ତୀତୁସ୍କି ନାମେନୁ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍କି ଚିଠି
ଭୂମିକା
ତୀତୁସ୍ ଅଣ୍ଟା ବିନାୟାହୁଦୀ ଖ୍ରୀସ୍ତ୍ ବିଶ୍ୱାସୀ ରାଚାସ୍, ଏକାସ୍ କା ପାଉଲୁସ୍କି ପ୍ରଚାର୍ କାମ୍ନା ନାଲ୍ଖୁନୁ ଆସ୍କି ସାଙ୍ଗେ ଆରୁ ଆସିନ୍ ମଦେତ୍ କାମୁ ରାଚାସ୍। ଖାସ୍ଚେଲା ପାଉଲୁସ୍ ଯୁୱାନ୍ ତୀତୁସ୍କି ନାମେନୁ ଇ ଚିଠିନ୍ ଲେଖ୍ଚ୍କାଦାସ୍। ଏକାସ୍ କା କ୍ରେତେନୁ ରାଚାସ୍। ଆସ୍ ପାଉଲୁସ୍ସିନ୍ ମଦେତ୍ କାମାଲିୟାସ୍। ଆସିନ୍ କ୍ରେତେନୁ ମଣ୍ତ୍ଲୀନ୍ତା ନାଲ୍ଖୁନ୍ ଏରାହଜା କାମାଗେ ଆସାନ୍ ଆମ୍ବା କେର୍କିଚା। ଇ ଚିଠି ମୁନ୍ଟା ମୁଖ୍ୟା ବାରେନୁ ଦାର୍ଶାବାଇ।
ପହ୍ଲେ, ତୀତୁସ୍ସିନ୍ ଇବନ୍ ମନେ କାମ୍ତା କେର୍କିଚିକା ମଣ୍ତ୍ଲୀନ୍ତା ଆଗୁୱାର୍ଘି ଚାଲିଚଲନ୍ ଏସ୍କେ ମାନ୍ନା କାତ୍ଥା, ବିଶେଷ୍କିରି କ୍ରେତେନ୍ତା ଢେର୍ ଆଲାର୍ଘି ଖାରାପ୍ ଚାଲିଚଲନ୍ବନ୍ ଏରିକିରି ଏନ୍ନେ ତେଙ୍ଗାକେର୍କିଚି। ଦୁସ୍ରା, ତୀତୁସ୍ସିନ୍ ଏନ୍ନେ ସାଲାହ୍ ଚିଆ କେର୍କିଚିକା ମଣ୍ତ୍ଲୀନୁ ରାନାବାଲା ଭିନେ-ଭିନେ ଦଲ୍ବନ୍ ଏସ୍କେ ଉପ୍ଦେଶ୍ ଚିଆକୋ, ପାଚ୍ଚକିରିନ୍, ପାଚ୍ଚରିନ୍ (ଏକାର୍ କା ଜାମାବାକେନ୍ ଯୁୱାନ୍ ମାଏକିନିଆଁରିନ୍ ଉପ୍ଦେଶ୍ ଚର୍) ଯୁୱାନ୍ କୁକ୍କ ଆରୁ ଗୁତ୍ତିୟାରିନ୍। ତିସ୍ରା, ଲେଖକସ୍ ତୀତୁସ୍ସିନ୍ ଖ୍ରୀସ୍ତ୍ ବିଶ୍ୱାସୀ ଚାଲିଚଲନ୍ଘି ବାରେନୁ ସାଲାହ୍ ଚିଦାସ୍। ବିଶେଷ୍କିରି ପୁରାପୁରୀ ଶାନ୍ତି ଆରୁ ବନ୍ଧୁ ମାନାଗେ; ଆରୁ ହାଁଣ୍ନା ତୁଫ୍ନା, ଝାଗ୍ଡ଼ାଝାଟି ଆରୁ ମଣ୍ତ୍ଲୀନୁ କାଁଟ୍ଛାଁଟ୍ କାମିକିରି ଭିନେ-ଭିନେ ମାନ୍ନାନ୍ତି ବାଛ୍ରାଗେ।
ରୂପ୍-ରେଖା
ଯୋହାର୍ ୧:୧-୪
ମଣ୍ତ୍ଲୀନ୍ତା ଆଗୁୱା ୧:୫-୧୬
ମଣ୍ତ୍ଲୀନ୍ତା ଭିନେ-ଭିନେ ଦଲ୍ତା ନାଲ୍ଖୁ ୨:୧-୧୫
ଉପ୍ଦେଶ୍ ଆରୁ ଚେତାବନୀ ୩:୧-୧୧
ଆଖ୍ରୀ କାତ୍ଥା ୩:୧୨-୧୫
1ଯୋହାର୍
