Apocalipse

Apocalipse

Tä uni hasulupamanö noai ĩ ta

João anö Jesus ta wäsä sinomotima kutenö, homa tili pata töpönö a peama apa nö, mötati tuu ha sanöta Patömosö tä kuo taso pamö titita wi a sai a kule, ĩ a sai na João a titikö tasoma. Ĩ a sai ha a titia tä, João anö hi waheta tä sãököpalöma. Tä sãököpalö nö, ‑Jesus a na makö pewö koka kutenö, ai töpönö makö peama thama wi na ĩ na sa peama thama naia kule. Kamakö õsi na Jesus a kaikanamo sinomo wi, ai töpönö ĩ makö pewö peamati kule maaki, makö kasiapalo hö̃tötiopököö! Makö kasiapalo opa wi, ĩ makö na Teusö anö noa tä toita apii noa tä totoki kitäö!‑ ĩ na João a kuuma.

Hi tä waheta sãököpalö nö, 7 tökö uli kule ha Jesus a thapo wi ĩ töpö kokamo sinomo noai, ĩ töpö na hi tä waheta simönöma. Hi waheta tä na ĩ töpö noa thaa nö, João anö uni tökö tapa noai, ĩ tökö uni a kateha nömöoma. Ĩ tökö uni a kateha nömöo nö, ‑Jesus anö Sai tä sai pata peama totio kitäö!‑ a kuu nö, ‑“Masita tä uli pewö hamö töpö pilipai, ĩ töpö sanöma na kaikana töpö kaikanamo noai, huki kamakö hai ĩ Teusö Kaikana tä, Teusö anö a saia asapalö noai ĩ Cristo a, ĩ na töpö kui, sanöma töpö na ĩ töpö kaikanamo totio nömöo wi, ĩ tä kupaso kitäö! Teusö a kaikanamo mapo mai kitäö!” ĩ na sa kuu kuleö!‑ ĩ na João a kuuma.

¹Jesus Cristo anö tä hasulupamanö noai, ĩ sa ta wäsä pia kule. Teusö aiki, ‑Tä kua piale, ĩ tä na Jesus a na makö kalipalo sinomo wi ĩ pö pi hatukuikiö!‑ ĩ na Teusö a pi kuu salo, Jesus Cristo a na ĩ tä hasulua somapamanöma. Tä hasulua somapamani ha, Jesus Cristo anö kama hai ĩ ãju tä simöpalönö nö, ‑Tä kua piale, João a na ĩ ta wäsätöö!‑ ĩ na Jesus a kuuma. Ĩ na a kuu ha, João sa na ĩ ãju tä waloköma. ²Kamisa na ĩ ãju tä waloiki nö, kamisa na tä hasulupamanö solö noai, ai töpö na ĩ sa tä pewö a wäsä kipili. Ĩ sa ta wäsä noai, hi waheta tä na ĩ sa tä pewö sãököki ke. ³Tä kua piale, ĩ tä tetepo totio mai ha, ĩ tä kupo soata pia kule. Önö kutenö, ai töpö na ai wanö ĩ waheta wa tä kateha kuköma, ĩ wa pi mönaha apa kuki kitä. Ĩ Teusö tä waheta katehaö ha, ĩ tä na ai makö sömöka taiki nö, ĩ ma ta hini totiatalo opa kuköma, makö pi mönaha apa naio kitä.

Jesus a thapo wi töpö kokamo sinomo wi, ĩ 7 töpö pata

⁴João sa. Jesus ma thapo wi, Ásia tä uli ha ĩ 7 makö sai pö pata kule ha ĩ makö kokamo sinomo wi, ĩ makö pewö na hi waheta sa tä simöpali ke. Huki Teusö a kutipoli, ĩ a kuo soatio laso noai, waiha hisimö ĩ a huu kõo piale, ĩ Teusö anö makö totiapala apaö, makö pi topapalama apaö, ĩ na Teusö anö makö thama wi, ĩ sa tä pi ipaö. Teusö a õsi kua tolele, kaikana tä lota wi ĩ lotami ti kotö ha ĩ a pata kule, ĩ a patanö makö totiapala naioö, makö pi topapalama apa naioö, ĩ na makö thama wi, ĩ sa tä pii naioö. ⁵Ĩ na Jesus Cristo anö makö thama naio wi, ĩ sa tä pi ipaö. Jesus Cristo anö pitili toti ipii ĩ ta wäsä wi, ĩ a. Sanöma makö nomasoma, ĩ ai makö temöa konaso kitä maaki, Jesus a temöa kõa somasoma. Sanöma kaikana töpö pewö na a kaikanamo totio opa wi, ĩ Jesus Cristo a.

Jesus anö makö pewö pi ipaö. Wanisala ma tä thaa noai, ĩ tänö makö huöpo lototopo opama maaki, Jesus anö makö tholoha kopamanöma. A säpamono nö, kama iä pö haa noai, ĩ tänö makö tholoha kopamanöma.

⁶Makö uni kusöa kopamanö nö, kama hai ĩ pö̃ Teusö a na makö kalipalo sinomopö, makö pewö kaikana naipalö nö, kamakönö Teusö ma täpä sinomopö, ĩ makö thapalöma. Ĩ Jesus Cristo a na makö pewö aiki, ‑Wa totiatalo opa asawöö! Wa loteteapalo satia apawöö!‑ ĩ na makö kuupö. Ĩ na tä kuapöö!

⁷Möö nökö. Ilasi tökö na a tikiliki nö, a huu kõo kitä. A huu kõo pole, sanöma makö pewönö ĩ ma tä tapa apa kitä. Hii ti pakalai ti ha a sätäa tä, sokopi anö a tiwöha noai, a huu kõone, ĩ töpönö ĩ tä tapa naio soata kitä. A huu kõa tä, ĩ tä uli pewö hamö töpö pilipai, ĩ a na ĩ töpö pewö ö̃köpalo opa lälaso kitä. Awai. Ĩ na tä kua totio kitä.

⁸Teusö pata tä lotete epii, ĩ aiki, ‑Aupa sa. Ômeka sa naiwö. “Aupa sa” ta kuu pole, “Kolo sa kuo soma noai ĩ sa” ĩ na ta kuu alu kule. “Ômeka sa” ta kuu pasile, “Ola sa kuo soatio kitä” ĩ na ta kuu naia kule. Huki sa kutia, sutu upa sa kua somatioma, waiha sa huu kõo, ĩ na sa kuaö‑ ĩ na Teusö pata tä kuu.

João anö Jesus a uni tapa noai ĩ ta

⁹Kamakö, João sa, ĩ na makö kui makönö Jesus ma thapo wi ĩ makö. Jesus a na makö pewö koka kutenö, ai töpönö makö peama thama wi na ĩ na sa peama thama naia kule. Kamakö õsi na Jesus a kaikanamo sinomo wi, ai töpönö ĩ makö pewö peamati kule maaki, makö kasiapalo hö̃tötia kule. Teusö sa kai wäsätii, Jesus sa ta wäsätii, ĩ na sa kuati ha, sa peama pi topa salo, mötati tuu ha sanöta Patömosö tä kuo taso pamö sa thakö tasoma. ¹⁰Sanöta Patömosö tä uli kuo taso pamö sa kutia tasoa tä, Jesus pata tä hai ĩ tomĩku tä wakala na Teusö a õsi kua tolele, ĩ anö sa õsi simöa toitioma. Sa õsi simöa toitioö ha kamisa noa ha ta hola wi ĩ ta holamö lotete kui na, ĩ na ta hapalo loteteo kuo opama. ¹¹Kamisa na ĩ ta pata hapalo nö, ĩ na ta kuuma: ‑Wa tä tapa piale, waheta tä na ĩ wa tä sãökökö nö, tä simöpalöö! Epesu tä uli, Esömihina tä uli, Péhekamu tä uli, Siasita tä uli, Sahasisö tä uli, Pilatéupia tä uli, Laosiséia tä uli, ĩ na 7 tä uli kulali, ĩ ha Teusö a thapo wi ĩ töpö kokamo hätäpo sinomo wi, ĩ töpö na tä waheta simönöö!‑ ĩ na ta kuuma.

¹²Ĩ na ta kuu ha, ‑Kamisa na ĩ witi pili a hapalo kule?‑ sa pi kuu nö, sa nomöhöa soatalo nö, 7 oto taka wakö pi hĩta thale, ĩ sa taka wakö pi talalöma.

¹³Ĩ tökö mötali na sanöma tä kupaso noai, ĩ a kui na, ĩ na a kui a huma. Kama hai ĩ haloi ösö lapeo opama. Pili a ami öpaha wäle ha ĩ ha kama hai ĩ haloi ösö halo wäoma. Pili a pesokö na oto toto halukupoma. ¹⁴A hunuku ausio opama. Kahaneitu kõiki ausi ipö, nepi tä ausi ipö, ĩ na tökö ausi kui na, ĩ na a hunuku kuoma. Koa taka sii hili kua wi na, ĩ na pili a mamo sii wakö pewö hili kua totioma. ¹⁵Pötõosi söpala ösö lö kui, ösö sami hosali pia salo, koa taka na ösö hilälä pa ösö sopia toitaso noai ha ösö hölökö hölökömaö ha, ösö wakalapo opa kua wi na, ĩ na a ami wakala kuo soatama. Satehe epii pola kökö a kuu wi na, ĩ na a hapalo kuoma. ¹⁶Kate a poko aminö satehe epii, 7 sitikali kökö kui kökö humöpoö. Poo a namo hẽtutula tä, a poo holelepalöma. Hi tä hẽtu sai ha motokö kua tä, motokö sii wakala apa kuo wi na, ĩ na pili a moikömö wakala kuoma.

¹⁷Ĩ sa tä talalö nö, a amiki öpahale ha, ĩ ha sa nomawö kea soasoma. Sa nomawö kea soasoma maaki, kamisa na kate a poko ami walipaiki nö, ‑A kili tihöö! Kolo sa kuo soma noai ĩ sa. Kolo sa kuo noai, ĩ ola sa kuo soatio kitä. ¹⁸Sa temö öpii ĩ sa. Sa nomasoma maaki, sa temöa konasoma. Huki sa noma kota mai ha, sa temöo soatio kitä. Sanöma töpö nomasoma, ĩ sa töpö simöa kuki kitä. Õsi töpö kule, ĩ töpö sai pö ha taka lototoa apöle, ĩ sa taka hãkopalö nö, ĩ õsi sa töpö simöa kuki kitä. ¹⁹Önö kutenö, huki tä kuati pole ĩ tä, waiha tä kua piale ĩ tä, ĩ wa tä pewö tapa pia wi, waheta tä na ĩ tä pewö sãökököö! ²⁰Kate sa poko aminö 7 sitikali sa kökö humöpo pole, ĩ wa tä talalöhe, ĩ kökö na, “Ĩ ka pi tä uni?” wa pi kuu pole, kawa na ĩ sa ta wäsä hasulupa pia kule. Oto taka sii wakö pi hĩta thale, ĩ 7 taka wakö sii pi kui, wa tökö talalöhe, ĩ sa tökö wäsä hasulupa naio soata pia kule. 7 sitikali kökö kule, kamisanö sa töpö simöta wi ĩ töpö uni. 7 sai kökö pata ha kamisa thapo polai ĩ töpö kokamo sinomo wi, ĩ töpö na 7 sa töpö simöta wi, ĩ töpö uni. 7 koa taka pi hĩtae, 7 sai kökö pata ha sa thapo wi ĩ töpö kokamo sinomo wi, ĩ töpö uni‑ ĩ na a kuuma.

Epesu tili töpönö Jesus a thapo salo, ĩ töpö kokamo sinomo wi, ĩ töpö na

¹Ĩ na a kuu nö, ĩ na a kuu nömöoma: ‑Waheta wa tä sãököpalö nö, epesu tili töpönö sa thapo wi ĩ töpö kokamo sinomo wi, ĩ töpö na ai sa tä simöta wi, ĩ a na ĩ tä waheta simönöö! Ĩ tä waheta na, ĩ na wa kuu! “Kate a pokonö 7 sitikali kökö humöpo pole, koa taka pi hĩtale, ĩ 7 oto tökö mötali ha a huu pole, ĩ a wäo nö, ĩ na a kuu kule: ²‘Makö kuati noai, ĩ sa tä taö öpa kule. Pe epii makö kalipalo opa thali. ‑Päla‑ makö kuu mai, makö kasiapalo opa thali. Wanisala tä tha apa wi ĩ ma töpö taa wani. Ĩ na tä kua tä, ai töpö aiki, ‑Jesus anö sa simöa sinomo wi ĩ sa‑ ĩ na töpö holisi kuu wi, ĩ ma töpö wapa nö, ‑Ma. Jesus anö ĩ töpö simöa sinomo wi ĩ töpö mai kitä. Töpö holisimo päoö‑ ĩ na ma töpö noa thama. ³Kamisa na, ‑Päla‑ makö kuu mai, opii makö kasiapalo opa nö, kamakönö sa thapo kutenö, ai töpönö makö pepalama apatima. Makö pepalama apatima maaki, kamisa na, ‑Pälaö!‑ makö pi kuu maama. ⁴Ĩ na makö kuati kule maaki, ‑Sami tä na makö tomöpo mane‑ sa pi kuu kule. Somi tä kamakönö sa pii kuapili na, huki kamakönö ĩ na sa pii kua totia mane. ⁵Somi tä, kamakönö sa pi ipapili, ĩ tä na pö pi hatukua totikiö! Ĩ tä na makö pi hatukuiki nö, ‑Häö! Wanisala sama tä thaa silia apa sai taköö!‑ ĩ na makö pi kuu nö, ĩ wanisala ma tä hosalalö nö, somi tä makö kuatipili na, ĩ na pö kua totio kõoö! Makö kuatipili na, ĩ na makö kua totio kõo mi tä, kamakö na sa waloiki nö, makö kule ha koa taka pi hĩta thale, ĩ sa taka pi täa konönö kitä. ⁶Ĩ na makö kua kule maaki, Nikolau töpö kuati pole, kamakönö ĩ ma tä taa wani. Ma tä taa wanine, ĩ tä topa. Nikolau töpö kuati pole, ĩ sa tä taa wani naioö.

⁷Önö kutenö, ma ta hini pi topale, ĩ makönö ta hinia totilöö! Ai töpönö Jesus sa thapo wi ĩ töpö kokamo sinomo wi, Teusö a õsi kua tolele, ĩ töpö na ĩ a kuu wi, ĩ ta hinia totilöheö!

Sai tä sai pata na wa palupaso wi, ĩ wa na kamisa aiki, ‑Teusö tä uli ha sanöma makö temöpama kõo wi, ĩ tiki öpale, ĩ tiki na thomo thomo salolole, ĩ wa thomo oalöpö‑ ĩ na sa kuu kitä’ ĩ na Jesus a kuu kuleö!” ĩ na wa kuu!‑ kamisa na ĩ na Jesus a kuuma.

Esömihina tili töpönö Jesus a thapo salo, ĩ töpö kokamo sinomo wi, ĩ töpö na

⁸Ĩ na a kuu nö, ĩ na a kuu nömöoma: ‑Waheta wa tä sãököpalö nö, esömihina tili töpönö sa thapo wi ĩ töpö kokamo sinomo wi, ĩ töpö na ai sa tä simöta wi, ĩ a na ĩ tä waheta simönöö! Ĩ tä waheta na, ĩ na wa kuu! “A kuo somatio noai ĩ a, waikii a kua naine, ĩ a nomasoma maaki, a temöa konaso noai, ĩ na ĩ a kuu kule: ⁹‘Makö pepalo opati wi, ĩ sa tä taö öpaö. Wani ma tä thapo maa kule maaki, kamakö na Jesus sanö sa tä totoma wi, ĩ ma tä thapo opa kule. Ma tä thapo opöle, sa tä taö. ‑Juteu samakö‑ ai töpö holisi kuu wi, ĩ töpönö Teusö a thapo mi ipö. Sai tä sai pata thapo wi, ĩ töpö pasiwö. Ĩ töpönö makö a kateha wanisala apa wi, ĩ sa tä taö. ¹⁰Makö pepalo opa piale, ĩ tä na pö kili tihöö! Pi naka. Sai tä sai patanö wanisala tä na makö wapa pia salo. ‑Ĩ töpönö Jesus a hula hãtoki kitä‑ a pi kuu nö, titita wi a sai ha ai makö titiki kitä. Makö titia tä, 10 tä mumi na makö pepalo opa kitä. Makö pepalo opa nö, makö nomaso kitä maaki, kamakönö Jesus sa hula tihöö! Sa hula mi tä, kamakö na kaikana sa hesowa totoki kitä. Makö õsi palimipaso wi, ĩ a hesowa aiki.

¹¹Önö kutenö, ma ta hini pi topale, ĩ makönö ta hinia totilöö! Ai töpönö Jesus sa thapo wi ĩ töpö kokamo sinomo wi, Teusö a õsi kua tolele, ĩ töpö na ĩ a kuu wi, ĩ ta hinia totilöö!

Sai tä sai pata na wa palupaso wi, ĩ wa nomasoma, waiha ĩ wa ola noma kota mai kitä. Teusö a na wa kuo naio soatio kitä. Õsi töpö pea mapo mai, ĩ tä uli ha ai töpö huu pasio wi, polakapii ĩ töpö noma pi kupasoö’ ĩ na Jesus a kuu kuleö!” ĩ na wa kuu!‑ kamisa na ĩ na Jesus a kuuma.

Péhekamu tili töpönö Jesus a thapo salo, ĩ töpö kokamo sinomo wi, ĩ töpö na

¹²Ĩ na a kuu nö, ĩ na a kuu nömöoma. ‑Waheta wa tä sãököpalö nö, péhekamu tili töpönö sa thapo wi, ĩ töpö na ai sa tä simöta wi, ĩ a na ĩ tä waheta simönöö! Ĩ tä waheta na, ĩ na wa kuu!

“Poo a ola namo hẽtutui a poo po pole, ĩ na ĩ a kuu kule: ¹³‘‑Witi ha makö pilia?‑ sa pi kuu mane. Kamakö hai ĩ tä uli ha ai töpö na Sai tä sai pata simöo totio wi, ĩ tä uli ha makö pilia naia kule. Ĩ tä uli ha makö pilia naia kule maaki, ‑Jesus a pitili‑ ĩ na makö pi kuu sinomo nö, kamakönö Jesus sa hula maama. Sa thapo mapo mai, makö kasiapalo soatia kule. Ãtipasö anö sa kai a wäsä sinomotima kutenö, kamakö kule ha Sai tä sai pata pilile, ĩ tä uli ha Ãtipasö a säpalöma. A säpalöma maaki, kamisa na, ‑Päla‑ makö kuu maama. ¹⁴Ĩ na makö kuati kule maaki, wani ipii makö tomöpo maa soa kule. Sutu ha Palaki a na Palaão aiki, ‑Ĩ naköö! Ĩ na a kuaö!‑ a kuu noai, huki ai makönö ĩ ma ta hini totiatalo opa kule. Ĩ na Palaão a kuuma: ‑Isöhaeu töpö na wa hapalo nö, “Töpö sai töpömo pia salo, ukutupö tökö na töpö noamamo wi, ĩ tökö ukutupö na nii tä totokö noai, ĩ tä nii na makö iapalopököö! Makö iapalo nö, ai tiko tä suö na makö sapäkäpalopököö!” ĩ na wa kuu! Ĩ na wa kuu ha, isöhaeu töpönö ĩ ta hini nö, wanisala tä tha apa kitäö!‑ Palaki a na ĩ na Palaão a kuuma. Ĩ na a kuu noai, huki ai makönö ĩ nasimö ma ta hini nömöo nö, wanisala ma tä thaa hö̃töa kule. ¹⁵Ĩ na tä kua tä, Nikolau töpönö ta wäsä sinomo wi, ai makönö ĩ ma ta hinia naia kule. ¹⁶Önö kutenö, kamakö aiki, ‑Teusö sa ta hini totio mai, ai tiko sa ta hiniatala silia apa sai taka. Wanisala sa tä thaa pole, ĩ sa tä hosalö nökö o‑ ĩ na makö pi kuupököö! Ĩ na makö pi kuu mi tä, wanisala ma tä thaa wi, ĩ makö na sa wasu huu kitä. Pili sa kai na poo sa holelepali wi, ĩ sa poo wasu kai huu kitäö!

¹⁷Önö kutenö, ma ta hini pi topale, ĩ makönö ta hinia totilöö! Ai töpönö Jesus sa thapo wi ĩ töpö kokamo sinomo wi, Teusö a õsi kua tolele, ĩ töpö na ĩ a kuu wi, ĩ ta hinia totilöö!

Maná tä nii sosale, Sai tä sai pata na wa palupaso wi, ĩ wa na ĩ sa tä nii totoki kitä. Maa ma ausi ipii, ĩ maa ma na tute wa hilo pole, ĩ sa tä sãökökö nö, kawa na sa tä totoki kitä. Wa hilo wi ĩ tä sãököle, ai töpönö ĩ tä taö pasia mai kitä. Kama wa hilo wi, ĩ kama wanö ĩ wa tä taö sisaö’ ĩ na Jesus a kuu kuleö!” ĩ na wa kuu!‑ kamisa na ĩ na Jesus a kuuma.

Siasita tili töpönö Jesus a thapo salo, ĩ töpö kokamo sinomo wi ĩ töpö na

¹⁸Ĩ na a kuu nö, ĩ na a kuu nömöoma: ‑Waheta wa tä sãököpalö nö, siasita tili töpönö sa thapo wi, ĩ töpö na ai sa tä simöta wi, ĩ a na ĩ tä waheta simönöö! Ĩ tä waheta na, ĩ na wa kuu! “Koa taka sii hili kua wi na, ĩ na pili a mamo sii wakö hili kua hö̃töo wi, pötõosi ösö hölököpalöma, ösö wakala apö kui na, ĩ na pili a ami huu wi ĩ a ami wakala apö kuö hö̃töi, ĩ na Teusö a hai ĩ pelupö a kui, ĩ na ĩ a kuu kuleö!

¹⁹‘Huki makö kuati pole, ĩ sa tä taö öpa. Ai ma töpö noima apaö, ‑Jesus a pitili‑ makö pi kutii, Teusö a na makö kalipalo opaö, makö kasiapalo opaö, ĩ na makö kuati pole, ĩ sa tä taö öpa. Kamakönö Jesus sa thapo tute tä, toitai ma tä thama maaki, huki toitai ma tä thaa pala apaimati, ĩ sa tä taö öpa. ²⁰Toitai ma tä thaa pala apa kimati maaki, ‑Sami tä na makö tomöpo maa sisata kule‑ sa pi kuu kule. Jesapeusoma aiki, ‑Teusö sa kai wäsä sinomo wi ĩ sa‑ a kuti wi, ĩ ma wasuatala maa kule. Kamisa na töpö kalipalo sinomo wi, Jesapeusoma anö ĩ töpö mönama nö, piliso wanisalai tiso ha töpö simöatii. Ĩ töpö na ta wäsä nö, ‑Ukutupö tökö na töpö noamamo wi, ĩ tökö ukutupö na nii tökö totoma noai, ĩ tökö nii na makö iapalopököö! Makö iapalo nö, ai ma töpö po mane maaki, ĩ ma töpö mamopalamapököö!‑ ĩ na a kutii. ²¹Jesapeusoma a na, ‑Wano töpö sapäkama tihöö! Ai tiko töpö wano na a sapäko tihöö!‑ ĩ na sa kuu tetea apa waikia kule maaki, ai tiko töpö wano sapäkama pi topa apati salo, sa hini mane. ‑Häö. Wanisala sa tä thaa waniwöö!‑ a pi kuu mane. ²²Önö kutenö, Jesapeusoma a, ĩ anö wano töpö sapäkama sinomo wi ĩ töpö, ĩ na töpö kui töpö aiki, ‑Wanisala sa tä thaa kota mai kitäö!‑ töpö kuu mi tä, Jesapeusoma sa hãsiapakö nö, ĩ sa pilia komakö nö, ĩ a na wano töpö sakapalo pole, ĩ sa töpö pewö peama apa kitä. ²³Jesapeusoma a hai ĩ ulu sa töpö sälali kitä. Kama hai ĩ ulu sa töpö säpali ha, sa thapo wi ĩ töpö kokamo hätäpo sinomo wi, ĩ töpö pewö aiki, ‑Sanöma makö pi tapotio wi ĩ tä, ma tä pi ipa wi ĩ tä, ĩ na tä kui, Jesus anö ĩ tä pewö taö öpaö‑ ĩ na ĩ töpö pi kuu kitä. Makö kuati noai, ĩ sa tä noa totoki kitä.

²⁴Ai siasita tili makönö Jesapeusoma ma kai a hini totiatalo opa kule maaki, ai makönö ĩ ma kai a hini pasio mai, ĩ ai makö kua pasia kule. ‑Sai tä kai pata hasulupamanö noai, ĩ ta‑ ĩ na ai töpö kuu wi, ĩ ma ta hini pasio maama. Pei. ‑Ĩ na pätawö. Kamisanö makö noa thaa kõo mai kitä‑ ĩ na sa kuu kule. ²⁵‑Masita tä uli ha sa huu kõo paio mi tä, pitili ma ta hini waikio noai, ĩ ta hini totioö!‑ ĩ na makö noa thaa sisa kule.

^26-28Sai tä sai pata na wa palupaso wi, ĩ wanö toitai sa tä thama pi topa wi ĩ wanö ĩ wa tä thama mapo mi ipö tä, kamisanö ĩ wa kaikanapali kitä. Masita tä uli na töpö pilipai, ĩ töpö pewö na ipa hao anö sa kaikanamoma kua noai na, kamisanö ĩ na ĩ wa kaikanamoma thama naio kitä. Kamisa kaikanamo lotete kui na, ĩ na wa kaikanamo lotetea kua naipaso kitä. Söpala ösö lapei ösönö töpö sä wi, ĩ ösö lotete kui na, ĩ na wa kaikanamo wi, ĩ na ĩ tä lotete kupaso kitä. Wa kaikanamo lotete epö salo, ai töpönö wa wanipo sinomo wi, ĩ wa töpö pewö mapamani kitä. Masita hapoka wania kupaso wi na, ĩ na ĩ wa töpö wania thapali kitäö! Hena tä sai tä sitikali wakala apii, ĩ a sitikali toita apö kui na, ĩ na wa kaikana toita apii wa kupaso wi, kawa na ĩ sa tä totoki kitä.

