1 Pità

Ŋwàk nə̀ Mantombì

nə̀ PITÀ à Còom

Tu njo nə̀ Pità à còm ŋwàk ènə bʉ̀ʉ zeŋ nə, a də ya yi fisə fa krətèŋ wèŋ ntʉm bə ŋgə’ə sə̀ bwìŋ sə fa wo də bʉ̀ʉsə̀ wo a dzəm bohòJisòs sə. Yi à sə cèp kùm mali bə nzak Ntirə̀ nə̀ Bə̀boŋ nə. Yi sə dʉk də mʉmvə̀’nə̀ Jisòs à lòkok mvwe’ kpʉ, nə kak də yi nə bwi və ntsə’mòk, yà’a gʉ̀gə̀ krətèŋ wèŋ ŋgòko ntʉm. Yi də mvə̀’nə̀ yà’wèeŋ rìŋtse’ vɛ’nə fana yà’wèeŋ jihi nzòŋ ghà nə̀ ŋgə’ və̀ə, bʉ̀ʉsə̀ a yà’sə yumok sə̀ yà’ sə mùmsə wo. Wo riŋ sə̀’ də nùmbu nə̀ Jisòos kə̀ yəəŋ jəja fana yà’wèeŋ nə̀ tse’ lə̀làk àwo.

¹Còm ŋwàk nè’e mʉ̀ʉ Pità nə̀ mʉ ŋgà ntum Jisòs Krɛst. Mʉ̀ sə còm fa ŋwàk ènə bohòwèŋ bwe Nwì sə̀ wèeŋ ŋga’a ŋkʉ̀iŋ lakmvum. Wèŋ sə̀ wèŋ sam cu lòmvwe’ nze Poŋtòs, Gàlesiyà, Kàpàdosiyà, Ɛsiyà nə ye Bìtiniyà. ²Tà Nwì ànə swek noŋsə weŋ ŋga yi dzəm kok gù sə və̀ə yi də wèeŋ nə ye bʉ̀ʉ ye. Anə gèŋ, yi gʉ̀ rɛŋsə weŋ bə yòŋsə̀ ye də ya wèeŋ nə sə yuk dʉk Jisòs Krɛst fana ndʉəm ye cùk rɛŋsə weŋ. Nwìi gʉ weŋ bə̀boŋ, nə fa weŋ fifi wùriŋ.

Lùŋ Nə̀ Krətèŋ Wèŋ

³Vesùwèeŋ kwasə Nwì nə̀ yi Nwì, nə ye tɛ̀’ɛ Jisòs Krɛst, bʉ̀ʉsə̀ yi à tse’ koksə̀manziŋ ye cɛ̀bʉ̀ə̀, nə gʉ ves a tse’ dzədzə nə̀ fi nə. Yi fa ves nà’ bə mandzə̀ nə̀ də yi à lòkoksə Jisòs Krɛst mvwe’ kpʉ. Yè’sə zeŋ sə̀ yà’a gʉ̀gə̀ ves ŋkuŋ vès sə naaŋ tu də vesùwèeŋ nə̀ kə̀ lù sə̀’. ⁴Yà’a njo nə̀ vès sə kʉ̀k gèsə lòlis mantombì sə̀’ də vèes nə kə tse’ bum wùriŋ sə̀ Nwì a nòŋsə fa bʉ̀ʉ ye. Yi sə nòŋsə fa weŋ yà’ mʉbu mvwe’ sə̀ kaco yà’ bi yeŋ. Yà’a nə kà bʉp, nə kà sə̀’ rèŋ. ⁵Bum yè’sə sə̀ yàwèŋ. Wèŋ sə̀ Nwì a nòŋsə weŋ bə ŋàaŋ ye bə̀boŋ bʉ̀ʉsə̀ wèŋ a dzəmtse’ bohòyi. Yi noŋsə weŋ də wèeŋ nə̀ kə̀ tse’ lùŋ nə̀ nà’ cu də nà’a nə yəəŋ ghà nə̀ nzeŋgònə mèe. ⁶Wèeŋ kwa bə bum sə̀ Nwì sə gʉ̀ fa weŋ yè’sə kwa, a ye-a sə̀ də wèeŋ nə ye gesə nsàap ŋgə’ zok zok mʉmvə̀k moòmjo na. ⁷Nsàap ŋgə’ yè’sə sə və̀ bohòwèŋ ŋgòmùmsə ja’a weŋ də wèŋ sə fa ntʉm awèŋ bohòNwì zìnə àlɛ. A dʉk-a nsàp ntɛŋ nə̀ wo togə̀ nà’ də guù nà’a. Bwì sə tɛŋ yà’ sə misə̀ ya ŋga ma nə̀ bə̀boŋ nə cum fo’. Yà’ mègù sə̀’ vɛ’nə bə ntʉm awèŋ nə̀ nà’ gʉ ntɛŋ nə casə ntɛŋ guù nə. Wo tse’ ŋgòmùmsə nà’ sə̀’ ya nà’a cum mali fo’ sə̀’ gʉgʉŋ. A vɛ’nə ya nùmbu nə̀ Jisòs Krɛst nə̀ bwì və̀ sə nzeŋgòoŋ fɛɛŋ wo kwasə weŋ, nə fa weŋ ŋguk. ⁸Wèŋ ka-a Jisòs Krɛst nə bə lis sə̀ ye yuk, wèŋ sə dzəm malì yi. Nə̀ ŋga’a wèŋ ka yi sə̀’ ye, wèŋ sə naaŋ mali tu bohòyi fana wèŋ sə kwa wù kà fʉ̀k. ⁹Bʉ̀ʉ yà? Bʉsə̀ wèŋ sə tse’ swe’e yusə̀ wèŋ à sə fa ntʉm fo’ sə. Swe’e sə lùŋ nə̀ nà’a nə̀ kà mè.