1ଏନ୍ ପାଉଲୁସ୍ ପ୍ରାଭୁସ୍କି ସେବା କାମ୍ନାବାଲା ଗୁତ୍ତିୟାନ୍, ଆରୁ ଯୀଶୁ ଖ୍ରୀସ୍ତ୍ସ୍କି ଖାସ୍ଚେଲାରିନ୍, ପାର୍ମେଶ୍ୱାର୍ସ୍କି ଚାଜ୍ଜକା ଆଲାର୍ଘି ବିଶ୍ୱାସ୍ବନ୍ ବାଢ଼ାବାଗେ ଆରୁ ଯୀଶୁସ୍କି ସତ୍ତୁ ବଚନ୍ବନ୍ ଆରୁ ଧାର୍ମିକ୍ ଜୀବନ୍ ବିତାବାନାଘି ବାରେନୁ ଶିକ୍ଷା ଚିୟାଗେ ଏଙ୍ଗାନ୍ ତାଇୟା କେର୍କିଚି। 2ପାର୍ମେଶ୍ୱାର୍ସ୍କି ଚାଜ୍ଜକା ଆଲାର୍ ପାର୍ମେଶ୍ୱାର୍ସ୍ଗାନେ ଜାମାବାକେନ୍ ଜୀବନ୍ ବିତାବାଗେ ଆଶ୍ରା କାମ୍ଚ୍କାନାଏ। ଆ ଆଶ୍ରାଘି ଦ୍ୱାର୍ନୁ ବିଶ୍ୱାସ୍ନୁ ଆଘ୍ଲି ବାଢ଼୍ରାଗେ ଏଙ୍ଗାନ୍ ଶିକ୍ଷା ଚିୟାଗେ ତାଇୟା କେର୍କିଚି, ପାର୍ମେଶ୍ୱାର୍ସ୍ ଝୁଟ୍ଟୁ ମା ତେଙ୍ଗ୍ଦାସ୍ ଏନ୍ଦେର୍ଗେକା ଆସ୍ ଦୁନିଆଁନ୍ତା ସୁରୁଘିନ୍ତିନିନ୍ ନାମାନ୍ ପ୍ରତିଜ୍ଞା କାମ୍ଚ୍କାଦାସ୍। 3ଠିକ୍ ସାମାୟନୁ ପାର୍ମେଶ୍ୱାର୍ସ୍ ତାଙ୍ଘାଏ ବଚନ୍ବନ୍ ପ୍ରକଟ୍ କାମ୍ଚାସ୍, ଆ ବଚନ୍ବନ୍ ପ୍ରଚାର୍ କାମାଗେ ଏଙ୍ଗାଗେ ସୋଁପାକେର୍କିଚି ଏନ୍ଦେର୍ଗେକା ନାହ୍ମାଏ ବାଛାବୁ ପାର୍ମେଶ୍ୱାର୍ସ୍ ଏନ୍ନେ କାମାଗେ ଏଙ୍ଗାଗେ ହୁକୁମ୍ ଚିଚ୍ଚକାଦାସ୍।
4ଏନ୍ ତିତୁସ୍କେ ଇ ଚିଠି ଲେଖାଲ୍ଦାନ୍, ସତ୍ତୁନିନ୍ ନିନ୍ ଏଙ୍ଘାଏ ହାଦ୍ଦୁୟ ଲେଖା, ଏନ୍ଦେର୍ଗେକା ନାମ୍ ଅଣ୍ଟା ପାର୍ମେଶ୍ୱାର୍ସିନ୍ ବିଶ୍ୱାସ୍ କାମ୍ଦାତ୍:
ଏନ୍ ବିନ୍ତି କାମାଲ୍ଦାନ୍ କା ବାଙ୍ଗ୍ ପାର୍ମେଶ୍ୱାର୍ସ୍ ଆରୁ ନାହ୍ମାଏ ବାଛାବୁ ଯୀଶୁ ଖ୍ରୀସ୍ତ୍ସ୍ ନିଙ୍ଗାଗେ କ୍ରିପା ଆରୁ ଶାନ୍ତି ଚିନାସ୍।
ତୀତୁସ୍ କ୍ରେତେ ଟାପୁନୁ ରାଇକିରି ନାଲ୍ଖୁ କାମାଲ୍ଦାସ୍
5ଏନ୍ ନିଙ୍ଗାନ୍ ଇଦ୍ଘିଲାଗାନ୍ କ୍ରେତେ ଟାପୁନୁ ଆମ୍ବେଇ ଚିଚ୍ଚକାଚ୍କାନ୍ କା ଏକା ନାଲ୍ଖୁ ବାକି ରାଇ ଆବନ୍ ପୁରା କାମୟ ଆରୁ ଏଙ୍ଘାଏ ଚିଚ୍କା ଆଦେଶ୍ ଅନୁସାର୍ ନିନ୍ ସହର୍-ସହର୍ନୁ କାଇକିରି ମଣ୍ତ୍ଲୀନ୍ତା ଆଗୁୱାରୀନ୍ ଚାଜ୍କେ। 