2 Coríntios

2 Coríntios

Kotĩtu tili töpö na waheta tä simöa nömöpalö noai ĩ ta

Paulo anö kotĩtu tili töpö na waheta tä simöa somapalö noai ha, ‑Waheta tä na kotĩtu tili sa töpö päsäpama kutenö, ĩ töpö pi wanisala hãtoa kule? Sa töpö noa thaa noai, ĩ töpönö ĩ ta hini wanio hãtoma?‑ Paulo a pi kuu salo, Tito a na, ‑Kotĩtu tä uli ha a hulolöö! Wa hulolö nö, ĩ töpö kuati pole, ĩ ma tä taa salo, wa waloa kõkiso nö, ĩ ma ta wäsä kõosoö!‑ ĩ na Paulo a kuuma.

Ĩ na Tito a na Paulo a kuu ha, kotĩtu tili töpö na Tito a noimomö hulasolöma. A noimo nö, Paulo a na a waloa kõkiso nö, ‑Kawa na kotĩtu tili töpö hĩso maa thaliö! Ĩ wa töpö noa thaa noai, ĩ töpönö ĩ ta hinia totia apölöma thaliö!‑ a kuu nö, ‑Kawa na “Pälaö!” ĩ töpö kuu mai kitä maaki, ai polakapi töpö aiki, “Jesus Cristo anö Paulo a simöpa pasio maamaö! Paulo a hini tihöö!” ĩ na ĩ töpö kuu thaliö!‑ ĩ na Paulo a na ĩ na Tito a kuuma. Tito a kuu noai, Paulo anö ĩ ta hininö nö, ĩ waheta tä sãököpalö nö, kotĩtu tili töpö na tä simönöma.

¹Jesus Cristo anö Paulo sa simöa wi ĩ sa. Teusö a pata aiki, ‑Paulo a simönöö!‑ ĩ na a kuuma kutenö, Jesus Cristo anö sa simönöma. Teusö ma thapo wi ĩ makö kokamo sinomo wi ĩ makö na hi waheta sama tä simöpali ke. Timóteo anö Cristo a thapo naio wi ĩ a solo hi waheta sama tä simöpali ke. Teusö a patanö akaia tili makö thapo sokapo asale, Akaia tä uli pewö pata hamö ĩ makö pilipai, ĩ makö na hi waheta sama tä simöa naipali ke.

²Kamakö hai ĩ pö̃ Teusö a pata, Jesus Cristo Kaikana tä, ĩ na kilii töpönö makö totiapala apaö, makö pi topapalama apaö, ĩ na makö pewö pi thama totioö!

Makö pepalo opati tä, Teusö a patanö makö pasilipali kitäö!

³Kamakö hai ĩ Jesus Cristo pata tä hai ĩ pö̃ Teusö a pata na, ‑Wa totiatalo opa asatiowöö!‑ ĩ na makö pewö kuupököö! Pö̃ Teusö a patanö sanöma makö pi ipa nö, kamakö na a pi honipo opa nö, makö totiapala apaö, makö pasilipoö, makö pi topapalama apatii, ĩ na Teusö a pata kuatii. ⁴Ai töpö pepalo opa piale, ĩ ma töpö pasilipo tolea nömöopö, huki makö pepalo opa soale, Teusö a patanö ĩ makö pasilipo soa kule. Teusö a patanö makö pasilipo kua wi na, ĩ na kamakö pewönö ai ma töpö pasilipo tolea kua nömöo kõoö. ⁵Cristo a pea kua noai na, ĩ na makö pea kua hö̃töoö. Önö kutenö, Teusö a patanö Cristo a na pe epii makö pewö pasiliapalama apatii. ⁶Kamakö na samakö kuiki nö, Teusö sama ta wäsä tä, ai töpönö samakö peama apatii. Samakö peama apati kule maaki, Teusö sama ta wäsäö ha, makö pasilipoö, makö täapa kõo läoö, Teusö a patanö ĩ na makö thamaö. Teusö a patanö samakö pasilipo kuati wi na, ĩ na makö pasilipo kua naioö. Samakö pea kuati wi na, ĩ na makö pea kua naio hãtoa tä, Teusö a patanö makö pasilipo opa kutenö, makö kasiapalo satimo opa hö̃töo soatioö. ⁷‑Kotĩtu tili makö kasiapalo satimo opati kitäö!‑ ĩ na samakö pi kuti kule. Awai. Kamisamakö pepalo kuati wi na, ĩ na makö pepalo kua apa hö̃tötia kule. Ĩ na makö kua tä, Teusö a patanö samakö pasilipo kuati wi na, ĩ na makö pasilipo kua hö̃töo kitä. Önö kutenö, ‑Makö kasiapalo satimo opa kitä‑ ĩ na samakö pi kuu wi ĩ tä mapo mi.

⁸Ásia tä uli ha samakö pepalo opa noai, ĩ tä na makö pi hatukupamani pia salo, sa kuu kule. Pe epii samakö pea apati salo, ‑Samakö noma pia kuleö!‑ ĩ na samakö pi kutima. ⁹‑Samakö noma piale, ĩ tä kua waikia kuleö!‑ ĩ na samakö pi ku upa kutenö, kama samakö na kama samakö mamo teteo sapao kõo päo mai, Teusö a patanö nomawö töpö temöma kõo wi, ĩ a na samakö mamo tetea sisaiki nö, ‑Samakö noama totioö!‑ ĩ na Teusö a pata na samakö pi kutima. ¹⁰Ĩ na samakö pi kuti ha, samakö noma pia wi, ĩ tä na Teusö a patanö samakö noama apatima. Samakö noamati nö, samakö noama mapo mai kitäö! Teusö a pata na samakö mamo teteiki nö, ‑Samakö noama kõo kitäö!‑ ĩ na samakö pi kuu toitia kule. ¹¹Kamakönö samakö pasilipalö nö, Teusö a pata na makö hapaloö ha, Teusö a patanö samakö noama kõo kitäö! Teusö a pata na makö satehe epii makö kuu wi, Teusö a patanö ĩ ta hininö nö, samakö totiapala apati kitä. Samakö totiapala apaö ha, makö satehe epii makö aiki, ‑Aitaköö! Kawanö Paulo wa töpö noama toitioma thaliö!‑ Teusö a pata na ĩ na makö ku upa kitä.

Samakö pitilimo opa nö, toitai sama tä thatii

¹²Ĩ na samakö õsi kuu kule: ‑Teusö a patanö samakö totiapala apaö, samakö pasilipo opaö, ĩ na Teusö a pata kua kutenö, Teusö a thapo mai, ĩ töpö pewö na samakö pitilimo opa nö, toitai sama tä thatii. Teusö ma thapo wi ĩ makö na ĩ na samakö kua totio naio thaliö! Kamisamakö pi saimo pola nö kuno mai, Teusö a patanö samakö pasilipo opa kutenö, ĩ na samakö kuati päoö‑ ĩ na samakö pi kuu nö, samakö pi mönaha apaö. ^13-14Kamakö na waheta sama tä simöpali wi, ĩ ma tä möö nö, ma ta hinia makoka totili kitä. Kamisamakönö makö pi wi na takömoma mane maaki, kamakönö samakö taö totia apa soatia maneö! ‑Waiha samakö taö opia totia hãtoki kitäö!‑ ĩ na sa pi kuu kule. Kamakönö samakö taö totia apa kuköma, Jesus pata tä huu kõa tä, kamisamakö na makö pi mönaha apa, kamakö na samakö pi mönaha apa hö̃töa, ĩ na makö pewö kuapököö!

Kamakö na sa huu mai ha, waheta sa tä simöa päpalö noai ĩ ta.

^15-16‑Kamisamakö na kotĩtu tili töpö pi mönaha apa kitäö!‑ ĩ na sa pi kuuma kutenö, ĩ na sa pi kuuma: ‑Kotĩtu tili töpö na sa hama huu paio tasoköö! Masetônia tä uli hamö sa huulö tä, kotĩtu tili töpö na sa hamamo hasupasolö kitäö! Ĩ na tä kua tä, Masetônia tä uli ha sa husoa kono nö, sa huu koima tä, kotĩtu tili töpö na sa hamamo hasua nömöa kopasolö kitäö! Ĩ töpö na sa hamamo soma tä, Teusö a kai na ĩ sa töpö pasilipoö, waiha ĩ töpö na sa hamamo kõa tä, sa töpö pasilipo kõo, ĩ na sa kuapöö!‑ ĩ na sa pi kuuma. Ĩ na sa pi kuu nö, ‑Ĩ kotĩtu tili töpö na sa hamamo kõo nö, Jutéia tä uli ha sa huu kõo pia tä, ĩ kotĩtu tili töpönö sitipa kökö na sa pasilia hö̃töpali kitä‑ sa pi kuuma. ¹⁷Ĩ na sa pi kuu tä, sa pi hätämo maama. Ai sanöma tä pi moti wani kutio kua wi na, ĩ na sa kua mai kitä. ‑Awai‑ ai tä kuu kule maaki, ‑Mawöö!‑ a kuu hö̃töo soataö. Ĩ na ĩ a kuu kua wi na, ĩ na sa kua pasio mai kitäö! ¹⁸Teusö a pata pitilimo kua wi na, ĩ na sa pitilimo kua hö̃töo nö, kamakö na, ‑Awai‑ sa kuu tä, ‑Mawöö!‑ sa kuu hö̃töo soata maama. ¹⁹Kamisa, Silas a, Timóteo a, ĩ na kilii samakönö kamakö na Teusö a pata hai pelupö Jesus Cristo sama wäsäpili, ĩ aiki, ‑Awai‑ a kuu nö, ‑Mawöö!‑ ĩ na a kuu hö̃töo soata mai kitä. Ĩ a pitilimo totio opaö. ²⁰Teusö a pata aiki, ‑Ĩ na kamisanö sanöma makö thama kitäö!‑ ĩ na a kuu tä, Jesus Cristo aiki hö̃töwö ‑Awai‑ ĩ na a kuu hö̃töa soatasoö. Ĩ na Jesus a kuu hö̃töoö ha, kamakö aiki, ‑Awai. Ĩ naköö!‑ ĩ na makö kuu nö, ‑Teusö a pata totiatalo opawöö!‑ makö kuu. ²¹Teusö a patanö kamakö, kamisamakö, ĩ na makö kui makö pewö pi lotetepamanö nö, ‑Cristo a pitili‑ ĩ na makö pi thamanö nö, Teusö ma thapo salo, Teusö a patanö makö thaa soka totipali. Makö thaa soka totipalö nö, ‑Teusö a thapo wi ĩ töpö‑ ĩ na Teusö a patanö ai töpö pi thama nö, ²²kama õsi kua tolele, kamakö õsi ha ĩ a õsi titiki nö, ‑Teusö a kuu wi ĩ tä pewö a pitili ipö‑ ĩ na makö pi thamama.

²³Sa pitilimo opa wi, Teusö a patanö ĩ tä taö totia waikia. Sa õsi kuu wi, ĩ anö ĩ tä taö öpa waikia kutenö, ĩ na sa kuu kule. Kotĩtu tili makö na sa hamamo pi topa apama maaki, kamisanö makö õsi wanisalama wani ipö salo, kamakö na sa hamamo maama. ²⁴Kamisamakönö makö noa thaa wani ipö. ‑Ĩ na pö pi kuu totioö!‑ ĩ na makö noa thaa wani ipö. ‑Awai. “Cristo a pitili” ĩ na makö pi kuu totia waikia kuleö!‑ ĩ na samakö pi ku upati kutenö, makö noa thatala mai ha, makö pi mönahapamani pia salo, makö pasilia päpali.

¹Önö kutenö, ‑Kotĩtu tili makö na sa hamamo kota kuköma, makö õsi pewö wanisalapaso matimöö!‑ ĩ na sa pi kuu salo, ‑Ĩ ha sa huu kota mai kitä‑ ĩ na sa pi kuuma. ²Kamisanö makö õsi wanisalama kuköma, makö õsi pewö wanisala apa tä, ai makönö sa pi mönaha kopamani kitä ta o? ³‑Kamakönö sa pi mönahapamanöpö‑ sa pi kuu tä, kamakönö sa õsi wanisalapamanö matimöö! Kamakönö sa õsi wanisalapamani wi ĩ sa tä pii mi ipö kutenö, kamakö na sa huu maama. Kamakö na waheta sa tä simöa päpalöma. ‑Kamisa pi mönaha apa tä, kamakö pi mönaha apa hö̃töa‑ ĩ na sa pi kuu totia kule. ⁴Ĩ sa tä waheta simöpalö noai, ĩ sa tä waheta sãöka pola nö, sa pi honipoö, sa õsi wanisala, sa mamo puu tikiliatalo opaö, ĩ na sa kuatima. Kamisanö makö õsi wanisalama pi topa mai ha, ‑Paulo anö makö pi ipawö‑ ĩ na makö pi thama pia salo, ĩ sa tä waheta simöpalöma.

‑Wanisala wa tä thaa noai, ĩ tä na kamisamakö hĩso maa kopaso keheö!‑ ĩ na pö kuu!

