1 Coríntios

1 Coríntios

Kotĩtu tili töpö na waheta tä simöa somapalö noai ĩ ta

Paulo anö Jesus ta wäsä hätäpoti pamö mötati tuu kasö pata ha Kotĩtu tä uli kulati, ĩ tä uli ha a walokö tasoma. A waloikitö nö, ĩ tä uli ha Jesus ta wäsäti tä, juteu töpönö ta hini wanio opama maaki, juteu töpö pasi mai, ĩ ai töpönö Jesus ta hini pi topa apa asama. Ta hinia totilö nö, ‑Jesus a pitili‑ töpö pi kuu kuki ha, ĩ töpö na Paulo anö Teusö a kai a taömatima. Ĩ ha Teusö a kai a taömati tä, ai tä inama, ai tä inama mötalipo kõa, ĩ na tä inama kupasoma.

Ĩ na tä inama kupalo nö, Paulo a hua konasolö noai ha, 3 tä inama matalo nö, ĩ kotĩtu tili töpönö Jesus a thapo noai, ĩ töpö tomöpo haio maama. Töpö noimaso totio mi, töpö hapalo selekepasoö, ĩ na töpö kua haio pätioma. Ĩ na töpö kuati ha, hi waheta tä sãököpalö nö, ai töpö noima totio wi ĩ ta kateha totioma.

Ĩ na tä kua tä, kotĩtu tili töpönö Paulo a na tä hini pi topa apa salo, ĩ töpönö waheta tä simöpalöma kutenö, kotĩtu tili töpö na Paulo anö hi waheta tä simöa hö̃töpalöma. Teusö a õsi kua tolele, ĩ anö tä totoma wi, ĩ tä na Paulo anö ĩ töpö taöma totioma. Ĩ na tä kua tä, kamakö pewö nomaso kitä maaki, makö pewö temöa konaso laso wi, Paulo anö ĩ ta kateha naioma.

^1-2Paulo sa. Teusö anö sa naka pi topa apama kutenö, sa nakalöma. Jesus Cristo anö töpö simöpa asa noai, ĩ nasimö sa kua naipasopö, sa nakalöma. Sósötenisö anö Jesus a thapo naio wi ĩ a solo hi waheta sama tä simöpali ke. Kotĩtu tä uli ha makö kokamo nö, makö Teusömo sinomo wi ĩ makö na sama tä waheta simöpali ke. Jesus Cristo anö makö thaa sokamapo asale, ĩ makö. Jesus Cristo ma thapo wi ĩ makö topa apa wi, ĩ makö kua asapasopö, Teusö anö makö naka asalöma. Ĩ tä uli pewö hamö töpö pilia setekepai, ĩ töpönö Jesus Cristo pata tä sai naka wi ĩ töpö pewö na hi sama tä waheta simöa naipali ke. Jesus Cristo a hai, kama töpö hai ĩ pata tä, Jesus Cristo a hai, kamisamakö hai ĩ pata tä nai soatawö. ³Kamakö hai ĩ pö̃ Teusö a, kamakö hai ĩ Jesus Cristo pata tä, ĩ na kilii töpö na sa hapalo nö, ‑Kotĩtu tili ma töpö totiapala apaö! Ma töpö pi topapalama totio opaö!‑ ĩ na sa kuu.

Teusö anö tä pewö totoma wi, ĩ ma tä pewö thapo waikia kule

⁴Teusö anö Jesus Cristo a na makö totiapalama apa kutenö, kamakö na sa pi mönaha apa nö, ‑Aitaköö!‑ Teusö a na ĩ na sa kuu sinomoö. ⁵Jesus Cristo a na makö koka totia kutenö, makö pi tao opaö. Makö hapalo taö öpaö, ma tä taö öpa naia soataa, ĩ na Teusö anö ĩ na makö thapamanöma. ⁶Kamakönö Cristo ma ta hini totio opama. ⁷Önö kutenö, kamakö hai ĩ Jesus Cristo pata tä tapamo kõo piale, ĩ ma tä tapala opimo toitia tä, Teusö anö tä pewö totoma wi, ĩ ma tä pewö thapo waikia kule. ⁸Jesus Cristo anö makö pasilipo opa kutenö, Jesus ma kai a hini mapo mai kitä. Ĩ ma kai a hini soatio kuköma, Jesus Cristo pata tä sai huu kõköma, ‑Wa wanisala apaöö!‑ ĩ na Jesus a kuu mai kitä. ⁹Teusö a suasimo pikio mi. Kamakö, Teusö a hai ĩ ulu a, ĩ kamakö hai ĩ Jesus Cristo pata tä sai pata, ĩ na makö kui makö noimaso kuköpö, Teusö anö makö nakalöma. Makö nakalö noai, ĩ a holisimo mi. Ĩ anö makö pasilipo opa soatio kuki kitäö!

Makö pi uni selekepo mai, makö pi pewö sototoapalo totio nököö!

¹⁰Ipa pö! Sa kuu piale na, ĩ na kamakö hai ĩ Jesus Cristo pata tä kuu naia kule. Makö pewö hapalo ösöho hẽtupaso totiolöpököö! Makö pi uni selekepalo mai, makö pi pewö kokapalo totio nököö! Samii ĩ tä na makö pi kuo kololo sisapököö! ¹¹Ipa pö! Kamisa na ai Kloé töpö kopo nö, ‑Kotĩtu tili töpönö Jesus a thapo wi ĩ töpö hapalo hẽtupaso pi hĩsuha apa kulaliö!‑ ĩ na ĩ töpö kuu solö kipili. ¹²Pi naka. Makö hapalo hẽtupaso pi hĩsuha apöla nö, ‑Paulo sa kai a hini wi ĩ sa‑ ĩ na ai wa kuu, ‑Apoolu sa kai a hini wi ĩ sa‑ ĩ na ai wa kuu hö̃töa, ‑Sepasö sa kai a hini wi ĩ sa‑ ĩ na ai wa kuu hö̃töa, ‑Cristo sa kai a hini wi ĩ sa‑ ĩ na ai wa kuu soka hö̃töa, ĩ na makö kuu selekea kule. ¹³Ĩ na makö kuu hẽtupaso maiki. Cristo a asawösöpasoma ta o? Ma. Samii Cristo kama kua. Önö kutenö, Cristo a hai ĩ makö selekepo mai kitä. Makö täapa kõo läopö, hii ti pakalai ti ha Paulo sa säpamonasoma ta o? Kamakönö Paulo sa kai a hua sinomo pia salo, makö mãi õmamonasoma ta o? Ĩ na kuno mai. Cristo ma kai a hua sinomo pia salo, makö mãi õmamonasoma.

¹⁴Kamisanö makö mãi õma maapili. Kötiisöpu a, Kaiu a, ĩ na kilii sa töpö mãi õa sisamani kipili nökö. ¹⁵Kamisanö makö mãi õma maama kutenö, ‑Paulo sa kai a hua sinomo pia salo, sa mãi õmamonaso kipiliö!‑ pö kuu hãto tihöö! ¹⁶Esötépanasö sa töpö mãi õa naia sisamani kipili. Ai sa töpö mãi õa sätäa naimani wi ĩ sa tä taö maa saile ta. ¹⁷Cristo aiki, ‑Paulo anö ai töpö mãi õmananöpö, Paulo sa simöpa pia kule‑ ĩ na Cristo a pi kuu maama. ‑Ta topa apöle, Paulo anö ta wäsä kuköpöö!‑ ĩ na Cristo a pi kuu salo, Paulo sa simöa pasipalöma. Sa simöpali ha, hii ti pakalai ti ha Cristo a säpamonaso noai, ĩ ta lotetea apöle, ai töpönö ĩ ta taö mapo maapö, ai sanöma töpö hapalo tao opa kua päo wi na, ĩ na sa hapalo kua päo mai kitä.

Teusö a lotete epii, a pi hatuka apa asa wi, Cristo anö ĩ tä tapamomaö

¹⁸Õsi töpö pea tolea wi ĩ tä uli ha töpö huu piale, ĩ töpö aiki, ‑Hii ti pakalai ti ha Cristo a säpamonaso noai, ĩ ta suasi pasiwö‑ ĩ na ĩ töpö pi kuu kule maaki, Cristo anö makö täapa kõo läo wi ĩ makö aiki, ‑Hii ti na Cristo a säpamonaso noai, ĩ ta lotetea apa asaa. Ĩ ta lotete epö kutenö, ĩ ma ta hini kuköma, Teusö anö makö täapa kõo läoö‑ ĩ na makö pi kuu pasioö.

¹⁹Ĩ na Teusö tä waheta sãökama kuu:

‑“Ĩ töpö pi mosaia apa nö kilile ia!” ĩ na ai sanöma töpö kuu kule maaki, “Ĩ töpö pi mosaia pasia maneö!” Teusö sa kuu kitä.

“Ĩ töpö pi hatuka apawö” sanöma töpö kuu kule maaki, “Ĩ töpö pi motia apa soaleö!” ĩ na Teusö sa kuu satia kitä‑

ĩ na tä sãökama kuu.

²⁰Önö kutenö, Teusö a thapo mai ĩ töpö pi mosai ipii, wi na ĩ töpö kua totiopö? Teusö a thapo mai maaki, ĩ töpö pi hatuka apa naine, wi na ĩ töpö kua naiopö? Teusö a thapo mai ĩ töpö hapalo tao opa wi, wi na ĩ töpö kua naiopö? ‑Teusö a thapo mai ĩ töpö pi hatuka apa‑ sanöma makö pi pewö kuuma maaki, ‑Ĩ töpö osemo totia pasia alu kuleö!‑ Teusö anö ĩ na makö pi thama pasioma.

²¹Teusö a pi hatuku upö kutenö, ‑Kama sanöma töpö pi hatukupalo saimopalo pätio wi, ĩ tänö sa taö pasio mai kitäö!‑ ĩ na Teusö a pi kuuma. ‑“Jesus ta wäsä sinomo wi ĩ ta suasi pasiwö” ĩ na ai töpö pi kuu päla tä maaki, Jesus ta hini totio wi ĩ sa töpö täapa kõo läo asa kitäö!‑ ĩ na Teusö a pi kuu totioma. Ĩ Jesus sama ta wäsä sinomoö. ²²Juteu töpö aiki, ‑“Jesus hai, ĩ pitili tä sai” sa pi kulasopö, ĩ ai wa tä aipöama tamoma totio mi salo‑ ĩ na juteu töpö kuu sinomoö. Ĩ na tä kua tä, töpö pi hatuka apöle, ĩ töpönö ta hapalo pole, juteu töpö a hilo pasia mane, ĩ köteeku töpönö ĩ ta hini pi topa apa pasioö. ²³Ĩ na ĩ töpö kua kule maaki, hii ti pakalai ti ha a säpamonaso noai, kamisamakönö ĩ Cristo sama ta wäsä sinomo pasioö. Juteu töpö na ĩ ta hĩsua apa, juteu töpö pasi mai ĩ töpö na ĩ ta suasia apa, ĩ na ĩ töpö na, ĩ na ĩ ta kua pasia. ²⁴Ĩ na ĩ töpö na, ĩ na ĩ ta kua kule maaki, ai juteu töpö, juteu töpö pasi mai ĩ töpö, ĩ na töpö kui, Teusö anö ĩ ai töpö nakalöma. Ĩ töpö nakalö noai, ĩ töpö aiki, ‑Teusö a lotete epö kui na, ĩ na Cristo a lotete kuö hö̃töwö. Teusö a pi hatuku upö kui na, ĩ na Cristo a pi hatuku kuö hö̃töwö‑ ĩ na ĩ töpö pi kuu asaö. ²⁵‑Teusö a kai a suasi pasiwö‑ ĩ na ai töpö pi kuu kule maaki, kama sanöma töpö pi hatukupalo pätio wi, ĩ tä na Teusö a kai a hatuka satia apa asaa. ‑Teusö a wani utiti‑ ĩ na ĩ töpö pi kuu kule maaki, sanöma töpö lotetea apa wi, ĩ tä na Teusö a lotetea hasua apa asaö.

Töpö komoapalo sinomo pasitio noai, Teusö anö ĩ töpö saia totia asalö noai ĩ ta

²⁶Ipa pö! Teusö anö makö nakalö noai, ĩ tä makö kua noai, ĩ tä na pö pi tapomo totikiö! ‑Makö pi hatuka apa wi ĩ makö‑ ĩ na ai sanöma töpö kuu pasio maama. Makö pi hatuka apa wi, satehe epii ĩ makö kuo maama. Makö lotete epii, satehe epii ĩ makö kuo maama. Ai töpö na makö hösökapalo asatio wi, satehe epii ĩ makö kuo maama. ²⁷Teusö anö makö nakalö noai, ĩ tä, ĩ na makö kuo maama maaki, Teusö anö makö saia asapalöma. Sanöma töpö pi hatukupalo pätio wi, Teusö anö ĩ töpö komopamani pia salo, makö saia asalöma. Ai sanöma töpönö makö a kateha nö, ‑Ĩ töpö pi hatukua mi ipö kitäö!‑ ĩ na ĩ töpö kutima maaki, Teusö anö makö saia asalöma. Hiki. Sanöma töpö lotete epii, Teusö anö ĩ töpö pewö pi komopamanöpö, sanöma töpö utiti ipii, Teusö anö ĩ töpö saia asalöma.

²⁸Ai sanöma töpönö ĩ töpö komoapalamatima maaki, Teusö anö ĩ töpö saia asalöma. Ai sanöma töpö na ai töpö hösökapaloti noai, Teusö anö ĩ töpö komopamani pia salo, töpö komoapalo paio noai, Teusö anö ĩ töpö saia asalöma. ²⁹Teusö a sömöka tala tä, ‑Sa lotete epö asawö‑ ĩ na ai sanöma töpö kuu maapö, töpö komoapalo sinomo wi, Teusö anö ĩ töpö saia totia asalöma. ³⁰Teusö anö Jesus Cristo a na makö thaa koka naiköma. Teusö anö Jesus Cristo a na makö pewö thaa kokaköma kutenö, Cristo a pi hatuka kui na, ĩ na makö pewö pi hatukua kua naia waikia kuleö! Cristo a na makö pewö thaa kokaköma kutenö, Teusö anö makö makokopali, makö sokamakö nö, makö õsi ausia soapali, makö täa koni, Teusö anö ĩ na makö thamama. ³¹Teusö anö ĩ na makö thamama kutenö, Teusö tä wahetanö makö noa thaa wi ĩ ta hua totilöheö! Pi naka. Ĩ na tä waheta kuu:

‑“Sa lotete epö waikiwöö!” ai sanöma tä kuu pi topa wi, ĩ aiki, “Ipa pata tänö tä thama sinomo wi, ĩ tänö sa lotete epö päwö” ĩ na ĩ a kuupököö!‑

ĩ na Teusö tä waheta kuu.

Hii ti pakalai ti ha Cristo a säpamonaso noai, Paulo anö ĩ ta wäsäti noai ĩ ta

¹Ipa pö! Kamisanö kamakö na Teusö sa kai a wäsäti tä, ‑Paulo a hapalo patamo taö öpawö. A hapalo pi mosaia apawö‑ kamisanö ĩ na makö pi thama pi topa maapili. ²‑Jesus Cristo sa ta wäsä sisa kuköpököö! Hii ti pakalai ti ha a säpamonaso noai, ĩ sa ta wäsä sisapököö!‑ ĩ na sa pi kuu sisa kipili nökö. ³Kamakö na sa kua soatia tä, sa utiti, sa kili ipa salo sa satitimo opaö, ĩ na sa kuati kipili. ⁴Sanöma töpö wäo kuköma, töpö hapalo taö öpaö, töpö hapalo pi mosai ipö, ĩ na sanöma töpö hapalo kua kua wi na, ĩ na Cristo sa ta wäsä tä, ĩ na sa hapalo kua kua pasio maapili. Cristo sa ta wäsä tä, ‑Teusö a õsi kua tolele, ĩ a lotete epii, ĩ anö Paulo a hapalamawö‑ ĩ na makö pi thama kipili. ⁵‑Sanöma töpö hapalo pi mosai kui na, ĩ na sa hapalo pi mosai kuö hö̃tö salo, “Cristo a pitili” ĩ na kotĩtu tili töpö pi kuu kuki kitäö!‑ ĩ na sa pi kuu maapiliö! ‑Teusö a lotete epö kutenö, “Cristo a pitili” ĩ na ĩ töpö pi kuu kuki kitäö!‑ ĩ na sa pi kuu pasio kipili.

Teusö a õsi kua tolele, ĩ anö makö pi hatuka totia sisapamani wi ĩ ta

⁶Ĩ na sa pi kuu pasio kipili maaki, Teusö a na töpö pi luluo totio opa wi ĩ töpö na Teusö a kai pi a mosaia apa wi, ĩ sama ta wäsä sisaö. Teusö a thapo mai ĩ töpö, sanöma töpö patamopalo opati wi ĩ töpö patamo mapoimati ĩ töpö, ĩ na töpö kui töpö kai pi a mosaia apa wi, ĩ sa ta wäsä pasio mi. ⁷Teusö a kai pi a mosaia apa totile, Teusö anö ĩ ta hasulupama paio maa noai, huki ĩ sama ta hasulupama kule. Teusö anö masita tä uli thapa paio mi tä, Teusö aiki, ‑Sa kai pi a mosaia totile, ĩ tänö ipa sanöma sa töpö totia totipalöpöö!‑ ĩ na Teusö a pi kuuma. ⁸Teusö a kai pi a mosaia apöle, ĩ sa ta hasulupamane, sanöma pata töpönö ĩ ta hini makoka apa maama. Ĩ töpönö ĩ ta hini totioma aköna, Jesus pata tä toita apö asai, hii ti pakalai ti ha ĩ a sätäma maa noa kipi. ⁹Teusö anö ĩ ta hasulupama paio maa noai maaki, kamisamakö na ĩ ta hasulua asapamanöma. Ĩ na Teusö tä waheta kuuma:

‑Teusö a pi ipa asale, ĩ töpö na Teusö anö tä totoma pi topale, ai sanöma pili tä mamo sainö ĩ tä tapa maama. Ai tä sömökanö ĩ ta hini maama. “Teusö anö ĩ nasimö tä totoma hãto kitäö!” ai sanöma tä pi kuu maama‑

ĩ na Teusö tä waheta kuuma.

¹⁰Ĩ na ai sanöma töpö kua kule maaki, kamakö na Teusö anö kama õsi kua tolele, ĩ a simöpalö nö, ta hasulupama paio maa noai, kamakö na ĩ ta hasulua asa waikipamanöma. Ĩ tä pewö na Teusö a õsi kua tolele, ĩ anö makö pi hatukupamani. Teusö anö tä thama pi topa wi, ĩ tä pewö na makö pi hatukupamani. ¹¹Sanöma tä pi tapotio wi, kama pili a õsinö ĩ tä taö sisaö. Ĩ na tä kua kua wi na, ĩ na Teusö a kua hö̃töoö. Teusö a pi tapotio wi, samii kama õsi kua tolele, ĩ anö ĩ tä taö sisaö. ¹²Sanöma töpö pi tapomo päo wi, ĩ nasimö ma tä sua maama. Teusö anö kama õsi kua tolele, ĩ a simöpalö noai, ĩ ma sua pasilöma. Teusö anö kamakö na ĩ tä pewö totokö noai, ĩ tä pewö na kama õsi kua tolele, ĩ anö makö pi hatuka totipamani.

¹³Teusö a õsi kua tolele, ĩ sama sua waikilöma kutenö, Teusö a thapo mai ĩ töpö hapalo pi hatukua kua päo wi na ĩ na samakö hapalo pi hatukua kua naio päo mi. Teusö a õsi kua tolele, ĩ a kuu kua wi na, ĩ na samakö kuu naioö. Önö kutenö, Teusö a õsi kua tolele, ĩ anö ta wäsä noai, ĩ sama ta wäsä toleaö. Teusö a õsi kua tolele, ĩ anö töpö pi hatuka waikipamanö noai, ĩ töpö na sama ta wäsä toleaö. ¹⁴Teusö a pi kuu wi, Teusö a õsi kua tolele, ĩ anö kamisamakö na ĩ ta wäsä wi, Teusö a õsi kua tolele, ĩ a thapo mai ĩ töpönö ĩ ta hua mi. ‑Teusö ta wäsä wi ĩ ta suasi‑ ĩ na ĩ töpö pi kuu sinomoö. Teusö a õsi kua tolele, ĩ a thapo totile, ĩ töpönö Teusö a õsi kua tolele, ĩ a kai a hinia totia asali. ¹⁵Teusö a õsi kua tolele, ĩ a kai a hini pole, ĩ töpö pi tao opa asaö. Ĩ töpö aiki, ‑Ki tä topa. Ki tä wanisala pasiwö‑ ĩ na ĩ töpö kuu taö öpa sisaö. Ĩ töpönö tä makokama taö öpa sisaö. Ĩ na tä kua tä, Teusö a thapo totile, ĩ töpö kuati wi, Teusö a thapo mai ĩ töpönö ĩ tä taö makokoa totia naia mi. ¹⁶Teusö a pi kuu wi, witi pili anö ĩ tä taö asaö? Teusö a na, ‑Ĩ na wa kuapököö!‑ ĩ witi pili a kuu taö asaö? Teusö ma thapo wi ĩ makönö, Cristo a pi kuu wi ĩ ma tä taö asaö.

