Efésios

Efésios

Epesu tili töpö na waheta tä simöpalö noai ĩ ta

Epesu tili töpö na Paulo anö Jesus ta wäsäti noai, 3 tökö inama hasupamanöma. 3 tökö inama hasupamanö nö, a hua konasolö noai ha, ai tiko tä uli ha Paulo anö Jesus ta wäsäti ha, titita wi a sai ha ai töpönö Paulo a titiköma. A tititia tä, hi waheta tä sãököpalö nö, epesu tili töpö na tä simönöma.

‑Hi tä hẽtu hamö töpö kulali ĩ töpö, hi masita tä uli hamö makö kupai ĩ makö, ĩ na makö pewö kui, Teusö anö Cristo a na ĩ makö pewö kokapamanö nö, ĩ makö pewö na Teusö anö Cristo a kaikanamoma pia salo‑ ĩ na epesu tili töpö na ĩ na Paulo a kuu pi topa apama kutenö, hi waheta tä sãököpalöma. Tä sãököpalö nö, ‑Jesus ma thapo wi, huki Teusö anö Jesus a na ĩ makö koka waikipalöma kutenö, makö lotetea waikia kuleö! Önö kutenö, Sai tä sai patanö makö peama maapököö!‑ ĩ na a kuu nömöoma.

Ĩ na a kuu nö, ‑Makö pole mo mai, Teusö a õsi kua tolele, ĩ a na, “Sa simöa sinomo totihoö!” pö pi kuu totihoö!‑ a kuuma.

Ĩ na a kuu nö, ‑Kamakö na Sai tä sai pata ekuo tä, makö läa mosawia hö̃tököpö, Teusö anö ösöskö uni totoma wi, ĩ ösökö ha pö uni haloikiö!‑ ĩ na Paulo a kuu totio opama.

¹Paulo sa. Jesus Cristo anö samakö simöa asalö noai, ĩ ai sa. Teusö aiki, ‑Jesus Cristo anö Paulo a simöa nainöpököö!‑ ĩ na Teusö a pi kuu ha, Jesus Cristo anö sa simöa noai ĩ sa. Epesu tili pö! Teusö anö makö thapo wi, Jesus Cristo a na huki makö kokale, ĩ a na makö pi kuapaloti wi, ĩ makö na hi waheta sa tä simöpali ke. ²Kamakö hai ĩ pö̃ Teusö a, kamakö hai ĩ Jesus Cristo pata tä, ĩ na kilii töpö na sa hapalo nö, ‑Noa mi, epesu tili töpö totiapala apaö! Töpö pi topapalama apaö!‑ ĩ na sa kuu.

Jesus Cristo a na makö kua kutenö, Teusö anö makö õsi pewö totiapala apaö

³Kamakö hai ĩ Jesus Cristo pata tä hai ĩ pö̃ Teusö a na, ‑Aitaköö! Wa totiatalo opawöö!‑ ĩ na makö pewö kuupököö! Cristo a na makö pewö kua kutenö, Teusö anö makö õsi totiapala apa nö, hi tä hẽtu ha tä toitai tä kupoli, Teusö anö kamakö na ĩ nasimö tä pewö totopöma. Wani tökö aiki kuno mai. Pili makö õsi lotetea wi, ĩ nasimö tä totopöma. Cristo a na makö kalipalo taö öpa kuki wi, tä totoa naipöma. ⁴Hi masita tä uli thapa paio mai ha, Teusö aiki, ‑Cristo a na ĩ töpö kua naiköpöö!‑ ĩ na a pi kuu nö, makö pewö saia asa soapalöma. Kama na makö õsi ausi ipii, makö wanisala mi ipii, ĩ na makö kui makö kuköpö, makö sailöma. Makö pi ipa salo, ⁵Jesus Cristo a na makö kokamakö nö, ‑Ĩ töpö hai, ipa ulu töpö kupasoö ha, sa pi mönaha apa kuki kitäö!‑ ĩ na Teusö a pi kuu nö, ‑Ĩ töpö hai, ipa ulu töpö kupasopöö!‑ ĩ na a pi kuuma. ⁶Ĩ na a pi kuu nö, ‑Ipa töpö aiki, “Aitaköö! Teusö a ö̃tö öpii, ĩ anö kama hai pelupö a pi ipa wi ĩ pelupö a na makö kokapamanö nö, noa mi makö totiapala totio opama” ĩ na ipa töpö kuupököö!‑ ĩ na Teusö a pi kuuma. ⁷Cristo a iä pönö makö uni kusöpalöma. Wanisala ma tä thaa noai, ĩ tä na Teusö a hĩso noai, Cristo anö ĩ tä mapamanöma. Pe epii Teusö anö noa mi makö totiapala apama. ⁸Noa mi makö totiapala apa wi, pe epii kamakö na ĩ tä pala soamanöma.

Teusö a pi tao opaö, a pi mosawi ipö, ĩ na a kua nö, ⁹‑Ĩ na sa tä thama kuki kitäö!‑ ĩ na a pi kuu nö, ‑Cristo sa simöpalö nö, ĩ na sa tä thama kuki kitäö!‑ a pi kuu noai, kamakö na ĩ tä möma hasulua apama. ¹⁰‑Pei. Huki ĩ sa tä pewö thama hötötöpa waikio pia kuleö!‑ ĩ na Teusö a pi kuu tä, hi tä hẽtu hamö töpö kupoli ĩ töpö, hi masita tä uli hamö makö kupai ĩ makö, ĩ na makö kui, Teusö anö Cristo a na ĩ makö pewö kokapamanö nö, ĩ makö pewö na Teusö anö Cristo a kaikanamoma pia salo.

¹¹‑Ĩ na sa tä thamapököö!‑ Teusö a pi kuu totio waikioma kutenö, ĩ tä pewö thama totihoö. Hi masita tä uli kua paia mai ha, ĩ na Teusö a pi kuuma: ‑Waiha Cristo a na sanöma sa töpö kokapali wi, ĩ sa töpö saipalö nö, ipa sa töpö täli kitäö!‑ ĩ na a pi kuu waikioma kutenö, makö saia asapalöma. ¹²Önö kutenö, Cristo a na samakö noamamo soma noai, ĩ samakö aiki, ‑Teusö a wakala apii, ĩ tä toita apö‑ ĩ na samakö kuupökö.

¹³‑Teusö anö makö noama apa nö, makö täa koni kitäö!‑ ĩ na ta kuu wi ĩ ta topa apöle, ta pitili ipii, epesu tili makönö ĩ ma ta hini nö, ‑Cristo a pitili‑ makö pi kuu naioma kutenö, Teusö anö makö thapo wi ĩ makö kupasoma. Ĩ makö kupasoö ha, ‑Teusö anö töpö thapo wi ĩ töpö‑ ĩ na Teusö anö ai töpö pewö pi thama pia salo, kamakö na kama õsi kua tolele, ĩ a titiköma. ¹⁴Kamakö pewö na Teusö a õsi kua tolele, ĩ a titiköma kutenö, ‑“Waiha ipa töpö na ĩ sa tä totoki kitä” ĩ na Teusö a kuu noai, ĩ pitili taö!‑ ĩ na makö pewö pi thamaö. Teusö a õsi kua tolele, ĩ ma thapo waikia kutenö, ‑Teusö anö makö uni kusöa totipali kitäö!‑ ĩ na makö pi kuu. Önö kutenö, ‑Teusö a wakala apii ĩ tä toita apö‑ ĩ na makö pewö pi kuupököö!

