1 Tètàlonikà

Ŋwàk nə̀ Mantombì,

nə̀ Pol à Còm Fa Bʉ̀ʉ sə̀ Mvwe’ Lak

TÈTÀLONIKÀ

Lak Tètàlonikà à ye tu lak nə̀ mvwe’ nzeŋgòŋ Màsìdoniyà nə. Pol à kə̀ mùk cos fo’ yi. Pol nə, nə ye Timatì bə Silàs wèŋ à və̀ fo’ bəbɛ’. À ka sap fana bʉ̀ʉ Juus mok wèŋ yeto ŋgòto liŋ Pol sə bʉp, bʉp. Wo à sə gʉ̀ vɛ’nə bʉ̀ʉsə̀ wo à sə wa mʉmvə̀’nə̀ Pol à sə tsòho ncèp Jisòs nə fana bʉ̀ʉ awo mok sə yèto ŋgòbwì lòmok ma nə̀ Pol nə. Yà’ à ghak fana Pol me’rə lak Tètàlonikà sə. À sàp ko’ fana Timatì com tsok vesə fa Pol nə mʉmvə̀’nə̀ cos nə̀ mvwe’ lak Tètàlonikà nə sə gìi.

Pol à còm fa wo ŋwàk nə̀ mantombì ènə ŋgòtsə̀’ Krətèeŋ sə də wo ko ntʉm, nə təəŋ mali gʉgʉŋ. Wo à sə fek kɛ’cà yà’ mʉ cos anə bə mʉmvə̀’nə̀ də Jisòos nə̀ bwì foho və̀ə. Wo à sə fek mok dʉk də, a ye-a ŋga ŋwè dzəm bohòJisòs, nə kpʉ ŋga Jisòs nə ka ntòbwi və, fana Jisòs nə kə̀ bwì və̀ ntsə’mòk, wo tse’ yàwo lùŋ nə̀ nà’a nə̀ kà mè sə̀’ àlɛ? Jisòs nə nə və yè’sə sèŋ nɛ? Pol à jə mvə̀k ènə ŋgòtsə̀’ gesə fa wo də Jisòos nə bwi foho və. Yi və̀ə, yi jəŋ bʉ̀ʉ sə̀ wo à dzəm bohòyi nə kpʉ lo laŋ kè sə̀ wo cu malì ntòŋwʉm àlɛ’ pwe’ ya bə yà’wèeŋ lo nə kə cum mok mvèsə̀ nə̀ mvèsə̀. Yi tsok wo də yà’wèeŋ sə fak mali megu vɛ’nə nə sə kontʉm, də Jisòs nə nə̀ və̀ tsə lì ntsə’mòk.

¹Còm ŋwàk nè’e mʉ̀ʉ Pol, ves Silàs, nə ye Timatì wèŋ bəbɛ’. Vès sə còm fa nà’ bohòbʉ̀ʉ cos nə̀ mvwe’ lak Tètàlonikà. Vès lɛŋ də Tà Nwìi fa weŋ fifi, nə gʉ weŋ bə̀boŋ.

Pol Kwa Bə Fantʉm Nə Ye Ncù Krətèŋ Mvwe’ Lak Tètàlonikà

²Ghà nə̀ vèes lɛŋgə̀ Nwì nə̀ yi tɛ̀’ avès pwe’, vès sə tsərə wèŋ. Vès sə kwasə yi bʉ̀ʉ tu awèŋ. ³Bʉsə̀ vèes tsərəgə̀ fàak sə̀ wèŋ à gʉ̀ bʉ̀ʉsə̀ wèŋ à fa ntʉm awèŋ bohòTà avès Jisòs Krɛst ŋgòfàk bohòyi. Vès sə tsərə mvəsə̀ wèŋ à fàk gʉgʉŋ bʉ̀ʉsə̀ wèŋ dzəm yi, nə ye mvəsə̀ wèeŋ naaŋgə̀ tu bohòyi bə ntʉm nə̀ zìnə, nə̀ co wèeŋ nə kà maŋkwɛ̀ŋ foho yà’a sə̀’.

