2 Tessalonicenses

Tesalônika tili töpö na waheta tä simöa nömöpalö noai ĩ ta

Ai töpönö tesalônika tili töpö peama apatima maaki, ‑Jesus a pitili‑ ĩ tesalônika tili töpö pi kuu satimo opaö ha, ‑Makö topa apa kule‑ ĩ na hi tä waheta kolo na ĩ na Paulo a kuuma. A kuu nö, ‑Teusö a kai a peama wi, waiha Teusö anö ĩ töpö peama totio hö̃töo kitäö!‑ a kuuma.

Ĩ na tä kua tä, Jesus a huu kõo piale, ai töpönö ĩ ta kateha nö, ‑Jesus Cristo Kaikana tä walo kõo piale, ĩ tä kolo kua totia waikia kuleö!‑ ĩ na ĩ töpö kuuma kutenö, Paulo aiki, ‑Ai tänö makö mönama pia tä, pö pi hatukuikiö! Jesus a huu kõo mai ha, a kua soa kuleö!‑ a kuuma. A kuu nö, ‑Jesus a huu kõo paio mai ha, Teusö a kai a peama totio opa wi, ĩ a wani hasulua paipaso kitä. Ĩ a wani aiki, “Ai tä hai, Teusö a kua satia mai kitäö! Kamisa hai, Teusö sa waikiwöö!” ĩ na ĩ a wani kuu kitä. Ĩ a wani kuu noai ha, Jesus a waloiki nö, pili a kai hẽasinö ĩ a wani säpaso kitä. Önö kutenö, kamisamakönö kamakö na sama ta wäsäpili, ĩ ta hosa pasio mai, ta hini totioheö! Makö satimo nö, ĩ ta hini totihoö!‑ ĩ na Paulo a kuuma.

Ĩ na a kuu nö, töpö kalipalo mataso noai, hi tä waheta ola na ĩ töpö a kateha nömöoma. ‑Makö kalipalo mapo maikiö! Ai tä kalipalo wani ipö pasiwö ha, ĩ a wani na nii tä totoa tihöö!‑ a kuuma.

¹Tesalônika tä uli ha makö pilio wi ĩ makö kokamo nö, makö Teusömo sinomo wi ĩ makö na hi waheta sama tä simöpali ke. Paulo sa, Silas a, Timóteo a, ĩ na samakö kui samakönö hi waheta sama tä simöpali ke. Kamakö pewö hai ĩ pö̃ Teusö a, Jesus Cristo Kaikana tä, ĩ na töpö kui töpönö makö thapo wi, ĩ makö na hi waheta sama tä simöni ke. ²Kamakö hai ĩ pö̃ Teusö a, Jesus Cristo Kaikana tä, ĩ na töpö kui töpö na samakö hapalo nö, ‑Tesalônika tili töpö totiapala apaö! Töpö pi topapalamaö!‑ ĩ na samakö kuu.

Jesus a huu kõa tä, ai töpö peama piale ĩ ta

³Ipa pö! ‑Jesus a pitili‑ makö pi kuu wi, ĩ tä pala kimati. Makö pewö noimaso wi ĩ tä pala naio kimati. Ĩ na makö kuaö ha, ‑“Aitaköö! Ĩ töpö topa kimati” ĩ na Teusö a na ĩ na sa kuu sinomopökö‑ ĩ na samakö pi kuu kuleö! ⁴Teusö ma thapoö ha, ai töpönö makö peama kule maaki, Teusö a na, ‑Päla‑ makö kuu pola nö kuno mai, ‑Jesus a pitili‑ ĩ na makö pi kuu satimo opaö. Ĩ na makö pi kuu satimo opaö ha, ‑Ĩ na tesalônika tili töpö kuaö. Ĩ töpö topa apa thaliö!‑ ĩ na samakö kuu. Ĩ tä uli pewö hamö ai töpö kokamo nö, töpö Teusömo sinomo wi ĩ töpö na kamisamakönö makö a wäsä nö, ‑Ai töpönö tesalônika tili töpö peama apa kule maaki, “Jesus a pitili” ĩ na ĩ töpö pi kuu satimo opa thaliö! Ĩ na töpö kuati wi, ĩ tä topa apa‑ ĩ na samakö kuu.

