Tito

Tito

Tito a na waheta tä simöpalö noai ĩ ta

Tito a hai, juteu tä pasi mai, ĩ a. Jesus a thapo wi ĩ a kupalo nö, Paulo a nokapalo kuköma, a pasilipotima. A pasilipoti tä, Jesus ta wäsä naitioma. Ĩ na tä kua tä, Köteeta tä uli pata ha Paulo a, Tito a, ĩ na kilii töpö kalipalo waikioma maaki, ‑Tä tomöpo mi soai, Tito anö ĩ tä topama haiopöö!‑ Paulo a pi kuu salo, Köteeta tä uli ha Tito a takölöma. A takölö nö, hi waheta tä sãökökö nö, ‑Sai pö kuo hätäho pamö Jesus a thapo wi ĩ töpö na töpö patamo wi, ĩ pata töpö thaa hätäha hailalöö!‑ ĩ na Tito a noa thama.

Ĩ na Tito a noa thaa nö, ‑Kawanö toitai wa tä thaa sinomoö! Toitai wa tä thaa sinomoö ha, ai töpönö wa uöma nö, toitai tä thaa naio kitä. Wanisala tä thaa hãkikio ti! Teusö a na ai wa töpö pi hatukupama tä, wa ta wäsä holisimo mai, wa suasimo mai, ĩ na wa kua totihoö!‑ ĩ na Paulo anö tä sãököpalö nö, ĩ na a kuuma.

Ĩ na tä kua tä, Teusö anö makö täapa kõo läo wi, hi waheta tä na Paulo anö ĩ ta katehama. ‑Toitai ma tä thaa pola tä kuno mai, wanisala ma tä thaa päla tä maaki, Teusö anö makö pi ipa päo salo, makö konöma. Teusö anö makö konöpö, kama õsi kua tolele ĩ a simönöma. A simöni ha, ĩ anö makö õsi salupalöma. Makö õsi salupalöma kutenö, Teusö ulupö makö pewö thapalö nö, makö õsi tikopöpalöma‑ Paulo a kuuma.

¹Paulo sa. Teusö anö sa kalipalama sinomo wi, ĩ sa. Jesus Cristo anö sa simönö noai, ĩ sa. Teusö anö töpö sailö noai, ‑Teusö a pitili‑ Jesus anö ĩ na ĩ töpö pi thama pia salo, sa simönöma. Teusö ta pitilii, ĩ tä na ĩ töpö pi hatukupamani pia salo, sa simönöma. Töpö pi hatukupamani wi, ĩ töpönö pitili ta hini totioma, ĩ töpö Teusöpöa päpaso kitä. Toitai tä thaa sinomoti wi, ĩ töpö kupaso kitä. ²‑Sa õsi palimia waikipasoma salo, Teusö a na sa kuo soatio kitä‑ tä kuu wi, ĩ na Jesus anö ĩ töpö pi thama pia salo, sa simönöma. Sutu ha, hi masita tä uli thaa paio mi tä, Teusö a holisimo mi ipii, ĩ aiki, ‑Sanöma sa töpö õsi palimipamani kitäö!‑ ĩ na sutu ha, ĩ na Teusö a kuu nö, ³tä tetea apöpasoma tä, ‑Peiö! Hukikiö!‑ Teusö a pi kuu nö, ‑“Teusö anö sanöma makö õsi palimipamani kitäö!” tä kuu wi, huki ĩ sa ta hasulupama pia kuleö! Kamisa kai a wäsäpö, huki ĩ ta hasulupama pia kuleö!‑ ĩ na Teusö a pi kuuma. Ĩ na a pi kuu nö, Teusö anö makö täapa kõo läo wi, ĩ aiki, ‑Sa kai a wäsä sinomoö!‑ ĩ na Teusö anö sa noa thama.

⁴Tito ai. Kawa na hi waheta sa tä simöni ke. Kamisamakönö Jesus sama thapo kua wi na, ĩ na kamisanö wa thapamanöma kutenö, kawa hai, ĩ ipa ulu wa totiwö. Kamakö hai ĩ pö̃ Teusö a, Jesus Cristo anö makö täapa kõo läo wi ĩ a, ĩ na kilii töpönö wa totiapala nö, wa pi topapalama apa nö, ĩ na ĩ töpö kuapököö!