⁴Bwetɛ̀’ avès, vès rìŋtse’ dʉk də Nwì dzəm weŋ, nə cokfis jə noŋsə weŋ də wèeŋ bʉ̀ʉ ye. ⁵Vès rì vɛ’nə bʉ̀ʉsə̀ ghà nə̀ vès à jə və̀ fa weŋ Ntirə̀ nə̀ Bə̀boŋ nə̀ Jisòs Krɛst nə, nà’ ànə ka bohòwèŋ co ncèep sə̀ wà və. Nà’ ànə ye bə ŋàaŋ Yòŋsə̀ nə̀ Rərɛŋ nə. Wèŋ à rì bə̀boŋ də Ntirə̀ nə̀ Bə̀boŋ nə ye zìnə. Wèŋ rì ncu avès nə̀ bə̀boŋ nə̀ vès à sə cu, ŋga vès cu vesùwèŋ sə̀’. Vès à cu vɛ’nə lòoŋ ya yà’a boŋ ma njàwèŋ. ⁶Wèŋ ànə cum fʉ’rə nsàp ncu àvès, nə ye nə̀ Tà nə. Wèŋ ànə ye na ŋgə’ sə̀’ wùriŋ fana wèŋ à jə ncèp Nwì nə bə kwəkwa. Kwəkwa nə nà’ à və̀ bohòYòŋsə̀ nə̀ Rərɛŋ nə. ⁷Yè’sə ànə ye vɛ’nə fana, wèŋ ye mok bʉ̀ʉ sə̀ ŋgònìtsə̀’ fa bwìŋ mandzə̀ nə̀ bʉ̀ʉ sə̀ wo à dzəm Jisòs pwe’ tse’ ŋgòye. Wèŋ à ye vɛ’nə bohòbʉ̀ʉ sə̀ mvwe’ nzeŋgòŋ Màsìdoniyà, nə ye sə̀ mvwe’ nzeŋgòŋ Àkayà. ⁸Ncèp nə̀ bə liŋ Tà nə̀ nà’à sə ye ndzə nì’ì wèŋ nə à ka mvwe’ nzeŋgòŋ Màsìdoniyà bə Àkayà ləsə megu. Yu sə də, bʉ̀ʉ sə̀ ma fòpwe’ a yuk mʉmvə̀’nə̀ wèŋ a fa ntʉʉm awèŋ bohòNwì. Yà’ nə yeè nə vɛ’nə fana, yu səmok sə̀ vèes nə cep fe’lə bwi bə liŋ awèeŋ bʉ̀ə̀. ⁹Vès yuk də bʉ̀ʉ yà’a wèŋ sə cèp mvə̀’nə̀ vès ànə kə̀ kɛ’ ye weŋ, wèŋ gʉ ves bə̀boŋ yà’a. Wo cep mvəsə̀ wèŋ a mè’rə rùum sə̀ wà, nə bwi lo ma nə̀ Nwì, ŋgòkùksə yi nə̀ yi Nwì zìnə nə, nə̀ yi cu ŋwəm. ¹⁰Nə ye sə̀’ də wèŋ sə tək mo ye nə̀ yi Jisòs, ŋgòtsə və̀ mʉbu. Yi nə̀ Nwì à lòkoksə yi mvwe’ kpʉ. A Jisòs nə̀ yi a caŋsə gɛsə vesùwèŋ mvwe’ dzə̀’ nzak nə̀ Nwìi nə̀ kə̀ sak bwìŋ bʉ̀ʉ jə̀jòk ye.

Nsàp Ntʉm Nə̀ Pol À Tse’ ŊgòTsòho Nza’ Nwì

¹Bwema avès, wèŋ rìŋtse’ yàwèŋ sə̀’ dʉk də mvə̀’nə̀ vès a kə̀ kɛ’ yə weŋ yà’a, à ka wà ca. ²Wèŋ rì mvəsə̀ wo ànə yak ves, nə yeŋsə ves ŋgə’ mvwe’ lak Fìlipiyà ŋkuŋ vès sə coho və ŋgòkə̀ yə weŋ mvwe’ lak Tètàlonikà yà’a. Ànə ye-a sə̀ dʉk də bwìŋ ànə sə gʉ co də wo lok mandzə̀ də ya bum kà fo’ fàk fana, Nwì ànə gʉ ya wʉə kà ves ko. Nwì ànə gʉ ves vɛ’nə fana, vès ko mali ntʉm ŋgòtsə̀’ fa weŋ Ntirə̀ ye nə̀ Bə̀boŋ nə.

