Colossenses

Colossenses

Kolososö tili töpö na waheta tä simöpalö noai ĩ ta

Kolososö tä uli ha Paulo a huu maama. Kolososö tili töpö na Paulo a hai ĩ noi tä Epapötasö a hua pasilolö nö, ĩ töpö na Jesus Cristo ta wäsä somama.

Titita wi ĩ a sai õsimö ha Paulo a titia tä, Paulo a na ai töpö waloiki nö, ‑Kolososö tili töpö na ai töpönö Cristo ta wäsä mai, sai töpönö ta wäsä wi, ĩ töpönö ĩ sai töpö kai a wäsä tolea päo thaliö! Ĩ töpönö Teusö a kai hini totio mai ha, kama töpö pi saimo päo nö, töpö kuti päo thaliö!‑ ĩ na töpö kuu ha, Paulo a pi honipo opa nö, kolososö tili töpö na hi waheta tä simöpalöma. Síkiku a na tä simönöma.

Paulo anö hi waheta tä sãököpalö nö, ‑Jesus Cristo ta pitilii, ĩ ta hinia sisalöö!‑ Paulo a kuu nö, ‑Cristo a na makö koka kutenö, Cristo a temöa thaa kopalö noai na, ĩ na makö temöa thaa kõa naia soapalöma. Teusö anö makö temöa kopamanö nö, wanisala ma tä thaa noai, ĩ tä na Teusö a hĩso noai, ĩ tä maa kopasoma‑ a kuuma. Ĩ na a kuu nö, ‑Teusö ma thapo wi ĩ makö pasi kutenö, pö noimaso makokoa totihoö! Makö pewö noimaso makokoa totia tä, toitai makö kupalo toitio kitäö!‑ Paulo a kuuma.

¹Paulo sa. ‑Paulo a simönöö!‑ Teusö a pi kuu ha, Jesus Cristo anö sa simöpalöma. Jesus Cristo anö sa simöa wi ĩ sa. Kamisa, Timóteo anö Jesus a thapo naio wi ĩ a, ĩ na kilii samakönö hi waheta sama tä simöpali ke.

²Kolososö tili pö! Teusö anö makö sokamakö noai, ĩ makönö Jesus ma hosa kõo mi ipii, ĩ makö na hi waheta sama tä simöpali ke. Kamakö hai ĩ pö̃ Teusö a na ĩ na sa kuu: ‑Kolososö tili töpö totiapala apaö, töpö pi topapalama apaö, ĩ na wa töpö thamaö!‑ ĩ na sa kuu.

Teusö a na Paulo a hapalo nö, Kolososö tili töpö a wäsä noai ĩ ta

³Kamakö hai ĩ Jesus Cristo pata tä hai ĩ pö̃ Teusö a na samakö hapalo nö, makö a wäsä nö, ‑Aitaköö!‑ ĩ na samakö kuu kule. ⁴‑“Jesus Cristo a pitili” ĩ na kolososö tili töpö pi kutii, Teusö a thapo wi, kolososö tili töpönö ĩ töpö pewö pi ipaö, ĩ na kolososö tili töpö kua kulaliö!‑ ĩ na tä kuu wi sama ta hini kule. Önö kutenö, ‑Aitaköö!‑ ĩ na samakö kuu kule. ⁵Jesus Cristo ta pitili ipii ĩ ta topa apöle, kamakö na ĩ ta waloa somakö noai ĩ na ĩ ta kuuma: ‑Waiha Teusö tä uli ha makö hua konasolöma, Teusö anö makö pi topapalama apa soatio kitäö! Ĩ tä na makö mamo lätia kuleö!‑ ĩ na tä kuuma. Ĩ na tä kuu noai, ĩ ma ta hinima. Teusö tä uli ha makö waloköma, Teusö anö makö pi topapalama apa soatio wi, ĩ tä na makö mamo lätia kutenö, ‑Jesus Cristo a pitili‑ ĩ na makö pi kutii, Jesus a thapo wi ĩ ma töpö pewö pi ipaö, ĩ na makö kuaö. ⁶Jesus Cristo ta topa apöle, ĩ tä uli pewö hamö ĩ ta pala salo, sanöma töpö satehe epii töpö pi topapalo opati kule. Ĩ tä kua pole na, kamakö na ĩ ta palalo nö, makö pi topapalo opa hö̃töa kule. Teusö anö makö noa mi totiapala apa totio wi, ĩ pitili ma ta hini soma noai, ĩ ma ta hininö nö, makö pi topapalo kuköma, huki makö pi topapalo opa soatia kule. ⁷Jesus ta topa apöle, kamakö na Epapötaasö anö ĩ ta wäsäma. Epapötaasö sama pi ipaö. Jesus Cristo anö samakö simöaö, Epapötaasö a simöa naioö, ĩ na samakö pewö thamaö. Jesus anö Epapötaasö a simöa kutenö, a monimo mai a, a pitilimo opa nö, Epapötaasö anö makö pasilipa apatii. ⁸Ĩ aiki, ‑Kolososö tili töpönö ai töpö pi ipa wi, Teusö a õsi kua tolele ĩ anö ĩ tä totoköma‑ ĩ na kamisamakö na ĩ na ĩ a kuuma.

