Hebreus

Hebreus

Epöteu töpö na waheta tä simöpalö noai ĩ ta

Juteu töpö, epöteu töpö a hilo kua naine, ĩ töpö na hi waheta tä simönöma. Ĩ epöteu töpö na hi waheta tä simönö noai, ĩ töpönö Jesus a thapoma kutenö, ai epöteu töpönö Jesus a thapo pasi mai, ĩ töpö aiki, ‑Kamakö hai ĩ nö patapö töpö Teusömo sinomo kua noai na, ĩ na makö Teusömo kua sisapököö! Jesus ma thapo naio maiköö! A hosalöheö!‑ ĩ na ai töpö kuuma.

Önö kutenö, ai tänö hi waheta tä sãököpalö nö, ĩ na a kuuma: ‑Jesus a hosa tihöö! Sutu upa Teusö anö juteu makö pi hatukupamani pia salo, kama kai a wäsä sinomo noai, Teusö anö ĩ töpö simöpalöma maaki, huki makö pi hatuka totipamani pia salo, kama hai ĩ ulu Jesus a simöa nömöpalöma. A simöpalö noai, ĩ Jesus a hinia totilöö! Ãju töpö, Moisés a pata, Teusö a täpä sinomo noai ĩ töpö, ĩ na töpö kui töpö pewö hai, ĩ pata töpö pewö maaki, Jesus a hai, ĩ pata tä sai totiwö‑ ĩ na a kuuma. Ĩ na a kuu nö, ‑Huki Cristo a iä pö lotete sati ipö. Salo pö hiima iä hai kuno mai. Cristo a säpamonaso noai, ĩ a iä pönö makö õsi ausipasoma. Sanöma makönö wanisala ma tä thaa wi, ĩ tä pi na Cristo a säpamonasoma‑ ĩ na a kuuma. Ĩ na a kuu noai, hi waheta tä na ĩ tä sãökökö nö, ĩ epöteu töpö na ĩ tä waheta simöpalöma.

Jesus anö kamakö pewö na Teusö a kai a wäsä noai ĩ ta

¹Sutu ha kamakö hai ĩ nö patapö töpö na Teusö a hapalo pia salo, kama kai a wäsä sinomoti noai, ĩ töpö na a hapalo somatioma. Ĩ töpö na a hapalo somatioö ha, ai nö patapö töpö pewö na ĩ töpönö Teusö a kai a wäsäa tolea nömöa kõatalo opa hö̃tötiotima. ²Sutu ha ĩ na nö patapö töpö na Teusö a hapaloma maaki, huki ola makö na a hapalo pia salo, kama hai ĩ pelupö a simönöma. A simönöma, kamakö pewö na pelupö anö pö̃ a kai a wäsä tolea nömöoma. Somi tä sai tä, pelupö a na Teusö a hapalo nö, ‑Hutu mosökö pata, pili motokö, pilipoma a, sitikali pö, hi masita tä uli, ĩ na tökö pewö kui tökö thapalöö!‑ a kuu ha, pelupö anö ĩ tökö pewö thapalöma. Ĩ na tä kua tä, Teusö aiki, ‑Ĩ wa tökö pewö thapopöö!‑ ĩ na pelupö a na ĩ na pö̃ a kuuma. Ĩ tökö pewö thapo noai, kamakö na ĩ a hapaloma. ³Teusö a wakala kui na, ĩ na pelupö a wakala kuö nai soatawö. Teusö a kui na, ĩ na pelupö a kuö nai soatawö. Hutu mosökö pata, pili motokö, pilipoma a, sitikali pö, hi masita tä uli, Teusö a hai ĩ pelupö anö ĩ tökö pewö huöpoö. A hapalo lotete epii, ĩ tänö ĩ tökö pewö huma makoka apatii. Sanöma makönö wanisala ma tä thaa noai, Teusö a hai ĩ pelupö anö ĩ tä salupalö nö, makö õsi ausipalö nö, ösö öpö hamö a konasolöma. A kononö nö, pelupö a hai, pata tä nai soata kutenö, Teusö a lotete sati ipii, ĩ a kotö ha a loköma.

Ãju töpö na Teusö a ulupö hai, ĩ pata tä sati ipöwö

⁴Teusö anö kama hai ĩ töpö simöta sinomo wi, ĩ ãju töpö hai, ĩ pata töpö sai waikiwö maaki, Teusö anö pelupö a hai, ĩ pata tä thaa satia apöpalöma. Önö kutenö, ‑Ipa ulu a‑ Teusö a kuu wi, ĩ a hilo topa satia apa. ‑Ipa ãju töpö‑ ĩ na Teusö a kuu wi, ĩ töpö a hilo topa maaki, ‑Ipa ulu a‑ ĩ na Teusö a kuu wi, ĩ a hilo topa satia apa asaa.

⁵Önö kutenö, ĩ na Teusö a kuuma:

‑“Kawa hai, ipa ulu wa. Kamisa hai, au hao sa” huki ĩ na sa kuu kuleö!‑

ĩ na pelupö a sai na ĩ na Teusö a kuu asama. Ãju tä na a kuu maama. Kama hai ĩ pelupö a sai na a kuu sisama.

‑Au hao sa kupaso kitä. Ipa ulu wa kupaso kitä‑

ĩ na ai ãju tä na ĩ na a kuu pasio maama. Pelupö a na a kuu sisa asama.

⁶Ĩ na tä kua tä, Teusö anö kama hai pelupö a kuo soma noai, hi masita tä uli ha sanöma makö pilile, ĩ makö na pelupö a simöpa salo, ‑“Teusö a ulupö hai, ĩ pata tä sai asawöö!” ĩ na ipa ãju töpö pewö kuu kuköpököö!‑ ĩ na Teusö a kuuma.

⁷Ĩ na tä kua tä, ãju töpö a kateha nö,

‑Teusö sanö ipoko sa tä thama kua wi na, ĩ na ãju sa töpö thama kua hötöoö. Koa taka ãka thama kua wi na, ĩ na ãju sa töpö thaa thama hö̃töoö‑

ĩ na Teusö a kuuma.

⁸Ĩ na tä kua tä, Teusö a kaikana pata kui na, ĩ ha pelupö a kaikana wäa hö̃töa soata kutenö,

‑Teusö ai. Ai töpö na wa kaikanamo mapo mai kitä. Au töpö na wa kaikanamo makoka apa kuki kitäö!

⁹Toitai wa tä thaa pi topa apa sisaö. Wanisala wa tä thaa wani ipö. Önö kutenö au pata tä Teusönö wa saia asapalöma. Kawa na ai töpö kua naia kule maaki, Teusö anö wa saia asapalö nö, wa kaikana asapalöma kutenö, pe epii wa pi mönaha satia apöpamanömaö!‑

ĩ na Teusö tä waheta kuu. ¹⁰Ĩ na tä kua tä,

‑Kaikana ai. Somi tä sai tä, masita wa tä uli thapalöma. Pili wa aminö hutu mosökö pata thaa naipalöma.

¹¹Ĩ wa tä pewö thapalö noai, ĩ tä pewö mataso kitä maaki, kawa mapo mai kitä. Haloi ösö hotea kulaso wi na, wa tä thapalö noai, ĩ na ĩ tä pewö hotea kulaso kitä.

¹²Ai tänö haloi ösö hote hapolokoa kopalö nö, tiko ösö täa thaa nömöa koni wi na, hutu mosökö pata, masita tä uli pata, ĩ na tökö kui, ĩ na wa tökö hapolokoa thaa hö̃töpalö nö, tiko wa tökö thaa nömöpali kitäö! Ĩ tä pewö hoteso kitä maaki, kawa hote pasio mai kitä‑

ĩ na pelupö a na ĩ na Teusö a kuuma. ¹³Ĩ na a kuu nö,

‑“Kawa solo makö kaikanamopöö!” ĩ na sa pi kuu salo, kamisa kotö ha a loikisoö! Wa wanipoti wi, ĩ sa töpö pewö utitipamanö nö, kawa na ĩ sa töpö kilima kuki kitäö! Sa töpö utitipama totio paio mi tä, kamisa na wa lotiki nö, wa kaikanamo naiopököö!‑

ĩ na pelupö a na Teusö a kuuma. Ãju töpö na a kuu pasio maama.

¹⁴Wi na ãju töpö kuö pasiwö? Ipoko tä kui na, ĩ na töpö kuö pasiwö. Pili töpö sai kua mi. Wi na ĩ töpö kua pasioö? Teusö anö ĩ töpö simöa sinomo wi ĩ töpö. Teusö anö ĩ töpö simöaö ha, Teusö anö sanöma makö täapa kõo läo piale, huki ĩ ãju töpönö ĩ makö pasilipo sinomoö.

Teusö anö makö täapa kõo läo wi, ĩ tä toita apö

¹Önö kutenö, Teusö a hai ĩ pelupö anö ta wäsä noai, kamakö na ai töpönö ĩ ta wäsä tolea noai, ĩ tä na makö pi hanoa maapöö! Ĩ ma ta hini makoka totiatalo opapöö! ²Sutu ha Sinai makö pata hamö ãju töpönö Moisés a na ta wäsä noai, ĩ ta pitilio opama. Ĩ ta pitili ipii, ai töpönö ĩ ta hini pasio mai, Teusö anö ĩ töpö peama totioma. ³‑Teusö anö makö täapa kõo läo wi ĩ tä toita apö‑ huki tä kuu wi, kamakö na ĩ ta wäsä noai, ĩ ma ta hini wani tä, pe epii Teusö anö makö peama nömöo kitä. Teusö anö makö täapa kõo läo wi, Jesus pata tänö ĩ ta wäsä somama. Jesus anö ĩ ta wäsä soma noai, Jesus a hini noai, ĩ töpönö ĩ ta wäsä tolea nömöoma. Ĩ ta wäsä tolea nömöoö ha, ‑Pitili ta‑ samakö pi thamama. ⁴‑“Teusö anö makö täa koni kitäö!” tä kuu wi, ĩ ta pitili‑ ĩ na Teusö anö samakö pewö pi thama naio pia salo, tä aipöama pi kiliha apatima. Ai töpö salia apati wi ĩ töpö toapama kõo, ai töpö noma totisoma maaki, töpö temöa komani, Teusö anö ĩ na tä thamatima. Ĩ na tä thamati nö, ‑Kamisa õsi kua tolele ĩ anö tä pewö totoma wi, sanöma töpö na ĩ tä totoma hätäpopöö!‑ ĩ na Teusö a pi kuu noai, sanöma makö na ĩ tä pewö totoma hätäpotima. Önö kutenö, ‑“Teusö anö makö täa koni kitäö!” tä kuu wi, ĩ pitili tä sai a‑ ĩ na samakö pi thama totio opama.

Jesus anö makö pasilipalö nö, makö täa koni wi ĩ ta

⁵Masita tä uli tutei tä uli na Teusö anö sanöma makö piliama piale, ĩ tä pi na sa hapaloti pole, ĩ tä uli na kamakö na Teusö anö ãju töpö kaikanamoma mai kitä. ‑Ĩ töpö na pö kaikanamoö!‑ ĩ na ãju töpö na Teusö a kuu pasio maama. ⁶Pi naka. Ĩ na Teusö tä waheta na ĩ na ai ta kua pasia:

‑Teusö ai. Sanöma samakö na wa pi tapomo opati nö kiliawö. Sanöma samakö päwö maaki, kamisamakö na wa pi honipo opa nö, samakö pasilipo opatii.

⁷Kawanö ãju töpö na sanöma samakö komoatalama paioma. Samakö komoatalama paioma maaki, samakö hösöka kopamanö nö, kaikana tä toita apii tä kui na, ĩ na samakö thaa nömöpalöma. “Ĩ sanöma töpö totiatalo opawö,” ĩ na kawanö ai töpö thama apama.

⁸Kawanö ĩ tä pewö na sanöma samakö kaikanamoma totioma‑

ĩ na Teusö tä waheta kuu.

‑Ĩ tä pewö na sanöma makö kaikanamoma totioma‑ tä kuu kutenö, ai tä na makö kaikanamo pasio mai tä kua pasia mai kitä. Ĩ tä pewö na makö kaikanamoma totioma maaki, ĩ tä pewö na sanöma makö kaikanamo wi, huki ĩ ma tä tapa mane. ⁹Ĩ ma tä tapa mane maaki, Jesus ma uni tapa sisa kule. Teusö aiki, ‑Ipa ulu a hai, sanöma tä kupasopö‑ ĩ na Teusö a pi kuu ha, pelupö a hai, sanöma tä kupasoma. Ãju töpö na Teusö anö Jesus a komoapalama paioma. A komoapaloma kutenö, a nomasoma. Teusö anö sanöma makö noima nö, makö totiapala apa kutenö, sanöma makö pewö noa na Jesus a säpamonasoma. Pe epii a peamamo totio opa paioki nö, a säpamonasoma kutenö, Teusö anö a kaikana totipalöma. Önö kutenö, huki Jesus a möamö toita apii, a kaikana toti ipii, ĩ ma uni tapa kule.

¹⁰Huki a kaikanamo totia kule maaki, a pea totio opa paioma. A pea paio maama köna, a kaikana kupo maa noa kipi. Teusö anö hutu mosökö pata, ãju töpö, masita tä uli pata, salo pö, sanöma töpö, ĩ na tökö kui tökö pewö thapo pi topa apa salo, ĩ na tökö pewö thapalöma. Teusö a wakala apii, a toita apii, ĩ na Teusö a kui, hi tä hẽtu hamö ĩ a kupoli, ĩ hamö kama hai ĩ ulupö makö satehe epii, makö kuo naiopö, Teusö anö Jesus a kaikanapalöma. Jesus a kaikanapalö noai, ĩ anö Teusö a na Teusö ulupö makö kai konasolöma, Teusö anö makö täa koni.

¹¹Wanisala ma tä thaa wi, Jesus anö ĩ tä hosalö nö, makö ausipali. Makö ausipali wi ĩ makö, Jesus a, ĩ na kilii makö hai, Teusö ulupö makö pewö. Önö kutenö, Teusö ulupö makö na, ‑Ipa hoose töpö‑ ĩ na Jesus a kuu kili mai kitä. ¹²Ĩ na a kuuma:

‑Teusö ai. Ipa hoose töpö na kamisanö wa wäsä kitä. Ĩ töpö pewö kokamo pa, kawa na au ama sa ta thaa kitäö!‑

ĩ na a kuuma. ¹³Ĩ na a kuu nö,

‑Teusö a na sa mamo teteki kitäö! “Teusö a pitili” sa pi kuu totio kitä‑

ĩ na a kuuma. Ĩ na a kuu nö,

‑Kamisa na Teusö anö kama hai ĩ ulu töpö totopö noai, hisa ha ĩ töpö solo samakö kua kule‑

ĩ na Jesus a kuuma.

¹⁴Teusö ulupö makö sanöma kutenö, pili makö sãi, pili makö iä pö, ĩ na tä kui tä kua. Önö kutenö, ĩ na Jesus a kua naipasoma. Jesus a sãi, a iä, ĩ na a kua naipasoma. Sai tä sai patanö sanöma töpö säpa taö öpa wi, Jesus anö ĩ a utitia totipali pia salo, sanöma tä kupalo nö, a säpamonasoma. A säpamonaso noai, ĩ tökö, Sai tä sai pata utitia totipalöma. ¹⁵Pata tänö ai töpö noa mi kalipalama pätio nö, töpö peama sinomo wi, ĩ a pata na ĩ töpö kili kua soatio kua wi na, ĩ na makö nomaso wi, ĩ tä na ĩ na makö kili kua soatioma. Makö nomaso wi, ĩ tänö makö uni pewö huöpo totitioma maaki, Jesus anö makö uni täa kõo pi topa salo, a säpamonasoma. ¹⁶Jesus anö ãju töpö pasilipopö, a huu maama. Sanöma makö, ĩ Abraão tolewö makö pasilipopö, a huu pasioma.

¹⁷Pi naka. Jesus aiki, ‑Ĩ sanöma sa töpö pasilipo pia salo, Teusö sa täpä sinomo wi, ĩ pata sa kupo pi topa apaö‑ ĩ na a pi kuu nö, ĩ poose makö kua kuati wi na, ĩ na Jesus a kua kua totipasoma. Makö totiapala apatii, Teusö a na a kalipalo mapo mi, ĩ na Jesus a kua pi topa salo, kamakö kua kua wi na, ĩ na Jesus a kua kua hö̃töpasoma. Wanisala ma tä thaa wi, Jesus anö ĩ tä noa maa totipamani pia salo, sanöma tä kupasoma. Sanöma tä kupalo nö, Teusö a täpäpö, Teusö a na a walota asa wi, ĩ a kupasoma. ¹⁸Jesus a hai, ĩ sanöma tä kupasoma tä, Sai tä sai patanö wanisala tä na a simöa totioö ha, a peatima. Önö kutenö, huki Sai tä sai patanö wanisala tä na makö simöa sinomo wi, Jesus anö ĩ makö pasilipo taö öpa kitä.