³Ncèp àvès nə̀ vès sə dzəm də nà’a ni sə ntʉʉ̀ wèŋ nə, nà’ ka bə tè’eŋkup yeŋ. Vès sə kà nà’ wà tsòhòbasə̀. Nə ye sə̀’ dʉk də vès sə kà mandzə̀ də vèes borə ŋwə̀ nəmòk bòrə làp. ⁴Yusə lɛ vɛ’nə dʉk də, vès cèp mvəsə̀ Nwì dʉk də vèes cep. Nwì nə a kʉ̀k ja’a ves, nə də vèes kə̀kʉrə̀ co yi fa ncèp ye nə ndzə bohòvès. Fana mvə̀’nə̀ vès sə cèp bohòwèŋ, vèes kà mandzə̀ nə̀ ŋgògʉ̀ də ya bwìiŋ sə kwa bohòvès làpgə̀. Vèes làpgə̀ yàvès mandzə̀ nə̀ ŋgògʉ̀ʉ ya Nwìi kwa yi. Yi Nwì nə̀ yi riŋ yusə̀ yà’ cu sə və̀ə vès. ⁵Wèŋ rì sə̀’ vɛ’ɛ bə̀boŋ dʉk də, mvəsə̀ vès à və̀ bohòwèŋ, vès à ka bə nsàp nə̀ ŋgòkwasə bòrə weŋ bə ncèp cù nə̀ bə̀boŋ wà və. Nwì rì də vès à cèp bum kà ŋgòjə yumòok awèŋ, nə ghak bə zeŋ ye. ⁶Vès ànə ka mandzə̀ nə̀ co wèŋ, kè bʉ̀ʉ səmok sə̀ zok, kwasə ves sə̀’ lap. ⁷Nə ye sə̀’ də vès co ŋgàa ntum Jisòs Krɛst, vès ànə fek-a weŋ ŋgòfa ves bum sə̀ vès dzəm, yà’ kà bə jòŋ sə̀’ ye. Fana vès ànə sə ye megu yu avès fʉ̀ə̀. Vès à ye fʉ̀ə̀, co ŋwà nəmòk nə̀ yi sə kʉ̀k bwe ye wèŋ vɛ’ɛ. ⁸Njo nə̀ vès ànə dzəm weŋ wùriŋ fana, ntʉm boŋ ves ŋgògàp Ntirə̀ nə̀ Bə̀boŋ nə̀ nà’ à və̀ bohòNwì nə vesùwèŋ. Vès à ye kə̀kʉrə̀ ŋgòkpʉ bʉ̀ʉ wèŋ sə̀’. Vès dzəm weŋ vɛ’ɛ cɛ̀bʉ̀ə̀.

⁹Bwema am, wèŋ rìŋtse’ mvəsə̀ vès à ci’ ndùrù bə fàk vɛ’ɛ wùriŋ ghà nə̀ vès à ye vesùwèŋ yà’a. Mvəsə̀ vès à sə tsòho fa weŋ ntirə̀ nə, vès à fàk maràŋ bə ndzəmə̀ də ya vèes kà də vèes kʉk lis bohòwèŋ bə yusə̀ vès dzəm yà’ dʉk. ¹⁰Wèŋ, nə ye Nwì, rì sə̀’ dʉk də ncu àvès nə̀ vès à cu vesùwèŋ, sə̀ wèeŋ Krətèŋ, nà’ à ye rərɛŋ nə ye rərəŋ sə̀’. Yumok sə̀ co wo bɛŋ ves də yà’ à ye bə jòŋ à ka yeŋ. ¹¹Wèŋ rì də vès à kotse’ weŋ lòoŋ mvəsə̀ tɛ̀’ɛ kotse’gə̀ bwe ye. ¹²Vès à sə kwɛ’sə weŋ, vès ce’e fa weŋ ncèep sə̀ ŋgòfisə weŋ ntʉm də ya wèeŋ cum nsàp ncu nə̀ nà’a kə̀kʉrə̀ bohòNwì. Bʉsə̀ yi Nwì nə̀ yi à co’fis weŋ ŋgòkə̀ tse’ bo sənə gaŋ ye sə̀ yà’a vɛ’ɛ maŋgəŋgèŋ sə.

