1 João

1 João

João anö waheta tä sãöka somapalö noai ĩ ta

Hi waheta tä na João aiki, ‑Teusö anö makö noima sinomoti wi, ĩ a. Kawanö ai wa töpö noimati tä, Teusö a na wa kutia, kawa na Teusö a kua hö̃tötia, ĩ na tä kuaö. Önö kutenö, makö wanihaso mai, makö noimaso totihoö!‑ ĩ na a kuu totiatalotima.

Ĩ na tä kua tä, João anö wakala tä kateha nö, ‑Wakala tä na Teusö a kua sinomo kuo wi na, ĩ na makö kua hö̃töa tä, Jesus a thapo wi ĩ töpö na makö noimo topa apa kitä. Wakala tä na Teusö a kuo sinomo salo, wanisala tä taa wani, ĩ na Teusö a kua wi na, ĩ na makö kua hö̃töa tä, Teusö a hai ĩ pelupö Jesus anö makö õsi salua totipali kitä. Jesus a iä pö kupasoma salo, wanisala ma tä thaa noai, ĩ tä noa pewö maa totipamanö nö, makö õsi salua totipali kitä‑ João a kuuma. A kuu nö, ‑Au ai wa tä wanipo tä, “Sa pi hatukua waikia kutenö, Teusö a na sa topa apa kule” ĩ na wa hole kuu nö, wa pi motöa soa, mumi mumi tä na wa kua soa, ĩ wa kua soaleö!‑ João a kuuma.

Ĩ na tä kua tä, ai töpönö ta holisii ta wäsä wi, João anö ĩ töpö a kateha nö, ‑A holisi wani wäo wi, ĩ a hapalo nö, “Jesus hai, Teusö anö a simönö nö, a kaikanapalö noai, ĩ a mai kitä” ĩ na a holisi kutii. Ĩ a hai, Cristo a wanipo opa wi, ĩ a. “Jesus a hai pö̃ a hai, ĩ Teusö a mai kitä. Teusö a hai pelupö a hai, ĩ Jesus a mai kitä” ĩ na ĩ a holisi kutii‑ ĩ na João a kuuma.

Jesus hai, a haö wi ĩ a

¹A haö wi, ĩ Jesus a, ĩ sama wäsä kule. A haö wi, ĩ anö õsi temöama wi, ĩ a. Hi masita tä uli kua paia mi tä, ĩ a kuo somama. Ĩ a kuo soma noai, ĩ sama hini kipili. Ĩ sama tapa kipili. Ĩ sama möö nö, sama höpöa kipili. ²Õsi temöama wi, ĩ a tapamonasoma. Kama temöo soatio noai, pö̃ a na a kuo soatio noai, kamisamakö na ĩ a tapamono nö, ĩ sama tapa nö, kamakö na ĩ sama wäsä kule. ³Ĩ sama tä tapapili, ĩ sama ta hinipili, kamakö na ĩ sama ta wäsä kule.

Pö̃ a, pelupö Jesus Cristo a, ĩ na kilii töpö na samakö noia apa kutenö, ‑Ĩ töpö na makö noimo naiopököö!‑ ĩ na makö pi thama pia salo, sama ta wäsä kule. ⁴Samakö pi mönaha totio opa kuköpö, ĩ sama ta wäsä wi, ĩ sa tä sãököpalö nö, kamakö na sa tä simöpa pia kule.

Teusö a wakala toita apö

⁵Jesus Cristo anö ta wäsäpili, kamakö na ĩ sama ta wäsä tolea pia kule. Teusö a pi hatuka apa, a topa apa sinomoö, ĩ na Teusö a kua kutenö, ‑Teusö a wakala toita apö‑ ĩ na Jesus a kuu kipili. Teusö anö wanisala tä thaa mi kutenö, ‑Teusö a na mumi mumi tä kua mai kitä‑ ĩ na Jesus a kuu kipili. ⁶Önö kutenö, mumi mumi tä na wanisala tä thaa wi, ĩ a wani kua wi na, ĩ na kamakönö wanisala ma tä thatima, ‑Teusö a na sa noimo totia apa kule‑ ĩ na makö kuu kitä maaki, makö pitilimo totio opa hãto mai kitä. Makö holisimo päoö. ⁷Wakala tä na Teusö a kua sinomo kuo wi na, ĩ na makö kua hö̃töa tä, Jesus a thapo wi ĩ töpö na makö noimo topa apa kitä. Wakala tä na Teusö a kuo sinomo salo, wanisala tä taa wani, ĩ na Teusö a kua wi na, ĩ na makö kua hö̃töa tä, Teusö pelupö Jesus anö makö õsi ausia totipamani kitä. Jesus a iä pö kupasoma salo, wanisala ma tä thaa noai, ĩ tä pewö hosa totilö nö, makö õsi ausia totipamani kitä. ⁸‑Hö. Wanisala sa tä thaa tai mi. Sa wanisala mai kitä‑ makö kuu tä, makö mönao sapamoö. Makö pitilimo mi.

