Atos

Atos

Jesus a thapo wi ĩ töpö kuati noai ĩ ta

Jesus a kuati noai, Lucas anö Teópilu a pata na ĩ waheta tä simönö noai, ĩ tä noa ha ĩ a pata na hi waheta tä simöa nömönöma. Hi tä hẽtu hamö Jesus a konasolö noai ha Jesus a thapo wi ĩ töpö kua haitio noai, hi waheta tä na Lucas anö ĩ ta wäsäma.

Jesus a kai a hua sinomoti noai ĩ töpö na Jesus aiki, ‑Kamakö na Teusö a õsi kua tolele, ĩ a ithopasoma, makö õsi lotetea apöpamani kitä. Makö õsi lotetea apöpalo nö, kamakönö sa wäsä kuki kitä. Jetusalẽi tili töpö na sa wäsäö, jutéia tili töpö pewö na sa wäsäö, samatia tili töpö na sa wäsäö, masita tä uli pewö hamö töpö kupai, ĩ töpö pewö na sa wäsäö, ĩ na makö kuapököö!‑ ĩ na Jesus anö ĩ töpö noa thama kutenö, ĩ töpönö Jesus ta topa apöle ĩ ta wäsä hätäpotima. Ta wäsä hätäpoti noai, Lucas anö ĩ ta kateha totioma.

Jesus a thapo wi, Jetusalẽi tä uli ha ĩ töpö kuo noai, ĩ töpö na Pedro a patamo kukö noai, Lucas anö ĩ ta wäsä somama. Ĩ na tä kua tä, juteu töpö pasi mai, pai hamö ĩ töpö kuo selekeo opa pa Paulo anö Jesus ta wäsä hätäpoti noai, ĩ ta wäsä nömöoma. Estêvão a, Filipe a, Pahanapé a, Silas a, Timóteo a, ĩ na töpö kui töpö a wäsä naioma. Teusö a õsi kua tolele, ĩ a kuati noai, ĩ ta wäsä totio opama.

‑Teusö a õsi kua tolele, ĩ anö makö õsi salupali kitäö!‑

¹Teópilu ai. Hi tä hẽtu hamö Jesus a kõo paiolö maa noai ha, Jesus anö ta wäsäti noai, waheta tä na ĩ sa tä pewö sãöka waikipali kipili. Jesus a kuati noai, ĩ sa tä sãöka naio kipili. ²Hi tä hẽtu hamö a koonö pia tä, Jesus anö töpö simöpali pia salo, töpö saipalö noai, ĩ töpö na Jesus a hapaloma. ‑“Ĩ na makö kua haitiopököö!” ĩ na wa kuu!‑ Jesus na ĩ na Teusö a õsi kua tolele, ĩ a kuu ha, ‑Ĩ na makö kua haitiopököö!‑ ĩ na Jesus a kuuma.

³Pi naka. Ĩ na tä kuama. Jesus a nomano nö, a temöa kono nö, ĩ tä mumi pewö hamö Jesus a walo walomoti noai, sami pilipoma, ai a pilipoma hẽtupo kõa, ĩ na pilipoma kökö kui kökö pilipoma hasupamanöma. Töpö simönö noai, ĩ töpö na Jesus a walo walomotima. ‑Jesus a temöa kõa waikiso noaö!‑ ĩ na ĩ töpö pi thama pia salo, a walo walomotima. A walo walomoti nö, Teusö a kaikanamo totio opati wi, Jesus anö ĩ ta wäsätima. ⁴Töpö simönö noai, ĩ töpö na Jesus a kua naia tä, ‑Jetusalẽi tä uli ha pö kua paikiö! “Ĩ sa tä pio kitäö!” ipa hao a kuupili, ĩ tä totoa paia mai ha, tiko hamö pö huu paio tihöö!‑ ĩ na Jesus anö töpö noa thaa nö, ‑Ipa hao a kuupili, kamakö na ĩ sa ta wäsä kipili nökö‑ ĩ na a kuuma. ⁵Ĩ na a kuu nö, ‑João anö töpö mãi õma nö, maa tuunö töpö õsi salutima maaki, tä tetepo opa mai ha, kamakö õsi ha Teusö a õsi kua tolele, ĩ a titiki nö, ĩ a õsinö makö õsi salupali kitäö!‑ ĩ na Jesus a kuuma.

Hi tä hẽtu hamö Jesus a konasolö noai ĩ ta

⁶Ĩ na tä kua tä, töpö kokamo tä, Jesus a na töpö hapalo nö, ‑Kaikana ai. Wi na tä kuto tä, kamisamakö na ai tiko tä kaikanamoti wi, ĩ wa tä mapamanö nö, juteu samakö sai hai ĩ kaikana wa tä thapali pia salo? Hukiki hãtowö?‑ ĩ na töpö kuu ha, ⁷Jesus aiki, ‑Kamakönö ĩ ma tä taö mai kitä. Teusö anö ĩ tä taö sisaö. “Ĩ tökö. Ĩ na tä wakala kuto tökö” kamakö na ĩ na Teusö a kuu mai kitä. ⁸A kuu mai kitä maaki, kamakö na Teusö a õsi kua tolele, ĩ a ithopasoma, makö õsi lotetea apöpamani kitä. Makö õsi lotetea apöpalo nö, kamakönö sa wäsä kuki kitä. Jetusalẽi tili töpö na sa wäsäö, jutéia tili töpö pewö na sa wäsäö, samatia tili töpö na sa wäsäö, tole hamö töpö kulati, ĩ töpö pewö na sa wäsäö, ĩ na makö kuapököö!‑ ĩ na Jesus a kuuma.

⁹Ĩ na a kuu nö, ĩ töpö mamo tetela tä, Teusö anö Jesus a ösöma koonöma. A ösöma koonö tä, ilasi tä pata na a paimöa kõkö lasoma.

¹⁰Jesus a hoköpo tä, hutu mosökö ha töpö nonoa tä, polakapi töpönö haloi ösökö ausi ipii ösökö halolö nö, ĩ töpö waloa haiköma. ¹¹Töpö waloa haiki nö, ‑Kaliléia tili pö! Wi na makö pi kuu salo hutu mosökö pata na makö nonoa kule? Hi tä hẽtu hamö Jesus a ösöa konohe, ĩ a huu kõo kitä. Hi tä hẽtu hamö Jesus a ösö kua koonö noai na, ĩ na a waloa kua kõki kitä‑ ĩ na ĩ töpö kuuma.

Töpö kokamo nö, Teusö a na töpö hapaloti noai ĩ ta

¹²Ĩ na töpö kuu nö, Jetusalẽi tä uli kotö ha, sami kilômetötu tä kule ha, Olipa tä heu pata kule, ĩ ha töpö kuoma, Jetusalẽi tä uli hamö töpö konasolöma. ¹³Töpö kopolö nö, Pedro a, João a, Tiago a, André a, Filipe a, Tomé a, Patolomeu a, Mateus a, Aupeu a hai ĩ pelupö Tiago a, Simão anö homa tili töpö utitipama pi topa apa wi ĩ a, Tiago a hai ĩ pelupö Jutasö a, ĩ na töpö kui, sai a ha ĩ töpö kuta wi, ĩ a sai õsimö hösöka ha töpö kokamonasoma. ¹⁴‑Teusö a na makö hapalotipöö!‑ töpö pewö kuu nö, ĩ ha töpö pewö kokamono nö, Teusö na töpö hapalo sinomotima. Suö töpö, Jesus a hai ĩ pöpönö Maria a, Jesus a hai ĩ poose töpö, ĩ na kilii, Teusö na töpö hapalo sinomo naitioma.

Masiasö a saipalö noai ĩ ta

¹⁵Ĩ na tä kua tä, polakapi tä mumi matalo nö, Jesus a thapo wi ĩ ai 120 töpö kui töpö kokamo tä, Pedro a hapalo pia salo, a öpaiki nö, ĩ na a kuuma: ¹⁶‑Ipa pö! Sutu ha, Davi a na Teusö a õsi kua tolele, ĩ anö ta wäsä noai, Davi anö Teusö tä waheta na ĩ tä sãökökö noai, ĩ pitili ta kuo totioma. Ĩ tä waheta na Jutasö a wani a wäsäma. Jesus a huölöpö, Jesus a kuo taso pamö Jutasö anö wasu töpö kai huu halu taso noai, ĩ a wani a wäsäma. ¹⁷Jutasö a hai, ĩ ai makö kuoma. Jesus a wäsäti noai, ĩ ai a kuo naioma. ¹⁸Jutasö anö wanisala tä thaa noai, ĩ tä noa na sitipa kökö tälö nö, ĩ kökö sitipa totokö nö, kama hai ĩ tä uli tälöma. Ĩ tä uli tälö nö, ĩ tä uli ha a kelo nö, a pösömö huitipalo nö, a isiki päsäpaiki nö, a nomasoma. ¹⁹A nomaso noai, Jetusalẽi tä uli pata hamö töpö pilile, ĩ töpönö ĩ ta hininö nö, ĩ tä uli hilaköma. “Aseutama tä uli na” ĩ na töpö kuuto thali. Kama töpö kai sai ha, “Tä uli iäpöi, ĩ tä uli na” ĩ na töpö kuuto thali‑ ĩ na Pedro a kuuma. ²⁰Ĩ na Pedro a kuu nö, ‑Ĩ na tä kua noai, Ama tä waheta na ĩ ta wäsäma. “Kama sai a taköma, poke a sai kutiopöö!” ĩ na tä waheta kuu. “Ai a patamo wi, ĩ a matasoma kutenö, ai tä patamo nömöopököö!” ĩ na tä waheta kuu naioö‑ ĩ na Pedro a kuuma. ²¹Ĩ na a kuu nö, ‑Önö kutenö, ai tä patamo nömöopö, ma tä saia nömöpalöpököö! Jesus a na a noka totiatalo opa naitiopili, ĩ ma saipalö nöö! “Jesus a pata temöa konasoma thaliö!” ĩ a kuu naiopöö! ²²João anö Jesus a mãi õmani ha, ĩ ha Jesus a na makö noka soaiki nö, ĩ kamakö na töpö nokapalotipili, ĩ ai ma tä sailö nököö! Hi tä hẽtu hamö Teusö anö Jesus a konöma tä, kamakö na ĩ töpö nokapalo soatiopili, ĩ ai ma tä sailö nököö!‑ ĩ na Pedro a kuuma.

²³Ĩ na a kuu ha, polakapi tökö a kateha nö, ‑José Pasapásö a hai, ĩ Jusötu a hilo kua naine, ĩ aiki hãtowö? Masiasö aiki hãtowö?‑ ĩ na ĩ töpö kupaloma. ²⁴Ĩ na töpö kupalo nö, Teusö a na töpö hapalo soatama. ‑Pata! Kawanö sanöma samakö õsi pewö taö öpaö. Önö kutenö, hi polakapi sama tökö a kateha pole, ĩ witi wa saipalöma? ²⁵Jesus anö samakö simöpalili, Jutasö a hai, ĩ ai a kuoma maaki, ĩ a solo makö patamoti wi, Jutasö anö ĩ tä takö nö, kama hai ĩ tä uli na a kõa pasisolöma. Töpö pea sinomoti wi, ĩ hamö a kõa pasisolöma. Önö kutenö ai wa tä saipalö noai, ĩ a patamo nömöopököö!‑ ĩ na Teusö a na töpö hapalo nö, ĩ na töpö kuuma. ²⁶Ĩ na töpö kuu nö, sami a sailöpö, maa makö ose wai na ĩ polakapi töpö wai hilo wi, ĩ tä sãökökö nö, ĩ makö ose wai säsälö nö, maa ma ose hösöka na Masiasö a hilo wi, ĩ tä sãökama pi hösöka asapasoma kutenö, ĩ a saia asalöma. Jesus anö töpö simöa asalö noai, ĩ 11 töpö kui töpö kuoma maaki, Masiasö a saia nömöpali ha, ĩ 12 töpö kua kopasoma.

Teusö a õsi kua tolele, ĩ a ithopaso noai ĩ ta

¹Ĩ na tä kua tä, Pẽtekoosösisö tä wakala kuiki nö, Jesus a thapo wi ĩ töpö pewö kokamoma. ²Töpö kokamo tä, hutu mosökö pata hamö pe epii ipoko ta pata kui na, ĩ na tä kuu kai pata itholasoma. Tä kuu kai pata ithololö nö, ĩ töpö kokamo pole ha, ĩ ha ta pata lisipalo nö, sai a õsi pewö hamö ĩ na ta pata kuuma. ³Ĩ na ta pata kuu nö, koa taka pata hili kua wi na, ĩ na ta pata kui, ta pata selekepalo nö, töpö kokamo pole, ĩ töpö pewö na ta pata kua hätäpoma. ⁴Ta pata kua hätäpo nö, ĩ töpö õsi pewö na Teusö a õsi kua tolele, ĩ a kua totiköma. A kua totiki nö, töpö kai a haö tikopöpasoma.

⁵Ĩ na tä kua tä, tiko töpö uli pö pewö hamö juteu töpö pilio hätähämo paio noai, Jetusalẽi tä uli hamö ĩ ai töpö pilio nömököma. Ĩ töpö Teusömo sinomoma. ⁶Ĩ töpönö ĩ ipoko ta pata hini nö, ĩ hamö töpö satehe epii töpö waloa läköma, Jesus anö töpö sailö noai, ĩ töpö haö tikopö öpö kutenö, ‑Kamisa kai sai na töpö hapalo opa nö kiliawö‑ ĩ na töpö waloa läki wi, ĩ na töpö kuuma. ^7-8Ĩ na ĩ töpö kuu nö, ‑Hi töpö hapalo pole, ĩ kaliléia tili töpö maaki, kamisa kai sai na töpö hapalo opa nö kilile‑ ĩ na töpö kupaloma. ⁹Ĩ na töpö kuu nö, ‑Pásia tä uli, Métia tä uli, Elão tä uli, Mesopotâmia tä uli, Jutéia tä uli, Kapatósia tä uli, Põtu tä uli, Ásia tä uli, ¹⁰Pötísia tä uli, Pãpiilia tä uli, Esitu tä uli, Siteni tä uli kotö na Lípia tä uli kule, ĩ tä uli, Homa tä uli, ĩ na tä uli kui tä uli na makö pilioma. ¹¹Ai makö aiki, juteu makö sai. Ai makö hai, tiko makö kuoma maaki, juteu töpö na makö kokapalo päo kipili. Ai makö hai, ĩ köteeta tili makö. Ai makö hai ĩ atápia tili makö. Hi makö kai satehe epii maaki, kamakö kai sai a thaa nö, hi töpö wäo nö, “Teusö a hai, ĩ pata tä sai kutenö, ĩ na a kua asatioö” ĩ na hi töpö kuu wi, ĩ ma ta hini makokoa totia apa asale‑ ĩ na ĩ juteu töpö kuuma. ¹²Ĩ na töpö kuu nö, töpö kilipalo nö, ‑Wi na taköö!‑ ĩ na töpö kupalotima. ¹³Ai töpö aiki, ‑Tuu wasui tuunö hi töpö polemo päa alu kule‑ ĩ na ai töpö kuu pi wasöa apama.

Pedro a hapalo noai ĩ ta

¹⁴Ĩ na töpö kupaloö ha, Jesus anö töpö simönö noai, ĩ 11 töpö kui töpö na Pedro a öpa naiki nö, lope epii a hapaloma. A hapalo nö, ‑Ipa juteu pö! Jetusalẽi tili pö pewöö! Makö sömöka taiki nö, sa kuu piale, ĩ ta hini totioheö! ¹⁵“Hi töpö polemo päa alu kuleö!” pö pi kuti tihöö! Töpö polemo mane. Motokö hẽtupo paia mai ha, töpö polemo kitä ta o? ¹⁶Teusö a kai a wäsä sinomo noai, ĩ Joeu a hilo noai, sutu ha ĩ a hapalo nö, hi töpö kuati pole, ĩ ta wäsä paioma. Ĩ ta wäsä nö, ĩ na a kuuma:

¹⁷“Pi naka. Ĩ na Teusö a kuu kuleö: ‘Waiha tä mumi pewö mapo pia tä, sanöma töpö pewö na kamisa õsi kua tolele, ĩ sa õsi ithopaki kitä. Sa uni ithopaikö kölö nö, au ulu töpö, au thäwö töpö, ĩ na töpö kui töpönö sa kai a wäsä kuki kitäö! Au hĩsa töpönö uni tä tapa kuki kitä. Au pata töpö wano manimo kuki kitä.

¹⁸Wano töpö, suö töpö, ĩ na kilii sa töpö kalipalama sinomo wi, ĩ töpö na kamisa õsi kua tolele, ĩ sa õsi ithopaköma, ĩ töpönö sa kai a wäsä kuki kitä.

¹⁹Töpö kilima wi, hutu mosökö ha ĩ nasimö sa tä thama kitä. Sanöma töpönö tä thama tai mi ipii, ĩ nasimö sa tä thama asa kitä. Iä iä tä pata, koa taka pata, koa taka wãkisi supe pata, ĩ na tä kua kitä.

²⁰‑Aitaköö! Teusö a huu kõo waikia kule‑ ĩ na töpö kuu paio mai ha, pili motokö sii lupasoö, iä iä tä kui na, ĩ na pilipoma hanaha kupasoö, ĩ na tä kua kitä.

²¹Ĩ na tä kua tä, ‑Teusö ai. Sa pasilipalöö!‑ töpö kuu wi, Teusö anö ĩ töpö täapa läo kõo kitäö!’ ĩ na Teusö a kuu kuleö!”

ĩ na Joeu a kuumaö!‑ ĩ na Pedro a kuuma.

²²Ĩ na a kuu nö, ‑Isöhaeu tili pö! Pö sömöka taikiö! “Teusö anö a simöni wi, ĩ nasaté tili tä Jesus a hai, ĩ a pasiwöö!” ĩ na makö thama pia salo, Teusö anö Jesus a lotetea apöpali kipili. A lotetea apöpalö nö, sanöma töpönö tä thama tai mii ipii, Teusö anö Jesus a na ĩ tä totoa soaki, töpö kilimani wi, ĩ tä totoa soaki, ĩ na Jesus a kua kipili. ²³Ĩ na Jesus a kua kipili maaki, wanisala tä thati wi, ĩ töpö na Jesus ma namo simökö nö, ma säpamanöma. Ma säpama paio mai ha, Teusö a pi hatuku upö waiki kutenö, “Jesus a säpamanöpöö!” ĩ na a pi kuu waikioma. Ĩ na a pi kuu waikioma kutenö, hii ti pakalai ti ha söpala ösönö Jesus ma sutimakö nö, ma säpamanöma. ²⁴Ma säpamani ha, a noma totisoma maaki, Teusö anö a temöa komanöma. Nomaso wi, ĩ tä lotete epö maaki, ĩ tä na Teusö anö Jesus a uni kusöa kopalöma. Jesus a nomawö õkama kuo soatio maa noai kitä. Önö kutenö, Teusö anö Jesus a temöa komanöma. A temöa komanöma kutenö, a hote maama.

²⁵Sutu upa Davi anö Jesus a wäsäma. Ĩ na Davi a kuuma:

“Ipa pata sa tä tapa sinomo opaö. Kamisa kotö ha a kuo sinomo kutenö, ai tä na sa kili mai kitä. ²⁶Önö kutenö, sa õsi pi mönaha apa. Sa hapalo pi mönahapalo opaö. Sa äpäti maaki, sa noma pia tä, sa pi honipo mai kitä. ²⁷Pata täö! Õsi töpö sai pö ha kawanö sa taalö mai kitäö! ‘Ipa a toitai, ipa a hote maapököö! Ipa a toitai, sa kai a hini totiatalo opati wi, ĩ ipa a hote maapököö!’ ĩ na wa kuu kitäö! ²⁸Palimi sa kupasopö, hi wa tiso namo simököma. Kawa na sa kuköma, kawanö sa pi mönahapalama apa kitäö!”

ĩ na Davi a kuumaö!‑ ĩ na Pedro a kuuma.

²⁹Ĩ na Pedro a kuu nö, ‑Ipa pö! Davi a pata kuo noai, ĩ a pata na sa hapalo makokoa pia kule. Davi a nomasoma. A nomasoö ha, a patiliköma. A patilio noai, hi tä uli ha ĩ taka kua soa kule. ³⁰Davi a hai, Teusö a kai a wäsä sinomoti noai, ĩ ai a kuoma kutenö, a pi hatukuo opama. “Davi a kaikanamo kua noai na, ĩ na Davi a hai ĩ ola sa tä kaikanamoma kua nömöo kitäö!” ĩ na Teusö a ku upa noai, Davi anö ĩ ta taö öpama. ³¹Teusö anö tä thama pia noai, Davi anö ĩ tä taö öpa kutenö, Cristo Kaikana tä temöa konaso noai, ĩ ta wäsä totioma. Ta wäsä nö, “Õsi töpö sai pö ha Teusö anö a taalö maama. A hote maama” ĩ na Davi a kuu paioma. ³²Teusö anö Jesus a temöa komanöma thaliö! A temöa komanö noai ha, ĩ samakö pewönö sama tapa nö, ĩ sama wäsä kule. ³³Jesus a temöa komanö nö, Teusö a na a hila kõkölö nö, “Kamisa kotö ha a kutikiö!” ĩ na Teusö a kuu nö, “Kamisa õsi kua tolele, sanöma töpö õsi ha ĩ sa õsi kuki kitäö!” pö̃ Teusö a kuu paioma kutenö, Jesus anö ĩ a õsi tälö nö, ĩ a õsi ithopamanöma. Ma tä tapa pole ĩ tä, ma tä hini pole ĩ tä, Jesus anö ĩ tä thama kule. ³⁴Hi tä hẽtu hamö Jesus a ösölo nö, Teusö a kotö ha a kutio noai na, ĩ na Davi a kuo pasio maama. Ĩ na kama Davi a kuuma:

“Ipa pata tä na ĩ na Teusö pata tä kuuma: ‘Kamisa kotö ha a loikisoö! ³⁵Wa loikiso nö, wa wanipo wi, ĩ töpö na kamisanö wa kaikanapamani kitäö!’ ĩ na Teusö a pata kuuma”

ĩ na Davi a kuuma.

³⁶Pi naka. “Hii ti pakalai ti ha Jesus ma thakö nö, ma säpalö noai, Teusö anö ĩ a kaikanapalöma. Cristo anö makö noama totio wi, ĩ a kaikanapalöma” isöhaeu makö pewö na ĩ na sa kuu totia apa kuleö!‑ ĩ na Pedro a kuuma. ³⁷Ĩ na Pedro a kuu ha, töpö pi honipo opama. Töpö pi honipo opa nö, Pedro a, Jesus anö töpö simönö noai, ĩ töpö, ĩ na kilii töpö na, ‑Ipa pö! Wi na samakö kuapö?‑ ĩ na töpö pi honihi wani kuuma. ³⁸Ĩ na töpö pi honi wani kuu ha, Pedro aiki, ‑Makö pi tapomo sapamo nö, makö wanisala wi, ĩ ma tä hosalö nö, Jesus Cristo a tälöö! Jesus Cristo ma täli salo, makö mãi õmamono nö, makö kuaö! Ĩ na makö kuaö ha, makö wanisala wi, ĩ tä na Teusö a hĩso mapalo nö, kamakö na kama õsi totoki kitäö! ³⁹Kamakö, au ulu töpö, pai hamö töpö pililati, ĩ töpö, ĩ na makö kui, Teusö anö ĩ makö pewö naka piale, ĩ makö pewö na, “Kamakö na sa õsi kuki kitäö!” ĩ na Teusö a kuuma thaliö!‑ ĩ na Pedro a kuuma.

⁴⁰Ĩ na a kuu nö, a hapalo soatio nö, ‑Töpö wanisala apati wi, ĩ töpö uöma ti! Ĩ ma töpö uöma naiköma, ĩ töpö peama kua piale na, ĩ na makö peama thama naio kitäö!‑ ĩ na Pedro anö ĩ töpö noa thama. ⁴¹Töpö noa thaö ha, ai töpönö ĩ ta hini nö, ‑Pitili ta‑ töpö kuu hö̃töo nö, ĩ töpö mãi õmamono nö, ĩ tä wakala ha töpö satehe epii, 3.000 töpö kui töpönö Jesus a täa soatalöma. Jesus a täa soatalö nö, Jesus a thapo wi ĩ töpö na ĩ töpö koka naia soataköma.

Jesus a thapo wi ĩ töpö kuati noai ĩ ta

⁴²Ĩ na tä kua tä, Jesus a tälö noai, ĩ töpönö ta hini sinomotima. Jesus anö töpö simönö noai, ĩ töpönö ta katehati wi, ĩ ta hini sinomotima. Jesus a tälö noai, ĩ töpö noimaso sinomotima. Jesus a nomaso noai, ĩ tä na ĩ töpö pi tapomo pia salo, ĩ töpö kokamo nö, ĩsa ãi kakapa sinomoma. Teusö a na ĩ töpö hapalo sinomotima. ⁴³Jesus anö töpö simönö noai, ĩ töpö lotetea apöpasoma. Ai sanöma töpönö tä thaa tai mi ipii ĩ tä thamatii, töpö kilima wi ĩ nasimö tä thamatii, ĩ na tä kuati ha, ‑Aipa apa nö kiliawö. Kamakö na Teusö a kua totia kuleö!‑ ĩ na töpö pi pewö kutima. ⁴⁴Jesus a thapo wi ĩ töpö kokamoti nö, töpö noimaso sinomoti nö, kama hai ĩ wani tä umapo maama. ⁴⁵Ai töpö na kama hai ĩ wani tä totokö nö, sitipa kökö tälö nö, kama töpö honimoti wi, ĩ töpö na sitipa kökö totota sinomotima.

⁴⁶Ĩ na tä kua tä, ĩ tä wakala pewö hamö Teusömo wi a sai ha ĩ töpö kokamo sinomotima. ‑Samakö kulahamo waikia kuleö!‑ ĩ na töpö pi mönahai, töpö pi kuu nö, kama töpö sai pö hamö ĩsa ãi kaka nö, ĩ töpö ia sinomotima. ⁴⁷‑Aitaköö! Wa toita apöö!‑ ĩ na Teusö na ĩ na ĩ töpö kuu sinomotima. ‑Jesus a thapo wi ĩ töpö toita apö‑ ĩ na ai töpö pewö kuuma. Jesus a thapo soma noai, ĩ töpö na, Jesus a täa nömöanani wi, Teusö anö ĩ töpö kokapamanöma.

Pili a konona ami wanisalati wi, ĩ a toa komanö noai ĩ ta

¹Ĩ na tä kua tä, motokö akäpo tä, Teusö a na töpö hapalo sinomo wi, ĩ tä, Teusömo wi a sai hamö Pedro a, João a, ĩ na kilii töpö hulasolöma. ²Töpö huulö pamö, a konona ami wanisala wi, ĩ a wani söpöpo läolöma. Ĩ a ose wani thapa soata tä, a ami wani wanisala soatama. Teusömo wi ĩ a sai päka na töpö lisito sinomo wi, ĩ töpö na ĩ a waninö sitipa kökö naka läatalotipö, ai töpönö a wani söpölölö nö, Sai a päka toita a hilo wi ĩ a sai päka kasö ha a wani lotama läo sinomotima. ³A wani loa waikitamakö noai ha, Teusömo wi a sai ha ĩ a waninö Pedro a, João a, ĩ na kilii töpö lisipo taa nö, ĩ töpö na sitipa kökö nakama. ⁴Ĩ a wani na ĩ töpö mamo teteiki nö, ‑Kamisamakö na a mamo teteikiö!‑ ĩ na Pedro a kuu ha, ⁵‑Aitaka. Hi töpö na sitipa sa kö tätakö o!‑ a pi wani kuu nö, a mamo tetea totiki ha, ⁶Pedro aiki, ‑Sitipa sa kökö thapo mane. Sa kökö thapo mane maaki, sa tä thapo pasio wi, ĩ sa tä totoki kitä. Nasaté tili tä Jesus a lotete epö salo, “A hutalolöö!” kawa na sa kuu kuleö!‑ ĩ na Pedro a kuuma.

⁷Ĩ na a kuu nö, kate a poko läkälö nö, a wani öpapamanöma, a wasapöna wani tikäa lototoa apa kõköma. ⁸A wasapöna wani tikäa lototoa apa koiki nö, a wani helutalo nö, a öpa kõo soataiki nö, a wani hua soatasolöma. Teusömo wi a sai ha a kai wani lisipo tä, a wani huulö pola nö, a wani helu helumoapalolö nö, ĩ na a wani kuati nö, ‑Aitaka. Aitaka. Teusö a toita apöö!‑ ĩ na a wani kuulöma. ⁹Ĩ na a kuu kai wani huatalo wi, ai töpö pewönö ĩ tä talalö nö, ¹⁰‑Taka toita apii taka kolo ha a wani lopaloti sinomo wi, sitipa kökö na a nako sinomo wi, ĩ a wani‑ ĩ na töpö pi kuu nö, ‑A. A. Ĩ a wani toa totia apa konaso noa‑ ĩ na töpö kililo nö, ĩ na töpö kuuma. ¹¹A wani toa komanö noai, ĩ a waninö, Pedro a, João a, ĩ na kilii töpö huöpo tä, ‑Kilatiha!‑ ĩ na töpö kuu nö, Teusömo wi a sai kule, ĩ a sai atu ha Salomão a hai sai a kua soatale, ĩ ha töpö pewö läläa läköma.

Teusömo wi a sai ha Pedro a hapalo noai ĩ ta

¹²Töpö pewö läläa läiki ha, Pedro aiki, ĩ töpö na a hapalo nö, ‑Isöhaeu tili pö! Wi na tä kuaö ha makö halili läläapalo opa kule? Wi na makö pi kuu salo, kamisamakö na makö mamo tetea kule? “Pedro a, João a, ĩ na kilii töpö Teusömo lotete epö kutenö, ĩ a wani huatalama kõa kule” ĩ na makö pi kuu hãtoö? Ĩ na pö pi kupalo ti! ¹³Kamakö pewö hai ĩ pata töpö kuo noai, Abraão a, Isaki a, Jacó a, ĩ töpönö Teusö a thapo noai, ĩ Teusö anö Jesus a temöa komanöma. Teusö anö Jesus a simöa sinomo wi, ĩ a temöa komanö nö, a naka konö nö, kama kotö ha a thaa konöma. Kamakönö ĩ Jesus ma säpamani pia salo, pata töpö na Jesus ma namo simöa päköma. Jesus ma namo simököma, Pilatosö a pata aiki, “Jesus sa noama läopököö!” ĩ na Pilatosö a pata kuuma maaki, “Naiö! Jesus a noama läo tihöö! A hulapa kõo tihöö! A säpalöö!” ĩ na makö wani ku upa kipili. ¹⁴Wanisala tä thaa maa noai, ĩ a toita apii, ĩ ma namo simökö nö, Pilatosö a pata na, “A hulapa kõo tihöö!” ĩ na makö kuu nö, sanöma töpö sä noai, ĩ ma wani noama pi topa nö, “Ĩ a wani hula pasia kopalöö!” ĩ na makö wani kuu silia apa kipiliö! ¹⁵Töpö temöma sinomo wi, kamakönö ĩ ma säpamani kipili. A säpamani kipili maaki, Teusö anö a temöa komanöma thaliö! ¹⁶A temöa komanö noai, Jesus a hilo wi, ĩ a na samakö mamo teteiki nö, “Jesus a lotete epö” ĩ na samakö õsi kuu salo, Jesus anö hi a ami wani topa kõköma. Hi ma wani taö waikio wi, ĩ ma wani tapa pole, Jesus anö ĩ a wani lotetea apa kopamanöma. “Teusö a lotete epö” Jesus anö ĩ na samakö pi thama salo, hi a ami wani topa kõa kule‑ ĩ na Pedro a kuuma.

¹⁷Ĩ na a kuu nö, ‑Ipa pö! Makö pi motio opa noa thali. Kamakö hai ĩ pata töpö solo makö pi moti ipö salo, Jesus ma säpamanöma. ¹⁸Makö pi motio opama maaki, Teusö aiki, “Cristo a pea kitä” ĩ na sutu ha ĩ na Teusö a kuu noai, Teusö a kai a wäsä sinomo wi, ĩ töpö pewönö ta wäsä nömöo noai, ĩ pitili tä sai a kuoma thali. “Cristo a pea kitä” töpö kuu noai, ĩ pitili ta kuo totioma thaliö! ¹⁹Ĩ na tä kuaö ha, makö wanisala wi, ĩ ma tä hosalö nö, Teusö a na pö sapa kopaloö! Teusö a na makö sapa kopasoma, makö wanisala wi, Teusö anö ĩ tä hosa totia koni kitäö! ²⁰Tä hosa totia konö nö, makö õsi lotetea totia kopalö nö, “Ĩ töpö na a kaikanamoö!” Jesus a na Teusö a kuu paio noai, kamakö na ĩ Jesus a kaikanamo totio wi, kamakö na Teusö anö ĩ a simöpali kitäö! ²¹Teusö anö tä uli pewö topa kõo paio mi tä, hi tä hẽtu hamö Jesus Cristo a kua paia kulali. “Hisimö a kutio paiopököö!” ĩ na Jesus a na ĩ na Teusö a kuuma. Hi tä uli pewö totipa kõo paio mi tä, hi tä uli na Jesus Cristo a walo kõo paio mai kitä. Hi tä hẽtu hamö a kuo pasi paitio laso kitä. Teusö anö tä uli pewö totipa kõo piale, sutu ha Teusö anö ĩ ta wäsäma. Teusö a kai wäsä sinomo noai, sutu ha ĩ töpönö ĩ ta hininö nö, ta wäsä toleama. ²²Moisés anö ĩ ta wäsäma:

“Kamakö hai ĩ Teusö pata tänö sa simöa thapalö noai na, ĩ na kamakö hai ĩ ai tä simöa thaa nömöa kopali kitäö! Teusö a kai wäsä sinomo wi, kamakö hai ĩ ai tä simöa nömöa kopali kitäö! Ĩ anö ta wäsä wi, ĩ ma tä pewö a hinia totilöpököö! ²³Ai tänö ĩ a hini mi ha, Teusö anö ĩ a peama kitä. Teusö a thapo wi ĩ töpö na a kuo naitio mai, tiko hamö a kuo pasio soatio kitäö!”

ĩ na Moisés anö töpö noa thama.

²⁴Sutu ha Samueu a, Samueu a noa ha ai töpönö Teusö a kai a wäsä sinomo tolea noai ĩ töpö, ĩ na töpö kui, huki tä kua wi, ĩ töpönö ĩ ta wäsä paioma. ²⁵Ĩ Teusö ta wäsäti noai, kamakö na ĩ ta wäsä totio hö̃töoö. Teusö aiki, “Kamakönö sa kai a hinini ha, makö pasilia hö̃töpali kitäö!” ĩ na kamakö hai ĩ kolo töpö na Teusö a kuu noai, kamakö na ĩ na Teusö a kuu totio hö̃töoö. “Masita tä uli pewö hamö töpö pilipai, au tolewö töpönö ĩ töpö pewö totipamani kitäö!” ĩ na Abraão a na ĩ na Teusö a kuuma. ²⁶Önö kutenö, Teusö anö Jesus a saipalö nö, “Kamisanö wa simöa sinomo wi, ĩ wa” Teusö a pi kuu nö, Jesus a temöa komanö nö, kamakö na Jesus a simöa somama. Makö totipamani pia salo, makö pasilipalö nö, wanisala ma tä thatala apati wi, Teusö anö ĩ tä mamaköma‑ ĩ na Pedro a kuu totiatalo opama.

Pata töpö na Pedro a, João a, ĩ na kilii töpö hapalo noai ĩ ta

¹Ĩ töpö na Pedro a, João a, ĩ na kilii töpö hapalo soa tä, Teusö a täpä sinomo wi ĩ ai töpö, Teusömo wi a sai na töpö mamo läo sinomo wi, ĩ töpö kalipalama sinomo wi ĩ a pata, satuseu töpö, ĩ na töpö kui töpö waloköma. ²Töpö waloiki nö, Pedro a, João a, ĩ na kilii töpö aiki, ‑Jesus a nomasoma maaki, a temöa konasoma kutenö, sanöma töpö pewö nomaso noai, ĩ töpö pewö temöa naia konaso kitä‑ ĩ na ĩ töpö kuti ha, töpö walokö noai, ĩ töpö hĩso opama. ‑“Töpö temö kõo mai kitä ta” kökö pi wani kuu sö ö̃‑ töpö pi kuu nö, töpö hĩso opama. ³Töpö hĩso opa salo, Pedro a, João a, ĩ na kilii töpö huölöma. Tä wisa apö waikiwö ha, ‑Hena tä, hi töpö na makö hapalopököö!‑ töpö pi kuu salo, sai a päka lototoa apöle, ĩ a sai ha töpö titia paiköma. ⁴Töpö titiköma maaki, Teusö ta wäsä noai, ĩ ta hini nö, ‑Awai. Pitili ta‑ ĩ na ai töpö satehe epii töpö kuu asama. Ĩ na tä kua tä, Jesus a thapo noai, ĩ wano töpö sateo opama. 5.000 wano töpö kui töpö wano kuoma.

⁵Ĩ na tä kua tä, ĩ hena tä, juteu töpö na töpö kaikanamo wi ĩ töpö, juteu pata töpö, Moisés a kai taöma wi ĩ töpö, ĩ na töpö kui, Jetusalẽi tä uli pata ha ĩ töpö kokamoma. ⁶Teusö a täpä totio wi, ĩ pata tä Anásö a, Kaipasö a, João a, Alesiãtöti a, Anásö a pata hai ĩ ai töpö, ĩ na töpö kui töpö na töpö kokamoma. ⁷Ĩ töpö kokamo pole, ĩ töpönö, Pedro a, João a, ĩ na kilii töpö nakalö nö, kama töpö kokamo pole ha, ĩ tä mötali ha töpö öpamakö nö, ‑Wi na a ami kua kõoma? Ka pi tänö a ami wani topa kõköma? Wi na a hilo kua wi ma nakalö nö, ma ami wani topa komaköma?‑ ĩ na pata töpö kuu ha, ⁸Pedro a õsi na Teusö a õsi kua tolele, ĩ a kua totiki ha, Pedro a hapalo soata nö, ‑Kaikana pö! Pata pö! ⁹A ami wanisala apa noai, ĩ sama wani pasilipalöma kutenö, kamakönö samakö nakalö nö, samakö hini pi topa kule? “Wi na ma tä thamaö ha, ĩ a ami wani topa kõköma?” ĩ na makö kuu ha, ¹⁰kamakö, isöhaeu töpö pewö, ĩ na makö kui makö na ĩ na sa kuu kule: “Nasaté tä uli ha a pilio noai, ĩ Jesus Cristo a hilo wi, ĩ anö hi a wani toa komanipili, kamakö kotö ha temö öpii, kamakö na ĩ a wani öpapalo naia kule. Hii ti pakalai ti ha Jesus Cristo ma säpalipili, Teusö anö ĩ a temöa komanö noai, ĩ anö hi a wani toa komani kipili. ¹¹Ĩ na Teusö tä waheta kuu:

‘Kamakönö maa ma ma sai thaa sinomo wi, ĩ makönö maa ma ma hosalö noai, ĩ ma toita apö asai, ĩ ma kupasoma’

ĩ na tä kuu. Ĩ ma ma hosalö noai, ĩ Jesus a. Ĩ a toita apö asai. ¹²Ai tiko tänö makö täapa kõo mai kitä. Ĩ tä uli pewö hamö töpö pilipai, ĩ ai tänö makö täapa kõo mai kitä. Jesus a hilo wi, ĩ anö makö täapa kõo läo sisa wi, ĩ a” ĩ na sa kuu kuleö!‑ ĩ na Pedro a kuuma.

¹³Ĩ na Pedro a kuu ha, pata töpö aiki, ‑Kilia apawöö! Hi Pedro a, João a, ĩ na töpö kui, pata töpö mai kitä maaki, ĩ töpö na, “Ĩ naköö! Ĩ naköö!” ĩ na pata töpö kuu maa noai maaki, hi töpö kili mai, töpö hapalo opatiwö. Jesus a na töpö nokapalo noai, hi ĩ töpö pasiwö‑ ĩ na pata töpö kuuma. ¹⁴Ĩ na pata töpö kuuma maaki, a wani toa komanö noai, Pedro a, João a, ĩ na kilii töpö kotö ha ĩ a wani öpale, pata töpönö ĩ a wani öpa talalöhe nö, ĩ töpö hapalo pi wasöha maama. ¹⁵Pata töpö hapalo pi wasöa maa noai maaki, ‑Atu hamö pö wani öpa paitaikötöö!‑ ĩ na pata töpö kuu nö, kama töpö hapalo hẽtupaso nö, ¹⁶‑Ki töpö na ĩ ka pi ma tä thamapö? Jetusalẽi tili töpö pewö aiki, “Kilia apawöö! Pedro a, João a, ĩ na kilii töpönö ki a wani toa komanöma thaliö!” ĩ na töpö pewö ku upaö. “Pitili ta” ĩ na makö pi kuu hö̃töoö. ¹⁷Ĩ na tä kua kutenö, ki töpönö Jesus ta wäsä wi, ai töpö pewö na ĩ ta palaso matimö. Önö kutenö, “Jesus a hilo wi, ĩ a wäsäti maikiö!” ĩ na makö kuupököö!‑ ĩ na pata töpö kuuma.

¹⁸Ĩ na pata töpö kuu nö, Pedro a, João a, ĩ na töpö kui töpö nakalö nö, ‑Jesus a hilo wi, ĩ a wäsä kota maikiö! A kateha kota ti!‑ ĩ na pata töpönö töpö noa thama. ¹⁹Töpö noa thama maaki, ‑“Ta wäsä kota ti!” kamakö kuu kule maaki, “Ta wäsäö!” ĩ na Teusö a kuu pasioö. Witi pili sama hini pasiopökö? Wi na makö pi kuu kule? “Ta wäsäö!” Teusö a kuu päla tä maaki, samakö kai humo sinomo pasitio wi ĩ samakö pasi ta o. ²⁰Sama tä talalipili, sama ta hininipili, ĩ na samakö kua wi, ĩ sama tä pewö a wäsä satimo opa hö̃töo kitä‑ ĩ na Pedro a, João a, ĩ na kilii töpö kuuma.

^21-22A ami wani wanisala sinomoti noai, ĩ tä, ĩ na inama tä hasua kua waikipasoma. Satehe epii, 40 tä inama kui tä inama kua waikipasoma kutenö, ‑Aitaköö! Teusö anö ĩ a wani toa komanöma thaliö!‑ ĩ na ai töpö pewö kupalo opama. Ĩ na töpö kupalo opaö ha, pata töpö lö kui, ĩ töpönö Pedro a, João a, ĩ na kilii töpö peama maama. ‑Ĩ ka pi tä noa na, ma töpö peamapö?‑ ĩ na pata töpö kuu nö, ‑Pö hua kononöö! Ta wäsä kota ti! Ma ta wäsä kotaö ha, makö wani peama totio kitä‑ ĩ na pata töpö kuu nö, töpö hula kopalöma.

Teusö a na töpö hapalo noai ĩ ta

²³Pedro a, João a, ĩ na töpö kui töpö hula kopali ha, kama hai ĩ töpö na töpö ekuiki nö, ‑Ki Teusö a täpä sinomo wi ĩ töpö, pata töpö, ĩ na töpö kui, ĩ na ĩ töpö kuu kipii‑ ĩ na töpö kuu ha, ²⁴kama hai ĩ töpönö ĩ ta hininö nö, Teusö a na töpö pewö hapalo soatama. Töpö pewö hapalo soata nö, ‑Teusö Kaikana ai! Kawanö hutu mosökö pata, masita tä uli pata, mötati tuu pata, ĩ na kawanö ĩ wa tä pewö thaa thapalöma. Kawanö ĩ tä uli pewö hamö salo pö hupalo wi, kawanö ĩ salo wa pö pewö thama. Mötati tuu pata hamö salaka pö hupalo wi, kawanö ĩ wa pö pewö thama. ²⁵Kawanö, kawa õsi kua tolele ĩ wa õsi simöpalo nö, wa kalipalamati noai, ĩ kamakö hai ĩ kolo Davi a na wa kuu noai, Davi anö ĩ ta wäsä nömöiki nö, “Wi na tä kuaö ha tiko töpö hĩso opama? Wi na tä kuaö ha ĩ töpö pi tapotia tä, töpö pi motöa apatii? ²⁶Ai tiko töpö na töpö kaikanamo wi ĩ töpö, ai pata töpö, ĩ na töpö kui töpönö Teusö a wanipo nö, Teusö anö a kaikanapali wi, ĩ a peama pia salo, töpö kokamoö” ĩ na Davi a kuuma‑ ĩ na Teusö a na ĩ na töpö kuuma.

²⁷Ĩ na töpö kuu nö, ‑Sutu ha a kuu noai, ĩ na tä kua totio opama. Hi tä uli pata ha, Etoosisö a pata, Põsiu Pilatosö, isöhaeu töpö, ai tiko töpö, ĩ na töpö kui töpönö Jesus a wanipo opama. Au ulu Jesus anö wanisala tä thaa tai mi ipii, ĩ wa kaikanapali wi, ĩ a peama pia salo, töpö kokamo kipiliö! ²⁸“Ĩ na ĩ töpönö tä thama kuki kitä” ĩ na sutu ha ĩ na wa pi kuu waikioma kutenö, ĩ töpönö ĩ tä thama pia salo, töpö kokamo kipiliö!‑ ĩ na ĩ töpö kuuma.

²⁹Ĩ na töpö kuu nö, ‑Teusö a Kaikana ai! “Ĩ Teusö ma ta wäsä kotaö ha, makö peama totio kitäö!” ĩ na pata töpö kuu wi, ĩ wa ta hiniö! Kawanö samakö kalipalamati wi, ĩ samakö. Önö kutenö, kamisamakönö wa kai a wäsä kili wi, ĩ tä matamanöö! ³⁰Ĩ wa tä matamanö nö, töpö salia wi, ĩ töpö toa komanöö! Wa lotete epii, ĩ tä mömaö! “Pitili ta” ĩ na wa töpö pi thama nö, “A kilia apawöö!” töpö thamaö! Jesus a toita apö asai, ĩ wa simöa sinomo wi ĩ a lotete epii ĩ tänö sama tä aipöama sinomo kuköpököö!‑ ĩ na Teusö a na ĩ na töpö kuuma.

³¹Ĩ na töpö kuuma, töpö kokamo sinomo wi ĩ a sai pata tepuku tepukumo opa nö, Teusö a õsi kua tolele, ĩ anö ĩ töpö õsi pewö lotetea apöpamani ha, ĩ töpönö Teusö ta wäsä kili mai, Teusö ta wäsä kuköma.

Töpö ö̃töo opa noai ĩ ta

³²Ĩ na tä kua tä, Teusö a thapo wi ĩ töpö wanihaso mai, töpö noimaso sinomotima. ‑Wani sa tä thapo wi, ĩ ipa sa tä umapo opa pasiowöö!‑ ĩ na ai tä kuu maama. ‑Wani sa tä thapo wi, ĩ kamakö pewö hai, ĩ tä‑ ĩ na töpö noa thapaso totitioma. ³³Jesus anö töpö simönö noai, Teusö anö ĩ töpö kai lotetea apöpamanöma. Ĩ töpö kai lotetea apöpamani ha, ‑Jesus a Kaikana temöa konasoma thaliö!‑ ĩ na ĩ töpö ku upati nö, ai töpö pi hatukua totipamanöma. Teusö a thapo wi, Teusö anö ĩ töpö pewö totiapala apatima. ³⁴Ai tä honimo pasio maama. Kama töpönö kama sai a totokö nö, sitipa kökö täli, kama tä uli totokö nö, sitipa kölö täli, ĩ na töpö kua nö, ³⁵Jesus anö töpö simönö noai, ĩ töpö na sitipa kökö totoki ha, töpö honimo wi, ĩ töpö na ĩ sitipa kökö totopa toleatima.

³⁶Ĩ na tä kua tä, Sipöti tä uli ha a pilio soma noai, ĩ lepii tili tä hai, José a hilo kuo somama. Jesus anö töpö simönö noai, ĩ töpönö Pahanapé, ĩ na a wani a hila thaa nömököma. Pahanapé a hai, töpö pi topamapo sinomo wi, ĩ a hilo. ³⁷Ĩ a waninö kama hai ĩ tä uli totokö noai, ĩ tä noa na sitipa kökö tälö nö, Jesus anö töpö simönö noai, ĩ töpö na ĩ kökö sitipa totoköma.

