ଯୋହାନ୍ସ୍କି ପ୍ରକାଶିତ୍ ଏର୍କା ବଚନ୍
ବହିଘି ପରିଚୟ
ଯୋହାନ୍ସ୍ ଇ ପ୍ରକାଶିତ୍ ବଚନ୍ବନ୍ ଏନ୍ନେ ସାମାୟନୁ ଲେଖ୍ଚ୍କାଦାସ୍, ଯେତ୍କବାକେନ୍ କା ଖ୍ରୀସ୍ତ୍ ବିଶ୍ୱାସୀରିନ୍ ସାତାବାଲିୟାର୍। ଆବ୍ଡ଼ାର୍ଘି ବିଶ୍ୱାସ୍ଘି ଲାଗାନ୍ ଆବ୍ଡ଼ାରିନ୍ ସାତାବାଲିୟାର୍। ଏନ୍ଦେର୍ଗେକା ଆବ୍ଡ଼ାର୍ ଯୀଶୁ ଖ୍ରୀସ୍ତ୍ସିନ୍ ତାହ୍ମା ପ୍ରାଭୁ ଆରୁ ମାଲିକ୍ ବୁଲି ବିଶ୍ୱାସ୍ କାମାଲିୟାର୍। ଲେଖକସ୍ ପାଢ଼ୁରିନ୍ ଭାର୍ଷା ଆରୁ ଉତ୍ସାହିତ୍ କାମ୍ତାଲ୍ଦାସ୍ କା ଆବ୍ଡ଼ାର୍ ଇ ଦୁଃଖୁ ଆରୁ ସାତାବାନାଘି ସାମାୟନୁ ବିଶ୍ୱାସ୍ କାମ୍ନାଘି ଲାଇଗ୍ ରର୍।
ପ୍ରକାଶିତ୍ ବଚନ୍ ପାର୍ମେଶ୍ୱାରସ୍କି ଆରୁଅହନ୍ ବାର୍ନାଘି ଉଲ୍ଲାନ୍ତା କାତ୍ଥାଗୁଠିନ୍ ଏଦିଦ୍। ଇ ଦୁନିଆଁନୁ ଖାରାପ୍ ଶକ୍ତିଗୁଠିଦ୍ ନାଲ୍ଖୁ କାମାଲିଦ୍। ପାର୍ମେଶ୍ୱାର୍ସ୍ ପ୍ରାଭୁ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ତାଙ୍ଘା ଜାମା ବିରୋଧିରିନ୍ ସବୁଦିନ୍ଘି ଲାଗାନ୍ ହାରାବସ୍ ଆରୁ ଏକା ଆଲାର୍ ପାର୍ମେଶ୍ୱାର୍ସ୍କି ସେବାନୁ ତାହ୍ମା ଜୀବନ୍ ସୋଁପଚେଇଚ୍କାନାଏ, ଆବ୍ଡ଼ାର୍ଗେ ପୁନା ଆକାଶ୍ ଆରୁ ପୁନା ଦୁନିଆଁବନ୍ ଚସ୍।
ରୂପ୍-ରେଖା
ଯୋହାନ୍ସ୍କି ଭବିଷତ୍ କାତ୍ଥା ଆରୁ ବିନ୍ତି ୧:୧-୮
ସୁରୁନ୍ତା ଦର୍ଶନ୍ ଆରୁ ସାତ୍ତେଟା ମଣ୍ଡ୍ଲୀଗେ ଚିଠି ୧:୯—୩:୨୨
ସାତ୍ତେଟା ମହଁର୍ତି ବନ୍ଦ କାମ୍ଚ୍କା ଚିଠି ୪:୧—୮:୧
ସାତ୍ତେଟା ତୁର୍ହି ବାଜା ୮:୨—୧୧:୧୯
ବଡ୍ଡାନେର୍ରୁ ଆରୁ ଯୋଡ଼େ ଜାନ୍ତୁ ୧୨:୧—୧୩:୧୮
ଦୁସ୍ରା-ଦୁସ୍ରା ଦର୍ଶନ୍ ୧୪:୧—୧୫:୮
ପାର୍ମେଶ୍ୱାର୍ସ୍କି ଖୀସ୍ଘି ସାତ୍ତେଟା କାଟୋରା ୧୬:୧-୨୧
ବାବିଲୋନ୍ଘି ଛାର୍ଖାର୍ ମାନ୍ନା, ଆରୁ ପଶୁ ଝୁଟ୍ଟୁ ନାବୀ, ଆରୁ ଶାଏତାନ୍ଘି ହାର୍ନା ୧୭:୧-୧୦
ଆଖ୍ରୀ ନ୍ୟାୟ ୨୦:୧୧-୧୫
ପୁନା ଆକାଶ୍, ପୁନା ଦୁନିଆଁ ଆରୁ ପୁନା ଯେରୁଶାଲେମ୍ ୨୧:୧—୨୨:୫
ଆଖ୍ରୀ କାତ୍ଥା ୨୨:୬-୨୧
11ଏକାନ୍ ଇ ବହିନୁ ଘାଟ୍ଣାଘି ବାରେ ଲେଖାକେର୍କିଚା ଆବନ୍ ପାର୍ମେଶ୍ୱାର୍ସ୍ ଯୀଶୁ ଖ୍ରୀସ୍ତ୍ସିନ୍ ପ୍ରକଟ୍ କାମ୍ଚାସ୍, ଏସ୍କେ କା ଆସ୍ ତାଙ୍ଘା ଗୁତ୍ତିୟାରିନ୍ ଏସ୍କିନ୍ଭି ଜାଲ୍ଦି ମାନ୍ନାବାଲା ଘାଟ୍ଣାଘି ବାରେ ଏଦୋସ୍; ଆରୁ ଯୀଶୁ ଖ୍ରୀସ୍ତ୍ ସରଗ୍ ଦୂଁତ୍ବନ୍ ତାଇୟିକିରି ତାଙ୍ଘା ସେବକ୍ ଯୋହାନ୍ସିନ୍ ଆହ୍ତାଚାସ୍। 2ଯୋହାନ୍ସ୍ ପାର୍ମେଶ୍ୱାର୍ସ୍କି ବଚନ୍ ଆରୁ ଯୀଶୁ ଖ୍ରୀସ୍ତ୍କି ସାକ୍ଷୀ ଚିଚ୍ଚାସ୍, ମତ୍ଲବ୍ ଆସ୍ ଏନ୍ଦ୍ରିନ୍ଭି ଏର୍କାଚାସ୍, ଆଦ୍ଘି ବାରେନୁ ସାକ୍ଷୀ ଚିଚ୍ଚାସ୍। 3ଧଏନ୍ ଆବ୍ଡ଼ାର୍ ଏକାର୍ କା ଇ ଭବିଷତ୍ କାତ୍ଥାବନ୍ ପାଢ଼୍ନାଏ, ଆରୁ ଏକାର୍ ଇ ବଚନ୍ବନ୍ ମେନ୍ନାଏ ଆରୁ ଇନ୍ନୁ ଲେଖ୍ଚ୍କା କାତ୍ଥାବନ୍ ପାଲନ୍ କାମ୍ନାଏ। ଏନ୍ଦେର୍ଗେକା ଆ ସାମାୟ ଚାହାନୁ ରାଇ।
ଯୋହାନ୍ସ୍ ସାତ୍ତେଟା ମଣ୍ତ୍ଲୀବନ୍ ଯୋହାର୍ ତେଙ୍ଗାଲ୍ଦାସ୍
4ଯୋହାନ୍ସ୍କି ତାର୍ତି ଆସିଆ ଏରିୟାନୁ ରାନା ସାତ୍ତେଟା ମଣ୍ତ୍ଲୀଘି ନାମେନୁ ଚିଠି ଲେଖାଲ୍ଦାନ୍:
ଆ ପାର୍ମେଶ୍ୱାର୍ସ୍କି ତାର୍ତି ଏକାସ୍ ଆକ୍କୁନ୍ ରାଦାସ୍, ଆରୁ ଏକାସ୍ ସବୁଦିନ୍ଘି ଲାଗାନ୍ ରାଚାସ୍, ଆରୁ ଏକାସ୍ ବାର୍ନାବାଲା ରାଦାସ୍, ଆ ସାତ୍ତେଟା ଆତ୍ମାର୍ଘି ତାର୍ତି ଏକାସ୍ ଆସ୍କି ରାଜ୍ଗାଦୀଘି ଚାହାନୁ ରାଦାସ୍ 5ଆରୁ ଯୀଶୁ ଖ୍ରୀସ୍ତ୍ସ୍କି ତାର୍ତି ଏକାସ୍ କା ବିଶ୍ୱାସ୍ କାମ୍ନାଘି ଲାଇଗ୍ ସାକ୍ଷୀସ୍, ଆରୁ କେଚ୍ଚକାର୍ସ୍ତି ପହ୍ଲେ ଉଜ୍ଜନା ବାଲାସ୍, ଆରୁ ଦୁନିଆଁନ୍ତା ରାଜା ଜାମାର୍ଘି ରାଜାସ୍, ନିମାଗେ କ୍ରିପା ଆରୁ ଶାନ୍ତି ହାଖ୍ଖର୍ତେ ରାନାଦ୍।
ଆସ୍ ନାମାନ୍ ବାନେ ହାଖ୍ଖଦାସ୍, ଆରୁ ଆସ୍ ତାଙ୍ଘା ଜୀଆ ଚିଇକିରି ତାଙ୍ଘା ହେଁସୁତି ନାହ୍ମା ପାପ୍ତି ଛୁଡ଼ାବାଚାସ୍। 6ଆସ୍ ନାମାନ୍ ଅଣ୍ଟା ରାଜୀ ଚାହେ ନିଜର୍ ମାହାନ୍ ବାଙ୍ଗ୍ ପାର୍ମେଶ୍ୱାର୍ସ୍କି ସେବାନୁ ପୁରୋହିତ୍ ବାନାବାଚାସ୍। ଆସ୍କି ମାହିମା ଆରୁ ଶକ୍ତି ସବୁଦିନ୍ଘି ଲାଗାନ୍ ମାନ୍ତେ ରଦ୍। ଆମେନ୍! 7ମେନା, ଆସ୍ ବାଦ୍ଲିନୁ ବାର୍ନାବାଲା ରାଦାସ୍, ଆରୁ ଜାମାର୍ ଆସିନ୍ ଏରୋର୍, ଏକାର୍ ଯୀଶୁସିନ୍ ଯୋବ୍ଚ୍କାଚାର୍, ଆବ୍ଡ଼ାର୍ହି ଆସିନ୍ ଏରୋର୍ ଆରୁ ଦୁନିଆଁନ୍ତା ଜାମା ଆଲାର୍ ଆସ୍କି ଲାଗାନ୍ ଏହୁ ଡେମ୍ରର୍, ଆଦ୍ ଜରୁର୍ ରାଇ। ଆମେନ୍।
8ପ୍ରାଭୁ ପାର୍ମେଶ୍ୱାର୍ସ୍, ଏକାସ୍ ରାଦାସ୍, ଏକାସ୍ ରାଚାସ୍ ଆରୁ ଏକାସ୍ ବାର୍ନାବାଲା ରାଦାସ୍, ଏକାସ୍ ଜାମାର୍ଘିନ୍ତି ଶକ୍ତିଶାଲୀ ରାଦାସ୍, ଏନ୍ନେ ତେଙ୍ଗ୍ଦାସ୍, “ଆଲ୍ଫା ଆରୁ ଓମେଗା ମତ୍ଲବ୍ ଏନିନ୍ ସୁରୁ ଆରୁ ଆଖ୍ରୀନ୍।”
ଯୋହାନ୍ସ୍କେ ଖ୍ରୀସ୍ତ୍କି ଦର୍ଶନ୍
9ଏନ୍ ଯୋହାନ୍, ଯୀଶୁସ୍କି ମିଆଁ ନିହ୍ମାଏ ଭାଇ ଆରୁ ତକ୍ଲିପ୍ନୁ, ରାଜୀ ଆରୁ ଧିରାଜ୍ନୁ ନିହ୍ମାଏ ଭାଗିଦାର୍ନ୍। ପାର୍ମେଶ୍ୱାର୍ସ୍କି ସୁସାମାଚାର୍ଘି ପ୍ରଚାର୍ କାମ୍ନା ଚାହେ ଯୀଶୁସ୍କି ବାରେ ସାକ୍ଷୀ ଚିନାଘି ଲାଗାନ୍ ପାତ୍ମସ୍ ନାମେଘି ଟାପୁନୁ ରାଚ୍କାନ୍। 10ଏନ୍ ପ୍ରାଭୁସ୍କି ଉଲ୍ଲାନୁ ପାବିତାର୍ ଆତ୍ମାତି ଭାର୍ପୁର୍ ମାନ୍ଚ୍କାନ୍ କେର୍କାନ୍, ଆରୁ ଏଙ୍ଘା ପାଛ୍ଲି ତୁର୍ହି ବାଜା ଲେଖା ଅଣ୍ଟା ବାଡ଼୍କା ଶବଦ୍ ମେନ୍ଚ୍କାନ୍, 11“ନିନ୍ ଏକାନ୍ ଦର୍ଶନ୍ କାମ୍ଦାଏ, ଆବନ୍ ଅଣ୍ଟା ବହିନୁ ଲେଖିକିରି ଇ ଇଫିସୁସ୍, ସ୍ମୁର୍ନା, ପିର୍ଗମୁନ୍, ଥୁୟାଥୀରା, ସାର୍ଦୀସ୍, ଫିଲାଦେଲ୍ଫିଆ ଆରୁ ଲାଉଦୀକିଆଗେ ସହର୍ତା ସାତ୍ତେଟା ମଣ୍ଡ୍ଲୀଗେ ତାଇୟାଚା।”
12ଆଙ୍ଗେନ୍ ନେଦ୍ ଏଙ୍ଘାଗାନେ କାଚ୍ନେଖ୍ରାଲ୍ନାଏ, ଆବନ୍ ଏରାଗେ ଏନ୍ ପାଛ୍ଲି କିର୍ର୍ଚେ ଏର୍କାନ୍ ଆରୁ ପାଛ୍ଲି କିର୍ରେ ଏରିକିରି ସୋନାଘି ସାତ୍ତେଟା ବିଲ୍ଲୀ ଉଇନା ଖୁଟାବନ୍ ଏର୍କାନ୍। 13ଆରୁ ଆ ବିଲ୍ଲୀ ଖୁଟା ମାଝାନୁ ମୁନୁଷ୍ ହାଦ୍ଦୁସ୍କି ଲେଖା ଅଣ୍ଟା ଆଲାସିନ୍ ଏର୍କାନ୍, ଆସ୍ ଗୁଢ଼ିତକ୍ ଚିଢ଼ା ଆତ୍ତକାଚାସ୍, ଆରୁ ଏହୁନୁ ସୋନାଘି ପଟି ହିର୍କା ରାଚା। 14ଆସ୍କି କୁକ୍କୁ ଆରୁ ଚୁଟ୍ଟି ରୁଆଁ ଲେଖା ଧୋବ୍ ରାଚା, ଆରୁ ଆସ୍କି ହାନ୍ନୁ ରାଓଁ-ରାଓଁ ଚିଚ୍ଚୁ ଲେଖା ରାଚା। 15ଆସ୍କି ହେଡ୍ଡୁଦ୍ ଭାଠାନୁ ସାଜ୍ଜକା ଚାମ୍କାରାନା ପିତ୍ତାଲି ଲେଖା ରାଚା, ଆରୁ ଆସ୍କି ଶବଦ୍ ବାଡ଼୍କା ଝାର୍ନାଘି ଗାର୍ଜାରାନା ଲେଖା ମେନ୍ଦ୍ରାଲିୟାଦ୍। 16ଆସ୍ ତାଙ୍ଘା ତିନା ହେଖ୍ଖାନୁ ସାତ୍ତେଟା ବିନ୍କୋ ଧାର୍ଚ୍କାଚାସ୍, ଆରୁ ଆସ୍କି ଥୁମ୍ଣାନ୍ତି ଅଣ୍ଟା ଯୋଡ଼େ ଧାର୍ ରାନାବାଲା ଖଣ୍ଡା ଉର୍ଖାଲିୟାଦ୍, ଆରୁ ଆସ୍କି ଚେହେରାଦ୍ କୁଚ୍ଚାପୋ ମାନ୍ଚ୍କୁନ୍ ବିଡ଼ିଦ୍ ଏସ୍କେ ବିଲ୍ଚିଦ୍ ଆନ୍ନେ ବିଲ୍ଚାଲିୟାଦ୍। 17ଆସିନ୍ ଏରିକିରି ଏନ୍ ଆସ୍କି ହେଡ୍ଡମୁଲିନୁ କେଚ୍ଚକାର୍ ଲେଖା ଖାତ୍ର୍କାନ୍ କେର୍କାନ୍। ଆଙ୍ଗେନ୍ ଆସ୍ ଏଙ୍ଘା ମିଆଁ ତାଙ୍ଘା ତିନା ହେଖ୍ଖାନ୍ ଉଇୟିକିରି ତେଙ୍ଗିୟାସ୍, “ଆମା ଏଲ୍ଚା; ଏନ୍ ସୁରୁ ଆରୁ ଆଖ୍ରୀତକ୍ ଉଜ୍ଜାଲ୍ଦାନ୍। 18ଏନ୍ କେଚ୍ଚକାନ୍ କେର୍କାଚ୍କାନ୍ ଆରୁ ଏରା ଆକ୍କୁନ୍ ଏନ୍ ଯୁଗ୍-ଯୁଗ୍ତକ୍ ଉଜ୍ଜନ୍। ଆରୁ ଏଙ୍ଘା ହେଖ୍ଖାନୁ ମରନ୍ ଆରୁ ନରକ୍ ଗାଡ୍ଡିଘି ମିଆଁ ହକ୍ ରାଇ। 19ହୁଦ୍ଘିଲାଗାନ୍ ଏକା କାତ୍ଥାନ୍ ନିନ୍ ଏର୍କାଦାଏ ଆରୁ ଏକା କାତ୍ଥା ମାନାଲିଦ୍ ଆରୁ ଏକା କାତ୍ଥା ଇଦ୍ଘି ପାଛ୍ଲି ମାନ୍ନାବାଲା ରାଇଦ୍, ଆ ଜାମାନ୍ ଲେଖା ଉୟା। 20ନିନ୍ ଏକା ସାତ୍ତେଟା ବିନ୍କୋବନ୍ ଏଙ୍ଘା ତିନା ହେଖ୍ଖାନୁ ଏର୍କାଏ, ଆଦ୍ଘି ଆରୁ ସୋନାଘି ସାତ୍ତେଟା ବିଲ୍ଲୀ ଖୁଟାଘି ନୁହ୍ର୍କା ଇଦ୍ଘି ଲେଖା ରାଇ: ସାତ୍ତେଟା ବିନ୍କୋ ସାତ୍ତେଟା ମଣ୍ଡ୍ଲୀନ୍ତା ସରଗ୍ ଦୂଁତ୍ଦ୍, ଆରୁ ସାତ୍ତେଟା ବିଲ୍ଲୀ ଖୁଟାଦ୍ ସାତ୍ତେଟା ମଣ୍ଡ୍ଲୀଦ୍।”
2ଇଫିସୁସ୍ ସହର୍ତା ଖ୍ରୀସ୍ତିୟା ମଣ୍ତ୍ଲୀର୍ଗେ ଖବର୍
1“ନିନ୍ ଇଫିସୁସ୍ ସହର୍ତା ଖ୍ରୀସ୍ତିୟା ମଣ୍ତ୍ଲୀନ୍ତା ଦୂଁତ୍ଗେ ଏନ୍ନେ ଲେଖା:
ଏକାସ୍ ତାଙ୍ଘା ତିନା ହେଖ୍ଖାନୁ ସାତ୍ତେଟା ବିନ୍କୋ ଧାର୍ଚ୍କାଦାସ୍ ଆରୁ ସୋନାଘି ସାତ୍ତେଟା ବିଲ୍ଲୀ ଖୁଟାଘି ମାଝାନୁ କୁଦ୍ଦଦାସ୍, 2ଆସ୍ ଏନ୍ନେ ତେଙ୍ଗାଲ୍ଦାସ୍ କା ଏନ୍ ନିଙ୍ଘା ନାଲ୍ଖୁ, ନିଙ୍ଘା ଖାଟ୍କାନ୍ ଆରୁ ନିଙ୍ଘା ଧିରାଜ୍ବନ୍ ଆହ୍ଦାନ୍। ଆରୁହି ଆହ୍ଦାନ୍ କା ନିନ୍ ଖାରାପ୍ ଆଲାର୍ଘି ନାଲ୍ଖୁନ୍ ସାହା ପଲ୍ଲଦାରିନ୍; ଆରୁ ଏକାର୍ ନିଜ୍କେନିଜ୍ ଖାସ୍ଚେଲା ବାନାଏ, ଲେକିନ୍ ଅସଲ୍ନୁ ଖାସ୍ଚେଲା ମାଲ୍ନାଏ, ଆବ୍ଡ଼ାରିନ୍ ନିନ୍ ବିଡ଼୍ଚେ ଏରିକିରି ଝୁଟ୍ଟୁର୍ ବୁଲି ଆକ୍କାଦାର୍। 3ନିନ୍ ଧିରାଜ୍ ଧାର୍ଦିନ୍ ଆରୁ ଏଙ୍ଘା ନାମେଘି ଲାଗାନ୍ ଦୁଃଖୁ ସାହ୍ତେ-ସାହ୍ତେ ମା ଥାକ୍ର୍କିନ୍ ହାଲେହି ଏଙ୍ଗାନ୍ ମା ଆମ୍ବକିନ୍। 4ହାଲେହି ନିଙ୍ଘା ବିରୁଦ୍ଧ୍ନୁ ଏଙ୍ଗା ଏନ୍ନେ ତେଙ୍ଗ୍ନା ରାଇ କା ନିନ୍ ଏଙ୍ଗାନ୍ ଆଘ୍ଲିନ୍ତା ଲେଖା ବାନେ ହାଖ୍ଖନାନ୍ ଆମ୍ବେଇ ଚିଚ୍ଚକିଦିନ୍। 5ହୁଦ୍ଘିଲାଗାନ୍ ବିଚାର୍ କାମୁ କା ନିନ୍ ଏକା ପାପ୍ନୁ ଖାତ୍ର୍କିଦିନ୍, ଆ ପାପ୍ଘି ଲାଗାନ୍ ପାସ୍ତାରୁ ଆରୁ ଆଘ୍ଲିନ୍ତା ଲେଖା ନାଲ୍ଖୁ କାମୁ। ଯଦି ନିନ୍ ମା ପାସ୍ତାରୟ ତା ଏନ୍ ନିଙ୍ଘାସାନ୍ ବାରୋନ୍ ଆରୁ ନିଙ୍ଘାଏ ବିଲ୍ଲୀ ଖୁଟାନ୍ ଆସ୍କି ଆଡ୍ଡାସ୍ତି ପାଖିୟନ୍ ଚନ୍। 6ଲେକିନ୍ ହଁ, ନିଙ୍ଘାଏନୁ ଅଣ୍ଟା ବାନେ ଗୁଣ୍ ରାଇ କା ନିନ୍ ନୀକୁଲାୟର୍ଘି ମୂର୍ତ୍ତୀ ପୂଜାନ୍ ଆରୁ ଖାରାପ୍ ନାଲ୍ଖୁନ୍ ହାଁଣ୍ଦିନ୍। ଏକାରିନ୍ କା ଏନ୍ହି ହାଁଣ୍ଦାନ୍। 7ଧିୟାନ୍ତି ମେନା କା ପାବିତାର୍ ଆତ୍ମାଦ୍ ମଣ୍ତ୍ଲୀବନ୍ ଏନ୍ଦେର୍ ତେଙ୍ଗାଲିଦ୍। ଏକାସ୍ ଜିତସ୍ ଆସ୍କେ ପାର୍ମେଶ୍ୱାର୍ସ୍ ସରଗ୍ନୁ ଏକା ସବୁଦିନ୍ତା ଜୀବନ୍ ମାନ୍ନୁ ରାଇ, ଆନ୍ନୁନ୍ତା ଫାଡ଼ୁନ୍ ମହାଁଗେ ଚିୟସ୍।”
ସ୍ମୁର୍ନା ସହର୍ତା ମଣ୍ତ୍ଲୀଗେ ଖବର୍
8“ନିନ୍ ସ୍ମୁର୍ନା ସହର୍ତା ଖ୍ରୀସ୍ତ୍ ମଣ୍ତ୍ଲୀନ୍ତା ଦୂଁତ୍ଗେ ଇବନ୍ ଲେଖା:
ଏକାସ୍ ସୁରୁ ଆରୁ ଆଖ୍ରୀସ୍, ଆସ୍ କେଚ୍ଚାସ୍ କେର୍କାଚାସ୍ ଆରୁ ଆକ୍କୁନ୍ ଉଜ୍ଜିୟାସ୍ କେର୍କାଦାସ୍, ଆସ୍ ଏନ୍ନେ ତେଙ୍ଗାଲ୍ଦାସ୍, 9ଏନ୍ ନିଙ୍ଘାଏ ତକ୍ଲିପ୍ ଆରୁ ଗରୀବ୍ବନ୍ ଆହ୍ଦାନ୍, ଅସଲ୍ନୁ ନିନ୍ ଧାନ୍ନୁୟ, ଆରୁ ଏକା ଆଲାର୍ ନିଜ୍କେ-ନିଜ୍ବନ୍ ୟାହୁଦୀ ବାନାଏ, ଅସଲ୍ନୁ ୟାହୁଦୀ ମାଲ୍ନାଏ, ଲେକିନ୍ ଶାଏତାନ୍ର୍ଘି ଦଲ୍ର୍, ଆରୁ ଆବ୍ଡ଼ାର୍ଘି ନିନ୍ଦାନ୍ହି ଏନ୍ ଆହ୍ଦାନ୍। 10ଏକା ନିଙ୍ଗାଗେ ସାହା ଖାତ୍ରୋ, ଆବ୍ଡ଼ାନ୍ ଆମୁ ଏଲ୍ଚୁ; ଏନ୍ଦେର୍ଗେକା ଶାଏତାନ୍ ନିମାନ୍ ବିଡ଼୍ଚେ ଏରାଗେ ନିହ୍ମାସ୍ତି ନେକା-ନେକାନ୍ ଜେହେଲ୍ନୁ ଗୁଡ଼୍ନା ବାଲା ରାଇ। ଆରୁ ନିମାଗେ ଦଶ୍ ଦିନ୍ତକ୍ ସାତାୱାଟ୍ ସାହା ଖାତ୍ରୋ। ନିମ୍ ଖିନାତକ୍ ବିଶ୍ୱାସ୍ କାମ୍ନାଘି ଲାଇଗ୍ ରା, ତା ଏନ୍ ନିମାଗେ ଜୀବନ୍ଘି ମୁକୁଟ୍ ଚନ୍। 11ଏକାର୍ଗେ ବୁଝୁର୍ନା ରାଇ ଆବ୍ଡ଼ାର୍ ଧିୟାନ୍ତି ମେନା କା, ପାବିତାର୍ ଆତ୍ମାଦ୍ ମଣ୍ତ୍ଲୀଗୁଠିନ୍ ଏନ୍ଦେର୍ ତେଙ୍ଗାଲିଦ୍। ଏକାସ୍ ଜିତସ୍ ଆସ୍କେ ଦୁସ୍ରା ମରନ୍ତି ଏନ୍ଦେର୍ହି ନୁକ୍ସାନ୍ ମା ମାନିଦ୍।”
ପିର୍ଗମୁନ୍ ସହର୍ତା ଖ୍ରୀସ୍ତିୟା ମଣ୍ତ୍ଲୀଗେ ଖବର୍
12“ନିନ୍ ପିର୍ଗମୁନ୍ ସହର୍ତା ଖ୍ରୀସ୍ତିୟା ମଣ୍ତ୍ଲୀନ୍ତା ଦୂଁତ୍ଗେ ଇବନ୍ ଲେଖା:
ନେଖାସାନ୍ ଯୋଡ଼େ ପାଖା ଧାରେ ରାନାବାଲା ଧାରେ ଖଣ୍ଡା ରାଇଦ୍ ଆସ୍ ଏନ୍ନେ ତେଙ୍ଗାଲ୍ଦାସ୍ କା 13ଏନ୍ ଆହ୍ଦାନ୍ କା ନିନ୍ ଏକାସାନ୍ ରାଦିନ୍, ଏକାସାନ୍ କା ଶାଏତାନ୍ଘି ରାଜ୍ଗାଦୀ ରାଇ; ହାଲେହି ନିନ୍ ଏଙ୍ଘା ନାମେନୁ ମଜ୍ବୁତ୍ ରାଦିନ୍; ଆରୁ ନିନ୍ ଆ ଉଲ୍ଲାନୁହି ଏଙ୍ଘା ମିଆଁ ନିଜର୍ ବିଶ୍ୱାସ୍ ମା ଆମ୍ବକିନ୍, ଯେତ୍କବାକେନ୍ ଏଙ୍ଘାଏ ବିଶ୍ୱାସ୍ ଲାଇଗ୍ ସାକ୍ଷୀ ଆନ୍ତିପାସ୍, ନିହ୍ମା ସହର୍ନୁ ଏକାସାନ୍ ଶାଏତାନ୍ଘି ରାନାବାଲା ଆଡ୍ଡା ରାଇ ଆସାନ୍ ପିଟାଚା କେରା। 14ଲେକିନ୍ ଏଙ୍ଗା ନିଙ୍ଘା ବିରୁଦ୍ଧ୍ନୁ କେତ୍କ କାତ୍ଥା ତେଙ୍ଗ୍ନା ରାଇ, ଏନ୍ଦେର୍ଗେକା ନିଙ୍ଘାସାନ୍ କେତ୍କର୍ ଏନ୍ନେ ରାନାଏ, ଏକାର୍ କା ବିଲିୟାମ୍ସ୍କି ଶିଖାବାଚ୍କାବନ୍ ମାନ୍ନାଏ, ଏକାସ୍ କା ବାଲାକ୍ ରାଜାସ୍ ଇସ୍ରାଏଲୀରିର୍ଘି ଆଘ୍ଲି ଠୋକର୍ଘି ଲାଗାନ୍ ଉଇନା ଶିଖାବାଚାସ୍ କା ଆବ୍ଡ଼ାର୍ ମୂର୍ତ୍ତୀଗୁଠିନୁ ଚାଢ଼ାବାଚ୍କା ଜିନିଷ୍ଗୁଠିନ୍ ମହଁର୍ ଆରୁ ବେଭିଚାର୍ କାମର୍। 15ନିହ୍ମା ମାଝାନୁ କେତ୍କ ଏନ୍ନେ ଆଲାର୍ହି ରାନାଏ, ଏକାର୍ ନୀକୁଲାୟର୍ଘି ଶିଖାବାଚ୍କାବନ୍ ମାନ୍ନାଏ। 16ହୁଦ୍ଘିଲାଗାନ୍ ପାସ୍ତାରୁ, ମାଲ୍ଲାହାଲେ ଏନ୍ ଚାଁଣେ ନିଙ୍ଘାସାନ୍ ବାରିକିରି ଏଙ୍ଘା ଥୁମ୍ଣାନ୍ତା ଧାରେ ଖଣ୍ଡାତି ଆବ୍ଡ଼ାର୍ ଗାନେ ଲାଡ଼ନ୍। 17ନିମ୍ ଧିୟାନ୍ ଚିଆ କା ପାବିତାର୍ ଆତ୍ମାଦ୍ ଖ୍ରୀସ୍ତିୟା ମଣ୍ତ୍ଲୀଗୁଠିନ୍ ଏନ୍ଦେର୍ ତେଙ୍ଗାଲି। ଏକାସ୍ ଜିତସ୍ ଆସ୍କେ ଏନ୍ ନୁହ୍ର୍କା ଲେଖା ମାନ୍ନାବନ୍ ଚିଅନ୍। ଆରୁ ଆସ୍କେ ଅଣ୍ଟା ଧୋବ୍ ଚାଁଚା ଚିଅନ୍; ଆ ଚାଁଚାନୁ ଅଣ୍ଟା ପୁନା ନାମେ ଲେଖ୍ଚ୍କା ରୋ, ଆବନ୍ ହାଖ୍ଖନା ବାଲାସିନ୍ ଆମ୍ବିକିରି ଆ ନାମେନ୍ ଆରୁ ନେଦ୍ହି ବାଲ୍ନାଇନ୍।”
ଥୁଆତୀରା ସହର୍ତା ଖ୍ରୀସ୍ତ୍ ମଣ୍ତ୍ଲୀଗେ ଖବର୍
18“ନିନ୍ ଥୁୟାଥୀରା ସହର୍ତା ଖ୍ରୀସ୍ତ୍ୟା ମଣ୍ଡ୍ଲୀନ୍ତା ଦୂଁତ୍ର୍ଗେ ଇବନ୍ ଲେଖା:
ପାର୍ମେଶ୍ୱାର୍ସ୍କି ହାଦ୍ଦୁସ୍ ଏକାସ୍କି ହାନ୍ନୁ ଲାଘ୍ର୍ନା ଚିଚ୍ଚୁ ଲେଖା ରାଇ, ଆରୁ ଏକାସ୍କି ପାଦୁ ଭାଠାନୁ ସାଜ୍ଜକା ଚାମ୍କାରାନା ପିତ୍ତାଲି ଲେଖା ରାଇ, ଆସ୍ ଏନ୍ନେ ତେଙ୍ଗାଲ୍ଦାସ୍, 19ଏନ୍ ନିଙ୍ଘା ନାଲ୍ଖୁନ୍, ନିଙ୍ଘା ବାନେ ହାଖ୍ଖନା, ବିଶ୍ୱାସ୍, ସେବା ଆରୁ ଧିରାଜ୍ବନ୍ ଆହ୍ଦାନ୍ କା ନିନ୍ ଆଘ୍ଲିନ୍ତିହି ଆକ୍କୁନ୍ ବାଗ୍ଗେ ନାଲ୍ଖୁ କାମାଲ୍ଦିନ୍। 20ଲେକିନ୍ ଏଙ୍ଗା ନିଙ୍ଘା ବିରୁଦ୍ଧ୍ ଏନ୍ନେ ତେଙ୍ଗ୍ନା ରାଇ କା ନିନ୍ ଇଜେବେଲ୍ବନ୍ ରାଗେ ଆଡ୍ଡା ଚିଚ୍ଚକି, ଏକାଦ୍ କା ନିଜ୍କେନିଜ୍ବନ୍ ଭବିଷତ୍ କାତ୍ଥା ଆହେନ୍ ବୁଲି ତେଙ୍ଗିକିରି ଆରୁ ଏଙ୍ଘା ଗୁତ୍ତିୟାରିନ୍ ବେଭିଚାର୍ କାମାଗେ ଆରୁ ମୂର୍ତ୍ତୀସାନ୍ ଚାଢ଼ାବାଚ୍କା ଜିନିଷ୍ଗୁଠିନ୍ ମହାଁଗେ ଫୁସ୍ଲାବିଦ୍। 21ଏନ୍ ଆବନ୍ ପାସ୍ତାରାଗେ ମୋଉକା ଚିଚ୍କାନ୍, ହାଲେହି ଆଦ୍ ତାଙ୍ଘା ବେଭିଚାର୍ବନ୍ ଆମ୍ବିକିରି ପାସ୍ତାରା ମା ବେଦ୍ଦିୟାଦ୍। 22ମେନା, ଯଦି ଆବ୍ଡ଼ାର୍ ନିଜର୍ ଜାମା ଖାରାପ୍ ନାଲ୍ଖୁନ୍ତି ମା ପାସ୍ତାରର୍ ତା ଏନ୍ ଆବ୍ଡ଼ାରିନ୍ ବେମାର୍ତି ନାଟ୍ରୁନୁ ଟିଡ଼ନ୍ଚନ୍; ଆରୁ ଏକାର୍ ଆଦ୍ଘିଗାନେ ବେଭିଚାର୍2:22 ବେଭିଚାର୍ ପାର୍ମେଶ୍ୱାର୍ସ୍କି ବଚନ୍ ମା ମାନ୍ନାବାଲା କାମ୍ନାଏ, ତା ଏନ୍ ଆବ୍ଡ଼ାରିନ୍ ବାଡ଼୍କା ଦୁଃଖୁନୁ ଟିଡ଼ନ୍ଚନ୍। 23ଏନ୍ ଆଦ୍ଘି ହାଦ୍ଦୁବଚ୍ଚରିନ୍ ପିଟନ୍ଚନ୍; ଆଙ୍ଗେନ୍ ଜାମା ମଣ୍ଡ୍ଲୀଦ୍ ଆହଦ୍ କା ଏନ୍ ଜାମାର୍ଘି ମନ୍ ଆରୁ ଜୀଆବନ୍ ଆହ୍ନା ବାଲାନ୍ ଏନିନ୍। ଆରୁ ଏନ୍ ନିହ୍ମାସ୍ତି ଅର୍ତୁ ଅର୍ତୁରିନ୍ ନିହ୍ମା ନାଲ୍ଖୁଘି ଲେଖା ବାଦ୍ଲା ହୋନ୍। 24ଆକ୍କୁନ୍ ଏଙ୍ଗାନ୍ ଥୁୟାଥୀରାନ୍ତା ଆ ବାକି ଆଲାରିନ୍ ଏନ୍ଦ୍ରିନ୍ ତେଙ୍ଗ୍ନା ରାଇ ଏକାର୍ ଇ ଶିକ୍ଷାନୁ ମା ଚାଲ୍ର୍ନାଏ, ଆରୁ ଏକାର୍ ଶାଏତାନ୍ଘି ଗାହିର୍ କାତ୍ଥାବନ୍ ବାଲ୍ଲନାଏ। ଏଙ୍ଗାଗେ ନିହ୍ମା ମିଆଁ ଏନ୍ଦେର୍ହି ଆରୁ ଭାର୍ ଚିନା ମାଲ୍ଲାଦିନ୍। 25ଏକା ଶିକ୍ଷା ନିହ୍ମାସାନ୍ ରାଇଦ୍, ଆବନ୍ ଏଙ୍ଘା ବାର୍ନାତକ୍ ଆଦ୍ଘି ମିଆଁ ମଜବୁତ୍ ମାନିକିରି ରା। 26ଏକାସ୍ ଜିତସ୍, ଏକାସ୍ ଆଖ୍ରୀତକ୍ ଏଙ୍ଘା ଇଚ୍ଛା ପୁରା କାମ୍ତେ ରସ୍, ଏନ୍ ଆସ୍କେ ରାଜୀଘି ମିଆଁ ଆ ହକ୍ ଚିଅନ୍। ଏସ୍କେ ଏଙ୍ଘା ବାଙ୍ଗ୍ସ୍ ଏଙ୍ଗାଗେ ଚିଚ୍କାଦାସ୍। 27ଚାହେ ଆସ୍ ଆବ୍ଡ଼ାର୍ଘି ମିଆଁ ପାନ୍ନାଘି ଛଡ଼୍ତି ଶାସନ୍ କାମସ୍। ଆରୁ ଆସ୍ ଆବ୍ଡ଼ାରିନ୍ କୁମ୍ଭରାର୍ଘି ହାଜ୍ଜୁଘି ଖୁରୀ ଗିନା ଲେଖା ଖଣ୍-ଖଣ୍ କାମଚସ୍। 28ଆରୁ ଏନ୍ ଆସ୍କେ ପାଇରିନ୍ତା ବିନ୍କୋନ୍ ହି ଚନ୍। 29ଧିୟାନ୍ ଚିକିରି ମେନର୍ କା ପାବିତାର୍ ଆତ୍ମାଦ୍ ଖ୍ରୀସ୍ତିୟା ମଣ୍ତ୍ଲୀଗୁଠିନ୍ ଏନ୍ଦେର୍ ତେଙ୍ଗାଲିଦ୍?”
