Filipenses

Filipenses

Hiliposö tili töpö na waheta tä simöpalö noai ĩ ta

Paulo anö hiliposö tili töpö na Jesus ta wäsä somama. Ta wäsäö ha, ai hiliposö tili töpönö ĩ ta hinia totilö nö, ai tiko tä uli ha Paulo a hua konasolö noai ha ĩ hiliposö tili töpönö Jesus a thapoma kutenö, ĩ töpö kokamo sinomo haioma. Ĩ töpö kokamo sinomoti noai, ĩ töpö na Paulo anö hi waheta tä simönöma.

Hi waheta tä na ĩ na Paulo a kuuma: ‑Jesus Cristo sa ta wäsä sinomo kutenö, ai töpönö sa peama apa kuleö! Awai. Kamakönö Jesus Cristo ma thapo kutenö, Teusö a thapo mai ĩ töpönö makö wanipo naiki kitäö! Ai töpönö makö wanipo nö, makö peama tä, pö kasiapalo totioö!‑ Paulo a kuuma. A kuu nö, ‑Ai töpönö Cristo ta wäsä makoka totio mi tä, töpö a hini tihöö!‑ a kuu nömöo nö, ‑Jesus Cristo ma thapo pasile, ĩ makö pewö noimaso pasiopököö!‑ a kuu naioma.

Ĩ na Paulo a kuu nö, hiliposö tili töpö na Paulo a pi mönaha apa salo, hi waheta ola tä na a hapalo nö, ‑Sa honimo opa tä, hiliposö tili makönö sa pasilipo nö, kamisa na sitipa ma kökö simöpalö noai, ĩ tä topa apama‑ ĩ na Paulo anö tä sãököpalö nö, ĩ na a kuuma.

¹Paulo sa. Jesus Cristo a na hiliposö tili makö pewö kua koka naio wi, ĩ makö na Timóteo a solo hi waheta sama tä simöpali ke. Jesus Cristo anö samakö kalipalama sinomo wi ĩ samakö. Jesus a thapo wi ĩ töpö pewö na ai makö patamo sinomo wi ĩ makö, ai makönö Jesus a thapo wi ĩ ma töpö pewö pasilipo sinomo wi ĩ makö, ĩ na makö kui makö na hi waheta sama tä simöa naipali ke. ²Kamakö hai ĩ pö̃ Teusö a, Jesus Cristo pata tä, ĩ na kilii töpö na ĩ na sa kuu: ‑Hiliposö tili töpö pewö totiapala apaö! Ĩ töpö pi topapalama apaö!‑ ĩ na sa kuu.

Teusö a na Paulo a hapalo noai ĩ ta

³Kamakö na sa pi tapomo sinomoö. Sa pi tapomo nö, ‑Aitaköö! Ĩ töpö topa apa thaliö!‑ ĩ na ipa Teusö a na ĩ na sa kuu sinomoö. ^4-5Jesus sa ta wäsä tä, kamakönö sa pasilipo sinomoö, Jesus ma ta wäsä naio sinomoö, ĩ na makö kua thali. Jesus ma thapo tute tä, ĩ na makö kuatima, ĩ na makö kua soaö. Ĩ na makö kua soaö ha, Teusö a na makö a wäsä nö, sa pi mönaha apöki nö, makö a wäsäö. ⁶Kamakö õsi na Teusö anö toitai tä thakö noai, Jesus Cristo a huu kõo paio mi tä, Teusö anö toitai tä thaa soatio kitä. Jesus a huu kõa tä, kamakö õsi na toitai tä thaa hötötöki kitä. Ĩ pitili tä sai a. ⁷Kamisanö makö pi ipa kutenö, ĩ na sa kuu kule: Pi naka. ‑Jesus a kai holisi‑ ai töpö kuu pi wasöaö ha, ‑Naiö! Pitili tahaö!‑ ĩ na sa kuu hö̃töa kule. ‑Awai. Jesus a kai pitili‑ ĩ na sa töpö pi thama sinomoö. Ĩ na sa töpö pi thama tä, Teusö anö sa totiapalaö. Huki, hi sai a lototole, ĩ a sai ha sa titia kule maaki, Teusö anö sa totiapalaö. Sa totiapala apati tä, Teusö anö makö totiapala naia kule. Ĩ na tä kuaö ha, kamisanö makö pi ipaö. ⁸Jesus Cristo anö makö pii kua wi na, ĩ na kamisanö makö pii kua hö̃töoö. Pitili ta. ‑Ĩ pitili ta‑ Teusö a kuu naioö.

⁹Teusö a na sa hapalo nö, ‑Hiliposö tili töpö noimaso palasopö, tä thapalöö! Töpö pi hatukua apöki nö, töpö pi tao opa wi, ĩ na töpö pi hatukua thaa naipamanöö!‑ ĩ na sa kuu. ¹⁰Ĩ na Teusö anö makö thamaö ha, tä toita sati ipii, ĩ ma tä saili kitä. Tä toita sati ipii, ĩ ma tä sailöma, Cristo a walo kõa tä, kamakö na wanisala tä kupo mai kitä. ‑Wa wanisala apapiliö!‑ Cristo a kuu mai kitä. ¹¹Kamakö õsi na Jesus Cristo a kalipalo waikia kutenö, toitai ma tä tha apa kitä. Toitai ma tä tha apaö ha, ‑Teusö a hai, ĩ pata tä sai. Ĩ a totiatalo opa asaö‑ ĩ na ai töpö kuu kitä.

