1 Timóteo

1 Timóteo

Timóteo a na waheta tä simöa somapalö noai ĩ ta

Timóteo a hai ĩ pöpönö a hai, juteu tä kuoma. Ĩ anö Jesus a thapoma. Timóteo a hai ĩ pö̃ a hai, köteeku tä kuo pasioma. Timóteo anö Jesus a thapo naio wi, ĩ a kuoma. Ĩ töpö kuo pa Paulo anö Jesus ta wäsäti tä, Timóteo a nakaö ha, Paulo a na Timóteo a nokapalo nö, Paulo a pasilipo sinomotima.

Timóteo a na Paulo anö polakapi waheta tökö simönö noai ĩ tökö waheta, Tito a na ai waheta tä simönö noai ĩ tä waheta, ĩ na tökö waheta kui, Jesus a thapo wi ĩ töpö na pata töpö patamo makokapö, ĩ tökö waheta.

Teusö tä waheta na Timóteo anö epesu tili töpö pi hatukumani pia manu kule, ĩ na Paulo anö tä sãököpalö nö, ĩ na a kuuma: ‑Timóteo ai. A hapalo makoka totioö! Toitai tä thaa sinomoö! Ai töpö noima totioö! “Teusö a pitili” ĩ na a pi kuu totioö! Hiopö tä thaa tihöö! Ĩ na wa kuati ha, ai töpönö Jesus a thapo wi ĩ töpönö wa uöma nö, kawa totiatalo opa kuati wi na, ĩ na ĩ töpö totiatalo kua naiopököö! Toitai wa tä thaa sinomoö ha, ĩ töpö aiki, “Timóteo a hai, ĩ hĩsa tä maaki, ‘Ĩ naköö! Ĩ naköö!’ a kuu silia apatiwö” ĩ na ai töpö pi kuu mai kitä‑ Paulo a kuuma.

¹Paulo sa. Teusö anö makö täapa kõo läo wi ĩ a, Jesus Cristo a na makö mamo läo sinomo wi ĩ a, ĩ na töpö kui töpönö sa noa thaa nö, sa simöa totio noai, ĩ sa.

²Timóteo wa na hi waheta sa tä simöpali ke. Kamisanö Teusö ulupö wa thapalöma kutenö, ‑Ipa ulu wa totiwöö!‑ ĩ na kawa na sa kuu kuleö! Kamakö hai ĩ pö̃ Teusö a, kamakö hai ĩ Jesus Cristo pata tä, ĩ na kilii töpö na sa hapalo nö, ‑Timóteo a totiapala apöö! A pea tä, ma totiapala apaö! A pi honipo mapamanö nö, ma pi topapalama apaö!‑ ĩ na sa kuu.

‑Teusö ta wäsä holisimo wi, ĩ töpö wasulöö!‑

³Masetônia tä uli hamö sa huu pia tä, ‑Hi Epesu tä uli ha a kua haikiö!‑ ĩ na kawa na sa kuu kua noai na, ĩ na kawa na sa kuu kõa kule. Epesu tä uli ha ai töpönö holisi ta kateha polai, ĩ töpö na, ‑Ta holisia apöle, ĩ ta katehati maikiö!‑ ĩ na wa kuu! ⁴‑“Ĩ na nö patapö töpö kuamaö!” töpö holisi kuu wi, ĩ ta kateha maikiö!‑ ĩ na wa kuu! ‑Ĩ nö patapö ma töpö satehe epii ma töpö a hilapalati maikiö!‑ ĩ na wa kuu! Ĩ töpönö nö patapö töpö a katehati kuköma, töpö pewö hapalo isi wanihio soa päataloti kitä. Töpö hapalo isi waniho soa päatalo opati nö, Teusö a pi kuu totile, ĩ tä na ĩ töpö pi hatukupo mai kitä. ‑Teusö ta pitili‑ ĩ na makö pi kuu totia tä, Teusö a pi kuu wi, ĩ tä na makö pi hatuka sisapasoö. ⁵Ai ma töpö wanipo mai, ma töpö pi ipa sisa kuköpö, wa noa thali ke. Pili makö õsi topa totia tä, ai ma töpö pi ipa kuki kitä. ‑Sa tomöpo mi‑ makö õsi pi kuu mi kutenö, ai ma töpö pi ipa kuki kitä. ‑Teusö ta pitili‑ ĩ na makö pi kuu pitilia apa tä, ai ma töpö pi ipaö. ⁶Ĩ na ai töpö kupo mi kutenö, töpö kai monösoma. Töpö kai monöno nö, töpö hapalo osemo soa päatalo opaalöma. ⁷Moisés anö pata töpö noa thaa noai, ĩ töpönö ĩ ta kateha pi topa apa wi maaki, ĩ ta hini mi ipö. Ĩ töpönö ĩ ta kateha apa kulai maaki, töpö pi moti soawö.

⁸Moisés anö töpö noa thaa noai, ĩ ma ta kateha makoka apa tä, ĩ ta topa apöle kitä. Ĩ ma tä taö öpaö. ⁹Noa thaa wi, witi pili töpö na ĩ ta hinimoma totio sinomoö? Töpö topapalo opöle, ĩ töpö na kuno mai. Töpö wanisala apa wi ĩ töpö, hiopö tä thaa sinomo wi ĩ töpö, pata töpönö töpö noa thaa noai, ĩ ta hini mi ipii ĩ töpö, Teusö a na, ‑Päla‑ töpö kuu wi ĩ töpö, ‑Teusö ta pitili mi‑ töpö pi kuu wi ĩ töpö, ĩ na töpö kui töpö noa thaa wi, ĩ ta hinimoma sisaö. Pö̃ a säpali, pöpönö a säpali, ai tä säpali, ĩ na töpö wani kua wi ĩ töpö, ¹⁰tiko tä suö na peanopö a pi wani saimo opaö, ĩ na tä kua tä, pusopö a lö kui, tiko tä wano na ĩ a pi saimoö, ĩ na ĩ töpö kuati wi ĩ töpö, ai kama wano töpö mamopalo wi ĩ töpö, ai töpönö ai sanöma töpö thomönö nö, töpö läkälölö nö, töpö kalipalama apa wi ĩ töpö, ai töpö holisi wäo wi ĩ töpö, ĩ na töpö kua wi ĩ töpö noa thaa wi ĩ ta hinimoma hö̃töoö. Ta wäsä makoka wi ĩ tä na töpö pi pälamo nö, wanisala tä thaa sisa wi ĩ töpö pewö na noa thaa wi ĩ ta hinimoma totio sisaö. ¹¹Teusö anö ta topa apöle ĩ ta totokö noai, ĩ ta wäsä tä, ĩ ta makoka apaö. Ta topa apöle ĩ ta totokö nö, ‑Ta wäsä sinomoö!‑ ĩ na kamisa na ĩ na Teusö a kuu kipili. Teusö a liähä äpii, ĩ a na, ‑Aitaköö!‑ ai töpö kuu sinomo wi ĩ anö ta topa apöle ĩ ta totoköma.