3ସାର୍ଦୀସ୍ ସହର୍ତା ଖ୍ରୀସ୍ତ୍ ମଣ୍ତ୍ଲୀର୍ଗେ ଖବର୍
1“ନିନ୍ ସାର୍ଦୀସ୍ ସହର୍ ମଣ୍ତ୍ଲୀନ୍ତା ଦୂଁତ୍ଗେ ଏନ୍ନେ ଲେଖା:
ନେଖାସାନ୍ ପାର୍ମେଶ୍ୱାର୍ସ୍କି ସାତ୍ତେଟା ଆତ୍ମା ରାଇଦ୍, ଆରୁ ସାତ୍ତେଟା ବିନ୍କୋ ରାଇ, ଆସ୍ ଏନ୍ନେ ବାଲ୍ଦାସ୍କା ଏନ୍ ନିଙ୍ଘାଏ ନାଲ୍ଖୁବନ୍ ଆହ୍ଦାନ୍: ନିନ୍ ଉଜ୍ଜାଲ୍ଦାନ୍ ବୁଲି ତେଙ୍ଗ୍ର୍ଦାଏ, ଲେକିନ୍ ଅସଲ୍ନୁ କେଚ୍ଚ୍କାଦାଏ। 2ଚେତ୍ରିକିରି ରା, ଆରୁ ଏକା ଜିନିଷ୍ଦ୍ ବାକି ରାଚାକେର୍କିଚି ଆରୁ ଏକାଦ୍ ନୁହ୍ର୍ନା ବାଲା ରାଇଦ୍, ଆବନ୍ ମଜ୍ବୁତ୍ କାମା; ଏନ୍ଦେର୍ଗେକା ଏନ୍ ନିଙ୍ଘାଏ ଏକା ନାଲ୍ଖୁବନ୍ହି ଏଙ୍ଘା ପାର୍ମେଶ୍ୱାର୍ସ୍କି ଚାହାନୁ ପୁରା ମାଲ୍ଲା କାମୁନ୍। 3ହୁଦ୍ଘିଲାଗାନ୍ ନିନ୍ ଏକାନ୍ ଶିଖ୍ର୍କିଦିନ୍ ଆରୁ ମେନ୍ଚ୍କିଦିନ୍ ଆବନ୍ ଧିୟାନ୍ କାମୁ ଆରୁ ଆବନ୍ ମାନୁ ଆରୁ ପାସ୍ତାରୁ। ଯଦି ନିନ୍ ଚେତ୍ରିକିରି ମା ରୟତା ଏନ୍ ଚୋର୍ହାର୍ ଲେଖା ବାରନ୍, ଆରୁ ନିନ୍ ବାଲ୍ଦିନ୍ କା ଏନ୍ ଏକା ବାକେନ୍ ନିଙ୍ଘାସାନ୍ ବାରନ୍। 4ଲେକିନ୍ ହଁ ସାର୍ଦୀସ୍ନୁ ନିଙ୍ଘାସାନ୍ କେତ୍କ ଲୋକ୍ ଏନ୍ନେ ରାନାଏ, ଏକାର୍ କା ନିଜର୍-ନିଜର୍ ଚିଢ଼ାନ୍ ମାଏଲା ମାଲ୍ଲା କାମୁର୍, ଆବ୍ଡ଼ାର୍ ଧୋବ୍ ଚିଢ଼ା ଆତ୍ତିକିରି ଏଙ୍ଘାଗାନେ କୁଦ୍ଦର୍ ଏନ୍ଦେର୍ଗେକା ଆବ୍ଡ଼ାର୍ ଇଦ୍ଘି ଲାଇଗ୍ ରାନାଏ। 5ଏକାସ୍ ଜିତସ୍ ଆସିନ୍ ଏନ୍ନେନିନ୍ ଧୋବ୍ ଚିଢ଼ା ଆତ୍ତ୍ତାକୋ ଆରୁ ଏନ୍ ଆସ୍କି ନାମେ ଜୀବନ୍ ବହିନ୍ତି ଏସ୍କିନ୍ହି ମା ମେଟାବାଦାନ୍; ଲେକିନ୍ ଆସ୍କି ନାମେନ୍ ଏଙ୍ଘା ବାଙ୍ଗ୍ ଆରୁ ସରଗ୍ ଦୂଁତ୍ଜାମାର୍ଘି ଆଘ୍ଲି ସ୍ୱୀକାର୍ କାମନ୍। 6ଆବ୍ଡ଼ାର୍ ଧିୟାନ୍ ଚିକିରି ଆବନ୍ ମେନା କା ପାବିତାର୍ ଆତ୍ମାଦ୍ ମଣ୍ଡ୍ଲୀଗୁଠିନ୍ ଏନ୍ଦେର୍ ତେଙ୍ଗାଲିଦ୍।”
ଫିଲାଦେଲ୍ଫିଆ ସହର୍ତା ଖ୍ରୀସ୍ତ୍ ମଣ୍ତ୍ଲୀଗେ ଖବର୍
7“ନିନ୍ ଫିଲାଦେଲ୍ଫିଆ ମଣ୍ଡ୍ଲୀନ୍ତା ଦୂଁତ୍ଗେ ଏନ୍ନେ ଲେଖା:
ଏକାସ୍ ପାବିତାର୍ ଆରୁ ସତ୍ତୁସ୍,ଏକାସ୍କି ହେଖ୍ଖାନୁ ଦାଉଦ୍ସ୍କି ଚାଭି ରାଇ, ଏକାସ୍କି ଖୋଲ୍ଚ୍କାନ୍ ନେର୍ହି ବନ୍ଦ୍ କମା ପଲ୍ଲନାଇନ୍ ଆରୁ ବନ୍ଦ୍ କାମ୍ଚ୍କାନ୍ ନେର୍ହି ଖୋଲା ପଲ୍ଲନାଇନ୍, 8ଆସ୍ ଏନ୍ନେ ତେଙ୍ଗ୍ଦାସ୍ କା ଏନ୍ ନିଙ୍ଘା ନାଲ୍ଖୁନ୍ ଆହ୍ଦାନ୍; ମେନା, ଏନ୍ ନିଙ୍ଘା ସାମ୍ନାନୁ ଅଣ୍ଟା ବାଲି ଖୋଲ୍ଚ୍କାଦାନ୍, ଆବନ୍ ନେଦ୍ହି ମୁଚ୍ଚା ପଲ୍ଲନାଇନ୍; ଆରୁ ଏନ୍ ଆହ୍ଦାନ୍ କା ନିଙ୍ଘା ଶକ୍ତିତା ଥୋଡ଼େକେନ୍ ରାଇ, ହାଲେହି ନିନ୍ ଏଙ୍ଘା ବଚନ୍ବନ୍ ମାନ୍ଚ୍କିଦିନ୍ ଆରୁ ଏଙ୍ଘା ନାମେନ୍ ମାନା ମାଲ୍ଲା କାମୁୟ। 9ମେନା, ଏକାର୍ ୟାହୁଦୀ ମାଲ୍ନାଏ, ଲେକିନ୍ ନିଜ୍କେନିଜ୍ ୟାହୁଦୀ ବୁଲି ତେଙ୍ଗିକିରି ଠାକ୍ନାଏ, ଏନ୍ନେ ଶାଏତାନ୍ ଦଲ୍ତା ଆଲାରିନ୍ ଏନ୍ ଅନ୍ଦ୍ରିକିରି ନିଙ୍ଘା ହେଡ୍ଡ୍ ମୁଲିନୁ ଟିଡ଼୍ନ୍ ଚନ୍ ଆରୁ ଏନ୍ ନିଙ୍ଗାନ୍ ବାନେ ହାଖ୍ଖଦାନ୍, ଇବନ୍ ଆବ୍ଡ଼ାରିନ୍ ଏଦୋନ୍ ଚିଅନ୍। 10ନିନ୍ ଏଙ୍ଘାଏ ସାତାୱାଟ୍ଘି ସାମାୟନୁ ଧିରାଜ୍ଘି ବଚନ୍ବନ୍ ବାଚାବାଚ୍କି ଉଇକିରୋ, ହୁଦ୍ଘିଲାଗାନ୍ ଏନ୍ହି ନିଙ୍ଗାନ୍ ବାଛାବନ୍, ଯେତ୍କବାକେନ୍ ଦୁନିଆଁନ୍ତା ଆଲାରିନ୍ ବିଡ଼୍ଚେ ଏରାଗେ ଗୋଟା ଦୁନିଆଁନୁ ଅଣ୍ଟା ପରୀକ୍ଷାଘି ସାମାୟ ବାରଦ୍। 11ଏନ୍ ଚାଁଣେ ବାର୍ନାବାଲା ରାଦାନ୍; ଯେତ୍କୋଭି ନିଙ୍ଘାସାନ୍ ରାଇ ଆବନ୍ ଧାରୁ ଉଇୟୁ, ତାକା ନେଦ୍ହି ନିଙ୍ଘା ମୁକୁଟ୍ବନ୍ ମା ଲୁଟର୍ ହର୍। 12ଏକାସ୍ ଜିତସ୍, ଆସିନ୍ ଏନ୍ ପାର୍ମେଶ୍ୱାର୍ସ୍କି ମନ୍ଦିର୍ଘି ବିଲ୍ଲୀ ଖୁଟା ଲେଖା କାମନ୍ ଆରୁ ଆସ୍ ଆସାନିନ୍ ଜାମାବାକେନ୍ ରସ୍କସ୍; ଆରୁ ଏନ୍ ଏଙ୍ଘା ପାର୍ମେଶ୍ୱାରସ୍କି ନାମେ ଆରୁ ଏଙ୍ଘା ପାର୍ମେଶ୍ୱାର୍ସ୍କି ସହର୍ ମତ୍ଲବ୍ ପୁନା ଯେରୁଶାଲେମ୍ଘି ନାମେ ଏକାଦ୍ କା ଏଙ୍ଘା ପାର୍ମେଶ୍ୱାର୍ସ୍କି ଚାହାନ୍ତି ସରଗ୍ତି ଏତ୍ତନା ବାଲା ରାଇଦ୍ ଆରୁ ଏଙ୍ଘା ପୁନା ନାମେ ଆସ୍କି ମିଆଁ ଲେଖାକ। 13ଆବ୍ଡ଼ାର୍ ଧିୟାନ୍ ଚିକିରି ମେନର୍ କା ପାବିତାର୍ ଆତ୍ମାଦ୍ ମଣ୍ଡ୍ଲୀଗୁଠିନ୍ ଏନ୍ଦେର୍ ତେଙ୍ଗାଲିଦ୍।”
ଲାଉଦୀକିଆ ସହର୍ତା ଖ୍ରୀସ୍ତ୍ ମଣ୍ତ୍ଲୀଗେ ଖବର୍
14“ନିନ୍ ଲାଉଦୀକିଆ ସହର୍ତା ଖ୍ରୀସ୍ତ୍ ମଣ୍ଡ୍ଲୀନ୍ତା ଦୂଁତ୍ଗେ ଏନ୍ନେ ଲେଖା:
ଏକାସ୍ ସତ୍ତୁସ୍, ବିଶ୍ୱାସ୍ କାମ୍ନାଘି ଲାଇଗ୍, ଆରୁ ସତ୍ତୁ ସାକ୍ଷୀସ୍, ଏକାସ୍ ପାର୍ମେଶ୍ୱାର୍ସ୍କି ସୁରୁଘି ମୂଲିସ୍, ଆସ୍ ଏନ୍ନେ ତେଙ୍ଗ୍ଦାସ୍ କା ଏନ୍ ନିଙ୍ଘା ନାଲ୍ଖୁନ୍ ଆହ୍ଦାନ୍, 15ନିନ୍ ନା ତା ଥାଣ୍ଡାଏ, ନା ଗରମ୍: ବାନେ ମାନଦ୍ନେ କା ନିନ୍ ଥାଣ୍ଡା ଚାହେ ଗରମ୍ ରୟନେ। 16ନିନ୍ ନା ତା ଥାଣ୍ଡାଏ ନା ଗରମ୍, ଲେକିନ୍ ଉଷୁମ୍ ରାଦିନ୍, ହୁଦ୍ଘିଲାଗାନ୍ ଏନ୍ ନିଙ୍ଗାନ୍ ଏଙ୍ଘା ଥୁମ୍ଣାନ୍ତି ଉଲ୍ଗାନା ଚିନାବାଲା ରାଦାନ୍। 17ନିମ୍ ତେଙ୍ଗ୍ଦାର୍ କା ଏମ୍ ଧାନ୍ନୁ ବାଲାମ୍, ଏହ୍ମାଏ ବାଗ୍ଗେ ଧାନ୍ନୁ ରାଇ, ଆରୁ ଏହ୍ମା ଏନ୍ଦେର୍ହି ଘାଟି ମାଲ୍ଲାଦିନ୍, ଲେକିନ୍ ନିମ୍ ମୁରୁକ୍ ଦୁଃଖି, ଗୋଡ଼୍ଗୋଡ଼ା, ଗରୀବ୍ ଆରୁ କାଣାଁ, ଆରୁ ଡୁଡ଼୍ଙ୍ଗୁ, ଚିଢ଼ା ମାଲ୍ଲା ଆତ୍ତୁର୍ ଆବନ୍ ବାଲ୍ଦାରିନ୍। 18ହୁଦ୍ଘିଲାଗାନ୍ ଏନ୍ନେ ତେଙ୍ଗାଲ୍ଦାନ୍ କା ଧନୀ ମାନାଗେ ନିନ୍ ଏଙ୍ଘାସ୍ତି ଚିଚ୍ଚୁନୁ ଟାଘ୍ଲାଚ୍କା ସୋନା ହେନ୍ଦୁ, ଆରୁ ଧୋବ୍ ଚିଢ଼ା ହେନ୍ଦୁ ତାକା ଆବନ୍ ଆତ୍ତୟ ଆରୁ ନିଙ୍ଗାଗେ ଡୁଣ୍ଙ୍ଗୁ ରାନାବାକେନ୍ ଲାଜ୍ଜେ ମା ଲାଗ୍ଗ ଆରୁ ହାନ୍ନୁନୁ ଲାଗାବାଗେ ମଲମ୍ ହେନ୍ଦା ତାକା ନିମ୍ ଏରା ଅଙ୍ଗର୍। 19ଏନ୍ ନେକାନ୍ ବାନେ ହାଖ୍ଖଦାନ୍, ଆବ୍ଡ଼ାରିନ୍ ଧାମ୍କାଦାନ୍, ଆରୁ ଦଣ୍ଡ୍ ଚିଦାନ୍; ହୁଦ୍ଘିଲାଗାନ୍ ରିଝ୍ରିକିରି ପାସ୍ତାରା। 20ମେନା, ଏନ୍ ବାଲିସାନ୍ ଇଜ୍ଜକାଦାନ୍, ଆରୁ ବାଲିନ୍ ଠୋକ୍-ଠୋକ୍ କାମାଲ୍ଦାନ୍; ଯଦି ଏକାସ୍ ଏଙ୍ଘା ଶବଦ୍ ମେନସ୍, ଆରୁ ବାଲି ତିସ୍କସ୍, ତା ଏନ୍ ଉଲା ଆସ୍କି ଚାହା କନ୍ ଆରୁ ଏନ୍ ଆସ୍ଗାନେ ଅନନ୍ ମହନ୍ ଆରୁ ଆସ୍ ଏଙ୍ଘାଗାନେ ଅନସ୍ ମହସ୍। 21ଏକାସ୍ ଜିତସ୍, ଆସିନ୍ ଏନ୍ ଏଙ୍ଘାଗାନେ ଏଙ୍ଘା ରାଜ୍ଗାଦୀନୁ ଅକ୍କାଗେ ହକ୍ ଚନ୍, ଏସ୍କେ କା ଏନ୍ହି ଜିତ୍କାନ୍ ଆରୁ ଏଙ୍ଘା ବାଙ୍ଗ୍ସ୍ ଗାନେ ତାଙ୍ଘା ରାଜ୍ଗାଦୀନୁ ଅକ୍କାଦାନ୍। 22ଆବ୍ଡ଼ାର୍ ଆବନ୍ ଧିୟାନ୍ ଚିକିରି ମେନର୍ କା ପାବିତାର୍ ଆତ୍ମା ମଣ୍ଡ୍ଲୀଗୁଠିନ୍ ଏନ୍ଦେର୍ ତେଙ୍ଗି।”
4ପାର୍ମେଶ୍ୱାର୍ସ୍କି ରାଜ୍ଗାଦୀଘି ବାରେନୁ ଯୋହାନ୍ସ୍କେ ଦର୍ଶନ୍
1ଇଦ୍ଘି ପାଛ୍ଲି ଏନ୍ ଅଣ୍ଟା ଇ ମାହାନ୍ ଦୃଶ୍ୟ ଏର୍କାନ୍। ଏନ୍ ଏର୍କାନ୍ କା ସରଗ୍ନୁ ଅଣ୍ଟା ଖୋଲ୍ର୍କା ବାଲି ରାଇ, ଆରୁ ଆଦ୍ ତୂରୀବାଜାଘି ଲେଖା ଶବଦ୍, ଏସ୍କେ ଏନ୍ ପହ୍ଲେ ନିଜର୍ଗାନେ କାତ୍ଥା କାମ୍ନା ମେନ୍ଚ୍କାଚ୍କାନ୍, ଆଦ୍ ତେଙ୍ଗାଲି କା “ଇସାନ୍, ମିଆଁ ବାରା। ଏନ୍ ନିଙ୍ଗାନ୍ ଏଦନ୍ କା ଏକାଦ୍ ପାଛ୍ଲି ଏସ୍କ୍ରିନ୍ଭି ମାନ୍ନାବାଲା ରାଇ।” 2ଏନ୍ ଜାଲ୍ଦିନିନ୍ ପାବିତାର୍ ଆତ୍ମାନୁ ଭାର୍ପୁର୍ ମାନ୍ଚ୍କାନ୍ କେର୍କାନ୍। ଏନ୍ ଏର୍କାନ୍ କା ସରଗ୍ନୁ ଅଣ୍ଟା ରାଜ୍ଗାଦୀ ଉଇକା ରାଇ ଆରୁ ଆଦ୍ଘି ମିଆଁ ନେର୍ ଅକ୍କାନାଏ, 3ନେଖା ଚେହେରା ହିରା ଆରୁ ମୋତି ଲେଖା ଏଥ୍ରାଲାଦ୍। ଆରୁ ରାଜ୍ଗାଦୀଘି ଚାରିପାଖା ଅଣ୍ଟା ଇନ୍ଦ୍ରଧନୁ ରାଚା ଆରୁ ଆଦ୍ ମଣି ଲେଖା ଚାମ୍କା ରାଲିୟାଦ୍। 4ଆ ରାଜ୍ଗାଦୀଘି ଚାରିପାଖା ଚୋବିସ୍ଟା ରାଜ୍ଗାଦୀ ଆତ୍ଲି; ଆରୁ ଇ ରାଜ୍ଗାଦୀ ମିଆଁ ଚୋବିସ୍ ଲୋକ୍ ପୁର୍ଖାର୍ ଧୋବ୍ ଚିଢ଼ା ଆତ୍ତିକିରି ଅକ୍କାନାଏ, ଆରୁ ଆବ୍ଡ଼ାର୍ଘି କୁକ୍କୁନୁ ସୋନାଘି ମୁକୁଟ୍ ଆତ୍ଲି। 5ଆ ରାଜ୍ଗାଦୀନ୍ତି ବିଜ୍ଲି ମାରାଲିଦ୍ ଆରୁ ବାଦ୍ଲି ଗାର୍ଜାରାଲି ଆରୁ ରାଜ୍ଗାଦୀଘି ଚାହାନୁ ସାତ୍ତେଟା ବିଲ୍ଲୀଦ୍ ଚିଚ୍ଚୁ ଲେଖା ଲାଘ୍ରାଲିଦ୍, ଆଦ୍ ପାର୍ମେଶ୍ୱାର୍ସ୍ଘି ସାତ୍ତେଟା ଆତ୍ମାଦ୍। 6ରାଜ୍ଗାଦୀଦ୍ଘି ଚାହାନୁ ଚାମ୍କାରାନା କାଁଚୁ ଲେଖା ସାମ୍ଧୁର୍ ରାଚା ଆରୁ ରାଜ୍ଗାଦୀଘି ମାଝାନୁ ଆରୁ ଚାରିପାଖା ଉଜ୍ଜନା ପଶୁ ରାଚାର୍, ଏକାର୍ଘି ଆଘ୍ଲି ପାଛ୍ଲି ହାନ୍ନୁହି ହାନ୍ନୁ ରାଚା। 7ପହିଲ୍ ଜୀବ୍ଜାନ୍ତୁ ଡୁକ୍କା ଲେଖା ରାଇ, ଆରୁ ଦୁସ୍ରା ଜୀବ୍ଜାନ୍ତୁ ବାଛ୍ରୁଘି ସାମାନ୍ ରାଇ, ତିସ୍ରା ଜୀବ୍ଜାନ୍ତୁଘି ଚେହେରା ଆଲାର୍ ଲେଖା ଏଥ୍ରିଦ୍ ଆରୁ ଚଉଥା ଜୀବ୍ଜାନ୍ତୁ ଉଢିୟାରାନା ବାଜ୍ ଓଡ଼ା ଲେଖା ରାଚା। 8ନାହ୍ଟା ପଶୁର୍ଘି ସୁଏଟା-ସୁଏଟା ଡେଣା ରାଇ, ଆରୁ ଆଦ୍ଘି ଚାରିପାଖା ଆରୁ ମାଝାନୁ ହାନ୍ନୁହି ହାନ୍ନୁ ରାଇ; ଆରୁ ଆବ୍ଡ଼ାର୍ ଉଲ୍ଲାନ୍ ମାଁହାନ୍ ଇବନ୍ ତେଙ୍ଗାଗେ ମା ଥାକ୍ରାଲାର୍, “ପାବିତାର୍, ପାବିତାର୍, ପାବିତାର୍! ପ୍ରାଭୁ ପାର୍ମେଶ୍ୱାର୍ସ୍ ଜାମାର୍ଘିନ୍ତି ତାକତ୍ବାଲା, ଏକାସ୍ ରାଚାସ୍ ଆରୁ ଏକାସ୍ ରାଦାସ୍ ଆରୁ ଏକାସ୍ ବାର୍ନାବାଲା ରାଦାସ୍।” 9ଯେତ୍କବାକେନ୍ ଆ ପଶୁର୍ ଆସ୍କି ଏକା ରାଜ୍ଗାଦୀନୁ ଅକ୍କାନାଏ, ଆରୁ ଏକାଦ୍ ଯୁଗ୍ଗୁ ଯଗ୍ଗୁତକ୍ ଉଜ୍ଜିଦ୍ ଆବ୍ଡ଼ାର୍ଘି ମାହିମା ଆରୁ ଆଦର୍ ଆରୁ ଧାନ୍ୟାବାଦ୍ କାମତ୍; 10ହାଲେ ଚୋବିସ୍ ଲୋକ୍ ପୁର୍ଖାର୍ ରାଜ୍ଗାଦୀନୁ ଅକ୍ନା ବାଲାର୍ଘି ଚାହାନୁ ଖାତ୍ରର୍କର୍ ଆରୁ ଆବନ୍ ଏକାର୍ କା ଯୁଗ୍ଗୁ-ଯୁଗ୍ଗୁ ଉଜ୍ଜନାଏ ଆବ୍ଡ଼ାରିନ୍ ଯୋହାର୍ କାମତ୍; ଆରୁ ଆବ୍ଡ଼ାର୍ ନିଜର୍-ନିଜର୍ ମୁକୁଟ୍ବନ୍ ରାଜ୍ଗାଦୀଘି ଚାହାନୁ ଉଇୟିକିରି ଆରୁ ତେଙ୍ଗ୍ନାଏ; 11“ନାହ୍ମାଏ ପ୍ରାଭୁ ପାର୍ମେଶ୍ୱାର୍! ନିନ୍ ମାହିମା, ଆଦର୍, ଶକ୍ତି ଆରୁ ଲାଇଗ୍ ରାଦାଏ। ଏନ୍ଦେର୍ଗେକା ନିନ୍ ଜାମା ଜିନିଷ୍ବନ୍ ବାନା ବାଚ୍କାଦାଏ। ନିଙ୍ଘା ଇଚ୍ଛାତି ଆସ୍ ରାଚାସ୍ ଆସ୍କି ସୃଷ୍ଟି ମାନ୍ଚ୍କିଚି।”
5ମାର୍ଖା ଲାକ୍କା ବହି ଆରୁ ଭେଡ଼ିହାଦ୍ଦୁ
1ଏକାସ୍ ରାଜ୍ଗାଦୀନୁ ଅକ୍କାଚାସ୍। ଏନ୍ ଆସ୍କି ତିନା ହେଖ୍ଖାନୁ ଅଣ୍ଟା ବହି ଏର୍କାନ୍ ଏକାନୁ କା ଉଲା ବାହ୍ରି ଲେଖ୍ଚ୍କାରାଚା, ଆରୁ ଆଦ୍ ସାତ୍ତେଟା ମୋହର୍ ଲାଗାବିକିରି ଢାପ୍କା ରାଚା। 2ହୁଦ୍ଘିପାଛ୍ଲି ଏନ୍ ଅଣ୍ଟା ତାକତ୍ବାଲା ସରଗ୍ ଦୂଁତ୍ବନ୍ ଏର୍କାନ୍, ଯୋର୍ ଯୋର୍ସେ ଚିର୍ରା ରାଇକିରି ତେଙ୍ଗାଲିୟା। ଇ ବହିବନ୍ ଖୋଲ୍ନା ଆରୁ ଆଦ୍ଘି ମହଁର୍ବନ୍ ତୋଡ଼୍ନାଘି ନେର୍ ଲାଇଗ୍ ରାନାଏ? 3ଲେକିନ୍ ସରଗ୍ନୁ ନା ଦୁନିଆଁନୁ ନା ଦୁନିଆଁଘି କିୟାଁ ନେଦିନ୍ ଆ ବହିବନ୍ ଖୋଲ୍ନା ଆରୁ ନାଜ୍ରାନାଘି ହକ୍ ମାଲ୍ଲାଦିନ୍। 4ହୁଦ୍ଘିଲାଗାନ୍ ଏନ୍ ନିହ୍ଚାରା-ନିହ୍ଚାରା ଅହ୍ଲାଗେ ଲାକ୍କାନ୍ ଏନ୍ଦେର୍ଗେକା ହୁ ବହିବନ୍ ଖୋଲାଗେ ଆରୁ ନଜର୍ ଉୟାଗେ ନେର୍ହି ଲାଇଗ୍ ମା ହାଖ୍ଖରାର୍। 5ଇନ୍ନୁନ୍ତି ଆ ପୁର୍ଖାର୍ଘିନ୍ତି ଅଣ୍ଟାସ୍ ଏଙ୍ଗାନ୍ ତେଙ୍ଗିୟାସ୍ “ଆମା ଅହ୍ଲା; ଏରା, ଯୁଦାସ୍କି ବାଉଁଶାର୍ନ୍ତା ଆ ଡୁକ୍କା ଏକାସ୍ କା ଦାଉଦ୍ସ୍କି ମୁଲିନ୍ତାସ୍, ଆ ବହିବନ୍ ଖୋଲ୍ନା ଆରୁ ଆସ୍କି ସାତ୍ତେଟା ମହଁର୍ବନ୍ ତୋଡ଼ାଗେ ଲାଇଗ୍ ରାଦାସ୍।” 6ଆନ୍ତିନ୍ ଏନ୍ ଆ ରାଜ୍ଗାଦୀ ଆରୁ ନାହ୍ଟା ଜୀବ୍ଜାନ୍ତୁ ଆରୁ ପୁର୍ଖାର୍ଘି ମାଝାନୁ ଅଣ୍ଟା, କେଚ୍ଚ୍କା ଲେଖା ଭେଡ଼ି ହାଦ୍ଦୁଘି ଇଜ୍ଜକାନ୍ ଏର୍କାନ୍। ଆଦ୍ଘି ସାତ୍ତେଟା ମାର୍ଗୁ ଆରୁ ସାତ୍ତେଟା ହାନ୍ନୁ ରାଚା; ଇଦ୍ ପାର୍ମେଶ୍ୱାର୍ସ୍କି ସାତ୍ତେଟା ଆତ୍ମାଦ୍ ଏକାନ୍ କା ପାର୍ମେଶ୍ୱାର୍ସ୍ ଜାମା ଦୁନିଆଁନୁ ତାଇୟାସ୍। 7ଆଙ୍ଗେନ୍ ଭେଡ଼ିହାଦ୍ଦୁ ଚାହା ବାରିକିରି ରାଜ୍ଗାଦୀନୁ ଅକ୍କନା ବାଲାସ୍କି ତିନା ହେଖାସ୍ତି ବହିବନ୍ ଅଚ୍ଚା। 8ଯେତ୍କବାକେନ୍ ଆସ୍ ବହିବନ୍ ଅଚ୍ଚାସ୍, ତା ଆ ନାହ୍ଟା ଜାନ୍ତୁର୍ ଆରୁ ଚୋବିସ୍ ପୁର୍ଖାର୍ ଆ ଭେଡ଼ି ହାଦ୍ଦୁଘି ଆଘ୍ଲି ଖାତ୍ରାର୍ କେରାର୍ ଆନ୍ନୁନ୍ନ୍ତି ଜାମାର୍ଘି ହେଖ୍ଖାନୁ ବିଣା ଆରୁ ଧୁପ୍ ଏକାଦ୍ କା ପାବିତାର୍ ଆଲାର୍ଘି ବିନ୍ତି ପ୍ରାର୍ଥନାତି ନିନ୍ଦ୍କା ସୋନାଘି କାଟୋରାଗୁଠିଦ୍ ରାଚା। 9ଆବ୍ଡ଼ାର୍ ଇବନ୍ ତେଙ୍ଗିକିରି ଅଣ୍ଟା ପୁନା ଗୀତୁ ପାଡ଼ାଲିୟାର୍, “ନିମ୍ ବହିନ୍ ଗ୍ରହନ୍ କାମିକିରି ଆସ୍କି ମାର୍ଖାନ୍ ଖୋଲାଗେ ଲାଇଗ୍ ରାଦାର୍, ଏନ୍ଦେର୍ଗେକା ନିଙ୍ଗାନ୍ ପିଟାଚା କେର୍କିଚି। ନିମ୍ ନିଜର୍ ହେଁସୁ ବାହାବିକିରି ପାର୍ମେଶ୍ୱାର୍ସ୍କି ଲାଗାନ୍ ଜାମା ବାଉଁଶା, ଭାଷା, ଜାତି ଆରୁ ରାଜୀସ୍ତି ଆଲାରିନ୍ ହେନ୍ଦ୍କାର୍। 10ଆରୁ ଆବ୍ଡ଼ାର୍ ନାହ୍ମାଏ ପାର୍ମେଶ୍ୱାର୍ସ୍କି ଇଚ୍ଛାତି ଅଣ୍ଟା ରାଜୀଘି ପୁରୋହିତ୍ କାମ୍ଚାର୍। ଆରୁ ଆବ୍ଡ଼ାର୍ ଦୁନିଆଁନୁ ରାଜୀ କାମର୍।” 11ଯେତ୍କବାକେନ୍ ଏନ୍ ଏର୍କାନ୍; ତା ଆ ରାଜ୍ଗାଦୀ ଆରୁ ଆ ଜାନ୍ତୁର୍ଘି ଆରୁ ଆ ପୁର୍ଖାର୍ଘି ଚାରିପାଖା ଯୁକ୍କୁ ସରଗ୍ ଦୂଁତ୍ର୍ଘି ଶବଦ୍ ମେନ୍ଚ୍କାନ୍, ଏକାର୍ଘି କା ସଂଖ୍ୟା ଲାଖ୍ କୋଟିନୁ ରାଚା, 12ଆରୁ ଆବ୍ଡ଼ାର୍ ଜୋର୍ସେ ଚିର୍ରା ରାଇକିରି ତେଙ୍ଗାଲିୟାର୍, ବଲୀ ଚିଚ୍ଚକା ଭେଡ଼ି ହାଦ୍ଦୁଦ୍ହି ହକ୍, ଧନ୍, ବୁଦ୍ଧି, ବଲ୍, ଆଦର୍, ମାହିମା ଆରୁ ଧାନ୍ୟାବାଦ୍ଘି ଲାଇଗ୍ ରାଇ। 13ଆନ୍ତିନ୍ ଏନ୍ ଜାମା ଦୁନିଆଁନ୍ ଆକାଶ୍ ଆରୁ ଦୁନିଆଁନୁ, ଦୁନିଆଁଘି କିୟାଁ ଆରୁ ସାମ୍ଧୁର୍ଘି ଉଲାନ୍ତା ଜାମା ସିର୍ଜାଚ୍କା ଜିନିଷ୍ବନ୍ ଇବନ୍ ତେଙ୍ଗ୍ତେ ମେନ୍ଚ୍କାନ୍, “ରାଜ୍ଗାଦୀନୁ ଅକ୍କାସିନ୍ ଚାହେ ଭେଡ଼ି ହାଦ୍ଦୁଘି ସବୁଦିନ୍ତା ସ୍ତୁତି, ଆଦର୍, ମାହିମା, ବଲ୍।” 14ଆଙ୍ଗେନ୍ ନାହ୍ଟା ପଶୁର୍ ତେଙ୍ଗିୟାର୍ ଏନ୍ନେନ୍ ମାନ୍ନାଦ୍, ଆରୁ ପୁର୍ଖାର୍ ହେଡ୍ଡମୁଲିନୁ ଖାତ୍ରିକିରି ଯୋହାର୍ କାମ୍ଚାର୍।