Makö hapalo säläho mai nököö!

¹Ipa pö! Teusö a õsi kua tolele, ĩ a hini totio wi ĩ töpö na sa hapalo kua kuati wi na, ĩ na kamakö na ĩ na sa hapalo kua kua pikio maapili. Teusö a õsi kua tolele, ĩ a hini mai ĩ töpö na sa hapalo kua kua wi na, kamakö na ĩ na sa hapalo kuu pikio kipili. Ulu töpö ose wai kui na, ĩ na makö kuö. Teusö a thapo tute epii ĩ töpö na sa hapalo kua kua wi na, kamakö na ĩ na sa hapalo kua kua naio pikio kipili. ²Ulu töpö ose wai na sui tuu sino koama kua paio kua päo wi na, ĩ na kamakö na ĩ na sa kuu kua päo kipili. Ulu töpö ose wai kui na, ĩ na makö kuö soa kutenö, kamakö na Teusö sa tä pewö a wäsä totio paio maapili. Nii tä sai na ulu töpö wai ia tai mi ipö pai kui na, ĩ na makö kuoma. Kama makönö Teusö ma tä pewö a hini pi topa maama kutenö, ĩ sa tä pewö a wäsä maapili. Teusö a õsi kua tolele, ĩ ma hini totio paio mai, ĩ makö soawö kutenö, Teusö ma tä pewö a hini pi topa mi ipö soawö. ³Ai ma töpö hĩsu thaö, pe epii makö hapalo hẽtupaso pi wasöa soatalo opatii, ĩ na makö kua kutenö, ‑Teusö a õsi kua tolele, ĩ ma hini totio mai, ĩ makö‑ ĩ na sa kuu kule. ‑Teusö a thapo mai ĩ töpö kua kuati wi na, ĩ na makö kupalo hö̃tötioö‑ ĩ na sa pi kuu kule. ⁴Ai makö aiki, ‑Paulo sa kai a hini sisa wi ĩ sa‑ ĩ na ai makö kuu. Ĩ na tä kua tä, ‑Apoolu sa kai a hini pasio wi ĩ kamisa pasiwö‑ ĩ na ai makö kupalotii. Ĩ na makö kuu sälähäpalo opaö ha, ‑Teusö a thapo mai, ĩ töpö hapalo kua kua wi na, ĩ na kotĩtu tili töpö hapalo kua hö̃töa kule o!‑ ĩ na kamakönö ĩ na sa pi thapalama totia pasia kuleö!

⁵Apoolu a hai, pata tä sai asawö ta o? Paulo sa hai, ĩ pata sa sai naiwö ta o? Ma. Teusö anö samakö simöa sinomo päo wi, ĩ samakö päwö. Teusö anö samakö simönöma kutenö, kamakö aiki, ‑Jesus Cristo a pitili‑ ĩ na makö pi kuu kuköma. ‑Apoolu ai! Ĩ na kawa kuapököö! Paulo ai! Ĩ na kawa kua pasio kuköpöö!‑ ĩ na Teusö anö samakö noa thama. ⁶Ĩ na samakö noa thaö ha, ĩ na samakö kuama. Pi naka. Ai tänö nii tä tököma maaki, tä uli hãsiti ipö kutenö, nii tä ãke tomöpo mi ipö nö hĩsuwö ha ai tänö nii töpö heuhama sinomoti kuköma, nii töpö pata haö liäha apa kuki. Ĩ na tä kua kua wi na, kamisamakönö ĩ na makö thama totio alu kipili. Teusö ma kai a hini totiopö, kamakö õsi na kamisanö Teusö sa ta töki, ta tökö noai, Apoolu anö Teusö ta uni heuhama pia salo, Teusö ta wäsä nömöo sinomotii, ĩ na samakö kua kua toitio alu kipili. Ĩ na samakö kuo kipili maaki, Teusö ma kai a hini totilöpö, Teusö anö ĩ tä pata totimanöma. ⁷Ai tänö Teusö ta tösa wi ĩ a toita apö asa mai kitä. Ai tänö Teusö ta wäsä nömöo sinomo pasio wi ĩ a toita apö asa nai mai kitä. Teusö anö töpö sawäa totia asamani wi, ĩ a toita apö asawö. ⁸Teusö ta tösa wi ĩ a, Teusö ta wäsä sinomo nömöo wi ĩ a, ĩ na kilii töpönö ai töpö pewö pasilipa ösöho opatii. Teusö ta tösa wi ĩ töpö na Teusö anö noa tä totoki, Teusö ta wäsä sinomo nömöo wi ĩ töpö na Teusö anö ai noa tä totoki, ĩ na ĩ töpö na ĩ na Teusö anö tä totoa thaki kitä. ⁹Teusö a na kamisa kalipaloö, Teusö a na Apoolu a kalipalo naioö, ĩ na samakö kalipalo kua polakapaloti wi ĩ samakö. Hikali pö na nii tä ãke wi ĩ tä nii kua kua wi na, ĩ na kamakö kua kua pasioö. Kamakö hai, Teusö a hai ĩ hikali makö kutenö, kamakö na a kalipalo opatii.

Teusö a sai pö hai, ĩ kamakö uni

Teusö a sai pö hai, ĩ kamakö uni pewö. ¹⁰Teusö anö sa pasilipoö ha, sai a thaa taö öpa wi ĩ anö sai a thaa kua wi na, ĩ na Teusö sa sai thaa kua hö̃töoma. Kamisanö sai pili sa kolo thaa kuköma. Ai tänö ĩ a sai ola thaa nömöa kule. Ĩ a sai na makö kalipalo pi topa naia tä, makö pi mosaia totiki nö, ma sai thaö! ¹¹Sai a kolo kua waikia. Sai a kolo hai, ĩ Jesus Cristo a. Ai tänö ai tiko sai a kolo thaa nömöo mai kitä. ¹²Sai a ola thaa tä, ai töpönö oto tä, pötaata tä, maa ma noa apii ĩ ma, ĩ na tä kui tänö a sai thaki. Ai töpönö hii ti, sĩsi tä, hoko nakö, ĩ na tökö äpäti kui tökönö ola a sai tiä päki. ¹³Ĩ tökö pewönö ola sai thakö noai, Teusö anö ĩ tökö pewö wapa pia salo. Cristo a huu kõa tä, ola a sai thakö noai, Teusö anö ĩ tökö wapa kõso nö, ‑Sai ma thaa toita apa noaö!‑ Teusö a patanö ĩ na ai töpö noa thaa konö solö kitä. Ĩ na tä kua tä, ‑Sai ma thaa taö maa noaö!‑ ĩ na ai töpö noa thaa konö solö kitäö! Teusö anö koa takanö a sai wapa pia salo. ¹⁴Ai tänö ola a sai thakö noai, ĩ a sai ĩsi mi ha, Teusö anö ĩ a na noa tä totoki kitä. ¹⁵Ĩ na tä kua tä, ai tänö ai ola a sai thaa pasikö noai, ĩ a sai ĩsisoö ha, ĩ a wani na Teusö anö noa tä totoa pasio mai kitä. Ĩ a wani na noa tä totoa mai kitä maaki, koa taka na Teusö anö ĩ a wani noama kitä. Sanöma töpö sai pö wakö umö tä, sai a õsimö ha ai sanöma tä ĩsi pia tä, ai sanöma tänö ĩ a noama nö, a kõa thali wi na, ĩ na Teusö a sai thaa taö maa noai, ĩ na ĩ a wani ĩsi kua pia tä, Teusö anö ĩ na ĩ a wani noama kua nö, a wani kõa thaa hö̃töli kitä. ¹⁶Kamakö na Teusö a õsi kua tolele, ĩ a pilia. Teusö a sai pö hai, ĩ kamakö uni ta pi kuu mai. ¹⁷Teusö a sai toita apii, a sai ausi ipii, ĩ na a sai kuö kutenö, ai tä waninö a sai waniapalöma, Teusö anö ĩ a wani wania hö̃töpali kitä.

¹⁸Kama pö mönao sapao kõo tihöö! ‑Ai sanöma töpö pi hatukua kua wi na, ĩ na sa pi hatukua kua naia‑ ĩ na wa pi kuu päo tä, ‑Sa tä tai mi ipö. Teusö anö tä taö sisaö‑ ĩ na wa pi kuupököö! Ĩ na wa pi kuu tä, wa pi hatuka totio opa kuki kitä. ¹⁹‑Sa pi mosawi ipö‑ ĩ na sanöma töpö kuu päa kule maaki, Teusö aiki, ‑Ĩ töpö pi motia apa pasia. Ĩ töpönö tä tai mi ipö pasiwö‑ ĩ na Teusö a pi kuu. Ĩ na Teusö tä waheta kuu:

‑“Sa pi mosawi ipö kutenö, ĩ na sa tä thama pia salo” ĩ na sanöma töpö pi kuu päo wi, Teusö anö ĩ töpö namo keki.

²⁰“Kama töpö pi mosaiapalo pätio wi, ĩ tä noa apö mai kitä” ĩ na Teusö a pi kuu‑

ĩ na Teusö tä waheta kuu.

²¹Önö kutenö, sanöma wa tä kateha nö, ‑Ĩ a pi hatuka totia apa nö kilile‑ ĩ na a kuu hãto tihöö! Kamakönö ĩ ma tä pewö thapo waikia kule. Kamakönö samakö thapo wi ĩ samakö päwö. ²²Paulo sa, Apoolu a, Pedro a, ĩ na samakö kui kamakönö ĩ samakö thapo wi, ĩ samakö pewö. Makö pasilipo wi ĩ samakö pewö waikiwö. Hi masita tä uli pewö hai, ĩ kamakö hai ĩ tä uli pewö. Temöo wi ĩ tä, nomaso wi ĩ tä, huki tä kuati wi ĩ tä, waiha tä kua kuki wi ĩ tä, ĩ tä pewö hai, ĩ kamakö hai ĩ tä pewö waikiwö. ²³Cristo anö makö thapo wi, ĩ makö pasiwö. Teusö anö Cristo a thapo wi, ĩ Cristo a pasiwö.

‑Kamisa na wa kalipalotipili, ĩ wa totiatalo opawö‑ ĩ na Jesus Cristo a kuu pia wi ĩ ta

¹Önö kutenö, kamisamakö na makö pi tapoa tä, ‑Paulo a, kamisamakö na ai töpönö Teusö ta wäsä sinomo naio wi ĩ töpö, ĩ na kilii töpö hai, Cristo anö ĩ töpö kalipalama sinomo wi ĩ töpö‑ ĩ na pö pi kuu totihoö! ‑Teusö anö kama kai a hasulupama paio maa noai, huki ĩ töpönö ĩ ta wäsä hasulupalo waikia kuleö!‑ ĩ na makö pi kuu naio soataloö! ²Pi naka. Ai sanöma pata tänö töpö kalipalama sinomo wi ĩ a pata aiki, ‑“Ki töpö kalipalo totiatalo opa sinomotiwö” ĩ töpönö ĩ na sa pi thama mi salo‑ ĩ na ĩ pata tä pi kuu. ^3-4Kamakö, ai sanöma töpö, ĩ na kilii makönö, Teusö a na sa kalipaloti wi, ĩ ma tä taa totio nö, ‑Paulo a kalipalo makoka apati nö kiliawö‑ ĩ na makö kuu ha, ‑Ĩ na töpö kuu päoö‑ ĩ na sa pi kuu hö̃töo kitä. ‑Aitaköö!‑ sa pi kuu paio mai kitä. Jesus Cristo aiki, ‑Paulo a kalipalo makoka apatiwö‑ ĩ na Jesus Cristo a kuu ha, ‑Aitaköö!‑ ĩ na sa pii kuu sisa kitä. Kamisa pi maaki, ‑Teusö a na sa kalipalo makoka apa wi ĩ sa‑ ĩ na sa pi kuu hö̃töo mi. ‑Teusö a na sa kalipalo tomöpaloti hãto mai kitä‑ ĩ na sa pi kuu mi päla tä maaki, ‑Sa kalipalo makoka apa wi ĩ sa‑ ĩ na sa pi kuu päo mai kitä. Ĩ na sa pi kuu kule maaki, ‑Teusö a na sa makoka apa waikia kule‑ ĩ na sa pi kuu mi. Teusö anö ĩ tä taö sisaö. Teusö a na sa kalipaloti wi, Jesus Cristo anö ĩ tä taa totio nö, ‑Paulo a makoka apa waikia kule‑ ĩ na Jesus Cristo a kuu sisaö. ⁵Ĩ na Jesus Cristo a kuu sisa kutenö, Jesus pata tä huu kõo paio mi tä, ai sanöma ma tä kateha nö, ‑Ki a wani kuati wi ĩ tä makoka apa‑ ĩ na pö pi kuu paio ti! Ai sanöma tä pi wani kupalo hãtotile, ai sanöma töpönö ĩ tä tapa maa noai maaki, Jesus Cristo anö ĩ ta wäsä hatuka apa kuki kitä. Ai sanöma tä pi kuu hãtotile, ai sanöma töpönö ĩ tä tai mia apöle, Jesus Cristo anö ĩ tä taöma hasulua apa kuki kitä. Ĩ na Jesus Cristo anö tä thama tä, sanöma makönö toitai makö kuati noai ĩ makö pewö na Teusö aiki, ‑Wa kuatipili, ĩ tä totiatalo opama‑ ĩ na Teusö a kuu pasio kitä.

⁶Ipa pö! Kamisanö makö pi hatukupamani pia salo, kamisa, Apoolu a, ĩ na kilii samakö na makö pi tapomoma pi topa ke. ‑Hãu. Ĩ na Paulo a, Apoolu a, ĩ na kilii töpö kua kua wi na, ĩ na makö kua kua naiopököö!‑ ĩ na makö pi thamapö, kamisamakö kuati wi, kamakö na ĩ sa tä wäsä ke. Teusö tä waheta kuu wi, ĩ ma tä hinipököö! Teusö ma tä waheta hini tä, ‑Ki sa kai wani hini pasio mai, ki sa kai pata hini sisaö. Ĩ sa kai pata hini asa kutenö, sa tä taö öpaö‑ ĩ na pö pi kuu ti! ⁷Witi pili anö pata wa thaa asapalöma? Wa tä pewö thapo pole, kawa na Teusö anö ĩ tä pewö totoa päköma. Teusö a na ĩ wa tä pewö sua pälöma kutenö, ‑Kamisanö sa tä taö öpa asawö‑ ĩ na wa pi kuu maiki.

Ai töpönö samakö komopama sinomo wi, ĩ samakö

⁸Makö puko opa waikia kule ta o? Makö honimopalo opa maa kule ta o? Samakö kua mi tä, makö patamo kuköma ta o? Makö patamo totioma aköna, tä topala pi ta. Kamakö na samakö patamo naina pi. ⁹‑Teusö anö samakö simöa asa noai, Teusö anö ĩ samakö komoa hãtopamanöma‑ ĩ na sa pi thapalama kule. Töpö satehe epii töpö mamo tetela tä, pata töpönö ai töpö wani säpa piale, ĩ töpö wani kua pole na, ĩ na samakö kua hö̃töa kule. Kamisamakö pea pole, ĩ samakö na sanöma töpö, ãju töpö, ĩ na töpö kui töpö mamo tetea hö̃töa kule. ¹⁰Cristo sama ta wäsäö ha, ai töpö aiki, ‑Makö osemo opawö‑ ĩ na töpö kupaloö. Cristo ma thapo kutenö, makö pi hatuka apa hãtoa asa kule. ‑Kamisamakö utiti. Kamakö lotete hãtoa asawö‑ ĩ na kamakönö sa pi hole thapalama kule. Ai töpönö samakö komoapama kule maaki, kamakö hösökapalo opa asa kule. ¹¹Samakö ohi, samakö amisi, ĩ na samakö kua pasia soatia. Samakö haloi ösöpö mi. Ai töpönö samakö soapala apatii. Kamisamakö sai pö sai kua mi. ¹²Pili samakö aminö samakö kalipalo wasisopalo opa pasitio päoö. Kamisamakö na, ‑Makö wanisala apawö‑ ĩ na ai töpö kuu päla tä, ‑Teusö anö makö totiapala apa kuköpöö!‑ ĩ na samakö kuu hö̃töa. Ai töpönö samakö pepalama apa kule maaki, samakö kasiapalo satia apa hö̃töa. ¹³Ai töpönö samakö a kateha wanisala apa kule maaki, samakö hapalo hölapalo mai, opii ĩ töpö na samakö hapalo totio asaö. Sanöma töpö nii pö hote hosa thama kua wi na, ai töpönö ĩ na samakö hosa thama hö̃töoö. Sami sami tä pii mi ipö kui na, ĩ na samakö pii mi ipö kuö hö̃töwö.

Pö̃ anö kama ulu a noa thaa kua wi na, ĩ na Paulo anö ĩ töpö noa thaa kua hö̃töoö

¹⁴‑Paulo anö samakö pi kiliha apöpamanöpö, tä sãököpalö nö, samakö noa thaa kule‑ ĩ na pö pi kuu ti! ‑Ipa ulu makö pi ipa wi, ĩ makö‑ ĩ na sa pi kuu salo, makö noa thaa kule. ¹⁵Kamakö na Cristo ta taöma sinomo wi, ĩ töpö satehe epii töpö kua kule maaki, kamakö hai pö̃ sa samii sa kua kule. Kamakö na Jesus ta topa apöle, ĩ sa ta wäsä somama kutenö, Jesus Cristo ma thapo wi, ĩ kamakö hai ĩ pö̃ sa wani kupasoma. ¹⁶Kamisa hai, ĩ kamakö hai ĩ pö̃ sa kutenö, ‑Sa uöma totihoö!‑ ĩ na sa ku upaö. ¹⁷Önö kutenö, kamakö na Timóteo sa simöpali kipili. Timóteo a na, ‑Ipa ulu a‑ sa kuu sinomoö. Ĩ sa pi ipaö. Kama anö sa kai a hosa mi ipö. Ĩ tä uli pewö hamö Jesus a thapo wi ĩ töpö kokamo sinomo wi, ĩ sa töpö pi hatukumanöpö, ‑Cristo sa thapo salo, ĩ na sa kuati kule. Sa kua kuati wi na, ĩ na makö kua kua naiopököö!‑ ĩ na sa kuu sinomoö. Kamakö na Timóteo sa simönö nö, ‑Sa kuati wi ĩ ta wäsätöö!‑ ĩ na sa kuuma.

¹⁸Ĩ na tä kua tä, ‑Kama Paulo a sai huu mai kitä‑ ĩ na ai makö pi kuu salo, ‑Pata makö hö̃tö waikiwö‑ ĩ na ĩ makö pi kuu nö kilia sai. ¹⁹‑Paulo a huu mai kitä‑ ĩ makö pi kuu kule maaki, Teusö anö sa simöpa tä, tä tetepo totio mai ha kamakö pewö na sa huu kitä. Kamakö na sa waloiki nö, ‑Pata sa asawö‑ ai makö pi kuu päo wi, ĩ makö hapalo pasio päo wi, ĩ sa ta hini pi topa mai, Teusö a lotete epii ĩ anö makö õsi lotetea apa naipalö noai, ĩ sa tä möö pi topa sisaö. ²⁰Sanöma makö na Teusö a pata kaikanamo wi, ĩ nasimö ai wa kupasoma, wa hapalo päo mai, wa õsi lotetea totipaso kitä. ²¹Kamakö na sa waloiki nö, wi na sa kua kukö solöpö? Kamakö na sa talalo nö, makö päsäpa kuki wi ĩ ma tä pii hãtoa kule? Kamakö na sa talalo nö, noi ipii sa hapalo päo kukö solöpö, ĩ ma tä pii hãtoa?

A mamo wanisala apa wi, ĩ a wani

¹‑Kotĩtu tili ai a wani Teusömo sinomo naitio wi maaki, ĩ a mamo wani wanisala apa kulaliö!‑ ĩ na sa tä kuu hini kule. ‑Pö̃ a husopö na maaki, ĩ a wani mamo wanisala apa pikio nö kilia sai‑ ĩ na sa tä kuu hini kule. Ai sanöma töpönö Teusö a thapo maa kule maaki, ĩ na töpö kua pasio mai kitä. ²Kamakö na a wani Teusömo naio wi, ĩ a mamo wani wanisala apati kule maaki, ‑Ĩ na ĩ a mamo wani kuo päoö. Kamakö pewö topa apa waikia päalököö!‑ ĩ na makö pi ta kuu nö kiliawö. Ĩ na makö pi kuu mai, makö pewö pi otapo mi salo. A mamo wani wanisala apati pole, ĩ a na, ‑Kamisamakö Teusömo tä, kamisamakö na wa tikiliapalo maikiö!‑ ĩ na makö kuupökö. ³Kamakö na pili sa sai kua naitia mane maaki, kamakö na sa uni kua naitia kule. Kamakö na sa uni kua naitia kutenö, kamakö hai ĩ Jesus pata tä kuu kua noai na, ĩ na sa kuu kua naio ke. ‑Pö̃ a husopö nö thaö läapaloti wi, ĩ anö wanisala tä hole thaa totio opa nö kilile‑ ĩ na sa thapalama ke. ⁴Makö kokamo nö, makö Teusömo tä, kamakö na sa uni nö kokamo naio kitä. Önö kutenö, Jesus Cristo anö makö õsi lotetepamani wi, ĩ tänö ⁵Sai tä sai pata na ĩ ma wani simököpököö! Sai tä sai pata na ĩ ma wani simököma, Sai tä sai patanö ĩ pili a wani säpalöpöö! Sai tä sai patanö pili a sai säpalöma maaki, waiha Cristo pata tä huu kõa tä, Teusö anö ĩ a õsi wani täa konöpöö!

