1 Timatì

Ŋwàk nə̀ Mantombì,

nə̀ Pol à Còm Fa

TIMATÌ

Timatì à ye krətèŋ ŋga yi ntòmʉwà’ŋwè. Pol ànə fa noŋsə lo cos nə̀ mvwe’ lak Efesònə ndzə bohòyi. Ŋwàk nə̀ Pol à còm to fa Timatì ènə nà’ sə tip yi nja gʉgʉŋ bə bum tɛ’. Nə̀ mò’fis ŋgòfa ntip bə nzak yəyə’rə̀ nə̀ nà’a bə mvwès mʉmvwe’ cos nə. Bʉ̀ʉ mok sə yə’rə də bum sə̀ a sə yə yà’ bə lis ènə yà’a bʉp. Bwìŋ à sə dʉk sə̀’ də aco ŋwè kə tse’ megu lùŋ ŋga yi tse’ nsàp ŋkərə̀ mòk nə̀ bwìŋ ka nà’ pwe’ riŋ. Yi tse’ ŋgòdzə̀ zʉzʉʉ mok, nə kà bo bə nzak gù sə̀’ tse’ lok ŋkuŋ. Pol còm ŋgòdʉk fa Timatì də nà’a kà tu bə yəyə’rə̀ə sə̀ mvwès yà’sə naàŋ.

Ŋwàk nə sə cèp mʉmvə̀’nə̀ aco wo sə gʉ bum mʉ cos sə̀’, nə ye mʉmvə̀’nə̀ ŋgòkùksə Nwì. Nà’ sə cep bə nsàp ŋwə̀ nə̀ bʉ̀ʉ sə̀ wo mantombì mʉ cos tse’ ŋgòye sə̀’. Nà’ ləsə bə ntip bohòTimatì nə də yi ye ŋgà fàk nə̀ bə̀boŋ bohòJisos Krɛst. Yi sə riŋ fàha sə̀ yi tse’ ŋgògʉ̀ fa bohòbòop bwìŋ zəzok sə̀ wo a dzəm bohòJisòs nə.

¹Còm ŋwàk nè’e mʉ̀ʉ Pol, nə̀ mʉ ŋgà ntum Jisòs Krɛst. Nwì nə̀ yi à lùŋsə ves nə, nə ye Jisòs Krɛst nə̀ vesùwèŋ sə naaŋ tu bohòyi nə, wo a dʉk wo də mʉ ye ŋgà ntum. ²Mʉ̀ sə còm fa ŋwàk ènə bohòwù Timatì, nə̀ wu co mo àm, bʉ̀ʉsə̀ wù à fa ntʉm yòbohòJisòs Krɛst. Mʉ̀ lɛŋ Nwì nə̀ yi Tɛ̀’ avès, nə ye Jisòs Krɛst nə̀ yi Tà àvès nə də wo gʉ wu bə̀boŋ, nə tɛsə wu bə koksə̀manziŋ awo, nə fa wu fifi sə̀’.

Bʉ̀ʉ Mok Sə Yə’rə Fa Bwìŋ Yusə̀ Zok

³Ghà nə̀ mʉ̀ à sə lòmvwe’ lak Màsìdoniyà yà’a à ye fana mʉ̀ tip wu də wu cum mvwe’ lak Efesò. Bʉ̀ʉ mok wèŋ cu fo’ sə̀ wo sə yə’rə fa bwìŋ nsàap bum mok sə̀ zok. Fana mʉ̀ dzəm də wu cum fo’, nə gʉ wo də wo kà vɛ’nə mok sə gʉ̀. ⁴Tsok fa wo sə̀’ də wo teŋsə ŋgòtaaŋ ŋgàam sə̀ yà’ ka fàk tse’ yà’a. Wo kà də wo sə taaŋ kɛ’cà bum sə̀ bə nzak njàŋ dʉk. Nsàap bum yà’sə gʉ̀gə̀ bwìŋ ŋgòcàsə mvə̀k bə mamfenə̀ fana wo kà yusə̀ Nwì à fʉ̀hʉ nòŋsə̀ mantombì jə lò. Bwìiŋ fa ntʉm awo bohòNwì ŋkuŋ fana wo riŋ bum sə̀ Nwì dzəm yè’sə. ⁵Njo nə̀ mʉ̀ dʉk wu vɛ’nə nə, də ya ŋga wo dzəm mòk bə mòk. Aco ŋwè dzəm to mòk bə mòk ŋga yi tse’ ntʉm nə̀ rərɛŋ, nə ye ŋga yi tse’ tsətsə’rə̀ə sə̀ kə̀kʉrə̀, nə fa ntʉm ye bohòNwì bə zìnə. ⁶Bʉ̀ʉ mok wèŋ cu sə̀ wo a mè’rə bum sə̀ zìnə yè’sə, nə jam mandzə̀ nə, fana wo sə cep mok bum sə̀ kaco yà’ jəŋ lo wo mvwe’ mok yeŋ. ⁷Wo sə dzəm də wo sə yə’rə fa bwìŋ lʉ̀k ŋga wo sə kà yusə̀ wo sə cèp sə sə̀’ rɛɛŋ. Wo sə cèp yà’ nə kà məmərə̀ tse’, ŋga wo sə kà yà’ sə̀ rɛɛ̀ŋ fʉ̀k.