Pol Kwa Bə Dzədzəm Nə Ye Kontʉm Bʉ̀ʉ Tètàlonikà

¹³Fana njo mòk cu malì nə̀ vèes kwasəgə̀ Nwì bʉ̀ʉ zeŋ sə̀’. Yusə də mvəsə̀ vès à jə və̀ fa weŋ ncèp Nwì, wèŋ yuk nà’, nə jəŋ nà’ co ncèp Nwì anə. Wèŋ à ka nà’ co ncèp ŋwə̀ nə̀ sə nze fɛɛŋ jəŋ. Ŋga nà’a ncèp Nwì anə nə̀ zìnə. A sə̀’ ncèp ènə nə̀ nà’ sə kùm ntʉm awèŋ sə̀ wèŋ a dzəm Jisòs. ¹⁴Mʉ̀ cèp vɛ’nə bʉ̀ʉsə̀, yusə̀ yà’ a gʉ̀ weŋ, yà’a mègù sə̀’ yusə̀ yà’ a gʉ̀ bʉ̀ʉ coos Nwì sə̀ mvwe’ nzeŋgòŋ Jùdiyà, bwema avès a. Vès sə dʉk bòp bʉ̀ʉ sə̀ wo bʉ̀ʉ Jisòs Krɛst yà’a. Wèŋ a yə ŋgə’ ndzə bohòbʉ̀ʉ lak awèŋ sə̀’ mvə̀’nə̀ wo à yə ŋgə’ ndzə bohòbʉ̀ʉ Jus sə̀ wo bʉ̀ʉ lak awo. ¹⁵Bʉ̀ʉ Jus yà’sə, a wo sə̀ wo à zə Tà Jisòs, bə ŋgàa tsòhòbum Nwì, nə fa ves ŋgə’. Bʉ̀ʉ yè’səə jòksəgə̀ Nwì ntʉm. Wo mègù co ŋgbʉ bə nàm bohòbwìŋ pwe’fo’. ¹⁶Ghà nə̀ vès à sə tsòho fa bʉ̀ lakmvum ncèp nə̀ co nà’ fa wo lùŋ nə fana, wo lap mandzə̀ co vèes kà yà’wèŋ tsòhòfa. Mvəsə̀ wo à gʉ̀ vɛ’nə yà’sə, ye də wo à gʉ̀ wesə nsàap bʉp awo sə̀ wo gʉ̀gə̀ sə pwe’ mok laŋ. Nə yeè nə də wo jòksə Nwì ntʉm ŋgòsak wo laŋ.

Pol À Dzəm ŊgòKɛ’ Yə Wo Sə̀mok

¹⁷Ŋgòcèp yumok bə ma nə̀ njàvès fana bwema avès wèŋ, yà’a kə̀ bʉ̀ʉŋ təəŋ də vesùwèeŋ nə ga’a tsoŋ mʉnə mvə̀k momjo. Gə̀gà’à nə a mègù də vesùwèŋ a ka lis mok sə yenə bwɛ̀rɛ wèŋ a cu malì sə ntʉʉ̀ vès. Vès a làp mandzə̀ vɛ’ɛ gʉgʉŋ dʉk də vèes ye fe’lə weŋ sə̀mok, bʉ̀ʉsə̀ mvəsə̀ vesùwèŋ à gà’a yà’sə, a yaaŋ ves sə ntʉʉ̀ vɛ’ɛ wùriŋ. ¹⁸Vès a dzəm də vèes bwi lo kə ye weŋ. Mʉ̀ bə tu am, mʉ̀ a làp mandzə̀ ŋgòbwì fe’lə lòkə̀kɛ̀’ fana Satà sə lok ves mandzə̀. ¹⁹Yumok ka bʉp, bʉ̀ʉsə̀ a sə̀ wèŋ à gʉ̀ ŋkuŋ vès tse’ naàŋ tu nə ye kwəkwa, ni’ sə boŋ ves də ghà nə̀ Tà Jisòos və̀ə, vèes nə kə təəŋ mantombìi yi co bʉ̀ʉ sə̀ wo ca caŋ nə caŋ ghak. ²⁰Bə nə̀ zìnə, vès sə kwa, ni’ sə boŋ ves sə̀’ bʉ̀ʉ wèŋ.

Timatì Kwɛ’sə Bʉ̀ʉ Tètàlonikà Wèŋ

¹Mvə̀k nə̀ ŋgòko ntʉm à ka mok yeŋ fe’lə fana, vès mam yàvès lak Atèn fɛɛŋ vəvès, ²nə də Timatìi lo kə ye weŋ. Yi moma àvès, nə̀ venəwèeŋ fàkgə̀ bəbɛ’. Vèes fàkgə̀ bohòNwì ŋgòtsòho fa bwìŋ Ntirə̀ nə̀ Bə̀boŋ nə̀ nà’a bə liŋ Jisòs Krɛst. Vès tumsə yi də yi kə kwɛ’sə weŋ nə gʉ weŋ ya tu awèŋ sə̀ wèŋ sə naaŋ bohòJisòos gʉŋ lo mantombì. ³Ya kà də mok mʉtsətsə’rə wèeŋ foho lo maŋkwɛ̀ŋ bʉ̀ʉ nsàap ŋgə’ sə̀ wo sə fa weŋ yà’a dʉk. Wèŋ rì yàwèŋ sə̀’ də bo Nwì cu ca sə̀’, də wo fa ves nsàp ŋgə’ ènə. ⁴Ghà nə̀ vesùwèŋ ànə cum ntòbəbɛ’ yà’a, vès ànə tsok weŋ ŋga mvə̀k nə à ka ntòdzeŋ, də wo nə yeŋsə vesùwèŋ ŋgə’. Fana wèŋ rì tse’ sə̀’ də yà’a nə ye megu sə̀’ mʉmvə̀’ ànə. ⁵Nà’a njo nə̀ mʉ̀ a tum Timatì nə. Mʉ̀ a ko fʉ̀k ntʉm bʉ̀ə̀ fana mʉ̀ tum yi də yi kə kʉk ja’a-na də wèŋ sə fa malì ntʉm awèŋ bohòJisòs àlɛ. Mʉ̀ a sə mərə də kè ŋgà mùmsə̀ bwìŋ nə a gʉ̀ weŋ, wèŋ gbʉ foho lo maŋkwɛ̀ŋ, ya fàha sə̀ vès à gʉ̀ sə bisə wà àlɛ’.

