2 Pedro

2 Pedro

Pedro anö waheta tä simöa nömöpalö noai ĩ ta

Pedro anö hi waheta tä sãöka nömöpalö noai, Jesus a thapo wi ĩ töpö pewö na tä simöpalöma. Hi waheta tä na ĩ na a kuuma: ‑Ai töpönö kamakö na Teusö tä kai a wäsä holisimo tikiliapaloti kua kuki kitä. Ĩ töpö a hini pasio tihöö! Ĩ töpönö Jesus a kateha nö, “Jesus a pitili mai kitäö!” ĩ na töpö holisi wäoti wi, ĩ na ĩ töpö kuu kitä. Ĩ töpö holisimo opati ha, ai töpö aiki, “Jesus ta holisi ipö” ĩ na ai töpö thaa totia apöpamani kitä. Ta wäsä holisimo sinomoti wi, ĩ töpönö hiopö tä thatala apati ha, ai töpö satehe epii töpönö hiopö tä thatala apa naio kuki kitä‑ ĩ na Pedro a kutima.

Ĩ na a kuu nö, ‑Ai töpö hapalo pi wasöa apati nö, “Jesus aiki, ‘Waiha hi masita tä uli ha sa huu kõo kitäö!’ a kuuma maaki, a huu kõa mane. Tä tetepo opa päle” ĩ na ai töpö kuu kuki kitä. Ĩ na ai töpö kuu pasia kule maaki, Teusö pata tä na tä tetepo paia mane. Sanöma makö na a pi tapoapaloti päo salo, a opimo päa kule. “Ipa sanöma töpö pewönö wanisala tä thaa wi, ĩ töpönö ĩ tä hosa haiatalo mi salo. Töpö nomano nö, töpö pepalo pasitio wi, ĩ tä uli na ĩ töpö huu pasio maapöö!” ĩ na Teusö a pi kuu salo, Jesus pata tä walo kõo haio mi päwö‑ ĩ na Pedro a kuuma. Ĩ na a kuu nö, ‑Önö kutenö, Jesus a walo kõo piale, ĩ tä na makö mamo läa läiki nö, makö kasiapalo läopöö! Makö kasiapalo läo nö, Jesus a walo kõa tä, “Wa õsi sami mi, wa õsi ausi ipö waikiwö, kamisa na wa noimo läoö, ai sanöma töpö na wa noimo naioö, ĩ na wa kuati kuleö!” ĩ na Jesus ma thama totio hö̃töo läoö!‑ ĩ na Pedro a kuuma.

¹Simão Pedro sa. Jesus Cristo anö sa simönö noai, ĩ sa. Jesus Cristo a na sa kalipalo sinomo wi ĩ sa.

Jesus Cristo ma tälö noai, ĩ makö na hi waheta sa tä simöni ke. Jesus a lö kui, kamakö hai ĩ Teusö a waikiwö. Makö täapa kõo läo noai ĩ a. Jesus a toita apö, a makoka apa sinomoö, ĩ na a kuati kutenö, makö pi hatukupamanöma. Makö pi hatukupamani ha, ‑Jesus a pitili‑ makö pi kuu kuköma. ‑Jesus a pitili‑ kamisamakö pi kuu wi, ĩ tä toita apö kui na, ĩ na kamakö aiki, ‑Jesus a pitili‑ makö pi kuu kua naine, ĩ na ĩ tä toita apö kuö naiwö.

²Teusö a, kamakö hai ĩ Jesus pata tä, ĩ na töpö kui, ĩ ma töpö taö ha, Teusö anö makö totiapala apaö, makö pi topapalama apatii, ĩ na makö kua palasolöpöö!

Teusö anö makö pasilipalöma, Teusö ma pi mönahapama taö öpa kuki kitä

³Teusö anö makö pasilipa kutenö, Teusö ma pi mönahapama taö öpa sinomoö. Teusö a mömomö toita apii, a wakala apii, a totiatalo opaö, ĩ na Teusö a kua kua wi na, ĩ na makö kua kua naiopö, Teusö anö makö nakalöma. Makö nakalö noai, ĩ makönö ĩ Teusö ma taö öpa kutenö, Teusö a lotetea apöle, ĩ tänö makö lotetea naipasoma. Makö lotetea naipasoma kutenö, ‑Ĩ na makö kuatipöö!‑ ĩ na Teusö a kuu ha, ĩ na makö kua totiatalo totiopököö! ⁴Teusö aiki, ‑Makö õsi temöpamani, makö pasilipali, makö lotetepali, kamisanö ĩ na makö thama kuki kitäö!‑ ĩ na Teusö a kuu noai, kamakö na ĩ ta hinimomanöma. Ĩ ta toita sati ipö asawö. Ĩ ta makoka totia asaa. Teusö a kua wi na, ĩ na makö kua naitiopö, kamakö na ĩ ta hinimomanöma. Ĩ ta wäki ha, Teusö a thapo mai, ĩ töpönö wanisala tä thaa pi topa apa sinomoti wi, ĩ tä pi na makö toköpalo opa kuki.