⁹Önö kutenö, kamisamakö na Epapötaasö anö makö a wäsäö ha, Teusö a na samakö hapalo sinomo nö, makö a wäsä matalo mi. Samakö wäo nö, ‑Teusö ai. Kawanö wa tä pi ipa wi, ĩ tä na kolososö tili töpö taöma totihoö! Wa tä pi ipa wi, kawa õsi kua tolele ĩ anö ĩ töpö na ĩ tä taöma totio nö, ĩ töpö pi hatukua totipalöö!‑ ĩ na Teusö a na ĩ na samakö kuu. ¹⁰Teusö anö ĩ na makö thamaö ha, ‑Ĩ na makö kuatipököö!‑ ĩ na Teusö a kuu wi, ĩ ma ta hinia totili kitäö! Makö pi mönahapama sinomo kuki kitäö! Hii ti mo pi siko opii mo pi lalo kua wi na, ĩ na kamakönö toita ma tä laloama kua hö̃töolö kitä. Teusö ma taö satia apa kitäö! ¹¹Teusö a na makö a kateha tä, ‑Teusö ai. Kawa lotete sati ipii, ĩ tänö ĩ töpö pi lotetea totipamanöö!‑ ĩ na samakö kuu. Teusö anö makö lotetea totipamani ha, makö pea kule maaki, opii makö kasiapalo opati kitä. Makö pi mönaha apa salo, ¹²Teusö a na, ‑Aitaköö!‑ ĩ na makö kuu kitä. Awai. Kamakö hai ĩ pö̃ Teusö a na, ‑Aitaköö!‑ makö kuupökö. Teusö a wakala apii, Teusö a toita apii, ĩ anö kama hai ĩ töpö na a kaikanamo totio piale, ĩ ha Teusö a thapo wi ĩ töpö na tä totoa piale, kolososö tili makö na ĩ tä totoa naiki kitä. Teusö anö makö totia waikipalöma kutenö, makö täpäa naini kitä. ¹³Mumi mumi tä na Sai tä sai patanö makö õsi uni pewö õkapoti tä, ĩ tä, Teusö anö makö õsi uni õkama kusöa kopalöma. Makö õsi uni kusöa kopalö nö, kama hai ĩ ulu Jesus a pi ipa wi, ĩ a kaikanamo totio wi, ĩ ha Teusö anö makö hilaköma. ¹⁴Teusö a hai ĩ ulu anö makö täa konöma. Kamakönö wanisala tä thaa noai, Teusö a hai ĩ ulu Jesus Cristo anö ĩ tä noa thapalö nö, makö täa konöma.

Ĩ na Jesus Cristo a kuaö

¹⁵Pö̃ Teusö a kui na, ĩ na pelupö Cristo a kuö toti ipö hö̃töwö. Teusö ma tapa mai maaki, Teusö ulupö Cristo ma tapa kuköma, Teusö ma tapa totiki. Teusö anö ĩ tä pewö thaa paio mai ha, kama hai ĩ pelupö a kuo somama. Pelupö a kuo soma noai ĩ Jesus Cristo a. Somi tä sai tä ĩ tä pewö thaa noai ĩ tä pewö na Teusö a hai ĩ pelupö a tolehea satia apa asa wi ĩ a. ¹⁶Teusö anö pelupö a simöaö ha, pelupö anö ĩ tökö pewö thapalöma. Hi tä hẽtu hamö tökö kupoli ĩ tökö pewö, hi masita tä uli ha tökö kupai ĩ tökö pewö, ma tökö tapa wi ĩ tökö, ma tökö tapa mai ĩ tökö, Teusö a hai ĩ pelupö anö ĩ tökö pewö thapalöma. Teusö anö kama hai ĩ töpö simöta sinomo wi, ĩ ãju töpö a hilo wi, ĩ ãju töpö, sai töpö lotetea apöleĩ töpö, töpö kaikanamo lotetea apöle ĩ töpö, ai töpö na ĩ töpö kaikanamo sinomo wi ĩ töpö, Teusö a hai ĩ pelupö anö ĩ töpö pewö thapalöma. Teusö anö pelupö a lotete tolehapalama pia salo, pelupö na ĩ tökö pewö thapamanöma. ¹⁷Ĩ tökö pewö kua paia mai ha, Teusö a ulupö kuo somama. Ĩ anö ĩ tökö pewö huopoö. Ĩ tökö pewö huopo salo, ĩ tökö pewö kua makokoa apötia kule. ¹⁸Pili he hai, ĩ kama sai. Pili a sai hai, ĩ kamakö pasiwö. Jesus Cristo ma thapo wi ĩ makö kokamo sinomoti wi ĩ makö. Cristo anö makö simöa sinomo wi ĩ a. Cristo anö makö kokapalö nö, makö temöa komanöma. Teusö a ulupö kuo soma noai ĩ Cristo a. Ĩ töpö pewö na Cristo a kaikanamo asapö, Teusö anö a temöa kõa asa somamanöma. Önö kutenö, Cristo a hai ĩ pata tä sai. ¹⁹Pö̃ Teusö a kui na, ĩ na pelupö a kuö toti naiwö, Teusö anö ĩ tä pi ipama. ²⁰Önö kutenö, ĩ tökö pewö täa koni pia salo, pelupö a simönöma. ‑Hii ti pakalai ti ha ipa ulu a säpamonasopöö!‑ ĩ na Teusö a pi kuu nö, a simönöma. Ĩ tä, hii ti pakalai ti ha pelupö a säpamonasoö ha, Teusö anö ĩ tökö pewö täa konöma. Hi tä hẽtu hamö tökö kupoli, ĩ tökö pewö, hi masita tä uli ha tökö kupai, ĩ tökö pewö, ĩ na tökö kui tökö pewö konöma.