Teusö a lotetea apöle, kamakö õsi ha ĩ tä kalipalo opaö ha, makö õsi lotete tole epö

¹⁵Ĩ na Teusö anö makö thama waikioma kutenö, ai töpönö makö a kateha kule. ‑Epesu tili töpö aiki, “Jesus Kaikana a pitili” ĩ na ĩ töpö pi kuu totio opaöö! Teusö a thapo wi, epesu tili töpönö ĩ töpö pewö noima totio opaöö!‑ ĩ na ai töpö kuu wi ĩ sa ta hini salo, ¹⁶‑Aitaköö! Epesu tili töpönö wa thapo kuleö!‑ Teusö a na ĩ na sa kuu mapo mi. Teusö a na sa hapalo nö, makö a wäsä nö, ¹⁷Jesus Cristo pata tä hai ĩ Teusö a, kamakö hai ĩ pö̃ a wakala apii, ĩ a na kamisa aiki, ‑Hapa Teusö! Kawa õsi kua tolele, ĩ anö epesu tili töpö pi mosawipamanö nö, kawa na ĩ töpö pi hatuka totimaköö! Ĩ töpönö wa taö totio opapöö!‑ ĩ na sa kuu. ¹⁸‑Ĩ wa töpö pi hatuka totimakö nö, töpö õsi wakalapalöö! Töpö pi motia apötile, ĩ tä mapamanöö! Ĩ wa tä mapamanöma, “Teusö anö sa nakalöma kutenö, waiha ĩ na sa thama kuki kitäö!” ĩ na ĩ töpö pi kuupököö! “Teusö anö makö sokamakö nö, makö thapo pole, ĩ makö na tä toita apii tä totoma apa kitäö!” ĩ na ĩ töpö pi kuu taö öpapöö!‑ ĩ na sa kuu. ¹⁹Ĩ na sa kuu nö, ‑“Cristo a na makö pi kua wi, ĩ makö õsi na Teusö a lotetea apöle, ĩ tä kalipalo pole, pe epii ĩ tä lotete” ĩ na ĩ töpö pi kuu taö öpapököö!‑ ĩ na Teusö a na ĩ na sa kuu. ²⁰Teusö a lotete epii, ĩ tänö Cristo a nomawö temöa komanö nö, hi tä hẽtu hamö Teusö a kotö ha a loa komakölö nö, a kaikanapalöma. Cristo a na Teusö a kalipalo lotetea apa kua noai na, ĩ na kamakö na ĩ na a kalipalo lotetea apa kua hö̃töoö. ²¹Teusö anö Cristo a kaikanapali ha, hi tä hẽtu ha pata töpö kupoli, Cristo anö ĩ pata töpö pewö na a kaikanamo kupoli. Ãju pata töpö, sai pata töpö, ĩ na pata töpö kui töpö pewö na Cristo a kaikanamo kupoli. Ĩ töpö lotetea apa waikia kule maaki, Cristo a loteteapalo satia apaö. Huki pata töpö patamo pole, ĩ töpö na a kaikanamo satia apa asaö. Hi masita tä uli mapaso noai ha, töpö patamo pia wi ĩ töpö na Cristo a kaikanamo nömöo pia salo. ²²Ĩ töpö pewö na Teusö anö Cristo a patamoma totioma. Cristo ma thapo wi ĩ makö kokamo sinomo wi ĩ makö na Teusö anö Cristo pata tä patamoma naioma. Pata töpö pewö na Teusö anö Cristo a kaikanamoma noai, kamakö na ĩ a kaikanamoma naioma. ²³Cristo ma thapo wi ĩ makö hai, ĩ Cristo pili makö sai waikiwö. Cristo a na ĩ makö pewö koka kutenö, Cristo a solo, ĩ makö pewö kua ösöhöa totiki. Ĩ tökö uli pewö hamö töpö kupai, ĩ töpö na Cristo a kua salo, hi masita tä uli pewö hamö sanöma makö kule ĩ makö, hi tä hẽtu hamö töpö kupoli ĩ töpö, ĩ na makö kui makö pewö na Cristo a kaikanamoö.

Teusö anö Cristo a na makö kokamakö nö, makö temöpamanö noai ĩ ta

¹Teusö ma hini totio mai, wanisala ma tä thaa tikiliapalo opatii, ĩ na makö kuatima kutenö, makö õsi nomawöo opama. Makö õsi nomawöo opama maaki, Teusö anö makö õsi temöa kopamanöma. ²Makö õsi nomawö öpö tä, Teusö a thapo mai, ĩ ma töpö uömatima. Sai tä sai patanö sai töpö simöati wi, ĩ Sai ma ta pata hini toitioma. Sanöma töpönö Teusö a hini mai, huki ĩ Sai tä sai patanö ĩ töpö simöatii. ³Teusö a hini mai, ĩ töpö kua kuati wi na, ĩ na makö pewö kua totio naitioma. Kama makönö ma tä thaa pi topa päo noai, ĩ ma tä thaa pätioma. Makö pi tapomo wanisala apa nö, wanisala tä na makö puko pi topa päo salo, ma tä thaa pi topa apa päo noai, ĩ ma tä tha apatima. Ai sanöma töpö pewönö Teusö a hĩsumanöma kutenö, waiha Teusö anö ĩ töpö peama kua piale na, ĩ na Teusö ma hĩsua thaa naimanöma kutenö, ĩ na makö moni peamamo kua naioma.

⁴Makö wanisala apatima maaki, pe epii Teusö anö makö pi ipaö, pe epii makö totiapala apaö, ĩ na Teusö a kua kutenö, ⁵makö temöpalöma. Teusö ma hini mai ĩ makö õsi nomawö öpö soa tä, Teusö anö Cristo a na makö kokaköma, makö temöpasoma. Makö wanisala apama maaki, Teusö anö makö totiapala apa nö, makö täa konöma. ⁶Jesus Cristo a na makö kokaköma, makö õsi temöpamanö nö, makö uni hoköpamanö nö, hi tä hẽtu hamö Cristo a lopoli, ĩ hamö makö uni loa naimakö lasoma. ⁷‑Sanöma makö wanisala apa noai maaki, Teusö anö makö pi ipamaö! Makö pi ipa nö, pe epii makö totiapala satia apapö, kamakö na Jesus Cristo a simöpalömaö!‑ waiha ĩ na makö pi thama totio pia salo. Hi masita tä uli mapaso noai ha, ĩ na makö pewö pi thama soatio pia salo. ^8-9Kamakö lö kui, makö wanisala apa wi maaki, Teusö anö makö totiapala satia apa nö, ‑Teusö a pitili‑ makö pi kuu kuköma, makö täa koni. Makö täapa kõo läo wi, noa mai ha Teusö anö ĩ tä totomaö. ‑Toitai sa tä thati ha, Teusö anö sa täa konömaö!‑ ĩ na makö pi kuu tihöö! Teusö anö noa mai makö täapa kõo päoö. ¹⁰Makö täa konö noai ha, toitai ma tä thatipö, Teusö anö Jesus Cristo a na makö koka totimakö nö, tute makö thapalöma. ‑Ĩ töpönö toitai tä thatipököö!‑ ĩ na Teusö a pi kuu nö, tute makö thapalöma.

Makö wanihasoma maaki, makö noipaso kõo wi, Cristo anö ĩ kamakö na ĩ tä toto

¹¹Kamakö hai ĩ nö patapö töpö hai, ĩ juteu töpö kuo maama. Ĩ na tä kua tä, kamakö pasi lö kui, juteu makö pasi mai ĩ makö ola hö̃töwö. Juteu töpö aiki, ‑Samakö isi ola ösö hosapamo pasio wi ĩ samakö asa kutenö, Teusö sama thapo wi ĩ samakö asawö‑ ĩ na ĩ töpö kuu wi, kamakö na ĩ töpö aiki, ‑Makö isi ola ösö hosapamo pasio mai ĩ makö pasi kutenö, Teusö ma thapo wi ĩ makö mai kitä‑ ĩ na ĩ töpö kuu. Ai sanöma töpö na makö isi ola ösö hosapamo pasio mi kutenö, ĩ na ĩ juteu töpö kuu päoö. Teusö ma thapo mai, ĩ makö kuo totio paio noai, ĩ tä na pö pi motipo tihöö! ¹²Teusö ma thapo paia mi tä, Cristo a na makö pi hatukuo paio maama. Teusö anö ai töpö saia asalö noai ĩ ai makö kuo maama kutenö, tiko makö kuo pasioma. Teusö aiki, ‑Kamisanö makö totiapala kuki kitäö!‑ ĩ na kama hai juteu töpö na ĩ na a kuu kua noai na, kamakö na ĩ na a kuu kua pasio maama. Teusö ma thapo mi kutenö, ‑Teusö anö makö totiapala apa kitäö!‑ ĩ na makö pi kuu tao maama.

