Gálatas

Gálatas

Kalásia tili töpö na waheta tä simöpalö noai ĩ ta

Paulo anö Jesus ta wäsä hätäpoti pamö Kalásia tä uli na a waloikitö nö, kalasia tili töpö na Jesus ta wäsä kuköma. Ta wäsäö ha, ai kalasia tili töpönö ĩ ta hinia totilö nö, Jesus a thapo wi ĩ töpö kupasoma. Ĩ na tä kua tä, Paulo a hua konasolö noai ha, ai tiko töpö waloa haiki nö, ai tiko ta wäsä haioma. ‑Moisés ma kai a hini totio mi tä, Teusö a na makö taamö toita mai kitäö!‑ ĩ na ĩ töpö kutima.

Ĩ na ĩ töpö kuati noai, Paulo anö ĩ ta hini nö, a pi honipo opa salo, kalasia tili töpö na hi waheta tä simönöma. ‑“Jesus Cristo a pitili” ĩ na sanöma makö pewö pi kuu kuköma, Teusö a na makö pewö taamö totia apölasoö. Moisés anö nö patapö töpö noa thaa noai, sanöma makönö ĩ ma ta hini totile, ĩ tänö Teusö a na makö taamö toita toti mai kitäö!‑ ĩ na Paulo a kuu nö, ‑Moisés anö nö patapö töpö noa thaa noai, ĩ tä na Cristo anö makö uni kusöpalöma. Önö kutenö, ‑“Ĩ na pö kuaö! Ĩ na pö kuaö!” Moisés anö töpö noa thaa noai, ĩ ta hini totioö!‑ töpö kuu wi, ĩ töpö a hini tihöö! Pö pi mosaia totikiö! Ĩ töpö a hini tihöö! Ma töpö a hininöma, töpö noa mi kalipalamati wi, ĩ töpö pea kuati wi na, ĩ na makö pea kua naikö matimöö!‑ Paulo a kuuma. ‑Ai sanöma töpönö makö noa thaa wi, ĩ ma tä pewö a hini totia kule maaki, Jesus ma thapo mi tä, Teusö a na makö taamö toita mai kitä. “Jesus Cristo a pitili” ĩ na sanöma makö pewö pi kuu totio wi, ĩ tänö Teusö a na makö taamö toita sisa kitäö!‑ ĩ na hi waheta tä kuu.

¹Paulo sa. Jesus Cristo anö ai töpö simökö noai, ĩ ai sa. Sanöma tänö sa simöa maama. Jesus Cristo a sainö sa simököma. Jesus Cristo a noma totisoma tä, kamakö hai ĩ pö̃ Teusö anö a temöa komanö noai, ĩ Teusö anö sa simököma. ²Kamisa, Jesus a thapo wi, kamisa na ai töpö kule ĩ töpö, ĩ na samakö kui samakönö hi waheta sama tä simöpali ke. Kalásia tä uli kule ha Jesus ma thapo wi ĩ makö pilia setekelati, ĩ makö kokamo hätäpoti polati, ĩ makö na sama tä waheta simöpali ke.

³Kamakö hai ĩ pö̃ Teusö a, kamakö hai ĩ Jesus Cristo pata tä, ĩ na kilii töpö na sa hapalo nö, ‑Kalásia tili wa töpö totiapala apapöö! Wa töpö pi topapalama apapöö!‑ ĩ na sa kuu. ⁴Kamakönö wanisala ma tä thaa wi, ĩ tä noa na Jesus a säpamonasoma. Sanöma makönö wanisala ma tä thati wi, ĩ tä noa na Jesus anö makö täa konöpö, a säpamonasoma. Kamakö hai ĩ pö̃ Teusö aiki, ‑Sanöma makö pewönö wanisala tä thaa wi, ĩ tä noa na ipa ulu a säpamonasopököö!‑ a pi kuuma. ‑Sa thapo pasia mane, ĩ töpönö wanisala tä thati wi, ĩ tä na ipa töpö kõapapö, ipa ulu Jesus a säpamonasopöö!‑ ĩ na Teusö a pi kuuma. ⁵‑Teusö a totiatalo opa asaö!‑ ĩ na sanöma makö pewö kuu soatiopöö! Ĩ naköö!

Jesus ta topa apöle, ĩ na ai ta kua naio wi, ai ta kua sätäa mai kitä

⁶Ipa kalásia tili pö! Teusö ma hosa soatoö ha, kamakö na sa pi wi na takömo opa kuleö! Cristo anö makö totiapala apaö ha, Teusö anö makö nakalöma. Makö nakalö noai, ĩ ma hosa soatalö nö, ai tiko ma ta hini pi topa apa nö kilile a. ‑Ĩ ta topa apöle‑ ai töpö kuu ha, ⁷‑Ĩ pitili ta‑ pö pi kuu tihöö! Jesus ta topa apa sisaa. Ai tiko ta topa apa naine ĩ ta kua mai kitä. Jesus Cristo ta topa apöle, ai töpönö ĩ tä isi a wanihipama pi topa apa päa salo, makö isi wanihama naia päa kule. ⁸‑Kamakö na Jesus ta topa apöle ĩ sa ta wäsäpili, ĩ pitili tä sai a totiwö. Ãju tänö kamakö na ai tiko ta wäsä kuköma, Teusö anö ĩ a peama hö̃tököpöö! Hi kamisamakönö hö̃töwö, ai tiko sama ta wäsä hö̃tököma, Teusö anö samakö peama hö̃töopököö!‑ ĩ na sa kuu kule. ⁹‑Jesus ta topa apöle, kamakö na ĩ sa ta wäsäpili, ai tänö ĩ tä isi a waniha pasipalö nö, tiko ta wäsä nömöoma, ĩ a wani nomasoö ha, Teusö anö ĩ a wani peama soatiopöö!‑ ĩ na sa kupili, huki ĩ na sa kuu kõa kule. ¹⁰‑Paulo anö ta wäsäti wi, ĩ ta topa apa‑ sanöma sa töpö pi thama pi topa sisa mane. ‑Paulo anö ta wäsä pole, ĩ ta topa apa‑ ĩ na Teusö sa pi thama pi topa totia kule. Teusö sa pi mönahapama pi topa totia sisa kule. Sanöma sa töpö pi mönahapama pi topa sisa aköna, ‑Cristo anö sa simöa wi, ĩ saö!‑ sa kuu mana pi.

Teusö anö Paulo a nakalö noai ĩ ta

¹¹Ipa pö! Ĩ na kamakö na sa kuu pia kule. Jesus Cristo ta topa apöle, sa ta wäsä sinomo wi, sanöma tä pi saimo päo nö, ĩ ta wäsä maama. ¹²Sanöma tä na ĩ sa ta hini maama. Ai sanöma tänö kamisa na ĩ ta taöma maama. Jesus Cristo anö kamisa na ĩ ta taöma sisama.

¹³Juteu pata töpönö ta wäsä sinomo wi, ĩ sa ta hini paitioma. Ĩ tä, sa kua somatio noai, ĩ ma ta hini waikitioma. ‑Teusö a thapo wi ĩ töpö kokamo sinomo wi, Paulo anö pe epii ĩ töpö peama apatimaö! Ĩ töpö mapama pi topa apa kõomaö!‑ ĩ na ĩ ma ta kuu hini tete waikitioma. ¹⁴Ipa Juteu töpö nö patapö noa thamoti noai, ĩ sa ta taö pi topa apatima. Ĩ na nö patapö töpö kuati kua noai na, ĩ na sa kua pi topa kua naioma kutenö, nö patapö töpö noa thamo noai, ĩ sa ta hini pi topa totiatalo opa naioma. Sa pi pata hata waiki tä, ipa ai juteu pi pata hatawö töpönö ĩ ta hinipala apa hö̃tötioma maaki, ĩ sa ta hinia tolea apa asalöma.

¹⁵Ĩ na sa kuama maaki, Teusö anö sa totiapala nö, ipa nao a thalupökö wani na sa ositi wai kua soa tä, Teusö anö sa saia totilöma. Sa saia totilö nö, sa simöa sinomo pia salo, sa nakalöma. ¹⁶Sa nakalö nö, juteu töpö a hilo pasia mane ĩ töpö na Jesus sa wäsäpö, kamisa na Teusö anö kama hai ĩ pelupö a sai tapamomanöma. Ĩ tä, ai sanöma sa tä hini tolemo maama. ¹⁷Jesus anö töpö simöa somanö noai, Jetusalẽi tä uli ha ĩ töpö kulati, ĩ töpö na sa huumö kua totioolö mai ha, Atápia tä uli hamö sa huamö kua totia pasia pälasolöma. Ĩ hamö sa huamö kua totia apölo nö, waiha Tamaasöku tä uli ha sa waloa nömökö tasoma. ¹⁸Ĩ na tä kua tä, 3 tä inama maa kutalo nö, Pedro sa huama pia salo, Jetusalẽi tä uli ha sa hulolö nö, Pedro a na sa kuo taso noai, 15 tä mumi kupaso tasoma. ¹⁹Jesus anö töpö simönö noai, ĩ sa töpö pewö tapa maama. Pedro a, Jesus a hai ĩ poose Tiago a, ĩ na kilii sa töpö tapa sisama.