Ananiasö a, pusopö Sapiita a, ĩ na kilii töpö holisimo noai ĩ ta

¹Ĩ na tä kua tä, Ananiasö a, pusopö Sapiita a, ĩ na kilii töpönö kama hai ĩ tä uli noa na sitipa kökö tälö nö, ²pusopö a pi motöla tä kuno mai, Ananiasö anö ĩ sitipa kökö ose thalö nö, Jesus anö töpö simönö noai, ĩ töpö na ai sitipa kökö ose totoki, ĩ na Ananiasö anö ĩ na tä thaköma. ³Ĩ na tä thaki ha, Pedro aiki, ‑Ananiasö ai! Wi na wa pi kuu salo, Sai wa ta pata hininöma? “Häö! Naiö!” Sai tä sai pata na ĩ na wa kuu maa noa. Kawa na Sai tä sai pata kua totiköma salo, Teusö a õsi kua tolele, ĩ a na wa holisi hapalo ke. Sitipa wa kökö ose thapo hãtoa soakö? ⁴Ĩ wa tä uli totoa paio mai ha, au tä uli sai kuoma. Wa tä uli totokö noai ĩ tä uli noa na sitipa wa kökö tälö noai, ĩ au kökö sitipa pasiwö. Wi na wa pi kuu salo, wa holisi wäo ke? Sanöma töpö na wa holisi wäo mae. Teusö na wa holisi wäo pasio ke‑ ĩ na Pedro a kuuma. ⁵Ĩ na Pedro a kuu wi, Ananiasö anö ĩ ta hininö nö, a noma kea soasoma. A noma kea soalo nö, a noma totia soasoma. Ananiasö a nomaso wi, ĩ ta hininö nö, töpö pewö pi honipo opama.

⁶Ananiasö a nomasoö ha, hĩsa töpö ekuiki nö, a nomawö sohokö nö, a nomawö maonönö nö, a nomawö wani patiliköma.

⁷A wani patiliköma, tä tetepo mai ha, ĩ tä wakala ha soatawö, pusopö a pi moti wani waloa läiki ha, ⁸‑A. Kamakö hai ĩ tä uli noa na, ĩ na sitipa kökö kui, ma kökö tälöma?‑ ĩ na Pedro a kuu ha, ‑Awai. Ĩ na sitipa kökö kui, sitipa sama kö täli kipili‑ ĩ na suö a holisi kuuma. ⁹Ĩ na suö a holisi kuu ha, ‑“Teusö a õsi kua tolele, ĩ ma wapa nököö!” wi na makö pi kuu salo, ĩ na makö wani kuuma? Au heano a patilikö noai, hi a sai päka ha ĩ töpö öpatia kule. Ĩ töpönö wa maoa naionö pia kule‑ ĩ na Pedro a kuu ha, ¹⁰ĩ suö a nomawö kea soatasoma. A nomawö kea soatasoö ha, hĩsa töpö ekuiki nö, a nasi wani tuki ha, peanopö a kotö ha a wani patilia naiköma. Ĩ na tä kuama. ¹¹Ĩ na tä kuaö ha, Teusö a thapo wi ĩ töpö, ai töpönö ĩ ta hini wi ĩ töpö, ĩ na töpö kui, Teusö a na ĩ töpö kilia apösoma.

Töpö satehe epii töpö toa komanö noai ĩ ta

¹²Ĩ na tä kua tä, ‑Pitili ta‑ ĩ na ai töpö thama pia salo, Teusö anö tä thaa asa wi, Jesus anö töpö simönö noai, ĩ töpönö ĩ nasimö tä thatima. Teusömo wi a sai ha Salomão a sai pö sätäle, ĩ ha ĩ töpö pewö kokamotima. ¹³Jesus a thapo wi ĩ töpö na ai töpö kokamo kili ipatima maaki, ‑Jesus a thapo wi ĩ töpö toita apö‑ ĩ na töpö kuuma. ¹⁴Ai wano töpö satehe epii, ai suö töpö satehe epii, ĩ na ai töpö satehe kui töpönö Jesus a tälöma kutenö, Teusö a thapo wi ĩ töpö satea apököma. ¹⁵Jesus anö töpö simönö noai, ĩ töpönö ai töpö toapama kotioma kutenö, ‑Pedro a hasuo tä, a salia wi, ĩ a na Pedro a nonosi hasua hãtopaso kitä‑ ĩ na töpö pi kuu salo, piliso pata hamö töpö salia apa wi, ĩ töpö silölö nö, mia kai maketa wi ĩ tiki na ai töpö makeki, ĩ na tä kua tä, kui ösö kui na, ĩ na ösö kui ösö tiäpalöma tä na ai töpö salia wi ĩ ai töpö paki, ĩ na töpö kuatima. ¹⁶Jetusalẽi tä uli kotö pata ha ai sai pö hö̃kökö öpii sai pö kulali ha töpö kuo noai, ĩ töpönö, salia wi ĩ töpö, ai töpö na sai töpö sapäko sinomo wi ĩ töpö, ĩ na töpö kui töpö kai waloköma, salia wi ĩ töpö pewö toapama kotioma.

Jesus anö töpö simönö noai, ai töpönö ĩ töpö peamati noai ĩ ta

¹⁷Ĩ na tä kua tä, Teusö a täpä totio wi ĩ pata tä, kama na ai töpö kuati noai, ĩ satuseu töpö, ĩ na töpö kui töpö aiki, ‑Hö. Jesus anö töpö simönö noai, ĩ töpö na ai töpö pewö nokapalo silia apa asa sai taköö!‑ ĩ na töpö kuu nö, töpö ekuiki nö, ¹⁸Jesus anö töpö simönö noai, ĩ töpö läkäa konö nö, wanisala tä thaa wi ĩ töpö titita sinomo wi, ĩ a sai lototo opa wi, ĩ a sai ha ĩ töpö titiköma. ¹⁹Töpö titiköma maaki, mumai ha, Teusö anö kama hai ĩ ãju tä simöpalö nö, ĩ anö sai a päka pata hãkopalö nö, töpö lisia kopamanöma. Töpö lisia kopamanö nö, ²⁰‑Pö hua kononöö! Teusömo wi a sai ha töpö kule, ĩ töpö na makö hapalo nö, Jesus anö sanöma töpö temöa komani wi, ĩ ma tä pewö a wäsäö!‑ ĩ na ĩ ãju tä kuu ha, ²¹‑Ö̃kö. Awai‑ töpö kuu hö̃töo nö, hena tä sai tä, Teusömo wi a sai ha töpö ekuiki nö, Teusö ta wäsä soatama.

Ki hamö, Teusö a täpä totio wi ĩ pata tä, kama hai ĩ noi töpö, ĩ na kilii töpö ekuiki nö, juteu pata töpö pewö kokapamanö nö, Teusömo wi a sai na töpö mamo läapalo sinomo wi, ĩ ai töpö simönö nö, ‑Sai a lototo opa wi, ĩ a sai ha makö hulolö nö, Pedro a, João a, ĩ na kilii töpö nakalötöö!‑ ĩ na pata töpö kuu ha, töpö hua soatasolöma. ²²Töpö hua soatasolöma maaki, sai a lotototio wi, ĩ ha töpö waloikitö nö, Pedro a, João a, ĩ na kilii töpö titia tapa taso maama. Töpö titia tapa mi salo, pata töpö na töpö hua kononö nö, ²³‑Sai a lototoa apa waikia kule maaki, sotatu töpö läapalo sinomoti wi, ĩ a sai päka ha ĩ töpö öpatio ke maaki, sai sama päka hãkopali ke maaki, ai sama töpö tapa taso maa ke. Sai a õsi poke thai‑ ĩ na ĩ töpö kuuma. ²⁴Ĩ na töpö kuu nö, Teusömo wi a sai ha pata tänö töpö mamo läapalama sinomoti wi ĩ a pata, Teusö a täpä sinomo wi ĩ töpö, ĩ na kilii töpönö ĩ ta hininö nö, ‑Wi na taköö! Witi ha töpö kua hãtoa kõa kuno mai?‑ ĩ na töpö kuu tä, ²⁵‑Titita wi ĩ a sai na ma töpö titikö noai, Teusömo wi a sai na ĩ töpö kua kulaiö! Sai a lototo opa wi a sai ha ma töpö titikö noai, ĩ töpönö ai töpö na Teusö ta wäsäti kulaiö!‑ ĩ na ai tä waloiki nö, ĩ na a kuuma.

²⁶Ĩ na a kuu ha, Teusömo wi a sai ha töpö mamo läapalama sinomo wi ĩ pata tä, töpö mamo läapaloti wi ĩ töpö, ĩ na töpö kui töpö hulolö nö, höla mai ha, Jesus anö töpö simönö noai, ĩ töpö konönöma. ‑Makö höla mai, ma töpö sä mai, ma töpö konönöpöö! Makö hölaö ha, ai töpönö maa mapönö makö säsä nö, maa mapönö makö säpalö matimöö!‑ ĩ na töpö pi kuu nö, höla mai ha, töpö konönöma. ²⁷Töpö konönö nö, pata töpö na töpö kai waloköma. Töpö kai waloiki nö, Teusö a täpä totio wi ĩ pata tä hapalo nö, ²⁸‑“Jesus ta wäsä kota ti!” ĩ na kamisamakönö makö noa thaa kipili maaki, Jetusalẽi tä uli pewö pata hamö ma ta wäsä satimo opatiwö. Ma ta wäsä nö, kamisamakö a kateha apati saiö! “Kamakö hai ĩ pata töpönö Jesus a säpamanöma” ĩ na makö wani kuu hiopöa apati saiö!‑ ĩ na a pata kuuma.

²⁹Ĩ na a pata kuu ha, Pedro a, Jesus anö töpö simönö noai ĩ töpö, ĩ na kilii töpö hapaloma. Töpö hapalo nö, ‑Teusö sama hini sisapökö. Sanöma sama töpö a hini mai kitä‑ ĩ na töpö kuuma. ³⁰Ĩ na töpö kuu nö, ‑Hii ti pakalai ti ha Jesus ma thakö nö, ma säpamanipili, Teusö anö ĩ a temöa komanöma. Kamakö hai ĩ kolo töpönö Teusö a thapo noai, ĩ Teusö anö Jesus a temöa komanöma. ³¹A temöa komanö nö, “Kamisa na a kuikiö! Wa kuiki nö, wa kaikanamopököö! Wa töpö täapa kõo läo sinomoö!” ĩ na Jesus a na ĩ na Teusö a kuuma. Ĩ na a kuu nö, “Ĩ na wa kuaö ha, isöhaeu tili töpö aiki, ‘Wanisala sa tä thati wi, ĩ sa tä pii mi’ ĩ na töpö kuu ha, wanisala tä thati wi, ĩ tä na sa hĩso mataso kitäö!” ĩ na Teusö a pi kuu nö, “Wa kaikanamopököö! Wa töpö täapa kõo läo sinomoö!” ĩ na Jesus a na ĩ na Teusö a kuumaö!‑ ĩ na töpö kuuma. ³²Ĩ na töpö kuu nö, ‑Kamisamakö mamo tetela tä, Teusö anö tä thamapili, ĩ sama ta wäsäti kule. Teusö a hini totio wi, ĩ töpö na Teusö a õsi kua tolele, ĩ a totoakö noai, ĩ a õsinö ĩ ta wäsä naitiotii‑ ĩ na Jesus anö töpö simönö noai, ĩ na ĩ töpö kuuma.

³³Ĩ na ĩ töpö kuu ha, pata töpö hĩsua apölo nö, ‑Hi ma töpö säpamanöpöö!‑ ĩ na pata töpö kuuma. ³⁴Ĩ na pata töpö kuuma maaki, patiseu tä Kamalieu a pata hapalo läoma. Kamalieu anö Moisés a kai taöma sinomotima. ‑Kamalieu a pata totiatalo opawö‑ ĩ na isöhaeu töpö pewö kuu sinomoma. ‑Hi töpönö Jesus a wäsä wi, ĩ ma töpö säpamanöpöö!‑ ĩ na juteu pata töpö kuu ha, Kamalieu a pata öpa läiki nö, a hapalo läo nö, ‑Jesus a wäsä wi ĩ töpö atua paipamanöö!‑ a kuu ha, ³⁵töpö atupamanöma tä, Kamalieu a hapalo kõo nö, ‑Isöhaeu pö! Pö pi hatukuikiö! Ĩ Jesus a wäsä wi ĩ töpö thama soata maikiö! ³⁶Sutu ha, Teutasö a hai, “Pata sa” a kuu ha, ĩ a na töpö satehe epii, 400 töpö kui töpö nokapalotima. Ĩ na tä kua tä, ai tiko töpönö Teutasö a säpalöma ha, töpö nokapaloti noai, ĩ töpö selekepasoma. Önö kutenö, Teutasö anö töpö nokapalama apati noai, ĩ tä matasoma. ³⁷Ĩ na tä kua tä, “Wi na kilii juteu töpö kua totia kule?” pata töpö kuu ha, ĩ juteu makö hilo wi ĩ tä pewö sãökökö noai, ĩ tä, kaliléia tili tä Jutasö anö ai töpö lulupoma. Ĩ ha, ai töpönö Jutasö a säpalöma ha, kama hai ĩ töpö selekea hö̃töpasoma. ³⁸Önö kutenö, huki ĩ na sa kuu kule: “Jesus a thapo wi ĩ töpö thama tihöö! Teusö anö hi töpö simöa hãtopalömaö! Kama töpö pi kuu saimo hãtoa päa mane kitä. Ĩ kama töpö pi kuu saimo päo nö, töpö kuu hãtoa tä, ĩ ha kama töpö a hino maa kõa soa pätaki. Ĩ na tä kua tä, Teusö anö hi töpö simöa totia tä, hi töpönö Jesus ta wäsä polai, ĩ ma tä mapama totio wi tä kua mai kitä. ³⁹Teusö anö hi töpö simöa wi ĩ töpö hãtowö maaki, kamakönö ma töpö wasu pole, ĩ kamakönö Teusö ma wanipo alu kule” ĩ na sa kuu kule‑ ĩ na Kamalieu a pata kuu totiataloma.

⁴⁰Ĩ na Kamalieu a pata kuu ha, ‑Hai. Awai‑ ĩ na juteu pata töpö kuu hö̃töoma. Ĩ na töpö kuu nö, Jesus anö töpö simönö noai, juteu pata töpönö ĩ töpö naka konö nö, ĩ töpö soapamanö nö, ‑Jesus a wäsä kota tihöö!‑ ĩ na töpö kuu hö̃töo nö, töpö hula kopalöma. Töpö hula kopalö nö, ‑Pei. Pö kononöö!‑ ĩ na töpö kuuma. ⁴¹Ĩ na töpö kuu ha, Jesus anö töpö simönö noai, ĩ töpö aiki, ‑Teusö ma thapo totia salo, Jesus ma wäsä sinomo kutenö, ai töpönö makö peamati päa kule‑ ĩ na töpö pi kuu nö, töpö pi mönaha apii töpö konasolöma. ⁴²Töpö kononö nö, ĩ tä wakala pewö hamö Teusömo wi a sai ha töpö eku ekumo sinomo nö, sai pö pewö ha töpö loa hätäpoti nö, Jesus a wäsätii, a katehatii, ĩ na töpö kuatima. ‑Jesus a hai, Teusö anö a simönö noai, ĩ a. Teusö anö a kaikanamoma wi, ĩ Cristo a hilo wi, ĩ Jesus a pasiwö‑ ĩ na töpö kutima.

Estêvão a läkäpolö noai ĩ ta

¹Ĩ na tä kua tä, juteu töpönö Jesus a thapo wi ĩ töpö pala apa tä, juteu töpönö köteeku töpö kai a thaa pasio wi, ĩ töpönö ai juteu töpö päsäpama. Juteu töpönö epöteu tä kai thaa asa wi, ĩ töpönö nii tä totoma tä, köteeku tä kai a thaa pasio wi, ĩ töpö suö hai peanopö töpö noma pasiso noai, ĩ töpö suö walapa sinomotima. Önö kutenö, epöteu kai a thaa wi, ĩ töpö päsäpama. Köteeku tä kai a thaa wi, ĩ töpönökö. ²Ĩ na töpö kuaö ha, Jesus anö 12 töpö kui töpö simönö noai, ĩ töpönö, Jesus a thapo wi ĩ töpö pewö kokamomanö nö, ĩ na töpö kuuma: ‑Nii sama tä totoma sinomo kuköma, Teusö sama ta wäsä tomöpoti mai kitäö! Ĩ tä topa mai kitäö! ³Ipa pö! Önö kutenö, “Ĩ töpö pi hatuku upii, Teusö a õsi kua tolele ĩ anö ĩ töpö õsi lotetepama sinomoö” makö kuu wi, ĩ ai töpö saipalöö! 7 ma töpö sailöö! Ĩ ma töpö saili wi ĩ töpö na, “Nii ma tä totoma sinomoö!” ĩ na samakö kuu kitäö! ⁴Kamisamakö aiki, Teusö a na samakö hapaloö, Teusö sama ta wäsäö, ĩ na samakö kua sisaöö!‑ ĩ na ĩ 12 pata töpö kuuma. ⁵Ĩ na ĩ töpö kuu ha, ‑Awai. Topa‑ ĩ na töpö pewö kuu hö̃töoma. Ĩ na töpö pewö kuu nö, Estêvão a sailöma. Estêvão aiki, ‑Teusö a lotete epö‑ a pi kuu sinomotima. ‑Teusö anö sa hini hãto mai kitä‑ a pi kuu maama. Estêvão a õsi ha Teusö a õsi kua tolele, ĩ a kuo totio opama. A Teusöpöo totio opama. Filipe a, Pötókotu a, Nikanoo a, Simõ a, Páhamenasö a, Ãsiokia tili tä Nikolau a, ĩ na kilii töpö saia nainöma. Nikolau a hai, juteu tä kuo maama maaki, juteu töpö na a Teusömo naio waikitioma. ⁶Jesus anö 12 töpö simönö noai ĩ töpö na, töpö saipalöhe ĩ töpö hilaköma, Teusö a na ĩ 12 pata töpö hapalo nö, töpö hilakö noai ĩ töpö na ĩ 12 töpö ami walia soaköma.

⁷Ĩ na tä kua tä, Teusö a wäsä wi, ĩ ta palalo nö, Jetusalẽi tä uli pata hamö Jesus ta hua sinomo noai, ĩ töpö sateho opama. Juteu töpönö Teusö a täpä sinomo wi, ĩ ai töpö satehe epii töpö aiki, ‑Jesus ta pitili‑ ĩ na ĩ töpö õsi kuu nö, Jesus ta hua nainöma.

⁸Ĩ na tä kua tä, Teusö anö Estêvão a pi ipa nö, a lotetepamanöma. A pi hatukupamanöma. Teusö anö tä thaa asa wi, Estêvão anö ĩ nasimö tä thati ha, ‑A kilia apawö. Teusö a lotete epö‑ ĩ na töpö kutima. ⁹Ĩ na töpö kutima maaki, ai töpönö Estêvão a wanipoma. Siteni tä uli, Alesiãtötia tä uli, Silísia tä uli, Ásia tä uli, ĩ na tä uli kui tä uli ha ai juteu töpö kuo paio noai, ĩ töpönö Estêvão a wanipoma. Ai töpönö noa mi juteu töpö kalipalama sinomoma maaki, ĩ juteu töpö hula kopalö noai ĩ töpö kokamo sinomo noai, ĩ a sai na töpö kokamo sinomo noai, ĩ töpönö Estêvão a wanipo nö, a päsäpamae. ¹⁰A päsäpama maaki, Teusö a õsi kua tolele, ĩ anö Estêvão a pi hatukua apöpamanöma kutenö, Estêvão a hapalo tao opama. A hapalo tao opa salo, a päsäpa noai, ĩ töpö a hino maa totimaköma.

¹¹Ĩ na tä kua tä, Estêvão a wanipo wi, ĩ töpönö ai töpö na sitipa kökö totoa hãtokö nö, ‑“Estêvão a hapalo tä, Teusö a hiopöama sinomo thaliö! Moisés a hiopöama sinomo thaliö!” ĩ na pö holisi kuu!‑ ĩ na ĩ töpö kuuma. ¹²Ĩ na töpö kuu nö, ĩ töpönö pata töpö, Moisés a kai wäsä sinomo wi ĩ töpö, ai töpö, ĩ na töpö kui töpö lululö nö, pata töpö kokamo wi ĩ hamö Estêvão a läkälölöma. ¹³Estêvão a läkälölö nö, ai töpö aiki, ‑Hi a wani hapalo pola nö, “Hi Teusömo wi a sai topa mai kitäö! Moisés a kuu noai, ĩ ta hini tihöö!” ĩ na hi a wani kuu sinomo thaliö! ¹⁴Estêvão aiki, “Nasaté tili tä Jesus anö hi Teusömo wi a sai pata waniapali kitäö! Moisés anö pata töpö noa thaa noai, ĩ ma ta thapo soale, Jesus anö ĩ ta hosali pia salo” ĩ na Estêvão a kuu kipiliö!‑ ĩ na töpö holisi kuuma.

¹⁵Ĩ na tä kua tä, pata töpö lole, Estêvão a na ĩ töpö mamo tetea läa tä, ãju tä moikömö möamö wakala apö kui na, ĩ na Estêvão a moikömö möamö kuoma.

Estêvão a hapalo hö̃töo noai ĩ ta

¹Ĩ na tä kua tä, Teusö a täpä totio wi, Estêvão a na ĩ a pata hapalo nö, ‑Hi töpö kuuhe, ĩ pitili ta hãtowö?‑ ĩ na a pata kuuma. ²Ĩ na a pata kuu ha, Estêvão a hapalo hö̃töoma. A hapalo nö, ‑Ipa pö! Ipa pata pö! Sa hiniö! Atã tä uli ha kamakö hai ĩ pata tä sai Abraão a pata pilio paio mai ha, Mesopotâmia tä uli ha a pata pilia soa tä, ĩ a pata na Teusö a toita apii ĩ a tapamonasoma. ³A tapamono nö, “Au wa tä uli hosalö nö, au wa töpö takölö nö, a alulöö! Kawa na ai tiko sa tä uli möma nömöo kitäö! Ĩ tä uli na a alulöö!” ĩ na Abraão a na ĩ na Teusö a kuu totioma. ⁴Ĩ na Teusö a kuu ha, Kautéia tä uli ha a pata husolo nö, Atã tä uli ha a pata pilia nömökö tasoma. Ĩ na tä kua tä, kama hai ĩ pö̃ a nomaso noai ha, hi tä uli ha makö pilile, ĩ tä uli ha Teusö anö a pata simöpalöma. ⁵Hi tä uli ha Teusö anö Abraão a pata simöpalöma maaki, ĩ a pata na hi tä uli totoa haio maama. Wani ipii hi tä uli wai totoa maama. Tä uli totoa paio maama maaki, Abraão a pata na Teusö a hapalo nö, “Kawa, au ola töpö, ĩ na kilii makönö hi ma tä uli thapo kuki kitäö!” ĩ na Teusö a kuuma. Abraão a hai ĩ ulu tä mi päla tä maaki, “Kawa, au ola töpö, ĩ na kilii makönö hi ma tä uli thapo kuki kitäö!” ĩ na Teusö a kuu totio opama. ⁶“Tiko tä uli ha au ola töpö pilia paiki kitä. Ĩ tä uli ha töpö pilia tä, ai tiko töpönö noa mi au ola töpö kalipalamati nö, au ola töpö peamati kitä. Au ola töpö peamati tä, satehe epii, ĩ 400 inama tä kui tä inama mataso kitäö!” ĩ na Teusö a kuu nö, ⁷“Ĩ tiko töpönö au ola töpö peamati piale, kamisanö ĩ sa töpö peama naio kitäö! Sa töpö peama noai ha, au töpö ola kopi kitäö! Töpö kopo nö, hi tä uli ha töpö Teusömo totia kõkö solö kitäö!” ĩ na Abraão a pata na ĩ na Teusö a kuuma. ⁸Ĩ na Teusö a kuu nö, “Au ai sa töpö totiapala asa pia salo, ĩ na ma tä thama hö̃töo totioö! Wano ma töpö isi ola ösö hanöpalö nö, ĩ ösö hosa sinomoö! Ĩ na ma tä thama sinomoö!” ĩ na Abraão a pata na ĩ na Teusö a kuuma.

Ĩ na tä kua tä, Abraão a hai ĩ ulu a kupasoma. A kupasoö ha, 7 tä mumi kui tä mumi matalo nö, Isaki a isi ola ösö wai hanöpalöma.

Ĩ na tä kua tä, Isaki a patalo nö, Isaki anö Jacó a thaköma. Ĩ na tä kua tä, isöhaeu pata töpö kuo soma noai, Jacó anö ĩ 12 töpö kui töpö thaa nömököma. ⁹Ĩ töpö patalo nö, poose José a hĩsu thaa nö, ai tiko töpö na sitipa kökö tälö nö, ĩ tä noa na pepala töpönö José a totoköma. A totokö nö, “Esitu tä uli hamö ma noa mi kalipalamapököö!” ĩ na pepala töpö kuuma. Ĩ na pepala töpö kuama maaki, Teusö anö José a totiapala apa pasitioma. ¹⁰Ai töpönö José a peama apatima maaki, a peama apati noai, Teusö anö ĩ tä mapamanöma. Teusö anö José a totiapala apa nö, a pi hatukama apama kutenö, “José a pi hatuka apa asaleö!” ĩ na José anö ĩ na esitu tili töpö kaikana Patao a pi pata thamama. Ĩ na a pi pata thamaö ha, “Kamisa sai pö ha töpö kalipalo sinomo wi, ĩ wa töpö simöa sinomo pasitiopököö! Huki kaikana wa kupaso keö! Kawanö ipa esitu tili wa töpö pewö simöa totio sinomopököö!” ĩ na José a na, ĩ na esitu tili töpö kaikana a pata kuuma.

¹¹Ĩ na tä kua tä, Esitu tä uli, Kanaã tä uli, ĩ na tä uli kui tä uli pewö pata oia apöpasoma. Kamakö hai ĩ kolo töpö hai ĩ nii tä kuo maama kutenö, töpö pepalo opatima. ¹²Töpö pepalo opati tä, “Esitu tä uli ha nii tä pi kua apa kulaliö!” Jacó anö ĩ na tä kuu hininö nö, ĩ tä uli hamö kama hai ĩ ulu töpö simönöma. Ĩ töpö simönö noai, kamakö hai ĩ kolo töpö. ¹³Ĩ töpö kopö noai ha, Esitu tä uli hamö töpö hamamo kõo tasoa tä, José aiki, “Poose saö! José saö!” ĩ na pepala töpö na ĩ na José a kuuma.

Ĩ na tä kua tä, esitu tili tä kaikana patanö, “José hai pepala töpö, kama hai ĩ poosa a, ĩ na kilii töpö talasoma thaliö!” ĩ na tä kuu hininöma. Ĩ na tä kua tä, kaikana tä pata na José a hai ĩ töpö a wäsä totioma.

¹⁴Önö kutenö, José anö pö̃ a nakama. Kama ai töpö kai pewö, ĩ 75 töpö kui töpö kai nakama. ¹⁵Pö̃ Jacó töpö pewö nakaö ha, Esitu tä uli hamö Jacó anö töpö kai pewö alulö nö, ĩ tä uli ha töpö kai pilia nömöikitö nö, ĩ hamö Jacó a, kamakö hai ĩ kolo töpö, ĩ na töpö kui töpö nomasoma. ¹⁶Töpö nomano nö, ĩ tä uli ha ĩ töpö nomawö titia paiköma maaki, Kanaã tä uli ha Sikẽi tä uli kule, ĩ ha ĩ töpö nomawö titia nömöa kõköma. Abraão a patanö Amõ ulupö töpö na noa tä totokö nö, maa maka tälö noai, ĩ maka na ĩ kamakö hai ĩ kolo töpö nomawö titiköma.

¹⁷Ĩ na tä kua tä, Esitu tä uli ha kamakö hai ĩ kolo töpö pilio noai, ĩ töpö satehea apöpasoma. Teusö aiki, “Tiko töpönö makö pepalama apa wi, ĩ sa töpö peama hö̃töo nö, kamisanö makö koni kitäö! Makö konöma, au tä uli ha makö konasolö kitäö!” ĩ na Teusö anö ĩ na töpö noa thaa waikioma kutenö, Teusö anö esitu tili töpö peama hö̃töo nö, kama hai ĩ isöhaeu töpö konöma. Ĩ isöhaeu töpö kõo pia tä, töpö satehea apöpasoma. ¹⁸Ĩ tä, ai esitu tili tä kaikanapasoma. Ĩ a patanö José a tai mio opa pasioma. ¹⁹Önö kutenö, ĩ a patanö kamakö hai ĩ kolo töpö mönama apati nö, töpö peama apatima. “Au ulu wa töpö wai hosalalö nö, wa töpö wai nomamananöpöö!” ĩ na a pata kuu nö hĩsua apama.

²⁰Ĩ na tä kua tä, Moisés a wai kupasoma. A wai liähäo opama. A wai toita apö ha, a wai hosa maama. Pö̃ a sai pö õsimö ha pöpönö anö a wai satimapo hö̃töoma. A wai satimapo tä, 3 pilipoma kökö hasupamanö nö, ²¹ĩ kökö pilipoma mato totia tä, a pi wai sosamaköma tä, Patao kaikana a pata hai ĩ pete anö Moisés a pi wai talalö nö, a wai tälö nö, a wai patamanöma. “Hi ipa ulu a” ĩ na Patao a pata hai ĩ pete a kuu asama. ²²Ĩ na tä kua tä, Moisés a wai pataalö tä, ai töpönö Moisés a wai na tä taöma sinomotima kutenö, esitu tili pata töpö pi hatukuo kuo noai na, ĩ na Moisés a pi hatukua kua nömöpasoma. A hapalo makoko opama. A kalipalo tao opama.

²³Ĩ na tä kua tä, Moisés a hai, pata tä kupo waikia tä, ĩ a na 40 tä inama kua waikia tä, “Ipa isöhaeu tili töpö na sa hamamo tasokö o!” ĩ na a pi kuuma. ²⁴Ĩ na a pi kuu nö, a hama hulasolöma. A hama huulö pamö, ai esitu tili tänö isöhaeu tä peama läoma. Esitu tili tänö isöhaeu tä peama pole, Moisés anö ĩ tä taa nö, kama hai ĩ isöhaeu tä noama nö, Moisés anö ĩ esitu tili tä peama hö̃töoma. A säa totia asapalöma. ²⁵“‘Makö pewö peama wi, Teusö anö ĩ tä mapamani pia salo, Moisés a simöpalömaö!’ ĩ na isöhaeu töpö pi kuu kitäö!” ĩ na Moisés a pi kuuma maaki, ĩ na isöhaeu töpö pi kuu maama.

²⁶Ĩ hena tä, polakapi isöhaeu tili töpö säso tä, Moisés a waloa läköma. A waloa läiki nö, töpö wasu nö, “Ai pö! Ĩ kama makö pewö ta makö pi kuu mai, makö säsotiwö” ĩ na Moisés a kuu läoma. ²⁷Ĩ na Moisés a kuu läoö ha, töpö säso pole, ĩ ai tänö Moisés a hãsialö nö, “Witinö wa kaikana pasipalöma? Kaikana wa mai kitäö! Wa tä makokama läo sinomo wi ĩ wa pasi mai kitä. ²⁸Hi wisa ha esitu tili wa tä säa thapalö noai na, ĩ na sa tä thama pia kule?” ĩ na ĩ ai isöhaeu tä kuu hö̃töoma. ²⁹Ĩ na Moisés a na ĩ na isöhaeu tä kuu hö̃töoö ha, tiko hamö Moisés a hua soasolöma. A hua soalolö nö, Mitiã tä uli ha a waloa soaikitö nö, ĩ hamö a pilia nömöa soakö tasoma. Mitiã tä uli ha a pilikitö nö, pusopö a tälö nö, polakapi kama hai ulu kökö wai thaa soakö tasoma.

³⁰Ĩ na tä kua tä, inama tä satehe epii, ĩ 40 tä inama matalo nö, Sinai makö kotö pata ha sanöma töpö kuo maa pa hii ti wakö umö pole, ĩ ti õsi ha ãju tä kuiki nö, Moisés a na a tapamonasoma. ³¹Moisés anö ĩ tä möö nö, a pi honipo opama. A pi honipo opa nö, tä möö totio pia salo, a ekua kotöa totiköma. A ekuo kotöo totio opa tä, Teusö a hapalo läoma. ³²“Au nö patapö töpönö sa thapo noai, ĩ sa. Abraão a, Isaki a, Jacó a, ĩ na töpö kui töpönö sa thapo noai, ĩ sa” ĩ na Teusö a kuuma. Ĩ na a kuu ha, Moisés a kilia apölo nö, a satitimo opama. A kili ipa salo, tä möö kili ipama.

³³Ĩ na tä kua tä, Moisés a na Teusö a hapalo kõo nö, “Hi wa öpale, ipa tä uli asawö. Önö kutenö, pili wa ami ha tökö kule, ĩ tökö hasupalöö! ³⁴Esitu tä uli ha ipa töpö pepalo opati wi, ĩ sa tä taa waikio kipiliö! Töpö halilimo opa wi, ĩ sa tä hini waikio kipiliö! Önö kutenö, sa töpö koni pia salo, sa ithopasomaö! Esitu tä uli hamö wa simöa koni pia salo” ĩ na Moisés a na, ĩ na Teusö a kuumaö!‑ ĩ na Estêvão a kuuma.

³⁵Ĩ na a kuu nö, ‑Moisés sa kateha pole, isöhaeu töpönö ĩ Moisés a kai a hini wanio opa waikioma. “Witi pilinö wa kaikanapalöma? Kaikana wa mai kitäö!” ĩ na töpö kuu waikioma. Ĩ na töpö kuu waikio noai ha, Teusö anö Moisés a simöpalö nö, a kaikana opipalöma. “Isöhaeu wa töpö koni wi, ĩ waö!” ĩ na Teusö a kuuma. Hii ti wakö umö pole, ĩ ti õsi ha ãju tä kuiki nö, Moisés a na a tapamonaso noai, Teusö anö ĩ a simöpali ha, ĩ ãju tänö Moisés a simöa tolea hö̃tölöma. ³⁶Ĩ na tä kua tä, Esitu tä uli ha isöhaeu töpö kuo noai, Moisés anö ĩ töpö kai konasolöma. Esitu tä uli ha Moisés anö tä aipamatima. Mötati tuu hanahai tuu pata ha aipö tä thama. Ĩ na tä kua tä, sanöma töpö kuo maapö tä uli ha, Moisés anö tä aipamati pa, satehe epii, ĩ 40 tä inama hasumaköma. Moisés anö tä aipama apati pola nö, töpö kai konasolöma. ³⁷“Kamakö na Teusö anö ai tä simöpali kitäö! Kamisanö Teusö sa kai wäsä kua wi na ĩ na ai tänö Teusö a kai wäsä kua hö̃töo wi, Teusö anö ĩ a simöpali kitäö! Kamakö hai ĩ ai täö!” ĩ na isöhaeu töpö na ĩ na Moisés a kuu noai, ĩ Moisés sa katehati kule. ³⁸Sanöma töpö kuo maapö tä uli pata ha isöhaeu töpö kokamo noai, ĩ töpö na Moisés a kokamo naioma. Kamakö hai nö patapö töpö na a kua naioma. Sinai makö pata ha Moisés a na ãju tä hapalo noai, ĩ a na Moisés a kuo naioma. Sanöma makö õsi temöpama wi, Moisés anö ĩ ta hininö nö, kamakö na ĩ ta wäsä toleo totiatalo opama.

³⁹Ĩ ta wäsä toleo totiatalo opama maaki, kamakö hai nö patapö töpönö Moisés a hini wanio opama. “Esitu tä uli ha makö pilia koikitö nöka” ĩ na ĩ töpö kupaloma. ⁴⁰Ĩ na töpö kupalo nö, Atão a na töpö hapalo nö, “Makö noama wi ĩ tä ukutupö thapalöö! Ĩ ukutupö tänö makö kai konasolöpöö! Wi na Moisés a kuatima kuno mai, a walo kõa mane? Esitu tä uli ha makö kua tä, Moisés anö makö kai hulasolö kipili maaki, a ithopo koa mai ha, tä kua soa kuleö!” ĩ na töpö kuuma. ⁴¹Ĩ na töpö kuu nö, paka ukutupö thapalöma. Ĩ tä ukutupö thapalö noai, ĩ tä na salo kökö noki totokö nö, ĩ tä ukutupö na töpö pi mönaha apa salo, töpö iapalo opaö, töpö paöpalo opaö, ĩ na tä kuama. ⁴²Önö kutenö, ĩ töpö na Teusö a noimo mapasoma. “Päla” a kuuma. “Töpö Teusömo wani salo, tiko hamö töpö pi tapomö kua pasio päoö! Pili motokö, pilipoma a, sitikali kökö, ĩ na tökö kui tökönö makö noamapöö! ‘Ĩ töpö hai, kamakö hai ĩ pata töpö’ ĩ na töpö pi kuu päoö” ĩ na Teusö a pi kuuma. Ĩ na Teusö a pi kuu noai, waiha Teusö a kai a wäsä sinomo noai, ĩ töpönö ĩ ta sãökököölöma. Tä sãökököölö nö,

“‘Isöhaeu pö. Sanöma töpö kuo maapö tä uli hamö satehe epii, ĩ 40 ma tä inama thapamanö noai, ĩ tä, salo ma pö säti nö, ma pö nokomati noai, kamisa na ĩ ma pö noki totomatima ta o? ⁴³Ma. Kamisa na makö noamamo totio mai, sai töpö na makö noamamo pasio kipili nökö. Sai tä Moloki na makö noamamo wi ĩ ma tä thapoma. Moloki a hai ĩ watata ma ösö sai wai silö nö, makö huti kipili. Sitikali Haipã ma tä ukutupö thapo naio kipili. ‑Haipã a hai, ĩ ipa pata tä sai‑ ĩ na makö wani kuu nö hĩsua apa kipili. Moloki, Haipã, ĩ na kilii ma tökö ukutupö thapalö nö, ĩ tökö ukutupö na makö noamamo kua sisa kipili. Kamisa thapo pasio maama kutenö, Papilônia tä uli kule, ĩ tole ha makö simöpali pia salo’ ĩ na Teusö a kuumaö!”

ĩ na Teusö a kai a wäsä sinomo noai, ĩ anö ĩ na tä kuu tä, tä sãökököma‑ ĩ na Estêvão a kuuma.

⁴⁴Ĩ na a kuu nö, ‑Salo ösö sai ha Teusö a kuo noai, sanöma töpö kuo maapö tä uli ha kamakö hai nö patapö töpö huulö pamö ĩ a sai thapoma. “Ĩ na a sai kui ipa wa sai thaa totikiö!” Teusö anö ĩ na Moisés a noa thaa totioma kutenö, ĩ na a sai kui a sai thaa totia hö̃tököma. ⁴⁵Ĩ a sai thakö noai, sanöma töpö kuo maapö tä uli ha ĩ kamakö hai ĩ nö patapö töpönö ĩ a sai tälö nö, ĩ a sai kai konasolöma. Josué anö ĩ töpö kai konasolö wi, Teusö anö tiko töpö sasupalö noai, kamakö hai ĩ nö patapö töpönö ĩ tä uli täa asalö nö, Teusö a hai salo ösö sai thapotima. Davi a kupo paio mi tä, ĩ tä uli ha Teusö a hai salo ösö sai kuo soama.

⁴⁶Ĩ na tä kua tä, Teusö anö Davi a totiapala apa sinomoti noai, Teusö a na ĩ a hapalo nö, “Teusö ai. Jacó anö wa thapo noai ĩ waö! Au sai sa sai thaköpököö! Ĩ a sai na wa pilitiopöö!” ĩ na Davi a kuuma. ⁴⁷Ĩ na Davi a kuuma maaki, Salomão anö ĩ a sai thaa haiköma.

⁴⁸Ĩ a sai na Salomão anö Teusö a thaki pia salo, a sai thaköma maaki, sanöma makönö sai a thakö noai, ĩ a sai na Teusö a pata pilio mai kitä. Ösö hamö Teusö a kupoli, sanöma makönö sai a thakö noai, ĩ a sai na ĩ a pata kuo mai kitäö! Ĩ na Teusö a kai a wäsä sinomo wi, ĩ na ĩ a kuu hö̃töoö:

⁴⁹“‘Hi tä hẽtu hamö tä uli kupoli, ĩ ipa lotami ti. Konona sa ami maketio wi, ĩ ipa masita tä uli’ ĩ na Teusö a kuu. Ĩ na a kuu nö, ‘Önö kutenö, sa kuköpö, wi na sai a kui ma sai thaköpö? Sa mota mapopö, witi ha ma sai thaköpö? Sa piliköpö, sanöma makönö ĩ ma sai thaa mai kitä ta pi kuu mai. ⁵⁰Teusö sanö ĩ sa tä pewö thama pi kuu mai’ ĩ na Teusö a kuu”

ĩ na Teusö a kai a wäsä sinomo noai, ĩ na ĩ a kuuma‑ ĩ na Estêvão a hapalo nö, ĩ na a kuuma.

⁵¹Ĩ na Estêvão a kuu nö, ‑Teusö ma ta hini maapa wi. Teusö ma ta hini wanio opapa wi. Kamakö hai ĩ nö patapö töpö kua noai na, ĩ na makö ta kua hö̃töowö. Teusö a õsi kua tolele, ĩ ma hini wani ipö. ⁵²Teusö a kai a wäsä sinomo noai, au nö patapö töpönö ĩ töpö pewö peama sinomotima. “Toitai tä thaa sinomo asa wi, waiha ĩ a walokö solö kitäö!” töpö kuu noai, au nö patapö töpönö ĩ töpö säma. Toitai tä thaa sinomo asa wi, ĩ Jesus a hilo wi, ĩ ma namo simököma. Ĩ ma monima nö, ma säpamani kipili. ⁵³Teusö anö makö noa thaa noai, ãju töpönö ĩ ta wäsä tolea noai, ĩ ma ta tälöma maaki, ĩ ma ta hini totio maama‑ ĩ na Estêvão a kuu totiatalo opama.

Estêvão a säpalö noai ĩ ta

⁵⁴Estêvão a kuu noai, juteu töpö hai ĩ pata töpönö ĩ ta hininö nö, töpö hĩso opama. Töpö hĩso opa nö, töpö pewö asö asömo opama. ⁵⁵Ĩ na tä kua tä, Estêvão a na Teusö a õsi kua tolele, ĩ a kua totiki ha, hi tä hẽtu hamö Estêvão a nonoiki nö, Teusö a wakala apöpoli, ĩ tä tapama. Ĩ tä tapa nö, Teusö a kotö ha pelupö Jesus a öpapoli, ĩ tä tapa apa naio soatama. ⁵⁶Ĩ tä tapa nö, ‑Möö nökö. Teusö anö hutu mosökö hãkomapole, ĩ sa tä tapa apa kule. Teusö a kotö ha sanöma tä kupaso noai, ĩ Jesus a lö kui ĩ sa tapa apa kule‑ ĩ na Estêvão a kuuma. ⁵⁷Ĩ na a kuu ha, juteu pata töpönö Estêvão a hini wani ipö salo, töpö sömöka kasöiki nö, töpö lalupalo nö, Estêvão a na töpö läläa soaiki nö, ⁵⁸a huölö nö, Jetusalẽi tä uli atu pata hamö a läkäpolöma. A läkälölö nö, maa mapönö a säpalöpö, Estêvão a säsä kolola apama. Estêvão a säsäti pole, watata ösönö ĩ töpö halole, ĩ töpönö ĩ ösökö hasulalö nö, Saulu a hĩsa öpa pa, ĩ ösökö pewö paköma. ⁵⁹Estêvão a säsäö ha, ‑Jesus Kaikana. Kawanö sa õsi konöö!‑ ĩ na Estêvão a kuuma. ⁶⁰Ĩ na a kuu nö, masita tä ha a lotaiki nö, pili maekonö a hĩta thaiki nö, ‑Ipa pata täö! Hi töpö wanisala apa wi, ĩ töpö hĩsu thaa tihöö! Sa nö sua tihöö!‑ ĩ na Estêvão a kuu lalupalo nö, a nasi tuköma.

Saulu anö, Jesus a thapo wi ĩ töpö peamati noai ĩ ta

¹Ĩ töpönö Estêvão a säsä tä, Saulu anö ĩ töpö wasu maama. ‑Awai. A säpalöö!‑ a kuuma.

Estêvão a nasi tuo pole, ĩ tä wakala ha, Jetusalẽi tä uli pata ha, Jesus a thapo wi, ai töpönö ĩ töpö pe epii töpö peama kolo kupoma. Töpö peama kolo kupoö ha, Jutéia tä uli pata hamö ai töpö toköamö kulasolöö, Samatia tä uli hamö ai töpö toköamö kulasoö, ĩ na töpö kuama. Jesus anö töpö simönö noai, Jetusalẽi tä uli pata ha ĩ töpö pilio haio asama.

²Teusö a thapo totio opa wi, ĩ ai töpönö Estêvão a patiliköma. Estêvão a na ĩ töpö ö̃kö lalupalo opama.

³Saulu anö Jesus a thapo wi ĩ töpö peama apatima. Ĩ töpö sai pö ha a lisia hätäpo nö, wano töpö, suö töpö, ĩ na töpö läkäa thalalölö nö, sai a lototoa apöle, ĩ a sai ha töpö titiaköma.

Samatia tä uli ha Jesus a wäsä noai ĩ ta

⁴Ĩ na tä kua tä, töpö selekepaso noai, ĩ töpönö Jesus a wäsätiilöma. ⁵Samatia tä uli ha ai pö sai hö̃kökö öpii sai pö kule, ĩ hamö Filipe a timökitö nö, ĩ töpö na Cristo a wäsätima. ⁶Filipe anö ta wäsä wi, ĩ töpönö ĩ ta hinia totialalöma. Teusö anö aipö tä thaa taö asa wi, Filipe anö ĩ nasimö tä thatima salo, ĩ töpönö ta hinia totilöma. ⁷Ĩ töpö na sai töpö sapäko sinomotima maaki, Filipe anö Jesus a wäsä tä, sai töpö lalupalo nö, ĩ ai töpö satehe epii töpö hulakö nö, töpö toköa konasolöma. Töpö huu hiopöi, Teusö anö ĩ töpö totia kopalöma. Töpö huatalo mi ipii, ĩ töpö toa naia komanöma. ⁸Önö kutenö, ĩ sai pö pata ha töpö kuo noai, ĩ töpö pi mönaha apama.

A sapuli ipii, ĩ Simão

⁹Samatia tä uli ha Filipe a huu paio mai ha, ĩ tä uli ha Simão a sapulimo sinomotima. A sapulimo sinomoti ha, ‑A kilia apatiwö‑ töpö kutima. ‑Sa sapulimo tao opa asa kutenö, kamisa hai, pata sa asawö‑ ĩ na Simão a kuu sinomoma. ¹⁰A kuu tä, pata töpö solo, samatia tili töpö pewö aiki, ‑Ĩ pitili ta. A sapuli ipö, Teusö anö Simão a lotetepamanö noa‑ ĩ na töpö kutima. ¹¹Simão a sapulimo sinomo nö, ‑A wani kila apati noa‑ ĩ na töpö thama tetea apa waikia salo, ĩ töpö pewönö Simão a kai a hinia totilöma. ¹²Simão a kai a hini paioma maaki, Filipe a kai a hinia nömönöma. Ta topa apöle, Filipe anö ĩ ta wäsä nö, a hapalo nö, ‑Teusö a kaikanamo sinomo wi, ĩ na ĩ tä kuaö. Jesus Cristo a hilo wi, ĩ na ĩ a kuaö‑ ĩ na Filipe a kuu ha, ‑Filipe anö ta wäsä wi, ĩ pitili ta‑ ĩ na samatia tili töpö kuu nö, Jesus a tälöma. Jesus a tälö nö, wano töpö, suö töpö, ĩ na töpö kui töpö mai õhomamonasoma. ¹³Simão a lö kui, a sapulimo sinomoti noai, ĩ anö Jesus a täa nainöma. Jesus a täa nainö nö, a mai õhomamono nö, Filipe a na a nokapalotima. A nokapaloti tä, Filipe aiki, ‑Teusö a lotete epö‑ ĩ na töpö pi thama pia salo, Teusö anö tä thama taö asa wi, Filipe anö ĩ tä thamatima. Tä aipamatima. Tä aipamati wi, Simão anö ĩ tä taa nö, ‑Kilia apawö‑ ĩ na a kutima.

¹⁴Ĩ na tä kua tä, Jesus anö töpö simönö noai, ĩ töpö na, ‑Samatia tili töpönö Teusö tä kai a hini thaliö!‑ ĩ na ai töpö kuu ha, ki hamö, Samatia tä uli hamö Pedro a, João a, ĩ na kilii töpö simönöma. ^15-16Samatia tili töpö aiki, ‑Kaikana Jesus sa thapo pi topa‑ ĩ na ĩ töpö kuuma ha, töpö mai õhomanöma. Töpö mai õhomanöma maaki, ĩ töpö na Teusö a õsi kua tolele, ĩ a ithopo mai ha, töpö kutioma. Ĩ na ĩ töpö kutioma kutenö, Pedro a, João a, ĩ na kilii töpö waloiki nö, Teusö a na ĩ töpö hapalo nö, ‑Hi töpönö, kawa õsi kua tolele ĩ a täalalöpöö!‑ ĩ na ĩ töpö kuuma. ¹⁷Ĩ na töpö kuu nö, samatia tili töpö na töpö ami waliki ha, samatia tili töpönö Teusö a õsi kua tolele, ĩ a täalalömae.