⁶‑Makö pewö topa waikia kuleö!‑ makö kupalo pole, ĩ ta topa maa saile ta. Ĩsa ãi thaa pia tä, ĩsa ãi hölöopo opa wi, wani ipii ĩ tä kopeke wai kea pätamaköma maaki, pe epii ãi hölöpo opaö ta pi kuu mai. ⁷Ĩsa ãi hölöopo opa wi ĩ tä kua kua wi na, ĩ na wanisala tä thaa wi, ĩ na ĩ tä kua hö̃töoö. Ĩsa ãi hölöopo opa wi ĩ tänö ĩsa ãi palama apaö. Önö kutenö, makö pewö ausi ipii makö kupasopö, wanisala tä thaa noai, ĩ tä hosalöheö! Wanisala ma tä hosalöma, ĩsa ãi ãketema na ĩsa ãi hölöopo wi ĩ ma tä keama mi tä, ĩsa ãi ãketema hölöopo mi kua kua wi na, ĩ na makö kupaso kitä. Juteu töpö pásökoamo nö, töpö iapalo tä, oweha tiapö, ĩsa ãi hölöopo pasio mai ĩ ãi oa sinomo pasioö. Ĩ oweha a säta sinomo wi, ĩ Cristo a uni waikiwö. Kamakö pewö nö läpopö, Cristo a säpamonasoma. A säpamonasoma kutenö, ĩsa ãi namöma hölöopo mi ipö kui na, ĩ na makö kua hö̃töa waikia kule. ⁸Önö kutenö, makö iapalopö, makö kokamo tä, Cristo ma sai uni oalö nö, ĩsa ãi hölöopo wi, ĩ tä kua kua wi na, ĩ na wanisala tä kua wi, ĩ ma tä wanisala thati noai, ĩ tä hosalöheö! Wanisala ma tä thaö, makö wanihaso soatalo opatii, ĩ na makö kuati wi, ĩ tä na makö iapalo maapököö! Makö ausi ipö, makö pitilimo opa totioö, ĩ na makö kua wi, ĩ tä na makö iapalo totiopököö!

⁹Kamakö na waheta sa tä simöpalipili, ĩ tä waheta na ĩ na sa kuu kipili: ‑Ai töpö waninö suö tä po totia mane maaki, töpö wani mamopalo pätile, ĩ töpö wani na pö noimo hãto tihöö!‑ ĩ na sa kuu kipili. ¹⁰Jesus Cristo a thapo mai ĩ töpö pewö na kuno mai. ‑Jesus Cristo a thapo mai, ĩ töpönö sami sami tä thaö, wani tä na ĩ töpö pi wasisopalo opa sisatioö, töpö thomömoö, ukutupö tä na töpö noamamo sinomoö, ĩ na ĩ töpö kuati wi, ĩ töpö na pö noimo hãto tihöö!‑ ĩ na sa kuu maapili. Teusö a thapo mai, ĩ töpö na makö pilia naia mi aköna, hi ma tä uli taa waiki kölö noa kipi. ¹¹‑“Jesus sa thapo wi ĩ sa” ĩ na ai tä wani kuu wi, ĩ a waninö sami sami tä thaö, wani tä na a pi wani wasiso opa sisatioö, ukutupö tä na a noamamo sinomoö, a hölapalo opa pasio päoö, wasui tuunö a wani polemo sinomo pasioö, a thomömoö, ĩ na ĩ a wani kua sinomoö wi, ĩ a wani ha pö noimo hãto tihöö! “Jesus sa thapo naio wi saö!” a wani kuu päla tä maaki, ĩ a wani na pö iapalo naio hãto tihöö!‑ ĩ na sa kuu totia kule.

^12-13Jesus Cristo a thapo mai, ĩ töpö na sa tä makokama läapalo paio mai kitä. Ĩ töpö na Teusö anö tä makokama läapalo pasio sisa kuki pia salo. ‑Makö wanisala apa noa‑ ĩ na Teusö a kuu sisa kuki kitä. Kamakö na a Teusömo naine, ĩ a waninö wanisala tä thatala apa pasitio wi, ĩ ma wani soka kopamanöö!

Teusö a thapo mai ĩ töpö na, ‑Tä makokama läapaloö!‑ ĩ na pö kuu tihöö!

¹Ĩ na tä kua tä, Cristo a thapo wi, ĩ ai tänö kawa na wanisala tä thaa tä, Teusö a thapo mai ĩ töpö na, ‑Hi a na ma tä makokopama läo mi salo!‑ ĩ töpö na ĩ na a kuu tihöö! Teusö a thapo wi ĩ töpö na ĩ na wa kuu sisapököö! ²Waiha Teusö ma thapo wi ĩ makönö sanöma töpö pewö na ma tä makokama läapalo kitä ta pi kuu mai. Sanöma töpö pewö na ma tä makokama läapalo pia manu kule, huki wani ipii ma tä makokama tai mi ipö paikö ta o? ³Waiha ãju töpö na ma tä makokama läapalo naio kuki kitä ta pi kuu mai. ‑Huki sanöma töpö na ma tä makokama waikio kolo kupo pia kule‑ makö pi kuu mi salo. ⁴Önö kutenö, kamakö na ai töpönö wanisala tä thaa tä, ai töpö Teusömo totio mai ĩ töpö na, ‑Ma tä makokopama läo mi salo‑ ĩ na pö kuu tihöö! ⁵Ma tä tai mio opapa nö kiliapale a. Teusö a thapo pole, ĩ a na ai tänö Teusö a thapo naia kule maaki, Teusö a thapo pole, ĩ a na wanisala tä thaa tä, ĩ ha ai wanö wa tä makokama läapalo taö öpa wi, ĩ ha ĩ ai wa kua mai kitä ta o? ⁶Ĩ na sa kuu kule maaki, Teusö ma thapo wi ĩ makö pewö maaki, Teusö a thapo pasio mai ĩ töpö na ai wa ekuiki nö, ‑Ma tä makokama läapalo mi salo‑ ĩ na ai wa kuu nö kilile. Ĩ na ai wa kuu pola mai nököö!

⁷Ĩ na tä kua tä, Teusö a thapo mai, ĩ ai töpö na makö ekuiki nö, ‑Tä makokama läapaloö!‑ ĩ na makö kupaloti manu kule, ‑Ĩ töpö tomöpo mi ipö waikiwököö!‑ ĩ na kamakönö sa pi thapalama totia alu kuleö!

Kamakö na ai töpönö wanisala tä thaö, töpö thomömoö, ĩ na töpö kuaö ha, ‑Ĩ na töpö kua pasio päoö‑ ĩ na makö kuu totiatalo mi sai. ⁸‑Ĩ na tä kua päoö‑ makö kuu mi tä, ai makönö, Teusö a thapo naio wi ĩ töpö na wanisala ma tä thaö, ĩ töpö na makö thomömoö, ĩ na makö ta kua pikitiowö. ⁹Teusö a kaikanamo sinomo wi, ĩ ha wanisala tä thapo pasile, ĩ töpö pilipalo naio mai kitä. Kama makö mönao sapao maiki.

Wano tänö suö tä po totio mane maaki, töpö mamo wanisala apati wi ĩ töpö,

ukutupö tä na töpö noamamo wi ĩ töpö,

ai tiko tä suö na töpö mamo wi ĩ töpö,

ai wano töpö na ai wano töpö mamo silia apa wi ĩ töpö pewö,

töpö thomömo wi ĩ töpö,

¹⁰wani tä na töpö pi wasiso satia apa wi ĩ töpö,

töpö polemo pi topa apa wi ĩ töpö,

töpö hölapalo opa wi ĩ töpö wani nai soatawö,

töpö waitili ipii ĩ töpönö wani tökö thomöma soa päatalo opa wi ĩ töpö,

ĩ na töpö kui, Teusö a kaikanamo pole, ĩ ha ĩ töpö pilio naio mai kitä.

¹¹Ĩ töpö kuati kua wi na, ĩ na ai makö kuati kua hö̃tötioma. Ĩ na makö kuatima maaki, Teusö anö makö õsi salupalö nö, makö õsi ausipalöma. Teusö anö makö thapo asa wi ĩ makö kua asa soapasoma. Teusö anö makö totia waikipalöma. Jesus Cristo pata tä, kamakö hai Teusö a õsi kua tolele ĩ a, ĩ na kilii töpönö ĩ na makö thama totioma.

Wa po totia mane, ĩ a na a mamo hãto tihöö!

¹²Ĩ na tä kua tä, ‑Wa tä thama pi topa wi ĩ tä thama ti!‑ ĩ na ai tänö wa noa thaa mai kitä maaki, wa tä thama pi topa wi ĩ tä topa hãto mai kitä. ‑Wa tä thama pi topa wi ĩ tä thama ti!‑ ai tänö ĩ na sa noa thamo mane maaki, ĩ sa tä pewö thama mai kitä. ‑Sa tä thama pi topa wi ĩ sa tä thama kuköma, sa tä thama satimo opa matimöö‑ ĩ na sa pi kuu salo, ‑Päla. Ĩ sa tä thama mai kitä‑ ĩ na sa pi kutii. ¹³Õsimö hamö ai pili pösömö kua kutenö, nii tä kua hö̃töa. Nii tä kua kutenö, pili pösömö kua hö̃töa. Ĩ na tä kua kule maaki, waiha nii tä, pili pösömö, ĩ na tä kui Teusö anö ĩ tä pewö mapamani kitä. Pili makö sai lö kui, ai tiko tä suö na makö mamopö, ĩ pili makö sai kua hanoa mai kitä. Pili makö sai kua tä, kamakö õsi na Cristo pata tä kuköma, pili makö sai kua. Cristo a na pili makö sai pewö kokapalo kuköpö, kamakö õsi na Cristo a kua. ¹⁴Cristo a nomasoma maaki, pö̃ Teusö anö a temöa komanöma. Kamakö nomasoma maaki, Teusö a lotete epii ĩ tänö makö temöa hö̃töa komani kitä.

¹⁵Cristo a na makö koka kutenö, pili makö sai hai, Cristo makö sai kua hö̃töpasoma ta pi kuu mai. Önö kutenö, pili makö sai hai, Cristo makö sai kua hö̃töpasoma kutenö, wano töpö mamopalama sinomo päo wi, ĩ a suö na wa koka nömöki kitä ta o? Ma. Ĩ na kuno mai. ¹⁶Wano töpö mamopalama sinomo wi ĩ a suö na wa kokaiki nö, makö nö thapaso kuköma, polakapi makö kutioma maaki, sami makö kupasoö. ‑Ai wa tä nö thaa tä, polakapi makö kuoma maaki, sami makö kupaso kitä‑ ĩ na Teusö tä waheta kuu. ¹⁷Ĩ na tä kua tä, Cristo a, kawa, ĩ na makö koka kua tä, sami makö kupasoö.

¹⁸Suö wa tä po mane, ĩ a na wa mamo wi, ĩ tä na a toköa totiloö! Ai wanisala wa tä thama, pili wa pewö samipo mai kitä maaki, suö wa tä po mane, ĩ tä suö na wa sapäko kuköma, ĩ wa pewö samia totipasoö. ^19-20Pili makö sai hai, Teusö a õsi kua tolele, ĩ a hai ĩ a sai ta pi kuu mai. Kamakö na Teusö a õsi kua tolele, ĩ a totokö noai, ĩ a hai ĩ a sai. Teusö anö noa tä na makö tälöma kutenö, kamanö makö thapo waikia kule. Kama makö thapo sapao kõo mai kitä. Önö kutenö, pili makö sainö wanisala ma tä thaa mai, toitai tä thaa totioheö! Toitai ma tä thaa totio nö, ‑Teusö a pitilio opapa nö kiliawö‑ ĩ na ai ma töpö pi thama kuköpököö!

Töpö supasolaso wi ĩ ta

¹Ĩ na tä kua tä, kamakönö ipa waheta ma tä sãököpalö nö, ‑Paulo ai. Wi na wa pi kuu kule?‑ makö kuupili, ĩ tä pi na kamakö na ĩ na sa kuu hö̃töo pia kule. Pi naka. Wano wanö suö wa tä sua mai, sinoi wa kutile, ĩ tä topa. ²Ĩ tä topa apa kule maaki, suö tä po totia mai, ĩ töpö suö na töpö mamopalo opa päle, ĩ nasimö tä kua apa kutenö, au husopö wa sulöpököö! Suö wanö au heano wa sua soalöpököö! ³Ĩ na tä kua tä, au husopö a na wa isi umao maikiö! Au heano a na wa posö umao maikiö! Makö totipaso totiopököö! ⁴Suö kama pili a sai simöo sapao kua kõo mai kitä. Peanopö anö pusopö a simöa pasioö. Ĩ na tä kua kua wi na, ĩ na wano kama pili a sai simöo sapao kua kõo mai kitä. Pusopö anö peanopö a simöa nomöha hö̃töoö. ⁵Önö kutenö, wa pole, ĩ a na pö umapaso hẽtupaso hãto ti! Ĩ na sa kuu kule maaki, peanopö a, pusopö a, ĩ na kilii töpö aiki ‑Pi naka. Huki makö mamo paio mai ha, Teusö na makö hapalo paio pia kuleö!‑ ĩ na ĩ töpö noa thaso pole, ĩ ta topa hö̃töa. Teusö a na makö hapaloti pa, ma tä mumi tetea waikipamane maaki, ai tä wakala na peanopö wa, pusopö wa, ĩ na makö kui, ai tä wakala na pö umapaso sapao hẽtupaso kõo tihöö! Makö umapaso hẽtupaso kõtaköma, wanisala tä thaa wi ĩ tä na makö pälamo pi mosaia apa mi tä, ‑Wanisala sa tä thaa päopökö o‑ Sai tä sai patanö makö thamaö ha, ai tiko töpö na makö sapäkopalo kukö matimöö!

⁶‑Au husopö wa sai popöö! Suö wanö au heano wa sai po naiopöö!‑ ĩ na sa kuu ke maaki, makö noa thaa totia mane. ‑Au wa tä suö po pi topa tä, wa tä popö. Au heano wa sai po pi topa tä, wa tä popö‑ ĩ na sa kuu päa kule. ⁷‑Sinoi sa kua kupaloti pole na, ĩ na makö pewö kua kuaö aköna, tä topala pi‑ ĩ na sa pi kuu kule. Ĩ na sa pi kuu kule maaki, sinoi sa kua kupaloti pole, Teusö anö ĩ tä totoa thakö noai na, ĩ na ai töpö pewö na ĩ nasimö ai tä totoa thaa pasio maama.

⁸Sinoi makö kupaloti wi ĩ makö, suö makö sinopo kõo wi ĩ makö, ĩ na makö kui makö na ĩ na sa kuu kule. ‑Sinoi sa kua kupaloti pole na, ĩ na sinoi makö kua kupalo naitia tä, ĩ tä topa satia apaö‑ ĩ na sa kuu alu kule. ⁹Ĩ na tä kua tä, sinoi wa kupaloti kule maaki, ‑Ki suö sa nö thaa nö toa nö alu kikö ö̃‑ wa pi kuu hãtoa tä, au wa suö popöö! Makö pisi ipii makönö ma töpö suö popö. Suö makö lö kui, ĩ na makö kua hö̃töo soatapö. ‑Ki wano sa nö thaa nö toa nö alu kikö ö̃‑ ĩ na wa pi kuu wi ĩ au heano wa popöö!

¹⁰Makö supaso waikiso noai, ĩ makö na sa kuu nömöa alu kule. ‑Suö pö! Au heano a hosa tihöö!‑ ĩ na makö noa thaa kule. Kama sa pi saimo päo nö, makö noa thaa mane. Ĩ na Jesus pata tä kuu totia kule. ¹¹Au heano wa hosalö nö, ai tiko tä wano sua tihöö! Au heano wa sua sapa konöpöö! Au heano wa sua sapa kõo mai maaki, ai tiko tä wano sua asa tihöö! Peanopö wa lö kui, au husopö a hosa tihöö!

¹²Jesus a thapo mai ma töpö po pole, ĩ makö noa thaa nömöa alu kule. Teusö anö ĩ makö noa thaa mane. Paulo sanö ĩ makö noa thaa alu kule. Wano wanö Jesus wa thapo wi, Jesus a thapo mai ĩ wa suö po kule maaki, au husopö aiki, ‑Wa po wania maa kule‑ ĩ na au husopö a kuu tä, ĩ anö Jesus a thapo mi päla tä maaki, a hosa tihöö! ¹³‑Suö wanö Jesus wa thapo wi, Jesus a thapo mai ĩ wa wano po kule maaki, ĩ wano aiki, “Wa po pi waniha maa kuleö!” ĩ na au heano a kuu tä, ĩ anö Jesus a thapo mi päla tä maaki, a hosa tihöö!‑ ĩ na kawa na sa kuu naia kule. ¹⁴Au heano anö Jesus a thapo mai maaki, pusopö wa na a sätäapalo totia waikia kutenö, Teusö makö pewö soka kua kule na, ĩ na au heano a wani soka kua totia hö̃töa. Au husopö anö Jesus a thapo mai maaki, Jesus wa thapo asale, ĩ wa na au husopö a sätäapalo opa kutenö, ĩ na au husopö a soka kua naia soataa. Ĩ makö soka mi aköna, Jesus a thapo mai ĩ töpö ulupö kua kua wi na, ĩ na kamakö ulupö kua naina pi. Wa po pole, ĩ anö Jesus a thapo maa kule maaki, kawanö Jesus wa thapo waikia kutenö, Teusö anö au ulu töpö täa soka hö̃tölöma.

¹⁵Ĩ na tä kua kule maaki, au heano anö Jesus a thapo mai ĩ anö pusopö wa hosa pi topa apa tä, wa hosa konöpö. Au husopö anö Jesus a thapo mai ĩ anö peanopö wa hosa pi topa apa kõa tä, wa hosa konöpö. ‑Ĩ a hula hãto tihöö!‑ ĩ na Teusö anö wa noa thaa mai kitä. Wa pi topapalo kuköpö, Teusö anö wa nakalöma. ¹⁶Suö pö! Jesus ma thapo asale, ĩ suö pö! Kamakö aiki, ‑Toitai sa tä thatii, Jesus sa ta wäsätii, ĩ na sa kuaö ha, waiha ipa heano anö ĩ sa taa nö, ipa heano anö Jesus a thaa naio hãtoli kitäö!‑ ĩ na makö pi kuu kule maaki, au heano anö Jesus a täa hãto mai kitäö!

Wano pö! Kamakö aiki, ‑Toitai sa tä thatii, Jesus sa ta wäsätii, ĩ na sa kuaö ha, waiha ipa husopö anö ĩ sa taa nö, ipa husopö anö Jesus a thaa naio hãtoli kitäö!‑ ĩ na makö pi kuu kule maaki, au husopö anö Jesus a täa hãto mai kitäö!

¹⁷Ĩ na tä kua tä, ‑Ĩ na wa kua pasiopöö!‑ Jesus pata tänö wa noa thaa noai, ĩ na wa kua hö̃tötiopöö! Teusö anö wa naka tute tä, wa kua kua noai na, ĩ na wa kua soatiolöö! Ĩ tä uli pewö hamö töpö kokamo nö, töpö Teusömopalo sinomo wi ĩ töpö pewö na ĩ na sa kupalo kua naia kule.

¹⁸Teusö anö wa naka tute tä, juteu wa kutenö, wa isi ola hanöpamo waikiolasoma salo, ĩ tä uno mapama pi topa ti! Ĩ na tä kua tä, Teusö anö wa naka tute tä, wa isi ola hanöpo maa noai, ĩ a isi ösö hosapamo ti! ¹⁹‑Wa ösö hosapamonaso wi ĩ tä topa‑ ĩ na Teusö a pi kuu mai kitä. ‑Wa ösö hosapamo mai ĩ tä topa‑ ĩ na Teusö a pi kuu naio mai kitä. ‑Teusö sanö wa noa thaa pole, ĩ wa ta hini totiatalo opa wi ĩ tä topa sisaa‑ ĩ na Teusö a pi kuu sisaö. ²⁰Teusö anö wa naka tute tä, wa kua kua noai na, ĩ na wa kua kua soatiolöö! ²¹Teusö anö wa naka tute tä, ai tänö wa noa mi kalipalama sinomo noai, ĩ wa kuoma? Ĩ wa kuoma maaki, a pi honipo tihöö! Ĩ na tä kua tä, ai tänö wa noa mi kalipalama sinomoti wi, ĩ anö wa thapo pi topa satia mi tä, ĩ a na wa soka kopasopöö! ²²Ai pata tänö wa noa mi kalipalama sinomo pätio noai, ĩ a pata na Jesus Cristo pata tänö wa uni kusöa konöma. Cristo anö wa thaa nömönöpö, wa kusöa konöma. Ĩ na tä kua tä, ai pata tä na noa mi wa kalipalo mai, Cristo pata tänö ĩ wa nakali ha, Cristo a na wa noa mi kalipalo sinomo wi, ĩ wa kua nömöpasoma. ²³Jesus Cristo a iä pö kupalo nö, ĩ a iä pö noa na makö täa konöma. Noa tä na Cristo anö makö tälö nö, makö thapo kule. Önö kutenö, ‑Ai sanöma töpönö sa thapo kõpököö!‑ pö pi kuu tihöö! ²⁴Ipa pö! Teusö a na makö noimoti nö, Teusö anö wa naka tute tä, wa kua noai na, ĩ na wa kua soatiolöö!