⁹‑Awai. Wanisala sa tä thama‑ ĩ na makö kuu totioö ha, wanisala ma tä thaa noai, Teusö anö ĩ tä noa täa kõo mai kitä. Teusö a pitilimo opaö, a makoka apaö, ĩ na Teusö a kua kutenö, wanisala ma tä thaa noai, ĩ tä noa täa kõo mai, ĩ wanisala tä pewö hosalö nö, makö õsi ausia totipamani kitä. ¹⁰‑Wanisala sa tä thaa maa thaliö!‑ ĩ na makö kuu hö̃töo tä, ‑Teusö a holisi. Teusö anö sa mönama päoö‑ ĩ na makö pi kuu päoö. Ĩ na makö pi kuu nö, Teusö ma hini mi sinomo päwö salo, ‑Wanisala sa tä thaa maa thaliö!‑ ĩ na makö pi kuu päoö.

Jesus a hapalo läatalo opa kitä

¹Ipa ulu pö! ‑Wanisala ma tä thaa maiki!‑ ĩ na sa kuu pia salo, hi waheta sa tä sãököpalö nö, kamakö na sa tä simöpa pia kule. ‑Wanisala ma tä thaa maiki‑ ĩ na sa kuuhe maaki, wanisala wa tä thaö ha, Jesus Cristo a hapalo läatalo hö̃töo kitä. Wanisala tä thaa mai, ĩ anö makö noama pia salo, pö̃ a na ĩ a hapalo läatalo kitä. ²Kamakö, masita tä uli pewö hamö töpö pilio wi, ĩ töpö solo, ĩ na kamakö pewö wanisala wi, ĩ tä na Teusö a hĩso kule maaki, Teusö a hĩso maa kopamani pia salo, Jesus a säpamonasoma.

³‑Ĩ naköö! Ĩ na wa kuapö!‑ ĩ na Teusö a kuu wi, ĩ ma ta hini totia tä, ĩ tökö sisawö, ‑Teusö sa taö‑ ĩ na makö kuu sisaö. ⁴‑Ĩ na wa kuapöö!‑ ĩ na Teusö a kuu wi, ĩ wa ta hini mi tä, ‑Teusö sa taö‑ ĩ na wa kuu kule maaki, wa holisi kuu pätioö. Wa pitilimo mi ipö nö kiliwö. ⁵Teusö wa kai hini kuköma, Teusö wa pi ipa wi, ĩ wa. Teusö wa kai hini tä, ‑Teusö a na sa kuo soatio wi ĩ sa‑ ĩ na wa kuu kitä. ⁶‑Teusö a na sa kuo soatio wi ĩ sa‑ ĩ na wa kuu manu kule, Jesus a kua noai na, ĩ na wa kua hö̃töopöö!

Makö noimaso totihoö!

⁷Kamisanö makö pi ipa wi, ĩ pö! ‑Ĩ na makö kuapöö!‑ ĩ na Teusö a kuu wi, kamakö na sa tä sãöka pole, ĩ ta tute mai kitä. Somi tä ĩ ma ta hini waikioma. Somi tä sai tä Teusö ma ta hini tä, ‑Ĩ na makö kuapöö! Makö wanihaso mai, makö noimaso totihoö!‑ ĩ na Teusö a kuu wi, somi tä ĩ ma ta hini waikioma. ⁸Ĩ ma ta hini waikioma maaki, kamakö na ĩ sa ta sãöka pole, ĩ ta tutea hö̃töa. ‑Ai wa töpö noimaö!‑ ĩ na Teusö a kuu noai, Jesus Cristo a tapamono nö, ĩ ta makokoa totipalöma. Jesus anö töpö noima totio wi, ĩ tä tamananö nö, ‑Ai wa töpö noima totiopöö!‑ Teusö a kuu noai, ĩ ta makokoa totipalöma. Wakala tänö tä uli pewö hatukama kua wi na, ĩ na Jesus hai, ĩ wakala tä sai, ĩ anö töpö pi hatukama hö̃töa waikia kule. Pi motöama wi, ĩ mumi mumi tä mapo waikia kule. Ĩ na tä kua kutenö, Jesus anö ai töpö noima kua noai na, ĩ na makö kua hö̃töoö. Ĩ na Jesus a, kamakö, ĩ na kilii makö kua salo, ‑Kamakö na sa tä sãöka pole, ĩ tute tä sai a‑ sa kuuhe, ĩ pitili ta.

⁹Au ai wa tä wanipo tä, ‑Sa pi hatukua waikia kutenö, Teusö a na sa topa apa kule‑ ĩ na wa hole kuu nö, wa pi motöa soale. Mumi mumi tä na wa kua soale. ¹⁰Au ai wa tä noima tä, wa pi hatukua sisaö. Ĩ tä, wakala tä na wa kua sisaa. Wakala tä na wa kua kutenö, wanisala wa tä thaa mai kitä. ¹¹Mumi mumi tä na wa huu tä, wa tä tapa mi kutenö, wa monö kua wi na, au ai wa tä wanipo tä, ĩ na wa kua hö̃töoö. Wa pi hatukupo mai kitä. Mumi mumi tä na wa kua kutenö, wa pi moti ipö.

¹²Ipa ulu pö! Makö wanisala wi, Jesus Cristo anö ĩ tä noa thaa waikipalöma kutenö, hi waheta sa tä sãököpalö nö, kamakö na sa tä simöa pia kule.

¹³Pata pö! Hi masita tä uli kua paia mi tä, a pata kuo somatio noai, ĩ ma pata taö waikia kutenö, hi waheta sa tä sãököpalö nö, kamakö na sa tä simöpali ke.

