Marcos
Marcos anö waheta tä sãököpalö noai ĩ ta
‑Juteu töpö pasi mai, ĩ töpö na Marcos anö hi waheta tä sãökamama‑ ĩ na samakö pi kuu. ‑Pedro anö Marcos a na Jesus ta wäsä noai, ai töpö na Marcos anö ĩ ta wäsä tolea hö̃töoma‑ ĩ na samakö pi kuu naioö.
Jesus anö Teusö ta wäsätii, töpö salia apa wi ĩ töpö toa komani, sai töpö sasua koni, ĩ na Jesus a kuati noai, Marcos anö ĩ ta wäsä tolea hö̃töoma. ‑Teusö anö sa simönöma kutenö, masita tä uli pewö hamö sanöma töpö pilipai, ĩ töpönö wanisala tä thaa sinomoti wi, ĩ tä na Teusö a hĩso opa wi, kamisanö ĩ tä maa kopamani kitäö!‑ ĩ na Jesus a kuu noai, Marcos anö ĩ ta wäsä naioma.
Jesus aiki, ‑“Sanöma sa kupaso noai, masita tä uli na sa waloiki nö, sanöma sa töpö pasiliapalapöö! Sanöma töpö satehe epii sa töpö täapa kõo läopö, ĩ tä noa na sa säpamonasopököö!” ĩ na sa pi kuu salo, sa huma‑ ĩ na Jesus a kuu noai, Marcos anö ĩ ta wäsä naioma.
1João anö töpö mãi õma sinomo noai ĩ a
Mateus 3.1-12; Lucas 3.1-20; João 1.19-28
1Teusö a hai ĩ pelupö Jesus Cristo ta topa apöle, ĩ sa tä kolo a wäsä pia kule.
2Sutu upa Jesus Cristo a hai, ĩ sanöma tä kuo paio maa noai ha, Teusö a kai a wäsä sinomoti wi, ĩ Isaías a pata hilo wi, ĩ a patanö tä sãököpalöma. Tä sãököpalö nö,
Ĩ na Teusö a kuuma: ‑Kawa simöa paio mai ha, sa kai a wäsä wi, ĩ ai sa tä simöa paipali kitä. Ĩ sa simöa paipalö nö, ĩ anö wa wäsä kitä. Wa wäsä nö, “Kaikana tä pata huu ateo opa pialeö! A huu ateo opa pia salo, Teusö a na makö tomöpo maa wi, ĩ tä hosalöö! Piliso paimö tä, ma tiso paimö hosa kua wi na, makö tomöpo maa wi, ĩ na ĩ tä hosa thalöheö! Õsi wanisala apati wi, ĩ tä hosalöheö!” ĩ na sa kai a wäsä wi, ĩ na a kuu kitä. 3Ai töpö kuo taso maa pamö ĩ hamö a komö kukö taso kitä. A komö kutakitö nö, “Pata tä hama huima tä, ai töpönö piliso makokopama kua wi na, ĩ na pata tä sai pata huimaö ha, pö pi makokoa topaikiö!” ĩ na sa kai a wäsä wi, ĩ na a kuu kitäö!‑ ĩ na Teusö a kuuma.
Ĩ na a kuu noai, sutu upa Isaías a patanö ĩ tä sãököpalöma.
4Isaías a patanö tä sãököa kua noai na, ĩ na João anö töpö mãi õma sinomo noai, ĩ João Pasisöta a hilo noai, ĩ na ĩ a kua tolea totiatalo opatima. Ai töpö kuo taso maa pamö João Pasisöta a alulö nö, a wäotima. ‑Teusö a na makö tomöpo mi ipii, ĩ tä hosalöheö! Tä hosalö nö, pö mãi õmamoö! Ĩ na makö kuaö ha, makö tomöpo maa noai, ĩ tä na Teusö a hĩso maa kopasoma, ĩ a na makö taamö toita apöpaso kitäö!‑ ĩ na João Pasisöta a kutima.
5Ĩ na tä kua tä, Jutéia tä uli ha töpö pewö pilile ĩ töpö, Jetusalẽi tä uli ha töpö pilile ĩ töpö, ĩ na ĩ töpö kui, João a kuo pamö ĩ töpö hulasolöma. Töpö hulasolö noai, ĩ töpö wanisala sinomoti wi, João a na ĩ töpönö ĩ ta wäsätimae. Ta wäsäti nö, ‑Samakö tomöpo mi ipö pasiwöö!‑ ĩ na töpö kutima. Ĩ töpönö wanisala tä thaa noai, ĩ tä kateha hokapalöma. Ĩ ta kateha hokapali ha, Johotão u pata hamö João anö ĩ töpö mãi õmatima.
6João a hai ĩ haloi ösö hai, kamelu kõiki ösö kuoma. Salo ösö hai, sita a kuoma. Siki sikimö a kui na, ĩ na a kui a oaö, pu ola oaö, ĩ na a kuatima. 7Ĩ na a kuati nö, ‑Kamisa na a pata noane, pata tä sai asawö. Ĩ a hai, pata tä sai kutenö, “Kamisanö ĩ sa pasilipopököö!” ĩ na sa pi kuu kili ipawöö. 8Kamisanö maa tuu na makö mãi õma pätio nö, makö salupali kipili maaki, kamanö Teusö a õsi kua tolele, ĩ a na makö õsi salupamani kitä‑ ĩ na João a kutima.
Jesus a mãi õmamo noai ĩ ta
9Ĩ na tä kua tä, Jesus a kui, Kaliléia tä uli ha Nasaté tä uli wai kulati, ĩ tä uli ha Jesus a hususoma. A husolo nö, Johotão u pata ha a waloköma tä, João anö a mãi õma läoma. 10A mãi õma läoma, Jesus a söposöa kopalo nö, hutu mosökö pata hãkopo läle, Jesus anö ĩ tä taa soatalalö nö, a mamo tetea soatia tä, holeto a kui na, ĩ na Teusö a õsi kua tolele, Jesus a na ĩ a ithopaköma. 11A ithopaköma, Teusö aiki, ‑Kamisanö ipa ulu wa pi ipa wi, ĩ waö! Kawa na sa pi mönaha apa kuleö!‑ ĩ na pö̃ a kuu haio lasoma.
Sai tä sai patanö wanisala tä na Jesus a wapa noai ĩ ta
12Ĩ na a kuu haio nö, Teusö a õsi kua tolele, ĩ anö, ai töpö kuo taso maa pa Jesus a simöa soatalöma. 13A simöa soatali ha, ĩ tä uli hamö Jesus a kutio tasoma. A kutia tä, ai pilipoma patasipö maa waikipalo nö, ai a pilipoma ose kuo nömöo kõoma. 40 tä mumi hasupasoma. Ĩ tä uli ha Jesus a kutia tä, wanisala tä thaa wi, ĩ tä na Sai tä sai patanö Jesus a simöatima. ‑“Teusö a hini tihöö! Teusö a hini tihöö!” ĩ na Jesus a na sa ku upaö ha, Jesus anö Teusö a kai hini hãtoa mane kitä‑ ĩ na Sai tä pi pata kuu salo, a pata kua läapalo naitioma. Ĩ tä uli ha Jesus a kuo noai ha, ĩ tä uli ha salo pö waitili kuo opa naioma maaki, hi tä hẽtu pata ha Teusö anö kama hai ĩ töpö simöta sinomo wi, ĩ ãju töpönö Jesus a noama läapalo opama.
Kaliléia tä uli ha Jesus anö Teusö a wäsä soatioolö noai ĩ ta
Mateus 4.12-22; Lucas 4.14-15; 5.1-11
14Ĩ na tä kua tä, sai a päka lototoa apöle, ĩ a sai ha ai töpönö João a titiköma. A titikö noai ha, ki hamö, Kaliléia tä uli hamö Jesus a hua soasolöma. A hua soalolö nö, ta topa apöle, Jesus anö ĩ ta wäsätiilöma. 15Ta wäsätiilö nö, ‑Tä tetea apa waikia saileö! Teusö anö huki sanöma makö simöa wi ĩ tä atea waikia kuleö! Makö simöa pia manu kule, makö wanisala sinomo wi, ĩ ma tä hosalöö! Ta topa apöle, ĩ ma ta hini totiopöö!‑ ĩ na Jesus a kutima.
‑Kamisa na pö nokapaloö!‑ ĩ na Jesus a kuti noai ĩ ta
16Ki hamö, Kaliléia tä uli ha kosoto u pata kule, ĩ u kasö pata hamö Jesus a hasuo kõa tä, polakapi töpö talalöma. Simão, poose André, ĩ na kilii töpönö salaka hiki sinomoti wi, ĩ töpönö kosoto u pata hamö wahi tökö pata pe epii tökö pata keama lätioma. Tökö pata keamati tä, Jesus anö töpö talalöma.
17Töpö talalö nö, ‑Hapo. Kamisa na pö nokapaloö! Salaka ma hiki thama kua wi na, ĩ na sanöma ma töpö thama kuköpöö! Salaka ma hiki sinomotima maaki, kamisa na makö nokapasoma, kamisanö makö pi hatukupamanöma, sanöma töpö na Teusö ma kai a wäsä sinomo kuki kitäö! “Jesus a na pö nokapalo sinomoö!” ai töpö na makö kuu sinomo kuki kitäö!‑ ĩ na Jesus a kuuma.
18A kuu ha, wahi tökö pata hula soa pätakölö nö, Jesus a na ĩ töpö noka soa pätasolöma. 19Töpö noka soasolöma, thapi hamö Jesus a huulö pamö, Sepeteu a pelupö Tiago, poose João, ĩ na kilii töpönö wahi tökö totima kõtia tä, Jesus anö ĩ töpö talalöma. 20Töpö talalö nö, töpö naka soatama. Töpö nakaö ha, pö̃ a, pö̃ anö töpö kalipalama wi ĩ töpö, ĩ na töpö kui, kutiata a hamö ĩ töpö titia taa soa pätakölö nö, Jesus a na pelupö töpö noka soatasolöma.
Jesus anö sai tä lisia kopamanö noai ĩ ta
21Töpö nokapalo soa tä, Kapahanaũ tä uli hamö Jesus anö töpö kai taa soatalaso tasoma. Töpö taa soalalotö nö, mota mato wi, ĩ tä wakala ha, juteu töpö kokamo sinomo wi, ĩ a sai ha Jesus a lisia soapalotö nö, Teusö a wäsä soata tasoma. 22Ta wäsä soatatö nö, töpö pi hatukupamani ha, ‑Jesus a haö totiatalo opawö. Moisés a kai a wäsä sinomo wi, ĩ töpö haö kui na kuno mai, Jesus a hapalo loteteapalo opatiwö‑ ĩ na ĩ töpö kutima.
23Ĩ na tä kua soa tä, kokamo sinomo wi, ĩ a sai na sai tänö a wani saliama sinomo wi, ĩ a wani lisipalo nö, 24‑Jesus ai! Nasaté tili ai! Wi na tä kuaö ha samakö thama pia salo? Samakö maa kopamani pia salo wa huu ke? Kamisanö wa taö waikileö! Teusö a na wa totiatalo opa wi, Teusö anö ĩ wa simöpalö noai, ĩ waö!‑ ĩ na a lalupalo pola nö, ĩ na a wani kuuma.
25A kuu ha, ‑A wani hapaloti ti! A lisia kopaloö!‑ ĩ na Jesus anö ĩ na sai tä noa thaö ha, 26sai tänö a wani polemomanö nö, a lalupalo nö, a lisia kopasoma.
27A lisia kopasoö ha, töpö mamo tetea pasile, ĩ töpö aiki, ‑Wi na ta kua kule? Jesus a hapalo loteteapalo kiliatiwö. Jesus anö sai töpö noa thaö ha, Jesus a hini hö̃töopa wi. Jesus anö Teusö ta wäsä wi, ĩ ta makokoa topa apa asale‑ ĩ na töpö kuuma. 28Töpö kuu nö, Kaliléia tä uli pewö hamö ĩ töpönö Jesus a wäsä soaköma.
Jesus anö töpö satehe epii töpö toa komanö noai ĩ ta
29Ĩ na tä kua tä, juteu töpö kokamo sinomo wi, ĩ a sai ha Jesus a, Tiago a, João a, ĩ na töpö kui töpö lisia kopalo nö, Simão a, André a, ĩ na kilii töpö sai pö ha ĩ töpö hulasolöma. 30Ĩ töpö walokötasoma, Simão a hai ĩ pösösö a kamakalipö kuo lätioma. Ĩ na a kua lätia tä, ‑A kamakalimo opa kuleö!‑ Jesus a na ai töpö kuuma. 31Ĩ na ai töpö kuu ha, Jesus a huo soataki solö nö, pili a ami hĩsola na a ami waliki nö, a söpötalöma, a kamakalipö maa soatasoma. A kamakalipö maa kõa soatalo nö, ĩ a suönö ĩ töpö ösö potehepalama soatama.
32Ĩ tä wakala ha soatawö, tä mumahapalo opa tä, töpö salia wi ĩ töpö pewö, ai töpö na sai töpö sapäko sinomo wi ĩ töpö, ĩ na töpö kui, Jesus a na ĩ töpö kai pewö waloköma. 33Kapahanaũ tä uli ha töpö pilile, Jesus a kuta wi ĩ a sai päka na ĩ töpö pewö kokamoma. 34Töpö salia wi, Jesus anö ĩ töpö satehe epii töpö toa komananöma. Ai töpö kamakalipö, ai töpö thoko thokopö, ai töpö hasili, ai töpö amukumo, ĩ na töpö kuama maaki, ĩ töpö pewö toa komananöma. Jesus anö satehe epii sai töpö hosa konöma. Sai töpö aiki, ‑Teusö anö wa simöni wi, ĩ waö!‑ sai töpö kuu ha, ‑Pö hapalo ti! Teusö a thapo wi ĩ töpönö sa wäsä asapöö!‑ ĩ na Jesus anö ĩ na sai töpö noa wani thalöma.
‑Teusö sa tä kai a wäsämö huu kipili‑ Jesus a kuu noai ĩ ta
35Ĩ na tä kua tä, tä halu äwäho tä, Jesus a natalo nö, sanöma töpö kuo maa pa a hua halulolö nö, Teusö a na a hapalo tasoma. 36Teusö a na a hapalo tasoa tä, Simão anö töpö kai hua hailolö nö, Jesus a tae haio tasoma. 37A talalö nö, ‑Ai töpö pewönö wa tae hailaiö!‑ töpö kuu haio tasoma.
38Töpö kuu haia kulati maaki, Jesus aiki, ‑Päla. Thapi hamö, ai töpö sai pö satehe epii sai pö hö̃kököo opa pamö makö huulöö! Makö hulolö nö, Teusö sa kai a wäsä nömöopököö! Teusö sa kai a wäsäpö, sa huu kipili‑ ĩ na töpö waloa haiki ha, ĩ töpö na Jesus a kuu läoma. 39Ĩ na a kuu nö, Kaliléia tä uli pewö hamö a huti pa, juteu töpö kokamo sinomo wi, ĩ kökö sai ha Teusö a kai a wäsä hätäpotii, sai töpö hosa koni, ĩ na Jesus a kuatima.
Wasu wasu tänö pili a ösö hiopöo noai, ĩ a wani toa komanö noai ĩ ta
40Ĩ na tä kua tä, wasu wasu tänö pili a ösö hiopöo noai, Jesus a na ĩ a wani waloa läiki nö, ‑Kaikana wa pata‑ a pi wani kuu salo, pili a maekonö a hĩta thaiki nö, a mãi poiki nö, ‑Kawanö sa toma pi topa kõa tä, kawanö sa toama taö öpa kitäö!‑ a ösö hiopö öpii ĩ na ĩ a wani kuuma.
41A kuu ha, ĩ a wani na Jesus a pi honipoma. A pi honipo nö, ‑Häö! A salia pasitioti tihöö!‑ ĩ na Jesus a pi honi kuuma. A pi kuu nö, a ami totokö nö, a ösö hiopö öpii ĩ a wani höpöa nö, ‑Awai. Wa toma kõo pi topa kule. A toa konöö!‑ Jesus anö a noa wani thama.
42A noa thaö ha, a ösö hiopö öpii ösö maa kõa soatalo nö, a ösö topa kõa soataköma.
43-44A ösö topa kõa soataki ha, ‑Pei. Ai töpö na wa toa konohe, ĩ ta wäsä tihöö! Teusö a täpä sinomo wi, ĩ a wani na a mömo kõo sisatöö! Wa mömo kõo tasoö ha, “Awai. Wa toa kõo waikiso keö!” ĩ a wani kuu kitä. A kuu ha, ĩ a wani na salo a totoköö! Wa toa konaso salo, ĩ salo a totoköpököö! Sutu ha, “Ĩ na makö kuaö!” ĩ na Moisés a patanö nö pata töpö noa thama. Ĩ na pata töpö noa thama ha, salo a totoa haitaköö! Ai töpönö ĩ salo a tapa salo, “Hiki. A wani toa kõo waikiloheö!” ai töpö kuupököö!‑ ĩ na Jesus a kuuma. Ĩ na a kuu nö, ‑A huu konöö! Wa toa kotaso noai, ai töpö na ĩ ta wäsä tihöö!‑ ĩ na Jesus anö a ösö hiopöo noai, ĩ a noa wani thama.
45Ĩ na a noa wani thama maaki, a wani hua kononö nö, ai töpö na a wani wäo kõo soata tasoma. ‑Jesus anö sa toa totia komani kipiliö!‑ a wani kuu soatasoma. Ĩ na a kuu hätäpoti ha, ĩ tä uli pewö na töpö kupai, ĩ ai töpönö Jesus a tae hisatima. A tae hisama ha, sai pö hö̃kököi sai pö kule hamö Jesus a lisipo maama. Somai hamö, sai pö polakapi wai kuo pa, ĩ ha Jesus a kuo päoma. A kuo päoma maaki, tä uli pewö ha töpö kuoma, Jesus a na töpö waloa haikö tasoma.
2A kõheo wi, ĩ a wani toa lämanö noai ĩ ta
1Ĩ na tä kua tä, waiha Kapahanaũ tä uli hamö Jesus a kotapi ha, ‑Jesus a kotapöma thaiö!‑ ĩ na ai töpö kuu hätäpotima.
2Ĩ na töpö kuu hätäpoti ha, Jesus a na töpö satehe epii töpö kokamo opama. Töpö kokamo opaö ha, sai õsi pewö matia apököma. Sai a matia apa waiki ha, sai a päka holeo pa, töpö öpahapama. Sai a matia apa tä, Jesus anö Teusö ta wäsäma.
3Teusö ta wäsäti tä, Jesus a na a wani kõheo wi, ĩ a kai wani waloköma. Ai tä hẽtu manana, ai tä hẽtu manana, ĩ na töpö kui töpönö a pi wani saluku poimamae.
4Sai a matia apa waiki ha, a kai wani lisipo mi salo, sai a hõo hamö ĩ a kai wani tua soata pätapolö nö, Jesus a lole, ĩ tä hẽtu na sai a päka thakö nö, a wani kõheo wi, ĩ a pi wani ithomanömae.
5A pi ithomani ha, ‑“Jesus a lotete epö salo, a wani toa komani kitä” ĩ na ĩ töpö pi kuu hãtoakö‑ ĩ na Jesus a pi kuu nö, a wani kõheo wi, ĩ a wani na a hapaloma. A hapalo nö, ‑Wanisala wa tä thati noai, ĩ tä na Teusö a hĩso wi, ĩ sa tä maa kõo waikipamani keheö!‑ ĩ na Jesus a kuuma.
6-7Ĩ na Jesus a kuu ha, Moisés a kai a wäsä sinomoti wi, ĩ töpö lole, ĩ töpö aiki, ‑Wi na taköö? Jesus a hai, sanöma tä päwö maaki, “Teusö sa” Jesus a pi wani kuu hĩsua apawö‑ ĩ na töpö pi kuu nö, ‑Wanisala tä thati wi, ĩ tä na Teusö a hĩso wi, Teusö anö ĩ tä maa kõo sisapamani kitä pi kuu mai‑ ĩ na töpö pi kutima.
8Ĩ na töpö pi kuti wi, ĩ tä na Jesus a pi hatuku upö salo, ‑Wi na tä kuaö ha, makö pi kuu kule?‑ Jesus a kuuma.
9‑“Wanisala wa tä thati noai, ĩ tä na Teusö a hĩsopole, ĩ sa tä maa kõa waikipamani keheö!” ai sanöma tä kuu taö mai kitä. Teusö a kuu taö öpa sisaö. Ĩ na tä kua tä, a wani kõheo wi, ĩ a wani na, “Wa öpa kopalo nö, au sii totokö kai hua kononöö!” ai sanöma tä kuu taö mai kitä. Teusö a kuu taö sisaö‑ ĩ na Jesus a kuuma.
10A kuu nö, ‑Ĩ na ai sanöma tä kuu taö mai kitä maaki, kamisa na Teusö aiki, “Masita tä uli pewö hamö sanöma töpö pilipai, ĩ töpönö wanisala tä thaa sinomoti wi, ĩ tä na sa hĩso opa wi, kawanö ĩ tä maa kopamanöö!” ĩ na kamisa na Teusö a kuu waikio kipili. “Jesus a pitilimo opaö. A lotete epö. Teusö anö Jesus a simönöma kutenö, sanöma makönö wanisala ma tä thaa wi, ĩ tä na Teusö a hĩso pole, Jesus anö ĩ tä mapama taö öpaö” kamisanö ĩ na makö pi thama pia salo, hi a wani kõheo wi, sa wani toma kõo pia kuleö!‑ ĩ na Jesus a kuu nö, a wani kõheo wi, ĩ a wani na,
11‑“Wa öpa kopalo nö, au totokö kai hua kononöö!” kawa na sa kuu kuleö!‑ ĩ na Jesus a kuuma. 12A kuu ha, totokö täa konö nö, ai töpö mamo tetela tä, a wani kõhetioma maaki, a wani hua kõo soasolöma. A wani hua kõa hö̃tösolö ha, ‑Kilatiha. A kõheo wi, ĩ a temöma kõa nö kilimane a! Jesus a aipa apa nö kilia sai. Teusö a totiatalo opawö. Ĩ nasimö sama tä tapa paio maa noai, huki ĩ sama tä talali ke‑ ĩ na töpö kupalo opama.
‑“Sa wanisala apa saiö!” wa kuu tä, wa õsi topa kopali‑
13Ĩ na tä kua tä, kosoto u kasö pata hamö Jesus a hua kononö nö, ĩ hamö a walokö tasoma tä, töpö satehe epii töpö waloa läköma. Töpö waloa läki ha, Jesus anö Teusö ta wäsä nö, töpö pi hatukumanöma.
14Töpö pi hatukumanö nö, Jesus a hulasolöma. A huulö pa, Aupeu a hai ĩ pelupö Lepii a loa talalöma. Kaikana tä pata na noa tä totoköpö, sitipa suta wi, ĩ a sai ha Lepii a lotioma. A lotia tä, ‑Hapo. Kamisa na a nokapalo sinomoö!‑ ĩ na Jesus a kuuma. A kuu ha, Lepii a hoköpalo nö, a noka soasolöma.
15Ĩ na tä kua tä, Lepii a sai pö na Jesus a, kama kai a hua sinomo wi ĩ töpö, ĩ na kilii töpö ia kai lotasoma. Töpö iapaloti tä, sitipa täa sinomoti wi ĩ töpö, ‑Töpö wanisala apati wi ĩ töpö‑ ai töpö pi kuu noai ĩ töpö, Jesus a na ĩ töpö nokapalo naio noai, ĩ töpö satehe epii töpö iapalo naitioma.
16Ĩ töpö iapalo naia tä, patiseu töpönö Moisés a kai a wäsä sinomo wi, ĩ töpö kõa haipöma. Töpö kõa haipo nö, Jesus a ia talalöma. Töpö wanisala apati wi ĩ töpö, sitipa täa sinomoti wi ĩ töpö, ĩ na töpö kui ĩ töpö na Jesus a ia naia tä, a loa talalöma. A loa talalö nö, Jesus a kai a hua sinomoti wi ĩ töpö na, ‑Häö! Hi töpö wanisala apati wi, ĩ töpö na Jesus a ia naio silia apawö‑ ĩ na patiseu töpö kuuma.
17Ĩ na töpö kuu ha, Jesus aiki hö̃töwö ‑Wa temö öpö tä, töpö ononopama sinomo wi, kawa na ĩ a walo kõo paio mai kitä. Wa salia apa tä, ĩ a waloa kõo sisaki. Ĩ tä kua kua wi na, ĩ na sa kua hö̃töoö. Kawa aiki, “Wanisala sa tä thaa mi. Sa õsi toita apö waiki. Sa totiatalo opaö” wa kuu ha, kawa na sa walo mai kitä. Wa õsi topama mai kitä‑ ĩ na Jesus a kuu nö, ‑“Wanisala sa tä tha apati wi ĩ saö!” ĩ na wa kuu ha, kawa na sa waloa asaki kitäö! Kawa na sa waloa asaiki nö, “Wanisala tä na sa pi tapomo sapao kõo nö, ĩ sa tä hosa pi topa kuleö!” ĩ na wa pi kuupö, kamisanö wa naka kitäö!‑ ĩ na Jesus a kuuma.
Teusömo totio pia salo, nii tä oa maa noai ĩ ta
18Ĩ na tä kua tä, João Pasisöta a kai a hua sinomo wi ĩ töpö, patiseu töpö, ĩ na töpö kui, ĩ töpö Teusömo totio pia salo, töpö ia paio mai töpö kuo paioma. Ĩ na töpö kuati ha, Jesus a na ai töpö waloiki nö, ‑Wi na taköö? João a kai a hua sinomo wi ĩ töpö, patiseu töpö kai a hua sinomo wi, ĩ töpö, ĩ na töpö kui, Teusömo totio pia salo, ĩ töpö ia paio mai maaki, kawa kai a hua sinomo wi, ĩ töpö aiki, “Huki sa Teusömo totio pia salo, nii sa tä oa paio mai kitäö!” ĩ na ĩ töpö kuu maa saio noa‑ ĩ na Jesus a na ĩ na töpö kuuma.
19Ĩ na töpö kuu ha, Jesus aiki hö̃töwö, ‑Töpö täpaso pia tä, satehe epii ai töpö naka noai, ĩ töpö kai kokamo pola nö, kama hai pusopö a täa piale, ĩ töpö na ĩ a tikiliapalo kutenö, “Päla. Nii sa tä pii mi” töpö kuu mai kitä. Töpö iapalo opa kitä.
20Ĩ na töpö kua kua wi na, kamisa kai a hua sinomoti wi, ĩ na ĩ töpö kua hö̃töoö. Kama hai pusopö a täa piale, tiko hamö ĩ a hua lälasolöma tä, sai a na töpö kua haile, ĩ töpönö nii tä oa wani kui na, ĩ na ipa töpö kua kitä. Waiha tiko hamö sa hua konasolöma tä, wa Teusömo totio pia salo, nii wa tä oa paio mai kitä‑ ĩ na Jesus a kuuma.
21Ĩ na a kuu nö, ‑Haloi ösö hotei ösö na ai tute wa ösö asawösö wai hẽha sätäama mai kitä. Tute wa ösö wai hẽha sätäamaköma, haloi wa ösö salupalöma, tute ösö hẽha sätäle, ĩ ösö wai alukusia apöpasoma, ösö hotei, ĩ ösö kaka pea apöpasolö kitä‑ ĩ na Jesus a kuuma.
22Ĩ na a kuu nö, ‑Salo ösö holokoto hotei, ĩ a holokoto ha upa mo puu tutei wa tuu löa mai kitä. Tute tute wa tuu lököma, tuu hölö nö, upa mo puunö ösö holokoto hotei, a holokoto homopaso kitä. Holokoto a homopasoma, tuu waniapasoö, holokoto a waniapasoö, ĩ na tä kua kitäö! Ĩ na tä kuaö ha, tute tute salo ösö holokoto ha tutei upa mo puu läa sisaki. Tute tute wa tuu läa sisaköma, salo ösö holokoto waniapo mi, upa mo puu wanio mi, ĩ na tä kuaö‑ ĩ na Jesus a kuuma. ‑Jesus a kai tutei, ĩ sa kai a hinia sisalöpököö!‑ ĩ na Jesus anö töpö pi thama pia salo, a kuuma.
Mota mato wi, ĩ tä wakala
23Ĩ na tä kua tä, mota mato wi ĩ tä wakala ha, hikali a ha tötiiku pili mosö kuo pa, Jesus anö kama kai a hua sinomoti wi ĩ töpö kai hasuoma. Töpö kai hasuo pamö töpö oi ipö salo, tötiiku mopö käalalö nö, mopö oa kai hutiilöma.
24Mopö käalali ha, patiseu töpö aiki, ‑“Mota mato wi ĩ tä wakala ha pö kalipalo hãto tihöö!” Moisés a patanö nö patapö töpö noa thama maaki, kawa kai a hua sinomo wi ĩ töpö kalipalo silia apawö‑ ĩ na Jesus a na ĩ na patiseu töpö kuuma.
25Ĩ na töpö kuu ha, Jesus aiki, ‑Davi a, kamanö töpö nokapalamati wi ĩ töpö, ĩ na töpö kui töpö hai ĩ nii tä kua mi ha, töpö oi ipö tä, Davi a kuati noai, ĩ ma tä sãökama hini maapa noai.
26Teusömo wi ĩ a sai ha Teusö a täpä totio wi, ĩ pata tä Apiataa a patamo tä, ĩ Teusömo wi a sai ha Davi a lisipalo nö, Teusö a täpä sinomo wi ĩ töpönö Teusö a na ĩsa ãi totoma sinomo wi, Davi anö ĩ ãi tälö nö, kama hai ĩ töpö solo ãi oalalömae. “Teusö a täpä sinomo wi ĩ töpönö ĩ ĩsa ãi oa sisalöö!” ĩ na Moisés anö nö patapö töpö noa thama maaki, Davi a, kama hai ĩ töpö, ĩ na töpö kui töpönö ĩ ãi oalalömae. Ĩ ãi oalalöma maaki, “Wanisala” ĩ na Teusö a kuu maama‑ ĩ na Jesus a kuuma.
27Ĩ na a kuu nö, ‑Teusö aiki, “Mota mapo wi ĩ sa tä wakala selekeama pi topa apa salo, sanöma sa töpö thaa nömöa päpali kitäö!” ĩ na Teusö a pi kuu maama. Ĩ na Teusö a pi kuu pasioma: “Sanöma sa töpö pasilipo pi topa salo, ĩ töpö mota mapo sinomopö, ĩ sa tä wakala thaa nömöa päpali kitäö!” a pi kuu pasioma.
28Önö kutenö, sanöma sa kupaso noai, ĩ kaikana sa kutenö, mota mato wi ĩ tä wakala maaki, “Pö kalipaloö!” ĩ na sa kuu ha, ĩ tä wanisala mai kitäö!‑ ĩ na Jesus a kuuma.
3Ami wani humöo wi, ĩ a toa komanö noai ĩ ta
1Ĩ na tä kua tä, juteu töpö kokamo sinomo wi ĩ a sai ha a ami humöo noai, ĩ a wani lotia tä, Jesus a lisipasoma. 2Ĩ a sai na töpö lole, Jesus a na ĩ ai töpö mamo teteiki nö, ‑Taa nökö. Huki mota mato wi ĩ tä wakala maaki, Jesus anö ĩ a wani toma pi topa hãtoa kõa kule. A wani toa komani ha, “Jesus a wanisala. Moisés a kai a hini hãto mikö” ĩ na samakö kuupö‑ ĩ na töpö pi kuuma.
3Ĩ na töpö pi kuu tä, Jesus hai, a ami humöo wi ĩ a wani na, ‑Hi mötali ha a hutaiki solö‑ a kuuma.