²⁰Kamakö na sa tä sãökama pole, ĩ pitili ta. Sa holisimo mai kitäö! Teusö anö ĩ tä taö.

²¹Jetusalẽi tä uli ha sa husolo nö, Sítia tä uli hamö sa hua soalolö nö, Silísia tä uli ha sa huu nömöoma. ²²Jesus Cristo a thapo wi ĩ töpö kokamo sinomo wi, Jutéia tä uli ha ĩ töpö kule, ĩ töpönö sa tapa maama. ²³Ai töpönö sa kateha noai, ĩ töpönö ĩ ta hini päoma. ‑Sutu ha makö peamatipili, ĩ anö Jesus ta wäsä kulaliö! “Jesus a tälö heö!” tä kuu wi, Paulo anö ĩ tä mapama pi topa kipili maaki, huki ĩ ta wäsä kulaliö!‑ ĩ na Jutéia tä uli ha ĩ na ĩ tä kuu hini päoma. ²⁴‑Paulo anö Jesus ta wäsä kulaliö!‑ ĩ na tä kuu hininö nö, ‑Teusö a loteteo opapawö‑ ĩ na töpö kupalotima.

Jesus anö töpö simönö noai, Paulo anö ĩ töpö huama noai, ĩ ta

¹Ĩ na tä kua tä, sakimi ipii, 14 tä inama kui tä inama matalo nö, Jetusalẽi tä uli hamö Pahanapé a, Tito a, ĩ na kilii sa töpö kai hua konasolöma. ²‑Jetusalẽi tä uli ha a hulolöö!‑ Teusö a kuu ha, sa hua hö̃tösolöma. Ĩ ha sa waloikitö nö, Jesus a thapo wi ĩ pata sa töpö naka sisalö nö, ai töpö loa naia mi tä, ĩ pata töpö na sa hapalo nö, juteu töpö pasi mai ĩ töpö na Jesus sa ta wäsä hätäpoti wi, ĩ pata töpö na ĩ sa ta katehama. ‑Awai. Jesus wa ta wäsä makoka waikiomakö. Wa ta wäsä tomöpo mi maa noa‑ ĩ na ĩ pata sa töpö thama pia salo, sa ta katehama. ^3-4Sa ta katehaö ha, ‑Awai. Wa ta wäsä makoko opa waikiwöö!‑ pata töpö kuu hö̃töoma. Ĩ na tä kua tä, ai töpönö Jesus a thapo holisipo noai, ĩ töpö aiki, ‑Paulo a kateha piale, ĩ ma ta hini naio maapököö! Paulo aiki, “Jesus na makö koka naiköma kutenö, Moisés anö juteu töpö nö patapö noa thati noai, ĩ ta hini maikiö!” ĩ na Paulo a kuu hãto kitäö! Ĩ na a kuu ha, “Naiö! Kamakö hai ĩ nö patapö töpö noa thati noai, ĩ sama ta hini pi topa kuleö!” ĩ na makö kuupökö‑ ĩ na Jesus a holisi thapo pasio päo noai, ĩ na ĩ töpö kupaloma. Ĩ na ĩ töpö kuu waikio nö, Jesus a thapo totio noai, ĩ töpö na ĩ töpö holisimo wi, ĩ töpö loa tikiliki nö, ĩ töpö hapalo toleho läatalo opama. Ĩ töpö aiki, ‑“Makö Teusömo makoko pi topa salo, makö isi ola ösö wai hanöpalö nö, ĩ makö isi ola ösö wai hosalöpöö” ĩ na nö patapö töpö kuuma thaliö!‑ ĩ na ĩ töpö pi kuu nö, ‑Paulo anö Tito a nokapalama pole, isi ola ösö wai hosapa mi salo‑ ĩ na ĩ töpö kuuma. Kamakö hai ĩ nö patapö töpönö makö noa thaa noai, ĩ tä na Jesus anö makö uni kusöa waikipalöma maaki, ĩ töpö loa tikilio noai, ĩ töpönö samakö uni õkapama pi topa kõoma. Ĩ na ĩ töpö kuatima maaki, Jesus a thapo totio wi ĩ pata töpö aiki, ‑Tito a ösö wai hosapamo mi salo‑ ĩ na ĩ pata töpö kuu maama. Tito a hai, ĩ köteeku tä maaki, ‑A ösö wai hosapamo mi salo‑ ĩ na pata töpö loo noai, ĩ na ĩ töpö kuu maama. ⁵Jesus a thapo holisipo noai, ĩ töpö aiki, ‑Kamakö nö patapönö makö noa thaa noai, ĩ ta hini totioheö!‑ ĩ na ĩ töpö kuuma maaki, Jesus ta topa apöle ta pitili ipii, kalásia tili makönö ĩ ma ta thapo soatiopö, ‑Naiö!‑ samakö kuu totio opa hö̃töoma.

⁶Sanöma töpö möamö patapöi, ĩ töpö na, ‑Pata makö‑ ĩ na ai töpö pi kuu kule maaki, ĩ na Teusö a pi kuu pasio mai kitä. Teusö anö sanöma pili makö õsi pewö möö ösöhöo nö, ‑Kamakö hai, pata makö‑ ĩ na Teusö a pi kuu pasioö. ‑Ki töpö hai, pata töpö‑ ai töpönö töpö noa thaa pasile, ĩ pata töpönö sa pi hatukama pasio maama. Kamisanö sa ta wäsäti pole, ĩ tä na ai pata töpönö ai ta sätäama naio maama. ⁷Ĩ pata töpö aiki, ‑Teusö anö Pedro a simöa kua noai na, ĩ na Paulo a simöa thaa hö̃tölöma. Pedro a simöaö ha, Jesus ta topa apöle, juteu töpö na Pedro anö ĩ ta wäsätii, Paulo a simöa naioö ha, juteu töpö pasi mai ĩ töpö na Paulo anö Jesus ta wäsä hö̃töa, ĩ na töpö kua kule‑ ĩ na ĩ pata töpö kulasoma. ⁸Teusö anö juteu töpö na Pedro a simönö nö, a pasilipo kua noai na, ĩ na juteu töpö pasi mai ĩ töpö na Teusö anö sa simönö nö, ĩ na sa pasilipo kua naioma. ⁹Önö kutenö, ‑Tiago a, Pedro a, João a, ĩ na kilii, ĩ pata töpö sai‑ ai töpönö töpö noa thaa wi, ĩ pata töpö aiki, ‑Paulo ai. Jesus wa ta wäsäpö, Teusö anö wa simönöma. Kawa, Pahanapé a, ĩ na kilii makönö Jesus ma ta wäsäti wi ĩ makö, kamisamakönö Jesus sama ta wäsäti wi ĩ samakö hö̃töwö, ĩ na makö pewö kua manu kule, “Juteu töpö na kamisamakönö Jesus sama ta wäsäpöö! Juteu töpö pasi mai ĩ töpö na kamakönö Jesus ma ta wäsä hö̃töopököö!” ĩ na samakö pewö kuu kuleö!‑ kamakö na ĩ na ĩ pata töpö sai kuuma. ¹⁰Ĩ na ĩ pata töpö kuu nö, ‑Töpö honimoti wi, hi tä uli ha ĩ töpö kule, ĩ ma töpö pasilia totipalöpököö!‑ ĩ na ĩ töpö kuuma. Töpö kuu ha, ‑Awai. Ĩ na sa pi kuu hö̃töa waikia kuleö!‑ sa kuu hö̃tösoma.

Pedro a na Paulo a hapalo opa noai ĩ ta

¹¹Ĩ na tä kua tä, Ãsiokia tä uli ha Pedro a waloiki nö, a tomöpo mi ha, Pedro sa päsäpama. ¹²Juteu töpö pasi mai ĩ töpö na Pedro a ia naio waikioma maaki, Tiago anö töpö simönö noai, ĩ töpö waloa haiki ha, tiko ha Pedro a ia kai loo hanomoma. ‑Juteu töpö pasi mai ĩ töpö ösö hosapamo naiopököö!‑ töpö kuti noai, ĩ töpö na Pedro a kili salo, juteu töpö pasi mai ĩ töpö na Pedro a ia kai loo sätäo kili kõoma. ¹³Juteu töpönö Jesus a thapo noai, ĩ ai töpö holisimo naio nö, ĩ juteu töpö pasi mai ĩ töpö na ĩ töpö holisi wani ekuo hanopalo läo naioma. Pahanapé a maaki, ĩ a hanopalo naioma. ¹⁴Ĩ na ĩ töpö kuaö ha, ‑Ĩ töpönö Jesus ta topa apöle, Jesus ta pitili ipii, ĩ ta hini totia aköna, töpö holisimo mana pi. Juteu töpö pasi mai ĩ töpö na ĩ töpö ekuo hanopalo mana pi‑ ĩ na sa pi kuu salo, Pedro a na sa hapaloma. Sa hapalo nö, ‑Juteu töpö pasi mai ĩ töpö na wa iapalo naioma kutenö, kawa hai, juteu wa maaki, hi juteu töpö a hilo pasia mane ĩ töpö kua kuati wi na, ĩ na wa kua naia kule. Ĩ na wa kua naia kule maaki, ĩ juteu töpö pasi mai ĩ töpö na wa hapalo nö, “Juteu samakö kuati wi na, ĩ na makö kua naitiopököö!” ĩ na wa kuu silia apatiwö a‑ ĩ na Pedro a na ĩ na sa kuuma.

