2 Timóteo

2 Timóteo

Timóteo a na waheta tä simöa nömöpalö noai ĩ ta

Paulo a noma piale, ĩ tä atea waikia manu kule, Timóteo a na hi waheta tä simöpalöma. Paulo a na Timóteo a nokapalo sinomoti pamö Paulo a kuati noai, Timóteo anö ĩ tä taö öpama. ‑Jesus ta pitili‑ Paulo a pi kuu sinomo noai ĩ tä, a hĩso soatalo mai ha a noi ipii ĩ tä, ai töpö pi ipa wi ĩ tä, a satimo opa noai ĩ tä, ai töpönö a wanipo nö, a peama apa noai ĩ tä, Timóteo anö ĩ tä pewö taö öpa waikioma.

Timóteo a na Paulo aiki, ‑Ai töpönö sa peamatima maaki, sa satimo opa hö̃töoma. Ĩ wa tä taö öpa waikile kitä. Sa peamatima maaki, Teusö anö sa noama hö̃tötioma. “Kamisa na a kalipaloö! Sa kai a wäsä sinomoö!” kamisa na ĩ na Jesus a kuu noai, ĩ sa ta hinia totilö nö, Jesus sa kai a hulapa mai, Jesus a na sa kalipalo totiatalo opatima‑ a kuu nö, ‑Sa kuati kua noai na, ĩ na wa kua kua hö̃tötiopöö! A pi mosaikiö! A kasiapalo sinomoö! Wa peama tä, a kasiapaloö! Jesus ta topa apöle ĩ ta wäsä sinomoö! Teusö a na wa kalipalo sinomo wi ĩ wa kutenö, a kalipalo makoka apaö!‑ ĩ na Paulo a kuuma.

¹Paulo sa. Teusö anö sa simöpa pi topaö ha, Jesus Cristo anö sa simöa wi, ĩ sa. ‑“Jesus Cristo a na wa kua naiki nö, wa õsi palimipalo nö, temö öpii wa kuo soatio kitäö!” tä kuu wi, Paulo anö ĩ ta wäsä hätäpotipököö!‑ Jesus a pi kuu salo, sa simöa kule.

²Timóteo ai! Pösa ai! Wa pi ipa salo, hi waheta sa tä simöpali ke.

Pö̃ Teusö a, kamakö hai ĩ Jesus Cristo Kaikana tä, ĩ na kui töpö na sa hapalo nö, ‑Timóteo a noa mi totiapalaö! A tomöpo mi tä, a totiapala satimoö! Ĩ a pi topapalama satia apaö!‑ ĩ na sa kuu.

Timóteo anö Jesus a thapo pitilimo opa noai ĩ a

³Ipa nö patapö töpö Teusömo kua noai na, ĩ na sa Teusömo kua hö̃töoö. ‑Sa holisimo hãtoa kule. Wanisala sa tä thaa pi topa soa kule‑ ĩ na sa pi kuu mai ha, sa pitilimo opa nö, sa Teusömo sinomoö. Teusö a na sa hapalo tä, wa wäsä sinomo nö, ‑Aitaköö!‑ ĩ na Teusö a na ĩ na sa kuu. ⁴‑Sa kõa pasilolöheö!‑ kawa na sa kuu ha, wa mamo puu soapasopili, ĩ sa tä taö soa tä, mumai ha kawa na sa pi tapoö, wakalai ha kawa na sa pi tapoö, ĩ na sa kua tä, wa möö pi topa apaö. Sa pi mönaha apöpaso pia salo, wa möö pi topa apaö. ⁵Jesus wa thapo pitilimo opa wi, ĩ sa tä taö soa kule. Au nao a patasoma Lois anö Jesus a thapo somama, au nao a Euniisi anö Jesus a thapo nömöa, ĩ na ĩ töpönö Jesus a thapo kuo noai na, ĩ na wa kua totia hö̃töa kule. ‑Timóteo anö Jesus a thapo hãtoa mane kitäö!‑ sa pi kuu mi.

‑Jesus ta wäsä makokoa totioö!‑

⁶Önö kutenö, ‑Teusö wa ta wäsä sinomopö, kawa na sa ami walikipili, ĩ tä, Teusö anö wa pasilipo pia salo, kawa õsi na Teusö anö tä totokipili, ĩ tä mapama tihöö! Teusö ta wäsä taö öpa wi ĩ tä totokipili, ĩ tä mapama hãto tihöö!‑ kawa na ĩ na sa ku upa kule. ⁷Pi kiliho wi, Teusö anö kamakö na ĩ tä totoa maama. Pi kilihitala nö kuno mai, pi lotetea apa wi, ĩ tä totoköma. Ai tä noima totio wi, ĩ tä totoa naiköma. Osemo pola nö kuno mai, pi mosaio opa wi, Teusö anö ĩ tä totoa naiköma.