Töpö sinoi ĩ töpö

²⁵Töpö sinoi, Jesus pata tänö ĩ töpö noa thaa paio maama maaki, kama sa pi saimo nö, makö sinoi makö na ĩ na sa kuu kule. Jesus pata tänö sa pasilipalö nö, sa pi hatuka apöpamanöma kutenö, ĩ na sa pi kuu kule. Kamakö aiki, ‑Jesus anö Paulo a pi hatukupamanöma kutenö, Paulo a pitilimo kuleö!‑ ĩ na makö pi kuupökö. ²⁶‑Huki makö pewö pepaloti wi ĩ tä kua waikia manu kule, wa kutia kua waikitile na, ĩ na wa kutio kua soatiopököö!‑ ĩ na sa pi kuu kule. ²⁷Suö wa po waikile, ĩ wanö au husopö a hosa pi topa kõo ti! Sinoi wa kupaloti wi ĩ wanö suö tä sua pi topa ti!

²⁸Ĩ na sa kuu kule maaki, suö wa tä sua pi topa tä, au wa suö suli wi, ĩ tä wanisala mai kitä. Moko wanö au heano a täli wi ĩ tä wanisala naio mai kitä. Ĩ tä wanisala mai kitä maaki, makö supasolasoma, makö pi sokamo kuki kitä. Wa po pole ĩ a, au ulu töpö, ĩ na töpö kui töpö pea tä, makö pi sokamo kuki kitä. ²⁹Ipa pö! Ĩ na sa kuu kule: Hi masita tä uli mapo piale, ĩ tä wakala atea waikia kule. Huki hi tä uli mapo paio mi tä, makö supaso waikilaso noai, Teusö a na töpö sinoi töpö kalipalo kuati wi na, ĩ na ĩ makö kalipalo kua naitiopököö! ³⁰Makö ö̃köpalo pole, ĩ makö lö kui, ai töpö ö̃köpaloti mi ipii Teusö a na ĩ töpö kalipalo kua wi na, ĩ na makö kua naiopököö! Makö pi mönahapalo opati wi ĩ makö aiki, ‑Sa pi mönahapalo opa waikia kutenö, Teusö a na sa kalipalo pasio mai kitäö!‑ makö pi kuu maiki. Wani ma tä täli wi, ĩ makö aiki, ‑Wani tökö na sa pi wasiso satia apa sisaö‑ ĩ na makö pi kuu maikiö! ³¹Hi masita ma tä uli tapa pole, ĩ tä mapo pia manu kule, wani wa tökö suati kule maaki, pe epii wani tökö na a pi luluo sisa tihöö!

³²Makö pi honipo opa sinomo wi ĩ sa tä pii mi. Hiki. Ai wano tänö suö tä po mane, ĩ anö Jesus pata tä pi topapalama pi topa kuköpö, Jesus anö tä thaa pi topa wi, ĩ wano tänö ĩ tä thaa sinomotii. ³³Ĩ na tä kua tä, ai wano tänö suö tä po pasile, ĩ anö pusopö a pi topapalama pasiopö, a kalipalo pasio soatiotii. ³⁴A kalipalo soatio tä, a pi setekeo opatii.

Ĩ na ĩ a wano kua kuati wi na, ĩ na ai suö tä kua naioö. Pi naka. Ĩ a suö heanopö mane, ĩ kama pili a sai, kama õsi, ĩ na tökö kui tökönö Jesus pata tä pi topapalama apa sisa kuköpö, Jesus anö tä thaa pi topa wi ĩ suö tänö ĩ tä thaa totitiolöö. Ĩ na tä kua tä, ai suö tänö peanopö a po pasile, ĩ anö peanopö a pi topapalama pasiopö, a kalipalo pasio soatiotii.

³⁵Kamisanö makö pasilipo pi topa apa kutenö, ĩ na sa kuu keheö! Makö noa thaa pi topa päo mai kitä. Tä toita apii tä makoka apa wi, ĩ na ma tä thatala kuati wi, ĩ sa tä pewö pi ipaö. ‑Jesus pata tä na kalipalo totiopöö!‑ ĩ na sa kuu alu keheö!

³⁶Jesus a na wa kalipalo sisa pi topa tä, wa husopö kua kule maaki, ĩ au husopö wa nö thaa paio mai ha, wa kua soa tä, ‑Häö. Ipa husopö a na sa tomöa hãtoa maa alu kuleö!‑ ĩ na wa pii kuu nö, ‑Ipa husopö sa täa hö̃köa totia nö tolö sö ö̃‑ ĩ na wa pi kupalo sinomoti salo, au husopö wa täa hö̃köa totilöpöö! Makö supaso hö̃köpasoa totilöö! Makö supasolaso hö̃köpasoa totilaso wi ĩ tä wanisala mai kitä.

³⁷Ĩ na tä kua tä, ‑Päla. Ipa husopö a kua kule maaki, ĩ sa nö thaa mai kitäö! Ĩ sa täa pi topa totia mane‑ ĩ na wa pi kuu totia tä, au husopö wa sai täa totio mai ĩ tä topa hö̃töa. ³⁸Önö kutenö, au husopö wa täa totili wi, ĩ tä topa kule maaki, au husopö wa täa totio mai ĩ tä topa satia apaö.

³⁹Ĩ na tä kua tä, pusopö wanö au heano wa po pole, ĩ a temö soa tä, pusopö wanö ai tiko wa tä wano täa maapöö! Au heano a nomaso noai ha, ai tiko wa tä wano täa pi topa wi ĩ a täa sisalöpöö! Jesus a thapo wi ĩ wa tä wano sulöpöö! ⁴⁰Ĩ na sa kuu kule maaki, ‑Au heano a nomaso noai ha, sinoi wa kua soatiköma, wa pi mönaha satia apa kitä‑ ĩ na sa pi kuu kule. ‑Ĩ na kama sa pi kuu pole, ĩ na Teusö a õsi kua tolele, ĩ anö ĩ na sa pi thama kuleö!‑ ĩ na sa pi kuu kule.

Ukutupö tä na salo a sãi totoma sinomo wi ĩ ta

¹Ĩ na tä kua tä, ‑Sa noama wi tä ukutupö‑ ai töpö pi kuu wi ĩ tä ukutupö na salo a sãi totoma wi ĩ sa ta kateha nömöo pia kule. Ĩ tä ukutupö na ai töpönö salo a sãi totoma wi, ĩ tä pi na makö pewö pi hatuka apa waikia kule. Makö pi hatuka apa salo, ‑Ai töpö na sa pi hatuka satia apa‑ ĩ na makö pi kuu päoö. ‑Sa pi hatuka satia apa‑ makö pi kuu mi tä, makö noimaso totio nö, ‑Ai sa töpö pasilipopöö!‑ ĩ na makö pi kuu sisa kitä. ²‑Sa pi hatuka apa waikia kule‑ ĩ na wa pi kuu pole maaki, ĩ tä pewö na ĩ wa pi hatukua totia apa mai kitä. Teusö a kuu wi ĩ tä pewö na wa pi hatuka apa naia mai kitä. ³Maaki, kawanö Teusö wa noima apa tä, Teusö anö wa taö öpa kitä.

⁴Ĩ na tä kua tä, ‑Sa noama wi tä ukutupö‑ töpö pi kuu wi, ĩ tä ukutupö na salo a sãi totoma wi, ai töpönö ĩ pö sãi opala kõo wi ĩ tä pi ha sa hapalo nömöo pia kule. Ĩ tä ukutupö hai, pata tä sai mai kitä. Teusö a hai, pata tä sai sisawö. Ĩ tä na makö pi hatuka waikia. ⁵Teusö a thapo mai ĩ töpö aiki, ‑Hi tä hẽtu hamö sai töpönö sanöma makö noama wi, ĩ sai töpö kupoli ĩ töpö hai, ĩ pata töpö sai. Hi masita tä uli ha ai töpö sai pata kua komopa hö̃töi, ĩ töpö hai, pata töpö sai pata nai soatawö‑ ĩ na töpö kuu. ‑Pata töpö sai kua. Sanöma töpö kaikanamo totio wi ĩ töpö satehe epii töpö kua naia‑ ĩ na töpö kuu. ⁶‑Ĩ na ai sanöma töpö kuu kule maaki, ĩ na makö kuu naio mai kitä. Hi tä hẽtu hamö sami pata tä sai kua satia lasoa‑ ĩ na Teusö ma noa thaa satiaö. ‑Pata tä sai hai, ipa hao Teusö a‑ ĩ na makö kuutoö. Ĩ a patanö ĩ tä pewö thapalöma. Teusö ma pi mönahapalama apapö, sanöma makö kua. A pata kaikanamo totio wi, sami a kua sisaa. A kaikanamo totio wi ĩ Jesus Cristo a. Ĩ a patanö tä pewö thapalöma. Ĩ anö sanöma makö thaa naipalöma. Makö thapalöma kutenö, makö kua matatä.

⁷Sa kuuhe, ĩ tä na Jesus a thapo wi, ĩ ai töpö pi hatukua mi. Ĩ töpönö Jesus a thapo paio mi tä, ‑Sa noama wi tä ukutupö‑ ĩ töpö pi kuu noai, ai töpönö ĩ tä ukutupö na salo a sãi totoma sinomoma kutenö, huki Jesus a thapo wi ĩ ai töpönö ĩ a sãi oa pola nö, ‑Häö. Ĩ tä ukutupö na ĩ salo a totoma noai, ĩ sa salo sãi oa silia apa nö kiliawö‑ ĩ na ĩ töpö pi kuu. Ĩ töpönö ĩ a salo sãi oa kilia apama kutenö, ĩ na ĩ töpö pi kuu. ⁸Pi naka. ‑Salo wa oaö ha, wa topa‑ ĩ na Teusö a pi kuu mi. Ĩ na tä kua tä, ‑Salo wa oa mi kutenö, wa topa‑ ĩ na Teusö a pi kuu hö̃töo mi.

⁹‑“Ukutupö tä na ĩ salo a sãi totoa waikikö noai ĩ a salo oa tihöö!” ĩ na Teusö a kuu mi päla tä maaki, hi sa sãi oalöma, hi anö a sãi oa kili pasile, ĩ anö sa taa nö, “Sa salo sãi oa naiokö o!” a pi kuu nö, a sãi oalöma, “Häö! Ukutupö tä na hi a sãi totoa waikiköma ta sa pi kuu mai, sa tä sãi oa salia saile taköö!” ĩ na a pi wani kuu hãto kitäö!‑ ĩ na pö pi kuu paio totihoö! ¹⁰‑Sa noama wi ĩ tä‑ töpö pi kuu wi, ĩ tä ukutupö pi hĩtale, ĩ a sai pata ha wa pi hatuka asa wi ĩ wanö salo wa sãi oa kai lotia tä, a salo sãi oa kili pasile, ĩ anö ĩ wa taa nö, ‑Ĩ tä ukutupö na ĩ a sãi totoma sinomo wi, ĩ sa sãi oa naiokö o!‑ kawanö ĩ na ĩ wa pi thama matimöö! ¹¹Kawanö ĩ na ĩ wa pi thama nö, wa pi hatuka asa wi ĩ tänö a pi kilia apöle, ĩ a õsi waniapali kitäö! Au ai tä pi kilia apa pasile, ĩ a pi na Cristo a säpamoa naisoma maaki, wa pi hatuka asa wi ĩ tänö ĩ au ai wa õsi wanisala kopali. ¹²Cristo a thapo wi ĩ au ai tä pi kilia apöle, kawanö ĩ wa õsi wania kopalö noai, kawanö ĩ a na wanisala wa tä thama. Ĩ a na wanisala wa tä thama kutenö, kawanö Cristo a na wanisala wa tä thaa naioö. ¹³Önö kutenö, Cristo a thapo naio wi, ĩ ipa ai anö salo a sãi oa kai lola nö, ‑Häö. Wanisala sa tä thati hãtoa kule‑ kamisanö ĩ na ipa ai sa pi thama wani ipö pasi salo, ‑Ipa ai tänö wanisala tä thaa kota maapöö!‑ sa pi kuu salo, ĩ sa salo sãi oa kota mai kitä.

Teusö sa ta wäsä makokopö, sa kalipalo wasiso opatii

¹Ai tänö sa simöa maa noai kitä. Cristo anö samakö simöa asalö noai, ĩ ai sa. Kamisanö kamakö hai ĩ Jesus pata sa tä tapa hö̃töo kipili. Jesus Cristo a na sa kalipalo opama kutenö, kamakönö Jesus ma täalalöma. ²‑Paulo a lö kui, Cristo anö töpö simönö noai ĩ ai a‑ ĩ na ai töpö kuu mai kitä maaki, kamakö aiki, ‑Cristo anö Paulo a simöa nainö noai, ĩ a‑ ĩ na kamakö kuu asaö. Cristo anö sa simöa maama aköna, Cristo a thapo wi ĩ makö kupo maa noa kipi.

³Pi naka. Ai töpönö sa huama tä, ĩ na sa kuu hö̃töoö! ⁴Jesus Cristo sama wäsäti pamö ai töpönö samakö iapalama sinomo wi ĩ tä wanisala mai kitä. ⁵Jesus pata tänö ai töpö simöa asalö noai ĩ töpö, Jesus a hai ĩ poose töpö, Pedro a, ĩ na kilii töpönö pusopö töpönö Jesus a thapo wi ĩ töpö husopö kai huu kuati wi na, ĩ na samakö husopö kai huu kua naitioö aköna, ĩ tä wanisala hö̃töa mana pi. ⁶‑Ai töpönö Cristo ta wäsäti wi, ĩ töpö na nii tä, haloi ösökö, ĩ na tökö totota thama sinomoö maaki, Paulo a, Pahanapé a, ĩ na kilii töpönö noa mi Cristo ta wäsäpöö! Ĩ na tä kua tä, ai tiko kalipalo wi tä na sitipa kökö noa na töpö kalipalopököö!‑ ĩ na makö pi kuu hãtoa kule? ⁷Ai tä sotatumo tä, noa mai ha a iapaloö, wani tä noa mi täli, ĩ na a kuaö. Ai tä pasi lö kui, a hikalimo tä, ĩ kama hai ĩ hikali a na nii tä kuoma, ĩ anö ĩ tä oa mai kitä ta o? Oweha kökö thapo sinomo wi ĩ anö ĩ kökö sui puu koa mai kitä ta o?

⁸Kama sa pi saimo nö, ĩ na sa kuu päa mane. Teusö anö Moisés a na nö patapö töpö noa thama noai, ĩ na ĩ ta kuu naia. ⁹Moisés anö tä sãökökö nö, ĩ na a kuuma: ‑Tötiiku mokö na paka ma kö kai kalipalo pole, ĩ paka kökö kahi õka maikiö! Kökö oi tä, tötiiku ösö oa soatalopököö!‑ ĩ na Teusö anö Moisés a na töpö noa thamama. Paka kökö na Teusö a pi honipo päo salo, a kuuma ta o? ¹⁰Kamakö pewö na Teusö a pi honipo salo, a kuuma. Ĩ na tä kua tä, ai tä hikalimo nö, nii töpö töaköma, ‑Tökö nii pewö patasipö tä, sa ösö potehopöö!‑ ĩ na a pi kuu. Waiha ai tänö mokö pewö patasipöa totilasoö ha, wöö a kai ekuiki nö, mopö huköalalö nö, ‑Hi mopö ha sa ösö potehopökö o!‑ ĩ na ai tä pi kuu naioö. ¹¹Kamisamakönö kamakö õsi na Jesus Cristo sama kai uni tösama kutenö, nii tä, wani tä ose wai, ĩ na tä kui, kamakö na ĩ sama tä sulali wi, ĩ tä wanisalale kitä ta o? ¹²Ai töpö aiki, ‑Kotĩtu tili töpönö samakö täpäli kitä‑ ĩ na ai töpö pi kuu wi, ĩ ta topa manu kule, kamisamakö aiki, ‑Kotĩtu tili töpönö samakö täpäa naini kitä‑ ĩ na samakö pi kuu naia aköna, ĩ ta topa satia apöla pi. Ĩ ta topa satia apa maaki, kamakö na nii tä, wani tä, ĩ na tökö kui, sama tökö sua maama. ‑Samakö täpämamo kuköma, ai töpö aiki, “Cristo sa ta hini wani” ĩ na ai töpö pi kuu matimö‑ ĩ na samakö pi kuu salo, samakö pea kitä maaki, samakö täpämamo mi päla tä maaki, samakö kasiapalo hö̃töo kitä. ¹³Teusömo wi a sai ha nii tä kule, ĩ tä nii na Teusömo wi a sai ha töpö kalipalo sinomo wi ĩ töpö ösö poteho soataloti sinomo matatä. Teusö a na salo pö totopapö, matakali ti na ĩ salo pö nokama sinomo piale, ĩ töpönö ĩ pö salo see opala hö̃töo kõo sinomoö. Ĩ ma tä taö waikia kule. ¹⁴Ĩ na ĩ töpö kua kua wi na, ĩ na Cristo ta wäsäti wi, ĩ na ĩ samakö kua kua hö̃töoö. ‑Cristo ta wäsä sinomo wi ĩ töpö na Cristo ma tä kai a huapole, ĩ makönö nii tä, wani tä, ĩ na tökö kui ma tökö totoa sinomopököö!‑ ĩ na Teusö anö makö pewö noa thama.

¹⁵Ĩ na makö pewö noa thama maaki, kamakö na, ‑Sa täpälöheö!‑ sa kuu pasio maapili. ‑Paulo anö wani tä täa pi topa päo salo, tä sãöka päa kule‑ ĩ na pö pi kuu ti! ‑Paulo anö noa mi Cristo ta wäsä totiatalo opatii‑ ĩ na makö thama pia salo, sa oi luki kitä maaki, ‑Nii tä, wani tä, ĩ na tökö kui tökö na sa täpälöheö!‑ sa kuu mai kitä. ¹⁶‑Kawanö sa wäsä sinomo totihoö!‑ ĩ na Teusö anö sa noa thama. Ĩ na Teusö anö sa noa thama kutenö, kamisa aiki, ‑Cristo sa ta wäsä wi ĩ sa totiatalo opa asawö‑ ĩ na sa kuu mane. Cristo sa ta wäsä mi aköna, sa pepalo opa hö̃tötila pi. ¹⁷Teusö anö sa noa thaa maama aköna, kama sa pi saimo päo nö, ‑Cristo sa ta wäsä pi topa kuleö!‑ ĩ na kama sa pi kuu päoma aköna, kamakö na noa sa tä täli pi. Maaki, kama sa pi saimo päo maama. Teusö anö sa simöama. ¹⁸Önö kutenö, kamakö na noa sa tä täa mai kitä. Ai sanöma makö na noa sa tä naka pikila nö kuno mai, Cristo sa ta wäsä sisatio nö, sa pi topapalo opaö. Cristo sa ta wäsäti pamö sa pi topa apa wi, ĩ ipa noa tä waikiwö. Sanöma makö na, ‑Cristo sa ta wäsä sinomo kutenö, ipa noa ma tä pio mi salo‑ ĩ na sa kuu mai kitä.