⁸A riŋ də lʉ̀ʉk yusə̀ bə̀boŋ, ŋga a ye-a də bwìŋ jə tse’ yà’ bə mandzə̀ nə̀ kə̀kʉrə̀ nə na. ⁹Wèeŋ riŋ də Nwì ànə ka lʉ̀ʉk sə bohòbʉ̀ʉ sə̀ wo gʉ̀gə̀ bum bə mandzə̀ nə̀ rərəŋ nə nòŋsə fa. Yi à nòŋsə fa yà’ bohòbʉ̀ʉ sə̀ wo gʉ̀ bʉpsəgə̀ yà’, nə ye bʉ̀ʉ sə̀ wo kà yi yukgə̀. Yi à nòŋsə fa yà’ bohònsàp bʉ̀ nə̀ co ŋgàa kà Nwì wəp, ŋgàa gʉ̀ bʉp, bʉ̀ʉ sə̀ wo sə kà mandzə̀ Nwì bɛ’, sə̀ wo jəgə̀ bum sə̀ Nwì sə co yu ywì’lə-nzòŋ; bʉ̀ʉ sə̀ wo sə zə tɛ̀’ awo bə ma awo wèŋ, nə sə zə bʉ̀ʉ mok wèŋ sə̀’. ¹⁰Wo sə koho sàhà, mbəmbam sə nooŋ fe’lə sə̀’ bə mbəmbam mok, wo sə yə bwìŋ, sə ci’ mvwès, wo kɛŋ nə sə ci’ mali mvwès. Nwì à nòŋsə fa lʉ̀ʉk sə bohònsàp bʉ̀ ènə, sə̀ wo sə gʉ̀ nsàap bum sə̀ yà’ ka bə mandzə̀ yəyərə̀ nə̀ zìnə nə̀ vès ànə yə’rə fa weŋ fa’ nə yeŋ. ¹¹Yəyə’rə̀ nə̀ zìnə nə, nà’a ye mandzə̀ nə̀ mò’fis bə Ntirə̀ nə̀ Bə̀boŋ nə̀ Jisòs Krɛst à fa ndzə bohòmʉ̀ nə. Ncèp nə sə tsə̀’ bum maŋgəŋgèeŋ sə̀ yà’ və̀ bohòNwì nə̀ yi tse’ mègù ye yusə̀ yà’a bə̀boŋ nə.

Pol Tsə̀’ Mvə̀’nə̀ Jisòs Krɛst A Gʉ̀ Yi Bə̀boŋ

¹²Mʉ̀ kwasə Tà àvès Jisòs Krɛst nə̀ yi a fa mʉ ŋàŋ ŋgògʉ̀ fàak yè’sə. Mʉ̀ kwasə yi bʉ̀ʉsə̀ yi kʉ̀k ja’a mʉ co ŋwə̀ nə̀ mʉ̀ tse’ zìnə, nə cokfis mʉ, də mʉ fak bohòyi. ¹³Wèŋ rì də mʉ̀ ànə sə bʉpsə liŋ ye sə fa’. Mʉ̀ à sə yeŋsə yi ŋgə’, nə sə yak yi, mʉmvə̀’nə̀ mʉ̀ à sə gʉ̀ vɛ’nə bohòbʉ̀ʉ ye yà’a. Bum yè’sə ànə ye-a sə̀ vɛ’nə fana yi koksə mali manziŋ bohòmʉ̀ anə, bʉ̀ʉsə̀ mʉ̀ ànə sə gʉ vɛ’nə ŋga mʉ̀ ka bohòKrɛst ntòdzəm tse’ fana nə kà zìnə nə sə̀’ ntòrìŋ. ¹⁴Jisòs Krɛst nə̀ yi Tà àvès nə a gʉ̀ mʉ bə̀boŋ wùriŋ. Yi gʉ̀ mʉ, mʉ̀ nə dzəm bohòyi, nə dzəm bʉ̀ʉ mok wèŋ sə̀’. Yi gʉ̀ fagə̀ bʉ̀ʉ sə̀ bə yà’wèeŋ mvwe’ mò’fis mʉmvə̀’ ànə. ¹⁵Ncèp nə̀ mʉ̀ sə də mʉ cep nè’e ncèp nə̀ zìnə, nə̀ aco ndàaŋwè pwe’ dzəm nà’ də, Jisòs Krɛst à və̀ sə nzeŋgòŋ anə ŋgòlùŋsə ŋgàa gʉ̀ bʉp wèŋ. Mʉ̀ʉ Pol, mʉ ŋkum gʉ̀ bʉp wèŋ sə̀’ mʉ̀. ¹⁶Njo nə̀ Nwì a koksə manziŋ bohòmʉ̀ nə, də ya Jisòs Krɛst niŋtsok fa bwìŋ də yi ŋgà ko rì ntʉm pap. Wo nə ye riŋ yi vɛ’nə ŋga wo yə mvə̀’nə̀ yi ko ntʉm bohòmʉ̀ nə̀ mʉ ŋkum ŋgàa gʉ̀ bʉp nə. Yà’a mʉmvə̀’nə̀ mʉ co ŋwə̀ nə̀ mantombì ŋgònìtsə̀’ fa bʉ̀ʉ sə̀ wo nə̀ kə̀ dzəm bohòyi nə tse’ lùŋ wèŋ nsàp kontʉm ye nə. ¹⁷Yi ŋkum nə̀ mvèsə̀; bwìŋ kuksə yi nə̀ yi Nwì yiìyi nə. Yi Nwì nə̀ kaco bwìŋ ye to yi bə lis yeŋ, kaco yi kpʉ sə̀’ yeŋ. Bwìŋ sə kuksə liŋ ye sə mvèsə̀ nə̀ mvèsə̀. Yà’a ye vɛ’nə.

¹⁸Mo àm Timatì, mʉ̀ sə fa ntip nè’e ndzə bohòwù. Yusə̀ mʉ̀ sə gʉ̀ yè’sə, yà’a kə̀kʉrə̀ bə yusə̀ ŋgàa tsòhòbum Nwì wèŋ ànə cep fa’ bə liŋ yo sə. Mè’rə ncèp ànə cum sə ntʉʉ̀ wù anə gʉgʉŋ, ya wu sə mak lo dzè’ nə̀ Nwì mantombì bə̀boŋ. ¹⁹Təəŋ mali bə dzədzəm yònə̀ bohòKrɛst nə gʉgʉŋ, nə sə gʉ yusə̀ wù ànə yə’rə nə riŋ də yà’a kə̀kʉrə̀ sə. Bʉ̀ʉ mok wèŋ cu sə̀ wo kà yusə̀ wo rì də yà’a kə̀kʉrə̀ sə gʉ̀gə̀. Wo gʉ̀ vɛ’nə, nə gʉ bʉpsə mʉmvə̀’nə̀ wo à dzəm tse’ bohòKrɛst sə. ²⁰Nsàap bʉ̀ʉ sə̀ wo a gʉ̀ vɛ’nə mook Hìminiyàs bə Àlèsandà. Mʉ̀ a fa wo ndzə bohòSatà, ya wo yə’rə riŋ də wo kà liŋ Nwì sə bʉpsə̀ kɛ’.