⁸Ĩ na tä kuaö ha, kamakö hai ĩ Jesus Kaikana a wäsä kili tihöö! ‑Paulo anö Jesus a wäsäma kutenö, a õkama titia kule‑ wa pi kuu nö, ‑Paulo a titile, ĩ ipa ai a‑ ĩ na a kuu kili tihöö! Jesus wa wäsäö ha, wa peama kitä maaki, Teusö anö wa pi lotetepamanöma kutenö, ‑Sa pea pasio päo‑ ĩ na a pi kuu totihoö! ⁹Teusö anö makö selekepamanöpö, toitai tä thaa sinomo wi, ĩ na Teusö anö ĩ na makö thapali pia salo, makö nakalö nö, makö täapa läo kõoma. ‑Ĩ töpönö toitai tä thaa waikioma salo, sa töpö täa koni kitäö!‑ ĩ na Teusö a pi kuu maama. A pi saimo nö, makö totiapala pi topa päa salo, makö täa konöma. Masita tä uli kua paia mai ha, Teusö a pi tapoiki nö, ‑Ipa ulu a Jesus Cristo sa simönö nö, ipa sanöma sa töpö totiapala apa kitäö!‑ ĩ na Teusö a pi kuuma. ¹⁰Huki, Jesus Cristo anö makö koni wi, Teusö anö ĩ a simöa waikipalöma kutenö, makö totiapala apa wi, Teusö anö ĩ tä möpalama waikioma. Jesus anö, nomaso wi ĩ tä mapamanö nö, õsi palimipo wi ĩ tä, makö temöo soatio wi ĩ tä, ĩ tä möpalamama. Ta topa apöle ĩ ta wäsä waikioma salo, makö õsi palimipo wi, ĩ tä möpalama waikioma.

¹¹‑Paulo anö ĩ ta wäsätipököö!‑ Teusö a pi kuu salo, sa simönö nö, ‑Jesus wa ta wäsä hätäpotipököö!‑ a kuuma. Önö kutenö, Teusö anö sa simöa wi, ĩ sa. Jesus ta wäsä sinomoti wi, ĩ sa.

¹²Ĩ na sa kua salo, hi sai a lototole, ĩ a sai ha sa peati kule. Sa peati kule maaki, sa kili mai kitä. ‑Häö! Wi na taköö!‑ sa pi kuu mi. ‑Jesus a pitili‑ ĩ na sa pi kuupili, ĩ Jesus sa taö öpa. ‑Teusö a na kama sa uni totopili, Teusö anö ĩ sa noama totio kitä. A huu kõo paio mi tä, sa noama totio kitäö!‑ ĩ na sa pi ku upaö.

¹³Kamisanö ta makoka apa wi, ĩ sa ta kateha makokoatipili, ĩ wa ta hinitipili, kamisa uöma nö, ĩ ta kateha nömöoö! Jesus a na wa kua naia kutenö, Jesus wa thapo totitio nö, ai wa töpö noima totitio nö, ĩ na wa kuaö! ¹⁴Kawa na tä totokipili, ĩ tä noamaö! Kawa na Jesus a kai a totokipili, ĩ a kai a wäsä makokoa satimoö! Kamakö na Teusö a õsi kua tolele, kamakö na ĩ a pilitile, ĩ anö wa pi lotetepamani ha, Jesus wa kai a wäsä satimopököö!

Onesípotu anö Paulo a totiapala sisa noai ĩ ta

¹⁵Ĩ na tä kua tä, ‑Ásia tä uli ha töpö pililati, Paulo a na ĩ töpö kuatima maaki, ĩ töpö pewönö Paulo a hosalö nö, a taa kõkölöma. Pisielu a, Ehemósienisö a, ĩ na kilii töpö solo‑ ĩ na wa ta kuu hini waikio noai kitä. ^16-17Onesípotu anö sa pi topa totiatalama sisama kutenö, Teusö a na, ‑Onesípotu töpö totiapala apaö!‑ ĩ na sa kuu. Söpala ösö totonö sa õkatioma maaki, kamisa na Onesípotu a walo kili maama. Hi Homa tä uli pata ha a waloiki nö, a kasiapalo nö, sa taeti nö, sa talalöma. ¹⁸Ĩ na a kuama kutenö, Jesus pata tä na ĩ na sa kuu: ‑Wa huu kõa tä, Onesípotu a totiapalapököö!‑ ĩ na sa kuu. Epesu tä uli ha Onesípotu anö sa pasilia totiatala apati noai, ĩ wa tä taö öpaö.