6ନେକାନ୍ ନିନ୍ ଚାଜୟ ଆସ୍ ନିର୍ଦ୍ଦୋଷ୍ ଆରୁ ଆସ୍କି୧:୬ ଆସ୍ ତାଙ୍ଘା ଆଲିଗାନେ ବିଶ୍ୱସ୍ତ ରାନା କାତ୍ଥା ଅଣ୍ଟା ଖାଲି ମାଏକିନିଆଁ ରର୍, ଆସ୍କି ହାଦ୍ଦୁବଚ୍ଚର୍ ବିଶ୍ୱାସୀ ରର୍, ଆରୁ ଆୟାଙ୍ଗ୍ ବାଙ୍ଗ୍ର୍ଘି ହୁକୁମ୍ ମା ମେନାଲ୍ଦାସ୍ ବୁଲି ଆରୁ ଖାରାପ୍ ନାଲ୍ଖୁ କାମିକିରି ଉଜ୍ଜାଲ୍ଦାସ୍ ବୁଲି ଦୁସ୍ରା ଆଲାର୍ ଆବ୍ଡ଼ାର୍ଘି ମିଆଁ ଦୋଷ୍ ମା ଲାଗାବାନା କାତ୍ଥା। 7ମଣ୍ତ୍ଲୀନ୍ତା ଆଗୁୱାର୍ଘି ହେଖ୍ଖାନୁ ପାର୍ମେଶ୍ୱାର୍ସ୍କି ସେବା ସୋଁପାକେର୍କିଚି, ହୁଦ୍ଘିଲାଗାନ୍ ଆବ୍ଡ଼ାର୍ ନିର୍ଦ୍ଦୋଷ୍ ରାନା କାତ୍ଥା, ଘମଣ୍ଡି, ଖୀସାରାନାବାଲା, ମାତ୍ୱାଡ଼୍, ମାର୍ପିଟ୍ କାମ୍ନାବାଲା, ଆରୁ ପାଏସାଘି ବାଗ୍ଗେ ଲୁଭି ମା ରାନା କାତ୍ଥା। 8ଖୁସୀତି ମାଇନ୍ କାମ୍ନାବାଲା, ଭାଲାଇ କାମ୍ନାବାଲା, ବାନେ ବେଭାର୍ କାମ୍ନାବାଲା, ନ୍ୟାୟି, ପାବିତାର୍ ଆରୁ ନିଜ୍କେ କାବୁନୁ ଉଇନାବାଲା ମାନ୍ନା କାତ୍ଥା। 9ଆରୁ ଆସ୍ ବିଶ୍ୱାସ୍ କାମ୍ନାଘି ଲାଇଗ୍ ବଚନ୍ଘି ମିଆଁ ଏକା ବଚନ୍ବନ୍ କା ଆସ୍ ହାକ୍କାଦାସ୍ ଆନ୍ନୁ ମଜ୍ବୁତ୍ ରସ୍ ତାକା ଆଲାରିନ୍ ସତ୍ତୁ ଶିକ୍ଷାଘି ଉପ୍ଦେଶ୍ ଚିୟସ୍ ଆରୁ ବିରୋଧିଜାମାର୍ଘି ଭୁଲ୍ ଏଦିକିରି ଆବ୍ଡ଼ାର୍ଘି ଥୁମ୍ଣାନ୍ ବନ୍ଦ୍ କାମାଅଙ୍ଗସ୍।
ଝୁଟ୍ଟୁ ଗୁରୁ ଜାମାର୍ଘି ବିରୁଦ୍ଧ୍ନୁ ଚେତାବାନୀ
10ଏନ୍ଦେର୍ଗେକା ବହୁତ୍ ଏନ୍ନେ ଆଲାର୍ ରାନାଏ ଏକାର୍ କା ସତ୍ତୁ ଶିକ୍ଷାଘି ବିରୁଦ୍ଧ କାମ୍ନାଏ, ଆବ୍ଡ଼ାର୍ ଫାଲ୍ତୁ କାତ୍ଥା ତେଙ୍ଗିକିରି ଧୋଖା ଚିନାଏ; ବିଶେଷ୍କିରି ଏକା ୟାହୁଦୀ ଆଲାର୍ ପ୍ରାଭୁସିନ୍ ବିଶ୍ୱାସ୍ କାମ୍ନାଏ ଆବ୍ଡ଼ାର୍ ଦୁସ୍ରା ଜାତିୟାରିନ୍ ପ୍ରାଭୁସ୍କି ମିଆଁ ବିଶ୍ୱାସ୍ କାମାଗେ ଖାତ୍ନା କାମ୍ନା ପାଡ଼୍ରବୁଲି ଶିକ୍ଷା ଚିନାଏ। 11ଆବ୍ଡ଼ାରିନ୍ ଚୁପ୍ କାମ୍ତାନା କାତ୍ଥା, ଏନ୍ଦେର୍ଗେକା ଆବ୍ଡ଼ାର୍ ଏକାଦ୍ ଦାର୍କାର୍ ମାଲ୍ଲାଦ୍ ଆବନ୍ ଶିଖାବାନାଏ ଆରୁ ଆବ୍ଡ଼ାର୍ ଖାଲି ପାଏସା କାମାବାଗେ, ଭୁଲ୍ ଶିକ୍ଷା ଚିଇକିରି ଢେର୍ ପରିବାର୍ବନ୍ ବିଶ୍ୱାସ୍ତି ଭାଟ୍କାନାଏ ଚିନାଏ। 