2 Korè

Ŋwàk nə̀ Ba,

nə̀ Pol à Còm Fa Bʉ̀ʉ sə̀ Mvwe’ Lak

KORÈ

Pol à còm ŋwàk nə̀ ba nè’nə ghà nə̀ bʉ̀ʉ mok wèŋ à sə dʉk də yi ka ŋgà ntum Jisos Krɛst nə̀ zìnə yeŋ. Mvə̀’nə̀ yi à dʉk to də yi nə kə kɛ’ cepsə cos sə nə kà mok loòfana, bʉ̀ʉ mok jəŋ nà’ nə də kaco ŋwè naaŋ tu bohòyi yeŋ. Bʉ̀ʉ mok wèŋ à yèto ŋgòcèp sə̀’ də wo ŋgàa ntum Jisòs sə̀ zìnə sə wo, də Pool ye nə̀ mvwès. Mʉmvə̀’nə̀ Pol à còom fana yi sə niŋtsok də yi dzəm ŋgòye cù mò’fis bə cos nə ya wo sə kuksə lok Nwì bə kəkwa. Megu də yi à dʉk də yi nə kà bʉ̀ʉ sə̀ wo sə jə və̀ ŋgə’ mʉ ŋgorə̀ wo anə mè’rə̀.

Pol à yèto ŋwà’ nə, nə sə tsok njo nə̀ yi ànə com ŋwà’ mòk, nə cep fəsə gesə bohòwo bə ŋàŋ, nə sə yak wo bə yà’a mwè sə. Yi sə cep fe’lə də yi sə kwa bʉ̀ʉsə̀ ncèp ye nə̀ gʉgʉŋ ènə a gʉ̀ bwìŋ ŋgòkupsə nə ye fe’lə cù mò’fis sə̀mok (ye mbʉ̀p 1:12-7:16).

Pol à lòmantombì nə cep rɛŋsə bə nza’ mbàam sə̀ wo à sə sù’ də wo tɛsə krətèeŋ sə̀ wo jìŋ, sə̀ mvwe’ nzeŋgòŋ Jùdiyà yà’a (ye mbʉ̀p 8:1-9:15). Yi à cèp lə̀sə ndzənə ŋwàk ènə ŋgòrɛŋsə fa bwìŋ də yi ŋgà ntum Jisòs nə̀ zìnə (ye mbʉ̀p 10:1-13:10).

¹Còm ŋwàk nè’e mʉ̀ʉ Pol nə̀ Nwì a fʉ̀hʉ də mʉ ye ŋgà ntum Jisos Krɛst. Ves moma àvès Timatì cèpsə weŋ. Mʉ̀ sə còm fa nà’ bohòbʉ̀ʉ cos nə̀ Nwì mvwe’ lak Korè nə ye bʉ̀ʉ Nwì mvwe’ nzeŋgòŋ Gris yà’a pwe’fo’. ²Mʉ̀ lɛŋ də Nwì nə̀ yi tɛ̀’ àvès nə ye bə Tà Jisòs Krɛɛst gʉ weŋ bə̀boŋ, nə fa weŋ fifi.

Vesùwèeŋ Yə Ŋgə’,Nwì Sə Fa Ves Fifi

³Vesùwèeŋ kwasə Nwì nə̀ yi Nwì nə ye tɛ̀’ɛ Tà Jisòs Krɛst àvès nə. Yi tɛ̀’ nə̀ yi tse’ koksə̀manziŋ, nə ye Nwì nə̀ yi gʉ̀gə̀ ndàaŋwè ŋgòtse’ ntʉm nə̀ fifi sə̀’ yi nə. ⁴Vesùwèeŋ yə-a nsàp ŋgə’ nə̀ fòpwe’ fana yi gʉ ntʉm avès ŋgòye fifi, ya ŋga vesùwèeŋ fisə to fa bʉ̀ʉ sə̀ wo sə yə nsàp ŋgə’ nə̀ fòpwe’ ntʉm yàwo sə̀’, bə nsàp fifi nə̀ Nwì a fa ves nə. ⁵Wèŋ riŋ də mvə̀’nə̀ vesùwèeŋ yə nsàp ŋgə’ nə̀ Jisòs à yə nə fana yi Jisòs nə fisə kʉrə riŋ fa ves ntʉm avès sə̀’ vɛ’nə. ⁶Vèes yə-a ŋgə’ fana ŋgə’ avès nə ye ŋgòtɛsə weŋ, ya ŋga wèeŋ tse’ lùŋ. A ye-a ŋga Nwì fisə fa ves ntʉm fana ye də yi nə fisə ntʉm yàwèŋ sə̀’ ya ŋga wèeŋ təəŋ gʉgʉŋ ŋga wèŋ sə yə-a nsàp ŋgə’ nə̀ vès sə yə ènə na. ⁷Vès sə naaŋ tu də mvə̀’nə̀ wèŋ sə yə ŋgə’ mvəsə̀ vès sə yə fana Nwì nə̀ yi tɛsəgə̀ ves nə, nə tɛsə weŋ sə̀’.

⁸Bwema am wèŋ, mʉ̀ dzəm də wèeŋ rɛɛŋ bə nsàp ŋgə’ nə̀ vès à yə mvwe’ lak Ɛsiyà. Vès à yə ŋgə’ sə baŋ ŋɛ̀ŋ fana vès tsəm də vèes nə kà bò. ⁹Vès à tsəm də kpʉ və̀ laŋ. Yè’sə ànə kumtsə’rə ves vɛ’nə ŋgògʉ̀ də vèes riŋ də, vèes cu, vès kà də vès sə cu bə ŋàaŋ yàvès tsərə̀, vès sə naaŋ megu tu lɛ bohòNwì nə̀ yi lòkoksəgə̀ bwìŋ mvwe’ kpʉ nə. ¹⁰Nwì à gèmsə ves fana yi sə gèmsə malì ves ŋga’a sə̀’, ye də vès sə naaŋ tu avès bohòyi də yi nə̀ gemsə ves mok sə̀’. ¹¹Wèŋ pwe’, wèeŋ be’lə ŋgòlɛŋ fa ves sə̀’, bʉ̀ʉsə̀ bwìŋ ye-a ŋkʉ̀ʉŋ sə̀ wo sə lɛŋ Nwì fana bwìŋ nə ye sə̀’ ŋkʉ̀ʉŋ sə̀ wo nə kwasə yi ghà nə̀ yi tɛsə ves bə yusə̀ wo lɛŋ fa ves sə.

Pol Kupsə Gì Ye

¹²Yusəmok cu sə̀ vès sə kumŋgùŋ bʉ̀ʉ zeŋ, vès sə rì sə ntʉʉ̀ vès sə̀’ də yà’a zìnə. Yu nə də ncu avès nə̀ sə nzeŋgòŋ nə a ye rərɛŋ nə ye rərəŋ. Vès à sə kà bum bə mandzə̀ nə̀ bwìiŋ tsərəgə̀ə nə gʉ̀. Vès à sə gʉ̀ yàvès bum sə̀ Nwì à nì fa ves, nə tɛsə ves də vèes gʉ yà’. Vès ànə gʉ vɛ’nə bohòwèŋ yàwèŋ sə̀’. ¹³Yusə̀ vès còm fa weŋ pwe’, mok ka nja sə̀ sə̀swihì yeŋ, yà’ mègù bum sə̀ aco wèŋ taŋ yà’ bə tu awèŋ, nə rɛɛŋ bə zeŋ. ¹⁴Megu də wèŋ ka nsàp ŋwə̀ nə̀ mʉ yàm nə pwe’ riŋ wes; mʉ̀ sə tsəm də nùmbu nə̀ Tà Jisòos bwì və̀ə fana wèeŋ nə rɛɛŋ bə̀boŋ də aco wèŋ kumŋgùŋ bʉ̀ʉ tu am mvə̀’nə̀ mʉ̀ sə kumŋgùŋ bʉ̀ʉ wèŋ sə.

¹⁵Bʉsə̀ mʉ̀ à rì də wèŋ rì mʉ fana mʉ̀ də mʉ və to ntòbohòwèŋ ŋkuŋ nə sə lo mvwe’ nzeŋgòŋ Màsìdoniyà, də ya wèeŋ kwa, nə kwa fe’lə sə̀mok bʉ̀ʉsə̀ mʉ̀ və̀ kɛ̀’ ba. ¹⁶Mʉ̀ à dʉk də mʉ cu ŋgòlòMàsìdoniyà, mʉ̀ ca nə ye ca weŋ, nə ye fe’lə weŋ ŋga mʉ̀ sə foho və̀ə, fana wèŋ tɛsə mʉ bə gì àm nə̀ ŋgòlòmvwe’ nzeŋgòJùdiyà. ¹⁷Mvə̀’nə̀ mʉ̀ ànə ka və yà’sə, ye də mʉ̀ à sə cèp basə ŋgwàŋ à? Ye də mʉ ŋwə̀ nə̀ mʉ̀ dʉk də mʉ nə gʉ yumok, mʉ̀ dzəm Ŋ̀, nə bʉʉŋ dʉk fe’lə hai’ co bʉ̀ʉ mok wèeŋ dʉkgə̀ yà’a à? ¹⁸Mʉmvə̀’nə̀ Nwìi ŋwə̀ nə̀ zìnə fana yusə̀ mʉ̀ ànə kak weŋ sə ànə ka Ŋ̀ ŋga a hai’ yeŋ. ¹⁹Njo nə̀ Jisòs Krɛst mo Nwì, nə̀ Silàs bə Timatì nə ye mʉ̀ ànə tsoho fa weŋ nə, yi ka Ŋ̀, nə bʉʉŋ fe’lə hai’ yeŋ. Yi mègù ye sə Ŋ̀, yà’ me. ²⁰Bum sə̀ Nwì à kàk yà’ pwe’fo’, yi Ŋ̀ nə̀ Nwì nə yi. Nà’a njo nə̀ vès dʉk càsəgə̀ də <<Yà’a ye vɛ’nə>> bə liŋ ye ŋgòkùksə Nwì sə. ²¹A yi Nwì ànə, nə̀ yi gʉ̀ vesùwèŋ ŋgòtəəŋ ves Krɛst wèŋ gʉgʉŋ, nə jəŋ ves ŋgòye ŋgàa fàak ye. ²²Yi a naaŋ yumok nə̀ nà’a co mvə̀k mʉni’ì vès ŋgònìtsə̀’ də vesùwèeŋ bʉ̀ʉ ye. Yu ènə yòŋsə̀ ye nə̀ yi à fa ves nà’ sə ntʉʉ̀ vès ŋgònìtsə̀’ də bum mok cu malì sə̀ yi nə fa ves yà’ ŋkuŋ.

²³Yusə də, mʉ̀ ànə ka mvwe’ lak Korè anə və vɛ’nə də ya wèeŋ kà tɛ’. Mʉ̀ to Nwì ŋgòye mʉ tuhù mʉ̀ də yusə̀ mʉ̀ sə cèp sə, a zìnə. ²⁴Kà də mʉ̀ sə cèp yè’sə də mʉ co masà mòk bə bum sə̀ wèŋ a dzəm tse’ sə dʉk, bʉ̀ʉsə̀ wèŋ tə gʉgʉŋ bə yusə̀ wèŋ a dzəm sə. Yusə də, mʉ̀ dzəm yàm də mʉ fàk vesùwèŋ fana wèŋ sə kwa.

¹Ànə geŋ mʉ̀ dʉk də mʉ kà də mʉ kə ye fe’lə weŋ ya ntʉm awèeŋ yaaŋ fe’lə sə̀mok dʉk. ²Bʉsə̀ mʉ yaŋsə-a weŋ ntʉm, ye də ŋwə̀ nə̀ yi nə gʉ mʉ yàm mʉ̀ kwa yè’sə ndà? Mègù ka sə̀’ wèŋ sə̀ mʉ̀ yaŋsə weŋ ntʉm sə yeŋ à? ³Nà’a njo nə̀ mʉ̀ ànə com fa weŋ ŋwàk fa’ nə; bʉ̀ʉsə̀ mʉ̀ də mʉ və̀ bohòwèŋ, fana wèŋ yaŋsə bwi mʉ ntʉm ŋga anə ye co wèŋ gʉ ntʉm àm kwa kwa. Mʉ̀ kwà’ də wèŋ rì tse’ zìnə də a ye-a ŋga wèŋ sə kà kwa, kaco mʉ̀ kwa yàm sə̀’ yeŋ. ⁴Mʉ̀ à còm fa weŋ ŋga mʉ̀ cu bə tsətsərə̀, ntʉm sə yaaŋ mʉ, ndzəplis sə tesə mʉ sə̀’. Yà’sə ànə ka ŋgògʉ̀ də wèeŋ sə tɛ’ yeŋ, yà’ ànə ye də ya wèeŋ riŋ də mʉ̀ dzəm weŋ vɛ’ɛ wùriŋ.