Teusö a na makö taamö totia apölasoö

¹⁵Kamisamakö hai ĩ pata töpö hai, juteu töpö kutenö, kamisamakö hai, juteu samakö. ‑Juteu töpö pasi mai ĩ töpö wanisala apa kua wi na, ĩ na samakö wanisala kua mai kitä‑ ĩ na juteu samakö pewö pi kuu kule maaki, ¹⁶‑Jesus Cristo a pitili‑ ĩ na sanöma makö pewö pi kuu kuköma, Teusö a na makö pewö taamö totia apölasoö. Moisés anö nö patapö töpö noa thaa noai, sanöma makönö ĩ ma ta hini totile, ĩ tänö Teusö a na makö taamö toita toti mai kitä. Makö häwäpo soa kule. Ĩ ma tä taö waikia kule. Önö kutenö, ‑Jesus Cristo a pitili tä sai‑ ĩ na sanöma makö pewö pi kuu totio nö, Teusö a na makö taamö totipasoö. Önö kutenö, ‑Jesus Cristo a pitili‑ ĩ na juteu samakö pi kuu naioma. ‑Moisés anö nö patapö töpö noa thaa noai, ĩ ma ta hini ha, Teusö na makö taamö totipaso kitä‑ samakö pi kuu mane. Moisés anö nö patapö töpö noa thaa noai, sanöma makö pewönö ĩ ta hini totio wi ĩ tänö Teusö a na sanöma makö pewö totipo mai kitä.

¹⁷‑“Cristo a pitili” sa pi kuu totia apököma, Teusö a na sa taamö totipaso kitäö!‑ ĩ na makö pi kuu tä, ĩ tökö soatawö wa pi tapoiki nö, ‑Häö. Sa wanisala sai taköö!‑ ĩ na makö pi kuu kitä. Ĩ na makö pi kuu kitä maaki, ‑Sanöma makönö wanisala ma tä thatala wi, Cristo anö ĩ tä pii hãtoa kule‑ pö pi kuu ti! ¹⁸‑Moisés anö nö patapö töpö noa thaa noai, ĩ sa ta hininöma kutenö, sa totia waikipasoma‑ ĩ na sa pi hole kuu paio noai, ĩ sa ta hosa waikilöma maaki, ĩ sa ta hini sapa opimo kõköma, wanisala sa tä thaa kõo wi ĩ sa kua kõa soatasoö. Ĩ sa ta hini sapa kõone, ĩ tä wanisala. ¹⁹‑Moisés anö nö patapö töpö noa thaa noai, ĩ wa ta hininöma, Teusö a na wa taamö totipaso kitäö!‑ tä kuu wi sa ta hini mai kitä. Nomawö tänö ta hini mi kui na, ĩ na sa ta hini mi kuö öpö. Moisés anö nö patapö töpö noa thaa noai, ĩ tänö sa õsi peama apa nö, sa õsi noma totimanöma. ‑Moisés anö töpö noa thaa noai, ĩ sa tä pewö a hini makokopo totia aköna, Teusö a na sa taamö toita apö kitä maaki, ĩ sa ta hini makoka totia mi kutenö, Teusö a na sa taamö toita mai kitäö! Önö kutenö, wi na sa kua pätakö?‑ ĩ na sa pi kuuma. Önö kutenö, ‑“Cristo a pitili” ĩ na sa pi kuu totia sisaköma, Teusö a na sa taamö totia apapaso kitä‑ huki ĩ na sa pi kuu salo, Teusö sa hini pi topa sinomo wi ĩ sa. ²⁰Hii ti pakalai ti ha Cristo a na sa uni säpamo naio waikilasoma kutenö, huki sa temöa mane. Kama sa sai temö mai maaki, pili sa õsi sai na Cristo a kua kule. Huki hi masita tä uli ha sa kua tä, ‑Teusö ulupö a pitili‑ sa pi kuu pole, ĩ tänö sa temöa päa kule. ‑Cristo a pitili‑ sa pi kuu totia apöla nö, ĩ a na sa mamo teteiki nö, sa kutia. Ĩ anö sa noima apama. Sa noima apa nö, sa täa koni pia salo, a säpamonasoma. ²¹Teusö anö sanöma makö noima apa nö, makö totiapala apati wi ĩ sa tä hosa mane. Moisés anö nö patapö töpö noa thaa noai, ĩ tänö Teusö a na makö taamö totia apa waikipasoma aköna, Cristo a säpamo maa noa kipi.

Jesus ma ta hininöma kutenö, Teusö a õsi kua tolele, kamakö õsi na ĩ a kukö noai ĩ ta

¹Ipa kalásia tili pö. Makö pi hatukuo maapa wikö. Ai töpönö makö isi wanihama apa noa. Hii ti pakalai ti ha Jesus Cristo a säpalö noai, kamakö na ĩ ta kateha totioma maaki, ĩ tä na makö pi motio opa soapawö. ²Wi na makö pi kuu kule? Moisés anö nö patapö töpö noa thaa noai, ĩ ma ta hinia totilöma salo, Teusö a õsi kua tolele, kamakö õsi na ĩ a kuköma ta o? Ma. Noa thaa päo wi ĩ ma ta hini päoö ha kuno mai. Jesus ta topa apöle, ĩ ma ta hini nö, ‑Ĩ pitili tä sai a‑ makö pi kuu totioma kutenö, kamakö õsi na Teusö a õsi kua tolele, ĩ a kua totiköma. ³Pö pi motio opati ti! Teusö ma thapo tute tä, Teusö a õsi kua tolele, ĩ anö makö õsi totia sisapalöma maaki, kamakö aiki, ‑Huki kama sa õsi lotetea waikia kutenö, sa õsi topa apa waikia kuleö! “Teusö a õsi kua tolele, ĩ anö sa pasilipo nö toapököö!” sa pi kua hata maneö!‑ ĩ na makö pi kupalotipa wikö a. ⁴Makö kuatipili, ĩ ma tä taö maa waikitasopa noaikö a. ‑Kalásia tili töpö pepalo opa waikitioma kutenö, huki ĩ töpö kasiapalo opa kitäö!‑ ĩ na sa kuu pi topa kule maaki, makö kasiapalo mi kutenö, ‑Ĩ töpö pea hãto päo kipili?‑ kamakönö ĩ na sa pi thama kule. ⁵Wi na makö kuati ha, kamakö na Teusö anö kama õsi kua tolele, ĩ a totokö nö, kamakö na tä aipöamatii? ‑Moisés anö nö patapö töpö noa thaa noai, ĩ sama ta hini totia salo, Teusö anö kama õsi kua tolele, ĩ a õsi tototaö‑ makö pi kuu kule? Ma. Ĩ na pö pi kuu tihöö! Jesus ma ta hini nö, ‑Ĩ ta pitili‑ ĩ na makö pi kuu ha, Teusö anö kama õsi kua tolele, ĩ a õsi totoki.

⁶Nö patapö Abraão a na ĩ na tä kua somama. ‑Teusö a pitili‑ a pi kuu totio nö, Teusö a na a mamo teteoma kutenö, Teusö a na Abraão a taamö totia apöpasoma. ⁷Ĩ na tä kuaö ha, ‑Teusö a pitili‑ töpö pi kuu totio opa nö, Teusö a na ĩ töpö mamo teteo totio opa wi ĩ töpö hai, Abraão a ulupö töpö kui na, ĩ na ĩ töpö kuö asawö. Teusö a na Abraão a taamö toita apa kua noai na, ĩ na ĩ töpö taamö kuö hö̃töwö. ⁸Sutu ha, ĩ na Teusö tä waheta kuu somama: ‑Juteu töpö pasi mai ĩ töpö maaki, ĩ töpö aiki, “Teusö a pitili” ĩ töpö pi kuu totio opa asaö ha, Teusö anö ĩ töpö õsi totipali kitäö!‑ ĩ na Teusö tä waheta kuuma. Abraão a na toita ta wäsä noai, Teusö tä waheta na ĩ tä sãökököma. ‑“Teusö a pitili” ĩ na wa pi kuu makoka kuu wi na, ĩ na sanöma töpö pewö pi kuu kuköma, ĩ sa töpö pewö totiapala hö̃töki kitäö!‑ ĩ ta wäsä noai, ĩ tä sãökököma. ⁹‑Teusö a pitili‑ Abraão a pi kuu totioma kutenö, Teusö anö a totiapala hö̃töoma. Ĩ na tä kua kua noai na, huki ĩ na tä kua hö̃töoö. ‑Teusö a pitili‑ töpö pi kuu totio wi, huki Teusö anö ĩ töpö totiapala kua hö̃töoö.