²¹Teusö ma thapo paio mi tä, Teusö a na makö pã apama. Ĩ tä, ma wanipo opatima. Wanisala tä na makö pi tapomoa sisatiki nö, wanisala ma tä thatima. ²²Ĩ na makö kuatima maaki, Teusö a ulupö hai ĩ sanöma tä kupalo nö, a säpamonasoma kutenö, huki makö täa konö nö, kamakö na a noimo kõköma. Ĩ na Teusö anö makö thama waikioma kutenö, Teusö a na makö toitai, makö waloki kitä. Makö waloköma, Teusö aiki, ‑Makö wanisala. Wanisala ma tä thaa noai ĩ makö‑ ĩ na huki kamakö na ĩ na Teusö a kuu wi tä kua mai kitä. ²³‑Jesus Cristo ta pitilia apa‑ ĩ na pö pi kuu sinomoö! Ĩ na makö pi kuu sinomoö ha, ‑Makö wanisala‑ ĩ na Teusö a kuu mai kitä. ‑Jesus Cristo ta pitilia apa‑ ĩ na makö pi kuu sinomoti ha, makö õsi lotete epö kitä. Sai pili a kolo lototoa apa tä, sai a ola lotete kua wi na, ĩ na wa õsi lotete kua hö̃töo kitä. Jesus wa hosa mai kitä. Sai a kolo lototoa apa kua wi na, ĩ na makö kua hö̃tököma, ‑Jesus Cristo ta pitili ipö‑ ĩ na makö pi kuu mapo mai kitä. Jesus Cristo ta topa apöle, ĩ ma ta hini noai, ĩ tä, kamakö aiki, ‑Teusö anö makö täapa kõo läo totio kitäö!‑ ĩ na makö õsi kuu kua noai na, ĩ na pö õsi kuu mapo tihöö! Hi masita tä uli pewö hamö sanöma töpö pewö kupai, ĩ hamö Jesus Cristo ta topa apöle ĩ ta wäsä waikioma. Paulo sanö ĩ sa ta wäsä sinomoti wi, ĩ tä na sa kalipalo sinomotii.

Cristo a na pe epii Paulo a kalipalo sinomoti noai ĩ ta

²⁴Kamisanö makö pasilipoö ha, ai töpönö sa peamati kuleö! Cristo aiki, ‑Kamisa pea kua noai na, ĩ na sa thapo wi, ĩ na ĩ töpö pea kua naio kitäö!‑ ĩ na a pi kuuma kutenö, ai töpönö sa peama soatioö. Cristo sa thapoö ha ĩ töpönö sa peamati pole, ĩ tä na sa pi mönaha kule. Cristo ma thapo wi, Cristo anö makö kokapalö noai, ĩ makö lö kui, ĩ Cristo pili a sai uni. Ĩ Cristo pili a sai uni na sa peati kule. Ĩ Cristo pili a sai uni na sa peati wi, ĩ sa tä pewö hötötöa totipali pia salo. ²⁵Cristo anö töpö kokapalö noai, ĩ tä uli pewö hamö ĩ töpö kupai, ĩ töpö pewö na sa kalipalo sinomo wi ĩ sa. Teusö anö sa simöpalö nö, ‑Paulo ai. Ĩ töpö pewö na a kalipalo sinomoö! Kolososö tili töpö na a kalipalo naioö! Ĩ töpö na sa kai pewö a wäsä totihoö!‑ ĩ na Teusö anö sa noa thama. ²⁶Teusö sa kai a wäsä pole, nö patapö töpö na ai tänö ĩ ta wäsä paio maama. Ĩ töpönö ĩ ta taö paio maama. Huki ĩ ta hasulupo pole, Teusö ma thapo wi ĩ makö na ĩ ta wäsä kule. ²⁷Teusö aiki, ‑Ta topa satia apöle ĩ ta wäsä paio maama maaki, huki ipa töpö na ĩ ta wäsä pia kuleö! Juteu töpö pasi mai, ĩ töpö pewö na ĩ ta wäsä naio pia kuleö!‑ ĩ na Teusö a pi kuuma. Ta wäsä paio maa noai, ĩ na ĩ ta kuu: ‑Kamakö õsi na Cristo a kua kuleö! Kamakö õsi na Cristo a kua manu kule, Teusö a wakala apii, a toita apii, ĩ na Teusö a kui, ĩ na makö kupaso kitäö!‑ ĩ na ta kuu. ²⁸Ĩ Cristo sama ta wäsä sinomotii. Töpö kua makoko toita apii, sama töpö pewö thama pia salo, ĩ Cristo sama ta wäsä sinomoö. Cristo a na töpö kokaki salo, töpö makoko toita apii, ĩ na töpö kua wi, Teusö a na ĩ sama töpö waloama pi topa salo, samakö pi mosaiki nö, ‑Ĩ na pö kua totihoö!‑ ĩ na samakö kuu nö, ‑Ĩ na Cristo ta kuu kuleö!‑ ĩ na samakö kuu sinomoö. ²⁹Önö kutenö, Cristo sa wäsäti pamö, Cristo anö sa õsi lotete mapo kutenö, sa kasiapalo opati nö, sa kalipalo opatii. Sa kalipalo opati kutenö, sa motapo opatii.

¹Ta hiniheö! Kamakö, laosiséia tili töpö, ai töpönö sa tapa pasia paia manahai ĩ töpö, ĩ na makö kui makö pewö na pe epii sa pi honipo opatii. Kamakö na sa pi honipo salo, sa kasiapalo opa nö, Teusö a na makö a wäsä sinomoö. ²Makö pi lotetepasoö, makö noimasoö, makö pi hatukupasoö, ĩ na makö kupasopö, Teusö a na pe epii makö a wäsä sinomoö. Makö pi hatukua totipalo nö, Teusö anö tä hasulupama paio maa noai, ĩ ma tä taö kuki kitä. Teusö anö tä hasulupama paio maa noai, ĩ Cristo a. Cristo ma taö kuki kitä. ³Cristo ma taö kuköma, Teusö anö sanöma töpö pi hatukua totipamani wi, ĩ anö makö pi hatukupamani kitä. Cristo ma taö kuköma, kamakö na Teusö anö ĩ tä pewö taöma apa kitä.

⁴Önö kutenö, kamakö na ĩ na sa kuu kule: ‑Ai töpö aiki, “Ĩ naköö! Ĩ naköö!” ĩ na ĩ töpö holisi kuu wi, ĩ ma ta hini nö, “Ĩ ta topa hãtoa” ĩ na makö pi kuu kule maaki, ma. Ĩ töpönö makö mönama päoö. Ĩ töpö na pö mönamamo tihöö!‑ ĩ na sa kuu kule. ⁵Kamakö na sa pã apa kule maaki, kamakö na sa õsi kua manu kule, ĩ na sa kuu kule. Kamakö na sa pi tapotia kule. Sa pi tapotiki nö, makö kuati wi ĩ sa tä taö, ‑Cristo a pitili‑ ĩ na makö pi pewö kuu ösöho lotetea apöle ĩ sa tä taö, ĩ na sa tä taö kua apa salo, sa pi mönaha apa kule.