¹⁰À mègù sə̀’ lù nə̀ nà’a nə̀ kà mè ènə nə̀ ŋgàa tsòhòbum Nwì wèŋ à làp, nə kʉk ca bə̀boŋ ŋgòrì tse’ nà’. Ŋgàa tsòhòbum Nwì sə wèŋ ànə tsok noŋsə nsàp bòvə̀m nə̀ Nwìi nə̀ niŋ fa weŋ ènə taŋntɛ̀ŋ. ¹¹Yòŋsə̀ Jisòs Krɛɛst nə̀ nà’ à ye sə ntʉʉ̀ wo à sə tsòho fa wo bə nsàp ŋgə’ nə̀ Krɛst nə̀ kə̀ yə, nə ye nsàp fònə̀ yi nə tse’ bwi nà’ maŋkwɛ̀ŋ. Wo à sə làp sə̀’ ŋgòrì mvə̀k nə̀ bum yè’sə nə̀ ye, nə ye də yà’a nə̀ ye valɛ. ¹²Ànə gèŋ, Nwì niŋ tsok fa wo dʉk də ntirə̀ ènə ka nə̀ njàwo yeŋ. Yi niŋ tsok fa wo də, tse’ ntirə̀ ànə wèŋ. Nə ye də bʉ̀ʉ sə̀ wo tsòhogə̀ Ntirə̀ nə̀ Bə̀boŋ nə a tsə̀’ weŋ yà’ ŋga’a sə̀’. Yòŋsə̀ nə̀ Rərɛŋ nə̀ nà’ ànə tsooŋ mʉbu nə à fa wo ŋàŋ ŋgòcèp càsə ncèp ànə. Masinjàa Nwì wèŋ sə dzəm ŋgòrì yà’ yàwo sə̀’.

Wèeŋ Ye Bʉ̀ʉ Sə̀ Rərɛŋ

¹³Ye də mvəsə̀ Nwì a nìŋtsə̀’ fa weŋ nsàp bòvə̀m nje nə̀ nà’ yam wùriŋ ènə fana wèeŋ jəŋ ŋkərə̀, nə ko ni’ awèŋ ya wèeŋ naaŋ megu tu awèŋ bə bum sə̀ wèeŋ nə̀ kə̀ tse’ yà’ wèŋ sə. Yà’a nə̀ kə̀ ye yàwèŋ nùmbu nə̀ Jisos Krɛst nə̀ kə̀ yəəŋ fe’lə sə̀mok nə. ¹⁴Wèeŋ yùgə̀ bum sə̀ Nwìi dzəmgə̀ dʉk də wèeŋ gʉ yà’. Wèeŋ kà də wèeŋ gʉ fe’lə bum sə̀ yà’ à sə bòto weŋ taaŋ ŋga wèŋ ka Ntirə̀ nə̀ Bə̀boŋ nə ntòrì yà’a mok dʉk. ¹⁵Nwì nə̀ yi a to weŋ ŋgòye bʉ̀ʉ ye nə, yi rərɛŋ fana wèŋ tse’ ŋgòye bə mandzə̀ə awèŋ pwe’ rərɛŋ sə̀’ co yi nə. ¹⁶Yà’sə mègù sə̀’ yəyərə̀ mvəsə̀ wo ànə com noŋsə lo ndzənə ŋwàk Nwì mantombì dʉk də,

<<Ye bə mandzə̀ə yo pwe’ rərɛŋ bʉ̀ʉsə̀ mʉ yàm sə̀’ rərɛŋ.>>

¹⁷Mvə̀’nə̀ wèŋ sə lɛŋ Nwì, wèŋ sə to yi də Tɛ̀’. Tɛ̀’ àwèŋ Nwì nə sakgə̀ ndàaŋwè pwe’ yəyərə̀ bə yusə̀ ŋgə̀ŋgàŋ gʉ̀ʉ, fana a bə̀boŋ də wèeŋ niŋtsok fa yi wəwəp, nə cum ncu nə̀ bə̀boŋ ŋga’a nə̀ wèŋ cu co ŋkʉ̀ìŋ sə nzeŋgòŋ fɛn. ¹⁸Wèŋ rì dʉk də ghà nə̀ Nwì ànə fis gɛsə weŋ mvwe’ nsàap bum lak sə̀ wà, sə̀ tɛ̀’ awèŋ ànə ni tsok weŋ, yi à ka weŋ bə mbàm nə̀ nà’a nə̀ cà wà nè’e ywiŋ. ¹⁹Yi à ywiŋ weŋ bə ndʉəm Jisòs sə̀ yà’ gʉ ntɛŋ vɛ’ɛ wù kà fʉ̀k. Yà’ ànə ye co wo à jə nsùŋga nə̀ nà’ à ka yu səmok sə̀ bʉp mʉ ni’ì yi tse’, nə sʉə nà’, nə jə və fa Nwì co yu cop. ²⁰Ŋkuŋ Nwì à sə kə̀ gʉ̀ nzeŋgònə ŋga yi ànə cok noŋsə Krɛst laŋ də yi nə kə tɛsə ves. Nə̀ ŋga’a nè’e, yi nì fa-a nə ves Krɛst nə. ²¹Vesùwèŋ tse’ mandzə̀ ŋgònaaŋ tu bohòNwì yè’sə bʉ̀ʉ Krɛst nə. Bʉsə̀ Nwì ànə lokoksə yi mvwe’ kpʉ, nə kuksə yi wùriŋ. A bʉ̀ʉsə̀ Nwì ànə gʉ vɛ’nə ŋkuŋ vesùwèŋ tse’ mandzə̀ nə̀ ŋgòfa ntʉm bohòyi, nə sə kʉk gesə lis bohòyi sə̀’. ²²Wèŋ a rɛŋsə tsə’rə ni’ awèŋ bə mandzə̀ nə̀ də wèŋ sə bɛ’ zìnə nə fana yà’a gʉ̀ də wèeŋ sə dzəm bwema awèŋ bə mandzə̀ nə̀ zìnə nə. Ye də ncèp njàm nə̀ mʉ̀ sə cep fa wèeŋ dʉk də, wèeŋ dzəm mòk bə mòk, nə lo mantombì. ²³Sə tsərə tse’ də wo a dzə fe’lə weŋ nə̀ kɛ̀’ ba. Dzədzə ènə à və̀ bʉ̀ʉ ŋàaŋ ncèp ye nə̀ nà’ tse’ lùŋ nə. Nsàp lù ènə, nà’a kà mègə nə kà sə kupsə̀ yuk. ²⁴Yè’sə mègù mvəsə̀ wo à còm nòŋsə ndzənə ŋwàk Nwì dʉk də,

<<Bwìŋ pwe’ gù co ŋgaŋ sə̀ yà’a kpʉgə̀ yè’e.