⁵Ai töpönö makö peama apati manu kule, ‑Waiha Teusö anö sanöma makö pewö na tä makokama läo kitäö!‑ ĩ na makö pi thamaö. Huki Teusö anö makö simöa wi ĩ makö sai kutenö, ai töpönö makö peamatii. Makö peama apati kutenö, waiha Teusö aiki, ‑Hapo. Sa thapo wi, ĩ makö pasiwö‑ ĩ na kamakö na ĩ na a kuu asa kuki kitä. ^6-8Teusö a wanisala mai kitä. A pi hatuka apa. Teusö anö makö nö suli pia salo. Makö peamati noai, ĩ töpö peama hö̃töo kuki kitä. Ĩ töpö peama hö̃töo nö, kamakö, kamisamakö, ĩ na makö pewö kui makö peati noai, ĩ tä maa kopamani kitä. Jesus Kaikana a tapamo kõa tä, ĩ na tä kua kitä. Hi tä hẽtu ha Jesus a kupoli, ĩ anö ãju töpö lotete epii töpö kai waloiki nö, koa taka hili toita apii, ĩ taka kai waloiki nö, ai töpö peama kitä. Teusö a tai mio opa noai ĩ töpö, Jesus Kaikana a wäsä wi ĩ ta topale, ĩ ta hini maa noai ĩ töpö, ĩ na töpö kui, Jesus anö ĩ töpö peama kitä. ⁹Jesus a huu kõa tä, Jesus anö ĩ töpö peama apa nö, ĩ töpö wania totipamani kitäö! Waiha ĩ töpö totipo kota mai kitä. Ĩ töpönö Jesus Kaikana a tapa kota mai kitä. Jesus a möamö lotete toita apii, ĩ töpönö ĩ a tapa pasio kota mai kitä. ¹⁰Jesus a huu kõa tä, ĩ na tä kua kitä. Kama hai ĩ töpö õsi ausipalö noai, Jesus a na ĩ töpö kua naia tä, ‑Jesus a topa apa asawöö!‑ ĩ na ĩ töpö pewö kupalo asa kitä. ‑Jesus a pitili‑ töpö pi kuu waikile, ĩ töpö aiki, ‑Jesus a topa apa nö kilia sai!‑ ĩ na ĩ töpö kupalo kuki kitä. Ĩ na kamakö kupalo naio kuki kitä. Kamisamakönö kamakö na Jesus sama wäsäpili, ĩ ma ta hinia totilö nö, ‑Pitili ta‑ makö pi kuuma kutenö, ‑Jesus a topa apa nö kilia sai!‑ makö kuu naio kitä.

¹¹Ĩ na tä kuaö ha, kamakö hai ĩ Teusö a na makö a wäsä sinomoti nö, ‑Tesalônika tili wa töpö nakama kutenö, wa töpö topapalöpököö!‑ ĩ na samakö kuu totiatalo opaö. ‑“Toitai samakö kuo totiopököö!” ĩ na ĩ töpö kuu manu kule, ĩ töpö topapalöö! Wa lotete epö salo, ĩ töpö topa totipalöö! “Jesus a pitili” ĩ na ĩ töpö pi kuu nö, toitai tä thaapö, ĩ tä totoköö!‑ ĩ na Teusö a na ĩ na samakö kuu. ¹²Ĩ na Teusö anö kamakö na ĩ na ĩ tä totoa thaköma, kamakönö kamakö pewö hai ĩ Kaikana tä Jesus ma kateha nö, ‑Jesus a totiatalo opaö‑ makö kuu kitä. Ĩ na tä kua tä, Jesus aiki hö̃töwö, ‑Ĩ tesalônika tili töpö totiatalo opaö‑ ĩ na a kuu hö̃töo kitä. Kamakö hai ĩ Teusö a, Jesus Cristo Kaikana tä, ĩ na kilii töpönö tesalônika tili makö totiapala apati kutenö, ‑Ĩ tesalônika tili töpö totiatalo opaö‑ ĩ na Jesus a kuu kitä.

Teusö a kai peama totio opa wi ĩ a wani

¹Ĩ na tä kua tä, kamakö hai ĩ Jesus Cristo Kaikana tä huu kõo piale, ĩ sama ta wäsä pia kule. Jesus a huu kõa tä, ĩ a na makö kokamo piale, ĩ sama ta wäsä pia kule. Ĩ sama ta wäsä nö, makö noa thaa pia kule. ²‑Jesus Cristo Kaikana tä walo kõo piale, ĩ tä kolo kua totia waikia kuleö!‑ tä kuu wi, ĩ tä na pö pi honipo ti! Pö pi wi na takömo ti! ‑“Cristo kaikana tä walo kõo piale, ĩ tä kolo kua waikia kuleö!” ĩ na kamisa na ĩ na Teusö a kuu hasulua apamaö!‑ ĩ na ai tä kuu hãtoma? Ĩ na ai tänö Teusö ta wäsä nö, ĩ na ai tä kuu hãtoma? Ĩ na tä kua tä, ‑Ĩ na Paulo anö tä sãököpalö nö, “Kaikana tä walo kõo piale, ĩ tä kolo kua waikia kuleö!” ĩ na Paulo a kuu kuleö!‑ ĩ na ai tä kuu hãtoma?