Makö loteteapaloti nö, ĩ na makö kuatipöö!

⁵Önö kutenö, ĩ na makö kuati nö, pö kasiapalo totihoö! ‑Jesus Cristo a pitili‑ makö pi kuu wi ĩ tä na toitai ma tä thaa totio wi, ĩ tä kokaköö! Toitai ma tä thaa nö, pö pi taoapalo naioö! ⁶Makö pi taoapalo naio nö, wanisala ma tä thaa pi topa tä, ‑Naiö! Wanisala sa tä thati mai kitäö!‑ makö pi kuu! Ĩ na makö pi kuu hö̃töa kule maaki, makö pea päla nö maaki, pö kasiapalo totio hö̃töoö! Makö kasiapalo nö, ‑Ĩ na makö kuati kuköpöö!‑ ĩ na Teusö a kuu manu kule, ĩ na makö kua toitio hö̃töopöö! ⁷Ĩ na makö kuati salo, pö noimaso totihoö! Makö noimaso totio nö, pö pipaso hẽtupaso totihoö! ⁸Ĩ na makö kua toitio kuköma, kamakö hai Jesus Cristo pata ma tä taö öpa salo, makö tomöpo mi mai kitä. Makö totiatalo opati kuki kitä.

⁹Ĩ na wa kua mi tä, a mamo höpöpö öpii ĩ a huu makoko toita mi kui na, ĩ na wa huu kua naia totipaso kitä. Pai pamö tä kulati, ai tänö ĩ tä tapa mi kui na, ĩ na wa kua naia totipaso kitä. Wa pi mosawipo mai kitä. Wanisala wa tä thati noai, ĩ tä pi na Teusö anö wa salupalö noai, ĩ tä na wa pi tao mapaso kitä.

¹⁰Ipa pö! Önö kutenö, ‑Teusö anö sa sailö nö, sa nakalö noai ĩ sa‑ ĩ na makö pi kuu sinomo kuköpö, pö kasiapalo totioö! Makö kasiapalo totio hö̃tötioma, Jesus Cristo ma hosa mai kitä. ¹¹Ĩ na makö kua hö̃tötioö ha, kamakö hai ĩ pata tä Jesus Cristo anö makö täa konö noai, ĩ anö töpö simöa sinomo piale ha, ĩ ha ĩ anö makö lisia totipamani kitä. Ĩ ha Jesus a kaikanamo mapo mai kitä.

Ai töpönö Teusö ta taö mapo maapö, Pedro anö ĩ ta wäsä kõataloti noai ĩ ta

¹²Teusö sa ta wäsähe, ĩ ma ta taö waikia kule. Kamakö na ĩ pitili sa ta wäsä waikitioma. ‑Kamisamakö na ta wäsä waikitio noai, ĩ pitili ta waikiwö haö!‑ ĩ na makö pi kuu sinomoö. Önö kutenö, ĩ ma ta taö waikia kule maaki, ‑Tä taö maa kõa hãtopaso matimö‑ ĩ na sa pi kuu salo, sa ta wäsä kõatalotii. ¹³‑Sa noma paio mi tä, kamakö na ĩ sa ta wäsä kõataloti wi, ĩ ta hiniamö toitakö. Sa ta wäsä kõataloti mi tä, makö pi motia pätaso matimöö!‑ ĩ na sa pi kuti kule. ¹⁴Awai. Tä tetepo totila tä kuno mai, sa nomaso kitä. Kamakö hai ĩ Jesus Cristo pata tä aiki, ‑Pedro ai. Tä tetepo totila tä kuno mai, wa nomaso kitäö!‑ ĩ na a kuu totioma. ¹⁵Önö kutenö, sa nomaso noai ha sa ta wäsä sinomo noai, ĩ ma ta taö haio soatiopö, huki sa kasiapalo opatii.