Nzùum awo sə̀ wo sə fom mègù co nzàamŋgaŋ sə̀ ghàr vɛ’ɛ yà’ kpʉ nə yɛ’ gbʉ yè’e.>>

²⁵Fana bohòncèp nə̀ Tà Nwì nə ye, nà’a cu maligə̀ ye fo’. Nè’e zeŋ, ncèp Ntirə̀ nə̀ Bə̀boŋ nə̀ wo à tsòho fa weŋ nə.

Tà Nwì A Cokfis Nòŋsə Weŋ ŊgòYe Bʉ̀ʉ Ye

¹Mvə̀’nə̀ wèŋ rì də bum yè’sə vɛ’nə fana ncu awèŋ nə̀ wèŋ cu, kà bʉp tse’ fe’lə̀. Kà ŋgòŋ mok lim fe’lə̀, nə kà bum cù ba sə cèp. Kà yu ŋwə̀ nəmòk wa, nə kà liŋ ŋwè bʉpsə̀. ²Wèeŋ bwe Nwì sə̀ wo a dzə weŋ fi. Wèeŋ waŋ njè nsàp mbwi nə̀ bə̀boŋ nə̀ nà’a ze’səgə̀ yòŋsə̀ nə. Mbwi nə̀ nà’ tse’ ŋgòkùksə wù tè wù gʉŋ lo mvwe’ lùŋ. ³Bʉsə̀ wèŋ à yu’rə ja’a bə̀bo nə̀ Tà Jisòs, nə riŋ də nà’a bòcɛ̀bʉ̀ə̀ laŋ. ⁴Wèeŋ sooŋ kʉəp və bohòyi nə̀ yi lìs kùmndap. Bwì à də yi ka fàk tse’. Nə ye də Nwì a swe’ fis yi də yi tse’ fàk wùriŋ. ⁵Wèŋ sə̀ wèŋ a tse’ lùŋ nə laŋ fana, bòdə wèeŋ ye co lìis sə̀ aco wo ci ndap Nwì bə zeŋ. Wèeŋ ye sə̀’ co ŋgàa fa satikà’ nə sə fa Nwì nsàp satikà’ nə̀ nà’a rərɛŋ nə̀ yi nə ko jəŋ nà’. Yi dzəm nà’ bʉ̀ʉ fàha sə̀ Jisòs Krɛst. ⁶Yèè! Yà’ cu ndzənə ŋwàk Nwì sə̀’ də,

<<Mʉ̀ sə nòŋsə lìs mòk nə̀ bə̀boŋ

Mvwe’ ntʉm lak àm nə̀ wo togə̀ fo’ də Zayòŋ.

Nà’a lìs tò’ndap nə̀ mʉ nə ci ndap àm mbwa.

Lìs ènə, mʉ̀ a cokfis yi, nə̀ yi tse’ fàk wùriŋ.

Ndàaŋwè pwe’ nə̀ yi naaŋ na tu bohòlìs ènə,

Ŋgə̀ŋgàaŋ nə kà wà kə̀ màhà.>>

⁷Yusə dʉk də, lìs ènə tse’ fàk wùriŋ bohòwèŋ sə̀ wèŋ naaŋ tu bohòyi. Nə ye də bohòbòp bʉ̀ nə̀ wo ka tu bohòyi naaŋ, fana riŋ də,

<<Lìs nə̀ ŋgàa bom ndap wèŋ à dzèeŋ mà’ nà’ də nà’a bʉp nə,

Nà’ kə̀ tse’ gha’ fe’lə fàk sə̀’ yi nə.>>

⁸Yu səmok cu malì bə lìs ènə ndzənə ŋwàk Nwì sə̀’ ŋkuŋ. Yu sə dʉk də,

<<Bwìiŋ nə̀ lʉ’rə mbwa, nə gbʉ.>>

Njo nə̀ bwì nə gbʉ vɛ’nə nə, a bʉ̀ʉsə̀ wo a ka yusə̀ Nwì a cèp yuŋ. Nwì ànə fʉhʉ noŋsə me mantombì də yà’a nə gbʉ vɛ’nə.

⁹Nə ye də wèeŋ yàwèŋ bʉ̀ʉ sə̀ Nwì à cok fis nòŋsə weŋ yi. Wèeŋ yàwèŋ bòp bʉ̀ ŋgàa fa satikà’ sə̀ mʉ nto’ Nwì. Wèeŋ ŋgwì bʉ̀ Nwì. Wèeŋ nsàp bʉ̀ nə̀ zok. Yi a to fis jə weŋ də ya wèeŋ kwasə liŋ ye, nə niŋ fa fàak ye bohòbwì. Bʉsə̀ yi à fis gɛsə weŋ mvwe’ ndzəm, nə jəŋ lo weŋ mvwe’ nsàp marɛŋ nə̀ co ŋwè kà cèp to. ¹⁰Wèŋ à ka mantombì bòp lak bwì bə tu awèŋ yeŋ. Nə̀ ŋga’a nè’e wèeŋ mok bòp lak nə̀ Nwì. Wèŋ à ye bʉ̀ʉ sə̀ Nwì a sə kà manziŋ bohòwèŋ koksə̀gə̀. Nə̀ ŋga’a nè’e Nwì sə koksə manziŋ bohòwèŋ.