¹⁹Ai töpönö noa mi sa kalipalama sinomo wi ĩ sa mai kitä maaki, ‑Ai töpönö Cristo a täalalö nö, töpö satehea apöpaso wi, ĩ töpö na sa kalipaloti kuköpö o! Ĩ töpö na Cristo sa ta wäsä totio kuköpöö!‑ ĩ na sa pi kuu alu kipili. ²⁰Juteu töpö na Jesus sa ta wäsäti tä, ĩ juteu töpönö Jesus a thapo kuköpö, juteu töpö kua kuati wi na, ĩ na sa kua kua naitioma. Moisés sa kai a hini sinomo wi ĩ sa nai mai kitä maaki, ‑Juteu töpönö Jesus a na juteu töpö thapo kuköpöö!‑ ĩ na sa pi kuu salo, juteu töpönö Moisés a kai a hini kua wi na, ĩ na Moisés sa kai a hini kua naia päa. ²¹‑Juteu töpö pasi mai ĩ töpönö Jesus Cristo a thapo naiopöö!‑ ĩ na sa pi kuu salo, ĩ töpö na Cristo sa ta wäsä tä, Moisés anö pata töpö noa thaa noai, juteu töpö pasi mai ĩ töpönö ĩ ta hini mi kuati wi na, ĩ töpö na sa kutia tä, ĩ na ĩ sa ta hini mi kua naiwö. ‑Teusö anö makö noa thaa wi, Paulo anö ĩ ta hini mi ipöö!‑ ĩ na pö pi kuu ti! Cristo anö makö noa thaa pole, ĩ sa ta hini totiatalo opaö. ²²Ĩ na tä kua tä, ai töpö utitii töpönö Cristo a thapo naio kuköpö, ĩ töpö na sa kua naitia tä, ĩ töpö utiti kui na, ĩ na sa utiti kuö naiwö. ‑Jesus sa ta wäsä kuköma, sanöma töpö satehe epii töpönö Cristo a thaa totialalöpököö!‑ ĩ na sa pi kuu salo, ĩ sanöma töpö pewö kua kuati wi na, ĩ na sa kua kua naiotii.

²³Cristo ta topa apöle, ai töpönö ĩ ta hini totiopö, ĩ töpö pewö kua kuati wi na, ĩ na sa kua kua naitioö. Ĩ töpönö Cristo ta topa apöle ĩ ta hini polai, ĩ tänö ai töpö pi topapama kua wi na, kamisanö Cristo sa ta wäsä pole, ĩ tänö sa pi topapama kua naioö. ²⁴Noa tä suli pia salo, satehe epii töpö läläsoma maaki, sami ai tä läläa palua asapaso wi, ĩ anö noa tä sua asali. Ĩ na tä kua wi, ĩ ma tä taö waikia. Töpö läläpalo nö, töpö kasiapalo kua wi na, ĩ na pö kasiapalo kua totio hö̃töoö! Kamakö na Teusö anö noa tä totoköpöö! ²⁵Töpö läläpalo wi ĩ töpö, pola a na töpö inamo wi ĩ töpö, töpö säso wi ĩ töpö, ĩ na töpö kui töpö aiki, ‑Witi pili anö tä noa sua asali? Sa lotete epö asai, ĩ sanö sa tä noa sua asalöpököö!‑ ĩ na ĩ töpö pi kuu salo, töpö wapamo opati nö, töpö wasiso opatii. Saa nakö hena hesowa silikito haio opa wi, ĩ nakö noa hesowa thati ha, töpö wasiso opatii. Noa tä palimi ipii, Teusö anö ĩ tä totoa piale, ĩ tä pi ha kamakö wasiso opa hö̃töoö.

²⁶Önö kutenö, sa läläa salilia apösolöö. Töpö säso wi ĩ töpö pi mosaia apa kua kule na, ĩ na sa pi mosaia apa kua hö̃töa. ²⁷‑“Ai töpö na kawanö sa kai a wäsä waikioma maaki, huki wa pi tomöpo maneö! Noa wa tä täa mai kitäö!” ĩ na Teusö a kuu matimöö!‑ ĩ na sa pi kuu nö, kama sa kasiapalo opatii. Kama sa uni säa sapa kopasoö, kama sa uni simöa sapa kopasoö, ĩ na sa kuatii.

Nö patapö töpö kua kuati noai na, ĩ na makö kua maapöö!

¹Ipa pö. Moisés a na kamisamakö hai ĩ pata töpö nokapaloti noai ĩ tä na pö pi motio tihöö! Ilasi tä komo ha pata töpö pewö hupalotima. Kosoto tuu pata hanahai tuu pata tekukumakö noai ĩ hamö ĩ pata töpö pewö pökatökö lasoma. ²Jesus a thapo wi ĩ töpö mãi õmamo kua wi na, ĩ na ĩ töpö kua hö̃töoma. Moisés a na ĩ töpö pewö nokapalo sinomoti wi ĩ töpö pewö kupasopö, ilasi tä komo ha Moisés anö nö patapö töpö kai huulöö, kosoto tuu komo pata hamö ĩ töpö pökatöpasolöö, ĩ na ĩ töpö kuama. ³Teusö anö nii tä totoakö noai ĩ tä nii na ĩ töpö pewö ösö pewö potehoö, ⁴Teusö anö maa tuu totota noai ĩ tuu na ĩ töpö pewö amisipaloö, ĩ na ĩ töpö pewö kuatima. Teusö anö maa ma tapamomanö noai ĩ ma na maa tuu halaso noai, pata töpö pewönö ĩ tuu kopala apatima. Ĩ maa ma hai, pata töpö na ĩ ma nokapaloti noai, ĩ Cristo a uni kuoma. Ĩ töpö na Cristo a nokapalo totitioma. ⁵Ĩ na tä kuama maaki, satehe epii ai töpö na Teusö a pi mönaha maama. Ĩ töpö na a hĩsosoma kutenö, poke poke tä uli hamö wasimö töpö huu soalö pamö, ĩ töpö nomapoolöma.

⁶Önö kutenö, kamakö pewö pi mosawipamanöpö, ĩ nö patapö töpö na Teusö anö ĩ na ĩ tä thamama. Ĩ töpönö wanisala tä pi ipa kuati noai na, ĩ na ma tä pii kua maapököö! ⁷Ĩ töpönö Teusö a thapo mai, ‑Sa totiapala wi tä ukutupö‑ töpö pi kuu wi ĩ töpö ukutupö thapo kuati noai na, ĩ na makö kua maikiö! ‑Ĩ töpö iapalo opa nö, tuu wasui tuu koa tikilio opa nö, töpö paöpalo opama‑ ĩ na Teusö tä waheta kuu. ⁸Tiko töpö suö na makö mamo maapököö! Tiko töpö suö na ai pata töpö mamonaso noai, ĩ tä wakala ha soatawö ĩ töpö satehe epii, 23.000 töpö kui töpö noma soatalasoma. ⁹Ĩ töpönö Teusö a wapa nö, ‑Wanisala sama tä thaa kule maaki, Teusö anö samakö peama hãto mai kitäö!‑ ĩ na ĩ töpö pi kuuma kutenö, olö kökö wasunö ĩ töpö nomanasoma. Ĩ töpönö Teusö a wapa kua noai na, ĩ na pö kua tihöö! ¹⁰Ai nö patapö töpö aiki, ‑Moisés a kuati wi ĩ tä wanisala‑ ĩ na ĩ töpö kuu kua noai na, ĩ na pö hapalo kua tihöö! ‑Moisés a kua wi ĩ tä wanisala‑ ĩ töpö kuuma kutenö, ãju tänö töpö sä sinomo wi ĩ anö ĩ nö patapö töpö sälalöma.

¹¹Ai töpö pi mosaia totipamanöpö, ĩ nö patapö töpö na ĩ na tä thama pasioma. Huki hi tä wakala pewö mapo kõo pia manu kule, kamakö pewö pi mosawipamanöpö, ĩ pata töpö kuati noai, waheta tä na ĩ tä sãökököma. ¹²Önö kutenö, ‑Wanisala sa tä thaa mai kitäö!‑ ĩ na wa pi hole kuu wi, ĩ wa pi mosaia totikiö! Wa pi mosaia mi tä, wanisala wa tä thaa matimöö! ¹³Wanisala tä thaa pi topa wi ĩ tä na ai tänö wa simöa kuati wi na, ĩ na wanisala tä thaa pi topa wi ĩ tä na ai sanöma töpö pewö simöa kua sinomo naitioö. Wanisala tä thaa pi topa wi ĩ tä na ai tänö wa simöati kule maaki, Teusö anö wa hulapa mai kitä. Wa noama apa nö, wanisala wa tä thaa pia tä, ‑Ĩ na pätawö‑ ĩ na Teusö a kuu nö, wa pi hatuka totipamani kitä. Wa õsi lotetea totipamanöma, wanisala wa tä thaa sapa kota mai kitä.

¹⁴Ipa noi pö! Önö kutenö, ‑Hi tä ukutupö pi hĩtale, ĩ tä ukutupönö sa noamapököö!‑ ĩ na pö kuu tihöö! Pö Teusömo sisaaö! ¹⁵Kamakö pi hatuka apa kutenö, ĩ na sa kuu kule. Sa kuu pole, ĩ tä na makö pi tapomo totihoö! ¹⁶Makö Teusömo tä, ma tuu pi wai kopala wi, ĩ tuu na, ‑Aitaköö!‑ ĩ na Teusö na makö kuu sinomo wi, ĩ ma tuu kopala tä, Cristo a na makö pewö uni kokapalo nö, Cristo ma iä pö kopala ösöha totialali. Ĩ na tä kua tä, ĩsa ma ãi nakasilalö nö, ĩ ma ãi oalali wi, ĩ makö pewönö Cristo pili ma sai uni oa ösöha hö̃töalali. ¹⁷Sami ĩsa ãi na makö ia ösöha kutenö, kamakö satehe epö maaki, sami makö pewö kua totia kule.

¹⁸Juteu töpö na pö pi tapoa nömöikiö! Ĩ ai töpö kokamo nö, Teusö a na salo a totoköpö ĩ salo a ĩsima piale, ĩ salo a see wai na ĩ juteu töpö iapalo tä, ‑Ĩ töpö pewö Teusömoti kule‑ ĩ na ĩ töpönö ai töpö pi thamaö. ¹⁹‑“Sa noama wi ĩ tä ukutupö” ai töpö pi kuu wi, ĩ tä ukutupö hai, ĩ pata tä saiö!‑ sa kuu kule ta o? ‑Ĩ tä ukutupö na nii tä totoma sinomo wi, ĩ a ukutupö hai, pata tä sai kutenö, ĩ a ukutupö na nii ma tä totoa sinomopököö!‑ ĩ na sa kuu kule ta o? ²⁰Ma. Ĩ na sa kuu mane. Teusö a thapo mai ĩ töpönö ĩ nasimö a ukutupö na nii tä totoma wi, sai töpö na ĩ töpönö ĩ nii tä totoma pasioö. Sai töpö na makö pi kuapalo wi ĩ sa tä pii mi ipöö! ²¹Cristo pata tä hai ĩ ma tuu koaö, sai töpö hai ĩ ma tuu koa naioö, ĩ na makö kua maikiö! Cristo pata tä hai ĩ ma tuu koa waikia manu kule, sai töpö hai ĩ ma tuu uni koa naio pikio maikiö! Cristo pata tä hai ĩ nii ma tä oa waikia manu kule, sai töpö hai ĩ ma tä nii oapala naio hãto pikio maikiö! ²²Cristo ma hĩsoma maapököö! Cristo a na makö lotetea satia apa hö̃töa kule ta o? Ma. Cristo ma hĩsomanöma, Cristo anö makö peama hö̃töki.

‑Teusö a totiatalo opa asawöö!‑ ĩ na ai töpö pi thama totihoö!

²³Wa tä thaa pi topa wi ĩ wa tä thaa kuköma, ‑Ĩ tä thaa tihöö!‑ ĩ na ai pata tä kuu mai kitä maaki, wa tä thaa pi topale, ĩ tä topa hãtoa mai kitä. Wa tä thaa piale, ĩ wa tä thaa tä, ai pata tänö wa wasu mai kitä maaki, ĩ wa tä thaa kuköma, ai sanöma wa töpö pasilipa hãto mai kitä. ²⁴‑Kama sa pi topa sapa kopamonasopöö!‑ ĩ na a pi kuu tihöö! ‑Ai sa pi wani mönaha apöpamanöpöö!‑ ĩ na a pi kuu sisaaö!

^25-26Hi masita tä uli lö kui, Teusö a hai ĩ tä uli. Hi masita tä uli ha tä pewö kupai, Teusö a hai ĩ tä pewö. Teusö a hai ĩ tä pewö kutenö, salo a suta sinomo taso wi ĩ a sai ha salo a kulati, ĩ a salo oa kili tihöö! Ĩ wa salo oa pia salo, ‑Wi na hi salo a kuama?‑ a kuu hãto tihöö!

²⁷Jesus Cristo a thapo mai ĩ aiki, ‑A liasoö!‑ kawa na ĩ na ĩ a kuu ha, wa lio naia tä, kawa na tä totoki wi, ĩ tä pewö oalöö! ‑Wi na hi tä kuama?‑ a kuu hãto tihöö! ‑Ĩ nasimö tä salo waniö!‑ ai tä kuu ha, kawa aiki, ‑Hi sa tä oa silia apa nö kiliale ia!‑ wa pi kuu matimö. ²⁸Ĩ na tä kua tä, ‑“Sanöma töpö totiapalapö tä” ai töpö pi kuu wi ĩ tä ukutupö na hi a salo totoa waikikö noai, ĩ a salo‑ kawa na ĩ na ai tä kuu pätasoö ha, ĩ a salo oa tihöö! Kawa na ĩ a salo totoki wi, ĩ aiki, ‑Kawa na hi a salo toita hãto mai kitä‑ ĩ na a pi kuapaloö ha, ĩ a salo oa hãto tihöö! ²⁹A pi wani kilihia apöle, ĩ a waninö salo a totoki ha, ĩ a salo oa tihöö!

‑Salo sa oaö ha, ai tä pi kiliha pasia päla tä maaki, ĩ sa salo oa satia apa kitäö!‑ ĩ na wa pi kuu kule? ‑Sa ia satimo wi ĩ tä wanisala mane‑ wa pi kuu alu kule? ³⁰‑Teusö a na sa hapalo nö, “Aitaköö! Hi wa salo totopi keö!” ĩ na sa kuu alu kule maaki, wi na ki a pi kuu salo, a pi wani kilia pasia pikia apa kule?‑ ĩ na wa pi kuu kule?

³¹Pi naka. ‑“Teusö a totiatalo opatiwö” ĩ na ai sa töpö pi thamapö, ĩ na sa kuaö‑ ĩ na makö pi kuu sinomoö! Makö iaö, makö amisioö, ĩ na makö kua tä, ‑Teusö a totiatalo opatiwö‑ ĩ na ai ma töpö pi thamaö! ‑“Teusö a totiatalo opawö” ĩ na ai sa töpö pi thama pia salo, ĩ na sa kuatii‑ ĩ na pö pi kuu sinomoö! ³²Juteu töpö, juteu töpö pasi mai ĩ töpö, Teusö a thapo wi ĩ töpö kokamo sinomo wi ĩ töpö, ĩ na töpö kui töpö õsi wanisalama tihöö! ³³Ĩ na kamisa kuaö. Teusö anö sanöma töpö pewö täapa kõo läo wi, ĩ sa tä pi ipaö. Ĩ sa tä pii kutenö, ‑Sa töpö pewö topamapo pi topa kule. Hi kamisanö sa töpö õsi wanisalama pola nö kuno mai, sa töpö pi makokoa kopamanöpöö!‑ ĩ na sa pi kutii. ‑Kama sa pi makokoa kõa sisapasopököö!‑ sa pi kuu pola nö kuno mai. ‑Ai töpö satehe epii sa töpö pi totiapala apa naio soatapököö!‑ ĩ na sa pi kuu sinomoö.

¹Cristo sa uöma kua wi na, ĩ na kamakönö sa uöma kua hö̃töoheö!

Wano töpö, suö töpö, ĩ na töpö kui töpö Teusömo tä, suö töpö noa thaa noai ĩ ta

²Sa kuati wi ĩ tä na makö pi motia maa kule. Kamakö na Cristo sa ta wäsä toleapili, ĩ ma ta hini totio opa thali. Önö kutenö, ‑Makö topa apa‑ ĩ na sa kuu kule. ³Sa kuu piale ĩ tä na pö pi hatukuikiö! Cristo anö wano töpö pewö simöa sinomo wi ĩ Cristo a. Wano töpönö suö töpö simöa sinomo wi ĩ töpö wano. Teusö anö Cristo a simöa sinomo wi ĩ Teusö a. ⁴Pili a he na ösö sohopo wi, wano tänö ĩ ösö soholö nö, Teusö a na ĩ a wano hapaloö, Teusö a kai a wäsäö, ĩ na ĩ a wano kua tä, ĩ anö Cristo a komopamani. ⁵Pili a he na suö tänö watata ösö sohopo mai ha, Teusö a na a hapaloö, Teusö a kai a wäsäö, ĩ na ĩ a suö kua tä, kama hai ĩ peanopö a komopamani. Ai suö tä he manopasoma, tä he mömomö pi kilihi ipö kui na, ĩ na suö tänö Teusö a kai a wäsä tä, watata ösö sohopo mane, ĩ na ĩ tä mömomö pi kilihi kuö hö̃töwö. ⁶Suö tänö watata ösö sohopo mi tä, a he manoa soatasopökö. A he wani manoa nö kilipasoma salo, watata ösö sohoapala kuköpö. ⁷Teusö a toita apii ĩ a patamo wi, wano töpönö ĩ tä tamamopö, Teusö anö ĩ töpö wano thapalöma kutenö, ‑Ösö sohopo wi, wano töpönö ĩ ösö sohopopöö!‑ tä kuu wi tä kua mai kitä. Teusö a toita apii ĩ a patamo wi, wano töpönö ĩ tä tamamoö, ĩ na wano töpö kuaö. Ĩ na tä kua tä, wano töpö toitai töpö patamo wi, suö töpönö ĩ tä tamamoö, ĩ na suö töpö kuaö. ⁸Somi tä sai tä, Teusö anö wano tä nemonãu tälö nö, suö tä thapalöma. Wano tä lö kui, ĩ suö tä nemonãu kuo pasio maama. ⁹Suö tä pi na wano tä thapa maama. Wano tä pi na Teusö anö suö tä thaa nömöpalöma. ¹⁰Önö kutenö, peanopö töpönö pusopö makö simöa wi tä tamamopö, suö makö he na watata ösö sohopöö! Suö makö he na ösö sohoö ha, ãju töpö mamo teteo sinomo wi ĩ töpö pi hähämo mai kitä.

¹¹Peanopö makönö au husopö ma töpö simöa sinomo wi maaki, kamakö pewönö Jesus Cristo ma thapo waikiköma kutenö, wano makö na suö töpö kupalo kua naitioti kua wi na, ĩ na au husopö töpö na wano makö kupalo kua hö̃tötiotii. Wano makö kua mi tä, suö töpö pepalo kua wi na, ĩ na suö töpö kua kua mi tä, ĩ na wano makö pepalo kua hö̃töoö. ¹²Wano tä na suö tä kupasoma. Ĩ na tä kua tä, suö tä na wano tä ose kupasoö. Ĩ na tä kua kule maaki, wano töpö, suö töpö, ĩ na töpö kui, Teusö anö ĩ töpö pewö thapali.

¹³Suö wa he na watata ösö sohola nö kuno mai, Teusö a na wa hapalo pole, ĩ tä topa apöle kitä ta o? Wi na makö pi kuu kule? ¹⁴Teusö anö sanöma makö thapalö noai, ĩ makö aiki, ‑Wano tä hunuku lape epii ĩ a möamö wanisala‑ ĩ na ĩ makö pi thamaö. ¹⁵Ĩ na tä kua tä, suö tä hunuku lape epii ĩ a suö möamö toita apö. Pili a he na pili a hunuku sohopö, Teusö anö ĩ suö tä na pili hunuku totomaö. ¹⁶Ai tä aiki, ‑Makö Teusömo tä suö töpönö watata ösö sohopo mane maaki, ĩ tä topa hö̃töa‑ ĩ na ai tä kuu kule maaki, ‑Suö makö he na watata ösö soholö nö, Teusö a na makö hapalopököö‑ ĩ na kamisamakö kuu pasio thali. Ĩ töpö uli pewö hamö ai töpö Teusömopalo hö̃töo wi, ĩ na ĩ töpö kuu hö̃töoö.

Cristo a uni opalati wi ĩ ta

¹⁷Kamisanö makö noa thaa pia kule. Makö kokamopalo kule maaki, makö Teusömo makoka totio maa thaliö! Makö pasilipaso totio mai, makö wanisalama hẽtupasoö. Önö kutenö, ‑Kamisanö makö noa thaa pole, makö a topa apati alu kuleö!‑ makö noa thaa mane. ¹⁸‑“Töpö Teusömo kule maaki, töpö Teusömo totio mai, töpö hölapalo opa nö, töpö kokamo selekeo opa päo thaliö!” ĩ na sa tä kuu hini pole, ĩ pitili ta hãtowö‑ ĩ na sa pi kuu kule. ¹⁹Makö kokamo selekeapalo wi, ĩ tä topa mane maaki, makö kokamo selekeapalo opa päa manu kule, ai makö Teusömo makoka asale, ai töpö na ĩ makö hatuka apa asaö. Ĩ tä topa. ²⁰Ĩ tä topa kule maaki, makö kokamo pola nö, Jesus Cristo pata tä na makö iapalo totio maa noa thali. ²¹Makö iapalo tä, ai töpö ia pasio paio mai ha, ai makö ia asa waikitaö, ai makö iapalo asala tä, ai töpö oi pasi soawö, ai makö polemo tikilipalo opa asa waikitaö, ĩ na makö kua silia apati nö kiliawö. ²²Ĩ na kuno mai. Kamakö sai pö na makö ösö potelasoö, makö ösö potepalo pa ma tuu koa tikilia soalali, makö kua wi, kamakö hai a sai kua mi ta o? Teusömo wi ĩ ma sai hãsiapo alu kule ta o? Nii tä na töpö honimopalo wi ĩ ma töpö pi kilihipama pi topa kule? Ĩ tä pi na wi na sa kuupö? ‑Makö topa waikia kule‑ ĩ na sa kuupö? Ma. Ĩ na sa kuu mai kitä.