Moisés a hai, pata tä waikiwö maaki, Jesus a hai, pata tä sati ipöwö

¹Teusö anö makö nakalö noai, ĩ makönö Jesus ma thapo naio wi ĩ pö! Jesus a na pö pi tapomo totihoö! ‑Teusö anö a simönö noai, ĩ Jesus a. Teusö a täpä sinomo wi, ĩ pata tä sai‑ ĩ na makö kuu wi, ĩ Jesus a na makö pi tapoa totiköö! ²Teusö anö Jesus a sailö nö, ‑Ĩ na wa tä thamaö!‑ ĩ na Teusö anö Jesus a noa thaö ha, Jesus anö ĩ tä pewö thama totiatalo opatima. Teusö anö sanöma töpö thapo wi, ĩ töpö õsi pewö hamö Teusö a kua kutenö, ĩ töpö hai, Teusö a sai pö uni. Teusö a sai pö pewö hamö Moisés a kalipalo makoka apa kuati noai na, ĩ na ĩ pö sai pewö hamö Jesus a kalipalo makoka kua hö̃tötioma. ³Sanöma wa tä sai pö möö nö, ‑Sai a toita apö a‑ wa pi kuu kule maaki, ma, ĩ sai a thakö noai, ĩ pili a sai toita sati ipö. Önö kutenö, ‑Moisés a toita apö‑ ĩ na makö kuu kule maaki, ‑Jesus a toita sati ipö‑ ĩ na makö kuu totiopökö. ⁴Sai pö pewö kule, sanöma töpönö ĩ sai pö thaköma maaki, Teusö anö ĩ tä pewö thaa satia apöpalöma. ⁵Teusö anö Moisés a kalipalama sinomo noai, ĩ Moisés a. Teusö a thapo noai ĩ töpö hai, Teusö a sai pö uni kuo noai, ĩ a sai pö pewö ha Moisés a kalipalo makoka apa soatioma. Moisés a kalipalo pola nö, ‑Waiha, ĩ na Teusö a kuu pia salo‑ ĩ na Moisés a kutima. ⁶Teusö anö Moisés a kalipalamati noai, ĩ a päwö. Jesus a hai, Teusö a hai ĩ pelupö a toti pasiwö. Jesus anö Teusö a hai ĩ sai a thapo makoka apaö. Ĩ a sai hai, ĩ kamakö. Jesus anö makö thapoö. Makö kili mai, ‑Teusö anö makö täapa kõo läo totio kitäö!‑ ĩ na makö kuu mapo mi tä, kamakö hai, Teusö a sai pö uni.

Teusö a hai ĩ töpö mota mapo wi ĩ ta

⁷Önö kutenö, Teusö a õsi kua tolele, ĩ a kuu wi, ĩ ta hinia totilöö!

‑Huki, Teusö a hapalo pole, ĩ wa ta hini nö, “Päla” pö kuu ti!

⁸Sutu ha, sanöma töpö pilia mai, ĩ tä uli hamö au kolo töpö huti pamö, ĩ töpönö Teusö a wapati nö, a kai peama kua ti noai na, ĩ na pö kua nömötio tihöö!‑

ĩ na Teusö a õsi kua tolele, ĩ na ĩ a kuu.

⁹Teusö aiki,

‑Ĩ hamö 40 tä inama na sa kuati noai, ĩ töpönö ĩ tä taa waikioma maaki, ĩ töpönö sa wapati nö, “Teusö anö makö peama hö̃töo hãto mai kitäö!” ĩ na ĩ töpö pi kutima.

¹⁰Ĩ na töpö pi kuti ha, ĩ töpö na sa hĩsolo nö, “Ĩ töpö pi wani tapomo wanisala apawö. Sa kai peama apatiwö” ĩ na sa kuu totioma‑

ĩ na Teusö a kuuma. ¹¹Ĩ na a kuu nö,

‑Sa hĩso opa salo, “Ki tä uli ha töpö mota mato wi, ĩ sa tä uli totoa pi topa apama maaki, ĩ tä uli ha ĩ töpö lisipo pasio mai kitäö!” ĩ na sa kuu totia kuleö!‑

ĩ na Teusö a kuuma.

¹²Ipa pö! Pö mosawia totikiö! Makö mosawia mi tä, makö pi tapoa wanisala apöki nö, ‑Teusö a pitili‑ makö pi kuu mapaso matimöö! Ĩ na makö pi kuu mapalo nö, Teusö a temö öpii, ĩ a na, ‑Pälaö!‑ ĩ na makö pi kuu totio matimöö! ¹³Ĩ na makö kua maiki. ‑Huki‑ tä kuu wi, ĩ tä wakala pewö hamö makö mosawia totiki nö, pö hapalo hẽtupaso totioö! ‑Ĩ naköö! Ĩ na makö kua totio opapöö!‑ ĩ na makö kuu hẽtupaso mi tä, wanisala tä thaa wi, ĩ tänö makö mönamaö ha, Teusö a na, ‑Päla‑ makö kuu satimo opa kukö matimöö! ¹⁴Somi tä, kamakö pewö aiki, ‑Cristo a pitili‑ makö kuu kukö noai na, ĩ na makö kuu mapo mi tä, Cristo ma thapo wi, ĩ makö sai. ¹⁵Teusö tä waheta aiki,

‑Huki Teusö ma kai hini tä, Teusö a kuu wi ĩ tä na, “Päla” pö kuu ti! Au kolo töpönö Teusö a kai a peama apa nö, Teusö a na “Päla” töpö kuu satimo opa kua noai na, ĩ na pö kua nömöo tihöö!‑

ĩ na Teusö tä waheta kuu.

¹⁶Teusö a kai a hini nö, a kai a peama apa nö, Teusö a na, ‑Päla‑ töpö kuu satimo opa noai, ĩ witi pili töpö kuoma? Esitu tä uli ha töpö kuo noai, tiko tä uli hamö Moisés anö ĩ töpö täa konönö noai, ĩ töpönö Teusö a kai a peamatima. ¹⁷40 tä inama na ai töpö na Teusö a hĩso opati noai, ĩ töpö hai, ĩ witi pili töpö pasiwö? Ai töpönö wanisala tä thatala apati salo, sanöma töpö kua mai, ĩ tä uli ha ĩ töpö huti pamö, töpö nomapoti noai, ĩ töpö na Teusö a hĩsoma. ¹⁸Teusö aiki, ‑Makö mota apöle, ki tä uli ha ĩ sa tä mapama pi topama maaki, ĩ hamö makö lisipo pasio mai kitäö!‑ ĩ na Teusö a kuu noai, ĩ witi pili töpö na ĩ na a kuuma? Teusö a kai a hini maa noai, ĩ töpö na a kuu totioma. ¹⁹Önö kutenö, ‑Teusö a pitili‑ ĩ na töpö pi kuu mi ipö kutenö, ĩ tä uli ha töpö lisipo pasio maama.

¹Teusö aiki, ‑Makö mota mapo wi, kamakö na ĩ sa tä totoki kitäö!‑ ĩ na kamakö na Teusö a kuu waikioma kutenö, pö pi mosawia totikiö! Makö pi mosawia mi tä, Teusö aiki, ‑“Makö mota mapo wi ĩ sa tä totoki kitäö!” ĩ na sa kuu totioma maaki, ĩ ma tä täa hö̃töo maama‑ ĩ na kamakö na ĩ na Teusö a kuu kitäö! Önö kutenö pö pewö pi mosawia totikiö! ²Kolo töpö na Teusö ta topa apöle ĩ ta wäsä noai, ola makö pewö na ĩ ta wäsä nömöoma. Teusö ta wäsä noai, ĩ kolo töpönö ĩ ta hini hö̃töoma maaki, ‑Pitili taö!‑ ĩ na ĩ nö patapö töpö pi kuu totio maama kutenö, mota mapo wi ĩ tä uli hamö Teusö anö ĩ töpö lisipama maama. ³Kamakö aiki, ‑Teusö ta pitili ipö‑ ĩ na makö pi kuu totio wi, ĩ makö puko opa asaö. Teusö anö makö mota mapamani wi, ĩ ha makö lisia asapamani. Teusö aiki,

‑“Mota mapo wi, ĩ sa tä totoki kitä maaki, ĩ töpö na sa tä totoa pasio mai kitäö!” ĩ na sa hĩso opa salo, ĩ na sa kuu totioma‑

ĩ na Teusö a kuuma. Somi tä sai tä, Teusö anö tä pewö thapalö noai, ĩ tökö soatawö, mota mapo wi ĩ tä kua soata naioma maaki, ‑Ĩ töpö na, mota mapo wi ĩ sa tä totoa pasio mai kitäö!‑ ĩ na a kuuma.

⁴Mota mapo wi ĩ tä wakala kuo noai, Teusö tä wahetanö ĩ ta katehama: ‑6 tä wakala kui tä wakala na Teusö a kalipaloti nö, a kalipalo paio nö, ĩ hena tä ai tä wakala kuki wi, ĩ tä wakala na Teusö a kalipalo mai, a mota mapasoma‑ ĩ na Teusö tä waheta kuu. ⁵Ĩ na Teusö tä waheta kuu nö, mota mapo wi ĩ tä pi na a kuu kõo nö, ‑Ĩ tä uli ha sa töpö mota mapama pi topa apama maaki, ĩ tä uli ha ĩ töpö lisipo mai kitäö!‑ ĩ na Teusö tä waheta kuu. ⁶Teusö ta topa apöle, kolo töpönö ĩ ta hini soma noai, ĩ töpönö ĩ ta hini totio maama. ‑Teusö a pitili‑ ĩ na ĩ kolo töpö pi kuu mi salo, ĩ töpönö mota mapo wi ĩ tä täa pasio maama. Önö kutenö, mota mapo wi, ai tiko töpönö ĩ tä täa asali kitä. ⁷Mota mapo wi ĩ tä uli ha kolo töpö lisipo mi ha, Teusö aiki, ‑Mota mapo wi, waiha ĩ sa tä totoki kitä‑ a pi kuuma. Huki Teusö anö ĩ tä totoa pi topa kule. Mota mapo wi ĩ tä uli ha kolo töpö lisipo maa noai ha, waiha Teusö anö Davi a noa thaa nö,

‑“Huki Teusö ma kai a hini salo, ‘Päla’ pö kuu satimo tihöö!” ĩ na wa kuu‑

ĩ na Teusö a kuuma.

⁸Davi a kua paia mai ha, mota mapo totio wi, ĩ tä uli ha Josué anö ĩ kolo töpö kai lisipasoma aköna, Teusö anö mota mapo wi ĩ tä kuo piale, waiha ĩ ta kateha kõo maa noa kipi. ⁹Önö kutenö, mota mapo totio piale, Teusö ma thapo wi ĩ makö na ĩ tä kua soa. ¹⁰Makö õsi mota mapo totio wi, Teusö anö ĩ tä totoki wi, kawanö ĩ wa tä tälöma, Teusö a kalipalo maa kupaso noai na, ĩ na wa kalipalo maa kua naipaso kitä. ¹¹Önö kutenö, makö kasiapalo opa nö, mota mapo wi, Teusö anö ĩ tä totoa pole, ĩ ma tä täa totilöpöö! Ma tä tälöma, kolo töpö kua kua noai na, ĩ na makö kua mai kitä. ‑Teusö a pitili‑ ĩ na kolo töpö pi kuu maa noai, ĩ töpönö Teusö a kai a hini wani ipö salo, mota mapo wi ĩ tä uli ha ĩ töpö lisipo pasio maama.

¹²Teusö a haö wi ĩ Teusö a kai a temö öpö. A lotete epö. Poo a namo pewö hẽtutule, ĩ a po namo opö maaki, Teusö a kai namo sati ipö. Wa thuu tupö tipöle ha Teusö a kai hẽasi kloso, thuu tu õsika hamö kai hẽasi kloso, pili wa õsi sai hamö hẽasi kloso, pei, wa pi kuu wi, pili wa õsi ha tä titile, ĩ tä hatuka totipamani. Wa tä thaa pi topa wi, ĩ tä hatuka nai soatamani. ¹³Teusö anö töpö pewö thapalö noai, Teusö a na ĩ ai tä sosa mai kitä. Teusö anö ĩ töpö pewö tapa apaö. Teusö a na tä pewö hatuka apaö. Ĩ tä pewö hatuka apa kutenö, Teusö a na makö waloiki nö, makö kuati noai, Teusö a na ĩ ma tä pewö a wäsä kitä.

Makö pasilipopö, Teusö a na Jesus a walota sinomoö

¹⁴Teusö a täpäpö, Teusö a na a walota sinomo wi, kamakö hai ĩ pata tä kua. Teusö a hai ĩ pelupö Jesus a hai, ĩ a pata. Makö pasilipali pia salo, hi tä hẽtu hamö Teusö a kulali, ĩ ha ĩ Jesus a lisia waikipaso lasoma kutenö, ‑Jesus sa thapo wi ĩ sa‑ ĩ na makö kuu wi, ĩ makö aiki, ‑Jesus a pitili‑ ĩ na makö pi kuu totio soatiopöö! ¹⁵Teusö a täpä sinomo wi, ĩ kamakö hai ĩ Jesus pata tä hai, kamakö na ĩ a pi honipo soatioö. Wanisala tä na makö simöa sinomo kua wi na, ĩ na Jesus a simöa kua hö̃töoma. Wanisala tä na Jesus a simöa sinomo hö̃töoma maaki, wanisala tä thaa pasio maama. Wanisala tä na Jesus a simöa sinomotima kutenö, kamakö na Jesus a pi honipo opa nö, makö pi ipa salo, kamakö na a mamo läo sinomoö. ¹⁶Önö kutenö, makö kili maikiö! Teusö anö makö totiapala pi topa apa wi, ĩ a pata lotio pa makö uni lisipasopököö! Makö uni lisipasoö ha, Teusö anö makö pi ipa salo, makö totiapala apa kitä. Makö peaö ha, Teusö anö makö pasilipali kitä.

¹Teusö a täpä sinomo wi, Teusö anö ĩ pata töpö saiapa sinomoö. ‑Au sanöma wa töpö pasilipapö, sanöma töpönö wanisala tä thaa sinomo wi ĩ tä noa mapama sinomoö!‑ ĩ na Teusö a pi kuu nö, ĩ pata töpö saiapa sinomoö. Ĩ pata töpö saia asali wi, ĩ töpönö Teusö a täpä sinomoö. Sanöma töpönö wanisala tä thaö ha, ĩ pata töpönö ĩ tä noa na Teusö a na nii tä, salo a, ĩ na tökö kui tökö totota sinomoö. ²Ĩ pata töpö utiti ipö nai kutenö, ai töpö pi hatuku mi ipii, ĩ töpönö toitai tä thaa makokoa mi ipii, ĩ töpö na ĩ pata töpö pi honipo opaö. ³Ĩ pata töpö pi honipo opa nö, ai töpönö wanisala tä thaa wi, ĩ tä noa na Teusö a na ĩ pata töpönö salo a totota sinomoö. Ai töpönö wanisala tä thaa wi, ĩ tä noa na sisawö kuno mai. Kama töpö utiti nai kutenö, ĩ töpönö wanisala tä thaa naioö. Ĩ töpönö wanisala tä thaa naio wi, ĩ tä noa na ĩ töpönö salo pö hiima totota naio soataö. ⁴Ai tä aiki, ‑Teusö sa täpä sinomo wi, ĩ nasimö sa pata kupoöö!‑ ĩ na ai tä kuu mai kitä. Teusö anö ĩ ai tä nakalö nö, ‑Kawanö sa täpä sinomo wi, ĩ wa pata kupasopöö!‑ ĩ na Teusö a kuu sisaö. Teusö anö Atão a naka kua soma noai na, ĩ na ai sanöma töpö naka kua hö̃töoö.

⁵Teusö anö Atão a naka kua noai na, ĩ na Teusö anö ĩ na Cristo a naka kua hö̃töoma. Cristo aiki, ‑Teusö sa täpä sinomo wi, ĩ sa pata kupoöö!‑ ĩ na Cristo a kuu maama. Teusö aiki, Cristo a na,

‑Sanöma wa töpö pasilipopö, kawanö sa täpä sinomo wi, ĩ nasimö pata wa kupaloö!‑

ĩ na Teusö a kuu sisama. Ĩ na a kuu nö,

‑Kawa hai ĩ ipa ulu wa. Huki au hao sa kupasoma‑

ĩ na Cristo a na ĩ na Teusö a kuuma.

⁶Waheta tä na ĩ na Teusö a kuu hö̃töoma:

‑Kawanö sa täpä sinomo wi, ĩ na wa kua mapo mai kitäö! Meukiseteki a patanö sa täpä sinomo kua noai na, ĩ na kawanö sa täpä kua sinomo kuki kitäö!‑

ĩ na Teusö a kuuma.

⁷Hi masita tä uli ha Jesus a kua tä, ‑Sa hoteso wi, ĩ tä na Teusö anö sa noama taö öpa kitäö!‑ ĩ na Jesus a pi kuu nö, Teusö a na pe epii a hapalo opama. A pi honipo tä, a mamo puu soati pola nö, Teusö a na a komö öpama. Ĩ na tä kua tä, Jesus anö Teusö a kai a hini sinomotima kutenö, Teusö anö Jesus a hinia hö̃tölöma. ⁸Jesus a hai, Teusö a ulupö maaki, a pea apatima. A pea apatima kutenö, Teusö a kai a hini totio opa wi, ĩ tä taö öpa kuköma. ⁹Jesus a pea apati nö, Teusö a kai a hini totia apöli, ĩ na Jesus a kua salo, a totia apöpasoma. A totia apöpalo nö, sanöma töpönö a kai a hini wi, ĩ töpö täa konö nö, ĩ töpö õsi temöpama totio wi, ĩ Jesus a kupasoma. ¹⁰Teusö anö Meukiseteki a naka kua noai na, ĩ na Jesus a naka kua hö̃töo nö, ‑Kawanö sa täpä sinomo wi, ĩ nasimö pata wa kupasopöö!‑ ĩ na Teusö a kuuma.

