1 Pedro

1 Pedro

Pedro anö waheta tä simöa somapalö noai ĩ ta

Teusö a thapo pasio wi, ai töpönö ĩ töpö selekepamanö noai, ĩ töpö na Pedro anö hi waheta tä simönöma. Ĩ töpö selekepaso noai, ĩ töpönö Jesus a thapoma kutenö, ai töpönö ĩ töpö peamatima. Töpö pepalo opati noai, Pedro anö ĩ töpö pi mönahapamani pia salo, tä sãököpalö nö, ‑“‘Jesus a pitili’ makö pi kuu wi, ĩ pitili ta. Makö holisimo päo mi ipö” ĩ na Teusö ma thamapö, makö pepalo pätia kule‑ Pedro a kuu nö, ‑Makö pepalama apati päla tä maaki, pö kasiapalo satia apaö! “Ipai töpönö sa uömapököö!” ĩ na Cristo a pi kuunö, makö noama pia salo, a pea totio opama. Cristo a kuati kua noai na, ĩ na makö kua totio naiopököö!‑ Pedro a kuuma.

Ĩ na a kuu nö, ‑Teusö anö makö nakalö noai, ĩ a totiatalo kua wi na, ĩ na pö kua totiatalo naioö! Toitai ma tä thaa sinomopököö!‑ a kuu nö, ‑Teusö anö makö saia totia asalö noai, ĩ makö sai. Teusö anö makö thapo pole, ĩ makö asawö. Teusö ma ta wäsäpö, makö sailöma. Mumi mumi tä na makö hupaloti tä, Teusö a hai ĩ tä wakala toita apii tä wakala ha makö huma totio asapö, makö saia asalöma‑ ĩ na Pedro a kuuma.

¹Pedro sa. Jesus Cristo anö sa simönö noai, ĩ sa. Põtu tä uli, Kalásia tä uli, Kapatósia tä uli, Ásia tä uli, Pisínia tä uli, ĩ na tökö uli kui tökö uli hamö Teusö ma thapo pasio wi, ĩ hamö ai töpönö makö selekepamanö noai, ĩ makö na hi sa tä waheta simöni ke. ²Kamakö hai ĩ pö̃ Teusö anö tä pewö taö paioma kutenö, makö saia asalöma. Kama õsi kua tolele, ĩ anö makö thaa sokakö nö, makö totipalöma. Jesus Cristo ma hinini, Jesus a iä pönö makö õsi ausipamani, ĩ na makö thamapö, Teusö anö makö saia asalöma.

Teusö anö makö totiapala soatioö, makö pi topapalamaö, ĩ na Teusö anö makö thama totio nö toapököö!

‑Teusö anö makö temöa kopalö nö, makö totiapala soatio kitäö!‑

³Jesus Cristo a hai ĩ pö̃ Teusö a na, ‑Wa totiatalo opawö‑ ĩ na makö pewö kuupökö. Teusö anö makö totiapala apa kutenö, makö õsi palimipamanöma. Jesus Cristo a noma totisoma maaki, temö temö a sai kua kopasoma kutenö, ‑Teusö anö ĩ na makö temöa thaa kõa hö̃töpalö nö, makö totiapala soatio kitäö!‑ ĩ na makö kuu sinomo opaö! ⁴‑Teusö a na makö kukö lasoma, Teusö anö makö totiapala soatio nö, kamakö na tä toita apii tä totoma pia salo‑ ĩ na makö kuu sinomoö. Kamakö na tä toita apii tä totoma piale, ĩ tä pewö na Teusö a mamo läapalo soatia kupoli. Kamakö na tä totoma pia wi, ĩ tä palimi. Ĩ tä hote mi. Ĩ tä mapo totio mai kitä. ⁵Teusö a na makö waloköma, kamakö na ĩ tä pewö totoma kitä. Kamakö aiki, ‑Jesus a pitili‑ makö pi kuu ha, Teusö a lotete epö kutenö, makö noama hö̃tötio kitäö! Teusö anö makö õsi palimia totipamanö nö, makö totiapala apati wi, hi masita tä uli mapo pia tä, Teusö anö ĩ tä tapamomani kitä. Ĩ tä tapamoma pia salo, makö noama paitia kule.

⁶Önö kutenö, makö pi mönahapököö! Makö pepalo opa kule maaki, makö pi mönahapököö! Makö pepalo soatio mai kitä. ⁷‑“Jesus a pitili” makö pi kuu wi, ĩ pitili ta. Makö holisimo päo mi ipö‑ Teusö ma thamapö, makö pepalo pätia kule. Koa taka na oto tä wapa kule maaki, oto tä palimi toti mai kitä. Oto tä wapa kua wi na, ‑Jesus a pitili‑ makö pi kuu wi, ĩ na ĩ tä wapa kua hö̃töoö. Oto tä noa apö waiki maaki, ‑Jesus a pitili‑ makö pi kuu wi, ĩ tä noa sati ipö. ‑Jesus a pitili‑ makö pi kuu wi, ĩ tä wapa tä, makö pitilimo nö, ‑Jesus a pitili‑ makö pi kuu satimoö ha, Jesus a tapamonaso tä, ‑Makö pitilimo waikioma. Makö totiatalo opawö. Kamisa na makö kuo soatio asapöö!‑ ĩ na Jesus a kuu kitä. ⁸Jesus ma tapa mane maaki, Jesus ma pi ipaö. Jesus ma tapa paio mane maaki, ‑Jesus a pitili‑ makö pi kuu kule. Önö kutenö, makö pi mönaha totiatalo opaö. Pe epii makö pi mönaha totiatalo opa kutenö, ‑Wi na sa hapalo kuu pätaka?‑ ĩ na makö pi kuu. ⁹‑Jesus a pitili‑ makö pi kuu salo, makö õsi palimipo waikia kule. Önö kutenö makö pi mönaha apaö.