4A kuu nö, töpö lole, ĩ töpö na Jesus a hapaloma. ‑Mota mato wi, ĩ tä wakala na wi na kamakö pewö kuatipö? Wi na Moisés a pata kuuma? “Ai tä na hiopö tä thaö! A säpalöö!” ĩ na Moisés a pata kuu maama. “Ai tä totiapalaö! A noama totihoö!” ĩ na Moisés a pata kuu pasioma‑ ĩ na Jesus a kuuma. A kuu ha, töpö lole, ĩ töpö hapalo hö̃töo maama.
5Töpö hapalo hö̃töo mi tä, ĩ töpö na Jesus a mamo läapalo nö, a hĩsoma. ‑A ami humöne, ĩ a toa kõo haitamanöö!‑ ĩ na töpö kuu mi ha, Jesus a hĩsoma. Kama kai na ĩ töpö waio satia apama kutenö, Jesus a pi ota apama. A pi ota apa nö, a ami humöne, ĩ a wani na, ‑A poko totoköö!‑ a kuuma. A kuu ha, a poko totoa tä, a ami topa kõköma.
6A ami topa kõköma ha, patiseu töpönö Jesus a säpamanöpö, töpö hulasolöma. Mota mato wi, ĩ tä wakala na Jesus a kalipalo hĩsuaö ha, a ami humöo noai, Jesus anö ĩ a wani toa komani ha, ĩ töpönö Jesus a säpama piama. A säpamani pia salo, Etoosisö töpö na töpö ekuiki nö, ‑Jesus sama säpama pia kuleö!‑ töpö kuuma.
Ai töpö toa komanö noai ĩ ta
7Ĩ na tä kua tä, kosoto u pata hamö Jesus anö, kama kai a huati wi, ĩ töpö kai asulöma. Töpö kai hulolö nö, kaliléia tili töpö satehe epii töpö hua naisolöma. 8Ĩ hamö Jesus a wäsä hätäpo tä, ‑Ĩ na Jesus a kua thaliö!‑ ĩ na tä kuu hini nö, Jesus a na ai töpö satehe epii töpö walokö tasoma. Jutéia tä uli ha töpö pilile ĩ töpö, jetusalẽi tili töpö, Ituméia tä uli ha töpö pililati ĩ töpö, Johotão u pökatö pata hamö töpö pililati ĩ töpö, Situ tä uli, Sitõ tä uli, ĩ na tökö uli kui tökö uli ha töpö pililati ĩ töpö, ĩ na töpö kui, Jesus a na ĩ töpö satehe epii töpö walokö tasoma.
9-10Jesus anö ai töpö satehe epii töpö topa kõa waikipamanöma ha, töpö salia apa soatile, ĩ töpö aiki, ‑Jesus sa höpöpalöma, sa toa kõa hãtoso kitäö!‑ ĩ na töpö pi kuu nö, Jesus a na töpö pakäho opama. Töpö pakäho opaö ha, kama kai a hua sinomoti wi, ĩ töpö na Jesus aiki, ‑Töpö satehe epö salo, sa hutikipaso matimö. Kutiata a kãkölöö! Ĩ kutiata õsimö ha sa loo pia kuleö!‑ ĩ na Jesus a kuuma.
11Ĩ na tä kua tä, sai töpönö Jesus a talalöma, Jesus a kotö na ĩ töpö kelo nö, töpö lalupalo nö, ‑Kawa hai, Teusö ulupö wa!‑ ĩ na Jesus a na sai töpö kuuma.
12Töpö kuu ha, ‑“Teusö ulupö wa” makö kuu maikiö! Sa wäsä ti! Ipa sanöma töpönö sa wäsä sisapököö!‑ ĩ na Jesus anö sai töpö noa wani thama.
Jesus anö 12 töpö saipalö noai ĩ ta
13Ĩ na tä kua tä, heuma tä pata kulati hamö Jesus a hemopaso lasoma. A hemopalolö nö, töpö naka pi topa noai, ĩ töpö nakali ha, Jesus a na ĩ töpö huu läoimama. 14-15Ĩ töpö huu läoima wi, ĩ ai 12 töpö saia asapalöma. Ĩ töpö naka asalö nö, ĩ töpö na Jesus a hapalo nö, ‑Kamisa na makö kuo naio paiopö, makö saia asapali ke. Kamisa na makö kuo naio paioma, makö simönö nö, “Teusö anö Jesus sa simönö noai, ĩ ma ta wäsä hätäpotipököö! Ĩ ma ta wäsäti pamö, sai ma töpö hosa hätäpotipöö!” ĩ na kamisanö makö noa thaapököö!‑ ĩ na Jesus a kuuma.
16Ĩ na töpö kui töpö saia asapalöma: Simão a hilo soma noai, Pedro a, Jesus anö a hila thaa nömökö noai ĩ a, 17Sepeteu a pelupö Tiago a, poose João a, ĩ töpö a hilo kua soma noai, Poanehesisö, ĩ sanö ta pata kui na, ĩ na tökö kui, Jesus anö ĩ töpö hila nömökö noai ĩ töpö, 18André a, Filipe a, Patolomeu a, Mateus a, Tomé a, Aupeu a pelupö Tiago a, Tateu a, Simão a hapalo lotete epii ĩ a, 19Jutasö Isökatiosisö anö Jesus a monima piale ĩ a, ĩ na töpö kui töpö saia asalöma.
Sai tä sai pata hai, Peusepuu a hilo naine, ĩ a
Mateus 12.22-32; Lucas 11.14-23; 12.10
20Töpö saia asapalö nö, Jesus a kopölöma. A kopi ha, Jesus a möö pia salo, töpö satehe epii töpö kokamoa lälasoma. Töpö satehe epö kutenö, Jesus anö kama kai a hua sinomoti wi ĩ töpö kai ia maama. 21Ĩ na tä kuaö ha, ki hamö Jesus a hai ĩ töpö na ai töpö hapalo nö, ‑Jesus a na töpö satehe epii töpö kokamo kulatiö!‑ ĩ na töpö kuu ha, ‑Jesus a isi wani wanio opa hãto noa‑ ĩ na Jesus a hai ĩ kama ai töpö pi kuu nö, a koamö asulöma.
22Ĩ na tä kua tä, Moisés a kai a wäsä sinomo wi, Jetusalẽi tä uli hamö ĩ töpö kuoma, Jesus a na töpö timösolöma. Töpö timöpalolö nö, töpö hapalo nö, ‑Sai töpö pewö na Sai tä sai pata simöo sinomoti wi, ĩ a patanö Jesus a thapoö. A thapo kutenö, Jesus a lotetepamani ha, Jesus anö sai töpö sasu hö̃töo sinomotii‑ ĩ na töpö kuu päoma.
23Ĩ na töpö kuu ha, töpö nakalö nö, Jesus anö uni ta wäsä nö, ĩ na a kuuma: ‑Ai töpö na Sai tä sai pata simöoti wi, ĩ a patanö ĩ töpö sasu mai kitä‑ ĩ na Jesus a kuu hö̃töoma.
24A kuu hö̃töo nö, ‑Pi naka. Ai töpö na kaikana tä simöo sinomo wi, ĩ töpö pewö koka tä, töpö höla kuköma, töpö selekepasoö. 25Au töpö hölaö ha, makö pewö kuo sototo soatio mai kitä. Ĩ tökö soawö, makö selekea soapasoö. 26Ĩ na tä kua kua wi na, ĩ na kama ai töpö na ĩ na Sai tä sai pata höla kuaö aköna, ĩ töpö pewö selekepalo nö, töpö kua sototoa soa mana pi. Ĩ töpö na Sai tä sai pata simöo soa mana pi‑ ĩ na Jesus a kuuma.
27A kuu nö, ‑Ai sanöma tä lotete epii ĩ wa õkapa paio mai ha, ĩ sanöma lotete epii, ĩ a sai pö ha wa thomömo mai kitä. Kama hai ĩ wani wa tä sua mai kitä. Wa wani õka paipalö nö, kama hai ĩ wani wa tä thomöni. Ĩ tä kua kua wi na, ĩ na sa kua hö̃töoö. Sai tä sai pata lotete epö salo, kamisanö sa wani utitipama paio mai ha, sai sa töpö sasu mai kitä‑ ĩ na Jesus a kuuma.
28Ĩ na a kuu nö, ‑“Sanöma töpönö wanisala tä thaa wi ĩ tä, ai tä kateha wanisala wi ĩ tä, ĩ na tä kui tä pewö na Teusö a hĩso maa kopaso kitä maaki, 29ai tänö Teusö a õsi kua tolele, ĩ a kateha wanisala wi, ĩ tä na Teusö a hĩso mapo mai kitäö! Ai tänö Teusö a õsi kua tolele, ĩ a kateha wanisala wi, hi masita tä uli na ĩ a kuati tä, ĩ a na Teusö a hĩso thaa soatioö, waiha ĩ a nomaso noai ha, ĩ a õsi na a hĩso soatioö, ĩ na Teusö a hĩso kua kitäö!” ĩ na sa kuu kule. Sa kuu pole, ĩ pitili ta. Sa holisi mai kitä‑ ĩ na Jesus a kuuma.
30‑Teusö a õsi kua tolele, ĩ a hai kuno mai, Jesus anö sai tä sai pata thapo pasioö‑ ĩ na töpö kuuma ha, ĩ na Jesus a kuu hö̃töoma.
Jesus a hai, ĩ kama hai ĩ ai töpö
Mateus 12.46-50; Lucas 8.19-21
31Ĩ na tä kua tä, Jesus a hai ĩ pöpönö a, poose töpö solo, töpö huu läolöma. Sai a kasö ha töpö öpa paiki nö, ‑Jesus a nakalösoö!‑ ai töpö na ĩ töpö kuuma. 32Töpö kuu ha, Jesus a kotö ha töpö satehe epii töpö lotia tä, ‑Jesus ai! Sai a kasö ha au nao a, au hoose töpö, ĩ na töpö kui, ĩ töpönö wa naka polaiö!‑ ĩ na ai töpö kuuma.
33A kuu ha, ‑Witi ipa nao a? Witi ipa hoose töpö?‑ a kuu nö, 34kama kotö ha töpö lole, ĩ töpö na mamo läapalo nö, ‑Sai a kasö ha töpö öpale, ĩ ipa ai töpö maaki, ai makö na, “Ipa nao töpö. Ipa hoose töpö” sa kuu hö̃töo kitä. 35Teusö a kai a hini wi, ĩ töpö na, “Ipa hoosa a. Ipa sao a. Ipa nao a” ĩ na ĩ töpö na sa kuu hö̃töo päo kitäö!‑ ĩ na Jesus a kuuma.
4Thomo thomo säsäha sinomoti wi, ĩ a
1Ĩ na tä kua tä, kosoto u kasö pata hamö Jesus a huu tä, ai töpö pi hatukupamanöpö, Teusö ta wäsä kõoma. Teusö ta wäsäti tä, kama kotö ha töpö satehe epii töpö kokamo opaö ha, kosoto u pata ha kutiata kãne, ĩ ösö ha a titiki nö, a loköma. Kosoto u kasö pata ha töpö satehe epii töpö hilatioma. 2Ĩ töpö na Teusö ta wäsä tä, töpö pi hatukupamani pia salo, uni ta wäsäma. Jesus anö töpö pi hatukamapö, uni ta wäsä sinomoma. ‑Ĩ tä kua wi na, ĩ na ĩ tä kuaö‑ ĩ na Jesus a kuu sinomotima.
3Ĩ na tä kua tä, uni ta wäsä nö, ‑Pi naka. Thomo thomo säsäha sinomoti wi, hikali a na ĩ anö thomo thomo säsähamö hulasolöma. 4Mo säsäha tä, piliso hamö ai mo kelaso noai, salo pö katä wi, ĩ pönö ĩ mo oalöma. 5Ĩ na tä kua tä, tä uli maa mapö öpö ha, ĩ masita tä ösö patete epö ha, ai mo kelo nö, masita tä ösö patete epö salo, mo ãkea soatasoma. 6Mo ãkea soatasoma maaki, motokö ösöto tä, motokö sii lotete epö kutenö, mosö wai nokoa pasipasoma. Mosö nasikili wai wani ipii kutenö, mosö wai häwäsoma.
7Ki ha, tä uli mösököpöo opa pa, ai mo wai kelaso noai, mösökö tipö mötali ha mosö wai haa hö̃tösoma maaki, pe epii mösököpölemö tiki kua apa kutenö, ĩ mosö ha pili mokö sätäo mai ha, mosö wai häwäa pälasoma.
8Ĩ na tä kua tä, tä uli topa apa pa ai mo kea asaköma, mo ãkelo nö, mo sätäa haia asataköma. Ai mo wai kea pasia pälaso noai, ĩ mo wai ãkelo nö, 100 mokö kui mokö sätäköma. Ĩ na tä kua tä, ai mo wai kea hö̃töa naia pälaso noai, ĩ mo wai ãkelo nö, 60 mokö kui mokö sätäköma. Ĩ na tä kua tä, ai mo wai kea pasilo nö, mo wai ãkeso noai, ĩ mosö wai na pasiwö, 30 mokö wai sätäa pasiköma‑ ĩ na Jesus a kuuma.
9Ĩ na a kuu nö, ‑Sa kai a hini pi topa totile, ĩ pö sömöka taa totikiö!‑ ĩ na a kuuma.
10Ĩ na a kuu ha, waiha töpö satehe epii töpö kua mai ha, Jesus a kai a hua sinomo wi ĩ 12 töpö, Jesus a kotö ha ai töpö kuo naine ĩ töpö, ĩ na töpö kui, ‑Wi na ta kuu wi ĩ uni wa ta wäsä ke?‑ ĩ na töpö kuuma.
11Ĩ na ĩ töpö kuu ha, Jesus a hapalo hö̃töoma. A hapalo hö̃töo nö, ‑Pi naka. Sanöma makö na Teusö a simöo wi, sutu ha ĩ tä na nö patapö töpö pi motio opama maaki, huki kamakö na ĩ sa ta wäsä makoka apa asa kule. Kamisa kai hini wani ipii, ĩ töpö na ĩ sa ta wäsä makoka mai kitä. Ĩ töpö na uni sa tä wäsä päa kule. Teusö a simöo wi, ĩ sa ta wäsä makoka totio mai kitä. 12Ĩ töpö na uni sa ta wäsä päo nö, “Wi na ta kui wa ta kateha kule? Sa ta hini tomöpo mane” ĩ na ĩ sa töpö thamati kule. Ĩ na ĩ töpö thama salo, ĩ töpö pi wi na takömo nö, töpö mamo tetea hö̃töa kule maaki, tä tapa totio mi. Ta hini kule maaki, ĩ tä sai a hini totio mi. Ta hini totio köna, töpö wanisala apati wi, ĩ tä na Teusö a hĩso maa kopaso pi‑ ĩ na Jesus a kuuma.
13Ĩ na a kuu nö, ‑Mo säsäha wi, ĩ sa ta katehahe, ĩ uni ma ta hini maa ke? Ĩ ma ta hini mi tä, ai tiko uni ma ta hini hãto mai kitä‑ Jesus a kuu nö, 14-15‑Pi naka. Mo säsäha kua wi na, ĩ na Teusö ta wäsä kua kua hö̃töoö. Piliso ha mo kea kulaso noai na, ĩ na Teusö tä kai a hini päo wi, ĩ na ĩ töpö kua päoö. Ĩ töpö na Teusö ta wäsäma maaki, Sai tä sai pata kea haikösolöma, “Sa ta hini maa haiatalo opawö. Päla. Sa ta hini wani ipö sai” ĩ na ĩ töpö kuu soatasoö.
16Tä uli maa mapöo opa pa ai mo kea kulaso noai na, ĩ na Teusö ta hini wi, ĩ na ai töpö kuaö. Ĩ töpönö Teusö a kai a hini nö, töpö pi topa haiatalo opaö. 17Töpö pi topa haiatalo opaö maaki, mo nasökili wai kuo maa kuo noai na, ĩ na ĩ pili töpö õsi na ĩ na Teusö ta hinipo mi kuö ha, ĩ töpönö Teusö tä kai a hosa soali kitä. Ĩ töpö pea kuiki nö, Teusö tä kai a hula soaki. Ĩ töpönö Teusö ta hini pi topa apa kuki ha, ai töpönö ĩ töpö wanipoö. Ĩ töpö wanipoö ha, “Hö. Teusö sa ta hini pi topa tä, ai töpönö sa wanipo kutenö, Teusö sa tä kai a hini wania hö̃töa kuleö!” ĩ na ĩ töpö pi kuu. Töpö pi kuu nö, Teusö tä kai a hula soaki. Ĩ na ĩ töpö kuaö.
18Ĩ na tä kua tä, mösököpöo opa pa mo kea kulaso noai na, ĩ na ai töpö kuaö. Ĩ töpönö Teusö ta hini soata kule maaki, 19waiha, “Ipa kalipalo wi ĩ tä kua apa pikia saile taköö!” ĩ na töpö pi kuu sinomoö ha, Teusö ta hini pi topa wi, ĩ tä hini matasoö. “Ipa wani tökö satehe epö ipa tökö kuo nö toa sö ö̃” ĩ na töpö pi kuu sinomoti salo, ĩ töpönö Teusö tä kai a hini wanipasoö. Ĩ na ĩ töpö kuaö.
20Ĩ na ĩ ai töpö kua pasia kule maaki, ai töpönö Teusö tä kai a sua totia asali. Masita tä topa apa pa, mo kea kua asakö noai na, ĩ na ĩ töpö kua asaö. Ĩ mo ãkelo nö, ĩ mosö na pili mo lalo nö, pili mo pala kua kulaso wi na, ĩ na ĩ töpö uni kua kua hö̃töpasoö. Ĩ töpönö Teusö tä kai a sua asalö nö, toitai tä tha apati asa kuki. Ai töpönö toitai tä thaö, ai töpönö lapaha apii toitai tä thaö, ai töpönö lape epö sati ipii toitai tä thaö, ĩ na ĩ töpö kua kua asaö‑ ĩ na Jesus a kuuma.
Hoka apa pa koa wa taka sii hĩta pasioö
21Ĩ na Jesus a kuu nö, ‑Koa wa taka sii hilimanö nö, wöö a õsimö ha wa taka sii titia mai kitä. Mita wi ĩ ti komo ha wa taka sii hĩta mai kitä. Hoka apa pa koa wa taka sii hĩtata pasioö. 22Koa taka sii hĩtata hatuka kule na, ĩ na Teusö a kai na sanöma töpö pi hatuka kupaso kitä. Huki töpö pi moti ipö maaki, waiha töpö pi hatukupaso kitäö!‑ ĩ na Jesus a kuuma.
23Ĩ na a kuu nö, ‑Sa kai a hini pi topa totile, ĩ pö sömöka taa totikiö!‑ ĩ na Jesus a kuuma. 24A kuu nö, ‑Teusö a kai ha wa sömöka taa totiköma, kawa na Teusö anö ta hinimoma hö̃töo kitä. Wani ipii Teusö a kai ha wa sömöka taö ha, wani ipii Teusö anö ta hinimoma hö̃töo kitä. Pe epii wa sömöka taö ha, pe epii wa ta hinimoma hö̃töo kitä. 25Wani ipii Teusö a kai ha wa sömöka taa pi topa tä, wani ipii wa kai a hini kule maaki, waiha pe epii Teusö anö wa ta hinimoma asa kitä. Ĩ na tä kua tä, Teusö a kai ha wa sömöka taa wani tä, wani ipii Teusö wa kai a hini waikia maaki, Teusö anö wa hinimoma mi kutenö, Teusö wa kai a hini maa haiatalo opa kitä‑ ĩ na Jesus a kuuma.
‑Teusö a thapo wi ĩ töpö palaso kitä‑
26-27Ĩ na Jesus a kuu nö, ‑Sanöma tänö pili mo wai tököma, mo pala kulaso wi na, ĩ na sanöma töpö na Teusö a simöo sinomoti wi, ĩ töpö pala kua hö̃tösoö. Wa mo tököma, ai tä mumi ha wa mio kõo, ai tä mumi ha wa mio kõo, ai tä mumi ha wa mio kõo, ĩ na wa kuati pi motöati pola tä, mo wai ãkea totia hãtoa pasilo nö, mo patasoö. Mo patasoö ha, “Ĩ ka pi tänö mo pata hö̃töa nö kilisoma?” wa pi kuu. 28Masita tänö mo pata sinomoö. Mosö wai ãkea pailo nö, mo wai sätäa opia nömöiki nö, mokö patasipöa apösoö. Ĩ na tä kuaö. 29Ĩ na tä kuaö ha, ĩ mokö pewö patasipöa totiso noai ha, hikali a na sanöma tänö poo a kai hua soasolöö. Ĩ na tä kua wi na, sanöma töpö na Teusö a simöo sinomoti wi, ĩ na ĩ töpö kua hö̃töoö. Teusö a kai a hini totio wi, ĩ a sami ipö maaki, waiha ĩ anö Teusö ta wäsä kuköma, ai töpö satehe epii töpönö Teusö a täa hö̃töli kitä‑ ĩ na Jesus a kuuma.
30Ĩ na Jesus a kuu nö, ‑“Töpö satehe epii töpö na Teusö a simöo kitä” ĩ na sa kuu pia manu kule, ai uni sa ta wäsä kõo pia kule‑ ĩ na Jesus a kuuma. 31Ĩ na a kuu nö, ‑“Ai mo wai wani ipö” wa pi kuu kule maaki, mosötaahata mo wai wani sati ipö. Ĩ mo wai ãke kua wi na, ĩ na Teusö a kaikanamo wi, ĩ na ĩ tä kua hö̃töoö. 32Ai tänö mosötaahata mokö wai tälö nö, hikali a na mokö wai somösöa hätähalö nö, mokö wai wani ipii maaki, mosö wai ãkelo nö, mosö pata totisoma, mosö pea apöpasoö. Ai tiko mosö na mosötaahata mosö pea satia apa asapasoö. Ĩ mosö patasoma, ĩ mosö pata pe epö salo, ĩ pili ösökö poko pewö hamö salo pö ose sapuku pö wai kuo opaki. Ĩ na ĩ tä kua kua wi na, Teusö a kaikanamo wi, ĩ na ĩ tä pala kua hö̃töoö‑ ĩ na Jesus a kuuma.
33Jesus a na töpö satehe epii töpö sömöka tati noai, ĩ töpönö ta hini totia soala tä, Jesus anö Teusö ta wäsä nö, uni ta wäsätima. 34Ĩ satehe epii töpö na uni ta wäsä mi tä, Teusö ta wäsä maama maaki, kama kai a hua pasitio wi, ĩ töpö na, ‑Uni sa ta wäsähe, ĩ na ĩ ta kuu totia kuleö!‑ ĩ na ĩ töpö na Jesus a kuu asatio nö, ĩ töpö pi hatuka asapamanöma.
Jesus anö ipoko tä wasulö noai ĩ ta
35-36Ĩ tä wakala na soatawö tä wisasoö ha, kama kai a huati wi, ĩ töpö na, ‑Makö pökatökö lasopököö!‑ ĩ na Jesus a kuuma. Ĩ na a kuu ha, söposö ha ai töpö satehe epii töpö takölö nö, Jesus a kai a huati wi, ĩ töpönö Jesus a kai hulasolöma. A kai hulasolöma, ai töpö pi huu haio lasoma. 37Jesus a kai huu soala tä, ipoko ta pata hululua läpalo nö, kutiata õsimö ha pola pata keo soataki nö, maa tuu kasö pata manököa waikitaalöma. 38Maa tuu kasö manöka waikia tä, kutiata kolo ha Jesus a mia kai makeo pikitioma. Watata ösö kauko na a nakö tökö maketioma.
A mia kai maketia tä, ai töpönö a namanö nö, ‑Jesus ai! Makö nasi tuo pia kule maaki, kawa aiki, “Ĩ na tä kua päoö” ĩ na wa pi kuu hãto alu kule‑ ĩ na Jesus a na, töpö kili ipa salo, ĩ na töpö kuuma.
39Töpö kuu ha, Jesus a natalo nö, ipoko ta pata wasulöma. ‑Kua tihöö!‑ a kuuma. A kuu nö, kosoto u pata na, ‑Ĩ na pätawöö! Kalipalo tihöö!‑ ĩ na kosoto u noa thama. Noa thali ha, ipoko ta pata maa kõa soatasoma.
40Kosoto u pata kalio mai, tuu pata kua kõo soatasoma. Tuu pata kua kotaköma, Jesus aiki, ‑Wi na tä kuaö ha makö kili ipaö? “Teusö anö makö noama kitä” makö pi kuu mai‑ ĩ na ĩ töpö na Jesus a kuuma. 41Ĩ na a kuu ha, töpö kili ipa nö, ‑Hi Jesus a hai, ĩ witi a pasiwö? Ĩ na ipoko tä noa thaö ha, ĩ ipoko tä maaki, Jesus a hini hö̃töopa wi. Kosoto u noa thaö ha, ĩ kosoto u patanö Jesus a hini hö̃töopa wi, kalio mai tuu pata kua kõo soataki ke‑ ĩ na kama töpö noa thasoma.
5Kusi kökö na sai töpö lisipamanö noai ĩ ta
1Ĩ na tä kua tä, kosoto u pökatö ha sietasa tili töpö pililali, ĩ hamö töpö pökatöa soatakö lasoma. 2Töpö pökatöa soatakilö nö, töpö söposöpalo nö, nomawö töpö titio sinomoti pa a wani kuoma, Jesus a na a wani ekua läköma. 3A wani ekuo läle, sai tänö ĩ a wani saliama sinomotima. Nomawö töpö titiomö kuo sinomo wi hamö, ĩ hamö a wani piliomö kuoma. Ai töpönö söpala ösö totokönö a wani õkatima maaki, a wani õka tomöpoti maama. 4Söpala ösökö pata ha a konona a wani tititioma maaki, ĩ a waninö söpala ösökö wania kotioma. Söpala ösö totonö a poko wani õkatioma maaki, totokö huitia konanöma. A wani lotete epö salo, ai töpönö a wani utitipama maama. 5A wani utitipama mi ha, nomawö töpö titio pamö a lalupalo kai wani hutii, ki hamö, maa makö pata hamö a lalupalo kai wani hutii, mumai ha a hutii, wakalai ha a hutii, ĩ na ĩ a wani kuatima. Maa ma namo patanö kama ösö wani hikiko pätioma.
6Ĩ na a wani kuati tä, pai hamö Jesus a huu talalö nö, a wani läläa läiki nö, ‑Kaikana wa pata‑ a pi wani kuu nö, a mãi wani poa läköma. 7-8A mãi wani poa läki ha, ‑Sai wa wani! A lisia kopaloö!‑ ĩ na sai tä wani na, ĩ na Jesus a kuuma. Jesus a kuu ha, a mãi wani pole, ĩ a wani lalupalo nö, ‑Jesus ai! Ösö hamö Teusö a kule, ĩ pelupö waö! Ĩ ka pi wa tä thaamö huu ke? Teusö a na kawa aiki, “Hi sa wani peama pasipa mai kitäö!” ĩ na a kuu totihoö!‑ ĩ na a wani lalupalo pola nö, ĩ na a wani kuuma.
9A wani lalupalo kuu ha, ‑Wi na wa hilo kuaö?‑ Jesus a kuu ha, ‑Sai samakö satehe epö salo, Satehei tili samakö hiloöö!‑ a wani kuu nö,
10‑Tiko tä uli hamö hi sai töpö simöpa tihöö!‑ a wani ku upama.
11-12‑Ki hamö, heu tä palökö ha kusi kökö satehe epii kökö iapolali, ĩ kökö õsimö ha samakö thaa nömököö!‑ ĩ na sai töpö ku upatima.
13Töpö ku upati ha, ‑Awai. Kusi kökö na pö kuikiö!‑ Jesus anö töpö noa thaö ha, sai töpö ekua hö̃töiki nö, ki hamö, kusi kökö õsimö ha töpö lisia nömöpasoma. Töpö lisia nömöpalo nö, satehe epii kökö, 2.000 kökö, ĩ na kökö kui kökö läläa timöpalo nö, kosoto u pata ha kökö kea soapasoma. Kökö kea soapalo nö, kökö nasi pewö tua soapasoma. 14Kökö nasi pewö tua soapasoö ha, kusi kökö na töpö kalipalo sinomo wi, ĩ töpö läläa soalö nö, ai töpö na, ‑Ki hamö Jesus a waninö sai töpö thaki ha, kusi kökö nasi pewö tupaso keheö!‑ ĩ na ĩ töpö kupalotima. Sai pö satehe epii, sai pö hö̃kököa apöle, ĩ pö sai ha ta wäsä naio soatama. Ki hamö sai pö kuo sololo opa pa tä wäsä naio soatama. Kusi kökö wanisalama wi, ĩ ta wäsä hätäpoö ha, ai töpö hulasolö wi, ‑Kamisa solo. Sa tä möö! Kusi kökö isi waniama noai, ĩ sa tä möpöö!‑ töpö kuu kai hua soasolöma. 15Jesus a na töpö hua soalolö nö, sai töpönö a wani saliama sinomo noai, ĩ a wani talalömae. A polemo mai ha, a wani temö öpii, kama hai ĩ haloi ösö na a wani haloa soaiki nö, a wani lotioma. A wani lotia tä, ai töpönö a wani talalö nö, töpö kilia apösoma. 16Töpö kili ipa tä, Jesus anö a wani toa komanö noai, ai töpönö ĩ tä taa totio noai, ĩ töpönö ĩ ta wäsäö, kusi kökö isi waniho taa totio noai ĩ ta wäsäö, ĩ na tä pewö a wäsä kua läoma.
17Ta wäsä läo nö, Jesus a na, ‑Ipa tä uli ha a kuo tihöö! Tiko hamö a hua kononöö!‑ ĩ na töpö pewö kuuma.
18Töpö kuu ha, kutiata a na Jesus a titio pia tä, sai töpönö a wani saliama sinomo noai, ĩ a wani aiki, ‑Kamisa solo. Kawa na sa huu naiopököö!‑ ĩ na Jesus a na a wani ku upama.
19A ku upa kule maaki, ‑Naiö! Au ai töpö na a kõa pasilolöö! Au ai töpö na, “Sai töpönö sa saliama sinomo kipili maaki, Teusö Kaikana ta patanö töpö hosali kipiliö! A totiatalo opa thaliö!” wa kuupököö!‑ ĩ na Jesus anö a noa wani thama. 20A noa wani thaö ha, a wani konasolöma. A kononö nö, Tekápolisö tä uli pewö hamö a wäo nö, ‑Sai töpönö sa saliama sinomo kipili maaki, Jesus anö töpö hosali kipiliö!‑ ĩ na a wani kutima. Ĩ na a wani kuu wi, ai töpönö ĩ ta hininö nö, ‑Kilatiha! A isi wani waniho opama maaki, a wani toa totia kotaso noa‑ ĩ na ai töpö pewö kuuma.
Jaitu a pata waloa haikö noai ĩ ta
21Ĩ na tä kua tä, kutiata a na Jesus a pökatöa konasolöma. A pökatöa kononö nö, kosoto u kasö pata ha a huu soa tä, Jesus a na töpö satehe epii töpö waloa läköma. 22Töpö waloa läiki nö, Jaitu a pata waloa haiköma. Kaikana tä kutenö, juteu töpö kokamo sinomoti wi, ĩ a sai pö ha Jaitu a pata simöo sinomotima. Jesus a huu soa tä, Jaitu a pata waloa haiki nö, Jesus a talalö nö, ‑Kaikana sa maaki, hi a pata hai ĩ kaikana tä sai pata‑ a pi kuu salo, Jesus a kotö ha a mãi poa läköma.
23A mãi poa läiki nö, Jesus a na, ‑Ipa thäwö a wai noma pia sailaliö!‑ a kuu nö, ‑Hapo. Ipa wai na a ami walikiö! Wa ami waliköma, ipa wai temöa kõa soatasopököö!‑ ĩ na a pata ku upaö ha, 24ĩ a pata na Jesus a nokasolöma.
Jesus hai ĩ haloi ösö höpöa hãtopalö noai ĩ ta
A kai huu soatioima tä, Jesus a na töpö satehe epii töpö hua nainonö nö, Jesus a na töpö pakäho opama.