‑Jesus a hosa tihöö!‑ tä kuu wi ĩ ta

¹¹Sa kuuhe, ĩ tä na sa hapalo lapa pi topa kule maaki, makö pi hatukupo haiatalo mi kutenö, sa ta wäsä totia pikia maa kule. ¹²‑Jesus ma thapo tetea apa waikia salo, ai töpö na Teusö ma ta taöma sinomo wi ĩ maköö!‑ ĩ na sa pi kuu pi topa tä, Teusö ta wäsä soma wi, ĩ ma ta hini totio mi soai, ĩ makö soawö. Ulu töpö ose wai kui na, ĩ na makö kuö. Nii ma tä sai oa pasio mai, sui ma tuu sino koa pasitioö. ¹³Ai tänö sui tuu koa sinomo pasio wi, ĩ ulu tä pasiwö. Ĩ ulu tä aiki, ‑Ĩ tä topa apa. Ai tä wanisala pasiwö‑ ĩ na ĩ ulu a pi wai kuu tai mi. Ĩ ulu töpö ose pi wai kuu tao mi kui na, ĩ na makö kuö. ¹⁴Ĩ na tä kua tä, pata töpönö nii tä sai oaö. Pata töpö kutenö, ‑Ĩ tä wanisala pasiwö. Ai tä topa apa asaö‑ ĩ na ĩ töpö pi kuu taö öpaö.

¹Önö kutenö, makö patasopököö! Cristo ta wäsä soma noai, ĩ ma ta hini waikio noai maaki, ĩ ma ta hini sisatioti maikiö! Pata töpö na Cristo ta wäsä asa wi, ĩ ma ta hini nömöopöö! Sai wa kolo thaa waikiköma, wa sai kolo höpöa sapa kõo mi kua wi na, ĩ na Cristo tä kolo a kuö. Ai töpönö Cristo kolo ta wäsä waikio noai, ĩ ma tä kolo a thaa sapamo kõo maapöö! ‑Wa kuati noai, Teusö a na ĩ tä tomöpo maa noai, ĩ wa tä hosalö nö, “Teusö a pitili” ĩ na a pi kuu totioö!‑ ĩ na tä kuu wi ĩ kolo ta päwö. Ĩ ma ta hini waikioma. ²Töpö mãi õmo wi ĩ ma ta hinima. Cristo a thapo wi, Teusö anö ĩ töpö totiapalapö, ĩ töpö na ai töpö ami waliköpö, ĩ ma ta hini hö̃töoma. Teusö anö töpö temöma kõo piale, ĩ ma ta hinima. Õsi töpö pepalo opati wi ĩ tä uli ha Teusö a thapo mai, Teusö anö ĩ töpö simöpa piale ĩ ta, Teusö a thapo asa wi, ĩ töpö na ‑Hapo. Kamisa na makö kuo soatiopöö!‑ ĩ na ĩ töpö na Teusö a kuu asa piale ĩ ta, ĩ na ta kui ma ta hini waikioma. ³Ĩ ma tä pewö a hini waikioma kutenö, Cristo ola ma ta hini nömöo nö, makö pi patasopököö! Makö pi pataso wi, Teusö anö ĩ tä pi ipa salo, Cristo ma tä ola a hinipököö!

⁴Ai töpönö Cristo a hosa totia konöma, ĩ töpö pi tapoa sapa kotaki kitä ta o? Önö kutenö, ‑Cristo sa sua kõkö o!‑ ĩ töpö kuu kota mai kitä. Cristo ta wäsä wi ĩ tä na Teusö anö ĩ töpö pi hatuka waikipamanöma. Ĩ töpönö Teusö anö tä totoma wi ĩ tä tälöma, Teusö a õsi kua tolele, kama töpö õsi na ĩ a õsi kalipalo opati wi, ĩ töpönö ĩ tä taö öpama. ⁵Teusö a kai a totiatalo opati wi, ĩ töpönö ĩ ta taö öpama. Teusö a lotetea apöle, Teusö anö ĩ tä möma piale, ĩ tänö ĩ töpö lotetea waikipamanöma. ⁶Önö kutenö, ĩ töpönö Cristo a hosa kõa totilöma, ‑Häö. Sa wanisala apawöö! Cristo sa sua kõokö o!‑ ĩ na ĩ töpö kuu tai mi kitä. Ĩ töpönö Teusö a ulupö hosa kõa totili salo, hii ti pakalai ti ha Cristo a pi sätäa komaki wi ĩ töpö. Cristo a pi sätäa komaki ha, Cristo a na ai töpö hapalo pi wasöa apatii. Ĩ na ĩ töpö kua kutenö, ‑Cristo sa sua kõokö o!‑ ĩ töpö kuu kõo mai kitä.

⁷Ai tänö tä uli thapo pole, maa tänö ĩ tä uli heumati tä, ĩ tä uli ha nii tä kua apököma, Teusö anö ĩ tä uli totiapala apaö. ⁸Ĩ na tä kua tä, ai tä uli mösököpö öpö pasii, ĩ tä uli ha nii tä haö tomöpo mi pasiwö kutenö, ‑Häö. Ĩ tä uli wanisala pasi waikiwököö! Ĩ tä uli na nii tä kua kota maapöö!‑ ĩ na Teusö a pi kuu nö, ĩ tä uli ĩsimani kitä.

⁹Ipa pö! Ĩ na sa kuu kule maaki, ‑Ĩ tä uli wanisala kui na, ĩ na makö kua pasia mane‑ ĩ na sa pi kuu kule. Cristo ma hosa maama kutenö, Teusö anö makö totiapala apa nö, makö thapo soa kule. ¹⁰Teusö a makoka apaö. Teusö ma pi ipa salo, Teusö a na makö kalipalo nö, Cristo a thapo naio wi ĩ ma töpö pasilipo wi, ĩ tä na Teusö a pi moti mi. ¹¹Makö kasiapalo kua noai na, ĩ na makö kasiapalo kua totia soatio wi, ĩ sama tä pi ipaö. Makö kasiapalo soatioma, ‑Sa nomano nö, Teusö a na sa konasolö kitä‑ ĩ na makö kuu wi, ĩ ta kua tolea totia apöle kitä. ¹²Makö moimo wi ĩ sama tä pii mi. ‑Cristo a pitili‑ ĩ na ai töpö pi kuu nö, töpö kasiapalo soatio wi, ĩ ma töpö uömapöö! ‑Ĩ sa tä totoki kitä‑ ĩ na Teusö a kuu noai, ĩ töpönö ĩ tä täli kitä.

‑Ĩ sa tä totoki kitäö!‑ Teusö a kuu noai, ĩ tä kua tolea totio wi ĩ ta

¹³Abraão a na Teusö aiki, ‑Au tolewö sa töpö palamani kitäö!‑ ĩ na a kuu tä, ‑Pitili ta‑ ĩ na Abraão a pi thama pi topa salo, ‑Pata sa sai sisawö, Teusö sa hilo wi, ĩ sanö au tolewö sa töpö satea totia apöpali kitäö!‑ ĩ na Teusö a kuuma. ¹⁴‑“Wa totiapala apa nö, au ola sa töpö palamani kitäö!” ĩ na sa kuu totia kuleö!‑ ĩ na Abraão a na, ĩ na Teusö a kuuma. ¹⁵Ĩ na a kuu ha, Abraão a silimo mai, kama hai ulu a mi päla tä maaki, ‑Teusö anö ipa ulu a totopi kitäö!‑ ĩ na a pi kuu soatioma. Önö kutenö, Teusö anö Abraão a na ulu a wai totoköma. ¹⁶‑Pitili ta‑ ai tänö ai tä pi thama pia salo, ‑Ai pata sa tä sömöka tamakö nö, sa kuu kuleö!‑ ĩ na a kuu. Ĩ na a kuu ha, ai tänö ĩ ta hini pole, ĩ aiki hö̃töwö, ‑Awai. Pitili tä sai a‑ ĩ na a pi kuu. ¹⁷Ĩ na tä kuu kua wi na, ĩ na Teusö a kuu hö̃töoma. ‑Ĩ sa tä totoa totiki kitäö!‑ ĩ na ai töpö na ĩ na Teusö a kuu noai, ‑Pitili ta‑ ĩ na Teusö anö ĩ töpö pi thama pia salo, ‑Pata sa sai. Ai pata tä kua satia mai kitäö! Pata sa sai, Teusö sa hilo wi, ĩ sanö ĩ sa tä totoa totiki kitäö!‑ ĩ na a kuuma. Teusö a hai, pata tä waikiwö kutenö, ai pata tä sömöka tamapo maama.

¹⁸Önö kutenö, ‑“Ĩ sa tä totoa totiki kitäö!” ĩ na pata sa sai, Teusö sa hilo wi, ĩ sa kuu totia kuleö!‑ ĩ na Teusö a kuu noai, ĩ a holisi mai kitä. A kuu waikio noai, ĩ tä na ai tiko ta makea nömöa mai kitä. Önö kutenö, ‑Teusö anö sa noama totiopöö!‑ ĩ na makö pi kuu nö, Teusö a na makö ekuköma. ‑“Makö noama kitäö!” ĩ na Teusö a kuu noai, ĩ pitili ta‑ ĩ na makö pi kuu sinomo kutenö, makö kili mi. ¹⁹Söpala ösö patanö kutiata a lototoa apa kutenö, tiko hamö a kalä mi kui na, ‑Cristo anö makö noama kitäö!‑ makö pi kuu wi, ĩ tänö makö õsi pi monöopo mi. Toitai makö kuatii. ‑Hi tä hẽtu ha Teusö a sai pö kupoli, ĩ a sai õsimö ha watata ösökö uni katöa läle, ĩ ösökö ha Cristo a lisipalo nö, Teusö a kua totile ha, ĩ a sai ha Cristo a lisia tolepaso noai, ĩ Cristo anö makö noama totio kitäö!‑ ĩ na makö pi kuu sinomoö. ²⁰Makö pasilipali pia salo, Teusö a kupoli, ĩ ha sanöma makö lisipo paio mi tä, ĩ ha Cristo a paluiki nö, Teusö a täpä sinomo wi, ĩ pata tä kupasoma. Meukiseteki anö Teusö a täpä sinomo kua noai na, ĩ na Cristo anö Teusö a täpä kua sinomo nömöo nö, Teusö a täpä mapo mai kitä.

Meukiseteki a pata

¹Salẽi tili töpö na Meukiseteki a pata kaikanamo sinomoma. Teusö pata tä sainö Meukiseteki a simöa sinomotima kutenö, Teusö a täpä sinomo wi, ĩ Meukiseteki a pata kuoma. Ĩ na Meukiseteki a pata kua tä, ai kaikana töpönö ai töpö wasu kai huu noai, Abraão töpönö ĩ kaikana töpö säamö paa läpalöma. Töpö säamö läpalö nö, Abraão anö kama töpö kai koonö tä, Abraão a pata na Meukiseteki a pata walokö tasoma. A waloikitö nö, Teusö a na a hapalo nö, ‑Teusö ai. Abraão a totiapala totioö!‑ a kuuma. ²Ĩ na a kuu ha, Abraão anö kaikana töpö a sälö nö, ĩ töpö mati pö tälö noai, ĩ ai tä sua sokalö nö, Meukiseteki a pata na ĩ wani tökö ose totoa selekeköma.

‑Meukiseteki‑ ta kuuto wi, ĩ na ĩ a hilo kuuto totioö: ‑Kaikana tänö toitai tä thaa sinomo wi ĩ a‑ ĩ na a hilo kuuto totioö. ‑Salẽi tili töpö na a kaikanamo sinomo wi ĩ a‑ ta kuu wi, ĩ na ĩ ta kuuto totioö: ‑Töpö hölati pole, kaikana tänö ĩ töpö noima sinomo wi ĩ a‑ ĩ na ta kuuto totioö. ³Meukiseteki a hai ĩ pö̃ a, pöpönö a, kolo töpö, ĩ na töpö kui töpö hilo sãökama kua mi. Meukiseteki a kupaso noai ĩ tä wakala, a nomaso noai ĩ tä wakala, ĩ na tökö wakala kui tökö wakala hilo sãökama kua mai kitä. Teusö a hai ĩ pelupö anö Teusö a täpä sinomo wi, ĩ tä mapo mi kua wi na ĩ na Meukiseteki anö Teusö a täpä sinomo wi, ĩ tä mapo mi kuö hö̃töwö.

⁴Önö kutenö, ‑Meukiseteki a hai, ĩ pata tä pata kuoma ta o!‑ ĩ na makö pi kuu kitä. Kamakö hai ĩ kolo Abraão a kuo soma noai, ĩ anö wani tä pata tälö nö, ai tä ose wai sua sokalö nö, Meukiseteki a na ose wai totoa selekeköma. ⁵Pi naka. Teusö a täpä sinomo wi ĩ töpö hai, Lepii a hai ĩ tolewö töpö. Moisés anö ĩ töpö noa thaa nö, ‑Kamakö hai ĩ isöhaeu töpö na wani ma tä ose täa tolemo sinomopöö! Kama töpö hai ĩ wani tökö satehe epii tökö kua tä, polakapi wani tökö ose wai täa tolemo sinomotipököö!‑ ĩ na a kuuma. Lepii töpö, ai isöhaeu töpö, ĩ na töpö kui, Abraão a hai ĩ tolewö töpö pewö maaki, lepii töpönö kama töpö hai ĩ isöhaeu töpö na ĩ wani töpö ose sua sinomoö.

⁶Ĩ na Moisés anö töpö noa thama maaki, Meukiseteki a hai, tolewö lepii tä kuo maa noai maaki, Abraão a hai ĩ wani tä ose tälöma. Ĩ na tä kua tä, ‑Ĩ sa tä totoki kitäö!‑ Abraão a na ĩ na Teusö a kuu asa noai, Teusö a na Meukiseteki anö ĩ a wäsä nö, ‑Abraão a totiapala totioö!‑ ĩ na Meukiseteki a pata kuuma. ⁷Pi naka. Ai tä hai, ĩ pata tä waikiwö maaki, ĩ a na ai tä aiki, ‑Teusö anö wa totiapala apapököö!‑ a kuu wi, ĩ pata tä sati ipöwö. Önö kutenö, Abraão a hai, pata tä hö̃tö waikiwö maaki, Meukiseteki a hai, pata tä sati ipöwö.

⁸Ĩ na tä kua tä, sanöma töpö nomapo kua wi na, ĩ na lepii töpö olanö wani tä ose täa sinomo wi, ĩ na ĩ töpö ola nomapo kuaö. Ĩ na tä kua kule maaki, ‑Meukiseteki anö wani tä ose tälö noai, ĩ a temö soa‑ ĩ na Teusö tä waheta kuu. ‑Meukiseteki a nomasoma‑ tä waheta kuu soata maama. ^9-10Lepii a kua paia mi tä, Abraão a na Meukiseteki a waloköma. Lepii a lö kui, Abraão tolewö tä kutenö, Abraão a õsimö ha a kuo paioma. Önö kutenö, Meukiseteki a na Abraão a patanö wani tä ose totoa tä, lepii a uninö ĩ wani tä ose totoa naiköma. Teusömo wi a sai ha lepii töpö kalipalo sinomo kutenö, wani tä ose täa sinomo wi maaki, ĩ lepii töpö uni na Meukiseteki a patanö wani tä totoa maama. Lepii töpö uninö Meukiseteki a pata na wani tä totoa toleha läa asaköma.

¹¹Teusö anö isöhaeu töpö noa thaa noai, ĩ na ĩ ta kuoma: ‑Lepii tolewö töpö hai, ĩ Atão töpönö sa täpä sinomopöö!‑ ĩ na ta kuuma. Pi naka. Ĩ na ĩ lepii töpönö tä thamaö ha, Teusö anö sanöma töpö õsi totipalöma aköna, ai tiko tänö Teusö a täpä sinomo wi, ĩ a kuo kõo maa noa kipi. Lepii töpönö Teusö a na sanöma töpö õsi totia totipama maama kutenö, ai tiko tä kua nömöpasoma. Ai tiko tä kua nömöpaso noai, lepii tä ola Atão a kui na, ĩ na ĩ a kuo maama. Meukiseteki a kui na ĩ na ai tä kui, ai tä kua tolea nömöa kopasoma. ¹²Ai tiko tänö Teusö a täpä sinomo wi, ĩ a kua nömöa kopasoma, Teusö anö makö noa thaa wi, ĩ ai tiko ta kua tolea nömöa kõki. ¹³‑Ai tiko tä kua kõköma‑ sa kuuhe, ĩ kamakö hai ĩ Jesus pata tä. Lepii a ola hai, Jesus a kuo maama. Jesus a hai ĩ kolo töpönö Teusö a täpä pasio maama. ¹⁴Jutá a ola hai, Jesus a kuo noai, ĩ ma tä taö. Moisés a pata aiki, ‑Jutá a hai ĩ ola töpönö Teusö a täpä sinomopöö!‑ ĩ na a kuu maama. ‑Lepii a hai ĩ ola makönö Teusö ma täpä sisapököö!‑ ĩ na Moisés anö lepii töpö hai ĩ ola töpö noa thaa asama.

¹⁵Sa kuu piale, ĩ ma ta hininöma, sa kuuhe, ĩ ma ta taö öpa kuki kitä. Ai tiko tänö Teusö a täpä sinomo wi, ĩ a kua nömöa kopasoma. Meukiseteki a kua noai na, ĩ na ĩ a kua wi a kua nömöa kopasoma. ¹⁶‑Jesus a hai, lepii tä ola soatawö kutenö, Teusö a täpä sinomo wi, ĩ a kupasopöö!‑ ĩ na sanöma töpö kuu wi, ĩ ta kuo maama. Jesus a hai, lepii tä ola kuo maama. Teusö aiki, ‑Jesus a õsi temöo mapo mi. A õsi temöo soatio kutenö, ĩ anö sa täpä sinomo kuköpö, ĩ Jesus sa thapalöma‑ ĩ na Teusö a kuuma. ¹⁷Teusö tä wahetanö Jesus a kateha nö, ‑Meukiseteki a kua noai na, ĩ na wa kua tolea nömöo hö̃töo soatio kitäö! Teusö wa täpä sinomo wi, ĩ tä mapo mai kitäö!‑ ĩ na Teusö tä waheta kuu. ¹⁸Önö kutenö, sutu upa Moisés anö töpö noa thaa noai, ĩ ta tomöpo maama. Ĩ ta utitio opama kutenö, huki ai tiko ta kua nömöa. ¹⁹Moisés anö nö patapö töpö noa thaa noai, ĩ ta tomöpo maama. Ĩ tänö nö patapö töpö totiatalo opa maama. Huki ĩ na tä kua mai kitä. Huki Jesus ma thapo kuköma, Teusö a na makö waloa totiki kitä. Ĩ na makö kua wi, ĩ tä topa satia apa.