Wèeŋ Swifa Ŋwə̀ Nə̀ Yi Gʉ̀ Bʉp

⁵Ŋwə̀ nəmòk a gʉ̀-a yumok sə̀ ntʉm a yaaŋ ŋwè bʉ̀ʉ zeŋ. Yi ka yà’ bohòmʉ̀ gʉ, yi a gʉ̀ lì yà’ lɛ bohòwèŋ. Mʉ̀ ka dzəm ŋgòcèp bə zeŋ ləlà dzəm. ⁶Ŋgə’ nə̀ wèŋ bwìŋ ŋkʉ̀ʉŋ a yeŋsə ŋwə̀ ènə, nà’a kə̀kʉrə̀ bohòyi. ⁷Bòghak ŋga’a mok də wèeŋ swifa yi, nə gʉ yi co ntʉm nje fi sə̀’; bʉ̀ʉsə̀ a kà-a vɛ’nə ye, kàmòk aco yi wo wesə lo maŋkwɛ̀ŋ bə ma nə̀ Nwì nə kɛ̀’ mò’fis. ⁸Ye də mʉ̀ sə lɛŋ weŋ də wèeŋ gʉ yi ya yi riŋtse’ də wèŋ sə dzəm yi. ⁹Yusə̀ mʉ̀ ànə com fa weŋ fa’ sə ànə ye ŋgòbʉə ja’a weŋ də wèeŋ ŋgàa yuk dʉk àlɛ. ¹⁰A ye-a ŋga wèŋ swifa ŋwə̀ nəmòk yumok fana mʉ̀ swifa yi yàm sə̀’. Bohòmʉ̀ yàm mʉyu nə̀ mʉ̀ tse’ ŋgòswìfa ŋwə̀ ànə fana mʉ̀ sə swìfa yi nà’ bʉ̀ʉ tu awèŋ mantombìi Krɛst. ¹¹Yà’ ye vɛ’nə də ya Satàa kà də yi ghak vesùwèŋ dʉk, bʉ̀ʉsə̀ a rì ŋkərə̀ nje nə̀ yi gʉ̀gə̀ nə laŋ.

Ncu Bʉ̀ʉ Nwì Wèeŋ Jwɛ̀ŋgə̀ Bʉ̀ʉ Sə̀ Sə Nzeŋgòŋ

¹²Bə gì nə̀ mʉ̀ ànə lo mvwe’ lak Truwà, ŋgòkə̀ tsòho fa bʉ̀ʉ sə̀ fo’ Ntirə̀ nə̀ Bə̀boŋ nə̀ bə liŋ Krɛst nə fana, mʉ̀ ànə kə dzeŋ fo’ mʉ̀ ye də Tà Nwì a mùk nòŋsə mandzə̀ nə̀ ŋgògʉ̀ fàak sə̀ fo’ sə to laŋ. ¹³Megu də ntʉm ànə ka mʉ fi lok bʉ̀ʉsə̀ mʉ̀ ànə ka moma àvès Taitòs bə lis ye. Fana mʉ̀ cepsə bʉ̀ʉ sə̀ fo’ sə, nə yuŋ jəŋ mandzə̀ àm nə lo mvwe’ nze Màsìdoniyà ŋgòlàp yi nə yuk nzu coòs bohòyi.

¹⁴Megu də vesùwèeŋ kwasə Nwì. Mvwe’ sə̀ vèes lòpwe’fo’, yi sə gʉ ves ŋgòyù Krɛst co ŋkwɛ̀ɛŋ sə̀ yi ghak və̀ wo bə dzè’. Yi sə gʉ də bwìiŋ riŋ Krɛst bohòvès, fana Ntirə̀ nə̀ Bə̀boŋ nə sə rəm saaŋ boŋsə ma nə̀ fòpwe’ co làmindàa sə̀ bə̀boŋ. ¹⁵Vesùwèŋ mègù co làmindàa sə̀ yà’ rə̀m bòŋsə vɛ’ɛ sə̀ Krɛst a kɛ̀’ fa Nwì, yà’ sə rəm lo bohòbʉ̀ʉ sə̀ wo nə tse’ lùŋ bə bʉ̀ʉ sə̀ wo sə bisə yàwo bisə wèŋ. ¹⁶Yà’a rə̀mgə̀ bohòbʉ̀ʉ sə̀ wo sə bisə sə co yu kpʉ sə̀ yà’a nə zə ŋwè. Yà’ rəm boŋsə bohòbʉ̀ʉ sə̀ wo sə lù yàwo lùu sə wèŋ co yu bə̀boŋ sə̀ yà’a nə gʉ wo ŋgòye lə̀luŋ. Ye də ŋwə̀ nə̀ yi kʉ̀rə ŋgòye co nsàp làmindà ànə yè’sə ndà? ¹⁷Vès riŋ də vès sə kà yàvès ncèp nə̀ Nwì nə mvə̀’nə̀ bʉ̀ʉ mok wèeŋ sèŋgə̀ yà’a sèŋ. Ye də aco vès ye to li co làmindàa yà’sə, bʉ̀ʉsə̀ vèes cèpgə̀ yàvès co bʉ̀ʉ Krɛst wèŋ sə̀ zìnə, sə̀ Nwì a tum və̀ ves yi.

Rʉ̀k Nə̀ Fi Nə Ghak Rʉ̀k Nə̀ Zəm

¹Bum sə̀ vès cèp yè’sə, yà’ səsə co də vès də vèes niŋtsok fa fe’lə weŋ nsàap bʉ̀ʉ sə̀ vès cu sə à? Hai’, ka vɛ’nə yeŋ lok. Vès ka co bʉ̀ʉ mok wèŋ yà’a yeŋ, ka də vèes kə fa weŋ ŋwàk, kènə də wèeŋ com fa ves àlɛ’ ŋkuŋ ya bwìiŋ riŋ ves yeŋ. ²Wèŋ bə tu awèŋ, wèeŋ ŋwàk nə̀ aco bwìŋ taŋ, nə riŋ ves bə zeŋ nə. Wèeŋ ŋwàk nə̀ wo a còm nòŋsə nà’ sə ntʉʉ̀ vès nə. ³Yà’ nòjəja də Krɛst à còm ŋwàk nə yi, nə fa ves də vèes ni fa bwìŋ. Yi à ka nà’ mʉnə lìs bə nsàp ntatʉ ŋwàk nə̀ bwìiŋ còmgə̀ bə zeŋ nè’e com, yi à còm nà’ mʉmvwe’ ntʉm bwìŋ, Yòŋsə̀ Nwì à còm fa yi nà’ yi. ⁴Aco vès cep to bum yè’sə bʉ̀ʉsə̀ ves Krɛst wèeŋ mvwe’ mò’fis fana vès sə naaŋ tu bohòNwì də aco yi gʉ ves a ye kə̀kʉrə̀ ŋgògʉ̀ fàak yè’sə. ⁵Vès à ka kə̀kʉrə̀ ŋgògʉ̀ to nsàp fàk ènə yeŋ. Nwì a gʉ̀ ves yi ŋkuŋ vès ye kə̀kʉrə̀ ŋgògʉ̀ to yà’ bə̀boŋ. ⁶A yi nə̀ yi a gʉ̀ ves ŋkuŋ vès riŋ ŋgòkʉ̀k ja’a to, nə sə gʉ boŋsə fàak sə̀ yà’a bə rʉ̀k nə̀ fi nə̀ yi a fa ves nə. Rʉ̀k ènə ka nə̀ wo à còm nà’ mʉnə lìs yeŋ, a nə̀ nà’a ma nə̀ bə yòŋsə̀. Lʉ̀k nə̀ wo à còm naaŋ nà’ mʉnə lìs nə jə və̀gə̀ kpʉ, nə̀ ndzənə yòŋsə̀ nə jəŋ və ye lùŋ.

⁷Ghà nə̀ wo à fa və̀ lʉ̀ʉk sə̀ wo ànə com yà’ mʉnə lìs, sə̀ yà’a jə və̀gə̀ kpʉ sə, à ye fana ŋàaŋ sə̀ Nwì sə ànə rɛŋ fo’ vɛ’ɛ wùriŋ. A ye-a sə̀ də marɛŋ ènə ànə ca gɛsə lo fo’, fana nà’ ànə rɛŋ mʉ sihì Musì vɛ’ɛ nsàp nə̀ bʉ̀ʉ Izùrɛ wèŋ kà lis mʉ sihì yi anə kʉ̀k to. A ye-a də rʉ̀k nə̀ fàak ye ànə ye ŋgòjə və̀ kpʉ nə ànə və bə nsàp ŋàŋ ànə vɛ’nə, ⁸ye də aco nsàp rʉ̀k nə̀ ndzənə yòŋsə̀ nə̀ nà’a nə jəŋ və ye lùŋ nə nə və bə marɛŋ nə̀ nà’ gha’ nə̀ kpʉ nə kɛ̀’ ŋkʉ̀ʉŋ. ⁹Fàak rʉ̀k sə̀ yà’ ànə jə və fa bwìŋ nzak sə ànə tse’ marɛŋ fana ye də fàak rʉ̀k sə̀ yà’a nə gʉ bwìŋ ŋgòkà nzak bohòNwì kə̀ tse’ sə nə tse’ marɛŋ nə̀ nà’ càsə. ¹⁰Aco vès dʉk də, mvə̀’nə̀ marɛŋ nə̀ ŋga’a nə sə rɛŋ vɛ’ɛ wùriŋ fana, marɛŋ nə̀ nà’ ànə ye to fa’ nə ka mok co marɛŋ səsə fe’lə. ¹¹Nə ye də a ye-a ŋga yu nə̀ nà’a nə kà fo’ cu mam tse’ nsàp marɛŋ nə̀ bə ŋàŋ vɛ’nə ye də marɛŋ yu nə̀ yi nə̀ cu mam ye fo’ nə tse’ ŋgòyam càsə vɛ’ɛ wùriŋ.

¹²Vesùwèŋ tse’ tsətsərə̀ nə̀ də bum yè’sə nə̀ kə̀ ye bə̀boŋ vɛ’nə fana vès cep fis, nə kà yumok swìhì. ¹³Musì ye, yi à sə cèp wesgə̀ bohòbʉ̀ʉ Izùrɛ fana yi lok tu ye bə cə̀k mòk. Yi à sə lokgə̀ vɛ’nə də ya bʉ̀ʉ Izùrɛ sə wèeŋ kà mvə̀’nə̀ marɛŋ nə̀ Nwì nə sə lògɛsə mʉsihì yi yə. Vès ka yàvès co Musì nə̀ yi à sə gʉ̀ vɛ’nə ànə yeŋ. ¹⁴Ŋkərə̀ bʉ̀ʉ Izùrɛ wèŋ yè’sə kà bum mok rɛɛŋ. Ghà nə̀ wo ta ŋwàk rʉ̀k nə̀ zəm nə fana ye co cə̀k ànə sə təhə lok mali ŋkərə̀ə awo tè kə dzeŋ nie’. Tse’ŋga ŋwè dzəm bohòJisòs Krɛst cə̀k ànə yè’e gɛsə fo’. ¹⁵Ghà nə̀ fòpwe’ nə̀ wo ta ŋwàak Musì sə fana cə̀k ànə sə lok mali ŋkərə̀ə awo sə. ¹⁶Kaco nà’a nə ye’e gɛsə fo’ yeŋ, tse’ŋga wo bʉ̀ʉŋ və̀ bohòTà Jisòs ŋkuŋ. ¹⁷Tà nə yi yòŋsə̀, nə ye də mvwe’ sə̀ də yòŋsə̀ Tà nə cu fo’ fana ye də ŋwè ka fo’ ŋkwɛ̀ŋ bohòyumok mok yeŋ. ¹⁸Vesùwèŋ sə̀ yumok ka si avès lok sə, marɛŋ nə̀ Tà nə sə kə̀ təm mbwa, nə sə ba’a lo bohòbʉ̀ʉ mok wèŋ. Marɛŋ nə sə yam ghaha, ghaha mvə̀’nə̀ vesùwèŋ sə bʉʉŋ wes lòbə nsəsə̀ə ŋwə̀ nə̀ a sə nìtsə̀’ yi nə. Yè’sə fàak Tà nə̀ yi yòŋsə̀ nə.

Vèes Co Kʉ̀ʉŋ Ncàk Sə̀ Yusə̀ Bə̀boŋ Cu Ca

¹Nwì a fa ves fàak sə̀ ŋgòtsə̀’ fa bwìŋ bə rʉ̀k nə̀ fi ènə bə bòvə̀m ye fana vès fak yà’, nə kà də a wo bʉ̀ʉsə̀ də ntʉm sə kà vès mok bo dʉk. ²Vès co’rə fis bo bə bum marè’tu sə̀ yà’a sə̀swihì, ves kà gəgorə̀ tse’, nə kà ncèp Nwì nə bʉpsə̀. Vès fis tes yusə̀ yà’a zìnə sə jəja, fana nə niŋ fa ni’ avès bohòndàaŋwè pwe’fo’ ya wo riŋ də vèes kə̀kʉrə̀ mantombìi Nwì. ³Ntirə̀ nə̀ Bə̀boŋ nə̀ vès sə tsòho nə ye-a sə̀swihì, ye də nà’a sə̀swihì yà’sə bohòbʉ̀ʉ sə̀ wo sə bisə, bisə. ⁴Satà, nə̀ yi nwì nə̀ sə nze fɛŋ a jə ŋkərə̀ə bʉ̀ʉ sə̀ wo sə kà dzəm sə, nə lok tes yà’ bə ndzəm; wo kà marɛŋ Ntirə̀ nə̀ Bə̀boŋ nə̀ nà’a bə ŋàaŋ Krɛst nə yə. Krɛst nə, a yi nə̀ yi sə nìtsə̀’ fa bwìŋ mvə̀’nə̀ Nwì cu sə. ⁵Vès sə kà liŋ sə̀ yàvès tsòhò. Vès sə tsòho liŋ sə̀ Jisòs Krɛst də yi Tà, vès ye yàvès ŋgàa fàak awèŋ bʉ̀ʉ tu ye. ⁶Nwì nə̀ yi ànə dʉk fa’ də, <<Marɛŋ rɛɛŋ tesə və ndzənə ndzəm>> nə a gʉ̀ sə̀’ yi ŋkuŋ marɛŋ nje nə nà’ rɛɛŋ sə ntʉʉ̀ vès anə. Anə geŋ yà’ fa ves marɛŋ ŋgòrɛɛŋ bum bə nsàp marɛŋ Nwì nə̀ nà’a rɛɛŋ tesə və̀gə̀ mʉsihì Krɛst.