Bʉ̀ʉ Nwìi Wəp Bʉ̀ Ŋkəŋkum Sə̀ Sə Nzeŋgòŋ

¹¹Ŋge’ am wèŋ, wèeŋ riŋ tse’ dʉk də wèeŋ ŋkʉ̀ìŋ. Nzeŋgòŋ nè’e ka mvwe’ ncum awèŋ yeŋ. Ye də bòco wèŋ kà ni’ awèŋ bum sə̀ yà’ sə dzəm yà’ yà’a fa, bʉ̀ʉsə̀ yà’ sə mà’ dzè’ bə yòŋsə̀ə àwèŋ sə. ¹²Mvə̀’nə̀ wèŋ cu mʉtsətsə’rə bʉ̀ʉ sə̀ wo ka Nwì riŋ fana wèeŋ cum ncu nə̀ bə̀boŋ. Wèeŋ cum vɛ’nə ya ŋga wo dʉk-a də wèŋ sə gʉ̀ bʉp fana, wo ye bə̀bo awèŋ nə̀ wèŋ sə gʉ̀ʉ, wo kuksə Nwì nùmbu nə̀ yi nə və. ¹³Wəp ŋkwàha bʉ̀ʉ sə̀ wo a co’ nòŋsə wo də wo sə sak bwìŋ bʉ̀ʉsə̀ Tà Jisos Krɛst sə dzəm vɛ’nə. Wèeŋ yuk ŋkum nə̀ ghaŋ nə̀ yi gha’ mok pwe’ nə̀ yi cu mvwe’ lak Rumà. ¹⁴Nə yuk govənòo sə̀ wo a nòŋsə yà’wèŋ də wo yeŋsə ŋgàa gʉ̀ bʉp wèŋ ŋgə’, nə kwasə ŋgàa gʉ̀ bə̀boŋ wèŋ yà’a, wəp wo sə̀’. ¹⁵Bʉsə̀ Nwì sə dzəm dʉk də wèeŋ lok cùu ŋgàa ləm sə̀ wo ka yumok riŋ bə fàha awèŋ sə̀ bə̀boŋ. ¹⁶Wèeŋ cum-a mok co bʉ̀ʉ sə̀ yumok ka wo ko kiiŋ tse’. Kà də wèeŋ jəŋ nsàp ncu awèŋ ènə ŋgògʉ̀ bʉp bə zeŋ dʉk. Ncu àwèŋ nə̀ wèŋ cu nə nà’a ye də wèeŋ ŋkwɛ̀ŋ bohòNwì. ¹⁷Wèeŋ wəp ndàaŋwè lòoŋ fo’, nə dzəm bwema sə̀ wo à dzəm Jisòs. Wèeŋ wəp Nwì nə ye ŋkum nə̀ yi gha’ mok wèŋ nə̀ mvwe’ lak Rumà nə sə̀’.

Ko Ntʉm Bə Ŋgə’ Nə̀ Wù Yə Jìnjo Co Krɛst

¹⁸Wèŋ sə̀ wèŋ sə fàk bohòbʉ̀ʉ mok, wèeŋ jəŋ ni’ awèŋ sə nze bohòwo. Wèeŋ yuk dʉk awo sə̀’. Wèeŋ gʉ vɛ’nə bohòwo sə̀ wo tse’ ntʉm sə̀ bə̀boŋ nə ye sə̀ wo bʉp ntʉm wèŋ pwe’. ¹⁹Yi fa-a wu ŋgə’ ŋgwàŋ ŋga wù ka yumok bʉpsə, fana wù ko ntʉm yò, bʉ̀ʉsə̀ wù rì də Nwìi dzəmgə̀ nsàp ŋwə̀ ànə, fana Nwìi nə kwa bohòwù. ²⁰A ye-a ŋga wo ləp ŋwè də yi gʉ̀ bʉp ŋga yi gʉ̀ nà’ laŋ nə̀ zìnə fana yi sə ko ntʉm, ye də yi ka yà’sə yumok gʉ, bʉ̀ʉsə̀ yi sə yə ŋgə’ bʉ̀ʉ yusə̀ yi rì yà’ laŋ. Nə ye də ŋwə̀ nə̀ yi ka yumok bʉpsə, wo yeŋsə yi ŋgə’ wà fana Nwìi nə dzəm fa yi də ŋ̀, yi gʉ̀ kə̀kʉrə̀. ²¹Nà’a njo nə̀ Nwì à cok fis nòŋsə wu ŋgòko ntʉm vɛ’nə. Bʉsə̀ Krɛst bə tu ye à yə ŋgə’ bʉ̀ʉ wèŋ, nə niŋ noŋsə lo fa weŋ də ya wèeŋ gi yuŋ mvwe’ kùu ye sə. ²²Yi à ka bʉp nə̀ mò’fis gʉ yuk. Ŋwè kà ntsə’mòk ŋga limŋgòŋ tesə tsə kə̀ cùhu yi sə̀’ yuk yuk. ²³Ghà nə̀ wo à sə yà’ yi, yi à ka yà’wèŋ yak fəsə. Wo à yeŋsə yi ŋgə’, yi kà də yi nə gʉ yà’wèŋ bʉp sə̀’ dʉk. Yi à mè’rə fa gù ni’ ye ndzə bohòNwì nə̀ yi sakgə̀ nzak bə zìnə. ²⁴Krɛst bə tu ye à bə̀k kok lòbʉp avès mʉntə̀əŋ ndzə ni’ì yi, nə kpʉ bə zeŋ. Yi à gʉ̀ vɛ’nə ya vesùwèeŋ ye mok co bʉ̀ʉ sə̀ wo kpʉ mè’rə bʉp laŋ, nə cum mok ncu nə̀ rərɛŋ. Wèŋ à lù bʉ̀ʉ mvwe’ ye sə̀ yi à ko. ²⁵Wèŋ ànə ye co nsùŋgaaŋ sə̀ wo à jàm mandzə̀. Nə̀ ŋga’a nè’e wèŋ a foho və̀ ŋgòyù ganakù’ nə nə̀ yi ŋgà nòŋsə̀ yòŋsə̀ə awèŋ.