6ସାତ୍ତେଟା ମହଁର୍ବନ୍ ଖୋଲା କାଇ
1ଆରୁଅହନ୍ ଏନ୍ ନାଜ୍ରାଚ୍କାନ୍ କା ଭେଡ଼ି ହାଦ୍ଦୁଦ୍ ସାତ୍ତେଟା ମହଁର୍ଘିନ୍ତି ଅଣ୍ଟା ମହଁର୍ବନ୍ ଖୋଲ୍ଚ୍କା; ଆରୁ ଆ ନାହ୍ଟା ଜୀବ୍ଜାନ୍ତୁଘିନ୍ତି ଅଣ୍ଟା ଜାନ୍ତୁଘି ବାଦ୍ଲି ଗାର୍ଜାରାନାଘି ଶବଦ୍ ଲେଖା ମେନ୍ଚ୍କାନ୍, “ବାରା!” 2ଯେତ୍କବାକେନ୍ ଏନ୍ ନାଜ୍ରାଚ୍କାନ୍, ତା ହାକ୍କାନ୍ କା ଏଙ୍ଘା ଚାହାନୁ ଆରୁ, ଅଣ୍ଟା ଧୋବ୍ ଘୋଣଦ୍ ରାଚା, ଘୋଣ ଚାଲାବୁସ୍ ଇଡ଼୍ତୁ ଅଚ୍ଚକାଚାସ୍; ଆରୁ ଆସ୍ଗେ ଅଣ୍ଟା ମୁକୁଟ୍ ଚିଆକେରା ଆରୁ ଆସ୍ ଜିତ୍କାର୍ଘି ଲେଖା ଜିତ୍ନାଘି ଲାଗାନ୍ ବାହ୍ରି ଉର୍ଖିୟାସ୍। 3ଯେତ୍କବାକେନ୍ ଭେଡ଼ିହାଦ୍ଦୁସ୍ ଦୁସ୍ରା ମୋହର୍ ଖୋଲ୍ଚାସ୍, ତା ଏନ୍ ଦୁସ୍ରା ଜୀବ୍ଜାନ୍ତୁଘି ତେଙ୍ଗ୍ନାନ୍ ମେନ୍ଚ୍କାନ୍, “ବାରା!” 4ଆନ୍ନୁନ୍ତି ଆରୁଅହନ୍ ଅଣ୍ଟା ଘୋଣଦ୍ ଉର୍ଖିୟା ଏକାଦ୍ କା ଲାଲ୍ ରଙ୍ଗ୍ଘି ରାଚା; ଆ ଘୋଣନ୍ ଚାଲାବୁସ୍କେ ଏନ୍ନେ ହକ୍ ଚିୟାକେରା କା ଦୁନିଆଁନ୍ତା ଶାନ୍ତିବନ୍ ହାଟାବଚସ୍, ତାକା ଆଲାର୍ ଏକ୍ ଦୁସ୍ରାରିନ୍ ପିଟର୍ଚର୍, ଆରୁ ଆସ୍କେ ଅଣ୍ଟା ବାଡ଼୍କା ଖଣ୍ତା ଚିଆକେରା 5ଭେଡ଼ି ଚାର୍ୱାହାସ୍ ଯେତ୍କବାକେନ୍ ଆସ୍ ତିସ୍ରା ମୋହର୍ ଖୋଲ୍ଚାସ୍, ତା ଏନ୍ ତିସ୍ରା ଜୀବ୍ଜାନ୍ତୁଘି ଇ ବାନାନ୍ ମେନ୍ଚ୍କାନ୍, “ବାରା!” ଏନ୍ ନାଜ୍ରାଚ୍କାନ୍, ଆରୁ ମେନା, ଅଣ୍ଟା ମୋହର ଘୋଣଦ୍ ରାଇ, ଆରୁ ଆସ୍କି ଘୋଣ ଚାଲାବୁସ୍କି ହେଖ୍ଖାନୁ ଅଣ୍ଟା କିଲୋ ବାଟ୍କାରା ରାଚା। 6ଆରୁ ଏନ୍ ଆ ନାହ୍ଟା ଜୀବ୍ଜାନ୍ତୁଘି ମାଝାନ୍ତି ଅଣ୍ଟା ଏନ୍ନେ ଶବଦ୍ ତେଙ୍ଗ୍ନାନ୍ ମେନ୍ଚ୍କାନ୍ “ଦିନାର୍” ଅନ୍ ଆଉଡ଼୍କା ଗହମ୍, ଆରୁ ଦିନାର୍ଘି ତିନ୍ ଆଉଡ଼୍କା ଯାଉ, ଲେକିନ୍ ଇସୁଙ୍ଗ୍ ଆରୁ ଅଙ୍ଗୁର୍ ରାସେବନ୍ ନୁକ୍ସାନ୍ ଆମ୍କେ କାମା। 7ଭେଡ଼ିହାଦ୍ଦୁ ଯେତ୍କବାକେନ୍ ଆସ୍ ନାହ୍ଟା ମୋହ୍ର୍ ଖୋଲ୍ଚାସ୍ ତା ଏନ୍ ନାହ୍ଟା ଜୀବ୍ଜାନ୍ତୁଘି ଏନ୍ନେ ଶବଦ୍ ତେଙ୍ଗ୍ନାନ୍ ମେନ୍ଚ୍କାନ୍, କା “ବାରା”। 8ଏନ୍ ନାଜ୍ରାଚ୍କାନ୍ କା, ଆରୁ ମେନା, ଅଣ୍ଟା ପିଲା ରଙ୍ଗ୍ଘି ଘୋଣ ରାଇ; ଆରୁ ଆସ୍କି ଘୋଣ ଚାଲାବୁସ୍କି ନାମେ ଖିନା ରାଚା, ଆରୁ ନରଗ୍ଦ୍ ଆସ୍କି ପାଛ୍ଲି ବାରାଲିୟାର୍, ଆରୁ ଆବ୍ଡ଼ାର୍ ଧାନ୍ତାରିନ୍ତା ଚାର୍ଭାଗ୍ତି ଅଣ୍ଟାଘି ମିଆଁ ଅଧିକାର୍ ଚିୟାକେରା କା ଖଣ୍ଡା, ଆରୁ ଆକାଲ୍, ଆରୁ ମାହାମାରି, ଆରୁ ଦୁନିଆଁନ୍ତା ଜଙ୍ଗ୍ଲି, ଜାନ୍ତୁଘି ଦ୍ୱାରା ଆଲାରିନ୍ ପିଟାଗେଲାଗାନ୍ ଅଧିକାର୍ ଚିଚ୍ଚାର୍। 9ଏନ୍ ଏରାଲ୍ଦାନ୍ କା ଯେତ୍କବାକେନ୍ ଭେଡ଼ିହାଦ୍ଦୁସ୍ ପାଞ୍ଚେଟା ମହଁର୍ବନ୍ ଖୋଲ୍ଚାସ୍, ଆରୁ ପାର୍ମେଶ୍ୱାର୍ସ୍କି ବଚନ୍ଘି ପ୍ରଚାର୍ କାମ୍ନାଘି ଦ୍ୱାର୍ନୁ ଆରୁ ନିଜର୍ ସାକ୍ଷୀ ଚିନାଘି ଦ୍ୱାର୍ନୁ ଏକା ଆଲାର୍ କେଚ୍ଚାର୍ କେର୍କାନାଏ ଆବ୍ଡ଼ା ଆଲାର୍ଘି ଆତ୍ମାବନ୍ ବେଦୀଘି କିୟାଁ ଏରାଲ୍ଦାନ୍। 10ଆବ୍ଡ଼ାର୍ ଇବନ୍ ତେଙ୍ଗିକିରି ଚିର୍ରାରାଲିୟାର୍: “ମାହାନ୍ ପାବିତାର୍ ଆରୁ ସତ୍ତୁ, ପ୍ରାଭୁ! ନିନ୍ ନ୍ୟାୟ କାମ୍ନା ଆରୁ ଧାନ୍ତାରିନ୍ତା ରାନାବାଲା ଆଲାରିନ୍ ଏହ୍ମାଏ ହେଁସୁଘି ବାଦ୍ଲା କିର୍ତାନାଘି ଲାଗାନ୍ କେତ୍କତକ୍ ଦେରି କାମୟ।” 11ଆନ୍ତିନ୍ ହାରେକ୍ ଆଲାର୍ଗେ ପାଣ୍ତ୍ରୁ ଚିଢ଼ା ଚିୟାକେରା, ଆରୁ ଆବ୍ଡ଼ାରିନ୍ ତେଙ୍ଗାକେରା କା ଆବ୍ଡ଼ାର୍ ଥୋଡ଼େ ଡେରି ହଖର୍ କା ଯେତ୍କତକ୍ ତାହ୍ମା ସାଙ୍ଗେ ଆରୁ ଭାଇ ବୁହୁଣୀରିନ୍ ଆବ୍ଡ଼ାର୍ଘି ଲେଖା ପିଟାଚାକୋ ଆରୁ ଆବ୍ଡ଼ାର୍ଘି ସଂଖ୍ୟା ପୁରା ମା ମାନ୍ନା ସାମାୟତକ୍ ଧିରାଜ୍ ଉଇୟାଗେ ତେଙ୍ଗାକେରା। 12ଭେଡ଼ିହାଦ୍ଦୁସ୍ ସୁୟେଟା ମୋହର୍ ଖୋଲ୍ନା ସାମାୟନୁ ଏନ୍ ଏର୍କାନ୍, ଆସାନ୍ ମାହା ଭୁଇଁଡୋଲ୍ ମାନ୍ଚା, ବିଡ଼ିଦ୍ ଏନ୍ନେ ମହଁରୋ ମାଞ୍ଚାକେରା ଏସ୍କେ କା ଦୁଃଖୁ ମାନିକିରି ଆଲାସ୍କି କକ୍ଣାରାଚ୍କା ଚିଢ଼ା ଲେଖା ମାନିକାଇ ଆରୁ ପୁରା ଚାନ୍ଦୋଦ୍ ହେଁସୁ ଲେଖା ଲାଲ୍ ମାଞ୍ଚାକେରା। 13ଆକାଶ୍ ତା ବିନ୍କୋ ଧାନ୍ତାରିନୁ ଏନ୍ନେ ଖାତ୍ରା କେର୍କିଚାଦ୍ ଏସ୍କେ କା ଜୋର୍ସେ ଧୁନ୍ଦୁ ଧୁକା ବାର୍ନାଘି ଲେଖା ଡୁମାରି ମାନ୍ନୁନ୍ତି ହେନା ଡୁମାରି ଫାଡ଼ୁଦ୍ ଖାତ୍ରିଦ୍। 14ଆକାଶ୍ବଦ୍ ଦୁଇ ଭାଗ୍ ମାନ୍ଚା କେର୍କିଚା ଆରୁ ଅଣ୍ଟା ବହିଘି ଲେଖା କକ୍ଣାରାଚା କେର୍କିଚା ଜାମା ପାର୍ତ୍ତା ଆରୁ ଟାପୁ ନିଜର୍-ନିଜର୍ ଆଡ୍ଡାନ୍ତି ପାଖିଆରାଚା କେର୍କିଚା। 15ଦୁନିଆଁନ୍ତା ରାଜାର୍, ମୁଖିଆ, ସାର୍ଦାର୍, ସେନାପତି, ଧନୀ, ତାକତ୍ବାର୍, ଗୁଲାମି ଆରୁ ଆଜାଦୀ ଜାମା ଆଲାର୍ ପାର୍ତ୍ତା ମାଝାଘି ଗୁମ୍ଫାନୁ ଆରୁ ଚାଟ୍ଣୀନୁ ନୁହ୍ରାର୍। 16ଆରୁ ଆବ୍ଡ଼ାର୍ ପାର୍ତ୍ତାନ୍ ଆରୁ ଚାଟ୍ଣୀବନ୍ ତେଙ୍ଗାଲିୟାର୍, “ଏହ୍ମା ମିଆଁ ଖାତ୍ରୁ କାଲ୍ ଆରୁ ରାଜ୍ଗାଦୀନୁ ଅକ୍କାସ୍କି ନଜର୍ତି ଆରୁ ଭେଡ଼ି ହାଦ୍ଦୁସ୍କି ଖୀସ୍ତି ଏମାନ୍ ନୁଡ଼ାଚା। 17ଏନ୍ଦେର୍ଗେକା ଆବ୍ଡ଼ାର୍ଘି ବାଦ୍ଲା ହୋନାଘି ମାହା ଉଲ୍ଲାଦ୍ ବାର୍ଚା କେର୍କିଚି। ଏକାର୍ ଟିକା ଅଙ୍ଗର୍?
7ଇସ୍ରାଏଲ୍ତା ୧,୪୪,୦୦୦ ଆଲାର୍
1ଇଦ୍ଘି ପାଛ୍ଲି ଏନ୍ ଦୁନିଆଁଘି ଚାର୍ହି କୋଣାନୁ ଚାର୍ ସରଗ୍ ଦୂଁତ୍ଜାମାର୍ଘି ଇଜ୍ଜକାନ୍ ଏର୍କାନ୍, ଆବ୍ଡ଼ାର୍ ଦୁନିଆଁନ୍ତା ନାହ୍ଟା ହାୱାବନ୍ ରୋକ୍ଚାର୍ ଉଇକାଚାର୍ ତାକା ଧାନ୍ତାରି ଆରୁ ସାମ୍ଧୁର୍ ଆରୁ ଏନ୍ଦ୍ରିନ୍ ମାନ୍ନୁନୁ ହାୱା ମା ଚାଲ୍ର୍ନା କାତ୍ଥା। 2ଆନ୍ତିନ୍ ଏନ୍ ଆରୁ ଅଣ୍ଟା ସରଗ୍ ଦୂଁତ୍ବନ୍ ଜିବିତ୍ ପାର୍ମେଶ୍ୱାର୍ସ୍କି ମହଁର୍ ହୋଇକିରି ପୁରୁବ୍ ତାର୍ତି ବାର୍ନାନ୍ ଏର୍କାନ୍, ଆସ୍ ଆ ନାହ୍ଟା ସରଗ୍ ଦୂଁତ୍ରିନ୍ ଏକାର୍ କା ଜୋର୍ସେ ଚିର୍ରା ରାଇକିରି ତେଙ୍ଗିୟାର୍ କା ଦୁନିଆଁ ଆରୁ ସାମ୍ଧୁର୍ବନ୍ ନୁକ୍ସାନ୍ କାମାଗେ ହକ୍ ହାଖ୍ର୍କିଚା, 3ଯେତ୍କବାକେନ୍ ନାମ୍ ନିଜର୍ ପାର୍ମେଶ୍ୱାର୍ସ୍କି ଗୁତ୍ତିୟାର୍ଘି କାପ୍ଡ଼େନୁ ମୋହଁରା ଆମ୍କେ ଲାଗାବା, ହତ୍କବାକେନ୍ତକ୍ ଧାନ୍ତାତାରି ଆରୁ ସାମ୍ଧୁର୍ ଆରୁ ମାନ୍ନୁବନ୍ ନୁକ୍ସାନ୍ ଆମ୍କେ ଆଣ୍ସ୍ତା,” 4ଏକାନୁ ମଁହର୍ ଚିଚ୍ଚକା ରାଇ ଏନ୍ ଆଦ୍ଘି ଗଣ୍ନାନ୍ ମେନ୍ଚ୍କାନ୍ କା ଇସ୍ରାଏଲ୍ ହାଦ୍ଦୁବଚ୍ଚର୍ଘି ଜାମା ଗତର୍ଘିନ୍ତି ଏକ୍ ଲାଖ୍ ଚଉରାଲିଶ୍ ହାଜାର୍ନୁ ମଁହର୍ ଚିଚ୍ଚକା ରାଇ: 5ଯୁଦାସ୍କି ଗତର୍ଘିନ୍ତି ବାର ହାଜାର୍ ମଁହର୍ ଚିଆ କେର୍କିଚି; ରୁବେନ୍ସ୍କି ଗତର୍ଘିନ୍ତି ବାର ହାଜାର୍, ଗାଦ୍ଘି ଗତର୍ଘିନ୍ତି ବାର ହାଜାର୍; 6ଆଶେର୍ଘି ଗତର୍ଘିନ୍ତି ବାର ହାଜାର୍, ନାପ୍ତାଲିଘି ଗତର୍ଘିନ୍ତି ବାର ହାଜାର୍, ମାନ୍ଶିଶହ୍ଘି ଗତର୍ଘିନ୍ତି ବାର ହାଜାର୍, 7ଶିମୋନ୍ସ୍ଘି ଗତର୍ଘିନ୍ତି ବାର ହାଜାର୍, ଲେବୀସ୍କି ଗୋତର୍ଘିନ୍ତି ବାର ହାଜାର୍, ଇସାଖର୍ଘି ଗତର୍ଘିନ୍ତି ବାର ହାଜାର୍, 8ଯୁବୁଲୁନ୍ଘି ଗତର୍ଘିନ୍ତି ବାର ହାଜାର୍, ଯୋଷେଫ୍କି ଗତର୍ଘିନ୍ତି ବାର ହାଜାର୍, ଆରୁ ବିନ୍ୟାମୀନ୍ଘି ଗତର୍ଘିନ୍ତି ବାର ହାଜାର୍ ମଁହର୍ ଚିଆ କେର୍କିଚା।
ଧୋବ୍ ଚିଢ଼ା ଆତ୍ତ୍କା ଅଣ୍ଟା ବାଡ଼୍କା ଭିଡ଼୍
9ଇଦ୍ଘି ପାଛ୍ଲି ଏନ୍ ଜାମା ରାଜୀନ୍, ଜାତି, ବାଉଁଶାର୍, ଆରୁ ଭାଷାଘି ଅଣ୍ଟା ବାଡ଼୍କା ଭିଡ଼୍ ଆଲାରିନ୍ ଏର୍କାନ୍ ଏକାଘି ଗନ୍ତି ନେର୍ହି କାମା ପଲ୍ଲନାଏ। ଆବ୍ଡ଼ାର୍ ଧୋବ୍ ଚିଢ଼ା ଆତ୍ତିୟାର୍ ଆରୁ ନିଜର୍ ହେଖ୍ଖାନୁ ଖିଜ୍ରୀଘି ଡାଡ଼ାନ୍ ଅଚ୍ଚାର୍ ଆରୁ ରାଜ୍ଗାଦୀ ମତ୍ଲବ୍ ଭେଡ଼ି ହାଦ୍ଦୁଘି ଆଘ୍ଲି ଇଜ୍ଜକାଚାର୍। 10ଆରୁ ଜୋର୍ସେ ଚିରାରାଇକିରି ତେଙ୍ଗାଲିୟାଦ୍, ମୁକ୍ତିଘି ଲାଗାନ୍ ରାଜ୍ଗାଦୀନୁ ଅକ୍କା ନାହ୍ମାଏ ପାର୍ମେଶ୍ୱାର୍ସ୍କି; ଆରୁ ଭେଡ଼ି ହାଦ୍ଦୁଘି ଜାୟ-ଜାୟ ମାନ୍ନାଦ୍। 11ଜାମା ସରଗ୍ଦୂଁତ୍ ରାଜ୍ଗାଦୀ ପୁର୍ଖାର୍ ଆରୁ ଆ ନାହ୍ଟା ଜୀବ୍ଜନ୍ତୁର୍ ଚାର୍ହି ପାଖା ଇଜ୍ଜକାଚାର୍। ଆରୁ ରାଜ୍ଗାଦୀଘି ଆଘ୍ଲି ଖାତ୍ରିକିରି ଇ ସରଗ୍ ଦୂଁତ୍ର୍ ପାର୍ମେଶ୍ୱାର୍ସ୍କି ଆରାଧାନା କାମ୍ଚାର୍। 12“ଆମେନ୍! ନାହ୍ମାଏ ପାର୍ମେଶ୍ୱାର୍ସ୍କି ସ୍ତୁତି, ଆରାଧାନା, ମାହିମା, ବୁଦ୍ଧି, ଧନ୍ୟାବାଦ୍, ଆଦର୍, ତାକତ୍, ଆରୁ ଶକ୍ତି ଯୁଗ୍-ଯୁଗ୍ ମାନ୍ନାଦ୍ ଆମେନ୍!” 13ଇନ୍ନୁ ପୁର୍ଖାର୍ଘିନ୍ତି ଅଣ୍ଟାସ୍ ଏଙ୍ଗାନ୍ ତେଙ୍ଗିୟାସ୍ “ଇ ଧୋବ୍ ଚିଢ଼ା ଆତ୍ତକାନ୍ ନେଦ୍? ଆରୁ ଏକାସ୍ତି ବାର୍ଚ୍କାଦାସ୍?” 14ଏନ୍ ଆସିନ୍ ତେଙ୍କାନ୍ “ହେ ମାଲିକ୍ ନିମ୍ ଆହ୍ଦାର୍,” ଆସ୍ ଏଙ୍ଗାନ୍ ତେଙ୍ଗିୟାସ୍, “ଇବ୍ଡାର୍ ବାଡ଼୍କା ସାତାବାନାସ୍ତି ଉର୍ଖିଆର୍ ବାର୍ଚ୍କାନାଏ; ଇବ୍ଡ଼ାର୍ ନିଜର୍ ଚିଢ଼ାନ୍ ଭେଡ଼ି ହାଦ୍ଦୁଘି ହେଁସୁତି ନଣୀରିକିରି ଧୋବ୍ କାମ୍ଚ୍କାନାଏ। 15ଇଦ୍ଘିଲାଗାନ୍ ଆବ୍ଡ଼ା ଆଲାର୍ ପାର୍ମେଶ୍ୱାର୍ସ୍କି ରାଜ୍ଗାଦୀଘି ଆଘ୍ଲି ରାନାଏ, ଆରୁ ଉଲ୍ଲାନ୍ ମାହାନ୍ ଆସ୍କି ମନ୍ଦିର୍ନୁ ସେବା କାମ୍ନାଏ, ଆରୁ ଏକାସ୍ ରାଜ୍ଗାଦୀନୁ ଅକ୍କାଦାସ୍ ଆସ୍ ଆବ୍ଡ଼ାର୍ ଗାନେ ରାଇକିରି ଆବ୍ଡ଼ାର୍ରିନ୍ ବାଛାବସ୍। 16ଆରୁ ଏକ୍ଲାହି ଆବ୍ଡ଼ାର୍ଗେ ମାଣ୍ଡି କିଡ଼ା ନା ଆମ୍ମୁକିଡ଼ା ମା ଲାଗ୍ଗ, ଆରୁ ଇବ୍ଡ଼ାର୍ଗେ ନା ତା ବିଡ଼୍ନା ସେକଦ୍, ନା ଏକ୍ରିନ୍ କୁଡ଼୍ନାତି ତକ୍ଲିପ୍ ମାନଦ୍। 17ଏନ୍ଦେର୍ଗେକା ରାଜ୍ଗାଦୀଘି ମାଝାନୁ ଅକ୍ନା ବାଲା ଭେଡ଼ିହାଦ୍ଦୁସ୍ ଇବ୍ଡ଼ାର୍ଘି ହାପୁସ୍ ମାନସ୍, ଆରୁ ଇବ୍ଡ଼ାର୍ଗେ ଜୀବନ୍ ଚିନାବାଲା ଆମ୍ମୁଘି ଚାହାନୁ ହୋସ୍କସ୍ ଆରୁ ପାର୍ମେଶ୍ୱାର୍ସ୍ ଇବ୍ଡ଼ାର୍ଘି ହାନ୍ନୁନ୍ତି ଜାମା ହାଞ୍ଜାଲୋ ଆମ୍ମୁନ୍ ଚିଁଚୋ ଚସ୍।”
8ସାତ୍ୱାଁ ମୋହର୍ ଆରୁ ସୋନାଘି ଧୁପ୍ଦାନ୍
1ଯେତ୍କବାକେନ୍ ଭେଡ଼ିହାଦ୍ଦୁସ୍ ସାତ୍ୱାଁ ମୋହର୍ ଖୋଲ୍ଚାସ୍, ତା ସରଗ୍ନୁ ଲାଗ୍ଭାଗ୍ ଆଧା ଘାଣ୍ଟାତକ୍ ଶୁନ୍ଶାନ୍ ମାନ୍ଚାକେରା। 2ଇଦ୍ଘି ପାଛ୍ଲି ଏନ୍ ଆ ସାତ୍ତେଟା ସରଗ୍ ଦୂଁତ୍ରିନ୍ ଏର୍କାନ୍, ଏକାର୍ ପାର୍ମେଶ୍ୱାର୍ସ୍କି ଆଘ୍ଲି ଇଜ୍ଜକା ରାନାଏ, ଆରୁ ଆବ୍ଡ଼ାର୍ଗେ ସାତ୍ତେଟା ତୁର୍ହି ବାଜା ଚିଆ କାଲିଦ୍।
3ଆନ୍ତିନ୍ ଅଣ୍ଟା ଆରୁ ସରଗ୍ଦୂଁତ୍ ସୋନାଘି କାଟୋରାନୁ ଆଦ୍ ଧୁମ୍ମାଲୀ ଧାରିକିରି ବେଦୀନୁ ବାର୍ଚା; ଆସ୍କେ ଢେର୍ ଧୁମ୍ମାଲୀ ଚିଆକେରା କା ଆବନ୍ ଆସ୍ ରାଜ୍ଗାଦୀଘି ଚାହାନୁ ଉଇୟାସ୍। ଆରୁ ସୋନାଘି ବେଦୀନୁ ଜାମା ପାବିତାର୍ ଆଲାର୍ଗେ ବିନ୍ତିଗାନେ ଚାଢ଼ାବାଚାସ୍। 4ଆ ଧୁମ୍ମାଲୀଘି ଧୁଙ୍ଗିୟାଦ୍ ପାବିତାର୍ ଆଲାର୍ଘି ବିନ୍ତିଗାନେ ସରଗ୍ଦୂଁତ୍ଘି ହେଖ୍ଖାନ୍ତି ପାର୍ମେଶ୍ୱାର୍ସ୍କି ଚାହାନୁ ଆଣ୍ସିୟା କେରା। 5ଆଙ୍ଗେନ୍ ଆ ଦୂଁତ୍ଦ୍ ଧୁମ୍ମାଲୀ ଦାନ୍ ହୋଇକିରି ଆନ୍ନୁ ବେଦୀନ୍ତା ଚିଚ୍ଚୁନ୍ ନିନ୍ଦିଆ ଆରୁ ଧାନ୍ତାରିନୁ ଖେବ୍ଡ଼େଇଚା। ଆଙ୍ଗେନ୍ ବାଦ୍ଲି ଗାର୍ଜାରାନା, ନାନ୍ନା-ନାନ୍ନା ଶବଦ୍, ବିଲ୍ଚ୍ତାନା, ଆରୁ ଭୁଇଁଡୋଲ୍ ମାନ୍ଚା।
ସାତ୍ତେଟା ତୁର୍ହି ବାଜା
6ହତ୍କବାକେନ୍ ଆବ୍ଡ଼ା ସାତ୍ତେଟା ସରଗ୍ ଦୂଁତ୍ର୍ ନେଖାସାନ୍ କା ସାତ୍ତେଟା ତୁର୍ହି ବାଜା ରାଚା, ଆବନ୍ ଆବ୍ଡ଼ାର୍ ଉରାଗେ ତିୟାର୍ ମାନ୍ଚାର୍।
7ପହିଲ୍ ସରଗ୍ଦୂଁତ୍ ତୁର୍ହି ବାଜାବନ୍ ଉରିୟାଦ୍, ଆରୁ ହେଁସୁତି ମେଶାବାଚ୍କା ଆଲି, ଆରୁ ଚିଚ୍ଚୁ ସିର୍ଜାରାଚା ଧାନ୍ତାରିନୁ ତୁନ୍ଦାଚା କେରା; ଆରୁ ଦୁନିଆଁନ୍ତା ତିନ୍ ଭାଗ୍ ଅଲିଆ କେରା ଆରୁ ମାନ୍ନୁଘି ତିନ୍ ଭାଗ୍ ଅଲିଆ କେରା ଆରୁ ଜାମା ହାରା-ହାରା ଘାଁସିଦ୍ ଅଲିଆ କେରା।