Cristo a na makö kuati wi ĩ ta

⁶Jesus Cristo pata ma tä tälö noai, ĩ tä, ‑Jesus pata tä pitili‑ ĩ na makö pi kuu kukö noai na, ĩ na makö pi kuu kua soatiopököö! Ĩ na makö pi kuu kua soatio nö, ⁷pili ti nasikilinö ti kolo lototoa apa kutenö, pili ti lotete kuo wi na, ĩ na Cristo a na makö kuköpöö! Cristo a na ĩ na makö kuköma, ĩ na makö lotetea kua hö̃töpaso kitä. Sai pili a kolo lototoa tä, ola a sai lototoa hö̃töa soataa. Cristo a na makö kuköma kutenö, ĩ a na makö kuo soatiopököö! ‑Cristo a pitili‑ makö pi kuuma kutenö, ‑Cristo a pitili‑ ĩ na makö pi kuu loteteaalöpököö! Kamakö na Cristo ta wäsä tä, ĩ na ai tä kuu waikioma. ‑Cristo a pitili‑ ĩ na makö pi kuu loteteaalö pamö, Teusö a na, ‑Aitaköö! Wa totiatalo opatiwöö!‑ ĩ na makö kuu wi ĩ tä pala naisopököö!

⁸Kamakö na ai töpö monimo nö, makö täa pi topa wi, ĩ töpö na pö pi mosaia totikiö! Cristo a na makö kua kule maaki, tiko hamö ĩ töpönö makö tälölö pia salo. Önö kutenö, sanöma pata töpö pi kuu päo nö, ta wäsä sinomo noai, huki makö mönama pi topa wi ĩ töpönö ĩ pata töpö kai wäsä nömöo päoö. Cristo ta wäsä mai, sai töpönö ta wäsä wi, ĩ töpönö ĩ sai töpö kai a wäsä tolea päoö.

⁹Jesus Cristo a hai, ĩ sanöma tä kupaso noai, Teusö a kui na, ĩ na ĩ a kuö toti naiwö. ¹⁰Teusö anö Cristo a na makö kokamaköma kutenö, makö õsi temöa totipalöma. Huki makö õsi kulahamo waikia kule. Sai töpö lotete epii, ĩ töpö pewö na Cristo a kaikanamo sinomoö. Cristo a hai, ĩ pata tä sai.

¹¹Teusö anö Cristo a na makö kokamaköma kutenö, Cristo anö makö ösö uni hosapalöma. Sanöma töpönö pili isi ola ösö hanöpalö nö, ösö hosa sinomo wi, ĩ nasimö tä hai kuno mai. Cristo anö makö ösö uni hosapalö nö, wanisala ma tä thaa pi topa sinomo noai, Cristo anö ĩ tä hosalöma. ¹²Makö mãi õmamo tä, maa maka ha Cristo a nomawö titia thakö noai na, ĩ na makö mãi õmamo tä, ĩ na makö uni titio kuo naioma. Ĩ na makö uni titio kuo naioö ha, Teusö anö Cristo a na makö kokamaki salo, Cristo a temöa thaa komanö noai na, ĩ na makö temöa thaa naia komanöma. Kamakö aiki, ‑Teusö a lotete toti ipö nö kiliwö ia!‑ ĩ na makö õsi pi kuu totio wi, ĩ tänö makö temöa kõa naipalöma.

¹³Juteu makö pasi mi ipii, ĩ makönö Teusö ma thapo mai ĩ makö kuoma kutenö, wanisala ma tä thatala apatima. Wanisala ma tä tha apatima kutenö, makö temöo maama. Nomawö makö uni kuoma. Nomawö makö uni kuo noai, Teusö anö ĩ makö temöa komanöma. Cristo a na makö koka kutenö, Cristo a temöa thaa kopalö noai na, ĩ na makö temöa thaa naia kõa soapalöma. Teusö anö makö temöa kopalö nö, wanisala ma tä thaa noai, ĩ tä na Teusö a hĩso noai, ĩ tä matasoma. ¹⁴Wanisala ma tä thaa noai, waheta tä na ĩ tä pewö uni sãökama kuoma. Ĩ tä waheta na soatawö, ‑Ĩ ai tä thaa tihöö! Ĩ ai tä thaa tihöö! Ĩ ai tä thaa tihöö! Ĩ wanisala ma tä thama, ĩ ma tä noa thapali kitäö! Wanisala ma tä thatalati noai, ĩ tä noa na Teusö anö makö peama hö̃töo kitäö!‑ ĩ na Moisés anö töpö noa thaa kõataloti noai, ĩ tä sãökama kuo naioma. Ĩ tä waheta uni kuoma maaki, hii ti pakala ti ha Jesus a sätämakö noai, ĩ ti ha Teusö anö ĩ tä waheta sãökama sätäa naimaköma, Teusö anö ĩ tä waheta sãökama pewö maa totipamanöma. ‑Wanisala ma tä thatala apati noai, ĩ tä noa na wa peama kitäö!‑ tä kuu wi, ĩ tä pewö a hosa totilöma. ¹⁵Hii ti pakalai ti ha Cristo a pi hĩta tä, sai töpö pata loteteo opa noai, Cristo anö ĩ tä hosalö nö, ĩ sai töpö utitipamanöma. Cristo anö ĩ sai töpö utitipamanö noai, ai töpö na ĩ tä möma hoka apama. Ĩ tä möma pia salo, sai töpö õkaiki nö, sai töpö õkala tä, Cristo a huulö pamö, sai töpö nokamaköma.