12ଆବ୍ଡ଼ାର୍ଘି ଭିତର୍ନୁ ଅଣ୍ଟା ବୁଦ୍ଧିମାନ୍ସ୍ ତେଙ୍କାଦାସ୍ କ୍ରେତେନ୍ତା ଆଲାର୍ଘି ଜାମାବାକେନ୍ ଝୁଟ୍ଟୁ ତେଙ୍ଗ୍ନା ଅଣ୍ଟା ଆଦତ୍ ଆବ୍ଡ଼ାର୍ ଖାରାପ୍ ପଶୁ ଲେଖା ରାନାଏ ଆରୁ କୁଢ଼ି, ଆରୁ ପେଟୁ ରାନାଏ। 13-14ଏଙ୍ଘାଏ ହିସାବ୍ତି ଇ ସାକ୍ଷୀଦ୍ ସତ୍ତୁଦ୍, ହୁଦ୍ଘିଲାଗାନ୍ ନିନ୍ ଆବ୍ଡ଼ାରିନ୍ ଶକତ୍ ଚେତାବାନୀ ଚିଇକିରି ତେଙ୍ଗା କା ୟାହୁଦୀ ଜାମାର୍ଘି ଝୁଟ୍ଟୁ ମନ୍ ଗାଢ଼ଚ୍କା କାହ୍ନୀ ଆରୁ ଝୁଟ୍ଟୁ ଗୁରୁର୍ ଘି ଶିକ୍ଷାନୁ ଧ୍ୟାନ୍ ଆମ୍କେଚିୟା ହାଲେ ନିମ୍ ବିଶ୍ୱାସ୍ନୁ ମଜ୍ବୁତ୍ ରର୍। 15ଏକା ଆଲାର୍ଘି ମନ୍ଦ୍ ଶୁଦ୍ଧ୍ ରାଇ ଆବ୍ଡ଼ାର୍ଗେ ଜାମାଦ୍ ଶୁଦ୍ଧ୍ ରାଇ, ଲେକିନ୍ ନେଖାଏ ମନ୍ ଖାରାପ୍ତି ନିନ୍ଦିୟା କେର୍କିଚି ଆରୁ ଯୀଶୁସ୍କି ମିଆଁ ବିଶ୍ୱାସ୍ ମା କାମ୍ନାଏ ଆବ୍ଡ଼ାର୍ଗେ ଏନ୍ଦେଦ୍ହି ଶୁଦ୍ଧ୍ ମାଲ୍ଲାଦିନ୍, ଏନ୍ଦେର୍ଗେକା ଆବ୍ଡ଼ାର୍ଘି ମନ୍ଘି ଚିନ୍ତା ପାପ୍ତି ନିନ୍ଦିୟା କେର୍କିଚି, ଆରୁ ଆବ୍ଡ଼ାର୍ ଏନ୍ଦ୍ରିନ୍ ଦୋଷ୍ କାମ୍ଚ୍କୁନ୍ହି ଦୋଷୀ ଅନୁଭବ୍ ମା କାମ୍ନାଏ। 16ଝୁଟ୍ଟୁ ଗୁରୁ ଜାମାର୍ ପାର୍ମେଶ୍ୱାର୍ସିନ୍ ଆହ୍ଦାମ୍ବୁଲି ତେଙ୍ଗ୍ନାଏ, ଲେକିନ୍ ତାହ୍ମାଏ ଚାଲିଚଲନ୍ତି ଏକାନ୍ ତେଙ୍ଗ୍ନାଏ ଆଦିନ୍ ଗ୍ରହନ୍ ମା କାମ୍ନାଏ, ଏନ୍ଦେର୍ଗେକା ଆବ୍ଡ଼ାର୍ ଏନ୍ନେ ନାଲ୍ଖୁ କାମ୍ନାଏ କା ଆଲାର୍ ଆବ୍ଡ଼ାର୍ଘି ନାଲ୍ଖୁବନ୍ ହାଁଣ୍ନାଏ ତୁଫ୍ନାଏ ଆରୁ ପାର୍ମେଶ୍ୱାର୍ସ୍କି ଆଦେଶ୍ବନ୍ ମା ମାନ୍ନାଏ ଆରୁ ଆବ୍ଡ଼ାର୍ ଏନ୍ଦେର୍ହି ବାନେ ନାଲ୍ଖୁଘି ଲାଇଗ୍ ମାଲ୍ଲନାଏ।
2ବିଶ୍ୱାସୀ ଜାମାର୍ଘି ଚାଲିଚଲନ୍ ଏସ୍କେ ମାନ୍ନା କାତ୍ଥା
1ଲେକିନ୍ ନିମ୍ ଏନ୍ନେ ଝୁଟ୍ଟୁ ଗୁରୁର୍ ଲେଖା ଆମାମାନା ଲେକିନ୍ ଏକାଦ୍ ସତ୍ତୁ ଉପ୍ଦେଶ୍ ଗାନେ ମେଲ୍ ମହାଁଲ୍କିରୋ ଆଦିନ୍ ଶିଖାବାତେ ରା। 