2 PITÀ

Ŋwàk nə̀ Ba

nə̀ PITÀ à Còom

Pità à còm ŋwàk nə̀ ba ènə ŋgòcèp bə mvwèes sə̀ bʉ̀ʉ mok wèŋ sə yə’rə yà’ mʉ cos nə sə. Wo à sə dʉk də Jisòos nə kà mok bwì və̀. Yi sə tsok fa wo də Jisòs sə cu mam vɛ’nə bʉ̀ʉsə̀ yi ka dzəm də ŋwə̀ nəmòok bisə dzəm, yi sə fa mandzə̀ də ndàaŋwè pwe’ bʉʉŋ gɛsə mvwe’ bʉp awo ŋkuŋ ya yi bwi foho və.

¹Còm ŋwàk nè’e mʉ̀ʉ Saimʉ̀ Pità, nə̀ mʉ mo ŋgà fàk Jisòs Krɛst nə ye sə̀’ ŋgà gə̀ ntum ye. Mʉ̀ sə còm fa nà’ bohòwèŋ bʉ̀ʉ sə̀ wèŋ a fa ntʉm awèŋ bohòyi yà’a. Jisòs Krɛst nə gʉ̀gə̀ bum ye pwe’ bə mandzə̀ nə̀ kə̀kʉrə̀ də ya vesùwèeŋ fa ntʉm bohòyi. Nsàp yu nə̀ yi a gʉ̀ fa weŋ nə yà’ bòkʉ̀rə bə sə̀ yi a fa vès sə. Jisòs Krɛst nə Nwì nə ye sə̀’ ŋgà lùŋsə̀ ves. ²Mʉ̀ lɛŋ də mvə̀’nə̀ wèŋ sə rì lòTà Jisòs nə ye Nwì fana, Nwìi nə gʉ də bə̀bo ye bə fifi ye yam ghaha bohòwèŋ anə yamə.

Wèeŋ Cum Ncu Nə̀ Co Nà’ Niŋ Də Nwì A To Weŋ Laŋ

³Nwì nə a jə ŋàaŋ ye sə̀ ghaŋ sə, nə fa vesùwèŋ bum sə̀ a sə dzəm yà’ pwe’ ŋgòcu ncu nə̀ bə̀boŋ, nə̀ co nà’ gʉ Nwì kwa. Yi a gʉ̀ də vesùwèeŋ tse’ bum yè’sə bə mandzə̀ nə̀ də vès rì ŋwə̀ nə̀ yi a to ves nə. Yi a to ves bʉ̀ʉsə̀ yi maŋgəŋgèŋ nə ye sə̀’ bə̀boŋ. ⁴Yi a gʉ̀ vɛ’nə fana ye də yi fa vesùwèŋ bum sə̀ yi ànə kak ves yà’, sə̀ yà’ tse’ swe’ bohòvesùwèŋ wùriŋ sə. Yi à gʉ̀ vɛ’nə də ya wèeŋ swirə bʉp nə̀ nà’ cu sənə nzeŋgòŋ nə, nə̀ nà’ sə tesə və̀ bohòbʉp sə̀ bwì sə dzəm yà’ sə, fana nə tse’ lɛ nsàp ntʉm nə̀ nà’a co nə̀ Nwì.