Cristo a na sa nokapalo pi topa sisaö

¹²Ipa pö! Pi naka. Titita wi a sai ha sa titiköma kutenö, Jesus a thapo wi ĩ töpö satehea apa kimati. ¹³Ĩ na tä kuaö ha, kaikana tä sai pö ha sotatu töpö läo sinomo wi ĩ töpö, ai töpö pewö solo, ‑Paulo anö Cristo a kai wäsä sinomoö ha, a titiköma‑ ĩ na ĩ töpö pewö pi kupalo opama. ¹⁴Hisimö sa titia salo, Jesus a thapo wi ĩ ai töpö satehe epii töpö kili mai, ĩ töpönö Teusö ta wäsä kule. Ĩ töpö wäo kili noai, Teusö anö ĩ tä mapamanöma kutenö, töpö kili mai, Teusö ta wäsä kule.

¹⁵Ai töpö aiki, ‑Paulo anö ta wäsä wi, ai satehe epii töpönö ĩ ta hini silia apa sisatio saiö!‑ ĩ na ai töpö pi kuu salo, ĩ töpönö Paulo sa hĩsu thaa pasioö. Sa hĩsu thaa pasio nö, ‑Paulo anö Cristo ta wäsä lotetea apa asa thali maaki, huki kamisanö sa ta wäsä asa kuleö!‑ ĩ na ai töpö pi kuu nö, Cristo ta wäsä kule. Ĩ töpönö sa hĩsu thaa nö, Cristo ta wäsä kule maaki, ai töpönö Teusö ta wäsä pi topa apa salo, ĩ töpönö Cristo ta wäsä kule. ¹⁶‑“Cristo ta pitili” ĩ na töpö pi thama pia salo, Teusö anö Paulo a simönöma‑ ĩ na ĩ töpö pi kuu nö, sa pi ipa salo, ĩ töpönö Cristo ta wäsä nömöa kule. ¹⁷‑Sa hĩsu thaa nö, ai töpönö Cristo ta wäsä kule‑ sa kuuhe, ĩ töpö patamo pi topa päa salo, ta wäsä päa kule. ‑Paulo a titila tä, Cristo sa ta wäsä pasioma, “Häö. Wi na taköö!” Paulo a pi kuu nö, a pea kitä‑ ĩ na ĩ töpö pi kuu päoö.

¹⁸Ĩ nakö pälaö! Kamisa aiki, ‑Wi na takö a?‑ sa pi kuu mai kitä. Hi ai töpönö sa pi ipa salo, Cristo ta wäsäö, ĩ na tä kua tä, ai töpönö sa hĩsu thaa salo, Cristo ta wäsäö, ĩ na töpö kua päla tä maaki, ĩ töpönö Cristo ta wäsä salo, sa pi mönaha satia apa kule. ¹⁹Awai. Sa pi mönaha apa kitä. Teusö a na makö hapaloö, Jesus Cristo a õsi kua tolele ĩ anö sa pasilipoö, ĩ na sa kua salo, ‑Sa lisia kopamani kitäö!‑ ĩ na sa pi kuu nö, sa pi mönaha kule. ²⁰‑Paulo a wani tomöpo mi ipö saiö!‑ ĩ na sa töpö pi thama wani ipö sai. Sa kili mai ha, sa kuatipili na, huki ĩ na sa kua soaö. Ĩ na sa kua soa nö, ‑Paulo a kuati pole, ĩ ma tä taa nö, “Cristo a topa apaö” ĩ na makö pi kuu kuleö!‑ ĩ na sa töpö pi thama pi topa apa sisaö. Sa temö tä, ĩ na sa töpö pi thamaö, sa nomasoma maaki, ĩ na sa töpö pi thama satia soaö, ĩ na sa töpö pi thama pi topa apaö. ²¹Sa temö tä, Cristo a na sa nokapalo pi topa apa sisaö. Sa nomano nö, Cristo a na sa kuo totio naitio kitä. Ĩ na tä kua kutenö, sa nomaso wi ĩ tä topa satia apa. ²²Ĩ tä topa satia kule maaki, sa noma paio mi tä, Cristo a na sa kalipalo nö, Cristo a na ai töpö satehe epii sa töpö nokapalama kitäö! Önö kutenö, ka pi sa tä sailöpö taka? Sa temötio wi ĩ sa tä saia hãtolöpö? Sa nomaso wi ĩ sa saia hãtolöpö? Sa tä sai tai mi ipö. ²³Sa noma pi topa kule maaki, sa temötio wi, ĩ sa tä pi hö̃töa kule. Sa konasolöma, Cristo a na sa kutio kitä. Cristo a na sa kutio wi ĩ tä topa satia apa kutenö, sa kõo pi topa apaö. ²⁴Sa kõo pi topa apa kule maaki, kamakö na Cristo sa ta wäsä paio pia salo, sa noma paio mai kitä. Sa nomasoma, wi na makö kua haiopö? ²⁵‑Ĩ pitili ta‑ ĩ na sa pi kuu salo, ‑Sa noma paio mai kitäö!‑ ĩ na sa pi kuu. Kamakö na sa kutiköma, makö õsi õsitioma maaki, makö õsi pataso kitä. ‑Cristo a pitili‑ ĩ na makö pi kuu totio nö, makö pi mönahapalo opati wi, kamisanö ĩ na makö thama pia salo, kamakö na sa kutio kõo kitä. ²⁶Önö kutenö, Jesus Cristo ma thapo salo, kamakö na sa kua kõköma, makö pi mönaha apa kitä. Jesus Cristo anö sa noama waikioma kutenö, makö pi mönaha apa kitä.