Suö tä salia apa noai ĩ a
25Ĩ hamö suö a huu naionöma. Satehe epii, 12 tä inama kua waikia kule maaki, suö tä iä mapo haio maama. 26Töpö ononotama wi ĩ töpö satehe epii töpönö a timö wani pima maaki, a wani salia satimo opatima. Ĩ töpönö a wani peama apama. A salia apa soa päla nö maaki, töpö ononotama wi ĩ töpö na kama hai wani tä pewö totoa asa päköma. Kama hai wani tä pewö totoa asakö noai ha maaki, a toö kõo maama. A salia sipa soasolöma.
27-28A salia sipa soa tä, töpö satehe epii töpö huulö pamö a wani huu naionö nö, Jesus a na a wani hua hailolö nö, Jesus a na a nasö wani hulia haiköma. A nasö wani hulia haiki nö, ‑Jesus hai ĩ haloi sa ösö höpöa pätama, sa toa konaso kitä‑ a pi wani kuu salo, haloi ösö höpöa hö̃töoma. 29Haloi ösö höpöa päpalöma maaki, a kupo maa kotasoma. ‑Sa kupo maa kõa nö topaloe‑ ĩ na a pi wani kuu soatasoma.
30Suö tä pi wani kuu soa tä, Jesus aiki, ‑Sa lotetea apöle, ĩ tänö ai tä toa kõa hãtopaso ke‑ ĩ na Jesus a pi kuu nö, satehe epii töpö mötali ha a öpa nomöhöpalo nö, ‑Witinö ipa haloi ösökö höpöa hãtopali ke?‑ ĩ na Jesus a kuuma.
31Ĩ na a kuu ha, kama kai a hua sinomoti wi ĩ töpö aiki, ‑Kawa na satehe epii samakö pakäho opa wi maaki, “Witinö ipa haloi ösökö höpöa hãtopali ke?” wa ta kuuwö‑ ĩ na Jesus a na Ĩ töpö kuuma.
32Ĩ na ĩ töpö kuuma maaki, Jesus a mamonö tä tae hö̃töoma.
33A mamonö tä tae tä, suö tä aiki, ‑Jesus anö sa toa kõa waikipali ke‑ ĩ a pi wani kuu nö, a kili ipa salo, a satitimo nö, Jesus a kotopö ha a mãi poa soataköma. A mãi poa soataiki nö, Jesus a na, ‑Kamisanökö. Sa salia apa salo, kamisanö au sa ösö höpöpali ke‑ ĩ na a wani kuti nö, tä pewö a wäsä totioma. 34Ta wäsä totioö ha, ‑“Jesus anö sa toa komani kitä” wa pi kuuma salo, wa toa konaso ke. A kili mai, a kopolöö! Wa salia maneö!‑ ĩ na Jesus a kuuma.
Jaitu a pete a temöa komanö noai ĩ ta
35Ĩ na Jesus a kuu pola tä, Jaitu a kaikana sai pö ha töpö kuo noai, ĩ töpö waloa läköma. Töpö waloa läiki nö, Jaitu a pata na, ‑Au thäwö a noma totia apa hisaloheö! Jesus a naka tihöö!‑ ĩ na töpö kuuma.
36Töpö kuuma maaki, Jesus anö ĩ ta hini nö, Jaitu a pata na, ‑A pi honipo tihöö! A pi topaikiö! “Jesus a lotete epö kitä” a pi kuu totihoö!‑ ĩ na Jesus a kuuma. 37A kuu nö, ‑Ai pö noka tihöö!‑ ai töpö na a kuu nö, Pedro, Tiago, Tiago a poose João, ĩ na töpö kui töpö na a hapalo asa nö, ‑Makö huu pätaö!‑ ĩ na Jesus anö ĩ töpö noa thama.
38Töpö noa thalö nö, kaikana sai pö hamö töpö taa soalalotö nö, Jesus anö töpö satehe epii töpö ö̃kö lalupalo hininö tasoma. 39Töpö ö̃kö lalupalo hininötö nö, a lisipalo nö, ‑Wi na tä kuaö ha makö ö̃kö lalupalo opati kule? Moko tä nasi tuo maahe. Tä mia pätia alu kuleö!‑ ĩ na Jesus a kuuma.
40Ĩ na a kuu ha, ‑Hö. Pi moti wani kuti ti! Tä nasi tua totiki alu ke pi kuu mai‑ ĩ na töpö kuuma. Ĩ na töpö kuu ha, Jesus anö ĩ töpö pewö atupamanöma. Moko tä hai ĩ pö̃ a, pöpönö a, Jesus a na töpö huu naine ĩ töpö, ĩ na töpö kui, moko tä kuo pa ĩ töpö lisia asapasoma.
41Töpö lisia asapalo nö, moko tä ami ha Jesus a ami walia soataiki nö, ‑Talitá kumi‑ ĩ na Jesus a kuuma. Kamakö kai sai ha a hapaloma aköna, ‑Naka ai! A öpa kopaloö!‑ ĩ na a kuu noa kipi.
42-43Ĩ na a kuu ha, moko a hĩso ukua kono nö, a öpa kõa soatalo nö, a huu kõo soatama. A huu kõo soataö ha, ‑Tä aipa apa nö kiliawö‑ töpö pi kuuma.
Ĩ na tä kua tä, Jesus aiki, ‑Hi moko tä na nii tä totoköö!‑ a kuuma. A kuu nö, ‑Pö wäo tihöö!‑ ĩ na Jesus anö töpö noa thaa totilöma. ‑Hi töpö wäo ha, “Jesus anö sa toa komani kitä” ai töpö pi kuu nö, Teusö ta hini wani ipö maaki, kamisa na ĩ töpö satehe epii töpö walokö matimöö!‑ ĩ na Jesus a pi kuu nö, ‑Pö wäo tihöö!‑ töpö noa thaa totilöma.
Ĩ moko tä temöa konaso noai, ĩ tä na 12 inama tä kuo waikioma.
6Kama hai ĩ tä uli ha Jesus a kotapölö noai ĩ ta
Mateus 13.53-58; Lucas 4.16-30
1Ĩ na tä kua tä, kama hai ĩ tä uli hamö Jesus anö kama kai a hua sinomoti wi, ĩ töpö kai kõa soapölöma.
2Töpö kai kõa soapolö nö, mota mato wi ĩ tä wakala ha juteu töpö kokamo sinomoti wi, ĩ a sai ha Jesus anö Teusö a kai ha töpö pi hatukuma kuköma. Ĩ töpö satehe epii töpönö Jesus a kai a hini nö, ‑Jesus a haö aipö öpö kiliwö‑ ĩ na töpö kuuma. Töpö kuu nö, ‑Witi hamö hinö ta hinimö kua tasoma? Wi na kua nö, a pi hatukua asasoma?‑ töpö kuu nö, ‑Jesus anö tä aipöma apa nö kiliawö. Wi na kuati nö, a lotetea apöpasoma?‑ töpö kuuma.
3Töpö kuu nö, ‑Hii ti na a kalipalo sinomoti wi, ĩ a ta pi kuu mi sai. Maria a hai ĩ pelupö a matatä. Tiago, José, Jutasö, Simão, ĩ töpö hai ĩ pepala a matatä. Kamakö na pese töpö kua naine, ĩ pese a pasiwö‑ ĩ na kama hai ĩ töpö pewö hãtomo nö, töpö kuuma. Ĩ na töpö kuuma, ĩ töpönö Jesus a hini wanio opama.
4A hini wani ipö ha, Jesus a hapalo hö̃töo nö, ‑Teusö a kai a wäsä sinomo wi, tiko hamö ĩ a wäa tä, tiko töpönö ta hini pi topa apa asa kitä. Kama hai ĩ tä uli ha töpö pilio wi, ĩ töpö, kama hai töpö sai, ĩ na kilii töpönö ĩ a kai a hini wani ipö pasi kitä‑ ĩ na Jesus a kuuma.
5Ĩ na a kuuma, ĩ töpönö Jesus a hini wani ipö salo, ĩ hamö Jesus anö tä aipöama totio pasio maama. Polakapi töpö höpöa sisa nö, töpö toa kõo asamanöma.
6Polakapi töpö toa kõo asamanö nö, ‑Häö! Hi töpö aiki, “Jesus a pitili. A lotete epö” hi töpö kuu mi salo‑ ĩ na Jesus a pi kuuma. A pi kuu nö, ĩ tä uli kotö ha sai pö kua sototopai, ĩ tä uli hamö Jesus a huu hätäpotima. A huu hätäpoti pamö, Teusö a kai a wäsä nö, Jesus anö töpö pi hatukupamatima.
Jesus anö kama hai 12 töpö simönö noai ĩ ta
7Ĩ na tä kua tä, kama kai a hua sinomoti wi, 12 töpö, ĩ töpö nakalö nö, töpö simöa soalöma. Ki hamö ai polakapi tökö hama simöni, ki hamö ai polakapi tökö hama simöni, ki hamö ai polakapi tökö hama simöni, ĩ na töpö hama simöa setekea thaköma. Töpö hama simöa setekea thama pia tä, ‑Kamisanö sai sa töpö hosa kua wi na, ĩ na makö kua hö̃töopököö!‑ ĩ na Jesus a kuuma.
8-9A kuu nö, ‑Makö hama huu pa, ĩsa ãi poolö tihöö! Solai a sipoolö tihöö! Sitipa ma kökö pi poolö tihöö! Hitihimo wi ĩ tiki po sisalölöö! Pili makö ami huu wi, ĩ makö ami halole, ĩ tökö thaa sisalölöheö! Polakapi haloi ösökö poolö maikiö! Sami ösö haloa hätähäa päaköheö! Ĩ na poke epii pö alulöö!‑ ĩ na Jesus anö töpö noa thama.
10Töpö noa thaa nö, ‑Ai töpö sai pö na makö hamamo salo, sami a sai ha makö pökö kuo totiataloö! Pö pökö kuo hätäpo tihöö!
11Ai töpö sai pö hamö makö hama huu pa, “Hisa ha pö kuikiö!” töpö kuu mai ha, “Makö a hini wani saiö!” töpö kuu ha, makö sapa kõa soapaloö! Makö sapa kõo soapalo nö, “Makö a hini wani saiö!” töpö kuu wi, ĩ tä noa na makö ami koasipö honöpaloö! Makö ami koasipö honöpasoö ha, kama töpö aiki, “Kamisamakö na Teusö a hĩso hãtoa kuleö!” ĩ na töpö pi kuupö‑ ĩ na Jesus a kai a hua sinomoti wi, ĩ na ĩ töpö noa thama.
12Töpö noa thaö ha, töpö hama selekepo tasoma. Töpö selekepalotö nö, Teusö ta wäsätima. ‑Makö wanisala apati wi, ĩ tä ha makö pi otataloö! Wanisala ma tä thaa wi, ĩ tä hosalöö! Thama kota ti!‑ ĩ na ĩ töpö kutima.
13Töpö kuti tä, ĩ töpönö satehe epii sai töpö hosalöma. Töpö satehe epii töpö salia wi, hii ti mo tapunö ĩ töpö huluka nö, töpö toa komanöma.
João Pasisöta a olai wani päpalö noai ĩ ta
14Ĩ na tä kua tä, ĩ tä uli pewö hamö töpö pilipai ĩ töpö aiki, ‑Ĩ na Jesus a kua thaliö!‑ ĩ na töpö kupalotima. Töpö kupaloti ha, Jesus a kuati noai, Etoosisö kaikana tänö ĩ ta hini hö̃töoma. Ai töpö aiki, ‑Jesus a hai, ĩ João Pasisöta a säpalö noai, ĩ aiki. A nomawö maaki, a temöa kõo hãtosomakö. Önö kutenö, Jesus a lotete epö salo, tä aipöamatiwö‑ ĩ na ai töpö kuuma.
15Ai töpö aiki hö̃töwö, ‑Jesus hai, ĩ Elias a pata pasiwö! Sutu upa Elias a pata kuo noai, Jesus a hai, ĩ Elias a pata pasiwö!‑ ai töpö kuu hö̃töoma. Ĩ na tä kua tä, ai töpö aiki hö̃töwö, ‑Sutu ha Teusö a kai wäsäti noai, ĩ töpö kuo noai na, ĩ na Jesus a kua hö̃töoö‑ ĩ na ai töpö kuu pasioma.
16Kuu pasioö ha, Etoosisö a pata aiki, ‑Naiö! Kamisanö pili sa olai wani päpamanipili, João Pasisöta a hilo wi, ĩ a toa konasomaö!‑ ĩ na Etoosisö a pata kuuma.
17-20João a olai päpalö noai, ĩ na ĩ tä kuama: Etoosisö a patanö poose Filipe a hai ĩ pusopö Etoosisösoma a wani sua lälöma. A sua läli ha, João aiki, ‑Wanisala. Au hoosa hai ĩ pusopö a sua läli wi, ĩ tä wanisala. “Hoosa hai ĩ pusopö thama läo ti!” ĩ na Teusö a kuu‑ ĩ na Joãö a kuuma.
Ĩ na a kuu ha, Etoosisösoma a waninö a wanipo hö̃töoma. A wanipo hö̃töoö ha, Etoosisö a patanö ai töpö simönö nö, João a õkapamanö nö, a titiköma. Etoosisösoma a wani aiki, ‑João a säpamanöö! A säpamanöö!‑ ĩ na a wani kutima maaki, Etoosisö a patanö a noama apa läoma.
‑João a topa apaö. Teusö a na a mamo teteo sisaö‑ ĩ na Etoosisö a pi pata kuu salo, João a na a kilitima. A kili ipati ha, sai a ha a titia soama maaki, a noama apa lätioma. A noama apa lätia tä, João a hiniti nö, ‑Wi na taköö! Sa wanisala waikiwö! Ka pi sa tä thaa pätaköö!‑ ĩ na Etoosisö a pi pata kutima maaki, João a hini pi topa soatioma.
21Ĩ na tä kua soa tä, Etoosisö a pata thapali wi, ĩ tä wakala ha kõwö, ai töpö nakalöma. Kamanö töpö simöati wi ĩ töpö, pata töpönö sotatu töpö simöa sinomoti wi ĩ pata töpö, Kaliléia tä uli ha pata töpö kuo wi ĩ töpö, ĩ na töpö kui, töpö nakalö nö, töpö liamama.
22Töpö iapalo tä, moko tä hai, ĩ Etoosisösoma a wani hai ĩ pete a hai, ĩ a lisipalo nö, Etoosisö a patanö töpö kai iapaloti pole, ĩ töpö pewö lole, ĩ ha Etoosisösoma a hai ĩ pete a paöatima. A paöati nö, Etoosisö a pi pata mönahapalama apatima. Töpö pi mönahapalama apaö ha, ‑“Kamisa na a nako läoö! Wa tä pi ipa wi, ĩ wa tä nakali ha, sa tä totoa hö̃töki kitä.
23Sa simöoti wi, ĩ tä uli ha ipa wani tä kua apa wi, ĩ wa tä see pata naka kitä maaki, sa tä totoa totia apa hö̃töki kitä. Kamisanö wani sa tä thapo kua wi na, ĩ na kawanö wani wa tä thapo kua ösöhopöö! Pitili sa” ĩ na sa kuu totia kuleö!‑ ĩ na a pata kuuma. Ĩ na Etoosisösoma hai ĩ pete a na a pata kuu ha, 24pöpönö a na a ekua soaköma. A ekua soaiki nö, ‑Ĩ ka pi sa tä nakalöpö?‑ a kuuma. A kuu ha, ‑Huki ipa salo sa oaö!‑ a pi kuunö, ‑João Pasisöta he wani nakalöö!‑ ĩ na pöpönö a kuu hö̃töoma.
25A kuu hö̃töoö ha, kaikana a pata na pete a läläa koonö nö, ‑Pötaatu tä na João Pasisöta a he wani titikö nö, a he pi wani piho kõo haitaö!‑ ĩ na Etoosisö a pata na a kuu hö̃töo tasoma.
26Ĩ na a kuu hö̃töo tasoö ha, Etoosisö a pi pata ota apöpasoma maaki, hama töpö hini pola tä, ‑Sa tä totoa totia hö̃töki kitä‑ a pata kuu waikioma ha, ‑Päla. A he pi wani piho mai kitä‑ a kuu kili ipama.
27‑Päla‑ a kuu kili salo, ‑Pili a he wani sua kõaki solöö!‑ ĩ na ai sotatu tä noa thaa soatama. A noa wani thaa soataö ha, a hulolö nö, João a titio pa, ĩ a sai õsimö ha, olai wani päa soapalöma.
28A olai wani päa soapalö nö, pötaatu tä na a he wani titikö nö, a he kai wani waloa kõkö solöma. Moko tä na a he pi wani totoköma. Tä totoki ha, moko tänö pöpönö a wani na a he pi wani totoa nömököma.
29A he pi wani totoa nömököma, João a kai a hua sinomoti wi, ĩ töpönö ta hininö nö, töpö hulolönö, pili a sai wani konötö nö, thaka taka hamö pili a sai wani titia pasia kõköma.
Ĩsa ãi, salaka kökö, ĩ na tökö pala thamanö noai ĩ ta
Mateus 14.13-21; Lucas 9.10-17; João 6.1-14
30Ĩ na tä kua tä, Jesus anö kama hai 12 töpö simönö noai, Jesus a na ĩ töpö waloa koiki nö, ĩ töpö kuati taso noai, ĩ tä pewö a wäsä kõsolöma. Tä pewö a wäsä nö, ‑Wa kuu noai, ĩ tä pewö na sama töpö pi hatukupamati kipiliö!‑ ĩ na töpö kuuma.
31Ĩ na tä kua tä, Jesus a kule ha, ĩ ha ai töpö satehe epii töpö huta hutamo läapalo opati ha, Jesus a kai a hua sinomoti wi, ĩ töpö kai ia pi topama maaki, töpö kai ia maama. Töpö kai ia mi ha, Jesus aiki, ‑Ki hamö, töpö maa pa, makö hulolö nököö! Pö mota maa paitaloö!‑ ĩ na Jesus a kuuma.
32Ĩ na Jesus a kuu nö, kutiata a na, a kai a hua sinomoti wi, ĩ töpö kai titia soa asataiki nö, töpö hua soa asasolöma.
33Töpö pi hua soa asasolöma maaki, töpö satehe epii töpönö ĩ töpö pi huu taa hailalö nö, ‑Ki Jesus a piö! Kama kai a hua sinomoti wi, ĩ töpö kai pökatö kimani‑ ĩ na töpö kuu haioma. Töpö kuu haio nö, piliso hamö töpö läläa tolehepasoma. Ai sai pö pewö hamö töpö kulati, ĩ ai töpö satehe epii töpö solo, kosoto u kasö pata hamö töpö läläa sokea tolehepalo nö, Jesus a pi katöo paita mai ha, töpö läläa tolehepo pole, ĩ töpö waloa paitaköma.
34Ĩ na tä kua tä, Jesus a söposöpalo nö, satehe epii töpö hila läo pa, töpö möö nö, ĩ töpö na Jesus a pi honipoma. Oweha pö na ai töpö mamo läapalo sinomoti wi, ĩ töpö mai ha oweha pö pea kua wi na, ĩ na ĩ töpö pea kua hö̃tötioma. Ĩ na ĩ töpö pea kua hö̃tötioö ha, ĩ töpö na Jesus a pi honipo opama. A pi honipo opa nö, töpö pi hatukupamani pia salo, pe epii Teusö ta wäsä soatama.
35-36Teusö ta wäsä tä, tä wisa pälasoö ha, Jesus a kai a hua sinomoti wi, Jesus a na ĩ töpö ekuiki nö, ‑Tä wisa waikileö! Hisa ha nii tä maneö! Hisa ha ai töpö pilia maa saileö!‑ ĩ na ĩ töpö kuu nö, ‑Hi töpö oi sai. “Pö huu koonöö!” a kuu! Polakapi sai kuo sololo kulali ĩ sai pö, ai sai pö satehei sai pö kuo laso wi ĩ sai pö, ĩ na sai pö kui sai pö hamö hi töpönö sitipa kökö ha kama töpö hai ĩ nii tä tälöpököö!‑ ĩ na Jesus a na töpö kuuma.
37Ĩ na töpö kuuma maaki, Jesus aiki, ‑Kamakönököö! Hi töpö na kamakönö nii ma tä totoaköö!‑ ĩ na Jesus a kuu hö̃töoma. Ĩ na a kuu hö̃töoö ha, ‑Ka pi tänö sama töpö iamapö takö? Hi töpö satehe epö manu kule, ĩsa ãi noa apö kitä ta pi kuu mai. 8 pilipoma kökö ha sanöma tä kalipalo pi kua wi, ĩ tä noa kui na, ĩ na ĩsa ãi noa kuö hö̃tö kitä‑ ĩ na ĩ töpö kuuma.
38Ĩ na töpö kuu ha, ‑Wi na kilii ĩsa ãi kua waikia kule? Ma tä mötatöö!‑ a kuuma. A kuu ha, ĩsa ãi talalö nö, ‑5 ĩsa ãi, polakapi salaka kökö, ĩ na kökö kui tökö kua päa kuleö!‑ ĩ na töpö kuuma.
39-40Ĩ na töpö kuu ha, Jesus aiki, ‑Sĩsi tä manönö öpii sĩsi tä kule ha pö loo sokamopotöö!‑ ĩ na Jesus a kuu ha, ĩ töpö loo sokaköma. Ki ha ai töpö satehe epii, ĩ 100 töpö loo sokaa, ki ha ai töpö satehei, ĩ 50 töpö loo sokaa, ki ha ai 100 töpö loo sokaa, ki ha ai 50 töpö loo sokaa, ĩ na töpö loo sokaa kuoma.
41Töpö loa soka tä, Jesus anö 5 ĩsa ãi, polakapi salaka kökö, ĩ na kökö sua thalö nö, hi tä hẽtu pata hamö a mamo teteiki nö, Teusö a na, ‑Hapa. Hi nii wa tä totopi keheö! Wa toita apö‑ ĩ na Jesus a kuuma. Ĩ na Jesus a kuu nö, ĩsa ãi nakasilalö nö, kama kai a hua sinomoti wi ĩ töpö na, ‑Ika. Hi töpö na ĩsa ãi totoaköö!‑ Jesus a kuuma. A kuu nö, polakapi ĩsa ãi kuoma maaki, ĩ ãiki pala soamanöma. Salaka a wai polakapi maaki, salaka pala hö̃tömanöma. Önö kutenö, ĩ töpö pewö na, ĩsa ãi, salaka kökö, ĩ na tökö totoa thaa soaköma.
42Tä totoa thaki ha, ĩ töpö pewö iapalo nö, töpö pewö pötöa soasoma.
43Töpö pewö pötöa waikilaso noai ha, wöö kökö, 12 kökö wöö ha ĩsa ãi nakasi, salaka nakasi, ĩ na tä kasö pata manöka kula tä, satehe epii wöö kökö konönöma.
44Ĩsa ãi oalalö noai, satehe epii töpö kuoma. 5.000 wano töpö, suö töpö, ulu töpö, ĩ na töpö kui töpö sateho opama.
Maa tuu hösöka hamö Jesus a huu noai ĩ ta
45Ĩ na tä kua tä, Jesus aiki, ‑Kutiata a na pö titikiö! Pökatö hamö, Petösaita tä uli hamö pö pi huu paiolöö! Hi töpö satehe epii töpö kule, ĩ töpö na, “Pö kõa pasia hailolöö!” ĩ na sa kuu pasio pia kuleö!‑ ĩ na Jesus anö kama kai a hua sinomoti wi, ĩ na ĩ töpö noa thama. 46‑Pö kononöö! Ki hamö sa huu pasiolököö!‑ ĩ töpö na Jesus a kuu nö, heuma tä hamö Teusö a na a hapalopö, a hulasolöma.
47Teusö a na a hapaloti tä, tä mumasoö ha, ki hamö, kosoto u mötali pata ha kama kai a hua sinomoti wi ĩ töpö pi kaläma. Söposö ha sami Jesus a öpa haitioma. 48Ĩ tökö soatawö, kosoto u mötali pata ha, ipoko ta patanö ösö saläälö ha, ĩ töpönö lope epii ösö saka hö̃töoma. Lope epii ösö saka pola tä, Jesus anö töpö tapa haioma. Töpö tapa haio nö, halu äwäho tä, maa tuu hösöka hamö ĩ töpö na Jesus a huu haiolöma. Ĩ töpö na a hasuo pia tä, 49-50maa tuu hösöka ha a huulö ha, töpö pi honipo opa nö, ‑Sai tä wani hãtowöö!‑ ĩ töpö pi kuu nö, lope epii töpö lalupaloma. Töpö lalupaloö ha, ‑Pö pi honipo opati ti! Kamisaö! Pö pi topaikiö!‑ ĩ na Jesus a kuuma. 51A kuu nö, kutiata a na a titia naiköma, ĩ ha ipoko ta pata maa kõa soatasoma. Ipoko ta pata maa kõa soatasoö ha, töpö pi wi na takömoa pälasoma.
52‑Jesus anö ĩsa ãi palamanipili, ĩ a lotete epö. A aipö öpö‑ ĩ na töpö pi kuu pola nö kuno mai, töpö pi hatukupo mi ipö salo, töpö wi na takömo opama.
Sienesaté tä uli ha, töpö toa komanö noai ĩ ta
53Ĩ na tä kua tä, töpö pökatölolö nö, Sienesaté tä uli hamö töpö waloiki nö, kutiata a saipalö nö, 54töpö söpopasoma, ai töpönö Jesus a taa soatalalöma. 55A taa soatalalöma kutenö, ĩ tä uli pewö hamö töpö läläalö nö, ‑Ki hamö Jesus a kua kulaliö!‑ töpö kuu hätäpo nö, Jesus a kuo pamö mia kai pata wi, ĩ ti na töpö salia apa wi, ĩ töpö pi salukulölöma.
56Ki sai satehe epii, sai hö̃kökö öpii sai a kule ha Jesus a lisipasoö, ki ai a sai polakapi sai hö̃kököi sai a kule ha a lisipasoö, ki ai a sai polakapii sai sololo kule ha a lisipasoö, ĩ ha Jesus a lisipo pa sapono ha töpö salia apa wi, ai töpönö ĩ töpö paköma. Töpö pakö nö, Jesus a na töpö hapalo nö, ‑Hi töpö salia apa wi, ĩ töpönö au haloi ösö kasö höpöa päopököö!‑ Jesus a na ĩ na töpö kuuma. Ĩ na töpö kuuma, töpö salia wi ĩ töpönö Jesus a hai ĩ haloi ösö höpöa nö, ĩ töpö toa kõa soatasoma.
7Töpö holisi Teusömo päo wi ĩ töpö
1Ĩ na tä kua tä, patiseu töpö, Moisés a kai a wäsä sinomoti wi ĩ töpö, ĩ na töpö kui, Jetusalẽi tä uli hamö töpö kuoma, Jesus a na ĩ ai töpö kokamoma. 2Töpö kokamo nö, ĩ töpö mamo lätia tä, Jesus a kai a hua sinomoti wi, ĩ töpö ami sanumo paio mai, töpö iapaloma. Patiseu töpö ami sanumo totio mai ha, töpö ia maa noai kitä.
3‑Makö ami sanumo totio mai ha, pö ia soa päatalo ti!‑ sutu upa ĩ na pata töpö kuu sinomoma kutenö, ami sanumo paio mai ha, patiseu töpö, juteu töpö pewö, ĩ na töpö kui töpö ia mai kitä. Pata töpö kua kua sinomoti noai na, ĩ na patiseu töpö, juteu töpö pewö, ĩ na kilii töpö kua toleatii. 4Wani tä suta wi, ĩ hamö ĩ töpönö wani tä sulö nö, wani tä kai kopo nö, ‑Ipa wani tä na wasu wasu tä kua hãtole kitäö!‑ ĩ na töpö pi kuu nö, tä salupa paio mai ha, ĩ töpö ia mai kitä. Tä salupali pia salo, mokota a salupali, hapoka a salupali, tasa tä salupali, ĩ na töpö kua sinomotii. 5Ĩ na töpö kua sinomoti ha, patiseu töpö, Moisés a kai a wäsä sinomoti wi ĩ töpö, ĩ na töpö kui, Jesus a na ĩ töpö hapaloma. Töpö hapalo nö, ‑“Wa ami sanumo paio mai ha, a ia tihöö!” ĩ na pata töpö kuu thali maaki, kawa kai a hua sinomo wi, wi na ĩ töpö pi kuu salo, töpö ami sanumo mai ha töpö ia soa päatalo opatii?‑ ĩ na töpö kuuma.
6Ĩ na töpö kuu ha, ‑Kamakö holisimo opatiwö. Sutu upa Isaías a patanö kamakö a kateha totioma. Kateha noai, ĩ ta pitilia apa. Ĩ ta kateha noai, ĩ tä sãököpalö nö,
“Ĩ töpö aiki, ‘Teusö a toita apö. Teusö sa pii’ ĩ na pili kai ha töpö ku upa wi maaki, pili töpö õsinö Teusö a pii totio mi. Ĩ töpö holisi Teusömo päoö.
7‘Teusö a kuu wi, ĩ sa tä wäsä sinomoö!’ töpö pi kuti kule maaki, sanöma töpö pi saimo wi, ĩ ta wäsä pasio päoö”
ĩ na tä kuu wi, Isaías a patanö tä sãököpalöma. 8Teusö a kuu wi, ĩ ma ta hini wani ipö kutenö, pata töpö kuu noai, ĩ ma ta hini sisaö‑ ĩ na Jesus a kuuma.
9Ĩ na Jesus a kuu nö, ‑Pata töpönö makö noa thaa sinomoti noai, ĩ ma ta hini totiopö, Teusö anö makö noa thaa wi, ĩ ma ta hini wani ipö saiö! 10Sutu upa, Moisés a pata aiki,
“Au hao a, au nao a, ĩ na töpö kui töpö a hini totoö! Wa töpö pi ipa nö, wa töpö pasilipopököö!” ĩ na a kuu nö, “Au hao a, au nao a, ĩ na töpö kui töpö na wa hapalo wanisala apaö ha, ai töpönö wa säpalöpököö!”
ĩ na Moisés anö sanöma makö noa thama. 11Ĩ na makö noa thama maaki, kamakö aiki, “Au hao a, au nao a, ĩ na töpö kui, wani tä na ĩ töpö honimo kule maaki, ‘Hapa. Napa. Hi ipa wani tä kule, Teusö a na ĩ sa tä totoa waikiköma kutenö, wani tä na makö pasilipo mai kitäö!’ ĩ na ai wa kuu ha, 12‘Teusö a na ĩ wani sa tä totoa waikiköma’ ĩ na wa kuu waikioma kutenö, ‘Ĩ wani tä na au hao a, au nao a, ĩ na wa töpö makö pasilipopököö!’ kawa na ĩ na samakö kuu mai kitäö!” ĩ na makö kuu sila apawö. 13Ĩ na makö kuu tä, Teusö ma kai a hini totio mai, kama makönö ai ma töpö noa thaa päo wi, ĩ ma ta hini sapa pi topa apa kõo päoö. Ĩ na makö kua sinomotii. Teusö ma kai a hini totio mai, pata töpönö makö noa thaa sinomo pätio noai, ĩ na au ulu ma töpö noa thaa tolea päatalo opatiwö‑ ĩ na Jesus a kuuma.
Nii tänö wa saliama mai kitä
14Ĩ na Jesus a kuu nö, ĩ töpö satehe epii töpö nakalö nö, a hapalo kõo nö, ‑Ĩ makö pewönö sa hiniö! Pö pi hatukukiö!‑ a kuuma. 15A kuu nö, ‑Wa tä oa wi, pili wa nipiki hamö tä keki wi, ĩ tänö wa salia mai kitä. Pili wa õsi sai ha tä titile, ĩ tä kupo wi, ĩ tänö wa salia pasioö‑ ĩ na Jesus a kuuma. 16[Ĩ na a kuu nö, ‑Sa kai a hua pi topa salo, sa tä wäsä pole, ĩ tä na a sömöka taa totikiö!‑ Jesus a kuuma.]