⁵Ye də mvə̀’nə̀ wèŋ a fa ntʉm awèŋ bohòJisòs fana yà’a kà fa’nə lə̀ təəŋ. Wèeŋ jihi nzòŋ gʉgʉŋ, nə yamsə naaŋ gesə bum mok sə̀ bə̀boŋ mbwa; wèeŋ ye də wèŋ yamsə naaŋ də wèeŋ kà sənə bʉp nə̀nàk gbʉ̀ ni. Nə yamsə naŋ fe’lə ŋkərə̀ nə̀ ŋgòrì bum sə̀ ma nə̀ Jisòs. ⁶Anə kà ŋkərə̀ mègù, wèeŋ yamsə naaŋ fe’lə nə̀ ŋgòko ni’ awèŋ mbwa sə̀’. Wèeŋ sə ko ni’ fana wèŋ yamsə naŋ gesə kontʉm mbwa. Wèeŋ sə ko ntʉm, wèŋ yamsə naaŋ fe’lə ŋgògʉ̀ bum sə̀ yà’a bə mandzə̀ Nwì pwe’. ⁷Wèeŋ sə gʉ̀ bum sə̀ yà’a bə mandzə̀ Nwì sə fana wèŋ yamsə naaŋ nə̀ ŋgòjə ndàaŋwè pwe’ co moma yo. Wèeŋ sə jə ndàaŋwè pwe’ vɛ’nə fana wèŋ yamsə naaŋ nə̀ ŋgòdzəm bwìŋ mbwa sə̀’. ⁸A ye-a ŋga wèŋ sə gʉ̀ bum yè’sə, nə sə gʉ ghaha yà’ ghaha fana ye də mvə̀’nə̀ wèŋ a rì Tà àvès Jisòs Krɛst sə nə kà wà ye, ncu awèŋ nə nə tse’ fàk bə̀boŋni. ⁹Bʉ̀ʉ sə̀ wo sə kà-a yàwo vɛ’nə gʉ̀ fana wo co ŋwə̀ nə̀ yi kà sə̀sap yə gèsə̀gə̀, wo co ŋwə̀ nə̀ lis ye à loho laŋ. Wo a swì bisə də Jisòs à cùk fis fa wo bʉp awo sə̀ wo à gʉ̀ sə laŋ.

¹⁰Bwema am wèŋ, bum yè’sə nə yeè nə vɛ’nə fana mʉ̀ lɛŋ weŋ wùriŋ də wèeŋ jihi nzòŋ, nə gʉ ŋga yà’a niŋtsok də Nwì a to cok fis jəŋ weŋ də ya wèeŋ ye bʉ̀ʉ ye wèŋ anə zìnə. Wèeŋ gʉ̀-a vɛ’nə fana wèŋ kà maŋkwɛ̀ŋ gbʉ̀ fohòlòyuk. ¹¹Yà’a mvwe’ sə̀ Nwìi nə muk fa li weŋ mandzə̀ nə̀ ŋgòkə̀ ni mvwe’ gaŋ ŋkum sə̀ Tà àvès Jisòs Krɛst, nə̀ yi sə̀’ ŋgà lùŋsə̀ vès nə; fana a cum mam mok vesi wèŋ nə̀ mvèsə̀.

¹²Bum yè’sə nə yeè nə vɛ’nə fana mʉ̀ dzəm də mʉ sə tsərə fa weŋ yà’. Mʉ̀ rì sə̀’ də wèŋ a rì zìnə nə sə̀’ laŋ, nə sə təəŋ nə bə zeŋ sə̀’ gʉgʉŋ. ¹³Megu də nə̀ mʉ̀ cu tse’ ntòfo’ bə lis nè’e fana yà’ sə bòmʉ yàm də mʉ sə tsərə fa weŋ yà’ ghà yà lòoŋ, ya ŋga wèeŋ ye mali bə zeŋ cəcuŋ. ¹⁴Mʉ̀ rì də ka mok sə̀sap cum fe’lə ya mʉ fweŋ mak gɛsə ŋgùpni’ nè’e fo’. Mʉ̀ rì vɛ’nə bʉ̀ʉsə̀ Tà àvès Jisòs Krɛst a tsə̀’ mʉ vɛ’nə yi jəja. ¹⁵Mʉ nə jihi nzòŋ, nə lap noŋsə fa weŋ mandzə̀ nə̀ co də a ye-a ŋga mʉ̀ kpʉ lòyàm sə̀ laŋ fana wèŋ sə tsərə mali bum yè’sə fo’.