‑Jesus sama kai wäsä tä, samakö pi saimo päo maama‑

¹⁶Kamakö hai ĩ Jesus Cristo pata tä lotete epii, ĩ a walo kõo piale, ĩ sama ta katehati noai, ĩ samakö pitilimo opama. Ai töpö pi saimo päo nö, ta wäsäti noai, ĩ sama ta wäsä tolea hö̃töo päo maama. Jesus pata tä kaikanamo toita apii, pili samakö mamonö ĩ sama tä tapa totio nö, sama ta wäsäma. ¹⁷Pö̃ Teusö anö pelupö Jesus a wakalapalö nö, ‑Jesus a toita apöö!‑ ĩ na samakö pi thamani kipili. Teusö a wakala sati ipii, Jesus a na ĩ a hapalo nö, ‑Ipa ulu sa pi ipa sinomo wi ĩ a. Ĩ a na sa pi topa apa sinomoö‑ ĩ na a kuu kipili. ¹⁸Heuma tä pata hamö Teusö a kuo lasopili hamö, ĩ hamö Jesus Kaikana tä na samakö huu naiopili, ĩ heuma tä pata hamö ta hapalo lasopili, ĩ sama ta hinia naini kipili.

¹⁹Önö kutenö, ‑Teusö a kai a wäsä sinomo noai, ĩ töpönö ta wäsä noai, ĩ pitili tä sai a totiwö haö!‑ ĩ na samakö pi ku upa waikio kipili maaki, huki ĩ na samakö pi kuu satia apa soatiotii. Teusö ta wäsä noai, ĩ ma ta hini totio wi ĩ tä topa apa. Mumai ha koa taka sii hili kua wi na, ĩ na Teusö ta kua hö̃töa. Tä halu paio mi tä, a sömöka taikiö! Ma ta hini totioö ha, halu äwäho tä sitikali a hatuka apa soale, ĩ sitikali a kui na ĩ na Jesus a kui, ĩ anö makö õsi wakalapamanö nö, makö pi hatukupamani kitä. ²⁰Sa kuu piale, ĩ ta hini totioheö! Teusö a kai wäsä sinomo noai, ĩ töpönö Teusö a kai wäsä tä, kama töpö pi saimo pasio päo maama. ²¹‑Kama sa pi tapomo pasio päo wi, ĩ sa ta wäsä pasio päopököö!‑ ĩ na ĩ töpö pi kuu maama. Ĩ töpö õsi na Teusö a õsi kua tolele, ĩ a kalipaloö ha, ĩ töpönö Teusö ta wäsäma.

Ai töpönö Teusö ta wäsä holisimo pasitio wi, ĩ na ĩ töpö kuati noai ĩ ta

Judas 3-16

¹Kolo töpö na ai töpönö Teusö a kai a wäsä holisimo tikiliapaloti kua noai na, ai töpönö kamakö na ĩ na Teusö ta wäsä holisimo tikiliapaloti kua kuki kitä. Holisii ta wäsä kuköma, ai töpönö ĩ ta hininö nö, ĩ töpö isi waniho opa kuki kitä. Ta wäsä holisimo wi, Jesus pata tänö ĩ töpö sua konö noai, ĩ töpönö Jesus a kateha nö, ‑Jesus a pitili mai kitäö!‑ ĩ na töpö holisi wäoti wi, ĩ na ĩ töpö kuu kitä. Ĩ na töpö kuu ha, ai õsi töpö pea soatio wi, ĩ tä uli ha Teusö anö ĩ töpö simöa pasiki kitä. ²Ta wäsä holisimo sinomoti wi, ĩ töpönö hiopö tä thatala apati ha, ai töpö satehe epii töpönö hiopö tä thatala apa naio kuki kitä. Ĩ töpö holisimo opati ha, ai töpö aiki, ‑Jesus ta holisi ipö‑ ĩ na ai töpö thaa totia apömani kitä. Jesus ta pitilia apa kule maaki, ĩ na ai töpö kuu hãkikio opa kitä. ³Teusö ta wäsä holisimo sinomo wi, ĩ töpönö noa tä pi ipa päo salo, ta wäsä sinomoö. Holisi ta wäa päkö nö, kamakö na noa tä naka totili kitä. Teusö aiki, ‑Ĩ töpö wanisala apati kutenö, ĩ sa töpö peama totio pia salo‑ sutu ha Teusö a pi kuu toitio noai, ĩ ta kua soa. Teusö a napalo soatio kutenö, ai õsi töpö pepalo sinomoti wi, ĩ tä uli hamö töpö simöa totiki pia salo.

