ରୋମୀ

ରୋମୀୟାର୍‌ଘି ନାମେନୁ ଯୀଶୁ ଖ୍ରୀସ୍ତ୍‌କି ଖାସ୍‌ଚେଲା ପାଉଲୁସ୍‌କି ଚିଠି

ବହିଘି ପରିଚୟ

ପାଉଲୁସ୍ ସିଲିସିଆ ରାଜୀଘି ତାର୍‌ସୁସ୍ ସହର୍‌ନୁ ଜନମ୍ ମାନ୍‌ଚ୍‌କାଚାସ୍। ଆସ୍ ବେଞ୍ଜାମିନ୍‌ସ୍‌କି ବାଁଉଶାନ୍ତା ରାଚାସ୍। ଆସ୍‌କି ପରିବାର୍ ଫାରିସୀ ରାଚାର୍। ପାଉଲୁସ୍‌କି ପରିବାର୍ ମୁଶାସ୍‌କି ନିୟମ୍‌ବନ୍ ପୁରା ମାନାଲିୟାର୍। ଶାଉଲ୍‌ସ୍ ୧୩ ବଛର୍‌ନୁ ପାଲେଷ୍ଟାଇନ୍ କେରାସ୍। ଆସ୍ ଗାମାଲିଏଲ୍ ଗୁରୁସ୍‌ତି ୟାହୁଦୀ ଜାମାର୍‌ଘି ଇତିହାସ୍, (ଆଘ୍‌ଲି ଯୁଗ୍‌ତା କାତ୍‌ଥା) ଗୀତୁ ସଂହିତା ଆରୁ ନାବୀଜାମାର୍‌ଘି ନାଲ୍‌ଖୁଘି ବାରେ ଶିଖ୍‌ରାସ୍। ଶାଉଲ୍‌ସ୍ ଖ୍ରୀସ୍ତ୍ ବିଶ୍ୱାସୀ ଜାମାରିନ୍ ସାତାବାଲିଆସ୍। ଆସ୍ ଦାମାସ୍‌କସ୍‌ତି ବିଶ୍ୱାସୀ ଜାମାରିନ୍ ହିଁଇକିରି ଯେରୁଶାଲେମ୍‌ଗେ ଅନ୍ଦ୍ରାଗେ କାଲିୟାସ୍। ଯେତ୍‌କବାକେନ୍ ଆସ୍ ଦାମାସ୍‌କସ୍ ସହର୍‌ଘି ଚାହା ଆଣସାଲିୟାସ୍, ହତ୍‌କବାକେନ୍ ପ୍ରାଭୁସ୍ ଆସ୍‌କେ ଦର୍ଶନ୍ ଚିଚ୍ଚାସ୍ ଆରୁ ଆସ୍ ପ୍ରାଭୁସିନ୍ ଗ୍ରହନ୍ କାମ୍‌ଚାସ୍। ପାଉଲୁସ୍ ଲାଗ୍‌ଭାଗ୍ ୫୫-୫୬ ନୁ ରୋମ୍‌ତା ଖ୍ରୀସ୍ତ୍ ବିଶ୍ୱାସୀର୍‌ଗେ ନିଜର୍ ପରିଚୟ ଚିୟାଗେ ଇ ଚିଠିନ୍ ଲେଖ୍‌ଚ୍‌କାଚାସ୍। ଏନ୍ଦେର୍‌ଗେକା ରୋମ୍‌ତି ଅଥ୍‌ରେଇ ଚିଚ୍‌କା ୟାହୁଦୀ ଖ୍ରୀସ୍ତ୍ ବିଶ୍ୱାସୀର୍ ହୁବାକେନ୍ ରୋମ୍‌ଗେ କିର୍‌କାଚାର୍ ଆରୁ ପୁନା ଖ୍ରୀସ୍ତ୍ ବିଶ୍ୱାସୀ ବିନାୟାହୁଦୀର୍ ପାଉଲୁସ୍‌ସିନ୍ ବାଲ୍ଲକାଚାର୍।

ରୋମ୍‌ତା ମଣ୍ତ୍‌ଲୀନ୍ତା ଆଲାରିନ୍ ପାଉଲୁସ୍ ତାଙ୍ଘା ଯୋହାର୍ ଆରୁ ତାଙ୍ଘା ଲାଗାନ୍ ବିନ୍ତି କାମାଗେ ତେଙ୍ଗ୍‌ଦାସ୍। ଇସ୍ରାଏଲ୍ ଜାମାର୍‌ଘି ପୁର୍‌ଖା ଆବ୍ରାହାମ୍‌ସ୍‌କି ବିଶ୍ୱାସ୍, ପାର୍‌ମେଶ୍ୱାର୍‌ସ୍‌କି ନଜର୍‌ନୁ ଗ୍ରହନ୍ ଲାଇଗ୍ ମାନ୍‌ଚା, ତା ପାର୍‌ମେଶ୍ୱାର୍‌ସ୍ ଆସ୍‌କେ କାତ୍‌ଥା ଚିଚ୍ଚାସ୍, ଆରୁ ଇଦ୍ ସୁସାମାଚାର୍‌ଘି ମୁଖ୍ୟା ବିଷୟ ବୁଲି ପାଉଲୁସ୍ ଇ ଚିଠିନୁ ତେଙ୍ଗ୍‌ଦାସ୍। ୪:୧୩ ଆନ୍ତିନ୍ ମୁଶାସ୍‌କି ଚିଚ୍‌କା ନିୟମ୍‌ନୁ ପାର୍‌ମେଶ୍ୱାର୍‌ସ୍‌କି ଆଲାର୍‌ଘି ପାପ୍ ଛେମାଲାଗାନ୍ ଯୀଶୁ ଖ୍ରୀସ୍ତ୍‌ସିନ୍ ତାଇୟାସ୍। ଏସ୍‌କେ କା ନେଦିନ୍ ଯୀଶୁ ଖ୍ରୀସ୍ତ୍‌କି ମିଆଁ ବିଶ୍ୱାସ୍ କାମ୍‌ଚ୍‌କୁନ୍ ପାର୍‌ମେଶ୍ୱାର୍‌ସ୍‌କି ହାଦ୍ଦୁବଚ୍ଚର୍ ବୁଲି ଆହ୍‌ତାରର୍। ଏକାଦ୍ କା ନିୟମ୍‌ତି ମାଲ୍ଲା ମାନୁଦ୍। ନିୟମ୍ ମାନ୍ନାଦ୍ ବେକାର୍ ଆରୁ ନିୟମ୍ ମାନୁର୍ ପାର୍‌ମେଶ୍ୱର୍‌ସ୍‌କି ହାଦ୍ଦୁବଚ୍ଚ ମାଲ୍‌ନାଏ। ଲେକିନ୍ ପାଉଲୁସ୍ ତେଙ୍ଗ୍‌ଦାସ୍ ଯୀଶୁ ଖ୍ରୀସ୍ତ୍‌ସିନ୍ ବିଶ୍ୱାସ୍ କାମୁ ଜାମା ଆଲାର୍ ପାର୍‌ମେଶ୍ୱାର୍‌ସ୍‌କି ହାଦ୍ଦୁବଚ୍ଚର୍।

ପୁରା ମୁନୁଷ୍ ଜାତିୟାର୍, ୟାହୁଦୀ ଆରୁ ବିନାୟାହୁଦୀ ପାର୍‌ମେଶ୍ୱାର୍‌ସ୍‌ଗାନେ ମେଲ୍‌ମିଲାପ୍ କାମ୍‌ନାକାତ୍‌ଥା। ଏନ୍ଦେର୍‌ଗେକା ଜାମାର୍ ପାପ୍‌ଘି ଅଧିନ୍‌ନୁ ରାନାଏ। ଯୀଶୁ ଖ୍ରୀସ୍ତ୍‌ସିନ୍ ବିଶ୍ୱାସ୍ କାମ୍‌ନାଘି ଦ୍ୱାର୍‌ନୁ ଆଲାର୍‌ଘି ପାର୍‌ମେଶ୍ୱାର୍‌ସ୍‌ଗାନେ ମେଲ୍‌ମିଲାପ୍ ମାନିଦ୍। ଆରୁ ପାର୍‌ମେଶ୍ୱାର୍‌ସ୍‌କି ଆତ୍ମାଦ୍ ପାପ୍ ଆରୁ ମରନ୍‌ତି ଆବ୍ଡ଼ାରିନ୍ ଆଜାଦ୍ କାମିଚିଇଦ୍। ୟାହୁଦୀ ଜାମାର୍‌ଘି ଦ୍ୱାର୍‌ନୁ ଯୀଶୁସିନ୍ ଅସ୍ଵୀକାର୍ କାମ୍‌ନାଦ୍‌ହି ପାର୍‌ମେଶ୍ୱାରସ୍‌କି ଯୋଜ୍‌ନା ଘି ଅଣ୍ଟା ଭାଗ୍‌ଦ୍‌। କା ଜାମା ମୁନୁଷ୍ ଜାତି ଆରୁ ଯୀଶୁ ଖ୍ରୀସ୍ତ୍‌କି ଦ୍ୱାର୍‌ନୁ ପାର୍‌ମେଶ୍ୱାରସ୍‌କି ଦାୟାନୁ ଅନ୍ଦ୍ରାଗେ ବାନାବା କେର୍‌କିଚି। ଆରୁ ୟାହୁଦୀର୍ ସବୁଦିନ୍ ଯୀଶୁସିନ୍ ମାନା ମା କାମ୍‌ନାଏ। ଆଖ୍‌ରୀନୁ ପାଉଲୁସ୍ ଲେଖ୍‌ଦାସ୍ କା ବିଶ୍ୱାସୀ ଜୀବନ୍ ଏସ୍‌କେ ବିତାବାନା କାତ୍‌ଥା। ଆରୁ ଇ ଚିଠିଘି ଆଖ୍‌ରୀନୁ ପାଉଲୁସ୍ ସାଲାହ୍ ଚିଇକିରି ଆରୁ ପାର୍‌ମେଶ୍ୱାର୍‌ସ୍‌କି ସ୍ତୁତି ଗାନେ କାମ୍‌ଦାସ୍।

ରୂପ୍-ରେଖା

ଯୋହାର୍ ଆରୁ ସୁରୁ କାତ୍‌ଥା ୧:୧-୧୭

ମୁନୁଷ୍ ଜାତିୟାର୍‌ଘି ପାପ୍‌ତି ବାଛ୍‌ର୍‌ନାଘି ଦାର୍‌କାର୍ ୧:୧୮—୩:୨୦

ପାପ୍‌ତି ବାଛ୍‌ର୍‌ନାଘି ପାର୍‌ମେଶ୍ୱାର୍‌ସ୍‌କି ପାବୁ ୩:୨୧—୪:୨୫

ଖ୍ରୀସ୍ତ୍‌କିନୁ ପୁନା ଜୀବନ୍ ୫:୧—୮:୩୯

ପାର୍‌ମେଶ୍ୱାର୍‌ସ୍‌କି ଯୋଜ୍‌ନାନୁ ଇସ୍ରାଏଲ୍ ୯:୧—୧୧:୩୬

ଖ୍ରୀସ୍ତ୍ ବିଶ୍ୱାସୀର୍‌ଘି ଚାଲିଚଲନ୍ ୧୨:୧—୧୫:୧୩

ଆଖ୍‌ରୀ କାତ୍‌ଥା ଆରୁ ଯୋହାର୍ ୧୫:୧୪—୧୬:୨୭

ଖାସ୍‌ଚେଲା ପାଉଲୁସ୍‌କି ଯୋହାର୍

¹ପାଉଲୁସ୍‌କି ତାର୍‌ତି, ଏକାସ୍ ଯୀଶୁ ଖ୍ରୀସ୍ତ୍‌କି ଗୁତ୍ତିୟାସ୍, ଆରୁ ଚେଲା ମାନାଗେଲାଗାନ୍ ମେହାଁକେର୍‌କିଚି, ଆରୁ ପାର୍‌ମେଶ୍ୱାର୍‌ସ୍‌କି ଆ ସୁସାମାଚାର୍‌ଘି ଲାଗାନ୍ ଭିନେ କାମାକେରା। ²ଏସ୍‌କେ ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ, ପାର୍‌ମେଶ୍ୱାର୍‌ସ୍ ବହୁତ୍ ଆଘ୍‌ଲି ନିଜର୍ ନାବୀର୍‌ଘି ଦ୍ୱାର୍‌ନୁ ଇ ସୁସାମାଚାର୍‌ଘି କାତ୍‌ଥା କାମ୍‌ଚ୍‌କାଚାସ୍। ³ଇ ସୁସାମାଚାର୍ ପାର୍‌ମେଶ୍ୱାର୍‌ସ୍‌କି ହାଦ୍ଦୁ, ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍‌କି ବାରେନୁ ରାଇ ଏକାସ୍ ଶରୀର୍‌ଘି ରୂପ୍‌ତି ତା ଦାଉଦ୍‌ସ୍‌କି ବାଉଁଶାନ୍ତି ଜନମ୍ ମାନ୍‌ଚାସ୍। ⁴ଆସ୍ ମୁନୁଷ୍‌ଘି ରୂପ୍‌ନୁ ଦାଉଦ୍‌ସ୍‌କି ବାଉଁଶାନୁ ଜନମ୍ ମାନ୍‌ଚାସ୍, ଆରୁ କେଚ୍ଚକାସ୍ତି ଉଜ୍ଜନାଘି ଲାଗାନ୍ ପାବିତାର୍ ଆତ୍ମାଘି ଦ୍ୱାର୍‌ନୁ ଶକ୍ତିଘି ସାଙ୍ଗେନ୍ ପାର୍‌ମେଶ୍ୱାର୍‌ସ୍‌କି ହାଦ୍ଦୁ ଠାହ୍‌ରାରାଚାସ୍।

⁵ଇ ଯୀଶୁ ଖ୍ରୀସ୍ତ୍‌କି ଦ୍ୱାର୍‌ନୁ ଏଙ୍ଗାଗେ କ୍ରିପା ଆରୁ ଅଣ୍ଟା ଖାସ୍‌ଚେଲା ମାନାଗେ ବିଶେଷ୍ ହକ୍ ହାଖ୍ଖର୍‌କିଚି କା ଏନ୍ ଆସ୍‌କି ନାମେନୁ ଜାମା ଆ ବିନାୟାହୁଦୀର୍‌ଘି ମାଝାନୁ ପ୍ରଚାର୍ କାମନ୍ ତାକା ଆବ୍ଡ଼ାର୍ ବିଶ୍ୱାସ୍ କାମିକିରି ଆସିନ୍ ମାନ୍ନାର୍। ⁶ଆ ବିନାୟାହୁଦୀର୍‌ଘିସ୍ତି ନିମାନ୍‌ହି ଯୀଶୁ ଖ୍ରୀସ୍ତ୍‌କି ନିଜର୍ ଆଲ୍ ମାନାଗେ ମେହାଁକେର୍‌କାରାଇ।

⁷ଏନ୍ ଆ ଜାମା ଆଲାର୍‌ଘି ନାମେନୁ ଚିଠି ଲେଖାଲ୍‌ଦାନ୍ ଏକାର୍ କା ରୋମ୍‌ନୁ ପାର୍‌ମେଶ୍ୱାର୍‌ସିନ୍ ବାନେ ହାଖ୍ଖନାଏ ଆରୁ ଏକାରିନ୍ ପାବିତାର୍ ଆଲ୍ ମାନାଗେ ମେହ୍‌କା ରାଇ।

ନାହ୍ମା ବାଙ୍ଗ୍ ପାର୍‌ମେଶ୍ୱାର୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍‌କି ତାର୍‌ତି ନିମାଗେ କ୍ରିପା ଆରୁ ଶାନ୍ତି ହାଖ୍ଖର୍‌ତେ ରାନାଦ୍।

ପାଉଲୁସ୍ ରୋମ୍ ସହର୍ ବାର୍‌ନାଘି ଲାଗାନ୍ ଇଚ୍ଛା କାମାଲ୍‌ଦାସ୍

⁸ଦୁନିଆଁନୁ ନିହ୍ମା ଜାମାର୍‌ଘି ବିଶ୍ୱାସ୍‌ଘି ଚାର୍‌ଚା ଫାଏଲାରାଚା କେର୍‌କିଚି, ହୁଦ୍‌ଘିଲାଗାନ୍ ଜାମାର୍‌ଘିନ୍ତି ପହ୍‌ଲେ ଏନ୍ ନିହ୍ମା ଜାମାର୍‌ଘି ଲାଗାନ୍ ଯୀଶୁ ଖ୍ରୀସ୍ତ୍‌କି ଦ୍ୱାର୍‌ନୁ ଏଙ୍ଘା ପାର୍‌ମେଶ୍ୱାର୍‌ସିନ୍ ଧାନ୍ୟାବାଦ୍ ଚିଦାନ୍, ⁹ଏକା ପାର୍‌ମେଶ୍ୱାର୍‌ସ୍‌କି ସେବାନୁ ଆସ୍‌କି ହାଦ୍ଦୁସ୍‌କି ସୁସାମାଚାର୍‌ଘି ଦ୍ୱାର୍‌ନୁ ପୁରାପୁରୀ ଜୀଆତି କାମ୍‌ଦାନ୍, ପାର୍‌ମେଶ୍ୱାର୍‌ସ୍ ଏଙ୍ଘା ସାକ୍ଷୀସ୍ କା ଏନ୍ ଏଙ୍ଘା ନିଜର୍ ବିନ୍ତିନୁ ନିମାରିନ୍ ଜାମାବାକେନ୍ ମନେ କାମ୍‌ଦାନ୍। ¹⁰ଆରୁ ଏନ୍ ଏଙ୍ଘା ବିନ୍ତିନୁ ଜାମାବାକେନ୍ ଆର୍‌ଜୀ କାମ୍‌ଦାନ୍ କା ପାର୍‌ମେଶ୍ୱାରସ୍‌କି ଇଚ୍ଛା ମାନ୍‌ଚ୍‌କୁନ୍ ଏସ୍‌କିନ୍‌ଭି ନିହ୍ମାସାନ୍ ବାରାଗେ ମଉକା ହାଖ୍ଖର୍‌ନାଦ୍। ¹¹ନିମାଗେ ପାର୍‌ମେଶ୍ୱାର୍‌ସ୍‌କି ଅଣ୍ଟା ବାର୍‌ଦାନ୍ ଚନ୍ ଏସ୍‌କେ କା ନିମ୍ ଆତ୍ମିକ୍ ରୂପ୍‌ନୁ ମଜ୍‌ବୁତ୍ ମାନାଅଙ୍ଗର୍ ହୁଦ୍‌ଘିଲାଗାନ୍ ଏନ୍ ନିହ୍ମାଗାନେ ଭେଁଟ୍ ମାନାଗେ ବହୁତ୍ ଇଚ୍ଛା କାମ୍‌ଦାନ୍। ¹²ଏଙ୍ଗା ତେଙ୍ଗ୍‌ନା କାତ୍‌ଥା କା ଏନ୍ ଚାହ୍ଁଦାନ୍ କା ଯେତ୍‌କବାକେନ୍ ନିହ୍ମାସାନ୍ ରନ୍ ଏନ୍ ନିହ୍ମା ବିଶ୍ୱାସ୍‌ତି ଆରୁ ନିମ୍ ଏଙ୍ଘା ବିଶ୍ୱାସ୍‌ତି ଦିଲାସା ହାଖ୍ଖର୍। ¹³ହେ ଭାଇ ବୁହୁଣୀଜାମାରୋ, ଏନ୍ ଚାହ୍ଁଦାନ୍ କା ନିମ୍ ଆହା କା ନିହ୍ମାସାନ୍ ଧିୟାନ୍-ଧିୟାନ୍ ବାରାଗେ ଚାହଁଚ୍‌କାନ୍ ଏସ୍‌କେ ଏନ୍ ଦୁସ୍‌ରା ବିନାୟାହୁଦୀରିନ୍ ଯୀଶୁ ଖ୍ରୀସ୍ତ୍‌କିନୁ ଅନ୍ଦର୍‌କାନ୍ ଆରୁ ବିଶ୍ୱାସ୍‌ନୁ ମଜ୍‌ବୁତ୍ କାମ୍‌ଚ୍‌କାନ୍ ହନ୍ନେନ୍ ନିମାନ୍‌ହି ଯୀଶୁ ଖ୍ରୀସ୍ତ୍‌ନୁ ଅନ୍ଦରନ୍ ଆରୁ ବିଶ୍ୱାସ୍‌ନୁ ମଜ୍‌ବୁତ୍ କାମନ୍, ଲେକିନ୍ ଆକ୍କୁନ୍‌ତକ୍ ବାଧା ବାର୍‌ତେ ରାଇଦ୍। ¹⁴ଏଙ୍ଘା ମିଆଁ ୟାହୁଦୀର୍ ଆରୁ ବିନାୟାହୁଦୀର୍‌ଘି, ପାଢ଼୍‌ଚ୍‌କା ଆରୁ ମା ପାଢ଼୍‌ଚ୍‌କା, ଜାମାର୍‌ଘି ଦାୟିନ୍। ¹⁵ହୁଦ୍‌ଘିଲାଗାନ୍ ଏନ୍ ନିମାନ୍ ରୋମ୍‌ତା ବାସିନ୍ଦାରିନ୍‌ହି ସୁସାମାଚାର୍‌ଘି ଉପ୍‌ଦେଶ୍ ଶୁଣାବାଗେ ରିଝ୍‌ର୍‌ଦାନ୍। ¹⁶ସୁସାମାଚାର୍‌ନୁ ଏକା ଆଲାର୍ ବିଶ୍ୱାସ୍ କାମ୍‌ନାଏ, ଆବ୍ଡ଼ା ଆଲାର୍‌ଗେ ପାପ୍‌ଘି ଦଣ୍ତ୍‌ସ୍ତି ବାଛାବାନାଘି ଲାଗାନ୍ ପହ୍‌ଲେ ତା ୟାହୁଦୀ, ଆନ୍ତିନ୍ ବିନାୟାହୁଦୀର୍‌ଘି ଲାଗାନ୍ ଇ ସୁସାମାଚାର୍ ପାର୍‌ମେଶ୍ୱାର୍‌ସ୍‌କି ଶକ୍ତିଦ୍, ହୁଦ୍‌ଘିଲାଗାନ୍ ଏନ୍ ଇ ସୁସାମାଚାର୍‌ଘି ଲାଗାନ୍ ମା ଲାଜ୍‌ର୍‌ଦାନ୍। ¹⁷ଇ ସୁସାମାଚାର୍ ନାମାନ୍ ତେଙ୍ଗିଦ୍ ପାର୍‌ମେଶ୍ୱାର୍‌ସ୍ ଏସ୍‌କେ ତାଙ୍ଘା ନଜର୍‌ନୁ ନାମାନ୍ ଏସ୍‌କେ ବାନେ କାମ୍‌ଦାସ୍, ଇଦ୍ ବିଶ୍ୱାସ୍‌ଘି ଦ୍ୱାର୍‌ନୁ ସୁରୁନ୍ତି ଆଖ୍‌ରୀତକ୍ ସିଦ୍ଧ୍ କାମ୍‌ଚାସ୍। ଏସ୍‌କେ କା ପାବିତାର୍ ଶାସ୍ତ୍ର ତେଙ୍ଗିଦ୍, ଇଦ୍ ବିଶ୍ୱାସ୍‌ଘି ଦ୍ୱାର୍‌ନୁ ରାଇଦ୍ ଏକା ଆଲାର୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାରାଦାସ୍ ଆସ୍ ବିଶ୍ୱାସ୍‌ତି ଉଜ୍ଜସ୍।

ପାପ୍ କାମ୍‌ନା ବାଲାର୍‌ଗେ ପାର୍‌ମେଶ୍ୱାର୍‌ସ୍ ଦଣ୍ଡ୍ ଚିଦାସ୍

¹⁸ଏକା ଆଲାର୍ ଅନ୍ୟାୟଘି ଦ୍ୱାର୍‌ନୁ ସତ୍ତୁବନ୍ ରୋକ୍‌ନାଏ ଉଇନାଏ ଆରୁ ଜାମା ଲେଖା ଅଧର୍ମ ଆରୁ ଅନ୍ୟାୟ କାମ୍‌ନାଏ ଆବ୍ଡ଼ା ଆଲାର୍‌ଘି ମିଆଁ ସରଗ୍‌ତି ପାର୍‌ମେଶ୍ୱାର୍‌ସ୍‌କି ଖୀସୁ ପ୍ରକଟ୍ ମାନିଦ୍। ¹⁹ଏନ୍ଦେର୍‌ଗେକା ଆବ୍ଡ଼ାର୍ ପାର୍‌ମେଶ୍ୱାର୍‌ସ୍‌କି ବାରେନୁ ସତ୍ତୁବନ୍ ଆହ୍‌ନାଏ, ଆରୁ ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ଇଦ୍‌ଘି ବାରେ ବାତାବାଚ୍‌କାଦାସ୍। ²⁰ଯେତ୍‌କବାକେନ୍ତିନ୍ ଦୁନିଆଁନ୍ ବାନାବା କେରା, ଆଲାର୍ ଦୁନିଆଁନ୍ ଆରୁ ଆକାଶ୍‌ବନ୍ ଏରିୟାର୍। ଯେତ୍‌କୋଭି ପାର୍‌ମେଶ୍ୱାର୍‌ସ୍ ବାନାବାଚ୍‌କାଦାସ୍ ଆନ୍ନୁ ଆବ୍ଡ଼ାର୍ ସାଫା-ସାଫା ଏରା ଅଙ୍ଗ୍‌ନାଏ, କା ପାର୍‌ମେଶ୍ୱାର୍‌ସ୍ ଏସ୍‌କେ ରାଦାସ୍, ଆସ୍‌କି ସବୁଦିନ୍‌ତା ଶକ୍ତିନ୍, ହୁଦ୍‌ଘିଲାଗାନ୍ ପାର୍‌ମେଶ୍ୱାର୍‌ସିନ୍ ବାଉନାନାଘି ଏନ୍ଦେର୍‌ହି ବାହ୍‌ନା ଆବ୍ଡ଼ାର୍‌ସାନ୍ ମାଲ୍ଲାଦିନ୍। ²¹ଆବ୍ଡ଼ାର୍ ପାର୍‌ମେଶ୍ୱାର୍‌ସିନ୍ ଆହ୍‌ନାଏ, ହାଲେହି ଆବ୍ଡ଼ାର୍ ପାର୍‌ମେଶ୍ୱାର୍‌ସ୍‌କି ଉଚିତ୍ ଆଦର୍ ଆରୁ ଧାନ୍ୟାବାଦ୍ ମା ଚିନାଏ। ଆବ୍ଡ଼ାର୍ ପାର୍‌ମେଶ୍ୱାର୍‌ସ୍‌କି ବାରେନୁ ବାନେ ସୋଚ୍‌ବିଚାର୍ ମା କାମ୍‌ନାଏ, ଏତ୍‌କତକ୍ କା ଆବ୍ଡ଼ାର୍‌ଘି ନିର୍‌ବୁଦ୍ଧିଆ ମନ୍‌ଦ୍ ବାନେ ସୋଚ୍‌ବିଚାର୍ ମା କାମିଦ୍। ²²ଆବ୍ଡ଼ାର୍ ନିଜ୍‌କେନିଜ୍ ବୁଦ୍ଧିୟାର୍ ବୁଲି ସୋଚ୍‌ନାଏ, ଲେକିନ୍ ମୁରୁଖ୍ ମାନ୍ନାଏକାନାଏ। ²³ଆରୁ ନାଶ୍ ମା ମାନ୍ନାବାଲା ପାର୍‌ମେଶ୍ୱାର୍‌ସ୍‌କି ମାହିମାବନ୍ ନାଶ୍ ମାନ୍ନାବାଲା ମୁନୁଷ୍, ଆରୁ ଓଡ଼ା ଗୁଠିନ୍, ପଶୁ ଆରୁ ନେର୍‌ରୁଘି ମୂର୍ତ୍ତୀ ତିଆର୍ କାମିକିରି ଆବ୍ଡ଼ାନ୍ ପୂଜା କାମ୍‌ନାଏ।

²⁴ହୁଦ୍‌ଘିଲାଗାନ୍ ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ତାହ୍ମା ମନ୍‌ଘି ଖାରାପ୍ ଇଚ୍ଛା ଲେଖା ଅଶୁଦ୍ଧ୍‌ଘି ଲାଗାନ୍ ଆମ୍ବେଇଚାସ୍‌କା ଆବ୍ଡ଼ାର୍ ଏକ୍ ଦୁସ୍‌ରାର୍‌ଗାନେ ନିଜର୍ ଶରୀର୍‌ବନ୍‌ହି ମାଇନ୍ ମା କାମ୍‌ନାଏ। ²⁵ଏନ୍ଦେର୍‌ଗେକା ଆବ୍ଡ଼ାର୍ ପାର୍‌ମେଶ୍ୱାର୍‌ସ୍‌କି ସତ୍ତୁବନ୍ ବାଦ୍‌ଲିକିରି ଝୁଟ୍ଟୁ ବାନାବାଚାର୍। ଆରୁ ଆବ୍ଡ଼ାର୍ ଦୁନିଆଁନ୍ ବାନାବୁ ପାର୍‌ମେଶ୍ୱାର୍‌ସ୍‌କି ଆରାଧାନା କାମ୍‌ନାନ୍ ଆମ୍ବିକିରି ତାଙ୍ଘା ବାନାବାଚ୍‌କା ଜିନିଷ୍‌ବନ୍ ଆରାଧାନା କାମାଗେ ଲାଗ୍ଗିୟାର୍। ପାର୍‌ମେଶ୍ୱାର୍‌ସ୍ ଖାଲି ସବୁଦିନ୍‌ଘି ଲାଗାନ୍ ଧାନ୍ୟାବାଦ୍‌ଘି ଲାଇଗ୍ ରାଦାସ୍। ଆମେନ୍।

²⁶ହୁଦ୍‌ଘିଲାଗାନ୍ ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ଖାରାପ୍ ନାଲ୍‌ଖୁ କାମାଗେ ଆମ୍ବେଇଚାସ୍। ଆବ୍ଡ଼ାର୍‌ଘି ମାଏକିନିଆଁର୍‌ହି ସ୍ୱାଭାବିକ୍ ସମ୍ବନ୍ଧବନ୍ ଆମ୍ବିକିରି ଅସ୍ୱାଭାବିକ୍ ସମ୍ବନ୍ଧ କାମାଗେ ଲାଗ୍ଗିୟାର୍। ²⁷ଏନ୍ନେନ୍ ଆବ୍ଡ଼ାର୍‌ଘି ମାର୍‌ଦ୍‌ନାର୍‌ହି ତାହ୍ମା ମାଏକିନିଆଁର୍‌ଗାନେ ସ୍ୱାଭାବିକ୍ ସମ୍ବନ୍ଧ ଆମ୍ବିକିରି ଏକ୍ ଦୁସ୍‌ରାର୍‌ଗାନେ ସମ୍ବନ୍ଧ ଉଇୟାଗେ ଜାଲ୍‌ରାଗେ ଲାଗ୍ଗିୟାର୍। ଆରୁ ମାର୍‌ଦ୍‌ନାର୍-ମାର୍‌ଦ୍‌ନାର୍ ଗାନେ ଖାରାପ୍ ନାଲ୍‌ଖୁ କାମ୍‌ଚାର୍। ଆବ୍ଡ଼ାର୍‌ଗେ ଖାରାପ୍ ନାଲ୍‌ଖୁଘି ବାରାବୁରି ଦଣ୍ତ୍‌ ହାଖ୍ଖରା।

²⁸ଏନ୍ଦେର୍‌ଗେକା ଆବ୍ଡ଼ାର୍ ପାର୍‌ମେଶ୍ୱାର୍‌ସିନ୍ ଚିହ୍ନା ମା ବେଦ୍ଦିୟାର୍। ଆଙ୍ଗେନ୍ ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ତାହ୍ମା ବାନେକିରି ନାଲ୍‌ଖୁ ମା କାମୁ ମନ୍‌ନୁ ଆମ୍ବେଇଚାସ୍, ଆରୁ ଆବ୍ଡ଼ାର୍ ଏନ୍ନେ ଉଚିତ୍ ମାଲ୍ଲିଦ୍ ଆ ନାଲ୍‌ଖୁନ୍ କାମାଗେ ଲାଗ୍ଗିୟାର୍ ଏକାନ୍ ମା କାମ୍‌ନାକାତ୍‌ଥା। ²⁹ଆବ୍ଡ଼ାର୍ ଜାମା ରକମ୍‌ଘି ଅଧର୍ମ, ବଦ୍‌ମାସି, ଲୋଭ୍‌ଲାଲଚ୍‌, ହାଁଣ୍‌ନା ତୁଫ୍‌ନାତି ନିନ୍ଦିୟାର୍‌କେରାର୍। ଆରୁ ମାର୍‌ପିଟ୍, ପିଟ୍ଟନା, ଝାଗ୍‌ଡ଼ା, ଏଦ୍‌ର୍‌ନା, ହିସ୍‌ଙ୍ଗା, ତି ପୁରାପୁରୀ ମାନ୍‌ଚାର୍ କେରାର୍। ³⁰ବଦ୍‌ନାମ୍ କାମ୍‌ନାବାଲା, ପାର୍‌ମେଶ୍ୱାର୍‌ସ୍‌ସିନ୍ ହାଁଣ୍‌ନା ତୁଫ୍‌ନାବାଲା, ଦୁସ୍‌ରାରିନ୍ ଆଦର୍ ମା କାମ୍‌ନାବାଲା, ଘମଣ୍ଡି, ବଡ଼୍‌ପଣି, ଖାରାପ୍ କାତ୍‌ଥା କାମୁ, ଆୟାଙ୍ଗ୍ ବାଙ୍ଗ୍‌ର୍‌ଘି ହୁକୁମ୍ ମା ମାନ୍ନାବାଲା। ³¹ନିର୍‌ବୁଦ୍ଧିଆ, ଧୋଖା ଚିଉର୍, ବାନେ ମା ହାଖ୍ଖୁର୍, ସଗ୍ଗେ ମା କାମୁର୍। ³²ଆବ୍ଡ଼ାର୍ ତା ପାର୍‌ମେଶ୍ୱାର୍‌ସ୍‌କି ଇ ଧାର୍ମିକ୍ ନିୟମ୍‌ବନ୍ ଆହ୍‌ନାଏ କା ଏନ୍ନେ ନାଲ୍‌ଖୁ କାମୁର୍ ମରନ୍‌ଘି ଦଣ୍ଡ୍ ଲାଇଗ୍ ରାନାଏ ହାଲେହି ତା ଆବ୍ଡ଼ାର୍ ଖାଲି ଏନ୍ନେ ଖାରାପ୍ ନାଲ୍‌ଖୁ ମା କାମ୍‌ନାଏ ଲେକିନ୍ ଏନ୍ନେ ଖାରାପ୍ କାମୁର୍‌ଘି ଲାଗାନ୍‌ହି ଲିଝ୍‌ର୍‌ନାଏ।

ପାର୍‌ମେଶ୍ୱାର୍‌ସ୍‌କି ସତ୍ତୁ ନ୍ୟାୟ

¹ହୁଦ୍‌ଘିଲାଗାନ୍ ହେ ଆଲାରିନ୍ ଦୋଷ୍ ଚିଉରୋ, ନିନ୍ ଚାହେ ନେଦିନ୍ ରୟ, ନିଙ୍ଗାଗେ ଦୁସ୍‌ରାର୍‌ଘି ମିଆଁ ଦୋଷ୍ ଚିନାଘି ହକ୍ ମାଲ୍ଲାଦିନ୍! ଏନ୍ଦେର୍‌ଗେକା ଏକା କାତ୍‌ଥାନୁ ନିନ୍ ଦୁସ୍‌ରାରିନ୍ ଦୋଷ୍ ଚିଦାଏ ଆ କାତ୍‌ଥାନୁ ନିନ୍ ନିଜ୍‌କେନିଜ୍ ଦୋଷୀୟ, ଏନ୍ଦେର୍‌ଗେକା ନିନ୍ ଏକା ଦୋଷ୍ ଚିଦାଏ ଆବନ୍ ନିନ୍‌ହି ନିଜେ କାମ୍‌ଦାଏ। ²ଆକ୍କୁନ୍ ନାମ୍ ଇବନ୍ ଆହ୍‌ଦାତ୍ କା ଏକା ଆଲାର୍ ଏନ୍ନେ ଖାରାପ୍ ନାଲଖୁ କାମ୍‌ନାଏ ଆବ୍ଡ଼ାର୍‌ଗେ ପାର୍‌ମେଶ୍ୱାର୍‌ସ୍ ଉଚିତ୍ ଦଣ୍ଡ୍ ଚିଦାସ୍। ³ହେ ଆଲାରୋ, ନିନ୍ ଏନ୍ନେ ନାଲ୍‌ଖୁ କାମୁର୍‌ଘି ମିଆଁ ଦୋଷ୍ ଚିଦାଏ ଆରୁ ନିନ୍ ନିଜେ ଆ ନାଲ୍‌ଖୁନ୍‌ନିନ୍ କାମ୍‌ଦାଏ ତା ନିନ୍ ଏନ୍ଦେର୍ ସୋଚ୍‌ଦାଏ କା ନିନ୍ ପାର୍‌ମେଶ୍ୱାର୍‌ସ୍‌କି ଦଣ୍ତ୍‌ତି ବାଛ୍‌ରୟକୟ? ⁴ଚାହେ ନିନ୍ ଆସ୍‌କି ମାହାନ୍ ଦାୟା, ସାହ୍‌ନା ଶକ୍ତି ଆରୁ ଧିରାଜ୍‌ବନ୍ ହିନିସ୍ତା ସୋଚ୍‌ଦାଏ ଆରୁ ଇବନ୍ ମା ବୁଝ୍‌ର୍‌ଦାଏ କା ପାର୍‌ମେଶ୍ୱାର୍‌ସ୍‌କି ଦାୟାଦ୍ ନିଙ୍ଗାନ୍ ପାସ୍ତାରାନାଘି ତାରାହ୍ ହୋଇକାଇ? ⁵ନିମ୍ ବହୁତ୍ ଢିଠ୍‌ ଆଲାର୍ ଆରୁ ଏକ୍‌ଲାହି ମା ପାସ୍ତାରାଦାର୍ ହୁଦ୍‌ଘିଲାଗାନ୍ ଯେତ୍‌କବାକେନ୍ ପାର୍‌ମେଶ୍ୱାର୍‌ସ୍‌କି ସତ୍ତୁ ନ୍ୟାୟ ପ୍ରକଟ୍ ମାନ ଆ ଉଲ୍ଲା ପାର୍‌ମେଶ୍ୱାର୍‌ସ୍ ନିମାଗେ ବହୁତ୍ ଦଣ୍ଡ୍ ଚୋସ୍। ⁶ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଜାମାର୍‌ଗେ ତାହ୍ମା ନାଲ୍‌ଖୁଘି ଅନୁସାର୍ ଫଲ୍ ଚୋସ୍। ⁷ଏକାସ୍ ଧିରାଜ୍‌ଘି ସାଙ୍ଗେ ବାନେ ନାଲ୍‌ଖୁ କାମ୍‌ତେ ରାଦାସ୍ ଆରୁ ମାହିମା, ଆଦର୍ ଆରୁ ନାଶ୍ ମା ମାନ୍ନା ଜୀବନ୍‌ଘି ଖୋଜାର୍‌ନୁ ଲାକ୍କାରାଦାସ୍। ପାର୍‌ମେଶ୍ୱାର୍‌ସ୍ ଆସ୍‌କେ ସବୁଦିନ୍‌ତା ଜୀବନ୍ ଚସ୍। ⁸ଲେକିନ୍ ଏକାର୍ ନିଜର୍‌ଲାଗାନ୍ ଖାଲି ସୋଚ୍‌ନାଏ ଆରୁ ସତ୍ତୁବନ୍ ମା ମାନ୍ନାଏ ଅଧରମ୍‌ନୁ ଚାଲ୍‌ର୍‌ନାଏ ଆବ୍ଡ଼ାର୍‌ଘି ମିଆଁ ପାର୍‌ମେଶ୍ୱାର୍‌ସ୍‌କି ବହୁତ୍ ଖୀସ୍ ଖାତ୍‌ରୋ ଆରୁ ଆବ୍ଡ଼ାଗେ ବହୁତ୍ ଦଣ୍ଡ୍ ଚୋସ୍। ⁹ଏକାର୍ ଖାରାପ୍ ନାଲ୍‌ଖୁ କାମ୍‌ନାଏ ଆବ୍ଡ଼ା ଜାମା ଆଲାର୍‌ଗେ ଦୁଃଖୁ-ତକ୍‌ଲିପ୍ ବାରୋ ପହ୍‌ଲେ ୟାହୁଦୀର୍‌ଗେ ଆନ୍ତିନ୍ ବିନାୟାହୁଦୀର୍‌ଗେ। ¹⁰ଆରୁ ବାନେ ନାଲ୍‌ଖୁ କାମୁ ଜାମା ଆଲାର୍‌ଗେ ପହ୍‌ଲେ ୟାହୁଦୀର୍‌ଗେ ଆନ୍ତିନ୍ ବିନାୟାହୁଦୀର୍‌ଗେହି ମାହିମା, ଆଦର୍ ଶାନ୍ତି ହାଖ୍ଖରଦ୍। ¹¹ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ନେଖା ପାଖାହି ମା ମାନ୍‌ଦାସ୍। ¹²ହୁଦ୍‌ଘିଲାଗାନ୍ ଏକାର୍ ନିୟମ୍ ମା ହାଖ୍ଖୀକିରି ପାପ୍ କାମ୍‌ନାଏ ଆବ୍ଡ଼ାର୍ ନିୟମ୍ ମା ହାଖ୍ଖୀକିରି ନାଶ୍ ମାନର୍‌କର୍; ଆରୁ ଏକାର୍ ନିୟମ୍ ହାଖ୍ଖୀକିରି ପାପ୍ କାମ୍‌ଚାର୍, ଆବ୍ଡ଼ାର୍ ଦଣ୍ଡ୍ ନିୟମ୍‌ଘି ଅନୁସାର୍ ନ୍ୟାୟ କାମାକୋ। ¹³ଏନ୍ଦେର୍‌ଗେକା ଖାଲି ନିୟମ୍ ମେନୁର୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାଲ୍‌ନାଏ ଲେକିନ୍ ନିୟମ୍ ଲେଖା ଚାଲ୍‌ରୁ ଆଲାର୍ ନିର୍ଦ୍ଦୋଷ୍ ଠାହ୍‌ରାରର୍। ¹⁴ଲେକିନ୍ ବିନାୟାହୁଦୀର୍ ନେଖାସାନ୍ ନିୟମ୍ ମାଲ୍ଲାଦିନ୍ ଯେତ୍‌କବାକେନ୍ ଆବ୍ଡ଼ାର୍ ନିଜର୍ ସାଭାବ୍‌ତି ନିୟମ୍‌ବନ୍ ପାଲନ୍ କାମ୍‌ନାଏ ତା ଚାହେ ଆବ୍ଡ଼ାର୍‌ସାନ୍ ନିୟମ୍ ମା ରାଚ୍‌କୁନ୍‌ହି ଆବ୍ଡ଼ାର୍ ନିଜେ ନିଜର୍-ନିଜର୍‌ଲାଗାନ୍ ନିୟମ୍ ମାନ୍ନାବାଲା ରାନାଏ। ¹⁵ନିୟମ୍‌ଘି ନାଲଖୁ ଆବ୍ଡ଼ାର୍‌ଘି ଜୀଆନୁ ରାଇ। ଆରୁ ଆବ୍ଡ଼ାର୍‌ଘି ବିବେକ୍ ସାକ୍ଷୀ ଚିଇଦ୍ ଆରୁ ଆବ୍ଡ଼ାର୍‌ଘି ସୋଚ୍‌ ଆବ୍ଡ଼ାରିନ୍ ଦୋଷୀ ଚାହେ ବିନାଦୋଷୀ ଠାହ୍‌ରିଦ୍। ¹⁶ଇବ୍ଡ଼ା ଜାମାଦ୍ ଆ ଉଲ୍ଲା ପ୍ରକଟ୍ କାମାକୋ ଯେତ୍‌କବାକେନ୍ ପାର୍‌ମେଶ୍ୱାର୍‌ସ୍ ଏଙ୍ଘାଏ ପ୍ରଚାର୍ କାମ୍‌ଚ୍‌କା ସୁସାମାଚାର୍‌ଘି ଅନୁସାର୍ ଯୀଶୁ ଖ୍ରୀସ୍ତ୍‌କି ଦ୍ୱାର୍‌ନୁ ଆଲାର୍‌ଘି ମନ୍‌ତା ନୁହୁର୍‌କା କାତ୍‌ଥାଗୁଠିନ୍ ନ୍ୟାୟ କାମସ୍।