8ଦୁସ୍ରା ସରଗ୍ଦୂଁତ୍ ତୁର୍ହି ବାଜାବନ୍ ଉରିୟାଦ୍ ଆରୁ ଏନ୍ନେ ଲାଗ୍ଗିୟା କା ଅଣ୍ଟା ବାଡ଼୍କା ପାର୍ତ୍ତାଦ୍ ଚିଚ୍ଚୁ ଲେଖା ଲାଘ୍ର୍ନାବନ୍ ସାମ୍ଧୁର୍ନୁ ଖେବ୍ଡ଼ାଚାକେରା; ଆରୁ ସାମ୍ଧୁର୍ଦ୍ ତିନ୍ ଭାଗ୍ ହେଁସୁ ଲେଖା ଲାଲ୍ ମାନ୍ଚାକେରା। 9ଆରୁ ସାମ୍ଧୁର୍ତା ତିନ୍ ଭାଗ୍ ଜାନ୍ତୁଦ୍ କେଚ୍ଚାକେରା। ଆରୁ ଅଣ୍ଟାତିନ୍ ଭାଗ୍ ଜାହାଜ୍ଦ୍ ଏସ୍ରିକିରି ନୁକ୍ସାନ୍ ମାନ୍ଚାକେରା।
10ତିସ୍ରା ସରଗ୍ଦୂଁତ୍ ତୁର୍ହି ବାଜାନ୍ ଉରିୟାଦ୍, ତା ଲାଘ୍ର୍ନା ମାସାଲ୍ଘି ଚିଚ୍ଚୁ ଲେଖା ଅଣ୍ଟା ବାଡ଼୍କା ବିନ୍କୋ ଆକାଶ୍ତି ଖାତ୍ରା ଆରୁ ହଁସ୍ରାଘି ତିନ୍ ଭାଗ୍ ଆରୁ ଝାର୍ନାଗୁଠିନୁ ଖାତ୍ରାଦ୍। 11ଆ ବିନ୍କୋଘି ନାମେ (ନାଗ୍ଦାଉନା) ହାଡ଼୍ଖା ରାଚା ଆରୁ ତିନ୍ ଭାଗ୍ ଆମ୍ମୁଦ୍ (ନାଗ୍ଦାଉନା) ମାନ୍ଚାକେରା। ହୁଦ୍ଘିଲାଗାନ୍ ଢେର୍ ଆଲାର୍ ଆମ୍ମୁ ହାପ୍ପିକିରି କେଚ୍ଚାର୍ କେରାର୍। ଏନ୍ଦେର୍ଗେକା ଆମ୍ମୁଦ୍ ବିଷ୍ ମାନ୍ଚା କେର୍କିଚା।
12ଚଉଥା ସରଗ୍ଦୂଁତ୍ ତୁର୍ହି ବାଜାନ୍ ଉରିୟାଦ୍ ଆରୁ ବିଡ଼ିଘି ତିନ୍ ଭାଗ୍, ଚାନ୍ଦୋଘି ତିନ୍ ଭାଗ୍, ଆରୁ ବିନ୍କୋଘି ତିନ୍ ଭାଗ୍ନୁ ବାଜ୍ଡ଼ାରାଚାଦ୍, ଇବ୍ଡ଼ାସ୍ତି ଆଦ୍ଘି ଅଣ୍ଟା ତିନ୍ ଭାଗ୍ ଉହା ମାନ୍ଚାକେରା। ଆରୁ ଉଲ୍ଲାହି ତିନ୍ ଭାଗ୍ନୁ ବିଲ୍ଲୀ ମା ରାଚା ଆରୁ ମାଁହାହି ତିନ୍ ଭାଗ୍ନୁ ବିଲ୍ଲୀ ମା ରାଚା।
13ଯେତ୍କବାକେନ୍ ଏନ୍ ଆରୁଅହନ୍ ନାଜ୍ରାଚ୍କାନ୍ ତା ଆକାଶ୍ଘି ମାଝାନୁ ଅଣ୍ଟା ଗିଧିବଦ୍ ଉଢ଼ିୟାରାଲିଆଦ୍। ଆଦ୍ଘି ଜୋର୍ସେ ଏନ୍ନେ ତେଙ୍ଗ୍ନାନ୍ ମେନ୍ଚ୍କାନ୍, “ଧାନ୍ତାରିନୁ ରୁ ଆଲାର୍ଘି ମିଆଁ ଢେର୍ ବିପଦ୍ ବାରୋଦ୍। ଆ ତିନ୍ ସରଗ୍ ଦୂଁତ୍ର୍ଘି ତୁର୍ହି ବାଜାଘି ଉର୍ନା ବାକି ରାଇଦ୍।” ହାୟରେ, ହାୟରେ, ହାୟରେ।
9ପାଞ୍ଚୱାଁ ତୁର୍ହି
1ଆନ୍ତିନ୍ ପାଞ୍ଚୱାଁ ସରଗ୍ଦୂଁତ୍ ତୁର୍ହି ବାଜାବନ୍ ଉରିୟାଦ୍ ତା ଏନ୍ ଆକାଶ୍ତି ଅଣ୍ଟା ବିନ୍କୋନ୍ ଧାନ୍ତାରିନୁ ଖାତ୍ର୍ନାନ୍ ଏର୍କାନ୍। ଆରୁ ଆଦ୍ଗେ ପାତାଲ୍ ଗାଡ୍ଡିନ୍ତା ଚାଭି ଚିୟାକେରା। 2ଆଦ୍ ପାତାଲ୍ ଗାଡ୍ଡିନ୍ ଖୋଲ୍ଚା, ଆରୁ ଆ ବାଡ଼୍କା ଭାଟ୍ଟା ଗାଡ୍ଡିନ୍ତା ଧୁଙ୍ଗିୟା ଲେଖା ଧୁଙ୍ଗିୟା ଉର୍ଖିୟାଦ୍ ଆରୁ ଆ ପାତାଲ୍ ଗାଡ୍ଡିନ୍ତା ଧୁଙ୍ଗିୟାତି ବିଡ଼ି ଆରୁ ଆକାଶ୍ ଉହା ମାନ୍ଚାକେରା। 3ଆ ଧୁଙ୍ଗିୟାନ୍ତି ବଖ୍ଖୋ ଉର୍ଖିକିରି ଦୁନିଆଁନୁ ବାର୍ଚାଦ୍, ଆରୁ ଆବ୍ଡ଼ାର୍ଗେ ଦୁନିଆଁନ୍ତା ବିଚ୍ଛି ଲେଖା ଶକ୍ତି ଚିୟାକେରା। 4ଆବ୍ଡ଼ାନ୍ ତେଙ୍ଗାକେରା କା ନା ଦୁନିଆଁନ୍ତା ଘାଁସିନ୍, ନା ଏକିନ୍ ହୋପ୍ପାନ୍, ନା ତା ଏକିନ୍ ମାନ୍ନୁନ୍ ନୁକ୍ସାନ୍ କାମଦ୍, ଲେକିନ୍ ଏକା ଆଲାର୍ଘି କାପ୍ଡ଼େନୁ ପାର୍ମେଶ୍ୱାର୍ସ୍କି ମୋହର୍ ମାଲ୍ଲାଦିନ୍, ଆବ୍ଡ଼ାରିନ୍ ଖାଲି ନୁକ୍ସାନ୍ କାମଦ୍। 5ଆବ୍ଡ଼ାନ୍ ଆଲାରିନ୍ ପିଟାଗେତା ମାଲ୍ଲା, ଲେକିନ୍ ପାଞ୍ଚ୍ ମାସ୍ତକ୍ କଷଟ୍ ଚିୟାଗେ ହକ୍ ଚିଚ୍କା ରାଚା। ବିଚ୍ଛି ପାର୍ମ୍କୁନ୍ ଏସ୍କେ କଷଟ୍ ହାଖ୍ଖରିଦ୍, ଇବ୍ଡ଼ା ଆଲାର୍ଘି କଷଟ୍ଦ୍ହି ହନ୍ନେ ରାଚା। 6ଆ ଉଲ୍ଲାନୁ ମୁନୁଷ୍ର୍ ମରନ୍ବନ୍ ବେଦ୍ଦର୍, ଲେକିନ୍ ଆଦ୍ ଆବ୍ଡ଼ାର୍ଗେ ମା ହାଖ୍ଖରିଦ୍; ଆବ୍ଡ଼ାର୍ ଖିଆଗେ ଇଚ୍ଛା କାମର୍, ଲେକିନ୍ ଖିନାଦ୍ ଆବ୍ଡ଼ାର୍ସ୍ତି ବୁଙ୍ଗ୍ତେ ରଦ୍।
7ଆ ବଖ୍ଖୋଘି ଗଢ଼ନ୍ ଲାଡ଼ାଇଘି ଲାଗାନ୍ ସାପ୍ଡ଼ାରାଚ୍ କା ଘୋଣ ଲେଖା ରାଚା। ଏନ୍ନେ ଲାଗ୍ଗାଲିୟାଦ୍ କା ଆବ୍ଡ଼ାର୍ଘି କୁକ୍କୁନୁ ସୋନାଘି ମୁକୁଟ୍ ଲେଖା ରାଚା, ଆବ୍ଡ଼ାର୍ଘି ଚେହେରା ଆଲାର୍ଘି ଚେହେରା ଲେଖା ରାଚା। 8ଆବ୍ଡ଼ାର୍ଘି ଚୁଟ୍ଟିଦ୍ ମାଏକିନିଆଁର୍ଘି ଚୁଟ୍ଟି ଲେଖା, ଆରୁ ଆବ୍ଡ଼ାର୍ଘି ପାଲ୍ଲୁ ଡୁକ୍କାଘି ପାଲ୍ଲୁ ଲେଖା ରାଚା। 9ଆବ୍ଡ଼ାଘି ଏହୁନୁ ପାନ୍ନାଘି ଝୀଲମ୍ ଆତ୍ତ୍କା ଲେଖା ଏଥ୍ରାଲିୟାଦ୍, ଆବ୍ଡ଼ାର୍ଘି ଡେଣାଘି ଶବଦ୍ ଲାଡ଼େଇନୁ କୁଦ୍ଦିଆରାନା ଘୋଣ ଗାଡ଼ି ଆରୁ ଢେର୍ ଘୋଣଘି ଜୋର୍ସେ କୁଦ୍ଦିଆରାନାଘି ଶବଦ୍ ଲେଖା ମେନ୍ଦ୍ରାଲିୟାଦ୍। 10ଆବ୍ଡ଼ାର୍ଘି ହଲାଦ୍ ଚିଚ୍ଚୁ ବିଚ୍ଛି ଦାଗ୍ନା ଲେଖା ହଲା ରାଚା ଆରୁ ପାଞ୍ଚ୍ ମାହିନାତକ୍ ଆଲାରିନ୍ ଦୁଃଖୁ ଚିନାଘି ଏକା ଶକ୍ତି ହାଖ୍ଖର୍କିଚା, ଆଦ୍ ଆବ୍ଡ଼ାର୍ଘି ହଲାନୁ ରାଚା। 11ପାତାଲ୍ ଗାଡ୍ଡିନ୍ତା ଦୂଁତ୍ ଆବ୍ଡ଼ାର୍ଘି ରାଜା ରାଚା, ଆଦ୍ଘି ନାମେ ଇବ୍ରାନୀ ଭାଷାନୁ ଆବ୍ଦ୍ଦନ୍ ଆରୁ ୟୁନାନୀନୁ ଆପଲ୍ଲିୟୋନ୍। ମତ୍ଲବ୍ ନାଶ୍ କାମ୍ନାବାଲା ତେଙ୍ଗାକାଇ।
12ପହ୍ଲେ ବିପଦ୍ ବିତ୍ରାକେରା, ମେନା ଇଦ୍ଘି ପାଛ୍ଲି ଆରୁ ଯୋଡ଼େ ବିପଦ୍ ବାର୍ନାବାଲା ରାଇଦ୍।
13ଯେତ୍କବାକେନ୍ ଛାଟ୍ୱାଁ ସରଗ୍ଦୂଁତ୍ ତୁର୍ହି ବାଜାବନ୍ ଉରିୟାଦ୍ ତା ପାର୍ମେଶ୍ୱାର୍ସ୍କି ଆଘ୍ଲି ରାନାବାଲା ସୋନାଘି ବେଦୀନ୍ତା ଚାରିହ୍ କୋଣାନ୍ତି ଏନ୍ ଏନ୍ନେ ଶବଦ୍ ମେନ୍ଚ୍କାନ୍, 14ଆଦ୍ ଛାଟ୍ୱାଁ ସରଗ୍ ଦୂଁତ୍ବନ୍ ନେଖାସାନ୍ କା ତୁର୍ହି ବାଜା ରାଚା ଆବନ୍ ତେଙ୍ଗିୟାଦ୍, “ଫାରାତ୍ ବାଡ଼୍କା ହଁସ୍ରାଘି ଚାହାନୁ ହିଁଚ୍କା ନାହ୍ଟା ସରଗ୍ ଦୂଁତ୍ବନ୍ କୋଲ୍ଲୁଚି।” 15ଆ ନାହ୍ଟା ସରଗ୍ ଦୂଁତ୍ରିନ୍ ଖୋଲ୍ଚେଚା, ଆବ୍ଡ଼ାର୍ ହୁବାକେନ୍, ହୁ ଉଲ୍ଲା, ହୁ ମାସ୍ ଆରୁ ହୁ ବଛର୍ନୁ ଆଲାର୍ଘି ତିନ୍ ଭାଗ୍ବନ୍ ପିଟାଗେ ତିୟାର୍ କାମ୍ଚ୍କା ରାଚା। 16ଆବ୍ଡ଼ାଘି ଘୋଣ ଚାଲାବୁର୍ କୁଡ଼ିଏ କାରୋଡ଼୍ ରାଚା, ଏନ୍ ଆବ୍ଡ଼ାର୍ଘି ଗନ୍ତି କାମ୍ଚ୍କାନ୍ ମେନ୍ଚ୍କାନ୍। 17ଆରୁ ଏନ୍ ଇ ଦର୍ଶନ୍ନୁ ଘୋଣ ଆରୁ ଘୋଣ ଚାଲାବୁରିନ୍ ଏନ୍ନେ ଏର୍କାନ୍, ଆବ୍ଡ଼ାର୍ଘି ଝୀଲମ୍ ଚିଚ୍ଚୁ ଲେଖା ଲାଲ୍, ହୀରା ମୋତି ଲେଖା ନୀଲା ଆରୁ ଗନ୍ଧକ୍ ଲେଖା ହଲ୍ଦିଆ ରାଚା ଆରୁ ଆବ୍ଡ଼ା ଘୋଣଘି କୁକ୍କୁଦ୍ ଡୁକ୍କାଘି କୁକ୍କୁ ଲେଖା ରାଚା; ଆରୁ ଆବ୍ଡ଼ାଘି ଥୁମ୍ଣାନ୍ତି ଚିଚ୍ଚୁ, ଧୁଙ୍ଗିୟା ଆରୁ ଗନ୍ଧକ୍ ଉର୍ଖାଲିୟାଦ୍। 18ଇବ୍ଡ଼ା ମୁଣ୍ଟା ବିପଦ୍ଘି ଦ୍ୱାର୍ନୁ, ଚାହେ ଚିଚ୍ଚୁ, ଧୁଙ୍ଗିୟା ଆରୁ ଗନ୍ଧକ୍ ଦ୍ୱାର୍ନୁ, ଏକାଦ୍ ଘୋଣଘି ଥୁମ୍ଣାନ୍ତି ଉର୍ଖାଲାଦ୍, ଅଣ୍ଟାତିନ୍ ଭାଗ୍ ମୁନୁଷ୍ରିନ୍ ପିଟାଚା କେରା। 19ଏନ୍ଦେର୍ଗେକା ଆ ଘୋଣଘି ଶକ୍ତି ଆବ୍ଡ଼ାଘି ଥୁମ୍ଣା ଆରୁ ହଲାନୁ ରାଚା, ଏନ୍ଦେର୍ଗେକା ଆବ୍ଡ଼ାଘି ହଲାଦ୍ ନେର୍ରୁଘି ହଲା ଲେଖା ରାଚା, ଆରୁ ହଲାଘି କୁକ୍କୁ ହି ରାଚା, ଆତ୍ତି ଆବ୍ଡ଼ାଦ୍ କଷଟ୍ ଚିଆଲିୟାଦ୍। 20ବାକି ଆଲାର୍ ଏକାର୍ ଇ ତକ୍ଲିପ୍ତି ମା ପିଟା କେର୍କାଚାର୍, ଆବ୍ଡ଼ାର୍ ଆ ଭୁତ୍ତୁଗୁଠିନ୍ ପୂଜା କାମ୍ଚାର୍, ଆରୁ ତାହ୍ମା ହେଖ୍ଖାନ୍ତି କାମ୍ଚ୍କା ସୋନା ରୂପା, ପିତ୍ତାଲି, ଚାଁଚା, କାଙ୍କୁଘି ମୂର୍ତ୍ତୀ, ଏକାଦ୍ କା ମା ଏରିଦ୍, ନା ମେନିଦ୍, ନା ଏକା ଅଙ୍ଗିଦ୍, ଆବନ୍ ମା ଆମ୍ବିୟାର୍ ମା ପାସ୍ତାରାଚାର୍। 21ଆରୁ ଆବ୍ଡ଼ାର୍ ତାହ୍ମା କାମ୍ଚ୍କା ନାଲ୍ଖୁ, ଆଲ୍ ପିଟ୍ଟକା, ଯାଦୁଟୋନା, ବେଭିଚାର୍ ଆରୁ ଚୋର୍ହା ନାଲ୍ଖୁନୁ ମା ପାସ୍ତାରାଚାର୍।
10ସରଗ୍ଦୂଁତ୍ ଆରୁ ଛୋଟେ ବହି
1ଆରୁଅହନ୍ ଏନ୍ ଅଣ୍ଟା ତାକତ୍ବାଲା ସରଗ୍ ଦୂଁତ୍ବନ୍ ବାଦ୍ଲିନୁ ଗୁଢ଼ିଆରାଚ୍କା ସରଗ୍ତି ଏତ୍ତନାନ୍ ଏର୍କାନ୍। ଆଦ୍ଘି କୁକ୍କୁନୁ ଇନ୍ଦ୍ରଧନୁ ରାଚା ଆରୁ ଆଦ୍ଘି ଚେହେରାଦ୍ ବିଡ଼ିଘି ଲେଖା ବିଲ୍ଚାଲିୟାଦ୍ ଆରୁ ଆଦ୍ଘି ହେଡ୍ଡୁଦ୍ ଚିଚ୍ଚୁଘି ଖାମ୍ବାଘି ଲେଖା ରାଚା। 2ଆଦ୍ଘି ହେଖ୍ଖାନୁ ଖୋଲ୍ଚ୍କା ଅଣ୍ଟା ଛୋଟେ ବହି ରାଚା। ଆରୁ ଆଦ୍ ନିଜର୍ ତିନା ହେଡ୍ଡୁନ୍ ସାମ୍ଧୁର୍ନୁ ଆରୁ ଡେବ୍ବା ହେଡ୍ଡୁନ୍ ଧାନ୍ତାରିନୁ ଉଇୟାଦ୍। 3ଆରୁ ଏନ୍ନେ ବାଡ଼୍କା ଶବଦ୍ତି ଚିର୍ରାରାଚା ଏସ୍କେ କା ଡୁକ୍କାଦ୍ ଚିର୍ରାରାଇଦ୍, ଆରୁ ଯେତ୍କବାକେନ୍ ଆଦ୍ ଚିର୍ରାରାଚାଦ୍ ଆ ସାତ୍ତେଟା ବାଦ୍ଲିଘି ଶବଦ୍ ଚିର୍ରାରାନା ଲେଖା ମେନ୍ଦ୍ରାଲିୟାଦ୍। 4ଯେତ୍କବାକେନ୍ ବାଦ୍ଲିଘି ସାତ୍ତେଟା ଚିର୍ରାରାନା ଶବଦ୍ ମେନ୍ଦ୍ରା, ତା ଏନ୍ ଲେଖ୍ନାବାଲା ରାଚ୍କାନ୍, ଲେକିନ୍ ଏନ୍ ସରଗ୍ତି ଇ ଶବଦ୍ବନ୍ ମେନ୍ଚ୍କାନ୍; “ଆ ସାତ୍ତେଟା ବାଦ୍ଲିଘି ଶବଦ୍ ମେନ୍ଚ୍କାଦାନ୍, ଆବନ୍ କାଡ଼େ-କାଡ଼େ ଉଇୟା ଆରୁ ଆମା ଲେଖା।” 5ଆଙ୍ଗେନ୍ ଏକା ସରଗ୍ ଦୂଁତ୍ବନ୍ ସାମ୍ଧୁର୍ ଆରୁ ଧାନ୍ତାରିନୁ ଇଜ୍ଜକା ଏର୍କାଚ୍କାନ୍ ଆଦ୍ ତାଙ୍ଘା ତିନା ହେଖ୍ଖାନ୍ ସରଗ୍ ତାରା ଟେକ୍ଚା। 6ଆରୁ ଆସ୍କି କସମ୍ ମହିଁକିରି ସରଗ୍ଦୂଁତ୍ ତେଙ୍ଗିୟା ଆକ୍କୁନ୍ ତା ଡେରି ମା ମାନିଦ୍, ପାର୍ମେଶ୍ୱାର୍ସ୍ ଏକାସ୍ କା ଯୁଗ୍-ଯୁଗ୍ ଉଜ୍ଜଦାସ୍ ଆସ୍ ସରଗ୍, ଧାନ୍ତାରି, ସାମ୍ଧୁର୍ ଆରୁ ଏନ୍ଦ୍ରିନ୍ ଆସ୍ତି ସିର୍ଜାରାଚ୍କିଚି, ଆରୁ ଏକାସ୍ ସରଗ୍ବନ୍, ଏନ୍ଦ୍ରିନ୍ ଆସ୍କିନୁ ରାଇ, ଧାନ୍ତାରିବନ୍, ଆରୁ ଏନ୍ଦ୍ରିନ୍ ଆସ୍ତି ସିର୍ଜାରାଚ୍କିଚି, ଆବନ୍ କାମ୍ଚାସ୍। 7ଏକା ଉଲ୍ଲା ସାତ୍ୱାଁ ସରଗ୍ଦୂଁତ୍ଘି ତୂରୀ ବାଜା ଉର୍ନା ଶବଦ୍ ମେନ୍ଦ୍ର। ଆ ଉଲ୍ଲାନୁ ପାର୍ମେଶ୍ୱାର୍ସ୍କି ନୁଡ୍କା ମନ୍ତା କାତ୍ଥା ପୁରା ମାନୋ କୋ। ଏସ୍କେ କା ଆସ୍ ତାଙ୍ଘା ଗୁତ୍ତିୟାର୍ଗେ ନାବୀରିନ୍ ତେଙ୍ଗିୟାସ୍, 8ଏନ୍ ଏକା ଶବଦ୍ବନ୍ ସରଗ୍ତି ବାର୍ନାନ୍ ମେନ୍ଚ୍କାଚ୍କାନ୍, ଆଦ୍ ଆ ସାମାୟନୁ ଏଙ୍ଗାନ୍ ଆରୁଅହନ୍ ତେଙ୍ଗିୟା, କାଲା ଏକା ସରଗ୍ଦୂଁତ୍ ସାମ୍ଧୁର୍ ଆରୁ ଧାନ୍ତାରିନୁ ଇଜ୍ଜକିଚି ଆଦ୍ଘି ହେଖ୍ଖାନ୍ତି ଆ ଖୋଲ୍ଚ୍କା ବହିନ୍ କାଲା ହୁଆ। 9ଏନ୍ ସରଗ୍ଦୂଁତ୍ଘି ଚାହାନୁ କାଇକିରି ତେଙ୍କାନ୍, “ଇ ଛୋଟେ ବହିନ୍ ଏଙ୍ଗା ଚିଇ।” ଆଦ୍ ଏଙ୍ଗାନ୍ ତେଙ୍ଗିୟା, “ହୁଆ କାଲା ଇବନ୍ ମହୁଁଚି, ଇଦ୍ ନିଙ୍ଘା କୁଲୁନ୍ କାଡ଼୍ୱା କାମୋ, ଲେକିନ୍ ନିଙ୍ଘା ଥୁମ୍ଣାନୁ ତିନିରାସେ ଲେଖା ଲାଗ୍ଗ।” 10ଆଙ୍ଗେନ୍ ଏନ୍ ଆ ଛୋଟେ ବହିନ୍ ଆ ସରଗ୍ଦୂଁତ୍ଘି ହେଖ୍ଖାନ୍ତି ହୋଇକିରି ମକ୍କାନ୍ ଚିଚ୍କାନ୍। ଆଦ୍ ଏଙ୍ଘା ଥୁମ୍ଣାଗେ ତିନିରାସେ ଲେଖାତା ତିନିଆ, ଲେକିନ୍ ଯେତ୍କବାକେନ୍ ଆବନ୍ ମକ୍କାନ୍, ତା ଏଙ୍ଘାଏ କୁଲୁ କାଡ଼୍ୱା ମାନ୍ଚାକେରା। 11ଆଙ୍ଗେନ୍ ଏଙ୍ଗାନ୍ ଇ ତେଙ୍ଗାକେରା, “ନିଙ୍ଗାଗେ ବହୁତ୍ ଆଲାର୍, ଆରୁ ଜାତିୟାର୍, ଭାଷାଗୁଠିନ୍, ରାଜାର୍ଘି ବାରେନୁ ଆରୁଅହନ୍ ଭବିଷତ୍ କାତ୍ଥା ତେଙ୍ଗା ଖାତ୍ରୋ।”
11ଦୁଇ ଲୋକ୍ ସାକ୍ଷୀ ଚିନାବାଲାର୍
1ଆରୁଅହନ୍ ଏଙ୍ଗାନ୍ ନାପାଗେ ଲାଗାନ୍ ଅଣ୍ଟା ଠେଙ୍ଗା ଚିୟାକେରା, ଆରୁ ନେଦିନ୍ ତେଙ୍ଗିୟାର୍, “ଉସ୍କାରା, ପାର୍ମେଶ୍ୱାର୍ସ୍କି ମନ୍ଦିର୍ ଆରୁ ବେଦୀଦ୍, ଆରୁ ଆନ୍ନୁ ଆବ୍ଡ଼ାରିନ୍ ଆରାଧାନା କାମୁରିନ୍ ନାପା। 2ଲେକିନ୍ ମନ୍ଦିର୍ଘି ବାହ୍ରିନ୍ତା ଚାଲିବନ୍ ଆମ୍ବାଚା ଆବନ୍ ଆମା ନାପା ଏନ୍ଦେର୍ଗେକା ଆବନ୍ ବିନାୟାହୁଦୀର୍ଗେ ଚିଆ କେର୍କିଚି, ଆରୁ ଆବ୍ଡ଼ାର୍ ପାବିତାର୍ ସହର୍ବନ୍ ବୟାଲିଶ୍ ମାହିନାତକ୍ ତିର୍ହର୍ ନାବର୍। 3ଏନ୍ ନିଜର୍ ଯୋଡ଼େ ସାକ୍ଷୀବନ୍ ଇ ହକ୍ ଚିଅନ୍ କା ବସ୍ତାବନ୍ ଢାପ୍ରିକିରି ଅନ୍ ହାଜାର୍ ଦୁଇ ଶହ୍ ଷାଠିଏ ଦିନ୍ତକ୍ ଭବିଷତ୍ କାତ୍ଥା ତେଙ୍ଗ୍ତେ ରର୍।”
