉ sə̀ bʉp wèŋ. Vès dʉk vɛ’nə bʉ̀ʉsə̀ sə kà ncèp ènə bwìŋ pwe’fo’ dzəm wes. ³Yusə də Tà a ye zìnə. Yi nə gʉŋsə weŋ, nə caŋsə gɛsə weŋ mvwe’ Satà nə̀ yi ŋwə̀ nə̀bʉp nə. ⁴Tà a gʉ̀ ves, vès kà məmərə̀ sə ntʉʉ̀ vès bʉ̀ʉ wèŋ tse’ lok. Vès rì pap də wèeŋ nə sə gʉ tse’ megu bum sə̀ vès də wèeŋ gʉ. ⁵Vès lɛŋ də Tàa gʉ bʉsə ntʉʉm awèŋ ya wèeŋ dzəm bohòNwì, nə fa weŋ kontʉm nsàp nə̀ Krɛst.

ŊgòCu Ncu Wɛ’ Ka Bə̀boŋ Yeŋ

⁶Yumook yè’, bwema avès, vès cèp yè’sə bə liŋ Tà Jisòs Krɛst, də ka də wèeŋ sə be’lə bə bwema sə̀ wo dzəm ŋgòcu ncu wɛ’ dʉk. Vès sə dʉk bʉ̀ʉ sə̀ wo sə kà mandzə̀ nə̀ vès à yə’rə weŋ yù yà’a. ⁷Wèŋ riŋ yàwèŋ sə̀’ də wèŋ tse’ ŋgòfʉ̀’rə mandzə̀ ncu àvès. Ghà nə̀ vesùwèŋ à ye nà’a, vès à ka ŋgàa wɛ’ yeŋ. ⁸Vès à ka yu ŋwə̀ nəmòk ŋga vès ka lak zʉ yuk. Vès à fàk vɛ’ɛ, nə ci’ ndùrə̀ nə̀ maràŋ bə ndzəmə̀ pwe’, də ya vèes kà ŋwə̀ nəmòk ŋgə’ wà yamsə̀ fa. ⁹Vès à sə gʉ̀ vɛ’nə yè’sə, vès à dzəm-a də wèeŋ fa ves, yumok yà’ kà bə jòŋ sə̀’ ye. Vès à gʉ̀ yè’sə ŋgògʉ̀ nì fa weŋ ya wèeŋ bɛ’ sə̀’ zeŋ. ¹⁰Vesùwèŋ ànə ye fa’ vès tsok weŋ sə̀’ laŋ də, <<A ye-a ŋga ŋwə̀ nəmòk dʉk-a də yi kà fàk fàk, yi kà sə̀’ zʉ.>> ¹¹Vès sə cèp yè’sə bʉ̀ʉsə̀ vès yuk də bʉ̀ʉ mok cu mʉŋgorə̀ wèŋ sə̀ wo sə cu yàwo ncu wɛ’. Wo kà yumok fàk, nə sə dzəm megu ŋgògbʉ̀ ni kɛ’cà sənə bum bʉ̀ʉ mok wèŋ. ¹²Vès sə cèp yè’e bohònsàp bʉ̀ ànə ŋgòtip wo bə liŋ Tà Jisòs Krɛst də, wo ko ni’, nə fak zʉ bə bo awo. ¹³Nə ye də kà də wèeŋ wo ŋgògʉ̀ bə̀boŋ dʉk, bwema avès a. ¹⁴A ye-a ŋga ŋwə̀ nəmòk bɛ̀ŋ ncèp nə̀ vès còm fa weŋ ndzənə ŋwàk nè’e fana wèŋ kʉk tasə tse’ yi bə̀boŋ, nə kà yumok wenə wèŋ tse’ be’lə̀ lok. Wèeŋ gʉ vɛ’nə ya marè’tu ko ŋwə̀ ànə. ¹⁵Nə ye sə̀’ də wèŋ kà yi co yi ŋwə̀ nə̀ wèŋ bɛ̀ŋ yi bɛ̀ŋnə gʉ̀. Wèeŋ tip yi lɛ co yi ye sə̀’ moma awèŋ.

Cə̀cèpsə̀ Nə̀ Nà’ Lə̀sə

¹⁶Vès lɛŋ də Tà nə̀ yi fagə̀ fifi yi nə fa weŋ fifi, yi bə tu ye. Yi fa weŋ fifi bə mandzə̀ nə̀ fòlòoŋ ghà yà lòoŋ sə̀’. Tà nə ye bohòwèŋ pwe’fo’. ¹⁷Mʉ̀ʉ Pol, mʉ̀ còm fa weŋ cə̀cèpsə̀ ènə mʉ̀ bə bo sə̀ yàm. Nè’e yu nə̀ wu yə nà’ ndzənə ŋwàk, wù riŋ də còm ŋwàk ànə mʉ̀ nə. Ye’e mvə̀’nə̀ mʉ còmgə̀ yàm sə. ¹⁸Mʉ̀ lɛŋ də bə̀bo nə̀ Tà Jisòs Krɛst àvèes ye bohòwèŋ pwe’fo’.