^20-21Teusö a täpä sinomo wi, ĩ Jesus a kupo tä, ĩ na Teusö a kuu totioma:

‑“Kawanö sa täpä sinomo wi, ĩ tä mapo mai kitäö!” ĩ na pata sa kuu totia manu kule, waiha, “Pälaö! Kawanö sa täpä sinomo wi, ĩ wa mai kitäö!” ĩ na kawa na sa kuu mai kitäö!‑

ĩ na Teusö a kuu totioma. Jesus a kua paia mi tä, ai töpö na ĩ na Teusö a kuu totio maama. Ai töpönö Teusö a täpä sinomo noai, ĩ töpö na Teusö aiki, ‑Kamakönö sa täpä sinomo wi ĩ tä mapo mai kitäö!‑ ĩ töpö na ĩ na Teusö a kuu totio pasio maama.

²²Jesus a na, ‑“Kawanö sa täpä sinomo wi ĩ tä mapo mai kitäö!” kawa na ĩ na sa kuu totia kuleö!‑ ĩ na Jesus a na Teusö a kuu asama. Ĩ na a kuuma kutenö, huki Teusö anö sanöma makö noa thaa wi, ĩ ta toita sati ipii ĩ ta kua.

²³Ĩ na tä kua tä, Jesus a kua paia mi tä, Teusö a täpä sinomo noai, ĩ töpö sateheo opama. Ĩ ai tä nomasoö ha, ai tä kua kõa nömöpasoö, ĩ a nomasoö ha, ai a kua kõa nömöpasoö, ĩ na töpö kua nömöatalotiilö noai, ĩ töpö sateheo opama. ²⁴Ĩ na tä kua tä, Jesus a noma pasio mai, ĩ anö Teusö a täpä sinomo wi ĩ tä mapo mi. ²⁵Jesus a temö soati kutenö, Teusö a na töpö waloamaki wi, Jesus anö ĩ töpö täapa kõo läo totio pia salo, Teusö a na Jesus anö ĩ töpö a wäsä soatioö. Önö kutenö, Jesus anö ĩ töpö täapa taö öpa kõo wi, ĩ tä mapo mai kitä.

²⁶Pata tänö Teusö a täpä sinomo wi, ĩ pata tä Jesus. Jesus anö makö pasilipo sisaö. ‑Jesus a totiatalo opa asawöö!‑ ĩ na Teusö a pi kuu. Jesus anö wanisala tä thaa tai mi. A makokoa sinomo opatii. Sanöma töpönö wanisala tä thatala apati wi, ĩ töpö na Teusö anö Jesus a soka totipalöma. Hutu mosökö hẽtu tole pata hamö a ösöa tolemanöma. Önö kutenö, Teusö a täpä sinomo wi, ĩ pata tä Jesus.

²⁷Ai pata töpönö Teusö a täpä sinomo wi, ĩ pata töpö kua kuati wi na, ĩ na Jesus a kua naio mai kitä. Ĩ töpönö wanisala tä thatalati wi, ĩ tä noa na ĩ kama töpönö Teusö a na salo pö hiima ĩsi toto, ai sanöma töpönö wanisala tä thatalati wi ĩ tä noa na salo a hiima ĩsi totoa nömöki, ĩ na ĩ tä wakala pewö hamö ĩ na ĩ töpö kuaö. Jesus anö wanisala tä thaa mi ipö kutenö, ĩ pata töpö kua wi na, ĩ na Jesus a kua mi. Sanöma töpö pewönö wanisala tä thaa wi, ĩ tä noa na Jesus a säpamo waikilasoma kutenö, huki Teusö aiki, ‑Wanisala tä thaa wi ĩ tä noa na hiima ma pö salo säpapököö!‑ Teusö a kuu mai kitä. ²⁸Sutu ha Jesus a kua paia mi tä, Moisés anö nö patapö töpö noa thaa noai, ĩ na ĩ ta kuuma: ‑Ai makönö Teusö ma täpä sinomo wi, ĩ ai pata makö kupasopöö!‑ ĩ na tä kuuma. Ĩ töpönö Teusö a täpä sinomo wi, ĩ pata töpö kupo paio mi tä, ĩ pata töpönö toitai tä thaa sinomo maa noai maaki, ‑Teusö ma täpä sinomo asapöö!‑ ĩ na Moisés a kuuma. Ĩ na a kuuma maaki, Moisés anö nö patapö töpö noa thaa waikio noai ha, Teusö aiki, ‑“Ai tiko pata tänö sa täpä sinomo wi, waiha ĩ a huu kitäö!” ĩ na sa kuu totia kuleö!‑ ĩ na Teusö a kuu nö, kama hai ĩ pelupö a saipalöma. Ĩ pelupö anö wanisala tä thaa tai mi ipö. Toitai tä thaa soatio wi ĩ tä mapo mi.

Makö pasilipopö, Jesus anö Teusö a täpä sinomoö

¹Sa kuu pole, ĩ na ĩ ta kuu totia kule. Makö pasilipopö, pata tänö Teusö a täpä sinomo wi, ĩ pata tä kua. Ĩ Jesus a. Hi tä hẽtu ha Teusö a wakala apii, a lotete epii, ĩ a pata lopoli, ĩ a kotö ha Jesus a loa naia. ²Sutu ha sanöma töpönö salo ösö sai pö thakö noai, Teusömo wi ĩ sai a kuoma. Ĩ a sai ha Teusö a täpä sinomo asa noai, ĩ ha ĩ töpö kalipalotima. Huki hi tä hẽtu ha Teusö anö Teusömo wi a sai thakö noai, ĩ a sai kua lasoa. Sanöma tänö ĩ a sai thaa maama. Ĩ a sai ha Jesus a kalipalotii.

³Sutu ha Teusö a na nii tä, salo pö hiima, salo pö hiima ĩsi, ĩ na tökö kui tökö totoköpö, Teusö anö ai sanöma töpö saia asapalöma. Ĩ töpö saipalö noai, pata töpönö Teusö a täpä sinomo wi, ĩ töpö kupasoma. Ĩ na ĩ pata töpönö Teusö a täpä sinomo kua noai na, huki ĩ na Jesus pata tä kua nömöoö. Önö kutenö, Teusö a na Jesus anö tä totoköpö tä kua mi tä, tä tomöpo mai kitä.

⁴Moisés anö nö patapö töpö noa thaa nö, ‑Ai makönö Teusö a täpä sinomo wi ĩ makönö Teusö a na ĩ nasimö tä totoa sinomopöö!‑ ĩ na a kuu noai, huki ĩ töpö kua soa. Teusö a täpä sinomo wi ĩ töpö kua soa kutenö, hi masita tä uli ha Jesus a kuo naio soa aköna, Teusö a täpä sinomo wi, ĩ Jesus a kua mana pi. ⁵Teusö a täpä sinomo asa wi, ĩ töpönö Teusö a na tä totota sinomo wi, ĩ uni tä päwö. Hi tä hẽtu ha Jesus a kuati polali, ĩ tä uni päwö. Moisés anö Teusömopö salo ösö sai thakö noai, ĩ a sai hai, hi tä hẽtu ha Teusömo wi a sai kupoli, ĩ a sai uni hö̃töwö. Moisés anö ĩ a sai thaa pia tä, Teusö aiki, ‑Maa makö hemo pata ha, kawa na salo sa ösö sai ukutupö mömapili, ĩ a sai kui na, ĩ na a sai kui wa sai thaköpöö! Ĩ a sai ha sa walo makokota totiopököö!‑ ĩ na Teusö anö Moisés a noa thama. ⁶Moisés anö kama hai ĩ töpö pasilipali pia salo, sai a thakö noai a sai ha ai töpönö Teusö a täpä sinomoma. Teusö a täpä sinomo noai, ĩ tä topa apa waikioma maaki, huki Jesus anö Teusö a täpä sinomoti wi, ĩ tä topa satia apa asaa. Huki Teusö anö makö noa thaa wi, ĩ ta topa satia apa naia. Sutu ha Teusö anö Moisés a noa pata thaa noai, ĩ anö kama hai ĩ töpö noa thaa tolea noai, ĩ ta topa apama maaki, huki Teusö anö Jesus a na makö noa thama wi ĩ ta topa satia apa. Sutu ha Teusö aiki, ‑Tä toita apii sa tä totoki kitäö!‑ ĩ na a kuuma maaki, ‑Tä toita sati ipii, ĩ sa tä totoa nömöki kitäö!‑ huki ĩ na Teusö a kuu asa kule.

⁷Sutu ha Teusö anö nö patapö töpö noa thaa noai, ĩ ta tomöpo maama. Ĩ nö pata töpö õsi utiti ipö kutenö, Teusö a kai a hini tomöpo maama. Önö kutenö, huki Teusö anö sanöma makö noa pewö thaa kõone, ĩ ta kua. Ĩ ta tomöpo mi mai kitä. ⁸Teusö aiki, ‑Kamakö hai, ipa makö maaki, makö makokopo maneö!‑ ĩ na a pi kuuma. Ĩ na a pi kuu nö,

‑Isöhaeu makö, jutá makö, ĩ na makö kui, kamisanö ĩ makö noa thaa piale, ĩ tute ta. Ĩ tute sa ta thaa piale, ĩ tä atea waikia kule. ⁹Kamakö hai ĩ kolo sa töpö noa thaa kua noai na, ĩ na sa ta thaa piale, ĩ na ĩ ta kua kua naio mai kitä. Ĩ kolo sa töpö noa thaa noai, ĩ tä, Esitu tä uli pata na ĩ töpö kua soa tä, ĩ sa töpö poko tutuapala apa nö, sa töpö täa konönöma. Ĩ sa töpö täa konönöma maaki, sa töpö noa thaa noai, ĩ töpönö ĩ ta peama totioma. Ĩ töpönö sa hini pasio maama kutenö, ĩ sa töpö a hini hö̃töo maama‑

ĩ na Teusö a kuu nö,

¹⁰‑Waiha ĩ na isöhaeu sa töpö noa thaa kitä. Sa töpö noa thaa piale, ĩ töpö õsi ha ĩ sa ta titiköma, ĩ töpönö sa kai hini mapo mai kitäö! Ĩ töpö õsi ha sa tä sãöka kuki kitäö! Kamisa na, “Ipa Teusö a” ĩ na ĩ töpö kuu ha, ĩ töpö na hö̃töwö, “Ipa töpö” sa kuu nomöho hö̃töo kitäö!‑

ĩ na Teusö a kuuma. ¹¹Ĩ na a kuu nö,

‑Ĩ töpö pewönö sa taö kuki kitäö! Pata töpö, pata töpö pasi mai ĩ töpö, ĩ na töpö kui töpö pewönö sa taö öpa kuki kitäö! Ĩ töpö pewönö sa taö waikia kutenö, “Teusö a na ipa sa töpö pi hatukupamanöpö” ĩ na ai tä pi kuu mai kitä. “Teusö wa taö öpa mi salo” ĩ na kama ai töpö na a kuu mai kitä. Ĩ töpö pewönö Teusö a taö öpa waikia kutenö.

¹²Ĩ töpönö wanisala tä thaa noai, ĩ tä na sa hĩso mataso kitä. Wanisala tä thama maaki, ĩ tä noa na sa töpö peama hö̃töo mai kitäö!‑

ĩ na Teusö a kuuma.

¹³‑Sa töpö noa thaa kuköpö, tute sa ta thapali kitä‑ ĩ na a kuuma.

Teusö anö kolo töpö noa thaa noai, ĩ ta hotea waikiköma kutenö, ai tute ta kua kõki. Tä hoteso noai, ĩ tä mapo pia kule.

Moisés anö töpö kai Teusömo soma noai, ĩ tä tomöpo maa noai ĩ ta

¹Teusö anö sanöma makö noa thaa soma noai, ĩ na ta kuuma: ‑Ĩ na makö Teusömo kua totiopöö!‑ ĩ na Teusö a kuu nö, ‑Makö Teusömo totiopö, salo ma ösö sai thaköö!‑ ĩ na a kuuma. ²Ĩ a sai thakö noai, ĩ a sai õsimö ha polakapi sai a kai kuoma. Teusö a täpä sinomo wi ĩ töpö lisipo sinomo wi ĩ a sai kai hai, Teusö a kuo wi, ĩ a sai kai a hiloma. Ĩ a sai õsimö ha, koa taka sii pi hĩta wi ĩ ti hĩta, Teusö a na ĩsa ãi totoköpö, hii ti na ĩ ãi maketa wi ĩ tiki hõtoa, ĩ na tiki kuoma. ³Mötali a sai õsimö ha watata ösö katöo õsimöo läo noai, ĩ tole tömö Teusö a kuo totio sinomo wi, ĩ a sai kai a hilo pasioma. ⁴Ĩ a sai õsimö ha pãhi pãhi tä nisamö toita apii, Teusö a na tä ĩsima sinomopö, ĩ tiki ha oto tä patete sutitile, ĩ tiki hĩtama. Ĩ ha ai ti holotoi ti ha oto tä patete hauhu sutitile, ĩ tiki pata hõto naioma. Ĩ ti õsimö pata ha oto tä holokoto ha mana tökö pi titihile ĩ a holokoto, Atão a hitihimo noai, ĩ ti ãkea konasoso noai ĩ ti, Teusö anö töpö noa thaa noai, polakapi maa makö patete ha ĩ tä sãöka noai, ĩ makö patete, ĩ na tökö titio kuoma. ⁵Ĩ ti holotoi ĩ ti hösöka ha polakapi ketupĩ töpö ãju ukutupö sutioma. Ĩ töpö hai, Teusö a wakala apii, ĩ a uni. Ti sohole ĩ ti hösöka ha ĩ ketupĩ töpö maisökö katötio noai, ĩ ha isöhaeu töpönö wanisala tä thaa noai, Teusö anö ĩ tä noa mapama sinomotima. Huki ĩ sa tä pewö a kateha totio mai kitä.

⁶Ĩ na tiki pewö hõtoa thamakömae. Ĩ na tiki pewö hõtoa thaa waikimakö noai ha, lisito soma paio noai, ĩ a sai kai õsimö ha Teusö a kuo noai, Teusö a täpä sinomo wi, ĩ tä wakala pewö hamö ĩ ha ĩ töpö lisi lisimo sinomo nö, Teusö a na ĩ töpö kalipalo sinomotima. ⁷Ĩ a sai kai tole tömö ai a sai kai ha Teusö a kua totile ha, ĩ ha pata tänö Teusö a täpä sinomo noai, sami ĩ pata tä pata lisito sisama. Ĩ tä wakala pewö hamö kuno mai. Sami inama tä na a lisipoö, ai tä inama ha a lisia kopasoö, ai tä inama ha a lisia kopasoö, ĩ na ĩ a pata kua sisatioma. Kamanö wanisala tä thaa hãto noai ĩ tä, kama hai ĩ isöhaeu töpö pi moti tä, wanisala tä thaa hãto noai ĩ tä, ĩ na tä kui tä noa mapamani pia salo, Teusö a kua totile, ĩ a sai kai ha ĩ pata tänö salo hiima a iä kai lisipasoma. Atu ha hiima a säpalö noai, ĩ hiima a iä tälö nö, hiima a iä kai lisipasoma. Tole tömö a sai kai kule, ĩ ha Teusö a kua totile ha, hiima a iä kai lisia tolepasoma.

⁸Ai tä inama na Teusö a kua totile, ĩ ha sami ĩ pata tä lisipo sisama kutenö, wi na makö pi kuupö? Teusö a õsi kua tolele ĩ anö makö pewö pi hatukumanöma salo, ĩ na makö pi kuu: ‑Ĩ Teusömo wi a sai kuo soma noai, ĩ a sai kua soa tä, Teusö a kua totile, ĩ ha sanöma makö pewö lisipasopö, tä hãkopa mai ha tä kua soa kule‑ ĩ na makö pi kuu totioö. ⁹Ĩ a sai kuo noai, ĩ uni tä kuo päoma. Huki tä kua nömöne, ĩ tä uni kuoma. Teusö a na nii tä, salo pö hiima säpalö noai ĩ pö, ĩ na tökö kui tökö totoma sinomo wi, ĩ tökönö töpö Teusömo wi ĩ töpö õsi totipo totio mai kitä. ¹⁰Teusö anö Cristo a simöpa paio mi tä, töpö Teusömo nö, Teusö a na nii tä, salo pö hiima säpalö noai ĩ pö, ĩ na tökö kui tökö totoa tä, ‑Makö Teusömo pi topa salo, ĩ nii ma tä oa sisalöö! Ĩ tuu koa sisalöö! Makö ami sanumo sinomopöö!‑ ĩ na pata töpönö töpö noa thaa sinomoma. Ĩ na töpö noa thaa totioma maaki, töpö õsi toma kõo totio maama. Önö kutenö huki Teusö anö makö noa thaa wi ĩ tute ta kua.