Mandzə̀ Nə̀ Bʉ̀ʉ Nwì Tse’ ŊgòKùksə Nwì Mʉ Cos

¹Ntip nə̀ mʉ̀ sə də mʉ fa to wu nə nè’, də bwìiŋ sə lɛŋ fa bwìŋ pwe’ pìriyà. Wo sə lɛŋ Nwì də nà’a fa bwìŋ pwe’ yusə̀ yà’wèŋ sə jamə nə sə tɛsə wo bə ŋgə’ awo, wo sə kwasə yi bə yusə̀ yi sə gʉ̀ʉ sə sə̀’. ²Tsok fa wo də wo lɛŋ fa bʉ̀ ŋkəŋkum wèŋ pìriyà, nə ye bʉ̀ʉ sə̀ wo mantombì wèŋ sə̀’, ya ŋga vesùwèeŋ tse’ mandzə̀ ŋgòcu gəe’, nə cum bə fifi fana nə sə yuk Nwì; a riŋ ŋga’a ŋgòcu ncu nə̀ nà’a bə̀boŋ nə. ³A bə̀boŋ də wo lɛŋ fa bwìŋ vɛ’nə, yà’a gʉ̀gə̀ Nwì nə̀ yi ŋgà lùŋsə̀ ves nə kwa. ⁴Bʉsə̀ yi dzəm də ndàaŋwè pwe’ tse’ lùŋ nə riŋtse’ zìnə nə. ⁵Yusə də Nwì mègù mò’fis. Ŋwèe sə̀’ mò’fis nə̀ yi tə mʉtsətsə’rəə Nwì nə ye bwìŋ, ŋgòjə be’lə və̀ yà’ mvwe’ mò’fis. Ŋwə̀ ànə yi ŋwè bə ŋgùpni’, yi Jisòs Krɛst. ⁶A yi nə̀ yi ànə me’rə fa ni’ ye ŋgòfìŋ mè’rə bwìŋ bə zeŋ nə. Ghà nə̀ mvə̀k ànə kʉrə fana yi niŋtsok fa bwìŋ də Nwì dzəm də bwìŋ pwe’ tse’ lùŋ vɛ’nə. ⁷Nà’a njo nə̀ yi à cokfis mʉ, nə gʉ mʉ ŋgòye ŋgà ntum nə. Mʉ̀ sə cèp yè’sə zìnə, mʉ̀ sə kà mvwès cì’. Yi ànə bʉsə mʉ ŋgà ntum də ya mʉ tsoho lo ncèp nə̀ nje nə, nə sə yə’rə bʉ̀ lakmvum wèŋ sə̀’ ŋgòdzəm bum sə̀ zìnə yè’sə.

⁸Mʉ̀ dzəm də mbəmbaam sə̀ ma fòpwe’ sə lɛŋ pìriyà. Wo cu ŋgòlɛŋ, wo fis kok bo sə̀ rərɛŋ mʉtsə̀, nə kà jə̀jòk kè ŋkʉ̀ə̀m àlɛ’ sə ntʉʉ̀ wo tse’.

⁹Ma nə̀ bohòbə̀ba yàwo də, wo ni megu cə̀ək sə̀ yà’a kə̀kʉrə̀ bohòŋwàŋwè ŋgòni yà’. Wo fʉhʉ ni’ sə̀’ bə mandzə̀ nə̀ nà’a kə̀kʉrə̀. Ka bə̀boŋ də wo jəŋ mvə̀k ŋgòbak tu nsàp mòk, nə nisə ntìm bə nsàp, tasə mviŋ sə̀’ bə nsàp, nisə kwàŋ sə̀’ bə nsàp, nə ni cə̀ək sə̀ yà’ gʉ ntɛ̀ŋ wùriŋ yeŋ. ¹⁰Yusə lɛ də cə̀ək bàa sə̀ wo sə bɛ’ mandzə̀ Nwì wèŋ tse’ ŋgòni yà’, ya yà’a yəəŋ bə̀boŋ, a ŋgògʉ̀ bə̀boŋ bohòbwìŋ. ¹¹Bə̀ba wèeŋ yə’rə jəŋ bum gəe’, nə sə niŋ də wo sə wəp bʉ̀ʉ sə̀ wo mantombì. ¹²Mʉ̀ ka dzəm də bə̀ba yə’rə mbəmbam wèŋ dzəm, wo kà ŋàŋ mʉtuhù mbəmbam wèŋ wo sə̀ tse’. Wo cum gəe’. ¹³Bʉsə̀ Nwì ànə gʉ to ntòAdàm ŋkuŋ nə gʉ Iìf. ¹⁴Yumok ye fe’lə sə̀’ də, ŋwə̀ nə̀ wo à bòrə yi fana yi gʉ bʉp nə à ye ŋwàŋwè, à ka Adàm yeŋ. ¹⁵Yè’sə ye-a sə̀ vɛ’nə fana bə̀ba nə luŋ ŋga wo dzə bwe, ŋga a ye-a də wo tse’ malì dzədzəm bə ncèp nə̀ zìnə nə, nə sə dzəm bwìŋ, nə ye rərɛŋ nə sə cum bə mandzə̀ nə̀ nà’a kə̀kʉrə̀ nə na.