²⁹Önö kutenö, ma ta hini pi topa wi, ĩ makönö ta hinia totilöö! Ai töpönö Jesus sa thapo salo, ĩ töpö kokamo sinomo wi, Teusö a õsi kua tolele, ĩ töpö na ĩ a kuu wi, ĩ ta hini totioö!’ ĩ na Jesus a kuu kuleö!” ĩ na wa kuu!‑ ĩ na Jesus a kuuma.

Sahasisö tili töpönö Jesus a thapo salo, ĩ töpö kokamo sinomo wi ĩ töpö na

¹Ĩ na a kuu nö, ĩ na a kuu nömöoma: ‑Waheta wa tä sãököpalö nö, sahasisö tili töpönö sa thapo wi, ĩ töpö na ai sa tä simöta wi, ĩ a na ĩ tä waheta simönöö! Ĩ tä waheta na, ĩ na wa kuu! “Teusö a õsi kua tolele, ĩ a pata thapo wi ĩ anö 7 sitikali kökö kui kökö humöpo pole, ĩ na ĩ a kuu kule: ‘Makö kuati pole, ĩ sa tä taö öpaö. Ai töpönö makö a kateha nö, ‑Teusö ma thapo totio wi, ĩ makö waikiwö. Teusö ma kai a hini totiatalotiwö‑ ĩ na ĩ töpö kuu kule maaki, Teusö ma kai a hini mi ipö. ²Pö nanöö! Wani ipii kamakönö sa kai a hini pole, ĩ sa kai hini palaloheö! Ma tä hinipalaalö mi tä, kamakönö sa kai a hini maa totipaso kitä. Kamakönö sa hulaki kitä. Ipa Teusö aiki, ‑Makö kuati wi ĩ tä makokoa maneö!‑ ĩ na a pi kuu ha, kamakö na ĩ na sa kuu kule. ³Önö kutenö, kamakö na Teusö ta wäsä tä, ĩ ma ta hininö noai, ĩ tä na pö pi motöpo tihöö! Ĩ ma ta hininö nö, ‑Wanisala sa tä tha apatipili, ĩ sa tä thaa kota mai kitäö!‑ makö pi kuu! Makö naa mi tä, makö pi motöla tä a thomömo wi a waloa kua hãtoki wi na, ĩ na makö pi motöa kula tä, ĩ na kamisa waloa kua hö̃töa hãtotaki kitä. ⁴Ĩ na sa kuu ke maaki, ai sahasisö tili makönö kamakö hai ĩ haloi ma ösökö samima pasio maama. ‑Wanisala ma tä thaa pasio maama‑ sa kuu alu kule. Ĩ makö topa asa kutenö, haloi ösökö ausi ipii ĩ ma ösökö halolö nö, kamisa solo makö hupalo asatio kitä.

⁵Sai tä sai pata na wa palupaso wi, ĩ wanö haloi ösökö ausi ipii ĩ wa ösökö haloa naini kitä. Töpö õsi palimi ipii ĩ töpö a hilo wi ĩ tä sãököle, ĩ tä waheta na ĩ wa hilo wi ĩ tä sãöka naine, ĩ sa tä sanöpa mai kitä. Ipa hao a, kama hai ĩ ãju töpö, ĩ na töpö kui töpö na kamisanö wa kateha nö, ‑Sa thapo wi ĩ a‑ ĩ na sa kuu hoka apa kitä.

⁶Önö kutenö, ma ta hini pi topa wi, ĩ makönö ta hinia totilöö! Ai töpönö Jesus sa thapo salo, ĩ töpö kokamo sinomo wi, Teusö a õsi kua tolele, ĩ töpö na ĩ a kuu wi, ĩ ta hini totioö!’ ĩ na Jesus a kuu kuleö!” ĩ na wa kuu!‑ ĩ na Jesus a kuuma.

Pilatéupia tili töpönö Jesus a thapo salo, ĩ töpö kokamo sinomo wi, ĩ töpö na

⁷Ĩ na a kuu nö, ĩ na a kuu nömöoma: ‑Waheta wa tä sãököpalö nö, pilatéupia tili töpönö sa thapo wi, ĩ töpö na ai sa tä simöta wi, ĩ a na ĩ tä waheta simönöö! Ĩ tä waheta na, ĩ na wa kuu! “A pitilimo opa wi, Teusö anö ĩ a saia asapalö noai, sutu upa Davi a kaikanamo loteteo opa kuo noai na, ĩ na ĩ a kaikanamo lotete epö kuö hö̃töwö. A kaikanamo pole, ĩ ha taka lale, ĩ anö ĩ taka hãkopalöma, ai tänö ĩ taka laa kõo mai kitä. Ĩ na tä kua tä, ĩ anö ĩ taka laa kõköma, ai tänö ĩ taka hãkopa kota mai kitä. Ĩ a kaikananö ĩ na tä kuu wi ta wäsä pia kule. ⁸‘Makö kuati pole, ĩ sa tä taö. Pe epii makö loteteapalo totia mane maaki, kamakönö sa kai a hini totiatalo opa thali. Kamakönö sa hosa maama. Kamakö palu ha taka holele, kamisanö ĩ sa taka hãkopali ke. Sa taka hãkoa waikipalöma kutenö, ai tänö ĩ taka laa kõo mai kitä. Ĩ taka na makö lisia totipaso kitä. ⁹Sa kai a hiniö! Ai töpö aiki, ‑Juteu sa. Teusö sa thapo wi ĩ sa‑ ĩ na ĩ töpö kuu kule maaki, Teusö a thapo mane. Sai tä sai pata thapo wi ĩ töpö pasiwö. Kamakö na ĩ sa töpö walomaki ha, ‑Teusö anö hi pilatéupia tili töpö pi ipawö‑ ĩ na sa töpö pi thama kitä. ¹⁰‑Makö pepalo opati kule maaki, pö kasiapalo satia apaö!‑ kamakö na sa kuu noai, ĩ ma ta hinia totia apötalöma kutenö, makö kasiapalo hö̃töoma. Makö kasiapalo opama kutenö, waiha kamisanö makö noama hö̃töo kitä. Ĩ tä uli pewö hamö töpö pilipai, ĩ sa töpö wapa kuköma, ĩ töpö pewö pepalo opa wi tä kupaso kitä. Ai töpö pewö pepalo opa kitä maaki, makö noama asa kitä. ¹¹Lope epii sa huu kõo pia kule. Makö pi mosawiki nö, sa kai a hua totilöheö! Kamakönö sa kai a hini mapo mi tä, Sai tä sai pata na makö palupaso wi, Teusö anö ĩ tä noa totoa piale, ai tänö ĩ tä noa thomöa läo mai kitä.

¹²Teusömo wi a sai lototomapo wi, ĩ ti pata hĩta kule na, ĩ na Sai wa ta pata peama wi, kamisanö ĩ na ĩ wa thama hö̃töo kitä. Teusömo wi a sai ha ti hĩtale, ĩ ti hĩta kuo soatio kua wi na, ĩ na Teusö a sai pö na ĩ na wa kuo kuo soatio kitäö! Kawa na ipa Teusö a hilo wi, ĩ sa tä sãökökö kitä. Tute tute Jetusalẽi tä uli ha Teusö a kupoli, ĩ tä uli itho laso pialei, a sai pata hilo pole, ĩ sa tä sãököa naiki kitäö! Tute sa hilo pole, Jesus sanö kawa na ĩ sa tä sãököa naiki kitäö!

¹³Önö kutenö, ma ta hini pi topa wi, ĩ makönö ta hinia totilöö! Ai töpönö Jesus sa thapo salo, ĩ töpö kokamo sinomo wi, Teusö a õsi kua tolele, ĩ töpö na ĩ a kuu wi, ĩ ta hini totioö!’ ĩ na Jesus a Kaikana kuu kuleö!” ĩ na wa kuu!‑ ĩ na Jesus a kuuma.

Laosiséia tili töpönö Jesus a thapo salo, ĩ töpö kokamo sinomo wi ĩ töpö na

¹⁴Ĩ na a kuu nö, ĩ na a kuu nömöoma: ‑Waheta wa tä sãököpalö nö, laosiséia tili töpönö sa thapo wi, ĩ töpö na ai sa tä simöta wi, ĩ a na ĩ tä waheta simönöö! Ĩ tä waheta na, ĩ na wa kuu! “A wäo piale, ĩ a pitili ipö kutenö, ‘Awai. Teusö a kuu wi ĩ pitili ta’ ĩ na makö pi thamaö. Ĩ a pitilimo opa wi, Teusö a wäsä pitilia sinomo opa wi, ĩ a na Teusö anö ĩ tä pewö pata thapamanöma. Masita tä uli ha tä pewö pata kule ĩ tä, masita tä uli hẽtu pata ha tä kule ĩ tä, ĩ tä pewö pata thapamanöma. Pi naka. A pitilimo opa wi, ĩ na ĩ a kuu kule: ¹⁵‘Makö kuati pole, ĩ sa tä taö. Tuu sopii tuu kui na, ĩ na makö kuö mi, tuu ösö holelei tuu kui na, ĩ na makö kuö mi, tuu utiti ipii tuu kui na ĩ na makö utiti kua kule. Kamakönö sa wanipo mane maaki, kamakönö sa pii mi. Sa pii aköna, ‑Topa‑ sa pi kuu pi. Sa wanipo aköna, ‑Ĩ nakö päla‑ sa pi kuu pi. ¹⁶Sa wanipo mi, sa pii mi, ĩ na makö kuaö ha, maa tuu utiti kui na, ĩ na makö kuö. Ĩ na makö kuö kutenö, maa tuu utitii tuu holelea thapali wi na, ĩ na makö thapali kitä. ¹⁷Kamakö aiki, ‑Wani sama tä thapo opaö. Samakö honimo mi ipö. Samakö puko opatii‑ ĩ na makö kuu kule maaki, makö pi moti ipö. Makö pi tomöwö mi. Makö wanisala. Teusö anö tä totoma wi, ĩ ma tä thapo mi. Toitai ma tä thatala mi kutenö, sinoi töpö kupalo kuati wi na, ĩ na makö kui makö hupalotii. Teusö ma taö totio mi kutenö, makö uni höpöpö öpö.

¹⁸Önö kutenö, ĩ na sa kuu kule. ‑Oto tä sai toita apö kui na, ĩ na tä kui, kamisanö sa tä totoma wi, ĩ tä täalalöheö! Ĩ ma tä tälöma, makö honimo mai kitäö! Kamisa na haloi ösö ausi ipii ösö täa naiananöheö! Ĩ ösö na makö halotaköma, toitai ma tä thaa kuköma, makö möamö pi kilihio wi, ĩ tä matasoö. Ĩ na tä kua tä, kamisanö pili mamo uni hönöma wi, ĩ nasimö tuu uni sua naiananöheö! Ĩ ma tuu sulöma, pili makö mamo ha ma tuu kemaköma, makö höpöpö mai kitä‑ kamakö na ĩ na sa kuu. ¹⁹Sa töpö pi ipa wi, ĩ töpö na, ‑Ĩ na makö kua maikiö!‑ ĩ na sa kuu sinomoö. ‑Ĩ töpönö wanisala tä thaa kota maapököö!‑ sa pi kuu nö, ĩ sa töpö makokopama sinomoö. Önö kutenö, pö pi tapoa totikiö! ‑Wanisala sa tä hosalö nö, ĩ wanisala sa tä thaa kota wani ipöö!‑ ĩ na pö pi kuu! ²⁰Hini nökö. Pili wa kotopö sai päka holeo pa sa öpataiki nö, ‑Sa lisipamanöö!‑ sa kuti kule. Ĩ wa ta hinitalö nö, wa taka hãkotali ha, au sai a päka ha sa lisia soataso kitä. Sa lisia soatalo nö, kawa na sa noimo nö, makö iapalo soata pia kuleö!

²¹Sai tä sai pata na wa palupaso wi, ĩ wa na, ‑Hapo. Kawa solo, kaikana hai ĩ lotami ti kaikana ti na makö loköpöö! Sai tä sai pata na sa palua totipasoma kutenö, kaikana ti na ipa hao a lole, ĩ ti na ĩ na sa loa kua naikö noai na, ĩ na kaikana ti na sa lole ha, ĩ ti na ĩ na wa loa kua naiköpöö!‑ sa kuu kitä.

²²Ma ta hini pi topa wi, ĩ makönö ta hinia totilöö! Ai töpönö Jesus sa thapo salo, ĩ töpö kokamo sinomo wi, Teusö a õsi kua tolele, ĩ töpö na ĩ a kuu wi, ĩ ta hini totioö!’ ĩ na Jesus a kuu kuleö!” ĩ na wa kuu!‑ ĩ na Jesus a kuuma.

Hi tä hẽtu ha Teusö a kulali, ĩ ha töpö Teusömo wi ĩ ta

¹Ĩ na Jesus a kuu noai ha, ai sa tä uni tapa kotama. Hi tä hẽtu ha Teusö a kulali, ĩ ha taka holeo wi, ĩ sa taka hãkoa tapama. Ta pata hola lope epö kui na, ĩ na ta pata hapalo lope epö kui, kamisa na ĩ ta pata hapalo waikio noai, kamisa na ĩ ta pata hapalo kõoma. Pi na ta kuuma: ‑Hapo. Hisimö a huoki solöö! Tä kua piale, kawa na ĩ sa tä möma pia kuleö!‑ ĩ na ta pata ha kuuma.

²Ĩ na ta pata ha kuu noai, ĩ tökö soatawö Teusö a õsi kua tolele, ĩ anö sa simöa totioma. Hi tä hẽtu ha Teusö a kulali, ĩ ha kaikana hai ĩ lotami ti hõtopoli, ĩ ti ha ai tä lotioma. ³Maa ma ose noa apii, ĩ jasöpi ma wai hilo wi ĩ ma wai, ai ma wai noa apö nai soatai, ĩ sáhasiu ma wai a hilo kua wi ĩ ma wai, ĩ makö wai wakala apö kui na, ĩ na kaikana tä hai ĩ lotami ti na a lotile, ĩ na ĩ a moikömö wakala kuo hö̃töo soatama. Kaikana ti lotami ti hõtole, ĩ tä tutakö pewö hamö olökö sii ãsokoma. Esömetauta ma wakala kui na, ĩ na ĩ olökö sii wakala kuoma. ⁴Ĩ kaikana ti lotami hõtole, ĩ ti tutakö pewö hamö ai kaikana tipö satehe epii, tipö hõto ãsokoma. 24 tiki kui tiki hõto ãsokoma. Ĩ tiki ha pata töpö satehe epii, ĩ 24 pata töpö kui töpö lohomoma. Kama töpönö haloi ösökö ausi ipii ösökö haloalalöe nö, pili töpö he na oto hesowa pö sohoalalöe nö, töpö lohomoma. ⁵Ĩ töpö mötali ha kaikana ti lotami ti hõtole, ĩ ha tä pata sami samimo opaö, ta pata hapalo opaö, sanö ta pata kua naia soataa, tä pata kua apama. Ĩ ti kotö ha 7 asawa tökö wakö sii hilipalo kule. Ĩ 7 asawa tökö wakö sii hilipalo pole, ĩ Teusö a õsi kua tolele, ĩ a uni pata. ⁶Kaikana tä lole, ĩ hisi hisimö, kosoto tuu kui na ĩ na walala tä pata kui, kötisötau maa makö walala kui na ĩ na tä kui tä walala pata pama.

Kaikana ti lotami ti hõtole, ĩ ti kotö ha 4 töpö kui ĩ temö temö töpö öpa ãsokomoma. Ĩ pili töpö mamo kuo opama. Pili töpö kotopö hamö pili töpö mamo sälähä äpö, pili töpö hõo hamö ai töpö mamo sälähä äpö, ĩ na töpö mamo satehe sälähämo opa kuoma. ⁷Töpö öpatile, ĩ ai a hai, öla a pata kui na, ĩ na ai a pata kuö hö̃töwö, ai a soatawö, paka wano a pata kui na, ĩ na ai a pata kuö hö̃tö soatawö, ai a soatawö lö kui, sanöma tä moikimö kui na, ĩ na ai a moikimö pata kuö nai soatawö, ai a pata nai soatawö lö kui, nonosi a pata katä kua wi na, ĩ na ai a pata mömomö kuö soatawö, ĩ na töpö pata kui töpö pata kuoma. ⁸Ĩ 4 temö temö töpö öpale, ĩ töpö maiki pewö pata kuo opama. Ai a na 6 maiki kua, ai a na 6 maiki sätäa hö̃töoö, ai a na 6 maiki kua hö̃töa, ai a na 6 maiki kua hö̃töa, ĩ na töpö maiki pata kumoma. Pili töpö maiki hõo pata hamö töpö mamo sälähämo opama. Pili töpö maiki kotopö pata hamö ai tä mamo pata sälähämo opa naio soatama. Ĩ tä wakala pewö pata hamö ĩ töpö pewö pata amamo soatioma. Amamo soatia tä, tä muma konasoö, tä halua konasoö, tä wisa konasoö, tä halua konasoö, ĩ na ĩ töpö pata amamo soatia tä, ĩ na tä wakala hasua kupasoma. Ama ta thaa noai ĩ na ĩ tä ama kua:

‑Teusö anö wanisala tä thaa pasio mi ipii ĩ ai.

Teusö anö wanisala tä thaa pasio mi ipii ĩ ai.

Teusö anö wanisala tä thaa pasio mi ipii ĩ ai.

Teusö a lotete hasu upö asai, ĩ ai.

A kuo soma noai ĩ ai.

A kua nömöa kõone, ĩ ai.

A walo nömöo kõo piale, ĩ ai‑

ĩ na tä ama kui, tä ama thaa sinomotima.

⁹Kaikana tä lota wi ĩ ti na kama a lotile, ĩ a temö kuo soatio wi, ĩ a na ĩ 4 temö temö töpö kui töpö amamo tä, ‑Wa lotete hasuwö öpö asawö. Wa totiatalo hasuwö öpö asawö. Aitaköö! Kawanö samakö pewö totiapala apati wi ĩ waö!‑ ĩ na töpö amamo nö, töpö kuu kõatalotima. Töpö kuu kõataloti tä, ¹⁰mötali ha a lole, ĩ a kotö ha 24 pata töpö kui töpö mãi poa soataiki nö, töpö Teusömo nö, ĩ a na töpö pi tapomo opatima. Ĩ kaikana tä pata lotile, ĩ a kaikana tä pata na töpö pi tapomo kuiki nö, ĩ töpö pewönö töpö palupaso noai ĩ töpö hai ĩ kökö hesowa pewö sopo polai, ĩ kökö hesowa pewö hasua soatalalö nö, kaikana tä kotö ha ĩ hesowa kökö pewö paa soataköma. Hesowa kökö paa soatakö nö, ĩ na töpö kuuma:

¹¹‑Kamisamakö hai ĩ Teusö a pata! Kawanö ĩ wa tä pewö pata thalalöma. Ĩ wa tä pewö pata thapa pi topa salo, wa pi tapoa soataiki nö, wa tä pewö pata thapalöma. Ĩ wa tä pewö pata thapa pi topa totio noai, ĩ tä pewö pata kua totia hö̃töa. Önö kutenö, kawa na, “Kawa Teusö wa lotete hasuwö öpö asawö. Wa totiatalo hasuwö öpö asawö. Wa lotete sati ipö” ĩ na makö pewö kuupökö‑

ĩ na pata töpö kuuma.

Oweha anö waheta tä hãkopa piale, ĩ a

¹Ĩ na tä kua tä, kaikana lota sinomo wi ĩ ti na kama kaikana tä lotile, ĩ kate a pokonö waheta tä sãökama pi hãsokamai, tä sãökama pi po pole, ĩ sa tä tapama. Tä pi sãökama hẽtutui, ĩ tä ola kõo pa 7 tä sõtikipö sutia kula tä, tä pi sãökama hãsokama po pole, ĩ sa tä talalöma. ²Ĩ tä pi sãökama hãsokama pi po pole, ĩ sa tä talalö nö, ãju tä lotete epii, ĩ sa tä taa nömönanöma. Ĩ ãju tä aiki, ‑Waheta tä sutia lototoa päla tä maaki, ai tänö toitai tä thaa sinomo kutenö, ĩ anö sõtikipö tökö hasu hasuma nö, waheta tä hãkopa taö öpa wi, ĩ nasimö ai tä kule kitä?‑ ĩ na lope epii a kuuma. ³A kuuma maaki, ai tä kuo maama. Hi tä hẽtu hamö töpö kule ĩ töpö, hi tä uli ha ai töpö kule ĩ töpö, hi tä komo hamö ai töpö kupokili ĩ töpö, ĩ na töpö kui töpö na a kupalo hätäpo hö̃töoma maaki, tä waheta hãkopalö nö, tä waheta sãököle, ĩ tä möö taö öpa wi, ĩ ai tä kuo maama. ⁴Ĩ tä waheta hãkopalö nö, tä waheta sãököle, ĩ tä möö taö öpa wi, ĩ ai tä kua mi kutenö, sa ö̃köpalo opatima. ⁵Sa ö̃köpalo opaö ha, kamisa na ai pata tä aiki, ‑A ö̃köpalo tihöö! Jutá a hai ĩ pelupö tolewö töpö pata kule, ĩ ai a hẽtu hai, kaikana tä Davi a kuo noai, ĩ a hai ĩ ola tolewö tä hai, öla a pata hilo wi, ĩ a palua asa waikipasoma kutenö, 7 sõtikipö tökö sutile, ĩ anö ĩ tökö hasu hasuma taö öpa kitä. Ĩ tökö hasu hasuma hötötöa toitalo nö, tä waheta haposeama taö öpa kitä‑ ĩ na ĩ ai pata tä kuuma.

⁶Ĩ na a pata kuu ha, kaikana tä hai ĩ lotami ti hõtole ha, ĩ ha 4 temö temö töpö öpa ãsokole ha, ĩ töpö hõo ha pata töpö öpa tulekea naine, ĩ töpö mötali ha oweha a okalo wai hõtoa tä, sa wai talalöma. Sa talalö nö, ‑Ki a nomaso noai, ki ĩ a hãtoa?‑ ĩ na ĩ oweha a okalonö sa pi thamama. Sonaköpö satehe epii, ĩ 7 sonaköpö kuoma. Ĩ na tä kua tä, pili a mamo lö kui, mamo satehe epii, ĩ 7 pili a mamo kuoma. Pili a mamo hai, Teusö a õsi kua tolele, masita tä uli pewö hamö Teusö anö ĩ a simönö noai, ĩ a uni.

⁷Ĩ na tä kua tä, oweha a okalo holetaiki nö, kaikana tä lotile, ĩ anö kate a pokonö waheta tä sãökama pi po pole, oweha a okalonö ĩ tä sãökama pi täa soatalöma. ⁸Ĩ tä waheta sãökama pi täa soatali ha, 4 temö temö töpö, 24 pata töpö, ĩ na töpö kui, ĩ oweha a okalo kotö ha ĩ pili töpö maekonö töpö hĩta thaa soatakö nö, töpö mãi poa soataköma. Söpala ösö toto thata thatamaö ha ama ta thaa sinomo wi, ĩ töpönö ĩ nasimö tökö poma. Oto tökö tasa ose õsimö wai ha pãhi pãhi tä nisamö häläläamö toita apii, ĩ tökö pi po naio soatamae. Ĩ pãhi pãhi tä lö kui, Teusö a na kama hai töpö hapalo wi, ĩ tä uni. ⁹Ĩ töpönö ama tä tutei tä ama ha thama. Pi na tä ama ha kui tä ama ha thama:

‑Kawa totiatalo opa asatio salo,

kawanö ĩ waheta wa tä sua taö öpa asa kitäö!

Wa tä sulö nö, sõtikipö tökö sutitile,

ĩ wa tökö sõtikipö hãko hãkoma taö öpa asa kitä.

Hii ti pakalai ti ha wa pi hĩtaköhe nö, wa säpalöma.

Wa säpalö noai, ĩ wa iä pönö sanöma wa töpö täa konöma.

Pata töpönö töpö kai kule ĩ töpö,

ĩ tä uli pewö hamö töpö hapalo aipii, töpö pewö pata kua apöle ĩ töpö,

ai töpö lölöhö, ai töpö usi, ai töpö ausi, ĩ na töpö kui töpö,

hi masita tä uli pewö hamö töpö pata pilipai, ĩ töpö pewö pata,

ĩ na töpö kui, kawa iä pönö ĩ ai wa töpö täa konöma.

Teusö a na wa töpö totoki pia salo, wa töpö täa konöma.

¹⁰Wa töpö täa konö noai, Teusö a na ĩ töpö kalipalo sinomopö,

ĩ töpönö Teusö a täpä sinomopö, wa töpö täa konöma.

Wa töpö täa konö noai, ĩ töpö kaikanamo naio kitäö!

Masita tä uli pewö hamö töpö pilipai, ĩ töpö pewö na ĩ töpö kaikanamo kuki kitäö!‑

ĩ na ama tä kuu wi tä ama ha thamae.

¹¹Ĩ na tä kua tä, sa tä möö kõoö ha, ãju töpö satehe epii sa töpö talalöma. Sitikali kökö satehe epö kui na, ĩ na ãju töpö satehe epii töpö kui, sa töpö talalöma. Kaikana ta pata lole, ĩ tä kotö na ai 4 temö temö töpö öpa tulekele, ĩ tä hõo ha pata töpö öpa tulekea naine, ĩ töpö kotö ha ĩ ãju töpö satehe epii töpö öpa tulekeo naioma. ¹²Ĩ ãju töpö öpa tulekeo naio noai, ĩ töpö pewönö lope epii ama ta thaa nö,

‑Oweha a okalo wai säpalöma kutenö, ĩ töpö pewö na ĩ a kaikanamopöö! Sanöma töpö, sai töpö, ãju töpö, wani tökö pewö, ĩ na ĩ anö ĩ tökö pewö thapo kuapöö! A pi mosawi kui na, ĩ na ĩ a pi mosawi kuo soatiopöö! A lotete kui na, ĩ na ĩ a loteteo kuo soatiopöö! “Kawa hai, pata waö!” töpö pewö kuupököö! Ai töpö pewö na wa hasua asapasopöö! “Wa totiatalo opati asawöö” ĩ na kawa na töpö pewö kuupököö!‑

ĩ na ama ta thaa nö, ĩ na ĩ töpö kuuma.