¹³Ĩ na makö kua paioma maaki, Teusö a na makö kuo pã apa paio tasoma maaki, huki Jesus Cristo ma thapo salo, Teusö a na ĩ makö waloa atea totia waikiki solöma. Cristo a iä pö halaso noai, ĩ tänö Teusö a na makö atea totimaköma. ¹⁴Juteu samakö, juteu makö pasi mai ĩ makö, ĩ na makö kui makö wanihasotima maaki, huki makö noimaso kuki wi, Cristo anö ĩ tä totopöma. Makö wanihasoti noai, ĩ tä mötali ha tä uni pata katöo läo noai, ĩ tä hõo pata ha juteu samakö kua, ĩ tä hẽtu hõo pata ha hö̃tö soatawö, juteu makö pasi mai ĩ makö kua hö̃töa soataa, ĩ na makö kua paitioma maaki, tä pata katöo läo noai, Cristo anö ĩ tä uni pata waniapalöma, polakapii makö kuo paitioma maaki, samii makö kupasoma. ¹⁵Teusö anö juteu samakö hai ĩ nö pata töpö noa thaa nö, ‑Ĩ na pö kuikiö! Ĩ na tä kua tä, ĩ na pö kua tihöö!‑ ĩ na töpö noa thatalati noai, Cristo anö ĩ ta hosalöma. Ĩ ta hosalö nö, juteu samakö sokaa, juteu makö pasi mai ĩ makö soka hö̃töa, ĩ na makö kuoma maaki, Cristo anö makö pewö kokapalö nö, samii makö thapalöma. Önö kutenö, makö wanihasoma maaki, Cristo anö makö noipaso kõo wi ĩ tä totopöma, makö noipaso kõköma. ¹⁶Hii ti pakalai ti ha Cristo a säpamoa waikilasoma kutenö, juteu samakö, juteu makö pasi mai ĩ makö, ĩ na makö kui makö wanihasopili, Cristo anö ĩ tä mapamanöma. Cristo anö makö pewö kokapalö nö, makö samii makö uni thapalö nö, Teusö a na ĩ makö pewö waloa komaköma. ¹⁷Teusö a na juteu samakö kotöo asa soata noai ĩ samakö pi hatuka asa wi ĩ samakö, Teusö a na juteu makö pasi mai ĩ makö kuo pã apa pasio taso noai ĩ makö pi moti ipii ĩ makö, ĩ na makö kui makö pewö na Cristo a walokiso nö, noimaso kõo wi ĩ ta topa apöle ta wäsä solöma. ¹⁸Cristo anö makö noamaö, Teusö a õsi kua tolele, ĩ ma thapo wi ĩ anö makö pasilipoö, ĩ na ĩ tä kua kutenö, Teusö a na makö pewö walo taö öpa kõoö.

¹⁹Önö kutenö, juteu makö pasi mai, ĩ tiko makö kuoma maaki, tiko makö soa mai kitä. Huki Teusö ma thapo wi ĩ makö nai waikiwö. Teusö ulupö makö nai waikiwö. ²⁰Sai a kui na ĩ na makö kuö. Kamakö hai, Teusö a hai ĩ sai makö uni. Sai a lototomaköpö, ĩ a sai kolo ha maa makö paa sinomoö. Cristo anö töpö simönö noai ĩ töpö, Teusö a kai a wäsä sinomo wi ĩ töpö, ĩ na töpö kui töpönö sai a kolo ha maa makö uni paköma. Ai maa manö sai a lototo satio opa wi ĩ Cristo a uni paköma. ²¹Ĩ maa ma toita sati ipii, ĩ Cristo a uni hai, ĩ ma hösöka ha satehe epii ai ma pö makekele, ĩ kamakö uni pasiwö. Cristo a na makö uni makekea topa totiki nö, Teusö pata tä hai ĩ sai a uni thaa hötötöa totiki. ²²Ĩ a sai õsi ha Teusö a õsi kua tolele ĩ a kule, ĩ a sai hai, kamakö solo makö pewö uni kuki.

Cristo ta hinimoma paio maa noai, kamakö na huki ĩ ta hasulua asapamanö noai ĩ ta

¹Önö kutenö, juteu makö pasi mi ipii ĩ makö na Cristo sa ta wäsäti wi, ĩ tä noa na titita wi a sai ha sa titia kule. ²Teusö anö makö noima nö, makö totiapala apa pia salo, kamakö na sa simönöma. Cristo sa ta wäsätipö, Teusö anö sa simönöma. Ĩ ma tä taö waikile kitä. ³Sanöma makönö ma tä taö paio maa noai, Teusö anö kamisa na ĩ ta hasulua asapamanöma. Ĩ ta hasulupamanö noai, hi waheta tä na wani ipii ĩ sa ta wäsä waikio ke. ⁴Ĩ waheta ma tä möö nö, kamisa na Teusö anö Cristo ta hasulupamanö noai, ĩ tä na sa pi hatuka apöle, ĩ ma tä taö öpa kuki kitä. ⁵Teusö anö ĩ ta hasulupamanö noai, ai nö patapö töpö na ĩ ta wäsä pasio paio maama. Huki Teusö anö samakö simöa asalö noai ĩ samakö, Teusö sama ta wäsä sinomo asa wi ĩ samakö, ĩ na samakö kui, ĩ samakö na Teusö a õsi kua tolele, ĩ anö ĩ ta hasulua asapamanö nö, kamisamakö na ĩ ta wäsä asama. ⁶Ta hasulupamanö noai, pi na ĩ ta kua. Juteu samakönö Teusö sama thapo sisa mai kitä. Cristo ta topa apöle, ĩ ma ta hinia waikilöma tä, pi na makö kuaö. Teusö anö sanöma makö na tä toita apii tä totoma wi, juteu samakönö ĩ sama tä täli, juteu makö pasi mai maaki, ĩ makönö ĩ ma tä täa hö̃töli, ĩ na makö pewö kuatii. Cristo ma thapo wi ĩ makö pewö. Juteu samakö, juteu makö pasi mai ĩ makö, ĩ na makö kui makö pewö hai, Cristo makö uni pewö. Ĩ makö pewönö Cristo ma thapo ösöha kutenö, juteu samakö, juteu makö pasi mai ĩ makö hö̃töwö, ĩ na makö kui makö na Teusö aiki, ‑Kamakö hai, ipa ulu makö kupasoma, makö totiatalo opati kitäö!‑ ĩ na kamakö pewö na ĩ na Teusö a kuu.