Teusö anö sa totiapala noai ĩ ta

¹²Kamakö hai ĩ Jesus Cristo pata tä na, ‑Aitaköö!‑ ĩ na sa kuutoö. Jesus sa kai a wäsä tä, ĩ anö sa loteteapalama sinomo thali. ‑Paulo anö sa kai a hula kõo mai kitäö! Sa kai a wäsä satimo opaalö kitäö!‑ Jesus a pi kuu salo, ‑Sa kai a wäsä sinomoö!‑ ĩ na kamisa na Jesus a kuuma. A kuuma kutenö, ‑Aitaköö!‑ ĩ na sa kuu sinomoö. ¹³Jesus sa kateha wanisala apaö, Jesus a thapo wi ĩ sa töpö peamaö, sa höla apaö, ĩ na sa kuati kipili maaki, ‑Ĩ na wa wani kuaö ha, wa peama hö̃töo kitä‑ Teusö a kuu hö̃töo pasio maama. ‑Sa kai a wäsä sinomoö!‑ ĩ na a kuu pasioma. ‑Jesus ta pitili‑ ĩ na sa pi kuu pasio mi tä, sa pi moti ipii sanö wanisala sa tä thaa sinomoti kipili maaki, sa pi wani moti ipö ha, ‑Ĩ na a wani kua päoö. Wa wani peama hö̃töo kitä‑ Teusö a pi kuu maama. Kamisa na a pi honipo opa nö, sa pasilipalöma. ¹⁴Sa wanisala apama maaki, kamakö hai ĩ Jesus pata tänö sa totiapala satia apa hö̃töoma. Sa totiapala apa nö, Jesus sa thapoma kutenö, ‑Jesus ta pitili ipö‑ ĩ na pata tänö sa pi thamatima. Ai sa töpö pi ipa wi, ĩ na sa õsi thaa naipalöma.

¹⁵‑Wanisala tä thaa wi, ĩ töpö täapa kõo läo pia salo, hi masita tä uli ha Jesus Cristo a huma‑ tä kuu wi, ĩ pitili tä sai a. ‑Ĩ ta pitilia apa‑ makö kuupökö. Ai töpö pewönö wanisala tä tha apa kule maaki, wanisala sa tä thaa satia apa wi ĩ sa. ¹⁶Ĩ töpö na sa wanisala satia apa kule maaki, pe epii sa wanisala hasua satia apa kutenö, kamisa na Jesus a pi honipo nö, sa pasilipalöma. ‑Pe epii Paulo a wanisala apama maaki, Jesus Cristo anö a peama soata maa noa. Ö̃kö ta o. Ĩ na Jesus a kuaö ta o‑ ĩ na Jesus Cristo anö ai töpö pi thama pia salo, sa pasilipalöma. ‑Wanisala sa tä thatala apa noai maaki, Jesus sa thapo kuköma, sa palimipaso kitäö! Jesus anö Paulo a totiapala kua noai na, ĩ na sa totiapala kua hö̃töo kuki kitäö!‑ ĩ na Jesus anö töpö pi thama pia salo, sa totiapala thama apama. ¹⁷Ai tiko pata tä sai kua mai ha, ĩ Teusö sami a kua sisale, ĩ a pata lö kui, ai töpö pewö na a pata kaikanamo mapo mi ipö, a pata noma mi pikiwö, a tapamo mi ipö pikiwö, ĩ a pata na, ‑Aitaköö! Teusö a lotete epö sisawöö! A pata toita apö sisawöö!‑ ĩ na makö pewö kupalo sinomopököö! Ĩ naköö!

¹⁸Pösa ai. Ĩ na kamisanö Timóteo wa noa thaa kule. ‑Ĩ na Timóteo a na ĩ na wa kuu!‑ Teusö a kuu waikioma kutenö, ĩ na sa kuu tolea hö̃töa kule. Teusö a kuu waikiopili, ĩ tä ha wa pi tapoiki nö, a kasiapaloö! Wasu töpö säpaso tä, töpö kasiapalo kua wi na, ĩ na Teusö ta wäsä holisimo wi ĩ töpö na ĩ na wa kasiapalo kua hö̃töoö! ¹⁹Wa kasiapalo nö, ‑Jesus ta pitili‑ ĩ na wa pi kuu satimoö! ‑Ĩ naköö! Wanisala sa tä thaa mai, toitai sa kutioköö!‑ ĩ na pili wa õsi kuu tä, ‑Päla pasiwöö!‑ a pi kuu tihöö! Ai töpö aiki, ‑Ĩ na sa kuapököö! Toitai sa kuopököö!‑ ĩ na kama töpö õsi pi kuuma maaki, ‑Päla‑ töpö pi kuu sapa kõoma kutenö, ‑Jesus ta pitili‑ ĩ na ĩ töpö pi kuu maa kopasoma. ²⁰Ĩ na Imeneu a, Alesiãtöti a, ĩ na kilii, ĩ na ĩ töpö kuama. Sai tä sai pata na ĩ sa töpö totokö nö, ‑Sai tä sai patanö ĩ töpö peamapöö!‑ ĩ na sa pi kuuma. ‑Töpö peamaö ha, töpö pi hatukua satia kopalo nö, Teusö a na ĩ töpö hapalo hiopöa kota mai kitä‑ ĩ na sa pi kuu nö, ‑Sai tä sai patanö ĩ töpö peamapöö!‑ ĩ na sa pi kuuma.

Teusö a na makö hapalo tä, ĩ na makö kuapököö!

¹Ĩ na tä kua tä, kawa, Jesus a thapo naio wi, ĩ na makö kui, kamisanö ĩ makö noa thaa pia kule. Teusö a na makö hapalo nö, ĩ töpö pewö a wäsäheö! ‑Ai töpö honimo pasile, ĩ töpö na tä totomaö!‑ ĩ na pö kuu! Ai töpö topa pasia mi tä, Teusö a na makö hapalo läatalopöö! Ĩ na tä kua tä, ‑Aitaköö! Wa topa apawö‑ ĩ na Teusö a na ĩ na pö kuu! ²Kamakö na ai töpö höla mi, makö pi kilihita mi, ĩ na makö kuapö, Teusö a na pö hapaloö! Teusö a na toitai ma tä thaa nö, ai töpö na toitai ma tä thaa tolea hö̃töo nö, ĩ na makö kua pi topa salo, Teusö a na pö hapaloö! Teusö a na makö hapalo nö, kaikana töpö, pata töpö pewö, ĩ na töpö kui ma töpö a wäsä sinomopököö! ‑Pata wa töpö pewö pi hatukumaö!‑ ĩ na makö kuu! ³Ĩ na Teusö a na makö hapalo wi, ĩ ta topa. ‑Awai. Ĩ tä topa‑ Teusö a pi kuu. Teusö anö makö pewö täapa kõo läo wi, ĩ na ĩ a pi kuu. ⁴‑Sanöma sa töpö pewö täapa pi topa apa kõo läo wi, ĩ sa‑ Teusö a pi kuu. ‑Pitili tä na sanöma töpö pewö pi hatukupo mi salo‑ ĩ na Teusö a pi kuu sinomoö.