¹³Ĩ na tä kua tä, sa tä möö nö, hi tä hẽtu ha Teusö a kulali, ĩ ha töpö kupoli ĩ töpö, masita tä uli hamö sanöma töpö kua naine ĩ töpö, ĩ tä uli komo hamö töpö kupokili ĩ töpö, mötati tuu pata ha töpö kule ĩ töpö, ĩ na töpö kui töpönö ama ta thaa wi, ĩ sa tä ama ha hininöma. Pi na tä ama ha kuu wi tä ama ha thama:

‑Kama hai ĩ lotami ti na kama kaikana a lotile ĩ a, oweha a okalo, ĩ na töpö kui töpö na, “Makö totiatalo opati asawöö! Kamakö hai, ĩ pata maköö! Ai töpö na makö hasuha asapasopöö!” ĩ na töpö pewö kuu soatio kuköpököö!‑

ĩ na ama ta thaa nö, ĩ na ĩ töpö pewö kupalotima.

¹⁴Ĩ na töpö kupaloti ha, ĩ 4 temö temö töpö aiki, ‑Awai. Ĩ naköö!‑ ĩ na ĩ töpö kuu hö̃töoma. Ĩ na töpö kuu hö̃töoö ha, masita tä uli ha pata töpö maeko hĩta thaa soataiki nö, Teusö a na ĩ töpö pewö pi tapoa soataiki nö, ‑Teusö ai. Wa pi ipawöö! Wa totiatalo opawö‑ ĩ na ĩ töpö pi kuu soatasoma.

Sõtikipö tökö sutitile, ĩ tökö

¹Ĩ na tä kua tä, sa mamo tetela tä, sõtikipö tökö sutitile, ĩ 7 tökö kui tökönö tä waheta kasö patetepo ãkököa apöle, oweha a okalonö sami tä hoköpalöma. Ĩ tä hoköpalö noai, ĩ sa tä talalö nö, 4 temö temö töpö kule, lope epii ai tä hapalo kuköma, sanö ta pata klau klaumo kua wi na ĩ na ĩ a hapalo kuu nö, ‑Hapo!‑ a kuuma.

²Ĩ na ĩ a kuu ha, sa tä moni möö kuki maaki, kapalu a ausii sa talalöma. Ĩ kapalu a kai huu pole, ĩ anö silaka nai poma. Ĩ a na a palupaso noai ĩ a hesowa totoköma. Ĩ hesowa a, silaka nai naiwö, ĩ na ĩ tökö kai hua kua soasolöö. Ĩ tökö kai hua soatalolö nö, ai töpö peama sinomo pi topa apa kutenö, töpö pewö peama soata tasoma.

³Ĩ na tä kua tä, oweha a okalonö sami sõtikipö tä hoköa waikipalö noai ha, ai sõtikipö tä hoköa nömöa kotalöma. Tä hoköa nömöa kotali ha, sa sömöka taa pasia tä, ai temö temö tä aiki nömöwö, ‑Hapo!‑ ta kuuma.

⁴Ĩ na a kuu tä, ai kapalu a hanahai a huma. Ĩ kapalu a kai huu wi, ĩ kama na ai pata tä aiki, ‑Masita tä uli hamö töpö kule, ĩ töpö säpaso totio wi, ĩ wa tä thamaö!‑ ĩ na ai pata tä kuuma kutenö, ĩ anö poo a pata täa soatalö nö, kapalu a kai ekua soataköma.

⁵Ĩ na tä kua tä, oweha a okalonö polakapi sõtikipö tökö hoköa waikitalö noai ha, ai tä hoköa nömöa kotalöma. Ai tä hoköa nömöa kotali ha, sa sömöka taa nömöa kota tä, ai temö temö tä aiki nömö kotawö, ‑Hapo!‑ ta kuuma. Ĩ na ta kuu pa, sa tä moni möö kuki maaki, kapalu a usi ipii sa talalöma. Ĩ kapalu a kai huu pole, ĩ anö soatawö hute wapa wi ĩ tä söpöpo pole. ⁶Ĩ tä, 4 temö temö töpö mötali ha sanöma tä hapalo kua wi na, ĩ na ta hapalo kuu wi, ĩ sa ta hinima. Ĩ na ta kutima. ‑Tä uli oi ipö kutenö, nii tä noa apö. Sami tä wakala na ai tä kalipalo wi, ĩ tä noa na sami kaukösö a kasö wai he wäle ha tötiiku mo kopeke löa he wäa pätalöpöö! Ĩ na tä kua tä, sami tä wakala na ai tä kalipalo wi, ĩ tä noa na 3 kaukösö a kasö wai he wäle ha tötiiku mo kopeke löa he wäa pätaköpöö! Tapu tapu tuu, upa mo puu, ĩ na tuu kui tuu wanisalama tihöö!‑ ĩ na ta kuuma.

⁷Ĩ na tä kua tä, oweha a okalonö ĩ 3 sõtikipö tökö hoköa waikipalö noai ha, ai tä hoköa nömöa kotalöma. Ai tä hoköa nömöa kotali ha, sa sömöka taa nömöa kota tä, ai temö temö a waiki totii aiki, ‑Hapo!‑ ta kuuma.

⁸Ĩ na ta kutasoö ha, sa tä mötaalöma, kapalu a hanei, a kai hupole ĩ a, ĩ na kilii sa tökö talalöma. Ĩ kapalu a kai huu pole, ĩ a na, ‑Ai töpö säpa wi ĩ ai‑ ĩ na ai töpö kuutoma. Ĩ a na õsi töpö noka naisolöma. Ai tänö ĩ töpö huu pole, ĩ töpö lotetepamani nö, ‑Sanöma ma töpö säa hãkikilalöpöö!‑ ĩ na ĩ töpö noa thama. ‑Poo kökö, oi oi tä, wasu wasu tä, uli hamö salo pö waitili hupalo wi ĩ pö, ĩ na tökö kui tökönö sanöma ma töpö säa hãkikia totimananöpöö!‑ töpö noa thama.

⁹Ĩ na tä kua tä, oweha anö 4 sõtikipö tökö hoköa kõo waikitalö noai ha, ai tä hoköa nömöa kotalö nö, söpala ösö matakali tiki kule, ĩ tiki hösöka ha Teusö a na salo a säpalö noai ĩ a totoköpö tä thama sinomo wi, ĩ sa tiki talalöma. Ĩ tiki komo ha ai õsi sa töpö taa nainanöma. Ĩ töpönö Teusö a kai a wäsä mapo mi ipö ha, ai töpönö ĩ töpö säpalö noai, ĩ õsi sa töpö talalöma. ¹⁰Lope epii ĩ töpö hapalo nö, ĩ na töpö kuuma: ‑Teusö ai. Wa kaikana lotete hasu upö asai, ĩ wa. Wanisala wa tä thaa pasio mi ipö. Wa pitilimo opaö. Wa thapo mai, ĩ wa töpö peama haiatalo mi salo. Samakö säpalö noai, ĩ tä na samakö nö sua haiatala mi salo‑ ĩ na lope epii töpö kuuma.

¹¹Ĩ töpö kuu noai, ĩ töpö pewönö haloi ösö ausi ipii ösö täalalöma. Ĩ töpö na, ‑Pö silimo tihöö! Wanai pö kuikiö! Kamakönö Teusö ma thapo wi, Teusö a na ĩ makö kalipalo kua sinomo wi na, ai töpönö Teusö a thapo naio wi, ĩ na Teusö a na ĩ töpö kalipalo kua sinomo naioö. Makö säa thapalö noai na, ĩ na ĩ töpö säa thaa nömöpali kitä. Ĩ töpö säa hötötöa paio mai ha, pö silimo paio tihöö! Kamisanö makö pewö nö sua soatali kitäö!‑ ĩ na Teusö a kuuma.

¹²Ĩ na tä kua tä, sa mamo tetela tä, oweha anö 5 sõtikipö tökö hoköa waikitalö noai ha, ai tä hoköa nömöa kotalöma. Ai tä hoköa nömöa kotali ha, pe epii tä uli pata lakö lakömoma. Tä uli pata lakö lakömonasoma, watata ösö usi kui na, ĩ na pili motokö pata kupasoö, pilipoma pata hai, iä iä tä kui na ĩ na pilipoma pata kupasoö, ĩ na tökö pata kupasoma. ¹³Ĩ na tökö pata kupo tä, ipoko ta patanö thomo thomo tate epii, thomo siko pata kea kulaso wi na, ĩ na masita tä uli hamö ĩ na sitikali kökö siko pata kea hö̃tösoma. ¹⁴Ĩ ha, waheta tä lapeo opama maaki, tä hãsoko hãsokomo nö, tä mapo kua wi na, ĩ na hutu mosökö hãsoko hãsokomo kua nö, ĩ na hutu mosökö maa kua hö̃töpasoma. Ĩ na tä kua tä, maa makö pewö pata öpa pasököki, mötati tuu pata ha sanöta tökö kuo wi, ĩ tökö paa pasököa soataki, pata u ha ai sanöta tökö kuo wi, ĩ tökö paa pasököa naia soataki, ĩ na tä kuama. ¹⁵Ĩ na tä pewö kuaö ha, hi masita tä uli pewö hamö töpö pilipai, ĩ töpö pewö tokösolöma. Tä uli pe epii tä uli kule ha töpö kule, ĩ töpö na pata töpö kaikanamo pole ĩ töpö pata, ai tä uli wani ipii tä uli ha ai töpö pilile, ĩ töpö na ai töpö kaikanamo naioö, sotatu töpö na pata töpö kaikanamo wi ĩ töpö, wani tökö thapo opa wi ĩ töpö, töpö lotete epii ĩ töpö, ai tänö noa mi toti ipii töpö kalipalamati wi ĩ töpö pewö, ai tänö ai töpö kalipalama mataso noai ĩ töpö pewö, ĩ na töpö kui töpö tokölo nö, kama töpö sosa paimikö pia salo, maa maka ha ai töpo lukösolöö, maa makö sotehele ĩ makö komo ha ai töpö hiläläki, ĩ na töpö kuköma.

¹⁶Ĩ na töpö kuiki nö, maa makö na lope epii töpö lalupalo nö, ‑Kamisamakö na maa makö pata keloö! Kama hai ĩ lotami ti na kama kaikana tä pata lopoli, kamisamakö na ĩ a mamo pata tetea saileö! Önö kutenö, kamisamakö na maa makö pata läikiö! Oweha anö samakö hĩsu thaö öpöle, ĩ oweha a na samakö noamaö! ¹⁷Sanöma samakönö Teusö sama thapo mai, ĩ samakö na ĩ töpö hĩso opa salo, ĩ töpönö samakö pewö peama piale, huki ĩ tä wakala kuki keö! Samakö peama piale ĩ tä na kama samakö noao sapao kõo mai kitäö!‑ ĩ na maa makö na ĩ na töpö kuuma.

Isöhaeu töpö satehe epii, ĩ 144.000 töpö kui, ĩ töpö

¹Ĩ na töpö kuu waikio noai ha, 4 ãju töpö kui, hi masita tä uli pata hamö ĩ ãju töpö öpa hätähäa apölati, ĩ sa töpö talalöma. Hi masita tä uli pata, mötati tuu pata, hii tiki pewö pata, ĩ na tökö kui tökö pata kuo pa, tä ipokomo maapö, 4 ipoko tökö kui, ĩ ãju töpönö ĩ tökö ipoko pewö huöa lälöma. ²Ĩ sa töpö talalö nö, hena tä sai tä, ki hamö motokö huumö kua totio wi hamö ai ãju tä hösökapo nömönati, ĩ ãju sa tä taa nömönanöma. Teusö a temö öpii ĩ a hai ĩ sãökama tä pi säa patetea wi, ĩ ãju tänö ĩ tä pi humöpoma. Ĩ 4 ãju töpö öpa hätähäa apölati, ĩ töpö na ĩ ãju tä hapalo nö, ‑Masita tä uli, mötati tuu pata, ĩ na tökö pata kui tökö pata waniapamanöö!‑ ĩ na Teusö a kuu noai, ĩ ãju töpö na lope epii ĩ ai ãju tä komö nö, ³‑Kamakö hai ĩ Teusö anö töpö kalipalama sinomoti wi, ĩ töpö hũko na sãökama tä ma pi säa patetea paio mai ha, hi masita tä uli, mötati tuu pata, hii tiki pewö pata, ĩ na töpö pewö pata kui, tökö pewö pata wania paio tihöö!‑ ĩ na ĩ ãju tä kuuma.

⁴Ĩ na tä kua tä, ai tä aiki, ‑Pili töpö hũko na Teusö a hai ĩ sãökama tä pi säa patetea waikikö noai, ĩ na töpö kui töpö kua‑ ĩ na tä kuu noai, ĩ sa ta hininöma. Satehe epii, 144.000 töpö kuoma. Ĩ töpö lö kui, isöhaeu töpö ola soawö.

^5-8Isöhaeu a hai pelupö Jutá töpö ola hai, 12.000 töpö ola kuoma.

Isöhaeu a hai ĩ pelupö Hupẽi töpö ola hai, 12.000 töpö ola kuoma.

Isöhaeu a hai ĩ pelupö Kasi töpö ola hai, 12.000 töpö ola kuoma.

Isöhaeu a hai ĩ pelupö Asee töpö ola hai, 12.000 töpö ola kuoma.

Isöhaeu a hai ĩ pelupö Napötalii töpö ola hai, 12.000 töpö ola kuoma.

Isöhaeu a hai ĩ pelupö Manasésö töpö ola hai, 12.000 töpö ola kuoma.

Isöhaeu a hai ĩ pelupö Simeão töpö ola hai, 12.000 töpö ola kuoma.

Isöhaeu a hai ĩ pelupö Lepii töpö ola hai, 12.000 töpö ola kuoma.

Isöhaeu a hai ĩ pelupö Isakaa töpö ola hai, 12.000 töpö ola kuoma.

Isöhaeu a hai, ĩ pelupö Sepulõ töpö ola hai, 12.000 töpö ola kuoma.

Isöhaeu a hai ĩ pelupö José töpö ola hai, 12.000 töpö ola kuoma.

Isöhaeu a hai ĩ pelupö Pẽijamĩ töpö ola hai, 12.000 töpö ola kuoma.

⁹Ĩ na tä kua tä, töpö satehe epii sa töpö taa nömönanöma. Pata töpönö töpö kai kua hãkikia apöle ĩ töpö, ai töpö lölöhö, ai töpö usi, ai töpö ausi, ĩ na töpö kui töpö, ĩ tä uli pewö hamö töpö hapalo aipii töpö pewö pata kua hãkikia apöle ĩ töpö, hi masita tä uli pewö hamö töpö pata pilipai, ĩ töpö pewö pata, ĩ na töpö kui töpö kule, ĩ ai sa töpö satehe pata talalöma. Ĩ töpö satehe epö salo, ai tänö ĩ töpö wapa tai mio opama. ‑Ĩ na kilii töpö kua‑ ai tä kuu tai mioma. Haloi ösökö ausi ipii ösökönö ĩ töpö halohoiki nö, ösö hena ola huölö nö, kaikana tä hai lotami ti na Teusö a lole ĩ a pata, ĩ a kotö ha oweha a okalo hõtoa hö̃töa soatale ĩ a, ĩ na töpö kui töpö kuo pa ĩ töpö satehe epii töpö öpahatioma. ¹⁰Töpö öpahatiki nö,

‑Kaikana tä hai lotami ti na kamisakö hai ĩ Teusö a lole ĩ a pata, ĩ a kotö ha oweha a okalo hõtoa hö̃töa soatale ĩ a, ĩ na töpö kui töpönö samakö täapa kõo läo wi ĩ töpö‑

lope epii ĩ na töpö kuuma.

¹¹Ĩ na töpö kuu ha, kaikana tä hai lotami ti na Teusö a lole ĩ a, pata töpö, ĩ 4 temö temö töpö, ĩ na töpö kui töpö kule ha ãju töpö satehe epii töpö öpa ãsokole, kaikana hai ĩ lotami ti kotö ha masita tä na pili töpö moikömö poa mãi hö̃köiki nö, Teusö a na töpö pi tapomoa soatalo nö, ‑Teusö a totiatalo opa sai taköö!‑ ĩ na töpö kuuma.

¹²Ĩ na töpö kuu nö,

‑Awai. Ĩ naköö! “Ai taköö! Wa totiatalo opati asawöö” ĩ na kawa na töpö pewö kuupököö! Wa pi mosawia sinomo wi ĩ waö! Kawa na, “Samakö totiapala apati wi ĩ kawa” ĩ na töpö pewö kuu soatiopököö! Ai töpö na wa hasuho asa wi ĩ waö! Kawa hai, pata wa lotete sati ipii ĩ waö! Ĩ na wa kua wi na, ĩ na wa kua mapo mai kitäö! Ĩ na wa kua soatio kitäö! Ĩ naköö!‑

ĩ na ĩ ãju töpö kuuma.

¹³Ĩ na ãju töpö kuu ha, kamisa na ai pata tä aiki, ‑Toitai tä thaa totio salo, haloi ösö ausii ösö halopo polahai, ĩ witi pili töpö? Witi hamö ĩ töpö kuamö kua wi ĩ töpö?‑ ĩ na a kuu ha, ¹⁴‑Kui. Kawanö wa tä taö‑ sa kuu hö̃töoma.

Ĩ na sa kuu hö̃töoö ha, pata tä aiki, ‑Pi naka. Ai töpönö ĩ töpö peama apati noai ĩ töpö. Kama töpönö oweha a iä pönö kama töpö hai ĩ haloi ösökö salu saluma waikioma kutenö, kama töpö hai ĩ haloi ösökö ausia waikia kule. ¹⁵Önö kutenö, kaikana tä hai lotami ti na Teusö a lotile, ĩ ha ĩ töpö öpa tulekeiki nö, wakalai ha Teusömo wi a sai na ĩ töpö kalipaloö, mumai ha töpö kalipalo halutii, ĩ na ĩ töpö kuatii. Kama hai ĩ lotami ti na Teusö a lotile, töpö öpahale, ĩ töpö na ĩ Teusö a kua naia kutenö, ĩ töpö noama sinomotii. ¹⁶Ĩ töpö lö kui, töpö oi mi, töpö amisi pasio mi, töpö kua soatio kitä. Pili motokö siinö ĩ töpö hä mai kitä. Ai tä wãkenö ĩ töpö hä naio mai kitä. ¹⁷Kaikana tä hai ĩ lotami ti hõtole, ĩ ti mötali na oweha a kule, ĩ anö ĩ töpö thapo kuki kitä. Önö kutenö, maa tuu ola na tuu pokö pokömo wi ĩ tuu koalö nö, töpö õsi temöpo kõo wi, ĩ tuu kuo taso pamö ĩ töpö kai hulasolö kitä. Ĩ tä, Teusö anö ĩ töpö mamo puu pewö sanöa hãsitipamani kitä‑ ĩ na ĩ pata tä kuuma.

Ai sõtikipö tä hoköa kotalö noai ĩ ta

¹Ĩ na tä kua tä, oweha anö 6 sõtikipö tökö hoköa waikipalö noai ha, samii ai tä sõtikipö hoköa kotalöma, Teusö a kupoli, ĩ ha töpö hinio maa pi tetehea toitaso lasoma. ²Teusö a kotö ha 7 ãju töpö öpahale, ĩ sa töpö talalöma. Ĩ töpö na 7 hola wi tökö totoma hätäpoma.

³Ĩ tökö hola wi ĩ tökö totoa hätähäa waikitakö noai ha, pãhi pãhi tä wakö umömaköma, tä nisamö hälälä toita apii, ĩ tä titiköpö, ai ãju tänö oto tä mokota kai waloa nömököma. Söpala ösö tiki matakali kule, ĩ tiki hösöka ha Teusö a na tä totoköpö tä thama sinomo wi, ĩ tiki kotö ha ĩ ãju tä öpatioma. A öpatiki nö, pãhi pãhi tä kua apöle, ĩ tä pãhi täta tätama nö, mokota na tä pãhi titiki nö, Teusö a thapo wi, Teusö a na ĩ töpö hapalo wi, ĩ töpö kai uni tikiliki nö, oto tiki matakali kule, ĩ tä hösöka na ĩ tä pewö thama piama. ⁴Teusö a na töpö hapalo wi, pãhi pãhi tä na ĩ töpö kai uni tikilila tä, tä wakö umömaköma, ãju tä öpale, ĩ a amiki ha wãkisi tä kule, Teusö a loomö kuo pamö ĩ tä wãkisi pewö ösöamö kua soatasolöö. ⁵Ĩ tä wãkisi ösöamö kua soatasolö ha, mokota na ĩ pãhi pãhi tä pi täa soatalö nö, söpala ösö tiki matakali hösöka ha koa taka hili pole, ĩ mokota na ĩ koa taka titipaö ha, koa taka lahoa soataköma. Ĩ koa taka lahoa soataki ha, ĩ ãju tänö soatawö, masita tä uli na ĩ tä pi wakö säsäa soataköma. Ĩ koa taka pi säsätaköma, ĩ tökö soatawö, sanö ta pata, sami samimo opa wi ĩ tä pata, tä uli pata lakö lakömo opa wi ĩ tä pata, ĩ na tä pata kua soatasoma.

Hola wi ĩ tökö

⁶Ĩ na tä kua tä, ĩ 7 ãju töpönö 7 hola wi tökö hola piama.

⁷Ai ãju tänö ai ta hola somaö ha, maa tä komi amatosi pata pälä wi ĩ tä, iä iä tä tikilia, koa taka tikilia naia, ĩ na tä tikilia hãkikia kula tä, masita tä uli na ĩ tä pewö pi pata säsäa soaköma. Ĩ tä pewö pi pata säsäa soaköma, masita tä uli pata ĩsia sätäa pälasoma. Hii tiki, sĩsi tökö, ĩ na tökö kui tökö ĩsia naisoma. Ai sami tä uli ĩsiso, polakapi ai tökö uli ĩsi mi, ai sami hii ti ĩsiso, polakapi ai tiki ĩsi mi, ai sami sĩsi tä ĩsiso, polakapi ai sĩsi tökö ĩsi mi, ĩ na tökö uli pata ĩsia kulasoma.

⁸Ĩ na tä kua tä, ai ãju tänö ai hola wi ta hola nömöoma. Ta hola nömöoö ha, maa makö wakö pata hili kua wi na, ĩ na tä wakö pata hili kua wi, mötati tuu pata ha ĩ tä pata säsäköma. Tä pata säsäköma, ĩ ta patanö mötati tuu iä pata sätäa asawösököma. Ai sami mötati tuu asawösö pata iäpaso, polakapi ai mötati tuu pata iäpo mi, ĩ na mötati tuu pata iä kupasoma. ⁹Mötati tuu iä pata sätäa asawösöle, ĩ tänö mötati tuu õsimö pata hamö töpö hupalo wi, ĩ ai töpö satehe epii töpö noma hätähäolasoma. Mötati tuu õsimö pata hamö töpö hupalo wi, ai sami tä pata nomasoö, polakapi ai tä pata noma mi, ĩ na töpö noma kulasoma. Ĩ tökö nömöwö, kutiata kö pata wania hätähäo nömöo soatalasoma. Ai sami kutiata kökö pata waniapasoö, polakapi ai kutiata kökö pata waniapo mi, ĩ na kutiata kökö wania kupasoma.

^10-11Ĩ na tä kua tä, ai ãju tänö ai tä hola wi ĩ ta hola nömötama, asawa tä wakö hili kua wi na, ĩ na sitikali a wakö hili kua wi, ĩ a sitikali wakö hili pola tä, a kepasoma. Ai sami pata tuu pata na a kepasoö, polakapi ai pata tuu pata na a keo mi, ĩ na ĩ sitikali wakö hili kua wi, ĩ na ĩ a sitikali kea kupasoma. Wai tuu ola hamö tuu haapo haapomo sinomo wi ĩ tuu na a kea naipasoma. Ĩ na ĩ sitikali a kea kupasoö ha, pata tuu pata, wai tuu ola, ĩ na tuukö kui tuu koamia hätähäa apöpasoma. Önö kutenö, ĩ a sitikali hai, ĩ Koami a hilo. Ai sami tuukö koamipasoö, polakapi ai tuukö koamipo mi, ĩ na tuu koamia kupasoma. Sanöma töpönö ĩ koami tuu koalalöma, ĩ tuu koaminö töpö satehe epii töpö nomasoma.

¹²Ĩ na tä kua tä, ai ãju tänö ai tä hola wi ĩ ta hola nömöo soatama, pili motokö, pilipoma a, sitikali kökö, ĩ tökö kui, tökö kasö pata sälöma. Ai sami pili motokö kasö säö, polakapi ai pili motokö kasö sä mi, ai sami pilipoma a kasö säö, polakapi ai pilipoma kasö sä mi, ai sami sitikali kökö säö, polakapi ai sitikali kökö sä mi, ĩ na tökö kasö pata säa kuköma. Tökö säkö noai, ĩ tökö pata luta lutamo soata lasoma. Önö kutenö, wakala tä maaki, tä wakala lapeo totio maama. Motokö hẽtupo pia tä, tä pata mumasoö. Mumai ha pilipoma a, sitikali kökö, ĩ na tökö kui tökö sii wakala kuo lapa totio maama. Mötali tä mumi kupo pia tä, pilipoma a, sitikali kökö, ĩ na tökö kui tökö sii lupasoma.

¹³Ĩ na tä kuati noai, ĩ sa tä taa nö, ösö öpö hamö nonosi a katä polali, ĩ nonosi sa taa nömönanöma. Ĩ na tä kua soata tä, lope epii ĩ nonosi a hapalo nö, ‑3 ãju tökö kui tökönö ta hola piale, masita tä uli hamö sanöma töpö pilipai, ĩ töpö pewönö ĩ ta hininöma, ĩ töpö pea pasiki kitä. Wanisala tökö kilihi ipii tökö kuki kitä. Ĩ töpö na 3 wanisala tökö kui tökö kuki kitä‑ ĩ na ĩ nonosi a kuuma.