ୟାହୁଦୀ ଆଲାର୍‌ଘି ଲାଗାନ୍ ପାର୍‌ମେଶ୍ୱାର୍‌ସ୍ ନ୍ୟାୟ କାମସ୍

¹⁷ଲେକିନ୍ ଯଦି ନିନ୍ ନିଜ୍‌କେନିଜ୍ ୟାହୁଦୀ ବାଦାଏ ଆରୁ ନିୟମ୍‌ଘି ମିଆଁ ଆଶ୍ରା କାମ୍‌ଦାଏ ଆରୁ ପାର୍‌ମେଶ୍ୱାର୍‌ସାନ୍ ବଡ଼୍‌ପଣି କାମ୍‌ଦାଏ। ¹⁸ଆରୁ ନିନ୍ ଆସ୍‌କି ଇଚ୍ଛାବନ୍ ଆହ୍‌ଦାଏ ଆରୁ ଏକାଦ୍ ବାନେ-ବାନେ କାତ୍‌ଥାଦ୍ ଆବନ୍ ଆହ୍‌ଦାଏ। ଏନ୍ଦେର୍‌ଗେକା ନିନ୍ ନିୟମ୍‌ତି ଶିଖ୍‌ର୍‌କାଦାଏ। ¹⁹ଆରୁ ନିନ୍ ନିଜର୍ ମିଆଁ ଭାର୍‌ଷା ଉଇଦାଏକା ଏନ୍ କାଁଣାର୍‌ଘି ଆଗୁୱାନ୍, ଆରୁ ଉହାନୁ ଖାତ୍‌ରୁର୍‌ଘି ବିଲ୍ଲୀନ୍। ²⁰ଆରୁ ବିନାୟାହୁଦୀରିନ୍ ଶିଖାବାନାବାଲା, ହାଦ୍ଦୁରିନ୍୨:୨୦ ହାଦ୍ଦୁରିନ୍ ମତ୍‌ଲବ୍ ଏକାର୍ ବିନା ୟାହୁଦୀନ୍ତି ୟାହୁଦୀଗେ ବାର୍‌ଚାର୍, ଆବ୍ଡ଼ାର୍ ନିୟମ୍‌ଘି ବାରେ ବାଲ୍‌ନାଇନ୍, ହୁଦ୍‌ଘିଲାଗାନ୍ ଆବ୍ଡ଼ାରିନ୍ ହାଦ୍ଦୁ ବୁଲି ତେଙ୍ଗାକେର୍‌କିଚି।ଉପ୍‌ଦେଶ୍ ଚିନାବାଲାନ୍, ଏନ୍ଦେର୍‌ଗେକା ନିୟମ୍‌ନୁ ଏକା ବୁଦ୍ଧି ଆରୁ ସତ୍ତୁବନ୍ ଏନ୍ ଠିକ୍ ରୂପ୍‌ତି ହାକ୍କାଦାନ୍ ଏନ୍ନେ ନିମ୍ ସୋଚ୍‌ଦାର୍। ²¹ଆରୁ ନିନ୍ ଦୁସ୍‌ରାରିନ୍ ଶିଖାବାଦାଏ ତା ନିଜ୍‌କେନିଜ୍ ଏନ୍ଦେର୍‌ଗେ ମା ଶିଖାବାଦାଏ? ନିନ୍ ଆମାହାଡ଼ା ବୁଲି ଉପ୍‌ଦେଶ୍ ଚିଦାଏ ତା ନିନ୍ ଏନ୍ଦେର୍‌ଗେ ହାଡ଼୍‌ଦାଏ? ²²ନିନ୍ ତା ବେଭିଚାର୍ ଆମା କାମା ବୁଲି ତେଙ୍ଗ୍‌ଦାଏ ତା ନିଜେ ଏନ୍ଦେର୍‌ଗେ ବେଭିଚାର୍ କାମ୍‌ଦାଏ। ନିନ୍ ତା ମୂର୍ତ୍ତୀଗୁଠିନ୍ ହାଁଣ୍‌ଦାଏ ଆରୁ ତୁଫ୍‌ଦାଏ ତା ନିନ୍ ଏନ୍ଦେର୍‌ଗେ ମନ୍ଦିର୍‌ତା ଧାନ୍ନୁବନ୍ ଲୁଟ୍‌ଦାଏ। ²³ନିନ୍ ମୁଶାସ୍‌କି ନିୟମ୍‌ଘି ବାରେ ବଡ଼୍‌ପଣି କାମ୍‌ଦାଏ ତା ନିନ୍ ନିୟମ୍ ମା ମାନିକିରି ଏନ୍ଦେର୍‌ଗେ ପାର୍‌ମେଶ୍ୱାର୍‌ସ୍‌କି ମାଇନ୍ ମା କାମ୍‌ଦାଏ? ²⁴ଏନ୍ଦେର୍‌ଗେକା ନିହ୍ମା ଲାଗାନ୍ ବିନାୟାହୁଦୀର୍‌ଘି ମାଝାନୁ ପାର୍‌ମେଶ୍ୱାର୍‌ସ୍‌କି ନିନ୍ଦା ମାନାଲିଦ୍ ଏସ୍‌କେ ପାବିତାର୍ ଶାସ୍ତ୍ରନୁ ଲେଖଚ୍‌କା ରାଇ।

²⁵ଯଦି ନିନ୍ ମୁଶାସ୍‌କି ନିୟମ୍ ଲେଖା ଚାଲ୍‌ର୍‌ଦାଏ ତା ଖାତ୍‌ନାଘି ରୀତିନୀତିତି ଫାଏଦା ମାନିଦ୍, ଲେକିନ୍ ଯଦି ନିନ୍ ନିୟମ୍‌ବନ୍ ମା ମାନ୍‌ଦାଏ ତା ନିଙ୍ଘା ଖାତ୍‌ନାଘି ରୀତିନୀତି ଖାତ୍‌ନା ମା କାମ୍‌ଚ୍‌କା ଲେଖା ମାନିଦ୍। ²⁶ହୁଦ୍‌ଘିଲାଗାନ୍ ଯଦି ଏକା ଆଲାର୍‌ଘି ଖାତ୍‌ନା ମା ମାନ୍‌ଚ୍‌କିରୋ ଲେକିନ୍ ଆବ୍ଡ଼ାର୍ ନିୟମ୍‌ବନ୍ ମାନର୍ ତା ଆବ୍ଡ଼ାର୍‌ଘି ବିନାଖାତ୍‌ନାଦ୍ ଖାତ୍‌ନା ମାନ୍‌ଚ୍‌କା ବୁଲି ତେଙ୍ଗାକୋ। ²⁷ଏକା ଆଲାସ୍‌କି ଖାତ୍‌ନା ମାଲ୍ଲାମାନୁ ଯଦି ଆସ୍ ନିୟମ୍‌ବନ୍ ମାନ୍‌ଦାସ୍ ତା ଆସ୍ ନିଙ୍ଗାନ୍ ଦୋଷୀ କାମସ୍ ଏନ୍ଦେର୍‌ଗେକା ନିଙ୍ଘାସାନ୍ ନିୟମ୍ ରାଇ। ଆରୁ ନିଙ୍ଘାଏ ଖାତ୍‌ନା ମାନ୍‌ଚ୍‌କିଚି? ²⁸ଏକାସ୍ ବାହାରି ତାର୍‌ତି ୟାହୁଦୀ ଲେଖା ଏଥ୍‌ର୍‌ଦାସ୍, ଆସ୍ ସତ୍ତୁନ୍ ୟାହୁଦୀ ମାଲ୍‌ଦାସ୍ ଆରୁ ଶରୀର୍‌ଘି ଖାତ୍‌ନାଦ୍ ଅସଲ୍‌ନୁ ଖାତ୍‌ନା ମାଲ୍ଲିଦ୍। ²⁹ସତ୍ତୁ ୟାହୁଦୀର୍ ଆବ୍ଡ଼ାର୍ ଏକାର୍ ମନ୍‌ତି ୟାହୁଦୀର୍, ଆରୁ ଅସ୍‌ଲି ଖାତ୍‌ନାଦ୍ ଆଦ୍ ଏକାଦ୍ କା ଜୀଆଉଲ୍‌ତି ମାନ୍‌ଚ୍‌କିରି ଆରୁ ନିୟମ୍‌ଘି ଅନୁସାର୍ ମାଲ୍ଲିଦ୍, ଲେକିନ୍ ଏକା ଆଲାର୍‌ଗେ ପାବିତାର୍ ଆତ୍ମାଘି ଦ୍ୱାର୍‌ନୁ ଜୀଆଘି ଖାତ୍‌ନା ମାନ୍‌ଚ୍‌କିଚି ଆବ୍ଡ଼ାର୍‌ଗେ ମୁନୁଷ୍‌ଘି ମାଲ୍ଲା ବରନ୍ ପାର୍‌ମେଶ୍ୱାର୍‌ସ୍‌କି ପ୍ରଶଂସା ହାଖ୍‌ର୍‌କିଚି।

¹ହାଲେ ୟାହୁଦୀ ମାନ୍ନାଘି ଏନ୍ଦେର୍ ଫାଏଦା, ଚାହେ ଖାତ୍‌ନା କାମ୍‌ଚ୍‌କାଘି ଏନ୍ଦେର୍ ଲାଭ୍? ²ଜାମାର୍‌ଘିନ୍ତି ପହ୍‌ଲେ ତା ପାର୍‌ମେଶ୍ୱାର୍‌ସ୍ ୟାହୁଦୀ ଜାମାର୍‌ଘି ଲାଗାନ୍ ମୁଶାସ୍‌କି ନିୟମ୍ ଚିଚ୍ଚାସ୍, ହୁଦ୍‌ଘିଲାଗାନ୍ ୟାହୁଦୀ ମାନିକିରି ଆବ୍ଡ଼ାର୍‌ଗେ ଜାମା ପ୍ରକାର୍‌ତି ବାଗ୍ଗେ ଫାଏଦା ମାନିଦ୍। ³ଯଦି ଆବ୍ଡ଼ାସ୍ତିହି କେତ୍‌କ ବିଶ୍ୱାସ୍‌ଘାତ୍ ମାନ୍‌ଚାର୍ କେର୍‌କାନାଏତାହି ଏନ୍ଦେର୍ ମାନ୍‌ଚା? ଏନ୍ଦେର୍ ଆବ୍ଡ଼ାର୍‌ଘି ବିଶ୍ୱାସ୍ ଘାତ୍‌ବନ୍ ପାର୍‌ମେଶ୍ୱାର୍‌ସ୍‌କି ବିଶ୍ୱାସ୍ ଲାଇଗ୍‌ବନ୍ ବେକାର୍ କାମଚୋ? ⁴ବିଲ୍‌କୁଲ୍ ମାଲ୍ଲା! ଯଦିଭି ଜାମା ଆଲାର୍ ଠାକ୍‌ନାଏ ଲେକିନ୍ ପାର୍‌ମେଶ୍ୱାର୍‌ସ୍ ସତ୍ତୁସ୍: ଏସ୍‌କେ କା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ, “ନିମ୍ ନିଜର୍ କାତ୍‌ଥାନୁ ଧାର୍ମିକ୍ ବୁଲି ଆହ୍‌ତାରର୍, ଆରୁ ବିଚାର୍ କାମ୍‌ନା ସାମାୟନୁ ଜିତର୍।” ⁵ଯେତ୍‌କବାକେନ୍ ନାମ୍ ଅଧର୍ମ କାମ୍‌ଦାତ୍ ଆଦ୍ ସାଫା-ସାଫା ଏଥ୍‌ରିକାଇ କା ପାର୍‌ମେଶ୍ୱାର୍‌ସ୍‌ହି ଠିକ୍‌ସ୍, ତା ଏନ୍ ଆଲାର୍ ଲେଖାଇନ୍ ତେଙ୍ଗାଲ୍‌ଦାନ୍ ଏନ୍ଦେର୍ ପାର୍‌ମେଶ୍ୱାର୍‌ସ୍ ଅନ୍ୟାୟ ମା କାମ୍‌ଦାସ୍, ଯେତ୍‌କବାକେନ୍ ଆସ୍ ନାମାଗେ ଦଣ୍ଡ୍ ଚିଦାସ୍? ⁶ବିଲ୍‌କୁଲ୍ ମାଲ୍ଲା! ଯଦି ପାର୍‌ମେଶ୍ୱାର୍‌ସ୍ ଅନ୍ୟାୟୀ ରସ୍‌ନେ ତା ଆସ୍ ଜାମା ମୁନୁଷ୍ ଜାତିୟାର୍‌ଘି ନ୍ୟାୟ ଏସ୍‌କେ କାମାଅଙ୍ଗସ୍? ⁷ଯଦି ଏଙ୍ଘା ଠାକ୍‌ନାଘି ଲାଗାନ୍ ପାର୍‌ମେଶ୍ୱାର୍‌ସ୍‌କି ସତ୍ତୁ ଆସ୍‌କି ମାହିମାଘି ଲାଗାନ୍, ବାଗ୍ଗେ କାମିକିରି ପ୍ରକଟ୍ ମାନିଦ୍ ତା ହାଲେହି ଏନ୍ଦେର୍‌ଗେ ପାପୀର୍‌ଘି ଲେଖା ଏନ୍ ଦଣ୍ଡ୍‌ଘି ଲାଇଗ୍ ଠାହ୍‌ରା ରାଦାନ୍? ⁸ଯଦି ଏନ୍ନେ କାତ୍‌ଥା ରାଇ, ତା ନାମ୍ ଖାରାପ୍ ନାଲ୍‌ଖୁ ଏନ୍ଦେର୍‌ଗେ ମା କାମତ୍, ଆସ୍‌ତି ବାନେ ନାଲ୍‌ଖୁ ପ୍ରକଟ୍ ମାନୋ। କେତ୍‌କ ଆଲାର୍ ଏଙ୍ଗାନ୍ ବଦ୍‌ନାମ୍ କାମ୍‌ନାଏ କା ଏନ୍ ଏନ୍ନେ ଶିଖାବାଦାନ୍ କା ବାଗ୍ଗେ ପାପ୍ କାମର୍ ତା ଠିକ୍ ରଦ୍‌ନେ, ଏନ୍ନେ ଆଲାର୍ ପାର୍‌ମେଶ୍ୱାର୍‌ସ୍‌କି ଦଣ୍ଡ୍‌ଘି ଲାଇଗ୍ ରାନାଏ।

ଜାମା ଆଲାର୍ ପାପୀର୍ ନେଦ୍‌ହି ଧର୍ମିକ୍ ମାଲ୍‌କାରିନ୍

⁹ତା ହାଲେହି ନାମ୍ ଏନ୍ଦେର୍ ତେଙ୍ଗତ୍? ଏନ୍ଦେର୍ ନାମ୍ ୟାହୁଦୀ ଆଲାତ୍, ବିନାୟାହୁଦୀର୍‌ସ୍‌ତି ବାନେ ରାଦାତ୍ କାଁଏ? ବିଲ୍‌କୁଲ୍ ମାଲ୍ଲା! ଏନ୍ଦେର୍‌ଗେକା ନାମ୍ ଇବନ୍ ଏଦ୍‌କାଦାତ୍ କା ୟାହୁଦୀ ଆରୁ ବିନାୟାହୁଦୀର୍‌ହି ଜାମାତ୍ ପାପ୍‌ଘି ଫାନ୍ଦାନୁ ରାଦାତ୍। ¹⁰ପାବିତାର୍ ଶାସ୍ତ୍ରନୁ ଲେଖଚ୍‌କା ରାଇ କା ନେଦ୍‌ହି ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାଲ୍‌କାରିନ୍, ଅଣ୍ଟାହି ମାଲ୍ଲା।

¹¹ଏନ୍ନେ ଅଣ୍ଟାହି ମାଲ୍‌କାରିନ୍ ଏକାର୍ କା ସତ୍ତୁଦ୍ ଏନ୍ଦେଦ୍ ଆବନ୍ ବୁଝ୍‌ରା ଅଙ୍ଗର୍; ନେଦ୍‌ହି ପାର୍‌ମେଶ୍ୱାର୍‌ସିନ୍ ଆହାଗେ ମା ବେଦ୍ଦନାଏ।

¹²ଜାମାର୍ ପାର୍‌ମେଶ୍ୱାର୍‌ସ୍‌ତି ଗେଚ୍ଛା ବୁଙ୍ଗେଇ ଚିଚ୍ଚକାନାଏ। ଜାମାର୍ ଭୁଲ୍ ପାବୁନୁ କାଲ୍‌ନାଏ। ନେଦ୍‌ହି ବାନେ ନାଲ୍‌ଖୁ କାମୁର୍ ମାଲ୍‌କାରିନ୍ ଅଣ୍ଟାହି ମାଲ୍ଲା।

¹³ଖୁଲା ରାନା ମାସ୍‌ଣାନ୍ତି ଏସ୍‌କେ ବାସ୍‌ନା ବାରିଦ୍ ହନ୍ନେ ଆବ୍ଡ଼ାର୍‌ଘି ଥୁମ୍‌ଣାନ୍ତି ଖାରାପ୍ କାତ୍‌ଥା ଉର୍‌ଖିଦ୍ ଆବ୍ଡ଼ାର୍‌ଘି ତାଥାଦ୍ ଝୁଟ୍ଟୁ କାତ୍‌ଥାତି ନିନ୍ଦିୟାକେର୍‌କିଚି ଆବ୍ଡ଼ାର୍‌ଘି ଚଲଦ୍ ବିଷ୍ ରୁ ନେର୍‌ରୁ ଲେଖା ରାଇ ଆବ୍ଡ଼ାର୍ ଯେତ୍‌କ ତେଙ୍ଗ୍‌ନାଏ, ଆବ୍ଡ଼ାଦ୍ ଆଲାରିନ୍ ଦୁଃଖୁ ଚିଦ୍।

¹⁴ଆବ୍ଡ଼ାର୍‌ଘି ଥୁମ୍‌ଣାନ୍ତି ସାର୍‌ପାନା ଆରୁ ହାଁଣ୍‌ନାତି ନିନ୍ଦିୟାକେର୍‌କିଚି।

¹⁵ଆବ୍ଡ଼ାର୍ ଜାମାବାକେନ୍ ଲାଡ଼ାଗେ ତିଆର୍ ରାନାଏ, ଆବ୍ଡ଼ାର୍ ଦୁସ୍‌ରାରିନ୍ ପିଟାଗେ ଚାହଁନାଏ।

¹⁶ଆବ୍ଡ଼ାର୍ ଏକାତାରା କାନାଏ ଆଇୟା ଦୁସ୍‌ରାର୍‌ଘି ନାଶ୍ କାମ୍‌ନାଏ ଆରୁ ଦୁଃଖୁ ଚିନାଏ,

¹⁷ଆବ୍ଡ଼ାର୍ ବାଲ୍‌ନାଇନ୍ କା ଏସ୍‌କେ ଶାନ୍ତିନୁ ରାନା କାତ୍‌ଥାଦ୍।

¹⁸ପାର୍‌ମେଶ୍ୱାର୍‌ସ୍‌କି ମାଇନ୍ ଆବ୍ଡ଼ାର୍‌ସାନ୍ ବିଲ୍‌କୁଲ୍ ମାଲ୍ଲାଦିନ୍। ¹⁹ଆକ୍କୁନ୍ ନାମ୍ ଇବନ୍ ଆହ୍‌ଦାତ୍ ମୁଶାସ୍‌କି ନିୟମ୍‌ନୁ ଯେତ୍‌କ ତେଙ୍କାରାଇ ଆବ୍ଡ଼ାଗୁଠିନ୍ ଏକାର୍ ନିୟମ୍‌ଘି ଅଧିନ୍‌ନୁ ରାନାଏ ଆବ୍ଡ଼ାରିନ୍ ତେଙ୍କାରାଇ ହୁଦ୍‌ଘିଲାଗାନ୍ ପାର୍‌ମେଶ୍ୱାର୍‌ସ୍‌ଘି ଆଘ୍‌ଲି ଏନ୍ଦେର୍‌ହି ବାହାନା କାମା ପଲ୍ଲନାଇନ୍ ଆରୁ ଗୋଟା ଦୁନିଆଁଦ୍ ପାର୍‌ମେଶ୍ୱାର୍‌ସ୍‌କି ଦଣ୍ଡ୍‌ଘି ଲାଇଗ୍ ମାନଦ୍। ²⁰ଏନ୍ଦେର୍‌ଗେକା ନିୟମ୍‌ବନ୍ ମାନ୍‌ଚ୍‌କୁନ୍ ନେଦ୍‌ହି ପାର୍‌ମେଶ୍ୱାର୍‌ସ୍‌କି ଆଘ୍‌ଲି ନିର୍ଦ୍ଦୋଷ୍ ମା ମାନ୍ନାଏ। ନାମ୍ ନିୟମ୍‌ଘି ଦ୍ୱାର୍‌ନୁ ଆହ୍‌ଦାତ୍ କା ନାମ୍ ପାପୀତ୍।

ପାର୍‌ମେଶ୍ୱାର୍‌ସ୍ ଏସ୍‌କେ ଆଲାରିନ୍ ନିଜର୍ ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାଚାସ୍

²¹ଲେକିନ୍ ଆକ୍କୁନ୍ ପାର୍‌ମେଶ୍ୱାର୍‌ସ୍ ଆଲାର୍‌ଗେ ଇବନ୍ ଏଦ୍‌କାଦାସ୍ କା ନିୟମ୍‌ବିନା ତାଙ୍ଘାଗାନେ ଆଲାର୍‌ଘି ସମ୍ୱନ୍ଧ ଠିକ୍ ରାଇଦ୍। ହୁଦ୍‌ଘି ବାରେନୁ ମୁଶାସ୍‌କି ନିୟମ୍‌ନୁ ଆରୁ ନାବୀର୍‌ଘି ବହିନୁ ଲେଖ୍‌ଚ୍‌କା ରାଇ। ²²ଏକା ଆଲାର୍ ଯୀଶୁ ଖ୍ରୀସ୍ତ୍‌ସିନ୍ ବିଶ୍ୱାସ୍ କାମ୍‌ନାଏ ଆବ୍ଡ଼ାରିନ୍ ପାର୍‌ମେଶ୍ୱାର୍‌ସ୍ ନିଜର୍ ନଜର୍‌ନୁ ନିର୍ଦ୍ଦୋଷ୍ ଗନ୍ତି କାମ୍‌ଦାସ୍। ପାର୍‌ମେଶ୍ୱାର୍‌ସ୍ ନେକାନ୍‌ହି ଭେଦ୍‌ଭାବ୍ ମା ଉଇଦାସ୍। ²³ଏନ୍ଦେର୍‌ଗେକା ୟାହୁଦୀ ଚାହେ ବିନାୟାହୁଦୀଜାମାର୍ ପାପ୍ କାମ୍‌ଚ୍‌କାନାଏ। ଆରୁ ପାର୍‌ମେଶ୍ୱାର୍‌ସ୍‌ଗାନେ ଏକା ମାହିମା ପହ୍‌ଲେ ରାଚା ଆଦ୍ ଆକ୍କୁନ୍ ଆବ୍ଡ଼ାର୍ ଗାନେ ମାଲ୍ଲାଦିନ୍। ²⁴ଲେକିନ୍ ପାର୍‌ମେଶ୍ୱାର୍‌ସ୍ ତାଙ୍ଘା କ୍ରିପାଘି ବିନାଦାମ୍‌ତି ନାମାନ୍ ନିଜର୍ ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାଚ୍‌କାଦାସ୍ ଇବନ୍ ଆସ୍ ଯୀଶୁ ଖ୍ରୀସ୍ତ୍‌କି ବଲୀ ଦ୍ୱାର୍‌ନୁ କାମ୍‌ଚାସ୍। ଯୀଶୁ ଖ୍ରୀସ୍ତ୍ ନାହ୍ମା ପାପ୍‌ଘି ଲାଗାନ୍ କ୍ରୁଶ୍‌ନୁ ବଲୀ ମାନ୍‌ଚାସ୍ ଆରୁ ନାମାନ୍ ପାପ୍‌ତି ବାଛାବାଚାସ୍। ²⁵ପାର୍‌ମେଶ୍ୱାର୍‌ସ୍ ଯୀଶୁ ଖ୍ରୀସ୍ତ୍‌ସିନ୍ ନାହ୍ମା ଜାମା ଆଲାର୍‌ଘି ଲାଗାନ୍ ବଲୀ କାମ୍‌ଚାସ୍। ଯେତ୍‌କବାକେନ୍ ଆବ୍ଡ଼ାର୍ ଯୀଶୁ ଖ୍ରୀସ୍ତ୍‌କି ବଲୀଦାନ୍ ଆରୁ ହେଁସୁଘି ମିଆଁ ବିଶ୍ୱାସ୍ କାମ୍‌ଚାର୍ ହତ୍‌କବାକେନ୍ ଆଲାର୍‌ଘି ପାର୍‌ମେଶ୍ୱାର୍‌ସ୍‌ଗାନେ ସମ୍ବନ୍ଧ ଠିକ୍ ମାନ୍‌ଚା। ପାର୍‌ମେଶ୍ୱାର୍‌ସ୍ ଏନ୍ନେ ତାଙ୍ଘା ନ୍ୟାୟଘି ସାକ୍ଷୀ ଚିଚ୍ଚାସ୍ କା, ଆସ୍‌କି ସାହ୍‌ନାଘି ଶକ୍ତି ରାଇ ଏନ୍ଦେର୍‌ଗେକା ଆସ୍ ଏକାର୍ ଆଘ୍‌ଲି ପାପ୍ କାମ୍‌ଚ୍‌କାଚାର୍ ଆବ୍ଡ଼ାର୍‌ଗେ ଦଣ୍ଡ୍ ମା ଚିଚ୍ଚାସ୍ ²⁶ଇନ୍ନାହି ପାର୍‌ମେଶ୍ୱାର୍‌ସ୍ ତାଙ୍ଘା ନ୍ୟାୟବନ୍ ଏଦ୍‌ନାଘି ଲାଗାନ୍ ଏନ୍ନେ କାମ୍‌ଚାସ୍। ଆସ୍ ନ୍ୟାୟ କାମୁସ୍, ଆରୁ ଏକା ଆଲାର୍ ଯୀଶୁ ଖ୍ରୀସ୍ତ୍‌କି ମିଆଁ ବିଶ୍ୱାସ୍ କାମ୍‌ନାଏ ଆବ୍ଡ଼ା ଆଲାର୍‌ଘିହି ନ୍ୟାୟ କାମ୍‌ନାବାଲା ଆ ପାର୍‌ମେଶ୍ୱାର୍‌ସିନ୍ ରାଦାସ୍।

²⁷ହୁଦ୍‌ଘିଲାଗାନ୍ ନେକାହି ନିଜର୍ ମିଆଁ ବଡ଼୍‌ପଣି କାମ୍‌ନାଘି ହକ୍ ମାଲ୍ଲାଦିନ୍। ଏକା ନିୟମ୍‌ଘି କାରଣ୍ ଇ ହକ୍ ଠାହ୍‌ରାବାକାଇ? ଇବଦ୍ ମୁଶାସ୍‌କି ନିୟମ୍ ପାଲନ୍ କାମ୍‌ନାଘି କାରଣ୍‌ତି ମାଲ୍ଲା, ବରନ୍ ଯୀଶୁ ଖ୍ରୀସ୍ତ୍‌କି ମିଆଁ ବିଶ୍ୱାସ୍ କାମ୍‌ନାଘି କାରଣ୍‌ତି ମାନ୍‌ଚା। ²⁸ହୁଦ୍‌ଘିଲାଗାନ୍ ଆଲାର୍ ନିୟମ୍‌ବନ୍ ବାନେକିରି ପାଲନ୍ କାମ୍‌ନାତି ମାଲ୍ଲା ଲେକିନ୍ ଯୀଶୁ ଖ୍ରୀସ୍ତ୍‌କି ମିଆଁ ବିଶ୍ୱାସ୍ କାମ୍‌ନାତି ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନାଅଙ୍ଗର୍। ²⁹ପାର୍‌ମେଶ୍ୱାର୍‌ସ୍ ଖାଲି ୟାହୁଦୀର୍‌ଘି ପାର୍‌ମେଶ୍ୱାର୍‌ସ୍ ରାଦାସ୍ କାଁଏ? ମାଲ୍ଲା! ବିନାୟାହୁଦୀ ଜାମାର୍‌ଘି ପାର୍‌ମେଶ୍ୱାର୍‌ସ୍‌ହି ମାଲ୍‌ଦାସ୍ କାଁଏ? ହଁ ଏସ୍‌କିନ୍‌ଭି ଆସ୍ ଇ ଦୁନିଆଁନୁ ଯେତ୍‌କ ଆଲାର୍ ରାନାଏ ଜାମାର୍‌ଘି ପାର୍‌ମେଶ୍ୱାର୍‌ସ୍। ³⁰ଏନ୍ଦେର୍‌ଗେକା ଅଣ୍ଟା ଖାଲି ପାର୍‌ମେଶ୍ୱାର୍‌ସ୍ ରାଦାସ୍ ଏକାସ୍ କା ୟାହୁଦୀର୍‌ଘି ଇ ଯୀଶୁ ଖ୍ରୀସ୍ତ୍‌କି ମିଆଁ ବିଶ୍ୱାସ୍‌ତି ଆରୁ ବିନାୟାହୁଦୀରିନ୍‌ହି ବିଶ୍ୱାସ୍‌ତି ନିଜର୍ ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାବସ୍। ³¹ତା ଏନ୍ଦେର୍ ନାମ୍ ନିଜର୍ ବିଶ୍ୱାସ୍‌ଘି ଦ୍ୱାର୍‌ନୁ ନିୟମ୍‌ବନ୍ ହାଟାବାଦାତ୍ କାଁଏ? ବିଲ୍‌କୁଲ୍ ମାଲ୍ଲା! ସତ୍ତୁନିନ୍ ନାମ୍ ନିଜର୍ ବିଶ୍ୱାସ୍‌ଘି ଦ୍ୱାର୍‌ନୁ ନିୟମ୍‌ବନ୍ ଆରୁ ବାଗ୍ଗେ ମଜ୍‌ବୁତ୍ କାମାଲ୍‌ଦାତ୍।

ଆବ୍ରାହାମ୍‌ସ୍‌କି ବିଶ୍ୱାସ୍‌ଘି ନାମୁନା

¹ତା ନାମ୍ ଏନ୍ଦେର୍ ତେଙ୍ଗତ୍ କା ନାହ୍ମା ପୁର୍‌ଖା ବୁଆ ଆବ୍ରାହାମ୍‌ସ୍‌କେ ଇ କାତ୍‌ଥାନୁ ଏନ୍ଦେର୍ ହାଖ୍‌ରା? ²ଆବ୍ରାହାମ୍‌ସ୍ ନିଜର୍ ନାଲ୍‌ଖୁଘି ଦ୍ୱାର୍‌ନୁ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାରସ୍‌ନେ ତା ଆସ୍ ନିଜର୍ ମିଆଁ ବଡ଼୍‌ପଣି ଏଦ୍‌ରା ଅଙ୍ଗସ୍‌ନେ ଲେକିନ୍ ଆସ୍ ପାର୍‌ମେଶ୍ୱାର୍‌ସ୍‌କି ଚାହାନୁ ଅସଲ୍‌ନୁ ବଡ଼୍‌ପଣି ଏଦ୍‌ରା ପଲ୍ଲସ୍‌ନେ। ³ପାବିତାର୍ ଶାସ୍ତ୍ରଦ୍ ଏନ୍ଦେର୍ ତେଙ୍ଗିଦ୍? ଆବ୍ରାହାମ୍‌ସ୍ ପାର୍‌ମେଶ୍ୱାର୍‌ସ୍‌କି ମିଆଁ ବିଶ୍ୱାସ୍ କାମ୍‌ଚାସ୍ ଆରୁ ଆ ବିଶ୍ୱାସ୍‌ଘି ଲାଗାନ୍ ପାର୍‌ମେଶ୍ୱାର୍‌ସ୍ ଆବ୍ରାହାମ୍‌ସିନ୍ ତାଙ୍ଘା ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାଚାସ୍। ⁴ଆରୁ ଆ ବିଶ୍ୱାସ୍‌ଘି ଦ୍ୱାର୍‌ନୁ ନାଲ୍‌ଖୁ କାମୁର୍‌ଗେ ମଜ୍‌ରୀ ହାଖ୍‌ର୍‌ନା କ୍ରିପାଘି ରୂପ୍‌ନୁ ମା ଚିଆକାଇ ବରନ୍ ମଜ୍‌ଦୁରୀ ହାଖ୍ଖନା ଆସ୍‌କି ହକ୍ ରାଇ। ⁵ଲେକିନ୍ ନେର୍ ନାଲଖୁ ମା କାମ୍‌ନାଏ ଆରୁ ପାର୍‌ମେଶ୍ୱାର୍‌ସ୍‌ସିନ୍ ବିଶ୍ୱାସ୍ କାମ୍‌ନାତି ଆସ୍‌କି ନଜର୍‌ନୁ ନିର୍ଦ୍ଦୋଷ୍ ମାନ୍ନାଏକାନାଏ ତା ଆବ୍ଡ଼ାର୍ ଖାଲି ନିଜର୍ ବିଶ୍ୱାସ୍‌ଘି ଲାଗାନ୍ ନିର୍ଦ୍ଦୋଷ୍ ମାନ୍ନାଏକାନାଏ। ⁶ଇଦ୍‌ଘି ଲେଖା ଦାଉଦ୍‌ସ୍‌ହି ଆ ମୁନୁଷ୍‌ସିନ୍ ଧଏନ୍ ବାନାଏ ଏକାସିନ୍ ପାର୍‌ମେଶ୍ୱାର୍‌ସ୍ ନାଲ୍‌ଖୁଘିବିନାହି ନିଜର୍ ନଜର୍‌ନୁ ନିର୍ଦ୍ଦୋଷ୍ ମାନ୍‌ଦାସ୍, ଦାଉଦ୍‌ସ୍ ଏନ୍ନେ ତେଙ୍ଗିୟାସ୍। ⁷କେତ୍‌କ ଧଏନ୍ ରାନାଏ ଆବ୍ଡ଼ାର୍ ଏକାର୍‌ଘି ଦୋଷ୍ ଛେମା କାମା କେର୍‌କିଚି ଆରୁ ଏକାର୍‌ଘି ପାପ୍‌ବନ୍ ଡାବାଚା କେର୍‌କିଚି। ⁸କେତ୍‌କ ଧଏନ୍ ରାନାଏ କା ଏକାର୍‌ଘି ପାପ୍‌ବନ୍ ପ୍ରାଭୁସ୍ ମା ଗଣଦାସ୍।

⁹ଖାଲି ୟାହୁଦୀଜାମାର୍ ପାର୍‌ମେଶ୍ୱାର୍‌ସ୍‌ତି ଆଶୀର୍ବାଦ୍ ହାଖ୍ଖର୍ କାଁଏ? ବିନାୟାହୁଦୀ ଆଲାର୍‌ହି ପାର୍‌ମେଶ୍ୱାର୍‌ସ୍‌ତି ଆଶୀର୍ବାଦ୍ ହାଖ୍ଖର? ହଁ ନାମ୍ ତେଙ୍ଗ୍‌ଦାତ୍ କା ପାର୍‌ମେଶ୍ୱାର୍‌ସ୍ ଆବ୍ରାହାମ୍‌ସିନ୍ ଆସ୍‌କି ବିଶ୍ୱାସ୍‌ଘି ଲାଗାନିନ୍ ତାଙ୍ଘା ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାଚାସ୍। ¹⁰ପାର୍‌ମେଶ୍ୱାର୍‌ସ୍ ଆବ୍ରାହାମ୍‌ସିନ୍ ଏକ୍‌ଲା ନିର୍ଦ୍ଦୋଷ୍ ଠାହ୍‌ରାଚାସ୍। ଖାତ୍‌ନା କାମ୍‌ଚ୍‌କାଘି ପହ୍‌ଲେ କା ଖାତ୍‌ନା କାମ୍‌ଚ୍‌କାଘି ପାଛ୍‌ଲି? ମାଲ୍ଲା, ଲେକିନ୍ ପାର୍‌ମେଶ୍ୱାର୍‌ସ୍ ଆବ୍ରାହାମ୍‌ସିନ୍ ଖାତ୍‌ନା ମାନ୍‌ଚ୍‌କାଘି ଆଘ୍‌ଲିନିନ୍ ନିଜର୍ ନଜର୍‌ନୁହି ନିର୍ଦ୍ଦୋଷ୍ ଠାହ୍‌ରାଚାସ୍। ¹¹ଆବ୍ରାହାମ୍‌ସ୍‌କି ବିନାଖାତ୍‌ନାଘି ସାମାୟନୁ ଖାଲି ଆସିନ୍ ବିଶ୍ୱାସ୍‌ଘି ଦ୍ୱାର୍‌ନୁ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାବା କେରାଦ୍ ଆରୁ ଆବ୍ରାହାମ୍‌ସ୍‌କି ମିଆଁ ମୋହର୍‌ଘି ଲେଖା ଖାତ୍‌ନାଘି ଚିହ୍ନା ଲାଗାବା କେରା। ଇଦ୍‌ଘି ଲେଖା ଆବ୍ରାହାମ୍‌ସ୍ ଜାମାର୍‌ଘି ବାଙ୍ଗ୍ ମାନ୍‌ଚାସ୍ କେରାସ୍ ଏକା ଖାତ୍‌ନା କାମ୍‌ଚ୍‌କା ବିନା ପାର୍‌ମେଶ୍ୱାର୍‌ସ୍‌କି ମିଆଁ ବିଶ୍ୱାସ୍ କାମ୍‌ନାଏ। ଆରୁ ଆ ବିଶ୍ୱାସ୍‌ଘି ଦ୍ୱାର୍‌ନୁହି ଆବ୍ଡ଼ାର୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାରାନାଏ। ¹²ନାହ୍ମା ବାଙ୍ଗ୍ ଆବ୍ରାହାମ୍‌ସ୍‌କି ବିଶ୍ୱାସ୍‌ଦ୍‌ ଏକାଦ୍ ଆବ୍ଡ଼ାରିନ୍ ଖାତ୍‌ନାଘି ପହ୍‌ଲେ ହାଖ୍ଖର୍‌କିଚା ଆ ବିଶ୍ୱାସ୍‌ଘି ପାବୁନୁ ଏକାର୍ ଏକ୍‌ନାଏ, ଆ ଜାମାର୍‌ଘି ବାଙ୍ଗ୍‌ସ୍‌ ଆବ୍ରାହାମ୍‌ସ୍।

