1 Jon

Ŋwàk Nə̀ Mantombì

nə̀ JON à Còom

Jon à còm ŋwàk ènə ŋga bwìŋ sə yə’rə də bum sə̀ aco ŋwè ye bə lis, nə jwɛŋ bə bo pwe’fo’ bʉp. Wo sə dʉk də bum sə̀ bə̀boŋ mègù sə̀ yà’a ma nə̀ ndzənə yòŋsə̀. Fana ŋwèe kà də yi sə dʉk də mʉ gʉ̀-a vɛ’ yà’ ye bʉp kè bə̀boŋ dʉk, bʉ̀ʉsə̀ bum pwe’ sə̀ yi sə gʉ̀ bə ni’ ye yəyərə̀. Mʉmvə̀’nə̀ wo à tse’ nsàp tsətsərə̀ ànə fana wo sə dʉk də ànə ka yeŋ co Jisòs mo Nwì tse’ ŋgùpni’ yeŋ.

Jon com ŋgòcèp càsə bum ba: də bwìiŋ cum cù mò’fis bə Nwì nə ye bə mo ye Jisos Krɛst. Yi còm sə̀’ də bwìiŋ jəŋ ŋkərə̀ bə bum sə̀ mvwès sə̀ bʉ̀ʉ mok sə yə’rə kɛ’ yà’a bʉ̀ʉsə̀ yà’a nə gʉ bʉpsə ncu nə̀ cù mò’fis ènə. Yi sə tsok mali fa wo də Jisòs à ye ŋwè bə nə̀ zìnə, nə ye də ŋwə̀ nə̀ nà’ dzəm-a Nwì fana nà’ tse’ ŋgògì gì nə̀ nà’ tse’ marɛŋ nja.

Ncèp Nə̀ Nà’ Tse’ Lùŋ Nə

¹Yumòk à ye to ye fo’ nə̀ mʉ̀ à yuk nà’, nə ye nà’ bə lis am, nə jwɛŋ nà’ bə bo sə̀’. Yu ànə a Ncèp nə̀ nà’a lùŋ nə, ŋga nà’a Jisòs mo Nwì. ²Lùŋ nə ànə yəəŋ, fana vès ye yi, nə sə tsə̀’ fa-à nə weŋ bə nzak lùŋ nə̀ nà’a nə̀ kà mè, nə̀ nà’ à ye to ntòbə tɛ̀’ Nwì ŋkuŋ vès ye nà’ nə. ³Vès sə tsə̀’ fa weŋ bum sə̀ vès à yə, nə yuk yè’sə, ya ŋga wèeŋ cum ncʉ̀ mò’fis vesùwèŋ. Vèes cum cù mò’fis ves Tà Nwì nə ye mo ye Jisòs Krɛst wèŋ. ⁴Njo nə̀ vès còm bum yè’sə də ya kwəkwa nə̀ vesùwèŋ nə yam tsə’rə wesə bə̀boŋ.

Sə Gi Sənə Marɛŋ Bʉsə̀ Nwìi Marɛŋ

⁵Ncèp nə̀ vès à yuk bohòmo ye, nə sə tsə̀’ fa-à nə wèŋ nə də, Nwìi rərɛŋ co marɛŋ, yi ka ŋgà ndzəndzəm ye lok saam. ⁶A ye-a ŋga vesùwèŋ dʉk də, ves Nwì wèŋ cu cù mò’fis, nə sə gi sənə mandzəm, fana ye də yusə̀ vesùwèŋ sə cèp, nə sə gʉ sə pwe’fo’ mvwès. ⁷Vesùwèeŋ gì-a sənə marɛŋ, mʉmvə̀’nə̀ yi sə̀’ sənə marɛŋ, ye də vesùwèeŋ mvwe’ mò’fis. Jisòs mo ye sə cùk rɛŋsə fis fa ves bʉp avès bə ndʉəm ye. ⁸A ye-a ŋga vesùwèŋ dʉk-a də a ka ŋgàa gʉ̀ bʉp yeŋ, ye də vesùwèŋ sə bòrə ni’ avès, vesùwèŋ ka zìnə nə riŋ lok nə̀ mvèsə̀. ⁹A ye-a ŋga vesùwèŋ gʉ̀ bʉp, nə dzəm fis kə̀ cùhu vès, fana yi ŋwə̀ nə̀ zìnə, yi nə ye sə̀’ kə̀kʉrə̀ ŋgòswì fa ves, nə cuk rɛŋsə fis fa ves bʉp avès sə. ¹⁰A ye-a ŋga vesùwèŋ dʉk də, a ka bʉp gʉ, ye də vesùwèŋ sə dʉk yà’sə də yi ŋgà cì’ mvwès. Ye də ncèp ye nə ka sə ntʉʉ̀ vès yeŋ.