Teusö anö Moisés a noa thaa noai, ĩ wa ta hini kule maaki, wa õsi totipo totio mai kitä

¹⁰‑Nö patapö töpö noa thaa noai, ĩ ta sãökökö noai, ĩ sa ta hinia totilöma, Teusö a na sa õsi totia apöpaso kitäö!‑ ĩ na töpö pi kuu wi, ĩ töpö na Teusö aiki, ‑Makö peama kuki kitä‑ ĩ na a pi kuu. ‑Moisés anö nö patapö töpö noa thaa noai, ĩ wa tä pewö a hini totio mi tä, Teusö anö wa peama kitäö!‑ Teusö tä waheta na ta kule, ĩ na ta kua. ‑Nö patapö töpö noa thaa noai, ĩ sa ta hinia totilöma, Teusö a na sa õsi totia apöpaso kitäö!‑ ĩ na wa pi kuu kule maaki, ĩ wa tä pewö a hini totiatalo opa mi kutenö, Teusö aiki, ‑Wa peama kitä‑ ĩ na Teusö a pi kuu. ¹¹‑Moisés anö nö patapö töpö noa thaa noai, ĩ sa ta hini ha, Teusö a na sa õsi totia apöpaso kitäö!‑ ĩ na wa pi kuu kule maaki, ĩ na Teusö tä waheta kuu mi ipö matatä. ‑“Teusö a pitili” wa pi kuu totio nö, Teusö a na wa mamo teteiki nö, Teusö a na wa õsi totia apöpamonasoma, wa temöapalo opa asatio kitäö!‑ ĩ na Teusö tä waheta kuu. ¹²Nö patapö töpö noa thaa noai, ĩ tiko ta pasiwö. ‑“Teusö a pitili” wa pi kuu totio nö, Teusö a na wa mamo teteköma, wa õsi totia apöpaso kitäö!‑ ĩ na nö patapö töpö noa thaa noai, ĩ na ĩ tä waheta kuu mi. ‑Toitai wa tä pewö thaa sinomo kuköma, wa õsi totia apöpaso kitäö!‑ ĩ na nö patapö töpö noa thaa noai, ĩ na ĩ tä waheta kuu pasioö. ‑Moisés anö nö patapö töpö noa thaa noai, ĩ wa ta hini totio kuköma, wa õsi temöo opötio kitäö!‑ ĩ na ĩ tä waheta kuu.

¹³‑Toitai wa tä pewö thaa mi tä, wa nomasoma, wa wani peama tolea kuki kitäö!‑ ĩ na nö patapö töpö noa thama maaki, makö pea tolea piale, ĩ tä pi na Cristo anö makö pewö kusöpalöma. Makö täapa kõo läopö, Cristo a noma waikisoma kutenö, makö nomasoma maaki, õsi makö pea tolea kõo naso mai kitä. ‑Hii ti na sanöma töpö sauo wi, ĩ töpö õsi pea tolea konaso kitä‑ ĩ na Teusö tä waheta kuu manu kule, pakalai ti ha Cristo a pi hĩta tä, a pea totioma. Kamakö noa na Cristo a pea totio waikioma kutenö, huki makö pea tolea konaso wi tä kua mai kitä. ¹⁴Jesus Cristo anö makö täapa kõo läo waikioma kutenö, Teusö anö sanöma makö pewö totiapala apaö. ‑Wa totiapala apa salo, wa õsi totia apöpamani kitäö!‑ ĩ na Abraão a na Teusö a kuu kua noai na, huki juteu töpö pasi mai ĩ töpö na ĩ na Teusö a kuu kua naioö. Jesus Cristo anö makö pewö täapa kõo läo waikioma kutenö, ‑Jesus Cristo a pitili‑ ĩ na makö pi kuu totio kuköma, kamakö pewönö Teusö a õsi kua tolele, ĩ ma õsi täalali. ‑Hi kamisa õsi kua tolele ĩ sa õsi totoki kitäö!‑ Teusö a kuu noai, ĩ ma õsi täa setekoö.

Teusö a, Abraão a, ĩ na kilii töpö noa thaso noai ĩ ta

¹⁵Ipa pö! Teusö anö makö noa thaa kua wi na, ĩ na ai sanöma tänö ĩ na ai sanöma tä noa thaa kua hö̃töoö. Makö noa thaso nö, makö noa thaso pole, ĩ tä sãököki, pili makö a hilo pole ĩ ma tä sãöka sätäki, ĩ na makö kua tä, makö noa thaso pole, ĩ ta kusöpa mai kitä. Makö noa thaso waikioma kutenö, ĩ tä na ai ta sätäa hösökama naio mai kitä. ¹⁶Sutu upa, Teusö a, Abraão a, ĩ na kilii töpö noa thaso nö, Abraão a na Teusö a hapalo nö, ‑Kawa, au ulu tolewö tä sai, ĩ na kilii makönö sanöma ma töpö pewö pi hatukupamani ha, kamisanö ĩ sa töpö pewö totiapala apa kitä‑ ĩ na Teusö a kuuma. ‑Au ulu tolewö töpö‑ ĩ na Teusö tä waheta kuu mi. ‑Au ulu tolewö tä‑ tä kuu sisaö. Satehe epii töpö aiki kuno mai. Sami tä aiki pätawö. ‑Au ai ulu tolewö tä‑ tä kuu pole, ĩ Cristo a. ¹⁷Pi naka. Ĩ na sa kuu totia alu kule. ‑Makö totiapala totio opa kitäö!‑ Abraão a na Teusö a kuu totiatalotima. A kuu totiatalo waikio noai ha, sakimi ipii, ĩ 430 tä inama kui tä inama matalo nö, Moisés a na Teusö a hapalo nömöo nö, a noa thaa nömöoma. A noa thaa nömöoma maaki, Abraão a na Teusö a hapalo waikio noai, ĩ ta mapama maama. ‑Makö totiapala apati kitäö!‑ Teusö a kuu noai, ĩ ta mapama päo maama. ¹⁸Teusö aiki, ‑“Ĩ na pö kua totioö! Ĩ na pö kua totioö!” Moisés sa noa thaa noai, ĩ wa ta hinia totilöma, wa totiapalati kitäö!‑ ĩ na Teusö a kuu kule ta o? Ma. Ĩ na a kuu mi ipö. ‑Wa totiapala apati kitäö!‑ Teusö a kuu noai, ĩ tä na, ‑Pitili ta‑ wa pi kuu kuköma, Teusö anö wa totiapalati kitä. Abraão a lö kui, ‑“Wa totiapala apati kitäö!” Teusö a kuu wi, ĩ pitili tä sai aö!‑ ĩ na a pi kuu ha, Teusö anö a totiapala apa hö̃tötioma. Ĩ na tä kuama.

Wi na Teusö a pi kuu salo, Moisés a na nö patapö töpö noa thamatima?

¹⁹Ĩ na tä kuama kutenö, wi na Teusö a pi kuu salo, Moisés a na nö patapö töpö noa thamama? Wi na makö pi kuu kule? Pi naka. Tä wanisala apati wi, ĩ tä na sanöma makö pi hatukumani pia salo, Teusö anö nö patapö töpö noa thama. ‑Au tolewö tänö Teusö sa na sanöma töpö pewö pi hatukupamani ha, ĩ sa töpö pewö totiapala apa kitä‑ ĩ na Teusö a kuuma. Ĩ Abraão a hai ĩ tolewö tä, ĩ Cristo a hai, ĩ a huu paio mi tä, Teusö anö nö patapö töpö noa thaa paio päoma. Teusö anö sanöma nö patapö töpö noa thaa pi topa noai, ãju töpö na ĩ ta wäsä somaö ha, ĩ ãju töpönö Moisés a na ĩ ta wäsäa nömöoma. Ta wäsä nömöoö ha, Moisés anö kama hai töpö na ĩ ta wäsä tolea nömöoma. ²⁰Abraão a na Teusö a hapalo tä, Abraão a na ai tänö Teusö a kai a wäsä tolea wi, ĩ ai tä kuo pasio maama. Kama Teusö a sai hapalo soata tä, Abraão anö tä hini totio soata noai, ĩ Abraão a kuoma.

²¹Abraão a nomaso noai ha, sakimi ipii waiha Teusö anö Moisés a na nö patapö töpö noa thamatima. Sakimi ipii nö patapö töpö noa thamatima kutenö, ‑Sanöma wa töpö pewö totiapala apa kitä‑ Abraão a na a kuu soma noai, ĩ ta maa kõo hãtopasoma? Ma. Ĩ ta mapo kõo maama. Teusö anö Moisés a na nö patapö töpö noa thamati noai, ĩ tänö sanöma makö õsi palimipalöma aköna, ĩ nö patapö töpö noa thaa noai, ĩ tänö Teusö a na makö taamö totipamanö noa kipi. ²²Nö patapö töpö noa thaa noai, ĩ tänö Teusö a na makö taamö totipama maama. ‑Sanöma töpö pewönö wanisala tä thaa sipa apatiwö‑ ĩ na Teusö tä waheta kuu. Önö kutenö, ‑Jesus Cristo a pitili‑ ĩ na töpö pi kuu totio wi, ĩ töpö na õsi palimipo wi ĩ tä totoa asaki kitä. ‑Kamisa na makö taamö totia apöpaso kitä. Makö õsi palimipo wi ĩ sa tä totoki kitä‑ Teusö a kuu noai, ĩ tä totoa asaki kitä. ‑Teusö a pitili‑ ĩ na töpö pi kuu wi ĩ töpö na.