⁴Ãju töpönö wanisala tä thaa noai, Teusö anö ĩ töpö toköapama kõo maama. Töpö pea sinomoti wi, ĩ tä uli hamö Teusö anö ĩ ãju töpö simönö nö, mumi mumi tä mötali na töpö õkama titiköma. Waiha Teusö aiki, ‑Wanisala wa tä thaa noai, ĩ tä noa na wa pea soatio kitäö!‑ ĩ na sanöma töpö pewö na Teusö a kuu piale, ĩ tä wakala kupo paio mi tä, mumi mumi tä mötali na ĩ ãju töpö titia paia päa kule. ⁵Sutu ha sanöma töpönö wanisala tä tha apati noai, Teusö anö ĩ töpö toköapama hö̃töo kõo maama. Töpö wanisala apati noai, ĩ töpö hai ĩ tä uli ha tuu õkimomanö nö, ĩ töpö pewö nomamanöma. Noé a, ai 7 töpö, ĩ na töpö kui töpö totiapala sisama. Noé anö Teusö ta wäsä nö, ‑Toitai ma tä thaa mi salo‑ ĩ na a kuu sinomo noai ĩ a, kama ai 7 töpö, ĩ na töpö kui töpö nasi tupo pasio maama.

⁶Teusö anö sotoma tili töpö sai pö, komoha tili töpö saipö, ĩ na töpö sai pö kui, Teusö anö ĩ töpö sai pö pewö ĩsia thamanöma. ‑Wanisala tä thaa noai, Teusö anö ĩ töpö peama kua noai na, ĩ na huki wanisala tä thaa polai, ĩ na Teusö anö ĩ töpö peama kua hö̃töo kitäö!‑ ĩ na Teusö anö ĩ na sanöma makö pi thama pia salo, sutu ha ĩ na töpö kuati ha, Teusö anö ĩ töpö pewö matamanöma. ⁷Ló anö toitai tä thaa sinomo noai, Teusö anö ĩ a noama asa nö, a sua kõo sisa asalöma. Ĩ töpönö hiopö tä thaa sinomo opa kutenö, Ló a pi honipama apatimae. ⁸Ló anö toitai tä thaa sinomoti noai, ĩ töpö na ĩ Ló a pilia naia soa tä, ĩ töpönö hiopö tä tha apati noai, Ló anö ĩ tä hini waikioö, tä taa wania apöpasoö, ĩ na Ló a wani kuati nö, ĩ tä wakala pewö na a õsi salia kuköma. ⁹Önö kutenö, Teusö a thapo wi ĩ töpö pea tä, Teusö anö ĩ töpö sua taö öpa kõoö. Ĩ na tä kua tä, hiopö tä thaa pasitio wi, Teusö anö ĩ töpö sua pasio kõo mii. Teusö anö ĩ töpö toköapama mi kui na, ĩ na tä kua wi, Teusö anö ĩ tä taö öpaö. Ĩ töpönö wanisala tä tha apati ha, Teusö aiki, ‑Wanisala wa tä thaa noai, ĩ tä noa na pe epii wa pea soatio kuki kitäö!‑ ĩ na Teusö a kuu piale, ĩ tä wakala kupo paio mi tä, Teusö anö ĩ töpö uni huölö nö, töpö peamati kule. ¹⁰Hiopö tä thaa pi topa apa wi, ĩ töpö aiki, ‑Teusö sa hini wani ipö saiö!‑ ĩ na ĩ töpö kuu wi, Teusö anö ĩ töpö peama totio opa pasio kitä.

Teusö ta wäsä holisimo sinomoti wi, ĩ töpö pi kilihipo mi. ‑Pata sa hö̃tö waikiwöö!‑ ĩ na ĩ töpö pi kuu salo, ai töpö a haö hini mi. Hi tä hẽtu ha töpö kupoli, ĩ töpö a kateha wanisala apatii. ¹¹Teusö ta wäsä holisimo opati wi, ĩ töpö na ãju töpö loteteapalo satia apa kule maaki, ãju töpönö hi tä hẽtu hamö töpö kupoli, ĩ töpö a kateha hiopöa pasio mi. Teusö a na ĩ ãju töpö waloiki nö, ‑Ĩ töpö hiopöa apati thaliö!‑ ĩ na ãju töpö kuu mi.