ପାର୍‌ମେଶ୍ୱାର୍‌ସ୍ ଆବ୍ରହାମ୍‌ସଗେ କାତ୍‌ଥା ଚିଚ୍ଚାସ୍

¹³ପାର୍‌ମେଶ୍ୱାର୍‌ସ୍ ଆବ୍ରାହାମ୍ ଆରୁ ତାଙ୍ଘା ହାଦ୍ଦୁର୍‌ଗେ ଏନ୍ନେ କାତ୍‌ଥା ଚିଚ୍ଚାସ୍ କା ଆବ୍ଡ଼ାର୍ ଦୁନିଆଁଘି ହକ୍‌ଦାର୍ ମାନର୍, ଇଦ୍ ହୁଦ୍‌ଘିଲାଗାନ୍ ମା ମାନ୍‌ଚା କା ଆବ୍ରାହାମ୍‌ସ୍ ନିୟମ୍‌ଘି ପାଲନ୍ କାମ୍‌ଚାସ୍। ବରନ୍ ଇଦ୍‌ଘିଲାଗାନ୍ ମାନ୍‌ଚା କା ଆବ୍ଡ଼ାର୍ ପାର୍‌ମେଶ୍ୱାର୍‌ସ୍‌କି ମିଆଁ ବିଶ୍ୱାସ୍ କାମ୍‌ଚାର୍ ଆରୁ ଆ ବିଶ୍ୱାସ୍‌ଘି ଦ୍ୱାର୍‌ନୁ ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ନିଜର୍ ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାଚାସ୍। ¹⁴ଯଦି ନିୟମ୍ ପାଲନ୍ କାମ୍‌ନାତି ହକ୍‌ଦାର୍ ମାନ୍ନାଏ ତା ବିଶ୍ୱାସ୍‌ଦ୍‌ ବେକାର୍‌ଦ୍, ଆରୁ କାତ୍‌ଥା ଚିଚ୍ଚକାଦ୍ ପାଖିଆରି କାଇଦ୍। ¹⁵ଏକାସାନ୍ ନିୟମ୍ ଆତ୍‌ଲି ଆରୁ ନା ଆଲାର୍ ନିୟମ୍‌ବନ୍ ମା ମାନ୍ନାଏ ତା ପାର୍‌ମେଶ୍ୱାର୍‌ସ୍ ଆବ୍ଡ଼ାର୍‌ଗେ ଦଣ୍ତ୍‌ ଚିଦାସ୍। ଲେକିନ୍ ଏକାସାନ୍ ନିୟମ୍‌ଦିନ୍ ମାଲ୍ଲାଦିନ୍ ଆସାନ୍ ନିୟମ୍ ତୋଡ଼୍‌ନାଦ୍‌ହି ମାଲ୍ଲାଦିନ୍।

¹⁶ପାର୍‌ମେଶ୍ୱାର୍‌ସ୍‌କି କାତ୍‌ଥା ଚିଚ୍ଚକାଦ୍ ଖାଲି ବିଶ୍ୱାସ୍‌ତି ହାଖ୍ଖରିଦ୍, ଆରୁ ପାର୍‌ମେଶ୍ୱାର୍‌ସ୍‌କି ବିଶ୍ୱାସ୍ ନା ଖାଲି ଆ ଆଲାର୍‌ଘି ମିଆଁ ଏକା ନିୟମ୍‌ବନ୍ ପାଲନ୍ କାମ୍‌ନାଏ ବରନ୍ ଆ ଆଲାର୍‌ଘି ମିଆଁହି ଲାଗୁ ମାନିଦ୍ ଏକା ଆଲାର୍ ଆବ୍ରାହାମ୍‌ସ୍‌କି ଲେଖା ବିଶ୍ୱାସ୍ କାମ୍‌ନାଏ, ଆ ଆବ୍ରାହାମ୍‌ସ୍ ନାହ୍ମାଏ ଜାମାର୍‌ଘି ବାଙ୍ଗ୍‌ସ୍‌। ¹⁷ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ, “ଏନ୍ ନିଙ୍ଗାନ୍ ଜାମା ଜାତିନ୍ତା ବାଙ୍ଗ୍ ବାନାବନ୍ ଇଦ୍ ଇଦ୍‌ଘିଲାଗାନ୍ ମାନ୍‌ଚା କା ଆବ୍ରାହାମ୍‌ସ୍ ପାର୍‌ମେଶ୍ୱାର୍‌ସିନ୍ ବିଶ୍ୱାସ୍ କାମ୍‌ଚାସ୍ ଏକା ପାର୍‌ମେଶ୍ୱାର୍‌ସ୍ କେଚ୍ଚକାରିନ୍ ଉଜ୍ଜତାଦାସ୍ ଆରୁ ମା ରାନା ଜିନିଷ୍‌ବନ୍ ରାନା ଲେଖା କାମ୍‌ଦାସ୍।” ¹⁸ଆବ୍ରାହାମ୍‌ସ୍ ହାତାଶ୍ ରାନା ସାମାୟନୁହି ଆଶ୍ରା ଉଇକିରି ବିଶ୍ୱାସ୍ କାମ୍‌ଚାସ୍ ଆରୁ ଆସ୍ ବହୁତ୍ ଜାତିୟାର୍‌ଘି ବାଙ୍ଗ୍ ମାନ୍‌ଚାସ୍ କେରାସ୍ ଏସ୍‌କେ କା ଆବ୍ଡ଼ାରିନ୍ ତେଙ୍ଗାକେର୍‌କିଚା ନିଙ୍ଘାଏ ଗଣାପଲ୍‌ନା ବାଉଁଶା ମାନର୍। ¹⁹ଆବ୍ରାହାମ୍‌ସ୍‌କି ଲାଗ୍‌ଭାଗ୍ ଶୋଏ ବଛର୍ ମାନ୍‌ଚା କେର୍‌କିଚା ଆରୁ ହାଦ୍ଦୁବଚ୍ଚ ଜନମ୍ କାମ୍‌ନାଘି ବୟସ୍ ବିତ୍‌ରା କେର୍‌କିଚା ଆରୁ ସାରାଦ୍ ବାନ୍‌ଝୀ ରାଚା ହାଲେହି ଆବ୍ରାହାମ୍‌ସ୍ ବିଶ୍ୱାସ୍‌ନୁ ମା ଡାଗ୍‌ମାଗ୍‌ରାସ୍। ²⁰ଆବ୍ରାହାମ୍‌ସ୍ ପାର୍‌ମେଶ୍ୱାର୍‌ସ୍‌କି କାତ୍‌ଥା ଚିଚ୍ଚକାଘି ମିଆଁ କାଟେହି ଶାକ୍ ମା କାମ୍‌ଚାସ୍ ଲେକିନ୍ ଆସ୍‌କି ବିଶ୍ୱାସ୍ ଆରୁହି ବାଗ୍ଗେ ମଜ୍‌ବୁତ୍ ମାନ୍‌ଚା ଆରୁ ଆସ୍ ପାର୍‌ମେଶ୍ୱାର୍‌ସ୍‌କି ମାହିମା କାମ୍‌ଚାସ୍। ²¹ଆବ୍ରାହାମ୍‌ସ୍‌କେ ପୁରା ଭାର୍‌ଷା ରାଚା କା ଏକା କାତ୍‌ଥା ପାର୍‌ମେଶ୍ୱାର୍‌ସ୍ ଚିଚ୍‌କାଦାସ୍ ଆବନ୍ ପୁରା କାମାଗେ ତାଙ୍ଘା ଶକ୍ତି ରାଇ। ²²ଆବ୍ରାହାମ୍‌ସ୍‌କି ବିଶ୍ୱାସ୍‌ଘି ଦ୍ୱାର୍‌ନୁ ଆସିନ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାଚାସ୍। ²³ବିଶ୍ୱାସ୍‌ଘି ଦ୍ୱାର୍‌ନୁ ପାର୍‌ମେଶ୍ୱାର୍‌ସ୍ ତାଙ୍ଘା ନଜର୍‌ନୁ ଧାର୍ମିକ୍ ଗନ୍ତି କାମ୍‌ଚାସ୍ ଇ କାତ୍‌ଥା ପାବିତାର୍ ଶାସ୍ତ୍ରନୁ ଲେଖା ରାଇ ଏସ୍‌କେ ଆବ୍ରାହାମ୍‌ସ୍‌କେ ଖାଲି ଲେଖ୍‌ଚ୍‌କା ମାଲ୍ଲାଦିନ୍। ²⁴ନାହ୍ମାଲାଗାନ୍‌ହି ଲେଖ୍‌ଚ୍‌କା ରାଇ ପାର୍‌ମେଶ୍ୱାର୍‌ସ୍ ନାମାଗେ କାତ୍‌ଥା ଚିଚ୍‌କାଦାସ୍ କା ଆସ୍ ନାମାନ୍ ତାଙ୍ଘା ନଜର୍‌ନୁ ନିର୍ଦ୍ଦୋଷ୍ ଗନ୍ତି କାମସ୍, ଏକାସ୍ କା ନାହ୍ମାଏ ପ୍ରାଭୁ ଯୀଶୁସିନ୍ କେଚ୍ଚ୍‌କାସ୍ତି ଉଜ୍ଜତାଚାସ୍। ²⁵ଆ ଯୀଶୁ ଖ୍ରୀସ୍ତ୍‌ସିନ୍ ନାହ୍ମା ଦୋଷ୍‌ଘି ଲାଗାନ୍ କ୍ରୁଶ୍‌ନୁ ଠୋକାଚାକେରା ଆରୁ ନାମାନ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ବାନାବାଗେ ଉଜ୍ଜତାକେରା।

ପାର୍‌ମେଶ୍ୱାର୍‌ସ୍‌ଗାନେ ନାହ୍ମା ମେଲ୍‌ମିଲାପ୍ ମାନ୍‌ଚାକେର୍‌କିଚି

¹ଏନ୍ଦେର୍‌ଗେକା ନାହ୍ମା ବିଶ୍ୱାସ୍‌ଘି ଲାଗାନ୍ ପାର୍‌ମେଶ୍ୱାର୍‌ସ୍ ନାମାନ୍ ତାଙ୍ଘା ନଜର୍‌ନୁ ନିର୍ଦ୍ଦୋଷ୍ କାମ୍‌ଚାସ୍ ତା ପ୍ରାଭୁ ଯୀଶୁ ଖ୍ରୀସ୍ତ୍‌କି ବଲୀ ଦ୍ୱାର୍‌ନୁ ପାର୍‌ମେଶ୍ୱାର୍‌ସ୍‌ଗାନେ ନାହ୍ମାଏ ମେଲ୍‌ମିଲାପ୍ ମାନ୍‌ଚ୍‌କିଚି। ²ଆ ପ୍ରାଭୁ ଯୀଶୁ ଖ୍ରୀସ୍ତ୍‌କି ଦ୍ୱାର୍‌ନୁ ବିଶ୍ୱାସ୍‌ଘି ଲାଗାନ୍ ପାର୍‌ମେଶ୍ୱାର୍‌ସ୍‌କି କ୍ରିପା ନାମାଗେ ହାଖ୍ଖର୍‌କିଚି, ଆରୁ ନାମ୍ ଆ କ୍ରିପାନୁ ରତ୍। ଆରୁ ନାମ୍ ପାର୍‌ମେଶ୍ୱାର୍‌ସ୍‌କି ମାହିମାଘି ଭାଗୁ ହାଖ୍ଖନାଘି ଆଶ୍ରାନୁ ରିଝୁତି ନାମ୍ ଉଜ୍ଜ୍‌ଦାତ୍। ³ଏତ୍‌କ ଖାଲି ମାଲ୍ଲା ନାମ୍ ନାହ୍ମା ଦୁଃଖୁ କଷଟ୍‌ନୁହିଁ ଖୁସ୍ ରାଦାତ୍। ଏନ୍ଦେର୍‌ଗେକା ନାମ୍ ଆହ୍‌ଦାତ୍ କା ଦୁଃଖୁ କଷଟ୍‌ତିନିନ୍ ସାହ୍‌ନା ଶକ୍ତି ହାଖ୍ଖରିଦ୍। ⁴ନାମ୍ ଧିରାଜ୍‌ତିନିନ୍ ପ୍ରାଭୁସ୍‌କି ନଜର୍‌ନୁ ବାନେତ୍। ଆରୁ ବାନେ ରାନାତିନିନ୍ ନାହ୍ମାଏନୁ ଆଶ୍ରାଦ୍ ସିର୍‌ଜାରିଦ୍। ⁵ଆରୁ ଆଶ୍ରାତି ହାତାଶ୍ ମା ମାନିଦ୍ ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ନାମାଗେ ପାବିତାର୍ ଆତ୍ମା ଚିଚ୍‌କାଦାସ୍ ଆତ୍ତି ନାମ୍ ପାର୍‌ମେଶ୍ୱାର୍‌ସ୍ ତାଙ୍ଘା ବାନେ ହାଖ୍ଖନାବନ୍ ନାହ୍ମା ମନ୍‌ନୁ ଭାର୍‌ପୁର୍ ଚିଚ୍ଚକାଦାସ୍। ⁶ଏନ୍ଦେର୍‌ଗେକା ଯେତ୍‌କବାକେନ୍ ନାମ୍ କମ୍‌ଜୋର୍ ରାଚ୍‌କାତ୍, ଆରୁ ନାମ୍ ନିଜେ ବାଛ୍‌ରା ପଲ୍ଲାଲ୍‌କାତ୍ ଆ ଠିକ୍ ସାମାୟନୁ ଖ୍ରୀସ୍ତ୍‌ ନାହ୍ମା ଅଧର୍ମି ଆଲାର୍‌ଘି ଲାଗାନ୍ ନିଜର୍ ଜୀବନ୍‌ବନ୍ ବଲୀ ଚିଚ୍ଚଚାସ୍। ⁷ଧର୍ମି ଆଲାସ୍‌କି ଲାଗାନ୍ ନେଦିନ୍ ମା ଖିନାଏ ହାଲେହି ଅଣ୍ଟା ବାନେ ଆଲାସ୍‌କି ଲାଗାନ୍ ନେଦିନ୍ ଖିଆଗେ ଲାଗାନ୍ ତିୟାର୍ ମାନା ଅଙ୍ଗ୍‌ଦାସ୍। ⁸ଯେତ୍‌କବାକେନ୍ ନାମ୍ ପାପୀନିନ୍ ରାଚ୍‌କାତ୍ ତା ଖ୍ରୀସ୍ତ୍‌ ନାହ୍ମା ପାପ୍‌ଘି ଲାଗାନ୍ ଜୀଆ ଚିଚ୍ଚାସ୍ ଲାଗ୍ଗିୟାସ୍। ଆରୁ ଇନ୍ନୁନ୍ତି ନାହ୍ମା ପ୍ରତି ପାର୍‌ମେଶ୍ୱାର୍‌ସ୍ ତାଙ୍ଘା ମାହାନ୍ ବାନେ ହାଖ୍ଖନାବନ୍ ଏଦିୟାସ୍। ⁹ଯୀଶୁ ଖ୍ରୀସ୍ତ୍‌କି ହେଁସୁତି ନାମ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନ୍‌ଚ୍‌କାତ୍ ଆରୁ ନାମାନ୍ ଆଖ୍‌ରୀ ନ୍ୟାୟ ଉଲ୍ଲାନୁହି ପାର୍‌ମେଶ୍ୱାର୍‌ସ୍‌କି ଦଣ୍ତ୍‌ତି ନାମ୍ ଜରୁର୍ ବାଛ୍‌ରତ୍‌କତ୍। ¹⁰ଯେତ୍‌କବାକେନ୍ ନାମ୍ ପାର୍‌ମେଶ୍ୱାର୍‌ସ୍‌କି ବିରୁଦ୍ଧ କାମାଲ୍‌କାତ୍ ହତ୍‌କବାକେନ୍ ପାର୍‌ମେଶ୍ୱାର୍‌ସ୍ ତାଙ୍ଘା ହାଦ୍ଦୁସ୍‌କି ମରନ୍ ଦ୍ୱାର୍‌ନୁ ତାଙ୍ଘାଗାନେ ନାହ୍ମା ମେଲ୍‌ମିଲାପ୍ କାମ୍‌ତାଚାସ୍। ଆରୁ ନାହ୍ମା ମେଲ୍‌ମିଲାପ୍ ଏନ୍ନେ ମାନ୍‌ଚାକେର୍‌କିଚି କା ପାର୍‌ମେଶ୍ୱାର୍‌ସ୍‌କି ହାଦ୍ଦୁସ୍‌କି ଜୀବନ୍‌ଘି ଦ୍ୱାର୍‌ନୁ ନାହ୍ମା ମୁକ୍ତି ଜରୁର୍ ମାନଦ୍। ¹¹ଏତ୍‌କ ଖାଲି ମାଲ୍ଲା ଆକ୍କୁନ୍ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍‌କି ଦ୍ୱାର୍‌ନୁ ପାର୍‌ମେଶ୍ୱାର୍‌ସ୍‌ଗାନେ ନାହ୍ମାଏ ମେଲ୍‌ମିଲାପ୍ ମାନ୍‌ଚାକେରା। ହୁଦ୍‌ଘିଲାଗାନ୍ ନାମ୍ ଆସ୍‌କି ଦ୍ୱାର୍‌ନୁ ପାର୍‌ମେଶ୍ୱାର୍‌ସ୍‌କି ମିଆଁ ଭାର୍‌ଷା ଉଇକିରି ରୀଜ୍‌ଝୁ କାମାଲ୍‌ଦାତ୍।

ଆଦାମ୍‌ସ୍‌କି ଦ୍ୱାର୍‌ନୁ ମରନ୍ ଆରୁ ଯୀଶୁ ଖ୍ରୀସ୍ତ୍‌କି ଦ୍ୱାର୍‌ନୁ ଉଜ୍ଜନାଦ୍

¹²ଆଦାମ୍‌ସ୍ ପାର୍‌ମେଶ୍ୱାର୍‌ସ୍‌କି ନିୟମ୍‌ବନ୍ ମା ମାନ୍ନାଘି କାରଣ୍‌ତି ପାପ୍ ଦୁନିଆଁନୁ ବାର୍‌ଚା। ଆରୁ ଆଦାମ୍‌ସ୍‌କି ମା ମାନ୍ନାଘି କାରଣତିହି ମରନ୍‌ଦ୍ ଜାମା ଆଲାର୍‌ଘିନୁ ଫାଏଲାରାଚା କେରା ଆରୁ ଜାମା ଆଲାର୍ ପାପୀ ମାନ୍‌ଚାର୍ କେରାର୍। ¹³ପାର୍‌ମେଶ୍ୱାର୍‌ସ୍ ମୁଶାସ୍‌କି ନିୟମ୍ ଚିନାଘି ଆଘ୍‌ଲିନିନ୍ ପାପ୍ ଦୁନିଆଁନୁ ରାଚା, ଲେକିନ୍ ଏକାସାନ୍ ନିୟମ୍ ମା ମାନ୍ନାଘି କାରଣ୍‌ତି ପାପ୍‌ବନ୍ ଗଣା ମା କାଇ। ¹⁴ଆଦାମ୍‌ସ୍‌ତି ହୋଇକିରି ମୁଶାସ୍‌କି ସାମାୟତକ୍ ମରନ୍ ଜାମା ଆଲାର୍‌ଘି ମିଆଁ ଶାସନ୍ କାମ୍‌ତେ ରାଇ। ଆବ୍ଡ଼ା ଆଲାର୍ ଆଦାମ୍‌ସ୍‌କି ଲେଖା ଏକ୍ରିନ୍ କାତ୍‌ଥା ମା ମାନ୍ନାଘି ଦ୍ୱାର୍‌ନୁ ପାପ୍ ମାଲ୍ଲା କାମ୍‌ଚ୍‌କାରୁର୍। ଆରୁ ଆଦାମ୍‌ସ୍ ତା ବାର୍‌ନାବାଲା ମୁକ୍ତିଦାତାସ୍‌କି ଲେଖା ରାଚାସ୍। ¹⁵ଆଦାମ୍‌ସ୍‌କି ନିୟମ୍ ମା ମାନ୍ନାଘି ଦ୍ୱାର୍‌ନୁ ଆରୁ ପାର୍‌ମେଶ୍ୱାର୍‌ସ୍‌କି କ୍ରିପା ଇ ଯୋଡ଼େନ୍ ତୁଲ୍‌ନା କାମା ପଲ୍ଲଦାତିନ୍। ଇ କାତ୍‌ଥାଦ୍ ସତ୍ତୁଦ୍ କା ଅଣ୍ଟା ଖାଲି ମୁନୁଷ୍ ଆଦାମ୍‌ସ୍‌କି କାତ୍‌ଥା ମା ମେନ୍ନାଘି କାରଣ୍‌ତି ବହୁତ୍ ଆଲାର୍ କେଚ୍ଚାର୍ କେରାର୍। ଲେକିନ୍ ଆନ୍ନେନିନ୍ ଅଣ୍ଟା ମୁନୁଷ୍ ଯୀଶୁ ଖ୍ରୀସ୍ତ୍‌ସ୍‌କି ଦ୍ୱାର୍‌ନୁ ପାର୍‌ମେଶ୍ୱାର୍‌ସ୍‌କି କ୍ରିପା ଜାମା ଆଲାର୍‌ଗେ ବାଗ୍ଗେ ହାଖ୍‌ରା। ¹⁶ଆଦାମ୍‌ସ୍‌କି କାତ୍‌ଥା ମା ମେନ୍ନା ଆରୁ ପାର୍‌ମେଶ୍ୱାର୍‌ସ୍‌କି କ୍ରିପାନୁ ଏନ୍ଦେର୍‌ହି ଫରକ୍ ମାଲ୍ଲାଦିନ୍। ଆଦାମ୍‌ସ୍‌କି କାତ୍‌ଥା ମା ମେନ୍ନାଘି କାରଣ୍‌ତି ଜାମା ଆଲାର୍‌ଘି ମିଆଁ ପାର୍‌ମେଶ୍ୱାର୍‌ସ୍‌କି ଦଣ୍ଡ୍ ବାର୍‌ଚା କେରା, ଲେକିନ୍ ଜାମା ଆଲାର୍‌ଘି ଦୋଷ୍‌ଘି ପାଛ୍‌ଲି ପାର୍‌ମେଶ୍ୱାର୍‌ସ୍‌କି ଏକା କ୍ରିପା ଚିୟାକେରା ଆସ୍‌କି ନଜର୍‌ନୁ ମୁନୁଷ୍‌ର୍‌ ନିର୍ଦ୍ଦୋଷ୍ ଠାହ୍‌ରାରାଚାର୍। ¹⁷ଆଦାମ୍‌ସ୍‌କି କାତ୍‌ଥା ମା ମେନ୍ନାଘି ଲାଗାନ୍ ଜାମା ଆଲାର୍‌ଘି ମିଆଁ ମରନ୍‌ଦ୍ ଶାସନ୍ କାମ୍‌ଚା, ଲେକିନ୍ ଯୀଶୁ ଖ୍ରୀସ୍ତ୍‌କି ଦ୍ୱାର୍‌ନୁ ପାର୍‌ମେଶ୍ୱାର୍‌ସ୍‌କି କ୍ରିପା ଆରୁ ପାପ୍‌ସ୍ତି ମୁକ୍ତିଘି ବାର୍‌ଦାନ୍ ଜାମା ମୁନୁଷ୍‌ର୍‌ଗେ ହାଖ୍‌ରା ଆରୁ ଜାମା ମୁନୁଷ୍‌ର୍‌ ସୁଃଖୁ ଜୀବନ୍ ବାଗ୍ଗେ ହାଖ୍ଖନାଘି ଲାଇଗ୍ ମାନ୍‌ଚାର୍ କେରାର୍।

¹⁸ଆଦାମ୍‌ସ୍ ପାର୍‌ମେଶ୍ୱାର୍‌ସ୍‌କି ନିୟମ୍ ମା ମାନ୍ନାଘି କାରଣ୍‌ତି ଜାମା ଆଲାର୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ଦୋଷୀ ମାନ୍‌ଚାର୍ କେରାର୍ ଲେକିନ୍ ଯୀଶୁ ଖ୍ରୀସ୍ତ୍‌ସ୍‌କି ବଲୀଘି ଦ୍ୱାର୍‌ନୁ ପାର୍‌ମେଶ୍ୱାର୍‌ସ୍‌ଗାନେ ବାନେ ସମ୍ୱନ୍ଧ ମାନ୍‌ଚା ଆରୁ ଜାମାର୍‌ଘି ଲାଗାନ୍ ସବୁଦିନ୍‌ତା ଜୀବନ୍ ହାଖ୍ଖରା। ¹⁹ଆରୁ ଆଦାମ୍‌ସ୍ ପାର୍‌ମେଶ୍ୱାର୍‌ସ୍‌କି ଆଦେଶ୍‌ବନ୍ ମା ମାନ୍‌ଚାସ୍ ଆରୁ ଜାମା ଆଲାର୍ ପାପୀ ମାନ୍‌ଚାର୍। ଲେକିନ୍ ଯୀଶୁ ଖ୍ରୀସ୍ତ୍‌ସ୍‌ ପାର୍‌ମେଶ୍ୱାର୍‌ସ୍‌କି ହୁକୁମ୍‌ବନ୍ ମାନ୍‌ଚାସ୍ ହୁଦ୍‌ଘିଲାଗାନ୍ ଢେର୍ ଆଲାର୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାରାଚାର୍। ²⁰ପାର୍‌ମେଶ୍ୱାର୍‌ସ୍ ମୁଶାସ୍‌କେ ନିୟମ୍ ଚିଚ୍ଚାସ୍ ଆଙ୍ଗେନ୍ ଆଲାର୍ ପାପ୍‌ବନ୍ ଆହା ଅଙ୍ଗିୟାର୍। ଲେକିନ୍ ପାପ୍ ଆରୁ ବାଢ଼୍‌ରାଗେ ଲାଗ୍ଗିୟା, ଏକାସାନ୍ ବାଗ୍ଗେ ପାପ୍ ମାନ୍‌ଚା ଆସାନ୍ ପାର୍‌ମେଶ୍ୱାର୍‌ସ୍‌କି କ୍ରିପା ଆରୁହି ବାଗ୍ଗେ ମାନ୍‌ଚା। ²¹ପାପ୍‌ଘି ଲାଗାନ୍ ମରନ୍ ମାନ୍‌ଚା। ଲେକିନ୍ ପାର୍‌ମେଶ୍ୱାର୍‌ସ୍‌କି କ୍ରିପା ଇଦ୍‌ଘିନ୍ତି ଆରୁହି ଢେର୍‌ବାଗ୍ଗେ ମାନ୍‌ଚା। ଆନ୍ନେନିନ୍ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍‌କି ଦ୍ୱାର୍‌ନୁ ନାମ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନ୍‌ଚ୍‌କାତ୍ କେର୍‌କାତ୍ ଆରୁ ଜାମାର୍‌ଗେ ସବୁଦିନ୍‌ତା ଜୀବନ୍ ହାଖ୍ଖରା।

ଖ୍ରୀସ୍ତ୍‌କି ଦ୍ୱାର୍‌ନୁ ପାପ୍‌ଘି ବନ୍ଧନ୍‌ତି ମୁକ୍ତି

¹ତା ନାମ୍ ଏନ୍ଦେର୍ ତେଙ୍ଗତ୍? କା ନାମ୍ ପାପ୍ କାମ୍‌ତେରତ୍ ତାକା ପାର୍‌ମେଶ୍ୱାର୍‌ସ୍‌କି କ୍ରିପା ବାଢ଼୍‌ର୍‌ତେ ରୋ? ²ବିଲ୍‌କୁଲ୍ ମାଲ୍ଲା! ଯଦି ନାମ୍ ପାପ୍‌ଘି ଚାଲ୍‌ତେ କେଚ୍ଚକାତ୍ କେର୍‌କାଦାତ୍ ଆରୁ ପାପ୍‌ଘି ସମ୍ବନ୍ଧତୀ ପୁରାପୁରୀ ଭିନେ ମାନ୍‌ଚ୍‌କାତ୍ କେର୍‌କାଦାତ୍ ତା ନାମ୍ ଏସ୍‌କେ ପାପ୍ କାମିକିରି ଉଜ୍ଜାଅଙ୍ଗତ୍? ³ଆରୁ ନିମ୍ ବାଲ୍‌ଦାର୍ କାଁଏ କା ନାମ୍, ଯେତ୍‌କ ଆଲାର୍ ଯୀଶୁ ଖ୍ରୀସ୍ତ୍‌କି ଆସ୍ନାନ୍ ଅଚ୍ଚକାଦାତ୍, ଆସ୍‌କି ମରନ୍‌ଘିହି ଆସ୍ନାନ୍ ଅଚ୍ଚକାଦାତ୍। ⁴ହୁଦ୍‌ଘିଲାଗାନ୍ ଆସ୍‌କି ମରନ୍‌ଘି ଆସ୍ନାନ୍ ହାଖ୍ଖନାଘି ଦ୍ୱାର୍‌ନୁ ନାମ୍ ଆସ୍‌ଗାନେ କେଚ୍ଚକାତ୍ କେର୍‌କାତ୍ ତାକା ଏସ୍‌କେ ଯୀଶୁ ଖ୍ରୀସ୍ତ୍‌ ପାର୍‌ମେଶ୍ୱାର୍‌ସ୍‌କି ମାହିମାତି କେଚ୍ଚକାନ୍ତି ଉଜ୍ଜତାକେରା, ଆନ୍ନେନ୍ ନାମ୍‌ହି ପୁନା ଜୀବନ୍ ଲେଖା ଚାଲ୍‌ରତ୍। ⁵ଯେତ୍‌କବାକେନ୍ ନାମ୍ ଆସ୍‌କି ମରନ୍‌ନୁ ଆସ୍‌ଗାନେ ରାଚ୍‌କାତ୍ ତା ଏସ୍‌କିନ୍‌ଭି ଆସ୍ ଲେଖା ଜୀଉଠ୍‌ର୍‌ରିକିରି ଉଜ୍ଜତ୍। ⁶ନାମ୍ ଆହ୍‌ଦାତ୍ କା ନାହ୍ମାଏ ଆଘ୍‌ଲିନ୍ତା ପାପ୍ କାମ୍‌ନାଘି ସାଭାବ୍ ଯୀଶୁ ଖ୍ରୀସ୍ତ୍‌ସ୍‌ଗାନେ କ୍ରୁଶ୍‌ନୁ ଆର୍‌ଗ୍‌ତାଚା କେରା ତାକା ପାପ୍ ନାହ୍ମା ଜୀଆନୁ ଶାସନ୍ ମା କାମ ଆରୁ ନାମ୍ ପାପ୍‌ଘି ଗୁତ୍ତିୟା ମା ମାନତ୍। ⁷ଏନ୍ଦେର୍‌ଗେକା ଏକାସ୍ ଯୀଶୁ ଖ୍ରୀସ୍ତ୍‌ଗାନେ କେଚ୍ଚାସ୍‌କେରାସ୍, ଆସ୍ ପାପ୍‌ତି ଛୁଟ୍‌କାରା ହାଖ୍ଖୀକିରି, ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାବାକେରା। ⁸ଖ୍ରୀସ୍ତ୍‌ସ୍‌ ମରନ୍‌ତି ଜୀଉଠ୍‌ରାସ୍ ହୁଦ୍‌ଘିଲାଗାନ୍ ଆସ୍ ଏକ୍‌ଲାହି ମା ଖିଦାସ୍। ଆରୁ ନାହ୍ମା ବିଶ୍ୱାସ୍ ରାଇ ତା ନାମ୍ ଆସ୍‌ଗାନେ ଉଜ୍ଜତ୍‌ହି। ⁹ଏନ୍ଦେର୍‌ଗେକା ନାମ୍ ଆହ୍‌ଦାତ୍ କା ଖ୍ରୀସ୍ତ୍‌ସ୍‌ କେଚ୍ଚ୍‌କାସ୍ତି ଉଜ୍ଜିୟାସ୍ କେରାସ୍ ଇସ୍ ଏକ୍‌ଲାହି ମା ଖିଦାସ୍। ଆସ୍‌କି ମିଆଁ ଆରୁଅହନ୍ ମରନ୍‌ଘି ହକ୍ ମାଲ୍ଲାଦିନ୍। ¹⁰ପାପ୍‌ଘି ହିସାବ୍ ଚୁକାବାନାଘି ଲାଗାନ୍ ଖ୍ରୀସ୍ତ୍‌ସ୍‌ ଅହ୍‌ନାସାରେନ୍ କେଚ୍ଚାସ୍‌କେରାସ୍ ଆରୁ ଆକ୍କୁନ୍ ଆସ୍ ପାର୍‌ମେଶ୍ୱାର୍‌ସ୍‌କି ଲାଗାନ୍‌ହି ଉଜ୍ଜଦାସ୍। ¹¹ଇଦ୍‌ଘି ଲେଖା ନିମ୍ ନିଜର୍ ଲାଗାନ୍‌ହି ସୋଚା କା ନିମ୍ ପାପ୍‌ଘି ଚାଲ୍‌ତେ କେଚ୍ଚକାର୍ କେର୍‌କାଦାର୍ ଆରୁ ପାପ୍‌ଘି ସମ୍ବନ୍ଧତି ପୁରାପୁରୀ ଭିନେ ମାନ୍‌ଚ୍‌କାର୍ କେର୍‌କାଦାର୍। ଆରୁ ଖ୍ରୀସ୍ତ୍ ଯୀଶୁସ୍‌କିନୁ ପାର୍‌ମେଶ୍ୱାର୍‌ସ୍‌କି ଲାଗାନ୍ ଉଜ୍ଜତ୍।

¹²ହୁଦ୍‌ଘିଲାଗାନ୍ ନିହ୍ମାଏ ନାଶ୍ ମାନ୍ନାବାଲା ଶରୀର୍‌ନୁ ପାପ୍‌ବନ୍ ଶାସନ୍ କାମାଗେ ଆମା ଚିଆ। ତାକା ନିମ୍ ପାପ୍‌ଘି ଇଚ୍ଛାନୁ ଏକ୍‌ଲାହି ଆମା ଚାଲ୍‌ରା। ¹³ନିହ୍ମାଏନୁ ପାପ୍‌ଘି ଶାସନ୍ ମା ମାନି ଏନ୍ଦେର୍‌ଗେକା ନିମ୍ ନିୟମ୍‌ଘି ଅଧିନ୍‌ନୁ ମାଲ୍ଲା ଉଜ୍ଜୁର୍ ବରନ୍ ପାର୍‌ମେଶ୍ୱାର୍‌ସ୍‌କି କ୍ରିପାଘି ଅଧିନ୍‌ନୁ ଉଜ୍ଜାଲ୍‌ଦାର୍। ¹⁴ପାପ୍ ଆରୁ ନିହ୍ମା ଅଧିନ୍‌ନୁ ମାଲ୍ଲାଦିନ୍ ନିମ୍ ନିୟମ୍‌ଘି ଅଧିନ୍‌ନୁ ଆରୁ ମା ରାଦାର୍ ଆଦ୍‌ଘି ବାଦ୍‌ଲା ନିମ୍ ପାର୍‌ମେଶ୍ୱାର୍‌ସ୍‌କି କ୍ରିପାଘି ଅଧିନ୍‌ନୁ ରାଦାର୍।

ପାର୍‌ମେଶ୍ୱାର୍‌ସିନ୍ ରୀଜ୍‌ଝୁ କାମ୍‌ନାବାଲା ନାଲ୍‌ଖୁ କାମ୍‌ତେ ରା

¹⁵ନାମ୍ ନିୟମ୍‌ଘି ଅଧିନ୍‌ନୁ ମାଲ୍‌କାତିନ୍, ଲେକିନ୍ ପାର୍‌ମେଶ୍ୱାର୍‌ସ୍ କ୍ରିପାଘି ଅଧିନ୍‌ନୁ ରାଦାତ୍? ତା ନାମ୍ ପାପ୍ କାମତ୍ କାଁଏ? ବିଲ୍‌କୁଲ୍ ମାଲ୍ଲା! ¹⁶ନିମ୍ ବାଲ୍‌ଦାର୍ କାଁଏ ଯଦି ଅଣ୍ଟାସ୍ ଗୁତ୍ତିୟା ମାନାଗେ ଚାହଁଦାସ୍ ତା ଆସ୍ ତାଙ୍ଘା ମାଲିକ୍‌ସ୍‌କି କାତ୍‌ଥାନ୍ ମାନ୍‌ଦାସ୍। ଯଦି ନିମ୍ ପାପ୍‌ଘି କାତ୍‌ଥାନ୍ ମାନ୍‌ଦାର୍ ତା, ନିମ୍ ପାପ୍‌ଘି ସେବକ୍ ମାନ୍‌ଦାର୍ କାଦାର୍ ତା ପାପ୍ ନିମାନ୍ ମରନ୍ ତାରା ହୋଇକାଇ। ଆରୁ ନିମ୍ ପାର୍‌ମେଶ୍ୱାର୍‌ସ୍‌କି କାତ୍‌ଥାନ୍ ମାନ୍‌ଦାର୍ ତା ଆଦ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ବାନେ ଜୀବନ୍ ଉଜ୍ଜନାତାରା ହୋଇକାଇ। ¹⁷ପାର୍‌ମେଶ୍ୱାର୍‌ସ୍‌କେ ଧାନ୍ୟାବାଦ୍ ଚିଦାନ୍! କା ନିମ୍ ଜାମାର୍ ଏକାର୍ ଆଘ୍‌ଲି ପାପ୍‌ଘି ଗୁତ୍ତିୟା ରାଚ୍‌କାର୍ ଲେକିନ୍ ଆକ୍କୁନ୍ ପୁରାପୁରୀ ଜୀଆତି ଆ ଶିକ୍ଷାଘି ପାବୁନୁ ଏକାଲ୍‌ଦାର୍ ଏକାନ୍ ନିମାନ୍ ଚିଆ କେର୍‌କିଚି। ¹⁸ନିମାଗେ ପାପ୍‌ଘି ବନ୍ଧନ୍‌ତି ଛୁଟ୍‌ର୍‌କାରା ହାଖ୍ଖରା ଆରୁ ନିମ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ବାନେ ନାଲ୍‌ଖୁଘି ସେବକ୍ ମାନ୍‌ଚ୍‌କାର୍ କେର୍‌କାଦାର୍। ¹⁹ଏନ୍ ନିହ୍ମାଏ ଶରୀର୍‌ଘି କମ୍‌ଜୋରିଘି ଲାଗାନ୍ ମୁନୁଷ୍‌ଘି ରିତୀନୁ ତେଙ୍ଗାଲ୍‌ଦାନ୍। ନିମ୍ ଆଘ୍‌ଲି ଏସ୍‌କେ ନିହ୍ମା ମେଦୁନ୍ ବେଭିଚାର୍ ଆରୁ ଦୁସ୍‌ରା-ଦୁସ୍‌ରା ଖାରାପ୍ ନାଲ୍‌ଖୁଘି ଅଧିନ୍‌ନୁ ଉଇକାଚ୍‌କାର୍, ହୁଦ୍‌ଘିଲାଗାନ୍ ନିନ୍ ପାପ୍‌ନୁ ଡୁବ୍‌ରା କେର୍‌କିଚା ହନ୍ନେନ୍ ଆକ୍କୁନ୍ ନିମ୍ ନିହ୍ମା ମେଦୁନ୍ ଧାର୍ମିକ୍‌ତାଘି ଅଧିନ୍‌ନୁ ଉଇନା କାତ୍‌ଥା ଏସ୍‌କେ କା ଆଦ୍ ପାବିତାର୍ ମାନକୋ।