2ପାଚ୍କି ଆଲାରିନ୍ ଶିଖାବାକା ଆବ୍ଡ଼ାର୍ ନିଜ୍କେ କାବୁନୁ ଉଇନାବାଲା ମାନର୍, ଏନ୍ନେ ବେଭାର୍ କାମର୍ କା ଦୁସ୍ରା ଆଲାର୍ ଏରିକିରି ଆବ୍ଡ଼ାର୍ଘି ମାଇନ୍ କାମର୍, ଭଲ୍ମନ୍ଦ ଚିହ୍ନାବାଲା ମାନ୍ନା କାତ୍ଥା ଆରୁ ଆବ୍ଡ଼ାର୍ ବିଶ୍ୱାସ୍ ଆରୁ ବାନେ ହାଖ୍ଖନାନୁ ଆରୁ ଧିରାଜ୍ ଧାର୍ନାନୁ ମଜ୍ବୁତ୍ ରାନା କାତ୍ଥା। 3ଏନ୍ନେନ୍ ପାଚ୍ଚ ଆଲାରିନ୍ ଶିଖାବାକା ଆବ୍ଡ଼ାର୍ଘି ଚାଲିଚଲନ୍ ଦ୍ୱାରା ପାର୍ମେଶ୍ୱାର୍ସ୍କେ ମାଇନ୍ ହାଖ୍ରୋ, ଆବ୍ଡ଼ାର୍ ଚୁଗ୍ଲି କାମ୍ନାବାଲା ଆରୁ ମାତ୍ୱାଡ଼୍ ମା ମାନ୍ନା କାତ୍ଥା, ଲେକିନ୍ ବାନେ କାତ୍ଥା ଶିଖାବୁବାଲା ମାନ୍ନା କାତ୍ଥା। 4-5ଆବ୍ଡ଼ାର୍ ଯୁୱାନ୍ ମାଏକିନିଆଁରିନ୍ ଶିଖାବାତେ ରର୍ କା ନିଜର୍ ଆଲାସିନ୍ ଆରୁ ହାଦ୍ଦୁରିନ୍ ବାନେ ହାଖ୍ଖର୍, ନିଜ୍କେ କାବୁନୁ ଉଇୟର୍, ନିଜର୍ ଆଲାସିନ୍ ଆମ୍ବିକିରି ନେଖାଗାନେହି ସମ୍ୱନ୍ଧ ମା ଉଇନା କାତ୍ଥା, ଆଡ଼୍ପାନ୍ତା ଜାମା ଜିମେଦାର୍ବନ୍ ବାନେକିରି କାମ୍ନାବାଲି, ଦାୟାଲୁ, ଆରୁ ନିଜର୍ ଆଲାସ୍କି ଅଧିନ୍ନୁ ରାନାବାଲି ମାନ୍ନା କାତ୍ଥା ହାଲେ ପାର୍ମେଶ୍ୱାର୍ସ୍କି ବଚନ୍ଘି ନିନ୍ଦା ମା ମାନଦ୍।
6ହନ୍ନେନିନ୍ ଯୁୱାନ୍ କୁକ୍କରିନ୍ ବୁଝାବାକା ନିଜ୍କେ କାବୁନୁ ଉଇୟର୍। 7ଜାମା ନାଲ୍ଖୁନ୍ ନିନ୍ ନିଜେ ବାନେକିରି କାମ୍ତେ ରୟ ହାଲେ ଯୁୱାନ୍ ଆଲାର୍ ନିଙ୍ଗାନ୍ ଏରିକିରି ହନ୍ନେନ୍ ଜୀବନ୍ ବିତାବର୍। ନିନ୍ ପାର୍ମେଶ୍ୱାର୍ସ୍କି ବାରେନୁ ଏନ୍ଦ୍ରିନ୍ ଶିଖାବୟ ଆଦ୍ ଇମାନ୍ଦାର୍ ରୋଦ୍ ଆରୁ ଆଲାର୍ଗେ ଆଦ୍ ଗ୍ରହନ୍ କାମ୍ନାଘି ଲାଇଗ୍ ରୋ। 8ଆରୁ ଏକାଦ୍ ପୁରାପୁରୀ ଠିକ୍ଦ୍ ଆବନ୍ ଶିଖାବାତେ ରା କା ନେଦ୍ହି ଆବନ୍ ଭୁଲ୍ବୁଲି ତେଙ୍ଗା ପଲ୍ଲରିନ୍ ଆରୁ ନେଦ୍ ନାମାନ୍ ବିରୋଧ୍ କାମ୍ନାଏ ଆବ୍ଡ଼ାର୍ ନାହ୍ମା ମିଆଁ ଦୋଷ୍ ଲାଗାବାଗେ ମଉକା ମା ହାଖ୍ଖୀକିରି ଲାଜରର୍କର୍।