²⁷Pö sömöka taa totikiö! Cristo ta topa apöle ĩ ta hinia totilöheö! Ma ta hinia totilöma, Cristo ma hula mai kitä. ‑Cristo a kuu noai, ĩ na makö pewö kua totiatalo opapököö!‑ ĩ na makö kuu kitä. Makö pewö kasiapalo nö, Cristo ma ta hini sinomo nö, Cristo ma ta wäsä satimo opa kitä. Ĩ na makö kuaö ha, kamakö na sa waloa kõköma, ‑Makö kasiapalo opa noa‑ ĩ na sa kuupököö! Kamakö na sa walo paio mi päla tä maaki, ‑Hiliposö tili töpö kasiapalo opa thaliö!‑ ĩ na sa tä kuu hininönöpököö! ²⁸Makö wanipo sinomo wi ĩ töpö na pö kili ti! Makö kili mi ha, makö wanipo wi ĩ töpö aiki, ‑Teusö anö ĩ töpö noama asa salo, ĩ ma töpö utitipama mai kitä. Teusö anö makö utitia pasipamani kitäö!‑ ĩ na ĩ töpö pi kuu kitä. ²⁹Cristo a na makö nokapalo wi ĩ makö na Teusö aiki, ‑“Cristo a pitili” ĩ na makö pi kuu totiopököö!‑ kamakö na ĩ na Teusö a kuu asaö. ‑Cristo ma thapo salo, ai töpönö makö peama kuki kitä!‑ ĩ na kamakö na Teusö a kuu naio asaö. ³⁰Cristo sa ta wäsätima kutenö, makö mamo tetela tä, ai töpönö sa peama kipili. Sa peama kipili maaki, Cristo sa ta wäsä satimo kipili. ‑Paulo a peama kule maaki, Cristo ta wäsä satimo kulaliö!‑ ĩ na ma ta kuu hini soa kule. Kamisa kua pole na, ĩ na makö kua hö̃töa kule.

Cristo anö makö pasilipali pia salo, sanöma tä kupaso noai ĩ ta

¹Pi naka. Cristo a na makö koka kutenö, makö õsi lotetea apaö. Cristo anö makö pi ipa salo, makö pi topapalama apatii. Kamakö pewönö Teusö a õsi kua tolele, ĩ ma õsi thapo waikia. Ai tä pea tä, ‑Ĩ a wani pea päo‑ makö pi kuu mai, ‑Häö. Ĩ a wani pea saile taköö!‑ ĩ na makö pi kuu sinomoö! ²Pö hapalo isi waniho soatalo opa tihöö! Pö pewö noimaso totihoö! Makö pi wasöa mai, ‑Awai. Ĩ na makö pewö kuapököö!‑ ĩ na pö kuu ösöho totiataloö! Ĩ na makö kuaö ha, sa pi mönaha apa kitä. ³‑Samii kamisa pi mönahapalo kuköpö, sa tä thamatii‑ ĩ na makö pi kuu mai, ‑Ai töpö pi mönahapalo naio kuköpö, sa tä thama kuleö!‑ ĩ na pö pi kuu totihoö! ‑Kamisa na ai töpö aiki, “Wa totiatalo opawö” ĩ na ai töpö kuupö, sa tä thama päa kule‑ ĩ na pö pi kuu ti! ‑Kamisanö sa tä taö öpa asa sisaö‑ ĩ na makö pi kuu maiki. ‑Ĩ töpönö tä taö öpa naio soataö‑ ĩ na pö pi kuu totihoö! ‑Kamisa na ĩ a topa satia apa‑ ĩ na makö pi kuupökö. ⁴‑Samii kamisanö sa tä thaa pi topa wi ĩ sa tä pii sisaö‑ makö pi kuu mai, ‑Ai töpönö tä thama pi topa wi ĩ sa tä pi ipa naia kule‑ ĩ na pö pi kuu totihoö! ⁵Cristo a pi tapomo kua noai na, ĩ na pö pi tapomo kua totihoö!

⁶Teusö a kui na, ĩ na Cristo a kuoma maaki, ‑Teusö a kui na, ĩ na sa kuö salo, sanöma sa kupo mai kitäö!‑ ĩ na Cristo a pi kuu maama.

⁷‑Teusö a kui na, ĩ na sa kuö maaki, sanöma sa kupasopököö!‑ ĩ na a pi kuuma. A pi kuu nö, ai töpö na ai tä kalipalo sinomo kua wi na, ĩ na sanöma makö na Jesus Cristo a kalipalo kua pia salo, sanöma tä kupasoma. Sanöma tä mömomö kui na, ĩ na Cristo a mömomö kuo totio opa hö̃töoma.

⁸A patamo pi topa mai ha, Teusö a hini pi topa apa sisa salo, a säpamonasoma. Hii ti pakalai ti ha a säpamonasoma.

⁹Ĩ na Cristo a kuaö ha, ‑Pata wa sai kupasopöö!‑ ĩ na Cristo a na ĩ na Teusö a kuu nö, ‑Ai töpö pewö na wa kaikanamo totiopöö!‑ ĩ na Teusö a kuuma.

¹⁰Ĩ na Teusö a kuuma kutenö, ‑Jesus a hai, ĩ pata tä sai‑ ĩ na töpö pewö kuu kuki kitä. Hi tä hẽtu pata ha töpö kuo wi ĩ töpö, masita tä uli ha töpö kuo wi ĩ töpö, töpö noma waikiso noai ĩ töpö, ĩ na töpö kui töpö loiki nö, pili töpö maekonö töpö hĩta thaiki nö,

¹¹‑Jesus Cristo a hai, ĩ pata tä sai‑ ĩ na ĩ töpö pewö kuu kuki kitä. Ĩ na töpö pewö kuu nö, kamakö hai ĩ pö̃ Teusö a na, ‑Wa topa apa asawöö!‑ ĩ na ĩ töpö pewö kuu kuki kitä.