‑A kasiapalo totioö!‑ Paulo a kuu noai ĩ ta

¹Ipa ulu ai! Jesus Cristo anö makö totiapalama sinomo kutenö, wa pi lotetea totipalo nö, wa kuaö!

²Ai töpö sömöka tala tä, kawa na sa ta wäsäpili, ai töpö na ĩ wa ta wäsä nömöoö! Pitilimo opa wi, ĩ töpönö ai töpö na ĩ ta wäsä toleo taö öpapö, ĩ töpö na ĩ wa ta wäsä nömöoö!

³Pata töpönö sotatu töpö simönö nö, wasu töpö na ĩ sotatu töpö kasiapalo kua wi na, ĩ na Jesus Cristo anö wa simönöma kutenö, ĩ na a kasiapalo kua totio opa hö̃töoö! Wa kasiapalo opa wi ĩ wa kutenö, kamisa pea kua wi na, ĩ na wa pea kua naio kuki kitä. Wa pea naio kitä maaki, ‑Sa pea wani ipö sai‑ a pi kuu tihöö!

⁴Sotatu töpö na pata tä simöo sinomoti wi, ĩ sotatu töpönö ĩ pata tä pi mönahapamani pia salo, sotatu töpö pasi mai ĩ töpö kua kuati wi na, ĩ na sotatu töpö kua kua pasio mi. Kawa na Jesus Cristo a simöo sinomoti wi ĩ wanö Jesus wa pi mönahapamani pia salo, Jesus a thapo mai, ĩ töpö kua kuati wi na, ĩ na wa kua pasio maikiö! Jesus a na a kalipalo sisaaö!

⁵Hĩsa töpö inamo tä, ai hĩsa tä inamo kasiapalo satia apa salo, noa tä täa asali kitä maaki, ‑Makö inamo tä, ĩ na makö kua totiopököö!‑ ĩ na pata töpönö hĩsa töpö noa thaa wi, ĩ ai hĩsa tänö ĩ ta hini mi tä, noa tä täa pasio mai kitä. Ĩ na tä kua kua wi na, ĩ na wa kua kua hö̃töoö. ‑Ĩ na makö kuapököö!‑ Jesus Kaikana tänö wa noa thaa wi, ĩ wa ta hini mi tä, noa wa tä täa hö̃töo pasio mai kitä.

⁶Hikali a na pe epii ai tä kalipalo opa asa wi, ĩ a na hikali a ha nii tä kule, ĩ a na ĩ nii tä totoa somaki. Ĩ tä kua wi na, ĩ na wa kua hö̃töopökö. Teusö a na wa kalipalo kasiapalo opaö ha, noa wa tä täa hö̃töli kitäö! ⁷Sa kuuhe, ĩ tä na a pi tapokiö! Ĩ tä na wa pi tapoa tä, ĩ tä pewö na Teusö anö wa pi hatukupamani kitä.

⁸Teusö anö Jesus a temöa komanö noai, nö patapö Davi a hai ĩ pelupö tolewö a hai, ĩ Jesus a kuoma. Ĩ sa ta wäsä sinomoö. Jesus ta topa apöle, ĩ sa ta wäsä tä, Jesus a temöa komanö noai ĩ sa ta wäsä sinomo opaö. Jesus sa ta wäsäti wi, ĩ Jesus a na a pi motimo tihöö! ⁹Jesus sa ta wäsäti kutenö, sa peati kule. Wanisala tä thati wi, söpala ösö totonö ĩ töpö õka kuo wi na, ĩ na sa õka kua hö̃töa kule. Ĩ na sa õka kua kule maaki, Teusö ta wäsä wi, ĩ tä paukupaso kitä. Teusö ta wäsä satimo opaa. ¹⁰Önö kutenö, sa peati kule maaki, sa kasiapalo opaa. Teusö anö töpö sailö noai, ĩ töpö na sa pi tapoiki nö, sa kasiapalo opaö. ‑Jesus Cristo anö ĩ töpö konöma, Teusö a wakala apii, a toita apii, ĩ a na ĩ töpö kuo soatio kitäö!‑ ĩ na sa pi kuu salo, sa kasiapalo opaö.

¹¹Sa kuu piale, ĩ ta pitilia apa.

Jesus a noma kua noai na, ĩ na makö noma kulasoö ha, Jesus a temöa kua konaso noai na, ĩ na makö temöa kua kono nö, Jesus na makö kuo kõo naio kitä.

