Romanos

Romanos

Homa tili töpö na Paulo anö waheta tä simöpalö noai ĩ ta

Ĩ tä uli pewö hamö homa tili pata tä kaikanamoma kutenö, Homa tä uli kuo pa Paulo a huu pi topa apama. A huu paio mai ha, homa tili töpönö Jesus a thapo noai, ĩ töpö na Paulo anö hi waheta tä simönöma.

Hi waheta tä na Jesus ta topa apöle, ĩ Paulo anö ĩ ta wäsä totiatalo opama. ‑Sanöma makö pewönö wanisala ma tä thama. Teusö a wakala apii, a toita apii, ĩ tä na makö pewö häwäpotii‑ ĩ na a kuu nö, ‑Sanöma makönö wanisala ma tä thaa wi ĩ tä noa na makö nomasoö. Ĩ na tä kua päla tä maaki, Teusö anö kamakö hai ĩ Jesus Cristo Kaikana tä na makö õsi palimipamani wi, noa mai ha ĩ tä totomaö. “Jesus Cristo a pitili” makö pi kuu totio opa kuköma, Teusö anö makö totipali kitä. Teusö anö ĩ makö totia asapali wi, ĩ makö õsi palimipaso kitä‑ ĩ na Paulo a kuuma.

Ĩ na a kuunö, juteu töpö, juteu töpö a hilo pasia mane ĩ töpö, ĩ na töpö kui, Teusö anö ĩ töpö pewö thama piale, Paulo anö ĩ ta wäsä nömöoma. Ĩ ta wäsä nömöo nö, ‑Jesus ma thapo wi ĩ makönö toitai tä thaa nö, ĩ na makö kua sinomotipököö!‑ Paulo a kuuma.

Ĩ na a kuu nö, ‑Homa tili pö! Kamakö hai ĩ tä uli tole hamö Esöpaania tä uli kule, ĩ tä uli ha sa huu pi topa apa salo, kamakö na sa noimo tä, sa pasilipalöö! Kamakö na Jesus sa tä wäsäö, esöpaania tili töpö na sa ta wäsä nömöoö, ĩ na sa kua pi topa kuleö!‑ ĩ na ola na ĩ na Paulo a kuuma.

¹Paulo sa. Jesus Cristo anö sa kalipalama sinomo wi ĩ sa. Ĩ anö sa simöa sinomo wi ĩ sa. Teusö ta topa apöle ĩ sa ta wäsätipö, Teusö anö sa sailö nö, sa nakalöma.

²‑Waiha ta topa apöle ta wäsä kuki kitä‑ ĩ na sutu upa ĩ na Teusö a kuu noai, kama kai wäsä sinomo noai, ĩ töpönö ĩ ta hini nö, ‑Waiha ta topa apöle ta wäsä kuki kitäö!‑ ĩ na ĩ töpö kuu nömöoma. Ĩ na töpö kuu nömöo wi, Teusö tä waheta ha ĩ tä sãökökömae. ³Ta topa apöle, ĩ Teusö a hai pelupö Jesus Cristo a hai ĩ ta. Jesus a hai, ĩ sanöma tä kupasoma. Kama hai kolo Davi a kuoma maaki, ⁴Teusö a hai pelupö a sai kuo satio soama. Jesus a nomasoma maaki, a temöa konasoma kutenö, ‑Jesus Cristo a hai, Teusö a ulupö lotete epii ĩ a. Ĩ a hai, kamakö hai kaikana tä‑ ĩ na Teusö a õsi kua tolele, ĩ anö ĩ na makö pi thamaö. ⁵Jesus Cristo a na sa kalipalotipö, ĩ anö sa totiapala apa nö, hi masita tä uli pewö hamö töpö pilipai, ĩ töpö pewö na sa simöama. ‑Jesus Cristo a pitili‑ ĩ töpö pi kuu totiki nö, Teusö a kai a hini totio kuköpö, ĩ töpö na sa simöa asama. ⁶Homa tili makö aiki, ‑Jesus a pitili‑ makö pi kuu totio nö, Teusö ma kai a hini totio wi, ĩ makö naiwö. Jesus Cristo ma thapo wi, ĩ makö kua naipasopö, Teusö anö makö nakalöma.

⁷Teusö anö homa tili makö pi ipa wi, ĩ makö hai, kama hai ĩ tili makö thaa asapalöpö, makö nakalöma. Ĩ makö na hi waheta sa tä simöpali ke. Kamakö hai ĩ pö̃ Teusö a, Jesus Cristo Kaikana tä, ĩ na kilii töpönö makö totiapala apaö, makö pi topapalama apaö, ĩ na makö pewö thama kukiö!

Kamakö na sa pi tapomo nö, Teusö a na, ‑Aitaköö!‑ sa kuu kule

⁸Pi naka. Ĩ na sa kuu somata pia kule. Jesus Cristo sa thapo kutenö, kamakö na sa pi tapomo pole, ĩ tä na, ‑Aitaköö!‑ Teusö a na ĩ na sa kuu kuleö! Ĩ tä uli pewö hamö töpö pilipai, ĩ töpö pewö na, ‑“Jesus Cristo a pitili” ĩ na homa tili töpö pi kuu totia kulaliö!‑ ĩ na ai töpö kuu waikia kutenö, Teusö a na, ‑Aitaköö!‑ ĩ na sa kuu kule. ^9-10Teusö a na sa hapalo pola nö, kamakö na sa pi tapomo tikiliapalo sinomoö. Teusö a na sa kalipalo totio opa nö, kama hai ĩ pelupö sa ta wäsätii. Ĩ Teusö aiki, ‑“Homa tili makö na sa pi tapomo sinomoö” Paulo a kuu pole, ĩ pitili ta‑ ĩ na Teusö a pi kuu. Teusö a na sa hapalo pola nö, ‑Hapa. Homa tili töpö na sa huu pi topa apöle, ĩ hamö sa simöpa pi topa tä, sa simöpalöö!‑ ĩ na sa kuu sinomoö. ¹¹Kamakö na sa talalo nö, Teusö sa ta wäsä kuköma, ‑Teusö a õsi kua tolele, ĩ anö makö totiapala apa nö, makö õsi pi loteteapalama kuköpöö!‑ ĩ na sa pi kuu salo, kamakö na sa hamamo pi topa apa kulasoiö! ¹²Sa hamamo tä, makö pasilipasolasopököö! ‑Jesus a pitili‑ sa pi kuu totia apöle, ĩ ma tä taa nö, makö pi lotetea hö̃töpasoö, ĩ na tä kua tä, ‑Jesus a pitili‑ makö pi kuu totia apöle, ĩ sa tä taa nö, sa pi lotetea hö̃töpasoö, ĩ na makö kuapasolasopököö!

¹³Ipa pö. Pi naka. ‑Homa tili töpö na sa hamamo tasokö o!‑ sa kuta kutamoti kule maaki, sa huu kusö kusömo pikitia kuleö! Juteu töpö pasi mai ĩ töpö na Jesus Cristo sa ta wäsäö ha, ĩ töpönö Jesus a thapo kua kukö noai na, ĩ na kamakö kuamö kule hamö juteu töpö pasi mai ĩ töpö kule, ĩ töpö na Jesus Cristo sa ta wäsä nömöo kuköma, ĩ töpönö Jesus a thapo naio kuki wi, ĩ sa tä pii kule. ¹⁴‑Sanöma töpö pewö pasilipoö!‑ ĩ na Teusö anö ĩ na sa noa thalöma kutenö, waheta tä taö öpalai ĩ töpö, waheta tä taö pasia manai ĩ töpö, töpö pi hatuku upii ĩ töpö, töpö pi moti ipii ĩ töpö, ĩ na töpö kua kua wi ĩ töpö pewö na Jesus Cristo sa ta wäsäö.

¹⁵Önö kutenö homa tili makö na Jesus Cristo ta topa apöle ĩ sa ta wäsä pi topa apa naia kule.

Jesus Cristo ta topa apöle ĩ ta lotetea apa

¹⁶Jesus Cristo ta topa apöle, ĩ sa ta wäsä kili mai kitä. Ĩ ta lotetea apöle, Teusö anö ĩ tänö sanöma makö täapa kõo läoö. Juteu samakönö Jesus Cristo sama täa somanö noai, Teusö anö ĩ samakö täa kõa somani, juteu töpö pasi mai ĩ töpönö Jesus Cristo a täa nömöni wi ĩ töpö täa kõa nömöni, ĩ na Teusö anö makö thama kuki. ¹⁷Jesus Cristo ta topa apöle ĩ ta aiki, ‑Teusö a na sanöma makö wanisala apama maaki, Teusö anö makö totipali kitä. “Jesus Cristo a pitili” makö pi kuu totio kuköma, Teusö anö makö totipali kitä. “Jesus Cristo a pitili” makö pi kuu totia mi tä, Teusö anö makö totipa mai kitä‑ ĩ na ta topa apöle, ĩ na ĩ ta kua. Teusö tä waheta aiki, ‑“Teusö a pitili” ĩ na sanöma makö pi kuu kuköma, Teusö anö ĩ makö totia asapali wi, ĩ makö õsi palimipaso kitä‑ ĩ na ĩ tä waheta kuu.

‑Teusö sa tai mi ipö pasi kutenö, wanisala sa tä thaa kule maaki, ĩ tä na Teusö a hĩso mai kitä‑ ĩ na a pi kuu ti!

¹⁸Sanöma töpönö wanisala tä thatala apati pole ĩ tä na Teusö a hĩsopolali, ĩ tä hatuka apaö. Ĩ töpönö Teusö a na wanisala tä thaö, ai sanöma töpö na wanisala tä thaö, ĩ na tä kua wi ĩ tä pewö na Teusö a hĩso opa nö, ĩ töpö peamaö. Ĩ töpö peama wi ĩ tä hatuka apaö. Ĩ töpönö wanisala tä thatala apati salo, Teusö ta pitili ipii ĩ tä na ĩ töpö waio opa wi ĩ tä na Teusö a hĩso opaö. ¹⁹Teusö a na ĩ töpö pi hatuka apa waikia. Teusö anö ĩ töpö pi hatuka waikipalöma maaki, ĩ töpö waio satia apaö ha, Teusö anö ĩ töpö peamaö. ²⁰Teusö anö hi masita tä uli piäpalö noai, ĩ tä, sanöma nö patapö töpö kuo soata noai ĩ töpönö Teusö a tapa totio maa noai kitä maaki, Teusö a loteteo opa soatio wi ĩ tä taö öpa soatama. Huki ola töpönö ĩ tä taö tolea apa soa kulai. ‑Teusö a hai ĩ pata tä sai pata‑ ĩ na töpö pi kuu tao opa naio soataö. Teusö anö tä thaa noai, sanöma töpönö ĩ tä pewö tapa apa kutenö, Teusö pata tä loteteo opa soatio wi, ĩ töpönö ĩ tä taö öpaö. Önö kutenö, ‑Teusö sama tai mi ipö‑ ĩ na ĩ töpö kuu kule maaki, ĩ tä na, ‑Awai. Ĩ tä topa kuleö!‑ Teusö a kuu mai kitä. ²¹Ĩ töpönö Teusö a taö öpa waikia kule maaki, ‑Teusö a hai, pata tä sai pata‑ ĩ na ĩ töpö pi kuu totio mi. Teusö a na, ‑Aitaköö! Wa totiatalo opa noa‑ ĩ na ĩ töpö kuu mai, töpö pi tapomo isi waniho soa päatalo opatii. Ĩ töpö pi tapo makokopo totio mi kutenö, töpö õsi mumia apölasoö. ²²‑Samakö pi mosawi ipii ĩ samakö‑ ĩ na ĩ töpö kuu kule maaki, töpö osemo opaö.

²³Teusö a palimi ipii, a wakala apii, ĩ a na, ‑Ipa pata tä sai‑ ĩ töpö pi kuu mi. Ĩ Teusö a na ĩ töpö mamo teteo pola nö kuno mai, sanöma töpö äpäti ipii ĩ töpö, salo pö katäpalo wi ĩ pö, masita hamö pö salo holepalo wi ĩ pö, ĩ na tökö kui tökö ukutupö thaa thapalö nö, ĩ tökö ukutupö na ĩ sanöma töpö mamo teteo sisa nö, ‑Hi tä ukutupö hai, ipa pata tä waikiwöö!‑ ĩ na ĩ töpö kuu.

²⁴Ĩ na ĩ sanöma töpö kuati ha, ĩ töpönö sami sami tä thaa wi ĩ tä na, ‑Ĩ na töpö kuati päoö‑ ĩ na Teusö a pi kuuma. Ĩ töpönö sami sami tä thati nö, töpö mamopaloti wi ĩ tä kiliha apa.

²⁵Ĩ töpönö pitili ta hini wanio opa nö, ta holisia apöle, ĩ ta hini pi topa apa pasia sisa nö kilia saila hai. ‑Teusö a na, “Wa totiatalo opa sisawöö! Ĩ naköö!” ĩ na sanöma makö kuu totio soatiopököö!‑ ĩ na ta kuu wi, ĩ pitili ta maaki, ĩ na ĩ töpö kuu mi ipö. Teusö anö ĩ tä pewö piäpalö noai, ĩ a pata na ĩ töpö Teusömo totio mai, ĩ a pata na ĩ töpö mamo teteo totio sisa mai, ĩ a patanö tä pewö thaa noai ĩ tä pewö na ĩ töpö mamo tetea sisa silia apa nö kilile. Teusö a na ĩ töpö simöamo totio mai, Teusö anö tökö thaa pasia waikipalö noai ĩ tä na töpö simöaso pasio päoö.

²⁶Ĩ na ĩ töpö sanöma kuati ha, ĩ töpönö sami sami tä thaa pi topa apa wi ĩ tä na, ‑Sami sami tä thati päoheö!‑ ĩ na Teusö a pi kuuma. Ai suö tä wani hö̃töwö maaki, ai suö tä wani na tä wani mamo pi kilihia apa kõa. ²⁷Ĩ na tä kua tä, suö töpö na wano töpö mamopalo toitio mai, kama ai wano töpö na maaki, ai wano töpö mamopalo opati nö kiliawö. Ai wano töpö na maaki, ai wano töpö mamopaloti wi, Teusö anö ĩ pili töpö pewö peama kuki.

²⁸Ĩ töpö sanömanö Teusö ta pitilii ĩ ta hosa kutenö, Teusö aiki, ‑Töpö pi tapomo isi wanihiapalo päoö‑ ĩ na Teusö a pi kuuma. Ĩ na Teusö a pi kuu waikioma kutenö, ĩ töpö sanömanö sami sami tä tha apatii.

²⁹Ĩ töpönö wanisala tä tha apaö, pe epii wani tökö na ĩ töpö pi wasiso opaö, ai töpö hĩsu tha apatii, ai töpönö tä thapo waikilai, ĩ tä na ĩ töpö pi wasiso satia apaö, töpö säpasoö, töpö hölapaso opatii, töpö mönamamo hẽtupasoö, töpö wanihasoö, ai töpö a wai soatalo, ĩ na ĩ töpö sanöma kupaso opatii. ³⁰Ai sanöma töpö na ĩ töpö hapalo pi wasöha soatalo opatii. Ĩ töpönö Teusö a wanipo soatalo opa naitioö. Ai sanöma töpö uni komoapalama apa asa nö, ‑Pata sa asawö. Sa totiatalo opa asa wi ĩ sa asawö‑ ĩ na ĩ töpö kuu. ‑Wanisala sama tä thaa nö, ai tiko wanisala sama tä thaa naioö, ai tiko wanisala sama tä thaa nömöoö, ĩ na makö kuatipöö!‑ ĩ na ĩ töpö pi kuu sateheapalo opatii.

Ĩ na tä kua tä, ĩ töpönö pö̃ a, pöpönö a, ĩ na töpö a hini mi kuö nai soatawö. ³¹Ĩ töpö osemo opati nö, wanisala tä tha apatihe. Ĩ töpö holisimo opatii. Ĩ töpönö ai sanöma töpö möö wani ipö. Ai töpö na ĩ töpö pi honipo tai mi ipö. ³²‑Ĩ na makö kuati wi ĩ tä noa na makö säa hö̃töpalö matimöö!‑ ĩ na Teusö a kuu wi, ĩ töpönö ĩ ta taö öpa waikia kulai maaki, wanisala tä thaa satimo opati nö kiliawö. Ĩ töpönö wanisala tä thatihe nö, ‑Ai makönö wanisala ma tä thaa naio wi ĩ tä topa‑ ĩ na ai töpö na ĩ na ĩ töpö kuu.

Wa wanisala naio kutenö, Teusö anö wa peama kuki kitä

¹Önö kutenö, ‑Ki töpö wanisala apatii‑ ĩ na ai makö kuu wi ĩ makö aiki, ‑Kamisa topa apa asatioö‑ ĩ na makö kuu maiki. Wanisala tä tha apati wi ĩ töpö kua kua soataloti wi na, ĩ na kawa kua kua naio soata tä, ‑Ĩ töpö wanisala apa pasitioö!‑ ĩ na wa kuu asa kule maaki, ‑Kawa wanisala apa hö̃töo soata wi ĩ wa hö̃tö soatawö‑ ĩ na kawanö Teusö wa thama hö̃töo soataö. ²Wanisala tä tha apati wi ĩ töpö na, ‑Makö wanisala apaö‑ ĩ na Teusö pitili a sai kuu. ³‑Ki töpö wanisala apatiwöö!‑ ĩ na wa kuu asale, ĩ wanö wanisala wa tä thaa hö̃töa tä, kawa na, ‑Wa wanisala apatiwö‑ ĩ na kawa na Teusö a kuu asa mai kitä ta o? Teusö anö wa peama hö̃töo soata kitä. ⁴Teusö anö wa totiapala apatii, kawa na a hĩso haiatalo mi, wa peama haiatalo mi, ĩ na Teusö a kuaö ha, ‑Teusö anö sa peama asa wi, ĩ sa mai kitä‑ ĩ na a pi kuu ti! Teusö aiki, ‑Wa pi sapa kõpalo nö, wanisala wa tä thati noai ĩ tä hosalöö!‑ ĩ na Teusö a pi kuu salo, huki Teusö anö wa peama paio mai ha, wa totiapala apa paitio päo ta pi kuu mai. ⁵Wa pi sapapo kõo mai, wanisala wa tä thaa pi topa satimo opaalö ha, pe epii Teusö anö wa peama kitä ta pi kuu mai. Sanöma töpönö wanisala tä thati wi, ĩ tä na Teusö a hĩsua apölo nö, ‑Makö wanisala apati manu kui, makö pea kuki kitä‑ waiha ĩ na Teusö pitili a kuu hoka apa tä, pe epii wa peama naio kuki kitä. ⁶Ĩ tä, sanöma makö kuati noai ĩ tä na Teusö anö noa tä totoma kitä. ⁷Ai töpönö toitai tä thatala apati wi, ĩ töpö aiki, ‑Makö totiatalo opatiwöö!‑ ĩ na ĩ töpönö Teusö a pi thama pi topa apölai, ‑Teusö anö makö õsi palimipali wi ĩ ma tä pi ipa nököö!‑ ĩ na ĩ töpö pi ku upa wi, ĩ töpö na õsi palimipo wi, Teusö anö ĩ tä totoa asaki kitä.

⁸Ĩ na tä kua tä, ai töpö umi ipii, samii ĩ kama töpö puko pi topa apa sisatio nö kilia sai. Ĩ töpönö pitili ta hini totio mai, ta wanisala apöle, ĩ ta hini päohe nö, wanisala tä tha apatihe. Ĩ töpö na Teusö a hĩso opa salo, waiha ĩ töpö wasiama kuki kitä. ⁹Wanisala tä tha apati wi ĩ töpö na Teusö a hĩso opa nö, töpö pi wi na takömoma nö, töpö peama apa kitä. Juteu töpö peama somataö, juteu töpö pasi mai ĩ töpö peama nömöo soataö, ĩ na Teusö anö töpö wanisala apati wi, ĩ na ĩ töpö peama thama kuki kitä.

¹⁰Ĩ na tä kua tä, toitai tä thatala apati wi ĩ töpö na, ‑Makö totiatalo opa asatiowöö!‑ ĩ na Teusö a kuu nö, ĩ töpö pi topapalama kuki kitä. Juteu töpö pi topapalama somaö, juteu töpö pasi mai ĩ töpö pi topapalama nömöoö, ĩ na Teusö anö ĩ na töpö thama kua kuki kitä. ¹¹Teusö anö sanöma makö pewö na ĩ tä pewö thama ösöho soataalöö.

¹²Moisés anö nö patapö töpö noa thaa noai, juteu töpö pasi mai ĩ töpönö ĩ ta thapo mane, ĩ töpönö wanisala tä tha apati wi, ĩ töpönö Moisés a kai thapo mi päla tä maaki, ĩ töpö nomano nö, Teusö a na ĩ töpö koonö mai kitä. Ĩ na tä kua tä, Moisés anö nö patapö töpö noa thaa noai, juteu töpönö ĩ tä sãökama thapo asale, ĩ töpönö wanisala tä tha apa naitia tä, Moisés anö töpö noa thaa noai, Teusö anö ĩ ta kateha nö, ‑Ĩ na Moisés anö makö noa thama maaki, ĩ ma ta hini totio maa noa‑ ĩ na Teusö a kuu nö, ĩ töpö peama kitä.

¹³Moisés anö nö patapö töpö noa thaa noai, ai töpönö ĩ ta hini pätia tä, Teusö anö ĩ töpö totipa pasio mai kitä. Moisés anö nö patapö töpö noa thaa noai, ai töpönö ĩ ta hini totio asa wi ĩ töpönö toitai tä thaa asa wi, Teusö anö ĩ töpö totia asapali. ¹⁴‑Toitai ma tä thaa totihoö!‑ ĩ na Moisés a kuu noai, juteu töpö pasi mai ĩ töpönö ĩ tä sãökama thapo pasia mane maaki, toitai tä thaa hö̃töa tä, ĩ töpönö Moisés a kai a thapo mane maaki, ‑Ĩ naköö! Ĩ na makö kua totiopököö! Wanisala ma tä thaa maikiö!‑ ĩ na kama töpö noa thapaso sapao kõo päoö.

¹⁵Ĩ töpönö toitai tä thati hö̃töo kutenö, Moisés anö makö noa thaa wi, ĩ töpö õsi na ĩ nasimö tä titia hö̃töa hãtoakö. Awai. Ĩ töpö pi tapoiki nö, ‑Toitai ma tä thaapököö!‑ ĩ na kama töpö pi kuu päo salo, kama töpönö Moisés a kai a titipo hö̃töa hãtoaköö! Ĩ töpönö wanisala tä thaahe nö, töpö pi tapoiki nö, ‑Sa tä thaae, ĩ tä wanisala‑ ĩ na ĩ töpö pi kuu päoö. Ĩ na tä kua tä, ĩ töpönö toitai tä thaahe nö, ‑Sa tä thaae, ĩ tä toita‑ ĩ na ĩ töpö pi kuatalo opati päoö. ¹⁶Sa kuu pole, waiha ĩ na tä kua totio kitä. Ta topa apöle sa ta wäsä sinomoti wi, ĩ na ĩ ta kuu. Waiha Teusö a na sanöma makö pewö waloköma, Jesus Cristo a na Teusö aiki, ‑Ĩ töpö pi tapopalo wanisala hãtotio noai ĩ tä, ai töpö mamo tetela tä kuno mai, ĩ töpönö wanisala tä thaa hãtotio noai ĩ tä, ĩ na tä kui wa tä pewö a kateha nö, töpö wanisala noai, ĩ tä noa na töpö peamaö!‑ ĩ na pelupö na ĩ na pö̃ a kuu kitä.