¹⁰Teusö anö sanöma makö täapa kõo läo nö, makö õsi palimipamani wi, sutu ha ĩ tä ha ai töpö pi taemo totio nö, ĩ ta katehatima. Teusö a kai a wäsä sinomoti noai, ĩ töpönö. ‑Waiha, Teusö anö ai töpö noa mi totiapala apa asa nö, ĩ töpö täapa kõo läo pia salo‑ ĩ töpö kuti noai, ĩ töpönö ta katehatima. ¹¹Ĩ töpö na Cristo a õsi kuo noai, ĩ töpö na Cristo a õsinö ta wäsä nö, ‑Waiha, Teusö anö a kaikanapa pia wi, ĩ Cristo a pepalo opa kuki kitä maaki, waiha a toita apii, a wakala apii, ĩ na a kua kopalo nö, a kaikanamo totio kitä‑ ĩ na Cristo a õsinö ta wäsäö ha, Teusö a kai a wäsä tolemo sinomoti wi, ĩ töpö pi tapomo totio nö, ‑Teusö anö a kaikanamoma pia wi, wi na tä kuto tä, ĩ a waloki? Teusö anö ĩ a kaikanapali wi, ĩ tä wi na tä kua kuki?‑ ĩ na ĩ töpö pi ku upatima. ¹²Teusö a kai a wäsä sinomoti noai, sutu ha ĩ töpönö Jesus Cristo ta wäsä paioma. Teusö anö ĩ töpö pi hatukupamanöma. ‑Huki kamakö na Cristo sa simöpa paio mai kitä. Waiha, sanöma sa töpö totiapala totio piale, ĩ töpö na sa simöa asali wi, ĩ Cristo anö ĩ töpö täapa läo kõo asapöö!‑ ĩ na sutu ha, ĩ na Teusö a kuuma. Huki, Cristo anö makö täapa kõo läo wi, ĩ makö pasiwö. Jesus Cristo anö makö täapa kõo läo wi, huki ĩ ta topa apöle ĩ ta wäsä sinomoti wi, ĩ töpö na Teusö anö kama õsi kua tolele ĩ a simököma kutenö, ĩ töpönö kamakö na ĩ ta wäsä makoka apatima. Jesus Cristo anö sanöma makö täapa kõo läo wi, ĩ tä na ãju töpö pi tapoa totitia hö̃töa kule.

Makö toitai, makö kuopököö!

¹³Önö kutenö, pö pi mosaia totikiö! ‑Wanisala sa tä thaa wani‑ ĩ na pö pi kuu sinomoö! ‑Jesus Cristo a tapamo konaso tä, sa totiapala apa kitäö!‑ ĩ na pö pi kuu sinomo totihoö! ¹⁴Teusö ulupö makö kutenö, ma hinia totilöö! Makö pi moti hãto soa tä, wanisala ma tä thaa pi topa kua noai na, huki ĩ na pö kua pi topa hãto tihöö! ¹⁵Teusö anö makö nakalö noai, ĩ a totiatalo kua wi na, ĩ na pö kua totiatalo hö̃töoö! Toitai ma tä thaa sinomopököö! ¹⁶Teusö tä waheta aiki, ‑Kamisa toita kui na, ĩ na pö toita kua hö̃töikiö!‑ ĩ na Teusö a kuu.

¹⁷Toitai wa tä thaö ha, ‑Wa topaö‑ ĩ na Teusönö wa noa thaö. Wanisala wa tä thaa pasia tä, ‑Wa wanisala apatiwö‑ ĩ na Teusö anö wa noa thaö pasioö. Ĩ na sanöma makö pewö na, ĩ na Teusö a kuu ösöho totio opatii. Ĩ Teusö a na makö hapalo tä, ‑Hapa‑ ĩ na makö kuu sinomoö. Önö kutenö, Teusö a thapo mai, ĩ töpö na makö pilia naia tä, Teusö ma hini totilöö! ¹⁸Kamakö hai ĩ nö patapö töpö kua kua pätio noai na, ĩ na ola makö kua tolea nömöa pätia tä, Teusö anö makö sua konöma. Oto tä, pötaata tä, ĩ nasimö tökö noa hototiatalo sinomo wi, ĩ nasimö tökö noanö makö sua kõo maama. ¹⁹Cristo a iä pö noa apii, ĩ tänö makö sua konöma. Oweha a ose toita apii a kui na, ĩ na Cristo a kuoma. A toita apii, ĩ anö wanisala tä thaa totio maa noai, ai töpönö ĩ a säpalöma. A säpali ha, kama iä pö noa apii, ĩ tänö makö sua konöma. ²⁰Teusö anö hi masita tä uli thapa paio mai ha, Cristo a sailö nö, ‑Waiha, sanöma wa töpö sua konöpöö!‑ ĩ na Teusö a kuuma maaki, huki hi masita tä uli mapo pia tä, makö totiapalapö, Cristo a tapamonasoma. ²¹Cristo a tapamonasoma kutenö, kamakö aiki, ‑Teusö a pitili‑ makö pi kuu totiatalo opaö. Cristo a noma totisoma maaki, Teusö anö a temöa kopamanö nö, a kaikana totia kopalö lasoma. Önö kutenö, ‑Teusö a pitili‑ ĩ na makö pi kuu totio nö, ‑Teusö anö sa temöa kopamanö nö, sa totiapala soatio kitäö!‑ ĩ na makö pi kuu totiatalo sinomo opaö.

²²Jesus ma thapo wi ĩ makö noimaso pitilimopö, Teusö ta pitili ipii ĩ ma ta hini nö, makö õsi ausipamonasoma. Önö kutenö, pö noimaso totihoö! ²³Sanöma tä äpäti ipö kui na, ĩ na kui tänö makö õsi thapa kõo maama. Teusö a palimi ipii, ĩ anö makö õsi thaa asa kopalöma. Makö õsi thaa kopalöma, makö õsi palimipasoma. Önö kutenö pö noimaso totihoö! Teusö a palimi ipii, ĩ a kai mapo mai, ĩ a kainö makö õsi palimipalöma. ²⁴Sĩsi tä häwäpo kua wi na, ĩ na sanöma makö pewö kuaö. Hole hole tä toita apama maaki, tä silikilasoö. Ĩ tä häwäpo kua wi na, ĩ na sanöma makö kua hö̃töoö. Makö toita apii, makö liähä äpii, makö lotete epii, makö patamoö, ĩ na makö kua kule maaki, waiha makö hotesoö. ²⁵Ĩ na Teusö a kai kua pasio mai kitä. Teusö a kai mapo mai, a kuo soatio kitä. Kamakö na Jesus Cristo ta wäsä noai, ĩ Teusö a kai a totiwö.