⁵Teusö a kui na, ĩ na ai tä kuö mai kitä. Ai pata tä sai kua mai kitä. Samii Teusö a kua sisaa. Teusö a pata, sanöma makö, ĩ na makö kui makö noimaso kua wi, ĩ tä thama wi, ĩ samii a kua sisaa. Jesus Cristo a hai, ĩ sanöma tä kupaso noai, ĩ anö ĩ tä thama sisaö.

⁶Ĩ anö sanöma makö pewö nö läa pia salo, a säpamonasoma. ‑“Teusö anö makö pewö täapa kõo läo pi ta topa noa” ĩ na huki ĩ na sa töpö pi thama pia salo, huki sa säpamonasopöö!‑ ĩ na Jesus a pi kuuma.

⁷‑Jesus wa ta wäsäö!‑ kamisa na Teusö a kuu nö, sa simöpalöma. Pitili sa. Sa holisimo mai kitä. ‑Juteu töpö pasi mai, ĩ töpö na ta taömaö! Pitili tä sai a wäsäpököö! “Jesus ta pitili” ĩ na töpö pi thamaö!‑ ĩ na kamisa na Teusö a kuu nö, sa simöpalöma.

⁸Timóteo ai. Jesus a thapo wi ĩ töpö kokamo sinomo wi, ĩ sai pö pewö hamö wano töpö kokamoti wi, ĩ töpö na wa hapalo nö, ‑Teusö a na ĩ pö hapaloö! Makö õsi sami makö aiki kuno mai, makö õsi salumamoa waikiso noai ĩ makö poko sononoiki nö, Teusö a na makö hapalopöö! Makö hĩsu thapaso mai, makö höla mai, ĩ na makö kua nö, Teusö a na pö hapalo sisaaö!‑ ĩ na wano töpö na, ĩ na wa kuu totiataloö!

⁹Suö töpö na wa hapalo nö, ‑“Kamisa na ai töpö mamo tetea asa wi, ĩ na ĩ sa töpö thama pia salo” ĩ na suö makö pi kuu maiki. Hunuku aipöama maiki. Sitipa noa apii, maa ma ose wai noa apii, ĩ nasimö tä sälähäama maiki. Kama makö na haloi ösö noa apii, ösö haloapalama maiki‑ ĩ na wa kuu nö, ¹⁰‑“Kama ösö liähäapalo opa nö kilia sai” ĩ makönö ĩ na ai wano ma töpö pi thama maikiö! “Kama wanö toitai tä thaa sinomoö” ĩ töpö pi thama pasioö! “Teusö sa thapo wi ĩ sa” suö makö kuu wi, ĩ na ĩ makönö ĩ na ai töpö pi thama totihoö!‑ ĩ na wa kuu!

¹¹Ĩ na wa kuu nö, ‑Makö kokamo tä, ai wano tänö tä taöma tä, suö makö hapalo tikiliapalo nö kuno mai, suö makönö ta hini totio sisaheö! “Suö sanö sa tä taö öpa hö̃töa salo, sa tä taöma hö̃töopö” ĩ na suö makö kuu maikiö! ¹²Suö makönö wano töpö na Teusö ma tä waheta wäsä maikiö! Suö makönö wano töpö simöa tihöö! Suö pö sömöka pewö taa totikiö!‑ ĩ na suö sa töpö noa thaa sinomoö. ¹³Pi naka. Teusö anö Adão a thaa somapalöma. Ĩ tä noa ha, Epa a thaa nömöpalöma. ¹⁴Adão a mönama maama. Suö tä mönama pasio nö, Teusö a kai hinia mao nö, wanisala tä thama. Önö kutenö, ‑Suö makönö wano töpö simöa tihöö!‑ sa kuu. ¹⁵Ĩ na sa kuu kule maaki, ĩ na sa kuu hö̃töo pia kule. Suö töpö nö läa hö̃töo kitä. Suö töpönö ulu töpö thapa tä, Teusö anö ĩ suö töpö nö läa hö̃töo kitä. ‑Jesus ta pitili‑ ĩ na ĩ töpö pi kuu soatioö, ai töpö noima soatioö, hiopö tä na kama suö töpö noamo nö, toitai tä thaa sinomoö, ĩ na suö töpö kuama, Teusö anö ĩ töpö nö läa hö̃töo kitä.

Teusömo wi ĩ töpö na pata töpö patamo sinomo wi ĩ töpö

¹‑“Teusömo wi, ĩ töpö na sa patamo sinomo pi topa apaö” wa pi kuu tä, ĩ tä topa‑ ĩ na tä kuu wi, ĩ ta pitilia totia apa. ²Pi naka. Teusömo wi, ĩ töpö na a patamo sinomo pi topa wi, ĩ na ĩ a kuaö. Teusömo wi, ĩ töpö na a patamo wi ĩ anö toitai tä thaa sinomoö. ‑Ĩ a wanisala‑ ĩ na ĩ anö ai töpö thama mai kitä. Teusömo wi, ĩ töpö na a patamo wi, ĩ anö sami pusopö a thapo sisaa. Ĩ anö tuu wasui, pe epii tuu koa apa mai kitä. A osemo mai kitä. ‑Wanisala sa tä thaa maiki o!‑ kama õsi pi kuu nö, wanisala tä thaa mai kitä. Hiopö tä thaa mai, toitai a kuo sinomoö. Hama töpö na, ‑Ipa sai a ha pö kuikiö!‑ ĩ na ĩ a kuu sinomoö. Ĩ anö Teusö a kai a wäsä taö öpaö. ³Tuu wasui tuu na a polemo mai kitä. A waitilimo mai, a noi ipö. A höla wani ipö. Sitipa kökö na a pi wasiso opa mi. ⁴Kama sai pö ha töpö pilia naine, ĩ töpö na toitai a patamo sinomoö. Kama hai ĩ ulu töpö aiki, ‑Ipa hao a hapalo wi, ĩ sa tä hinia totili kitä. “Päla,” ipa hao a na sa kuu mai kitä‑ ĩ na ĩ anö ĩ na kama hai ĩ ulu töpö pi thama sinomoö. ⁵Kama hai ĩ töpö na a patamo tai mi tä, Teusömo wi, ĩ töpö na a patamo totiki kitä ta o? ⁶Hi wisa ha Jesus a tälö noai, ĩ a na wa hapalo nö, ‑Ai töpö na a patamo soata tihöö!‑ ĩ na wa kuu! Jesus a thapo tetepo mai, ai töpö na ĩ a patamo soaköma, ‑Pata sa asawöö!‑ a pi kuu matimöö! ‑Pata sa asawöö!‑ ĩ na a pi kuu tä, Teusö anö a peama matimöö! ‑Wa peama hö̃töo kitä‑ Sai tä sai pata na Teusö a kuu noai na, ĩ na Teusö a kuu kitä. Somi tä, ĩ Sai tä sai pata aiki, ‑Pata sa asawöö!‑ ĩ na ĩ a pi wani kuu ha, ĩ tä noa na Teusö anö a wani peama thama noai na, ‑Pata sa asawö‑ a pi kuu wi, ĩ na Teusö anö ĩ na ĩ a peama thama matimöö! ⁷Teusömo wi ĩ töpö na a patamo sinomo wi ĩ a patanö ai töpö pi thama nö, ‑Ĩ a totiatalo opawö‑ ĩ na Teusö a thapo mai, ĩ na ĩ a patanö töpö pi thamapököö! ‑Ĩ a wani topa apaö‑ töpö kuu mi tä, Sai tä sai pata läiki nö, ĩ a hiopöpamani. ‑Teusömo wi, ĩ töpö na a patamo kule maaki, ĩ a hiopöpaso noa‑ Jesus a thapo mai, ĩ na ĩ töpö kuu kitä.