¹Bwe am wèŋ, mʉ̀ sə còm fa weŋ bum yè’e də ya wèeŋ kà bʉp gʉ̀. A ye-a ŋga ŋwə̀ nəmòk gʉ̀-a bʉp, Jisòs Krɛst cu yo nə̀ yi nə təəŋ mantombìi Tɛ̀’ àvès Nwì, nə lɛŋ fa nà’. Yi ye ŋwə̀ nə̀ yi kə̀kʉrə̀. ²Jisòos co yu cop nzak bohòNwì ya yi swifa ves fɛ̀ŋ avès. Yi ka yu cop nzak bohòvesùwèŋ mègù, yi bohònzeŋgòŋ nə pwe’fo’. ³Yusə̀ aco yà’ niŋtsok də vesùwèŋ rì Nwì, a ŋga vesùwèŋ sə noŋsə-a ncèp ye nə na. ⁴Ŋwə̀ nəmòk dʉk-a də yi rì Nwì, nə kà yusə̀ Nwì sə dʉk gʉ̀, fana ye də ŋgə̀ŋgàaŋ ye ŋgà cì’ mvwès. Yi ka zìnə nə̀ Nwì nə riŋ lok nə̀ mvèsə̀. ⁵Ŋwə̀ nə̀ yi gʉ̀gə̀-a yusə̀ Nwì də yi gʉ fana nà’a yi nə̀ yi dzəm Nwì bə ntʉm ye pwe’fo’ nə. Nà’a mandzə̀ nə̀ aco vesùwèŋ riŋ də a cu ndzə ni’ì Nwì zìnə. ⁶Ŋwə̀ nə̀ yi dʉk-a də yi bə Nwì mvwe’ mò’fis fana yi tse’ ŋgògì nsàp gì nə̀ Jisos Krɛst à gìi.

Dzəm Moma Yo Bwɛ̀rɛ Wù Kà Marɛŋ Nə Tse’

⁷Ŋge’ am wèŋ, yusə̀ mʉ̀ sə còm fa weŋ yè’e, ka yumok sə̀ fi yeŋ, yà’ mègù yusə̀ zəm sə̀ wèŋ ànə riŋ yà’ mantombì fa’ sə. Yusə̀ zəm yè’sə, a ncèp nə̀ wèŋ ànə yuk me nà’ laŋ nə. ⁸A ye-a sə̀ vɛ’nə fana yusə̀ mʉ̀ sə còm fa weŋ yè’sə sə̀ fi sə̀’. Yu ànə à yəəŋ bə nsàp ncu Jisòs, nə ye bə nə̀ njàwèŋ sə̀’. Nà’a nə̀ fi bʉ̀ʉsə̀ ndzəm sə cà gɛsə lòfana marɛŋ nə̀ zìnə sə yè ŋgòrɛɛŋ və̀ə. ⁹A ye-a ŋga ŋwə̀ nəmòk dʉk-a də yi cu mvwe’ marɛŋ, nə sə bɛŋ mali moma ye fana ye də ŋgə̀ŋgàŋ cu mali ŋga’a ntòsənə mandzəm. ¹⁰A sə̀’ zìnə də ŋwə̀ nə̀ yi dzəm-a moma ye fana ye də yi cu sənə marɛŋ. Yumok ka bohòyi co yi gbʉ yeŋ. ¹¹Fana mamòk nə sə̀’ də ŋwə̀ nə̀ yi bɛ̀ŋ-a moma ye, ye də yi cu sənə ndzəm, nə sə jam kɛ’ ca, bʉ̀ʉsə̀ mandzəm lok yi lis laŋ.

Kà Nzeŋgòŋ KòBwɛ̀rɛ Kə̀kòNwì Ka Sə Ntʉʉ̀ Wù Yeŋ

¹²Bwe am wèŋ, mʉ̀ sə còm fa weŋ ŋwàk nè’e bʉ̀ʉsə̀ wèŋ a tse’ sə̀swìfa bə bʉp awèŋ mʉŋkwɛ̀ɛŋ liŋ Jisòs Krɛst. ¹³Mʉ̀ sə còm fa weŋ tɛ̀’ bʉ̀ʉsə̀ wèŋ rì yi nə̀ yi ànə ye ŋga nzeŋgòŋ ka ntòyeto nə. Weŋ wàhabwìŋ, mʉ̀ sə còm fa weŋ bʉ̀ʉsə̀ wèŋ a ghak ŋkum ŋgà gʉ̀ bʉp nə laŋ. ¹⁴Weŋ bwe am, mʉ̀ sə còm fa weŋ bum yè’e bʉ̀ʉsə̀ wèŋ rì tɛ̀’ àvès Nwì. Mʉ̀ sə còm fa weŋ tɛ̀’ bʉ̀ʉsə̀ wèŋ rì yi nə̀ yi ànə ye ŋga nzeŋgòŋ ka ntòyeto nə. Mʉ̀ sə còm fa weŋ wàhabwìŋ bʉ̀ʉsə̀ wèŋ tse’ ŋàŋ. Ncèp nə̀ Nwì cu sə ntʉʉ̀ wèŋ, fana wèŋ ghak ŋkum ŋgà gʉ̀ bʉp nə.