Juteu töpönö, Moisés a kuu noai ĩ tä waheta thapo asalai, ĩ töpö topa apa asa mai kitä

¹⁷Juteu a hilo wi ĩ ai! ‑Moisés anö nö patapö töpö noa thaa noai ĩ sa ta thapo asa waikia kutenö, sa topa apa asa waikileö!‑ ĩ na wa kutii. ‑Teusö sa thapo wi ĩ sa waikiwö‑ ĩ na wa kupalotii. ¹⁸‑Ĩ na ipa sanöma töpö kuapöö!‑ Teusö a kuu wi ĩ wa ta taö öpa waikia kule. Moisés anö nö patapö töpö noa thaa noai, ĩ wa ta hua waikilöma kutenö, tä toitai ĩ wa tä sai taö öpaö.

¹⁹‑Töpö höpöpöi, ĩ sa töpö tutuapala taö öpaö‑ ĩ na wa kuu. ‑Sa wakala apö asa waiki kutenö, mumi mumi tä na töpö kua pasile, ĩ sa töpö pasilipo wi ĩ sa‑ ĩ na wa kuu. ²⁰‑Töpö pi moti ipö soai, kamisanö ĩ sa töpö pi hatukama wi ĩ sa‑ wa kuu. ‑Ulu töpö taöma sinomo wi ĩ sa‑ ĩ na wa kuu naioö. ‑Moisés anö nö patapö töpö noa thaa noai, ĩ tänö sanöma makö pi hatuka asapali, ĩ ta pitilia apa sisaa, ĩ na tä kuaö‑ ĩ na wa pi kuu totia kule. ²¹Ai wa töpö pi hatukama apati manu kui, kama wa pi hatukupo sapao kõo naio mi salo. ‑Pö thomömo tihöö!‑ ai wa töpö noa thaa sai maaki, wa thomömo hö̃töo soataö. ²²‑Ai tiko tä suö na a mamo hãto tihöö!‑ ĩ na ai wa tä noa thaa asa wi maaki, ai wa tä suö huu talalöma, wa mamoa soatasoö. ‑Sa noama sinomo wi tä ukutupö‑ ai töpö pi kuu wi, ĩ wa tä ukutupö pii mi ipö maaki, ĩ tä ukutupö pi hĩtale, ĩ a sai õsimö ha wani tökö kua wi tökö wani ha wa thomömo pi topa apa sisaö. ²³‑Teusö anö nö patapö töpö noa thaa noai, ĩ sa tä waheta thapo asa kule‑ ĩ na wa ku upa wi wa maaki, ĩ wa ta hini totio mi kutenö, ‑Teusö a holisi‑ ĩ na ai wa töpö pi thapalama apati sai. ²⁴Teusö tä waheta ha ĩ na ta kuu wi ta kua. ‑Juteu makö holisimopalo opati wi, ĩ tä na juteu töpö pasi mai ĩ töpönö Teusö a katehepala isi waniho opatie‑ ĩ na tä waheta kuu.

²⁵Teusö anö nö patapö töpö noa thaa noai ĩ wa ta hinia totilöma, juteu wa isi ola ösö hosapamonaso wi, ĩ tä topa sisa kule. Ĩ wa ta hini makoka totio paio maa noai maaki, wa isi ola ösö hosapamonasoma, ĩ tä topa mai kitä. ²⁶Juteu töpö pasi mai ĩ töpö isi ola ösö hosapamo pasio maa noai maaki, ĩ töpönö Teusö a kai a hinia totia asalöma, Teusö aiki, ‑Ĩ töpö hai, juteu töpö pasi mai kitä maaki, ipa juteu töpö isi ola ösö hosapamoti wi, ĩ töpö kuati wi na, ĩ na ĩ tiko töpö maaki, ĩ na ĩ töpö kua naioö. Ĩ tiko töpö maaki, sa kai a hini totia kutenö, ĩ ipa töpö nai soatawö‑ ĩ na Teusö a pi kuu kitä. ²⁷Önö kutenö, Teusö wa tä waheta thapo waikia salo, wa isi ola ösö hosapamo waikiso noai, ĩ wanö Teusö wa kai a hini totio mi tä, juteu tä pasi mai ĩ a isi ola ösö hosapamo maa noai maaki, ĩ anö Teusö a kai a hini totia asa tä, ‑Juteu wa isi ola ösö hosapamo waikiso noai maaki, wa wanisala apatiwö‑ ĩ na ĩ anö ĩ na Teusö a thama kuki kitä.

²⁸Ai töpönö wa möö nö, ‑Ĩ a hai ĩ juteu tä‑ ĩ na kawa na ĩ na ai töpö pi kuu kule maaki, pili wa õsinö Teusö wa thapo mi tä, juteu wa sai mai kitä. Pili wa isi ola ösö hosapamo waikiso noai maaki, juteu wa sai hãto mai kitä. ²⁹Teusö anö makö noa thaa noai, pili wa õsinö ĩ wa ta hini totia tä, ĩ tökö sisawö, ĩ juteu wa sai. Teusö wa thapo wi ĩ wa. Pili wa isi ola ösö hosapamo saimo pälasoma, ‑Kawanö sa thapo wi ĩ wa‑ ĩ na Teusö a pi kuu mai kitä. Moisés anö nö patapö töpö noa thaa noai, ĩ tä sãökökö noai, ĩ tänö wa toita mai kitä. Teusö a õsi kua tolele, ĩ anö wa totipa sisaö. Wa õsi wanisalati noai, Teusö a õsi kua tolele, ĩ anö ĩ tä hosalö nö, wa õsi tikopöpalöma, ‑Wa toita apö‑ kawa na ai sanöma tä kuu mai kitä maaki, Teusö aiki, ‑Kamisa na wa toita waikileö!‑ ĩ na kawa na ĩ na Teusö a kuu kitä.

¹Ĩ na sa kuu pole, ĩ tä na ai wa aiki, ‑“Juteu töpö pasi mai ĩ töpö na juteu töpö palupo mai kitä” Paulo a kuu hãtoa alu kule? “Juteu töpö pasi mai ĩ töpö kui na, ĩ na juteu töpö kuö naiwö. Juteu töpö isi ola ösö hosapamo wi ĩ tä topa mai kitä” ĩ na Paulo a kuu hãto alu kule?‑ ĩ na ai wa pi kuu kule hö̃? ²Ma. Ĩ na sa kuu mane. Juteu töpö pasi mai ĩ töpö na juteu makö palupo pi satehepoö. Pi naka. Juteu töpö na Teusö anö kama kai a totoa asakö nö, ‑Sa kai a thaa totilöö! Ai töpö na sa kai a wäsä sinomoö!‑ a kuuma. ³‑Ai juteu töpönö Teusö a kai a hini totio mi ha, Teusö a pitilimo mi ipö hãtokö‑ ĩ na pö pi kuu ti!

⁴Pö pi kuu ti! Ai sanöma töpö holisimopaloti wi maaki, Teusö a holisimo pasio mai kitä. Pi naka. Ĩ na Teusö tä waheta kuu:

‑Teusö ai. “Wa kuu wi ĩ ta makoka apa” ĩ na ai tänö ĩ na Teusö wa noa thaa kitä. Ai töpönö kawa na tä hini waikioma tä, “Teusö a pitilimo totia waikia alu kuleö!” ĩ na ĩ töpö kulaso kitä‑

ĩ na Teusö tä waheta kuu.

⁵Sanöma makönö wanisala ma tä thapala apati tä, ‑Teusö anö toitai tä thaa sisa wi ĩ a ta o‑ ĩ na ai ma töpö pi thapalama kutenö, wanisala ma tä thapala apati wi, ĩ tä topa hãtoa waikia kule? Ai sanöma töpö kuu kua päo wi na, ĩ na sa kuu naia päa kule. ‑Wanisala ma tä thapala apati wi ĩ tä noa na Teusö anö makö peama kuköma, Teusö a topa mai kitä‑ ĩ na makö pi kuu tao kitä ta o? ⁶Ma. Makö pi kuu tao mai kitä. Teusö a topa apa mi aköna, waiha sanöma makö pewö na tä makokama läapalo mi kipi.

⁷Ai makö aiki, ‑Hi kamisamakö holisimopaloti ha, “Ã ãi. Teusö a pitilimo sisaö ta o!” ĩ na ai sama töpö pi thapalama apati manu kule, samakö holisimopalo ti wi ĩ tä wanisala hãtoa mai kitäö!‑ ĩ na ai makö pi kuu hãtole kitä. Ĩ na makö pi kuu maapöö! ‑Samakö holisimo wi ĩ tä topa waikia kutenö, wi na Teusö a pi kuu salo, samakö peama kuki?‑ ĩ na makö pi kuu maapöö! ⁸Ĩ na makö pi kuu aköna, ‑Waiha toitai tä kupasopö, huki wanisala ma tä thaa paio nököö!‑ ĩ na makö kuu pola pi ta pi kuu mai. Ai töpönö sa kateha hiopöa apa nö, ‑“Toitai tä kupasopö, wanisala ma tä thaa paio nököö!” ĩ na Paulo a kuu thaliö!‑ ĩ na ai töpö holisi kuu waikia kule. Ĩ na ĩ töpö kuu pole, Teusö anö ĩ tä noa na ĩ töpö peama hö̃töo kitä.

Ai sanöma tänö toitai tä thatala asatio wi tä kua mai kitä

⁹Wi na samakö kuupökö? ‑Teusö a na juteu samakö topa asa kule. Juteu töpö pasi mai ĩ töpö wanisala apa pasioö‑ ĩ na samakö kuupökö? Ma. ‑Juteu samakönö wanisala sama tä thatala apaö, juteu töpö pasi mai ĩ töpönökö naiwö, wanisala tä thatala apa naio soataö, ĩ na makö pewö kua ösöhatii‑ ĩ na sa kuu waikio kipili.

¹⁰Ĩ na Teusö tä waheta kuu hö̃töo soataö:

‑Ai sanöma tänö toitai tä thaa wi ai tä kua mai kitä.

¹¹Ai tä pi hatuka apa wi tä kua mi. Teusö a na ai pili tä õsi pi wasisoti wi, ai tä kua mai kitä.

¹²Teusö a na sanöma töpö pewö hanoatii. Ai töpö pi topapalo wi tä kua mi ipö. Ai tänö toitai tä thaa asa wi, sami ai tä kua asa mai kitä.

¹³Ĩ töpö kai a hiopöa apati nö, ai töpö nomapamatii. Ĩ töpö kai holisia hapaloti nö, ai töpö mönama apatii. Olö kökö nakö wasu kui na, ĩ na ĩ töpö kai wasu kuö hö̃töwö.

¹⁴Ĩ töpönö ai töpö hĩsu thaa soatalo opa nö, töpö höla soatalo opatii.

¹⁵Ai töpö säpa pi topa salo, töpö wasu huu soatalo opatii.

¹⁶Ĩ töpö wasu huti pamö ai töpö peamaö, ai töpö säpaö, ĩ na ĩ töpö kuatii.

¹⁷Ĩ töpönö ai töpö noima tai mi.

¹⁸Teusö a na ĩ töpö kili maapa wikö‑

ĩ na Teusö tä waheta kuu.

¹⁹‑Teusö anö nö patapö töpö noa thaa noai, ai töpönö ĩ ta taö öpa wi ĩ töpönö ĩ ta hini totiopökö‑ ĩ na ta kuu wi ĩ ma ta taö waikia. Ĩ töpönö wanisala tä thaa tä, ‑Nö patapö töpö noa thaa noai, ĩ sama ta tai mi salo, wanisala sama tä thaa päoma‑ ĩ na ĩ töpö kuu wi tä kua mai kitä. Sanöma makö pewö na Teusö aiki, ‑Wanisala wa tä thatala apatipili, ĩ wa‑ ĩ na Teusö a kuu tä, ‑Mawöö!‑ ĩ na makö kuu hö̃töso wi tä kua mai kitä. ²⁰‑Teusö anö nö patapö töpö noa thaa noai, ĩ sa ta hinia totia waikilöma kutenö, Teusö aiki, “Wa topa” ĩ na Teusö a kuu kitäö!‑ ĩ na pö pi kuu tihöö! ‑Wanisala sa tä thatala apati wi ĩ sa‑ ĩ na Teusö anö sanöma makö pi thama pia salo, nö patapö töpö noa thaa päoma ta pi kuu mai.

Teusö anö sanöma makö totipali wi ĩ ta

²¹Huki Teusö anö sanöma makö totipali wi, kamakö na ĩ tä möma kule. Teusö anö nö patapö töpö noa thaa soma noai ĩ tänö makö totipo mai kitä. Ĩ na Moisés a, Teusö a kai a wäsä sinomoti noai ĩ töpö, ĩ na töpö kui töpö kuu hö̃töoma. ²²‑Jesus Cristo a pitili‑ ĩ na sanöma makö pi kuu totio kuköma, ĩ tökö, Teusö anö makö totia sisapali. Ĩ tökö, ‑Kamisa na huki wa taamö toita‑ ĩ na Teusö a pi kuu kuki. ‑Cristo a pitili‑ ĩ na makö pi kuu totio wi, Teusö anö ĩ makö pewö totia ösöha totipali. ²³Sanöma makö pewönö wanisala ma tä thama. Teusö a wakala apii, a toita apii, ĩ tä na makö pewö häwäpotii. ²⁴Noa mai ha Teusö anö makö totiapala apa nö, Jesus Cristo a na Teusö anö makö totipamani. Cristo anö makö õsi uni kusöpali. ²⁵Sanöma makönö wanisala ma tä thati wi, Teusö anö Jesus Cristo a na ĩ tä noa thapamanöpö, Cristo a simöpalöma. Cristo a säpamoa waikisoma kutenö, wanisala ma tä thaa noai ĩ tä na Teusö a hĩso matasoma. ‑Cristo a pitili‑ makö pi kuu totio nö, ‑Kamisa noa na Cristo a säpamono nö, a iä pö halasoma‑ ĩ na makö õsi kuu ha, kamakö na Teusö a noimo totio kitä. Önö kutenö, ‑Ĩ na Teusö anö sanöma makö totipali wi, ĩ na ĩ tä kuö ta o‑ ĩ na makö pi thama pia salo, Teusö anö Cristo a simöpalöma. A simöpa paio mi tä, sanöma nö patapö töpönö wanisala tä thaa hö̃töo paitioma maaki, Teusö anö ĩ töpö peama soatalo maama. ‑Ipa sanöma töpönö wanisala tä thapalati päohe!‑ ĩ na a pi kuu paioma. ²⁶Ĩ na Teusö a pi kuu paioma maaki, huki ĩ na a pi kuu mai kitä. Huki ĩ na a pi kuu mai kitä maaki, ‑Sanöma makönö wanisala ma tä thatalati wi, Teusö anö huki ĩ makö totipali kitäö!‑ Teusö anö huki ĩ na makö pi thama wi ĩ tä kua. ‑Jesus a pitili‑ makö kuu totio wi, Teusö a topa apati wi ĩ anö ĩ makö totia hö̃töpali kitä.

²⁷Önö kutenö, sanöma makö aiki, ‑Kama sa topa apa waikitiowöö!‑ ĩ na makö pi kuu kitä ta o? Ma. Ĩ na makö pi kuu mane. Teusö anö nö patapö töpö noa thaa noai ĩ ma ta hini pi topa wi maaki, ĩ tänö makö totipa mai kitä. ‑Jesus Cristo a pitili‑ makö pi kuu totio wi ĩ tänö makö totia sisapali. ²⁸Ĩ na tä kuaö ha, ‑Nö patapö töpö noa thaa noai ĩ sa ta hini totia tä, Teusö aiki, “Kamisa na wa taamö toita” a pi kuu kitä‑ ĩ na makö pi kuu mai, ‑“Jesus Cristo a pitili” sa pi kuu totio kuköma, “Kamisa na wa taamö toita” ĩ na Teusö pi kuu kitäö!‑ ĩ na makö pi kuu sisaö.

²⁹‑Teusö a lö kui, juteu töpönö ĩ a thapo asa wi ĩ a sisawö‑ pö pi kuu ti! Juteu töpö pasi mai ĩ töpönö ĩ a thapo naio soata wi ĩ a nai soatawö. ³⁰Sami ĩ Teusö a pata waikiwö. Juteu töpönö Teusö a pata thapo wi ĩ a pata hai, juteu töpö pasi mai ĩ töpönö ĩ a pata thapo naio soata wi, ĩ a pata soatawö. Sami Teusö a kua kutenö, ‑Jesus Cristo a pitili‑ ĩ na juteu töpö pi kuu totio kuköma, Teusö anö ĩ töpö totipali, ‑Jesus Cristo a pitili‑ ĩ na juteu töpö pasi mai ĩ na ĩ töpö pi kuu naio kuköma, Teusö anö ĩ töpö totia naipali, ĩ na Teusö anö sanöma makö thalali. ³¹‑“Kamisa na wa taamö toita” ĩ na Teusö ma pi thama pi topa salo, “Jesus Cristo a pitili” ĩ na makö pi kuupököö!‑ ĩ na sa kuu kule. Ĩ na sa kuu pole, ĩ sa aiki, ‑Sutu ha Teusö anö nö patapö töpö noa thaa noai ĩ ta hosalöheö!‑ sa kuu alu kule? Ma. Ĩ na sa kuu mane. Pi naka. ‑Nö patapö töpö noa thaa noai ĩ ta topa apa soa‑ ĩ na sa kuu alu kule.

‑Teusö a pitili‑ Abraão a pi pata kuu totio noai ĩ ta

¹Kamisamakö hai nö patapö Abraão a pata kuo noai, ĩ na ĩ a pata kuama. ²‑“Abraão anö toitai tä thati salo, kamisa na a taamö toita waikia kule” sa pi kuu kule‑ ĩ na Teusö a pi kuu aköna, Abraão aiki, ‑Kamisa totiatalo opa asawöö!‑ a pi kuu hö̃töo noa kipi. Ĩ na a pi kuu hö̃töo noa kipi maaki, Teusö a na ĩ na a kuu maa noa kipi. ³Ĩ na Teusö tä waheta kuu: ‑“Teusö a pitili” ĩ na Abraão a pi kuu totio noai ĩ tä noa na sisawö Teusö aiki, “Kamisa na Abraão a taamö toita waikia kule” ĩ na Teusö a kuuma‑ ĩ na tä waheta kuu. ⁴Ai tä na sanöma wa kalipalo noai, kawa na ĩ aiki, ‑Noa mi hi sitipa sa kökö totoa päo pia kule‑ ĩ na ĩ a kuu mai kitä. ‑Wa kalipalopili, hi ĩ tä noa‑ ĩ na a kuu sisaö. ⁵Ĩ na tä kua kule maaki, kawa kalipalo noai, ĩ tä noa na Teusö anö wa totipa mai kitä. Wa kalipalo mai ha, ‑Teusö a pitili‑ ĩ na wa pi kuu totio päköma, Teusö anö wa totipali. Toitai kama wanö tä thatala apati päo wi ĩ tä noa na kuno mai, ‑Teusö a pitili‑ wa pi kuu totio wi ĩ tä noa na sisawö Teusö anö wa totipali. Teusö aiki, ‑Wanisala wa tä tha apati kipili maaki, kamisanö wa totipali ke. Huki kamisa na wa taamö toita waikia kule‑ ĩ na Teusö a kuu wi ĩ a na wa mamo teteiki nö, ‑Teusö a pitili‑ wa pi kuu salo, ‑Kamisa na wa taamö toita‑ ĩ na kawa na ĩ na Teusö a kuu kuki. ⁶Ĩ na Davi a pata kuu hö̃töoma. ‑Toitai wa tä thatala apati wi ĩ tä noa na kuno mai. Noa mai ha Teusö anö wa totipali‑ ĩ na sa kuu kuae na, ĩ na Davi a pata kuu kua hö̃töoma:

⁷‑“Wanisala wa tä thatala apatipili, ĩ tä na sa hĩso mataso ke. Wanisala wa tä thaa noai, ĩ sa tä noa matamani ke” kawa na ĩ na Teusö a kuu pole, ĩ tä na wa pi mönaha apa.

⁸“Wanisala wa tä thatala apati kipili” kawa na ĩ na Teusö a kuu mai, ĩ tä na wa pi mönaha apa‑

ĩ na Davi a pata kuuma.

⁹‑Wa pi mönaha apa‑ sa kuuhe, pili makö isi ola ösö hosapamo sisa noai ĩ makö na sa kuu sisa kule ta o? Ma. Pili töpö isi ola ösö hosapamo pasio maa noai, ĩ töpö na ĩ na sa kuu naia soata kule. Pi naka. ‑Teusö a pitili‑ Abraão a pi kuu totio noai ĩ tä na Teusö aiki, ‑Huki kamisa na Abraão a taamö toita‑ ĩ na Teusö a kuuma. ¹⁰Abraão a isi ola ösö hosapamo waikio noai ha, ĩ na Teusö a kuuma ta o? Ma. A isi ola ösö hosapamo paio mi tä, ‑Huki kamisa na wa toita‑ ĩ na Teusö a kuu soatama. ¹¹A isi ola ösö hosapamo paio mi tä, ‑Teusö a pitili‑ ĩ na Abraão a pi kuu soatama. ‑Teusö a pitili‑ a pi kuu totio waikio noai ha, a isi ola ösö hosapamonasoma. ‑Teusö a pitili‑ a pi kuu noai ĩ tä noa na Teusö anö a totipalö noai, ĩ tä pi na tä uno thaköma. Önö kutenö, ‑Teusö a pitili‑ ĩ na sanöma makö pi kuu totio wi, ĩ makö aiki, ‑Abraão a pata hai, ipa hao a‑ ĩ na makö pewö kuuto päoö. ‑Teusö a pitili‑ sanöma töpö pi kuu kuköma, pili töpö isi ola ösö hosapamo mai maaki, ĩ töpö na, ‑Huki kamisa na wa taamö toita‑ ĩ na Teusö a kuu. ¹²Ĩ na tä kua tä, pili samakö isi ola ösö hosapamo waikio noai, ‑Teusö a pitili‑ ĩ na ĩ samakö pi kuu totia naine, ĩ samakö na, ‑Huki kamisa na wa taamö toita‑ ĩ na Teusö a kuu naioö. Abraão a isi ola ösö hosapamo paio mi tä, ‑Teusö a pitili‑ a pi kuu soatama kutenö, ‑Huki wa toita apii ĩ wa kupaso ke‑ ĩ na Teusö a kuu kua noai na, ĩ na kamisamakö aiki, ‑Teusö a pitili‑ samakö pi kuu naio kuköma, ‑Huki wa toita apii wa kupaso ke‑ ĩ na kamisamakö na ĩ na Teusö a kuu naiki.