17Ĩ na Jesus a kuu nö, ĩ töpö satehe epii töpö takölö nö, sai a õsimö hamö a lisipasolö ha, kama kai a hua sinomo wi ĩ töpö aiki, ‑Wi na ta kui wa ta wäsä ke? “Pili wa õsi sai ha tä titile, ĩ tä kupo wi, ĩ tänö wa salia pasioö” wa kuuhe, ĩ sama ta hini tomöpo maahe‑ ĩ na töpö kuuma.
18-19Ĩ na töpö kuu ha, ‑Makö pi moti ipö hö̃töwö?‑ Jesus a kuu nö, ‑Pi naka. Nii wa tä oa wi, pili wa õsi sai ha ĩ nii tä kuo mai kitä. Pili wa pösömö ha nii tä kuo pasioö. Pili wa pösömö ha nii tä kuiki nö, tä hasuta pasioö. Ĩ na tä kuaö ha, nii wa tä oa wi, ĩ tänö wa salia mai kitä ta pi kuu mai. Nii tä pewö wasu mai kitä‑ ĩ na Jesus a kuu nö, 20‑Pili wa õsi pi tapotiki nö, wa hapalo wanisala apaö, wanisala wa tä thaö, ĩ na wa kuati wi, ĩ tänö wa salia pasioö. 21Wanisala tä thaa wi, ĩ tä na wa pi tapoa paiki nö, wanisala wa tä thaa totiki‑ ĩ na Jesus a kuuma. Ĩ na a kuu nö, ‑Au husopö a na kuno mai, tiko tä suö na wa mamo wi ĩ tä, thomömo wi ĩ tä, sanöma tä nomamani wi ĩ tä, ĩ na tökö kui tökö na wa pi tapoa paitiki nö, wa tä thama totio kitä. 22Ai tä hai ĩ pusopö wa nö thaa pi topa wi ĩ tä, “Ipa tä kuo nö toa sö ö̃” wa pi ku upa wi ĩ tä, wanisala tä pewö thati wi ĩ tä, töpö mönama wi ĩ tä, hatuka apöle maaki, wanisala tä thaa sinomoti wi ĩ tä, ĩ tä na wa pi tapoa paiki nö, wa tä thama totiki kitä. Ai wa tä hĩsu thaa wi ĩ tä, ai tä kateha wanisala wi ĩ tä, “Kamisa aipöa topa apa asawöö!” wa pi kuu wi ĩ tä, osemo sinomoti wi ĩ tä, ĩ tä na wa pi tapoa paiki nö, wa tä thama totiki kitä. 23Pili wa õsi sai ha ĩ nasimö tä pewö na wa pi tapoa paiki nö, wa tä thama totiki ha, wa salia pasioö. Wanisala tänö wa pi tapomapo pasio wi, ĩ tänö wa salia pasioö‑ ĩ na Jesus a kuuma.
Situpenísia tilisoma tä
24Ĩ na tä kua tä, Situ tä uli hamö Jesus a hulasolöma. A hulolö nö, ai a sai ha a kukö tasoma. Ĩ a sai ha a kuiki nö, a hamamo pia hãtoa kule maaki, ai töpönö Jesus a taa lälalöma. 25Jesus a taa lälali ha, ‑Jesus a kua kulaliö!‑ töpö kuu ha, sai tänö a wai saliama wi, ĩ a hai ĩ pöpönö a wani ekuköma. A ekuiki nö, Jesus a na a kili salo, Jesus a kotö na a mãi poma. 26A mãi pole, ĩ juteu tä pasi mai, ĩ tiko tä pasiwö. Situpenísia tilisoma tä pasiwö. Jesus a na ĩ a wani aiki, ‑Ipa thäwö a na sai tä kule, ĩ tä hosa konöö!‑ ĩ na a wani ku upama.
27Ĩ na a wani kuu ha, ‑Naiö! Juteu wa mai kitä. Ipa ai juteu sa töpö toa soma kõa paimani kitäö!‑ ĩ na Jesus a kuu nö, ‑Pole kökö wani na nii wa tä totoa paio mai kitä. Au ulu töpö na nii wa tä totoa somaki. Ĩ na sa kuaö. Tiko sa töpö toma kõo paio mai kitä‑ ĩ na Jesus a kuuma.
28Ĩ na Jesus a kuuma maaki, suö tä aiki, ‑Awai. Ĩ na tä kua kule maaki, ulu töpö hai ĩ nii tä nakasi paa pa pole a honimo nö, ĩ nii tä oa hö̃töli kitä. Ulu pö hai ĩ nii tä nakasi hila pa pole a wani honimo kua wi na, ĩ na sa kua hö̃töoö. Tiko sa maaki, kawa na sa nako kule. Au juteu wa töpö toa kõa paimananö nö, ipa thäwö a wai toa naia komanöö!‑ ĩ na suö tä kuuma.
29Ĩ na suö tä kuu ha, ‑Ĩ na wa kuu salo, wa hua konasolöpököö! Au thäwö a õsi na sai tä kule, ĩ sa lisia waikia kopamani keö!‑ ĩ na suö tä na Jesus a kuuma.
30Ĩ na Jesus a kuu ha, suö tä hua konasolöma. A hua kononö nö, tä möö ha, sai tä lisia kõa waikipasoma kutenö, pete a pilitioma.
A sömöka komii, ãka a ãkasöpii, ĩ a
31Ĩ na tä kua tä, Situ tä uli hamö Jesus a kuoma, a huu koonö tä, Sitõ tä uli hamö a hasua paiki nö, Tekápolisö tä uli hamö a hasua nömöiki nö, Kaliléia tä uli ha, kosotu u pata hamö Jesus a waloa kõkö tasoma. 32A waloa kõkitö nö, Jesus a na ai töpönö, a sömöka komii, a ãkasöpii, ĩ a hilakö tasoma. Ĩ a hilakötö nö, ‑Hi a na a ami walikiö!‑ töpö ku upama. 33Töpö ku upaö ha, töpö satehe epii töpö kule, ĩ töpö atu na Jesus anö a wani tälölö nö, pili a sömöka pewö ha Jesus a ami hĩsola hĩkama. A ami hĩkaiki nö, a nakipö keiki nö, a ãkasöpii ĩ a ãka na a nakipö keköma. 34A nakipö keiki nö, hi tä hẽtu pata hamö Jesus anö tä möö nö, a ãkasöpii, ĩ a wani na Jesus a pi honipo opa salo, a henekepasoma. A henekepalo nö, kama kai ha, ‑Epatá‑ Jesus a kuuma. Kamakö kai ha, ‑A sömöka wakala kopalöö!‑ ĩ na a kuuma.
35Ĩ na Jesus a kuu ha, a sömöka wakala kopalöma. A ãkasöpö maa kopamanöma. Ĩ na a wani kuaö ha, a wani hapalo makokoa kopasoma.
36Ĩ na tä kua tä, ‑Ai töpö na pö wäo tihöö!‑ ĩ na Jesus anö ĩ töpö noa tha apatima. Ĩ töpö noa tha apatima maaki, ĩ töpönö ta wäsä satimo opatima. 37Ta wäsä wi, ĩ ta hini pole, ĩ töpö pewö aiki, ‑Kilatiha! Jesus anö töpö topama totio kotio asawö. Töpö sömöka komi ipii maaki, ĩ töpö sömöka wakalapama kõo asawö. Töpö ãkasöpöo opama maaki, ĩ töpö ãkasöpö mapama totio kotio asawö‑ ĩ na ĩ töpö kuuma.
8Jesus anö 4.000 töpö iama noai ĩ ta
1Ĩ na tä kua tä, Jesus a na töpö satehe epii töpö kokamoma. Töpö kokamo tä, nii tä mapasoö ha, Jesus anö kama kai a hua sinomoti wi, ĩ töpö nakalö nö, 2ĩ na a kuuma: ‑3 tökö mumi kui tökö mumi ha kamisa na hi töpö satehe epii töpö huu naia waikia kule. Nii tä maa waikio noaö! Ĩ na tä kuaö ha, töpö oi ipö salo, ĩ töpö na sa pi honipo kuleö! 3Nii tä totoa paio mai ha, “Pö pewö kopolöö!” sa kuu ha, piliso hamö ĩ töpö huu koonö pa töpö utitia apöpalo nö, töpö kelaso kitä. Pai ipö hamö ĩ ai töpö kuamö kua‑ ĩ na Jesus a kuuma.
4A kuu ha, ‑Hö. Hi tä uli ha, hi ma töpö ösö potehepama mai kitä. Tä uli pokea apöle ta pi kuu mai‑ ĩ na töpö kuu hö̃töoma.
5Töpö kuu hö̃töoö ha, ‑Wi na kilii ĩsa ãi kua kule?‑ Jesus a kuu ha, ‑7 ãi kua päta kuleö!‑ töpö kuuma.
6Ĩ na töpö kuu ha, töpö satehe epii töpö öpa sototole, ĩ töpö na, ‑Masita ha pö loikiö!‑ ĩ na Jesus anö töpö noa thama. Töpö noa thaa nö, 7 ĩsa ãi tälö nö, Teusö a na, ‑Hapa. Hi ĩsa wa ãi totopi keö! Wa totiatalo opawö‑ ĩ na a kuu nö, ĩ ãi nakasilalö nö, kama kai a hua sinomo wi ĩ töpö na ĩ ãi nakasi totoaköma. Tä totoaki ha, töpö satehe epii töpö lole, ĩ töpö na ãi nakasi totoa soataköma.
7Ĩ na tä kua tä, polakapi salaka kökö wai kuo hö̃töoma. Jesus anö ĩ salaka kökö tälö nö, Teusö a na, ‑Hapa. Hi salaka wa kökö wai totopi ke. Wa totiatalo opawö‑ a kuu nö, salaka kökö polakapi maaki, kökö pala soatamanöma. Kökö pala soatamanö nö, Jesus a kai a hua sinomoti wi, ĩ töpö na, ‑Peiö! Hi töpö na hi salaka kökö totoaköö!‑ ĩ na Jesus anö töpö noa thaö ha, 8töpö pewö ösö potehepalo nö, ĩ töpö pewö pötösoma. Töpö pewö pötöa waikisoö ha, 7 wöö kökö ha ĩsa ãi nakasi, salaka nakasi, ĩ na tä kasö pata manöka kula tä, ĩ 7 wöö kökö konönöma.
9Töpö satehe epii töpö, ĩ 4.000 töpö ösö potehepasoma. Ĩ töpö ösö potehepasoö ha, ‑Pö hua kononöö!‑ Jesus a kuu nö, 10kutiata a na Jesus anö kama kai a hua sinomoti wi, ĩ töpö kai titiki nö, Taumanuta tä uli hamö ĩ töpö kai hulasolöma.
Patiseu töpö na, ‑Päla‑ Jesus a kuu noai ĩ ta
Mateus 12.38-42; 16.1-4; Lucas 11.29-32
11Ĩ töpö kai waloköma, ĩ na tä kua tä, patiseu töpö waloa läiki nö, Jesus a huamatimae. A huamati pola nö, a wapa pia salo, patiseu töpö aiki, ‑Wa tä aipöama mi salo. Teusö anö tä thama taö öpa asa wi, ĩ nasimö tä thamaö! Wa tä thamaö ha, “Hiki. Teusö anököö! Teusö anö Jesus a lotetepama waikileö!” ĩ na samakö pewö pi kuupököö!‑ ĩ na ĩ töpö kuuma.
12Ĩ na töpö kuu ha, ‑Jesus a pitili mai kitä‑ töpö pi kuu ha, Jesus a pi otatasoma. Jesus a pi ota salo, a kotopö henekepalo nö, ‑“Päla. Huki ola makö kule, Teusö anö tä thama taö asa wi, ĩ nasimö ĩ ma tä naka sinomowö. Teusö anö tä thama taö asa wi, kamakö pewö na ĩ nasimö tä möma mai kitäö!” kamakö na sa kuu pitilimo opa kule‑ ĩ na Jesus a kuu nö, 13töpö takölöma. Töpö takölö nö, kutiata a na Jesus a kai a hua sinomo wi, ĩ töpö kai titia koiki nö, töpö kai pökatölasolöma.
‑Patiseu töpönö ta wäsä wanisala apö‑ Jesus a kuu noai ĩ ta
14Ĩ na tä kua tä, töpö pi motöpalo nö, ĩsa ãi täaalö maama. Kutiata a na sami ãi titio sisama. 15Ĩ na tä kua tä, Jesus anö uni tä wäsä nö, ‑Patiseu töpö, Etoosisö a pata, ĩ na töpö kui töpönö ĩsa ãi hölöma wi, ĩ nasimö tä thapo wi, ĩ tä na pö pi mosaia totikiö!‑ ĩ na Jesus a kuuma. Ĩsa ãi hölöma wi, ĩ tä sai a kateha maama. Patiseu töpö, Etoosisö a pata, ĩ na kilii töpö kai wanisala sinomo wi, Jesus anö ĩ ta kateha pasioma.
16Ĩ na a kuu ha, Jesus a kai a hua sinomo wi ĩ töpö hapalo nomöhöpaso nö, ‑Wi na a pi kuu salo, a kuu ke? Ĩsa sama ãi po mi ha, a kuu ke‑ ĩ na ĩ töpö kupalotima.
17Töpö kupaloti pole, Jesus anö ĩ ta hininö nö, ‑Wi na makö pi kuu salo, ĩsa ma ãi po maa noai, ĩ ma ta katehati kule? Sa kuuhe, ĩ ma ta hini totia mane. Ĩ tä na makö pi hatukupo totio mai.
18-19Pili makö mamo wani kua kule maaki, ma tä tai mio opapa wi. Pili makö sömöka kua kule maaki, ma tä hini totio mi ipö. Sa lotete epö salo, ĩsa sa ãi palamanipili, ĩ tä na makö pi motio opapa wi‑ ĩ na Jesus a kuu nö, ‑Töpö satehe epii töpö kuopili, ĩ 5.000 töpö, ĩ töpö oi ipö salo, 5 ĩsa sa ãi nakasilalipili, ĩ tä na makö pi motio opapa wi. Wöö kökö ha ĩsa ãi nakasi kasö pata manököla tä, wi na kilii ĩsa ma ãi nakasi pi täa thaa konönöma?‑ Jesus a kuu ha, ‑Ĩ na kilii, ĩ 12 wöö sama kö konönö kipili‑ töpö kuu hö̃töoma.
20Töpö kuu hö̃töoö ha, ‑Ĩ 4.000 töpö kuopili, ĩ töpö oi ipö salo, 7 ĩsa sa ãi nakasilalipili, wöö a na ĩ ãi nakasi kasö pata manököla tä, ĩ wi na kilii wöö ma kö konönö kipili?‑ Jesus a kuu ha, ‑7 wöö sama kö konönö kipili‑ ĩ na töpö kuu hö̃töoma.
21Töpö kuu hö̃töoö ha, ‑“Patiseu töpö, Etoosisö a pata, ĩ na töpö kui töpönö ĩsa ãi hölöma wi, ĩ nasimö tä thapo wi, ĩ tä na pö pi mosaia totikiö!” sa kuuhe, ĩ tä na makö pi hatukupo maa soa kule?‑ ĩ na kama kai a hua sinomoti wi, ĩ töpö na ĩ na Jesus a kuuma.
A mamo höpöpö öpii, ĩ a wani
22Ĩ na tä kua tä, Petösaita tä uli ha Jesus töpö walokö tasoma. Töpö waloki ha, ai töpönö a mamo höpöpii, Jesus a na ĩ a wani hilakö tasoma. A wani hilakötö nö, ‑Tä wani höpöa haitaö!‑ Jesus a na ĩ töpö ku upama. 23Töpö ku upaö ha, Jesus anö a ami tälö nö, sai pö satehei sai pö kuo wi, ĩ atu hamö Jesus anö a wani tutulölöma. A wani tutulölö nö, pili a mamo ha a nakipö keiki nö, a wani höpöa nö, ‑Wa tä tapa kule?‑ Jesus a kuuma.
24Jesus a kuu ha, ĩ a waninö tä möö nö, ‑Awai. Sanöma sa töpö huu tapa kule. Hii tiki kui na, ĩ na töpö kuökö‑ ĩ na a wani kuuma. 25Ĩ na a wani kuu ha, Jesus anö pili mamo ha a ami papähäköma. Ĩ ha a mamo höpöpii, ĩ a mamo teteiki nö, a mamo topa kõa soataköma. 26Ĩ tä pewö tapa totia kõki ha, ‑A kõa haitapolöö! Sai pö satehei kulati hamö a huu paio tihöö!‑ ĩ na Jesus anö a noa wani thama.
‑Teusö anö kamisamakö na wa simönö noai, ĩ wa‑ Pedro a kuu noai ĩ ta
Mateus 16.13-20; Lucas 9.18-21
27Ĩ na tä kua tä, Sesatéia Filipe tä uli ha sai satehei sai hö̃kököi sai a kule hamö Jesus a kai a hua sinomoti wi, ĩ töpö kai hua konasolöma. Töpö kai huu soaalö tä, Jesus anö töpö huamama. Töpö huama nö, ‑Ai töpönö kamisa kateha tä, wi na töpö kuu? “Jesus a hai, ĩ witi pili a pasiwö?” ai töpö kuu ha, ai töpö hai, ĩ wi na ĩ töpö kuu hö̃töoö?‑ ĩ na Jesus a kuu ha, 28‑“João Pasisöta a nomaso noai, ĩ a hai, Jesus a kua nömöa hãtopasoma” ĩ na ai töpö kuu hö̃töo thaliö! Ai töpö aiki, “Naiö! Elias a pata nomaso noai, ĩ a pata hai, Jesus a kua nömöa hãtopasoma” ĩ na ai töpö kuu hö̃töo thaliö! Ai töpö aiki, “Naiö! Sutu upa Teusö a kai wäsä sinomoti noai, sami ĩ ai tä temöa konasoma, ĩ a hãtowöö!” ĩ na ai töpö kuu hö̃töo thaliö!‑ ĩ na Jesus a na töpö kuuma.
29Ĩ na töpö kuu ha, ‑Kamakö hai kini, wi na makö kuu?‑ Jesus a kuu ha, Pedro aiki, ‑Teusö anö wa simönö nö, sanöma samakö na wa kaikanapalö noai ĩ wa! Cristo wa hiloö‑ ĩ na Pedro a kuuma. 30Pedro a kuu ha, ‑Ĩ na hi a kuuhe, ai töpö na ĩ ta wäsä tihöö!‑ ĩ na Jesus anö töpö noa thama.
Jesus a säpa pialai, Jesus anö ĩ ta wäsä noai ĩ ta
Mateus 16.21-28; Lucas 9.22-27
31Ĩ na tä kua tä, ai töpönö Jesus a säpa pialai, Jesus anö ĩ ta wäsä kuköma. ‑Sanöma sa kupaso noai ĩ sa wani pea apa kitä. Pata töpö, Teusö a täpä sinomo wi ĩ pata töpö, Moisés a kai a wäsä sinomoti wi ĩ töpö, ĩ na töpö kui, ĩ töpönö sa hosali kitä. Sa hosalö nö, sa säpamani kitäö! Sa säpamani kitä maaki, hi tä mumi, hi ai tä mumi, ĩ ai tä hena tä sa temöa konaso kitä‑ 32ĩ na Jesus a kuu makoka apama. Ĩ na Jesus a kuu ha, Jesus a kai a hua sinomoti wi ĩ töpö lole, ĩ tä atu ha Pedro anö Jesus a nakalölö nö, a päsäpa tasoma. ‑“Sa säpali kitä” kuu tihöö!‑ ĩ na Pedro a kuu soatasoma.
33Ĩ na Pedro a kuu soataloö ha, Jesus a öpa nomöhötalo nö, kama kai a huati wi ĩ töpö möö nö, Pedro a na, ‑Kua tihöö! Sai tä sai pata kua wi na, ĩ na wa kua hö̃töa. Sanöma töpö pewö na sa säpamoa läpaso wi, Sai tä sai patanö ĩ tä pii mi. Teusö a pi tapomo kua wi na, ĩ na wa pi tapomo kua mane. Sanöma töpö pi tapomo kua pasio päo kua wi na, ĩ na wa kua pasio päoö‑ ĩ na Pedro a na Jesus a kuuma.
Jesus a na wa nokapaloti pi topa tä, ĩ na wa kuapököö!
34Ĩ na Jesus a kuu nö, ai töpö satehe epii töpö, Jesus a kai a huati wi ĩ töpö, ĩ na töpö kui, ĩ töpö pewö nakalö nö, ĩ na a kuuma: ‑Kamisa na wa nokapaloti pi topa tä, “Kamisa na Jesus a simöo wi, ĩ sa tä pii mi” ĩ na a pi kuu ti! “Sa saimo nö, sa kua pi topa päo wi, ĩ sa tä pii mi” ĩ na wa pi kuupökö. “Sa puko pi topa kule maaki, ‘Ĩ na wa kua maikiö!’ ĩ na Teusö anö sa noa thaö ha, ‘Awai’ sa kuu hö̃töo kitä” ĩ na a pi kuu totioö! “Jesus a na sa noka tä, ai töpönö hii ti pakalai ti ha sa peama pi topa kitä maaki, sa noka satia apa kitä” ĩ na a pi kuu totioö! Kamisa na wa nokapalo totia tä, ĩ na wa kuapököö! 35“Jesus sa kai a hini wani ipö saiö! Sa pea päo matimöö!” wa pi kuu kuköma, waiha wa pea totio kitä. Ĩ na tä kua tä, “Jesus sa thapo wi ĩ sanö Jesus sa ta wäsäti ha, ai töpönö sa peama kitä maaki, Jesus sa kai a hini pi topa satia apa kitä” wa pi kuu kuköma, waiha wa pea mai kitä. Wa pi topa soatio kitä‑ ĩ na Jesus a kuuma.
36A kuu nö, ‑Hi tä uli pewö hamö wani tä kuo opa wi, ĩ wani wa tä pewö tälöma maaki, wani wa tä pewö tälö nö, wa nomasoö. Wa nomano nö, töpö pea mapo mai ĩ tä uli ha wa õsi hulolö nö, wa pea soatiotii. Ĩ na wa kuaö ha, “Aitaköö!” wa pi kuu kitä ta o? Teusö tä uli ha wa konasolö wi, ĩ tä noa ha ĩ ka pi wa tä totoköpö? 37Au wani tä kua apöle maaki, ĩ wani tä pewö totoki kitä maaki, ĩ wani tä noa na Teusö tä uli ha wa koonö mai kitä‑ ĩ na Jesus a kuuma. 38Jesus a kuu nö, ‑Sanöma sa kupaso noai ĩ sa. Ipa hao a na sa kõo paipolö nö, waiha sa huu kõo kitä. Teusö a hai ĩ ãju sa töpö kai huu kõo kitä. Sa huu kõa tä, “Pö̃ a toita apö kui na, ĩ na pelupö Jesus a kuö. Pö̃ a lotete epö kui na, ĩ na Jesus a kuö” ĩ na sanöma töpö kuu kitä. Töpö kuu kitä maaki, huki Teusö a hosa sinomo wi ĩ töpö, wanisala apa sinomoti wi ĩ töpö, ĩ na töpö kui, ĩ töpö na wa kua naia tä, “Jesus sa thapo wi ĩ sa. Jesus sa kai a hini pi topa kule” ĩ na wa kuu kili ipaö ha, kawa na, “Hapo. Ipa wa kutenö, hapo” sa kuu kili hö̃töo kitä‑ ĩ na Jesus a kuuma.
9Elias a, Moisés a, ĩ na töpö kui töpö tapamoa kulaso noai ĩ ta
1Ĩ na tä kua tä, Jesus a hapalo nö, ‑“Sanöma töpö na Teusö a kaikanamo totio kitä. Kamakö kule, ĩ ai makö kua soa tä, pe epii Teusö a kaikanamo totio wi, ĩ ma tä tapa kuki kitä. Ĩ tä tapa paio mai ha, ĩ makö noma paio mai kitä” ĩ na kamakö na sa kuu pitilimo opaö‑ ĩ na Jesus a kuuma.
2Ĩ na a kuuma, polakapi, ĩ 6 tökö mumi kuto tä, Jesus anö Pedro, Tiago, João, maa makö ösöa apöpoli, ĩ makö pata hamö ĩ töpö kai hua asasolöma. Töpö kai hua asalolö nö, töpö kai hemoa asapasolöma. Töpö kai hemoa asapalolö nö, Jesus a mömomö aipöa apöpasoma. 3Sanöma töpönö haloi ösö salupali wi, ĩ ösö ausi waikia kui na kuno mai, Jesus a hai ĩ ösö ausio totio opama. Jesus a hai ĩ ösö ausio satio opa asama. Jesus a hai ĩ ösö ausia totia apöpalo nö, ösö wakala apii ösö kupasoma. 4Ĩ ha Moisés a pata, Elias a pata ĩ na kilii töpö waloiki nö, töpö tapamonasoma. Sutu upa ĩ töpö nomasoma maaki, ĩ töpö tapamonasoma. Ĩ töpö tapamo pole, ĩ töpönö Jesus a huamatima. 5Jesus a huamati tä, Pedro aiki, ‑Pata täö! Hisa ha kamakö kua nö tole. Au sai sama pakita thaki, Moisés a pata hai ĩ sai sama pakita thaki, Elias a hai ĩ sai sama pakita thaki, ĩ na sama sai pakita thaa thaköpököö!‑ ĩ na Jesus a na ĩ na Pedro a kuuma.
6Töpö kilia apölo nö, ‑Wi na sa kuu pätaka?‑ Pedro a pi kuu salo, ‑Sai sama kökö pakita thaköpököö!‑ ĩ na a wani hole kuu päoma.
7Ĩ na a wani hole kuu päoma, ĩ töpö kuo pa ilasi tä pata kea totia soatakö solöma. Ilasi tä pata kekö noai, ĩ tä mötali ha ta hapalo nö, ‑Mi a öpale, ipa ulu sa pi ipa wi ĩ a. Ĩ ipa ulu a hiniheö!‑ ĩ na ta pata kuuma. 8Ĩ na ta pata kuu ha, töpö mamo tetea haia soa tä, Elias a pata, Moisés a pata, ĩ na töpö kui töpö tapa kõo maama. Jesus a tapa sisama.
9Ĩ na tä kua tä, töpö timöo kõa tä, ‑Huki ma tä tapapi, ĩ ta wäsä ti! Sanöma sa sai kupaso noai, ĩ sa nomaso kitä maaki, sa temöa konaso kitä. Sa temö kõo paio mi tä, ma tä tapapi, ai töpö na ĩ ta wäsä ti!‑ ĩ na Jesus anö töpö noa thama.
10Ĩ na Jesus anö töpö noa thaö ha, töpö wäo maama. Ai töpö na ta wäsä maama maaki, töpö hapalo hẽtupaso nö, ‑“Sa temöa konaso kitä” ĩ na Jesus a kuuhe, wi na a pi kuu salo, a kuu ke?‑ ĩ na töpö kuuma. 11Ĩ na töpö kuu nö, Jesus a na, ‑“Elias a pata waloa paiki kitä. Ĩ tä noa ha Cristo a waloa haiki solö kitä” ĩ na Moisés a kai a wäsä sinomoti wi, ĩ na ĩ töpö kuu thali. Wi na ĩ töpö pi kuu salo, ĩ na ĩ töpö kuu?‑ ĩ na töpö kuuma.
12Ĩ na töpö kuu ha, Jesus aiki, ‑Awai. Elias a pata waloa paiki kitä. A pata waloa paiki nö, “Teusö anö a simönö nö, a kaikanapalö noai, ĩ Cristo a hilo wi, ĩ a huu ateo waikileö! Makö wanisala apati wi, ĩ tä ha pö pi otataloö! Teusö a na makö tomöpo mi ipii, ĩ tä hosalöheö!” ĩ na a pata kuti pia salo, ĩ na Elias a pata waloa paiki kitä. Ĩ na a pata waloa paiki kitä maaki, “Sanöma tä kupaso wi, pe epii ai töpönö ĩ a peamati nö, ‘Päla. Pii mi. Hini wani ipö saiö!’ ĩ na ai töpö kuu kitä” ĩ na sutu upa ĩ na tä sãöka thamama. Wi na tä kuaö ha tä sãököpalöma? Wi na makö pi kuu kule?‑ ĩ na Jesus a kuu nö, 13‑“Elias a pata peama kitä” sutu upa ta sãököpalö nö, ĩ ta kuu noai, huki ĩ tä kua tolea hö̃töoma. “Elias a pata kui na, ĩ na ĩ a kui, ĩ a waloa waikiki kipili nökö. A waloa waikiki kipili maaki, ai töpönö ĩ a peama pikio kipili nökö” ĩ na kamakö na sa kuu‑ ĩ na Jesus a kuuma.
Ulu tä saliama sinomo wi, ĩ sai tä maa komanö noai ĩ ta
Mateus 17.14-20; Lucas 9.37-43
14Ĩ na tä kua tä, töpö timösolöma, ĩ tä, komo hamö Jesus a kai a hua sinomoti wi, ĩ ai töpö kuo haio noai, ĩ töpö kuo pa töpö satehe epii töpö kokamoma. Töpö kokamo tä, Moisés a kai a wäsä sinomoti wi, ĩ ai töpönö, Jesus a kai a huati wi, ĩ töpö huama apama. Töpö huama soa tä, Jesus a huu läoma. 15Ĩ töpö satehe epii töpönö Jesus a huu talalö nö, ‑Kilatiha. Jesus a huu kulaliö!‑ töpö pi kuu nö, töpö läläa lätaiki nö, ‑Wa huu ke?‑ ĩ na töpö kuuma.
16Ĩ na töpö kuu ha, ‑Ĩ ka pi tä na makö hapalo opa kule?‑ Jesus a kuuma.
17A kuu ha, ĩ töpö satehe epii töpö kokamo kule, ĩ ai tä ekuiki nö, ‑Pata täö! Ipa ulu a na sai tä sapäko sinomoti salo, kawa na ipa ulu sa kai huu kipii. Ĩ sai tänö ipa a wai ãkasöpöma sinomotii. 18Ipa a namo wai kusöpati pamö a säsäpatii. A säsäpati tä, ipa ulu a kaupö mosi pata posakatii. Nakö pata ãö ãömotii. A wai utitia apöpasoö. Ĩ na ipa a wai kua sinomo thaliö! Ĩ na tä kuaö ha, kawa na ipa sa wai mömapö, ipa sa kai wai waloki kipii. Sa kai wai waloiki nö, kawa mai ha, kawa kai a hua sinomoti wi, ĩ töpö na, “Sai tä wani hosalöö!” sa kuu kipii maaki, tä wani hosa tomöpo maapi‑ ĩ na a kuuma.
19Ĩ na a kuu ha, ĩ töpö na, ‑Sutu upa kamakö na sa kuo waikitio kipili maaki, “Awai. Teusö a lotete epö ta” makö pi kuti mi sai. Satehe epii tä inama ha kamakö na sa kuo naio aköna, “Teusö a lotete kitä” makö pi kuu mana pi‑ ĩ na Jesus a kuuma. Ĩ na a kuu nö, ‑Ĩ ulu a hilapasoö!‑ a kuuma.
20Ĩ na a kuu ha, Jesus a na ĩ ulu a wai hila hö̃tökö solöma. A wai hilakö solö ha, sai tänö Jesus a tapa nö, ĩ a waninö ĩ ulu a wai polemoma soataköma. A wai polemoma soata nö, masita tä na a wai kelo nö, a pulu upama. A pulu upa nö, a kaupö mosi pata posakatima. A polemo opama. 21A polemo opa tä, ‑Au ulu a na sai tä sapäko opati wi, ĩ tä tetea apa hãtoa waikia kule?‑ Jesus a kuu ha, ‑Ĩ na ipa ulu a ose tä, ĩ na ipa a wai kua soatasoma. 22Ĩ sai tänö ipa a wai säpali pia salo, koa taka ha ipa a säsäa sinomoti thaliö! Maa tuu na ipa a keama sinomo thali. Ĩ na a kua thali maaki, wa lotete epö salo, samakö pi ota apaö ha, wa pi honipo nö, samakö pasilipalöö! “Ĩ na makö kua päoö” a pi kuu tihöö! Sai tä hosalöö! Wa lotete epö kitä?‑ ĩ na pö̃ a kuuma.