Jesus a thapo wi ĩ töpö pasilipo wi ĩ a

⁸Teusömo wi ĩ töpö pasilipo wi, ĩ sa töpö a kateha nömöo pia kule. Ĩ na ĩ töpö kuaö. Hiopö tä thaa mai, toitai töpö kutioö. Ĩ töpö holisimo mai kitäö! Pe epii wasu wasu tuu koa apa mai kitä. Sitipa kökö na töpö pi wasiso opa salo, ai töpö mönama nö, sitipa kökö täli, ĩ na ĩ töpö kua mai kitä. ⁹Jesus ta pitilia apöle, ai töpönö ĩ ta hasulama noai, Teusömo wi ĩ töpö pasilipo sinomo totio wi, ĩ töpönö ĩ ta hua sinomo kitä. ‑Jesus sama ta hini totioö‑ ĩ töpö õsi kuu wi, ĩ töpönö Jesus ta hini sinomo kitä. ¹⁰Ĩ töpö wapa paioö! ‑Ĩ töpö wanisala mai kitä. Ĩ töpö topa waikia kule‑ ĩ na ai töpö pi kuu tä, Teusömo wi ĩ töpö pasilipo sinomo kuköpöö! ¹¹Ĩ na ĩ töpö kua kua wi na, ĩ na kama töpö hai ĩ pusopö töpö kua kua naio kitä. Ĩ pusopö töpönö hiopö tä thaa mai, toitai töpö kuo kitä. Ĩ suö töpönö ai sanöma ta kateha hiopöa mai kitä. Pe epii wasu wasu tuu koa apa mai kitä. Ĩ suö töpö holisimo mai, töpö pitilimo totio opaö. ¹²Teusömo wi, ĩ töpö pasilipo sinomo wi, ĩ töpönö sami pusopö a thapo sisaö. Kama töpö hai ĩ ulu töpö, kama töpö sai pö ha töpö pilia naine ĩ töpö, ĩ na töpö kui töpö na ĩ töpö patamo totio opaö. ¹³Teusömo wi ĩ töpö pasilipo totio wi, ai töpönö ĩ töpö a kateha tä, ‑Ĩ töpö topa apaö‑ ĩ na ai töpö kuu kitä. Teusömo wi ĩ töpö pasilipo totio wi ĩ töpö aiki, ‑“Jesus Cristo ta pitili ipö” sa pi kuu wi ĩ sa‑ ĩ na ai töpö na ĩ na ĩ töpö kuu kili mai kitä.

¹⁴‑Tetepo maa noai ha, kawa na sa huu haio kitä‑ ĩ na sa pi kuu kule maaki, kawa na hi sa tä waheta simöpali ke. ¹⁵Sa tetepoö ha, hi waheta wa tä möö nö, ‑Hãu. Ĩ na makö kuapököö! Teusömo wi a sai ha makö kokamo sinomo wi, ĩ na ĩ makö kuapököö!‑ ĩ na wa pi kuupököö! Teusö a temöo soatio wi, ĩ a pi pata na ĩ makö kokamo sinomoö. Ĩ makönö Teusö a kai pitilia apöle, ĩ ma ta taö asaö. Teusö a kai pitilia apöle, ĩ ma ta wäsä asaö.

Teusö ta wäsä hasuluo noai ĩ ta

¹⁶Jesus ma thapo wi, Teusö a õsi kua tolele ĩ anö ĩ ta wäsä hasuluo opa noai, ĩ ta topa apa.

Jesus a hai, ĩ sanöma tä kupalo nö, a mömo hasulua apama.

‑Jesus a totiatalo opa sisaö. Jesus a pitili ipöö!‑ ĩ na Teusö a õsi kua tolele ĩ a kuuma.

Teusö anö kama hai ĩ töpö simöta wi, ĩ ãju töpönö Jesus a tapama.

Ĩ tä uli pewö hamö töpö pilipai, ĩ töpö na ai töpönö Jesus a wäsäma.

Ĩ ta hini noai ĩ töpö aiki, ‑Jesus ta pitili ipö‑ ĩ na ĩ töpö pi kuu nö, a tälöma.

Teusö anö Jesus a täa konönöma. Ĩ na Jesus Cristo a kuama.

Töpö holisimo opa nö, ai töpö mönama apa wi ĩ töpö

¹Ĩ na Teusö a õsi kua tolele, ĩ na ĩ a kuu makoka apaö: ‑Waiha Jesus a huu äwäho tä, ĩ na tä kua kitäö! “Jesus ta pitilia apa” ĩ na ai töpö pi kuuma maaki, ĩ töpönö ĩ ta hulaki kitäö!‑ ĩ na Teusö a õsi kua tolele, ĩ na ĩ a kuu. Sai töpönö sanöma töpö mönama sinomo wi, ĩ sai töpö kai a hua kuki kitä. Sai töpönö ta kateha wi, ĩ ta hua kuki kitä. ²Sai töpönö ĩ ta kateha wi, sanöma töpönö ĩ ta kateha tolemo wi, ĩ töpö aiki, ‑Sa ta kateha wi, ĩ pitili ta‑ ĩ töpö kuu kule maaki, töpö holisimo opaö. Ĩ töpönö ai töpö mönama pi topa apaö. Ĩ töpö holisimo opa kule maaki, ‑Häö. Sa töpö mönama wanisala sai taköö!‑ ĩ na töpö pi kuu tai mi. ³Wano tänö suö tä täa pia tä, ‑Pö täpaso tihöö! Sinoi wa kuo pätiopöö!‑ ĩ töpö kuu. ‑Salo a na a waioö!‑ ĩ töpö kuu hö̃töoö. Teusö anö salo pö pewö thapalö nö, ‑Ipa sanöma töpönö salo pö pewö oapöö!‑ Teusö a pi kuuma maaki, ‑Salo a na a waioö!‑ ĩ töpö kuu pasioö. Teusö aiki, ‑“Jesus ta pitili” töpö pi kuu wi, ta pitilia apöle, ĩ töpönö ĩ ta taö öpöle, ĩ töpönö salo pö pewö oapöö! “Aitaköö!” kamisa na töpö kuu nö, töpö iapalo topa apapöö!‑ ĩ na Teusö a pi kuuma. ^4-5Teusö anö tä pewö thapalö noai, ĩ tä pewö toita apö. ‑Salo ma pö pewö oa kuköpöö!‑ Teusö a kuuma kutenö, Teusö a na ĩ salo pö pewö toita apö matatä. Kamakö aiki, ‑Hi wa totopi keö! Hi a totipalöö!‑ ĩ na Teusö a na ĩ na makö kuu ha, salo a totia apöpali kitä. Ĩ ma oali ha, Teusö a pi topa kutenö, ‑Pälaö. Sa tä oa kili ipaö‑ pö kuu tihöö! Salo ma tälö nö, Teusö a na, ‑Aitaköö! Wa totopi keö!‑ makö kuupökö.