¹⁵Kà də wèeŋ dzəm nzeŋgòŋ bə bum sə̀ nzeŋgòŋ nə tse’ sə̀’ dʉk. Bʉsə̀ wèeŋ dzəm-a nzeŋgòŋ, ye də dzədzəm nə̀ tɛ̀’ àvès ka sə ntʉʉ̀ wèŋ yeŋ. ¹⁶Bum sə̀ nzeŋgòŋ nə tse’ pwe’, a bum sə̀ ŋgùpni’ sə dzəm yà’, bum sə̀ co bwìiŋ yəgə̀ yà’, nə sə waŋ yà’ də wo dzəm ŋgòtse’ yà’, nə ye yusə̀ bwìiŋ nɛ̀gə̀ ni’ bə zeŋ sə nzeŋgòŋ fɛɛŋ pwe’fo’. Mòk ka yu nə̀ nà’ və̀ bohòTɛ̀’ yeŋ, yà’ mègù lòoŋ sə̀ sə nze fɛɛŋ. ¹⁷Nzeŋgòŋ nə sə cà lòcàa, nà’ sə cà lòbə bum sə̀ yà’a ca sə̀ bwìŋ dzəmgə̀ yà’ sə pwe’. Fana ŋwə̀ nə̀ yi sə gʉ̀-a ye yusə̀ Nwì dzəm, yi nə̀ cu mam malìgə̀ fo’.

Wèeŋ Kərə Bə Bʉ̀ʉ Sə̀ Wo Bɛ̀ŋgə̀ Krɛst

¹⁸Bwe am wèŋ, nzeŋgòŋ nə kʉəp ŋgòmèe. Tsərə tse’ mvə̀’nə̀ wo ànə tsok weŋ dʉk də nzeŋgòoŋ kʉəp ŋgòmè fana ŋwə̀ nə̀ yi bɛ̀ŋgə̀ Krɛst nə nə və. Nsàap bʉ̀ʉ yà’sə a və̀ ŋkʉ̀ʉŋntɛ̀ŋ laŋ. Fana aco vesùwèŋ riŋ də nzeŋgòŋ nə kʉəp ŋgòmè laŋ. ¹⁹Bʉ̀ʉ yè’sə a tesə lògɛsə mʉtsətsə’rə vès bʉ̀ʉsə̀ wo à ka ŋkùp ma nə̀ njàvès yeŋ. Wo ànə yeŋ-a ŋkùp ma njàvès bwɛ̀rɛ də wo à ka tesə lò. Wo a tesə lòvɛ’nə fana yà’ ni tsok jəja də wo ka ŋkùp ma nə̀ njàvesùwèŋ yeŋ. ²⁰Wèeŋ yàwèŋ bʉ̀ʉ sə̀ Jisòs Krɛst a sè wèŋ, nə fa weŋ Yòŋsə̀ nə̀ Rərɛŋ nə fana wèŋ rì yàwèŋ zìnə nə laŋ. ²¹Njo nə̀ mʉ̀ sə còm fa weŋ nə, ka də a bʉ̀ʉsə̀ wèŋ ka zìnə nə riŋ yeŋ. A bʉ̀ʉsə̀ wèŋ rì zìnə nə, nə riŋ sə̀’ dʉk də kaco mvwès tesə yuk ndzənə zìnə yeŋ. ²²A ye-a mʉmvə̀’ ànə zìnə, ye də ŋgà cì’ mvwèes yè’sə ndà? A ndàaŋwè pwe’ nə̀ yi bɛ̀ŋ də Jisòs ka ŋkum ŋgà gèm bwìŋ nə̀ Nwì à tum vèsə sə nze nə yeŋ. Ŋwə̀ nə̀ yi dzèeŋ-a nà’ vɛ’nə ye də nà’a ŋwə̀ nə̀ yi ŋgà bɛ̀ŋ mo Nwì bə tɛ̀’ ye nə sə̀’. ²³Mʉ̀ sə dʉk yè’sə dʉk də ŋwə̀ nə̀ yi dzèeŋ-a mo ye nə, yi ka bə tɛ̀’ɛ nà’nə yeŋ. Ye də ŋwə̀ nə̀ yi dzəm-a mo ye nə, yi tse’ tɛ̀’ nə sə̀’.

²⁴Wèeŋ riŋ tse’ pap də wèeŋ kotse’ ncèp nə̀ wèŋ à yuk to mantombì nà’a sə ntʉʉ̀ wèŋ cʉ̀k. Bum sə̀ wèŋ ànə yuk to yè’sə cu-a sə ntʉʉ̀ wèŋ, ye də wèeŋ nə cum malì mvwe’ mò’fis weŋ mo nə, nə ye tɛ̀’ nə. ²⁵Tsərə tse’ də Jisòs Krɛst à kà’ nòŋsə lòfa vès lùŋ nə̀ nà’a nə̀ kà mè nə. ²⁶Mʉ̀ còm fa weŋ yà’a bə mandzə̀ bʉ̀ʉ sə̀ wo sə làp ŋgòbòrə weŋ. ²⁷Wèeŋ yàwèŋ bʉ̀ʉ sə̀ Jisòs Krɛst a sè wèŋ bə yòŋsə̀ nə̀ nje, nà’ cu sə ntʉʉ̀ wèŋ. Nà’a njo nə̀ wèŋ ka tse’ ŋgòlàp ŋwə̀ nəmòk ŋgòyə’rə weŋ tse’ nə, bʉ̀ʉsə̀ yòŋsə̀ ànə sə yə’rə weŋ ŋgòrì bum pwe’. Yusə̀ Yòŋsə̀ nə sə yə’rə weŋ sə, yà’a zìnə, mvwès ka nja yeŋ. Nà’a njo nə̀ mʉ̀ sə dʉk weŋ də wèeŋ cum malì weŋ Jisòs mʉmvə̀’nə̀ Yòŋsə̀ nə sə yə’rə fa weŋ. ²⁸Bwe am wèŋ, mʉ̀ sə dʉk fe’lə sə̀mok də wèeŋ təəŋ mali ndzə ni’ì Jisòs, ya ŋga nùmbu nə̀ yi bwì foho və̀ə, vesùwèŋ ye bə kwəkwa, a kà də a swihi lis bə marè’tu dʉk. ²⁹Wèŋ rì də Jisòos ŋwə̀ nə̀ kə̀kʉrə̀. Aco wèŋ riŋ tse’ sə̀’ də ndàaŋwə̀ pwe’ nə̀ yi gʉ̀gə̀ bum kə̀kʉrə̀ fana ye də yi mo Nwì.