¹²Uli tä uli hamö salo pö pi moti kui na, ĩ na Teusö ta wäsä holisimo wi, ĩ na ĩ töpö pi moti kuö naiwö. Salo pö pi hatuku mi ipii, ĩ pö nasö sukö nö, ĩ pö sä wi, ĩ tä kua. Teusö ta wäsä holisimo wi, ĩ töpö pi hatukua mi ipö maaki, ai töpö a kateha apa sinomoö. Salo a säpa kua wi na, ĩ na Teusö anö ĩ töpö maa thaa hö̃töpamani kitä. ¹³Ĩ töpönö ai töpö peama noai, ĩ tä noa na Teusö anö ĩ na ĩ töpö peama thama totiatalo opa hö̃töo kuki kitä. Wakala pa ĩ töpönö wanisala tä thatala apati wi, ĩ tä na kama töpö puko opatii. Kamakö na ĩ töpö iapalo naia tä, ĩ töpö holisimo pi topa apa sinomoti salo, wanisala tä thaa pi kilihi ipö. Ĩ töpönö ai töpö õsi wanisalama tolea apa salo, makö iapalo wi, ĩ tä sai makokopo totio mi. ¹⁴Ĩ töpönö ai tiko tä suö talalö nö, a nö thaö pi topa sinomo opaö. Ĩ na ĩ töpö kuati wi, ĩ töpönö wanisala tä thaa mapo mi. Ĩ töpönö ai töpö pi mosawi mi ipii, ĩ töpö mönama sinomoö. Ĩ töpönö wani tä pi ipa sisaö. ‑Kamakö wanisala apatiwö‑ Teusö anö ĩ na ĩ töpö noa thaa wi tä kua. ¹⁵Pili tiso salili ipii, ĩ tiso hamö töpö huu totio mai, pili tiso hanone, ĩ tiso hamö ĩ töpö ekuiki nö, töpö monöti kule. Peoo a hai ĩ pelupö Palaão a hai ĩ tiso ha ĩ töpö huu nömöa kule. Palaão anö wani tä sua pi topa päo wi tä na wanisala tä thama. ¹⁶Wanisala tä thaö ha, Palaão a na kapalu a kui na, ĩ na puhu a kui, ĩ a hapalo nö, ‑Wanisala wa tä thaa totioma‑ a kuuma. Sanöma tä hapalo kuu wi na, ĩ na puhu a hapalo kuu nö kiliaö ha, Palaão anö wanisala tä thaa osemo opati wi, ĩ tä maa kopasoma.

¹⁷Maa tuu hikita sinomo noai, ĩ taka na maa tuu weheki, taka hãsitia totiki, ĩ na ĩ tuukö hãsitia kua totia kukö noai na, töpö holisimo opa wi, ĩ na ĩ töpö kua hö̃töo kuki. ‑Maa tä hälä pia kuleö!‑ wa pi kuu kule maaki, tiko hamö ipoko tänö ilasi tä saläa lälöma, tä maa hälä mi kui na, ĩ na ĩ töpö kua hö̃töoö. Mumi mumi tä pata kuamö kule hamö, ĩ hamö Teusö anö ĩ töpö hilakö taso pia salo. ¹⁸Ĩ töpönö ta wäsä isi waniho opa päo nö, ‑Makö pi mosawipamani pia salo, ĩ sa ta hasuluama kuleö!‑ ĩ na ĩ töpö kuu hö̃töa kule maaki, kama töpö pi saimo nö, ta kateha päoö. ‑Wa tä thaa pi topale, ĩ wa tä thaö ha, wanisala mai kitä‑ ĩ na ĩ töpönö ĩ ai töpö noa thaa sinomoö. Ĩ töpönö ĩ tä thaa pi topa apa wi, ĩ tä hiopöa apöle maaki, ĩ töpö aiki, ‑Ĩ tä hiopö pasi mai kitä‑ ĩ na kama töpö kuu. Ĩ töpö holisi wäo sinomo wi, ĩ töpönö hiopö tä thaa pi topa apati päo salo, ai töpö mönama apati päoö. Wanisala tä tha apati wi, ĩ tä pi na ai töpö tokömö kua piale, ĩ töpö nakalö nö, ĩ töpö mönama sinomoti päoö. ¹⁹Ta wäsä holisimoti wi, ĩ töpö aiki, ‑Sa ta wäsäti wi, ĩ ma ta hini salo, wa tä thaa pi topa wi, ĩ wa tä thaapöö! Ai tänö wa wasu läo wi tä kua mai kitäö! Ai tänö wa simöa läo mai kitäö!‑ ĩ na ĩ töpö kuu totia kule maaki, hiopö tä thaa wi, ĩ tänö ĩ töpö simöa sinomoö.