Jesus a thapo wi ĩ töpö na a patamo wi, ĩ na ĩ a kuaö

⁵Tito ai. ‑Makö kalipalo waikioma maaki, tä tomöpo mi soai, Tito anö ĩ tä topama haiopöö!‑ sa pi kuu salo, Köteeta tä uli pata ha wa takölö kipili. Wa takölö nö, ‑Sai pö kuo hätäho pamö Jesus a thapo wi ĩ töpö na töpö patamo wi, ĩ pata töpö thaa hätäha hailalöö!‑ ĩ na wa noa thaa kipili. ⁶‑Ĩ a wani tomöpo mi thali‑ töpö kuu tä, a tomöpo mi ha, ĩ a hai, pata tä thapa ti! Tä husopö wani samiati tä kuno mai, ĩ pata tä thapa ti! Ai töpö aiki, ‑Kama hai ulu töpö wanisala sipa apaö. Pata töpö hini mi ipö‑ ĩ na ai töpö kuu tä, ĩ pö̃ a hai, pata tä thapa ti! Kama ulu töpönö Jesus a thapo wi ĩ töpö hai ĩ pö̃ a hai, pata tä thapa sisaaö! ⁷Pata tä hai, Jesus a thapo wi ĩ töpö na a mamo läpalo sinomo wi, Teusö a na ĩ a kalipalo sinomo kutenö, a totiatalo opati kitä. Önö kutenö, pata tä kupo pia wi, ĩ a tomöpo mi kutenö, ‑Ĩ a wani tomöpo mi‑ ĩ na ĩ anö ai töpö pi thamaö ha, ĩ a hai, ĩ pata tä kupo mai kitä. Jesus a thapo wi ĩ töpö na a mamo läapalo sinomo wi, ĩ aiki, ‑Kamisa pi tao opa asa sisaö. Ai töpö pi tao mi pasiwö‑ ĩ na ĩ a pi kuu maapökö. A hĩsoatalo mi, a polemo mi, a waitilimo mi, wani tä pi ipa mi, ĩ na Jesus a thapo wi ĩ töpö na a mamo läapalo sinomo wi ĩ a kupasopö, ĩ na ĩ a kua kitä. Ĩ na a kua mi tä, ĩ a hai, pata tä thapa ti! ⁸Jesus a thapo wi ĩ töpö na a mamo läapalo sinomo wi, ĩ anö hama töpö ösö potehea läatalama sinomoö. Ĩ anö toitai tä pii sinomo sisaö. A pi mosaiapalo sinomo opaö. Wanisala tä thatala mi ipii, Teusö a na ĩ a topa apaö. Hiopö tä na a noamo sapao opaö. Ĩ na Teusö a thapo wi, ĩ pata tä kupo pia wi, ĩ na a kuaö. ⁹Pata tä kupo piale, ĩ a hai, pitili sama ta wäsä sinomo wi, ĩ tä ha a pi luluopököö! Ĩ tä ha a pi luluo nö, ĩ anö ĩ ta wäsä nömöo nö, ‑Ĩ naköö! Ĩ na wa kua totiopököö!‑ ĩ na ĩ a kuu tao opa kitä. Ai töpönö ĩ ta pitilimo wi ĩ ta peama wi, ĩ anö ĩ töpö kai a makokopamanöpöö!