Teusö a na makö kalipalo totiatalo opa wi ĩ makö

⁶Timóteo ai! Sa kuuhe, Jesus a thapo wi ĩ töpö na ĩ wa ta wäsä tä, Jesus Cristo a na wa kalipalo totiatalo opati wi, ĩ wa totiwöö! ‑Jesus ta pitili‑ ta kuu wi, ĩ wa ta hini totio nö, Teusö a kai pitilia apöle, wa ta hua totio nö, ĩ na wa kua kutenö, wa õsi patalo nö, wa tä taö öpa kuki kitä. ⁷Ĩ na tä kua tä, Teusö ta kateha pasia mane, ai tiko ta kateha holisimo pasia päle, ĩ tä na, ‑Päla‑ a pi kuu totihoö! Ĩ ta kateha osemo opa wi, ĩ ta hini tihöö! Teusö anö wa noa thaa wi, ĩ wa tä hini pi topa totia apa salo, a kasiapalo totihoö! ⁸Pi naka. Wa kalipalo sinomoö ha, pili wa sai pewö lotetea apöpasoö. Pili wa sai lotetea apöpaso wi ĩ tä topale maaki, Teusö a kua wi na, ĩ na wa kua hö̃töo nö, wa õsi lotetea apöpasoö. Wa õsi lotetea apöpaso wi ĩ tä topa satia apa. Wa õsi lotete epö salo, wa pi topapalo opa kuki. Wa pi topapalo opa kuiki nö, waiha Teusö tä uli ha wa konasolöma, wa pi topapalo opa hö̃töo kuki. ⁹Sa kuuhe, ĩ pitili ta. Ĩ ta hinia totilöö! ‑Ĩ pitili tä sai a waikiwöö!‑ wa kuupököö! ¹⁰Teusö a temö mapo mi ipii ĩ anö sanöma makö pewö täapa kõo läo wi ĩ a. ‑Jesus ta pitili ipö‑ ĩ na töpö pi kuu wi, Teusö anö ĩ töpö täapa kõo läo totio opaö. Ĩ Teusö a na makö mamo tetetio salo, makö kasiapalo opa nö, ĩ a na makö kalipalo opaö.

¹¹Sa kuuhe, ĩ wa ta taömapököö! ‑Ĩ naköö! Ĩ naköö!‑ wa kuu totiatalo opapököö! ¹²‑Timóteo a hai, hĩsa tä maaki, “Ĩ naköö!” a kuu silia apawö‑ ĩ na ai töpö pi thama tihöö! A hapalo makoka totioö! Toitai tä thaa sinomoö! Ai töpö noimaö! ‑Teusö a pitili‑ ĩ na a pi kuu totioö! Hiopö tä thaa tihöö! Ĩ na wa kuati ha, ai töpönö Jesus a thapo wi ĩ töpönö wa uöma nö, kawa totiatalo kuati wi na, ĩ na ĩ töpö totiatalo kua naiopököö! Toitai wa tä thaa sinomoö ha, ĩ töpö aiki, ‑Timóteo a hai, hĩsa tä maaki, “Ĩ naköö! Ĩ naköö!” a kuu silia apawö‑ ĩ na ai töpö pi kuu mai kitä. ¹³Timóteo ai! Sa walo paio mi tä, Jesus a thapo wi ĩ töpö kokamo tä, Teusö wa tä waheta kateha nö, ĩ wa ta taömapököö! ‑Ĩ na makö kuapöö!‑ ĩ na wa kuu totiatalo opatipököö! ¹⁴Teusö a kai wäsä wi ĩ töpönö ta wäsä tä, kawa na, ‑Teusö a na a kalipalo sinomoö!‑ ĩ na ĩ töpö kuuma kutenö, kawa na pata töpö ami waliköma. Pata töpö ami walio tä, Teusö a kai a wäsä taö öpa wi, kawa na Teusö anö ĩ tä totoköma. Kawa na Teusö anö ĩ tä totokö noai, ĩ tä na a pi mosaia totikiö! Teusö ta wäsä totihoö! ¹⁵‑Timóteo a makoka totio kimatiö!‑ ĩ na wa töpö pi pewö thamapö, sa kuuhe, ĩ na wa kua totiatalo opatipököö! A kasiapalo opaö! ¹⁶A pi mosaia totikiö! Wa kuati wi, ĩ tä na a pi tapoa totikiö! Wa ta wäsäti wi ĩ tä na a pi tapoa totikiö! Ĩ na wa kuati kuköma, kama wa noamo sapamo kõo kitä. Wa kai a hini wi, ĩ wa töpö noama naio kitä.

Teusö a thapo wi ĩ töpö na ĩ na wa kuatipököö!

¹Ai pata tä päsäpa tihöö! Au hao a na wa hapalo kua wi na, ĩ na ai pata tä na ĩ na wa hapalo kua totiataloö! ‑Ĩ naköö! Ĩ na wa kua mai, ĩ na wa kua totiopököö!‑ au hao a na wa kuti kua wi na, ĩ na ai pata tä na, ĩ na wa kuu kua totiatalo opatipököö! Au hoose töpö na wa kuti wi na, ĩ na hĩsa töpö na ĩ na wa kuu totiatalo opa naitiopököö! Wa töpö päsäpa maiki. ²Au nao wa noa thaa kuati wi na, ĩ na pata wa töpö suö noa wani thaa kua totitiopököö! Au sao wa töpö noa thaa kua wi na, ĩ na moko wa töpö noa thaa kua totiopököö! Hiopö tä thaa ti! ‑Hi moko tä na sa sapäko nö toa nö alu kuikö ö̃!‑ wa pi kuu maiki.