¹Önö kutenö, wanisala ma tä thaa wi, ĩ tä hosalöheö! Ai töpö mönama wi ĩ tä, holisimo wi ĩ tä, ai tä wani puko opa asaö ha, ‑Ĩ na sa kua naio nö toa sö ö̃‑ makö kuu wi ĩ tä, makö hapalo wanisala soatalo opa wi ĩ tä, ĩ na tä kui ĩ tä pewö hosalöheö! ^2-3Teusö pata tänö makö totiapalati wi, ĩ ma tä taö waikia kutenö, ulu tä ose wainö sui tuu pi ipa kua wi na, ĩ na Teusö ma kai pi ipa kua hö̃töopököö! Sui tuunö ulu tä patama kua wi na, ĩ na Teusö a kai toitai ĩ a kainö makö õsi patama kua hö̃töo kitä. Makö õsi patalo nö, makö õsi palimia totipaso kitä.

Teusömo wi ĩ a sai hai, ĩ maa makö sai kui na, ĩ na makö kuö

^4-5Maa mapö satehe epii mapö makea helulua kupolö nö, sai a thaa kua wi na, ĩ na Teusö anö kamakö koka thapalö nö, Teusömo wi a sai kui na, ĩ na makö kuö hö̃töwö.

Jesus Cristo hai, maa ma palimi, maa ma temö, ĩ na Jesus a kui, ĩ a na pö waloa hö̃köa totikiö! Sanöma töpönö maa ma sai thaa tä, ai maa ma wanisala wani hosa thali wi na, ĩ na sanöma töpönö Jesus a hosa thaa hö̃tölöma maaki, Teusö aiki, ‑Jesus a toita apö‑ a pi kuu nö, a saia asalöma. Maa makö palimi kui na, ĩ na kamakö kuö hö̃töwö. Makö õsi temö lotete epö ha, makö kokapalöma. Makö kokapasoma, Teusömo wi a sai pö kui na, ĩ na makö kupasoö. Teusö a õsi kua tolele, ĩ anö ĩ a sai thatii.

Ĩ a sai na Teusö a na makö pewö kokamo sinomo kuköpö kutenö, Teusö ma täpä sinomo wi, ĩ kamakö waikiwö. Teusö a na salo ma pö totopati wi, ĩ tä aiki kuno mai. Kamakö õsi na Teusö a õsi kua tolele ĩ a kalipaloti kutenö, Teusö a na makö hapaloö, kama ma kai wäsäö, toitai ma tä thaö, ĩ na makö kuati wi, Teusö a na ĩ nasimö ma tä totomatipöö! Ĩ nasimö ma tä totomati ha, Jesus Cristo anö makö pasilipo kutenö, Teusö aiki, ‑Kamisa na ma tä totopati wi, ĩ tä topa‑ ĩ na a kuu. ⁶Pi naka. Ĩ na Teusö tä waheta kuu:

‑Maa ma toita apii, ma noa apii, ĩ sa ma saia totilöma. Ĩ sa ma sailö nö, Sião tä uli ha Teusömo wi a sai thati pole, ĩ a sai kolo ha ĩ sa ma thaa somata pia kule. Kamakö aiki, “Teusö anö maa makö sailö noai, ĩ makö totiwö” ĩ na makö pi kuu salo, “Samakö mönama hãtoa pikia alu kuleö!” ĩ na makö pi kuu mai kitä‑

ĩ na Teusö tä waheta kuu.

⁷‑Jesus a pitili‑ makö pi kuu wi, ĩ makö aiki, ‑Ĩ maa ma toita apö. Ĩ ma noa apö‑ ĩ na makö pi kuu. Ĩ na tä kua tä, ‑Jesus a pitili‑ töpö pi kuu pasio mane, Teusö tä wahetanö ĩ töpö a katehaö. ‑Maa ma sai thakö noai ĩ töpö aiki, “Ĩ maa ma wani wanisala” ĩ na ĩ töpö pi kuu pasio noai, ĩ töpönö ĩ ma hosa pailöma. Ĩ ma hosalöma maaki, ĩ ma toita satio opa asa kõoma‑ ĩ na Teusö tä waheta kuu. ⁸‑Sanöma töpö wäkäpama wi, ĩ maa ma. Töpö kepamani wi, ĩ maa ma‑ ĩ na Teusö tä waheta kuu naioö. Teusö tä kai a hini pasio mai, ĩ töpö wani kepamanöma. Teusö aiki, ‑Ĩ töpönö sa kai a hini mi kutenö, ĩ töpö kea pasopököö!‑ ĩ na Teusö a pi kuuma.

⁹Teusö anö makö saia totia asalö noai, ĩ makö sai. Kamakönö Teusö Kaikana ma pata täpä sinomo wi ĩ makö. Teusö anö makö sokapalö nö, makö õsi ausipamanö noai, ĩ makö pewö. Teusö anö makö thapo pole, ĩ makö asawö. Aipa apa wi ĩ tä, tä toita apii ĩ tä, Teusönö ĩ na tä thaa kua sinomoti wi, ĩ ma ta wäsäpö, makö sailöma. Mumi mumi tä na makö hupaloti tä, Teusö a hai ĩ tä wakala toita apii tä wakala ha makö huma totio asapö, makö saia asalöma. ¹⁰Teusö a hai ĩ makö kuo paio maa noai maaki, huki Teusö a hai ĩ makö sai toti waikiwö. Teusö anö sanöma makö noa mi totiapala apa wi, ĩ ma tä tai mio opa noai maaki, huki Teusö anö makö totiapala apati wi, kamakö na huki ĩ tä pewö totoköma.

Teusö a thapo mai ĩ töpö na makö kua tikilia naia kutenö, toitai makö kuatipököö!