Töpö holisimo opa wi, ĩ töpönö ai tiko ta kateha apaö

¹⁰Pitili ta hini wani ipii, ĩ töpö kua apa. Ĩ töpö haö päatalo opaö. Ĩ töpönö ai töpö mönama sinomoö. Ĩ na nö patapö Moisés a kai hini totio wi, ĩ na ĩ töpö satehe epii ĩ na ĩ töpö kuaö. ¹¹Sitipa kökö sua pi topa apa päo salo, ĩ töpönö ta wäsä tä, noa tä naka silia apawö. Pitilimo totila nö kuno mai, ai tiko ta wäsä soa päoimatasoö ha, töpö pilia kokale, ĩ ai töpö pewö aiki, ‑Jesus ta pitili hãto mai kitä‑ ĩ töpö pi kulasoö. Ĩ na tä kuaö ha, ai tiko ta wäsä holisimo wi, ĩ wa töpö wasupököö! ¹²Köteeta tili töpö kule, ĩ ai tänö ĩ töpö pi hatukutama wi, ĩ na ĩ a kuuma: ‑Köteeta tili töpö holisimo sinomoö. Salo a waitilimo kua wi na, ĩ na ĩ töpö waitilimo kuaö. Ĩ töpö ota hatai kuno mai, ĩ töpö ösö potehepalo pi topa sisaö‑ ĩ na a kuuma. ¹³Ĩ na a kuu noai, ĩ pitili ta kutenö, ĩ töpö na wa hapalo nö, ‑Ĩ na kuno maiö!‑ ĩ na wa kuu totihoö! ‑Jesus a pitili‑ ĩ na ĩ wa töpö pi thama totio pia salo, ĩ na a kuu totihoö! ¹⁴‑Juteu töpö nö patapönö ta kateha holisimo noai, ĩ pitili ta pi ti!‑ ĩ na wa kuu totiataloö! ‑Pitili tä sai a peama wi, ĩ töpö aiki, “Ĩ na wa kuapököö!” töpö kuu wi maaki, ĩ töpö hini pikio tihöö!‑ ĩ na wa kuu totiataloö! ¹⁵Töpö õsi ausii, ĩ töpö na salo pö pewö oamo toita apö. Ai a salo na ĩ töpö waio mai kitä. Jesus a thapo pasia mane, ĩ töpö õsi samii, ĩ töpö na ai salo a oamö wanisala apö. Salo a na ĩ töpö waio opaö. Ĩ töpö pi tapomo wanisala apö. ‑Ki tä topa. Ki tä wanisala‑ ĩ na ĩ töpö pi kuu tai mi. ¹⁶‑Teusö sa taö‑ ĩ töpö kuu thali maaki, ĩ töpönö wanisala tä thatala salo, ‑Ĩ töpönö Teusö a tai mi pasiwö‑ ĩ na ĩ töpönö ai töpö pi thapalama apa pasioö. ‑Ĩ töpö wanisala apawö‑ Teusö a pi kuu. Ĩ töpönö Teusö ta hini maapa wi. Ĩ töpönö toitai tä thaa tai mi ipö.

Pitili wa ta hini tä, ĩ na wa kua kitä

¹Kawanö pitili wa ta wäsä pola nö, ‑Ĩ na makö kuapököö!‑ ĩ na a kuu sinomoö!

²Pata töpö wano na, ‑Pe epii wasu wasu tuu koa apa ti!‑ ĩ na wa kuu! ‑Makö osemo mai, pö pi mosaia totikiö!‑ ĩ na wa kuu! ‑“Teusö a pitili” pö pi kuu totihoö! Ma töpö noima totihoö! Teusö ma tä kai hosa mai, makö satimo totihoö!‑ ĩ na pata töpö wano na, ĩ na wa kuu totiataloö!

³Pata töpö suö nakö, ‑Teusö a na tä toita apii, ĩ tä thaa sinomo wi, ĩ na makö kuapöö!‑ ĩ na pata töpö suö na wa kuu naioö! ‑Ai ma töpö a kateha wanisala maikiö! Pe epii wasu wasu tuu koa apa tihöö!‑ ĩ na pata töpö suö na ĩ na wa kuu! Toitai tä thaa sinomo wi, ĩ tä na pata töpö suönö moko töpö pi hatukupamanöpököö! ⁴Moko töpö pi hatukupamanö nö, ‑Au heano a, au ulu töpö, ĩ na töpö kui wa töpö noima totihoö!‑ ĩ na moko töpö na opii ĩ na pata töpö suö kuu sinomotipököö! ⁵Töpö pi mosawi ipii, hiopö tä thaa mai, ai tiko tä wano na sapäko mai, kama töpö sai pö na suö töpö kalipalo makoka sinomoö, töpö kuati wi na, ĩ na pata töpö suönö ĩ na moko töpö thama toitiopököö! Ai töpö totiapalati kua wi na, ĩ na moko töpö thama hö̃töopöö! Peanopö a hini totiatalo kua wi na, ĩ na pata töpö suönö ĩ na moko töpö thamapököö! Ĩ na moko töpö thamaö ha, ai töpö aiki, ‑Teusö a kai a topa mi‑ ĩ na ĩ töpö kuu mai kitä. ‑Teusö a kai a huati wi, ĩ töpö tomöpo mi. Teusö a kai a holisi hãtowö‑ ai töpö kuu mai kitä.