²³Kamisa na Jesus pata tänö ta wäsä paio noai, kamakö na ĩ sa ta wäsä tolea nömöo kipili. Jesus pata tä monima noai ĩ tä mumi ha Jesus anö ĩsa ãi sulö nö, ²⁴Teusö a na, ‑Hi ĩsa wa ãi totopi ke. Wa totiatalo opawö‑ a kuu nö, ĩ ĩsa ãi nakasipalö nö, ‑Ika. Hi ãi hai, kamisa sai. Kamisa na makö pi tapoiki nö, ãi oalöö!‑ ĩ na a kuuma. ²⁵Ĩ na a kuu nö, ĩ töpö ia matalo nö, Jesus anö ĩsa ãi täa thatalö noai na, ĩ na kaukösö a täa thaa nömötalö nö, ‑Teusö anö sanöma makö noa thaa wi ĩ tute ta kua. “Huki Teusö sanö Jesus a iä pönö sanöma makö nö läpo kuki kitäö!” ĩ na a iä pö noa thamo wi, hi ĩ tuu. Hi ma tuu koa pola nö, kamisa na pö pi tapoa totikiö!‑ ĩ na Jesus a kuuma. ²⁶Önö kutenö, ĩsa ma ãi oali, pili ma tuu koali, ĩ na ma tä thalalö nö, Jesus pata tä nomaso noai ĩ ma ta wäsäti alu kule. Jesus a huu kõo paio mi tä, ĩ ma ta wäsä kõatalotipö.

²⁷Ĩ na tä kua kutenö, Jesus a na ai wa pi tapomo totio mai, Jesus wa sai uni oa holisimoö, pili wa iä pö uni koa holisimoö, ĩ na wa tä thama tä, Jesus pili a sai, pili a iä pö, ĩ na tä kui ma tä komopamani. ²⁸Önö kutenö, kawa aiki, ‑Sa holisimo hãtoa alu kuleö! Sa kuati wi, ĩ sa tä makokama totio mi salo!‑ ĩ na wa pi tapomo nö, ĩ na wa pi kuu totiopököö! Ĩ na wa pi kuu totio paio nö, ĩ ĩsa wa ãi oali, pili wa tuu koali, ĩ na ma tä thamapököö! ²⁹Jesus pili a sai na wa pi kua mi päla tä maaki, ĩ wa sai oali, pili iä pö koali, ĩ na wa kua tä, Teusö aiki, ‑Wanisala wa tä thaa ke‑ ĩ na a kuu kitä. ³⁰Ĩ ma sai oa holisimoö, pili ma iä pö koa holisialali, ĩ na ma tä thalalöma kutenö, ai makö satehe epii makö utiti, ai makö saliaö, ai makö nomapoö, ĩ na makö kuatii. ³¹Ĩ na makö kuati kule maaki, ‑Sa holisimo wi ĩ sa tä pewö hosali kitäö!‑ ĩ na makö pewö pi kuu totia paia tä, Teusö anö makö peama mai kitä. ³²‑Wi na Teusö a pi kuu salo, makö peama kule?‑ ĩ na makö pi kuu hãtoa kule. Pi naka. Teusö a thapo mai ĩ töpö na, ‑Makö nomano nö, makö pepalo opa soatiopöö!‑ ĩ töpö na ĩ na Teusö a kuu kua wi na, ĩ na kamakö na ĩ na huki a kuu wani salo, huki makö peama soataö. Huki makö peamaö ha, Teusö a na makö pi hatuku kuki. Makö pi hatukuiki nö, makö nomano nö, makö peama kota mai kitä.

³³Ipa pö! Önö kutenö, Cristo ma uni na makö iapalopö, makö kokamo tä, ai tä ia pasio paio mai ha, wa ia soata maikiö! Makö iapalo ösöho soatopököö! ³⁴Ai wa oi ipö salo, au sai a na wa ösö potepalo pasio paitapököö! Ĩ na makö kua mi tä, makö iapalo isi waniho soa päataloti tä, Teusö anö makö peama matimö. Kamakö na sa waloiki nö, ai tä pi na makö noa thaa nömöo kitä.

Teusö a õsi kua tolele, ĩ anö tä totoma wi ĩ ta

¹Ipa pö. Teusö a õsi kua tolele, ĩ anö tä totoma wi, ĩ tä na kamisanö makö pi hatukupama pia kule. ²Teusö ma thapo paio mi tä, ‑Hi ukutupö tänö sa noama apa kitä‑ makö pi kuu noai, ĩ tä ukutöpö hapalo tai mi ipii, ĩ töpö ukutupönö makö simöa nö, makö hanoama sinomotima. Ĩ ma tä pewö a taö öpa waikila nö, ĩ makö pewö. ³Önö kutenö, sa kuu piale, ĩ tä na makö pewö pi hatukua totia hö̃töloö! Teusö a õsi kua tolele, ĩ anö wa hapalama tä, ‑Jesus a wanisala apöö!‑ ĩ na wa kuu tikilio mai kitä. Ĩ na tä kua tä, Teusö a õsi kua tolele, ĩ anö wa hapalama mi tä, ‑Jesus a hai, ĩ pata tä saiö!‑ ĩ na wa kuu hö̃töo mai kitä.

⁴Teusö a õsi kua tolele, ĩ anö ai tä totoö, ai tiko tä totoki, ai tiko tä totoki, ĩ na Teusö a õsi kua tolele, ĩ anö ĩ na tä totoma thama sinomoö maaki, sami anö ĩ tä pewö totoma setekeo opaö. ⁵Teusö a na makö kalipalo tä, makö kalipalo setekepalo opa kule maaki, sami pata tä na makö kalipaloö. ⁶Teusö anö makö pewö pasilia waikipalöma kutenö, makö kalipalo pi satehepo taö öpaö. Makö pewö kalipalo pi satehepo kule maaki, makö pewö pasilipo wi, sami ĩ Teusö a kua. ⁷‑Kamisa na Teusö a õsi kua tolele, ĩ a ta kalipalo opatiwö‑ ĩ na Teusö anö makö pi thama pia salo, Teusö a thapo wi, kamakönö ĩ ai töpö pasilipo taö öpa wi, kamakö pewö na Teusö anö ĩ nasimö tä pewö totoma hätäpoö. ⁸Teusö a õsi kua tolele, ĩ anö ai tä pi mosawipalöma kutenö, ĩ anö ta wäsä pi mosaia apa kuki. Teusö a õsi kua tolele, ĩ anö ai tä na tä taömanöma kutenö, ĩ anö ai tä na ta wäsä toleaö. ⁹Ĩ na tä kua tä, ‑Jesus Cristo a lotete epö kutenö, ĩ tä pewö thaa taö öpa kitä‑ ai tä pi kuu taö öpa asa wi, Teusö a õsi kua tolele, ĩ anö ĩ tä totoki. Ĩ anö ai tä na, ai töpö salia apa wi ĩ töpö toama taö öpa kõo wi, ĩ tä totoa toleki. ¹⁰Ai tä na, tä aipöama taö öpa wi ĩ tä totoa pasioö. Ai tä na, Teusö ta wäsä taö öpa pasio wi ĩ tä totoa soka pasiki. Teusö a õsi kua tolele, ĩ anö ai tä pi hatukua totipalö noai ĩ aiki, ‑Hi anö Teusö a kai wäsäö. Ki anö pasiwö, sai töpö kai thapo pasio wi, ki ĩ a wani pasiwö‑ ĩ na ai tä kuu tao opaö. Ĩ na tä kua tä, ai tä hapalo aipöa apa wi, ĩ tä toto. Ai tänö a hapalo aipö öpii, ĩ ta hini nö, kama kai sai na ta wäsä kõo wi, ĩ tä totoki. ¹¹Sami Teusö a õsi kua tolele, ĩ anö ĩ tä pewö totomaö. Ĩ anö tä totoa pi topa wi, ai tä na ai tiko tä totoki, ai tä na ai tiko tä totoki, ai tä na ai tiko tä totoki, ĩ na Teusö a õsi kua tolele, ĩ anö tä totoa setekea thaki.

Ai sanöma tänö Cristo a thapo pole, ĩ kawa hẽtu nai soatawö

¹²Sami sanöma pili tä waikiwö maaki, a uni pewö satehea apa. Pili a he, pili a sömöka pewö, pili a wakö pewö, pili a poko pewö, ĩ na tä sälähäa apa kua kule maaki, sami pili a sai kua makokoa. Ĩ na tä kua kule na, ĩ na Cristo a na ĩ na tä kua hö̃töa. ¹³Sami Teusö a õsi kua tolele, ĩ anö makö uni mãi õmananö nö, Cristo a na makö pewö kokapalöma. Ai tä hai, juteu tä, ai tä hai, juteu ta hilo pasia mane ĩ a, ai tä lö kui, pata tänö a noa mi kalipalama pasitio wi ĩ a, noa mi ai tä kalipalo pasio mai ĩ a, ĩ na makö kua kua kule maaki, Teusö a õsi kua tolele, ĩ anö Cristo a na makö pewö kokapalöma. Teusö anö sami kama õsi kua tolele ĩ a na makö uni pewö nö koamananö nö, kamakö pewö na kama õsi kua tolele ĩ a titiköma.

¹⁴Sami pili wa sai na maaki, satehe epii ai tä säläha apa. Sami ai tä sätäa sisa mai kitä. Pili ami, pili wasapöna, pili maeko, ĩ na tä kui tä satehe epii tä säläha apa. ¹⁵Pili ami huu wi ĩ ami hapalo nö, ‑Ia wi ĩ sa ami pasi mi kutenö, pili tä sai na sa sätäo wi ĩ sa pasi mai kitä‑ ĩ na pili ami huu wi tä kuu kule maaki, pili a sai na ĩ a ami pi sätäa naia soataa. ¹⁶Ĩ na tä kua tä, ‑Kamisa hai, pili sa mamo mi kutenö, pili a sai na sa sätäo naio wi ĩ sa mai kitä‑ ĩ na pili sömöka kuu kule maaki, pili a sai na a sätäa naia soata kule. ¹⁷Pili a sai na pili mamo pata sätäa sisa aköna, ka pi tänö ta hinina pi? Pili a sai na sami pili a sömöka sätäo sisa aköna, ka pi tänö tä nisa pasila pi? ¹⁸Teusö anö pili tä sai na sami tä sätäama maama. Pili mamo, pili sömöka, pili ami, pili koso, pili pösömö, ĩ na tä kui, Teusö anö ĩ nasimö tä pewö sätäama pi topa apa nö, pili a sai na ĩ tä pewö sätäa thaa soamaköma. ¹⁹Sami tä sätäa sisamaköma aköna, pili wa sai tomöpalo mana pi. ²⁰Önö kutenö, sami pili tä sai na maaki, ĩ tä pewö sälähäa soataa.

²¹Pili tä sai na ĩ tä pewö sälähäa soata kutenö, pili mamo aiki, pili ami na, ‑Kamisanö wa pii mai kitä‑ ĩ na pili mamo kuu mai kitä. Pili ami huu wi ĩ ami na, ‑Kamisanö wa pii mai kitä‑ ĩ na pili he kuu hö̃töo mai kitä. ²²Pili wa sai na ai tä sätäle, ĩ tä na, ‑Hi tä utiti ipö nö kili a‑ ĩ na wa pi kuu kule maaki, ĩ tä kua naia mi aköna, pili wa topapalo mana pi. ²³Ai tä na, ‑Hi a wani komoapalo pasitile‑ ai töpö pi kuu salo, ĩ wa hösökapalama apaö. Ĩ na tä kua tä, ai tä möamö wanisala apö pasii, ĩ wa tä totiapala satimo opa soatioö. Ĩ tä na, ‑Hi tä mömomö kilihi ipö pasiwö‑ ĩ na wa pi kuu salo, ĩ wa tä nö läpo pasia. ²⁴Ai tä möamö toita apii, ĩ wa tä totiapala waikia kutenö, ‑Ĩ tä totiapala totioö!‑ tä kuu satimo wi tä kua mai kitä. Önö kutenö, ‑Ai tänö ĩ pili tä totiapala pasio mai, ĩ tä totiapala totiopököö!‑ ĩ na Teusö a pi kuu nö, pili wa thapalöma. ²⁵Önö kutenö, sami wa maaki, wa tä sälähämapo pole, ĩ tökö wanihaso mai kitä. Ĩ tökö pewö noimaso totio opaö. ²⁶Sami ai tä pea tä, ĩ tökö pewö pea ösöho naioö. Ai tänö sami ai tä totiapala tä, ai tökö pewö pi mönaha naia soataa.

²⁷Ĩ na tä kua tä, Cristo pili a sai lö kui, ĩ kamakö pewö. Cristo pili a sai na makö pewö sälähäa. ²⁸Teusö ma thapo wi ĩ makö kokamo sinomo wi, Teusö anö ĩ makö pewö pasilipalöpö, Cristo anö ai makö simöa soma asalö noai ĩ makö totoma somama. Ĩ makö totoma soma nö, Teusö ma kai wäsä taö öpa wi, ĩ ai makö totoma nömöoma. Ĩ makö totoma nömöo nö, tä aipöama sinomo wi ĩ ai makö, töpö salia tä, töpö toapama kõo wi ĩ ai makö hö̃töwö, ai ma töpö pasilipo pasio wi ĩ ai makö hö̃tö soatawö, ai töpö simöa taö öpa wi ĩ ai makö hö̃tö soatawö, ai makö kai aipöa nö, makö hapalo opa wi ĩ ai makö hö̃tö soatawö, ĩ na makö kui makö totoma hö̃töoma. ²⁹Kamakö pewö a hai, Cristo anö makö simöa soma asalö noai, ĩ makö pewö asawö ta o? Ĩ makö pewönö Teusö ma tä kai a wäsä taö öpa asa wi ĩ makö pewö ta o? Teusö ma ta taömatalo wi ĩ makö pewö ta o? Tä aipöama sinomo wi ĩ makö pewö ta o? ³⁰Töpö salia tä, ma töpö toapama pi hatuka apa kõo wi ĩ makö pewö ta o? Makö kai aipöa nö, makö hapalo opa wi, ĩ makö pewö ta o? Ai tä hapalo aipöa apa tä, ĩ ma ta hini nö, kamakö kai sai na ma ta wäsä sapamo kõo wi, ĩ makö pewö ta o? Ma. Ĩ makö pewö mai kitä. ³¹Önö kutenö, Teusö a õsi kua tolele, ĩ anö tä pewö totoma wi ĩ ai tä topa satia apöle, ĩ ma tä saia totilöö!

Kamakö na, tä topa satia apöle, huki kamakö na ĩ sa ta wäsä pia kule.

Töpö noima totio wi ĩ ta

¹Hi masita tä uli pewö hamö töpö pilipai, ĩ sa töpö kai a thaa nö, sa hapaloö, ãju sa töpö kai a thaa naio nö, sa hapaloö, ĩ na sa hapalo kua aköna, ai sa töpö noima mi tä, toö toö a sä kuköma, a toö toö wani lalupalo opa kua päo wi na, ĩ na sa lalupalo kua päla pi. ²Teusö sa kai wäsä taö öpa wi, Teusö a õsi kua tolele, ĩ anö ĩ sa thapalöma kutenö, Teusö sa kai wäsä sinomoö, Teusö anö ta hasulupamani wi, ĩ tä pewö na sa pi hatuka apa asaa, sa tä pewö taö öpa asaö, ‑Teusö a lotete epö salo, tä aipöama totio kitäö!‑ ĩ na sa pi kuu totio nö, maa makö pata maaki, tiko hamö ĩ sa makö pata öpa sokapama taö öpaö, ĩ na sa kua kua aköna, ai sa töpö noima mi tä, sa tomöpoti mana pi. ³Wani tä na töpö honimoti wi ĩ töpö na ipa wani sa tä pewö totoki aköna, ĩ sa töpö noima mi tä, sa tomöpoti mana pi. ‑Cristo wa thapo satimo opa manu kule, wa säpalö nö, wa ĩsimani kitäö!‑ ĩ na ai töpö kuu ha, ‑Awai. Sa säpalö nö, sa ĩsimanöö!‑ ĩ na sa kuu hö̃töa aköna, ai sa töpö pewö noima hãto mi tä, sa tomöpo mana pi.

⁴Ai wa töpö noima wi, lope epii ĩ wa hapalo pi hĩsuha soatalo mai kitä. Opii wa hapalo totioimatasoö. Ai wa töpö totiapala apa sinomoö. Ai wa töpö noima apati wi ĩ wanö ai wa töpö hĩsu thaa soatalo mai kitä. ‑Kamisa totiatalo opa asa kuleö!‑ wa kuu mai kitä. ⁵Wa sapäko wanisala apa mai kitä. Kama wa puko sapamo kõo pätio mai, ai wa töpö pukama naio soataö. Sanöma wa töpö noima apati wi ĩ wa pi hĩso soatalo mai kitä. Ai töpönö wanisala tä thaa noai, ĩ tä na wa pi tapomo satimoti mai kitä. ⁶Ai töpö makoka mi ipii, ĩ töpönö wanisala tä thaa noai, ĩ tä na wa pi mönaha mai kitä. Ai töpönö toitai tä thaa makoka apa kuköma, ĩ tä na wa pi mönaha apa sisaö. ⁷Wa töpö noima wi, pi na ĩ na ĩ wa kuaö: Ai tä na wa hĩso soatalo mai kitä. ‑Ĩ a holisimo opa nö kiliawö‑ wa pi kuu soatalo mai kitä. ‑Ĩ a pitili hãtoa‑ ĩ na wa pi kuu pasio kitä. ‑Ĩ a totia hãtoa kõtaso kitä‑ wa pi kuu naio kitä. Ai tänö wa peama kule maaki, kawanö ĩ wa peama nomöho hö̃töo soata mai kitä. Ai wa töpö noima apa asa wi, ĩ na ĩ wa kua asaö.

⁸Teusö a kai a wäsä wi ĩ tä, kai aipa apa nö, hapalo wi ĩ tä, tä taö öpa wi ĩ tä, ĩ na tä kui tä pewö maa pasipaso kitä maaki, ai wa töpö noima apati wi, ĩ tä mapo mai kitä. ⁹Ĩ ma tä pewö pata taö öpa wi, huki ĩ tä kua paia mai kitä. Teusö ma kai pewö pata wäsä wi, ĩ tä kua paia mai kitä. ¹⁰Waiha tä pewö pata taö totio wi ĩ tä waloköma, ma tä pewö pata taö pasio mi ipii, ĩ tä mataso kitä. Teusö ma kai pewö pata wäsä tai mi ipii, ĩ tä maa naia soapaso kitä.

¹¹Sa ose tä, sa osemo sinomotima. Ulu tä wai hapalo osemo kua wi na ĩ na sa kua hö̃tötioma. Ulu tä pi wai kuu kuati wi na, ĩ na sa pi kuu kua hö̃tötioma. Ulu tä pi wai tapomo kuati wi na, ĩ na sa pi tapomo kua hö̃tötioma. Ĩ na sa pi osemo kuatima maaki, sa pata totilo nö, sa osemo matasoma. ¹²Walala pösösö öpö tä, ma tä möö tomöpo mi kui na, ĩ na huki Teusö ma tä möö tomöpo mi kuö hö̃töwö. Waiha Teusö ma möö hatuka apa kitä. Huki sa tä pewö pata taö paia mai kitä. Waiha sa tä pewö pata taö sisaköpö tä kua. Teusö anö sa taö totia apa kua kule na, ĩ na sa tä pewö taö totia apa kuki kitä.

¹³Huki, ‑Teusö a pitili‑ wa pi kuu totio wi ĩ tä kua, ‑Teusö anö tä thama totio kitäö!‑ pi kuu wi ĩ tä kua, ai wa töpö pewö noima apa wi ĩ tä kua, ĩ na kilii tä kua kule maaki, ai töpö pewö noima apa wi ĩ tä topa satia apa.

Kai aipa apa nö, hapalo wi ĩ ta

¹‑Ai sa töpö pewö noima totiopököö!‑ ĩ na pö pi kuu totihoö! Teusö a õsi kua tolele, ĩ anö tökö totoma wi ĩ tökö pii totihoö! Teusö ma kai wäsä taö öpa wi ĩ tä pii satia apaö! ²Ai tä kai aipa apa nö, a hapalo kule maaki, ai töpönö ĩ ta hini mai kitä. Önö kutenö ai töpö lole, ĩ töpö na a hapalo mai, Teusö a na a hapalo sisaö. Teusö a õsi kua tolele, ĩ anö ĩ a na ta hasulua asapalö nö, a hapalama apaö ha, ĩ anö ĩ ta wäsäö. Ta wäsä kule maaki, a hapalo aipa apa kutenö, töpö lole ĩ töpönö ĩ ta hini mi. Teusö anö ĩ ta hini sisaö. ³Ĩ na tä kua tä, Teusö kai wäsä totio pasio wi ĩ a lö kui, ai makö na ĩ a hapalo totio pasioö. Ai makö na a hapaloti wi, ĩ tänö makö õsi pasililali. Ĩ makö noa thaö ha, makö pi topa konasoö. ⁴Kai aipa apa nö, a hapalo wi, ĩ kama pasilia sapa kõa päpasoö. Teusö a kai wäsä sinomo wi ĩ anö, töpö kokamo wi ĩ töpö pasilipo pasioö.