¹⁶Önö kutenö, kamakö na ai töpö aiki, ‑Ĩ tä oa tihöö! Ĩ tuu koa tihöö!‑ ĩ na ĩ töpö kuu kule maaki, ĩ töpö a hini tihöö! Ĩ na tä kua tä, ĩ töpö aiki, ‑Kokamopö tä wakala kuköma, pö Teusömoö! Ai pilipoma ose wai kua toitaki ha, makö Teusömo hö̃töo sinomoö! Sápatu tä wakala na makö Teusömopököö!‑ ĩ na ĩ töpönö makö noa thaa sinomo wi, ĩ ta hinia naio tihöö! ¹⁷Cristo a walo paio mi tä, juteu töpö Teusömo noai, ĩ tä hai, ĩ Cristo a uni kua paioma. Huki Cristo a sai tapamoa waikilasoma. ¹⁸‑Juteu töpö Teusömo kua sinomo kua noai na, ĩ na makö Teusömo kua naiopököö!‑ ĩ na ai töpönö makö noa thaa wi, kamakö na ĩ töpö aiki, ‑Makö kuati wi ĩ tä wanisala‑ ĩ na ĩ töpö kuu kule maaki, ĩ töpö a hini tihöö! Ĩ töpö aiki, ‑Ma tä tai mio wi, kamisa na Teusö anö ĩ tä tapamoma asaö‑ ĩ na ĩ töpö kuu. Ĩ na ĩ töpö kuu nö, ‑Makö Teusömo pi topa totia tä, nii tä oa paio maikiö!‑ ĩ na ĩ töpö kuu holisimo opaö. ‑Teusö a na makö hapalo kua wi na, ĩ na ãju töpö na ĩ na pö hapalo kua hö̃töoö!‑ ĩ na ĩ töpö kutiwö. Ĩ töpönö Teusö a kai hini totio mai ha, kama töpö pi saimo päo nö, töpö kuti päoö. ‑Sa wäo tao opa asa wi ĩ sa‑ ĩ na ĩ töpö holisi kuti päoö. ¹⁹Cristo anö makö pewö simöa sinomo wi, ĩ töpönö ĩ a thapo manai, ĩ töpönö Cristo a hulaköma. Cristo a na ĩ töpö koka mi. Cristo anö makö simöa sinomo wi, ĩ pili a he. Cristo pili a sai lö kui, ĩ kamakö pasiwö. Thuu tupö tipöa, somanai totopö kua, ĩ na tä kua kule na, Cristo anö makö kokapalöma, ĩ na makö kua hö̃töpasoö. Ĩ na makö kuama, Cristo anö makö patamani. ‑Ipa töpö patasopököö!‑ ĩ na Teusö a pi kuu salo, Cristo anö makö kokapalö nö, makö patamani.

^20-21Cristo a noma tä, kamakö uni noma naisoma kutenö, sai töpönö makö uni õkapalöma maaki, Teusö anö makö uni kusöa kopalöma. Hi tä hẽtu ha ĩ sai töpö kaikanamoö, hi masita tä uli ha sanöma töpö simöa naioö, ĩ na sai töpö kua wi, ĩ töpö na makö kusöa kopalöma. Önö kutenö, wi na makö pi kuu salo, hi tä uli ha Teusö a thapo mai, ĩ töpö kua kuatile na, ĩ na makö kua kua naitioö? Kamakö na ai töpö aiki, ‑Hi tä po tihöö! Hi tä oa tihöö! Hi tä höpöa tihöö!‑ ĩ na ai töpönö makö noa thaö ha, wi na makö pi kuu salo, ĩ ma ta hini toita apa kule? ²²Sanöma makö iapö, nii tä kua. Ma tä oalöma, tä mato soaö. Ĩ na tä kua sinomo wi maaki, ‑Hi tä höpöa tihöö! Hi tä oa tihöö!‑ ĩ na ĩ töpö ta kuuwö. Sanöma töpö pi saimo päo wi, ĩ töpönö ĩ ta wäsä sinomo päoö. ²³‑Makö Teusömo totio pi topa salo, ĩ töpönö makö noa thaa wi, ĩ ma ta hininöpöö!‑ ĩ na makö pi kuu kule maaki, makö noa thaa wi, ĩ töpö pi saimo päo nö, ta wäsä päoö. ‑Hi tä höpöa tihöö! Hi nii ma tä oa maikiö!‑ ĩ na ĩ töpö kuu ha, ai makö aiki, ‑Makö noa thaa wi ĩ töpö pi hatuka apaö‑ ĩ na makö pi kuu kule maaki, ĩ töpö pi hatukua mi. ‑Kama wa honio sapa kõo wi ĩ tä topa‑ ĩ na töpö kuu. Ĩ na töpö kuu wi tä kua kutenö, ai makönö ĩ tä pewö a hininö nö, ‑Ĩ töpönö makö noa thati pole, ĩ töpö pi ta hatukua apöle‑ ĩ na ai makö pi kuu kule maaki, ĩ töpö pi hatukua mane. Ĩ töpönö wa noa thaa wi ĩ wa ta hini kule maaki, wanisala wa tä thaa pi topa wi, ĩ tä na wa wasuo tao mai kitä. Wanisala wa tä thaa pi topa wi, ĩ wa tä thaa soatioolö kitäö!

Hi tä hẽtu ha Cristo a na makö uni kua naia nasoa wi ĩ ta

¹Cristo a temöa konaso noai, ĩ tä, Cristo a na kamakö uni temöa kõa naisoma. Önö kutenö, hi tä hẽtu ha Teusö a kotö ha Cristo a lotio wi, ĩ tä uli ha tä kule, ĩ tä na pö pi wasiso totihoö! ^2-3Cristo a nomaso noai, ĩ tä makö uni noma naisoma. Teusö a na Cristo a kutio kua wi na, ĩ na makö õsi temöa apati wi, ĩ na Teusö a na ĩ na ĩ tä kutia kua naia hãtoa lasoa. Makö õsi temöa apa wi, Teusö a na ĩ tä kua naitia kutenö, hi masita tä uli ha tä kua wi, ĩ tä na makö pi tapotio mai, hi tä hẽtu ha tä kupoli, ĩ tä na makö pi tapoa sisatiki nö, ĩ tä pii totihoö! ⁴Cristo a temöa konaso noai, kamakö õsi ha ĩ a kutia kutenö, makö õsi temötioö. Cristo anö makö õsi temömani wi, sanöma makö na ĩ a tapamo konasoma, ai töpö aiki, ‑Ĩ a toita apö‑ ĩ na töpö kuu kitä. Ĩ a tapamo konaso tä, makö tapamo naio tä, ‑Ĩ töpö toita apö‑ töpö kuu naio kitä.