¹¹Huki Cristo a huma. Jesus pata tänö Teusö a täpä sinomo wi ĩ pata tä sai huma. Teusö a na makö õsi totia totipamani wi ĩ a. Hi tä hẽtu ha sai a na Cristo a kalipalo wi ĩ a sai toita sati ipö. Sanöma töpönö sai a thaa wi, ĩ a sai aiki päwö kuno mai. ¹²Sai a õsimö ha Teusö a kua totile, ĩ a sai kai ha a uni lisia waikipasoma. A uni lisia waikipasoma kutenö, a uni lisipo kota mai kitä. Ĩ a sai kai ha paka a iä pö, posi a iä pö, ĩ na iä pö kui iä pö kai lisipo mai, kama iä pö sai kai lisia totipasoma. Kama iä pö sai kai lisipalo nö, pö̃ a na kama iä pö totokö nö, sanöma makö õsi täapa kõo läoma. Makö õsi täapa kõo läoö ha, õsi temöo wi, ĩ tä mapo mai kitä.

¹³Sutu upa Moisés anö töpö noa thaa nö, ‑Posi a iä pö, paka iä pö, paka okalo ĩsi, ĩ na tökö kui, kamakö na ĩ tökö sopäkäköma, wanisala tä na pili makö ösö ausia kopaso kitä‑ ĩ na a kuuma. ¹⁴Ĩ na tä kuama maaki, huki Cristo a iä pö lotete sati ipö. Cristo a iä pönö makö õsi ausipasoma. Teusö a õsi kua tolele ĩ a kuo soatio wi, ĩ anö Cristo a simöaö ha, sanöma makönö wanisala ma tä thaa wi, ĩ tä pi na Cristo a säpamonasoma. A säpamonasoö ha, Teusö aiki, ‑Ĩ naköö! Tä topa waikia kuleö!‑ ĩ na a pi kuuma. Cristo a iä pönö makö õsi ausipasoma kutenö, makö kuati noai, ĩ tä tomöpo maa noai, huki ĩ tä maa totipaso keö! Ĩ tä mapasoö ha, Teusö a temö öpii ĩ a na makö kalipalotii.

¹⁵Önö kutenö, Teusö anö Moisés a noa thaa noai, Moisés anö ĩ ta wäsä nömöo noai, nö patapö töpönö ĩ ta hini totio maama kutenö, wanisala tä thaa noai, Cristo anö ĩ tä noa maa naia kopamani pia salo, a säpamonasoma. A säpamono nö, Teusö anö makö saia waikipalö noai, Cristo anö ĩ makö noa thaa wi, ĩ tute ta kua. Ĩ tute ma ta hinia totilöma, Teusö anö makö totiapala apa soatio kitä. ‑Kamisanö makö totiapala apa wi ĩ tä mapo mai kitäö!‑ Teusö a kuu noai, ĩ pitili ta kua tolea totio opa kitä.

^16-17Ai sanöma pata tä noma pia salo, waheta tä thaa nö, ‑Sa nomaso noai ha, ĩ na makö kua haiopököö!‑ ĩ na kama ai ĩ töpö noa thaa sinomoö. Pata tä noma paio mi tä, kama ai töpönö ĩ ta hini paio mai kitä. Kama ai töpö noa thaa waikio noai, ĩ tä waheta sãökama kuu wi, pata tä noma totiso noai ha, ĩ töpönö ĩ ta hini sisaö. ¹⁸Ĩ ta kuu wi na, ĩ na Teusö anö sanöma makö noa thaa wi, ĩ na ĩ ta kua hö̃töa kule. Teusö anö sanöma töpö noa thaa soma noai, ĩ na ĩ ta kuo hö̃töoma: ‑Salo a hiima iä pö kupo mi tä, sa töpö noa thaa wi ĩ ta tomöpo mai kitäö!‑ ĩ na Teusö a pi kuuma. ¹⁹Moisés anö isöhaeu töpö noa thaa wi, ĩ tä waheta sãökököma. Ĩ tä waheta sãökökö nö, ĩ töpö na Moisés anö ĩ tä pewö a wäsäma. Ta wäsä nö, paka a, posi a, ĩ na kökö kui kökö säpalö noai, maa tuu na ĩ kökö iä tikiliki nö, ĩ tuunö ĩ tä waheta mãi sopäkälalöma. Isöhaeu töpö pewö mãi sopäkäa nainanöma. Hisopo ti na oweha kõiki hanahai ĩ a kõiki õkakö nö, kõiki heumanö nö, ĩ töpö pewö mãi sopäkälalöma. ²⁰Töpö mãi sopäkälalö nö, ‑“‘Makö noa thaa wi, ĩ ta hini totioheö!’ ĩ na Teusö anö makö noa thaa noai, ĩ pitili taö!” ĩ na makö kuupö, ĩ a iä pö‑ ĩ na Moisés a kuuma. ²¹Ĩ na Moisés anö tä thama kua noai na, ĩ na töpö Teusömo kuapö a sai thakö noai ĩ a sai, ĩ a sai na tökö pewö titio noai ĩ tökö pewö, iä iä tänö Moisés anö ĩ tökö pewö mãi sopäkälalöma. ²²‑Ĩ iä iä tänö ĩ tökö pewö ausipasopöö!‑ ĩ na Moisés anö töpö noa thama. Ai tä säpa mi tä, iä iä tä kupo mi tä, sanöma makönö wanisala ma tä thaa wi, ĩ tä noa mapo mai kitä.

Cristo a säpamonaso noai, ĩ tökö, wanisala tä noa maa kopaso noai ĩ ta

²³Moisés anö Teusömo wi a sai thakö noai ĩ a sai, ĩ a sai õsimö ha tökö titio noai ĩ tökö, ĩ na tökö kui tökö pewö hai, ĩ uni tökö pewö. Hi tä hẽtu hamö Teusö a sai pö kupoli, ĩ a sai uni kuoma. Moisés anö sai a thakö noai ĩ a sai, ĩ a sai õsimö ha wani tökö titio noai ĩ tökö, ĩ na tökö kui, hiima kökö iänö ĩ tökö pewö ausipalöma. Iä iä tänö ĩ tökö pewö mãi sopäkäpa maama aköna, ĩ tökö ausipo maa noa kipi. Ĩ na tä kua tä, Teusö a kupoli ha, ĩ hamö hiima kökö iänö makö ausipamo mi kutenö, ĩ hamö makö lisipo laso mai kitä. Ai tiko tä iä toita sati ipii tä iänö makö lisipama totio sisaö. ²⁴Teusö a walo sinomopö, sanöma töpönö ĩ a sai thakö noai, ĩ a sai ha Cristo a lisipo maama. Ĩ a sai hai, Teusö a kua totipoli, ĩ a sai uni kuoma. Hi tä hẽtu ha Teusö a kupoli ha, ĩ a sai na Cristo a lisia sisapaso lasoma. Huki sanöma makö pasilipo totio pia salo, Teusö a kua totipoli ha, ĩ ha Cristo a kua naia nasoa. ²⁵Teusömo wi a sai õsimö ha a sai kai kua tolele, ĩ a sai kai õsimö ha Teusö a kua totile ha, pata tänö Teusö a täpä sinomo wi, ĩ pata tä patanö ĩ ha salo a hiima iä kai lisipo sinomoö. Ai tä inama na a lisipasoö, ai tä inama na a lisia kopasoö, ĩ na a pata kua sinomotii. Ĩ na Cristo a kua mi. Cristo a säpamo sinomo mai kitä. Teusö a kua totipoli ha, ĩ ha Cristo a lisi lisimo holepalo opa mai kitä. ²⁶Teusö a kua totipoli hamö, ĩ hamö ĩ tä inama pewö hamö Cristo kama iä pö kai lisi lisimo kõataloti lasoa aköna, ĩ tä inama pewö hamö a pea totila pi. Ĩ tä inama pewö hamö Jesus a säpamo kõatalotima aköna, ĩ tä inama pewö hamö a pea kõapalo toitio noa kipi. Somi tä sai tä Teusö anö töpö pewö thapalö noai, ĩ tä Jesus a peaö, a pea kõo, a pea kõo, ĩ na a pea kua kõataloti noa kipi. Ĩ na a kua maama. Huki hi masita tä uli mapasopö tä atea waikia tä, sanöma töpönö wanisala tä thaa wi, Cristo anö ĩ tä noa mapamani pia salo, sami a pi walosolö pa a säpamoa soasoma. ²⁷Sami sanöma makö pi nomapo päo wi tä kua. Makö nomaso tä, Teusö a na makö waloköma, makö kuati noai, Teusö anö ĩ tä pewö a kateha hasulua totia apöpali kitä. Tä kateha hasulua totia apa läa päpalö nö, Jesus a thapo mai, Teusö anö ĩ töpö täa kõo läo mai kitäö! Ĩ na tä kua tä, Jesus ma thapo wi ĩ makö täa läa kõa asali kitäö! ²⁸Sami sanöma makö noma pi kupo wi na, ĩ na sami Cristo a noma pi kua hö̃töa pälasoma. Sanöma töpö pewönö wanisala tä thaa noai, ĩ tä noa mapamani pia salo, Cristo a säpamonasoma. A säpamonaso noai, waiha ĩ a waloa kõki kitä. A walo kõa tä, sanöma töpönö wanisala tä thaa noai, ĩ tä noa na a säpamo kota mai kitä. Sanöma töpönö Cristo a walo taa konai, Cristo anö ĩ töpö täapa kõa läo pia salo, a waloa kõkiö!

¹Moisés anö isöhaeu töpö noa thaa noai, ĩ uni tä päwö. Waiha Teusö anö sanöma töpö pewö totiapala apa kuköpö tä uni kuoma. Ĩ uni tä kuo päoma kutenö, waiha Teusö anö sanöma makö totiapala apa kuköpö tä na töpö pi hatukuo totio paio maama. Ĩ tä inama pewö hamö ĩ töpönö wanisala tä tha apati noai, ĩ tä noa na salo pö hiima sä sinomotima. Önö kutenö, Teusö a na ĩ töpö noimo noai, ĩ töpönö ĩ salo pö hiima säpa sinomotima maaki, Teusö a na ĩ töpö õsi ausipamo totio maama. ²Ĩ töpönö wanisala tä tha apati noai, Teusö anö ĩ tä noa mapama paio maama. Ĩ tä noa matamanöma aköna, ‑Huki sa õsi ausi‑ ĩ na töpö pi kuu noa kipi. Maaki, ĩ töpönö wanisala tä thaa noai, Teusö anö ĩ tä noa mapama paio maama kutenö, ĩ töpö aiki, ‑Häö. Sa õsi ausi miö! Wanisala sa tä thaa noai, ĩ tä noa kua soaleö!‑ ĩ na ĩ töpö pi kutima. Ĩ na ĩ töpö pi kuti maama aköna, wanisala tä noa na salo pö hiima säpati noai, ĩ tä mapaso noa kipi. ³Ĩ tä inama pewö hamö wanisala tä thaa noai ĩ tä na salo pö hiima sä sinomoti nö, ‑Haö. Wanisala sa tä thaa noai, ĩ tä noa kua hãtoa soale kitä‑ ĩ na ĩ töpö pi kuu sinomoma. ⁴Sanöma töpönö wanisala tä thaa wi, paka iä pö, posi a iä pö, ĩ na kökö iä kui kökö iänö ĩ tä noa mapo mai kitä.

⁵Önö kutenö, hi masita tä uli ha Cristo a huu tä, Teusö a na,

‑Sanöma töpönö salo pö hiima säpalö noai ĩ pö salo, nii tä, ĩ na tökö kui, kawa na tökö totoki wi, ĩ wa tä pii sisa mai kitä. Kama sanö kawa na sa pewö totoköpö, ĩ wa tä pii satia apa kutenö, kawa na pili sa sai pewö totoköpö, kawanö sa pewö thapalöma.

⁶Sanöma töpönö wanisala tä thaa wi, ĩ tä noa mapamanöpö, salo pö hiima ĩsi, nii tä, ĩ na tökö kui, kawa na ĩ tökö totoma wi, ĩ tökö na wa pi mönaha sisa mai kitä.

⁷Önö kutenö, hapa, hisa ha sa kua kuleö! “Ĩ na wa kuapöö!” ĩ na wa kuu wi, ĩ na sa kua totiopö sa huu kuleö! Au waheta tä na, “Ĩ na wa kuapö” ĩ na wa kuu noai, ĩ na sa kua totio pia salo!‑

ĩ na Jesus Cristo a kuuma.

⁸‑Sanöma töpönö wanisala tä thaa wi, ĩ tä noa mapamanöpö, salo pö hiima säpalö noai ĩ pö, nii tä, ĩ na tökö kui, kawa na ĩ tökö totoki wi, ĩ wa tä pii sisa mai kitä. Ĩ tä na wa pi mönaha sisa mai kitäö!‑ ĩ na Cristo a kuuma. ‑Teusö a na salo pö hiima ĩsi totoaköö!‑ ĩ na Moisés anö kolo töpö noa thama maaki, ‑Salo pö hiima ĩsi totoki wi, ĩ wa tä pii mi‑ ĩ na Cristo a kuuma. ⁹Ĩ na a kuu nö, ‑Hapa. “Ĩ na wa kuapöö!” wa kuu wi, ĩ na sa kua totiopö sa huu keö!‑ ĩ na a kuu nömöoma. Önö kutenö, Jesus Cristo a säpamoa waikilasoma kutenö, Teusö a na wanisala tä noa na salo pö hiima säpalö nö, ĩ salo pö totoa sinomo noai, huki Teusö anö ĩ tä mapamanöma. ¹⁰Jesus Cristo aiki, ‑Hapa. Kamisa na, “Ĩ na wa kuapöö!” ĩ na wa kuu ha, ĩ na sa kua totio hö̃töo kitäö!‑ ĩ na a kuu nö, sanöma makönö wanisala ma tä thaa wi, ĩ tä noa na Teusö a na kama pili a pewö sai totokö nö, a säpamonasoma. A säpamonasoma salo, sanöma makö õsi ausio wi tä kupasoma.

¹¹Teusö a täpä sinomo wi, ĩ töpö Teusömo pia salo, ĩ tä wakala pewö hamö Teusömo wi a sai ha ĩ töpö pewö kalipalo sinomoö. Wanisala tä thaa noai, ĩ tä noa na ĩ töpönö salo pö hiima ĩsi totota sinomo kule maaki, ĩ tänö wanisala tä noa mapo mai kitä. ¹²Ĩ na Cristo a kua mane. Sanöma töpönö wanisala tä thaa wi, ĩ tä noa na sami Cristo a pi säpamoa sisasoma. A säpamoa waikilasoma kutenö, wanisala tä noa na salo pö hiima sä sinomo wi, Teusö anö ĩ tä pii mai kitä. Cristo a säpamono nö, Teusö a na kama totoa sapa koiki nö, Teusö a kotö ha a loikilö nö, ĩ ha a loa soatia kupoli. ¹³Ai töpönö Cristo a wanipo wi, Teusö anö ĩ töpö peama apa nö, Cristo a na, ‑Ĩ wa töpö simöa sinomopöö!‑ ĩ na a kuu kitä. Teusö anö ĩ töpö peama piale, Cristo anö ĩ tä tati kule. ¹⁴Sanöma töpönö wanisala tä tha apati noai, Cristo anö ĩ töpö õsi ausia totia asapalö nö, ĩ töpö õsi totipalöma. Sami kama iä pö pi halaso noai, ĩ tänö ĩ töpö totipalö noai, ĩ töpö õsi ausia apa waikipalöma kutenö, ĩ töpö õsi wanisalapo kõo mai kitä.

¹⁵Ĩ na Teusö a õsi kua tolele ĩ a kuu naioö. Ĩ a hapalo nö,

¹⁶‑“Ipa ai sa töpö noa thaa wi, kama töpö õsi na ĩ sa tä titiki nö, kama töpö õsi na ĩ sa tä sãökökö kitäö!” ĩ na Teusö sa kuu kuleö!‑ ĩ na Teusö a õsi kua tolele ĩ a kuu nö,

¹⁷‑“Ĩ töpönö wanisala tä thaa noai, ĩ sa tä noa maa waikipamanöma kutenö, ĩ tä noa na sa töpö peama kota mai kitäö!” Teusö sa kuu kuleö!‑

ĩ na Teusö a õsi kua tolele, ĩ na ĩ a kuu nömöoma.

¹⁸Önö kutenö, sanöma töpönö wanisala tä thaa wi, ĩ tä noa maa waikipasoma salo, wanisala tä thaa wi, ĩ tä noa na salo pö hiima säpa sinomo wi, ĩ tä kua kota mai kitä. Ĩ tä noa na Cristo a säpamo kota naio mai kitä.

Huki Teusö a na makö walo ateo kili mai kitä

¹⁹Ipa pö! Jesus Cristo a säpamono nö, a iä pö halasoma kutenö, Teusö a kua totile, ĩ a sai uni õsimö ha makö lisipo kili mai kitä. ²⁰Teusö a kua totile ha Jesus anö makö walomaköpö, piliso tutei piliso walomaköma. Teusömo wi a sai õsimö ha watata ösökö katöa soa tä, Teusö a kua totile ha piliso walo maama. Jesus a säpamono nö, pili a sai waniapasoö, watata ösökö katöa õsimöa läle, ĩ ösökö wania naipasoö, ĩ na tä kupasoma kutenö, Teusö a kua totile ha, piliso waloa totiköma. Ĩ tiso ha makö huu nö, makö õsi temöpaso kitä. ²¹Huki makö pasilipopö, pata tänö Teusö a täpä sinomo wi, Teusö a sai pö na ĩ Jesus pata tä kaikanamo wi ĩ a. A kaikanamo nö, Teusö a sai pö thapo wi ĩ a.