¹²Makö kasiapalo opati tä, Jesus a kaikanamoö, kamakö kaikanamo sätäa naia, ĩ na tä kua kitä. Jesus a na makö pi pälamoö ha, kamakö na, ‑Päla‑ Jesus a kuu hö̃töo kitä.

¹³Jesus ma monima kitä maaki, Jesus anö makö monima pasio mai kitä. Jesus a pitilimo sinomo asa kutenö, makö monima tai mi ipö kitä.

‑Kawa topa apa asawö‑ ĩ na Teusö a pi thamaö!

¹⁴Sa kuuhe, kawa kule ha töpö kule, ĩ töpö na ĩ wa ta wäsä kõataloö! Teusö anö wa tapa apa kutenö, ta wäsä totioö! ‑Makö hapalo isi waniho mai, makokoi tä thaa totihoö! Pö hapalo hẽtupaso pi hĩsuha tihöö!‑ wa kuu! Makö hapalo hẽtupaso pi hĩsuha wi, ĩ ta topa mane. Ai töpönö ĩ ta hini kuköma, töpö pi hatukupo mai kitä. Töpö pi moti ipö kitä. ¹⁵‑Kawa topa apawö‑ ĩ na Teusö a pi thamaö! A kasiapaloö! Wa kalipalo opati nö, Teusö a kai a pitilimo opa wi, ĩ a kai a wäsä makoka apaö! Teusö wa kai a wäsä makokoa tä, ‑Sa ta wäsä makokoa mi salo, Teusö a na sa kili ipaö‑ ĩ na wa pi kuu mai kitä. ¹⁶Töpö hapalo hẽtupaso osemo päo wi, Teusö anö ĩ ta hini wani ipii, ĩ ta hini tihöö! Ĩ töpö hapalo hẽtupaso wi, ai töpönö ĩ ta hininöma, töpö wanisala husua apösolö kitä. Teusö a na ĩ töpö pi hanoapalo husua apösolö kitä. ¹⁷Ĩ ta wäsä isi waniho wi, ai töpönö ĩ ta hininö nö, töpö wanisala apa kuki kitä ta pi kuti mai. Sonaka tä kuköma, sonaka tänö sãi sãi tä wanisalama kua kua wi na, ĩ na ĩ ta isi waniho wi, ĩ na ĩ tänö töpö õsi wanisala kua husua apösolö kitä. Imeneu a, Pileeto a, ĩ na kilii töpönö ĩ ta wäsä naio thali. ¹⁸Ta pitilia apöle, ĩ ta hosalö nö, ‑Makö temöa konaso wi, ĩ tä kuo waikiomaö!‑ ĩ na ĩ töpö kuu. Ai töpönö ĩ ta hininö nö, ‑Jesus ta pitili‑ ĩ na ĩ töpö pi kuu matasoma. ¹⁹‑Jesus ta pitili‑ ĩ na ai töpö pi kuu matasoma maaki, Teusö a kai a lotete epö. Sai a kolo lototo opa kuo wi na, ĩ na Teusö anö pili tä uni kolo lototoa thaa hö̃töki. Ĩ na tä uni kolo lototoa thaa hö̃tökö nö, sai a kolo na tä sãökama thaa thaki wi na, ĩ na Teusö anö ĩ na tä thaa thaa hö̃töki. Ĩ na tä thaa thaa hö̃tökö nö, ĩ na Teusö a kuu: ‑Kamisanö ipa sa töpö taö öpaö. “Teusö sa thapo wi ĩ sa” makö kuu wi, ĩ makönö wanisala tä thaa hãto maikiö!‑ ĩ na Teusö a kuu.