²⁰ଯେତ୍‌କବାକେନ୍ ନିମ୍ ପାପ୍‌ଘି ବନ୍ଧନ୍‌ନୁ ରାଚ୍‌କାର୍, ହତ୍‌କବାକେନ୍ ନିମ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିମ୍ ବାନେ ନାଲ୍‌ଖୁ କାମା ପଲ୍ଲକାଚ୍‌କାର୍। ²¹ନିମ୍ ନିହ୍ମା ଆଘ୍‌ଲିନ୍ତା କାମ୍‌ଚ୍‌କା ନାଲ୍‌ଖୁଘି ଲାଗାନ୍ ଏନ୍ଦେର୍ ଫଲ୍ ହାକ୍କାର୍? ଏକାଘି ଲାଗାନ୍ ଆକ୍କୁନ୍ ଲାଜରାଲ୍‌ଦାର୍ ଆରୁ ଏକା ନାଲ୍‌ଖୁନ୍ ନିମ୍ କାମ୍‌ଚ୍‌କାଦାର୍ ଆଦ୍ ସବୁଦିନ୍‌ତା ମରନ୍‌ଘି ତାରା ହୋଇକାଇ। ²²ଲେକିନ୍ ଆକ୍କୁନ୍ ନିମ୍ ପାପ୍‌ତି ଛୁଟ୍‌କାରା ହାକ୍କାର୍‌କେର୍‌କାଦାର୍ ଆରୁ ପାର୍‌ମେଶ୍ୱାର୍‌ସ୍‌କି ଗୁତ୍ତିୟା ମାନ୍‌ଚ୍‌କାର୍ କେର୍‌କାଦାର୍ ଆରୁ ଆକ୍କୁନ୍ ନିମ୍ ଏକାନ୍ କାମାଲ୍‌ଦାର୍ ଆଦ୍ ନିମାନ୍ ପାବିତାର୍ କାମିଦ୍ ଆରୁ ସବୁଦିନ୍‌ତା ଜୀବନ୍ ତାରା ହୋଇକାଇ। ²³ଅଣ୍ଟା ଆଲାସ୍ ମେହ୍‌ନତ୍ କାମସ୍‌ତା ମଜ୍‌ରୀ ହାଖ୍ଖସ୍। ହନ୍ନେନ୍ ଏକାସ୍ ପାପ୍ କାମ୍‌ତେ ରସ୍‌ତା ଆଦ୍‌ଘି ମଜ୍‌ରୀ ସବୁଦିନ୍‌ତା ମରନ୍‌ଦ୍, ଲେକିନ୍ ପାର୍‌ମେଶ୍ୱାର୍‌ସ୍‌ତି ଏକାନ୍ ହାକ୍କାଦାସ୍ ଆଦ୍ ସବୁଦିନ୍‌ତା ଜୀବନ୍। ଆରୁ ଇଦ୍‌ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍‌ସ୍‌କି ଦ୍ୱାର୍‌ନୁ ନାମାଗେ ସବୁଦିନ୍‌ତା ଜୀବନ୍ ହାଖ୍ଖର୍‌କିଚି।

ମୁଶାସ୍‌କି ନିୟମ୍‌ଘି ଅଧିନ୍‌ତି ଛୁଟ୍‌କାରା

¹ହେ ଭାଇ ଆରୁ ବୁହୁଣୀ ଜାମାରୋ, ନିମ୍ ବାଲ୍‌ଦାର୍ କାଁଏ? ଏନ୍ ମୁଶାସ୍‌କି ନିୟମ୍‌ବନ୍ ଆହ୍‌ନାବାଲାରିନ୍ ତେଙ୍ଗାଲ୍‌ଦାନ୍ କା ଯେତ୍‌କତକ୍ ଅଣ୍ଟା ମୁନୁଷ୍ ଉଜ୍ଜ୍‌ଦାସ୍ ହତ୍‌କତକ୍ ଆସ୍‌କେ ମୁଶାସ୍‌କି ନିୟମ୍‌ବନ୍ ମାନା ଖାତ୍‌ରି। ²ଏନ୍ଦେର୍‌ଗେକା ଅଣ୍ଟା ବେଞ୍ଜର୍‌କା ଆଲି ଯେତ୍‌କତକ୍ ତାଙ୍ଘା ଆଲାସ୍ ଉଜ୍ଜ୍‌ଦାସ୍ ହତ୍‌କତକ୍ ଆଦ୍ ଆସ୍‌ଗାନେ ରାଇ, ଲେକିନ୍ ଯେତ୍‌କବାକେନ୍ ତାଙ୍ଘା ଆଲାସ୍ ଖିଦାସ୍‌କାଦାସ୍ ତା ଆଦ୍ ବେଞ୍ଜାଘି ବନ୍ଧନ୍‌ତି ଆଜାଦ୍ ମାନିକାଇ। ³ହୁଦ୍‌ଘିଲାଗାନ୍ ଯଦି ତାଙ୍ଘା ଆଲାସ୍‌କି ରାତେ-ରାତେ ଆଦ୍ ଦୁସ୍‌ରା ଆଲାସ୍ ଗାନେ ସମ୍ୱନ୍ଧ ଉୟି ତା ଆଦ୍ ବେଭିଚାର୍ କାମାଲିଦ୍‌ବୁଲି ତେଙ୍ଗାକାଇ। ଲେକିନ୍ ଯେତ୍‌କବାକେନ୍ ତାଙ୍ଘା ଆଲାସ୍ ଖିଦାସ୍‌କାଦାସ୍ ତା ଆଦ୍‌ଗେ ବେଞ୍ଜାଘି ନିୟମ୍ ଲାଗୁ ମା ମାନିଦ୍। ହୁଦ୍‌ଘିଲାଗାନ୍ ଯଦି ଆଦ୍ ଆରୁ ଦୁସ୍‌ରା ଆଲାସ୍‌ସିନ୍ ବେଞ୍ଜ୍‌ର୍‌କୁନ୍ ଆଦ୍ ବେଭିଚାର୍ କାମାଲିଦ୍‌ବୁଲି ତେଙ୍ଗା ମା କାଇ। ⁴ହେ ଏଙ୍ଘା ଭାଇ ଆରୁ ବୁହୁଣୀରୋ ନିମ୍ ଯୀଶୁ ଖ୍ରୀସ୍ତ୍‌ସ୍‌କି ଶରୀର୍‌ଘି ଦ୍ୱାର୍‌ନୁ ମୂଶାସ୍‌କି ନିୟମ୍‌ଘି ସମ୍ବନ୍ଧତି ଭିନେ ମାନ୍‌ଚ୍‌କାର୍ କେର୍‌କାଦାର୍, ତାକା ନିମ୍ ଦୁସ୍‌ରା ଅଣ୍ଟା ଆଲାସ୍‌କି ମାନର୍‌କର୍ ଏକାସ୍ କା କେଚ୍ଚ୍‌କାନ୍ତି ଉଜ୍ଜିୟାସ୍ ତାକା ନାମ୍ ପାର୍‌ମେଶ୍ୱାର୍‌ସ୍‌କି ଲାଗାନ୍ ବାନେ ନାଲ୍‌ଖୁ କାମା ଅଙ୍ଗତ୍। ⁵ଯେତ୍‌କବାକେନ୍ ନାମ୍ ନିଜର୍ ପାପ୍‌ଘି ସାଭାବ୍‌ଘି ଅଧିନ୍‌ନୁ ରାଚ୍‌କାତ୍, ହତ୍‌କବାକେନ୍ ପାପ୍ କାମ୍‌ନାଘି ଇଚ୍ଛା ନିୟମ୍‌ଘି ଦ୍ୱାର୍‌ନୁ ନାହ୍ମା ଜୀଆନୁ ଶାସନ୍ କାମାଲା ଆରୁ ମରନ୍‌ଘି ଫଲ୍‌ହି ସିର୍‌ଜାରାଲାଦ୍। ⁶ଲେକିନ୍ ଆକ୍କୁନ୍ ନାମ୍ ନିୟମ୍‌ଘି ଅଧିନ୍‌ତି ଛୁଟ୍‌କାରା ହାକ୍କାତ୍ କେର୍‌କାଦାତ୍ ଆରୁ ଆକ୍କୁନ୍ ନିୟମ୍‌ବନ୍ ପାଲନ୍ କାମ୍‌ନାଘି ଜରୁରୀ ମାଲ୍ଲାଦିନ୍, ଆରୁ ଆକ୍କୁନ୍ ନାମ୍ ଆଘ୍‌ଲିନ୍ତା ଲେଖ୍‌ଚ୍‌କା ନିୟମ୍‌ନୁ ମାଲ୍ଲା ଲେକିନ୍ ପାବିତାର୍ ଆତ୍ମାଘି ତେଙ୍କାତି ନାମ୍ ପାର୍‌ମେଶ୍ୱାର୍‌ସ୍‌କି ସେବା କାମ୍‌ଦାତ୍।

ନିୟମ୍ ଆରୁ ପାପ୍

⁷ତା ନାମ୍ ଏନ୍ଦେର୍ ତେଙ୍ଗତ୍? ନିୟମ୍‌ଦ୍ ପାପ୍‌ତ୍‌ କାଁଏ? ବିଲ୍‌କୁଲ୍ ମାଲ୍ଲା! ଲେକିନ୍ ଯଦି ନିୟମ୍ ମା ରଦ୍‌ନେ ତା ପାପ୍ ଏନ୍ଦେଦ୍ ଆବନ୍ ଏନ୍ ବାଲ୍ଲକାରନ୍‌ନେ। ଯଦି ନିୟମ୍ ମା ତେଙ୍ଗଦ୍‌ନେ ତା ଲାଲଚ୍‌ ଆମା କାମା ତା ଏନ୍ ବାଲ୍ଲକାରନ୍‌ନେକା ଲାଲଚ୍‌ କାମ୍‌ନାଦ୍ ଏନ୍ଦେର୍‌ଦ୍? ⁸ଯେତ୍‌କବାକେନ୍ ଏନ୍ ନିୟମ୍ ମେନ୍‌ଚ୍‌କାନ୍‌ ତା ଏଙ୍ଗା ପାପ୍ କାମାଗେ ଇଚ୍ଛା ମାନିଦ୍। ନିୟମ୍ ମାଲ୍ଲାତା ପାପ୍‌ହି ମାଲ୍ଲାଦିନ୍। ନିୟମ୍ ମାଲ୍ଲାଦିନ୍ ତା ପାପ୍‌ଘି ଏନ୍ଦେଦ୍‌ହି ଆସାର୍ ମାଲ୍ଲାଦିନ୍। ⁹ଅଣ୍ଟା ସାମାୟ ରାଚା ଯେତ୍‌କବାକେନ୍ ଏନ୍‌ ନିୟମ୍‌ବନ୍ ବାଲ୍ଲିକିରି ଜୀବନ୍ ବିତାବାଲ୍‌କାନ୍ ଲେକିନ୍ ଯେତ୍‌କବାକେନ୍ ନିୟମ୍‌ଘି ଆଦେଶ୍ ବାର୍‌ଚାତା ପାପ୍‌ଘି ଜନମ୍ ମାନ୍‌ଚା। ¹⁰ଆରୁ ଏନ୍ କେଚ୍ଚକାନ୍ କେର୍‌କାନ୍, ନିୟମ୍‌ଘି ଆଦେଶ୍ ଏକାଦ୍ ଏଙ୍ଗାନ୍ ଜୀବନ୍‌ଘି ଲାଗାନ୍ ରାଚା ଆଦ୍ ଏଙ୍ଘାଲାଗାନ୍ ମରନ୍ ଅନ୍ଦ୍ରା। ¹¹ଏନ୍ଦେର୍‌ଗେକା ପାପ୍‌ଦ୍ ଆ ନିୟମ୍‌ଘି ଫାଏଦା ଉଠାବାଇକିରି ଏକାନ୍ ଏଙ୍ଗା ମା କାମ୍‌ନାକାତ୍‌ଥା ଆବନ୍ କାମ୍‌ତାଚା ଆରୁ ଏଙ୍ଗାନ୍ ପାର୍‌ମେଶ୍ୱାର୍‌ସ୍‌କି ଦଣ୍ଡ୍‌ଘି ଲାଇଗ୍ କାମ୍‌ଚା।

¹²ନିୟମ୍ ପାବିତାର୍ ଆରୁ ହୁକୁମ୍‌ଦ୍‌ଧି ପାବିତାର୍, ବାନେ, ଆରୁ ଠିକ୍‌ଦ୍‌। ¹³ଆସ୍‌କି ଦ୍ୱାର୍‌ନୁ ପାପ୍ ଏଙ୍ଘାଲାଗାନ୍ ମରନ୍‌ଘି କାରଣ୍ ମାନ୍‌ଚା କାଁଏ? ବିଲ୍‌କୁଲ୍ ମାଲ୍ଲା! ଲେକିନ୍ ଏକା କାତ୍‌ଥାଦ୍ ବାନେଦ୍ ଆତ୍ତିନିନ୍ ଏଙ୍ଘାଲାଗାନ୍ ପାପ୍‌ଦ୍ ଏଙ୍ଘାଲାଗାନ୍ ମରନ୍‌ଘି କାରଣ୍ ମାନ୍‌ଚା। ଆରୁ ଏନ୍ନେନ୍ ପାପ୍‌ଘି ଅସଲ୍ ରୁପ୍ ଆହ୍‌ତାରାଚା। ଆରୁ ନିୟମ୍‌ଦ୍ ବାତାବାଚା କା ପାପ୍‌ଦ୍ କେତ୍‌କ ଖାରାପ୍‌ଦ୍।

ପାପ୍‌ଗାନେ ଲାଡ଼େଇ

¹⁴ଏନ୍ଦେର୍‌ଗେକା ନିୟମ୍‌ଦ୍ ପାର୍‌ମେଶ୍ୱାର୍‌ସ୍‌କିଦ୍, ଲେକିନ୍ ଏନ୍ ଶାରୀରିକ୍ ଆରୁ ପାପ୍‌ଘି ଗୁତ୍ତିୟା ମାନାଗେ ବିଁଶ୍‌ର୍‌କାନ୍ କେର୍‌କାଦାନ୍। ¹⁵ଆରୁ ଏନ୍ ଏକାନ୍ କାମ୍‌ଦାନ୍ ଆବନ୍ ଏନ୍ ବାଲ୍‌ଦାନିନ୍ ଏନ୍ଦେର୍‌ଗେକା ଏନ୍ ଏକା ବାନେ ନାଲ୍‌ଖୁନ୍ କାମାଗେ ବେଦ୍ଦ୍‌ଦାନ୍ ଆବନ୍ କାମା ପଲ୍ଲଦାନିନ୍। ଆରୁ ଏକାନ୍ କାମାଗେ ମା ବେଦ୍ଦ୍‌ଦାନ୍ ଆବନିନ୍ କାମ୍‌ଦାନ୍। ¹⁶ଆରୁ ଯଦି ଏନ୍ ଏକାନ୍ କାମାଗେ ମା ବେଦ୍ଦ୍‌ଦାନ୍ ଲେକିନ୍ ଆ ନାଲ୍‌ଖୁନ୍ କାମ୍‌ଦାନ୍ ତା ଏନ୍ ଆହ୍‌ଦାନ୍ କା ନିୟମ୍‌ଦ୍ ବାନେଦ୍। ¹⁷ତା ଇବ୍ଡ଼ା ଜାମା ଖାରାପ୍ ନାଲ୍‌ଖୁନ୍ କାମ୍‌ନାବାଲାନ୍ ଅସଲ୍‌ନୁ ଏନ୍ ମାଲ୍‌ଦାନ୍ ଲେକିନ୍ ଏଙ୍ଘାଏନୁ ରାନାବାଲା ପାପ୍ ସାଭାବ୍ ଏନ୍ନେ କାମାଲିଦ୍। ¹⁸ଆରୁ ଏନ୍ ଆହ୍‌ଦାନ୍ କା ଏଙ୍ଘାଏନୁ ଏନ୍ଦେର୍‌ହି ବାନେ ଗୁଣ୍ ମାଲ୍ଲାଦିନ୍ ହୁଦ୍‌ଘିଲାଗାନ୍ ଏଙ୍ଘା ପାପ୍‌ଘି ସାଭାବ୍‌ଘି ଲାଗାନ୍ ଏନ୍ ଏକାଦ୍ ବାନେଦ୍ ଆବନ୍ କାମାଗେ ବେଦ୍ଦ୍‌ଦାନ୍ ଲେକିନ୍ କାମା ପଲ୍ଲଦାନିନ୍। ¹⁹ଏନ୍ଦେର୍‌ଗେକା ଏକା ବାନେ ନାଲ୍‌ଖୁନ୍ କାମାଗେ ସୋଚ୍‌ଦାନ୍ ଆବନ୍‌ତା କାମା ପଲ୍ଲଦାନ୍ ଲେକିନ୍ ଏକା ଖାରାପ୍ ନାଲ୍‌ଖୁନ୍ ମା କାମାଗେ ଚାହଁଦାନ୍ ଆବନ୍ କାମ୍‌ଦାନ୍। ²⁰ଆରୁ ଏକାନ୍ ଏନ୍ ମା କାମାଗେ ଚାହଁଦାନ୍ ଲେକିନ୍ ଆବନ୍ ଏନ୍ କାମ୍‌ଦାନ୍ ତା ଅସଲ୍‌ନୁ ଆବନ୍ କାମ୍‌ନାବାଲା ଏନ୍ ମାଲ୍‌ଦାନ୍ ଲେକିନ୍ ଏଙ୍ଘାଏନୁ ରାନାବାଲା ପାପ୍‌ଦ୍ କାମିଦ୍।

²¹ହୁଦ୍‌ଘିଲାଗାନ୍ ଏନ୍ ଏଙ୍ଘା ଜୀବନ୍‌ନୁ ଇ ନିୟମ୍‌ ହାକ୍କାନ୍ କା ଯେତ୍‌କବାକେନ୍ ଏନ୍ ବାନେ ନାଲ୍‌ଖୁ କାମାଗେ ଚାହଁଦାନ୍ ତା ଏନ୍ ଖାରାପ୍ ନାଲ୍‌ଖୁନ୍‌ନିନ୍ କାମା ଅଙ୍ଗ୍‌ଦାନ୍। ²²ଏନ୍ଦେର୍‌ଗେକା ଏନ୍ ଏଙ୍ଘା ଜୀଆନୁ ପାର୍‌ମେଶ୍ୱାର୍‌ସ୍‌କି ନିୟମ୍‌ନୁହି ବହୁତ୍ ଖୁସ୍ ରାଦାନ୍। ²³ଲେକିନ୍ ପାପ୍‌ଘି ସାଭାବ୍ ଏକାଦ୍ କା ଏଙ୍ଘାଏନୁ ରାଇ ଆଦ୍ ଏଙ୍ଘା ମନ୍‌ଗାନେ ଲାଡ଼ାଇ କାମି। ମନ୍‌ଦ୍ ବାନେ ନାଲ୍‌ଖୁ କାମାଗେ ଚାହିଦ୍ ଲେକିନ୍ ଏଙ୍ଘାଏନୁ ରାନାବାଲା ପାପ୍ ସାଭାବ୍ ଏଙ୍ଗାନ୍ ଗୁତ୍ତିୟା କାମିଚିଦ୍ ଆରୁ ବାନେ ନାଲ୍‌ଖୁ କାମା ମା ଚିଦ୍। ²⁴ଏଙ୍ଘା କାପ୍‌ଡ଼େନୁତା ଏନ୍ଦେର୍‌ହି ଲେଖ୍‌ଚ୍‌କା ମା ରାଚ୍‌କା ଆଲାନ୍। ଆରୁ ଖେନାଘି ଅଧିନ୍‌ନୁ ରାନାବାଲା ଶରୀର୍‌ତି ଏଙ୍ଗାନ୍ ନେର୍ ବାଛାବର୍? ²⁵ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍‌ସ୍‌ ଏଙ୍ଗାନ୍ ପାପ୍‌ତି ଛଡ଼ାବାଚାଷ୍ ହୁଦ୍‌ଘିଲାଗାନ୍ ପାର୍‌ମେଶ୍ୱାର୍‌ସ୍‌କି ଧାନ୍ୟାବାଦ୍ ଚିଆଲ୍‌ଦାନ୍ ଏନ୍ ପାର୍‌ମେଶ୍ୱାର୍‌ସ୍‌କି ନିୟମ୍‌ବନ୍ ମାନାଗେ ଚାହଁଦାନ୍, ଲେକିନ୍ ଏଙ୍ଘାଏନୁ ରାନାବାଲା ପାପ୍ ସାଭାବ୍ ଏଙ୍ଗାନ୍ ପାପ୍ କାମ୍‌ତିଦ୍।

ପାବିତାର୍ ଆତ୍ମାଘି ଦ୍ୱାର୍‌ନୁ ଜୀବନ୍

¹ହୁଦ୍‌ଘିଲାଗାନ୍ ଆକ୍କୁନ୍ ଏକାର୍ ଯୀଶୁ ଖ୍ରୀସ୍ତ୍‌ସ୍‌କି ମିଆଁ ବିଶ୍ୱାସ୍ କାମ୍‌ନାଏ ଆବ୍ଡ଼ାରିନ୍ ପାର୍‌ମେଶ୍ୱାର୍‌ସ୍ ଦୋଷୀ ମା କାମ୍‌ଦାସ୍। (ଏନ୍ଦେର୍‌ଗେକା ଆବ୍ଡ଼ାର୍ ଶରୀର୍‌ଘି ଲେଖା ମାଲ୍ଲା ବରନ୍ ପାବିତାର୍ ଆତ୍ମାଘି ଲେଖା ଚାଲ୍‌ର୍‌ନାଏ) ²ଏନ୍ଦେର୍‌ଗେକା ଯୀଶୁ ଖ୍ରୀସ୍ତ୍‌ସ୍‌କି ଦ୍ୱାର୍‌ନୁ ଜୀବନ୍ ଚିନାବାଲା ଆତ୍ମା ପାପ୍ ଆରୁ ମରନ୍‌ଘି ନିୟମ୍‌ତି ଛୁଟ୍‌କାରା କାମ୍‌ଚେଇଚ୍‌କିଚି। ³ପାର୍‌ମେଶ୍ୱାର୍‌ସ୍‌କି ଦ୍ୱାର୍‌ନୁ ଚିଚ୍ଚକା ନିୟମ୍ ଶାସ୍ତ୍ର ମୁନୁଷ୍‌ଘି ପାପ୍ ସାଭାବ୍‌ଘି କାରଣ୍‌ତି, ନିଜର୍‌ନୁ କମ୍‌ଜୋର୍ ମାନିକିରି କାମାପଲ୍ଲାଦିନ୍ ଆବନ୍ ପାର୍‌ମେଶ୍ୱାର୍‌ସ୍ ନିଜର୍ ହାଦ୍ଦୁସିନ୍ ଅଣ୍ଟା ମୁନୁଷ୍ ରୂପ୍‌ନୁ ଇ ଦୁନିଆଁନୁ ତାଇୟିକିରି ପାପ୍‌ଘି ଲାଗାନ୍ ବଲୀଦାନ୍ କାମ୍‌ଚାସ୍। ଇଦ୍‌ଘି ଲେଖା ପାର୍‌ମେଶ୍ୱାର୍‌ସ୍ ମୁନୁଷ୍‌ର୍‌ଘି ଶରୀର୍‌ନୁ ପାପ୍‌ବନ୍ ଦଣ୍ଡ୍ ଚିଚ୍ଚଚାସ୍। ⁴ହୁଦ୍‌ଘିଲାଗାନ୍ ନାମ୍ ନିୟମ୍‌ଘି ରୀତିନୁ ନାହ୍ମାଏ ଶରୀର୍‌ଘି ଲେଖା ମାଲ୍ଲା ବରନ୍ ପାବିତାର୍ ଆତ୍ମାଘି ଲେଖା ଚାଲ୍‌ରିକିରି ପୁରା କାମ୍‌କେ। ^5-6ଏନ୍ଦେର୍‌ଗେକା ଏକା ଆଲାର୍ ପାପ୍‌ନୁ ଚାଲ୍‌ର୍‌ନାଏ, ଆବ୍ଡ଼ାର୍ ପାପ୍ କାମ୍‌ନାଘି ବାରେ ସୋଚ୍‌ନାଏ ଆବ୍ଡ଼ାର୍‌ଗେ ଆତ୍ମିକ୍ ମରନ୍ ମାନିଦ୍ ଲେକିନ୍ ଏକାର୍ ପାବିତାର୍ ଆତ୍ମାଘି ଲେଖା ଚାଲ୍‌ର୍‌ନାଏ ଆବ୍ଡ଼ାର୍ ପାବିତାର୍ ଆତ୍ମାଦ୍ ଏକାନ୍ ତେଙ୍ଗିଦ୍ ଆବନ୍ କାମ୍‌ନାଏ ଆବ୍ଡ଼ାର୍‌ଗେ ସବୁଦିନ୍‌ତା ଜୀବନ୍ ଆରୁ ଶାନ୍ତି ହାଖ୍ଖରି। ⁷ପାପ୍ ସଭାବ୍‌ଘି ଅଧିନ୍‌ନୁ ରାଇକିରି ଚାଲ୍‌ର୍‌ନା ପାର୍‌ମେଶ୍ୱାର୍‌ସ୍‌କି ବିରୁଦ୍ଧ୍, ଇ ପାର୍‌ମେଶ୍ୱାର୍‌ସ୍‌କି ନିୟମ୍‌ଘି ଅଧିନ୍‌ନୁ ମା ମାନି ଆରୁ ନା ମାନାଅଙ୍ଗ। ⁸ହୁଦ୍‌ଘିଲାଗାନ୍ ଏକା ଆଲାର୍ ତାହ୍ମା ପାପ୍ ସାଭାବ୍‌ଘି ଅଧିନ୍‌ନୁ ରାଇକିରି ଜୀବନ୍ ବିତାବାନାଏ, ଆବ୍ଡ଼ାର୍, ପାର୍‌ମେଶ୍ୱାର୍‌ସ୍‌ସିନ୍ ଖୁସ୍ କାମା ପଲ୍ଲନାଇନ୍।

⁹ଯଦି ପାର୍‌ମେଶ୍ୱାର୍‌ସ୍‌କି ଆତ୍ମା ସତ୍ତୁନିନ୍ ନିହ୍ମାଏନୁ ରାଇ ତା ନିମ୍ ଜାମାର୍ ନିଜର୍ ପାପ୍ ସଭାବ୍‌ତି ମାଲ୍ଲା ବରନ୍ ପାବିତାର୍ ଆତ୍ମାତି ଚାଲ୍‌ର୍‌ଦାର୍। ଏକା ଆଲାସ୍‌କିନୁ ଖ୍ରୀସ୍ତ୍‌ଘି ଆତ୍ମା ମା ରାଇ ତା ଆସ୍ ଖ୍ରୀସ୍ତ୍‌କି ମାଲ୍‌ଦାସ୍। ¹⁰ଆରୁ ଯଦି ଖ୍ରୀସ୍ତ୍‌ସ୍‌ ନିହ୍ମାଏନୁ ରାଦାସ୍। ତା ପାପ୍‌ଘି ଲାଗାନ୍ ନିହ୍ମା ଶରୀର୍ କେଚ୍ଚା କେର୍‌କିଚି ଲେକିନ୍ ନିମ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ଠାହ୍‌ରା କେରା ହୁଦ୍‌ଘିଲାଗାନ୍ ନିହ୍ମା ଆତ୍ମାଦ୍ ଉଜ୍ଜାଲିଦ୍। ¹¹ଯଦି ପାର୍‌ମେଶ୍ୱାର୍‌ସ୍‌କି ଆତ୍ମା ଏକାସ୍ ଯୀଶୁସିନ୍ କେଚ୍ଚକାସ୍ତି ଉଜ୍ଜତାଚା, ଆ ଆତ୍ମାଦ୍ ନିହ୍ମାଏନୁ ରାଇ ଏକାସ୍ ଖ୍ରୀସ୍ତ୍‌ସିନ୍ କେଚ୍ଚକାନ୍‌ତି ଉଜ୍ଜତାଚାସ୍, ଆ ଆତ୍ମାଘି ଦ୍ୱାର୍‌ନୁ ଏକାଦ୍ ନିହ୍ମାଏନୁ ରାଇ, ନିହ୍ମାଏ କେଚ୍ଚକା ଶରୀର୍‌ବନ୍‌ହି ଜୀବନ୍ ଚସ୍।

¹²ହୁଦ୍‌ଘିଲାଗାନ୍ ହେ ଭାଇ ବୁହୁଣୀଜାମାରୋ, ପାପ୍ ସାଭାବ୍‌ଘି ନାହ୍ମା ମିଆଁ ଏନ୍ଦେର୍‌ହି ହକ୍ ମାଲ୍ଲାଦିନ୍ ନାମ୍ ଆଦ୍‌ଘି ଅଧିନ୍‌ନୁ ରାଇକିରି ଜୀବନ୍ ମା ବିତାବାଦାତ୍। ¹³ଏନ୍ଦେର୍‌ଗେକା ନିମ୍ ପାପ୍ ସାଭାବ୍‌ଘି ଅଧିନ୍‌ନୁ ରାଇକିରି ଚାଲ୍‌ରର୍ ତା ଖିଅର୍। ଲେକିନ୍ ନିମ୍ ପାବିତାର୍ ଆତ୍ମାଘି ଦ୍ୱାର୍‌ନୁ ପାପ୍ ସାଭାବ୍‌ବନ୍ ଖତମ୍ କାମର୍‌ଚର୍ ତା ନିମ୍ ଉଜ୍ଜର୍‌କର୍। ¹⁴ହୁଦ୍‌ଘିଲାଗାନ୍ ଯେତ୍‌କ ଆଲାର୍ ପାର୍‌ମେଶ୍ୱାର୍‌ସ୍‌କି ଆତ୍ମାଘି ଅନୁସାର୍ ଚାଲ୍‌ର୍‌ନାଏ। ଆବ୍ଡ଼ାର୍ ପାର୍‌ମେଶ୍ୱାର୍‌ସ୍‌କି ହାଦ୍ଦୁବଚ୍ଚର୍। ¹⁵ନିମ୍ ଏଲ୍‌ଚ୍‌ନାଘି ଆତ୍ମା ମାଲ୍ଲା ହାଖ୍ଖୁର୍ ଲେକିନ୍ ନିମ୍ ପାର୍‌ମେଶ୍ୱାର୍‌ସ୍‌କି ଆତ୍ମା ହାକ୍କାଦାର୍ ଯେତ୍‌କବାକେନ୍ ଆସ୍ ନିମାନ୍ ତାଙ୍ଘାଏ ନିଜର୍ ହାଦ୍ଦୁସ୍ ଲେଖା ବାଲ୍‌ପୋଷ୍ କାମ୍‌ଚ୍‌କାଦାସ୍। ହୁଦ୍‌ଘିଲାଗାନ୍ ନାମ୍ ଆସିନ୍ ବୁଆ, ବାଙ୍ଗ୍ ବୁଲି ମେହଁଦାତ୍। ¹⁶ପାବିତାର୍ ଆତ୍ମାଦ୍ ନାହ୍ମା ଆତ୍ମାନ୍ ତେଙ୍ଗିଦ୍ କା ନାମ୍ ପାର୍‌ମେଶ୍ୱାର୍‌ସ୍‌କି ହାଦ୍ଦୁବଚ୍ଚତ୍। ¹⁷ଯଦି ନାମ୍ ପାର୍‌ମେଶ୍ୱାର୍‌ସ୍‌କି ହାଦ୍ଦୁବଚ୍ଚତ୍ ତା ନାମ୍ ଆସ୍‌କି ସମ୍ପତ୍ତିଘି ହକ୍‌ଦାର୍‌ତ୍‌ହି। ଆରୁ ନାମ୍ ଖ୍ରୀସ୍ତ୍‌ଗାନେ ନାମ୍‌ହି ସମ୍ପତ୍ତିଘି ହକ୍‌ଦାର୍। ଯଦି ନାମ୍ ଆସ୍‌ଗାନେ ଦୁଃଖୁ ତକ୍‌ଲିପ୍ ସାହତ୍‌ତା ନାମାଗେ ଆସ୍‌ଗାନେ ମାହିମାବନ୍‌ହି ହାଖ୍ଖତ୍।

ନାହ୍ମା ଭବିଷତ୍‌ତା ମାହିମା

¹⁸ଏନ୍ଦେର୍‌ଗେକା ଏନ୍ ଆହାଲ୍‌ଦାନ୍ କା ଆକ୍କୁନ୍ ନାମ୍ ଏକା ଦୁଃଖୁ ତକ୍‌ଲିପ୍ ହାଖ୍ଖାଲ୍‌ଦାତ୍ ଆଦ୍ ଭବିଷତ୍‌ନୁ ଏକା ମାଇନ୍ ନାମାଗେ ହାଖ୍ଖରୋ, ଆଦ୍‌ଘି ତୁଲ୍‌ନାନୁ ଆକ୍କୁନ୍ ତା ଇ ଦୁଃଖୁଦ୍ ଏନ୍ଦେର୍‌ହି ମାଲ୍ଲିଦ୍। ¹⁹ଖାଲି ମୁନୁଷ୍ ଜାତି ମାଲ୍ଲା ଲେକିନ୍ ଜାମା ସିର୍‌ଜାଚ୍‌କା ଜିନିଷ୍ ଏକାନ୍ କା ପାର୍‌ମେଶ୍ୱାର୍‌ସ୍ ସିର୍‌ଜାଚ୍‌କାଦାସ୍ ଆବ୍ଡ଼ାର୍ ଆଶ୍ରାତି ଭବିଷତ୍‌ନୁ ଏକାର୍ ପାର୍‌ମେଶ୍ୱାର୍‌ସ୍‌କି ଅସଲ୍ ହାଦ୍ଦୁବଚ୍ଚର୍ ଆହ୍‌ତାରୋ। ଆ ଉଲ୍ଲାନ୍ ଆଶ୍ରା ଏରାଲ୍‌ନାଏ। ²⁰ଜାମା ସୃଷ୍ଟି ଇ ଦୁନିଆଁଦ୍ ବେକାର୍‌ଘି ଅଧିନ୍ ମାନ୍‌ଚାକେର୍‌କିଚି, ଇ ନିଜର୍ ଇଚ୍ଛାତି ମାଲ୍ଲା ବରନ୍ ଆସ୍‌କି ଇଚ୍ଛାତି ଏକାସ୍ ଆବନ୍ ତାଙ୍ଘା ଅଧିନ୍‌ନୁ ସିର୍‌ଜାଚ୍‌କାଦାସ୍। ²¹ଇ ଆଶ୍ରା ରାଇ କା ଜାମା ସୃଷ୍ଟି ନିଜର୍ ନାଶ୍‌ଘି ଗୁତ୍ତିୟାତି ଛୁଟ୍‌କାରା ହାଖ୍ଖୀକିରି ପାର୍‌ମେଶ୍ୱାର୍‌ସ୍‌କି ହାଦ୍ଦୁର୍ ଖ୍ରୀସ୍ତ୍‌ସ୍‌ଘି ମୁକ୍ତିନ୍ ହାଖ୍ଖର୍ ତାକା ନାହ୍ମାଏ ପାପ୍‌ତି ନିନ୍ଦ୍‌କା ଶରୀର୍‌ତି ଛୁଟ୍‌କାରା ହାଖ୍ଖା ଅଙ୍ଗତ୍। ²²ଏନ୍ଦେର୍‌ଗେକା ନାମ୍ ଆହ୍‌ଦାତ୍ କା ଜାମା ସିର୍‌ଜାଚ୍‌କା ଜିନିଷ୍‌ଦ୍‌ ଆକ୍କୁନ୍‌ତକ୍ ଦୁଃଖୁ କଷଟ୍‌ତି ତାଡ଼୍‌ପାରାଲି। ²³ଆରୁ ଆଦ୍ ଖାଲି ମାଲ୍ଲା ଲେକିନ୍ ନାମ୍‌ହି ନେଖାସାନ୍ କା ପାବିତାର୍ ଆତ୍ମାଘି ପହ୍‌ଲେ ଫଲ୍ ରାଇ, ନିଜେ ଦୁଃଖୁ ସାହାଲି। ଏନ୍ଦେର୍‌ଗେକା ନାମାଗେ ଆସ୍‌ଗେ ଦ୍ୱାର୍‌ନୁ ପାର୍‌ମେଶ୍ୱାର୍‌ସ୍‌କି ହାଦ୍ଦୁ କାମ୍‌ନାଘି ଆଶ୍ରା ଏରାଲ୍‌ଦାର୍। ତାକା ନାହ୍ମା ପାପ୍‌ତି ନିନ୍ଦ୍‌କା ଶରୀର୍‌ତି ଛୁଟ୍‌କାରା ହାଖ୍ଖା ଅଙ୍ଗତ୍। ²⁴ଇ ଆଶ୍ରାଘି ଲାଗାନ୍ ନାହ୍ମାଏ ଛୁଟ୍‌କାରା ହାଖ୍ଖର୍‌କିଚି ଲେକିନ୍ ଇନ୍ନୁନ୍ତିନିନ୍ ନାହ୍ମାଏ ମନ୍‌ନୁ ଆଶ୍ରା ରାଇ ଲେକିନ୍ ଯେତ୍‌କବାକେନ୍ ନାମ୍ ଏକାଘି ଆଶ୍ରା କାମ୍‌ଦାତ୍ ଆବନ୍ ଏରା ଅଙ୍ଗ୍‌ଦାତ୍ କା ଆ ଆଶ୍ରାଦ୍ ମା ରାଇଦ୍, ଆରୁ ଏକାଦ୍ ଏଥ୍‌ରାଲିଦ୍ ଆଦ୍‌ଘି ଆଶ୍ରା ଏକାର୍ କାମା ଅଙ୍ଗର୍। ²⁵ଲେକିନ୍ ଏକା ଜିନିଷ୍‌ବନ୍ ନାମ୍ ମା ଏର୍‌ଦାତ୍ ଯଦି ଆଦ୍‌ଘି ଆଶ୍ରା ଏରତ୍ ତା ଧିରାଜ୍‌ତି ଆଦ୍‌ଘି ଆଶ୍ରା ଏରତ୍।

²⁶ପାବିତାର୍ ଆତ୍ମାଦ୍ ନାହ୍ମାଏ କମ୍‌ଜୋରିନୁ ମଦେତ୍ କାମିଦ୍ ଏନ୍ଦେର୍‌ଗେକା ନାମ୍ ଏସ୍‌କେ ବିନ୍ତି କାମତ୍ ଆବନ୍ ବାଲ୍‌ଦାତିନ୍ ଲେକିନ୍ ପାବିତାର୍ ଆତ୍ମାଦ୍ ଏସ୍‌କେ ନାମ୍ ନିଜର୍ ଥୁମ୍‌ଣାଘି ଶବଦ୍‌ତି ତେଙ୍ଗା ପଲ୍ଲଦାତ୍ ଆନ୍ନେନିନ୍ ନାହ୍ମାଲାଗାନ୍ ପାବିତାର୍ ଆତ୍ମା ବିନ୍ତି କାମିଦ୍। ²⁷ଆରୁ ପାର୍‌ମେଶ୍ୱାର୍‌ସ୍ ଜାମାର୍‌ଘି ଜୀଆବନ୍ ଆହ୍‌ଦାସ୍ ଆରୁ ପାବିତାର୍ ଆତ୍ମାଦ୍ ଏନ୍ଦେନ୍ ତେଙ୍ଗାଲି? ଆବନ୍ ଆହ୍‌ଦାସ୍ ଏନ୍ଦେର୍‌ଗେକା ଆଦ୍ ପାବିତାର୍ ଆଲାର୍‌ଗେ ପାର୍‌ମେଶ୍ୱାର୍‌ସ୍‌କି ଇଚ୍ଛାଘି ଲେଖା ବିନ୍ତି କାମତ୍।

²⁸ଏକା ଆଲାର୍ ପାର୍‌ମେଶ୍ୱାର୍‌ସିନ୍ ବାନେ ହାଖ୍ଖନାଏ ଆରୁ ନେକାନ୍ ଆସ୍ ତାଙ୍ଘା ଇଚ୍ଛାଘି ଅନୁସାର୍ ମେହ୍‌କାଦାସ୍ ଆବ୍ଡ଼ାଘି ଲାଗାନ୍ ଜାମା କାତ୍‌ଥାଦ୍ ବାନେବନ୍ ସିର୍‌ଜିଦ୍। ²⁹ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଏକାରିନ୍ ପହ୍‌ଲେନ୍ତିନିନ୍ ଚାଜ୍ଜକାଦାସ୍ ଆବ୍ଡ଼ାରିନ୍ ପହ୍‌ଲେନ୍ତିହି ନିଜର୍ ହାଦ୍ଦୁସ୍‌କି ରୂପ୍‌ନୁ ଠାହ୍‌ରାଚାସ୍ ତାକା ଢେର୍ ଭାଇ ଆରୁ ବୁହୁଣୀର୍‌ଘିନ୍ତି ଆସ୍ ଜାମାର୍‌ଘିନ୍ତି ବାଡ଼୍‌କା ମାନାଅଙ୍ଗସ୍। ³⁰ଆରୁ ନେକାନ୍ ପହ୍‌ଲେନ୍ତିନିନ୍‌ ପାର୍‌ମେଶ୍ୱାର୍‌ସ୍ ଚାଜ୍ଜିୟାସ୍ ଆବ୍ଡ଼ାରିନ୍ ମେଁହିୟାସ୍ ଆରୁ ନେକାନ୍ ଆସ୍ ମେଁହିୟାସ୍ ଆବ୍ଡ଼ାରିନ୍ ତାଙ୍ଘା ନଜର୍‌ନୁ ନିର୍ଦ୍ଦୋଷ୍ ବୁଲି ଠାହ୍‌ରାଚାସ୍ ଆରୁ ଆବ୍ଡ଼ାର୍‌ଗେ ମାହିମାହି ଚିୟସ୍।