⁷Teusö a lotete epii, ĩ tänö Teusö anö sa totiapala sinomo wi, kamisa na ĩ tä totopöma kutenö, Cristo ta topa apöle, ĩ tä na sa kalipalamati kule. Cristo ta topa apöle, ĩ sa ta wäsä sinomotipö, sa simönöma. ⁸Teusö a thapo wi ĩ töpö pewö na sa komoapalo satia apati wi maaki, Teusö anö sa totiapala apa nö, juteu töpö na kuno mai, juteu makö pasi mai ĩ makö na Cristo ta wäsätipö, sa simönöma. Tä noa apii, kamakönö ĩ ma tä tai mi ipii, Cristo anö kamakö na ĩ tä pewö totomati wi, ĩ sa ta wäsä sinomotipö, Teusö anö sa simöpalöma. ^9-10Teusö anö tä thama pia wi ĩ tä hatukupo paio maama maaki, ai töpö pewö na ĩ sa ta hatukupamanöpö, Teusö anö sa simönöma. Teusö anö tä pewö thaa noai ĩ anö nö patapö töpö na tä hatukupama paio maama. Teusö anö ãju töpö simöa sinomo wi ĩ töpö na ĩ ta hasulupama hö̃töo paio maama. Jesus Cristo a thapo wi, Teusö anö ĩ töpö möma totio nö, ‑Ĩ tä pewö na Teusö a pi mosawio opapawö‑ huki ĩ na Teusö anö kama hai ĩ ãju töpö pi thamatii. ¹¹Somi tä sai tä Teusö anö tä thama pi topa soata noai, huki Kaikana Jesus Cristo a na ĩ tä thama totioma. ¹²Jesus Cristo a na makö kokale, ‑Cristo a pitili‑ ĩ na ĩ makö pi kuu totia kutenö, Teusö a na makö hapalo kili mai, ‑Kamisa na Teusö a sömöka taa waikia kuleö!‑ ĩ na makö pi kuu totioö. ¹³Önö kutenö, ‑Kamakö na Cristo sa ta wäsäö ha, ai töpönö sa peama pole, ĩ tä na pö pi ota hãto tihöö!‑ ĩ na kamakö na sa kuu kule. Makö pasilipoti wi, ĩ tä pi na sa pea kule. ‑Epesu tili töpö toita apö‑ ĩ na ai sa töpö thama pia salo, ai töpönö sa peama kule maaki, kamakö na Cristo sa ta wäsä satimo opati kule.

Pe epii Cristo anö makö pi ipa totio wi, ĩ ma tä taö kuköpököö!

¹⁴Önö kutenö, pili sa maekonö sa loa hĩtaiki nö, kamakö hai ĩ pö̃ Teusö a na sa hapaloö. ¹⁵Hi tä hẽtu hamö Teusö a na töpö kupoli ĩ töpö, hi masita tä uli pewö hamö sanöma makö pewö kule ĩ makö, ĩ na makö kui, Teusö a na, ‑Ipa hao a‑ ĩ na makö pewö kuu. Kamakö pewö na Teusö aiki, ‑Ipa ulu töpö‑ ĩ na a kuu hö̃töoö. Önö kutenö, ‑Teusö ulupö töpö‑ ĩ na Teusö anö makö hila thaköma. ¹⁶Teusö a na kamisa aiki, ‑Hapa Teusö. Hi tä hẽtu ha wa kupoli, ĩ wanö tä toita apii wa tä thapo polali, ĩ tä kua apa kutenö, kawa õsi kua tolele ĩ anö epesu tili töpö na lotetea apa wi ĩ wa tä totokö nö, töpö õsi lotetea totia apöpamanöö!‑ ĩ na sa kuu. ¹⁷Ĩ na sa kuu nö, ‑Ĩ wa töpö õsi lotetepamani ha, “Cristo a pitili” ĩ na ĩ töpö pi kuu kuki ha, ĩ töpö õsi na Cristo a kuo totio soatiopököö!‑ ĩ na sa kuu. Ĩ na sa kuu nö, ‑Komo hamö hii ti nasökili kua apa tä, pili ti lototo kuo wi na, ĩ na Cristo anö samakö noima apa wi ĩ tä na ĩ töpö pi kua soatioö ha, ĩ na ĩ töpö õsi lotetea kuo hö̃töopöö! ¹⁸Ĩ na ĩ töpö pi lotetea apa kua hö̃töo nö, ĩ töpö pi hatukupasopököö! Kawanö samakö pewö thapo wi ĩ samakö pewö pi hatukua totipasopököö! Pe epii Cristo anö samakö pewö pi ipa soatio wi ĩ tä na samakö pi hatukuköpöö!‑ ĩ na Teusö a na ĩ na sa kuu. ¹⁹Ĩ na sa kuu nö, ‑Cristo anö epesu tili töpö pi ipa wi, ĩ töpönö ĩ tä taö kuköpököö!‑ ĩ na sa kuu. Sanöma makönö ĩ ma tä taö totia apa mai kitä maaki, sa kuu päa alu kule. Cristo anö makö pi ipa wi ĩ ma tä taö kuköma, kamakö õsi ha Teusö a kua totiki kitä. Teusö a toita apii a kuati wi na, ĩ na makö pewö toita apii makö kua naiki kitä.

²⁰Ĩ na tä kua tä, kamakö õsi na Teusö a lotetea apöle, ĩ tä kalipalo soatio kutenö, Teusö anö makö pasilia totipali kitä. Kamakö aiki, ‑Samakö pasilipalöö!‑ Teusö a na ĩ na makö kuu nö, ‑Wani ipii Teusö anö sa pasilia hãtopali kitä‑ ĩ na makö pi kuu kule maaki, pe epii Teusö anö makö pasilipa taö totio opa kitä. ²¹Önö kutenö, Teusö a na, ‑Wa totiatalo opatiwö‑ ĩ na Cristo ma thapo wi, makö kokamo sinomo wi, ĩ na ĩ makö pewö kuu soatiopököö! Hi masita tä uli maa päpaso noai ha maaki, ĩ na makö kuu mapo maapököö! Ĩ naköö! ‑Teusö ai. Wa totiatalo opatiwöö!‑ ĩ na makö kuu soatiopököö!

Teusö anö makö kokapalöma, samii makö kupasoö

¹Önö kutenö, kamisanö makö noa thaa pia kule. Cristo sa ta wäsäti pole, ĩ tä noa na sa titile, ĩ sanö makö noa thaa pia kule. ‑Teusö anö makö nakalöma, “Ĩ na makö kuatipököö!” ĩ na a kuu kua noai na, ĩ na pö kua totio soatioö! ²“Pata sa waikiwöö! Sa tä taö öpa asawöö!” pö pi kuu tihöö! Makö höla mai, opii pö hapalo totihoö! Makö hĩso soatalo mai, pö noimaso totihoö! ³Teusö a õsi kua tolele, ĩ anö makö kokapalöma, samii makö kupasoma. Önö kutenö, pö höla tihöö! Pö hapalo isi waniho tihöö! Makö hapalo isi waniho nö, makö höla pia salo!‑ ĩ na kamisanö makö noa thaa kule. ⁴Samii Cristo pili a sai lö kui, ĩ makö. Ai pili a uni sai kua mai kitä. Samii Teusö a õsi kua tolele, ĩ a kua sisaa. ‑Teusö anö sa nakalöma kutenö, waiha sa nomaso kitä maaki, Teusö anö sa koni!‑ ĩ na makö pewö pi kuu totio sisaö. ⁵Sami pata tä kua sisaa. Pata tä hai, Jesus Cristo a. Ai pata tä na makö noamamo pola nö kuno mai, Jesus Cristo a na makö noamamo sisaö. Ai tiko ma tä thapo mai, Cristo ma thapo sisa tä, makö mãi õmamonasoö. ⁶Samii kamakö pewö hai ĩ pö̃ Teusö a kua. Ai pata tä sai kua satia mai kitä. Ai tä na, ‑Hapa‑ makö kuu naio wi, ai tä kua satia mai kitä. Kamakö hai ĩ pö̃ Teusö anö makö pewö simöati wi ĩ a sisawö. Kamakö õsi pewö ha a kalipaloti wi ĩ a. Kamakö õsi pewö na a kuo wi, ĩ a.