²³‑Jesus Cristo a pitili‑ ĩ na makö pi kuu totio wi, ĩ nasimö tä kua paita mi tä, nö patapö töpö noa thaa noai, ĩ tänö makö uni pewö õkakö nö, makö huöpotima. ‑Cristo a pitili‑ ĩ na sanöma makö pi kuu totio wi, Teusö anö ĩ tä tapamoma paio mi tä, ĩ na makö õka kuo paitioma. ²⁴Hi tä uli ha Cristo a huu paio mi tä, Cristo a na makö walomaköpö, nö patapö töpö noa thaa noai ĩ tänö makö simöa sinomo paio pätioma. ‑Cristo a pitili‑ makö pi kuu nö, Teusö a na makö taamö totipasopö, nö patapö töpö noa thaa noai, ĩ tänö Cristo a na makö walomaköma. ²⁵‑Cristo a pitili‑ ĩ na sanöma makö pi kuu totio wi ĩ tä waloa waikikö solöma kutenö, nö patapö töpö noa thaa noai, ĩ tänö makö simöa noai, huki ĩ tä kua soa mai kitä.

²⁶‑Jesus Cristo a pitili‑ ĩ na makö pi kuu kuköma, Teusö ulupö makö pewö kupasoö. Teusö ulupö makö kupalo nö, Cristo a na makö pewö kokaki. ²⁷Makö mãi õmamoa totisoma, Cristo a na makö koka totiki nö, au haloi ösönö wa halota kua kõo kua wi na, ĩ na kawanö Cristo wa uni haloa thaa hö̃tölöma. ²⁸Cristo a na makö pewö uni koka waikia kutenö, sami makö kua. Sami makö kua waikipasoma kutenö, ‑Juteu wa pasi mai, ĩ tiko wa pasiwö‑ huki ĩ na tä kuu wi, ĩ tä kua mai kitä. ‑Noa mi wa kalipalo sinomo pasio pätio kutenö, Teusö wa thapo wi wa mai kitäö!‑ ĩ na tä kuu wi tä kua naia mai kitä. ‑Suö wa pasi kutenö, wa Teusömo tomöpo pasio mai kitäö!‑ tä kuu wi tä kua naia mai kitä. ‑Cristo anö wa thapo wi ĩ wa‑ ĩ na ĩ makö pewö na tä kuu wi, tä kua ösöhöa sisaa. ²⁹Cristo anö makö pewö thapo kutenö, Abraão hai ĩ tolewö töpö kui na, ĩ na makö pewö kuö. Abraão a na, ‑Au tolewö sa töpö totiapala apa kitäö! Ĩ töpö na sa õsi kua tolele ĩ sa õsi totoki kitä. Sa töpö õsi totipali kitäö!‑ Teusö a kuuma. Teusö anö makö õsi totia waikipalöma kutenö, ‑Abraão hai ĩ tolewö makö pewö‑ sa kuu alu kule.

¹Pi naka. Ĩ na sa kuu kule. Pö̃ a nomasoö ha, pelupö anö pö̃ a hai ĩ wani ĩ tä kuo noai, ĩ tökö pewö täli. Pelupö a wai ose epö soa tä, ĩ wani tökö sua paio mai kitä. Waiha a wai pata opia totilo nö, ĩ pö̃ a hai ĩ wani tökö sua sisali. A wai ose epö tä, pö̃ a sai pö ha töpö kalipalo wi, ai pata tänö ĩ töpö simöa kua wi na, ĩ na pelupö a ose wai simöa kua hö̃töoö. ²A ose soa päla tä, ai töpönö a wai simöa sinomotii. Pö̃ aiki, ‑Waiha sa nomaso noai ha, ĩ na tä kuto tä, ipa ulu anö ipa wani tökö kuo noai, ĩ tökö täa hailöpöö!‑ ĩ na pö̃ a kuu soata waikioma kutenö, pö̃ a nomaso noai ha, ĩ tökö soatawö, kama hai ĩ ulu anö ĩ wani tökö täa haia soatali. ³Ĩ na tä kua kua wi na, ĩ na Jesus ma thapo wi, ĩ na makö pewö kuaö. Teusö a na makö osemoti tä, Teusö a na makö pi hatukua paia mi tä, sai töpönö ai töpö simöa sinomoti wi, ĩ sai töpönö makö simöa naitioma. ^4-5Sai töpönö makö simöa sinomotima maaki, Teusö anö kama hai ĩ pelupö a simönöma. ‑Ĩ na ĩ tä wakala kuto totia hö̃töa tä, ipa ulu sa simöni pia salo‑ Teusö a pi kuu noai, ĩ na ĩ tä wakala kua toitasoö ha, pelupö a simönö lasoma. Sanöma tä suönö a thapalöma. Teusö a ulupö hai, ĩ sanöma tä kupasoma. ‑Moisés anö töpö noa thaa noai, ĩ tänö töpö simöa sisa wi, ĩ töpö tomöpo mi ipö kutenö, ĩ sa töpö täapa kõo läo nö, Teusö ulupö sa töpö thalali pia salo‑ ĩ na Teusö a pata hai ĩ pelupö a pi kuu salo, sanöma tä kupasoma. Moisés anö nö patapö töpö noa thati noai, ĩ tänö a simöa hö̃tötio noai, ĩ a kuoma.

⁶Huki Teusö ulupö makö kutenö, kamakö õsi ha Teusö anö kama hai ĩ pelupö a õsi kua tolele, ĩ a õsi simönöma. Teusö a na, ‑Hapa. Ipa hao ai!‑ makö thamati wi, ĩ a õsi aiki. ⁷Önö kutenö, huki ai tänö makö simöa wi, ai tä mai kitä. Teusö ulupö makö sisawö. Teusö ulupö makö kutenö, Teusö anö tökö thapo polali, kamakö na ĩ tökö pewö totoki kitä.

Kalásia tili töpö na Paulo a pi honipoö

⁸Teusö ma taö paio mi tä, ai pata töpönö makö simöatima. Ĩ pata töpö hai, ĩ sai töpö kuoma. Ĩ sai töpö hai, pata töpö sai kuo maama. ⁹Huki Teusö ma thapo totia kule. ‑Teusö anö makö thapoö‑ ĩ na sa kuu totia kule. Ĩ na tä kua kule maaki, wi na makö pi kuu salo, sai ma töpö thapo pi topa kõatalo opa nö kilia sai? Teusö a na ĩ töpö utiti, töpö tomöpo mi, ĩ na ĩ sai töpö kuö maaki, ĩ töpö na, ‑Sa simöa naioö!‑ makö pi ku upawö. ¹⁰‑Ĩ tä wakala sai na makö kokamoö, ĩ a pilipoma sai na makö kokamoö, ĩ tä inama sai na makö kokamoö, ĩ na makö kokamo kua totio mi tä, Teusö a na makö taamö toita mai kitäö!‑ ĩ na makö pi ku upawö. ¹¹Kamakö na sa pi honipo waikia kule. Sa kasiapalo opa nö, kamakö na Jesus sa wäsäti kipili maaki, ‑Makö wani tomöpo mi ipöö!‑ kamakönö ĩ na sa pi thama apawöö!

¹²Ipa pö! Nö patapö töpö noa thaa noai, ĩ tänö makö simöa soma maama. Önö kutenö, nö patapö töpö noa thaa noai, ĩ sa ta hosalöma kutenö, kamakö kua kua somatio kua noai na, ĩ na kamisa kua hö̃töa kule. Nö patapö töpö noa thaa noai, ĩ tänö sa simöa pasio mai, ĩ sa. Jesus a na sa mamo teteo sisaö. Ĩ na makö kua naio mi salo. Jesus ma hini totio sisa mi salo. Kamakönö sa wanipo maapili. Huki sa wanipo maikiö! ¹³Sa salipo maama aköna, kamakö sai pö na sa walo maa noa kipi. Tiko hamö sa hua waikisolö noa kipi. Sa salia päpasoma kutenö, kamakö na sa waloiki nö, kamakö na Jesus sa ta wäsä soma päo kipili. ¹⁴Sa salia apa kipili maaki, kamakönö sa hãsia maa kipili. ‑Kamisamakö na a kuo tihöö!‑ makö kuu maapili. ‑Hapo. Kamisamakö sai pö na a kuikiö! Wa kuiki nö, Jesus ta wäsäö!‑ ĩ na makö kuu kipili. Kamakö na ãju tä waloa totiköma köna, ĩ ma tä totiapala pi topa kua wi na, ĩ na kamakönö ĩ na sa totiapala pi topa kua totio opa hö̃töo kipili. Kamakö na Jesus Cristo a waloa totiköma köna, ĩ ma totiapala pi topa kua wi na, ĩ na kamakönö ĩ na sa totiapala pi topa kua totio opa hö̃töo kipili. ¹⁵Makö pi mönaha apa kipili. Huki wi na makö pi kuu salo, makö pi mönahapalo matasoma? Kamakönö sa totiapalama kutenö, ‑Pili makö mamo uköpalo nö, Paulo a na ai makö mamo totoa mi salo‑ ai makö kuuma aköna, pili makö mamo uköpalo nö, kamisa na ĩ ai makö mamo totopö noa kipi. ¹⁶Kamakö na pitili sa tä sai a wäsäö ha, huki kamakönö sa wanipo pikia hãtoa kule?