Mvə̀’nə̀ Bʉ̀ʉ Sə̀ Wo Mantombì Mʉ Cos Tse’ ŊgòYe

¹Wo cèpgə̀ ncèp mòk də, <<A ye-a ŋga ŋwè dzəm də yi ye ŋwə̀ nə̀ mantombì mvwe’ cos àlɛ, ye də yi dzəm yà’sə fàak sə̀ bə̀boŋ.>> Ncèp ènə nà’a zìnə. ²Ŋwə̀ nə̀ mantombì nə tse’ ŋgòye ŋwə̀ nə̀ bwìiŋ sə kà yumok sə̀ yà’a bə jòŋ bohòyi yə. Yi ye ŋwə̀ nə̀ yi tse’ ŋgwe mò’fis, ye ŋwə̀ nə̀ yi jəgə̀ bum fʉ̀ə̀, ŋwə̀ nə̀ yi tse’ tu, ŋwə̀ nə̀ bwìŋ wəpgə̀ yi, yi ye ŋgà jàhà bə bwìŋ, nə ye ŋwə̀ nə̀ aco yi yə’rə riŋ to fa bwìŋ bum. ³Yi kà ŋgà jʉ̀hʉ̀ rùk ye, nə kà ŋgà lʉ̀lʉ̀ sə̀’ ye. Yi ye lɛ ŋwə̀ nə̀ fʉ̀ə̀, nə kà ŋgà ŋkʉ̀ə̀m ye, nə kà mbàm ləlà sə dzəm ti’. ⁴Yi ye ŋwə̀ nə̀ yi sə kotse’ rì ndap ye bə̀boŋ, bwe yee sə yuk yi, nə sə wəp yi. ⁵Bʉsə̀ a ye-a ŋga ŋwè ka mvə̀’nə̀ aco yi kotse’ to ndap ye bə̀boŋ riŋ, ye də aco yi kotse’ riŋ to cos nə̀ Nwì nə va? A bʉ̀ə̀. ⁶Yi kà ŋwə̀ nə̀ yi a bʉ̀ʉŋ krətèŋ ghà ànə ye; bʉ̀ʉsə̀ kàmòk yi nə ye ŋgònɛ̀ni’, nə gbʉ ni sənə nzak bohòNwì, mvə̀’nə̀ ŋkum ze’ nə ànə gʉ, nə gbʉ yà’a. ⁷Yusəmook sə̀’ də, ŋwə̀ nə̀ mantombì nə tse’ ŋgòye ŋwə̀ nə̀ bʉ̀ʉ sə̀ wo ka krətèŋ yeŋ wèeŋ wəpgə̀ yi sə̀’; ya ŋga kà də bwìiŋ ye ŋgòto liŋ ye bʉp fana yi gbʉ ni sənə tam nə̀ ŋkum ze’ nə nòŋsə nə dʉk.

⁸Ma nə̀ bohòdikìŋ wèeŋ yàwo də, wo tse’ ŋgòye bʉ̀ʉ sə̀ bwìiŋ wəpgə̀ wo, nə ye bʉ̀ʉ sə̀ wo kà cù ba cèpgə̀, nə kà rùk ləlà sə no. Wo ye bʉ̀ʉ sə̀ wo kà ntʉm bə nzak mbàm ləlà sògə̀. ⁹Wo sə dzəm tse’ bum sə̀ Nwì a nìtsə̀’ fa bwìŋ sə, nə sə tse’ tsətsərə̀ nə̀ nà’a kə̀kʉrə̀. ¹⁰Wèeŋ mumsə ja’a nsàp bʉ̀ ènə ŋkuŋ nə fa wo nsàp fàk ènə. A ye-a ŋga wèŋ ka yumok sə̀ bʉp bohòwo ye, fana wèŋ fa wo fàak yè’sə. ¹¹Bə̀ba wèeŋ nə ye tsoŋ sə̀’ bʉ̀ʉ sə̀ bwìŋ wəpgə̀ wo, nə kà ŋgàa ncəncàŋ ye. Wo ye bàa sə̀ wo tse’ tu, nə ye sə̀ aco bwìŋ naaŋ tu bə yusə̀ wo sə fàak. ¹²Dikìŋ wèeŋ ye ŋgàa tse’ ŋgwe mò’fis, mò’fis. Wo ye bʉ̀ʉ sə̀ wo rì ŋgòkotse’ ndap awo bə bwe awo bə̀boŋ. ¹³A ye-a ŋga wo gʉ̀ fàak cos sə bə̀boŋ vɛ’nə, bwìiŋ nə wəp wo fana aco wo cep to yusə̀ wo dzəm tse’ yà’ bə liŋ Jisòs Krɛst sə, nə kà yumok wəp.

¹⁴Mʉ̀ sə tsəm də mʉ nə kə kɛ’ ye weŋ mvə̀k momjo fana mʉ̀ sə còm fa weŋ bum yè’e. ¹⁵Bʉsə̀ kàmòk aco yumok gʉ mʉ, mʉ̀ kà nə̀nàk və̀ àlɛ. Mʉ̀ dzəm də wèeŋ riŋtse’ mvə̀’nə̀ aco bʉ̀ʉ sə̀ wo mvwe’ bòp bʉ̀ nə̀ bʉ̀ʉ Nwì wèŋ tse’ ŋgòcu ncu njàwo nə. Wèŋ rì də bòp bʉ̀ nə̀ bʉ̀ʉ Nwì nə a cos Nwì nə̀ yi cu ŋwəm nə. Cos nə tàm tse’gə̀ zìnə nə yi. ¹⁶Yà’ nòjəja də bum sə̀ Nwì a nɛ̀ nìtsə̀’ fa ves yà’ bə mandzə̀ ye nə yam vɛ’ɛ co wù kà fʉ̀k. Yusə də,

Ma nə̀ bə ŋgùpni’ ye, yi anə bʉʉŋ ŋwè, fana bwìŋ ye yi bə lis;

Ma nə̀ bə yòŋsə̀ ye, Nwì ànə niŋtsok fa bwìŋ də yi ŋwə̀ nə̀ rərəŋ;

Bə ma nə̀ masinjàa Nwì fana wo à yə yi bə lis awo;

Bohòma nə̀ bwìŋ fana wo à tsòho lòliŋ ye sə sənə nzeŋgòŋ nə pwe’;

Ma nə̀ bohònzeŋgòŋ nə fana bwìŋ à dzəm bohòyi;

Ma nə̀ mʉbu fana Nwì ànə jəŋ kok lo yi mʉbu anə, nə fa yi mvwe’ ncum sə̀ ghaŋ wùriŋ.

