1 Korè

Ŋwàk nə̀ Mantombì,

nə̀ Pol à Còm Fa Bʉ̀ʉ sə̀ Mvwe’ Lak

KORÈ

Pol ànə yeto cos nə̀ mvwe’ lak Korè nə fana bum mok yeto ŋgòye mbwa sə̀ yà’ à ka bə̀boŋ yeŋ fana yi com ŋwàk ènə ŋgòcèp bə bum yà’sə. Bum sə̀ Pol à tse’ yà’ sə ntʉʉ̀ yi ŋkuŋ nə sə dzəm də yi com yusə mok bə zeŋ sə, mok à ye də: cos nə à tse’ ntaŋmba, nzak sàhà ye mbwa sə̀’, nə ye jòoŋ sə̀ bə nzak gù. Yi sə fa wo ntip mʉmvə̀’nə̀ wo və̀ cos fana wo sə gʉ. Yi sə cep fe’lə sə̀’ bə bum sə̀ a fagə̀ ŋwè yà’ Yòŋsə̀ nə̀ Rərɛŋ nə ŋgògʉ̀ fàak sə̀ Nwì sə bə zeŋ, nə ye bə nza’ nə̀ ŋgòlòkok mvwe’ kpʉ. Yi à cèp bə bum yè’sə vɛ’ɛ gʉgʉŋ, nə sə niŋtsok yà’ bə yəyə’rə̀ə ye sə.

Mbʉ̀p nə̀ 13 sə cèp bə dzədzəm bohòbwìŋ də nà’a yu nə̀ nà’ tə mantombì bum pwe’ nə. Nə̀ mò’fis, dzədzəm nə̀ ŋgònaaŋtu bə yusə̀ lis ka yà’ ye yuk. Nə̀ baa ŋgòtse’ tsətsərə̀ nə̀ də Nwìi nə̀ gʉ̀ fa ves yusə̀ yi à dʉk. Nə̀ tɛ’ ye dzədzəm. Fana dzədzəm nə yam càsə ghak mok sə pwe’ yi. Dzədzəəm yu nə̀ wo cèp bə zeŋ ndzə mvwe’ mbʉ̀p ŋwàk ènə ŋkʉ̀ʉŋ.

¹Còm ŋwàk nè’e mʉ̀ʉ Pol nə̀ Nwì ànə dzəm kok sə ntʉʉ̀ yi, nə gʉ mʉ ŋgòye ŋgà ntum Jisòs Krɛst. Mʉ̀ còm nà’ mʉ lìsə̀ Sostinì nə̀ yi moma àvès bʉ̀ʉ Jisòs nà’a. ²Vès sə còm fa nà’ bohòbʉ̀ʉ sə̀ wo nigə̀ cos sə̀ mvwe’ lak Korè. Vès còm fa wèŋ sə̀ wèeŋ mò’fis weŋ Krɛst fana Nwì a rɛŋsə, nə to fis weŋ ŋgòye bʉ̀ʉ ye yà’a. Yi a cokfis weŋ nə ye bə ndàaŋwè pwe’ nə̀ yi kùksəgə̀ Tà Jisòs Krɛst. Jisòs Krɛɛst Tà nə̀ njàwo bə nə̀ njàvès sə̀’. ³Vès lɛŋ də tɛ̀’ avès Nwì bə Tà Jisòs Krɛst gʉ weŋ bə̀boŋ, nə fa weŋ fifi sə̀’.

⁴Mʉ kwasəgə̀ Nwì ghà yà lòoŋ wùriŋ, bʉ̀ʉsə̀ yi a nìtsə̀’ fa weŋ bòvə̀m nə̀ nje nə ndzə bohòJisòs Krɛst. ⁵Bʉsə̀ mvə̀’nə̀ wèŋ a ye mvwe’ mò’fis weŋ Krɛst wèŋ yè’sə, yà’a gʉ̀ʉ wèŋ bʉʉŋ ŋgàa ghàk bə bum zəzok. Ghàha sə̀ wèŋ tse’ sə mòok ŋkərə̀ nə̀ ŋgòrɛɛŋ bum Nwì nə ye ŋàaŋ sə̀ ŋgòcèp rɛŋsə ncèp ye nə. ⁶Ncèp nə̀ zìnə nə̀ wèŋ à yuk nà’ bə liŋ Krɛst nə a ni weŋ mok sə ntʉʉ̀ bə̀boŋni. ⁷Yè’sə yà’ a gʉ̀ fana wèŋ tse’ bum sə̀ Nwìi fagə̀ bʉ̀ʉ ye yà’ pwe’, wèŋ sə kà ko nə̀ mò’fis jamə. Wèŋ tse’ yà’ mvə̀’nə̀ a sə cu tək nùmbu nə̀ Tà àvès Jisòs Krɛst nə̀ kə̀ nìtsə̀’ fe’lə ni’ ye sə̀mok nə. ⁸Anə megu sə̀’ yi Jisòs Krɛst nə nə̀ yi nə gʉ weŋ ŋgòtəəŋ gʉgʉŋ tè kə lə. A vɛ’nə ya ŋga nùmbu nə̀ Jisòs Krɛst nə̀ yi Tà àvèes bwìŋ və̀ə, ŋwè kà nzak bohòNwì gbʉ̀. ⁹Yè’sə zìnə bʉ̀ʉsə̀ Nwìi ŋwə̀ nə̀ aco a naaŋ tu bohòyi. A yi nə̀ yi à to weŋ ŋgòkə̀ ye ŋge’ bə mo ye Jisòs Krɛst, nə̀ yi Tà àvès nə.

Cù Zəzok Mʉ Cos

¹⁰Bʉ̀ʉ am wèŋ, bə liŋ Jisòs Krɛst nə̀ yi Tà àvès, mʉ̀ wup fa weŋ bo də wèeŋ cum cù mò’fis, kà də wèeŋ ga’a zəzok dʉk. Kwəkwè’, tsətsərə̀ awèŋ nə ye mò’fis bə yusə̀ wèŋ sak tes pwe’fo’. ¹¹Mʉ̀ dʉk vɛ’nə bʉ̀ʉsə̀ bʉ̀ʉ Kloòwèŋ mok a tsə̀’ fa mʉ dʉk də ŋkʉ̀ə̀m cu mʉ kwe’è wèŋ anə, bwema am wèŋ na. ¹²Yusə̀ mʉ̀ sə cèep sə də wèŋ mok sə dʉk lo də, <<Vèes yàvès ves Pol.>> Bòp mòk sə dʉk də, <<Vèes yàvès bʉ̀ʉ Àpolò,>> mok bʉ̀ʉ Pità bə bʉ̀ʉ Krɛst wèŋ nduk! ¹³Kàcò, wèŋ na gàpsə Krɛst bə bòp bə bòp àlɛ? Ŋwə̀ nə̀ yi ànə kpʉ mʉ ntə̀əŋ bʉ̀ʉ wèŋ à ye Pol à? kènə də wo à bàptɛsə weŋ co ŋgàa fàha Pol ɛ? ¹⁴Bà’lo, mʉ̀ kwasə Nwì də mʉtsətsə’rə wèŋ pwe’, mʉ̀ à ka mòk bàptɛsə. Mʉ̀ à bàptɛsə mègù Kripòs bə Gayòs bwìŋ ba. ¹⁵Ŋwə̀ nə̀ mò’fis nə̀ aco yi dʉk də ànə geŋ mʉ̀ to liŋ am nə baptɛsə yi bə zeŋ bʉ̀ə̀. ¹⁶Òhoò, mʉ̀ tsərə kok mòk nə̀ mʉ̀ anə swi. Mʉ̀ à bàptɛsə Stìfanà bə ndap yè pwe’ sə̀’. Mʉ̀ ka riŋ də mòk cu fe’lə nə̀ mʉ̀ à bàptɛsə yi. ¹⁷Jisòs Krɛst ànə ka mʉ də mʉ kə baptɛsə kɛ’ bwìŋ tum. Yusə̀ gʉgʉŋ sə̀ yi à tum mʉ bʉ̀ʉ zeŋ sə dʉk də mʉ tsoho lo fa bwìŋ ncèp nə̀ nje nə. Fana mvə̀’nə̀ mʉ̀ à sə tsòho ncèp nə, mʉ̀ kà nsàp nə̀ də ya bwìiŋ dʉk də, <<Ŋwə̀ nè’e cep lʉ̀msə bòŋsə cù, yi tse’ ŋkərə̀ mbà>> gʉ̀. Mʉ̀ à sə tsòho bə nsàp mandzə̀ nə̀ bwìiŋ riŋ də kpʉ nə̀ Krɛst à kpʉ tse’ mègù ŋàŋ yi.

Jisòs Krɛɛst Ŋàŋ Nə Ye Ŋkərə̀ Nwì

¹⁸Yu səmook də, bʉ̀ʉ sə̀ wo sə yù lòmandzə̀ nə̀ nà’ lə̀sə bə kpʉ jəgə̀ yàwo ncèp kpʉ nə̀ Jisòs Krɛst mʉntə̀əŋ nə də a bum ləm. Bohòvesùwèŋ sə̀ a sə yù lòmandzə̀ nə̀ nà’ lə̀sə bə lùŋ nə, yà’ ka bum ləm yeŋ, a ŋàaŋ Nwì. ¹⁹Wo à còm nòŋsə yà’ ndzənə ŋwàk Nwì laŋ də Nwì à cèp də,

<<Mʉ nə gʉ bʉpsə bʉ̀ ŋgàa ŋkərə̀ bə ŋkərə̀ə awo pwe’.

Mʉ nə dzeeŋ bʉ̀ʉ sə̀ wo rì ŋwàk wèŋ.>>

²⁰Ye də bʉ̀ ŋgàa ŋkərə̀ə sə tə yè’e ma fò? Bʉ̀ʉ sə̀ wo rìgə̀ ŋwàk yà’a, wo sə̀’ ma nə̀ fò? Mòok bʉ̀ ŋgàa gʉ̀ mamfenə̀ sə̀ sə nzeŋgòŋ fɛŋ yè’e wo yè’e ma fò? Nwì nìtsə̀’ də ŋkərə̀ nə̀ sə nzeŋgòŋ fɛŋ nə nà’a ləm bohòyi. ²¹Nwì ànə gʉ mandzə̀ nə̀ ŋgòlùŋsə bwìŋ fana yi kà mandzə̀ də bwìiŋ riŋ yi bə ŋkərə̀ nə̀ sə nzeŋgòoŋ fɛŋ fa. À bòyi bə ŋkərə̀ nje də yi luŋsə bʉ̀ʉ sə̀ wo dzəm sə bə ncèp nə̀ bwìŋ sə tsərə də nà’a ləm nə. ²²Bʉ̀ʉ Jus wèŋ à sə làp yàwo də wo ye nsàp maŋgəŋgèŋ mòk ŋkuŋ ya wo dzəm də ncèp ènə nà’a zìnə. Bʉ̀ʉ Gris wèŋ sə dʉk yàwo də wo nə rɛɛŋ jəŋ ŋkərə̀ fo’ ŋkuŋ. ²³Bohòma nə̀ njàvès fana a sə tsoho fa yàvès bwìŋ kpʉ Jisòs Krɛst nə̀ wo à tɛ’lə zə yi mʉntə̀əŋ. Ncèp kpʉ ènə bʉ̀ʉ Jus wèŋ ka kwəkwa bə zeŋ tse’, bohòbʉ̀ lakmvum yàwo yà’ yuhu fə ntu’ù wo co bum ləm. ²⁴Nə ye də bohòndàaŋwè pwe’ nə̀ Nwì a to yi ŋgòye ŋwə̀ ye, fana a dzəm ŋga yi ŋwə̀ə Jus kè ŋwə̀ lakmvum, wo riŋ də Jisòs Krɛɛst ŋàaŋ Nwì. Yi ŋkərə̀ nə̀ Nwì sə̀’ yi nə. ²⁵A yà’a də bwìŋ sə dʉk yàwo də yusə̀ Nwì a gʉ̀ yè’sə yà’a ləm, ŋga ləm nə̀ Nwì a gʉ̀ ènə nà’ càsə ŋkərə̀ bwìŋ pwe’fo’. Yu Nwì sə̀ bwìŋ tsəm dʉk də yà’a jì ŋàŋ, tse’ gha’ ŋàŋ zeŋ nə noŋsə ŋàaŋ bwìŋ sə nze fɛŋ pwe’.

²⁶Bwema am wèŋ, aco weŋ ye yàwèŋ sə̀’ də mʉtsətsə’rəə wèŋ sə̀ Nwì a to pwe’, nsàap bʉ̀ʉ sə̀ nzeŋgòoŋ jəgə̀ wo co ŋgàa ŋkərə̀, wo ka mʉŋgorə̀ wèŋ ŋkʉ̀ʉŋ yeŋ. Nə ye sə̀’ də nsàap bʉ̀ʉ sə̀ wo tse’ ŋgì mʉtsətsə’rə̀ə lak kè bʉ̀ʉ sə̀ wo à dzə wo mvwe’ ntòmbi nə̀ nà’ tse’ liŋ ka mʉŋgorə̀ wèŋ anə ŋkʉ̀ʉŋ sə̀’ yeŋ. ²⁷Nwì a swè’ jə ye nsàp bʉ̀ʉ sə̀ nzeŋgòoŋ tsərəgə̀ də wo ləm. Yi a gʉ̀ vɛ’nə ya marè’tu ko bʉ̀ ŋgàa ŋkərə̀ wèŋ sə. Yi swèk jəŋ mok bʉ̀ʉ sə̀ wo kʉ̀kgə̀ yàwo co ŋgàa jì ŋàŋ ya marè’tu ko bʉ̀ ŋgàa ŋàaŋ sə. ²⁸Yi a swè’ fis jə bum sə̀ bwìiŋ kà yà’ dzəmgə̀, sə̀ bwìiŋ bwi’lə kɛ’gə̀ yà’ bə kù, nə ye sə̀ wo jəgə̀ yà’ co yusə̀ wà. Yi swèk fis jəŋ bum yè’sə ya yà’a gʉ bʉpsə bum sə̀ bʉ̀ʉ sə̀ sə nzee jəgə̀ də yà’ tse’ fàk sə. ²⁹A vɛ’nə fana kaco ŋwè kum ŋgùŋ kù mantombìi Nwì yeŋ. ³⁰Weŋ Jisòs wèeŋ mò’fis bʉ̀ʉ Nwì yiìyi. Mègù sə̀’ bʉ̀ʉ Jisòs Krɛst nə ŋkuŋ fana vesùwèŋ tse’ ŋkərə̀. Fana Nwìi jəgə̀ vesùwèŋ co bʉ̀ʉ sə̀ kə̀kʉrə̀ bʉ̀ʉ yi, co bʉ̀ʉ sə̀ rərɛŋ sə̀’ bʉ̀ʉ yi, nə fis ves mvwe’ bʉp sə̀’ bʉ̀ʉ yi. ³¹Nà’a njo nə̀ a tse’ ŋgògʉ̀ mègù mvə̀’nə̀ wo à còm ndzənə ŋwàk Nwì dʉk də,

<<A ye-a ŋga ŋwə̀ nəmòk dʉk-a də yi kum ŋgùŋ,

Yi kum megu nà’ bʉ̀ʉ yusə̀ Tà Nwì a gʉ̀ yi.>>

Kpʉ Krɛst Gʉ Gha’ Ŋkərə̀ Bwìŋ

¹Bwema am wèŋ, wèŋ rìŋ də ghà nə̀ mʉ̀ à və̀ ŋgòtsòho fa weŋ bum sə̀ yà’ ànə ye sə̀swihì yà’a, fana mʉ̀ à ka bə nsàp nə̀ ŋgònìtsə̀’ də mʉ cep rìŋgə̀ cù, nə tse’ ŋkərə̀ wùriŋ və. ²Bʉsə̀ mʉ̀ à dʉk sə və̀ə mʉ̀ də ghà nə̀ mʉ vesùwèŋ fana mʉ nə tsoho fa gu weŋ Jisòs Krɛst yiìyi. Mʉ nə tsoho megu kpʉ Krɛst nə̀ yi à kpʉ mʉntə̀əŋ. ³Ànə geŋ, mvə̀’nə̀ vesùwèŋ ànə ye fana mʉ̀ à və̀ co dem. Mʉ̀ à sə kà bə wʉə wùriŋ. ⁴Nə ye sə̀’ də ncèp nə̀ mʉ̀ à sə tsòho, mʉ̀ kà bə ŋkərə̀ bwìŋ sə nze fɛɛŋ də ya yà’a boŋ weŋ tsòhò. Ŋàaŋ Yòŋsə̀ nə̀ Nwì à sə nìtsə̀’ fa weŋ zìnə nə yi. ⁵Mʉ̀ à gʉ̀ vɛ’nə ya ntʉm awèŋ sə̀ wèŋ a fa bohòJisòs Krɛst sə kà bʉ̀ʉ ŋkərə̀ bwìŋ təəŋ mam, a ye bʉ̀ʉ ŋàaŋ sə̀ Nwì.

Ŋkərə̀ Nə̀ Nwì

⁶Nə ye də mvə̀əsə̀ vèes tsoho fagə̀ ncèp nə̀ Nwì nə bohòbʉ̀ʉ sə̀ wo à gʉ bə bum sə̀ ma nə̀ Nwì laŋ, vès sə cep bə ŋkərə̀. Nè’nə ka nsàp ŋkərə̀ nə̀ nà’ tesə bohòbʉ̀ʉ nzeŋgòŋ yeŋ. Ŋàaŋ awo sə nə ca gɛsə lo fo’. ⁷Ŋkərə̀ nə̀ vès sə tsoho ènə a ŋkərə̀ Nwì. Nà’ ànə ye to mantombì sə̀swihì, bwìŋ kà bə zeŋ rì. Yi ànə nòŋsə me bum yè’sə mantombì ŋkuŋ, nə sə kə gʉ nzeŋgòŋ maŋkwɛ̀ŋ. Yi ànə gʉ bum yè’sə də ya anə kə tse’ kə̀kuk njàvès ca sə̀’. ⁸Ŋkəŋkum sə̀ sə nze fɛɛŋ ànə kà ŋkərə̀ ènə rìŋ. Wo ànə riŋ-a nà’ bwɛ̀rɛ wo ànə ka Tà Jisòs Krɛst nə̀ yi tse’ fòènə mʉntə̀əŋ tɛ’lə. ⁹Megu də wo à còm nòŋsə ndzənə ŋwàk Nwì dʉk də,

<<Bum sə̀ Nwì à fʉ̀hʉ nòŋsə fa bʉ̀ʉ sə̀ wo dzəm yi,

A bum sə̀ ŋwè ka yà’ bə lis ye yuk,

Kà bə ntu’ sə̀’ yuk yuk,

Nə kà bə zeŋ sə̀’ ntòtsərə yuk.>>

¹⁰Bum yè’sə, a rì yà’ bʉ̀ʉsə̀ Nwì a tum fa ves Yòŋsə̀ ye ŋgòtsə̀’ fa ves yà’. Yòŋsə̀ ye nə làpgə̀ sə tsətsə’rə̀ anə sə̀sap, nə sə tsoho rɛŋsə bum Nwì sə̀ yà’a cəco. ¹¹Ŋwè cu yè’e, kaco ŋwè riŋ yusə̀ yà’ cu sə ntʉʉ̀ ŋwə̀ nəmòk yeŋ, a rìŋ mègù yà’ ŋgə̀ŋgàŋ ànə. A bohòNwì sə̀’ vɛ’nə, də rì mègù bum Nwì sə̀’ Yòŋsə̀ nə̀ nje. ¹²Yòŋsə̀ nə̀ Nwì a gèsə fa ves sə ntʉʉ̀ vès nə, a Yòŋsə̀ nə̀ nje. Nà’ ka yòŋsə̀ nə̀ bwìŋ sə nze fɛɛŋ yeŋ. Yòŋsə̀ ye ènə gʉ̀gə̀ ves yi ŋkuŋ a sə rì nsàap bum sə̀ Nwì a sè vesùwèŋ bə zeŋ. ¹³Nə yeè nə də bum yè’sə vɛ’nə, vèes cu ŋgòtsòho fa bwìŋ fana vès kà bə nsàp ncèpcù nə̀ fa ves nà’ ŋkərə̀ bwìŋ sə nze fɛɛŋ cèp. Vès cep bə nsàp nə̀ Yòŋsə̀ Nwì nìtsə̀’ fa ves yi. Vès tsok rɛŋsə fa bum sə̀ Yòŋsə̀ Nwì nìtsə̀’ fa ves sə bohòbʉ̀ʉ sə̀ wo tse’ Yòŋsə̀ Nwì sə ntʉʉ̀ wo. ¹⁴Ŋwə̀ nə̀ yi ka-a Yòŋsə̀ Nwì sə ntʉʉ̀ yi tse’, kaco yi dzəm bum sə̀ Yòŋsə̀ ènə yeŋ. Yi nə kà rɛɛŋ, yà’a nə sə yəəŋ bohòyi co a bum ləm. A vɛ’nə bʉ̀ʉsə̀ ŋgà rɛŋsə̀ fa bwìŋ bum yè’sə mègù Yòŋsə̀ nə̀ Nwì. ¹⁵A ye-a bohòŋwə̀ nə̀ yi tse’ Yòŋsə̀ nə̀ Nwì nə sə ntʉʉ̀ yi fana yi rɛɛŋ yà’, nə riŋ bum pwe’fo’. Bʉ̀ʉ sə̀ sə nzeŋgòoŋ yə nsàp ŋwə̀ ènə, wo sə mərə yi mərə. ¹⁶Yè’sə mègù mvə̀’nə̀ yà’ cu ndzənə ŋwàk Tà Nwì dʉk də,

<<Ŋwə̀ nəmòok yo nə̀ aco yi riŋ yusə̀ Nwìi tsərəgə̀ə àlɛ?

Ŋwə̀ nəmòk cu yo nə̀ aco yi fa Nwì ntip àlɛ?>>

Bohòvesùwèŋ yàvès, sə̀ a tse’ Yòŋsə̀ Nwì, a tse’ tsətsə’rə̀ nə̀ Krɛst.