⁵Ai wanö sa õsi wanisalapamanöma maaki, ĩ anö makö õsi wanisala satia apöpamanöma. Ĩ makö pewö aiki hãto kuno mai. Ai makö õsi wanisalapamanöma. Pe epii sa hapalo pi hĩsuapalo pi topati mane. ⁶Ĩ a wani wanisala apaö ha, kamakö pewönö ma wani peamama. Kamakö pewönö ma wani peama waikioma kutenö, ‑Ĩ na pätawö‑ sa pi kuu kule. ⁷Ĩ ma pi wani topa kopamanöpököö! Ĩ a wani na, ‑Ĩ na pätawö. Makö noimaso totio kõo nököö!‑ ĩ na pö kuu! Ĩ na makö kuu haiatalo mi tä, pe epii ĩ a õsi wani wanisala apöpaso matimöö! ⁸‑Wa pi ipa soaleö!‑ ĩ na pö kuu kõoö! ⁹Kamisanö makö wapa pia salo, ‑Kotĩtu tili töpönö sa kai a hini pi topa hãtokö?‑ ĩ na sa pi kuu salo, kotĩtu tili makö na ĩ sa tä waheta simöpali kipili. ¹⁰‑Wanisala wa tä thaa noai, ĩ tä na kamisamakö hĩso maa kopaso keö!‑ ai tä na ĩ na makö kuu tä, ĩ na kamisa kuu naio soataö. Cristo anö sa möti kutenö, kamisanö makö pasilipali pia salo, ai tänö wanisala tä thaa tä, ‑Wanisala wa tä thaa noai ĩ tä na kamisa hĩso maa kõa waikipaso keö!‑ ĩ na sa kuu. ¹¹Sai tä sai patanö tä thaa pi topa wi, kamakö pewönö ĩ ma tä taö öpa waikia. Önö kutenö, Sai tä sai patanö makö utitipama maapö, ĩ ai tä na kamisa aiki, ‑Wanisala wa tä thaa noai ĩ tä na sa hĩso maa kopasoma‑ ĩ na sa kuu kule.

Tötôasi tä uli ha Paulo a husoa haitasoö

¹²Ĩ na tä kua tä, Cristo ta topa apöle ĩ sa ta wäsä pia salo, Tötôasi tä uli ha sa walokö tasoma. Sa waloikitö nö, Cristo sa ta wäsä tä, ai töpönö sa wasu maama maaki, ¹³ĩ ha ipa Tito sa tapa taso maama kutenö, sa pi honipo opa tasoma. Sa pi honipo opa salo, tötôasi tili töpö na sa husoa kõa soatalo nö, Masetônia tä uli hamö sa hulasolöma.

Teusö a patanö ai töpö pewö peama waikioma kutenö, samakö lotetea apa asapasoö

¹⁴Ĩ na sa kuama maaki, Teusö a pata na, ‑Aitaköö! Kawanö wa tä taö öpa asawö. Wa totiatalo opa asawöö!‑ ĩ na sa kuu kule. Teusö a patanö Sai tä sai pata peama waikioma kutenö, Cristo a na samakö kuo koka naio wi, Teusö a patanö ĩ samakö kai pewö pi mönaha apii samakö kai hutii. Teusö a patanö samakö pasilipoö kutenö, ĩ tä uli pewö hamö Cristo sama ta wäsä hätäpoti nö, Cristo sama ta wäsä kutenö, tuu nisamö hälälä äpii tuu nisamö hälälo paukupo kua wi na, ĩ na Cristo ta paukupo kua hö̃töoö. ^15-16Ĩ töpö pewö na sama ta wäsä kutenö, Teusö a pata aiki, ‑Tuu nisamo toita apii tuu kui na, ĩ na Cristo a wäsäti polai, ĩ na ĩ töpö uni nisamö toita apö kuö hö̃töwö‑ ĩ na Teusö a pata pi kuu. Teusö a patanö ai sanöma töpö täapa asa kõo wi, ĩ töpö õsi palimi ipö kutenö, ĩ töpö na samakö uni nisamö toita apö naiwö. Ĩ na tä kua tä, Teusö a patanö ai töpö täapa läo pasio kõo mai, ĩ töpö nomano nö, õsi töpö pepalo tolea soatio wi, ĩ tä uli hamö ĩ töpö huu pia wi, ĩ töpö na samakö uni nisamö wanisala apö pasiwö. Önö kutenö, Teusö a patanö sanöma makö pasilipo mi tä, kama makönö Cristo ma ta wäsä taö öpa päo mai kitä. ¹⁷Ai töpö satehe epii ĩ töpönö noa tä pi ipa päo salo, Teusö tä holisi a wäpala apati päoe. Ĩ na kamisamakö kua pasio mai kitä. Teusö a patanö samakö simöa totio kutenö, kamisamakö na Teusö mamo teteapalo totio kutenö, Cristo anö samakö kalipalama wi ĩ samakö pitilimo totio opa nö, Teusö sama ta wäsä totio opa asatioö.

‑Paulo töpö pitilimo opa waikioö‑ ĩ na kamakönö ai ma töpö pi thamaö

¹Ĩ na sa kuu ha, ‑“Paulo a topa apa asawö” ĩ na kama Paulo anö makö pi thama pi topa apa hãtoakö?‑ ĩ na makö pi kuu kule? ‑Kamakö na Teusö ta wäsä piale, ĩ a pitilimo opaö‑ ĩ na ai waheta tä kuu wi, ai töpönö ĩ nasimö tä waheta simöpa kua wi na, ĩ na kamisamakönö ĩ nasimö sama tä waheta simöpa kua pasio mai kitä. Ĩ na tä kua tä, ai tiko töpö na Teusö sama ta wäsä pi topa tä, ‑Ĩ töpö na waheta ma tä simöpa mi salo. “Paulo töpö pitilimo opa thaliö!” ĩ na makö kuu mi salo‑ ĩ na kamakö na ĩ na samakö kuu mai kitä. ²Kotĩtu tili makö hai, ĩ nasimö tä waheta uni waikiwö. Kamisamakö õsi na ĩ tä waheta uni sãöka hö̃töa waikia. Ai töpö pewönö ĩ tä waheta uni möö nö, tä hini ipaö. ³Kamakö hai, Cristo anö waheta tä sãöka wi, ĩ makö uni waikiwö. Kamakö na Cristo anö samakö simöpali ha, Cristo sama kai wäsäma kutenö, Cristo a hai ĩ waheta tä lö kui, ĩ kamakö uni makö kupasoma. Sanöma töpönö tuu lelei tuunö tä sãöka wi ĩ tuunö ĩ waheta tä uni sãököpa maama. Teusö a pata temöo opati wi ĩ a õsi kua tolele, ĩ anö ĩ tä waheta uni sãöka pasiköma. Maa ma patetei ma kotopö ha tä sãöka mai, sanöma töpö õsi na ĩ tä sãököa pasiköma.

⁴Cristo a na samakö kuo naio nö, ‑Teusö a pata pitili‑ samakö pi kuu totio opa sinomo salo, ĩ na samakö kuu. ⁵Kama samakönö Teusö sama ta wäsä taö öpa mai kitä. Teusö a patanö samakö pi hatukua päpamani ha, Teusö sama ta wäsä taö öpa päoö. ⁶Teusö a patanö sanöma makö pewö noa thaa noai, ĩ ta tutea apöle, ĩ sama ta wäsä taö öpa sisaö. Teusö a patanö makö pewö noa thaa soma noai, ĩ sama tä sãökama wäsä maneö! Teusö a õsi kua tolele, ĩ anö samakö noa thaa nömöo noai, ĩ sama ta wäsä pasitioö. Makö noa thaa soma noai, sanöma makö pewönö ĩ ma tä sãökama hini tai mi ipö salo, makö nomasoö. Önö kutenö, makö noa thaa soma noai, ĩ tänö makö nomamani kitä. Ĩ tänö makö nomamani kitä maaki, Teusö a õsi kua tolele, ĩ anö makö õsi palimia päpali.

Tute sama ta wäsäti pole, ĩ tä topa satia apaö

⁷Teusö a patanö sanöma makö noa thaa paio noai, maa makö patetei makö kotopö ha ĩ tä sãökököma. Ĩ tä sãöka waikikö noai ha, Teusö a pata wakala apii ĩ tä tapamonasoma. Moisés a moikömö na ĩ tä wakala sätäo noai, ĩ tä wakala mapo opia koonöma maaki, ĩ tä wakala sii lotete epö kutenö, Moisés a na töpö mamo teteo maama. Pata töpö noa thaa soma noai, ĩ tänö sanöma makö pewö nomamani wi, ĩ ta waloköma, tä wakala apöpasoma. ⁸Önö kutenö, Teusö a õsi kua tolele ĩ anö makö noa thaa nömöo noai, ĩ tä waloköma, tä totiatalo satia apati kitä ta pi kuu mai. ⁹‑Wanisala ma tä thatala apatiwö‑ ĩ na tä kuu wi ta waloköma, tä wakala apii tä waloa naiköma. ‑Wanisala ma tä thatala apatima maaki, Teusö a patanö makö totia apa kopalöma‑ ĩ na tä kuu wi ĩ ta waloköma, tä wakala sati ipii, ĩ tä waloa naiköma. ¹⁰Makö noa thaa soma noai ĩ tä waloköma, tä toita apii tä kuoma maaki, huki tä waloa nömökö noai, ĩ tä toita sati ipö kutenö, tä toitai tä kuo soma noai, ĩ tä toita wani maa pasia kopasoma. ¹¹Ĩ tä maa kopaso noai ĩ tä toita apama maaki, tä mapo mi ipii ĩ tä toita sati ipö.

¹²‑Teusö a õsi kua tolele ĩ anö makö noa thaa noai, ĩ ta toita sati ipö‑ ĩ na samakö õsi pi kuti salo, samakö kili mai, Cristo sama ta wäsä hokapalo totio opatii. ¹³Moisés anö tä thama kua noai na, ĩ na sama tä thama kua pasio mi. Tä wakala apii ĩ tä maa kõo paio mi tä, isöhaeu töpönö ĩ tä wakala möö maapö, Moisés anö kama moikömö ha watata ösö soholöma. ¹⁴Teusö a kai na isöhaeu töpö pi motio opa soatioma. Watata ösönö Moisés a moikömö soho kuo noai na, huki ĩ na isöhaeu töpö õsi uni sohoa kua hö̃töa. Moisés a na, ‑Ĩ na töpö noa thaö!‑ ĩ na Teusö a pata kuti noai, isöhaeu töpönö ĩ tä waheta möti kule maaki, töpö õsi uni sohoa kutenö, ĩ tä waheta na ĩ töpö pi hatukupo mi. Cristo a na makö sätäapalo naia totiköma, ĩ tä, makö õsi uni sohotio noai, ĩ tä maa toitasoö. Makö pi hatukua totipasoö. ¹⁵Awai. Huki isöhaeu töpönö Moisés a waheta möö tä, ĩ töpö õsi uni sohoa soatia. ¹⁶Ĩ töpö õsi sohoa soatia kule maaki, ai tänö pata tä thapo tä, kama õsi sohotile, pata tänö ĩ tä hosali. ¹⁷Ĩ pata tä hai, Teusö a õsi kua tolele, ĩ a sai. Teusö a õsi kua tolele, ai wa na ĩ a kua tä, ai tänö ĩ wa huapala mai kitä. Teusö a õsi kua tolele, wanisala tä na ĩ anö wa uni kusöpali. ¹⁸Makö moikömö pewö sohopa mi kutenö, walala mömomö kui na, ĩ na makö moikömö mömomö kuö. Ai töpönö makö möö kuköma, pata tä wakala apii ĩ tä tapa naioöhe. Teusö pata tä sai õsi kua tolele, ĩ a wakala apii ĩ tä sainö makö tikopöpamani. Önö kutenö, pata tä toita apii, a ausi ipii ĩ a kui na, ĩ na makö kupo naioimatasoö.

Samakö õsi na tä wakala hili wi ĩ samakö utiti. Hapokasi hapoka a wani noni kui na.

¹Teusö a patanö samakö totiapala apa kutenö, kama kai a wäsä sinomo wi, kamisamakö na Teusö a patanö ĩ tä totopöma. Önö kutenö, samakö pi lotete epö. ²Teusö sama ta hula mi kutenö, wanisala tä thati wi ĩ sama tä thaa pi topa mi ipö. Ai sama töpö mönama wani ipö. Teusö sama tä waheta wäsä holisi päta mai kitä. Pitili sama ta wäsä äpa nö, Teusö a patanö samakö tapa toitia apa kutenö, ‑Paulo töpö pitilimo opawö‑ ĩ na ai sama töpö pi thama pi topa apaö. ³Sama ta wäsäti wi ĩ ta hatuka mi tä, õsi töpö pepalo tolea apati wi ĩ tä uli ha töpö huu piale, ĩ töpö na ĩ ta hatuka mi sisawö. Ĩ töpö na Teusö ta wäsä kule maaki, töpö pi hatukupo mi. ⁴Sai tä sai patanö sanöma makö pewö simöati wi ĩ anö ĩ töpö pi motipamanöma kutenö, ‑Teusö ta pitili ipö‑ ĩ na ĩ töpö pi kuu mi ipö. Teusö a pata kui na, ĩ na Cristo a kuö hö̃töi, ĩ a wakala apii, ĩ ta topa apöle ĩ ta wäsä tä, sanöma makö na ĩ tä wakala kuki kitä maaki, Sai tä sai patanö ai töpö pi motöama pasio noai, ĩ töpönö ĩ tä wakala tapa pasio mi. ⁵Kamisamakönö kama samakö a wäo mai ha, ‑Jesus Cristo a hai, ĩ pata tä sai‑ tä kuu wi ĩ sama ta wäsä sisaö. Ĩ sama ta wäsä nö, ‑Jesus a na samakö kalipaloti wi ĩ samakönö makö pasilipo sinomo wi, ĩ samaköö!‑ ĩ na samakö kuu naioö. ⁶Somi tä sai tä, tä pata muma apati tä, ‑Wakala tä kuikiö!‑ ĩ na Teusö a pata kuu noai, ĩ anö kamisamakö õsi na kama hai ĩ wakala tä titiki nö, samakö pi hatukupamanöma. Samakö pi hatuku upö kutenö, Teusö a pata wakala apii, Cristo a moikömö ha ĩ tä wakala kuo wi, kamisamakönö ĩ sama tä wakala taö öpaö.