⁷Mvə̀’nə̀ vesùwèŋ tse’ yusə̀ yà’ bòwùriŋ sə fana yà’a ye co vès tse’ yà’ sənə kʉ̀ʉŋ ncàak sə̀ aco yà’ voho; yà’a ŋgùup ni’ àvès yè’e. Yè’sə vɛ’nə ya ŋga ndàaŋwè rɛɛŋ nsàp ŋàŋ nə̀ nà’ ghak càsə ànə a ŋàaŋ sə̀ Nwì, yà’ ka yàvès yeŋ. ⁸Ŋgə’ bɛŋ nòktse’gə̀ ves ma nə̀ fòpwe’fo’, vès sə təəŋ mali fo’, bum sə jipsə kɛ’ ves, ŋkərə̀ə avès kà sə̀ mè wes. ⁹Wo yeŋsə ves ŋgə’, Nwì kà ves sə̀ mè’rə̀. Wo bwi’ mak ves sə nze, wo kà ves sə̀’ lə̀sə̀. ¹⁰A yè’sə də vèes sə bək gikɛ’ kpʉ nə̀ Jisòs nə ndzə ni’ì vès, ya ŋga bwìiŋ ye lùŋ nə̀ Jisòs nə ndzə ŋgùpni’ì vès anə. ¹¹A zìnə də vès cu ncu nə̀ aco kpʉ ko ves ghà nə̀ fòlòoŋ bʉ̀ʉsə̀ vès sə fàk bohòTà Jisòs. A vɛ’nə ŋga a sə niŋtsok lùŋ nə̀ Jisòs nə ndzənə ni’ avès sə̀ aco yà’ kpʉ sə. ¹²Mvə̀’nə̀ vès sə tsòho ncèp nə fana kpʉ sə kʉəp və ves, yà’ sə ye bohòwèŋ lùŋ.

¹³Vès tse’ nsàp ntʉm nə̀ ŋgòfàk bohòNwì co ŋwə̀ nəmòk nə̀ wo à còm ndzənə ŋwàk Nwì bə liŋ ye də <<Mʉ̀ à fa ntʉm àm bohòNwì fana mʉ̀ cep.>> Yà’a sə̀’ mvə̀’nə̀ vès fa ntʉm avès sə̀’ vɛ’nə, nə cep sə̀’. ¹⁴Njo nə̀ vès rì də ŋwə̀ nə̀ yi ànə lokoksə Tà Jisòs mvwe’ kpʉ nə, yi nə lokoksə ves Jisòs wèŋ, nə tes ves kù mantombìi yi ves Jisòs wèŋ bəbɛ’. ¹⁵Ye də, ŋgə’ avès sə̀ vès sə yə sə tse’ swe’ bohòwèŋ. Ghà nə̀ bwìŋ yam ŋkʉ̀ʉŋ sə̀ wo dzəm bohòKrɛst fana bwìŋ ye sə̀’ ŋkʉ̀ʉŋ sə̀ aco wo kwasə Nwì bə bòvə̀m ye nə, fana kə̀kuksə̀ lo bohòyi.

¹⁶Nà’a njo nə̀ kaco vès teŋsə bʉ̀ʉsə̀ də ntʉm avès sə kà mok bòyeŋ sə. A ye-a sə̀ də ŋgùupni’ avès yè’e sə wòbʉp lòo fana ni’ avès sə̀ ma ndzə ntòsə gʉŋ ghàha lòbwi bə ŋàaŋ mok nùumbu pwe’. ¹⁷Ŋgə’ avès sə̀ yà’a nə ca gɛsə mvə̀k momjo yè’sə gʉ̀ gʉŋsə nòŋsə ves ŋgòkə̀ bə̀k to bòoŋ Nwì sə̀ vèes nə̀ kə̀ tse’, sə̀ kaco ŋwè cep to yeŋ sə. ¹⁸Bʉsə̀ vès sə kà lis bə bum sə̀ a sə yə yà’ ŋga’a yè’e kʉ̀k, a sə kʉ̀k bə sə̀ yà’ cu mantombì, sə̀ lis sə kà yà’ ŋga’a yə. Bʉsə̀ bum sə̀ a sə yə yà’ sə nə̀ cà gɛsə lòfo’ fana bum sə̀ a sə kà yà’ ŋga’a yə sə nə kà kə̀ mè yuk.

A Sə Kʉ̀k ŊgòNitse’ Ŋgùpni’ Nə̀ Fi

¹Vès sə kʉ̀k vɛ’nə bʉ̀ʉsə̀ vès rì də ni’ avès sə̀ sə nzeŋ fɛŋ sə co du nə̀ nà’a nə kəəŋ gbʉ sə nze. Nà’ gbʉ-a, fana Nwìi nə fa ves ni’ mok co ndap avès. Ndap ènə mʉbu nə̀ nà’a nə kà kə̀ə̀ŋ yuk, wo à ka nà’ bə bo bwìŋ ci. ²Nə̀ ŋga’a nè’e fana a sə tsərə, sə som vɛ’ɛ də vesùwèŋ dzəm ŋgòkə̀ tse’ ndap avès nə̀ mʉbu nə. ³Ya ŋga vèes nitse’ nà’ co cə̀k, fana a kà nswɛ̀’mbwè ye. ⁴Ghà nə̀ a cu ntòmʉ mvwe’ duŋ sə yè’e fana a sə tsərə, nə sə som vɛ’ɛ wùriŋ də bum sə kà bò. Yè’sə ka də vès sə dzəm ŋgòmà’ ŋgùpni’ nè’e yeŋ; a də vès sə dzəm ŋgònitse’ nə̀ ma mʉbu nə, ya ŋga nə̀ ma mʉbu nə kupsə nə̀ aco nà’ kpʉ nè’nə. ⁵A fʉhʉ fa ves nsàp nə̀ ŋgòkupsə vɛ’nə ènə Nwì, nə fa ves yòŋsə̀ ye nə co yu nə̀ ŋgònìtsə̀’ ves də yà’a nə̀ kə̀ ye lì tsə vɛ’nə.

⁶Mvəsə̀ a yə vɛ’nə fana vèes təəŋ gʉgʉŋ, a rì də mvə̀’nə̀ a cu bə ŋgùpni’ mvwe’ lak avès sə̀ fɛŋ yè’e fana a ka mvwe’ lak avès sə̀ Tà cu fo’ sə yeŋ. ⁷Mʉ̀ sə dʉk yè’sə də a sə kà Tà bə lis mvwe’ lak avès sə ŋga’a yè’e yə, a sə gì nə sə naaŋ tu də yi cu fo’. ⁸Mʉ̀ də vesùwèeŋ təəŋ gʉgʉŋ vɛ’nə, nə sə dzəm ghak lɛ də vesùwèeŋ me’rə ŋgùpni’ nè’e, nə lo la’à kə cum ves Tà wèŋ. ⁹Yusə̀ yà’a bohòvèes ŋga’a də, a cu-a sə̀ mvwe’ lak avès yè’e kè mok sə àlɛ’, vesùwèŋ sə lap megu mandzə̀ nə̀ ŋgògʉ̀ yi kwa. ¹⁰Vèes sə gʉ vɛ’nə bʉ̀ʉsə̀ vesùwèŋ pwe’ nə̀ kə̀ təəŋ mvwe’ dzə̀’ nzak Krɛst. Vesùwèeŋ nə kə təəŋ vɛ’nə ya yi kʉk ja’a bum sə̀ vesùwèŋ à gʉ̀ yà’ ghà nə̀ vesùwèŋ à cu bə ŋgùpni’ sə fana yi lak ndàaŋwè pwe’fo’ mvə̀’nə̀ ŋgə̀ŋgàŋ a gʉ̀ʉ, bə̀boŋ kè bʉp àlɛ’.

A Sə Fàk Ya Ndàaŋwè Pwe’ Tɛsŋkɛ̀ŋ Bə Nwì

¹¹Mvə̀’nə̀ vès rìŋtse’ yàvès yusə̀ yà’ cu bə ŋgòwəp Tà sə laŋ fana vès sə lʉ̀ gʉgʉŋ ŋgòtsòho fa bwìŋ ya wo rɛɛŋ nə wəp Tà sə̀’. Nwì riŋtse’ də vèes sə ntʉʉ̀ vès anə rərɛŋ bə ncèp ènə, fana mʉ̀ tsərə də wèŋ rì yà’ sə ntʉʉ̀ wèŋ sə̀’. ¹²Ka yè’sə də vès sə làp mandzə̀ ŋgògʉ̀ də ya wèeŋ jəŋ fe’lə ves sə̀mok co bʉ̀ʉ sə̀ bə̀boŋ yeŋ. Yusə də vès sə làp də wèeŋ tse’ njo nə̀ nà’a bə̀boŋ nə̀ aco wèŋ kumŋgùŋ mʉtuhù vès bʉ̀ʉ zeŋ, ya wèeŋ riŋtse’ mvə̀’nə̀ aco wèŋ cep fəsə fa bʉ̀ʉ sə̀ wo kumgə̀ ŋgùŋ bə ŋwè, mvə̀’nə̀ wo yə nà’ mʉlisə̀, nə kà mvə̀’nə̀ nà’ cu sə pap rì yà’a. ¹³Vès sə yəəŋ-a mʉlisə̀ wèŋ co ŋgàa ŋaŋ fana vèes vɛ’nə ya liŋ Nwìi kuk; nə ye sə̀’ də a ye-a ŋga vès ka co ŋgàa ŋaŋ yeŋ fana vèes vɛ’nə bʉ̀ʉ tu awèŋ. ¹⁴Dzədzəm nə̀ Krɛst tse’ nà’ bohòvès nə bwì’ tse’ ves vɛ’ɛ bʉ̀ʉsə̀ vès riŋ də, mʉmvə̀’nə̀ ŋwə̀ nə̀ mò’fis a kpʉ bʉ̀ʉ tu bwìŋ pwe’fo’ fana ye də bwìŋ pwe’ a kpʉ laŋ. ¹⁵Fana yi a kpʉ bʉ̀ʉ tu bwìŋ pwe’ vɛ’nə də ya ŋga bʉ̀ʉ sə̀ wo lùu nə kà mok ncu nə̀ ŋgùupni’ awo dzəm cu; wo cum mok ncu ŋwə̀ nə̀ nà’ à kpʉ bʉ̀ʉ tu awo, nə lokok fe’lə mvwe’ kpʉ nə.

¹⁶Ye də a ŋga’a mok də kaco vès kʉk ja’a ŋwè, nə fʉk fe’lə yi mvə̀’nə̀ nzeŋgòŋ nə fʉ̀kgə̀ə yeŋ. Vès ànə fʉk to Krɛst mantombì fa’ vɛ’nə laŋ fana kaco vès fʉk fe’lə yi vɛ’nə yeŋ. ¹⁷Yusə də ŋwə̀ nə̀ yi ye-a bə Krɛst mvwe’ mò’fis fana ye də yi mok ŋwə̀ nə̀ fi, bum sə̀ zəm a cà gɛsə lo laŋ, bum pwe’ mok sə̀ fi pumm. ¹⁸Bum yè’sə pwe’fo’ fàak Nwì. Nwì anə tɛs ŋkɛ̀ŋ vesiwèŋ ndzə bohòKrɛst, nə fa ves fàak sə̀ ŋgòtirə lòfa bwìŋ mvə̀’nə̀ yi tɛsgə̀ ŋkɛ̀ŋ sə. ¹⁹Nwì à gʉ̀ càsə fàak ye ndzə bohòKrɛst. Yi à ka bum sə̀ bʉp sə̀ wo à gʉ̀ʉ sə mʉtuhù wo mok tsərə naaŋ fe’lə. Fana yi a fa ves fàak sə̀ ŋgògʉ̀ bʉ̀ʉ mok wèeŋ riŋ mvə̀’nə̀ yi tɛsgə̀ ŋkɛ̀ŋ bə bwìŋ sə. ²⁰Vèes yè’, vès tə mvwe’ kùu Krɛst fana Nwì sə cep casə fa bwìŋ bohòvès anə. Ncèp nə̀ ŋgòtsə̀’ fa bwìŋ nə də, vès sə lɛŋ bwìŋ də wo və ya bə Nwì wèeŋ tɛs ŋkɛ̀ŋ. ²¹Krɛst ànə ka bʉp gʉ yuk, Nwì nə gʉ bʉsə yi bʉp bʉ̀ʉ tu bwìŋ də ya ŋga vesùwèeŋ ye kə̀kʉrə̀ nsàp nə̀ Nwìi ye.