Hĩsa pö! A wani wanisala apa wi, ĩ ma utitipamanöma kutenö, kamakö na hi waheta sa tä simöpali ke.

¹⁴Ulu pö! Kamakönö pö̃ Teusö ma taö waikia kutenö, kamakö na hi waheta sa tä simöpali ke.

Pata pö! Masita tä uli kua paia mi tä, a kuo somatio noai ĩ ma taö waikia kutenö, kamakö na hi waheta sa tä simöpali ke.

Hĩsa pö! Makö kasiapalo opa nö, Teusö ma kai a hini sinomoti nö, a wanisala apa wi, ĩ ma wani utitipamanö nö, ĩ na makö kuaö ha, kamakö na hi waheta sa tä simöpali ke.

Wanisala ma tä pii maikiö!

^15-16Hi masita tä uli ha Teusö a na töpö waio wi, ĩ töpö kua wi na, ĩ na makö kua pi topa maikiö! Hi masita tä uli ha wanisala tä kuo wi, ĩ ma tä pii maikiö! Wanisala tä na makö pi wasiso opaö, pili makö mamokönö tä tapa wi ĩ tä na makö pi wasiso opaö, ‑Wani sa tä thapo opa asawö. Kama sa pi saimo nö, sa tä thaa taö öpa asa wi ĩ sa‑ ĩ na makö pi kuu, ĩ na makö kua pi topa apa tä, Teusö ma uöma mi. Teusö a na töpö waio wi, ĩ ma töpö uöma pasio päoö. Ĩ na tä kuaö ha, hi masita tä uli ha wanisala tä kuo wi, ĩ ma tä pii tä, kamakö hai ĩ pö̃ Teusö ma pii mai kitä. ¹⁷Hi masita tä uli matasoö, masita tä uli ha wanisala tä na wa pi wasiso opa wi ĩ tä matasoö, ĩ na tä maa kutaso kitä maaki, Teusö a kai a hini wi, ĩ töpö mapo mai, Teusö a na töpö kuo soatio kitä.

Töpö holisimo wi ĩ töpö

¹⁸Ipa ulu pö! Jesus Cristo a huu uöho waikia kule. ‑Cristo a huu paio mai ha, Cristo a wanipo opa wi, ĩ a wani huu paio kitä‑ ĩ na ma ta kuu hinima. Huki, Cristo a wanipo opa wi, ĩ töpö satehe epii töpö hupalo waikia salo, ‑Jesus Cristo a huu uöho waikia kule‑ ĩ na makö pi kuu kule. ¹⁹Cristo a wanipo wi, kamakö na ĩ töpö kokamo naitioma maaki, ĩ töpö kokamo matasoma. Jesus a thapo naio maama kutenö, ĩ töpö hai, ĩ kamakö pewö kuo maama. Ĩ na tä kuaö ha, ĩ töpö hulasolöma. Jesus a thapo naioma aköna, kamakö na ĩ töpö kua naia soala pi. Ĩ töpö hulasolöma kutenö, ‑Ĩ töpö hai, ĩ kamakö pewö mai kitä‑ ĩ na makö pi kuu matatä.

²⁰Kamakö na Cristo anö Teusö a õsi kua tolele, ĩ a lisipamanöma kutenö, pitili tä na makö pewö pi moti mi. ²¹‑Pitili tä na ĩ töpö pi moti soa salo, ĩ töpö na waheta sa tä simöpa pia kule‑ ĩ na sa pi kuu maama. ‑Pitili ma tä taö waikia salo, kamakö na hi sa tä waheta simöpa pia kule‑ ĩ na sa pi kuu totioma. ²²A holisi wani wäo wi, ĩ a hapalo nö, ‑Jesus hai, Teusö anö a simönö nö, a kaikanapalö noai, ĩ a mai kitä‑ ĩ na a holisi kutii. Ĩ aiki, Cristo a wanipo opa wi, ĩ a. ‑Teusö a hai, ĩ Jesus a hai ĩ pö̃ a mai kitä. Jesus a hai, ĩ Teusö a hai ĩ pelupö a mai kitä‑ ĩ na ĩ a holisi kutii. ²³‑Jesus a hai, ĩ Teusö a ulupö mai kitä‑ ĩ na ai tä kuu wi, ĩ anö Teusö a thapo mai kitä. ‑Jesus a hai, ĩ Teusö a hai ĩ pelupö a‑ ĩ na ai tä kuu wi, ĩ anö Jesus a thapoö. ²⁴Somi tä, pitili ma ta hini noai, kamakö na ĩ ta kuo soatiopököö! Somi tä, ma ta hini noai, kamakö na ĩ tä kuo soatioö ha, pö̃ Teusö a, Teusö a hai ĩ pelupö a, ĩ na kilii töpö na makö kuo soatio kitä. ²⁵Ĩ töpö na makö kuo soatio wi, ĩ makö na, ‑Makö õsi palimipali kitä‑ ĩ na Cristo a kuuma.