4ଇ ସାକ୍ଷୀର୍ ଆବ୍ଡ଼ା ଜେଇତୁନ୍ଘି ଯୋଡ଼େ ମାନ୍ନୁ ଆରୁ ଯୋଡ଼େ ବିଲ୍ଲୀ ଉଇନା ଖୁଟାଦ୍, ଏକାର୍ ଧାନ୍ତାରିଘି ପ୍ରାଭୁସ୍କି ଚାହାନୁ ଇଜ୍ଜକାନାଏ। 5ଯଦି ନେଦିନ୍ ଆସିନ୍ ନୁକ୍ସାନ୍ ଆଣସ୍ତାଗେ ଚାହଁନାଏ, ତା ଇବ୍ଡ଼ାର୍ଘି ଥୁମ୍ଣାନ୍ତି ଚିଚ୍ଚୁ ଉର୍ଖି ଆରୁ ଆସ୍କି ଦୁଶ୍ମାନ୍ରିନ୍ ନାଶ୍ କାମ୍ନାଏ; 6ଏକାର୍ ଆବ୍ଡ଼ାରିନ୍ ନୁକ୍ସାନ୍ ଆଣ୍ସ୍ତାଗେ ଚାହଁର୍ ଆସ୍କେ ଆଦ୍ଘି ଲେଖା ଖିଆ ଖାତ୍ରୋ। ଇବ୍ଡ଼ାର୍ଗେ ଆକାଶ୍ଘି ବାଲି ବନ୍ଦ କାମାଗେ ହକ୍ ରାଇ। ଇବ୍ଡ଼ାର୍ଘି ଭବିଷତ୍ କାତ୍ଥାଘି ସାମାୟନୁ ଚେପୁ ମା ପୁୟି। ଆରୁ ଇବ୍ଡ଼ାର୍ଗେ ଆମ୍ମୁବନ୍ ହେଁସୁନୁ ବାଦ୍ଲାଗେ ଆରୁ ଯେତ୍କ-ଯେତ୍କବାକେନ୍ ଚାହେ ହତ୍କ-ହତ୍କବାକେନ୍ ଧାନ୍ତାରିନୁ ଜାମା ଲେଖା ମାହାମାରି ତାୟାଗେ ହକ୍ ରାଇ। 7ଯଦି ଆବ୍ଡ଼ାର୍ ନିଜର୍ ସାକ୍ଷୀ ଚିଆ ଅଙ୍ଗଦ୍, ତା ଆବ୍ଡ଼ା ଜାନ୍ତୁଦ୍ ଏକାଦ୍ କା ପାତାଲ୍ ଗାଡ୍ଡିନ୍ତି ଅଥ୍ରଦ୍, ଆବ୍ଡ଼ାର୍ ଗାନେ ଲାଡ଼ାଇ କାମୋ ଆରୁ ଆବ୍ଡ଼ାରିନ୍ ହାର୍ତିକିରି ପିଟର୍ଚର୍। 8ଏକାସାନ୍ କା ଆବ୍ଡ଼ାର୍ଘି ପ୍ରାଭୁସିନ୍ହି କ୍ରୁଶ୍ନୁ ଠୋକ୍ଚାର୍ ଆରୁ ପିଟ୍ଟେଇଚ୍କାଚାର୍। ଆରୁ ଏକାର୍ ଆତ୍ମିକ୍ ରୂପ୍ତି ସଦୋମ୍ ଆରୁ ମିଶର୍ ତେଙ୍ଗାକାଇ, ଆବ୍ଡ଼ାର୍ଘି ମାଁଣା ଆ ବାଡ଼୍କା ସହର୍ଘି ପାବୁନୁ ଖାତ୍ରା କେର୍କିରୋ। 9ଜାମା ଆଲାର୍ ଆରୁ ତାହ୍ମା ବାଉଁଶାର୍ ଆରୁ ଭାଷାଗୁଠିନ୍ ଆରୁ ଜାତିୟାର୍ଘି ଆଲାର୍ ଆବ୍ଡ଼ାର୍ଘି ମାଁଣାବନ୍ ସାଢ଼େତିନ୍ ଦିନ୍ତକ୍ ଏର୍ତେ ରର୍, ଆରୁ ଆବ୍ଡ଼ାର୍-ଆବ୍ଡ଼ାର୍ଘି ମାଁଣାବନ୍ ମାସ୍ଣାନୁ ଉଇୟା ମା ଚିନାଏ। 10ଧାନ୍ତାରିନୁ ରାନା ବାଲାର୍ ଇବ୍ଡ଼ାର୍ଘି ଲାଗାନ୍ ଲୀଝ୍ରିକିରି ଖୁସୀ ମାନାବର୍, ଆରୁ ଏକ୍ ଦୁସ୍ରାର୍ଗେ ଉପହାର୍ ଚିଅର୍, ଏନ୍ଦେର୍ଗେକା ଇ ଯୋଡ଼େ ନାବୀର୍ ଧାନ୍ତାରିନୁ ରାନାବାଲାରିନ୍ ସାତାବାଲାର୍। 11ଲେକିନ୍ ସାଢ଼େତିନ୍ ଦିନ୍ଘି ପାଛ୍ଲି ପାର୍ମେଶ୍ୱାର୍ସ୍କି ତାର୍ତି ଇ ଦୁହି ଲୋକ୍ର୍ନୁ ଜୀଆ ବାର୍ଚା ଆରୁ ଇବ୍ଡ଼ାର୍ ଉସ୍କାରାଚାର୍ ଆରୁ ଇଜ୍ଜାର୍ ଆନ୍ତିନ୍ ଜାମା ଏରୁର୍ ମୁରୁକ୍ ଏଲ୍ଚିୟାର୍ କେରାର୍। 12ସରଗ୍ତି ଅଣ୍ଟା ଶବଦ୍ ଇବ୍ଡ଼ାର୍ସ୍ତି ଇବନ୍ ତେଙ୍ଗିକିରି ମେନ୍ଦ୍ରା, “ଇସାନ୍ ମିଆଁ ବାରା।” ଆରୁ ଇବ୍ଡ଼ା ନିଜର୍ ଦୁଶ୍ମାନ୍ ଜାମାରିନ୍ ଏର୍ତେ-ଏର୍ତେ ବାଦ୍ଲିନୁ ସରଗ୍ଗେ କେରାର୍। 13ଆନ୍ତିନ୍ ହୁଖାନେନ୍ ଅଣ୍ଟା ବାଡ଼୍କା ଭୁଇଁଡୋଲ୍ ମାଞ୍ଚା, ଆରୁ ସହର୍ଘି ଦଶ୍ଭାଗ୍ ଖାତ୍ରା କେରା; ଆରୁ ଆ ଭୁଇଁଡୋଲ୍ତି ସାତ୍ ହାଜାର୍ ଆଲାର୍ କେଚ୍ଚାର୍ କେରାର୍, ଆରୁ ଏକାର୍ ବାଛ୍ରାର୍ କେରାର୍, ଆବ୍ଡ଼ାର୍ ଏଲ୍ଚିୟାର୍ କେରାର୍ ଆରୁ ସରଗ୍ତା ପାର୍ମେଶ୍ୱାର୍ସ୍କି ମାହିମା କାମାଗେ ଲାଗ୍ଗିୟାର୍।
14ଦୁସ୍ରା ବିପଦ୍ ବିତ୍ରାକେରା; ଏରା ତିସ୍ରା ବିପଦ୍ ଚାଁଣେ ବାର୍ନାବାଲା ରାଇ।
ସାତ୍ତେଟା ତୂରୀ ବାଜା
15ଯେତ୍କବାକେନ୍ ସାତ୍ତେଟା ଦୂଁତ୍ଜାମାର୍ ତାହ୍ମା ତୂରୀ ବାଜାନ୍ ଉରିୟାର୍ତା ସରଗ୍ନୁ ଇଦ୍ଘି ବାରେନୁ ଜୋର୍ସେ ଏନ୍ନେ ଶବଦ୍ ମାନା ଲାଗ୍ଗିୟା: “ଆକ୍କୁନ୍ ଦୁନିଆଁଦ୍ ନାହ୍ମା ପ୍ରାଭୁସ୍କି ଆରୁ ଆସ୍କି ଖ୍ରୀସ୍ତ୍କି ରାଜୀ ମାନ୍ଚାକେରା। ଆରୁ ଆସ୍ ଯୁଗ୍-ଯୁଗ୍ତକ୍ ରାଜୀ କାମସ୍।”
16ଆନ୍ତିନ୍ ଚବିଶ୍ ଲୋକ୍ ପୁର୍ଖାର୍ ଏକାର୍ କା ପାର୍ମେଶ୍ୱାର୍ସ୍କି ଆଘ୍ଲି ତାହ୍ମା-ତାହ୍ମା ରାଜ୍ଗାଦୀନୁ ଅକ୍କାଚାର୍, ହାଁଠୁୱାରାଇକିରି ପାର୍ମେଶ୍ୱାର୍ସ୍କି ସେବା ଆରାଧାନା କାମ୍ଚାର୍। 17ଆବ୍ଡ଼ାର୍ ତେଙ୍ଗିୟାର୍ ହେ ମାହାନ୍ ପ୍ରାଭୁ ପାର୍ମେଶ୍ୱାର୍ସ୍ ଏକାସ୍ ରାଦାସ୍ ଆରୁ ଏକାସ୍ ରାଚାସ୍, ଏମ୍ ନିଙ୍ଘା ଧାନ୍ୟାବାଦ୍ କାମ୍ଦାମ୍ ନିନିନ୍ ନିଜର୍ ମାହାନ୍ ଶକ୍ତିବନ୍ ଏଦିକିରି ଜାମାର୍ଘି ଶାସନ୍ ସୁରୁ କାମ୍ଚ୍କାଦାଏ।
18ଜାତିୟାର୍ ଖୀସାରାଚାର୍, ଲେକିନ୍ ନିଙ୍ଘା ଖୀସ୍ ବାର୍ଚା କେରା ଆରୁ ଆ ସାମାୟ ବାର୍ଚା କେରା କା କେଚ୍ଚକାର୍ଘି ନ୍ୟାୟ କାମାକୋ, ଆରୁ ନିଙ୍ଘା ଗୁତ୍ତିୟାର୍ ନାବୀର୍ ଆରୁ ପାବିତାର୍ ଆଲାର୍ଗେ ଆରୁ ଆ ଛୋଟେ ବାଡ଼୍କାରିନ୍ ଏକାର୍ ନିଙ୍ଘା ନାମେତି ଆଦର୍ କାମ୍ନାଏ ଆବ୍ଡ଼ାର୍ଗେ ଉପହାର୍ ଚିଆକୋ ଆରୁ ଧାନ୍ତାରିନ୍ନ୍ତା ବାଗ୍ଡ଼ାନା ବାଲାରିନ୍ ନାଶ୍ କାମାକୋ। 19ଆନ୍ତିନ୍ ପାର୍ମେଶ୍ୱାର୍ସ୍କି ଏକା ମନ୍ଦିର୍ ସରଗ୍ନୁ ରାଇ ଆବନ୍ ଖୋଲାକେରା ଆରୁ ଆସ୍କି ମନ୍ଦିର୍ନୁ ଆସ୍କି କାତ୍ଥା ଚିଚ୍ଚକାଘି ସନ୍ଦୁକ୍ ଏଥ୍ରା, ଆରୁ ବିଜ୍ଲି ଆରୁ ଶବଦ୍ ଆରୁ ବାଦ୍ଲି ଗାର୍ଜାରାନା ଆରୁ ଭୁଇଁଡୋଲ୍ ମାଞ୍ଚା ଆରୁ ବାଡ଼େ-ବାଡ଼େ ଆଲି ଖାତ୍ରା।
12ମାଏକିନିଆଁ ଆରୁ ବଡ୍ଡାନେର୍ରୁ
1ଆନ୍ତିନ୍ ଆକାଶ୍ନୁ ଅଣ୍ଟା ବାଡ଼୍କା ଚିହ୍ନା ଏଥ୍ରା, ଚାହେ ଅଣ୍ଟା ଆଲିଦ୍ ବିଡ଼ିଘି ଚିଢ଼ା ଆତ୍ତକିଚା, ଆରୁ ଆଦ୍ଘି ହେଡ୍ଡୁ କିୟାଁ ଚାନ୍ଦୋ ରାଚା ଆରୁ ଆଦ୍ଘି କୁକ୍କୁନୁ ବାରଟା ବିନ୍କୋଘି ମୁକୁଟ୍ ରାଚା। 2ଆଦ୍ ମେଦୁନୁ ରାଚା, ଆରୁ ହାଦ୍ମହଁରା ବାଲା ରାଚା, ହୁଦ୍ଘିଲାଗାନ୍ ହାଦ୍ମହଁର୍ନା ଦୁଃଖୁ ହାଖ୍ଖୀକିରି ଚିର୍ରାରାଲିୟାଦ୍। 3ଆରୁ ଅଣ୍ଟା ଚିହ୍ନା ସରଗ୍ନୁ ଏଥ୍ରା, ଆରୁ ଏରା ଅଣ୍ଟା ବାଡ଼୍କା ଲାଲ୍ ରଙ୍ଗ୍ଘି ବଡ୍ଡାନେର୍ରୁ ରାଚା ଆଦ୍ଘି ସାତ୍ତେଟା କୁକ୍କୁ ଆରୁ ଦଶେଟା ମାର୍ଗୁ ରାଚା ଆରୁ ଆଦ୍ଘି ଅଣ୍ଟା-ଅଣ୍ଟା କୁକ୍କୁନୁ ଅଣ୍ଟା-ଅଣ୍ଟା ମୁକୁଟ୍ ରାଚା। 4ଆଦ୍ଘି ହଲାଦ୍ ଆକାଶ୍ ତା ବିନ୍କୋଘି ତିନ୍ ଭାଗ୍ବନ୍ ଟାଣିକିରି ଧାନ୍ତାରିନୁ ଖେବ୍ଡ଼େଇଚା, ଆରୁ ଆ ବଡ୍ଡାନେର୍ରୁଦ୍ ଏକା ଆଲିଦ୍ ହାଦ୍ମହଁର୍ନା ବାଲା ରାଚା, ଆଦ୍ଘି ଆଘ୍ଲି ଇଜ୍ଜା ତାକା ହାଦ୍ମହଁର୍ନା ଖାନେନ୍ ଆଦ୍ ଆ ହାଦ୍ଦୁବନ୍ ଗିଡ଼ଚୋ। 5ଆ ଆଲିଦ୍ ଅଣ୍ଟା କୁକ୍କୋ ହାଦ୍ଦୁ ଜନମ୍ ଚିଚ୍ଚା, ଏକାସ୍ କା ଜାମା ଜାତିୟାରିନ୍ ପାନ୍ନାଘି ଠେଙ୍ଗାତି ଚାଲାବସ୍ ଆରୁ ଆ ହାଦ୍ଦୁସିନ୍ ଟେକିକିରି ପାର୍ମେଶ୍ୱାର୍ସ୍କି ଚାହା ଆରୁ ଆସ୍କି ରାଜ୍ଗାଦୀସାନ୍ ଆଣ୍ସ୍ତାଚା କେରା। 6ଆରୁ ଆ ଆଲିଦ୍ ହାର୍ବୁଗେ ବୁଙ୍ଗାକେରା। ଏକାସାନ୍ କା ପାର୍ମେଶ୍ୱାର୍ସ୍ ତାଙ୍ଘା ତାର୍ତି ଆଦ୍ଘି ଲାଗାନ୍ ଆଡ୍ଡା ତିୟାର୍ କାମ୍ଚ୍କାଚାସ୍; ଆଦ୍ ଆସାନ୍ ଏକ୍ ହାଜାର୍ ଦୁଇ ଶହ୍ ଷାଠିଏ ଦିନ୍ତକ୍ ଏରା ହଜାକୋ।
7ଆନ୍ତିନ୍ ସରଗ୍ନୁ ଲାଡ଼େଇ ମାନ୍ଚା, ମିଖାଏଲ୍ ଆରୁ ଆଦ୍ଘି ସରଗ୍ ଦୂଁତ୍ର୍ ବଡ୍ଡା ନେର୍ରୁଗାନେ ଲାଡ଼ାଗେ ଉର୍ଖିୟାର୍। ଆଙ୍ଗେନ୍ ଆ ବଡ୍ଡାନେର୍ରୁ ଆରୁ ଆଦ୍ଘି ଦୂଁତ୍ର୍ହି ଆବ୍ଡ଼ାର୍ ଗାନେ ଲାଡ଼୍ଚାର୍। 8ଲେକିନ୍ ଆବ୍ଡ଼ାର୍ ହାରିଆର୍ କେରାର୍ ଆରୁ ସରଗ୍ନୁ ନେର୍ରୁ ଆରୁ ଆଦ୍ଘି ଦୂଁତ୍ର୍ଗେ ଆଡ୍ଡା ମା ହାଖ୍ଖରା। 9ଆଙ୍ଗେନ୍ ଆ ବାଡ଼୍କା ନେର୍ରୁ, ଆ ପାଚ୍ଚା ନେର୍ରୁ, ଏକାନ୍ କା ଭୁତ୍ତୁ ଆରୁ ଶାଏତାନ୍ ବାନାଏ ଆରୁ ଏକାଦ୍ ଗୋଟା ଦୁନିଆଁନ୍ ଫୁସଲାନା ବାଲାଦ୍, ଆବନ୍ ଧାନ୍ତାରିନୁ ଖେବ୍ଡ଼େଇଚାର୍ ଆରୁ ଆଦ୍ଘିଗାନେ ଆଦ୍ଘି ଦୂଁତ୍ର୍ରିନ୍ହି ଖେବ୍ଡ଼େର୍ଚାର୍। 10ଆରୁଅହନ୍ ଏନ୍ ସରଗ୍ତି ଏନ୍ନେ ବାଡ଼୍କା ଶବଦ୍ ବାର୍ତେ ମେନ୍ଚ୍କାନ୍, “ଆକ୍କୁନ୍ ନାହ୍ମାଏ ପାର୍ମେଶ୍ୱାର୍ସ୍କି ମୁକ୍ତି ଆରୁ ଶକ୍ତି, ରାଜୀ ଆରୁ ଆସ୍କି ଖ୍ରୀସ୍ତ୍ସ୍କି ହକ୍ ହାଖ୍ଖରା, ଏନ୍ଦେର୍ଗେକା ନାହ୍ମାଏ ଭାଇର୍ଘି ମିଆଁ ଦୋଷ୍ ଲାଗାବାନା ବାଲାସ୍, ଏକାସ୍ କା ଉଲ୍ଲାନ୍ ମାଁହାନ୍ ନାହ୍ମାଏ ପାର୍ମେଶ୍ୱାର୍ସ୍କି ଚାହାନୁ ଆବ୍ଡ଼ାର୍ଘି ମିଆଁ ଦୋଷ୍ ଲାଗାବାଲିୟାସ୍, ଆସିନ୍ ଖେବ୍ଡ଼ାଚାକେରା। 11ଆବ୍ଡ଼ାର୍ ଭେଡ଼ି ହାଦ୍ଦୁସ୍କି ହେଁସୁଘି ଦ୍ୱାର୍ନୁ ଆରୁ ନିଜର୍ ସାକ୍ଷୀଘି ବଚନ୍ଘି ଲାଗାନ୍ ଆସ୍କି ମିଆଁ ଜିତ୍ୟାର୍, ଆରୁ ଆବ୍ଡ଼ାର୍ ନିଜର୍ ଜୀଆଘି ବାରେନୁ ମା ସୋଚିକିରି, ଏତ୍କତକ୍ କା ମରନ୍ବନ୍ହି ସାହ୍ଚାର୍। 12ହୁଦ୍ଘିଲାଗାନ୍ ହେ ସରଗ୍ତା ରାନା ବାଲାରୋ ଲୀଝ୍ରା; ଲେକିନ୍ ହାୟ! ନିମାରିନ୍ ଇ ଧାନ୍ତାରି ଆରୁ ସାମ୍ଧୁର୍, ନିହ୍ମା ଲାଗାନ୍ କେତ୍କ ଖାରାପ୍ ମାନଦ୍ ଏନ୍ଦେର୍ଗେକା ଶାଏତାନ୍ ଆରୁ ନିହ୍ମା ମିଆଁ ବାର୍ଚା କେରାଦିନ୍। ଆଦ୍ ଲାଘ୍ର୍ନା ଚିଚ୍ଚୁଘି ଲେଖା ଖୀସ୍ତି ନିନ୍ଦ୍ୟା କେର୍କିଚି। ଆରୁ ଆଦ୍ ଆହାଲି କା ଆକ୍କୁନ୍ ତାଙ୍ଘାଏ ଢେର୍ ଥୋଡ଼େ ସାମାୟ ବାଛର୍କିଚି।”
13ଯେତ୍କବାକେନ୍ ନେର୍ରୁଦ୍ ଏରିୟା କା ତାଙ୍ଗାନ୍ ଧାନ୍ତାରିନୁ ଖେବ୍ଡ଼େଇଚ୍କାନାଏ ତା, ଆଦ୍ ଆ ଆଲିନ୍ ଏକାଦ୍ କା କୁକ୍କୋ ହାଦ୍ଦୁ ଜନମ୍ ଚିଚ୍ଚକିଚା ଆବନ୍ ସାତାବାଗେ ଲାଗ୍ଗିୟା। 14ଲେକିନ୍ ଆ ଆଲିଗେ ବାଡ଼୍କା ଗିଧିଘି ଡେଣାନ୍ ଚିୟାକେରା, ତାକା ଆଦ୍ ନେର୍ରୁଘି ଚାହାନ୍ତି ଉଢ଼ିୟାରାଇକିରି ଶୁନ୍ଶାନ୍ ଆଡ୍ଡାସାନ୍ କଦ୍ ଏକାସାନ୍ କା ଆଦ୍ ସାଢ଼େତିନ୍ ବଛର୍ତକ୍ ଏରା ହଜାକୋ। 15ଆରୁ ବଡ୍ଡାନେର୍ରୁ ଆ ଆଲିଘି ପାଛ୍ଲି ନିଜର୍ ଥୁମ୍ଣାତି ଜୋଡୁଘି ବାଢ଼ି ଲେଖା ଆମ୍ମୁ ଅହଡ଼ାଚାକା ଆବନ୍ ଇ ଜୋଡ଼ୁତି ଅହଡ଼୍ତ ଚୋ। 16ଲେକିନ୍ ଆ ଧାନ୍ତାରିଦ୍ ଆ ଆଲିବନ୍ ମଦେତ୍ କାମ୍ଚା ଆରୁ ତାଙ୍ଘା ଥୁମ୍ଣାବନ୍ ଖୋଲ୍ଚା ଆରୁ ଆ ବାଢ଼ି ଆମ୍ମୁନ୍ ଏକାନ୍ କା ନେର୍ରୁଦ୍ ତାଙ୍ଘା ଥୁମ୍ଣାନ୍ତି ଅଥ୍ର୍କିଚା ଆବନ୍ ଚିପ୍ପେଚିଚ୍ଚା। 17ଆ ବଡ୍ଡାନେର୍ରୁଦ୍ ଆଲିବନ୍ ମୁରୁକ୍ ଖୀସାରାଚା କେରା ଆରୁ ଏକାର୍ କା ପାର୍ମେଶ୍ୱାର୍ସ୍କି ହୁକୁମ୍ ମାନ୍ନାଏ ଆରୁ ଯୀଶୁ ଖ୍ରୀସ୍ତ୍କି ସାକ୍ଷୀ ଚିନାଏ ଆ ରାନାବାଲା ହାଦ୍ଦୁର୍ ଗାନେ ବଡ୍ଡାନେର୍ରୁ ଲାଡ଼ାଗେ କେରା। 18ଆରୁ ଆଦ୍ ସାମ୍ଧୁର୍ତା ଚାଲ୍କ୍ରୀନୁ ଇଜ୍ଜା।
13ଯୋଡ଼େ ଜାନ୍ତୁ
1ଆନ୍ତିନ୍ ଏନ୍ ଅଣ୍ଟା ଜାନ୍ତୁନ୍ ସାମ୍ଧୁର୍ତି ଉର୍ଖ୍ନାନ୍ ଏର୍କାନ୍, ଆଦ୍ଘି ଦଶେଟା ମାର୍ଗୁ ଆରୁ ସାତ୍ତେଟା କୁକ୍କୁ ରାଚା। ଆଦ୍ଘି ମାର୍ଗୁନୁ ଦଶେଟା ମୁକୁଟ୍ ରାଚା ଆରୁ ଆଦ୍ଘି କୁକ୍କୁନୁ ପାର୍ମେଶ୍ୱାର୍ସ୍କି ନିନ୍ଦାଘି ନାମେ ଲେଖ୍ଚ୍କାରାଚା। 2ଏକା ଜାନ୍ତୁନ୍ ଏନ୍ ଏର୍କାନ୍ ଆଦ୍ ଚିତା ଲାକ୍ଡ଼ା ଲେଖା ରାଚା, ଆରୁ ଆଦ୍ଘି ପାଦୁଦ୍ ଭାଲୁ ଲେଖା ରାଚା; ଆରୁ ଥୁମ୍ଣାଦ୍ ଡୁକ୍କା ଲେଖା ରାଚା। ଆ ବଡ୍ଡାନେର୍ରୁଦ୍ ତାଙ୍ଘା ଶକ୍ତି, ତାଙ୍ଘା ରାଜ୍ଗାଦୀ ଆରୁ ବାଡ଼୍କା ହକ୍ ଚିଚ୍ଚାଲାଗ୍ଗିୟା। 3ଏନ୍ନେ ଲାଗ୍ଗାଲା କା ଆଦ୍ଘି ଅଣ୍ଟା କୁକ୍କୁଘି ମିଆଁ ଏନ୍ନେ ବାଡ଼୍କା ଖାଦି ରାଚା ଏସ୍କେ କା ଖିନା ଲେଖା ଏଥ୍ରାଲା ଲେକିନ୍ ଆଦ୍ଘି ବାଡ଼୍କା ଖାଦି ଛୁଟ୍ରା କେର୍କିଚା। ଜାମା ଧାନ୍ତାରି ଆଚ୍ମିତ୍ ମାନିକିରି ଆ ଜାନ୍ତୁଘି ପାଛ୍ଲି କେରାର୍। 4ଆ ଜାନ୍ତୁଗେ ତାଙ୍ଘା ହକ୍ବନ୍ ଚିଚ୍ଚାଲାଗ୍ଗିୟା ଆରୁ ଆଲାର୍ ବଡ୍ଡାନେର୍ରୁବନ୍ ପୂଜା କାମ୍ଚାର୍ ହୁଦ୍ଘିଲାଗାନ୍ ଇ ଜାନ୍ତୁ ଲେଖା ନେର୍ ରାନାଏ? ନେର୍ ଇଦ୍ଘି ଲେଖା ଲାଡ଼ାଇ କାମା ଅଙ୍ଗର୍? ଏନ୍ନେ ତେଙ୍ଗିକିରି ଇ ଜାନ୍ତୁନ୍ହି ପୂଜା କାମା ଲାଗ୍ଗିୟାର୍।
5ଆ ଜାନ୍ତୁଗେ ବଡ଼୍ପଣି କାତ୍ଥା କାମାଗେ ଆରୁ ପାର୍ମେଶ୍ୱାର୍ସ୍କି ନିନ୍ଦା କାମାଗେ ଛୁଟି ଚିୟାକେରା। ଆରୁ ଆଦ୍ଗେ ବୟାଲିଶ୍ ମାହିନାତକ୍ ଶାସନ୍ କାମାଗେ ହକ୍ ଚିୟାକେରା। 6ଆଙ୍ଗେନ୍ ଆଦ୍ ପାର୍ମେଶ୍ୱାର୍ସ୍କି ନିନ୍ଦା କାମାଗେ ଥୁମ୍ଣା ଖୋଲ୍ଚା। ଆସ୍କି ନାମେ, ତାମ୍ବୁ ମତ୍ଲବ୍ ସରଗ୍ ରାଜୀ ଆରୁ ସରଗ୍ନୁ ରାନାବାଲା ଜାମାର୍ଘି ନିନ୍ଦା କାମ୍ଚା। 7ଆରୁ ଜାମା ପାର୍ମେଶ୍ୱାର୍ସ୍କି ପାବିତାର୍ ଆଲାର୍ ଗାନେ ଲାଡ଼ାଗେ ଆରୁ ଆବ୍ଡ଼ାର୍ସ୍ତି ଜିତାଗେ ଜାନ୍ତୁଗେ ହକ୍ ଚିୟାକେରା, ଆରୁ ଜାମା କୁଲ୍, ବାଉଁଶା, ଜାମା ଭାଷାଗୁଠିନ୍, ଆରୁ ଜାତିଘି ମିଆଁ ଆଦ୍ଗେ ଶାସନ୍ ହକ୍ ଚିୟାକେରା। 8ଧାନ୍ତାରିନୁ ରାନାବାଲା ଆବ୍ଡ଼ାର୍ଜାମାର୍ ଆ ଜାନ୍ତୁବନ୍ ପୂଜା କାମର୍, ନେଖା ନାମେଦ୍ କା ପିଟ୍ଟକା ଚିଚ୍ଚକା ଭେଡ଼ି ହାଦ୍ଦୁସ୍କି ଜୀବନ୍ ଶାସ୍ତ୍ରନୁ ଦୁନିଆଁଘି ସୁରୁନ୍ତି ଲେଖ୍ଚ୍କା ମାଲ୍ଲାଦିନ୍। 9ଧିୟାନ୍ ଚିକିରି ଇବନ୍ ମେନା। 10ନେକାନ୍ ବନ୍ଦୀ କାମ୍ନା ରାଇ ଆସିନ୍ ଏସ୍କ୍ରିନ୍ହି ବନ୍ଦୀ କାମାକୋ, ନେକାନ୍ ଖଣ୍ଡାତି ଖିନା ରାଇ, ଏସ୍କ୍ରିନ୍ହି ଆସିନ୍ ଖଣ୍ଡାତି ପିଟାକୋ। ଆକ୍କୁନ୍ ପାର୍ମେଶ୍ଵାର୍ସ୍କି ପାବିତାର୍ ଆଲାର୍ଘି ଧିରାଜ୍ ଆରୁ ବିଶ୍ୱାସ୍ନୁ ରାନାଘି ସାମାୟଦ୍।
11ଆନ୍ତିନ୍ ଏନ୍ ଆରୁ ଅଣ୍ଟା ଜାନ୍ତୁବନ୍ ଦୁନିଆଁନ୍ତି ଉର୍ଖ୍ନାନ୍ ଏର୍କାନ୍, ଆଦ୍ଘି ଭେଡ଼ିହାଦ୍ଦୁ ଲେଖା ଯୋଡ଼େ ମାର୍ଗୁ ରାଚା ଆରୁ ଆଦ୍ ବଡ୍ଡାନେର୍ରୁ ଲେଖା କାଚ୍ନେଖ୍ରାଲିୟାଦ୍। 12ଆ ବାଡ଼୍କା ବଡ୍ଡାନେର୍ରୁଘି ଆଘ୍ଲି ଆଦ୍ ପହ୍ଲେ ଜାନ୍ତୁଘି ଜାମା ହକ୍ବନ୍ ବେଭାର୍ କାମାଲିଆଦ୍, ଆଦ୍ ଧାନ୍ତାରିନ୍ ଆରୁ ଧାନ୍ତାରିନୁ ରୁ ଜାମା ଆଲାରିନ୍ ଆ ପହ୍ଲେ ଜାନ୍ତୁଘି ସେବା ପୂଜା କାମ୍ତାଚା, ଏକାଘି କା ବାଡ଼୍କା ଚୋଟ୍ ଲାକ୍କା ଖାଦିଦ୍ ଛୁଟ୍ରାକେରା। 13ଆ ଦୁସ୍ରା ଜାନ୍ତୁଦ୍ ବାଡ଼େ-ବାଡ଼େ ଅଦ୍ଭୁତ୍ ନାଲ୍ଖୁ କାମାଲିୟାଦ୍, ଏତ୍କତକ୍ କା ଜାମା ଆଲାର୍ଘି ଆଘ୍ଲି ଆଦ୍ ଆକାଶ୍ତି ଧାନ୍ତାରିନୁ ଚିଚ୍ଚୁ ପୁଇତାଚା। 14ଆଦ୍ ଧାନ୍ତାରିନ୍ତା ଜାମା ଆଲାରିନ୍ ଫୁସ୍ଲାଲିୟାଦ୍, ଏନ୍ଦେର୍ଗେକା ଆଦ୍ଘିସାନ୍ ପହ୍ଲେ ଜାନ୍ତୁଘି ସାମ୍ନାନୁ ଆଚ୍ମିତ୍ ନାଲ୍ଖୁ ଏଦ୍ନାଘି ଶକ୍ତି ରାଚା। ଆରୁ ଦୁସ୍ରା ଜାନ୍ତୁ ଧାନ୍ତାରିନ୍ତା ଜାମା ଆଲାରିନ୍ ଆ ପହ୍ଲେ ଜାନ୍ତୁବନ୍ ମାଇନ୍ ଚିନାଘି ଲାଗାନ୍ ତେଙ୍ଗିୟା ଏକାଘି କା ଖଣ୍ଡାତି ଖାଦି ମାନ୍ଚ୍କିଚା ଆରୁ ଆଦ୍ଘି ଖାଦି ଠିକ୍ ମାନ୍ଚା କେର୍କିଚା ଆରୁ ଆଦ୍ଘି ମୂର୍ତ୍ତୀ କାମାଗେ ତେଙ୍ଗିୟାଦ୍। 15ଆ ଦୁସ୍ରା ଜାନ୍ତୁଗେ ପହ୍ଲେ ଜାନ୍ତୁଘି ମୂର୍ତ୍ତୀନୁ ଜୀଆ ଚିଆଗେ ହକ୍ ହାଖ୍ରା, ତାକା ଆଦ୍ କାଚ୍ନେଖ୍ରା ଲାଗ୍ଗିୟାଦ୍ ଆରୁ ଏକା ଆଲାର୍ ପହ୍ଲେ ଜାନ୍ତୁଘି ମୁର୍ତ୍ତୀବନ୍ ପୂଜା ମା କାମର୍, ତା ଆବ୍ଡ଼ା ଜାମାରିନ୍ ପିଟାଗେ ହୁକୁମ୍ ଚିଆକୋ। 16ଆ ଦୁସ୍ରା ଜାନ୍ତୁଦ୍ ବାଡ଼୍କା ଛୋଟେ, ଧନୀ ଗରୀବ୍, ଆଜାଦ୍ ଗୁତ୍ତିୟା ଜାମାର୍ଘି ତିନା ହେଖ୍ଖା ଚାହେ କାପ୍ଡ଼େନୁ ଅଣ୍ଟା-ଅଣ୍ଟା ଛାପା କାମ୍ତାଗେ ଯବର୍ଜସ୍ତି କାମ୍ଚାଦ୍। 17ଆରୁ ଆ ମାର୍ଖା ମତ୍ଲବ୍ ଜାନ୍ତୁଘି ନାମେ ଚାହେ ଆଦ୍ଘି ନାମେଘି ସଖ୍ୟା ମା ଲେଖ୍ଚ୍କା ଆଲାରିନ୍ ହେନ୍ଦା ଆରୁ ବିଁସାଗେ ପଲ୍ଲୀଦ୍। 18ଇସାନ୍ ଜ୍ଞାନ୍ଘି ଦାର୍କାର୍ ରାଇଦ୍: ନେଦ୍ ବୁଦ୍ଧିୟାର୍ ଆସ୍ ଜାନ୍ତୁଘି ସଂଖ୍ୟା ଗଣସ୍ ଏନ୍ଦେର୍ଗେକା ଆଦ୍ ଅଣ୍ଟା ମୁନୁଷ୍କି ନାମେଘି ସଂଖ୍ୟା ଆରୁ ଆସ୍କି ସଂଖ୍ୟା ଛ ଶହ୍ ଛ ଷଠି ରାଇ।