Pol Tsə̀’ Mvə̀’nə̀ Yi Yə Ŋgə’ ŊgòGʉ̀ Fàak Nwì

¹Mvə̀’nə̀ vès sə fà’ ves Nwì wèŋ mvwe’ mò’fis fana vès sə lɛŋ weŋ də kà də wèeŋ me’rə bòvə̀m nə̀ Nwì a fa weŋ nə də nà’a ca lo ŋgwàŋ dʉk. ²Yusə̀ Nwì a cèp yi yè’ də,

<<Ghà nə̀ mvə̀k à kʉ̀rə,

Mʉ̀ yuk fa weŋ yusə̀ wèŋ sə lɛŋ,

Mʉ̀ tɛsə weŋ nùmbu nə̀ mʉ̀ à nòŋsə ŋgòfa weŋ lùŋ.>>

Mʉ tsok fa weŋ yàm sə̀’ də mvə̀k nə̀ kə̀kʉrə̀ nə ŋga’a yè’e, nə ye sə̀’ də nùmbu nə̀ Nwì à nòŋsə ŋgòfa weŋ lùŋ nə sə̀’ ntinə. ³Vès sə̀ vèes bʉ̀ʉ Nwì, vès ka dzəm ŋgònòŋsə fa ŋwə̀ nəmòk yumok sə mandzə̀ə yi co yi kə lʉ’rə bə zeŋ dzəm, ya ŋga bwìiŋ kà fàak avès sə liŋ sə̀ bʉp to fa. ⁴Vèes kogə̀ ntʉm ŋgònìtsə̀’ də vèes ŋgàa fàak Nwì. Vèes kogə̀ ntʉm vɛ’nə ŋga vès sə yə ŋgə’ nə ye ŋga vèes jìŋ, nə ye ŋga yumok sə ghak ves sə̀’ pwe’. ⁵Ghà nə̀ wo sə lə̀p ves, bə ghà nə̀ wo nisə ves ndapndzəm, bə ghà nə̀ bwìŋ pwe’ joho tse’ ves. Mok ye mali sə̀’ ghà nə̀ vès sə fàk nə tiŋ ndùrə̀, bə ghà nə̀ vès nònòoŋ nca, nə ye bə ghà nə̀ vès cu njè sə̀’. ⁶Vèes nìtsə̀’gə̀ də vèes ŋgàa fàak Nwì bə mandzə̀ nə̀ də vèes cugə̀ ncu nə̀ nà’a rərɛŋ, vès sə riŋ bum sə̀ Nwì sə bə̀boŋ, vès sə ko ntʉm, vès sə gʉ̀ bòŋ bohòbwìŋ, vès sə yuk bohòYòŋsə̀ nə̀ Rərɛŋ nə, fana nə sə dzəm bwìŋ bə ntʉm nə̀ mò’fis sə̀’. ⁷Vès sə cep megu yusə̀ yà’a zìnə, nə sə gʉ fàak Nwì bə ŋàaŋ sə̀ ye sə. Mʉmvə̀’nə̀ ncu àvès nə rərɛŋ vɛ’nə fana yà’ ye co də vès bə̀hə tse’ bum màk dzè’e Nwì sə bo ma màk bə ma ŋkwìp ba fo’. ⁸Ghà mòok ye bwìŋ sə wəp ves də vèes bʉ̀ʉ Nwì, ghà mòk wo koksə ves marè’tu. Wo sə cep bʉp bə liŋ avès. Wo sə ci’ fa ves mvwès sə̀’, ghà mòk wo kwasə ves. Wo sə jəŋ ves co ŋgàa cì’ mvwès ŋga vès sə cèp zìnə. ⁹Wo sə jəŋ ves co bʉ̀ʉ sə̀ wà, ŋga liŋ avès a yuhu lòma nə̀ fòpwe’ laŋ. Vès sə swirə kpʉ, nə sə cum mali fo’ ŋwʉm. Wo sə tʉksə kɛ’ca ves vɛ’nə, vès kà sə̀’ kpʉ. ¹⁰Ntʉm sə yaaŋ ves wùriŋ, vès sə tse’ mali kwəkwa sə̀’. Vès ye ŋgàa jìŋ, nə sə gʉ bwi bʉʉŋ ŋgàa ghàk. Bwìŋ sə ye co vès ka yumok tse’, ŋga bum sə̀ Nwì à gʉ̀ pwe’fo’ yàvès.

¹¹Haama ŋge’ am bʉ̀ʉ Korè wèŋ, vès a cèp bohòwèŋ, nə kà yumok swìhì lok fʉ̀k, vès a muk tosə fa weŋ ntʉm avès pwe’. ¹²Wèŋ sə tsərə-a də yumok cu mali fo’, ye də yà’ cu ma sə ntʉʉ̀ wèŋ, ka bohòvès yeŋ. ¹³Mʉ̀ cèp bohòwèŋ co mʉ̀ sə cèp bohòbwe am; ye də ŋgògʉ̀ də ya bum sə ye ma lòoŋ fo’ yəyərə̀ fana wèeŋ muk tosə ntʉm awèŋ sə̀’ vɛ’nə.

Bum Sə̀ Yà’ Ka ŊgòTòrə Boŋ

¹⁴Kà də ŋwèe be’lə bə ŋwə̀ nə̀ yi ka Nwì riŋ də bə nà’a sə gʉ yumok dʉk. Bʉsə̀ aco bòŋ bə bʉp tse’ yè’sə nsàp ŋge’ yà? Kènə aco marɛŋ bə mandzəm ye ŋge’ anə va? ¹⁵Yusə̀ Krɛst tse’ be’lə yà’ fo’ bə ŋkum ze’, yè’sə yà? Kènə də ŋwə̀ nə̀ yi dzəm Krɛst bə nə̀ yi ka Krɛst dzəm, wo tse’ be’lə yà? ¹⁶Aco ndap Nwì tse’ yà sə̀ yà’ ye cù mò’fis bə tàap rùm ɛ? Mʉ̀ sə cèp vɛ’nə bʉ̀ʉsə̀ vesùwèeŋ ndap Nwì nə̀ yi cu ŋwəm nə. Yè’e yusə̀ Nwì nə à cèp də,

<<Mʉ nə ci lak mʉŋgorə̀ wo, nə cum vesiwèŋ;

Mʉ nə ye Nwì àwo fana wo ye bʉ̀ʉ am.>>

¹⁷<<Ye də a bə̀boŋ də wèeŋ tesə gɛsə mʉŋgorə̀ wo anə, nə ye yàwèŋ zok,

Cèp vɛ’nə Tà.

Wu tesə cu vɛ’nə, wù kà yumok sə̀ yà’ ka rərɛŋ yeŋ jwɛ̀ŋ,

Fana mʉ nə jəŋ weŋ.

¹⁸Mʉ nə ye tɛ̀’ àwèŋ, fana wèŋ ye bwìŋ yàwèŋ bwe am sə̀ ndzə və̀ə mʉ̀.

Cèp yè’sə Tà Nwì nə̀ yi tse’ bum pwe’ yi nə.>>

¹Ŋge’ am wèŋ, yà’a bum sə̀ Nwì a kàk fa vesùwèŋ sə, ye də vesùwèeŋ cuk fis mak bum sə̀ aco yà’ gʉ bʉpsə ŋgùpni’ kè yòŋsə̀ə avès àlɛ pwe’fo’. A gʉ vɛ’nə ya ŋga vesùwèeŋ sə kuk kok bə mandzə̀ nə̀ rərɛŋ bʉ̀ʉsə̀ vesùwèŋ sə wəp Nwì.

Pol Tsə̀’ Fa Bʉ̀ʉ Korè Wèŋ Də Yi Sə Kwa Bʉ̀ʉ Tu Yà’wèŋ

²Wèeŋ kotse’ ves sə ntʉʉ̀ wèŋ bʉ̀ʉsə̀ wèŋ rì də vès a ka ŋwə̀ nəmòk bʉp gʉ; vès a ka ŋwə̀ nəmòk gʉ bʉpsə, nə kà yu ŋwə̀ nəmòk sə̀’ bòrə̀ jə. ³Ka də mʉ̀ sə cèp yè’sə ŋgònaaŋ bɛ̀ŋ mòk mʉtuhù wèŋ yeŋ. Mʉ̀ à tsə̀’ fa weŋ fa’ laŋ də wèŋ cu sə ntʉʉ̀ vès, a dzəm ye kpʉ bə lùŋ. ⁴Mʉ̀ rì də wèŋ tse’ ntʉm nə̀ ŋgòyù mandzə̀ Nwì. Mʉ̀ sə kumŋgùŋ bʉ̀ʉ wèŋ anə sə̀’. Mvə̀’nə̀ yà’a vɛ’nə fana mʉ̀ sə yə-a sə̀ ŋgə’ fana ntʉm àm sə ye fifi, mʉ̀ sə kwa sə̀’ wù kà fʉ̀k.

⁵Mvə̀’nə̀ vès à kə̀ dzèŋ mvwe’ nze Màsìdoniyà fana vès à ka fifi tse’ lok. Ŋgə’ à ye ma nə̀ fòpwe’, bwìŋ sə kʉəm bə mok wèŋ, wʉə ye sə ntʉʉ̀ vès anə sə̀’. ⁶Fana Nwì nə̀ yi fisə fagə̀ ŋwè ntʉm ghà nə̀ yumok sə bʉp yi nə fisə fa ves ntʉm avès. Taitòs ànə kə dzeŋ fana ntʉm fi ves. ⁷Ka də vès a kwa mègù bʉ̀ʉsə̀ də yi à kə̀ tsèŋ ves yeŋ. Vès a kwa mvə̀’nə̀ yi à tsə̀’ fa ves mvə̀’nə̀ wèŋ ànə gʉ yi fana ntʉm nje ye cəcuŋ yà’a sə̀’. Yi à tsə̀’ ves də wèŋ sə dzəm ŋgòyə mʉ vɛ’ɛ wùriŋ, nə ye mvə̀’nə̀ ntʉm a yaaŋ weŋ, nə ye fe’lə bə mvə̀’nə̀ wèŋ sə dzəm ŋgòtəəŋ fa mʉ gèm. Bum yè’sə pwe’ a gʉ̀ mʉ ŋga’a mʉ̀ sə kwa ghaha ghaha.

⁸A ye-a sə̀ də ŋwàk nə̀ mʉ̀ à còm fa weŋ fa’ nə a fa ntʉm awèŋ ŋgə’ fana mʉ̀ sə kà də mʉ̀ ànə riŋ-a bwɛ̀rɛ mʉ̀ ànə ka nà’ còm dʉk. Mʉ̀ ànə dʉk-a vɛ’nə sə̀ laŋ bʉ̀ʉsə̀ də mʉ̀ à yə də ntʉm awèŋ sə fa weŋ ŋgə’ mvə̀k momjo, ⁹mʉ̀ sə kwa ŋga’a yè’e vɛ’ɛ wùriŋ. Ka də mʉ̀ sə kwa bʉ̀ʉsə̀ də mʉ̀ a gʉ̀ ntʉm yaaŋ weŋ yeŋ, mʉ̀ sə kwa bʉ̀ʉsə̀ də yaàŋ ntʉm àwèŋ nə a gʉ̀ weŋ, wèŋ nə kupsə mandzə̀ awèŋ nə. Nà’a nsàp yaàŋ ntʉm nə̀ Nwì dzəm nə. Ye də vès a ka weŋ yumok gʉ bʉpsə fa lok. ¹⁰A ye-a ŋga ntʉm yaaŋ ŋwè bə mandzə̀ Nwì, yà’ gʉ̀ ŋwè yi kupsə mandzə̀ ye, nə tse’ lùŋ fana ye də yumok ka fo’ bʉp. Yaàŋ ntʉm nə̀ nà’a nsàp nə̀ nzeŋgòŋ nə jə və̀gə̀ ye kpʉ. ¹¹Wèeŋ kʉk ja’a na yàwèeŋ yusə̀ yaaŋ ntʉm nə̀ bə mandzə̀ Nwì nə a gʉ̀ fa weŋ ɛ̀. Nà’ à gʉ̀ weŋ, wèŋ jəŋ yusə̀ mʉ̀ còm fa weŋ bə zeŋ sə gʉgʉŋ. Nà’ à gʉ̀ʉ, ndàaŋwè pwe’ fiŋ ncù, nà’ gʉ̀ weŋ, wèŋ jok; nà’ gʉ̀, wʉə ko weŋ; nà’ gʉ̀ʉ, wèŋ dzəm də wèeŋ ye fe’lə mʉ sə̀mok; nà’ gʉ̀ weŋ ŋgòye gʉgʉŋ bə mandzə̀ nə̀ nà’a zìnə nə; nà’ gʉ̀ weŋ, wèŋ sə gʉhʉ tsə’rə bum pwe’ ŋgòye mok bə̀boŋ. Wèŋ a gʉ̀ tə̀tè nə kà bɛ̀ŋ mʉtuhù wèŋ mok tse’ fe’lə̀.