¹Ĩ na tä kua tä, ai ãju tänö ai tä hola wi ĩ ta hola nömöo soatama, sa mamo tetela tä, masita tä uli hamö sitikali a keloe, ĩ a sitikali na masa maka kai lale, ĩ tä hãkota wi, ĩ tä totoköma. ²Ĩ tä totoki ha, ĩ sitikali anö ĩ masa maka kai pata hãkoa läpalöma. Masa maka kai pata hãkoa läpali ha, ĩ masa maka kai pata ha koa taka wãkisi pata sononoa soatama. Hikali a wakö pata umömaköma, taka wãkisi pata kuta kutamo kua wi na, ĩ na tä wãkisi pata kuta kutamo soatama. Ĩ masa maka kai pata ha koa taka wãkisi pata sononoa pole, ĩ taka wãkisi patanö motokö sii lupamani ha, uli pewö pata muma tipöa soasoma. ³Ĩ tä wãkisi mötali pata ha kusuma pö aipö öpii pö kuo opama. Ĩ kusuma pö sutu sutumo seteko soata nö, masita tä uli na pö kepa soatama. Sui tä tisina nini kui na, ĩ na kusuma pö nini kua naipasoma. ⁴Ĩ kusuma pö na Teusö aiki, ‑Sĩsi tä, hii tiki, hikali a na nii tä kule ĩ tä, ĩ na tökö pewö kui tökö pewö wania tihöö! Sa thapo mai, ĩ töpö hũko na ipa sãökama tä pi säa patetea maa noai, ĩ töpö pewö haikia sisalalöö!‑ ĩ na Teusö a kuu nö, ⁵‑Ĩ töpö säpa totio tihöö! 5 kökö pilipoma kui kökö pilipoma na soatiwö, ĩ sanöma töpö peama soatio pätiopököö!‑ ĩ na Teusö anö ĩ kusuma pö noa thama. Ĩ na Teusö anö ĩ kusuma pö noa thaö ha, kusuma pönö ĩ ta hininö nö, ĩ töpö haikia hö̃tölalöma. Ĩ töpö haikilalöma, sui tä nini kui na, ĩ na ĩ kusuma pö nini kuo hö̃töoma. ⁶Ĩ kusuma pönö töpö haikilalöma, ‑Sa nomato soa päoö‑ ĩ na töpö pi kuu kule maaki, töpö nomato päha mi.

⁷Kapalu kökö wasu kai huu piale, ĩ kökö mömomö kui na, ĩ na ĩ kusuma pö mömomö kuo hö̃töoma. Oto hesowa kökö kui na, ĩ na hesowa pö kui, kusuma pö he na ĩ hesowa pö sohoma. Sanöma töpö moikömö kui na, ĩ na ĩ kusuma pö moikömö kuoma. ⁸Sanöma töpö suö hunuku kui na, ĩ na pili pö kõi kuoma. Öla pö nakökö kui na, ĩ na pili pö nakökö kuoma. ⁹Sanöma töpönö pili töpö kotopö ha söpala ösö amatosii ösö sätämanö nö, töpö noamo kua wi na, ĩ na ĩ kusuma pö noamamopö, pili töpö kotopö ha söpala ösö amatosi sutitimapomae. Kapalu kökönö ösökö läkäapala wi, ĩ ösökö na sotatu töpö titiki nö, töpö wasu kai huu tä, pe epii ĩ ösökö ami lalupalo kua wi na, ĩ na ĩ kusuma pö maisökö lalupalo kua apa hö̃töoma. ¹⁰Sui tä tisina namo kui na, ĩ na ĩ kusuma pö tisina namo kumoma. ‑5 pilipoma kökö kui kökö pilipoma na soatiwö, ĩ pö tisinanö sanöma töpö haikipatipöö!‑ ĩ na Teusö anö ĩ pö noa thama. ¹¹Ĩ kusuma pö na ai tä kaikanamo wi a kuoma. Masa maka pata na töpö kule, ãju tänö ĩ töpö pewö huöpo sinomo wi, kusuma pö na ĩ a kaikanamoma. Ĩ a na, ‑Apatõ‑ ĩ na epöteu töpö kuu. Köteeku töpö aiki, ‑Apolião‑ töpö kuu. ‑Ai töpö säpa sinomo wi ĩ a‑ ta kuu totia alu kule.

¹²Wanisala tä kilihi ipii, ĩ tä kuo soma noai, ĩ tä hasua waikipaso ke. Wanisala tökö kilihi ipii, polakapii ĩ tökö kuo pia kule.

¹³Ĩ na tä kua tä, ãju töpönö 5 hola wi tökö hola waikio noai ha, ai ãju tänö ai tä hola wi ĩ ta hola nömöo soatama. Teusö a kule ha oto tiki matakali kule, ĩ tiki matakali kasö tilelea hätähäle ha, ĩ ha ta hapalo hätähäle, ĩ sa ta hinima. ¹⁴Ĩ ãju tänö hola wi tä po pole, ĩ a na, ‑Eupötaasisö u pata ha 4 ãju töpö kui töpö õkama kulati, ĩ töpö kusöa kopalötöö!‑ ĩ na ta kuuma.

¹⁵Ĩ na ta kuu ha, ĩ 4 ãju töpö kusöa kopalö tasoma. Ĩ ãju töpö aiki, ‑Pei. Ĩ nasimö tä inama na ĩ nasimö pilipoma kupo piale, ĩ a pilipoma na ĩ nasimö tä wakala kuiki nö, ki ha tä motokö wäto tä, sanöma töpö säa hãkikilalöö! Polakapi ma töpö säpa mai, sami ma säpali, ai polakapi ma töpö säpa mai, ai sami a säpali, ĩ na töpö pewö säa thaa hãkikia thalalöö!‑ ĩ na Teusö anö ĩ ãju töpö noa thaa noai, ĩ tä wakala na totiwö töpö kusöa kopalöma.

¹⁶Ĩ na tä kua tä, sotatu töpönö kapalu kökö kai wasu huu piale, ĩ töpö satehe epö. ‑Töpö satehe epii, 200.000.000 töpö kui töpönö kapalu kökö kai wasu huu pia kuleö!‑ tä kuu wi, ĩ sa ta hinima. ¹⁷Sotatu töpö, kama töpö hai ĩ kapalu kökö, ĩ na tökö kui sa töpö uni tapama. Ĩ sotatu töpö noamo sapao kõopö, ĩ töpö kotopö na söpala ösö amatosii ösö sätäa, kapalu kökö kotopö ha ĩ söpala ösö amatosii ösö sätäa naia, ĩ na tä thapo opamae. Koa taka pata hanaha kui na, ĩ na ĩ söpala ösökö hanaha kuö, maa ma ose noa apii, ĩ sapiita ma hilo wi, ĩ ma usi kui na, ĩ na ĩ ösökö usi kuö, hösösöpö taka wakö hane kui na, ĩ na ösökö hanö kuö naiwö, ĩ na ĩ söpala ösöpö kumoma. Kapalu kökö he hai, öla kökö he pata kui na, ĩ na kapalu kökö he kui kökö he tikäkämoma. Ĩ kapalu kökö kai na koa taka, koa taka wãkisi, hösösöpö taka wakö pata, ĩ na taka pata kui taka pata nia niamoma. ¹⁸Koa taka, koa taka wãkisi, hösösöpö taka wakö, ĩ na tökö wasu kui, kapalu kökö kai na ĩ tökö wasu nia niamo wi, ĩ tökö wasunö sanöma töpö säpalöma. Ĩ tä uli pewö hamö sanöma töpö pilipai, ĩ töpö säa hãkikilalöma. Ai polakapi töpö säpa mai, ai sami a säpali, ai polakapi töpö säpa mai, ai sami a säpali, ĩ na töpö pewö säa hãkikia thalalömae. ¹⁹Kapalu kökö kai, pili kökö sina, ĩ na tä kui tä wasu upö. Olö kökö kui na, ĩ na pili kökö sinakö kuoma. Olö kökö he kui na, ĩ na pili pö sina ola kumoma. Ĩ pili pö sinanö sanöma töpö ösö wäsätima.

²⁰Kapalu kökö wasunö sanöma töpö säpa pasio maa noai, ĩ sanöma töpönö wanisala tä thaa noai, ĩ tä hosa maama. ‑Sa wanisala sai taköö! Sai sa töpö thapo pole ĩ sa töpö hosalöpököö!‑ töpö pi kuu maama. ‑Ĩ ukutupönö sa pasilipopököö!‑ ĩ töpö pi kuu sinomo wi, ĩ ukutupö hai, oto ukutupö, pötaata ukutöpö, pötõosi ukutupö, maa ma ukutupö, hii ti ukutöpö, ĩ na töpö ukutupö kui, töpö ukutupö thapo pole, ĩ töpö ukutupönö tä tapa mi, ta hini mi, töpö huu mi, ĩ na ĩ töpö ukutupö kua wi töpö ukutupö kua kule maaki, ĩ töpö ukutupö hosa maama. ²¹Ĩ töpö aiki, ‑Sa töpö säpali, sa õkamoö, ai sa töpö po mai maaki, ĩ töpö na sa sapäko sinomo päoö, sa thomömoö, ĩ na sa kua pätiopöö! Ĩ na sa kua wi, ĩ sa tä hosa mai kitäö!‑ ĩ na töpö pi kuuma.

Ãju tänö waheta tä po pole ĩ ta

¹Ĩ na tä kua tä, ai ãju tä lotete epii a ithoolö tä, sa talalöma. Ilasi tä na ĩ ãju tä pukosöla tä, pili motokö sii kui na, ĩ na pili a moikimö kuö naiwö, pili he hẽtu ha olö kökö sii tokea naia, koa taka wakö lape kui na, ĩ na pili a kononakö lape kuö nai soatawö, ĩ na ãju tä kui, sa tä talalöma. ²Ĩ ãju tänö waheta tä hãsoko hãsokomo sinomo wi, ĩ tä waheta sãökama pi kusöpalö nö, tä sãökama pi wai poma. A ithopaiki nö, mötati tuu pata na kate a konona öpapaki, masita tä uli na pasiwö, hai a konona öpa pasipaki, ĩ na ĩ ãju tä öpa pakata kupakö kölöma. ³Ĩ na a kupaiki kölö nö, lope epii öla kökö pata komö lalupalo kui na, ĩ na ĩ ãju tä komö lalupalo kuoma. Lope epii a komö lalupalo opa noai ha, sanö ta pata satehe epii, ĩ 7 ta pata kui, ta pata klau klaumo pola nö, ta pata hapalo hö̃töoma. ⁴Ĩ ta pata hapalo pole, ĩ tökö soatawö ĩ sa tä moni sãökököma maaki, hi tä hẽtu ha Teusö a kulali, ĩ ha ai sa ta hinima. Sa ta hini noai, ĩ na ĩ ta kuuma: ‑Ĩ 7 sanö ta pata kuu noai, ai töpö na ĩ ta hasulupama hãto tihöö! Wanaikiö! Ĩ töpö kai a sãöka hãto tihöö!‑ ĩ na ta pata kuuma.

⁵Ĩ na tä kua tä, mötati tuu pata na ãju tä konona öpapaki, masita tä uli na pasiwö, ai a konona öpa naipaki, ĩ na ãju tä kupakö noai, ĩ sa talalö noai, hi tä hẽtu hamö ĩ ãju tä poko totokö nö, ⁶ĩ na a kuuma: ‑Teusö a noma mi ipii ĩ anö hutu mosökö pata, masita tä uli, mötati tuu pata, ĩ na tökö pata kui, ĩ tökö pewö thapalö noai, ĩ tökö na ĩ tä pewö kule, ĩ tä thaa naipalö noai, ĩ Teusö a patanö sa hini kutenö, sa kuu piale, ĩ ta pitili. Sa holisimo mi. Pi naka. Tä tetepo mai kitä. ⁷Ãju töpö satehei, ĩ 6 töpönö hola wi tökö hola waikio noai ha, ai ãju tänö ta hola tä, Teusö a kai wäsä sinomo noai, Teusö anö ĩ töpö kalipalama sinomo noai, ĩ töpö na Teusö aiki, “Sa tä thama piale, huki sanöma makönö ĩ ma tä tai mi ipii, waiha ĩ sa tä thama kitäö!” Teusö a kuu noai, waiha ĩ tä thama totio kitä. Ĩ ãju tänö ta hola tä, ĩ tökö soatawö, Teusö anö ĩ tä thama kitäö!‑ ĩ na mötati tuu pata na ãju kate a konona öpapaki, masita tä ha hai a konona öpapaki, ĩ na a öpa pakata kupakö kölö noai, ĩ na ĩ a kuuma.

⁸Hi tä hẽtu ha Teusö a kulali, ĩ ha ta hapalo noai, ĩ sa ta hini noai, kamisa na ĩ ta hapalo kõoma. Ta hapalo nö, ‑Mötati tuu pata na ai a konona öpaa, masita tä ha ai a konona öpaa, ĩ na ãju tä öpa pakata kulati, ĩ a na a hulolöö! Ĩ ãju tänö tä waheta sãökama kusösama pi wai po pole ĩ tä waheta tälötöö!‑ ĩ na sa noa thama.

⁹Ĩ na sa noa thaö ha, sa hulolö nö, ĩ ãju tä na, ‑Mi waheta tä sãökama pi wai totopa‑ sa kuu ha, ‑Ika. Tä tälöö! Hi wa tä waheta tätalö nö, tä waheta oa soatalöö! Wa tä waheta oalöma, pili wa niipö hamö tä koami ipö maaki, pili wa kai na puu misa keteti kui na, ĩ na tä waheta ketetia kua apöpaso kitäö!‑ a kuuma. ¹⁰A kuu ha, sa tä waheta täa soatalö nö, sa tä oalöma. Sa tä oa tä, pili sa kai na puu misa keteti kui na, ĩ na tä waheta ketetia kua apöpasoma maaki, sa tä sualöma, ĩ tökö soatawö sa niipö õsi koamia apöpasoma.

¹¹Ĩ na tä kua tä, ‑Teusö wa kai wäsä kõo wi, wa kua kopasopököö! Teusö wa kai wäsä kõo nö, pata töpönö töpö kai kua hãkikia apöle ĩ töpö, ai töpö lölöhö, ai töpö usi, ai töpö ausi, ĩ na töpö kui töpö, töpö hapalo aipö hãkikii ĩ töpö pewö pata, kaikana töpö, ĩ na töpö kui töpö pewö a katehaö!‑ ĩ na sa noa thama.

Polakapi töpönö ta wäsä wi ĩ töpö

¹Ĩ na tä kua tä, kamisa na wapa wi ti totopöma. Ti totopöma, ‑A hulolöö! Ĩ wapa wi ĩ tinö Teusömo wi ĩ wa tä uli wapa tasopököö! Ĩ hakö soatawö söpala ösö tiki matakali kule, ĩ tiki hösöka ha Teusö a na tä totoköpö tä thama sinomo wi, ĩ wa tiki wapa naia soatalöö! Ĩ a sai pata ha töpö Teusömo wi ĩ wa töpö wapa naio soataaö! ²Sika sika sai pata na tä wapa naio tihöö! Teusö a thapo pasia mane, ĩ töpö na ĩ sika sika tä totoa pasia waikikömaö! Teusömo wi ĩ a sai kotö pata ha ai kökö sai hö̃kököa apöle, ĩ hamö Teusö a thapo pasia mai, ĩ hamö ĩ töpö hulolö nö, ĩ tä uli hamö ĩ töpö hupalo hätäpo pasitio taso kitä. Ĩ hamö töpö hupalo soatia tasoa tä, ai pilipoma matasoö, 10 tökö mumi hasua kutasoö, polakapi tä mumi hasua kotasoö, ĩ na tä mumi hasua kutasoö. ³Sa kai wäsä sinomo wi, ĩ polakapi töpö mömomö pi wanitalopö, töpö haloi ösökö sĩti ipii ĩ ösökö na kama töpö halo kitä. Ĩ ösökö na töpö halole, ĩ sa töpö simöpali kitäö! Sa töpö simöpalöma, sa kai a wäsä soatia tä, 3 inama tökö, ai tä inama mötalipo kõa, ĩ na tökö inama kui tökö inama hasua kupaso kitä. Ĩ 1.260 tökö mumi kui tökö mumi hasua kupaso kitä‑ ĩ na kamisa na ĩ na tä kuuma.

⁴Ĩ tä uli pewö hamö sanöma töpö pewö pilipai, ĩ töpö na Teusö a kaikanamo wi, ĩ a kotö pata ha polakapi olipa tiki öpale, Teusö a kai wäsä sinomo wi, ĩ töpö uni. Ĩ hamö polakapi koa taka sii pi hĩtale, Teusö a kai wäsä sinomo wi, ĩ töpö uni nai soatawö. ⁵Ai töpönö ĩ töpö peama pi topale, Teusö a kai wäsä wi, ĩ pili töpö kai na koa taka pata nia niamo nö, ai töpö ĩsia soatamani kitä. Awai. Ai töpönö ĩ polakapi töpö peama pi topa apa wi, ĩ töpö nomaso kitäö! ⁶Ĩ töpönö Teusö a kai a wäsä soatia tä, ĩ töpönö maa tä häläma maapö, ĩ töpönö hutu mosökö päka pata kasu taö öpa kule. Maa tuu pewö pata iäpama taö öpa naia kule. Masita tä uli hamö ĩ töpönö wasu wasu tä thapa pi topa tä, wasu wasu tä thapa taö öpa naia kule.

⁷Ĩ polakapi töpönö Teusö ta wäsä mataso noai ha, maa maka pata ha sai tä kuo noai, ĩ töpö na ĩ sai tä höla apa läo kitä. Ĩ a namo kea läiki nö, ĩ töpö peama totio nö, ĩ sai tänö ĩ töpö säa totipali kitä. ⁸Töpö säa totipalöma, hii ti pakalai ti ha kama töpö hai ĩ pata tä säpalö noai, ĩ tä uli mötali pata hamö piliso kua mötalilati, ĩ tiso hamö ĩ töpö nomawö paalati kitäö! Ĩ tä uli hamö töpö pililati, ĩ töpö wanisala apa kutenö, ĩ nomawö töpö patile, ĩ Sotoma tä uli hilo päoö. Ĩ Esitu tä uli hilo naio päoö. ⁹Hi tä uli pewö hamö töpö pilipai, ĩ töpö satehe epii töpönö ĩ töpö nomawö paale, ĩ töpö nomawö möti kitä. Pata töpönö töpö kai kua hãkikia apöle ĩ töpö, hi tä masita tä uli pewö hamö töpö pata pilipai, ĩ töpö pewö pata, töpö hapalo aipö hãkikii ĩ töpö pewö pata, ai töpö lölöhö, ai töpö usi, ai töpö ausi, ĩ na töpö kui töpö, ĩ na töpö kui, ĩ satehe epii töpönö ĩ töpö nomawö paale, ĩ töpö mötii. 3 tökö wakala kui tökö wakala na ĩ töpö nomawö möö soatioö. Ĩ töpö möö soatia tä, ai tä wakala na nömö kõwö tä motokö hẽtupasoö. Ĩ töpö nomawö möti pole, ĩ töpö aiki soatawö, ‑Ki töpö nomawö patilia tihöö!‑ ĩ na töpö kupaloö. ¹⁰Teusö a kai wäsä sinomoti wi, ĩ polakapi töpö sä nö topali ha, hi tä uli pewö hamö töpö pilipai, ĩ töpö pi mönahapalo opa kitä. Ĩ kama polakapi töpönö Teusö ta wäsä sinomoö ha, Teusö a thapo mai ĩ töpö pepalo opati noai, ĩ tä maa waikia nö topasoma kutenö, ĩ töpö pewö pi mönahapalo opa kitä. Töpö pi mönahapalo opa salo, noa mi wani töpö totoma hẽtupaso soa päatalo opa kitä. ¹¹Teusö a thapo mai ĩ töpönö ĩ polakapi töpö nomawö paale, ĩ töpö möta mötamati tä, 3 tökö mumi kui tökö mumi hasua kutalo nö, tä motokö hẽtupo kõa tä, töpö temöto kõo wi, Teusö anö ĩ tä hẽasi kemanö nö, ĩ töpö nomawö paale, ĩ töpö kai na temöto kõo wi ĩ tä hẽasi titiköma, töpö temöa kõo soatasoma. Teusö anö polakapii ĩ töpö hĩso uköa komanöma. Ĩ töpö hĩso uköa komani ha, töpö öpa kõo soatasoma. Töpö öpa kõo soatasoö ha, ai töpönö töpö möti noai, pe epii ĩ töpö pewö kilia apösoma.

¹²Ĩ na tä kua tä, ĩ polakapi töpönö Teusö a kai wäsä sinomo wi ĩ töpö öpa kõo soatalo nö, hi tä hẽtu hamö ta pata komöpolali, ĩ ta pata hinia kõo soatalömae. Ĩ na ĩ ta pata kuu lasoma. ‑Hapo. Pö huo kõki solöö!‑ ĩ na ta pata kuu lasoma. Ĩ na ta pata kuu lasoö ha, ilasi tä pata hamö töpö tikilia kõa soapölöma. Ai töpönö ĩ töpö wanipo sinomoti noai, ĩ töpö mamo tetela tä, ilasi tä na ĩ töpö tikiliki nö, hi tä hẽtu hamö töpö kõa soasolöma. ¹³Ĩ tökö nömö soatawö, pe epii masita tä uli pata lakö lakömo nömöo soatama. Tä uli pata lakö lakömo opaö ha, ĩ tä uli kulati, ĩ a sai pewö pata wania hãkikia totipasoma. 10 sai pö kulati, ĩ ai a sai wania pasoö, ĩ sai pö kotö na ai 10 sai pö kulati, ĩ ai a sai wania kõo naia soapasoö, ĩ na töpö sai pö wania hãkikia kulasoma. Tä uli pata lakö lakömoa apöso noai, ĩ tänö ai töpö satehe epii, 7.000 töpö kui töpö säpasoma. Töpö nomapo naio soata mai, ĩ töpö kilia apölo nö, hi tä hẽtu hamö Teusö a kupoli, ĩ a na ĩ töpö aiki, ‑Wa kilihia apa nö kiliawöö! Kawa hai, ĩ pata wa waikiwöö!‑ ĩ na ĩ töpönö Teusö a noa thama.

¹⁴Polakapii Teusö anö sanöma töpö peama pi kua waikipasoma. Ĩ töpö peama nömöo piale, ĩ ma tä taa nökö.

¹⁵Ĩ na tä kua tä, ãju töpönö 6 hola wi tökö hola waikio noai ha, ai ãju tänö ai tä hola wi ĩ ta hola nömöo soatama. Ĩ ta hola tä, hi tä hẽtu ha Teusö a kulali, ĩ ha lope epii ai töpö hapalo lasoma. Töpö hapalolö nö,

‑Masita tä uli pewö hamö töpö pilipai, ĩ töpö sanöma na kaikana töpö kaikanamo noai, huki kamakö hai ĩ Teusö Kaikana tä, Teusö anö a saia asapalö noai ĩ Cristo a, ĩ na töpö kui, ĩ töpö sanöma na ĩ töpö kaikanamo nömöo totio wi, ĩ tä kupaso keheö! Teusö a kaikanamo mapo mai kitäö!‑

ĩ na töpö kuuma.

¹⁶Ĩ na tä kua tä, Teusö a kotö na kaikana töpö lota wi, ĩ tiki na satehe epii, ĩ 24 pata töpö lole, ĩ pili töpö maekonö ĩ töpö hĩta thaa soataiki nö, masita tä na töpö moikömö hö̃köa soataiki nö, Teusö a na töpö pi tapoa soataiki nö,

¹⁷‑Teusö ai. Aitaköö! Kawa hai, pata waö! Kawa lotete sati ipö. Sutu ha wa kuoma maaki, huki wa kua soa kule. Wa lotete epö salo, huki kawanö ai wa töpö simöa kolo kua kuköma.

¹⁸Masita tä uli pewö hamö töpö pilipai, ĩ töpönö wa thapo mai, ĩ töpö na wa hĩso nö, ĩ wa töpö peama pia wi, ĩ tä kupaso ke. Õsi töpö na, “Makö temö tä, wanisala ma tä tha apati noai, ĩ tä na sa kateha pia kuleö!” wa kuu pia wi, ĩ tä kua naipaso ke. Önö kutenö, wa thapo mai ĩ töpö hĩso opaö. Ĩ na tä kua tä, wa thapo asa noai, ĩ töpö na noa wa tä totoa piale, ĩ tä kua naipaso ke. Wa kai wäsä sinomo noai, kawa na ĩ töpö kalipalo sinomo noai ĩ töpö, au ai töpö pewö, pata töpö, töpö patamo pasio mai ĩ töpö, ĩ na töpö kui töpö pewönö wa kai a hini totiatalo opa noai ĩ töpö, ĩ na töpö kui töpö pewö na noa wa tä totoaki kitä. Ĩ na tä kua tä, masita tä uli pewö hamö töpö kule, ai töpönö ĩ töpö peama noai, huki kawanö ĩ töpö peama hö̃töa pia kuleö!‑

töpö mãi pole, ĩ pata töpö kuuma.

¹⁹Ĩ na tä kua tä, hi tä hẽtu hamö Teusömo wi ĩ a sai kupoli, ĩ a sai hãkopasoma. Ĩ a sai hãkopasoö ha, Teusö anö töpö noa thaa noai, maa makö patete ha ĩ tä sãöka noai, tiki holotoi tiki õsimö ha ĩ makö sãökama titile, ĩ sa tiki talalöma. Ĩ tökö soatawö, tä pata sami samimo opaö, ta pata lalupalo opaö, sanö ta pata klau klaumo opaö, tä uli pata lakö lakömopalo opaö, pe epii maa tä komi amatosi pata päläpalo opaö, ĩ na tä kuama.

Suö tä, olö kökö, ĩ na töpö kui töpö

¹Ĩ na tä kua tä, hi tä hẽtu hamö uni tä aipö öpii tä tapamo kuköma. Ĩ uni tä lö kui, ĩ suö tä. Kama hai ĩ haloi ösö hai, ĩ pili motokö sii. A ami öpahale, ĩ tä komo ha pilipoma a kuoma. Ĩ suö tä he na kaikana tä hai ĩ hesowa a sohopo kule. Ĩ a hesowa sohopo pole, ĩ hesowa na 12 sitikali kökö kui kökö sitikali tikäkämoma. ²Kama hai ĩ ulu a wasu kua kutenö, pe epii a ninio opa nö, a lalupalo opa kule.