²⁶Jesus a thapo mai, ĩ töpönö makö mönama pia salo. Ĩ sa töpö a kateha nö, hi waheta sa tä simöpa pia kule. ²⁷Ĩ töpönö makö mönama pia salo maaki, kamakö na Cristo anö Teusö a õsi kua tolele, ĩ a lisipamanöma kutenö, kamakö na Teusö a õsi kua tolele, ĩ a kua soatia. A kua soatia kutenö, ‑Ai tänö makö pi hatukupama mi salo‑ ĩ na pö pi kuu ti! Teusö a õsi kua tolele, ĩ anö kamakö õsi na tä pewö a kateha nö, makö pi hatukupama waikia kule. Kamakö õsi na ta kateha wi, ĩ pitili ta. Ĩ na tä kuaö ha, Teusö a õsi kua tolele, ĩ anö ta taöma wi, ĩ ta hini totioheö! Cristo a na makö kuo soatio naiopököö!

Cristo a na makö kuo soatiopököö!

²⁸Ipa ulu pö! Cristo a na makö kuo soatiopököö! Cristo a na makö kuo soatioö ha, a tapamo kõa tä, makö pi kiliho mai kitä. Cristo a huu kõa tä, makö pi kiliho mi salo, ‑Wi na sa kuapö taköö!‑ makö pi kuu mai kitä. Makö mömo kili läo mai kitä. ²⁹‑Teusö anö wanisala tä thaa tai mi. A topa apaö‑ ĩ na makö kuu manu kule, wanisala tä thaa mai, a topa apaö, ĩ na ai tä kuaö ha, ‑Ĩ a hai, Teusö a hai ĩ pelupö a‑ ĩ na makö kuu hö̃töo kitä.

Teusö ulupö makö

¹Pö̃ Teusö anö makö pii totio wi, ĩ tä na pö pi tapotikiö! Makö pi ipa salo, ‑Ipa ulu maköö!‑ ĩ na kamakö na ĩ na Teusö a kuutoö. Kamakö hai, Teusö ulupö makö waikiwö. Teusö a thapo mai, ĩ töpönö Teusö a taö maama kutenö, kamakö taö hö̃töa mi. ‑Jesus a thapo wi ĩ töpö hai, ĩ Teusö ulupö töpö‑ ĩ na ĩ töpö pi kuu mi. ²Kamisanö makö pi ipa wi, ĩ pö! Huki Teusö ulupö makö waikiwö. ‑Waiha, Teusö tä uli ha ĩ na sa kua kitä‑ ĩ na makö kuu tai mi maaki, ‑Jesus Cristo a huu kõa tä, Jesus a kui na, ĩ na sa kua hö̃töo kitä‑ ĩ na makö kuu taö öpaö. Kamakönö Jesus ma tapa totio kitä. Ma tapa totio salo, Jesus a kui na, ĩ na makö kua hö̃töo kitä. ³Jesus Cristo a hai, hiopö tä thaa tai mi. ‑Aitaköö! Jesus a kui na, ĩ na sa kua hö̃töo kitä‑ ĩ na wa pi kuti tä, Jesus anö hiopö tä thaa mi kua wi na, ĩ na hiopö wa tä thaa wani ipö hö̃töo kitä.

⁴‑Ĩ na wa kuapöö!‑ ĩ na Teusö a kuu wi, ĩ wa ta hini mi tä, wa wanisala apa kitä. Ĩ na tä kuaö ha, wanisala wa tä thaa tä, Teusö wa kai a hini mane. ⁵Sanöma töpönö wanisala tä thaa wi, Cristo anö ĩ tä hosali pia salo, a tapamonasoma. Ĩ anö wanisala tä thaa taö mi. Ĩ na sa kuu wi, ĩ wa tä taö waikia kule. ⁶Cristo a na wa kua soatia tä, wanisala wa tä thati mai kitä. Wanisala wa tä thati salo, Jesus Cristo wa taa maa noai kitä. Ĩ a na wa pi motöa soale.

⁷Ipa ulu pö! Makö mönama pia wi, ĩ töpö na pö pi mosawia totikiö! Toitai tä thati wi, ĩ a topa apaö. Cristo a topa kua wi na, ĩ na ĩ a topa kua hö̃töoö. ⁸Somi tä sai tä Sai tä sai patanö wanisala tä thatima, ĩ na a wani kua soatioö. Ĩ na tä kuaö ha, wanisala tä thati wi, ĩ a hai, ĩ Sai tä sai pata hai ĩ ulu a pasiwö. Sai tä sai patanö tä thaa wi, ĩ tä mapamani pia salo, Teusö a hai ĩ pelupö a tapamonasoma. ⁹Teusö ulupö wa na Teusö a õsi kua tolele, ĩ a kua salo, wanisala wa tä thati mai kitä. Teusö ulupö wa kutenö, au hao a kua wi na, ĩ na wa kua hö̃töoö. Wanisala wa tä thaa pikitio mai kitä. ¹⁰‑Wanisala tä thati wi, ĩ a hai, Teusö ulupö a mai kitä. Ĩ a hai, ĩ Sai tä sai pata hai ĩ ulu a pasiwö. Teusö ulupö sai lö kui, ĩ na ĩ a kua mai kitä‑ ĩ na makö kuupököö!

Makö wanihaso mai, makö pi noimaso totihoö!

¹¹Somi tä, kamakö na ta wäsä nö, ‑Makö wanihaso mai, makö noimaso totihoö!‑ ĩ na ma ta kuu hini waikioma. ¹²Kãii a wani kua noai na, ĩ na pö kua ti! Kãii a waninö Sai tä sai pata thapo noai, ĩ a wani kuoma kutenö, kama hai ĩ poosa a säpalöma. Pepala Kãii a waninö wanisala tä thatii, poosa anö toitai tä thaa asatioma, ĩ na tä kuaö ha, poosa a wanipo nö, a säpalöma.