9ବିଶ୍ୱାସୀ ଗୁତ୍ତିୟାରିନ୍ ବୁଝାବାକା ଆବ୍ଡ଼ାର୍ ନିଜର୍-ନିଜର୍ ମାଲିକ୍ସ୍କି ଅଧିନ୍ନୁ ରର୍ ଆରୁ ଜାମା ନାଲ୍ଖୁନୁ ମାଲିକ୍ସ୍ସିନ୍ ଖୁସ୍ କାମର୍ ଆରୁ ଯାବାବ୍ ଆମ୍ବର୍ ଉଲ୍ଟା। 10ବାଇମାନ୍ କାମିକିରି ନିଜର୍ଲାଗାନ୍ ଏନ୍ଦେର୍ହି ଆମ୍ବର୍ ଉଇୟା, ଆରୁ ଏନ୍ଦ୍ରିନ୍ ନାଲ୍ଖୁନ୍ କାମର୍ ଆବନ୍ ପୁରା ଇମାନ୍ଦାର୍ତି କାମର୍ ଏସ୍କେ କା ଜାମା ନାଲ୍ଖୁନୁ ନାହ୍ମା ବାଛାବୁ ପାର୍ମେଶ୍ୱାର୍ସ୍କି ବଚନ୍ବନ୍ ଦୁସ୍ରା ଆଲାର୍ ମାଇନ୍ ଚିଅର୍।
ପାର୍ମେଶ୍ୱାର୍ସ୍ ଆଲାରିନ୍ ପାପ୍ସ୍ତି ବାଛାବାଲ୍ଦାସ୍
11ଏନ୍ଦେର୍ଗେକା ପାର୍ମେଶ୍ୱାର୍ସ୍ ଜାମା ଆଲାରିନ୍ ବାଛାବାଗେ ତାଙ୍ଘାଏ ଦାୟାବନ୍ ପ୍ରକଟ୍ କାମ୍ଚ୍କାଦାସ୍। 12ପାର୍ମେଶ୍ୱାର୍ସ୍କି କ୍ରିପା ନାମାନ୍ ଶିଖାବାଇ କା ପାର୍ମେଶ୍ୱାର୍ସିନ୍ ମାଇନ୍ ମା କାମିକିରି ଦୁନିଆଁନ୍ତା ଅଭିଲାଷା ହାଖ୍ଖାଗେ ଏକାନ୍ ବାଗ୍ଗେ ଇଚ୍ଛା କାମ୍ଚ୍କାଦାତ୍ ଆବନ୍ ଆମ୍ବନା କାତ୍ଥା ଆରୁ ଇ ଦୁନିଆଁନୁ ନିଜ୍କେ କାବୁନୁ ଉଇନା ଆରୁ ଧାର୍ମିକ୍ ଭକ୍ତିତି ଜୀବନ୍ ବିତାବାନା। 13ଆରୁ ନାମ୍ ଆଶୀର୍ବାଦ୍ ହାଖ୍ଖନାଘି ଆଶ୍ରା କାମିକିରି ନାହ୍ମା ମାହାନ୍ ପାର୍ମେଶ୍ୱାର୍ସ୍ ଆରୁ ନାହ୍ମା ବାଛାବୁ ଯୀଶୁ ଖ୍ରୀସ୍ତ୍କି ଶକ୍ତିତି ଦୁନିଆଁନୁ ବାର୍ନାଘି ପାବୁ ଏର୍ତେ ରତ୍। 14ଯୀଶୁ ଖ୍ରୀସ୍ତ୍ସ୍ ନିଜର୍ ଇଚ୍ଛାତି ନାହ୍ମାଲାଗାନ୍ ଜୀଆ ଚିଚ୍ଚାସ୍ ତାକା ନାମାନ୍ ଜାମା ରକମ୍ଘି ପାପ୍ତି ବାଛାବସ୍ ଆରୁ ନାମାନ୍ ଅଣ୍ଟା ଏନ୍ନେ ଆଲ୍ କାମସ୍ ଏକାଦ୍ ଶୁଦ୍ଧ୍, ଏକାର୍ ତାଙ୍ଘା ନିଜର୍ ମାନିକିରି ବାନେ-ବାନେ ନାଲ୍ଖୁ କାମାଗେ ବାଗ୍ଗେ ଇଚ୍ଛା କାମର୍।
15ନିନ୍ ପାର୍ମେଶ୍ୱାର୍ସ୍କି ଚାଜ୍ଜକା ଆଲାଏ ହୁଦ୍ଘିଲାଗାନ୍ ପୁରା ହକ୍ତି ତେଙ୍ଗା ଆରୁ ବୁଝାବା ଆରୁ ଶିଖାବାତେ ରା, ତାକା ନେଦ୍ହି ନିଙ୍ଗାନ୍ ତୁଚ୍ଛ ମା କାମର୍।
3ଖ୍ରୀସ୍ତ୍ ବିଶ୍ୱାସୀର୍ଘି ଚାଲିଚଲନ୍