‑Teusö a pitili‑ töpö pi kuu totio wi ĩ töpö na Teusö aiki, ‑Toitai wa kuati kitä‑ ĩ na a kuu

¹³Abraão a, kama hai ĩ tolewö töpö, ĩ na töpö kui töpö na, Teusö aiki, ‑Ĩ ma tä uli pewö thapo kuköma, toitai makö kupaloti kuki kitä‑ ĩ na a kuuma. Kamakö aiki, ‑Teusö anö nö patapö töpö noa thaa noai, Abraão anö ĩ ta hinia totilöma kutenö, ĩ na Teusö a kuuma‑ pö pi kuu tihöö! ‑Teusö a pitili‑ Abraão a pi kuu totioma kutenö, Teusö anö a totipali salo, ‑Ĩ wa tä uli pewö thapo kuköpököö!‑ ĩ na Teusö a kuuma. ¹⁴Nö patapö töpö noa thaa noai, ai töpönö ĩ ta hini totio opa wi ĩ töpö na, ‑Toitai makö kupalo kuki kitä‑ ĩ töpö na ĩ na Teusö a kuu sisa aköna, ‑Teusö a pitili‑ makö pi kuu totile ĩ makö na, ‑Toitai makö kupalo kuki kitä‑ ĩ na Teusö a kuu naio mi kipi. ‑“Teusö a pitili” ĩ na pö pi kuu sisa totioö!‑ tä kuu wi tä kua mana pi. Pi naka. Teusö anö nö patapö töpö noa thaa noai, ai töpönö ĩ ta hini totia aköna, toitai ĩ töpö kupalo pola pi maaki, nö patapö töpö noa thaa noai, ai tänö ĩ ta hini totia wi, ai tä kua asa mai kitä ta pi kuu mai. ¹⁵Nö patapö töpö noa thaa noai, ĩ ma ta hosaö ha, kamakö na Teusö a hĩsolo nö, makö peama kuki kitä maaki, Teusö anö nö patapö töpö noa thaa pasio maama aköna, ĩ ma ta hosa wi tä kua mana pi.

¹⁶‑Teusö a pitili‑ makö pi kuu totio wi ĩ makö na, ‑Toitai makö kupaloti kuki kitäö!‑ ĩ na Teusö a kuu naioö. Teusö anö makö totiapala apa päo kutenö, Abraão makö ola na ĩ na a kuu sisaö. Teusö anö nö patapö töpö noa thaa noai, ai töpönö ĩ ta hini totio wi, ĩ töpö na, ‑Toitai makö kupaloti kitäö!‑ ĩ töpö na ĩ na Teusö a kuu asa mi. ‑Teusö a pitili‑ ĩ na Abraão a pi kuu kua noai na, ĩ na makö pi kuu kua nömöne, ĩ makö hai, Abraão a hai ĩ ola tolewö makö naiwö. Abraão a kuo noai ĩ a na, ‑Ipa hao a‑ ĩ na makö kuu kuköpö. Ĩ makö na, ‑Toitai makö kuki kitäö!‑ ĩ na Teusö a kuu naioö. ¹⁷‑Satehe epii, ai sanöma töpö pilia setekepai, kawa hai ĩ töpö hai ĩ pö̃ a kupaloö!‑ ĩ na Abraão a na ĩ na Teusö a kuu noai, Teusö tä waheta ha ĩ na ĩ ta kua. Önö kutenö, ‑Teusö a pitili‑ Abraão a pi kuu totio noai, ĩ a na ĩ Teusö aiki, ‑Toitai makö kuki kitäö!‑ ĩ na Teusö a kuu totioma. Nomawö töpö temöapama kõo wi, ĩ a kuuma. Hi tä uli ha tä pewö kua paia mi tä, ĩ tä pewö thapalö noai, ĩ a kuuma. ¹⁸Abraão a na, ‑Au tolewö töpö sateha apöki kitäö!‑ ĩ na Teusö a kuu ha, ‑Pitili tahaö!‑ ĩ na Abraão a pi kuu hö̃töoma. Abraão a, kama pusopö a, ĩ na kilii töpö ulupö mai ha, töpö patasipöa pälasoma maaki, ‑Kamisa ola tolewö kupo mai kitäö!‑ ĩ na Abraão a pi kuu maama. ‑Teusö ta pitilia apa‑ a pi kuuma kutenö, satehe epii kama hai ĩ tolewö töpö kupasoma. ‑Au tolewö töpö sateha apöki kitäö!‑ ĩ na Teusö a kuuma kutenö, ‑Abraão a kuo noai ĩ ipa hao a‑ satehe epii sanöma töpö kupaloö.

¹⁹Abraão a patasipö toti ipö waiki tä, ĩ a na 100 inama tä kua waikia tä, ‑Sa noma pia wi ĩ tä atepa apa waikileö!‑ ĩ na a pi kuu waikila tä, kama hai ĩ pusopö Sata a patasoma apa hö̃töa waikia kule maaki, ‑Teusö a kuu noai, ĩ ta holisi‑ Abraão a pi kuu maama. ‑Teusö a pitili‑ a pi kuu holisimo maama. ^20-21‑Teusö a pitili‑ a pi kuu mapo maama. ‑Kamisa na Teusö a kuu noai ĩ ta holisi hãtoa‑ ĩ na a pi kuu maama. ‑Kamisa na Teusö a kuu noai, Teusö anö ĩ tä thama totio kitäö!‑ ĩ na a pi kuu salo, ‑Teusö a pitili‑ a pi kuu totio wi ĩ tä lotetea apöpalo nö, Teusö a na, ‑Aitaköö! Kawa lotete epö asawöö!‑ ĩ na a kuuma. ²²‑Teusö a pitili‑ Abraão a pi kuu totioma kutenö, ‑Kamisa na Abraão a taamö toita apö‑ ĩ na Teusö a pi kuuma. ²³‑Kamisa na Abraão a taamö toita apö‑ Teusö a pi kuu totio noai ĩ tä sãökama kuu noai, Abraão a na tä kuu sisa maama. Abraão a kateha sisa maama. ²⁴Jesus pata tä nomasoma maaki, Teusö anö a temöa komanö noai, ĩ Teusö a na, ‑Ĩ a pitili‑ makö pi kuu totio wi ĩ makö na ĩ tä waheta kuu naioö. ‑Teusö a pitili‑ makö pi kuu totio kuköma, ‑Kamisa na makö taamö toita apö‑ ĩ na Teusö a kuu naioö. ²⁵Wanisala ma tä thaa noai, ĩ tä noa na Jesus a säpamanöpö, a säpa totio pialahai, ĩ töpö na a totoköma. Ĩ na tä kua tä, Teusö a na sanöma makö taamö toita apa kuköpö, a temöa konasoma.

Teusö a na makö taamö toita apii ĩ ta

¹‑Teusö a pitili‑ ĩ na makö pi kuu totioö ha, Teusö anö makö totipalöma. Teusö a na makö toita waiki kutenö, ĩ a na makö kili mai, huki ĩ a na makö noimopaloö. Kamakö hai ĩ Jesus Cristo pata tänö makö pewö noipalöma. ²‑Teusö a pitili‑ makö pi kuu totio kuköma kutenö, Teusö a na Jesus Cristo anö makö pewö noipalöma. Ĩ na Jesus Cristo anö makö thama totioma salo, Teusö anö makö totiapalatii. Teusö anö makö totiapala apati salo, makö pi toitai makö kupalotii. Önö kutenö, ‑Teusö a wakala apii ĩ a kua kua wi na, ĩ na makö kua kua naio kitä‑ ĩ na makö pi kuu salo, makö pi mönaha apa nö, makö pi topa apaö. ³Ĩ tä na makö pi mönaha sisa mai kitä. Hi tä uli ha makö pepalo opati kule maaki, ĩ tä na makö pi topa hö̃töa. Makö pea satia soatia tä, ‑Teusö a pitili‑ ĩ na makö pi kuu satimo kuköma, makö pi lotetea apa kuki. Önö kutenö, makö pi topa apa. ⁴‑Teusö a pitili‑ makö pi kuu satimo opaö ha, ‑Makö toita apö‑ ĩ na Teusö a kuu. ‑Makö toita apö‑ ĩ na Teusö a kuu nö, ‑Teusö anö makö nö läpo kitäö!‑ ĩ na makö pi thamaö. ⁵‑Teusö anö makö pi ipawöö!‑ ĩ na makö pi thamaö. Kamakö na Teusö anö kama õsi kua tolele, ĩ a õsi totokö noai ĩ a õsinö ĩ na makö pi thama kutenö, ‑Teusö anö makö nö läpo kitä‑ ĩ na makö kuu wi ĩ ta pitilia apa.

⁶Makö utiti ipö soa salo, kama makö noamo tai mi ipö soa tä, wanisala ma tä thaa noai, Cristo anö ĩ makö noama pia salo, a säpamoa lälasoma. ‑Pei. Huki wa säpama pia kuleö!‑ ĩ na pö̃ anö Cristo a noa thaö ha, a säpamonasoma. ⁷Ai sanöma tä topa apati wi, ĩ a noamapö ai sanöma tä säpamo wani ipö kitä. Ĩ na sa kuu kule maaki, a topa apati wi, ĩ a na ai sanöma tä säpamo pi topa wi, ĩ ai tä kua hãtole kitä. ⁸Ĩ na tä kua kitä maaki, ‑Teusö anö sanöma makö ta pi ipa noa‑ ĩ na Teusö anö makö pi thama pia salo, makö wanisala soa tä, kamakö noa na Cristo a säpamonasoma. ⁹Cristo a noma tä, a iä pö halaso noai, ĩ a iä pönö Teusö anö makö totipalöma kutenö, makö täapa totia kõa läkö laso kitä. Wanisala tä thaa wi ĩ töpö na Teusö a hĩso opa nö, töpö peama totio opa piale, ĩ tä, Teusö anö makö täa konö naso kitä. ¹⁰Teusö ma wanipoti wi ĩ makö kuoma maaki, kamakö noa na Cristo a säpamonasoma kutenö, kamakö na Cristo anö Teusö a noipalöma. Huki makö noi ipö tä, Cristo a temöa konaso noai, ĩ a temö öpii ĩ anö makö õsi täapa kõo läo kitä. ¹¹Ĩ na pätawö kuno mai. Kamakö hai Jesus Cristo Kaikana tänö kamakö na Teusö a noipalöma salo, Teusö a na makö pewö pi mönahapalo opatii.

Adão a, Cristo a, ĩ na kilii töpö

¹²Pi naka. Sami wano tänö wanisala pili tä kolo thapalöma kutenö, ĩ ola ai sanöma töpönö wanisala tä thaa tolea wi tä kupasoma. Wanisala tä thaa soma noai ĩ tä noa na sanöma töpö nomapo kua kukö noai na, ĩ na sanöma makö pewönö wanisala ma tä thaa kua hö̃töoö ha, ĩ na makö pewö noma kua hö̃tölasoö. ¹³Teusö anö Moisés a noa thaa paio mi tä, sanöma töpönö wanisala tä thaa somama. Teusö anö Moisés a noa thaa noai ĩ ta kua paia mi kutenö, wanisala tä thaa soma noai ĩ töpö na Teusö aiki, ‑Sa töpö noa thaa wi ĩ töpönö ĩ ta hini mi manu kui, sa töpö peama kuki kitäö!‑ ĩ na Teusö a pi kuu paio maama. ¹⁴Ĩ na Teusö a pi kuu maama maaki, Moisés a kupo paio mi tä, Adão a hai ĩ tolewö töpö kuo noai, ĩ töpö hotelasoma. Teusö anö Adão a noa thaa noai, ĩ töpönö ĩ ta tai mi pasi kutenö, Adão anö ĩ ta hosa kua noai na, ĩ na ĩ töpönö ĩ ta hosa tolea kua maama. Ĩ ta hosa tolea kua maama maaki, ĩ töpönö ai wanisala tä thama hö̃töoma salo, ĩ töpö nomanasoma.

Hi tä uli ha Cristo a huu noai, ĩ a kuo kuo noai na, ĩ na Adão a kuo kuo hö̃töoma. Ĩ töpö polakapio opama maaki, ĩ töpönö satehe epii sanöma töpö thaa toleköma. ¹⁵Cristo a kui na, ĩ na Adão a kuo kuo hö̃töoma maaki, Cristo a kua totio noai na, ĩ na Adão a kua totio pasio maama. Teusö anö sanöma töpö noa mi totiapala apa wi ĩ tä kua wi na, Adão anö wanisala tä thaa noai, ĩ na ĩ tä kua pasio maama. Sami a maaki, wanisala tä thaa soatasoma kutenö, sanöma töpö satehe epii töpö nomapo maaki, Teusö anö sanöma makö totiapala satia apaö. Teusö anö sanöma makö totiapala apa wi, kamakö na Jesus Cristo anö ĩ tä totoma apaö. Cristo sami a maaki, noa mi satehe epii makö totiapala apaö. ¹⁶Adão anö sami wanisala tä pi thama kutenö, Teusö aiki, ‑Wanisala tä thaa noai ĩ tä na makö peama kuki kitäö!‑ Teusö a kuu nö, sanöma makö peamama. Ĩ na tä kua kua noai na ĩ na Teusö anö makö totiapala wi, ĩ na ĩ tä kua mi. Sanöma makönö satehe epii wanisala ma tä thaa pi kupo wi tä kua maaki, noa mi päla tä, Teusö anö makö totiapala apa kutenö, ‑Huki kamisa na makö taamö toita‑ ĩ na Teusö a kuu. ¹⁷Sami a maaki, Adão anö wanisala tä thama kutenö, sanöma makö nomapo kuköma maaki, Jesus Cristo sami a maaki, tä thaa asa wi ĩ tä lotetea satia apa asaa. Jesus Cristo anö makö pasilia waikipalöma kutenö, makö õsi nomaso wi ĩ tä kua pikia mai kitä. ‑Teusö anö sa totiapala apa wi, ĩ sa tä pii! Sa wanisala apati wi maaki, Teusö anö sa totipali wi ĩ sa tä pii kuleö!‑ ĩ na makö pi kuu totio nö, Jesus Cristo ma täa kuköma, makö õsi nomapo mai, makö õsi palimia totipasoma, wanisala tänö makö utitipama kota mai kitä.

¹⁸Önö kutenö, Adão anö sami wanisala tä pi thama kutenö, sanöma makö pewö na, ‑Makö wanisala‑ ĩ na Teusö a kuu. Ĩ na tä kua tä, Cristo anö sami toitai tä pi thaa asama kutenö, sanöma makö pewö na, ‑Huki kamisa na makö taamö toita‑ ĩ na Teusö a kuu nö, makö õsi temöo soatio wi ĩ tä, tolo. ¹⁹Sami ai tänö Teusö a kai a hini maama kutenö, sanöma töpönö wanisala tä thaa wi, satehe epii ĩ töpö kupaso kua noai na, ĩ na sami ai tänökö asawö, Teusö a kai a hini totio asama kutenö, Teusö a na satehe epii töpö toitai, ĩ töpö kua hö̃töpaso kitä.

²⁰‑Wanisala sa tä thaa wi ĩ sa waikiwö‑ ĩ na Teusö anö makö pi thama totio pia salo, nö patapö töpö noa thama. Wanisala tä thaa wi ĩ tä pea apa waikia kule maaki, Teusö anö sanöma makö totiapala wi ĩ tä pe sati ipö. Wanisala ma tä thatala apati kule maaki, Teusö anö makö totiapala satia apatii. ²¹Önö kutenö, wanisala ma tä thaa wi ĩ tä lotete epö salo, makö nomaso wi tä kua kule na, ĩ na Teusö anö noa mi makö totiapala apati wi ĩ tä lotete epö kuö sati ipö salo, ĩ na makö totipa kua hö̃töoö. Makö totipalö nö, Teusö anö kamakö hai ĩ Jesus Cristo pata tä na makö õsi palimipamaö.

Cristo anö makö temöama wi ĩ ta

¹Önö kutenö, wi na makö kuupökö? ‑Wanisala ma tä thaa päla tä maaki, Teusö anö makö totiapala satia apa manu kule, wanisala ma tä thaa satia apatipököö!‑ ĩ na makö kuupökö? ²Ma. Wanisala tä thaa wi ĩ tä na nomawö töpö pi wasiso mi kui na, ĩ na makö kua hö̃töa waikipaso noai, ĩ makönö wanisala ma tä thaa sapa kõataloti kitä ta o? Ĩ na kuno mai. ³Jesus Cristo a na makö koka waikipasoma kutenö, makö mãi õhomamonasoma. Makö mãi õmamo tä, Cristo a noma kulaso noai na, ĩ na makö uni noma kua hö̃tösoö ta pi kuu mai. ⁴Makö mãi õmamonasoma kutenö, Cristo a na makö kokaiki nö, Cristo a solo makö nomano nö, Cristo a solo makö nomawö titiköma. Kamakö hai pö̃ Teusö a lotete toti ipii ĩ tänö Cristo a nomawö temöa thaa komanö noai na, ĩ na makö temöa thaa hö̃töa kopalöma. Önö kutenö, makö tikopö öpii makö kutiopö, Cristo a solo makö nomawö titikömae.

⁵Cristo a na makö koka tä, Cristo anö makö kai noma kulaso noai na, Cristo anö ĩ na makö kai temöa kua hö̃töa konasoö. ⁶Ĩ ma tä taö waikia. Teusö ma thapo paia mi tä, makö kuati noai, ĩ makö uni nomasoma. Hii ti pakalai ti ha Cristo a säpamo pa, ĩ ha kamakö uni säpamoa naisoma. Wanisala ma tä thaa pi topa apa sinomo wi ĩ tä lotete epii, Teusö anö ĩ tä mapamani pia salo, wanisala ma tä thaa sipa maapö, makö kuati noai, ĩ tä uni säa naipamanöma. ⁷Sanöma tä noma waikiso noai, ĩ anö wanisala tä thaa pi topa kota mai kitä. ⁸Cristo a solo makö nomasoma kutenö, ‑Cristo a solo makö temöa konasoö‑ ĩ na makö pi kuu totia kule. ⁹Teusö anö Cristo a temöa komanöma. A noma kota mai kitä. Nomaso wi ĩ tänö Cristo a utitipama kota mai kitä. Ĩ ma tä taö waikia kule. ¹⁰Wanisala tä thaa wi ĩ tä lotete epii tä maa totipamani pia salo, Cristo a noma pälasoma. Cristo a nomano nö, wanisala tä thaa wi ĩ tä utitia waikipamanöma salo, a noma kota mai kitä. ¹¹Ĩ na Cristo a kua kua noai na, ĩ na makö kua naiopökö. ‑Wanisala tä thaa noai, ĩ tä na sa noma waikisoma sa‑ ĩ na makö pi kuu nö, ‑Jesus Cristo a na sa koka kutenö, temö temö sanö Teusö sa hini totio wi ĩ sa‑ ĩ na pö pi kuu totio naioö!

¹²Önö kutenö, wanisala ma tä thaa wi ĩ tä na pili makö äpätii, ĩ makö simöamo maapöö! Cristo a na makö koka paia mi tä, wanisala ma tä thaa pi topa sipa apati noai, ĩ tä thaa pi topa kota maikiö! ¹³Kama pili makö sainö wanisala ma tä thaa maapö, wanisala tä na kama makö toto sapao kõo mai, Teusö anö makö temöa komanöma kutenö, Teusö a na kama makö toto sapao sisaaö! Kama pili makö sainö toitai ma tä thaa sisapö, Teusö a na kama pili makö pewö toto sapa totio kõpököö! ¹⁴Nö patapö töpö noa thaa noai, ĩ tänö makö simöa mane. Teusö anö makö totiapala apa wi ĩ tänö makö simöa kule. Önö kutenö wanisala tä na makö simöamo mai kitä. Wanisala tä na, ‑Sa simöa sinomoö!‑ ĩ na makö kuu mai, Teusö a na, ‑Sa simöa sinomoö!‑ ĩ na makö kuu sisa kitä.

Teusö anö makö simöa sisa wi ĩ ta

¹⁵Önö kutenö, wi na makö kuapö? Noa thaa wi ĩ tä na makö simöamo mai ha, Teusö anö makö totiapala apa wi ĩ tä na makö simöamo totia manu kule, wanisala ma tä thaa satimoatalo opati kitä ta o? Ĩ na kuno mai ta pi kuu mai. ¹⁶Ai sanöma tä na, ‑Sa simöa sinomoö!‑ ĩ na wa kuu ha, ĩ anö wa simöa sinomo kuköma, wa kalipalama sinomo kuki. Ĩ na tä kua kua wi na, ĩ na wanisala tä na, ‑Sa simöa sinomoö!‑ ĩ na wa pi kuu kuköma, wanisala tänö wa simöaö ha, wa nomasoma, Teusö a na wa koonö mai kitä. Ĩ na tä kua tä, Teusö a na, ‑Sa simöa sinomoö!‑ ĩ na wa pi kuu sisa kuköma, Teusö wa kai a hini kuköma, Teusö a na wa taamö toita apö kitä. ¹⁷Wanisala ma tä thati noai ĩ tänö makö simöa sinomo paioma maaki, kamisanö makö pi hatukupamanöpö, kamakö na pitili sa tä sai a totokipili, huki ĩ ma ta hini totiatalo soatioö. ¹⁸Wanisala tä thaa wi, ĩ tänö makö simöa sinomo noai, Teusö anö ĩ tä uni kusöpalö nö, Teusö anö makö simöa kutenö, huki toitai ma tä thaa sisatia kule. ¹⁹Sa kuu pole, ĩ ma ta hininöpö, ‑Hãu. Ĩ na Paulo a kuu totia alu kule ta o‑ ĩ na makö pi thamapö, ‑Sanöma pata töpönö ai töpö simöa kua sinomo kua wi na, ĩ na wanisala tänö makö simöa kua sinomo hö̃töoma‑ ĩ na sa kuu kule. ‑Toitai tänö makö simöa nömöopöö!‑ ĩ na sa kuu alu kule. Wanisala ma tä thaa pi topa apa salo, ‑Wanisala tä, sami sami tä, ĩ na tä kui tänö sa simöa totio pätiopököö!‑ ĩ na makö pi kuu sinomotima. Huki ĩ na pö pi kuu tihöö! Huki, ‑Toitai sa tä thaa pi topa apa salo, toitai sa tä thaa pi topa wi ĩ tänö sa simöa nömöo sisatiopökö o!‑ ĩ na pö pi kuu totihoö!

²⁰Wanisala tä thaa wi ĩ tänö makö simöati tä, toitai tä thaa wi ĩ tänö makö simöatala naitio pikio maama. ²¹Wanisala ma tä thati noai, ĩ tä na huki makö pi kilihia apöle, ĩ ma tä wanisala thati tä, toitai makö kuatima ta o? Ma. Wanisala ma tä thaa noai ĩ tä noa na makö nomasoö. ²²Wanisala tänö makö simöa sinomo opama maaki, Teusö anö ĩ tä uni kusöpalö nö, huki Teusö anö makö simöa sisa wi ĩ tä kua kule. Teusö anö makö simöaö ha, toitai ma tä thaa sinomo wi ĩ makö kupasoma. Toitai ma tä thaa wi ĩ tä noa na makö õsi palimipasoö. ²³Wanisala ma tä thaa wi ĩ tä noa na makö nomapoti kitä maaki, Teusö anö kamakö hai ĩ Jesus Cristo Kaikana tä na makö õsi palimipamani wi, noa mi ĩ tä totomaö.