23Ĩ na pö̃ a kuu ha, ‑Awai. “Jesus a lotete epö kitä” ĩ na wa pi kuu totia tä, sa tä pewö thama hö̃töo kitäö!‑ ĩ na Jesus a kuuma.
24Ĩ na Jesus a kuu ha, pö̃ aiki, ‑“Wa lotete epö” sa pi kuu kule maaki, “Jesus a lotete hãto mai kitä” sa pi kuu hö̃töa tä, sa pi hatukua soatamanöö! “Jesus a lotete hãto mai kitä” sa pi kuu wi, ĩ tä matamanöö!‑ ĩ na pö̃ a ku upama.
25Pö̃ a ku upa tä, satehe epii töpö kokamo soatasoma. Töpö kokamoö ha, ãkasöpöma sinomo wi, sömöka komiamati wi, ĩ sai tä na, ‑“A atua kopaloö! Wa atua kopalo nö, hi ulu tä na a sapäko kota tihöö!” kamisanö ĩ na wa noa wani thaa kuleö!‑ ĩ na Jesus a kuuma.
26Ĩ na Jesus a kuu ha, lope epii ĩ sai tä wani lalupalo nö, a wai polemoma toitaiki nö, a wani hua hö̃töa konasolöma. A wani hua konasolö noai ha, ulu tä nomawö wai patioma. A patioma salo, ‑Tä wai noma waikiso alu keheö!‑ ĩ na töpö satehe epii töpö kuuma. 27Ĩ na töpö kuuma maaki, pili ami ha Jesus a ami walitaköma, ulu a wai hoköa kopalo nö, a wai öpa kõa soatasoma.
28Ĩ na tä kua tä, sai a na Jesus a lisia kotalo nö, ai töpö satehe kua mai ha, Jesus a na, ‑Wi na tä kuaö ha kamisamakönö sai sama tä hosa tai mio opa kipii?‑ ĩ na Jesus a kai a hua sinomoti wi, ĩ na ĩ töpö kuuma. 29Ĩ na töpö kuu ha, ‑Teusö a na wa hapalo paio mai ha, ĩ nasimö sai wa tä wani hosa mai kitä‑ ĩ na Jesus a kuuma.
‑Sa säpali kitä maaki, sa temöa konaso kitä‑ Jesus a kuu kõo noai ĩ ta
Mateus 17.22-23; Lucas 9.43-45
30Ĩ na tä kua tä, Jesus anö, kama kai a hua sinomoti wi, ĩ töpö kai hulasolöma. Töpö kai hulolö nö, Kaliléia tä uli hamö Jesus anö töpö kai hasua soa hãtokö tasoma. 31A hasuo hãtoa tä, Jesus a kai a hua sinomoti wi, ĩ töpö pi hatukamatima. Töpö pi hatukamati pola nö, ĩ na a kuuma: ‑Sanöma sa sai kupaso noai, ai töpö na ĩ sa totoki kitä. Sa totokö nö, sa säpali kitä. Sa säpali kitä maaki, polakapi mumi kuto tä, sa temöa konaso kitä‑ ĩ na Jesus a kuuma. 32Ĩ na Jesus a kuuma maaki, ‑O. Wi na a kuiki nö, ĩ na a kuu ke?‑ ĩ na töpö pi kuuma. Ĩ na töpö pi kuuma maaki, ‑Ĩ ta kateha totiataloö!‑ ĩ na töpö kuu kõo kili ipama.
‑Kamakö kule, ĩ witi pili a hai ĩ pata tä sai?‑
33Ĩ na tä kua tä, ki hamö, Kapahanaũ tä uli hamö töpö kõa soapölöma. 34Töpö huu soaimatö tä, ‑Kamakö kule, ĩ witi pili a hai ĩ pata tä sai?‑ ĩ na Jesus a kai a hua sinomoti wi, ĩ na ĩ töpö pewö kuti pamö, Kapahanaũ tä uli hamö töpö kõa soapölöma. Töpö kõa soapolö nö, sai a õsimö ha töpö kua kõki ha, Jesus aiki, ‑Piliso hamö ĩ ka pi ma tä katehati ke?‑ Jesus a kuuma. A kuuma maaki, töpö kuu kili salo, töpö hino maa asaköma. 35Töpö hino maa asaki ha, Jesus a loiki nö, kama hai ĩ 12 töpö na, ‑Hapo. Pö loa naikiö! Pö sömöka taa kotakiö!‑ ĩ na Jesus a kuu nö, ‑Pata wa kupo pi topa tä, pi uluhutawö a kua paikiö! Ai töpö na wa simöo pi topa tä, ai wa töpö a hini paio nököö!‑ ĩ na Jesus a kuuma. 36Ĩ na a kuu nö, Jesus anö ulu tä tälö nö, ĩ töpö mötali ha a wai hilakö nö, a wai hãsokotilö nö, 37ĩ töpö na, ‑Hi ulu tä kui na, ĩ na tä kui wa tä täli ha, kawanö kamisa täa hö̃töli. Kamisa täli ha, sa simönipili, ĩ ipa hao a lö kui, ĩ wa täa hö̃töli‑ ĩ na Jesus a kuuma.
Ai tänö makö wanipo mai, ĩ kamakö pewö
38Ĩ na tä kua tä, Jesus a na João a hapalo soata nö, ‑Jesus ai. Ai tä aiki, “Jesus sa thapo salo, sa lotetea hö̃töpamani kipili” ĩ na a wani kuu nö, sai töpö hosalali kipili. Töpö hosalali ha, “Thama ti!” ĩ na samakö kuu kipili. Kamisamakö na a wani noka naio sinomo mi ha, ĩ na samakö kuu kipili‑ ĩ na João a kuuma.
39Ĩ na João a kuuma ha, ‑Naiö! “Thama ti!” pö kuu hãto tihöö!‑ Jesus a kuu nö, ‑“Teusö a lotete sisawö. Jesus sa thapo salo, sa lotetepamani kitä” ĩ na ai tä kuu tä, Teusö anö tä thama taö asa wi, ĩ ai tänö ĩ nasimö tä thama hö̃töo kitä. Tä aipama hö̃töo kitä. Tä aipama hö̃töo wi, ĩ anö sa kateha wanisala soata mai kitä. 40Makö wanipo mai, ĩ tä wani hai, ĩ makö pewö hö̃töwö‑ ĩ na Jesus a kuuma. 41Ĩ na a kuu nö, ‑Pi naka. “Kawanö Cristo sa thapo salo, kawa na mokota ha maa tuu totoki wi, ĩ a wani na noa tä totoa hö̃töki kitä” ĩ na sa kuu pitilimo opa kuleö!‑ ĩ na Jesus a kuuma.
Koa taka hili soatio pamö wa pea soatio wi, ĩ tä wanisala apawöö!
42Ĩ na Jesus a kuu nö, ‑Hi ulu töpö lö kui, ĩ ai ulu tä aiki, “Jesus sa pi ipaö. Jesus a pitili” ĩ na ĩ ulu tä kuu kule maaki, “Pälaö. Jesus sa hosali kitäö!” ĩ na ĩ ulu ma tä pi thamaö ha, wa wanisala apa kuki kitä. Ĩ ulu tänö sa hosapama paio mi tä, pili wa olai ha maa ma pata saumakö nö, kosoto u pata hamö wa kepamani aköna, kawa na ĩ tä topa apala pi. Wa nasi tupasoö aköna, ĩ ulu tä na sa hosapama kõa mana pi‑ ĩ na Jesus a kuuma.
43A kuu nö, ‑Pili wa poko aminö wanisala wa tä thaa sinomoö ha, ami wani päpalöö! Poko wani hematha päla tä maaki, sami ami kua päla tä maaki, Teusö tä uli hamö wa huu wi, ĩ tä topa apa hö̃töa. Polakapi wa ami kua kule maaki, pili aminö wanisala tä thaa sinomoti kutenö, koa taka hili soatio pamö wa pea soatioö ha, ĩ tä wanisala apawöö! 44[Ĩ ha mosa töpö noma mai kitä. Koa taka hili mapo mai kitä.] 45Pili wa konona aminö wanisala wa tä thaa sinomoö ha, ĩ ami wani päpalöö! Konona hematha päla tä maaki, Teusö tä uli hamö wa huu wi, ĩ tä topa apa. Polakapi wa ami kua soale maaki, peati wi, ĩ hamö wa kepamani wi, ĩ tä wanisala apa. 46[Ĩ ha mosa töpönö noma mai kitä. Koa taka hili mapo mai kitä.] 47Pili wa mamonö wanisala wa tä thaa sinomoö ha, ĩ tä mamo wani hoköpaloö! Mamo asawösö päla tä maaki, Teusö a simöo totio wi, ĩ hamö wa kupaso laso wi, ĩ tä topa apa. Polakapi mamo kua soale maaki, peati wi, ĩ hamö wa kepamani wi, ĩ tä wanisala apa. 48Töpö pea soatio pa ĩ töpö pea mapo pasio mai kitä. Ĩ hamö töpö pewö hotepo soatia. Ĩ hamö koa taka pata luo kota mai kitä‑ ĩ na Jesus a kuuma.
49Ĩ na a kuu nö, ‑Sutu upa Teusö a na salo a totoki pia salo, salo a säpalö nö, mötati tä kemakö nö, salo a nokopalö nö, ĩ na tä kua sinomoma. Ĩ na tä kua sinomo wi, ĩ tä totiatalo opama. Ĩ tä kua sinomo kua wi na, ĩ na wa kuaö kitä. Mötati tänö ĩ salo a sãi totipama kua wi na, sanöma makö pea apati wi, ĩ na ĩ tänö makö totia kua hö̃töpaso kitä‑ ĩ na Jesus a kuuma. 50A kuu nö, ‑Mötati tä toita apii maaki, mötati tä õkitipasoö ha, ka pi tä kea nömömakö nö, tä mötatia kopaso taka? Ai tänö mötati tä mötatia kopamani wi tä kua mai kitä. Wa peamati tä, mötati tä toita kua wi na, ĩ na Teusö anö ĩ na wa totia thapali kitä. Wa totia apöpali ha, ai töpö na wa höla mai, wa noimopököö!‑ ĩ na Jesus a kuuma.
10‑Au husopö a hosa tihöö!‑
Mateus 5.31-32; 19.1-12; Lucas 16.18
1Ĩ na tä kua tä, Jutéia tä uli hamö a hulolö nö, Johotão u pökatö hamö a hua soasolöma. Ĩ hamö Jesus a na satehe epii töpö kokamo kõo soa tasoma. Ĩ töpö kokamoa kõa soatalotö nö, Jesus anö töpö pi hatukama sinomoma kutenö, ĩ töpö pi hatukama kõtasoma.
2Ĩ na tä kua tä, Jesus a na ai patiseu töpö ekuiki nö, Jesus a wapa pia salo, a huamama. ‑Hiki. Jesus a hapalo wanisala‑ töpö kuu pia salo, Jesus a wapama. ‑Pusopö a hosali wi, ĩ tä wanisala mai kitä? “Ĩ na tä kua päoö” Teusö a kuu kitä?‑ ĩ na ĩ töpö kuuma. 3Ĩ na ĩ töpö kuu ha, ‑Wi na Moisés a patanö kamakö hai ĩ nö patapö töpö noa thama?‑ ĩ na Jesus a kuu hö̃töoma. 4A kuu hö̃töoö ha, ‑Moisés a pata aiki, “Au husopö wa hosa kõo pia tä, waheta wa tä sãöka paio nököö! ‘Ipa husopö sa wani hosa kõa waikilölö keö!’ wa kuu wi, ĩ tä sãökaö! Wa tä sãöka paio nö, au husopö a hosa konöpö” ĩ na Moisés a patanö ĩ töpö noa thama‑ ĩ na ĩ töpö kuuma.
5Ĩ na ĩ töpö kuu ha, ‑Makö pi hatukamo wani ipö kutenö, “Ö̃kö. Au husopö a hosa konö” ĩ na Moisés anö töpö noa thaa noai, ĩ ta sãöka thama päoma. 6Ĩ na Moisés a patanö tä sãöka thama päoma maaki, somi sai tä, Teusö anö sanöma töpö thapalö nö, hi wano tä, hi suö tä, ĩ na kilii töpö kua somaköma. 7-8Ĩ na tä kuaö ha, au hao a, au nao a, ĩ na kilii wa töpö takölö nö, au husopö wa täa soalö tasoö. Ĩ nakö. Makö polakapaloti noai maaki, sami tä kua wi na, ĩ na makö kua hö̃töa. 9Ĩ na makö kua hö̃töoö ha, Teusö anö makö koka kua waikimakö noai ha, “Au husopö a hosa tihöö!” ĩ na sa kuu kuleö!‑ ĩ na Jesus a kuuma. 10A kuu nö, a kai a hua sinomoti wi, ĩ töpö kai kotapölöma. Töpö kai kotapolö nö, ‑Patiseu töpö na wa ta katehapi, ĩ ta kateha kõo totiataloö!‑ ĩ na Jesus a kai a hua sinomoti wi, ĩ töpö kuuma. 11Töpö kuu ha, ‑Pi naka. Au husopö wa sai wani hosa konö nö, ai tiko wa tä suö täa nömönö nö, wa kua tä, au husopö wa hosa somanö noai ĩ wa peamaö, Teusö wa kai peamaö, ĩ na wa kua kitä. 12Au heano wa sai wani hosa konö nö, ai tiko wa tä wano täa nömöo kuköma, au heano wa hosa somanö noai, ĩ wa peamaö, Teusö wa kai a peamaö, ĩ na wa kua kitä‑ ĩ na Jesus a kuuma.
Jesus anö ulu töpö totiapala noai ĩ ta
Mateus 19.13-15; Lucas 18.15-17
13Ĩ na tä kua tä, Jesus a na ai töpönö ulu töpö kai waloköma. ‑Hi ipa ulu töpö wai na Jesus a ami waliköma, Teusö anö ĩ töpö wai totiapala apa kitäö!‑ töpö kuu pia salo, töpö kai wai waloköma. Töpö kai waloki ha, Jesus a kai a hua sinomoti wi ĩ töpö aiki, ‑Au ulu töpö kai walo tihöö!‑ töpö kuu nö, ulu töpö solo töpö simöa sapa konöma. 14Töpö simöa sapa konö noai, Jesus anö tä talalö nö, a hĩsoma. ‑Kamisa na ulu töpö walo tä, töpö simöa sapa kõa läatalo tihöö! Teusö a na ulu töpö hapalo nö, “Sa simöaö! Kawa kai hini pi topa apa kuleö!” ĩ na Teusö a na ĩ na ulu töpö wai kuu kua wi na, ĩ na Teusö a simöo totio wi, ĩ hamö ĩ na sanöma töpö pewö kuu kua hö̃töo kitä ta pi kuu mai. 15“‘Sa simöa totiataloö!’ Teusö a na ĩ na ulu töpö wai kuu kua wi na, ĩ na wa kuu kua hö̃töo mi tä, Teusö a simöo totio wi, ĩ hamö wa kuo mai kitä” ĩ na sa kuu kuleö! Sa holisi mai kitäö!‑ ĩ na Jesus a kuuma. 16Ĩ na Jesus a kuu nö, ulu töpö wai hãsokoapala hätäpoti nö, ĩ töpö wai na Jesus a ami walia hätäpotima. Töpö wai na a ami walia hätäpoti nö, Teusö a na, ‑Hapa. Hi ulu töpö wai totiapala apa totihoö!‑ ĩ na Jesus a kuuma.
Wani wa tä pii sisa tä, Jesus wa thapo mai kitä
Mateus 19.16-30; Lucas 18.18-30
17Ĩ na tä kua tä, Jesus a hua konasolöma. Jesus a huulö tä, ai tä läläa haitaiki nö, ‑Jesus a hai, kakana tä‑ a pi kuuma kutenö, Jesus a kotö ha a loiki nö, pili a maeko hĩta thaiki nö, ‑Jesus ai. Samakö pi hatuka totipamani wi ĩ wa toita apö‑ a kuu nö, ‑Wi na sa kua nö, sa õsi palimipasoö?‑ ĩ na Jesus a na a kuuma. 18Ĩ na a kuu ha, ‑Wi na tä kuaö ha kamisa na, “Wa toita apö” wa kuu kule? Teusö a hai, ĩ a toita apö sisawö‑ ĩ na Jesus a kuuma. 19Ĩ na a kuu nö, ‑Moisés a patanö nö patapö töpö noa thaa noai, ĩ wa ta taö öpa waiki kule nökö:
“Sanöma tä säpa ti!
Tiko tä suö na a mamo ti!
A thomömo ti!
A holisi wäo ti!
Ai sanöma wa tä mönama ti!
Hao a, nao a, ĩ na kilii wa töpö kai a hini totihoö!”
ĩ na Moisés anö nö patapö töpö noa thama‑ ĩ na Jesus a kuuma.
20A kuu ha, ‑Ĩ na Moisés a patanö nö patapö töpö noa thaa noai, ĩ sa ta hini sinomo opaö. Sa ose tä, Moisés a kai a kuu wi, ĩ tä ha, “Hai o” sa kuu waikilasoma, huki sa pi kuu soa kule nökö‑ ĩ na wani kuuma. 21Ĩ na a wani kuu ha, ĩ a na Jesus a mamo teteiki nö, a pi ipama. A pi ipa nö, ‑Wani ipii wa tomöpo waikia mane. Sitipa kökö na au wani wa tä pewö totokö nö, töpö matihipö wai honi ipii, ĩ töpö na ĩ sitipa kökö pewö totoa soaköö! Au sitipa wa kökö pewö totoa soakö nö, wa kua nö, hi tä hẽtu hamö pe epii Teusö anö wa täpäli kitä. Hapo. Wani wa tä pewö totoa soakö nö, kamisa na pokei a noka soapaloö!‑ ĩ na Jesus a kuuma. 22Ĩ na Jesus a kuu ha, ĩ na Jesus a kuu hininö nö, a pi wani ota apama. A pi wani ota apa nö, ‑Häö. Ipa wani tä kua apa pasi saile. Ipa wani sa tä totoma wani ipöpaloikö ö̃. Päla. Jesus a na sa nokapalo mai kitä‑ ĩ na a pi wani kuu nö, a pi wani honipo pola nö, a wani konasolöma.
23A wani konasolö noai ha, Jesus a kai a hua sinomoti wi, ĩ töpö na Jesus a mamo tetea kõo nömököma. A mamo tetea kõo nömöa koiki nö, ‑Wani tökö thapo opöle, ĩ töpö hai, Teusö a kaikanamo wi, ĩ hamö ĩ töpö lisipaso wi tä makoka pasia mai kitä. Wani tökö thapo opa wi, ĩ ha ĩ töpö aiki, “Teusö anö sa simöa sinomopököö!” ĩ töpö kuu wi, ĩ tä makoka mai kitä‑ ĩ na Jesus a kuuma. 24A kuu ha, ĩ töpö pi wi na takömoma. Töpö pi wi na takömoma maaki, Jesus aiki, ‑Ipa pö! Ai töpönö wani tökö satehe epii wani tä pii sisa tä, Teusö a kaikanamo wi, ĩ hamö ĩ töpö lisipaso wi tä makoka pasia mai kitä‑ ĩ na Jesus a kuu konasoma. 25Ĩ na a kuu kõo nö, ‑“Makusa tä päka na kamelu a pata holepaso wi, ĩ tä isi waniha apa waikia alu kuleö!” wa pi kuu kule maaki, wani töpö thapo opöle, Teusö a kaikanamo wi, ĩ hamö ĩ a holepaso wi, ĩ tä isi waniha totia satia apa. Wani töpö thapo opöle, ĩ aiki, “Teusö ai. Sa simöa totihoö!” ĩ na ĩ a kuu wi, ĩ tä makokoa totia mi‑ ĩ na Jesus a kuu soasoma. 26Ĩ na Jesus a kuu soasoö ha, ‑Kilatiha‑ töpö pi kuuma.
Ĩ na ĩ töpö pi kuu nö, ‑Ĩ na wa kuu ha, Teusö anö ĩ witi pili a täa konöpö? Teusö a simöo totio wi, ĩ hamö wani tökö thapo opöle ĩ a lisipo wi, ĩ tä makokoa totia mi manu kule, ĩ witi pili a lisipo pasiopö?‑ ĩ na töpö kuuma. 27Ĩ na töpö kuu ha, Jesus anö ĩ töpö möö nö, ‑Sanöma töpönö tä thama tai mi ipii, Teusö anö ĩ tä pewö thama taö sisaö. Teusö a kaikanamo wi, ĩ ha sanöma kama töpö lisipo taö mai kitä maaki, Teusö anö töpö lisipama taö öpa sisaö‑ ĩ na Jesus a kuuma.
28Ĩ na a kuu ha, Pedro aiki, ‑Kamisamakönö sama tä pewö takölö nö, kawa na samakö nokapasoma‑ ĩ na a kuuma. 29-30Ĩ na a kuu ha, ‑“Ai wanö sa pi ipaö, ta topa apöle ĩ wa ta wäsä pi topaö, ĩ na wa kuati salo, au ai wa töpö pewö tapölö ha, kawa na ai töpö satehe epii töpö kua hö̃töo kitä. Au hepala töpö, au hoose töpö, au sao töpö, au nao a wani, au hao a wani, ĩ na töpö kui, ĩ töpö tapölöma, ai töpö satehe epii wa töpö täa satia apa hö̃töli kitä. Ai töpö satehe epii töpö na, ‘Ipa hepala’ wa kuu, ‘Ipa hoose’ wa kuu, ‘Naka ai’ wa kuu, ‘Pösa ai’ wa kuu, ‘Hapa’ wa kuu, ‘Napa’ wa kuu, ĩ na wa kuu kitä. Au sai wa tapölö ha, ai sai pö satehe epii sai pö ha wa kuki kitä. Ai tä uli satehe epii ĩ hamö wa kua nömöki kitä. Huki ai wanö Teusö wa ta wäsäö ha, ai töpönö wa wanipo opa nö, wa peama kitä maaki, waiha wa õsi palimia totipaso wi ĩ wa tä täa hö̃töli kitä. 31Huki hi tä uli ha satehe epii pata töpö kule, waiha ĩ töpö hai, satehe epii pata töpö kupo mai kitä. Ĩ na tä kua tä, huki pata töpö pasi mai, waiha ĩ töpö hai, satehe epii pata töpö kua asapaso kitä” ĩ na sa kuu kuleö! Pitili sa‑ ĩ na Jesus a kuuma.
‑Sa säpali kitä maaki, sa temöa konaso kitä‑
32Ĩ na tä kua tä, pili tiso na Jesus anö kama kai a hua sinomoti wi ĩ töpö kai hulasolöma. Jetusalẽi tä uli hamö ĩ töpö kai hulasolöma. Ĩ hamö ai tiko töpönö Jesus a säpa piama maaki, Jesus anö kama hai ĩ töpö kai hua satia apösolöma. Töpö kai hua satia apölolö nö, Jesus a paluapalotiilöma. Kama kai a hua sinomoti wi, ĩ töpö pi ote noapalotima. Ĩ na tä kua tä, Jesus anö, kama kai a hua sinomoti wi ĩ 12 töpö, ĩ töpö nakama. Töpö nakalö nö, ‑Ĩ na sa kua kitä. 33Pi naka. Jetusalẽi hamö makö huu kimani, ĩ tä uli ha makö walokö lasoma, sanöma sa kupaso noai, ai tänö ĩ sa namo simökö nö, Teusö a täpä sinomo wi ĩ pata töpö, Moisés a kai a wäsä sinomoti wi ĩ töpö, ĩ na töpö kui, ĩ töpö na sanöma sa kupaso noai, ĩ sa totoki kitä. Sa totoki ha, ĩ pata töpö aiki, “Jesus ma säpamanöpököö!” ĩ na ĩ töpö kuu nö, juteu töpö pasi mai ĩ töpö na sa totoa tolea nömöki kitä. 34Sa totoa nömököma, juteu töpö pasi mai, kamisa na ĩ töpö hapalo pi wasöa apa nö, sa nakipömanö nö, sa soapalö nö, sa säpali kitä. Sa säpali kitä maaki, 3 tä mumi kuto tä, sa temöa konaso kitä‑ ĩ na Jesus a kuuma.
‑Kamisa na ai töpö simöotipökö‑
35Ĩ na tä kua tä, Sepeteu a hai ĩ pelupö töpö, ĩ Tiago a, João a, ĩ na kilii, Jesus a na ĩ töpö waloa läköma. Töpö waloa läiki nö, ‑Jesus ai. “Ĩ na tä thamaö!” kawa na samakö kuu ha, wa tä thama hö̃töo kitä?‑ ĩ na töpö kuu ha, 36‑Kamakö na ĩ ka pi sa tä thaa pasiopö?‑ ĩ na Jesus a kuu ha, 37‑Waiha wa kaikanamo totia tä, wa kaikanamo wi ĩ lotami tä na wa loa tä, kamisamakö na, “Kamakö solo. Pö kaikanamo naiopöö! Kate sa poko kuamö kule hamö ai wa loki, hai sa poko kuamö kule hamö ai wa loki, ĩ na makö loa kuköpököö!” ĩ na wa kuu kitä?‑ ĩ na töpö kuuma.
38Ĩ na töpö kuuma maaki, ‑Naiö! Makö kuuhe, ĩ tä na makö pi hatuku totio mi ipö. Sa pea kua piale na, ĩ na makö pea kua taö öpa naio kitä ta o?‑ Jesus a kuu ha, ‑Awai. Ĩ na samakö pea kua taö öpa naio kitä‑ töpö kuu hö̃töoö ha, 39‑Sa pea kua wi na, ĩ na makö kua hö̃töo kitä maaki, 40kamisa kuo pa “Pö kaikanamo naioö!” kamisa kuu mai kitä. Ipa hao aiki, “Ipa ulu a kotö ha pö kaikanamo naioö!” ĩ na ipa hao a kuu sisaö‑ ĩ na Jesus a kuuma. 41Ĩ na Jesus a kuu ha, ta kateha pole, ĩ ta hininö nö, Jesus a kai a hua sinomo wi, Tiago a, João a, ĩ na kilii töpö na ĩ ai 10 töpö pi hĩsuha apöpasoma.
‑Ai sa töpö pasiliapalapököö!‑
42Ĩ töpö pi hĩsuha apöpasoma, Jesus anö töpö pewö nakaki solö nö, ‑“Ĩ töpö hai, ĩ kaikana töpö” ai töpö kuu wi, ĩ kaikana töpönö ai töpö simöa sinomoö. Ĩ pata töpönö ai töpö noa thaa sinomoö. Ĩ ma tä taö öpa waikia kule‑ ĩ na Jesus a kuu nö, 43‑Ĩ na ai pata töpö kua kuati wi na, ĩ na pö kua tihöö! Wa patamo pi topa salo, ai wa töpö pasilipopököö! 44Kaikana wa kupo pi topa salo, ai wa töpö pasilipo nö, ĩ töpö na wa noami kalipalotipököö!‑ ĩ na Jesus a kuu nö, 45‑Sanöma sa kupaso noai, masita tä uli na sa waloiki nö, “Ai sa töpö simöaö ha, ĩ töpönö sa pasiliapala sinomopöö!” ĩ na sa pi kuu maama. “Ai sa töpö pasiliapalapöö! Sanöma töpö satehe epii sa töpö täapa kõo läopö, ĩ tä noa na sa säpamonasopököö!” ĩ na sa pi kuu salo, sa huma‑ ĩ na Jesus a kuuma.
A höpöpö öpii, Pasimeu a wani
Mateus 20.29-34; Lucas 18.35-43
46Ĩ na tä kua tä, Jetikó tä uli hamö töpö talaso tasoma. Jetikó hamö töpö kuo wi, ĩ ai töpö satehe epii ĩ töpö, Jesus a kai a hua sinomoti wi ĩ töpö, Jesus anö ĩ töpö pewö kai hulasolöma. Töpö pewö kai hulolö nö, pili tiso kasö na Simeu a hai ĩ pelupö a wani, Pasimeu a wani loo lätioma. A wani höpöpö kutenö, a wani loa lätiki nö, töpö hasuo pole, ĩ töpö na sitipa kökö ha a wani nako läo sinomotima. 47Ĩ a wani loa lätia tä, ‑Nasaté tili a pata hai, ĩ Jesus a hilo wi, ĩ a pata hasuo kulatiö!‑ ĩ na ai töpö kuu ha, a wani komöma. A wani komö nö, ‑Jesus ai! Kaikana tä Davi wa ulupö tolewöö! Kamisa na, “Ĩ na wa höpöpö wani kuo päoö” a pi kuu tihöö! Kamisa na a pi honipo totihoö!‑ ĩ na a moni wani kutasoma maaki, 48ai töpö satehe epii töpönö a wani päsäpa läoma. ‑A wani lalupalo tihöö!‑ töpö kuuma. Töpö kuuma maaki, lope epii a wani komö satimo hö̃töoma. ‑Davi a kaikana pata kuo noai, ĩ pelupö tolewö waö! “Ĩ na wa wani kuo päoö” a pi kuu tihöö! Kamisa na a pi honipo totihoö!‑ ĩ na a wani komö kuuto läoma. 49Ĩ na a wani komö kuuto läoö ha, Jesus a öpa opia soataiki nö, ‑A wani höpöpö öpii a wani nakaki solöö!‑ a kuuma. A kuu ha, a wani höpöpö öpii ĩ a wani nakaki solö nö, ĩ a wani na, ‑A pi topaikiö! A öpapaloö! Wa naka waikilatiö!‑ ĩ na töpö kuuma. 50Töpö kuu ha, a wani soho wi, ĩ ösö hosalö nö, lope epii a wani öpa haitalo nö, Jesus a na a wani ekua soataköma. 51A wani ekua soataki ha, ‑Wi na wa thamapö?‑ ĩ na Jesus a kuu ha, ‑Sa mamo huu topa komaköö!‑ ĩ na a wani kuuma. 52A wani kuu ha, ‑A koonöö! “Jesus anö sa mamo huu topa komaki kitä” wa pi kuu wi, ĩ tänö wa mamo huu topa kõa pasia pälaso ke‑ ĩ na Jesus a kuuma. Ĩ na Jesus a kuu ha, a mamo huu topa soa kotamaköma. A mamo huu topa soa kotamaki ha, pili tiso hamö Jesus a na a wani noka konasolöma.
11Jetusalẽi tä uli na Jesus a lisipaso noai ĩ ta
Mateus 21.1-11; Lucas 19.28-40; João 12.12-19
1Jetusalẽi tä uli kotö pata ha, ĩ Petöpasié tä uli, Petânia tä uli, ĩ na tökö uli kui tökö uli kuo pa, ĩ ha Jesus anö töpö kai atetasoma. Töpö kai atetalo nö, Olipa tä heuma na töpö kai waloki ha, Jesus anö a kai a hua sinomoti wi, ĩ ai polakapi töpö simöa tolehelöma. 2Töpö simönö nö, a hapalo nö, ‑Thapi hamö sai pö kulati, ĩ hamö makö lisipalo nö, jumẽtu a okalo õkale, ĩ a hõo pata na sanöma tä loo tai mi ipii, ĩ ma talali kitä. Ĩ ma pata talalö nö, ma pata kusöpalö nö, ma pata täaki solöö! 3Ma pata täli ha, kamakö na ai tä aiki, “Wi na makö pi kuu salo, ma täa kule?” ai tä kuu ha, “Ipa kaikana a patanö a naka kipiö! A simöa kõa haitali kitä” makö kuu!‑ ĩ na Jesus anö töpö noa thama. 4Ĩ na töpö noa thaö ha, töpö hulasolöma.