1ବିଶ୍ୱାସୀ ଆଲାରିନ୍ ମନେ କାମ୍ତା କା ଆବ୍ଡ଼ାର୍, ଏକାର୍ ନିହ୍ମା ମିଆଁ ଶାସନ୍ କାମ୍ନାଏ ଆବ୍ଡ଼ାର୍ଘି ନିୟମ୍ବନ୍ ମାନର୍, ଆରୁ ଜାମା ପ୍ରକାର୍ଘି ବାନେ-ବାନେ ନାଲ୍ଖୁ କାମାଗେ ତିୟାର୍ ରର୍। 2ନେକାନ୍ହି ଝୁଟ୍ଟୁ ତେଙ୍ଗିକିରି ଦୋଷ୍ ଆମ୍କେ ଲାଗାବା, ଝାଗ୍ଡ଼ାଲୁ ଆମ୍କେମାନା, ଲେକିନ୍ ନରମ୍ ମାନିକିରି ରାକେ, ଜାମା ଆଲାର୍ ଗାନେ ବାନେକିରି ରାକେ। 3ଏନ୍ଦେର୍ଗେକା ଏମ୍ହି ପାର୍ମେଶ୍ୱାର୍ସିନ୍ ଆହ୍ନାଘି ଆଘ୍ଲି ନିର୍ବୁଦ୍ଧିଆ ରାଚ୍କାମ୍, ଆଦେଶ୍ ମା ମାନ୍ନାବାଲା ରାଚ୍କାମ୍, ଭାଟ୍କାରାଚ୍କାମ୍ କେର୍କାଚ୍କାମ୍, ଭିନେ-ଭିନେ ରକମ୍ଘି ଭୁଲ୍ନୁ ଖାତ୍ର୍କାଚ୍କାମ୍ ଆରୁ ମୋହମାୟାନୁ ଫାସ୍ର୍କାମ୍ କେର୍କାଚ୍କାମ୍, ବାଦ୍ଲା ହୁଆଗେ ଚିନ୍ତା କାମାଲ୍କାମ୍, ଆରୁ ହିସିଙ୍ଗା କାମ୍ନାନୁ ଜୀବନ୍ ବିତାବାଲ୍କାମ୍ ଆରୁ ଦୁସ୍ରାର୍ ଏମାନ୍ ହାଁଣାଲିୟାର୍ ଆରୁ ଏମ୍ହି ଦୁସ୍ରାରିନ୍ ହାଣାଲ୍କାମ୍। 4ଲେକିନ୍ ନାହ୍ମା ବାଛାବୁ ପାର୍ମେଶ୍ୱାର୍ସ୍ ଯୀଶୁ ଖ୍ରୀସ୍ତ୍ସିନ୍ ତାଇୟିକିରି ଜାମା ମୁନୁଷ୍ ଜାତିରିନ୍ ଦାୟା ଆରୁ ବାନେ ହାଖ୍ଖନାବନ୍ ଏଦିୟାସ୍। 5ଆସ୍ ନାମାନ୍ ବାଛାବାଚାସ୍; ନାହ୍ମା ବାନେ ନାଲ୍ଖୁଘି ଲାଗାନ୍ ମାଲ୍ଲା ଲେକିନ୍ ପାର୍ମେଶ୍ୱାର୍ସ୍ ନାହ୍ମା ମିଆଁ ଦାୟା କାମିକିରି ନାହ୍ମା ଜାମା ପାପ୍ବନ୍ ନଣେଇଚାସ୍, ଆରୁ ପାବିତାର୍ ଆତ୍ମାଘି ଦ୍ୱାର୍ନୁ ପୁନା ଜୀବନ୍ ଆରୁ ପୁନା ଜନମ୍ ଚିଚ୍ଚାସ୍। 6ପାର୍ମେଶ୍ୱାର୍ସ୍ ନାହ୍ମା ବାଛାବୁ ଯୀଶୁ ଖ୍ରୀସ୍ତ୍ସ୍କି ଦ୍ୱାର୍ନୁ ଢେର୍ବାଗ୍ଗେ ପାବିତାର୍ ଆତ୍ମା ନାମାଗେ ଖୁଲାମନ୍ତି ଚିଚ୍ଚାସ୍। 7ଏସ୍କେ ନାମ୍ ତାଙ୍ଘା କ୍ରିପାତି ନିର୍ଦ୍ଦୋଷ୍ ଗନ୍ତି ମାନିକିରି ଆରୁ ଭାର୍ଷା ଉଇକିରି ସବୁଦିନ୍ତା ଜୀବନ୍ଘି ହକ୍ଦାର୍ ମାନା ଅଙ୍ଗତ୍।
8ଇ କାତ୍ଥାଦ୍ ସତ୍ତୁଦ୍ ଆରୁ ଏନ୍ ଚାହାଁଲ୍ଦାନ୍ କା ନିନ୍ ଇଦ୍ଘି ବାରେନୁ ଯୋର୍ ଚିଇକିରି ତେଙ୍ଗା ଏନ୍ଦେର୍ଗେକା ନେଦ୍ ପାର୍ମେଶ୍ୱାର୍ସ୍ସିନ୍ ବିଶ୍ୱାସ୍ କାମ୍ନାଏ, ଆବ୍ଡ଼ାର୍ ବାନେ-ବାନେ ନାଲ୍ଖୁ କାମାଗେ ଧ୍ୟାନ୍ ଉଇୟର୍, ଇ କାତ୍ଥାଦ୍ ବାନେଦ୍ ଆରୁ ଜାମା ଆଲାର୍ଘି ଲାଗାନ୍ ଫାଏଦାଦ୍। 