Ŋwə̀ Nə̀ Yi Mo Nwì Zìnə Kà Bʉp Gʉ̀hʉ̀gə̀

¹Kʉk ja’a na yòo ma nsàp dzədzəm nə̀ Tɛ̀’ nə tse’ bohòvesùwèŋ-ɛ. Yi dzəm ves vɛ’ɛ tə̀tè nə to fa ves liŋ də vesùwèeŋ bwe Nwì, ŋga a zìnə də vesùwèeŋ bwe Nwì anə. Njo nə̀ bʉ̀ʉ sə̀ sə nzeŋgòoŋ kà vesùwèŋ rìgə̀, a bʉ̀ʉsə̀ wo ka tɛ̀’ àvès Nwì sə̀’ riŋ. ²Ŋge’ am wèŋ, vesùwèeŋ ŋga’a yè’e bwe Nwì. A ka nsàp bʉ̀ nə̀ vesùwèeŋ nə kə bʉʉŋ nùu, ntòrɛɛŋ tsə’rə. Yu nə̀ mò’fis nə̀ a rì nə də, nùmbu nə̀ Jisòs və̀ə, vesùwèeŋ nə ye co yi, bʉ̀ʉsə̀ a nə ye yi bə lis kwaraŋgaŋ mʉmvə̀’nə̀ yi cu sə. ³Ŋwə̀ nə̀ yi tse’-a nsàp naaŋ tu ènə sə ntʉʉ̀ yi sə nòŋsə ni’ ye rərɛŋ njàaŋ mvə̀’nə̀ Jisòos ye sə̀’ rərɛŋ njàaŋ sə. ⁴Ŋwə̀ nə̀ yi gʉ̀gə̀-a bʉp, ye də yi gʉ̀ bʉpsə lʉ̀k nə̀ Nwì, bʉ̀ʉsə̀ yusə̀ wo togə̀ yà’ də bʉp sə, a ŋgòkà lʉ̀ʉk Nwì nòŋsə̀. ⁵Wèŋ rì də njo nə̀ Jisòs Krɛst à və̀ sə nze fɛn, a ŋgòjə lòbʉp avès. Yi ka ye bʉp ndzə ni’ì yi tse’ lok nə̀ kɛ̀’ mò’fis. ⁶Ye də ŋwə̀ nə̀ yi cu ndzə ni’ì Jisòs Krɛst kà bʉp gʉ̀hʉgə̀. Ŋwə̀ nə̀ yi gʉ̀ malìgə̀-a bʉp ye də ŋwə̀ ànə ka nà’ ntòye yuk, nə kà nà’ sə̀’ rì lok fʉ̀k.

⁷Bwe am, ŋwə̀ nəmòok kà weŋ bòrə̀. Ŋwə̀ nə̀ yi gʉ̀hʉgə̀ bum kə̀kʉrə̀ pwe’, ŋwə̀ ànə yi kə̀kʉrə̀ mvəsə̀ Jisos Krɛst sə̀’ kə̀kʉrə̀ sə. ⁸Ŋwə̀ nə̀ yi gʉ̀gə̀-a bʉp, ye də yi mo Satà. Bʉsə̀ Satà cu ye ŋgà gʉ̀ bʉp, mvə̀’nə̀ à yèto yèe. Njo nə̀ Jisòs mo Nwì à və̀ sə nzeŋgòŋ fɛn, də ya yi kə gʉ bʉpsə fàak sə̀ Satà sə gʉ̀ pwe’. ⁹Ŋwə̀ nə̀ yi mo Nwì bə nə̀ zìnə, yi kà bʉp gʉ̀hʉ̀gə̀. Bʉsə̀ yi tse’ mok nsàp ntʉm nə̀ Nwì, fana kaco yi gʉ bʉp yeŋ. ¹⁰Yusə̀ yà’ sə nìtsə̀’ zəzok nə̀ nà’ cu mʉtsətsə’rəə bwe Nwì nə ye bwe sə̀ Satà sə yè’. Ŋwə̀ nə̀ yi kà bə̀boŋ gʉ̀gə̀, ye də ŋgə̀ŋgàŋ ka mo Nwì yeŋ. Ŋwə̀ nə̀ yi kà dzədzəm bohòmoma ye tse’gə̀, ye də yi ka mo Nwì sə̀’ yeŋ.