⁶Timatì nə a bwì foho və̀ laŋ. Yi tsə̀’ fa ves mvəsə̀ dzədzəm àwèŋ cu. Yi də ntʉʉm awèŋ tə malì mègù bohòNwì, nə də wèŋ sə dzəm malì mòk bə mòk. Yi tsə̀’ fa fe’lə ves mok sə̀’ dʉk də wèeŋ tsərəgə̀ ves vɛ’ɛ bə̀boŋ nùumbu pwe’. Malə a ko weŋ mvəsə̀ malə a ko ves bohòwèŋ sə̀’. ⁷Nə yeè nə də bwema avès-a, bə jamə̀ nə ye ŋgə’ nə̀ vès sə yə nə pwe’fo’ fana ntʉm avès kwa mvəsə̀ vès à yuk də wèŋ sə lo malì mantombì. ⁸Nə̀ ŋga’a nè’e yòŋsə̀ kwɛ̀hɛ̀ nə ves. Ntʉm avèes nə sə boŋ vɛ’nə ŋga wèeŋ təəŋ mali-a gʉgʉŋ bə dzədzəm àwèŋ, weŋ Tà wèŋ mvwe’ mò’fis na. ⁹Nə̀ ŋga’a nè’e aco vès kwasə liŋ Nwì àvès bʉ̀ʉ tu awèŋ. Vès tse’ ŋgòkwasə yi bʉ̀ʉ nsàp kwəkwa nə̀ vès tse’ nà’ mantombìi yi bʉ̀ʉ wèŋ. ¹⁰Vèes fekgə̀ Nwì nùm bə ndzəm bə ntʉm avès pwe’ də co yi gʉ ya vèes ye fe’lə si awèŋ sə̀mok. Vèes ye weŋ ya vèes tɛsə weŋ bə yusə̀ wèŋ sə jamə mali yà’ bə dzədzəm àwèŋ nə̀ bə liŋ Jisòs nə.

¹¹Nwì àvès nə̀ yi tɛ̀’, nə ye Tà Jisòos fʉhʉ noŋsə mandzə̀ co vès kə ye weŋ sə̀mok. ¹²Nwìi gʉ co dzədzəm nə̀ wèŋ tse’ nà’ mʉtsətsə’rə̀ə wèŋ, nə ye bohòbwìŋ pwe’ nà’a kuk lo mantombì. Nà’a kuk, nə yam dzeŋ co mvəsə̀ vès dzəm weŋ yà’a. ¹³Bə nsàp dzədzəm ènə fana yi nə gʉŋsə weŋ, wèŋ ye kə̀kʉrə̀ bə rərɛŋ sə̀’ mantombìi Nwì àvès nə̀ yi Tɛ̀’, nùmbu nə̀ Tà Jisòos nə̀ və̀ bə bʉ̀ʉ ye sə̀ rərɛŋ sə.