Nzak Ntaŋmba

¹Bwema am wèŋ, mvə̀’nə̀ mʉ̀ ànə ye vesùwèŋ fa’ yà’a, mandzə̀ kà co mʉ cep bohòwèŋ co bʉ̀ʉ sə̀ wo rì bum sə̀ ma nə̀ Nwì ye lok. Mʉ̀ à sə cèp bohòwèŋ mok co mʉ̀ sə cèp bohòbʉ̀ʉ sə̀ sə nze fɛɛŋ, bʉ̀ʉsə̀ wèŋ à ye mali ntòco bwe sə̀ lʉə bə bum sə̀ ma nə̀ Jisòs Krɛst. ²Mvə̀k ànə à ye, bum sə̀ mʉ̀ à yə’rə weŋ sə à ye co mʉ̀ sə fa weŋ mbwi, kà bɛŋ sə̀ bɛŋ ye, bʉ̀ʉsə̀ wèŋ à ka kə̀kʉrə̀ ŋgòzʉ yà’ yeŋ. Haaŋ kə dzeŋ ntinə wèŋ ka ntòkʉrə mali. ³A vɛ’nə bʉ̀ʉsə̀ wèŋ sə gʉ̀ malì bum ntòco bʉ̀ʉ sə̀ sə nze fɛɛŋ. Moma sə wa malì bum moma mòk, moma bə moma sə kʉəm kɛ’ca sə̀’, yà’sə sə kà yà’a jəja kwaraŋgaŋ də wèŋ gù co bʉ̀ʉ sə̀ sə nzeŋgòŋ nì à? Wèŋ sə gʉ̀ lòbʉp sə̀’ co bʉ̀ʉ sə̀ wà wèŋ sə gʉ̀ʉ. ⁴A ye-a ŋga ŋwə̀ nəmòk sə dʉk ye də, <<Mʉ ves Pol,>> mòk sə dʉk də, <<Mʉ yàm ves Àpolò,>> yà’sə sə kà yà’a də wèŋ sə gʉ malì bum co bʉ̀ʉ sə̀ sə nze fɛɛŋ nì à?

Mvə̀əsə̀ Ŋgà Fàk Tse’ ŊgòFàak

⁵Ja’a na yàwèeŋ sə̀’ də Àpolòo ndà? Pol ye ye ndà? Vès pwe’, vès mègù ŋgàa fàha Nwì sə̀ yi a tum ves ŋgòkə̀ gʉ̀ʉ də ya wèeŋ dzəm bohòTà Jisos Krɛst. Venə sə gʉ̀ mègù fàha sə̀ Nwì a gàpsə fa ves ŋgògʉ̀ʉ. ⁶Vès mègù co ŋgàa fàk nzum wèŋ vɛ’ɛ. Mʉ̀ à bì yàm bìi, Àpolòye ye ŋgà gèsə ndzəp, Nwì ye ye ŋwə̀ nə̀ ŋgògʉ̀ də yà’a to, nə kuk. ⁷Mʉtsətsə’rə̀ə vès pwe’, nə̀ gʉgʉŋ ka ŋwə̀ nə̀ yi a bì bìi kè ŋwə̀ nə̀ yi gèsə ye ndzəp yeŋ. Nə̀ gʉgʉŋ nə mègù Nwì yiìyi nə̀ yi a gʉ̀ ŋkuŋ yà’ to, nə kuk. ⁸Ŋwə̀ nə̀ yi à bìi bə ŋwə̀ nə̀ yi à gèsə ndzəp pwe’, wo mègù yəyərə̀, zəzook bʉ̀ə̀. Nwìi nə̀ kə̀ làk ndàaŋwè pwe’ mvəsə̀ yi à fàak. ⁹Vès ba fo’, vès sə be’lə mvwe’ mò’fis ŋgògʉ̀ fàha Nwì nə̀ mò’fis. Wèeŋ co nzum Nwì bə tu ye.

Aco mʉ̀ dʉk sə̀’ də wèŋ mègù co ndap mòk nə̀ Nwì sə ci nà’ yi bə tu ye. ¹⁰Bohòmʉ̀ yàm, Nwì fa mʉ ŋàŋ ŋgòyèto kùum sə co ŋwə̀ nə̀ yi rì ŋgòyèto kùum ndap nə. Ŋwə̀ nəmòok ye nə̀ yi sə ci ye ndap nə ci. Ndàaŋwè pwe’ nə̀ yi sə ci-a ndap ènə, yi jəŋ ŋkərə̀, nə ci nà’ bə̀boŋ. ¹¹Bə nzak ma nə̀ kùum sə fana nzak ka yeŋ, bʉ̀ʉsə̀ Nwì a jə Jisòs Krɛst laŋ, nə noŋsə yi co kùum sə sə̀ vesùwèŋ pwe’ tə mbwa. Kùum mok sə̀ zook mok bʉ̀ə̀. ¹²Ma nə̀ ndap nə ye, bʉ̀ʉ səmok jəgə̀ nsàap ntɛŋ mok sə̀ bə̀boŋ sə̀ wo togə̀ yà’ də guù bə sivà, nə ye lìis sə̀ yà’ gʉ ntɛŋ, nə ci nà’ bə zeŋ. Bʉ̀ʉ mok yàwo, wo gbɛ̀’ jəŋ tʉ bə ŋgaŋ, nə ye kàa gòmbìi sə̀ wà yè’e, nə ci ndap nə bə zeŋ. ¹³Nùmbu mòk cu nə̀ fàha ndàaŋwè pwe’ nə̀ kə̀ yəəŋ jəja. Bʉsə̀ nùmbu nə̀ Jisòs Krɛst bwìŋ və̀ fe’lə fana Nwìi nə mumsə ja’a fàha ndàaŋwè pwe’ bə mis. Mis nə nə niŋtsok jəja mvəsə̀ fàha ndàaŋwè pwe’ cu, də ŋwə̀ nè’e à gʉ̀ vɛ’ɛ, nè’e gʉ̀ ye vɛ’ɛ bə̀boŋ kè bʉp àlɛ. ¹⁴A ye-a ŋga fàha sə̀ ŋwè ànə gʉ mʉmvwe’ kùum ndap ènə ka-a sə, ye də wo nə lak yi. ¹⁵Ŋga fàha ŋwèe sə-a ye də lə̀làk ye nə bisə laŋ. Yi nə ye megu mok botu co ŋwə̀ nə̀ ndap sə yi, yi caŋ tesə botu. Yi lim megu bo ye mok də yi ka kpʉ. ¹⁶Wèŋ ka riŋ də wèŋ bʉ̀ʉ Nwì, wèeŋ ndap bohòNwì, nə̀ yi cugə̀ mbwa riŋ nà? Yòŋsə̀ nə̀ Nwì nə cugə̀ sə ntʉʉ̀ wèŋ. ¹⁷A ye-a ŋga ŋwə̀ nəmòk bʉpsə-a ndap Nwì nə, Nwìi nə gʉ bʉpsə ŋgə̀ŋgàŋ sə̀’. A vɛ’nə bʉ̀ʉsə̀ ndap ye rərɛŋ, ŋga ndap ye nə̀ mʉ̀ sə dʉk ènə, a wèŋ bə tu awèŋ.

¹⁸Ŋwə̀ nəmòok kà də yi borə ni’ ye dʉk. A ye-a ŋga ŋwə̀ nəmòok mʉtsətsə’rə wèŋ nə̀ yi sə tsəm dʉk də yi ŋgà ŋkərə̀ sə nze fɛɛŋ, boŋ co yi jəŋ ni’ ye co ləm ŋkuŋ ya yi tse’ rì ŋkərə̀ nə̀ nà’a zìnə nə. ¹⁹Mʉ̀ sə dʉk vɛ’nə bʉ̀ʉsə̀ bum sə̀ nzeŋgòoŋ jəgə̀ yà’ co yà’a yu ŋkərə̀, yà’a bohòNwì bum ləm. A nə̀ zìnə mvəsə̀ wo a còm ndzənə ŋwàk Nwì dʉk də,

<<Nwì kogə̀ bʉ̀ʉ ŋgàa ŋkərə̀ sə nzeŋgòoŋ fɛŋ sə̀’ bə ŋkərə̀ə awo sə.>>

²⁰Mvwe’ mok cu sə̀’, sə̀ wo à còm ndzənə ŋwàk Nwì anə də,

<<Tà Nwì riŋtse’ də tsətsərə̀ə bʉ̀ ŋgàa ŋkərə̀ ka fàk tse’.>>

²¹Nə yeè nə vɛ’nə, kà də ŋwə̀ nəmòok kum ŋgùŋ bʉ̀ʉ ŋwè wà, nə sə dʉhʉ kɛ’ca də, <<Mʉ yàm ves ŋwə̀ nè’e kè ŋwə̀ nà’a>> dʉk. Yusə̀ wèeŋ riŋ sə də, ŋga a ye-a sə̀ yà lòoŋ, wèŋ tse’ yà’ wèŋ. ²²A ye-a sə̀ Pol kèe Àpolòbə Pità pwe’ wo yà’sə sə̀ yàwèŋ. Nzeŋgònè’e nə ye lùŋ bə kpʉ pwe’ gù sə̀’ sə̀ yàwèŋ. Bum sə̀ a sə yə yà’ ŋga’a bə sə̀ yà’ cu mantombì pwe’fo’, wèŋ tse’ yà’ wèŋ. ²³A nə ye me vɛ’nə pwe’ fana Jisòs Krɛst tse’ bwi weŋ yi. Nwì tse’ bwi ye Jisòs Krɛst nə.

Mvə̀’nə̀ Bʉ̀ʉ Korè Tse’ ŊgòJə Ŋgà Fàk Nə̀ Nwì

¹Mʉ̀ dzəm də bwìiŋ jəŋ vès bʉ̀ʉ sə̀ mantombì mʉ cos yè’e pwe’ də vès mègù ŋgàa fàk bohòJisòs Krɛst. Nwì a jə bum ye sə̀ yà’a sə̀swihì, nə fa ndzə bohòvès də vèes yə’rə fa bwìŋ. ²Yusə̀ gʉgʉŋ sə̀ bohòŋgà fàak dʉk də, yi sə gʉ yusə̀ yà’a zìnə bohòŋwə̀ nə̀ yi sə fàk bohònà’ nə. ³A ye-a bə ma nə̀ bohòmʉ̀ yàm fana ŋga wèeŋ dʉk-a də mʉ bʉp kè bə̀boŋ àlɛ’ pwe’, mʉ nə kà bə zeŋ yàm ŋkʉ̀ʉŋ tsərə̀. A ye-a ŋga ŋwə̀ nəmòk nə̀ zok sə cep ye sə̀’ də mʉ bə̀boŋ kè bʉp àlɛ’ pwe’, yà’sə ka yusə̀ gʉgʉŋ sə zeŋ yeŋ. Mʉ̀ bə tu am mʉ kà də mʉ̀ sə gʉ̀ bə̀boŋ dʉkgə̀. ⁴Ŋgòcèp zìnə, mʉ̀ ka jòŋ nə̀ mʉ̀ à gʉ̀ʉ riŋ, megu də mʉ̀ ka cùu sə̀ ŋgòdʉk fis də mʉ̀ ka nzak tse’ sə̀’ tse’. A nə sak megu mʉ Tà Nwì, yi nə̀ yi sakgə̀ nzak yəyərə̀. ⁵Nə yeè nə də vɛ’nə fana ka bə̀boŋ co wèŋ sə sak kɛ’cà bwìŋ yeŋ. Bòdə wèeŋ yu’rə vɛ’nə tə̀tè mvə̀ək kʉ̀rə, nùmbu nə̀ Tà Jisòs bwi və̀ fana yi nə fis noŋsə bum jəja, nə gʉ bum sə̀ bwìŋ sə tsərə yà’ rɛɛŋ və sə̀’. Nà’a nùmbu nə̀ Nwìi nə̀ kwasə ndàaŋwè pwe’ nə̀ nà’a yəyərə̀ ŋgòtse’ kwəkwasə.

⁶Bwema am wèŋ, bum sə̀ mʉ cèp yà’ bə liŋ am nə ye liŋ Àpolòyà’sə, mʉ cep vɛ’nə ya wèeŋ riŋtse’ bum sə̀ wèŋ tse’ ŋgògʉ̀ʉ. Bum sə̀ wèŋ tse’ ŋgògʉ̀ʉ sə, a sə̀ wo à còm nòŋsə yà’ ndzənə ŋwàk Nwì. A yà’sə dʉk də, ka bə̀boŋ də wèeŋ sə nɛni’ bʉ̀ʉ ŋwə̀ nəmòk, nə sə bɛŋ mòk bɛ̀ŋnə yeŋ. ⁷Wù nə̀ wù sə dʉk də wù gha’ bwìŋ pwe’ wù ànə, à gʉ̀ bʉ̀sə wu ŋwə̀ nə̀ ŋkʉ̀ʉŋ nà’nə ndà? Mʉ fek fe’lə-a wu sə̀mok də, yusəmok cu sə̀ wù tse’ yà’ ŋga Nwì à ka wu yà’ yi fa àlɛ? Mvəsə̀ Nwì ànə fa wu bum pwe’ yi, ye ŋga’a va ŋkuŋ wù sə kum kɛ’ ŋgùŋ co də wù à tse’ yà’ bə ŋàaŋ yo-ɛ? ⁸Wèŋ sə dʉk də wèŋ tse’ bum pwe’ ɛ̀? Wèŋ sə jə ni’ awèŋ co ŋgàa ghàk. Wèŋ a bʉ̀ʉŋ ŋkum ŋga vès ka yàvès ŋkum yeŋ ɛ̀? Wèŋ anə ye-a ŋkum zìnə bwɛ̀rɛ də bòmʉ wùriŋ ya a kok gaŋ sə vesùwèŋ bəbɛ’. ⁹Gʉ̀ co Nwì a jə vès ŋgàa ntum Jisòs nə noŋsə ves ŋkusə̀ mbwèŋ. Vès mègù co bʉ̀ʉ sə̀ wo də wo kə zə wo zəə bʉ̀ʉsə̀ wo bʉ̀ʉ sə̀ bʉp. Vès tə yè’e mantombìi masinjàa Nwì nə ye bwìŋ də maŋgòoŋ kʉk bʉrə ves. ¹⁰Vès mègù mok co ŋgàa ləm bʉ̀ʉ Jisòs Krɛst. Wèeŋ yàwèŋ ŋgàa ŋkərə̀ bʉ̀ʉ tu Jisòs Krɛst. Vèes yàvès dem, wèŋ ye yàwèŋ ŋgàa ŋàŋ. Wo jəgə̀ weŋ co bwìŋ, wo sə fa ves yàvès marè’tu. ¹¹Haaŋ kə̀ wɛ̀s ntinə jìŋ tse’ ves nsàp nə̀ njè sə yaŋ ves, ntʉm sə sə ves, vès kà yusə̀ ŋgòno tse’. Vès sə ni kɛ’ gù yàvès gàa cə̀k. Bwìŋ yeŋsəgə̀ ves ŋgə’ wùriŋ, vès kà ndap nòòŋ sə̀’ tse’. ¹²Vèes fàkgə̀ bə bo avès tè vès wo. Bwìŋ yàk ves, vès cep fəsə fa wo bə nə̀ bə̀boŋ. Wo fa ves ŋgə’, vès ko ntʉm. ¹³Ghà nə̀ wo to fa ves liŋ sə̀ bʉp, vès bʉsə fa wo fʉ̀ə̀. Wo jə ves co bèp sə̀ yà’ ka fàk tse’ yè’e, tè kə wɛs nie’. Wo kʉ̀kgə̀ ves co kùup yusə̀ wà.

¹⁴Bwema am wèŋ, ka yè’sə də mʉ̀ sə cep bum yè’sə bohòwèŋ də ya marè’tu ko weŋ yeŋ. Mʉ̀ cèp yè’sə ŋgòtip weŋ tipə bʉ̀ʉsə̀ wèeŋ bwe am sə̀ mʉ̀ dzəm weŋ vɛ’ɛ wùriŋ. ¹⁵A ye-a sə̀ də bʉ̀ʉ sə̀ wo sə tip weŋ bə mandzə̀ nə̀ Jisòs Krɛst ŋkʉ̀ʉŋ fana nə̀ yi co tɛ̀’ àwèŋ mègù nə̀ mò’fis. Mʉ̀ mègù co tɛ̀’ àwèŋ mʉmʉ̀, bʉ̀ʉsə̀ wèŋ ànə bʉʉŋ to bʉ̀ʉ Jisòs Krɛst ŋga mʉ̀ ànə tsoho fa weŋ Ntirə̀ nə̀ Bə̀boŋ nə mʉ̀. ¹⁶Yà’ təə̀ŋ nə də mʉ tɛ̀’ àwèŋ fana mʉ̀ lɛŋ weŋ kwəkwè’, wèeŋ bɛ’ kùugì am. ¹⁷Nà’a njo nə̀ mʉ̀ tum Timatì də yi kə tsok fe’lə weŋ mvə̀’nə̀ kùugì am sə cu bə mandzə̀ nə̀ Jisòs. Yà’a yusə̀ mʉ̀ sə yə’rə bʉ̀ʉ sə̀ mʉ cos ma nə̀ fòlòoŋ də wo gʉ. Wèeŋ yuk Timatì nə bʉ̀ʉsə̀ yi mo àm nə̀ mʉ̀ dzəm yi wùriŋ. Yi gʉ̀gə̀ fàha Tà Jisòs Krɛst sə̀’ bə ntʉm ye lòoŋ.

¹⁸Yu səmook də bʉ̀ʉ səmok mʉŋgorə̀ wèŋ anə sə nɛ̀ni’, nə sə tsok də mʉ nə̀ kà mok bwì və̀ yuk fe’lə̀. ¹⁹Zìnə nə də, a ye-a ŋga Nwì fa ŋàŋ, mʉ nə və. Nà’a mvə̀k nə̀ mʉ nə riŋ də bʉ̀ʉ sə̀ wo sə nɛ̀ni’ yè’sə wo tse’ ŋàaŋ sə̀ Tà Nwì kè wo sə cep mègù cù wà àlɛ’. ²⁰A ye-a ŋga gaŋ ŋkum Nwì cu sə ntʉʉ̀ bwìŋ zìnə fana yà’a nə ye bə ŋàŋ, a nə kà cèp cù wà ye mègù. ²¹Nə̀ wèŋ dzəm nə̀ fò? Də mʉ və̀ə, mʉ̀ jəŋ ŋkwɛ̀s ŋgə’ ŋgòyeŋsə weŋ ŋgə’ bə zeŋ, kè də wèŋ dzəm ŋgòkupsə kùugì awèŋ ya mʉ və bə fifi ŋgònìtsə̀’ fa weŋ də mʉ̀ dzəm weŋ ɛ?

Jòŋ Nə̀bʉp Cu Mʉkwe’è Wèŋ

¹Bwema am wèŋ, wo a tsə̀’ mʉ də bʉ̀ʉ mok cu mʉkwe’è wèŋ sə̀ wo sə koho sàhà nsàp nə̀ bʉp. A megu-a sə̀ pegè wèŋ, wo kà nsàp ànə gʉ̀. Kwɛ’fò! Mʉ̀ a yuk də ŋwə̀ nəmòk cu mʉŋgorə̀ wèŋ anə nə̀ yi sə nòoŋ bə ŋgwe tɛ̀’ ye. ²Aco wèŋ sə nɛni’ va, ŋga bwìŋ cu mʉŋgorə̀ wèŋ anə sə̀ wo sə gʉ̀ nsàp yu ènə ɛ? Anə ye co wèŋ sə waŋ lɛ waa. Wèeŋ fis gɛsə ŋwə̀ nə̀ yi a gʉ̀ nsàp yu ànə mʉŋgorə̀ wèŋ anə fisə. ³Bwema am wèŋ, vesùwèŋ sə kà-a si bə si sə̀’ yenə̀ fana ntʉm àm cu mègù bohòwèŋ. Bə ŋàaŋ Tà Jisòs Krɛst fana mʉ̀ sak wes mè nzak ŋwə̀ nə̀ yi a gʉ̀ nsàp yu ènə laŋ. Mʉ̀ a sak wes nà’ co də mʉ vesùwèŋ bəbɛ’. ⁴Yusə̀ wèŋ tse’ ŋgògʉ̀ʉ sə də, wèeŋ benə və mvwe’ mò’fis, mʉ ye yàm sə̀’ vesùwèŋ sə ntʉʉ̀ fana bə ŋàaŋ Tà Jisòs Krɛst, ⁵wèŋ fis fa ŋwə̀ ènə bohòSatà. Wèeŋ fis fa yi vɛ’nə ya ŋgùpni’ ye ye ŋgə’. Yi yə ŋgə’ vɛ’nə, nùmbu nə̀ Tà Jisòs bwìŋ və̀ə yòŋsə̀ ye luŋ ye lùuŋ.

⁶Bwema am wèŋ, ka bə̀boŋ co wèŋ sə kum ŋgùŋ mvə̀’nə̀ wèŋ sə gʉ̀ yà’sə yeŋ. Hàva’-èè, co wèŋ ka riŋ də ku’ nə̀ mò’fis bʉpsəgə̀ mok riŋ à? ⁷Bògha’ də wèeŋ fis gɛsə nsàp bʉp ànə mʉtsətsə’rə̀ə wèŋ anə fo’, ya wèeŋ ye bʉ̀ʉ sə̀ bə̀boŋ. Zìnə nə də wèeŋ yà’sə bʉ̀ʉ sə̀ bə̀boŋ bʉ̀ʉsə̀ Nwì a jə cop nə̀ ŋgògʉ̀ mèsə fa vesùwèŋ bʉp avès nə laŋ. Cop nə̀ yi à jə nə, a Jisòs Krɛst.5:7 Ŋgo ŋwàak yè’e sə cèp bə ŋkà’a bʉ̀ʉ Jus wèŋ sə̀ wo à sə to yà’ də ŋkà’a jì yis yà’a. Mvə̀k nə à sə kʉ̀rə, wo fis gɛsə yis mʉ nda’à wo pwe’ nə sə zʉ megu brɛd jì yis. Pol sə fʉ̀hʉ yiìs sə fɛŋ bə bʉp sə̀ ŋwè sə gʉ̀ʉ. Wo à sə zʉ ŋkà’a yà’sə wo sə sʉə fa Tà Nwì nsùŋgaŋ co cop.⁸Ye də vesùwèeŋ cum lɛ ncu nə̀ nà’a zìnə nə ye làaŋ. A kà də a sə gʉ bʉp sə̀ co ŋgòbɛ̀ŋ bwìŋ, nə sə kok kɛ’ ca ŋkʉ̀ì’ dʉk.