³Ĩ na tä kua tä, hi tä hẽtu hamö ai uni tä aipö öpii tä tapamoa konasoma. Ĩ tä uni hai, ĩ olö kökö pata kui na ĩ na tä kuoma. Ĩ olö kökö hanahai ĩ kökö pata. 7 kökö he pata kui kökö he pata kuoma. Pili kökö he pata na 10 pili kökö sonaköpö pata kui tä pata tikäkämo opama. Ĩ pili kökö he pewö pata hamö kaikana tä hai ĩ hesowa a kui na ĩ na hesowa pö kui pö hesowa sohopo opama. ⁴Pili kökö sina patanö, hutu mosökö kasö pata hamö sitikali kökö pata hõtetea hãkikipalölöma. Ai polakapi kökö hõtetepa mai, ai sami a hõtetepali, ai polakapi kökö hõtetepa mai, ai sami a hõtetepali, ĩ na sitikali kökö pewö hõtetea thapalöma. Ĩ na kökö pewö hõtetea hãkikipalölö nö, masita tä uli na soatawö ĩ kökö sitikali pewö pata säsäa soaköma. Ĩ kökö sitikali pewö pata säsäa soakö nö, suö tä sipinapi kotö na ĩ kökö olö pata opia soataköma. Ulu tä thatali ha ĩ kökö patanö ulu tä ositi oa läa soatali pia salo, suö tä kotö na kökö pata opia soatakö solöma. ⁵Ĩ na tä kua tä, hi masita tä uli hamö sanöma töpö pilipai, ĩ töpö pewö na a kaikanamo lotetepo opa piale, pöpönö anö ĩ wano ose wai thapali, ĩ tökö soatawö, pöpönö a kua pasia haia päla tä maaki, ai tänö kama hai ĩ ulu a ositi wai sua pasia soatalö nö, kama hai ĩ lotomi ti na Teusö Kaikana tä lopoli, ĩ hamö ulu a ositi kai wai waloa soatakö lasoma. ⁶Pöpönö a lö kui, olö kökö pata na a kili salo, poke tä uli hamö pöpönö a hua hö̃töa soasolöma. 3 inama tökö, ai tä inama mötalipo kõa, ĩ na inama tökö kui tökö inama matalo nö, Teusö anö ĩ suö tä noama soatio pia salo, poke tä uli ha ai tä uli titia õsimöne, ĩ tä uli na suö tä noamapö, Teusö anö ĩ tä uli thakö noai, ĩ tä uli hamö ĩ suö tä simöa pasilöma. Ĩ tä uli hamö Teusö anö ĩ suö tä noama soatia tä, satehe epii, 1.260 tökö mumi kui tökö mumi hasuki pia salo.

⁷Ĩ na tä kua tä, hi tä hẽtu hamö töpö opaso lasoma. Ãju tä Mikeu a, kama hai ĩ töpö simöta sinomo wi ĩ töpö pewö hö̃töwö, ĩ na tä kua tökö hö̃töwö, olö kökö pata, kama hai ĩ töpö simöta sinomo wi ĩ töpö hö̃töwö, ĩ na töpö kui töpö opaso lasoö. ⁸Ĩ töpö opasolö nö, ĩ olö kökö patanö ĩ töpö peama maama. Ĩ olö kökö patanö ĩ töpö peama mi ha, hi tä hẽtu hamö tä uli kupoli, ĩ olö kökö pata, ĩ olö kökö patanö kama hai ĩ töpö simöta sinomo wi ĩ töpö, ĩ na töpö kui, ĩ tä uli hamö ĩ töpö kupalo totio kotio laso maama. ⁹Ĩ olö kökö pata pe epii ĩ olö kökö pata hosa soalöma. Ĩ olö kökö pata hai, sutu ha ĩ olö kökö õsi ha Sai tä sai pata kukö noai, ĩ olö kökö pata. Ĩ Sai tä sai pata hai, Diabo, Satanasö, ĩ na ĩ a pata hilo kua kua. Ĩ a patanö sanöma töpö pewö mönama sinomo wi, ĩ a. Ĩ a pata, kama hai ĩ töpö simöta wi ĩ töpö, ĩ na töpö kui, masita tä uli hamö ĩ töpö pewö säsähäa soataköma.

¹⁰Ĩ na tä kua tä, hi tä hẽtu hamö ta hapalo polahali, ĩ sa ta hinia soatalöma. Ĩ ta hapalo nö,

‑Teusö anö sanöma töpö täapa kõo läo wi, huki ĩ tä wakala kupaso keö! Teusö anö Sai tä sai pata hosalöma kutenö, “Teusö a Kaikana apö kutenö, a lotete epö” ĩ na samakö pi thama ke. “Teusö anö Cristo a saipalö noai, ĩ anö ai töpö pewö simöa taö öpaö” ĩ na Cristo anö samakö pi thama ke. Teusö a kupoli hamö, Jesus a thapo naio wi, ĩ hamö Sai tä sai patanö ĩ töpö namo simöa sinomoti laso wi, ĩ hamö ĩ a walo walomo sinomotiilö nö, “Ĩ töpönö wanisala tä thaa pasitio thaliö!” ĩ na Teusö a na wakalai ha a kuu, mumai ha a kuu, ĩ na Teusö a na a kuta kutamo sinomo noai, huki ĩ a hosali keö!‑ ĩ na ta pata kuuma.

¹¹Ĩ na ta pata kuu nö, ‑Jesus a hai, ĩ oweha a okalo a hilo wi, ĩ a nomasoma kutenö, Jesus a thapo naio wi, ĩ töpönö oweha a okalo iä pönö Sai tä sai pata peama totio opamaö! Ĩ töpönökö nai soatawö Cristo ta pitili ipii ĩ ta wäsä naio soatio wi, ĩ tänö a peama totio opamaö! “Cristo sa thapo asaö ha, ai töpönö sa säpali kitä maaki, Cristo sa hosa mai kitäö!” ĩ na ĩ töpö kuumaö!

¹²Önö kutenö, hutu mosökö pata! A pi mönahaikiö! Hi tä hẽtu hamö makö pilia pasile, ĩ pö pi mönaha naikiö! Masita tä uli pata! Mötati tuu pata! Makö pi mönapo pasio mai kitä. Kamakö na Sai tä sai pata walokö solöma. Wanisala tä thaa wi ĩ tä mapamanöpö tä wakala atepa apa waikia wi, Sai tä sai patanö ĩ tä taö öpa hö̃töa waikia kutenö, a hĩso opa kuleö!‑

ĩ na ta pata kuuma.

¹³Ĩ na tä kua tä, olö kökö pata aiki, ‑Teusö anö hi masita tä uli na sa säsäa pikikö noa‑ ĩ na a pi kuu salo, wano ose wai thapalö noai, ĩ suö tä nasö täa soalölöma. ¹⁴Ĩ suö tä na ĩ a hua haia soasolöma maaki, poke tä uli na Teusö anö ĩ suö tä hai ĩ tä uli thakö noai, ĩ tä uli kuomö kuo taso pamö ĩ suö tä katäamö kulasolöpö, nonosi a pe epii a maiki pata polakaa, ĩ na nonosi a maiki pata kui, ĩ suö tä na Teusö anö ĩ a maiki pata totoa haikö tasoma. Ĩ poke tä uli hamö ĩ suö tä hai ĩ tä uli thaa naiki taso noai, ĩ tä uli hamö ĩ suö tä walokö tasoma, Teusö anö nii tä na ĩ suö tä pasilipo kitä. Teusö anö ĩ suö tä pasilipo soa tä, 3 inama tökö, ai tä inama mötalipo kõa, ĩ na tökö inama kui tökö inama hasupaso kitä. Ĩ tä uli hamö olö kökö pata walo haio taso mai kitä. ¹⁵Ĩ na tä kua tä, suö tä noa hamö ĩ olö kökö pata huu haioolö nö, ĩ olö kökö kaiki pata na soatawö pata u kui na ĩ na maa tuu kui tuu pata holelea soatama. ‑Ĩ tuu õki pata hamö ĩ suö tä kaläsolöpököö!‑ ĩ na ĩ olö kökö pi pata kuu nö, ĩ suö tä noa hamö soatawö ĩ tuu pata holelea soatalöma. ¹⁶Ĩ tuu holelea soatalöma maaki, masita tä uli patanö ĩ suö tä pasilipo läoma. Ĩ masita tä uli kai pata kaka läpalo nö, olö kökö patanö maa tuu holelepali wi, ĩ tuu pewö pata suha läalöma. ¹⁷Ĩ tuu pewö pata suha läali ha, ĩ suö tä na olö kökö pata hĩsua apa soatalo nö, ĩ suö tä tolewö ulupö töpö na ĩ olö kökö wasu pata hua tolea soasolöma. Teusö anö sanöma makö noa thaa wi, suö tä tolewö ulupö töpö pewönö ĩ ta hini totio nö, Jesus anö ta wäsä noai, ĩ ta hini pitilia totio opa kutenö, ĩ töpö na olö kökö wasu pata hua tolea soasolöma. ¹⁸Kökö pata hua tolea soalolö nö, mötati tuu kasö pata hamö maka maka tä pata paa katölati, ĩ tä maka maka pata hamö ĩ olö kökö pata waloa soataikitö nö, ĩ hakö soatawö kökö pata öpa soatakö tasoma.

Polakapi sai töpö

¹Ĩ na tä kua tä, mötati tuu komo pata na sai tä kutioma, a helupo tä, sa talalöma. Ĩ sai tä na 10 a sonaköpö kuoma. 7 a he kuoma. Ai a sonaköpö na ai a hesowa, ai a sonaköpö na ai a hesowa, ai a sonaköpö na ai a hesowa, ĩ na kökö sonaköpö sohopo kuama. Ĩ a he pewö na Teusö a kateha wanisala wi ĩ tä sãökama sälähämoma. ²Sai sa tä tapa noai, öla tulu wi a pata kui na, ĩ na a kuoma. Ĩ sai pili tä ami lö kui, täpä a ami pata kui na, ĩ na usu a ami pata kui, ĩ a ami pata kui na, ĩ na ĩ sai tä ami kuoma. Öla kitanani a pata kui na ĩ na öla leão a pata kui, ĩ a kai pata kui na, ĩ na ĩ sai tä kai kuoma. Olö kökö patanö ĩ sai tä lotetepamanö nö, ‑Hi kaikana tä hai ĩ lotami ti na a loikiö! Wa loiki nö, ai töpö na a kaikanamo totioö!‑ ĩ na olö kökönö ĩ sai tä noa thama.

³Ĩ na tä kua tä, sami sa he pata möö nö, ‑Sami a he pata säa hãtopalöma‑ ĩ na sa pi kuuma maaki, ĩ uno uno tä pewö pata häa totia waikia koiki nö, a he temöa waikia konaso noai, ĩ sa he pata tapama. Hi masita tä uli pewö hamö töpö pilipai, ĩ töpönö ĩ sai tä talalö nö, ĩ sai tä na ĩ töpö pi lulua apöki nö, ĩ sai tä na ĩ töpö pewö nokapalo opama. ⁴Ĩ sai tä na olö kökö pata aiki, ‑Pata a kupaloö! Ai wa töpö simöa sinomopöö!‑ ĩ na a kuu ha, ĩ olö kökö pata na ĩ töpö pewö aiki, ‑Kawa hai, kamisamakö hai ĩ pata wa sai a hilo kuleö!‑ ĩ na töpö kutima. Sai tä na soatawö, ‑Kawa hai, kamisamakö hai ĩ pata wa sai‑ ĩ na töpö pewö kupalo naitioma. Ĩ na töpö kuu nö, ‑Hi sai tä lotete kui na, ĩ na ai tä lotete kui tä kule kitä ta o? Ĩ witi pili anö hi a pata säpö, ĩ witi pili a lotetei a kua? Ma. Ai tä kua mai kitä‑ ĩ na ĩ töpö pewö kupalotima.

⁵Ĩ na tä kua tä, ĩ sai tä aiki, ‑Pata sa sai‑ ĩ na a kuu nö, Teusö a kateha wanisala totio opatima. Ĩ na a hapalo wanisala apama maaki, ‑Ĩ na a hapalo kuu tihöö!‑ ĩ na Teusö a kuu maama. ‑3 inama tökö, ai inama mötalipo kõa, ĩ na tökö inama kui tökö inama ha a kaikanamo päopöö! 42 pilipoma kökö na a kaikanamo sisapököö!‑ ĩ na Teusö a pi kuuma. ⁶Ĩ sai tä patanö Teusö a, hi tä hẽtu hamö Teusö a kupoli ĩ tä uli, ĩ tä uli ha töpö kua kupoli ĩ töpö, ĩ na töpö kui, ĩ sai tä patanö ĩ töpö pewö a kateha hiopöa apama. ⁷Teusö a pata hai ĩ töpö na sai tä wasu kai pata ekuiki nö, töpö peama totiopö, olö kökö patanö sai tä pata simököma. Ĩ sai tä pata simökö nö, ‑Masita tä uli pewö hamö töpö pilipai ĩ töpö pata, pata töpönö töpö kai kua hãkikia apöle ĩ töpö, töpö hapalo aipö hãkikii ĩ töpö pewö pata, ai töpö lölöhö, ai töpö usi, ai töpö ausi, ĩ na töpö kui töpö, ĩ na töpö kui töpö pewö pata na a kaikanamoö!‑ ĩ na ĩ olö kökö patanö sai tä noa pata thama. ⁸Ĩ na sai tä noa pata thaö ha, sai tä pata na ĩ töpö pewö pi tapoiki nö, ‑Wa totiatalo opa asatiowöö! Kawa hai, pata wa sai‑ ĩ na töpö kuu kitä. Teusö anö hi masita tä uli thaa paio mai ha, sanöma töpö õsi palimipo wi, ĩ töpö a hilo wi, ĩ tä sãöka waikikö noai, oweha a okalo säpalö noai, ĩ anö ĩ tä waheta sãökama thapo wi ĩ tä waheta na töpö a hilo wi, ĩ tä sãököa pasia mane, ĩ töpö aiki, ‑Ĩ sai tä pata totiatalo opa asatiowöö!‑ ĩ na ĩ töpö pewö kuu.

⁹Sa kai a hini pi topa salo, ma ta hininököö! ¹⁰‑Titita wi a sai ha wa titiki kitäö!‑ Teusö a pi kuu ha, wa titia totiki kitäö! Ĩ na tä kua tä, ‑Poo anö ai tänö wa säpali kitäö!‑ a pi kuu ha, poo anö wa säa totipali kitäö! Önö kutenö, Teusö ma thapo wi ĩ pö kasiapalo totioö! ‑Teusö ta pitili‑ ĩ na pö pi kuu totioö!

¹¹Ĩ na tä kua tä, masita tä uli na ai sai tä hösökapo tä, sa tä talalöma. Kahaneitu a sonaköpö kui na ĩ na polakapi sonaköpö kui, a sonaköpö kuoma. Ĩ na a sonaköpö kuoma maaki, olö kökö pata hapalo kui na, ĩ na a hapalo kuu totioma. ¹²Ai sai tä kuo soma noai, ĩ a pata loteteo opa kuo noai na, ĩ na hi a lotete kuö toti ipö nai soatawö. Ai sai tä mamo tetela tä, sai tä kua nömöne, ĩ anö ai töpö simöa toitioma. Ĩ anö sai tä kuo soma noai, ĩ a na sanöma töpö pewö pi tapomoma nö, ‑Ĩ sai tä nomaso noai, ĩ uno uno tä pewö pata häa totia waikia kõkö noai, ĩ a hai, ĩ pata tä sai‑ ĩ na sai tä kua nömöne, ĩ sai tänö töpö pi thamama. ¹³Sai tä kua nömöne, töpö kilima wi, ĩ anö ĩ tä aipö öpii tä thalö nö, ĩ anö töpö kilima sinomotima. Satehe epii ai töpö mamo tetela tä, hi tä hẽtu pata hamö koa taka pata hili pola tä, koa taka pata kemanö nasoma. ¹⁴Ĩ sai tä lotetepamanöma kutenö, sai tä kuo soma noai, ĩ a mamo tetela tä, sai tä kuo nömöne, ĩ anö sanöma töpö pewö mönamanöma. Masita tä uli pewö hamö töpö pilipai, ĩ töpö pewö mönamanöma. Ĩ töpö pewö na ĩ sai tä aiki, ‑Poo anö sai tä tusälöma maaki, a noma totio maa noai, ĩ a ukutupö thapalöö! “Ĩ sai tä hai ĩ pata tä sai” töpö pewö kuupö, a ukutupö thaköö!‑ ĩ na a kuuma. ¹⁵Ĩ na tä kua tä, ĩ töpönö ukutupö tä thakö noai ha, sai tä kuo nömöo noai, ĩ a lotetepamani ha, ĩ sai tänö sai tä kuo soma noai, ĩ a ukutupö hĩso uköa komanöma, ĩ a ukutupö hapalopö, a ukutupö temöa konasoma. Ĩ a ukutupö na ai töpö aiki, ‑Ĩ a ukutupö hai, pata tä sai‑ ĩ na ĩ ai töpö kuu pasio mai, ĩ töpö säpalöpö, a ukutupö temöa konasoma. ¹⁶Sanöma töpö pewö, pata töpö, ai töpö patamo mai ĩ töpö, wani tä thapo opa wi ĩ töpö, wani tä na töpö honimo wi ĩ töpö, noa mi töpö kalipalamati wi ĩ töpö, noa mai ai töpö kalipalama pasio mai ĩ töpö, ĩ na töpö kui töpö pewö na ĩ sai tä ukutupö aiki, ‑Ai tänö kate makö poko ami na tä sãökököpöö! Pili makö hũko na tä sãököa naiköpöö!‑ ĩ na töpö noa thama. ¹⁷Ĩ na töpö noa thaa noai, ĩ tä na, ‑Pälaö!‑ töpö kuu wi, ĩ töpö poko na sai tä hilo wi ĩ tä sãökama kua mi, pili töpö hũko na ai tä sãökama kua mi, ĩ na tä kua kutenö, nii tä sua mi, wani tä täa mi, noa tä na ai töpö na wani tä totoa mi, ĩ na tä kua kuki kitä. Tä sãököle, ĩ sai tä hilo wi ĩ tä sãököa kule. Sai tä hilo wi ĩ tä sãöka mi tä, sai tä numetu tä sãköa pasia kule.

¹⁸‑Wi na sai tä numetu sãökama kuö?‑ ĩ na wa pi kuu kule maaki, wa pi hatuku upö tä, wa pi tapoa totiki nö, wa tä taö öpa kitä. Sanöma tä numetu tä sãökama kule, ĩ sanöma tä numetu. Ĩ tä sãökama kule, ĩ 666 a hilo.

Teusö ama ta tutei ĩ ta

¹Ĩ na tä kua tä, Sião makö ha oweha a okalo hõtolati, ĩ sa taa nömönanöma. Ĩ a na satehe epii ĩ 144.000 töpö kui töpö öpaha naioma. Ĩ oweha a, kama hai ĩ pö̃ Teusö a, ĩ na tökö kui tökö a hilo wi, ĩ pili töpö hũko ha ĩ tökö sãökama sälähämoma. ²Ĩ sa tä taa nö, hi tä hẽtu hamö ta pata hapalo pole ĩ sa ta hinima. Ta hapalo pole, pola pö pata satehe epii pola pö a hinio kua wi na ĩ na ta hinio kuama. Sanö ta kuu wi na ĩ na a kuuma. Söpala ösö toto thata thatamaö ha ama ta thaa sinomo wi, ĩ ama ta kui na, ĩ na ta hapalo pole, ĩ na ĩ ta hapalo kuuma. ³Kaikana tä hai ĩ lotami ti na kaikana tä lole ĩ a, 4 temö temö töpö, 24 pata töpö, ĩ na töpö kui töpö kotö ha ĩ 144.000 töpö öpapalotima. Töpö öpapaloti tä, ama ta tutei ama ta thama. Masita tä uli ha ĩ 144.000 töpö kua tä, Teusö anö ĩ töpö nö läpo nö, töpö täa kõa läa asalö noai, ĩ töpönö ĩ ama ta hua totiatalo opa asama. ⁴Tiko töpö suö na ĩ töpö mamoatalo maama kutenö, ĩ töpö õsi ausio opa sinomotima. Oweha a okalo huatalo pamö ĩ töpö nokapalo sinomo wi, ĩ töpö. Sanöma töpö satehe epii maaki, Teusö anö ĩ töpö sokapalö nö, töpö täa kõa läa asalöma. Teusö a na salo kökö, nii tökö, ĩ na tökö kui tökö totoma soma kua noai na, ĩ na Teusö a, oweha a okalo, ĩ na töpö kui töpö na, ĩ na ĩ töpö totoma soma kua hö̃töoma. ⁵‑Ĩ töpö holisi‑ tä kuu wi ĩ tä kuo maama. Wanisala tä thaa mai, töpö totiatalo opa sinomotima.

Ãju töpönö ta wäsä noai ĩ ta

⁶Ĩ na tä kua tä, ösö hamö ai ãju tä katä polali, ĩ sa talalöma. Masita tä uli pewö hamö töpö pilipai ĩ töpö pata, ai töpö lölöhö, ai töpö usi, ai töpö ausi, ĩ na töpö kui töpö, töpö hapalo aipö hãkikii ĩ töpö pewö pata, pata töpönö töpö kai kua hãkikia apöle ĩ töpö, ĩ na töpö kui töpö pewö pata na ĩ ãju tä wäo pia kule. Ta topa apöle ĩ ta mapo mai, ĩ ta wäsä pia kule. ⁷Lope epii ta wäsä nö, ĩ na a kuuma: ‑Sanöma töpö pewö na Teusö anö tä makokama läapalo pia kuleö! Önö kutenö, Teusö a na pö pi kilihia totikiö! “Teusö a lotetea satia apawöö!” pö kuu! Hutu mosökö pata, masita tä uli, mötati tuu pata, wai tuu ola pewö, ĩ na tä kui, Teusö anö ĩ tä pewö thapalö noai, ĩ a na makö pi tapoa totiki nö, “Teusö a hai, pata tä sai” ĩ na pö pi kuu totihoö!‑ ĩ na ĩ ãju tä kuuma.

⁸Ĩ ãju tä kuu soma noai, ĩ tä noa ha ai ãju tä hapalo nömöoma. A hapalo nö, ‑Papilônia tä uli wania totia waikipaso keö! Papilônia tili töpönö ai sanöma töpö pewö na kama töpö hai ĩ wasu wasu tuu koamananömaö! Ĩ wasu wasu tuu hai, sami sami tä tha apa wi, ĩ tä uni‑ ĩ na ãju tä hapalo nömöo noai, ĩ na ĩ a kuuma.

⁹Polakapi ãju töpö hapalo waikio noai ha, ai ãju tä nömöwö, ‑Sai tä, sai tä ukutupö, ĩ na tökö kui tökö na ai tä aiki, “Aitaköö! Kawa hai, ipa pata wa sai” ĩ na ai tä kuu nö, “Pili sa hũko ha sai tä hilo wi tä sãökama sutimaköö! Pili sa hũko ha tä sãökama sutima mi tä, pili sa ami na tä sutia pasimaköö!” ĩ na ai tä na ĩ na a kuu naio wi, ¹⁰Teusö anö ĩ a peama naio soata kitäö! Sai tä na, “Kawa hai, ipa pata wa sai” a kuu noai, ĩ anö Teusö a hai ĩ wasu wasu tuu koali kitä. Mokota a na Teusö anö wasu wasu tuu sino sai pata lökö noai, ĩ tuu koali kitä. Wasu wasu tuu hai, Teusö a hĩso opa wi ĩ tä uni. Teusö a hai ĩ ãju töpö, oweha a okalo, ĩ na töpö kui töpö mamo tetela tä, wasu wasu tuu koalö noai, koa taka, hösösöpö taka wakö, ĩ taka kui takanö pe epii ĩ töpö husi pepalo opa kuki kitä. ¹¹Ĩ takanö ĩ töpö husi pepalo opati wi, ĩ taka wãkisi mapo mai ha, ĩ taka wãkisi sonoka soatioö. Sai tä, sai tä ukutupö, ĩ na tökö kui tökö na, “Kawa hai, ipa pata wa sai” ĩ na ai töpö kuu wi ĩ töpö, “Sai tä hilo wi, kamisa na ĩ tä sãökama sutimaköö!” ĩ na ai töpö kuu naio wi ĩ töpö, ĩ na töpö kui, wakalai ha töpö pepalotii, mumai ha töpö pepalotii, ĩ na ĩ töpö kua sinomotii‑ ĩ na lope epii ĩ na ĩ ãju tä kuuma.

¹²Ĩ na töpö kua kutenö, Teusö ma thapo wi ĩ makö kasiapalo totio asapököö! Teusö anö makö noa thaa wi ĩ ma ta hini totioö, Jesus ma hosa mai, ĩ na makö kua wi makö kasiapalo totiopököö!

¹³Ĩ na tä kua tä, hi tä hẽtu hamö ai ta hapalo nömöne, ĩ sa ta hinima. Ĩ na ta kuuma: ‑Sa kuu piale, ĩ tä sãökököö! Jesus pata tä thapo wi ĩ töpö nomasoma, ĩ töpö pi mönaha apa kitä. Teusö a õsi kua tolele, ĩ aiki naiwö, “Awai. Ĩ pitili ta” ĩ na a kuu nö, “Masita tä uli ha ĩ töpö kalipalo nö, töpö pepalo opati noai, ĩ tä matasoma kutenö, ĩ töpö pi mönaha apa kitä. Teusö a na ĩ töpö kalipalo noai, ĩ töpö na Teusö anö noa tä totoki kitäö!” ĩ na Teusö a õsi kua tolele, ĩ na ĩ a kuuma‑ ĩ na ĩ ta kuuma.

Upa mo kopekeama wi ĩ tä hai, sanöma töpö säpali wi, ĩ tä uni

¹⁴Ĩ na tä kua tä, sa tä möö nö, ilasi tä ausii ipii sa tä talalöma. Ĩ ilasi tä hösöka na sanöma tä kui na, ĩ na tä kui tä looma. Kaikana tä hai ĩ oto hesowa a kui na, ĩ na hesowa a kui a hesowa sohopoma. Ĩ na tä kua tä, poo a toloko namo opii a poo poma.

¹⁵Ĩ na tä kua tä, Teusömo wi a sai na ai ãju tä looma, a atutasoma, ilasi tä hösöka na sanöma tä kui tä lopoli, ĩ tä na lope epii ãju tä komöma. A komö nö, ‑Huki masita tä uli pewö hamö tökö kupai, ĩ tökö sua hätäpo kõpö, huki ĩ tä wakalaö! Ĩ tä wakala kutenö, mi poo a toloko kai hulolö nö, tökö päsä nö, tökö sua hätäpoö!‑ ĩ na ĩ ãju tä komö kuuma.

¹⁶Ĩ na a kuu ha, ilasi tä hösöka na sanöma tä kui tä lopoli, ĩ anö poo a toloko kai hulolö nö, masita tä uli pewö hamö tökö kupai, ĩ tökö päsä nö, ĩ tökö sua hätäpoma.

¹⁷Ĩ na tä kua tä, hi tä hẽtu hamö Teusömo wi a sai kupoli, ĩ a sai na ai ãju tä kuoma, a atua nömöpaso laso noai, ĩ sa taa nömönanöma. Ĩ anö ai poo a toloko namo opii, a poo po naioma.