Ncu Nə̀ Co Nà’ Gʉ Nwì Yi Kwa

¹Ŋgòlə̀sə lòbə zeŋ fana bwema avès, wèŋ a yə’rə jə nsàp ncu nə̀ wèŋ tse’ ŋgòcu ya Nwìi nə kwa bohòwèŋ nə bohòvès laŋ. Wèŋ ànə sə cum lok to mantombì sə̀’ vɛ’nə. Nə̀ ŋga’a nè’e fana vès sə lɛŋ weŋ nsàp nə̀ gʉgʉŋ bə liŋ Tà Jisòs də wèeŋ ghaha wesə ghaha. ²Wèŋ rì tse’ ntip sə̀ vès à fa weŋ bə ŋàaŋ Tà Jisòs yà’a laŋ. ³Yusə̀ Nwì dzəm bohòwèeŋ dʉk də wèeŋ ye rərɛŋ, nə kà bo sənə nzak sàhà tse’ lok. ⁴Ndàaŋwè pwe’ riŋ nsàp mandzə̀ nə̀ co bə ŋgwe yee cum. Wo cum bə nsàp mandzə̀ nə̀ nà’a ye bə̀boŋ bohòNwì, nə kà ywì’lə nzòŋ jə və̀. ⁵Nà’a kà ncu nə̀ nà’ mègù bʉ̀ʉ njè bə̀ba kè mbəmbam ye. Bʉ̀ʉ pegè sə̀ wo ka Nwì riŋ cugə̀ yàwo vɛ’nə. ⁶Bə nzak ŋwàŋwè bə ŋwə̀mbam ènə fana, ka bə̀boŋ co ŋwèe lim zʉ mòk yeŋ. Vès ànə tsok fa weŋ yè’sə mantombì laŋ. Nə̀ ŋga’a nè’e vès sə sə̀ mali weŋ ntu’ gʉgʉŋ də Tà Nwìi nə kà nsàp ŋwə̀ nə̀ yi gʉ vɛ’nə mè’rə̀. ⁷Nwì ànə to vesùwèŋ, ka də a sə kə koho sàhà yeŋ. Yi à to vesùwèŋ ŋgòcu ncu nə̀ rərɛŋ co bʉ̀ʉ ye. ⁸Ye də a ye-a ŋga ŋwə̀ nəmòk dzèeŋ-a yusə̀ vès yə’rə fa weŋ yè’sə, yi sə kà ŋwè dzèeŋ. Yi dzèeŋ Nwì nə̀ yi fagə̀ ves Yòŋsə̀ ye nə̀ Rərɛŋ nə.

⁹Kaco vès com fa yiskok weŋ mvə̀’nə̀ wèŋ tse’ ŋgòdzəm bwema sə̀ wo a dzəm Jisòs còmə yeŋ. Vès dʉk vɛ’nə bʉ̀ʉsə̀ Nwì a yə’rə fa weŋ bə tu awèŋ mvə̀’nə̀ wèŋ tse’ ŋgò dzəm mòk bə mòk sə laŋ. ¹⁰Wèŋ a nìtsə̀’ fa bwema sə̀ mvwe’ nzeŋgòŋ Màsìdoniyà pwe’ nsàp dzədzəm ànə. Fana bwema avès, vès sə lɛŋ də wèeŋ gʉŋ casə vɛ’nə càsə. ¹¹Wèeŋ kiŋ sə və̀ə wèŋ də wèeŋ cum ncu nə̀ nà’a gəe’. Kà də wèeŋ sə gesə kɛ’cà cùu awèŋ bə nzak bwìŋ ŋga wo ka weŋ to dʉk. Fàk bum sə̀ wèŋ dzəm yà’ bə bo awèŋ. Vès ànə tsok weŋ yè’sə mantombì fa’ laŋ. ¹²Wèeŋ gʉ-a vɛ’nə fana wèeŋ nə gʉ bʉ̀ʉ sə̀ wo ka Jisòs riŋ ŋgòjə weŋ co bwìŋ. Yà’ ye sə̀’ də yusə̀ wèŋ dzəm yà’ fana wèŋ kà lis bohòŋwə̀ nəmòk kʉ̀k yiskok.

Mvə̀k Nə̀ Tà Jisòos Nə̀ Bwìŋ Və̀ə

¹³Bwema avès a, vès dzəm də wèeŋ riŋtse’ zìnə nə̀ nà’ cu bə bòp bʉ̀ nə̀ wo a kpʉ lòyàwo laŋ. Wèeŋ riŋtse’ ya wèeŋ cu, ntʉm kà weŋ bə zeŋ sə rwì’. Wèeŋ kà-a yà’ rì fana, ntʉm sə rwi’ weŋ co bʉ̀ʉ sə̀ wo ka naàŋ tu də Jisòs Krɛɛst nə̀ kə̀ lòkoksə yà’wèŋ ntsə’mòk tse’. ¹⁴Vès dzəm sə ntʉʉ̀ vès dʉk də Jisòs à kpʉ fana Nwì lòkoksə yi mvwe’ kpʉ. Ye də vès sə dzəm sə̀’ dʉk də Nwìi nə jəŋ fəsə və fe’lə bʉ̀ʉ sə̀ wo ànə kpʉ bə Jisòs wèŋ bəbɛ’. Vès sə dʉk bʉ̀ʉ sə̀ wo ànə kpʉ ŋga wo dzəm bohòyi. ¹⁵Yusə̀ vès sə də vèes yə’rə fa weŋ ŋga’a yè’e, a yəyə’rə̀ nə̀ Tà Jisòs. Nùmbu nə̀ Tàa bwi foho və̀ə fana vesùwèŋ sə̀ a cu ŋwəm, a nə kà mantombì nə me’rə bʉ̀ʉ sə̀ wo à kpʉ laŋ maŋkwɛ̀ŋ ntòlòto. ¹⁶Nùmbu ànə ye, wo nə kɛ’ dʉksə ŋgù nə̀ nà’ tse’ ŋàŋ. Ŋgì masinjà Nwì nə̀ tu nə, nə cep, anə yuk ŋgì ntà Nwì ŋga wo fʉəp nà’. Tàa nə tesə tsoŋ mʉbu bə tu ye. Bʉ̀ʉ sə̀ wo à dzəm Jisòs, nə kpʉ lo mee nə lokok mvwe’ kpʉ ŋkuŋ, ¹⁷fana Nwì kurə be’lə vesùwèŋ sə̀ a cu malì ŋga’a ŋwʉm mvə̀k ànə sə mvwe’ mò’fis, a kə tseŋ Tà mʉ mba’a. Yà’a mok mvə̀k nə̀ vesùwèeŋ nə̀ cu malìgə̀ mok ves Tà wèŋ mvwe’ mò’fis. ¹⁸Nə yeè nə də bə ncèp ènə, wèeŋ jəŋ nà’, nə fupsə ntʉm awèŋ bə zeŋ.