²²Önö kutenö, makö pitilimo totio opapököö! ‑Jesus a pitili‑ ĩ na makö pi kutipököö! ‑Wanisala sa tä thaa noai, ĩ tä noa kua hãtoa soa‑ makö pi kuu mai, maa tuu ausii tuunö makö uni salupamonasopököö! Ĩ na makö kua nö, Teusö a na makö walo ateta sinomopököö! ²³Teusö aiki, ‑Makö nomano nö, kamisa kupoli ha, ĩ ha makö waloamaki kitäö!‑ ĩ na Teusö a kuuma kutenö, ĩ ha makö waloa totiki kitä. Önö kutenö, kamakö aiki, ‑“Sa nomano nö, Teusö a na sa konasolö kitäö!” ĩ na ai töpö na sa kuu wi, ĩ pitili ta‑ ĩ na makö pi kuu tao soatiopöö! ²⁴Makö pi tapoa paiki nö, ‑Makö noimaso totiopöö! Makö totiapalomo sinomopöö!‑ ĩ na pö kuu sinomoö! ²⁵Jesus a thapo wi ĩ töpö kokamo sinomo wi maaki, ai töpö kokamo maa kopasoma. Ĩ töpö kokamo maa kupaso noai na, ĩ na makö kua naio maapöö! Makö kokamo nö, ‑Ĩ naköö! Ĩ na makö kua totiopököö!‑ makö kuu sinomoö! Jesus a huu kõo piale, ĩ tä wakala ateo kõo waikile, ĩ ma tä taö öpa salo, ‑Ĩ na makö kua totiopöö!‑ ĩ na makö kuu totio sinomopöö!

²⁶Jesus ta pitilii ĩ ma ta taö waikioma tä, ‑Päla. Wanisala sa tä thaa sinomo pi topa apaö‑ ĩ na makö pi kuu nö, wanisala ma tä thaa sinomoti ha, ĩ wanisala ma tä thati wi, ĩ tä noa mapamani wi, ai tä kua mai kitä. Wanisala tä thaa wi ĩ tä noa mapamanöpö, Teusö a na tä totoköpö, ai tä kua mai kitä. ²⁷Makö kilipaloti wi, ĩ tä kua sisaa. Kamakönö wanisala ma tä thaa noai, ĩ tä noa na Teusö anö makö peama piale, ĩ tä na makö kili totioö. Koa taka patanö Teusö ma wanipo wi, ĩ makö mapama piale, ĩ tä na makö kili wi, ĩ tä kua sisaa. ²⁸Moisés anö töpö noa thaa noai, ĩ tä na, ‑Päla totiwö‑ ĩ na ai tä kuu ha, ‑Päla‑ ĩ a kuu pole, ai polakapi töpönö ĩ ta hininö nö, pata töpö na ta wäköma, pata töpö aiki, ‑Moisés a kai na a wani pälamo opöle, ĩ a wani säpalöö!‑ ĩ na pata töpö kuu.

²⁹Ĩ na tä kua manu kule, ai tänö Teusö a ulupö wanipo nö, a hosali ha, Teusö anö ĩ a peama satia apa kitä. Huki Teusö anö makö noa thaa nömöa tä, Cristo a säpamono nö, kama iä pö halaso wi, ĩ a iänö ai tä õsi ausipasoma maaki, ĩ a õsi ausipaso noai ĩ aiki, ‑Cristo a iänö sanöma makö õsi ausipa mai kitä‑ a pi kuu nö, Teusö a õsi kua tolele ĩ anö makö totiapala apati wi, ĩ a na ĩ a hapalo pi wasöa apaö ha, pe epii Teusö anö ĩ a peama satia apa kitä. ³⁰Teusö a kuu noai, ĩ ma tä taö öpaö. Ĩ na Teusö a kuuma: ‑Sa wanipo wi, ĩ töpö na sa suo hö̃töo kitäö! Sa peama noai, ĩ sa töpö peama hö̃töo kitäö!‑ ĩ na Teusö a kuuma. ‑Ipa töpönö wanisala tä thaa noai, ĩ tä noa na pata sanö ĩ sa töpö peama kitäö!‑ ĩ na a Teusö a kuu naioma. ³¹Teusö a temö öpii, ĩ anö töpö huöli wi, ĩ tä kilihia apa.

³²Makö kuati noai, ĩ tä na makö pi motöpo maikiö! Teusö anö makö õsi wakalapamanö nö, makö pi hatukupaso noai ha, ai töpönö makö peama apatima maaki, makö kasiapalo satia apa hö̃tötioma. ³³Ai töpö mamo tetela tä, ai töpönö makö a kateha wanisala apa nö, makö pepalama apatima. Ĩ na tä kua tä, makö pea kuati noai na, ĩ na ai töpö pea kua hö̃tötio noai, ĩ töpö na makö pi honipo salo, ‑Ĩ töpö na sa noima kuköma, ai töpönö sa peama naio matimöö!‑ ĩ na makö pi kuuma maaki, ‑Ai töpönö sa peama päo‑ ĩ na makö pi kuu nö, ĩ ai töpö pepalo opati noai, ĩ töpö na makö noimo satia apa hö̃tötioma. ³⁴Cristo a thapo wi ĩ tä noa na titita wi a sai õsimö ha ai töpö tititio noai, ĩ töpö pea kuati noai na, ĩ na makö pea kua naitioma. Ai töpönö au wani tökö pewö tälölöma maaki, makö pi topa satio opama. ‑Kamisa na Teusö anö tä totopö noai, ĩ tä toita sati ipöwö. Ĩ tä mapo mi‑ ĩ na makö pi kuu salo, ‑Pälaö! Ĩ töpönö ipa wani tökö pewö tälölöma maaki, sa hĩso mai kitäö!‑ ĩ na makö pi kuuma. ³⁵Önö kutenö, pö kili tihöö! ‑Teusö a pitili‑ ĩ na makö pi kuu totio wi, ĩ tä hosa tihöö! Makö kili mai, ‑Teusö a pitili‑ makö pi kuu totio wi, ĩ makö na Teusö anö pe epii noa tä totoa asaki kitäö!

³⁶Önö kutenö, makö kasiapalo opapöö! Makö kasiapalo opa nö, ‑Ĩ na makö kuapöö!‑ ĩ na Teusö anö makö noa thaö ha, ĩ na makö kua totio opati kitä. Teusö anö makö noa thaa wi, ĩ ma ta hini totiköma, ‑Kamakö na ĩ sa tä totoki kitäö!‑ ĩ na Teusö a kuu noai, ĩ ma tä täa totili.

³⁷Ĩ na Teusö tä waheta kuu:

‑Tetepo mai ha, waiha a huu kota piale, lope epii a huu kota pia saloö!

³⁸Sanöma sa töpö totipalö noai, “Teusö a pitili” ĩ na ĩ töpö pi kuu mapo mi tä, töpö õsi temöo soatio kitäö! Ĩ na tä kua tä, kamisa na ai sanöma tä waloköpö, tä huu kimi maaki, a wani sapa kopasolö ha, ĩ a na sa pi mönaha mai kitäö!‑

ĩ na Teusö tä waheta kuu.

³⁹Makö kopasolö wi, ĩ makö mai kitä. Önö kutenö ai õsi töpö pepalo opa piale, ĩ tä uli ha makö huu pia wi makö mai kitä. ‑Teusö a pitili‑ makö pi kuu totio wi ĩ makö pasi kutenö, Teusö anö makö õsi temöa asapalöma. Önö kutenö, Teusö a na makö konasolö kitä.

‑Teusö a pitili‑ nö pata pö töpö pi kuu totio noai ĩ ta

¹‑Teusö a pitili‑ ĩ na wa pi kuu totiköma, ‑“Ĩ na tä kua kuki kitäö!” sa pi kuu pole, waiha ĩ tä kua tolea totiki kitäö!‑ ĩ na wa pi kuu totiki kitä. ‑Ĩ sa tä tapa totio mai maaki, ĩ tä kua totiatalo opaö‑ ĩ na wa pi kuu kuki kitä. ²‑Teusö a pitili‑ nö patapö töpö pi kuu totioö ha, ĩ töpö na, ‑Makö topa‑ ĩ na Teusö a kuuma.

³‑Teusö a pitili‑ makö pi kuu manu kule, kamakö aiki, ‑Hi masita tä uli, sanöma töpö pewö, hi tä hẽtu hamö tökö pewö kupoli ĩ tökö, ĩ na tökö kui, Teusö anö ĩ tökö pewö thapalöma. A hapalo päoö ha, tökö pewö kuköma‑ ĩ na makö pi kuu sinomoö. ‑Ma tä tapa mane ĩ tänö, ma tä tapa pole, ĩ tä pewö thapalöma‑ ĩ na makö pi kuu. ‑Teusö a pitili‑ ĩ na makö pi kuu kuköma, ĩ na makö pi kuu.

⁴Apeu aiki, ‑Teusö a pitili‑ a pi kuu salo, Teusö a na salo a hiima säpalö noai ĩ a salo totoa makokoa asaköma. Kama hai ĩ pepala Kaĩ anö Teusö a na nii tä totoa naiköma maaki, Apeu anö tä totokö noai, ĩ tä toita satio opa asama. ‑Teusö a pitili‑ a pi kuu asama kutenö, Teusö aiki, ‑Kamisa na wa tä totopae, ĩ tä toita‑ ĩ na a kuu nö, ‑Kawa toita waikiwö‑ ĩ na a kuuma. ‑Teusö a pitili‑ Apeu a pi kuu totioma kutenö, a nomasoma maaki, kamakö na a uni hapalo soa.

⁵Ĩ na tä kua tä, Enoki aiki, ‑Teusö a pitili‑ a pi kuuma kutenö, a noma maama. Teusö anö temö temö a supölöma. A supölöma, ai töpönö a tapa kõo maama. ‑Teusö anö Enoki a sua paiolö mi tä, Enoki anö Teusö a pi mönahapamatima‑ ĩ na Teusö tä waheta kuu.

⁶Önö kutenö, ‑Teusö a pitili‑ wa pi kuu mi tä, Teusö wa pi mönahapama mai kitä. ‑Teusö a kua. A kua kutenö, sanöma makönö Teusö ma pii totile, Teusö anö ĩ makö pasilipali kitäö! Teusö a na makö walo pi topa apati wi, Teusö anö ĩ makö waloamaki kitäö!‑ ĩ na wa pi kuu totia mi tä, wa Teusömo totio mai kitä. Teusö a na wa walo laso mai kitä.

⁷Ĩ na tä kua tä, Noé aiki, ‑Teusö a pitili‑ a pi kuu totia salo, Teusö a kai a hini totioma. ‑Waiha ĩ na tä kua kuki kitäö!‑ ĩ na sanöma töpö pi kuu tai mio opama maaki, ‑Ĩ na tä kua kuki kitäö!‑ Teusö a kuu noai, Noé anö ĩ ta hininö nö, kutiata ösö pata thapalöma. Ĩ ösö pata na Noé anö kama ai töpö kai titia asaköma kutenö, ĩ töpö nasi tupo asa maama. ‑Teusö a pitili‑ Noé a pi kuu asama kutenö, ‑Ki ai töpönö Teusö a thapo pasio maa noai, ĩ töpö ta wanisala apa pasio noa‑ ĩ na makö pi thamaö. ‑Teusö a pitili‑ Noé a pii kuu ha, ‑Noé a toita‑ ĩ na Teusö a pi kuu hö̃töoma.

⁸Ĩ na tä kua tä, Abraão aiki, ‑Teusö a pitili‑ a pi kuu totia salo, Teusö a hinima. Teusö anö a sailö nö, ‑Kawa na sa tä uli totoa piale, ĩ hamö a hulolöö!‑ ĩ na Teusö a kuu ha, Abraão anö kama hai ĩ tä uli takölö nö, a hulasolöma. ‑Witi tä uli ha Teusö anö sa waloa totimakö taso pia salo?‑ ĩ na a pi kuu päla nö maaki, a hulasolöma. ⁹‑Ĩ sa tä uli totoki kitäö!‑ Teusö a kuu noai, ĩ tä uli ha Abraão a waloikitö nö, ‑Tiko sa pasiwöö!‑ a pi kutima maaki, ‑Teusö a pitili‑ a pi kuu nö, ĩ tä uli ha a kutioma. Sai a sai ha a kuo totio maama. Salo ösö sai pakitai a sai ha a kupaloti päoma. Abraão a hai ĩ ulu Isaki a, Isaki a hai ĩ ulu Jacó a, ĩ na kilii töpö na, ‑Hi sa tä uli totoa nömöki kitäö!‑ ĩ na Teusö a kuu nömöne, salo ösö sai pakitai sai kökö na ĩ töpö kupalo naitioma. ¹⁰Abraão a pi tapoiki nö, ‑Teusö tä uli ha sai pö kupoli, ĩ pö sai ha sa kutio nömöo pia salo‑ ĩ na Abraão a pi kutima. Teusö aiki, ‑Ĩ na sai sa pö thaa thaki pia salo‑ ĩ na Teusö a pi kuu noai, ĩ sai pö kolo lototopa apö kutenö, sai pö mapo mai, ĩ pö sai na Abraão a kuo nömöo laso pia wi, ĩ tä na Abraão a mamo läpalotima.

¹¹Pusopö Sata aiki, ‑Teusö a pitili‑ a pi kuu naioma. ‑“Wa patasoma apö waiki maaki, au ulu wa thapali kitäö!” ĩ na kamisa na Teusö a kuu noai, ĩ a pitilimo opaö‑ ĩ na Sata a pi kulasoma kutenö, kama hai ĩ ulu a wai thapalöma. ¹²Önö kutenö, Abraão a patasipöo opa waikio noai maaki, kama hai ĩ tolewö töpö satehea apöpasoma. Sitikali pö satehe epö kui na, maka maka tökö satehe epö kui na, ĩ na Abraão a hai ola tolewö töpö kupasoma.

¹³Sa töpö a katehahe, Teusö a na ĩ töpö pewö aiki, ‑Teusö a pitili‑ ĩ töpö pi kuu soatio pamö, töpö nomasoma. ‑Ĩ sa tä totoki kitäö!‑ ĩ na Teusö a kuu noai, ĩ töpönö ĩ tä täa hö̃köa totio maama. ‑Sa tä totoki kitäö!‑ Teusö a kuu noai, pãui ĩ töpönö ĩ tä uni tapati päo nö, töpö pi mönaha apatima. ‑Hi tä uli hai, ipa tä uli sai mai kitä. Teusö a kupoli ha, ĩ ha ipa tä uli sai kua soa kupoli. Hi tä uli hamö sa huti paio päoö‑ ĩ na ĩ töpö kuu hoka apatima. ¹⁴Kamakö aiki, ‑Ĩ na ĩ töpö kuti noai, ĩ töpönö ai tiko tä uli ta pi ipa noa. Hi tä hẽtu hamö tä uli kupoli, kama töpö hai ĩ tä uli sai kutenö, ĩ tä uli na ĩ töpö ta pilio pi topa satio opa laso noa‑ ĩ na ĩ töpönö makö pi thamaö.

¹⁵‑Makö pilio soma tasopili hamö, ĩ hamö makö pilia kõo kitä nököö!‑ töpö pi kuu maama. Ĩ tä uli ha ĩ töpö kõo pi topaalöma aköna, ĩ tä uli ha ĩ töpö konasolö noa kipi. ¹⁶Hi tä hẽtu hamö tä uli kupoli, ĩ tä uli toita sati ipö asai, ĩ tä uli pii satia apa asamae. Önö kutenö Teusö aiki, ‑Ĩ töpö hai, ipa töpö. “Teusö ma thapo wi ĩ maköö!” ĩ na ĩ töpö kuu wi, ĩ ipa töpö sai totiwöö!‑ ĩ na Teusö a kuu kili mi kutenö, ĩ töpö kutiopö, Teusö anö sai pö thaköma.

^17-18Ĩ na tä kua tä, ‑Teusö a pitili‑ ĩ na Abraão a pi kuu totio hö̃tötioma. Teusö anö a wapa nö, ‑Au ulu wa säpalö nö, kamisa na au ulu a totopaö!‑ ĩ na Teusö a kuu ha, Abraão aiki hö̃töwö, ‑Awai‑ a kuu nö, Teusö a na kama hai ulu a totoki pia salo, ‑Ipa ulu sa säpakö o‑ ĩ na a pi kuuma. Kama hai ĩ ulu Isaki a kupo paio mi tä, Teusö aiki, ‑Au ulu Isaki a kupo pia manu kule, au ola töpö satehea apöpaso kitäö!‑ ĩ na Teusö a kuu ha, Abraão a pi mönaha apama maaki, ‑Au ulu a säpalöö!‑ waiha, ĩ na Teusö a kuu ha, ‑Awai. Ipa ulu sa säpali kitä‑ ĩ na Abraão a pi kuu hö̃töoma. ¹⁹Ĩ na a pi kuu nö, ‑Ipa ulu sa säpali kitä maaki, Teusö a lotete epö kutenö, ipa ulu a temöa komani kitäö!‑ ĩ na Abraão a pi kuuma. Ĩ na tä kua tä, Isaki a säpa totio maa noai kitä maaki, ‑Teusö anö Abraão a hai ĩ pelupö a nomawö temöa komanö nö, Abraão a na a totoa kõköma‑ ĩ na tä kuu wi ta kua.

²⁰Ĩ na tä kua tä, Isaki aiki, ‑Teusö a pitili‑ ĩ na a pi kuuma kutenö, kama hai ĩ pelupö töpö Jacó a, Esaú a, ĩ na kilii töpö na, ‑Teusö anö makö totiapala apa kuki kitäö! Tolewö makö totiapala tolea kuki kitäö!‑ ĩ na Isaki a kuuma.

²¹Jacó a noma pia tä, ‑Teusö a pitili‑ ĩ na a pi kuu totioma kutenö, kama hai ĩ pelupö José a hai ĩ ulu töpö na a hapalo hätäpo nö, ‑Teusö anö wa totiapala haiki kitäö!‑ ĩ na a kuu hätäpoma. Ĩ na a kuu nö, a hitihimo sinomo wi, ĩ tinö a pasihiki nö, Teusö a na a hapalo nö, ‑Wa totiatalo opatiwöö!‑ ĩ na a kuuma.