Moisés anö makö noa thaa noai, Teusö anö ĩ tä uni kusöpalö noai ĩ ta

¹Ipa pö! Moisés anö makö noa thaa noai ĩ ma ta taö waikia kutenö, sa kuu piale, ĩ ma ta hinia hö̃töli kitä. Sanöma makö noma paio mi tä, noa thaa wi ĩ tänö makö simöa sisaö. Makö nomasoma, makö noa thaa wi tä kua mai kitä. ²Hiki. Pi naka. ‑Au heano a temö soa tä, pusopö wanö au heano a hosa maapöö!‑ ĩ na makö noa thaa wi tä kua. Ĩ na tä kuu wi maaki, au heano a nomasoma tä, ‑Ai tiko tä wano täa nömöo tihöö!‑ ĩ na tä kuu wi tä kua mai kitä. ³Peanopö tä temö soa tä, pusopö anö ai tiko tä wano sapäkamaö ha, ‑Hi suö anö ai tiko tä wano sapäkama apöleö!‑ tä kuu wi tä kua sisaa. Ĩ na tä kua kitä maaki, peanopö a nomasoö ha, ĩ suö anö ai wano tä sua nömönöma, ‑Häö. Ki suö anö ai tä wano supalawö‑ ĩ na tä kuu wi tä kua mai kitä. ⁴Ipa pö! Ĩ na tä kua kua wi na, ĩ na kamakö na ĩ na tä kua hö̃töoö. Cristo a na makö sätäa waikia kutenö, Moisés anö nö patapö töpö noa thaa noai ĩ tä pi na makö uni noma waikisoma. Nö patapö töpö noa thaa noai ĩ tänö makö simöa mane. Teusö a na makö kalipalopö, Teusö anö Cristo a temöa komanö noai, huki ĩ Cristo anö makö thapo kule. ⁵Cristo anö ai sanöma töpö thapo mai, ĩ töpö kua kuati wi na, ĩ na makö kua naitia tä, Moisés anö nö patapö töpö noa thaa noai, pili makö õsi na ĩ tä kalipalo opa kutenö, wanisala ma tä thaa pi topa apatima. Wanisala ma tä thaa pi topati ha, makö nomapopö, ĩ makö kupasoma. ⁶Ĩ makö kupasoma maaki, Moisés anö makö noa thaa wi ĩ tänö makö uni õkapalö noai, ĩ tä pi na makö uni noma waikisoma kutenö, huki makö noa thaa wi ĩ tänö makö õka mane. Teusö anö makö uni kusöa waikipalöma kutenö, huki makö noa thaa wi ĩ tänö makö simöa mane. Önö kutenö, Teusö a na makö kalipalo pi topa salo, Moisés anö makö noa thaa wi ĩ ma tä sãökama hinitima maaki, huki ĩ na makö kua mai kitä. Teusö a õsi kua tolele, ĩ ma hini sisa nö, Teusö a na makö kalipalo opatii.

Teusö anö makö noa thaa wi ĩ ta topa apa kule maaki, wanisala ma tä thaa pikiowö

⁷Önö kutenö, wi na makö kuupökö? ‑Moisés anö makö noa thaa wi ĩ tä wanisala‑ ĩ na makö kuupökö? Ma. Ĩ na kuno mai. Moisés anö sa noa thaa wi ĩ tänö wanisala tä na sa pi hatukupamani. Hiki. ‑Ai sanöma tänö tä thapo waikile, ĩ tä na a pi wasiso tihöö!‑ ĩ na Moisés anö sa noa thaa läo maama aköna, ‑Sa pi wasisoti wi ĩ tä wanisalale‑ sa pi kuu tao mana pi. ⁸‑Ai tänö tä thapo pole, ĩ tä na a pi wasiso tihöö!‑ ĩ na sa noa thaö ha, wanisala sa tä thaa pi topa wi ĩ tä walo läatalo kutenö, ai tänö tä thapo pole, ĩ tä na sa pi wasiso husua apösoma. Sa noa thaa wi ĩ tä kua mi tä, wanisala sa tä thaa pi topa husuoolö mi. ⁹Moisés anö sa noa thaa noai ĩ sa ta tai mi tä, ‑Sa õsi temö. Sa topa apa waikitiowö‑ ĩ na sa pi kuuma maaki, Teusö anö sa noa thaa noai ĩ sa tä taö kuköma, wanisala sa tä thaa noai ĩ tä palalo nö, ‑Sa õsi palimi mi. Sa topati mi ipö kutenö, Teusö a na sa hanoa kule‑ ĩ na sa pi kulasoma. ¹⁰Teusö a na sa hanoa maapö, sa noa thaa wi, Teusö anö ĩ tä totopöma maaki, ĩ tä totopi wi ĩ tänö sa õsi temöa totio mai, Teusö a na sa hanoa kuköma. ¹¹Sa noa thaa wi, ĩ sa ta hini waikitioma kutenö, wanisala tä na sa pi hatuka apa waikisoma. Wanisala tä na sa pi hatuka apa waikisoma kutenö, wanisala sa tä thaa pi topa sinomo wi ĩ tänö sa mönama nö, sa uni nomamanöma.

¹²Önö kutenö, Teusö anö makö noa thaa wi ĩ ta wanisala mi. Ĩ ta hai, Teusö a kai a kutenö, ta topa apa. Teusö anö makö noa thaa wi ĩ ta hai, Teusö a kai a kutenö, ĩ tä pewö a makoka apa. Ĩ tä pewö a topa apa. ¹³Ta topa apöle, ĩ tänö sa õsi noma lämanö nö, Teusö a na sa hole hanoa läpamanöma ta o? Ĩ na pö pi kuu tihöö! Wanisala sa tä thaa pi topa apa wi ĩ tänö sa simöaö ha, Teusö ta topa apöle, ĩ sa ta peamama. Ĩ sa ta peamama kutenö, Teusö a na sa hanoa kuköma. Wanisala sa tä thaa noai ĩ tänö Teusö a na sa hanoa läpamani ha, ‑Wanisala sa tä thaa wi ĩ tä wanisala totiwöö!‑ ĩ na sa pi kulasoma. Teusö anö sa noa thaa noai, ĩ tä na sa pi hatukupalo nö, ‑Wanisala sa tä thaa nö hĩsua apati noa‑ ĩ na sa pi kulasoma.

¹⁴Teusö anö makö noa thaa wi, Teusö a õsi kua tolele, ĩ anö ĩ ta totoköma kutenö, ĩ ta topa apa. Ĩ ma tä taö waikia kule maaki, sanöma sa päwö kutenö, sa utiti. Wanisala sa tä thaa wi ĩ tänö sa simöa sinomo pikio opatii. ¹⁵Sa kuati wi ĩ tä na sa pi hatuka totia mane. Sa tä thaa pi topa wi ĩ sa tä thaa totio mai, sa tä thaa wani ipii ĩ sa tä thaa soa päatalo opatii. ¹⁶Wanisala sa tä thaa wani ipii ĩ sa tä thaa soa päatalo opati kule maaki, ‑Teusö anö sa noa thaa wi ĩ ta topa‑ ĩ na sa pi kuu. ¹⁷Önö kutenö, kama sa sainö wanisala sa tä thaa mane. Pili sa õsi na wanisala tä kule, ĩ tänö kamisa na wanisala tä thama päoö. ¹⁸Kama sa pi saimo nö, kama sanö toitai sa tä thaa wi tä kua mai kitä. Ĩ na tä kua wi ĩ sa tä taö waikia. Kama sanö toitai sa tä thaa pi topa kule maaki, toitai sa tä thaa tai mi. ¹⁹Toitai sa tä thaa pi topa wi ĩ sa tä thaa mai, wanisala sa tä thaa wani ipii ĩ sa tä thaa soa päatalotii. ²⁰Wanisala sa tä thaa wani ipii ĩ sa tä thaa kuköma, kama sa sainö ĩ wanisala sa tä thaa päa mane. Pili sa õsi na wanisala tä kule, ĩ tänö kamisa na ĩ wanisala tä thama päoö.

²¹Önö kutenö, pi naka. Toitai sa tä thaa pi topa kule maaki, wanisala sa tä thaa soa päatalo opa wi ĩ tä läo läatalo opaö. ²²‑Teusö anö makö noa thaa wi ĩ ta topa apa. Ĩ sa ta pi ipaö‑ ĩ na kamisa õsi kuu kule maaki, ²³Teusö anö sa noa thaa wi ĩ sa ta pi mi ipii, kamisa õsi na ĩ tä kua naia kule. ‑Teusö sa kai a pi ipaö‑ ĩ na sa õsi pi kuu kule maaki, ‑Teusö a kai a hini ti!‑ ĩ na tä kuu wi, kamisa õsi ha ĩ nasimö tä kua naia kule. Ĩ tä kua kutenö, wanisala sa tä thaa wi ĩ tänö sa simöa sinomoö. ²⁴Sa pi topapalo mi ipöö! Wanisala sa tä thaa wi ĩ tänö sa simöa sinomo kutenö, Teusö a na sa hanoa totitile, witi pili anö ĩ tä maa totipamanöpö taköö? ²⁵Kamakö hai Jesus Cristo pata tänö ĩ tä matamani kitäö! Önö kutenö, ‑Aitaköö!‑ ĩ na Teusö a na makö kuupökö.

Önö kutenö, ĩ na sa kuatii. Teusö anö makö noa thaa wi, kamisa õsinö ĩ ta hini soatio wi maaki, wanisala tänö sa simöa sinomoö ha, wanisala sa tä thaa soa päatalo opatii.

Wanisala ma tä thaa sinomo opati wi, Teusö a õsi kua tolele, ĩ anö ĩ tä uni kusöa kopali

¹Önö kutenö, Jesus Cristo a na makö koka wi ĩ makö na, ‑Wa wanisala‑ huki ĩ na tä kuu wi tä kua mai kitä. ²Teusö a õsi kua tolele, ĩ anö Jesus Cristo a na makö kokamakö nö, makö õsi temöa komanö noai ĩ tänö makö uni kusöa kopali. Wanisala ma tä thapala apati ha, makö õsi nomaso wi, ĩ tä na makö uni kusöa kopali. ³Sanöma makönö Teusö ma thapo mi tä, wanisala tänö makö simöa sinomoti ha, Teusö anö Moisés a na makö noa thama wi ĩ ta utiti. Önö kutenö, Moisés anö makö noa thaa noai ĩ tänö makö õsi kusöpa paio maama. Teusö anö makö uni kusöa sisapalöma. ‑Sanöma töpönö wanisala tä thaa sinomo wi ĩ tä wanisala apati sai‑ ĩ na Teusö a pi kuu nö, wanisala tä peamama. Kama hai ĩ pelupö a simöpalö nö, ‑Sanöma töpönö wanisala tä thaa sinomo wi ĩ töpö kui na ĩ na ipa ulu a kupasopö‑ ĩ na a pi kuu nö, ‑Sanöma töpönö wanisala tä thapala apati wi, ipa ulu anö ĩ tä mapamanöpö‑ ĩ na Teusö a pi kuu salo, kama hai ĩ pelupö a simöpalöma.

⁴Teusö aiki, ‑Sanöma töpönö kamisa õsi kua tolele, ĩ a thapo mi tä, sa töpö noa thaa noai ĩ ta hini totio mai kitä. “Teusö a õsi kua tolele, ĩ anö sa lotetepamanö nö, sa simöa sinomopöö!” ĩ na ĩ töpö sanöma pi kuu tä, sa töpö noa thaa noai ĩ ta hinia totili kitä‑ ĩ na Teusö a pi kuu nö, wanisala tä peama pia salo, kama hai ĩ pelupö a simöpalöma. ⁵Sanöma töpönö tä thaa pi topa päo sinomo wi, ai töpönö ĩ tä thaa soa päatalo opati kutenö, ĩ töpönö tä thaa pi topa päo wi ĩ tänö ĩ töpö õsi simöa sinomo opati päo sai. Ĩ na tä kua tä, Teusö a õsi kua tolele, ĩ anö tä thaa pi topa wi, ai töpönö ĩ tä thatala apati kutenö, Teusö a õsi kua tolele, ĩ anö ĩ töpö õsi simöa sinomo asa sisaö. ⁶Teusö anö sanöma töpö simöa mai, ĩ töpönö tä thaa pi topa apa wi, ĩ tänö ĩ töpö õsi simöa pasio päoö ha, ĩ töpö õsi nomaso kitä. Ĩ töpö nomaso kitä maaki, Teusö a õsi kua tolele, ĩ anö ai töpö õsi simöa asa salo, ĩ töpö õsi palimipalo nö, töpö pi topapalo opa kuki kitä. ⁷Önö kutenö, Teusö a õsi kua tolele, ĩ anö sanöma töpö simöa mai, ĩ töpönö tä thaa pätio wi ĩ tä thaa pi topa apa tä, ĩ töpönö Teusö a wanipo wi ĩ töpö kupasoö. Teusö anö makö noa thaa wi ĩ töpönö ĩ ta hini totio mi. Ĩ ta hini totio mai kitä. ⁸Teusö anö töpö simöa mai, ĩ töpönö tä thaa sinomo pi topa pätio wi ĩ tänö ĩ töpö simöa sinomo pasio wi ĩ töpönö Teusö a pi mönahapama taö mai kitä.

⁹Ĩ na kamakö kua asa mai kitä. Teusö a õsi kua tolele, kamakö õsi na ĩ a pilia kutenö, sanöma töpönö tä thaa sinomo pi topa pätio wi ĩ tänö makö simöa mai, Teusö a õsi kua tolele, ĩ anö tä thaa pi topa wi ĩ tänö makö simöa asatiotii. Teusö a õsi kua tolele, Cristo anö ĩ a õsi simönö noai, kawa õsi na ĩ a õsi pilia mi tä, Cristo wa thapo wi ĩ wa mai kitä. ¹⁰Kamakö na Cristo a pilia tä, makö õsi temö öpö. Wanisala ma tä thaa wi ĩ tä noa na makö nomaso kitä maaki, Teusö anö makö totia waikipalöma kutenö, pili makö õsi uni temö öpö soawö. ¹¹Teusö anö Jesus Cristo a noma temöa komanö noai, kamakö õsi na ĩ Teusö a õsi kua tolele, ĩ a pilia waikia kutenö, pili makö sai nomapoti wi, Teusö anö ĩ makö sai temöa naia kopali kitä. Teusö a õsi kua tolele, kamakö na ĩ a õsi pilile, ĩ anö pili makö sai temöa kopali.

Cristo a hösökapalo asaö ha, ĩ a na makö hösökapalo naio kuki kitä

¹²Ipa pö! Önö kutenö, sanöma makönö wanisala ma tä thaa pi topa apa pätio wi, ĩ na makö kuati mai nököö! Sanöma makönö wanisala ma tä thaa pi topa apa pätio wi, ĩ tä na makö simöamo sinomo wi, ĩ makö mai kitä. ¹³Wanisala ma tä thaa sinomoti ha, makö nomaso kitä. Wanisala ma tä thapala apa sinomoti wi, Teusö a õsi kua tolele, ĩ a na kamakönö ĩ ma tä mapamanöma, temö temö makö kupaso kitä. ¹⁴Teusö a õsi kua tolele, ĩ anö makö poko tutuapalati pole, ĩ makö hai, Teusö ulupö makö. ¹⁵Kamakö na Teusö anö kama õsi kua tolele, ĩ a õsi totokö noai ĩ a õsinö makö noa mi kalipalama kuki wi tä kua mai kitä. Ĩ a õsinö makö kilima mai kitä. Teusö a õsi kua tolele, ĩ anö kama hai ĩ ulu makö thapali. Kama hai ĩ ulu makö thapali ha, Teusö ma nakalö nö, ‑Hapa. Ipa hao ai!‑ ĩ na makö kuu kuki. ¹⁶Ĩ na makö kuu tä, ‑Awai. Teusö ulupö maköö!‑ ĩ na Teusö a õsi kua tolele, ĩ a kuu naioö. ¹⁷Teusö ulupö makö kutenö, Teusö anö tä toita apii tä totoa piale, ĩ ma tä täa totili kitä. Cristo a na Teusö anö tä totoa piale, ĩ kamakö na ĩ tä totoa naiki kitä. Cristo a pea kua noai na, ĩ na makö pea kua naio tä, Cristo a hösökapalo asale ha, ĩ a na makö hösökapalo naio kuki kitä.

Huki makö pea kule maaki, waiha makö pea mai, pe epii makö pi topapalo opa soatio kitä

¹⁸Waiha tä toita apii, tä wakala apii, kamakö na Teusö anö ĩ tä totopöma, pe epii makö hösökapalo kitä manu kui, huki wani ipii makö peati kule maaki, makö pi hähämo mane. Ĩ na sa pi kuu kule. ¹⁹Waiha Teusö anö kama hai ĩ ulu töpö möma hoka apa piale, Teusö anö tökö piäma noai ĩ tökö pewönö ĩ tä taa pi topa apatii. Salo pö, hii tiki, sitikali pö, ĩ na tökö kui, Teusö anö kama hai ĩ ulu töpö möma piale, ĩ tä na ĩ tökö uni pewö mamo läapalo opatii. ²⁰Teusö anö tökö pewö piäma noai, ĩ tökö pewö tomöpalo mi. ‑Makö tomöpo mai ĩ makö kupoö!‑ ĩ na ĩ tökö uni pi kuu pola tä kuno mai, ‑Ĩ na ĩ tökö pewö kua päopöö!‑ ĩ na Teusö a pi kuu ha, ĩ tökö pewö tomöpalo mai, ĩ tä pewö kua soapasoma. Hotepo wi ĩ tä, salia wi ĩ tä, wasu wasu tä, ĩ na tä kua wi tä kupasoma. Ĩ tä kupasoma maaki, ĩ tä kua soatiolö mai kitä. ²¹Waiha Teusö anö tökö piäma noai, Teusö anö ĩ tökö pewö pata tikopöpali kitä. Ĩ tökö pewö hotepo sinomo opati wi, waiha Teusö anö ĩ tä mapamani kitä. Sanöma töpö hotepo wi, ĩ tä na Teusö anö kama hai ĩ ulu töpö uni kusöpalö noai, ĩ tä topa apa kule na, ĩ na Teusö anö tökö pewö piäma noai, hotepo wi ĩ tä na ĩ tökö pewö kusöa naipali wi, ĩ tä topa apa kua hö̃töle kitä.

²²Suö tänö ulu a thapa pia tä, a halilimo kua wi na, ĩ na Teusö anö tökö pewö piäma noai, sutu ha ĩ na ĩ tökö uni halilimopalo opama maaki, huki ĩ tökö pewö uni halilimopalo soatia kule. ²³Ĩ tökö pewö halilimo sisa mane. Kamakö na Teusö anö kama õsi kua tolele, ĩ a totopa soma noai, ĩ ma õsi thapo pole, ĩ makö õsi halilimo naia kule. Waiha kamakö na Teusö aiki, ‑Ipa ulu makö waikiwö‑ ĩ na Teusö a kuu nö, pili makö tikopöa totipali wi, huki ĩ tä na makö mamo läa soa kutenö, makö õsi halilimopalo paitia kule. ²⁴Teusö anö makö täapa kõköma, kamakö aiki, ‑Waiha Teusö anö makö tikopöpali kitäö!‑ ĩ na makö pi kuu nö, makö tikopöpa piale, ĩ tä na makö mamo läapalo soatia kule. Ĩ tä na makö mamo läapaloti pole, ĩ ma tä tapa waikia aköna, ĩ tä na makö mamo läapalo soa mana pi. Wa tä tapa waikile, ĩ tä waloa waikiköma maaki, ĩ wa tä walo taa satia soa kitä ta o? ²⁵Ma. Huki ma tä tapa paia mane, ĩ tä na makö mamo läapaloti manu kule, makö pewö pi silio opa mai, Teusö anö makö tikopöpa piale, ĩ tä na makö mamo läapalo soatioö.

Teusö anö makö pasilipali pia salo, a kalipalo sinomotii

²⁶Ĩ na tä kua tä, makö õsi utitipo tä, Teusö a õsi kua tolele, ĩ anö makö pasilipaö. Teusö a na makö hapalo tä, ‑Wi na sa kuupö taka?‑ ĩ na makö pi kuu kule maaki, Teusö a õsi kua tolele, Teusö a na ĩ anö makö a wäsä läataloö. Sanöma makö hapalo kuu wi na, ĩ na a hapalo kuö mi sai maaki, sanöma makö na a pi honipo opa salo, a halilimo pola nö, Teusö a na makö a wäsäö. ²⁷Teusö anö sanöma makö õsi taö öpaö. Kama õsi kua tolele, ĩ a pi kuu wi, Teusö anö ĩ tä taö öpa naioö. Teusö a na kama õsi kua tolele, ĩ anö makö a wäsä tä, ‑Au ai wa töpö pasilipali pia salo, wa tä thaa pi topa wi, ĩ tä thaa totihoö!‑ ĩ na a kuu. ²⁸Teusö ma pi ipa wi ĩ makö na toitai tä kuopö, ĩ tä wakala pewö hamö kamakö na tä kuati wi, ĩ tä pewö na Teusö a kalipalotii. Ĩ ma tä taö waikia. Teusö aiki, ‑Ĩ na ipa töpö kua kuköpöö!‑ ĩ na Teusö a pi kuu nö, makö nakalö noai ĩ makö pasilipali pia salo, a kalipalotii. ²⁹Makö kua paia mi tä, Teusö anö makö taö öpa soatama. Makö taö öpa soata nö, ‑Ipa ulu a kua kuati wi na, ĩ na töpö kua naiopöö!‑ ĩ na a pi kuu nö, makö kua paia mi tä, makö saipalöma. Teusö a hai ĩ pelupö a hai, kamakö hai ĩ pepala pata kupasopö, Teusö anö makö sailöma. ³⁰Makö sailö noai, ĩ makö nakalöma. Makö nakalö nö, makö tomöpo maa päo noai ha maaki, makö totipalöma. Makö totipalö nö, Teusö a toita apö, a wakala apö, ĩ na Teusö a mömomö kui na, ĩ na makö kui makö thaa hö̃töpalöma.