Fʉhʉ, Bʉsə̀ Tà Jisòos Nə Bwi Foho Və

¹Bwema am wèŋ, njo nə̀ də mʉ com yis fa weŋ ŋgòrìŋtse’ ghà nə̀ bum yè’sə nə̀ kə̀ ye nə bʉ̀ə̀. ²Bʉsə̀ wèŋ bə tu awèŋ, wèŋ rìŋtse’ vɛ’ɛ pap də nùmbu nə̀ Tà nə nə̀ kə̀ və̀ə co ŋgà yə̀ və̀ nòoŋ ndzəmə̀, wù kà rì. ³Ghà nə̀ bwìŋ sə dʉk də, <<Bum pwe’ mègù mok bə̀boŋ də ŋgə’ə bʉ̀ə̀>> fana, wo ye megu ŋga ŋgə’ nə̀bʉp və̀ vɛ’ɛ vak. Yà’a nə və co mvəsə̀ dzəmwee kogə̀ ŋwàŋwè yè’e. Yà’a və̀ vɛ’nə, fana wo kà swìrə̀. ⁴Fana bohòma nə̀ njàwèŋ, wèŋ ka sənə ndzəm cum, bwema am wèŋ na. Fana ntsə’ nə nə̀ kà weŋ co ŋgà yə̀ və̀ yi ŋga wèŋ ka riŋ kə̀ tsèŋ. ⁵Wèeŋ bòp bʉ̀ nə̀ bohòmarɛŋ, wèeŋ bʉ̀ʉ sə̀ wèeŋ gʉ̀gə̀ bum ŋga a maràŋ bə nùm. Vesùwèŋ ka bòp bʉ̀ ŋgàa ndzəm yeŋ. A kà bum mvwe’ sə̀swihì gʉ̀gə̀. ⁶Nə yeè nə də bum yè’sə zìnə vɛ’nə fana, vesùwèeŋ kà də a sə dzəmlo co mvə̀’nə̀ bʉ̀ʉ mok dzəmgə̀ yà’a dʉk. Vesùwèeŋ sə kʉk kʉ̀’ʉ, nə sə ko ni’ avès. ⁷Mvə̀k nə̀ bwìŋ dzəmgə̀ lo, mok jʉhʉ rùk wèŋ pwe’, a nə̀ ndzəmə̀. ⁸Nə ye də vesùwèeŋ yàvès bòp bʉ̀ ŋgàa marɛŋ. Vesùwèŋ tse’ ŋgòko yàvès ni’. A tse’ ŋgòtəhə lok ni’ avès bə dzədzəm nə ye naaŋtu bohòNwì co ŋkə̀ ŋga bʉp kà ves jwɛ̀ŋ. A sə kʉk gesə lis àvès bə lù nə̀ Nwìi nə̀ kə̀ fa ves. Yà’sə nə ye co tàm mòk nə̀ a ta tse’ nà’ co yu səmok sə̀ bʉp kà ves tu jwɛ̀ŋ. ⁹Ka də Nwì ànə cokfis vesùwèŋ də ya yi fa ves ŋgə’ yeŋ. Yi à cokfis ves ya a tse’ lù nə̀ yi fa ves nà’ ndzə bohòTà Jisòs Krɛst. ¹⁰Yi Jisòs nə̀ yi à kpʉ bʉ̀ʉ vès, də ya a cum vesiwèŋ bəbɛ’. Də ya ŋga a cu-a sə̀ ŋwəm bə ŋga a kpʉ, yà’ lok gu yəyərə̀, ghà nə̀ yi və̀ə, anə̀ cu vesiwèŋ. ¹¹Nə yeè nə vɛ’nə fana bòdə wèeŋ sə tɛsə mòk bə mòk, nə gʉ wo lo mantombì mvəsə̀ wèŋ sə gʉ̀ ŋga’a yè’e.