⁶Hĩsa töpö na, ‑Pö pi mosaikiö!‑ wa kuu totiataloö! ⁷Kawanö toitai wa tä thaa sinomoö! Toitai wa tä thaa sinomoö ha, ai töpönö wa uöma nö, toitai tä thaa naio kitä. Wanisala tä thaa hãkikio ti! Teusö a na ai wa töpö pi hatukupama tä, wa ta wäsä holisimo mai, wa suasimo mai, ĩ na wa kua totihoö! ⁸Wa ta wäsä makoka totiataloö! Wa ta wäsä makokaö ha, makö wanipo wi, ĩ töpö aiki, ‑Ĩ a wanisala‑ ĩ na ĩ töpö kuu wi tä kua mai kitä. Teusö a na ai wa töpö pi hatukupama makokaö ha, ĩ töpönö makö a kateha tä, ‑Teusö ta kateha sinomo wi, ĩ töpö wanisala‑ ĩ töpö kuu tai mi salo, ĩ töpö kiliso kitä.

⁹Ai töpö na töpö noa mi kalipalo sinomo wi, ĩ töpö na wa hapalo nö, ‑Pata töpönö makö noa mi kalipalama sinomo wi, ĩ pata ma töpö a hini nö, ma töpö pi mönahapama sinomoö! Ĩ töpö na, “Ĩ na a wani kuti ti!” pö kuu tihöö!‑ wa kuu nö, ¹⁰‑Pö thomömo ti! “Ĩ a thomömo tai mi ipö thaliö!” ĩ na makö kalipalama wi, ĩ na ĩ ma pi wani thamaö!‑ ĩ na wa kuu totiataloö! Ai pata tä na töpö kalipalo sinomo wi, ĩ töpö topati ha, ĩ pata tänö Teusö ta hiopöpama mai kitä. Teusö anö makö täapa kõo läo wi, ĩ Teusö ta hiopöpama mai, ‑Teusö ta topa apa‑ ĩ na ĩ a pi kuu kuki kitä.

Teusö anö makö totiapala wi ĩ ta

¹¹Pi naka. ‑Teusö anö sanöma makö totiapala apa salo, makö pewö täapa kõo läo pi topa apaö‑ tä kuu wi, huki ĩ ta kuu hinio kule. ¹²Ĩ ta kuu hinioö ha, makö pi hatukulo nö, Teusö a hini mai, ĩ töpö kua kua wi na, huki ĩ na makö kua wani ipö. ‑Teusö anö makö totiapala apaö‑ tä kuu wi, ĩ ta kuu hinioö ha, ‑Hi masita tä uli ha makö kua naitia tä, ĩ na makö kuatipököö!‑ ĩ na makö pi thama thali. ‑Päla. Wanisala tä na sa pi wasiso wi, ĩ sa tä pii mi ipöö!‑ ĩ na makö pi thama thali. Wanisala tä na makö pi mosawi, makö topa sinomoö, Teusö ma hini totihoö, huki ĩ na makö kuati wi, huki ĩ na makö thamati thali. Teusö anö makö totiapala wi, ĩ ta wäsäma kutenö, ĩ na makö thamati thali. ¹³Ĩ ta wäsäma kutenö, kamakö hai ĩ Teusö a pata hai, ĩ Jesus Cristo a hai, ĩ anö makö täapa kõo läo wi, ĩ a tapamoa konaso piale, ĩ tä na makö mamo pewö läa soa kule. ‑Aitaköö! Kilia apawöö! Ipa pata Jesus a huu kõa waikio kimi‑ ĩ na makö kuu piale, ĩ tä na makö pi tapoa soatia kule. ¹⁴Ĩ Jesus Cristo a lö kui, wanisala ma tä pewö thati noai, ĩ tä noa na a säpamonasoma. A säpamono nö, makö konöma. ‑Wanisala sa tä thaa wani ipii, toitai sa tä thaa pi topaö‑ ĩ na Jesus anö makö pi thama pia salo, makö õsi totipalö nö, Jesus anö makö thapo pi topa asa salo, a säpamono nö, makö konöma.