⁹Ŋwàk nə̀ mʉ̀ à còm fa weŋ fa’ mantombì nà’a, mʉ̀ à còm fa weŋ nja dʉk də, kà də wèeŋ sə be’lə kɛ’ weŋ nsàap bʉ̀ʉ sə̀ wo sə ko kɛ’cà sàhà dʉk. ¹⁰Mʉ̀ à sə kà yà’sə də wèeŋ kà weŋ bʉ̀ʉ sə̀ wo ka krətèŋ yeŋ wèŋ cu be’lə̀ dʉk. A ye-a ŋga ŋwè ka krətèŋ yeŋ, nə sə koho sàhà, gʉ bum lak co rùm, nə dzəm bum ləlà, nə ye ŋgà yə̀, wenəwèeŋ kàa be’lə̀ lok tse’ ŋga wèŋ tesə gɛsə lòsənə nzeŋgòènə fo’ ŋkuŋ wenəwèŋ kà be’lə̀ yuk. ¹¹Yusə̀ mʉ̀ a dʉk sə, mʉ̀ à sə tip weŋ tipə də a ye-a ŋga ŋwè də yi krətèŋ, nə sə gʉ mali bʉp àlɛ, wenə wèŋ kà be’lə̀. A ye-a ŋga nsàp krətèŋ ànə sə gʉ̀ nsàap bʉp sə̀ co də yi sə ko sàhà, sə waŋ bum bʉ̀ʉ mok, sə gʉ bumlak co rùm, sə yak bwìŋ, sə no jʉhʉ rùk, nə sə yəyə̀ fana wenə wèŋ kà be’lə̀. Wèŋ ka tse’ ŋgòzʉ be’lə zʉzʉ ma weŋ ŋwə̀ ànə wèŋ. ¹²Krətèŋ ka ŋàaŋ sə̀ ŋgòsak bʉ̀ʉ sə̀ wo ka krətèŋ yeŋ tse’. Bʉ̀ʉ sə̀ aco a kʉk ja’a, nə dʉk də wo sə gʉ̀ bə̀boŋ àlɛ sə mègù krətèŋ wèŋ. ¹³Nwìi nə sak bòp bʉ̀ʉ nə̀ wo ka krətèŋ yeŋ wèŋ yi. Ye də wèeŋ gʉ ma njàwèŋ mvə̀’nə̀ wo à còm nòŋsə ndzənə ŋwàk Nwì dʉk də, <<Bɛ’ fis gɛsə ŋgà gʉ̀ bʉp mʉtsətsə’rə wèŋ fo’.>>

Nzak Mʉtsətsə’rə̀ə Krətèŋ Wèŋ

¹A ye-a ŋga ŋwə̀ nəmòk mʉŋgorə̀ wèŋ tse’ mʉnzak bə mòk nə̀ yi sə̀’ krətèŋ, kaco marè’tu ko weŋ ŋgòjə lònzak nə mʉ kot yeŋ à? Co a yè’e bə̀boŋ bohòwèŋ bʉ̀ʉ Nwì ŋgòkə̀ təəŋ mʉ kot mantombìi pegè wèŋ, də wèŋ sə sak nzak, nə noŋsə ŋgòmèsə nzak nə mʉtsətsə’rə̀ə wèŋ bʉ̀ʉ Nwì à? ²Co wèŋ ka riŋ də bʉ̀ʉ Nwìi nə̀ kə̀ sak bʉ̀ʉ sə̀ sə nzeŋgòŋ fɛŋ ntsə’mòk wèŋ riŋ à? A ye-a də wèeŋ nə̀ kə̀ sak nzeŋgòŋ nə ntsə’mòk wèŋ, njo nə̀ wèŋ kà wabə̀ ŋgòsak bwe nzak awèŋ wabə̀ ye yà? ³Wèŋ ka riŋ də vesùwèeŋ nə̀ kə̀ sak masinjàa Nwì bə tu riŋ à? Yè’sə nə yeè nə vɛ’nə, co ghak vesùwèŋ yè’e ŋgòsak nzak avès sə nzeŋgòŋ fɛŋ à? ⁴A ye ŋga nzak lòkok, wèŋ caŋ jə lòfa bʉ̀ʉ sə̀ sə mbiŋ, sə̀ cos jəgə̀ wo co wo ka Nwì riŋ, də wo sak fa weŋ yè’e bʉ̀ʉ yà? ⁵Waà, marè’tu ko johotse’ weŋ. Co ŋwə̀ nəmòk nə̀ mò’fis mʉŋgorə̀ wèŋ nə̀ yi ŋgà ŋkərə̀ co yi sak fa krətèŋ mòk nzak awo yè’e bʉ̀ə̀ à? ⁶Nsàp nə̀ njàwèeŋ də, krətèŋ mòok jə lòkrətèŋ mòk mʉ kot də wo kə təəŋ ŋgòsak nzak mantombìi bʉ̀ʉ sə̀ wo ka Jisòs Krɛst dzəm. ⁷Mʉ tsok fa weŋ ncèp nə̀ nà’a zìnə. A jòŋ nə̀bʉp bohòwèŋ ŋgòtse’ lok fʉ’ nzak mʉŋgorə̀ wèŋ. A ye-a ŋga ŋwə̀ nəmòk gʉ wu bʉp, kaco wu me’rə yi ntɛ̀ŋ yeŋ à? Nə ye də a ye-a ŋga ŋwə̀ nəmòk lim zʉ-a wu, kaco wu me’rə yi sə̀’ ntɛ̀ŋ yeŋ à? ⁸Wèŋ sə gʉ̀ bwìŋ bʉp sə̀’ wèŋ. Wèŋ sə lim jə bum bʉ̀ʉ mok ŋga wenə wèeŋ vɛ’ɛ bwema bʉ̀ʉ Jisòs Krɛst.

⁹Co wèŋ ka yè’e riŋ də bʉ̀ʉ sə̀ wo gʉ̀gə̀ bʉp nə̀ kà mvwe’ sə̀ Nwì cu ŋgòsak gaŋ ye ni riŋ à? Kà də wèeŋ borə ni’ awèŋ dʉk; Ŋgà kohònto, ŋgà kùksə̀ rùm, ŋgwe ŋwè kèe ndu ŋwè nə̀ yi sə tesə sə mbiŋ, bə ŋwə̀ nə̀ yi ŋwə̀mbam yi nòoŋ bə ŋwə̀mbam mòk kènə ŋwàŋwè nə̀ yi nòoŋ bə ŋwàŋwè mòk pwe’, wo nə̀ kà mvwe’ gaŋ ŋkum Nwì kə̀ ni yuk. ¹⁰Nə ye sə̀’ də nsàp ŋwə̀ nə̀ ŋgà yə̀, ŋgà waŋ bum bʉ̀ʉ mok, ŋgàa jʉhʉ rùk, yak bwìŋ bə ŋgàa lim zʉ kɛ’ bwìŋ yè’e pwe’, nə̀ mò’fis nə̀ kà bòoŋ sə̀ yà’ cu mvwe’ gaŋ ŋkum Nwì sə̀’ kə̀ tse’ yuk. ¹¹Bʉ̀ʉ mok mʉtsətsə’rə wèŋ à sə cu togə̀ nsàp ncu nə̀ bʉp ènə. Fana Nwì a cùk rɛŋsə fis weŋ mvwe’ nsàap bʉp yà’sə mok laŋ. Yi a fis tes weŋ mok zok, nə fa weŋ ŋàaŋ sə̀ ŋgòcu nsàp ncu nje nə̀ nà’a bə̀boŋ nə. Yi jəgə̀ weŋ mok co bʉ̀ʉ sə̀ wèeŋ ŋgàa jì nzak mʉ lisə̀ Nwì. Yà’a pwe’ vɛ’nə bʉ̀ʉ liŋ Tà Jisòs Krɛst nə ye bʉ̀ʉsə̀ Yòŋsə̀ Nwì nə̀ a kùksəgə̀ yi nə cu sə ntʉʉ̀ vès.

Mandzə̀ Nə̀ Krətèŋ Tse’ ŊgòGʉ̀ Bə Ni’ Ye

¹²Mʉ̀ yə də bʉ̀ʉ mok sə dʉk də, <<Mʉ̀ ka yumok ŋgòdzə̀ yà’ tse’.>> A lɛ zìnə də wèŋ ka yumok sə̀ wèŋ tse’ ŋgòdzə̀ə tse’. Wèeŋ riŋ sə̀’ də, bum mok cu yo sə̀ kaco yà’ tɛsə weŋ bə yumok yeŋ. Mʉ̀ yàm sə̀’ bə tu am, mʉ̀ ka yumok sə̀ mʉ̀ tse’ ŋgòdzə̀ə sə̀’ tse’. Megu də kaco mʉ me’rə ni’ àm ŋgòye ŋkwɛ̀ŋ bohòyumok yeŋ. ¹³Aco wèŋ sə dʉk də, <<Wo à gʉ̀ fa bɛŋ bohòvə̀m, nə gʉ fa və̀m bohòbɛŋ.>> Mʉ̀ dzəm laŋ də a vɛ’nə zìnə. Megu də wèeŋ sə tsərə tse’ də, nùmbu mòk cu nə̀ Nwìi nə gʉ bʉpsə və̀m bə bɛŋ pwe’, yà’ ca bisə lo. Bə ma nə̀ ŋgùupni’ awèŋ, wo à ka yà’ də wèeŋ sə koho bə zeŋ sàhà gʉ̀, wo à gʉ̀ yà’ də wèeŋ fak bohòTà Jisòs Krɛst bə zeŋ. A sə̀’ Tà Jisòs Krɛst nə nə̀ yi jəgə̀ ŋkərə̀ bə ŋgùupni’ nə. ¹⁴A nə̀ ye sə̀’ də mvə̀’nə̀ Nwì à lòkoksə Tà Jisòs Krɛst mvwe’ kpʉ yà’a, yi nə̀ jə sə̀’ nsàp ŋàŋ ànə, nə lokoksə vesùwèŋ mvwe’ kpʉ sə̀’. ¹⁵Co wèŋ ka yè’e riŋ, də ŋgùup ni’ awèeŋ ŋgùpni’ nə̀ Jisòs Krɛst ma mòk riŋ à? Nə ye də, a kə̀kʉrə̀ co ŋwè jəŋ ŋgùpni’ nə̀ Jisòs Krɛst nə, nə kə be’lə nà’ bə ŋgùpni’ ŋwà sàhà nà? Kàyà’, kaco ye yuk vɛ’nə yeŋ lok. ¹⁶A ye-a ŋga ŋwè kə be’lə ni’ ye bə nə̀ ŋwà sàhà, ye də bə nà’a yà’a mok ni’ nə̀ mò’fis. Yà’ cu ndzənə ŋwàk Nwì sə̀’ vɛ’nə də,

<<Ŋwə̀mbam bə ŋwàŋwèe bʉ̀ʉŋ mok ŋwə̀ nə̀ mò’fis.>>

¹⁷Ŋwə̀ nə̀ yi jə-a ni’ ye, nə be’lə nà’ bə nə̀ Tà Jisòs Krɛst fana ye də bə nà’a mok sə̀’ mò’fis ndzənə yòŋsə̀. ¹⁸Nà’a njo nə̀ mʉ̀ dʉk weŋ də wèeŋ caŋ gɛsə mvwe’ ko sàhà nə. Bʉp mok sə̀ ŋwèe gʉ̀gə̀ yà’a pwe’, yà’a kà ŋgùpni’ bʉpsəgə̀. Bohòko sàhà ye, ŋgə̀ŋgàaŋ gʉ̀ nsàp bʉp ànə, fana nà’ bʉpsə ŋgùpni’ ye nə bʉpsə. ¹⁹Riŋ də ŋgùpni’ yòo co ndap mvwe’ sə̀ Yòŋsə̀ nə̀ Rərɛɛŋ cugə̀ nja. Yòŋsə̀ nə̀ nà’a sə ntʉʉ̀ wù ànə a və̀ bohòNwì bə tu ye. Wù ka ŋgùpni’ yòwù tse’, Nwì tse’ nà’ yi. ²⁰Yi tse’ nà’ yi bʉ̀ʉsə̀ yi à ywi wu ywinə. Nə yeè nə vɛ’nə fana ye də yusə̀ wù gʉ̀-a bə ŋgùpni’ yòpwe’, yà’a ye ŋgòkùksə Nwì, nə sə gʉ yi kwa.

Nzak Gù

¹Mʉ̀ sə còm fəsə fa weŋ yè’e bum sə̀ wèŋ à còm fek vèsə mʉ̀ yà’a. A ye-a ŋga ŋwè də yi kà ŋgwe jə, ye də yi gʉ̀ bə̀boŋ. ²Yè’sə ye-a sə̀’ vɛ’nə fana a bə̀boŋ də ndàaŋwè pwe’ tse’ ŋgwe nə̀ nje, ŋwàŋwè nə̀ fòpwe’ tse’ ndu nə̀ nje sə̀’. Wo tse’ vɛ’nə ya kà də wo gbʉ ni sənə bʉp nə̀ ŋgòko sàhà dʉk. ³Ndum nə gʉ fa ŋgwe ye nə bum pwe’ sə̀ ndum tse’ ŋgògʉ̀ fa ŋgwe. Ŋwàŋwè nə gʉ fa ndu ye nə yà pwe’ sə̀ ŋgwe tse’ ŋgògʉ̀ fa ndum sə̀’. ⁴Ŋwàŋwè nə ka bə tu ye cum. Ndu ye nə tse’ nà’ yi. Ŋwə̀mbam nə ka tu ye yi sə̀’ tse’. Ŋwàŋwè nə tse’ nà’ sə̀’ yi. ⁵Ndum nə bə ŋgwe nə ba fo’, mòok kà mòk mʉ kèhe yi bɛ’. Tse’ŋga wo dzəm mvwe’ mò’fis də wo ga’a cum vɛ’nə mvə̀k momjo, ya ŋga wo jəŋ mvə̀k ànə ŋgògʉ̀ pìriyà. Nà’a mèe, fana wo be’lə co ŋgwe bə ndum sə̀mok. Wo be’lə vɛ’nə ya Satàa kà mandzə̀ tse’ ŋgòbòrə wo də wo gbʉ bʉ̀ʉsə̀ də wo ko fʉk ntʉm bʉ̀ə̀ dʉk.

⁶Ntip nə̀ mʉ̀ sə fa weŋ nà’ bə nzak gù ènə, ka də mʉ̀ sə fa ŋàŋ də a ye tsooŋ vɛ’nə yeŋ. Mʉ̀ sə fa mègù yàm ntip. ⁷Bohòmʉ̀ yàm, a ye-a də bwìŋ pwe’ cum mvə̀’nə̀ mʉ̀ cu yè’e, boŋ ghak lɛ zeŋ. Mʉ cèp-a sə̀ vɛ’nə fana mʉ̀ sə riŋ sə̀’ də Nwì a fa ndàaŋwè pwe’ nsàp nə̀ nje zok ŋgòfàk bohòyi. Yi à gʉ̀ ŋwə̀ nəmòk ŋgòfàk ma vɛ’ɛ, mok ye ŋgòfàk ma vɛ’ɛ.

⁸Yusə̀ aco mʉ̀ cep bohòbòop bʉ̀ʉ sə̀ wo ka sənə nzak ŋgwe bə ndum ntòni bə bàa yepmfə wèeŋ də, bòghak də wo cum woòwo mvə̀’nə̀ mʉ̀ cu yàm yè’e. ⁹Ŋgə’ nə̀ ca nə də, bʉ̀ʉ mook yo sə̀ kaco wo ko to riŋ ni’ awo yeŋ. Bòbohònsàp bʉ̀ ànə ŋgòjə ŋgwe, ŋwàŋwè jəŋ ndum. A bə̀boŋ də bwìiŋ cum ncu ŋgwe bə ndum, nə noŋsə nə̀ də njè ŋgwe bə ndum sə tɛŋ wo co mis.

¹⁰Bohòbòp bʉ̀ nə̀ wo à lògù laŋ, ŋwàŋwèe kà ndu ye də yi tesə gù laŋ dʉk lok. Nà’a nə təəŋ megu vɛ’nə bʉ̀ʉsə̀ mʉ̀ sə kà yè’sə mʉmʉ̀ cèp. Jisòs Krɛst bə tu ye sə dʉk sə̀’ vɛ’nə. ¹¹Nə ye də, a ye-a ŋga ŋwà mòk tesə gù, yi nə cum yiìyi. Yi kà ndu mòk nə̀ zok jə fe’lə̀. Yi dʉk-a də yi jəŋ ndum, yi bwìŋ foho lo fe’lə sə̀’ bohòŋwə̀ nə̀ bə nà’ à ye to nə. Yà’ mègù sə̀’ vɛ’nə bohòŋwə̀mbam də yi kà də yi bɛ’ fis me’rə ŋgwe ye dʉk.

¹²Ma nə̀ bohòbʉ̀ʉ mok sə̀ wo tse’ ŋgwe nə ye sə̀ wo tse’ ndum ŋga yà’ ka krətèŋ yeŋ, mʉ̀ tse’ yumok ŋgòtsə̀’ fa wo sə̀’. Ncèp nə̀ mʉ̀ sə tsə̀’ wo nə, ka də Tà Jisòs Krɛst cèp nà’ yi yeŋ. Yà’ mègù sə̀ mʉ̀ tsərə mʉ̀ də a vɛ’nə yəyərə̀. A ye-a ŋga ŋwə̀mbam nə̀ yi krətèŋ tse’ ŋgwe ye nə̀ nà’ ka krətèŋ yeŋ, ŋwà nə dzəm də bə ndu ye nə cum fana kà də ndum nə bɛ’fis ŋgwe nə dʉk. ¹³Nə ye sə̀’ də a ye-a ŋga ŋwàŋwè nə̀ yi krətèŋ, tse’ ndu nə̀ nà’ ka krətèŋ yeŋ, ndum nə dzəm də bə ŋgwe nə nə cum mali fana kà də ŋwà nə dzeeŋ nà’ sə̀’ dʉk. ¹⁴Mʉ̀ dʉk vɛ’nə bʉ̀ʉsə̀ Nwì sə se ndum nə̀ yi ka krətèŋ ye co krətèŋ mʉŋkwɛ̀ɛŋ ŋgwe ye nə̀ yi krətèŋ nə. Nə ye sə̀’ də ŋgwe nə̀ yi ka krətèŋ yeŋ nə, Nwìi sègə̀ yi sə̀’ mʉŋkwɛ̀ɛŋ ndu ye nə̀ yi krətèŋ nə. A vɛ’nə bʉ̀ʉsə̀ a ye-a ŋga gùu sə ga’a na, kàmòk bwe awo sə nə ye mok co bwe pegè, ŋga Nwì a jə wo laŋ də wo bwe sə̀ rərɛŋ bʉ̀ʉ ma kèe tɛ̀’ awo sə. ¹⁵A ye-a ŋga a ŋgwe kè ndum ɛ̀’, nə̀ yi ka krətèŋ yeŋ, nə dʉk də yi nə lo tsoŋ megu lòo, yi lo sə̀ ntɛ̀ŋ, yumok ka bʉp. Bə nsàp ènə ŋwàŋwè kè ŋwə̀mbam nə nə̀ yi krətèŋ, yi ka nzak mòk tse’. Yusə̀ Nwì dzəm, də vesùwèeŋ cum ncu nə̀ nà’a bə fifi. ¹⁶Wùu ŋwàŋwè nə̀ wu krətèŋ, wù ka lɛ riŋ, aco ndu yònə̀ yi ka krətèŋ yeŋ nə kə riŋ Jisòs Krɛst ntsə’mòk, nə tse’ lùŋ sə̀’ bʉ̀ʉ wù. Yà’ mègù bohòŋwə̀mbam nə̀ yi krətèŋ sə̀’ vɛ’nə, wù ka lɛ riŋ, aco ŋgwe yo nə̀ yi ka krətèŋ yeŋ ènə kə riŋ Jisòs Krɛst ntsə’mòk, nə tse’ luŋ bʉ̀ʉ wù.