‑Makö kua paitio noai, ĩ tä hosalöheö!‑

⁵Önö kutenö, sanöma makönö wanisala ma tä thaa pi topa apati wi ĩ tä noma totimanöheö! Ai tiko tä suö na makö mamopalo wi ĩ tä, ai suö makönö ai wano ma töpö mamopalama wi ĩ tä, sami sami ma tä thaa wi ĩ tä, wanisala ma tä thaa pi topa apa wi ĩ tä, ĩ na tä kui tä maa totipamanöheö! Wani tä na makö pi wasisopalo opa sinomoti wi, ĩ tä maa naipamanöheö! Teusö ma thapo mai, ai tiko ma tä thapo pikio wi, ĩ na ĩ tä wanisala kua wi na, ĩ na wani tä na makö pi wasisopalo opati wi, ĩ na ĩ tä wanisala kua naio soataö. ⁶Teusö a kai hini totio mai, ĩ töpönö ĩ wanisala tä pewö thaa wi, ĩ töpö na Teusö a hĩso opa nö, töpö peama kitä. ⁷Teusö ma thapo paio mi tä, ĩ wanisala ma tä thaa pi topa apa sinomoti salo, wanisala ma tä thaa sinomo opatima.

⁸Ĩ na makö kuatima maaki, huki ĩ tä hosalöheö! Hĩso wi ĩ tä, waitilimo wi ĩ tä, höla wi ĩ tä, ĩ na tä kui tä pewö hosalöheö! Ai ma ta kateha hiopöa maapököö! Makö hapalo samia maapököö! ^9-10Haloi ösö hotei ma ösö hasupalö nö, ma ösö hosalö nö, tutei ösö ha makö haloa nömöki, ĩ na makö kua kua wi na, ĩ na wanisala ma tä thati noai, ĩ ma tä hosalö nö, tute tä na makö uni haloa nömököma. Önö kutenö, makö hapalo hẽtupaso nö, makö hapalo holisimo maikiö!

Teusö anö makö tutepalöma. Teusö a kua kuati wi na, ĩ na Teusö anö makö thamati kule. ‑Ipa töpönö sa taö totia apököpököö!‑ ĩ na Teusö a pi kuu salo, ĩ na makö thama apatii. ¹¹Teusö anö makö tutepalöma kutenö, ‑Juteu wa mai kitä. Tiko wa pasiwöö!‑ ĩ na tä kuu wi tä kua mai kitä. ‑Wa hapalo tikopö pasii, ĩ wa‑ tä kuu wi tä kua naio mai kitä. ‑Waheta tä na wa pi hatukupo mi ipii ĩ wa pasiwö‑ ĩ na tä kuu wi tä kua naio mai kitä. ‑Noa mi wa kalipalo mai, ĩ wa asawöö!‑ tä kuu wi tä kua mai kitä. Ĩ na tä kua tä, ‑Ai pata tä na noa mi wa kalipalo pätio wi ĩ wa pasiwöö!‑ ĩ na tä kuu wi ĩ tä kua mi ipö. Teusö anö makö pewö tutea waikipalöma kutenö, ‑Cristo makö. Cristo ma thapo wi ĩ makö pewö‑ ĩ na tä kuu wi tä kua asaa. Kamakö õsi pewö na Cristo a pilia totia waikia kutenö, ĩ na tä kua asaö.

¹²Teusö anö makö thapo pia salo, makö sailö nö, makö thaa sokaköma. Teusö anö makö pi ipa wi ĩ makö. Önö kutenö, toita ma tä thaa wi, ai töpö na ĩ tä möma sinomoö! Ai töpö pea tä, ĩ töpö na makö pi honipo opa nö, ma töpö totiapala sinomopököö! ‑Pata sa sai waikiwö‑ ĩ na pö pi kuu tihöö! Makö höla soatalo mai, opii makö hapalo totiopököö! ¹³Ai töpö na makö hĩso soatalo mai nököö! Ai tänö kawa na wanisala tä thaö ha, kawa aiki, ‑Pälaö! Kamisa na ĩ anö wanisala tä thaa pole, ĩ a na sa hĩso mai kitäö!‑ ĩ na pö pi kuuto totihoö! Cristo pata tä aiki, ‑Wanisala wa tä thaa noai, ĩ tä na sa hĩso mai kitäö!‑ ĩ na Cristo a kuu kua noai na, ĩ na ai sanöma töpö na ĩ na pö kuu totiataloö! ¹⁴Ĩ na makö kua nö, pö noimaso makokoa totihoö! Makö pewö noimaso makokoa totia tä, toitai makö kupalo toitio kitäö! ¹⁵Makö pi wi na takömo tä, Cristo a na makö hapalo nö, ‑Kawanö samakö pi topapalama wi ĩ tänö samakö õsi pi makokapalama lätioö‑ ĩ na pö kuu! Makö höla mai, makö noimasoö, makö pi topapalo sinomoö, ĩ na makö kuatipö, Cristo anö makö nakalö nö, makö kokapalöma. Makö kokapalöma, satehe epö makö maaki, samii makö kupasoma. Teusö a na, ‑Aitaköö! Teusö wa totiatalo opa asawöö!‑ ĩ na pö pi kuu sinomoö! ¹⁶Cristo ta topa apöle, kamakö õsi ha ĩ ta kuo totiopöö! Makö pi mosaia totiki nö, Cristo ma ta wäsä nö, makö pi hatukupaso sinomopököö! Teusö tä waheta na ama ta kule ĩ ta, Jesus Cristo ama ta, Teusö a õsi kua tolele ĩ anö ama ta totoma wi ĩ ama ta, ĩ na ama tökö a kule, ĩ ma tökö a thaa sinomopököö! Ĩ ama ma tökö a thaa pola nö, ‑Aitaköö! Teusö wa totiatalo opatiwöö!‑ ĩ na makö kuutopököö! ¹⁷Önö kutenö, ai töpö na makö hapalo tä, ‑Jesus pata sa tä thapo wi ĩ sa‑ ĩ na makö pi kuu totila nö, pö hapaloö. Makö kuati wi, ĩ tä na Jesus pata ma tä pi mönahapamanöpököö! Jesus ma pi mönahapamanö nö, ĩ anö makö totiapala apa sinomoti manu kui, kamakö hai ĩ pö̃ Teusö a na kamakö aiki, ‑Aitaköö! Wa totiatalo opatiwöö!‑ ĩ na pö kuu sinomoö!