Cristo anö makö patamanö nö, makö õsi totipali

⁷Cristo anö makö pewö totiapala apa nö, makö pewö täpä hätäpoma. Teusö a na makö kalipalo taö öpa kuköpö, ĩ tä totopöma. ⁸Pi na Teusö tä waheta kuu. ‑Ai töpönö a wanipoti noai, ĩ anö ĩ töpö peama apa nö, ai töpö satehe epii töpö tälö nö, hi tä hẽtu hamö ösö hamö ĩ töpö kai konasolöma. Ĩ töpö kai konasolö noai ha, sanöma töpö kua haipaso noai ĩ töpö pasilipali pia salo, töpö täpäma‑ ĩ na tä waheta kuu. ⁹‑Ösö hamö a konasolöma‑ tä kuu wi, ĩ wi na ĩ pili ta kuu totia alu kule? Pi naka. Ösö hamö a kuo pasioma maaki, hi masita tä uli ha a ithopalo nö, a nomano nö, õsi töpö kuta kölö wi, ĩ ha a huoki kölö nö, a ösöa konasolöma. ¹⁰Hi tä hẽtu hamö töpö kupoli ĩ töpö, hi masita tä uli hamö makö kule ĩ makö, ĩ na makö kui, Cristo anö ĩ makö pewö simöa pia salo, hi tä hẽtu pata hamö Teusö a kupoli, ĩ hamö a kopö lasoma. ¹¹A kopolö nö, sanöma makö täpäpö, ĩ ai makö sailöma. Makö sailö nö, ‑Kamisanö makö simöa totio asa wi ĩ makö‑ ĩ na ai makö na ĩ na Cristo a kuu asama. Ĩ na tä kua tä, ‑Ai makönö sa kai a wäsä sinomotipöö!‑ ĩ na Cristo a kuuma. Ĩ na a kuu nö, ‑Teusö ta topa apöle, ai makönö ĩ ma ta wäsä hätäpotipököö!‑ ĩ na a kuu nö, ‑Sa thapo wi ĩ töpö na ai pata makö mamo läapalo sinomopököö!‑ ĩ na a kuu nö, ‑Ai makönö kamisa kai na ipa ma töpö pi hatukama sinomoö!‑ ĩ na a kuuma. ¹²Cristo ma thapo wi, Cristo a na ĩ makö pewö kalipalo tao opaö, makö palasoö, makö lotetea apöpasoö, ĩ na makö thamapö, Cristo anö makö sailöma. Ai makönö Cristo pili ma uni sai sawämanöpö, makö sailöma. ¹³Ĩ na tä kuaö ha, Cristo ma thapo wi, ĩ makö pewö aiki, ‑Jesus Cristo a pitili‑ makö pewö pi kuu ösöha totio kuköma, Teusö a hai ĩ pelupö Cristo ma taö ösöha totiki kitäö! Cristo ma taö totio kuköma, makö õsi pewö pata ösöha kua totilo nö, Cristo a toita kui na, ĩ na makö toita kua naipaso kitäö!

¹⁴Makö osemoti maapököö! Ai töpö holisimo wi ĩ töpönö ai töpö mönama sinomo wi ĩ töpönö ta wäsä holisimo wi, ĩ töpö na makö mönamamo maapököö! Ipoko tänö pola a tepu tepumo kua wi na, ĩ na ta wäsä holisimo wi, ĩ na ĩ tänö ĩ na makö õsi thama hö̃töoö. ¹⁵Makö isi wanihoti mai, makö noimaso totio nö, makö pitilimo opati nö, makö pi liähäa apa kuköpöö! Makö õsi patalo nö, Cristo a kua kua wi na, ĩ na makö kua kua naiopö. Cristo a hai, pili a he. Cristo anö makö simöa wi ĩ a. ¹⁶Kamakö hai, pili makö sai pasi päwö. Pili wa hãkokö, pili wa kononakö, ĩ na tä kua kule na, ĩ na makö kua hö̃töoö. Pili wa henö pili wa pewö sai simöa mi tä, pili wa poko, pili wa konona, ĩ na tökö kui tökö kalipalo totio mi. Cristo anö makö simöa totio nö, makö pewö kokapalö nö, makö lotetepamani. Makö lotetepamanöma kutenö, makö pewö kalipalo makoka apatii. Makö kalipalo makoka apa nö, makö õsi patalo nö, makö noimaso kutenö, makö liäha totipasoö.

Töpö õsi mumi ipii töpö kua kuati wi na, ĩ na pö õsi kua naio tihöö!

¹⁷Önö kutenö, Jesus pata tänö sa simönöma kutenö, kamisanö makö noa thaa kule. Ai tiko töpönö Teusö a thapo mai, ĩ töpö kua kuati wi na, ĩ na pö kua naitio tihöö! Ĩ kama töpö pi saimo päo nö, töpö pi kuti wi, ĩ ta topa mai kitäö! ¹⁸Ĩ töpö õsi mumi ipö kutenö, töpö pi hatukupo mi. Ĩ töpö pi moti ipö, Teusö a kai na ĩ töpö pälamo satia apatii, ĩ na ĩ töpö kuati salo, Teusö anö sanöma makö õsi temöa komani wi ĩ tä na ĩ töpö hanoa pasitioö. ¹⁹Wanisala tä thaa wi ĩ tä na ĩ töpö kili wi tä kua mi ipö. Ĩ töpönö wanisala tä thaa pi topa sinomo opatii. Sami sami tä pewö thaa husuo opatie. ²⁰Cristo a na makö pi hatukupamanö noai, ĩ tä, ‑Sami sami tä thaa wi ĩ tä wanisala mai kitäö!‑ ĩ na a kuu wi, ĩ a kuo maama. ²¹Jesus ta pitilii ĩ ta wäsäma. Ĩ ta wäsäö ha, Jesus Cristo ma ta hini totio nö, ĩ a na makö pi hatukupasoma.

²²Önö kutenö, Cristo ma thapo paia mi tä makö kuati noai, ĩ tä hosalöheö! Cristo ma thapo paia mi tä, pili makö õsinö wanisala ma tä thaa pi topa apati noai, ĩ tänö kama makö mönamamo sapao kõo pätio nö, makö wanisala totipasoma. ²³Tute makö õsi kupasopököö! Makö pi tapopalo pätio wi, ĩ ma tä tutea naipalöpöö! ²⁴Teusö a kua kuati wi na, ĩ na makö õsi kua naipasopö, tutei, ĩ na makö õsi thapalöma. Teusö a pitilimo opa kutenö, makö õsi totipali, wanisala tä na makö õsi uni sokamaki, Teusö anö makö õsi tutei, ĩ na makö õsi thaköma. Önö kutenö, haloi ösö hotei ma ösö hasupalö nö, tute ösö na makö halo kua kõo wi na, ĩ na tute pö õsi haloa kua kõikiö!

²⁵Makö õsi tute epö kutenö, holisimo wi ĩ tä hosalöheö! Cristo ma thapo wi ĩ makö pewö kutenö, pö pitilimo hẽtupaso totihoö! ²⁶Makö hĩsolo nö, wanisala tä thaa tihöö! Makö hĩso pa, tä wisama tihöö! ²⁷Sai tä sai pata na pö mosawikiö! Makö mosawia mi tä, Sai tä sai pata lisipasoma, wanisala ma tä thaa hãto matimöö! ²⁸Ai makö thomömo sinomoti noai ĩ makö thomömo kota mai, huki pö kalipalo sisaaö! Makö kalipalo nö, wani tä na ai töpö honimo wi ĩ ma töpö pasilipalöpököö!

²⁹Sami sami ta kateha tihöö! Makö kai toita apii makö kai hapalo nö, ai töpö pi utitile, ĩ ma töpö pi lotetea kopamanöpöö! Toitai makö hapalo nö, Cristo a thapo wi ĩ töpö õsi uni palapamanöpöö! Toitai makö kai hapaloö ha, ai töpönö makö a hini pole, ĩ ma töpö pi topapalama apa kitä.