⁷‑Teusö a thapo wi ĩ töpö utiti pasiwö. Teusö a pata lotetea sati ipö sisawö‑ ĩ na kamisamakönö ai sama töpö pi thama sinomopö, kamisamakö õsi na ĩ tä wakala titio wi, ĩ samakö äpäti. Hapokasi hapoka a äpäti kui na, ĩ na samakö õsi kuö hö̃töwö. ⁸Ai töpönö samakö peamati kule maaki, maawöö! Samakö peama totia mane. Samakö pi wi na takömo opa kule maaki, Teusö a pata na, ‑Päläö!‑ samakö kuu mi. ⁹Ai töpönö samakö wanipo opati kule maaki, Teusö a patanö samakö noima satia apa pasioö. Ai töpönö samakö namo keo kule maaki, samakö säpa totio mi. ¹⁰Jesus a temö öpii, kamisamakö õsi na ĩ a titile, ĩ a tapamonasopö, Jesus a säpamoa kulaso noai na, ĩ na samakö kua hö̃töoö. ¹¹Samakö äpäti maaki, kamisamakö na Jesus a titio wi, ai töpö na ĩ a tapamonasopö, samakö temö öpö soa tä, Jesus sama ta wäsätii. Jesus sama ta wäsäti ha, ai töpönö samakö säpa pi topa apa sinomoö. ¹²Önö kutenö, Jesus sama ta wäsäö ha, ai töpönö samakö säpa pi topa kule maaki, kamakönö ĩ ma ta hinia totilö nö, makö õsi palimipasoö.

¹³‑“Teusö ta pitili” sa pi kuu totio opa salo, sa hapaloma‑ ĩ na Teusö tä waheta kuu. Ĩ na tä kuu kua wi na, ĩ na samakö kuu kua hö̃töo salo, samakö hapalo hö̃töoö. ¹⁴Teusö a patanö Jesus Kaikana tä temöa thaa komanö noai na, ĩ na samakö temöa thaa kõa hö̃tömani pia salo. Kamisamakö, kamakö, ĩ na makö kui makö pewö temöa komanö nö, Jesus a kulali hamö Teusö a patanö makö pewö hilakö laso kitä. ¹⁵Kamisamakönö makö pasilipa pi topa apa salo, ai töpönö samakö pepalama apatii. Kamisanö makö pasilipo opati kutenö, Teusö a patanö makö totiapala apati wi, ai makö na ĩ tä pala kimati. Ai makö na ĩ tä palaö ha, Teusö ma thapo wi ĩ makö satehea apöpasoma kutenö, Teusö a pata na, ‑Aitaköö! Wa totiatalo opawöö!‑ tä kuu wi ĩ tä pala naioö. Ĩ na ai makö kuu ha, ‑Teusö a pata topa apa asawö‑ ĩ na makö pewö kuu.

Wani ipii samakö peatalo opati wi maaki, pe epii samakö puko kõatalo opaalö kitä

¹⁶Önö kutenö, samakö pi utitipo mane nökö. Pili samakö pewö äpätipo kule maaki, ĩ tä wakala pewö hamö samakö õsi lotetea kõatalo opatii. ¹⁷Huki wani ipii samakö peataloti kule maaki, waiha Teusö a pata na samakö waloköma, samakö pea apa waikitioma kutenö, pe epii samakö puko kukö laso kitä. Samakö peati wi ĩ tä alukusi ipö soawö. Teusö a pata na samakö puko opa piale, ĩ tä pata pe sati ipö. Samakö peati wi ĩ tä maa pasipaso kitä maaki, Teusö a pata na samakö puko opa piale, ĩ tä mapo pasio mai kitä. ¹⁸Hi masita tä uli ha tökö pewö kupai, ĩ sama tökö tapa sinomo waikitio wi, ĩ tökö na samakö mamo teteo mai kitä. Tökö tapamo pasio mai, ĩ tökö na samakö mamo tetea sisaa. Huki sanöma makönö ma tökö tapa pole, ĩ tökö mapaso kitä maaki, huki ma tökö tapa mi ipii, ĩ tökö mapo pasio mai kitä. Ĩ tökö kuo soatio asaö.

Sai a hote mi ipii, ĩ a sai ha makö kuo soatio kitä

¹Hi masita tä uli ha makö pewö kua soa tä, sai a kui na, ĩ na pili makö ösö uni kuö hö̃töwö. Ĩ a sai uni kule, ĩ a sai hotesoö ha, hi tä hẽtu hamö makö konasolöma, kamakö na Teusö a patanö ai tiko a sai totoa nömöa kõki kitä. Sanöma töpönö a sai thaa wi, ĩ nasimö a sai aiki kuno mai, Teusö a patanö tiko a sai thaa waikikö noai, a sai hote tai mi ipii, ĩ a sai totoki kitä. ²Hi tä hẽtu ha kamakö sai pö kupoli, ĩ a sai ha makö kuo pi topa apa salo, huki makö halilimoti kule. ³Makö õsi manokosi ipii makö kuo maapö, ĩ a sai na makö kuo pi topa apaö. ⁴Huki pili makö ösö õsi na pili makö õsi titia tä, makö pi honipo opa nö, makö halilimo opaö. Kamisamakönö pili makö ösö hosa pi topa mai kitä maaki, hi tä hẽtu ha makö sai pö kupoli, ĩ a sai na makö õsi kuo pi topa satia apaö. Makö äpäti ipii, ĩ tä palimia totipasopö. ⁵Hi tä hẽtu ha sai a kupoli, ĩ ha makö pilimaköpö, Teusö a patanö makö thapalöma. Makö thapalö nö, ‑Hi tä hẽtu ha sai a hote mi ipii ĩ a sai na makö õsi kuköpöö!‑ ĩ na Teusö a patanö makö pi thama pia salo, kamakö na kama õsi kua tolele, ĩ a titiköma.

⁶Ĩ na tä kuaö ha, makö pi honipo mai, makö pi topapalo opa sinomoö. Huki pili makö ösö na makö õsi kua soa tä, hi tä hẽtu ha Teusö a pata kupoli, ĩ ha makö kuo paio mi. ⁷Hi masita tä uli ha makö kutia tä, Jesus Cristo ma tapa mi päla tä maaki, ĩ a na makö mamo teteo sinomo paio päoö. ‑Cristo a pitili‑ ĩ na makö pi kuu totio opatii. ⁸Makö pi honipo mi ipö. Pili makö ösö na makö õsi titile, ĩ ma ösö hosalö nö, Cristo pata tä na makö konasolöpö, ĩ ma tä pii satia apatii. ⁹Önö kutenö, pili makö ösö ha makö õsi kua soa tä, Cristo ma pi mönahapalama pi topa apaö. Ĩ na tä kua tä, Jesus Cristo a na makö kononö nö, Cristo ma pi mönahapalama pi topa soatio kitä. ¹⁰Cristo a na makö konasolöma, Cristo anö makö pewö lomaki kitä. Makö lomakö nö, hi masita tä uli ha makö kuati noai, ĩ ta wäsä hatukua totipali pia salo. Ĩ ta wäsä hatukua totipalö nö, toitai ma tä thati noai, ĩ tä noa totoki, wanisala ma tä thati noai, ĩ tä noa totoa naiki, ĩ na Cristo anö tä thama pia salo.

Cristo anö makö pewö pi ipa wi, ĩ tänö sa huöpoti kule

¹¹Önö kutenö, Cristo pata tä na samakö kili ipa kutenö, ai sanöma töpö na, ‑Ĩ naköö! Ĩ na pö kua totioö!‑ ĩ na samakö kuu upaö. Teusö a patanö samakö taö öpaö. ‑Paulo töpö kuati noai ĩ sa tä taö‑ ĩ na makö pi kuu naio wi, ĩ sa tä pii totia kule. ¹²‑Kamisamakö pitilimo opaö‑ ĩ na kamakö na samakö kuu mane. Samakö kuati wi ĩ tä na makö pi tapotiki nö, ‑Paulo töpö pitilimo opawö‑ ĩ na makö pi thama pi topa päa kule. Ĩ na makö pi thamaö ha, ai töpönö samakö a kateha wanisala wi, ĩ töpö na makö hapalo taö öpa hö̃töopökö. Ĩ töpönö ai töpö õsi kuati wi, ĩ tä tapa pasio mai ha, ai töpö tapamo pasio pätio wi, ĩ tä tapa päo nö, ‑Ĩ töpö topa‑ ĩ na ĩ töpö kuu päoö. ¹³‑Paulo töpö isi waniho opati noa‑ ĩ na ai töpö kuu kule maaki, ‑Ĩ na töpö kuu päoö‑ ĩ na samakö kuu hö̃töoö. Teusö sama ta wäsä makoka apati kutenö, ‑Paulo töpö isi waniho opati noa‑ ĩ na töpö kuu päoö. Ĩ na töpö kuu kule maaki, samakö pi hatukua totio opaö. Samakö pi hatuka apa kutenö, makö pasilipo taö öpa kule. ¹⁴Cristo a sami ipii maaki, sanöma makö pewö täapa kõo läo pia salo, a säpamonasoma. Kamakö pewönö wanisala tä thaa noai, ĩ tä noa na Cristo a säpamonasoma kutenö, makö pewö uni säpamoa naisoma. Önö kutenö, Cristo anö makö pewö pi ipa wi ĩ tänö samakö huöpoti kule. ¹⁵Makö õsi palimi waikii, ĩ kama makö pi mönahapo sapapo kõo mai, kamakö noa na Cristo a säpamono nö, a temöa konaso noai, ĩ ma pi mönaha sisapamanöpö, Cristo a säpamoa pasisoma.

¹⁶Önö kutenö, Teusö a thapo mai, ai töpö na ĩ töpö pi tapomo kuati wi na, huki ĩ na samakö pi tapomo kua pasio mai kitä. Teusö a thapo mai, Cristo a na ĩ töpö pi tapomo kuati noai na, ĩ na Cristo a na samakö pi tapomo kua hö̃tötioma maaki, huki ĩ na samakö pi tapomo kua mai kitä. ¹⁷Önö kutenö, Cristo a na ai tä sätäapalo kuköma, ĩ a tute epii ĩ a kupasoö. A kuati noai, ĩ tä matalo nö, tä tute epii ĩ tä waloki ha, a tikopö öpii a kua nömöa soapasoö.

Teusö a pata, kamakö, ĩ na makö kui makö noimaso kua kõoö

¹⁸Teusö a patanö makö tikopöpamanöma. Teusö a pata, kamakö, ĩ na kilii makö wanihaso paioma maaki, Teusö a patanö Cristo a simöpalöma kutenö, makö noimaso kuköma. Makö noimaso kuiki nö, Teusö a pata aiki, ‑Sa wanipoti wi ĩ töpö na kamakönö sa wäsä hätäpoti nö, sa töpö noima kõo wi, ĩ ma ta wäsä totioö!‑ ĩ na Teusö a patanö samakö noa thalöma. ¹⁹Teusö a pata, sanöma makö pewö, ĩ na makö kui makö wanihasoti wi, ĩ tä mapamani pia salo, Teusö a patanö Cristo a simöpalö noai, ĩ sama ta wäsäti kule. Sanöma makönö wanisala ma tä thaa noai, ĩ tä na Teusö a pata hĩso matasoma. ‑“Kamisa, sanöma töpö, ĩ na kilii makö noimaso kuköpöö!” sa kuu wi, ai sanöma töpö na ĩ ta wäsä hätäpotöö!‑ ĩ na Teusö a patanö samakö noa thalöma.

²⁰Cristo anö samakö simöpalö noai ĩ samakö. Cristo a kuti wi, ai sanöma töpö na ĩ sama ta wäsä nömötioö. ‑Sa kai a hini totioheö!‑ sanöma makö pewö na Teusö a pata kuu pi topa apa wi, ai sanöma töpö na ĩ sama ta wäsä toleatii. Cristo anö samakö simöpalöma kutenö, ‑Teusö ma ta hini totioö! Ma ta hini totioö ha, Teusö ma wanipoti wi, Teusö a patanö ĩ tä mapamanö nö, makö noimaso totiki kitäö!‑ ĩ na samakö kutii. ²¹Cristo anö wanisala tä thati maa noai maaki, Teusö a patanö makö pewö täapa kõo läo pia salo, Cristo a peamama. Teusö aiki, ‑Sanöma töpönö wanisala tä thati wi, ĩ tä noa na sa töpö peama hö̃töo nö toapöö!‑ ĩ na a pi kuuma maaki, sanöma makö täa koni pia salo, Teusö anö Cristo a peama pasioma. A peama waikioma kutenö, Cristo a na makö kua naiköma, Teusö kama a toita apö kui na, Teusö anö ĩ na makö totia thaa naia soapali.