Motosi topa kua wi na, ĩ na makö topa kuki wi ĩ ta

^12-13Ipa pö! Pi naka. Sa hiniö! Kamakö na sa kuopili, ĩ tä Cristo ma kai hini kipili. Huki kamakö na sa kua mi tä, Cristo ma kai hini totihoö! Kamakö õsi na Teusö a kalipalotii. ‑Ĩ na wa kuapököö!‑ a kuu tä, ‑Hai. Awai. Ĩ na sa kua pi topaö‑ ĩ na Teusö anö makö pi thamaö. Ĩ na tä kua tä, ‑Ĩ na wa kuapököö!‑ ĩ na Teusö a pata kuu ha, ĩ na wa kua hö̃töo kuki wi, ĩ na Teusö anö makö thama hö̃töoö. Önö kutenö, ‑Teusö a na sa kili salo, wanisala sa tä thaa wani ipö saiö!‑ ĩ na pö pi kuu! Jesus ma thapo salo, makö kasiapalo nö, Jesus a kua noai na, ĩ na makö kua totiopököö!

¹⁴Pö hapalo pi hĩsuho soatalo tihöö! Makö hapalo hẽtupaso pi hĩsuho soatalo opa maikiö! ¹⁵Makö hapalo makoka apaö ha, ai töpönö makö a kateha nö, ‑Ĩ töpö tomöpo mi‑ ĩ na ĩ töpö kuu mai kitä. Hiopö tä na töpö pi tapomo sinomo wi ĩ töpönö wanisala tä tha apati wi ĩ töpö na makö kua sätäa naine, ĩ makönö toitai ma tä thaa asaö. Teusö ulupö makö asa kutenö, mumi mumi tä na motosi topa kuo wi na, ĩ na makö kua asaö. ¹⁶Ĩ na makö kua asa salo, töpö õsi palimipo wi ĩ ma ta wäsä sinomoö. Ĩ na makö kuaö ha, Cristo a walo kõa tä, kamisa aiki, ‑Sa kasiapaloma maaki, töpö tomöpo ma thaliö!‑ sa pi kuu mai, ‑Aitaköö! Kamisa kasiapalo nö, hiliposö tili töpö na Cristo sa ta wäsäma kutenö, ĩ töpö topa apaö‑ ĩ na sa pi kuupökö.

¹⁷Teusö sa pi mönahapamani pia salo, sa kasiapalo nö, kamakö na Cristo sa wäsä kipili. Pi naka. Sutu ha ai töpönö Teusö a pi mönahapamani pia salo, Teusö a na salo a noki totoma sinomotima. Huki, ‑Cristo a pitili‑ ĩ na makö pi kuu wi, ĩ tä na Teusö a pi mönaha sisaö. Teusö sa pi mönahapamani pia salo, ‑Cristo a pitili‑ ĩ na makö pi kuu wi, kamisanö ĩ makö thapali kipili. Ĩ makö thapalöma kutenö, ai töpönö sa wanipo kipili. Sa wanipoö ha, kamisa aiki, ‑Sa säa hãtopali kitäö! Teusö a na salo a noki totoköpö, ĩ tä hösöka na upa mo puu lösa sinomo kua noai na, ĩ na sa iä uni lösa kua hãto kitä. “Cristo a pitili” ĩ na hiliposö tili sa töpö pi thama noai, ĩ tä hösöka ha sa iä uni löa hãtoki kitä‑ ĩ na sa pi kuu kule. Ĩ na sa pi kuu kule maaki, sa pi topaiki nö, kamakö na sa pi mönaha apa kule. ¹⁸Kamakö na sa pi mönaha kule na, ĩ na kamisa na pö kua hö̃tökiö!

Timóteo a, Epapötotiito a, ĩ na töpö kui töpö

¹⁹Ĩ na tä kua tä, Jesus Kaikana aiki, ‑Awai‑ a kuu ha, kamakö na Timóteo sa simöpa pia kule. Timóteo sa simöpalöma, waiha kamisa na a kopo nö, ‑Ĩ na hiliposö tili töpö kua thaliö!‑ ĩ na Timóteo a kuu ha, sa pi mönaha apa kitä. ²⁰Kamisa pi tapomo kuati wi na, ĩ na Timóteo a pi tapomo kua naitioö. Ĩ na ai tä kua mai kitä. Ĩ na Timóteo a kua naio sisaö. Makö tomöpo mi tä, kamakö na sa pi honipo kua wi na, ĩ na Timóteo a pi honipo kua naio nö, makö pasilipo pi topa apa kitä. ²¹‑Ipa wani tä na sa kalipalo pi topa sisaö. Jesus Cristo a na sa kalipalo wani ipö saiö!‑ ĩ na ai töpö pewö pi kuu. ²²Ĩ na Timóteo a kua pasio mai kitä. A topa apaö. A topa apa wi ĩ ma tä taö waikia kule. Pö̃ a na ulu a wai nokapaloti kua wi na, kamisa na ĩ na Timóteo a kuatii. Ĩ a solo, Jesus ta topa apöle, ĩ sama ta wäsä sinomoö. ²³Ĩ na Timóteo a kuaö ha, ‑Waiha, sotatu töpö aiki, “Pei. Ĩ na wa kuapö” ĩ na kamisa na ĩ na sotatu töpö kuu ha, kamakö na Timóteo sa simöni kitä‑ ĩ na sa pi kuu kule. ²⁴‑Awai‑ Jesus Cristo a kuu ha, ‑Tä tetepo opa mai ha, kamakö na sa huu hö̃töo pia kuleö!‑ ĩ na sa pi kuu kule.