⁵Makö kai pewö aipa apa nö, makö hapalo wi ĩ tä kua aköna, ‑Ĩ tä topa‑ sa kuu hö̃töla pi. Sa tä pii hö̃töla pi maaki, Teusö ma kai wäsä wi ĩ sa tä pii satia apaö. Teusö a thapo wi ĩ töpö Teusömo kokamopalo wi ĩ töpö õsi pasilipamopö, a kai aipa apa nö, a kuu noai, kama kai sai na ĩ ta wäsä tolea nömöopököö! Ta wäsä tolea nömöo mi tä, a kai aipa apa nö, a hapalo sinomo wi, ĩ a topa kule maaki, Teusö a kai wäsä pasio totio wi ĩ a topa satia apa sinomoö. ⁶Ipa pö! Kamakö na sa waloiki nö, sa kai aipa apa nö, kamakö na sa hapalo kuköma, kamisanö makö õsi pasilipo mai kitä. Kamisa na Teusö anö tä hasulupalö noai, kamakö na ĩ sa ta hasulua nömöpali, kamisa na Teusö anö tä taöma noai, kamakö na ĩ sa tä taöma nömöoö, kamakö na Teusö sa kai wäsäö, kamisanö makö pi hatukupamani, ĩ na sa kua kuköma, makö pasilia sisapamonasoö.

⁷Thola ösö, toö toö a pata husupa wi ĩ a pata, ĩ na tökö kui tökö hapalo mai maaki, ĩ nasimö tökö na ama ta thaa makoka totia tä, ai töpö sömöka taha pasile, ĩ töpönö ĩ ta ama hini totio kitä. Ai töpönö ĩ nasimö tökö na ama ta thaa tomöpo mi tä, töpö sömöka tahale, ĩ töpönö ĩ ta ama hini makoka totio mai kitä.

⁸Ĩ na tä kua kua wi na, sotatu töpö wasumopö, söpala ösö hola sinomo wi ĩ ösö hola kule maaki, ösö hola tomöpo mi tä, ‑Pei. Makö wasumo satia nököö!‑ ĩ na sotatu töpö kuu mai kitä. ⁹Toö toö a pata, thola ösö, hola wi tä, ĩ na tökö kua kua wi na, ĩ na makö kua kua hö̃töoö. Wa kai aipa pola nö, wa ta wäsä päa tä, ai töpönö ĩ ta hini tomöpo mi. Sanöma töpönö ĩ ta hini pola tä kuno mai, ipoko tä na wa hapalo päoö. ¹⁰Hi masita tä uli pewö hamö ai töpö satehe epii töpö pilipai, satehe epii ĩ töpö kai kua kule maaki, kama töpö na kama töpö kai a hinio opaö. ¹¹Kawanö ĩ wa töpö kai hini pasio mi ipii ĩ wa na, ‑Ki tiko tä pasiwöö!‑ ĩ na töpö pi kuu soatasoö. Ĩ töpö na, ‑Tiko töpö pasiwö‑ ĩ na wa pi kuu hö̃töa soataa. ¹²Ĩ na tä kua manu kule, Cristo ma thapo wi ĩ makö kokamo nö, makö Teusömo sinomo wi ĩ makö õsi pewö pasilia hẽtupasolasopököö! Teusö a õsi kua tolele, ĩ anö tä totoma wi ĩ tä pewönö töpö pasilipa wi, ĩ nasimö tä na makö pi wasiso kuköpököö!

¹³Önö kutenö, wa kai aipa apa salo, Teusö a na wa hapalo kõo nö, ‑Sa kai aipa apa nö, sa kuuhe, ĩ sa ta wäsä makoko tolea kõpalöpö, ĩ tä totopaö!‑ ĩ na Teusö a na ĩ na wa kuu kõpöö! ¹⁴Teusö a na sa hapalo tä, sa kai a aipa apa nö, sa hapalo kuköma, pili sa õsinö sa hapalo päa kutenö, ĩ sa ta taö totio mi. ¹⁵Wi na sa kuapö? Sa kai aipa apa nö, pili sa õsinö Teusö a na sa hapaloö, sa pi tao totio wi ĩ tänö Teusö a na sa hapalo makoka totio naioö, ĩ na sa kuapöö! Sa kai aipa apa nö, pili sa õsinö ama sa ta thaö, sa pi tao totio wi ĩ tänö ama sa ta thaa naioö, ĩ na sa tä ama thaa kuapö. ¹⁶Wa kai aipa apa nö, Teusö a na wa hapalo nö, ‑Aitaköö! Wa totiatalo opa asawöö!‑ pili wa õsinö ĩ na wa kuu päoö ha, ai tä Teusömo naio wi ĩ anö ĩ aipö kai a hini tai mi pasii, ĩ aiki ‑Awai. Ĩ naköö!‑ ĩ a pi kuu totio mai kitä. Wa kai a hini mi kutenö. ¹⁷Wa kai aipa apa nö, Teusö a na, ‑Aitaköö!‑ wa kuu wi ĩ tä topa kule maaki, ai wa tä õsi pasilipa maa kule. ¹⁸Makö kai aipa apa nö, makö hapalo sinomo wi maaki, kamisa kai aipa apa nö, sa hapalo sinomo satia apa kutenö, ‑Aitaköö!‑ Teusö a na ĩ na sa kuu. ¹⁹Ĩ na sa hapalo kua satia apa wi maaki, ai töpö na sa Teusömo naia tä, sa kai aipa apa nö, sa hapalo mai kitä. Sa kai aipa apa nö, sa hapalo lapa apa wi maaki, ai töpönö ĩ ta hini mi kutenö, ĩ töpö pi hatukupo mai kitä. Ĩ na tä kua tä, sa hapalo makoka apa sisa wi, ai töpönö ĩ ta hini ipa kutenö, sa hapalo hototia apa kule maaki, sa hapalo makoka apa sisa wi ĩ sa tä pii sisaö.

²⁰Ipa pö! Makö pi tapomo osemo maiki. Ulu töpönö wanisala tä thatala mai, töpö kutio kua wi na, ĩ na makö kutio kua sisatiopököö! Ulu töpö pi wai tapomo kua wi na, ĩ na makö pi tapomo kua naio mai, pata töpö pi tapomo kua wi na, ĩ na makö pi tapomo kua pasiopöö! ²¹Ĩ na Teusö tä waheta kuu:

‑Teusö aiki, “Hi töpö na sa ta wäsä piale, tiko töpö kai na töpö hapalo aipa sinomo wi, hi töpö na ĩ tiko töpönö ĩ ta wäsä tolea nömöo kitä maaki, hi töpönö sa kai a hini totio mai ha, hi töpönö sa kai a peama apa nö hĩsua kitäö!” ĩ na Teusö pata tä kuu kule‑

ĩ na Teusö tä waheta kuu.

²²Önö kutenö, ‑Ĩ töpönö Teusö ta hini mi ipö. “Teusö a pitili” ĩ töpö pi kuu mai, ĩ töpö wani. Teusö ta peama apati wi ĩ töpö‑ ĩ na Teusö anö makö pi thamapö, kai a aipö öpii a kai a thaa nö, ĩ töpö wani na ĩ ta wäsä päoö. Ĩ na tä kua tä, ‑Ĩ töpö pasi lö kui, “Teusö a pitili” ĩ töpö pi kuu asale ĩ töpö pasiwö‑ ĩ na Teusö anö makö pi thamapö, ĩ töpö na Teusö ta wäsä makoka sinomo asaö. ²³Önö kutenö, makö kokamo tä, makö kai aipa apa nö, makö pewö hapalo soata tä, Teusö a thapo pasi mai, ĩ töpö pi moti ipii töpö holepalo nö, makö kai aipa apati pole, ĩ töpönö ĩ makö kai a hini nö, ‑Hi töpö ta hapalo isi wanihi ipö nö kili‑ ĩ na ĩ töpö kuu matimö. ²⁴Ĩ na tä kua tä, kamakö pewönö Teusö ma kai a wäsä makoka pola tä, Teusö a thapo mai ĩ töpö pi moti ipii, ĩ ai tä lisipasoma, Teusö ma kai wäsäti pole, ĩ a waninö ĩ ta hini ha, ‑Hi töpönö ta wäsä pole, ĩ pitili ta. Wanisala sa tä thaa wi ĩ sa pasiwö ta o‑ ĩ na makö pewönö ĩ ma pi wani thama kitä. ²⁵Kama pi wani na pasiwö, wanisala tä na a pi wani tapo pasitio wi ĩ ma tä kateha hasulua apa nö kilipali ha, a wani kililo nö, a mãi wani poa soataki. A mãi wani poa soataiki nö, a Teusömo soata nö, ‑Kamakö pewö na Teusö a kua totia apa alu kule‑ kamakö na ĩ na ĩ a wani kuu soatasoö.

²⁶Ipa pö! Ĩ na sa kuu totio pia kule. Makö kokamo nö, makö Teusömo tä, ai wanö ama ta thaö, ai wanö ai töpö na Teusö wa ta taöma pasia, Teusö anö tä hasuluma noai, ĩ ai wanö ĩ wa ta wäsä pasioö, ai wa kai aipa apanö, wa hapalo pasioö, tä kai aipa apa nö, tä hapalo pole, ai wanö ĩ wa ta wäsä tolea makokaö, ĩ na makö kua sinomotii. Ĩ na makö kuati nö, makö pewö pi pasilia hẽtupasotipököö! ²⁷Ai makö kai aipa apa wi, ĩ polakapi makö hapalo sisapöö! Ai wa hapalo somataö, waiha ai wa hapalo nömötaö, ai wa hapalo pi topa naio wi ĩ wa hapaloö, ĩ na makö kuapö. Ai töpö hapalo aipa noai, waiha ai wanö ĩ wa ta wäsä makoka tolea nömöopököö! ²⁸Ĩ ta wäsä makoka tolea nömöo kõo wi ĩ ai tä kua mi tä, makö Teusömo wi ĩ a sai ha ai pö hapalo aipöa tihöö! Teusö a na pili a õsi hapalo päoö! ²⁹Teusö ma kai a wäsä taö öpa sinomo wi, polakapi kama makö hapalo sisaaö! Ai makö kokamo naine, ta wäsä pole, ĩ tä na pö pewö pi tapoa totia pasikiö! ³⁰Ĩ na tä kua tä, ai makö loa naine, ĩ ai wa na Teusö anö kama kai hasulupamonasoma, ai tä hapaloti pole, ĩ a hapalo maa soatasopö. ³¹Ĩ makö pewönö Teusö ma kai wäsä nömöatalopöö! Teusö ma kai wäsä nömöatalo kuköma, makö pi pewö hatukua totipasoö, makö pewö pi topapalo kuki, ĩ na makö kua kuköpöö! ³²Teusö a kai wäsä totio sinomo wi ĩ töpö hapalo makoka taö öpa kitä. Ai tä hapaloti tä, ai tä hapalo tikilio soata mai kitä. ³³Makö hapalo isi waniho wi, Teusö anö ĩ tä pii mi. Makö hapalo topa apati wi ĩ tä pii sisaö.

Ĩ tä uli pewö hamö Teusö a thapo wi ĩ töpö kokamo nö, toitai töpö Teusömo kuati wi na, ĩ na makö kokamo nö, toitai makö Teusömotipö. ³⁴Teusö a hai ĩ töpö kokamo tä, suö töpö Teusömo naine, wanai ĩ töpö suö lotiopö. Ĩ töpö hapalo pasio maapö. Töpö sömöka taa totio pasiopö. Suö töpönö wano töpö simöa maapö. Ĩ na Moisés anö ĩ na nö patapö töpö noa thaa soma hö̃töoma. ³⁵Makö Teusömo tä, ‑Wi na ta kuu totio ke?‑ suö töpö kuu pi topa salo, kama töpö sai pö na töpö waloa koiki nö, peanopö töpö na, ‑Wi na ta kuu totio kipii?‑ ĩ na ĩ töpö suö kuupö. Töpö Teusömo pola tä, suö tä hapalo pasile ĩ ta hiopöa apa.

³⁶Kamakönö Teusö ta wäsä somama ta o? Kamakö na ai töpönö ĩ ta wäsä sisama ta o? ³⁷Hi sa tä sãököpalö nö, makö noa thaa pole, Cristo pata tänö makö noa thaa wi ĩ tä sai a. ‑Teusö sa kai a wäsä sinomo wi ĩ sa. Teusö a õsi kua tolele, ĩ anö tä totoma wi ĩ sa tä thapo waikia kule‑ ĩ na ai tä pi kuu nö, ‑Paulo sa kai a hini wani‑ ĩ na a pi kuu tä, ‑Cristo pata tänö makö noa thaa wi, Paulo anö ĩ ta wäsä tolea kule‑ ĩ na ĩ a pi kuu totiopökö. ³⁸Kamisanö makö noa thaahe, ai tä waninö ĩ ta hini wani tä, ĩ a wani a hini hö̃töo maikiö!

³⁹Ipa pö! Önö kutenö, ‑Teusö sa kai a wäsä makoka pi topa totia apa kuleö!‑ ĩ na pö pi kuu totihoö! ‑Makö kai aipa apa nö, pö hapalo hãto tihöö!‑ ĩ na ai töpö noa thaa tihöö! ⁴⁰Ĩ na sa kuu kule maaki, makö hapalo isi wanihoti mai, toitai makö hapalo makokatipököö!

Cristo a temöa konaso noai ĩ ta

¹Ipa pö! Teusö ta topa apöle sa ta wäsä waikio kipili, kamakö na ĩ sa ta kateha kõo pia kule. Sa ta wäsäpili, ma tä hininöma kutenö, ‑Cristo a pitili‑ ĩ na makö pi kuu soatia kule. ²Cristo sa ta wäsä noai ĩ ma ta hini soatila nö, ‑Cristo a pitili‑ ĩ na makö pi kuu mapo mi tä, Cristo anö makö täapa kõo läo kitä. Ĩ na tä kua tä, Cristo ma ta hini wanipasoma, ‑Cristo a pitili‑ ĩ na makö pi kuu noai maaki, ‑Cristo a pitili‑ makö pi kuu holisimo hãto päomakö.

³Kamakö na ta wäsä noai, kamakö na ĩ sa ta wäsä tolea soma kipili. ‑Ĩ ta toita sati ipö‑ sa pi kuu salo, ĩ sa ta wäsä soma kipili. Sa ta wäsäpili, ĩ na ĩ ta kuu kipili: Wanisala ma tä thapala apati wi ĩ tä noa na Cristo a säpamonasoma. Ĩ na Teusö tä waheta kuu. ⁴Cristo a nomasoö ha, ai töpönö thaka taka ha a nomawö titiköma. A nomawö titiköma maaki, polakapi tä mumi matalo nö, ĩ hena tä, Teusö anö a temöa komanöma. Ĩ na Teusö tä waheta kuu. ⁵Cristo a temöa komanö noai ha, Pedro a na pili a tapamoa konasoma. Pili a tapamoa paia kono nö, waiha kama kai a hua sinomoti noai, 12 töpö lö kui ĩ töpö na a tapamoa nömöa kono nö, ⁶Teusö a thapo wi ĩ töpö satehe epii, ĩ 500 töpö kui ĩ töpö kokamo pole, ĩ töpö na a tapamoa nömöa konasoma. Ĩ töpö na a tapamonaso noai, ĩ polakapi ai töpö noma waikisoma maaki, satehe epii ai töpö temöa soa kule. ⁷Ĩ töpö pewö na a tapamo totio paio koiki nö, Tiago a na a tapamoa nömöno nö, kamanö kama hai ĩ töpö simönö noai ĩ töpö pewö na a tapamoa totia nömöa konasoma.

⁸Ĩ töpö pewö na a tapamo totio paio koiki nö, waiki totii, kamisa na a tapamoa nömösoma. ‑Paulo a hai, Teusö ulupö a kua hãtopaso kitäö!‑ ĩ na töpö pi kuu totio mi tä, Teusö ulupö sa kupasoma. Ĩ sa na Cristo a tapamoa nömösoma. ⁹Cristo anö sa simönö noai ĩ ai sa nai maaki, Cristo anö ai töpö simönö noai ĩ töpö pewö na sa komoapalo wi ĩ sa pasiwö. ‑Sa totiatalo opatima kutenö, Cristo anö sa simöa nainö noai ĩ sa‑ ĩ na sa pi kuu mane. ‑Teusö a hai ĩ sa töpö peama hĩsua apatima maaki, Cristo anö sa simönö noai, huki ĩ sa naiwö‑ ĩ na sa pi kupalotii. ¹⁰Teusö anö sa totiapala apa päo kutenö, Cristo anö sa simöa nainö noai, ĩ sa. Teusö anö sa totiapala apama kutenö, sa kasiapalo hö̃tötioö. Cristo anö ai töpö simönö noai, Cristo a na ĩ töpö kalipaloma maaki, Cristo a na kamisa kalipalo satia apama. Kama sa aiki kuno mai. Teusö anö sa totiapala apa wi ĩ tänö sa lotetepalo nö, sa kalipalo opama. ¹¹‑Paulo anö ta wäsä wi ĩ sa ta hini sisaö‑ pö pi kuu ti! ‑Cristo anö ai töpö simönö noai ĩ töpönö ĩ ta wäsä wi ĩ sa ta hini pasioö!‑ pö pi kuu naio ti! Kamisanö Teusö ta pitili ipii ĩ sa ta wäsäö, Cristo anö ai töpö simönö noai ĩ töpönö ĩ ta wäsä naia soataö, ĩ na sama ta wäsä thamaö ha, kamakönö ĩ pitili ma ta pima.

Kamakö pewö nomaso kitä maaki, makö pewö temöa konaso laso wi ĩ ta

¹²Önö kutenö, Cristo a noma totisoma maaki, a temöa konaso noai, ĩ sama ta wäsäti kule maaki, wi na makö pi kuu salo, ai makö aiki, ‑Sanöma makö noma totia waikiso noai, ĩ makö temö kõo mai kitä‑ ĩ na ĩ makö kuu kule ta o? ¹³Sanöma makö temöa konasopö tä kua mi aköna, Cristo a temö kõo maa noa kipi. ¹⁴Cristo a temö kõo maama aköna, Teusö sama ta holea wäpala päla pi. Cristo a temö kõo maama aköna, ‑Cristo a pitili‑ ĩ na makö pi kuu wi ĩ tä topa mana pi. ¹⁵‑Teusö anö sanöma nomawö makö temöa komani kitä‑ tä kuu wi ĩ ta holisi aköna, Teusö anö Cristo a temöma kõo maa noa kipi. Teusö anö Cristo a temöma kõo maama aköna, ‑Teusö anö Cristo a temöa komanömaö!‑ ĩ sama ta wäsä kule maaki, ‑Teusö ma ta wäsä holisimo päa kuleö!‑ ĩ na ai sama töpö pi thama pola pi. ¹⁶Teusö anö sanöma makö temöa komani wi ĩ nasimö tä kua mi aköna, Teusö anö Cristo a temöa komanö noai ĩ nasimö tä kuo maa noa kipi. ¹⁷Teusö anö Cristo a temöma kõo maama aköna, ‑Cristo a pitili‑ makö pi kuu wi ĩ tä topa mana pi. Wanisala ma tä thatala noai ĩ tä na Teusö a hĩso soatila pi. ¹⁸Teusö anö Cristo a temöma kõo maama aköna, Cristo a thapo noai, ĩ töpö noma waikiso noai, Teusö anö ĩ töpö täapa kõo läo maa noa kipi. Õsi töpö pea soatio wi, ĩ hamö ĩ töpö kua soatila pi. ¹⁹‑“Cristo a pitili” ĩ na sa pi kuu ha, hi tä uli ha sa hupaloti tä, Teusö anö sa täa kõa sisali. Waiha sa nomaso noai ha, sa täa kõo läo mai kitä‑ ĩ na makö pi kuu sisa aköna, makö pi mönaha mana pi. ‑Cristo a thapo wi ĩ töpö pepalo satia apatii‑ ĩ na tä kuu wi tä kula pi.