¹³Ipa ulu pö! Jesus a thapo mai, ĩ töpönö makö wanipo tä, ‑Häö. Wi na taka?‑ pö pi kuu tihöö! ¹⁴Kamakö ai ĩ ma töpö noima salo, ‑Sa nomano nö, pea sinomo wi, ĩ hamö sa huu piama maaki, huki Teusö anö sa õsi palimipamanö nö, sa õsi topa‑ ĩ na makö kuu kule. Au ai wa töpö noima kutenö, ĩ na makö kuu kitä. Au ai wa töpö noima mi tä, wa õsi palimipo mai kitä. Wa nomano nö, peama sinomo wi, ĩ hamö wa huu kitä. ¹⁵Au ai wa tä wanipo opa tä, sanöma tä nomama wi, ĩ nasimö wa. Sanöma tä nomama wi, ĩ a õsi wani palimipo pola nö kuno mai, ĩ a wani nomano nö, a pea hö̃töki kitä matatä. ¹⁶Jesus anö makö noima kutenö, makö noama pia salo, a säpamonasoma. A säpamonasoö ha, ‑Hãu. Ĩ na Jesus anö makö noima salo, ĩ na a kuama‑ ĩ na makö pi kutasoö. Ĩ na tä kuaö ha, ‑Ipa sa töpö noima salo, sa töpö noama nö, sa nomaso kitä maaki, ĩ sa töpö noama satimo opa kitä‑ ĩ na makö kuu kitä. ¹⁷Wani wa tä thapo opa wi maaki, au ai tä honimo opa tä, ‑Tä wani honimo pasio päo‑ ĩ na wa pi kuu tä, Teusö wa pii mi.

Teusö a na makö kili mai kitä

¹⁸Ipa ulu pö! ‑Ai sa töpö noima apaö‑ ĩ na makö kai kuu päatalo maiki. Makö pitilimo opa nö, ai ma töpö noima apa nö, ĩ ma töpö noamapököö! Ĩ ma töpö täpäpöö! ¹⁹Ĩ na ai ma töpö noima kuköma, Teusö a na makö walo tä, ‑Sa pitilimo opa thaliö! Teusö a na sa kili mi‑ ĩ na makö pi kuu kitä. ²⁰‑Sa tomöpo mi hãtoakö‑ ĩ na makö pi kuu tä, makö õsi pi hatukua maaki, kamakö na Teusö a pi hatukua satia apa. Teusö anö tä pewö taö öpaö. ‑Wi na ĩ a kua totioö?‑ ĩ na Teusö a pi kuu mi. Ĩ na tä kuaö ha, ‑Teusö a na sa kili mi‑ ĩ na makö pi kuu kitä. ²¹Ipa pö! ‑Sa tomöpo mi‑ ĩ na makö õsi pi kuu mi tä, Teusö a na makö kili mai kitä. ²²‑Ĩ naköö! Ĩ na wa kuapöö!‑ ĩ na Teusö a kuu wi, ĩ ma ta hini totiatalo opaö, Teusö ma pi mönahapama sinomoö, ĩ na makö kua salo, Teusö a na ma tä nakali wi, ĩ ma tä täli kitä. ²³Pi naka. Kamakö na Teusö a hapalo nö, ‑“Teusö a hai ĩ ulu a Jesus Cristo a pitili!” pö pi kuu totihoö! Ĩ na makö pi kuu nö, makö wanihaso mai, makö noimaso totihoö!‑ ĩ na Teusö anö makö noa thaö. ²⁴Makö noa thaa nö, ĩ ai tänö ta hini totiatalo opa tä, Teusö a na ĩ a kuo soatio kitä. Ĩ a na Teusö a kuo soatio hö̃töoö kitä. Kamakö na Teusö a õsi kua tolele, ĩ a totoköma kutenö, ‑Kamakö õsi na Teusö a kua soatioö‑ ĩ na makö kutii.

Cristo a wanipo opa wi ĩ tä wani

¹Ipa pö! ‑Teusö sa kai a wäsäti wi, ĩ sa‑ ai töpö holisi kuu wi, tä uli pewö hamö ĩ töpö satehe epii töpö hupalo opa waikia kule. Ĩ na tä kuaö ha, ‑Teusö a õsi kua tolele, kamisanö ĩ sa thapo salo, sa ta wäsä wi, ĩ Teusö a kai‑ ĩ ma ta kuu hini tä, ‑Ĩ pitili ta‑ ĩ na pö pi kuu soatoolö ti! ‑Teusö a õsi kua tolele, ĩ töpönö ĩ a thapo hãto mane. Teusö a kai a wäsä hãto mane‑ ĩ na pö pi kuu paioö! Töpö wäo wi, ĩ töpö na makö sömöka taa totia paiki nököö! ²Makö sömöka taiki nö, ‑Jesus a hai, Teusö anö a simöni wi, ĩ a. Teusö anö a simöni wi ĩ a hai, sanöma tä sai kupasoma‑ töpö wäo wi, ĩ na ĩ töpö kuu ha, ‑Awai. Teusö a õsi kua tolele, ĩ a kuu wi, ĩ töpönö ĩ ta wäsä nömöa kule‑ ĩ na makö pi kuu! ³Ai tä aiki, ‑Jesus a hai, Teusö anö a simöni wi, ĩ a mai kitä. Teusö anö a simöni wi, ĩ a hai, sanöma tä sai kupo maa noai kitä‑ ĩ na ai tä wani kuu ha, ‑Ma. A wäo wi, ĩ anö Teusö a thapo mi salo, sai tä kuu wi, ĩ ta wäsä nömöa pasia päa kule. Teusö a kai a wäsä mane‑ ĩ na makö pi kuu! Cristo a wanipo opa wi, ĩ tä wani wäo paio nö, ‑Cristo a hai, ĩ sanöma tä kupo maa noai kitä‑ ĩ na tä kuu wi, ĩ ta wäsä nömöa pasia päa kule. ‑Cristo a wanipo opa wi, ĩ tä wani huu kitä‑ ĩ na ma ta kuu hini waikiopili nökö. Cristo a wanipo opa wi, hi tä uli hamö ĩ a wani huu waikia kule.