¹¹Ipa pö! Teusö ma thapo wi ĩ makö waiki kutenö, huki tiko makö waikiwö. Teusö a sai pö hamö makö konasolöpö makö maaki, hi masita tä uli ha makö hamamopalo paia pätia kule. Önö kutenö, ‑Wanisala ma tä thaa pi topa apa wi, ĩ nasimö tänö makö õsi namo kusöpa sinomoö. Önö kutenö, wanisala tä thaa pi topa wi, ĩ tä na pö umao totio opaö!‑ ĩ na sa ku upaö. ¹²Toitai tä thaa sinomoheö! Toitai ma tä thaa sinomoö ha, Teusö a thapo mai, ĩ töpö na makö pilia naine, ĩ töpö aiki, ‑Jesus a thapo wi ĩ töpö wanisala‑ ĩ na töpö kuu kule maaki, toitai ma tä thaa sinomo wi, ĩ töpönö ĩ tä taa nö, ‑Jesus a thapo wi ĩ töpönö toitai tä tha apatii‑ ĩ na ĩ töpö kuu kuki kitä. Ĩ na ĩ töpö kuu kuiki nö, waiha sanöma töpö na Teusö a pata walo tä, ‑Teusö a totiatalo opa asa sai taköö!‑ ĩ na ĩ töpö kuu naio soatalopöö!

Makö simöa sinomo wi, ĩ töpö a hiniheö!

¹³Jesus pata tä na töpö hapalo pi wasöa maapö, pata ma töpö a hiniö! Kaikana ma tä pata hini totioö! ¹⁴Kaikana tänö ai pata töpö simöa nö, ‑Wanisala tä thaa wi ĩ töpö wani peamaö! Toitai tä thaa wi, ĩ töpö toleha asapamanöö!‑ ĩ na pata töpö noa thaa sinomo asa wi, ĩ ma töpö a hinia naia totilöö! ¹⁵Teusö aiki, ‑Toitai ma tä thatala apa totihoö! Toitai ma tä thatala apati ha, sa thapo mai, ĩ töpö pi hatukupo mi ipii, ĩ töpö hapalo osemo mai kitä‑ ĩ na Teusö a pi kuu. ¹⁶Ai sanöma tänö makö simöa maa kule maaki, wanisala tä thaa hãto tihöö! Teusö anö makö simöa sinomoti wi, ĩ makö pasi kutenö, Teusö ma kai a hinia totilöö! ¹⁷Ai sanöma ma tä komopama pasio maapököö! Jesus a thapo naio wi, ĩ töpö solo pö noimaso totihoö! Teusö a na makö kili ipa nö, Teusö ma ta hinia totilöö! Ĩ na tä kua tä, ‑Ai sanöma sa tä kaikana hini pasio mai kitä‑ pö pi kuu hãto tihöö!

Jesus a wasisama tä, a hapalo wanisala maa kuo noai na, ĩ na makö kuapököö!

¹⁸Ai töpö na makö kalipalo sinomoti wi, ĩ pö! Makö kalipalama sinomoti wi, ĩ töpö a hiniheö! Ĩ töpö na, ‑Päla‑ pö kuu ti! Ai töpönö makö kalipalama sinomo wi, ĩ töpö noimo mai, ĩ töpö hapalo wanisalaö, ĩ na ĩ töpö kuati päla tä maaki, ĩ töpö a hinia totilöheö! ‑Sa totiapala apatii, kamisa na a noimo opatii, ĩ na a kuati wi, ĩ sa hinia sisali pia salo‑ pö pi kuu tihöö! Makö kalipalama sinomoti wi, ĩ töpönö makö wasisama apa sinomoti päla tä maaki, ĩ töpö a hinia totia nainöö! ¹⁹Makö kalipalo topati kule maaki, ĩ töpönö makö pepalama tikiliapalo naitia tä, ‑Teusö anö sa tapala waikipoli kitäö‑ ĩ na makö pi kuutoö! Ĩ na makö pi kuu nö, makö kasiapalo satimo opaö ha, ‑Wa totiatalo opawö a!‑ ĩ na Teusö a kuu kitä. ²⁰Wanisala ma tä thaö ha, makö soapalöma, ‑Wa totiatalo opawö‑ Teusö a kuu mai kitä. Toitai ma tä thaa kule maaki, makö peama pikia kule maaki, makö kasiapalo satimo opaö ha, ‑Wa totiatalo opawö‑ Teusö a kuu totio kitä.

²¹‑Makö pepalama apati päla tä maaki, pö kasiapalo satia apaö!‑ ĩ na Teusö a kuu. ‑Ipai töpönö sa uömapököö!‑ ĩ na Cristo a pi kuunö, makö noama pia salo, a pea totio opama. Cristo a kuati kua noai na, ĩ na makö kua totio hö̃töopököö! ²²Cristo anö wanisala tä thaa totio maama. A hapalo holisimotalo maama. ²³Ĩ a na ai töpö hapalo wanisala apati kule maaki, a hapalo wanisala hö̃töo maama. A pepalama apati ha, ‑Makö pepalama hö̃töo kitä‑ ĩ na a kuu maama. ‑Ipa hao Teusö anö tä makokama läapalo opa wi ĩ a kutenö, kamisa na ai töpönö wanisala tä thaö ha, Teusö anö ĩ töpö peama hö̃töo pasio kitäö!‑ ĩ na Cristo a õsi kuu makoka apama. ²⁴Nomawö tänö wanisala tä thatala mi kui na, ĩ na makö pewö kua naiopö. Wanisala tä na nomawö töpö kua kua wi na, ĩ na wanisala tä na ĩ na pö kua kua totio naioö! Toitai tä na temö temö pö sino kukiö! Ĩ na Cristo anö makö thamapö, wanisala ma tä thaa noai, hii ti pakalai ti ha ĩ wanisala tä kai sätäköma. Cristo a soa noai ĩ tä, a tiwöha noai ĩ tä, ĩ na tä kua kua noai, ĩ tänö makö toa komani. ²⁵Oweha kökö monö sinomo kua wi na, ĩ na makö monö kua hö̃töoma maaki, Cristo anö makö sua konöma. Oweha kökö na ai tä mamo läapalo nö, kökö noama sinomo kua wi na, ĩ na kamakö na Cristo a mamo huu hätäpo kuati nö, ĩ na makö õsi noama kua hö̃töoö. Ĩ Cristo a na makö nokapalopö, makö monö tä, makö sua konöma.