¹⁸Ĩ na tä kua tä, söpala ösö matakali hösöka ha Teusö a na tä totoköpö tä thama sinomo wi, ĩ ösökö matakali hĩta thale ha ai ãju tänö koa taka thapo asa wi, ĩ ha a kule, ĩ a hulasolöma. A hulolö nö, ãju tänö poo a toloko namo opii a poo po pole, ĩ a na lope epii a komö nö, ‑Upa mopö tatea apa waikia kuleö! Au poo a toloko namo opii, ĩ wa poo tälö nö, hi masita tä pewö hamö upa mopö kule, ĩ wa mopö pito pälalö nö, mopö pewö sototolalöö!‑ ĩ na a komö kuuma.

¹⁹Ĩ na a kuu ha, ĩ ãju tänö poo a kai huu nö, mopö pito paotilalö nö, mopö kopeketa wi, ĩ a hapoka kai pata na mokö pewö pata titiköma. Upa mo kopekeama wi ĩ tä hai, Teusö a hĩso opa wi, ĩ tä uni. ²⁰Sai pö sika hamö ĩ hapoka a pata kuoma. Ĩ hapoka a na ãju tänö upa mokö pewö pata titiköma, ĩ upa mopö pewö pata kopekea totikö noai ĩ tä iä pata lösa nö, kapalu a hõtoa tä, kapalu a olai pata wäle ha, ĩ ha tuu õki iä pata wäoma. Pai pamö tuu õki pata kaläsolöma. Pai pamö, 300 kilômetötu tä kuo taso pamö tuu õki pata wäkö tasoma.

Teusö a hĩso opa wi ĩ tuu pi totoakö noai ĩ ta

¹Ĩ na tä kua tä, hi tä hẽtu hamö uni tä pata aipö öpii, sa tä uni pata talalöma. Ĩ tä patanö sa pi wi na takömoa totia apömanöma. 7 sanöma töpö peama pi kupaso pia salo, ãju töpö huma. Ãju töpö satehei, 7 töpö kui töpö huma. Sanöma töpö na Teusö a hĩso salo, ĩ töpö peama pole, ĩ tä mapo pia manu kule, ĩ ãju töpönö sanöma töpö peama mapo pia kule.

²Ĩ na tä kua tä, walala patete pata kui na ĩ na mötati tuu pata kui, ĩ mötati tuu pata na koa takapö hilipalo hãkikio opöle, ĩ sa tä talalöma. Ai sai tä, ai sai tä ukutupö, ai sai tä na 666 tä sãökama sätäle, ĩ na töpö kui, sanöma töpönö ĩ töpö peama noai, ĩ sanöma sa töpö taa nömönanöma. Mötati tuu pata kui na, ĩ na walala patete pata kui, ĩ a walala kotö pata na ĩ töpö öpaiki nö, söpala ösö toto höpö höpöma nö, ama ta thaa wi, Teusö anö ĩ töpö na ĩ nasimö toto totokö noai, ĩ toto thama kai öpatiomae. ³Ĩ toto thama kai öpatikehe nö, Teusö anö Moisés a kalipalama sinomo noai, ĩ Moisés a hai ĩ ama ta thamae. Oweha a okalo hai ĩ ama ta thaa naio soatama. Ĩ na ĩ ama ta kuoma:

‑Teusö pata tä! Wa lotetea satia apa wi, ĩ wa. Ĩ wa tä pewö thaa taö öpawö. Wa pi mosawi ipii ĩ wanö wa tä thaa wi, ĩ tä na, “Kilatiha!” ĩ na samakö pi kuu. Kaikana töpö pewö na kama wa kaikanamo satia apaö. Wa pi kuu wi ĩ tä makoka apaö. Ĩ ta pitili ipö.

⁴Toita toti ipii, ĩ kawa sisawö. Teusö a pata! Kawa na samakö pewö kili ipa kitä. “Teusö a hai, pata tä sai. A pata totiatalo opawö” ĩ na samakö pewö kuu kitä. Kawanö toitai wa tä thaa makoka apa sinomo opa wi, ĩ tä tapamo kutenö, kawa na kaikana töpönö kama töpö hai ĩ töpö kai waloki kitä. Töpö waloiki nö, kawa na ĩ töpö pi tapoa totiki nö, “Teusö ai. Pata wa sai” töpö kuu kitä‑

ĩ na ama ta thaa nö, ĩ na töpö kuuma.

⁵Ĩ na tä kua tä, sa mamo tetea tä, hi tä hẽtu ha Teusö a kulali, ĩ ha Teusömo wi a sai kupoli, ĩ a sai õsimö ha sai a kai kule ha Teusö a walo walomo sinomo wi, ĩ a sai kai hãkopasoma. ⁶Ĩ a sai kai hãkopasoma tä, ãju töpö satehei, 7 töpö kui töpönö 7 sanöma töpö pewö peama pi kupo piale, Teusömo wi a sai na ĩ ãju töpö kuoma, töpö atupoma. Sinanu ũko wai ausi ipii ĩ nasimö haloi ösönö töpö halohoiki nö, töpö atupoma. Ĩ haloi ösöpö pewö wakala apama. Oto tä hauhui oto tökö halehepomae.

⁷Ĩ na tä kua tä, 4 temö temö tökö kui tökö kuo noai, ĩ ai sami tänö ĩ 7 ãju töpö na 7 oto tökö tasa totoa hätähäaköma. Teusö a temöo soatio wi, ĩ a hĩso opa wi, ĩ tuu pi totoaköma. ⁸Teusömo wi ĩ a sai õsimö hamö, Teusö a möamö toita apii, a lotete epii, ĩ na Teusö a kui, ĩ Teusö a kule ha wãkisi tä pata sonoko sonokomo opama. Ĩ 7 ãju töpönö 7 sanöma töpö pewö peama pi kupo paio mi tä, Teusömo wi a sai ha ai töpö lisiatalo paio mai kitä.

Teusö a hĩso opa wi, 7 tasa tökö na ĩ tuu pi kule, ĩ ta

¹Ĩ na tä kua tä, 7 ãju töpö na Teusömo wi ĩ a sai na ta pata hapalo pole, ĩ sa ta pata hini ipama. Ta pata hapalo nö, ‑Pei. Teusö a hĩso opa wi, 7 tasa tökö na tuu pi kule, masita tä uli pewö hamö ĩ tuu pi lösa hätäpoheö!‑ ĩ na ta pata kuuma.

²Ĩ na ta pata kuu ha, ai ãju tänö tasa tä kai hulolö nö, masita tä uli ha ĩ tuu lösa soatama. Ĩ tuu löpalöma, sai tä hilo wi, ai töpö na ĩ tä sãökama sätäle, ĩ sai tä ukutupö na ĩ töpö pi luluo nö, ĩ tä ukutupö na töpö pi tapoati noai, pe epii ĩ töpö walakasöpöa apölasoma. Ĩ walakasö tänö ĩ töpö ninio opama.

³Ĩ na tä kua tä, ai ãju tänö kama hai tasa tä na tuu kule, ĩ mötati tuu pata na ĩ tuu löa nömököma. Ĩ tuu löa nömököma, maa tuu pata kuoma maaki, sanöma tä nomasoma, tä iäpö kui na, ĩ na tuu pata kupasoma. Ĩ na tuu pata kupasoma, ĩ mötati tuu pata hamö kökö pewö hupalo wi ĩ kökö pewö pata nomasoma.

⁴Ĩ na tä kua tä, ĩ polakapi ãju töpönö tuu löa waikikö noai ha, pata tuu pewö pata, wai tuupö ola hamö maa tuupö haapo wi ĩ tuupö, ĩ na tuupö kui tuupö pewö hamö ai ãju tänö kama hai ĩ tuu löa hätähäaköma. Ĩ tuu löa hätähäaköma, ĩ maa tuupö pewö pata hai, iä iä tuu sino pewö pata kupasoma. ⁵Ai ãju tänö tuupö pewö pata thapo wi, ĩ a hapalo tä, sa ta hinima. Ĩ na a kuuma:

‑Teusö ai. Huki wa kua wi, sutu upa ĩ wa kuo soatama. Wa totiatalo opatiwö. Wa makoka apatiwö. Ai wa töpö peama wi, ĩ tä wanisala mai kitä.

⁶Wa thapo wi ĩ töpö, wa kai wäsä sinomoti wi ĩ töpö, ĩ na töpö kui, ai töpönö ĩ töpö säpati nö, töpö iä hamatima kutenö, huki ĩ töpö na iä iä wa tuu koamanöma. Au töpö säpati noai, ĩ tä noa‑

ĩ na ĩ ãju tä kuuma.

⁷Ĩ na tä kua tä, söpala ösökö matakali ha ta hapalo pole, ĩ sa ta hinima.

‑Teusö ai. Kawa hai, ĩ pata wa. Wa lotete sati ipö asawö. “Makö wanisala apawöö!” wa kuti wi ĩ pitili tä sai a. Ĩ ta makoka apa‑

ĩ na a kuuma.

⁸Ĩ na tä kua tä, ĩ 3 ãju tökö kui tökönö kama töpö hai ĩ tuu löa waikipalö noai ha, ai ãju tänö pili motokö na kama hai ĩ tuu löa nömököma. ‑Pili motokö koa takanö sanöma töpö hämananöpöö!‑ ĩ na Teusö anö a noa thama.

⁹Ĩ na Teusö anö a noa thaö ha, ĩ pili motokö koa takanö ĩ töpö pewö hämananöma. Ĩ töpö pewö hämanani ha, ĩ töpö pewönö Teusö a wai ipama. ‑Tuu löpalöö!‑ ĩ na Teusö anö ãju töpö noa thaa noai, ĩ töpö na, ‑Häö. Samakö hiopöa apati salo‑ ĩ na ĩ töpö kuu maama. ‑Teusö a hai, pata tä sai sisawöö! A totiatalo opatii!‑ ĩ na ĩ töpö kuu maama.

¹⁰Ĩ na tä kua tä, ĩ 4 ãju tökö kui tökönö kama töpö hai ĩ tuu pi löa asa waikipalö noai ha, kaikana tä hai ĩ lotami ti na sai tä lotile, ĩ ti na ai ãju tänö kama hai ĩ tuu löa nömököma. Kama hai ĩ tuu löa nömöpalöma, ĩ sai tänö sanöma töpö simöa sinomo wi, ĩ tä uli pewö pata muma soasoma. Ĩ tökö soatawö, pe epii ĩ sanöma töpö nini ipö salo, kama töpö ãka wötöo opa kõoma. ¹¹Pe epii töpö nini, pe epii töpö walakasöpö, ĩ na töpö kuö salo, Teusö a na töpö hapalo pi wasöa apama. Pe epii ĩ töpö pepalo opa kule maaki, wanisala tä thaa noai, ĩ tä hosa maamae.

¹²Ĩ na tä kua tä, ĩ 5 ãju tökö kui tökönö kama töpö hai ĩ tuu pi löa asa waikipalö noai ha, Eupötaasisö tuu pata hamö ai ãju tänö kama hai ĩ tuu löa nömököma. Kama hai ĩ tuu löa nömöpalöma, ĩ tuu pata wehea soatasoma. Motokö huumö kua hena wi hamö ĩ tä uli hamö kaikana töpö huimi, ĩ töpö hai ĩ piliso kupasopö, ĩ tuu pata wehea läpamanöma.

¹³Ĩ na tä kua tä, ai sai töpö õsi kua tolele, ĩ 3 töpö kui sa töpö talalöma. Ĩ sai töpö õsi kua tolele, ĩ töpö pewö samio opama. Plõa plõamö a möamö kui na, ĩ na töpö kuoma. Olö kökö kai pata na ai plõa plõamö a holepasoö, ĩ na tä kua tä, sai tä kai pata ha ai plõa plõamö a holepasoö, ĩ na tä kua tä, a wäo holisi ipii, ĩ a kai na ai plõa plõamö a holepasoö, ĩ na tä kuama. ¹⁴Ĩ plõa plõamö kökö holepaso noai, ĩ kökö hai, sai töpö õsi kua tolele, ĩ töpönö tä aipöama apa sinomo wi ĩ kökö. Teusö a lotete sati ipii ĩ a huu kõo wi, ĩ tä wakala ateo waikia manu kule, Teusö a thapo polai, ĩ töpö na ĩ sai töpönö kaikana töpö kai wasu ekuki pia salo, masita tä uli pewö hamö ĩ kaikana töpö kulati, sai töpönö ĩ töpö kokamoma tasoma.

¹⁵Jesus aiki, ‑Pö sömöka taikiö! Ai töpö pi motila tä thomömo sinomo wi ĩ a huu kui na, ĩ na ai töpö pi motila tä, ĩ na sa huu kuaima pia salo. Wa mamo läapalo totia asale, ĩ wa pi mönaha apa asapaso kitäö! Au haloi ösökö na wa mamo läapalo totia mi tä, au haloi ösökö thomönönöma, atu hamö hoka apa pa sinoi wa huu kili ipa kitäö!‑ ĩ na Jesus pata tä kuu kule.

¹⁶Ĩ na tä kua tä, epöteu töpönö Ahamasietõ tä uli a hila noai, ĩ tä uli hamö sai töpö õsi kua tolele, ĩ töpönö kaikana töpö pewö wasu kokamoma tasoma.

¹⁷Ĩ na tä kua tä, 6 ãju tökö kui tökönö kama töpö hai ĩ tuu pi läa asa waikipalö noai ha, hi tä hẽtu hamö ai ãju tänö kama hai ĩ tuu löa nömöpalö lasoma. Ĩ tuu löa nömöpalö lasoma, hi tä hẽtu hamö Teusömo wi a sai kupoli, ĩ a sai õsimö na kaikana tä hai ĩ lotami ti hõtopoli, ĩ ti na ta loiki nö, pe epii ta pata hapalo lasoma. Ta pata hapalo nö, ‑Pei. Ĩ sa tä pewö thama waikio keheö!‑ ĩ na ta pata hapalo kuu lasoma.

¹⁸Ĩ na ĩ a kuu matalolö nö, tä pata sami samimo opaö, ta pata hapalo opaö, sanö ta pata klau klaumo opaö, uli pata tölöko opaö, pe epii tä uli pata lakö lakömo opaö, ĩ na tä kuama. Pe epii tä uli pata lakö lakömo kua noai na, ĩ na nö patapö töpö kua soa tä, ĩ na tä uli pata kua wi ĩ nasimö tä kuo maama. Sutu ha pe epii tä uli lakö lakömo wi tä kuo paio maama. Sutu ha tä uli pata lakö lakömo hö̃töo waikioma maaki, tä uli lakö lakömo nömö kõo noai, pe toti ipii ĩ tä uli pata lakö lakömo pi kiliha satia totio opama. ¹⁹Pe epii tä uli pata lakö lakömo opa nö, sai pö kua apöle, ĩ tä uli pata kakapalo nö, polakapi tä uli asawösö, sami ai tä uli asawösö, ĩ na 3 tä uli asawösö kupasoma. Ĩ na tä kua tä, hi masita tä uli pewö hamö sai pö hö̃kökö öpii sai pö kupai, ĩ sai pö pewö pata waniapasoma. Ĩ na tä kua tä, Papilônia tä uli na Teusö a pi tapoa naia soataiki nö, pe epii a hĩso opöle, kama hai ĩ tasa tä na ĩ upa mo puu wasui tuu pi kule, papilônia tili töpö na ĩ tuu pi totoköma. ²⁰Ĩ na tä kua tä, maa tuu mötali ha sanöta tökö kule, ĩ tökö pewö pata, maa makö pewö pata, ĩ na tökö kui, tökö pata tapamo maa totia apöpasoma. ²¹Ĩ na tä kua tä, maa tä komi amatosi pata päläma. Ai maa ma pata pei, 40 kilu ma hute pata kui na, ĩ na maa töpö komi pata kui, sanöma töpö hösöka na ĩ maa töpö komi hute pata päläma. Sanöma töpö na pe epii ĩ maa töpö komi pata päläö ha, pe epii ĩ sanöma töpönö Teusö a wai kolola apamae.

Suö tänö wano töpö sapäkama sinomo wi ĩ suö tä

¹Ĩ na tä kua tä, 7 ãju töpönö 7 tasa tökö po pole, kamisa na ĩ ai ãju tä waloikiso nö, ‑Hapo. Suö tä wanisala totii, ĩ a patanö wano töpö sapäkama sinomo wi, ĩ sa möma pia kule. Ĩ suö tä hai, sai pö pata pe epii pö sai pata na töpö wanisala apii töpö kule, ĩ tä uni. Satehe epii pata u kule, ĩ tuu kasö pata hamö ĩ sai pö kua kule. Teusö anö ĩ suö a peama pia salo. A peama wi, kamisanö kawa na ĩ sa tä möma kitä. ²Masita tä uli pewö pata hamö töpö kaikanamo totio wi, suö tä na ĩ töpö pewö sapäkopalo opama. Masita tä uli pewö hamö töpö kupai, ĩ suö anö ĩ töpö lululö nö, wasu wasu tuu koamananöma. Ĩ tuu koamanani ha, ĩ kaikana töpönö pe epii sami sami tä thaa totiomae. Hiopö tänö töpö pewö polemopalo opama‑ ĩ na ĩ ãju tä kuuma.

³Ĩ tä, Teusö a õsi kua tolele, ĩ anö sa õsi thama toitioma. Sa õsi thama toitioö ha, ĩ ãju tänö sa kai hulolö nö, poke tä uli hamö samakö walokö tasoma. Samakö waloikitö nö, sai tä pata aipö toti ipii, a pata hanaha toti ipii, ĩ na a pata kui, a hõo pata na ĩ suö a tikätile, ĩ sa tä talalöma. Ĩ sai tä lö kui, a he satehe epö. 7 tökö he kuoma. 10 a sonaköpö kuoma. Ĩ sai tä pewö na Teusö a kateha wanisala wi tä pewö sãököoma. ⁴Kaikana töpö hai ĩ haloi ösö hanaha kui na, ĩ na haloi ösö kui ösö na ĩ suö tä haloma. Pe epii oto totokö halepoma. Maa makö ose toita apii, noa apii, makö ose halepo naioma. Ĩ suö tänö oto tä mokota poma. Ĩ mokota na suö tänö sami sami tä thaa noai, ĩ sami sami tä lahoa totila tä, mokota ha tä pi poma. ⁵Pili a hũko ha kama hilo wi ĩ tä sãököoma. Ĩ tä sãököle, ĩ na ta kuu alu kule:

‑Papilônia tä uli.

Suö töpönö wano töpö sapäkama wi ĩ pöpönö a.

Sami sami tä thaa soma wi ĩ a pata‑

ĩ na a hilo kua wi tä sãökama. Ĩ wa hilo sãökama möö nö, ‑Wi na ta kuu totia kule?‑ wa pi thama kitä.

⁶Ĩ suö sa möö ha, Teusö a thapo wi ĩ töpö iä pönö ĩ suö a polemo opama. ‑Jesus a pitili‑ ĩ na ĩ töpö kuu totio nö, Jesus a hosa wanio opama kutenö, Teusö a thapo pasio mai ĩ töpönö ĩ töpö säpalöma. Töpö säpalö noai, ĩ töpö iä pönö ĩ suö a polemo opöle, ĩ sa tä talalö nö, pe epii sa pi honipo opama. ⁷Sa pi honipo opaö ha, ĩ ãju tä aiki, ‑Wi na wa pi kuu salo wa pi honipo ke? Pi naka. Sai tä hõo ha suö tä tikäle ĩ a, ĩ sai tä aipö öpii, a he satehe epii, 7 a he kuo wi, 10 a sonaköpö kua naine ĩ a, ĩ na tökö kua wi, kawa na ĩ sa tökö pewö ha kateha hasulupa pia kule. ⁸Sai wa tä hanaha pata talalö noai, ĩ a pata temöo opama maaki, a nomasoma. A nomasoma maaki, maa maka talo opii taka pata hamö a wani hemopo kõo pia kule. A wani hemoa kopasoma tä, a wani maa kopamani kitä. A mapamo kõo paio mai ha, masita tä uli pewö pata hamö Teusö a thapo mai ĩ töpö kule, ĩ töpönö sai tä talalö nö, ĩ töpö pewö pata kilia apöso kitä. Teusö anö hi masita tä uli thaa paio mai ha, sanöma töpö õsi palimipo wi ĩ töpö a hilo wi, ĩ tä sãöka waikikö noai, ĩ tä waheta na ai töpö a hilo wi, ĩ tä sãökama kua pasia mane, ĩ töpö kilia apölo nö, “Kilatiha! Ĩ sai tä nomasoma maaki, a wani kua kõa pikia sai palohe taköö!” ĩ na ĩ töpö kulaso kitäö!‑ ĩ na ãju tä kuuma.

⁹Ĩ na a kuu nö, ‑Pi naka. Ĩ wa tä taö pi topa apa salo, makö pi tapoa totiki nö, makö pi hatukuo opapököö! Pili he satehe epii, 7 pili a he kule, ĩ 7 heuma tökö uni. Ĩ heuma tökö kule ha suö a loa kule. Ĩ na tä kua tä, ĩ 7 a he kule, ĩ 7 kaikana töpö uni naiwö. ¹⁰Ĩ 7 kaikana töpö kuo noai, ĩ ai 5 töpö kaikanamo maa waikitasoma. Ai sami a kaikanamo kule. Waiha ai kaikana tä kupasopö ai a kua soa kule. Ĩ a kaikanapalo nö, ĩ a kaikanamo teteho mai kitä. ¹¹Sai tä kuo noai, ĩ a nomasoma maaki, a temöa kõo pia kule. Ĩ a temöa kõa tä, a kaikanamo nömöo pia kule. Satehe epii, ĩ 7 kaikana töpö kuo noai, ĩ sai tä hai, ĩ ai kaikana tä naiwö. A kaikanamo waikioma maaki, a kaikanamo kõo pia kule. A kaikanamo kõo kitä maaki, ai tänö a kaikanamo maa haipamani kitä.

¹²10 wa tökö sonaköpö talalö noai, ĩ tökö hai, ĩ kaikana töpö hö̃töwö. Ĩ töpö kaikanamo totio paio mai kitä maaki, waiha sai tä solo, hototi ipii töpö kaikanamo päo pia salo. ¹³Ĩ kaikana töpö noa thaso hẽtupaso nö, sai tä na, “Kamisamakö kaikanamo kua wi na, ĩ na kawa kaikanamo kua nömöo sisapöö! Kamisamakö lotete epii ĩ samakö kua wi na, ĩ na wa kua nömöo sisapöö!” ĩ na töpö kuu kitä.

¹⁴Ĩ na tä kua tä, ĩ töpö kokamo nö, oweha a okalo wanipo nö, töpö wasu ekuki kitä. Töpö wasu ekuki kitä maaki, oweha a, oweha a na töpö nokapalo sinomo wi ĩ töpö, ĩ na töpö kui töpönö ĩ wasu töpö peama totio kitä. Oweha a hai, pata tä sai pasiwö. Töpö kaikana apii ĩ töpö pewö na a simöo totio wi, ĩ a. Pata töpö pewö na a simöo totio naio wi, ĩ a. Oweha a na töpö nokapalo sinomo wi, Teusö anö ĩ töpö saia asapalöma. Ĩ töpö pitilimo opaö. Ĩ töpönö Teusö a thapo matalo mi ipö‑ ĩ na ãju tä kuuma.

¹⁵Ĩ na a kuu nö, kamisa na ĩ ãju tä hapalo soa pa, ĩ na a kuuma: ‑Suö tänö wano töpö sapäkama sinomo wi, satehe epii pata u kule, ĩ tuu kasö pata hamö ĩ suö tä loopili, ĩ pata u pewö hai, ĩ sanöma töpö uni. Pata töpönö töpö kai kua hãkikia apöle ĩ töpö pewö pata, hi masita tä uli pewö hamö töpö pata pilipai, ĩ töpö pewö pata, ai töpö lölöhö, ai töpö usi, ai töpö ausi, ĩ na töpö kui töpö, töpö hapalo aipö hãkikia apöle, ĩ töpö pewö pata, ĩ na töpö kui, pata u pewö hai, ĩ töpö uni. ¹⁶Sai tä, 10 sonaköpö tökö, ĩ na tökö kui wa tökö talalö noai, ĩ töpönö ĩ suö a wanisala totii ĩ a wanipo opa kitä. A wanipo opa nö, suö a hai ĩ wani tä pewö sua hötötöa totialalö nö, ĩ a suö oalö nö, koa takanö a ĩsimani kitä. ¹⁷Ĩ töpö õsi na Teusö a kalipaloma kutenö, kama Teusö anö suö tä thama pi topa wi, ĩ na ĩ töpönö ĩ suö tä thama totioma. “Suö ma tä peama nököö!” ĩ na Teusö anö ĩ töpö pewö pi thamama. Ĩ töpö noa thaso nö, ĩ sai tä na, “Pei. Kamisamakö kaikanamotima maaki, huki kawa kaikanamo sisaaö! Wa pasilia hö̃töpali kitäö!” ĩ na ĩ töpönö ĩ a noa pata thama. Teusö a kuu noai, ĩ na töpö kua tolea nömöopö, tä kuama.

¹⁸Ĩ suö wa talalö noai ĩ a hai, sai pö pata pe epii pö sai na töpö wanisala apii töpö kule, ĩ töpö uni. Masita tä uli pewö hamö kaikana töpö kule, ĩ töpö na suö a kaikanamo satia apa wi, ĩ suö a‑ ĩ na ĩ ãju tä kuuma.

Papilônia tä uli waniapaso noai ĩ ta

¹Ĩ na tä kua tä, ai ãju tä kaikanamo toti ipii, ĩ a ithoa nömöpaköma. Kama pili a pewö wakala apö kutenö, masita tä uli pewö pata wakala kölöma. ²A ithopolalö nö, a komö lasoma. A komö nö,

‑Pei. Huki Papilônia tä uli pewö pata mataso ke. Ĩ tä uli pewö pata wania totipaso keheö! Huki ĩ tä uli na salo pö pewö hiopö öpii pö katä wi, ĩ pö huu sisaa. Sai töpö wani hupalo opa sisaa‑

ĩ na ãju tä kuu kai itho lasoma. Ĩ na tä kuu kai ithopaiki nö,

³‑Papilônia tili töpönö ai sanöma töpö pewö na kama töpö hai wasu wasu tuu koamananöma. Ĩ wasu wasu tuu hai, sami sami tä tha apa wi, ĩ tä uni. Masita tä uli pewö hamö töpö kupai, ĩ papilônia tili töpönö ĩ töpö pewö lulualalö nö, wasu wasu tuu koamananöma. Tuu koamanani ha, pe epii sami sami tä thaa totiomae. Masita tä uli pewö pata hamö töpö kaikanamo totio wi ĩ töpö, papilônia tili töpö, ĩ na töpö kui töpönö hiopö tä tha apamae. Pe epii papilônia tili töpönö wani tökö pi ipa sinomoti ha, ĩ töpö na wani tökö totoma sinomo wi, pe epii ĩ töpönö sitipa kökö suatima‑

ĩ na ĩ ãju tä komö kuu lasoma.