³⁰Teusö a õsi kua tolele, kamakö na Teusö anö ĩ a totoa waikiköma kutenö, ‑Waiha Teusö anö sa uni kusöpalö nö, sa täa koni kitäö!‑ ĩ na makö pi thamaö. Önö kutenö, Teusö a õsi kua tolele, ĩ a pi otatalama tihöö! Wanisala tä thaa tihöö!

³¹Ai töpö wanipo hãto ti! Pö hĩso tihöö! Ai töpö hĩsu thaa tihöö! Pö höla ti! Ai töpö na pö hapalo pi wasöa tihöö! Ai töpö na wanisala ma tä thaa mai, toitai tä thaa totioheö! ³²Toitai ma tä thaa totio nö, makö pasilipasopököö! Ai töpö na makö pi honipo opa nö, ma töpö totiapalatipököö! Kamakö na ai töpönö wanisala tä thaa noai ĩ töpö na makö hĩso matasopöö! Teusö a na wanisala ma tä thama maaki, Teusö anö kamakö na Cristo a simöpalö lasoma, kamakö na a hĩso maa kutaso noai na, ĩ na ai töpö na makö hĩso maa kuto hö̃töopököö!

¹Teusö anö kama hai ĩ ulu makö pi ipa wi ĩ makö kutenö, Teusö ma uömaö! ²Cristo anö makö noima kua noai na, ĩ na ai ma töpö noima kua hö̃töopöö! Cristo anö makö noima nö, makö noama pia salo, a säpamonasoma. A säpamonasoö ha, Teusö aiki, ‑Ipa ulu a säpamonaso noai, ĩ tä topa‑ ĩ na pö̃ Teusö a pi kuuma. Cristo a säpamonaso noai, ĩ tä na Teusö a pi topa apama. Teusö a na oweha kökö totoköpö, kökö ĩsima sinomo noai, Teusö a na ĩ kökö ĩsi nisamö toita kuo noai na, ĩ na Cristo a säpamonaso noai, ĩ na ĩ tä toita kuo hö̃töoma. Oweha kökö ĩsinö Teusö a pi mönaha kutaso noai na, ĩ na Cristo a säpamonaso noai, ĩ tä na ĩ na Teusö a pi mönaha kua hö̃tötasoma.

Wakala tä na makö kutia kutenö, toitai makö kutiopököö!

³Teusö anö makö ausipalö nö, makö sokamakö noai, ĩ makö kutenö, ma töpö po mane, ĩ töpö solo pö mamopalo tihöö! Sami sami tä thaa hãto tihöö! Ai tänö tä thapo pole, ĩ tä na pö pi wasiso tihöö! ‑Teusö a thapo wi ĩ töpö maaki, wanisala tä thaa tikilio opatiwö‑ ĩ na ai töpö thama tihöö! ⁴Makö hapalo pola nö, sami sami ta wäsä tihöö! Hapalo suasii ĩ ta kuo maapöö! Sami sami tänö ai makö ĩkapalama wi ĩ tä kuo naio maapöö! Makö hapalo wanisala mai, ‑Aitaköö! Teusö a totiatalo opawö‑ ĩ na makö kuu totiopököö! ⁵A po pasia mane, ĩ a na ai tä mamo wi ĩ a, sami sami tä thatala apa wi ĩ a, ĩ na kilii, Teusö a kupoli ha ĩ töpö walo pasio mai kitä ta pi kuu mai. Teusö a, Cristo a, ĩ na kilii töpö kaikanamo totio wi, ĩ ha ĩ töpö lisipo pasio mai kitä. Ai tänö tä thapo wi ĩ tä na ai tä pi wasiso soatalo opa pasio wi ĩ a, Teusö a kupoli ha ĩ a huu naio mai kitä. Teusö a thapo mai, ai tiko tä thapo pikio wi, ĩ na ĩ tä wanisala kua wi na, ĩ na wani tä na ai tä pi wasisopalo opati wi, ĩ na ĩ tä wanisala kua naio soataö.

⁶Pö mönamamo ti! Sa hapalo pole, ai tänö ĩ ta hini nö, ‑Wanisala wa tä thaa kule maaki, Teusö anö wa peama mai kitä‑ ĩ na ai tä holisi kuu ha, ‑Pitili ta‑ pö pi kuu tihöö! Teusö a hini mai, ĩ töpönö wanisala tä thaö ha, Teusö a hĩso opa nö, ĩ töpö peama totioö. ⁷Önö kutenö, wanisala tä tha apati wi ĩ töpö na makö kua naia salo, wanisala tä thaa naio maikiö! ⁸Kamakö õsi mumio opa naio paitioma maaki, Teusö pata ma tä thapo waikia kutenö, huki makö õsi wakala apa waikia kule. Wakala tä na makö kutia kutenö, toitai makö kutiopököö! ⁹Wakala tänö makö toita apö, makö topatia, makö pitilimo opaö, ĩ na makö kuatii. ¹⁰Önö kutenö, ‑Ĩ na pö kua totihoö!‑ ĩ na Teusö anö makö noa thaa wi ĩ tä na makö pi hatukupasopöö! ‑Ĩ na sa kuaö ha, Teusö a pi mönaha apa kitäö!‑ ĩ na makö pi kuu taö öpa salo, Teusö a pi mönaha totipamanöheö! ¹¹Mumi mumi tä na ai töpö kua kutenö, ĩ töpönö wanisala tä thatala apatii. Ĩ töpönö wanisala tä thati wi, ĩ tä wanisala thaa naio hãto maikiö! Pi naka. ‑Ĩ töpönö tä thati wi ĩ tä wanisala apö‑ ĩ na pö kuu totihoö! ¹²Ĩ töpönö tä thatala apati hãtole, ĩ ta hiniomö hiopö kitä. Ĩ ta hiniomö hiopö kutenö, kamakö aiki, ‑Ĩ wanisala sa tä thaa tihöö!‑ ĩ na pö kuu totihoö! ¹³Teusö a kuu wi, wakala tä kui na ĩ na ĩ ta kuö. Wakala tänö tä pewö hatukupo opaö. Wakala tänö tä pewö hatukupo opa kua wi na, ĩ na Teusö a hapalo kuköma, ‑Ĩ tä wanisala‑ Teusö a kuu wi, ĩ tänö ĩ na wanisala tä hatukupo kua apa hö̃töo kitä. ¹⁴Ĩ tä pewö hatukupalo nö, ĩ tä pewö wakala apii, ĩ tä kupasoö. Önö kutenö, ĩ na waheta tä kuu: ‑Wa uni mine, a uni naanoö! Wa õsi nomawö öpii ĩ wa õsi hoköpasopöö! Wa õsi hoköpasoma, Cristo anö wa wakalapali kitäö!‑ ĩ na tä waheta kuu.

¹⁵Önö kutenö, makö pi mosawiki nö, wanisala tä thaa hãto maiki. Töpö pi motia apati wi, ĩ töpö kua kuati wi na, ĩ na makö kua kua naitio mai, töpö pi hatuka apati wi, ĩ töpö uöma totioheö! ¹⁶Huki wanisala tä pata kua apa kutenö, makö pi mosawiki nö, toitai ma tä thaa sinomotipököö! ¹⁷Pö pi motio opa tihöö! Cristo pata tänö makö noa thaa wi, ĩ tä pewö na makö pi hatukupasopököö!