Ŋwə̀ Nə̀ Yi Tse’ Lùŋ Zìnə Kà Moma Ye Bɛ̀ŋgə̀

¹¹Ncèp nə̀ wèŋ ànə yuk to mantombì nə nè’ də, wèeŋ dzəm mòk bə mòk. ¹²A kà nsàp ntʉm nə̀ Ken, nə̀ yi à ye ŋwə̀ə Satà à tse’, nə zə moma ye nə̀ bə nà’ à ye və̀m mò’fis nà’a tse’. Ken nə à zə moma ye nə yè’sə bʉ̀ʉ yà? Yi à zə nà’ bʉ̀ʉsə̀ nà’ à sə gʉ̀ yusə̀ yà’a kə̀kʉrə̀ fana yi sə gʉ̀ ye bʉp. ¹³Yè’sə ànə ye-a vɛ’nə, ye də a ye-a ŋga nzeŋgòŋ nə bɛ̀ŋ-a weŋ sə̀’ fana wèŋ kà də wèeŋ mərə də a vɛ’nə bʉ̀ʉ yà lɛ dʉk. ¹⁴Vesùwèŋ rì yàvès də a cà tesə ndzə bohò kpʉ laŋ, a cu mok mvwe’ lùŋ. Vesùwèŋ rì də yè’sə zìnə bʉ̀ʉsə̀ vesùwèŋ tse’ dzədzəm bohòbwema avès. A yà’a mok jəja də ŋwə̀ nə̀ yi ka moma ye dzəm, ye də yi cu malì ntòndzə bohòkpʉ. ¹⁵Ŋwə̀ nə̀ yi sə bɛ̀ŋ-a moma ye, ye də yi ŋgà zə bwìŋ. Wèŋ rì sə̀’ də ŋgà zə bwìŋ ka lùŋ nə̀ nà’a nə̀ kà mè nə tse’ lok.

¹⁶Ye’e mʉmvə̀’nə̀ aco a rì tse’ dzədzəm sə, də Jisòs Krɛst à fa tu ye bohòvès. Ye də aco a fa tu avès bohòbwema avès sə̀’. ¹⁷A ye-a ŋga ŋwə̀ nəmòk tse’ bum, nə ye moma ye ŋga nà’ ka yumok tse’, yi kà manziŋ ŋgòtɛsə nà’ tse’, yà’sə ni tsok də yi ka dzədzəm nə̀ Nwìi fagə̀ ŋwè ŋgòdzəm moma ye sə ntʉʉ̀ yi tse’. ¹⁸Bwe am wèŋ, bum yè’sə ye-a mʉmvə̀k ènə fana boŋ də kà də vesùwèeŋ sə dʉhʉ mègù bə cù dʉk də vesùwèŋ tse’ dzədzəm dʉk. Vesùwèeŋ sə niŋtsok dzədzəm nə̀ zìnə ya lis ye sə̀’.

¹⁹A yà’a zeŋ sə̀ aco yà’ niŋtsok fa vesùwèŋ də a ma nə̀ zìnə nə. A sə̀’ zeŋ nə̀ aco nà’ gʉ ves a ko to ntʉm kù mantombìi Nwì, ²⁰ŋga ntʉm avès sə sak-a ves, də vesùwèeŋ bʉ̀ʉ sə̀ bʉp. A sə rì də Nwì yam ghak ntʉm avès, nə riŋ bum pwe’ sə̀’. ²¹Ŋge’ am wèŋ, a ye-a ŋga ntʉm avès sə kà ves sak, ye də aco vesùwèŋ təəŋ lì kù mantombìi Nwì, nə kà wəp. ²²Fana yusə̀ vesùwèŋ fek-a yi, vesùwèŋ tse’ yà’, bʉ̀ʉsə̀ vesùwèŋ sə nòŋsə lʉ̀ʉk ye, nə sə gʉ yusə̀ yà’ sə bòyi. ²³Lʉ̀k ye nə də vɛ’, də vesùwèeŋ dzəm bohòmo ye Jisòs Krɛst, nə dzəm mòk bə mòk mvə̀’nə̀ Jisòs à dʉk. ²⁴Ŋwə̀ nə̀ yi nòŋsəgə̀-a lʉ̀ʉk sə̀ Nwì fana ye də yi cu ndzə ni’ì Nwì, Nwì cum bwi ndzə ni’ì yi sə̀’. Nè’e mandzə̀ nə̀ aco vesùwèŋ rì də Nwì cu vesiwèŋ, a bʉ̀ʉ yòŋsə̀ nje nə̀ yi a fa ves nə.