⁴Ĩ na tä kua tä, hi tä hẽtu ha Teusö a kulali, ĩ ha ai ta pata hapalo pole, ĩ sa ta hinima. Sa ta hini noai, ĩ na ta kuu lasoma:

‑Ipa ai pö! Mi hamöö! Mi tä uli na pö pilio tihöö! Mi töpönö pe epii hiopö tä tha apa wi ĩ töpö na pö pilio koka naio tihöö! Makö kua tikilia naia tä, makö pepalo naio matimöö!

⁵Ĩ töpönö pe epii wanisala tä tha apatima kutenö, ĩ wanisala tä pata lö kui, hutu mosökö palökö pata hamö ĩ wanisala tä pata sutuho he wäo lasoma. Ĩ töpönö wanisala tä tha apati noai, ĩ tä na Teusö a pi motipo mai kitä.

⁶Ĩ töpönö makö peama thama noai na, ĩ na töpö peama thama hö̃töoö! Wani ipii töpö peama päo tihöö! Pe epii töpö peama totio soataaö! Kama töpönö wasu wasu tuu thata sinomo opa noai, ĩ a hapoka a na ai tuu wasu sati ipii tuu thaa kulaha totiki nö, ĩ töpö na tuu koama sapa kõpöö!

⁷Ĩ töpö aiki, “Pe epii sa puko waikia kule. Sa totiatalo opa waikia kule. Kaikana tä suö kua wi na, ĩ na sa kua hö̃töa kule. Suö watii suö kua wi na, ĩ na sa kua pasio mai kitäö! Sa ö̃kö mai, sa kua soatio kitäö!” ĩ na töpö pi kuu pole, ĩ tä noa na pe epii ĩ töpö peama totihoö!

⁸Ĩ na ĩ töpö pi kuu wi, ĩ tä hĩsuwö na pe epii wanisala tä waloa totoki kitä. Wasu wasu tä, noma soato wi ĩ tä, töpö ö̃köpalo opati wi ĩ tä, oi oi tä pata, ĩ na tä kui ta pata waloa soataki kitä. Tä pata waloa soataköma, koa taka patanö ĩ töpö pewö ĩsiso kitä. Teusö anö ĩ töpö peama wi, ĩ a pata lotete epö kutenö, ĩ na tä thama kuki kitäö!‑

ĩ na ta pata hapalo kuu lasoma.

⁹Ĩ na tä kua tä, ĩ papilônia tä uli ĩsimanöma, masita tä uli pewö pata hamö kaikana töpö kupai, ĩ töpönö ĩ wãkisi tä pata sonoka talalö nö, töpö ö̃köpaloa apölaso kitä. Papilônia tili töpönö hiopö tä na ĩ kaikana töpö lululö noai, ĩ töpö kaikana ö̃köpalo opa kitä. ¹⁰Koa taka pata na töpö kili salo, pai pamö töpö öpatiki nö,

‑Kilatiha! Papilônia tili töpö pata loteteo opama maaki, lope epii ĩ töpö pata peama apa soatama‑ ĩ na ĩ kaikana töpö kupaloma.

¹¹Papilônia tä uli ha töpö kule, ĩ töpö na wani tä totoma nö, sitipa kökö sua sinomoti noai, ĩ töpö ö̃köpalo naisoma. Ĩ tä uli wania nö satipasoö ha, ‑Witi ha ai wani ma tökö totoma kotapö?‑ töpö pi kuu salo, töpö pewö pata ö̃köpaloa apölasoö. ¹²Ĩ papilônia tili töpö na wani tökö totoma sinomo noai, ĩ na ĩ wani tökö kuoma. Oto tä, söpala ösö wakala apii ösö noa apii, ĩ pötaata ösö hilo wi ĩ ösökö, maa makö ose wai noa apii ĩ makö wai, masulu kökö noa apii, ĩ petola kökö a hilo wi ĩ masulu kökö, haloi ösö ausi toita apii, ĩ liniu ösö kui ĩ ösökö, haloi ösö hanaha toita apii ĩ ösökö, suö tä haloi ösö walehe toita apii ĩ ösökö, haloi ösö hanaha aipö sati ipii ĩ nasimö ösökö, hii ti nisamö toita apii ĩ ti, elepãsi pili a hĩso atho pata ha tökö namo pata kule, ĩ tökö pata totipalö nö, wani tökö ose toita apii tökö thapa sinomo wi ĩ nasimö wani tökö, hii tiki noa apii ĩ tiki, söpala ösö hanaha toita apii, ĩ pötõosi a hilo wi ĩ nasimö wani tökö, söpala ösö sai amatosi toti ipii ĩ nasimö tökö wani, maa ma ösö takaka toita apii, sai a thaa wi ĩ nasimö makö wani, ¹³nii tä häläläamö totipa apa wi ĩ nasimö tökö, mötati tä, paki tä, tuu nisamö toita apii ĩ tuu, ai tuu nisamö toita apii tuu hönöma wi ĩ tuu, upa mo puu, tapu tapu tuu toita apii, ĩ aseisi tuu hilo wi ĩ tuu, tötiiku mo, ĩ mo kopeke, paka kökö, oweha kökö, kapalu kökö, kapalu kökönö ösökö saiapala wi ĩ ösökö, noa mai ha sanöma töpö kalipalotipö ĩ töpö, ai sanöma töpö, ĩ na tökö kui, papilônia tili töpönö ĩ nasimö tökö sua sinomotima.

¹⁴Papilônia tili töpö na wani tökö totoma sinomo wi, ĩ töpö aiki, ‑Papilônia tili pö! Wani tä toita apii wani tä na makö pi wasiso opati noai, ĩ wani tä pewö matasoma. Oto tä, ai wani tä toita apii ĩ wani tä, ĩ na tökö kui ma tökö thapo opa noai, ĩ tökö kua kota mai kitäö! Matasomaö!‑ ĩ na töpö pi honi kuu kule. ¹⁵Ĩ töpönö papilônia tili töpö na sitipa kökö sua sinomo opa noai, ĩ tä uli wakö pata umö totile, ĩ koa taka pata na töpö kili salo, ‑Samakö pepalo naio matimöö!‑ töpö pi kuu nö, töpö öpa häwäikitö nö, töpö lalupalo opa nö, töpö ö̃köpalo opa soaso kitä.

¹⁶Töpö ö̃kö pola nö, ‑Häö! Töpö pepalo opa noa‑ töpö kuu nö, ‑Papilônia tä uli toita apa saiopiliö! Haloi ösö ausi toita apii, haloi ösö hanaha toita apii, haloi ösö na oto toto toita apii toto sutio wi ĩ nasimö haloi ösökö, maa makö ose noa apii ĩ makö, petola masulu, ĩ na tökö kui tökö kuo opa kipiliö!‑ töpö kuu kitä. ^17-18Ĩ na töpö kuu nö, ‑Wani tä kuo opa kipili maaki, lope epii wani tökö pewö maa soatasoma‑ töpö kupalo opa kitä.

Ĩ na tä kua tä, mötati tuu mötali hamö kutiata pöpönö ösökö pata kai huu sinomo wi ĩ töpö, ĩ kutiata ösökö na töpö kalipalo sinomo wi ĩ töpö, ĩ ösökö na töpö pi pata huti pole ĩ töpö, ĩ kutiata ösökö thapo wi ĩ töpö, ĩ na töpö kui töpö pewö mamo huu tolehaö ha wãkisi tä pata talalö nö, töpö kili hö̃töo salo, pai hamö ĩ töpö pi kaläa pola nö, töpö lalupalo opama. Töpö lalupalo nö, ‑Häö! Ki tä uli toita apa kuohe na, ĩ na ai tiko tä uli toita apö kui ai tä uli kuo maa noai kitäö!‑ töpö kuuma.

¹⁹Ĩ na töpö kuu nö, töpö pi honipo opa salo, kama töpönö sopo osi humönö nö, kama töpö he hamö sopo osi hulaka sapamo kõo nö, töpö ö̃köpalo pola nö, töpö lalupalo opa nö, ‑Häö! Töpö pea apa noa. Kutiata pöpönö ma ösö pata thapo wi, ĩ makö pewönö papilônia tili töpö na wani ma tä totomati nö, pe epii sitipa ma kökö sua sinomo topa apa kipiliö! Ĩ tä uli ha wani tä kuo opa kipili maaki, lope epii ĩ tä uli wania totia apa saipalohe taköö!‑ ĩ na töpö pi honihi kuuma.

²⁰Ĩ tä uli waniapasoma kutenö, hi tä hẽtu hamö makö kupoli, makö pi mönahapököö! Teusö anö makö simöa sinomo wi ĩ makö, Teusö ma kai wäsä sinomo wi ĩ makö, Teusö ma thapo wi ĩ makö pewö, ĩ na pö kui pö! Papilônia tili töpönö makö peamati noai, ĩ tä noa na Teusö anö ĩ töpö peama hö̃töoma salo, makö pi mönahapököö!

²¹Ĩ na tä kua tä, ai ãju tä lotete epii ĩ anö maa ma pe epii, sini mo kopekepama sinomo wi ĩ ma pata kui, ĩ ma pata söpölö nö, mötati tuu mötali ha ĩ ma pata kepamanöma. Ma kepamanö nö, ĩ na a kuuma: ‑Papilônia tä uli! Ĩ maa ma pata kepama thamae na, ĩ na lope epii wa thama hö̃töo kitä. Papilônia wa sai pata tapamo kota mai kitä. ²²Kawa kule ha ama ta hinio kota mai kitä. Söpala ösö toto höpöa nö, ama ta thaa wi ĩ töpö, thola ösö hola wi ĩ töpö, ai hola wi tä hola wi ĩ töpö, ĩ na töpö kui töpönö ama ta thaa sinomo noai, ĩ ama ta hinio kota mai kitä. Hii tiki, söpala ösökö, ĩ na tökö kui tökö na papilônia tili töpö kalipalo sinomo noai, ĩ na ĩ töpö kua kota mai kitä. Maa ma patanö sini mo kopekeama wi ĩ ta hinio kota mai kitä. ²³Papilônia tä uli! Kawa kule ha koa taka sii hilipalo opa noai, ĩ taka hilipalo kota mai kitä. Töpö husopö too sinomoö ha, töpö lalupo peheliapalo sinomotima maaki, ta hinipo kota mai kitä. Masita tä uli pewö hamö wani tä sua sinomo wi töpö kua apa kule maaki, papilônia tili makönö wani tä pata sua satia apama. Makö õkamo nö, sanöma ma töpö pewö mönamanöma. Önö kutenö, makö maa totipaso kitä‑ ĩ na ĩ ãju tä kuuma.

²⁴Teusö a kai wäsä sinomo noai ĩ töpö, Teusö a thapo wi ĩ töpö, masita tä uli pewö hamö töpö kupai ĩ töpö, ĩ na töpö kui, papilônia tili töpönö ĩ töpö sälalö nö, töpö iä hamananö noai, ĩ tä noa na Teusö anö ĩ töpö peama hö̃töoma.

¹Ĩ na tä kua tä, hi tä hẽtu hamö satehe epii töpö hapalo kua wi na ĩ na ta pata hapalo kui, sa ta pata hinima. Ĩ na ta pata kuuma:

‑Aleluia. “Teusö a totiatalo opawöö!” makö pewö kuupököö! Teusö anö makö täapa kõo läo wi ĩ a. A toita apii, a wakala apii ĩ a. Teusö a lotete epö sisawö. Ĩ na kamakö hai ĩ na Teusö pata tä kua wi ĩ a.

²“Makö wanisala apawöö!” Teusö a kuu wi ĩ pitili tä sai a. Ĩ ta makoka apa. Suö tänö wano töpö sapäkama hätäpo wi, Teusö anö ĩ suö tä namo simököma. Teusö anö kama hai ĩ töpö kalipalama sinomo wi, ĩ suö tänö ĩ töpö säpalöma kutenö, Teusö anö ĩ suö tä peama apa hötöoma‑

satehe epii töpö hapalo noai, ĩ na ĩ töpö kuuma.

³Ĩ na töpö kuu nö, lope epii töpö hapalo kõo nö,

‑Aleluia. Teusö a totiatalo opawöö! Suö tä hai, ĩ Papilônia tä uli uni hai, ĩ tä uli matasoma. Papilônia tä uli wakö pata umöso noai, ĩ koa taka wãkisi pata mapo mai, ĩ koa taka wãkisi pata sonoka soatia‑

ĩ na töpö kuuma. ⁴Ĩ na töpö kuu ha, kaikana tä hai ĩ lotami ti na Teusö a lole, ĩ a kotö na 24 pata töpö, 4 temö temö töpö, ĩ na töpö kui töpö Teusömo pia salo, töpö mãi pohama. Ĩ töpö mãi pohaiki nö, Teusö a na töpö pi tapoa totiki nö,

‑Awai. Ĩ naköö! “Teusö a totiatalo opawöö!” makö pewö kuupököö!‑

ĩ na töpö kuuma.

Oweha anö pusopö a täli wi ĩ ta

⁵Ĩ na tä kua tä, kaikana tä hai ĩ lotomi ti ha ta hapalo pole, ĩ na ta kuuma:

‑Kamakö hai ĩ Teusö a na, “Wa totiatalo opawöö!” ĩ na makö pewö kuupököö! Teusö a na makö kalipalo sinomo wi ĩ makö, pata makö, patamo totio mai ĩ makö, ĩ na sanöma makö kui makö pewönö Teusö ma kai a hini totio opa wi ĩ makö hai, “Teusö wa totiatalo opawöö!” makö kuu!‑

ĩ na ta kuuma.

⁶Ĩ na ta kuu ha, sanöma töpö satehe epii töpö hapalo kua wi na ĩ na ta hapalo kua wi sa ta hinima. Pola a pata pe epii a pola pata kuu wi na, ĩ na a hapalo kuuma. Sanö ta pata klau klaumo opa kua wi na ĩ na ta hapalo wi ĩ na ta kuuma. Ta hapalo nö, ĩ na ta kuuma:

‑Aleluia. “Teusö a totiatalo opawöö!” makö pewö kuupököö! Kamakö hai ĩ Teusö pata tä lotete sati ipii ĩ a hai, ĩ kaikana tä sai.

⁷Makö pi topai, makö pi mönaha apöpököö! “Teusö pata tä hai, ĩ a totiatalo opawö” makö kuupököö! Oweha anö kama hai pusopö a täa pia salo, makö kokamoö, makö iapaloö, ĩ na makö kua pia kuleö! Ĩ na tä kua tä, kama hai pusopö a pewö husoa hötötöa waikisomaö!

⁸A haloköpö, napä ũko haloi ösö kui na, ĩ na liniu ösö haloi kui, ĩ pusopö anö ĩ ösö täa waikilömaö! Ĩ haloi ösö sami mi ipö, ösö ausi ipö, ösö wakala apö, ĩ na ösö kui ösö tälömaö!‑

ĩ na ta kuuma. Ĩ liniu ũko haloi ösö hai, Teusö a thapo wi ĩ töpönö toitai tä thaa wi, ĩ tä uni.

⁹Ĩ na tä kua tä, kamisa na ĩ ãju tä aiki, ‑Sa kuu pole, ĩ tä sãökököö! Oweha a okalo, kama hai pusopö a, ĩ na töpö kui töpö supasolaso tä, ai töpö na, “Hapo! Makö iapalo naiosoö!” tä kuu noai, ĩ töpö pi mönaha apa kitä‑ ĩ na ĩ ãju tä kuu nö, ‑Sa kuuhe, ĩ Teusö a kai pitili ipii ĩ ta‑ ĩ na a kuuma.

¹⁰Ĩ na a kuu ha, ĩ ãju tä na, ‑Wa totiatalo opawöö!‑ ĩ na sa kuu pia salo, ĩ ãju tä ami öpahale ha, ĩ ha sa mãi poa soataköma. Sa mãi poa soataki ha, ‑Ĩ na a kua tihöö! Wa mãi poiki nö, “Wa totiatalo opawöö!” Teusö a na ĩ na a kuu sisaaö! Kawa, ai töpönö Jesus a thapo naio wi ĩ töpö, ĩ na makö kui, Teusö a na makö kalipalo kua wi na, ĩ na Teusö a na ĩ na sa kalipalo kua naioö. Jesus anö ta wäsä noai, ĩ ma ta hini pitilia totia apöle, ĩ makö kui na, ĩ na sa kua naioö‑ ĩ na ĩ ãju tä kuuma.

Jesus anö ta wäsä noai, ĩ ma ta hini pitilia totia apöle, Teusö a kai wäsä sinomo wi, ĩ töpönö ĩ ta wäsä tolea nömöo sinomoö.

Sai tä, Teusö a kai wäsä holisimo wi ĩ a, ĩ na töpö kui, Jesus anö ĩ töpö peama wi ĩ ta

¹¹Ĩ na tä kua tä, hutu mosökö palökö pata ha taka hãkopoli ĩ sa taka hãkoa taa nömönanöma. Ĩ sa taka hãkoa tapa tä, kapalu a ausii a tapamonasoma. Ĩ kapalu a hõo na a tikäiki nö, kapalu a kai huu sinomo wi ĩ a na, ‑A pitilimo opa wi ĩ a. Teusö a kai hiniatala sinomo opa wi ĩ a‑ ĩ na töpö kuu. A kaikanamo makoka apati wi ĩ a. Wanisala tä mapamanöpö, a wasu kai hutii. ¹²Pili a mamo hai, koa taka ãka kui na, ĩ na pili a mamo kuoma. Pili a he na kaikana tä hai hesowa kökö satehe epii kökö hesowa sohoma. Kama a hilo wi, kama na tä sãökama sätäo noai, ai töpönö ĩ tä hila tai mio opama. Kamanö ĩ ta hila taö öpa sisama. ¹³Iä iä tä na kama hai ĩ haloi ösö kãköma, ösö iäo opama. ‑Teusö a kai‑ ĩ na a hilo kuoma. ¹⁴Hi tä hẽtu hamö sanöma töpö satehe epii töpö kupoli, kapalu a kai huu wi ĩ a na ĩ töpö nokasolöma. Ĩ töpö nokapalo pole, ĩ töpö hai ĩ liniu ũko haloi ösö sami mi ipii, ösö ausi ipii, ĩ na ösökö kui ösökö haloalalöhe nö, kapalu kökö ausi ipii ĩ kökö hõo ha töpö tikäkäiki nö, töpö nokaalöma. ¹⁵A haloi ösö iäo opa noai, ĩ a kai ha poo a namo opii a poo ola he salehepasoma. Ĩ a poonö hi masita tä uli pewö hamö kaikana töpö kule ĩ töpö, ĩ kakana töpönö töpö kai pilio wi ĩ töpö, ĩ na töpö kui töpö pewö peama totioma. Ĩ töpö na poo a thapo pole, ĩ a kaikanamo lotetea apa kitä. Pe epii Teusö a lotete epii, wanisala tä na ĩ a hĩso opa wi, ĩ kaikana tänö ĩ tä möma kitä. Upa mo kopekemanö nö, hapoka a pata na ĩ mo puu lösa thama wi na, ĩ na Teusö a thapo mai, ĩ na ĩ töpö thama hö̃töo kitä. A kaikanamo lotetea apa wi, ĩ anö ĩ töpö peama totio kitä. ¹⁶Kama hai ĩ haloi ösö lapei ösö na ĩ na tä sãökama sätäle, pili a wakö na tä sãökama sätäa naine, ĩ na tä sãökama kuu:

‑Kaikana töpö pewö na a kaikanamo satia apa wi ĩ a.

Pata töpö na ĩ pata tä sai sati ipö asawöö!‑

ĩ na tä sãökama kuuma.

¹⁷Ĩ na tä kua tä, pili motokö hösöka na ai ãju tä öpapoli, ĩ sa tä talalöma. Ösö hamö salo pö katäpalo polali, ĩ salo pö pewö na lope epii ĩ ãju tä komö nö, ‑Hapo. Teusö anö makö iapalama pia kuleö! Makö iapalopö pö kokamosoö! ¹⁸Hapo. Kaikana töpö pata, pata töpönö sotatu töpö simöa sinomo wi ĩ töpö, sotatu töpö, kapalu kökö, kapalu kökö kai huu sinomo wi ĩ töpö, sanöma töpö pewö, ai töpö noa mi kalipalama sinomo wi ĩ töpö, ai töpö noa mi kalipalama mai ĩ töpö, töpö patamo wi ĩ töpö, töpö patamo pasio mai ĩ töpö, ĩ na töpö pewö pata kui töpö oalalösoö!‑ ĩ na salo pö katä wi, ĩ töpö na ĩ na ĩ ãju tä komö kuuma.

¹⁹Ĩ na tä kua tä, sai sa tä tapa waikio noai ĩ sai sa tä taa kõo nömönanöma. Hi masita tä uli pewö hamö töpö kaikanamo wi ĩ töpö pewö, ĩ kaikana töpönö wasu töpö kai huu sinomo wi ĩ töpö, ĩ na töpö kui sa töpö taa nainanöma. Kapalu a hõo na a tikäle ĩ a, ĩ anö kama hai ĩ wasu töpö kai huu wi ĩ töpö, ĩ na töpö kui töpö na ĩ kaikana töpö wasu ekuköpö, töpö kokamo pole, ĩ sa töpö talalöma.

²⁰Ĩ na tä kua tä, ĩ sai tä lototoa lämaköma. Teusö ta wäsä holisimo opa sinomo noai, sai tä mamo tetela tä ĩ anö aipö tä kilihi ipii tä thama sinomoti noai, ĩ a lototoa läa naimaköma. Ĩ anö aipö tä kilihi ipii tä thama sinomoti salo, ai töpö mönama apatima. Sai ta hilo wi, ai töpö na ĩ tä sãökama sätäamakö noai, ĩ töpö aiki, ĩ sai tä ukutupö na, ‑Aitaköö! Wa totiatalo opawöö!‑ ĩ na ĩ töpö kuu noai, ĩ töpö mönama apatima.

Ĩ na tä kua tä, ĩ sai tä, Teusö ta wäsä holisimo opa sinomo noai ĩ a, ĩ na töpö kui töpö temö soa tä, kosoto tuu pata ha koa taka, hösösöpö taka wakö, ĩ na taka kui taka hili pole, ĩ taka na töpö temö soa päla tä maaki, ĩ töpö säsäköma.

²¹Ĩ na tä kua tä, kapalu a ausii a hõo ha a tikäo noai, ĩ a kai ha poo a lisipaso noai, Teusö a thapo mai ĩ töpö wasu ekukö noai, ĩ a poonö ĩ töpö sälalöma. Ĩ töpö sälalö noai, ĩ töpö sãi na salo pö katä wi ĩ pö pewö ösö potehea totipasoma.

1.000 tökö inama na tä kua wi ĩ ta

¹Ĩ na tä kua tä, hi tä hẽtu hamö ai ãju tä kupoli, ĩ a itho lasoa tä, kamisanö ĩ sa talalöma. A itho laso noai, ĩ anö masa maka kai lototomaköpö tä, söpala ösö toto hute epii ĩ toto, ĩ na tökö kui tökö poma. ²Ĩ tökö po nö, ĩ ãju tänö olö kökö pata huölö nö, kökö pata õka soatalöma. Ĩ olö kökö pata hai, sutu ha ĩ olö kökö õsi ha Sai tä sai pata kukö noai, ĩ olö kökö pata. Ĩ Sai tä sai pata hai, Diabo, Satanasö, ĩ na ĩ a pata hilo kua kua. Ĩ olö kökö pata õka soatia tä, inama tökö satehe epii, 1.000 tökö inama kui, tökö inama hasupasoma. ³Ĩ ãju tänö Sai tä sai pata õkapalö nö, masa maka pata hamö a säsäköma. A säsäkö nö, ĩ taka lakö nö, taka lototoa soatamaköma. 1.000 tökö inama kupo paio mi tä, hi masita tä uli pewö hamö sanöma töpö pilipai, Sai tä sai patanö ĩ töpö mönama maapö, masa maka ha ĩ a pata säsäköma. Masa maka ha ĩ a õkama wani säsäköma maaki, waiha, 1.000 tökö inama kui tökö inama matalo nö, wani ipii a pata kusöa kõo paipali kitä. Tetepo mai ha a pata peama sapa kõo soata kitä.

⁴Ĩ na tä kua tä, ai kaikana tä hai ĩ lotami sa tiki taa nömönanöma. Ĩ tiki ha töpö lotile, ĩ töpö na Teusö aiki, ‑Ma tä makokama lätopököö!‑ ĩ na Teusö a kuuma. Ĩ na tä kua tä, Jesus ta wäsäö, Teusö a kai a wäsäö, ĩ na ai töpönö ta wäsä kuaö ha, ĩ töpö olai päpalö noai, ĩ õsi sa töpö taa nainanöma. Sai tä, sai tä ukutupö, ĩ na tökö kui tökö na Teusö a kai wäsä noai ĩ töpö aiki, ‑Ipa pata töpö sai‑ ĩ na ĩ töpö pi kuu pasio mai, ‑Teusö a hai, pata tä sai asawö‑ ĩ na töpö pi kuu noai ĩ sa töpö talalöma. Kama töpö hũko ha sai tä hilo wi ĩ tä sãökama sätäa mi, kama töpö ami ha tä sãökama sätäa mi, ĩ na tä kuoma. Ĩ töpö temöa kono nö, satehe epii, 1.000 tökö inama kui tökö inama na Cristo anö ĩ töpö kai kaikanamo naitioma. ⁵Ai töpö nomaso noai, ĩ töpö temö kõo paio maama. Ĩ 1.000 tökö inama mataso noai ha, ĩ töpö temöa nömöa konasoma. Ĩ 1.000 tökö inama kui tökö inama kolo kupo tä, Cristo a solo töpö kaikanamo naio piale, ĩ töpö temöa kõa somaso kitä. ⁶Ĩ töpö temöa kõa somaso wi ĩ töpö pi mönaha apa kitä. Teusö a thapo mai ĩ töpö noma sapa kõa pasiso kitä maaki, töpö temöa kõa somaso wi ĩ töpö noma kota mai kitä. Teusö a na ĩ töpö õsi sokapo mai kitä. Ĩ töpönö Teusö a, Cristo a, ĩ na kilii töpö täpä sinomo kitä. Satehe epii, 1.000 tökö inama kui tökö inama na Cristo anö ĩ töpö kai kaikanamo naitio kitä.