‑Ĩ na makö kuatipöö!‑ tä kuu wi ĩ ta

¹⁸Pusopö pö! Cristo ma thapo salo, kamakö hai ĩ peanopö töpö a hini totiataloö!

¹⁹Peanopö pö! Kamakö hai ĩ pusopö töpö noima totihoö! Ĩ töpö peama mai, töpö totiapala apaö!

²⁰Ulu pö. Cristo ma thapo salo, kamakö hai ĩ pö̃ a, pöpönö a, ĩ na töpö kui ma töpö a hini totiataloö! Kamakönö ĩ ma töpö a hini totiatalo wi, Teusö anö ĩ tä pi ipaö.

²¹Pö̃ pö! Pöpönö pö! Kamakö hai ĩ ulu töpö hĩsuma maikiö! Ma töpö hĩsumaö ha, ĩ ulu töpö õsi pi wanisala apa kuki kitäö!

²²Pata töpönö makö kalipalama sinomo pätio wi ĩ pö! Sanöma pata töpönö makö kalipalama sinomoti wi, ĩ töpö a hini totiatalo sinomoö! Kamakö aiki, ‑“Wa kalipalo tao opawö” ĩ na pata sa tä pi thama pia salo, ĩ a mamo tetela tä sa kalipalo opa sisaö‑ ĩ na pö pi kuu ti! Ĩ töpö mamo teteo mi päla tä maaki, Teusö ma pi ipa salo, makö holisimo mai, pö kalipalo makokoa totioö! ²³Makö kalipalo tä, pö kasiapalo totihoö! Makö kalipaloti pola nö, ĩ na makö pi kuupöö! ‑Sanöma makö na sa kalipalo sisa maneö! Teusö pata tä na sa kalipalo totia kuleö!‑ ĩ na makö pi kuu sinomopököö! ²⁴Ĩ na makö pi kuu nö, ‑Sa kalipaloti wi ĩ tä noa na ipa Jesus Cristo pata tänö sa täpäli kitäö!‑ ĩ na makö pi kuu! Cristo pata tä na makö kalipalo totio opati wi ĩ makö na, Cristo aiki, ‑Waiha ipa töpö na noa sa tä totoki kitäö!‑ ĩ na Cristo a kuu totioma. ²⁵Ĩ na tä kua tä, ai töpönö wanisala tä thaa noai, ĩ tä noa na Teusö anö ĩ töpö peama kitä. Waiha Teusö anö sanöma töpö pewö kokapalö nö, ai töpönö wanisala tä thaa noai ĩ tä noa na ĩ töpö pewö peamaö, toitai tä thaa asa noai, ĩ töpö pewö na noa tä toita apii tä totoa asaki, ĩ na Teusö anö sanöma töpö pewö thama ösöho kitäö!

¹Ai ma töpö kalipalama sinomo wi ĩ pata pö! Ĩ töpö peama mai, töpö kalipalama makokoa totihoö! Ĩ ma töpö kalipalamati pola nö, ‑Hi tä hẽtu hamö pata tä kupoli, ĩ anö sa simöa sinomo hö̃tötio wi ĩ sa‑ ĩ na makö pi kuupökö.

‑Teusö a na makö hapalo mapo maapöö!‑

²Teusö a na makö hapalo sinomoö! Teusö a na makö hapalo pola nö, makö pi mosaia totiki nö, Teusö a na, ‑Aitaköö! Wa totiatalo opatiwöö!‑ ĩ na makö kuu! ³Teusö a na makö hapalo nö, samakö a wäsä naio nö, ‑Teusö ai. Paulo anö kawa kai a wäsä hoka apapö, ĩ tä totoköö! Sutu ha Cristo ta wäsä paio maa noai, huki Paulo anö ĩ ta wäsäpö, ĩ tä totoa naikiö!‑ ĩ na Teusö a na ĩ na makö kuu! Paulo sanö Cristo sa ta wäsäti ha, hi a sai päka lototoa wi, ĩ a sai õsi ha ai töpönö sa õkapalö nö, sa titiköma, hisa ha sa õkama titia soa kuleö! ⁴Önö kutenö, Teusö a na wa hapalo nö, ‑Paulo anö Cristo ta wäsä hoka kõopö, ĩ tä totoköö! Wa tä totokö nö, Paulo anö ta wäsä makoka apa wi, ĩ tä totoköö!‑ ĩ na makö kuu! Cristo sa ta wäsä makoka apati wi, Teusö anö ĩ tä pi ipa kutenö, ĩ na makö kuupököö!