²⁰Sai a pe epii a sai ha, söpala ösö hapoka, söpala ösö holokoto, söpala ösö kaukösö, söpala ösö mokota, tasa tä, kusiali a, ĩ nasimö söpala ösökö noa apii ösökö kua. Söpala ösö noa apii, ĩ oto tä, pötaata tä, ĩ nasimö söpala ösökö noa apii ösökö kua. Ĩ na tä kua tä, wani tä noa mi ipii, ĩ hapokasi kökö, hii ti kusiali tökö, ĩ na wani tökö noa mi ipii tökö kua kua hö̃töa. Wani tökö noa apii ĩ tökö na, ‑Ĩ tökö toita apa asawö‑ ĩ na töpö pi kuu. Ĩ na tä kua tä, ‑Tökö noa pasi mai, ĩ tökö toita apö‑ tä pi kuu wi tä kua mai kitä. ²¹Ĩ na tä kua wi na, ĩ na makö kuaö. Wa wanisala kutenö wa uni salupamonasoma, wanisala wa tä thaa mi tä, wani tökö toita apö kui na, ĩ na makö kupaso kitä. Teusö aiki, ‑Wa toita apö‑ Teusö Kaikana tä pi kuu kitä. ‑Kamisa na wa kalipalo taö öpa asaö. Toitai wa tä thaa taö öpa asaö‑ ĩ na Teusö a pi kuu kitä. ²²Hĩsa töpönö wanisala tä thaa pi topa apa wi, ĩ tä na a pi kuo naio tihöö! A tokölolöö! Toitai tä thaö, ‑Teusö ta pitili‑ wa pi ku upaö, ai wa töpö pi ipaö, ai töpö na wa noimoö, ĩ na wa kasiapalo nö, ĩ na wa kuaö! Töpö õsi ausi ipii, ĩ töpönö Teusö a naka wi ĩ töpö na wa kua naiki nö, ĩ na a kua totihoö! ²³Töpö pi moti ipii, töpö hapalo hẽtupaso osemo kõataloti wi, ĩ ta hini maikiö! Töpö hapalo hẽtupaso osemo kõataloti wi, ĩ töpö hölapalo kuki kitä. Ĩ wa tä taö waikia. ²⁴Teusö a na a kalipaloti wi, ĩ a höla mai kitä. Ai töpö pewö na a noimo opaö. Ai töpö pi hatukama apaö. Teusö a na a kalipaloti wi, ĩ a hapalo soatalo mai kitä. A hĩso soatalo mai kitä. ²⁵A höla mai, ĩ a na töpö hapalo pi wasöa apa wi, opii ĩ a hapalo nö, ‑Ĩ na makö kua maikiö!‑ ĩ na a kuu opimo kitä. Ĩ na a kuu ha, töpö hapalo pi wasöa apa wi, Teusö anö ĩ töpö pi hatukua hãtopamani. Ĩ töpö pi hatukupamani ha, ‑Häö! Sa ta wäsä tomöpo mi sai taköö!‑ ĩ na töpö pi kuu nö, tä pitilimo opa wi, ĩ tä taö kuki kitä. ²⁶Tä pitilimo opa wi, ĩ tä taö kuiki nö, Sai tä sai pata na töpö toköa konasolö kitä. Sai tä sai pata aiki, ‑Sa hinia totili wi, ĩ na sa töpö thama pia salo!‑ ĩ na Sai tä pi pata kuu nö, ĩ töpö huölöma maaki, töpö toköa konaso kitä.

Jesus a huu kõo pia tä, ĩ na töpö kua kitä

¹Sa kuu piale, ĩ tä na a pi hatukuikiö! Jesus Cristo a huu kõo pia tä, sanöma töpö aiki, ‑Toitai makö kua kuleö!‑ tä kuu wi tä kua mai kitä. ²Töpö pipaso mai, kama töpö pio sapamo kõkötaso kitä. Sitipa kökö pi ipa kuki kitä. ‑Sa pi tao opa asaö‑ töpö pi kuu nö, ‑Ĩ sa tä taö öpa asaleö!‑ ĩ na töpö kuu kuki kitä. Ai tä na töpö hapalo wanisala kuki kitä. Ĩ na tä kua tä, pö̃ a, pöpönö a, ĩ na töpö kui töpö a hini mai kitä. Töpö totiapala apa wi maaki, ‑Aitaköö!‑ töpö pi kuu totio mai kitä. Teusö a na, ‑Päla‑ töpö pi kuu kuki kitä. ³Ai töpö pii mai kitä. Ai töpö wanipo wi ĩ töpö na ĩ töpö noimo kõo mai, töpö pi hanoa sipa apatii. Ai töpö a kateha wanisala apati kuki kitä. ‑Naiö! Wanisala sa tä thaa mai kitäö!‑ töpö pi kuu mai, wanisala tä tha apati kitä. Töpö waitilimo opa kuki kitä. Toitai tä pii pasio mai kitä. ⁴Töpö monimo opa kitä. Töpö pi tapomo paio mai ha, ‑Ĩ na sa kua soa päta pia kuleö!‑ ĩ na töpö pi kuu soa päatalo opati kuki kitä. ‑Pata sa asawöö!‑ töpö pi ku upa kuki kitä. ‑Teusö sa pii mai, sa puko opa wi, ĩ sa tä pi ipa sisaö‑ töpö pi ku upa kuki kitä. ⁵Töpö Teusömo naio kitä maaki, Teusö a kai a hini totio mai kitä. ‑Sa õsi lotetepamanöö! Sa pi hatukupamanöö!‑ Teusö a na ĩ töpö kuu mai kitä. Ĩ töpö na a kuo naio tihöö! ⁶Sa töpö a katehahe, ai töpö sai pö ha ĩ ai töpö lisipalolö nö, suö töpö pi hatukua mi ipii, ĩ suö töpö mönamatii. Ĩ suö töpö wanisala apatii. ‑Hiopö sa tä thaöö!‑ ĩ töpö pi kuu salo, wanisala tä thatala apa pikitiotii. ⁷‑Sa pi hatukupo pi topa apa kule‑ ĩ na ĩ suö töpö pi kuu kule maaki, pitili tä na töpö pi hatukupo mi ipö. ⁸Sutu upa Janesö a, Jãpötisö a, ĩ na kilii töpönö Moisés a kai a peama kua noai na, ĩ na holisi ta wäsäti wi, ĩ na ĩ töpönö ta pitilii, ĩ ta peama kua hö̃töoö. Ĩ töpö pi moti ipö. Ĩ töpö pi tapopalo wanisala apa pasitiowö. Ĩ töpö Teusömo holisimopalo opatiwö. ⁹Ai töpönö ĩ töpö kai a hini soatio mai kitä. ‑Töpö osemo opawö‑ ĩ na töpö pewö pi kuu kuki kitä. ‑Janesö a, Jãpötisö a, ĩ na kilii töpö osemo opawö‑ ĩ na sutu ha töpö pewö pi kuu kua noai na, ‑Ta pitilii, ĩ ta peama wi ĩ töpö osemo opawö‑ ĩ na töpö pewö pi kuu hö̃tölaso kitä.