Vès Sə Tsə̀’ Ka Bum Sə̀ Ŋwè Tsərə Kok Yeŋ

¹⁶Vès a tsə̀’ fa weŋ mvə̀’nə̀ Tà àvès Jisòs Krɛst ànə tesə və bə ŋàŋ yà’a laŋ. Bum sə̀ vès a tsə̀’ fa weŋ yà’sə, ka ncèep cùu sə̀ wà sə̀ bwìŋ a tsərə kok gù yà’ bə ŋkərə̀ə yàwo, nə sə cep yeŋ. Yà’a yumok sə̀ vès a yə ŋàaŋ ye sə bə lis avès. ¹⁷Ghà nə̀ Tà Nwì ànə yamsə yi, nə kuksə yi nə, à ye ŋga vèes sə̀’ fo’. Vès à yuk mvə̀’nə̀ Nwì nə̀ yi yam càsə ndàaŋwè pwe’ yi nə à sə cèp də, <<Nè’e mo àm nə̀ mʉ̀ dzəm yi, yi gʉ̀gə̀ ntʉm àm sə kwa wùriŋ.>> ¹⁸Vès à ye mʉmvwe’ nda nə̀ Nwì ànə və mbwa nà’a ves Tà Jisòs wèŋ bəbɛ’, nə yuk ŋgì nə mvə̀’nə̀ nà’ sə cèp vèsə mʉbu bə ntu’ avès.

¹⁹Vesùwèŋ rì tse’ ŋga’a mok pap də bum sə̀ ŋgàa tsòhòbum Nwì wèŋ sə̀ njamòk à cèp sə yà’a zìnə bʉ̀ʉ bum sə̀ vès a yə yè’sə. Ye də anə boŋ bohòwèŋ wùriŋ ŋga wèŋ fa-a ŋkərə̀ awèŋ bohòncèp ènə, bʉ̀ʉsə̀ nà’a co laàm nə̀ nà’ sə rɛŋ mvwe’ ndzəndzəm tə̀tè kə dzeŋ ghà nə̀ tsok sə də a rɛŋ. Ghà nə̀ sɛ̀tsok kok kàmòk fana wèŋ ye rɛɛŋ wes bum sə ntʉʉ̀ wèŋ anə. 1:19 Sɛ̀tsok nə̀ wo sə to nè’nə, a Jisòs, bʉ̀ʉsə̀ ndzənə ŋwàk Bum sə̀ Nwì a Nìtsə̀’ Fa Jon 22:16, fana wo to Jisòs sə̀’ bə liŋ yà’sə vɛ’nə.²⁰Yusə̀ gʉgʉŋ sə a də wèeŋ riŋ də, bum sə̀ ŋgàa tsòhòbum Nwì wèŋ à cèep, nə com ndzənə ŋwàk Nwì sə à ka yumok sə̀ bwì à tsərə kok yà’ sə və̀ə wo bə ŋkərə̀ nə̀ njàwo yeŋ. ²¹Ncèp nə̀ ŋgàa tsòhòbum Nwì wèŋ à cèep nə wo à ka nà’ bə ŋàaŋ yàwo cep, Yòŋsə Nwì ànə ni sə ntʉʉ̀ wo ŋkuŋ nà’ sə gʉ wo, wo cep bum sə̀ yà’ sə tesə və̀ bohòNwì.

Jəŋ Ŋkərə̀ Bə Mvwèes Sə̀ Bʉ̀ʉ Mok Sə Yə’rə

¹Ànə ye to mantombì fa’, bʉ̀ʉ sə̀ wo à sə dʉk də wo sə tsòho bum Nwì ŋga wo sə cì’ mvwès wèŋ à ye mʉŋgorə̀ bʉ̀ʉ Nwì wèŋ. Yà’a niè’ sə̀’ vɛ’nə də bʉ̀ʉ sə̀ wo yə’rə fagə̀ bwì mvwès wèeŋ nə ye mʉŋgorə̀ wèŋ sə̀’. Wo nə wooŋ və, nə sə yə’rə fa bwìŋ yəyə’rə̀ nə̀ bə jòŋ nə̀ nà’a nə gʉ bʉpsə bwìŋ. Wo nə dzeeŋ masà àwo nə̀ yi ànə kə tiŋ və tu awo yi nə mwè. Anə kà sàp fana nsàp ŋgə’ nə̀ bʉp nə və mʉ tuhù wo bʉ̀ʉ nsàp yu nə̀ wo sə gʉ̀ ànə. ²Bwìŋ ŋkʉ̀ʉŋ nə bɛ’ mandzə̀ awo nə̀ jì marè’tu nə. Bʉ̀ʉ yè’sə wèeŋ nə gʉ bwì wo sə cèp bum sə̀ bʉp bə mandzə̀ Nwì nə̀ nà’a zìnə nə. ³Ŋgàa yə’rə̀ fa bwì mvwès yè’sə wèeŋ dzəm mègù də wo tse’ bum pwe’fo’ wo. Fana wo sə borə kɛ’ weŋ bə mvwès də ya wo tse’ swe’ awo fo’. Ŋwə̀ nə̀ yi sakgə̀ nzak ànə fʉhʉ ye ntinə bʉ̀ə̀ ŋgòyeŋsə wo ŋgə’. Anə kà sàp fana yi mesə wo pwe’fo’.