¹²Mʉ̀ ànə com fa-a weŋ ŋwàk ànə sə̀ vɛ’nə fana yusə̀ gʉgʉŋ sə̀ yà’ ànə gʉ mʉ ŋkuŋ mʉ̀ còm ŋwàk nə à ka bʉ̀ʉ ŋwə̀ nə̀ wo gʉ̀ yi bʉp nə kè də bʉ̀ʉ ŋwə̀ nə̀ yi ànə gʉ bʉp nə yi nə yeŋ. Mʉ̀ à còm nà’ lɛ ŋgògʉ̀ weŋ də wèeŋ rɛɛŋ mantombìi Nwì, mʉmvə̀’nə̀ wèŋ a fa ni’ awèŋ bohòvès sə. ¹³Yà’a yusə̀ vès à yə fana yà’ gʉ ntʉm boŋ ves vɛ’ɛ wùriŋ sə. À ka yà’sə megu, vès a kwa mvə̀’nə̀ Taitòs à tsə̀’ fa ves kwəkwa nje mvəsə̀ wèŋ à gʉ̀ yi ni’ wɛs yi yà’a sə̀’. ¹⁴Mʉ̀ à sə kum ŋgùŋ bə liŋ awèŋ bohòyi də wèeŋ bʉ̀ʉ sə̀ bə̀boŋ wùriŋ fana wèŋ a gʉ̀ cùu am sə kà wà cà. Yusə̀ mʉ tsə̀’ fagə̀ weŋ pwe’, mʉ̀ ka weŋ mvwès ci’ yuk fa, fana yà’ nə yəə̀ŋ nə sə̀’ vɛ’nə də mvə̀’nə̀ vès à tsə̀’ Taitòs də wèeŋ bʉ̀ʉ sə̀ bə̀boŋ, a zìnə. ¹⁵Taitòs nə dzəm wesə weŋ mok nsàp nə̀ bə jòŋ, mvə̀’nə̀ yi tsərə mvəsə̀ yi à kə yə weŋ, wèŋ yuk yi, nə le’ tse’ yi bo ma ba, nə sə wəp yi vɛ’ɛ wù kà fʉ̀k. ¹⁶Mʉ̀ sə kwa yàm sə̀’ wù kà fʉ̀k bʉ̀ʉsə̀ də aco mʉ̀ naaŋ tu am bohòwèŋ, nə kà yumok mok tsərə̀.

Fəfa Nə̀ Nà’a Bə̀boŋ BohòKrətèŋ Wèŋ

¹Bwema avès, vès dzəm də wèeŋ riŋ mvə̀’nə̀ bòvə̀m nə̀ Nwì a yəəŋ mʉmvwe’ coos sə̀ mvwe’ nzeŋgòŋ Màsìdoniyà sə. ²Ŋgə’ nə̀ wo à yə, à mùmsə wo vɛ’ɛ nsàp nə̀ bə ŋgʉi’. Yà’ ànə ye-a sə̀ vɛ’nə fana wo tse’ mali kwəkwa sə ntʉʉ̀ wo anə wùriŋ. Ghà nə̀ wo ànə cum bə jìŋ nə̀bʉp fana kwəkwa nə̀ sə ntʉʉ̀ wo nə tesə kok və bə nsàp fa mbo mòk vɛ’ɛ nə̀ wù kà fʉ̀k. ³Aco mʉ̀ kɛŋ də wo à ka yusə̀ aco wo fa yà’ fa megu, wo à fa nə ghak casə. Wo ànə sə fa vɛ’nə ŋga ŋwə̀ nəmòk ka wo yi sə̀ dʉk. ⁴Wo à lɛŋ ves, nə lɛŋ gwərə ves vɛ’ɛ zìnə də wo dzəm ŋgòye sə̀’ sə mvwe’ fàak bʉ̀ʉ Nwì wèŋ yè’sə, nə fa ŋgòtɛsə bʉ̀ʉ Nwì wèŋ mok sə̀’. ⁵Yumok sə̀ vès ànə ka tsəm də aco yà’ ye vɛ’nə tsəm ànə ye də, wo à fa to ntòni’ awo bohòTà Jisòs ŋkuŋ nə fa. Wo à fa ni’ awo sə bohòvès sə̀’ mvə̀’nə̀ Nwì dzəm.

⁶Ntʉm a bòves bə fa-mbo bʉ̀ʉ Màsìdoniyà wèŋ nə vɛ’ɛ wùriŋ fana vès dʉk də vèes tum Taitòs ŋgòkə̀ jə və̀ fəfa ma nə̀ njàwèŋ nə. Yi ànə cep to bohòwèŋ yi ŋkuŋ ntʉm awèŋ boŋ ŋgòfa yumok fana vès də yi kə gʉ mesə fàak sə̀ bə̀boŋ yè’sə sə̀’ yi nə. ⁷Vès rì tse’ weŋ bə̀boŋ də wèeŋ nsàp bʉ̀ nə̀ wèeŋ yegə̀ mantombì bə bum ŋkʉ̀ʉŋntɛ̀ŋ. Mʉ̀ rì də wèŋ sə fa ntʉm awèŋ bohòJisòs ŋkʉ̀ʉŋntɛ̀ŋ. Wèŋ rì ŋgòtsòho fa bwìŋ ncèp nə̀ Nwì nə, wèŋ rì bum sə̀ yà’a ma nə̀ bohòNwì, wèŋ rì ŋgògʉ̀ fàak Nwì bə ntʉm nə̀ mò’fis, fana wèŋ dzəm ves sə̀’ bə ntʉm nə̀ mò’fis. Mvə̀’nə̀ bum yè’sə vɛ’nə fana vès sə kʉ̀k də wèeŋ ye li mantombì bə nsàp fàk nə̀ bə̀boŋ nè’nə sə̀’. ⁸Ka də mʉ̀ sə fa ŋàŋ də wèeŋ nə̀ gʉ tsoŋ vɛ’nə yeŋ. Mʉ̀ sə fʉ̀’rə ja’a fàk àwèŋ nə bə sə̀ bʉ̀ʉ mok wèŋ, ya mʉ riŋ mvə̀’nə̀ dzədzəm àwèŋ cu sə. ⁹Wèeŋ tsərə a nsàp bòvə̀m nə̀ Tà Jisòs Krɛst ànə tse’ nà’a ɛ̀. Yi ànə ye ŋgà ghàk, nə bʉʉŋ ŋgà jìŋ bʉ̀ʉ tu awèŋ. Yi à gʉ̀ vɛ’nə də ya wèeŋ bʉʉŋ ŋgàa ghàk bʉ̀ʉ jìŋ ye nə.

¹⁰Fana ntip njàm nə̀ aco mʉ̀ fa weŋ bə bum yè’sə a də, bə lùmŋgòŋ nə̀ nà’ a cà lònè’e, wèŋ à fa to wèŋ, nə tse’ to ntʉm nə̀ ŋgògʉ̀ vɛ’nə sə̀’ wèŋ. ¹¹Ye də a bə̀boŋ də wèeŋ gʉ mesə yà’. Wèeŋ gʉ mesə yà’ sə̀’ bə ntʉm nə̀ kwəkwa, mʉmvə̀’nə̀ wèŋ ànə sə kwa to ŋgòcèp də wèeŋ nə gʉ nsàp yumòk vɛ’nə sə. Wèeŋ fa mʉmvə̀’nə̀ wèŋ tse’. ¹²A ye-a ŋga ntʉm nə̀ ŋgòfa nə yo fana Nwìi jəgə̀ ye yusə̀ ŋwè tse’, ka də yi dʉkgə̀ də ŋwèe fa yusə̀ nà’ ka tse’ yeŋ. ¹³Yusə̀ vès sə dzəm sə, ka də wèeŋ ye ŋgə’ ŋgòfa wùriŋ ya bʉ̀ʉ mok wèeŋ ghak bə zeŋ yeŋ. Vès dzəm də bwìŋ pwe’ tse’ yəyərə̀. ¹⁴Wèŋ tse’ ŋga’a yè’e ŋkʉ̀ʉŋ fana wèeŋ fa bʉ̀ʉ sə̀ wo sə jamə, ya nùmbu mòok ye ŋga wo tse’ bwì ŋkʉ̀ʉŋ fana wo fa bwi weŋ yusə̀ wèŋ sə jamə sə̀’. Yà’a mʉmvə̀’nə̀ ndàaŋwè pwe’ nə tse’ yəyərə̀ sə. ¹⁵A ye vɛ’nə fana yà’ ye mvə̀’nə̀ wo à còm də, <<Ŋwə̀ nə̀ yi ànə kʉp ŋkʉ̀ʉŋ, à ka ŋkʉ̀ʉŋ ləlà tse’; ŋwə̀ nə̀ yi ànə kʉp ye momjo, kà momjo ləlà sə̀’ tse’.>>

Bʉ̀ʉ Sə̀ Wo Nə Kə Jəŋ Fəfaa Sə̀ Lak Korè Sə

¹⁶Vès kwasə Nwì vɛ’ɛ wùriŋ bʉ̀ʉsə̀ yi gʉ̀ Taitòs ŋgòtse’ ntʉm nə̀ ŋgòtɛsə weŋ sə̀’ co vès. ¹⁷Vès à də yi kə ye weŋ fana yi dzəm, nə sə kwa ŋgòtɛsə ye sə̀’ fana yi fʉhʉ ŋgòlòo nə kə ye weŋ. ¹⁸Vès sə tumsə be’lə yi bə moma mòk nə̀ coos pwe’ jəgə̀ yi co ŋwè bʉ̀ʉsə̀ yi tsòhogə̀ Ntirə̀ nə̀ Bə̀boŋ nə bə̀boŋ wùriŋ. ¹⁹Mòok sə̀’ də a cokfis ŋwə̀ ènə coos sə, də venəwèeŋ gi lo ŋgòjə lòbum sə̀ wo a fa sə mvwe’ lak Jòrosalèm. Fàak yè’sə nə kuksə liŋ Tà fana nə niŋ tsok fa bwìŋ də vès tse’ kwəkwa ŋgòtɛsə mòk bə mòk. ²⁰Mvə̀’nə̀ vès sə tumsə wo vɛ’nə fana vès tsəm də cèp cùu nə kà bə mvə̀’nə̀ vès sə kotse’ nsàp mbàm nə̀ wo a fa wùriŋ ènə tesə̀. ²¹Vès sə lap mandzə̀ nə̀ ŋgògʉ̀ yusə̀ yà’a bə̀boŋ mʉlisə̀ Tà nə ye mʉlisə̀ bwìŋ sə̀’. ²²Vès sə tumsə lòwo bə moma àvès mòk sə̀mok. Vès a mùmsə yi, nə ye də yi ŋwə̀ nə̀ yi tse’ ntʉm nə̀ ŋgòfàak. Ŋga’a nə̀ yi a rì tse’ mok bə̀boŋ də wèŋ tse’ ntʉm nə̀ ŋgòfa fana yi sə ghaha, ghaha ŋgòtɛsə. ²³A ye-a ŋga bʉ̀ʉ mok cu sə̀ wo ka Taitòs riŋ fana mʉ̀ dzəm ŋgòrɛŋsə də yi ŋwə̀ nə̀ a fàkgə̀ vesi ŋgòtɛsə weŋ. Bwema mok sə̀ yi sə gì bə yà’wèŋ yà’a yàwo bʉ̀ʉ sə̀ a tum wo coos. Fàak sə̀ wo sə gʉ̀ʉ sə sə gʉ̀ də liŋ Krɛst kuk. ²⁴Ye də wèeŋ niŋtsok fa wo də wèŋ dzəm wo. Wèeŋ gʉ wo vɛ’nə ya ŋga coos mok sə rɛɛŋ bə zeŋ, nə riŋ sə̀’ də vèes kumgə̀ ŋgùŋ bʉ̀ʉ wèŋ ŋga a zìnə.

Ntip Nə̀ ŊgòFʉ̀hʉ Nòŋsə Fəfa

¹Anə ye co mʉ̀ kà weŋ bə nzak nə̀ ŋgòtɛsə bʉ̀ʉ Nwì wèŋ còm fa yiskok. ²Mʉ̀ dʉk vɛ’nə bʉ̀ʉsə̀ mʉ̀ rì mvə̀’nə̀ wèŋ tse’ ntʉm nə̀ ŋgòtɛsə nə laŋ. Mʉ̀ a kumŋgùŋ bə liŋ awèŋ bohòbʉ̀ʉ Màsìdoniyà wèŋ vɛ’ɛ wùriŋ. Mʉ̀ a tsə̀’ wo də wèŋ bʉ̀ʉ Gris wèŋ à fʉ̀hʉ ŋgòfa laŋ, ye jəŋ bə lùmŋgòŋ nə̀ nà’ à cà nà’a. Fana ntʉm àwèŋ nə̀ ŋgòfa ànə a yə̀msə bwìŋ lo ŋkʉ̀ʉŋ. ³Mʉ̀ sə tumsə lòbwema yè’e wèŋ ya wo ja’a də wèŋ fʉ̀hʉ bə mbàam awèŋ pap laŋ, mvə̀’nə̀ mʉ̀ a tsə̀’ fa wo də wèŋ à fʉ̀hʉ laŋ sə àlɛ. Mʉ̀ ka dzəm də yà’a kə bʉʉŋ tesə də mvə̀’nə̀ mʉ̀ à sə kùm ŋgùŋ bə liŋ awèŋ sə mvwès dzəm. ⁴A ye-a ŋga bʉ̀ʉ Màsìdoniyà mok wèŋ və̀ venəwèŋ, nə kə ye də wèŋ ka ntòfʉ̀hʉ fana marè’tu nə ko ves vɛ’ɛ wùriŋ. Bʉsə̀ mʉ kùmgə̀ ŋgùŋ bə liŋ awèŋ sə, nə kà wəp. Mʉ ka-a ma njàwèŋ sə̀ cèp, wèŋ riŋ də marè’tu nə ko weŋ sə̀’. ⁵Nà’a njo nə̀ mʉ̀ tumsə lòbwema yè’e wèŋ də wo lo to mantombì, wo ja’a də yusə̀ wèŋ à kà’ də wèeŋ nə fa sə, wèŋ a fa wes yà’ laŋ. Də ya wèeŋ fa bə kwəkwa, a kà də wèeŋ fa bə ŋàŋ dʉk.