Peanopö a nomaso noai, ĩ pusopö töpö na ĩ na wa kuatipököö!

³Ĩ na tä kua tä, peanopö a nomaso noai, ĩ pusopö a na a mamo läapaloö! Kama ai töpö mi ha, a sami ipö tä, ĩ a na a mamo läapaloö! ⁴Kama hai ĩ ulu töpö kua tä, ĩ töpö na, ‑Au nao wa totiapalatipököö!‑ ĩ na wa kuu! Pö̃ a, pöpönö a, pö̃ a patasipö, pöpönö a patasoma, ĩ na töpö kui töpönö kama hai ulu töpö patamanö nö, ulu töpö wai totiapala apa kuati noai na, ĩ na ĩ ulu töpö wai patalo nö, ĩ na kama hai ĩ pata töpö totiapala thama hö̃töopököö! ‑Ĩ naköö!‑ Teusö a kuuma salo, ĩ na sa kuu kule. Ulu töpönö, kama töpö hai ĩ töpö totiapalaö ha, Teusö a pi mönaha apaö. ⁵Peanopö a nomaso noai, ĩ pusopö a hai ĩ kama ai töpö mi toti ipö tä, Teusö a na ĩ a mamo teteo opaö. Mumai ha Teusö a na a hapaloö, wakalai ha Teusö a na a hapaloö, ĩ na ĩ a hapalo kua sinomoö. ‑Sa pasilipalöö!‑ a kuu sinomoö. ⁶Ĩ na ai tä suö kua mai kitä. Ĩ tä suö hai ĩ peanopö a nomasoma maaki, a puko opa pi topa sinomo päoö. Ĩ a wani temö maaki, Teusö a na kama õsi sai temö mi. Nomawö tä kua wi na, ĩ na a kua hö̃töoö. ⁷‑“Jesus a thapo wi ĩ töpö tomöpoti mi ipöö!” ĩ na ai töpö kuu matimöö!‑ sa pi kuu salo, sa kuu ke. Sa kuuhe, ĩ wa ta wäsä nö, wa töpö noa thaa totihoö!

⁸Ai tä hai ĩ ai töpö na nii tä totoma mi tä, ĩ a wani tomöpo mi. Kama sai pö ha kama ai töpö sai kule, ĩ töpö na nii tä totoma mi tä, ĩ a wani tomöpo mi ipö kitäö! Kama ai töpö na nii tä totoma mi tä, ‑Ĩ anö Jesus a thapo kuleö!‑ a kuu ti! Jesus a thapo mai, ĩ töpö tomöpo mi maaki, ĩ töpö na ĩ a wani tomöpo mi tole epö.

^9-10Peanopö töpö nomaso noai, ĩ pusopö ma töpö totiapala sinomopö tä waheta ha ĩ na suö töpö kui töpö a hilo wi, ĩ tä sãöka sisaköö! A patasoma toti ipii, ĩ a na 60 tä inama kua wi, ĩ a waninö kama peanopö a hosa mai ha, sami peanopö a thapo noai, ĩ a wani hilo wi ĩ wa tä sãökökö nö, ĩ ma wani totiapala apa soatio asapöö! Ĩ na tä kua tä, ‑Ĩ a waninö toitai tä thaa sinomo wi, ĩ a‑ töpö kuu ha, ĩ ma suö totiapala asapöö! Ulu töpö patamani, hama töpö noimaö, Jesus a thapo wi ĩ töpö ami salu sinomoö, töpö peati wi ĩ töpö pasilipaö, toitai tä thaa satimo opaö, ĩ na peanopö a nomaso noai, ĩ pusopö a sinoi, ĩ na ĩ a wani kua sinomo noai, ĩ ma wani totiapala totiopöö! Suö töpö totiapala sinomopö tä waheta ha ĩ suö tä hilo wi ĩ tä sãökökö nö, ĩ ma suö totiapala sinomopöö!

¹¹Töpö patasoma pai mai, ĩ tä waheta ha ĩ töpö a hilo wi, ĩ tä sãöka ti! Wano töpö na ĩ töpö mamo teteiki nö, wano tä thapo pi topa salo, Cristo a na ĩ töpö kalipalo sisa wani ipö kitä. ¹²‑“Cristo a na sa kalipalo sisa sinomo pia salo” ĩ töpö kuu totioma maaki, Cristo a na ĩ töpö kalipalo mataso noa‑ ĩ na tä kuu wi tä kule kitä. ¹³Ĩ töpö kalipalo mai, ai töpö sai pö ha ĩ töpö hupaloti päoö. Töpö hupaloti päo nö, ai töpö a katehati nö, toitai ta kateha mi. Ai töpö kuati wi, ĩ ta kateha päo. ^14-15Peanopö a nomaso noai, Jesus a na ĩ ai töpö suö nokapalo matalo nö, Sai tä sai pata na ĩ töpö nokasolöma. ‑Önö kutenö, töpö patasoma pai mai, ĩ töpönö wano töpö täalalöpököö!‑ sa pi kuu. Wano tä täli, kama ulu töpö thaki, kama sai pö ha a kalipalotii, ĩ na ĩ töpö kua wi, ĩ töpö kuo pasiopököö! Ĩ na ĩ töpö kuaö ha, Jesus ma thapo wi ĩ makö wanipo wi, ĩ töpö aiki, ‑Jesus a thapo wi ĩ töpö tomöpo mi ipö‑ ĩ töpö kuu tao mai kitä. ¹⁶Ai suö tänö Jesus a thapo wi ĩ anö, kama ai töpö kule ha peanopö a nomaso noai ĩ ai tä wani kua naine, ĩ a wani pasilipopököö! Teusömo wi a sai ha töpö kokamo sinomo wi ĩ töpönö kuno mai. Ĩ töpönö satehe epii suö töpö iama mai kitä. Peanopö töpö nomaso noai, ĩ suö töpö wani hai, ĩ kama ai töpö kua mi tä, Teusömo wi a sai ha töpö kokamo sinomo wi ĩ töpönö ĩ töpö suö na nii tä totoma sisapököö!

Jesus a thapo wi ĩ töpö na töpö patamo wi, ĩ töpö na ĩ na wa kuatipököö!