Mùmsə Ja’a Yòŋsə̀ə Sə Ŋkuŋ Nə Dzəm Yà’

¹Ŋge’ am wèŋ, kà də wèeŋ yàaŋ dzəm fa ndàaŋwè pwe’ nə̀ yi dʉk də yi tse’ Yòŋsə̀ Nwì dʉk. A bə̀boŋ ŋgòmùmsə ja’a də yi tse’ Yòŋsə̀ Nwì anə zìnə àlɛ. Bʉsə̀ bʉ̀ ŋgàa tsòhòmvwèes sə nzeŋgòŋ anə ŋkʉ̀ʉŋntɛ̀ŋ sə̀ wo sə dʉk də wo sə tsòho ncèp nə̀ Nwì nə. ²Mandzə̀ nə̀ aco wèŋ riŋ də yi tse’ Yòŋsə̀ Nwì àlɛ’ vɛ’: ŋwə̀ nə̀ yi cèp tosə fis-a jəja də Jisòs Krɛst à və̀ sə nze bə ŋgùpni’ laŋ fana ye də yi tse’ Yòŋsə̀ Nwì. ³Fana ŋwə̀ nə̀ yi dʉk-a ye də Jisòs à ka bə ŋgùpni’ sə nze və, ye də yi ka Yòŋsə̀ Nwì tse’. Ŋwə̀ ànə tse’ yà’sə yòŋsə̀ ŋwə̀ nə̀ yi bɛ̀ŋgə̀ Jisòs, nə̀ wèŋ à yuk dʉk də yi nə̀ kə̀ və̀ sə nze fɛŋ nə. Mʉ̀ tsə̀’ wèŋ bə zìnə də yi ŋga’a sə nzeŋgòŋ anə.

⁴Bwe am wèŋ, wèeŋ yàwèŋ bwe Nwì, wèŋ a gha’ ŋgàa cì’ mvwès sə laŋ, bʉ̀ʉsə̀ yòŋsə̀ nə̀ nà’a sə ntʉʉ̀ wèŋ gʉ ghak yòŋsə̀ nə̀ sə nze nə. ⁵Ŋgàa tsòhòkɛ’ mvwès yà’sə yàwo bʉ̀ʉ nzeŋgòŋ, ye də yusə̀ wo sə cèp pwe’ mègù bum nzeŋgòŋ. Fana bʉ̀ʉ sə̀ sənə nzeŋgòŋ sə sə yu’rə fa wo. ⁶Vesùwèeŋ yàvès bwe Nwì. Bʉ̀ʉ sə̀ wo rì Nwì yu’rəgə̀ yàwo bohòvès. Ŋwə̀ nə̀ yi ka-a mo Nwì yeŋ, yi kà bohòvès yu’rə̀gə̀. Nà’a mandzə̀ nə̀ aco vesùwèŋ riŋ də ŋwè tse’ yòŋsə̀ nə̀ zìnə kè yòŋsə̀ nə̀ mvwès àlɛ’ nə.

Ŋwə̀ Nə̀ Yi Dzəm-a Bwìŋ Ye Də Yi Mo Nwì

⁷Ŋge’ am wèŋ, bòdə vesùwèeŋ dzəm mòk bə mòk. Nwì gʉ̀gə̀ yi ŋkuŋ vesùwèŋ riŋ mvə̀’nə̀ a dzəm bwìŋ, ye də ŋwə̀ nə̀ yi dzəm-a bwìŋ, yà’ sə tsok də yi mo Nwì, yi rì Nwì sə̀’. ⁸Ŋwə̀ nə̀ yi kà bwìŋ dzəmgə̀, ye də yi ka Nwì riŋ, bʉ̀ʉsə̀ Nwì mègù ye sə dzədzəm. ⁹Mandzə̀ nə̀ Nwì a nì tsə̀’ fa ves də yi dzəm ves nə vɛ’; yi à tumsə fa vesùwèŋ kwə’rə̀ mo ye sə nzeŋgòŋ də ya vesùwèeŋ tse’ lùŋ ŋkwɛ̀ɛŋ yi. ¹⁰Ka də vesùwèŋ à dzəm to yi vès yeŋ, Nwì ànə dzəm to ves yi ŋkuŋ, nə tumsə fa ves mo ye co yu cop nzak bə fɛŋ avès. Yà’a nìtsə̀’ dzədzəm nə̀ nà’a zìnə nə. ¹¹Ŋge’ am wèŋ, wèeŋ ye-na yàwèŋ sə̀’, Nwìi dzəm-a vesùwèŋ mʉmvə̀k ènə, a kà ni’ avès dzəm à? ¹²Ŋwə̀ nəmòk ka Nwì bə lis ntòye yuk, megu də vesùwèŋ dzəm-a mòk bə mòk, ye də Nwì cu ndzə ni’ì vès, fana dzədzəm nə̀ nje nə gʉŋ wesə ndzə ni’ì vès anə.

¹³Yusə̀ aco yà’ gʉ̀ vès rì də a cu ves Nwì mvwe’ mò’fis, Nwì ye bwi vesiwèŋ sə̀’, a bʉ̀ʉsə̀ yi a fa ves Yòŋsə̀ ye sə ntʉʉ̀ vès. ¹⁴Vès a yə bə lis avès də Tɛ̀’ a tumsə vèsə mo ye də nà’a və kə luŋsə bʉ̀ʉ sə̀ sə nzeŋgòŋ. Vès nə sə tsə̀’ fa-à nə bwìŋ də yu yè’sə zìnə. ¹⁵Yusə də, a ye-a sə̀ ndà pwe’ nə̀ yi cèp fis dʉk də Jisòs Krɛst mo Nwì, ye də Nwì cu ndzə ni’ì ŋwə̀ ànə, yi cum bwi ndzə ni’ì Nwì sə̀’. ¹⁶Vesùwèŋ a riŋ mʉmvə̀’nə̀ Nwì dzəm ves zìnə ŋkuŋ nə fa ntʉm avès fo’ lòoŋfo’.