¹⁸Tuu wasui tuunö pö polemopalo ti! Makö polemo opati tä, makö isi wanihipaso kitä. Makö polemo mai, Teusö a õsi kua tolele, ĩ a na, ‑Sa simöa sinomo totihoö!‑ ĩ na pili pö pi kuu totihoö! Kamakö õsi na Teusö a õsi kua tolele, ĩ a kuo pitilio totio opapököö! ¹⁹Makö hapalo hẽtupasoti pola nö, Teusö tä waheta na ama ta kule, ĩ ama ma ta thaö, Teusö ama ma tä pewö a thaö, ĩ na makö kuaö! Ĩ na tä kua tä, pili makö õsinö ama ma ta thaa nö, ‑Teusö a totiatalo opawö‑ ĩ na makö õsi kuu! ²⁰Jesus Cristo pata ma tä thapo salo, ĩ tä wakala pewö hamö tä kuati wi ĩ tä na, ‑Aitaköö!‑ ĩ na kamakö hai ĩ pö̃ Teusö a na, ĩ na makö kuu sinomoö!

Peanopö töpö, pusopö töpö, ĩ na töpö kui, ĩ töpö na Paulo a hapaloö

²¹‑Cristo a hai ĩ ipa pata tä‑ ĩ na makö kuu manu kule, Cristo ma thapo wi, ĩ pö a hapalo hinipaso totihoö!

²²Pusopö pö! Cristo ma hini kua wi na, ĩ na kamakö hai heano ma töpö a hini kua totiataloö! ²³Cristo ma thapo wi ĩ makö kokamo sinomo wi, Cristo anö ĩ makö simöa kua wi na, ĩ na kamakö hai ĩ heano töpönö ĩ na pusopö makö simöa kua hö̃töoö. Cristo ma thapo wi, ĩ makö kokamo wi ĩ makö hai, ĩ Cristo makö uni pewö waikiwö. Makö täapa kõo läo wi, ĩ Cristo a. ²⁴Önö kutenö, Cristo ma thapo wi ĩ makö kokamo wi ĩ makönö Cristo ma hini kua wi na, ĩ na pusopö makönö au peanopö ma töpö a hini kua totiataloö!

²⁵Peanopö pö! Cristo ma thapo wi ĩ makö kokamo wi, Cristo anö ĩ makö pi ipa nö, a säpamo kulaso noai na, ĩ na kamakö hai pusopö ma töpö pii kua totio opa hö̃töopököö! ²⁶Cristo anö makö sokamakö nö, makö thapo asa pia salo, a säpamonasoma. Cristo a säpamono nö, makö õsi ausipalö nö, makö sokamaköma. Maa tuunö tä salupalöma, tä ausipo kua wi na, ĩ na Cristo ta topa apöle ĩ ta wäsä wi ĩ tänö ĩ na makö õsi ausia kua hö̃töpasoö. ²⁷Cristo ma thapo wi ĩ makö kokamo wi ĩ makö sami mi, makö ösö ũkunu mi, makö liähä äpö, ĩ na makö kui, Cristo anö ĩ makö täa asali pia salo, makö ausipalöma.

²⁸Kama wa pio sapao kua kõo wi na, ĩ na au husopö wa pii kua totihoö! Au husopö wa pii tä, kama wa pio sapao waikia kota. ^29-30Kama pili wa sai waniho sapao kõo mai, wa iapaloö, kama wa noamo sapao kõo, ĩ na wa kua sinomoö. Kamakö hai, Cristo makö uni pewö kutenö, Cristo ma thapo wi ĩ makö kokamo sinomo wi, Cristo anö ĩ makö totiapala kua apa kua wi na, ĩ na kama pili makö sai totiapalo kua apa kua hö̃töo kõoö. ³¹Ĩ na Teusö tä waheta kuu: ‑Önö kutenö, wano wanö au hao a, au nao a, ĩ na kilii wa töpö takölö nö, au husopö a na wa sätäapalo totiköma, makö polaka kule maaki, sami makö uni kupaso kitäö!‑ ĩ na tä waheta kuu. ³²Ĩ ta kuu pole, ĩ ta hasulupo paio maama. Pi naka. ‑Samii makö uni kupaso kitäö!‑ sa kuuhe, ĩ tä hai, ĩ uni ta. ‑Cristo a, Cristo anö makö thapo wi ĩ makö, ĩ na makö kui makö a kateha totio opa nö, ta kuu totio opaö‑ ĩ na sa kuu kule. ³³Ĩ na ta kuu totia apa kule maaki, peanopö makö, pusopö makö, ĩ na makö kui, ĩ makö a kateha naioö. Önö kutenö, kama peanopö wa pii sapamo kua kõo wi na, ĩ na au husopö a pii kua hö̃töopököö! Pusopö wanö au heano a hini totiatalo hö̃töopököö!

Pö̃ töpö, pöpönö töpö, ulu töpö, ĩ na töpö kui, ĩ töpö na Paulo a hapalo nömöo noai ĩ ta

¹Ulu pö! Jesus pata ma tä thapo kutenö, au hao a, au nao a, ĩ na töpö kui töpö a hiniö! Ĩ ma töpö a hini wi ĩ tä topa. ^2-3‑Ĩ na wa kua kuköma, toitai wa kutio kitäö!‑ ĩ na Teusö anö nö patapö töpö noa thaa soma noai, pi na ĩ ta kuuma: ‑Au hao a, au nao a, ĩ na töpö kui wa töpö a hini totio kuköma, toitai wa kutio kitäö! Toitai wa kutiki nö, masita tä uli ha wa kua soa tä, wa patasipöa totiso kitäö!‑ ĩ na Teusö a kuuma.

⁴Pö̃ makö, pöpönö makö, ĩ na makö kui makönö au ulu töpö hĩsuma maikiö! Au ulu ma töpö sawäma makoka totio opa wi, Jesus pata tänö ĩ tä taa pi topa apa kutenö, pö̃ wa, pöpönö wa, ĩ na kilii makönö kamakö hai ulu ma töpö noa thaa läo sinomoö! Au ulu ma töpö pi hatukama nö, ĩ töpö na Cristo ta wäsä soamoonöö! Ĩ na makö kuati ha, kama makö ulupö sawäo makoko toito opa kitä.

Noa mi töpö kalipalo sinomo wi ĩ töpö na

⁵Noa mi pö kalipalo sinomo wi ĩ pö! Makö kalipalo holisimo mai, pitilii pö kalipalo totihoö! ‑Pata tä na sa kili mai kitäö!‑ pö kuu tihöö! Pata ta hini totioheö! Cristo ma hini kua wi na, ĩ na noa mi makö kalipalama sinomo wi, ĩ na ĩ ma töpö a hini kua totiatalo hö̃töoheö! ⁶Kama töpö mamo tetela tä, kama ma töpö pi mönaha päpamanöpö, makö kalipalo päo mai nököö! ‑Ĩ töpö na makö kalipalo salo, pö kalipalo makoka totihoö!‑ ĩ na Teusö a pi kuu kutenö, holisii pö kalipalo päo tihöö! Cristo a na noa mi makö kalipalo sinomo wi ĩ makö kutenö, makö kalipalo makoka sinomoö! Makö kalipalama sinomo wi, kamakö na ĩ töpö mamo tetetia mi päla tä maaki, pö kalipalo loteteapalo sinomoö! ⁷‑Ĩ töpönö sa simöa sisa mai kitäö! Jesus pata tänö sa simöa totio wi ĩ saö!‑ ĩ na makö pi kuu nö, noa mi makö kalipalo päla nö maaki, pö kalipalo kasiapalo opaö! ⁸Noa mi makö kalipalo sinomo wi ĩ makö, noa tä na makö kalipalo sinomo pasio wi ĩ makö, ĩ na makö kui makö pewö aiki, ‑Toitai sa tä thaö ha, kamisa na Teusö anö noa tä totoa hö̃töpi kitäö!‑ ĩ na pö pi kuu totihoö!