²⁰Teusö anö Cristo a temöa komanö noai, ĩ pitili ta sisawö. ‑Teusö anö Cristo a temöa waikia komanöma kutenö, ai töpö nomasoma, Teusö anö ĩ töpö temöa hö̃töa komani kitä‑ ĩ na makö pi thapalamaö. ²¹Somi tä sai tä sami wano tä waninö wanisala tä thama kutenö, sanöma makö pewö nomaso wi ĩ tä kua kupaso kua noai na, waiha sami ai wano tänö toitai tä thaa kõoma kutenö, sanöma makö temöa konaso wi, ĩ na ĩ tä kua kua hö̃töpasoma. ²²Adão makö pewö kutenö, makö pewö nomasoö. Ĩ na tä kua kua wi na, Cristo makö hö̃töwö kutenö, Teusö anö makö pewö temöa hö̃töa komani kitä. ²³Ĩ makö pewö temöma kõo soata mai kitä. Teusö anö Cristo a temöa paia komanöma. Waiha Cristo a huu kõa tä, Cristo makö temöa nömöa komani kitä. ²⁴Ĩ tä noa ha, ĩ tä uli pewö hötötöpaso kitä. Ĩ tä uli pewö hötötöpaso noai ha, kaikana töpönö Teusö a thapo mai ĩ töpö, sai töpö, ĩ na töpö kui töpönö sanöma töpö simöa sinomo wi, Cristo anö ĩ töpö pewö utitipamanö nö, Cristo anö makö pewö simöa asa noai, Teusö a na Cristo anö ĩ tä totoki kitä.

²⁵Cristo a wanipo wi, Teusö anö ĩ töpö pewö utitipama totio paio mi tä, hi tä uli na Cristo anö sanöma makö pewö simöa paitio kitä. ²⁶Sanöma makö nomapo sinomo wi, ĩ tänö makö pea sinomo wi, waiha Teusö anö ĩ tä pewö maa totipamani kitä. ²⁷‑Teusö anö Cristo a na ĩ tä pewö utitipamanöma‑ ĩ na Teusö tä waheta kuu. ‑Cristo anö ĩ tä pewö simöa kuki kitä‑ ĩ na tä kuu kule maaki, Cristo anö Teusö a simöa pasio mai kitä. Teusö anö Cristo a na ĩ tä pewö utitipama piale, ĩ pata tä sai kutenö, ĩ a pata na Cristo a simöo pasio mai kitä. ²⁸Teusö aiki, ‑Ipa ulu Cristo anö ĩ tä pewö simöa kuköpö‑ ĩ na Teusö a kuu noai, Cristo anö ĩ tä pewö simöa totia hö̃tökö noai ha, pö̃ Teusö a na, ‑Pei. Hi wa tä pewö simöa nömöo totio soatiopöö!‑ ĩ na a kuu kitä. Ĩ na a kuu ha, Teusö anö ĩ tä pewö simöa totiatalo opati kitä.

²⁹Ĩ na tä kua tä, ai töpö nomapo paitio noai ĩ töpö noamapö, ai töpö temö soai ĩ töpö mãi õmamo sinomo wi, wi na ĩ töpö pi kuu? Töpö nomaso noai ĩ töpö temöopo kõo mi aköna, ĩ töpö noamapö, ai töpö mãi õmamo mana pi. ³⁰Kamisamakö lö kui, nomawö töpö temöopo kõo mi aköna, ĩ tä wakala pewö hamö ai samakö peamamo mana pi. ³¹Ipa pö! Ĩ tä wakala pewö hamö, ‑Huki ai töpönö sa säa hãtopali kitäö!‑ ĩ na sa pi kupalo opatii. Kamisa, kamakö, ĩ na makö pewö kui, kamakö hai ĩ Jesus Cristo pata tä na ĩ makö pewö sätäapalo opa kutenö, ‑Ipa kotĩtu tili makö totiatalo opawöö!‑ ĩ na sa pi kuu pole, ĩ pitili ta kua kule na, ĩ tä wakala pewö hamö, ‑Huki sa säa hãtopali kitäö!‑ sa kuu wi, ĩ pitili ta hö̃töwö. ³²Epesu tä uli hamö sa kua tä, salo pö waitili ipii salo pö kua kua wi na, ĩ na sanöma töpö waitili kuö hö̃töi, ĩ töpö na sa kasiapaloma. Ĩ töpö na sa kasiapalo opama maaki, Teusö anö nomawö töpö temöapama kõo mi aköna, sa kasiapalo noai, ĩ tä topa maa noa kipi. Teusö anö nomawö töpö temöapama kõo mi aköna, ‑Hena tä makö noma hãtoso kitä maaki, huki makö iapalo opa päo nököö! Tuu toita apii ma tuu kopala apa päo nököö!‑ ĩ na makö kuu pi.

³³Kama makö mönao sapao kõo maikiö! Ai töpönö wanisala tä thaa wi, ĩ töpö na makö hupalo tikilio kuköma, toitai ma tä thati wi ĩ ma tä matamani kitä. ³⁴Makö pi hatukupalo nö, wanisala ma tä thaa maikiö! Ai makönö Teusö ma taö pasio mi. Ĩ na sa kuu ha, ‑Häö. Awai. Teusö sa tai mio opa nö kilio pasiopawö‑ ĩ na ĩ makö pi kuupökö.

Teusö anö pili makö ösö temöa komani wi, ĩ na ĩ makö ösö kua kitä

³⁵Ai wa aiki, ‑Wi na Teusö a pi kuuto nö, nomawö töpö temöapama pi hatukama apa kõo? Wi na pili makö ösö kua haia pasia kõköpö kuno mai?‑ ĩ na ai wa kuu kuki. ³⁶Makö pi moti hãtowökö? Hikali a hamö kawanö pili wa mo töa paio mi tä, mo ãke päta mai kitä. ³⁷Ösö patasipö öpii wa ösö tösa soata mai kitä. Tötiiku mo, ai tiko mo, ĩ na mokö kui wa mokö wai tösa sisa päoö. Wa mokö wai töa somatakö noai, ĩ Teusö anö ĩ mokö patamani. ³⁸‑Hi mo wai na, mosö kupasopöö!‑ ĩ na Teusö a pi kuu nö, ‑Ki ai tiko mo wai na, ai tiko mosö kua hö̃töpasopöö!‑ ĩ na a pi kuu naio nö, Teusö anö ĩ na mokö noa pewö wai thaö.

³⁹Ĩ na pili mokö kua kua wi na, ĩ na töpö hupalo wi, ĩ na ĩ töpö kua kua hö̃töoö. Sanöma makö ösö lö kui ĩ tiko makö ösökö hö̃töwö, masita hamö kökö holepalo wi ĩ kökö ösö hai, tiko ösökö hö̃töwö, hii tiki hamö kökö umöpalo pasio wi ĩ kökö ösö hai, tiko ösökö hö̃töwö, salo pö katä pasio wi ĩ pö ösö hai, tiko ösökö hö̃töwö, maa u hamö kökö hupalo pasio wi ĩ kökö ösö lö kui, ĩ tiko kökö ösökö hö̃töwö, ĩ na makö ösö pewö kui, makö ösö pewö kupawö.

⁴⁰Hi tä hẽtu ha ai tiko tökö kua hö̃töa lasoa, hi masita tä uli ha salo pö pewö, sanöma makö, ĩ na makö mömomö tiko opö kui makö kua komoa hö̃töasolöa, ĩ na makö kua. Hi tä hẽtu hamö tökö kua pasilali, ĩ tökö möamö toita apö. Ĩ na tä kua tä, hi masita tä uli hamö ĩ tiko makö sai totiwö maaki, makö möamö toita apö hö̃töwö. ⁴¹Pili motokö möamo toita apö hö̃töwö, pilipoma a mömomö tikopö maaki, a mömomö toita apö hö̃töwö, sitikali kökö mömomö tikopö hö̃töwö maaki, ĩ kökö mömomö toita apö nai soatawö, ĩ na ĩ kökö kuö. Ĩ na tä kua tä, sitikali kökö pewö mömomö toita apö maaki, ai sitikali a mömomö ausi ipö, ai a mömomö pi hanehe, ĩ na sitikali pö kuö hãkiki.

⁴²Ĩ na ĩ kökö mömomö toita kui na, ĩ na Teusö anö makö temöa komanöma, ĩ na makö mömomö toita apa kua hö̃töa kopasoö. Pili wa patiliki wi, ĩ ösö hotea pasisoö. Ĩ wa ösö sai hotea pasiso noai ha, Teusö anö ĩ tute wa ösö thaa kopalö lasoö. Ĩ wa ösö hote kota mai kitä. ⁴³Wa ösö pi patiliki wi, ĩ wa ösö mömomö hiopö öpö pasiwö. Ĩ wa ösö äpäti ipö pasiwö. Teusö a na wa walo kõkö lasoma, ĩ tute wa ösö thaa kopalö lasoö. Ĩ wa ösö lö kui, ösö palimi ipö, ösö liähä äpö, ĩ na wa ösö kai kuo soatiopö, ĩ wa ösö kai kupasoö. ⁴⁴Hi masita tä uli ha wa nomano nö, wa pewö ösö kai patiliki. Ĩ na tä kua tä, Teusö a na wa õsi konasolöma, Teusö a õsi kua tolele, ĩ anö wa ösö tutei wa ösö thaa kopali wi, ĩ ösö palimia tolea totia apa kopasoö. Wa noma kõo mai kitä. Önö kutenö, hi masita tä uli ha wa ösö äpäti ipö maaki, Teusö a sai pö na wa konasolöma, wa ösö tute epö, wa ösö palimi ipö, ĩ na wa ösö kua kõkö lasoö.

⁴⁵‑Teusö anö sanöma tä thaa somapalö noai, ĩ Adão a hiloma. Teusö anö ĩ a na pili õsi sai titiki nö, a temöpamanöma‑ ĩ na Teusö tä waheta kuu. Ai Adão a kua nömöa kotaso noai, ĩ Cristo a hilo. Ĩ anö sanöma makö õsi palimipama pasio wi ĩ a. ⁴⁶Pili õsi titikö noai ĩ tä kuo somama, ĩ tä noa ha pili õsi palimipo wi ĩ tä kuo nömöoma. ⁴⁷Sanöma tä kuo soma noai, masita tänö a thapalö noai, ĩ Adão a kuo somama. Masita tä kopekenö a thapalöma. Sanöma tä kua nömöpaso noai, ĩ Cristo a lö kui, hi tä hẽtu hamö a kuo paioma maaki, sanöma tä kua nömöpasoma. ⁴⁸Masita tänö Teusö anö Adão a thapalö noai, ĩ a äpäti kuo kuo noai na, ĩ na masita tä uli na töpö pilipai, ĩ na ĩ töpö äpäti kuö nai soatawö. Ĩ na tä kua tä, hi tä hẽtu hamö Cristo a kuo paio noai, ĩ a palimi kui na, ĩ na Cristo a thapo wi, ĩ na ĩ töpö palimi kuö nai soatawö. ⁴⁹Masita tänö Adão a thapalö noai ĩ a äpäti kuo kuo noai na ĩ na makö pewö äpäti kuö nai soatawö. Hi tä hẽtu hamö Cristo a kuo paio noai ĩ a palimi kui na, ĩ na makö palimi kua nai nasoö.

⁵⁰Ipa pö! Sãi sãi tä, iä iä tä, pili wa ösö, ĩ na wa kua päi, Teusö a kaikanamo soatio wi, ĩ hamö ĩ wa pilio naio laso mai kitä. Wa äpäti pasi soa kutenö, wa kutio mai kitä.

^51-52Sa ta hasulupa piale, ĩ ma ta hiniö! Makö pewö noma mai kitä maaki, hola wi tä hola konaso pialali, ĩ ta hola kukö lasoma, Teusö anö makö pewö tikopölali kitä. Lope epii pili mamo kasö mita mitamo holepalo opa kua wi na, ĩ na lope epii makö tikopöa kua haitalaso kitä. Ta hola lasoa tä, Teusö anö, töpö noma paiso noai, ĩ töpö kõa naia soatalölöma, ĩ töpö noma tolea kota laso mai kitä. Ta hola lasoa tä, Teusö anö makö pewö tikopölali kitä. ⁵³Sanöma makö pewö äpäti ipö, makö hotepo sinomoö, ĩ na makö pewö kuati wi, Teusö anö ĩ tä mapamanö nö, makö palimi ipö, makö noma kota mai, ĩ na makö kuaalöpö, ĩ na makö thapali kitä. ⁵⁴Makö hoteopo wi ĩ tä mapalo nö, makö palimi ipii ĩ makö kupasoö, makö nomaso wi ĩ tä mapalo nö, makö noma kota mai ĩ makö kupasoö, ĩ na makö kupalo nö, ‑Teusö tä waheta kuu noai ĩ ta pitilio totio opa nö kilia noa‑ ĩ na makö kuu kitä.

Nomaso wi, Teusö anö ĩ tä mapamanöma kutenö, makö noma kota mai kitä.

⁵⁵Makö nomapo sinomo noai ĩ tänö makö peama kota mai kitä. Makö peama kota mai kitä kutenö, makö noma kili kota mai kitä.

⁵⁶Teusö aiki, ‑Wanisala ma tä thaa wi kamakö na ĩ nasimö ĩ tä kua kutenö, makö peama kuki kitäö!‑ ĩ na Teusö a kuu ha, sanöma töpö noma kili ipama. ‑Ĩ na makö kuapököö!‑ ĩ na Teusö anö sanöma töpö noa thaa wi, ĩ töpönö ĩ ta hini totio mai, wanisala tä tha apa pasitioti kutenö, Teusö anö töpö peama kuki kitä.

⁵⁷Sanöma makönö wanisala ma tä thaa noai, kamakö hai ĩ Jesus Cristo pata tänö ĩ tä noa mapamanöma kutenö, Teusö anö makö peama mai kitä. Önö kutenö makö noma kili mai kitä. Ĩ na tä kuaö ha, ‑Aitaköö!‑ Teusö a na ĩ na makö kuupököö!

⁵⁸Ipa pö! Önö kutenö, pö kasiapalo totihoö! Pö utitipo tihöö! Makö otea apöpalo nö, Cristo pata tä na makö kalipalo sinomoö! Cristo a na makö kalipalo wi, ĩ tä toita apö kutenö, makö kalipalo päo wi ĩ tä kua mai kitä.

Jetusalẽi tili töpö na sitipa kökö simöpa piale, ĩ ta

¹Ĩ na tä kua tä, Jutéia tä uli ha Teusö a thapo wi töpö pililati, ĩ töpö na sitipa kökö simöpa wi ĩ sa ta kateha nömöo pia kule. Kalásia tä uli ha töpö Teusömo sinomo wi töpö kulati, ĩ sa töpö noa thaa kua noai na, ĩ na makö noa thaa kua nömöo piale, ĩ ta hiniö! ²Sitipa ma kökö sualali wi, tomĩku tä wakala pewö na ai ma kö sitipa thaa seleketa soa sinomoö! Pe epii sitipa ma kö täli salo, kulaha apö hö̃töi, ai ma kö thaa sokata soaö, polakapi hitai sitipa ma kö suli salo, polakapihii ma kö thaa soka pasia pätaki, ĩ na ma kökö sitipa thaa seleketa soaö! Ĩ ma kökö sitipa koka waikipalö noai ha, kamakö na sa hama huu kuköma, ma kö sitipa koka hö̃töa waikipalöma kutenö, ‑Ai ma kö koka haitalöpöö!‑ makö kuu wi tä kuo maapököö!

³Kamakö na sa waloiki nö, ma töpö saipali wi, jetusalẽi tili töpö na ĩ töpönö ĩ kökö sitipa totoköpö, ĩ sa töpö simöpali kitä. Jetusalẽi tili töpö na ĩ sa töpö simöpa piale, ĩ töpö na waheta sa tökö simöa naipali kitä. ⁴Jetusalẽi tä uli hamö sa huu piale, ĩ tä topa tä, kamisa na ĩ töpö huu naiopö.

⁵Masetônia tä uli hamö sa hasupasolö pia salo. Ĩ tä uli hamö kolo sa hasua paipalolö nö, kamakö na ĩ ola sa hasuo nömöo koonö pia salo. ⁶Kamakö na sa hamamo nö, tiko hamö sa huu kõa haio mai kitä. Tä uli ösö holele pai tä, kamakö na sa kutio hãto pia salo. Kamakö na sa kutioma, tiko tä uli hamö sa huu kõo nömöoonö pia tä, sa pasilipalöpököö! ⁷Huki kamakö na lope epii sa hamamo päo wi ĩ tä kua mane. ‑Awai‑ ĩ na Teusö a kuu ha, kamakö na sa kuo tetepo pi topa apa kule.

⁸Önö kutenö, Pẽtekoosösisö tä wakala kupo paio mi tä, hi Epesu tä uli ha sa kuo paitio pia salo. ⁹Teusö sa ta wäsä pole, ai töpö satehe epii töpönö ĩ ta hini pi topa apa naia kutenö, hisimö sa kuo paitio pia salo. Ai töpö satehe epii töpönö sa wanipo kule maaki, ai töpönö sa hini pi topa apa pasia kule.

Paulo anö töpö nokapalama wi ĩ töpö

¹⁰Timóteo a lö kui, Cristo pata tä na sa kalipalo kua sinomo wi na, ĩ na Timóteo a kalipalo kua hö̃töoö. Önö kutenö kamakö na ĩ a huu tä, ‑Hisa ha a huu kili tihöö!‑ ĩ na Timóteo a na ĩ na makö kuu totihoö! ¹¹Ai wanö Timóteo a komopama tihöö! Kamakö na ĩ a hamamoma, a huu kõo pia tä, ma pasilipalöö! A pi topa apöla nö, kamisa na a waloa kõkö solöpöö! ‑Cristo a thapo wi ĩ ai töpö na Timóteo a waloa naikö solöpököö!‑ ĩ na sa pi kuu kule.

¹²Apoolu a na, ‑Kotĩtu tili töpö na Cristo a thapo wi ĩ ai töpö hamamo piale, ĩ töpö na wa huu naio mi salo‑ ĩ na sa kuuma maaki, huki a huu pi topa maama. A huu pi topa tä, a huu haio kitä.

Paulo a kuu waikipo piale ĩ ta

¹³Ĩ na tä kua tä, pö pi mosaia totikiö! ‑Jesus Cristo a pitili‑ makö pi kuu wi ĩ tä hosa tihöö! Makö pi kiliho mai, pö lotetea totikiö! ¹⁴Makö noimaso opa nö, makö kalipalotipököö!

¹⁵Ipa pö! Akaia tä uli ha Esötépanasö a, kama ai töpö, ĩ na kilii töpö pilia sätäa wi ĩ ma töpö taö waikia kule. Ai akaia tili makönö Cristo ma thapo paila tä kuno mai, Esötépanasö töpönö Cristo a thapo somama. Ĩ töpönö Cristo ma thapo wi ĩ makö pewö pasilipo sinomotii. ¹⁶‑Ĩ töpö kua kuati wi na, ĩ na ai töpö kua naitio wi, ĩ ma töpö pewö a hini totihoö! Cristo a na töpö kalipalo wasiso opati nö, Cristo a thapo wi ĩ töpö pasilipo sinomo wi ĩ ma töpö pewö a hini totiopököö!‑ ĩ na kamisanö ĩ na makö noa thaa alu kule.

^17-18Ĩ na tä kua tä, Esötépanasö a, Potunatu a, Akaiku a, ĩ na kilii töpö waloa haikö solöma kutenö, sa pi mönaha apa kule. Kamisa na makö kuo naio maama kutenö, kamakönö sa pi topapalama pikio maapili maaki, ĩ töpö waloa haikö solö wi, ĩ töpönö sa pi topa apa sisapamanöma. Ĩ töpönö makö pi topa naipamanöma. ‑Ĩ töpö topa apaö‑ ĩ na makö pewö kuupököö!

¹⁹Hi Ásia tä uli pata ha töpö kokamo nö, töpö Teusömo sinomo wi ĩ töpö aiki, ‑“Makö topa soa kule?” ĩ na kotĩtu tili töpö na ĩ na wa kuu!‑ ĩ na kamisa na ĩ na ĩ töpö kuu kule. Akila a, Pötisiilasoma a, kama sai pö na töpö Teusömo sinomo wi ĩ töpö, ĩ na kilii töpö aiki, ‑Kotĩtu tili töpönö Cristo pata tä thapo naia kutenö, ĩ töpö na, “Makö topa kule?” ĩ na kotĩtu tili töpö na ĩ na waheta wa tä sãököpalö nö, ĩ na a kuu!‑ ĩ na ĩ töpö kuu kule. ²⁰Ĩ na Cristo a thapo polai, ĩ na ĩ töpö pewö kupalo naia kule. Kamakö na Cristo a thapo wi, ĩ töpö waloki ha, makö pi mönaha apa salo, makö hanokopaso totiopököö!

²¹‑Paulo anö hi waheta tä pewö sãöka kipili‑ ĩ na makö pi thama pia salo, ‑Makö topa hö̃töa kule?‑ sa kuu pole, kama Paulo sa aminö sa tä sãöka kule.

²²Ai tänö Cristo pata tä pii mi ipii, Teusö anö ĩ a peamapöö! Kamakö hai ĩ pata tä na, ‑Matanata‑ sa kuu kule. ‑Matanata‑ tä kuu pole, ‑Pata täö! A huo kõki solöö!‑ ĩ na ta kuu alu kule.

²³Jesus Cristo pata tänö makö totiapala apati wi, ĩ sa tä pii sisa kule.

²⁴Jesus Cristo ma thapo naio kutenö, kamisanö makö pi ipa sinomo hö̃töoö!