Pi naka. Toitai wa tä thaa sinomo wi ĩ tänö wa simöa sinomoö ha, toitai wa tä thaa lapa apöpasoö. Ĩ na tä kua tä, wanisala wa tä thaa sinomo pasio wi, ĩ tänö wa simöa sinomoö ha, wanisala wa tä thaa sinomo pasitioö. ²⁰Jesus Cristo pata tänö sanöma makö täapa kõo läo wi, ai töpönö ĩ a taö öpa kutenö, Teusö a thapo pasio mai ĩ töpönö ai töpö õsi samiamati wi, ĩ tä pi na Jesus a taö öpa wi ĩ töpö toköa soa asasolöö. Önö kutenö, õsi samiamati wi ĩ tä pi na ĩ töpö toköa waikisolöma maaki, waiha õsi samiamati wi ĩ tänö ĩ töpö õsi kai sapa kopalotö nö, töpö simöa kõköma, ĩ töpönö hiopö tä thaa satia kõoö ha, ĩ töpö kua sapa kõki ke kutenö, tä wanisala satia apaö. Ĩ töpö kua somatio noai, ĩ tä wanisala apa waikitioma maaki, ĩ töpö kua nömöa kotale, ĩ tä wanisala satia apaö. ²¹‑Ĩ na wa kuaö ha, wa totiatalo opa kitäö!‑ Teusö ta kuu wi, ĩ töpönö ĩ ta hini maama aköna, Teusö anö wani ipii ĩ töpö peama noa kipi. Teusö anö makö noa thaa wi, ĩ ta topa apöle, ĩ töpönö ĩ ta hini waikio noai maaki, ĩ ta hinia maahe nö, töpö sapa kopasoma, Teusö anö pe epii ĩ töpö peama kitä. ²²Ĩ na ta kuu wi ta kua: ‑Pole a suapaloma ha, ĩ sua sua tä paa pa pole a waloa sapa kõkö solöö. Kusi a sanumoa waikitasoma maaki, samio opa pa a paa kua soataki‑ ĩ na ta kuu wi ta kua. Ĩ kökö kua kua wi na, ĩ na ĩ töpönö Teusö ta hini maa kupaso noai, ĩ na ĩ töpö kua kua naioö.

Jesus a walo kõo piale ĩ ta

¹Makö pi ipa wi ĩ ipa pö! Kamakö na waheta sa tä simöa waikipali kipili. Huki ai sa tä waheta sãököa kopalö nö, sa tä waheta sãökama simöpa kota päta pia kule. Makö naa hetehea paitamani, makö pi motimo mi, ĩ na makö pi thama pia salo, polakapi waheta sa tökö sãököpalöma. ²Sutu ha Teusö a thapo noai ĩ töpönö Teusö a kai a wäsä sinomo noai, ĩ ma ta hiniti noai, ĩ tä na makö pi motimo maapöö! Jesus pata tänö makö täa koni wi, ĩ anö kamakö na töpö simönö noai, ĩ töpö kuu noai, ĩ tä taö naio soatiopököö! Jesus anö ĩ töpö noa thaa noai, ĩ töpönö kamakö na ĩ ta wäsä nömöo noai, ĩ tä na pö pi motöo tihöö!