⁴Ipa ulu pö! Teusö a hai ĩ makö pasiwö. Kamakö õsi na Teusö a kua. Teusö a tai mio wi, ĩ töpö na sai tä sai pata kua pasile, ĩ a pata lotete epö maaki, kamakö õsi na a kule, ĩ a lotete sati ipö. Ĩ na tä kua salo, Jesus Cristo a wanipo opa wi, ĩ ma töpö utitia waikipamanöma. ⁵Ĩ töpö hai, Teusö a tai mio wi, ĩ ai töpö. Ĩ na tä kuaö ha, Teusö a tai mi ipii, ĩ töpö pi saimo päo nö, töpö pi tapomo kua wi na, töpö wäo wi, ĩ na ĩ töpö pi tapoa hö̃töiki nö, ĩ töpö wäo päoö. Ĩ töpö wäo päo tä, Teusö a tai mi ipii ĩ töpö pewönö, töpö wäo wi, ĩ töpö hini sinomotii. ⁶Kamakö hai, Teusö a hai ĩ makö pasiwö. Teusö a taö wi, ĩ töpönö makö hini kitä. Teusö a tai mi ipii, ĩ töpönö makö hini pasio mai kitä. Ĩ na tä kuaö ha, Teusö a taö wi, ĩ töpönö makö kai hini salo, kamakö aiki, ‑Teusö a õsi kua tolele, ĩ a pitilii, ĩ ma thapo kutenö, ma ta wäsä wi, ĩ pitili ta‑ ĩ na makö kuu kitä. Ĩ na makö kuu nö, ‑Teusö a tai mi ipii, ĩ töpönö makö kai hini mai, ĩ töpönö sai tä holisimo wi ĩ a wani thapo kutenö, ĩ töpönö ta wäsä wi ĩ holisi tä wani a‑ ĩ na makö kuu hö̃töo kitä.

Teusö anö ai töpö noima sinomoti wi ĩ a

⁷Makö pi ipa wi, ĩ pö! ‑Ai sa töpö noima apaö‑ ĩ na Teusö anö ĩ na makö pi thama pi topa sinomo kutenö, makö noimasopöö! Ai töpö noima wi, ĩ a hai ĩ Teusö ulupö a. Ai töpö noima wi, ĩ anö Teusö a taö. ⁸Teusö anö ai töpö noima sinomoti wi, ĩ a. Önö kutenö ai tä waninö ai töpö noima mi ipii, ĩ a waninö Teusö a tai mi. ⁹Teusö anö, pelupö a na makö õsi palimipamani pia salo, hi masita tä uli ha kama hai ĩ pelupö a sami päla tä, a simöpalöma. A simöpalöma kutenö, ‑Teusö anö makö noima apa noa‑ ĩ na makö kuu sinomotii. ¹⁰Kamakönö Teusö ma noima paila tä kuno mai, Teusö anö makö noima somama. Makö noima soma nö, pelupö a simönöma. Makö wanisalati wi, ĩ tä na kama a hĩso maa kopasopö, Teusö anö pelupö a simönöma. Ĩ na Teusö a kuaö ha, ‑Hãu. Ĩ na ai töpö noima wi, ĩ na ĩ tä kuaö‑ ĩ na makö pi thamaö. ¹¹Makö noima wi, ĩ ipa pö! Ĩ na pe epii Teusö anö makö noima apama salo, makö noimaso hö̃töopököö! ¹²Makö noimaso hö̃töo nö, ai tänö Teusö a tapa maama maaki, makö noimasoö ha, kamakö õsi na Teusö a kua totiki kitä. Makö noimasoö ha, Teusö ma noima totia apöki kitä.