Ncèp Nə̀ Ze’ Nə Borə Bwìŋ Bə Zeŋ

¹Yòŋsə̀ nə̀ Nwì nə a tsə̀’ fa ves jəja laŋ də anə̀ ye ghà nə̀ nùumbu sə mè lòo fana bʉ̀ʉ mok wèeŋ nə me’rə mandzə̀ nə̀ zìnə nə̀ wo à dzəm tse’ nə, nə yuŋ lo yusə̀ yòŋsə̀ə ze’ sə bòrə kɛ’ bwìŋ bə zeŋ sə, nə dzəm sə̀’ yusə̀ yà’ sə yə’rə fa bwìŋ sə. ²Nsàap ncèep yè’sə sə tesə və̀ bohòbʉ̀ʉ sə̀ woo cì’gə̀ mvwès, nə kà mbɛŋ kòm, ŋkərə̀ə awo à jip laŋ. ³Nsàp bʉ̀ ànə nə sə dʉk də, gù ka yusə̀ bə̀boŋ yeŋ, nə də nsàap zʉzʉʉ mok cu sə̀ bwìiŋ kà yà’ zʉ. Ŋga Nwì ànə gʉ zʉzʉʉ yà’sə də ya ŋga bʉ̀ʉ sə̀ wo a dzəm bohòyi nə rɛɛŋ zìnə nə wèeŋ jəŋ yà’, nə zʉ yà’, nə kwasə yi fo’. ⁴Yusə də, bum sə̀ Nwì à gʉ̀ yà’ pwe’fo’ bə̀boŋ. Yusə̀ co ŋwèe dzeeŋ yà’a bʉ̀ə̀, ŋga a ye-a də wo jə yà’, nə kwasə yi bə zeŋ na. ⁵Bum pwe’ rərɛŋ bʉ̀ʉsə̀ ncèp Nwì sə cèp vɛ’nə, nə ye bʉ̀ʉsə̀ wo lɛŋ pìriyà bə zeŋ.

Pol Tsə̀’ Fa Timatì Mvə̀’nə̀ Yi Sə Gʉ̀ Fàak Nwì

⁶A ye ŋga wù jə ntip yè’sə, nə tip bwema mok sə wèŋ fana wù ye ŋgà fàk Jisòs Krɛst nə̀ bə̀boŋ. Wu nə niŋ də ntʉm yògʉ laŋ bʉ̀ʉsə̀ wù sə naaŋ tu bohòncèp nə̀ Jisòs Krɛst, nə sə kotse’ yəyə’rə̀ nə̀ zìnə, nə̀ wù a dzəm nà’ gʉgʉŋ nə. ⁷Wu dzeeŋ taàŋ ŋgàam ləm sə̀ yà’ ka yumok bə ma nə̀ Nwì tse’ yà’a. Yə’rə ni’ yòlɛ ŋgòcu nsàp ncu nə̀ aco nà’ gʉ Nwì kwa. ⁸Bʉsə̀ a ye-a ŋga ŋwè yə’rə-a ŋgùpni’ ye ŋgòye gʉgʉŋ fana yà’ tse’ swe’. Fana a ye-a ŋga ŋwè yə’rə ntʉm ye ŋgòbɛ’ mandzə̀ Nwì fana nà’nə boŋ ghak wùriŋ bʉ̀ʉsə̀ ye də yi tse’ swe’ bə ncu nə̀ ŋga’a nè’e, nə ye bə ncu nə̀ nà’ cu mantombì nə sə̀’.

⁹Ncèp nə̀ mʉ̀ cèp ànə nà’a zìnə, kaco ŋwè mərə fʉk nà’ yeŋ. ¹⁰Nà’a njo nə̀ vèes gèsəgə̀ ŋàŋ, nə fak vɛ’ɛ gʉgʉŋ sə, bʉ̀ʉsə̀ vès a naaŋ tu avès bohòNwì nə̀ yi cu ŋwəm, nə̀ yi ŋgà lùŋsə̀ bwìŋ pwe’, nə ye lɛ bohòbʉ̀ʉ sə̀ wo a dzəm bohòyi wèŋ.

¹¹Tsok fa bwìŋ ntip yè’sə, nə yə’rə wo ŋgògʉ̀ yà’ sə̀’. ¹²Kà də wu gʉ co bwìŋ sə jəŋ wu co mweŋke’ dʉk. Cum ncu yòlɛ bə mandzə̀ nə̀ aco bwìŋ kʉk ja’a wu, nə sə gʉ yàwo sə̀’ vɛ’nə. Sə gʉ vɛ’nə bə mandzə̀ nə̀ wù sə cèp ncèp, nə ye bə mandzə̀ nə̀ wù sə gʉ̀ bum yo pwe’. Wu sə dzəm bwìŋ, nə fa ntʉm yòbohòNwì, nə cum ncu nə̀ nà’a rərɛŋ. ¹³Ye jəŋ ŋga’a tè mʉ̀ kə və fana wu jəŋ mvə̀k yòŋgòta fa bwìŋ ŋwàk Nwì, nə sə tsoho fa wo ncèp Nwì, nə sə yə’rə wo sə̀’. ¹⁴Tsərə tse’ mvə̀’nə̀ bʉ̀ ŋkwàha bwìŋ wèŋ ànə naaŋ fa wu bo mʉtuhù fana ŋwə̀ mòk nə cep yumok bə liŋ yo, ŋga yi sə cèp bə ŋàaŋ Nwì yà’a. Kà də wu swi mak li ŋkərə̀ nə̀ Nwì à fa wu nùmbu ànə nà’a dʉk. ¹⁵Bum sə̀ mʉ̀ tsə̀’ wù yè’sə, fa ntʉm yòfo’, nə fa ŋàaŋ yo sə̀’ fo’, ya ŋga ndàaŋwè pwe’ nə sə ye mʉmvə̀’nə wù sə lòmantombì sə. ¹⁶Jəŋ ŋkərə̀ bə ncu yònə̀ wù cu nà’, nə jəŋ ŋkərə̀ bə yusə̀ wù sə yə’rə fa bwìŋ. Sə gʉhʉ bum yè’sə, bʉ̀ʉsə̀ wu gʉ-a yà’ fana wu nə gem ni’ yo nə ye bʉ̀ʉ sə̀ wo yuk wu ŋga wù sə cèep sə.