³Sa kuu piale, ĩ tä na makö pi hatukua soataikiö! Jesus a huu kõo pia tä, ai töpönö wanisala tä thaa pi topa apa wi, ĩ töpönö ĩ wanisala tä thaa sinomo wi, ĩ töpö hapalo pi wasöa apati kitä. Ĩ töpö hapalo pi wasöa apati nö, ⁴‑Jesus aiki, “Waiha hi masita tä uli ha sa huu kõo kitäö!” ĩ na a kuuma maaki, a huu kõa mane. Witi hamö ĩ a kua kõa soaköma?‑ ĩ na ĩ töpö kuu nö, ‑Kamakö hai ĩ nö patapö töpö noma waikisomaö! Teusö anö hi masita tä uli thapalö noai, ĩ somi tä sai tä hi masita tä uli kuo soata kuo noai na, ĩ na tä kua kua soatio päoimama matatä‑ ĩ na ĩ töpö kupaloö. ^5-6Ĩ na ĩ töpö kupaloti maaki, sa kuu piale, ĩ töpönö ĩ tä taö mapasoma. Pi naka. Sutu upa Teusö a hapalo nö, hi masita tä uli pata, hutu mosökö pata, ĩ na tökö pata kui, Teusö anö ĩ tökö pewö thapalöma. Maa tuu komo ha hi masita tä uli kuo somama. Ĩ na tä kua tä, tä uli hösöka nömöpasoma. Tä uli hösöka nömöpasoma, ĩ tä uli kasö pewö hamö maa tuu pewö kua iotokötasoma. Ĩ na tä kua tä, Teusö anö hi masita tä uli pata thaa waikipalö noai ha, waihakö nömöwö, maa tuu õkimoa nömömanöma. Tuu pata õkimoa nömömanö nö, sanöma töpö nasi pewö pata tupamanöma. Huki töpö hapalo pi wasöa apati wi, ĩ tuu õki pata na ĩ töpö pi motipo pi topa apa päa alu kule. ⁷Ĩ na tä kua tä, masita tä uli pata, hutu mosökö pata, ĩ na tökö pata kui, ĩ tökö pata waniapo mane. Teusö a pinö ĩ tökö pata waniapo maa kule. Huki ĩ na tä kua maa kule maaki, waiha Teusö a hapalo kõköma, koa taka pata simöpalö nö, hi masita tä uli ĩsimani, Teusö a thapo pasio mai, ĩ töpö ĩsia naimani, ĩ na Teusö anö ĩ na tä thama kõo kitä.

⁸Ipa noi pö! Sa kuu piale, ĩ tä na makö pi motimoti maikiö! Teusö pata tä pi aiki, ‑Sami mumi mumi tä kui na, ĩ na inama tä satehe epii, 1.000 tä inama kui, tä inama kuö hö̃tö pätawö‑ ĩ na Teusö pata tä pi kuu. Ĩ na tä kua tä, ‑Satehe epii, 1.000 tä inama kui, tä inama kui na, ĩ na sami tä mumi kuö hö̃töwö‑ ĩ na Teusö a pi kuu. ⁹Ĩ na tä kua tä, ai töpö aiki, ‑“Waiha sa huu kõo kitäö!” ĩ na Jesus a kuuma maaki, tä tetepo opa päle‑ ĩ na ai töpö pi kuu. Ĩ na ai töpö pi kuu pasia kule maaki, Teusö pata tä na tä tetepo paia mane. Sanöma makö na a pi tapoapaloti päo salo, a opimo päa kule. ‑Ipa sanöma töpö pewönö wanisala tä thaa wi, ĩ töpönö ĩ tä hosa haiatalo mi salo. Töpö nomano nö, töpö pepalo pasitio wi, ĩ tä uli na ĩ töpö huu pasio maapöö!‑ ĩ na Teusö a pi kuu salo, Jesus pata tä walo kõo haio mi päwö. ¹⁰Ai töpö motio opa pa, a thomömo wi ĩ a walo kua wi na, ĩ na sanöma töpö motio opa kuo hö̃töo pa, ĩ na Jesus pata tä a waloa kua hö̃töa kõköpö, tä wakala kua hö̃töa päle kitäö!

Ĩ na tä kua tä, hi tä hẽtu pata ha pe epii ta pata lalupalo opa lasoa tä, hi tä hẽtu pata ha tökö pata kupoli, ĩ tökö pewö pata maa soatasoö, hutu mosökö pata, hi masita tä uli, ĩ tökö pewö pata ĩsia soatasoö, hi masita tä uli, hii ti, salo pö, ĩ tökö pewö pata maa soapasoö, ĩ na tä uli kua kitä. ¹¹Ĩ tä uli pewö mapo piale, ĩ ma tä taö pole kitä manu kule, Teusö ma thalö nö, toitai ma tä thaa sinomopököö! ¹²Teusö ma walo taa totio kõoö! Jesus aiki, ‑Ipa ai töpö kasiapalo totio läoö ha, lope epii sa waloa kõki kitäö!‑ ĩ na Jesus a pi kuu manu kule, makö kasiapalo totio hö̃töo läoö! Jesus a walo kõo piale, ĩ tä wakala kua kõki ha, hi tä hẽtu pata hamö tökö pewö pata kupoli, koa taka patanö ĩ tökö pewö pata ĩsilo nö, tökö pewö pata maa totipaso kitä. Masita tä uli pata, sitikali kökö pewö pata, pili motokö naiwö, pilipoma a naiwö, ĩ na tökö pewö kui, wake wake tä patanö ĩ tökö pewö ĩsiso kitä. ¹³Ĩ na tä kua totio kitä maaki, Teusö aiki, ‑Tute hutu mosökö, tute masita tä uli, ĩ na tökö kui, sa tökö thaa nömöpali kitäö!‑ ĩ na Teusö a kuuma. Teusö ma thapo wi ĩ makö aiki, ‑Ĩ pitili ta‑ ĩ na makö pi kuu nö, Teusö anö tä uli tutei tä uli thaa nömöo piale, ĩ ma tä taa lätia kule. Ĩ tute tä uli na toitai tä thaa wi ĩ tä kuo soatio kitä.