Cum Mali Mʉmvə̀’nə̀ Nwì À To Wu Ŋga Wù Cu Yà’a

¹⁷Nə yeè nə vɛ’nə yusə̀ yà’a gʉgʉŋ sə də, ndàaŋwèe cum nsàp ncu nə̀ Tà Jisòs fʉ̀hʉ fa yi nə. Yi kà də yi kupsə me’rə nsàp ŋwə̀ nə̀ yi ànə ye ghà nə̀ Nwì a to yi nə dʉk. Yà’a yusə̀ mʉ̀ sə yə’rə fa bwìŋ ma fòpwe’ də wo gʉ lo mʉnə cos pwe’fo’ vɛ’nə. ¹⁸Ŋwə̀ nəmòok ye-a yo nə̀ Nwì ànə to yi ŋga wo kom fa yi tu mbəmbam laŋ fana yi cum vɛ’nə. Kà də yi lap mandzə̀ ŋgògʉ̀ fe’lə nà’ ŋgòyəəŋ co wo à ka yi yà’ kom fa dʉk. Nə ye sə̀’ də ŋwə̀ nəmòok ye-a yo nə̀ Nwì a to yi ŋga yi ka tu mbəmbam ntòkom fana yi cum mam vɛ’nə ntɛ̀ŋ. ¹⁹Zəzok ka bohòŋwə̀ nə̀ yi a kom bə nə̀ yi a ka kom yeŋ. Yusə̀ gʉgʉŋ sə də, ŋwèe noŋsə yusə̀ Nwì də yi gʉ yà’. ²⁰Nà’a njo nə̀ mʉ̀ dʉk də, ndàaŋwè pwe’ cum mali mvə̀’nə̀ yi à ye ghà nə̀ Nwì à to yi də yi bɛ’lo Jisòs Krɛst ŋga yi cu sə. ²¹Nwì ànə to-a ŋwə̀ nəmòk ŋga yi cu co ŋkwɛ̀ŋ, yumok ka bʉp, yi cum mali vɛ’nə ntɛ̀ŋ. Ye sə̀’ də ŋga mandzə̀ nə̀ co yi tesə, nə kà ŋkwɛ̀ŋ mok yee yo, yi tesə sə̀’ ntɛ̀ŋ. ²²Mʉ̀ sə dʉk vɛ’nə bʉ̀ʉsə̀ ŋwèe ye-a ŋkwɛ̀ŋ ŋga Nwì to yi laŋ, yi bɛ’ lo Jisòs Krɛst fana ye də yi ka yà’sə ŋkwɛ̀ŋ mantombìi Tà Jisòs yeŋ. Yà’a sə̀’ də ghà nə̀ Nwì ànə to-a ŋwə̀ nəmòk ŋga yi ka ŋkwɛ̀ŋ yeŋ, ye də yi ŋga’a mok ŋkwɛ̀ŋ bohòJisòs Krɛst. ²³Sə ritse’ də wù ka bə tu yo cum. Jisòs Krɛst tse’ wu yi, bʉ̀ʉsə̀ yi a ywiŋ fis wu mvwe’ bʉp. Kà də wu ye fe’lə ŋkwɛ̀ŋ ŋwə̀ nəmòk nə̀ zok dʉk. ²⁴Nà’a njo nə̀ mʉ̀ sə dʉk weŋ də ndàaŋwè pwe’ sə bɛ’ mali mandzə̀ Nwì, nə cum mali sə̀’ mvə̀’nə̀ Nwì ànə to yi ŋga yi cu, bwema am wèŋ na.

Bʉ̀ʉ Sə̀ Wo Ka Sənə Gù NtòNi Nə Ye Bàa Ŋgwemfə Wèŋ

²⁵Bə nzak bʉ̀ʉ sə̀ wo ka sənə nzak ŋgwe bə ndum ntòni fana Tà ka mʉ yumok bə zeŋ tsok fa. Mʉ nə tsok fa weŋ yu yàm sə̀ mʉ̀ tsərə də yà’a bə̀boŋ. Mʉ̀ rì də yà’a nə yeŋ bə̀boŋ bʉ̀ʉsə̀ Nwì sə tɛsə mʉ̀, mʉ̀ sə yuŋ Tà Jisòs Krɛst bə ntʉm nə̀ mò’fis. ²⁶Wu kʉ̀k ja’a-na nsàap bum sə̀ yà’a ŋga’a, fana boŋ ghak co ŋwè cum lɛ mvə̀’nə̀ yi cu yiìyi. Mʉ̀ sə dʉk vɛ’nə bʉ̀ʉsə̀ ŋgə’ ŋga’a ŋkʉ̀ʉŋntɛ̀ŋ. ²⁷Ŋwə̀ nə̀ yi tse’-a ŋgwe laŋ, yi kà də yi me’rə nà’ dʉk. Nə ye sə̀’ də ŋwə̀ nə̀ yi ka-a ŋgwe ntòjəŋ, kà də yi lap mandzə̀ ŋgòjə ŋwàŋwè sə̀’ dʉk. ²⁸A ye-a sə̀ də mʉ̀ dʉk vɛ’nə fana a ye-a ŋga ŋwə̀ nəmòk jə-a ŋgwe, ye də yi ka bʉp gʉ. Ye sə̀’ də ŋga wà’ŋgwɛ̀ɛŋ jə-a ndum, ye də yi ka bʉp sə̀’ gʉ. Wèeŋ riŋ də bʉ̀ʉ sə̀ wo a ni sənə nzak gù laŋ tse’ ŋgə’ vɛ’ɛ wùriŋ. Bòcà mʉ yàm də wo cum lɛ woòwo, ya wo kà nsàp ŋgə’ ènə yə.

²⁹Bwema am wèŋ, yusə̀ mʉ̀ sə dʉk sə də mvə̀k nə̀ Nwì a fa ves nə nà’a lə̀m. Ye də ye jəŋ ŋga’a nè’e, bʉ̀ʉ sə̀ wo tse’ ŋgwe fak bohòNwì co ŋgàa jì ŋgwe. ³⁰Bʉ̀ʉ sə̀ wo sə wa wèeŋ gʉ co wo sə kà wa. Bʉ̀ʉ sə̀ wo sə kwa wèeŋ gʉ sə̀’ co wo sə kà mvə̀k pwe’ bə kwəkwa càsə wes. Bʉ̀ ŋgàa gì gìi ntɛŋ gʉ mok sə̀’ co wo kà gìi ntɛŋ gìgə̀. ³¹Ŋwə̀ nə̀ yi sə gʉ̀-a nsàp fàk nə̀ fòlòoŋ sə nzeŋgòoŋ fɛn, yi gʉ mok co yi ka tsətsərə̀ ye bə bum sə̀ sə nze fɛɛŋ pwe’ noŋsə. A ye vɛ’nə bʉ̀ʉsə̀ ncu nə̀ a cu nà’ ènə nà’ sə cà gɛsə lòghàr.

³²Mʉ̀ sə dʉk yè’sə bʉ̀ʉsə̀ mʉ̀ dzəm də yumòok kà weŋ ŋgə’ sə fa. Ŋwə̀ nə̀ yi ka ŋgwe tse’, tse’ gha’ mvə̀k yi ŋgòtsərə bə bum sə̀ ma nə̀ Tà Jisòs Krɛst, mvə̀’nə̀ aco yi gʉ ya nà’a kwa bohòyi. ³³Ŋwə̀ nə̀ yi tse’ ye ŋgwe, ka vɛ’nə bohòyi yeŋ. Tsətsərə̀ ye tə bə bum nzeŋgòŋ. Yi sə lap mandzə̀ nə̀ co yi gʉ̀ ya ŋgwe yee sə kwa bohòyi. ³⁴Ye də tsətsərə̀ ye ga’a sə ntʉʉ̀ yi bòp ba. Bə̀ba mègù sə̀’ vɛ’nə. Mʉwà’ŋgwɛ̀ŋ nə̀ yi ka-a ndum tse’, tse’ gha’ mandzə̀ nə̀ ŋgòtsərə bə bum sə̀ Tà Jisòs Krɛst yi. Yi jə ntʉm ye bə ni’ ye ba fo’, nə noŋsə bə fàha Jisòs Krɛst. Ŋwà nə̀ yi tse’-a ye ndum, tsətsərə̀ ye cu bə bum nzeŋgòŋ. Yi sə lap mandzə̀ nə̀ ŋgògʉ̀ ya ndu ye kwa bohòyi. ³⁵Mʉ̀ cèp bum yè’sə ŋgòtɛsə weŋ. Ka də mʉ̀ sə làp mandzə̀ ŋgòkɛ̀s weŋ yu sə̀ bə̀boŋ yeŋ. Mʉ̀ dzəm mègù də bum pwe’ ye lwìiŋ ya yumook kà fàak awèŋ sə̀ bohòTà Jisòs sə jipsə̀.

³⁶Bə nzak nə̀ mo ŋwə̀mbam bə mo ŋwàŋwè nə̀ wo cèp tes də wo nə cum gù. Wo dʉk kok fe’lə də wo nə kà gʉ̀ mok cu bʉ̀ʉsə̀ wo dzəm ŋgòfàk bohòNwì, fana ŋwə̀mbàm nə kà bə̀boŋ sə gʉ̀ bʉ̀ʉsə̀ yi ko fʉ̀k ntʉm bʉ̀ə̀, nə sə cum megu bə nà’ fana boŋ də wo gʉ tsə’rə gùu sə mvèsə̀. Yà’sə ka bʉp yeŋ. ³⁷Ye sə̀’ də, a ye-a ŋga ŋwə̀mbam nə tsərə kok sə ntʉʉ̀ yi də yi nə kà ŋwà nə mok jə, yi riŋ də yi nə kà nà’ jwɛ̀ŋ yuk, nə təəŋ bə zeŋ cʉ̀k, fana ye də yi gʉ̀ bə̀boŋ. Yi me’rə ŋwà nə ntɛ̀ŋ. ³⁸Bə nsàp ènə fana ŋwə̀ nə̀ yi jə ŋgwe gʉ̀ yà’sə bə̀boŋ, nə̀ yi dʉk ye də yi kà jə, boŋ ghak kok yi.

³⁹Ŋwàŋwè tse’ ŋgòcu mègù bə ndu ye tə̀tè nà’ kə kpʉ. Ghà nə̀ yi kpʉ nə fana ye də ŋwà nə tse’ mandzə̀ mok yo co yi kə jəŋ ndu mòk nə̀ nà’ bòyi. Megu də yi kà ŋwə̀ nə̀ nà’ ka ŋwə̀ə Tà Jisòs yeŋ jə. ⁴⁰A ye-a sə̀ də aco yi lo mali gù vɛ’nə fana bə tsətsərə̀ nə̀ njàm, mʉ̀ tsəm də aco yi tse’ kwəkwa ŋga yi cu mam-a yiìyi na. Yusə̀ mʉ̀ sə cèp yè’sə, mʉ̀ rì də Yòŋsə̀ nə̀ Nwì nə sə fa mʉ yà’ yi.

Njàap Rùm

¹Mʉ̀ dzəm ŋgòtsə̀’ weŋ yumok bə nzak bumlak co njàap rùm. Wèŋ sə cèp ncèp mòk də, <<Vesùwèŋ pwe’ tse’ ŋkərə̀.>> Ncèp ànə ka mvwès yeŋ. Megu də nsàp ŋkərə̀ ànə gʉ̀gə̀ ŋwè yi sə koksə ŋkwɛ̀ŋ wà. Yusə̀ aco yà’ tɛsə ŋwèe də a dzəm mòk bə mòk. ²A ye-a ŋga ŋwə̀ nəmòk sə tsərə bə tu ye də, <<Mʉ̀ rìi, mʉ rìi>>, ye də ŋwə̀ ànə ka mʉbè’lə̀ ŋkərə̀ nə̀ yi nə tse’ ŋgòrì nə tse’ lok. ³A vɛ’nə bʉ̀ʉsə̀ yusə̀ gʉgʉŋ sə də, ŋwèe dzəm Nwì. Ŋwə̀ nə̀ yi dzəm-a Nwì fana Nwì riŋ ŋgə̀ŋgàŋ də nà’a mo ye. ⁴Bə nzak nə̀ ŋgòzʉ njàap rùm, a rì tse’ zìnə də mvə̀’nə̀ wo kùksəgə̀ bum yà’sə co Nwì, wo sə kùksə nwì nə̀ yi bʉ̀ə̀ nə̀ bʉ̀ə̀. A rì yàvès də, Nwì nə̀ yi cu nə yi mègù mò’fis. ⁵A ye-a sə̀ də bum cu mʉbu bə sə nze ŋkʉ̀ʉŋ sə̀ bwìŋ jəgə̀ yà’ co nwì nə ye tà bohòwo fana, ⁶vesùwèŋ rì yàvès də Nwì mègù nə̀ mò’fis. Yi tɛ̀’ àvès yi. Yi à gʉ̀ bum pwe’fo’ sə̀’ yi, nə gʉ ves də ya yi tse’ ves. A tse’ mègù Tà sə̀’ nə̀ mò’fis, nə̀ liŋ yee Jisòs Krɛst. Nwì ànə gʉ casə bum pwe’ ndzə bohòyi. Lùŋ àvès nə̀ a tse’ nà’ ŋga’a nè’e à və̀ sə̀’ bohòyi. Yà’a yusə̀ vesùwèŋ rì sə. ⁷Megu də, krətèŋ wèŋ ka vɛ’nə pwe’ riŋ. Mok cu sə̀ wo à zʉ njàap rùum sə tə̀tè, wo zʉ malì-a yà’ ŋga’a, wo sə jə mali yà’ də a njàp rùm fana sə gʉ wo sə ntʉʉ̀ wo də wo gʉ̀ bʉp bʉ̀ʉsə̀ ntʉm awo ka pap ntògʉŋ. ⁸Yusə̀ a rì tse’ də, ŋwèe kà ŋwə̀ nə̀ bə̀boŋ mantombìi Nwì də bʉ̀ʉsə̀ yi zʉ nsàp yumòk bʉ̀ʉ̀ŋgə̀. Yusə də vesùwèeŋ zʉ-a yà, a nə kà swe’ mòk fo’ tse’. A kà-a yà’ zʉ, yumok kà sə̀ bʉp.

⁹Yusə̀ gʉgʉŋ sə̀ yà’a ca sə də, wèŋ sə̀ wèŋ riŋ də ŋwèe zʉ-a sə̀ yà pwe’ yumok kà fo’ bʉp yà’a, wèeŋ jəŋ ŋkərə̀. Kà də wèeŋ gʉ co bʉ̀ʉ mok sə̀ wo ka yàwo ŋkərə̀ ànə ntòriŋ gbʉ bʉ̀ʉ wèŋ dʉk. ¹⁰A dʉk-a də, ŋwə̀ nəmòk yə-a wù nə̀ wù rì yòlaŋ ŋga wù kə̀ cu mvwe’ zʉ njàap rùm ŋga ntʉm nje ka pap ntògʉŋ, yi nə tsərə da? Yi nə kà də a bə̀boŋ ŋgòzʉ njàap rùm, nə zʉ ye sə̀’ dʉk à? ¹¹Yi zʉ-a vɛ’nə fana ye də wù nə̀ wù rì yòŋkərə̀ nə laŋ, wù gʉ̀ ŋwə̀ nə̀ yi ka gʉgʉŋ yeŋ nè’nə wù ŋkuŋ yi gbʉ. Ka vɛ’nə bə̀boŋ yeŋ, bʉ̀ʉsə̀ yi yà’sə moma yo nə̀ Jisòs Krɛst à kpʉ mʉ tuhù yi sə̀’. ¹²A ye-a ŋga wèŋ sə gʉ̀ bʉp bohòkrətèeŋ yè’sə də wo sə gbʉ vɛ’nə fana ye də wèŋ gʉ̀ bʉp ànə bohòJisòs Krɛst bə tu ye. ¹³Ye də bohòmʉ̀ yàm, mʉ riŋ-a də mʉ zʉ-a yumok yà’ gʉ moma am mòk ŋgògʉ̀ bʉp fana mʉ̀ teŋsə, nə kà nsàp yu ànə zʉ ya yi kà gbʉ̀.

Njo Nə̀ Mʉ̀ Sə Kà Swe’ Làp

¹Yusəmook də, mʉ̀ rì bə tu am də yusəmok ka mʉ ko kìiŋtse’. Wèŋ rì də mʉ ŋgà ntum Jisòs Krɛst. Mʉ̀ à yə Jisòs nə̀ yi Tà àvès nə bə lis am vɛ’ɛ laŋ. Fàha sə̀ mʉ̀ sə gʉ̀ bohòTà Jisòs sə wèeŋ yè’e nto’o sə. ²A ye-a sə̀ də bʉ̀ʉ mok wèeŋ kà-a rì də mʉ ŋgà ntum Jisòs rì fana mʉ̀ də wèŋ rì yàwèŋ vɛ’nə laŋ. Njo nə̀ wèŋ a dzəm bohòJisòs fana wèeŋ yà’a co yumok sə̀ yà’ sə nìtsə̀’ fa bwìŋ də mʉ ŋgà ntum Tà Jisòs Krɛst nə. ³Ŋwə̀ nəmòok dʉk-a də yi lap mʉ co bə nzak də mʉ̀ ka ŋàŋ bə yusə̀ yà’a yàm sə co ŋgà ntum Jisòs tse’ fana mʉ̀ cep fəsə fa ŋgə̀ŋgàŋ vɛ’ɛ: ⁴Co ka kə̀kʉrə̀ bohòbwìŋ ŋgòfa mʉ bɛŋ bə nəno bʉ̀ʉ nsàp fàk nə̀ mʉ̀ sə gʉ̀ nè’e yeŋ à? ⁵Wèŋ sə dʉk yè’sə də kaco mʉ̀ jəŋ ŋgwe nə̀ yi sə̀’ krətèŋ, ya vesi sə gihi kɛ’ca co ŋgàa ntum mok sə gʉ̀ yà’a yeŋ à? Kaco vesi gihi vɛ’nə co Pità bə ŋgàa ntum mok yà’a nə ye bwema Tà Jisòs wèŋ yà’a yeŋ à? ⁶Kènə də bʉ̀ʉ sə̀ wo nə fak yàwo bə bo awo ŋkuŋ nə zʉ mègù ves Bànabà ba bʉ̀ʉ yà?

⁷Sojà mòk cu nə̀ yi fàkgə̀ co sojà, nə sə kə lap bwi mbàam zʉ ye mvwe’ sə̀ zok yo à? Ŋwə̀ nəmòk à fàk yuk nzum, nə kà bum sə̀ yà’ tesə mbwa zʉ yuk laŋ à? Kènə də ganakù’ mòk cu nə̀ yi gʉ̀msəgə̀ nàm, wo dʉk fa yi də yi nə kà mbwi sə ŋam no yo à? ⁸Bum sə̀ mʉ̀ sə cèp yè’sə, ka də yà’ mègù mvəsə̀ bwìŋ dzəmgə̀ vɛ’nə woòwo yeŋ. Yà’ cu ndzənə ŋwàk lʉ̀ʉk Musì sə̀’ vɛ’nə. ⁹Wo à còm nòŋsə nja də,

Kà də ŋwèe kiŋ lok cùu nàm nə̀ wo gʉ̀gə̀ yi, yi sə ku gòmbì nà’a dʉk.

Co də Nwì à sə dʉk yè’sə ŋga yi sə tsərə mègù yè’e nàm-à?¹⁰Co yi à sə kà bohòvesùwèŋ sə̀ a bwìŋ àwo tsərə̀ à? Yi à còm yè’sə bʉ̀ʉ vesùwèŋ, bʉ̀ʉsə̀ ŋgà fàk nzum bə ŋgà kùkù pwe’fo’ nə riŋ tsooŋ də wo nə tse’ ma njàwo ŋgòzʉ ŋkuŋ wo fak. ¹¹Vès a tsòho fa weŋ ncèp Ntirə̀ nə̀ Bə̀boŋ nə laŋ. Nà’ cu sə və̀ə wèŋ co ŋgwìi bum mok sə̀ ŋwè bì mʉnzuù yi. Ye də a yè’e bʉp co wèŋ tɛsə ves yàvès bə bum sə̀ co bɛŋ bə cə̀k wèŋ sə̀ vès sə dzəm ŋgòtɛsə ŋgùpni’ avès bə zeŋ à? ¹²Mvəsə̀ wèeŋ fagə̀ bʉ̀ʉ mok bum sə̀ wo dzəmgə̀ yà’ ŋgòtɛsə ni’ awo bə zeŋ yà’a, a nə ye co wèŋ fa to ntòvès. Mʉ cèp-a sə̀ vɛ’nə, ka də mʉ̀ sə lɛŋ weŋ də wèeŋ fa mʉ yeŋ. Mʉ̀ a dzəm də mʉ̀ ye nsàp ŋgə’ nə̀ fòpwe’ nè’nə mʉ̀ bə tu am. Mʉ ye ŋgə’ vɛ’nə ya kà də yusəmook təhə lok fa ŋwə̀ nəmòk mandzə̀ nə̀ ŋgòyuk Ntirə̀ nə̀ Bə̀boŋ nə̀ Jisòs Krɛst nə dʉk. ¹³Wèŋ rìŋtse’ də, bʉ̀ʉ sə̀ wo fàkgə̀ mʉmvwe’ ndap Nwì nə̀ ghaŋ nə zʉgə̀ yàwo sə̀’ zʉzʉʉ sə̀ bwìiŋ jə və̀gə̀ mʉmvwe’ mbwa sə. Bʉ̀ʉ sə̀ wo fàkgə̀ yàwo mvwe’ fa Nwì satikà’ sə̀ bwìiŋ jə və̀gə̀ yà’ yà’a zʉgə̀ ma nə̀ njàwo ca sə̀’. ¹⁴Yà’ mègù sə̀ yəyərə̀ bə bʉ̀ʉ sə̀ wo tsòhogə̀ yàwo Ntirə̀ nə̀ Bə̀boŋ nə. Tà Jisòs Krɛst a fa ŋàŋ laŋ də bwìiŋ fa yà’wèŋ bum sə̀ co wo tɛsə ni’ awo bə zeŋ sə̀’.

¹⁵Mʉ̀ sə kʉk-a lis də bwìiŋ fa mʉ bum sə̀ mʉ̀ dzəm fana yà’ kà bə jòŋ ye. Anə geŋ, mʉ̀ ka yu am ŋwə̀ nəmòk vɛ’nə sə̀ dʉk yuk fa. Mvə̀’nə̀ mʉ̀ sə còm yè’sə, ka də mʉ̀ gʉ̀ vɛ’nə ya wèeŋ fa mʉ bum sə̀ yà’ tse’ ŋgòye yàm sə yeŋ. A ye-a də mʉ̀ fek weŋ bum yà’sə fana kaco mʉ̀ kum fe’lə ŋgùŋ də mʉ̀ gʉ̀ fa weŋ yumok wà mok yeŋ. Bògha’ də mʉ kpʉ lɛ kpʉ nə noŋsə ŋgòfek weŋ vɛ’nə. ¹⁶Mʉ tsòho fagə̀-a bwìŋ sə̀ Ntirə̀ nə̀ Bə̀boŋ nə fana mʉ̀ ka ŋgònɛ̀ni’ bʉ̀ʉ zeŋ tse’, bʉ̀ʉsə̀ Nwì a tsə̀ tse’ mʉ̀ bə zeŋ yi. Ye də mʉ kà-a bwìŋ ncèp Ntirə̀ nə̀ Bə̀boŋ nə tsoho fa fana ye də mʉ̀ cu bʉp. ¹⁷A ye-a də mʉ̀ ànə tsərə kok gu-a sə və̀ə mʉ̀ ŋgòtsòho ncèp ènə bwɛ̀rɛ mʉ̀ sə kʉk lis də mʉ tse’ tsoŋ swe’ fo’. Nə yeè nə də mʉ̀ à ka yà’ mʉ̀ tsərə kok, Nwì a fa fàha yè’sə ndzə bohòmʉ̀ yi. ¹⁸Swe’e sə̀ mʉ̀ sə tse’ fo’ yà? Swe’e yàm mègù də mʉ tsoho fa bwìŋ ncèp Ntirə̀ nə̀ Bə̀boŋ nə wà. Nà’a njo nə̀ mʉ kà bwìŋ də wo fa mʉ bum sə̀ yà’ tse’ ŋgòye sə̀ yàm fekgə̀ sə.