²⁵Kamakö na Epapötotiito sa simöa naia kõki pia salo. Kamakö aiki, ‑Paulo a pasilipalöö!‑ ĩ na Epapötotiito a na makö kuu nö, kamisa na ma simöpalöma. Ĩ a na, ‑Ipa hoosa a‑ sa kuu. Ĩ a solo samakö kasiapalo nö, Cristo sama ta wäsä satimo opa thali. Huki ĩ sa simöa kõki pia salo. ²⁶Epapötotiito anö makö pewö pi ipa salo, kamakö na a kõo pi topa apa. ‑Epapötotiito a salipasoma thaliö!‑ ĩ na ma tä kuu hininöma, Epapötotiito a pi honipo kule. ²⁷Ma ta hini noai, ĩ pitili ta. A salipalo nö, a moni hotesoma. A moni hotesoma maaki, ‑Ĩ na a kua päo‑ Teusö a pi kuu maama. A salia tä, sa pi ota apama. A nomasoma aköna, pe epii sa pi honipo opa noa kipi. ‑Paulo a pi honipo opa matimö‑ ĩ na Teusö a pi pata kuu nö, Epapötotiito a toa komanöma ²⁸Ĩ na tä kuaö ha, kamakö na Epapötotiito sa simöpa pi topa kõa kule. Ĩ ma taa konanöma, makö pi mönaha apa kitä. Makö pi mönaha apaö ha, sa pi ota mataso kitä. ²⁹Ĩ na tä kuaö ha, kamakö na Epapötotiito a kopöma, Jesus a thapo naio kutenö, ‑Aitaköö!‑ makö pi kuu nö, ma totiapala totio opapököö! Epapötotiito a kua wi na, ĩ na ai töpö kua wi ĩ töpö totiapala opapököö! ³⁰Kamisa na makö kua naio maama kutenö, Epapötotiito anö sa pasilia pasipalöma. Ĩ a solo, Cristo a na samakö kalipaloma. Cristo a na samakö kalipalotima salo, a moni nomasoma. ‑Sa nomaso kitä maaki, Cristo a na sa kalipalo satimo opa kitäö!‑ ĩ na Epapötotiito a pi kuuma.

‑Cristo a pitili‑ wa pi sai kuu tä, Teusö anö wa totia totipali wi ĩ ta

¹Ipa pö! Sa tä sãöka hötötöpo paio mai ha, ĩ na sa kuu pia kule. Sa kuu piale, kamakö na ĩ sa ta kateha waikioma maaki, ‑Ĩ sa tä sãöka kõo wani ipöö!‑ ĩ na sa pi kuu mi. Makö noama pia salo, ĩ sa tä sãöka pi topa satia kõa kule. Teusö a na makö koka kutenö, pö pi mönahaikiö!

²Pi naka. Ĩ na ai töpö kuu: ‑Pili wa isi ola ösö hosapamo mi tä, ĩ Teusö ulupö wa mai kitäö! Teusö a na wa tomöpo mai kitäö!‑ ĩ na ĩ töpö pi wani hole kuu nö, pili makö ösö waniapa pi topaö. Pole tä wani kuopa wi. Ĩ töpö wanisala apawö. Ĩ töpö na pö pi mosaia totikiö! ³‑Pili wa ösö hosalöma, Teusö a na wa topa sisaö‑ ĩ na ai töpö kuu kule maaki, ĩ töpö holisimo opaö. Pili wa õsinö wanisala tä thaa pi topa apa wi, Teusö anö ĩ tä hosalöma, toitai wa kua sisaki. Pili makö ösö na kuno mai, pili makö õsi na Teusö a kalipaloma kutenö, Teusö a na makö totia apöpasoö. Teusö ma õsi pata thapo kutenö, makö Teusömo sinomo wi ĩ makö. Jesus Cristo a na makö koka kutenö, makö pi mönaha apaö. ‑Pili makö ösö hosapamoa pälasoma, Teusö a na makö toita mai kitäö!‑ ĩ na makö pi kuu. ‑Hösöka pili makö kuati päoö ha, makö totipo mai kitäö!‑ makö pi kuu kule. ⁴Jesus Cristo a thapo pasio mai, ĩ töpö aiki, ‑Hösöka pili sa kua päa kule maaki, sa kua pole ĩ sa topa waikia kule‑ ĩ na töpö kuu wi, ĩ ta pitilia aköna, kamisa aiki, ‑Hösöka pili sa kua päa kule maaki, sa kua pole ĩ sa topa waikia kule‑ ĩ na sa pi kuu naina pi. Ai töpö na sa totiatalo satia apa asala pi. ⁵Sa ose kupaso noai ha, kamisa na 8 tä mumi kua waikia tä, juteu sa kutenö, pili sa isi ösö ola hosapamonasoma. Isöhaeu, epöteu sa hilo kua naine ĩ sa. Pẽijamĩ tili sa. Ipa hao a, ipa nao a, ĩ na kilii töpönö epöteu töpö kai thaa nö, ĩ kama töpö kai sai kuoma. Epöteu kama töpö kai sai a hö̃töwö, kamisa kai sai a hö̃töwö, ĩ na samakö kai a kuapaloma. Moisés a kai a hini totio wi, ĩ patiseu töpö a hilo wi ĩ ai sa. ⁶Sa kasiho opama salo, Jesus a thapo wi ĩ sa töpö peamatima. Moisés anö pata töpö noa thaa noai, ĩ sa ta hini totio opama. Ai töpönö sa kateha nö, ‑Saulu anö Moisés a kai a hini mi salo, wanisala tä thatala apaö‑ ĩ na ai tä pi kuu mosawio wi ai tä kuo maama. ⁷‑Ĩ na sa kuati kutenö, Teusö a na sa topa apaö‑ ĩ na sa pi hole kuu paio kipili maaki, ‑Ĩ na sa kuatima maaki, Teusö a na sa tomöpo mi ipöö!‑ ĩ na sa pi kuu nömöa kule. Cristo sa thapo pi topa kutenö, ĩ na sa pi kuu nömöa kule. ^8-9Awai. Ipa Jesus Cristo Kaikana sa taö wi ĩ tä topa satia salo, ‑Cristo sa thapo mi tä, hösöka sa kua pätio wi ĩ tä pewö topa mi‑ ĩ na sa pi kutii. Cristo sa tälö nö, ĩ a na sa koka naiki nö, ĩ na sa kua pia salo, Cristo sa thapo mi tä, ĩ tä, sa tä thama päo noai, ĩ sa tä pewö hosalöma. ‑Wanisala tä hosa wi, ĩ nasimö tä kui na, sa kuati noai, ĩ na ĩ tä pewö kuö‑ ĩ na sa pi kuu nö, ĩ sa tä pewö hosalöma. ‑Moisés sa kai a hininöma, Teusö aiki, “Wa toita apö” ĩ na Teusö a kuu kitäö!‑ ĩ na sa pi kuu mai kitä. ‑Cristo a pitili‑ ĩ na sa pi kuu salo, Teusö anö sa totipali kitä. ¹⁰Cristo sa taö pi topa sisaö. Teusö anö Cristo a temöa komanöma, a lotete kupaso noai na, ĩ na sa lotete kupo pi topa hö̃töa kule. Cristo a pea kua noai na, ĩ na sa pea kua pi topa hö̃töoö. Cristo a noma tä, a kua noai na, ĩ na sa kua pi topa hö̃töoö. ¹¹‑Ĩ na sa kuama, sa nomaso noai maaki, Teusö anö sa temöa hö̃töa kopamani kitäö!‑ ĩ na sa pi ku upaö.