Pata töpönö ai töpö kalipalama sinomo wi, ĩ pata töpö na

⁹Noa mi, ai ma töpö kalipalama sinomo wi ĩ pö! Kamakö na ĩ töpö kalipalo makoka kuati wi na, ĩ na ĩ töpö simöa makoka kua totihoö! Ĩ ma töpö kilima tikiloti maikiö! Ĩ töpö peama maikiö! Hi tä hẽtu hamö Teusö pata tä kupoli, ĩ anö kamakö thapoö, noa mi ma töpö kalipalama sinomo wi, Teusö anö ĩ töpö thapo naia, ĩ na Teusö a kuaö. Ĩ tä na pö pi hatukuikiö! Teusö anö ai töpö totiapala asaö, Teusö anö ai töpö möö hanopo pasioö, ĩ na Teusö a kua mai kitä ta pi kuu mai.

Kama makö noamo sapao kõo wi, ĩ nasimö tökö uni na pö uni haloikiö!

¹⁰Ĩ na sa kuu mapo pia kule. Jesus Kaikana a na makö kokaiki nö, pö lotetepaloö! Pe epii Jesus a lotetea apati wi, ĩ tänö pö lotetepaloö! ¹¹Kamakö na Sai tä sai wasu pata ekuo tä, makö läa hö̃tököpököö! Makö läa mosawia hö̃tököpö, Teusö anö ösökö uni totoma wi, ĩ ösökö ha pö uni haloikiö! Kama makö noamo sapao kõopö, ĩ ösö ha pö haloikiö!

¹²Ai sanöma töpö solo makö säso wi, ĩ makö pasi mai kitä. Sai töpönö hiopö tä thaa wi ĩ töpö solo makö säso wi, ĩ makö sisawö. Sai pata töpönö sanöma töpö simöati wi, ĩ töpö solo makö säso naioö. Mumi mumi tä ha töpö kule, ĩ töpönö wanisala tä thaa sinomo wi ĩ töpö na sai töpö lotete epii töpö simöo sinomo wi, hi tä hẽtu hamö ĩ sai töpö kupoli, ĩ sai töpö solo makö säso naio wi ĩ makö. ¹³Ĩ na tä kuaö ha, Teusö anö makö noama wi ĩ nasimö ösökö uni ha pö haloikiö! Makö haloköma, sai töpö wanisala apati wi ĩ töpö wasu huima tä, makö lotetea apa asa läa hö̃töpasopököö! Makö lotetea apa asa läpalo nö, sai ma töpö sasua sapa totia kopalöma, sai töpönö makö utitipama mai kitä. ¹⁴Önö kutenö, pö läapalo hö̃töoö! Pitili ma tä tälöma, pili kolo ha ösö läpo kua wi na, ĩ na pitili tänö ĩ na makö nö läpo kua hö̃töo kitä. Pili kotopö ha söpala ösö amatosii ma ösö halolö nö, makö noamo kua wi na, ĩ na toitai ma tä thaa tä, ĩ na makö noamamo kua hö̃töo kitä. ¹⁵Jesus ta topa apöle, ĩ tänö töpö pi topapalama wi, ĩ ma ta wäsä hätäpotipöö! ‑Sanöma makö na Teusö a noimo kõa kuleö!‑ tä kuu wi ĩ ma ta wäsä hätäpopököö! Ma ta wäsä hätäpo pi topa tä, söpala ösökönö sotatu ami haloiki nö, töpö noamo kua wi na, ĩ na makö noamo kua hö̃töo kitä. ¹⁶‑Jesus a pitili‑ ĩ na pö pi kuu totioö! Söpala ösökö läa läatala wi ĩ ösökönö sotatu tä noama kua wi na, ĩ na, ‑Jesus a pitili‑ ĩ na makö pi kuu kuköma, ĩ na makö noama kua hö̃töo kitä. Söpala ösökö läapala wi ĩ ösökönö silaka wakö hili pole, ĩ taka lupama kua wi na, ĩ na, ‑Jesus a pitili‑ ĩ na makö pi kuu kuköma, Sai tä sai pata wanisala wi ĩ a pata na ĩ na makö noamo kua hö̃töo kitä. ¹⁷Makö pi tapoiki nö, ĩ na pili makö pi kuu sinomoö! ‑Teusö anö sa õsi totipalöma kutenö, sa pea mai, Teusö a na sa kuo soatio kitäö!‑ ĩ na makö pi tapoiki nö, ĩ na makö pi kuu sinomo opati nököö! Ĩ na makö pi kuu sinomo kuköma, pili he ha hesowa a amatosi soholö nö, töpö he noamo kua wi na, ĩ na makö õsi noamamo kua hö̃töo kitäö! Teusö a õsi kua tolele, ĩ anö Teusö ta totopi wi, ĩ ma ta tälöö! Sotatu tänö poo a täa thali wi na, ĩ na Teusö ma kai sua thaa nainöheö! Ĩ Teusö ma ta thaa nainö nö, sai ma töpö kilima hö̃töopököö!

¹⁸Ĩ na tä kua tä, Teusö a na pö hapalo sinomoö! Teusö a na makö hapalo tä, Teusö a õsi kua tolele, ĩ anö makö simöa sinomopöö! Teusö a õsi kua tolele ĩ a na, ‑Sa pasilipalöö!‑ ĩ na makö kuu sinomopöö! Pö pi mosawia totikiö! Teusö a na makö hapalo mapo maikiö! Teusö a na makö hapalo tä, Jesus a thapo wi ĩ ma töpö pewö a wäsäö! ¹⁹Kamakönö sa wäsä naio sinomopököö! Teusö a na makö hapalo nö, ‑Paulo anö wa kai a wäsä tä, ta wäsä makoka apa wi ta totoköö!‑ ĩ na makö kuu! ‑Kawanö wa töpö õsi totipa wi ĩ ta wäsä paio maa noai, huki Paulo anö ĩ ta wäsä tä, ta wäsä kili mai, Paulo anö ĩ ta wäsä totiopököö!‑ Teusö na ĩ na makö kuu! ²⁰Teusö anö töpö õsi totipa wi ĩ sa ta wäsäpö, Jesus Cristo anö sa simöa wi ĩ sa. Huki sai õsi ha sa õkama titia kule maaki, Jesus sa kai wäsä wi ĩ sa soawö. Teusö a na makö hapalo nö, ‑Paulo a kili mai, kawa kai a wäsäpöö! Ĩ na Paulo a kua kuköma, wa kai a wäsä tomöpo mi mai kitäö! Önö kutenö, Paulo a wäo kili maapököö!‑ ĩ na pö kuu!

‑Kamakö na Síkiku sa simöpalöma‑ Paulo a kuu noai ĩ ta

²¹Ĩ na tä kua tä, kamisa kuati pole, kamakö na Síkiku anö ĩ ta wäsä pia salo. Teusö a thapo naio wi ĩ ma pi ipa wi ĩ a. Cristo pata tä na ĩ a kalipalo sinomoö. ²²Kamisamakö kuati pole, Síkiku anö ĩ ta wäsäpö, kamakö na ĩ sa simöpalöma. ‑Epesu tili töpö na Síkiku anö ĩ ta wäsä kuköma, ĩ töpö pi topa apöpamanöpököö!‑ ĩ na sa pi kuu salo, kamakö na ĩ sa simöpalöma.

Teusö anö makö totiapala apapököö!

²³Toitai makö kutio wi, kamakö hai ĩ pö̃ Teusö a, Jesus Cristo pata tä, ĩ na kilii töpönö ĩ tä totoköpöö! Makö noimaso wi ĩ tä totoa naiköpöö! Ĩ tä pewö totokö nö, ‑Teusö a pitili‑ makö pi kuu totio wi, ĩ tä totoa naiköpöö! ²⁴Kamakö pewönö kamakö hai Jesus Cristo Kaikana ma tä pii mapo mai, Teusö anö ĩ makö totiapala apapököö!