¹⁹Mʉ̀ cu yè’e, mʉ̀ ka ŋkwɛ̀ŋ yeŋ. Ŋwə̀ nəmòk ka mʉ yi tse’. A ye-a sə̀ vɛ’nə fana mʉ̀ a gʉ̀ bʉ̀sə ni’ àm co ŋkwɛ̀ŋ bohòbwìŋ pwe’. Mʉ̀ a gʉ̀ vɛ’nə ya mʉ jəŋ və bwìŋ ŋkʉ̀ʉŋ bohòTà Jisòs Krɛst. ²⁰Mʉ ye be’lə ves bʉ̀ʉ Jus wèŋ, mʉ̀ sə gʉ lo bum sə̀’ co wo. Mʉ gʉ̀ vɛ’nə də ya mʉ jəŋ və wo ŋgòbɛ’lòTà Jisòs Krɛst. Lʉ̀ʉk sə̀ Nwì à fa Musì yà’a ka mʉ ko kìiŋtse’. A ye-a sə̀ vɛ’nə fana ghà nə̀ mʉ̀ cu be’lə ves bʉ̀ʉ sə̀ lʉ̀ʉk sə kotse’gə̀ wo fana mʉ̀ sə gʉ yàm sə̀’ co yà’ sə kotse’ mʉ̀ sə̀’. Mʉ̀ sə gʉ vɛ’nə də ya mʉ jəŋ və wo ma nə̀ Jisòs Krɛst. ²¹Ghà nə̀ mʉ̀ cu be’lə ves bʉ̀ʉ sə̀ wo ka bʉ̀ʉ Jus yeŋ, sə̀ lʉ̀ʉk Nwì ka yumok bohòwo tse’ fana mʉ̀ gʉ sə̀’ co wo. Mʉ̀ sə gʉ̀ vɛ’nə də ya mʉ jəŋ və wo bohòJisòs Krɛst. Mʉ gʉ̀ vɛ’nə, kà yà’sə də mʉ̀ sə kà Nwì wəp yeŋ. Yusə də mʉ̀ sə noŋsə yusə̀ Jisòs Krɛst à cèp yi. ²²Nə ye fe’lə sə̀’ də mʉ kə cu be’lə ves bʉ̀ʉ sə̀ ŋkərə̀ə awo ka gʉgʉŋ bə ma nə̀ Nwì yeŋ fana mʉ̀ sə gʉ sə̀’ mvə̀’nə̀ wo sə gʉ̀ʉ. Mʉ jəgə̀ ni’ àm co wo vɛ’nə ya mʉ gʉ mandzə̀ nə̀ də a ye-a sə̀ yà, mʉ̀ bɛ’ ko jəŋ və mali bʉ̀ʉ mok ŋgòkə̀ tse’ lùŋ nə̀ Nwì nə. ²³Yè’sə pwe’fo’, mʉ̀ sə gʉ̀ mègù yà’ njo Ntirə̀ nə̀ Bə̀boŋ nə, də ya mʉ nə̀ kə̀ tse’ bə̀bo nə̀ nà’a və̀gə̀ bohòbwìŋ njo Ntirə̀ nə̀ Bə̀boŋ nə.

²⁴Wèŋ rì də bwìiŋ cagə̀ caŋ, ŋga wo bwìŋ ŋkʉ̀ʉŋ fana ŋwə̀ nə̀ yi caŋ tè nə kə zʉ mantombìi nə megu nə̀ mò’fis. Ye də wèeŋ caŋ gʉgʉŋ ya wèeŋ kə tse’ lə̀là’ nə. ²⁵Ŋwə̀ nə̀ yi dzəmgə̀ də yi nə caŋ caaŋ cugə̀ ŋgòfʉ̀hʉ, yi kà bum nduk sə gʉ̀ kɛ’, də ya yi tse’ ŋàŋ. Yi gʉ̀ yè’sə vɛ’nə pwe’fo’ ŋga wo nə lak yi bə yu səmok wà sə̀ yà’a nə bʉp. Lə̀làk njàvès nə̀ a sə kʉ̀k də a nə̀ kə̀ tse’ nə nà’a kà bʉpgə̀. ²⁶Bohòmʉ̀ yàm, mʉ̀ sə ca lo mègù rərəŋ jʉrr, ya mʉ kə dzeŋ mvwe’ sə̀ wo kə̀ lə̀səgə̀ sə. Mʉ̀ ka co ŋwə̀ nə̀ yi sə mà’ kɛ’cà ndò’ wà, nə kà yusə̀ yi də yi ta sə ta yeŋ. ²⁷Mʉ fagə̀ ni’ àm nsàap ŋgə’ə sə̀ fòpwe’, də ya mʉ̀ kotse’ nà’ cʉ̀k ŋgòye kə̀kʉrə̀ bə fàha Tà. Ya kə̀ dzèŋ nùu, wo kà mʉ̀ nə̀ mʉ̀ sə tsoho Ntirə̀ nə̀ Bə̀boŋ mʉ̀ nə də mʉ̀ ka yàm kə̀kʉrə̀ yeŋ dʉk fa.

Ŋgə’ə Sə̀ Yà’ À Və̀ BohòBwe Izùrɛ Ye Ntip BohòVès

¹Bwema am wèŋ, mʉ̀ sə dzəm də wèeŋ tsərə tse’ yusə̀ yà’ à ye bohòtàcicii avès wèŋ sə̀ wo à yù Musì. Mvə̀’nə̀ wo à sə gì dzòoŋ kɛ’cà ŋgəà fana mbàk mòk à sə nìŋ lòfa wo mandzə̀. Wo pwe’ à lò, nə kə to ndzəp nə̀ wo togə̀ nà’ də <<Ndzəp nə̀ bə̀baŋ>> nà’a sə kùhu. ²Mvə̀’nə̀ wo à yù lòmbàk ànə, nə kə to ndzəp ànə fana yà’ à ye bohòwo yà’sə co nsàp bàptɛ mòk ya wo bʉ̀ʉŋ bʉ̀ʉ Musì wèŋ. ³Wo lòoŋ fo’ à zʉ zʉzʉʉ sə̀ Nwì à sə tum fa tsə wo mʉbu. ⁴Wo pwe’fo’ à no ndzəp nə̀ Nwì à sə fa wo yi. Ndzəp nə̀ wo ànə no à sə tesə ndzə wohò. Wo nə̀ ndzəp à sə tesə nja nə à ye yà’sə co yumok ŋgònìtsə̀’ gèsə lòbohòJisòs Krɛst bə tu ye. Yi à ye bə yà’wèŋ ghà nə̀ wo à sə gìhi nə. ⁵Wo ànə ye mvəsə̀ Nwì à gʉ̀ bohòwo vɛ’nə pwe’, mok ye mʉŋgorə̀ ànə ŋkʉ̀ʉŋ sə̀ wo à gʉ̀ʉ Nwì jok. Wo ànə gʉ vɛ’nə fana wo kpʉ ram nooŋ wes ŋgəà anə.

⁶Bum sə̀ yà’ ànə ye yè’sə sə nìtsə̀’ fa vesùwèŋ də kà də vesùwèeŋ dzəm ŋgògʉ̀ bʉp mvəsə̀ tàcicii avès wèŋ à gʉ̀ yà’a dʉk. ⁷Mok mʉŋgorə̀ wo anə à sə gʉ̀ mok bə rùm wèŋ. Yà’a mvə̀’nə̀ wo à còm ndzənə ŋwàk Nwì də, <<Bʉ̀ʉ sə wèŋ à cu sə nze, nə zʉ, nə no, nə lokok mʉtsə̀ ŋgòkàaŋ fa rùum awo sə dzeŋ.>> Kà də wèeŋ sə kuksə rùm mvə̀’nə̀ wo à gʉ̀ yà’sə dʉk. ⁸Mvə̀k mòk ànə ye sə̀’, sə̀ wo à sə ko sàhà. Wo à kpʉ nùmbu nə̀ mò’fis co bwìŋ ncùhù hum ba-ncòp-tɛ’ njo sàhà ènə. Ye də vesùwèeŋ kà mvəsə̀ wo à gʉ̀ yà’sə gʉ̀. ⁹Mvə̀k nəmòk à ye fe’lə sə̀mok, wo sə mùmsə Tà Nwì fana wo sə cwaŋ yusə̀ Nwì gʉ̀ fa wo cwaa. Wo à cwà vɛ’nə, Tà Nwì gʉ̀ no lurə zə wo. A kà də a cwaŋ yàvès Nwì dʉk. ¹⁰À kə̀ dzèŋ fe’lə mvə̀k nəmòk sə̀mok, wo cep ŋwəm kɛ’ca ŋwəmə. Masinjà Nwì nə̀ yi zəgə̀ ye bwìŋ à kə̀ zə wo. Vesùwèeŋ kà co wo à ŋwə̀m yà’sə ŋwə̀m.

¹¹Bum sə̀ yà’ à ye yè’sə pwe’ yà’a ŋgònì fa bwìŋ də wo kərə. Wo à còm nòŋsə yà’ ndzənə ŋwàk sə̀’ də ya a sə jəŋ ŋkərə̀, bʉ̀ʉsə̀ a cu bə mvə̀k nə̀ nzeŋgònə nà’ kʉəp ŋgòmèe. ¹²Ye də a ye-a ŋga ŋwə̀ nəmòk sə tsərə də yi gʉgʉŋ fana yi jəŋ ŋkərə̀ ya kà də yi gbʉ dʉk. ¹³Mə̀mumsə̀ mòk ka bohòwèŋ nə̀ də nà’a kà bohòbwìŋ pwe’ və̀gə̀ və yuk. Yusə də, mə̀mumsə̀ və̀-a bohòwèŋ, Nwìi nə kà mè’rə̀ də nà’a ghak weŋ mè’rə̀, bʉ̀ʉsə̀ yi ŋwə̀ nə̀ zìnə. Mə̀mùmsə̀ə və-a bohòwèŋ, yi nə gʉ fa weŋ mandzə̀ nə̀ co wèŋ təəŋ, nə ghak nà’.

Bwìiŋ Me’rə Nzak Bum Rùm

¹⁴Ŋge’ ntʉm am wèŋ, nà’a njo nə̀ mʉ̀ sə lɛŋ weŋ də kà də wèeŋ tse’ bo sənə rùm dʉk nə. ¹⁵Mʉ̀ sə cèp bohòwèŋ co bʉ̀ʉ sə̀ wèŋ tse’ ŋkərə̀ mʉ tuhù wèŋ, wèeŋ tsərə-a yàwèŋ sə̀’ də bum sə̀ mʉ̀ sə cèp yè’sə zìnə kè ka’ ɛ. ¹⁶Ghà nə̀ vesùwèeŋ zʉgə̀ Losopà mvwe’ mò’fis, vesùwèŋ sə kwasə Nwì bə ŋgàp nə̀ a nogə̀ fo’ nə. Vesùwèeŋ no nəno sə, ye də a sə be’lə ves Jisòs Krɛst wèŋ mvwe’ mò’fis ndzə mvwe’ ndʉəm ye. A zʉ brɛd ye də a sə be’lə bə ni’ Jisòs Krɛst sə̀’, kè ka vɛ’nə yeŋ ɛ? ¹⁷Yà’a nìtsə̀’gə̀ də vesùwèeŋ mò’fis bʉ̀ʉsə̀ ntuk brɛd nə̀ a zʉgə̀ nə ye mègù nə̀ mò’fis, a benə pwe’, nə zʉ nà’. ¹⁸Wèeŋ tsərə-a bʉ̀ʉ Jus sə̀ wo zʉgə̀ njàap sə̀ wo jə və̀gə̀ yà’ ŋgòfa satikà’ bohòNwì bə zeŋ yà’a nɛ̀. Wo zʉ yà’ vɛ’nə, ye də wo bə Nwì wèeŋ mvwe’ mò’fis sə̀’. ¹⁹Yè’sə sə nìtsə̀’ yè’sə da? Co yà’ sə nì də rùm bə zʉzʉʉ sə̀ wo jə və̀gə̀ mvwe’ rùm sə yà’a yumok sə̀ gʉgʉŋ à? ²⁰Ka’, ka vɛ’nə yeŋ lok. Yusə̀ mʉ̀ sə dʉk sə də, bʉ̀ʉ sə̀ wo ka Nwì riŋ fagə̀ satikà’ njàwo ŋga wo sə fa nà’ yà’sə bohòyòŋsə̀ə ze’, kà Nwì ye. Yusə də mʉ̀ ka dzəm də wèŋ ze’ wèeŋ ye mò’fis dzəm. ²¹Aco ŋwè no ŋgàp nə̀ Tà Jisòs Krɛst, nə kə bʉʉŋ no fe’lə ŋgàp nə̀ ze’ wèŋ yè’sə va? Kènə də aco ŋwè zʉ zʉzʉ bə Jisòs, nə kə zʉ be’lə fe’lə bə ze’ va? ²²A bə̀boŋ də a gʉ bum sə̀ co yà’ gʉ Tà yi jok à? Wèŋ tsəm də a tse’ ŋàŋ nə ghak Nwì à?

Gʉ̀ Mègù Yusə̀ Co Yà’ Tɛsə Bʉ̀ʉ Mok Sə̀’

²³Mʉ̀ dʉk to mantombì fa’ də bʉ̀ʉ mok sə̀ mʉŋgorə̀ wèŋ sə dʉk də, yusəmok sə̀ co wo dzə̀ə bʉ̀ə̀. A zìnə də yusə̀ co wèeŋ dzə̀ə bʉ̀ə̀, megu də a sə̀’ zìnə də kaco bum pwe’ tɛsə ŋwè yeŋ. Yumok ka bohòwèŋ ŋgòdzə̀ə yeŋ, a zìnə, megu də bum mook yo sə̀ aco yà’ gʉ ŋwè yi kà gʉgʉŋ bə bum sə̀ ma nə̀ Tà Jisòs Krɛst ye. ²⁴Kà də ŋwèe sə kʉk lis ŋgògʉ̀ mègù yusə̀ yà’ sə bo yi yiìyi dʉk. Yi gʉ yusə̀ co yà’ tɛsə bʉ̀ʉ mok sə̀’.

²⁵Wèeŋ yə-a ŋga wo sə sèŋ njàp mʉntɛɛ̀ŋ, wèŋ ywiŋ zʉ dədok, nə kà yumok fek. ²⁶Mʉ̀ dʉk yè’sə bʉ̀ʉsə̀ wo à còm ndzənə ŋwàk Tà Nwì də,

<<Nwì tse’ nzeŋgònə bə bum sə̀ yà’a sənə ŋgònə pwe’ yi.>>

²⁷A ye-a ŋga ŋwə̀ nəmòk nə̀ yi ka krətèŋ yeŋ to wu də wu kə zʉ zʉzʉ mʉnda’à yi, wù dzəm, nə geŋ, fana yusə̀ yi fa wu pwe’ wù zʉ yà’ dədok. Kà də yà’a bə̀boŋ kè bʉp àlɛ’ sə fek kɛ’cà. ²⁸Nə ye də a ye-a ŋga ŋwə̀ nəmòk dʉk fa wu də, <<Njàp ànə njàp rùm,>> fana wù kà zʉ. Wù teŋsə vɛ’nə njo nə̀ kàmòk ŋwə̀ ànə nə dʉk də wù sə gʉ̀ bʉp. ²⁹Wu nə me’rə zʉzʉʉ yà’sə vɛ’nə bʉ̀ʉ tu ŋwə̀ mòk, anə ka-a bʉ̀ʉ tu yòyeŋ. Kàmòk aco ŋwə̀ nəmòk fek də, <<Aco mʉ̀ cum yàm co ŋgà ndapndzəm bʉ̀ʉ tu ŋwə nà’ mòk àlɛ? ³⁰A ye-a ŋga mʉ̀ kwasə Nwì bə zʉzʉ, nə zʉ yà’, yaaŋ bʉ̀ʉ mok fo’ yà ŋkuŋ wo dʉk də mʉ̀ gʉ̀ bʉp, ŋga mʉ̀ kwasə Nwì bə zeŋ laŋ ɛ?>> ³¹Nə̀ mʉ̀ tse’ ŋgòcèp fəsə də, bə̀boŋ də a ye-a ŋga wù sə gʉ-a sə̀ yà pwe’, gʉ̀ yà’ bə mandzə̀ nə̀ bwìiŋ yə, wo kuksə Nwì. ³²Jəŋ ŋkərə̀ də wèeŋ kà yusəmok sə̀ co yà’ sə yaŋsə ŋwə̀ nəmòk ntʉm gʉ̀. A dzəm ŋgə̀ŋgàŋ ye ŋwə̀ə Jus kè ŋwè lakmvum, kènə bʉ̀ʉ cos àlɛ, wèŋ kà də wèeŋ gʉ co ntʉm bʉp wo dʉk. ³³Bohòmʉ̀ yàm, yusə̀ mʉ gʉ̀gə̀ pwe’, mʉ̀ sə lap mandzə̀ nə̀ co də mʉ gʉ ndàaŋwè pwe’ yi kwa. Mʉʉ kà yàm bə yusə̀ də yà’a nə tɛsə mʉ mʉmʉ̀ tsərəgə̀, mʉ tsərəgə̀ yàm bə yusə̀ aco yà’ tɛsə bwìŋ ŋkʉ̀ʉŋ. Mʉ gʉ̀gə̀ vɛ’nə də ya mʉ jəŋ və wo bohòNwì, də ya wo tse’ lùŋ.

¹Ye də wèeŋ bɛ’ kùugì am mvə̀’nə̀ mʉ̀ sə bɛ’ kùugìi Jisòs Krɛst.

Bə̀ba Lok Tu Awo Ŋkuŋ Nə Kuksə Nwì

²Mʉ̀ kwasə weŋ wùriŋ bʉ̀ʉsə̀ wèŋ sə tsərə malì ncèp àm, nə sə gʉ bum sə̀ mʉ̀ à yə’rə weŋ. ³Yusəmok cu sə̀’ sə̀ mʉ̀ sə də wèeŋ rɛɛŋ bə zeŋ. Yusə də, ŋwə̀ nə̀ yi tu bohòŋwə̀mbaam Jisòs Krɛst. Ŋwə̀mbam nə ye bwi ye tu bohòŋwàŋwè, Nwì ye tu bohòJisòs Krɛst yi. ⁴Ye də, a ye-a ŋga ŋwə̀mbam sə gʉ̀ pìriyà kènə də yi sə tsoho ncèp Nwì mvwe’ sə̀ bwìŋ sə kùksə Nwì, nə ta tse’ tàm fana ye də yi sə fa marè’tu bohòJisòs Krɛst nə̀ nà’a tu bohòyi nə. ⁵Bohòŋwàŋwè ye, ma nje zok də yi sə gʉ-a bum yè’sə, yi kiŋlok tu ye. A kà-a vɛ’nə ye, ye də ŋwà ànə sə fa marè’tu bohòŋwə̀mbam nə̀ nà’a tu bohòyi nə.11:5 Ghà nə̀ wo à còm ŋwàk nè’e à ye ŋga bàa sə̀ wo lògù tse’ ŋgòlok tu awo lo’o. Zok ka bohònsàp ŋwà ànə bə nə̀ yi kom sù màk fis tu ye kpoho, kpoho yeŋ. ⁶A ye-a ŋga ŋwàŋwè dʉk də yi kà tu ye kì lok fana ye də yi kom kpo’rə yà’. A rì tse’ bə̀boŋ də a yu marè’tu bohòŋwàŋwè ŋgòkom kpo’rə tu, ye də yi kiŋ lok yà’ kìi.

⁷Njo nə̀ ka bə̀boŋ bohòŋwə̀mbam ŋgòlok tu ye yeŋ nə də, ŋwə̀mbam tse’ nsəsə̀ə Nwì. Ŋwə̀mbam nìtsə̀’gə̀ mvə̀’nə̀ kə̀kuk nə̀ Nwì cu fana ŋwàŋwè sə niŋtsok ye mvə̀’nə̀ kə̀kuk nə̀ ŋwə̀mbam cu. ⁸Wèŋ rì də, Nwì ànə jəŋ vəp ŋwə̀mbam, nə gʉ ŋwàŋwè bə zeŋ, ka də yi à jə vəp ŋwàŋwè, nə gʉ ŋwə̀mbam bə zeŋ yeŋ. ⁹Yumook sə̀’ də, Nwì ànə gʉ ŋwàŋwè bʉ̀ʉ ŋwə̀mbam, ka də yi à gʉ̀ ŋwə̀mbam bʉ̀ʉ ŋwàŋwè yeŋ. ¹⁰Ye də a bə̀boŋ də ŋwàŋwèe kiŋlok tu ye ŋgònìtsə̀’ də yi ka tu bohòŋwə̀mbam yi yeŋ. Yi gʉ vɛ’nə ya ntʉm kà masinjàa Nwì yaàŋ. ¹¹Mvə̀’nə̀ bum yè’sə vɛ’nə kà də wèeŋ swi yè’e dʉk. Ncu àvès nə̀ ves Tà Jisòs wèŋ ènə, ŋwə̀mbam tse’ ŋgòye sə̀’, ŋwàŋwè ye sə̀’. Bʉsə̀ wo sə fak bo bə bo. ¹²A rì də yè’sə zìnə bʉ̀ʉsə̀ Nwì ànə jəŋ vəp ŋwə̀mbam nə gʉ ŋwàŋwè bə zeŋ, ŋwàŋwè dzə fe’lə bwi ŋwə̀mbam sə̀’. Bum pwe’ və̀gə̀ bohòNwì.