Töpö hulolö nö, sai pö kulali hamö töpö waloikilö nö, jumẽtu a okalo pata talalöma. Pili tiso kasö pata ha sai a päka pata holeo pa a pata õkatio läoma. 5A pata kusöpali ha, ai töpö öpale, ĩ töpö aiki, ‑Ĩ ka pi ma tä thaa pia salo, ma okalo pata kusöa kule?‑ ĩ na töpö kuuma. 6Ĩ na töpö kuu läoö ha, Jesus a kuu noai, ĩ ta thaa hö̃töoma: ‑Kaikana tä patanö a okalo pata naka kulaiö! A simöa kõa haitali kitäö!‑ töpö kuuma. Töpö kuu ha, ‑Ö̃kö. A okalo pata tälölöö!‑ töpö kuu hö̃töoma.
7Töpö kuu hö̃töoö ha, Jesus a na jumẽtu a okalo pata tälölöma. A pata tälölö nö, pili a hõo pata ha kama töpö hai ĩ haloi ösö hãsokopo wi, jumẽtu a hõo pata ha ĩ ösökö lukököma, ĩ ösökö ha Jesus a tikäa soataköma. 8A tikäa tä, töpö satehe epii töpö aiki, ‑Kaikana tä sai pata huu polaliö!‑ töpö pi kuu salo, kama töpö hai ĩ haloi ösökö hãsokopo wi, ĩ ösökö paa toleha läatalatilöma. Koanata amösö hena kui na, ĩ na ösö hena kui, pölösö hamö ösö hena pätalalö nö, pili tiso hamö ĩ ösö hena hila paa naionöma. Ösö hena paa tolehea läatalatilöma. Kaikana tä sai pata huu ha, ĩ tä thamatima. 9Tä thamati nö, Jesus a na ai töpö palule ĩ töpö, Jesus a noa ha ai töpö kule ĩ töpö, ĩ na töpö kui, Teusö a na ĩ töpö pewö aiki,
‑Kawa toita apöö! Pata wanö wa simöpalö noai, ĩ a totiapala totihoö!
10Sutu upa hao Davi a pata kaikanamo kua noai na, ĩ na Jesus a kaikanamo kuapököö! A kaikanamo piale, ĩ tä topa apa kule. Teusö wa totiatalo opawöö!‑
ĩ na Teusö a na, lope epii ĩ na töpö ku upama.
Jesus anö piku tiki noa thaa noai ĩ ta
11Ĩ na töpö ku upa tä, Jetusalẽi tä uli hamö Jesus a lisipalotö nö, Teusömo wi a sai pö pata hamö Jesus a lisia soatasoma. A lisipalo nö, tä pewö möö nö, tä wisa waiki ha, Petânia tä uli hamö a kuki pia salo, Jesus anö kama hai ĩ 12 töpö kai hua kõa soatasolöma. 12Töpö kai hua kõa soatalolö nö, Petânia tä uli ha töpö kai kuo wi, ĩ hena tä, töpö kai kõa soapalotö nö, pili tiso hamö Jesus a huu koonö tä, a oio opama. 13Jesus a oi ipö tä, piku tiki öpa talalöma. Tiki hena siko opii, pai hamö ĩ tiki öpa talalö nö, Jesus anö ĩ tiki mo mömö ekua soataköma. Ĩ tiki ha a waloikitö nö, pili mo lalo sinomo wi, ĩ kökö pilipoma kua totia mi kutenö, Jesus anö ĩ tiki moni möö maaki, pili nakö hena sino kuo sisama. 14Pili tiki henakö sino kuo sisa ha, hii ti na Jesus a hapaloma: ‑Pili wa mo mi nö hĩsuwö a. Sanöma töpönö pili wa mo wani oa kõo maa nö toapököö! Kawa na pili mo sätäo kõo mai kitäö!‑ ĩ na ĩ ti na Jesus a kuuma. Ĩ na Jesus a kuu wi, kama a kai a hua sinomoti wi, ĩ töpönö ĩ ta hinima.
Teusömo wi a sai ha töpö kuo wi, Jesus anö ĩ töpö sasupalö noai ĩ ta
Mateus 21.12-17; Lucas 19.45-48; João 2.13-22
15Ĩ ta hininöma, ki hamö, Jetusalẽi tä uli hamö töpö kai kõa soapölöma. Töpö kai kõa soapolö nö, Teusömo wi a sai pö pata na Jesus a lisipasoma. A lisipalo nö, sitipa kökö ha wani tä totoma sinomo wi ĩ töpö, sitipa kökö ha wani tä täalali wi ĩ töpö, ĩ na töpö kui, Jesus anö ĩ töpö pewö sasupalöma. Sitipa kökö totoa nomöhöa hö̃töo soatalo sinomo wi, ĩ töpö hai ĩ hii tiki ha sitipa kökö maketa wi, Jesus anö ĩ tiki pata nomöhöpamani, Teusö a na holeto kökö wai totoköpö, sitipa kökö noa ha ĩ holeto kökö wai totoa sinomo wi ĩ töpö hai ĩ lotami tiki nomöhöpamani, ĩ na tiki nomöhöa thapamanöma. 16Tiki nomöhöpamanö nö, ai töpö ekuki wi, ĩ töpö na, ‑Teusömo wi, ĩ a sai pö ha sapono a kule, ĩ ha wani tä kai ekuo pasio tihöö!‑ ĩ na Jesus a kuuma. 17Ĩ töpö pewö pi hatukupamani pia salo, ĩ na a hapalo kõo nö, ‑Pi naka. Teusö tä waheta na ĩ tä sãökama kua:
“‘Teusö sa na sanöma töpö pewö hapalo sinomo wi ĩ a sai’ ĩ na ipa sai a hila thama hö̃töki kitä” ĩ na Teusö a kuuma. Ĩ na Teusö a kuuma maaki, Teusö a hapalo sinomoti wi, ĩ a sai ha ai töpö na makö thomömo sinomowö. Sitipa pe epii ma naka sinomowö. Teusömo wi ĩ a sai hai, thomömo wi, ĩ a sai kupaso noa‑ ĩ na Jesus a kuuma.
18Ĩ na Jesus a kuu pole, Teusö a täpä sinomo wi ĩ pata töpö, Moisés a kai a wäsä sinomoti wi ĩ töpö, ĩ na töpö kui, ĩ töpönö ĩ ta hininöma. Ta hininö nö, töpö hĩso opa salo, ‑Wi na ma tä wani säa thapalöpö?‑ ĩ na ĩ töpö kuuma. Ĩ na töpö kuuma maaki, Jesus a na ĩ töpö kili ipatima. Ai töpö pewö aiki, ‑Jesus anö Teusö a kai a wäsä taö öpa nö kilia sai‑ ĩ na ai töpö pewö kuti ha, ‑Jesus ma säpalöpöö!‑ kuu wi, Jesus a na ĩ töpö kili ipama. ‑Ai töpö pewönö makö wanipo hãto kitä‑ ĩ töpö pi kuu nö, Jesus a na ĩ töpö kili ipama.
‑Teusö a lotete epö‑ pö pi kuu!
19Ĩ na tä kua tä, Jetusalẽi tä uli ha Jesus anö, a kai a hua sinomoti wi, ĩ töpö kai kuoma, wisa täi ha töpö kai konasolöma. 20Töpö kai konasolö wi, ĩ hena tä töpö kai hasuo tä, piku tiki na Jesus a hapalo noai, ĩ tiki möö kõoma. Ĩ tiki poko, tiki nasikili, ĩ tiki pewö häwäa waikisoma. 21Ĩ tiki möö nö, ‑Sanöma töpönö pili wa mo wani oa kõo maa nö toa apököö!‑ ĩ na Jesus a kuu noai, Pedro anö ĩ ta taö soa salo, ‑Ã ãi. Hi tiki ha wa hapalopili, ĩ tiki häwäa waikiso noa thaiö!‑ ĩ na Jesus a na a kuuma.
22A kuu ha, ‑Pi naka. “Teusö a lotete epö” makö pi kuu ha, 23hi heu tä öpale, ĩ heu tä ha wa hapalo nö, “A hoköpalo nö, kosoto u pata ha a kepaloö!” wa kuu ha, heu tä pata maaki, kosoto u pata ha tä pata kepaso kitä. “Teusö a lotete hãto mi ipö. Heu tä hokö hãto mai kitä” ĩ na wa pi kuu mi tä, a hoköpo hö̃töo kitä. Ĩ na sa kuu pitilimo opa kule. 24Önö kutenö, “Teusö a na sa tä nakali wi, ĩ sa tä pewö sua hö̃töli kitä” ĩ na wa pi kuu ha, wa tä nakali wi, ĩ wa tä pewö sua hö̃töli kitä‑ ĩ na Jesus a kuuma.
25Ĩ na a kuu nö, ‑Teusö a na wa hapaloti pamö ai sanöma wa tä hĩsu thaö ha, wa tä hĩsu thaa wi, ĩ tä maa kopamanöö! Ĩ wa tä maa kopamani salo, wa wanisala apati wi, ĩ tä na Teusö a hĩsu thaa maa kõa hö̃töpaso kitä. 26[Ai wa tä hĩsu thaa wi, ĩ wa tä mapama kõo mi ha, hi tä hẽtu hamö au hao a kulali, ĩ a patanö kawa hĩsu thaa wi, ĩ tä mapama kõo hö̃töo mai kitä]‑ ĩ na Jesus a kuuma.
‑Witi pili anö wa simöaö ha, wa töpö sasupalöma?‑ pata töpö kuu noai ĩ ta
27Ĩ na tä kua tä, Jetusalẽi tä uli hamö töpö kai taa konaso tasoma. Töpö kai taa konanotö nö, Teusömo wi ĩ a sai ha sapono a kule, ĩ a sapono ha Jesus a hupalotima. A hupalo tä, Teusö a täpä sinomo wi ĩ pata töpö, Moisés a kai a wäsä sinomoti wi ĩ töpö, juteu pata töpö, ĩ na töpö kui, Jesus a na ĩ töpö pewö ekua ateköma. 28Töpö ekua ateiki nö, Jesus a na, ‑Wa tä thamatihe, witi pili anö wa simöaö ha, wa tä thamati ke?‑ ĩ na ĩ töpö kuuma. 29-30Töpö kuu ha, ‑Kamakö na sa tä hini hö̃töo pia kule. Kamakö na sa ta hini ha, kamakö aiki hö̃töwö, “Ĩ naköö!” makö kuu makoka hö̃töoö ha, “Wa tä thamatihe, witi pili anö wa simöaö ha, wa tä thamati ke?” makö kuuhe, ĩ tä na, “Ĩ anököö!” sa kuu hö̃töo kitäö!‑ ĩ na Jesus a kuu nö, ‑Witi pili anö João a simöaö ha, ĩ anö töpö mãi õmatima? Teusö anökö hãtowö? Sanöma töpönökö hãtowö? Wi na makö pi kuu kule?‑ Jesus a kuuma. 31Ĩ na Jesus a kuu ha, töpö pi tapomo nö, kama töpö hapalo nomöhöpaso nö, ‑“Teusö anö João a simököma” makö kuu ha, Jesus aiki hö̃töwö, “Ĩ na makö kuu manu kule, wi na makö pi kuu salo, João ma kai a hini totio maama?” ĩ na Jesus a kuu hö̃töo kitä‑ töpö kuu nö, 32‑“Sanöma töpönö päwö” makö kuu ha, ai töpö pewönö makö wanipo matimöö!‑ ĩ na ĩ töpö kuuma. ‑“João a patanö Teusö a kai a wäsä totio wi, ĩ a sai kuo totioma” ĩ na ai töpö pewö kupaloti saiö!‑ ĩ na ĩ töpö pi kuu salo, ‑Sanöma töpönö päwö João a simököma‑ ĩ na ĩ töpö kuu kili ipama. 33Töpö kuu kili ipa salo, ‑Kui. Sama tä tai mi‑ Jesus a na ĩ na ĩ töpö kuuma. Töpö kuu ha, ‑Ĩ na makö kuu salo, “Witi pili anö wa simököma?” makö kuu kule maaki, kamakö na sa kuu hö̃töo mai kitäö!‑ ĩ na Jesus a kuuma.
12Kaikana a pelupö säpalö noai ĩ ta
Mateus 21.33-46; Lucas 20.9-19
1Ĩ na tä kua tä, ai uni tökö a wäsä kuiki nö, ĩ na a kuuma: ‑Ai pata tänö upa totokö satehe epii totokö tösama. Ĩ mokö tösa nö, ĩ totokö kuo pamö tä hokoloköma. Tä hokolokö nö, upa mokö kopekeama pia salo, maa ma pata thaköma. Maa ma pata thakö nö, ösö ha tikio wi tiki matakali thaa nömököma. Matakali tiki thaa nömökö nö, ai töpö na, “Hi ipa hikali ha pö kalipalo hisaö! Waiha au noa sa tä totoki kitäö!” ĩ na a pata kuuma. Ĩ na a pata kuu nö, pai pamö, tiko töpö uli hamö a pata asulöma. 2A pata alulö nö, tiko tä uli ha a pata kutio tasoma. A kutio tasoa tä, tä tetea apöpaso noai ha, mo patasipö tä, polakapi kama hai ĩ upa mokö suli pia salo, ĩ pata tänö töpö nokapalamati wi, ai tä simököma. Hikali a ha töpö kalipalama noai, ĩ töpö na a simöa konöma. 3A kopi ha, töpö hikalimo hisa wi, ĩ töpönö a wani huölö nö, a wani soalalö nö, pokei a wani simöa konömae. 4Pokei a wani simöa koni ha, pata tänö töpö nokapalamati wi, ĩ ai a wani simöa nömönöma. A wani simöa nömönöma maaki, ĩ a wani na töpö höla apa nö, ĩ a he wani säpömae. 5Ĩ tä noa ha pata tänö töpö nokapalamati wi, ĩ ai tä simöa nömönöma. A simöa nömöa koni wi, ĩ a wani säpalöma. Ĩ na ai töpö satehei töpö simöo hätäpotima. Töpö simöo hätäpoti tä, ai töpö he wani säa läpo wi, ĩ töpö wani konasolöö, ai töpö he wani säalali wi, ĩ töpö säa totia apa pasipasoö, ĩ na töpö kuama.
6Ĩ na töpö kuaö ha, pata tä kuo pa ai sami tä kuo sisama. Ĩ kama hai ĩ pelupö a kuo sisama. Pelupö a pi ipama maaki, sakimi ipii, töpö hikalimoma wi, ĩ töpö na kama hai pelupö a simönöma. “Ipa ulu tä na töpö höla mai kitä. Ipa ulu a hini hãto kitäö!” a pi kuu nö, kama hai pelupö a simönöma. 7Kama hai pelupö a simönöma maaki, töpö hikalimoma wi ĩ töpö aiki, “Pata tä hai ĩ pelupö a huu kulati taö. Pelupö a kutenö, waiha pö̃ a nomaso noai ha, pelupö anö hi hikali a pata täa asali pia saloö! Ma wani säpalöpöö! Ma säpalö nö, hikali ma pata sua asalöpöö!” ĩ na ĩ töpö kuuma. 8Ĩ na töpö kuu nö, pata tä hai ĩ pelupö a huölö nö, a säpalömae. A säpalö nö, hikali a kasö hamö a nomawö hosalömae. Ĩ na tä kuama‑ ĩ na Jesus a kuuma.
9Ĩ na a kuu nö, ‑Ĩ töpönö a säpalö noai, ĩ tä noa na wi na pata tänö töpö thama pia salo? A pata kopo nö, töpö hikalimoma hisa noai ĩ töpö säa hö̃töpali kitä. Ĩ töpö säa hö̃töpalö nö, ai tiko töpö na ĩ hikali a totoa nömökö nö, ĩ töpö hikalimoma nömöo kitä‑ ĩ na Jesus a kuuma.
10Ĩ na Jesus a kuu nö, ‑Teusö tä waheta kuu noai, ĩ ma tä sãökama möö maa kipili ta o?
“Maa ma sai thaa wi ĩ töpönö ai ma hosalö noai, ĩ ma toita satio opa kuköma. Ĩ manö sai a lototoama totio wi, ĩ ma. 11Ĩ na tä kuo wi, Teusö anö ĩ tä thama. Teusö anö tä thaa wi, ĩ sama tä möö nö, ‘Totiatalo opaö’ samakö kuu”
ĩ na waheta tä ha ĩ na tä sãöka thaköma‑ ĩ na Jesus a kuuma.
12Ĩ na a kuu ha, ‑Jesus anö makö a kateha totia alu kule. “Maa ma hosalö noai, ĩ ma hosa kua noai na, ĩ na kamakönö sa hosa kua hö̃töoö!” ĩ na Jesus a pi kuu hãtoakö‑ ĩ na töpö pi kuuma. Ĩ na töpö pi kuu nö, a hua piama. A hua piama maaki, ‑A huopoö ha, ai töpönö makö wanipo kitäö!‑ ĩ na töpö pi kuu salo, Jesus a takölöma. A takölö nö, ĩ töpö hua konasolöma.
Jesus a hapalo isi wanipamani pia salo
Mateus 22.15-22; Lucas 20.20-26
13Töpö hua kononö nö, Jesus a hapalo isi wanipamani pia salo, Jesus a na ai patiseu töpö, ai etoosisö töpö, ĩ na kilii töpö simönöma. 14Töpö simöni wi, ĩ töpö waloiki nö, Jesus a na töpö hapaloma.
‑Wa pitilimo opaö. Ai töpö haö ha wa kili mai kitä. Ai töpönö wa kateha wanisala apati wi maaki, “Ĩ na tä kuo päoö” ĩ na wa pi kuu sinomoö. Wa toita apö. Pata töpö maaki, pata töpö na wa kili mi salo, Teusö wa tä wäsä makoko opaö. Ĩ na wa kuaö ha, kawa na sama tä hini pia kule‑ ĩ na töpö kuu nö, ‑Sesa kaikana tä pata na sitipa sama kökö totoköpökö? Wi na Teusö a kuu?‑ ĩ töpö kuuma. Ĩ na ĩ töpö holisimo kuu päoma. 15Ĩ na ĩ töpö holisimo kuu päoö ha, Jesus a pi hatuka apa salo, ‑Wi na sa kuaö ha sa wapa nö, sa hapalo isi wanipama pia kule? Sitipa suaki solö. Sa tä möö!‑ ĩ na Jesus a kuu hö̃töoma. 16Ĩ na Jesus a kuu hö̃töoö ha, sitipa suaki solöma, Jesus aiki, ‑Hi sitipa kökö ha, ĩ witi pili a hai ĩ hilo sãöka thamama. Witi pili a ukutupö sätäa?‑ a kuu ha, ‑Sesa kaikana tä pata aiki‑ töpö kuuma. 17Ĩ na töpö kuu ha, ‑Sesa kaikana tä pata hai, ĩ kaikana tä kutenö, ĩ a patanö makö noa thaa wi ĩ ta hiniö! Teusö a lö kui, kaikana tä sai pata kutenö, ĩ a patanö makö noa thaa wi ĩ ma ta hini totio hö̃töoö!‑ Jesus a kuuma. Ĩ na Jesus a kuu ha, ‑Jesus a haö taö öpa kiliawö‑ ĩ na ĩ töpö kuuma.
‑Nomawö töpö temöa konaso kitä‑
Mateus 22.23-33; Lucas 20.27-40
18Ĩ na tä kua tä, ‑Nomawö töpö temöpo kõo mai kitäö!‑ satuseu töpö kuu sinomo wi, Jesus a na ĩ ai satuseu töpö waloköma. Jesus a na ĩ töpö waloiki nö, 19‑Jesus ai. Kamakö hai ĩ nö patapö töpö na ĩ na Moisés a pata kuuma: “Au hepala hai ĩ ulu töpö kuo mai ha, au hepala nomasoö ha, ĩ a hai ĩ pusopö a kuo noai ĩ wa sua nömönöö! Wa sua nömönö nö, au ulu wa töpö thaköö! Au ulu töpö sai maaki, ‘Pepala hai ĩ ulu töpö päwö’ ai töpö kuupö. Ĩ na pö kuaö!” ĩ na sutu upa ĩ na Moisés anö tä sãöka thaköma‑ ĩ na Jesus a na töpö kuuma. 20-21Ĩ na töpö kuu nö, Jesus a na, ‑Pi naka. Poose töpö satehe epii, ĩ 6 poose töpö kuoma. Pepala a kuo soma noai ĩ anö suö tä tälö nö, ulu tä thaa mai ha, a nomasoma. Pepala a nomasoö ha, poosa a kuo nömöo noai, ĩ anö pepala a hai ĩ pusopö a kuo noai, ĩ a sua nömöa hailöma. A sua nömöo hailö nö, ulu tä thapa mai ha, ĩ a noma kõa nömöa soatasoö. Ĩ tä noa ha, ĩ hai poosa anö ĩ suö a sua kõa nömöa haia soatalö nö, ulu tä thapa mai ha, ĩ a noma kõa nömöa soatasoö. Ĩ na ĩ poose töpö pewö kuama. 22Poose töpö pewönö ĩ suö a sua nömöatala kule maaki, töpö ulu pö kuola tä kuno mai, töpö pewö noma pälasoma. Ĩ na tä kuatima. 23Ĩ na tä kuama kutenö, waiha sanöma töpö nomapo noai ĩ töpö temöa konasoma tä, ĩ 7 töpönö ĩ suö a po hätähatalo noai, ĩ suö a hai, witi pili a hai ĩ pusopö a sai kupasoö?‑ ĩ na töpö kuuma.
24Ĩ na töpö kuu ha, Jesus aiki hö̃töwö, ‑Teusö ma tä waheta tai mi ipö, Teusö a lotetea apöle, ĩ ma tä tai mi ipö, ĩ na ma tä tai mi kuö kutenö, makö pi tapomo makokoa mane. 25Pi naka. Waiha sanöma makö nomaso noai, ĩ makö pewö temöa konasoma tä, Teusö anö kama hai ĩ töpö simöta wi, ĩ ãju töpö kua wi na, ĩ na sanöma makö kua naio kuki kitä. Suö ma töpö po mai kitä‑ ĩ na Jesus a kuuma.
26Ĩ na a kuu nö, ‑Töpö nomawö temö kõo wi, ĩ sa ta kateha kõo pia kule‑ a kuu nö, ‑Abraão a, Isaki a, Jacó a, ĩ na kilii töpö noma waikiso noai ha, Moisés a pata na Teusö a hapaloma. Hii tiki ose wakö wai hili noai ĩ hamö Teusö a hapalo nö, “Abraão a, Isaki a, Jacó a, ĩ na kilii töpö aiki, ‘Teusö a hai, ipa pata tä’ ĩ na ĩ töpö kuu soatioö” ĩ na Teusö a kuuma. Ĩ na Teusö a kuu noai, Moisés a patanö ĩ ta sãökama. Ĩ ta sãökama maaki, ĩ ma tä möö maapili ta o? 27Makö pi tapomo makoka maneö! “Teusö a hai, ipa pata tä” ĩ na nomawö töpö kuu mai kitä. Töpö temö öpii, ĩ na ĩ töpö kuu sisaö. Önö kutenö, Abraão a, Isaki a, Jacó a, ĩ na kilii töpö nomasoma maaki, ĩ töpö temöa konasoma‑ ĩ na Jesus a kuuma.
‑Ĩ pili wa ta hinia totilöpököö!‑
Mateus 22.34-40; Lucas 10.25-37
28Ĩ na tä kua tä, Jesus a, satuseu töpö, ĩ na töpö kui töpö hapalo nomöhöpaso wi, Moisés a kai a wäsä sinomoti wi ĩ anö ĩ ta hini nö, ‑Jesus a hapalo taö öpawö‑ ĩ na ĩ a pi wani kuuma. Ĩ na a pi wani kuu salo, a hapalo nö, ‑Jesus ai. Moisés a patanö töpö noa thatiilö noai, ĩ witi pili ta topa satia apöle, ĩ sa ta hinia totilöpökö‑ ĩ na a wani kuuma. 29Ĩ na a wani kuu ha, Jesus aiki, ‑Moisés a patanö juteu töpö noa thaa noai, ĩ ta topa satia apaö: “Isöhaeu pö! Kaikana tä sai pata, ĩ Teusö a hilo wi, ĩ sami tä kua sisaa. 30Teusö pata wa tä pii totio opatipököö! Ĩ a pata na wa pi kuo totio opatipököö! Pe epii a pata pii totihoö! Ĩ a na wa pi tapomo sinomoti nö, pe epii a pii totihoö!” ĩ na Moisés anö töpö noa thaa noai, ĩ pili wa ta hinia totilöpököö! 31Ĩ wa ta hinia totia apölö nö, “Kama wa pio sapao kua kõo wi na, ĩ na ai töpö pii kuaö!” ĩ na Moisés anö töpö noa thaa naio noai, ĩ wa ta hinia nömönöpököö! Ĩ na Moisés anö polakapi töpö noa thaa pi kupaso noai, ĩ tä na ai ta topa satio opa mai kitä‑ ĩ na Jesus a kuuma.
32Ĩ na Jesus a kuu ha, ‑Wa kuuhe, ĩ pitili tä sai a. Sami Teusö a kua sisaa. Ai tiko Teusö tä kua tolea mai kitä. 33“Sa wanisala apati wi, ĩ tä ha wa hĩso wi ĩ tä matamanöö!” ĩ na Teusö a na sa kuu pia salo, salo a noki, wani tä, ĩ na kilii, Teusö a na sa tä uni totoki, ĩ na sa kuati wi, ĩ tä topa kule maaki, Teusö pata sa tä pii totio opatii, ĩ a pata na sa pi kuo totio opatii, pe epii sa pata pii totihoö, ĩ a na sa pi tapomo sinomoti nö, pe epii ĩ Teusö sa pii totihoö, kama sa pi sapao kua kõo wi na, ĩ na ai sa töpö pii kuaö, ĩ na sa kuati wi, ĩ tä topa satia apaö‑ ĩ na ĩ a wani kuuma. 34Ĩ na a wani kuu ha, ‑Ĩ a wani hapalo pi hatuku upa thai‑ Jesus a pi kuuma. A pi kuu nö, ‑“Kamisa na Teusö a simöo totiopököö!” ĩ na wa pi kuu hãto pia kule‑ ĩ na Jesus a kuuma. Ĩ na Jesus a kuu ha, Moisés a kai a wäsä sinomo wi, ĩ töpö pewönö Jesus a huama kili ipama.
Cristo a hai, ĩ witi pili a?
Mateus 22.41-46; Lucas 20.41-44
35Ĩ na tä kua tä, juteu töpö Teusömo wi ĩ a sai ha Jesus anö Teusö ta wäsä tä, ĩ na a kuuma: ‑Moisés a kai a wäsä sinomoti wi, ĩ töpö aiki, “Teusö anö a simöni wi, ĩ Cristo a hilo wi, ĩ a hai, Davi a pata hai ĩ pelupö a tolewö” wi na ĩ töpö pi kuu salo, ĩ na töpö kutii? 36Teusö a õsi kua tolele ĩ anö Davi a pi hatukua waikipamanöma kutenö, ĩ na a kuuma:
“Ipa pata tä na Teusö pata tä aiki, ‘Ai töpönö wa wanipo wi ĩ sa töpö peama totio kitäö! Sa töpö peama noai ha, ĩ töpö na wa kaikanamo toitio kitäö! Ĩ töpö na wa kaikanamo totio paio mai ha, kamisa na wa kua paitiki nö, kawa solo makö kaikanamo paitiopököö!’ ĩ na kamisa na a simöo sinomoti wi, ĩ a na ĩ na Teusö a kuuma”
ĩ na tä kuu wi, Davi a patanö tä sãökama. 37“Kamisa na a simöo sinomoti wi, ĩ wa. Ipa pata wa” ĩ na Cristo a na Davi a pata kuuma. Ĩ na a pata kuuma kutenö, Cristo a hai, Davi a hai ĩ pelupö a tolewö päwö ta o?‑ ĩ na Jesus a kuuma.
Jesus a na ai töpö satehe epii töpö sotota pole, ĩ töpönö Jesus a kuti wi, ĩ ta hinitia tä, töpö pi mönaha apatima.
Moisés a kai a wäsä sinomo wi, ĩ töpö uöma tihöö!
Mateus 23.1-36; Lucas 20.45-47
38Ĩ na tä kua tä, Jesus anö ta wäsä nö, töpö pi hatukamati tä, ‑Moisés a kai wäsä sinomoti wi ĩ töpö na pö pi mosaikiö! Ĩ töpö kua kua wi na, ĩ na pö kua hö̃töo tihöö! “Ĩ pata töpönö ĩ nasimö watata ösökö halopo sinomo wi, ĩ ösökö pasiwöö!” ĩ na ai töpö pi thama pi topa salo, watata ösö lape epii ösö patanö ĩ töpö haloiki nö, ĩ töpö hupalo pi topa apaö. Wani tä suta wi, ĩ ha satehe epii töpö kuo pa, ĩ töpö hupalo naitioö. Töpö hupalo opati pamö, “Pata! Wa huu kule?” ĩ na ai töpö pewö thama pi topa apö. 39Juteu töpö kokamo sinomo wi ĩ pata töpö lota sinomo asa wi ĩ ha ĩ töpö loo pi topa apa naioö. Töpö iapalo tä, lotami ti toita apii ti na ĩ töpö loo pi topa apa sinomo asaö. 40Ĩ töpönö peanopö a nomaso noai, ĩ pusopö töpö mönama nö, ĩ töpö suö hai ĩ wani tä sua silia apa sai thaliö! Ĩ na ĩ töpö kuati maaki, “Ĩ töpö totiatalo opawö” ĩ na ai töpö pi thama pia salo, Teusö a na ĩ töpö hapalo lapapo opa pätioö. Teusö anö ĩ töpö peama satia apa kitä‑ ĩ na Jesus a kuuma.
Polakapi sitipa kökö wai titia päkö noai ĩ ta
41Ĩ na tä kua tä, Teusömo wi ĩ a sai ha Teusö a na sitipa kökö totoma sinomo pa töpö satehe epii töpönö sitipa kökö titipatima. Sitipa kökö titipa tä, ĩ tä kotö ha Jesus a loiki nö, ĩ töpö na a mamo tetetioma. Sitipa kökö satehe epii kökö thapo wi ĩ töpönö sitipa kökö satehe epii kökö titipama. 42Kökö titipa soa tä, peanopö a nomaso noai, ĩ pusopö a wani waloköma. A waloiki nö, kama hai ĩ wani tä mi kutenö, sitipa kökö wai noa mi ipii, polakapi pätawö, ĩ sitipa kökö wai titia päköma. 43Ĩ kökö wai titio päki ha, Jesus anö kama kai a hua sinomoti wi ĩ töpö nakalö nö, ĩ töpö na a hapalo nö, ‑“Ki suö tänö sitipa kökö polakapi kökö wai totoköma maaki, Teusö aiki, ‘Ĩ kökö kua apa satia apa kule’ ĩ na Teusö a pi kuu kule” kamakö na ĩ na sa kuu pitilimo opa kule. 44Ai töpönö sitipa kökö satehe epii kökö thapo kutenö, sitipa kökö satehei kökö titia päköma. Kama töpö hai ĩ sitipa kökö kuo opa soama. Ki suö tä lö kui, ĩ a wani honimo opa maaki, kama hai ĩ sitipa kökö wai pewö titiköma. Kama hai ĩ nii tä wai naka wi ĩ sitipa kökö wai pewö titiköma‑ ĩ na Jesus a kuuma.