Paulo anö Timóteo a noa thaa kõo noai ĩ ta

¹⁰Kamisa na kawa mamo teteo thali. Sa ta katehati wi ĩ wa ta taö, sa kuati wi ĩ wa tä taö, ‑Ĩ na sa kua pi topa apö‑ sa pi kuti wi ĩ wa tä taö naia, ĩ na wa kua waikia. ‑Jesus ta pitili‑ sa pi kuu sinomo wi ĩ tä, sa hĩso soatalo mai ha, sa noi ipii ĩ tä, ai sa töpö pi ipa wi ĩ tä, sa satimo opa wi ĩ tä, ai töpönö sa wanipo nö, sa peama apa wi ĩ tä, ĩ wa tä pewö a taö öpa waikia. ¹¹Ãsiokia tä uli, Ikôniu tä uli, Liisötöta tä uli, ĩ na tökö uli hilo kule, ĩ tökö uli pewö hamö ai töpönö sa peamatima maaki, sa satimo opa hö̃töoma. Ĩ wa tä taö öpa waikile kitä. Sa peamatima maaki, Teusö anö sa noama hö̃tötioma. ¹²Awai. Jesus a thapo wi, Jesus Cristo a na ĩ töpö kua naia kutenö, Teusö a kai a hininö nö, wanisala tä thatalati mai, ĩ na töpö kua pi topa apa wi, ĩ töpö pepalama apa kitä. ¹³Töpö wanisala pasio wi, ĩ töpö holisimo opa wi, ĩ töpönö ai töpö mönamati nö, kama töpö mönamamo sapamo opati nö, wanisala tä thaa huso opati kitä. ¹⁴Kawanö wa ta hua noai, ‑Pitili tä sai ha‑ wa pi kuu totio noai, ĩ ta hula kõo ti! Kawa na ĩ ta wäsäti noai, ĩ wa töpö taö öpa kutenö, ĩ ta hula kõo ti! ¹⁵Wa ose tä, Teusö wa tä waheta taö noai, ĩ wa tä taö soa matatä. Ĩ Teusö hai ĩ waheta tänö wa pi hatukua pälasoö. Wa pi hatukua pälo nö, ‑Jesus Cristo ta pitili‑ ĩ na wa pi kuu nö, ĩ na wa kuaö ha, Teusö anö wa täa koni kitä. ¹⁶Teusö tä waheta sãöka noai, Teusö anö ĩ töpö pi hatukupamanö nö, kama hai ĩ waheta tä pewö sãököpamanöma. Teusö tä wahetanö wa pasilipo nö, wa pi hatukupamani. Teusö tä wahetanö wa noa thaa nö, ‑Ĩ wanisala wa tä thaa maikiö!‑ ĩ na tä kuu nö, ‑Toitai tä thaa totio pasioö!‑ ĩ na tä kuu. ¹⁷Teusö wa thapo wi ĩ wa tomöpo mi mai ha, toitai wa tä pewö thaa sinomo taö öpapö, ĩ na Teusö tä waheta kuu.