¹³Wèeŋ kʉk ja’a na yàwèŋ sə fɛnə sə̀’ ɛ̀. Co a bə̀boŋ bohòŋwàŋwè ŋgòlòkok təəŋ ŋgòlɛŋ Nwì mvwe’ bwìŋ tu to àlɛ? ¹⁴A kʉ̀k ja’a mègù-a mvə̀’nə̀ Nwì à gʉ̀ bum fana yà’ ye də a marè’tu bohòŋwə̀mbam ŋgòtse’ nʉ̀əmtu sə̀ sə̀sap. ¹⁵Bohòŋwàŋwè ye yà’a bohòyi bum ŋgwɛ̀ŋ bʉsə Nwì à fa wo nʉ̀əmtu ya wo lok tu awo bə zeŋ. ¹⁶A ye-a ŋga ŋwə̀ nəmòk cu, nə də yi fenə bum yè’sə fana ŋgə̀ŋgàaŋ riŋ də vès, nə ye bʉ̀ʉ cos ma fòpwe’, vès tse’ mègù yàvès mandzə̀ nə̀ mò’fis ŋgòkùksə Nwì bə zeŋ.

Ntip Bə Nzak Losopà

(Mat. 26:26-29; Mak 14:22-25; Luk 22:14-20)

¹⁷Yu nə̀ mʉ̀ sə də mʉ tip weŋ bə zeŋ ŋga’a nè’e, kaco mʉ̀ kwasə weŋ bə zeŋ kwasə yeŋ. Yusə də, bə mvə̀k nə̀ wèeŋ kə̀ be’ləgə̀ ŋgòkùksə Nwì fana wèŋ sə gʉ ghak fo’ bʉp. ¹⁸Nə̀ mò’fis də, bwìŋ a tsə̀’ mʉ də wèeŋ və mvwe’ mò’fis co cos, wèŋ ye cù zəzok, nə ga’a bəbòp bəbòp. Yusə̀ wo a tsə̀’ mʉ yè’sə sə yəəŋ bohòmʉ̀ co a zìnə. ¹⁹(A zìnə də cù zəzook bʉp, megu də nà’a gʉ̀gə̀ ghà mòk yi ŋkuŋ wù rì ŋwə̀ nə̀ yi zìnə mʉŋgorə̀ wèŋ anə.) ²⁰Wèeŋ kə be’ləgə̀ mvwe’ mò’fis ŋgòzʉ fana wèeŋ kà yà’sə Losopà zʉgə̀. ²¹Mʉ̀ dʉk vɛ’nə bʉ̀ʉsə̀ wèeŋ zʉgə̀ə, ndàaŋwè pwe’ sə zʉ sə̀ ye, nə kà mòk tək. Wèeŋ gʉ̀ vɛ’nə, bʉ̀ʉ mok sə waŋ njè ŋga mok sə jʉ̀hʉ də wo no cà cù. ²²Kwɛ’fò! Wèŋ jə bʉ̀sə ndap Nwì co yusə̀ wà, nə sə fa bʉ̀ʉ sə̀ wo ka yumok tse’ marè’tu bʉ̀ʉ yà? Wèŋ ka ndap co wèŋ zʉ nə no fo’ mvə̀’nə̀ wèŋ dzəm tse’ à? Wèŋ dzəm də mʉ dʉk yè’sə daa? Co mʉ kwasə weŋ bə nsàp nə̀ wèŋ sə gʉ̀ ènə à? Njo’ò, mʉ nə kà weŋ kwasə̀.

²³Mʉ̀ à yə’rə fa weŋ bum sə̀ Tà Jisòs à nìtsə̀’ mʉ laŋ. Yusə də à ye nòoŋ bə ndzəm nə̀ wo seŋ Tà Jisòs nà’a, yi jəŋ brɛd, ²⁴nə kwasə Nwì bə zeŋ. Yi ànə kwasə wes Nwì, yi bə’rə nà’, nə cep də, <<Nè’e ŋgùpni’ àm nə̀ mʉ̀ fa nà’ bʉ̀ʉ wèŋ. Wèeŋ sə gʉhʉ vɛ’nə, ŋgòtsərə tse’ mʉ.>> ²⁵Wo ànə zʉ wes fana yi jəŋ ŋgàp nə, nə cep sə̀’ də, <<Ŋgàp nè’e rʉ̀k nə̀ fi nə̀ nà’ kì ŋge’ ndzənə ndʉəm am. Ghà nə̀ wèeŋ no ŋgàp nè’e pwe’, wèŋ sə tsərə tse’ mʉ.>>

²⁶Ye də ye jəŋ ŋga’a tə̀tè kə dzeŋ nùmbu nə̀ Tà Jisòos nə̀ bwìŋ foho və̀ə, ghà nə̀ wèeŋ zʉ brɛd nè’e nə no ŋgàp nè’e pwe’, ye də wèŋ sə nìtsə̀’ fa bwìŋ yà’sə kpʉ Tà Jisòs nə. ²⁷Ye də a ye-a ŋga ŋwə̀ nəmòk zʉ brɛd ènə kè no ŋgàp ye nə bə mandzə̀ nə̀ nà’ ka bə̀boŋ yeŋ fana ye də ŋgə̀ŋgàŋ cu bʉp bə ni’ nə ye ndʉəm Tà Jisòs. ²⁸Ye də ŋwə̀ nə̀ yi dʉk-a də yi zʉ brɛd nə, nə no ŋgàp nə fana yi fek ni’ ye bə̀boŋ ŋkuŋ yi zʉ yà’. ²⁹Bʉsə̀ ŋwə̀ nə̀ yi zʉ-a ŋga yi kà ŋgùpni’ Tà Jisòs tsərəgə̀ fana ye də ŋgə̀ŋgàŋ sə to naaŋ nzak mʉ tuhù yi. ³⁰Nà’a njo nə̀ bʉ̀ʉ awèŋ sə yaa ŋkʉ̀ʉŋ, mok ye wòwo fana mok sə kpʉ kpʉʉ jwaŋ. ³¹A ye-a də a fek ni’ avès bə̀boŋ ŋkuŋ nə zʉ yà’ fana ye də Nwìi nə kà vesùwèŋ bə nzak bɛ’. ³²Njo nə̀ Tà Nwìi sakgə̀ ves, nə yeŋsə ves ŋgə’ a yegə̀ ŋgòrəŋsə fa ves jòoŋ avès. Yi gʉ̀ vɛ’nə ya nùmbu nə̀ yi və̀ ŋgòkə̀ sak nzeŋgòŋ fana yi kà ves bə bʉ̀ʉ sə̀ wo gbʉ nzak bohòNwì be’lə̀. ³³Bwema am wèŋ, ye də ghà nə̀ wèeŋ kə be’lə ŋgòzʉ Losopà fana boŋ də wèŋ tək bwema mok wèŋ wo və wes ŋkuŋ. ³⁴A ye-a ŋga njè sə ya ŋwə̀ nəmòk fana yi zʉ və bɛŋ ye mʉ nda’à yi ŋkuŋ nə və. Yi gʉ vɛ’nə ya ŋga wèeŋ kə be’lə mvwe’ mò’fis fana Nwì kà weŋ bə nzak bɛ’.

Mʉ və̀ ŋkuŋ vesùwèŋ cep bə bum mok sə̀ wèŋ à com fek mʉ yà’a laŋ.

Bʉ̀ʉ Cos Wèeŋ Co Ni’ Nə̀ Mò’fis Nə Tse’ Bòp Zəzok

¹Bwema am wèŋ, yumok sə̀ mʉ̀ sə dzəm də wèeŋ rɛɛŋ bə zeŋ, a bə nzak ŋkərə̀ nə̀ Yòŋsə̀ Nwìi fagə̀ bwìŋ ŋgògʉ̀ bum bə zeŋ. ²Wèŋ rì də à ye mantombì fa’ ŋga wèŋ ka bohòJisòs ntòdzəm, wèŋ à sə jàm kɛ’ bə mandzə̀ zəzok. Wèŋ yuŋ kɛ’ lo rùm sə̀ wo ka cù cèpgə̀ wèŋ nduk. ³Ye də wèeŋ rɛɛŋ bə zeŋ də, a ye-a ŋga Yòŋsə̀ Nwì sə gʉ̀-a ŋwə̀ nəmòk fana kaco ŋgə̀ŋgàŋ dʉk də, <<Ndòo bɛ’ Jisòs>> yeŋ. A sə̀’ də kaco ŋwè dʉk də, <<Jisòos Tà>>, ŋga Yòŋsə̀ Nwì sə kà ŋgə̀ŋgàŋ yi gʉ̀ yeŋ.

⁴Ncèp nə̀ mʉ̀ anə yeto bə zeŋ nà’a də, Yòŋsə̀ Nwìi fagə̀ bwìŋ ŋkərə̀ ŋgògʉ̀ bum bə mandzə̀ zəzok. Yòŋsə̀ Nwì nə̀ yi sə fa bwìŋ ŋkərə̀ə yè’sə mègù yi nə̀ mò’fis. ⁵Fàha sə̀ ŋgòfàk bohòTà Jisòos sə zəzok. Tà Jisòs nə̀ wo sə fàk bohòyi nə, yi nə̀ mò’fis. ⁶Bwìŋ tse’ mandzə̀ə sə̀ ŋgògʉ̀ fàha Nwì bə zeŋ zəzok. Ŋga gàpsə fa bwìŋ ŋkərə̀ nə̀ ŋgòfàk bə zeŋ vɛ’nə Nwì nə̀ mò’fis. ⁷Fana Yòŋsə̀ Nwìi nì fagə̀ ŋwə̀ nə̀ mò’fis yumok də ya nà’a jəŋ yu ànə, nə tɛsə bʉ̀ʉ ye sə̀ wo à dzəm bə zeŋ pwe’. ⁸Yòŋsə̀ nə fagə̀ ŋwə̀ nəmòk ye mandzə̀ nə̀ ŋgòfa bwìŋ ntip nə̀ bə̀boŋ bə bum sə̀ ma nə̀ Nwì, nə fa mòk ye ŋkərə̀ nə̀ ŋgòyə’rə rɛŋsə fa bwìŋ bum Nwì. Yè’sə lòoŋ ŋga sə fa gù Yòŋsə̀ Nwì nə̀ mò’fis. ⁹Yòŋsə̀ Nwì nə fagə̀ ŋwə̀ mòk ŋàaŋ sə̀ ŋgòtse’ rì nsàp dzədzəm nə̀ də Nwìi nə gʉ tsoŋ li yusə̀ yi fek nà’. Yi fa ŋwə̀ mòk ye nə̀ də aco yi luŋsə ŋgà yiyaŋ. ¹⁰Bʉ̀ʉ mok tse’ yàwo ŋàaŋ sə̀ ŋgògʉ̀ bum sə̀ yà’a maŋgəŋgèŋ, mok ye yàwo sə̀ ŋgòcèp rì bum mok sə̀ Nwì tsoho fa wo yà’ yi ŋga gù sə̀ Yòŋsə̀ Nwì nə̀ mò’fis nə. Bʉ̀ʉ mook ŋgàa rì də yu yè’e yà’ və̀ bohòYòŋsə̀ nə, yè’e sə̀ yà’ ka bohòYòŋsə̀ və. Ŋwə̀ mòok nə̀ aco yi cep riŋ ncèep lak mok sə̀ bwìŋ kà yà’ yukgə̀ fana mòk ye ye nə̀ ŋgòtsòho rɛŋsə fa bwìŋ yusə̀ mòk nə cèep sə. ¹¹Ye də sənə bum sə̀ a sə gʉ̀ yè’sə pwe’fo’, Yòŋsə̀ nə̀ yi fa ŋàŋ də bwìŋ gʉ vɛ’nə nə, yi mègù yi nə̀ mò’fis. Yi fagə̀ ndàaŋwè pwe’ ŋàaŋ sə̀ nà’ zok yiìyi mvə̀’nə̀ yà’ bòyi ŋgòfa nà’.

Fəfaa Sə̀ Zəzok Sə Sə Fak Mègù Ndzənə Ni’ Nə̀ Mò’fis

¹²Aco a fʉhʉ ja’a nsàap fəfaa yè’sə bə ni’ ŋwè. A rìŋ də ni’ ŋwè tse’ bòp zəzok. Nà’a ye-a sə̀ zəzok vɛ’nə ŋga nà’ gù nə̀ mò’fis. Bòop sə pwe’ be’ləgə̀ mvwe’ mò’fis ŋgòye ni’ nə̀ mò’fis. Yà’ mègù bohòbʉ̀ʉ Jisòs Krɛst wèŋ sə̀’ vɛ’nə. ¹³Vesùwèeŋ mok bʉ̀ʉ Jus, mok bʉ̀ lakmvum. Mok ŋkwɛ̀ŋ, mok kà ŋkwɛ̀ŋ ye. Vesùwèŋ lòoŋ à bʉ̀ʉŋ co ŋwə̀ nə̀ mò’fis ghà nə̀ wo à bàptɛsə ves bə yòŋsə̀ nə̀ mò’fis nə. A sə̀’ yòŋsə̀ ànə nə̀ a jə nòŋsə nà’ sə ntʉʉ̀ vès.

¹⁴Ni’ ŋwèe mò’fis, ŋga nà’ tse’ bòp ŋkʉ̀ʉŋ ŋkuŋ yi ye ni’ nə̀ mò’fis nə. ¹⁵A ye-a ŋga kù dʉk də, <<Njo nə̀ mʉ̀ ka bo yeŋ àlɛ, ye də mʉ̀ ka mok bòp ni’ yeŋ.>> Yà’sə nə kà kù də wo kà bòp ni’ mamòk yeŋ gʉ̀. ¹⁶A ye-a də ntu’ dʉk də, <<Bʉsə̀ mʉ̀ ka yàm lis yeŋ, ye də mʉ̀ ka ma ni’ ŋwè mok yeŋ.>> Aco yà’sə kupsə ntu’u sə à? ¹⁷Tsərə-a yàwèŋ sə̀’ də ni’ ŋwè ànə ye megu-a liìs lis, yi yuk bum bə yà? Kè a ye-a də ni’ ŋwè pwe’ à ye mègù ntu’ù ntu’, yi rəmsə bum bə yà? ¹⁸Nwì ànə ka vɛ’nə gʉ̀. Yi à gʉ̀ nòŋsə ni’ nə nja zəzok mvə̀’nə̀ yà’ à bòyi. ¹⁹A ye-a də ni’ ŋwèe ye megu lòoŋ nsàp yu nə̀ mò’fis, kaco wù to nà’ də a ni’ ŋwè yeŋ. ²⁰Yusə də ni’ tse’ bòp zəzok ŋga yi mègù ni’ nə̀ mò’fis.

²¹Kaco lis dʉk fa bo də, <<Mʉ̀ ka fàk vesù tse’>> yeŋ. Kaco tu dʉk fa kù də, <<Mʉ̀ ka fàk vesù tse’>> sə̀’ yeŋ. ²²Yusə də, ma ni’ ŋwè nə̀ a tsəmgə̀ də nà’ ka fàk tse’ nə, kaco a cum to jì zeŋ yeŋ. ²³Ma ni’ sə̀ vèes tsərəgə̀ də yà’ a momjo yà’a, a jə ghakgə̀ ŋkərə̀ sə̀’ bohòma nà’nə. Ma ni’ nə̀ bwìŋ yə-a nà’ marè’tu ko ves nà’a, a təhə bòŋsə lo’ ghakgə̀ sə̀’ zeŋ. ²⁴Vesùwèeŋ təhə lok yà’ vɛ’nə, nə kà ni’ nə̀ ma nə̀ bə̀boŋ nə yumok təhə lok fa. Nwì à gʉ̀ ni’ nə vɛ’nə yi də ma ni’ sə̀ a jəgə̀ yà’ co yusə̀ wà sə vesùwèeŋ jə ghakgə̀ ŋkərə̀ sə̀’ bohòwo. ²⁵Ye də ni’ ŋwèe kà ma mòk co də nà’ ka fàk tse’ jəgə̀. Nà’a jəgə̀ ma nə̀ fòpwe’ də nà’ tse’ yumok ŋgògʉ̀ fa mòk. ²⁶Ni’ nə ma mòk sə yə-a ŋgə’, wo ye lo ŋgə’ nə sə̀ wo pwe’. Ma mòk cu-a bə̀boŋ, boŋ lo wo sə̀ lòoŋ fo’.

²⁷Yusə̀ mʉ̀ sə dʉk sə də, wèŋ pwe’fo’ mvwe’ mò’fis, wèeŋ ni’ Jisòs Krɛst. Nə ye sə̀’ də ŋwə̀ nə̀ fòpwe’ tə yà’a co ma ni’ ye nə ma mòk. ²⁸Nwì a fa bʉ̀ʉ sə̀ wo ma ni’ Jisòs Krɛst mòk yè’sə fàk zəzok. Yi fa mantombì də mook ŋgàa ntum Jisòs, bɛ’ɛ wo ŋgàa tsòhòbum Nwì wèŋ, nə̀ tɛ’ cicà wèŋ. Mok ye mali ŋgàa gʉ̀ maŋgəŋgèŋ, ŋgàa gʉ̀ bwìŋ lokok mvwe’ yiyaŋ, ŋgàa tɛsə̀ bwìŋ wèŋ, bʉ̀ʉ sə̀ aco wo benə riŋ bwìŋ ŋgòfàk mvwe’ mò’fis, nə ye bʉ̀ʉ sə̀ aco wo cep ncèep lak mok sə̀ wo kà yà’ rìgə̀ wèŋ sə̀’. ²⁹Kaco bwìŋ pwe’fo’ tse’ kʉrə ŋàŋ ŋgògʉ̀ nsàp fàk nə̀ mò’fis yeŋ. Aco bwìŋ pwe’ ye ŋgàa ntum Jisòs kè ŋgàa tsòhòbum Nwì kè cicà àlɛ’ à? Ka’, kaco ye vɛ’nə yeŋ. Kaco bwìŋ lòoŋ ye ŋgàa gʉ̀ maŋgəŋgèŋ, ³⁰kè ŋgàa lòkoksə̀ bwìŋ mvwe’ yiyaŋ bə ŋgàa tɛsə̀ bwìŋ yeŋ. Nə ye sə̀’ də kaco bwìŋ pwe’ ye wes ŋgàa cèp rì ncèep lak sə̀ wo ka yà’ rì, sə̀’ yeŋ. Kaco bwìŋ pwe’ tsoho rɛɛŋsə riŋ fa bwìŋ ncèep lak yè’sə sə̀ yeŋ. ³¹Nə ye də bohòwèŋ yàwèŋ, wèeŋ kʉk megu lis awèŋ bə ŋkərə̀ə sə̀ wèŋ rì də yà’ bògha’ zeŋ sə.

Dzədzəəm Mantombì

Mʉ niŋtsok fa weŋ yusə̀ yà’ tə mantombì sə.

¹A ye-a də ŋwə̀ nəmòk riŋ ncèep lak bwìŋ pwe’, nə yuk bə ncèep masinjàa Nwì sə̀’, nə kà bwìŋ dzəm, ye də yusə̀ yi sə cèep pwe’ mègù co ŋkʉ mòk sə cep gham wà. ²Ŋgə̀ŋgàaŋ tse’-a sə̀ ŋàaŋ sə̀’ ŋgòcèp rì bum mok sə̀ Nwì tsòho fa yi yà’ yi, yi riŋ bum pwe’, nə riŋ bum sə̀ yà’ cu sə̀swihì, nə tse’ dzədzəm nə̀ də yi dʉk-a də nda nè’e coho fa’, nə kə təəŋ fa’, nà’ coho, nə kà bwìŋ dzəm, ye də yi ŋwə̀ nə̀ wà. ³A ye-a sə̀ də yi gàp wes fa bwìŋ bum ye pwe’, nə fa ni’ ye də wo tɛŋ nà’, nə kà dzədzəm bohòbwìŋ tse’ fana ye də bum sə̀ yi gʉ̀ yà’sə pwe’ nə kà yi tɛsə̀.

⁴Ŋwə̀ nə̀ yi tse’gə̀ dzədzəm nə yegə̀ yè’sə va? Yi kogə̀ ntʉm, nə sə ye bə̀boŋ bə bwìŋ. Ŋwə̀ nə̀ yi tse’ dzədzəm nə yi kà də ŋwə̀ nəmòk ghak yi bʉ̀ʉ yàlɛ wagə̀, yi kà nsàp cù nə̀ də <<Mʉ̀ a gʉ̀ vɛ’ɛ, mʉ̀ a gʉ̀ vɛ’ɛ mʉ̀>> sə tse’ kɛ’cà, nə kà ni’ sə̀’ sə nɛ̀. ⁵Yi kà capgə̀, yi kà wi’ yegə̀, yi kà nə̀nàk jòkgə̀, nə kà bʉp sə ntʉʉ̀ yi nòŋsə̀. ⁶Yi kà bà’lo ŋga ŋwə̀ nəmòk gʉ̀ bʉp dʉkgə̀. Yi kwa mègù ŋga yi yə də ŋwè gʉ̀ yusə̀ yà’a bə̀boŋ. ⁷Yumok kà dzədzəm ghakgə̀. Yi tsərəgə̀ bə̀boŋ bohòbwìŋ, yi naaŋgə̀ tu də bwìiŋ nə bʉʉŋ bə̀boŋ. A bʉp-a yi sə̀ yà, yi kà ŋgògʉ̀ bə̀boŋ teŋsə̀.