⁴Ja’a na yàwèeŋ yusə̀ Nwì ànə gʉ mvə̀’nə̀ masinjàa Nwì mok wèŋ ànə gʉ bʉp yà’a nɛ̀. Yi à ka wo wà me’rə. Yi à ko màk gèsə wo mvwe’ ŋgə’ nə̀ sə misə̀. Wo nòca bə kwaŋ, ndzəm sə seŋ ca sə̀’ ŋkʉŋ. Wo nə cum mam ca vɛ’nə tə̀tè kə wɛs nùmbu sak nzak. ⁵Bʉ̀ʉ sə̀ njamòk sə̀ wo à gʉ̀ bʉp yà’a, yi à ka wo wà sə̀’ me’rə. Yi ànə gʉ ndzəp rwiŋ, nə zə wes wo. Bʉ̀ʉ sə̀ yi ànə gʉ yumok kà wo gʉ̀ sə, à ye mègù Nuà nə̀ yi à sə tsòho fa bwì də wo gʉ yusə̀ yà’a bə̀boŋ. À swìrə mègù Nuà nə bə ndap ye, wo à ye bwìŋ sàmba. ⁶Bʉ̀ʉ sə̀ wo à sə cugə̀ mvwe’ lak Sodòm bə Gòmorà yà’a wèŋ à gbʉ̀ nzak bohòNwì sə̀’. Nwì à tɛ̀ və̀psə lak yà’sə pwe’ nə̀ pwe’. Yi à gʉ̀ vɛ’nə ŋgònì fa bʉ̀ʉ sə̀ wo nə̀ kà bohòyi yuk də yi nə̀ kə̀ yeŋsə yà’ ŋgə’ ntsə’mòk. ⁷Yi ànə caŋsə gɛsə megu Lot yiìyi, nə̀ yi à sə bɛ’ ye mandzə̀ nə̀ nà’a zìnə. Lot nə à sə yəgə̀ nsàap bʉp sə̀ lak yà’sə wèŋ à sə gʉ̀gə̀ə fana ntʉm sə yaa yi. ⁸Yi à sə cugə̀ mʉtsətsə’rəə bʉ̀ʉ sə̀ bʉp yà’sə wèŋ, nə sə ye bʉp sə̀ wo à sə gʉ̀ʉ sə nùumbu pwe’. Yi à sə yukgə̀ bum sə̀ bʉ̀ʉ sə wèŋ à sə cèep sə sə̀’. Bʉp sə̀ bʉ̀ʉ sə wèŋ à sə gʉ̀ʉ sə à sə yaaŋ bʉp yi sə ntʉʉ̀ co wù kà fʉ̀k, bʉ̀ʉsə̀ yi à ye ŋwə̀ nə̀ yi à sə bɛ’ ye mandzə̀ nə̀ nà’a kə̀kʉrə̀. ⁹Bum yè’sə sə nì fa vesùwèŋ də Tà Nwì rì mandzə̀ nə̀ aco yi noŋsə bʉ̀ʉ ye wèŋ ya wo swirə ŋgə’ nə̀ nà’a nə̀ kə̀ və̀ nə. Bum yè’sə sə nì fa vesùwèŋ sə̀’ də yi rì mvə̀’nə̀ aco yi sə gʉ ŋgàa gʉ̀ bʉp wèŋ tə̀tè kə wɛs nùmbu nə̀ yi nə sak yà’wèŋ, nə yeŋsə wo ŋgə’. ¹⁰Bʉ̀ʉ sə̀ wo nə̀ yə ŋgə’ ènə nə casə bwìŋ pwe’, a nsàap bʉ̀ʉ sə̀ wo gʉ̀ mègù yàwo yusə̀ ntʉʉm awo sə dzəm də wo gʉ yà’a; nə ye fe’lə bʉ̀ʉ sə̀ wo bɛ̀ŋgə̀ ŋgòyuk bohòbʉ̀ʉ sə̀ yà’wèeŋ mantombìi wo.