¹³Kamakö na Teusö anö kama õsi kua tolele, ĩ a totoköma kutenö, ‑Teusö a na sa kua soatia. Kamisa na Teusö a kua soa hö̃tötia‑ ĩ na makö kuu kitä. ¹⁴Kamisamakö aiki, ‑Masita tä uli ha sanöma makö pewö kule, ĩ makö täapa kõo läo pia salo, Teusö anö pelupö a simöni kipili‑ ĩ na samakö kuu nö, sama ta wäsätii. ¹⁵Ai tä aiki, ‑Jesus a hai, ĩ Teusö a hai ĩ pelupö a‑ ĩ na ai töpö na a kuu ha, ĩ a na Teusö a kutia. Teusö a na ĩ a kua hö̃tötia. ¹⁶‑Teusö anö makö noima apaö‑ ĩ na makö pi kutii. ‑Teusö anö makö noima hãto mai kitä‑ ĩ na makö pi kuu mai kitä. Teusö anö makö noima sinomoti wi, ĩ a. Kawanö ai wa töpö noimati tä, Teusö a na wa kutia, kawa na Teusö a kua hö̃tötia, ĩ na tä kuaö. ¹⁷Teusö anö töpö pewö noima kua wi na, ĩ na ma töpö thama hö̃töoö. Jesus a kua kuati wi na, ĩ na hi tä uli ha ĩ na makö kua kua hö̃töoö. Ĩ na makö kua salo, waiha sanöma töpö na Teusö anö tä makokama läapalo tä, makö kili mai kitä.

¹⁸Ai ma töpö noima tä, Teusö a na makö kili mai kitä. Teusö anö ai töpö noima kua wi na, ĩ na ma töpö noima kua hö̃töa tä, makö kili wi ĩ tä maa kopaso kitä. Ai ma töpö noima tomöpo mi tä, makö kilipalo opa nö, ‑Teusö anö makö peama hãto kitä‑ ĩ na makö pi kuu kitä. ¹⁹Teusö anö makö pewö noima paioma kutenö, kamakönö Teusö a, ai töpö, ĩ na töpö kui, ma töpö noima hö̃töoö. ²⁰Ai tä waninö kama hai ĩ ai a wanipo tä, ‑Teusö sa noimaö‑ ĩ na a kuu kule maaki, a holisimo opaö. Kama hai ĩ ai a tapa pole, ĩ a noima mai maaki, Teusö a tapa mai maaki, ĩ a noima kitä ta o? ²¹Pi naka. Kamakö na ĩ na Teusö a kuu: ‑Teusö wa noima wi ĩ wa kutenö, au ai wa tä noima hö̃töopököö!‑ ĩ na Teusö a kuu.

Wanisala tä thaa wi, ĩ tä na sanöma makö simöa sinomo wi, ĩ ma tä utitipamani kitä

¹‑Jesus a hai, Teusö anö a simönö noai, ĩ a‑ makö kuu wi ĩ makö kutenö, Teusö ulupö makö. Pö̃ ma noima wi ĩ makö kutenö, kama hai pelupö ma noima hö̃töo kitä. ²Teusö ma noimaö, ‑Ĩ na makö kuapöö!‑ ĩ na Teusö a kuu wi, ĩ ma ta hinia totili, ĩ na makö kua salo, ‑Teusö ulupö sa töpö noima wi, ĩ sa‑ ĩ na makö õsi kuu kitä. ^3-4Teusö ma noima tä, ‑Ĩ na wa kuapöö!‑ ĩ na Teusö a kuu wi, ĩ ma ta hini hö̃töo kitä. Teusö a thapo mai, ĩ töpö aiki, ‑Teusö a kai a hini maikiö!‑ ĩ na ĩ töpö ku upa wi maaki, Teusö ulupö makö kupaso noai, ĩ makönö Teusö ma kai a hini satimo opa kitä. Önö kutenö, ‑Ĩ na wa kuapöö!‑ ĩ na Teusö a kuu wi, ĩ ma ta hini nö, ‑Hö. Wi na sa kuapö?‑ ĩ na makö pi kuu mai kitä. ‑Jesus a pitili‑ makö pi kuu salo, wanisala tä thaa wi ĩ tä na sanöma makö simöa sinomo wi, ĩ ma tä utitipamani kitä. ⁵Wanisala tä thaa wi ĩ tä na sanöma makö simöa sinomo wi, witi pili anö ĩ tä utitipamani? ‑Jesus a hai, ĩ Teusö a hai ulu a‑ ĩ na ai tä pi kuu wi, ĩ anö ĩ tä utitipamani kitä.