Nwì mègù ye dzədzəm. Ŋwə̀ nə̀ yi tse’gə̀-a dzədzəm, ye də yi cu ndzə ni’ì Nwì, Nwì cum bwi ndzə ni’ì yi sə̀’. ¹⁷A ye-a ŋga dzədzəm nə̀ Nwì cu sə ntʉʉ̀ vès dak, fana nùmbu nə̀ Nwìi sak ves, vesùwèŋ təəŋ, nə kà wʉə tse’. Bʉsə̀ mandzə̀ avès nə̀ sə nzeŋgòŋ fɛɛŋ nà’a co nə̀ Jisòs Krɛst. ¹⁸Yusə də, wʉə ka ndzənə dzədzəm yeŋ. Dzədzəm cu-a sə ntʉʉ̀ vès dak, fana yi bɛ’ fis gɛsə wʉə pwe’fo’. Fàha wʉə mègù ŋgòwəp ŋgə’ nə̀ də ŋwè gbʉ̀ nzak. Ye də ŋwə̀ nə̀ yi tse’-a wʉə sə ntʉʉ̀ yi, ye də yi ka dzədzəm nə̀ Nwì sə ntʉʉ̀ yi dak tse’. ¹⁹Vesùwèŋ tse’ dzədzəm sə ntʉʉ̀ vès, nə ye bohòNwì sə̀’ bʉ̀ʉsə̀ Nwì à tse’ to dzədzəm bohòvès yi. ²⁰Ŋwə̀ nəmòk dʉk-a də yi dzəm Nwì, nə sə bɛŋ moma ye, ye də ŋwə̀ ànə ŋgà cì’ mvwès. Bʉsə̀ ŋwè ka-a moma ye nə̀ yi yəgə̀ nà’ bə lis dzəm, mandzə̀ nə̀ co yi nə dzəm Nwì nə̀ yi ka nà’ ye yuk nə bʉ̀ə̀. ²¹Lʉ̀k nə̀ Nwì à nòŋsə nə də, ŋwə̀ nə̀ yi dʉk-a də yi dzəm Nwì, yi dzəm moma ye sə̀’.

Bwe Nwì Wèŋ Tse’ Ŋàaŋ Sə̀ ŊgòGhak Nzeŋgòŋ Bə Zeŋ

¹Yumook yè’ də, ŋwə̀ nə̀ yi dzəm-a də Jisòs Krɛst ŋkum ŋgà gèm bwìŋ nə̀ Nwì à də yi nə tum vesə sə nzeŋgòŋ nə fana, ye də ŋwə̀ ànə mo Nwì. Ŋwə̀ nə̀ yi dzəm-a tɛ̀’ mwe, ye də yi dzəm mo nà’nə. ²Aco vès rì tse’ dʉk də vesùwèŋ dzəm bwe Nwì, ŋga vesùwèŋ dzəm-a yi, nə sə noŋsə lʉ̀ʉk ye na. ³Mʉ̀ sə dʉk yè’sə də, a ye-a ŋga vesùwèŋ sə nòŋsə lʉ̀ʉk Nwì, yà’ ye yà’sə də vesùwèŋ sə dzəm yi. Yusə̀ yi sə dʉk də vesùwèeŋ gʉ sə, yà’ ka gʉgʉŋ yeŋ, ⁴bʉ̀ʉsə̀ bwe Nwì pwe’fo’ tse’ ŋàaŋ sə̀ ŋgògha’ nzeŋgòŋ nə bə zeŋ. Mvə̀’nə̀ vesùwèŋ sə fa ntʉm avès bohòJisòs, a yà’sə mandzə̀ nə̀ aco vesùwèŋ ghak nzeŋgòŋ nə bə zeŋ. ⁵Yà’sə sə tsə̀’ də ŋwə̀ nə̀ aco yi ghak nzeŋgòŋ nə, a ŋwə̀ nə̀ yi dzəm də Jisòos mo Nwì.