^18-19Simão a lö kui, Jesus anö töpö simönö noai, ai töpö na ĩ töpö ami waliki nö, Teusö a õsi kua tolele, ĩ a ithopamani wi, ĩ Simão a waninö ĩ tä taa nö, Pedro a, João a, ĩ töpö na, ‑Sa töpö höpöa nö, ĩ töpö na Teusö a õsi kua tolele, ĩ a ithopama kua wi na, ĩ na sa thama naioö! Sa thapalöma, kamakö na sitipa sa kökö totoki kitäö!‑ ĩ na Simão a kuu ha, ²⁰Pedro aiki, ‑Õsi töpö pea sinomoti wi, ĩ hamö au sitipa kökö kai hua pasia soatalolö. “Teusö anö noa mai ha kama õsi kua tolele, ĩ a tototaö ta” pi kuu mai‑ ĩ na Pedro a kuuma. ²¹Ĩ na a kuu nö, ‑Teusö a na wa õsi tomöpo mi kutenö, Teusö a na wa kalipalo mai kitä. ^22-23Wa õsi wanisala apa wi, ĩ sa tä taö waikia kule. “Kamisanö ai töpö na Teusö a õsi kua tolele ĩ sa õsi ithopama naio nö toa sö ö̃” ĩ na wa pi kupalo opati salo, wa pi topa mane. Wanisala wa tä thaa sipa apa sai‑ ĩ na Pedro a kuu nö, ‑“Sa wanisala wi, ĩ tä matamanöö! Wanisala sa tä thaa pi topa wi, ĩ tä matamanö nö, kamisa na a hĩso tihöö!” ĩ na Teusö a na a kuu!‑ ĩ na Pedro a kuuma. ²⁴Ĩ na Pedro a kuu ha, Simão aiki hö̃töwö, ‑“Ĩ na Teusö anö wa thama kitäö!” makö kuu ke maaki, Teusö a na makö hapalo nö, “Ĩ na Simão a thama tihöö!” ĩ na pö kuu!‑ ĩ na a kuuma.

²⁵Ĩ na tä kua tä, Pedro a, João a, ĩ töpönö Teusö a kai a wäsä nö, kai a kateha nö, Jetusalẽi tä uli hamö töpö huu koonö tä, Samatia tä uli pata ha sai pö hö̃kökö öpii sai pö kule hamö, Jesus ta topa apöle ĩ ta wäsätiilöma.

Esiópia tili pata tä na Filipe anö Jesus a wäsä noai ĩ ta

²⁶Ĩ na tä kua tä, Filipe a na Teusö a hai ĩ ãju tä hapalo nö, ‑A husoö! Ki hamö, Jetusalẽi tä uli ha piliso ola kule, Kasa tä uli ha ĩ piliso kolo kulakili, sai a kuo maa pa tiso kule, ĩ tiso ha töpö satehe epii töpö huatalo mi, ĩ tiso hamö a hulolöö!‑ ĩ na a kuuma. ²⁷Ĩ na a kuu ha, Filipe a husolo nö, ĩ hamö a hulasolöma.

Ĩ hamö, esiópia tili pata tä aiki, ĩ eunuku tä hilo wi, Jetusalẽi tä uli hamö ĩ a Teusömomö huma, ²⁸a Teusömo matalo nö, a koonö tä, Teusö a kai a wäsä sinomo wi, ĩ Isaías anö waheta tä sãököpalö noai, ĩ tä mötima. Kapalu anö töpö pi saiapalati wi, ĩ ösö na esiópia tili pata tä lotiki nö, waheta tä mötima. ²⁹Tä möö soatia tä, Filipe a na Teusö a õsi kua tolele, ĩ a hapalo nö, ‑Ki a na wa waloikitö nö, a nokapalolöö!‑ ĩ na a kuu ha, ³⁰Filipe a läläa hailolö nö, a waloikitö nö, esiópia tili ta hinima. Isaías anö waheta tä sãöka noai, esiópia tili tänö ĩ waheta tä kateha pole, Filipe anö ĩ ta hini nö, ‑Wa ta katehati pole, ĩ wa tä hini totia kule?‑ ĩ na Filipe a kuuma. ³¹Ĩ na a kuu ha, ‑Ma. Sa pi hatukupamanöpö, ĩ tä kua kule ta o? Hisa ha a loa naikisoö!‑ ĩ na esiópia tili tä kuuma.

³²Pi naka. Ĩ esiópia tili tänö tä waheta katehati noai, ĩ na ĩ tä waheta kuuma:

‑Oweha a säpali pia salo, a täa thalölö wi na, ĩ na ĩ a täa thaa hö̃tölölöma. Oweha a ose kõi wai päsä tä, a wai lalupalo mi kua wi na, ĩ na ĩ a lalupalo kua hö̃töo maama. ³³Ĩ a pepalama apama. A wanisala mi ipö maaki, ĩ a pepalama apama. A säpalöma ha, hi masita tä uli hamö a pilio matasoma. Önö kutenö, kama hai ĩ ola töpö kuo maama salo, ĩ töpö a kateha mai kitä‑

ĩ na ĩ tä waheta kuuma.

³⁴Ĩ na ĩ tä waheta kuu wi, ĩ ta kateha nö, ‑Teusö a kai a wäsä sinomo noai, ĩ anö ĩ witi pili a katehama? Kama aiki hãtowö? Ai tä aiki hãtowö?‑ ĩ na Filipe a na ĩ na esiópia tili tä kuuma. ³⁵Ĩ na a kuu ha, Filipe anö ĩ waheta kuu wi, ĩ ta kateha nö, Jesus ta wäsä soatama. ³⁶Jesus ta wäsä nö, ĩ piliso hamö töpö huulö tä, maa tuu ha töpö hasuoma. Töpö hasuo tä, ĩ esiópia tili pata tä aiki, ‑Möö nökö. Maa tuu kua kule. Sa mai õhoma mi salo‑ ĩ na a kuuma. ³⁷[A kuu ha, ‑Awai. “Wa kuuhe, ĩ pitili ta. Jesus sa pii” ĩ na wa kuu ha, wa mai õhoma pia kule‑ ĩ na Filipe a kuuma. A kuu ha, ‑Awai. Pitili ta. “Jesus Cristo a hai, ĩ Teusö pelupö a” ĩ na sa kuu naia kule‑ ĩ na esiópia tili pata tä kuu nö,] ³⁸‑Ösö opitamanöö!‑ ĩ na a kuuma. Ĩ na a kuu ha, ösö opitamanö nö, töpö ithopalo nö, maa tuu ha töpö ekuiki nö, ĩ ha töpö kalola nö, ĩ ha Filipe anö esiópia tili tä mai õhomanöma. ³⁹A mai õhomanö nö, töpö söposöa kopalo nö, Teusö a õsi kua tolele, ĩ anö Filipe a täa soatalölöma. Filipe a täa soatalölöö ha, a tapa kõo maama. Esiópia tili pata tä aiki, a pi mönaha apa salo, ‑Aitaköö! Aitaköö!‑ a kuu kai konasolöma. ⁴⁰Filipe a lö kui, Asotu tä uli ha a waloa soataköma. A waloa soataiki nö, Jesus a wäsäma. Ĩ ha a husoa kono nö, Sesatéia tä uli hamö a huulö tä, sai pö hö̃kökö öpii sai pö pewö hamö a hasuso tä, ta topa apöle, Filipe anö ĩ ta wäsätilöma.

Saulu anö Jesus a thapo wi a kupaso noai ĩ ta

Atos 22.6-16; 26.12-18

¹Ĩ na tä kua tä, Jesus pata ta hini sinomoti wi, Saulu anö ĩ töpö wanipo nö, ‑Ĩ sa töpö säpamanöpöö!‑ a kuu nö, Teusö a täpä totio wi, ĩ pata tä na Saulu a ekuiki nö, ²‑Tamaasöku tä uli pata ha sa hulolö nö, Jesus a thapo wi ĩ sa töpö talalö nö, suö töpö solo sa töpö õkapamanö nö, hisimö, Jetusalẽi tä uli pata hamö sa töpö suaki solö nö, ĩ na sa töpö thama pia salo‑ ĩ na Saulu a kuuma. Ĩ na a kuu nö, ‑Tamaasöku tä uli ha juteu töpö kokamo sinomo wi, ai sai pö ha töpö kokamo seteko wi, ĩ töpö na waheta wa tökö simöpalöö! Kamisa na ĩ waheta wa tökö simöpalöpököö! Ĩ wa tökö simöpalöma, ĩ töpö aiki, “Naiö! Töpö suaalö tihöö!” ĩ na ĩ töpö kuu mai kitäö!‑ ĩ na Saulu a kuuma. ³Ĩ na Saulu a kuu ha, ‑Awai!‑ ĩ na pata tä kuu hö̃töoö ha, Saulu a alulö nö, Tamaasöku tä uli pata ha a ateo tä, hutu mosökö ha ta pata wakala apii, Saulu a na ĩ ta pata ithoa läpaköma. ⁴Ĩ ta pata ithoa läpaki ha, masita ha Saulu a kea soasoma.

A kea soalo nö, Saulu a paa tä, ‑Saulu ai. Wi na wa pi kuu salo, sa peamatii?‑ ĩ na ta kuu soatasoma. ⁵Ĩ na ta kuu ha, ‑Pata. Ĩ witi wa?‑ Saulu a kuu ha, ‑Kawanö sa peamati wi, ĩ Jesus sa. A hoköpaloö!

⁶Tamaasöku tä uli pata ha wa talalo nö, ki ai tä aiki, kawa na ĩ a waloiki nö, “Ĩ na wa kuapököö!” ĩ na ĩ a kuu kitäö!‑ ĩ na ta kuu soatama. ⁷Ĩ na ta kuu pole, Saulu a na töpö huu naine, ĩ töpönö ĩ ta hini naia kule maaki, pili töpö mamo sainö sanöma tä tapa totio mi kutenö, töpö kilia apölo nö, töpö hapalo mai, töpö öpaha pasitioma. ⁸‑A hoköpaloö!‑ ta kuu ha, Saulu a hoköpalo nö, a mamo kasö mia mane maaki, lope epii a mamo huu maa soatapöma. A mamo huu maa soatapi ha, ai töpönö a tutulölö nö, Tamaasöku tä uli pata hamö a kai talaso tasoma. ⁹A kai talalotö nö, 3 tä mumi kui tä mumi kupo tä, tä tapa mai, a ia mai, a amisio mai, ĩ na Saulu a kua pi kupotima.

¹⁰Ĩ na Saulu a kua pi kupoti tä, Tamaasöku tä uli pata ha a pilile, Jesus a thapo wi, ĩ Ananiasö a hilo wi, ĩ a na Jesus pata tä tapamonasoma. Ananiasö a manimo tä, Jesus a tapamo maama. A mio mai ha, a mamo tetea soatia tä, Jesus a tapamonasoma. A tapamono nö, a hapaloma. A hapalo nö, ‑Ananiasö‑ a kuu ha, ‑Ö! Kaikana ai. Ka pi tä?‑ a kuu hö̃töoma. ¹¹A kuu hö̃töoö ha, ‑A hoköpaloö! Ki ha, Tiso salilii tiso kolo kule, ĩ tiso ha Jutasö a sai pö kule, ĩ hamö a alulöö! Ĩ hamö wa walotaikitö nö, “Tasu tä uli ha a piliamö kuo wi, ĩ Saulu a hilo wi, hisa ha ĩ a kua kule?” ĩ na wa kuu! Ki sai a ha kamisa na Saulu a hapalo waikilati kitä‑ ĩ na Jesus a kuuma. ¹²Ĩ na a kuu nö, ‑Saulu a na Ananiasö wa hilo wi, ĩ wa uni tapamonasoma. Wa uni tapamono nö, Saulu wa mamo huu topa komaköpö, Saulu wa mamo höpöama‑ ĩ na Ananiasö a na uni tä na ĩ na Jesus Kaikana a kuuma.

¹³Ĩ na Jesus a kuuma ha, ‑Kaikana ai. Naiö! “Wa thapo wi, Saulu anö ĩ töpö peama apati sai thaliö!” ĩ na töpö satehe epii töpö kuu thali nökö‑ ĩ na Ananiasö a kuuma. ¹⁴A kuu nö, ‑Ki ha, Teusö a täpä sinomo wi, ĩ pata töpö aiki, “Ai töpönö Jesus a naka nö, ĩ a na töpö hapalo sinomo wi, ĩ töpö õkapalölöö!” ĩ na Saulu a na, ĩ na pata töpö kuuma thali nökö‑ ĩ na Ananiasö a kuuma. ¹⁵Ĩ na a kuuma maaki, Jesus pata tä aiki, ‑A alulöö! Kamisanö Saulu sa kalipalama pia salo, kamisanö ĩ sa saia waikili kipili. Sa saia waikilöma kutenö, juteu töpö a hilo pasio mai ĩ töpö, ĩ töpö hai ĩ kaikana töpö, isöhaeu töpö, ĩ na töpö kui töpö na Saulu a alulö nö, sa wäsä kuki kitä‑ ĩ na Jesus pata tä kuu nö, ¹⁶‑“Kawanö sa wäsä totioö ha, ai töpönö pe epii wa peama kitäö!” Saulu a na ĩ na sa kuu kitä‑ ĩ na Ananiasö a na ĩ na Jesus a Kaikana kuuma.

¹⁷Ĩ na Jesus a kuu ha, ĩ a sai hamö Ananiasö a hulolö nö, a lisipalo nö, Saulu a höpöa nö, ‑Ipa Saulu ai. Ki piliso hamö wa huima tä, kawa na Jesus a Kaikana tapamonaso noai, kawa na ĩ anö sa simöpali ke. Wa mamo huu topa kõki, Teusö a õsi kua tolele, kawa na ĩ a kua totiki, ĩ na wa thamapö, Jesus anö sa simöpali ke‑ ĩ na Ananiasö a kuuma. ¹⁸Ĩ na a kuu tä, salaka ösö kui na, pili a mamokö ha ĩ na tä kui tä kelasoma, Saulu a mamo höpöpöo opama maaki, a mamo topa kõo soataköma. A mamo topa kõo soataiki nö, a hoköpalo nö, ĩ na tä kua tä, a mai õhomamonasoma. ¹⁹A mai õhomamono nö, a ia kõo nö, a lotetea apa kopasoma.

Tamaasöku tä uli pata ha Saulu anö Jesus a wäsäti noai ĩ ta

Satehe epii tä mumi ha, Tamaasöku tä uli pata ha Jesus ta hua sinomo wi, ĩ töpö na Saulu a kutioma. ²⁰A kutiki nö, juteu töpö kokamo sinomo wi ĩ sai pö hamö Saulu anö Jesus a wäsä hätäpo soa nö, ‑Jesus a hai, ĩ Teusö a ulupö pasiwö‑ ĩ na a kutima. ²¹Ĩ ta kuu hini wi, ĩ töpö aiki, ‑Kilia apawö. Jesus a nakati wi, Jetusalẽi tä uli pata hamö ĩ töpö pewö mapamani pia salo, ĩ töpö säpamati noai, hi ĩ a. Jesus a nakati wi, ĩ töpö õkapalö nö, Teusö a täpä sinomo wi ĩ pata töpö na ĩ töpö sulölö pia salo, hisa ha a walokö noai, hi ĩ a‑ ĩ na töpö kutima. ²²Ĩ na töpö kutima maaki, Saulu a hapalo lotetea apa nö, Tamaasöku tä uli ha juteu töpö pililati, ĩ töpö na, ‑Ĩ naköö! Ĩ naköö! Jesus a kaikanapalö noai, ĩ a‑ ĩ na Saulu a kuu totio opaö ha, juteu töpö hapalo hö̃töo maama.

²³Ĩ na tä kua tä, satehe epii tä mumi matalo nö, juteu töpö aiki, ‑Saulu ma wani säpalöpöö!‑ ĩ na töpö hãtomo nö, töpö kuuma maaki, ai tänö ĩ ta wäsäö ha, Saulu anö ĩ ta hini hö̃tölöma. ²⁴Saulu a säpali pia salo, Tamaasöku tä uli sika pata ha tä pata hokolole, ĩ ha töpö lisito sinomo wi, ĩ sami taka holele, ĩ taka ha juteu töpö läapalotima. Wakalai ha töpö läapalotii, mumai ha töpö läapalotii, ĩ na töpö kuatima. ²⁵Töpö läapalotima maaki, mumai ha Saulu a kai a huati wi, wöö a pata ha ĩ töpönö Saulu a titiki nö, tä pata hokolole, ĩ ai tä hẽtu pata hamö Saulu a pi ithoamö thaa kopamanöma.

Jetusalẽi tä uli pata hamö Saulu a hulasolö noai ĩ ta

²⁶Saulu a pi ithoamö thaa kopamani ha, Jetusalẽi tä uli pata hamö a hua soasolöma. A hua soalolö nö, ĩ hamö Jesus ta hua sinomo wi, ĩ töpö na Saulu a kuo pi topama maaki, Saulu a na ĩ töpö kili ipama. ‑Saulu anö Jesus ta hua wi, ĩ a mai kitä‑ ĩ na ĩ töpö pi kuuma. ²⁷Ĩ na töpö pi kuuma maaki, Jesus anö töpö sailö noai, ĩ töpö na Pahanapé anö Saulu a hilakölö nö, a hapalo nö, ‑Piliso na töpö huima tä, Saulu anö Jesus a Kaikana tapama thaliö! Saulu a na Jesus a hapaloma thaliö! Ki ha, Tamaasöku tä uli ha a kili mai, Jesus a wäsätima thaliö!‑ ĩ na Pahanapé a kuu läoma. ²⁸Ĩ na Pahanapé a kuu läoma, ĩ na tä kua tä, ĩ töpö na Saulu a kua naiki nö, Jetusalẽi tä uli pewö hamö a huti pamö ²⁹a kili mai, Jesus a Kaikana wäsätima. Juteu töpönö köteeku töpö kai hini wi, ĩ töpö na Saulu anö ta wäsäö ha, Saulu a na ĩ juteu töpö hapalo nomöho opa hö̃töoma. Töpö hapalo hö̃töo nö, Saulu a säpa pi topama. ³⁰Saulu a säpa pi topa wi, Jesus a thapo wi ĩ töpönö ĩ ta hininö nö, Sesatéia tä uli hamö Saulu a hilakötö nö, Tasu tä uli hamö a simöpalöma.

³¹Ĩ na tä kua tä, Jutéia tä uli pata, Kaliléia tä uli pata, Samatia tä uli pata, ĩ na tä uli kui tä uli pewö hamö Jesus a thapo wi, ai töpönö ĩ töpö peama kõo maama. Pea mai, töpö lotetea apöpasoma. Jesus a Kaikana hini totiatalo opaö ha, Teusö a õsi kua tolele, ĩ anö ĩ töpö õsi lotetea apöpamanö nö, töpö satehea apöpamanöma.

Enéias a toa komanö noai ĩ ta

³²Ĩ na tä kua tä, Pedro a pata hupalo hätäpoti tä, Lita tä uli hamö Teusö a thapo wi ĩ töpö pilile, ĩ töpö na Pedro a hama huu kölöma. ³³A talalo nö, Enéias a hilo wi, ĩ a talalöma. Enéias a wani kõheo sinomo wi a wani kutenö, a pilio soatioma. A wani huatalo mai ha, 8 tökö inama kui tökö inama hasua kua waikipasoma. ³⁴Ĩ na a wani kupaloti tä, Pedro a pata hapalo nö, ‑Enéias a wani! Jesus Cristo anö wa toa komani ke. A hoköpaloö! Wa paa wi, ĩ au tökö õka kopalöö!‑ ĩ na Pedro a pata kuu ha, a wani hoköa soatasoma. ³⁵A hoköa soatalo nö, Lita tä uli ha töpö pilile ĩ töpö, Satõ tä uli ha töpö pilile ĩ töpö, ĩ na kilii töpö pewönö Enéias a wani talalö nö, ĩ töpönö Jesus a naka läa soalöma. Jesus a naka soalö nö, Jesus a thapoma.

Tapita a temöa konaso noai ĩ ta

³⁶Ĩ na tä kua tä, Jopi tä uli ha suö tä hai, ĩ Tapita a hilo wi, ĩ a kuoma. ‑Tapita a‑ juteu töpö kuu pasio wi, köteeku töpö kai pasiwö, ‑Tokasö a wani‑ ĩ töpö kuu pasioö. Tokasö a hai, Jesus a thapo wi ĩ a kuoma. Ĩ a noio opa sinomotii, toitai tä thaa sinomoö, wani tä na töpö honimo opati tä, ĩ töpö täpä sinomoö, ĩ na ĩ a kua sinomotima.

³⁷Ĩ na a kua tä, a salipalo nö, a nomasoma. A nomasoö ha, ai töpönö a nomawö salupalö nö, sai a hösöka ha a nomawö pi alaköma. ³⁸A alaköma tä, Jesus a thapo wi, Pedro a pata na ĩ töpönö polakapi töpö simönöma. ‑Lita tä uli ha Pedro a kua kulaiö!‑ ĩ na tä kuu hininö nö, Lita tä uli atepa apa kutenö, Pedro a na ĩ töpö simönöma.

Ĩ na tä kua tä, töpö simönö noai, ĩ töpö waloikitö nö, ‑Kamisamakönö wa nakamö huu ke‑ ĩ na Pedro a na ĩ na ĩ töpö kuuma. ³⁹Ĩ na töpö kuu ha, Pedro a nokalolö nö, a waloikitö nö, sai a hösöka hamö Pedro a kai tupolö nö, ĩ ha suö töpö hai ĩ peanopö töpö noma waikilaso noai, Pedro a na ĩ töpö suö sototatima. Tokasö a nomasoö ha, töpö ö̃kö kai sototatima. Töpö ö̃kö kai sototati nö, Tokasö anö haloi ösökö tiäpalö noai, Pedro a na ĩ töpö suönö ĩ ösökö möma hätäpotima. Haloi ösökö hototii, ai ösökö lapei, ĩ na ösökö kui, ĩ ösökö satehe epii ösökö möma hätäpotima.

⁴⁰Ĩ na tä kua tä, Pedro a patanö ĩ töpö pewö atupamanö nö, pili a maekonö a hĩta thaiki nö, Teusö a na a hapaloma. Teusö a na a hapalo paio nö, nomawö tä pi alale ha, ĩ ha Pedro a öpa nomöhötalo nö, ‑Tapita ai. A hoköpaloö!‑ ĩ na Pedro a kuu ha, a mamo tetea kopasoma. A mamo tetea kopalo nö, Pedro a talalö nö, a loa sononoa kopasoma. ⁴¹A loa sononoa kopasoö ha, Pedro a ami totokö nö, a söpöa konöma. A söpöa konö nö, Jesus a thapo wi ĩ töpö, suö töpö sinoa kopaso noai ĩ töpö, ĩ na töpö kui, Pedro anö ĩ töpö naka kõo nö, suö tä temii ĩ a möma kõoma. ⁴²Suö tä temöa komani wi, Jopi tä uli pewö hamö ĩ ta wäsä hätäpoö ha, Jesus a Kaikana thapo wi, ĩ töpö satehe epii töpö kupasoma.

⁴³Ĩ na tä kua tä, salo ösö na Simão a kalipalo sinomo wi, ĩ a sai ha Pedro a kutioma. Ĩ ha a kutia tä, satehe epii tä mumi matasoma.

Sotatu tä Kohonéliu a

¹Sesatéia tä uli pata ha Kohonéliu a pilioma. Sotatu töpö satehe epii, 600 töpö kui, ĩ itália tili töpö sotatu a hilo wi, ĩ töpö na Kohonéliu a sotatumo naioma. Kohonéliu anö satehe epii, ĩ 100 sotatu töpö kui töpö simöa sinomotima. ²Kohonéliu a, kama ai töpö, ĩ na töpö kui töpönö Teusö a hini totio wi, ĩ töpö kuoma. Ĩ töpö Teusömo sinomoma. Wani tä na juteu töpö honimo wi, ĩ töpö na Kohonéliu anö sitipa kökö totoma sinomoma. Teusö a na a hapalo sinomoma.

³Ĩ na tä kua tä, motokö akäpo tä, Teusö a hai ĩ ãju tä waloköma. A walokö noai, Kohonéliu anö ĩ a uni talalöma. Ĩ a talalö nö, ĩ ãju tä aiki, ‑Kohonéliu ai!‑ a kuu ha, ⁴Kohonéliu a kili ipa salo, a mamo teteo päoma. A mamo tetea päiki nö, ‑Ka tä, pata tä?‑ a kuuma. A kuu ha, ‑Teusö a na wa hapalo sinomo wi, ĩ tä na Teusö a pi moti mai kitäö! Wani tä na töpö honimo opa tä, ĩ wa töpö täpä sinomo wi, ĩ tä na Teusö a pi moti nai mai kitäö! ⁵Önö kutenö, Jopi tä uli ha ai töpö simöpalöö! Simão a, ĩ Pedro a hilo kua naine, ĩ a nakalö tasopököö! ⁶Salo ösö na ai Simão a kalipalo sinomo wi, mötati tuu kasö pata hamö ĩ a hai ĩ sai a kulati, ĩ a na Simão Pedro a kua naia kule‑ ĩ na ĩ ãju tä kuuma. ⁷Ĩ na a kuo totioikilö nö, a konasolö noai ha, Kohonéliu anö töpö kalipalama sinomo wi, ĩ ai polakapi töpö nakalöma. Kohonéliu a na ai sotatu tä kalipalo sinomo noai, ĩ a naka nainöma. Ĩ sotatu tänö Teusö a hini totio wi, ĩ a naka nainöma. ⁸Töpö nakalö nö, ãju tä kuu noai, ĩ ta wäsä nö, Jopi tä uli ha ĩ töpö simönöma.

Pedro anö salo pö uni tapa noai ĩ ta

⁹Ĩ hena tä, Jopi tä uli ha töpö ateo opa tä, motokö hẽtupo tä, Teusö a na Pedro a hapalo pia salo, sai a hösöka salöi, ĩ a sai hösöka na a tupölöma. ¹⁰Teusö a na a hapaloti tä, a oia apöpasoma. A oi ipö tä, ĩ a sai õsimö ha ai töpönö nii tä thapala tä, salo kökö pi ithopaso wi, Pedro anö ĩ tä uni tapama. ¹¹Hutu mosökö hãkopalö laso noai, ĩ tä tapa tä, ĩ taka hamö sawana tökö kui, tä ola õkala tä, tä ithopole, ĩ tä talalöma. ¹²Ĩ sawana tökö õsimö ha, masita tä uli ha salo pö holea pasio wi ĩ pö, ösö ha salo pö katä pasio wi ĩ pö, ĩ na kökö kui kökö pewö titioma. ¹³Ĩ kökö pi itho lasoa tä, Pedro anö ta hinima. ‑Pedro ai. A öpaikoö! Salo kökö pi itho pole, ĩ kökö ithosoö ha, kökö wani säpalö nö, kökö oalöö!‑ ĩ na ta kuu haio lasoma.

¹⁴Ĩ na ta kuu haia lasoa ha, ‑Pata tä! Ĩ na a kuu tihöö! Ĩ sa kö oa mai kitä. Ĩ kökö sami. Sa waio opaö‑ ĩ na Pedro a kuu hö̃töoma. ¹⁵Ĩ na Pedro a kuu hö̃töoö ha, ta pata hapalo kota nö, ‑Teusö anö pö ausia totipalö noai, ĩ pö na, “Töpö wani sami ipöö!” a kuu tihöö!‑ ĩ na ta kuuma. ¹⁶‑Mi kökö oalöö! Mi kökö oalöö! Mi kökö oalöö!‑ ĩ na Pedro a na ĩ na ĩ ta kuu pi kupasoma, ĩ tökö soatawö, ĩ salo pö kai ösöa kõo soasolöma.

¹⁷Ĩ salo pö na Pedro a pi tapotiki nö, ‑Wi na taköö!‑ ĩ na a pi kuti tä, Kohonéliu anö töpö simöpalö noai, ĩ töpö aiki, ‑Witi ha Simão sai pö kua?‑ ĩ na ai töpö na ĩ na töpö kuu nö, Pedro a kuta wi ĩ a sai sika hokolole, ĩ ha piliso holele, ĩ taka ha ĩ töpö waloiki nö, ¹⁸‑Hi a sai na hama tä Simão Pedro a kua kule?‑ ĩ na ĩ töpö kuuma.

¹⁹Ĩ na tä kua soa tä, salo pö na Pedro a pi tapoa soa tä, Teusö a õsi kua tolele, ĩ aiki, ‑Pedro ai! Polakapi töpönö wa taeti kuleö! ²⁰Önö kutenö, wa öpapalo nö, a ithopaloö! Ĩ töpö na a nokalolöö! Kamisanö sa töpö simöpalö noai, ĩ töpö kutenö, ĩ töpö na a noka kili tihöö!‑ Pedro a na ĩ na Teusö a õsi kua tolele, ĩ a kuuma.

²¹Ĩ na Teusö a õsi kua tolele, ĩ a kuu ha, Pedro a ithoa soatalo nö, ĩ töpö na, ‑Kamakönö sa taeti pole, ĩ saö! Wi na makö pi kuu salo, makö huu ke?‑ ĩ na Pedro a kuuma. ²²Ĩ na Pedro a kuu ha, ‑Kohonéliu anö satehe epii, 100 sotatu töpö kui töpö simöa sinomo wi, ĩ anö samakö simöpalöma. Ĩ a totiatalo opaö. Teusö a hini totio wi ĩ a. “Kohonéliu a totiatalo opaö” ĩ na Kohonéliu a na ĩ na juteu töpö pewö kuu sinomoö‑ ĩ na ĩ töpö kuuma. Ĩ na töpö kuu nö, ‑Kohonéliu a na Teusö a hai ĩ ãju tä aiki, “Pedro a nakalötöö! Au sai a ha a waloki ha, ma hinipököö!” ĩ na ãju tä kuumaö!‑ ĩ na töpö kuuma.

²³Ĩ na töpö kuu ha, ‑Hapo. Hisa ha pö kua paikiö!‑ Pedro a kuu ha, ĩ ha töpö kua paiköma. Ĩ ha töpö kuo paikö nö, ĩ hena tä, ĩ töpö na Pedro a noka soasolöma. Jopi tä uli ha Jesus a thapo wi ĩ töpö pilio noai, ĩ ai töpö noka naisolöma. ²⁴Ĩ töpö nokalolö nö, ĩ hena tä, Sesatéia tä uli ha ĩ töpö kopölöma. Kohonéliu anö ĩ töpö kõo tatima. Ĩ töpö kõo tatima kutenö, kama ai töpö, kama hai ĩ noi töpö, ĩ na töpö kui töpö naka läo waikitama.

²⁵Ĩ na tä kua tä, Kohonéliu a sai pö ha Pedro a lisipo tä, Pedro a na Kohonéliu a waloa läiki nö, ‑Pedro a hai ĩ pata tä sai‑ ĩ na Kohonéliu a pi kuu salo, pili a maekonö a hĩta thaiki nö, a mãi po läoma. ²⁶Kohonéliu a maekonö a hĩta thaiki nö, a mãi poa ha, Pedro anö a öpapamanö nö, ‑A öpapaloö! Sanöma wa kui na, ĩ na sa kuö hö̃töwö‑ ĩ na Pedro a kuuma. ²⁷Ĩ na a kuu nö, Kohonéliu a na a hapalo nö, a lisipalo nö, töpö satehe epii töpö lole, ĩ töpö talalöma. ²⁸Ĩ töpö talalö nö, ĩ töpö na Pedro a hapalo nö, ‑Juteu pata töpö sai aiki, “Juteu töpö pasi mai ĩ töpö na juteu wa noimoti maikiö! Ĩ tiko töpö na a loo naitio tihöö!” ĩ na pata töpö kuu wi ĩ ma tä taö waikia kule. Ĩ na juteu pata töpö kuu kule maaki, Teusö aiki, “Ai sanöma tä na, ‘Ĩ a sami’ ĩ na a kuu tihöö!” kamisa na ĩ na Teusö a kuuma. ²⁹Önö kutenö, kamakönö sa nakaö ha, “Päla. Sa huu mai kitä” sa kuu mai ha, sa noka soatasolöma‑ ĩ na Pedro a kuuma. Ĩ na a kuu nö, ‑Wi na wa pi kuu salo, sa naka kipili?‑ ĩ na Pedro a kuuma.

³⁰Ĩ na a kuu ha, Kohonéliu aiki, ‑Hi wisahata ha, motokö akäpo tä, kamisa sai pö na sa kuiki nö, Teusö a na sa hapalotima. Teusö a na sa hapalo tä, ĩ ai tä mumi, ai tä mumi, ai tä mumi, ĩ na kilii tä mumi mapasoma. Teusö a na sa hapaloti tä, haloi ösö ausi ipii ösökö na ai tä haloiki nö, kamisa na a tapamonasoma. ³¹A tapamono nö, “Kohonéliu ai! Teusö a na wa hapaloti noai, Teusö anö ĩ ta hinimaö! Wani tä na töpö honimo pasitia tä, ĩ töpö na sitipa wa totoma sinomo wi ĩ tä na Teusö a pi moti mai kitäö! ³²Önö kutenö, Jopi tä uli ha ai töpö simöpalöö! Simão a, ĩ Pedro a hilo kua naine, ĩ ma nakalöpököö! Salo ösö na ai Simão a kalipalo sinomoti wi, mötati tuu kasö pata ha ĩ a sai pö kulati, ĩ a na Simão Pedro a hamamo tasoa” kamisa na ĩ na ĩ a kuu kipiliö! ³³Ĩ na ĩ a kuu ha, wa naka soalöma. Wa huu soatale, ĩ tä topa. Huki hi a sai ha samakö pewö kua kule. Hisa ha Teusö a kua naia kule. “Ĩ töpö na ĩ ta wäsäö!” ĩ na Teusö anö wa noa thaa noai, ĩ sama ta hini pi topa apa kule‑ ĩ na Kohonéliu a kuuma.

Kohonéliu töpö na Pedro a kuu noai ĩ ta

³⁴Ĩ na Kohonéliu a kuu ha, Pedro a hapalo hö̃töoma. A hapalo nö, ‑Huki sa pi hatukulaso ke. Teusö anö sanöma makö pewö pi ipaö. Ai töpö pi ipa asaö, ai töpö pii mi, ĩ na Teusö a kua mai kitä. Ĩ makö pewö pi ipa soataö. ³⁵Ĩ tä uli pewö hamö sanöma töpö pewö pilia setekepai, ĩ ai tänö Teusö a hinii, ĩ anö toitai tä thaö, ĩ na ai tä kuaö ha, ĩ a na Teusö a noimo opa hö̃töo kitä. “Tiko wa kutenö, kawa na sa noimo mai kitäö!” ĩ na Teusö a kuu mai kitä. ³⁶Isöhaeu makö na Teusö anö kama kai a simönö noai, ĩ ma ta taö waikile kitä. Sanöma makö pewö na Jesus Cristo a kaikanamo wi, ĩ anö makö pewö noima kõoö ha, Teusö a na makö noimo opa wi, ĩ ta topa apöle, Teusö anö ĩ ta wäsäma. ³⁷“Wanisala ma tä thati wi, ĩ ma tä hosalö nö, pö mãi õmonoö!” ĩ na João a kuti noai ha, Kaliléia tä uli pata na ai töpönö Jesus ta wäsä soaköma. Jutéia tä uli pewö pata ha ĩ ta wäsä nömöoma. ³⁸“Teusö anö nasaté tili tä Jesus a sailö nö, Jesus a na Teusö anö kama õsi kua tolele ĩ a õsi ithomanö nö, Jesus a õsi na Teusö a õsi kua tolele, ĩ a kuiki nö, Jesus a õsi lotetepamanömaö!” ĩ töpö wäo nö, ĩ na töpö kuu hätäpotima. Ĩ töpö kuu hätäpoti noai, ĩ ma ta hini ipa waikile kitä. Jesus a na Teusö a kua totiköma kutenö, ĩ tä uli pewö hamö Jesus a huti nö, sanöma töpö totiapala apati nö, ai töpö na Sai tä sai pata sapäko opati noai, Jesus anö ĩ töpö pewö toa komanöma.

³⁹Jetusalẽi tä uli pata, ai tä uli ha ai juteu töpö pilile ĩ tä uli, ĩ na kilii tä uli na Jesus a huti pamö a kua soataloti noai, ĩ sama tä tapa kipili. Hii ti pakalai ti ha ai töpönö söpala ösönö Jesus a lototomakö nö, a säpali kipili. ⁴⁰A säpali kipili maaki, polakapi tä mumi matalo nö, Teusö anö a temöa komanöma thali. A temöa komanö noai ha, Teusö anö a tapamoa komani kipili. ⁴¹Ĩ töpö pewö na kuno mai. Teusö anö samakö saipalö noai, ĩ samakö na Jesus a tapamoa komani kipili. Jesus a temöa kono nö, kamisamakö na a iapalo naio kipili. Ĩ samakö na Teusö anö Jesus a tapamoa komani kipili. ⁴²Kamisamakö na Jesus a tapamoa kono nö, ĩ na samakö noa thaa kipili: “Ĩ töpö pewö na ta topa apöle ĩ ta wäsäö! ‘Teusö anö Jesus a saipalöma kutenö, sanöma töpö pewö na tä makokama läo kitä. ‑Makö totiatalo opa asama kutenö, Teusö a sai pö ha pö kononöö!‑ ai töpö na ĩ na Jesus a kuu asa kitäö! Ĩ na tä kua tä, ai töpö na, ‑Makö wanisala apatima kutenö, töpö pea sinomo wi, ĩ töpö uli pö na pö kõa pasilolöö!‑ ĩ na Jesus anö ĩ töpö noa thaa pasio kitäö! Ai töpö temö asawö, ai töpö nomawö pasiwö, ĩ na töpö kui töpö na Jesus a kuu totio kitäö!’ ĩ na pö kuu hätäpoö!” ĩ na Jesus anö samakö noa thaa kipiliö! ⁴³Teusö a kai a wäsä sinomoti noai, ĩ töpö pewönö Jesus a wäsä totioma. Jesus a wäsä nö, ĩ na ĩ töpö kuuma: “‘Jesus a pitili’ ai töpö pi kuu nö, ĩ töpönö Jesus a thapo kutenö, ĩ töpönö wanisala tä thatala apati noai, ĩ tä na Teusö a hĩso opa noai, Jesus anö ĩ tä maa totia kopamani kitäö!” ĩ na Teusö ta wäsä noai, ĩ na ĩ töpö kuuma‑ ĩ na Pedro a kuu totiatalotima.

⁴⁴Ĩ na Pedro a kuu nö, a hapalo soa tä, Pedro a hini noai, ĩ töpö pewö na Teusö a õsi kua tolele, ĩ a itholo nö, ĩ töpö na a kuköma. ^45-46Ĩ töpö na Teusö a õsi kua tolele, ĩ a kukö noai, ĩ töpönö tä kai a aipö öpii tä kai a thaa nö, ‑Teusö a totiatalo opa asawöö!‑ ĩ na töpö kupaloma. Ĩ töpö kupalo wi, juteu töpönö Jesus a thapo noai, Pedro anö ĩ töpö hama kai huu noai, ĩ töpönö ĩ töpö kai aipö a hininö nö, töpö pi honipo nö, ‑Hi töpö hai, juteu töpö pasi mai kitä maaki, ĩ töpö na Teusö a õsi kua tolele, ĩ a lisia nö kilipamanö noa ia!‑ ĩ na töpö pi honipo opa nö, töpö kupalo opama.

⁴⁷Ĩ na tä kua tä, Pedro a hapaloma. ‑“Hi töpö mãi õma maikiö!” ai tä kuu kitä ta o? Kamakönö Teusö a õsi kua tolele, ĩ ma täli kipili. Ĩ na makö kuapili na, ĩ na hi töpö kua hö̃töo ke nökö. Önö kutenö, hi töpö mãi õmonasopököö!‑ ĩ na Pedro a kuu nö, ⁴⁸‑Jesus Cristo a hilo wi, hi töpönö ĩ a thapo kutenö, ĩ ma töpö mãi õmananöpöö!‑ ĩ na Pedro anö töpö noa thama.

Ĩ na tä kua tä, Kohonéliu töpö aiki, ‑Kamisamakö na a kua paikiö! Polakapi wa pi mio nö, wa konasolöpö‑ Pedro a na ĩ na töpö kuuma.

Kohonéliu töpö kua noai, Pedro anö ĩ ta wäsäti pole ĩ ta

¹Ĩ na tä kua tä, ‑Juteu töpö pasi mai ĩ töpönö Teusö ta hini naiomaö!‑ ĩ na ai juteu töpö kuuma. Jesus anö töpö simönö noai ĩ töpö, ai töpönö Jesus a thapo noai, Jutéia tä uli pata hamö ĩ töpö pilile ĩ töpö, ĩ na kili töpönö, ĩ na tä kuu wi ta hinima.

²Ĩ na tä kua tä, Jetusalẽi tä uli pata ha Pedro a kõo tä, ai juteu töpönö Jesus a thapo wi ĩ töpönö a päsäpa läoma. ³‑Sanöma makö isi ola ösö hosamo mai ha, Teusö ma thapo mai kitä‑ ĩ juteu töpö kuu sinomoma. Pedro a na ĩ töpö hapalo nö, ‑Töpö isi ola ösö hosamo maa noai, ĩ töpö na wa hamamo nö, ĩ töpö na wa iapalo silia apa thaliö!‑ ĩ na töpö kuu läoma.

⁴Ĩ na töpö kuu ha, Pedro a hapalo hö̃töoma. Kohonéliu a sai pö ha töpö kua noai, ĩ tä pewö a wäsä hö̃töoma. ⁵Ĩ na a kuuma: ‑Jopi tä uli ha Teusö a na sa hapalo tä, uni sa tä tapama. Sawana tökö kui, hi tä hẽtu ha ĩ sawana tökö kuoma, kamisa kuo pa ĩ sawana tä ola õkala tä, tökö ithosoma. ⁶Ĩ tökö ithosoma, ĩ tä õsimö ha sa tä möö ha, salo pö hiima, ulu tä uli ha salo pö hupalo wi ĩ pö, masita tä uli ha salo pö holea pasio wi ĩ pö, salo pö katä wi ĩ pö, ĩ na kilii kökö pewö titioma. ⁷Ĩ na tä kua tä, “Pedro ai. A öpaikiö! Mi salo wa kökö säpalö nö, kökö oalöö!” ĩ na ta kuuma. ⁸Ĩ na ta kuu ha, “Pata tä. Naiö! Pö wani samii sa pö oa tai mi saiö!” ĩ na sa kuu hö̃töoma. ⁹Ĩ na sa kuu hö̃töoö ha, ta pata hapalo kota nö, “Teusö anö pö ausipalö noai, ĩ pö na ‘Sami’ a kuu tihöö!” ĩ na ta kuuma. ¹⁰“Mi kökö oalöö! Mi kökö oalöö! Mi kökö oalöö!” ĩ na kamisa na ĩ na ta kuu pi kupasoma, ĩ tökö soatawö, ĩ salo pö kai ösöa kõo soasolöma.

¹¹Ĩ na tä kua soa tä, sa kuta pasio wi, ĩ a sai ha sa kua tä, 3 töpö kui töpö waloköma. Sesatéia tä uli ha ĩ töpö kuo wi, ĩ töpö simöpalö kölöma, töpö waloköma. ¹²Ĩ töpö waloki ha, Teusö a õsi kua tolele, ĩ a hapalo nö, “Pedro ai. Ĩ töpö na a noka soatalolöö!” a kuuma. Ĩ na a kuu ha, sa noka soasolöma. Jopi tä uli ha Jesus a thapo wi, ĩ 6 töpö kui töpö noka naipasoma. Samakö noka naipalo nö, Kohonéliu a sai pö ha samakö waloikitö nö, samakö lisipoma. ¹³Samakö lisipoö ha, Kohonéliu a hapalo läo nö, “Kamisa sai pö ha ãju tä öpa tä, ĩ sa talalöma. Ĩ ãju tä aiki, ‘Jopi tä uli ha ai wa töpö simöpalö nö, Simão Pedro a nakalötöö! ¹⁴Kawa na Pedro anö ta wäsä piale, ĩ wa ta hini ha, Teusö anö wa täa kõa läli kitäö! Au ai töpö täapa kõo läo naio kitäö!’ ĩ na ĩ ãju tä kuu kipiliö!” ĩ na Kohonéliu a kuu kipili.

¹⁵Ĩ na Kohonéliu a kuu ha, sa hapalo kõo pia tä, somi tä Teusö a õsi kua tolele, ĩ a ithopalo nö, kamakö na a kua kukö noai na, ĩ na Kohonéliu töpö na ĩ na Teusö a õsi kua tolele, ĩ a kua kua hö̃tököma. ¹⁶Ĩ töpö na Teusö a õsi kua tolele, ĩ a kuki ha, Jesus Kaikana a kuu noai, ĩ tä na sa pi hatukulasoma. “João anö maa tuu na makö mãi õma waikioma maaki, kamisanö Teusö a õsi kua tolele, ĩ a na makö uni mãi õma satia kitäö!” ĩ na Jesus a kuu noai, ĩ tä na sa pi hatukulasoma. ¹⁷Jesus Cristo a lö kui ĩ pata ma tä täli ha, Teusö anö kama õsi kua tolele, kamakö na ĩ a õsi thakö noai, tiko töpö na ĩ a õsi thaa naiköma ta pi kuu mai. Ĩ tiko töpö na Teusö anö kama õsi thaa pi topa tä, Teusö sa wasu läo kitä ta o? Teusö sa wasu läo mai kitä. Önö kutenö, tiko töpö na Teusö anö kama õsi thakö noai, ĩ tä, “Ĩ na kuno mai” sa pi kuu maama‑ ĩ na Pedro a kuu totio opama. ¹⁸Ĩ na Pedro a kuu totio opaö ha, ĩ juteu töpönö Pedro a päsäpa matasoma. Teusö a na, ‑Aitaköö!‑ töpö kuu nö, ‑“Tiko töpö maaki, ĩ töpö aiki, ‘Hö. Wanisala sa tä thaa wani ipö kõo sai taköö! Jesus a na sa mamo teteo totioköö!’ ĩ na töpö pi kuu ha, ĩ töpö õsi palimipo naiopököö!” ĩ na Teusö a pi kuu noa‑ ĩ na ĩ töpö kupaloma.

Ãsiokia tä uli ha Jesus a thapo wi ĩ töpö hai, ĩ Cristo töpö a hilo soma noai ĩ ta

¹⁹Ĩ na tä kua tä, Estêvão a säa waikipalö noai ha, Jesus a thapo wi ĩ töpö peamati ha, töpö selekepalo nö, pai hamö ĩ töpö hulasolöma. Penísia tä uli, Sipöti tä uli, Ãsiokia tä uli, ĩ na tökö uli kui tökö uli hamö töpö kua wäkö tasoma. Ĩ töpö huulö pa juteu töpö na ta wäsä asatioma. ²⁰Ĩ na tä kua tä, ai töpö hai, ĩ sipöti tili töpö, siteni tili töpö, ĩ na töpö kui, Ãsiokia tä uli ha töpö waloiki nö, juteu töpö pasi mai, ĩ töpö na Jesus a Kaikana wäsä naioma. ²¹Jesus a wäsä wi, Teusö anö ĩ töpö kai a lotetepamani ha, tä hini noai, ĩ töpö aiki, ‑Jesus a pitili‑ ĩ na töpö satehe epii töpö õsi kuu nö, Jesus a thapo wi ĩ töpö kupasoma.

²²Ĩ na tä kua tä, ‑Ãsiokia tili töpö satehe epii töpönö Jesus a thapo thaliö!‑ ĩ na Jetusalẽi tä uli pata ha Jesus a thapo wi ĩ töpönö ĩ ta kuu hininö nö, Ãsiokia tä uli hamö ĩ töpönö Pahanapé a simönöma. ²³Ãsiokia tä uli hamö Pahanapé a waloikitö nö, ‑Teusö anö hi töpö totiapala noa‑ ĩ na a pi kuu nö, a pi mönahama. Ĩ töpö pewö na a hapalo totio nö, ‑Jesus pata ma tä hosa mai, ma hini totiatalotipököö!‑ ĩ na töpö noa thama. ²⁴Pahanapé a topa apama. Teusö a õsi kua tolele, ĩ anö a õsi lotetepama sinomotima. ‑Jesus a pitili‑ ĩ na a pi kuu totioma. Ĩ na Pahanapé a kuama. Ĩ na a kuama ha, ĩ töpö na a hapaloö ha, ĩ töpö satehe epii töpönö Jesus a tälö nö, a thalöma.

²⁵Töpö satehe epii töpönö Jesus a thalöma, Tasu tä uli hamö Pahanapé anö Saulu a taemö hulasolöma. ²⁶A talalö nö, Ãsiokia tä uli hamö a hila kõkö tasoma. A hila kokötö nö, Jesus a thapo wi ĩ töpö na Pahanapé a, Saulu a, ĩ na kilii töpö kokamo naitio nö, sami tä inama na ĩ töpönö töpö satehe epii töpö pi hatukamatima. Ĩ na tä kua tä, Ãsiokia tä uli ha Jesus a thapo wi ĩ töpö hai, ĩ Cristo töpö a hilo somama.