Ŋgə’ Nə̀ Nà’ Sə Tə’ Bʉ̀ʉ Sə̀ Wo Sə Gʉ̀ Bʉp

Bʉ̀ʉ yà’sə wèeŋ kà yumok wəpgə̀ nə ye sə̀’ gʉgʉtu. Wo kà yòŋsə̀ə sə̀ bwìŋ tse’ ŋgòwəp wo yà’a sə̀’ wəp, wo sə yak yà’ yàak. ¹¹A mègù-a sə̀ masinjàa Nwì wèŋ sə̀ wo gʉ ghak ŋgàa yə’rə̀ fa bwìŋ mvwès yè’sə, wo kà liŋ yòŋsə̀ə sə mantombìi Tà yàkgə̀. ¹²Bʉ̀ʉ yè’sə wèŋ cèpgə̀ yusə̀ bʉp bə yumok sə̀ wo ka bə zeŋ rɛɛŋ. Wo sə gʉ̀ bum bə mandzə̀ ləm, co nàam ŋgaŋ sə̀ wo kʉ̀rə mègù ŋgòtəm zə wo təmə. A zìnə də mvə̀’nə̀ wo sə bʉpsə bʉ̀ʉ mok yà’sə, wo nə̀ kə̀ kpʉ màha ntsə’mòk wà. ¹³Ŋgə’ nə̀ wo sə fa bwìŋ ànə, Nwìi nə̀ làk fəsə wo sə̀’ bə ŋgə’. Bʉ̀ʉ yè’sə wèŋ sə dzəm mègù ŋgògʉ̀ yusə̀ ni’ awo sə dzəm yà’. Bum sə̀ ndzəmə̀, wo sə gʉhʉ yàwo yà’ maràŋ kwaŋ. Nsàp mandzə̀ àwo ànə sə jə və̀ marè’tu bohòbʉ̀ʉ Nwì wèŋ wù kà fʉ̀k. Wo zʉ be’ləgə̀ zʉzʉ wenə wèŋ mvwe’ mò’fis, wo sə wooŋ lo mali ŋgòkə̀ gʉ̀ bʉp, nə sə kwa bə zeŋ. ¹⁴Wo jə mvə̀k àwo pwe’ ŋgòtsərə mègù bə nza’ ko nto, wo gʉ bʉp, nə kà wòlok. Wo yə bʉ̀ʉ sə̀ wo ka gʉgʉŋ bə bum sə̀ ma nə̀ Nwì yeŋ fana wo borə yà’ ŋgòmè’rə mandzə̀ nə̀ Nwì nə. Wo à ləəŋ yàwo bə nsàp nə̀ ŋgòtsərə də wo tse’ megu bum pwe’ wo nà’a laŋ. Nsàp bʉ̀ ànə a gbʉ̀ nzak bohòNwì tè. ¹⁵Wo a mè’rə mandzə̀ nə̀ rərəŋ nə, nə bɛ’ lònə mok nə̀ bə jòŋ. Wo a bɛ’ lòmok mandzə̀ Balàm nə̀ mo Biyònà’a. Balàm nə à ye ŋwə̀ nə̀ yi à sə kwa ŋgògʉ̀ yusə̀ bʉp ya yi tse’ mbàm fo’. ¹⁶Ànə geŋ Nwì nə jwa sa’rə yi bə bʉp ye nə. Ànə ye də mvomndè’ nə̀ yi kà cù cèpgə̀ nè’e à cèp bohòyi co ŋwè sə cèp yi. Yi à cèp vɛ’nə, nə gʉ ŋgà tsòhòbum Nwì nə yi teŋsə ŋgògʉ̀ yu ləm yè’sə.