9ଲେକିନ୍ ବେମତ୍ଲବ୍ଘି ଝାଗ୍ଡ଼ା ଆରୁ ବାଉଁଶାର୍ଘି ଝାଗ୍ଡ଼ାସ୍ତି ଗେଚ୍ଛା ରା ଆରୁ ୟାହୁଦୀ ଜାମାର୍ଘି ନିୟମ୍ଘି ବାରେନୁ ବିରୋଧ୍ ଆରୁ ଝାଗ୍ଡ଼ା କାମ୍ନାସ୍ତି ବାଛ୍ରିକିରି ରା। ଏନ୍ଦେର୍ଗେକା ଇ ବେମତ୍ଲବ୍ କାତ୍ଥାଘି ଏନ୍ଦେର୍ହି ଫାଏଦା ମାଲ୍ଲାଦିନ୍ ଆରୁ ଇଦ୍ ବେକାର୍ଦ୍। 10ଏକା ଆଲାସ୍ ମଣ୍ତ୍ଲୀନ୍ତା ଆଲାର୍ ଗାନେ କାଁଟ୍ଛାଁଟ୍ କାମିକିରି ଆଲାରିନ୍ ଭାଗ୍ କାମ୍ଦାସ୍ଚିଦାସ୍ ଆସିନ୍ ଅହନ୍ ଦୁଇ ଥର୍ ବୁଝାବା, ହାଲେହି ଯଦି ଆସ୍ ମା ବୁଝ୍ରାଲ୍ଦାସ୍ ତା ଆସ୍କି ମିଆଁ ସାମାୟ ବାର୍ବାଦ୍ ଆମା କାମା ଆରୁ ବିଶ୍ୱାସୀ ଆଲାର୍ଘି ମିଆଁ ଆସ୍କି ଆସାର୍ ଖାତ୍ରାଗେ ଆମ୍କେ ଚିଆ। 11ଇଦିନ୍ ନିନ୍ ଆହ୍ଦାଏକା ଏନ୍ନେ ଆଲାସ୍ ସତ୍ତୁ ପାବୁତି ଭାଟ୍କାରାଚାସ୍ କେର୍କାଦାସ୍, ଆରୁ ପାପ୍ କାମିକିରି ନିଜ୍କେନିଜ୍ ଦୋଷୀ ଠାହ୍ରାତେ ରାଦାସ୍।
ଆଖ୍ରୀ ଶିକ୍ଷା ଆରୁ ଯୋହାର୍
12ଯେତ୍କବାକେନ୍ ଏନ୍ ନିଙ୍ଘାସାନ୍ ଆର୍ତ୍ତେମାସ୍ ଚାହେ ତୁଖିକୁସ୍ସିନ୍ ତାଇୟନ୍ ତା ଏଙ୍ଘାସାନ୍ ନିକୁପୁଲିସ୍ ସହର୍ ବାରାଗେ ଏସ୍କିନ୍ ହାଲେହି କୋଶିଷ୍ କାମ୍କେ, ଏନ୍ଦେର୍ଗେକା ଏନ୍ ଆସାନ୍ ପାଇଁୟା ଉଲ୍ଲା ବିତାବାଗେ ସୋଚ୍କାଦାନ୍। 13ଯେନାସ୍ ଓକିଲ୍ ଆରୁ ଆପଲ୍ଲସ୍ ଜାମାର୍ଘି କାନା ପାବୁଘି ଲାଗାନ୍ ଯେତ୍କ ମଦେତ୍ କାମା ଅଙ୍ଗାଲ୍ଦାଏ କାମା ଆରୁ ଏରାକା ଆବ୍ଡ଼ାର୍ଗେ ଏନ୍ଦ୍ରିନ୍ ଜିନିଷ୍ଘି ଘାଟି ମା ମାନୋ। 14ତୀତୁସ୍ ନିନ୍ କ୍ରେତେ ଟାପୁନ୍ତା ଜାମା ବିଶ୍ୱାସୀ ଆଲାରିନ୍ ଶିଖାବାକା ଆବ୍ଡ଼ାର୍ ବାନେ-ବାନେ ନାଲ୍ଖୁ କାମ୍ନାନୁ ଲାକ୍କା ରାନାନ୍ ଶିଖ୍ରର୍ ତାକା ଆବ୍ଡ଼ାର୍ଘି ନାଲ୍ଖୁଘି ଦ୍ୱାର୍ନୁ ଦୁସ୍ରାର୍ଗେ ଫାଏଦା ମାନଦ୍।
15ଏଙ୍ଘା ଜାମା ସାଙ୍ଗେର୍ ନିଙ୍ଗାନ୍ ଯୋହାର୍ ତେଙ୍କାନାଏ, ଏକା ବିଶ୍ୱାସୀ ଆଲାର୍ ନାମାନ୍ ବାନେ ହାଖ୍ଖନାଏ ଆବ୍ଡ଼ାରିନ୍ ଯୋହାର୍।
ଏନ୍ ବିନ୍ତି କାମାଲ୍ଦାନ୍ କା ପାର୍ମେଶ୍ୱାର୍ସ୍ ନିହ୍ମା ମିଆଁ ଜାମାବାକେନ୍ ଦାୟା କାମ୍ନାସ୍।