2 Jon

Ŋwàk nə̀ Ba

nə̀ JON à Còom

Ghà nə̀ Jon ànə com ŋwàk ènə à ye ŋga bʉ̀ʉ sə̀ wo sə yə’rə Ntirə̀ nə̀ Bə̀boŋ nə sə gìhi yə’rə lòkɛ’ nà’ mʉtsə̀. Bʉ̀ʉ mok sə̀ wo à sə yə’rə yàwo bum mvwès à sə gìhi sə̀’ vɛ’nə, fana Jon sə tip Krətèŋ wèŋ də yà’a jəŋ ŋkərə̀ bə nsàp bʉ̀ nə yà’wèŋ sə jəŋ nisə mʉ ndà’à.

Jon Cèpsə Krətèeŋ Mok Wèŋ

¹Còm ŋwàk nè’e mʉ̀ nə̀ mʉ ŋkwà’ŋwè mʉ cos. Mʉ̀ cèpsə wu, Àvà, nə̀ Nwì a swekfis wu bə bwe yo1:1 Àvà nə̀ yi ma nə̀ bə̀boŋ nə yà’a cos nə fana bwe ye sə ye yàwo krətèŋ wèŋ. A vɛ’nə sə̀’ ndzənə ŋgo nə̀ 13. sə̀ mʉ̀ dzəm weŋ sə ntʉʉ̀ mʉ̀ zìnə sə. Sə kà weŋ mʉ̀ dzəm mègù, sə dzəm weŋ bʉ̀ʉ sə̀ wo rì zìnə nə̀ Nwì nə pwe’fo’. ²Vès dzəm weŋ bʉ̀ʉsə̀ ncèp nə̀ zìnə nə cu sə ntʉʉ̀ vès, fana nà’a nə cum mali ca nə̀ mvèsə̀. ³Nwì nə̀ yi tɛ̀’ àvès bə Jisòs Krɛst mo ye gʉ̀ vesùwèŋ bə̀boŋ, wo tse’ koksə̀manziŋ bohòvès, nə gʉ vesùwèŋ ŋgòtse’ fifi sə ntʉʉ̀ vès. Bum yè’sə, vesùwèeŋ nə tse’ yà’ mʉmvə̀’nə vesùwèŋ sə bɛ’ zìnə nə, nə sə dzəm ni’ avès.

A Dzəm Ni’ Avès

⁴Mʉ̀ sə kwa nə̀ bʉp mʉmvə̀’nə̀ mʉ̀ a yuk də bwe yo mok sə bɛ’ zìnə nə̀ tɛ̀’ àvès Nwì a nìtsə̀’ fa ves nə. ⁵Àvà, yusə̀ mʉ̀ sə dzəm ŋgòcèp sə ka yumok sə̀ fi yeŋ, yà’ mègù sə̀ ncèp nə̀ vès ànə tse’ to mantombì nə də, vesùwèeŋ dzəm ni’ avès. ⁶Mandzə̀ nə̀ aco vesùwèŋ niŋ tsok də vesùwèŋ dzəm Nwì, a ŋgònòŋsə lʉ̀ʉk ye. Lʉ̀k nə̀ wèŋ à yuk mantombì nə də, wèeŋ cum ncù nə̀ nà’a bə dzədzəm.

Bʉ̀ʉ Sə̀ Wo Bèŋ Jisos Krɛst

⁷Yusə̀ yà’ gʉ̀ ŋkuŋ mʉ̀ cep vɛ’nə a bʉ̀ʉsə̀ ŋgàa cì’ mvwès a ram lòsənə nzeŋgòŋ nə ŋkʉ̀ʉŋntɛ̀ŋ. Bʉ̀ʉ yè’sə sə bɛ̀ŋ də Jisòs Krɛst à ka sə nzeŋgòŋ bə ŋgùpni’ co ŋwè və. Nsàp ŋwə̀ ànə yi yà’sə ŋgà cì’ mvwès nə, nə ye ŋgà bɛ̀ŋ Jisòs nə̀ wo à dʉk nə. ⁸Wèeŋ jəŋ ŋkərə̀ də yusə̀ wèŋ a fàk sə wèeŋ kà bə zeŋ wà kə̀ màhà. Wèeŋ jihi nzòŋ ya wo kà weŋ jipsə̀ ya wèeŋ kə tse’ lə̀làk awèŋ dak mʉmvə̀’ nə. ⁹Ŋwə̀ nə̀ yi naaŋ gèsə-a yumok mʉnə yusə̀ Jisòs a yə’rə fa bwìŋ, nə kà zeŋ yù mègù, ye də ŋwə̀ ànə ka bə Nwì yeŋ. Ŋwə̀ nə̀ yi tə mègù-a ye bə yusə̀ Jisòs a yə’rə sə fana ye də yi bə Nwì, nə ye mo ye Jisòs Krɛst wèŋ mvwe’ mò’fis. ¹⁰A yà’sə də a ye-a ŋga ŋwə̀ nəmòk və̀-a bohòwèŋ, nə sə yə’rə yusə̀ zok nə noŋsə sə̀ Jisòs à yə’rə sə fana wù kà yi mvwe’ nòoŋ fa, nə kà yi də <<Və̀ bə̀boŋ>> sə̀’ dʉk lok. ¹¹Mʉ̀ dʉk vɛ’nə bʉ̀ʉsə̀ ŋwə̀ nə̀ yi cèpsə-a nà’ ye də yi be’lə bə nà’ bə nsàp bʉp nə̀ yi sə gʉ̀ nə.

Cə̀cèpsə̀

¹²Bum mok cu ŋkʉ̀ʉŋntɛ̀ŋ sə̀ mʉ̀ tse’ ŋgòcòm fa weŋ, fana mʉ nə kà yà’ còm, bʉ̀ʉsə̀ mʉ̀ sə və̀ bə kù am ŋgòkə̀ yə weŋ, ya ŋga vesùwèeŋ yenə si bə si, nə kwa nə̀bʉp. ¹³Bwe njɛ̀’ yo nə̀ Nwì a swekfis yi sə cèpsə wu bə̀boŋ.