Paulo a kasiapalo opati wi ĩ ta

¹²‑Ĩ na sa kua waikia kuleö!‑ sa kuu mane. ‑Wanisala sa tä thatala mai, pe epii sa topa apa waikia kuleö!‑ ĩ na sa kuu mane. Ĩ na sa kuu mi sai maaki, sa kasiapalo opaö. Cristo anö sa täa konö noai, ĩ tä, Cristo aiki, ‑Toitai a kua totikiö!‑ ĩ na Cristo a kuuma. Önö kutenö, toitai sa kuo pi topa apaö. Toitai sa kuo pi topa apa kutenö, sa kasiapalo opaö. ¹³Ipa pö! ‑Wanisala sa tä thatala mai, pe epii sa topa waikia kuleö!‑ ĩ na sa pi kuu mai maaki, sa kuo paiopili, ĩ tä na sa pi motöa soatalo nö, ‑Ĩ na a kua totio nömöoö!‑ Cristo a kuu wi ĩ tä na sa pi wasiso opaö. ¹⁴Töpö läläapalo tä, noa tä täa pi topa salo, töpö kasiapalo kua wi na, ĩ na sa kasiapalo kua hö̃töoö. Jesus Cristo sa thapo kutenö, hi tä hẽtu ha Teusö a kupoli, ĩ aiki, ‑Hapo. Kamisa totiatalo kua wi na, ĩ na wa totiatalo kua naiopö. Kamisa na wa kuo mapo mai ha, wa kua soatiopöö!‑ ĩ na Teusö a kuu piale, ĩ ipa noa tä waikiwö. Önö kutenö, sa kasiapalo opaö. ¹⁵Ĩ na makö pewö kuaö! Pe epii Teusö ma kai a hinia totilö noai, ĩ makö pewö aiki, ‑Teusö a topa kua wi na, ĩ na makö kua pi topa salo, makö kasiapalo opapököö!‑ ĩ na makö pi kuupököö! Ĩ na makö pi kuu totio mi tä, ‑Ĩ na makö pi kuu totio mi salo‑ ĩ na kamakö na ĩ na Teusö a kuu kitä. ¹⁶Pe epii Teusö ma kai a hini totio maa noai maaki, ma ta hini waikio noai, ĩ ta hinia totilöheö!

¹⁷Ipa pö! Kamisa uömaö! Kamisamakö kua wi na, ĩ na makö kuapököö! Kamisamakö uöma wi ĩ töpö na pö mamo teteköö! ¹⁸Ai töpö satehe epii töpönö Cristo a wanipo pasio nö, ‑Wanisala tä hosali pia salo, hi ti pakalai ti ha Cristo a säpamonasomaö!‑ ĩ na ĩ töpönö ĩ ta kuu hini wani ipö pasi sai. Kamakö na ĩ sa ta wäsä waikitioma, huki ai töpönö Cristo a wanipoö ha, sa õsi ö̃kö pola nö, sa ta wäsä kõa kule. ¹⁹Pea mapo mi ipii, ĩ tä uli hamö ĩ töpö huu pasio kitä. ‑Teusö sa thapo wani ipö saiö!‑ ĩ na ĩ töpö pi wani kuu nö, Teusö a na ĩ töpö pi wasiso pasio mai, nii tä na töpö pi wasiso sisaö, tiko töpö suö na ĩ töpö pi wasiso sisaö, ĩ na ĩ töpö kua pasioö. Ĩ na ĩ töpö kua tä, ĩ töpönö wanisala tä thapala apati pole maaki, töpö kili mi. ‑Ĩ na sa kua sinomo pasio päoö! Sa topa waikia alu kuleö!‑ ĩ na ĩ töpö kuu pi wasöaö. Hi tä hẽtu ha tä uli kupoli, ĩ tä uli ha ĩ töpö pi tapomo pola nö kuno mai, hi masita tä uli na ĩ töpö pi tapomo sisaö. ²⁰Ĩ na ĩ töpö kua wi maaki, Teusö tä uli ha kamakö pi tapomo sinomo pasitioö. Hi tä hẽtu ha Teusö a kupoli, ĩ kamakö uli pö sai. Ĩ tä uli ha Jesus a kua lasoa. Makö täapa kõo läo wi, ĩ Jesus Cristo Kaikana a hilo wi ĩ a kua lasoa. Ĩ a na makö mamo läa kule. A huu kõo tä, ²¹makö äpätii, Jesus anö ĩ makö aipöpamani kitä. Jesus a ösö toita apö kui na, ĩ na makö thapamani kitä. Jesus a lotete epö salo, ĩ tä pewö na a simöo tao kua wi na, ĩ na makö aipöama thama taö öpa hö̃töo kuki kitä.