¹⁷Jesus a thapo wi ĩ töpö na ĩ na wa kuu! ‑Kamakö na pata töpö patamo totiatalo opati wi, ĩ pata töpö na noa tä totomaö! Ĩ töpö kasiapalo nö, Teusö a kai a wäsäö, Teusö ta katehaö, ĩ na töpö kuati kutenö, ĩ töpö na noa tä totomaö!‑ ĩ na wa kuu! ¹⁸Pi naka. ‑Au paka wa pata kalipalama tä, a kai pata õka tihöö! A pata oi hãto tä, tötiiku mo oa soatalo naiopököö!‑ ĩ na Teusö tä waheta kuu. ‑Sanöma tä kalipalo tä, ĩ a na noa tä totoa kitä‑ ĩ na Teusö tä waheta kuu naioö. Önö kutenö, ‑Jesus ma thapo wi ĩ makö na pata töpö patamo sinomo wi, ĩ töpö na noa ma tä totoköpököö!‑ ĩ na wa kuu! ¹⁹‑Jesus a thapo wi ĩ töpö na ĩ pata tä patamo sinomo wi ĩ a waninö wanisala tä thaa kipiliö!‑ ĩ na sami tä kuu sisaö ha, ĩ ta hini ti! Ĩ na polakapi töpö kuu ha, ĩ wa ta hini sisapököö! ²⁰Pata töpönö wanisala tä thaa satimo opaö ha, ‑Ĩ na kuno maiö! Ĩ na wa kua maikiö!‑ ĩ na wa kuu! Ai töpö kilimani pia salo, ai töpö sömöka pewö tala tä, ĩ na wa kuu!

²¹‑“Ĩ naköö! Ĩ naköö!” sa kuuhe, ĩ ta hinia totilöö!‑ ĩ na wa noa thaa kule. Teusö a, Jesus Cristo a, Teusö anö ãju töpö sailö noai ĩ töpö, ĩ na töpö kui, kamisa na ĩ töpö mamo tetela tä, ĩ na kamisanö wa noa thaa kule. Kawa aiki, ‑Naiö! Ĩ a wani hai, ĩ ipa tä kutenö, Paulo anö tä sãöka noai, ĩ sa ta hini totio mai kitäö!‑ a pi kuu ti! ‑Ipa tä kutenö, a tomöpo mi päla tä maaki, “Ĩ na wa kua maikiö!” sa kuu mai kitäö!‑ a pi kuu ti! ²²Kawa aiki, ‑Jesus a thapo wi ĩ töpö na a patamo sinomo wi, ĩ na ĩ a kua wi, ĩ na ĩ a kua haita mi salo‑ a kuu soata tihöö! Ĩ a wani na a ami walio soata tihöö!

Ai töpönö wanisala tä thaa päla tä maaki, kawanö wanisala tä thaa naio ti! Wa õsi samipo pola nö kuno mai, wa kuopöö!

²³Ĩ na tä kua tä, maa tuu sino koati maiki. Wa amukumo sinomo salo, wani ipii upa mo puu wasui wa tuu wai koalöö!

²⁴Ai töpönö wanisala tä thaa wi, ĩ wanisala tä hatuka apaö. ‑Wanisala wa tä thaa maikiö!‑ tä kuu wi, tä kua paia mai ha, tä hatuka apaö. Ai töpönö wanisala tä thaa wi, ĩ tä hatuka soata mai kitä. Sakimi tä hasulua sisapasoö. ²⁵Wanisala tä thaa wi, ĩ tä hatukua kua wi na, ĩ na toitai tä thaa wi, ĩ na ĩ tä hatukua kua hö̃töoö. Toitai tä thaa wi, ĩ tä hatuku mi tä, sakimi, tä hasulua hö̃töpasoö.

Pata töpönö ai töpö kalipalama apati wi ĩ töpö

¹‑Makö thapo wi, ĩ töpönö makö kalipalamati pole, ĩ ma töpö a hinia totilöö! Ma töpö a hinia totili ha, Teusö a na ai töpö hapalo pi wasöa mai kitäö!‑ ĩ na wa kuu nö, ‑Makö moimo mi tä, “Jesus a kai a wäsä wi, ĩ ta holisia hãtoa” ĩ na ai töpö kuu mai kitäö!‑ ĩ na wa kuu! ²‑“Jesus a thapo wi ĩ anö sa kalipalamati pole, ĩ sa hini totio mai kitäö! Sa kalipalo opa mai kitäö!” makö pi kuu mai, “Sa kalipalama sinomoti wi, ĩ anö Jesus a thapo wi ĩ sa pii kutenö, ĩ sa hini totio opa kitäö! Pe epii sa kalipalo opa kitäö!” ĩ na pö pi kuu totioö!‑ ĩ na wa kuu! Sa kuuhe, ĩ wa ta thalö nö, ĩ na wa kuu totio nömöoö!

Sitipa wa pi ipa wi, ĩ tä topa mai kitä

³Ai tänö ai tiko ta kateha tä, a pi moti ipö. Kamakö hai ĩ Jesus Cristo Kaikana tä kai a makoka apa wi, ĩ a waninö ĩ a kai a hini mi tä, a pi hatukua mi. Teusö a topa kua wi na, ĩ na makö topapalama kua wi, ĩ ta kateha sinomo wi, ĩ ai tä waninö ĩ ta hua mi tä, a pi wani moti ipöö!

⁴‑Ai tiko sa ta wäsä taö öpa asaö!‑ ĩ na a pi wani kuu kule. Ĩ na a pi wani kuu kule maaki, a pi hatukua mi ipöö! Ĩ a waninö a kai a makoka apa wi ĩ a kai hini wani ipö salo, ‑Naiö! Holisi ta! Ĩ na tä kua pasioöö!‑ ĩ na ĩ a wani kuu pi topa siliapawö. Ai töpö na a wani hapalo isi wani soa päatalo pi topa apaö. Ĩ na ĩ a wani kuaö ha, ai töpö aiki, ‑Ki töpö puko opa asatiowö‑ ĩ na ai töpö pi kutii, töpö hapalo isi waniho opatii, töpö hapalo pi wasöa apaö, ‑Ki töpö wani wanisala hãtowöö!‑ töpö pi kuu sinomoö, ĩ na ai töpö kua kitä. ⁵Ĩ na ai töpö kua nö, ĩ töpö holisimo opaö, hiopö tä na ĩ töpö pi tapomo sinomotii, ĩ na ĩ töpö kua naio nö, ĩ töpö hapalo isi wani soatalo opaö. ‑Sa Teusömo salo, noa sa tä täli kitä‑ ĩ na ĩ töpö pi kuu. ⁶Awai. Teusö wa thapo salo, noa wa tä täa hö̃töli kitä. Wani tä aiki kuno mai. Teusö wa thapo wi, ĩ tä noa na, wa pi topapalama wi, Teusö anö ĩ tä totoa hö̃töki kitä. Wani tä na wa pi wasiso mi tä, wa pi topa apa kitä. ⁷Au nao anö wa thapa tä, wani wa tä kai kupaso kipili ta o? Wa nomano nö, wani wa tä kai konasolö kitä ta o? Pokei wa kupasoma, wa nomasoma, pokei wa konasolöö. ⁸Önö kutenö, nii tä, haloi ösö, ĩ na wa tökö thapo tä, ‑Ipa wani tä na sa kulahamo waikile‑ wa pi kuupökö. Ai wani tä na wa pi wasiso mai, wa kuapökö. ⁹‑Ipa wani tä kuo opa nö toa sö ö̃‑ ĩ na ai töpö pi kuu ha, kama töpö mönao sapamo opaö. Sanöma tänö salo a wani säpalöpö, sanöma tänö nii tä na salo a wani mönama kua wi na, wani tä na ĩ na ai sanöma töpö mönama kua hö̃töoö. Töpö pi hatuku mi kutenö, ‑Sa pea kitä‑ töpö pi wani kuu pola nö kuno mai, wani tä kuo opa pa, ĩ töpö pi wasiso opa sinomoti nö, töpö pepalo kuki. ¹⁰Sitipa wa pi ipa tä, sitipa wa tälö pia salo, wanisala wa tä thaa matimö. Ai töpö aiki, sitipa na ĩ töpö pi lulua apa salo, ‑Teusö ta pitili‑ ĩ na ĩ töpö pi kuu maa waikipasoma. Ĩ na töpö pi kuu maa waikipalo nö, töpö pea totio nö, töpö pi topala nö kuno mai, õsi wanisala apa kuköma.