Ntip Nə̀ Wù Tse’ ŊgòFa Bʉ̀ʉ Cos Wèŋ

¹Kà də wu jwa ŋkwà’ ŋwè dʉk, cep bohòyi lɛ co yi tɛ̀’ yò. Gʉ̀ bohòwàhanzùm wèŋ co də wo bwema yo wèŋ. ²Gʉ̀ bohòbàa sə̀ wo rèŋ laŋ wèŋ co də wo ma yo wèŋ, nə gʉ bohòwàhaŋgwɛ̀ŋ wèŋ co də wo njɛ̀’ yo wèŋ. Tsətsərə̀ yònə̀ wù tse’ bohòwo nə, ye nə̀ nà’a rərɛŋ.

Bàa Yepmfə Wèŋ

³Jəŋ ŋkərə̀ bohòbàa yepmfə, sə̀ wo bàa yepmfə zìnə bə zìnə. ⁴A ye-a ŋga ŋwà ŋgwemfə tse’ bwe kè bwe sə̀ bwe ye àlɛ’ fana bwe sə wèŋ riŋ to ntòmvə̀’nə̀ wo nə sə kʉk ŋwə̀ awo nə bə mandzə̀ nə̀ bə̀boŋ. Yà’a mvə̀’nə̀ wo nə gʉ ya wo lak bo fàak sə̀ wo à gʉ̀ fa bwe sə. Nwì dzəm də yà’a ye vɛ’nə. ⁵Bàa yepmfə sə̀ wo bàa yepmfə zìnə, sə̀ wo ka bʉ̀ʉ sə̀ co yà’ tɛsə wo tse’, sə̀ wo naaŋgə̀ tu awo bohòNwì yà’a. Wo sə lɛŋ nùm bə ndzəm pwe’ də Nwìi tɛsə wo. ⁶Fana ŋwà ŋgwemfə nə̀ yi sə tsərə ye bum sə̀ yà’a nə gʉ yi kwa, mègù ye yà’sə co ŋwə̀ nə̀ yi a kpʉ laŋ, ŋga ye-a sə̀ də yi cu fo’ ŋwəm na. ⁷Tsok fa bwìŋ də wo sə gʉ vɛ’nə ya ŋga ŋwèe kà yumok sə̀ co yi to liŋ awo bʉp bʉ̀ʉ zeŋ tse’. ⁸A ye-a ŋga ŋwə̀ nəmòk sə kà njə̀njàaŋ ye, nə ye wesə co ndap ye kʉ̀k fana ye də ŋwə̀ ànə a mà’ dzədzəm ye nə laŋ. Nsàp ŋwə̀ ànə bʉp càsə ŋwə̀ nə̀ yi ka Nwì riŋ lok. ⁹Wu cu ŋgòcòm liŋ bàa yepmfə wèŋ fana wù com megu liŋ bàa sə̀ wo a dzèŋ lùumŋgòŋ hum ntùŋfu nə casə lo mantombì, nə ye sə̀’ nsàp ŋwà nə̀ bə ndu ye nə à sə cugə̀ bə̀boŋ. ¹⁰Yi ye ŋwà nə̀ bwìŋ rì yi də yi gʉ̀gə̀ bə̀boŋ. A ye nsàap bàa sə̀ wo à kʉ̀k bwe awo bə̀boŋ; nə sə jaha bə ŋkʉ̀ìŋ wèŋ mʉnda’à wo wùriŋ, nə cuk fa bʉ̀ʉ Nwì wèŋ kù, nə tɛsə ŋgàa yə ŋgə’ wèŋ, nə ye sə̀ wo jə wes mvə̀k awo ŋgògʉ̀hʉ nsàap bum sə̀ bə̀boŋ zok, zok, nduk.

¹¹Kà də wu com liŋ bàa yepmfə sə̀ wo cu ntòbə ŋàŋ dʉk, bʉ̀ʉsə̀ wo nə dzəm ŋgòlòfe’lə gù sə̀mok fana nə kà ntʉm ŋgòyù Krɛst mok ko fe’lə̀. ¹²A ye-a ŋga wo gʉ̀ vɛ’nə fana ye də wo gʉ̀ bʉp bʉ̀ʉsə̀ wo bʉpsə yusə̀ wo ànə kak to bohòKrɛst sə laŋ. ¹³Yumook sə̀’ də, bàa yepmfə sə̀ wo cu ntòbə ŋàŋ sə wèeŋ nə bʉʉŋ ŋgàa wɛ’, nə ye ŋgòni dzooŋ kɛ’ ndap bwìŋ. Yumòk nə̀ nà’ bʉp càsə wesə, a nə̀ də wo nə ye ŋgòcaŋsə kɛ’ ncəncàŋ, nə sə gbʉ ni kɛ’ bə bum sə̀ yà’ ka yàwo yeŋ, nə sə cep kɛ’ yusə̀ yà’ ka bə̀boŋ yeŋ. ¹⁴Mvə̀’nə̀ bum yè’sə nə yeè nə vɛ’nə fana mʉ̀ sə dʉk də a bə̀boŋ də bàa yepmfə sə̀ wo cu ntòbə ŋàŋ wèeŋ jəŋ ndum, nə dzə bwe, nə kʉk ndap awo bə̀boŋ, ya bʉ̀ʉ sə̀ wo sə bɛŋ ves sə kà yumok sə̀ co wo to liŋ avès bə zeŋ bʉp tse’. ¹⁵Mʉ̀ sə cèp vɛ’nə yè’sə bʉ̀ʉsə̀ bàa yepmfə mok wèŋ a jàm mè’rə mandzə̀ nə̀ zìnə nə laŋ, nə bɛ’ lo Satà. ¹⁶A ye-a ŋga ŋwə̀ nəmòk cu nə̀ yi tse’ ŋwà ŋgwemfə mʉ ntòmbìi yi fana yi kʉk lis bohòŋwà ànə. Kà də yi jəŋ fàak yà’sə, nə tsə cos nə fo’ dʉk, ya ŋga cos nə tse’ mandzə̀ ŋgòkʉ̀k rì lis bə bàa yepmfə sə̀ wo yàwo bàa yepmfə zìnə, zìnə sə.