²⁷Ĩ na tä kua tä, Jetusalẽi tä uli pata ha Teusö a kai a wäsä wi, ĩ töpö kuoma, töpö alulö nö, Ãsiokia tä uli ha ĩ töpö walokö tasoma. ²⁸Töpö waloikitö nö, Teusö a kai a wäsä wi, ĩ ai tä hai, ĩ Akapu a hai, Teusö a õsi kua tolele, ĩ anö ĩ a pi hatukupamani ha, ĩ a wäoma. A wäo nö, ‑Tä uli pewö pata oia apöpaso kitä‑ ĩ na Akapu a kuuma. Akapu a kuu noai, ĩ pitili ta kuoma. Waiha homa tili tä kaikana Cláudio a kaikanamo tä, hi masita tä uli pewö pata oia totia apöpasoma. ²⁹Ĩ na Akapu a kuu ha, Jesus a thapo wi ĩ töpö aiki, ‑Sitipa ma kökö kokapalö nö, Jutéia tä uli pata ha Jesus a thapo wi ĩ töpö oi ipii, ĩ töpö na sitipa ma kökö simöpalö nököö!‑ ĩ na töpö kuu ha, ‑Awai. Ipa sitipa kökö kule, ĩ sa kökö ose totoki kitäö!‑ ĩ na ĩ töpö pewö kuu nö, ³⁰sitipa kökö kokapalö nö, kökö simöpalöma. Pahanapé a, Saulu a, ĩ na kilii töpö na, ‑Ki hamö Jesus a thapo wi ĩ pata töpö na hi sitipa kökö totokötöö!‑ ĩ na töpö kuu nö, sitipa kökö simöpalöma.

Titita wi a sai ha Pedro a lisia kopamanö noai ĩ ta

^1-2Ĩ na tä kua tä, Jesus a thapo wi, kaikana tä Etoosisö a patanö ĩ ai töpö namo simököma. João a poose Tiago a, poo anö ĩ a pahotipalöma. ³A pahotipalöma ha, ‑Aitaköö!‑ ĩ na juteu töpö kuuma. Ĩ na juteu töpö kuuma salo, Pedro a namo simöa nömököma. Ĩsa ãi hölömo mai, ĩ ãi na juteu töpö iapalo tä, Pedro a namo simöa nömököma. ⁴A namo simöa nömökö nö, a huölö nö, titita wi a sai õsi ha Pedro a titikö tasoma. A titiki tasoö ha, Pedro a na sotatu töpö satehei töpö mamo läapaloma. Hi ai tökö manana, ai tökö manana, ĩ töpö noa ha, ai tökö manana, ai tökö manana, ĩ töpö noa ha, ai tökö manana, ai tökö manana, ĩ töpö noa ha ai tökö manana, ai tökö manana, ĩ na sotatu töpö kui, Pedro a na töpö mamo läapaloma. Etoosisö a pata aiki, ‑Juteu töpö pásökoamo noai ha, ĩ töpö mamo tetela tä Pedro sa säpali pia salo‑ ĩ na a pi pata kuu nö, Pedro a titia paiköma.

⁵Ĩ hamö Pedro a tititioma maaki, tiko hamö Jesus a thapo wi, Teusö a na ĩ töpö hapalo opa hö̃tötioma. ‑Pedro a noamaö! Hapa. Etoosisö a pata na Pedro a noamaö!‑ ĩ na töpö kutima.

⁶Ĩ na tä kua tä, Etoosisö a patanö Pedro a säpama pia tä, ĩ tä mumi ha Pedro a mitioma. Söpala ösö totonö a õka kule. Pili a tutakö hamö ai sotatu tä läa kule. Ai a tutakö hẽtu hamö ai sotatu tä läa kule. Sai a päka lototole, ĩ a sai päka ha ai sotatu töpö öpa lätia. Ĩ ha Pedro a mia kai patia. ⁷Ĩ na Pedro a mia kai patia tä, ĩ hamö ãju tä waloa haluköma. Ĩ a waloa haluköma, ĩ sai õsimö hamö tä pata wakala apöki. Ta pata wakala apömakö nö, ĩ ãju tänö Pedro a hãkanakö höpöpalö nö, a natamanö nö, ‑Pedro ai. A hoköa haitaloö!‑ ĩ na a kuu ha, söpala ösö totonö a ami õkale, ĩ toto kea soatamanöma. ⁸Ĩ toto kea soatamanö nö, ‑Au sita a thakö nö, au pili ami pösö thaa kõo haitalöö!‑ ĩ na ãju tä kuuma. Ĩ na a kuu ha, Pedro anö kama hai ĩ sita a thaki, kama pili ami pösö thaki, ĩ na a kuama. Ĩ na a kuaö ha, ‑Au haloi ösö haloa haitalö nö, kamisa na a noka kõo soataloö!‑ ĩ na ĩ ãju tä kuuma. ⁹Ĩ na a kuu ha, ‑Ö̃kö‑ Pedro a kuu hö̃töo nö, ĩ ãju tä na a noka kõo soatalolö nö, titita wi a sai õsimö ha a kuoma maaki, a atua kopasoma. ‑Sa thaa kopali ke‑ ĩ na Pedro a pi kuu pola nö kuno mai, ‑Sa manimo päa kuleö!‑ ĩ na a pi kuu päoma. ¹⁰Ĩ na a pi kuu päa tä, ai sotatu töpö läle, ĩ töpö na, hasu. Thapi tömö ai sotatu töpö läle, ĩ töpö na, hasu. Teusö anö ĩ sotatu töpö pi motipamanöma. Ĩ na ĩ töpö na ĩ ãju tänö Pedro a kai hasuiki nö, sai pö sika hamö tä hokolole, ĩ a taka päka kule, ĩ taka ha söpala ösö pata lale, ĩ söpala ösö pata ha Pedro a kai ateo opa tä, sanöma tä ami walio pola tä kuno mai, kama taka hãkoa päpasoö. Ĩ taka pata hãkoa päpaso wi, ĩ taka ha Pedro a kai lisia kõo soatalolö nö, piliso pata hamö a kai hua tolea kõo soatasolöma. A kai hua tolea soatasolö wi, ĩ tä, ĩ ãju tä kõa soatasolöö. ¹¹A kõa soatasolöma, Pedro aiki, ‑Ã ãi. Sa manimo maneö! Teusö anö sa thaa kopamani pia salo, kama hai ĩ ãju tä simöpalöma‑ ĩ na Pedro a kuuma. Ĩ na a kuu nö, ‑Etoosisö a patanö sa säpama piama maaki, ãju tänö sa koni ke. “Aitaka. Etoosisö a patanö Pedro a säa totipamani kitäö!” ĩ na juteu töpö pi kuu kule maaki, sa koni ke‑ ĩ na Pedro a kuuma. ¹²Ĩ na Pedro a kuu nö, João Marcos a pöpönö Maria a sai pö hamö a hulasolöma. Ĩ a sai pö ha töpö satehe epii töpö kokamo nö, Teusö a na ĩ töpö hapalo halutima.

¹³Ĩ töpö kokamo halua tä, ĩ sai a hokolole, ĩ tä päka ha Pedro a waloiki nö, töpö naka nö, ĩ a sai ha moko tä kalipalo sinomo wi, ĩ Hosisoma a hilo wi, Pedro a na ĩ a walo läo pia tä, Pedro a hapalo pole, ĩ ta hininö nö, ¹⁴‑Ĩ Pedro a‑ ĩ na ĩ moko tä pi kuu nö, a pi mönaha apa salo, ĩ taka hãkopa paio mai ha, sai õsimö hamö a läläa sapa kotaiki nö, ‑Ki taka ha Pedro a öpa kulaiö!‑ ĩ na ĩ moko tä kuuma. ¹⁵Ĩ na a kuu kule maaki, ‑Hö. Wa isi waniho hãtoa päa kule‑ ĩ na töpö kuu ha, ‑Naiö! Pedro a öpa totia kulaiö!‑ ĩ na ĩ moko tä ku upama. Ĩ na a ku upaö ha, ‑Naiö! Pedro a õsi hãtowö‑ ĩ na ĩ töpö kuu tä, ¹⁶atu hamö Pedro anö ĩ töpö naka soa tasoma. Naka soatioö ha, ĩ töpönö taka hãkopalöma, Pedro a öpa talalö nö, ‑Kilia apawöö!‑ ĩ na ĩ töpö kupaloma. ¹⁷Ĩ na töpö kupaloö ha, Pedro a ami wasuo nö, a wäoma. Titita wi a sai ha Teusö anö Pedro a lisia kopamanö noai, ĩ tä pewö a wäsäma. Ĩ tä pewö a wäsä nö, ‑Tiago a, Jesus a thapo wi ĩ töpö, ĩ na töpö kui töpö na makö wäoö!‑ ĩ na Pedro a kuu nö, tiko hamö a hulasolöma.

¹⁸Ĩ na tä kua tä, tä halusoö ha, ki hamö sotatu töpö pi honipo opa nö, ‑Witi ha Pedro a kua kuno mai?‑ ĩ na sotatu töpö pi honihi kuuma. ¹⁹Ĩ töpö kuu ha, Etoosisö a pata aiki, ‑Pedro a taetöö!‑ a kuu kule maaki, a tapa maama. A tapa mi salo, ‑Sotatu töpö säpalöö!‑ ĩ na Etoosisö a pata kuuma. Pedro a tapa mi ha, sotatu töpö na Etoosisö a hapalo paio nö, ‑Makö läapalo tomöpo mi ipö sai thaiö!‑ ĩ na a kuu nö, ĩ sotatu töpö säpamanöma.

Ĩ na tä kua tä, Jutéia tä uli pata ha Etoosisö a pata kuoma, Sesatéia tä uli hamö a alulö nö, ĩ hamö a kutioma. ²⁰A kutia tä, situ tili töpö, sitomö tili töpö, Etoosisö a patanö ĩ na kilii töpö hĩsu thatima. Töpö hĩsu thati ha, ĩ töpö aiki, ‑Etoosisö kaikana a hĩso salo, kamakö na nii tä simöa mataso matimöö!‑ ĩ na ĩ töpö pi kuu nö, ‑Nii tä simöa matasoma, makö oi lukö matimöö!‑ ĩ na ĩ töpö pi kuu salo, Etoosisö a sai pö pata ha ĩ töpö asulöma.

Etoosisö a sai pö pata ha töpö talalo nö, Etoosisö a kotö ha a kalipalo sinomo wi, ĩ Plasötu a hilo wi, ĩ a na ĩ töpö hapalo paio nö, ‑Samakö pasilipo mi salo. “Makö wanihaso mai, makö noimaso kopököö!” ĩ na Etoosisö a pata na ĩ na wa kuu!‑ ĩ na Plasötu a na, ĩ na ĩ töpö kuuma. ²¹Ĩ na ĩ töpö kuu ha, ĩ na tä kua tä, Etoosisö a pata lö kui, ‑Awai. Ĩ tä wakala ha, kamakö na sa hapalo kitä‑ ĩ na a pata kuu nö, ĩ tä wakala kuki ha, kaikanamo wi, ĩ ösö na a haloiki nö, kaikanamo wi, ĩ lotami ti ha a loiki nö, ĩ töpö na Etoosisö a pata hapaloma. ²²A pata hapalo mataso noai ha, töpö sototole ĩ töpö aiki, ‑Sanöma tä hapalo kua päo wi na, ĩ na ĩ a pata hapalo kua päo mai, hi tä hẽtu ha pata töpö kulali, ĩ töpö na makö noamamo sinomo wi, ĩ töpö hapalo kuu wi na, ĩ na a pata hapalo kuu keheö!‑ lope epii ĩ na ĩ töpö kuuma. ²³Ĩ na ĩ töpö kuu ha, Etoosisö a pata aiki, ‑Teusö anö sa pi hatukupamanöma salo‑ ĩ na Etoosisö a pi kuu pola nö kuno mai, ‑Kama sa pi saimo nö, sa hapalo tao opa asa päo salo‑ ĩ na a pi kuu ha, Teusö a hai ĩ ãju tänö a pata säpalöma. Holemasi kökö na a pata oamanöma.

²⁴Ĩ na tä kua tä, Teusö ta palalo nö, ta hini totio noai, ĩ töpö satehea apöpasoma.

²⁵Ĩ na tä kua tä, Pahanapé a, Saulu a, ĩ na kilii töpönö wani tä na töpö honimo wi, Jetusalẽi tä uli pata ha ĩ töpö pilile, ĩ töpö na sitipa kökö totoa waikiki nö, Ãsiokia tä uli ha töpö konasolöma. João Marcos a kai konasolömae.

Pahanapé a, Saulu a, ĩ Paulo a hilo kua naine ĩ a, ĩ na kilii töpö simöpalö noai ĩ ta

¹Ĩ na tä kua tä, Ãsiokia tä uli ha Jesus a thapo wi ĩ töpö kokamo sinomo wi, ĩ töpö na Teusö a kai a wäsä sinomo wi ĩ töpö, Teusö a kai a taöma sinomo wi ĩ töpö, ĩ na töpö kui töpö kuoma. Ĩ na töpö a hilo kuama: Pahanapé a, Simão a, ĩ Nekötu a hilo kua naine ĩ a, siteni tili tä Lúsiu a, Manaẽi a, ĩ Etoosisö a kaikana pata na a pata naiso noai ĩ a, Saulu a, ĩ na ĩ töpö a hilo kuama. ²Ĩ töpö iatalo paio mai, töpö Teusömotima, töpö Teusömoti tä, Teusö a õsi kua tolele, ĩ aiki, ‑Pahanapé a, Saulu a, ĩ na kilii, kamisa na ĩ töpö kalipalo soka kuköpöö! “Ĩ töpönö Teusö tä kai a wäsä kuköpöö!” ĩ na sa pi kuu waikioma kutenö, ĩ töpö sokapalöö!‑ ĩ na Teusö a õsi kua tolele, ĩ a kuuma. ³Ĩ na a kuu ha, ĩ töpö iatalo paio mai, Teusö a na töpö hapaloö, ĩ na töpö kua nö, Pahanapé a, Saulu a, ĩ na kilii töpö na ĩ töpö ami makeiki nö, töpö simönöma.

Sipöti tä uli hamö

⁴Teusö a õsi kua tolele, ĩ anö Pahanapé a, Saulu a, ĩ na kilii töpö simöni ha, Selêusia tä uli hamö ĩ töpö hulasolöma. Ĩ hamö ĩ töpö waloikitö nö, mötati tuu mötali ha Sipöti tä uli kule, ĩ tä uli hamö, kutiata a pata hamö ĩ töpö hua nömösolöma. ⁵Töpö hua nömönonö nö, Salamina tä uli ha ĩ töpö waloiki nö, juteu töpö kokamo sinomo wi, ĩ sai pö pewö hamö ĩ töpö na Teusö tä kai a wäsä hätäpoma. Pahanapé, Saulu, ĩ na kilii töpö na João Marcos a nokapalo nö, ĩ töpö pasiliapalatima.

^6-8Ĩ na tä kua tä, Sipöti tä uli pewö hamö ĩ töpö huu waikio nö, Paposö tä uli ha töpö waloiki nö, Teusö ta wäsä tä, Pahajesus a wani kuo läoma. Pahajesus a na köteeku töpö aiki, ‑Elimasö a hilo‑ ĩ na ĩ töpö kuutoma. Elimasö a hai, ĩ sapuli tä kuoma. Juteu tä kuoma. ‑Teusö sa kai a wäsä totio wi, ĩ sa‑ ĩ na ĩ a holisi wani kutima. Sérgio Paulo a kaikana na Elimasö a wani kalipalo sinomotima. Sérgio Paulo a kaikana pi pata tao opama. Ĩ a patanö Teusö a kai a hini pi topa salo, Pahanapé a, Saulu a, ĩ na kilii töpö nakama. Ĩ töpö nakama maaki, Elimasö a waninö ĩ töpö wanipoma. Önö kutenö, kaikana tä na, ‑Hi töpö a hini tihöö! “Jesus ta pitili” ĩ na a pi kuu tihöö!‑ ĩ na Elimasö a wani kuuma. ⁹Ĩ na a kuu ha, Saulu a hai, ĩ Paulo a hilo kua naine, Teusö a õsi kua tolele, ĩ anö ĩ a lotetepamanöma kutenö, Elimasö a na Paulo a mamo tetea totiki nö, ¹⁰‑Sai tä sai pata hai ĩ ulu wa kuopa wi. Toitai, ĩ wa tä wasisama sinomo wi ĩ wa. Wanisala wa tä thaa sinomotiwö. Wa töpö mönama sinomoö. Teusö a kai a makoko opii, ĩ wa tä isi wanihama sinomoti salo. Ĩ na wa kua maiki ta pi kuu mai‑ ĩ na Paulo a kuuma. ¹¹Ĩ na a kuu nö, ‑Huki Teusö anö wa peama pia kuleö! Huki wa mamo höpöpöpama pia kuleö! Wa tä motokö sii tapa paio mai kitäö!‑ ĩ na sapuli tä Elimasö na ĩ na Paulo a kuuma. Ĩ na Paulo a kuu wi, ĩ tökö soatawö, Elimasö mamokö wani na ilasi tä pata keiki nö, a mamokö pewö höpöpöa totilo nö, ‑Sa tutupolöö!‑ ĩ na Elimasö a kuu kai wani hupaloma.

¹²Ĩ na tä kua tä, kaikana tänö ĩ tä pewö taa nö, ‑Jesus a pitili‑ ĩ na a pi kuu soatama. ‑Ö̃kö ta o! Ĩ na Jesus Kaikana a wäsä wi, ĩ na ĩ ta kua ta o‑ ĩ na kaikana a pi ku upa salo, ‑Jesus a pitili‑ ĩ na a pi kuuma.

Pisísia tä uli ha Ãsiokia tä uli kule, ĩ tä uli ha

¹³Ĩ na tä kua tä, Paposö tä uli ha Paulo töpö kuoma, kutiata pata hamö ĩ töpö hulasolöma. Pãpiilia tä uli ha Pehesi tä uli kule, ĩ hamö ĩ töpö hulasolöma maaki, Jetusalẽi tä uli pata hamö João Marcos a kõa pasisolöma.

¹⁴Ĩ na tä kua tä, Paulo a, ai töpö solo, Pehesi tä uli ha töpö hasuiki nö, Pisísia tä uli ha Ãsiokia tä uli kule, ĩ hamö ĩ töpö talaso lasoma. Ĩ hamö töpö talalolö nö, sápatu tä wakala ha, juteu töpö kokamo sinomo wi, ĩ a sai ha ĩ töpö holepalotö nö, töpö loköma. ¹⁵Töpö loköma, Moisés a kai sãökökö noai ĩ tä waheta, Teusö a wäsä sinomo wi ĩ töpönö tä sãökökö noai ĩ tä waheta, ĩ na tä waheta kui, pata töpönö ĩ tä waheta kateha nö, ai töpö na, ‑“Ai pö. Hi töpö kokamone, ĩ töpö pi lotetepamanöpö, ma ta wäsäpököö!” ĩ na Paulo töpö na ĩ na pö kuu!‑ ĩ na pata töpö kuuma.

¹⁶Pata töpö kuu noai, Paulo anö ĩ ta hini nö, a öpaiki nö, a ami wasuo nö, a hapaloma. A hapalo nö, ‑Isöhaeu pö! Juteu makö pasi mai, ĩ makö Teusömo naio wi ĩ pö! Sa hiniö! ¹⁷Hi isöhaeu töpö hai ĩ Teusö anö kamisamakö hai ĩ nö patapö töpö saia asapalö nö, esitu tili töpö uli ha ĩ nö patapö töpö pilia tä, ĩ töpö satehea apöpamanöma. Ĩ tä uli ha esitu tili töpönö isöhaeu töpö peama apaö ha, Teusö a lotete epö kutenö, ĩ töpö täa konöma. ¹⁸Tä uli pokei tä uli ha ĩ töpönö wanisala tä thapala apa soatia tä, tä inama satehe epii, 40 tä inama kui tä inama hasumaköma maaki, Teusö anö ĩ töpö hosa mai, töpö thapo soatioma. ^19-20Kanaã tä uli ha 7 tökö uli ha töpö pilia sätäle, Teusö anö ĩ töpö säpamanöma. Inama tä satehe epii, ĩ 450 tä inama kui tä inama matalo nö, Teusö anö ĩ töpö säpamanöma. Ĩ töpö säpamanö nö, kama hai ĩ isöhaeu töpö na ĩ tökö uli totokö nö, ĩ tökö uli ha kama hai ĩ töpö pilimaköma.

Töpö pilimaköma tä, Samueu anö Teusö a kai a wäsä sinomo noai, ĩ a patamo paio mai ha, Teusö anö isöhaeu töpö na ai pata töpö patamoma kuköma. ²¹Samueu a patamo tä, “Ai tä kaikanapalöö! Kaikana sama tä pii” ĩ na isöhaeu töpö kuu ha, Teusö anö Kisö a hai ĩ pelupö Sauu a kaikanapamanöma. Sauu a hai, pẽijamĩ tä kuoma. A kaikanamo tä, inama tä satehe epii, ĩ 40 tä inama kui tä inama hasupamanöma.

²²Ĩ na tä kua tä, Teusö anö Sauu a kaikanamo maa kopamanö nö, ĩ töpö na Davi a kaikanamoma nömöoma. Teusö anö Davi a kateha nö, “‘Jesé a hai ĩ pelupö Davi a totiatalo opaö. Davi sa pi ipaö’ ĩ na Davi anö sa pi thamama. Sa tä thama pi topa wi, Davi anö tä pewö thama hö̃töo kuki kitäö!” ĩ na Teusö a kuuma.

²³“Davi a hai ĩ ai tolewö tänö isöhaeu töpö noama kuki kitäö!” Teusö a kuu noai, ĩ pitili ta kuo totioma. Jesus anö isöhaeu töpö noamapö, Teusö anö ĩ a simöpalöma. ²⁴Jesus a walo paio mai ha, João aiki, “Makö pi tapomo sapamo nö, wanisala ma tä hosalö nö, pö mãi õmamoö!” ĩ na isöhaeu töpö pewö na João a wäoti nö, ĩ na a kutima. ²⁵Ĩ na João a kuti nö, a wäo sinomoti noai, ĩ tä mapo pia tä, “Witi pili sa? Wi na makö pi kuti kule? Makö noama wi, ĩ sa pasi mai kitäö! Kamisa noa ha, kamakö na ĩ a waloki kitäö! Ĩ a hai, ĩ pata tä sai. A topa apa asaö. Önö kutenö, sa topa pasio mi kutenö, ‘Jesus sa pasilipopököö!’ ĩ na sa pi kuu kili ipaö” ĩ na João a kuumaö!‑ ĩ na Paulo a kuuma.

²⁶Ĩ na Paulo a kuu nö, ‑Ipa pö! Abraão a hai ĩ ola pö! Juteu makö pasi mai ĩ makönö Teusö ma thapo naio wi, ĩ pö! “Jesus anö makö pewö täapa kõo läo pia salo!” ta kuu wi, kamakö na ĩ ta simöpalö lasoma. ²⁷Jetusalẽi tili töpö, jetusalẽi tili pata töpö, ĩ na töpö kui töpönö Jesus a taö totio maama. “Jesus anö sanöma makö täapa läo kõo wi ĩ a” ĩ na töpö pi kuu tai mio opama. Teusö a kai wäsäti noai, ĩ töpönö waheta tä sãököpalö noai, sápatu tä wakala pewö hamö ĩ tä waheta kateha sinomoti wi, ĩ ta taö hö̃töo maama. Ĩ na töpö kua salo, Jesus a namo simököma. “Waiha töpö täapa läo kõo wi ĩ a namo simöki kitäö!” ĩ na sutu ha Teusö a kai wäsä noai, ĩ na ĩ töpö kuu noai, ĩ na tä kua totiatalo opama. Jetusalẽi tili töpönö Jesus a namo simöa totiköma. ²⁸“Jesus anö wanisala tä thama kutenö, a säpamanöö!” ĩ na ĩ töpö kuu pi topama maaki, Jesus a topa apa kutenö, “Jesus a wanisala apama” töpö kuu tai mio opama. Ĩ na töpö kuu tai mio opama maaki, Pilatosö a pata na, “A säpamanöö!” ĩ na töpö ku upama.

²⁹“Ĩ na Jesus a thama kuki kitäö!” ĩ na sutu ha ĩ na Teusö tä waheta kuu paio noai, ĩ na ĩ tä kua totio opama. Ĩ töpönö Jesus a säa totipamanö nö, hii ti pakalai ti ha Jesus a nomasoö ha, Jesus a nomawö ithoa komanö nö, maa maka ha a nomawö titiköma. ³⁰A nomawö titiköma maaki, Teusö anö a temöa komanöma. ³¹A temöa komanö noai ha, tä mumi tetepo opa kõtia tä, Jesus a tapamo kõtioma. Kaliléia tä uli pata ha Jesus anö töpö kai husolo nö, Jetusalẽi tä uli pata hamö ĩ töpö hulasolö noai, ĩ töpö na Jesus a tapamo kõtio tasoma. Huki isöhaeu töpö na ĩ töpönö Jesus ta wäsätii.

^32-33Kamisamakönö ta topa apöle, kamakö na ĩ sama ta wäsä kule. Kamisamakö hai ĩ nö patapö töpö na Teusö a hapalo nö, “Waiha ĩ na sa tä thama kitäö!” a kuu noai, ĩ tä thama waikioma. Teusö anö Jesus a temöa waikia komanöma. Ola samakö, ai makö, ĩ na makö pewö kui makö noama pia salo, Jesus a temöa komanöma. Davi anö ama ta sãöka soma noai, ĩ tä noa ha ama ta sãöka nömöo noai, ĩ na ĩ ama ta kuu:

“Kawa hai, ipa ulu wa. Huki kamisanö wa thapalöma”

ĩ na ta kuu.

³⁴Jesus a temöa konaso wi, Teusö anö ĩ ta wäsä nö,

“A nomaso kitä maaki, a hote mai kitäö!”

ĩ na Teusö a kuuma. “Teusö sanö wa totiapala apa totio kitäö!” ĩ na Davi a na Teusö a kuu noai, ĩ na kamakö na ĩ na a kuu hö̃töo nö, makö noama pia salo, Jesus a temöa komanöma.

³⁵“Teusö wanö wa simöa sinomo wi, ĩ anö wa kai a hini totiatalo opati wi, ĩ a hote mai kitäö!”

ĩ na ai ama ta kuu.

³⁶Teusö anö Davi a simöaö ha, kama hai ĩ töpö na Davi a kaikanamoti nö, a nomano nö, kama hai ĩ pata töpö noma titihimo pa, ĩ ha Davi a patilia naiköma, a hotesoma. ³⁷Ĩ na Davi a kuama maaki, Teusö anö ai tä temöa komanö noai, ĩ a hote pasio maama.

^38-39Ipa pö! Sa hini totihoö! “‘Jesus a pitili’ ĩ na makö õsi kuu kuköma, wanisala wa tä thaa noai ĩ tä na Teusö a hĩso matasoö” ĩ na kamakö na samakö kuu kule. “Jesus a pitili” ĩ na makö õsi kuu kuköma, wanisala wa tä thatala noai maaki, Jesus anö wa totia kopamani kitäö! “Moisés sa kai hini salo, sa toita apö” ĩ na wa pi kuu kule maaki, Moisés wa kai hini wi, ĩ tänö wa toita mai kitäö!‑ ĩ na Paulo a kuuma. ⁴⁰Ĩ na a kuu nö, ‑Pö pi mosaikiö! Makö pi mosaia mi tä, Teusö a kai wäsä sinomo noai, ai töpö na ĩ töpönö ta wäsä kua noai na, kamakö na ĩ ta wäsä kua nömökö matimöö! Ta wäsä noai, ĩ na ta kuuma:

⁴¹“Makö hapalo pi wasöati wi, ĩ pö! Ĩ ma tä taa nökö. Sa tä thama pia wi, kamakö na ai tänö ĩ ta wäsä kitä maaki, ‘Pitili ta’ makö pi kuu mai kitäö! Önö kutenö, makö pi honipo pola nö, pö nomapoö!”

ĩ na ta kuumaö!‑ ĩ na Paulo a kuu totiatalo opama.

⁴²Ĩ na Paulo a kuu totiatalo nö, ĩ juteu töpö kokamo sinomo wi ĩ a sai ha Paulo a, Pahanapé a, ĩ na kilii töpö lisipo kõa tä, ‑Ai sápatu tä wakala ha, hisimö makö huu kota nö, ĩ ma ta wäsä kotasoö!‑ ĩ na töpö kupaloma. ⁴³Ĩ na töpö kupalo nö, töpö kokamo matalo nö, juteu töpö, juteu töpö pasi mai ĩ töpönö Moisés a kai a hini naio noai ĩ töpö, ĩ na töpö kui, Paulo a, Pahanapé a, ĩ na kilii töpö na ĩ töpö nokapaloma. Ĩ töpö nokapalo tä, Paulo a, Pahanapé a, ĩ na kilii töpö aiki, ‑Teusö anö makö totiapala apati wi, ĩ tä na pö hanopo tihöö!‑ ĩ na ĩ töpö kuuma.

⁴⁴Ĩ na tä kua tä, Ãsiokia tä uli ha töpö pilio noai, ĩ töpönö Teusö ta hini pi topa salo, ai sápatu tä wakala ha ĩ töpö pewö kokamoma. ⁴⁵Töpö kokamo pole, juteu töpönö ĩ tä taa nö, ‑Hö. Hi töpönö kamisamakö kai a hini sisa mai, Paulo a kai a hini pi topa nai pikio sai taköö!‑ ĩ na juteu töpö pi kuu nö, ‑Paulo a holisi. Paulo a hini tihöö!‑ ĩ na juteu töpö kutasoma. ⁴⁶Ĩ na juteu töpö kuu ha, Paulo a, Pahanapé a, ĩ na töpö kui töpö kili mai, töpö hapalo nö, ‑“Juteu töpö na kamisa kai a wäsä somaheö!” ĩ na Teusö a kuu ha, kamakö na Teusö sama ta wäsä soma waikio kipili. Sama ta wäsä waikio kipili maaki, ĩ ma ta hosa waikitalöpa noa‑ ĩ na töpö kuu nö, ‑Teusö ma ta hini wanio opama kutenö, “Juteu töpö tomöpaloti mi saiö! Ĩ sa töpö õsi palimipama mai kitä” ĩ na Teusö ma pi thaa totia apöpamanö noa‑ ĩ na töpö kuu nö, ‑Ĩ na makö kuati ha, juteu töpö pasi mai ĩ töpö na sama ta wäsä nömöo pia salo‑ ĩ na Paulo a, Pahanapé a, ĩ na kilii töpö kuuma. ⁴⁷‑“Juteu töpö pasi mai ĩ töpö na ta wäsäö!” ĩ na Teusö anö samakö noa thama. “Mumi mumi tä pata kua tä, koa taka siinö tä hatukama kua wi na, ĩ na wa kua hö̃töo kitäö! Juteu töpö pasi mai, ĩ töpö na kawanö sa kai a wäsä tä, wa töpö pi hatukama kuki kitäö! Hi masita tä uli pewö hamö töpö pilile, ĩ töpö na wa ta wäsä kuköma, sa töpö täapa läo kõo kitäö!” ĩ na kamisamakö na ĩ na Teusö a kuumaö!‑ ĩ na Paulo a, Pahanapé a, ĩ na kilii töpö kuuma.

⁴⁸Ĩ na ĩ töpö kuu noai, ĩ juteu töpö pasi mai ĩ töpönö ĩ ta hininö nö, ĩ töpö pi mönaha apa nö, ‑Aitaköö! Teusö ta wäo pole, ĩ ta topa apa‑ ĩ na ĩ töpö kuuma. Ĩ na tä kua tä, ai töpö õsi temö mapo mi ipii, ĩ na töpö kupasopö, Teusö anö ĩ töpö saia asalö noai, ĩ töpö aiki, ‑Jesus ta pitili‑ ĩ na ĩ töpö õsi pi kupalo opa kuköma. ⁴⁹Ĩ tä, ĩ tä uli pewö hamö Teusö tä kai a pala soasolöma. ⁵⁰Teusö a kai a pala soasolöma maaki, juteu töpönö Paulo a, Pahanapé a, ĩ na kilii töpö peamama. Ĩ tä uli ha pata töpö pilio noai ĩ töpö, suö töpönö wani tä thapo opa noai ĩ töpö Teusömo sinomo noai ĩ töpö, ĩ na töpö kui, juteu töpönö ĩ töpö luluapala nö, ‑Paulo a, Pahanapé a, ĩ na kilii ma töpö peamapököö!‑ ĩ na pata töpö na ĩ na juteu töpö kuuma. Ĩ na töpö kuu nö, Paulo a, Pahanapé a, ĩ na kilii töpö na, ‑Mihamököö! Hi tä uli ha a kuo tihöö!‑ ĩ na töpö kuu nö, töpö sasupalöma. ⁵¹Ĩ töpö sasu tä, ‑Teusö sama thapo mai, ĩ samakö waikiwö‑ ĩ na ĩ töpö pi thama pia salo, Paulo a, Pahanapé a, ĩ na töpö kui töpö konona na masita tä sätäle, ĩ tä masita honöpalö nö, Ikôniu tä uli hamö ĩ töpö hulasolöma. ⁵²Ãsiokia tili töpönö Jesus a thapo kukö noai, ĩ töpö pi mönaha apa haitioma. Ĩ töpö õsi na Teusö a õsi kua tolele, ĩ a kua totiköma.

Ikôniu tä uli ha

¹Ĩ na tä kua tä, Ãsiokia tä uli ha Paulo a, Pahanapé a, ĩ na töpö kui töpö kuo pi kupoti noai na, ĩ na Ikôniu tä uli ha ĩ na ĩ töpö kuo pi kupo nömötio tasoma. Ikôniu tä uli ha juteu töpö kokamo sinomo wi, ĩ a sai kule, ĩ a sai na Paulo a, Pahanapé a, ĩ na kilii töpö lisia nömökö tasoma. Töpö lisipalo nö, pe epii töpö hapalo opa kukö tasoma kutenö, juteu töpö, juteu töpö pasi mai ĩ töpö, ĩ na kilii töpö satehe epii töpö aiki, ‑Jesus ta pitili‑ ĩ na töpö pi kuu kuköma. ²‑Jesus ta pitili‑ ĩ na töpö satehe epii töpö pi kuu kuköma maaki, Jesus a thapo wi ĩ töpö na ai töpö wanipo naiopö, ‑Jesus ta pitili‑ ĩ na juteu töpö pi kuu pasio maa noai, ĩ töpönö juteu töpö pasi mai ĩ töpö pi lulumaköma. ³Ĩ töpö pi lulumaköma maaki, Ikôniu tä uli ha Paulo a, Pahanapé a, ĩ na kilii töpö kutiki nö, töpö kili pola nö kuno mai, pata tä Jesus a wäsä hoka totio opama. Pata tä Jesus aiki, ‑Kamisanö sa tä aipama kua wi na, ĩ na Paulo a, Pahanapé a, ĩ na kilii töpönö tä aipama naiopöö! “Ta wäsä pole, ĩ ta pitili” ĩ na ai töpö pi kuupököö!‑ ĩ na Jesus a pi kuuma kutenö, ĩ töpönö aipö tä thaa naitioma. Ĩ töpönö aipö tä thaa naitioma kutenö, Jesus anö töpö pewö totiapala apa wi ĩ ta wäsäö ha, ‑Ĩ töpönö ta wäsä wi, ĩ pitili ta‑ pata tä Jesus anö ĩ na ai töpö pi thamatima. ⁴‑Jesus anö hi töpö simönö noai, ĩ töpö pitilimo opaöö!‑ ĩ na ai töpö kuuma maaki, ‑Juteu töpö pitilimo opa sisaöö!‑ ĩ na ai töpö kuu pasioma.

⁵Ĩ na tä kua tä, juteu töpö pasi mai ĩ töpö, juteu töpö, kama hai ĩ pata töpö, ĩ na töpö kui töpö lalupo opa nö, ‑Hi ma töpö peama nököö! Maa maanö ma töpö säsä nö, ma töpö säpalö nököö!‑ ĩ na töpö kupaloma. ⁶Ĩ na töpö kupalo wi, Paulo a, Pahanapé a, ĩ töpönö ĩ ta hininö nö, töpö tokösolöma. Liisötöta tä uli, Tehepi tä uli, ĩ na kilii tökö uli kui, Likaônia tä uli pata na ĩ tökö uli kulati, ĩ tökö uli ha töpö tokösolöma. Ĩ tökö uli kotö ha tä uli kulati, ĩ hamö töpö hua hö̃tösolöma. ⁷Töpö hulolö nö, ĩ tä uli pewö hamö ta topa apöle ĩ ta wäsä hätäpotima.

Liisötöta tä uli ha

⁸Ĩ na tä kua tä, Liisötöta tä uli ha ai tä ami wanisalai ai tä kuoma. A huu wi, ĩ a ami wanisala salo, a wani huu mai, a wani lotio sinomoma. A ositi wani kupo tä, a ami wani wanisala soatama. ⁹Paulo anö Jesus ta wäsä tä, ĩ a ami wani wanisalai, ĩ a sömöka wani tatioma. A sömöka tatia tä, Paulo aiki, ‑“Paulo anö sa toa kõo hãtomani kitäö!” a pi wani kuti hãtoa kule?‑ ĩ na Paulo a pi kuu nö, ĩ a wani na a mamo teteiki nö, ¹⁰‑A öpaikiö!‑ lope epii ĩ na Paulo a kuuma. Ĩ na Paulo a kuu ha, a wani helutalo nö, a wani hua soatasolöma.

¹¹Ĩ na Paulo anö a wani thama noai, töpö satehe epii töpönö ĩ a wani taa nö, lope epii kama likaônia tili töpö kai a thaa nö, ‑Sai töpönö makö noama sinomo wi, ĩ töpö ithopalo nö, sanöma töpö kupasomaö!‑ ĩ na töpö lalupalo opa nö, ĩ na töpö kuuma. ¹²Ĩ na töpö kuu nö, Pahanapé a na, ‑Sai wa Júpite waö!‑ töpö kuuma. Paulo a wäo sinomo asa kutenö, ĩ a na, ‑Sai wa Mekútiu waö!‑ ĩ na töpö kuu pasioma.

¹³Ĩ na tä kua tä, Liisötöta tä uli kotö hamö töpö Júpitemo sinomo wi, ĩ a sai ha sai tä Júpite a wani täpä sinomo wi, ĩ anö paka wano kökö, hole hole tökö, ĩ na tä kui tä kai hulolö nö, thaka taka holeo pa, tökö kai waloköma. Sai tä Júpite a täpä sinomo wi ĩ a, ĩ ai töpö satehe epii töpö, ĩ na töpö kui töpö aiki, ‑Paulo a, Pahanapé a, ĩ na töpö kui töpö hai, ĩ sai töpö‑ ĩ na töpö pi kuu salo, ĩ paka kökö nokopalö nö, Paulo a, Pahanapé a, ĩ na kilii töpö na ĩ paka kökö noki, hole hole tökö, ĩ na tä kui tä totoa piama. ¹⁴Ĩ töpönö ĩ na tä thama pi topa salo, Paulo a, Pahanapé a, ĩ na kilii töpö pi honipo opama. Töpö pi honipo opa kutenö, kama töpö hai ĩ haloi ösö kakapalö nö, ĩ töpö satehe epii töpö na ĩ töpö läläaalö nö, lope epii töpö hapalo tasoma. ¹⁵‑Ai pö! Wi na makö pi kuu salo, ĩ ma tä thaa kule? Kamakö kui na ĩ na samakö kuö naiwö. Sai töpönö makö noama pasio mai kitäö! “Sai töpö pitili” makö pi kuu wi, ĩ sama tä mapamani pia salo, Teusö ta topa apöle, ĩ sama ta wäsäti kule. “Teusö a pitili sisawö” ĩ na makö pi thama pia salo. Hutu mosökö pata, masita tä uli pata, mötati tuu pata, salo kökö, sanöma makö pewö, Teusö a temö öpii anö ĩ tä pewö thama. ¹⁶Sanöma kolo töpö nö patapö kua tä, ĩ töpönö tä tai mi ipö salo, kama töpö pi saimo pätio nö, kama töpö kua pi topa wi, ĩ töpö kua pasio pätioma. Ĩ na ĩ töpö kua pasio pätioma maaki, “Ĩ na töpö kua päoö” ĩ na Teusö a pi kuuma. ¹⁷Ĩ na Teusö a pi kuuma maaki, “Hãu. Ö̃kö ta o. Teusö a hai, ĩ pata tä ta o” ĩ na Teusö anö nö patapö töpö pi thamati pia salo, töpö totiapala apatima. Huki makö pewö totiapala apa soatioö. Maa tä häläma sinomoö. Hikali a heupo kutenö, nii tä kua apa. Önö kutenö, makö pi mönahapalama apatii‑ ĩ na Paulo a, Pahanapé a, ĩ na kilii töpö kuu totio opama.

¹⁸Ĩ na töpö kuu totio opatima maaki, ĩ töpö satehe epii töpö sototati pole, ĩ töpö aiki, ‑Paulo a, Pahanapé a, ĩ na kilii töpö hai, ĩ sai töpö pasiwö‑ ĩ na ĩ töpö pi kuu satia salo, paka wano kökö nokoma pi topa apama. ‑Thama tihöö!‑ Paulo anö töpö noa thama maaki, ‑Ö̃kö‑ töpö kuu haio maama.

¹⁹Ĩ na tä kua tä, Ãsiokia tä uli, Ikôniu tä uli, ĩ na kilii tä uli ha juteu töpö kuo wi, Liisötöta tä uli ha ĩ töpö waloikitö nö, töpö satehe epii töpö lulupoma. Töpö lululö nö, ĩ töpö pewönö maa manö Paulo a moni säpalöma. A säsäälö pamö a kemanöma. ‑A säa waikipaso alu keö!‑ ĩ na ĩ töpö pi kuu nö, ĩ tä uli atu hamö a läkälölö nö, a pakö tasoma. ²⁰Ĩ hamö, Paulo a nomawö paa pa, Jesus a thapo wi ĩ töpö waloiki nö, Paulo a paalati ha, ĩ ha ĩ töpö öpa ãsokoa tä, Paulo a öpa kopasoma. A öpa kopalo nö, ĩ tä uli ha a kopölöma. A kopolö nö, ĩ hena tä, Pahanapé a solo, Tehepi tä uli hamö töpö hua soasolöma.

Sítia tä uli pata ha Ãsiokia tä uli kule, ĩ hamö töpö waloa kõkö noai ĩ ta

²¹Tehepi tä uli ha töpö talalo nö, Jesus ta topa apöle ĩ ta wäsäti ha, tehepi tili töpö satehe epii töpönö Jesus a tälöma. Ĩ töpönö Jesus a tälö noai ha, Paulo a, Pahanapé a solo, Liisötöta, Ikôniu, Ãsiokia, ĩ na tä uli kui tä uli hamö töpö hua sapa konasolöma. ²²Töpö hua sapa kononö nö, ĩ hamö Jesus a thapo noai, ĩ töpö pi topa komakö tasoma. Töpö pi topa komakötö nö, ‑“Päla” Jesus a na makö kuu mai, ĩ a na makö mamo pewö tetea totikiö!‑ ĩ na Paulo a, Pahanapé a, ĩ na kilii töpö kuu kõo tasoma. Ĩ na töpö kuu koikitö nö, ‑Huki makö pewö pea apa paio kitä maaki, waiha kamakö na Teusö a kaikanamo sinomo wi, ĩ tä uli ha makö kua nömöki kitäö!‑ ĩ na töpö kuuma.

²³Ĩ na tä kua tä, Jesus a thapo wi ĩ töpö kokamo sinomo wi, ĩ hamö Paulo a, Pahanapé a, ĩ na kilii töpö huu hätäpo nö, Jesus a thapo wi ĩ töpö na pata töpö patamo läo sinomo wi, ĩ pata töpö saia hätähalalöma. Ĩ pata töpö saia hätäha tä, Paulo a, Pahanapé a, ĩ na ĩ töpö iapalo paio mai, Teusö a na ĩ töpö hapaloma. Töpö hapalo nö, ‑Jesus ai! Hi pata töpö saipalö noai, ĩ töpö aiki, “Jesus a pitili” ĩ na ĩ töpö pi kuu totio noai, ĩ töpö noama totio haioö!‑ ĩ na töpö kuuma.

²⁴Ĩ na tä kua tä, töpö hulolö nö, Pisísia tä uli ha töpö hasupalo nö, Pãpiilia tä uli hamö töpö hulasolöma. ²⁵Töpö hulolö nö, Pehesi tä uli ha töpö walokö tasoma. Töpö waloikitö nö, Teusö ta wäsä nö, mötati tuu kasö pata hamö Atália tä uli kulati, ĩ hamö töpö hua nömöa soasolöma. ²⁶Ĩ tä uli ha töpö waloikitö nö, maa u hamö ĩ töpö hua konasolöma. Sítia tä uli pata ha Ãsiokia tä uli kule, ĩ ha Paulo a, Pahanapé a, ĩ na kilii töpö kuo paio noai, ĩ tä, Jesus a thapo wi ĩ ai pata töpö aiki, ‑Teusö ai! Hi Paulo a, hi Pahanapé a, ĩ na kilii töpönö tiko töpö na Jesus ta wäsä hätäpoti tä, töpö noamaö!‑ ĩ na Ãsiokia tä uli ha ĩ na pata töpö kuu soma noai, ĩ tä uli hamö Paulo a, Pahanapé a, ĩ na kilii töpö pi konasolöma. Jesus ta wäsä hötöto waikioma kutenö, töpö konasolöma. ²⁷Ĩ tä uli hamö töpö kopolö nö, Jesus a thapo wi ĩ töpö pewö kokamoma nö, ‑Ĩ na Teusö anö kamisamakö na ĩ na tä thamatima. Teusö aiki, “Juteu töpö pasi mai ĩ töpö aiki, ‘Jesus a pitili’ ĩ na ĩ töpö pi kuu naiopököö!” ĩ na Teusö a pi kuuma kutenö, ĩ juteu töpö pasi mai ĩ töpönö Jesus a täa naini kipiliö!‑ ĩ na Paulo a, Pahanapé a, ĩ na kilii töpö kuuma. ²⁸Ĩ na töpö kuu nö, Jesus a thapo wi ĩ töpö na Paulo a, Pahanapé a, ĩ na kilii töpö kuo tetepo opatima.

Jetusalẽi tä uli ha pata töpö kokamo noai ĩ ta

¹Ĩ na tä kua tä, Jutéia tä uli pata ha ai töpö kuoma, Ãsiokia tä uli hamö töpö waloikitö nö, Jesus a thapo wi ĩ töpö na Moisés a kai a kateha nö, ‑“Wano tä isi ola ösö hanöpalö nö, ĩ ösö hosa sinomoö!” ĩ na Moisés anö kama hai ĩ isöhaeu töpö noa thamaö!‑ ĩ na töpö kuu nö, ‑Ĩ na Moisés anö töpö noa thama kutenö, ĩ na makö kua kuköpöö! Isi ola ösö hosapamo mi tä, Teusö anö makö täapa kõo läo mai kitäö!‑ ĩ na töpö kuuma. ²Ĩ na töpö kuu ha, ‑Naiö! Ĩ na kuno maiö!‑ ĩ na Paulo a, Pahanapé a, ĩ na kilii töpö kuu pasioma. Ĩ na töpö kuu ha, töpö hapalo nomöhaso opama. Önö kutenö, ‑Jetusalẽi tä uli pata ha Paulo a, Pahanapé a, ai töpö, ĩ na töpö kui töpö hulasolöpöö! Jesus anö töpö simönö noai ĩ töpö, Jesus a thapo wi ĩ pata töpö, ĩ na töpö kui töpö na hi töpö hapalopöö!‑ ĩ na töpö kuuma. ³Ĩ na töpö kuu nö, Ãsiokia tä uli ha Jesus a thapo wi ĩ töpö kule, ĩ töpönö ĩ töpö simöpalöma. Töpö simöpalöma, Penísia tä uli, Samatia tä uli, ĩ na tä uli kui tä uli ha ĩ töpö hasuo tä, Paulo a, Pahanapé a, ĩ na kilii töpö wäo nö, ‑Juteu töpö pasi mai, ĩ töpönö Jesus a täa naini kipiliö!‑ ĩ na töpö kuu ha, Jesus a thapo wi ĩ töpö pewö pi mönahapaloma.

⁴Ĩ na tä kua tä, Paulo a, Pahanapé a, ĩ töpö na ai töpö nokale ĩ töpö, ĩ na töpö kui, Jetusalẽi tä uli pata ha töpö walokö tasoma. Töpö walokö tasoö ha, ĩ töpö na, Jesus a thapo wi ĩ töpö, Jesus anö töpö simöa asa noai ĩ töpö, ai pata töpö, ĩ na töpö kui töpö noimopalo läoma. Ĩ tä, Paulo a, Pahanapé a, ĩ na kilii töpö wäoma. ‑Teusö anö samakö simönö nö, ĩ na Teusö anö kamisamakö na ĩ na tä thamati kipiliö! Teusö anö kamisamakö lotetepamanöma kutenö, ĩ na samakö kua kipiliö!‑ ĩ na töpö kuuma. ⁵Ĩ na töpö kuu ha, patiseu töpönö Jesus a thapo noai ĩ töpö öpaha läiki nö, ‑“Makö isi ola ösö hosapamonasopököö!” ĩ na juteu töpö pasi mai ĩ töpö na ĩ na makö kuu mi salo. “Moisés ma kai a hinia totilöö!” ĩ na makö kuu totiopököö!‑ ĩ na ĩ töpö kupaloma.