¹⁵Tito ai. Sa kuuhe, ĩ ta katehaö! Ĩ wa ta kateha nö, ‑Ĩ naköö! Ĩ na makö kuapököö!‑ ĩ na wa kuu totihoö! Ĩ töpö tomöpo mi ha, ‑Ĩ na makö kua maikiö!‑ wa kuu totihoö! Ĩ na wa töpö noa thaa totilöö! ‑Sa noa thaa maiki. Pata wa ta o?‑ ĩ na ai tä kuu ha, ‑Ĩ na a kuu ti! Teusö sa tä kai a wäsä wi, ĩ saö!‑ wa kuu totihoö!

Makö wanisala apama maaki, Teusö anö makö koni

¹‑Töpö kaikanamo sinomo wi ĩ töpö, pata töpö, ĩ na töpö kui töpö na, “Päla” kuu ti! Ĩ töpö hini totiataloö!‑ ĩ na wa kuu! Wa kuu nö, ‑Makö pi mosaiki nö, toitai ma tä thaa sinomoö! ²Ai ta kateha wanisala ti! Pö hapalo opa tihöö! Makö höla mai, ai töpö pewö na a noimo sinomoö!‑ ĩ töpö na wa kuu totihoö! ³Teusö a na makö pi motio opa hö̃töo kipili. Teusö ma ta hini hö̃töo maapili. Makö mönama sinomo kipili. Wanisala tä pewö na makö pi wasiso opa nö, wanisala ma tä thaa pi topa apa nö, ĩ na makö kuati kipili. ‑Hi a wani kua wi na, ĩ na sa kua nö toa sö ö̃‑ makö pi kuu nö, ai ma töpö hĩsu thaa nö, ĩ na makö kua sinomo kipili. Ai töpönö makö wanipoö, kamakönö ĩ ma töpö wanipo hö̃töa, ĩ na makö kuati kipili. ^4-5Ĩ na makö kua kipili maaki, Teusö anö makö täapa kõo läoma. ‑Teusö anö makö totiapala apawö. Makö pi ipawö‑ ĩ na makö pi thama nö, Teusö anö makö täa konöma. Toitai ma tä thaa pola tä kuno mai, wanisala ma tä thaa päla tä maaki, Teusö anö makö pi ipa päo salo, makö konöma. Teusö anö makö konöpö, kama õsi kua tolele ĩ a simönöma. A simöni ha, ĩ anö makö õsi salupalöma. Makö õsi salupalöma kutenö, Teusö ulupö makö pewö thapalö nö, makö õsi tikopöpalöma. ⁶Jesus Cristo anö makö täapa kõo läo wi, Teusö anö ĩ a simönönö nö, Teusö anö a õsi kua tolele, kamakö na ĩ a õsi ithoa totipamaköma. ⁷A õsi ithoa totipamakö nö, Teusö anö makö totiapala apa salo, ‑Ĩ töpö topa kukömaö!‑ Teusö a pi kuuma. Ĩ na a pi kuu ha, Teusö ulupö makö kupasoma. Teusö ulupö makö kupalo nö, ‑Sa õsi palimia waikia kutenö, Teusö a na sa pilia soatiopöö!‑ ĩ na makö õsi kuu sinomoö.