Pusopö töpö, peanopö töpö, ĩ na töpö kui töpö noa thaö

¹Ĩ na pusopö makönö au heano töpö a hini kua hö̃töoheö! Au heano wa hiniti ha, au heano anö Jesus Cristo ta hini mai maaki, wa topa apati ha, au heano anö Jesus Cristo ta hini kuköpöö! ²Kawa hapalo mai ha, Teusö wa hini salo, toitai wa tä thaa sinomo wi, au heano anö ĩ tä taa nö, ĩ anö Jesus a täa kuköpö. ³‑Sa hunuku möamö totia apöpasoö, söpala ösö toto noa apii ĩ sa toto haleli, haloi ösö toita apii sa ösö haloa naini, ĩ na sa tökö thaa thalöma, sa liäha apöpasoö‑ a pi kuu tihöö! ⁴Pili wa ösö aiki kuno mai. Õsi pili wa sai liäho opa sisapöö! Wa pi hölahatalo mai, wa õsi pi hĩsuha mai, ĩ na wa õsi kuati ha, wa õsi liäha apa kitä. ‑Wa õsi liäha apa sinomo wi, ĩ tä noa apö sisawö‑ ĩ na Teusö a kuu. ⁵Sutu ha Teusö a thapo noai, ĩ töpö suö aiki, ‑Teusö a pitilimo opaö‑ töpö pi kuti noai, ĩ na ĩ töpö suö liähäpamonasoma. Kama töpö hai ĩ peanopö töpö a hini noai, ĩ tänö ĩ suö töpö õsi liähäa apöpamonasoma. ⁶Ĩ na Sata a kuama. Peanopö Abraão a na, ‑Sa simöaö!‑ ĩ na a kuu nö, peanopö a hininöma. Makö kili totio mai, toitai ma tä thaa sinomo kuköma, Sata a kua kua noai na, ĩ na makö kua hö̃töo kitä.

⁷Ĩ na peanopö makö kua naiopö. Au husopö a na wa sätäapalo totia tä, au husopö a na wa pi tapomoti nö, wa pi hatuka apa nö, ‑Wano sa lotete kui na, ĩ na ipa husopö a lotete kuö mai kitä‑ ĩ na wa pi kuu totio nö, au husopö a na a höla tihöö! A komopama tihöö! Teusö anö õsi palimipama wi, kawa na ĩ tä tototaö, au husopö a na ĩ tä toto naia soataki, ĩ na tä kuaö ta pi kuu mai. Ĩ na kamakö hai ĩ pusopö töpö na ĩ na makö kua totitioö ha, Teusö a na makö hapalo tä, makö a hinini kitä. Kamakö hai ĩ pusopö töpö na peanopö makö noimo mi tä, Teusö anö makö a hini pasio mai kitä.

Toitai ma tä thaa kule maaki, ai töpönö makö peama hĩsua apa wi ĩ ta

⁸Ĩ na sa kuu mapo pia kule. Kama makö pewö aiki, ‑Ĩ na makö kuapököö!‑ ĩ na kama pö pewö pi kuu ösöhoö! Ai tä wani pea tä, ‑Ĩ na ĩ a wani kua pasi päoö‑ pö pi kuu ti! Jesus ma thapo wi ĩ makö noimaso totio opapököö! Ai ma töpö pi ipa nö, ma töpö totiapalapököö! ‑Pata sa asawöö!‑ ĩ na pö pi kuu tihöö! ⁹Kawa na ai tä waninö wanisala tä thaa tä, ĩ a wani na wanisala tä thaa nomöho hö̃töo tihöö! Kawa na ai tä hapalo hiopöaö ha, a hapalo hiopöo nomöho hö̃töo soato tihöö! Teusö anö makö naka tä, ‑Makö totiapala apa kitä‑ ĩ na Teusö a kuuma kutenö, kawa na ai tä wani wanisala kule maaki, kawanö ĩ a wani totiapala satia apa hö̃töoö! ¹⁰Pi naka. Ĩ na Teusö tä waheta kuu: ‑Temii wa kuo lapa pi topa soaö, wa pi topaö, wa hupalo pi topaö, ĩ na wa kua pi topa soa salo, a hapalo wanisalatalo hãto tihöö! A kai holisimoatalo hãto tihöö! ^11-12Toitai tä thati wi, ĩ töpö na Teusö a mamo läapaloti asa kule. Teusö a na ĩ töpö hapalo tä, Teusö anö ĩ töpö a hini totiatalo asaö. Wanisala tä thatalati wi, Teusö anö ĩ töpö wanipo pasioö. Önö kutenö, wanisala tä thaa pasio mai, toitai tä thaa totihoö! Makö hölatalo mai, makö noimo sinomoö!‑ ĩ na Teusö tä waheta kuu.

¹³Toitai ma tä thaa pi topa apa tä, ai töpönö makö wanisalama totio mai kitä. ¹⁴Toitai ma tä tha apa tä, ai töpönö makö peama apa kuköma maaki, makö pi topa satia apa hö̃töo kitä. Ai töpönö makö peama wi, ĩ töpö na pö kili tihöö! Pö pi honipo tihöö! ¹⁵‑Cristo a hai, ĩ pata tä sai‑ ĩ na makö pi kuu nö, ĩ a na pö mamo tetea sisaköö! ‑“Teusö anö sa täa koni kitä” makö pi kuti wi, ĩ ta wäsä makoka totioheö!‑ ĩ na ai tä kuu ha, ‑Kui. Ĩ sa ta wäsä tai mi‑ a kuu hãto tihöö! Ĩ tä wakala pewö hamö wa pi tapoiki nö, ‑“Ĩ ta wäsäö!” ai tä kuu ha, sa kili mai ha, ĩ sa ta wäsä hö̃töo kitä‑ ĩ na pö pi kuu sinomo totihoö! ¹⁶Ĩ ma ta wäsä salo, makö höla mai, opii ta wäsä makoka totioheö! Wanisala tä thaa ti! Wanisala ma tä thama, ‑Wanisala sa tä thaa silia apa sai taköö!‑ ĩ na makö õsi pi kuu matimöö! Wanisala ma tä thaa mi päla tä maaki, kamakö na ai töpö hapalo pi wasöha nö, ‑Cristo a thapo wi ĩ töpö wanisala‑ ĩ na ĩ töpö kuu kitä maaki, toitai ma tä thaa sinomo pasio wi ĩ makö kutenö, ĩ töpö kiliso kitä. ¹⁷Wanisala ma tä thaa noai, ĩ tä noa na makö peama wi, ĩ tä kua. Toitai ma tä thaa noai, ĩ tä noa na makö peama wi, ĩ tä kua naia pikia. Önö kutenö, Teusö aiki, ‑Toitai ma tä thati noai, ĩ tä noa na ai töpönö wa peama päo‑ ĩ na a pi kuu waikila tä, makö peama pole, ĩ tä topa waikia kule.