Ncèp Nə̀ Nà’ Lə̀sə Lòo

¹²Bwema avès, vès sə lɛŋ weŋ də wèeŋ jəŋ bʉ̀ʉ sə̀ wo fàkgə̀ bohòwèŋ yà’a co bʉ̀ʉ sə̀ bwìŋ nə̀ zìnə. Wo sə̀ wo kʉ̀kgə̀ weŋ, nə sə yə’rə weŋ co bʉ̀ʉ sə̀ Tà Jisos yà’a. ¹³Wəp wo, nə dzəm wo càsə yà pwe’. Gʉ̀ wo vɛ’nə bʉ̀ʉ nsàp fàk nə̀ wo sə gʉ̀ʉ. Wèeŋ cum cù mò’fis, nə kà sə kʉ̀ə̀m. ¹⁴Vès sə lɛŋ weŋ bwema avès-a, də wèeŋ tip ŋgàa wɛ’ wèŋ. Wèeŋ kwɛ’sə bʉ̀ʉ sə̀ wo tse’ wʉə, nə tɛsə sə̀ wo jì ŋàŋ. Wèeŋ sə ko ntʉm awèŋ bohòbwìŋ lòoŋ. ¹⁵Kà də wèeŋ fa mandzə̀ də ŋwèe gʉ fəsə fa ŋwè bʉp bə bʉp dʉk. Yusə ye də, ghà yà pwe’ nə̀ wèŋ cu, wèŋ tse’ ntʉm nə̀ ŋgògʉ̀ bə̀boŋ bohòmòk bə mòk. Wèeŋ gʉ bohòbwìŋ lòoŋ sə̀’ vɛ’nə.

¹⁶Wèeŋ sə kwa ghà yà lòoŋ. ¹⁷Wèeŋ sə gʉ pìriyà ghà nə̀ fòlòoŋ, nə kà wò. ¹⁸Ŋga sə bʉp-a sə̀ yà pwe’, wèeŋ sə kwasə Nwì. Yà’a yusə̀ Nwì dzəm də yà’a ye vɛ’nə bə ncu àwèŋ co bʉ̀ʉ Jisòs Krɛst. ¹⁹Wèeŋ kà də wèeŋ limsə Yòŋsə̀ nə̀ Rərɛŋ nə ŋga yi kà fàha ye gʉ̀ dʉk. ²⁰Kà də wèeŋ bɛŋ ncèep sə̀ bʉ̀ʉ sə̀ wo sə tsòho bum sə̀ Nwì a nìŋtsə̀’ fa wo dʉk. ²¹Mùmsə ja’a yà’ pwe’fo’, nə bɛ’ tse’ sə̀ wèŋ yə də yà’a bə̀boŋ. ²²Wèeŋ kà bo sənə bʉp nə̀ mò’fis gèsə̀ lok. ²³Nwì bə tu ye, nə̀ yi fagə̀ vesùwèŋ fifi, yi noŋsə ncu àwèŋ kə̀kʉrə̀ bə mandzə̀ nə̀ fòpwe’fo’. Yumok kà bohòwèŋ bʉp lok. Yi noŋsə yà’ nsàp nə̀ Jisòs Krɛst nə̀ yi Tà àvèes nə kə̀ bwì və̀ə, wèŋ ye jìnjo. ²⁴Yi Nwì nə̀ yi a to weŋ, yi nə gʉ yà’, bʉ̀ʉsə̀ yi ŋwə̀ nə̀ zìnə.

²⁵Bwema avès, wèeŋ sə lɛŋ fa ves pìriyà yàvès sə̀’. ²⁶Cepsə fa mʉ bʉ̀ʉ sə̀ wo à dzəm Jisòs sə pwe’ bə cə̀cèpsə̀ nə̀ bə̀boŋ co bwema. ²⁷Mʉ̀ cèp bohòwèŋ bə ŋàaŋ sə̀ bohòTà də wèeŋ taŋ fa ŋwàk ènə bohòbʉ̀ʉ sə̀ wo à dzəm Jisòs pwe’fo’. ²⁸Bə̀bo nə̀ Tà àvès Jisòs Krɛst nà’a ye bohòwèŋ.