ପାର୍‌ମେଶ୍ୱାର୍‌ସ୍‌କି ବାନେ ହାଖ୍ଖନା

³¹ନାମ୍ ଇ କାତ୍‌ଥାଘି ବାରେନୁ ଏନ୍ଦେର୍ ତେଙ୍ଗତ୍? ଯଦି ପାର୍‌ମେଶ୍ୱାର୍‌ସ୍ ନାହ୍ମା ପାଖା ରାଦାସ୍‌ତା ନେଦ୍ ନାହ୍ମା ବିରୁଦ୍ଧ୍ କାମା ଅଙ୍ଗର୍? ³²ଏକାସ୍ ନିଜର୍ ତାଙ୍ଘା ହାଦ୍ଦୁସିନ୍‌ହି ମା ବାଛାବାଚାସ୍ ଲେକିନ୍ ଆସିନ୍ ନାହ୍ମା ଜାମାର୍‌ଘି ଲାଗାନ୍ ଚିଚ୍ଚାସ୍ ଲାଗ୍ଗିୟାସ୍, ଆରୁ ଏନ୍ନେ ମାନତ୍ ତା ଆସ୍-ଆସ୍‌ଗାନେ ନାମାଗେ ଖୁସୀତି ଜାମାକିଛିନ୍ ଏନ୍ଦେର୍‌ଗେ ମା ଚିୟସ୍? ³³ପାର୍‌ମେଶ୍ୱାର୍‌ସ୍‌କି ଚୁନ୍‌ଚ୍‌କାର୍‌ଘି ମିଆଁ ଦୋଷୀ ନେର୍ ଠାହ୍‌ରର୍? ପାର୍‌ମେଶ୍ୱାର୍‌ସ୍‌ହି ରାଦାସ୍ ଏକାସ୍ କା ଆବ୍ଡ଼ାରିନ୍ ତାଙ୍ଘା ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାନାବାଲାସ୍। ³⁴ହୁଦ୍‌ଘିଲାଗାନ୍ ନେଦ୍ ନାମାନ୍ ଦୋଷୀ କାମର୍? ଯୀଶୁ ଖ୍ରୀସ୍ତ୍‌ତା କେଚ୍ଚାସ୍‌କେରାସ୍ ଆରୁ ଉଜ୍ଜିୟାସ୍ ଆରୁ ପାର୍‌ମେଶ୍ୱାର୍‌ସ୍‌କି ତିନାତାରା ରାଇକିରି ନାହ୍ମାଲାଗାନ୍ ବିନ୍ତି କାମ୍‌ଦାସ୍। ³⁵ନେର୍ ନାମାନ୍ ଖ୍ରୀସ୍ତ୍‌ସ୍‌କି ବାନେ ହାଖ୍ଖନାତି ଭିନେ କାମଦ୍, ତକ୍‌ଲିପ୍, ସାତାୱାଟ୍, ଆକାଲ୍, ଅସୁବିଧା, ବିପଦ୍, ଖଣ୍ଡା, ଡୁଣ୍‌ଙ୍ଗୁ। ³⁶ଏସ୍‌କେ କା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ, “ନିଙ୍ଘାଲାଗାନ୍ ଏମ୍ ଜାମା ଉଲ୍ଲା ମରନ୍‌ଘି ସାମ୍‌ନା କାମାଲ୍‌ଦାମ୍। ଏମ୍ ପିଟ୍‌ନା ଭେଡ଼ି ଲେଖା ଗନ୍ତି ମାନ୍‌ଚ୍‌କାଦାମ୍।” ³⁷ନାହ୍ମାଏ ଯୀଶୁ ଖ୍ରୀସ୍ତ୍‌ସ୍‌ ଏକାସ୍ ନାମାନ୍ ବାନେ ହାଖ୍ଖଦାସ୍ ଆସ୍‌କି ଦ୍ୱାର୍‌ନୁ ନାମ୍ ଇବ୍ଡ଼ା ଜାମା କାତ୍‌ଥାନୁ ଅଣ୍ଟା ବାନେ ବାଡ଼୍‌କା ଜିତ୍‌ନା ହାଖ୍ଖାଲ୍‌ଦାତ୍। ³⁸ଏନ୍ଦେର୍‌ଗେକା ଏନ୍ ଏସ୍‌କ୍ରିନ୍‌ହି ଆହାଲ୍‌ଦାନ୍ କା ନା ମରନ୍, ନା ଜୀବନ୍, ନା ସରଗ୍‌ଦୂଁତ୍, ନା ଶାସନ୍ କାମ୍‌ନାବାଲା ଆତ୍ମାର୍, ନା ଆକ୍କୁନ୍ ତା ଏନ୍ଦ୍ରିନ୍ ଜିନିଷ୍, ଆରୁ ନା ବାର୍‌ନାବାଲା ଏନ୍ଦ୍ରିନ୍ ଜିନିଷ୍, ନା ଏକ୍ରିନ୍ ଶକ୍ତି, ³⁹ମିଁତା ଏନ୍ଦ୍ରିନ୍ ଜିନିଷ୍ ଚାହେ କିଁତା ଏନ୍ଦ୍ରିନ୍ ଜିନିଷ୍ ସିର୍‌ଜାଚ୍‌କା ଏନ୍ଦ୍ରିନ୍ ଜିନିଷ୍ ନାମାନ୍ ପାର୍‌ମେଶ୍ୱାର୍‌ସ୍‌କି ବାନେ ହାଖ୍ଖନାସ୍ତି ଭିନେ କାମା ପଲ୍ଲୀଦ୍ ଏକାଦ୍ କା ଯୀଶୁ ଖ୍ରୀସ୍ତ୍‌ସ୍‌କି ଦ୍ୱାର୍‌ନୁ ହାଖ୍ଖର୍‌କିଚି।

ପାର୍‌ମେଶ୍ୱାର୍‌ସ୍ ଆରୁ ୟାହୁଦୀ ଆଲାର୍

¹ଏନ୍ ଖ୍ରୀସ୍ତ୍‌କି ମିଆଁ ବିଶ୍ୱାସ୍ କାମ୍‌ଦାନ୍ ହୁଦ୍‌ଘିଲାଗାନ୍ ମାଲ୍ଲା ଠାକ୍‌ନା, ସତ୍ତୁନ୍ ତେଙ୍ଗାଲ୍‌ଦାନ୍ ଆରୁ ଏଙ୍ଘା ମନ୍‌ଦ୍‌ହି ପାବିତାର୍ ଆତ୍ମାତି ଏକ୍‌ମତ୍ ମାନିକିରି ସାକ୍ଷୀ ଚିଇଦ୍ କା ²ଏଙ୍ଘାଏ ୟାହୁଦୀ ଆଲାର୍‌ଘି ଲାଗାନ୍ ମୁରୁକ୍ ଦୁଃଖୁ ଲାଗ୍ଗାଲି। ³ଏନ୍ଦେର୍‌ଗେକା ଏନ୍ ଏତ୍‌କତକ୍ ଚାହାଁଲ୍‌କାନ୍ କା ଏଙ୍ଘା ୟାହୁଦୀ ଭାଇ ବୁହୁଣୀର୍‌ଘି ଲାଗାନ୍ ଏକାର୍ ପାର୍‌ମେଶ୍ୱାର୍‌ସ୍‌ତି ଗେଚ୍ଛା ମାନ୍‌ଚାର୍ କେର୍‌କାନାଏ, ଆବ୍ଡ଼ାର୍‌ଘି ଲାଗାନ୍ ପାର୍‌ମେଶ୍ୱାର୍‌ସ୍‌କି ସାରାପ୍ ଏଙ୍ଘା ମିଆଁ ପଛେ ମାନ୍ନାଦ୍ ଆରୁ ଏନ୍ ପଛେ ଖ୍ରୀସ୍ତ୍‌ତି ଭିନେ ମାନନ୍‌କନ୍‌ନେ ତା ବାନେ ମାନଦ୍‌ନେ, ଲେକିନ୍ ଆବ୍ଡ଼ାର୍ ପାର୍‌ମେଶ୍ୱାର୍‌ସ୍‌କି ଚାହା ବାର୍‌ନାଇନ୍ କାତ୍‌ଥା। ⁴ଆବ୍ଡ଼ାର୍ ଇସ୍ରାଏଲ୍ ଆରୁ ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ଚାଜ୍ଜକାଦାସ୍ ଆରୁ ନିଜର୍ ହାଦ୍ଦୁସ୍‌ଘି ହକ୍ ଚିଚ୍ଚକାଦାସ୍। ଆରୁ ଆସ୍ କେତ୍‌କ ମାହାନ୍‌ସ୍ ଆବନ୍ ଆବ୍ଡ଼ାରିନ୍ ଏଦ୍‌କାଦାସ୍ ଆରୁ ଆବ୍ଡ଼ାର୍ ଗାନେ ରାଜୀନାମା କାମିକିରି ଆବ୍ଡ଼ାର୍‌ଗେ ମୁଶାସ୍‌କି ଦ୍ୱାର୍‌ନୁ ନିୟମ୍ ଚିଚ୍‌କାଦାସ୍ ଆରୁ ଆରାଧାନା ଏସ୍‌କେ କାମାକୋ, ଆବନ୍ ଶିଖାବାଚାସ୍ ଆରୁ ଆବ୍ଡ଼ାର୍‌ଗେ କାତ୍‌ଥା ଚିଚ୍‌କାଦାସ୍। ⁵ପୁର୍‌ଖାର୍‌ହି ଆବ୍ରାହାମ୍, ଇସାକ୍ ଆରୁ ୟାକୁବ୍ ଆବ୍ଡ଼ାର୍‌ସ୍‌ତି, ରାଚାର୍ ଆରୁ ଶାରୀର୍‌ଘି ଅନୁସାର୍ ଆବ୍ଡ଼ାର୍‌ଘି ଖ୍ରୀସ୍ତ୍‌ହି ଜନମ୍ ମାନ୍‌ଚାସ୍। ଆସ୍ ଜାମାର୍‌ଘି ପାର୍‌ମେଶ୍ୱାର୍‌ସ୍, ଆ ମାହାନ୍ ଯୀଶୁ ଖ୍ରୀସ୍ତ୍‌ସ୍‌ ପାର୍‌ମେଶ୍ୱାର୍‌ସ୍‌କି ଯୁଗ୍‌ଯୁଗ୍ ସ୍ତୁତି ମାନଦ୍! ଆମେନ୍।

^6-7ଏନ୍ନେ ମାଲ୍ଲା କା ପାର୍‌ମେଶ୍ୱାର୍‌ସ୍ ତାଙ୍ଘା ଚିଚ୍ଚକା ବଚନ୍‌ବନ୍ ପୁରା ମା କାମ୍‌ଚାସ୍ ଲେକିନ୍ ଏକାର୍ ଇସ୍ରାଏଲ୍ ବାଉଁଶାନ୍ତାର୍, ଆବ୍ଡ଼ାର୍‌ଘି ଭିତର୍‌ତି ଜାମା ଆଲାରିନ୍ ପାର୍‌ମେଶ୍ୱାର୍‌ସ୍ ମାଲ୍ଲା ଚାଜୁସ୍। ଆରୁ ଏକାର୍ ଆବ୍ରାହାମ୍‌ସ୍‌କି ବାଉଁଶାନୁ ଜନମ୍ ମାନ୍‌ଚ୍‌କାନାଏ ଆବ୍ଡ଼ାର୍‌ଘି ଭିତର୍‌ତି ଜାମାର୍ ଆସ୍‌କି ହାଦ୍ଦୁବଚ୍ଚ ମାଲ୍‌ନାଏ। ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଆବ୍ରାହାମ୍‌ସିନ୍ ତେଙ୍ଗିୟାସ୍, ଏକାର୍ ଇସାକ୍‌ସ୍‌କି ବାଉଁଶାନ୍ତି ଜନମ୍ ମାନର୍ ଆବ୍ଡ଼ାର୍ ଖାଲି ନିଙ୍ଘା ହାଦ୍ଦୁବଚ୍ଚ ମାନର୍। ⁸ଇଦ୍‌ଘି ମତ୍‌ଲବ୍ ଇଦ୍ କା ଆବ୍ରାହାମ୍‌ସ୍‌କି ବାଉଁଶାନ୍ତି ଜନମ୍ ମାନ୍‌ଚ୍‌କା ଜାମା ଆଲାର୍ ପାର୍‌ମେଶ୍ୱାର୍‌ସ୍‌କି ହାଦ୍ଦୁବଚ୍ଚ ମାଲ୍‌ନାଏ। ଲେକିନ୍ ପାର୍‌ମେଶ୍ୱାର୍‌ସ୍ କାତ୍‌ଥା ଚିଚ୍ଚକାଘି ଅନୁସାର୍ ଏକାର୍ ଇସାକ୍‌ସ୍‌କି ବାଉଁଶାନ୍ତି ଜନମ୍ ମାନ୍‌ଚ୍‌କାନାଏ ଆବ୍ଡ଼ାରିନ୍ ଆବ୍ରାହାମସ୍‌କି ହାଦ୍ଦୁବଚ୍ଚର୍ ବୁଲି ତେଙ୍ଗାକାଇ। ⁹ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ କାତ୍‌ଥା ଚିଚ୍‌କାଚାସ୍ କା ଏନ୍ ଠିକ୍ ଏନ୍ନେ ସାମାୟନୁନିନ୍ ବାରନ୍। ଆରୁ ସାରାଘି ଅଣ୍ଟା କୁକ୍କହାଦ୍ଦୁ ମାନ୍‌ଚ୍‌କିରୋ। ¹⁰ଆରୁ ଆ ହାଦ୍ଦୁସ୍ ନାହ୍ମା ପୁର୍‌ଖା ବୁଆ ଇସାକ୍‌ସ୍ ରାଚାସ୍, ଇସାକ୍‌ସ୍‌କି ଆଲିଦ୍ ରେବେକା ମେଦୁନୁ ରାଚା ଆରୁ ଜାଁଉଣା କୁକ୍କ ହାଦ୍ଦୁରିନ୍ ଜନମ୍ ଚିଚ୍ଚାଦ୍। ^11-12ଆ ହାଦ୍ଦୁର୍‌ଘି ଜନମ୍ ମାନ୍ନାଘି ଆଘ୍‌ଲି ଆରୁ ଏନ୍ଦେର୍‌ହି ଖାରାପ୍ ଆରୁ ବାନେ କାମ୍‌ନାଘି ଆଘ୍‌ଲି ପାର୍‌ମେଶ୍ୱାର୍‌ସ୍ ରେବେକାନ୍ ତେଙ୍ଗିୟାସ୍, “ନିଙ୍ଘା ବାଡ଼୍‌କା ହାଦ୍ଦୁସ୍ ଛୋଟେ ହାଦ୍ଦୁସ୍‌କି ସେବା କାମସ୍।” ଇ ବଚନ୍ ଇବନ୍ ଏଦିକା ପାର୍‌ମେଶ୍ୱାର୍‌ସ୍ ଏକିନ୍ ଆଲାରିନ୍ ତାହ୍ମା ନାଲ୍‌ଖୁଘି ଲେଖା ମାଲ୍ଲା ଲେକିନ୍ ଆସ୍ ତାଙ୍ଘା ଯୋଜ୍‌ନା ପୁରା କାମାଗେ ତାଙ୍ଘା ଇଚ୍ଛା ଲେଖା ଚାଜ୍ଜଦାସ୍। ¹³ଆରୁ ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ, ପାର୍‌ମେଶ୍ୱାର୍‌ସ୍ ତେଙ୍ଗ୍‌ଦାସ୍ କା “ଏନ୍ ୟାକୁବ୍‌ସିନ୍ ବାନେ ହାକ୍କାନ୍ ଆରୁ ଏଷୋବ୍‌ସିନ୍ ହାଁଣ୍‌କାନ୍ ତୁଫ୍‌କାନ୍।” ¹⁴ତା ନାମ୍ ଏନ୍ଦେର୍ ତେଙ୍ଗତ୍? ପାର୍‌ମେଶ୍ୱାର୍‌ସ୍ ଅନ୍ୟାୟ କାମ୍‌ଦାସ୍ କାଁଏ? ବିଲ୍‌କୁଲ୍ ମାଲ୍ଲା! ¹⁵ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ମୁଶାସିନ୍ ତେଙ୍ଗିୟାସ୍ କା ଏନ୍ ନେଖା ମିଆଁ ଦାୟା କାମାଗେ ଚାହଁଦାନ୍ ଆସ୍‌କି ମିଆଁ କ୍ରିପା କାମନ୍, ଆରୁ ନେଖା ମିଆଁ ଦାୟା କାମାଗେ ଚାହଁଦାନ୍ ଆସ୍‌କି ମିଆଁ ନିନ୍ କ୍ରିପା କାମନ୍। ¹⁶ଇଦ୍ ତା ଆଲାର୍‌ଘି ଇଚ୍ଛାତି ମାଲ୍ଲା ନା ଆସ୍‌କି ମେହ୍ଁନତ୍‌ତି ମାଲ୍ଲା, ବରନ୍ ନେକାନ୍ ଆସ୍ ଚାଜ୍ଜକାଦାସ୍ ଆ ଦାୟା କାମୁ ପାର୍‌ମେଶ୍ୱାର୍‌ସ୍‌କି ମିଆଁ ଆଶ୍ରା ରାଇ। ¹⁷ଏନ୍ଦେର୍‌ଗେକା ପାବିତାର୍ ଶାସ୍ତ୍ରନୁ ପାର୍‌ମେଶ୍ୱାର୍‌ସ୍ ଫାରୋ ରାଜାସିନ୍ ତେଙ୍କାଚାସ୍ କା, “ଏନ୍ ନିଙ୍ଗାନ୍ ହୁଦ୍‌ଘିଲାଗାନ୍ ଚାଜ୍ଜକାଚ୍‌କାନ୍ କା ଏନ୍ ନିଜର୍ ଶକ୍ତିନ୍ ନିଙ୍ଘାଏନୁ ଏରା ଅଙ୍ଗନ୍ ଆରୁ ଏଙ୍ଘାଏ ନାମେ ଜାମା ଧାନ୍ତାରିନୁ ତେଙ୍ଗାକୋ।” ¹⁸ହୁଦ୍‌ଘିଲାଗାନ୍ ପାର୍‌ମେଶ୍ୱାର୍‌ସ୍ ନେକାନ୍ ଚାହଁଦାସ୍ ଆସ୍‌କି ମିଆଁ ଦାୟା କାମ୍‌ଦାସ୍ ଆରୁ ନେକାନ୍ ଚାହଁଦାସ୍ ଆସିନ୍ କାଠୋର୍ କାମ୍‌ଦାସ୍।

ପାର୍‌ମେଶ୍ୱାର୍‌ସ୍‌କି ଖୀସ୍ ଆରୁ ଦାୟା

¹⁹ହତ୍‌କବାକେନ୍ ନିନ୍ ଏଙ୍ଗାନ୍ ତେଙ୍ଗୟ କା ପାର୍‌ମେଶ୍ୱାର୍‌ସ୍ ଆରୁଅହନ୍ ଦୋଷ୍ ଏନ୍ଦେର୍‌ଗେ ବେଦ୍ଦଦାସ୍? ନେର୍ ଆସ୍‌କି ଇଚ୍ଛାଘି ବିରୁଦ୍ଧ୍ କାମ୍‌ଚ୍‌କାନାଏ? ²⁰ଲେକିନ୍ ନାମ୍ ତା ଖାଲି ମୁନୁଷ୍ ଜାତିୟାତ୍, ଆରୁ ପାର୍‌ମେଶ୍ୱାର୍‌ସ୍‌ସିନ୍ ବାରାବର୍ ଯାବାବ୍ ନାମ୍ ଏସ୍‌କେ ତେଙ୍ଗା ଅଙ୍ଗତ୍? ବାନାବାଚ୍‌କା ଜିନିଷ୍‌ଦ୍‌, କାଁଏ ତାଙ୍ଘା ବାନାବୁସ୍‌ସିନ୍ ନିନ୍ ଏନ୍ଦେର୍‌ଗେ ଏଙ୍ଗାନ୍ ଏନ୍ନେ ବାନାବାଚ୍‌କାଏ ବୁଲି ତେଙ୍ଗା ଅଙ୍ଗିଦ୍ କାଁଏ? ²¹ଚାହେ ଅଣ୍ଟା ହାଜ୍ଜୁ ଢିଣାନ୍ତି ଅଣ୍ଟାନ୍ ଖାସ୍ ନାଲ୍‌ଖୁଘି ଲାଗାନ୍ ଆରୁ ଅଣ୍ଟାନ୍ ରୋଜ୍‌ଦିନ୍‌ତା ନାଲ୍‌ଖୁଘି ଲାଗାନ୍ ଗାଢ଼ାଗେ ହାଜ୍ଜୁଘି ମିଆଁ କୁମ୍ଭରାସ୍‌କି ହକ୍ ମାଲ୍ଲାଦିନ୍ କାଁଏ? ²²ପାର୍‌ମେଶ୍ୱାର୍‌ସ୍‌କେ ଜାମାର୍‌ଘି ମିଆଁ ନିଜର୍ ଖୀସ୍‌ବନ୍ ଏଦାଗେ ଆରୁ ତାଙ୍ଘା ଶକ୍ତିବନ୍ ଏଦାଗେ ହକ୍ ରାଇ, ହାଲେହି ନେଖାଏ ନାଶ୍ ମାନ୍ନାବାଲା ରାଚା ଆବ୍ଡ଼ାର୍‌ଘି ମିଆଁ ପାର୍‌ମେଶ୍ୱାର୍‌ସ୍ ତାଙ୍ଘା ଖୀସୁନ୍ ମା ଏଦିୟାସ୍। ଲେକିନ୍ ଆବ୍ଡ଼ାରିନ୍ ଆସ୍ ଧିରାଜ୍‌ତି ସାହ୍‌ଚାସ୍। ²³ହୁଦ୍‌ଘିଲାଗାନ୍ ଆସ୍ ଏନ୍ନେ କାମ୍‌ଚାସ୍ କା ଆସ୍ ଦାୟା କାମ୍‌ଚ୍‌କା ଆଲାର୍‌ଘି ମିଆଁ ନିଜର୍ ମାହିମାବନ୍ ଏଦାଗେ ଚାହାଁଲ୍‌ଦାସ୍। ଏକାରିନ୍ ଆସ୍ ପହ୍‌ଲେନ୍ତିନିନ୍ ଆ ମାହିମାଘି ଲାଗାନ୍ ତିଆର୍ କାମ୍‌ଚ୍‌କାଚାସ୍। ²⁴ହୁଦ୍‌ଘିଲାଗାନ୍ ତା ଆସ୍ ନାମାନ୍ ୟାହୁଦୀ ଜାମାର୍‌ଘି ଭିତର୍‌ତି ଖାଲି ମାଲ୍ଲା, ଲେକିନ୍ ବିନାୟାହୁଦୀ ଜାମାର୍‌ଘି ଭିତର୍‌ତିହି ଚାଜ୍ଜକାଦାସ୍। ²⁵ଏସ୍‌କେ କା ବିନାୟାହୁଦୀର୍‌ଘି ବାରେନୁ ହୋଶେ ନାବୀସ୍‌କି ବହିନୁ ଲେଖ୍‌ଚ୍‌କା ରାଇ, ଏକାର୍ ଏଙ୍ଘା ଆଲ୍ ମାଲ୍ଲାରୁର୍ ଆବ୍ଡ଼ାରିନ୍ ଏନ୍ ଏଙ୍ଘା ଆଲ୍‌ବୁଲି ତେଙ୍ଗନ୍, ଆରୁ ଏକାରିନ୍ ଏନ୍ ଦୁଲାର୍ ମା କାମାଲ୍‌କାନ୍ ଆବ୍ଡ଼ାରିନ୍ ଏନ୍ ଦୁଲାର୍ କାମନ୍। ²⁶ଆରୁ ଏକା ଆଡ୍ଡାନୁ ପାର୍‌ମେଶ୍ୱାର୍‌ସ୍ ନିମାନ୍ ତେଙ୍କାଚାସ୍ କା ନିମ୍ ଏଙ୍ଘା ଆଲ୍ ମାଲ୍‌ଦାର୍, ଆ ଆଡ୍ଡାନୁ ଆବ୍ଡ଼ାରିନ୍ ଜୀବିତ୍ ପାର୍‌ମେଶ୍ୱାର୍‌ସ୍‌କି ହାଦ୍ଦୁବଚ୍ଚ ବୁଲି ତେଙ୍ଗାକୋ। ²⁷ଆରୁ ଇଶାୟାହ୍‌ସ୍ ନାବୀସ୍‌ହି ଇସ୍ରାଏଲ୍ ଜାମାର୍‌ଘି ବାରେ ଚିର୍‌ରା ରାଇକିରି ତେଙ୍ଗ୍‌ଦାସ୍: ଯଦିଭି ଇସ୍ରାଏଲ୍ ଜାମାର୍‌ଘି ଗନ୍ତି ସାମ୍‌ଧୁର୍‌ତା ଚାଲ୍‌କ୍ରୀଘି ବାରାବୁରି ମାନଦ୍, ହାଲେହି ଆବ୍ଡ଼ାର୍‌ଘିନ୍ତି ଥୋଡ଼େ ଆଲାର୍ ପାର୍‌ମେଶ୍ୱାର୍‌ସ୍‌କି ଦଣ୍ଡ୍‌ତି ବାଛ୍‌ରର୍। ²⁸ଏନ୍ଦେର୍‌ଗେକା ପ୍ରାଭୁସ୍ ଦୁନିଆଁନୁ ନିଜର୍ ନ୍ୟାୟବନ୍ ପୁରାପୁରୀ କାମିକିରି ଆରୁ ଚାଁଣେହି ଆବନ୍ ପୁରା କାମସ୍। ²⁹ଏସ୍‌କେ କା ଇଶାୟାହ୍‌ସ୍ ପହ୍‌ଲେନ୍ତି ତେଙ୍କାଚାସ୍ କା, “ଯଦି ଜାମାର୍‌ଘିନ୍ତି ଶକ୍ତିଶାଲୀ ପ୍ରାଭୁସ୍ ନାହ୍ମାଲାଗାନ୍ କେତ୍‌କ ବାଉଁଶାରିନ୍ ମା ଆମ୍ୱକା ରସ୍‌ନେ ହାଲେ, ନାମ୍‌ହି ସଦୋମ୍ ଆରୁ ଗମୋରାନ୍ତା ଆଲାର୍ ଲେଖା ମାନତ୍‌କତ୍‌ନେ। ପାର୍‌ମେଶ୍ୱାର୍‌ସ୍‌କି ତାର୍‌ତି ବହୁତ୍ ଦଣ୍ଡ୍ ନାମ୍‌ହି ହାଖତ୍‌ନେ।”

ଇସ୍ରାଏଲ୍ ଜାମାର୍‌ଘି ଅବିଶ୍ୱାସ୍

³⁰ଇଦ୍‌ଘି ମତଲବ୍ ଇଦ୍ କା ଏକା ବିନାୟାହୁଦୀର୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାରାଗେ ମା ବେଦ୍ଦାଲିୟାର୍, ଆବ୍ଡ଼ାର୍ ଯୀଶୁ ଖ୍ରୀସ୍ତ୍‌ସିନ୍ ବିଶ୍ୱାସ୍ କାମ୍‌ଚାର୍ ଆରୁ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ଠାହ୍‌ରାରାଚାର୍। ³¹ଲେକିନ୍ ଇସ୍ରାଏଲୀଜାମାର୍ ମୁଶାସ୍‌କି ନିୟମ୍‌ବନ୍ ମାନିକିରି ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନାଗେ କୋଶିଷ୍ କାମାଲିୟାର୍, ଲେକିନ୍ ଆବ୍ଡ଼ାର୍ ପାର୍‌ମେଶ୍ୱାରସ୍‌କି ନଜର୍‌ନୁ ନିର୍ଦ୍ଦୋଷ୍ ମାନା ପଲ୍ଲିୟାର୍। ³²ଏନ୍ଦେର୍‌ଗେ ଏନ୍ନେ ମାନ୍‌ଚା? ଇଦ୍‌ଘିଲାଗାନ୍ କା ଆବ୍ଡ଼ାର୍ ଯୀଶୁ ଖ୍ରୀସ୍ତ୍‌ସ୍‌କି ମିଆଁ ବିଶ୍ୱାସ୍ କାମିକିରି ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନାଗେ ମା ବେଦ୍ଦାଲିୟାର୍, ଲେକିନ୍ ନିୟମ୍ ମାନିକିରି ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନାଗେ କୋଶିଷ୍ କାମାଲିୟାର୍। ଖ୍ରୀସ୍ତ୍ ଅଣ୍ଟା ଚାଁଚା ଲେଖା ରାଦାସ୍। ଆରୁ ଆବ୍ଡ଼ାର୍ ଆସ୍‌କି ମିଆଁ ବିଶ୍ୱାସ୍ ମା କାମ୍‌ଚାର୍, ହୁଦ୍‌ଘିଲାଗାନ୍ ଆବ୍ଡ଼ାର୍ ଚାଁଚାତି ମୁଡ଼ିକିରି ଖାତ୍‌ର୍‌ନା ଲେଖା ମାନ୍‌ଚାର୍ କେରାର୍। ³³ଏସ୍‌କେ କା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ: “ଏରା, ଏନ୍ ସିୟୋନ୍‌ନୁ ଅଣ୍ଟା ଠେସ୍‌ର୍‌ନାଘି ଚାଁଚା ଆରୁ ଖାତ୍‌ର୍‌ନାଘି ଚାଟ୍‌ଣୀ ଉଇୟାଲ୍‌ଦାନ୍। ନେଦ୍ ଆଦ୍‌ଘି ମିଆଁ ବିଶ୍ୱାସ୍ କାମ୍‌ନାଏ ଆବ୍ଡ଼ାର୍‌ଗେ ଲାଜ୍ଜେ ମା ଲାଗ୍ଗ।”

ଯୀଶୁ ଖ୍ରୀସ୍ତ୍‌ସ୍‌କି ମିଆଁ ବିଶ୍ୱାସ୍ କାମ୍‌ଚ୍‌କୁନ୍ ପାପ୍‌ଘି ଦଣ୍ଡ୍‌ତି ମୁକ୍ତି ହାଖ୍ଖରୋ

¹ହେ ଏଙ୍ଘା ଭାଇ ଆରୁ ବୁହୁଣୀରୋ, ଏଙ୍ଘାଏ ବହୁତ୍ ଇଚ୍ଛା ରାଇ କା ପାର୍‌ମେଶ୍ୱାର୍‌ସାନ୍ ଏଙ୍ଘା ବିନ୍ତି ଇଦ୍ ରାଇଦ୍ କା ଏଙ୍ଘାଏ ଇସ୍ରାଏଲୀ ଆଲାର୍ ପାପ୍‌ଘି ଦଣ୍ତ୍‌ତି ମୁକ୍ତି ହାଖ୍ଖର୍। ²ଏନ୍ଦେର୍‌ଗେକା ଏନ୍ ଇସ୍ରାଏଲୀର୍‌ଘି ବାରେନୁନିନ୍ ତେଙ୍ଗାଲ୍‌ଦାନ୍ କା ଆବ୍ଡ଼ାର୍‌ଗେ ପାର୍‌ମେଶ୍ୱାର୍‌ସ୍‌କି ଲାଗାନ୍ ମୁରୁକ୍ ଇଚ୍ଛା ରାଇ ଲେକିନ୍ ଆବ୍ଡ଼ାର୍ ପାର୍‌ମେଶ୍ୱାର୍‌ସ୍‌କି ସତ୍ତୁ ବଚନ୍‌ଘି ଲେଖା ମାଲ୍‌କାରିନ୍। ³ଆରୁ ପାର୍‌ମେଶ୍ୱାର୍‌ସ୍ ଆଲାରିନ୍ ଏସ୍‌କେ ତାଙ୍ଘା ନଜର୍‌ନୁ ନିର୍ଦ୍ଦୋଷ୍ ବାନାବାନାଘି ପାବୁ ମା ଆହିକିରି ଆବ୍ଡ଼ାର୍ ନିଜର୍ ପାବୁନୁ ଚାଲ୍‌ରିକିରି ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନାଗେ କୋଶିଷ୍ କାମାଲିୟାର୍, ହୁଦ୍‌ଘିଲାଗାନ୍ ଆବ୍ଡ଼ାର୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନା ପଲ୍ଲିୟାର୍। ⁴ଆରୁ ଯେତ୍‌କବାକେନ୍ ଖ୍ରୀସ୍ତ୍‌ସ୍‌ ବାର୍‌ଚାସ୍, ହତ୍‌କବାକେନ୍‌ନ୍ତି ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନାଗେ ଆଲାର୍‌ଗେ ନିୟମ୍‌ଘି ଦାର୍‌କାର୍ ମାଲ୍ଲାମାନୁ। ଏନ୍ଦେର୍‌ଗେକା ଖ୍ରୀସ୍ତ୍‌କି ମିଆଁ ବିଶ୍ୱାସ୍ କାମିକିରି ନେଦିନ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନାଅଙ୍ଗ୍‌ନାଏ।

⁵ଆରୁ ଏକା ଆଲାର୍ ନିୟମ୍ ମାନିକିରି ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନା ବେଦ୍ଦନାଏ, ଆବ୍ଡ଼ାର୍‌ଘି ଲାଗାନ୍ ମୁଶାସ୍ ଲେଖ୍‌ଚ୍‌କାଦାସ୍ କା ଏକା ଆଲାସ୍ ନିୟମ୍‌ବନ୍ ପୁରା ମାନ୍‌ଦାସ୍, ଆସ୍ ଆ ନିୟମ୍‌ତି ସବୁଦିନ୍‌ତା ଜୀବନ୍ ହାଖ୍ଖସ୍। ⁶ଲେକିନ୍ ବିଶ୍ୱାସ୍ କାମିକିରି ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନ୍ନାଘି ବାରେ ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍‌ଚ୍‌କା ରାଇ କା, “ନିନ୍ ନିଙ୍ଘା ମନେ-ମନେ ଏନ୍ନେ ଆମାତେଙ୍ଗା କା, ଖ୍ରୀସ୍ତ୍‌ସିନ୍ ନାହ୍ମା ଚାହା ଅନ୍ଦ୍ରାଗେ, ସରଗ୍‌ଗେ ନେଦ୍ ଆର୍‌ଗା ଅଙ୍ଗର୍?” ⁷ଚାହେ “କେଚ୍ଚକାସ୍ତି ଉଜ୍ଜତିକିରି ଖ୍ରୀସ୍ତ୍‌ସିନ୍ ମିଆଁ ଅନ୍ଦ୍ରାଗେ ନେଦ୍ ଧାନ୍ତାରି କିୟାଁ ନେଦ୍ ଏତ୍ତର୍?” ⁸ଲେକିନ୍ ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍‌ଚ୍‌କା ରାଇ କା, ପାର୍‌ମେଶ୍ୱାର୍‌ସ୍‌କି ବଚନ୍‌ଦ୍ ନିଙ୍ଘା ଚାହାନୁ ରାଇଦ୍, ଆରୁ ନିନ୍ ଆଦ୍‌ଘି ବାରେନୁନିନ୍ ତେଙ୍ଗ୍‌ଦାଏ, ଆରୁ ଇଦ୍ ନିଙ୍ଘା ଥୁମ୍‌ଣାନୁ ଆରୁ ଜୀଆନୁହି ରାଇଦ୍, ଆରୁ ଏକା ବିଶ୍ୱାସ୍‌ଘି ବାରେନୁ ନାମ୍ ପ୍ରଚାର୍ କାମ୍‌ଦାତ୍, ଆଦ୍ ଇ ବଚନ୍‌ଦିନ୍। ⁹ଆରୁ ଯଦି ନିମ୍ ଯୀଶୁସିନ୍ ପ୍ରାଭୁସ୍ ବୁଲି ମାନର୍, ଆରୁ ପୁରା ମନ୍‌ତି ବିଶ୍ୱାସ୍ କାମ୍‌ଦାର୍ କା, ପାର୍‌ମେଶ୍ୱାର୍‌ସ୍ ଆସିନ୍ କେଚ୍ଚକାସ୍ତି ଉଜ୍ଜତାଚାସ୍‌ତା, ନିମ୍ ଏସ୍‌କ୍ରିନ୍‌ହି ପାପ୍‌ଘି ଦଣ୍ତ୍‌ତି ବାଛ୍‌ରର୍। ¹⁰ଏନ୍ଦେର୍‌ଗେକା ଯଦି ଅଣ୍ଟା ଆଲାସ୍ ପୁରା ମନ୍‌ତି ବିଶ୍ୱାସ୍ କାମ୍‌ଦାସ୍ ତା ଆସ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନ୍‌ଦାସ୍, ଆରୁ ଥୁମ୍‌ଣାତି ସ୍ୱୀକାର୍ କାମ୍‌ଦାସ୍ ତା ଆସ୍ ପାପ୍‌ଘି ଦଣ୍ତ୍‌ତି ବାଛ୍‌ର୍‌ଦାସ୍। ¹¹ଏନ୍ଦେର୍‌ଗେକା ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍‌ଚ୍‌କା ରାଇ କା, “ଏକାର୍ ଯୀଶୁ ଖ୍ରୀସ୍ତ୍‌ସ୍‌କି ମିଆଁ ବିଶ୍ୱାସ୍ କାମର୍, ଆବ୍ଡ଼ାର୍‌ଗେ ନିରାଶ୍ ମାନା ମା ଖାତ୍‌ରୋ।” ¹²ହୁଦ୍‌ଘିଲାଗାନ୍ ୟାହୁଦୀ ଆରୁ ବିନାୟାହୁଦୀନୁ ଏନ୍ଦେର୍‌ହି ଫରକ୍ ମାଲ୍ଲାଦିନ୍। ଏନ୍ଦେର୍‌ଗେକା ଜାମାର୍‌ଘି ପ୍ରାଭୁସ୍ ଅଣ୍ଟା ରାଦାସ୍। ଆରୁ ଯେତ୍‌କ ଆଲାର୍ ଆସ୍‌ସାନ୍ ବିନ୍ତି କାମ୍‌ନାଏ, ଆବ୍ଡ଼ାର୍‌ଗେ ଆସ୍ ଖୁଲାମନ୍‌ତି ଆଶିଷ୍ ଚିଦାସ୍। ¹³ଏନ୍ଦେର୍‌ଗେକା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ କା, “ନେଦିନ୍ ପ୍ରାଭୁସ୍‌କି ନାମେ ହୋଇକିରି ବିନ୍ତି କାମର୍, ଆର୍ ପାପ୍‌ଘି ଦଣ୍ତ୍‌ତି ବାଛ୍‌ରର୍‌କର୍।”

¹⁴ଲେକିନ୍, ଏକା ପାର୍‌ମେଶ୍ୱାର୍‌ସ୍‌ସିନ୍ ଆବ୍ଡ଼ାର୍ ବିଶ୍ୱାସ୍ ମା କାମ୍‌ନାଏ, ଆସ୍‌ସାନ୍ ଏସ୍‌କେ ବିନ୍ତି କାମର୍? ଆରୁ ଏକା ପାର୍‌ମେଶ୍ୱାର୍‌ସ୍‌କି ବାରେନୁ ଆବ୍ଡ଼ାର୍ ମାଲ୍ଲା ମେନୁର୍ ତା, ଏସ୍‌କେ ଆସ୍‌କି ମିଆଁ ବିଶ୍ୱାସ୍ କାମର୍? ଆରୁ ଆବ୍ଡ଼ାର୍‌ରିନ୍ ଯଦି ନେଦ୍‌ହି ଆସ୍‌କି ବାରେନୁ ମା ତେଙ୍ଗର୍ ତା ଆବ୍ଡ଼ାର୍ ଏସ୍‌କେ ମେନର୍? ¹⁵ଲେକିନ୍ ଯଦି ନେଦିନ୍ ଆସିନ୍ ମା ତାଇକୁନ୍ ଆସ୍ ଆବ୍ଡ଼ାର୍‌ଘି ଚାହାଗେ ଏସ୍‌କେ କାଇକିରି ପ୍ରଚାର୍ କାମସ୍? ଏସ୍‌କେ କା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ, “ଏକାର୍ ସୁସାମାଚାର୍ ଶୁଣାବାଗେ ବାର୍‌ନାଏ, ଆବ୍ଡ଼ାର୍‌ଘି ବାର୍‌ନାଦ୍ କେତ୍‌କ ଖୁସୀଘି କାତ୍‌ଥାଦ୍।” ¹⁶ଲେକିନ୍ ଜାମାର୍ ଆ ସୁସାମାଚାର୍‌ବନ୍ ଗ୍ରହନ୍ ମା କାମ୍‌ଚାର୍, ହୁଦ୍‌ଘିଲାଗାନ୍ ଇଶାୟାହ୍‌ସ୍ ନାବୀସ୍ ତେଙ୍ଗିୟାସ୍, “କା ହେ ପ୍ରାଭୁ ନେଦ୍ ନାହ୍ମା ତେଙ୍କା ସୁସାମାଚାର୍‌ବନ୍ ବିଶ୍ୱାସ୍ କାମ୍‌ଚାର୍?” ¹⁷ଏନ୍ଦେର୍‌ଗେକା ବଚନ୍ ମେନ୍ନାଘି ଦ୍ୱାର୍‌ନୁ ବିଶ୍ୱାସ୍ ମାନିଦ୍। ଆରୁ ନେଦିନ୍ ଖ୍ରୀସ୍ତ୍‌ସ୍‌କି ବାରେନୁ ପ୍ରଚାର୍ କାମ୍‌ନାଏ ତା ଆଲାର୍ ମେନାଗେ ଅଙ୍ଗ୍‌ନାଏ।