Mandzə̀ Tɛ’ Sə̀ Aco A Riŋ Jisòs Bə Zeŋ

⁶Mvə̀’nə̀ Jisòs Krɛst à və̀ sə nzeŋgòŋ fɛn, yi à cà sə ndzəpə̀, nə ca ndzənə ndʉəm. Yi à ka sə ndzəpə̀ ca megu, yi à cà ndzənə ndʉəm sə̀’. Yu səmook sə̀’ də Yòŋsə̀ nə̀ Rərɛŋ nə nìtsə̀’ fagə̀ ves nsàp ŋwə̀ nə̀ Jisòs cu nə. A dzəm yusə̀ yi cèpgə̀ sə, bʉ̀ʉsə̀ yi cèp mègù zìnə. ⁷Ye də vès tse’ mandzə̀ tɛ’ sə̀ yà’ sə nìtsə̀’ də Jisòos mo Nwì. ⁸Mandzə̀ə sə̀ tɛ’ yà’sə, mòok Yòŋsə̀ nə̀ Rərɛŋ nə, mòk ye ndzəp, mòk ye ndʉəm. Bum sə̀ tɛ’ yè’sə wo pwe’fo’ cu cù mò’fis. ⁹A ye-a ŋga bʉ̀ʉ sə̀ wà tsə̀’ də wo a yə yumok, fana vesùwèŋ sə dzəm fa wo nta ŋga’a Nwì nə̀ yi ghak bwìŋ à? Yà’a mʉmvə̀’nə̀ yi tsə̀’ fa ves də mo ye cu sə. ¹⁰Ŋwə̀ nə̀ yi dzəm-a də Jisòos mo Nwì, ye də yi rìŋ də bum yè’sə yà’a zìnə. ¹¹Ŋwə̀ nə̀ yi ka-a yusə̀ Nwì cèp yè’sə dzəm, ye də yi sə dʉk yà’sə də Nwìi ŋgà cì’ mvwès, bʉ̀ʉsə̀ yi ka yusə̀ Nwì cèp bə tu mo ye sə dzəm. Yusə̀ Nwì a tsə̀’ fa ves sə, a də yi a fa ves lùŋ nə̀ nà’a nə̀ kà mè. Lùŋ nə̀ nà’a nə̀ kà mè nə, nà’a ndzə bohòmo ye Jisòs. ¹²Ncèp ènə jəja də, ŋwə̀ nə̀ yi tse’-a mo Nwì, ye də yi tse’ lùŋ nə. Ŋwə̀ nə̀ yi ka mo Nwì tse’, ye də yi ka lùŋ ànə sə tse’ lok.

ŊgòKə̀ Mèsə Lòo

¹³Mʉ̀ com fa weŋ sə̀ wèŋ a dzəm liŋ mo Nwì bum yè’sə, ya ŋga wèeŋ riŋ də wèŋ tse’ lùŋ nə̀ nà’a nə̀ kà mè nə. ¹⁴Yè’e yusə̀ vesùwèŋ rì sə də, a ye-a ŋga vesùwèŋ fek yi yumok ŋga yà’ kʉ̀rə-a yi vɛ’nə fana yi yuk fa ves yà’. ¹⁵A ye-a də yi yukgə̀ ves ghà nə̀ vesùwèeŋ cèpgə̀ bohòyi pwe’fo’, fana aco a riŋ sə̀’ də yusə̀ a fek-a yi lòoŋ, ye də a tse’ yà’ laŋ.

¹⁶A ye-a ŋga ŋwə̀ nəmòk kə̀ tseŋ moma ye nə̀ ndzə ni’ì Jisòs ŋga nà’ sə gʉ̀ bʉp, fana yi lɛŋ fa nà’ pìriyà, ŋga bʉp nə̀ yi gʉ̀ nə ka-a nsàp nə̀ co nà’ jə və̀ fa nà’ kpʉ yeŋ nə. Yi lɛŋ-a vɛ’nə, Nwìi nə fa li moma ye ànə lùŋ. Tse’ŋga bʉp nə̀ yi gʉ̀ nə nsàp nə̀ nà’a jə fa və̀gə̀ ŋwè kpʉ nà’a. Bʉp mòok nə̀ ŋwèe gʉ nà’, nà’ jəŋ və fa yi kpʉ. Mʉ̀ ka də ŋwə̀ nə̀ yi gʉ̀-a nsàp bʉp ànə, wèŋ lɛŋ də Nwìi fa nsàp ŋwə̀ ànə lùŋ dʉk. ¹⁷Bʉp pwe’fo’ mègù bʉp, megu də bʉp mook sə̀ ŋwèe gʉ̀-a yà’, yà’ kà yi kpʉ jə və̀ fa.

Ncèp Nə̀ ŊgòLə̀sə

¹⁸Vesùwèŋ rì tse’ də, ŋwə̀ nə̀ yi ye-a mo Nwì fana yi kà bʉp sə gʉ̀hʉ̀. A vɛ’nə bʉ̀ʉsə̀ mo Nwì gʉ̀msəgə̀ yi ya ŋga Satà kà mandzə̀ nə̀ ŋgòjwɛ̀ŋ yi tse’. ¹⁹Vesùwèŋ rì yàvès də vesùwèeŋ bwe Nwì. Nzeŋgòŋ nə pwe’fo’ cu ndzə bohòSatà. ²⁰Vesùwèŋ rì də mo Nwì a və̀ sə nzeŋgòŋ fɛɛŋ ŋgògʉ̀ də vesùwèŋ rɛɛŋ bum ya ŋga vesùwèeŋ riŋ Nwì nə̀ zìnə nə. Mvə̀’nə̀ a ves mo ye Jisos Krɛst mvwe’ mò’fis fana vesùwèeŋ mvwe’ mò’fis ves Nwì nə̀ zìnə nə. Jisòos Nwì nə̀ zìnə nə. Yi tse’ lùŋ nə̀ nà’a nə̀ kà mè nə.

²¹Bwe am wèŋ, wèeŋ jə ŋkərə̀ bə tu awèŋ ya kà də wèeŋ noŋsə yumok sə̀ zok sə ntʉʉ̀ wèŋ co Nwì dʉk.