¹Teusö a patanö samakö kai kalipalo sinomo kutenö, kamisamakönö makö noa thaa kule. Teusö a patanö makö noima apa nö, makö totiapala apa wi ĩ tä hosa tihöö! ²Teusö a pata aiki, ‑Kamisanö makö totiapala apati pia tä, makö a hinima. Kamisanö makö täapa kõo pia tä, makö pasilipalöma‑ ĩ na Teusö a pata kuu. Hiki. Huki Teusö a patanö makö totiapala pi topa kule. Hukiki makö täapa pi topa apa kõa kule.

³‑Paulo töpönö Teusö ta wäsäti kule maaki, ĩ töpö tomöpoti mi ipö‑ ĩ na ai sama töpö pi thama wani ipö kutenö, wanisala sama tä thaa mai, toitai sama tä thaa pi topa sisaö. ⁴Ĩ na samakö kuati nö, ‑Teusö a patanö Paulo töpö simöati wi ĩ töpö‑ ĩ na ai sama töpö pi thamaö. Samakö pepalo opaö, samakö honimopalo opatii, samakö pi honipo opaö, ĩ na samakö kuati kule maaki, Teusö a pata na samakö kalipalo satimo opatii. ⁵Ai töpönö samakö soalali, titita wi a sai ha samakö titiki, ai töpö kokamo nö, ĩ töpönö samakö namo kusöli, samakö kalipalo wasiso opatii, samakö mio tomöpo mi ipö nö hĩsuwö, samakö oi ipö pikiwö, ĩ na samakö kuatima. ⁶Sami sami sama tä thaa mi ipö. Teusö sama ta taö öpaö. Ai töpönö samakö peamati kule maaki, ĩ sama töpö wanipo mai, sama töpö totiapala apatii. Kamisamakö õsi na Teusö a õsi kua tolele, ĩ a kalipalo totiatalo opaö. Ai sama töpö noima pitilia apatii. ⁷Pitili sama ta wäsä sinomoö. Teusö a pata lotete epii ĩ tänö samakö loteteapalo opa naio päoö. Sai sama tä namo pata kusölö nö, Teusö a patanö samakö totia waikipalö noai, ĩ tänö Sai sama ta pata utitipamani. Ĩ na tä kua tä, Sai tä sai patanö samakö namo kusö hö̃töa tä, Teusö a patanö samakö totipalö noai, ĩ tänö Sai sama ta pata utitipama läoö. ⁸‑Paulo töpö topa apaö‑ ĩ na ai töpö kuu kule maaki, ai tiko töpö aiki, ‑Paulo töpö wanisala apaö‑ ĩ na ĩ töpö kuu soka pasia. Ai töpönö samakö hösökapalamati kule maaki, ai tiko töpönö samakö komoapalama apatii. Samakö pitilimo opa waikia kule maaki, ‑Ĩ töpö holisi ipö‑ ĩ na ai töpö kuu soaö. ⁹Ai töpönö samakö taö mai kitä maaki, kamakö pewönö samakö taö öpa waikia kule. ‑Paulo töpö lotete mai kitäö! Ĩ töpö noma hãto pia kule‑ ĩ na ai töpö pi kuu kule maaki, samakö temöo opa soatioö. Ai töpönö samakö pepalama apati kule maaki, samakö säpa tai mi toti ipö. ¹⁰Samakö pi otatalo opati kule maaki, samakö pi topa satimo opa sinomoö. Wani tä na samakö puko opa mane maaki, Teusö a kai na päwö ai töpö satehe epii sama töpö pukapama apa sinomoö. Wani sama tökö thapo mai maaki, Teusö a patanö tökö totoma wi, ĩ sama tökö pewö thapo opa päoö.

¹¹Ipa kotĩtu tili pö! Kamisamakönö makö noima apa kutenö, kamakö na samakö hapalo hoka apa asaö, makö pi ipa asaö, ĩ na samakö kua asaö. ¹²Kamisamakönö makö pi ipa asa kule maaki, kamakönö samakö pi ipa hãtoa asa mai kitä. ¹³Pelupö töpö na pö̃ a hapalo kua wi na, kamakö na ĩ na sa hapalo kua hö̃töa kule. Kamisamakönö makö pi ipa kua wi na, ĩ na kamakönö samakö pii nomöha kua hö̃töo mi salo.

Jesus Cristo a thapo mai, ĩ töpö na pö sätäapaloti tihöö!

¹⁴Jesus Cristo a thapo mai, ĩ töpö na pö sätäapaloti tihöö! Toitai tä thaa pi topa wi ĩ töpö, wanisala tä thaa pi topa wi ĩ töpö, ĩ na töpö kui töpö kokamo kuköma, noi ipii ĩ töpö pewö kalipaloti kitä ta o? Wakala tä, mumi mumi tä, ĩ na tökö kui, toitai ĩ tökö kokamo totio kitä ta o? ¹⁵Cristo a, Sai tä sai pata, ĩ na kilii töpö noa thaso kua asa mai kitä. Cristo a thapo wi ĩ a pi tapomo kua wi na, ĩ na Cristo a thapo mai, ĩ na ĩ a pi tapomo kua pasio mai kitä. ¹⁶Teusömo wi a sai ha Teusö a pata kule, ĩ a sai soka hö̃töa, ukutupö tä na töpö noamamo wi ĩ tä ukutupö hĩtale, ĩ a sai soka hanoa totia hö̃töa, ĩ na ĩ töpö sai pö soka kua totia. Teusömo wi a sai ha Teusö a pata temö öpii a kule, ĩ a sai kui na, ĩ na makö uni kuö. Ĩ na Teusö a pata kuuma: ‑Ipa töpö na sa noimoti pia salo, ĩ töpö na sa kua naiki kitä. Kamisa na ĩ töpö aiki, “Ipa pata tä sai” töpö kuu kitä. Ĩ töpö hai, kamisa hai pata sa sai kua naipaso kitä‑ ĩ na Teusö a pata kuu nö, ¹⁷‑Önö kutenö, sa thapo mai, ĩ töpö na pö soka pasipaloö! Tä wanisala wi ĩ tä höpöa maikiö! Ĩ na makö kuaö ha, makö täa totialö kitäö! ¹⁸Makö täa totilöma, kamakö hai ĩ pö̃ sa sai kua totipaso kitäö! Ipa ulu wano makö, ipa ulu suö makö, ĩ na makö kupaso kitäö!‑ ĩ na Teusö a pata lotete sati ipii, ĩ na ĩ a kuuma.

¹Ipa noi pö! Kamakö na ĩ na Teusö a pata kuu manu kule, wanisala tänö pili makö pewö, pili makö õsi, ĩ na pili makö kui makö samipo wi, ĩ ma tä pewö hosalö nö, kama makö ausipamo totioö! Teusö a pata na makö kilia totiso salo, wanisala ma tä hosalöpököö!

Samakö pea apati kule maaki, samakö pi topapalo satia apatii

²Kamakönö samakö hãsiamati pola nö kuno mai, samakö pii totio mi salo. Ai wa na kamisamakönö wanisala sama tä thaa maama. Ai wa wanisalama asa maama. Ai wa mönama pasio maama. ³‑Makö wanisala apawöö!‑ sa kuupö, sa kuu mane. Kamisamakönö makö pi ipa kutenö, makö temöa soa tä, kamakö na samakö uni kua naitia, makö nomasoö ha, kamisamakö noma naia soatasoö, ĩ na samakö kuaö. Ĩ na kamakö na ĩ na sa kuu waikio kipili. ⁴‑Makö pitili ipöö!‑ kamakö na ĩ na sa pi kuu. ‑Makö totiatalo opawö‑ ĩ na sa pi kutii. Samakö pepalo opati kule maaki, sa pi wanisala pola nö kuno mai, sa pi mönaha apa.

⁵Masetônia tä uli ha samakö waloikitö nö, samakö mota mapo totio mai, samakö pepalo opatima. Ai töpönö samakö päsäpa apa pikitioö ha, samakö pi kilihio opa pikitioma. ⁶Samakö pi kilihio opatima maaki, makö pi utitipo pole, Teusö a patanö ĩ makö pewö pi loteteapalama sinomo wi, kamisamakö na ĩ anö Tito a simöpalö nö, samakö pi lotetea kopamanöma. ⁷Kamisamakö na Tito a waloki ha, samakö pi topa apama maaki, Tito aiki, ‑Kotĩtu tili töpönö sa pi topa totipamani kipiliö!‑ ĩ na a kuu ha, pe epii samakö pi topa apama. ‑Paulo ai. Kawa na kotĩtu tili töpö noimo pi topa apa kõo thaliö! Tä isi waniho noai ĩ tä na ĩ töpö pi ö̃köpalo opati thaliö! Kawa na ĩ töpö pi honipo opa thaliö!‑ ĩ na Tito a kuu ha, pe epii sa pi topa apama.

⁸Kamakö na waheta sa tä simöpalipili, ĩ tä wahetanö makö pi wanisalapalama teteho maama. Makö pi wanisalati ha, kamisa aiki, ‑Häö. Ĩ sa tä waheta simöa silia apa nö kilipale ia!‑ ĩ na sa pi moni kuuma maaki, huki ĩ na sa pi kuu mi. ⁹Huki sa pi mönaha apa kule. Kamisanö makö pi wanisalamanö noai ĩ tä na kuno mai. Kamisanö makö pi wanisalapamanöma salo, ‑Häö. Wanisala ma tä thaa noai, ĩ ma tä thaa kota maapököö!‑ ĩ na makö kuu noai, ĩ tä na sa pi mönaha sisaa. Kamisanö totiwö kuno mai. Teusö a patanö makö pi wanisala pasia päpamanöma. ¹⁰Teusö a patanö sanöma makö pi wanisalama kuköma, ‑Häö. Wanisala sa tä thaa noai ĩ sa tä thaa kota maapököö!‑ ĩ na makö pi kuu. Ĩ na makö pi kuu ha, Teusö a patanö makö nö läpo nö, makö täa koni. Makö täa konöma, ‑Teusö a patanö makö nö läpo noai, ĩ tä wanisala apö‑ makö pi kuu mai kitä. Ĩ na tä kua tä, Teusö a thapo mai, Teusö a patanö ĩ töpö õsi wanisalapama pasio mai, ĩ kama töpö pi wanisala päpaso wi, ĩ töpö nomasoma, Teusö a patanö ĩ töpö täapa kõo läo mai kitä. ‑Haö. Wanisala sa tä thaa noai, ĩ sa tä thaa kota maapököö!‑ ĩ na töpö pi kuu pasio mi kutenö, Teusö a patanö ĩ töpö täapa läo pasio kõo mai kitä. ¹¹Teusö a patanö makö pi wanisalapamanöma kutenö, ‑Wanisala ma tä thaa wi ĩ tä kuo päoö‑ ĩ na makö pi kuu matalo nö, ‑Kotĩtu tili töpö Teusömo wi ĩ töpö topa apa waikiowöö!‑ ĩ na ai ma töpö pi thama pi topa apama. Ai tänö wanisala tä thaa noai ĩ ma tä taa wanio opa nö, ĩ tä na makö pi honiho opama. Kamakönö sa hini pi topa apama. Teusö ma kai hini pi topa apa salo, ‑Ĩ a waninö wanisala tä thaa noai, ĩ tä noa na ma wani peama nököö!‑ ĩ na makö kuuma. Önö kutenö, ai wanö wanisala tä thama maaki, ‑Kotĩtu tili töpö makoka apa asa waikia‑ ĩ na samakö pi thamama.

¹²Ai wanö wanisala wa tä thaa noai, ĩ tä pi na waheta sa tä simöpa maama. Ai tä na ĩ tä wanisala thaa noai, ĩ tä pi na ĩ sa tä waheta simöpa hö̃töo maama. ‑Paulo ma pi ipa salo, ĩ ma hini pi topa apaö‑ ĩ na makö pi kuupö, ĩ waheta sa tä simöa pasia päpalöma. Teusö a patanö ĩ tä taö. ¹³Kamakönö samakö a hini pi topa apaö ha, samakö pi topa apama.

Samakö pi topa apa waikioma maaki, kamakönö Tito ma pi topa kopamanöma kutenö, huki samakö pi mönaha satia apaö. ¹⁴‑Tito a na kamisa aiki, “Kotĩtu tili töpö topa apa kitä” ĩ na sa kuu noai, ĩ ta pitilia apa totia kule‑ ĩ na kamakönö sa pi thamama. Kamakö na sa ta wäsä sinomo noai ĩ ta pitilio kuo opa noai na, ĩ na Tito a na sa kuu noai, ĩ na ĩ ta pitili kuo opa hö̃töo soatama. ¹⁵Kamakö na Tito a waloki ha, makö kilii, makö pi honipoö, ĩ na makö kua tä, ‑Hapo. Kamisamakönö wa kai a hini pi topa apati kuleö!‑ ĩ na Tito a na makö kuu noai, ĩ tä na Tito a pi tapotiki nö, makö pii pea apa kimati. ¹⁶Kamisa lö kui, ‑Makö pitilimo opaö‑ ĩ na sa pi kuu kutenö, sa pi topa apaö.