⁸Ŋwèe tse’-a sə̀ ŋàaŋ sə̀ ŋgòcèp rì bum sə̀ Nwì tsoho fa yi yà’ yi, nə cep riŋ bə ncèep lak sə̀ yi ka yà’ yə’rə yuk, nə tse’ ŋkərə̀ nə̀ Nwì a fa yi nà’ ŋgòrɛŋ bum ye bə zeŋ, fana yà’a nə̀ kə̀ mè ntsə’mòk. Dzədzəm kà ye lə̀ yukgə̀. ⁹Yusə də ŋkərə̀ nə̀ Nwì fa bwìŋ ŋgòrɛŋ bum Nwì bə zeŋ, nə ye nə̀ ŋgòtsòho bum sə̀ Nwì tsə̀’ fa ŋwè yà’ yi, yè’e pwe’ lə̀m. ¹⁰Sə̀ yà’a dak kə̀ və̀ ntsə’mòk fana, sə̀ lə̀m yè’sə nom bisə. ¹¹Yà’ mègù sə̀’ mvə̀’nə̀ mʉ̀ ànə ye mweŋke’, mʉ̀ sə cep cù, sə kʉk bum, nə sə tsərə bum sə̀’ co mweŋke’. Nə̀ ŋga’a nə̀ mʉ̀ a bʉ̀ʉŋ ŋwè laŋ nè’e, mʉ̀ ka fàk bə bum bweŋke’ mok tse’ fe’lə. ¹²A sə yə bum ŋga’a ntòjə̀jarə̀, mvə̀k ànə dzèŋ nùu, a nə ye bum mok co wù yə ŋwè si bə si. Ŋkərə̀ nə̀ a tse’ ŋga’a nè’e a sə rì bum bə zeŋ bɛ̀s ma mò’fis. Mvə̀k ànə kə̀ wɛ̀s nùu, a nə riŋ bum pwe’ nə̀ pwe’ co mvəsə̀ Nwìi rìgə̀ ŋwè yè’e.

¹³Ŋgòlə̀sə, a rì də bum cu tɛ’ sə̀ yà’a nə̀ kà kə̀ lə̀ yuk. Nə̀ mò’fis, dzədzəm nə̀ ŋgònaaŋtu bə yusə̀ lis ka yà’ ye yuk. Nə̀ baa ŋgòsə kʉ̀k lis də Nwìi nə̀ gʉ̀ fa ves yusə̀ yi à dʉk. Nə̀ tɛ’ ye dzədzəm. Fana dzədzəm nə yam càsə ghak mok sə pwe’ yi.

Fàk Bə Ŋkərə̀ə Sə̀ Nwì Fa Sə Bə̀boŋ ŊgòTɛsə Bʉ̀ʉ Cos

¹Làp mandzə̀ nə̀ ŋgòtse’ dzədzəm nə ghak nsàp yu yà pwe’, nə sə kʉk mali lis ŋgòtse’ ŋkərə̀ə sə̀ Nwìi fagə̀ bwìŋ yà’a sə̀’, nə yè lɛ ŋkərə̀ nə̀ ŋgòtsòho bum sə̀ Nwì tsə̀’ fa ŋwè yà’ yi yà’a ntɛ̀ŋ. ²A ye-a ŋga ŋwə̀ nəmòk sə cèp bə ncèep lak sə̀ bwìŋ kà yà’ yukgə̀, ye də yi sə cèp mègù yà’sə bohòNwì. A vɛ’nə bʉ̀ʉsə̀ yi cu ŋgòcèep, ŋwə̀ nəmòok nə kà yusə̀ yi sə cèep sə yuk rɛɛ̀ŋ. Mʉ̀ sə dʉk ghà nə̀ yi nə cep bum sə̀ bwìŋ ka yà’ rɛɛŋ ŋga yi sə cèp bə ŋàaŋ Yòŋsə̀ Nwì yà’a. ³Nə ye sə̀’ də, ŋwə̀ nə̀ yi cèpgə̀ ye bum sə̀ Nwì tsòho fa yi yà’ yi nə, cèpgə̀ ye ŋgòtɛsə ye bwìŋ. Yi kwɛ’səgə̀ wo, nə sə fisə fa wo ntʉm bə̀boŋ. ⁴Ŋwə̀ nə̀ yi cèpgə̀ bum sə̀ Nwì tsòho fa yi yà’ yi nə cu ŋgòcèep, yà’ tɛsə bʉ̀ʉ cos wèŋ. Nə̀ yi cèpgə̀ ye ncèep lak sə̀ bwìiŋ kà yà’ yukgə̀ nə cu ŋgòcèep, yà’ sə tɛsə megu sə̀’ ni’ ye yiìyi. ⁵A ye-a bə və̀əm yàm, mʉ̀ dzəm ghak də wèeŋ cep lɛ bum sə̀ Nwì sə tsòho fa weŋ yà’ yi, bʉ̀ʉsə̀ tse’ ghak fàk zeŋ. Mʉ̀ dzəm də wèeŋ cep ncèep lak sə̀ bwìŋ ka yà’ yukgə̀ sə sə̀’. Mègù də yà’a bòghakgə̀ ŋga wo tsoho rɛŋsə fa bwìŋ yusə̀ wo cèp sə. A ye-a mʉmvə̀’ ànə fana yà’ tɛsə bʉ̀ʉ cos nə.

⁶Bwema am wèŋ, a dʉk-a də mʉ kɛ’ və ŋkɛ’ bohòwèŋ ŋga mʉ̀ sə cèp ncèep lak sə̀ bwìŋ sə kà yà’ yuk, a nə boŋ fo’ yà? Mʉ̀ də anə boŋ megu ŋga mʉ̀ tsə̀’ weŋ yumok sə̀ yà’a fi, kè tsoho rɛŋsə weŋ ŋkərə̀, kè tsoho fa weŋ bum sə̀ Nwì tsə̀’ fa mʉ yi, nə fa weŋ bə ntip ŋkuŋ yà’ boŋ àlaa. ⁷Wèeŋ kʉk ja’a na yàwèŋ sə̀’ bə bum sə̀ jì yòŋsə̀ co ndìŋgòm kè luŋ yè’e nɛ̀. A ye-a ŋga wo ka nà’ bə̀boŋ koksə tsərə, aco ŋwè yuk riŋ nsàp ŋkì nə̀ wo sə buk nə va? ⁸Nə ye sə̀’ dʉk də a ye-a ŋga ŋwə̀ nəmòk sə fʉəp ŋkʉ̀p də bwìiŋ tesə lo kə mak dzè’, yi kà nà’ mvə̀’nə fʉəp rì, aco ŋwə̀ nə̀ mò’fis tesə nà? ⁹Bum yè’sə zìnə bə ncèpcù nə̀ bwìiŋ cèpgə̀ nè’e sə̀’. A ye-a ŋga ŋwè sə cèp yumok yi kà yà’ rərɛŋ cèp fis fana yà’ mègù fʉ ntu’ù bwìŋ co fə̀fə̀ sə cà yi. ¹⁰Ncèep lak sə nzeŋgòŋ fɛɛŋ ŋkʉ̀ʉŋntɛ̀ŋ, wo cep nə̀ fòpwe’ ŋga wo sə cèp yumok nja. ¹¹Nə ye də a ye-a də ŋwèe cèp yà’, mʉ̀ kà yuk fana ŋgə̀ŋgà nə̀ yi sə cèp nə nə ye bohòmʉ̀ co ŋwè mvum. Mʉ̀ ye bwi bohòyi sə̀’ co ŋwè lakmvum. ¹²A bohòwèŋ sə̀’ vɛ’nə, wèŋ sə tà’ vɛ’ɛ wùriŋ də wèeŋ tse’ nsàap ŋàaŋ sə̀ Yòŋsə̀ Nwìi fagə̀ bwìŋ yà’a, wèeŋ lap mandzə̀ ŋgòfàk ghak lɛ bə sə̀ aco yà’ kuksə bʉ̀ʉ cos nə.

¹³Ye də ŋwə̀ nə̀ yi sə cèp-a bə ncèep lak sə̀ bwìŋ sə kà rɛɛŋ fana yi lɛŋ Nwì də nà’a gʉ yi ŋgòtsòho rɛŋsə fa bwìŋ yusə̀ yi cèp sə sə̀’. ¹⁴Bʉsə̀ ŋwè sə lɛŋ na bə nsàp dʉk lak ànə vɛ’nə, ye də yi sə lɛŋ sə ntʉʉ̀ yi, nə kà yusə̀ yi sə lɛŋ sə tsərə̀ rì. ¹⁵Ye də yusə̀ aco yi gʉʉ yu yà? Yi tse’ ŋgòlɛŋ bə nsàp mandzə̀ nə̀ co yòŋsə̀ ye rɛɛŋ bə zeŋ, nə lɛŋ bə nsàp mandzə̀ nə̀ co ntʉm ye rɛɛŋ bə zeŋ sə̀’. Yi yəm ŋkì bə dʉk lak nə̀ bwìŋ sə rɛɛŋ nə, nə yəm bə dʉk lak nə̀ bwìŋ sə kà rɛɛŋ nə sə̀’. ¹⁶Bʉsə̀ a ye-a ŋga wù sə lɛŋ kwasə Nwì bə dʉk lak nə̀ bwìŋ sə kà nà’ rɛɛŋ nə ŋga bʉ̀ʉ mok cu mʉkwe’è anə sə̀ wo ka bum cos ŋkʉ̀ʉŋ rì, aco wo dʉk də <<Yà’a ye vɛ’nə>> va, ŋga wo ka rɛɛŋ nɛ? ¹⁷Kàmòk ŋga wù sə lɛŋ kwasə bòŋsə Nwì vɛ’ɛ wùriŋ, yà’ kà bʉ̀ʉ mok sə wèŋ yàwo tɛsə̀. ¹⁸Bohòmʉ̀ yàm, mʉ̀ kwasə Nwì wùriŋ də mʉ cèpgə̀ ncèep lak sə̀ bwìŋ kà yukgə̀ yà’sə mʉ̀ nə casə weŋ pwe’. ¹⁹Nə ye də a ye mʉ cos fana boŋ ghak co mʉ̀ cep megu ŋgìi dʉk tàŋ sə̀ aco bwìŋ yuk yà’ nə teŋsə, nə noŋsə ŋgòcèp ŋgìi dʉk nduk nə̀ nduk sə̀ bwìŋ sə kà yà’ rɛɛŋ. Mʉ gʉ vɛ’nə ya mʉ yə’rə bʉ̀ʉ mok wèŋ yàwo sə̀’.

²⁰Bwema am wèŋ, wèeŋ cu ŋgòtsərə bum, wèŋ kà co bweŋke’ sə tsərə wo tsərə̀. A ye-a bə mandzə̀ nə̀ ŋgògʉ̀ bʉp, wèŋ ye co bweŋke’ ntɛ̀ŋ. Wèeŋ tsərə bum co bʉ̀ʉ sə̀ wo gʉ laŋ. ²¹Wo à còm nòŋsə yà’ ndzənə ŋwàk Nwì dʉk də,

<<Mʉ nə cep bohòbʉ̀ʉ am cùhù ŋkʉ̀ìŋ wèŋ sə̀ ncèep lak awo zok;

Nə ye də mʉ gʉ-a sə̀ vɛ’nə,

Bʉ̀ʉ am sə wèeŋ nə kà mʉ sə̀ yuk malì. Cèp yè’sə Tà Nwì.>>

²²Yà’sə sə nìtsə̀’ də, ŋgòcèp rì ncèep lak sə̀ bwìiŋ kà yà’ rìgə̀ə yusə̀ yà’ sə nì ŋàaŋ Nwì bohòbʉ̀ʉ sə̀ wo ka Nwì dzəm. Ŋgòtsòho bum sə̀ Nwì tsə̀’ fa ŋwè yi ye mvə̀k nə̀ nà’ sə nì ŋàaŋ Nwì bohòbʉ̀ʉ sə̀ wo dzəm Nwì. ²³Wèŋ tsərə də aco yà’ ye va, ŋga bʉ̀ʉ cos sə pwe’ nə kə be’lə-a, ndàaŋwè pwe’ sə cep bə dʉk lak nə̀ bwìŋ kà nà’ yukgə̀-ɛ̀? A dʉk-a də wo sə cèp vɛ’nə bʉ̀ʉ mok sə̀ wo ka bum cos ŋkʉ̀ʉŋ riŋ nə ye sə̀ wo pegè wèŋ kə tseŋ wo ŋga wo sə cèep, wo nə kà bʉ̀ʉ cos sə wèŋ də ŋgàa ŋaŋ to à? ²⁴A ye-a də bʉ̀ʉ yè’sə nə və ŋga wèŋ sə tsòho bum sə̀ Nwì tsə̀’ fa weŋ yà’ yi fana yà’a nə gʉ wo ŋgòyə bʉp awo sə̀ wo gʉ̀gə̀, wo riŋ yàwo sə̀’ də wo bʉ̀ʉ sə̀ bʉp bə tu awo. Bum sə̀ wo yuk sə pwe’ nə sak wo sə̀’. ²⁵Bum sə̀ wo tsərə swìhigə̀ yà’ pwe’ nə yəəŋ bohòwo jəja. Wo nə bʉhʉ sə nze, nə kuksə Nwì, nə sə cep fis də, <<Nwì cu mvwe’ yè’sə wenə wèŋ zìnə.>>

Gʉ̀ Bum Mʉ Cos Pwe’ Bə Mandzə̀ Nə̀ Kə̀kʉrə̀

²⁶Bwema am wèŋ, bum sə̀ a sə cèp yè’sə pwe’, aco a ləsə yà’ vɛ’ɛ. A ye ŋga wèŋ və̀ mʉ cos ŋgòkùksə Nwì fana ndàaŋwè pwe’ tse’ ŋgòfʉ̀hʉ bə yuye sə̀ yi nə gʉ. Mòok tse’ ŋkì, mòk tse’ yəyə’rə̀, mòk tse’ yumok sə̀ Nwì tsə̀’ fa yi yà’, mòk ye ye ŋgà cèp bə ncèep lak sə̀ bwìiŋ kà rɛɛŋ gə̀, nə ye bwi ŋga’a ŋwə̀ nə̀ yi nə tsoho rɛŋsə yusə̀ mòk nə cèp sə. Bum sə̀ wèeŋ gʉ yà’ pwe’, yà’a ye nsàp nə̀ co yà’ tɛsə cos nə. ²⁷Wèeŋ cu mʉ cos anə, bʉ̀ʉ sə̀ wo nə cep bə ncèep lak sə̀ bwìŋ kà yukgə̀ sə, wo kà bwìŋ ba kè tɛ’ àlɛ’ càsə̀. Wo cu ŋgòcèep, mòok cep wes ye ŋkuŋ mòk lokok cep ye. Wo cèp wes fana ŋwə̀ nəmòk ye tsoŋ nə̀ ŋgòrɛŋsə fa bwìŋ yusə̀ wo cèp sə. ²⁸A ye-a də ŋwə̀ nə̀ co yi rɛŋsə fa bwìŋ yusə̀ wo cèp sə bʉ̀ə̀ fana wo kà co bwìŋ yuk cèp fis. Wo cep megu mok sə və̀ə wo bohòNwì. ²⁹Bʉ̀ʉ sə̀ ŋgòtsòho bum sə̀ Nwì tsə̀’ wo yi kà ba kè tɛ’ sə̀’ càsə̀. Wo nə cèp sə̀’ mò’fis, mò’fis, fana bwìŋ sə yu’rə mpooŋ də yusə̀ wo sə cèp sə kə̀kʉrə̀ àlɛ. ³⁰A ye-a ŋga ŋwə̀ nəmòk sə tsoho bum sə̀ Nwì a tsə̀’ fa yi fana mòk dʉk mʉŋgorə̀ anə də Nwì tsə̀’ ko’ fa yi yumok fo’ ghà ànə fana wèŋ gʉ co ŋwə̀ nə̀ mantombì nə teŋsə, nə fa ŋwə̀ ànə mandzə̀, ³¹fana aco wèŋ pwe’ tse’ mandzə̀ ŋgòtsòho mò’fis mò’fis. Bwìŋ pwe’ nə yə’rə jəŋ yumok fo’, nə sə jaha lo bə zeŋ. ³²Ŋwə̀ nə̀ yi tse’ ŋàaŋ sə̀ ŋgòtsòho bum Nwì, tse’ ŋàaŋ sə̀ ŋgòdə yi nə cep ŋga’a bə sə̀ də yi teŋsə ŋgòcèep sə̀’. ³³A vɛ’nə bʉ̀ʉsə̀ Nwì nə̀ yi a fa wo ŋàaŋ yà’sə, yi Nwì nə̀ yi kà bum sə̀ ŋgòye kɛ’cà nduk, nduk yè’e dzəmgə̀, yi dzəm ye fifi.

Mvə̀’nə̀ yà’ cu mʉ cos bʉ̀ʉ Nwì pwe’ vɛ’nə fana, ³⁴a bohòbə̀ba wèŋ vɛ’nə də wo kà cù mʉ cos cèp. Wo tse’ ŋgòcu dədok mvəsə̀ ŋwàk lʉ̀k Musì sə dʉk. Wo yuk bohòmbəmbam. ³⁵A ye-a ŋga wo tse’ yumok ŋgòfek, wo fek ndum awo la’à, bʉ̀ʉsə̀ yà’ sə yəəŋ co a marè’tu bohòŋwàŋwè ŋgòcèp fis ŋgì ye mʉ cos. ³⁶Wèeŋ dʉk-a də ka zìnə yeŋ, wèŋ riŋ də nzak Nwì à ka bohòwèŋ yeto, nà’a nə̀ kà bohòwèŋ sə̀’ lə̀. ³⁷A ye-a ŋga ŋwə̀ nəmòk dʉk də yi ŋgà tsòhòbum Nwì kènə də yi tse’ nsàp ŋkərə̀ mòk nə̀ Yòŋsə̀ Nwìi fagə̀ bwìŋ sə̀’ yi àlɛ’, yi nə rɛɛŋ də bum sə̀ mʉ̀ sə còm fa weŋ yè’e yusə̀ Tà a dʉk vɛ’nə yi. ³⁸Ŋwə̀ nəmòok kà-a də a zìnə dzəm, wèŋ kà yi ye sə̀’ dzəm fa.

³⁹Ye də bwema am wèŋ, wèeŋ lap mandzə̀ gʉgʉŋ ŋgòtsòho bum sə̀ Nwì tsə̀’ weŋ yà’ yi. Kà də wèeŋ dʉk də bʉ̀ʉ sə̀ wo sə cèp ncèep sə̀ bwìŋ kà yà’ yukgə̀ yà’a kà mok sə cep dʉk. ⁴⁰Wèeŋ gʉ-a sə̀ yà pwe’, wèŋ gʉ lɛ bə mandzə̀ nə̀ yà’a ye bə̀boŋ nə ye fəfom.

Wèeŋ Sə Tsərə Ntirə̀ Nə̀ Bə̀boŋ Nə

¹Bwema am wèŋ, mʉ tsok fe’lə fa weŋ Ntirə̀ nə̀ Bə̀boŋ nə̀ mʉ̀ ànə tsok to weŋ nə, ya wèeŋ kà swì. Wèŋ ànə dzəm nà’ laŋ, nə sə kotse’ malì nə nà’ cʉ̀k. ²A sə̀’ zeŋ nə̀ nà’ sə luŋsə weŋ. Wèŋ sə kotse’ malì Ntirə̀ nə̀ Bə̀boŋ nə cʉ̀k mvəsə̀ mʉ̀ à tsə̀’ weŋ nà’ sə à? Ka-a vɛ’nə yeŋ, ye də wèŋ ànə dzəm basə wà. ³Bum sə̀ mʉ̀ ànə yə’rə weŋ yà’a, a bum sə̀ Jisòs Krɛst ànə tsok mʉ yi. Yu nə̀ gʉgʉŋ nə̀ mʉ̀ ànə tsok fa weŋ nə də, Jisòs Krɛst à kpʉ bʉ̀ʉ bʉp avès mvə̀’nə̀ ŋwàk Nwì à dʉk də yi nə kpʉ sə. ⁴Wo à tuuŋ yi, yi lokok nùmbu nə̀ tɛ’ sə̀ mvə̀’nə̀ wo ànə com noŋsə ndzənə ŋwàk Nwì. ⁵Mvə̀’nə̀ yi ànə lokok mvwe’ kpʉ, Pità à yə yi. Ghà mòk à ye ŋgàa fàak ye sə̀ hum-ncòp-ba sə wèŋ ye yi sə̀’. ⁶Ghà mòk à ye sə̀’ nə̀ yi ànə yəəŋ bohòbʉ̀ʉ mok sə̀ wo à sə yù yi. Bʉ̀ʉ yè’sə à càsə bwìŋ ŋkʉ̀ tàŋ laŋ sə̀ wo à yə yi kɛ̀’ mò’fis. Bʉ̀ʉ sə̀ wo à yə yi yè’sə, ma nə̀ ghaŋ cu mali ŋwəm. ⁷Mvə̀k mòk à ye Jem ye yi sə̀’, ŋgàa ntum ye sə pwe’ ye fe’lə yi sə̀’. ⁸Mvə̀k nə̀ yi à yəəŋ lə̀sə, à ye mvə̀’nə̀ yi ànə yəəŋ bohòmʉ̀. Yi à yəəŋ bohòmʉ̀ nə̀ mʉ yàm co mo nə̀ wo à dzə yi ŋga ŋwə̀ nəmòk ka riŋ də wo nə dzə mwe riŋ. ⁹Mʉ̀ ànə sə fa bʉ̀ʉ Nwì ŋgə’, ye də mʉ̀ jə’rə càsə ŋgàa ntum Jisòs pwe’ mʉ̀. Aco mʉ̀ dʉk də mʉ̀ ka yàm kə̀kʉrə̀ co wo to mʉ də mʉ ŋgà ntum ye mòk yeŋ. ¹⁰A gʉ̀ bòvə̀m nə̀ Nwì ŋkuŋ mʉ̀ ye nsàp ŋwə̀ nə̀ mʉ ŋga’a ènə. Bòvə̀m ye nə̀ yi à nì fa mʉ nə à ka wà maha. Mʉ̀ dʉk vɛ’nə bʉ̀ʉsə̀ mʉ̀ a fàk wùriŋ nə casə ŋgàa ntum mok sə pwe’ mʉ̀. Yè’sə ka bə ŋàaŋ sə̀ yàm yeŋ, bə̀bo ye nə à sə fàk ndzə ni’ì mʉ̀ anə yi. ¹¹Ye də a ye-a sə̀ mʉ̀ kè wo àlɛ’, vès sə tsoho mègù ntirə̀ nə̀ mò’fis nə. A sə̀’ zeŋ nə̀ wèŋ a dzəm nə.