‑Ĩ na makö kuapököö!‑ Paulo a kuu noai ĩ ta

¹Ipa pö! ‑Ĩ na makö kua kitä kutenö, Cristo ma hula mai, ĩ a thaa totilöheö!‑ ĩ na kamakö na sa kuu kule. Makö pi ipawöö! Kamakö na sa pi tapomo sinomoö. Kamakönö sa pi mönahapama wi ĩ makö. ‑Hiliposö tili töpö na Cristo sa ta taöma sinomopili, ĩ töpö topa kule‑ ĩ na kamakönö sa pi thama sinomoö. Ĩ na makö kua kutenö, ‑Cristo a hula tihöö!‑ ĩ na sa kuu kule.

²Ĩ na tä kua tä, Epósiasoma a, Sĩsikisoma a, ĩ na kilii töpö na ĩ na sa kuu pia kule. ‑Jesus Kaikana ma thapo kutenö, pö hapalo pi hĩsuaha tihöö! Pö hapalo makokoa totihoö!‑ ĩ na sa kuu kule. Ĩ nakö.

³Ĩ na tä kua tä, kamisa na wa kalipalo naio totio wi ĩ wa na ĩ na sa kuu nömöo pia kule. ‑Epósiasoma a, Sĩsikisoma a, ĩ töpö pi hatukupamanöö! Ĩ töpö, Klemẽisi a, kamisa na ai töpö kalipalo naio wi ĩ töpö, ĩ na töpö kui, töpö kalipalo opama. Cristo ta topa apöle ĩ ta taöma hätäpo pia salo, ĩ töpö solo samakö kalipalo opama. Ĩ töpö a hilo pole, Teusö anö ĩ tä sãöka waikiköma. Töpö õsi palimii ĩ töpö a hilo pole ĩ tä sãököle, ĩ tä waheta na ĩ töpö a hilo wi tä sãökama sätäa waikia kule. Önö kutenö, Epósiasoma a, Sĩsikisoma a, ĩ na kilii töpönö Cristo ta taöma pia salo, kamisa na ĩ töpö kalipalo opa naioma kutenö, ĩ suö töpö hapalo pi hĩsuha wi, ĩ tä mapamanöö!‑ ĩ na sa kuu kule.

⁴Jesus Kaikana a na makö koka kutenö, pö pi mönahapalo opa sinomoö! ‑Pö pi mönahapalo opa soatioö!‑ ĩ na sa kuu kõa kuleö! ⁵‑Ĩ töpönö ai töpö totiapala apawöö!‑ ĩ na ai töpö pi thamaö! Jesus Kaikana a huu äwäho waikia kule. ⁶Pö pi honipo ti! ‑Ĩ tä na sa pi honipo opaö‑ makö pi kuu mai, Teusö a na ĩ ma tä pewö a kateha nö, ‑Hapa. Wa topa kutenö, kawa na sa pi mönaha apaö‑ ĩ na ĩ tä wakala pewö hamö ĩ na makö kuu nö, ‑Ĩ tä thamaö. Ĩ tä thamaö!‑ ĩ na Teusö a na makö nako nö, ĩ na pö kuu sinomoö! ⁷Ĩ na makö kuu sinomoö ha, Teusö anö makö pi topapalama apa wi ĩ tänö makö õsi noama totio kitä. ‑Wi na Teusö anö wi na tä thama nö, makö pi topapalama apaö?‑ ĩ na makö pi kuu sinomo wi maaki, Jesus Cristo a na makö koka salo, Teusö anö makö pi topapalama wi ĩ tänö makö õsi noama kitä.

⁸Ipa pö! Sa tä sãöka mapo paio mi tä, ĩ na sa kuu pia kule. Tä toita apii ĩ tä, ‑Ĩ tä topa apa‑ ĩ na töpö kuu wi ĩ tä, ĩ na tä kui tä na pö pi tapomo sinomoö! Ta pitilia apöle ĩ ta, tä totiatalo opati wi ĩ tä, tä makoko opii ĩ tä, ĩ na tä kui tä na pö pi tapomo sinomoö! Tä wanisala mai ĩ tä, töpö pi pewö topama wi ĩ tä, ta topa apöle ĩ ta, ĩ na tä kui tä na pö pi tapomo sinomoö! ⁹Kamakönö sa kai a huapili, ĩ tä thama totihoö! ‑Ĩ na makö kuapököö!‑ sa kuu sinomopili, ĩ na pö kua totihoö! Kamisa kua sinomotipili na, ĩ na pö kua totihoö! Ĩ na makö kua totioö ha, Teusö anö makö pi topama sinomo wi, kamakö na ĩ a kua naiki kitä.