Paulo anö Timóteo a noa thaa noai ĩ ta

¹¹Timóteo ai. Ĩ na ai töpö kua wi maaki, kawa aiki, Teusö wa thapo totia kutenö, wa wanisala maikiö! Jesus a kai a makoka apa wi, ĩ a kai a peamaö, ai tiko ta katehaö, wani tä na a pi wasiso opaö, ĩ na ai töpö kua wi maaki, ‑Ĩ sa tä taa waniwöö! Ĩ na sa kua mai kitäö!‑ ĩ na wa pi kuu! Ĩ na wa pi kuu nö, toitai wa kuaö! Teusö a topa kua wi na, ĩ na wa kuaö! ‑Jesus ta pitili ipö‑ ĩ na a pi kuu totioö! Teusö a pii totihoö! Ai töpö pewö pii naioö! Wa peama tä, a kasiapaloö! Wa höla mai, ai töpö na a noimoapalo totioö! Ĩ na wa kua totihoö! ¹²Töpö säsoö ha, töpö kasiapalo kua wi na, ĩ na Jesus wa thapo salo, ĩ na a kasiapalo kua hö̃töoö! ‑Jesus ta pitili‑ wa pi kuu sinomo kutenö, wa kasiapalo opa nö, ‑Teusö anö sa õsi palimipamanömaö! Teusö a na sa kua mapo mai kitäö!‑ ĩ na a pi kuu sinomoö! Ai töpö satehei, töpö sömöka tala tä, ‑“Jesus ta pitili ipö” ĩ na sa pi kuu nö, Jesus sa thapo waikia kuleö!‑ ĩ na wa kuu ha, ‑Wa õsi palimia hö̃töpaso kitä‑ ĩ na Teusö a kuuma. Ĩ na a kuu ha, ‑Teusö anö sa õsi palimipamanömaö! Teusö a na sa kua mapo mai kitäö!‑ ĩ na a pi kuu sinomoö! ¹³Teusö anö töpö pewö temöapalama wi ĩ a, Jesus Cristo a kili mai, Põsiu Pilatosö a na pitili ta wäsä totio opa noai ĩ a, ĩ na töpö kui töpönö sa tapa soala tä, ¹⁴wa noa thaa pia kule. ‑Ĩ naköö! Ĩ na wa kuaö!‑ Teusö a kuu wi, ĩ wa ta hinia totilöö! Kamakö hai ĩ Jesus Cristo pata tä tapamo kõo paio mai ha, wa ta hinia totilöö! Wa ta hinia totili ha, ‑Timóteo a toita apö. A tomöpo mi mai kitä‑ tä kuu wi tä kule kitä. ¹⁵Teusö anö Jesus a simöpa kõo pi topa tä, ‑Pei. Huki ipa sanöma töpö na Jesus a tapamo kopököö!‑ ĩ na Teusö a kuu kitä. Teusö a pi topapalo opa wi, ai töpö pewö na ĩ a kaikanamoti wi, ĩ na ĩ a kuu kitä. Kaikana töpö pewö simöa sinomoti wi, ĩ a. Pata töpö pewö simöati wi, ĩ a. ¹⁶Teusö a palimi ipii, ĩ kama saiwö. Ĩ na ai tä kua mai kitä. Tä wakala apii tä na a kua sinomo asaö. Ĩ tä wakala apö kutenö, ĩ tä na ai töpö atepo tai mi ipö kitä. Ai tänö Teusö a tapa waikio maama. Ai tänö Teusö a tapa tai mi ipö kitä. ‑Teusö a totiatalo opa asawöö! Teusö a kaikanamo soatio kitäö!‑ ĩ na makö pewö kuupököö! Ĩ naköö!

Wani tä thapo opa wi ĩ töpö na ĩ na wa kuu!

¹⁷Ĩ na tä kua tä, huki wani tä thapo opa wi, ĩ töpö na, ‑“Sa pi tao opa kutenö, wani sa tä thapo opaö” pö kuu ti!‑ ĩ na wa kuu! ‑Au wani tä mapo pia wi, ĩ wani tä na wa mamo teteo mai, Teusö a na a mamo tetea sisaköö! Teusö anö makö pi topapalamapö, kamakö na tä pewö totoma apaö‑ wa kuu! ¹⁸‑Wani ma tä thapo opa wi, ĩ makönö toitai tä thaa totihoö! Ai ma töpö totiapalapököö! Makö ö̃töa apöpalo nö, ai töpö na kamakö hai ĩ wani ma tä totoaköö!‑ ĩ na wa kuu! ¹⁹Ĩ na wa kuu nö, ‑Wani tä na makö mamo teteo sisa mai, Teusö a na pö mamo teteköö! Ai töpö na wani tä totoaköö! Ĩ na makö kua tä, Teusö a sai pö ha pe epii kamakö hai ĩ noa tä kua. Wani tä mapo pia wi, ĩ tä aiki kuno mai. Teusö a na makö kuo soatio wi, ĩ ma tä täli kitä‑ ĩ na wa kuu!

Timóteo a na a kuu waikila nö ta

²⁰Timóteo ai! Kawa na Teusö a kuu noai, ĩ wa ta hini totilöö! Ĩ ta hosa tihöö! Teusö ta kateha mai, tiko ta kateha päle, ĩ tä na a sömöka taa totio tihöö! Ai töpönö ĩ tiko ta kateha nö, ‑Wa pi hatukupamani wi ĩ ta‑ ĩ na ĩ töpö kuu kule maaki, ĩ ta isi waniho opa pasioö. ²¹Ai töpönö ĩ ta huölöma salo, ‑Jesus ta pitili‑ töpö pi kuu matalo nö, tiko tä na töpö pi hanoköma.

Teusö a na sa hapalo nö, ‑Timóteo a, Timóteo a kule ha töpö kua naine, ĩ töpö totiapala totihoö!‑ ĩ na sa kuu. Ĩ nakö.