¹⁸Sanöma makönö wanisala ma tä thaa wi, Cristo anö ĩ tä noa thapali pia salo, a säpamoa waikilasoma. A säpamo kota mai kitä. Teusö a na makö waloa kõkö lasopö, wanisala ma tä thaa noai, ĩ tä noa na a säpamoa waikilasoma. Cristo a hai, sanöma tä kuo noai, ĩ a nomasoma maaki, a temöa kono nö, õsi a sai kua kopasoma. ¹⁹Õsi a sai kua kopalo nö, titita noai ĩ a sai ha ai õsi töpö kuo noai, ĩ hamö Cristo a õsi holepalo nö, ĩ õsi töpö na Cristo anö Teusö ta wäsäma. ²⁰Noé anö kutiata a pata thati tä, ai töpönö Teusö ta hini maa pasio soatio noai, ĩ õsi töpö na Cristo a õsinö Teusö ta wäsäma. Sutu upa Noé a kua soa tä, Teusö aiki, ‑Ĩ töpönö sa hinia hãtoli kitä‑ ĩ na Teusö a pi kuu salo, ĩ töpö säpa paio soata maama. Maa tuu pata õkimo tä, kutiata a pata ha 8 töpö titia sisaki wi, maa tuu pata na Teusö anö ĩ töpö noama asama. ²¹Ĩ maa tuu õki kuo noai, maa tuu na makö mãi õmamo wi, ĩ tä uni. Huki, Jesus Cristo a temöa konasoma kutenö, maa tuu ha makö mãi õmamo tä, Teusö anö makö täapa kõo läo nö, makö õsi palimipamani. Wa ösö sami tä, maa tuunö wa ösö salupo wi, ĩ nasimö tä aiki kuno mai. Wa holisimo mai, ‑Teusö ai! Sa õsi salupa mi salo. Wa hosa mai kitä‑ ĩ na wa kuu wi, ĩ tä pi ha makö mãi õmani. ²²Jesus Cristo a temöa kono nö, ösö hamö a kononö nö, Teusö a kotö ha a kua asa kõa kupoli. Teusö a kotö ha a kua asaiki nö, ãju töpö, hi tä hẽtu ha töpö patamo wi ĩ töpö, töpö lotete epii ĩ töpö, ĩ na töpö kui, Cristo anö ĩ töpö pewö simöaö.

Teusö a thapo mai, ĩ ma töpö uöma toitio maikiö!

¹Önö kutenö, Cristo a hai, sanöma tä kupalo nö, pe epii a pea totioma. A pea kule maaki, a kasiapalo satia apama. Ĩ a kasiapalo kua noai na, ĩ na makö kasiapalo kua hö̃töopö, ‑Cristo a pea kua noai na, ĩ na sa pea kua hö̃töo päopöö!‑ ĩ na makö pi kuu totihoö! Wa pea totioma, ‑Wanisala sa tä thaa kota mai kitä‑ ĩ na wa pi kuu kitä. ²Önö kutenö, hi masita tä uli ha wa kua soa tä, ‑“Ĩ na wa kua totihoö!” Teusö a kuu wi, ĩ sa ta hini pi topa apa kule‑ ĩ na makö pi kuupökö. ‑Kamisanö sa tä thama pi topa päo wi, ĩ sa tä thama mai kitä‑ ĩ na makö pi kuupökö. ³Teusö a thapo mai, ĩ töpönö wanisala tä thaa pi topa apati wi, kamakönö ĩ ma tä thati tä, makö tetea apa waikipasoma. Wanisala ma tä thaa pi topaö, ai tiko tä suö na makö mamo tetehoö, makö polemo opaö, makö saponomo tä wanisala ma tä thaö, tuu wasui ma tuu kopala apaö, Teusö a na, ‑Samakö pasilipalöö!‑ makö pi kuu totio mai, ukutupö tä na, ‑Samakö pasilia totipalöö!‑ ĩ na makö pi kuu hanoa, ĩ na makö kuatima. ⁴Teusö a thapo pasio mai, ĩ töpönö hiopö tä thaa isi waniho opa sinomoti wi, ĩ töpö na makö kuo tikilio naio mi, hiopö ma tä thaa naio mi, ĩ na makö kuaö ha, Teusö a thapo mai, ĩ töpö aiki, ‑Makö aipa apa nö kiliawö‑ ĩ na ĩ töpö pi kuu nö, makö a wai soatalo opaö. ⁵Ĩ na ĩ töpö kua kule maaki, waiha Teusö anö ĩ töpö peama hö̃töo kitä. Töpö noma waikilaso noai ĩ töpö, töpö temö soai ĩ töpö, ĩ na töpö kui töpö na Teusö aiki, ‑Wi na makö kuati kipili?‑ ĩ na Teusö a kuu pia salo. Ĩ na a kuu nö, ĩ töpö a hini nö, ĩ töpö peama pia salo. Makö a wai ipati wi, Teusö a na ĩ töpö waloköma, ‑Wi na makö kuatima?‑ Teusö a kuu kitä. Ĩ töpönö wanisala tä thaa noai, ĩ ta kateha kuki kitä. ⁶Töpö nomapo waikio noai, ĩ töpö na Jesus ta topa apöle ĩ ta wäsäma. Wanisala tä thaa wi, ĩ tä noa na sanöma töpö pewö nomapo sinomo kutenö, ĩ na ĩ töpö noma kua hö̃tösoma. Ĩ töpö noma hö̃tösoma maaki, Teusö a õsi palimi kui na, ĩ na kama töpö õsi palimi thaa hö̃töpamani pia salo, ĩ töpö na Jesus ta topa apöle ĩ ta wäsäma.