‑Makö topa‑ Paulo a kuu noai ĩ ta

¹⁰Tä tetea waikipaso noai ha, ‑Paulo a honimo hãtole kitäö! Sitipa ma kö simönö nököö!‑ ĩ na makö ta kuu kõo noa. Ĩ na makö kuu kõoö ha, Jesus Kaikana a na sa koka naia kutenö, sa pi mönaha apa. ‑Paulo ma pasilipalö nököö! Sitipa ma kö simönö nököö!‑ ĩ na sutu ha ĩ na makö kuu waikioma maaki, ‑Witi pili a na sitipa sama kö simöpalöpökö?‑ ĩ na makö pi kuuma. ¹¹‑Paulo a honimo salo, a pea hãtoa. A pea salo, sitipa kökö a kateha kule‑ ĩ na pö pi kuu ti! ‑Wi na taköö! Ipa sitipa kökö kua ma apa saile taköö!‑ sa pi kuu mai kitä. Sa pi hatukua waikipamanöma kutenö, sa tä thapo waikile, ĩ tä na sa pi topa waikia kule. ¹²Wani sa tä thapo mi, waiha wani sa tä thapo opaö, ĩ na sa kua thali. Sa pötö öpö, wani sa tä thapo opaö, ĩ na sa kua tä, sa pi topa apaö. Sa ohi, ipa wani tä mii, ĩ na sa kua tä, sa pi mönaha apa hö̃töa. Ĩ na sa kua maama maaki, Teusö anö sa pi hatukupamanöma salo, huki ĩ na sa kua totioö. ‑Häö. Wi na taköö!‑ sa pi kuu mai kitä. ¹³Cristo anö sa lotetepamapo salo, ĩ sa tä pewö thaa taö öpaö. ‑Wi na sa kua pätakö?‑ ĩ na sa pi kuu mai kitäö!

¹⁴Ĩ na sa kua kule maaki, sa pea tä, kamakö aiki, ‑Paulo a pea apa sai taka‑ ĩ na makö pi kuu nö, kamisa na sitipa ma kö simöpalöma. Sitipa ma kökö simöpalö noai, ĩ tä na, ‑Hiliposö tili töpö topa apaö‑ ĩ na sa pi kuuma. ¹⁵Kamakö na Jesus ta topa apöle, ĩ sa ta wäsä tute tä, Masetônia tä uli ha sa kuoma, sa hulasolöma tä, kamakö na sitipa sa kö täa sisali kipili. Ĩ ma tä taö öpaö. Jesus a thapo wi ĩ ai töpönö sitipa kökö simöpa maapili. Hiliposö tili makönö kamisa na sitipa ma kö simöa sisapali kipili. ¹⁶Tesalônika tä uli ha sa kua tä, ipa sitipa kökö matasoma ha, ai sitipa ma kö simöa somatali, ai ma kö sitipa simöa nömöa kotali, ĩ na makö kuama. ¹⁷‑Kamisamakö na Paulo anö sitipa kökö täli wi, ĩ tä pii sisaö‑ ĩ na pö pi kuu tihöö! Sitipa ma kö totoa salo, kamakö na Teusö anö noa tä totoa hö̃töki wi ĩ sa tä pi ipaö. ¹⁸Kamisa na sitipa ma kö simöpalö noai, ĩ kökö sitipa kua apa soaleö! Epapötotiito a na ma kökö simöpalö noai, ĩ sa kö tälö noai, ĩ kökö kua apa soaleö! Sitipa ma kö simöpalö noai, ĩ tä na Teusö a pi mönaha. Hi masita tä uli ha Cristo a huu paio mi tä, Teusö a na sanöma makönö salo ma pö totoköpö, ĩ pö ĩsitama noai, Teusö a na ĩ tä ĩsini nisamö toita apa lasoma. Salo pö totokö noai, ĩ tänö Teusö a pi mönahapama kua noai na, ĩ na sitipa ma kö totota wi, ĩ na ĩ tänö Teusö a pi mönahapama kua hö̃töa kule. ¹⁹Önö kutenö, ai tökö na makö honimo tä, kamakö na ipa Teusö anö ĩ tä totoma apa kitä. Teusö anö Jesus Cristo a simönö nö, tökö toita apii tökö thapo opöpoli, kamakö na ĩ ai tökö totoma apa kitä. ²⁰‑Kawa toita apö. Wa topa apa asaö!‑ ĩ na pö̃ Teusö a na ĩ na makö kuupökö. Huki, ĩ na makö kuu soatiopökö. Hi masita tä uli mataso noai ha, ĩ na makö kuu hö̃töo soatiopökö. Ĩ nakö.

‑Makö topa kule?‑ Paulo a kuu noai ĩ ta

²¹Teusö a thapo wi, Jesus Cristo a na ĩ töpö koka wi, ĩ töpö pewö na, ‑“Wa topa kule?” ĩ na Paulo a kuu kuleö!‑ ĩ na makö kuu! Kamisa na Jesus a thapo wi ĩ töpö kua naio wi ĩ töpö aiki, ‑“Wa topa kule?” ĩ na hiliposö tili töpö pewö na wa tä sãököpalö nö, ĩ na wa kuu!‑ ĩ na ĩ töpö kuu kule. ²²Teusö a thapo wi, ĩ na ĩ töpö pewö kuu. Sesa Kaikana a sai pö pata ha töpö kalipalo wi, ĩ na ĩ töpö kuu totia apa kule. ²³Jesus Cristo Kaikana a na, ĩ na sa kuu: ‑Ĩ töpö pewö totiapala apaö!‑ ĩ na sa kuu. Ĩ naköö!