Teusö anö makö pi ipa wi, ĩ makö hösökapalama sinomoö

³¹Teusö anö ĩ na makö thama kutenö, wi na makö kuupökö? Teusö anö makö pasilipo manu kule, ai tänö makö peama wi tä kua mai kitä. ³²Teusö anö makö pewö koni pia salo, kama hai ĩ pelupö a umapo mai, kama hai ĩ pelupö a säpa pi topa wi ĩ töpö na pelupö a totoköma. Ĩ töpö na pelupö a totokö nö, kamakö na a totoa nömöpöma. Kama hai ĩ pelupö a totoa waikipöma kutenö, kamakö na ĩ tä pewö noa mi totoa naipi kitä matatä. ³³Teusö anö makö saia asalö noai ĩ makö na, ‑Kamisanö makö totipalöma kutenö, makö topa apa waikile‑ ĩ na Teusö a kuu manu kule, ‑Makö wanisala apatii‑ ĩ na ai tä kuu kule maaki, Teusö anö ĩ ta hini mai kitä. ³⁴‑Makö wanisala apati kutenö, makö peama kuki kitäö!‑ ĩ na ai tänö makö noa thaa kuköma, ĩ a holisimo opa päa kule. Jesus Cristo a lö kui, a säpamonaso noai ĩ a. Teusö anö ĩ a temöa komanö nö, kama hai ĩ Teusö a kotö ha a lomakö nö, a kaikanapalö noai, ĩ Jesus Cristo a. Teusö a na Jesus Cristo aiki, ‑Ipa sanöma töpö noama totihoö!‑ ĩ na a kuti ha, ‑Ki ma töpö peama kuköpöö!‑ ĩ na ai tä kuu wi tä kua mai kitä. ³⁵Cristo anö makö pi ipa wi ĩ tä na ai tänö makö selekepama mai kitä. Makö pea apati wi ĩ tä, makö õsi aulumoataloti wi ĩ tä, ai töpönö makö peama pi topa apati wi ĩ tä, oi oi tä, wani tä na makö honimo wi ĩ tä, ai tänö makö nomama pi topa wi ĩ tä, makö noma wi ĩ tä, ĩ na tä kule, ĩ tänö Teusö a na makö selekepama wi tä kua mai kitä. Teusö anö makö pi ipa wi, ai tänö ĩ tä maa läpamani wi tä kua mai kitä. ³⁶Pi naka. Ĩ na Teusö tä waheta kuu:

‑Teusö ma thapo kutenö, ĩ tä wakala pewö hamö ai töpönö makö säpa pia salo. Ĩ töpönö oweha kökö säpa thapa kua pialai na, ĩ na makö säa thaa naipali pia salo‑

ĩ na tä waheta kuu.

³⁷Makö peaö, makö õsi aulumoö, makö ohi, wani ma tä thapo mi, makö noma piaö, ĩ na makö kuati kule maaki, Teusö anö makö pi ipa noai ĩ anö makö pasilipo salo, ai tänö makö utitipama läo mai kitä. Makö hösökapalo sinomo asatio wi ĩ makö. ³⁸Teusö anö makö pi ipa wi ĩ tä na ai tänö makö selekea läpamani wi tä kua mai kitä. Ĩ sa tä taö öpaö. Nomaso wi ĩ tä, temöo wi ĩ tä, ãju töpö, ãju pata töpö kaikanamo wi ĩ töpö, sai töpö, huki tä kuati pole ĩ tä, waiha tä kua piale ĩ tä, ³⁹hi tä hẽtu hamö tä uli kupoli ĩ tä uli, hi tä komo ha ai tä uli kupokili ĩ tä uli, ĩ na tä pewö kua kule maaki, Teusö anö makö pi ipa wi ĩ tä na ĩ ai tänö makö selekepamani wi tä kua mai kitä. Teusö anö makö pi ipa salo, kamakö na kamakö hai ĩ Jesus Cristo pata tä simönöma. Teusö anö makö pi ipa wi, ai tänö ĩ tä mapama läo mai kitä.

Teusö anö juteu töpö sailö noai ĩ ta

¹Cristo sa thapo wi ĩ sa kutenö, sa holisimo mai kitä. Pitili sa. Teusö a õsi kua tolele, ĩ anö sa õsi simöati ha, ‑Sa kuu pole, ĩ pitili ta‑ ĩ na sa õsi pi kuti kule. ^2-3Ipa isöhaeu töpö hai, juteu töpö a hilo kua naine, ĩ töpö hai, ĩ ipa töpö hẽtu kutenö, ĩ töpö na sa pi honipo opa salo, sa õsi aulumoatalo opatii. Ipa isöhaeu sa töpö noama pi topa apa salo, Teusö anö ĩ töpö peama maapö, kamisa aiki, ‑Teusö ai. Ipa juteu wa töpö peama mai, kamisa nomasoö ha, kamisa peama pasio sisaaö!‑ ĩ na sa kuu ha, ‑Awai‑ ĩ na Teusö a kuu hö̃töo köna, ĩ na sa kua totia apa pasila pi. Teusö anö Cristo a na sa soka pasipamani wi, ĩ sa tä pii pasila pi. ⁴Isöhaeu töpö hai, ĩ Juteu töpö a hilo kua naine, Teusö anö töpö saipalö noai ĩ töpö. ‑Ipa ulu makö kupasopö‑ ĩ na ĩ töpö na ĩ na Teusö a kuuma. Ĩ töpö na Teusö a toita apii, a wakala apii, Teusö anö ĩ tä möma asatioma. ‑Ipa makö kutenö, ipa tolewö makö totiapala asa soatiolö kitäö!‑ ĩ na ĩ töpö na satehe epii Teusö a kuu pi kuu asama. Teusö anö Moisés a na nö patapö töpö noa thama noai, juteu töpö na Teusö anö ĩ ta totoa asaköma. Ĩ töpö Teusömo taö öpaö. Ĩ töpö na Teusö aiki, ‑Makö noama totio kitä‑ ĩ na a kuu sinomotima. ⁵Nö patapö töpö na Teusö a hapalo somatio noai, ĩ ola töpö hai, juteu töpö a hiloö. Cristo a hai, sanöma tä kupalo nö, juteu tä kupasoma. Cristo a hai, juteu tä kupaso noai, ĩ Teusö a. Ĩ anö töpö pewö simöa seteko sinomoti wi ĩ a. Önö kutenö, ‑Teusö a totiatalo opatii‑ ĩ na makö kuu soala nö, makö nomasoö, makö konasolöma maaki, ĩ na makö kuu mapo mai ha, ĩ na makö kuu soatiopököö! Ĩ naköö!

⁶‑Isöhaeu töpö nö patapö na Teusö a kuu noai, ĩ na tä kua tolea totia maa saile ta‑ ĩ na pö pi kuu ti! Pi naka. Isöhaeu töpö lö kui, Teusö anö töpö saipalö noai, ĩ töpö sai pewö toti mai kitä. ⁷Abraão a hai ĩ tolewö töpö lö kui, Teusö ulupö töpö pewö toti mai kitä. Abraão a na Teusö a hapalo nö, ‑Au ulu Isaki a lö kui, ĩ tolewö töpö hai, au ulu töpö sisawö‑ ĩ na Teusö a kuuma. ⁸Önö kutenö, Abraão a hai ĩ tolewö töpö hai, Teusö ulupö töpö pewö toti mai kitä. ‑Au ulu sa töpö thapali kitä‑ ĩ na Abraão a na Teusö a kuu noai ĩ töpö hai, Abraão a hai ĩ tolewö töpö sai. Ĩ töpö hai, Teusö ulupö töpö sisawö. ⁹Ĩ na Teusö a kuuma: ‑Hi inama tä matalo nö, a pilipoma kule, ĩ a pilipoma na sa huu pole, ĩ a pilipoma na au husopö Sata anö ulu a ose wai thapali kitäö!‑ ĩ na a kuuma. Ĩ ulu a wai thapalö noai, ĩ Isaki a wai a hilakömae.

¹⁰Ĩ na tä kua tä, kamisamakö hai ĩ nö patapö Isaki anö kama hai pusopö Hepeka a na ulu kökö wai poakapamanöma. ^11-12Ĩ kökö wai kupo paila tä kuno mai, ai a wainö wanisala tä thaö, ai a wainö toitai tä thaa asa, ĩ na ĩ kökö wainö tä thama kua paila tä kuno mai, Teusö anö sami ai a wai saipa pi topa asa kutenö, ĩ a wai saia asapalö nö, ‑Poosa anö pepala simöa sinomo kuköpököö!‑ ĩ na pöpönö Hepeka a na ĩ na Teusö a kuuma. Poosa a wainö toitai tä thaa asaö ha kuno mai, Teusö anö a naka pi topa päo salo, poosa a wai saia asapälöma. ¹³Ĩ na Teusö tä waheta kuu: ‑“Esaú sa totiapala pasio mai, Jacó sa pi ipa sisa kuköpököö!” ĩ na Teusö a pi kuuma‑ ĩ na tä waheta kuu.

¹⁴Önö kutenö, wi na makö kuupö? ‑Ai tä saia nai soata mai, sami ai tä saia asa sisali, ĩ na Teusö a kuaö ha, Teusö a pi makoka mi hãtoö?‑ ĩ na makö kuupö? Ma. Ĩ na makö kuu maapököö! ¹⁵Pi naka. Moisés a na Teusö aiki, ‑Ai sa tä totiapala pi topa wi ĩ sa totiapala asa kitäö! Ai tä na sa pi honipo pi topa wi ĩ a na sa pi honipo asa kitäö!‑ ĩ na a kuuma. ¹⁶Önö kutenö, ‑“Teusö anö sa saia totia nö tolö sö ö̃!” ĩ na wa pi kuu ha, wa saia asali kitä‑ ĩ na Teusö a pi kuu mi. ‑Wa kasiapalo opati kutenö, wa saipa asa pia kuleö!‑ ĩ na Teusö a pi kuu mi. Teusö anö wa totiapala pi topa päa salo, wa saia päpali. ¹⁷Ĩ na Patao a pata na ĩ na Teusö a kuuma: ‑“Teusö a lotete epö” ĩ na sa töpö pi thama pia salo, wa kaikanapalöma. Hi masita tä uli pewö hamö töpö pilipai, ĩ töpö na ai töpönö sa wäsä kuköpö, kamisanö wa kaikanapalöma‑ ĩ na Teusö a kuu noai, Teusö tä waheta ha ĩ tä sãökama kua. ¹⁸Önö kutenö, Teusö anö ai tä totiapala pi topa asa wi ĩ a totiapala apa asaö, ĩ na tä kua tä, ‑Hi anö sa hini totio mi ipö pasi sai o!‑ ĩ na Teusö anö ai tä noa thaa pasioö, ĩ na Teusö a kuaö.

¹⁹Ĩ na Teusö anö ai tä noa thaa pasioö ha, ai wa aiki pasiwö, ‑Ĩ a waninö Teusö a hini totio mi tä, Teusö aiki, “Häö. Kawanö sa hini mane, ĩ tä wanisala” wi na Teusö a pi kuu salo, ĩ na Teusö a pi kuu? Teusö anö tä thaa pi topa wi, ai tänö ĩ tä wasu taö mai kitä ta pi kuu mai‑ ĩ na ai wa kuu kitä. ²⁰Ĩ na ai wa kuu ha, kamisa aiki hö̃töwö, ‑Sanöma wa pätawö. Sanöma wa maaki, Teusö wa päsäpa kiliawö‑ ĩ na sa kuu hö̃töa kule. Ai tänö hapokasi hapoka thapalö noai ĩ a na ĩ a hapoka aiki, ‑Wi na wa pi kuu salo, kawanö ĩ na sa thaa thapalöma?‑ ĩ na a hapoka kuu kitä ta o? ²¹Ma. Hapoka a thaa sinomo wi ĩ anö hapokasi tälö nö, tä thaa pi topa wi ĩ tä thaa totioö. Ai a hapoka noa apii a hapoka möamö toita apii, ĩ a hapoka thapali, ĩ na tä kua tä, ĩ a hapokasi see na ai a hapoka noa mi ipii ĩ a hapoka thaa nömöpali, ĩ na tä kuaö.

²²Ĩ na tä kua kua wi na, ĩ na Teusö a kuaö. Teusö anö sanöma töpö thama pi topa wi, ĩ na Teusö anö töpö thama totioö. Ai töpö na a pi hĩsuapalo opa wi, Teusö anö ĩ tä hatukupama pi topaö, a lotete epii, ĩ tä tapamoma pi topa naia, ĩ na Teusö a kuama kutenö, töpö hĩsu thaa noai ĩ töpö mapama pi topama. Ĩ töpö mapama pi topama maaki, ‑Ĩ kama töpö pi sapamo kõo nö, wanisala tä hosalöpöö!‑ Teusö a pi kuu salo, töpö mapama soata maama. ²³Ĩ na tä kua tä, pe epii Teusö a toita apii, a wakala apii, ĩ tä hatukupama pi topa naioma. Önö kutenö, kamakö na Teusö a pi honipo opama. A toita apii, a wakala apii, kamakö na ĩ tä totoki pia salo, kamakö õsi na Teusö a kalipalo waikioma. A kalipalo waikioma kutenö, huki kamakö na Teusö a toita apii, a wakala apii, ĩ tä totoa waikiköma. ²⁴Teusö anö ai juteu samakö naka asalö noai ĩ samakö. Juteu makö pasi mai ĩ ai makö naka nainö noai, ĩ makö naiwö.

²⁵Teusö a kuu noai, Oséiasö anö ĩ ta sãökama. Tä sãököpalö nö,

‑Sa töpö thapo paio maa noai maaki, ĩ töpö na, “Ipa töpö” ĩ na sa kulaso kitä. Sa töpö pii maa noai ĩ töpö na, “Sa töpö pi ipa wi ĩ töpö” ĩ na sa kuu naio kuki kitä.

²⁶“Kamakö hai, ipa makö mai kitä. Tiko makö pasiwö” ĩ na sa kuu paio noai, ĩ tä uli ha soatawö, “Kamakö hai, ipa makö waikiwö” ĩ na Teusö sa temöa apati wi, ĩ na ĩ sa kuu kitä‑

ĩ na Teusö a kuu noai, Oséiasö anö ĩ ta sãökama.

²⁷Ĩ na tä kua tä, Isaías anö Teusö tä waheta na isöhaeu töpö a kateha nö, ĩ na a kuuma: ‑Mötati tuu pata hamö maka maka tä nakasi wai kua apa kule na, ĩ na isöhaeu töpö kua apa kua hö̃töa kule maaki, Teusö anö ĩ töpö polakapi wai täa kõa asali kitä. ²⁸“Sa thapo mai, ĩ sa töpö peama kitä” ĩ na Teusö a kuu waikioma kutenö, a opimo mai, hi tä uli pewö hamö töpö pilipai, lope epii ĩ töpö peama totio soata kitä‑ ĩ na Isaías a kuuma. ²⁹Ĩ na a kuu paio mai ha, ĩ Isaías aiki soatawö, ‑Teusö a lotete epö asai, ĩ anö makö polakapi wai täa kõo läo maama aköna, sotoma tili töpö, komohatili töpö, ĩ na töpö kui töpö ĩsilo nö, ĩ töpö maa kupaso noai na, ĩ na makö maa kua naipaso noa kipi‑ ĩ na Isaías a kuu paioma.

Isöhaeu töpö Teusömo sinomoma maaki, ‑Jesus a pitili‑ ĩ töpö pi kuu maa noai ĩ ta

³⁰Önö kutenö, ĩ na tä kuaö. Teusö a na juteu töpö pasi mai ĩ töpö aiki, ‑Wi na sa kua kuköma, kamisa na Teusö aiki, “Wa toita” a kuu kuki?‑ ĩ na ĩ töpö pi kuu pola nö kuno mai, ‑Teusö a pitili‑ ĩ na ĩ töpö pi kuu päoö ha, ĩ töpö na asawö, ‑Makö toita‑ ĩ na Teusö a pi kuuma. ³¹Ĩ na tä kua tä, isöhaeu töpö lö kui, ‑Teusö anö Moisés a na nö patapö töpö noa thama noai, ĩ sa ta hini totio kuköma, kamisa na Teusö aiki, “Wa toita” ĩ na a pi kuu kitäö!‑ ĩ na ĩ töpö pi kutima maaki, ‑Ĩ töpö toita‑ Teusö a pi kuu pasio maama. ³²‑Teusö a na sa tomöpo mi ipö maaki, “Teusö a pitili” ĩ na sa pi kuu totio päköma, Teusö aiki, “Wa toita” a pi kuu kitäö!‑ ĩ na ĩ töpö pi kuu mai, ‑Toitai sa tä thaa sinomoö ha, kamisa na Teusö aiki, “Wa toita” a pi kuu kitäö!‑ ĩ na ĩ töpö pi kuu päoö ha, Teusö a na ĩ töpö totipo maama. Ai tä huulö pamö, maa ma paa läa wi manö ai tä nasö tiekimono nö, tä kea kulaso wi na, ĩ na ‑Cristo a pitili‑ ĩ na isöhaeu töpö pi kuu maama kutenö, Cristo a na ĩ töpö uni tiekimono nö, töpö kelasoma. Teusö aiki, ‑Kamisa na ĩ töpö taamö toita‑ ĩ na ĩ töpö na ĩ na Teusö a pi kuu pasio maama. ³³Ĩ na Teusö tä waheta kuu:

‑Möö nökö. Sião tä uli ha, ĩ Jetusalẽi tä uli a hilo kua naine, ĩ ha Teusö sanö maa sa ma uni paki. Sai a toitai sai sa thaköpö, ĩ ma maaki, ĩ manö ai töpö kemani wi, ĩ ma naiwö. Ĩ ma na ai töpö mamo teteo asa wi ĩ töpö pi honipo asa mai kitä‑

ĩ na tä waheta kuu.

Ĩ ma hai, Cristo a uni. ‑Cristo a pitili‑ ai töpö pi kuu totio nö, ĩ a na ĩ töpö mamo tetea asaki wi ĩ töpö pi honipo mai kitä.

¹Ipa pö! Teusö anö ipa isöhaeu töpö täa totia koni wi, pe epii ĩ sa tä pii totia apa kuleö! Ĩ tä pi na Teusö a na ipa sa töpö a wäsä sinomoö. ²‑Ĩ töpö Teusömo sinomo opa wi maaki, töpö Teusömo pi hatuka totio mi‑ ĩ na sa kuu kule. ³‑“Cristo a pitili” ĩ na sanöma makö pi kuu totio kuköma, Teusö aiki, “Kamisa na makö taamö toita” ĩ na a pi kuu kitäö!‑ ĩ na tä kuu wi tä na ĩ töpö pi hatuka mai, ‑Toitai sa tä thati ha, Teusö aiki, “Kamisa na wa taamö toita” a pi kuu kitäö!‑ ĩ na ĩ töpö pi saimo päo nö, ĩ na ĩ töpö pi kuu. Önö kutenö, ‑“Kamisa na wa taamö toita” ĩ na kamisa na ĩ na Teusö a pi kuupö, “Cristo a pitili” ĩ na sa kuupököö!‑ ĩ na töpö pi kuu mi. ⁴Moisés anö nö patapö töpö noa thaa noai, ĩ tä na makö simöamo matasopö, Cristo a waloköma. ‑Cristo a pitili‑ töpö pewö pi kuu totio wi, Teusö anö ĩ töpö pewö täa konö nö, ĩ töpö na ‑Kamisa na makö taamö toita‑ ĩ na a pi kuu.

Teusö anö sanöma töpö pewö täapa kõo pi topa wi ĩ ta

⁵Moisés anö tä sãököpalö nö, ĩ na a kuuma: ‑Teusö anö makö noa thaa noai, kamakö na ĩ sa ta wäsä tolea nömöopili, ĩ ma tä pewö a hini totio nö, toitai ma tä pewö thaa totioö ha, kamakö na Teusö aiki, “Kamisa na makö taamö toita” a pi kuu nö, makö õsi palimipali kitä‑ ĩ na Moisés a kuuma. ⁶Ĩ na Moisés a kuuma maaki, ‑“Cristo a pitili” ĩ na wa pi kuu totioö ha, Teusö anö wa totipali kitä‑ tä kuu wi ĩ tä pi na ĩ na tä kuu hö̃töoö: ‑“Witi pili anö Cristo a kai ithopaso lasopö, hi tä hẽtu hamö ai tä hulasolöö?” a pi kuu ti! ⁷“Ĩ witi pili anö Cristo a konönöpö, hi tä komo ha nomawö töpö kupokili, ĩ ha witi a huu kölöö?” ĩ na a pi kuu naio tihöö!‑ ĩ na tä kuu wi tä kua. ⁸‑Kawa kotö ha Teusö ta kua waikia. Pili wa kai na ta kua soataa. Pili wa õsi na ta kua naia‑ ĩ na tä kuu wi tä kua. Ĩ Teusö sama ta wäsä waikia kule. ‑“Teusö a pitili” wa pi kuu totio kuköma, Teusö anö wa totipali kitä‑ tä kuu wi ĩ sama ta wäsä sinomo waikioö. ⁹‑Jesus a hai, ĩ ipa kaikana tä‑ ĩ na pili wa kai sai kuu nö, ‑Jesus a noma totisoma maaki, Teusö anö a temöa komanömaö!‑ ĩ na pili wa õsi pinö ĩ na wa kuu ha, Teusö anö wa täa koni kitä. ¹⁰‑Cristo a pitili‑ pili makö õsi pi kuu totio kuköma, Teusö anö makö totipali. ‑Jesus a hai, ipa kaikana tä‑ ĩ na pili makö kai sai kuu ha, Teusö anö makö täa koni. ¹¹‑“Teusö a pitili” ĩ na ai tä pi kuu totio kuköma, ĩ aiki, “Häö a” ĩ na a pi kuu mai kitä‑ ĩ na Teusö tä waheta kuu. ¹²Teusö anö juteu samakö, juteu makö pasi mai ĩ makö, ĩ na makö kui makö pewö totia ösöha totipali. ‑Teusö a pitili‑ makö pi kuu totio wi, Teusö pata tänö ĩ makö pewö simöa sinomoö. Teusö ma naka wi, Teusö anö ĩ makö pewö totiapala ösöha totio opaö. ¹³Jesus pata ta hilo wi, ai tänö ĩ a nakaö ha, Teusö anö ĩ a täa koni kitä.

¹⁴‑Cristo a pitili‑ ĩ na sanöma töpö pi kuu totia mane maaki, Cristo a naka päo wi tä kule kitä ta o? Cristo ta wäsä pole, ĩ töpönö ĩ ta hini paia mane maaki, ‑Cristo a pitili‑ ĩ na ĩ töpö pi kuu totio kitä ta o? Ĩ töpö na ai tänö Cristo ta wäsä mi päla tä maaki, ĩ töpönö ĩ ta hini kitä ta o? ¹⁵Cristo ta wäsä wi ai tänö ĩ töpö simöpa paio mi tä, Cristo ta wäsä wi tä kule kitä ta o? Ĩ na Teusö tä waheta kuu: ‑Teusö ta wäsä tasopö, pili kononanö a huimati, ĩ tä topa apa‑ ĩ na tä waheta kuu.

¹⁶Teusö ta wäsäpö, tä kai huma maaki, ĩ töpö pewönö ĩ ta topa apöle ĩ ta hini wanio opamae. Isaías aiki, ‑Teusö a pata! Kamisanö sa ta wäsä noai, ĩ töpö pewönö ĩ ta hini totio maama‑ ĩ na a kuuma. ¹⁷Pi naka. Cristo ta wäsä pole, ĩ tä na ai töpö sömöka taa totio paio mi tä, ĩ töpö aiki, ‑Cristo a pitili‑ ĩ na ĩ töpö pi kuu totio mai kitä. Cristo ta hini totio kuköma, ‑Cristo a pitili‑ ĩ na töpö pi kuu kuki kitä.