⁶Ĩ na ĩ töpö kupaloö ha, Jesus anö töpö simöa asa noai ĩ töpö, Jesus a thapo wi ĩ pata töpö, ĩ na töpö kui töpö kokamonasoma. ‑Hi patiseu töpö kuu pole, ĩ töpö na wi na makö kuupö?‑ ĩ na töpö kuu nö, töpö kokamo nö, ⁷töpö hapalo opama. Töpö hapalo opa noai ha, Simão Pedro a öpaiki nö, a hapalo hö̃töoma. A hapalo hö̃töo nö, ‑Ipa pö! Sutu ha, kamakö na sa kutia tä, Jesus ta topa apöle, juteu töpö pasi mai ĩ töpö na ĩ sa ta wäsäpö, Teusö anö sa saia totipalöma. “Ĩ töpönö Jesus ta hinipöö! ‘Jesus a pitili’ ĩ na ĩ töpö pi kuu naiopöö!” ĩ na Teusö a pi kuu salo, ĩ töpö na Teusö anö sa simöpalöma. Ĩ ma tä taö waikia kule. ⁸Teusö anö kamakö õsi pewö taö öpa wi, ĩ anö ĩ töpö na kama õsi kua tolele ĩ a õsi totoköma. Kamakö na kama õsi totoma kua noai na, ĩ na juteu töpö pasi mai ĩ töpö na kama õsi totoma kua hö̃töoma. Ĩ töpö na Teusö anö kama õsi totoa hö̃tökö nö, “Ö̃kö. Juteu töpö pasi mai, Teusö anö ĩ töpö pii naio noa” ĩ na kamakö pi thamama. ⁹Juteu makö kui na, ĩ na ĩ töpö kuö hö̃töwö. Teusö aiki, “Ĩ töpö hai, ĩ tiko töpö” ĩ na Teusö a kuu mai kitä. “Jesus a pitili” ĩ na ĩ töpö pewö kuu nö, Jesus a thapo salo, ĩ töpönö wanisala tä thaa noai ĩ tä na Teusö a hĩso maa totia apa hö̃töpasoma. ¹⁰Önö kutenö, “Moisés ma kai pewö a hini mi tä, Teusö anö makö täapa kõo läo mai kitäö!” ĩ töpö na ĩ na pö kuu tihöö! Kamakö hai ĩ pata töpö, kamakö, ĩ na kilii makönö Moisés ma kai a hini maa apama ta pi kuu mai. Önö kutenö, juteu töpö pasi mai ĩ töpönö Jesus a thapo wi ĩ töpö peama tihöö! Hute hute wa tä maomakö nö, ai wa tä peama kua wi na, ĩ na ĩ juteu töpö pasi mai, ĩ na ĩ töpö thama tihöö! Ĩ ma töpö peamaö ha, kamakö na Teusö a hĩsoso matimöö! ¹¹Ĩ na kuno mai. Juteu töpö pasi mai ĩ töpö aiki, “Jesus pata tä pitili” ĩ na ĩ töpö pi kuu totioö ha, Teusö anö ĩ töpö totiapala nö, töpö täa konöma. Ĩ tä kua wi na, kamakö aiki, “Jesus pata tä pitili” ĩ na juteu makö pi kuu totioö ha, Teusö anö makö totiapala nö, makö täapa kõo läo hö̃töoma‑ ĩ na Simão Pedro a kuu totio opama.

¹²Ĩ na tä kua tä, Simão Pedro a hapalo matalo nö, Paulo a, Pahanapé a, ĩ na kilii töpö hapalo nömöoma. Ĩ töpö hapaloti tä, töpö loa pasile, ĩ töpö hapalo mai, töpö sömöka taa totioma. Paulo a, Pahanapé a, ĩ töpö hapalo nö, ‑Juteu töpö pasi mai ĩ töpö na samakö kutia tä, Teusö anö samakö lotetepali ha, kamisamakönö aipö sama tä thamatima‑ ĩ na töpö kuuma. ¹³Ĩ na töpö kuu nö, töpö hapalo matasoö ha, Tiago a hapalo nömöoma. ‑Ipa pö! Pö sömöka taa totikiö! Simão Pedro a hapalo nö, ¹⁴“Juteu töpö pasi mai, Teusö anö ĩ töpö totiapala somamaö! Juteu töpö pasi mai, Teusö anö ĩ töpö saia asapalö nö, ‘Kamakö hai, ĩ ipa makö pasiwöö!’ ĩ na Teusö a pi kuumaö!” ĩ na Simão a kuu keheö! ¹⁵Ĩ na sutu ha Teusö a kai a wäsä sinomo noai, ĩ na ĩ töpö kuu hö̃töoma. Ĩ töpö kuu noai, Teusö tä waheta na ĩ tä sãököle, ĩ na ĩ tä kuu:

¹⁶“‘Waiha sa huu kõo kitäö!’ ĩ na Teusö a pata kuu. ‘Sa huu kõo nö, Davi a sai pö waniapaso noai ĩ sa sai thaa kõki kitäö! Sai sa nakasi pewö koka kopalö nö, sa sai thaa kõki kitäö! ¹⁷Önö kutenö, juteu töpö pasi mai ĩ töpö maaki, kamisa na ĩ töpö pi wasiso opa kitäö! ‑Ĩ tä uli pewö hamö töpö pilipai, ĩ töpö hai ĩ ipa ai töpö sai‑ sa pi kuu salo, ĩ sa töpö nakalili, kamisa na ĩ töpö pi wasiso opa kitäö!’ ĩ na Teusö a kuumaö! ¹⁸Sutu ha, ĩ na Teusö a wäo nö, ĩ na a kuumaö!” ĩ na Teusö tä waheta kuu‑ ĩ na Tiago a kuuma.

¹⁹Ĩ na a kuu nö, ‑Ĩ na sa pi kuu kule. Juteu töpö pasi mai, ĩ töpönö Teusö a thapo pole, ĩ töpö a wai ti! “Moisés ma kai a hini naiopöö!” ĩ na pö kuti tihöö! ²⁰Ĩ töpö na waheta ma tä simöpalöpö. “Ukutupö töpö na töpö noamamo wi, ĩ töpö ukutupö na salo a totoköpö, salo kökö ĩsimanö noai, Teusö a na ĩ kökö salo noki sami ipöö! Ĩ a salo oa maikiö!” ĩ na tä kuu wi ĩ ma tä sãöka sisapöö! “Ai wa tä po mane maaki, a mamo hãto tihöö!” ĩ na tä kuu wi ĩ ma tä sãöka naiopöö! “Salo a iä wanimo paio mai ha, a oa tihöö! Iä iä tä oa tihöö!” ĩ na tä kuu wi ĩ ma tä sãöka naiopöö! ²¹Sutu upa tiko töpö uli pö hamö juteu töpö kokamo sinomo wi, ĩ töpö sai pö hamö sápatu tä wakala pewö hamö Moisés a kai a katehati noai, huki ta kateha soa. Önö kutenö, ĩ juteu töpönö Moisés a kai hini ipa kutenö, juteu töpö pasi mai ĩ töpö na ĩ ma tä waheta simöpalöpöö!‑ ĩ na Tiago a kuuma.

²²Ĩ na Tiago a kuu ha, ‑Awai. Ĩ na makö kuapököö!‑ ĩ na Jesus anö töpö simönö noai ĩ töpö, Jesus a thapo totio wi ĩ pata töpö, Jesus a thapo wi ĩ töpö pewö, ĩ na töpö kui töpö kuuma. Ĩ na töpö kuu nö, kama ai töpö sailö nö, ‑Ĩ ma töpö simöpalöpököö! Ãsiokia tä uli hamö Paulo a, Pahanapé a, ĩ na kilii töpö kõo piale, ĩ töpö na ĩ töpö hua naisolöpöö!‑ ĩ na töpö kuuma. Ĩ na töpö kuu ha, Jesus a thapo wi ĩ ai polakapi pata töpö hai, ĩ Jutasö a, ĩ Pasapásö a hilo kua naine ĩ a, Silas a, ĩ na kilii töpö simönöma. ²³Ĩ töpö na waheta tä simöa nainöma. Ĩ na tä waheta kuuma:

‑Jesus anö samakö simöpalili ĩ samakö, Jesus a thapo wi ĩ pata samakö, ĩ na kilii samakönö hi waheta sama tä simöni ke. Ãsiokia tä uli, Sítia tä uli pata, Silísia tä uli, ĩ na tä uli kui tä uli na juteu makö pasi mai, ĩ makö pilipai, Teusö ma thapo naio wi, ĩ makö na hi waheta sama tä simöpali ke. Makö topa kule?

²⁴Ai sama töpö kai kokamo sinomoti noai, ĩ sama töpö simöpa pasio maama maaki, ĩ töpö hulasolöma. Ĩ töpö hulolö nö, kamakö na ĩ töpö hapalo nö, makö wai ipama thali. ^25-26Önö kutenö, “Ai makö saipalö nö, Ãsiokia tä uli ha Jesus a thapo wi ĩ töpö kokamoti wi ĩ töpö na ĩ ma töpö simönöpöö!” ĩ na samakö pewö kuu ösöha soapasoma. Paulo a, Pahanapé a, ĩ na kilii sama töpö pi ipa sinomo wi, pata tä Jesus Cristo a na ĩ töpö kalipaloti ha, ai töpönö ĩ töpö säpa pi topa sinomoma maaki, ĩ töpö kalipalo mapo maama. Ĩ töpö na, sama töpö saipalö noai, ĩ sama töpö simöpali ke. ²⁷Jutasö a, Silas a, ĩ na kilii sama töpö simöpali ke. Waheta sama tä simöne, kamakö na ĩ töpönö ĩ ta wäsä kitä. ²⁸Teusö a õsi kua tolele, ĩ a solo, ĩ na kamisamakö pi kuuma: “Juteu töpö pasi mai, pe epii ĩ ma töpö noa thaa maapököö! Moisés anö pata töpö noa thaa noai, ĩ ma tä pewö a wäsä maapököö!” ĩ na samakö pi kuuma. Ĩ na samakö kuu sisa kule: ²⁹“Ukutupö tä na nii tä totokö noai, ĩ tä nii oa tihöö! Iä iä tä oa ti! Salo a iä wanimo paio mai ha, ĩ a salo oa tihöö! Ai wa tä po mane maaki, a mamo hãto tihöö! Ma tä hini totioö ha, tä topa. Ĩ na pätawö” ĩ na samakö kuu kule‑

ĩ na ĩ tä waheta kuuma.

³⁰Ĩ waheta tä kai simöpalö noai, Ãsiokia tä uli hamö ĩ töpö hua soatasolöma. Ĩ tä uli hamö töpö talalotö nö, Jesus a thapo wi ĩ töpö kokamomanö nö, ĩ töpö na ĩ tä waheta totoköma. ³¹Ĩ tä waheta totoki ha, ĩ tä waheta möö nö, ĩ töpö pi mönahama. ‑Ĩ tä waheta kuu pole, ĩ ta topa‑ ĩ na töpö pi kuu nö, töpö pi mönaha apama. ³²Ĩ na tä kua tä, Jesus a thapo wi ĩ töpö kokamo pole, ĩ töpö na Jutasö a, Silas a, ĩ na kilii töpö hapalo opatima. Ĩ töpö hai, Jesus a kai wäsä sinomo wi, ĩ töpö kutenö, töpö kokamo pole ĩ töpö na, ‑Ĩ naköö! Ĩ na makö kua totiopököö!‑ töpö kuu nö, töpö pi topapalama apaö, töpö pi mönahapalama apaö, ĩ na töpö thamatima. ³³Ĩ na töpö thamati nö, ĩ töpö na töpö kua tetea apöpalo nö, ‑Samakö koonököö!‑ töpö kuu ha, Jesus a thapo wi ĩ töpö hapalo noimo opa nö, ‑Pö koonöö!‑ töpö kuu hö̃töoma. ³⁴[Ĩ ha Silas a kuo pi topa apa haia salo, ĩ tä uli ha a heipasoma.]

³⁵Ĩ na tä kua tä, Paulo a, Pahanapé a, ĩ na kilii, Ãsiokia tä uli ha ĩ töpö kutiki nö, Jesus ta wäsätima. Jesus a thapo wi ĩ ai töpö satehe epii töpönö Jesus ta wäsä naioma.

³⁶Ĩ na tä kua tä, tetea apöpaso noai ha, Paulo aiki, ‑Ki hamö Jesus ma ta wäsä hätäpotipili, ĩ tä uli pewö hamö Jesus a thapo wi ĩ töpö kule, ĩ töpö pewö na makö hamamo kõtö nökö. Huki töpö topa hãtoa kule. Ĩ ma töpö möö kõtö nököö!‑ ĩ na Pahanapé a na, ĩ na Paulo a kuuma. ³⁷Ĩ na Paulo a kuu ha, ‑Marcos ma nokamanönöö!‑ ĩ na Pahanapé a kuu kule maaki, ³⁸‑Naiö!‑ ĩ na Paulo a kuu pasioma. Ĩ töpö uli pö hamö Jesus ta wäsä soma tä, Marcos a noka waikimanönöma maaki, Pãpiilia tä uli na töpö walokö tasoma, ĩ tä uli na töpö kua tä, Marcos a kõa pasia waikipasoma kutenö, Paulo anö Marcos a nokamapo wanio opa kotama. ³⁹‑Ma nokamanönöpöö!‑ Pahanapé a kutima maaki, ‑Pälaö! Ma nokamapo kota mai kitäö!‑ Paulo a kuti ha, ĩ ha töpö selekea soapasoma. Pahanapé anö Marcos a noka pasimanönö nö, Sipöti tä uli ha kutiata a pata hamö töpö hulasolöma. ⁴⁰Paulo anö Silas a noka pasimanönöma. ‑Jesus ma tä wäsäti tä, pata tä Teusö anö makö totiapala apapöö!‑ ĩ na Jesus a thapo wi ĩ töpö kuu ha, tiko hamö Paulo anö Silas a kai hua pasisolöma. ⁴¹Sítia tä uli pata, Silísia tä uli, ĩ na tä uli kui tä uli hamö Jesus a thapo wi ĩ töpö kule, ĩ töpö na Paulo a hua pasilolö nö, Jesus ta wäsäti nö, Jesus a thapo wi ĩ töpö pi topapalama apama.

Tehepi tä uli, Liisötöta tä uli, ĩ na pö sai ha

¹Ĩ na tä kua tä, Tehepi tä uli, Liisötöta tä uli, ĩ na kilii tä uli ha Paulo a waloa nömökö tasoma. Liisötöta tä uli ha Timóteo a kuo läoma. Ĩ anö Jesus a thapoma. Kama hai ĩ pöpönö a hai, juteu tä kuoma. Ĩ anö Jesus a thapo naioma. Timóteo a hai ĩ pö̃ a hai, köteeku tä kuo pasioma. ²Liisötöta tä uli, Ikôniu tä uli, ĩ na kilii tökö sai kui tökö sai ha Jesus a thapo wi ĩ töpö kuo noai, ĩ töpö aiki, ‑Timóteo a totiatalo opawö‑ ĩ na töpö pewö kuuma. ³Ĩ na töpö kuu ha, Paulo anö Timóteo a nokamapo pi topa apama. ‑Hi tä uli ha juteu töpö pilipai, ĩ töpö aiki, “Timóteo a hai ĩ pö̃ a hai, ĩ köteeku tä kutenö, Timóteo a isi ola ösö hosapamo mai, a kua hãtoa soale kitäö!” ĩ na ĩ töpö pi kuu kitäö!‑ ĩ na Paulo a pi kuu salo, Paulo anö Timóteo a isi ola ösö hanöpalöma. ⁴A ösö hanöpalö nö, Timóteo a noka soamanönö wi, ki hamö ĩ tä uli hamö sai pö satehe epii sai pö hö̃kököa apöle, ĩ pö sai ha töpö huulö pamö, töpö wäo hasuolöma. Jesus anö töpö simöa asa noai ĩ töpö, Jesus a thapo wi ĩ pata töpö, ĩ na kilii, Jetusalẽi tä uli pata ha ĩ töpö kokamo noai, ĩ töpö aiki, ‑Juteu töpö hai kuno mai, ai tiko töpö na makö hapalo nö, “Ĩ na makö kua totiopököö! Kamisamakönö makö noa thaa wi, ĩ ta hini totiataloö!” ĩ na pö kuu!‑ ĩ na pata töpö kuu ha, Paulo töpö kuu hasuo totiatalo opa hö̃tötioolöma. ⁵Ĩ na töpö kuu hasuoö ha, Jesus a thapo wi ĩ töpö kokamo sinomo noai, ĩ töpö õsi lotetea apöpalo nö, Jesus a kai a hini totiatalo opaalöma. ‑Jesus a pitili‑ ĩ na ĩ töpö pi kuu totisoma. Ĩ tä wakala pewö hamö Jesus a thapo wi ĩ töpö pala apaalöma.

Tötôasi tä uli ha Paulo anö uni tä tapa noai ĩ ta

⁶Ĩ na tä kua tä, Pötísia Kalásia tä uli na töpö hulasolöma. Ĩ tä uli ha töpö hulolö nö, Ásia tä uli ha ĩ töpönö Jesus ta wäsä tasopö, ĩ hamö töpö huu pia tä, ‑Ásia tä uli ha pö huulö tihöö!‑ ĩ na Teusö a õsi kua tolele, ĩ a kuu läoma. ⁷Mísia tä uli ha töpö kua ateikitö nö, Pisínia tä uli ha töpö huu pi topa apa tasoma maaki, ‑Ĩ hamö pö huu taso tihöö!‑ ĩ na Teusö a õsi kua tolele, Jesus anö ĩ a õsi simönö noai, ĩ na ĩ a õsi kuu läoma. ⁸Ĩ na ĩ a õsi kuu läoö ha, Mísia tä uli hamö töpö hasua soaiki nö, mötati tuu kasö pata ha Tötôasi tä uli kule, ĩ ha töpö walokö tasoma. ⁹Töpö waloikitö nö, ĩ tä mumi ha Paulo anö uni tä tapama. Uni tä tapa nö, Masetônia tili tä talalöma. Ĩ a öpatiki nö, ‑Hapo. Hi Masetônia tä uli ha wa huoki solö nö, samakö pasilipalösoö!‑ ĩ na masetônia tili tä uni kutima. ¹⁰Ĩ na a mani kuti ha, ‑Masetônia tili töpö na Jesus ta topa apöle, ĩ ma ta wäsäpö, Teusö anö makö nakaö‑ ĩ na samakö pi kuu salo, ‑Masetônia tä uli hamö makö hua soalolö nököö!‑ ĩ na samakö kuu soatama.

Hiliposö tä uli ha Lítiasoma anö Cristo a tälö noai ĩ ta

¹¹Ĩ na samakö kuu soata nö, Tötôasi tä uli ha samakö husoa soalo nö, kutiata a pata hamö sanöta Samotötásia tä kulali, ĩ ha samakö kupakö lasoma. Samakö kupaikilö nö, ĩ hena tä samakö pökatöpalo nö, Neápolisö tä uli ha samakö kua nömöpakö lasoma. ¹²Ĩ ha samakö kua nömöpaikilö nö, Masetônia tä uli pata ha Hiliposö tä uli kulati, ĩ ha homa tili töpö satehe epii töpö pilia nainati, ĩ tä uli ha samakö waloa soaikitö nö, ĩ ha samakö kutioma. ¹³Ĩ ha samakö kutia tä, sápatu tä wakala kuiki nö, ‑Maa u kasö ha Teusö a na töpö hapalo hãto sinomo kitä‑ samakö pi kuu salo, ĩ hamö samakö hulasolöma. Ĩ hamö samakö hulolö nö, ĩ ha suö töpö kokamo noai, ĩ töpö na samakö loa naiki nö, ĩ suö töpö na samakö hapaloma. ¹⁴Ĩ suö töpö sömöka tatio noai, ĩ ai tä hai, Siasita tili tä Lítia a kuoma. Sitipa kökö täa pi topa salo, haloi ösö toita apii ösö totota sinomo wi, ĩ a kuoma. Lítia a Teusömo sinomoma. Teusö anö ĩ a pi hatuka totimanöma kutenö, Paulo anö ta wäsä pole, ĩ ta hini totio opama. ¹⁵Lítia a, Lítia sai pö na töpö kuo naio noai ĩ töpö, ĩ na kilii töpö mãi õmamono nö, Lítia aiki, ‑“Lítia anö Jesus a thapo totia kule. A pitilimo opaö” ĩ na makö pi kuu salo, kamisa sai pö ha pö pökö kuikiö!‑ ĩ na a kuu ha, ĩ ha samakö kutioma.

Paulo a, Silas a, ĩ na kilii töpö titikö noai ĩ ta

¹⁶Ĩ na tä kua tä, Teusö a na töpö hapalo sinomo wi, ĩ hamö samakö huu tä, ai töpönö noa mi moko tä kalipalama sinomo wi, ĩ moko tä huu läoma. Ĩ moko tä na sai tä wani kuo naio sinomo noai, ĩ sai tänö ĩ moko tä pi hatukupamani ha, ‑Waiha ĩ na tä kua kitä‑ ĩ na ĩ moko tä kuu sinomotima. Ĩ moko tä kalipalama sinomoti wi ĩ töpö na ai töpö ekuiki nö, moko tä hapalama nö, ‑Wi na sa kua kuki kitä?‑ ĩ na ĩ töpö kuu ha, ‑Ĩ na wa kua kuki kitä‑ ĩ na ĩ moko tä kuu sinomotima. ‑Ĩ na wa kua totio opa kuki kitä‑ moko tä kuu sinomo wi, ĩ tä noa na sitipa kökö kuo opa wi, ĩ kökö sitipa totoma sinomotima. Moko tä hapalama pi topa wi, ĩ töpö hai ĩ sitipa kökö kuo opa wi kökö totoma sinomotima. Moko tä thapo wi, ĩ töpö na ĩ noa tä totoma sinomotima.

¹⁷Ĩ na tä kua tä, Paulo a, kamisamakö, ĩ na kilii samakö na ĩ moko tä nokapalo pola nö, ai töpö na a hapalo sinomo nö, ‑Hi töpö hai, Teusö anö töpö simöa wi ĩ töpö. Sai töpö na a lotetea tolea asa wi, ĩ Teusö a hilo wi, hi töpö na ĩ a simöo sinomoö. Hi töpönö kamakö na Teusö tä kai wäsäti kuleö! Teusö anö makö täapa kõo läo wi, ĩ ta wäsäti kuleö!‑ ĩ na ĩ moko tä kutima. ¹⁸Wakala tä satehe epii tä wakala ha a kutima kutenö, Paulo a pi wanisala apa nö, a nomöhöpalo nö, sai tä na a hapalo nö, ‑Jesus Cristo sa thapo salo, “Hi moko tä na a sapäko maikiö! A kononöö!” ĩ na wa noa thaa kuleö!‑ ĩ na Paulo a kuuma. Ĩ na Paulo a kuu pole, ĩ tökö soatawö, sai tä konasolöma. ¹⁹Sai tä konasolö ha, moko tä thapo wi ĩ töpö aiki, ‑Hö. Paulo anö sai tä simöa koonö manu ke, hi ipa moko tä pi hatukua kota mai kitäö! Ĩ na tä kua manu kule, sitipa ma kökö sua kõo mai kitäö!‑ ĩ na ĩ töpö pi kuu nö, Paulo a, Silas a, ĩ na kilii töpö huölö nö, töpö läkälölöma. Ĩ tä uli mötali pata hamö pata töpö kule, ĩ hamö töpö läkälölöma. ²⁰Homa tili pata töpö na töpö läkälölö nö, ‑Hi töpö hai, ĩ juteu töpö pasiwöö! Kamisamakö sai pö na hi töpö talalo nö, samakö wai ipati thaliö! Töpö hapalo pi wasöa thaliö!‑ ĩ na ĩ moko tä thapo wi, ĩ na ĩ töpö kuuma. ²¹‑Hi juteu töpö hai, ĩ tiko töpö maaki, “Ĩ na wa kuapököö! Ĩ na wa kuapököö!” ĩ na hi töpö kuu sai thaliö! Homa tili samakö pasi kutenö, hi sama töpö kai hini wani ipöö! Hi sama töpö kai hini ha, kamisamakö hai ĩ kaikana tänö samakö peama matimöö!‑ ĩ na töpö kuuma. ²²Ĩ töpö sotota pole, ĩ na ĩ töpö pewö kuu naioma.

Ĩ na ĩ töpö pewö kupaloö ha, pata töpönö Paulo a, Silas a, ĩ na kilii töpö hai ĩ haloi ösökö kakapamanö nö, ösökö hasutalö nö, ‑Hii tinö töpö soalalöö!‑ ĩ na pata töpö kuuma. ²³Ĩ na pata töpö kuu ha, töpö soapalöma. Töpö soapalö nö, titita wi a sai õsimö ha töpö titia soatakö nö, a läapalo sinomo wi ĩ a na, ‑Hi töpö lototoa totimaköö!‑ ĩ na pata töpö kuuma. ²⁴Ĩ na pata töpö kuu ha, sai a õsimö sai ha, a läapalo sinomo wi ĩ anö ĩ ha töpö titia totiki nö, hii ti ha töpö konona ami lukömakö nö, töpö ami lototomaköma.

²⁵Ĩ na tä kua tä, mötali tä mumi ha, ai töpö titia naine ĩ töpö sömöka taa tä, Paulo a, Silas a, ĩ na kilii, Teusö a na töpö hapaloö, Teusö a ama pö a thaö, ĩ na ĩ töpö kua halutima. ²⁶Ĩ ama ta thaa tä, masita tä uli lakö lakömo soasoma. Masita tä uli lakö lakömono nö, ĩ a sai kolo waniapalo nö, sai pö päka pewö hãkoa soatalalo nö, hii tinö ami lototo noai, ĩ tiki haolea soatalo nö, ĩ na tä kuama.

²⁷Ĩ na tä kua tä, a läapalo sinomo wi, ĩ a wani naa soatalo nö, sai pö päka pewö hãkoa talalö nö, ‑Hö a. Töpö pewö toköo waikiloe kitä‑ ĩ na a pi wani kuu nö, ‑Pata töpönö sa säpali kitäö!‑ a pi kuu salo, ‑Sa säpo paioö!‑ a pi kuu nö, kama hai ĩ poo a läkäa soatali ha, ²⁸lope epii Paulo a hapalo nö, ‑Naiö! A säpo tihöö! Samakö pewö titia soa kuleö!‑ ĩ na Paulo a kuuma. ²⁹Ĩ na Paulo a kuu ha, a läapalo sinomo wi, ĩ a waninö koa taka sii nakalö nö, Paulo a, Silas a, ĩ na kilii töpö na a läläalö nö, a kili ipa salo, a satitimo nö, ‑Hi töpö topa apa asaö‑ ĩ na a pi kuu salo, ĩ töpö kotö ha pili a maekonö a hĩta thama. ³⁰Pili a maekonö a hĩta thama, a öpapalo nö, Paulo a, Silas a, ĩ na kilii töpö kai atua kopalo nö, ‑Wi na sa kuapö? Wi na sa kua kuköma, Teusö anö sa täa kõa läli?‑ ĩ na a kuuma. ³¹Ĩ na a kuu ha, ‑“Jesus pata tä pitili” ĩ na wa õsi sai pi kuu kuköma, wa täa kõa läli kitä. Kawa, au ai töpö, ĩ na makö kui makö täapa läo kõki kitä‑ ĩ na ĩ töpö kuuma. ³²Ĩ na ĩ töpö kuu nö, ĩ a na Teusö ta wäsäma. A läapalo sinomo wi ĩ a, kama hai ĩ ai töpö, ĩ na töpö kui töpö na Teusö ta wäsäma. ³³Teusö ta wäsä pole, ĩ tökö soatawö, a läapalo sinomo wi ĩ anö, Paulo a, Silas a, ĩ na kilii töpö noka soatamanönö nö, hii tipö uno iä pata salua halulalöma. Salua halulalö nö, a läapalo sinomo wi ĩ a, kama hai ĩ ai töpö, ĩ na töpö kui töpö mai õhomamo soatasoma. ³⁴Ĩ töpö mai õhomamono nö, kama sai pö ha, Paulo a, Silas a, ĩ na töpö kui töpö kai hulolö nö, ĩ töpö ösö potehepamanöma. A läapalo sinomo wi ĩ a, kama hai ĩ ai töpö, ĩ na kilii töpönö Teusö a tälöma kutenö, ĩ töpö pi mönaha apama.

³⁵Ĩ hena tä, a läapalo sinomo wi ĩ a na homa tili pata töpönö poliisia töpö simöpalö nö, ‑“Ki polakapi töpö õkalati, ĩ töpö kusöa kopalötöö!” ĩ na makö kuu‑ ĩ na pata töpö kuu ha, ĩ na poliisia töpönö ĩ a noa thaa hö̃töoma. ³⁶Ĩ na a noa thaö ha, Paulo a, Silas a, ĩ na töpö kui töpö na a läapalo haluti wi ĩ aiki, ‑“Töpö kusöa kopalöö!” ĩ na pata töpönö sa noa thama thai. Önö kutenö, wanai, pö kononöö!‑ ĩ na a kuuma. ³⁷Ĩ na a kuu ha, poliisia töpö na Paulo aiki, ‑Ĩ na kuno maiö! Kamisamakö na, “Wanisala ma tä thama” ĩ na pata töpö kuu pasio maama maaki, homa tili samakö naiwö maaki, ai töpö satehe epii töpö mamo tetela tä, ĩ töpönö samakö soapalöma. Samakö soapalö nö, titita wi a sai ha samakö titiköma. Ĩ na pata töpö kuama maaki, huki samakö simöa hãtoa koni pia salo. Ĩ na kuno mai. Ĩ pata töpö huoki solö nö, “Pö kononöö!” ĩ na kama töpö kuu totio solöpökö‑ ĩ na Paulo a kuuma.

³⁸Ĩ na Paulo a kuu ha, poliisia töpö hua kononö nö, Paulo a kuu noai, pata töpö na ĩ ta wäsä kõo tasoma. Ta wäsä kõo tasoö ha, ‑Kilatiha. Paulo a, Silas a, ĩ na töpö kui töpö hai, ĩ homa tili töpö naiwö ta o‑ ĩ na töpö pi kuu salo, ĩ pata töpö kilipalo opama. ³⁹Töpö kili salo, Paulo a kule ha, ĩ ha töpö ekuiki nö, Paulo a, Silas a, ĩ na kilii töpö na, ‑Kamakö na wanisala sama tä thaa kipiliö!‑ ĩ na töpö kuu nö, töpö lisia kopamanöma. Töpö lisia kopamanö nö, ‑Hi tä uli ha pö kuo tihöö! Pö kononöö!‑ ĩ na ĩ pata töpö kuuma. ⁴⁰Ĩ na pata töpö kuu ha, titita wi a sai ha Paulo a, Silas a, ĩ na kilii töpö kuoma, töpö lisia kopalo nö, Lítiasoma a sai pö hamö töpö ekuiki nö, Jesus a thapo wi ĩ töpö talalö nö, töpö pi lotetea apöpamanöma. Ĩ töpö pi lotetea apöpamanö nö, Paulo a, Silas a, ĩ töpö hua konasolöma.

Tesalônika tä uli ha

¹Töpö hua kononö nö, Ãpípolisö tä uli hamö töpö hasuiki nö, thapi hamö Apolônia tä uli hamö töpö hasua nömöikitö nö, Tesalônika tä uli ha töpö walokö tasoma. Ĩ ha juteu töpö kokamo sinomo wi, ĩ nasimö ai a sai kuoma. ²Tä uli pewö hamö juteu töpö kokamo sinomo wi, ĩ sai pö kule, ĩ sai pö ha Paulo a lisipo sinomotima kutenö, Tesalônika tä uli ha ĩ nasimö ai a sai kua kutenö, ĩ a sai ha a lisipaso tasoma. Ĩ ha, 3 sápatu tä wakala kui tä wakala ha Paulo anö Teusö tä waheta a kateha nö, ³‑Ĩ naköö! Ĩ naköö!‑ ĩ na a kuu nö, ‑“Waiha Teusö anö a simöpali wi, ĩ a pea nö, a nomano nö, a temöa konaso kitäö!” ĩ na Teusö tä waheta kuumaö!‑ ĩ na Paulo a kuuma. A kuu nö, ‑Ĩ na Teusö tä waheta kuu wi, ĩ na tä kua toleo totiatalo opatima thaliö!‑ ĩ na a kuu nö, ‑Kamakö na Jesus sa wäsä pole, Teusö anö a simöpalö noai, ĩ a pasiwöö!‑ ĩ na Paulo a kuuma. ⁴Ĩ na Paulo a kuu ha, ‑Pitili ta‑ ai töpö kuu nö, ‑Paulo a, Silas a, ĩ töpö kuu kua wi na, ĩ na sa kuu hö̃töoö‑ ĩ na ĩ ai töpö kuuma. Köteeku töpö Teusömo sinomo wi, ĩ töpö satehe epii töpö aiki, ‑Awai. Ĩ na sa kuu hö̃töoö‑ ĩ na ĩ töpö kuu naioma. Pata töpö suö hai, ĩ ai töpö satehei töpö suö kuu naioma. ‑Paulo a kuu wi ĩ pitili ta‑ ĩ na töpö kuu noai, Paulo a na ĩ töpö kutioma. Ĩ na tä kuama.

⁵Ĩ na tä kuaö ha, juteu töpö aiki, ‑Hö. Kamisa kai a sua mai maaki, Paulo töpö kai a sua asawö‑ ĩ na juteu töpö pi kuu nö, Paulo töpö hĩsu thama. Töpö hĩsu thaa nö, ai töpö wanisalai, töpö kalipalo mai, sai pö kule, ĩ hamö ĩ töpö hasuso opati päo wi ĩ töpö kokamomanö nö, ĩ töpö, juteu töpö, ĩ na kilii töpö lalupalo kua nö, töpö hapalo opatima. Töpö hapalo opati nö, Paulo a, Silas a, ĩ na kilii töpö taemö hulasolöma. Töpö kokamo pole, ĩ töpö na Paulo töpö läkälölö pia salo, töpö taemö hulasolöma. Töpö taemö hulolö nö, Jasão a sai pö hamö ĩ juteu töpönö ai töpö kai ekupa nö, lata wi ti waniapalö nö, ĩ töpö lisipasoma maaki, ⁶Paulo töpö tapa maama. Tapa mi ha, Jasão a, Jesus a thapo wi ĩ töpö, ĩ na töpö kui, pata töpö na ĩ töpö läkäköma. Töpö läkäkö nö, lope epii juteu töpö hapalo nö, ‑Paulo töpönö Jesus ta wäsäö ha, ĩ tä uli pewö hamö töpö pilipai, ĩ töpö pewö isi wanihipamanö noai, ĩ töpö ta pi kuu mai. Hisimö Paulo töpö lisia nömöpasoma thaliö! ⁷Jasão anö, kama sai ha ĩ töpö thapoma thaliö!‑ ĩ na ĩ juteu töpö kuuma. Ĩ na töpö kuu nö, ‑Ĩ töpönö kaikana tä kai a peamati kuleö! “Ai tiko tä kaikana hai, ĩ Jesus a hilo wi, ĩ kaikana tä pasiwöö!” ĩ na ĩ töpö kuu saileö!‑ ĩ na juteu töpö kuuma.

⁸Ĩ na töpö kuu ha, töpö satehe epii töpö kokamone ĩ töpö, pata töpö, ĩ na töpö kui töpö pi honipo opama. ⁹Töpö pi honimo opa salo, Jasão a, Jesus a thapo wi ĩ ai töpö, ĩ na kilii töpö na ĩ pata töpö hapalo nö, ‑Sitipa ma kökö totopöma, kamisamakönö makö titia mai kitäö!‑ ĩ na pata töpö kuu nö, sitipa kökö tälö nö, ‑Pei. Pö hua kononöö!‑ ĩ na pata töpö kuuma.

Petéia tä uli ha

¹⁰Ĩ na tä kua tä, mumi tutei ha, Jesus a thapo wi ĩ töpönö Paulo a, Silas a, ĩ na kilii töpö simöa kõa hãtolöma. Petéia tä uli hamö töpö simönöma.

Petéia tä uli ha Paulo töpö talalotö nö, juteu töpö kokamo sinomo wi ĩ a sai ha ĩ töpö ekua soaköma. ¹¹Tesalônika tili töpö kuo kuo noai na, ĩ na petéia tili töpö kuo naio maama. Petéia tili töpö sömöka wakala apa asama. Jesus ta hini pi topa apa asama. ‑Paulo a kuu wi, ĩ na Teusö tä waheta kuu naia hãtoa kule‑ ĩ na ĩ töpö pi kuu nö, ĩ tä wakala pewö hamö Teusö tä waheta mötima. ¹²Ĩ ha juteu töpö satehe epii töpö aiki, ‑Jesus ta pitili‑ ĩ na ĩ töpö pi kuu kuköma. Köteeku pata töpö suö satehe epö, Köteeku wano töpö satehe epö, ĩ na töpö kui töpö aiki, ‑Jesus a pitili‑ ĩ na ĩ töpö pi kuu kuköma.

¹³Ĩ na tä kua tä, Tesalônika tä uli ha juteu töpö kule, ĩ töpö aiki, ‑Petéia tä uli ha Paulo anö Teusö ta wäsä nömöo thaliö!‑ ĩ na ĩ juteu töpönö ĩ ta kuu hinia hailö nö, Petéia tä uli hamö ĩ töpö tapo haiolasoma. Töpö taa hailalolö nö, Paulo töpö peama pia salo, petéia tili töpö lulukö nö, töpö satehe epii töpö kokamomanöma. ¹⁴Töpö kokamo opaö ha, mötati tuu kasö pata hamö Jesus a thapo wi ĩ töpönö Paulo a simöa soatalöma. Paulo a simönöma maaki, Petéia tä uli ha Silas a, Timóteo a, ĩ na kilii töpö kua haiköma.

¹⁵Paulo a kai hulasolö noai, Ateenasö tä uli ha ĩ töpönö Paulo a kai talalo nö, Paulo a takölö nö, Petéia tä uli ha töpö kopölöma. Töpö kopolö nö, ‑“‘Kamisa na lope epii pö huo haioki solöö!’ ĩ na Silas a, Timóteo a, ĩ na kilii töpö na, ĩ na makö kuu totihoö!” ĩ na Paulo a kuu kipiliö!‑ ĩ na ĩ töpö kuuma.

Ateenasö tä uli ha

¹⁶Ateenasö tili töpönö satehe epii ukutupö tä thapoma. ‑Teusö anö makö noamapököö!‑ ĩ töpö kuu totio mai, ‑Ĩ töpö ukutupönö makö noamapököö!‑ ĩ na ĩ ateenasö tili töpö kuu sinomoma. Ĩ na tä kua tä, Ateenasö tä uli ha Paulo a kua tä, Silas a, Timóteo a, ĩ na kilii töpö walo taa tä, a huataloti pamö tökö ukutupö satehe epii tökö ukutupö talalöma. Maa ma ukutupö, hii ti ukutupö, söpala ösö ukutupö, ĩ na tökö ukutupö kui, kama töpönö ĩ tökö ukutupö thaa pasipalö nö, ‑Ipa pata tä pasiwö‑ ĩ na töpö pi kuu pasio pätioma. Paulo anö ĩ tökö ukutupö talalö nö, a pi honipo opama. ¹⁷A pi honipo opa salo, Jesus ta wäsätima. Juteu töpö kokamo sinomo wi ĩ a sai ha juteu töpö, köteeku töpö Teusömo naio wi ĩ töpö, ĩ na töpö kui, Paulo anö ĩ töpö pi hatukupamani pia salo, Jesus ta wäsätima. Ta wäsäti nö, wani tä suta sinomo wi, ĩ piliso hamö Paulo a hulolö nö, ĩ hamö töpö huu pole, ĩ tä wakala pewö hamö ĩ töpö na Paulo anö Jesus ta wäsä hö̃tötioma.

¹⁸Ĩ na tä kua tä, epikuteu töpö, esötoiku töpö, ĩ na kilii töpö aiki, ‑Ĩ naköö! Ĩ na tä kua hãtoa kuleö!‑ ĩ töpö kuu sinomo wi, Paulo a na ĩ töpö hapalo hö̃töoma. Paulo anö Jesus a kateha nö, ‑Sanöma makö pewö nomasoma maaki, makö pewö temöa konaso kitäö!‑ tä kuu wi, ĩ ta kateha hö̃töoö ha, töpö hapalo hö̃töo nö, ‑Hi a wani hapalo soa päatalo opa wi, wi na ĩ a wani kuu totitio pasio pia salo?‑ ĩ na ĩ töpö kuuma. ‑Sai töpö na ai tiko töpö noamamo wi, Paulo anö ĩ sai töpö a wäsä nö, “Ĩ sai töpö pitili sisawö” ĩ na Paulo a kuu hãtoa alu kuleö!‑ ĩ na ai töpö kuuma. ¹⁹Ĩ na töpö kuu nö, Ateópaku tä heuma ha pata töpö kokamo sinomo wi, ĩ töpö na Paulo a kai hulolö nö, ‑Tute wa ta wäsä wi, kamisamakö na ĩ ta kateha totihoö! ²⁰Wa ta wäsä wi, ĩ sama ta hini tai mi ipö. Ĩ tä na samakö pi hatukupama mi salo‑ ĩ na Paulo a na ĩ na ĩ töpö kuuma. ²¹Ateenasö tili töpö, Ateenasö tä uli ha ai tiko töpö pilio naio noai ĩ töpö, ĩ na kilii töpönö tute ta wäsä pi topa sinomoma. Tute ta hini pi topa naio sinomoma. Önö kutenö, ĩ töpönö Paulo a hini pi topa apama.

²²‑Wa ta wäsä wi, ĩ tä na samakö pi hatukupama mi salo‑ ĩ na ĩ töpö kuu ha, Paulo a öpaiki nö, Ateópaku tä heuma ha pata töpö kokamo sinomo wi, ĩ töpö na a hapalo nö, ‑Ateenasö tili pö! Sai ma töpö thapo opa noa‑ ĩ na Paulo a kuuma. ²³A kuu nö, ‑Sa huataloti pamö ukutupö tökö na makö noamamo wi ĩ ma tökö thapo wi, ĩ sa tökö ukutupö möö hätäpoti tä, maa mapö sutuhule ha, ĩ ha ĩ ai sami sa ma talali kipili. Ĩ ma hõo ha ĩ na tä sãökama kuu wi tä sãökama kuoma: “Pata tä sainö samakö noama sinomo wi ĩ sama tai mi ipii, hi ĩ a uni” ĩ na tä sãökama kuoma‑ ĩ na Paulo a kuu nö, ‑Ma tä tai mi ipii, ĩ tä na makö noamamo sinomo naitio wi, kamakö na ĩ sa tä wäsä pia kuleö!‑ ĩ na Paulo a kuuma.

²⁴Ĩ na Paulo a kuu nö, ‑Hi masita tä uli, hii tiki, salo pö, sanöma töpö, ĩ na tä kui, tä pewö thapalö noai, ĩ Teusö a hilo wi, ĩ Teusö a hai, ĩ kaikana tä sai. Hi tä hẽtu ha töpö kupoli ĩ töpö, hi masita tä uli ha töpö huu pole ĩ töpö, ĩ na töpö kui töpö pewö na Teusö a simöo sinomoö. Sanöma töpönö Teusömo sinomo wi ĩ nasimö a sai thaki wi, ĩ nasimö a sai na Teusö a pilio mai kitä. ²⁵Teusö a honio pasio mi kutenö, “Sanöma makönö sa pasilipo mi salo” ĩ na Teusö a pi kuu mai kitä. Sanöma makö temöapalo sinomo wi, sanöma makö pewö na Teusö anö ĩ tä totomaö. Heneko wi, ĩ tä totomaö. Teusö anö ĩ tä pewö totomaö‑ ĩ na Paulo a kuuma.

²⁶Ĩ na a kuu nö, ‑Teusö anö wano tä samii tä thaa paipalö nö, töpö palamanö nö, hi masita tä uli pewö hamö töpö selekepamanöma. Hi masita tä uli thaa paio mai ha, “Ĩ na tä kuto tä, ki tä uli ha ĩ ha ai sanöma töpö pilia wäköpököö! Ai töpö pasi lö kui, ĩ na tä kuto tä, ki ai tä uli ha ĩ töpö pilia wäa pasiköpököö!” ĩ na Teusö a pi kuuma‑ ĩ na Paulo a kuuma.

²⁷A kuu nö, ‑“Teusö sa taeti nö, sa nakalö nö, Teusö sa taa hãtolali kitäö!” ĩ na Teusö anö sanöma makö pi thama pia salo, makö thapalöma. Teusö ma tae kule maaki, kamakö na Teusö a pã apa mai kitä. ²⁸Teusö anö sanöma makö temöapalamaö, makö hupalamaö, ĩ na Teusö anö ĩ na sanöma makö thamaö. Teusö a kua mi aköna, sanöma makö temö hupalo manapi. Ĩ na kamakö hai, ĩ na ai töpönö tä sãöka sinomo wi, ĩ na ĩ töpö kuu kua hö̃töoma. “Teusö makö ulupö pewö” ĩ na ĩ töpö kuu hö̃töoma‑ ĩ na Paulo a kuuma.

²⁹Ĩ na a kuu nö, ‑Teusö ulupö makö pewö kutenö, “Hi tä ukutupö kui na, ĩ na Teusö a kuö” pö pi kuu hãto tihöö! Sanöma töpö pi saimo päo nö, hi oto söpala ösö ukutupö thapali, hi pötaata söpala ösö ukutupö thapali, hi maa ma ukutupö thapili, ĩ na tä ukutupö kui, sanöma töpönö ĩ nasimö tä ukutupö thaa päoö. Ĩ a ukutupö kui na, ĩ na Teusö a kuö pasio mai kitä ta pi kuu mai‑ ĩ na Paulo a kuuma.

³⁰Ĩ na a kuu nö, ‑Ĩ sanöma töpö pi moti paia tä, Teusö anö ĩ töpö peama maa noai maaki, huki Teusö a hapalo nö, “Pö pi sapamo totihoö! Wanisala ma tä thaa noai, ĩ tä hosalöheö! Tiko töpö na makö pi tapomo mai, kamisa na pö pi tapomo totio sisaaö!” ĩ na Teusö a kuu thaliö! ³¹Ĩ na Teusö a kuu nö, “Waiha ĩ na tä kuto tä, sanöma töpö pewö na tä makokama läopö, sanöma töpö hiopö tä thaa wi, ĩ ta kateha hasulua apa kuki kitäö! Sa sailipili, ĩ anö ĩ ta kateha hasulua apa kuki kitäö!” ĩ na Teusö a pi kuu kuleö! A pi kuu ha, Teusö anö a sailö noai, ĩ aiki, “Ĩ na wa kuatima. Ĩ na wa kuatima. Wa wanisala apatima salo, wa pea soatio kitäö!” ĩ na a pitilimo opa wi, ĩ na ĩ a kuu kuki kitäö!‑ ĩ na Paulo a kuu nö, ‑Teusö anö a sailö noai, ĩ a noma totisoma maaki, Teusö anö a temöa komanöma thaliö! “Awai. Pitili ta. Ĩ na tä kua totio kitä” ĩ na Teusö anö sanöma makö pi thama pia salo, a sailö noai, ĩ a temöa komanömaö!‑ ĩ na Paulo a kuuma.

³²Ĩ na Paulo a kuu ha, ‑A noma totisoma maaki, a temöa komanöma thaliö!‑ ĩ na Paulo a kuu ha, ai töpö hapalo pi wasöa apama maaki, ai töpö aiki, ‑Wa ta katehae, waiha ĩ wa ta kateha kotaö! Ĩ sama ta hini pi topa kota kitä‑ ĩ na Paulo a na, ĩ na ai töpö kuu pasioma. ³³Ĩ na tä kua tä, pata töpö kokamo sinomo wi, ĩ töpö na Paulo a hapalo matalo nö, a hua konasolöma. ³⁴Paulo a na ai töpö nokalolö nö, ‑Jesus a pitili‑ ĩ na töpö pi kuu nö, Jesus a tälömae. Ateópaku tä heuma ha pata töpö kokamo sinomo wi, ĩ ai pata tä hai, ĩ Sionísiu a hilo wi, ĩ anö Jesus a täa nainöma. Ai suö tä hai, ĩ Tâmatisö a hilo wi, ĩ anö Jesus a täa nainöma. Ai töpönö Jesus a täa naiananöma.

Kotĩtu tä uli ha

¹Ĩ na tä kua tä, Ateenasö tä uli ha Paulo a kuoma, Kotĩtu tä uli hamö a hulasolöma. ²Kotĩtu tä uli ha a talalo nö, juteu tä Akila a talalöma. Akila aiki, Põtu tä uli ha a kupasoma maaki, Itália tä uli pata ha Homa tä uli kule, ĩ tä uli ha a pilia nömököma. Ĩ ha a pilia tä, Cláudio a kaikana patanö juteu töpö sasulöma. ‑Hi Homa ha pö pilio tihöö! Tiko hamö pö kupalo kõoö!‑ ĩ na juteu töpö noa thaö ha, Akila a, pusopö Pötisiila a, ĩ na kilii töpö hua kononö nö, Kotĩtu tä uli ha ĩ töpö kopölöma. Töpö kõa waikipölö noai ha, ĩ hamö Paulo anö ĩ töpö talalö nö, ĩ töpö na Paulo a noimo nö, ³ĩ töpö sai pö ha a kutioma. Akila a, pusopö a, ĩ na kilii töpönö salo ösö sai thaa sinomotima. Paulo anö salo ösö sai thaa sinomo hö̃töoma kutenö, ĩ töpö na a kutiki nö, salo ösö sai na Paulo a kalipalo naitioma.