Jesus Cristo hai, ĩ Teusö hai pelupö a

⁶Teusö hai pelupö a hai, Teusö anö a simöni wi, ĩ Jesus Cristo a hilo wi, ĩ a. Ĩ a huoki solö nö, Teusö a kai a wäsä pia tä, maa tuu na a mãi õmamonasoma. A mãi õmamono nö, Teusö a kai a wäsä hötötöpo tä, a säpamono nö, a iä pö kupasoma. Maa tuu na a mãi õmamo sisa maama. A säpamoa hö̃tölo nö, a iä pö kua hö̃töpasoma. Ĩ na Teusö a õsi kua tolele, ĩ a pitilimo opa salo, ĩ na a kuu kule. ^7-8‑Teusö a hai, ĩ pelupö Jesus a‑ ĩ na Teusö a õsi kua tolele, ĩ na ĩ anö wa pi thamaö. Maa tuu na Jesus a mãi õhomamo noai ĩ tänö, ‑Teusö a hai, ĩ pelupö Jesus a‑ ĩ na wa pi thama naioö. Jesus a iä pö kupo wi, ĩ tänö, ‑Teusö a hai, ĩ pelupö Jesus a‑ ĩ na wa pi thama naioö. ⁹Ai sanöma tä aiki, ‑Ĩ na tä kuaö‑ ĩ na ai sanöma tä kuu ha, ‑Pitili ta‑ ĩ na makö kuu manu kule, Teusö aiki, ‑Ĩ na tä kuaö‑ ĩ na Teusö a kuu ha, ‑Pitili tä sai a‑ ĩ na makö kuu totiopöö! Pi naka. Ĩ na Teusö a kuu thali: ‑Jesus a hai, ĩ ipa ulu a‑ ĩ na Teusö a kuu thali. ¹⁰‑Teusö hai pelupö a pitili‑ wa pi kuu salo, ‑Teusö anö Jesus a kateha noai, ĩ pitili ta‑ ĩ na wa õsi kuu kitä. Teusö wa kai a hini mi salo, ‑Teusö a hai, holisi wäo wi, ĩ a‑ ĩ na wa pi kutii. ‑Jesus a hai, ĩ ipa ulu a‑ ĩ na Teusö a kuu noai ha maaki, ĩ wa ta peama kutenö, ‑Teusö a hai, holisi wäo wi, ĩ a‑ ĩ na wa pi kutii. ¹¹Pi naka. Ĩ na Teusö a kuuma: ‑Kamisanö ipa ulu a na makö õsi palimipamanöma salo, kamisa na makö kua soatio kitä‑ ĩ na Teusö a kuuma. ¹²Kawanö Teusö hai pelupö wa thapo tä, wa õsi palimipalo nö, Teusö a na wa kua soatio kitä. Teusö hai pelupö wa thapo mi tä, wa õsi palimipo mai kitä. Teusö a na wa kuo naio mai kitä.

‑Sa õsi palimia waikia kule. Teusö a na sa kua soatio kitä‑ ĩ na makö kuupö

¹³‑Teusö hai pelupö a pitili‑ makö pi kuu totio wi, ĩ makö na hi waheta sa tä sãöka kule. ‑Sa õsi palimia waikia kule. Teusö a na sa kuo soatio kitä‑ ĩ na makö pi thama pia salo, hi waheta sa tä sãöka kule. ¹⁴Sa kuu piale, ĩ ma ta taö waikia kule. Teusö anö tä pii wi, ĩ ma tä pii naio salo, Teusö a na ĩ ma tä nakalöma, Teusö anö makö a hini hö̃töo kitä. Ĩ na tä kuaö ha, Teusö a na makö hapalo tä, makö kili mai kitä. ¹⁵‑Teusö a na makö nakoö ha, makö a hini hö̃töo kitä‑ ĩ na makö pi kuu kutenö, ‑Teusö a na ma tä nakali wi, ĩ ma tä täli kitä‑ ĩ na makö kuu hö̃töoö.

^16-17Au ai tänö wanisala tä thaa wi, ĩ wa tä taa tä, Teusö a na wa hapalopökö. Pi naka. Ai wanisala tä thaa kule maaki, õsi töpö pepalo opa wi tä uli hamö ĩ töpö huu pasio mai, ĩ tä kua hö̃töa, ai tiko wanisala tä thaa wi, õsi töpö pepalo opa wi, ĩ tä uli hamö ĩ töpö huu pasio wi, ĩ tä kua soka hö̃töa, ĩ na tä kuaö. Wanisala tä thaa wi, Teusö a na ĩ tä pewö wanisala maaki, ĩ na tä kuaö. Önö kutenö, ai tänö wanisala tä thaa kule maaki, õsi töpö pepalo opa wi tä uli hamö töpö huu pasio mai, au ai tänö ĩ tä wanisala thaö ha, Teusö a na wa hapalo kuköma, ĩ wanisala tä thaa noai, Teusö anö ĩ a õsi palimipamani kitä. Ĩ na tä kua tä, ai tänö ai wanisala tä aipö öpii tä thaa salo, õsi töpö pepalo opa wi tä uli hamö a huu pasio wi, au ai tänö ĩ tä wanisala thaö ha, ‑Teusö a na wa hapalo läatalopököö!‑ ĩ na sa kuu mai kitä.

¹⁸Teusö ulupö wanö wanisala wa tä thati mai kitä. Teusö hai pelupö anö wa noama apa salo, a wanisala apati wi, ĩ Sai tä sai pata aiki, Teusö anö ĩ a pata õkaköma. Önö kutenö kawa na a pata sapäko mai kitä.

¹⁹Teusö a hai ĩ makö pewö pasiwö. Ĩ ma tä taö waikia. A wanisala apati wi ĩ a waninö, Teusö a thapo mai ĩ töpö pewö simöa sinomoö. Ĩ ma tä taö waikia. ²⁰Hi masita tä uli ha Teusö a hai ĩ pelupö a waloiki nö, Teusö a pitilii ĩ ma taö öpapö, makö pi hatukupamanöma. Ĩ ma tä taö naia kule. Teusö a pitilii, ĩ pelupö Jesus Cristo a na makö kua soatioö. Pelupö Jesus a na makö kua kutenö, Teusö a na makö kua naia soataki. Jesus Cristo a hai, Teusö a pitili ipii ĩ a nai soatawö. Ĩ anö makö õsi palimipama wi, ĩ a.

²¹Ipa ulu pö! Pö pi mosaikiö! Tiko tä na pö noamamo mai, Teusö a na pö noamamo totihoö! Ĩ nakö totiwö.