¹⁸‑Isöhaeu töpö na Teusö ta wäsä pasio maama‑ ĩ na sa kuu alu kule? Ma. Ĩ na sa kuu mane. Teusö tä waheta aiki,

‑Hi masita tä uli pewö hamö ta wäsä wi ĩ ta hini waikioma. Ĩ tä uli pewö hamö ta wäsä waikioma‑

ĩ na tä waheta kuu waikia. ¹⁹Teusö ta wäsä noai, isöhaeu töpönö ĩ ta taö pasio maama ta o? Ĩ tä na töpö pi tao opama. Moisés aiki,

‑“Isöhaeu pö! ‘Ki tiko töpö komoapalo opawö’ ĩ na makö pi kuu kule maaki, ĩ sa töpö totiapala asa kutenö, kamisanö makö totiapala naio wi, ĩ tä na makö pi wasiso opa kitä. ‘Teusö a na ĩ töpö pi moti ipö’ ĩ na makö pi kuu kule maaki, ĩ sa töpö pasilipo asaö ha, ĩ töpö na makö pi hĩsuhapalo kuki kitä” ĩ na Teusö a kuu kuleö!‑

ĩ na Moisés a kuu somama. ²⁰Ĩ na Moisés a kuu soma waikio noai ha, waiha ĩ na Isaías a kuu kili mai, ĩ na a kuu totio nömöoma:

‑Teusö aiki, “Ai tiko töpönö sa tae paio maa noai ĩ töpönö sa talalömae. Sa naka maa noai, ĩ töpö na sa tapamonasoma” ĩ na Teusö a kuu kuleö!‑

ĩ na Isaías a kuu nö, ²¹isöhaeu töpö a kateha nö,

‑Teusö a hini totio mi ipii, Teusö a na, “Pälaö!” töpö pi kuupa wi, Teusö anö ĩ töpö täapa läo kõo pi topa salo, hena tä sai tä ĩ töpö na a poko toto totomo soatio pa, tä wisa pälasoma‑

ĩ na Isaías a kuuma.

Teusö anö isöhaeu töpö hosa totio maa noai ĩ ta

¹Teusö a na isöhaeu töpö aiki, ‑Päla‑ töpö ku upatima maaki, Teusö anö ĩ töpö hosa hö̃töo maama. Abraão a pata kuo noai, hi kamisa hai ĩ sa ola. Pẽijamĩ tili sa isöhaeu. Isöhaeu sa maaki, Teusö anö sa hosa maama. ²Isöhaeu samakö kua paia mai ha, ‑Ki töpö hai, ipa töpö kupasopöö!‑ ĩ na Teusö a pi kuu nö, ĩ samakö taö öpa paio soata noai, ĩ samakö saia soalö noai, ĩ samakö hosa maama. Elias anö Teusö a na kama ai isöhaeu töpö a wäsä hiopöa noai, Teusö tä waheta na ĩ tä sãökama kuu noai, ĩ ma ta taö maa kule? ³Elias aiki, ‑Teusö ai. Ipa isöhaeu töpö waitilimo opa thaliö! Kawa kai wäsä sinomo wi ĩ töpö sälali kipiliö! Ĩ töpö sälalö nö, kawa na salo kökö totoköpö, kökö alata sinomo wi ĩ maa makö waniananöma thaliö! Wa pi ipa wi, sami sa heipaso kipiliö! Sami sa heipaso noai, ĩ töpönö ĩ sa säpa pi topa nömöa soata kulaiö!‑ ĩ na Elias a kuuma. ⁴Ĩ na a kuu ha, wi na Teusö a kuu hö̃töoma? ‑Ipa isöhaeu töpönö sai tä Paalö a pii mi kutenö, ĩ a ukutupö kotö ha töpö loiki nö, pili töpö maekonö töpö hĩta thaiki nö, töpö kuatalo mai, satehe epii ĩ töpö kua soa kuleö! Töpö Paalömopalo mai, satehe epii, 7.000 sa töpö umapo soa kuleö!‑ ĩ na Teusö a kuuma.

⁵Huki ĩ nasimö tä kua hö̃töa. Teusö anö samakö noa mi totiapala pi topa apa nö, samakö saia asalöma kutenö, isöhaeu samakö hãkikinö Teusö sama thapo asa wi, ĩ samakö kua soa. ⁶Toitai sama tä thaa wi ĩ tä na Teusö anö samakö saia asa mai, samakö noa mi totiapala pi topa päa salo, samakö saia asalöma. Toitai sama tä thaa noai ĩ tä noa na Teusö anö samakö saia asalöma aköna, ‑Teusö anö samakö noa mi totiapala apa päoö‑ ĩ na tä kuu wi tä kua mana pi. ⁷Önö kutenö, Teusö a na isöhaeu töpö toita apii töpö kupasopö, ĩ tä na isöhaeu töpö pewö pi taemotima maaki, ĩ tä tapa maama. Teusö anö samakö saia asalö noai, polakapii ĩ samakönö sama tä taa asalalöma. ‑Teusö a pitili‑ samakö pi kuu totia kutenö, Teusö anö samakö totia asapalöma. Teusö anö ai töpö saipa pasio maa noai, ĩ töpö pi hatukupama pasio maama. Ta pitili ipii ĩ tä na ĩ töpö waipalotima. ⁸Ĩ na Teusö tä waheta kuu:

‑Teusö anö ĩ töpö pi motipamanöma kutenö, huki ĩ töpö höpöpö, sömöka komi, ĩ na töpö kui töpö kua soa‑

ĩ na tä waheta kuu. ⁹Ĩ na tä kua tä, Davi aiki,

‑Töpö saponomo nö, töpö iapalo tä, wasu töpö monimo nö, töpö sä kuköma, sano tili töpö pea kua wi na, ĩ na isöhaeu töpö pea kua hö̃töopöö! “Teusö sa kai a thapo salo, sa topa apa waikitiowö” ĩ na töpö holisi pi kuu wi ĩ tä na töpö pea kuköpöö! Salo a kano na, salo a ia kai pi moti wani lotia tä, a wani nia thapali wi na, ĩ na isöhaeu töpö uni pi moti wani nia thapalöpöö!

¹⁰Ĩ töpö mamokö pewö mumanano nö, tä tapa maapököö! Ĩ töpönö hute hute tä pata siapala sinomo kukiö!‑

ĩ na Davi a kuu noai ĩ ta kua.

Juteu töpö uni wäkäpaköma maaki, ĩ juteu töpö huu kõo noai ĩ ta

¹¹Ai tä wäkäpaköma maaki, toitai ĩ a hua kua konasolö wi na, ĩ na isöhaeu töpö, juteu töpö a hilo kua naine, ĩ na ĩ töpö uni wäkäa kupaköma maaki, toitai ĩ töpö hua kua konasolö kitä. Ĩ töpönö Teusö a kai peamama kutenö, töpö uni wäkäa päpaköma. Ĩ töpönö Teusö a kai peamaö ha, juteu töpö pasi mai, Teusö anö ĩ töpö täa kõa asalöma. Juteu töpö aiki, ‑Häö! Teusö anö ai tiko töpö täapa kõo asa nö kiliawö. Kamisanö Teusö sa ta hini totio naio nökö o! Teusö anö sa täa naia konöpöö!‑ ĩ na Teusö anö juteu töpö pi thama pia salo, ‑Ĩ na ipa juteu töpö wäkäpa kua päoö‑ ĩ na Teusö a pi kuuma. ¹²Juteu töpönö Teusö a kai peamaö ha, hi masita tä uli pewö hamö ai tiko töpö pilipai, Teusö anö ĩ töpö pasilipa kuköma. Teusö anö juteu töpö peama nö, juteu töpö pasi mai ĩ töpö täa nömöa konöma. Teusö anö juteu töpö pasi mai ĩ töpö täapa kõo wi ĩ tä topa kule maaki, waiha juteu töpö pewönö Teusö a kai a hinia kõananömae, Teusö anö juteu töpö täa koni, juteu töpö pasi mai ĩ töpö täapa naio kõo, ĩ na Teusö anö sanöma makö pewö täa thapa kõo wi, ĩ tä topa satia apa.

Teusö anö juteu makö pasi mai, ĩ makö noama nö, makö täa koni

¹³Juteu makö pasi mai ĩ makö na ĩ na sa kuu kule. Juteu makö pasi mai ĩ makö na Teusö anö sa simöa noai ĩ sa kutenö, kamakö na Cristo sa ta wäsä sinomo wi ĩ tä na sa pi topa apaö. ‑Juteu töpö pasi mai ĩ töpö na sa kalipalo asa sinomo wi ĩ sa asawö‑ ĩ na sa kuu sinomoö. ¹⁴Ĩ na sa kuu sinomoö ha, ipa juteu töpö aiki, ‑Häö. Teusö anö ai tiko töpö täapa sisa kõo wi, ĩ nasimö ta aiki kuno maiö! “Cristo a pitili” ĩ na sa pi kuu naiopököö!‑ ĩ na ĩ töpö pi kuupö. Ĩ na ĩ töpö pi kuu ha, Teusö anö ĩ töpö noama naio nö, töpö kõa nainöpöö! ¹⁵Teusö anö juteu töpö hosalö nö, juteu töpö pasi mai ĩ töpö na a noimo nömököma. Teusö anö juteu töpö hosalöma maaki, ai tä nomasoma maaki, a temöa kono nö, toitai a kupalo kua kõo wi na, ĩ na juteu töpö na Teusö a noimo kua kõköma, ĩ na toitai töpö kupalo kua hö̃töa kõki kitä. Ĩ nakö?

¹⁶Ĩsa wa ãi namöma somatapi wi, Teusö a na ĩ wa ãi totoköma, ãketema ãi paa soale, Teusö a hai ĩ ãi ãketema pasi soawö. Ĩ na tä kua tä, hii pili ti nasökili lö kui, Teusö a na ĩ wa tiki nasökili totoki, poko poko tiki lö kui, Teusö a hai ĩ tiki poko soawö. ¹⁷Ĩ na tä kua tä, hikali a na ai tänö olipa tiki tökö noai, ĩ ai ti poko hẽtu ha olipa mo lalo pasio mane, ĩ ti poko hanöa pasipali. Ĩ ti poko hanöpalö nö, uli tä uli hamö ai olipa tiki öpalati, ĩ ai ti poko wai hanönötö nö, ĩ ti poko kai kopolö nö, hikali a na olipa tiki öpale, ĩ ti poko hanöpalö noai, ĩ ti poko ha ai ti poko tipö. Ĩ ti poko tipököma, ti poko ãkelo nö, pili mokö laloki. Ĩ na ĩ ti poko kua kua wi na, ĩ na juteu makö pasi mai ĩ makö kua kua hö̃töoö. Teusö anö ai juteu töpö hosalö nö, ai tiko makö tipöa nömömaköma. ¹⁸Makö tipöa nömöa päköma kutenö, ‑Hiki. Juteu töpö wanisala pasio noa. Huki kamisamakö toita asawö‑ ĩ na pö pi kuu ti! Pili ti pokonö pili ti kolo palama mai kitä. Kolo tinö ola pili tiki palamaö ta pi kuu mai. Ĩ na makö kua hö̃töoö. Juteu makö pasi mai ĩ makönö juteu kolo ma töpö palama mai kitä. Juteu kolo töpö na makö tipöa nömöa tä, ĩ pili makö palasoö.

¹⁹Ĩ na sa kuu kule maaki, kamakö aiki, ‑Teusö anö samakö palama pi topa apa salo, ai juteu töpö hosalö nö, samakö tipöa nömöa asamakömaö!‑ ĩ na makö kuu kitä. ²⁰Ĩ na makö kuu nö, ‑“Teusö a pitili” ĩ na ai juteu töpö pi kuu totio maama kutenö, Teusö anö ĩ töpö hosalöma. Ĩ na tä kua tä, “Teusö a pitili” ĩ na juteu samakö pasi mai ĩ samakö pi kuu totioö ha, Teusö anö samakö täa asalö nö, samakö tipöa nömöa asamakömaö!‑ ĩ na makö pi kuu nö, ‑Samakö toita apö asawö‑ ĩ na makö pi kuu mai, makö kililo nö, ‑Teusö aiki, “Makö toita” ĩ na kamisamakö na ĩ na Teusö a pi kuu päomaö!‑ ĩ na makö pi kuu! ²¹Ĩ na makö pi kuu nö, ‑Teusö anö juteu töpö thapo soma noai, ĩ ai töpö hosa thalö noai na, “Teusö a pitili” ĩ na samakö pi kuu totio mi tä, samakö hosa thaa nömönö matimöö!‑ ĩ na pö pi kuu totihoö! ²²Teusö anö ai töpö totiapala apa asaö, ai töpö peama pasioö, ĩ na Teusö a kua wi, ĩ tä na pö pi tapomo totihoö! Teusö a kai a peama wi, Teusö anö ĩ töpö peama totiatalo opa hö̃töoö. ‑Teusö a pitili‑ ĩ na makö pi kuu totia waikia kutenö, makö totiapala apa asa kule maaki, ‑Teusö a pitili‑ makö pi kuu totio mi tä, makö hosa hö̃töli kitä. ²³Juteu töpö lö kui, ĩ töpö aiki, ‑Teusö a pitili‑ ĩ na ĩ töpö pi kuu kõa tä, Teusö anö ĩ töpö täa konö nö, ĩ töpö tipöa komaki kitä. Teusö anö kama hai ĩ töpö thapo pole, ĩ töpö na Teusö anö ĩ juteu töpö tipöama taö öpa kõo kitä. ²⁴Uli tä uli hamö olipa ti öpalati, ai tänö ĩ ti poko tälö nö, hikali a na ai olipa ti öpale, ĩ ti ha ĩ ti poko tipöama thama kua kõo wi na, ĩ na Teusö anö juteu makö pasi mai ĩ makö tälö nö, kama hai ĩ töpö thapo pole ĩ töpö na ĩ na makö tipöa thaa hö̃töa kõki. Juteu makö pasi mai ĩ makö maaki, Teusö anö makö tipömakö nö, makö thapo kutenö, kama hai ĩ juteu töpö täa konö nö, töpö tipöa komakö nö, töpö thapo kõo kitä.

Teusö anö isöhaeu töpö totiapala kõo pi topa salo, töpö täa koni kitä

²⁵Ipa pö! Waiha Teusö anö isöhaeu töpö thama piale ĩ tä na nö patapö töpö pi hatuku paio maa noai maaki, huki ĩ tä na kamisanö juteu makö pasi mai ĩ makö pi hatukupama pia kule. Makö pi hatukupamanöma, ‑Teusö anö samakö totiapala sisaö‑ ĩ na makö pi kuu wi tä kua mai kitä. Huki isöhaeu töpö aiki, ‑Jesus a hai, Teusö a ulupö mai kitä. Kamakö na Jesus a kaikanamopö, a mai kitä‑ ĩ na ĩ töpö satehe epii töpö kuu satimo opati kule maaki, ĩ na ĩ isöhaeu töpö pewö kuu satimo soatiolö mai kitä. Juteu töpö pasi mai ĩ töpönö Teusö a thapo wi ĩ töpö pewö kua hötötöa toitasoma, waiha isöhaeu töpönö Teusö a kai a peama satimo opa wi ĩ tä mataso kitä. ²⁶Pi naka. Teusö anö isöhaeu töpö pewö täa koni pia salo. Teusö tä waheta aiki,

‑Töpö täapa kõo läo wi ĩ a huu kitä. Sião tä uli pata ha, ĩ Jetusalẽi tä uli a hilo naine, ĩ tä uli na ĩ a kuoma, a waloki kitä. A waloiki nö, Jacó a hai ĩ tolewö töpönö wanisala tä thaa wi ĩ tä matamani kitä.

²⁷Teusö aiki, “Ipa isöhaeu töpönö wanisala tä thatala apati noai ĩ tä na sa hĩso noai, ĩ sa tä matamanö nö, ‘Makö noama nö, makö totiapala soatio kitäö!’ ĩ na isöhaeu töpö na, ĩ na sa kuu kitäö!” ĩ na Teusö a kuu‑

ĩ na tä waheta kuu.

²⁸Cristo ta topa apöle, juteu töpönö ĩ ta peamaö ha, ĩ töpö na Teusö a noimo hö̃töo mi. Önö kutenö, Teusö anö juteu makö pasi mai makö pasilia asa sisapali. Ĩ makö pasilipa asa kule maaki, Teusö anö juteu samakö pewö pi ipa soa. Sutu upa, isöhaeu nö patapö töpö na, ‑Au tolewö sa töpö totiapala apa kuki kitäö!‑ ĩ na Teusö a kuu waikioma kutenö, huki isöhaeu ola samakö pi ipa soa. ²⁹‑Ĩ sa töpö saipalö nö, sa töpö totiapala apa kuki kitäö!‑ ĩ na Teusö a kuu waikioma kutenö, ‑Päla. Ĩ sa töpö saipa mai kitä. Sa töpö totiapala wani ipö‑ ĩ na Teusö a kuu kõo mai kitä. ³⁰Juteu töpönö Teusö a kai a peama kutenö, juteu makö pasi mai ĩ makönö Teusö ma hini wanio opa paioma maaki, huki kamakö na Teusö a pi honipo opa nö, makö totiapala asa kule. ³¹Kamakönö Teusö ma hini wanio opa kuo kuo paio noai na, ĩ na huki juteu töpönö Teusö a hini wani ipö kua kua nömöa kule maaki, Teusö anö makö totiapala kua pole na, ĩ na juteu töpö totiapala kua kõa hö̃töki kitä. ³²Sanöma makö pewö na Teusö a pi honipo opa nö, makö pewö noa mi totiapala apa kuköpö, ‑Sanöma töpö pewönö sa kai a peama sipa apatiwö‑ ĩ na Teusö a pi kuu paioma.

Teusö a lotete epii, pe epii ĩ anö sanöma makö pewö totiapala soatio wi ĩ ta

³³Teusö anö pe epii sanöma makö totiapala soatioö. Pe epii a pi hatuka apaö. Pe epii Teusö anö tä pewö taö öpaö. Teusö anö tä thaa pi topa wi, sanöma makönö ĩ ma ta kateha tai mi. Teusö anö tä thamati wi ĩ tä na makö pi hatuka mai kitä.

³⁴Teusö a pi kuu wi, ai wanö ĩ wa tä taö wi tä kua mi. ‑Teusö ai. Ĩ naköö! Ĩ na wa kuapököö!‑ ĩ na ai wa kuu sinomo wi, ĩ ai wa kua mai kitä. Ai wanö Teusö wa simöa wi, ĩ ai sanöma wa kua mai kitä.

³⁵Teusö aiki, ‑Ki anö sa täpälipili, ĩ sa täpä hö̃töoköö!‑ ĩ na Teusö a kuu pasio mai kitä.

³⁶Teusö anö tä pewö thapalöma. Teusö a lotete epö kutenö, huki ĩ tä pewö kua soa. Teusö a pi mönahapamanöpö, kama hai ĩ tä pewö kua. Önö kutenö, ‑Teusö a totiatalo opawöö!‑ ĩ na makö pewö kuu soatiopö. Ĩ naköö!

Makö Teusömo totia tä, ĩ na makö kuatipöö!

¹Ipa pö! Pe epii Teusö anö noa mi makö totiapala apa sinomoti kutenö, kamakö na ĩ na sa ku upa kule. Teusö a na salo pö noki uni totopa kua sinomo kua noai na, Teusö a na ĩ na kama pö uni toto sapao kua hö̃töo kõoö! Makö temö öpii, makö õsi ausi ipii, ĩ na makö kui, Teusö a na ĩ kama makö uni toto sapao kua kõo tä, Teusö ma pi mönahapamani kitä. Makö õsi ausi ipii, Teusö a na ĩ kama makö uni toto sapao kua kõo wi, ĩ tä hai, makö Teusömo totio wi ĩ tä sai. ²Teusö a thapo mai ĩ töpö uöma ti! Makö pi tapomoti noai ĩ ma ta tutea kopalö nö, makö tikopö öpii makö kua nömöpasopököö! Ĩ na makö kua kuköma, kamakö na Teusö anö tä thama pi topa apa wi ĩ ma tä taö kuki kitä. Teusö anö tä thama pi topa wi ĩ tä topa apöle kitä. Ĩ tänö makö pi mönahapalama apatii. Ĩ tä toita sati ipö.

Satehe epii Cristo a na makö kokaköma maaki, sami makö kua kopaso wi ĩ ta

³Teusö anö sa totiapala apa nö, sa simöatii kutenö, kamakö na ĩ na sa kuu kule. Kamakö aiki, ‑Pata sa asawö. Teusö anö sa simöa asa wi ĩ sa‑ ĩ na pö pi kuu ti! ‑Teusö anö sa simöa naio wi ĩ sa. Teusö anö sa õsi lotetepamani wi ĩ sa‑ ĩ tä na makö pi mosawiki nö, ĩ na pö pi kuu! ‑Teusö a pitili‑ makö pi kuu totile, ĩ na Teusö anö ĩ makö pi thama totia kutenö, ĩ na pö pi kuu totioö! ⁴Pi naka. Pili wa pewö hai, sami wa maaki, pili wa pewö kuamö kule ha satehe epii tökö kua. Pili wa mamo, pili wa kai, pili wa poko, pili wa konona, ĩ na tökö kui tökö kua. Pili wa mamonö wa tä tapaö, pili wa kainö wa hapaloö, pili wa pokonö wa kalipaloö, pili wa kononanö wa huu, ĩ na wa kuaö. Pili wa mamonö wa huu mai kitä. Pili wa kononanö wa tä tapa mai kitä. ⁵Ĩ na pili wa kua kua wi na, ĩ na Cristo a na makö pewö koka wi ĩ na makö kua kua hö̃töoö. Satehe epii makö maaki, Cristo a na makö kokaköma, sami makö kupasoö. Makö pasilipasopö, Cristo a na makö kokaa.

⁶Önö kutenö, ‑Pata sa asawö‑ pö pi kuu ti! Ai ma töpö pasilipopö, kamakö na Teusö anö tä totoma wi, kamakö na ĩ tä totoa hätähäaki kitä. Teusö anö makö totiapala apa nö, makö simöa hätäpo nö, ‑Ĩ na kawa kua totiopöö!‑ ai wa na Teusö a kuu nö, ai wa na hö̃tö soatawö, ‑Ĩ na kawa kua pasiopöö!‑ ĩ na a kuu. Ĩ na a kuu nö, makö pasilipali kitä. Ai wa na, ‑Sa kai a wäsä sinomoö!‑ ĩ na a kuu ha, ‑Teusö anö sa pasilipo kutenö, Teusö sa kai a wäsä totio kitäö!‑ ĩ na wa pi kuupö. ⁷Ĩ na tä kua tä, ai wa na, Teusö aiki, ‑Wa töpö pasilipo sinomopököö!‑ ĩ na a kuu ha, ‑Teusö anö sa lotetepama kutenö, ai sa töpö pasilipo sinomopököö!‑ ĩ na wa pi kuu hö̃töopököö! Ĩ na tä kua tä, Teusö tä waheta na ai wa töpö pi hatukama taö öpa kuköpö, ai wa na Teusö anö ĩ tä totoköma kutenö, wa töpö pi hatukama sinomo kuköpöö! ⁸‑“Ĩ naköö! Ĩ naköö! Ĩ na makö kua totiopököö!” ĩ na ai töpö na ĩ na a kuu sinomoö!‑ ĩ na ai wa na Teusö a kuu ha, ĩ na ai töpö na a kuu sinomo totihoö! Ĩ na tä kua tä, wani wa tökö thapo wi ĩ tökö na ai wa töpö täpä sinomo wi ĩ wa pasi kutenö, ‑Wa töpö täpä sinomopököö!‑ ĩ na kawa na Teusö a kuu pasioma kutenö, wa umamo mai, wa töpö täpä totiatalo sinomopököö! Ai wa töpö simöa sinomopö, ai wa na Teusö anö ĩ tä totoki ha, ai wa töpö simöa pi mosawiapala apapököö! Ai wa lö kui, ai wa töpö totiapala taö öpa wi ĩ wa pasi kutenö, wa pi mönaha apii wanö ai wa töpö totiapala sinomopököö!