Masetônia tili töpönö Jesus a thapo wi ĩ töpö ö̃töo opa noai ĩ ta

¹Ipa pö! Masetônia tä uli pewö hamö töpö kokamo nö, töpö Teusömo wi, Teusö a patanö ĩ töpö totiapala apama kutenö, ĩ töpö kuati wi, ĩ tä na kamisanö makö pi hatukupama pi topa. ²Pe epii töpö pepalo opatima maaki, töpö pi topapalo satimo opama. Ĩ töpönö wani tä thapo opa mane maaki, töpö ö̃töo opama. ³Ĩ töpönö sitipa kökö wai thapo noai, ĩ tä see wai kuno mai, pe epii ĩ tä see totoki kipili. Kama töpö pi saimo nö, pe epii ĩ tä see totokö noai, ĩ tä hösöka na ai kökö sitipa makeköma. ⁴Ĩ kökö makekö nö, ‑Jutéia tä uli ha Jesus a thapo wi ĩ sama töpö pasilipo naiopököö! Hi wa kö sitipa tälölö nö, ĩ töpö na kökö totokötöö!‑ ĩ na kamisamakö na ĩ na masetônia tili töpö ku upama. ⁵Kamisamakö aiki, ‑Masetônia tili töpönö sitipa kökö totoa hãtoki kitä‑ ĩ na samakö pi kuu tä, ĩ töpönö sitipa kökö totoa sisa maama. Teusö kaikana tä na kama töpö õsi pewö totoa sapa kõa naiki nö, ‑Samakö simöaö!‑ pata tä na ĩ na ĩ töpö kuuma. Ĩ na kamisamakö na ĩ na töpö kua nömöoma. ⁶Ĩ na ĩ töpö kuama kutenö, Tito sama noa thaa nö, ‑Nii tä na töpö honimo pole, ĩ töpö na sitipa wa kö simöpalöpö, masetônia tili töpö na sitipa wa kö kolo naka kua waikioma kutenö, kotĩtu tili töpö na wa kö ola naka nömöo kõotöö! Ĩ töpö na wa kökö naka kõkölöö! Ai töpö honimo pasitile, ĩ töpö totiapala apapö, kotĩtu tili töpönö ai kökö sitipa totoa kõköpököö!‑ ĩ na Tito a na ĩ na samakö kuuma. ⁷Kotĩtu tili makö totiatalo opawö. ‑Jesus a pitili‑ ĩ na makö pi kuu totio sinomoö, Teusö ma kai a wäsä taö öpaö, pitili ma tä sai a taö öpaö, ai ma töpö pasilipo pi topa apaö, samakö pii ipaö, ĩ na makö kua totiatalo opatii. Önö kutenö, ‑Ai töpö honimo pole ĩ ma töpö totiapala pi topa apa nö, ma töpö täpäa totilöpököö!‑ ĩ na kamakö na ĩ na samakö kuu kule nökö.

⁸Kamisanö makö noa thaa pi topa mane maaki, masetônia tili töpö ö̃töo opa noai, ĩ sa ta wäsä päa kule. Ĩ ma ta hini nö, ĩ na makö ö̃tö kua naipasoma, ‑Kotĩtu tili töpönö ai töpö noima pitilia totio opawö‑ ĩ na samakö pi thama totio opa kitäö! ⁹Kamakö hai Jesus Cristo Kaikana tänö makö noima nö, makö totiapala apa noai ĩ ma tä taö waikia kule. Hi tä hẽtu ha Jesus Cristo anö kama hai ĩ tä pewö thapoma maaki, sanöma makö pasilipo pia salo, hi masita tä uli ha a itholo nö, a honimopalo opa kukö solöma. Ĩ ma tä pewö thalalöpö, a honimo kukö solöma.

¹⁰Pi naka. Ĩ na sa pi kuu kule. ‑Ai tä inama na kamakönö sitipa ma kökö totoa somaköma. “Sitipa ma kökö totoköpöö!” ai töpö pi kuu pola tä kuno mai, ĩ na makö pi kuu somama. Ma kö totoa pi topa apa salo, ma kö totoköma. Huki ma kö totoma mapo mi tä, kamakö na ĩ tä totiatalo opati kitäö!‑ ĩ na sa pi kuu nö, ĩ na sa kuu kule. ¹¹Ĩ ma kö pewö totoa hötötöa soaköö! Jutéia tili ma töpö täpä pi topa kua soma noai na, huki ĩ na ma töpö täpäa hötötöa thaa nömöa totilöö! Sitipa ma kö thapo pole, ĩ kökö na ma töpö täpäö! Pe epii sitipa ma kö thapo salo, pe epii sitipa ma kö totoköpö. Wani ipii sitipa ma kö thapo päa salo, wani ipii ma kö totoa päköpö. ¹²Ma töpö täpä pi topa apa tä, pe epii sitipa ma kö thapo pole, ĩ kökö na pe epii ma töpö täpäö ha Teusö a pata pi mönaha, ĩ na tä kua tä, wani ipii sitipa ma kö thapo pasile, ĩ kökö na wani ipii ma töpö täpäa pälöma, Teusö a pata pi mönaha hö̃töoö, ĩ na tä kuaö.

^13-14‑Ai töpö na Paulo a nako mai, kamakö na a nako pi topa apawö‑ ĩ na pö pi kuu hãto ti! ‑Huki sitipa ma kö thapo opa manu kule, ai töpö honimo pole ĩ ma töpö pasilipalöpöö!‑ ĩ na sa kuu päa kule. Ai ma töpö pasilipoö ha, waiha kamakö hai sitipa kökö na makö honimo nömököma, ma töpö pasilipo noai, waiha ĩ töpönö sitipa kökö thapo opa nömököma, ĩ töpönö makö pasilia sapa kõa hö̃töpali kitä. Ĩ töpö, kamakö, ĩ na makö kui makö kuo ösöhöati pasiopököö! ¹⁵Ĩ na Teusö tä waheta kuu naioö: ‑Pe epii ai tänö nii tä täa noai ĩ tä niinö a ösö potehepaso noai ha, ĩ tä nii see kuo maama. Ĩ na tä kua tä, wani ipii ai tänö nii tä täa pasilö noai ĩ tä niinö a ösö potehea totia hö̃töa päpasoma. Ĩ töpö pewö ösö potehea ösöhöa totipasoma‑ ĩ na tä waheta kuu.

Tito anö makö pasilipo pi topa apaö

¹⁶Kamisamakönö makö pasilipo pi topa kua wi na, ĩ na Tito anö ĩ na makö pasilipo pi topa kua naia kule. Teusö a patanö ĩ na Tito a thamama kutenö, ‑Aitaköö!‑ Teusö a pata na ĩ na samakö kuu. ¹⁷Tito a na, ‑Kotĩtu tili wa töpö pasilipopö, ĩ töpö na wa huu mi salo‑ ĩ na samakö kuu ha, ‑Awai‑ ĩ na a kuu hö̃töoma. Samakö kuu paio mai ha, kamakö na Tito a huu pi topa apa somama. ¹⁸Tito a, Jesus a thapo wi ĩ ai tä, ĩ na kilii, kamakö na sama töpö simöpali ke. Jesus a thapo wi, Tito a na ĩ tä huu naine, ĩ a kateha nö, ‑Ĩ anö Jesus ta topa apöle ĩ ta wäsä makoka apatiwö‑ ĩ na ĩ tä uli pewö hamö töpö Teusömo sinomo wi, ĩ na ĩ töpö kuu. ¹⁹Ĩ töpö Teusömo sinomo wi ĩ töpönö ĩ a simönö nö, ‑Jutéia tä uli ha Paulo anö sitipa kökö kai huulö tä, Paulo a na a nokapalolöö!‑ ĩ töpönö ĩ na ĩ a noa thama. Jutéia tili töpö na ĩ sitipa sama kö totoa piale, ĩ sitipa sama kö totoköma, ‑Aitaköö! Teusö a pata totiatalo opa asawöö!‑ ĩ na ai töpö kuu kitä. ‑Paulo töpönö ai töpö pasilipo pi topa apawö‑ ĩ na ĩ töpö kuu naio kitä.

²⁰‑“Jutéia tili töpö na sitipa kökö satehe epii kökö simöpa piale, ai sami tänö ĩ kökö sitipa kai hulasolö wi, ĩ tä wanisala. Polakapi makönökö totiwöö!” ĩ na töpö kuu matimöö!‑ ĩ na samakö pi kuu salo, kamakö na polakapi sama töpö simöpali pia salo. ²¹Sama tä thama makoka pi topa kule. ‑Paulo töpönö tä thaa pole, ĩ tä makoka waikia kuleö!‑ ĩ na Teusö sama pi thama pi topa apaö. Ĩ na sanöma sama töpö pi thama pi topa naio soataö.

²²Önö kutenö, kamakö na Tito a, Jesus ta topa apöle ĩ ta wäsä makoka apa wi ĩ a, ĩ na kilii töpö na ai tänö Jesus a thapo wi ĩ sama simöa naipali ke. Ĩ sama wapa waikioma. Ĩ sama simöaö ha, ĩ anö samakö pasilipo pi topa sinomoö. Huki ĩ aiki, ‑Kotĩtu tili töpönö Teusö a pata hini ipa salo, töpö ö̃tö öpö kitä‑ ĩ na a pi kuu salo, kamisamakönö ĩ sama simöaö ha, samakö kai a hinia totilö nö, kamakö na a hua naisolö pia salo. ²³Kamisa na Tito a kalipalo sinomo wi ĩ a. Kamakö pasilipopö, Tito a solo samakö kalipalotii. Jesus a thapo pole ĩ töpö kokamo sinomo wi ĩ töpönö Tito a na ai polakapi töpö simönöma kutenö, Tito a na ĩ töpö nokapaloti kule. ‑Cristo a totiatalo opawöö!‑ ĩ na ĩ polakapi töpönö ĩ na ai töpö pi thama sinomoö. ²⁴Önö kutenö, ‑“Kotĩtu tili töpö totiatalo opaö” Paulo a kuu wi, pitili ta. Hiki. Paulo anö töpö simönö noai, kotĩtu tili töpönö ĩ töpö noima apama‑ ĩ na Jesus a thapo pole, ĩ töpö kokamo hätäpo sinomoti wi, ĩ na ĩ ma töpö pi thama totihopöö!

Jesus a thapo wi ĩ töpö honimoti pole, ĩ töpö na sitipa kökö totoma wi ĩ ta

¹Jesus a thapo wi ĩ töpö honimoti pole, ĩ töpö na sitipa kökö totoma wi, ĩ tä na makö pi hatuka waikia kutenö, ĩ tä pi na sa tä sãöka kõataloti kitä ta o? ²Töpö honimo wi ĩ ma töpö pasilipo pi topa waikia kule. Masetônia tili töpö na kamisa aiki, ‑Akaia tä uli ha kotĩtu tili töpö kulati, ĩ töpö topa apa thaliö! Jutéia tili töpö honimo pole, ai tä inama ha akaia tili töpönö ĩ töpö pasilipo pi topa waikioma‑ ĩ na sa kuuma. Ĩ na sa kuuma kutenö, masetônia tili töpö pewönö töpö honimo wi ĩ töpö pasilipo pi topa hö̃töa kule. ^3-4‑“Kotĩtu tili töpönö sitipa kökö totoma pi topa waikia kuleö!” ĩ na Paulo a kuu pole, ĩ ta holisi hãtoa‑ ĩ na ai töpö kuu maapö, kamakö na ipa sa töpö simöpa pia kule. Kamakö na sa huu haia tä, kamisa na ai masetônia tili töpö huu naio haioma, kamakö na samakö waloa haiki nö, ‑Häö. Hi kotĩtu tili töpönö sitipa kökö kokapa mai ha, töpö kua soatileö!‑ ĩ na masetônia tili töpö kuu ha, sa kili ipa kitä. Kamakö kilia apa naiso kitä. ‑Kotĩtu tili töpönö töpö honimo opöle, ĩ töpö pasilipo pi topa salo, sitipa kökö kokapa waikile kitä‑ ĩ na sa kuu waikioma kutenö, sitipa ma kö kokapa mai ha, makö kua soati ha, sa kili ipa kitä.

⁵Önö kutenö, sa simöpa piale, ĩ töpö na sa hapalo nö, ‑Kotĩtu tili töpö aiki, “Ai ma töpö pasilipali pia salo, sitipa ma kö kokapali kitäö!” ĩ na ĩ töpö kuu waikioma kutenö, ĩ töpö na makö huu paio nö, “Ĩ ma kökö sitipa koka waikipalöma?” ĩ na pö kuu! Ĩ na makö kuu ha, “Ma” töpö kuu hö̃töoö ha, “Ĩ kökö koka haitalöö! Paulo a huu haio pialeö!” ĩ na pö kuu!‑ ĩ na ipa sa töpö noa thama. Kamakö na sa waloiki nö, kamakö na sa nako wani ipö kitä. Kamakö aiki, ‑Kamakö na ĩ töpö nako opaö ha, sitipa ma kö totoa päköpö‑ ĩ na makö pi kuu mai, ‑Ĩ ma kö sitipa totoa pi topa salo, ma kö sitipa totoköpöö!‑ ĩ na makö pi kuupökö.