⁶Wèeŋ kà swì də, ŋwə̀ nə̀ yi bì-a momjo, yi nə̀ kʉp sə̀’ momjo. Ŋwə̀ nə̀ yi bì-a ye ŋkʉ̀ʉŋ, nə̀ kʉp sə̀’ ŋkʉ̀ʉŋ. ⁷Ndàaŋwè pwe’ fa yusə̀ yi tsərə kok sə ntʉʉ̀ yi. Kà də ŋwèe fa bə ntʉm nə̀ rə̀rwi’ kè bə ŋàŋ àlɛ’ dʉk. Nwìi dzəmgə̀ ye ŋwə̀ nə̀ yi fa bə ntʉm nə̀ kwəkwa. ⁸Aco Nwì fa casə to wu bum mʉmvə̀’nə̀ wù sə tsəm sə. Aco yi gʉ to wu, wù tse’ yusə̀ wù dzəm pwe’, nə gʉ mali wu, wù tse’ mok co wù gʉ fàak sə̀ bə̀boŋ bə zeŋ wùriŋ. ⁹Ŋwàk Nwì sə cèp bə nsàp ŋwə̀ ànə də,

Yi fagə̀ ŋgàa jìŋ wèŋ nduk nə̀ nduk,

Ntʉm ye nə̀ ŋgògʉ̀ bə̀boŋ nə nə̀ kà kupsə̀ yu’.

¹⁰Nwì nə̀ yi fagə̀ ŋgà fàk nzum ŋgwìi bum, nə fa bɛŋ də bwìiŋ zʉ, a yi nə̀ yi nə yamsə fa weŋ ŋgwìi bum sə pwe’ ya wèeŋ bi yà’, fana yi nə gʉ yà’, yà’ kuk sə̀’. Yà’a mvə̀’nə̀ fa-mbo nə̀ wù sə fa nə nə tɛsə bwìŋ ŋkʉ̀ʉŋ sə. ¹¹Yi nə gʉ weŋ, wèŋ sə tse’ bum ya ŋga wèeŋ sə fa mbo nùumbu pwe’. Ya ŋga bwìŋ ŋkʉ̀ʉŋ nə kwasə Nwì bə bum sə̀ wèŋ a fa càsə wo yà’ ndzə bohòvès sə. ¹²Ye də mvə̀’nə̀ wèŋ sə fa vɛ’nə fana wèŋ sə tɛsə bʉ̀ʉ Nwì sə̀ wo sə jamə, nə sə gʉ bwìŋ ŋkʉ̀ʉŋ sə kwasə ghaha Nwì ghaha sə̀’. ¹³Mʉmvə̀’nə̀ wèeŋ fa fana yà’ niŋtsok fa bwìŋ də wèŋ sə dzəm ŋgògʉ yusə̀ ntirə̀ nə̀ bə̀boŋ nə sə dʉk fana wo kuksə Nwì bʉ̀ʉsə̀ wèŋ a fa. ¹⁴Yumòok sə̀’ də wo nə dzəm weŋ wùriŋ, nə lɛŋ Nwì mʉtuhù wèŋ bʉ̀ʉsə̀ wo yə də wèŋ tse’ bə̀bo nə̀ Nwì nə sə ntʉʉ̀ wèŋ ŋkʉ̀ʉŋ. ¹⁵Vesùwèeŋ kwasə Nwì bə fəfa ye nə̀ kaco cù cep to nà’ yeŋ ènə.

Pol Sə Tsə̀’ Rɛŋsə Fa Bwìŋ Də Yi Ŋgà Ntum Jisòs Zìnə

¹A mʉ̀ Pol, yusə̀ mʉ̀ sə də mʉ cep ŋga’a yè’e sə tesə sə və̀ə mʉ̀. A mʉ̀ nə̀ wo dʉkgə̀ də mʉ ye vesùwèŋ si bə si fana mʉ̀ ye fʉ̀ə̀, anə ye ŋga mʉ̀ lògɛsə fo’ fana yusə̀ mʉ còm fa weŋ ye bə ŋàŋ nə. Mʉ̀ lɛŋ weŋ bə liŋ Jisòs nə̀ yi ŋwə̀ nə̀ gəe’ nə vɛ’ɛ wùriŋ də, ²kà də wèeŋ gʉ co də mʉ və̀ə, mʉ̀ cep bohòwèŋ bə ŋàŋ dʉk. Mʉ̀ rì də mʉ nə cep li bə ŋàŋ bohòbʉ̀ʉ mok ŋga mʉ̀ və̀ə. Mʉ nə cep bə ŋàŋ anə bohòbʉ̀ʉ sə̀ wo sə tsəm də mʉ̀ sə gʉ̀ fàak am sə ŋgòtse’ swe’ co bʉ̀ʉ sə̀ sə nzeŋgòoŋ fàkgə̀ yà’a wèŋ. ³A zìnə də vès cu sə nzeŋgòŋ bə ŋgùpni’, megu də a ye ŋga vès sə lʉ̀ ves nsàp bʉ̀ ànə fana vès kà bə ŋàaŋ ŋgùpni’ avès sə lʉ̀. ⁴Bum mà’ dzè’ sə̀ vèes lʉ̀ bə zeŋ sə, ka sə̀ sə nze yeŋ. A sə̀ Nwì, sə̀ yà’ tse’ ŋàŋ wùriŋ. Aco yà’ ghak ŋkə̀rə̀ bʉ̀ʉ sə̀ wo sə bɛ̀ŋ Nwì sə nzeŋgòŋ fɛŋ nə. ⁵A yà’a də vèes kʉ̀ə̀msə màkgə̀ nsàp ŋkərə̀ nə̀ wo tse’ nà’, nə sə dzeeŋ ŋgòrì Nwì, nə ye bə yusə̀ yà’ tse’ nɛ̀ni’ pwe’. Vèes jə fa lògə̀ nsàap tsətsərə̀ə yà’sə bohòKrɛst co ŋgàa ndapndzəm, də wo yuk bohòyi. ⁶Ghà nə̀ mʉ̀ rì fis wes bʉ̀ʉ sə̀ wo yù bum sə̀ mʉ̀ ànə com fa weŋ mʉtsətsə’rə̀ə wèŋ fana mʉ̀ tʉksə bʉ̀ʉ sə̀ wo sə kà yàwo yà’ yùsə.

⁷Wèeŋ kʉk ja’a yusə̀ yà’a jəja. A ye-a ŋga ŋwə̀ nəmòk sə tsərə də yi ŋwə̀ə Krɛst fana ŋgə̀ŋgàŋ riŋ tse’ də vèes sə̀’ bʉ̀ʉ Krɛst anə co yi. ⁸Kàmòk mʉ̀ sə kum ŋgùŋ bə ŋàaŋ sə̀ Tà a fa ves sə ləlà. Wèŋ riŋ də yi fa ves yà’ ŋgògʉ weŋ bə zeŋ də ya wèeŋ kuk lo mantombì, ka də ya vèes soŋ mak weŋ bə zeŋ sə nze yeŋ. A ye-a sə̀ də mʉ̀ sə kùm ŋgùŋ vɛ’nə fana marè’tu nə kà mʉ bə zeŋ ko. ⁹Kà də wèeŋ tsərə də mʉ̀ còm wəpsə mègù weŋ bə ŋwàk dʉk. ¹⁰Mʉ̀ dʉk vɛ’nə bʉ̀ʉsə̀ bʉ̀ʉ mok wèŋ sə dʉk də, mʉ còmgə̀ ma ndzə ŋwàak, ncèp àm gʉŋ nja wùriŋ; mʉ və̀ bə tu am fana wo ye ŋga mʉ̀ mègù mʉbwes ŋwè ŋgwàŋ, yusə̀ mʉ̀ sə cep sə yà’ kà bə ŋàŋ ye lok. ¹¹Nsàp bʉ̀ ànə wèeŋ riŋtse’ də yusə̀ vèes còm tumsə lògə̀ yà’ ndzə ŋwàak sə mègù sə̀’ yusə̀ vèes və̀-a bə tu avès, vès gʉ sə̀’ vɛ’nə.

¹²Bʉ̀ʉ mok wèŋ cu sə̀ wo gʉ̀gə̀ ni’ awo də ya wo ye co bʉ̀ʉ sə̀ ghaŋ wùriŋ. Kaco vès baŋ to ntʉm, nə fʉ’rə to ni’ avès bə bʉ̀ʉ yà’sə yeŋ. Wo fʉ̀hʉgə̀ ni’ awo sə megu bə yusə̀ wo tsərə kok yà’ sə ntʉʉ̀ wo. Wo fʉ̀hʉ vɛ’nə fana yà’ sə ye də wo jì ŋkərə̀. ¹³Bohòvès yàvès fana kaco vès sə kum ŋgùŋ ŋga vès ka yumok sə̀ yà’a kə̀kʉrə̀ sə̀ co vès fʉhʉ ni’ avès bə zeŋ tse’ yeŋ. Vèes fʉhʉ yàvès bə fàak sə̀ Nwì a cì’ nòŋsə fa ves sə. Wèŋ bə tu awèeŋ sə̀’ fàak sə̀ yi cì’ fa ves sə mamòk. ¹⁴A ye-a ŋga vès sə kùm ŋgùŋ bohòwèŋ vɛ’nə fana yà’ kà co də vès ànə ka weŋ ntòriŋ yuk ye; vès ànə kə tseŋ to weŋ bə Ntirə̀ nə̀ Bə̀boŋ nə̀ Krɛst nə fa’ vès. ¹⁵Vès sə kà ŋgùŋ bə fàak sə̀ a gʉ̀ yà’ bʉ̀ʉ mok wèŋ kùm. Nsàp kùmŋgùŋ ànə ka sə̀ mvwe’ fàak sə̀ Nwì a cì’ fa ves sə yeŋ. Vès tsəm də mvə̀’nə̀ wèŋ sə fa ntʉm awèŋ bohòKrɛst nə, nə sə kuk lo mantombì yà’a fana yà’ gʉ ves ŋgòfàk ghaha lòmantombì mʉtsətsə’rə wèŋ sə̀’. ¹⁶A ye vɛ’nə fana vès tsoho lo Ntirə̀ nə̀ Bə̀boŋ nə mvwe’ lak mok sə̀ yà’ sàp càsə yàwèŋ yà’sə, nə kà ŋgùŋ bə fàak sə̀ ŋwə̀ nəmòk à fàk nòŋsə lòyi sə kùm. ¹⁷A ye-a ŋga ŋwə̀ nəmòk dzəm ŋgòkùm ŋgùŋ fana yi kum bʉ̀ʉ Tà Nwì. ¹⁸Bʉsə̀ ŋwə̀ nə̀ Tàa dʉk də nà’a kə̀kʉrə̀ fana wo jəŋ ŋgə̀ŋgàŋ co ŋwə̀ nə̀ bə̀boŋ; ka ŋwə̀ nə̀ yi cèp yi bə cùu ye də yi vɛ’ nà’a yeŋ.

Njo Nə̀ Pol Sə Tɛ’ Fa Krətèeŋ Sə̀ Lak Korè

¹Mʉ̀ dzəm ŋgòcèp mʉncèp ləm, fana mʉ̀ lɛŋ weŋ ŋgòkontʉm, nə yu’rə fa mʉ momjo. ²Mʉ̀ dzəm ŋgòcèp vɛ’nə bʉ̀ʉsə̀ mʉ̀ dzəm weŋ nsàp nə̀ wèeŋ me’rə-a mʉ, nə yuŋ lo ŋwə̀ nə̀ zok fana ntʉm yaaŋ mʉ wùriŋ. Nwì a fa mʉ nsàp dzədzəm ènə bohòwèŋ anə yi fana mʉ̀ sə wa weŋ wùriŋ. Wèeŋ co wà’ŋgwɛ̀ŋ mòk nə̀ yi ka ŋwə̀mbam riŋ, nə̀ mʉ̀ a dʉk də mʉ nə gusə fa megu yi bohòŋwə̀ nə̀ mò’fis; ŋwə̀ ànə Krɛst. ³Wʉə sə ko mʉ də kàmòk mvə̀’nə̀ no ànə bòrə ŋwà nə̀ wo to yi də Iìf bə ŋkərə̀ fana aco wo jipsə tu awèŋ, fana wèŋ swi ŋgòfa ni’ awèŋ bohòKrɛst bə ntʉm nə̀ mò’fis. ⁴Mʉ̀ riŋ də ŋwèe kə̀ tsòho fa-a weŋ Jisòs mòk nə̀ zok fana wèŋ dzəm gesə fa yi nà’ sə̀’. A ye-a ŋga wo kə̀ tsòho fa-a weŋ bə liŋ yòŋsə̀ mòk nə̀ zok fana wèŋ dzəm gesə nà’ sə̀’. Wo kə tsoho fa-a weŋ Ntirə̀ nə̀ Bə̀boŋ mòk nə̀ zok, wèŋ dzəm nà’ sə̀’. ⁵Mʉ̀ tsəm də mʉ sə̀’ ŋwə̀ nə̀ ghaŋ co bʉ̀ʉ sə̀ wèŋ sə jə wo co ŋgàa ntum sə̀ ghaŋ yà’sə. ⁶A ye-a sə̀’ də mʉ kà cù cèp kwè rìgə̀ fana mʉ̀ ka ləm yeŋ, mʉ̀ rì bum sə̀ Nwì yo. Vès a tsə̀’ fa weŋ bum yè’sə pwe’fo’ kɛ̀’ ŋkʉ̀ʉŋntɛ̀ŋ laŋ.