²²Ĩ na tä kua tä, José aiki, ‑Teusö a pitili‑ a kutima kutenö, a noma nömöo pia salo, ĩ na kama hai ĩ isöhaeu töpö noa thaa tolea nömöoma: ‑Hi Esitu tä uli ha makö pewö husolo nö, ki hamö makö konasolöpököö!‑ ĩ na a kuu nö, ‑Sa nomao noai ha, makö huso salo, pili sa thuu tupö tälölöö!‑ ĩ na José anö töpö noa thama.

Moisés a kuati noai ĩ ta

²³Ĩ na tä kua tä, Moisés a hai ĩ pö̃ a, pöpönö a, ĩ na töpö kui, ĩ töpö aiki, ‑Teusö a pitili. Teusö a lotete sati ipö‑ ĩ na ĩ töpö pi kuu totia apa kutenö, Moisés a wai kupasoö ha, 3 pilipoma kökö kui kökö pilipoma na a wai sosamakömae. Esitu tili tä kaikana aiki, ‑Wano ose kupasoö ha, wa säa soatalöö!‑ ĩ na kaikana tä patanö isöhaeu töpö noa pewö thama maaki, Moisés a pö̃ a, pöpönö a, ĩ na kilii töpö aiki, ‑Ipa ulu a wai liähä äpö sai taköö!‑ ĩ na töpö pi kuu nö, ‑Pälaö! Kaikana tä na makö kili mai kitäö! Kaikana ma tä kai a hini mai kitäö!‑ ĩ na töpö kuu nö, Moisés a wai sosamakömae.

²⁴Ĩ na tä kua tä, kaikana tä hai ĩ pete anö Moisés a patamanöma maaki, a patalo nö, ‑Kamisa hai ĩ isöhaeu sa pasiwöö! “Kaikana tä hai ĩ pete a hai, Moisés a pöpönö a” pö kuu tihöö!‑ ĩ na Moisés a kuuma. ²⁵Wanisala tä thaa wi, ĩ tä na sanöma töpö puko opa wi maaki, Moisés aiki, ‑Wanisala tä na sa puko wani ipö saiö! Wanisala tä thaö ha, töpö puko opa wi maaki, töpö puko opa wi, ĩ tä maa haito opaö‑ ĩ na Moisés a pi kuuma. Esitu tili töpönö Teusö a hai isöhaeu töpö pepalama apati tä, Moisés aiki, ‑Isöhaeu sa naiwöö! Esitu tili töpönö sa peama naio soatapököö!‑ ĩ na a pi kuuma.

²⁶Ĩ na tä kua tä, ‑Waiha, kamisa na Teusö anö noa tä totopi kitäö!‑ ĩ na Moisés a pi kuu sinomo salo, ‑Hi Esitu tä uli ha wani tä toita apii tä kule, ĩ sa tä pii mai kitäö! Teusö anö kaikana tä saia totio piale, ai töpönö ĩ a peama thama pia kule na, ĩ na esitu tili töpönö sa peama thama naio kuköpöö! Sa pea naio kuki wi ĩ tä noa toita sati ipö kitäö!‑ ĩ na Moisés a pi kuu sinomotima. ²⁷‑Teusö a pitili‑ a pi kuu salo, Esitu tä uli hosalölöma. Tä uli hosalölö nö, tiko hamö a hua konasolö ha, pe epii esitu tili tä kaikana hĩso opama. A hĩso opama maaki, ĩ a na Moisés a kili maama. Teusö a tapamo hatuka totio mai maaki, Moisés anö ĩ a uni tapa apati salo, a sapapo pi topa kõo maama. ²⁸‑Teusö a pitili‑ ĩ na a pi kuti salo, isöhaeu töpö ulu wano töpö ose kupo soma wi, ãju tänö ĩ töpö säpa maapö, ‑Ipa isöhaeu pö! Makö pewö pásökoamopököö! Makö pásökoamo nö, oweha ma kökö sälalö nö, sai päka ha iä iä tä sanöaköheö!‑ ĩ na Moisés anö töpö noa thama.

²⁹Ĩ na tä kua tä, isöhaeu töpö aiki, ‑Teusö a pitili‑ töpö pi kuuma kutenö, Hanahai a kosoto mötali pata hamö piliso hãsiti pata kuköma. Ĩ tiso kukö noai, ĩ tiso pata hamö töpö pökatökö lasoma. Ĩ tä noa ha, esitu tili töpö wasunö isöhaeu töpö nasö po nö, ‑Makö pökatöa haitakö lasopököö!‑ ĩ na töpö kuu kule maaki, maa tuu pata koka kopalo nö, töpö pewö sohopakö nö, töpö nasi pewö tupasoma.

Kanaã tä uli ha isöhaeu töpö kuati noai ĩ ta

³⁰Isöhaeu töpö aiki, ‑Teusö a pitili‑ töpö pi kuu salo, jetikó tili töpö sai pö pata na tä pata hokolole, ĩ ha ĩ isöhaeu töpö iototati pa, 7 tä mumi maa kutalo nö, tä pata hokolole, ĩ ta pata waniapasoma. ³¹Jetikó tilisoma tä Haapi a hilo wi, wano töpö na ĩ a suö sakapalo opa sinomoti noai, ĩ aiki, ‑Teusö a pitili‑ ĩ na ĩ a pi kuu kuköma kutenö, jetikó tili töpönö Teusö a hini maa noai, Teusö anö ĩ töpö säpama kule maaki, Haapi a säpama pasio maama. Isöhaeu töpönö Jetikó tä uli pata tamati noai, Haapi anö ĩ töpö noama salo, töpö totiapala nö, sai a õsimö ha töpö sosamapoma. Önö kutenö, Teusö anö sami Haapi a noama hö̃töo sisama.

³²Ai töpö aiki, ‑Teusö a pitili‑ ĩ na ĩ töpö pi kuu naio wi, ĩ töpö satehe epö salo, ĩ sa töpö pewö a katepa totio mai kitä. Siteão a, Pataki a, Sãsãu a, Jepöté a, Davi a, Samueu a, Teusö a kai wäsä sinomoti noai ĩ töpö, ³³ĩ na töpö kui, töpö aiki, ‑Teusö a pitili‑ ĩ na töpö pi kuu salo, satehe epii wasu töpö peama apama. ‑Teusö a pitili‑ ĩ töpö pi kuu noai, ĩ töpönö toitai tä thaa sinomoti nö, Teusö a na noa tä sualalöma. ‑Kamakö na ĩ sa tä totoki kitäö!‑ Teusö a kuu noai, ĩ töpönö ĩ tä sua hätähalalömae. Öla kökö kai pata sapopali, ³⁴koa taka pata lumaki, ĩ na ĩ töpö kuama. Ai töpönö poo kökönö ĩ töpö säpa pi topa noai, ‑Teusö a pitili‑ ĩ na ĩ töpö pi kuuma kutenö, temii ĩ töpö hua konasolöö, ĩ na tä kua tä, töpö utitio opa noai maaki, Teusö anö ĩ töpö lotetea kopali, Teusö anö ĩ töpö lotetea kopalöma, ĩ töpönö ai tiko töpö wasu sasupali, ĩ na ĩ töpö kuatima. ³⁵Ai suö töpö aiki, ‑Teusö a pitili‑ ĩ na ĩ töpö pi kuuma kutenö, kama ai töpö nomapo noai, Teusö anö ĩ töpö temöa komanöma.

Ĩ na tä kua tä, Teusö a thapo wi, pe epii ai töpönö ĩ töpö hamiamakö nö, töpö sälalöma. ‑Teusö wa hosa konöma, wa säpa mai kitäö!‑ ĩ na ĩ ai töpö kuuma maaki, Teusö a thapo noai, ĩ töpö aiki, ‑Teusö a pitili‑ ĩ töpö pi kuu salo, ‑Sa nomasoma maaki, Teusö anö sa temöa komani kitäö! Sa temöa komanöma, Teusö a na sa kuo soatio kitäö! Ĩ tä toita sati ipö kitäö!‑ ĩ na ĩ töpö pi kuu salo, ‑Päla. Sa sä päo. Sa tokö mai kitäö!‑ ĩ na töpö kuuma. ³⁶Ai töpönö Teusö a thapo noai, ĩ töpö pepalama apa hö̃tötioma. Ĩ töpö na ai töpö hapalo pi wasöa soataloti nö, ĩ töpö soalalöma. Söpala ösö totonö ai töpö õkapalö nö, töpö tälölö nö, titita wi a sai ha töpö titiköma. ³⁷Teusö a thapo wi, maa manö ĩ ai töpö sälali, söpala ösö namonö ai töpö pesokö hanönani, poo anö ai töpö tusälali, ĩ na ĩ töpö kuatima. Wasu töpönö ai töpö sasupalöma, ĩ töpö hupalo pepalo opatima. Kama töpö hai ĩ haloi ösö sai kua mi kutenö, oweha ösö, posi ösö, ĩ na ösökö kui ösökö haloapala pätiomae. Nii tä, wani tä, ĩ na tä kui tä na töpö honimopalo totio opatima. Ai töpönö ĩ töpö peama apati nö, ĩ töpö na wanisala tä tha apatimae. ³⁸Ĩ na tä kuaö ha, ĩ töpö tokölolö nö, ai sanöma töpö pilio maa pa ĩ töpö hutii, maa makö pata hamö töpö hutii, maa makö kaiki hamö töpö kuki, masita taka ha ĩ töpö kuo soa päatalo opatii, ĩ na ĩ töpö kuatima. Ai sanöma töpö wanisala apa pasitio noai, ĩ töpö na Teusö a thapo noai, ĩ töpö totiatalo satia apatima.

³⁹‑Teusö a pitili‑ ĩ na ĩ töpö pi kuu sinomotima kutenö, ‑Makö toita apö‑ ĩ na Teusö a kuuma. Ĩ na Teusö a kuuma maaki, ‑Kamakö na ĩ sa tä totoki kitäö!‑ ĩ na ĩ kolo töpö na Teusö a kuu noai, ĩ töpönö ĩ tä täa paio maama. ⁴⁰Teusö aiki, ‑Waiha Cristo a kupaso noai ha, sa thapo wi ĩ töpö pewö na sa tä totoki kitäö!‑ ĩ na Teusö a pi kuuma. Önö kutenö, sutu ha kolo töpö kuo noai ĩ töpö, huki ola makö, ĩ na makö kui, Teusö anö ĩ makö pewö totiapala apa nö, makö pewö totia totipali.

Jesus a na makö mamo teteapalotipököö!

¹‑Teusö a pitili‑ ĩ na ĩ nö patapö töpö pi kuu totio somatio noai, hi tä hẽtu hamö ĩ töpö kõpoli, kamakö na ĩ töpö satehe epii töpö uni loa hokoloa kutenö, makö kasiapalopököö! ‑Ai töpö lotete wapamoö ha töpö läläapalo kuati wi na, ĩ na makö kua hö̃töopököö!‑ ĩ na Teusö a kuu ha, makö läläapalo sinomopököö! Töpö loa hokolole, ĩ töpö aiki, ‑Awai. Teusö a lotete. A pitili‑ ĩ na ĩ töpö kupaloö ha, makö kasiapalo opa nö, makö läläapalo totiopököö! Hute hute ma tä hosalö nö, wanisala ma tä thaa wi, ĩ tänö makö opimoma sinomo wi, ĩ ma tä hosa nainö nö, makö hetehe epö salo, lope epii makö läläapalopöö! ²‑Teusö a pitili‑ ĩ na Jesus anö ĩ na makö pi thama somama. ‑A pitili‑ ĩ na makö pi thama soatio kitäö! Önö kutenö, Jesus a na makö mamo teteapalotipököö! Jesus aiki, ‑Waiha, hi tä hẽtu hamö sa konasolöma, sa pi mönahapalo kõo soatio laso kitäö!‑ ĩ na a pi kuu salo, a kasiapalo mapo maama. Sanöma töpö pewö aiki, ‑Ki töpönö wanisala tä thatima kutenö, hii ti pakalai ti ha töpö pi hĩta kuleö!‑ ĩ na töpö pewö pi kupaloma maaki, Jesus aiki, ‑Wanisala sa tä thaa maa päo noai ha maaki, hii ti pakalai ti ha sa pi hĩta päopöö!‑ ĩ na a pi kuuma. Ĩ na a pi kuu nö, a säpamono nö, Teusö a lopoli, ĩ tä kotö ha ha Jesus a loa kõkö lasoö.

³Önö kutenö, ai töpönö wanisala tä tha apati noai, ĩ töpönö Jesus a hĩsu thaa nö, a peama sinomotima maaki, a kasiapalo satia apa hö̃tötio noai, ĩ tä na pö pi tapomo totio sinomoö! Jesus a kuati noai, ĩ tä na makö pi tapomo sinomotima, ‑Pälaö! Sa kasiapalo wani ipö saiö!‑ ĩ na makö pi kuu mai kitä. Makö kasiapalo soatio kitäö!

⁴Wanisala tä thaa wi, ĩ töpönö makö wanipoti wi, ĩ töpö na makö kasiapalo opati tä, ‑Häö. Samakö pepaloti hãto alu kuleö!‑ ĩ na makö pi kuu kule maaki, ĩ töpönö Cristo a säa thapalö noai na, ĩ na makö säa thapa mai ha, makö kua soa kule. Ĩ na makö kua soa salo, Teusö a na pö pälamo tihöö!

Kamakö hai pö̃ Teusö anö makö patamati wi ĩ ta

⁵Teusö anö makö pi lotetepamani pia salo, Teusö ulupö makö kutenö, kamakö na a hapaloma. A hapalo noai, ĩ tä na makö pi motöpo waikia kule? A hapalo nö, ĩ na a kuuma:

‑Ipa ulu ai! Teusö pata sanö wa peama pole, ĩ tä na sa kai a hinia totiatalaö! “Ĩ na wa kua maikiö!” ĩ na sa kuu ha, “Häö. Sa tomöpo mi waiki kutenö, sa kasiapalo kõatalo mai kitäö!” ĩ na a pi kuu tihöö!

⁶Pata sanö sanöma sa töpö pi ipa wi, ĩ sa töpö makokopamani pia salo, sa töpö peama päoö. “Kawa hai, ĩ ipa ulu waö!” ĩ na sa kuu salo, wa peama päa kuleö!‑

ĩ na Teusö a kuuma.

⁷Önö kutenö, makö pea tä, ‑Kamisa hai, Teusö sa ulupö kutenö, ĩ na Teusö anö sa hole thamati kule ta o‑ ĩ na Teusö anö makö pi thamaö. Ĩ na makö pi thama kutenö, makö pea salo, ‑Teusö sa ulupö kutenö, Teusö anö sa peama päa kuleö! Önö kutenö, “Sa peama maikiö!” ĩ na sa kuu mai kitäö!‑ ĩ na pö pi kuu totioö! Pö̃ sanöma wanö au ulu wa makokopamani pia salo, au ulu wa peama sinomoti matatä. Ĩ na sanöma makönö kama makö ulupö noa thapasoö. ⁸Teusö anö kama hai ĩ ulu töpö makokopama sinomo hö̃töoö. Önö kutenö, Teusö anö makö makokopama mi tä, Teusö ulupö makö sai mai kitä. Kama hai ĩ ulu makö holisi päwö. ⁹Au hao a, au nao a, ĩ na kilii töpönö makö makokopamanöma, ‑Ipa hao a sai, ipa nao a sai, ĩ na töpö kuö kutenö, sa makokopalöma‑ ĩ na makö pi kuu nö, ĩ ma töpö a hini totiatalo opatima. Ĩ na tä kua tä, hi tä hẽtu hamö kamakö hai ĩ pö̃ a kupoli, ĩ ma hinia satia apölöpöö! Ĩ ma hinia totilöma, makö õsi temöapalo opati kitä. ¹⁰Kamakö hai ĩ pö̃ töpö, kamakö hai ĩ nao töpö, ĩ na töpö kui töpö aiki, ‑Ipa ulu sa wai makokopamani pia salo, ipa sa wai peama tetehe pola nö kuno mai, sami ipa sa pi wai peama sisapököö!‑ ĩ na töpö pi kutima. Teusö a lö kui, ‑Ipa ulu sa töpö makokopamani pia salo, sa töpö peama päoö‑ ĩ na a pi kuu nö, ‑Sa töpö peama waikioma kutenö, toitai töpö kutio kitäö! Kamisa toita kuati wi na, ĩ na ĩ töpö toita kua naipasopöö!‑ ĩ na Teusö a pi kuuma. Ĩ na a pi kuu salo, makö peama päo nö, makö totipa sinomoö. ¹¹Makö peama tä, makö pi mönaha mai kitä. Ĩ tä, makö pi wanisalatalotii. Makö pi wanisalataloti kule maaki, Teusö anö makö peama nö, makö totipali wi, waiha ĩ makönö toitai ma tä thaa kuiki nö, makö pi topa apa kuki kitä.

Toitai ma tä thaa sinomopöö!

¹²Önö kutenö, makö pi wi na takömo mai, pö pi lotetea totipaloö! ¹³Pö huu saliliapalo totioö! Makö huu saliliapalo totio kuköma, töpö utitii ĩ ma töpö nokapalamati pole, tiko hamö ĩ töpö huu selekepaso wi tä kua mai kitä. Makö huu salilia totia tä, makö pi lotetea totipaso kitäö!