Teusö a patanö makö täpäa hö̃töli kitä

⁶Ĩ na sa kuu kule. Wani ipii ma kö totoki ha, wani ipii Teusö a patanö makö täpäa nomöa hö̃töa soali kitä. Pi naka. Hikali a ha polakapi nii wa mokö wai tököma, ĩ mokö ãkehesoma tä, polakapi wa mokö täa kõanani. Ĩ na tä kua tä, satehe epii wa thomokö tököma, ĩ mokö ãkehelasoma, satehe epii wa mokö täalali. ⁷Ĩ na tä kua kua wi na, ĩ na makö kua hö̃töopö. ‑Ĩ na sitipa kökö kui sa kö totoki pia salo‑ ĩ na wa pi kuu kua noai na, ĩ na kökö kui wa kö totoköpö. Wa pi mönaha apöiki nö, wa töpö täpä wi, Teusö a patanö ĩ wa pi ipa kitä. Önö kutenö, wa kö sitipa totoa wani tä, kökö sitipa totoa tihöö! ‑Ai tänö sa noa thaa läatalo kutenö, sa kö totoa päoö‑ ĩ na wa pi kuu maikö. ⁸Teusö a patanö makö totiapala apa taö öpa kutenö, makö honimo mai, makö kulahamo toitio kitä. Makö kulahamo waikia kutenö, ai ma töpö totiapala apa hö̃töo nö, pe epii ai ma töpö pasilipopököö! ⁹Pi naka. Ĩ na Teusö tä waheta kuu: ‑Ai töpö honimo opati wi ĩ anö ĩ töpö täpä hätäpoö. Ĩ anö töpö totiapala apati wi ĩ tä mapo mai kitä‑ ĩ na ĩ tä waheta kuu.

¹⁰Nii mokö tösa sinomo wi ĩ a na Teusö a patanö mokö totoma sinomoö. Ĩ mokö totokö nö, nii tä totoma nömöoö. Ĩ na tä kua kua wi na, ĩ na Teusö a patanö makö täpä nö, ma tä thapo wi, ĩ tä pala apöpamani kitä. Teusö a patanö ĩ tä pala totimani salo, ai ma töpö totiapala apa nö, ma töpö täpä äpa hö̃töopököö! ¹¹Teusö a patanö makö totiapala apa nö, makö täpä kuköma, ai töpö na makö ö̃töa apöpaso kitä. Kamisamakö na sitipa ma kö simöpa piale, ai töpönö ĩ kökö sitipa tälö nö, Teusö a pata na ĩ töpö hapalo nö, ‑Aitaköö! Kawanö hi sitipa wa kö simöpali ke‑ ĩ na ĩ töpö kuu kitä. ¹²Teusö a thapo wi ĩ ai ma töpö täpälö nö, ĩ töpö honimo wi, ĩ ma tä mapamani kitä. Ĩ töpö honimo wi, ĩ ma tä mapamanö nö, ‑Teusö a pata! Aitaköö! Kawanö samakö totiapala apawö‑ ĩ na satehe epii ĩ ma töpö thama naio kitä. ¹³‑Kotĩtu tili töpö aiki, “Jesus Cristo ta topa apöle ĩ ta pitili ipö” ĩ na ĩ töpö kuu nö, ĩ ta hinia totilö noa‑ ĩ na ma töpö täpä kuköma, ĩ na ma töpö thama kitä. Teusö a pata na ĩ töpö aiki, ‑Hapa. Aitaköö! Kamisamakö, ai töpönö Cristo a thapo wi ĩ töpö, ĩ na samakö kui samakö pewö na kotĩtu tili töpö ö̃töo opama‑ ĩ na ĩ töpö kuu kitä. ¹⁴Teusö a patanö makö noima apa nö, makö totiapala apama kutenö, ĩ töpönö makö pi ipa hö̃töo nö, Teusö a pata na makö a wäsä kuki kitä. ¹⁵Kamakö pewö na Teusö a patanö tä noa apa toti ipii, ĩ tä totopö noai, ĩ tä na, ‑Aitaköö! Wa totiatalo opawöö!‑ ĩ na Teusö a pata na, ĩ na makö pewö kutipököö!

‑Teusö a patanö sa simönö noai ĩ sa totiwö‑ Paulo a kuu totio noai ĩ ta

¹Kamakö na ĩ na Paulo sa kuu pia kule. Ai makö aiki, ‑Kamisamakö na Paulo a kutia tä, a hapalo lotetea apa mai maaki, kamisamakö na waheta tökö simöpali wi ĩ tökö waheta na a hapalo lotetea apa sisawö‑ ĩ na makö kuu. Cristo a noimo opa nö, opii a hapalo kua noai na, ĩ na opii sa hapalo kua pi topa hö̃töoö. ²Önö kutenö, kamakö na sa waloa kõköma, ‑Sa noimo mai, sa hapalo lotetea apa nököö!‑ kamakönö ĩ na sa pi thama tihöö! ‑Cristo a thapo mai, ĩ töpö pi tapomo kuati wi na, ĩ na Paulo a pi tapomo kua hö̃töoö‑ ĩ na ai makö kuu ha, sa hapalo lotetea apa nö, makö päsäpa matimö. ³Sai tä sai pata hai ĩ töpö na samakö uni wasu ekuo tä, samakö kasiapalo opatii. Cristo a thapo mai ĩ töpö na samakö pilia tikilia kule maaki, ĩ töpö kasiapalo opati pola nö, töpö pi tapomo kuati wi na, ĩ na samakö pi tapomo kua pasio mai kitä. ⁴Cristo a thapo mai, ĩ töpö holisi kasiapalo opati nö, kama töpö õsi ha töpö mamo teteo sapamo pätioö. Ĩ na töpö kuati kua wi na, ĩ na samakö kua pasio mai kitä. Sai tä sai pata hai ĩ töpö na samakö kasiapaloti nö, Teusö a pata mosawi ipii, a lotete epii, ĩ tä na samakö mamo teteo sisatioö. Teusö a pata lotete epii, ĩ sama thapo kutenö, Sai tä sai pata hai ĩ töpö lotete epö hö̃töi, ĩ sama töpö utitipama sinomoö. ⁵Sai tä sai pata thapo wi ĩ töpö hapalo holisimo wi, ĩ sama ta utitipamani, Teusö a kai ha ai sanöma töpö pi hatukupo maapö, Teusö a kai na ai töpö hapalo pi wasöa apati wi, ĩ sama ta mapamani, ĩ na samakö kuaö. ‑Cristo sa hini pi topa apa salo, ĩ a na sa pi tapomo sisaköpöö!‑ ĩ na sama töpö pi thamaö. ⁶Kamakönö Cristo ma hini taö totiköma tä, ai wanö Cristo wa hini pasio mi tä, kamisamakönö ĩ wa wasua läli kitä.

⁷Hösöka ha tä kua pätile, ĩ ma tä möö sisatiowö. Ĩ ma tä möö sisatio nö, ‑Paulo a utiti ipö‑ ĩ na makö kutiwö. ‑Cristo anö sa simöa asa wi ĩ sa‑ ĩ na ai wa kuu kule? Ĩ na ai wa pi kuu tä, ‑Cristo anö sa simöa kuati wi na, ĩ na Paulo töpö simöa kua naioö‑ wa pi kuu mi salo. ⁸Ai wanö sa kilima mai kitä. Cristo anö sa simöa wi ĩ sa pasiwö. Kamisanö makö pi utitipama mai, makö pi lotetea totipamanöpö, Cristo anö sa simöpalöma. Önö kutenö, ‑Cristo anö sa simöa totio wi ĩ saö!‑ ĩ na sa kuu kili mi ipö. ⁹‑Paulo anö makö kilimanöpö, ĩ waheta tökö simöpalöma‑ pö pi kuu ti! ¹⁰Ai makö aiki, ‑Waheta tökö na Paulo a hapalo lotetea apa nö, makö päsäpa sai maaki, kamakö na a hamomo solö tä, a utitia apöpalo nö, a hapalo kili ipa thali nökö‑ ĩ na ai makö kuu kitä. ¹¹Ĩ na ai makö kuu wi ĩ makö aiki, ‑Pai pamö Paulo a kua tasoa tä, kamakö na ĩ anö waheta tökö simöpa wi, ĩ tökö waheta na a hapalo kua wi na, ĩ na kamakö na a kua tä, ĩ na a hapalo kua hö̃töo kitäö!‑ ĩ na makö pi kuu totiopöö!

¹²‑“Samakö totiatalo opa asa kuleö!” ĩ na ai töpö pi kuu wi, ĩ töpö kua kuati wi na, ĩ na samakö kua kua hö̃tötioö‑ ĩ na samakö pi kuu mi. ‑Ĩ töpö na samakö totiatalo satia apaö‑ ĩ na samakö pi kuu hö̃töo mi. ‑Ai töpö pi hatuka hãtoa kule maaki, kamisa pi hatuka satia apa‑ ĩ na ĩ töpö pi kuti kule maaki, ĩ töpö pi moti ipö pasiwö. Ĩ töpö aiki, ‑Ai töpönö samakö uöma tä, ĩ töpö topa. Samakö uöma mi tä, ĩ töpö tomöpo mi ipö‑ ĩ na töpö pi moti ipii, ĩ na ĩ töpö kuu. ¹³Teusö a patanö samakö simöa mi tä, kamisamakö aiki, ‑Sa kuati wi ĩ tä topa apa‑ ĩ na samakö kuu päo mai kitä. Teusö a patanö samakö simöa tä, ‑Teusö a patanö samakö simöpalöma kutenö, sa kuati wi ĩ tä topa‑ ĩ tä, ĩ na samakö kuu sisa kitä. Kamakö na Teusö a patanö samakö simöa hö̃töpalöma. ¹⁴Kamakö na samakö waloiki nö, Jesus Cristo ta topa apöle, ĩ sama ta wäsä hö̃töoma. Kamakö na samakö simöpalöma kutenö, tole hamö ai töpö kule, ĩ töpö na sama ta wäsä hinimoma maama.

¹⁵Önö kutenö, tiko tä uli hamö ai töpönö Cristo ta wäsä waikio noai, ĩ tä uli ha sa waloikitö nö, Cristo sa ta wäsä nömöoma, ‑Hiki. Hi töpö na Cristo sa ta wäsäma kutenö, hi töpönö Cristo a thapoö‑ ĩ na sa kuu wi sa mai kitä. Ĩ tä uli ha ai töpönö Cristo ta wäsä waikio tasoma kutenö, ĩ na sa kuu mai kitä. Kamakö kule ha, ĩ ha samakö kalipalo pi topa kõa kule. Samakö kalipalo kõoö ha, Cristo a na makö mamo teteiki nö, ‑Cristo a pitili‑ makö pii kuu totio wi ĩ tä palasopöö! ¹⁶Cristo ma thapo waikio noai ha, kamakö kule, ĩ tä uli tole hamö Cristo a thapo mai, ĩ töpö na ta topa apöle sama ta wäsä nömöo tasopöö! Tiko tä uli ha ai töpönö Cristo ta wäsäö ha, ai töpönö Cristo a tälö noai, ĩ sama töpö a kateha nö, ‑Kamisa kainö ĩ töpönö Cristo a tälöma‑ ĩ na sa hole kuu wani ipö.

¹⁷Ĩ na Teusö tä waheta kuu: ‑“Sa totiatalo opawöö!” ĩ na a kuu tihöö! “Teusö anö sa totiapala apati kutenö, sa totiatalo opati asa päoö” ĩ na a kuu sisaöö!‑ ĩ na tä waheta kuu. ¹⁸‑Sa totiatalo opawö‑ ĩ na kama wa pi kuu päoö ha, tä topa mai kitä. ‑Wa totiatalo opawö‑ Teusö a pata pi kuu wi, ĩ tä topa sisaa.

‑Cristo anö sa simöa wi ĩ sa‑ töpö holisi kuu wi ĩ töpö

¹Sa osemo kule maaki, sa kai a hiniheö! ²Teusö a patanö makö pi ipa salo, makö noama kua wi na, ĩ na kamisanö makö pi ipa nö, makö noama kua hö̃töoö. Pö̃ anö pete a totoa thaki wi na, ĩ na Cristo a na kamisanö makö totoa thaa hö̃tököma. Ai wano tä na kama pete a sapäko paio mai ha, sami peanopö a na kama pete a totoa pi topa kua wi na, ĩ na Cristo a na kamisanö makö wanisala mai ha, ĩ na ĩ makö totoa pi topa kua hö̃töoö. ³Makö toita apii makö totoa pi topa kule maaki, makö wanisala hãto pikio kitä. ‑Sai tä pi pata mosawi ipii, ĩ anö Epa a mönama kua noai na, ĩ na makö mönama kua hö̃töo hãto kitä. Makö mönamaö ha, Cristo ma pi ipa totio sisa wi, ĩ ma tä hosa hãtoa pikili kitä‑ ĩ na sa pi ku upa pikia kule. ⁴Jesus ta topa apöle ĩ ta makoko opii, kamakö na ĩ sama ta wäsäö ha, ĩ ma ta hininö nö, Teusö a õsi kua tolele, ĩ ma täli kipili. Ĩ na makö kuama maaki, huki kamakö na ai töpö waloköma, Jesus ta wäsä makoko mi päla tä maaki, ‑Ĩ ta kuno maiö!‑ ĩ na makö kuu mi ipö. Teusö a õsi kua tolele, ĩ ma tälöma maaki, ‑Ai tiko tä tälöpöö!‑ ai töpö kuu pole, ĩ ma ta hini nömöoö.