³Naiö! Ĩ na kuno maiö! Ai tänö makö mönama pia tä, pö pi hatukuiköö! Pi naka. Teusö a na töpö pi pälamo opa kuki wi, ĩ tä kupo paio mi tä, Kaikana ta pata huu kõo wi, ĩ tä walo paio mai kitä. Teusö a kai a peama totio opa wi, ĩ a wani hasulua paipaso kitä. Teusö anö a wani peama hö̃töo piale, ĩ a wani. Õsi töpö pepalo opa pia wi, ĩ tä uli ha Teusö anö a wani simöpa naio piale, ĩ a wani hasulua paipaso kitäö! ⁴Ĩ a wani aiki, ‑Teusö a, sai töpö, ĩ na töpö kui wa töpö thapo maikiö! Ĩ töpö na wa mamo teteo mai, kamisa na a mamo tetea makokoa sisaikiö!‑ ĩ na ĩ a wani kuu kitä. Sanöma tä maaki, ĩ na ĩ a wani kuu kitä. Juteu töpö Teusömo sinomo wi, ĩ a sai ha a wani loiki nö, ‑Ai tä hai, Teusö a kua satia mai kitäö! Kamisa hai, Teusö sa waikiwöö!‑ ĩ na ĩ a wani kuu kitä. ⁵Kamakö sai pö na hama sa kuiki nö, kamakö na ĩ na sa kuu waikio kipili. ⁶Ĩ nasimö tänö ĩ a wani wasuti pole, ĩ ma tä taö waikia. ‑Pei‑ Teusö a pi kuu paio mai ha, Teusö a kai a peama totio opa wi, ĩ a wani hasulupo mai kitä. ‑Peiö!‑ ĩ na Teusö a kuu tä, ĩ a wani hasulua sisapasoö. ⁷Teusö a kai a peama wi, ĩ ai töpö kua hãtoa waikile kitä maaki, pe epii Teusö a kai peama piale, ai tänö ĩ a wani wasu läapaloö ha, a wani tapamo mai ha, tä kua soa päa kule. ⁸A wani wasu matasoma, Teusö a kai a peama totio opa wi, ĩ a wani hasulupaso kitä. A wani hasulupaso noai ha, Jesus Kaikana pili a kai hẽasinö ĩ a wani säpaso kitä. Jesus a wakala apii a walo tä, a wani säpali kitä. ⁹Teusö a kai a peama totio opa wi, ĩ a wani waloköma, Sai tä sai patanö ĩ a wani pasilipali kitä. A wani lotetepali kitä. A wani lotetepalöma, ĩ a holisi waninö tä aipöama kitä. Ai sanöma töpö aiki, ‑Ĩ anö tä aipöama apaö. Ĩ a hai, Teusö a sai hãto waikiwö‑ ĩ na töpö pi thama pia salo, tä aipöama kuki. Töpö kilima wi, ĩ a waninö ĩ tä thama kuki. ¹⁰Ĩ a waninö wanisala tä thatala apati kutenö, ai töpö mönama kuki kitä. Töpö pepalo opa wi, ĩ tä uli ha töpö huu piale, ĩ töpö mönama kuki. Ĩ töpönö pitili tä sai pii aköna, töpö pea sinomo wi, ĩ tä na Teusö anö ĩ töpö täapa kõa läo kitä maaki, ĩ töpönö pitili tä sai pii mi salo, töpö pepalo opa wi, ĩ tä uli ha töpö pea kuki kitä. ¹¹Pitili tä pii mi salo, Teusö anö ĩ töpö pi motömaki. Töpö pi motömaköma, ĩ töpönö holisi tä sai a hini totio kitä. ¹²Holisi ta hini ha, pea sinomo wi ĩ tä uli ha Teusö anö ĩ töpö simöpali kitä. Pitili ta hini mai, wanisala tä thaa wi ĩ töpönö ĩ tä pi ipaö ha, töpö pea sinomo wi ĩ hamö Teusö anö ĩ töpö simöpali kitä.