Ncu Ŋgwe Bə Ndum

¹Bohòma njàwèŋ yep bwìŋ, wèŋ tse’ ŋgòjəŋ ni’ awèŋ sə nze bohòndum awèŋ. A ye vɛ’nə ya ndum mok ye-a sə̀ wo ka ncèp Nwì ntòdzəm, wo nə bʉʉŋ ŋga ŋgwe nə ka yumok ntòcep lok. ²Bʉsə̀ wo yə ncu àwèŋ nə̀ nà’a rərəŋ bə wəwəp nə̀ bə̀boŋ nə. ³Kà də wèeŋ fʉhʉ megu ni’ awèŋ ŋgòyəəŋ bə̀boŋ bə nsàp mandzə̀ nə̀ ŋgòba’ tu, kè nisə ntìim ntɛŋ sə̀ yà’ sə bà’a bà’a bə cə̀k wèŋ dʉk. ⁴Bòlɛ də wèeŋ fʉhʉ ntʉʉm awèŋ. A ye-a ŋga wu fʉ̀ə̀, nə sə ko ni’, nà’a nsàp fə̀fʉhʉ̀ nə̀ bə̀boŋ. Nsàp nə̀ ŋgòye vɛ’nə ènə, Nwì dzəm nà’ wùriŋ. ⁵Yà’a mvə̀’nə̀ bàa sə̀ wo à sə yùgə̀ mandzə̀ Nwì nə sə naaŋ tu bohòyi lùum mok wèŋ à sə fʉhʉ ni’ awo vɛ’nə, nə sə yuk ndum awo wèŋ. ⁶Sàra ànə ye nsàp ŋwà nà’nə mòk. Yi à sə yukgə̀ ndu ye Abràham, nə sə to nà’ dʉk də, <<Masà àm.>> Wèeŋ yà’sə ŋga’a mok bwe Sàra ŋga wèŋ sə gʉ̀ bə̀boŋ, nə kà yumok sə wəp na. ⁷Mègù sə̀’ vɛ’nə bohòwèŋ mbəmbam də mvəsə̀ wèŋ cu bə yep awèŋ, rìŋtse’ də yi ka ŋàŋ co wù tse’. Wèeŋ kotse’ wo bə̀boŋ. Njo nə də wo nə̀ kə̀ tse’ lùŋ nə̀ Nwìi nə̀ kə̀ fa bwì nə yàwo sə̀’, wenə wèŋ bəbɛ’. Wèeŋ gʉ mʉmvə̀’ ànə ya wèeŋ gʉ̀ pìriyà fana yumok kà nà’ bʉpsə̀.

Ye Ŋgə’ Njo Gʉ̀ Bòŋ

⁸Ncèp àm nə̀ ŋgòlə̀sə bə zeŋ, a dʉk də wèŋ pwe’ tse’ sə̀’ nsàp ntʉm nə̀ mò’fis. Bwema sə̀ wo à dzəm bohòJisòs pwe’, wèeŋ dzəm wo. Wèeŋ tse’ koksə̀manziŋ, nə tse’ ntʉm nə̀ fə̀fwèŋ, nə jəŋ ni’ awèŋ sə nze bohòmòk bə mòk. ⁹A ye-a ŋga ŋwə̀ nəmòk gʉ-a weŋ bʉp, wèŋ kà yi bʉp sə̀’ gʉ̀ fəsə̀ fa. A ye-a sə̀’ dʉk də ŋwə̀ nəmòk yà’ weŋ, wèŋ kà yi sə̀’ yàk fəsə̀. Dʉk fa nsàp ŋwə̀ ànə lɛ dʉk də, <<Nwìi tɛsə wu.>> Bʉsə̀ Nwì a to weŋ, nə kak ŋgòsè weŋ. ¹⁰Yà’ cu ndzənə ŋwàk Nwì dʉk də,

<<A ye-a ŋga ŋwə̀ nəmòk dzəm-a dʉk də yi cum ncu nə̀ bə̀boŋ nə bə kwəkwa,

Fana yi kà cùu sə̀ bʉp tse’.

Yi kà mvwès sə cì’.

¹¹Yi tse’ ŋgòbʉ̀ʉŋ mè’rə mandzə̀ gʉ̀ bʉp,

Nə yuŋ mandzə̀ nə̀ ŋgògʉ̀ bə̀boŋ.

Yi lap fifi bə ntʉm ye pwe’fo’ zìnə.