¹⁷Ŋgàa mvwèes yè’sə wèŋ mègù co mvwe’ sə̀ ndzəp à sə tesəgə̀ fo’, nə yum bisə lo. Wo mègù sə̀’ co mbàk nə̀ fə̀fə̀ kə̀ bwì’ samsə nà’ ŋga nà’ ka mbʉ̀ŋ ntòli. Nwì a fʉ̀hʉ nòŋsə fa wo mvwe’ ŋkəŋkɛs ndzəm nə̀ wo nə̀ kə̀ cu fo’ laŋ. ¹⁸Wo cèp fomsə bòŋsə ncèep sə̀ wà kə̀ cùhu wo, nə sə lap ŋgòbòrə bʉ̀ʉ sə̀ wo sə də wo me’rə mandzə̀ bʉ̀ʉ sə̀ wo ka Nwì riŋ sə. Wo sə làp ŋgòbʉ̀sə yà’wèŋ vɛ’nə də ya yà’wèeŋ sə gʉ megu bum sə̀ yà’ sə bòni’ awo sə. ¹⁹Wo sə kak fa bʉ̀ʉ yà’sə wèŋ də yà’a nə cum bə tu yà’ mvə̀’nə̀ yà’ dzəm, ŋga wo sə̀ wo sə cèp sə cu ŋkwɛ̀ŋ bohòbʉp. A vɛ’nə bʉ̀ʉsə̀ yusə̀ yà’a ko kìiŋ tse’-a ŋwè lòoŋ, ye də ŋgə̀ŋgàŋ cu ŋkwɛ̀ŋ bohòyu ànə. ²⁰A ye-a ŋga bʉ̀ʉ sə̀ wo ànə riŋ me Jisòs Krɛst nə̀ yi Tà nə ye ŋgà lùŋsə̀ vès, nə caŋ tesə sənə bum nzeŋgòŋ sə̀ aco yà’ bʉpsə ŋwè sə fana nə kə gbʉ ni ca sə̀mok; ye də ncu àwo nə̀ maŋkwɛ̀ŋ nə bʉp càsə mvə̀’nə̀ wo à ye to mantombì. ²¹A ye-a vɛ’nə ye də ànə boŋ ghak lɛ co wo kà mandzə̀ nə̀ zìnə nə rì yuk, nə noŋsə də wo rì wes yà’ làaŋ, nə me’rə fe’lə lʉ̀ʉk Nwì sə̀ rərɛŋ sə, nə kà yà’ mok bɛ’. ²²Nsàp nə̀ wo gʉ̀ ànə sə nì də ncèp nə̀ bwìiŋ cèpgə̀ nə nà’a zìnə. Ncèp nə̀ də, <<Ŋgbʉ lu, nə kə te’ zʉ fe’lə yà’ sə̀mok.>> Ncèp mòk ye sə̀’ də, <<Wo cùk fa ŋgùnaŋ ni’ də ya yi ye rərɛŋ, yi bwi lo, nə kə nooŋ dzərə sənə mwɛ̀’ sə̀mok.>>