⁹Ipa pö! Pö noimaso holisimo päo tihöö! Wanisala tä thaa wi ĩ ma tä pii maa totiopöö! Toitai ma tä thaa wi ĩ ma tä pii totio sisapököö! ¹⁰Cristo ma thapo wi ĩ makö pewö kutenö, pö noimaso totihoö! Ai ma töpö a kateha hiopöa mai ha, pö hapalo nohi makokopaso totihoö! ¹¹Makö kalipalo moimo mai, pö kalipalo ota totiataloö! Jesus Cristo a na makö kalipalo pi topa apapököö! ¹²‑Waiha Teusö a na sa konasolö kitäö!‑ makö pi kuu nö, pö pi mönahapalo totio opaö! Makö pea salo, pö kasiapaloö! Teusö a na pö hapalo mapo tihöö! ¹³Jesus a thapo wi ĩ töpö ohi, wani tä na töpö honimoö, ĩ na töpö kua wi, ĩ ma töpö pasiliatalaö! Hama töpö talasoö ha, makö noimo nö, ‑Ipa sai a na pö pökö kuikiö!‑ makö kuu totiataloö!

¹⁴‑Sa peama wi ĩ wa töpö peama hö̃töopököö!‑ ĩ na Teusö a na ĩ na makö kuu mai, ‑Ĩ wa töpö totiapalapököö!‑ ĩ na pö kuu totihoö! ¹⁵Ai töpö pi mönaha apa tä, makö pi mönaha naiopököö! Ai töpö ö̃köpalo tä, makö ö̃köpalo naiopököö! ¹⁶Makö höla mai, makö pewö noi ipii makö kupalotipököö! ‑Pata sa kutenö, ai tä hai, pata tä pasi mai, ĩ a wani na sa noimo mai kitä‑ ĩ na makö pi kuu maiki. ‑Sa pi mosawi ipii ĩ sa asawö‑ ĩ na pö pi kuu tihöö!

¹⁷Ai tänö kawa na wanisala tä thaö ha, ĩ a na wanisala tä thaa nomöho tihöö! Toitai wa tä thaa totihoö! ‑Wanisala tä thaa wi ĩ a‑ ai töpö pi thama tihöö! ¹⁸Ai ma töpö wanipo mai, ma töpö pewö noima totiopököö! ¹⁹Ai töpönö makö peama tä, ĩ töpö peama nomöho maiki. Pö suo tihöö! ‑Ĩ töpö na Teusö a hĩso waikia kutenö, Teusö anö ĩ töpö peama kitäö!‑ ĩ na pö pi kuu totihoö! Teusö tä waheta aiki, ‑“Ai tänö wa peama wi, kamisanö ĩ sa peama hö̃töo kitäö! Kamisanö wa nö suli wi ĩ sa sisawö” ĩ na Teusö a kuu‑ ĩ na tä waheta kuu. ²⁰Önö kutenö, ai tänö wa wanipo pole, ĩ a oi ipö tä, ĩ a ösö potehepamanöö! A amisi ipö tä, maa tuu totoköö! Ĩ na wa tä thamaö ha, wa wanipo noai ĩ a wani kililo nö, ‑Häö. Kamisanö ki sa wanipo wanisala apa nö kilia ia!‑ ĩ na kawanö ĩ wa pi wani thama sapamoa kõo kitä. ²¹Wanisala tä thaa wi ĩ tä na wa utitipamo maapököö! Toitai wa tä thaa nö, wanisala tä thaa wi ĩ wa tä utitipamanö nö, ĩ wa tä mapamanöpöö!

Pata töpönö makö simöa sinomo wi, ĩ töpö a hini totihoö!

¹Ĩ na tä kua tä, kamakö pewönö pata ma töpö a hini totiopököö! Pata töpö na Teusö aiki, ‑Ai töpö simöa sinomopököö!‑ ĩ na a pi kuu. Teusö anö pata töpö simöa somama kutenö, pata töpönö makö simöa sinomo wi ĩ töpö kai a hiniö! ²Pata ma töpö kai a peama tä, Teusö anö pata töpö simönö noai, kamakönö ĩ Teusö ma kai pi a peama naia kule. Önö kutenö, pata ma töpö kai a peama kuköma, makö peamamo hö̃töo kuki kitä. ³Toitai ma tä thaa wi ĩ makö kutenö, pata töpö na ĩ makö kili mai kitä. Wanisala tä thaa wi, pata töpö na ĩ töpö kilipalo pasitio kitäö! Önö kutenö, pata töpö na wa kili wani salo, toitai tä thaa totihoö! Toitai wa tä thaö ha, ‑Wa topa apawö‑ ĩ na pata töpö kuu kitä. ⁴‑Toitai sa tä thaa nökö o!‑ ĩ na pata töpönö ĩ na makö pi thamapö, Teusö anö pata töpö kaikanapalöma. Pata töpönö, töpö wanisala wi ĩ töpö peama taö öpa wi ĩ töpö naiwö. Teusö anö pata töpö kaikanapalö noai ĩ töpönö töpö wanisala wi ĩ töpö peama hö̃töo sinomo kutenö, wanisala wa tä thaa tä, pata töpö na wa kili totiopököö! ⁵Önö kutenö, ‑Teusö anö sa peama hãto kitäö!‑ wa pi kuu nö, pata töpö a hini totiataloö! Ĩ na tä kua tä, ‑Toitai sa tä thaa pi topa kule‑ ĩ na wa õsi pi kuu naio salo, pata töpö a hini totiataloö!

⁶Teusö anö sanöma töpö pasilipo pia salo, pata töpö simönöma. Teusö a na pata töpö kalipalotii. Önö kutenö, pata töpönö kamakö na sitipa kökö nakaö ha, ma kökö totoköpö. ⁷Sitipa ma kökö thapo pole, ĩ ai kökö na pata töpö nako sinomo wi ĩ ma kö sitipa tototaö! ‑Pata töpönö samakö simöa silia apati nö kiliawö ia!‑ pö pi kuu tihöö! ‑Pata töpö simöo sinomo wi ĩ tä topa waikia kuleö!‑ ĩ na makö pi kuu totiopököö!

‑Ai wa tä noimaö!‑ wa noa thaa wi, ĩ ta topa satia apa

⁸‑Ai tä hena tä, au noa sa tä totoki kitäö!‑ ĩ na makö kuuma ha, a walo tä, ‑Ma. Huki kuno maiö! Hena tököö!‑ ĩ na pö kuu huso päoolö tihöö! Ĩ tökö soatawö ĩ noa tä totota soaheö! ‑Ĩ noa ma tä matama haio opaö!‑ ĩ na sa kuu kule. Ĩ na sa kuu kule maaki, ai noa tä mapo mai kitä. Noa tä kui na ai ma töpö noima wi ĩ na ĩ tä kuö hö̃töwö. Ĩ ma tä mapama maapöö! Pö noimaso mapo hãto tihöö! Ai wa tä noima tä, Teusö anö makö noa thaa wi ĩ wa ta hini totio wi ĩ wa waikiwö. ⁹Pi naka. Teusö anö nö patapö töpö noa thaa noai, Moisés anö ĩ tä sãökökö noai, ĩ na ĩ ta kuu: ‑Suö wanö wano wa tä po mane ĩ a nö thaa tihöö! Wano wanö suö wa tä po mane ĩ a nö thaa tihöö! Ai sanöma tä säpa tihöö! A thomömo tihöö! Ai tänö tä thapo wi ĩ tä na a pi wasiso tihöö!‑ ĩ na tä kuu wi, ĩ tä sãökama kua. Satehe epii ĩ nasimö ta kua kule na, ĩ na sami ai ta kuu naia. ‑Kama wa noimo sapao kua kõo wi na, ĩ na ai wa töpö noima kua hö̃töopöö!‑ ĩ na tä kuu wi ĩ wa ta hini totiköma, satehe epii ai tökö a kule, ĩ wa tökö pewö a hini totia naia waikia kule. Önökö? Ai wa tä noima apöle, kawanö ĩ a hai ĩ pusopö wa nö thaa mai kitä. Ĩ wa säpa mai kitä. Ĩ a hai ĩ wani tä na wa thomömo mai kitä. ¹⁰Ai wa töpö noima apa tä, ĩ wa töpö peama mai kitä. Önö kutenö, ai wa töpö noima apa tä, Teusö anö makö noa thaa wi ĩ wa ta hini totio wi, ĩ wa waikiwö.

Tä halu atea waikia manu kule, Cristo ma thapo pole, ĩ pö pewö nananoö!

¹¹Tä tetea apa waikile, ĩ ma tä taö waikia kutenö, Teusö anö makö noa thaa noai, ĩ ta hinia totilöö! Huki pö naa haitalaloö! Jesus Cristo a huu koiki nö, hi tä hẽtu hamö makö kai konasolöpö, makö täa totia koni wi ĩ tä atea apa waikia kule. ‑Jesus Cristo a pitili‑ ĩ na makö pi kuu soma tä, ‑Makö täa koni wi ĩ tä atepa apa waikia kuleö!‑ ĩ na makö pi kuuma maaki, huki ĩ tä atepa satia apa kule. ¹²Tä halu pia kule. Jesus a huu kõo pia kule. Mumi mumi tä na wanisala tä thaa wi ĩ ma tä thaa mai, wanisala tä thaa wi ĩ ma tä utitipamani pia salo, wakala tä na toitai tä thaa wi ĩ ma tä thaa sisapököö! ¹³Wakalai ha sanöma töpö hasuso opaö ha, wanisala ma tä thaa kili kua wi na, ĩ na Cristo ma thapo wi, wakala tä na ĩ makö kua salo, toitai ma tä thaapököö! Makö kokamo pola nö, tuu wasui ma tuu kopala maikiö! Makö polemopalo opa maikiö! Ai tiko tä suö na pö mamopalo tihöö! Sami sami tä thaa maikiö! Pö hölapalo tihöö! Ai tänö tä thapo waikile, ĩ tä na makö pi wasiso pikio mai nököö! ¹⁴Haloi ösö toitai ma ösö halopo kua wi na, ĩ na Jesus Cristo Kaikana ma uni haloapala kua naiopököö! ‑Wanisala sa tä thaa pi topa sinomo wi ĩ sa tä thatalakö o!‑ ĩ na pö pi kuu hãto tihöö!

Ai tä na, ‑Wa wanisala‑ ĩ na Teusö a kuu sisapö

¹Ĩ na tä kua tä, ai tänö Jesus Cristo a thapo kule maaki, a pi tapomo moti soai, ĩ a wani na, ‑Hapo. Kamisamakö na a kokamo naioö!‑ ĩ na makö kuu! Kamakö na ĩ a kokamo naia tä, ĩ a wani na, ‑Häö! Wa pi kuu pole, ĩ ta makoka pasia maneö! Kamisa pi kuu pole, ĩ ta makoka apa asa kuleö!‑ ĩ na pö kuu tihöö! ²Pi naka. Teusö a pi kuu wi ĩ tä na wa pi hatuku upii, salo a na ĩ wa waio mi. Ĩ na tä kua tä, Teusö a pi kuu wi, ĩ tä na ai a pi hatuku pasio mai, salo a na ĩ a waio pasioö. ³Salo a na wa waio mai, ĩ wanö salo a na a waio wi ĩ a kateha pi wasöa tihöö! ‑Ĩ a pi wani hatuka hãto mikö‑ a pi kuu tihöö! Ĩ na tä kua tä, salo a na wa waio wi, ĩ wa aiki, ‑Häö. Ĩ anö tä tai mi ipö salo, salo pö pewö oa soa päatalo opaö‑ ĩ na a pi kuu pasio tihöö! Teusö anö ĩ makö pewö täa konöma ta pi kuu mai. ⁴Pata tä na ai tä kalipalo sinomo wi ĩ a na ai wanö wa tä makokama läapalo kitä ta o? Ma. Pata tänö a kalipalama sinomo wi ĩ a patanö tä makokama läapalo sisaö. ‑Wa kalipalo tomöpo maa noa‑ ĩ na pata tänö ĩ a noa thaa sisaö. A kalipalo sinomo wi ĩ a kalipalo topa apa tä, ‑Wa kalipalo toita apöö!‑ ĩ a pata kuu sisaö. Ĩ a pata kuu kua wi na, ĩ na Teusö pata tä kuu satia apaö. Teusö a patanö kamakö na tä makokama läapalo kitä. Teusö pata tänö makö lotetepalöma kutenö, kamakö makoka apati kuki kitä.

⁵Ĩ na tä kua tä, ‑Teusö tä wakala kua hãkikia päa‑ ĩ na ai töpö kuu. Ai töpö aiki asawö, ‑Ĩ tä wakala pewö hai, Teusö tä wakala soatawöö!‑ ai töpö kuu asaö. Ĩ na makö pewö pi kuu tä, ‑Ĩ na sa pi kuu wi ĩ tä makoka hãto mai kitä‑ ĩ na pö pi kuu tihöö! Pö pi setekeapalo tihöö! Makö pi tapoa totiki nö, ‑Awai. Sa pi kuu wi ĩ tä makoka waikia alu kule‑ ĩ na pö pi kuu totihoö! ⁶Ai töpönö Teusö a pi mönahapamani pia salo, ĩ tökö wakala sokapali. Teusö a pi mönaha naipamanöpö, ai töpönö hö̃töwö, salo pö pewö opalaöhe. Salo kökö oa pola nö, ‑Teusö ai. Aitaköö! Kawanö hi salo wa kökö totopi ke‑ ĩ na ĩ töpö kuu. Ai töpönö Teusö a pi mönaha naipamani pia salo, ai salo kökö oa pasia manai, ĩ töpö aiki hö̃töwö, ‑Teusö ai. Aitaköö! Hi nii wa tä totopi ke‑ ĩ na ĩ töpö kuu hö̃töoö.

⁷Önö kutenö, makö temö soa tä, kama makö pi mönahapalo sapao kõo päo mai, makö noma pia tä, kama makö pi mönahapalo sapao kõo naio mai, ĩ na makö kuapököö! ⁸Makö temö soa tä, Teusö ma pi mönahapalamaö, makö nomasopö makö nasi tuo tä, Teusö ma pi mönahapalama naio soataö, ĩ na tä kuaö. Önö kutenö, makö temö soa tä, Teusö anö makö thapo waikia wi ĩ makö. Makö nomasoma maaki, Teusö anö makö thapo soa wi ĩ makö. Teusö anö makö simöa wi ĩ makö soawö. ⁹Sanöma temö temö makö, ai töpö noma waikiso noai ĩ töpö, ĩ na makö kui makö na Cristo a kaikanamo pia salo, a säpamonasoö, a säpamonasoma maaki, a temöa konasoö, ĩ na a kuama. ¹⁰Kamakö pewö na Cristo a kaikanamo manu kule, au ai tä na ‑Wa wanisala‑ wi na wa pi kuu salo, ĩ na wa kuu pi topaö? ‑Wa tomöpo mi ipö saiö!‑ wi na wa pi kuu salo, ĩ na wa kuu? Waiha Teusö a kupoli ha makö pewö kokamo kõa nasoa tä, Teusö anö makö pewö lomakönö, ai makö na, ‑Kawa topa‑ a kuu, ai makö na, ‑Kawa wanisala pasiwö‑ ĩ na a kuu, ĩ na Teusö a kuu sisa laso kitä. ¹¹Pi naka. Ĩ na Teusö tä waheta kuu:

‑“Kamisa na sanöma töpö pewö waloiki nö, töpö loiki nö, pili töpö maeko pewö hĩta thaiki nö, töpö mãi poahaiki nö, ‘Teusö a totiatalo opa asawöö!’ ĩ na töpö pewö kuu kitäö!” ĩ na Teusö a kuu totia kuleö!‑

ĩ na tä waheta kuu. ¹²Önö kutenö, hi masita tä uli na makö pilitiki nö, makö kuati wi, waiha Teusö a na opii ĩ ma tä pewö a wäsä totio kitä.

‑Ĩ tä wanisala hãto kitäö!‑ wa pi kuu tä, ĩ tä thama tihöö!

¹³Önö kutenö, ‑Wa kuati wi ĩ tä wanisala‑ ĩ na makö kuu maikiö! Pi naka. Ĩ na pö pi kuu pasioö! ‑Teusö a thapo wi ĩ ai tä aiki, “Ĩ nasimö sa tä thaa kuköma, tä wanisala kitä” ĩ na ĩ a kuu waikia tä, “Nai. Ĩ nasimö wa tä thaa mi salo. Tä wanisala mai kitä” ĩ na sa kuu läo mai kitäö!‑ ĩ na pö pi kuu totihoö! ‑Ĩ tä wanisala‑ ĩ na au ai tä pi kuu waikila tä maaki, ‑Naiö!‑ ĩ na wa kuu läoö ha, ĩ anö ĩ tä thaa kuköma, kama na ĩ wanisala tä sai totiwö. ¹⁴Jesus pata tänö sa pi hatukupalöma kutenö, ‑Salo pö pewö opala polai, ĩ tä wanisala mai kitä‑ ĩ na sa kuu. Ĩ na sa kuu kule maaki, ai tä aiki, ‑Ĩ sa salo oalöma, Teusö a na sa wanisala hãto matimöö!‑ ĩ na ĩ a pi kuu waikile maaki, ĩ anö ĩ a salo oali wi ĩ tä wanisala. ¹⁵Önö kutenö, salo wa oa piale, ĩ tä na au ai tä pi honipo päla tä maaki, ĩ wa salo oa satia apölöma kutenö, au ai wa tä pi ipa wi, ĩ tä kua mi. ‑Hi salo sa oalöma, toitai ipa ai tä kule, ĩ sa tä mapamanö matimöö!‑ ĩ na wa pi kuu nö, ĩ a salo oa tihöö! Salo a na a waio pole, ĩ a wani na Cristo a säpamoa naisoma ta pi kuu mai. ¹⁶‑Salo sa kö pewö oa kili mi‑ ĩ na wa pi kuu wi, ĩ tä topa kule maaki, ‑“Häö. Ĩ wa salo oa silia apawö” ĩ na kamisa na ĩ na ai töpö kuu matimöö!‑ ĩ na wa pi kuu pole, ĩ a salo oa tihöö! ¹⁷Teusö anö makö simöa wi ĩ makönö salo ma oa pole, ĩ tä na Teusö a pi tapomo totio mai kitä. Maa ma tuu koa pole, ĩ tä na a pi tapomo naio mai kitä. Toitai ma tä thaa wi ĩ tä, makö hölapalo mai, toitai makö kutio wi ĩ tä, Teusö a õsi kua tolele ĩ anö makö pi mönahapama sisa wi ĩ tä, ĩ na tä kui tä na Teusö a pi tapoa totia sisaa. ¹⁸Cristo a na wa kalipalo kuköma, toitai wa tä thaö, wa hölatalo mi, ai wa töpö noima apaö, ĩ na wa kuati ha, kawa na Teusö a pi mönaha apa nö, ‑Wa topa‑ ĩ na a pi kuu kitä. ‑Ĩ a topa apaö‑ ĩ na sanöma töpö pewö pi kuu naio soata kitä.

¹⁹Önö kutenö, makö wanihaso mai, makö pipaso totiopököö! Kamakönö Cristo ma pi ipa wi, ĩ tä palaso wi, ĩ tä na kama pö pewö pi luluo hẽtupasoö! ²⁰‑Salo sa pö opala naio nö, ipa ai sa tä õsi wanisalapamanö matimöö!‑ ĩ na makö pi kuu waikia manu kule, salo kökö pewö oa satimo tihöö! Ai tä õsi na Teusö a kalipaloti wi, ĩ tä waniapa tihöö! Salo kökö pewö ausi waikii, kökö salo oa wi tä topa kule maaki, ĩ wa salo oaö ha, ĩ salo a na a waio pasio wi ĩ wa õsi waniapamanö nö, ĩ wa salo oa pole, ĩ tä topa mai kitä. ²¹Ĩ wa õsi waniapama mai ha, wa kua wi ĩ tä topa sisaa. Önö kutenö, salo wa oaö, wa tuu koaö, ĩ na wa kua kua wi na, ĩ na au ai tä kua naio nö, ‑Häö. Wanisala sa tä thaa ke‑ ĩ na au ai tä pi kuu wi, ĩ na ĩ wa pi thama paio mi tä, ĩ a salo oa ti! Ĩ tuu koa ti! ‑Wanisala sa tä thaa ke‑ ĩ na ai wa tä pi thama mai, ĩ tä topa apa. ²²Kawa aiki, ‑“Salo sa kö pewö oa wi ĩ tä topa” ĩ na Teusö a pi kuu naio kitäö!‑ ĩ na wa pi kuu waikia manu kule, au ai töpö na ĩ ta wäsä tihöö! Pe epii makö hapalo hẽtupasolaso matimö. ‑Sa kuati wi ĩ tä wanisala mai kitä‑ ĩ na wa pi kuu tä, wa pi mönaha apa kitä. ²³Ĩ na tä kua tä, ‑Hi sa salo oa wi ĩ tä wanisala hãtoa‑ ĩ na wa pi kuu päla nö maaki, ĩ wa salo oa satialöma, ‑Wanisala wa tä thaa ke‑ ĩ na Teusö a kuu kitä. ‑Sa kua wi ĩ tä topa‑ ĩ na wa pi kuu totio mi kutenö, ‑Wanisala wa tä thaa ke‑ ĩ na Teusö a kuu kitä.

Ai töpönö Jesus Cristo a thapo utitia apölai, ĩ ma töpö pasilipoö!