⁷Hi masita tä uli mapo pia kuleö! Önö kutenö, Teusö a na makö hapalo makokapö, pö pi hatukuikiö! Pö pi mosawikiö! ⁸Ai wa tä noima wi, kawa na ĩ a waninö wanisala tä thama maaki, kawanö ĩ wa hĩsu thaa mai kitä. Önö kutenö, pö noimaso totihoö! Ai wa ta hini waikia kule maaki, sa kuu pole, kawanö ĩ ta hini hasua apa satia apa asaö! ⁹Teusö a thapo wi ĩ töpö hama talasoö ha, ‑Häö!‑ makö kuu mai, ‑Hisa ha pö kuikiö!‑ ĩ na makö kuu läto sinomoö! ¹⁰Kamakö na Teusö anö tä totoma hätäpo noai, ĩ tä umapo hãto maiki. Kawa na tä totoa asakö noai, ĩ tänö ai wa töpö pasilipapököö! ¹¹Teusö wa ta wäsä taö öpa kuköpö, Teusö anö ĩ wa thaa asapalöma, Teusö wa kai a wäsä totiopököö! Ai wa tä pasilipa taö öpa kuköpö, Teusö anö ĩ wa thaa asapalöma, Teusö anö wa lotetepamanöma kutenö, ai wa tä pasilia totipalöö! ‑Teusö a totiatalo opa asawöö!‑ ĩ na ma töpö pi thamapö, sa kuuhe, ĩ na makö kua totiatalotipököö! Ĩ töpönö Jesus Cristo a thapo salo, ‑Teusö a totiatalo opawöö!‑ ĩ na töpö kuupö. Ĩ a pata wakala apö, a toita apö, a lotete epö, ĩ na ĩ a pata kuö soatiowö. Pitili ta. Ĩ naköö!

Jesus ma thapo wi ĩ makö pepalo opa wi ĩ ta

¹²Ipa pö! Koa takanö söpala ösö noa apii ösö wapa kua wi na, ĩ na kamakö wapa kua hö̃töopö, makö peama päoö ha, ‑Häö! Wi na taköö! Sa peama wi ĩ tä aipa apa nö kilile‑ ĩ na pö pi kuu ti! ¹³Pö pi topa pasikiö! Waiha Cristo a wakala apii, a toita apii, ĩ tä tapamo kõa tä, makö pi mönahapalo opapö, Cristo a pea kua noai na, ĩ na huki makö pea kua paia kule. Önö kutenö, pö pi topaikiö! ¹⁴Cristo ma thapo kutenö, kamakö na ai töpö hapalo wanisala päla tä maaki, makö pi topaikiö! Teusö a õsi kua tolele ĩ a wakala apii, a toita apii, kamakö õsi na ĩ a kua manu kule, kamakö na ai töpö hatalo wanisala kuki kitä. Kamakö õsi na Teusö a õsi kua tolele ĩ a kua waikia salo, makö pi topaikiö! ¹⁵Ai sanöma wa tä säpali, wa thomömoö, wanisala wa tä thaö, ai wa tä isi wanihama sinomo opaö, ĩ na wa kuati noai, ĩ tä na wa peama hö̃tököpö, ĩ tä na sa kuu maa kule. Ĩ na makö kua naio maapököö! ¹⁶Cristo ma thapoö ha, ai töpönö makö peama kuköpö, ĩ tä na sa kuu kule. Kamakönö Cristo ma thapo kutenö, ai töpönö makö peamaö ha, pö kili ti! Ĩ töpönö makö a kateha tä, ‑Cristo a thapo wi ĩ a‑ ĩ na ĩ töpö kuu ha, Teusö a na, ‑Ai taköö! Au ulu Cristo sama thapo wi ĩ samakö waikiwöö!‑ ĩ na makö kuu totiataloö!

¹⁷Teusö anö tä makokama läapalo piale, ĩ tä pi äwäha waikia kule. Teusö ma thapo wi, Teusö anö ĩ makö na tä makokama läapalo soma wi, ĩ tä kua pia kule. Ĩ na tä kua tä, Teusö ta topa apöle ĩ ta hini pasio mai, ĩ töpö na Teusö anö tä makokama läapalo nömöo wi, ĩ töpö peama sati apa pia salo. ¹⁸Pi naka. Toitai tä thaa wi, Teusö anö ĩ töpö täapa kõo läa kule maaki, hi masita tä uli ha ĩ töpö pea paio sinomoö. Ĩ töpö topa apa kule maaki, ĩ töpö pea hö̃töoö. Önö kutenö, Teusö a na töpö pälamo wi ĩ töpönö wanisala tä thapala apati wi, waiha pe epii ĩ töpö pepalo satia apa kuki kitä. ¹⁹Önö kutenö, huki makö noma paio mi tä, Teusö aiki, ‑Ipa ai töpö pea paio päoö‑ ĩ na Teusö a pi kuu salo, Teusö a thapo wi ĩ ai makö pea hö̃töo kuki kitä. Ai makö pea hö̃töo wi, ĩ makö aiki, ‑Teusö a pitili‑ makö kuupökö. Teusö anö makö pewö thapalö noai, ĩ aiki, ‑Makö täapa kõo läo totio kitä‑ ĩ na ĩ Teusö a kuu wi, ĩ ta pitili ipö salo, ‑Teusö a pitili‑ makö kuupökö. Ĩ na makö kuu nö, toitai ma tä tha apatipököö!

Pö pasilipaso totihoö!