14ଭେଡ଼ିହାଦ୍ଦୁ ଆରୁ ୧,୪୪,୦୦୦ ଆଲାର୍
1ଆରୁଅହନ୍ ଏନ୍ ନାଜ୍ରାଚ୍କାନ୍ ଆରୁ ଏର୍କାନ୍ ଆ ଭେଡ଼ି ହାଦ୍ଦୁଦ୍ ସିୟୋନ୍ ପାର୍ତ୍ତାନୁ ଇଜ୍ଜକିଚି; ଆରୁ ଆଦ୍ଘିଗାନେ ଏକ୍ ଲାଖ୍ ଚଉରାଲିଶ୍ ହାଜାର୍ ଲୋକ୍ ରାନାଏ, ଏକାର୍ଘି କାପ୍ଡ଼େନୁ ଆସ୍କି ଆରୁ ତାଙ୍ଘାଏ ବାଙ୍ଗ୍ସ୍କି ନାମେ ଲେଖଚ୍କା ରାଇ। 2ଆରୁଅହନ୍ ଏନ୍ ସରଗ୍ତି ଅଣ୍ଟା ଏନ୍ନେ ଶବଦ୍ ମେନ୍ଚ୍କାନ୍, ଆଦ୍ଘି ବାଡ଼୍କା ଶବଦ୍ ବାଡ଼କା ଝାର୍ନାଘି ଆମ୍ମୁ ଖାତ୍ର୍ନା ଲେଖା ରାଚା, ଆରୁ ଇଦ୍ ବାଦ୍ଲି ଗାର୍ଜାରାନାଘି ଶବଦ୍ ଲେଖା ରାଚା। ଏକା ବାଡ଼୍କା ଶବଦ୍ ଏନ୍ ମେନ୍ଚ୍କାଚ୍କାନ୍, ଆଦ୍ ଆବ୍ଡ଼ାର୍ଘି ବୀଣା ବାଜା ବାଜାବୁର୍ଘି ଦ୍ୱାର୍ନୁ ଅହ୍ନାସାରେନ୍ ବାଜାବାଚ୍କା ବୀଣାଘି ଶବଦ୍ ଲେଖା ରାଚା। 3ଆବ୍ଡାର୍ ରାଜ୍ଗାଦୀଘି ଚାହାନୁ ଆରୁ ନାହ୍ଟା ଜୀବ୍ଜାନ୍ତୁର୍ ଆରୁ ପୁର୍ଖାର୍ଘି ଚାହାନୁ ଅଣ୍ଟା ପୁନା ଗୀତୁ ପାଡ଼ାଲିୟାର୍। ଆ ଏକ୍ ଲାଖ୍ ଚଉରାଲିଶ୍ ହାଜାର୍ ଆଲାରିନ୍ ଆମ୍ବା, ଏକାରିନ୍ ଧାନ୍ତାରିନ୍ନ୍ତି ହେନ୍ଦା କେର୍କିଚା, ଆରୁ ନେରିନ୍ ଆ ଗୀତୁନ୍ ଶିଖ୍ରା ପଲ୍ଲାଲିୟାର୍। 4ଇବ୍ଡ଼ାର୍ ଆ ଆବ୍ଡ଼ା ଆଲାର୍, ଏକାର୍ କା ମାଏକିନିଆଁର୍ଗାନେ ଅଶୁଦ୍ଧ୍ ମାଲ୍ଲା ମାନୁର୍, ଇବ୍ଡ଼ାର୍ କୁଆଁରାର୍। ଲେକିନ୍ ଏକ୍ରିନ୍ସାନ୍ହି ଭେଡ଼ିହାଦ୍ଦୁସ୍ କାଦାସ୍, ଇବ୍ଡ଼ାର୍ ଆସ୍ଗାନେ କାନାଏ, ଆରୁ ପାର୍ମେଶ୍ୱାର୍ସ୍କେ ଭେଡ଼ି ହାଦ୍ଦୁଦ୍ଘି ଲାଗାନ୍ ପହ୍ଲେ ଫାଡ଼ୁଘି ଲେଖା ଇବ୍ଡ଼ା ଆଲାର୍ଘିନ୍ତିନିନ୍ ହେନ୍ଦା କେର୍କାନାଏ। 5ଆବ୍ଡ଼ାର୍ଘି ଥୁମ୍ଣାନ୍ତି ଏକ୍ଲାହି ଝୁଟ୍ଟୁ କାତ୍ଥା ମା ଉର୍ଖାଲିୟାଦ୍; ଆବ୍ଡ଼ାର୍ ନିର୍ଦ୍ଦୋଷ୍ ରାନାଏ।
ତିନ୍ ଲୋକ୍ ସରଗ୍ଦୂଁତ୍
6ଆରୁଅହନ୍ ଏନ୍ ଅଣ୍ଟା ଆରୁ ସରଗ୍ ଦୂଁତ୍ବନ୍ ଆକାଶ୍ଘି ମାଝାନୁ ଉଢ଼ିୟାରାନାନ୍ ଏର୍କାନ୍, ଏକାର୍ଘି ଚାହାନୁ ଧାନ୍ତାରିନୁ ରାନାବାଲାର୍ଘି ଜାମା ଜାତିୟାର୍, ଆରୁ ବାଉଁଶାର୍, ଭାଷା, ଆରୁ ଆଲାରିନ୍ ମେନ୍ତାଗେ ରୋଜ୍ଦିନ୍ତା ସୁସାମାଚାର୍ ରାଚା। 7ଆସ୍ ଚିର୍ରା ରାଇକିରି ତେଙ୍ଗିୟାସ୍, “ପାର୍ମେଶ୍ୱାର୍ସିନ୍ ଏଲ୍ଚା ଆରୁ ଆସ୍କି ମାହିମା କାମା, ଏନ୍ଦେର୍ଗେକା ଆସ୍କେ ନ୍ୟାୟ କାମାଗେ ସାମାୟ ଆଣ୍ସିୟା କେର୍କିଚି; ଆରୁ ଆସ୍କି ଭଜନ୍ କାମା, ଏକାସ୍ କା ସରଗ୍, ଧାନ୍ତାରି, ସାମ୍ଧୁର୍, ଆରୁ ଝାର୍ନାନ୍ ବାନାବାଚ୍କାଦାସ୍ ଆସ୍କି ଆରାଧାନା କାମା।”
8ଆରୁଅହନ୍ ଇଦ୍ଘି ପାଛ୍ଲି ଅଣ୍ଟା ଦୁସ୍ରା ସରଗ୍ଦୂଁତ୍ ବାର୍ଚା ଆରୁ ଇ ତେଙ୍ଗିୟା, ଆଦ୍ଘି ନାଶ୍ ମାନ୍ଚାକେରା! ବାଡ଼କା ବାବିଲନ୍ଘି ନାଶ୍ ମାନ୍ଚାକେରା। ଆସ୍ ଜାମା ରାଜୀଘି ବେଭିଚାର୍ ଆଲାରିନ୍ ଫୁଲି ଆର୍ଖିବନ୍ ହାପ୍ପତାଚ୍କାନାଏ।
9ଆରୁଅହନ୍ ଇଦ୍ଘି ପାଛ୍ଲି ଆରୁ ଅଣ୍ଟା, ତିସ୍ରା ସରଗ୍ଦୂଁତ୍ ଜୋର୍ସେ ଚିର୍ରା ରାଇକିରି ବାର୍ଚା, “ନେଦିନ୍ ଆ ପଶୁ ଆରୁ ଆସ୍କି ମୂର୍ତ୍ତୀଘି ପୂଜା କାମର୍, ଆରୁ ନିଜର୍ କାପ୍ଡ଼େ ଚାହେ ନିଜର୍ ହେଖ୍ଖାନୁ ଆସ୍କି ଛାପାନ୍ ଗ୍ରହନ୍ କାମର୍। 10ତା ଆ ପାର୍ମେଶ୍ୱାର୍ସ୍କି ଖୀସୁଘି ନାଶା ହାପ୍ପତା, ଏକାନ୍ କା ଆସ୍କି ଖୀସୁଘି କାଟୋରାନୁ ତୁନ୍ଦାଚା କାଇ, ହାପ୍ପର୍ ଆରୁ ପାବିତାର୍ ସରଗ୍ଦୂଁତ୍ଘି ଆଘ୍ଲି ଆରୁ ଭେଡ଼ି ହାଦ୍ଦୁଘି ଆଘ୍ଲି ଚିଚ୍ଚୁ ଆରୁ ଗନ୍ଧକ୍ଘି ତକ୍ଲିପ୍ବନ୍ ସାହର୍। 11ଆବ୍ଡ଼ାର୍ଘି ନୁଞ୍ଜନାଘି ଧୁଙ୍ଗିୟାଦ୍ ଯୁଗ୍-ଯୁଗ୍ତକ୍ ନୁଜ୍ତେ ରୋ, ଆରୁ ଏକାର୍ ଆ ପଶୁ ଆରୁ ଆସ୍କି ମୂର୍ତ୍ତୀଘି ପୂଜା କାମ୍ନାଏ, ଆରୁ ନେଦ୍ ଆବ୍ଡ଼ାର୍ଘି ନାମେବନ୍ ଛାପ୍ନାଏ ଆବ୍ଡ଼ାର୍ଗେ ଉଲ୍ଲାନ୍ ମାଁହାନ୍ ଏକା ବାକେନ୍ହି ଶାନ୍ତି ମା ହାଖ୍ରି।”
12ଆକ୍କୁନ୍ ପାବିତାର୍ ଆଲାର୍ଘି ଧିରାଜ୍ ଉଇନାଘି ସାମାୟଦ୍, ଏକାର୍ କା ପାର୍ମେଶ୍ୱାର୍ସ୍କି ହୁକୁମ୍ବନ୍ ମାନ୍ନାଏ ଆରୁ ଯୀଶୁସ୍କି ମିଆଁ ବିଶ୍ୱାସ୍ ଉଇନାଏ।
13ଆରୁ ଏନ୍ ସରଗ୍ନ୍ତି ଇ ଶବଦ୍ ମେନ୍ଚ୍କାନ୍, “ଲେଖା: ନେଦ୍ ପ୍ରାଭୁସ୍କି ମିଆଁ ବିଶ୍ୱାସ୍ କାମିକିରି ଖିନାଏ, ଆବ୍ଡ଼ାର୍ ଆକ୍କୁନ୍ନ୍ତି ଧଏନ୍ର୍।” ପାବିତାର୍ ଆତ୍ମାଦ୍ ତେଙ୍ଗଦ୍, “ହଁ, ଏନ୍ଦେର୍ଗେକା ଆବ୍ଡ଼ାର୍ ନିଜେ ଜାମା ଖାଟ୍ନାନ୍ତି ଆରାମ୍ ହାଖ୍ଖର୍, ଆରୁ ଆବ୍ଡ଼ାର୍ଘି ନାଲ୍ଖୁ ଆବ୍ଡ଼ାର୍ ଗାନେ ମାନିକାଇ।
ଧାନ୍ତାରିନ୍ତା ଚାଷ୍ବାସ୍ବନ୍ ହୋଇନା
14ଏନ୍ ନାଜ୍ରାଚ୍କାନ୍, ଆରୁ ଏର୍କାନ୍ ଅଣ୍ଟା ଧୋବ୍ ବାଦ୍ଲି ରାଇ ଆରୁ ଆ ବାଦ୍ଲିନୁ ମୁନୁଷ୍ ହାଦ୍ଦୁସ୍ ଲେଖା ନେଦିନ୍ ଅକ୍କାନାଏ; ଏକାର୍ଘି କୁକ୍କୁନୁ ସୋନାଘି ମୁକୁଟ୍ ଆରୁ ହେଖ୍ଖାନୁ ଧାରେ ତାଁତାର୍ ରାଇ। 15ଆନ୍ତିନ୍ ଅଣ୍ଟା ଆରୁ ସରଗ୍ ଦୂଁତ୍ଦ୍ ମନ୍ଦିର୍ତି ଉର୍ଖିକିରି ଆବନ୍, ଏକାର୍ ବାଦ୍ଲିନୁ ଅକ୍କାଚାର୍, ଆବ୍ଡ଼ାରିନ୍ ଜୋର୍ସେ ଚିରାରାଇକିରି ତେଙ୍ଗିୟା; ନିଜର୍ ତାଁତାର୍ ଲାଗାବାଇକିରି ହୋୟା, ଏନ୍ଦେର୍ଗେକା ହୋଏନାଘି ବେଡ଼ା ଆଣ୍ସିୟା କେର୍କିଚି, ଆରୁ ଧାନ୍ତାରିନ୍ତା ଚାଷ୍ବାସ୍ଦ୍ ପାଞ୍ଜାକେର୍କିଚି।” 16ଏକାର୍ ବାଦ୍ଲିନୁ ଅକ୍କାଚାର୍ ଆବ୍ଡ଼ାର୍ ଧାନ୍ତାରିନୁ ନିଜର୍ ତାଁତାର୍ବନ୍ ଲାଗାବାଚାର୍, ଆରୁ ଧାନ୍ତାରିନ୍ତା ଚାଷ୍ବାସ୍ବନ୍ ହୋସ୍ସାର୍।
17ଆନ୍ତିନ୍ ଆରୁ ଅଣ୍ଟା ସରଗ୍ଦୂଁତ୍ ଆ ମନ୍ଦିର୍ନ୍ତି ଅଥ୍ରା ଏକାର୍ ସରଗ୍ନୁ ରାନାଏ, ଆରୁ ତାଙ୍ଘାସାନ୍ହି ଧାରେ ତାଁତାର୍ ରାଚା। 18ଆନ୍ତିନ୍ ଆରୁ ଅଣ୍ଟା ସରଗ୍ଦୂଁତ୍, ଏକାସ୍କି କା ଚିଚ୍ଚୁନୁ ହକ୍ ରାଚା, ବେଦୀନ୍ତି ଅଥ୍ରାସ୍, ଆରୁ ନେଖାସାନ୍ ଧାରେ ତାଁତାର୍ ରାଚା ଆସିନ୍ ଚିର୍ରା ରାଇକିରି ତେଙ୍ଗିୟାସ୍, “ନିଜର୍ ଧାରେ ତାଁତାର୍ବନ୍ ଲାଗାବାଇକିରି ଧାନ୍ତାରିନ୍ତା ଅଙ୍ଗୁର୍ ବାଟ୍କିନ୍ ତା ଫାଡ଼ୁନ୍ ହୁଆ ଏନ୍ଦେର୍ଗେକା ଅଙ୍ଗୁର୍ ପାଞ୍ଜାକେର୍କିଚି।” 19ଆଙ୍ଗେନ୍ ଆ ସରଗ୍ଦୂଁତ୍ ତାଙ୍ଘା ତାଁତାର୍ ଚାଲାବାଚା ଆରୁ ଧାନ୍ତାରିନ୍ତା ଅଙ୍ଗରୁବନ୍ ଚହିକିରି ଆବନ୍ ପାର୍ମେଶ୍ୱାର୍ସ୍କି ଖୀସ୍ଘି ଅଙ୍ଗୁର୍ ରାସେ ବାଡ଼୍କା କୁଣ୍ଡ୍ନୁ ସାଜ୍ଜେଇଚା। 20ସହର୍ ବାହ୍ରିନ୍ତା ଆ ରାସେ କୁଣ୍ଡ୍ନୁ ଅଙ୍ଗୁର୍ ପିହାଁକେରା। ଆରୁ ଆନ୍ନୁନ୍ତି ଏକା ହେଁସୁ ଉର୍ଖିଆ, ଆଦ୍ ସୋହ୍ଲସୋ କୁଣ୍ଡ୍ଘି ବାହ୍ରି ବାଢ଼ି ଲେଖା ଘୋଣଘି ଲାଗମ୍ଘି ମିଆଁତକ୍ ଅହଡ଼ାରାଚା, ଆରୁ ତିନ୍ସୋ କିଲୋମିଟର୍ ଗେଚ୍ଛାତକ୍ ବାହ୍ଚା।
15ସାତ୍ ସରଗ୍ଦୂଁତ୍ ସାତ୍ ବିପଦ୍ବନ୍ ଅନ୍ଦ୍ରିକିରି ବାରାଲି
1ଆରୁଅହନ୍ ଏନ୍ ସରଗ୍ନୁ ଆରୁ ଅଣ୍ଟା ବାଡ଼୍କା ଅଦ୍ଦଭୁତ୍ ଚିହ୍ନା ଏର୍କାନ୍, ଏନ୍ଦେର୍ଗେକା ସାତ୍ତେଟା ସରଗ୍ଦୂଁତ୍ ଏକାର୍ସାନ୍ କା ସାତ୍ତେଟା ଆଖ୍ରୀ ବିପଦ୍ ରାଚା, ଇଦ୍ଘି ଦ୍ୱାର୍ନୁ ପାର୍ମେଶ୍ୱାର୍ସ୍କି ଖୀସୁଦ୍ହି ଆଖ୍ରୀ ମାନିକାଇ।
2ଆନ୍ତିନ୍ ଏନ୍ ଚିଚ୍ଚୁନୁ ମେଶାବାଚ୍କା କାଁଚୁଘି ଲେଖା ଅଣ୍ଟା ସାମ୍ଧୁର୍ ଏର୍କାନ୍; ଆରୁ ଏକା ଆଲାର୍ ଆ ପଶୁନ୍ ଆରୁ ଆଦ୍ଘି ମୂର୍ତ୍ତୀନ୍ ଆରୁ ଆଦ୍ଘି ନାମେଘି ସଂଖ୍ୟାନୁ ଜିତ୍କାଚାର୍, ଆବ୍ଡ଼ାର୍ ଆ କାଁଚୁଘି ସାମ୍ଧୁର୍ନୁ ପାର୍ମେଶ୍ୱାର୍ସ୍କି ଚିଚ୍କା ବୀଣାନ୍ ହୋଇକିରି ଇଜ୍ଜକାଚାର୍। 3ଆବ୍ଡ଼ାର୍ ପାର୍ମେଶ୍ୱାର୍ସ୍କି ସେବକ୍ ମୁଶାସ୍କି ଗୀତୁ ଆରୁ ଭେଡ଼ି ହାଦ୍ଦୁଘି ଗୀତୁ ପାଡ଼ାଲିୟାର୍:
“ହେ ଜାମାର୍ଘିନ୍ତି ଶକ୍ତିଶାଲୀ ପ୍ରାଭୁ ପାର୍ମେଶ୍ୱାର୍, ନିଙ୍ଘା ନାଲ୍ଖୁଦ୍ ମାହାନ୍ଦ୍, ଆରୁ ଅଦ୍ଭୁତ୍ ରାଇ, ହେ ରାଜୀନ୍ତା ରାଜା ନିଙ୍ଘାଏ ପାବୁଦ୍ ଜାମାର୍ଘି ନ୍ୟାୟ ଆରୁ ସତ୍ତୁ ରାଇ। 4ହେ ପ୍ରାଭୁ, ନେଦ୍ ନିମାନ୍ ମା ଏଲ୍ଚର୍ ଆରୁ ନିଙ୍ଘା ନାମେଘି ମାହିମା ମା କାମର୍? ଏନ୍ଦେର୍ଗେକା ନିନିନ୍ ଖାଲି ପାବିତାର୍ ରାଦାଏ, ଜାମା ଜାତିୟାର୍ ବାରିକିରି ନିଙ୍ଘା ଚାହାନୁ ହାଁଠୁୱାରାଇକିରି ସେବା ଆରାଧାନା କାମର୍, ହୁଦ୍ଘିଲାଗାନ୍ ନିଙ୍ଘା ନ୍ୟାୟଘି ନାଲ୍ଖୁ ପ୍ରକଟ୍ ମାଞ୍ଚା କେର୍କିଚି।”
5ଇଦ୍ଘି ପାଛ୍ଲି ଏନ୍ ଏର୍କାନ୍ କା ସରଗ୍ତା ମନ୍ଦିର୍ ମତ୍ଲବ୍ ସାକ୍ଷୀଘି ତାମ୍ବୁନ୍ ଖୋଲାକେରା। 6ଆରୁ ଆବ୍ଡ଼ାର୍ ସାତ୍ତେଟା ସରଗ୍ଦୂଁତ୍ ନେଖାସାନ୍ କା ଆଖ୍ରୀ ସାତ୍ତେଟା ବିପଦ୍ ରାଚା, ହୀରା ଲେଖା ସାଫା ଆରୁ ବିଲ୍ଚ୍ନା ଚିଢ଼ା ଆତ୍ତିକିରି ଆରୁ ଏହୁନୁ ସୋନାଘି ପଟ୍ଟି ହିଁଚ୍କା ମନ୍ଦିର୍ତି ଉର୍ଖା। 7ଆନ୍ତିନ୍ ଆ ନାହ୍ଟା ଜୀବ୍ଜାନ୍ତୁର୍ଘିନ୍ତି ଅଣ୍ଟାଦ୍ ଆ ସାତ୍ତେଟା ସରଗ୍ ଦୂଁତ୍ର୍ଗେ ସାତ୍ତେଟା ସୋନାଘି କାଟୋରା ଚିଚ୍ଚା, ଆ ସାତ୍ତେଟା ଗିନାନୁ ଯୁଗ୍-ଯୁଗ୍ ଉଜ୍ଜନାବାଲା ପାର୍ମେଶ୍ୱାର୍ସ୍କି ଖୀସ୍ତି ନିନ୍ଦ୍କା ରାଚା। 8ଆ ମନ୍ଦିର୍ ପାର୍ମେଶ୍ୱାର୍ସ୍କି ବାଡ଼ାଇ ଆରୁ ଆସ୍କି ଶକ୍ତିଘି ଧୁଙ୍ଗିୟାତି ନିନ୍ଦ୍କା ରାଚା। ତାକା ଯେତ୍କବାକେନ୍ ଆ ସାତ୍ତେଟା ଦୂଁତ୍ର୍ ଗାନେ ନାଶ୍ ପୁରା ମା ମାନ୍ନା ହତ୍କତକ୍ ମନ୍ଦିର୍ନୁ ନେର୍ହି କରା ପଲ୍ଲିୟାରିନ୍।
16ପାର୍ମେଶ୍ୱାର୍ସ୍କି ଖୀସ୍ଘି ସାତ୍ତେଟା କାଟୋରା, ଗିନା
1ଆନ୍ତିନ୍ ଏନ୍ ମନ୍ଦିର୍ନୁ ଅଣ୍ଟା ବାଡ଼୍କା ଶବଦ୍ ମେନ୍ଚ୍କାନ୍, ଆଦ୍ ସାତ୍ତେଟା ସରଗ୍ ଦୂଁତ୍ବନ୍ ତେଙ୍ଗିୟାଦ୍, “କାଲା ପାର୍ମେଶ୍ୱାର୍ସ୍କି ଖୀସ୍ଘି ସାତ୍ତେଟା ଗିନାବନ୍ ଧାନ୍ତାରିନୁ ତୁନ୍ଦାଚା।”
2ଆଙ୍ଗେନ୍ ପହ୍ଲେ ସରଗ୍ଦୂଁତ୍ କାଇକିରି ତାଙ୍ଘା ଗିନାବନ୍ ଧାନ୍ତାରିନୁ ତୁନ୍ଦେଇଚା। ଆଙ୍ଗେନ୍ ନେଖାଏନୁ ପଶୁଘି ମୋହର୍ ରାଚା ଆରୁ ଆଦ୍ଘି ମୂର୍ତ୍ତୀବନ୍ ପୂଜା କାମ୍ଚ୍କାଚାର୍, ଆବ୍ଡ଼ାର୍ଘି ମେଦୁନୁ ହାଁଣ୍ନା ବାଲା ଆରୁ ମୁରୁକ୍ ଦୁଃଖୁ ଚିନା ଖାସୁ ଉର୍ଖିଆ।
3ଦୁସ୍ରା ସରଗ୍ଦୂଁତ୍ ତାଙ୍ଘା ଗିନାବନ୍ ସାମ୍ଧୁର୍ନୁ ତୁନ୍ଦେଇଚା, ଆରୁ ଆଦ୍ କେଚ୍ଚ୍କା ଆଲାର୍ଘି ହେଁସୁ ଲେଖା ମାଞ୍ଚାକେରା ଆରୁ ସାମ୍ଧୁର୍ତା ଜାମା ଜୀବ୍ କେଚ୍ଚାକେରା।
4ତିସ୍ରା ସରଗ୍ଦୂଁତ୍ ତାଙ୍ଘା ଗିନାବନ୍ ହଁସ୍ରା ଆରୁ ଝାର୍ନାନୁ ତୁନ୍ଦେଇଚା; ଆଙ୍ଗେନ୍ ଆ ଆମ୍ମୁଦ୍ ହେଁସୁ ମାଞ୍ଚାକେରା। 5ଆନ୍ତିନ୍ ଏନ୍ ଆମ୍ମୁନ୍ତା ସରଗ୍ ଦୂଁତ୍ବନ୍ ଏନ୍ନେ ତେଙ୍ଗ୍ନାନ୍ ମେନ୍ଚ୍କାନ୍:
“ହେ ପାବିତାର୍, ଏକାର୍ ଆତ୍ତଲ୍ଦାର୍, ଆରୁ ଏକାର୍ ରାଚ୍କାର୍ ନିମ୍ ନ୍ୟାୟ କାମୁର୍ ଆରୁ ନିହ୍ମା ଫାଏସ୍ଲାଦ୍ ନ୍ୟାୟଦ୍। 6ଏନ୍ଦେର୍ଗେକା ଆବ୍ଡ଼ାର୍ ପାର୍ମେଶ୍ୱାର୍ସ୍କି ପାବିତାର୍ ଆଲାର୍ଘି ଆରୁ ନାବୀର୍ଘି ହେଁସୁ ବାହାବାଚ୍କାଚାର୍ ଆରୁ ନିମ୍ ଆବ୍ଡ଼ାର୍ଗେ ହେଁସୁ ହାପ୍ପତାଚ୍କାର୍, ଏନ୍ଦେର୍ଗେକା ଆବ୍ଡ଼ାର୍ ଇଦ୍ଘି ଲାଇଗ୍ ରାନାଏ।”
7ଆନ୍ତିନ୍ ଏନ୍ ବେଦୀନ୍ତି ଏନ୍ନେ ତେଙ୍ଗ୍ନାନ୍ ମେନ୍ଚ୍କାନ୍, “ହେ ଜାମାର୍ଘିନ୍ତି ଶକ୍ତିଶାଲୀ ପ୍ରାଭୁ ପାର୍ମେଶ୍ୱାର୍ସ୍ ନିହ୍ମାଏ ନ୍ୟାୟ ଠିକ୍ଦ୍ ଆରୁ ସତ୍ତୁଦ୍।”
8ଚୋଉଥା ସରଗ୍ଦୂଁତ୍ ତାଙ୍ଘା ଗିନାବନ୍ ବିଡ଼ି ମିଆଁ ତୁନ୍ଦେଇଚା ଆରୁ ଆଦ୍ଗେ ଆଲାରିନ୍ ବାସ୍ନା ଚିନାଘି ହକ୍ ଚିୟାକେରା। 9ଆରୁ ଆଲାର୍ ମୁରୁକ୍ ସେକ୍ନାତି ଅଲ୍ଲିୟାର୍ କେରାର୍, ଆବ୍ଡ଼ାର୍ ଆ ବିପଦ୍ଘି ମିଆଁ ହକ୍ ଉଇନାବାଲା ପାର୍ମେଶ୍ୱାର୍ସ୍କି ନାମେଘି ନିନ୍ଦା କାମ୍ଚାର୍, ଲେକିନ୍ ଆବ୍ଡ଼ାର୍ ମା ପାସ୍ତାରାଚାର୍ ଆରୁ ଆସ୍କି ମାହିମା ମା କାମ୍ଚାର୍।
10ପାଞ୍ଚୱାଁ ସରଗ୍ଦୂଁତ୍ ତାଙ୍ଘା ଗିନାନ୍ ଆ ଜାନ୍ତୁଘି ରାଜ୍ଗାଦୀନୁ ତୁନ୍ଦେଇଚିଚ୍ଚା ଆରୁ ଆଦ୍ଘି ରାଜୀଦ୍ ଉହା ମାଞ୍ଚାକେରା। ଆଲାର୍ ଦୁଃଖୁତି ନୁଞ୍ଜନାତି ତାହ୍ମା ତାଥାଲନ୍ ପାର୍ମ୍ରାଗେ ଲାଗ୍ଗିୟାର୍। 11ଆରୁ ତାହ୍ମା ଦୁଃଖୁ ନୁଞ୍ଜନା, ବାଥ୍ନା ଆରୁ ଖାସୁଘି ଲାଗାନ୍ ସରଗ୍ତା ପାର୍ମେଶ୍ୱାର୍ସ୍କି ନିନ୍ଦା କାମ୍ଚାର୍; ଆରୁ ନିଜର୍-ନିଜର୍ ଖାରାପ୍ ନାଲ୍ଖୁଘି ଲାଗାନ୍ ମା ପାସ୍ତାରାଚାର୍।