Mamfenə̀ Bə Nzak Lòkok Mvwe’ Kpʉ

¹²Ntirə̀ nə̀ vès sə tsoho nə də Jisòs à lòkok mvwe’ kpʉ. Ye ŋga’a va ŋkuŋ mok mʉŋgorə̀ wèŋ sə dʉk də, kaco ŋwè lokok mvwe’ kpʉ yeŋ-ɛ? ¹³A ye-a də kaco bwìŋ lokok mvwe’ kpʉ yeŋ, ye də yà’ sə nì də Jisòs à ka mvwe’ kpʉ sə̀’ lokok. ¹⁴A ye-a də Jisòs à ka mvwe’ kpʉ lokok fana ye də tsə̀tsòhònə̀ vès sə tsòho nə nà’a wà. Yà’ ye sə̀’ də mʉmvə̀’nə̀ wèŋ sə də wèŋ sə naaŋ tu bohòJisòs sə yà’a wà. ¹⁵Yà’ ye sə̀’ də vès sə cì’ fa Nwì mvwès də yi à lòkoksə Jisòs Krɛst mvwe’ kpʉ, bʉ̀ʉsə̀ kaco yà’ ye zìnə yeŋ ŋga bwìiŋ kà-a mvwe’ kpʉ lòkokgə̀ na. ¹⁶A ye-a vɛ’nə, ye də Krɛst à ka mvwe’ kpʉ lokok. ¹⁷A ye-a zìnə də Jisòs à ka mvwe’ kpʉ lòkok fana ye də a ye-a ŋga wèŋ naaŋ tu bohòyi, yà’ kà fàk tse’. Wèŋ cu malì gù yà’sə sənə bʉp awèŋ mvə̀’nə̀ à ye. ¹⁸Ye sə̀’ də bʉ̀ʉ sə̀ wo à dzəm bohòJisòs nə kpʉ lo yà’a, à bisə sə̀’ wà. ¹⁹A ye-a də yusə̀ a sə naaŋ tu də Jisòos nə tɛsə ves bə zeŋ sə mègù bum sə̀ sə nze fɛɛŋ, ye də bwìŋ koksə manziŋ bohòvès nə casə yà pwe’fo’.

²⁰Zìnə nə də, Jisòs Krɛst a lòkok mvwe’ kpʉ anə laŋ. Yà’ sə nìtsə̀’ yà’sə də bʉ̀ʉ sə̀ wo à dzəm bohòJisòos nə̀ lòkok mvwe’ kpʉ sə̀’. ²¹Kpʉʉ və̀gə̀ bohòbwìŋ bʉ̀ʉ yusə̀ ŋwə̀ nə̀ mò’fis, Adàm, à gʉ̀ʉ fana a sə̀’ vɛ’nə də bwìiŋ nə lokok mvwe’ kpʉ bʉ̀ʉ yusə̀ ŋwə̀ nə̀ mò’fis, Krɛst, à gʉ̀ sə̀’. ²²Yà’ mègù sə̀’ də bwìiŋ kpʉgə̀ njo nə̀ wo ŋgwì bʉ̀ Adàm fana a sə̀’ vɛ’nə də bwìiŋ nə lokok mvwe’ kpʉ, nə tse’ lùŋ sə̀mok bʉ̀ʉsə̀ wo à bʉ̀ʉŋ bʉ̀ʉ Jisòs Krɛst. ²³Nə̀ fòpwe’ nə tse’ mvə̀k nə̀ nje zok. Jisòs a nìtsə̀’ to mandzə̀ nə yi. Ghà nə̀ yi bwì və̀ə, bʉ̀ʉ ye wèeŋ nə lokok yàwo sə̀’. ²⁴Yà’a ŋga’a ghà nə̀ bum lə̀ə. Mvə̀k ànə dzèeŋ, Jisòs Krɛst nə jəŋ ŋàaŋ ŋkəŋkum pwe’, nə təəŋ megu mok yi. Fana yi nə jəŋ yà’, nə fa yà’ bohòtɛ̀’ ye Nwì. ²⁵Yi nə jəŋ dzòho ŋkum yi tə̀tè kə dzeŋ ghà nə̀ Nwìi nə gʉ yi ghak bʉ̀ʉ sə̀ wo bɛ̀ŋgə̀ yi pwe’fo’. ²⁶Kpʉ ye sə̀’ ŋwə̀ nə̀ yi bɛ̀ŋgə̀ Jisòs. Yu nə̀ Jisòos nə̀ gha’ lə̀sə nə, a kpʉ. ²⁷Ŋwàk Nwì dʉk də,

<<Nwì a jə bum pwe’ nə̀ pwe’,

nə noŋsə sə ŋki’ì yi fana yi nəŋtes kù mbwa.>>

A dʉk də yi nəŋtes bum pwe’ fana a riŋ də yi ka Nwì nəŋtes, bʉ̀ʉsə̀ Nwì nòŋsə bum yè’sə pwe’ sə ŋki’ì Krɛst yi. ²⁸Ghà nə̀ Nwìi noŋsə wes bum pwe’ sə ŋki’ì Jisòs Krɛst fana Jisòs nə̀ yi mo Nwìi nə noŋsə ni’ ye sə ŋki’ì Nwì sə̀’. Yi nə gʉ vɛ’nə ya Nwìi ye ŋwə̀ nə̀ də ŋwə̀ nəmòok mok bʉ̀ə̀.

²⁹Weŋ bàptɛsəgə̀ bʉ̀ʉ mok mvwe’ kùu bʉ̀ʉ sə̀ wo à kpʉ laŋ. A ye-a zìnə də bwìŋ kà mvwe’ kpʉ lòkokgə̀, wo sə bàptɛsə yiskok ŋwə̀ nəmòk mvwe’ kùu mòk bʉ̀ʉ yà? ³⁰Ma nə̀ njàvès, njo nə̀ vèes gʉ̀gə̀ fàak Nwì mvwe’ sə̀ co kpʉ ko ves fo’ nùumbu lòoŋ, nə kà teŋsə̀ə yè’e bʉ̀ʉ yà? ³¹Mʉ̀ mègù yàm ŋgà kpʉ nùumbu pwe’, bwema am wèŋ na. Yà’sə mègù zìnə mvə̀’nə̀ a sə̀’ zìnə də mʉ̀ sə kwa də wèeŋ bʉ̀ʉ Jisòs Krɛst nə̀ yi Tà àvès. ³²Ŋgə’ nə̀ mʉ̀ a yə mvwe’ lak Efesòfɛɛŋ a mègù co də mʉ̀ sə lʉ̀ ves nàamŋgaŋ wèŋ. Mʉ̀ a sə gʉ̀-a yè’sə də ya bwìiŋ kwasə mʉ, ye də swe’e yàm sə ca yà? A ye-a də bwìiŋ nə kà mvwe’ kpʉ kə lòkok bwɛ̀rɛ mʉ̀ dʉk də vesùwèeŋ zʉ roŋ ni’ mvèsə̀, bʉ̀ʉsə̀ a zòŋ a kpʉ lo yu avès. ³³Kà də ŋwə̀ nəmòok borə weŋ dʉk. Wèeŋ gì be’lə-a weŋ bʉ̀ʉ sə̀ bʉp wèŋ fana wo nə gʉ bʉpsə weŋ sə̀’. ³⁴Wèeŋ jəŋ ŋkərə̀, nə kà bum ləm sə gʉ̀. Wèeŋ me’rə ŋgògʉ̀ bʉp sə̀’. Gʉ̀ co bʉ̀ʉ mok cu mʉŋgorə̀ wèŋ sə̀ wo ka yumok bə ma nə̀ Nwì riŋ lok. Mʉ̀ sə cèp yè’sə də ya marè’tu ko weŋ.

Nsàp Ŋgùpni’ Nə̀ Fi

³⁵Kàmòk aco ŋwə̀ nəmòk fek də aco bwìŋ lokok fe’lə mvwe’ kpʉ sə̀mok yè’sə valɛ? Nə ye sə̀’ də wo nə tse’ yè’sə nsàp ŋgùpni’ nə̀ fòlɛ? ³⁶Ləm a yè, wu bì-a ŋgwì yumòk, kaco nà’ to ŋga nà’ ka kpʉ yeŋ. ³⁷Ŋwèe bì ŋgwìi sə ŋga a ye-a sə̀ gòmbì kè nzaŋ àlɛ’ pwe’. Yi nə kà kàa sə bì. ³⁸Ŋgwìi yà pwe’ sə̀ yà’a togə̀ə, Nwìi fagə̀ yà’ nsàp ni’ nə̀ yi dzəm də yi fa yà’. ³⁹A mègù-a sə̀ bum sə̀ yà’ tse’ ndʉəm yè’e pwe’ yà’ ka nsàp njàp nə̀ mò’fis tse’. Nə̀ ŋwèe zok, nə̀ nàm sə̀’ zok, swiŋ ye sə̀’ zok, nə ye də fuk sə̀’ zok. ⁴⁰Bum sə̀ ma mʉbu bə sə̀ sə nze sə̀’ zəzok. Sə̀ ma mʉbu fomgə̀ zok, sə̀ sə nze sə fom sə̀’ zok. ⁴¹Nùum togə̀ zok, ŋwə sa sə̀’ zok fana ŋkə̀ŋkàŋ rɛɛŋ sə̀’ zok. Nə ye sə̀’ də ŋkə̀ŋkàaŋ sə kà pwe’ yəyərə̀ rɛŋgə̀. ⁴²Ni’ bwìiŋ nə̀ ye sə̀’ vɛ’nə ghà nə̀ wo lokok mvwe’ kpʉ. Wo à tuuŋ ni’ nə̀ nà’a bìgə̀ə, nà’a lokok, nà’ ye mok ni’ nə̀ nà’a nə kà mok bì yuk. ⁴³Wo tuuŋ nà’ ŋga nà’ tse’ nsəsə̀ nə̀bʉp nə ye jì ŋàŋ. Nà’a lokok, nà’ tse’ nsəsə̀ nə̀ bə bòoŋ Nwì, nə tse’ ŋàŋ. ⁴⁴Wo tuuŋ nà’, ŋga nà’a ŋgùpni’ nə̀ sə nze fɛŋ. Nà’a lòkok, ŋga nà’a mok nsàp ni’ nə̀ ma mʉbu. A ye-a də ni’ mòok yo nə̀ nà’a kə̀kʉrə̀ ŋgòye sə nze fɛŋ fana ye də ni’ mòok sə̀’ yo nə̀ nà’a kə̀kʉrə̀ ŋgòye mʉbu anə sə̀’. ⁴⁵Yà’a mʉmvə̀’nə̀ wo à còm yà’ ndzənə ŋwàk Nwì vɛ’nə də, <<Adàm nə̀ mantombì ànə kə̀ ye ŋwʉm. Adàm nə̀ ba, Krɛst, nə̀ yi lə̀sə yi nə, à kə̀ ye ye yòŋsə̀ nə̀ ŋgà gʉ̀ bwìŋ ŋgòye ŋwʉm.>> ⁴⁶A yə də à və̀ to mantombì ni’ nə̀ nà’a kə̀kʉrə̀ ŋgòye sə nze fɛŋ nə ŋkuŋ nə̀ yi kə̀kʉrə̀ ŋgòye mʉbu nə və. Nə̀ yi kə̀kʉrə̀ ŋgòye mʉbu nə a və̀ ye maŋkwɛ̀ŋ.

⁴⁷Wo à gʉ̀ Adàm nə̀ mantombì nə ye bə ncàk sə nze fɛn, nə̀ maŋkwɛ̀ŋ nə à tsooŋ ye mʉbu. ⁴⁸Adàm nə̀ mantombì nə sə nìtsə̀’ mvə̀’nə̀ nsàp bʉ̀ nə̀ sə nze cu. Nə̀ maŋkwɛ̀ŋ nə sə niŋtsok ye mvəsə̀ nsàp bʉ̀ nə̀ ma mʉbu cu sə̀’. ⁴⁹Vesùwèŋ sə̀ a tse’ ŋga’a nsəsə̀ə ŋwə̀ nə̀ Nwì ànə gʉ bə ncàk yè’sə nə̀ ye ntsə’mòk co ŋwə̀ nə̀ yi à tsə ye ma mʉbu nà’a.

⁵⁰Bwema am wèŋ, yusə̀ mʉ̀ ànə sə cèp sə pwe’fo’ də vɛ’. Kaco ŋgùpni’ nə̀ nà’a nja njàp bə ndʉəm nè’e ye kə̀kʉrə̀ ŋgòkə̀ cu mvwe’ sə̀ Nwì cu ŋkum fo’ yi yeŋ. Kaco yusə̀ yà’ a lə̀gə̀ə kə tse’ yusə̀ yà’a kà lə̀gə̀ yeŋ.

⁵¹Yèè, mʉ tsok fa weŋ yumok sə̀ yà’a sə̀swihì. Vesùwèeŋ nə̀ kà pwe’fo’ kpʉ wes, vesùwèeŋ nə̀ kupsə wes pwe’. ⁵²Yà’a nə̀ ye mègù vak co ŋwè cap lis ŋga mè tè. Mvə̀k nə kə̀ lə̀ə, ŋga ndoŋ ceep fana bʉ̀ʉ sə̀ wo à kpʉ laŋ nə lokok to ntòwo bə nsàp ni’ nə̀ nà’a nə kà mok kpʉ yuk. Nà’a ŋga’a ghà nə̀ a nə kupsə yàvès sə̀’. ⁵³Bʉsə̀ ni’ avès sə̀ yà’a kpʉ bʉpgə̀ yè’e nə̀ bʉ̀ʉŋ tsoŋ nsàp nə̀ kaco yà’ kpʉ bʉp fe’lə mok yeŋ. ⁵⁴Ghà nə̀ bwìiŋ kupsə mè vɛ’nə fana yusə̀ wo à còm ndzənə ŋwàk Nwì yà’a nə bʉʉŋ və zìnə də,

<<Wo gha’ kpʉ, nə mi bisə yi co wo mì bɛŋ ŋkpʉ̀ pìip.

⁵⁵Ho’ kpʉ, ghak fe’lə-ɛ bwìŋ sə̀mok ɛ̀.

Ho’ kpʉ, nzə̀ yònə̀ wu tagə̀ bwìŋ bə zeŋ nə ŋga’a fò?>>

⁵⁶Kpʉ tagə̀ bwìŋ bə nzə̀ ye bʉ̀ʉ gʉ̀ bʉp. Bʉp jəgə̀ ŋàaŋ ye bohòlʉ̀ʉk Nwì. ⁵⁷A ye-a sə̀’ vɛ’nə, fana a kwasə Nwì, yi nə̀ yi a fa ves ŋàŋ bohòTà Jisòs Krɛst ŋgòghak kpʉ bə zeŋ. ⁵⁸Nə̀ wèŋ rì də bum yè’sə vɛ’nə fana wèeŋ təəŋ gʉgʉŋ, nə kà sə tsòhò. Wèeŋ gʉ fàha Tà nùumbu pwe’ bə ntʉʉm awèŋ lòoŋ, bʉ̀ʉsə̀ wèŋ rì də fàha sə̀ wèŋ sə gʉ̀ fa Tà sə kà wà cà, bwema am wèŋ na.

Mandzə̀ Nə̀ ŊgòFʉ̀hʉ Fəfa

¹Mʉ̀ də mʉ cep ŋga’a bə nzak mbàam sə̀ wo nə tɛsə bʉ̀ʉ Nwì sə̀ mvwe’ nzeŋgòJùdiyà bə zeŋ yà’a. Wèŋ tse’ ŋgògʉ̀ yusə̀ mʉ̀ ànə tsok fa bʉ̀ʉ cos mvwe’ lak Gàlesiyà ŋgògʉ̀ yà’a. ²Yusə də nùumbu Sondè pwe’ ndàaŋwè pwe’ nə sə cokfis noŋsə mbàam mok. Ŋgà ghàak fa co ŋgà ghàk, ŋgà jìŋ fa sə̀’ co ŋgà jìŋ. Wèeŋ loksə yà’ vɛ’nə, ya mʉ və̀ə, ŋga wèŋ benə wes yà’ laŋ. ³Mʉ kə̀ dzèeŋ, mʉ̀ com fa bʉ̀ʉ sə̀ wèŋ dzəm də aco wo lo sə wèŋ ŋwàk ndzə bohò. Nə fa wo mbàam sə ya wo jəŋ lo yà’ Jòrosalèm mvwe’ nze Jùdiyà anə. ⁴A ye-a ŋga bògha’ co vesi wèŋ lo bəbɛ’ fana vesiwèŋ lo sə̀ ntɛ̀ŋ.

Pol Fʉ̀hʉ Gì Ye

⁵Mʉ nə və ŋgòkə̀ yə weŋ ŋga mʉ̀ cà to ntòmvwe’ lak Màsìdoniyà ŋkuŋ. Mʉ̀ dʉk vɛ’nə bʉ̀ʉsə̀ mʉ nə ca və ma mandzə̀ Màsìdoniyà anə. ⁶Kàmòk mʉ nə cum vesùwèŋ mweè sə̀sap ntɛ̀ŋ. Kàmòk ŋwʉ mbʉ̀ŋ yà’a pwe’ nə ca ŋga mʉ̀ cu vesùwèŋ. Yà’a mèe, wèŋ tɛsə mʉ ŋgòlòmali mantombì ma nə̀ mʉ nə dzəm ŋgòlòo pwe’. ⁷Mʉ̀ ka dzəm də mʉ və̀ə, vesùwèŋ cepsə megu mʉtsə̀ mʉ̀ ca lo dzəm. Mʉ̀ sə tsəm də a ye-a ŋga Tà fa-a ŋàŋ, vesùwèŋ cum mvə̀k sə̀sap ntɛ̀ŋ. ⁸Megu də mʉ nə cum mali mvwe’ lak Efesòfɛɛŋ tə̀tè ŋkàha Pentekòs kə dzeŋ ŋkuŋ mʉ̀ və. ⁹Bʉ̀ʉsə̀ mandzə̀ a mùhu bohòmʉ̀ wùriŋ ŋgòtsòho ntirə̀ nə̀ bə̀boŋ, fana bwìiŋ ŋkʉ̀ʉŋ sə̀ wo sə bɛ̀ŋ nà’.

¹⁰A ye-a ŋga Timatì kə̀ tsèŋ weŋ, wèŋ gʉ yi co yi riŋ də wèŋ kwa də yi və bə̀boŋ. Mʉ̀ dʉk vɛ’nə bʉ̀ʉsə̀ yi sə fàk mègù sə̀’ bohòTà mvə̀’nə̀ mʉ fàkgə̀ə. ¹¹Ŋwə̀ nəmòok kà də yi kʉk yi co mʉmweŋke’ wà dʉk. Wèeŋ tɛsə yi ŋgòlòmantombì bə gì ye nə bə fifi, ya yi kə tseŋ fe’lə mʉ fɛn. Mʉ̀ sə kʉ̀k də yi nə kə wɛs fɛɛŋ bə krətèeŋ mok yà’a bəbɛ’.

¹²A ŋga’a ma nə̀ moma àvès Àpolò. Mʉ cèpgə̀ bohòyi səsa də yi kə kɛ’ cepsə weŋ bə bwema mok yà’a wèŋ. Megu də ka sə ntʉʉ̀ yi co yi lo ŋga’a yè’e ntòbʉʉŋ. Ghà nə̀ yi tse’ mvə̀k nə ntsə’mòk, yi nə lo li.

¹³Wèeŋ kà ni’ swì, fa ntʉm awèŋ bohòJisòs gʉgʉŋ. Wèeŋ ko ntʉm, nə kà wʉə sə koksə̀. ¹⁴Wèeŋ sə gʉ fàak awèŋ pwe’ bə dzədzəm.

¹⁵Wèŋ rì nzak Stìfanà bə ndap ye pwe’-e laŋ, yà’a wo sə̀ wo à bʉ̀ʉŋ to krətèŋ mvwe’ lak Gris wo. Wo a fa ni’ awo ŋgògʉ̀ fàk bohòbʉ̀ʉ Nwì wèŋ. Bwema am wèŋ, mʉ̀ lɛŋ weŋ vɛ’ɛ wùriŋ, ¹⁶də wèeŋ yuk bohònsàp bʉ̀ ànə. Nə yuk bohòŋwə̀ nə̀ yi sə̀ ndà ŋga yi sə fàk be’lə bə yà’wèŋ. ¹⁷Mʉ̀ kwa wùriŋ mvəsə̀ Stìfanà bə Fòtùnatù nə ye Àkayikù wèŋ a kə̀ tsèŋ mʉ yè’e. Vesiwèeŋ cu, gʉ co mʉ cu vesùwèŋ. ¹⁸Wo gʉ̀gə̀ mʉ, mʉ̀ sə kwa sə̀’ mvə̀’nə̀ wo gʉ̀gə̀ weŋ wèŋ sə kwa yà’a. Vesùwèeŋ kotse’ nsàap bʉ̀ʉ sə̀ co wo yè’sə bə̀boŋ.

Cə̀cepsə̀

¹⁹Bʉ̀ʉ cos sə̀ mvwe’ nzeŋgòƐsiyà yà’a cèpsə weŋ pwe’ bə̀boŋni. Àkwilà bə Prìsiliyà nə ye bʉ̀ʉ sə̀ wo nigə̀ cos mʉnda’à wo yà’a cepsə weŋ pwe’ mʉnə liŋ Tà Jisòs. ²⁰Bwema sə̀ wo cu fɛŋ pwe’fo’ cèpsə weŋ sə̀’ bə̀boŋ. Wèeŋ ko wumsə gesə mòk bə mòk ndzə ŋgùu, nə cepsə wo bə̀boŋni. ²¹Còm yè’e mʉ̀ bə bo am. Mʉ̀ʉ Pol, mʉ̀ cèpsə weŋ. ²²Ŋwə̀ nə̀ yi ka Tà dzəm, ŋga yi ye-a sə̀ ndà, ndòbɛ’ yi. Tà àvès və̀ə! ²³Bə̀bo nə̀ Tà Jisòos ye bohòwèŋ lòoŋ. ²⁴Mʉ̀ dzəm weŋ pwe’fo’, bʉ̀ʉsə̀ vesùwèŋ nə ye Jisòs Krɛɛst mvwe’ mò’fis.