¹²Wèŋ rì də Tà Nwìi kʉ̀k tesgə̀ lis bohòbʉ̀ʉ sə̀ wo kə̀kʉrə̀,

Nə sə yuk yusə̀ wo sə lɛŋ bohòyi,

Fana Yi sə bɛŋ bʉ̀ ŋgàa gʉ̀ bʉp wèŋ.>>

¹³A ye-a dʉk də wèŋ sə làp mandzə̀ nə̀ ŋgògʉ̀ bə̀boŋ bə zìnə àwèŋ pwe’fo’ fana ye də aco ŋwə̀ nə̀ yi gʉ weŋ bʉp ye yè’sə ndà? ¹⁴A ye-a nə̀ də wèŋ sə yə ŋgə’ njo nə̀ wèŋ gʉ̀ bə̀boŋ fana wèŋ sə kwa bə zeŋ kwa. Bə yà’sə lòoŋ, kà də bwìiŋ wəpsə weŋ dʉk, nə kà ntʉm awèŋ ŋgə’ sə fa. ¹⁵Wèeŋ fa megu ntʉm awèŋ bohòKrɛst də yi mègù Tà sə ntʉʉ̀ wèŋ yi. Sə fʉhʉ ghà yà lòoŋ nə̀ wù cu ŋgòtsə̀’ fəsə fa ŋwə̀ nə̀ yi fek-a weŋ njo nə̀ wèŋ sə naaŋ tu bohòJisòs na. ¹⁶Wèeŋ cu ŋgòtsə̀’ fa yi, wèŋ ye fʉ̀ə̀, nə sə niŋ wəwəp sə̀’. Wèeŋ noŋsə ntʉm awèŋ rərɛŋ ya ŋga marè’tu nə ko bʉ̀ʉ sə̀ wo sə yàk weŋ ŋga wo yə də ncu awèeŋ bə̀boŋ co bʉ̀ʉ sə̀ wo sə yù mandzə̀ Jisòs Krɛst. ¹⁷Bʉsə̀ ŋga Nwì dzəm-a də wèeŋ ye ŋgə’ fana yà’ boŋ ghak də wèeŋ ye ŋgə’ ŋga wèŋ gʉ̀ bə̀boŋ, nə noŋsə ŋgòye ŋgə’ njo nə̀ wèŋ gʉ̀ bʉp. ¹⁸Jisòs Krɛst bə tu ye ànə ye ŋgə’, nə kpʉ bʉ̀ʉ bʉp avès nə̀ mvèsə̀. Yi nə̀ yi ŋwə̀ nə̀ rərɛŋ à yə ŋgə’ bʉ̀ʉ tu bʉ̀ʉ sə̀ wo ka rərɛŋ yeŋ, ya yi jəŋ və weŋ bohòNwì. Wo ànə zə yi bə ŋgùpni’, fana yi lokok fe’lə bə yòŋsə̀. ¹⁹Yi ànə kpʉ, yòŋsə̀ ye nə lo kə ye yòŋsə̀ə bʉ̀ʉ sə̀ wo à kpʉ mantombì, nə tsoho fa yà’wèŋ ncèp nə̀ Nwì. Ye’e yòŋsə̀ə sə̀ Nwì ànə ko lok noŋsə wo fo’. ²⁰A bʉ̀ʉ sə̀ wo ànə gʉŋtu bohòNwì. Wo ànə gʉŋtu bohòNwì ghà nə̀ Nuà ànə sə gʉ ŋgwes. Nwì ànə ko ntʉm də ya yà’wèeŋ bʉʉŋ fana yà’ cà wà. Ànə luŋ megu mʉ ndzəpə̀ anə bwì fwame’, wo sə̀ wo ànə ni ŋgwes nə. ²¹Ndzəp nə̀ wo ànə ca ca nə, ànə ye co a bàptɛ. Nà’ à sə nì tsə̀’ gèsə lòmantombì bə ndzəp bàptɛ nə̀ nà’a fisgə̀ weŋ mvwe’ bʉp awèŋ njo nə̀ Jisòs Krɛst ànə lokok mvwe’ kpʉ nà’a. Nà’ ka yusəmok bə ŋgòcù fis fa ŋwè ndom sə̀ mʉ ŋgùpni’ tse’. Nà’a nsàp yumok nə̀ vèes jəgə̀ nà’ ŋgòbʉ̀ʉŋ və̀ bohòNwì, nə lɛŋ yi də yi cuk rɛŋsə fa ves ntʉm avès. ²²Krɛɛst à lòmʉbu, yi cu mbwa bo ma mà’a Nwì. Yi ŋwə̀ nə̀ ghaŋ bohòmasinjàa Nwì bə yà lòoŋ sə̀ yà’ tse’ ŋàŋ wèŋ yi.

Ncu Ŋgà Rì Nwì

¹A rì də Jisòs Krɛst ànə ye ŋgə’ bə ŋgùpni’. Ye də wèeŋ fʉhʉ ŋgòyə ŋgə’ bə ŋgùpni’ sə̀’ mvə̀’nə̀ yi ànə ye ya wèeŋ ye gʉgʉŋ. Bʉsə̀ ndàaŋwè pwe’ nə̀ yi à yə-a ŋgə’ bə ŋgùpni’ ye fana ye də yi a gà’a bə ntʉm nə̀ ŋgògʉ̀ bʉp laŋ. ²Ye jəŋ ŋga’a nə lo mantombì, ncu ye sə nzeŋgòŋ fɛɛŋ nə ye ŋgòyù bum sə̀ Nwì dzəm vɛ’nə. Yi nə kà yusə̀ ŋwè sə dzəm yi yù. ³Wèŋ a càsə mvə̀k wùriŋ ŋga wèŋ sə gʉ̀hʉ bum sə̀ bʉ̀ʉ sə̀ wo ka Nwì rì dzəmgə̀ ŋgògʉ̀ʉ. À nə ye mantombì, wèŋ à sə gʉ̀gə̀ bʉp, nə kà lis maŋkwɛ̀ŋ kʉ̀k. Wèŋ à sə ko sàhà mvə̀’nə̀ yà’ bòweŋ, nə kà taŋsə̀. Wèŋ à sə jʉ̀hʉ rùk, nə sə rooŋ ni’, nə sə binə no kɛ’ rùk. Wèŋ à sə kùksə bum sə̀ wà co Nwì, nə sə kuksə bə nsàp mandzə̀ nə̀ bʉp. ⁴Nə ye də nə̀ ŋga’a nè’e, wèŋ sə kà mok wenə wèŋ mok be’lə̀ fe’lə̀, wèŋ sə kà nsàp bʉp nə̀ ləlà nà’nə mok gʉ̀ fe’lə̀. Wo sə mərə fana nà’a njo nə̀ wo sə yak weŋ. ⁵Yusə dʉk də mvə̀k sə və̀ə nə̀ nsàap bʉ̀ʉ yà’sə nə kə sak nzak bohòNwì. Wo nə̀ sak mvəsə̀ wo à cu ncu àwo sə nzeŋgòoŋ fɛn. Nwìi nə sak bʉ̀ʉ sə̀ wo cu ŋwəm bə sə̀ wo à kpʉ laŋ wèŋ pwe’. ⁶Nè’e njo nə̀ wo ànə kə tsoho fa bʉ̀ kpʉkpʉ wèŋ Ntirə̀ nə̀ Bə̀boŋ nə də ya wo tse’ nsàp lùŋ nə̀ Nwì, nə̀ nà’a ndzənə yòŋsə̀ nə̀. Nwì ànə sak me wo ghà nə̀ wo ànə ye ŋwəm sə̀’ laŋ mvəsə̀ wo sakgə̀ ndàaŋwè lòoŋ.