⁵Kamakö aiki, ‑Cristo anö kamakö na ĩ töpö simöa nömöpalö noai, ĩ töpönö ta taö satia apa asaö‑ ĩ na makö pi kuu kule maaki, ĩ töpö na sa komoapalo pasio mai kitä. ⁶Sa hapalo tai mi, ĩ sa wani pasiwö maaki, Teusö sa kai a taö öpa hö̃töoö. ‑Paulo anö tä taö öpawö‑ kamisanö ĩ na makö pi thama waikitioma.

⁷Kamakö na sa kutia tä, makö tolehepamanöpö, kama sa komoa sapatalo kõo pasitioma. Kamakö na Teusö ta topa apöle ĩ sa ta wäsäti tä, kamakö na sa nako maama. ‑Kamakö na Paulo a nako maa noai, ĩ ta wanisala apöle‑ makö pi kuu hãtoakö? ⁸Jesus sa ta wäsä wi ĩ tä na makö pasilipali pia salo, ai tiko töpö Teusömo hätäpo sinomoti wi ĩ töpö na sitipa sa kö täa sisalöma. ⁹Kamakö na sa kutia tä, sitipa kökö na sa honimoti kipili maaki, kamakö na sa nako maapili. Masetônia tili töpönö Cristo a thapo pole, ĩ ai töpö waloiki nö, ĩ töpönö sa täpä pasio päo kipili. Kamakö na sa nako maa kuapili na, ĩ na waiha ĩ na kamakö na sa nako kua mai kitä. ¹⁰Cristo a pitilimo kua wi na ĩ na sa kua hö̃töoö. ‑“Kamakö na sa nako asa mai kitäö!” wa kuu pole, ĩ na a kuu kota tihöö!‑ ĩ na ai akaia tili wa kuu kitä maaki, ĩ na sa kuu mapo mai kitä. ¹¹‑Paulo anö makö pi mi salo, ĩ na a kuu kule‑ pö pi kuu ti! Kamisanö makö pi ipawö. Sa kuu wi, Teusö a patanö ĩ tä taö öpa waikia.

¹²‑Cristo anö hi töpö simöa nömöpalöma‑ makö kuu pole, ĩ töpö aiki, ‑Paulo a kua kuati wi na, ĩ na samakö kua kua hö̃tötia‑ ĩ na ĩ töpö kuu maapö, kotĩtu tili makö na sitipa sa kö naka mai, sa pi moti kutio pia salo. ¹³Cristo anö ĩ töpö simöpa maama. ‑Cristo anö samakö simöpalö noai, ĩ samakö kutenö, sama ta wäsämö huu ke‑ ĩ na ĩ töpö holisi kuu päoö. ¹⁴Ĩ töpö holisimo wi, ĩ tä aipö mai kitä. Ĩ töpö kutio kuo päo wi na, ĩ na Sai tä sai pata kuo kuo naio pätioö. Ãju tä wakala apii, a mömomö toita apii, ĩ a tapamo kua wi na, ĩ na Sai tä sai patanö sanöma makö mönama pia salo, a wakala apii, ĩ na a tapamo kua hö̃töoö. ¹⁵Önö kutenö, Sai tä sai patanö töpö simöpa sinomo wi ĩ töpö kutenö, ĩ töpönö ai makö mönama nö, ‑Cristo anö ĩ töpö simöpa totio wi ĩ töpö‑ ĩ na makö pi thama matatä. Ĩ töpönö makö mönama noai ĩ tä noa na Teusö a patanö ĩ töpö peama hö̃töo kitä.

‑Cristo sa ta wäsätima ha, sa pepalo opatima‑ ĩ na Paulo a kuu noai ĩ ta

¹⁶‑“Paulo a hapalo osemo opati pole” ĩ na ai wa pi kuu maikö‑ ĩ na sa kuu kule maaki, ‑Paulo a hapalo osemo soa päatalo opatiwöö!‑ ĩ na makö pi kuu hãto kitä. Ĩ na makö pi kuu hãtoa tä, sa hapalo osemo opa wi, ĩ ma ta hini pätaö! ‑Ĩ töpö holisimo opati wi ĩ töpö na sa hösökapalo asaö‑ ĩ na sa kuupö, sa hapalo osemo päa kule. ¹⁷‑Ĩ na wa kuu totihoö!‑ kamisa na ĩ na Teusö a pata kuu maa päo noai ha maaki, kamakö na ĩ sa ta kateha päa kule. ‑Ĩ töpö na sa hösökapalo opa asa wi sa pasiwö‑ sa kuu päla nö maaki, sa kuu osemo päa kitä. ¹⁸Teusö a thapo mai ĩ töpö satehe epii töpö aiki, ‑Kamisa hösökapalo opatii‑ ĩ na ĩ töpö kuu kuati wi na, ĩ na sa kuu hö̃töa päa kule. ¹⁹Makö pi hatuku upii maaki, ai töpö pi moti ipii ĩ ma töpö hini ipa nö kiliawö. ²⁰Ai töpönö makö simöa sinomoö, kamakö hai ĩ wani tä suatalatii, makö mönama apatii, makö komoapalama apatii, makö nakö tökö uni soa pikiatala apatii, ĩ na ĩ töpönö ĩ na makö thamati kule maaki, ĩ töpö na makö sömöka taa pi topa apa pikia nö kiliale. ²¹Kamisa aiki, ‑Samakö kili ipa salo, ĩ töpönö makö thama kua wi na ĩ na kamisamakönö ĩ na makö thama mane‑ ĩ na sa kuu kili kule maaki, ĩ na sa kuu kule.

Ai töpö aiki, ‑Hiki. Ĩ na sa kua asa kutenö, sa topa apa waikile‑ ĩ na ai töpö kuu tä, ĩ na kamisa kuu hö̃töa kule. Sa hapalo osemo kõa kule. ²²Ĩ töpö hai, epöteu töpö asawö? Ma. Kamisa hai ĩ epöteu sa naiwö. Ĩ töpö hai, isöhaeu töpö sisa mai kitä. Isöhaeu sa hö̃töwö. Ĩ töpö aiki, ‑Abraão samakö olaö!‑ ĩ töpö kuu kua wi na, ‑Abraão sa ola naiwö‑ ĩ na sa kuu hö̃töoö. ²³Cristo a na ĩ töpö kalipalo sinomoö? Cristo a na sa kalipalo kasiapalo opa satia apaö. Awai. Sa hapalo polemoti kule. Cristo a na ai töpö kalipaloti kule maaki, Cristo a na sa kalipaloti nö, sa kasiapalo hasua apa asaö. Sai a titita wi ĩ a sai ha ai töpönö polakapii ĩ töpö titia pi thapali, polakapii ĩ töpö soa pi thapali, ĩ na ĩ töpö thamama maaki, ai töpönö satehe epii ĩ na sa thama pi kuama. Satehe epii sa moni noma pi kulasoma. ²⁴Wanisala tä thaa wi, juteu töpönö ĩ töpö soapa sinomo kua wi na, ĩ na ĩ töpönö sa thama hö̃töoma. 39 töpö soapa pi thama kua wi na, 39 sa soapa pi thaa hö̃töpalöma. Juteu töpönö sa soa kõatalo opa wi, ĩ 5 sa soa pi thapalömae. ²⁵Ai pata töpönö hii tinö sa säti wi, sa sä kõo, sa sä kõo, sa sä kõo, ĩ na sa sä pi thapalömae. Ai töpönö kamisa na maa ma säsäpi wi, ĩ manö sa moni säpalöma. Kutiata a hamö sa huu tä, ĩ kutiata a waniapasoö, waiha ai a kutiata ha sa titia kõa tä, ĩ ösö wania kopasoö, waiha ai a kutiata ha sa titia tä, ĩ ösö wania kopasoö, ĩ na ösö kö kua apatima. Ĩ na tä kua tä, mötati tuu mötali pata ha, kutiata ösö asawösö wai ha sa pi kalä halua soa tä, tä halusoö ha ĩ tä soawö wakalai ha sa pi kalä soa, ĩ na sa kuatima.

²⁶Piliso hamö pai hamö satehe epii sa huu pi kupasoö, maa tuu õkinö sa peama apaö, töpö thomömo sinomo wi ĩ töpö na sa mamo läapalo opa naia pikitia, ipa ai juteu töpö sai maaki, sa peama pi topa naia pikia, juteu töpö pasi mai ĩ töpönö sa peama pi topa apa naia, sai a satehe epii sai pö hö̃kököa apöle, ĩ ha sa moni säpalihe, sanöma töpö pilia mai, ĩ poke tä uli ha sa moni säpali, mötati tuu mötali pata ha sa nasi moni tupaso tasoö, ‑Teusö sa thapo wi ĩ sa‑ ĩ na ai töpö holisi kuu wi ĩ töpönö sa säpa pi topa apa pikitioöhe, ĩ na sa thama totioma. ²⁷Pe epii sa kalipalo wasiso opatima. Mumai ha sa mio mai, satehe epii ĩ na sa kua pi kupasoma. Sa oi ipö, sa amisi ipö, ipa haloi ösö mi kutenö, sa wati ipö, satehe epii ĩ na sa kua pi kupotima. ²⁸Ĩ na tä kua tä, Cristo a thapo wi ĩ töpö kokamo nö, töpö Teusömo hätäpoti wi, ĩ töpö pewö na sa pi honipo opa nö, ‑Ĩ töpönö Cristo ta hini mi toti hãtowökö‑ ĩ na sa pi kuu nö, sa pi aulumo soatalo opatii. ²⁹Ai tä õsi utiti tä, sa õsi utitia naia soatalo opatii. Ai tä mönama wi, ĩ anö wanisala tä thaa kuköma, sa pi ota apatii.

³⁰‑Ĩ na sa kua asawö‑ ai tänö ĩ na sa pi thama tä, ‑Hiki. Sa pepalo opati kutenö, sa utitia apa wi ĩ sa pasiwö‑ ĩ na sa kuu kitä. ³¹Jesus Kaikana tä hai ĩ pö̃ Teusö a na, ‑Wa totiatalo opa asatioöö!‑ makö kuu mapo mai, ĩ Teusö anö sa pitilimo opa wi, ĩ tä taö öpa waikia kule. ³²Pi naka. Tamaasöku tä uli pata ha sa kua tä, ĩ pö sai hokolole, ĩ taka holele ha sa hua lälöpö, ĩ taka kolo ha ai töpö läpalotima. Atetasö kaikana a patanö ai pata tä simöa sinomo noai, tamaasöku tili töpö na ĩ pata tä simöo toleo sinomoti noai, ĩ a patanö sotatu töpö lämaköma. ³³Ĩ pata tä kai simöoö ha, sotatu töpönö sa moni huölöma maaki, ai töpönö wöö a pata na sa titia läiki nö, tä hokolole, ĩ tä tutakö pata ha taka möö wi, ĩ taka wai kuamö kule hamö sa pi atupamanö nö, sa pi ithopamanöma. Sa pi ithopamanöma, sa tokösolöma.

Paulo a na uni tä tapamonaso noai ĩ ta

¹‑Ai töpö na sa hösökapalo opa asaö‑ sa kuu wi, ĩ tä topa mai kitä maaki, ĩ na sa kuu kõa kule. Kamisa na Jesus Kaikana tänö uni tä tamanani, kamisa na ta hasulupamani, ĩ na ĩ tä kua noai ĩ sa ta wäsä pia kule. ²Sutu ha, 14 tä inama kua soma tä, ai tänö Cristo a thapo wi ĩ sa taö öpa wi, hi tä hẽtu hamö Teusö a patanö ĩ a tälölöma. Pili a õsi hua hãtoa pälasolöma. Sa tä tai mi. Teusö a patanö tä taö sisaö. ³Hi tä hẽtu ha Teusö a pata kupoli, ĩ anö ĩ tä uli hamö ĩ a wani täpölöma. Pili a õsi hua hãtosolöma. Sa tä tai mi. Teusö a patanö tä taö sisaö. ⁴Ĩ hamö ĩ a kai wani kopolö nö, ta hasulupamanö noai, ĩ ta aipöo opama. ‑Ai sanöma töpö na ta wäsä tolea nömöo maapöö!‑ Teusö a pata pi kuuma kutenö, ĩ ta aipöo opama. Ĩ aipö ta hinimanöma. Pi naka. Hi tä hẽtu hamö sa hulasolö noai, ĩ sanö ĩ ta hini noai, ĩ kamisa. ⁵‑Hi tä hẽtu hamö sa huu asa laso noai, ĩ tä topa apa‑ ĩ na sa kuu kitä maaki, ‑Ai töpö na sa hösökapalo opa asaö. Kamisa topa apa asaö‑ ĩ na sa kuu mai kitä. ‑Sa utitio opa wi ĩ tä topa apa sisaö‑ ĩ na sa kuu sisa kitä. ⁶Sa ta wäsä wi ĩ pitili ta kutenö, ‑Ai töpö na sa hösökapalo opa asaö‑ ĩ na sa kuu pi topa aköna, ‑Paulo a hapalo osemo hãtoa kule‑ ĩ na sa töpö pi thama mana pi. Ĩ na sa töpö pi thama mana pi maaki, ‑Ai töpö na sa hösökapalo opa asaö‑ ĩ na sa kuu mai kitä. ‑Paulo anö uni tä talali, aipö ta hinini, ĩ na Paulo a kua asama kutenö, a topa apa asawö‑ ĩ na ai wa pi kuu maapököö! ‑Kamisamakö na Paulo a kutia tä, a toita apii a kutia, Teusö ta wäsä makoka apatii, ĩ na Paulo a kuatima kutenö, Paulo a topa apatii‑ ĩ na makö kuupökö.