¹⁷Jesus ta wäsä makoka pasia mai, kamakö na ĩ töpönö ta wäsä pi topa kule maaki, ĩ töpö pitilimo maneö! ‑Paulo ma hini maapököö!‑ ĩ töpönö ĩ na makö pi thama pi topa päa kule. ‑Kamisamakö kai a hini sisapököö!‑ ĩ na ĩ töpö pi kuu päoö. ¹⁸Kamakö na sa kua tä, kamakö aiki, ‑Pitili sama tä sai a hini pi topa totia kule‑ makö kuu wi, ĩ tä topa. Ĩ na tä kua tä, kamakö na sa kua mi päla tä maaki, ‑Pitili sama ta hini pi topa totia kule‑ ai töpö na makö kuu wi, ĩ tä topa naia kule. ¹⁹Ipa ulu pö! Kamakö na sa õsi aulumoti kule. Sanöma tä ulu ositi wai kupo tä, pöpönö a halilimo kua wi na, ĩ na kamakö na sa õsi pi häöamo kua hö̃töa kule. Kamakö õsi na Jesus Cristo a kua totia paia mi ha, kamakö na sa õsi aulumoti kule. ²⁰Kamakö sai pö na sa kuatalo aköna, kamakö na sa hapalo opio totiatalo opöla pi. Kamakö na sa pi honipo opa kule.

Akaa a, Sata a, ĩ na kilii töpö suö kuo noai ĩ ta

²¹‑Teusö anö Moisés a na nö patapö töpö noa thama noai, ĩ wa ta hini sinomo mi tä, Teusö a na wa taamö toita mai kitä‑ ĩ na makö kuti wi, wi na makö pi kuu salo, ĩ na makö pi kuti kule? Teusö anö töpö noa thaa soma noai, ĩ tä sãökökö noai, ĩ ma tä taö totia apa kule ta o? ²²Pi naka. Tä sãöka somakö noai, ĩ na ĩ tä kua kule: ‑Abraão a patanö polakapi ulu tökö thaköma. A kalipalama sinomoti noai, ĩ Akaasoma anö ai a ulu thapali, pusopö pata sai kalipalama mane, ĩ Sata anö ai a ulu thapali, ĩ na ĩ tökö ulu thaa thapalöma. ²³Sanöma töpö ulu pewö kupo kua wi na, ĩ na a kalipalamati noai, ĩ a suönö a ulu thapalö noai, ĩ na ĩ a wai kua kupasoma. Abraão a hai ĩ pusopö a sainö ai a ulu thaa pasipalö noai, ĩ na ĩ a wai kupo kua naio maama. Teusö aiki, “Wa patasoma apa waiki maaki, au ulu wa taa satia konani kitäö!” ĩ na Teusö anö a noa wani thaa waikilöma kutenö, a wai kua päköma‑ ĩ na Teusö tä waheta kuu. ²⁴Ĩ polakapi suö tökönö ĩ ulu kökö thapalö noai, ĩ uni ta kuoma. Ĩ polakapi suö tökö hai, polakapi Teusö a hapalo pi kupaso noai, ĩ tä uni. Akaasoma a noa mi kalipalo sinomo noai ĩ a lö kui, Sinai makö pata hamö Teusö anö Moisés a na nö patapö töpö noa thama noai, ĩ tä uni. Sinai makö pata ha Moisés anö nö patapö töpö noa thaa noai, ĩ tänö töpö simöa sinomo wi, ĩ töpö pea pasioö. Töpö noa mi kalipalama sinomo pätio wi ĩ töpö hai ĩ ulu töpö pea kua naio soata kua wi na, ĩ na Teusö anö Moisés a na nö patapö töpö noa thama noai, ĩ tänö töpö simöa sinomo wi, ĩ na ĩ töpö pea kua hö̃töo soataö. ²⁵Akaasoma a lö kui, Atápia tä uli ha Sinai makö pata öpale, ĩ makö uni. Jetusalẽi tä uli pea wi, Akaasoma a hai, ĩ tä uli uni naiwö. Töpö noa mi kalipalama sinomo pätio wi, ĩ töpö pea kua wi na, ĩ na jetusalẽi tili töpö pea kua hö̃töoö. Jesus ta hini mai, Teusö anö Moisés a na nö patapö töpö noa thama noai, sami ĩ ta hini sisa kutenö, töpö pepalo opaö. ²⁶Hi tä hẽtu hamö ai Jetusalẽi tä uli kupoli, Teusö a sai pö a hilo naipoli, ĩ a sai ha töpö kule, ĩ töpö pea asa mi. Töpö noa mi kalipalama pätio wi ĩ töpö pea kua sinomo wi na, ĩ na ĩ töpö pea kua pasio mi. Abraão a hai pusopö Sata a lö kui, hi tä hẽtu ha Jetusalẽi tä uli kupoli, ĩ tä uni. Sata a simöamo wasisamamo kua pasio maa noai na, ĩ na pelupö a simöamo kua naio soata maama. Polakapi ĩ töpö peamamo maama. Ĩ töpö pea mi kua noai na, ĩ na kamakö pea mi kuö hö̃töwö. ‑Kamakö hai ĩ nao a kui na, ĩ na Sata a kuö‑ ĩ na makö kuutoö. Önö kutenö, ‑Hi tä hẽtu hamö Jetusalẽi tä uli kupoli, kamakö hai nao a kui na, Jetusalẽi tä uli kui tä uli kua lasoa‑ ĩ na kamakö kuuto naioö.

²⁷Teusö tä wahetanö ĩ ta katehaö:

‑Ai suö tänö peanopö a po waikile, ĩ a suö hai ĩ ulu töpö kua waikia kule maaki, ai peanopö tänö suö wa hãsiama pasio noai, ĩ wa suö ulupö kua satia apöki kitä. Önö kutenö, ulu wa tapa taö pasia maa noai, ĩ wa pi mönaha apapököö! Ulu wa tä wasupo paio maa noai, ĩ wa aiki, “Aitaköö!” wa kuu loteteo opapököö!‑

ĩ na Teusö tä waheta kuu.

²⁸Ipa pö! ‑Au ulu wa talali kitä‑ ĩ na Teusö a kuu waikioma kutenö, Isaki a wai kua kukö noai na, ĩ na kamakö kua kua hö̃töki. ‑Ipa ulu töpö kupaso kitä‑ ĩ na Teusö a kuu waikioma kutenö, Teusö ulupö makö kupasoma. ²⁹Sanöma töpö ulu pewö kupo kua wi na, ĩ na a wai kua kua hö̃töpaso noai, ĩ a wainö kama hai poosa a wai peamatima. Teusö a õsi kua tolele, ĩ anö a wai totokö noai, ĩ a wai peamatima. Ĩ na huki ĩ na töpö kua soaö.

³⁰Wi na Teusö tä waheta kuu?

‑Pö̃ a nomaso noai ha, a kalipalama sinomo wi, ĩ a suönö pelupö a thapalö noai, ĩ pelupönö pö̃ a hai ĩ wani tökö täa mai kitä. Pusopö a sainö pelupö a thapalö noai, ĩ pelupö anö pö̃ a hai ĩ wani tökö täa sisali. Önö kutenö, suö a kalipalamati wi ĩ a, pelupö a, ĩ na kilii töpö hosalöö!‑

ĩ na Teusö tä waheta kuu.

³¹Ipa pö! Kamakö hai, suö a kalipalama sinomoti wi, ĩ a hai ĩ pelupö makö mai kitä. Pusopö a sai lö kui, ĩ pelupö makö sai.

Cristo anö makö uni kusöpalö noai ĩ ta

¹Ai pata tänö töpö noa mi kalipalama wasisama apa kua sinomo wi na, ĩ na Moisés anö nö patapö töpö noa thaa noai, ĩ na ĩ tänö makö wasisama kua sinomo naioma. Ĩ na makö wasisama kua sinomo naioma maaki, Moisés anö nö patapö töpö noa thaa noai, ĩ tä na Cristo anö makö uni kusöpalöma. Önö kutenö, ‑“Ĩ na pö kuaö! Ĩ na pö kuaö!” Moisés anö töpö noa thaa noai, ĩ ta hini totioö!‑ töpö kuu wi, ĩ töpö a hini tihöö! Pö pi mosaia totikiö! Ĩ töpö a hini tihöö! Ma töpö a hininöma, töpö noa mi kalipalama sinomo wi, ĩ töpö pea kuati wi na, ĩ na makö pea kua naio kukö matimöö!

²Sa kuu pole, ĩ ta hinia totilöö! ‑“Sa õsi palimipo wi, ĩ sa tä pi ipa salo, pili sa isi ola ösö hosapamonasopöö!” ĩ na wa pi kuu kuköma, “Cristo a säpamoa waikisoma kutenö, sa õsi palimia waikipasomaö!” ĩ na makö pi kuu totio mai kitä‑ ĩ na Paulo sa kuu kule. ³Wa ösö hosapamonaso salo, Moisés anö nö patapö töpö noa thaa noai, ĩ wa tä pewö a hini naiopököö! ⁴‑Teusö anö Moisés a na töpö noa thama noai, ĩ sa ta hini totia salo, Teusö a na sa taamö totia apa waikia kule‑ ĩ na wa pi kuu pole, ĩ Cristo a na wa sokapaso noai, ĩ wa. Cristo a na wa koka soa wi tä kua mi. ‑Teusö anö nö patapö töpö noa thaa noai, ĩ sa ta hini taö öpa kutenö, Teusö aiki, “Kamisa na wa taamö toita” Teusö a pi kuu‑ ĩ na wa pi kuu pole, Teusö anö noa mi wa õsi totipali wi, ĩ wa mai kitä. ⁵Kamisamakö aiki pasiwö, ‑“Jesus Cristo a pitili” ĩ na samakö pi kuu totioö ha, Teusö a õsi kua tolele, ĩ a lotete epii ĩ anö samakö õsi totia apöpali kitäö! Samakö õsi totia apöpasoma, Teusö a na samakö taamö toita apa kuki kitäö!‑ ĩ na samakö pi kuu sinomoö. ⁶Jesus Cristo a na makö koka tä, ai wa ösö hosapamo asasoö, ai wa ösö hosapamo pasio mi, ĩ na makö kua wi, ĩ tä na Teusö a mamo teteo sisa mai kitä. ‑Jesus Cristo a pitili‑ wa pi kuu wi, ĩ tä na Teusö a mamo teteo sisaö. ‑Jesus Cristo a pitili‑ wa pi kuu totia kutenö, ai wa töpö noima apati wi, ĩ tä na Teusö a mamo teteo sisaö.