12ଆନ୍ତିନ୍ ଛାଟ୍ୱାଁ ସରଗ୍ଦୂଁତ୍ ତାଙ୍ଘା ଗିନାବନ୍ ଫାରାତ୍ ବାଡ଼୍କା ହଁସ୍ରାନୁ ତୁନ୍ଦେଇଚା, ଆରୁ ଆନ୍ନୁନ୍ତା ଆମ୍ମୁଦ୍ ହାଇୟାକେରା ଆଙ୍ଗେନ୍ ପୁରୁବ୍ ତାର୍ତି ବାର୍ନାବାଲା ରାଜାର୍ଗେ ପାବୁ ତିୟାର୍ ମାନ୍ଚାକେରା। 13ଆନ୍ତିନ୍ ଏନ୍ ଆ ବଡ୍ଡାନେର୍ରୁଘି ଥୁମ୍ଣାନ୍ତି ଆରୁ ଆ ଜାନ୍ତୁଘି ଥୁମ୍ଣାନ୍ତି ଆରୁ ଆ ଝୁଟ୍ଟୁ ନାବୀସ୍କି ଥୁମ୍ଣାନ୍ତି ମୁନ୍ଟା ଭୁତ୍ତୁନ୍ ଉର୍କାନ୍ ଏର୍କାନ୍। ଆବ୍ଡ଼ାଦ୍ ବେଙ୍ଗା ଲେଖା ଏଥ୍ରାଲିୟାଦ୍। 14ଇବ୍ଡ଼ାଦ୍ ଶାଏତାନ୍ ଭୁତ୍ତୁ ରାଚା, ଆରୁ ଇଦ୍ ଅଦ୍ଭୁତ୍ ନାଲ୍ଖୁ କାମା ଅଙ୍ଗାଲିୟାଦ୍। ଆବ୍ଡ଼ାଦ୍ ଗୋଟା ଧାନ୍ତାରିନ୍ନ୍ତା ରାଜା ଜାମାରିନ୍ ଜାମାର୍ଘିନ୍ତି ଶକ୍ତିଶାଲୀ ପାର୍ମେଶ୍ୱାର୍ସ୍ ମାହା ନ୍ୟାୟଘି ଉଲ୍ଲାନୁ ଲାଡ଼ାଗେ ଅନ୍ଠାଣ୍ କାମାଗେ ଉର୍ଖାଦ୍ କେରାଦ୍। 15ମେନା ଏନ୍ ଚୋରାହ୍ର୍ ଲେଖା ବାରାଲ୍ଦାନ୍; ଧଏନ୍ ଆବ୍ଡ଼ାର୍ ଏକାର୍ କା ଏଜ୍ରାକାରାନାଏ ଆରୁ ତାହ୍ମା ଚିଢ଼ାନ୍ ସାଙ୍ଗେନ୍ ଉଇକାରାନାଏ, ଏନ୍ନେ କାମ୍ଚ୍କୁନ୍ ଆସ୍ ଡୁଡ଼୍ଙ୍ଗୁ ମା କୁଦ୍ଦସ୍ ଆରୁ ଆଲାର୍ ଆସ୍କି ଲାଜ୍ର୍ନାନ୍ ମା ଏରର୍। 16ଆବ୍ଡ଼ା ଭୁତ୍ତୁଦ୍ ଆବ୍ଡ଼ା ରାଜାରିନ୍ ଆ ଆଡ୍ଡାନୁ ଅନ୍ଠାଣ୍ କାମ୍ଚାଦ୍ ଆରୁ ଆ ଆଡ୍ଡାଘି ନାମେ ଇବ୍ରାନୀ ଭାଷାନୁ ମାଗିଦୋନ୍ ବାନାଏ।
17ଇଦ୍ଘି ପାଛ୍ଲି ସାତ୍ୱାଁ ସରଗ୍ଦୂଁତ୍ ତାଙ୍ଘା ଗିନାବନ୍ ହାୱାନୁ ତୁନ୍ଦେଇଚା, ଆରୁ ମନ୍ଦିର୍ତା ରାଜ୍ଗାଦୀନ୍ତି ଜୋର୍ସେ ଏନ୍ନେ ଶବଦ୍ ମେନ୍ଦ୍ରାଦ୍, “ଇଦ୍ ଆଖ୍ରୀ ମାନ୍ଚାକେରା।” 18ହତ୍କବାକେନ୍ ବିଜ୍ଲିଦ୍ ବିଲ୍ଚ୍ତାଚା ଆରୁ ନାନ୍ନା-ନାନ୍ନା ଶବଦ୍ ମେନ୍ଦ୍ରା, ବାଦ୍ଲି ଗାର୍ଜାରାଦ୍, ଆରୁ ଅଣ୍ଟା ବାଡ଼୍କା ଭୁଇଁଡୋଲ୍ ମାନ୍ଚା, ଏସ୍କେ କା ଧାନ୍ତାରିନୁ ଆଲାର୍ଘି ବାର୍ନାଘି ସାମାୟନ୍ତି ଏନ୍ନେ ବାଡ଼୍କା ଭୁଇଁଡୋଲ୍ ଏକ୍ଲାହି ମାଲ୍ଲା ମାନୁଦ୍। 19ଆ ବାଡ଼୍କା ସହର୍ ବାବିଲୋନ୍ ତିନ୍ ଭାଗ୍ ମାନ୍ଚାକେରା ଆରୁ ଜାତି ଜାତିନ୍ତାର୍ଘି ସହର୍ଦ୍ ଛାର୍ଖାର୍ ମାନ୍ଚାକେରା। ପାର୍ମେଶ୍ୱାର୍ସ୍ ବାଡ଼୍କା ସହର୍ ବାବିଲନ୍ବନ୍ ଦଣ୍ଡ୍ ଚିୟାଗେ ମନେ କାମ୍ତାଚାସ୍ ତାକା ଆସ୍ ଆଦ୍ଗେ ତାଙ୍ଘା ମୁରୁକ୍ ଜୋର୍ସେ ଖୀସ୍ଘି ଫୁଲି ଆର୍ଖି ନିନ୍ଦ୍କା ଗିନାନ୍ତା ଆଦ୍ଗେ ହାପ୍ପତାଚାସ୍। 20ଆରୁ ଜାମା ଟାପୁଦ୍ ହାଟ୍ରାକେରା, ଆରୁ ପାର୍ତ୍ତାଗୁଠିଘି ପାତା ମା ଚାଲ୍ରା। 21ଆକାଶ୍ତି ଆଲାର୍ଘି ମିଆଁ ବାଡ଼୍କା-ବାଡ଼୍କା ଆଲି ଖାତ୍ରା। ଆଲିଗୁଠିଦ୍ ଚାଲିଶ୍ କିଲୋ ମାଣେ-ମାଣେ ଓଜନ୍ ମାନ୍ନାଘି ଖାତ୍ରାଲିୟାଦ୍। ଆରୁ ଆଲି ଖାତ୍ର୍ନାଘି ଲାଗାନ୍ ଆଲାର୍ ପାର୍ମେଶ୍ୱାର୍ସ୍କି ନିନ୍ଦା କାମାଲିୟାର୍। ଏନ୍ଦେର୍ଗେକା ଇଦ୍ ଅଣ୍ଟା ମୁରୁକ୍ ବାଡ଼୍କା ବିପଦ୍ ରାଚା।
17ବାଡ଼୍କା ରାଣ୍ଡିବାଜି ଆଲି, ଆରୁ ଭାୟାନାକ୍ ଜାନ୍ତୁ
1ଏକା ସାତ୍ତେଟା ସରଗ୍ ଦୂଁତ୍ର୍ସାନ୍ ସାତ୍ତେଟା ଗିନା ରାଚା, ଆବ୍ଡ଼ାର୍ସ୍ତି ଅଣ୍ଟାଦ୍ ଏଙ୍ଘାସାନ୍ ବାର୍ଚାଦ୍ ଆରୁ ତେଙ୍ଗିୟାଦ୍, “ଇୟା ବାରା, ଏନ୍ ନିଙ୍ଗାନ୍ ଆ ବାଡ଼୍କା ରାଣ୍ଡିବାଜି ଆଲିଘି ଦଣ୍ଡ୍ବନ୍ ଏଦୋନ୍, ଏକାଦ୍ କା ଢେର୍ ଆମ୍ମୁନୁ ଅକ୍କିଚି। 2ଆଦ୍ଘିଗାନେ ଦୁନିଆଁନ୍ତା ରାଜାର୍ ବେଭିଚାର୍ କାମ୍ଚ୍କାନାଏ, ଆରୁ ଦୁନିଆଁନ୍ତା ଆଲାର୍ ଆଦ୍ଘି ବେଭିଚାର୍ଘି ନାଶାତି ଉଙ୍ଖିଆର୍ କେର୍କାଚାର୍।” 3ଆନ୍ତିନ୍ ଏନ୍ ପାବିତାର୍ ଆତ୍ମାତି ଭାର୍ପୁର୍ ମାନ୍ଚ୍କାନ୍ କେର୍କାନ୍ ଆରୁ ସରଗ୍ଦୂଁତ୍ ଏଙ୍ଗାନ୍ ଶୁନ୍ଶାନ୍ ଆଡ୍ଡାଗେ ଅଚ୍ଚାକେରା। ଆସାନ୍ ଏନ୍ ଅଣ୍ଟା ଆଲିନ୍ ଅଣ୍ଟା ଲାଲ୍ ରଙ୍ଗ୍ଘି ଭାୟାନାକ୍ ଜାନ୍ତୁଘି ମିଆଁ ଅକ୍କାନ୍ ଏର୍କାନ୍। ଆ ଭାୟାନାକ୍ ଜାନ୍ତୁଘି ଗୋଟା ମେଦୁନୁ ପାର୍ମେଶ୍ୱାର୍ସ୍କି ବାରେ ନିନ୍ଦା କାତ୍ଥା ଲେଖ୍ଚ୍କାରାଚା। ଆ ଭାୟାନାକ୍ ଜାନ୍ତୁଘି ସାତ୍ତେଟା କୁକ୍କୁ ଆରୁ ଦଶେଟା ମାର୍ଗୁ ରାଚା। 4ଇ ଆଲିଦ୍ ବାଇଗଣୀ ଆରୁ ଲାଲ୍ ରଙ୍ଗ୍ଘି ଚିଢ଼ା ଆତ୍ତକିଚା, ଆରୁ ସୋନା ଆରୁ ମୁରୁକ୍ ଦାମ୍ଘି ହୀରା ମୋତିତି ସିଙ୍ଗରାରାଚ୍କିଚା, ଆରୁ ଆଦ୍ଘି ହେଖ୍ଖାନୁ ଅଣ୍ଟା ସୋନାଘି ଗିନା ରାଚା, ଆରୁ ଏକାଦ୍ କା ଆଦ୍ଘି ବେଭିଚାର୍ଘି ହାଁଣ୍ନା ଆରୁ ଖାରାପ୍ ନାଲ୍ଖୁତି ନିନ୍ଦିଆ କେର୍କିଚା। 5ଆଦ୍ଘି କାପ୍ଡ଼େନୁ ଅଣ୍ଟା ଭେଦ୍ଦୁତି ନିନ୍ଦ୍କା ନାମେ ଲେଖ୍ଚ୍କାରାଚା, “ବାଡ଼୍କା ସହର୍ ବାବିଲନ୍ ଧାନ୍ତାରିନ୍ତା ରାଣ୍ଡିବାଜି ଆରୁ ହାଁଣ୍ନା ନାଲ୍ଖୁଘି ଆୟାଙ୍ଗ୍।” 6ଏନ୍ ଏର୍କାନ୍ କା ଆ ଆଲିଦ୍ ପାର୍ମେଶ୍ୱାର୍ସ୍କି ପାବିତାର୍ ଆଲାର୍ଘି ହେଁସୁ ଆରୁ ଯୀଶୁସ୍କି ସାକ୍ଷୀର୍ଘି ହେଁସୁ ହାପ୍ପିକିରି ଉଙ୍ଖିଆ କେର୍କିଚି। ଆବନ୍ ଏରିକିରି ଏନ୍ ମୁରୁକ୍ ଆଚ୍ମିତ୍ ମାନ୍ଚ୍କାନ୍ କେର୍କାନ୍।
7ଆଙ୍ଗେନ୍ ସରଗ୍ଦୂଁତ୍ ଏଙ୍ଗାନ୍ ତେଙ୍ଗିୟା, “ନିନ୍ ଏନ୍ଦେର୍ଗେ ଆଚ୍ମିତ୍ ମାନାଲ୍ଦାଏ? ଏନ୍ ନିଙ୍ଗାନ୍ ଆ ଆଲିଘି ଭେଦ୍ଦୁବନ୍ ତେଙ୍ଗନ୍ ଆରୁ ଆ ଭାୟାନାକ୍ ଜାନ୍ତୁଘି ହି, ଏକାନୁ କା ଆ ଆଲିଦ୍ ଅକ୍କିଚି ଆରୁ ଏକାଘି ସାତ୍ତେଟା କୁକ୍କୁ ଦଶେଟା ମାର୍ଗୁ ରାଇ” 8ଏକା ଜାନ୍ତୁନ୍ ନିନ୍ ଏର୍କାଏ, ଆଦ୍ ପହ୍ଲେ ତା ରାଚା, ଲେକିନ୍ ଆକ୍କୁନ୍ ମାଲ୍କିଦିନ୍, ଆରୁ ପାତାଲ୍ ଗାଡ୍ଡିସ୍ତି ବାରିକିରି ନାଶ୍ ମାନକୋ; ଆରୁ ଦୁନିଆଁନ୍ତା ଆଲାର୍ ଏକାର୍ଘି ନାମେ ଦୁନିଆଁଘି ସୁରୁ ମାନ୍ନାଘି ଆଘ୍ଲିନ୍ତି ଜୀବନ୍ ବହିନୁ ଲେଖ୍ଚ୍କା ମାଲ୍ଲାଦିନ୍, ଇ ଜାନ୍ତୁଘି ଏନ୍ନେ ଦାଶାନ୍ ଏରିକିରି ଆଚ୍ମିତ୍ ମାନର୍ କା ପହ୍ଲେ ରାଚା, ଆକ୍କୁନ୍ ମାଲ୍କିଦିନ୍ ଆରୁ, ଆରୁଅହନ୍ ବାରୋଦ୍। 9ଇବନ୍ ବୁଝ୍ରାଗେ ବୁଦ୍ଧିଘି ଦାର୍କାର୍ ରାଇଦ୍: ଆବ୍ଡ଼ା ସାତ୍ତେଟା କୁକ୍କୁ ସାତ୍ତେଟା ପାର୍ତ୍ତାଘି ମିଆଁ ଆ ଆଲିଦ୍ ଅକ୍କିଚି। 10ଆବ୍ଡ଼ାର୍ ସାତ୍ତେଟା ରାଜାର୍ହି ଆନ୍ନୁନ୍ତି ପାଞ୍ଚ ଲୋକ୍ ନାଶ୍ ମାନ୍ଚାର୍ କେର୍କାନାଏ, ଆରୁ ଅଣ୍ଟାସ୍ ଆକ୍କୁନ୍ ଜୀବିତ୍ ରାଦାସ୍, ଆରୁ ଆଖ୍ରୀ ଆକ୍କୁନ୍ତକ୍ ମାଲ୍ଲା ବାରୁସ୍, ଲେକିନ୍ ଯେତ୍କବାକେନ୍ ବାରସ୍, ତା କାଟେ ଖାଲି ସାମାୟତକ୍ ରା ଅଙ୍ଗସ୍। 11ଆ ଜାନ୍ତୁ ପହ୍ଲେ ଜୀବିତ୍ ରାଚାଦ୍, ଲେକିନ୍ ଆକ୍କୁନ୍ ଜୀବିତ୍ ମାଲ୍କିଦିନ୍, ଆଦ୍ ନିଜେ ଆଠ୍ୱାଁ ରାଜାଦ୍ ଆରୁ ଏକାଦ୍ ଆ ସାତ୍ ଲୋକ୍ନ୍ତିହି ଅଣ୍ଟାଦ୍, ଆଦ୍ଘିହି ଏକ୍ଲା ନାଶ୍ ମାନ୍ନାବାଲା ରାଇ। 12ଏକା ଦଶେଟା ମାର୍ଗୁ ନିନ୍ ଏର୍କାଏ ଆଦ୍ ଦଶେଟା ରାଜାର୍, ଏକାର୍ କା ଆକ୍କୁନ୍ତକ୍ ରାଜୀ ଆର୍ଗାର୍ ଚାଲାବା, ଲେକିନ୍ ଆ ଜାନ୍ତୁଗାନେ ଆବ୍ଡ଼ାର୍ଗେ ଅନ୍ ଘାଣ୍ଟାଘି ଲାଗାନ୍ ରାଜୀ ଚାଲାବାଗେ ହକ୍ ହାଖ୍ଖରଦ୍। 13ଆବ୍ଡ଼ାର୍ଘି ଅଣ୍ଟାନିନ୍ ମତ୍ଲବ୍ ରାଇ ଆବ୍ଡ଼ାର୍ ନିଜର୍ ଶକ୍ତି ଆରୁ ହକ୍ ଆ ଜାନ୍ତୁଗେ ଚିଅର୍ ଲାଗ୍ଗର୍। 14ଆବ୍ଡ଼ାର୍ ଭେଡ଼ି ହାଦ୍ଦୁସ୍ଗାନେ ଲାଡ଼ର୍ ଆରୁ ଭେଡ଼ିହାଦ୍ଦୁସ୍ ଆବ୍ଡ଼ାରିନ୍ ହାରାବସ୍, ଏନ୍ଦେର୍ଗେକା ଆସ୍ ପ୍ରାଭୁ ଜାମାର୍ଘି ପ୍ରାଭୁସ୍, ଆରୁ ରାଜା ଜାମାର୍ଘି ରାଜାସ୍, ଭେଡ଼ି ହାଦ୍ଦୁସ୍ଗାନେ ଆସ୍କି ମେହଁକାର୍, ଚାଜ୍ଜକାର୍ହି ଜିତର୍, ଆରୁ ବିଶ୍ୱାସ୍ କାମ୍ନାଘି ଲାଇଗ୍ ରାନାଏ।
15ସରଗ୍ ଦୂଁତ୍ଦ୍ ଏଙ୍ଗାନ୍ ଇ ତେଙ୍ଗିୟା, “ଏକା ଆମ୍ମୁ ନିନ୍ ଏର୍କାଏ, ଏକାସାନ୍ କା ଆ ରାଣ୍ଡିବାଜି ଆଲିଦ୍ ଅକ୍କିଚା, ଆବ୍ଡ଼ାର୍ ତା ଜାତିୟାର୍, ଆରୁ ଆଲାର୍ଘି ଭିଡ଼୍, ଆରୁ ରାଜୀ ଆରୁ ଭାଷାଗୁଠିଦ୍। 16ନିନ୍ ଏକା ଦଶେଟା ମାର୍ଗୁ ଏର୍କାଏ, ଆରୁ ଭାୟାନାକ୍ ଜାନ୍ତୁବନ୍ ଏର୍କାଏ, ଆବ୍ଡ଼ାର୍ ରାଣ୍ଡିବାଜି ଆଲିଘି ବିରୋଧି କାମର୍। ଆବ୍ଡ଼ାର୍ ଆବନ୍ ଡୁଡ଼୍ଙ୍ଗୁ କାମିକିରି ଅଥିନ୍ ଆମ୍ବର୍ଚର୍ ଆଦ୍ଘି ଆହ୍ଡ଼ାନ୍ ମହଁର୍ ଆରୁ ଆବନ୍ ଚିଚ୍ଚୁନୁ ବାସ୍ସଚର୍। 17ଏନ୍ଦେର୍ଗେକା ଆବ୍ଡ଼ାର୍ଘି ମନ୍ନୁ ଏନ୍ନେ ସୋଚ୍ ନିନ୍ଦଚସ୍ କା ଆବ୍ଡ଼ାର୍ ଆସ୍କି ଇଚ୍ଛାନ୍ ପୁରା କାମର୍ ଆରୁ ଯେତ୍କତକ୍ ପାର୍ମେଶ୍ୱାର୍ସ୍କି ବଚନ୍ ପୁରା ମା ମାନଦ୍ ହତ୍କତକ୍ ଏକ୍ମନ୍ ମାନିକିରି ନିଜର୍-ନିଜର୍ ରାଜୀନ୍ ଜାନ୍ତୁଗେ ଚିଅର୍ ଲାଗ୍ଗର୍। 18ଆ ଆଲିଦ୍ ଏକାନ୍ କା ନିନ୍ ଏର୍କାଏ, ଆଦ୍ ବାଡ଼୍କା ସହର୍ଦ୍, ଏକାଦ୍ କା ଦୁନିଆଁନ୍ତା ରାଜାର୍ଘି ମିଆଁ ଶାସନ୍ କାମିଦ୍।”
18ବାବିଲୋନ୍ଘି ନାଶ୍
1ଇଦ୍ଘି ପାଛ୍ଲି ଏନ୍ ଅଣ୍ଟା ସରଗ୍ ଦୂଁତ୍ବନ୍ ସରଗ୍ତି ଏତ୍ତନାନ୍ ଏର୍କାନ୍, ଏକାଗେକା ବାଡ଼୍କା ହକ୍ ରାଚା; ଆଦ୍ଘି ମାହିମାତି ଜାମା ଦୁନିଆଁଦ୍ ବିଲ୍ଲୀ ମାନ୍ଚାକେରା। 2ଆଦ୍ ଜୋର୍ସେ ଚିର୍ରା ରାଇକିରି ତେଙ୍ଗିୟାଦ୍,
ଖାତ୍ରା କେରା, ବାଡ଼୍କା ବାବିଲନ୍ଦ୍ ଖାତ୍ରା କେରା! ଆଦ୍ ଭୁତ୍ତୁଘି ଆଡ୍ଡାଦ୍ ଆରୁ ଜାମା ଲେଖା ଅଶୁଦ୍ଧ୍ ଆତ୍ମାର୍ଘି ଆରୁ ଜାମା ଲେଖା ଅଶୁଦ୍ଧ୍ ଆରୁ ହାଁଣ୍ନା ଓଡ଼ାଘି ରାନାବାଲା ଆଡ୍ଡା ମାନ୍ଚାକେରା। 3ଏନ୍ଦେର୍ଗେକା ଜାମା ଜାତିୟାର୍ ଆଦ୍ଘି ବେଭିଚାର୍ ନାଲ୍ଖୁଘି ନାଶା ହାପ୍ପକାନାଏ, ରାଜାଜାମାର୍ ଆଦ୍ଘିଗାନେ ବେଭିଚାର୍ କାମ୍ଚ୍କାନାଏ, ଆରୁ ଦୁନିଆଁନ୍ତା ବେପ୍ରିୟାର୍ହି ଆଦ୍ଘି ମଉଜ୍ ମଜ୍ଲିସ୍ତି ଧାନ୍ନୁବାଲା ମାନ୍ଚ୍କାନାଏ। 4ଆକାଶ୍ତି ଏନ୍ ଆରୁ ଅଣ୍ଟା ଶବଦ୍ ମେନ୍ଚ୍କାନ୍, “ହେ ଏଙ୍ଘା ଆଲାରୋ, ନିମ୍ ବାବିଲୋନ୍ ସହର୍ସ୍ତି ଉର୍ଖା ବାରା, ନିମ୍ ଆଦ୍ଘି ପାପ୍ଘି ଭାଗିଦାର୍ ଆମାମାନା, ତାକା ଆଦ୍ଘି ବିପଦ୍ ନିହ୍ମା ମିଆଁ ମା ଖାତ୍ରୋ। 5ଏନ୍ଦେର୍ଗେକା ଆଦ୍ଘି ବାଗ୍ଗେ ପାପ୍ଦ୍ ସରଗ୍ତକ୍ ଆଣ୍ସିୟା କେର୍କିଚି, ଆରୁ ପାର୍ମେଶ୍ୱାର୍ସ୍ ଆଦ୍ଘି ଦୋଷ୍ଗୁଠିନ୍ ମନେ କାମ୍ଚ୍କାଦାସ୍। 6ଏସ୍କେ ଆଦ୍ ନିମାଗେ ଚିଚ୍ଚକିଚା ଆନ୍ନେନିନ୍ ଆଦ୍ଗେ ଚିଆ, ଆରୁ ଆଦ୍ଘି ନାଲ୍ଖୁଘି ଲେଖା ଆଦ୍ଗେ ଦୁଇଗୁଣ୍ ବାଦ୍ଲା ଚିଆ; ଏକା କାଟୋରାନୁ ଆଦ୍ ନିନ୍ଦେଇ ଚିଚ୍ଚକିଚା, ଆନ୍ନୁନ୍ତି ଆଦ୍ଗେ ହି ଦୁଇଗୁଣ୍ ନିନ୍ଦା ଚିଆ। 7ଆଦ୍ ଯେତ୍କ ଡିଙ୍ଗ୍ ମାର୍ଚା ଆରୁ ଯେତ୍କ ମଉଜ୍ମଜ୍ଲିସ୍ କାମ୍ଚ୍କିଚି, ହତ୍କ ଆଦ୍ଗେ ଦୁଃଖୁ ଆରୁ କଷଟ୍ ଚିଆ। ଏନ୍ଦେର୍ଗେକା ଆଦ୍ ନିଜର୍ ମନ୍ନୁ ତେଙ୍ଗିଦ୍, ‘ଏନ୍ ରାନୀ ମାନିକିରି ରାଜ୍ଗାଦୀନୁ ଅକ୍କିଚେନ୍, ଏନ୍ ରାଣ୍ଡି ମାଲ୍ଲେନ୍; ଆରୁ ଏନ୍ ଏକ୍ଲାହି ଦୁଃଖୁନୁ ମା ଖାତ୍ରନ୍,’ 8ହୁଦ୍ଘିଲାଗାନ୍ ଉନ୍ଦୁଲ୍ନୁନିନ୍ ଆଦ୍ଘି ମିଆଁ ବିପଦ୍ଗୁଠିଦ୍ ବାରଦ୍, ଖିନା, ଶୋକ୍, ଆରୁ ଆକାଲ୍; ବାରଦ୍କଦ୍, ଆରୁ ଆଦ୍ ଚିଚ୍ଚୁନୁ ଅଲକୋ; ଏନ୍ଦେର୍ଗେକା, ପ୍ରାଭୁ ପାର୍ମେଶ୍ୱାର୍ସ୍ ଶକ୍ତିଶାଲୀସ୍ ଆରୁ ଆସ୍ ଆବନ୍ ଦୋଷୀ ଠାହ୍ରାଚାସ୍।”
9“ଦୁନିଆଁନ୍ତା ରାଜାସ୍ ଏକାର୍ ଆସ୍ଗାନେ ଖାରାପ୍ ନାଲ୍ଖୁ ଆରୁ ମଉଜ୍-ମଜ୍ଲିସ୍ କାମ୍ଚାର୍, ଯେତ୍କବାକେନ୍ ଆଦ୍ଘି ଅଲ୍ନାଘି ଧୁଙ୍ଗିୟାବନ୍ ଏରର୍, ତା ଆବ୍ଡ଼ାର୍ଘି ଲାଗାନ୍ ଅହ୍ଲର୍ ଆରୁ ଛାତିବନ୍ ଡେମ୍ରର୍। 10ଆବ୍ଡ଼ାର୍ ତାଙ୍ଘାଏ ତକ୍ଲିପ୍ଘି ଏଲ୍ଚ୍କାତି ଗେଚ୍ଛାନୁ ଇଲିକିରି ତେଙ୍ଗର୍, ହାୟ! ହାୟ! ବାଡ଼୍କା ସହର୍, ବାବିଲନ୍! ନିନ୍ ଦଣ୍ଡ୍ ହାଖ୍ଖନାଘି ଲାଇଗ୍ ରାଦିନ୍। ଏନ୍ଦେର୍ଗେକା କାଟେ ସାମାୟନୁନିନ୍ ନିଙ୍ଗାଗେ ଦଣ୍ଡ୍ ହାଖ୍ରା କେର୍କିଚି।”
11“ଦୁନିଆଁନ୍ତା ବେପାରିର୍ ଆବ୍ଡ଼ାର୍ଘି ଲାଗାନ୍ ଅହ୍ଲର୍ ଆରୁ ତାଡ଼୍ପ୍ରର୍, ଏନ୍ଦେର୍ଗେକା ଆକ୍କୁନ୍ ନେଦିନ୍, ଆବ୍ଡ଼ାର୍ଘି ଜିନିଷ୍ପତର୍ବନ୍ ମା ହେନ୍ଦର୍। 12ଜିନିଷ୍ ସୋନା, ଚାନ୍ଦି, ହୀରା, ମୋତି, ଆରୁ, ମଲ୍ମଲ୍, ବାଇଗଣୀ ରସ୍ନୀ ଆରୁ ଲାଲ୍ ରଙ୍ଗ୍ଘି ଚିଢ଼ା ଆରୁ ଜାମା ଲେଖା ବାସ୍ନା କାଙ୍କୁ, ଆରୁ ହାତୀ ପାଲ୍ଲୁଘି ଜାମା ଲେଖା ଜିନିଷ୍ପତର୍ ଆରୁ ଦାମିକା କାଙ୍କୁ ଆରୁ ତାମ୍ବା ଆରୁ ପାନ୍ନା ଆରୁ ସଙ୍ଗ୍ ମର୍-ମର୍ଘି ଜାମା ଲେଖା ଜିନିଷ୍ପତର୍, 13ଆରୁ ଡାଲ୍ଚିନି, ମାସ୍ଲା, ଧୁମ୍ମାଲୀ, ବାସ୍ନା ମହ୍ଲମ୍, ଲୋବାନ୍, ଅଙ୍ଗୁର୍ ରାସେଘି ଦାଖ୍ରାସ୍, ଓଲିଭ୍ ଫାଡ଼ୁଘି ଇସୁଙ୍ଗ୍, ମାଏଦା, ଗହମ୍, ଗାଏ ଓୟୁ, ଭେଡ଼ି ଏଡ଼ା, ଘୋଡ଼ା ରାଥୁ, ଗୁତ୍ତିୟା, ଆରୁ ଆଲାର୍ଘି ଜୀଆ।”