⁵Cristo a thapo mai, ĩ töpö na makö kua naia salo, makö pi mosaiki nö, pö kua naikiö! Ĩ na makö kua naitio nö, kamakö aiki, ‑Huki hi töpö na Cristo sa ta wäsäpö, tä kupo hãto kimatiö! Huki sa ta wäsä totiopököö!‑ ĩ na pö pi kuu totihoö! ⁶Ĩ na makö pi kuu nö, ai töpö na makö hapalo salo, pö hapalo wanisala tihöö! Toitai pö hapalo makokoa sisaöö! Nii tä na mötati wa tä kemaköma, ai töpönö ĩ tä oalö nö, ‑Ĩ nii tä mötati toita apö. Tä toita apö‑ ĩ na töpö kuu. Ĩ na töpö kuu kua wi na, makö hapalo wi ai töpönö ĩ ta hini nö, ‑Ĩ ta topa apa‑ ĩ na ma töpö pi thamapököö! Makö hapalo wi ĩ tä na ai ma töpö pi topapalama apapököö! Kamakö na ai töpönö tä hini pi topa tä, ‑Ĩ naköö! Ĩ naköö! Ĩ naköö!‑ pö kuu makokoa mosaia totioö!

Paulo a hai ĩ noi töpö

⁷Ĩ na tä kua tä, kamakö na Síkiku a waloikitö nö, sa kuati wi ĩ ta wäsä taso kitä. Síkiku anö Jesus Cristo a thapo naio wi ĩ a. Ĩ sa pi ipaö. Jesus pata tä na ĩ a kalipalo makoka apa naioö. Ĩ a solo samakö kalipalo sinomoö. ⁸Síkiku anö makö pi lotetea totia kopamanöpö, kamakö na ĩ sa simöpa pia kule. Samakö kuati pole, ĩ anö ĩ ta wäsä taso kitä. ⁹Onésimo sa simöpa naio pia kule. Kamakö hai, ĩ ai a. Onésimo anö Cristo a thapo naio wi ĩ a. Ĩ a monimo mai, a noimo soatioö. Ĩ sama pi ipa naioö. Ĩ a, Síkiku a, ĩ na kilii, kamakö na ĩ töpö waloikitö nö, hisa ha samakö kuati pole, ĩ tä pewö a wäsä kitä.

¹⁰Titita wi ĩ a sai ha sa titile, ĩ a sai ha Atisötaku a titia naia kule. Kolososö tili makö na Atisötaku aiki, ‑Makö topa kule?‑ ĩ na a kuu kule. Ĩ na Pahanapé a hai ĩ soli Marcos a kuu naia kule. Kamakö na Marcos sa wäsä waikioma maaki, huki sa wäsä kota kule. ‑Kamakö na Marcos a huu tä, ma totiapalaö!‑ ĩ na sa kuu kota kuleö! ¹¹Josué a, ĩ Jusötu a hilo kua naine, ĩ aiki, ‑Makö topa kule?‑ ĩ na kamakö na ĩ a kuu naia kule. Atisötaku a, Marcos a, Jusötu a, ĩ na töpö kui töpö hai, ĩ juteu töpö. Jesus a thapo wi ĩ töpö pewö. Sanöma makö na Teusö a kaikanamo totiopö, ĩ sama tä walomaki pia salo, ĩ töpö solo samakö kalipaloti kule. Kamisa na ai juteu töpö kalipalo naio maama. Atisötaku a, Marcos a, Jusötu a, ĩ na kilii töpönö sa pasiliapala apa soa sisatioö.

¹²Epapötaasö aiki, ‑Makö topa kule?‑ ĩ na ĩ a kuu naia kule. Kamakö hai, ĩ ai a naiwö. Jesus Cristo a na a kalipalo sinomo wi ĩ a. Teusö a na a hapalo nö, pe epii kamakö a wäsä sinomoö. A hapalo nö, ‑Teusö ai. Kolososö tili töpö pi loteteapalamaö! Ĩ töpö õsi pata totipamanöö! Wa tä thama pi topa apa wi, ĩ töpönö ĩ tä thama totio opa wi, ĩ tä totoköö!‑ ĩ na Teusö a na ĩ na Epapötaasö a kuu sinomoö. ¹³‑Ĩ anö, kamakö, laosiséia tili töpö, ietápolisö tili töpö, ĩ na makö kui makö pewö pasilipo pi topa salo, a kasiapalo opati kule‑ ĩ na kamakö na sa kuu kule. ¹⁴Lucas anö töpö ononopama sinomo wi, ĩ sama pi ipa wi ĩ a, Temasö a, ĩ na töpö kui töpö aiki naiwö, ‑Makö topa kule?‑ ĩ na ĩ töpö kuu naia kule.

¹⁵Laosiséia tili töpönö Jesus a thapo wi ĩ töpö, Nĩpasoma a, Nĩpasoma a sai pö ha Jesus a thapo wi ĩ töpö kokamo sinomo wi ĩ töpö, ĩ na töpö kui töpö na makö hapalo nö, ‑“Makö topa kule?” Paulo a kuu kuleö!‑ ĩ na pö kuu! ¹⁶Hi waheta ma tä möö nö, ma tä kateha waikio noai ha, laosiséia tili töpönö Jesus a thapo wi ĩ töpö kokamo sinomo wi, ĩ töpönö hi waheta tä möö nömöopö, ĩ töpö na ĩ tä simöa tolea nömönöö! Ĩ na tä kua tä, laosiséia tili töpö na waheta sa tä simönö noai, kamakö na ĩ töpönö ĩ tä waheta simöa tolea nömöo piale, ĩ ma tä möö nömöoö!

¹⁷Akipu a na kamakö aiki, ‑“Ĩ na kamisa na ĩ na a kalipalo kua totihoö!” ĩ na Teusö anö wa noa thaa noai, ĩ na a kalipalo kua totihoö!‑ ĩ na makö kuu!

¹⁸Kamisa ami sainö hi sa tä sãöka totio pia kule: ‑Makö topa kule?‑ ĩ na Paulo sa kuu kuleö! Titita wi, ĩ a sai ha sa titile, ĩ tä na pö pi motöo tihöö!

Teusö a na sa hapalo nö, ‑Kolososö tili töpö totiapala totihoö!‑ ĩ na sa kuu kule.