⁷‑“Kamisa na Teusö a patanö tä aipö öpii tä möma asama kutenö, ai töpö na sa hösökapalo opa asaö” ĩ na Paulo a pi kuu matimöö!‑ ĩ na Teusö a pata pi kuu salo, mösökö tänö sanöma makö hĩo kuköma, mösökö tä hasilipo opa kua wi na, ĩ na tä kua wi ĩ tä uninö sa hasilipamanöma. Kamisa na Sai tä sai pata sapäko opa nö, sa hasilipamanöma. ‑Ai töpö na sa hösökapalo opa asaö‑ ĩ na sa kuu maapö, sa hasilipama apatii. ⁸‑Sa hasilipo opati wi ĩ tä mapamanöö!‑ ĩ na Teusö a pata na sa kuuma maaki, tä mapama maama. Tä mapo mi ipö ha, ‑Tä hosalöö!‑ sa kuu kõoma maaki, tä mapo maama. Ĩ tä noa ha, ‑Tä hosa mi salo‑ ĩ na sa kuu kõoma maaki, tä hosapa maama. ⁹Sa peati tä, Teusö a pata aiki, ‑Kamisanö wa noima apa nö, wa totiapala apati wi, ĩ tänö toitai wa kutio kitä. Wa utiti ipö tä, sa lotete epii ĩ tänö wa lotetea naipaso kitä‑ ĩ na Teusö a pata kuu hö̃töoma. Ĩ na a kuu ha, sa utiti päla tä maaki, ‑Aitaköö! Sa utiti ipö kutenö, Cristo a lotete epii ĩ tänö sa lotetea hö̃töpaso kitäö!‑ ĩ na sa kuu kitä. ¹⁰Cristo a na sa kalipaloti tä, sa utiti, sa aulumo opatii, ai töpönö sa komoapalama apatii, sa wasiapalo opaö, ai töpönö sa peamaö, sa pi häamo opaö, ĩ na sa kuati kule maaki, sa pi topapalo satia apatii. Sa utiti tä, Cristo anö sa loteteapalama apati ha, sa pi mönaha satia apa hö̃töa.

Kotĩtu tili töpö na Paulo a pi honipo wi ĩ ta

¹¹Sa hapalo polemoti nö, ‑Sa hösökapalo opa asaö‑ sa kuu pole, kamakönö ĩ na sa thama kule. Kamakö aiki, ‑Paulo a totiatalo opa asa kutenö, sama hinikö o!‑ ĩ na makö kuu mai ha. Pata sa mai maaki, ‑Cristo anö sa simöa asapalö noai ĩ sa asawö‑ ĩ na ai töpö holisi kuu wi, ĩ töpö hösökapaloö, kamisa komoapalo pasia, ĩ na tä kua wi tä kua mai kitä. ¹²Kamakö na sa kutia tä, Cristo a na sa kalipalo mapo maama. Sa kalipaloti tä, Teusö a patanö sa lotetea apöpamanöma kutenö, sa tä aipama apati nö, töpö salia apati wi, ĩ ai sa töpö toapama kotioma. Sa tä aipama apatima ha, kamakö aiki, ‑Cristo anö töpö simöa asapalö noai, Paulo a hai, ĩ ai a‑ ĩ na makö kuupökö. ¹³Cristo a thapo wi ĩ töpö kokamo nö, töpö Teusömo hätäpoti wi, ĩ sa töpö totiapala kuati noai na ĩ na makö totiapala kua hö̃töoma. Makö totiapalatima maaki, kamakö na sa nako mai, ai töpö na sa nako sisama. ‑Ai töpö na Paulo a nako asa noai, ĩ tä wanisala‑ ĩ na makö pi kuu hãtoa alu kule? Ĩ na makö pi kuu tä, kamakönö sa hĩsu thaa wi ĩ tä matamanöheö!

¹⁴Kamakö na polakapii sa huu pi kua waikipasoma. Huki kamakö na sa huu pi topa kõa kule. Ĩ ha sa waloa koiki nö, kamakö na sa nako mai kitä. Ma tä thapo wi ĩ sa tä pii mi, kama makö pii sisa kitä. Pi naka. Pö̃ a, pöpönö a, ĩ na kili töpönö kama hai ulu töpö wai täpä sinomoö. Ulu töpö wainö kama hai ĩ pata töpö täpä pasio mai kitä. Ĩ na ĩ töpö kua kua wi na, ĩ na makö kua hö̃töoö. Kamakö na, ‑Ipa ulu töpö‑ ĩ na sa kuu kutenö, kamakö na sa nako pasio mai kitä. ¹⁵Makö õsi pasilipalöpö, kamakö na sa kua tä, sa thapo pole, ĩ sa tä mapama pi topa apa kitä. Sa wasiapalo opa kitä maaki, sa kasiapalo opa kitä. Pe epii kamisanö makö pii kutenö, kamakönö wani ipii sa pii hö̃töo kitä?

¹⁶‑Kamisamakö na wa nako maapili‑ ĩ na makö kuu kitä maaki, ai wa aiki, ‑Awai. Paulo a nako maapili maaki, a pi mosawi ipö kutenö, sitipa kökö täa hãtolöpö, a holisimo nö, makö mönama kipili‑ ĩ na ai wa kuu hãto kitä. ¹⁷Wi na kamisanö makö mönama kuama kuno mai? Kamakö na sa töpö simönipili, ĩ töpönö makö mönamanöma ta o? ¹⁸Tito a na, ‑Kotĩtu tili töpö na wa huu mi salo‑ ĩ na sa kuu upa nö, Cristo a thapo wi, Tito a na ĩ ai sa nokamanönöma. Kamakö na ĩ töpö waloiki nö, Tito anö makö mönamanöma ta o? Ma. Kamisa pitilimo kua wi na, ĩ na Tito a pitilimo kua hö̃töoö.

¹⁹‑“Paulo a kuati pole, ĩ tä topa waikia kule” ĩ na Paulo anö makö pi thama pi topa päa salo, ĩ na a hapalo kuu päa kule‑ ĩ na makö pi kuu hãtoakö? Ma. Ipa pö! Makö pasilipalö pia salo, Cristo sa thapo kutenö, Teusö a sömöka tala tä, kamakö na ĩ na sa hapalo kuu kule. ²⁰Kamakö na sa walokö noai ha, kamakö na sa pi mönaha mi, kamisa na kamakö pi mönaha hö̃töa mi, ĩ na makö kua hãto kitä. ‑Makö waipaso hẽtupaso opaö, makö hĩsu thaso opaö, makö hĩso satimo opaö, ai ma töpö pukama mai, kama makö puko sapao kõo pätioö, ai töpö na makö hapalo pi wasöa soatalo opaö, ai ma töpö a kateha wanisala apaö, “Kamisa na ai töpö wani komoapalo opaö” makö pi kutii, makö isi waniho opatii, ĩ na makö kua hãto kitä‑ ĩ na sa pi kuu nö, sa õsi kili pasia kule. ²¹‑Kamakö na sa walo kõa tä, Teusö a patanö sa kilia hãtomani kitä‑ ĩ na sa pi kuu kule. Ai makönö wanisala ma tä thaa noai, ĩ ma tä thatala hãtoa soatia tä, ĩ makö na sa pi honipo opa kitä. ‑Wanisala sa tä thaa noai, ĩ sa tä thaa wani ipö kotawö‑ ĩ na ĩ makö pi kuu mai, wanisala ma tä thaa pi topa apaö, sami sami ma tä thaa husuo opatii, tiko tä suö na makö sapäko opatii, ĩ na makö kua hãtotia tä, sa pi honipo opa nö, sa ö̃köa soa pälaso kitä.

Kama makö wapao sapao kotiopököö!

¹Kamakö na polakapii sa hama huu pi kupasoma. Huki kamakö na sa hama huu kõo pia kule. ‑“Ki a waninö wanisala tä thaa kipiliö!” ĩ na sami wa kuu maikö. Polakapi makö kuu sisaaö! Satehei makö kuu ösöha tä, ĩ tä topa naioö‑ ĩ na Teusö tä wahetanö ĩ na makö noa pewö thaö. ²Kamakö na sa hama huu kõpili, ĩ tä, ĩ na sa kuuma: ‑Hisimö sa huu kõa tä, wanisala ma tä thaa waikio noai, kamisanö ĩ makö noa thaa totio kitä‑ ĩ na sa kuuma, huki sa pã apa kule maaki, ĩ na sa kuu kõa kule. ³‑Paulo a na Cristo a kuu paio noai, Paulo anö ĩ ta hini nö, kamisamakö na a kuu tolea nömöo noa‑ ĩ na makö pi thama kitä. Kamakö na Cristo a utiti mi, a lotete epö thali. ⁴Ai töpönö hii ti pakalai ti ha Cristo a utiti ipii a säpalöma maaki, Teusö a pata lotete epii, ĩ tänö Cristo a temöa komanöma kutenö, Cristo a temö sati soawö. Cristo a na samakö koka kutenö, Cristo a utiti kua kua noai na ĩ na samakö utitia apa naia kule. Samakö utitia apa naia kule maaki, kamakö na samakö kua kõköma, samakö lotete epö nai kitä. Cristo a temö öpii ĩ a na samakö koka kutenö, Teusö a pata lotete epii ĩ tänö samakö temöapa naia komani. Önö kutenö, kamakö na samakö kua tä, samakö utitipo mai, samakö lotete epö kitäö!

⁵Kamakö aiki, ‑Awai. “Jesus a pitili” ĩ na sa pi kuu totia kule. Jesus sa thapo wi ĩ sa‑ ĩ na kama makö pi kuu nö, kama makö wapao sapao kõpököö! Kama makö na kama makö pi tapomo sapa kõa totikiö! Kamakö õsi na Jesus Cristo a kua waikia kule ta pi kuu mai. Kama makö na makö pi tapoa totiki nö, ‑Ma. Jesus sa thapo wi ĩ sa mai kitä‑ ĩ na makö pi kuu tä, kamakö na Cristo a kua mai kitä. ⁶Kamisa aiki, ‑Kamisamakö na makö pi tapomo totiki nö, samakö wapa kuköma, “Awai. Cristo anö ĩ töpö simöa totio noai ĩ töpö sai” ĩ na makö kuupökö‑ ĩ na sa pi kuu kule.

⁷Ĩ na sa pi kuu kule maaki, kamisamakö na makö pi tapomo totiköma, ‑Cristo anö Paulo töpö simöa totio maa noai kitä‑ ĩ na makö kuu kitä maaki, ‑Kotĩtu tili töpönö wanisala tä thaa wi ĩ tä na töpö noamaö!‑ ĩ na Teusö a pata na ĩ na sa kuu. ‑“Kotĩtu tili makönö wanisala ma tä thama” Paulo a kuu wi ĩ pitili ta‑ ĩ na kamisanö makö pi thama pi topa mane. Kamakönö toitai tä thaa wi ĩ sa tä pii sisaö. ⁸Jesus Cristo ta pitili ipii, ĩ sama ta peama pasio mai kitä. Ĩ sama ta palama apa sisaö. ⁹Samakö utitia apa päla tä maaki, kamakö lotetea apa asa tä, samakö pi mönaha apa. Teusö a pata na kamisamakö aiki, ‑Kotĩtu tili töpö õsi lotetepamanöö! Ĩ töpönö toitai tä thaapö, ĩ tä pala totimanöö!‑ Teusö a pata na ĩ na samakö kuu. ¹⁰Kamakö na sa waloiki nö, ‑Cristo anö sa simöa wi ĩ sa kutenö, sa hapalo loteteapalo opa nö, makö noa lotete thaa pia kuleö!‑ ĩ na sa kuu wani ipö kitä. Makö õsi utitipama mai, makö õsi lotetepamanöpö, Cristo anö sa simöa pasilöma. Önö kutenö, kamakö na sa walo paila nö kuno mai, kamakö na hi waheta sa tä simöa palua paipali keö!

¹¹Ipa pö! Ĩ na pätawö. Toitai ma tä thaa totioö! Sa kuu wi ĩ ta hini totioö! Makö höla mai, makö noimo totioö, ĩ na makö kua totio nö, toitai pö kua totikiö! Ĩ na makö kuaö ha, Teusö a patanö makö noima wi, ĩ anö makö pi topapalama sinomo wi, kamakö na ĩ a kutio kitä.

¹²Kamakö na Cristo a thapo wi ĩ töpö waloki ha, makö pi mönaha apa salo, makö noimaso opa nö, makö hanokopaso totio opapököö!

Hisa ha Cristo a thapo wi, kamakö na ĩ töpö pewö kai simöpaso keö!

¹³Jesus Cristo pata tänö makö totiapala apaö, Teusö a patanö makö noima apaö, makö noimaso wi, Teusö a õsi kua tolele, ĩ anö ĩ na makö thama apatii, ĩ na Teusö a patanö makö thama apati wi, ĩ sa tä pi ipa kule. Ĩ naköö!