Koa taka pata na Sai tä sai pata säsäki wi ĩ ta

⁷Ĩ na tä kua tä, ĩ 1.000 tökö inama kui tökö inama maa toitalo nö, masa maka pata ha Sai tä sai pata õkama titipokili, ĩ a lisia kopamani pia salo. ⁸A lisia kopamani ha, hi masita tä uli pewö hamö töpö pilipai, ĩ kokö tili töpö, makokö tili töpö, ĩ na töpö kui, Sai tä sai patanö ĩ töpö pewö mönama pia salo, a huu hätäpoti kitä. A huu hätäpoti pamö töpö lulua hätäpoti nö, töpö wasu kai huu pia salo, töpö kokamomati kitä. Maa u kasö ha maka maka tä hãsiti katöle, ĩ maka maka tökö satehe kui na, ĩ na ĩ töpö satehe kuö.

⁹Masita tä uli hamö ĩ töpö wasu hulolö nö, Teusö a thapo wi ĩ töpö na ĩ töpö walokö tasoma. Töpö waloikitö nö, sai pö pata na Teusö a thapo wi ĩ töpö kuahale, Teusö anö ĩ töpö sai pö pi ipa wi, ĩ töpö sai pö kule ha ĩ wasu töpö waloikitö nö, sai pö sika hamö ĩ töpö lämo ãsokatima. Töpö lämo ãsoka soatia tä, Teusö anö koa taka pata kemanöma, ĩ wasu töpö pewö ĩsisoma.

¹⁰Ĩ na tä kua tä, Sai tä sai patanö töpö mönama apati noai, koa taka pata na ĩ a säsäki kitä. Sai tä, Teusö ta wäsä holisimo opa sinomo noai ĩ a, ĩ na töpö kui töpö temö soa tä, kosoto tuu pata ha koa taka, hösösöpö taka wakö, ĩ na taka kui taka hili polati, ĩ taka na töpö temö soa päla tä maaki, ĩ töpö säsäa waikikö noai, ĩ taka na Sai tä sai pata säsäa nömököma, koa taka patanö ĩ töpö peama mato mai kitä. Mumai ha, wakalai ha, töpö pea soatioö. Waiha töpö pea mapaso wi tä kua mi. Töpö pea soa pätioö.

¹¹Ĩ na tä kua tä, lotami ti ausi pata na kaikana tä pata lotile, ĩ sa tä talalöma. Masita tä uli, hutu mosökö pata, ĩ na tökö uli pewö pata kui, ĩ kaikana tä pata na ĩ tökö kuo naioma maaki, ĩ tökö pata tokösolöma. Tökö pata tokösolö noai, tökö tapa kõo maama.

¹²Töpö patamo wi ĩ töpö, töpö patamo mai ĩ töpö, ĩ na töpö kui töpö nomaso noai, ĩ lotami ti kotö pata ha ĩ töpö öpahale, ĩ sa töpö öpa talalöma. Ĩ tä, waheta tökö hãkopalöma. Tökö hãkopalö nö, Teusö anö töpö õsi temöa waikipamanö noai, ai tä waheta na ĩ töpö a hilo sãököa sätäle, ĩ tä waheta hãkoa naipalöma. Ĩ tökö waheta na sanöma töpö pewö kuati noai, ĩ tä sãököoma. Lotami ti na kaikana tä lotile, ĩ a patanö ĩ tä sãökama möö nö, ai töpö hosali, ai töpö täa kõa asali, ĩ na a pata kuatima. Hiopö tä thati noai ĩ töpö hosali, ai töpönö toitai tä thati noai, ĩ töpö pewö täa koni, ĩ na kaikana tä hai ĩ lotami ti na a lotile, ĩ na ĩ a kuama. ¹³Mötati tuu pata ha töpö nasi tupaso noai ĩ töpö, ai õsi töpö pewö, ĩ na töpö kui, kaikana tä hai ĩ lotami ti ha a pata lotile, ĩ a pata na ĩ töpö pewö waloköma. Ĩ ha ĩ töpö pewö waloköma tä, ĩ töpö pewö kuati noai, ĩ kaikana tänö ĩ tä pewö möö totio nö, ai töpönö hiopö tä thati noai ĩ töpö hosa pasili, ai töpönö toitai tä thati noai ĩ töpö täa kõa asali, ĩ na a pata kuama. ¹⁴Kosoto u mötali pata na koa taka pata hili soatile, ĩ taka pata na Teusö a thapo maa noai ĩ õsi töpö pewö säsäa pasiköma. Teusö a na ĩ töpö õsi koonö mi kutenö, ĩ koa taka pata hai, töpö noma konaso wi ĩ koa taka pata. ¹⁵Teusö anö töpö õsi temöa kõo waikipamanö noai, waheta tä na ĩ töpö a hilo sãököle, ĩ tä waheta na ai töpö a hilo sãököa sätäa mane, ĩ koa taka pata na ĩ töpö säsäköma.

Hutu mosökö tute, masita tä uli tute, ĩ na tökö kui tökö tute

¹Ĩ na tä kua tä, hutu mosökö tute, masita tä uli tute, ĩ na tökö kui sa tökö talalöma. Hutu mosökö, masita tä uli, mötati tuu pata, ĩ na tökö pata kui tökö pata tapamo soma noai, ĩ tökö pewö pata tapamo maa kopasoma. Ĩ tökö pewö pata maa totiköma. ²Ĩ na tä kua tä, Teusö a hai sai pö pata, Jetusalẽi tä uli a hilo wi, ĩ pö sai pata tutei, hi tä hẽtu hamö ĩ pö sai pata kuo laso wi, pö sai pata ithopaso lasoma. Töpö supasolasopö, suö tänö haloi ösö toita apii ösö halopo wi, ĩ ösö toita kui na, ĩ na Jetusalẽi tä uli toita kuoma. ³Ĩ tä uli itho lasoa tä, kaikana tä hai lotami ti ha lope epii ta haa tä, sa ta hinima. Ĩ ta pata haa nö, ‑Huki sanöma töpö na Teusö a pilio naio wi, huki tä kua kuleö! Ĩ töpö na Teusö a pilia naiki kitäö! Ĩ töpö hai, ĩ Teusö a hai ĩ töpö kupaso kitäö! Ĩ töpö na Teusö a kuo naio totio kitäö! ⁴Ĩ töpö na Teusö a kuiki nö, ĩ töpö mamo puu pewö sanöpali kitäö! Nomaso wi tä kua kota mai kitäö! Tä kua soma noai tä pewö maa totia waikitasoma kutenö, ĩ töpö pi ota apa haio wi ĩ tä, ö̃kö wi ĩ tä, ninia apa wi ĩ tä, ĩ na tä kui tä kua kota mai kitäö!‑ ĩ na ta pata kuuma.

⁵Ĩ na tä kua tä, kaikana tä hai ĩ lotami ti na a lotile, ĩ aiki, ‑Huki ĩ sa tä pewö tutepa totia kuleö!‑ ĩ na a kuu nö, kamisa na a hapalo nö, ‑Sa kuu pole, ĩ pitili tä sai a. “Teusö a kuu wi, ĩ tä holisi mi” wa pi kuupököö! Ĩ na wa pi kuu nö, sa kuu pole, ĩ tä pitili kutenö, tä sãökököö!‑ ĩ na a kuuma.

⁶Ĩ na a kuu nö, ‑Huki ĩ sa tä pewö thama waikio keheö! Aupa sa. Ômeka sa naiwö. “Aupa sa” ta kuu pole, “Kolo sa kuo soma noai ĩ sa” ĩ na ta kuu alu kule. “Ômeka sa” ta kuu pasile, “Ola sa kuo soatio kitä” ĩ na ta kuu naia kule. Ola tuu na maa tuu haapo polali, ĩ tuunö töpö õsi temöpama sinomo wi, ai tä amisi ipii tä na ĩ sa tuu noa mi koamani kitä.

⁷Kawa na Sai tä sai pata läo läatalo kule maaki, Jesus wa hosa mai, Sai tä sai pata na wa palupalo nö, wa kua tä, toitai tä na Teusö sanö wa täpäli kitä. Sa tä totoa piale, ĩ na ĩ tä kuö: Kamisa hai, au Teusö sa kuki kitä. Kawa hai, ipa ulu wa kupasoö. ⁸Töpö kilipalo sinomo wi ĩ töpö, Teusö a hosa wi ĩ töpö, hiopö tä thaa wi ĩ töpö, ai töpö säpa wi ĩ töpö, tiko tä suö nö thaa wi ĩ töpö, töpö õkamo wi ĩ töpö, “Teusö anö sa pasilipo sinomo wi ĩ a” ĩ na töpö pi kuu mai, “Hi ukutupö tänö sa pasilipo pasio wi ĩ tä ukutupö” töpö pi kuu pasio wi ĩ töpö, töpö holisimo wi ĩ töpö, ĩ na töpö kui, kosoto tuu pata ha koa taka, hösösöpö taka pata, ĩ na taka pata kui, ĩ taka pata hamö ĩ töpö pewö säsäki pia salo. Ĩ töpö noma sapa konaso kitä‑ ĩ na Teusö a kuuma.

Jetusalẽi tä uli tutei tä uli

⁹Ĩ na tä kua tä, 7 tasa tökö na 7 sanöma töpö pi peama kupaso wi, 7 ãju töpönö ĩ tuu wasu pi po pole, ĩ ai ãju tä waloikiso nö, kamisa na ĩ na a kuuma: ‑Hapo. Oweha a okalonö pusopö a täa piale, kawa na ĩ sa möma pia kuleö!‑ ĩ na a kuu ha, ¹⁰Teusö a õsi kua tolele ĩ anö sa pi thamaö ha, maa makö ösö öpii makö hemo pata hamö ĩ ãju tänö sa kai hemopasoolöma. Sa kai hemopaloolö nö, Teusö a hai ĩ Jetusalẽi tä uli mömama. Hi tä hẽtu pata hamö Teusö a kupoli, ĩ ha ĩ tä uli kuo laso noai, ĩ tä uli ithopasoma. ¹¹Teusö a möamö wakala kui na, ĩ na ĩ a sai möamö wakala pata kuoma. Maa ma noa apii, ĩ ma wakala sii hili hilimo kua wi na, jasöpi ma walala apii ĩ ma sii hili hilimo kua wi na, ĩ na ĩ tä uli wakö sii pata hili hilimo kuama. ¹²Ĩ pö sai kolo pewö pata hokolo ösöo opama. Lisito wi, 12 thaka taka holeo kuoma. Ĩ thaka taka kasö pewö hamö 12 ãju töpö öpaha hätähämo läoma. Ĩ thaka taka hẽtu pewö hamö isöhaeu töpö ola hilo noai, ĩ 12 töpö pata kui, töpö a hilo wi, ĩ tä sãökama pewö sätäo hätähoma. ¹³Ĩ tä uli kule, ĩ a sai pewö pata hokolole, ĩ tä na thaka taka pö holele, motokö huumö kua hena wi hamö ĩ hamö 3 taka holeamö kua, motokö wisamö kuto wi hamö, ĩ hamö 3 taka holeamö kua hö̃töa, ai tä hẽtu hamö 3 taka holeamö kua hö̃töa, ĩ ai tä hẽtu hamökö hö̃töwö 3 taka holeamö kua hö̃töa, ĩ na tä kuoma. ¹⁴Tä hokolole, ĩ tä komo ha 12 maa makö kui, makö patilia komoa kule. Ĩ makö hõo totoha hatukua soale, ĩ ha oweha a okalonö 12 töpö simönö noai, ĩ ma hõo ha ĩ töpö a hilo wi tä sãökama sälähäa hätäha kule.

¹⁵Kamisa na ãju tä hapalo noai, ĩ anö oto tä hii ti poma. Ĩ tinö sai pö kua wäa totile ha, ĩ ha tä wapaö, thaka taka pewö wapa hätäpoö, sai pö hokolo wi ĩ tä pata wapaö, ĩ na tä wapa kuapö ti poma. ¹⁶Sai pö öpa he wäo pa, ĩ ha 4 tökö kasö kui tökö kasö pewö wäo ösöho totio opa hö̃töoma. Ĩ tinö ĩ ãju tänö ĩ tä uli kasö pata wapa kuköma, ĩ tä uli kasö pata lapa apa tasoma. 2.200 kilômetötu tä uli kasö hẽtu pata wäo tasoma. Ĩ na tä kua tä, masita tä uli na sai a lape kui na, ĩ na sai pili a sika pata ösöo opa naio soata lasoma. ¹⁷Ĩ tä uli pewö pata wapapalö nö, ĩ ãju tänö tä wapa sinomo wi ĩ tinö tä pata hokolole, ĩ tä pata wapa nömöpalöma. Ĩ tä pata wapa nömöpalö noai, ĩ tä pata hauhuo opama. 64 metötu ta pata kuoma. Sanöma töpönö tä wapa thama wi na, ĩ na ĩ ãju tänö tä wapa thama hö̃töoma. ¹⁸Ĩ tä pata hokolole, maa makö noa apii, jasöpi makö a hilo wi, ĩ makönö tä pata hokoloma. Ĩ tä uli hai, oto tä sino pata kuoma. Ĩ oto tä uli lö kui, teia tä wakala kui na ĩ na ĩ pö sai pewö pata möamö kumoma. ¹⁹Tä pata hokolole, ĩ tä pata lototopö, komo hamö maa mapö kule, mapö toita apö, mapö noa apö, ĩ na mapö kui mapö kua komoa. Ai ma hai, ĩ jasöpi ma, ai ma hai ĩ sapiita ma, ai ma hai ĩ akata ma, ai ma hai esömetauta ma, ²⁰ai ma hai sahatoonika ma, ai ma hai saahasiu ma, ai ma hai kötisoolitu ma, ai ma hai petiilu ma, ai ma hai topaasiu ma, ai ma hai kötisoopötasu ma, ai ma hai jasĩtu ma, ai ma hai amesiisöta ma, ĩ na mapö a hilo kui mapö kua komoa. ²¹Tä pata hokolole, ĩ tä pata na thaka takapö holele, ĩ 12 thaka takapö holelea. Ĩ thaka takapö lahale, ĩ takapö pewö hamö petola mapö pewö kua hätähäa. Ai taka na sami ai ma, ai taka na sami ai ma, ai taka na sami ai ma, ĩ na ĩ takapö pewö na ĩ na tä pewö kua. Ĩ tä uli mötali pata na piliso hasule, ĩ oto tiso sino. Teia tä wakala kui na, ĩ na ĩ piliso pewö kuö.

²²Ĩ tä uli ha Teusömo wi ĩ sa sai tapa maama. Teusö pata tä lotete sati ipii ĩ a, oweha a okalo, ĩ na töpö kui, ĩ sai pö pewö pata hamö ĩ töpö kua waikia kutenö, Teusömo wi ĩ sai kuo maama. ²³‑Pili motokö siinö tä wakalapöö! Pilipoma a siinö tä wakala halupöö‑ tä kuu wi tä kua mai kitä. Teusö a wakalanö ĩ tä uli wakalamapo sisaö. Oweha a okalonö ĩ tä uli wakalamapo naio soataö. ²⁴Ĩ tä wakala na ĩ tä uli pewö hamö sanöma töpö pilipai, ĩ tä wakala na töpö pewö huu hätähäwö. Hi masita tä uli hamö kaikana töpö pewö pata kule, ĩ tä uli hamö ĩ kaikana töpönö wani töpö kai waloki pia salo. ²⁵Ĩ tä uli ha wakalai ha ĩ pö sai päka hãko soatioö. Mumi mumi tä kua mi ipö kutenö, ĩ pö sai päka laa mai kitä. ²⁶Hi masita tä uli pewö hamö töpö pilipai, ĩ tä uli ha ĩ töpönö kama töpö hai ĩ wani töpö kai walopa sinomo pia salo. Ĩ töpö walopa nö, ‑Hi tä uli toita apöö!‑ töpö kuu kitä. ²⁷Ĩ tä uli na sami sami tä kai lisipo mi, hiopö tä thaa sinomo wi ĩ töpö lisipo mi, töpö holisimo wi ĩ töpö lisipo mi, ĩ na ĩ tä uli hamö ĩ na tä kuaö. Oweha a okalo hai ĩ tä waheta na töpö õsi temöpamanö noai, ĩ töpö a hilo pole, ĩ tä sãökama kule. Teusö a hai ĩ sai pö pata ha ĩ töpö lisipo sisaö.

‑Lope epii sa huu kõo pia kuleö!‑ Jesus a kuu noai ĩ ta

¹Ĩ na tä kua tä, kamisa na ĩ ãju tänö pata u patanö sanöma töpö õsi temöpama sinomo wi, ĩ tuu möma nömöoma. Maa ma möamö walala apii ma möamö wakala kui na, ĩ na ĩ pata tuu möamö kuö. Kaikana tä pata hai lotami ti na Teusö a, oweha a okalo, ĩ na töpö kui töpö lotile, ĩ hamö ola tuu kuamö kua. ²Ĩ Teusö tä uli mötali pata ha piliso hasule, ĩ piliso mötali ha ĩ tuu hasua. Ĩ tä uli mötali pata ha tuu hasule, ĩ tuu kasö ha sanöma töpö õsi temöapama wi ĩ tiki öpaa. Ai tä pökatö masi hẽtu ha sanöma töpö õsi temöapama wi ĩ ai tiki öpa pökatöa hö̃töa soata lasoa. Ĩ tä inama pewö hamö 12 ĩ ti mokö lalo lalomo pi kupasoö. Ai pilipoma kuta tä, ai mokö lalo, waiha ai pilipoma kuta tä, ai mokö lalo kõo, pilipoma kökö pewö hamö ĩ na ĩ mokö lalo lalomo kua sinomo opatii. Sanöma töpö pewö toa konasopö, ĩ pili tiki hena. ³‑Wanisala wa tä thaa noai, ĩ tä noa na wa peama kitäö!‑ ĩ tä uli na Teusö a kuu wi tä kua mai kitä.

Kaikana tä pata hai lotami ti na Teusö a, oweha a okalo, ĩ na töpö kui töpö lotile, ĩ tä uli ha ĩ lotami ti pata hõtoa kule. Ĩ hamö Teusö anö töpö kalipalama sinomoti wi, ĩ töpö Teusömo soatio kitä. ⁴Ĩ töpönö Teusö a moikömö tapa soatio kitä. Ĩ töpö hũko ha Teusö a hilo wi ĩ tä sãökama sätäa. ⁵Ĩ hamö mumi mumi tä kua kota mai kitä. Teusö pata tänö ĩ töpö wakalapama sinomo kutenö, ‑Ipa koa sa taka sii hilimanöpököö!‑ ĩ töpö kuu mai kitä. ‑Motokö sii wakala haia kotamaköö!‑ tä kuu wi tä kua mai kitä. Teusö a solo ĩ töpö kaikanamo soatio kitä. Töpö kaikanamo mapo mai kitä.

⁶Ĩ na tä kua tä, kamisa na ĩ ãju tä aiki, ‑Sa ta wäsä pole, ĩ pitili tä sai a totiwa. “Ĩ pitili tä sai a totiwahaö!” töpö pewö pi kuupököö!‑ ĩ na a kuuma. Ĩ na a kuu nö, ‑Teusö a kai wäsä sinomo wi, ĩ töpö na Teusö pata tänö kama õsi kua tolele ĩ a totoma wi, ĩ Teusö anö kama hai ĩ ãju tä hai, ĩ kamisa hai, ĩ sa simöpalö nö, “Sa thapo wi, ĩ töpö na wa hulolö nö, huki tä kua piale, ĩ töpö na ĩ tä mömaö!” ĩ na Teusö anö sa noa thamaö!‑ ĩ na ĩ ãju tä kuuma.

⁷Ĩ na tä kua tä, Jesus aiki, ‑Pi naka. Lope epii sa huu kõo pia kuleö! Hi waheta tä na sa kai sãökama kule, ĩ wa ta hini totio wi, ĩ wa pi mönaha apa kitä‑ ĩ na Jesus a kuuma.

⁸Joãö sanö ĩ sa tä pewö a wäsähe, ĩ sa tä hinii, ĩ sa tä tapaö, ĩ na sa kuama. Ĩ sa tä hinii, ĩ sa tä tapaö, ĩ na sa kua nö, kamisa na ãju tänö ĩ tä pewö pata möma noai, ĩ kama pili amösökö öpahale ha, ĩ tä kotö ha pili sa maeko hĩta thaiki nö, sa mãi poiki nö, ĩ ãju tä na, ‑Pata wa saiö! Wa totiatalo opa asawöö!‑ sa moni kuu ke maaki, ⁹‑Naiö! Ĩ na kua tihöö! Kamisa kotö na wa mãi po maikiö! Kawa, au töpönö Teusö a thapo naio wi ĩ töpö, Teusö a kai a wäsä sinomo wi ĩ töpö, hi waheta tä na Teusö a kai sãökama kule, ĩ ta hini totio wi ĩ töpö, ĩ na makö kui, Teusö a na makö kalipalo sinomo kua wi na, ĩ na sa kua hö̃töo wi ĩ sa. Teusö a na wa mãi poiki nö, “Wa totiatalo opawöö! Pata wa saiö!” ĩ na Teusö a na ĩ na wa kuu sisaaö!‑ ĩ na ĩ ãju tä kuuma.

¹⁰Ĩ na a kuu nö, ‑Hi tä waheta na Teusö a kai sãökama kule, “Ĩ na tä kua pia kuleö!” ĩ na tä sãökama kuu pole, ĩ na ĩ tä kua totiopö tä ateo waikia kuleö! Önö kutenö, ĩ ta sosamapo tihöö! Ĩ tä pewö a wäsä hasulua totihoö! ¹¹Wanisala tä thaa wi ĩ anö wanisala tä thaa soatiopököö! Sami sami tä thaa wi ĩ anö sami sami tä thatati pasiopököö! Toitai tä thaa wi ĩ anö toitai tä thaa soatio asapököö! Teusö a na ai tä ausipamonaso wi, ĩ a ausio soatio asapököö!‑ ĩ na ĩ ãju tä kuuma.

¹²Ĩ na tä kua tä, Jesus aiki, ‑Pi naka. A sömöka taikö. Lope epii sa huu kõo pia kuleö! Makö kuati noai, ĩ makö na ĩ sa tä noa totoki pia salo, ĩ sa tä noa kai huu pia kuleö! ¹³Aupa sa. Ômeka sa naiwö. Kolo sa kuo soma noai ĩ sa. Ola sa kuo soatio kitä. Sa kua kõhone ĩ sa.

¹⁴Ai tä aiki, “Hii ti mokö oalö nö, töpö õsi temöo wi ĩ sa mokö oa pi topa kuleö! Teusö tä uli hokolopoli, ĩ ha thaka taka holepoli, ĩ taka ha sa lisipo pi topa kupoliö!” ĩ na ai tä pi kuu salo, kamanö kama hai ĩ haloi ösö uni salupalöma, wanisala tä hosalöma, ĩ a pi mönaha apa kitä. ¹⁵Ĩ tä uli atu pata hamö ai töpö kuo pasitio pia salo. Sami sami tä thati wi ĩ töpö, õkamoti wi ĩ töpö, hiopö tä thati wi ĩ töpö, ai töpö säpa wi ĩ töpö, “Teusö anö sa noama wi hi ĩ a” ĩ na töpö pi kuu mai, “Hi tä ukutupönö sa noama pasio wi, hi ĩ tä ukutupö pasiwö” töpö pi kuu wi ĩ töpö, töpö holisimo opati wi ĩ töpö, töpö holisi wäo wi ĩ töpö, ĩ na töpö pewö kui töpö lisipo pasio mai kitä.

¹⁶Makö Teusömo pia salo, makö kokamo sinomo wi ĩ makö pewö na Jesus sanö ipa ãju sa tä simöpalö nö, “Sa ta wäsä pole, ĩ töpö na ĩ ta wäsä tolea nömöo kölöö!” ĩ na ipa ãju sa tä noa thama. Kaikana tä Davi a hai, ĩ sa ola. Tä halu wakalaalö pamö sitikali a wakala apii sitikali a kupoli, ĩ kamisa waikiwö‑ ĩ na Jesus a kuuma.

¹⁷Teusö a õsi kua tolele ĩ a, peanopö anö pusopö a täa piale ĩ pusopö a, ĩ na töpö kui töpö aiki, ‑Hapo‑ ĩ na töpö kuu. Ĩ wa ta hini pole, ‑Hapo‑ wa kuu naiopö. Wa amisi ipii, wa huoki solöpököö! Maa tuunö töpö temöo soatio wi, Teusö anö noa mi ĩ tuu totoma wi, ĩ wa tuu täa pi topa tä, wa huoki solöpököö! ¹⁸Hi tä waheta na Teusö a kai wäsä pole, ‑Ĩ na tä kua totio pia kuleö!‑ tä kuu wi, ĩ ma ta hini pole, ĩ makö na ĩ na sa kuu kule: ‑Hi waheta tä na ta wäsä waikila tä, ai wanö ai tiko wa ta wäsä sätäa naiköma, Teusö anö wa peama apa kitä. Teusö anö sanöma töpö peama piale, hi waheta tä na ĩ ta wäsä pole, ĩ töpö peama kua piale na, ĩ na Teusö anö wa peama kua naio kitäö! Wa pi saimo päo nö, wa ta wäsä sätäa naioö ha, Teusö anö wa peama naio kitäö!

¹⁹Ĩ na tä kua tä, hi waheta tä na Teusö a kai wäsä pole, ai wanö ai wa tä uni sanöa kopali ha, “Hii ti mokönö sanöma töpö temöo soatio kitäö!” ĩ na hi waheta tä sãökama kuu wi, ĩ wa ti mokö oa pia wi, Teusö anö ĩ tä uni sanöa kõa hö̃töpali kitä. “Teusö tä uli na ĩ töpö lisipasopököö!” ĩ na tä sãökama kuu naio wi, ĩ tä uli na wa lisipo piale, ĩ tä uni sanöa kõa naipali kitä‑ ĩ na sa kuu kule.

²⁰Tä kua totio piale, Jesus anö ĩ ta wäsä pole, ĩ aiki, ‑Awai. Lope epii sa huu pia saloö!‑ ĩ na ĩ a kuu kule. Ĩ na tä kuapöö! Jesus a pata! Lope epii a huoki solöö!

²¹Jesus pata tänö makö pewö noa mi totiapala apa wi ĩ sa tä pii totia kule.