Jisòos Nə Və Tsooŋ Mvə̀’nə̀ Yi À Kàk Nə

¹Ŋge’ am wèŋ, nè’e ŋga’a ŋwàk àm nə̀ ba nə̀ mʉ̀ còm fa weŋ. Ndzənə ŋwàak am sə̀ ba sə pwe’fo’, mʉ̀ a sə làp mandzə̀ ŋgòtsərə fa weŋ bum yè’sə, ya wèeŋ riŋ tse’ yusə̀ yà’a rərəŋ sə. ²Mʉ̀ a còm bum yè’sə ya wèeŋ sə tsərə ncèep sə̀ ŋgàa tsòhòbum Nwì sə̀ rərɛŋ wèŋ à cèp njamòk də yà’a nə̀ kə̀ ye ntsə’mòk sə. Wèeŋ sə tsərə tse’ lʉ̀ʉk sə̀ Tà Jisòs nə̀ yi sə̀’ ŋgà lùŋsə̀ vès, à tsə̀’ weŋ cùhu ŋgàa ntum ye sə̀ yi à tum yà’ də wo kə tsok wèŋ ŋgògʉ̀ʉ yà’a. ³Yusə̀ mʉ̀ sə dzəm də wèeŋ riŋ to sə də, ghà nə̀ nzeŋgòŋ nè’e kʉəp ŋgòmèe fana bwìiŋ nə tesə və sə̀ wo nə sə gʉ bum mvə̀’nə̀ bòwo. Bʉ̀ʉ yè’sə wèeŋ nə sə ywi ncèp nə̀ Nwì nə. ⁴Wo nə sə dʉk də, <<Jisòs ànə kak də yi nə bwi və sə̀mok àlaa? Yi nə yeè nə fò? Tɛ̀’ avès wèŋ à kpʉ wes lòntinə bʉ̀ə̀, bum pwe’ cu malì mvə̀’nə̀ yà’ ànə ye to mantombì; yumok nə̀ mò’fis ka kupsə lok.>> ⁵Bʉ̀ʉ sə̀ wo sə cèp vɛ’nə yè’sə, wo dzəm tsə mègù wo ŋgòbɛ̀ŋ də Nwì ànə cep bə cù wà fana ntòbu bə nze tesə və. Yi ànə gʉ nzeŋgòŋ nə bə ndzəp fana a yà’sə də nzeŋgòŋ à tesə ndzənə ndzəp. ⁶Yi à jə sə̀’ ndzəp, nə gʉ bʉpsə nzeŋgòŋ nə bə zeŋ ghà nə̀ ndzəp ànə rwiŋ nə, nə ses lok nzeŋgòŋ nə pwe’ nà’a. ⁷Nwìi nə sə nòŋsə ntòbu bə nzeŋgòŋ sə̀ yà’ cu ŋga’a fo’ yè’e sə̀’ bə ncèp ye nə də yà’a nə̀ cu lì vɛ’nə tə̀tè kə dzeŋ nùmbu nə̀ mis nə̀ tɛ̀ və̀psə yà’ pwe’. Yà’a nə̀ cu fo’ tə̀tè kə dzeŋ nə̀ yi nə̀ sak bwìŋ pwe’, nə ləsə bʉ̀ʉ sə̀ wo à ka mandzə̀ ye bɛ’ yà’a wèŋ.

⁸Ŋge’ am wèŋ, yumòok mò’fis nə̀ wèeŋ kà nà’ swì. Yu nə də lùumŋgòŋ ncùhù mò’fis bə nùmbu nə̀ mò’fis mègù bohòTà Nwì pwe’fo’ yəyərə̀, zəzook fo’ bʉ̀ə̀. ⁹Bʉ̀ʉ mok sə tsərə də Tà sə càsə mvə̀k ŋgwàaŋ wùriŋ, nə kà yusə̀ yi ànə kak də yi nə gʉ sə gʉ̀. Yusə də Nwì sə ko ntʉm, bʉ̀ʉsə̀ yi sə kà də ŋwə̀ nəmòok bisə dzəm. Yi sə dzəm də ndàaŋwè pwe’ kupsə, nə bwi fa bʉp awo ŋkwɛ̀ŋ. ¹⁰A ye-a sə̀ vɛ’nə fana, Tà Jisòs Krɛɛst nə̀ bwì və̀ ye və̀ə. Yi nə̀ və̀ co ŋgà yə̀ və̀ yi. Mvə̀k ànə ye, bwìŋ yuk ŋga sə cwì vɛ’ɛ nə̀bʉp, fana bum sə̀ yà’a ma mʉbu nə nom bisə wà. Bum pwe’ sə vəp wes, nzeŋgòŋ nə bə bum sə̀ yà’ cu ca sə pwe’fo’ nə nom bisə wes wà.