‑Kamakö na ta wäsäpili, ĩ ta hosa maikiö!‑

¹³Ipa pö. Ĩ na kamakö kua pasio mai kitä. Somi tä, Teusö anö makö täapa kõo läo pia salo, makö sailöma. Teusö a õsi kua tolele, ĩ anö makö õsi salupalö nö, makö täapa kõo läoma. Kamakönö pitili ma ta hininöma kutenö, Teusö anö makö täapa kõo läo asama. Önö kutenö, Teusö a na, ‑Aitaköö!‑ ĩ na samakö kuupö. ¹⁴Ta topa apöle, kamakö na ĩ sama ta wäsä nö, ‑Teusö anö makö naka kuleö!‑ samakö kuu kipili. Kamakö pewö hai ĩ Jesus Cristo a Kaikana wakala apii, a toita apii a kupoli, ĩ a kui na, ĩ na Teusö anö makö thaa naipali pia salo, makö nakalöma.

¹⁵Ipa pö. Önö kutenö, kamisamakönö kamakö na sama ta wäsäpili, ĩ ta hini totioheö! Kamakö na samakö hapalo nö, waheta sama tä simöpalö nö, sama ta wäsäpili, ĩ ta hosa maikiö! Makö satimo nö, ĩ ta hini totihoö!

¹⁶Kamakö hai ĩ pö̃ Teusö anö makö pi ipama. Makö totiapala sinomo kutenö, makö pasilipo soatio nö, makö pi topapalama soatio wi, ĩ tä totomama. ‑Teusö anö sa täa koni kitä‑ pi kuu wi, ĩ tä totoma naioma. Ĩ na makö pi kuu wi ĩ ta topa apa. Teusö a, kamakö hai ĩ Jesus Cristo a Kaikana, ĩ na töpö kui töpönö ¹⁷makö pi topapalamapököö! Ai ma töpö totiapala apati wi, kamakö na Teusö anö ĩ tä totoköpököö! Toitai makö hapalo wi, ĩ tä totoa naia soaköpököö!

‑Teusö a na samakö a wäsäö!‑

¹Ipa pö! Sama tä sãöka hötötöpa paio mai ha, ĩ na samakö kuu soalö pia kule. Teusö a na samakö a wäsäö! Teusö a na makö hapalo nö, ‑Kawa kai a wäsä wi, ĩ ta pala haitamanöö! Ĩ ta pala haitamanö nö, “Teusö a kai a pitilii ĩ sa kai a hini totio kitäö!” ĩ na ai töpö pi thamaö! Kamisamakö na wa kai palalo nö, wa kai a hini kua totio kua noai na, ĩ na ai töpö thapamanöö!‑ ĩ na Teusö a na pö kuu! ²Ĩ na makö kuu nö, ‑Ai töpö wani hiopöa apa wi ĩ töpönö wanisala tä thaa sinomo wi, ĩ töpö na Paulo töpö noamaö!‑ ĩ na pö kuu! ‑Jesus a pitili‑ ai töpö pi kuu mi pasi kutenö, ĩ na pö kuu! ³‑Jesus a pitili‑ ai töpö pi kuu mi kutenö, ‑Päla‑ ĩ töpö kuu kule maaki, Jesus Kaikana aiki, ‑Päla‑ ĩ na kamakö na ĩ na Kaikana a kuu pasio mai kitä. Jesus anö makö hosa mai, makö pi lotetepalö nö, Sai tä sai pata wanisala apa wi ĩ a pata na makö noama kitä. ⁴Jesus Kaikana tänö makö noama salo, ĩ na samakö pi kuu kule. ‑“Ĩ naköö! Ĩ na makö kuapököö!” ĩ na tesalônika tili töpö na samakö kuti wi, ĩ töpönö ĩ ta hinia totilö nö, ĩ na ĩ töpö kua tolea totia kule. Ĩ na ĩ töpö kua soasolö kitä‑ ĩ na samakö pi kuu kule. ⁵Teusö a na samakö hapalo nö, ‑Kawanö samakö pewö pi ipa wi, ĩ tä na tesalônika tili töpö pi hatukua totipamanöö!‑ samakö kuu nö, ‑Ai töpönö Cristo a peama apama maaki, kawa na Cristo a mamo teteo satimo opa noai, ĩ tä na ĩ töpö pi hatukua totipamanöö!‑ ĩ na Teusö a na ĩ na samakö kuu.