Jesus a walo kõo pia manu kule, pö kasiapalo hö̃töo läoö!

¹⁴Ipa pö! Önö kutenö, Jesus a walo kõo piale, ĩ tä na makö mamo läa läiki nö, makö kasiapalo läopöö! Makö kasiapalo läo nö, Jesus a walo kõa tä, ‑Wa õsi sami mi, wa õsi ausi ipö waikiwö, kamisa na wa noimo läoö, ai sanöma töpö na wa noimo naioö, ĩ na wa kuati kuleö!‑ ĩ na Jesus ma thama totio hö̃töo läopököö! ¹⁵‑Sanöma töpönö sa thapo haiatalo mi salo. Ĩ sa töpö sua pi topa kõa kuleö!‑ ĩ na pata tä pi kupaloti salo, a opimo päa kule. Ĩ tä na pö pi motimo tihöö! Ĩ tä pi tolewö na kamakö hai ĩ noi tä Paulo a wäo hö̃töoma. Teusö anö Paulo a pi taopamanöma, Paulo anö ĩ ta kateha nö, tä waheta sãöka soapalö nö, kamakö na ĩ tä waheta simöa soalöma. ¹⁶Ai töpö na Paulo anö tökö waheta sãökama simönö noai, ĩ tökö waheta sãökama pewö na ĩ ta wäsä naioma thali. Paulo anö tä waheta sãököpalö noa thali, ĩ ma tä waheta pewö hini totio maa noa thaliö! Paulo anö tä waheta simöpalö noa thali, ĩ tä waheta na ai ta kule ĩ tä na, ‑Wi na ta kua alu kule taka?‑ ĩ na makö kupalo päo noa thaliö! Ai töpö pi hatukupo mi ipii, ‑Jesus a pitili‑ ĩ töpö pi kuu totio mi ipii, ĩ töpönö Paulo a kai hini totio mi kutenö, kama töpö pi saimoa pälasopama thaliö! Kama töpö pi saimoa pälo nö, Paulo anö tä sãököpalö noai, ĩ töpönö ĩ tä waheta wäsä makokopo maa noa thaliö! Teusö tä waheta na ai ta kule, ĩ töpönö ĩ ta wäsä makokopo mi nai soatawö. Ĩ ta wäsä makokopo naitio mi kutenö, ĩ töpö peamamo pasio kitä. Töpö pea soatiopö tä uli hamö ĩ töpö huu pasio kitä.

¹⁷Ipa pö! Sa kuuhe, ĩ ma tä taö totia waikia kule. Önö kutenö, pö mosaia totikiö! Teusö ta hini pasio mai, ĩ töpönö hiopö tä thaa wi, ĩ töpö a hini maikiö! Ĩ ma tä holisi a hini kuköma, ‑Jesus a pitili‑ makö pi kuu totio wi, ĩ tä mataso matimöö! ¹⁸Ĩ na makö kuati maapöö! Ĩ na makö kua totio mai, Jesus anö makö totiapala apati wi, ĩ tänö makö pata totisolöpököö! Kamakö hai ĩ Jesus Cristo pata tänö makö täa koni wi, ĩ ma taö öpöle, ĩ tänö makö pata naioolöpököö! Jesus a na kamakö pewö aiki, ‑Wa totiatalo opawöö!‑ huki ĩ na makö kuu, waiha ĩ na makö kuta kutamo sinomotii, ĩ na makö kuu soatiopököö!