13Pe epii töpö pea kuki kitä
1Juteu töpö Teusömo wi ĩ a sai ha Jesus a kuoma, a atupo tä, kama kai a hua sinomoti wi ĩ ai tä aiki, ‑Jesus a pata! Hi sai a möö! Hi maa mapö sai pata toita apö‑ Jesus a na ĩ na a kuuma. 2Ĩ na a kuu ha, ‑Hi sai wa pö pata möö pole, ĩ ha maa makö pewö tipöle, ai töpönö ĩ maa makö pewö pata huitipalö nö, maa makö pewö kemani kitä. Ai ma tipöa soa mai kitä. Masita tä na ĩ makö pewö paki kitä. Hi Teusömo wi ĩ a sai pewö waniapaso kitä‑ ĩ na Jesus a kuuma.
3Ĩ na Jesus a kuu nö, a hua kononö nö, Olipa tiki öpale ha, ĩ tä heu ha a walokö lasoma. A walokilö nö, a loköma. A lotia tä, Pedro a, Tiago a, João a, André a, ĩ na kilii töpö aiki, ‑Jesus ai. Wi na tä kuto tä Teusömo wi ĩ a sai pata waniapaso pia salo? 4Ĩ a sai pata waniapo pia tä, wi na tä kua paio pia salo? Kamisamakö na wa ta wäa mi salo‑ ĩ na ai töpö mai ha, ĩ na Jesus a na ĩ töpö kuuma.
5Ĩ na ĩ töpö kuu ha, ‑Ai töpönö makö mönama pia salo, pö pi mosaia totikiö! 6Töpö satehe epii töpö waloiki nö, ĩ töpö aiki, “Cristo sa. Teusö anö sa simöpalöma sa” ĩ na töpö holisi kuu nö, ĩ töpönö ai töpö satehe epii töpö mönamani kitä‑ ĩ na Jesus a kuuma. 7A kuu nö, ‑“Hi atepale ha töpö säpaso kulaliö!” töpö kuu tä, “Ki hamö ai töpö a säpaso kulaliö!” ai töpö kuu nömöa tä, pö pi honipo tihöö! Töpö säpaso wi tä kua totio kitä maaki, hi masita tä uli mapo soata mai kitä. 8Ai tiko töpö kai hapalo wi ĩ töpö na töpö satehe epii töpö wasu ekupa sinomoti kitä. Ĩ na tä kua tä, ai töpö na pata tä kaikanamo wi ĩ töpö satehe epii töpö kokamo nö, ai tiko töpö satehe epö hö̃töi, ĩ töpö na ĩ töpö wasu ekupa sinomo kuki kitä‑ ĩ na Jesus a kuu nö, ‑Tä uli pata lakö lakömo hãkikio opa kitä. Hi masita tä uli oi hãkikio opa kitä‑ a kuu nö,
‑Ĩ na töpö pea kua kitä maaki, waiha pe epii töpö pea tolea totio opa kuki kitä. Suö tä na ulu a wasu kuo pia kua wi na, ĩ na tä kua kitä. Wani ipii töpö pea paio nö, waiha pe epii töpö pea satia apa kitä‑ ĩ na Jesus a kuuma. 9Ĩ na a kuu nö, ‑Pö pi mosaikiö! Ai töpönö makö peama pia salo, pata töpö wani kokamo sinomo wi ĩ hamö makö tälölö kitä. Juteu töpö kokamo sinomo wi ĩ a sai ha makö säpa kitä. Kamakönö sa thapo salo, pata töpö, kaikana töpö, ĩ na töpö kui, ĩ töpö wani na makö tälölöma, ĩ töpö na ta topa apöle, ĩ ma ta wäsä kitä‑ ĩ na Jesus a kuu nö, 10‑Hi masita tä uli pewö hamö sanöma töpö pilipai, ĩ töpö pewö na ta topa apöle ĩ ta wäsä paio mai ha, hi masita tä uli mapo mai kitä. 11Pata töpö wani na makö täalalö nö, ĩ töpö na makö totokö nö, ĩ na makö kua tä, “Wi na sa kuu pätakö?” ĩ na pö pi kuu tihöö! Pö kili tihöö! Pata töpö na makö totoki wi ĩ tökö soawö, “Ĩ na wa kuu! Ĩ na wa kuu!” ĩ na kawa na Teusö a õsi kua tolele, ĩ a kuu kitä‑ ĩ na Jesus a kuuma.
12A kuu nö, ‑Ĩ na tä kua tä, pepala töpönö ai töpö na poose töpö namo simöki, poose töpönö ai töpö na pepala töpö namo simöo hö̃töoki, pö̃ töpönö ai töpö na kama ulu töpö namo simöki, ĩ na tä kua kitä. Ulu töpönö kama töpö hai ĩ pö̃ a, pöpönö a, ĩ na kilii töpö namo simökö nö, ĩ töpö säpamani kitä. 13Kamakönö sa thapo salo, ai töpö pewönö makö wanipo kitä. Makö wanipo kitä maaki, “Jesus a pitili” wa pi kuu satia nö, “Jesus sa thapo wi ĩ sa totiwö” wa kuu mapo mi tä, Teusö anö wa täa koni kitä‑ ĩ na Jesus a kuuma. 14Hi waheta wa tä möö nö, a pi hatukuikiö! Pi naka. Ĩ na Jesus a kuu kõoma: ‑“Ĩ ha wasu tä wani hiopö öpii tä wani kuo naio läo pikio maiköö!” Teusö a pi kuu kule maaki, ĩ ha ĩ wasu tä wani kuo naio pikitio kitä. Ĩ ha tä wani kule, Teusö anö ĩ tä wani taa wani ipii, ĩ ma tä wani talalöma, maa makö pata ha jutéia tili pö toköa haitalolöö! 15Sai a atu ha wa kua tä, sai õsimö hamö a lisipo kõo tihöö! Pokei a toköa haitaloö! 16Hikali a na wa kalipalo pole, ĩ wanö soho wi ĩ haloi wa ösö sua pi topa kõa kule maaki, sai hamö a huu koonö tihöö! Pö opimo tihöö! 17Ĩ na tä kua tä, suö töpö sipinapi ipii ĩ töpö, ulu töpö haleapala soa wi ĩ töpö, ĩ na töpö kui, pe epii töpö pea kitä. Lope epii töpö tokö pia tä, ĩ töpö pea kitä. 18Ĩ na tä kuaö ha, Teusö a na pö hapaloö! Teusö a na makö hapalo nö, “Samakö peamati kitä maaki, maa tä pata hälä pola tä kuno mai, inama tä na samakö toköa totisolöpöö!” ĩ na Teusö a na ĩ na pö kuu!
19Ĩ tä, pe epii sanöma makö pea kuki kitä. Ĩ na makö pea kua piale na, somi tä sai tä, Teusö anö hi masita tä uli thapalö noai, ĩ tä töpö kuo noai, ĩ na ĩ töpö pea kua maama. Ĩ na nö patapö töpö pewö pea kua maama. Waiha pe epii makö pea kua piale na, ĩ na ai töpö pea kua kõo mai kitä. 20Pe epii makö pea kuki wi, ĩ tä, “Ĩ na pätawöö!” ĩ na Teusö a kuu mi aköna, sanöma töpö pewö nomasopi. Teusö anö makö naka makokoa asa noai, ĩ makö saia asalö noai, ĩ makönö Jesus sa thapo wi ĩ makö pi ipa salo, makö peati ha, Teusö aiki, “Ĩ na pätawöö!” ĩ na Teusö a kuu kitä‑ Jesus a kuuma.
21Ĩ na a kuu nö, ‑Ĩ na tä kua tä, kawa na, “Möö nökö. Hi Cristo a” ĩ na ai a wani kuu, “Ki Cristo a” ai a wani kuu, ĩ na ai töpö kuu ha, “Pitili ta” pö pi kuu hãto tihöö! 22“Teusö anö sa simönö noai, ĩ Cristo sa hilo wi ĩ sa” ai töpö holisi kuu kitä. “Teusö sa kai wäsä sinomo wi ĩ sa” ai töpö holisi kuu kitä. Töpö kuu wi ĩ töpönö, Teusö anö töpö naka makokoa asa noai, ĩ töpö mönamani pia salo, töpö kilima wi ĩ nasimö tä thamati kitä. “Ĩ a waninö Teusö a taö öpa hãtoakö” ĩ na Jesus sa thapo wi ĩ töpö pi thama pia salo, tä aipöamati kuki kitä. Ĩ na a wani kua kitä maaki, Teusö anö töpö naka makokoa asa noai, ĩ töpö mönama mai kitä. 23Önö kutenö, pö pi mosaikiö! Pö mamo läikiö! Ĩ tä kua paio mai ha, kamakö na sa ta wäsä kule‑ ĩ na Jesus a kuuma.
Jesus a huu kõo kitä
Mateus 24.29-31; Lucas 21.25-28
24Ĩ na Jesus a kuu nö, ‑Ĩ na tä kua tä, töpö pea mataso noai ha, motokö sii lupasoö, pilipoma a lupasoö, 25sitikali pö kelasoö, hutu mosökö pata huöpo sinomoti wi ĩ tä matasoö, ĩ na tä kua kitä. 26Ĩ na tä kua tä, ĩ töpö pewö mamo tetela tä, sanöma sa kupaso noai ĩ Jesus sa hai, sa lotete epii, sa wakala apii sa toita apii, ilasi tä hösöka na ĩ sa itho laso kitä. 27Sa itho tä, hi masita tä uli pewö pata hamö ãju sa töpö simöa setekeli kitä. Sa töpö simönöma, Teusö anö sanöma töpö saia waikipalö noai, ĩ ãju töpönö ĩ töpö kõa asalali kitä. Hi masita tä uli pewö hamö sanöma töpö pilipai, Teusö anö ĩ ai töpö saia asa waikipalö noai, ĩ töpö kõa asalalö nö, töpö kokamoma läo kitä‑ ĩ na Jesus a kuuma.
Jesus a huu kõo pia manu kule, pö pi mosaia totikiö!
Mateus 24.32-44; Lucas 21.29-33
28-29Ĩ na Jesus a kuu nö, uni ta wäsä nö, ĩ na a kuuma: ‑Piku tiki na makö pi tapoiki nö, pö pi hatukuikiö! Piku tiki poko liäa kopasoö, tiki poko ãkea konasoö, ĩ na piku tiki pokokö kuaö ha, “Inama tä ateo waikia kuleö!” ĩ na makö pi kuu kua wi na, sa kuti pole, ĩ tä kua kuköma, “Jesus a huu kõo wi, ĩ tä ateo waikia kuleö!” ĩ na makö pi kuu kua hö̃töopököö! 30“Sa kuuhe, ĩ kolo tä tapa pasio piale, ĩ töpö noma paio mai ha, sa kuu pole, ĩ tä pewö kupaso kitäö!” ĩ na sa kuu kuleö! Pitili sa. 31Hutu mosökö pata matasoö, hi masita tä uli matasoö, ĩ na tä kua kitä maaki, kamisa kai a mapo pasio mai kitäö!‑ Jesus a kuu nö, 32‑“Ĩ tä wakala ha hi masita tä uli mataso kitä ta o” ĩ na ai sanöma tä pi kuu taö mai kitä. “Ki hamö motokö kuto tä Jesus a huu kõo kitä” ai tä pi kuu taö mai kitä. Ãju töpönö ĩ tä wakala tai mi ipö naiwö. Kamisa hai, Teusö sa ulupö maaki, ĩ wakala sa tä tai mi naiwö. Ipa hao anö tä taö sisaö. 33Sa huu kõo wi, ĩ ma tä wakala tai mi salo, pö pi mosaikiö! Pö mamo läikiö! 34Pai hamö pata tä hama hulolö nö, a pata kõo kua wi na, ĩ na sa kua kitä. Pata tä hama huu pia tä, kama hai töpö kalipalama sinomo wi, ĩ töpö na, “Sa hama huu tä ipa uli a na a kalipalo haioö!” ĩ na a pata kuu hätäpoö. Sai a päka ha töpö lisio pa a mamo läapalo sinomo wi ĩ a wani na, “A mamo läapalo hisaö! Ipa wani tä thomönö matimöö!” ĩ na pata tänö a noa thaa sinomoö. Ĩ na tä kua wi na, ĩ na sa kua hö̃töo kitä. 35Mumi tute tä sa kõa hãtopiö! Mötali tä mumi ha sa kõa hãtopiö! Kalaka a komö halu tä sa kõa hãtopiö! Halu tä sa kõa hãtopiö! Pata sa kopi wi, ĩ ma tä wakala tai mi salo, pö pi mosaikiö! Pö mamo läikiö! 36Makö mamo läa mi tä sa huu kõo matimöö! 37Kamakö na, “Pö mamo läa totikiö!” sa kuu kule. “Pö mamo läa totikiö!” sanöma töpö pewö na sa kuu hö̃töoö‑ ĩ na Jesus a kuuma.
14Jesus a säpamani pia salo
Mateus 26.1-5; Lucas 22.1-2; João 11.45-57
1Ĩ na tä kua tä, juteu töpö kokamo nö, ĩsa ãi hölö maa noai, ĩ ãi oalöpö, ĩ pásökoa tä wakala kuo pia noai, ĩ tä na polakapi tä mumi läo soama. Önö kutenö, Teusö a täpä sinomo wi ĩ pata töpö, Moisés a kai a wäsä sinomo wi ĩ töpö, ĩ na töpö kui töpö aiki, ‑Ai töpö mamo tetea mai ha wi na Jesus ma huöa thalö nö, ma säpalöpö?‑ ĩ na töpö kuu nö, 2‑Juteu makö pewö iapalopö, makö pewö kokamo tä, Jesus ma sä pasio maapököö! Ĩ töpö satehe epii töpö kokamo piale, ĩ töpö höla matimöö! Waiha ĩ töpö konasolö noai ha ma säpalöpököö!‑ ĩ na ĩ töpö kuuma.
Jesus a na tuu noa apii tuu lösa noai ĩ ta
3Ĩ na tä kua tä, wasu wasu tänö Simão a ösö hiopöo opa noai, ĩ a toa komanö noai, Petânia tä uli ha ĩ a hai ĩ sai a kule ha, ĩ ha Jesus a kuoma. Ĩ a sai ha a iapaloti tä, Jesus a kuo pa suö tänö holokoto ose kai wai waloköma. Maa ma holokoto noni ipii a holokoto ose wai ha tuu hälälä äpii, tuu noa apii, ĩ nahatu tuu hilo kua wi, ĩ na tuu kui tuu titile, ĩ suö tänö ĩ tuu pi kai waloköma. Ĩ tuu pi kai waloiki nö, Jesus a iati tä, maa ma holokoto ola waniapalö nö, tuu hälälä äpii tuunö Jesus a he mãi löpalöma. 4Jesus a he mãi löpali ha, töpö iapalo naine, ĩ ai töpö pi hĩsuhupasoma.
5Ĩ töpö pi hĩsuhupalo nö, ‑Wi na hi suö tä pi kuu salo, tuu noa apii tuu wania kule? “Sami tä inama ha kalipalo soatio wi, ĩ tä noa kui na, ĩ na tuu noa kuö ta” pi kuu mai. “Ai töpö na hi tuu noa apii tuu pi totokö nö, sitipa kökö satehe epii kökö täa hö̃tölö nö, wani tä na töpö honimo opöle, ĩ kökö sitipa totoköpö ta” pi kuu mai‑ ĩ na ĩ suö tä kateha wanisala apa nö, ĩ na töpö kuuma.
6Ĩ suö tä kateha wanisala apama maaki, Jesus aiki, ‑Suö tä wai tihöö! Wi na tä kuaö ha hi suö ma tä kateha wanisala apa kule? Ĩ anö kamisa na tuu löke, ĩ tä topa apa. 7Wani tä na töpö honimo wi, kamakö na ĩ töpö kua soatia kutenö, ĩ ma töpö täpä pi topa tä, ĩ ma töpö täpäpöö! Kamakö na kamisa kuo soatio mai kitä. 8Hi suö tänö tä thama taö wi, ĩ tä thama ke. Nomawö töpö patilio pia tä, töpö halukupa sinomo kua wi na, sa temö soa päla tä maaki, ĩ na hi suö tänö sa hulukua thapali ke‑ ĩ na Jesus a kuuma.
9A kuu nö, ‑“Hi masita tä uli pewö hamö ai töpönö sa wäsä wi ĩ ta topa apöle ta wäsä pamö, hi suö tänö pili sa he na tuu hälälä äpii tuu lökö noai, ai töpö satehe epii töpönö ĩ ta wäsä kitä. ‘Ĩ suö tänö Jesus a na tuu noa apii tuu lökömaö!’ ĩ na töpö kuu sinomo kuki kitä” kamakö na sa kuu pitilimo opa kule‑ ĩ na Jesus a kuuma.
Jutasö a waninö Jesus a monima pia salo
10Ĩ na tä kua tä, 12 töpönö Jesus a kai a hua sinomo wi ĩ ai tä hai, Jutasö Isökatiosisö a hilo wi, ĩ a wani hulasolöma. Teusö a täpä sinomo wi, ĩ pata töpö na Jesus a totoki pia salo, ĩ töpö na Jutasö a hulasolöma. 11A waloikitö nö, ‑Kamakö na Jesus sa totoköpöö!‑ Jesus a wanipo wi, ĩ töpö na ĩ na Jutasö a kuuma. Ĩ na a kuu wi, ĩ ta hini ha, töpö pi mönaha apama. Töpö pi mönaha apa nö, ‑Jesus wa totopi wi, ĩ tä noa na sitipa sama kökö totoa hö̃töki kitä‑ ĩ na töpö kuuma. Ĩ na töpö kuu salo, Jutasö anö Jesus a monima nö, ĩ töpö na Jesus a totoki pia salo, a wani läapalo soatama.
Pásökoa tä wakala ha Jesus anö kama hai 12 töpö kai ia noai ĩ ta
Mateus 26.17-25; Lucas 22.7-13; João 13.21-30
12Ĩ na tä kua tä, ĩsa ãi hölö mai ĩ ãi na juteu töpö iapalo wi, ĩ kolo pili tä wakala kupasoma. Sutu upa Esitu tä ulu pata ha juteu kolo töpö kua tä, Teusö anö ĩ töpö täa konönö noai, ĩ juteu ola töpönö ĩ tä taö soa salo, töpö kokamo nö, töpö iapalo sinomoma. Töpö kokamo nö, ĩsa ãi hölö mai, ĩ ãi opala apatima. Ĩ ãi opala noai, ĩ kolo pili tä wakala ha oweha kökö säpalö noai, ĩ kökö tia sinomotima. Ĩ pásökoa tä wakala kuki ha, Jesus a na kama kai a hua sinomoti wi ĩ töpö waloiki nö, ‑Makö pásökoamo pia manu kule, witi pili a sai pö na nii sama tä pi makeköpö taka?‑ ĩ na töpö kuuma. 13Ĩ na töpö kuu ha, Jesus anö ĩ polakapi töpö simönö nö, ‑Sai pö hö̃kökö öpii sai pö kule, ĩ hamö makö waloikitö nö, hapokasi ha maa tuu pi tälö nö, tuu kai a huima pole, ĩ a na pö nokalolöö! 14Makö nokalolö nö, ĩ a wani lisito taso wi, ĩ a sai hamö makö lisia naia soatalolöö! Makö lisia naipalolö nö, pata tä kulati, ĩ a pata na, “‘Witi ha hama tä hai ĩ sai a? Ĩ a sai ha sa kuiki nö, kamisa, sa kai a hua sinomo wi ĩ töpö, ĩ na kilii samakö kuiki nö, oweha sama oalöpöö!’ ĩ na kamisamakö na a simöo sinomo wi ĩ na ĩ a pata kuu thaiö!” ĩ na makö kuu! 15Ĩ na makö kuu ha, sai a hösöka ha a ia sai kai pei, a sai kua tole poli, ĩ pata tänö ĩ a sai namo simöki kitä. Mesa tiki, ia kai lota wi ĩ tiki, ĩ na tiki kui tiki hĩta soatale kitä. Ĩ ha nii tä, oweha a löpö, ĩ na tä kui tä pi makekötöö!‑ ĩ na Jesus anö töpö noa thama.
16Ĩ na töpö noa thaö ha, töpö hua hö̃tösolöma, Jesus a kuu totio noai, ĩ na ĩ tä pewö kuo totioma. Ĩ na tä pewö kua toti ha, ĩ ha pásökoa tä na töpö iapalopö, ĩ nii tä, oweha a löpö, ĩ na tä kui tä makeköma. 17Ĩ tökö soawö, tä muma soatasoö ha, Jesus anö kama kai a hua sinomo wi ĩ 12 töpö kai waloikitö nö, 18töpö iapaloma. Töpö iati tä, Jesus aiki, ‑“Kamisa na makö ia naine, ĩ ai wanö sa monima pia salo” kamakö na sa kuu pitilimo opa kule‑ ĩ na Jesus a kuuma. 19Ĩ na Jesus a kuu ha, ĩ töpö pi otatalo nö, ‑Kamisanö kuno maiö!‑ ĩ töpö pewö kuu nömöatalotima. 20Ĩ na töpö pewö kuu nömöataloti ha, Jesus aiki, ‑12 makö lole, ĩ ai wanökö‑ ĩ na Jesus a kuu nö, ‑Hi kaukösö a ha ĩsa ãinö sa tä häa pole, ĩ ha ĩsa ãinö wa tä häa naine, ĩ wanö sa monima pia salo. 21Sanöma sa kupaso noai ĩ sa nomaso kitä. Sa nomaso wi, Teusö tä waheta na ĩ ta wäsä waikioma. Sa nomaso kitä maaki, sa monima wi ĩ a wani pea apati kitä. Kama hai ĩ pöpönö anö ĩ a wani thapa maama aköna, tä topa apöla pi. A wani pea pia mana pi‑ ĩ na Jesus a kuuma.
Jesus a uni na töpö iapalo wi ĩ ta
Mateus 26.26-30; Lucas 22.14-23; 1 Coríntios 11.23-25
22Ĩ na Jesus a kuu nö, töpö iapaloti tä, Jesus anö ĩsa ãi tälö nö, Teusö a na, ‑Hapa. Hi ĩsa wa ãi tä totoa waikipi ke. Wa totiatalo opawö‑ a kuu nö, ãi nakasipalö nö, kama kai a hua sinomo wi ĩ töpö na ãi asawösö totoa hätäha soataköma. Ĩ ãi totoa soatakö nö, ‑Ika. Au ãi tälö. Hi ãi hai, ĩ kamisa sai‑ ĩ na Jesus a kuuma. 23Ĩ na a kuu nö, kaukösö a tälö nö, Teusö a na, ‑Hapa. Hi upa wa mo puu totoa waikipi ke‑ ĩ na a kuu nö, kaukösö a totoköma, töpö pewö amisioma. 24‑Hi tuu hai, kamisa iä. Teusö aiki, “Kamisanö sanöma töpö satehe epii sa töpö täapa kõo läo kitä” Teusö a kuu totioma kutenö, kamisa iä kupaso kitä. Sa iä pö kupasoma, sanöma makö satehe epii makö täapa kõo läo kitä. 25“Hi upa sa toto mo puu koa kõo haio mai kitä. Teusö a kaikanamo totio wi ĩ hamö sa mo puu koa kõo sisa pia salo” kamakö na ĩ na sa kuu pitilimo opa kule‑ ĩ na Jesus a kuuma. 26Ĩ na Jesus a kuuma, ĩ töpönö Teusö tä ama thaa nö, Olipa tä heu pata hamö töpö hua soatasolöma.
‑Makö tokösolö kitäö!‑ Jesus a kuu noai ĩ ta
Mateus 26.31-35; Lucas 22.31-34; João 13.36-38
27Ĩ na tä kua tä, Jesus aiki, ‑Kamisa na makö pewö noka kili ipa kitä. Pi naka. Ĩ na Teusö tä waheta kuu: “Oweha pö na a kalipalo sinomo wi, Teusö sanö ĩ sa säpali ha, oweha pö hua soatalolö nö, pö selekea soataso kitä” Teusö tä waheta kuu. Ĩ na ta kua kutenö, makö tokösolö kitä‑ Jesus a kuu nö, 28‑Ai töpönö sa säpali kitä maaki, sa temöa konaso noai ha, Kaliléia tä uli pata hamö sa hulasolö kitä. Sa hulasolö noai ha, makö huu haiopöö!‑ ĩ na Jesus a kuuma. 29Ĩ na Jesus a kuu ha, Pedro aiki, ‑Kawa na töpö pewö noka kili ipa kitä maaki, kawa na sa noka kili mai kitäö!‑ Pedro a kuuma. 30A kuu ha, ‑“Hi tä mumi ha kalaka a polakapi komö pi kupo paio mai ha, kawa aiki, ‘Naiö! Jesus a na sa nokapalo mi’ wa kuu nö, ‘Naiö! Jesus sa tai mi ipöö!’ waiha ĩ na wa kuu kotaö, ‘Naiö! Jesus sa taö pasia mane’ wa kuu kotasoö, ĩ na ai töpö na wa kuu hätäpo halu kitäö!” ĩ na kawa na sa kuu kule. Sa holisi mai kitäö!‑ ĩ na Pedro a na ĩ na Jesus a kuuma. 31Ĩ na Jesus a kuuma maaki, ‑Naiö! Sa wani säa naia hãtopali kitä maaki, “Jesus sa tai mi” sa kuu mai kitäö!‑ ĩ na Pedro a ku upama. Ĩ na ĩ töpö pewö kupalo naio soatasoma.
Ketösêmani tä uli ha pö̃ a na Jesus a hapalo noai ĩ ta
Mateus 26.36-46; Lucas 22.39-46
32Ĩ na ĩ töpö pewö kuu nö, Ketösêmani tä uli hilo wi ĩ hamö ĩ töpö walokö tasoma. Töpö waloikitö nö, ‑Hisa ha pö loa haikiö! Teusö a na sa hapalo tasoöö!‑ ĩ na Jesus a kuuma. 33Ĩ na a kuu nö, Pedro a, Tiago a, João a, ĩ na töpö kui, ĩ töpö kai hulolö nö, Jesus a pi honipo opa nö, a õsi wanisala apöpasoma. 34‑Pe epii sa õsi wanisala apa kutenö, sa õsi tao mia apaimati. Pö kua haikiö! Pö mamo läa haikiö!‑ ĩ na Jesus a kuuma. 35Ĩ na a kuu nö, thapi tömö a hulolö nö, masita ha a paiki nö, Teusö a na a hapaloma. ‑Sa pea piale, ĩ sa tä pii mi. Sa noma piale, ĩ sa tä pii mi. 36Hapa. Wa lotete epö kutenö, wa tä pewö thama taö öpaö. Sa nomano nö, sa hoteso wi, ĩ tä na sa noamaö! Sa noma wani ipö maaki, “Wa noma päloö!” wa kuu ha, “Ö̃kö. Awai” sa kuu hö̃töa soa pätaso kitä‑ ĩ na Jesus a kuuma. 37Ĩ na Jesus a kuu nö, ‑Pö mamo läa haikiö!‑ kama hai ĩ töpö na Jesus a kuu noai, ĩ töpö mia kai hila pa Jesus a waloa kõköma. Töpö mia kai hila salo, Simão Pedro a na, ‑Simão. Wani ipii wa mamo läa haio mai, wa mitio päo noa. 38Pö mamo läikiö! Teusö a na pö hapaloö! Makö mamo läiki nö, Teusö a na makö hapalo nö, ĩ na makö kuaö ha, wanisala tä na Sai tä sai patanö makö simöa kule maaki, wanisala ma tä thaa mai kitä. Pili makö õsinö Teusö ma ta hini pi topa kule maaki, pili makö sai utiti ipö. Utiti salo, wanisala wa tä thaa sinomo opati sai‑ ĩ na Jesus a kuuma.
39Ĩ na Jesus a kuu nö, a hua sapa kononö nö, ‑Hapa. Wa lotete epö salo, sa nomano nö, sa hoteso wi, ĩ tä na sa noamaö! Sa noma wani ipö sai maaki, “Ĩ tä kuo päoö” wa kuu ha, “Ö̃kö” sa kuu hö̃töo kitä‑ ĩ na Jesus a kuu kotama. 40Ĩ na a kuu kõo nö, ‑Pö mamo läa haikiö!‑ kama hai ĩ töpö na Jesus a kuu noai, ĩ töpö na Jesus a waloa kõköma, töpö mia kai hila kõo lätama. Ĩ töpö manisi ipö salo, töpö mamo läa haio mai, töpö mia kai hila lätioma. Töpö mia kai hilatia tä, Jesus a waloa kotaiki nö, ĩ töpö natamanöma maaki, Jesus a na ĩ töpö hapalo tai mio opama. ‑Wi na sa kuu hö̃tösopö taka?‑ ĩ na ĩ töpö pi kulasoma.
41Ĩ na tä kua tä, Jesus a hua sapa kotalo nö, Teusö a na a hapalo kõo nö, kama hai ĩ töpö na a waloa kotaikö nö, ‑Makö wani manisio opapa wi. Makö wani mipalo haitiowö. Pei. Hukikiö! Töpö wanisala apa wi, ĩ töpönö sa wanipoti wi ĩ töpö na sanöma sa kupaso noai ĩ sa totoa pia kuleö! Sa monima wi, ĩ anö sa totoa pia kule. 42Pö öpapaloö! Makö huu koonöö! Möö nökö. Sa monima wi ĩ a wani huu waikia kulatiö!‑ ĩ na Jesus a kuuma.
Jutasö anö Jesus a monima noai ĩ ta
Mateus 26.47-56; Lucas 22.47-53; João 18.3-12
43Jesus a hapalo soa tä, 12 töpönö Jesus a kai a hua sinomo wi, ĩ ai tä Jutasö anö töpö satehe epii töpö kai waloa läköma. Teusö a täpä sinomo wi ĩ pata töpö, Moisés a kai wäsä sinomo wi ĩ töpö, ai juteu pata töpö, ĩ na töpö kui töpönö Jesus a namo simöa pi topa salo, töpö waitili ipii ĩ töpö simököma. Töpö simökö noai, Jutasö anö ĩ töpö kai waloköma. Poo kökö, hii tipö, ĩ na tä kai waloa kuköma. 44Walo paia mi tä, Jutasö anö Jesus a monima wi, ĩ aiki, ‑Makö walo pola nö, kamisanö ai sa hũko ususa pole, ĩ aö! Ĩ ma huölö nö, ma läkälölöpöö!‑ ĩ na töpö waitili ipii, ĩ töpö na a wani kuu hãtomoma. 45Ĩ na Jutasö a wani kuu hãtomo nö, a waloiki nö, Jesus a na a ekua soataiki nö, ‑Jesus ai!‑ a wani kuu läo nö, noi töpönö ai töpö hũko ususa thama kua wi na, ĩ na Jutasö anö Jesus a hũko ususa thama läoma. 46A hũko ususa thama läoö ha, töpö waitili ipii ĩ töpö ekua soataiki nö, Jesus a huöa soatalöma. 47A huöa soatali ha, ĩ töpö kotö ha Jesus töpö öpale, ĩ ai tänö poo a läkälö nö, ai tä tusälöma. Pili a sömöka wani pasopalöma. Teusö a täpä totio wi ĩ pata tä sainö töpö kalipalama sinomo wi, ĩ ai a sömöka wani pasopalöma.
48Ĩ na tä kua tä, Jesus a hapalo nö, ‑Sa läkäli pia salo, kamisa na poo kökö, hii tiki, ĩ na ma tä wasu kai huu kua hĩsua apawö. Töpö waitili ipii töpö thomömo sinomoti wi ĩ ai sa mai kitä ta pi kuu mai. 49Ĩ tä wakala pewö hamö Teusömo wi ĩ a sai ha kamisa solo makö kuati kipili. Ĩ tä sa töpö pi hatukama sinomoti tä, kamakönö sa läkäpo maapili nökö. Teusö tä waheta kuu noai, huki ĩ tä kua tolea totia kule. Önö kutenö, kamakönö sa läkälölö pia salo‑ ĩ na Jesus a kuuma. 50Ĩ na Jesus a kuu tä, Jesus a kai a hua sinomoti wi ĩ töpönö a taa kõkölö nö, töpö toköa konasolöma. 51-52Jesus a na hĩsa tä huu naio wi, sinoi ĩ a toköa konasolöma. Watata ösökönö tä haloa tä, töpö waitili ipii ĩ töpönö a huököma maaki, ĩ watata ösö humöpo haio päoma. Humöpo haia päa tä, hĩsa tä sinoi tä läläa konasolöma.