⁷Kalásia tili makö topa apa wi ĩ tä palaso kipili maaki, huki makö topa mane. Jesus Cristo ta pitili ipii, ĩ ma ta hini totia mane. Cristo ma ta hinipili, kamakö na ĩ witi pili anö ĩ ta hini matamanöma? ⁸Teusö anö kuno mai. Teusö anö makö nakali wi, ĩ anö kuno mai. Ai tiko tä hapalo läoö ha, pitili ma tä sai a hini maa hãtopasoma. ⁹Ĩsa ãi hölöopo opa wi, wani ipii ĩ tä wai kemaköma maaki, ĩsa ãi pata hölöa soatasoö. Ĩ na ĩsa ãi kua kua wi na, ĩ na makö kupasoö. Sami ai tä wani hapalo päoma maaki, wanisalai tä pata pala soatasolöma. Pitili sa tä sai a wäsä sinomopili, satehe epii ai makönö ĩ ma ta hosa hãtolömakö. ¹⁰‑Cristo anö makö pi hatukupamanöma, sa ta wäsätipili, ĩ ma ta hinia koni kitäö! Makö isi wanihiapamanö noai, Teusö anö ĩ a wani peama hö̃töo kitä‑ ĩ na sa pi kuu totia kule.

¹¹Ipa pö. Teusö sa ta wäsä pola nö, ‑Makö isi ola ösö hosapamopököö!‑ ĩ na sa kuu aköna, ai juteu töpönö sa peama mana pi. ‑Moisés anö nö patapö töpö noa thaa noai, ĩ ma ta hini totio mi salo, makö tomöpo mai, ĩ tä na hii ti pakalai ti ha Jesus a säpamonaso noai, ĩ a na pö mamo tetea sisaköö!‑ ĩ na Teusö sa ta wäsä nö, ĩ na sa kuu sinomoö. Ĩ na sa kuu sinomo pasioö ha, ai töpönö sa hĩsu thaa sinomoö. Hii ti pakalai sa ti a kateha mi aköna, ai töpönö sa hĩsu thaa mana pi. Ĩ töpönö sa peama mana pi. ¹²Töpö wäoti pole, ĩ töpönö makö isi wanihipalama apati päa kule. Ĩ pili töpö isi ola ösö wai hanöpamo pi topa apa manu kule, pili töpö wathe mokö wai hanöpamoa naia soatasopököö! Teusö a thapo mai, ĩ na ĩ ai töpö kuo hãkikio kuo wi na, ĩ na ĩ töpö kua naiopöö!

¹³Ipa pö! Nö patapö töpö noa thaa noai, ĩ tä na Teusö anö makö uni kusöa kopamanöma. Teusö anö makö naka tä, ‑“Moisés a na sa töpö noa thamapili, ĩ ta hini sinomoö!” ĩ na huki sa kuu kota mai kitäö!‑ ĩ na Teusö a pi kuuma. ‑Moisés anö töpö noa thaa noai, huki ĩ tä na sa töpö uni kusöa kopamanöpöö!‑ ĩ na a pi kuuma. Kamakö aiki, ‑Teusö anö Moisés a na töpö noa thama noai, ĩ tä na sa uni kusöa kopamanöma kutenö, huki wanisala sa tä thaa pi topa wi, ĩ sa tä thaa kitä‑ ĩ na pö pi kuu ti! Makö noimaso totio nö, makö pasilipaso hẽtupaso totiopököö! ¹⁴‑Kama wa noimo sapao kua kõo kua wi na, ĩ na ai wa töpö noima kua hö̃töopököö!‑ ĩ na Teusö a kuupö, Moisés a na nö patapö töpö noa thatalama apatima. Önö kutenö, pö noimaso totioö! ¹⁵Pole a waitili wani höla kua soa päatalo opa kua wi na, ĩ na pö kua soa päatalo tihöö! Pö pi hatukua totikiö! Ai ma töpö namo kusöpa soatalotii, makö hapalo wanisala soatalo opatii, ĩ na makö kuati kuköma, makö noimo maa totia apöpasoma, makö pewö maa totipaso matimöö!

Makö õsi wanisalaö, Teusö a õsi kua tolele, ĩ a topa apa asaö, ĩ na tä kuaö

¹⁶Pi naka. Ĩ na sa kuu totia kule: ‑Teusö a õsi kua tolele, ĩ a na makö simöamo sinomotipököö! Teusö a õsi kua tolele, ĩ anö makö simöa sinomoti ha, sanöma makö õsi wanisalai, ĩ makö õsinö wanisala ma tä thaa pi topa apa wi, ĩ ma tä thaa mai kitä. ¹⁷Teusö a õsi kua tolele, ĩ anö toitai tä thaa pi topa kua sinomo wi na, sanöma makö õsinö pasiwö ĩ na ma tä thaa pi topa kua pasio mi. Sanöma makö õsinö wanisala ma tä thaa pi topa sinomo wi, Teusö a õsi kua tolele, ĩ anö ĩ tä thaa pi topa naia mai kitä. Sanöma makö õsi wanisalai, Teusö a õsi kua tolele, ĩ anö ĩ makö õsi wanipo nö, makö õsi wasuli, Teusö a õsi kua tolele ĩ a toitai, sanöma makö õsinö ĩ ma õsi wanipo nö, ma õsi wasua hö̃töli, ĩ na tä kua nomöhasotii. Önö kutenö, toitai ma tä thaa pi topa kule maaki, wanisala ma tä thatala pikitiowö. ¹⁸Ĩ na makö kua sinomoti wi maaki, “Teusö a õsi kua tolele, ĩ a na sa simöamotipököö!” ĩ na makö kuu sinomoö kuköma, Moisés anö töpö noa thaa noai, ĩ tä na wa simöamo pasio wi ĩ wa mai kitä‑ ĩ na kamakö na sa kuu kule.

¹⁹Teusö a õsi kua tolele, ĩ a na wa simöamo mi tä, wa õsi wanisala soatalo opati wi, ĩ tä hatuka apaö. Wa õsi wanisalai, ĩ wanö hiopö wa tä thaa pi topa apa nö, tiko wa tä suö nö thaö, wanisala wa tä thaa kili mi, ĩ na wa kua apaö. ²⁰‑Sa noama pasiopö ĩ töpö ukutupö‑ wa pi kuu wi ĩ wa töpö ukutupö thapotii. Wa õkamoö, ai wa tä wanipoö, wa hölaö, ai wa tä hĩsu thaö, wa hĩsolo nö wa waitilimonasoö, ai töpö na wa hapalo pi wasöa soatalo opaö, wa patamo pi topa apa kutenö, wa selekepo pi topa apaö, ²¹ai tä kua asatio wi, ĩ wa tä taa nö, wa pi wasisa apa naisoö, wa polemo opaö, makö kokamo nö makö iapaloti tä, wanisala wa tä thaa tikiliapalo pasia, ĩ na wa kuaö. Sanöma wa õsi wanisalai, ĩ wa õsinö wa simöo sapao kõo tä, ĩ na wa kuaö. Ĩ na wa kua pasitioma, Teusö wa thapo mi kutenö, Teusö a pata kaikanamo sinomo wi, ĩ ha wa lisipo naio totio mai kitä. Sa kuu waikiopili, ĩ tä na sa kuu kõa kule.

²²Ĩ na tä kua tä, Teusö a õsi kua tolele, ĩ anö wa simöa pasia tä, ai wa töpö noimaö, wa pi mönaha apaö, wa pi honiha apa mi, wa hĩso soatalo mi, wa noimo opaö, ai wa töpö pasilipo opaö, wa pitilimo opaö, ²³wa waitilimo mi, wanisala tä thaa pi topa wi, ĩ tä na, ‑Naiö! Thama maikiö!‑ wa kuu sinomo läoö, ĩ na Teusö a õsi kua tolele, ĩ anö wa simöa tä, ĩ na wa kuaö. Ĩ na wa kua apati tä, ‑Ĩ na a kuati tihöö!‑ wa noa thaa wi tä kua mai kitä. ²⁴Pi naka. Jesus Cristo makö thapo pole, ĩ makö õsi wanisalale, ĩ kama makö sainö ĩ kama makö õsi säo sapapo kõoma. Ti pakalai ti ha Cristo a säpamoa kulaso noai na, ĩ na wanisala ma tä thaa pi topa sinomo wi, kama makö õsi na ĩ na ĩ tä kule, ĩ na ĩ ma tä säa thaa hö̃töa waikipalöma. ²⁵Teusö a õsi kua tolele, ĩ anö makö õsi temöa kopamanöma kutenö, Teusö a õsi kua tolele, ĩ anö makö simöa totio wi, ĩ sa tä pi ipa kule. ²⁶‑Kamisa hai, ĩ pata sa asawö. Sa topa apa asaö‑ ĩ na makö kuu maapököö! Ai tä hĩsuma hãto tihöö! Ai tä hĩsu thaa hãto tihöö!