Jesus ma thapo wi ĩ makö aiki, ‑Toitai sa tä thaa sinomo pia salo‑ ĩ na makö kuupököö!

⁸Tito ai. Sa kuuhe, ĩ pitili ta. ‑Sa kuuhe, ĩ na a kuu totio nömöoö!‑ ĩ na sa kuu kule. Ĩ na wa kuu totio nömöoö ha, ‑Teusö a pitili‑ töpö pi kuu totio wi, ĩ töpö aiki, ‑Toitai sa tä thaa sinomo pia salo‑ ĩ na ĩ töpö pi kuupököö! Sa ta katehahe, ĩ ta topa apa. Töpö pewö topama wi, ĩ ta pasiwö. ⁹Ai tiko ta topa mai, ta kua pikia kule. Ai töpö pi saimo päo wi, ĩ töpönö ta kateha isi waniho soa päatalo opa wi, ĩ ta kua pikia kule. Nö patapö töpö a hilo noai, ĩ ta kateha pätio wi, ta kua hö̃töa. Moisés a kai a kateha sokamo läapalo opa wi ta kua hö̃töa. Ĩ nasimö tä wani a kateha naio tihöö! Ĩ nasimö wa ta kateha tä, wa töpö topapalama pola nö kuno mai, wa töpö hapalama wanisala apa kitä. ¹⁰Ai tä aiki, kama pi wani saimo päo nö, ai töpö hapalama apa wi, ĩ a na, ‑Ĩ na a kua tihöö!‑ ĩ na wa kuu! Wa kuu kule maaki, wa kai a hini mi ha, ‑Ĩ na a kua tihöö!‑ ĩ na wa kuu kõoö! Ĩ na wa kuu kõa kule maaki, wa kai a hini mi sati ipö tä, ‑Pälaö! Ĩ na wa kua päoö‑ ĩ na wa kuu nö, ĩ wa wani hãsiamaö! ¹¹Ĩ a wani wanisala apa salo, ĩ wa wani hãsiamaö! Ĩ a waninö wanisala tä thaö ha, ‑Ĩ a wani wanisala apöpaso noa‑ ĩ na tä kuu wi ĩ tä kua.

¹²Kawa na ai sa tä simöni pia salo. Átemasö a hãtowö. Síkiku a wani hãtowö. Sa simöa piale, ĩ a talaso noai ha, kawa hai, Nikópolisö tä uli hamö a hua haitalolöö! Ĩ ha sa kua tä, wa kõa hö̃töpöpököö! Ĩ ha tä uli ösö holelea soa tä, ĩ ha sa kutio pia salo. ¹³Pata töpönö ai töpö noa thaa sinomo wi, ĩ tä sãököle, ĩ Senasö anö ĩ tä möö sinomo taö öpa wi ĩ a, Apoolu a solo, töpö hama huu tä, ĩ wa töpö totiapala totihoö! Ĩ töpö huso kõa tä, wani tä na töpö honi ipö ha, wa töpö täpälöö! ¹⁴Mi ha, Jesus a thapo wi ĩ töpö na, ‑Toitai ma tä thaa totihoö!‑ ĩ na wa kuu nö, ‑Wani tökö na töpö honimo wi, ĩ ma töpö pasilipalöpököö!‑ ĩ na wa kuu! Ĩ töpönö toitai tä thaa nö, ai töpö pasilipalö nö, ĩ na ĩ töpö kuaö ha, ĩ töpö tomöpo mi mai kitä.

¹⁵Kamisa na töpö kua naine, ĩ töpö aiki, ‑Tito a na wa tä sãököpalö nö, “‘Wa topa kule?’ ĩ na kamisa na töpö kule, ĩ töpö kuu kuleö!” ĩ na Tito a na ĩ na wa kuu!‑ ĩ na ĩ töpö kuu kule. Mi ha, ai töpönö Jesus a thapo naio kutenö, samakö pi ipaö. Ĩ töpö na, ‑“Wa topa kule?” ĩ na Paulo a kuu kuleö!‑ ĩ na wa kuu! Teusö anö makö pewö totiapalapököö!