¹⁸ଲେକିନ୍ ଏନ୍ ତେଙ୍ଗ୍‌ଦାନ୍, ଇସ୍ରାଏଲୀ ଆଲାର୍ ନାହ୍ମା ତେଙ୍କା ସୁସାମାଚାର୍‌ବନ୍ ମାଲ୍ଲା ମେନୁର୍ କାଁଏ? ଜରୁର୍ ଆବ୍ଡ଼ାର୍ ମେନ୍‌ଚାର୍, ଏନ୍ଦେର୍‌ଗେକା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ, “ପାର୍‌ମେଶ୍ୱାର୍‌ସ୍‌କି ବଚନ୍ ପ୍ରଚାର୍ କାମୁର୍ ପୁରା ଦୁନିଆଁନୁ ପ୍ରଚାର୍ କାମ୍‌ଚାର୍, ଆରୁ ଆବ୍ଡ଼ାର୍‌ଘି ପ୍ରଚାର୍ କାମ୍‌ଚ୍‌କା ବଚନ୍ ପୁରା ଦୁନିଆଁନୁ ଫାଏଲାରାଚା କେରା।” ¹⁹ଆରୁ ଏନ୍ ତେଙ୍ଗାଲ୍‌ଦାନ୍ କା ଇସ୍ରାଏଲୀଜାମାର୍ ବଚନ୍‌ବନ୍ ମା ବୁଝ୍‌ରାଲିୟାର୍ କାଁଏ? ଜରୁର୍ ବୁଝ୍‌ରାଲିୟାର୍, ଏନ୍ଦେର୍‌ଗେକା ମୁଶା ନାବୀସ୍‌କି ବହିନୁ ପାର୍‌ମେଶ୍ୱାର୍‌ସ୍ ତେଙ୍ଗ୍‌ଦାସ୍ କା, “ଏକାର୍ ଏଙ୍ଘା ଆଲ୍ ମାଲ୍ଲନାଏ ଆବ୍ଡ଼ାରିନ୍ ଏନ୍ ବେଭାର୍ କାମନ୍ ତାକା ଇବନ୍ ଏରିକିରି ନିମାଗେ ହିସ୍‌ଙ୍ଗା ଲାଗ୍ଗ। ଆରୁ ଏକାର୍ ପାର୍‌ମେଶ୍ୱାର୍‌ସ୍‌କି ବାରେନୁ ବାଲ୍ଲନାଇନ୍ ଏନ୍ନେ ଆଲାରିନ୍ ବେଭାର୍ କାମନ୍ ହତ୍‌କବାକେନ୍ ନିମ୍ ଇସ୍ରାଏଲୀ ଆଲାର୍ ମୁରୁକ୍ ଖିସାରର୍।” ²⁰ଆରୁ ଇଶାୟାହ୍‌ସ୍ ନାବୀସ୍ ବିନାଏଲ୍‌ଚିକିରି ପାର୍‌ମେଶ୍ୱାର୍‌ସ୍‌କି ବଚନ୍‌ବନ୍ ତେଙ୍ଗ୍‌ଦାସ୍ କା, “ଏକାର୍ ଏଙ୍ଗାନ୍ ମା ବେଦ୍ଦାଲିୟାର୍, ଆବ୍ଡ଼ାର୍ ଏଙ୍ଗାନ୍ ହାଖ୍ଖୀୟାର୍: ଆରୁ ଏକାର୍ ଏଙ୍ଘା ବାରେନୁ ମା ମେନାଲିୟାର୍। ଆବ୍ଡ଼ାର୍‌ଗେ ନିଜେ ଏନ୍ ଏଥ୍‌ର୍‌କାନ୍।” ²¹ଲେକିନ୍ ଇସ୍ରାଏଲୀ ଆଲାର୍‌ଘି ବାରେନୁ ପାର୍‌ମେଶ୍ୱାର୍‌ସ୍ ତେଙ୍ଗିୟାସ୍, “ଏକାର୍ ଏଙ୍ଘା ହୁକୁମ୍ ମା ମେନ୍ନାଏ ଆରୁ ଏକାର୍‌ଘି ଜୀଆ କାଠୋର୍ ମାନ୍‌ଚାକେର୍‌କିଚି ଆବ୍ଡ଼ାରିନ୍ ଗ୍ରହନ୍ କାମାଗେ ଜାମାବାକେନ୍ ଏଙ୍ଘା ହେଖ୍ଖା ବାଢ଼ାବାଚ୍‌କାଦାନ୍।”

ପାର୍‌ମେଶ୍ୱାର୍‌ସ୍ ତାଙ୍ଘା ଇସ୍ରାଏଲ୍ ଆଲାରିନ୍ ମା ମଦ୍‌ରାସ୍

¹ହୁଦ୍‌ଘିଲାଗାନ୍ ଏନ୍ ତେଙ୍ଗ୍‌ଦାନ୍ କା ପାର୍‌ମେଶ୍ୱାର୍‌ସ୍ ତାଙ୍ଘା ନିଜର୍ ଇସ୍ରାଏଲୀ ଆଲାରିନ୍ ଆମ୍ୱେଇ ଚିଚ୍‌କାଦାସ୍ କାଁଏ? ବିଲ୍‌କୁଲ୍ ମାଲ୍ଲା! ଏନ୍‌ହି ତା ଅଣ୍ଟା ଇସ୍ରାଏଲୀ ମୁନୁଷ୍। ଆରୁ ଆବ୍ରାହାମ୍‌ସ୍‌କି ବାଉଁଶାନ୍ତାନ୍ ଆରୁ ବିନ୍ୟାମୀନ୍‌ସ୍‌କି ପିଢ଼ିନ୍ତାନ୍। ²ପାର୍‌ମେଶ୍ୱାର୍‌ସ୍ ତାଙ୍ଘା ଇସ୍ରାଏଲୀ ଆଲାରିନ୍ ମାଲ୍ଲା ଆମ୍ବୁସ୍। ଏକାରିନ୍ କା ଆସ୍ ଆଘ୍‌ଲିନ୍ତି ଆକ୍କାଚାସ୍। ନିମ୍ ବାଲ୍‌ଦାରିନ୍ କାଁଏ ପାବିତାର୍ ଶାସ୍ତ୍ରନୁ ଏଲିୟାସ୍‌କି ବାରେନୁ ଏନ୍ଦେର୍ ଲେଖ୍‌ଚ୍‌କା ରାଇ। ଆସ୍ ଇସ୍ରାଏଲୀ ଜାମାର୍‌ଘି ବିରୁଦ୍ଧ୍‌ନୁ ପାର୍‌ମେଶ୍ୱାର୍‌ସାନ୍ ବିନ୍ତି କାମାଲିୟାସ୍। ³ହେ ପ୍ରାଭୁ, ଆବ୍ଡ଼ାର୍ ନିଙ୍ଘା ନାବୀଜାମାରିନ୍ ପିଟ୍ଟେଇଚାର୍ ଆରୁ ନିଙ୍ଘା ବେଦୀ ଗୁଠିନ୍ ତୋଡ଼େର୍‌ଚାର୍। ଏକାସାନ୍ ନିଙ୍ଘାଏ ଆରାଧାନା ମାନାଲିୟା। ଏନ୍ ଅଥାନ୍‌ଖାଲି ବାଛ୍‌ର୍‌କାଦାନ୍ ଆରୁ ଆବ୍ଡ଼ାର୍ ଏଙ୍ଗାନ୍‌ହି ପିଟାଚା ବେଦ୍ଦାଲ୍‌ନାଏ। ⁴ଲେକିନ୍ ନିମାଗେ ମନେ ରାଇ କା ପାର୍‌ମେଶ୍ୱାର୍‌ସ୍ ଆସିନ୍ ଏନ୍ଦେର୍ ଯାବାବ୍ ଚିଚ୍ଚାସ୍? ଆସ୍ ତେଙ୍ଗିୟାସ୍ କା, “ଏନ୍ ଏଙ୍ଘାଲାଗାନ୍ ସାତ୍ ହାଜାର୍ ମାର୍‌ଦାନାରିନ୍ ବାଛାବାଚ୍‌କାନ୍ ଉଇକାଦାନ୍ ଏକାର୍ କା ବାଆଲ୍‌ ଦେବ୍‌ତାବନ୍ ଆରାଧାନା ମା କାମ୍‌ଚାର୍।” ⁵ହନ୍ନେନ୍ ଇନ୍ନାହି ଇସ୍ରାଏଲ୍ ଜାମାର୍‌ଘି ଭିତର୍‌ତି କେତ୍‌କ ଲୋକ୍ ଆଲାର୍ ପାର୍‌ମେଶ୍ୱାର୍‌ସ୍‌କି ମିଆଁ ବିଶ୍ୱାସ୍ କାମ୍‌ନାଏ, ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ତାଙ୍ଘା କ୍ରିପାତି ଚାଜ୍ଜକାଦାସ୍। ⁶ପାର୍‌ମେଶ୍ୱାର୍‌ସ୍ ତାଙ୍ଘା ଦାୟାତିନ୍ ଆବ୍ଡ଼ାରିନ୍ ଚାଜ୍ଜକାଦାସ୍, ଆବ୍ଡ଼ାର୍‌ଘି କାମ୍‌ଚ୍‌କା ବାନେ ନାଲ୍‌ଖୁଘି ଲାଗାନ୍ ମାଲ୍ଲା ଚାଜୁସ୍। ଯଦି ଆବ୍ଡ଼ାର୍‌ଘି ନାଲ୍‌ଖୁଘି ଲାଗାନ୍ ଚାଜସ୍‌ନେ ତା ପାର୍‌ମେଶ୍ୱାର୍‌ସ୍‌କି କ୍ରିପାଘି ଏନ୍ଦେର୍‌ହି ଫାଏଦା ମା ମାନିଦ୍‌ନେ।

⁷ଆନ୍ତିନ୍ ଏନ୍ଦେର୍ ମାନ୍‌ଚା? ଏନ୍ନେକା ଏକା ଇସ୍ରାଏଲୀ ଆଲାର୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନାବେଦ୍ଦାଲିୟାର୍ ଆବ୍ଡ଼ାର୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ନିର୍ଦ୍ଦୋଷ୍ ମାନାପଲ୍ଲିୟାରିନ୍। ଲେକିନ୍ ଏକା ଆଲାରିନ୍ ପାର୍‌ମେଶ୍ୱାର୍‌ସ୍ ଚାଜ୍ଜକାଦାସ୍ ଆବ୍ଡ଼ାର୍ ଧାର୍ମିକ୍ ମାନ୍‌ଚାର୍, ଆରୁ ଏକାରିନ୍ ପାର୍‌ମେଶ୍ୱାର୍‌ସ୍ ମାଲ୍ଲା ଚାଜୁସ୍ ଆବ୍ଡ଼ାର୍‌ଘି ମନ୍‌ବନ୍ କାଠୋର୍ କାମ୍‌ଚେଇଚାସ୍। ⁸ଏସ୍‌କେ କା ପାବିତାର୍ ଶାସ୍ତ୍ରନୁ ଲେଖଚ୍‌କା ରାଇ, “ପାର୍‌ମେଶ୍ୱାର୍‌ସ୍ ଆବ୍ଡ଼ାର୍‌ଘି ମନ୍‌ବନ୍ ଶୁନ୍ କାମ୍‌ଚେଇଚାସ୍। ହୁଦ୍‌ଘିଲାଗାନ୍ ଆବ୍ଡ଼ାର୍ ହାନ୍ନୁ ରାତେହି ଏରା ପଲ୍ଲନାଇନ୍ ଆରୁ ହେବ୍‌ଦା ରାତେହି ବୁଝ୍‌ରା ମେନା ପଲ୍ଲନାଇନ୍। ଆରୁ ଇନ୍ନାତକ୍‌ହି ଏନ୍ନେନ୍ ମାନାଲିଦ୍।” ⁹ଆରୁ ଦାଉଦ୍‌ସ୍ ତେଙ୍ଗ୍‌ଦାସ୍ କା, “ଆବ୍ଡ଼ାର୍‌ଘି ହାପ୍ପନାଅନ୍ନାଦ୍ ମାଜା କାମ୍‌ନାଦ୍, ଆବ୍ଡ଼ାର୍‌ଘି ଲାଗାନ୍ ଫାନ୍ଦା ମାନ୍ନାଦ୍ କାନାଦ୍। ଆରୁ ଏକାନ୍ ଆବ୍ଡ଼ାର୍ ଆଶୀର୍ବାଦ୍ ସୋଚାଲ୍‌ନାଏ, ଆଦ୍ କିୟାଁ ଖାତ୍‌ର୍‌ନାଘି କାରଣ୍ ମାନ୍ନାଦ୍ କାନାଦ୍। ଆରୁ ଆବ୍ଡ଼ାର୍ ଏକାନ୍ କାମ୍‌ନାଏ ଆଦ୍‌ଘି ଲାଗାନ୍ ଆବ୍ଡ଼ାର୍‌ଗେ ଦଣ୍ଡ୍ ହାଖ୍ଖର୍‌ନାଦ୍। ¹⁰ଆବ୍ଡ଼ାର୍ କାଁଣାର୍ ଲେଖା ରାନାର୍ ଆରୁ ଏନ୍ଦେନ୍‌ହି ଏରା ପଲ୍ଲନାର୍, ଆରୁ ଆବ୍ଡ଼ାର୍ ତାହ୍ମା ମେଦୁନୁ ଗୁଲାମ୍ ଲେଖା ମୁରୁକ୍ ଯୁକ୍କୁ ଭାର୍ ଉଇକା ରର୍। ହୁଦ୍‌ଘିଲାଗାନ୍ ତାହ୍ମା ମେଦୁଦ୍ ଜାମାବାକେନ୍ ନୁହ୍‌କିରୋ।”

¹¹ହୁଦ୍‌ଘିଲାଗାନ୍ ଏନ୍ ତେଙ୍ଗ୍‌ଦାନ୍ କା ଇସ୍ରାଏଲୀ ଆଲାର୍ ବିଶ୍ୱାସ୍ ମା କାମ୍‌ଚାର୍, ହୁଦ୍‌ଘିଲାଗାନ୍ ପୁରା ନାଶ୍ ମାନ୍‌ଚାର୍ କେରାର୍ କାଁଏ? ବିଲ୍‌କୁଲ୍ ମାଲ୍ଲା, ଲେକିନ୍ ଆବ୍ଡ଼ାର୍ ପାର୍‌ମେଶ୍ୱାର୍‌ସ୍‌କି ହୁକୁମ୍‌ବନ୍ ମା ମାନ୍‌ଚାର୍, ହୁଦ୍‌ଘିଲାଗାନ୍ ପାର୍‌ମେଶ୍ୱାର୍‌ସ୍ ବିନାଇସ୍ରାଏଲୀରିନ୍ ଛୁଟ୍‌କାରା ଚିଦାସ୍ ତାକା ଇଦ୍‌ଘି ଦ୍ୱାର୍‌ନୁ ଇସ୍ରାଏଲୀର୍‌ଗେ ହିସ୍‌ଙ୍ଗା ଲାଗ୍ଗ। ¹²ଯଦି ଇସ୍ରାଏଲୀ ଜାମାର୍‌ଘି ବିଶ୍ୱାସ୍ ମା କାମ୍‌ନା ଆରୁ ଉଦ୍ଧାର୍‌ବନ୍ ଗ୍ରହନ୍ ମା କାମ୍‌ନାଘି ଦ୍ୱାର୍‌ନୁ ବିନାଇସ୍ରାଏଲୀର୍‌ଗେ ଆଶୀର୍ବାଦ୍ ହାଖ୍ଖରା। ତା ଯଦି ଇସ୍ରାଏଲୀ ଆଲାର୍ ପାର୍‌ମେଶ୍ୱାର୍‌ସ୍‌କି ଉଦ୍ଧାର୍‌ବନ୍ ଗ୍ରହନ୍ କାମର୍ ତା ଆବ୍ଡ଼ାର୍‌ଘି ଦ୍ୱାର୍‌ନୁ ଦୁନିଆଁନ୍ତା ଆଲାର୍‌ଗେ କେତ୍‌କ ଭାର୍‌ପୁର୍ ଆଶୀର୍ବାଦ୍ ହାଖ୍ଖରୋ।

ବିନାଇସ୍ରାଏଲୀର୍ ପାପ୍‌ତି ବାଛ୍‌ରର୍

¹³ଆକ୍କୁନ୍ ନିମା ବିନାଇସ୍ରାଏଲୀରିନ୍ ତେଙ୍ଗାଲ୍‌ଦାନ୍। ପାର୍‌ମେଶ୍ୱାର୍‌ସ୍ ଏଙ୍ଗାନ୍ ବିନାଇସ୍ରାଏଲୀର୍‌ସାନ୍ ଖାସ୍‌ଚେଲା ରୁପ୍‌ନୁ ତାଏକାଦାସ୍। ହୁଦ୍‌ଘିଲାଗାନ୍ ଏନ୍ ଏଙ୍ଘା ସେବା ନାଲ୍‌ଖୁବନ୍ ବହୁତ୍ ବାଡ଼୍‌କା ସୋଚ୍‌ଦାନ୍। ¹⁴ତାକା ଏସ୍‌କିନ୍‌ହି ରୀତିତି ଏନ୍ ନିଜର୍ ଇସ୍ରାଏଲୀର୍‌ଘି ମନ୍‌ନୁ ନିହ୍ମା ବିନାଇସ୍ରାଏଲୀ ଆବ୍ଡ଼ାର୍‌ଘି ଦ୍ୱାର୍‌ନୁ ହିସିଙ୍ଗା କାମ୍‌ତନ୍। ତାକା ଇସ୍ରାଏଲୀର୍‌ଘି ଭିତର୍‌ତି କେତ୍‌କ ଇସ୍ରାଏଲୀ ଆଲାର୍ ପାପ୍‌ଘି ଦଣ୍ତ୍‌ତି ବାଛ୍‌ରା ଅଙ୍ଗର୍। ¹⁵ଏନ୍ଦେର୍‌ଗେକା ଯେତ୍‌କବାକେନ୍ ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ଆମ୍ୱେଇଚିଚ୍ଚାସ୍ ତା ଦୁନିଆଁନ୍ତା ଦୁସ୍‌ରା ଆଲାର୍ ଏକାର୍ ପାର୍‌ମେଶ୍ୱାର୍‌ସିନ୍ ବାଲ୍ଲକାଚାର୍ ଆବ୍ଡ଼ାର୍‌ଘି ପାର୍‌ମେଶ୍ୱାର୍‌ସ୍‌ଗାନେ ବାନେ ସମ୍ୱନ୍ଧ ମାନ୍‌ଚା। ତା ଯଦି ଇସ୍ରାଏଲୀର୍ ପାର୍‌ମେଶ୍ୱାର୍‌ସିନ୍ ଗ୍ରହନ୍ କାମର୍ ତା ଆଦ୍ କେଚ୍ଚକାସ୍ତି ଉଜ୍ଜନା ଲେଖା ମାନକୋ। ¹⁶ଯଦି ପାର୍‌ମେଶ୍ୱାର୍‌ସ୍‌କେ ଭେଁଟ୍ ଚାଢ଼ାବାଚ୍‌କା ପହ୍‌ଲେ ଆସ୍‌ମାଦ୍ ବାନେଦ୍‌ତା ଜାମା ଆସ୍‌ମାଦ୍‌ହି ବାନେଦ୍। ଆରୁ ଯଦି ଏକିନ୍ ମାନ୍ନୁଘି ଚେରୁଦ୍ ବାନେଦ୍‌ତା ଆଦ୍‌ଘି ଡାହିଁଦ୍‌ହି ବାନେଦ୍।

¹⁷ଇସାନ୍ ଅଣ୍ଟା ମାନ୍ନୁଘି ନମୁନା ଚିଆ କେର୍‌କିଚି। ମାନ୍ନୁ ଆବ୍ରାହାମ୍‌ସିନ୍ ତେଙ୍ଗାକେର୍‌କିଚି। ଡାହିଁ ଇସ୍ରାଏଲ୍ ଆଲାରିନ୍ ଆରୁ ଜଙ୍ଗ୍‌ଲି ଜାଇତୁନ୍ ବିନାଇସ୍ରାଏଲୀରିନ୍ ତେଙ୍ଗାକେର୍‌କିଚି। ଇଦ୍ କା ମାନ୍ନୁନ୍‌ତା ଅଣ୍ଟା ଡାହିଁନ୍ ମୁର୍‌କିକିରି ଆଦ୍‌ଘି ଆଡ୍ଡାନୁ ଜଙ୍ଗ୍‌ଲି ଜାଇତୁନ୍‌ବନ୍ ଯୋଡ଼ା କେର୍‌କିଚି। ଆରୁ ମାନ୍ନୁନ୍‌ତା ଚେରୁଦ୍ ଏକା ଅନ୍ନାମହ୍‌ନା ଚିଦ୍ ଆଦ୍ ଜଙ୍ଗ୍‌ଲି ଡାହିଁଦ୍‌ହି ହାଖ୍ଖୀଦ୍। ହନ୍ନେନ୍ ଇସ୍ରାଏଲ୍ ଆଲାର୍‌ଗେ ଏକା ଆଶୀର୍ବାଦ୍ ହାଖ୍ଖରି ଆଦ୍ ବିନାୟାହୁଦୀର୍‌ଗେହି ହାଖ୍ଖରିଦ୍। ¹⁸ହୁଦ୍‌ଘିଲାଗାନ୍ ବାନେ ଡାହିଁ ମୁର୍‌କିକିରି ଆଦ୍‌ଘି ଆଡ୍ଡାନୁ ନିମାନ୍ ଜୋଡ଼୍‌କା ରାଇ ହୁଦ୍‌ଘିଲାଗାନ୍ ନିମ୍ ବଡ଼୍‌ପଣି ଆମା ଏଦା। ଆରୁ ଯଦି ବଡ଼୍‌ପଣି ଏଦ୍‌ରର୍ ତା ମନେ ଉଇୟା କା ନିମ୍ ଚେରୁନ୍ ଧାରିକିରି ମାଲ୍ଲା ଉୟୁ ଆମ୍ମୁ ମାଲ୍ଲା ଚିଉର୍ ଲେକିନ୍ ଚେରୁଦ୍ ନିମାନ୍ ଧାରିକିରି ଉଇକିଚି। ¹⁹ହାଲେ ନିମ୍ ତେଙ୍ଗର୍ କା ଏମାନ୍ ଏସ୍‌କେ ଜୋଡ଼ାକୋ ହୁଦ୍‌ଘିଲାଗାନ୍ ଡାହିଁଗୁଠିନ୍ ମୁର୍‌କାକେରା। ²⁰ଇଦ୍ ସତ୍ତୁଦ୍ କା ଆ ଡାହିଁଗୁଠିନ୍ ମୁର୍‌କାକେରା ଏନ୍ଦେର୍‌ଗେକା ଆବ୍ଡ଼ାର୍ ଖ୍ରୀସ୍ତ୍‌ସିନ୍ ବିଶ୍ୱାସ୍ ମା କାମ୍‌ଚାର୍, ଲେକିନ୍ ନିମ୍ ଖ୍ରୀସ୍ତ୍‌ସିନ୍ ବିଶ୍ୱାସ୍ କାମ୍‌ଚ୍‌କାର୍, ହୁଦ୍‌ଘିଲାଗାନ୍ ନିମ୍ ଆବ୍ଡ଼ାର୍‌ଘି ଆଡ୍ଡାନୁ ରାଦାର୍, ହୁଦ୍‌ଘିଲାଗାନ୍ ବଡ଼୍‌ପଣି ଆମା ଏଦ୍‌ରା ଲେକିନ୍ ପାର୍‌ମେଶ୍ୱାର୍‌ସ୍‌କି ଆଦର୍ କାମା। ²¹ଆରୁ ଯଦି ପାର୍‌ମେଶ୍ୱାର୍‌ସ୍ ଅସ୍‌ଲି ଡାହିଁବନ୍ ରା ମା ଚିଚ୍ଚାସ୍‌ତା ନିମାନ୍‌ହି ରା ମା ଚିଦାସ୍। ²²ହୁଦ୍‌ଘିଲାଗାନ୍ ନିମ୍ ପାର୍‌ମେଶ୍ୱାର୍‌ସ୍‌କି କ୍ରିପା ଆରୁ କାଠୋର୍ ସାଭାବ୍ ଯୋଡ଼େନିନ୍ ଏରା। ଏକାର୍ ଆସ୍‌କି କାତ୍‌ଥାନ୍ ମା ମେନ୍ନାଏ ଆବ୍ଡ଼ାର୍‌ଗେ ଆସ୍ ବହୁତ୍ କାଠୋର୍ ରାଦାସ୍। ଯଦି ନିମ୍ ଆସ୍‌କି ମିଆଁ ବିଶ୍ୱାସ୍ କାମ୍‌ତେ ରର୍, ହାଲେ ଆସ୍ ନିହ୍ମା ମିଆଁ କ୍ରିପା କାମସ୍। ଲେକିନ୍ ଯଦି ନିମ୍ ବିଶ୍ୱାସ୍ କାମ୍‌ନା ଆମ୍ୱର୍‌ଚର୍‌ତା ଆସ୍ ନିମାନ୍‌ହି ଡାହିଁଲେଖା ମୁର୍‌କିକିରି ଖେବ୍ଡ଼ ଚସ୍। ²³ଆରୁ ଯଦି ଇସ୍ରାଏଲ୍ ଆଲାର୍ ଆରୁଅହନ୍ ବିଶ୍ୱାସ୍‌ନୁ କିର୍‌ରର୍ ବାରର୍ ତା ଆବ୍ଡ଼ାରିନ୍ ଆରୁଅହନ୍ ମାନ୍ନୁଗାନେ ଜୋଡ଼ାଚାକୋ ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ଆରୁଅହନ୍ ଯୋଡ଼ା ଅଙ୍ଗ୍‌ଦାସ୍। ²⁴ଏନ୍ଦେର୍‌ଗେକା ଯଦି ନିମ୍ ସାଭାବ୍‌ତି ଜଙ୍ଗ୍‌ଲି ଜାଇତୁନ୍‌ଘି ଡାହିଁଲେଖା ରାଚ୍‌କାର୍, ଲେକିନ୍ ପାର୍‌ମେଶ୍ୱାର୍‌ସ୍ ନିମାନ୍ ମୁର୍‌କିରି ଇଦ୍ଦକା ମାନ୍ନୁଗାନେ ଯୋଡ଼େ ଚିଚ୍ଚାସ୍, ଏକାଦ୍ କା ସାଭାବ୍‌ଘି ବିରୁଦ୍ଧ ଆରୁ ଏକାଦ୍ କା ଏନ୍ନେ ମାନାପଲ୍ଲିଦ୍। ହୁଦ୍‌ଘିଲାଗାନ୍ ଏକା ଅସ୍‌ଲି ଡାହିଁନ୍ ପାର୍‌ମେଶ୍ୱାର୍‌ସ୍ ମୁର୍‌କେ ଚିଚ୍‌କାଚାସ୍, ଆବନ୍ ଆରୁଅହନ୍ ଯୋଡ଼ା ପଲ୍ଲଦାସ୍ କାଁଏ?

ପାର୍‌ମେଶ୍ୱାର୍‌ସ୍ ଜାମାର୍‌ଘି ମିଆଁ କ୍ରିପା କାମ୍‌ଦାସ୍

²⁵ହେ ଭାଇ ଆରୁ ବୁହୁଣୀ ଜାମାରୋ, ନିମ୍ ନିଜ୍‌କେନିଜ୍ ବୁଦ୍ଧିୟାର୍ ଆମା ସୋଚା, ହୁଦ୍‌ଘିଲାଗାନ୍ ଏନ୍ ଚାହାଁଲ୍‌ଦାନ୍ କା ନିମ୍ ପାର୍‌ମେଶ୍ୱାର୍‌ସ୍‌କି ନୁଡ୍‌କା ସତ୍ତୁବନ୍ ଆହା, ଆରୁ ଇ ସତ୍ତୁ ଇଦ୍ କା ଯେତ୍‌କବାକେନ୍‌ତକ୍ ବିନାଇସ୍ରାଏଲୀଜାମାର୍ ଏକାରିନ୍ କା ପାର୍‌ମେଶ୍ୱାର୍‌ସ୍ ଚାଜ୍ଜକାଦାସ୍ ତାଙ୍ଘା ଚାହାଗେ ମା ବାରର୍ ହତ୍‌କତକ୍ ଇସ୍ରାଏଲ୍‌ର୍‌ଘି ଭିତର୍‌ତି କେତ୍‌କ ଆଲାର୍‌ଘି ମନ୍ କାଠୋର୍ ରଦ୍। ²⁶ଆରୁ ଏନ୍ନେ ଜାମା ଇସ୍ରାଏଲ୍ ଜାମାର୍ ପାପ୍‌ଘି ଦଣ୍ତ୍‌ତି ବାଛ୍‌ରର୍। ଏସ୍‌କେ କା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ, “ଛୁଡ଼ାବାନାବାଲା ସିୟୋନ୍‌ସ୍‌ତି ବାରସ୍। ଆରୁ ଆସ୍ ଇସ୍ରାଏଲୀର୍‌ଘି ବାଁଉଶାନ୍ତା ଆଲାର୍‌ଘି ନାଲ୍‌ଖୁନ୍ ଏକାଦ୍ କା ପାର୍‌ମେଶ୍ୱାର୍‌ସ୍‌କି ନଜର୍‌ନୁ ବାନେ ମା ଲାଗ୍ଗିଦ୍ ଆ ନାଲ୍‌ଖୁନ୍ ହାଟାବସ୍।” ²⁷ଆରୁ ଆବ୍ଡ଼ାର୍ ଗାନେ ଏଙ୍ଘାଏ କାତ୍‌ଥାଚିଚ୍ଚକା ମାନଦ୍ କା ଯେତ୍‌କବାକେନ୍ ଏନ୍ ଆବ୍ଡ଼ାର୍‌ଘି ଜାମା ପାପ୍‌ବନ୍ ଛେମା କାମନ୍‌ଚନ୍। ²⁸ଢେର୍ ଇସ୍ରାଏଲୀ ଆଲାର୍ ଆକ୍କୁନ୍ ସୁସାମାଚାର୍‌ଘି ବିରୋଧନୁ ରାନାଏ ଆରୁ ନିନ୍ ବିନାଇସ୍ରାଏଲୀର୍‌ଘି ଲାଗାନ୍ ଫାଏଦା ମାନ୍‌ଚା, ହାଲେହି ପାର୍‌ମେଶ୍ୱାର୍‌ସ୍ ଇସ୍ରାଏଲ୍ ଜାମାରିନ୍ ବାନେ ହାଖ୍ଖଦାସ୍, ଏନ୍ଦେର୍‌ଗେକା ଆସ୍ ଇସ୍ରାଏଲୀ ଜାମାର୍‌ଘି ପୁର୍‌ଖାରିନ୍ କାତ୍‌ଥା ଚିଚ୍‌କାଚାସ୍। ହୁଦ୍‌ଘିଲାଗାନ୍ ଆବ୍ଡ଼ାର୍ ଅନ୍ଦୁଲ୍ ପାର୍‌ମେଶ୍ୱାର୍‌ସ୍‌କି ଚାହାଗେ ଜରୁର୍ ବାରର୍। ²⁹ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ନା ତା ନିଜର୍ ବାର୍‌ଦାନ୍‌ବନ୍ ନିଜେନିନ୍ ହଦାସ୍‌କାଦାସ୍ ଆରୁ ନେକାନ୍ ମେହ୍ଁଦାସ୍ ଆବ୍ଡ଼ାର୍‌ଘି ତାର୍‌ତି ନିଜର୍ ମନ୍‌ବନ୍ ଏକ୍‌ଲାହି ମା ବାଦ୍‌ଲାଦାସ୍। ³⁰ଲେକିନ୍ ପହ୍‌ଲେ ନିମ୍ ବିନାଇସ୍ରାଏଲୀର୍ ପାର୍‌ମେଶ୍ୱାର୍‌ସ୍‌କି ହୁକୁମ୍ ମା ମାନାଲ୍‌କାର୍, ଲେକିନ୍ ଆକ୍କୁନ୍ ଆବ୍ଡ଼ା ଇସ୍ରାଏଲୀଜାମାର୍ ପାର୍‌ମେଶ୍ୱାରସ୍‌କି ହୁକୁମ୍ ମା ମାନ୍‌ଚାର୍, ହୁଦ୍‌ଘିଲାଗାନ୍ ନିହ୍ମା ବିନାଇସ୍ରାଏଲୀର୍‌ଘି ମିଆଁ ପାର୍‌ମେଶ୍ୱାର୍‌ସ୍ କ୍ରିପା କାମ୍‌ଚାସ୍। ³¹ହନ୍ନେନ୍ ଇସ୍ରାଏଲୀଜାମାର୍ ଆକ୍କୁନ୍ ହୁକୁମ୍ ମା ମାନ୍‌ଚାର୍ ତାକା ନିହ୍ମା ବିନାଇସ୍ରାଏଲୀର୍‌ଘି ମିଆଁ ଏସ୍‌କେ ଦାୟା କାମାକେରା ହନ୍ନେନ୍ ଇସ୍ରାଏଲ୍‌ର୍‌ଘି ମିଆଁହି କ୍ରିପା କାମାକୋ। ³²ପାର୍‌ମେଶ୍ୱାର୍‌ସ୍ ଜାମା ଆଲାରିନ୍ ହୁକୁମ୍ ମା ମାନ୍ନାଘି ମଉକା ଚିଚ୍ଚାସ୍ ତାକା ଆସ୍ ଅନ୍ଦୁଲ୍ ଜାମାର୍‌ଘି ମିଆଁ ଦାୟା କାମାଅଙ୍ଗସ୍।

ପାର୍‌ମେଶ୍ୱାର୍‌ସ୍‌କି ସ୍ତୁତି

³³ଆରେ, ବାଫ୍‌ରେ, ପର୍‌କୁତ୍‌ନୁ ପାର୍‌ମେଶ୍ୱାର୍‌ସ୍ ତାଙ୍ଘା ବୁଦ୍ଧି ଆରୁ ଜ୍ଞାନ୍‌ତି ଏକାନ୍ କାମ୍‌ଚ୍‌କାଦାସ୍ ଆବନ୍ ନେଦ୍‌ହି ବୁଝ୍‌ରା ପଲ୍ଲନାଇନ୍। ଆରୁ ଆସ୍‌କି ନାଲ୍‌ଖୁ କାମ୍‌ନାଘି ତାରିକାବନ୍‌ହି ନେଦ୍‌ହି ବୁଝ୍‌ରା ପଲ୍ଲନାଇନ୍। ³⁴ଏନ୍ଦେର୍‌ଗେକା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ କା ପ୍ରାଭୁସ୍‌କି ମନ୍‌ତା ସୋଚ୍‌ବନ୍ ନେଦ୍ ଆହା ଅଙ୍ଗ୍‌ନାଏ? ଚାହେ ନେଦ୍ ଆସିନ୍ ସାଲାହ୍ ଚିଆ ଅଙ୍ଗ୍‌ନାଏ? ³⁵ଚାହେ ନେଦିନ୍ ପହ୍‌ଲେ ପାର୍‌ମେଶ୍ୱାର୍‌ସ୍‌କେ ଏନ୍ଦ୍ରିନ୍ ଚିଚ୍ଚକାନାଏ କାଁଏ, କା ଆଦ୍‌ଘି ବାଦ୍‌ଲା ପାର୍‌ମେଶ୍ୱାର୍‌ସ୍ ଆସ୍‌କେ ଚସ୍? ³⁶ଏନ୍ଦେର୍‌ଗେକା ଆସିନ୍ ଜାମାକିଛିନ୍ ସିର୍‌ଜାଚ୍‌କାଦାସ୍ ଆରୁ ଆସ୍‌କି ଦ୍ୱାର୍‌ନୁନିନ୍ ଜାମାକିଛି ମାନିଦ୍। ଆରୁ ଜାମାକିଛି ଆସ୍‌କିଦ୍। ତାକା ଆବ୍ଡ଼ାଦ୍ ଯୁଗ୍‌ଯୁଗ୍ ଆସ୍‌କେ ଆଦର୍ ଚିତେରଦ୍। ଆମେନ୍।

ନିଜର୍ ଜୀବନ୍‌ବନ୍ ପ୍ରାଭୁସ୍‌କେ ପୁରାପୁରୀ ସୋଁପାଚା

¹ହୁଦ୍‌ଘିଲାଗାନ୍ ହେ ଭାଇ ଆରୁ ବୁହୁଣୀ ଜାମାରୋ, ଏନ୍ ନିମାନ୍ ପାର୍‌ମେଶ୍ୱାର୍‌ସ୍‌କି ଦାୟାନ୍ ମନେ କାମ୍‌ତିକିରି ଆର୍‌ଜୀବିନ୍ତି କାମ୍‌ଦାନ୍, କା ନିମ୍ ନିଜ୍‌କେନିଜ୍‌ବନ୍ ପୁରାପୁରୀ ପାର୍‌ମେଶ୍ୱାର୍‌ସ୍‌କେ ଅଣ୍ଟା ଜୀବିତ୍ ବଲୀଦାନ୍‌ଘି ରୂପ୍‌ନୁ ସୋଁପାଚା। ଆରୁ ପାର୍‌ମେଶ୍ୱାର୍‌ସ୍‌ସିନ୍ ଖୁସ୍ କାମ୍‌ନା ଲେଖା ଅଣ୍ଟା ପାବିତାର୍ ଜୀବନ୍ ବିତାବା। ଇଦ୍ ପାର୍‌ମେଶ୍ୱାର୍‌ସ୍‌କି ସେବା କାମ୍‌ନାଘି ଅସଲ୍ ପାବୁଦ୍। ²ଆରୁ ଇ ଦୁନିଆଁନ୍ତା ଆଲାର୍ ଲେଖା ଆମାମାନା। ପାର୍‌ମେଶ୍ୱାର୍‌ସ୍ ନିହ୍ମା ମନ୍‌ବନ୍ ବାଦ୍‌ଲାନାସ୍ ତାକା ନିହ୍ମା ଚାଲିଚଲନ୍‌ହି ବାଦ୍‌ଲାରକୋ। ହାଲେ ପାର୍‌ମେଶ୍ୱାର୍‌ସ୍ ନିହ୍ମା ଲାଗାନ୍ ଏନ୍ଦେର୍ ଚାହାଁଲ୍‌ଦାସ୍ ଆବନ୍ ଆହାଅଙ୍ଗର୍। ପାର୍‌ମେଶ୍ୱାର୍‌ସ୍‌କି ଇଚ୍ଛା ବହୁତ୍ ବାନେଦ୍ ଆରୁ ଆ ଇଚ୍ଛାଘି ଲେଖା ନାମ୍ ଚାଲ୍‌ରତ୍ ତା ପାର୍‌ମେଶ୍ୱାର୍‌ସ୍ ଖୁସ୍ ମାନସ୍। ଆରୁ ନାମ୍ ବାନେ ଜୀବନ୍ ବିତାବା ଅଙ୍ଗତ୍। ³ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଏଙ୍ଘା ମିଆଁ ଏକା ବାର୍‌ଦାନ୍ ଚିଚ୍‌କାଦାସ୍, ଆବନ୍ ମନେ କାମିକିରି ନିହ୍ମାସ୍‌ତି ଅର୍‌ତୁ ଅର୍‌ତୁରିନ୍ ତେଙ୍ଗାଲ୍‌ଦାନ୍ କା ନିମ୍ ଯେତ୍‌କର୍ ବିଶ୍ୱାସ୍‌ଘି ଲାଇଗ୍ ରାଦାର୍ ଆଦ୍‌ଘିନ୍ତି ବାଗ୍ଗେ ନିଜ୍‌କେନିଜ୍ ଆମା ସୋଚା ଲେକିନ୍ ପାର୍‌ମେଶ୍ୱାର୍‌ସ୍ ନାମାଗେ ଯେତ୍‌କ ବିଶ୍ୱାସ୍ ଚିଚ୍‌କାଦାସ୍ ଆ ବିଶ୍ୱାସ୍‌ବନ୍ ବାନେ ସୋଚ୍‌ବିଚାର୍ କାମିକିରି ବେଭାର୍ କାମା। ⁴ଏନ୍ଦେର୍‌ଗେକା ନାହ୍ମା ଅଣ୍ଟା ମେଦୁନୁ ବହୁତ୍ ଅଙ୍ଗ ରାଇ ଆରୁ ଜାମା ଅଙ୍ଗଘି ଭିନେ-ଭିନେ ନାଲ୍‌ଖୁ ରାଇ। ⁵ହନ୍ନେନ୍ ନାମ୍‌ହି ବହୁତ୍ ରାଦାତ୍ ଲେକିନ୍ ଖ୍ରୀସ୍ତ୍‌ସ୍‌କିନୁ ନାମ୍ ରାଦାତ୍ ହୁଦ୍‌ଘିଲାଗାନ୍ ନାମ୍ ଅଣ୍ଟା ମେଦୁଘି ଭିନେ-ଭିନେ ଅଙ୍ଗ ଲେଖା ରାଦାତ୍। ଆରୁ ଏନ୍ନେନ୍ ଅଣ୍ଟା ଅଙ୍ଗଘି ଆରୁ ଅଣ୍ଟା ଅଙ୍ଗଗାନେ ବାନେ ସମ୍ୱନ୍ଧ ରାଇ। ⁶ଆରୁ ପାର୍‌ମେଶ୍ୱାର୍‌ସ୍ ନାହ୍ମା ମିଆଁ କ୍ରିପା କାମିକିରି ଭିନେ-ଭିନେ ବାର୍‌ଦାନ୍ ଚିଚ୍‌କାଦାସ୍। ତା ନେକାଗେ ପାର୍‌ମେଶ୍ୱାର୍‌ସ୍‌କି ତାର୍‌ତି ସନ୍ଦେଶ୍ ତେଙ୍ଗ୍‌ନାଘି ବାର୍‌ଦାନ୍ ହାଖ୍ଖର୍‌କିଚି, ଆସ୍ ତାଙ୍ଗାଗେ ଯେତ୍‌କ ବିଶ୍ୱାସ୍ ଚିଆ କେର୍‌କିଚି ଆଦ୍‌ଘି ଲେଖା ପାର୍‌ମେଶ୍ୱାର୍‌ସ୍‌କି ସନ୍ଦେଶ୍‌ବନ୍ ତେଙ୍ଗସ୍। ⁷ଆରୁ ଯଦି ଏକା ଦୁସ୍‌ରାରିନ୍ ମଦେତ୍ କାମ୍‌ନାଘି ବାର୍‌ଦାନ୍ ହାଖ୍ଖର୍‌କିଚିତା ଆସ୍ ମଦେତ୍ କାମ୍‌ତେ ରାନାସ୍, ଯଦି ନେକିନ୍‌ଗେ ଶିଖାବାନାଘି ବାର୍‌ଦାନ୍ ହାଖ୍ଖର୍‌କିଚିତା ଆସ୍ ଶିଖାବାତେ ରାନାସ୍। ⁸ଆରୁ ଯଦି ନେକିନ୍‌ଗେ ଦିଲାସା ଚିନାଘି ବାର୍‌ଦାନ୍ ହାଖ୍ଖର୍‌କିଚିତା ଆସ୍ ଦିଲାସା ଚିନାନୁ ଲାକ୍କାରସ୍। ଆରୁ ନେକିନ୍‌ଗେ ଦାୟା ଧରମ୍ କାମ୍‌ନାଘି ବାର୍‌ଦାନ୍ ହାଖ୍ଖର୍‌କିଚିତା ଆସ୍ ଖୁଲାମନ୍‌ତି ଦାୟା ଧରମ୍ କାମ୍‌ତେ ରାନାସ୍। ଆରୁ ନେକିନ୍‌ଗେ ଆଗୁୱା କାମ୍‌ନାଘି ବାର୍‌ଦାନ୍ ହାଖ୍ଖର୍‌କିଚିତା ଆସ୍ ଖୁସୀମନ୍‌ତି ତାଙ୍ଘା ନାଲ୍‌ଖୁନ୍ କାମ୍‌ନାସ୍। ଆରୁ ନେକିନ୍‌ଗେ ଦାୟା କାମ୍‌ନାଘି ବାର୍‌ଦାନ୍ ହାଖ୍ଖର୍‌କିଚିତା ଆସ୍ ଖୁସୀତି ଦାୟା କାମ୍‌ତେ ରାନାସ୍।