¹⁴Ai töpö pewö na makö noimo pi topa sinomoö! Wanisala ma tä thaa maikiö! Makö õsi ausia apa wi, ĩ ma tä pi ipa sisaaö! Ai tä õsi ausi mi tä, ĩ anö Teusö a tapa mai kitä. ¹⁵Pö pi mosawia totikiö! Teusö anö makö totiapala apa sinomo wi, ĩ tä na ai a pi hanoa pasio tihöö! Nasökili tä koami kui na ĩ na ai a kupo tihöö! Ĩ nasökili tä patalo nö, ĩ pili ti patalo nö, pili mokö laloki wi, ĩ mokö wasu kitä. Ĩ na tä kua kua wi na, ĩ na ai wanö wanisala wa tä thaa kua kuköma, satehe epii ai töpönö wa uöma nö, ĩ töpönö wanisala tä thaa naio kukö matimöö! ¹⁶Wa po mane, ĩ a na wa mamopaloti maapököö! Ai wanö Teusö wa hinipa maapököö! Esaú a uöma maikiö! Esaú anö Teusö a hini maama kutenö, poosa a na, ‑Ipa nii tä totopaö! Ĩ nii wa tä totopöma, pata wa kua asapaso kitäö! Sa kua somataso wi ĩ sa maaki, pata sa kupo pi topa mai kitäö!‑ ĩ na Esaú a kuuma.

¹⁷Ĩ na a kuu noai ha, pö̃ a na, ‑Hapa. Kawanö sa thaa soma noai ĩ sa kutenö, kawa aiki, “Pata a kupaloö!” kamisa na ĩ na wa kuupököö!‑ ĩ na Esaú a kuuma. Ĩ na Esaú a ö̃kö pola nö, a ku upama maaki, pö̃ aiki, ‑Naiö! Kawa aiki, “Pata wa kua asapasopöö!” ĩ na au hoose wa noa thaa waikio saio noa thali ta‑ ĩ na pö̃ a kuu hö̃töoma. Sa ta wäsä pole, ĩ ma ta taö waikia kule.

Isöhaeu nö patapö töpö kua kua noai na, ĩ na makö kua naio maa noai ĩ ta

¹⁸Ĩ na tä kua tä, isöhaeu nö patapö töpö kua kua noai na, ĩ na makö kua naio maama. Tä höpöa totio wi, ĩ tä na ĩ töpö waloa totiköma. Sinai makö pata ha ĩ töpö waloikitö nö, koa taka pata hili pole, ĩ taka pata, mumi mumi tä pata, ipoko ta pata, ĩ na tökö kui, ĩ töpönö ĩ tökö tapa totioma. ¹⁹Ĩ tökö tapa totia tä, pe epii ta pata hola polali ĩ ta hinii, ĩ na tä kua tä, ta pata hapalo polali, ĩ ta hini nömöa, ĩ na töpö kua totioma. Ta pata hapalo polali, ĩ ta hini nö, töpö kili salo, ‑A hapalo kota tihöö!‑ ĩ na töpö kuuma. ²⁰‑Ki maa makö pata ha pö huu pakäa hãto tihöö! Ĩ makö höpöa tihöö! Ĩ makö ha ai salo a hiima holeaö ha, maa manö ĩ ma säsä nö, a säpalöheö!‑ ĩ na ta pata kuu lasoö ha, ĩ isöhaeu töpö kilipalo opa nö, ‑A hapalo kota tihöö!‑ ĩ na töpö kuuma. ²¹Ĩ töpönö ĩ tä pewö tapa polai, ĩ tä pi pata kilihi ipö salo, Moisés aiki, ‑Pe epii sa kili ipa salo, sa satitimopalo opa kuleö!‑ ĩ na a kuuma.

²²Ĩ na makö kua naio maama. Teusö a temöa apati wi, ĩ a sai pö pata, ĩ Sião tä uli a hilo wi, Jetusalẽi tä uli a hilo naine, hi tä hẽtu hamö ĩ tä uli kupoli, ĩ ha ãju töpö satehe pata pilia naipoli, ĩ ha makö uni walokö lasoma. ²³Teusö a thapo asa wi, ĩ töpö na, ‑Ipa ulu makö asawöö!‑ ĩ na Teusö a kuu wi, hi tä hẽtu hamö ĩ töpö a hilo wi tä sãökama kupoli, ĩ töpö pi mönaha apii töpö kokamo sinomo wi, ĩ töpö na makö walokö lasoö, sanöma makö pewö na tä makokama läo sinomo wi, ĩ a pata na makö walokö lasoö, nö patapö töpönö toitai tä thaa noai, Teusö anö ĩ töpö õsi totia totipalö noai, ĩ töpö na makö walokö lasoö, ĩ na makö uni kua lasoma. ²⁴Jesus anö makö noa thaa noai, ĩ a na makö uni walokö lasoma. Sutu ha Teusö anö nö patapö töpö noa thaa paioma maaki, huki Jesus anö tute ta wäsä nömöo nö, makö noa thaa nömöoma. Makö noa thaa nömöo nö, makö õsi ausipali pia salo, kamakö õsi na kama iä pö uni sopäkaköma. Sutu ha Apeu a säpalö noai, ĩ a iä pö halaso salo, sanöma makö aiki, ‑Apeu a nö sua hö̃töso noai kitä‑ ĩ na Apeu a iänö makö pi thamaö. Ĩ na tä kua tä, ‑Huki kamisa na Teusö a noi ipö‑ ĩ na Jesus a iänö makö pi thama pasioö. Ĩ Jesus a na makö uni walokö lasoma.

²⁵Önö kutenö, kamakö na Teusö a hapalo wi, ĩ a kai a peama maikiö! Sanöma tä Moisés anö Teusö a kai a wäsä noai, nö patapö töpönö ĩ a kai a peamaö ha, Teusö anö ĩ töpö peama hö̃töoma. Önö kutenö, hi tä hẽtu hamö Cristo a kuo noai, ĩ anö Teusö a kai a wäsä noai, kamakönö ĩ ma kai a hini wani ipö tä, Teusö anö makö peama satia apa kitä. ²⁶Moisés a na Teusö a hapalo nö, hi masita tä uli pata lakö lakömoma totioma. Huki Teusö a hapalo nö, ‑Masita sa tä uli pata lakö lakömoa totia komani, hutu sa mosökö lakö lakömoa totia naia komani, ĩ na sami ĩ na sa tä pewö lakö lakömoa hätäha thaa totipamani kitäö!‑ ĩ na Teusö a kuuma.

²⁷Pi naka. ‑Sa tä pewö lakö lakömoa thaa totia komani kitäö!‑ ĩ na ta kuu noai, ĩ na ĩ pili ta kua totia kule. Hi masita tä uli, hutu mosökö pata, ĩ na tä kui, Teusö anö ĩ tä pewö lakö lakömomanö nö, ĩ tä pewö maa kopamani pia salo. Ĩ tä pewö maa kopamanöma, ai tä uli lakö lakömotalo mai, ai tä uli kua asa soatio laso kitä. Ĩ tä uli mapo mai kitä.

²⁸Teusö a kaikanamo wi, ĩ tä uli ha makö kaikanamo naio pia wi, ĩ ma tä uli sua piale, ĩ tä uli waniapaso wi tä kua pasia mai kitä. Önö kutenö, Teusö a na, ‑Aitaköö!‑ makö kuupököö! Teusö ma pi mönahapamati pia salo, ma kai a peama kili ipa nö, ma kai a hini totiatalo nö, makö Teusömo makokatipöö! ²⁹Kamakö hai ĩ Teusö a hai, koa taka patanö tä pewö ĩsima wi, ĩ taka kua kua wi na, ĩ na Teusö a kua kua hö̃töoö. Önö kutenö Teusö ma kai a hini totiatalaö!

Ĩ na makö pewö kuapököö!

¹Cristo makö pewö kutenö, pö noimaso sinomoö! ²Ai tiko töpö hama tapo tä, ma töpö noima nö, ‑Ipa sai a ha pö pökö kuikiö!‑ ĩ na makö kuu! Sutu ha ai töpö aiki, ‑Hi töpö huimii, ĩ ãju töpöö!‑ ĩ na ĩ töpö pi kuu pola nö kuno mai, ‑Hi töpö huimii, ĩ töpö na makö noimo nököö!‑ ĩ na töpö kuu nö, ãju töpö na töpö noimoma. Ĩ hama töpö tapo noai, ĩ sanöma töpö hama sai kuo maama. Ãju töpö kuo pasioma.

³Ĩ na tä kua tä, ‑Titita wi a sai ha töpö titile, ĩ töpö na sa titia naia aköna, sa pea naina pi‑ ĩ na makö pi kuu nö, ĩ töpö na makö pi honipo nö, ĩ töpö pasilipoö! ‑Cristo a thapo wi, ai töpönö ĩ töpö pepalama apati wi, ĩ töpö na sa kuo naio aköna, sa pepalo naina pi‑ ĩ na makö pi kuu nö, ĩ töpö pasilipa naioheö!

⁴‑Peanopö wa sainö au husopö wa po pole, ĩ tä topa. Pusopö wa sainö au heano wa sai po pole, ĩ tä topa naioö‑ ĩ na makö pewö pi kuupö. Wa po mane, ĩ a na a mãi sotepalo soa päatalo tihöö! Sami sami tä thaa wi ĩ töpö, ai töpö po totia mane, ĩ töpö na ai töpö mamopalo wi ĩ töpö, ĩ na töpö kui, Teusö anö ĩ töpö peama kitä ta pi kuu mai.

⁵Sitipa kökö na makö pi wasisopalo opa maikiö! Kama makönö ma tä thapo waikile, ĩ tä na pö pi mönaha sisaköö! Teusö aiki, ‑Kamisanö wa hosa mai kitäö! Kawa na sa kuo mapo mai kitäö!‑ ĩ na a kuuma. ⁶Önö kutenö, kamakö aiki, ‑Ai sanöma tänö sa thama kule maaki, ĩ tä na sa kili mai kitäö! Teusö anö sa pasilipo kutenö, ĩ tä na sa kili mai kitä‑ ĩ na makö kuu totiatalopöö!

⁷Kamakö na pata töpönö Teusö ta wäsä noai, ĩ tä na pö pi tapomo totioö! Ĩ töpö kuati noai ĩ tä na makö pi tapomoö, töpö nomaso noai ĩ tä na makö pi tapomo naia, ĩ na pö kuaö! Ĩ na makö kua nö, ‑Teusö a pitili‑ ĩ na ĩ töpö kuti noai, ĩ ma tä uömaö! ⁸Jesus Cristo a tikopöpo mai kitä. Sutu ha a kuo noai na, ĩ na a kuö soawö. Huki a kuati pole na, waiha ĩ na a kua soatioolö kitä. ⁹Ai töpönö tiko ta wäpalati wi, ĩ ta hini maikiö! Ĩ ma ta hininöma, piliso salilia apöle, ĩ tiso hamö makö huu mai, pili tiso ãkoto opii ĩ tiso hamö makö hulasolö kitä. Önö kutenö, Teusö anö makö totiapala apa wi, ĩ tänö makö õsi lotetepama wi, ĩ tä salilia sisaa. Nii tä, salo a, ĩ na tä kui tä na makö waipalo wi, ĩ tä topa mai kitä. ‑Ĩ tä oa tihöö!‑ ĩ na pata töpönö makö noa thaa wi, ĩ ma ta hini ha, makö õsi lotetepo mai kitä.

¹⁰Jesus Cristo ma iä pö thapoö. Nii tä oamo mai, ĩ tänö ai tä õsi ausipo mai kitä. ‑Jesus a iä pönö sa õsi ausipasoö‑ ĩ na makö pi kuu sisaö. Teusömo wi a sai ha Teusö a na salo pö hiima ĩsi totoma sinomo wi ĩ töpö aiki, ‑Salo a hiima iänö sa õsi ausipaso kitäö!‑ ĩ na ĩ töpö pi kuu wi, Jesus Cristo a iä pönö ĩ töpö õsi salupa mai kitä. ¹¹Juteu pata tänö Teusö a täpä sinomo wi, ĩ pata tänö ĩ salo pö hiima iä pö täa sinomoö. Ĩ salo pö iä tälö nö, Teusömo wi a sai õsimö ha a sai kai kua tolele, ĩ ha Teusö a kua totile ha, ĩ ha ĩ salo a hiima iä pö kai lisipo sinomoö. Juteu töpönö wanisala tä thaa noai, ĩ tä noa mapamani pia salo, Teusömo wi a sai õsimö ha a sai kai kua tolele, ĩ ha ĩ salo a iä pö kai lisipo sinomoö. Ĩ na tä kua tä, ĩ pili a sai pasi lö kui, juteu töpö sai pö sika ha ĩ pili a sai tälölö nö, atu hamö ĩ pili a sai ĩsima sinomoö. ¹²Önö kutenö, wanisala ma tä thaa wi, ĩ Jesus kama iä pönö ĩ tä noa mapamani pia salo, juteu töpö sai pö kule, ĩ atu ha a säpamonasoma.

¹³Ĩ na Jesus a kuama kutenö, Jesus a thapo mai, ĩ töpö kule, ĩ atu hamö Jesus a na makö uni nokalalolö nö, ‑Jesus a na ai töpö hapalo pi wasöa kua noai na, ĩ na kamakö na ai töpö hapalo pi wasöa kua nömöo päopöö!‑ ĩ na makö pi kuupököö! ¹⁴Hi tä uli na sai pö kupai, ĩ sai pö kuo soatio mai kitä. Waiha hi tä hẽtu ha sai pö kuo pialali, ĩ ma pö sai pi ipa sisaki. ¹⁵Önö kutenö, Jesus ma thapo salo, ‑Wa totiatalo opatiwöö!‑ ĩ na Teusö a na ĩ na makö kuu sinomopöö! Teusö ma pi mönahapamani pia salo, kama na ĩ ma ta totota sinomopö. ‑Teusö a hai, ipa pata tä‑ ĩ na pili makö kai kuu pole, ĩ ma tä totota alu kule.

¹⁶Ĩ na tä kua tä, toitai ma tä thaa mapo maapöö! Makö pasilipasotipöö! Ĩ na makö kupasoti wi, Teusö a na ĩ ma tä totoköma, kamakönö Teusö ma pi mönahapamani kitä.

¹⁷Teusö a thapo wi ĩ pata töpönö makö noa thaa wi, ĩ ta hini totioheö! Toitai makö õsi kutiopö, kamakö na ĩ pata töpö mamo läo sinomoö. Waiha ĩ pata töpö na Teusö aiki, ‑Au töpö na makö mamo läapalo makokoa sinomotima?‑ ĩ na Teusö a kuu läo pia manu kule, ĩ töpö kasiapalo nö, kamakö na ĩ töpö mamo läapalo sinomotii. Ĩ pata ma töpö a hini ha, ma töpö pi mönahapamani kitä. Ĩ na tä kua tä, ĩ ma töpö a hini mi ha, ĩ pata töpö õsi wanisala apöpaso kitä. Töpö õsi wanisala apöpasoma, makö pasilipa tomöpo mai kitä.

¹⁸Teusö a na makö hapalo salo, samakö a wäsä sinomoö! ‑Wanisala sama tä thatala apatii‑ ĩ na samakö pi kuu tai mi. Toitai sama tä thaa pi topa apa sinomoö. ¹⁹‑Teusö anö kamakö na lope epii sa simöa haia kotaki wi, ĩ sa tä pi ipa kutenö, ĩ tä pi na Teusö a na pö hapaloö!‑ ĩ na sa kuu totia kule.

²⁰Teusö anö sanöma makö pi topapalama apaö. Kamakö hai ĩ Jesus Cristo pata tä nomaso noai, Teusö anö ĩ a temöa komanö nö, a hoköa kopamanöma. Oweha kökö thapo kua wi na, ĩ na pata tä Jesus anö ĩ na makö thapo kua hö̃töoö. Makö täapa kõo läo pia salo, a säpamonasoma. A iä pö haa waikisoma kutenö, Jesus anö makö noa thaa noai, ĩ ta topa apöle ĩ ta mapo mai kitä. Kamakö na a kuu noai, ĩ ta kuo soatio kitä. ²¹Teusö anö Jesus a temöa kopalö noai, ĩ Teusö anö makö makokapalama totio wi ĩ sa tä pii kule. Toitai ma tä thaa sinomo wi, ĩ Teusö anö makö thamaöö! Ĩ na makö thama kuköma, ‑Ĩ na makö kuapöö!‑ ĩ na Teusö a kuu wi, ĩ ma ta hiniatala totioö! Pili makö õsi na Teusö a kalipaloti wi ĩ sa tä pi ipaö. Pili makö õsi na a kalipalo tä, kamakönö Teusö ma pi mönahapama totio opa kuki kitä. Kamakö õsi na Teusö anö Jesus Cristo a pilimaköma kutenö, Cristo anö makö pasilipo kitä. Makö pasilipo salo, Teusö ma pi mönahapama totio opa kuki kitä. ‑Cristo a totiatalo opa asatiowöö!‑ sanöma makö pewö kuu mapo maapököö!

²²Ipa pö! Hi waheta sa tä sãöka pole, ĩ tä sãökama hototi. Önö kutenö sa kuuhe, ĩ tä pewö a hinia totilöö! ²³Titita wi a sai na ai töpönö Timóteo a titimaköma maaki, a holea kopamanöma thali. ‑Ĩ ma ta hini hãtoa pasia mane kitä‑ ĩ na sa pi kuu nö, sa ta wäsä kule. Sa huso paio mi tä, hisa ha Timóteo a waloköma, kamakö na ĩ sa kai huu pia salo.

²⁴Kamakö hai ĩ pata töpö pewö, Teusö a thapo wi ĩ töpö pewö, ĩ na töpö kui töpö na, ‑“Makö topa kule?” ĩ na a kuu kuleö!‑ ĩ na makö kuu! ‑Makö topa kule?‑ kamakö na ĩ na itália tili töpö kuu naia kule.

²⁵Teusö anö makö pewö totiapala apati wi ĩ sa tä pi ipa kule.