⁷Ghà nə̀ mʉ̀ à tsòho fa weŋ Ntirə̀ nə̀ Bə̀boŋ nə̀ Nwì nə, mʉ̀ à ka də wèeŋ lak mʉ fo’ mbàm dʉk. Mʉ̀ à jə lòni’ àm sə nze də ya wèeŋ ye yàwèŋ mʉtsə̀; ye də mʉ̀ à gʉ̀ yà’sə bʉp à? ⁸Ghà nə̀ mʉ̀ à sə fàk bohòwèŋ, sə lak mʉ coos mok sə̀ zok; aco mʉ̀ dʉk də mʉ̀ à sə yə̀ wo ŋgòtɛsə weŋ. ⁹Ghà nə̀ vesùwèŋ ànə ye sə, nùmbu nə̀ mʉ jamə yumok fana mʉ̀ kà weŋ ŋgə’ sə̀ fa lok; bwema sə̀ wo à tesə mvwe’ nzeŋgòŋ Màsìdoniyà yà’a à fa mʉ yusə̀ mʉ̀ sə jamə yà’ pwe’fo’ wo. Mʉ̀ à sə jə ŋkərə̀ də mʉ kà weŋ ni’ nìrə̀, mʉ nə sə kərə mali də mʉ kà weŋ ni’ sə̀’ nìrə̀ yuk. ¹⁰Zìnə nə̀ Krɛst nə cu sə ntʉʉ̀ mʉ̀, mʉ nə kum mali ŋgùŋ vɛ’nə mvwe’ nzeŋgòŋ Gris pwe’fo’ mʉ nə kà ŋwè ni’ nìrə̀, yu nəmòk nə̀ co ŋwèe nə tsok fa mʉ də mʉ kà ŋgùŋ kùum nə kà ye. ¹¹Mʉ̀ à gʉ̀ vɛ’nə yè’sə bʉ̀ʉ yà? Wèŋ tsəm də mʉ̀ ka weŋ dzəm à? Nwì riŋtse’ də mʉ̀ dzəm weŋ. ¹²Mʉ nə sə gʉ mali mvə̀’nə̀ mʉ̀ sə gʉ̀ ŋga’a sə, də ya ŋga mʉ nə se noŋsə ŋgàaŋ bʉ̀ʉ sə̀ wo sə nɛ̀ni’ sə jəja, nə sə dʉk də vesi wèeŋ fàk kʉ̀rəgə̀ yəyərə̀ yà’a wèŋ. ¹³Bʉ̀ʉ yè’sə wèŋ ka ŋgàa ntum ye lok, wo ŋgàa bòrə̀ bwìŋ, nə sə jəŋ ni’ awo də ŋgàa ntum Krɛst wèŋ. ¹⁴Yè’sə ka yumok sə̀ co yà’ gʉ ŋwè mərə yeŋ, Satà bə tu, yi bɛ̀ŋgə̀ masinjàa Nwì sə̀ wo ŋgàa marɛŋ sə. ¹⁵Ye də a ye-a ŋga ŋgàa fàak ye wèŋ gʉ̀ bʉ̀sə ni’ awo co ŋgàa fàak sə̀ wo yàwo kə̀kʉrə̀ sə fana yà’ ka yu məmərə̀ ye. Wo nə̀ kə̀ lə̀ nùu sə̀’ mvə̀’nə̀ wo sə fàk sə.

Pol Fʉ̀’rə Ni’ Ye Bə Bʉ̀ʉ Mok Sə̀ Wo Sə Kùm Ŋgùŋ

¹⁶Mʉ̀ sə cèp fe’lə sə̀mok; kà də ŋwə̀ nəmòok jəŋ mʉ co ləm dʉk. A ye-a ŋga wèŋ jə mʉ vɛ’nə fana wèŋ fa mʉ mandzə̀ co ləm nə, ya mʉ kumŋgùŋ njàm sə̀’ momjo. ¹⁷Mʉ kumŋgùŋ vɛ’nə fana ka də Tà dʉk mʉ yi də mʉ cep vɛ’nə yeŋ, mʉ̀ sə cèp mègù co ləm. ¹⁸Bwìiŋ ŋkʉ̀ʉŋntɛ̀ŋ sə̀ wo kùmgə̀ ŋgùŋ bə gaŋ sə̀ sə nzeŋgòŋ fɛŋ fana mʉ nə kum yàm sə̀’. ¹⁹Wèŋ tsəm də wèŋ tse’ ŋkərə̀ wùriŋ, fana bum ləm sə̀ bwìŋ gʉ̀gə̀ə, wèŋ sə dzəm fa wo yà’ bə kwəkwa. ²⁰Ŋwèe tum kɛ’cà weŋ ntum, wèŋ sə dzəm; wo sə fak zʉ swe’ mʉtuhù wèŋ, wèŋ sə dzəm; wo sə te’ bʉsə weŋ mvə̀’nə̀ yà’ bòwo, wèŋ dzəm; wo kok təəŋ mʉtuhù wèŋ, wèŋ dzəm fa wo; wo sam weŋ bə bo mʉ sihì, wèŋ dzəm sə̀’. ²¹A yà’sə də, a bohòmʉ̀ yàm marè’tu bʉ̀ʉsə̀ mʉ̀ à ka nsàp ŋàŋ nə̀ ŋgògʉ̀ to weŋ yàm vɛ’nə nə tse’-a?

Mʉ̀ dzəm ŋgòcèp fe’lə co ləm sə̀mok. A ye-a ŋga ŋwə̀ nəmòk cu nə̀ yi də aco yi kumŋgùŋ bʉ̀ʉ yumok fana aco mʉ̀ kum yàm bʉ̀ʉ zeŋ sə̀’. ²²Wo sə dʉk də wo bʉ̀ʉ Hibrù wèŋ à? Mʉ yàm sə̀’ zeŋ. Kè wo sə dʉk də wo bʉ̀ʉ Izùrɛ à? Mʉ yàm sə̀’ mòk. Kè wo də wo ŋgwì bʉ̀ Abràham à? Mʉ yàm sə̀’ zeŋ. ²³Kènə wo sə dʉk də wo ŋgàa fàak Krɛst ɛ? Mʉ sə̀’ mòk. Mʉ̀ ghak wo pwe’fo’ mʉ̀. Mʉ̀ sə cèp yè’sə mok co ŋgà ŋaŋ. Mʉ̀ a fàk ghak wo gʉgʉŋ mʉ̀, nə ni ghak wo bə ndapndzəm sə̀’ mʉ̀. Wo à lə̀p ghak bə ŋkwɛ̀s sə̀’ mʉ̀ fana mʉ̀ swirə ghak wo kpʉ sə̀’ mʉ̀ nə. ²⁴Wo à lə̀p mʉ nsàp lə̀lə̀p bʉ̀ʉ Jus wèŋ nə̀ ŋkwɛ̀s hum tɛ’-ncòp-və̀ke’ nà’a kɛ̀’ tàŋ. ²⁵Bʉ̀ʉ Rumà wèŋ à lə̀p mʉ nsàp nə̀ njàwo sə̀’ kɛ̀’ tɛ’; wo à tərə mʉ bə lìs kɛ̀’ mò’fis; ŋgwes à bwì kɛ̀’ màk gèsə mʉ sə ndzəpə̀ kɛ̀’ tɛ’; mʉ̀ à naaŋ yiskok mʉ ndzəpə̀ tə̀tè nùm co, tsok rɛŋ kɛ̀’ mò’fis. ²⁶Bə gì am sə̀ mʉ̀ à sə gì kɛ’cà sə pwe’fo’, mʉ̀ kʉəp kpʉ mvwe’ sə̀ mantùŋ rwiŋ, nə ye bohòŋgàa yə̀ wèŋ. Mʉ̀ kʉəp kpʉ bohòbʉ̀ʉ lak am sə̀ wo bʉ̀ʉ Jus wèŋ, nə ye bohòbʉ̀ lakmvum wèŋ sə̀’. Mʉ̀ a kʉəp kpʉ mʉ ntòlak nə ye ŋgəà sə̀’. Mʉ̀ kʉəp kpʉ mvwe’ ndzəp nə̀ ghaŋ nà’a nə ye bohòbʉ̀ʉ sə̀ wo dʉk bòrəgə̀ də wo bʉ̀ʉ Krɛst yà’a. ²⁷Mʉ̀ à fàk, nə wo vɛ’ɛ wùriŋ. A kɛ̀’ ŋkʉ̀ʉŋ sə̀ mʉ kà lo mʉlisə̀ mʉ̀ gèsə̀ tsok rɛŋ; njè bɛŋ sə yaŋ mʉ, njè ndzəp sə yaŋ mʉ sə̀’. A kɛ̀’ ŋkʉ̀ʉŋ sə̀ mʉ̀ sə taŋ cum njè, mbʉəp sə ko mʉ, mʉ̀ kà cə̀k tse’. ²⁸Mʉ bwes noŋsə bum mok sə̀ yà’ ànə ye sə vɛ’nə fana ntʉm àm sə fa mʉ ŋgə’ bə fàak am sə̀ yà’ cu lòkɛ’ mʉmvwe’ coos sə wèŋ sə̀’. ²⁹Ŋwə̀ nəmòok ye wòwo fana mʉ̀ yuk ŋga ni’ àm wo mʉ yàm sə̀’. Ŋwə̀ nəmòok gbʉ̀ ni sənə bʉp fana ntʉm àm yaaŋ mʉ vɛ’ɛ wùriŋ.

³⁰A ye-a də mʉ kumŋgùŋ fana mʉ̀ kum bə bum sə̀ yà’a nìtsə̀’gə̀ də mʉ ŋwə̀ nə̀ jì ŋàŋ sə. ³¹Nwì nə̀ yi tɛ̀’ɛ Tà Jisòs, sə̀sèfaa ye bə liŋ sə̀ ye sə nə̀ mvèsə̀. Yi rì də mʉ̀ sə kà yè’sə mvwès cì’. ³²Ghà nə̀ mʉ̀ à ye mvwe’ lak Dàmaskù fana Govənònə̀ yi à sə fàk bohòŋkum Àritàs nà’a à nòŋsə sojà wèŋ mvwe’ ncùu ŋka’ lak sə də ya yà’wèeŋ ko mʉ. ³³Ànə geŋ bʉ̀ʉ mok fis casə mʉ bə tətoo ŋka’ mok sənə ŋkòk fana mʉ̀ swìrə.

Nwìi Jəgə̀ Yusə̀ Yà’a Jì Ŋàŋ, Nə Gʉ Fàk Bə Zeŋ Sə̀’

¹A ye-a sə̀ də kùmŋgùŋ ka fàk tse’ fana mʉ̀ tse’ ŋgòkùm malì ŋgùŋ nə. Mʉ nə cep ŋga’a mok bə lo sə̀ mʉ̀ yə, nə ye bum mok sə̀ Tà a nìtsə̀’ fa mʉ yà’. ²Mʉ̀ rì ŋwə̀ nəmòk nə̀ yi krətèŋ, a ŋga’a lùumŋgòŋ hum-ncòp-kwè nə̀ wo à ko jə kok lòyi mʉmvwe’ ntòbu nə̀ nà’ sàp càsə mok pwe’ nə. Yi ànə lo-a mbwa bə ŋgùpni’ jəja vɛ’ɛ kè də yi ànə lo-a sə̀ bə yòŋsə̀ àlɛ’, mʉ̀ ka riŋ; Nwì rì bə zeŋ yi. ³Mʉ̀ rì də wo ànə ko jəŋ lo ŋwə̀ ànə mʉ Pàràde. Mʉ̀ ka sə̀’ riŋ mali də yè’sə ànə ye bə ŋgùpni’ jəja vɛ’ɛ kè də yi ànə lo-a sə̀ bə yòŋsə̀ àlɛ’; mʉ̀ ka riŋ, Nwì rì mègù bə zeŋ yi. ⁴À kə̀ dzèŋ mbwa, yi yuk bum mok sə̀ kaco ŋwè cep to yà’ yeŋ; yà’ ye sə̀’ də ŋwèe kà yà’ cèp. ⁵Bohòma nə̀ tu ŋwə̀ ànə fana aco mʉ̀ kumŋgùŋ. Bohòma nə̀ tu yàm fana kaco mʉ̀ kumŋgùŋ yeŋ. Aco mʉ̀ kumŋgùŋ lɛ bə bum sə̀ yà’ sə nìtsə̀’ də mʉ ŋgà jì ŋàŋ sə. ⁶A ye-a ŋga mʉ̀ dzəm də mʉ kumŋgùŋ fana yà’ kà co nsàp kùmŋgùŋ ŋwə̀ ləm ye, bʉ̀ʉsə̀ yusə̀ mʉ nə sə cep sə, yà’a zìnə. Megu də mʉ nə kà kum, bʉ̀ʉsə̀ mʉ̀ ka dzəm də ŋwə̀ nəmòok jəŋ mʉ co ŋwə̀ nə̀ ghaŋ bʉ̀ʉ zeŋ dzəm, yi jə mʉ lɛ co nsàp ŋwə̀ nə̀ yi à yə ŋga mʉ̀ sə gʉ̀ʉ, nə yuk ŋga mʉ̀ sə cèep.