‑Makö moimo maikiö!‑

⁶Ipa pö! Kamisamakönö makö noa thaa nö, ‑“Ĩ na makö kuapököö! Makö moimo mai, a kalipalo totioö!” ĩ na samakö kuu kipili maaki, Jesus a thapo wi ĩ ai tä moi ipö tä, ĩ a wani moi ipii, ĩ a wani na pö noimo pakäa hãto tihöö!‑ ĩ na samakö ku upa kule. Jesus Cristo Kaikana sama wäsä totio salo, ĩ na samakö ku upaö. ⁷‑Paulo töpö kalipalo kua noai na, ĩ na makö kalipalo kua nömöopöö!‑ makö pi kuu waikia kule. Kamakö na samakö kua naia tä, samakö moimo maapili. ⁸Noa mi samakö ia päo maapili. ‑Kama töpö hai ĩ nii tä noa thapa mi tä, töpö pea hãto kitä‑ ĩ na samakö pi kuuma salo, wakalai ha samakö kalipaloö, mumai ha samakö kalipaloö, ĩ na samakö kuatima, pe epii samakö kalipalo salo, samakö mota apama. ⁹‑Teusö sama ta wäsä sinomo kutenö, samakö kalipalo maapököö! Tesalônika tili töpö na samakö lio päopökö o!‑ samakö kuu päoma aköna, ‑Awai. Ĩ tä topa kuleö!‑ ĩ na Teusö a pi kuu noa kipi. Ĩ na Teusö a pi kuu noa kipi maaki, samakö kalipalo opama. ‑Paulo sa töpö uömapöö!‑ ĩ na makö pi thama pia salo, pe epii samakö kalipalo opama. ¹⁰Kamakö na samakö kua tä, ‑Ai tä kalipalo wani ipö ha, ĩ a wani na nii tä totoa tihöö!‑ ĩ na kamakö na samakö kuu waikio kipili. ¹¹Ĩ na sama tä kuu hini kule: ‑Tesalônika tili töpönö Jesus a thapo wi, ĩ ai töpö moi ipö thaliö! Ĩ töpö kalipalo mai, töpö wäo kai öpa hätäpo opa pätio thaliö!‑ ĩ na sama tä kuu hini kule. ¹²Töpö moimo wi ĩ töpö na, ‑Wa wäoti mai, a kalipalo pi motöaö! Au kalipalo wi ĩ tä na a kalipalo pi motöa pasioö! Au kalipalo wi ĩ tä na wa kalipalo nö, au nii wa tä noa thaapököö!‑ ĩ na samakö ku upaö. Ĩ na Jesus Cristo Kaikana tä pi kuu kutenö, ĩ na samakö kuu naia kule. ¹³Ipa pö. ‑Ai makö moimo hãkikio mai, toitai tä na pö pewö kalipalo makoka soatioö! “Päla. Sa kalipalo wani ipö saiö!” pö kuu tihöö!‑ ĩ na samakö kuu kule.

¹⁴Hi waheta tä na samakö kuuhe, ĩ tä na ai tä aiki, ‑Päla. Ĩ sa ta hini wani ipö saiö!‑ ĩ na ai tä kuu ha, ĩ tä na pö pi hatukuikiö! Ĩ a na pö noimopalo totio tihöö! A wani wanisala apa wi, ĩ tä na a wani kilimapö, ĩ a na pö noimopalo ti! ¹⁵Ĩ a na makö noimotaloti maa kule maaki, a wani wanipo maikiö! Au hoosa a na opii wa hapalo kua wi na, ĩ na opii wa hapalo kua nö, ‑Pösa ai, ĩ na a kua tihöö!‑ ĩ na ĩ a na makö kuu!

‑Teusö anö makö pewö totiapalatipököö!‑

¹⁶Kaikana tä patanö makö pi topapama wi, ĩ anö makö pi topapalama sinomotipököö! Kamakö pewö na ĩ a kuo naiopököö!

¹⁷Hi ola ha Paulo sanö pili sa ami sainö sa tä sãököki ke. ‑Hi waheta tä kuu wi, ĩ Paulo a kai sai a totiwö haö!‑ ĩ na sa töpö pi thama pia salo, waheta sa tökö pewö simöpali wi, ĩ waheta tökö ola ha pili sa ami sainö sa tä sãöka sinomoö. Ĩ na sa tä sãöka thataö.

¹⁸Jesus Cristo Kaikananö makö pewö totiapala totio sinomopököö! Ĩ nakö.