Fa Ni’ YòBohòNwì Nə Sə Tək

¹¹Mvəsə̀ vesùwèŋ rì də bum pwe’ nə̀ kə̀ nòm bisə vɛ’nə fana ye də a bə̀boŋ də a cum ncu nə̀ nà’a vɛ’ɛ bə̀boŋ wùriŋ. Wèeŋ noŋsə fa ni’ awèŋ bohòNwì pwe’ nə̀ pwe’, nə sə yuk yi bə bum pwe’ sə̀’. ¹²Wèeŋ sə kʉk megu lis bə nùmbu nə̀ Nwìi nə̀ və̀ nə, nə sə lap mandzə̀ ŋgògʉ̀ sə̀’ gʉgʉŋ co də nùmbu ànə kə dzeŋ nə̀nàk. Nà’nə nùmbu nə̀ ntòbu nə sə nom bisə fana bum pwe’ sə vəp wes. ¹³Megu də Nwì a kàk vesùwèŋ laŋ də yi nə gʉ ntòbu nə̀ fi bə nzeŋgòŋ nə̀ fi sə̀’, fana bum nə megu mok fo’ pwe’ sə̀ bə̀boŋ. Yà’a yusə̀ a sə kʉ̀k ŋga’a zeŋ sə.

¹⁴Ŋge’ am wèŋ, mvə̀’nə̀ wèŋ sə tək nùmbu ànə fana wèeŋ lap mandzə̀ gʉgʉŋ co yi kə̀ bwì və̀ə, yi tseŋ weŋ ŋga wèŋ ka jòŋ bohòNwì gʉ; ya weŋ Nwì wèeŋ ye cù mò’fis bə fifi. ¹⁵Wèeŋ jəŋ lɛ də njo nə̀ Tà Jisòs sə kà ntòvə̀ nə, a ŋgòfa mandzə̀ də ya ndàaŋwè pwe’ tse’ lùŋ. Tə̀tà àvès Pol nə̀ vesùwèŋ dzəm yi nà’a còm fagə̀ weŋ, yi sə tsok weŋ sə̀’ vɛ’nə bə ŋkərə̀ nə̀ Nwì a fa yi nə. ¹⁶Ndzənə ŋwàak ye sə̀ yi còmgə̀ yà’ lòoŋ, yi sə cep kum bə zeŋ mʉmvə̀’ànə. Yi còmgə̀ bum mok ndzənə ŋwàak ye sə, sə̀ yà’ gʉ ŋgòrɛɛŋ yà’. Bʉ̀ʉ mok sə̀ ŋkərə̀ə awo ka pap təəŋ, nə ye sə̀’ ŋga wo ka yumok riŋ wèŋ fana wo jəŋ ncèep ye sə, nə sə cwiŋ bʉsə yà’ mvə̀’nə̀ wo cwi bʉ̀səgə̀ ncèep mok sə̀ ndzənə ŋwàk Nwì vɛ’nə. Mvə̀’nə̀ wo sə gʉ̀ vɛ’nə fana ye də wo sə to naaŋ ŋgə’ mʉ tuhù wo.

¹⁷Ŋge’ am wèŋ, mvəsə̀ wèŋ rì yàwèŋ bum yè’sə laŋ fana wèeŋ jəŋ ŋkərə̀ də ya bʉ̀ʉ sə̀ wo sə kà yàwo mandzə̀ Nwì bɛ’ yà’a kà weŋ ma njàwo nə̀ bə jòŋ sə̀ lò. Ya kà də wo kpɛs fis weŋ mvwe’ yàwèŋ sə̀ bə̀boŋ sə̀ wèŋ tə yà’a dʉk. ¹⁸Wèeŋ gʉ lɛ nə̀ ŋgòrì ghaha lòTà àvès Jisòs Krɛst nə̀ yi ŋgà lùŋsə̀ ves, nə sə gʉŋ wesə lo mantombì bə bòvə̀m nje nə. Vesùwèeŋ fa yi kə̀kuksə̀ nə kà teŋsə̀ yuk. Yà’a ye vɛ’nə.