⁴Ĩ na tä kua tä, sápatu tä wakala pewö hamö, juteu töpö kokamo sinomo wi, ĩ a sai ha Paulo a hapalotima. ‑Paulo a kuu wi, ĩ pitili ta‑ ĩ na Paulo anö juteu töpö, köteeku töpö, ĩ na töpö kui töpö pi thama pia salo, a hapalo loteteapalo opatima.

⁵Ĩ na tä kua tä, Masetônia tä uli ha a, ĩ na Silas a, Timóteo a, ĩ na kilii töpö kuoma, ĩ töpö hulolö nö, Kotĩtu tä uli ha ĩ töpö waloa haikö tasoma. Töpö waloa haikö tasoma tä, ĩ tä wakala pewö hamö Paulo anö ai tä na a kalipalo mi, Jesus ta wäsä sinomo sisatioma. Ta wäsä nö, juteu töpö na ta katehati nö, ‑Jesus a hai, Teusö anö a simöpalö noai ĩ a pasiwö‑ ĩ na Paulo a kutima. ⁶Ĩ na a kutima maaki, juteu töpönö Paulo a wanipo nö, Paulo a na ĩ töpö hapalo wanisala apatima. Töpö hapalo wanisala apati ha, ‑Pälaö! Teusö ma ta hini wanio opapa wikö. Teusö ma thapo mai, ĩ makö waikiwöö!‑ Paulo a pi kuu salo, kama hai ĩ haloi ösö na masita tä kopeke sälähäle, ĩ tä masita tepukupalö nö, a hapalo lotetea apa hö̃töpalo nö, ‑Makö nomano nö, makö pepalo tä, Teusö aiki, “Ĩ töpö na Paulo anö Jesus ta wäsäti maama kutenö, töpö pepalotii” ĩ na Teusö a pi kuu mai kitä. Kamisanö, kamakö na Jesus sa ta wäsä waikio ke nökö‑ ĩ na Paulo a kuu nö, ‑Pälaö! Huki juteu töpö pasi mai ĩ töpö na Jesus sa ta wäsä nömöo asaalö pia salo‑ ĩ na Paulo a kuuma. ⁷Ĩ na a kuu nö, juteu töpö kokamo sinomo wi, ĩ a sai kasö ha Sísiu Jusötu sai a kule, ĩ sai a ha Paulo a ekuiki nö, ĩ a sai ha Paulo a kuo nömötioma. Sísiu Jusötu a hai, ĩ juteu tä kuo maa noai kitä maaki, a Teusömo sinomotima.

⁸Ĩ na tä kua tä, juteu töpö kokamo sinomo wi, ĩ a sai ha a simöo sinomo wi, ĩ Kötiisöpu a hilo wi ĩ a, kama ai töpö, ĩ na kilii töpönö Jesus a Kaikana tälöma. Kotĩtu tili töpönö Paulo a kai a hininö noai, ĩ ai töpö satehe epii töpönö Jesus a tälö nö, ĩ töpö mai õhomamonasoma.

^9-10Ĩ na tä kua tä, Paulo anö Jesus a Kaikana uni tapa halu tä, Jesus a hapaloma. A hapalo nö, ‑Kawa na sa kua kutenö, a kili tihöö! Sa kai wäsä mapo mai, sa kai a wäsä soatioö! Ai tänö wa namo kusöpa mai kitäö! Hi tä uli ha sa thapo wi, ĩ satehe epii sa töpö thapamani pia salo!‑ ĩ na Jesus a kuu haluma. ¹¹Ĩ na Jesus a kuu ha, ĩ tä uli ha Paulo a kutioma. Ĩ töpö na Teusö a kai a taömati tä, ai tä inama, ai tä inama mötalipo kõa, ĩ na tä inama kupasoma.

¹²Ĩ na tä kua tä, Akaia tä uli ha töpö pilipai, ĩ töpö na homa tili töpönö Káliu a kaikanamoma tä, juteu töpönö Paulo a namo simöki pia salo, a huölö nö, Káliu a pata kaikanamo sinomo wi ĩ a sai hamö Paulo a kai ekuiki nö, ¹³‑Hi anö töpö Teusömoma hö̃töa kule maaki, kamisamakö hai ĩ pata töpönö samakö noa thaa kua noai na, ĩ na hi anö töpö noa thaa mai, tiko ta wäsä pasio thali‑ ĩ na ĩ juteu töpö kuuma. ¹⁴Ĩ na ĩ juteu töpö kuu ha, Paulo a moni hapalo kule maaki, juteu töpö na Káliu a pata hapalo läo nö, ‑Paulo anö pe epii wanisala tä thama aköna, kamisanö makö hini pi topala pi maaki, ¹⁵Paulo anö wanisala tä thaa maama. “Paulo a haö tomöpo mi” ĩ na makö kuu päoö. “Paulo anö juteu töpö nö patapö a kateha makoko mi, Jesus a hilo wi, ĩ a wäsä makoko mi, ĩ na Paulo a kuatii” ĩ na makö kuu päoö. “Juteu pata töpönö makö noa thaa kua noai na, ĩ na Paulo anö töpö noa thaa pasio mi” ĩ na makö kuu naio päoö. Paulo kama ma hini nö, “A wanisala” ĩ na makö kulasopö. Ĩ na kamisa kuu pasio mai kitäö! Kamisanö makö a hini mai kitäö!‑ ĩ na Káliu a pata kuuma. ¹⁶Ĩ na a pata kuu nö, ĩ juteu töpö atua kopamanöma. ¹⁷Töpö atua kopamani ha, juteu töpö kokamo sinomo noai ĩ a sai ha Sósötenisö a patamo sinomo noai, ĩ juteu töpönö ĩ a huölö nö, Káliu a pata kaikanamo wi ĩ a sai sika ha Sósötenisö a säma. A säma maaki, ‑Ĩ na töpö kua päoö‑ ĩ na Káliu a pi pata kuuma.

¹⁸Ĩ na tä kua tä, Kotĩtu tä uli ha Jesus a thapo wi ĩ töpö na Paulo a kutiki nö, satehe epii tä mumi matalo nö, Sítia tä uli pata hamö maa u hamö Paulo anö Pötisiila a, Akila a, ĩ na kilii töpö kai hulasolöma. Sẽikötéia tä uli ha kutiata a pata ha Paulo a titia paio mai ha, Paulo a hunuku päsä paioma. ‑“Ĩ na sa kua totio kitäö!” ĩ na Teusö a na ĩ na Paulo a kuu noai, ĩ pitili ta kuo totio noa‑ ĩ na töpö pi thamapö, a he manopasoma.

¹⁹Sẽikötéia tä uli ha ĩ töpö husolo nö, maa u hamö töpö hulasolö wi, Epesu tä uli ha töpö walokö lasoma. Töpö waloikölö nö, ĩ ha Pötisiila a, Akila a, ĩ na kilii töpö kuo haitioma. Ĩ na tä kua tä, Epesu tä uli ha Paulo a kua soa tä, juteu töpö kokamo sinomo wi ĩ a sai na a lisipalo nö, Paulo a, juteu töpö, ĩ na kilii töpö hapalo hẽtupasotima. ²⁰Töpö hapalo matalo nö, ‑Hisa ha wa kutiopököö!‑ ĩ na ĩ juteu töpö kuuma maaki, Paulo a hua satia konasolöma. ²¹A huu pia tä, ‑Teusö anö sa simöaö ha, sa huu kota kitäö!‑ ĩ na Paulo a kuu nö, Epesu tä uli ha a husoa kono nö, kutiata a pata ha a titia koiki nö, a hua konasolöma. ²²A hua konasolö wi, Sesatéia tä uli ha a waloa koikilö nö, a söposöpalo nö, Jetusalẽi tä uli pata hamö a hua soatasolöma. A hua soatalolö nö, Jetusalẽi tä uli pata ha Jesus a thapo wi ĩ töpö na a noimo nö, Sítia tä uli pata ha Ãsiokia tä uli kule, ĩ tä uli ha a hua nömösolöma. ²³Ãsiokia tä uli ha a waloa nömökikölö nö, ĩ ha satehei tä mumi mapamanö nö, a hua konasolöma. A hua kononö nö, Kalásia tä uli ha hasu, Pötísia tä uli hasua nömöpali, ĩ na a kuama. Ĩ tä uli hasupa tä, Jesus a thapo wi, Paulo anö ĩ töpö pewö pi lotetepamanöma.

²⁴Ĩ na tä kua tä, Epesu tä uli ha juteu tä Apoolu a talasoma. Apoolu a hai, Alesiãtötia tä uli pata ha a ose kupaso noai, ĩ a. A hapalo tao opama. Teusö tä waheta taö öpama. ²⁵Ai tänö Apoolu a na pata tä Jesus ta wäsä waikioma. Pe epii Apoolu anö Jesus pata ta wäsä sinomoma. Ĩ ta wäsä makoka apatima maaki, Jesus tä pewö a wäsä maama. Somi tä João anö töpö mãi õmati tä, João anö Jesus ta wäsä kua noai na, ĩ na Apoolu anö ta wäsä kua nömöo päoma. ²⁶Juteu töpö kokamo sinomo wi ĩ a sai ha Apoolu a kili mai ha, a hapaloma. Apoolu anö ta wäsä pole, Pötisiila a, Akila a, ĩ na kilii töpönö ĩ ta hini nö, ‑Apoolu anö Teusö ta wäsä makoka totio mi‑ ĩ töpö pi kuu nö, Apoolu a nakalö nö, a kai kõpöma. A kai kopo nö, Teusö anö sanöma makö täapa kõo läo wi, Apoolu a na ĩ ta wäsä makoka satia apama.

²⁷Ĩ na tä kua tä, Akaia tä uli hamö Apoolu a huu pi topa apama kutenö, ‑Awai! Ĩ ha wa hupököö!‑ ĩ na Jesus a thapo wi ĩ töpö kupalo nö, waheta tä sãököpalö nö, Akaia tä uli ha Jesus a thapo wi ĩ töpö pililati, ĩ töpö na ĩ tä waheta simöpalöma. ‑Apoolu a na makö noimo nö, “Hisa ha a kua naikiö!” Apoolu a na pö kuu!‑ ĩ na waheta tä simöpalö noai, ĩ na ĩ tä waheta kutasoma. Teusö anö Akaia tili töpö totiapala apa kutenö, ‑Jesus a pitili‑ ĩ na ĩ töpö pi thama totia apa waikila tä, ĩ töpö na Apoolu a talalotö nö, Jesus a thapo wi ĩ töpö pasilipo totio tasoma. ²⁸Apoolu anö ĩ töpö pasilipopö, satehe epii töpö sömöka tala tä, pe epii a hapalo nö, juteu töpö kai peama apatima. Teusö tä waheta wäsäti nö, ‑Teusö anö a kaikana asapali wi, ĩ Jesus a‑ ĩ na Apoolu a kutima.

Epesu tä uli ha

¹Ĩ na tä kua tä, Kotĩtu tä uli ha Apoolu a kutia tä, ola tä uli ha Paulo a hua pasilolö nö, Epesu tä uli ha a lisipaso tasoma. A lisipalotö nö, Jesus ta hua sinomo wi, Paulo anö ĩ ai töpö talalötö nö, ²ĩ töpö na a hapaloma. ‑“Jesus ta pitili” ĩ na makö pi kuu noai, ĩ tä, Teusö a õsi kua tolele, ĩ ma täalalöma?‑ ĩ na Paulo a kuu ha, ‑Ma. “Teusö a õsi kua tolele, ĩ a kua” tä kuu wi, ĩ sama ta hini pasio maapili‑ ĩ na ĩ töpö kuu hö̃töoma. ³Ĩ na töpö kuu ha, ‑Makö mãi õmamoö ha, wi na makö kua totioma?‑ ĩ na Paulo a kuu ha, ‑João anö töpö mãi õma kua noai na, ĩ na samakö mãi õmamo kua hö̃töoma‑ ĩ na töpö kuuma. ⁴Ĩ na töpö kuu ha, ĩ na Paulo a kuu hö̃töoma: ‑João aiki, “Makö pi saimo sapamo kõo nö, wanisala tä hosalöö! Wanisala ma tä hosalö nö, kamisa noa hamö a huu haio wi, ĩ Jesus ma täa totilöpöö!” ĩ na João a kuumaö!‑ ĩ na Paulo a kuuma. ⁵Ĩ na Paulo a kuu wi, ĩ ta hininö nö, ĩ töpönö Jesus pata tä täa totilö nö, ‑Ĩ töpönö Jesus pata tä thapo wi ĩ töpö‑ ĩ na ai töpö pi thama pia salo, ĩ töpö mãi õmamo kõo soatama. ⁶Töpö mãi õmamo kõo soataö ha, ĩ töpö na Paulo a ami walipaköma. A ami walipaiki nö, ĩ töpö pewö na Teusö a õsi kua tolele, ĩ a kua soaköma. Ĩ töpö na Teusö a õsi kua tolele, ĩ a kua soaki ha, tiko töpö kai aipö öpii töpö kai a thaa nö, töpö hapaloö, Teusö ta wäsäö, ĩ na töpö kua soatama. ⁷Ĩ töpö satehei, ĩ 12 töpö kui töpö kuoma.

⁸Ĩ na tä kua tä, juteu töpö kokamo wi ĩ a sai ha Paulo a ekuo sinomo nö, a hapalo kili mai ha, a hapalo loteteapalo opatima. ‑Pitili ta‑ ĩ na ĩ töpö pi thama pia salo, pe epii Teusö ta kateha apatima. ‑Kamakö na Teusö a kaikanamo sinomo wi, ĩ na ĩ tä kua totihoö!‑ ĩ na Paulo a ku upatima. Teusö ta katehati tä, 3 pilipoma kökö hasua thapamanöma. ⁹Teusö ta katehatima maaki, ai töpö aiki, ‑Pitili sa ta pii mi‑ ĩ na ai töpö pi kuu satimo opa nö, töpö kokamo wi, ĩ töpö na ĩ ai töpö hapalo nö, ‑“‘Ĩ na makö kuapököö!’ ĩ na Jesus a kuu thaliö!” ĩ na Paulo a kuti wi, ĩ ta wanisala apawöö!‑ ĩ na ĩ töpö kuu pi wasöa apatima. Ĩ na ĩ töpö kuti ha, Paulo anö, Jesus a kai a hua sinomoti wi, tiko hamö ĩ töpö kai hua nömönonö nö, Sitanu anö tä taöma sinomoti wi, ĩ a sai hamö ĩ töpö kai ekuiki nö, ĩ tä wakala pewö hamö Paulo anö Jesus ta wäsätima. ¹⁰Ĩ ha Paulo anö Jesus ta wäsäti tä, polakapi inama tökö mapasoma. Önö kutenö, juteu töpö, juteu töpö pasi mai ĩ töpö, ĩ na töpö kui, Ásia tä uli pata ha ĩ töpö pilio wi, ĩ töpö pewönö Jesus ta hinialalömae.

¹¹Ĩ na tä kua tä, Teusö anö Paulo a na tä aipama wi, töpö toapama kõo wi, ĩ tä totoköma. ¹²Paulo anö ai watata ösö pehai, ai watata ösö wani ipii, ĩ na ösö kui ösökö höpöo noai, ai töpönö ĩ ösökö tälölöma ha, salia wi ĩ töpönö ĩ ösökö höpöama, salia wi ĩ tä mapamani, sai töpö holea kopamani, ĩ na tä kuama.

Sai tänö Sepa a hai ĩ pelupö töpö sasupalö noai ĩ ta

¹³Ĩ na tä kua tä, ai juteu töpönö sai töpö sasutama sinomo wi ĩ töpö huu hätäpoti pamö ĩ töpönö Jesus a naka holisimotima. Sai töpönö töpö isi waniama wi, ĩ töpö na ĩ juteu töpö ekuiki nö, sai töpö na ĩ töpö hapalo nö, ‑“Paulo anö a wäsä sinomo wi, ĩ Jesus a hilo wi, ĩ sa naka manu kule, a holea kopaloö!” ĩ na wa noa thaa kuleö!‑ ĩ na ĩ töpö kutima. ¹⁴Ĩ na Teusömo wi a sai ha Sepa anö Teusö a täpä totio noai, ĩ na ĩ a pata hai ĩ 7 pelupö töpö kui töpö kutima. ¹⁵‑Jesus sa naka manu kule, a holea kopaloö!‑ ĩ na sai töpö na ĩ na ĩ töpö kutima maaki, ĩ töpö na ĩ ai sai tä hapalo hö̃töo nö, ‑Jesus sa taö, Paulo sa taö, ĩ na sa kua wi saö! Kamakö hai, ĩ witi makö pasiwö?‑ ĩ na ĩ sai tä kuuma. ¹⁶Ĩ na tä kuu nö, ĩ sai tänö a isi waniama noai, ĩ a waninö ĩ töpö namo keo nö, ĩ töpö hai ĩ haloi ösö kakalalö nö, pe epii töpö sälalö nö, töpö utitipamanöma. Ĩ töpö utitipamanöma kutenö, ĩ töpö lisia haipalo nö, töpö aulu upö, haloi ösö halopo mi, töpö sino toti ipii, ĩ na töpö kui töpö hulasolöma.

¹⁷Ĩ na tä kua tä, Sepa a pelupö töpönö Jesus a naka holisimoma salo, sai tänö ĩ töpö sälalö noai, ai töpönö ĩ ta wäsätima. Juteu töpö, juteu töpö pasi mai ĩ töpö, Epesu tä uli ha ĩ töpö pilile, ĩ töpö pewö na ĩ ta wäsätima. Ta wäsäö ha, töpö pewö kilipalo opa nö, ‑Jesus a Kaikana hilo wi, ĩ a lotete sisawöö!‑ ĩ na ĩ töpö kutima. ¹⁸Ĩ na ĩ töpö kuti tä, Jesus a thapo wi ĩ ai töpö satehe epii töpö hai, töpö kokamo wi töpö na ĩ töpö waloiki nö, satehe epii töpö sömöka taa tä, töpö hapalo hoka apati nö, ‑Hiopö sa tä thaa hö̃töo thaliö!‑ ĩ na ĩ töpö kuu hasulua apatima. ¹⁹Ĩ na ĩ töpö kuu nö, ĩ ai töpö õkamoti wi ĩ tä matasoma. Önö kutenö, ĩ töpö õkamo noai, ĩ ai töpö satehe epii töpönö õkamo wi ĩ tökö waheta hosali pia salo, ĩ tökö waheta kai waloiki nö, ĩ tökö waheta pewö kokapalö nö, ai töpö pewö mamo tetela tä, koa taka ha tökö waheta pewö sapöma. Ĩ tökö waheta pewö sapi ha, ‑Ĩ tökö waheta sakö noai, ĩ tökö waheta noa apa thaliö! Ĩ 50.000 pötaata sitipa kökö kui kökö noa kuoma thaliö!‑ ĩ na töpö kuuma. Ĩ na tä kuama. ²⁰Ĩ na tä kuama ha, Jesus a Kaikana wäsä wi, ĩ ta palasoma. Ta pala tä, Jesus ta hua wi, ĩ töpö sateheo opama.

²¹Jesus ta palaso noai ha, Paulo aiki, ‑Masetônia tä uli ha sa hasukitö nö, Akaia tä uli ha sa hasua nömöikitö nö, Jetusalẽi tä uli pata ha sa huu tasopököö!‑ a pi kuu nö, ‑Jetusalẽi tä uli pata ha sa hamamo paio nö, Homa tä uli pata ha sa hua totia nömösolöpököö!‑ ĩ na a kutima. ²²Ĩ na a kutima kutenö, Ásia tä uli ha a kua paitia tä, Masetônia tä uli ha polakapi töpö simönöma. Kama na Timóteo a, Etaasötu a, ĩ na kilii töpö kalipalo sinomo noai, ĩ töpö simönöma.

Epesu tili töpö hĩso opa nö, töpö hapalo opati noai ĩ ta

²³Ĩ na tä kua tä, ‑“Ĩ na makö kua totiopököö!” ĩ na Jesus pata tä kuu thaliö!‑ ĩ na tä kuu wi, ai töpönö ĩ ta kuu hininö nö, ‑Ĩ na kuno maiö!‑ ĩ na töpö kupalo opa nö, töpö lalupalo opama. ²⁴Sai a na sai tä Sianasoma a ukutupö wani hĩtale, Temétötiu anö ĩ a sai ukutupö wai thaa sinomotima. Ĩ pötaata tä sai ukutupö wai thaa sinomotima. Ĩ a sai ukutupö noa wai na pe epii noa tä sua sinomotima. Temétötiu a na töpö kalipalo wi, ĩ töpönö pe epii noa tä sua naio sinomoma. ²⁵Temétötiu a na töpö kalipalo wi ĩ töpö, pötaata tä ukutupö thaa sinomo naio wi ĩ ai töpö, ĩ na töpö kui, Temétötiu anö ĩ töpö kokamomanö nö, a hapaloma. ‑Ukutupö tökö noa na wani ma tä peli sua sinomo wi maaki, ²⁶Paulo aiki, “Sai töpö na makö noamamo sinomo wi, sanöma töpönö ĩ ukutupö töpö thaa pätali wi, ĩ pata töpö sai mai kitäö! Ĩ ukutupö töpö päwöö!” ĩ na Paulo a kuu sai thaliö!‑ ĩ na Temétötiu a kuuma. A kuu nö, ‑Hi Epesu tä uli ha töpö kule ĩ töpö, Ásia tä uli pewö hamö töpö kule ĩ töpö, ĩ na töpö kui, Paulo anö, “Jesus ta wäsä wi, ĩ pitili ta asawö” ĩ na ĩ töpö satehe epii töpö pi thaa waikimanöma thaliö! Kamakö aiki, “Awai. Ĩ na Paulo a kuati thaliö!” ĩ na makö kuu naio kitä. ²⁷Ĩ na tä kua tä, “Jesus ta wäsä wi ĩ pitili ta” ĩ na Paulo anö ĩ töpö satehe epii töpö pi thaa waikimanöma kutenö, hi töpö ukutupö na makö noamamo sinomo wi ĩ ma töpö thati pole, ai töpönö ĩ töpö ukutupö sua sinomo wi, ĩ tä mataso matimöö! Ĩ na tä kua tä, Sianasoma a pata hai ĩ sai a na töpö pewö hapalo pi wasöa matimöö! Ásia tili töpö, masita tä uli pewö hamö töpö pilile ĩ töpö, ĩ na töpö kui, Sianasoma a pata na ĩ töpö noamamo wi, ĩ a pata na ĩ töpö hapalo pi wasöa apa nö, Sianasoma a hosalö matimöö!‑ ĩ na Temétötiu a kuuma.

²⁸Ĩ na a kuu ha, töpö kokamo pole, ĩ töpö hĩsolo nö, töpö lalupalo opama. Ĩ töpö lalupalo opa nö, ‑Sianasoma a pata hai, ĩ pata tä pasiwöö! Epesu tili makö pewönö Sianasoma ma thapo wi, ĩ a hai ĩ pata tä sai pasiwöö!‑ ĩ na ĩ töpö kuu ha, ²⁹epesu tili töpö pewö hapalo opa hö̃töoma. Ĩ töpö hapalo opa hö̃töo nö, Paulo a na Masetônia tili töpö nokapalo pole, ĩ Kaiu a, Atisötaku a, ĩ na kilii töpö huölö nö, töpö kokamo sinomo wi ĩ a sai hamö töpö läkälölöma. ³⁰Ĩ na tä kua tä, töpö kokamo opöle, ĩ töpö na Paulo a hapalo pi topama maaki, Jesus a thapo wi ĩ töpönö a wasu läoma. ³¹Ĩ tä uli ha pata töpö kule, Paulo a na ĩ ai töpö noimo wi ĩ töpönö ai tä simöpalö nö, ‑“Töpö kokamo sinomo wi ĩ a sai na a huu tihöö!” ĩ na Paulo a na ĩ na a kuutöö!‑ ĩ na ĩ pata töpö kuuma.

³²Ĩ na tä kua tä, töpö kokamo pole, ĩ ai töpönö ai ta kateha nö, töpö lalupo opaö, ai töpönö tiko ta kateha nö, töpö lalupo opaö, ĩ na töpö lalupalo kua isi waniho opama. ‑Ĩ na tä kua salo, samakö kokamo kule‑ ĩ töpö pi kuu mai ha, motii töpö kokamo päoma. ³³Ĩ na tä kua tä, ĩ töpönö Alesiãtöti a namo simöki ha, juteu töpönö a mötalia soapamanöma. A mötalia soapamani ha, kama a noamo kõoö ha, a ami wani wasuo opa nö, a hapalo soata piama. ³⁴A hapalo soata piama maaki, töpö kokamo pole ĩ töpö aiki, ‑Ĩ a hai, juteu tä‑ töpö kuu nö, töpö lalupalo mapo maama. ‑Epesu tili makö hai ĩ sai tä Sianasoma hai, ĩ pata täö!‑ ĩ na töpö lalupalo opa nö, ĩ na töpö pewö ku upaalöma.

³⁵Ĩ töpö lalupalo hẽtupaso opaö ha, epesu tili pata töpö kai sãöka sinomo wi ĩ anö töpö wasua konö nö, a hapaloma. A hapalo nö, ‑Epesu tili pö! Epesu tili makönö Sianasoma a pata hai ĩ sai ma thapo kule. Hi tä hẽtu ha maa ma Sianasoma ukutupö kuoma, ĩ maa ma ukutupö kelaso noai, ĩ ma ma ukutupö thapo naia kule. Ĩ töpö pewönö ĩ tä taö waikile kitä. ³⁶“Ĩ ta holisi” töpö kuu mai kitä. Önö kutenö, wanaikiö! Pö pi hatukua totikiö! Wanisala ma tä thaa soatalo maikiö! ³⁷Sianasoma a hai ĩ sai a na wani tä kule, hi töpönö ĩ wani tä thomöa mai, sai tä Sianasoma anö makö noama wi ĩ a kateha wanisala mai, ĩ na töpö kuatima maaki, hisa ha hi ma töpö hila pikia apökö solöma. ³⁸Temétötiu a, Temétötiu a na töpö kalipalo wi ĩ töpö, ĩ na töpö kui töpö aiki, “Hi töpö wanisala apatiwöö!” ĩ na töpö kuu pi topa salo, pata töpö na Temétötiu ma töpö simöa mi salo. Ĩ tä wakala na pata töpö kokamo nö, ĩ nasimö ta hini sinomo wi, ĩ hamö Temétötiu a hapalo pasio taso mi salo. ³⁹“Makö hapalo pi topa salo, toitai makö kokamoö!” ĩ na pata töpö kuu waikioma kutenö, huki makö hapalo pi topa kõa salo, toitai makö kokamo totihoö! ⁴⁰Kamakö na pata töpö hapalo nö, “Ka pi ma tä thaa pia salo, makö kokamo pa, makö lalupotima? Witi pili anö wanisala tä thaa totipalöma?” ĩ na pata töpö kuu matimöö! Ĩ na pata töpö kuu ha, “Kui. Sama tä tai mi ipö” ĩ na makö kuu ha, “Makö waitilimo päo pia salo, makö lalupotima” ĩ na pata töpö kuu matimöö!‑ ĩ na pata töpö kai sãökati wi, ĩ a kuuma. ⁴¹Ĩ na a kuo hötötöo totioiki nö, ‑Peiö! Pö kopolöö!‑ ĩ na a kuuma.

Masetônia tä uli, Kötésia tä uli, ĩ na tökö uli kui tökö uli kule hamö

¹Ĩ na tä kua tä, epesu tili töpö hapalo isi waniho opa wi, ĩ tä mataso noai ha, Jesus a kai a hua sinomo wi, Paulo anö ĩ töpö nakalö nö, ‑Ĩ na makö kua totiopököö!‑ ĩ na a kuu nö, ĩ töpö pi topa apa kopamanöma. Ĩ töpö pi topa kopamanö nö, ‑Sa alulö heö!‑ ĩ na Paulo a kuu nö, Masetônia tä uli hamö a hulasolöma. ²A hulasolö wi, ĩ tä uli pewö hamö a huti nö, Jesus ta wäsä hätäpo nö, ĩ töpö pi topapamanö nö, a hua tolesolö wi, Kötésia tä uli ha a walokö tasoma. ³A waloikitö nö, ĩ Kötésia tä uli ha a kua tä, 3 kökö pilipoma kui kökö pilipoma hasupamanöma.

Ĩ na tä kua tä, Sítia tä uli pata ha Paulo a huu pia tä, ‑Juteu töpönö Paulo a namo simöa thaliö!‑ ĩ na Paulo anö ĩ na ta kuu hininö nö, ‑Masetônia tä uli hamö makö huu pasio koonöö!‑ ĩ na Paulo a kuuma. ⁴Ĩ na Paulo a kuu ha, petéia tili tä Pihu a hai ĩ pelupö Sópatötu a, tesalônika tili tä Atisötaku a, tesalônika tili tä Sekũtu a, tehepi tili tä Kaiu a, Timóteo a, ásia tili tä Síkiku a, ásia tili tä Tötópimu a, ĩ na töpö kui, Paulo a na ĩ töpö hua naisolöma. ⁵Masetônia tä uli hamö ĩ töpö hua nainonö nö, töpö pökatöa toleha paipasolöma. Töpö pökatöa toleha paipalolö nö, Tötôasi tä uli ha ĩ töpö waloikilö nö, ĩ hamö ĩ töpönö samakö walo taa läo lasoma. ⁶Juteu töpö pásökoamo tä, ĩsa ãi hölömo mai, ĩ nasimö ãi opala waikio noai ha, Hiliposö tä uli ha samakö husolö nö, kutiata a pata hamö samakö pi kaläa konasolö wi, 5 tä mumi kui tä mumi matalo nö, Tötôasi tä uli ha samakö waloa haia kõkö lasoma. Ĩ ha samakö kuki wi, sami semana sama tä hasupamanöma.

⁷Sami semana sama tä hasupamanö nö, tomĩku tä wakala kuki ha, samakö Teusömo pia salo, ĩsa sama ãi asawösö kakama oalöpö, samakö kokamoma. Ĩ hena tä sai tä, Paulo a hua konasolö pia salo, pe epii Jesus ta wäsä halutima. Mötali tä mumi ha ta wäsä soatioma. ^8-9Sai a hösöka ha ai sai a kupoli, ĩ a sai hösöka ha ai a sai kua tolepoli, ĩ ha samakö kokamo polali, ĩ ha koa taka sii satehe epii taka sii hilipalo opama. Atu hamö tä möö wi ĩ taka ha hĩsa tä Êusiku a tikitioma. Paulo a hapalo tetepo opati kutenö, ĩ hĩsa tä manisia apölo nö, a mikölöma. A mikölöma, atu ha a kelo nö, a säa totia apöpasoma. Ai töpönö a hoköa kopalöma maaki, a säa totia waikipasoma. ¹⁰Ĩ ha Paulo a ithoa kononö nö, hĩsa tä na Paulo a kaöhötaiki nö, a hãsokapala apa nö, ‑Pö pi honipo tihöö! A temöa soa kuleö!‑ ĩ na Paulo a kuuma. ¹¹Ĩ na a kuu nö, a tua kopolö nö, ĩsa ãi kakapalö nö, ãi oalö nö, ĩ töpö na a hapalo kõoma. A hapalo soatia tä, tä halusoma. Tä halulo nö, a hua konasolöma.

¹²Ĩ hĩsa tä temö öpii a kai konasolöma. Önö kutenö töpö pi mönaha apama.

¹³Ĩ na tä kua tä, Paulo aiki, ‑Mötati tuu kasö hamö Asôsö tä uli kulali, ĩ hamö maa u hamö pö pi hua pasilolöö! Piliso hamö opii sa hua pasitasolö kitä. Asôsö tä uli ha makö walotaikölö nö, sa waloa taa läoö!‑ ĩ na Paulo a kuu ha, kutiata a pata hamö samakö pi hua konasolöma. ¹⁴Samakö pi hua kononö nö, Asôsö tä uli ha samakö waloki kölö nö, piliso hamö Paulo a waloa haiki nö, kutiata a pata ha a titia naia koiki nö, Mitileni tä uli ha samakö pi hua konasolöma. ¹⁵Mitileni tä uli ha samakö kuo wi, samakö pi hua konasolö wi, sanöta Kiosö tä ha samakö pi hasuiki nö, thapi hamö, Samosö tä uli ha samakö pi hasuiki nö, ĩ hena tä, mötati tuu kasö hamö Miletu tä uli kule, ĩ tä uli ha samakö walokö lasoma. ¹⁶Ĩ tä uli ha samakö waloikilö nö, Pẽtekoosösisö tä wakala kua paia mai ha Jetusalẽi tä uli pata ha Paulo a walo pi topa apa salo, a silimo opama. A silimo kutenö, Ásia tä uli ha a kuo opimo wanio opama. Önö kutenö, ‑Epesu tä uli ha makö söposöpo mai kitäö!‑ ĩ na Paulo a kuu waikioma kutenö, Miletu tä uli ha samakö waloa soataköma.

Epesu tili töpönö Jesus a thapo wi, ĩ pata töpö na Paulo a hapalo noai ĩ ta

¹⁷Miletu tä uli ha samakö waloa soataiki nö, Paulo anö ai tä simöa tolea soatalöma. Ai tä simöa soatalö nö, epesu tili töpönö Jesus a thapo wi ĩ pata töpö naka soata tasoma. ¹⁸Ĩ pata töpö nakaö ha, Paulo a na ĩ töpö walokiso nö, ĩ töpö na Paulo a hapalotima. ‑Hi Ásia tä uli ha sa walo tute tä, kamakö na sa kutiki nö, sa kuati thali, ĩ ma tä taö öpa waikia kule‑ ĩ na Paulo a kuuma. ¹⁹Ĩ na a kuu nö, ‑Kamakö na sa kutiki nö, Jesus a Kaikana na sa kalipaloti kipili. Sa kalipaloti tä, “Pata sa asawöö!” sa pi kuu maapili. Jesus sa ta wäsä tä, juteu töpönö ĩ ta hini mi ipö ha, sa mamo puu soati pola nö, sa kalipaloti kipili. Juteu töpönö sa namo simöati nö, sa pepalamati kipili. Ĩ na kamakö na sa kalipaloti tä, ĩ na sa kuati kipili‑ ĩ na Paulo a kuuma. ²⁰A kuu nö, ‑Ta topa apöle, ĩ sa ta wäsä wanio maapili. Makö kokamo sinomo wi, ĩ ha Jesus sa ta wäsätii, kamakö sai pö hamö sa ta wäsä hätäpo opaö, ĩ na sa kuati kipili. ²¹Juteu töpö, juteu töpö pasi mai ĩ töpö, ĩ na kilii töpö na sa hapalo nö, “Makö pi taemo sapa kopalo nö, Teusö ma tälö nö, hiopö ma tä hosalö nö, kamakö hai ĩ Jesus a Kaikana na, ‘Jesus a pitili’ makö õsi kuu nö, ĩ na makö kua totiopököö!” ĩ na sa kuti kipiliö!‑ ĩ na Paulo a kuuma.

²²A kuu nö, ‑Huki Teusö a õsi kua tolele, ĩ anö sa simöa kutenö, Jetusalẽi tä uli pata hamö sa hua konasolö pia salo. Ĩ tä uli pata hamö sa kuo pialati, huki sa tä tai mi. ²³Kamisa na Teusö a õsi kua tolele, ĩ a kuu wi, ĩ sa tä taö sisaö. Sai pö pewö hamö sa huti pamö, Teusö a õsi kua tolele, ĩ a hapalo sinomo nö, “Ai töpönö wa titiki kitäö! Wa peama totio kitäö!” ĩ na kamisa na ĩ na Teusö a õsi kua tolele, ĩ a kuti thaliö! ²⁴Ĩ a kuti thali maaki, “Häö! Wi na taköö? Sa noma wani ipö sai taköö!” sa pi kuu mi. Jesus a Kaikana aiki, “Teusö anö makö totiapala apa wi, ĩ ta topa apöle ĩ ta wäsäö! ‘Hiopö ma tä thaa sinomo wi maaki, Teusö anö makö topa kopali kitäö!’ tä kuu wi, ĩ ta wäsä totihoö!” ĩ na kamisa na ĩ na Jesus a kuu kipiliö! Ĩ na a kuu ha, sa tä pewö a wäsä pi topa apa kule. “Jesus sa ta wäsä kota mai kitäö!” ĩ na sa pi kuu mi‑ ĩ na Paulo a kuuma.

²⁵Ĩ na Paulo a kuu nö, ‑Ĩ töpö pewö na Teusö a kaikanamo totio wi, kamakö na ĩ sa ta wäsä hätäpotipili, ĩ makönö sa tapa kota mai kitäö! ²⁶Ĩ na tä kuaö ha, ĩ na kamakö pewö na sa kuu pia kuleö! “Ai wa nomano nö, wa pea kuköma, Teusö aiki, ‘Paulo anö sa kai a wäsä maama salo, wa pea kule’ ĩ na Teusö a pi kuu mai kitä. ²⁷‘Ĩ na makö kua totiopököö!’ ĩ na Teusö a kuu wi, kamakö na ĩ sa tä pewö a wäsä waikitio kipili nökö” ĩ na sa kuu kuleö!‑ ĩ na Paulo a kuuma.

²⁸Ĩ na Paulo a kuu nö, ‑Hiopö tä na makö noamoö! Pö pi mosawikiö! Makö pi mosawiki nö, Jesus a thapo wi, hiopö tä na ĩ ma töpö noama hö̃töoö! “Ĩ töpö noama totihoö! Ĩ töpö na makö patamo sinomopököö!” ĩ na Teusö a õsi kua tolele, ĩ anö makö noa thama. Oweha kökö thapo wi, ĩ töpö mamo läapalo kua wi na, ĩ na Jesus a thapo wi ĩ töpö na pö mamo läapalo kua hö̃tötioö! Jesus a thapo wi, Teusö anö ĩ töpö kokamoma sinomo wi, kama hai ĩ pelupö Jesus iä pö noa na ĩ töpö tälö noai, ĩ töpö na pö patamo sinomoö! ²⁹Kamisa hua konasolö noai ha, ai töpö waloa haiki nö, “Jesus a hosalöheö!” ĩ na ĩ töpö kuu kitäö! Öla anö oweha kökö namo kusö kua wi na, ĩ na ĩ töpönö makö namo kusö thamati kitäö! Makö namo kusö thamati nö, “Jesus a hosalöheö!” ĩ na ĩ töpö ku upa kitäö! ³⁰Kamakö na ĩ töpö kokamo naio wi, waiha ĩ töpönö holisi ta kateha apa kuki kitäö! Jesus a thapo wi ĩ töpö luluapala pia salo, ĩ töpö mönamati pia salo. Ĩ töpö mönamati nö, holisi ta wäsä äpati kitäö! Ĩ na tä kua kitäö!

³¹Ĩ na tä kuaö ha, ĩ töpö na pö pi mosawikiö! “Kamakö na Paulo a kua tä, wakalai ha makö pi hatukupamani, mumai ha makö pi hatukupamani, ĩ na Paulo a kuati tä, 3 tökö inama kui tökö inama hasua waikimaki kipili” ĩ na pö pi kuu totihoö! “‘Ĩ na makö kuapököö! Ĩ na makö kuapököö!’ ĩ na kamakö pewö na ĩ na Paulo a ö̃kö kuti kipiliö!” ĩ na pö pi kuu totiataloö!‑ ĩ na Paulo a kuuma. ³²Ĩ na Paulo a kuu nö, ‑Pei. “Hi töpö noama haioö!” ĩ na Teusö a na ĩ na sa kuu kuleö! “Teusö tä kai na makö pi lulua haiopököö!” ĩ na kamakö na sa kuu kuleö! Teusö tä kai aiki, “Wanisala ma tä thaa wi maaki, Teusö anö makö totiapala apa kitä” ĩ na tä kuu wi, ĩ Teusö tä kai a. Ĩ Teusö tä kai na makö pi luluo opaö ha, makö õsi lotetea apöpaso kitäö! Teusö ma ta hini ipa tä, Teusö a hai ĩ makö pewö kutenö, Teusö tä uli ha makö kopölöma, Teusö anö ĩ makö pewö totiapala apa kõo naso kitäö!‑ ĩ na Paulo a kuuma.

³³Ĩ na a kuu nö, ‑Kamakö hai ĩ wani tä na sa pi wasiso maapili. Oto söpala ösö, pötaata söpala ösö, haloi ösö, ĩ na kamakö hai ĩ ösö kui ösö na sa pi wasiso maapili. ³⁴Kama sa ami sainö sa kalipaloti nö, ipa wani sa tä ose wai täati kipili. Wani sa tä wai täati nö, sa töpö nokapalama wi, ĩ töpö na wani sa tä ose wai totoma sinomo kipili. ³⁵“Sa kalipalo nö, töpö utiti ipii, wani tä na ĩ töpö honimo opöle, ĩ sa töpö pasilipopököö!” ĩ na makö pi thama pia salo, sa kalipalo sinomoti kipili. Jesus a Kaikana aiki, “Wani wa tä täa tä, wa pi mönaha apa kule maaki, ai wa tä täpälöma, wa pi mönaha satia apöpasoö” ĩ na Jesus a kuu noai, ĩ tä na pö pi motio hãto tihöö!‑ ĩ na Paulo a kuuma.

³⁶Paulo a hapalo matasoö ha, pili töpö maekonö töpö pewö hĩta thaiki nö, Teusö a na Paulo a hapaloma.

³⁷Teusö a na a hapaloma, ĩ ha ĩ töpö aiki, ‑A hua kononöö!‑ ĩ töpö kuu tä, Paulo a hãsokoapala nö, ĩ töpö pi otapalo nö, töpö pewö ö̃köpalo opama. ³⁸‑Kamakönö sa tapa kota mai kitäö!‑ ĩ na Paulo a kuu ha, pe epii ĩ töpö õsi wanisala apama. Ĩ ha Paulo a huu taa pi topa kõo salo, kutiata a pata kãa pamö Paulo a na ĩ töpö noka naisolöma.

Situ tä uli ha

¹Paulo a na töpö noka naisolö noai ĩ töpö na, ‑Samakö kõo pasiolököö!‑ ĩ na samakö kuu nö, kutiata a pata hamö samakö titia kõo soataiki nö, sanöta Kosö tä na samakö pi hua kõo soatasolöma. Kosö tä uli ha samakö hasuiki nö, ĩ hena tä, maa tuu kasö pata hamö Hosisö tä uli kulati, ĩ tä uli ha samakö kukö lasoma. Ĩ tä uli ha samakö kuikölö nö, Pátata tä uli ha samakö hua nömöa konasolö wi, ²ĩ ha samakö söposöa soapalo nö, Penísia tä uli hamö ai kutiata a kai pata huu piale, ĩ sama ösö kai huu talalö nö, ĩ ösö pata na samakö titia nömöa kõo soaki wi, samakö pi hua konasolöma. ³Samakö pi hua kononö nö, thapi hamö sanöta Sipöti sama tä uli talalö nö, kate a poko kuamö kule hamö, ĩ hamö samakö pi kaläamö kulolö nö, Sítia tä uli pata hamö samakö pi huamö kua soasolöma. Sítia tä uli pata ha Situ tä uli kule, ĩ tä uli ha kutiata a pata na töpö kalipalo sinomo noai ĩ töpönö wani tä pi söposöpamani ha, samakö söposöa naipasoma. ⁴Samakö söposöa naipalo nö, ĩ Situ tä uli ha Jesus a thapo wi ĩ ai sama töpö hẽtu talalöma. Ĩ sama töpö hẽtu talalö nö, ĩ töpö na sami semana tä hasupasoma. Ĩ töpö na samakö kua tä, Teusö a õsi kua tolele ĩ anö ĩ töpö pi hatukua waikipamanöma kutenö, ‑Jetusalẽi tä uli pata ha a huu taso tihöö!‑ ĩ na Paulo a na ĩ na ĩ töpö kuuma.

⁵Ĩ na tä kua tä, ĩ töpö na samakö kuo wi, ĩ ha samakö huso kõoma, Situ tä uli atu ha mötati tuu kasö pata kulati hamö, ĩ hamö Jesus a thapo wi, kamisamakö na ĩ töpö nokapasoma. Wano töpö, suö töpö, ulu töpö, ĩ na töpö kui töpö nokaalöma. Ĩ tuu kasö ha maka maka tä pata paalati, ĩ tä maka maka ha pili samakö maekonö samakö hĩta thaiki nö, Teusö a na samakö hapaloma. ⁶Teusö a na samakö hapalo matalo nö, ‑Samakö kõo pasiolököö!‑ ĩ na samakö kuu ha, ‑Pö kononöö!‑ ĩ na töpö kuu hö̃töoö ha, kutiata a pata ha samakö titia koiki nö, samakö pi kaläa konasolöma. Samakö pi kaläa konasolö ha, ĩ töpö pewö kõa pasisolöma.

Sesatéia tä uli ha

⁷Kamisamakö hai, Situ tä uli ha samakö husolo nö, Pötolemaita tä uli hamö samakö hulolö nö, ĩ ha samakö kua nömöa kõkö lasoö. Ĩ ha Jesus a thapo wi ĩ töpö na samakö noimo nömöa kõkölasoma. ⁸Samakö noimo nömöa koikilö nö, ĩ hena tä samakö hua nömöa kononö nö, Sesatéia tä uli ha samakö waloa nömöa kõkö lasoö. Samakö waloa nömöa koikilö nö, Jesus ta topa apöle, Filipe anö ĩ ta wäsä sinomo wi ĩ a sai pö na samakö pökö kuköma. Nii tä totoma sinomopö, Jesus anö töpö simönö noai ĩ töpönö 7 töpö kui töpö saipalö noai, Filipe a hai ĩ ai a kuoma. ⁹Filipe a hai ĩ 4 pete kökö kui, ĩ pete töpönö peanopö a thapo mai ha töpö kuo soa noai, ĩ töpö suönö Teusö a kai a wäsä sinomotima.

¹⁰Ĩ ha polakapi sama tä mumi thapama tä, Teusö a kai a wäsä sinomo noai, ĩ Akapu a hilo wi, Jutéia tä uli pata ha ĩ a kulati, ĩ a waloa läköma. ¹¹A waloiki nö, Paulo a hai ĩ sita hasulö nö, ĩ totonö kama ami pewö wani õka sapa kopasoma. Kama ami õka sapa kopalo nö, ‑“Kama sa ami õka sapa kupalohe na, hi sita thapo pole, waiha ai töpönö ĩ a õka thaa hö̃töpali kitäö! Jetusalẽi tä uli pata ha juteu töpö kule, ĩ töpönö ĩ a õkapali kitäö! A õkapalö nö, juteu töpö pasi mai ĩ töpö na a totoki kitäö!” ĩ na Teusö a õsi kua tolele, ĩ a kuu kuleö!‑ ĩ na Akapu a kuu läoma. ¹²Ĩ na Akapu a kuu läoö ha, ai töpö lole ĩ töpö, kamisamakö, ĩ na samakö kui samakö aiki, ‑Jetusalẽi tä uli pata ha a huulö tihöö!‑ ĩ na Paulo a na ĩ na samakö ku upa läo kipili. ¹³Ĩ na samakö ku upaö ha, ‑Makö ö̃kö maiki. Sa õsi wanisalama ti! Jetusalẽi tä uli pata ha Jesus pata sa ta wäsäö ha, ai töpönö sa õkapali ha, “Ĩ na tä kua pasio päo” sa kuu hö̃töo kitäö! Sa säa hãtopali kitä maaki, Jesus pata sa ta wäsä satimo pi topa apa hö̃töa kule‑ ĩ na Paulo a kuu satimo hö̃töoma. ¹⁴‑Naiö! A huulö tihöö!‑ ĩ na samakö ku upama maaki, Paulo anö samakö a hini maama. Samakö a hini mi ha, ‑Teusö anö tä thama pi topa apöle, Teusö anö ĩ tä thamapöö!‑ ĩ na samakö kuu soa pätasoma.

Jetusalẽi tä uli pata ha

¹⁵Ĩ na tä kua tä, polakapi tä mumi matalo nö, samakö husoa kononö nö, Jetusalẽi tä uli pata hamö samakö hulasolöma. ¹⁶Sesatéia tä uli ha Jesus a thapo wi töpö kule, kamisamakö na ĩ ai töpö noka naipasoma. Jetusalẽi tä uli ha samakö hulasolö wi, ĩ hamö samakö walokö lasoma. Ĩ hamö samakö walokö lasoö ha, kamisamakö na töpö noka wi ĩ töpönö, sipöti tili tä Menasõ a sai ha samakö kai walokö lasoma. Menasõ anö Jesus a thapo tete epa waikio noai ĩ a sai pö ha samakö pökö kuköma.