⁷Mvə̀’nə̀ mʉ̀ à yə bum maŋgəŋgèeŋ yè’sə, Nwì à ka dzəm də mʉ koksə ŋkwɛ̀ŋ, nə sə nɛni’ bʉ̀ʉ bum maŋgəŋgèeŋ sə̀ mʉ̀ à yə yà’ sə dzəm. Fana yi nə fa mʉ yumòk nə̀ nà à ye co njàk sòp tə mʉ ndzə ni’ì mʉ̀ anə. Nà’ ànə ye bohòmʉ̀ anə co masinjà Satà, nə̀ yi sə ləp mʉ də ya mʉ kà ni’ sə nɛ̀. ⁸Mʉ̀ à lɛŋ fis bohòTà kɛ̀’ tɛ’, də yi jəŋ fis gɛsə nà’ bohòmʉ̀ anə fo’. ⁹Yusə̀ yi à cèp fəsə fa mʉ sə à ye də, <<Bòvə̀m nə̀ njàm nə a kʉ̀rə bohòwù anə laŋ. Bʉsə̀ ŋàaŋ sə̀ yàm sə gʉ wesəgə̀ mvwe’ sə̀ jì ŋàaŋ fo’.>> Ye də mʉ nə kum ŋgùŋ, nə kwa wùriŋ ŋga mʉ wòwo, ya ŋga ŋàaŋ sə̀ Krɛst sə ye sə ntʉʉ̀ mʉ̀ anə. ¹⁰Ye də a ye-a ŋga mʉ wòwo, bwìŋ sə yak mʉ, bum sə gʉŋ ghak mʉ, bwìŋ sə gʉ mʉ bʉp, mʉ̀ sə ye ŋgə’ bʉ̀ʉ Krɛst fana ntʉm àm kà mʉ ŋgə’ sə fa; bʉ̀ʉsə̀ mʉ̀ rì də ghà nə̀ mʉ wə̀wo fana mʉ̀ ye gʉgʉŋ.

Ntʉm Yaaŋ Pol BohòBʉ̀ʉ Korè Wèŋ

¹¹Mʉ̀ bʉ̀sə ni’ àm ŋgòcèp co ləm, ŋga gʉ̀ mʉ wèŋ ŋkuŋ mʉ gʉ vɛ’nə; ŋga anə ye co wèŋ sə kwasə mʉ wèŋ. A ye-a sə̀ də mʉ̀ ka ŋwə̀ mòk mʉ̀ yeŋ, fana mʉ̀ ka ŋwə̀ nə̀ maŋkwɛ̀ŋ bohòŋgàa ntum awèŋ sə̀ wo nsàp njàwo zok yà’sə mʉ̀ yeŋ. ¹²Ghà nə̀ mʉ̀ à ye vesùwèŋ yà’a, fana mʉ̀ ko ntʉm, nə niŋtsok fa weŋ də mʉ ŋgà ntum nə̀ zìnə. Mʉ̀ sə gʉ bum maŋgəŋgèŋ wùriŋ, mʉ̀ sə gʉ bum mok sə̀ yà’ sə nìtsə̀’ mvə̀k sə̀’; mʉ̀ à gʉ̀ fàak sə̀ yà’ tse’ ŋàŋ sə̀’ mʉŋgorə̀ wèŋ anə. ¹³Yumok cu sə̀ mʉ̀ à gʉ̀ bohòcoos mok wèŋ, nə kà weŋ yàwèŋ gʉ̀ fa yo à? Mègù nə̀ də ghà nə̀ mʉ̀ à sə fàkgə̀ vesùwèŋ co ŋgà ntum yà’a, mʉ̀ à sə kà weŋ ni’ bə nzak mbàm nìrə̀. Bə yà’sə, mʉ̀ sə lɛŋ weŋ vɛ’ɛ də kwəkwè’ wèeŋ swi fa mʉ bə jòŋ ànə.

¹⁴Wèeŋ yeè, mʉ̀ sə fʉ̀hʉ ŋga’a ŋgòkə̀ kɛ’ yə weŋ sə̀mok, nə̀ kɛ̀’ tɛ’. Mʉ nə kà weŋ ni’ bə nzak mbàm sə̀’ nìrə̀; mʉ̀ dzəm weŋ, mʉ̀ ka bum awèŋ sə̀ wèŋ tse’ dzəm. Bweŋke’ ka tse’ ŋgòlàp fa bum bohòtɛ̀’ awo wo yeŋ, tɛ̀’ tse’ ŋgòlòksə fa bwe ye yi. ¹⁵Mʉ yàm yəyərə̀ ŋgòbʉpsə yusə̀ mʉ̀ tse’ pwe’fo’, nə bʉpsə ni’ àm sə̀’ bʉ̀ʉ tu awèŋ. A ye-a ŋga mʉ̀ dzəm weŋ wùriŋ vɛ’nə, ye də wèeŋ nə dzəm mʉ yàm momjo à?

¹⁶Bʉ̀ʉ awèŋ mok sə cep bə liŋ am də, <<A zìnə də yi və̀gə̀ə, yi kà ves ŋgə’ bə nzak mbàm lɛ fa anə; megu də yi yà’sə mʉ limŋgòŋ ŋwə̀ nə̀ tə̀tè. Vès rì tse’ də yi a zʉ lòtsoŋ swe’ bə mandzə̀ mòk bohòvès yè’sə laŋ.>> ¹⁷Kàcò, a yè’sə bə nsàp nə̀ fò? Bʉ̀ʉ sə̀ mʉ̀ a sə tum wo bohòwèŋ yà’a, mòk à lim zʉ fʉk ŋwə̀ nəmòk à? ¹⁸Mʉ̀ lɛŋ Taitòs də yi geŋ, nə tumsə be’lə yi bə moma mòk nà’a sə̀’. Wèŋ tsəm də Taitòs ànə lim weŋ à? Ves Taitòs nə tsərəgə̀ nsàp nə̀ mò’fis, nə sə gʉ bum sə̀’ nsàp nə̀ mò’fis, wèŋ ka vɛ’nə riŋ à?

¹⁹Kàmòk wèŋ sə tsərə də yusə̀ vès sə cèp yè’sə vès sə lap bə zeŋ mandzə̀ ŋgògʉ̀ də ya vèes yəəŋ mʉlisə̀ wèŋ co bʉ̀ʉ sə̀ vèes bə̀boŋ àlɛ’. Hai’ ka vɛ’nə yeŋ. Vèes cèpgə̀ mvə̀’nə̀ Krɛst sə dzəm də vèes cep sə, mantombìi Nwì. Ŋge’ am wèŋ, yusə̀ vèes gʉ̀gə̀ yà’ pwe’fo’, a yegə̀ ŋgòtɛsə weŋ. ²⁰Wʉə sə ko mʉ də kàmòk mʉ nə kə tseŋ weŋ, ŋga wèŋ ka nsàp nə̀ mʉ̀ dzəm də wèeŋ ye vɛ’nə nə yeŋ. Mʉ̀ kà yàm bohòwèŋ anə mvə̀’nə̀ wèŋ dzəm də mʉ ye sə sə̀’ yə. Wʉə sə ko mʉ də kàmòk mʉ nə kə tseŋ weŋ ŋga wèŋ sə kʉ̀ə̀m, mok sə waŋ bum bwìŋ, mok sə jok, mok ye ŋgàa wi’ bə ŋgàa yàk bwìŋ wèŋ. Mok ye ŋgà caŋsə̀ ncəncàŋ, ŋgàa nɛ̀ni’ nə ye ŋga bum ram bʉp wes pwe’fo’. ²¹Wʉə sə ko mʉ də mʉ və-a fana marè’tu nə ko mʉ mantombìi Nwì bʉ̀ʉ wèŋ. Fana mʉ̀ sə waaŋ geŋ bohòbʉ̀ʉ sə̀ wo à gʉ̀ bʉp, nə kà ntʉm awo kupsə̀. Mʉ nə sə waŋ bʉ̀ʉ sə̀ wo a gʉ̀ yusə̀ yà’ ka rərɛŋ yeŋ, nə sə ko sàhà, nə ye ncu nə̀ bʉp nə̀ anə ye co ŋwè kà vɛ’nə cu.

Pol Sə Tip Bʉ̀ʉ Korè Wèŋ, Nə Soŋ Wo Ntu’ Sə̀mok

¹Nè’e ŋga’a nə̀ kɛ̀’ tɛ’ nə̀ mʉ nə kə kɛ’ yə weŋ. Wo à còm ndzənə ŋwàk Nwì də, <<A ye-a ŋga wo jə və̀ nzak mʉtuhù ŋwə̀ nəmòk, kaco nzak nə zʉ yeŋ, tse’ŋga bwìŋ ba kè tɛ’ àlɛ’ dʉk də wo a yə bə lis awo ŋkuŋ.>> ²Mʉ̀ dzəm ŋgòtsə̀’ fa bʉ̀ʉ sə̀ wo à gʉ̀ bʉp fa’ mantombì yà’a yumok, nə ye bə mok yà’a pwe’ sə̀’. Mʉ̀ ànə cep bum yè’sə mantombì fa’ laŋ, ghà nə̀ mʉ̀ à kə̀ kɛ’ yə weŋ nə̀ kɛ̀’ ba nà’a; fana mʉ nə cep mali yà’ ŋga’a mvə̀’nə̀ mʉ̀ ka vesùwèŋ yeŋ yè’e sə̀mok; də mʉ və̀ fe’lə mok fana mʉ nə kà ŋwè mè’rə̀. ³Mʉ nə gʉ vɛ’nə bʉ̀ʉsə̀ wèŋ dzəm ŋgòyə yumok sə̀ yà’ sə nìtsə̀’ də Krɛst sə cèp càsə bohòmʉ̀ yi anə zìnə. Yi kà weŋ bə wòwo kotse’gə̀, yi nìtsə̀’gə̀ ŋàaŋ ye mʉŋgorə̀ wèŋ anə. ⁴A lɛ zìnə də wo à tɛ’lə yi mʉntə̀əŋ bə jì ŋàŋ, nə ye sə̀’ zìnə də yi cu bwìŋ ŋwəm sə̀’ bə ŋàaŋ sə̀ Nwì. Mʉmvə̀’nə̀ vesiwèeŋ mvwe’ mò’fis, vèes jì ŋàŋ fana vèes nə cum ŋwəm sə̀’ bə ŋàaŋ sə̀ Nwì sə, nə kotse’ weŋ bə ŋàŋ anə.

⁵Wèeŋ mum və̀əm awèŋ, nə ja’a-na də wèŋ sə fa mali ntʉm awèŋ bohòKrɛst nə àlɛ. Wèeŋ riŋtse’ də Krɛst cu sə ntʉʉ̀ wèŋ, tse’ŋga wèŋ a mùm və̀m awèŋ nə ye də wèŋ-a gbʉ̀ mə̀mumsə̀. ⁶Vès tsəm də wèeŋ nə kʉk ja’a ves, nə riŋ də vès ka yàvès gbʉ. ⁷Mʉ̀ lɛŋ bohòNwì də wèeŋ gʉ lɛ yusə̀ yà’a nə ye kə̀kʉrə̀. Mʉ̀ lɛŋ vɛ’nə fana yà’ kà də ya vèes yəəŋ co ma nsàp yumok, də fàak avès sə lòmantombì dʉk. Yusə̀ yà’a ca sə də vès dzəm də wèeŋ gʉ megu yusə̀ yà’a bə̀boŋ. Vès dzəm vɛ’nə, ŋga a ye-a sə̀ də yà’sə nə gʉ ves ŋgòyəəŋ co də vès gbʉ̀ laŋ na. ⁸A vɛ’nə bʉ̀ʉsə̀ kaco vès gʉ yumok ŋgòtəhə lok zìnə yeŋ, vès tse’ mègù ŋgògʉ̀ nà’ lo mantombì. ⁹A ye-a də vèes wòwo ŋga wèeŋ yàwèŋ gʉgʉŋ fana vès kwa cɛ̀bʉ̀ə̀. Yusə̀ vès sə lɛŋ Nwì bə zeŋ sə də wèeŋ foho təəŋ fe’lə rərəŋ sə̀mok. ¹⁰Ye də mʉ̀ sə còm fa weŋ bum yè’e ŋga mʉ̀ ka ntòvə vɛ’nə ya ŋga mʉ və̀ə, mʉ̀ kà də mʉ jə ŋàaŋ sə̀ Tà a fa mʉ sə, nə kotse’ weŋ bə bo sə̀ gʉgʉŋ dʉk. Yi a fa mʉ ŋàaŋ yà’sə ŋgògʉ̀ weŋ bə zeŋ də wèeŋ lo mantombì, ka də mʉ jəŋ lo weŋ bə zeŋ maŋkwɛ̀ŋ yeŋ.

¹¹Mʉ̀ sə mèsə ŋwàk àm nə mʉmvə̀k nè’e də bwema am wèŋ, wèeŋ cum bə̀boŋ. Wèeŋ te’e benə tsə’rə ncu àwèŋ, wèeŋ yuk yusə̀ mʉ̀ tsə̀’ fa weŋ, wèeŋ cum cù mò’fis, wèeŋ cum bə fifi, fana Nwì nə̀ yi tse’ dzədzəm, nə tse’ fifi, nə ye wenə wèŋ. ¹²Wèeŋ cepsə mòk bə mòk bə nsàp cə̀cèpsə̀ nə̀ də wèeŋ mò’fis. Bʉ̀ʉ Nwì sə̀ wo cu fɛŋ sə cèpsə gèsə weŋ pwe’. ¹³Mʉ̀ lɛŋ də bə̀bo nə̀ Tà Jisòs Krɛst, nə ye dzədzəm nə̀ Nwì nə ye bohòwèŋ. Mook sə̀’ də wèeŋ cumcòŋ nsàp nə̀ Yòŋsə̀ nə̀ Rərɛŋ tse’ nà’a.