‑Teusö a kai a wäsäö!‑ Paulo a kuu noai ĩ ta

^1-2Timóteo ai. ‑Teusö a kai a wäsäö!‑ ĩ na kawa na, ĩ na sa kuu kule. Ĩ na sa kuu nö, ‑Kawa aiki, “Huki topa apa kuleö! Huki Teusö sa kai wäsä pi topa apa kuleö!” wa pi kuu tä, Teusö a kai a wäsäö! Ĩ na tä kua tä, “Huki topa maneö! Huki Teusö sa kai wäsä wani ipö saiö!” wa pi kuu päla nö maaki, ta wäsä satimo hö̃töoö! Ai töpö tomöpo mi tä, “Ĩ na kuno maiö! Ĩ na wa kua totiopököö!” ĩ na wa kuu totiataloö! Ai töpö wanisala tä, “Naiö! Wanisala” wa kuu totiataloö! Ai töpö õsi wanisala tä, töpö õsi topa kõatalamaö! Ai töpö õsi utiti tä, töpö õsi lotetea kopamanöö! Teusö a kai na töpö pi hatukupamanöö! Wa silimo mai, opii wa töpö pi hatukua totipamanöö! Teusö a kai a wäsä totihoö!‑ kawa na ĩ na sa kuu kuleö! Teusö a, Jesus Cristo a, ĩ na töpö kui töpö sömöka tala tä, sa kuu kuleö! Töpö temii ĩ töpö, töpö nomaso noai ĩ töpö, ĩ na töpö kui töpö na Jesus Cristo anö tä makokama läo kitä. Tä makokama läo nö, ‑Ĩ na wa kuati kipiliö!‑ ĩ na a kuu nö, töpö sokamakö nö, ai töpö naka asalö nö, ‑Hapo. Kamisa na a kua naikiö!‑ a kuu asa kitä. Ĩ na a kuu nö, ai töpö na, ‑Päla. Kamisa na wa kuo naio mai kitäö!‑ ĩ na a kuu pasio kitä. Ĩ na tä kua wi tä kua läa kutenö, ‑Teusö a kai a wäsä totihoö!‑ ĩ na sa kuu kule. Jesus a tapamo kono nö, ĩ töpö pewö na a kaikanamo pia manu kule, ‑Teusö a kai a wäsäö!‑ sa kuu totia apa kule.

³Waiha Teusö a kai a pitili wäsäti wi, ai töpönö ĩ ta hini pi topa mai ha, ai tiko ta hini pi topa pikio kitä. Wanisala tä thaa pi topa satimo opa kutenö, ai tiko töpö a hini pi topa apa kitä. Teusö ta kai a pitili ipii, ĩ ta hini wani ipö salo, ‑Ki ma töpö naka pasilö nö, ma ta hini pi topa wi, ĩ töpönö ĩ ta wäsä pasile, ĩ ma ta hini pasiopököö!‑ ĩ na ĩ töpö kuu kitä. ⁴Ĩ töpönö Teusö tä kai a pitili ipii, ĩ tä na töpö sömöka taa wania kuikönö, ‑Ĩ na nö patapö töpö kuatima‑ tä holisi kuu wi, ĩ tä na ĩ töpö sömöka tapalo pasio pätio kitä. ⁵Önö kutenö, a pi mosaikiö! A kasiapalo sinomoö! Wa peama tä, a kasiapaloö! Jesus ta topa apöle ĩ ta wäsä sinomoö! Teusö a na wa kalipalo sinomo wi ĩ wa kutenö, a kalipalo makoka apaö!

⁶Ĩ na tä kua tä, kama sa wäo sapao kõo pia kule. Pi naka. Sa säpa pia kule. Sa säpalöma, Teusö a na sa konasolö kitä. ⁷Sa kasiapalo hö̃töo sinomotima. ‑Kamisa na a kalipaloö! Sa kai a wäsä sinomoö!‑ kamisa na ĩ na Jesus a kuu noai, ĩ sa ta hinia totilö nö, Jesus sa kai a hulapa mai, Jesus a na sa kalipalo waikia totia apöpasoma. ⁸Jesus a na sa kalipalo waikia totia apöpasoma kutenö, ĩ tä noa na sa totia kopali kitä. Jesus a huu kõa tä, wanisala sa tä thaa noai, Jesus anö ĩ tä pewö maa kopamanö nö, sa totia totia kopali kitä. Samii sa totipa kõo sisa mai kitä. Ai töpönö Jesus a pi ipa wi, ĩ töpönö a walo taa kõo naio wi, ĩ töpö totia kõa naipali kitä. Jesus a totiatalo opa wi, ĩ anö sanöma makö na tä makokama läo wi, ĩ anö wanisala tä pewö maa kopamanö nö, makö pewö totia totia kopali kitä.