ଖ୍ରୀସ୍ତିୟା ଜୀବନ୍ ବିତାବାନାଘି ନିୟମ୍

⁹ନିମ୍ ଏକ୍ ଦୁସ୍‌ରାରିନ୍ ସତ୍ତୁନ୍ ବାନେ ହାଖ୍ଖା, ଏକାଦ୍ ଖାରାପ୍‌ଦ୍ ଆବନ୍ ହାଁଣା ତୁପ୍‌ଫା, ଆରୁ ବାନେ ନାଲ୍‌ଖୁନ୍ କାମ୍‌ତେ ରା। ¹⁰ନିମ୍ ଏକ୍ ଦୁସ୍‌ରାରିନ୍ ଭାଇ ବୁହୁଣୀର୍ ଲେଖା ବାନେ ହାଖ୍ଖା, ଏକ୍ ଦୁସ୍‌ରାରିନ୍ ନିଜର୍‌ସ୍‌ତି ବାଡ଼୍‌କା ବୁଲି ସୋଚିକିରି ଆବ୍ଡ଼ାର୍‌ଘି ମାଇନ୍ କାମା। ¹¹ବହୁତ୍ ମେହ୍‌ନତ୍ କାମ୍‌ତେ ରା, ଆମା କୁଢ଼ିୟା ରା। ପୁରା ମନ୍‌ତି ପ୍ରାଭୁସ୍‌କି ସେବା କାମ୍‌ତେ ରା। ¹²ଆରୁ ପାର୍‌ମେଶ୍ୱାର୍‌ସ୍ ନିମାଗେ ଏକାନ୍ ଚିୟାଗେ କାତ୍‌ଥା ଚିଚ୍‌କାଦାସ୍ ଆବନ୍ ହାଖ୍ଖନାଘି ଆଶ୍ରା କାମିକିରି ରିଝ୍‌ରା। ଦୁଃଖୁ ତକ୍‌ଲିପ୍ ବାର୍‌ଚ୍‌କୁନ୍ ଧିରାଜ୍ ଧାରା। ଜାମାବାକେନ୍ ବିନ୍ତି କାମ୍‌ତେ ରା। ¹³ବିଶ୍ୱାସୀ ଆଲାର୍‌ଗେ ଏକାଦ୍ ଦାର୍‌କାର୍ ରାଇ ଆବନ୍ ପୁରା କାମା। ବିଶ୍ୱାସୀ ଜାମାର୍‌ଘି ଲାଗାନ୍ ନିହ୍ମା ବାଲି ଜାମାବାକେନ୍ ଖୁଲା ଉଇୟା। ¹⁴ଏକାର୍ ନିମାନ୍ ସାଧ୍‌ନାଏ ଆବ୍ଡ଼ାରିନ୍ ସାରାପ୍ ଆମା ଚିଆ ଲେକିନ୍ ପାର୍‌ମେଶ୍ୱାର୍‌ସ୍ ଆବ୍ଡ଼ାର୍‌ଗେ ଆଶିଷ୍ ଚସ୍ ହୁଦ୍‌ଘିଲାଗାନ୍ ବିନ୍ତି କାମା। ¹⁵ଖୁସୀ ମାନାବୁର୍ ଗାନେ ଖୁସୀମାନାବା, ଆରୁ ଏକାର୍ ଦୁଃଖୁନୁ ରାନାଏ ଆବ୍ଡ଼ାର୍ ଗାନେ ଦୁଃଖୁ ମାନା। ¹⁶ଜାମାର୍‌ଗାନେ ବାନେକିରି ରା, ବଡ଼୍‌ପଣି ଆମା ଏଦ୍‌ରା; ନରମ୍ ଆଲାର୍ ଗାନେ ମେଶ୍ରିକିରି ରା; ନିଜ୍‌କେନିଜ୍ ବୁଦ୍ଧିୟାର୍ ଆମା ସୋଚା। ¹⁷ଏକାର୍ ନିହ୍ମାଗାନେ ଖାରାପ୍ ବେଭାର୍ କାମ୍‌ଚ୍‌କାନାଏ ଆବ୍ଡ଼ାର୍‌ଘି ବାଦ୍‌ଲା ଆମାହୁଆ। ଆରୁ ଏକାଦ୍ ଜାମାର୍‌ଘି ନଜର୍‌ନୁ ବାନେଦ୍ ଆବନ୍ କାମାଗେ ସୋଚା। ¹⁸ଯେତ୍‌କତକ୍ ମାନା ଅଙ୍ଗି ନିମ୍ ଜାମା ଆଲାର୍ ଗାନେ ଶାନ୍ତିନୁ ରା। ¹⁹ହେ ଏଙ୍ଘା ପ୍ୟାରେ ଭାଇ ଆରୁ ବୁହୁଣୀଜାମାରୋ, ନିମ୍ ବାଦ୍‌ଲା ଆମ୍‌କେ ହୁଆ। ଲେକିନ୍ ପାର୍‌ମେଶ୍ୱାର୍‌ସିନ୍ ବାଦ୍‌ଲା ହୁଆଗେ ଚିଆ, ଏନ୍ଦେର୍‌ଗେକା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ କା, “ପ୍ରାଭୁସ୍ ତେଙ୍ଗ୍‌ଦାସ୍ ବାଦ୍‌ଲା ହୋନାଦ୍ ଏଙ୍ଘା ନାଲ୍‌ଖୁଦ୍, ଏନ୍‌ନିନ୍ ବାଦ୍‌ଲା ହୋନ୍।” ²⁰ଲେକିନ୍ ଯଦି ନିହ୍ମା ବିରୋଧିସ୍‌ଗେ କିଡ଼ା ଲାଗ୍ଗାଲ୍‌କିରୋତା ଆସ୍‌ଗେ ଅନାଗେ ଚିଆ; ଆରୁ ଯଦି ଆମ୍ମୁକିଡ଼ା ଲାଗ୍ଗାଲ୍‌କିରୋତା ଆମ୍ମୁ ହାପ୍ପାଗେ ଚିଆ; ଏନ୍ଦେର୍‌ଗେକା ଏନ୍ନେ କାମର୍ ତା ଆସ୍ ଲାଜରସ୍। ²¹ଯଦି ନେଦିନ୍ ନିମାନ୍ ଖାରାପ୍ ବେଭାର୍ କାମ୍‌ଚାର୍ ତା ନିମ୍‌ହି ଖାରାପ୍ ବେଭାର୍ କାମିକିରି ଆଦ୍‌ଘି ବାଦ୍‌ଲା ଆମାହୁଆ, ଯଦି ଏନ୍ନେ କାମର୍ ତା ଖାରାପ୍ ନିହ୍ମାସ୍‌ତି ଜିତୋକୋ। ଲେକିନ୍ ବାନେ ନାଲ୍‌ଖୁ କାମିକିରି ଆବ୍ଡ଼ାର୍‌ଘି ଖାରାପ୍ ନାଲ୍‌ଖୁସ୍ତି ଜିତା।

ଶାସନ୍ କାମୁର୍‌ଘି ହୁକୁମ୍ ମାନା

¹ଜାମା ବିଶ୍ୱାସୀ ଆଲାର୍ ନିଜର୍-ନିଜର୍ ଶାସନ୍ କାମୁର୍‌ଘି କିୟାଁ ରା; ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଆବ୍ଡ଼ାର୍‌ଗେ ହକ୍ ଚିଚ୍‌କାଦାସ୍ ଆରୁ ଯେତ୍‌କହି ଶାସନ୍ କାମୁର୍ ରାନାଏ ଆବ୍ଡ଼ାରିନ୍ ପାର୍‌ମେଶ୍ୱାର୍‌ସ୍ ଚାଜ୍ଜକାଦାସ୍। ²ହୁଦ୍‌ଘିଲାଗାନ୍ ଏକାସ୍ ଶାସନ୍ କାମୁର୍‌ଘି ବିରୋଧ୍ କାମ୍‌ଦାସ୍ ଆସ୍ ପାର୍‌ମେଶ୍ୱାର୍‌ସ୍‌କି କାମ୍‌ଚ୍‌କା ନାଲ୍‌ଖୁଘି ବିରୋଧ୍ କାମ୍‌ଦାସ୍। ଆରୁ ଏକାସ୍ ପାର୍‌ମେଶ୍ୱାର୍‌ସ୍‌କି କାମ୍‌ଚ୍‌କା ନାଲ୍‌ଖୁଘି ବିରୋଦ୍ଧ କାମ୍‌ଦାସ୍, ଆସ୍‌କେ ପାର୍‌ମେଶ୍ୱାର୍‌ସ୍‌କି ଦଣ୍ଡ୍ ହାଖ୍ଖର। ³ଏନ୍ଦେର୍‌ଗେକା ଏକା ଆଲାର୍ ବାନେ ନାଲ୍‌ଖୁ କାମ୍‌ନାଏ ଆବ୍ଡ଼ାର୍‌ଗେ ଶାସନ୍ କାମୁରିନ୍ ଏଲ୍‌ଚ୍‌ନାଘି ଦାର୍‌କାର୍ ମାଲ୍ଲାଦିନ୍, ଲେକିନ୍ ଏକାର୍ ଖାରାପ୍ ନାଲ୍‌ଖୁ କାମ୍‌ନାଏ ଆବ୍ଡ଼ାର୍ ଶାସନ୍ କାମୁରିନ୍ ଏଲ୍‌ଚ୍‌ନା କାତ୍‌ଥା; ହୁଦ୍‌ଘିଲାଗାନ୍ ଯଦି ନିମ୍ ଶାସନ୍ କାମୁରିନ୍ ଏଲ୍‌ଚା ମା ବେଦ୍ଦାଲ୍‌ଦାର୍‌ତା ବାନେ ନାଲ୍‌ଖୁ କାମା ହାଲେ ଆବ୍ଡ଼ାର୍ ନିହ୍ମା ନାମେ କାମର୍। ⁴ଏନ୍ଦେର୍‌ଗେକା ନିହ୍ମା ବାନେ ନାଲ୍‌ଖୁଘି ଲାଗାନ୍ ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ଚାଜ୍ଜକାଦାସ୍। ଲେକିନ୍ ଯଦି ନିମ୍ ଖାରାପ୍ ନାଲ୍‌ଖୁ କାମ୍‌ଦାର୍ ତା ଆବ୍ଡ଼ାରିନ୍ ଏଲ୍‌ଚା; ଏନ୍ଦେର୍‌ଗେକା ନିମାନ୍ ଦଣ୍ଡ୍ ଚିନାଘି ହକ୍ ଆବ୍ଡ଼ାର୍‌ଘି ହେଖ୍ଖାନୁ ରାଇ। ଏନ୍ଦେର୍‌ଗେକା ନିହ୍ମା ସେବା କାମାଗେ ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ଚାଜ୍ଜକାଦାସ୍। ଆରୁ ଏକାର୍ ଖାରାପ୍ ନାଲ୍‌ଖୁ କାମ୍‌ନାଏ ଆବ୍ଡ଼ାର୍‌ଗେ ଦଣ୍ଡ୍ ଚିୟାଗେ ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ଚାଜ୍ଜକାଦାସ୍। ⁵ହୁଦ୍‌ଘିଲାଗାନ୍ ନା ଖାଲି ନିମ୍ ଶାସନ୍ କାମୁର୍‌ଘି ହୁକୁମ୍ ମାନ୍ନା କାତ୍‌ଥା, ଖାଲି ଦଣ୍ଡ୍‌ଘି ଏଲ୍‌ଚ୍‌କାତି ମାଲ୍ଲା ବରନ୍ ବିବେକ୍‌ତି ନିମ୍ ଆହ୍‌ଦାର୍ କା ଏନ୍ନେ କାମ୍‌ନାଦ୍ ଠିକ୍‌ଦ୍‌। ⁶ହୁଦ୍‌ଘିଲାଗାନ୍ ତା ନିମ୍ ମାଲ୍‌ଗୁଜାରୀହି ଚିଦାର୍। ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଆବ୍ଡ଼ାର୍‌ଗେ ଏକା ନାଲ୍‌ଖୁନ୍ ଚିଚ୍‌କାଦାସ୍ ଆବନ୍ ଆବ୍ଡ଼ାର୍ ସେବକ୍‌ ଲେଖା ପୁରା କାମ୍‌ନାନୁ ଲାକ୍କାରାନାଏ। ⁷ହୁଦ୍‌ଘିଲାଗାନ୍ ଶାସନ୍ କାମୁର୍‌ଗେ ଏକାନ୍ ଚିନା କାତ୍‌ଥା ଆବନ୍ ଚିଆ। ଆରୁ ଜାମା ସାର୍‌କାରୀ ମାଲ୍‌ଗୁଜାରୀ ଚିଆ। ନେକାନ୍ ମାଇନ୍ କାମ୍‌ନାକାତ୍‌ଥା ଆବ୍ଡ଼ାରିନ୍ ମାଇନ୍ କାମା।

ଏକ୍ ଦୁସ୍‌ରାରିନ୍ ବାନେ ହାଖ୍ଖା

⁸ଏକ୍ ଦୁସ୍‌ରାରିନ୍ ବାନେ ହାଖ୍ଖନାଘି ଉଧାର୍ ଆମ୍ବିକିରି ଆରୁ ଏନ୍ଦ୍ରିନ୍‌ଘି ଉଧାର୍ ନିହ୍ମା ମିଆଁ ଆମା ଉଇୟା, ଏନ୍ଦେର୍‌ଗେକା ଏକାର୍ ଦୁସ୍‌ରାରିନ୍ ବାନେ ହାଖ୍ଖନାଏ ତା ଆବ୍ଡ଼ାର୍ ପାର୍‌ମେଶ୍ୱାର୍‌ସ୍ ଜାମା ହୁକୁମ୍‌ବନ୍ ପାଲନ୍ କାମ୍‌ଚ୍‌କାଦାସ୍। ⁹ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍‌କି ନିୟମ୍‌ନୁ ଲେଖ୍‌ଚ୍‌କା ରାଇ କା ବେଭିଚାର୍ ଆମା କାମା, ଆମା ପିଟା; ଆମାହାଡ଼ା, ଲାଲଚ୍‌ ଆମା କାମା ଆରୁ ଇବ୍ଡ଼ା ଲେଖା ଆରୁହି ହୁକୁମ୍ ରାଇ ତା ଇ ଅଣ୍ଟା ହୁକୁମ୍‌ନୁ ଜାମାଦ୍ ବାରିଦ୍। ଆରୁ ଇ ହୁକୁମ୍ ଇଦ୍ କା ନିମ୍ ନିଜ୍‌କେନିଜ୍ ଏସ୍‌କେ ବାନେ ହାଖ୍ଖଦାର୍ ଆନ୍ନେ ଦୁସ୍‌ରାରିନ୍‌ହି ବାନେ ହାଖ୍ଖା। ¹⁰ଏନ୍ଦେର୍‌ଗେକା ଏକାର୍ ଦୁସ୍‌ରାରିନ୍ ବାନେ ହାଖ୍ଖନାଏ ତା ଆବ୍ଡ଼ାର୍‌ଘି ଖାରାପ୍ ମା କାମ୍‌ନାଏ। ହୁଦ୍‌ଘିଲାଗାନ୍ ବାନେ ହାଖ୍ଖନା ମତ୍‌ଲବ୍ ପାର୍‌ମେଶ୍ୱାର୍‌ସ୍‌କି ଜାମା ହୁକୁମ୍‌ବନ୍ ମାନ୍ନାଏ। ¹¹ନାମ୍ ଏକା ସାମାୟନୁ ଜୀବନ୍ ବିତା ବାଲ୍‌ଦାତ୍ ଆବନ୍ ଚିହ୍ନା ହୁଦ୍‌ଘିଲାଗାନ୍ ଏନ୍ ନିମାନ୍ ଏକାନ୍ ତେଙ୍କାଦାନ୍ ଆବନ୍ କାମ୍‌ତେ ରା। ଆରୁ ଦୁସ୍‌ରା ଆଲାର୍ ଲେଖା ଆମାମାନା ଲେକିନ୍ ଚେତ୍‌ରିକିରି ରା। ଏକା ସାମାୟନୁ ନାମ୍ ବିଶ୍ୱାସ୍ କାମ୍‌ଚ୍‌କାଚ୍‌କାତ୍ ଆ ସାମାୟନ୍ତି ଆକ୍କୁନ୍ ନାହ୍ମାଏ ମୁକ୍ତି ଚାହାନୁ ରାଇ। ¹²ଲାଗ୍‌ଭାଗ୍ ମାଁହା ବିତ୍‌ରା କେର୍‌କିଚି ଆରୁ ଉଲ୍ଲା ମାନ୍ନାବାଲା ରାଇ; ହୁଦ୍‌ଘିଲାଗାନ୍ ଆଲାର୍ ଉହାନୁ ଏକା ଖାରାପ୍ ନାଲ୍‌ଖୁ କାମ୍‌ନାଏ ଆବ୍ଡ଼ାନ୍ ନାମ୍ ଆମ୍ୱନାଚିନା କାତ୍‌ଥା। ଆରୁ ଏସ୍‌କେ ଅଣ୍ଟା ପଲ୍‌ଟନ୍‌ସ୍ ହାଥିଆର୍ ଧାରିକିରି ତିଆର୍ ରାଦାସ୍ ହନ୍ନେନ୍ ନାମ୍‌ହି ଉଲ୍ଲା ବାକେନ୍‌ତା ବାନେ ନାଲ୍‌ଖୁ କାମାଗେ ତିଆର୍‌ରାନା କାତ୍‌ଥା। ¹³ଏସ୍‌କେ ଆଲାର୍ ଉଲ୍ଲା ବାକେନ୍ ଜୀବନ୍ ବିତାବାନାଏ ହନ୍ନେ ନାମ୍‌ହି ବାନେ ଜୀବନ୍ ବିତାବତ୍। ନାମାଗେ ଅନିମହିଁକିରି ମଉଜ୍‌ମଜ୍‌ଲିସ୍ ମା କାମ୍‌ନାକାତ୍‌ଥା। ବେଭିଚାର୍ ମା କାମ୍‌ନାକାତ୍‌ଥା, ନାମ୍ ଦୁସ୍‌ରାରିନ୍ ମା ହିସ୍‌ଙ୍ଗାନା କାତ୍‌ଥା ଏନ୍ଦେର୍‌ଗେକା ହିସ୍‌ଙ୍ଗାନୁ ଝାଗ୍‌ଡ଼ା ମାନିଦ୍। ¹⁴ପ୍ରାଭୁ ଯୀଶୁ ଖ୍ରୀସ୍ତ୍‌ ଏସ୍‌କେ ଜୀବନ୍ ବିତାବାଲାସ୍ ଆନ୍ନେନ୍ ନିମ୍‌ହି ଜୀବନ୍ ବିତାବା। ଆରୁ ନିଜର୍ ମନ୍‌ଘି ଖାରାପ୍ ଇଚ୍ଛାବନ୍ ପୁରା ଆମା କାମା।

ଦୁସ୍‌ରାର୍‌ଘି ଦୋଷ୍ ଆମା ଅଥ୍‌ରା

¹ନେଖା ବିଶ୍ୱାସ୍ କମ୍‌ଜୋର୍ ରାଇ ଆବ୍ଡ଼ାରିନ୍‌ହି ନିଜର୍‌ଗାନେ ହୁଆ ଲେକିନ୍ ଆବ୍ଡ଼ାର୍‌ଘି ସୋଚ୍‌ବିଚାର୍‌ଘି ମିଆଁ ଝାଗ୍‌ଡ଼ା ଆମା କାମା। ²ଆରୁ ନେରିନ୍ ମାନ୍ନାଏ ତା ଆସ୍‌କେ ଜାମା ଲେଖା ଜିନିଷ୍‌ବନ୍ ମହ୍ଁନା କାତ୍‌ଥା, ଯେତ୍‌କତକ୍ କା ଏକାସ୍‌କି ବିଶ୍ୱାସ୍‌ନୁ କମ୍‌ଜୋରି ରାଇ, ଆସ୍ ଆଢ଼ାଚେଁହ୍‌ଲା ଖାଲି ମହ୍ଁଦାସ୍। ³ତା ଆସ୍ ଜାମା ଲେଖା ଜିନିଷ୍ ଅନ୍‌ଦାସ୍ ମହଁଦାସ୍ ଆସ୍ ଆ ଆଲାସିନ୍ ତୁଚ୍ଛ ମା କାମ୍‌ନାକାତ୍‌ଥା, ଏନ୍ଦ୍ରିନ୍ ଜିନିଷ୍ ମା ମହଁଦାସ୍ ଆନ୍ନେନିନ୍ ଆସ୍ ଏକ୍ରିନ୍‌ନିନ୍ ମା ମହଁଦାସ୍, ଆସ୍ ଜାମା ମହଁନା ବାଲାସିନ୍ ଖାରାପ୍ ମା ତେଙ୍ଗ୍‌ନା କାତ୍‌ଥା ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଆସିନ୍ ଗ୍ରହନ୍ କାମ୍‌ଚ୍‌କାଦାସ୍। ⁴ନିମ୍ ନେଦ୍ ଦୁସ୍‌ରାର୍‌ଘି ଗୁତ୍ତିୟାସ୍‌ସିନ୍ ଦୋଷ୍ ଲାଗାବାନାବାଲାଏ? ଆସ୍‌କି ସ୍ଥିର୍ ରାନା ଚାହେ ଖାତ୍‌ର୍‌ନାକାନା ଆସ୍‌କି ମାଲିକ୍‌ସ୍ ଗାନେ ସମ୍ବନ୍ଧ ରାଇ, ବରନ୍ ଆସ୍ ସ୍ଥିର୍‌ହି କାମାକୋ, ଏନ୍ଦେର୍‌ଗେକା ପ୍ରାଭୁସ୍ ଆସିନ୍ ସ୍ଥିର୍ ଉୟାଅଙ୍ଗସ୍।

⁵କେତ୍‌କ ଆଲାର୍ ଏକ୍ରିନ୍ ଅଣ୍ଟା ଉଲ୍ଲାନ୍ ଦୁସ୍‌ରା ଉଲ୍ଲାନ୍ତି ବାନେ ମାନ୍ନାଏ, ଲେକିନ୍ ଆରୁ କେତ୍‌କ ଆଲାର୍ ଜାମା ଉଲ୍ଲାନ୍ ବାନେ ଉଲ୍ଲା ମାନ୍ନାଏ। ଜାମା ଆଲାର୍ ନିଜର୍ ବିଚାର୍‌ବନ୍ ମନ୍‌ନୁ ସ୍ଥିର୍ କାମ୍‌ନା କାତ୍‌ଥା। ⁶ଏକ୍ରିନ୍ ଆଲାସ୍ ଏକ୍ରିନ୍ ଉଲ୍ଲାବନ୍ ଅଣ୍ଟା ବାନେ ଉଲ୍ଲା ବୁଲି ମାନ୍‌ଦାସ୍ ତା ଆସ୍ ପ୍ରାଭୁସ୍‌ଗେ ମାଇନ୍ ଚିୟାଗେ ମାନ୍‌ଦାସ୍। ଆରୁ ଏକାସ୍ ଜାମାନ୍ ମହ୍ଁଦାସ୍ ଆସ୍ ପ୍ରାଭୁସ୍‌ଗେ ମାଇନ୍ ଚିୟାଗେ ମହ୍ଁଦାସ୍ ଏନ୍ଦେର୍‌ଗେକା ଆସ୍ ଏକାନ୍ ମହ୍ଁଦାସ୍ ଆଦ୍‌ଘି ଲାଗାନ୍ ପାର୍‌ମେଶ୍ୱାର୍‌ସିନ୍ ଧାନ୍ୟାବାଦ୍ ଚିଦାସ୍। ହନ୍ନେନ୍ ଏକାସ୍ ଜାମାନ୍ ମା ମହ୍ଁଦାସ୍ ଆସ୍ ପ୍ରାଭୁସିନ୍ ମାଇନ୍ ଚିୟାଗେ ମା ମହ୍ଁଦାସ୍। ଆରୁ ଆସ୍‌ହି ପାର୍‌ମେଶ୍ୱାର୍‌ସିନ୍ ଧାନ୍ୟାବାଦ୍ ଚିଦାସ୍। ⁷ଏନ୍ଦେର୍‌ଗେକା ନାହ୍ମାସ୍ତିନିନ୍ ନା ତା ନେରିନ୍ ନିଜର୍‌ଘି ଲାଗାନ୍ ମା ଉଜ୍ଜ୍‌ଦାତ୍ କା ନିଜର୍‌ଘି ଲାଗାନ୍ ମା ଖିଦାତ୍। ⁸ଯଦି ନାମ୍ ଉଜ୍ଜଦାତ୍ ତା ପ୍ରାଭୁସିନ୍ ମାଇନ୍ ଚିୟାଗେ ଉଜ୍ଜଦାତ୍; ଆରୁ ଯଦି ନାମ୍ ଖିଦାତ୍ ତା ପ୍ରାଭୁସ୍‌ଗେ ମାଇନ୍ ଚିୟାଗେନିନ୍ ଖିଦାତ୍। ହୁଦ୍‌ଘିଲାଗାନ୍ ନାମ୍ ଖିଦାତ୍ ଚାହେ ଉଜ୍ଜଦାତ୍, ନାମ୍ ପ୍ରାଭୁସ୍‌କିତ୍। ⁹ଏନ୍ଦେର୍‌ଗେକା ଖ୍ରୀସ୍ତ୍‌ସ୍‌ ଇଦ୍‌ଘିଲାଗାନ୍ କେଚ୍ଚାସ୍ ଆରୁ ଉଜ୍ଜିୟାସ୍‌କା ଆସ୍ କେଚ୍ଚକା ଆଲାର୍‌ଘିହି ଆରୁ ଉଜ୍ଜୁ ଆଲାର୍‌ଘିହି ପ୍ରାଭୁସ୍ ମାନସ୍‌କସ୍। ¹⁰ନିମ୍ ନିହ୍ମା ବିଶ୍ୱାସୀ ଭାଇ ବୁହୁଣୀର୍‌ଘି ମିଆଁ ଏନ୍ଦେର୍‌ଗେ ଦୋଷ୍ ଚିଦାର୍? ଚାହେ ନିମ୍ ଏନ୍ଦେର୍‌ଗେ ନିହ୍ମା ବିଶ୍ୱାସୀ ଭାଇ ବୁହୁଣୀରିନ୍ ଛୋଟେ ସୋଚ୍‌ଦାର୍? ଏନ୍ଦେର୍‌ଗେକା ଅନ୍ଦୁଲ୍ ପାର୍‌ମେଶ୍ୱାର୍‌ସ୍ ନାହ୍ମା ଜାମାରିନ୍ ନ୍ୟାୟ କାମସ୍। ¹¹ଏନ୍ଦେର୍‌ଗେକା ପାବିତାର୍ ଶାସ୍ତ୍ରନୁ ପ୍ରାଭୁସ୍ ତେଙ୍ଗ୍‌ଦାସ୍ କା ଏନ୍ ଉଜ୍ଜୁ ପାର୍‌ମେଶ୍ଵାର୍‌ନ୍ ହୁଦ୍‌ଘିଲାଗାନ୍ ଜାମା ଆଲାର୍ ଏଙ୍ଘା ଆଘ୍‌ଲି ହାଠୁୱାରିକିରି ସ୍ତୁତି କାମର୍। ଆରୁ ଜାମା ଆଲାର୍ ଏଙ୍ଗାନ୍ ପାର୍‌ମେଶ୍ୱାର୍‌ସ୍ ବୁଲି ମାନର୍। ¹²ହୁଦ୍‌ଘିଲାଗାନ୍ ନାହ୍ମା ଜାମାର୍‌ଗେ ନିଜର୍-ନିଜର୍ କାମ୍‌ଚ୍‌କା ନାଲ୍‌ଖୁଘି ହିସାବ୍ ପାର୍‌ମେଶ୍ୱାର୍‌ସ୍‌ଗେ ଚିଆକୋ।

ଦୁସ୍‌ରାରିନ୍ ପାପ୍‌ନୁ ଆମାଟିଡ଼ା

¹³ହୁଦ୍‌ଘିଲାଗାନ୍ ନାମ୍ ଆରୁ ଏକ୍ ଦୁସ୍‌ରାର୍‌ଘି ମିଆଁ ଦୋଷ୍ ଆମ୍ୱତ୍ ଚିଆ। ଆରୁ ଫାଏସ୍‌ଲା କାମତ୍ କା ନାମ୍ ଏନ୍ନେ ନାଲ୍‌ଖୁ ଆମ୍ୱତ୍ କାମା ଏସ୍‌କେ କା ନାମ୍ ଦୁସ୍‌ରା ବିଶ୍ୱାସୀରିନ୍ ପାପ୍‌ଘି ପାବୁନୁ ହତ୍‌କତ୍। ¹⁴ଏନ୍ ପ୍ରାଭୁ ଯୀଶୁସ୍‌କି ମିଆଁ ବିଶ୍ୱାସ୍ କାମ୍‌ଦାନ୍ ହୁଦ୍‌ଘିଲାଗାନ୍ ଏନ୍ ବାନେକିରି ଆହ୍‌ଦାନ୍ କା ଏନ୍ଦ୍ରିନ୍‌ହି ଜିନିଷ୍ ନିଜର୍‌ନୁ ଅଶୁଦ୍ଧ୍ ମାଲ୍ଲିଦ୍। ଯଦି ନେରିନ୍ ସୋଚ୍‌ନାଏ ତା ଏନ୍ଦ୍ରିନ୍ ମହଁନା ଅଶୁଦ୍ଧ୍ ରାଇ ତା ଆ ମହଁନା ଆସ୍‌କି ଲାଗାନ୍ ଅଶୁଦ୍ଧ୍ ମାନିକି। ¹⁵ଯଦି ନିମ୍ ନିହ୍ମା ବିଶ୍ୱାସୀ ଭାଇ ବୁହୁଣୀରିନ୍ ଏନ୍ଦ୍ରିନ୍ ଜିନିଷ୍ ମହାଁଗେ ଯବର୍‌ଜସ୍‌ତି କାମ୍‌ଦାର୍ ତା ଆବ୍ଡ଼ାର୍‌ଗେ ଦୁଃଖୁ ଲାଗ୍ଗି। ଇତ୍ତି ଆହ୍‌ତାରିଦ୍ କା ନିମ୍ ଆବ୍ଡ଼ାରିନ୍ ବାନେ ମା ହାଖ୍ଖଦାର୍, ହୁଦ୍‌ଘିଲାଗାନ୍ ନିହ୍ମା ଅନ୍ନାମହ୍‌ନାତି ନେଖିନ୍ ବିଶ୍ୱାସ୍‌ବନ୍ ନାଶ୍ ଆମା କାମା। ଏନ୍ଦେର୍‌ଗେକା ଆସ୍‌କି ଲାଗାନ୍‌ହି ଖ୍ରୀସ୍ତ୍‌ ତାଙ୍ଘା ଜୀଆ ଚିଚ୍ଚକାଦାସ୍। ¹⁶ହୁଦ୍‌ଘିଲାଗାନ୍ ଏକାସ୍ ନିଙ୍ଗାଗେ ବାନେ ଲାଗ୍ଗଦାସ୍ ଆସ୍‌କି ନିନ୍ଦା ମାନାଗେ ଆମା ଚିଆ। ¹⁷ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍‌କି ରାଜୀ ଖାଲି ଅନ୍ନାମହ୍‌ନା ମାଲ୍ଲିଦ୍, ଲେକିନ୍ ଇଦ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ବାନେ ଜୀବନ୍ ବିତାବାନା ଆରୁ ଏକ୍ ଦୁସ୍‌ରାର୍‌ଗାନେ ମେଲ୍‌ମିଲାପ୍‌ତି ରାନା ଆରୁ ପାବିତାର୍ ଆତ୍ମାତି ହାକ୍କା ଖୁସୀନୁ ରାନା ଆଦିନ୍। ¹⁸ଆରୁ ଏକାର୍ ଏନ୍ନେ ଜୀବନ୍ ବିତାବାଇକିରି ଖ୍ରୀସ୍ତ୍‌ସ୍‌କି ସେବା କାମ୍‌ନାଏ ତା ଆବ୍ଡ଼ାର୍‌ଘି ମିଆଁ ପାର୍‌ମେଶ୍ୱାର୍‌ସ୍ ଖୁସୀ ମାନ୍‌ଦାସ୍ ଆରୁ ଜାମା ଆଲାର୍ ଆସିନ୍ ମାଇନ୍ କାମ୍‌ନାଏ। ¹⁹ହୁଦ୍‌ଘିଲାଗାନ୍ ନାମାଗେ ଜାମାବାକେନ୍ ଏକ୍ ଦୁସ୍‌ରାର୍‌ଗାନେ ଶାନ୍ତିନୁ ରାଗେ କୋଶିଷ୍ କାମ୍‌ନା କାତ୍‌ଥା ଆରୁ ଏକ୍ ଦୁସ୍‌ରାରିନ୍ ବିଶ୍ୱାସ୍‌ନୁ ମଜ୍‌ବୁତ୍ କାମାଗେ କୋଶିଷ୍ କାମ୍‌ନା କାତ୍‌ଥା। ²⁰ଆରୁ ନିହ୍ମା ଅନ୍ନାମହ୍‌ନାଘି ଲାଗାନ୍ ପାର୍‌ମେଶ୍ୱାର୍‌ସ୍‌କି ନାଲ୍‌ଖୁନ୍ ଆମାବାଗ୍‌ଡ଼ା। ଜାମା ଅନ୍ନାମହ୍‌ନାଦ୍ ବାନେଦ୍ ଲେକିନ୍ ଏକା ଜିନିଷ୍‌ବନ୍ ମହ୍ଁନାଘି ଦ୍ୱାର୍‌ନୁ ଆଦ୍ ନେକିନ୍ ପାପ୍‌ଘି ପାବୁନୁ ହୋଇକାଇ ତା ଆ ଜିନିଷ୍ ଅନ୍ନାମହ୍‌ନାଦ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ଖାରାପ୍‌ଦ୍। ²¹ଯଦି ନିହ୍ମା ଆହ୍‌ଡ଼ା ମହ୍ଁନାଘି ଦ୍ୱାର୍‌ନୁ, ନାଶା ହାପ୍ପନାଘି ଦ୍ୱାର୍‌ନୁ ଆରୁହି ଏନ୍ନେନ୍ ନାଲ୍‌ଖୁ କାମ୍‌ଚ୍‌କୁନ୍ ଏକ୍ରିନ୍ ବିଶ୍ୱାସୀରିନ୍ ପାପ୍‌ଘି ପାବୁନୁ ହୋଇକାଇଦ୍ ତା ନିମାଗେ ଏନ୍ନେ ନାଲ୍‌ଖୁ ମା କାମ୍‌ନାକାତ୍‌ଥା। ²²ଇ କାତ୍‌ଥାଘି ବାରେନୁ ନିମ୍ ଏକା ବିଶ୍ୱାସ୍ ଉଇଦାର୍ ଆବନ୍ ନିହ୍ମାଏ ଆରୁ ପାର୍‌ମେଶ୍ୱାର୍‌ସ୍‌କି ମାଝାନୁ ରାଗେ ଚିଆ। କେତ୍‌କ ଆଲାର୍ ତାହ୍ମା ନଜର୍‌ନୁ ଏକାଦ୍ ବାନେଦ୍ ଆବନ୍ କାମ୍‌ନାଏ ଆରୁ ଆବନ୍ କାମାଗେ ଆବ୍ଡ଼ାର୍‌ଗେ ଖାରାପ୍ ମା ଲାଗ୍ଗ। ଏନ୍ନେ ଆଲାର୍ ଧଏନ୍ ରାନାଏ। ²³ଲେକିନ୍ ଏକାସ୍ ଶାକ୍ କାମିକିରି ଏନ୍ଦ୍ରିନ୍ ମହ୍ଁଦାସ୍। ଆସ୍ ପାର୍‌ମେଶ୍ୱାର୍‌ସ୍‌କି ନଜର୍‌ନୁ ଦୋଷୀ ମାନ୍‌ଚାସ୍ କେର୍‌କାଦାସ୍। ଏନ୍ଦେର୍‌ଗେକା ଆସ୍ ବିଶ୍ୱାସ୍ ମା କାମିକିରି ମହ୍ଁଦାସ୍। ଆରୁ ଏନ୍ଦ୍ରିନ୍‌ହି ବିନାବିଶ୍ୱାସ୍‌ସ୍ତି କାମାକାଇ ଆଦ୍ ପାପ୍‌ଦ୍।

ନିଜ୍‌କେନିଜ୍‌ବନ୍ ମାଲ୍ଲା ଦୁସ୍‌ରାରିନ୍ ଖୁସ୍ କାମା

¹ନାମ୍ ଏକାତ୍‌କା ବିଶ୍ୱାସ୍‌ନୁ ମଜ୍‌ବୁତ୍ ରାଦାତ୍, ବିଶ୍ୱାସ୍‌ନୁ କମ୍‌ଜୋରି ରାନାବାଲାରିନ୍ ସାହତ୍। ଲେକିନ୍ ନାମ୍ ଏକାନ୍ ଚାଁହତ୍ ଆବନ୍ ଖାଲି ଆମ୍ବତ୍ କାମା। ²ଆରୁ ନାମ୍ ନାହ୍ମା ବିଶ୍ୱାସୀ ଭାଇ ବୁହୁଣୀରିନ୍ ବିଶ୍ୱାସ୍‌ନୁ ମଜ୍‌ବୁତ୍ କାମାଗେ ଆବ୍ଡ଼ାର୍‌ଘି ଲାଗାନ୍ ଏକାଦ୍ ବାନେଦ୍ ଆବନ୍ କାମିକିରି ଆବ୍ଡ଼ାରିନ୍ ଖୁସୀ କାମ୍‌ନାକାତ୍‌ଥା। ³ଏନ୍ଦେର୍‌ଗେକା ଖ୍ରୀସ୍ତ୍‌ହି ନିଜ୍‌କେନିଜ୍‌ବନ୍ ଖୁସୀ କାମ୍‌ନାଘି ଲାଗାନ୍ ଜୀବନ୍ ମାଲ୍ଲା ବିତାବୁସ୍। ଲେକିନ୍ ଏସ୍‌କେ କା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ। “ହେ ବାଙ୍ଗ୍ ନିଙ୍ଗାନ୍ ନିନ୍ଦା କାମ୍‌ନାବାଲାର୍‌ହି ଏଙ୍ଘାଏହି ନିନ୍ଦା କାମ୍‌ଚ୍‌କାନାଏ।” ⁴ପାବିତାର୍ ଶାସ୍ତ୍ରନୁ ଯେତ୍‌କ କାତ୍‌ଥା ଆଘ୍‌ଲିନ୍ତି ଲେଖ୍‌ଚ୍‌କା ରାଇ, ଆଦ୍ ନାମାନ୍ ଶିଖାବାଗେ ଲାଗାନ୍ ଲେଖ୍‌ଚ୍‌କା ରାଇ, ଏକାତି କା ନାମାଗେ ଧିରାଜ୍ ଆରୁ ଦିଲାସା ହାଖ୍‌ର୍‌ତେରୋ ଆରୁ ଇଦ୍‌ଘି ଲେଖା ନାମ୍ ନିଜର୍ ଆଶ୍ରା ଉୟତ୍। ⁵ନାମାଗେ ଧିରାଜ୍ ଆରୁ ଶାନ୍ତି ଚିନାବାଲା ପାର୍‌ମେଶ୍ୱାର୍‌ସାନ୍ ଏନ୍ ବିନ୍ତି କାମାଲ୍‌ଦାନ୍ କା ଯୀଶୁ ଖ୍ରୀସ୍ତ୍‌କି ଶିକ୍ଷାଘି ଲେଖା ନିମ୍ ଏକ୍ ଦୁସ୍‌ରାର୍‌ଗାନେ ଶାନ୍ତିନୁ ରା ଅଙ୍ଗର୍। ଆଦ୍‌ଘି ଲାଗାନ୍ ଆସ୍ ନିମାନ୍ ମଦେତ୍ କାମ୍‌ନାସ୍। ଏନ୍ଦେର୍‌ଗେକା ଖ୍ରୀସ୍ତ୍ ଯୀଶୁସ୍‌ହି ଏନ୍ନେନ୍ କାମ୍‌ଚାସ୍। ⁶ତାକା ନିମ୍ ଜାମାର୍ ମେଶ୍ରିକିରି ଆରୁ ଏକ୍‌ମତ୍ ମାନିକିରି ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍‌ସ୍‌କି ବାଙ୍ଗ୍, ପାର୍‌ମେଶ୍ୱାର୍‌ସ୍‌କି ସ୍ତୁତି କାମର୍।