Kùugìi YòCo Krətèŋ

⁷Nzeŋgòŋ nə kʉəp ŋgòmè laŋ. Ye də wèeŋ fʉhʉ, nə jəŋ ŋkərə̀ ya wèeŋ nə riŋ mvəsə̀ ŋgòlɛŋ pìriyà. ⁸Yusə̀ yà’ yam casə pwe’fo’ dʉk də wèeŋ sə dzəm mòk bə mòk bə ntʉm awèŋ pwe’fo’. Bʉsə̀ ŋwèe dzəm-a ŋwè, dzədzəm nà’nə gʉ yi, yi kà bʉp nə̀ mòk nə sə gʉ̀ʉ yə. ⁹Noŋsə ncùu awèŋ to bohòndàaŋwè lòoŋ. Wèeŋ gʉ̀ vɛ’nə, wèŋ kà bə zeŋ sə cèp ŋwə̀m kɛ’cà. ¹⁰Nwì a fa ndàaŋwè pwe’ ŋkərə̀ ŋgògʉ̀ bum bə nsàap mandzə̀ zəzok. Ye də ndàaŋwè pwe’ kotse’ nsàp mandzə̀ ŋkərə̀ nə̀ nje bə̀boŋ. Yi nə sə fak bə zeŋ mvəsə̀ co nà’ tɛsə bʉ̀ʉ səmok wèŋ sə̀’. ¹¹Ŋwə̀ nə̀ aco yi cep riŋ yusəmok, fana yi sə tsoho megu co Nwì nə sə cèp yi bə tu ye. Ye sə̀’ də ŋwə̀ nə̀ aco yi tɛsə ŋwè fana yi tɛsə nà’ bə ŋàaŋ sə̀ Nwì a fa yi yà’ yi. Yi gʉ vɛ’nə ya bwìiŋ yə, wo kuksə liŋ sə̀ Nwì bʉ̀ʉ Jisòs Krɛst. Ŋàaŋ yee sə̀ ye fana bwìiŋ kuksə yi mvèsə̀ nə̀ mvèsə̀. Yà’a ye vɛ’nə.

Ŋgə’ Nə̀ ŊgòYə Nà’ Bʉsə̀ Də Wu Krətèŋ

¹²Ŋge’ am wèŋ, mə̀mumsə̀ə sə̀ yà’ gʉ wùriŋ sə və̀ bohòwèŋ. Wèeŋ kà də wèeŋ mərə kɛ’cà bə zeŋ co a nsàp yu nə̀ wèŋ nə ka riŋ dʉk. ¹³Wèeŋ kwa ləlɛ kwa dʉk də ŋgə’ nə̀ Jisòs Krɛst à yə, weŋnə wèŋ sə yə nà’ bəbɛ’. Ye də kwəkwa awèeŋ nə yam casə yà pwe’ nùmbu nə̀ wo nə̀ yə fòye sə̀ yi tse’ sə jəja. ¹⁴A rɛŋsi bohòwèŋ ŋga bwì sə ya’rə kɛ’cà-a weŋ də bʉ̀ʉsə̀ wèŋ sə bɛ’ mandzə̀ Jisòs Krɛst na. Yà’sə sə nì tsə̀’ dʉk də Yòŋsə̀ nə̀ Nwìi mʉ tuhù wèŋ. Yi nə̀ yi maŋgəŋgèŋ nə. ¹⁵A ye-a ŋga ŋwə̀ nəmòk sə yə ŋgə’ fana kà də yi ye ŋgə’ bʉ̀ʉsə̀ də yi ŋgà zə bwìŋ kè ŋgà yə̀ kè ŋgà gʉ̀ bʉp àlɛ ye. Ŋwèe kà ŋgə’ bʉ̀ʉsə̀ də yi sə gbʉ̀ ni kɛ’cà sənə bum bwìŋ wèŋ wàwà sə̀’ yə. ¹⁶Fana a ye-a ŋga ŋwè yə ŋgə’ də bʉ̀ʉsə̀ yi krətèŋ fana yi kà də yi koksə marè’tu dʉk. Yi kwasə Nwì bʉ̀ʉsə̀ wo sə jə yi co ŋwə̀ə Krɛst. ¹⁷Yusə dʉk də, mvə̀k kʉ̀rə laŋ nə̀ ŋgòkə̀ sak yèto nzak bohòbʉ̀ʉ Nwì wèŋ. Nə yeè nə də a ye-a ŋga bum sə̀ vesùwèŋ rì yà’ ŋga’a yè’e mègù yà’sə ntòyèyèto, fana yà’a nə kə ye wesə yè’sə nsàp nə̀ fòbohòbʉ̀ʉ sə̀ wo à bɛ̀ŋ Ntirə̀ nə̀ Bə̀boŋ nə̀ Nwì nə ɛ? ¹⁸Mvəsə̀ ŋwàk Nwì nə sə cèp dʉk də,

<<A gʉgʉŋ ŋkuŋ bʉ̀ʉ sə̀ wo kə̀kʉrə̀ə nə tesə də wo ka nzak bohòNwì gbʉ.

A ye-a vɛ’nə, ye də yà’a nə gʉŋ wesə yè’sə nsàp nə̀ fò

bohòbʉ̀ʉ sə̀ wo kà Nwì wəpgə̀ yà’a nɛ?>>

¹⁹Bʉ̀ʉ sə̀ wo sə yə ŋgə’ bʉ̀ʉsə̀ Nwì dʉk vɛ’nə yi fana wo sə gʉ mali bə̀boŋ, nə fa ni’ awo pwe’ ndzə bohòNwì nə̀ nà’ à gʉ̀ wo. Yi Nwì nə̀ yi gʉ̀gə̀ yusə̀ yi kak də yi nə gʉ pwe’.