¹⁷Ĩ na tä kua tä, Jetusalẽi tä uli ha samakö waloki ha, ‑Aitaköö! Makö huu ke?‑ ĩ na Jesus a thapo wi, ĩ na ĩ töpö pi mönaha kuu läoma. ¹⁸Ĩ na töpö kuuma, ĩ hena tä Tiago a na Paulo a hapalo pia salo, kamisamakö solo Tiago a na samakö ekuköma. Ĩ ha Jesus a thapo wi ĩ pata töpö pewö kokamoma. ¹⁹Ĩ pata töpö kokamo pole ha, ĩ ha samakö ekuköma, ĩ töpö na Paulo a hapalo noimo nö, Paulo a kuati noai ĩ tä pewö a wäsä totioma. Juteu töpö pasi mai ĩ töpö na Paulo a kalipaloti tä, ĩ tä Teusönö tä thama noai, Paulo anö ĩ ta wäsä toitioma. ²⁰Ĩ ta wäsä toitioö ha, ‑Aitaköö! Teusö a totiatalo opawö‑ ĩ na töpö kuu nö, ‑Ipa Paulo ai. Wa töpö taa nökö. Hi juteu töpö satehe epii töpönö Jesus a tälömae. Ĩ töpönö Moisés a kai hini soatioö. ²¹Ĩ na ĩ töpönö ta kuu hinima: “Tiko töpö na juteu töpö pilia nainati, ĩ juteu töpö na Paulo a hapalotö nö, ‘Moisés anö pata töpö noa thaa noai, ĩ ta hosalöö! Au ulu töpö isi ola ösö hosa tihöö! Juteu makö kua sinomo wi na, huki ĩ na makö kua naio maapököö!’ ĩ na Paulo a kuu thaliö!” ĩ na hi juteu töpönö ĩ na ta kuu hinima. ²²Önö kutenö, wi na makö kuapö? “Paulo a waloa waikiköma thaliö!” ĩ töpönö ta kuu hini waikile kitä. ²³Pi naka. Ĩ na wa kuapöö! Hisa ha kamisamakö na 4 töpö kui ai töpö kua naia kule. Teusö a na ĩ töpö hapalo nö, “Ĩ na samakö kua totio kitäö!” ĩ na ĩ töpö kuu totioma. ²⁴Ĩ na töpö kuu totioma kutenö, “Ĩ töpö pitili” ĩ na Teusö a pi thamapö, töpö Teusömo nö, töpö sanumoö, pata töpö maaki, töpö he manopasoö, ĩ na töpö kuati pia salo. Moisés anö pata töpö noa thaa noai, ĩ töpönö ĩ ta hini salo, ĩ na töpö kuati pia salo. Önö kutenö, ĩ töpö na a sanumo nainoö! Ai töpö na sitipa wa kökö totokö nö, ĩ töpö he manopamanöö! Ĩ na wa kuaö ha, “Ö̃kö ta o. ‘Paulo anö Moisés a kai a peama apa nö kiliawö ia!’ ĩ na makö kuu wi, ĩ ta holisi. Paulo anö Moisés a kai a hini naio pasiowö” ĩ na hi juteu wa töpö thamapököö! Paulo ai!‑ ĩ na töpö kuuma.

²⁵Ĩ na töpö kuu nö, ‑Juteu töpö pasi mai ĩ töpönö Jesus a tälö noai, ĩ töpö na waheta sama tä simöa waikipali kipili. Ĩ na ĩ tä waheta kuuma: “Ukutupö töpö na töpö noamamo wi, ĩ töpö ukutupö na salo a totokö noai, ĩ a salo oa tihöö! Salo a iä wanimo paio mai ha a oa tihöö! Iä iä tä oa tihöö! Ai wa tä po mane maaki, a mamo hãto tihöö!” ĩ na ĩ tä waheta na ĩ na samakö kuu kipili‑ ĩ na ĩ töpö kuu totiatalo opama. ²⁶Ĩ na ĩ töpö kuu totiatalo opaö ha, 4 töpö kui, Paulo anö ĩ töpö kai ekuiki nö, ĩ töpö na Paulo a sanumo naioma. A sanumo naio nö, Teusömo wi a sai õsimö na a lisitalo nö, ‑Ĩ na tä mumi kuto tä, samakö õsi salupamo matalo nö, Teusö a na tä totoköpö, ĩ nasimö sama tä totoki pia salo‑ ĩ na Paulo a kuuma.

Titita wi a sai ha Paulo a läkälölö noai ĩ ta

²⁷Ĩ na tä kua tä, 7 tökö mumi kui tökö mumi mapo pia tä, Teusömo wi a sai ha ásia tili töpö juteunö Paulo a talalöma. Paulo a talalö nö, ĩ töpönö ai juteu töpö satehe epii töpö lululö nö, Paulo a huölö nö, töpö lalupo opama. ²⁸‑Isöhaeu pö! Samakö pasilipalöö! Ĩ tä uli pewö hamö hi a wani aiki, “Isöhaeu töpö a hini tihöö! Moisés anö isöhaeu töpö noa thaa noai, ĩ ta hini tihöö! Isöhaeu töpö Teusömo sinomo wi ĩ a sai topa maneö!” ĩ na Paulo a wani ku upa thaliö! Huki hi Teusömo wi a sai ha juteu töpö pasi mai, Paulo anö ĩ töpö kai waloiki nö, töpö kai lisipasoma kutenö, hi a sai ausi ipii ĩ a sai samimananö noa‑ ĩ na töpö lalupo ku upama. ²⁹Sai pö hö̃kökö öpii sai pö kule, ĩ ha Paulo anö epesu tili tä Tötópimu a kai wani huu noai, ĩ töpönö ĩ tä talalöma kutenö, ‑Ĩ a wani hai, juteu tä pasi mi ipii, ĩ a maaki, Teusömo wi a sai na Paulo anö ĩ a kai wani lisia hiopöa apöpaso noa‑ ĩ na töpö pi kuuma.

³⁰Ĩ na tä kua tä, Jetusalẽi tä uli pewö pata hamö ĩ töpö lalupalo opa wi ĩ tä palasoma. Töpö pewö läläoki solö nö, töpö pewö walopa läo solöma. Töpö walopa läoso nö, Paulo a huöle nö, Teusömo wi a sai atu hamö Paulo a läkäa atulölö nö, sai a päka laa kõköma. ³¹Taka laa kõkö nö, Paulo a säpa pia tä, ‑Jetusalẽi tili töpö pewö lalupalo opa nö, töpö waitilimopalo opa kulaliö!‑ ĩ na homa tili töpö sotatu simöa sinomo wi ĩ a patanö tä kuu hininö nö, ³²ai sotatu töpö, ai sotatu pata töpö, ĩ na töpö kui töpö naka soatalölö nö, juteu töpö lalupalo pole, ĩ töpö na a läläa soatasolöma. A läläa soatasolöma, ĩ juteu töpö lalupalo polati hamö ĩ töpö kai hua soatasolöma. Töpö kai hua soatasolö wi, ĩ juteu töpö lalupo polati, ĩ töpönö ĩ sotatu töpö kai huu talalö nö, Paulo a sä maa lätasoma.

³³Paulo a sä maa lätasoma, ĩ ha ĩ sotatu pata tä waloa kotöa totiki nö, Paulo a huöa totilö nö, ‑Polakapi söpala ösö totokönö a õkapalöö!‑ ĩ na a pata kuu nö, ‑Hi a hai, ĩ witi pili a? Hinö ka pi tä thama?‑ ĩ na a pata kuuma. ³⁴Ĩ na a pata kuu ha, töpö lalupalo isi waniho opa päoma. Töpö hapalo makokopo mi kutenö, ‑Wi na tä kuaö ha, hi töpö lalupalo opati nö, töpö waitilimotii?‑ ĩ na a pi pata kuu pasioma. Ĩ na a pi kuu salo, kama hai ĩ sotatu töpö na, ‑Kamakö hai ĩ sai pö lototoa apöle, ĩ a sai na Paulo a titikötöö!‑ ĩ na ĩ a pata kutima. ³⁵Ĩ na a pata kuti ha, ĩ sotatu töpönö Paulo a täa soatalölöma. A täa soatalölö nö, sotatu töpö hai sai a ha tuo wi tä kule, ĩ ha Paulo a kai atelo nö, ĩ juteu töpö waitilimo opa läoö ha, sotatu töpönö Paulo a maopolöma. ³⁶Töpö satehe epii töpö lalupalo kai nokapalo pole ĩ töpö aiki, ‑A säpalöö! A säpalöö! A säpalöö!‑ ĩ na ĩ töpö pewö kupalo opama.

³⁷Ĩ na tä kua tä, sotatu töpö hai sai a lototoa apöle, ĩ a sai õsimö ha Paulo a kai lisipo pia tä, Paulo aiki, sotatu pata tä na, ‑Kawa na sa hapalo pi topa paia kule‑ ĩ na a kuu ha, ‑Köteeku wa töpö kai taö öpakö ta o. ³⁸Sutu ha homa tili töpö kaikanamo noai, esitu tili tänö ĩ tä taa wani ipö salo, poke tä uli ha wasu töpö satehe epii, ĩ 4.000 töpö kui töpö wasu kai hulasolö noai, ĩ wa hãtowö?‑ ĩ na ĩ sotatu pata tä kuuma. ³⁹A kuu ha, ‑Ma. Juteu sa. Silísia tä uli pata ha Tasu tä uli kulati, ĩ ha sa ose wai kupasoma. Ipa juteu töpö na sa hapalo pi topa kule. “Awai!” wa kuu kitä?‑ ĩ na Paulo a kuu ha, ⁴⁰‑Awai! A hapaloö!‑ ĩ na ĩ sotatu tä kuu hö̃töoma. Ĩ na a kuu hö̃töoö ha, sai a hamö tä tuo wi ĩ ha Paulo a öpapalo nö, juteu töpö lalupalo kai sotota pole, Paulo a aminö ĩ töpö wasuma. Ĩ töpö wasu ha, töpö lalupalo matasoma. Töpö lalupalo matasoö ha, Paulo anö epöteu töpö kai thaa nö, a hapaloma.

Kama hai ĩ juteu töpö na Paulo a hapalo noai ĩ ta

¹Paulo a hapalo nö, ĩ na a kuuma: ‑Ipa pö! Ipa pata töpö. Kamakönö sa säpa pi topa apa manu kule, kamakö na sa hapalo pia kule. Sa kuu piale, ĩ ta hiniheö!‑ ĩ na Paulo a kuuma. ²Ĩ na a kuu ha, ‑Epöteu makö kai a tha apa nö kilile ia‑ ĩ na ĩ töpö pi kuu nö, töpö hapalo mai ha, töpö sömöka taa totioma. ³Töpö sömöka taa totia tä, Paulo a hapalo kõo nö, ‑Juteu sa naiwö. Silísia tä uli pata ha Tasu tä uli kulati, ĩ hamö sa kupasoma. Ĩ hamö sa kupalo nö, hi Jetusalẽi tä uli ha sa patasoma. Sa pataalö tä, Kamalieu anö sa pi hatukamama. Moisés anö kamakö hai ĩ nö patapö töpö noa thaa noai, ĩ tä pi na sa pi hatukua totia apöpamanöma. Kamakönö Teusö ma hini pi topa apa kua wi na, ĩ na sa kua hö̃tötioma. ⁴“Jesus a thapo wi ĩ töpönö Teusö a hini mi ipö” ĩ na sa pi kuu salo, sa töpö säpama pi topa apa nö, sa töpö namo simöa sinomotima. Suö töpö solo sa töpö õkapamanö nö, titita wi a sai ha sa töpö titiaköma. ⁵Teusö a täpä totio wi ĩ pata tä, juteu pata töpö kokamo sinomo wi ĩ töpö, ĩ na töpö kui töpö aiki, “Paulo a kuu pole, ĩ pitili ta” ĩ na ĩ töpö kuu kitä. Ĩ pata töpönö kamisa na waheta tökö totopa nö, “Tamaasöku tä uli ha kamakö hai ĩ juteu töpö kulati, ĩ töpö na hi waheta tökö kai hulolöö!” ĩ na ĩ pata töpö kuuma. Ĩ na töpö kuu ha, Tamaasöku tä uli ha ĩ waheta sa tökö kai hulasolöma. “Tamaasöku tä uli ha Jesus a thapo wi ĩ sa töpö õkapamanö nö, hi Jetusalẽi tä uli pata ha sa töpö õkama hila kõkö solöpöö! Hisa ha sa töpö peama kõosolöpöö!” ĩ na sa pi kuu salo, Tamaasöku tä uli ha sa hulasolöma.

‑Jesus sa kai a hinia totili kipili‑ Paulo a kuu noai ĩ ta

Atos 9.1-19; 26.12-18

⁶Sa huulö pamö, Tamaasöku tä uli ha sa ateo opa tä, motokö hẽtupo pia tä, hutu mosökö ha tä pata wakala apii, kamisa na ĩ tä wakala pata waloköma. ⁷Ĩ tä wakala pata waloki ha, masita ha sa kelasoma. Sa kelo nö, ta pata hapalo pole ĩ sa ta hini ipa hö̃töoma. “Saulu ai. Wi na wa pi kuu salo, sa peamati kule?” ĩ na ta pata kuu soatama. ⁸Ĩ na ta pata kuu ha, “Pata tä! Ĩ witi wa?” sa kuu ha, “Nasaté tili Jesus sa. Kawanö sa peama wi ĩ sa” ĩ na ta pata kuuma. ⁹Kamisa na töpö huu naine, ĩ töpönö ĩ tä wakala pata tapa naioma maaki, ta pata kuu pole ĩ ta hini pasio maama.

¹⁰Ĩ na tä kua tä, “Pata tä! Wi na sa kuapö?” sa kuu ha, “A hoköa kopaloö! Tamaasöku tä uli ha a lisia kopalolö. Wa lisipasoö ha, ki töpö aiki, ‘‑Ĩ na wa kua totiopököö!‑ ĩ na Teusö a kuu kuleö!’ ĩ na ĩ töpö kuu kitäö!” ĩ na Jesus pata tä kuu totioma. ¹¹Ĩ na pata tä kuu ha, ĩ tä wakala patanö sa mamo höpöpöa soatasoma kutenö, kamisa na töpö huu naine, ĩ töpönö sa tutua kotalölö nö, Tamaasöku tä uli ha sa kai lisia kopaso lasoma.

¹²Sa kai walokö lasoma tä, kamisa na Ananiasö a waloa hö̃töa läköma. Ananiasö anö Moisés a kai a hini totiatalo opama. A Teusömo sinomotima. “Ananiasö a pata totiatalo opaö” ĩ na tamaasöku tili töpö juteu pewö kutima. ¹³Kamisa na Ananiasö a waloa läiki nö, “Ipa Saulu ai. A mamo tetea kopaloö!” ĩ na a kuu ha, sa mamo tetea kõo soatalo nö, Ananiasö a na sa mamo tetea kõo soatasoma.

¹⁴Sa mamo tetea kõo soatasoma, ĩ ha Ananiasö a hapalo soata nö, “Kamakö nö patapönö Teusö a thapo noai ĩ Teusö anö wa sailöma. Teusö anö tä thama pi topa wi, kawa na ĩ tä taöma pia salo. Jesus Cristo anö toitai tä thatala apa asa wi, kawanö ĩ wa tapa asapö, Teusö anö ĩ wa saia asalöma. ‘Jesus a hapalo wi, ĩ Saulu anö ĩ a hapalo hinipöö!’ ĩ na Teusö a pi kuuma. ¹⁵Wa tä tapae ĩ tä, wa ta hinie ĩ tä, ĩ na kilii sanöma töpö pewö na ĩ wa ta wäsäpököö! ¹⁶Pei. Wa hoköa soatalo nö, Jesus wa nakalö nö, wa mãi õmamono nö, wanisala wa tä thaa noai ĩ wa tä salupamanöpöö!” ĩ na kamisa na ĩ na Ananiasö a kuu totiatalo opama.

¹⁷Ĩ na Ananiasö a kuu ha, Jetusalẽi tä uli pata ha sa hua konasolöma. Ĩ ha sa waloikilö nö, Teusömo wi a sai ha Teusö a na sa hapaloti tä, uni sa tä talalöma. ¹⁸Jesus Kaikana a hapalo pole, ĩ sa uni talalöma. Kamisa na ĩ a hapalo nö, “Kawanö sa wäsä piale, hi jetusalẽi tili töpönö ĩ ta hini mai kitä. Önö kutenö, a lopatalolö. Tiko hamö a huu soatalö” ĩ na Jesus a kuu ha, ¹⁹“Pata tä! Juteu töpö kokamo sinomo wi ĩ sai pö hamö sa huu hätäpo nö, wa thapo wi ĩ sa töpö talalö nö, sa töpö soapali, titita wi a sai ha sa töpö titiki, ĩ na sa kuati kipili. Ĩ na sa kuatipili, hi jetusalẽi tili töpönö ĩ tä taö öpa waikile kitä. ²⁰Estêvão anö wa wäsäti noai, ĩ töpönö ĩ a säpa pia tä, kamisa aiki, ‘Awai. Ma säpalöpöö!’ sa kuu nö, a säpalö noai ĩ töpö hai ĩ haloi sa ösö huölöma” ĩ na Jesus Kaikana a na ĩ na sa kuuma. ²¹Ĩ na sa kuu ha, “Tiko hamö a hua kononöö! Pai ipa hamö juteu töpö pasi mai ĩ töpö pilipai, ĩ töpö na kamisanö wa simöpali pia salo” ĩ na Jesus Kaikana a kuuma‑ ĩ na töpö sotota pole, ĩ töpö na ĩ na Paulo a kuuma.

²²Ĩ na Paulo a kuu ha, töpö sotota pole ĩ töpö sömöka taa toitioma maaki, ‑Juteu töpö pasi mai ĩ töpö na Jesus pata tänö sa simöpali pia salo‑ ĩ na Paulo a kuu ha, töpö lalupaloa apösoma. Töpö lalua apölo nö, ‑A wani säpalöö! A wani säpalö nö, a wani hosalöö! Ma wani säpa maama, tä topa mai kitäö!‑ ĩ na töpö lalupalo kuuma. ²³Ĩ töpö lalupalo kuu nö, töpö waitili salo, töpö haloi ösö hasutalö nö, masita tä kopeke helumama. ²⁴Ĩ na töpö kuati ha, sotatu pata tä aiki, ‑Hi a sai ha Paulo a titia soataköö! Ma titiki nö, ma soapalö nö, Paulo a na ma tä hininö nö, “Wi na töpö pi kuu salo, ‘Paulo a säpalöpököö!’ ĩ na töpö lalupalo kuu kulai?” ĩ na Paulo a na ĩ na pö kuu!‑ ĩ na sotatu töpö na ĩ na pata tä kuuma.

²⁵Ĩ na pata tä kuu ha, sotatu töpönö Paulo a õkapalöma. Salo ösö totonö Paulo a õkati tä, sotatu tä na Paulo a hapalo nö, ‑“Ĩ homa tili tänö wanisala tä thaa totiomaö!” ĩ na pata töpö kuu paio mi tä, ĩ homa tili tä soapa pasio mai kitä ta pi kuu mai‑ ĩ na Paulo a kuu nö, ‑Kamisa hai, homa tili sa naiwö‑ ĩ na Paulo a kuu ha, ²⁶ĩ sotatu pata tä na ĩ sotatu tä ekuiki nö, ‑Ĩ a wani na ĩ ka pi wa tä thaa pia kule? Ĩ a wani hai, ĩ homa tili tä naiwö kutenö, a thama tihöö!‑ ĩ na ĩ sotatu tä kuuma. ²⁷Ĩ na a kuu ha, Paulo a na sotatu pata tä waloiki nö, ‑Homa tili wa totiwö?‑ a kuu ha, ‑Awai. Kamisa hai, homa tili sa totiwö‑ ĩ na Paulo a kuu hö̃töoma. ²⁸Ĩ na Paulo a kuu ha, ‑Homa tili sa kupaso pia salo, sitipa kökö satehe epii sa kö sitipa totoköma‑ ĩ na sotatu pata tä kuuma. Ĩ na a kuu ha, Paulo aiki hö̃töwö, ‑Sa ose wai kupaso noai, ĩ tä, homa tili sa kua soa pasipasoma‑ ĩ na Paulo a kuuma.

²⁹Ĩ na Paulo a kuu ha, Paulo a hapalama piale, ĩ töpö öpa pasököa soataköma. Ĩ ha, sotatu pata tä aiki, ‑Hö. Hi a hai, homa tili tä maaki, “A õkapalöö!” ĩ na sa wani kuu silia apa nö kililo ia!‑ ĩ na a pi pata kuu kõo salo, a kilipalo opama. ³⁰A kilipalo opa nö, ĩ hena tä, ‑Wi na Paulo a kuaö ha, “Paulo a wanisala apawö” ĩ na juteu töpö kupalo kule?‑ ĩ na ĩ sotatu pata tä pi kuu nö, Paulo a kusöa kopamanö nö, Teusö a täpä sinomo wi ĩ pata töpö, juteu pata töpö kokamo sinomo wi ĩ töpö, ĩ na töpö kui töpö nakalötö nö, töpö kokamomanöma. Ĩ töpö kokamomanö nö, Paulo a nakalö nö, ĩ juteu töpö kokamo pole, ĩ töpö mötali ha Paulo a lomaköma.

Juteu pata töpö na Paulo a hapalo nömöo noai ĩ ta

¹Juteu pata töpö kokamo pole, ĩ töpö na Paulo a hapaloma. ‑Ipa pö! “Teusö a na sa wanisala mai kitäö!” sutu ha sa pi kuuma, huki sa pi kuu soa kule‑ ĩ na Paulo a kuuma. ²Ĩ na a kuu ha, Teusö a täpä totio wi ĩ pata tä Ananiasö aiki, ‑Paulo a kai wani säkö‑ ĩ na Paulo a kotö ha töpö öpale, ĩ töpö na ĩ na ĩ a pata kuuma. ³Ĩ na a pata kuu ha, ĩ a na Paulo aiki, ‑Teusö anö wa wani säa hö̃töli kitäö! Wa holisimo opawö. Moisés anö pata töpö noa thaa noai, ĩ wa ta hininö nö, kamisa na wa tä makokamapö, hisa ha kawanö sa lomakö solöma maaki, Moisés wa kai a hini pasia mane. “Wanisala tä thaa pasio mai ĩ a sä tihöö!” ĩ na Moisés a kuuma maaki, “Paulo a sä!” wa kuu silia apawö‑ ĩ na Paulo a kuuma. ⁴Ĩ na Paulo a kuu ha, Paulo a kotö ha töpö lole, ĩ ai töpö aiki, ‑Teusö a täpä totio wi, ĩ pata tä na wa hapalo hiopöa apa maikiö!‑ ĩ na töpö kuu ha, ⁵‑Ipa pö! “Ĩ a hai, Teusö a täpä totio wi ĩ pata tä ta o” ĩ na sa pi kuu mae. Ĩ na Teusö tä waheta kuu: “Au ai pata tä na a hapalo wanisala tihöö!” ĩ na tä kuu‑ ĩ na Paulo a kuuma. ⁶Ĩ na a kuu nö, ‑Hi pata töpö kokamo pole, ĩ ai töpö hai ĩ satuseu töpö, ĩ ai töpö hai ĩ patiseu töpö, ĩ na kilii töpö kokamo kule‑ ĩ na Paulo a pi kuu manu kule, ‑Ipa pö! Patiseu sa. Patiseu ulupö sa. Kamakö aiki, “‘Noma waikilasoma maaki, töpö temöa konaso kitäö!’ ĩ na Paulo a pi kuu salo, a wani hiopöa apatii” ĩ na makö kuu hãtoa alu kule‑ ĩ na Paulo a kuuma.

⁷Ĩ na a kuu ha, patiseu töpö, satuseu töpö, ĩ na kilii töpö kokamo pole, ĩ töpö hapalo hẽtupaso pa, töpö päsäpasoma. ⁸Satuseu töpö aiki, ‑Sanöma makö noma waikilasoma, tä temö kota mai kitäö! Ãju töpö kua mai kitäö! Õsi töpö kua mai kitäö!‑ ĩ na ĩ töpö kuu sinomotii. Patiseu töpö aiki, ‑Sanöma makö noma waikilaso noai maaki, waiha töpö temöa konaso kitäö! Ãju töpö kua, õsi töpö kua, ĩ na tä kua‑ ĩ na ĩ töpö kuu sinomo pasitioö. ⁹Önö kutenö, töpö lalupalo opa nö, lope epii töpö päsäpaso lasoma. Ĩ na tä kua tä, patiseu töpönö Moisés a kai wäsä sinomo wi ĩ ai töpö öpaiki nö, pe epii töpö hapaloma. ‑“Paulo a wanisala mai kitä” ĩ na samakö pi kuu kuleö! Paulo a na ãju tä hapalo hãtomaö! Ĩ a na õsi tä hapalo hãtomaö!‑ ĩ na ĩ töpö kuuma. ¹⁰Ĩ na töpö kuuma, ĩ na tä kua tä, töpö lalupalo opati noai ĩ töpönö Paulo a läkäpo opaö ha, sotatu pata tä aiki, ‑Paulo a thuu tupö käpaso matimöö!‑ a pi pata kuu pasio nö, ‑Paulo a hua konöö! Sai pö lototoa apöle, ĩ sai pö ha Paulo a tutua konönöö!‑ ĩ a patanö ĩ na kama hai ĩ sotatu töpö noa thaö ha, ĩ a sai pö ha Paulo a tutua konönö nö, a hila kokö tasoma.

¹¹Ĩ na tä kua tä, ĩ tä mumi ha Paulo a na pata tä Jesus Kaikana a tapamonasoma. A tapamono nö, ‑A kili tihöö! A pi loteteikiö! Hi Jetusalẽi tä uli pata ha kawanö sa wäsä kuapili na, Homa tä uli pata ha sa wäsä nömöopököö!‑ ĩ na pata tä kuuma.

Paulo a säpa pi topa noai ĩ ta

¹²Ĩ hena tä, juteu töpö kokamono nö, Paulo a säpa pi topa apa salo, ‑Paulo ma säpa paio mi tä, makö iapalo mi, makö amisio mi, ĩ na makö kua paiopököö!‑ ĩ na töpö noa thasoma. ¹³Töpö satehe epii, ĩ 40 wano töpö kui, ĩ na töpö noa thasoma. ¹⁴Töpö noa thasolo nö, Teusö a täpä sinomo wi ĩ pata töpö, ai juteu pata töpö, ĩ na kilii töpö na töpö noa thaso noai ĩ töpö ekuiki nö, ‑“Paulo ma säpa paio mi tä, makö iapalo mi, makö amisio mi, ĩ na makö kua paiopököö!” ĩ na samakö noa thasoa totiso kipiliö! ¹⁵Huki pata töpö kokamo sinomo wi ĩ töpö, kamakö, ĩ na kilii makö aiki, “Paulo a hilapasoö!” ĩ na sotatu pata tä na ĩ na pö kuu! “Paulo sama hini makoka totiopököö!” ĩ na makö kuu! Pata töpö na Paulo a walo mai ha, samakö lämono nö, Paulo sama säpali pia salo‑ ĩ na töpö noa thaso noai ĩ na ĩ töpö kuuma.

¹⁶Ĩ na töpö kuuma maaki, Paulo a hai pusapö anö ĩ tä kuu noai ĩ ta hinima kutenö, sotatu töpö sai pö ha a lisipalo nö, Paulo a na ĩ tä pewö a wäsä soatama. ¹⁷Ĩ ta wäsäö ha, Paulo anö ai sotatu pata tä nakalö nö, ‑Sotatu pata tä sai na hi hĩsa tä hilakötöö! A hilakötö nö, “Kawa na hi hĩsa tä wäo pi topa kuleö!” ĩ na wa kuu!‑ ĩ na Paulo a kuuma. ¹⁸Ĩ na Paulo a kuu ha, ĩ sotatu pata tänö sotatu pata tä sai na ĩ hĩsa tä hilakötö nö, ‑Sotatu töpö sai pö ha Paulo a titilati, ĩ anö sa nakalö nö, “Sotatu pata tä sai na hi hĩsa tä hilakötöö! Ĩ a pata na hi hĩsa tä wäo pi topa kuleö!” ĩ na Paulo a kuu ke‑ ĩ na ĩ sotatu pata tä kuuma. ¹⁹Ĩ na a kuu ha, sotatu pata tä sainö ĩ hĩsa tä poko huölö nö, pasökö tömö a lomakö nö, ‑Wi na ta kua wi wa tä wäsä pi topa kule?‑ ĩ na a pata kuuma.

²⁰Ĩ na a pata kuu ha, ĩ hĩsa tä aiki, ‑“Juteu pata töpö kokamo sinomo taso wi ha, hena tä, ĩ töpö na Paulo a lomakötöö!” ĩ na kawa na ĩ na juteu töpö kuu pia salo. “Paulo sama hini makoka pi topa kuleö!” ĩ na töpö holisi kuu pia salo. ²¹Ĩ na töpö kuu ha, “Ĩ pitili ta” a pi kuu ti! Ĩ töpö satehe epii, ĩ 40 töpö kui töpönö Paulo a säpalöpö, töpö lämo pia salo. “Paulo ma säpa paio mi tä, makö iapalo mi, makö amisio mi, ĩ na makö kua paiopököö!” ĩ na ĩ töpö pewö kupalo opösoma. “Awai. Ĩ na sa kua kitäö!” ĩ na wa kuu ha, ĩ töpö lämono nö, Paulo a säpali kitä‑ ĩ na ĩ hĩsa tä kuuma. ²²Ĩ na ĩ hĩsa tä kuu ha, ĩ sotatu pata tä aiki, ‑Wanaiki. “Sotatu pata tä sai na ĩ sa ta wäki ke” a kuu tihöö!‑ ĩ na a pata kuu nö, ‑Peiö! A kopolöö!‑ ĩ na a pata kuuma.

Pélikösö pata tä na Paulo a simönö noai ĩ ta

²³Ĩ na ĩ sotatu pata tä sai kuu nö, polakapi sotatu pata tökö nakalö nö, ĩ tökö na a hapalo nö, ‑Ai sotatu töpö satehe epii, ĩ 200 töpö kui töpö nakalöö! Sotatu töpönö kapalu kökö kai huu sinomo wi ĩ töpö satehe epii ĩ 70 töpö kui töpö naka nainöö! Sokopi kökö kai huu pasio wi, ĩ töpö satehe epii, ĩ 200 töpö kui töpö naka nainöö! Mötali tä mumi kupo paio mai ha, 9 otasö kupo tä, Sesatéia tä uli hamö ĩ töpö pewö kai hua soalolöö! ²⁴Ai kapalu a na Paulo a tikäköpö, a kapalu thaa naikiö! Paulo ma noama totio nö, Pélikösö a kaikana na a tälölöheö!‑ ĩ na sotatu pata tä sainö ĩ na töpö noa thama.

²⁵Ĩ na töpö noa thaa nö, waheta tä sãököpalö nö, Pélikösö a kaikana na tä waheta simöpalöma. Ĩ na ĩ tä waheta kuuma:

²⁶‑Pélikösö a kaikana ai! Cláudio Lísiasö sa. Wa topa kule? ²⁷Juteu töpönö hi Paulo a huölö nö, a moni säpalöma. A säpa pia tä, “Hi kamisa hai, homa tili sa” kamisa na Paulo a kuuma kutenö, ipa sotatu sa töpö nakalö nö, Paulo sama noama läoma. ²⁸“Wi na Paulo a kuati ha, juteu töpö aiki, ‘Paulo a wanisala apatii’ ĩ na töpö kuti kule?” ĩ na sa kuupö, juteu pata töpö kokamo sinomo wi töpö na Paulo sa nakalölöma. ²⁹Sa nakalölö nö, sa töpö a hininö nö, “Paulo a wanisala mi ipöö!” sa kuuma. “Titita wi a sai ha a titio maapöö! A säpa maapö!” sa kuuma. “Moisés anö kamisamakö hai ĩ pata töpö noa thaa noai, Paulo anö ĩ ta hini maa thaliö!” ĩ na ĩ juteu töpö kuu noai ĩ tä pi na Paulo a namo simöa päköma.

³⁰Önö kutenö, “Juteu töpönö Paulo a säpali pia salo” ĩ na sa tä kuu hininö nö, “Pélikösö a kaikana na Paulo sa simöpalöpököö!” ĩ na sa pi kulasoma. Ĩ na sa pi kuu nö, juteu töpö na sa hapalo nö, “Pélikösö a kaikana na makö waloikitö nö, ‘Paulo anö wanisala tä thamaö!’ ĩ na kaikana tä na ĩ na makö kuupökö” ĩ na sa kuuma. Ĩ na pätawö‑

ĩ na sotatu pata tä sainö tä sãököpalö nö, ĩ na a kuuma.

³¹Ĩ na tä kua tä, sotatu töpö noa thama kutenö, ĩ sotatu töpönö Paulo a tälölömae. A tälölöe nö, Ãsipátötisi tä uli hamö Paulo a kai hua halusolöma. ³²A kai hua halulolö nö, tä halulo nö, sotatu töpö sai pö lototoa apöle ĩ a sai ha ai sotatu töpö kopölöma, kapalu kökö kai huu wi ĩ töpönö Paulo a kai hua kõa paisolöma. ³³A kai hua kõo paia konasolöma, Sesatéia tä uli ha a kai waloa koikitö nö, kaikana tä na waheta tä totoki, ĩ ha Paulo a totoki, ĩ na tä kuama. ³⁴Ĩ ha kaikana tänö tä waheta möö läo nö, Paulo a na, ‑Witi pili wa? Witi tä uli na wa kuoma?‑ ĩ na a pata kuu ha, ‑Silísia tä uli na sa kuoma‑ ĩ na Paulo a kuu ha, ³⁵‑Waiha wa namo simöa wi ĩ töpö waloa haiköma, kamisanö wa hini kitäö!‑ ĩ na kaikana tä kuu läoma. Ĩ na a kuu nö, ‑Etoosisö a sai pö ha Paulo a õkama kuköpöö!‑ ĩ na kaikana tä kuuma.

Juteu töpönö Paulo a kateha wanisala noai ĩ ta

¹Ĩ na tä kua tä, 5 tä mumi kui tä mumi matalo nö, Sesatéia tä uli ha Teusö a täpä totio wi ĩ pata tä Ananiasö a hulasolöma. Ai pata töpö, Tétulu a hapalo taö öpa wi ĩ a, ĩ na töpö kui töpö solo töpö hulasolöma. Töpö hulolö nö, Sesatéia tä uli ha töpö waloikitö nö, Pélikösö a kaikana na Paulo a kateha wanisala apama. ²Paulo a nakali ha, Tétulu a hapalo nö, Paulo a kateha wanisala apama. Ĩ na Tétulu a kuuma: ‑Pélikösö a kaikana pata! Wa kaikanamo tao opa salo, kamisamakö na wasu töpö walo mi, samakö hölapalo opati mi, ĩ na samakö kuati kule. Kawanö juteu samakö pasilipo pasiopö, “Ĩ na tä thamaö!” pata wa töpö noa thaa sinomotii. ³Ĩ tä uli pewö hamö samakö kua wi, ĩ samakö pewö pasilipo totio opa kutenö, “Aitaköö!” samakö kuu thaliö! ⁴Pata wa kutenö, kawa na sa hapalo opa mai kitäö! Wani ipii sa hapalo päta pia kule. Wani ipii sa hapalo piale, ĩ ta hiniö!

⁵Hi Paulo anö töpö a wai ipati thaliö! Pata töpö peama apa pia salo, ĩ tä uli pewö hamö juteu töpö pewö pilia setekelati, Paulo anö ĩ töpö pewö lulupo opa thaliö! Nasaté tili tä Jesus a kai hini sinomo wi, Paulo anö ĩ töpö simöa pasio wi ĩ a. ⁶Samakö Teusömo wi, Paulo anö ĩ a sai moni hiopöa totipamanöma kutenö, sama huölö nö, sama õkapalöma. “Kamakö hai ĩ pata töpönö makö noa thaa wi, Paulo anö ĩ ta hini mi ipö thali” ĩ na samakö kuupö, Paulo sama nakalöma. ⁷Sama nakalö nö, sama hini totio pia tä, sotatu pata tä sai Lísiasö anö a hua lälö nö, a täa soa lätalölöma. ⁸A täa soa lätalölö nö, kamisamakö na a hapalo nö, “‘Paulo anö wanisala tä thamaö!’ makö kuu noai ĩ makönö Paulo ma namo simöa päki pia salo, Pélikösö a kaikana pata na makö hulolö nö, ‘Paulo anö wanisala tä thatimaö!’ ĩ a pata na ĩ na makö kuu totio nömöopöö!” ĩ na Lísiasö a kuu kipiliö! Kawanö Paulo wa hapalamaö ha, kamisamakönö kawa na ta wäsä pole, Paulo anö ĩ ta wäsä hö̃töo kitä‑ ĩ na Tétulu a kuu totiatalo opama. ⁹Ĩ na Tétulu a kuu totiatalo opaö ha, ai juteu töpö lolasoi, ĩ töpö aiki, ‑Awai. Ĩ pitili ta. Paulo anö wanisala tä thama‑ ĩ na ĩ töpö kuu totiatalo opa naitioma.

Pélikösö pata tä na Paulo a hapalo noai ĩ ta

¹⁰Ĩ na töpö kuuma, Pélikösö a patanö Paulo a hinipö, a himöama. A himöaö ha, Paulo a hapalo hö̃töoma. ‑Kaikana ai! Inama tä satehe epii tä inama na juteu samakö na wa kaikanamo waikitia kule. Önö kutenö, kawa sömöka taa tä, sa hapalo pi topa kule. “Sa wanisala mai kitäö!” sa kuu pi topa kule. ¹¹Jetusalẽi tä uli pata ha sa Teusömo taso pia salo, ĩ hamö sa hulasolöma, 12 tä mumi kui tä mumi hasua päpasoma. ¹²Hi töpö aiki, “Jetusalẽi tä uli pata ha Paulo a kutiki nö, wanisala tä thaa kipiliö!” ĩ na hi töpö kuu pitiliapalo opa mai kitä. Teusömo wi a sai na sa höla mai, sa lisipasoma. Ai töpö na pe epii sa hapalo maama. Ai sa töpö lulupo opa maama. Juteu töpö kokamo sinomo wi ĩ a sai na ai sa töpö lulupo mi, Jetusalẽi tä uli pata ha ai sa töpö lulupo mi, ĩ na sa kuati thaliö! ¹³“Paulo anö wanisala tä thamaö!” ĩ na hi töpö kuu pole, ĩ pitili ta pi ti! “Ĩ naköö! Ĩ na Paulo anö wanisala tä thaa kipiliö!” hi töpö kuu makokoa totio mai kitä‑ ĩ na Paulo a kuuma.

¹⁴Ĩ na Paulo a kuu nö, ‑Kaikana ai! Ĩ na sa kuu kule: “Jesus Cristo a hai ĩ piliso hamö sa hutii. Juteu töpö aiki, ‘Ĩ piliso holisi’ ĩ na juteu töpö kuu päla tä maaki, ĩ tiso hamö sa huti pola nö, Teusö a na sa kalipalo sinomoö. Moisés anö pata töpö noa thati noai ĩ pitili sa ta pii nö, ĩ sa ta hini totioö. Teusö a kai a wäsä sinomo noai ĩ töpönö waheta tä sãököpalö noai, ĩ sa ta hini naio soataö. ¹⁵Hi juteu töpö lole, ĩ töpö aiki, ‘Teusö a pitili’ ĩ na ĩ töpö pi kuu kua wi na, ĩ na sa kuu naio sinomoö. ‘Teusö a pitili. Toitai tä tha apa noai ĩ töpö nomasoma maaki, ĩ töpö temöa konasoö, wanisala tä thatala noai ĩ töpö nomasoma maaki, ĩ töpö temöa hö̃töa konasoö, ĩ na töpö kua kitäö!’ ĩ na hi töpö kuu kua wi na, ĩ na sa kuu naio soataö. ¹⁶Önö kutenö, ‘Teusö a na wanisala sa tä thatalaö, sanöma töpö na wanisala sa tä thatalaö, ĩ na sa kuati hãtoma’ ĩ na sa pi kuu wi ĩ sa tä pii mi salo, toitai sa tä thaa pi topa apatii” kaikana ai, sa kuu kule‑ ĩ na Paulo a kuuma.

¹⁷Ĩ na Paulo a kuu nö, ‑Ĩ na tä kua tä, Jetusalẽi tä uli pata ha sa huu mai ha, satehe epii inama tä hasua waikia päpaso noai ha maaki, Jetusalẽi tä uli ha ipa ai töpö pilio noai, wani tä na ĩ ai töpö honimo wi ĩ töpö na sitipa sa kökö totoki, Teusö a na tä totoköpö, ĩ sa tä totoa naiki, ĩ na sa tä thama pia salo, ĩ Jetusalẽi tä uli ha sa hua konasolöma. ¹⁸Ĩ na sa tä thamati tä, sa ausia waikipamonaso noai ha, Teusömo wi a sai ha ai ásia tili juteu töpönö sa talalöma. Ĩ tä, kamisa na satehe epii ai töpö kuo naio maama. Samakö lalupalo mai ha, toitai samakö kutioma. ¹⁹Ĩ ásia tili juteu töpö aiki, “Paulo anö wanisala tä thamaö!” ĩ na ĩ töpö kuu pi topa wi, hisimö ĩ töpö huu mi salo. Kawa sömöka tala tä, “Paulo a wanisala apatiwö” ĩ na kawa na ĩ na töpö kuu mi salo. ²⁰Ĩ töpö walo mi ha, hi töpö lole, ĩ töpö kuu pasiopö. Juteu pata töpö kokamo sinomo wi ĩ töpönö sa hapalama tä, hi ai töpö lole ĩ töpö aiki, “Paulo anö wanisala tä thama” ĩ na töpö pi kuu noai, kawa na ĩ töpönö ĩ ta wäsä nömöo mi salo. ²¹Ĩ juteu pata töpönö sa hapalama tä, kamisa aiki, “‘Töpö noma waikilasoma töpö temöa konaso kitäö!’ ĩ na sa pi ku upa salo, kamakönö sa hapalama hãtoa kuleö!” ĩ na lope epii ĩ na sa kuu laso kipili‑ ĩ na Pélikösö a kaikana na, ĩ na Paulo a kuu totiatalo opama.

²²Ĩ na Paulo a kuu totiatalo opaö ha, Pélikösö a kaikana patanö, Jesus Cristo a hai ĩ piliso a wäsä wi ĩ tä taö waikia salo, Paulo a hapalama kõo maama. ‑Sotatu pata tä Lísiasö a waloki ha, “Ĩ naköö! Ĩ na Paulo sa thama pia kuleö!” ĩ na sa kuu läo kitäö!‑ ĩ na Pélikösö a pata kuuma. ²³Ĩ na a pata kuu nö, ai sotatu tä na, ‑Titita wi a sai ha Paulo a titikiö! Ĩ ha wa titiki salo, a peama tihöö! Ĩ a sai õsimö ha a titia tä, a õkapa tihöö! A huatalotipököö! Kama na töpö noimo wi ĩ töpönö a pasilipopö‑ ĩ na a pata kuuma.

²⁴Ĩ na tä kua tä, tetepo mai ha, Pélikösö a patanö pusopö Tötusiila a kai waloa kõköma. Pélikösö a pusopö a hai, ĩ juteu tä kuoma. Ĩ a kai waloiki nö, Paulo a nakama. A nakaö ha, ĩ ha Paulo a waloa läiki nö, Jesus Cristo a thapo wi ĩ ta wäsä läoma. Ĩ ta wäsä noai, Pélikösö a pata, pusopö a, ĩ na kilii töpönö ĩ ta hinima. ²⁵Toitai tä thaa wi, Paulo anö ĩ ta wäsäö, wanisala tä na sanöma kama töpö umao sapa kõo wi ĩ ta wäsäö, ĩ na Paulo a kuatima. Waiha sanöma makö nomaso noai ha, wanisala ma tä thaa noai, Teusö anö ĩ tä hasulupamanö nö, ‑Wanisala wa tä thama kutenö, wa pea pasitio kitäö!‑ ĩ na Teusö a kuu piale, Paulo anö ĩ ta wäsä naioma. Paulo anö ĩ na kui ta wäsäö ha, Pélikösö a pata kilia apösoma. A kilia apölo nö, ‑Pei. A hua kononöö! Waiha wa hini pi topa tä, wa naka koni kitäö!‑ ĩ na a pata kuuma. ²⁶‑“Pélikösö a pata na sitipa sa kökö totoki ha, sa kusöpali kitäö!” ĩ na Paulo a pi kuu salo, kamisa na sitipa kökö pio hãto kitäö!‑ ĩ na Pélikösö a pi pata kuuma. Ĩ na a pi pata kuu salo, Paulo a nakalö nö, a pata hapalo kõatalotima.

²⁷Ĩ na tä kua tä, polakapi tä inama matalo nö, Pélikösö a pata kaikanamo matasoö ha, Pósiu Pesötu a kaikanamo nömöo soatama. Pélikösö a patanö juteu töpö pi mönahapamani pia salo, ‑Titita wi a sai ha Paulo a titio pasitiopöö!‑ ĩ na töpö noa thama.

Pesötu a pata tä na Paulo a hapalo noai ĩ ta

¹Ĩ tä uli ha Pesötu a pata waloiki nö, 3 tä mumi matalo nö, Sesatéia tä uli ha a husolo nö, Jetusalẽi tä uli pata ha a asulöma. ²Jetusalẽi tä uli pata ha a waloki ha, Teusö a täpä sinomo wi ĩ pata töpö, ai juteu pata töpö, ĩ na pata töpö kui töpö aiki, ‑Paulo anö wanisala tä thamaö!‑ ĩ na Pesötu a pata na ĩ na pata töpö kuuma. ³Ĩ na ĩ pata töpö kuu nö, Paulo a säpa pi topa salo, piliso hamö ĩ töpö läapalo piama kutenö, ‑Hisimö, Jetusalẽi tä uli ha Paulo a simöpalöö!‑ ĩ na töpö kuuma. ⁴Ĩ na töpö kuuma maaki, Pesötu a pata aiki, ‑Sesatéia tä uli ha titita wi a sai pata kulati, ĩ a sai pata ha Paulo a titia kulati. Ĩ hamö sa huu koonö pia kule. ⁵Kamisa na makö nokapasopö. “Paulo anö wanisala tä thamaö!” ĩ na makö kupalo manu kule, kamisa na makö nokapalo nö, ĩ hamö makö waloikitö nö, “Paulo anö wanisala tä thamaö!” makö kuu kõo tasopökö‑ ĩ na a pata kuuma.

⁶Ĩ na tä kua tä, 8 tä mumi hãtowö, 10 tä mumi hãtowö, ĩ na tä mumi maa kupalo nö, Sesatéia tä uli hamö a konasolöma. A kononö nö, Sesatéia tä uli hamö a waloa koikitö nö, ĩ hena tä, pata tä loo sinomo wi ĩ ha a loiki nö, Paulo a nakama. ⁷Ĩ ha Paulo a waloa läki ha, Jetusalẽi tä uli ha juteu töpö kuo noai, Paulo a kotö ha ĩ töpö loa sototokö nö, ‑Paulo anö wanisala tä thatimaö!‑ ĩ na töpö pewö kupaloma. Ĩ na töpö pewö kupaloma maaki, töpö holisimo päoma. ‑Pitili taö!‑ ĩ na Pesötu a pi pata kuti maama.

⁸Ĩ na töpö kuu ha, ‑Wanisala sa tä thaa maapili. Moisés sa kai peama mi, Teusömo wi ĩ sa sai hiopöatalama mi, homa tili töpö hai ĩ kaikana tä pata na wanisala sa tä thaa mi, ĩ na sa kua sinomo pasitio thali nökö‑ ĩ na Paulo a kuuma. ⁹Ĩ na Paulo a kuu ha, Pesötu a pata aiki, ‑Jetusalẽi tä uli pata hamö wa huu pi topa kule? Ĩ hamö kamisanö wa huama kõo tasopökö. Ĩ hamö sa tä hini makoka kotapö‑ ĩ na juteu töpö pi mönahapamani pia salo, ĩ na Pesötu a pata kuuma. ¹⁰Ĩ na a pata kuu ha, Paulo aiki, ‑Homa tili kaikana a patanö wa kaikanapalöma kutenö, hisa ha kawanö sa hapalo hini kule. Kamisa na juteu töpönö ta hini kota maapöö! Juteu töpö na wanisala sa tä thaa maama. Ĩ wa tä taö hö̃töa kule. ¹¹Pata töpönö samakö noa pewö thaa wi ĩ sa ta peamama aköna, “Sa peama hö̃töoö!” sa kuu pola pi. Pe epii wanisala sa tä thama aköna, “Sa säpalöö!” sa kuu pola pi. Juteu töpönö sa kateha hiopa apa wi ĩ tä wani a holisia apa kutenö, ĩ töpö na ai pata tänö sa totoki wi tä kua mai kitäö! Önö kutenö, homa tili tä kaikana pata na sa simöpalöö! Ĩ a patanö sa hinipöö!‑ ĩ na Paulo a kuuma. ¹²Ĩ na Paulo a kuu ha, pata töpö kokamo sinomo wi ĩ töpö na Pesötu a pata hapalo paio nö, Paulo a na a hapalo nömöiki nö, ‑“Homa tili tä kaikana pata na sa simöpalöö!” wa kuu ha, wa simöa hö̃töli kitäö!‑ ĩ na Pesötu a pata kuuma.