¹Teusö a thapo wi ĩ töpö kokamo sinomo wi, ĩ töpö hai ĩ pata makö na sa hapalo nömöo pia kule. Sa patamo hö̃töo wi ĩ sa hapalo totio pia kule. Cristo a peati noai, ĩ sa tä taa totio noai ĩ sa. Cristo a wakala apii, a toita apii, ĩ tä tapamo kõa tä, wakala apii, toita apii, ĩ na sa kua naio pia wi ĩ sa. ²Oweha kökö thapo sinomo wi, oweha kökö na ĩ töpö mamo läapalo sinomo nö, kökö pasiliapalati nö, ĩ na ĩ töpö kua kuati kua wi na, ĩ na Teusö anö töpö thapo wi, ĩ töpö na ĩ na pata makö kua kua hö̃tötiopököö! ‑“Ipa ai töpö na makö mamo lätiki nö, töpö pasilipa sinomoö!” ĩ na Teusö anö pata sa noa thaa manu kule, ĩ töpö na sa mamo läo wani ipö maaki, ĩ sa töpö pasilipa sinomo päopököö!‑ pö pi kuu tihöö! ‑Ĩ sa töpö pasilipo pi topa apa kutenö, ĩ töpö na sa mamo läiki nö, sa töpö pasilipa sinomo opa kitäö!‑ pö pi kuu pasio totihoö! Ĩ na makö pi kuu kua wi, Teusö anö ĩ tä pii sisaö. ‑Teusö a thapo wi ĩ töpö na sa kalipalo wi, ĩ tä noa na sitipa sa kökö tälöpökö o‑ makö pi kuu mai, ‑Noa mi päla tä maaki, ĩ töpö na sa kalipalo pi topa päoö‑ ĩ na pö pi kuu totioö! ³‑Sa thapo wi, ĩ töpö pasilipa sinomoö!‑ ĩ na pata makö na ĩ na Teusö a kuu noai, ĩ ma töpö noa thaa päo maikiö! Pö hapalo päo tihöö! Toitai ma tä thatala wi, ĩ tä möma hatuka totihoö! Jesus a thapo naio wi, ĩ töpönö pata makö uöma naio soatalopököö! ⁴Sa kuuhe, ĩ na pata makö kuati ha, Jesus anö kamakö na noa tä totoki kitä. Jesus anö kama hai ĩ töpö thapo totio wi, ĩ töpö pasilipa sinomo wi, ĩ a pata tapamo kõa tä, noa tä toita apii, tä mapo mi ipii, pata makö na ĩ tä totoa hö̃töki kitäö!

⁵Kamisanö hĩsa makö noa thaa nömöo pia kuleö! Hĩsa makönö pata töpö a hinia totilöheö! Kamakö pewö aiki, ‑Sa patamo wi ĩ sa kutenö, ai sa töpö pasilipa pasio mai kitä‑ pö pi kuu ti! ‑Sa patamo wi ĩ sa asa kutenö, ai sa töpö pasilipa pasio mai kitä‑ ĩ na töpö pi kuu pasio wi, Teusö anö ĩ töpö wanipoö. ‑Pata sa asawö‑ ĩ na töpö pi kuu mai, ai töpö pasilipa sinomo asa wi, Teusö anö ĩ töpö totiapala apa asaö. Önö kutenö, ‑Sa patamo wi ĩ sa asa kutenö, ai sa tä pasilipa pasio mai kitäö!‑ pö pi kuu ti! ⁶‑Teusö a hai, ĩ ipa pata tä sai sisawö‑ ĩ na makö pi kuu totio sisa nö, Teusö a lotete epii, ĩ anö wa noama taö öpa sisa kutenö, kama wa komo komomo sapamo kõoö ha, Teusö anö wa hösökapama pi topa kõa tä, wa hösökatalama kõo hö̃töo kitäö! ⁷Teusö anö makö pasilipa pi topa apa sinomo kutenö, makö pi seheliapalo opati wi, ĩ ma tä thapo pole, Teusö a na ĩ tä totoköö!

⁸Pö pi hatuka totikiö! Sai tä sai patanö makö wanipo sinomoö. Öla a waitili salo, makö namo keki nö makö oalöpö, öla lämo ãsoka kua kua wi na ĩ na Sai tä sai pata lämo ãsoka kua kua hö̃töoö. Önö kutenö, pö pi mosawiapalo totihoö! ⁹‑Jesus a pitili‑ ĩ na pö pi kuu satimoö! Jesus a na pö noamamo satimo opa sinomoö! Jesus a na makö noamamo satimo nö, makö kasiapalo nö, Sai tä sai pata sasupalöheö!

Ĩ tä uli pewö hamö Jesus a thapo naio wi, ĩ töpö pilipai, ĩ töpö pepalo naitia kule. Jesus ma thapo salo, makö pepalo kuati wi na, ĩ na ĩ töpö pewö pepalo kua naitioö. Ĩ ma tä taö waikia kule.

¹⁰Teusö a toita apii, a wakala apii, a palimi ipii, ĩ aiki, ‑Sanöma töpönö ipa Jesus a thapo kutenö, kamisa toita kuati wi na, ĩ na ĩ töpö toitai, palimi ipii, ĩ na ĩ töpö kua naipasopöö!‑ ĩ na Teusö a pi kuu salo, makö nakalöma. Ĩ anö makö totipali kitäö! Makö pea tetepo opati mai kitäö! Makö pepalo matasoö ha, makö pi ipa wi, ĩ anö makö totiapala apati wi, ĩ Teusö anö makö lotetepamani kitäö! ‑Jesus a pitili‑ makö pi kuu mapo mai kitä. Makö lotetepamani ha, makö kasiapalo nö, ‑Jesus a pitili‑ makö pi kuu soatio kuki kitäö! ¹¹Teusö a kaikanamo totio soatiopöö! A kaikanamo mapo maapököö!

Ĩ na sa kuu mapo pia kule

¹²Jesus a thapo naia totio opa wi, ĩ ipa Silas a na hi waheta sa tä sãököpamani ke. Hototi ipii pätawö. Makö pi topapamanöpö, sa tä sãököpamani ke. Sa ta wäsähe, Teusö anö makö totiapala apati wi, ĩ tä sai a. Teusö anö makö totiapala apa manu kule, Teusö a na pö pälamo ti! Pö kasiapalo totihoö! ¹³Hi Papilônia tä uli ha Jesus a thapo wi ĩ töpö kokamo sinomo wi, Teusö anö makö naka kua noai na, ĩ na ĩ töpö naka thaa hö̃tölö noai, ĩ töpö aiki, ‑Makö topa soa kule?‑ ĩ na kamakö na ĩ na ĩ töpö kuu kule. Ipa ulu Marcos a hai, ‑Makö topa kule?‑ kamakö na ĩ na ĩ a kuu naia kule. ¹⁴Makö noimaso nö, makö kokamo nö, makö hanokopasopököö! Jesus ma thapo wi ĩ makö pi topapalo totio opapököö!