¹Jesus Cristo ma thapo wi ĩ makö pi tapomo mosawi ipii, ĩ makönö Jesus a thapo wi ĩ ai töpö pi tapomo moti pasi soai, ĩ ma töpö pasilipoö! Kama makö pi mönahapalo sapao kõo päo mai, ²ai ma töpö pi mönahapalama sisapököö! Ai töpönö Jesus a thapo lotetea kuköpö, ma töpö pasilipalö nö, ma töpö pi mönahapamanöpököö! ³Cristo kama pi mönaha sapao kõo maama. Teusö tä waheta aiki, ‑Hapa Teusö. Kawa na ĩ töpö hapalo wanisala apa noai, kamisa na ĩ töpö hapalo wanisala apa naioma‑ ĩ na tä waheta kuu. ⁴Sutu ha Teusö tä waheta na tä sãökökö noai, kamakö pewö pi hatukupamani pia salo, ĩ tä pewö sãökököma. Makö pi hatukupasoma, ‑Waiha toitai makö kuo soatio kitäö!‑ ĩ na makö pi kuu kuköpö, Teusö tä wahetanö makö õsi lotetepasoö, makö kasiapaloö, ĩ na makö kuaö. ⁵Önö kutenö, Teusö anö makö õsi lotetepamani, makö pi topapali, ĩ na makö õsi thama sinomo kutenö, Cristo ma uöma ösöha totio nö, makö hapalo isi wanihipaloti mai, toitai makö kutiopöö! ⁶Toitai makö kuati nö, kamakö hai ĩ Jesus Cristo pata tä hai ĩ pö̃ Teusö a na, ‑Teusö wa totiatalo opatiwöö!‑ ĩ na makö pewö kuu ösöho totio opatipököö!

Jesus Cristo ta topa apöle, juteu töpö pasi mai, ĩ töpö na ĩ ta wäsä naioheö!

⁷Önö kutenö, ‑Teusö a totiatalo opatiwö‑ ĩ na sanöma makö pewö pi thamapö, Cristo anö makö noima kua wi na, ĩ na pö pewö noimaso kua totio opaö! ⁸Pi naka. ‑Teusö a pitilimo opa noa‑ ĩ na Cristo anö sanöma makö pi thama pia salo, juteu töpö pasilipotima. Cristo anö juteu töpö pasilipotima kutenö, pi na sanöma makö pi thamama. ‑Sutu ha kamakö hai ĩ nö patapö töpö na Teusö aiki, “Waiha kamakö hai ĩ ola sa töpö täapa läo kõki kitäö!” ĩ na a kuu noai, ĩ na ĩ tä kua tolea totio opa noa‑ ĩ na Cristo anö makö pi thamama. ⁹Ĩ na tä kua tä, Cristo anö juteu töpö pasi mai ĩ töpö täapa naio kõoö ha, ‑Teusö a totiatalo opa noa‑ ĩ na ĩ töpö kuu naioö. Pi naka. Ĩ na Teusö tä waheta kuu:

‑Teusö ai. Juteu töpö pasi mai ĩ töpö na kamisanö wa wäsä nö, “Teusö a totiatalo opa asaöö!” ĩ na sa kuu nö, au ama sa ta thaa kitäö!‑

ĩ na tä waheta kuu.

¹⁰‑Juteu makö pasi mai ĩ pö! Teusö anö kama hai ĩ töpö saia somanö noai ĩ töpö pi mönaha apa, kamakö pi mönaha apa naia, ĩ na pö kuaö!‑

ĩ na Teusö tä waheta kuu naioö.

¹¹‑Juteu töpö pasi mai ĩ makö aiki, “Teusö pata tä totiatalo opa asawö” ĩ na ĩ makö kuupö. Ĩ na ai sanöma makö pewö kuu naiopö‑

ĩ na tä waheta kuu naioö. ¹²Isaías aiki naiwö,

‑Juteu töpö pasi mai ĩ töpö na Jesé a hai ĩ tolewö tä kaikanamo kuki kitäö! “Ĩ a patanö makö täapa kõo läo kitäö!” ĩ na ĩ töpö kuu kitäö!‑

ĩ na Isaías a kuuma.

¹³‑Teusö anö makö täapa kõa läo kitäö!‑ ĩ na Teusö anö makö pi thama soatio wi ĩ anö makö pi mönahapamani, makö pi topapamani, ĩ na makö pi thaa thaa totipamani wi ĩ sa tä pii kule. ‑Teusö a pitili‑ ĩ na makö pi kuu totioö ha, Teusö anö ĩ na makö pi thaa thaa totipamani kitä. Ĩ na makö pi thaa totipamanöma, ‑Teusö anö makö täapa kõo kitäö!‑ makö pi kuu wi, kamakö õsi na ĩ tä palaso kitä. Kamakö õsi na Teusö a õsi kua tolele ĩ a lotete epii, ĩ tä kalipalo opa kutenö, ‑Teusö anö makö täapa totia kõa läki kitäö!‑ ĩ na makö pi kuu sinomo opa kuki kitä.

Kamakö na sa kuti wi ĩ sa tä sãöka kili mai kitä

¹⁴Ipa pö. ‑Makö topa apaö. Ma tä pewö taö öpaö. Teusö a na makö pi hatukupamamo hẽtupaso taö öpaö‑ kamakö na ĩ na sa pi kuu totia waikia kule. ¹⁵Ĩ na makö kua waikia manu kule, makö pi motipo kota maapö, kamakö na sa kuu kili mai, sa tä sãököpalö nö, kamakö na hi sa tä waheta simöpali ke. Teusö anö sa totiapala apa nö, sa sailö nö, sa simönöma. Önö kutenö hi waheta sa tä simöpa kili mi. ¹⁶Jesus Cristo a na sa kalipalo sinomo nö, juteu töpö pasi mai ĩ sa töpö pasilipa kuköpö, Teusö anö sa simöpalöma. Önö kutenö, ai juteu pata tänö Teusö a täpä sinomo kuati wi na, ĩ na kamisanö Teusö sa täpä kua sinomo kua hö̃tötio pia salo, juteu töpö pasi mai ĩ töpö na Cristo sa ta wäsä sinomoö. Ai juteu pata töpönö Teusö a na salo a ĩsi totoma kuati wi na, ĩ na kamisanö Teusö a na ai sa töpö uni totoma thamati pia salo, Teusö sa ta wäsä sinomotii. Sa ta wäsäti ha, juteu töpö pasi mai ĩ töpönö Cristo a thapo kuki wi, ĩ töpö õsi na Teusö anö kama õsi kua tolele ĩ a titiköma kutenö, Teusö a na ĩ sa töpö uni totomaö ha, ĩ Teusö a pi mönaha apaö.

¹⁷Önö kutenö, Cristo a na sa kokaiki nö, Teusö a na sa kalipaloti wi ĩ sa ta kateha pi topa apaö. ¹⁸Cristo anö juteu töpö pasi mai ĩ töpö na Teusö a hinia totimani pia salo, sa simönöma. Ĩ tä na sa kuu sisaö. Ĩ sa ta kateha kili mi. Sa kuati noai, ĩ töpönö ĩ tä taa nö, sa ta wäsäti noai ĩ tä na töpö sömöka taiki nö, Teusö ta hini totikömae. ¹⁹Teusö a õsi kua tolele ĩ a lotete epii ĩ tänö sa lotetepamanöma kutenö, Teusö a lotetea apa wi, ai töpö na ĩ sa tä möma pia salo, sa tä aipamatima. Önö kutenö, Teusö anö sa simönöma, Jetusalẽi tä uli pata hamö sa hua somasolöö, ai satehe epii tä uli hamö sa huu nömöoö, Ilítia tä uli hamö sa huu nömöoö, ĩ na tä uli kui tä uli pewö hamö sa hutiilö pamö, Cristo ta topa apöle ĩ sa tä pewö a wäsä totio waikioma. ²⁰Ai tiko töpönö Cristo ta hini tai mi toti ipö pasi soai, ĩ töpö kuo pa, Cristo ta topa apöle, ĩ sa ta wäsä pi topa apa sinomoma. Ai tiko töpö na ai töpönö Cristo ta wäsä waikio noai, ĩ tiko töpönö Cristo ta hini taö waikia kutenö, ĩ töpö na Cristo sa ta wäsä pi topa nömöa mane. ²¹Cristo ta hini tai mia totia apölai, ĩ töpö kuo pa Cristo sa ta wäsä pi topa apa wi, ĩ ta kule na ĩ na Teusö tä waheta kuu hö̃töoö:

‑Ai töpönö Teusö tä kai a hini paio maa noai, ĩ töpönö Teusö a tapa kuki kitä. Ĩ töpönö Teusö ta hini paio maa noai, ĩ töpönö ĩ ta hininöhe nö, ĩ ta taö kuki kitä‑

ĩ na tä waheta kuu.

‑Kamakö na sa hama huu pia salo‑ ĩ na homa tili töpö na ĩ na Paulo a kuu noai ĩ ta

²²‑Homa tili töpö na sa hamamo tasokö o!‑ ĩ na sa pi kuu totia kule maaki, Cristo ta hini tai mi ipii ĩ töpö na Cristo sa ta wäsä paitia kutenö, kamakö na sa hamamo solö mai ha, sa kua soa päa kule. ²³Ĩ na sa kua nö, hi tä uli ha töpö pilipai, ĩ töpö na Cristo sa ta wäsä waikioma kutenö, kamakö na sa hamamo pi topa noai ĩ tä tetea apa waikia kutenö, ²⁴Esöpaania tä uli hamö sa huu piale, ĩ sa lö kui, kamakö na sa hamamo hasua kõpasolö kitä. Kamakö na sa hama kuo naioma, sa huso kõa tä, kamakönö sa pasilipalöpököö! ²⁵Huki kamakö na sa hamamo paio mai ha, jetusalẽi tili töpönö Teusö a thapo wi ĩ töpö na sitipa sa kökö totokö tasopö, ĩ tä uli hamö sa huu paio taso pia kule. ²⁶Jetusalẽi tili töpönö Teusö a thapo wi, sitipa kökö na ĩ ai töpö honimopalo wi ĩ töpö na, Masetônia tili töpönö Cristo a thapo wi ĩ töpö, Akaia tili töpönö Cristo a thapo wi ĩ töpö, ĩ na töpö kui töpönö sitipa kökö simöpa pialai, ĩ sitipa sa kökö kai huu pia kule. ²⁷‑Sitipa ma kökö simöpa mi salo‑ ĩ na sa kuu pola tä kuno mai, kama töpönö sitipa kökö simöpa pi topa apa päa kulai. Awai. Ĩ töpönö ĩ töpö honimo wi ĩ töpö täpälöpököö! Juteu töpö pasi mai ĩ töpönö juteu töpö na Teusö ta tälöma kutenö, sitipa kökö na, juteu töpö pasi mai ĩ töpönö juteu töpö pasilia hö̃töpalöpököö! ²⁸Ĩ töpönö sitipa kökö simöpali wi, jetusalẽi tili töpö na ĩ sa kökö totokölö nö, Esöpaania tä uli hamö sa hulasolö kitä. Sa hulolö nö, kamakö sai pö na sa hama hasupasolö kitä. ²⁹Sa hama hasuolö pamö, kamakö na Cristo sa ta wäsä kuköma, Cristo anö makö pi topapalama totio opa kitä.

³⁰Ipa pö! ‑Jesus Cristo pata tä pitili‑ makö pi kuu, makö noipaso kua totio wi, Teusö a õsi kua tolele ĩ anö ĩ na makö pewö noia thapali, ĩ na makö kua kutenö, makö kasiapalo opa nö, Teusö a na pe epii ĩ makö pewö hapalo nö, ‑Paulo a noamaö!‑ ĩ na makö kuu! ³¹‑Jutéia tä uli ha Cristo ta hini wani ipii, ĩ töpö kule, ĩ töpö na Paulo a noamaö!‑ ĩ na makö kuu nö, ‑Teusö ai. Jetusalẽi tili töpö aiki, “Paulo anö makö pasilipa wi ĩ tä topa apa kule” ĩ na töpö kuu wi ĩ sama tä pii kuleö!‑ ĩ na pö kuu totihoö! ³²Ĩ na makö kuu ha, kamakö na Teusö anö sa kai walokö solöma, sa pi mönaha apii sa talalo nö, kamakö na sa kutiki nö, sa pi honipo mai, sa pi topa apati kitä. ³³Pei. Teusö anö makö pewö pi topapalama sinomo wi, kamakö na ĩ a kuo soatio wi ĩ sa tä pii kuleö! Ĩ naköö!

Ipa noi makö na sa hapalo nömöo kule

¹Ĩ na tä kua tä, Pepisoma anö Cristo a thapo kutenö, ‑Nakai‑ ĩ na samakö kuutoö. Sẽikötéia tili töpönö Cristo a thapo wi ĩ töpö kokamo sinomo wi, ĩ töpö na Pepisoma a kalipalo sinomoö. Ĩ a toita apö. ²Kamakö na Pepisoma a talasoö ha, ĩ anö Cristo pata tä thapo kutenö, ‑Ipa sai a na a pökö kuikiö!‑ ĩ na makö noimo nö, ĩ na makö kuu! Teusö a hai ĩ makö pewö kutenö, ĩ na makö kuupökö. Kamisa, satehe epii ai töpö, ĩ na samakö kui, Pepisoma anö ĩ samakö pasilipo waikioma kutenö, kamakönö ĩ ma suö pasilipo nömöopököö!

³Pötisiilasoma a, Akila a, ĩ na kilii töpö na makö hapalo nö, ‑“Makö topa kule?” kamakö na ĩ na Paulo a kuu kuleö!‑ ĩ na makö kuu! ‑Jesus Cristo a na sa kalipalo tä, ĩ töpö kalipalo naioma‑ ĩ na sa kuu kule. ⁴Ĩ töpö kalipalo naia tä, ‑Pälaö! Paulo ma pasilipoö ha, ai töpönö makö säpalö matimöö!‑ ĩ na ĩ töpö pi kuu mai, sa pasilipo satia apatimae. Önö kutenö, ĩ töpö na, ‑Aitaköö!‑ sa kuu sinomoö. Juteu töpö pasi mai ĩ töpönö Cristo a thapo wi ĩ töpö kokamo pa, ĩ na ĩ töpö kuu hö̃töoö.

⁵Pötisiilasoma a, Akila a, ĩ na kilii töpö sai pö ha Cristo a thapo wi ĩ töpö kokamo sinomo wi ĩ töpö na makö hapalo naio nö, ‑“Makö topa kule?” kamakö na ĩ na Paulo a kuu kuleö!‑ ĩ na makö kuu nö, ásia tili töpö kule, ĩ tä uli ha Epênetu anö Cristo a thapo soma noai ĩ sa pi ipa wi, ĩ a solo makö huamaso nö, ‑“Wa topa kule?” kawa na ĩ na Paulo a ku upa kulatiö!‑ ĩ na makö kuu nö,

⁶kamakö na Maria a kalipalo opa noai ĩ a na ĩ na makö kuu naio nö,

⁷Ãtötôniku a, Júnia a, ĩ na kilii töpö na, ‑Makö topa kule?‑ makö kuu naioö! Ĩ töpö hai ĩ juteu töpö hö̃töwö. Titita wi a sai ha sa tititia tä, ĩ töpö tititio naioma. Cristo anö töpö simöa asalö noai ĩ töpö aiki, ‑Ãtötôniku a, Júnia a, ĩ na töpö kui töpö toita apö‑ ĩ na ĩ töpö kuu. Kamisanö Cristo sa thapo paio mai ha, ĩ töpönö Cristo a thapo somama.

⁸Ãplíatu anö Cristo pata tä thapo naio wi ĩ a na sa noimo opati wi, ĩ a na, ‑“Wa topa kule?” Paulo a kuu kuleö!‑ ĩ na makö kuu naioö!

⁹Ĩ na makö kuu nö, Uhupanu a na, ‑Wa topa kule?‑ makö kuu naioö! Ĩ a solo, Cristo a na samakö kalipaloma. Esötákisö sa pi ipa wi ĩ a na, ‑Wa topa kule?‑ makö kuu nö,

¹⁰‑Apeelisö anö Cristo a thapo wi ĩ a topa apa sinomoö‑ ĩ na Apeelisö anö ai töpö pi thama noai ĩ a,

Atisötópulu a, kama töpö pewö, ĩ na töpö kui töpö na, ‑Makö topa kule?‑ makö kuu naio nö,

¹¹kamisa hẽtu hai ĩ Etosião a hilo wi ĩ a, Nasiisu töpönö Cristo a thapo wi ĩ töpö, ĩ na töpö kui töpö na, ‑Makö topa kule?‑ ĩ na makö kuu naioö!

¹²Ĩ na makö kuu nö, Tötipena a, Tötiposa a, ipa noi tä Pésisi a, ĩ na töpö suö kui, Jesus pata tä na ĩ töpö kalipalo sinomo wi, ĩ töpö na, ‑Makö topa kule?‑ makö kuu naioö!

¹³Ĩ na makö kuu naio nö, Jesus pata tä na Hupu a kalipalo opati wi ĩ a, Hupu a hai ĩ pöpönö a, ĩ na kilii töpö na, ‑Makö topa kule?‑ makö kuu naioö! Hupu a hai ĩ pöpönö anö kama hai ĩ ulu töpö totiapala apa kua wi na, ĩ na ĩ a suönö ĩ na sa totipo kua apa hö̃töo kipiliö!

¹⁴Asĩkötitu a, Plekõsi a, Ehemisö a, Pátötopasö a, Ehemasö a, ĩ na kilii töpö sai pö na ai töpö kokamo sinomo wi ĩ töpö, ĩ na töpö pewö kui töpö na, ‑Makö topa kule?‑ makö kuu naioö!

¹⁵Ĩ na makö kuu naio nö, Pilóloku a, Júlia a, Neteu a, kama hai ĩ pese a, Olĩpasö a, ĩ na kilii töpö sai pö na ai töpönö Teusö a thapo wi ĩ töpö kokamo naio wi ĩ töpö, ĩ na töpö pewö kui töpö na, ‑Makö topa kule?‑ ĩ na makö kuu naioö! Sa töpö pewö a katehae, ĩ töpö pewö na, ‑“Makö topa kule?” ĩ na Paulo a kuu kuleö!‑ ĩ na makö kuu totihoö!

¹⁶Cristo a thapo naio wi, kamakö sai pö na ĩ töpö tapo tä, makö pi mönaha apa salo, makö hanokopasopököö!

Hi tä uli ha Cristo a thapo polai, ĩ töpö kokamo sinomo wi, ĩ töpö aiki, ‑Homa tili töpö na, “Makö topa kule?” wa kuu!‑ ĩ na ĩ töpö kuu kule.

¹⁷Ipa pö! Kamakö na Teusö ta taöma noai, ai töpönö ĩ ta peama pasio wi, ĩ ai töpö kua. Teusö ta peama nö, Teusö a thapo wi ĩ töpö selekepamani, ‑Cristo a pitili‑ ĩ na ai töpö pi kuu wi ĩ tä mapamani, ĩ na ĩ töpö kuaö. ‑Önö kutenö, ĩ na tä kua wi, ĩ tä na pö pi mosawikiö! Ĩ töpö na pö loo naio tihöö!‑ ĩ na sa kuu upati kuleö! ¹⁸Kamakö hai ĩ Cristo pata tä na ĩ töpö kalipalo pi topa totio mai ha, kama töpö puko pi topa sinomo päoö. ‑Ĩ töpö hapalo taö öpaö‑ ĩ na ĩ töpönö makö pi thama kule maaki, makö a kateha topa apati wi maaki, makö pi mosawia mi tä, ĩ töpönö makö mönama totio wi tä kupasoö. ¹⁹Kamakönö Cristo ma ta hini totia apa asale, ai töpö pewönö ĩ tä taö totia waikia. Cristo ma ta hini totia apaö ha, pe epii sa pi mönaha apaö. Kamakö na sa pi mönaha waikia kule maaki, pi na kamakö na sa kuu kule: ‑Toitai tä na pö pi hatukuikiö! Wanisala tä thaa wi, ĩ tä na moti moti pö kua totikiö!‑ ĩ na sa kuu kule. ²⁰Teusö anö makö pi topapalama apati wi, ĩ anö lope epii Sai tä sai pata utitipalöma, kamakönö Sai ma ta pata peama naio kitä. Pili makö aminö Sai ma ta pata katätäpo piale, Teusö anö kamakö na ĩ a katätämapo pia kule. Kamakö hai ĩ Jesus pata tänö makö totiapala apati wi, ĩ sa tä pii kule.

²¹Timóteo sa nokamanönö noai, Cristo a na ĩ a kalipalo naio wi, homa tili makö na ĩ aiki, ‑Makö topa kule?‑ kamakö na ĩ na Timóteo a kuu naia kuleö! Lúsiu a, Jasão a, Sosípatötu a, ĩ na juteu töpö kui, ĩ töpö aiki, ‑Makö topa kule?‑ kamakö na ĩ na ĩ töpö kuu naia kule.

²²Hi waheta tä na Paulo a kuu pole, Tésiu sanö ĩ sa tä sãöka läa päki ke. Cristo sa thapo naia kutenö, ‑Makö topa kule?‑ kamakö na ĩ na sa kuu naioö.

²³Kaiu a sai pö na Paulo sa kutia kule. Kama Kaiu sai pö ha Cristo a thapo wi ĩ töpö kokamo nö, töpö Teusömo sinomoö. ‑“Makö topa kule?” ĩ na homa tili töpö na, ĩ na wa kuu!‑ ĩ na Kaiu a kuu naia kule. Hisa ha, kotĩtu tili pata töpönö sitipa kökö nakapa sinomo wi, Etaasötu anö ĩ kökö thaa sinomo wi, ĩ aiki, ‑Makö topa kule?‑ ĩ na ĩ a kuu naia kule. Kuaatu a solo.

²⁴[Kamakö hai ĩ Jesus Cristo pata tänö makö pewö totiapala apa wi ĩ sa tä pii kule. Ĩ naköö!]

²⁵‑Teusö a totiatalo opa asatiowöö!‑ ĩ na makö pewö kutipököö! Teusö anö makö pi lotetepamanöma, ‑Cristo a pitili‑ ĩ na makö pi thama sinomo kuki kitäö! Jesus Cristo ta topa apöle, ĩ sa ta wäsä pola nö, ĩ na sa kuu sinomoö. Sutu upa ha Cristo ta wäsä mai ha, tä kutioma maaki, ²⁶huki ĩ tä na Teusö anö samakö pi hatukupamanöma. Sutu ha Teusö a kai wäsä sinomo noai ĩ töpö aiki, ‑Waiha sanöma makö täapa kõo läo wi, ĩ a huu kitäö!‑ ĩ na töpö a kuu nö, ĩ tä sãökökö noai ĩ tä na, ‑Wi na ta kuu totia kule taköö?‑ ĩ na samakö pi kuu paitioma maaki, huki ĩ tä na Teusö anö samakö pi hatukupamanöma. Samakö pi hatukupamani ha, ‑Ã ãi. “Sanöma makö täapa kõo läo wi, ĩ a huu kitäö!” tä kuu noai, ĩ Cristo a katehama ta o‑ ĩ na Teusö anö samakö pi thamanöma. Temii Teusö a kuo sinomo soatio wi, ĩ anö samakö simöama. Samakö simöaö ha, ‑Hi masita tä uli pewö hamö sanöma töpö pilipai, ĩ töpönö Cristo a hinia totilöpököö!‑ ĩ na samakö pi kuu nö, sama ta wäsä hätäpotii.

²⁷Teusö a hai, ĩ pata tä sai sisawö. Ĩ a pi pata hatuka apa sisaa. Sanöma makö täapa kõo läo pi topa salo, Jesus Cristo a simöpalöma. Önö kutenö, ‑Teusö a totiatalo opa asaöö!‑ ĩ na makö pewö kuu soatiopököö! Ĩ naköö! Peiö!