Makö pasilipaso totiopököö!

¹Ipa pö! Kamakö kule ha, ai tä kule, ĩ anö wanisala tä thaö ha, Teusö a õsi kua tolele, ĩ anö makö simöa totio wi, ĩ makönö ĩ ma wani pasilipalö nö, ma wani makokoa totia kopalöpököö! Makö höla mai, opii makö hapalo totio nö, ‑Wanisala tä thaa tihöö!‑ ĩ na makö kuupökö. Wanisala tä tha apa wi, ĩ a na makö hapalo salo, pö pi mosawikiö! Makö pi mosawi mi tä, wanisala ma tä thaa naio kukö matimöö! ²Ai tänö wani tä pi hute epii tä pi sihipo tä, ĩ wa wani pasilipa pi topa salo, ĩ a wani hai ai wani wa tä titia selekea thali wi na, ĩ na ai tä pi wanisala apati nö, a pi hutea apati wi, kawanö ĩ wa wani pasilipo hö̃töopököö! Cristo anö makö noa thaa noai, ĩ wa ta hinia totilöma, ai tä utiti pasii, ĩ a pi wanisala apati wi, kawanö ĩ wa pasilipo kitä. ³Wa tomöpo mai maaki, ‑Sa tomöpo mi mai kitä. Pata sa‑ ĩ na wa pi kuu nö, wa mönao opaö. ⁴Wa kuati wi, ĩ tä na wa pi tapoa totiki nö, ‑Sa tomöpo maa hãto alu kule? Sa topa hãtoa alu kule?‑ ĩ na wa pi kuupökö. Ĩ na wa pi kuu nö, wa topa apa waikia tä, wa pi mönaha hatuka apa kitä. Wa kuati wi, ĩ tä na wa pi tapoa waikia salo, ai tä wani na a pi tapomo naio tihöö! ‑Hi a wani na kamisa totiatalo hasua apa asaö‑ a pi kuu ti!

⁵Wa kuati wi, ĩ tä na wa pi tapoa sisaiki nö, Teusö a na wa pi tapomo sisapökö. ‑Teusö a na sa tomöpo hãtoa maa alu kule?‑ ĩ na wa pi kuu totiopökö.

⁶Ai tänö kawa na Teusö ta taöma sinomo wi, ĩ wanö ĩ wa wani täpälöpököö! ⁷Kama pö mönao sapao kõo tihöö! Teusö wa osemoma mai kitä. Au hikali a na mokö wanisala apii ĩ wa mokö tököma, waiha ĩ mosö ãkelo nö, pili mokö wanisala apii mokö kuki. Ĩ na tä kua tä, toita apii wa thomokö tököma, ĩ mokö ãkelo nö, mokö sätäköma, ĩ mokö toita apii wa mokö kõa totili. Hikali a na au nii tä patasipöpo kua wi na, ĩ na sanöma makö kuaö. ⁸Tä wanisalai wa tä uni töa tikiliköma, wanisala wa tä thaa kuki kitä. Wanisala wa tä thaa pi topa wi, ĩ wa tä thaa kuköma, wa õsi palimipo mai kitä. Ĩ na tä kua tä, toitai tä thaa wi, ĩ tä na Teusö a õsi kua tolele, ĩ a pi mönaha apati wi, ĩ wa tä thaa kuköma, wa õsi palimia tolea apa kuki kitä. ⁹Önö kutenö, ‑Sa kasiapaloti wani ipö salo, huki toitai sa tä thaa wania apa waikia kule‑ ĩ na pö pi kuu tihöö! Toitai tä thaa mapo maikiö! Wa kasiapalo opati kutenö, au hikali a na wa kalipaloti nö, au nii wa tä tököma, au nii tä patasipö kua apa tä, waiha ĩ au nii wa tä täa kõa hö̃töli kitä. Ĩ na wa kua kua wi na, ĩ na toitai ma tä thaa sinomo wi, ĩ na ĩ makö kua hö̃töo kuki kitä. Makö kasiapalo opati kutenö, ‑Toitai sa tä thaa mapo mai kitä‑ ĩ na makö pi kuu nö, waiha makö topa apa kuki kitä. ¹⁰Önö kutenö, huki ai töpö pewö na huki toitai ma tä thaa sinomotipököö! Kama makö pewö sai kui na, ĩ na ai töpönö Cristo a hini hö̃tölai, ĩ na ĩ töpö kuö hö̃töwö. Önö kutenö, ĩ töpö na toita ma tä thaa satia apa sinomo kuköpököö!

Teusö anö õsi tutepama kõo wi, ĩ ta

¹¹‑Hi waheta tä hai, Paulo a sai kuu wi hi ĩ tä waheta waikiwö‑ ĩ na makö pi thama pi topa salo, hi ola ha kama sa sainö sa tä sãököki ke. Tä sãökamö pe epö pasii, Paulo sa sainö ĩ sa tä sãöka pasiki ke. ¹²Pili makö isi ola ösö hosapa wi, ĩ töpö aiki, ‑Makö õsi topa apapökö‑ ĩ töpö pi kuu mi ipö. Ĩ kama töpö möamö totipo pi topa apa kõo päo salo, ‑Pili makö isi ola ösö hosapalöpököö‑ ĩ na ĩ töpö pi kuti päoö. ‑Hii ti pakalai ti ha Jesus a säpalö noai, ĩ sa ta wäsä pasio kuköma, ai töpönö sa peama matimöö!‑ ĩ na ĩ töpö pi kuu salo, ‑Pili makö ösö hosapamonasopököö!‑ tä kuu wi, ĩ töpönö ĩ ta wäsä sisa pasia kulai. ¹³‑“Makö isi ola ösö hosapamonasopököö!” Moisés anö nö patapö töpö noa thama kutenö, huki pili makö isi ola ösö hosapalöpököö!‑ ĩ na töpö kuu sinomo wi, Moisés anö töpö noa thaa noai, ĩ töpönö ĩ tä pewö a hini mi ipö. Ai töpönö ĩ tä pewö a hini mi ipö kui na, ĩ na ĩ töpönö ta hini mi ipö kuö hö̃töwö. ‑Ĩ sa töpö noa thama kutenö, ĩ töpö ösö hosapamonaso kipiliö!‑ ĩ na ai töpö na ĩ na ĩ töpö kuu pi topa apa kutenö, ‑Pö ösö hosapamonöö!‑ ĩ na ĩ töpö kuu sinomo päoö. ¹⁴Jesus Cristo pata tänö makö pewö täapa kõo läopö, hii ti pakalai ti ha a pata säpamonaso noai, kamisanö ĩ sa ta kateha pi topa pasioö. Ti pakalai ti ha Jesus a säpamoa waikisoma kutenö, Teusö a thapo mai, ĩ töpö kuati kua wi na, ĩ na sa kua mai kitä. Teusö a thapo manai, ĩ töpö kuati wi, ĩ tä na sa pi lulua mai kitä. Ĩ na tä kua tä, nomawö tä kua wi, ĩ sa tä pii mi kui na, ĩ na Teusö a thapo mai ĩ töpö kuati wi, ĩ sa tä pii mi kuö hö̃tö soatawö. ¹⁵‑Pili sa ösö hosapamoa waikisoma kutenö, Teusö na sa õsi makoka apa waikile kitäö!‑ pö pi kuu ti! ‑Pili sa ösö hosapamo mi päla nö maaki, Teusö na sa õsi makoka apa waikile kitäö!‑ ĩ na pö pi kuu naio tihöö! Pili wa ösö na Teusö a mamo teteo wi tä kua mai kitäö! Önö kutenö, ‑Teusö anö sa õsi tutea apapalöma kutenö, sa õsi makoka apa waikile kitäö!‑ ĩ na pö pi kuu sisaaö! ¹⁶‑Paulo a kuuhe, ĩ pitili tä sai haö! Ĩ na sa kua naitia kuleö!‑ ĩ na makö kuti wi ĩ makö, Teusö a hai ĩ makö pewö naiwö, ĩ na makö kui, kamisanö Teusö a na ĩ makö a wäsä nö, ‑Ĩ töpö pi topapalamaö! Ĩ töpö totiapala apaö!‑ ĩ na sa kuu kule.

¹⁷Ai makönö sa peama maikiö! Kamisanö Jesus sa ta wäsä satia apama tä, ai töpönö ĩ ta hini wanio nö, sa sä noai, pili sa sai na ĩ tä uno pewö kua waikia kule. Önö kutenö, ai wanö sa kai a peama tihöö!

¹⁸Ipa pö! Jesus Cristo pata tä na sa hapalo nö, ‑Kalásia tili wa töpö pewö totiapala apapöö!‑ ĩ na sa kuu.

Ĩ naköö!