ୟାହୁଦୀ ଆରୁ ବିନାୟାହୁଦୀ ଜାମାର୍‌ଘି ଲାଗାନ୍ ସୁସାମାଚାର୍ ରାଇଦ୍

⁷ହେ ଏଙ୍ଘା ପ୍ୟାରେ ଭାଇ ବୁହୁଣୀରୋ, ପାର୍‌ମେଶ୍ୱାର୍‌ସିନ୍ ମାଇନ୍ ଚିୟାଗେ ଖ୍ରୀସ୍ତ୍‌ ନିମାନ୍ ଗ୍ରହନ୍ କାମ୍‌ଚାସ୍ ହନ୍ନେ ନିମ୍‌ହି ଏକ୍ ଦୁସ୍‌ରାରିନ୍ ଗ୍ରହନ୍ କାମା। ^8-9ଏନ୍ଦେର୍‌ଗେକା ନିମାନ୍ ତେଙ୍ଗାଲ୍‌ଦାନ୍ କା ପାର୍‌ମେଶ୍ୱାର୍‌ସ୍ ୟାହୁଦୀ ଜାମାର୍‌ଘି ପୁର୍‌ଖାର୍‌ଗେ ଏକା କାତ୍‌ଥା ଚିଚ୍‌କାଚାସ୍ ଆ କାତ୍‌ଥା ଚିଚ୍‌କାବନ୍ ଆସ୍ ପୁରା କାମ୍‌ଚାସ୍। ଇବନ୍ ଏଦାଗେ ଖ୍ରୀସ୍ତ୍‌ ୟାହୁଦୀ ଜାମାର୍‌ଘି ଅଣ୍ଟା ସେବକ୍‌ସ୍‌କି ରୁପ୍‌ନୁ ବାର୍‌ଚାସ୍। ତାକା ବିନାୟାହୁଦୀ ଆଲାର୍‌ହି ପାର୍‌ମେଶ୍ୱାର୍‌ସ୍‌କି କ୍ରିପାଘିଲାଗାନ୍ ମାହିମା କାମର୍। ଏନ୍ଦେର୍‌ଗେକା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ କା “ଏନ୍ ବିନାୟାହୁଦୀର୍‌ଘି ମାଝାନୁ ନିଙ୍ଗାନ୍ ଧାନ୍ୟାବାଦ୍ ଚିଅନ୍। ଆରୁ ନିଙ୍ଘା ସ୍ତୁତି କାମନ୍।” ¹⁰ଆରୁହି ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ କା, “ହେ ବିନାୟାହୁଦୀ ଆଲାରୋ ନିମ୍ ପାର୍‌ମେଶ୍ୱାର୍‌ସ୍‌କି ଚାଜ୍ଜକା ୟାହୁଦୀ ଆଲାର୍ ଗାନେ ଖୁସୀମାନାବା।” ¹¹ଆରୁ ହେ “ଜାମା ବିନାୟାହୁଦୀ ଆଲାରୋ ପ୍ରାଭୁସ୍‌କି ସ୍ତୁତିବାଡ଼ାଇ କାମା ଆରୁ ଜାମା ଜାତିନ୍ତା ଆଲାର୍ ପାର୍‌ମେଶ୍ୱାର୍‌ସ୍‌କି ସ୍ତୁତି କାମା।” ¹²ପାବିତାର୍ ଶାସ୍ତ୍ରନୁ ଇଶାୟାହ୍‌ସ୍‌ହି ତେଙ୍ଗ୍‌ଦାସ୍ କା, “ଯିଶୟସ୍‌କି ବାଉଁଶାନୁ ଅଣ୍ଟା ରାଜାସ୍ ଜନମ୍ ମାନସ୍। ଆରୁ ଆସ୍ ବିନାୟାହୁଦୀରିନ୍ ଶାସନ୍ କାମସ୍। ଆରୁ ଆସ୍‌କି ମିଆଁ ଜାମା ବିନାୟାହୁଦୀର୍ ଆଶ୍ରା ଉଇୟର୍। ¹³ଏନ୍ ବିନ୍ତି କାମାଲ୍‌ଦାନ୍ କା ପାର୍‌ମେଶ୍ୱାର୍‌ସ୍ ଏକାସ୍ କା ଆଶ୍ରା ଚିଦାସ୍ ଆସ୍‌କି ମିଆଁ ନିମ୍ ବିଶ୍ୱାସ୍ କାମ୍‌ଦାର୍, ହୁଦ୍‌ଘିଲାଗାନ୍ ଆସ୍ ନିମାନ୍ ଖୁସୀ ଆରୁ ଶାନ୍ତିତି ଭାର୍‌ପୁର୍ କାମ୍‌ନାସ୍। ତାକା ଏକାନ୍ ନିମ୍ ଏକା ଆଶ୍ରା ଏରାଲ୍‌ଦାର୍ ଆଦ୍ ପାବିତାର୍ ଆତ୍ମାଘି ଶକ୍ତିତି ଆରୁହି ମଜ୍‌ବୁତ୍ ମାନ୍ନାଦ୍।”

ପାଉଲୁସ୍ ତାଙ୍ଘା ସେବା ନାଲ୍‌ଖୁଘି ବାରେନୁ ତେଙ୍ଗାଲ୍‌ଦାସ୍

¹⁴ହେ ଏଙ୍ଘା ଭାଇ ଆରୁ ବୁହୁଣୀଜାମାରୋ, ଏଙ୍ଗା ନିଜେ ନିହ୍ମା ମିଆଁ ଭାର୍‌ଷା ରାଇ କା ନିମ୍ ବାନେ ମତ୍‌ଲବ୍ ଆରୁ ବୁଦ୍ଧିତି ନିନ୍ଦ୍‌କା ରାଦାର୍। ଆରୁ ନିମ୍ ଏକ୍ ଦୁସ୍‌ରାରିନ୍ ଶିଖାବାନାଘି ଲାଇଗ୍ ରାଦାର୍। ¹⁵ହାଲେହି ଏନ୍ ନିମାନ୍ କେତ୍‌କ କାତ୍‌ଥାନ୍ ମନେ କାମ୍‌ତାଗେ ସାଫା-ସାଫା ଲେଖ୍‌ଚ୍‌କାଦାନ୍ ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଏଙ୍ଗାଗେ ଅଣ୍ଟା ବିଶେଷ୍ ବାର୍‌ଦାନ୍ ଚିଚ୍‌କାଦାସ୍। ¹⁶ଆରୁ ଆ ବାର୍‌ଦାନ୍ ଇଦ୍ କା ଏଙ୍ଗାନ୍ ଯୀଶୁ ଖ୍ରୀସ୍ତ୍‌କି ସେବକ୍ ମାନାଗେ ଚାଜ୍ଜକା ରାଇ। ଆରୁ ଏନ୍ ବିନାୟାହୁଦୀର୍‌ଘି ମାଝାନୁ ପାର୍‌ମେଶ୍ୱାର୍‌ସ୍‌କି ସୁସାମାଚାର୍ ଶୁଣାବାନାନୁ ଅଣ୍ଟା ପୁରୋହିତ୍‌ସ୍ ଲେଖା ନାଲ୍‌ଖୁ କାମନ୍। ତାକା ବିନାୟାହୁଦୀର୍ ପାର୍‌ମେଶ୍ୱାର୍‌ସ୍‌କି ଲାଗାନ୍ ଗ୍ରହନ୍ କାମ୍‌ନାଘି ଲାଇଗ୍ ବୁଲି ମାନାଅଙ୍ଗର୍, ଆରୁ ପାବିତାର୍ ଆତ୍ମାତି ପାବିତାର୍ ମାନିକିରି ଆବ୍ଡ଼ାରିନ୍ ପାର୍‌ମେଶ୍ୱାର୍‌ସ୍ ଗ୍ରହନ୍ କାମ୍‌ନାଘି ଲାଇଗ୍ ମାନାଅଙ୍ଗର୍। ¹⁷ଏନ୍ ଯୀଶୁ ଖ୍ରୀସ୍ତ୍‌ସ୍‌କି ଆଲାନ୍, ଆରୁ ଏନ୍ ପାର୍‌ମେଶ୍ୱାର୍‌ସ୍‌କି ଏକା ସେବା କାମାଲ୍‌ଦାନ୍, ହୁଦ୍‌ଘିଲାଗାନ୍ ଏନ୍ କିସ୍‌ମାତ୍ ବାଲାନ୍ ଆଙ୍ଗେନ୍ ଏନ୍ ନିଜ୍‌କେନିଜ୍‌ବନ୍ ବାଡ଼୍‌କା ସୋଚ୍‌ଦାନ୍। ^18-19ଆରୁ ଏଙ୍ଘା ଦ୍ୱାର୍‌ନୁ ଖ୍ରୀସ୍ତ୍‌ସ୍‌, ବିନାୟାହୁଦୀର୍‌ଘି ମାଝାନୁ ଏକାନ୍ କାମ୍‌ଚାସ୍ ଆ କାତ୍‌ଥାନ୍ ଖାଲି ତେଙ୍ଗାଗେ ଏଙ୍ଘା ହିମ୍ମତ୍ ରାଇ। ତାକା ବିନାୟାହୁଦୀର୍‌ହି ପାର୍‌ମେଶ୍ୱାର୍‌ସ୍‌ସିନ୍ ମାନର୍। ଆରୁ ଏକା ବଚନ୍ ଏନ୍ ଆବ୍ଡ଼ାରିନ୍ ଶୁଣାବାଚ୍‌କାନ୍ ଆବନ୍ ମେନିକିରି ଆରୁ ପାବିତାର୍ ଆତ୍ମାଘି ମଦେତ୍‌ତି ଏକା ଅଦ୍‌ଭୁତ୍ ନାଲ୍‌ଖୁ କାମ୍‌ଚ୍‌କାନ୍ ଆବନ୍ ଏରିକିରି ଆବ୍ଡ଼ାର୍ ବିଶ୍ୱାସ୍ କାମ୍‌ଚାର୍। ଏନ୍ନେନ୍ ଏନ୍ ଯେରୁଶାଲେମ୍‌ତି ହୋଇକିରି ଚାରିପାଖା ଇଲ୍ଲୁରିକୁମ୍ ରାଜୀତକ୍ ଜାମା ଆଡ୍ଡାନୁ ଖ୍ରୀସ୍ତ୍‌କି ବାରେ ସୁସାମାଚାର୍ ପୁରା-ପୁରା ଶୁଣାବାଚ୍‌କାନ୍। ²⁰ଆରୁ ଅଣ୍ଟା ଆଡ଼୍‌ପାଘି ପହ୍‌ଲେନ୍ତି ନାହିଗାଡ୍ଡି ଆର୍‌ହ୍‌ଖାନୁ ଆଡ଼୍‌ପା କାମ୍‌ନା ଲେଖା ଏକା ଆଡ୍ଡାନୁ ପହ୍‌ଲେନ୍ତି ସୁସାମାଚାର୍ ପ୍ରଚାର୍ କାମା କେର୍‌କିରୋ ଏନ୍ନେ ଆଡ୍ଡାନୁ ଏଙ୍ଗାଗେ ସୁସାମାଚାର୍ ପ୍ରଚାର୍ କାମାଗେ ଇଚ୍ଛା ମାଲ୍ଲାଦିନ୍। ଲେକିନ୍ ଏକାସାନ୍ ଆଲାର୍ ଖ୍ରୀସ୍ତ୍‌କି ନାମେତକ୍ ମାଲ୍ଲା ମେନୁର୍, ଏନ୍ନେ ଆଡ୍ଡାନୁ ସୁସାମାଚାର୍ ଶୁଣାବାଗେ ଏଙ୍ଘାଏ ବହୁତ୍ ଇଚ୍ଛା ରାଇ। ²¹ଲେକିନ୍ ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ କା, “ଏକାର୍‌ଗେ ଆସ୍‌କି ସୁସାମାଚାର୍ ମାଲ୍ଲା ଶୁଣାବାକୁ ଆବ୍ଡ଼ାର୍ ସତ୍ତୁବନ୍ ବୁଝରର୍। ଆରୁ ଏକାର୍ ଏକ୍‌ଲାହି ସୁସାମାଚାର୍ ମାଲ୍ଲା ମେନୁର୍ ଆବ୍ଡ଼ାର୍ ବଚନ୍‌ବନ୍ ମେନର୍।”

ପାଉଲୁସ୍ ରୋମ୍ କାଲାଗେ ଯୋଜ୍‌ନା କାମାଲ୍‌ଦାସ୍

²²ଏକା-ଏକା ଆଡ୍ଡାନୁ ସୁସାମାଚାର୍ ମାଲ୍ଲା ମେନୁର୍ ଆବ୍ଡ଼ା ଆଡ୍ଡାନୁ ସୁସାମାଚାର୍ ଶୁଣାବାଲ୍‌କାନ୍ ହୁଦ୍‌ଘିଲାଗାନ୍ ନିହ୍ମା ଚାହାଗେ କାଲା ପଲ୍ଲକାନିନ୍। ²³ଲେକିନ୍ ଆକ୍କୁନ୍ ଇବ୍ଡ଼ା ରାଜୀଘି ଜାମା ଆଡ୍ଡାନୁ ସୁସାମାଚାର୍ ଶୁଣାବାଗେ ମୁଞ୍ଜକାନ୍। ଆରୁ ବହୁତ୍ ବଛର୍‌ତି ନିହ୍ମାସାନ୍ କାଲାଗେ ଏନ୍ ବହୁତ୍ ଚାହାଁଲ୍‌କାନ୍। ²⁴ହୁଦ୍‌ଘିଲାଗାନ୍ ଯେତ୍‌କବାକେନ୍ ଏନ୍ ସ୍ପେନ୍ ଦେଶ୍ କନ୍ ତା ନିହ୍ମାଗାନେ ଭେଁଟ୍ ମାନନ୍। ଆରୁ ଏନ୍ ଚାହାଁଲ୍‌ଦାନ୍ କା କେତ୍‌କ ଉଲ୍ଲା ନିହ୍ମାଗାନେ ରାନାଘି ଖୁସୀ ହନ୍। ହୁଦ୍‌ଘିପାଛ୍‌ଲି ଏନ୍ ସୋଚାଲ୍‌ଦାନ୍ କା ଏଙ୍ଘା କାନାଘି ଲାଗାନ୍ ମଦେତ୍ କାମର୍। ²⁵ଲେକିନ୍ ଆକ୍କୁନ୍ ତା ଏନ୍ ଯେରୁଶାଲେମ୍ ତା ବିଶ୍ୱାସୀ ଆଲାର୍‌ଘି ମଦେତ୍ କାମାଗେ କାଲ୍‌ଦାନ୍। ²⁶ଏନ୍ଦେର୍‌ଗେକା ମାକିଦୁନିଆଁ ଆରୁ ଆଖାୟା ମଣ୍ତ୍‌ଲୀନ୍ତା ବିଶ୍ୱାସୀ ଆଲାର୍ ଯେରୁଶାଲେମ୍ ତା ଗରୀବ୍ ବିଶ୍ୱାସୀ ଆଲାର୍‌ଗେ କେତ୍‌କ ଦାନ୍ ଚିୟାଗେ ସୋଚ୍‌କାନାଏ। ²⁷ଆରୁ ଆବ୍ଡ଼ାର୍ ଏନ୍ନେ ଖୁସୀତି କାମ୍‌ଚାର୍ ଲେକିନ୍ ଏନ୍ନେ କାମାଗେ ଆବ୍ଡ଼ାର୍‌ଘି ଉଧାର୍ ହର୍। ଏନ୍ଦେର୍‌ଗେକା ବିନାୟାହୁଦୀର୍‌ଗେ ଯେରୁଶାଲେମ୍ ତା ୟାହୁଦୀର୍ ଆତ୍ମିକ୍ ଆଶିଷ୍ ମତ୍‌ଲବ୍ ସୁସାମାଚାର୍ ହାଖ୍ଖର୍‌କିଚି। ହୁଦ୍‌ଘିଲାଗାନ୍ ନିମ୍ ବିନାୟାହୁଦୀ ଆଲାର୍ ଆ ୟାହୁଦୀ ଆଲାରିନ୍ ଦାନ୍ ଚିକିରି ମଦେତ୍ କାମ୍‌ନା କାତ୍‌ଥା। ²⁸ହୁଦ୍‌ଘିଲାଗାନ୍ ଏନ୍ ଇ ନାଲ୍‌ଖୁନ୍ ପୁରା କାମିକିରି ମତ୍‌ଲବ୍ ଆବ୍ଡ଼ାର୍‌ଘି ହେଖ୍ଖାନୁ ଦାନ୍ ଚିକିରି, ନିହ୍ମାସାନ୍ କନ୍ ଆରୁ ଆସ୍‌ତି ସ୍ପେନ୍‌ଗେ କନ୍। ²⁹ଆରୁ ଏନ୍ ଆହ୍‌ଦାନ୍ କା ଯେତ୍‌କବାକେନ୍ ଏନ୍ ନିହ୍ମାସାନ୍ କନ୍ ହତ୍‌କବାକେନ୍ ଖ୍ରୀସ୍ତ୍‌ସ୍‌କି ଆଶୀର୍ବାଦ୍ ନିମାଗେ ଆରୁ ଏଙ୍ଗାଗେ ଭାର୍‌ପୁର୍ ହାଖ୍ଖର। ³⁰ହେ ଏଙ୍ଘା ଭାଇ ଆରୁ ବୁହୁଣୀଜାମାରୋ ଏନ୍ ନିମାନ୍ ଆର୍‌ଜୀବିନ୍ତି କାମ୍‌ଦାନ୍ କା ପ୍ରାଭୁ ଯୀଶୁ ଖ୍ରୀସ୍ତ୍‌କି ଦ୍ୱାର୍‌ନୁ ଆରୁ ପାବିତାର୍ ଆତ୍ମାଘି ଦ୍ୱାର୍‌ନୁ ବାନେ ହାଖ୍ଖଦାର୍। ଆ ବାନେ ହାଖ୍ଖନାତି ଏଙ୍ଘାଲାଗାନ୍ ପାର୍‌ମେଶ୍ୱାର୍‌ସାନ୍ ବିନ୍ତି କାମ୍‌ତେ ରା। ³¹କା ଏନ୍ ୟାହୁଦୀଆନ୍ତା ଏକା ଆଲାର୍ ପାର୍‌ମେଶ୍ୱାର୍‌ସିନ୍ ବିଶ୍ୱାସ୍ ମା କାମ୍‌ନାଏ ଆବ୍ଡ଼ାର୍‌ଘି ହେଖ୍ଖାନ୍ତି ଏଙ୍ଗାନ୍ ବାଛାବସ୍। ଆରୁ ଯେରୁଶାଲେମ୍ ତା ବିଶ୍ୱାସୀ ଆଲାର୍‌ଗେ ଏନ୍ ଏକା ଦାନ୍ ହୋଇକିରି କାଲ୍‌ଦାନ୍ ଆବନ୍ ଆବ୍ଡ଼ାର୍ ଖୁସୀତି ଗ୍ରହନ୍ କାମର୍। ³²ପାର୍‌ମେଶ୍ୱାର୍‌ସ୍‌କି ଇଚ୍ଛା ଲେଖା ଯେତ୍‌କବାକେନ୍ ଏନ୍ ନିହ୍ମାସାନ୍ ଖୁସୀତି ବାରନ୍ ତା ଜାମାତ୍ ମେଶ୍ରିକିରି ଖୁସୀ ମାନାବତ୍ ଆରୁ ଏକ୍ ଦୁସ୍‌ରାରିନ୍ ଦିଲାସା ଚିଅତ୍। ³³ଏନ୍ ବିନ୍ତି କାମାଲ୍‌ଦାନ୍ କା ଶାନ୍ତି ଚିନାବାଲା ପାର୍‌ମେଶ୍ୱାର୍‌ସ୍ ନିହ୍ମା ଜାମାର୍‌ଗାନେ ରାନାସ୍। ଆମେନ୍।

ପାଉଲୁସ୍ ରୋମ୍‌ତା ବିଶ୍ୱାସୀରିନ୍ ଯୋହାର୍ ତେଙ୍ଗାଲ୍‌ଦାସ୍

¹ଏନ୍ ନାହ୍ମାଏ ବୁହୁଣୀ ଫେବେଘି ବାରେନୁ ବାନେ କାତ୍‌ଥା ତେଙ୍ଗ୍‌ନା ରାଇ ଏକାଦ୍ କା କେଙ୍କ୍ରେୟା ମଣ୍ଡ୍‌ଲୀନ୍ତା ସେବିକା। ²କା ଏସ୍‌କେ ଅଣ୍ଟା ବିଶ୍ୱାସୀ ଆଲାସ୍ ଆରୁ ଅଣ୍ଟା ବିଶ୍ୱାସୀ ଆଲାସ୍ ଗାନେ କାମ୍‌ନାକାତ୍‌ଥା ଆନ୍ନେ ଇଦ୍‌ହି ଅଣ୍ଟା ବିଶ୍ୱାସୀ ଆଲିଦ୍ ଆରୁ ଏନ୍ଦ୍ରିନ୍ କାତ୍‌ଥାନୁ ଆଦ୍‌ଗେ ମଦେତ୍‌ଘି ଦାର୍‌କାର୍ ରାଇ ତା ଆଦ୍‌ଘି ମଦେତ୍ କାମା। ଏନ୍ଦେର୍‌ଗେକା ଆଦ୍ ଢେର୍ ଆଲାର୍‌ଘି ଆରୁ ଏଙ୍ଘାଏହି ମଦେତ୍ କାମ୍‌ଚ୍‌କିଚି।

³ଏଙ୍ଘାଗାନେ ଯୀଶୁ ଖ୍ରୀସ୍ତ୍‌ସ୍‌କି ସେବା କାମ୍‌ନାବାଲା ଆକ୍ୱିଲା ଆରୁ ତାଙ୍ଘା ଆଲି ପ୍ରିସ୍କାବନ୍ ଯୋହାର୍ ତେଙ୍ଗାଲ୍‌ଦାନ୍। ⁴ଆବ୍ଡ଼ାର୍ ଏଙ୍ଗାନ୍ ବାଛାବାଗେ ତାହ୍ମା ଜୀଆନ୍ ବିପଦ୍‌ନୁ ଟିଡ୍ଡେଇଚ୍‌କାଚାର୍। ଆରୁ ଏନ୍ ଖାଲି ମାଲ୍ଲା ଲେକିନ୍ ବିନାୟାହୁଦୀର୍‌ଘି ଜାମା ମଣ୍ଡ୍‌ଲୀନ୍ତା ଆଲାର୍‌ହି ଆବନ୍ ଧାନ୍ୟାବାଦ୍ ଚିନାଏ। ⁵ଆରୁ ଆବ୍ଡ଼ାର୍‌ଘି ଆଡ଼୍‌ପାନୁ ଏକା ବିଶ୍ୱାସୀର୍ ଠୁଡ଼ିୟା ରାଲିୟାର୍ ଆବ୍ଡ଼ାରିନ୍ ଏଙ୍ଘା ଯୋହାର୍ ତେଙ୍ଗା ଆରୁ ଏଙ୍ଘା ପ୍ୟାରା ସାଙ୍ଗେ ଇପ୍ପେନିତୁସ୍ ଏକାସ୍ କା ଆସିଆ ରାଜୀନ୍ତା ପହ୍‌ଲେ ଖ୍ରୀସ୍ତ୍‌ ବିଶ୍ୱାସୀ ଆସିନ୍‌ହି ଏଙ୍ଘା ଯୋହାର୍ ତେଙ୍ଗା। ⁶ମାରିୟାମ୍‌ବନ୍ ଏଙ୍ଘା ଯୋହାର୍ ତେଙ୍ଗା ଏକାଦ୍ କା ନିହ୍ମା ଲାଗାନ୍ ବହୁତ୍ ମେହ୍‌ନତ୍ କାମ୍‌ଚ୍‌କିଚି। ⁷ଆନ୍ଦ୍ରୁନୀକୁସ୍ ଭାଇସିନ୍ ଆରୁ ଯୁନିୟାସ୍ ବୁହୁଣୀବନ୍‌ହି ଏଙ୍ଘା ଯୋହାର୍ ତେଙ୍ଗା। ଆବ୍ଡ଼ାର୍‌ହି ଏଙ୍ଘାଏ ୟାହୁଦୀ ଭାଇ ବୁହୁଣୀର୍। ଆରୁ ଏଙ୍ଘାଗାନେ ଜେହେଲ୍‌ନୁ ରାଚାର୍। ଆରୁ ଖାସ୍‌ଚେଲାଜାମାର୍ ଆବ୍ଡ଼ାରିନ୍ ବହୁତ୍ ମାଇନ୍ କାମ୍‌ନାଏ, ଆରୁ ଏଙ୍ଘାସ୍‌ତିହି ଆଘ୍‌ଲି ଆବ୍ଡ଼ାର୍ ଖ୍ରୀସ୍ତ୍‌ସିନ୍ ବିଶ୍ୱାସ୍ କାମ୍‌ଚ୍‌କାଚାର୍। ⁸ଭାଇ ଆମ୍ପଲିୟାତୁସ୍‌ସିନ୍ ଏଙ୍ଘା ଯୋହାର୍ ତେଙ୍ଗା। ଆସ୍ ପ୍ରାଭୁସିନ୍ ବିଶ୍ୱାସ୍ କାମ୍‌ଦାସ୍ ହୁଦ୍‌ଘିଲାଗାନ୍ ଏନ୍ ଆସିନ୍ ବାନେ ହାଖ୍ଖଦାନ୍। ⁹ଭାଇ ଉର୍‌ବାନୁସ୍ ଏକାସ୍ କା ନାହ୍ମାଗାନେ ଖ୍ରୀସ୍ତ୍‌କି ସେବା କାମାଲ୍‌ଦାସ୍ ଆସିନ୍‌ହି ଏଙ୍ଗା ଯୋହାର୍ ତେଙ୍ଗା। ଆରୁ ଏଙ୍ଘା ପ୍ୟାରା ସାଙ୍ଗେ ଇସ୍ତ୍‌ଖୁସ୍‌ସିନ୍‌ହି ଏଙ୍ଘା ଯୋହାର୍ ତେଙ୍ଗା। ¹⁰ଆରୁ ଭାଇ ଆପେଲ୍ଲାସ୍‌ସିନ୍ ଏକାସ୍ କା ଏଦେଇ ଚିଚ୍ଚାସ୍ କା ଆସ୍ ଖ୍ରୀସ୍ତ୍‌ନୁ କେତ୍‌କ ଇମାନ୍‌ଦାର୍ ରାଦାସ୍, ଆସିନ୍ ଏଙ୍ଘାଏ ଯୋହାର୍ ତେଙ୍ଗା। ଆରୁ ଆରିସ୍ତୁବୁଲୁସ୍‌କି ଆଡ଼୍‌ପାନୁ ରାନାବାଲା ଜାମା ବିଶ୍ୱାସୀରିନ୍ ଏଙ୍ଘାଏ ଯୋହାର୍ ତେଙ୍ଗା। ¹¹ଏଙ୍ଘା ୟାହୁଦୀ ଭାଇ ହେରୋଦୀୟୋନ୍‌ସିନ୍ ଏଙ୍ଘା ଯୋହାର୍ ତେଙ୍ଗା। ଆରୁ ନାର୍‌କିସ୍ତୁସ୍ ଆଡ଼୍‌ପାନୁ ରାନାବାଲା ଏକା ଆଲାର୍ ପ୍ରାଭୁସ୍‌କି ମିଆଁ ବିଶ୍ୱାସ୍ କାମ୍‌ନାଏ, ଆବ୍ଡ଼ାରିନ୍‌ହି ଏଙ୍ଘାଏ ଯୋହାର୍ ତେଙ୍ଗା। ¹²ବୁହୁଣୀ ତ୍ରୁଫେନା ଆରୁ ତ୍ରୁଫୋସା ଏକାର୍ କା ପ୍ରାଭୁସ୍‌କି ସେବା ନାଲ୍‌ଖୁନୁ ବହୁତ୍ ମେହ୍‌ନତ୍ କାମ୍‌ନାଏ, ଆବ୍ଡ଼ାରିନ୍ ଏଙ୍ଘାଏ ଯୋହାର୍ ତେଙ୍ଗା। ଆରୁ ବୁହୁଣୀ ପରସିସ୍ ଏକାଦ୍ କା ଏଙ୍ଘାଏ ପ୍ୟାରେଦ୍, ଆବନ୍‌ହି ଏଙ୍ଘାଏ ଯୋହାର୍ ତେଙ୍ଗା। ଆଦ୍ ପ୍ରାଭୁସ୍‌କି ସେବା ନାଲ୍‌ଖୁନୁ ବହୁତ୍ ମେହ୍‌ନତ୍ କାମ୍‌ଚ୍‌କିଚି। ¹³ଭାଇ ରୁଫୁସ୍ ନେକାନ୍ କା ପ୍ରାଭୁସ୍‌କି ସେବା ନାଲ୍‌ଖୁଘି ଲାଗାନ୍ ଚାଜ୍ଜକା ରାଇ ଆରୁ ଆସ୍‌କି ଆୟାଙ୍ଗ୍‌ବନ୍ ଏକାଦ୍ କା ଏଙ୍ଘାଏହି ଆୟାଙ୍ଗ୍ ଲେଖା ରାଇ, ଆବ୍ଡ଼ା ଦୁହି ଲୋକ୍‌ରିନ୍ ଏଙ୍ଘାଏ ଯୋହାର୍ ତେଙ୍ଗା। ¹⁴ଆନ୍‌ସୁଙ୍କ୍ରିତୁସ୍, ଫିଲ୍‌ଗୋନ୍, ହିର୍‌ମେସ୍, ପତ୍ରୁବାସ୍ ଆରୁ ହିର୍‌ମାସ୍ ଭାଇଜାମାରିନ୍ ଆରୁ ଆବ୍ଡ଼ାର୍ ଗାନେ ରାନାବାଲା ଭାଇ ଆରୁ ବୁହୁଣୀରିନ୍ ଏଙ୍ଘାଏ ଯୋହାର୍ ତେଙ୍ଗା। ¹⁵ଭାଇ ଫିଲୁଲୁଗୁସ୍ ଆରୁ ବୁହୁଣୀ ଜୁଲିୟାବନ୍ ଏଙ୍ଘା ଯୋହାର୍ ତେଙ୍ଗା। ଆରୁ ଭାଇ ନେର୍‌ଗୁସ୍ ଆରୁ ଆସ୍‌କି ବୁହୁଣୀ ଆରୁ ଭାଇ ଓଲୁମ୍ପାସ୍ ଆରୁ ଆବ୍ଡ଼ାର୍ ଗାନେ ରାନାବାଲା ଜାମା ବିଶ୍ୱାସୀରିନ୍‌ହି ଏଙ୍ଘା ଯୋହାର୍ ତେଙ୍ଗା। ¹⁶ଏକ୍ ଦୁସ୍‌ରାର୍‌ଗାନେ ବହୁତ୍ ବାନେ ହାଖ୍ଖନାତି ଚାହାନୁ କାଇକିରି ଯୋହାର୍ କାମା। ନିମାନ୍ ଖ୍ରୀସ୍ତ୍‌ସ୍‌କି ଜାମା ମଣ୍ତ୍‌ଲୀଘି ତାର୍‌ତି ଯୋହାର୍।

ପାଉଲୁସ୍‌କି ଆଖ୍‌ରୀ ସାଲାହ୍

¹⁷ହେ ଏଙ୍ଘା ପ୍ୟାରେ ଭାଇ ଆରୁ ବୁହୁଣୀରୋ, ଆକ୍କୁନ୍ ଏନ୍ ନିମାନ୍ ଆର୍‌ଜୀବିନ୍ତି କାମ୍‌ଦାନ୍ କା ନିମ୍ ଆବ୍ଡ଼ାରିନ୍ ଚିହ୍ନା ଆରୁ ସାବ୍‌ଧାନ୍ ରା ଏକାନ୍ ନିମାନ୍ ଶିଖାବାକେର୍‌କିଚା ଆଦ୍‌ଘି ବିରୋଧ୍ ଶିଖାବିକିରି ନିମାନ୍ ଭାଗ୍-ଭାଗ୍ କାମ୍‌ନାଏଚିନାଏ ଆରୁ ବିଶ୍ୱାସୀରିନ୍ ପାର୍‌ମେଶ୍ୱାର୍‌ସ୍‌ତି ଗେଚ୍ଛା ହୋନାଏକାନାଏ। ¹⁸ଏନ୍ଦେର୍‌ଗେକା ଏନ୍ନେ ଆଲାର୍ ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍‌ସ୍‌କି ସେବା ମା କାମ୍‌ନାଏ, ଲେକିନ୍ ନିଜର୍ କୁଲୁଘିଲାଗାନ୍ ସେବା କାମ୍‌ନାଏ, ଫାଏଦାଘି ଲାଗାନ୍ ସେବା କାମ୍‌ନାଏ, ଆରୁ ଚିକ୍‌ଣା-ଚିକ୍‌ଣା କାତ୍‌ଥା କାମିକିରି ସାଧାସିଧା ଆଲାରିନ୍ ଫୁସ୍‌ଲାନାଏ। ¹⁹ଲେକିନ୍ ଜାମା ବିଶ୍ୱାସୀ ଆଲାର୍ ଆଖିୟାର୍ କା, ନିମ୍ ପ୍ରାଭୁସ୍‌କି ହୁକୁମ୍‌ବନ୍ ମାନ୍‌ଦାର୍, ହୁଦ୍‌ଘିଲାଗାନ୍ ଏନ୍ ନିହ୍ମା ବାରେନୁ ଲୀଝ୍‌ର୍‌ଦାନ୍। ଲେକିନ୍ ଏନ୍ ଚାହାଁଲ୍‌ଦାନ୍ କା ନିମ୍ ବାନେ ନାଲ୍‌ଖୁନ୍ କାମ୍‌ନାନୁ ବୁଦ୍ଧିୟାର୍ ମାନା, ଆରୁ ଖାରାପ୍ ନାଲ୍‌ଖୁସ୍ତି ଗେଚ୍ଛା ରା। ²⁰ଶାନ୍ତି ଚିନାବାଲା ପାର୍‌ମେଶ୍ୱାର୍‌ସ୍ ଶାଏତାନ୍‌ବନ୍ ନାଶ୍ କାମିକିରି ନିହ୍ମା ହେଡ୍ଡୁ କିୟାଁ ଟିଡ଼ସ୍‌ଚସ୍। ଆରୁ ଏନ୍ ବିନ୍ତି କାମ୍‌ଦାନ୍ କା ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍‌ସ୍‌କି କ୍ରିପା ନିହ୍ମା ମିଆଁ ହାଖ୍ଖର୍‌ତେ ରାନାଦ୍।

²¹ତୀମଥିଉସ୍ ଏକାସ୍ ଏଙ୍ଘାଗାନେ ସେବା ନାଲ୍‌ଖୁ କାମ୍‌ଦାସ୍, ଆରୁ ଏଙ୍ଘା ନିଜର୍ ୟାହୁଦୀ ଲୁକିୟୁସ୍, ଯାସୋନ୍ ଆରୁ ସୋସିପତ୍ରୁସ୍, ଇବ୍ଡ଼ାର୍ ଜାମାର୍ ନିମାନ୍ ଯୋହାର୍ ତେଙ୍ଗାଲ୍‌ନାଏ। ²²ଏନ୍ ତିରିତ୍‌ୟୁସ୍ ପାଉଲୁସ୍‌କି ଲାଗାନ୍ ଇ ଚିଠିନ୍ ଲେଖାଲ୍‌ଦାନ୍, ଏନ୍‌ହି ପ୍ରାଭୁସ୍‌କି ନାମେନୁ ନିମାନ୍ ଯୋହାର୍ ତେଙ୍ଗାଲ୍‌ଦାନ୍। ^23-24ଭାଇ ଗାୟୁସ୍ ନେଖା ଆଡ଼୍‌ପାନୁ କା ଏନ୍ ଆକ୍କୁନ୍ ରାଦାନ୍ ଆରୁ ନେଖା ଆଡ଼୍‌ପାନୁ କା ବିଶ୍ୱାସୀ ଆଲାର୍ ଆରାଧାନା କାମାଗେ ଠୁଡ଼ିୟାରାନାଏ, ଆବ୍ଡ଼ାର୍ ନିମାନ୍ ଯୋହାର୍ ବାଲ୍‌ନାଏ। ଆରୁ ଇ ସହର୍‌ତା ଖାଜାଞ୍ଚୀ ଭାଇ କ୍ୱାର୍‌ତୁସ୍‌ହି ନିମାନ୍ ଯୋହାର୍ ତେଙ୍ଗାଲ୍‌ଦାସ୍।

²⁵ପାର୍‌ମେଶ୍ୱାର୍‌ସ୍‌କି ସ୍ତୁତି ମାନ୍ନାଦ୍, ଏନ୍ଦେର୍‌ଗେକା ଏକା ସୁସାମାଚାର୍ ଏନ୍ ପ୍ରଚାର୍ କାମ୍‌ଦାନ୍, ଆଦ୍‌ଘି ଅନୁସାର୍ ଆଦିନ୍ ଯୀଶୁ ଖ୍ରୀସ୍ତ୍‌କି ମିଆଁ ବିଶ୍ୱାସ୍‌ନୁ ମଜ୍‌ବୁତ୍ କାମାଗେ ଶକ୍ତି ରାଇଦ୍। ଆରୁ ଏକା ସୁସାମାଚାର୍ ଯୁଗ୍-ଯୁଗ୍‌ତି ପାର୍‌ମେଶ୍ୱାର୍‌ସ୍ ନୁଡ଼୍‌କାଦାସ୍, ଆବନ୍ ଆସ୍ ଆକ୍କୁନ୍ ଜାମା ଆଲାର୍‌ସାନ୍ ଏଦ୍‌କାଦାସ୍। ²⁶ଆରୁ ଯୀଶୁ ଖ୍ରୀସ୍ତ୍‌କି ବାରେ ଏକାନ୍ ଏନ୍ ପ୍ରଚାର୍ କାମ୍‌ଦାନ୍, ଆଦିନ୍ ଆ ନୁଡ୍‌କା ସୁସାମାଚାର୍‌ଦ୍। ପହ୍‌ଲେ ନାବୀଜାମାର୍ ତାହ୍ମା ବହିନୁ ଯୀଶୁ ଖ୍ରୀସ୍ତ୍‌କି ବାର୍‌ନାଘି ବାରେ ବାତାବାଚ୍‌କାଚାର୍। ଆକ୍କୁନ୍ ସବୁଦିନ୍ ରାନାବାଲା ପାର୍‌ମେଶ୍ୱାର୍‌ସ୍ ହୁକୁମ୍ ଚିଇକିରି ବାତାବାଚ୍‌ କା, ଦୁନିଆଁନ୍ତା ଜାମା ଜାତିନ୍ତା ଆଲାରିନ୍ ଇ ସୁସାମାଚାର୍‌ବନ୍ ତେଙ୍ଗ୍‌ନା କାତ୍‌ଥା। ତାକା ଆଦ୍ ଏକାନ୍ ତେଙ୍ଗି, ଆବନ୍ ଜାମାର୍ ବିଶ୍ୱାସ୍ କାମର୍ ଆରୁ ମାନର୍। ²⁷ଆରୁ ନାହ୍ମା ଅଣ୍ଟା ଖାଲି ପାର୍‌ମେଶ୍ୱାର୍‌ସ୍ ରାଦାସ୍ ଆରୁ ଆସ୍ ଅଥାସ୍ ବୁଦ୍ଧିୟାର୍ ରାଦାସ୍। ଆରୁ ଯୀଶୁ ଖ୍ରୀସ୍ତ୍‌ ଏକାନ୍ କାମ୍‌ଚ୍‌କାଦାସ୍, ଆଦ୍‌ଘି ଦ୍ୱାର୍‌ନୁ ପାର୍‌ମେଶ୍ୱାର୍‌ସ୍‌କି ମାହିମା ଯୁଗ୍-ଯୁଗ୍ ମାନ୍ନାଦ୍। ଆମେନ୍।