Timóteo a na Paulo a hapalo waikipo wi ĩ ta

⁹Ĩ na tä kua tä, a huo haitaki solöö! ¹⁰Teusö a hai ĩ tä uli ha makö pilio piale, ĩ tä na Temasö a mamo teteo mai, hi masita tä uli ha makö pilio wi, ĩ tä pi ipa sisa kutenö, Temasö anö sa hosalöma. Sa hosalö nö, Tesalônika tä uli ha a konasolöma. Kötesẽisi a hai, Kalásia tä uli ha a kõa pasisolöma. Tito a hai, Taumásia tä uli ha a kõa hö̃tösolöma. ¹¹Kamisa na Lucas a kua sisa kule. Kawanö Marcos wa nakalö nö, a kai huoki solöö! ‑Jesus a na sa kalipalo tä, Marcos anö sa pasilipalöpököö!‑ ĩ na sa pi kuu. ¹²Epesu tä uli hamö Síkiku sa simöpalöma. ¹³Hisa ha wa huu tä, Tötôasi tä uli ha Kapu a na ipa haloi sa ösö takölö noai, ĩ wa ösö kõaki solöö! Ipa waheta tökö solo! Salo ösö na tä sãökama wi, ĩ wa tökö kõa totiaki solöö!

¹⁴Alesiãtöti a hai, söpala ösö na a kalipalo sinomo wi, ĩ anö kamisa na pe epii wanisala tä thama. Wanisala tä thaa noai, Teusö anö ĩ tä noa thaa hö̃töpali kitä. ¹⁵Sama ta wäsä noai, ĩ tä na Alesiãtöti a hapalo pi wasöa apama kutenö, ĩ a na a pi mosaikiö!

¹⁶Homa tili pata töpönö sa hapalama soma tä, ai tänö sa pasilipa maama. Ĩ ipa töpö pewönö sa takölö nö, sa hosalöma. Ĩ töpö pewö konasolöma. Töpö konasolöma maaki, Teusö a na kamisa aiki, ‑Ĩ töpönö sa hosalö noai, ĩ töpö na ĩ tä noa thapalöö!‑ ĩ na sa kuu mi. ¹⁷Ĩ töpönö sa pasilipo maama maaki, Jesus pata tänö sa pasilia pasipalö nö, sa lotetepamanöma. Sa pi lotetepamanöma salo, juteu töpö pasi mai ĩ töpö pewö na Jesus sa ta wäsä taö totio opatima. Sa wanipo wi ĩ anö sa oa pi topa apa noai, ĩ a kai wani na Jesus pata tänö sa nö läpoma. ¹⁸Tä wanisala wi, ĩ tä pewö na Jesus Kaikana tänö sa nö läpo nö, sa noama apa nö, hi tä hẽtu hamö a kaikanamo totio piale, ĩ ha sa täa konönö kitä. Teusö a na sa hapalo nö, ĩ na sa kuu: ‑“Jesus a totiatalo opa asawöö!” ĩ na makö pewö thama soatiopököö!‑ ĩ na sa kuu. Ĩ naköö!

¹⁹Pötisiila a, Akila a, Onesípotu a sai pö ha töpö kule ĩ töpö, ĩ na töpö kui töpö na, ‑“‘Wa topa kule?’ wa kuu!” ĩ na Paulo a kuu thaliö!‑ ĩ na wa kuu! ²⁰Kotĩtu tä uli ha Etaasötu a kua haipasoma. Miletu tä uli ha Tötópimu a saliaö ha, sa takölöma. ²¹Maa tä hälä paio mai ha, a huo haitaki solöö! Eupulu aiki, ‑Timóteo a na wa tä sãököpalö nö, “‘Wa topa kule?’ ĩ na Eupulu a kuu kuleö!” ĩ na wa kuu!‑ ĩ na Eupulu a kuu kule. Pötutẽisi a, Linu a, Cláudia a, Jesus a thapo wi ĩ töpö pewö, ĩ na töpö kui töpö solo, ‑Wa topa kule?‑ kawa na ĩ na ĩ töpö kuu kule.

²²Jesus Kaikana tä na sa hapalo nö, ‑Timóteo a õsi na a kua totikiö!‑ ĩ na sa kuu. Ĩ na sa kuu nö, ‑Ĩ töpö pewö totiapala apaö!‑ ĩ na sa kuu kule. Ĩ nakö.