Akötiipa pata tä na Pesötu anö Paulo a kateha noai ĩ ta

¹³Ĩ na tä kua tä, waiha Sesatéia tä uli ha Akötiipa a kaikana, kama hai ĩ pese Petenisi a, ĩ na kilii töpö waloköma. Pesötu a pata na ĩ töpö noimomö huma. ¹⁴Töpö noimo nö, polakapi tä mumi matalo nö, Paulo a kuati noai, Akötiipa a kaikana na Pesötu a patanö ĩ ta wäsätima. ‑Hisa ha titita wi a sai na Pélikösö anö ai tä titikölöma, huki tä titia soa kule‑ ĩ na a pata kuu nö, ¹⁵‑Ĩ a titia soa tä, Jetusalẽi tä uli pata ha sa waloköma, Teusö a täpä sinomo wi ĩ pata töpö, ai juteu pata töpö, ĩ na töpö kui töpö aiki, “Ĩ anö wanisala tä thama kutenö, ‘Ĩ a wanisala apa pasio wi, ĩ a säpalöpököö!’ ĩ na wa kuu mi salo” ĩ na ĩ töpö kupaloma. ¹⁶Ĩ na töpö kupaloö ha, “Naiö! Homa tili samakönö ai sama tä säa soata mai kitäö! A namo simöa wi ĩ a sömöka tala tä, ai töpönö ĩ a namo simöa wi ĩ sama töpö a hinii, a namo simöa wi ĩ sama hini nömöoö, ĩ na homa tili pata samakö kuaö” ĩ na sa kuu kipili‑ ĩ na Pesötu a pata kuuma.

¹⁷Ĩ na a pata kuu nö, ‑Ĩ na tä kua tä, hisa ha ĩ juteu pata töpö waloki ha, ĩ hena tä, kaikana tä lota wi ĩ ha sa loa soataiki nö, Paulo sa naka soata kipili. “Paulo a nakatalötöö!” ĩ na sa töpö noa thaa soata kipili. ¹⁸Sa töpö noa thaö ha, Paulo a naka hö̃töa soatalöma. “Pe epii Paulo anö wanisala tä thaa hãtoma” ĩ na sa pi kuuma maaki, Paulo a wanipo noai ĩ töpö öpaiki nö, ĩ töpönö pe epii wanisala ta kateha maapili. ¹⁹Moisés anö juteu töpö noa thaa noai ĩ ta kateha sisa kipili. Ai tä nomaso noai ĩ Jesus a hilo noai, ĩ a kateha naio päo kipili. “Jesus a temö soa” Paulo a kuti noai, ĩ ta kateha naio päo kipili. ²⁰Ĩ töpönö ĩ ta kateha noai ĩ sa tä tai mi salo, “Ĩ töpö na wi na sa kuu pasiopökö?” ĩ na sa pi kuu salo, Paulo a na sa hapalo nö, “‘Paulo anö wanisala tä thamaö!’ ĩ na hi töpö kuu manu kule, Jetusalẽi tä uli pata ha wa huu pi topa hö̃töa kule? Ĩ tä uli ha kawa na ta makokama läo kõopököö!” ĩ na sa kuu ha, ²¹Paulo aiki, “Homa tili kaikana Sesa a patanö ta makokama totio kõo läopököö! Ĩ a patanö sa hini paio mi tä, hisa ha, titita wi a sai pata ha sa kuo paitioköö!” ĩ na Paulo a kuu kipiliö! Ĩ na Paulo a kuu ha, “Sesa a kaikana pata na Paulo sa simöpa paio mi tä, Paulo a na makö mamo läo paitiopököö” ĩ na sotatu sa töpö noa thaa kipili‑ ĩ na Pesötu a pata kuu totioma.

²²Ĩ na Pesötu a pata kuu totioö ha, Akötiipa aiki, ‑Kamisanö Paulo sa hini pi topa kule‑ ĩ na a kuu ha, ‑Hena tä wa hinipöö!‑ ĩ na Pesötu a pata kuu hö̃töoma. ²³Ĩ na a kuu hö̃töoma, ĩ hena tä, Akötiipa a, pusopö Petenisi a, ĩ na kilii töpö liähä äpii töpö waloköma. Ĩ töpö hai, ĩ pata töpö kutenö, ĩ töpö na ai pata töpö nokaki solö nö, töpö waloa naiköma. Ĩ tä uli na töpö kaikanamo sinomo wi ĩ pata töpö, sotatu pata töpö, ĩ na pata töpö kui töpö waloa naikö solöma. Ĩ töpö waloki ha, Pesötu a patanö Paulo a walomakö nö, ²⁴‑Akötiipa a kaikana ai! Hi makö pewö lole, ĩ pö! Hi ma taa nökö. Hi tä uli ha juteu töpö pilile ĩ töpö, Jetusalẽi tä uli ha juteu töpö pilia pasilati ĩ töpö, ĩ na töpö kui, kamisa na ĩ töpö pewö aiki, “Paulo a wanisala apaö” kamisa na ĩ na töpö pewö kuu kule. “Paulo a säpamanöö!” kamisa na ĩ na töpö kupaloti kule. ²⁵Ĩ na töpö kupaloti kule maaki, “Paulo anö pe epii wanisala tä tha apa maa noai kitä” ĩ na sa pi kuu kule. Önö kutenö, “Paulo sa säpamanöpököö!” sa pi kuu pasia maneö! Paulo aiki, “Homa tili kaikana Sesa a patanö sa hini totio pasiopököö!” ĩ na Paulo a kuu ha, “Awai. Sesa a kaikana pata na wa simöpalöpöö!” ĩ na sa kuu hö̃töo kipili. ²⁶Ĩ na sa kuu hö̃töo kipili maaki, “Sesa a kaikana pata na wi na tä kuu wi sa tä sãöka pasiopö?” ĩ na sa pi kuu salo, kamakö na Paulo sa walomaki ke. Akötiipa a kaikana ai! Kawa na Paulo sa waloa totimaki keö! Paulo ma hininöma, “Ĩ nakö. Ĩ nakö. Ĩ na Paulo a kua totiomaö!” sa kuu wi ĩ sa tä sãökapököö! ²⁷“Ĩ nakö. ‘Ĩ na Paulo anö wanisala tä thamaö!’ ĩ na juteu töpö kuu kuleö!” ĩ na sa kuu makokoa totio mai ha, Paulo sa õkapalö nö, sa simöpali kitä ta o?‑ ĩ na Pesötu a pata kuuma.

Akötiipa pata tä na Paulo a hapalo noai ĩ ta

¹Ĩ na Pesötu a pata kuu ha, Paulo a na Akötiipa aiki, ‑“Paulo anö wanisala tä thamaö!” ĩ na töpö kuu manu kule, “Mawöö! Wanisala sa tä thaa maapiliö!” ĩ na wa kuu pi topa salo, a hapalo hö̃töoö!‑ ĩ na a kuuma. Ĩ na a kuu ha, Paulo a ami wasuo nö, a hapalo hö̃töoma. A hapalo nö, ĩ na a kuuma: ²‑Akötiipa a kaikana ai! Juteu töpö aiki, “Paulo anö wanisala tä thatalamaö!” ĩ na töpö kuuma ha, “A hapalo hö̃töoö!” ĩ na kamisa na wa kuu ke. Ĩ na wa kuu ha, sa pi mönaha kule. ³Juteu töpö kua sinomoti wi ĩ wa tä taö waikia kule. Ĩ töpönö ta kateha hẽtupasoti wi ĩ wa ta taö öpa hö̃töa waikia kule. Ĩ wa tä taö öpa waikia manu kule, kawa sömöka tala tä, sa hapalo pi topa apa kule. Önö kutenö, opii sa hini totihoö!‑ ĩ na Paulo a kuuma.

⁴Ĩ na a kuu nö, ‑Sa ose kai pilio noai ĩ tä uli pata, Jetusalẽi tä uli ha sa pilia nömökö noai ĩ tä uli, ĩ na tökö uli kui tökö uli ha sa hokotoma wai kuati noai, juteu töpönö ĩ tä taö öpöle kitä. Sa kua soatile, ĩ tä taö öpa soale kitä. ⁵Pata töpönö juteu samakö noa thaa noai, patiseu samakö juteunö ĩ sama ta hini totiatalo opa asa wi ĩ sa. Somi tä, patiseu juteu sa kuo noai, ĩ sa soawö. Juteu töpönö ĩ tä taö öpa thali. “Awai. Paulo a hai, ĩ patiseu tä” töpö kuu pi topa tä, töpö kuu kitä. ⁶Kamisamakö nö patapö na Teusö aiki, “‘Waiha sanöma tä nomasoma maaki, tä temöa konaso kitäö!’ ĩ na Teusö a kuu noai ĩ pitili ta kuo totioma” ĩ na sa kuu salo, “Paulo a wanisala apa sai a” ĩ na juteu töpö kupaloti kule. Ĩ na töpö kuti salo, kamisa na ĩ töpönö ta hini kule nökö. ⁷Isöhaeu a hai ĩ 12 ulu töpö kuo noai, ĩ kama töpö hai ĩ tolewö töpö hai, wakalai ha ĩ töpö Teusömoö, mumai ha ĩ töpö Teusömoö, ĩ na töpö kuati wi ĩ töpönö, tä nomaso noai ĩ tä temöa nö taa kotia kule. Kaikana ai! “Tä noma waikilasoma maaki, waiha Teusö anö tä temöa totia komani kitäö!” ĩ na sa pi ku upa salo, juteu töpö aiki, “Paulo a wanisala” ĩ na juteu töpö kuu. ⁸“Teusö anö, tä noma waikilasoma, tä temöma taö öpa kõo mai kitäö!” wi na juteu makö pi kuu salo, makö kuu pasia kule? Ĩ na pö kuu tihöö!‑ ĩ na Paulo a kuuma.

⁹Ĩ na Paulo a kuu nö, ‑“Nasaté tili Jesus a hilo wi, ĩ sa wanipo totio nö, Jesus a thapo wi ĩ sa töpö pewö peama totiokö hu!” ĩ na sa pi kuuma. ¹⁰Ĩ na sa pi kuu salo, Jetusalẽi tä uli ha Jesus a thapo wi ĩ töpö pilio wi, ĩ sa töpö peama totioma. Teusö a täpä sinomo wi ĩ pata töpö aiki, “Awai! Titita wi a sai ha ĩ wa töpö titikiö!” ĩ na töpö kuu ha, Jesus a thapo wi ĩ töpö satehe epii sa töpö titiköma. Sa töpö õkapamanö nö, ai töpönö ĩ Teusö töpö säpama pia tä, “Awai. Ĩ töpö wani sämanöö!” ĩ na sa kuu naio soatama. ¹¹Juteu töpö kokamo sinomo wi ĩ töpö sai pö hamö sa huu hätäpoti nö, Jesus a thapo wi ĩ sa töpö talalö nö, ĩ sa töpö peamatima. Sa töpö peama nö, “Jesus sa thapo maneö!” ĩ na sa töpö thama pi topama. Ĩ töpö na sa hĩso opama kutenö, ai sa töpö peama pi topa apa salo, ai töpö sai pö kuo taso pamö sa huu hätäpo nömötioma.

‑Jesus sa kai a hinia totili kipili‑ Paulo a kuu noai ĩ ta

Atos 9.1-19; 22.6-16

¹²Sa töpö peamapö, Tamaasöku tä uli hamö sa hulasolöma. Teusö a täpä sinomo wi ĩ pata töpö aiki, “Tamaasöku tä uli ha Jesus a thapo wi ĩ töpö kulati, ĩ wa töpö peama tasopöö!” ĩ na ĩ töpö kuu noai ĩ sa tä waheta kai hulasolöma. ¹³Sa hulasolö wi, motokö hẽtuto tä, piliso hamö sa huulö tä, hi tä hẽtu ha tä wakala apii tä kupoli, ĩ sa tä wakala pata talalöma. Sa tä wakala talalö noai, pili motokö na ĩ tä wakala pata kuo satio opama. Kamisa, kamisa na töpö nokale ĩ töpö, ĩ na samakö kui samakö kotö na ĩ tä wakala pata hilipalo opama. ¹⁴Kamisamakö kotö ha ĩ tä wakala pata hilipalo opaö ha, masita ha samakö pewö kelasoma. Samakö kelo nö, ĩ ha epöteu töpö kai thaa nö, ta hapalo pole, ĩ sa ta hini ipama. “Saulu ai. Wi na wa pi kuu salo, sa peamati kule? Kawa pea sapa kõo pätia kule. Paka anö hii ti namo pata katholöma, kama hamiopo sapamo kua kõo wi na, kawanö sa peamaö ha, kawa hamiopo sapapo kõo pasio päoö” ĩ na ta kuuma. ¹⁵Ĩ na ta kuu ha, “Pata tä! Ĩ witi wa?” sa kuu ha, “Jesus sa. Wa peamati pole, ĩ sa” ĩ na pata tä Jesus a kuu nö, ¹⁶“Wa hoköpalo nö, a öpaikiö! Huki wa talale, ai töpö na ĩ wa ta wäsäö, waiha kawa na sa tä möma piale ĩ wa ta wäsäö, ĩ wa ta wäsäpö, kawa na sa tapamonö nö, wa saipali ke. Wa saipalö nö, kamisanö wa kalipalama sinomoti pia salo. ¹⁷Juteu töpö, juteu töpö pasi mai ĩ töpö, ĩ na töpö kui töpö na kamisanö wa simöpalö nö, ĩ töpö na kamisanö wa noama kitäö! ¹⁸Kamisa na ĩ töpö mamo huu mi ipö kutenö, ĩ wa töpö pi hatukumanö nö, wa töpö mamo topa kõki kitäö! Mumi mumi tä na ĩ töpö hupalo opati wi, waiha wakala tä na ĩ wa töpö walomaki kitäö! Sai tä sai pata lotete epii ĩ anö ĩ töpö simöa sinomoti wi, Teusö a na ĩ wa töpö walomaki ha, Teusö anö ĩ töpö simöa nömöo kitäö! Kamisa na ĩ töpö pi kua nö, ‘Jesus a pitili’ ĩ na töpö pi kuu kuköma, ĩ töpönö wanisala tä thatalati noai, ĩ tä na Teusö a hĩso mataso kitäö! Ĩ tä na Teusö a hĩso matalo nö, Teusö anö töpö saia asapalö noai ĩ töpö kua asapaso kitäö!” kamisa na ĩ na Jesus a kuu kipili‑ ĩ na Paulo a kuuma.

¹⁹Ĩ na Paulo a kuu nö, ‑Akötiipa a kaikana ai! Ĩ na tä kuaö ha, tä wakala apii tä itho laso noai, ĩ tä kamisa na Jesus a kuu laso noai ĩ sa kai a peama maama. ²⁰Tamaasöku tä uli ha sa ta wäsä soma nö, Jetusalẽi tä uli pata ha sa ta wäsä nömöo nö, Jutéia tä uli pewö pata hamö sa ta wäsä nömöo nö, juteu töpö pasi mai ĩ töpö pililati, ĩ hamö sa ta wäsä hö̃töo taso kipili. Sa ta wäsä hö̃töotö nö, “Makö pi sapamo nö, wanisala ma tä hosalö nö, Teusö ma täa totilöö! Teusö ma täa totilö nö, toitai ma tä thaa totiopöö! ‘Töpö pi tapomo sapao kõoma kutenö, ĩ töpönö toitai tä thatala apaö’ ĩ na ai töpö pi thamaö!” ĩ sa ta wäsä nö, ĩ na sa kuu hätäpoti kipili. ²¹Ĩ na sa kuu hätäpoti ha, Teusömo wi a sai ha sa kua tä, ai juteu töpönö sa huölöhe nö, sa moni säpalömae. ²²Sa säpa pia tä, Teusö anö sa pasilipo läo nö, sa noama läoma. Huki Teusö anö sa pasilipo soa manu kule, pata töpö, pata töpö pasi mai ĩ töpö, ĩ na töpö kui töpö na Teusö sa kai a wäsäti kule. Teusö a kai a wäsä sinomo noai ĩ töpö, Moisés a, ĩ na töpö kui töpönö ta wäsä paio noai, ĩ sa ta wäsä nömöa kõa kule. “Ĩ na Cristo a kua kitä” ĩ na ĩ töpö wäo nö, ĩ na töpö kuu kua noai na, ĩ na sa ta wäsä kua hö̃töoö. ²³“Teusö anö a simönö noai, ĩ Cristo a pea totio nö, a säpamonaso kitä maaki, a temöa kõo somaso kitäö! A temöa kõo somano nö, juteu töpö, juteu töpö pasi mai ĩ töpö, ĩ na kilii töpö na, ‘Teusö anö makö täapa kõo läo pia salo!’ tä kuu wi, Cristo anö ĩ ta wäsä kitäö! Ĩ ta hai, wakala tä toita apii tä kua wi na, ĩ na ĩ ta kua hö̃töoö!” ĩ na töpö wäo kuu paioma‑ ĩ na Paulo a kuu totiatalo hö̃töoma.

²⁴Ĩ na Paulo a kuu totiatalo hö̃töoö ha, Pesötu a pata aiki, ‑Paulo ai. Wa isi waniha kule. Waheta wa tä möapala apama kutenö, wa isi waniho päomaö!‑ ĩ na a pata lalupalo pola nö, ĩ na a pata kuuma. ²⁵Ĩ na a pata kuu ha, ‑Pesötu a kaikana ai! Sa isi waniho mane. Sa hapalo makoka apa sisa kule. Pitili sa ta wäsä totia kule. ²⁶Jesus sama thapo wi ĩ samakö kuati thali, ĩ tä hatukuo opama kutenö, samakö kuati noai, kaikana wanö ĩ wa tä taö öpa waikia kule. Önö kutenö, kawa na sa hapalo kili maa kule. ²⁷Akötiipa a kaikana ai! Teusö a kai a wäsä sinomo noai ĩ pitili wa töpö a pii kule? “‘Pitili sa töpö a pii kule’ ĩ na wa pi kuu pole kitä” ĩ na sa pi kuu kule‑ ĩ na Paulo a kuuma.

²⁸Ĩ na Paulo a kuu ha, Akötiipa a pata aiki hö̃töwö ‑Paulo ai. “Wani ipii sa hapalo päa kule maaki, Akötiipa anö Jesus a thaa soatali kitäö!” wa pi kuu hãtoa kule?‑ ĩ na Akötiipa a kaikana pata kuuma. ²⁹Ĩ na a pata kuu ha, ‑Awai. “Hi kaikana a, hi töpönö sa hini polai ĩ töpö, ĩ na töpö kui töpö hai, kamisanö Jesus sa thapo kua wi na, ĩ na ĩ töpö kua hö̃töo soatapököö! Huki ĩ na töpö kua soata mai ha, sakimi, kamisa kuati kua wi na ĩ na töpö kulasopöö! Söpala ösö totokönö sa õkama kui na, ĩ na ĩ töpö kua sisa maapököö!” ĩ na Teusö a na sa kuu kule‑ ĩ na Paulo a kuuma.

³⁰Ĩ na Paulo a kuu ha, Akötiipa a kaikana, pusopö Petenisi a, Pesötu a kaikana, ĩ na kilii töpö öpaiki nö, ³¹töpö lisia kotasoma. Töpö lisipo kota tä, ‑Ĩ anö wanisala tä thaa maa noai kitä. Paulo a kuati noai, ĩ tä noa na kaikana tä patanö a säpama mai kitä. Ĩ tä noa na, titita wi a sai ha a titio mai kitäö!‑ ĩ na ĩ töpö kuuma. ³²Ĩ na töpö kuu nö, ‑“Homa tili tä kaikana na sa simöpalöö! Kamisa na ĩ anö tä hini sisapököö!” ĩ na Paulo a kuu maama aköna, a lisipama kõoma noa kipi‑ ĩ na Pesötu a pata na ĩ na Akötiipa a kaikana a kuuma.

Homa tä uli hamö Paulo a simönö noai ĩ ta

¹Ĩ na tä kua tä, Itália tä uli ha kutiata a pata hamö samakö simöpa pi topama kutenö, Paulo a, titita wi a sai ha ai töpö titio noai ĩ töpö, ĩ na töpö kui, homa tili pata sotatu tä Júlio a na ĩ töpö totokö nö, ‑Hi töpö na a mamo läapaloö!‑ ĩ na pata töpö kuuma. Homa tili tä kaikana patanö sotatu töpö simöa sinomo asa noai, Júlio a hai ĩ ai tä sotatu kuoma.

²Ĩ na tä kua tä, Atötamísiu tä uli ha kutiata a pata kãa sinomoti noai, ĩ ösö pata ha samakö titiköma. Ásia tä uli hamö mötati tuu kasö pata kulati, ĩ hamö ĩ ösö huu piaö ha, ĩ ösö pata ha samakö titiköma, samakö pi hulasolöma. Masetônia tä uli ha Tesalônika tä uli kulati, ĩ ha Atisötaku a pilio noai, kamisamakö na ĩ a huu naioma. ³Samakö hulolö nö, ĩ hena tä Sitõ tä uli ha samakö walokö lasoma. Samakö walokö lasoma, Júlio anö Paulo a totiapala apa nö, ‑Au noi töpö na wa noimopököö! Wani tä na wa pi wasiso pole, ĩ wa tä tälöpököö!‑ ĩ na Paulo a na, ĩ na Júlio a kuuma.

⁴Sitõ tä uli ha samakö kuiki nö, samakö pi hulasolöma, ipoko tä lotete epö kutenö, sanöta Sipöti tä kulati, ĩ tole tömö ipoko tä maa pa samakö pi hulasolöma. ⁵Samakö hulolö nö, ĩ mötati tuu kasö ha Silísia tä uli kulali, ĩ tä uli ha samakö pi hasu, thapi hamö Pãpiilia tä uli ha samakö pi hasu, ĩ ha samakö pi hasuiki nö, Lísia tä uli ha Miha tä uli hilo wi ĩ tä uli kulali, ĩ ha samakö waloa nömökö lasoma. ⁶Ĩ ha samakö waloa nömökilö nö, Alesiãtötia tä uli ha ai kutiata a pata kuo noai, Itália tä uli hamö ĩ ösö kai huu piale, homa tili tä sotatunö ĩ ösö pata talalö nö, ĩ ösö pata na samakö titia nömököma.

⁷Ĩ ösö na samakö titia nömöki wi, samakö pi hulasolö wi, opii samakö pi huu totitioima tasoö, ĩ hena tä opii samakö pi huu totitio koima tasoö, ĩ hena tä samakö pi huu totitio koima tasoö, ĩ na opi ipii samakö kuatima. Opi ipii samakö kua toitioolö pamö, Söniitu tä uli ha samakö ateoma. Ĩ tä uli ha samakö ateo opa tä, ipoko tä pata lotete kua läa kutenö, tiko hamö ipoko tä maa pamö samakö pi kupasoma. Sanöta Köteeta tä kulali, ĩ tole tömö samakö pi hulolö nö, Köteeta tä uli ha samakö pi ãkotopalo nö, Saumona tä uli iloloi tä uli kule, ĩ ha samakö pi hasuiki nö, ⁸opi ipii kaseete ha samakö pi hulolö nö, Laséia tä uli kotö ha Kosoto tuu toita apii tuu paale, ĩ tuu ha samakö pi walokö lasoma.

⁹Ĩ tuu ha samakö pi waloikilö nö, ĩ ha samakö kua tetea apöpalo nö, ‑Juteu makö ausipo wi ĩ tä wakala hasua waikiköma kutenö, mötati tuu pata tepuko opa kuki kitäö! Tuu pata tepuko opa nö, makö pi laköpaso matimöö!‑ ĩ na samakö pi kuu salo, Paulo aiki, ¹⁰‑Ai pö! “Makö huu koonö maapököö! Makö hua konasolöma, makö pea taso kitäö! Kutiata a waniapasoö, ai wani tä motöpasoö, ai makö nasi tupasoö, ĩ na makö kua matimöö!” ĩ na sa pi kuu kuleö!‑ ĩ na Paulo a kuuma. ¹¹Ĩ na Paulo a kuuma maaki, sotatu tänö Paulo a hini maama. Ĩ kutiata a pata huöpo wi ĩ a, ĩ kutiata ösö thapo wi ĩ a, ĩ na kilii, sotatu tänö ĩ töpö a hini sisama. ¹²‑Inama tä, kalio mai kutiata ösö kãa topa apa sai maaki, maa tä hälä tä kutiata ösö kãa topa mai kitäö! Maa tuu pata supa supamo opa kitäö!‑ töpö kuu nö, ‑Önö kutenö, Penisi tä uli hamö makö hulasolöpököö!‑ ĩ na kutiata a pata huöpo wi ĩ na ĩ a kuuma. Ai töpö satehe epii ĩ na töpö kuu naioma. Penisi tä uli kule, ĩ ha motokö wisamö kua wi, ĩ hamö kosoto tuu paamö kua manu kulati, ĩ hamö ipoko tä lotete mi kutenö, ‑Ĩ ha makö pi waloikölö nö, maa tä hälä soaö ha, ĩ kosoto tuu pata ha makö kutio lasopöö!‑ ĩ na töpö kuuma.

Mötati tuu kasö pata ha töpö moni nasi tupaso noai ĩ ta

¹³Ĩ na tä kua tä, motokö huu hena taso pamö wa tä möö ha, ĩ kate wa poko kuamö kule hamö, ĩ hamö opi ipii tä walimotima kutenö, ‑Pei. Pö huu konöö!‑ ĩ na töpö kuu nö, söpala ösö patanö kutiata a pata lototomaki wi, ĩ ösö pata söpöa konö nö, ĩ ösö pata titia koiki nö, samakö pi hua konasolöma. Samakö pi hua kononö nö, ĩ Köteeta tä uli kasö pata hamö samakö pi hutiilöma. ¹⁴Samakö pi hutiilö pamö, ipoko tä lotete epii, ĩ Nohoteesösi tä ipoko pata hilo wi, ĩ tä ipoko pata itholo nö, ¹⁵ĩ tä ipoko patanö kutiata a pata helula apama kutenö, kutiata a kolo pasitipo tomöpo maama. Önö kutenö kutiata a kolo pasitipo wi ĩ sama ti hulapalöma, ipoko tä patanö kutiata a helulapala pätioma.

¹⁶Ĩ na tä kua tä, sanöta tä wani ipii, ĩ Kauta ta hilo wi, ĩ tä sanöta kulati, ĩ ha tuu pata poale, ĩ hai tuu hamö samakö pi hulasolöma. Ĩ hamö samakö pi huulö tä, tuu pata tepu tepumo opaö ha, ‑Kutiata ma ösö wai saipo pole, ĩ ösö wai waniapaso matimöö!‑ ĩ na samakö pi kuu nö, samakö kasiapalo opa nö, thoo totonö kutiata sama ösö wai ösömanö nö, kutiata pöpönö ösö ha samakö titile, ĩ ösö ha sama ösö ose titiköma. ¹⁷Sama ösö ose titiki nö, ĩ kutiata a pata na töpö kalipalo sinomo wi ĩ töpönö kutiata pöpönö ösö lototomaköpö, thoo totonö ösö õkaköma. Ösö õkakö nö, ‑Ki ha, Lípia tä uli kasö pata hamö maka maka tänö tuu pata patetea apölati, ĩ hamö ipoko tä patanö samakö pi helululölö matimöö!‑ ĩ na töpö kuu nö, töpö kili salo, watata ösökönö kutiata a pata helula wi ĩ ösökö ithomanö nö, ipoko tä patanö kama kutiata a pata kaläa kõo pälasoolöma. ¹⁸Ĩ hena tä, ipoko tä patanö tuu pata tepu tepumo opa soatioö ha, kutiata a pata hetehepamani pia salo, ĩ töpönö wani tökö kepamanöma. ¹⁹Ĩ hena tä, watata ösökö pata, thoo totokö pata, hii ti hĩtale ĩ ti, ĩ na kilii tökö pata kea nömöpamanöma.

²⁰Ĩ na tä kua tä, pili sama tä motokö tapa mi, sitikali sama kö tapa mi, ĩ na samakö kuati tä, ta pata tetea apöpasoma. Ipoko tä pata mapo maama. Ĩ na tä kua tä, ‑Makö pewö nasi tupaso kitäö!‑ ĩ na samakö pewö pi pata kuu totio opama.

²¹Ĩ na tä kua tä, samakö iapalo mai ha samakö tetea apa waikipasoma kutenö, ĩ töpö mötali ha Paulo a öpaiki nö, ‑Ai pö! Köteeta tä uli ha makö kua tä, “Makö huu koonö maapököö!” ĩ na sa kuu kipiliö! Sa hinia totiatala apama aköna, wani ma tä kepama maa noa kipi. “Kutiata a waniapaso matimöö!” makö pi kuu maa noa kipi. ²²Sa hini maa noai maaki, “Pö pi honipo tihöö!” ĩ na sa kuu alu kule. Ai tä nasi tuo mai kitäö! Kutiata a wania sisa pasoö. ²³Hiki. Teusö anö sa thapo wi ĩ anö sa simöa sinomo wi, mumai ha kamisa na ĩ Teusö a hai ĩ ãju tä tapamoa halusoma. ²⁴A tapamoa halulo nö, “Paulo ai. A kili tihöö! Homa tili tä kaikana pata na wa waloki kitäö! Ĩ ha wa walo paio mai ha, ‘Hi töpö noamaö!’ ĩ na Teusö a na wa kuuma kutenö, Teusö anö wa totiapala apa nö, kawa na töpö pi huu naine, Teusö anö ĩ töpö pewö noama totio kitäö! Ai tä nasi tupo mai kitäö!” ĩ na ĩ ãju tä kuu halu kipi. ²⁵Önö kutenö, makö pi honipo mai, toitai pö kuikiö! “Teusö a pitili” sa pi kuu kule. “Kamisa na a kuupii, ĩ pitili ta totiwöö!” ĩ na sa pi kuu kule. ²⁶Ĩ na sa pi kuu kule maaki, sanöta ta pata hamö ipoko tä patanö samakö pi helululi kitä‑ ĩ na Paulo a kuuma.

²⁷Ĩ na tä kua tä, 14 tökö mumi matalo nö, Atötiaasiku mötati tuu pata hamö ipoko tä patanö samakö pi helulua apa haluti tä, mötali tä mumi ha ĩ kutiata a pata ha töpö kalipalo sinomo wi ĩ töpö aiki, ‑Huki mötati tuu kasö atepa hãtoa waikia kule‑ ĩ na töpö pi kuu nö, ²⁸thoo toto ola na söpala ösö õkakö nö, ĩ toto kemakö nö, ĩ totonö tuu patete möma. Tuu patete möö ha, ĩ toto na 36 metötu tä ösöhoma. Thapi hamö tuu patete möö kõoö ha, 27 metötu tä ösöhöa nömö ha, ²⁹‑Huki tuu patetepo kõa kuleö!‑ töpö kuu nö, töpö kilia apölo nö, ‑Maa ma patanö kutiata a pata waniapaso kitäö!‑ töpö kuuma. Ĩ na töpö kuu nö, kutiata a pata opimaki pia salo, thoo toto ola na söpala ösö hute pata õkale, ĩ 4 ösökö kui, kutiata a kolo pata ha ĩ ösökö kepamanöma. Ĩ ösökö kepamanö nö, Teusö a na töpö hapalo nö, ‑Tä halua haitamanö sa‑ ĩ na töpö kuuma.

³⁰Ĩ na tä kua tä, kutiata a pata na töpö kalipalo sinomo wi ĩ töpö tokösolö pia salo, maa u ha kutiata a ose wai kãa kõköma. ‑“Kutiata pöpönö ösö ola ha ki töpönö ai söpala ösökö kepama hãto pia kule” ĩ na töpö pi kuupöö!‑ kutiata a ose wai kãa kõo ke, ĩ na ĩ töpö kuuma.

³¹Ĩ kutiata a ose wai kãa kõki ha, sotatu töpö simöa sinomo wi ĩ a pata, sotatu töpö, ĩ na sotatu töpö kui töpö na, Paulo aiki, ‑Hi kutiata pöpönö ösö na töpö kalipaloti wi ĩ töpö titio mi tä, makö nasi tupaso kitäö!‑ ĩ na Paulo a kuuma. ³²Ĩ na Paulo a kuu ha, thoo totokönö kutiata a ose wai ithoa komanöhe, sotatu töpönö ĩ totokö paotia soapalöma. Ĩ totokö paotia soapali ha, sinoi kutiata a ose wai kaläa konasolöma.

³³Ĩ na tä kua tä, tä halu pia tä, Paulo aiki, ‑Nii ma tä opala mi salo‑ ĩ na ĩ töpö pewö na a kuu nö, ‑Makö pi honipo opa salo, makö iapalo mai ha polakapi semana tä kua waikipaso ke. ³⁴Hukiki wani ipii nii ma tä oalöpöö! Makö ia mai ha makö kutio kuköma, makö nomaso kitä. Hi mötati tuu patanö makö nasi tupo mai kitäö! Makö temö toti ipii makö söpoa kopaso kitäö!‑ ĩ na Paulo a kuuma. ³⁵Ĩ na a kuu nö, ĩ töpö pewö mamo tetela tä, ĩsa ãi tälö nö, Teusö a na a hapalo nö, ‑Hapa. Kawanö hi nii wa tä totopi ke. Wa toita apö‑ ĩ na a kuu nö, ĩ ĩsa ãi kakalalö nö, ĩ ãi asawösö oama. ³⁶Ĩ ãi asawösö oaö ha, töpö mamo tetele, ĩ töpö ia kili matalo nö, ĩ ãi oa naioma.

³⁷Ĩ kutiata a pata na samakö titio noai, satehe epii, ĩ 276 samakö titioma.

³⁸Ĩ na tä kua tä, ĩ töpö pewö iapalo matalo nö, kutiata a pata hetehepamani pia salo, ĩsa ãi thaa wi, ĩ tä kopeke pi kepamanöma.

³⁹Ĩ tä kopeke pi kepamanöma, tä halulo nö, kutiata a pata na töpö kalipaloti wi ĩ töpönö ĩ tä uli möö tai mio opama maaki, kosoto tuu kasö pata hamö maka maka tä paalati, ĩ tä talalöma. Ĩ tä talalö nö, ‑Ki hamö kutiata ma ösö pata katöamö thamakötö nököö!‑ ĩ na töpö kuu nö, ⁴⁰thoo totokö ola ha söpala ösö pata õkale, ĩ ösö pi pata paotipalö nö, ösö pi pata kepamanö nö, saka wi tökönö kutiata a kolo pata pasitipo pole, ĩ saka wi tökö kolo na thoo totokö õkale, ĩ totokö kusöpalöma. Ĩ totokö kusöpalö nö, maka maka tä paalati ha, ĩ ha töpö pi hulasolö pia salo, kutiata a ola pata na watata ösö katöo sinomo wi ĩ ösö ösöa komanöma. ⁴¹Maka maka tä paalati ha töpö moni hulasolöma maaki, tuu pateteo opa pa kutiata a ola pata kasöa läiki ha, pola a patanö kutiata ösö kolo pata wania soapasoma.

⁴²Kutiata ösö pata waniapasoö ha, sotatu töpö aiki, ‑Ki töpö õkale, ĩ ma töpö säpalö nököö! Kaseete hamö maka maka tä paalati, ĩ hamö ĩ töpö söposöpalo nö, töpö wani tokösolö matimöö!‑ ĩ na töpö kuuma. ⁴³Ĩ na töpö kuuma maaki, sotatu töpö simöa sinomo wi ĩ a patanö Paulo a noamama. A noama salo, ‑Töpö säpa tihöö!‑ ĩ na a pata kuu nö, kutiata a pata na samakö titile, ĩ samakö na, ‑Makö hälä taö öpa wi, maa u ha ĩ makö kepalo nö, maka maka tä paalati, ĩ hamö pö hälälolöö! ⁴⁴Ĩ tä noa ha, makö hälä tai mii makönö hii ma ti asawösö huölö nö, pö hälälolöö!‑ ĩ na sotatu tä patanö ĩ na samakö noa pewö thama. Ĩ na samakö noa pewö thaö ha, ĩ na samakö kua totio hö̃töo nö, ĩ tuu kasö ha samakö temii samakö pewö walokö tasoma.

Mauta tä uli ha

¹Samakö pewö waloikitö nö, samakö söposöpalotö nö, ‑Hi witi tä uli pasiwö?‑ samakö kuu ha, ‑Sanöta Mauta tä uli‑ ĩ na töpö kuu hö̃töo läoma. ²Ĩ sanöta ta pata ha töpö pilile, ĩ töpönö samakö totiapala apa läoma. Maa tä hälätima kutenö, samakö watio opama. Önö kutenö, ĩ mauta tili töpönö koa taka thakö nö, ‑Peiö! Pö pomoö!‑ ĩ na töpö kuu läoma.

³Ĩ na tä kua tä, Paulo anö hii ti ãsö toalalö nö, tiki ãsö sapöma. Tiki ãsö sapöma, olö kökö wai hä äpa salo, kökö wai sutulo nö, Paulo a ami hõo ha kökö wai sutipaköma. ⁴Paulo a ami hõo ha ĩ kökö olö wai sutile, mauta tili töpönö ĩ tä taa nö, ‑Ĩ a kanene hãtokö? Kanene tä kutenö, mötati tuu pata ha a nasi tupo maa noai maaki, ai sanöma tä säpalö noai, ĩ tä noa na huki olö kökö wasunö a nasi wani tuo pia kuleö!‑ ĩ na töpö kuuma. ⁵Ĩ na töpö kuuma maaki, koa taka na Paulo anö ĩ kökö wai säsäa soaköma. Kökö sutipaköma maaki, Paulo a ami ninio maama. ⁶Mauta tili töpö aiki, ‑A ami suöa apa soa hãtotaso kitäö! A nomawö kea hãtoa soaso kitäö!‑ ĩ na ĩ töpö pi kuuma maaki, Paulo a ami suö mi, a nomawö ke mi, ĩ na a kua tetepo opaö ha, töpö pi tapomo opimo opati nö, ‑Paulo a hai, sai tänö makö noama wi ĩ nasimö tä hãtowö. A noma mi salo‑ ĩ na töpö kuuma.

⁷Ĩ na tä kua tä, atepa apöle ha mauta tili tä kaikana Púpöliu a hai ĩ tä uli kuoma. ‑Ipa tä uli ha makö pi kuköpöö!‑ ĩ na kamisamakö na ĩ na Púpöliu a noimo pola nö, a kuu ha, ĩ ha ai tä mumi, ai tä mumi, ai tä mumi, ĩ na samakö kuo pi kupasoma. ⁸Ĩ ha samakö kutia tä, Púpöliu a hai ĩ pö̃ a aulumo lätioma. A sii lele epö, a kamakalimo opaö, ĩ na a kua kai pilitioma. Ĩ na a kua kai piliti ha, ĩ ha Paulo a lisipalo nö, Teusö a na a hapalo nö, a kamakalimo pole, ĩ a na a ami waliki nö, a toa komanöma. ⁹A toa komani ha, mauta tili töpö aulumo pole, Paulo a na ĩ töpö pewö waloa läköma. Ĩ töpö pewö waloa läki ha, Paulo anö ĩ töpö pewö toa komananöma. ¹⁰Ĩ töpö toa komananö noai, ĩ töpönö kamisamakö na wani tökö kua apöla tä, wani tökö totoapöma. Samakö huu piale, ĩ samakö pi huulö pamö nii sama tä oalöpö, kamisamakö na ĩ töpönö ĩ nii tä pewö titiköma.

¹¹Sanöta Mauta tä ha samakö kutia tä, 3 pilipoma kökö kui kökö pilipoma matasoma. Ĩ kökö pilipoma maa kutalo nö, Alesiãtöti tä uli ha kutiata a pata kuo noai, töpö poakapaso noai ĩ a kutiata hilo noai, ĩ a kutiata pata ha samakö titia nömöa soaköma. Maa tä hälä soa tä, sanöta Mauta tä kule ha ĩ a kutiata pata kãa läo waikioma. Ĩ a kutiata pata ha samakö hulasolöma. Samakö hulolö nö, ¹²Sitakusa tä uli kulali, ĩ hamö samakö kua nömökö lasoma. Ĩ hamö samakö kua nömöikilö nö, 3 tökö mumi kui tökö mumi maa kutalo nö, ¹³samakö hua kononö nö, Hésiu tä uli ha samakö pi waloa nömöa kokö lasoma. Samakö pi waloa nömöa koikilö nö, ĩ hena tä, ipoko tä toita apii tä ipoko kuköma kutenö, polakapi tä mumi matalo nö, Posuolii tä uli ha samakö waloa nömöa soatakö lasoma.

¹⁴Posuolii tä uli ha samakö waloa nömöa soaikilö nö, ĩ ha Jesus a thapo wi ĩ ai sama töpö talalöma, ‑Kamisamakö na pö kua naikiö!‑ ĩ na ĩ töpö kuuma. ¹⁵Ĩ na töpö kuu ha, ĩ ha samakö kua tä, sami semana tä matalo nö, Homa tä uli pata ha piliso hamö samakö hulasolöma. Ĩ na tä kua tä, Homa tä uli pata ha Jesus a thapo wi ĩ töpönö, ‑Paulo töpö walo pia kulatiö!‑ tä kuu wi ta hininöma. Ta hininö nö, kamisamakö na töpö pao läo pia salo, Apiu ha nii tä suta sinomo wi ĩ hamö ai töpö hulasolöö, hama töpö kuta sinomo wi ĩ polakapi sai kökö kule, ĩ hamö ai töpö hulasolöö, ĩ na töpö kuama. Paulo a na ĩ töpö pao läoö ha, Teusö a na Paulo aiki, ‑Aitaköö! Hi wa töpö simöpalöma‑ ĩ na Paulo a kuu nö, a pi topapalo opama.

Homa tä uli ha töpö talaso noai ĩ ta

¹⁶Ĩ na tä kua tä, Homa tä uli pata ha samakö talasoma, titita wi a sai pata ha pata töpönö Paulo a titia maama. ‑Wa kuo pi topa pa a kuikiö!‑ ĩ na Paulo a na ĩ na töpö kuuma. Ĩ na töpö kuu nö, ai sotatu tä na, ‑Paulo a na wa mamo läapalo sinomopöö! Önö kutenö, Paulo a na a kua naitikiö!‑ ĩ na pata töpö kuuma.

¹⁷Ĩ na tä kua tä, polakapi tä mumi matalo nö, Paulo anö juteu pata töpö nakalöma. Ĩ pata töpö waloki ha, Paulo aiki, ‑Ipa pö! Ipa juteu töpö na wanisala sa tä thaa maapili. “Kamakö hai ĩ pata töpö kuati kua noai na, ĩ na makö kua kua nömöo maapöö!” ĩ na sa kuu maapili. Kamakö hai ĩ pata töpö kuati kua noai na, ĩ na sa kua hö̃tötioö. Ĩ na sa kua hö̃töa kule maaki, Jetusalẽi tä uli pata ha sa kua tä, juteu pata töpönö sa õkapamanö nö, homa tili pata töpö na sa õkama totoki kipili. ¹⁸Homa tili pata töpö na sa õkama totokö noai ĩ pata töpönö sa hapalama totio noai ha, “Wi na Paulo a kuaö ha juteu töpönö Paulo a säpa pi topa kule? Paulo anö wanisala tä thaa maama. Önö kutenö, Paulo a säpa maapö” ĩ na homa tili pata töpö kuu nö, “Paulo ma kusöpalöpököö!” ĩ na ĩ töpö kuu kipili maaki, ¹⁹“A kusöpa kõo tihöö!” ĩ na juteu töpö kuu pasio kipili. Ĩ na juteu töpö kuu pasioma kutenö, “Homa tili tä kaikana na sa simöpalöö! Ĩ a patanö sa hapalama sisapököö!” ĩ na sa kuu pikio kipili. “Ipa juteu töpö wanisala apa thaliö!” ĩ na sa kuu tai mi ipö maaki, “Homa tili tä kaikananö sa hini sisapöö!” ĩ na sa kuu kipili. ²⁰Önö kutenö, kamisanö makö nakali ke. Makö taa pi topaö, kamakö na sa hapalo pi topaö, ĩ na sa kua pia salo, makö nakali ke. “Juteu makö täapa kõo läo piale, waiha ĩ a huu kitäö!” ĩ na juteu töpö kuu wi, kamisanö ĩ sa wäsäti kutenö, “Jesus Cristo a hai, makö täapa kõo läo wi ĩ a pasiwö” tä kuu wi ĩ sa ta wäsäti kutenö, hi söpala ösö thoo totonö sa õkapalöma, sa õkama kutia kule‑ ĩ na Paulo a kuuma.

²¹Ĩ na Paulo a kuu ha, ‑Ki hamö Jutéia tä uli pata ha juteu töpö pililati, ĩ töpönö kamisamakö na waheta tä simöpa maa noa thali. Wa kua noai ĩ tä sãököpa maa noa thali. Hisa ha jutéia tili töpö juteu hama huu maapili. “Ĩ na Paulo a kua thaliö! Paulo a wanisala thaliö!” ĩ na ai tä kuu maapili. ²²Jesus a thapo wi, ai töpönö ĩ töpö a kateha hiopöa apa thali. Ĩ tä uli pewö hamö ĩ töpö hiopöpama thaliö! Jesus wa thapo wi ĩ wa naiwö kutenö, wa ta wäsä sinomo wi, ĩ sama ta hini pi topa kule‑ ĩ na ĩ juteu pata töpö kuuma.

²³Ĩ na ĩ töpö kuu nö, ‑Ĩ tä wakala ha makö hapalo kopöö!‑ ĩ na töpö kuu nö, ĩ tä wakala ha Paulo a na ĩ töpö waloa kõköma. Töpö waloa kõki ha, hena tä sai tä Paulo a hapalo kuiki nö, a hapalo soatio pa tä wisamanöma. Sanöma töpö na Teusö a kaikanamo totio wi, opii ipii ĩ ta wäsätima. Ĩ ta wäsä nö, Moisés anö töpö noa thaa noai ĩ ta, Teusö a kai a wäsä sinomo noai ĩ töpönö tä sãöka noai ĩ ta, ĩ na tä kuu wi ĩ ta katehati nö, ‑Makö täapa kõo läo wi, ĩ Jesus Cristo a. Jesus Cristo anö makö täapa kõo läo kitäö!‑ ĩ na Paulo a kuu nö, ‑“Ĩ na Paulo a kuu pole, ĩ pitili ta” makö pi kuu mi salo‑ ĩ na Paulo a kutima. ²⁴Ĩ na a kuti ha, ‑Awai. Wa ta wäsä pole, ĩ pitili ta‑ ĩ na ai töpö kuu asa kule maaki, ‑Ĩ pitili ta‑ ĩ na ai töpö kuu pasio maama.

²⁵Ĩ na tä kua tä, Paulo a hapalo matasoö ha, ĩ töpö hapalo pi hĩsuhapaloiki nö, töpö konasolöma. Töpö kõo paiolö mai ha, ‑Ĩ pitili ta‑ töpö kuu pasio maa noai, ĩ töpö na Paulo aiki, ‑Kamakö hai ĩ pata töpö na Teusö a õsi kua tolele, ĩ a hapalopö, Teusö a kai a wäsä sinomo wi ĩ Isaías a simöpalö nö, ĩ na a kuu totiataloma:

^26-27“Ĩ töpö na a huulöö!” ĩ na Teusö a õsi kua tolele, ĩ na ĩ a kuu nö, “Ĩ töpö pi hatukua mikiö! Kama töpö sömöka kasöa sapa kõo päköma. Töpö mamo kasö mia naiköma. Önö kutenö, ĩ töpö na, ‘Makö sömöka taa kule maaki, ma ta hini mai kitä. Makö mamo tetea hö̃töa kule maaki, ma tä tapa mai kitä’ ĩ na a kuu totioö! Ĩ töpö mamo kasö mio maama aköna, tä tapa pola pi. Ĩ töpö sömöka kasöo maama aköna, ĩ ta hini hö̃töo noa kipi. Töpö pi hatukua apöla pi. Ĩ töpö pi tapomo sapao kõo nö, kamisa na ĩ töpö walo kona pi. Kamisa na ĩ töpö waloa kõki aköna, kamisanö ĩ sa töpö toa komani pi”

ĩ na Teusö a õsi kua tolele, ĩ na ĩ a kuumaö!‑ ĩ na Paulo a kuuma. ²⁸Ĩ na a kuu nö, ‑Sa kuu pole, ĩ ta hiniö! “Teusö anö töpö täapa kõo läo pia salo” tä kuu wi, juteu töpö pasi mai ĩ töpö na ĩ ta simöpalöma. Juteu töpö pasi mai ĩ töpönö ĩ ta hinia totialali wi kitä‑ ĩ na Paulo a kuuma. ²⁹[Ĩ na Paulo a kuu ha, pe epii töpö hapalo nomöhöpaso kõtiolöma.]

³⁰Ĩ na tä kua tä, sitipa noa na a kutati noai, ĩ a sai na Paulo a kutia tä, polakapi inama tä mapasoma. Ĩ a sai ha a kutia tä, Paulo a na töpö hapalo pi topa noai ĩ töpö na Paulo a noimo hö̃töoma. ³¹Sanöma töpö na Teusö a kaikanamo totio wi, Paulo anö ĩ ta wäsäö, Jesus Cristo pata tä na töpö pi hatukamaö, ĩ na Paulo a kuatima. Jesus a wäsä kili maama. Jesus a wäsäti tä, ‑Ĩ ta wäsäti tihöö!‑ ĩ na ai pata töpö kuu maama.