Bʉ̀ʉ Sə̀ Mantombì Mʉcos

¹⁷A bə̀boŋ də wo kʉk lis bohòbʉ̀ ŋkwàha bʉ̀ʉ sə̀ mʉ cos sə̀ wo gʉ̀gə̀ fàak awo bə̀boŋ, kʉ̀k wo lis kɛ̀’ ba. Mʉ̀ sə dʉk bohòbʉ̀ʉ sə̀ wo fàkgə̀ gʉgʉŋ ŋgòtsòho ncèp nə, nə sə yə’rə bwìŋ sə̀’ yà’a wèŋ. ¹⁸Wo à còm ndzənə ŋwàk Nwì sə̀’ vɛ’nə də, <<Kà də ŋwèe kiŋ lok cùu nàm nə̀ wo gʉ̀gə̀ yi, yi sə ku gòmbì dʉk.>> Wo à còm mok sə̀’ də, <<Ŋwə̀ nə̀ yi fàk laŋ, wo tse’ ŋgòlàk yi.>> ¹⁹A ye-a ŋga ŋwə̀ nəmòk jə və̀ nzak mʉtuhù ŋwə̀ nə̀ mantombì fana wù kà dzəm, tse’ŋga bwìŋ ba kè tɛ’ àlɛ’ dʉk də wo a yə sə̀’ ŋkuŋ. ²⁰Ŋwə̀ nə̀ yi gʉ̀-a bʉp, wù jwa sa’rə yi mvwe’ bwìŋ, ya ŋga mok sə wəp.

²¹Mʉ̀ sə cèp bohòwù yè’e mantombìi Nwì, nə ye Jisos Krɛst, nə ye masinjàa Nwì sə̀ yi a cokfis sə də, wu noŋsə ntip yè’sə, fana wu cu ŋgògʉ̀ yà’, wù kà ŋwə̀ mòk gèm ko fa, nə kà nza’ ŋge’ ca sə̀’ gèsə̀. ²²Jəŋ ŋkərə̀ pap ŋkuŋ nə naaŋ fa ŋwè bo mʉtuhù. Kà də wu tse’ fʉk bo sənə bʉp ŋwə̀ nəmòk dʉk. Cum ncu nə̀ nà’a rərɛŋ. ²³Kà də wu sə no tse’ megu ndzəp dʉk. No rùk momjo njo və̀əm yo sə̀ yà’a yagə̀ wu yà’a.

²⁴Bʉp sə̀ bʉ̀ʉ mok wèeŋ yəəŋgə̀ jəja, bwìŋ pwe’ riŋ də Nwìi nə sak wo bə zeŋ. Bʉp sə̀ bʉ̀ʉ mok wèeŋ kə̀ yəəŋgə̀ yàwo maŋkwɛ̀ŋ. ²⁵Yà’a bə ma nə̀ ŋgògʉ̀ bə̀boŋ sə̀’ vɛ’nə, bum sə̀ wo gʉ̀ yà’ bə̀boŋ mook yəəŋgə̀ jəja, mok kà ntɛ̀ŋ yəəŋ cà fana yà’a nə̀ kà sə̀swihì sə̀’ cu mam malì.

¹Bʉ̀ʉ sə̀ wo cu ŋkwɛ̀ŋ wèeŋ wəp masàa awo bə̀boŋ, ya ŋga bwìiŋ kà liŋ Nwì bʉ̀ʉ wo sə bʉpsə̀, nə kà yusə̀ bʉp bə bum sə̀ vesùwèŋ sə yə’rə fa bwìŋ sə cèp. ²Ŋkwɛ̀ɛŋ sə̀ masàa awo krətèŋ wèeŋ kà masàa awo sə̀’ co yusə̀ wà bʉ̀ʉsə̀ yà’wèeŋ krətèŋ jə. Wo gʉ fa yà’wèŋ fàak sə̀ bə̀boŋ sə ŋkʉ̀ʉŋ, bʉ̀ʉsə̀ wo sə tɛsə bə fàak awo sə krətèeŋ sə̀ wo dzəm yà’wèŋ sə. Timatì, wu yə’rə bwìŋ, nə tip wo bə bum yè’sə.

Ntip Bə Nzak Ghàk

³Timatì, a ye-a ŋga ŋwə̀ nəmòk cu nə̀ yi sə yə’rə fa bwìŋ yumok sə̀ zok, sə̀ yà’ ka mvwe’ mò’fis bə ncèp nə̀ zìnə nə̀ Tà Jisòs Krɛst àvès nə yeŋ, nə sə bɛŋ yəyə’rə̀ nə̀ nà’a bə mandzə̀ nə̀ vès sə yù Nwì fo’ nə, ⁴fana ye də yi ŋgà nɛ̀ni’, yi ka yumok riŋ. A yà’sə də ŋkərə̀ ye nə ləm, yi sə làp mègù ŋgòfi’ dʉk, nə sə jəŋ və ŋkʉ̀ə̀m bə bum sə̀ bwìŋ sə cèep. Bwìiŋ fi’ dʉk, nə sə kʉəm fana yà’ gʉ bwìŋ, wo sə tse’ ntʉm sə̀ cʉcʉk kè lʉ̀ wèŋ, nə gʉ bwìŋ ga’a, nə jəŋ və yàk bwìŋ, nə gʉ bwìŋ ŋgòmərə yusə̀ yà’ cu sə və̀ə ŋwə̀ nəmòk. ⁵Nsàp bʉ̀ ànə kʉ̀ə̀mgə̀ nùumbu pwe’ bʉ̀ʉsə̀ ŋkərə̀ə awo sə ka rərəŋ yeŋ. Wo ka zìnə nə mok riŋ. Wo tsəm də wo bɛ’ mandzə̀ Nwì ya ŋga wo tse’ swe’ fo’.