Juteu pata töpö na Jesus a tälölö noai ĩ ta
Mateus 26.57-68; Lucas 22.54-55, 63-71; João 18.12-14, 19-24
53Teusö a täpä totio wi ĩ pata tä sai hai ĩ sai pö pata hamö Jesus a tälölömae. Teusö a täpä sinomo wi ĩ ai pata töpö pewö, ai juteu pata töpö, Moisés a kai a wäsä sinomo wi ĩ töpö, ĩ na töpö kui töpö hila waikio pamö Jesus a tälölöma.
54Pai hamö Pedro a huu haio tasoma. A huu haio nö, Teusö a täpä totio wi ĩ pata tä sai pö atu ha tä hokolo pa a lisipalo nö, töpö läo wi ĩ töpö na Pedro a loa naiki nö, koa taka na a pomotima.
55Jesus a säpamani pia salo, Teusö a täpä sinomo wi ĩ pata töpö, juteu pata töpö kokamo sinomo wi ĩ töpö, ĩ na töpö kui töpö aiki, ‑“Jesus a wanisala apa thaliö!” ĩ na makö kuu!‑ ĩ na ai töpö na ĩ na ĩ pata töpö kuuma maaki, ai töpönö ta kateha makokoa maama. 56‑Awai. Jesus a wanisala apa thaliö!‑ ĩ na töpö satehe epii töpö holisi kuu päoma. Ĩ na töpö holisi kuu päoma maaki, töpö holisi wäo hanomo läoma.
57Ai töpö öpaiki nö, ĩ na ĩ töpö holisi wäo kuama: 58‑“Sanöma töpönö Teusömo wi ĩ a sai thakö noai, ĩ sa sai waniapali kitä. Sa sai waniapalö nö, 3 tä mumi ha, sanöma töpönö kuno mai, kamisanö tiko sa sai thaa haitaki kitäö!” ĩ na Jesus a wani kuu kipiliö!‑ ĩ na töpö holisi wäo kuama. 59Ĩ na töpö holisi kuu päoma maaki, töpö holisi wäo hanomo opa läoma.
60Ĩ na tä kua tä, Teusö a täpä totio wi ĩ pata tä öpaiki nö, Jesus a na a hapaloma. ‑Wa hapalo hö̃töa maa kule? “Jesus a wanisala apa thaliö!” hi töpö kuu pole, ĩ pitili ta hãtowö‑ ĩ na a pata kuuma. 61A pata kuuma maaki, Jesus a huo maama. Jesus a huo mi ha, ĩ pata tä aiki, ‑Cristo wa? Teusö anö wa simöa totipalö noai ĩ wa? Teusö a toita apii ĩ a hai ĩ pelupö wa sai?‑ ĩ na Jesus a na ĩ na a pata kuuma. 62A kuu ha, ‑Awai. Ĩ pelupö sa sai. Teusö a lotete epii ĩ a kotö ha sanöma sa kupaso noai ĩ sa loa tä, kamakö pewönö sa tapa kuki kitäö! Waiha masita tä uli hamö sa huu kõa tä, hutu mosökö ha ilasi tä kule, ĩ ha sa huu kõo tä, sa itho kõa tä, sa tapa kitä‑ ĩ na Jesus a kuuma.
63Ĩ na Jesus a kuu ha, Teusö a täpä totio wi ĩ pata tä hĩso soatama. A hĩso salo, kama hai ĩ haloi ösö kaka soatalöma. Ösö kakapalö nö, ‑Peiö! Ĩ naköö! Jesus anö Teusö a kateha wanisala apa kule. “Kamisa hai, Teusö sa totiwö” a wani kuu alu kuleö!‑ a kuuma. A kuu nö, ‑“Jesus a wanisala apa thaliö!” töpö kuu wi ĩ ai tä naka ti! 64Jesus anö tä wanisala a kateha pole, ĩ ma ta hini waikili ke. Wi na makö pi kuu kule?‑ ĩ na a pata kuuma. A pata kuu ha, ĩ töpö pewönö Jesus a namo simökö nö, ‑Jesus a wanisala. Ma wani säpamanöpöö!‑ töpö pewö kuu soatasoma. 65Töpö pewö kuu soatalo nö, ai töpönö Jesus a wanipo opa salo, a nakipömanöma. A nakipömanö nö, pili a moikömö ha watata ösö õka soatakö nö, a sä soatama. A sä soata nö, ‑Witi pili anö wa sä ke? Wa tä tapa mi päla tä maaki, wa sä noai, ĩ a wani katehepalöö!‑ töpö kuu nö, töpö läo wi ĩ töpönö Jesus a huölö nö, a säma.
‑Naiö! Jesus sa tai mi ipöö!‑ 3 Pedro a kuu pi kupaso noai ĩ ta
Mateus 26.69-75; Lucas 22.56-62; João 18.15-18, 25-27
66-67Ĩ na tä kua tä, sai a kotö ha Pedro a kuo kölö pa, Teusö a täpä totio wi ĩ pata tänö töpö kalipalama sinomoti wi, ĩ ai moko tä ekuiki nö, Pedro a pomoti tä, ĩ moko tänö a talalöma. Pedro a na a mamo teteiki nö, ‑Nasaté tili Jesus a na wa nokapalo naitio wi ĩ wa hãtowö?‑ ĩ na moko tä kuuma. 68A kuu ha, ‑Naioö! Wi na wa kuu totia kule? Jesus sa tai mi ipöö!‑ Pedro a kuu hö̃töoma. A kuu hö̃töo nö, sai a kotö ha maa makö paa sokele, ĩ makö hamö piliso holele, ĩ hamö Pedro a ekuköma. Ĩ ha, kalaka a komötasoma.
69Ĩ tä, moko tänö Pedro a möö kõo nö, töpö hilale, ĩ töpö na, ‑Ki a hai, Jesus a kai a hua sinomoti wi ĩ ai tä totiwö‑ a kuuma. 70A kuu ha, ‑Naiö!‑ Pedro a kuu hö̃töoma.
Ĩ na tä kua tä, waiha töpö hilale, ĩ töpö aiki, ‑Kaliléia tili wa kutenö, Jesus a kai a hua sinomoti wi ĩ ai wa pasiwö‑ ĩ na Pedro a na ĩ na ĩ töpö kuu ha, 71‑Naiö! Ĩ ma ta kateha pole, ĩ sa tä tai mi ipöö! Pitili sa. Sa holisimoö ha, Teusö anö sa peamapöö!‑ Pedro a ku upama. 72Ĩ na Pedro a kuu tä, kalaka komö kõo soatasoma. Kalaka a komö kõo soata tä, Jesus a kuu noai, ĩ tä ha Pedro a pi hatukua soasoma. ‑Kalaka a polakapi komö pi kupo paio mi tä, kawa aiki, “Naiö! Jesus sa tai mi” ĩ na 3 wa kuu pi kupaso kitäö!‑ Jesus a kuu waikio noai, ĩ tä na Pedro a pi hatukua soasoma salo, a pi otatalo nö, a ö̃kö tasoma.
15Pilatosö kaikana tä na Jesus a hilakö noai ĩ ta
Mateus 27.1-2, 11-14; Lucas 23.1-5; João 18.28-38
1Ĩ tä soatawö, tä halusoö. Tä halulo nö, Teusö a täpä sinomo wi ĩ pata töpö, ai juteu pata töpö, Moisés a kai wäsä sinomoti wi ĩ töpö, pata töpö kokamo sinomo wi ĩ töpö, ĩ na töpö kui töpö pewö kokamo nö, töpö hapalo hẽtupaso nö, ĩ töpönö Jesus a õkapalöma. A õkapalö nö, homa tili tä Pilatosö a pata na Jesus a kai hulolö nö, Pilatosö a pata na Jesus a totoköma. Pilatosö a hai, Jutéia tä uli pewö ha ĩ a pata kaikanamo sinomotima. 2Ĩ a pata na Jesus a totoki ha, ‑Juteu töpö na wa kaikana sinomo wi ĩ wa?‑ Pilatosö a pata kuuma. A pata kuu ha, ‑Awai. Wa kuu pole, ĩ pitili ta. Kaikana sa‑ Jesus a kuu hö̃töoma. 3A kuu ha, Teusö a täpä sinomo wi ĩ pata töpö aiki, ‑Jesus anö satehe epii wanisala tä thaa pi kupasoma ta pi kuu mai‑ ĩ na töpö kuu nö, ĩ ta katehatima. 4Ĩ ta katehati ha, Jesus a na Pilatosö aiki, ‑Wa hapalo hö̃töo mi salo. “Jesus anö wanisala tä thatima thali” ĩ na töpö kuu pole, ĩ wa ta hini maapa wi‑ Pilatosö a pata kuuma. 5A pata kuuma maaki, Jesus a hapalo hö̃töo maama. Jesus a hapalo hö̃töo mi ha, Pilatosö aiki, ‑Kilatiha!‑ a pi kuuma.
‑Pahapásö a atua kopamanöö! Jesus a säa pasipalöö!‑ ĩ na töpö ku upa noai ĩ ta
Mateus 27.15-26; Lucas 23.13-25; João 18.38-40
6Ĩ tä inama pewö hamö ĩsa ãi hölö mai, ĩ ãi na juteu töpö iapalo tä, titita wi a sai ha töpö titile, Pilatosö a patanö ĩ ai tä atupama sinomo kõoma. ‑Ĩ a wani lisia kopamanöö!‑ Pilatosö a pata na ĩ na juteu töpö kuu ha, ĩ a atupama sinomo kõoma. 7Juteu töpö iapaloti tä, titita wi a sai ha ai tä, Pahapásö a hilo wi, ĩ a wani tititioma. Kaikana tä na töpö höla tä, ĩ töpönö ai töpö säpalö noai, Pahapásö a hai, ĩ ai a kutenö, sai a lototoa apöle, ĩ a sai õsimö na a wani titio naioma. 8Pahapásö a wani titia naia tä, Pilatosö a pata na töpö satehe epii töpö kokamono nö, ‑Ĩsa ãi hölö mai, ĩ sama ãi opala tä, sami wa tä atupama sinomo thali nökö. Huki sami ai tä atua kopamanöö!‑ ĩ töpö kuuma. 9-10Ĩ na töpö kuu ha Pilatosö a pata aiki, ‑“Jesus a totiatalo opa sai” ai töpö satehe epii töpö kuu sinomo wi, Teusö a täpä sinomo wi ĩ pata töpönö ĩ ta hini wani hãtokö. Jesus a totiatalo opa kule maaki, hi töpönö a hĩsu thaa päa hãtoa kule‑ ĩ na Pilatosö a pi pata kuu nö, töpö kokamo pole, ĩ töpö na a pata hapalo nö, ‑Juteu makö na Jesus a kaikanamo totio wi ĩ sa atua kopamanöpö?‑ ĩ na Pilatosö a kuuma. 11Ĩ na a kuu ha, töpö satehe epii ĩ töpö öpahale, ĩ töpö na, Teusö a täpä sinomo wi ĩ pata töpö hapalo nö, ‑“Jesus aiki kuno maiö! Pahapásö a wani atua kõa pasipamanöö!” ĩ na pö kuu totiataloö!‑ ĩ na ĩ pata töpö kuuma.
12Ĩ na tä kua tä, Pilatosö a pata aiki, ‑“Juteu samakö na a kaikanamo sinomo wi ĩ a” makö kuti wi, wi na ĩ sa thamapö‑ a pata kuu ha, 13‑Ti pakalai ti ha a säpalöö!‑ ĩ na töpö lalupalo kuuma.
14Ĩ na töpö kuu ha, ‑Ĩ ka tä noa nakö? Wanisala tä thaa maa noai kitä ta pi kuu mai‑ ĩ na a pata kuuma maaki, ‑A säpalöö! Ti pakalai ti ha a säpalöö‑ töpö lalupalo kutima. 15Töpö lalupalo kuu ha, töpö pi mönahapamani pia salo, Pilatosö a patanö Pahapásö a wani atua kõa pasipamanöma. A wani atua kopamanö nö, Jesus a soapamanöma. A soapamanö nö, sotatu töpö na a totokö nö, ‑Pei. A säpalö‑ ĩ na töpö noa thama.
Sotatu töpönö Jesus a peama noai ĩ ta
16Ĩ na töpö noa thaö ha, Pilatosö a sai pö õsimö pata ha sapono a kule, ĩ hamö sotatu töpönö Jesus a tälölöma. A tälölö nö, ai sotatu töpö satehe epii töpö kokamomanö nö, 17kaikana tä pata haloi ösö lape hanahai, sotatu töpönö ĩ nasimö ösö tälö nö, ĩ ösönö Jesus a haloa pi wasöa apöpalöma. Jesus a haloa pi wasöa apöpalö nö, kaikana tänö hesowa a sohopo sinomo wi ĩ na hesowa a kui na, ĩ na hesowa a kui, hesowa a thapalöma. A hesowa mösököpö öpii a hesowa thapalöma. A thapalö nö, Jesus a he na tä sohomaköma. 18Tä somakö nö, Jesus a na, ‑Kaikana waö! Juteu töpö na wa kaikanamo sinomo wi ĩ waö! Siwawö‑ ĩ na sotatu töpö pi wasöwö kuutoma. 19Ĩ na töpö pi wasöwö kuuto nö, hii tinö Jesus a he säpöma. A he säpa nö, a nakipömanöma. A nakipömanö nö, ‑Kaikana waö!‑ sotatu töpö kuu pola nö, masita tä ha töpö loiki nö, pili töpö maeko hĩta thaköma. 20Jesus a na ĩ töpö hapalo pi wasöa apa nö, watata ösö hanaha hasua kõo soatalöma. Ösö hasua kõo soatalö nö, Jesus a hai ĩ haloi ösö sai haloa komakö nö, hii ti pakalai ti ha a säpali pia salo, a kai hulasolöma.
21A kai huu soalö pamö, Siteni tä uli ha Simão a kua wi, ĩ a pao läoma. Simão a hai, Alesĩatöti a, Hupu a, ĩ na kilii töpö hai ĩ pö̃ a wani kuoma. Sai selekeo opa pa a wani kuoma, Jesus a kai huulö pamö ĩ a wani pao läoma. A wani pao läoö ha, ‑Hi anö ti pakalai ti sipole, ĩ ti sia nömötalölöö!‑ ĩ na sotatu töpönö ĩ na Simão a noa wani thama. 22Ĩ na sotatu töpönö a noa wani thaa nö, He manokosi makö ha, ĩ Kókota makö hilo kua naine, ĩ makö hamö Jesus a kai hua konasolöma. Kókota makö hai, mamo huu ha sanöma he manokosi wani kui na, ĩ na ĩ maa makö kuö ha, ‑He manokosi makö‑ töpö kuutoma. 23Ĩ makö hamö Jesus a kai waloikitö nö, nini ipa wi ĩ tä matamanöpö, upa mo puu ha miha nakö titiki nö, ‑Tuu koalöö!‑ Jesus a na töpö kuuma maaki, ‑Päla‑ Jesus a kuu hö̃töoma.
Hii ti pakali ti ha Jesus a sätämakö noai ĩ ta
Mateus 27.32-44; Lucas 23.26-43; João 19.17-27
24Ĩ na tä kua tä, hii ti pakalai ti ha ĩ sotatu töpönö Jesus a thaköma. Ai ami hẽtu hamö söpala ösö pata pasöa hö̃töki, ai ami hẽtu hamö ai söpala ösö pata pasöa hö̃töki, pili a konona ami makea helulukö nö, pili a ami hõo ha ai tä pata pasöa hö̃töki, ĩ na Jesus a thaköma. Jesus a thakö nö, ‑Witi pili anö Jesus a hai ĩ haloi ösö tälöpö?‑ ĩ na sotatu töpö kuu ha, ‑Kamisanö hãtowö‑ töpö pi kuu salo, maa makö ose wai na tä sãökama sätäle, ĩ ma wai säsäköma. Ma wai säsäkö nö, ai tänö ai haloi ösö täa asali, ai tänö ai haloi ösö täa asali, ĩ na ĩ sotatu töpönö haloi ösökö täa thalöma.
25Ĩ na tä kua tä, motokö ösöa waikia tä, hii ti pakalai ti ha Jesus a thaköma. 26A thaki ha, ‑Ai töpö hasuo pole, ĩ töpö aiki, “Ĩ ka pi tä noa na a säpalöma?” ĩ na töpö kuu kitä‑ ĩ na Pilatosö a pi pata kuu salo, hii ti patete na tä sãökömaköma. Hi a hai, juteu töpö na a kaikanamo totio wi ĩ a ĩ na tä kuu wi ĩ tä sãökömaköma. Tä sãökömakö nö, Jesus a hösöka ha tä sãökama sätämaköma.
Ai tiki pakalai tiki ha wanisala tä thaa sinomo wi ĩ töpö thaa naikö noai ĩ ta
27Ĩ na tä kua tä, töpö thomömo sinomoti wi, ai tiki pakalai ĩ tiki ha ai polakapi töpö thaa naiköma. Jesus a pi hĩtale, ĩ tä tutakö ha ai tä thaa naia soaki, ai tä tutakö hẽtu ha ĩ ai tä thaa naia soaki, ĩ na tä thaköma. 28[Sutu ha ĩ na Teusö tä waheta kuu soatama:
‑Wanisala tä thaa sinomoti wi ĩ töpö peama thapali wi na, ĩ na a thama hö̃töo kitä‑
ĩ na tä sãökama kuu noai ha, ĩ na Jesus a thama totio opama.]
Jesus a na töpö ĩkapalo noai ĩ ta
29Ĩ na tä kua tä, töpö hasusoti pole, Jesus a na ĩ töpö ĩkapalotima. Töpö ĩkapalo pola nö, ‑“Teusömo wi ĩ sa sai waniapalö nö, 3 tökö mumi kui tökö mumi ha, ĩ sa sai thaa kõo kitäö!” wa wani kuupili maaki. 30Kama wa noao sapao kõo nö, hii ti ha a ithoa konoö!‑ ĩ na töpö kutima. 31Ĩ na Teusö a täpä sinomo wi ĩ pata töpö, Moisés a kai a wäsä sinomoti wi ĩ töpö, ĩ na töpö kui töpö kuu pi wasöa naioma. ‑Ki anö ai töpö noama läo sinomopili maaki, kama wani noao sapao kõo mai a. 32Hii ti pakalai ti ha a ithoa konaso aköna, “Awai. Jesus a pitili. Teusö anö a simökö noai, ĩ Cristo a hilo wi, ĩ a. Juteu makö na a kaikanamo totio wi ĩ a” makö pewö kuu pi‑ ĩ na töpö kuuma. Ĩ na töpö kuu tä, Jesus a kotö ha ai polakapi tiki pakalai ĩ tiki na töpö sätäo naine, Jesus a na ĩ töpö hapalo pi wasöa apa naioma.
Jesus a nomaso noai ĩ ta
Mateus 27.45-56; Lucas 23.44-49; João 19.28-30
33Ĩ na tä kua tä, motokö hẽtuto totia tä, mumi mumi tä pata waloa soa pätaköma. Mumi mumi tä pata waloa soa pätaiki nö, motokö kaöpo paio mai ha, masita tä uli pewö mumio opama. 34Tä uli mumio opa nö, motokö kaöto tä, Jesus a komöma. ‑Eloi. Eloi. Lemá sapakötani?‑ a kuuma. Kamakö kai sai ha, ‑Ipa Teusö ai. Ipa Teusö ai. Wi na tä kuaö ha sa hosalöma?‑ ĩ na Jesus a komö kuutoma. 35Ĩ na a komö kuutoö ha, ĩ a kotö ha töpö öpahale, ĩ ai töpönö ĩ ta hini nö, ‑Ta hiniö! Elias a pata hai, ĩ kolo tä kuo noai, ĩ a pata naka hãtoa alu kuleö!‑ ĩ na ta hini tomöpo mi salo, ĩ na töpö kuuma.
36Ĩ na töpö kuu tä, ‑Jesus a amisi ipö hãtoköö!‑ ai tä pi kuu nö, tuu nasii tuu ha tä kauko opii, ĩ tä kãpamanö nö, hii ti ola ha tä tikimakö nö, tuu pi himakö nö, ‑Ika. Tuu koalöö!‑ ĩ na Jesus a na a kuuma. Ĩ na a kuu nö, ‑Waihaö! Elias a pata a waloa hãtokiso nö, Jesus a ithoa hãto komani kitäö!‑ ĩ na tuu pi tikimakö wi, ĩ na ĩ a kuuma.
37Ĩ tä, Jesus a komö nö, a nasi tuköma.
38Ĩ na tä kua tä, ki hamö, Teusömo wi ĩ a sai mötali ha watata ösö supe pata katöo mötalio läo wi ĩ ösö pata, kletiti. Sanöma tänö ösö kakapa mai ha, hösöka ha kama ösö pata kaka pätalo nö, ösö pata kaka totipasoma.
39Ĩ na tä kua tä, sotatu töpö satehe epii töpö na a pata simöo sinomoti wi ĩ a patanö Jesus a nasi tuo tama. Mumi mumi ta pata waloköma tä, Jesus a komö nö, a nasi tuo noai, ĩ tä pewö taa nö, ‑Hi Teusö a hai ĩ pelupö a kuomaö!‑ a pata kuuma.
40Ĩ na tä kua tä, Jesus a noma tä, pai hamö ai suö töpö öpapalo nö, Jesus a na töpö mamo tetetioma. Maria Matalena a, José a, hĩsa tä Tiago a, ĩ na kilii töpö hai ĩ pöpönö Maria a, Salomé a, ĩ na töpö kui, 41Kaliléia tä uli ha Jesus a na ĩ töpö nokapaloti nö, Jesus a pasilipo sinomoti noai, Jesus a noma tä, ĩ töpö suö mamo tetetioma. Jetusalẽi tä uli pata hamö Jesus a na ai suö töpö huu naio noai, ĩ töpö satehei töpö solo, Jesus a nasi tuo tama.
Thaka taka ha Jesus a nomawö titikö noai ĩ ta
Mateus 27.57-61; Lucas 23.50-56; João 19.38-42
42-43Ĩ tä soatawö, tä wisasoma. Tä wisa tä, Atimatéia tä uli ha José a pilile, Pilatosö a kaikana pata na ĩ a waloköma. Juteu pata töpö kokamo sinomo wi, ĩ töpö na José a kokamo naio sinomotima. ‑José a pi tao opaö. A topa apaö‑ töpö kuu sinomoma. José aiki, ‑Kamakö na Teusö a kaikanamo piale, ĩ sa tä taa pi topa apa kuleö!‑ a pi kutima.
Ĩ na tä kua tä, ‑Hena tä, mota mato wi ĩ tä wakala kuki pia salo. Huki sa kalipalo soataö!‑ José a pi kuu nö, a kili mai, Pilatosö a pata na José a waloiki nö, ‑Jesus sa tä tälölö pia kuleö!‑ Pilatosö a pata na ĩ na a kuuma.
44A kuu ha, ‑Huua! Jesus a noma haitaso noa‑ Pilatosö a pi pata kuu nö, sotatu töpö na a simöo sinomoti wi ĩ ai tä nakalö nö, ‑Jesus a noma waikilaso ke?‑ a pata kuu ha, 45‑Awai. A noma waikiso keö!‑ ĩ na sotatu tä kuu hö̃töoma. A kuu hö̃töoö ha, José a na, ‑Pei. Jesus a tälölöö!‑ ĩ na Pilatosö a pata kuuma.
46Ĩ na a pata kuu ha, watata ösö toita apii, ösö ausi ipii, ĩ ösö kui ösö tälölö nö, a hulasolöma. A hulolö nö, ti pakalai ti ha Jesus a pi ithoa kopamanöma. A pi ithoa kopamanö nö, watata ösö tälölö noai, ĩ ösönö Jesus a nomawö haloa kolilipalö nö, nomawö töpö titita sinomo wi ĩ nasimö taka ha Jesus a nomawö titiköma. Maa makö ha thaka taka thakö noai, ĩ taka ha a titiköma. A titiki nö, ai maa ma pata puluama kupotö nö, taka kasököma. 47Maria Matalena a, José a hai ĩ pöpönö Maria a, ĩ na töpö kui töpönö Jesus a nomawö titio noai ĩ tä tapama.
16Jesus a temöa konaso noai ĩ ta
Mateus 28.1-8; Lucas 24.1-12; João 20.1-10
1Ĩ na tä kua tä, mota mato wi ĩ tä wakala hasua waikipaso noai ha, Maria Matalena a, Salomé a, Tiago a hai ĩ pöpönö Maria a, ĩ na kilii töpönö tuu hälälä äpii, ĩ tuunö Jesus a nomawö mãi löpali pia salo, sitipa kökö na tuu sulöma. 2Tuu sulö nö, ĩ hena tä sai tä, ĩ tomĩku tä wakala na motokö ösöto tä, Jesus a titikö tasoma hamö suö töpö hulasolöma. 3Suö töpö hulolö nö, töpö ateo salo, ‑Jesus a titile, ĩ hamö makö lisipo pia tä, ĩ taka pata kasöle, ĩ witi pili anö ĩ ma pata hãkopalöpö?‑ ĩ na töpö kuuma. 4Ĩ na töpö kuu tä, tä moni möö maaki, maa ma patanö thaka taka lakö noai, ĩ ma pata hãkoa waikia kõa kule. 5Suö töpönö ĩ tä talalö nö, töpö lisia soatalotö nö, kate a poko kuamö kuo pamö hĩsa tä lotio noai, ĩ tä talalöma. Ĩ hĩsa tä hai, ãju tä kuoma. Kama hai ĩ watata ösö ausii, ösö lapei, ösö kuoma. Ĩ na tä kuama ha, suö töpö kilia apösoma.
6Töpö kilia apaö ha, ‑Pö kilipalo opa tihöö! Nasaté tä uli ha Jesus a pilio noai, ĩ hii ti pakalai ti ha a säpalö noai, ĩ ma tä möömö huu ke? Ĩ a titia maneö! A temöa kõa waikiloheö! A paa noai, ĩ ha ma tä möö nökö. Hiki. Mane. 7Pö hua kononöö! Pedro a, Jesus a kai a hua sinomoti wi ĩ ai töpö, ĩ na töpö kui töpö na makö wäoö! “Kaliléia tä uli pata hamö kamisa huu paiolöpöö! Waiha makö huu haiopöö! Ĩ tä uli ha sa taa konanöpöö!” ĩ na kamakö na Jesus a kuu waikioma thali nökö‑ ĩ na suö töpö na ĩ na ĩ hĩsa tä kuuma. 8Ĩ na hĩsa tä kuu ha, töpö kili ipa salo, töpö satitimo opama. Töpö satitimo opa nö, töpö kõa soatasolöma. Ĩ suö töpö kili ipa salo, ai töpö na ĩ töpö wäo maama.
Maria Matalena a na Jesus a tapamo somaso noai ĩ ta
9[Ĩ na tä kua tä, tomĩku tä wakala na, hena tä sai tä, Jesus a temöa konasoma. A temöa kono nö, Maria Matalena a wani na Jesus anö sai töpö hosalö noai, ĩ a wani na Jesus a tapamo kõa somatasoma.
10-11Jesus a na töpö nokapalo sinomoti noai ĩ töpö ö̃köpalo hisati tä, Maria Matalena a wani kotapolö nö, ‑Jesus a temöa konasoma thaiö! Jesus a temii, sa taa konani keheö!‑ a wani kuu kule maaki, ‑Wa holisimo opawö‑ töpö kuuma.
Polakapi töpö na Jesus a tapamoa nömöso noai ĩ ta
12Ĩ na tä kua tä, sai pö sololoi sai pö kuo pamö polakapi töpö huulö tä, ĩ töpö na Jesus a tapamoa nömösoma. 13A tapamoa nömöso noai ha, töpö kõa soapolö nö, ‑Jesus a temöa konasoma thaliö!‑ Jesus a na töpö nokapalo sinomoti noai ĩ ai töpö na ĩ na ĩ töpö kuuma. Ĩ na ĩ töpö kuuma maaki, ‑Makö holisimo opawö‑ töpö pi kuu hö̃töoma.
Jesus a kai a hua sinomoti noai ĩ töpö na a tapamoa nömöso noai ĩ ta
Mateus 28.16-20; Lucas 24.36-49; João 20.19-23; Atos 1.6-8
14Ĩ na tä kua tä, waiha Jesus a kai a hua sinomoti noai, ĩ 11 töpö iapaloti tä, ĩ töpö na Jesus a tapamoa nömösoma. A tapamoa nömöno nö, ‑“Jesus a temöa konaso noa” makö pi kuu mi ipö nö kiliwö. “A temöa konasoma thaliö!” ai töpö kuu kipili maaki, “Holisimo opatiwö. Jesus a temö kõo maa noai kitäö!” makö kuti sai. Ĩ na pö kuti tihöö!‑ Jesus a kuuma.
15Ĩ na a kuu nö, ‑Masita tä uli pewö na makö hulolö nö, Teusö ta topa apöle, sanöma töpö pewö na ĩ ta wäsä hätäpotöö! 16Sanöma töpönö Teusö ta hini totiatalo nö, “Jesus a pitili” ĩ töpö pi kuu nö, ĩ töpö mãi õmamonaso wi ĩ töpö õsi palimipasoma kutenö, Teusö tä uli hamö ĩ töpö konasolö kitä. Ĩ na tä kua tä, “Jesus a pitili” töpö pi kuu mai, ĩ töpö na, “‘Jesus a pitili’ makö pi kuu pasio maama salo, töpö pea soatio wi ĩ tä uli hamö pö kõa pasilolöö!” ĩ na Teusö a kuu kitä‑ ĩ na Jesus a kuuma. 17-18Ĩ na a kuu nö, ‑“Jesus a pitili” töpö pi kuu totio wi ĩ sa töpö simöa salo, ĩ töpönö sai töpö hosali kitä. Kai a aipö öpii kai a thaa nö, töpö hapalo kitä. Ĩ töpönö olö kökö wasu upii kökö huöli, tuu wasu upii tuu koali, ĩ na töpö kua kitä maaki, töpö salia mai kitä. “Jesus a pitili. A lotete epö” töpö pi kuu wi, ai töpö salia wi ĩ töpö na ĩ töpö ami waliki ha, töpö toa konaso kitä. Ĩ na tä thamaö ha, ai töpönö tä möö nö, töpö kili ipa nö, “Awai. Teusö a lotete epö. Hi töpönö Teusö ta wäsä wi ĩ pitili ta” ĩ na ai töpö pi kuupöö!‑ ĩ na kama kai a hua sinomoti wi ĩ töpö na ĩ na Jesus a kuuma.
Hi tä hẽtu pata hamö Jesus a konasolö noai ĩ ta
19Ĩ na Jesus a kuu nö, a hapalo hötötötalo nö, hutu mosökö hẽtu pata hamö Teusö anö Jesus a Kaikana hilakö lasoma. Teusö a kotö ha Jesus a kuiki nö, a kaikanamo naio soatama.
Jesus a kai a hua sinomo wi ĩ töpönö Jesus ta topa apöle ĩ ta wäsäti noai ĩ ta
20Ĩ na tä kua tä, Jesus a kai a hua sinomo wi ĩ töpö hulolö nö, ĩ tä uli pewö hamö töpö pilio wi ĩ töpö pewö na Jesus ta wäsätima. Jesus ta wäsäti wi, Teusö anö ĩ töpö lotetepamani salo, Teusö anö tä thama taö asa wi, ĩ töpönö ĩ nasimö tä thama hö̃tötioma. Tä thama hö̃tötioö ha, ‑Jesus ta wäsä wi ĩ pitili ta!‑ ĩ na Teusö anö ĩ na ai töpö pi thamatima. Ĩ na tä kuama. Ĩ nakö.]