Ntip Nə̀ BohòŊkwàha Bʉ̀ʉ Sə̀ Mʉ Cos

¹Mʉ̀ tse’ mʉncèp mòk nə̀ mʉ̀ dzəm ŋgòtsə̀’ fa nà’ bohòwèŋ bʉ̀ʉ sə̀ wèeŋ ŋkwàha bwìŋ mʉ coos. Mʉ yàm sə̀’ ŋwə̀ nə̀ mantombì. Mʉ̀ ànə ye mvəsə̀ Krɛst à yə ŋgə’ bə lis am. Mʉ nə kə ye mòk nə̀ ŋgòtse’ kə̀kuksə̀ ye ma mòk nùmbu nə̀ yi və̀ə. Nà’a njo nə̀ mʉ̀ sə lɛŋ weŋ də, ²Jəŋ ŋkərə̀ bə bʉ̀ʉ Nwì sə̀ yi a fa ndzə bohòwèŋ yà’a bə̀boŋ. Sə kʉk wo mvəsə̀ ganakùu’ kʉ̀kgə̀ nàam ye. Kà də wèeŋ kʉk wo co a bə nza’ ŋàŋ dʉk, wèeŋ kʉk wo lɛ bʉ̀ʉsə̀ də wèŋ tse’ ntʉm nə̀ kwəkwa ŋgòkʉ̀k wo. Kà də wèeŋ noŋsə to mantombì mbàam sə̀ wo nə lak weŋ fo’ dʉk. Wèeŋ fak bə ntʉm nə̀ rərɛŋ. ³Kà də wèeŋ niŋ tsok fa bʉ̀ʉ sə̀ Nwì a fa ndzə bohòwèŋ sə ŋàŋ dʉk. Gʉ̀ bum ləlɛ bə nsàp mandzə̀ nə̀ co ŋga bwì pwe’ yə-a, wo nə dzəm ŋgòbɛ’ lònsàp nà’nə. ⁴Ya nùmbu nə̀ Jisòs Krɛst nə̀ yi ŋkum ganakù’ bwìŋ pwe’ nə tesə və̀ jəja fana yi nə fa weŋ lə̀là’ nə̀ nà’a kà bʉpgə̀. A yà’a də yi nə gʉ wèŋ yəə bə fò.

Ntip Nə̀ BohòKrətèeŋ Sə Wèŋ

⁵Bohòwèŋ wàhabwìŋ, yà’ mègù sə̀’ vɛ’nə də wèeŋ wəp bʉ̀ ŋkwàha bwìŋ wèŋ. Wèŋ pwe’ sə wəp mòk bə mòk, nə sə jəŋ ni’ awèŋ sə nze, nə ye gʉgʉŋ ŋgòfàk bohòmòk bə mòk, bʉ̀ʉsə̀ yà’ cu ndzənə ŋwàk Nwì dʉk də,

<<Nwìi bɛ̀ŋgə̀ bʉ̀ʉ sə̀ wo nɛ̀gə̀ ni’,

Nə sə se sə̀ wo jəgə̀ ni’ awo sə nze.>>

⁶Ye də wèeŋ jəŋ ni’ awèŋ sə nze bohòNwì, yi nə̀ yi tse’ ŋàŋ, ya mvə̀k nə̀ nje nə kʉrə fana yi fis kok weŋ mʉtsə̀. ⁷Me’rə fa yu yà pwe’ sə̀ yà’ sə gha’ weŋ ndzə bohòyi bʉ̀ʉsə̀ yi sə tsərə weŋ. ⁸Jəŋ ŋkərə̀, nə muk noŋsə lis awèŋ to, nə sə kʉk, bʉ̀ʉsə̀ ŋkum ze’, yi ŋwə̀ nə̀ wenə wèŋ cu bə dzè’ nə sə gi kɛ’ca. Yi sə gì kɛ’ca co gwim nə̀ yi sə wa làp ŋwə̀ nə̀ co yi ko zə nà’.⁹Təəŋ gʉgʉŋ co yi kà weŋ gha’, nə sə fa mali ntʉm awèŋ bohòNwì. Sə riŋ tse’ dʉk də bwe tɛ̀’ɛ yo sə̀ wo krətèŋ pwe’ sə yə ŋgə’ sə̀’ mʉmvə̀’nə̀ wèŋ sə yə yà’sə sənə nzeŋgònə ma fòlòoŋ.

¹⁰A ye ŋga wèeŋ yə ŋgə’ ghàr, fana Nwìi nə tɛsə weŋ. Bum sə̀ bə̀boŋ pwe’ və̀ mègù bohòyi. Yi à to weŋ ŋgòkə̀ tse’ kə̀kuksə̀ ye mamòk bʉ̀ʉ Jisòs Krɛst. Yi Nwì nə bə tu yee nə gʉ tsə’rə weŋ bə nsàp yu yà lòoŋ. Yi nə kə te’ lokoksə weŋ bə ŋàŋ, nə tes weŋ mʉmvwe’ kùum sə̀ gʉgʉŋ ya wèeŋ təəŋ gʉgʉŋ. ¹¹Ŋàaŋ ŋkum yee cum mali gu sə̀ ye. Yà’a ye vɛ’nə.

Ncèp Nə̀ Nà’ Lə̀sə

¹²Mʉ̀ còm fa weŋ mʉŋwàk ènə ŋga tɛsə mʉ Sìvanù. Mʉ̀ rìŋtse’ də yi ŋwə̀ nə̀ yi bɛ’gə̀ mandzə̀ Krɛst bə zìnə ye pwe’. Mʉ̀ còm ŋwàk ènə ŋgòkwɛ’sə weŋ ya wèeŋ təəŋ gʉgʉŋ. Bum sə̀ mʉ̀ còm tsə̀’ weŋ pwe’, a bum sə̀ Nwì bə zìnə. Fana wèeŋ kotse’ bum yè’sə cʉ̀k. ¹³Cos nə̀ mvwe’ lak Babilòŋ fɛɛŋ, nə̀ Nwì a cokfis wo co yi à cokfis weŋ nə, cèpsə weŋ bə̀boŋ. Mo àm Mak cèpsə weŋ sə̀’ bə̀boŋ. ¹⁴Wèeŋ cepsə mòk bə mòk bə nsàp cə̀cèpsə̀ nə̀ nà’ sə nìtsə̀’ dzədzəm. Wèŋ sə̀ wèeŋ bʉ̀ʉ sə̀ Krɛst pwe’, fifi ye bohòweŋ.