⁶A lɛ zìnə də a ye-a ŋga ŋwè sə bɛ’ mandzə̀ Nwì, nə ze’ bə yusə̀ yi tse’ fana ye də yi tse’ swe’ maŋgəŋgèŋ. ⁷Vesùwèŋ rì də vesùwèŋ ànə və sə nzeŋgòŋ fɛn botu, a nə̀ foho lòsə̀’ botu anə. ⁸Ye də a ye-a ŋga a tse’ yusə̀ ŋgòzʉ nə ye cə̀ək sə̀ ŋgòni fana yà’sə ye kə̀kʉrə̀ bohòvès anə. ⁹Bʉ̀ʉ sə̀ wo dzəm ghàk wèeŋ nə tse’ toho mə̀mumsə̀ nə̀nàk. Ntʉm nə̀ wo tse’ nà’ ŋgòdzəm bum nà’nə nə ye bohòwo co tam, nə̀ nà’a nə ko wo, nə gʉ wo dzəm bum ləm nə ye sə̀ co yà’ yaŋsə wo ntʉm fana yà’ gʉ wo gbʉ bisə. ¹⁰Bʉsə̀ ntʉm nə̀ ŋgòdzəm mbàam, mandzə̀ nə̀ bʉp pwe’ tesə və̀gə̀ fa’nə. Bʉ̀ʉ mok wèŋ a mè’rə mandzə̀ nə̀ Krɛst nə, bʉ̀ʉsə̀ də wo dzəm mbàm, fana nə ye nsàap ŋgə’ zəzok.

Pol Tipsə Timatì Də Nà’a Təəŋ Bə Mandzə̀ Nwì Gʉgʉŋ

¹¹A ye-a bohòwù yòfana Timatì, wu yòŋwə̀ə Nwì; caŋ nsàap bum yà’sə pwe’fo’. Jihi nzòŋ ŋgòyù lɛ yusə̀ yà’a rərəŋ. Gʉ̀ yusə̀ aco Nwì kwa bə zeŋ, nə sə naaŋ tu yo bohòKrɛst, dzəm bwìŋ, sə kontʉm, nə sə ye fʉ̀ə̀. ¹²Jihi nzòŋ, nə lʉ nsàp lʉ̀ nə̀ aco ŋwè lʉ nà’ ŋga yi fa ntʉm ye bohòKrɛst nə, ya wu bɛ’ ko lùŋ nə. Nà’a yà’sə lùŋ nə̀ Nwì ànə to wu də wu kə tse’ nà’ nə. Yi ànə to wu ghà nə̀ wù à təəŋ mvwe’ bwìŋ, nə cep jəja də wù dzəm bohòKrɛst nà’a. ¹³Mʉ̀ sə tsə̀’ wu ncèp nè’e mantombìi Nwì nə̀ yi fagə̀ yòŋsə̀ bohòbum pwe’, nə ye Jisòs Krɛst nə̀ yi à təəŋ mantombìi Poŋtiyòs Palè, nə cep fis zìnə ye jəja. ¹⁴Mʉ̀ sə tsə̀’ wu də, wu noŋsə ntip sə̀ mʉ̀ fa wu yè’e pwe’fo’, nə kà mòk bʉpsə lok fʉ̀k, ya ŋga ŋwə̀ nəmòok kà liŋ yo bə jòŋ to tə̀tè kə dzeŋ ghà nə̀ Tà àvès Jisòs Krɛst nə və sə̀mok nə. ¹⁵Mvə̀k nə kʉ̀rə fana Nwìi nə gʉ yi, yi tesə və jəja. Yi Nwì nə̀ yi tse’ mègù ye yusə̀ yà’a bə̀boŋ, yi tse’ nzeŋgònə yiìyi, yi ŋkum bohòŋkəŋkum wèŋ pwe’, nə ye Tà bohòtà wèŋ pwe’ sə̀’. ¹⁶Yi tse’ lùŋ nə̀ kaco nà’ me yeŋ, yi cugə̀ mʉtsətsə’rəə marɛŋ nə̀ kaco ŋwè kʉəp və to fo’ yeŋ. Ŋwè ka yi bə lis ye yuk, nə ye sə̀’ də kaco ŋwè ye to yi sə̀’ yeŋ. Bwìiŋ wəp yi, fana ŋàaŋ ye sə cum geŋ fo’ mvèsə̀ nə̀ mvèsə̀. Yà’a ye vɛ’nə.

¹⁷Ma nə̀ bohòbʉ̀ʉ sə̀ wo ŋgàa ghàk sə nze fɛŋ fana tsok fa wo də wo kà ni’ sə nɛ̀ŋ. Wo kà tu bə ghàha awo sə naaŋ bʉ̀ʉsə̀ ŋwè ka mvə̀’nə̀ yà’a nə me wes nə riŋ. Wo sə naaŋ tu awo lɛ bohòNwì bʉ̀ʉsə̀ yi ŋwə̀ nə̀ bo to, yi fagə̀ ves bum pwe’fo’ ŋkʉ̀ʉŋntɛ̀ŋ, də ya vèes kwa bə zeŋ. ¹⁸Wo sə gʉ bum sə̀ bə̀boŋ wùriŋ, wo tse’ bo awo to, nə sə fa bwìŋ mbo. Yà’a yusə̀ yà’a nə gʉ wo, wo ye ŋgàa ghàak sə̀ zìnə sə, ¹⁹bʉ̀ʉsə̀ a ye-a ŋga wo gʉ̀ vɛ’nə, ye də wo lòksə yà’sə bum sə̀ yà’a nə̀ tɛsə wo ntsə’mòk, fana wo nə kə tse’ lùŋ nə̀ nà’a lùŋ nə̀ zìnə nə.

²⁰Timatì, jəŋ ŋkərə̀ bə yusə̀ Nwì a fa ndzə bohòwù. Kà cùu yo bə ncèep sə̀ ŋgwàŋ sə̀ yà’ ka yumok bə ma nə̀ Nwì tse’ yà’a gèsə̀, nə kà cù bə mfi’dʉk ləm sò. Bʉ̀ʉ mok wèŋ sə tsəm də a ncèep ŋkərə̀, ŋga yà’ kà vɛ’nə yeŋ. ²¹Bʉ̀ʉ mok wèŋ tsəm də wo tse’ ŋkərə̀ fana yà’ a gʉ̀ʉ wo jam mandzə̀ nə̀ ŋgòtse’ bum sə̀ vesùwèŋ a dzəm sə. Nwìi gʉ wu bə̀boŋ.