14“ନିନ୍ ଏକା ଫଲ୍ଘି ଇଚ୍ଛା କାମାଲ୍କିନ୍, ଆଦ୍ ନିଙ୍ଘାସ୍ତି ଗେଚ୍ଛା ମାନ୍ଚାକେର୍କିଚି। ନିଙ୍ଘା ଜାମା ଧାନ୍ନୁ, ବାନେ ଏଥ୍ର୍ନା, ମଉଜ୍ ମଜ୍ଲିସ୍ଧି ନାଶ୍ ମାନ୍ଚାକେରା। ନିନ୍ ଇ ଜାମାନ୍ ଆରୁଅହନ୍ ମା ଏର୍ଦିନ୍। 15ଇ ଜିନିଷ୍ତି ବେପ୍ରିୟାର୍ ଏକାର୍ ଆସ୍କି ଦ୍ୱାର୍ନୁ ଧାନ୍ନୁ ମାନ୍ଚାର୍ କେର୍କାଚାର୍, ଦୁଃଖୁଘି ଲାଗାନ୍ ଗେଚ୍ଛାନୁ ଇଲର୍, ଆରୁ ଅହ୍ଲର୍ ଆରୁ ଛାତି ଡେମ୍ରର୍ ଆରୁ ତେଙ୍ଗର୍, 16‘ହାୟ! ହାୟ! ଇଦ୍ ତା ବାଡ଼୍କା ସହର୍ ମଲ୍ମଲ୍, ବାଇଗଣୀ ଆରୁ ଲାଲ୍ ରଙ୍ଗୁଘି ଚିଢ଼ା ଆତ୍ତକିଚା, ଆରୁ ସୋନା ଆରୁ ରତନ୍ ଆରୁ ମୋତୀତି ସିଙ୍ଗ୍ରା ରାଚ୍କିଚା। ଆଖାନେନିନ୍ ଇ ଜାମା ଧାନ୍ନୁଦ୍ ବାର୍ବାଦ୍ ମାନ୍ଚାକେରା।’ 17ଆରୁ ଜାମା ଜାହାଜ୍ ଚାଲାବୁର୍, ଆରୁ ଜାହାଜ୍ନୁ ଅକ୍କିକିରି କାଲୁ ଆଲାର୍, ସାମ୍ଧୁର୍ନୁ ବେପାର୍ କାମୁର୍ ଗେଚ୍ଛାନୁ ଇଜ୍ଜାର୍।”
18ଆରୁ ଆଦ୍ଘି ଲାଘ୍ର୍ନାଘି ଧୁଙ୍ଗିୟାନ୍ ଏରିକିରି ଜୋର୍ସେ ଚିର୍ରାରିକିରି ତେଙ୍ଗିୟାର୍, “ଇ ବାଡ଼୍କା ସହର୍ଘି ବାରାବର୍ ଏକା ସହର୍ବନ୍ କାମା ଅଙ୍ଗିୟା?” 19ଆରୁ ନିଜର୍-ନିଜର୍ କୁକ୍କୁନୁ ଧୁଲି ତୁନ୍ଦିୟାର୍ ଆରୁ ଅହ୍ଲତେ ଆରୁ ତାଡ଼୍ପାରାତେ ତେଙ୍ଗିୟାର୍, “ଇ ସହର୍ତା ଧାନ୍ନୁତି ଜାହାଜ୍ ତା ଜାମା ମାଲିକ୍ର୍ ଧାନ୍ନୁବାଲା ମାନ୍ଚାର୍ କେରାର୍। ଆରୁ ଆକ୍କୁନ୍ ଇଦ୍ କାଟେ ଡେରିନୁ ଛାର୍ଖାର୍ ମାନ୍ଚାକେରା। 20ହେ ସରଗ୍ ଆରୁ ପାବିତାର୍ ଆଲାରୋ, ଖାସ୍ଚେଲା ଆରୁ ନାବୀର୍ ଲୀଝ୍ରା, ଏନ୍ଦେର୍ଗେକା ପାର୍ମେଶ୍ୱାର୍ସ୍ ଆଦ୍ଘି ବିରୁଦ୍ଧ୍ ନିମାଗେ ନ୍ୟାୟ କାମ୍ଚ୍କାଦାସ୍।” 21ହତ୍କବାକେନ୍ହି ଅଣ୍ଟା ତାକତ୍ବାଲା ସରଗ୍ଦୂଁତ୍ ବାଡ଼୍କା ଜାତ୍ରି ଲେଖା ଅଣ୍ଟା ଚାଁଚାବନ୍ ଟେକ୍ଚା, ଆରୁ ଇ ତେଙ୍ଗିକିରି ସାମ୍ଧୁର୍ନୁ ଖେବ୍ଡ଼ିୟା,
“ବାଡ଼୍କା ସହର୍! ହେ ବାବିଲନ୍ ବାଡ଼୍କା ସହର୍! ଠିକ୍ ଏନ୍ନେନିନ୍ ନିଙ୍ଗାନ୍ ଟିଡ଼ାଚାକୋ, ନିନ୍ ଆରୁଅହନ୍ ନାଶ୍ ମାନୟକୟ ଆରୁ ନିନ୍ ଏକ୍ଲାହି ମା ହାଖ୍ଖରୟ। 22ବୀଣା ଆସ୍ନା ବାଲାର୍ ଆରୁ ଗୀତୁ ପାଡ଼ୁର୍ ଆରୁ ବାଇଁସିରି ଉରୁର୍, ଆରୁ ତୂରୀ ବାଜା ଉରୁର୍ଘି ଶବଦ୍ ଆରୁ ନିଙ୍ଘାଏନୁ ଏକ୍ଲାହି ମା ମେନ୍ଦ୍ରିଦ୍; ଆରୁ ଏନ୍ଦ୍ରିନ୍ କାର୍ବାର୍ କାମ୍ନାବାଲା କାରିଗର୍ହି ଆରୁ ନିଙ୍ଘାଏନୁ ଏକ୍ଲାହି ଜାତ୍ରି ଚାଲ୍ର୍ନା ଘି ଶବଦ୍ ମା ମେନ୍ନ୍ଦ୍ରି। 23ଆରୁ ମହମ୍ବାତିଘି ବିଲ୍ଲୀଦ୍ ଆରୁ ଏକ୍ଲାହି ନିଙ୍ଘାଏନୁ ବିଲ୍ଲୀ ମା ଏଥ୍ରିଦ୍, ଆରୁ ବର୍ କୁକ୍କୋସ୍ ଆରୁ କାନ୍ୟା କୁକାଏଘି ଶବଦ୍ ଆରୁ ଏକ୍ଲାହି ମା ମେନ୍ଦ୍ରିଦ୍, ଏନ୍ଦେର୍ଗେକା ନିଙ୍ଘାଏ ବେପ୍ରିୟାର୍ ଦୁନିଆଁନ୍ତା ମୁଖ୍ୟା ରାଚାର୍, ଆରୁ ନିଙ୍ଘା ଯାଦୁ ଟୋନାତି ଜାମା ଜାତିୟାର୍ ଫୁସ୍ଲାରାଚାର୍ କେର୍କାଚାର୍। 24ନେକାନ୍ ଦୁନିଆଁନୁ ପିଟାଚା କେର୍କିଚା ନାବୀରିନ୍, ପାବିତାର୍ ଆଲାର୍, ଆରୁ ଆ ଜାମା ଆଲାର୍ଘି ହେଁସୁ ବାବିଲୋନ୍ନୁ ହାଖ୍ଖର୍କିଚା।”
19ସରଗ୍ନୁ ପାର୍ମେଶ୍ୱାର୍ସ୍କି ସ୍ତୁତି
1ଇଦ୍ଘି ପାଛ୍ଲି ଏନ୍ ସରଗ୍ତା ଆଲାର୍ଘି ବାଡ଼୍କା ଭିଡ଼୍ନୁ ଜୋର୍ସେ ଚିର୍ରା ରାଇକିରି ଏନ୍ନେ ତେଙ୍ଗ୍ନାନ୍ ମେନ୍ଚ୍କାନ୍, “ହାଲ୍ଲେଲୁୟା! ପାର୍ମେଶ୍ୱାର୍ସ୍ ନିନ୍ ଏମାନ୍ ପାପ୍ତି ବାଛାବାଚ୍କାଦାଏ, ହୁଦ୍ଘିଲାଗାନ୍ ଏମ୍ ନିଙ୍ଘାଏ ମାହିମା କାମମ୍ ଆରୁ ନିନିନ୍ ଶକ୍ତିଶାଲୀୟ। 2ଏନ୍ଦେର୍ଗେକା ଆସ୍କି ନ୍ୟାୟଘି ବିଚାର୍ଦ୍ ସତ୍ତୁଦ୍ ଆରୁ ଠିକ୍ଦ୍। ଆସ୍ ଆ ବାଡ଼୍କା ରାଣ୍ଡିବାଜିନ୍, ଏକାଦ୍ ତାଙ୍ଘା ବେଭିଚାର୍ତି ଦୁନିଆଁବନ୍ ବର୍ବାଦ୍ କାମାଲିଆଦ୍, ନ୍ୟାୟ କାମ୍ଚ୍କାଦାସ୍, ଆରୁ ଆସ୍ ନିଜର୍ ଗୁତ୍ତିୟାର୍ଘି ହେଁସୁଘି ବାଦ୍ଲା ଅଚ୍କାଦାସ୍।”
3ଆରୁଅହନ୍ ଦୁସ୍ରାଥର୍ ଆବ୍ଡ଼ାର୍ ତେଙ୍ଗିୟାର୍, “ହାଲ୍ଲେଲୁୟା! ଆଦ୍ଘି ଅଲ୍ନାଘି ଧୁଙ୍ଗିୟାଦ୍ ଯୁଗ୍-ଯୁଗ୍ତକ୍ ରଦ୍।” 4ଆନ୍ତିନ୍ ଚବିଶ୍ ଲୋକ୍ ପୁର୍ଖାର୍ ଆରୁ ନାହ୍ଟା ଜୀବ୍ଜାନ୍ତୁର୍ ପାର୍ମେଶ୍ୱାର୍ସ୍କି ହେଡ୍ଡମୁଲିନୁ ତାଙ୍ଗାନ୍ ଆରାଧାନା କାମ୍ଚାର୍, ଏକାର୍ ରାଜ୍ଗାଦୀନୁ ଅକ୍କାଚାର୍, ଆବ୍ଡ଼ାର୍ ତେଙ୍ଗିୟାର୍, “ଆମେନ୍! ହାଲ୍ଲେଲୁୟା।”
ଭେଡ଼ି ହାଦ୍ଦୁଘି ବେଞ୍ଜା
5ଆନ୍ତିନ୍ ରାଜ୍ଗାଦୀନ୍ତି ଅଣ୍ଟା ଶବଦ୍ ମେନ୍ଦ୍ରାଦ୍, “ହେ ନାହ୍ମାଏ ପାର୍ମେଶ୍ୱାର୍ସିନ୍ ଜାମାର୍ ଏଲ୍ଚୁ ଗୁତ୍ତିୟାର୍, ଏକାର୍ ଛୋଟେ ବାଡ଼୍କା ନିମ୍ ଜାମାର୍ ଆସ୍କି ସ୍ତୁତି ମାହିମା କାମା।” 6ଆବ୍ଡ଼ାର୍ ପାବିତାର୍ ଆଲାର୍ ଆରୁ ନାବୀଜାମାର୍ଘି ହେଁସୁ ବାହାବାଚା, ଲେକିନ୍ ନିନ୍ ତା ନ୍ୟାୟ, ଆରୁ ନିନ୍ ଆବ୍ଡ଼ାର୍ଗେ ହେଁସୁ ହାପ୍ପାଗେ ଖାଲି ଚିଚ୍ଚକାଏ, ଏନ୍ଦେର୍ଗେକା ଆବ୍ଡ଼ାର୍ ଇଦ୍ଘି ଲାଇଗ୍ ରାଚାର୍। 7ବାରା, ନାମ୍ ଖୁସୀ ମାନାବତ୍ ଆରୁ ଲୀଝ୍ରତ୍, ଆରୁ ଆସ୍କି ସ୍ତୁତି କାମତ୍; ଏନ୍ଦେର୍ଗେକା ଭେଡ଼ି ହାଦ୍ଦୁସ୍କି ବେଞ୍ଜା ବାର୍ଚା କେର୍କିଚି, କାନ୍ୟା କୁକାଏଦ୍ ନିଜ୍କେନିଜ୍ ତିୟାର୍ ମାନ୍ଚ୍କିଚି। 8ଆସ୍କେ ସାଫା ବିଲ୍ଚ୍ନା ଚିଢ଼ା ଆତ୍ତାଗେ ହକ୍ ଚିଆକେରା, ଏନ୍ଦେର୍ଗେକା ଆ ସାଫା ମଲ୍ମଲ୍ଘି ମତ୍ଲବ୍ ପାର୍ମେଶ୍ୱାର୍ସ୍କି ପାବିତାର୍ ଆଲାର୍ଘି ଧରମ୍ ନାଲ୍ଖୁଦ୍। 9ଆନ୍ତିନ୍ ସରଗ୍ଦୂଁତ୍ ଏଙ୍ଗାନ୍ ତେଙ୍ଗିୟାଦ୍, “ଇବନ୍ ଲେଖା, କା ଧଏନ୍ସ୍ ଆସ୍, ଏକା ଭେଡ଼ି ହାଦ୍ଦୁଘି ବେଞ୍ଜାଘି ଭୋଜିନୁ ବାର୍ଚ୍କାଦାସ୍।” ଆରୁ ଆଦ୍ ଏଙ୍ଗାନ୍ ତେଙ୍ଗିୟା, “ଇଦ୍ ପାର୍ମେଶ୍ୱାର୍ସ୍କି ସତ୍ତୁ ବଚନ୍ଦ୍।” 10ଆନ୍ତିନ୍ ଏନ୍ ଆସ୍କି ଆରାଧାନା କାମାଗେ ଆସ୍କି ହେଡ୍ଡମୁଲିନୁ ଖାତ୍ର୍କାନ୍ କେର୍କାନ୍। ଆସ୍ ଏଙ୍ଗାନ୍ ତେଙ୍ଗିୟାସ୍, “ମେନା ଏନ୍ନେ ଆମା କାମା, ଏନ୍ ନିଙ୍ଘାଏ ଆରୁ ନିଙ୍ଘା ଭାଇ ବୁହୁଣୀର୍ଘି ସାଙ୍ଗେ ଗୁତ୍ତିୟାନ୍ ଏକାର୍ ଯୀଶୁସ୍କି ଚିଚ୍କା ସାକ୍ଷୀବନ୍ ବାଛାବିକିରି ଉଇନାଏ। ନିମ୍ ପାର୍ମେଶ୍ୱାର୍ସ୍କି ଖାଲି ଆରାଧାନା କାମା, ଏନ୍ଦେର୍ଗେକା ଯୀଶୁସ୍କି ବାରେନୁ ସାକ୍ଷୀ ଚିନାଏ, ଆବ୍ଡ଼ାର୍ଗେ ନାବୀର୍ଘି ଲେଖା ପାର୍ମେଶ୍ୱାର୍ସ୍କି ଆତ୍ମା ହାଖ୍ଖରିଦ୍।
ଧୋବ୍ ଘୋଣବନ୍ ଚାଲାବୁସ୍
11ଆରୁଅହନ୍ ଏନ୍ ସରଗ୍ବନ୍ ଖୋଲର୍ କା ଏର୍କାନ୍, ଆରୁ ଆସାନ୍ ଏଙ୍ଘା ଆଘ୍ଲି ଅଣ୍ଟା ଧୋବ୍ ଘୋଣଦ୍ ରାଚା। ଘୋଣ ଚାଲାବୁସ୍ ବିଶ୍ୱାସ୍ କାମ୍ନାଘି ଲାଇଗ୍ ଆରୁ ସତ୍ତୁସ୍ ଏନ୍ଦେର୍ଗେକା ନ୍ୟାୟତି ଆସ୍ ବିଚାର୍ କାମ୍ଦାସ୍ ଆରୁ ଲାଡ଼େଇ କାମ୍ଦାସ୍। 12ଆସ୍କି ହାନ୍ନୁଦ୍ ଚିଚ୍ଚୁ ଲେଖା ବିଲ୍ଲୀ ରାଇ, ଆରୁ ଆସ୍କି କୁକ୍କୁନୁ ଢେର୍ବାଗ୍ଗେ ରାଜ୍ ମୁକୁଟ୍ ରାଇଦ୍। ଆନ୍ନୁ ଅଣ୍ଟା ନାମେ ଲେଖ୍ଚ୍କା ରାଇ, ଏକାନ୍ ଆସିନ୍ ଆମ୍ବିକିରି ନେଦ୍ହି ବାଲ୍ନାଇନ୍। 13ଆସ୍ ହେଁସୁତି ଛିଟ୍କାରାଚ୍କା ଚିଢ଼ାନ୍ ଆତ୍ତକାଦାସ୍, ଆରୁ ଆସ୍କି ନାମେ ପାର୍ମେଶ୍ୱାର୍ସ୍କି ବଚନ୍।” 14ସରଗ୍ତା ସିପାହୀର୍ ଧୋବ୍ ଆରୁ ସାଫା ମଲ୍ମଲ୍ ଆତ୍ତିକିରି ଆରୁ ଧୋବ୍ ଘୋଡ଼ାନୁ ଅକ୍କିକିରି, ଆସ୍କି ପାଛ୍ଲି-ପାଛ୍ଲି କାଲିୟାର୍। 15ଏକା ଆଲାର୍ ପାର୍ମେଶ୍ୱାର୍ସ୍କି ବିରୁଦ୍ଧ୍ କାମ୍ନାଏ ଆରୁ ଆସ୍କି ଆରାଧାନା ମା କାମ୍ନାଏ ଆବ୍ଡ଼ା ଆଲାରିନ୍ ପିଟ୍ଟନାଘି ଲାଗାନ୍ ଆସ୍କି ଥୁମ୍ଣାନ୍ତି ଅଣ୍ଟା ଧାରେ ଖଣ୍ଡାଦ୍ ଉର୍ଖାଲିୟାଦ୍। ଆସ୍ ଆବ୍ଡ଼ାର୍ଘି ମିଆଁ ପାନ୍ନାଘି ରାଜ୍ଦଣ୍ଡ୍ତି ଶାସନ୍ କାମସ୍। ଆରୁ ଜାମାର୍ଘିନ୍ତି ଶକ୍ତିଶାଲୀ ପାର୍ମେଶ୍ୱାର୍ସ୍କି ଭାୟାନାକ୍ ଖୀସୁବନ୍ ଦାଖ୍ରାସ୍ଘି କୁଣ୍ଡ୍ନୁ ତିର୍ହ୍ସ୍ ନାବସ୍। 16ଆସ୍କି ଚିଢ଼ା ଆରୁ ହସ୍କାନୁ ଏନ୍ନେ ନାମେ ଲେଖ୍ଚ୍କା ରାଇ: “ରାଜା ଜାମାର୍ଘି ରାଜାସ୍ ଆରୁ ପ୍ରାଭୁ ଜାମାର୍ଘି ପ୍ରାଭୁସ୍।” 17ଆନ୍ତିନ୍ ଏନ୍ ଆରୁ ଅଣ୍ଟା ସରଗ୍ ଦୂଁତ୍ବନ୍ ବିଡ଼ିସାନ୍ ଇଜ୍ଜକାନ୍ ଏର୍କାନ୍। ଆଦ୍ ଜୋର୍ସେ ଚିର୍ରା ରାଇକିରି ଆକାଶ୍ଘି ମାଝାନ୍ତିନ୍ ଉଢିୟାରାନା ବାଲା ଜାମା ଅଡ଼ାନ୍ ତେଙ୍ଗିୟାଦ୍, “ବାରା, ପାର୍ମେଶ୍ୱାର୍ସ୍କି ବାଡ଼୍କା ଭୋଜିଘି ଲାଗାନ୍ ଅନ୍ଠାଣ୍ ମାନାକାଲା; 18ତାକା ନିମ୍ ଶାସନ୍ କାମୁର୍, ସିପାହୀର୍, ନାମୀଦାମୀ ମାର୍ଦ୍ନାର୍, ଘୋଣ ଆରୁ ଘୋଣ ଚାଲାବୁର୍ଘି ଆହ୍ଡ଼ାନ୍ ମହାଁ ଅଙ୍ଗର୍। ଆରୁ ଜାମା ଆଜାଦୀ ହାକ୍କା ଆଲାର୍ଘି ସେବକ୍, ଛୋଟେ ଆଲାର୍ ଆରୁ ବାଡ଼୍କା ଜାମାର୍ଘି ଆହ୍ଡ଼ାନ୍ ମହଁର୍।” 19ଆନ୍ତିନ୍ ଏନ୍ ଭାୟାନାକ୍ ଜାନ୍ତୁନ୍, ଆରୁ ଧାନ୍ତାରିନ୍ନ୍ତା ରାଜାର୍ ଆରୁ ଆବ୍ଡ଼ାର୍ଘି ଘୋଣ ଚାଲାବୁର୍ ଆରୁ ଆସ୍କି ସିପାହୀର୍ଗାନେ ଲାଡ଼୍ନାଘି ଲାଗାନ୍ ଅଣ୍ଟା ଜାଗାନୁ ଠୁଡ଼ିୟାରାଚ୍କାନ୍ ଏର୍କାନ୍। 20ଆ ଭାୟାନାକ୍ ଜାନ୍ତୁ, ଆରୁ ଇଦ୍ଘିଗାନେ ଆସ୍ ଠାକୁୱା ନାବୀ ଧାର୍ରାରାଚାସ୍ କେରାସ୍, ଆସ୍ଗାନେ ଆ ଅଦ୍ଭୁତ୍ ନାଲ୍ଖୁ କାମୁ ଠାକୁୱା ନାବୀସ୍ହି ରାଚାସ୍, ଏକାସ୍ କା ଆଲାରିନ୍ ଫୁସ୍ଲାଲିୟାସ୍, ଆରୁ ନେଖା ମିଆଁ ଆ ଭାୟାନାକ୍ ଜାନ୍ତୁଘି ଛାପା ଲାକ୍କିଚା, ଆରୁ ଏକାସ୍ ଆ ମୂର୍ତ୍ତୀଘି ସେବା ଆରାଧାନା କାମାଲିୟାସ୍ ଇ ଦୁହି ଲୋକ୍ରିନ୍ ଉଜ୍ଜତେ-ଉଜ୍ଜତେ ଆ ଚିଚ୍ଚୁଘି ହଁସ୍ରାନୁ, ଏକା ଗନ୍ଧକ୍ତି ଲାଘ୍ରିଦ୍ ଆନ୍ନୁ ଖେବ୍ଡ଼େଇଚାର୍। 21ବାକି ଆଲାର୍ ଆ ଘୋଣ ଚାଲାବୁସ୍କି ଖଣ୍ଡାତି, ଏକାଦ୍ ଆସ୍କି ଥୁମ୍ଣାନ୍ତି ଉର୍କିଚା ଆତ୍ତି ପିଟା କେରାର୍। ଆରୁ ଓଡ଼ାଗୁଠିଦ୍ ଆବ୍ଡ଼ାର୍ଘି ଆହ୍ଡ଼ାନ୍ କୁଲୁଭର୍ ମଖ୍ଖାଦ୍ ଆରୁ ଉଡ଼୍ଚାକେରାଦ୍।
20ପାର୍ମେଶ୍ୱାର୍ସ୍ ଅନ୍ ହାଜାର୍ ବଛର୍ ଶାସନ୍ କାମସ୍
1ହୁଦ୍ଘିପାଛ୍ଲି ଏନ୍ ଅଣ୍ଟା ସରଗ୍ ଦୂଁତ୍ବନ୍ ସରଗ୍ତି ଏତ୍ତନାନ୍ ଏର୍କାନ୍, ଆଦ୍ଘି ହେଖ୍ଖାନୁ ପାତାଲ୍ ଗାଡ୍ଡିନ୍ତା ଚାଭି ଆରୁ ଅଣ୍ଟା ବାଡ଼୍କା ସିକ୍ଡ଼ି ରାଚା। 2ଆ ଦୂଁତ୍ଦ୍ ଆ ବଡ୍ଡାନେର୍ରୁବନ୍ ଆ ପାଚ୍ଚା ନେର୍ରୁ, ଚାହେ ଏକାଦ୍ କା ଭୁତ୍ତୁଦ୍ ଆରୁ ଶାଏତାନ୍ଦ୍, ଆବନ୍ ଧାର୍ଚା ଆରୁ ଅନ୍ ହାଜାର୍ ବଛର୍ଘି ଲାଗାନ୍ ହିଁଚେଇଚା। 3ଆରୁ ଆବନ୍ ପାତାଲ୍ ଗାଡ୍ଡିନୁ ଡାବ୍ଚେଇଚା, ଆରୁ ଆନ୍ନୁ ମାର୍ଖା ଠୋକ୍ଚେଇଚା, କା ଆଦ୍ ଅନ୍ ହାଜାର୍ ବଛର୍ ମାନ୍ନାତକ୍ ଆଦ୍ ଜାତି ଜାତିନ୍ତା ଆଲାରିନ୍ ମା ଫୁସ୍ଲଦ୍। ଇଦ୍ଘି ପାଛ୍ଲି କାଟେ ଡେରିଘି ଲାଗାନ୍ ଆବନ୍ ଆମ୍ବନା ଚିନାଘି ଦାର୍କାର୍ ରାଇଦ୍। 4ଆନ୍ତିନ୍ ଏନ୍ ରାଜ୍ଗାଦୀଗୁଠିନ୍ ଏର୍କାନ୍। ଏକାର୍ ଆଦ୍ଘି ମିଆଁ ଅକ୍କାଗେ ବାର୍ଚାର୍, ଆବ୍ଡ଼ାର୍ଗେ ନ୍ୟାୟ କାମାଗେ ହକ୍ ଚିଆକେରା। ଏନ୍ ଆବ୍ଡ଼ା ଆଲାର୍ଘି ଆତ୍ମାନ୍ହି ଏର୍କାନ୍, ଏକାର୍ଘି କୁକ୍କୁ ଯୀଶୁସ୍କି ସାକ୍ଷୀ ଆରୁ ପାର୍ମେଶ୍ୱାର୍ସ୍କି ବଚନ୍ଘି କାରଣ୍ତି କୁକ୍କୁନ୍ ପୂଜା କେର୍କିଚା, ଏକାର୍ ଆ ଭାୟାନାକ୍ ଜାନ୍ତୁନ୍ ଆରୁ ଆଦ୍ଘି ମୂର୍ତ୍ତୀନ୍ ପୂଜା ମାଲ୍ଲା କାମୁର୍, ଚାହେ ନିଜର୍ କାପ୍ଡ଼େ, ହେଖ୍ଖାନୁ, ଆ ଭାୟାନାକ୍ ଜାନ୍ତୁଘି ଛାପା ଗ୍ରହନ୍ ମାଲ୍ଲା କାମ୍ଚ୍କାରୁର୍, ଆବ୍ଡ଼ାର୍ ଉଜ୍ଜିକିରି ଖ୍ରୀସ୍ତ୍ଗାନେ ଅନ୍ ହାଜାର୍ ବଛର୍ତକ୍ ରାଜୀ କାମ୍ତେ ରାଚାର୍। 5ବାକି କେଚ୍ଚକା ଆଲାର୍ ଆ ଅନ୍ ହାଜାର୍ ବଛର୍ ପୁରା ମା ମାନ୍ନାତକ୍ ମା ଉଜ୍ଜିୟାର୍। ଇଦ୍ଦିନ୍ ପହ୍ଲେ ଉଜ୍ଜନାଦ୍। 6ଏକାର୍ ପହ୍ଲେ ଉଜ୍ଜିୟାର୍, ଉଜ୍ଜନାନୁ ଭାଗିଦାର୍ ରାଚାର୍, ଆବ୍ଡ଼ାର୍ ଧଏନ୍ର୍ ଆରୁ ପାବିତାର୍; ଆରୁ ଦୁସ୍ରା ମରନ୍ ମତ୍ଲବ୍ ଆବ୍ଡ଼ା ଆଲାର୍ଗେ ପାତାଲ୍ନୁ ସବୁଦିନ୍ତା ମରନ୍ ମା ହାଖ୍ଖର। ଆବ୍ଡ଼ାର୍ ପାର୍ମେଶ୍ୱାର୍ସ୍କି ଆରୁ ଖ୍ରୀସ୍ତ୍କି ପୁରୋହିତ୍ ମାନିକିରି ଅନ୍ ହାଜାର୍ ବଛର୍ତକ୍ ଆବ୍ଡ଼ାର୍ ଗାନେ ରାଜୀ କାମର୍।
ଶାଏତାନ୍ଘି ନାଶ୍ ମାନ୍ନା
7ଯେତ୍କବାକେନ୍ ଅନ୍ ହାଜାର୍ ବଛର୍ ପୁର୍ନାତକ୍ ଶାଏତାନ୍ଦ୍ ଜେହେଲ୍ତି ଛୁଟ୍ରକୋ। 8ଦୁନିଆଁନ୍ତା ଚାର୍ହି କୋଣାନୁ ରାନାବାଲା ଜାତିୟାରିନ୍ ଆରୁ ଗୋଗ୍ ଆରୁ ମାଗୋଗ୍ ରାଜୀଘି ସିପାହୀରିନ୍ ଏକାର୍ କା ସାମ୍ଧୁର୍ତା ଚାଲ୍କ୍ରି ଲେଖା ରାନାଏ, ଆବ୍ଡ଼ାରିନ୍ ଫୁସ୍ଲିକିରି ଲାଡ଼େଇଘି ଲାଗାନ୍ ଅନ୍ଠାଣ୍ ଠୁଡ଼ିୟାଗେ ଉର୍ଖଦ୍। 9ଆବ୍ଡ଼ାର୍ ଗୋଟା ଦୁନିଆଁନୁ ଫାଏଲାରାଚାର୍ କେରାର୍ ଆରୁ ପାର୍ମେଶ୍ୱାର୍ସ୍କି ଆଲାର୍ଘି ତାମ୍ବୁ ଆରୁ ପ୍ୟାରା ସହର୍ବନ୍ ଘେର୍ଚାର୍; ହତ୍କବାକେନ୍ ସରଗ୍ତି ଚିଚ୍ଚୁ ଖାତ୍ରା ଆରୁ ଆବ୍ଡ଼ାରିନ୍ ନାଶ୍ କାମ୍ଚେଇଚା। 10ଏକା ଶାଏତାନ୍ ଆବ୍ଡ଼ାରିନ୍ ଫୁସ୍ଲାଲିୟାଦ୍, ଆବନ୍ ଚିଚ୍ଚୁ ଆରୁ ଗନ୍ଧକ୍ଘି ହଁସ୍ରାନୁ ତୁକ୍କେର୍ଚାର୍, ଆସାନ୍ ଆ ଜାନ୍ତୁ ଆରୁ ଝୁଟ୍ଟୁ ନାବୀର୍ହି ରାନାଏ; ଆରୁ ଆବ୍ଡ଼ାର୍ ଯୁଗ୍ଯୁଗ୍ ଉଲ୍ଲାନ୍ ମାଁହାନ୍ ନୁଞ୍ଜନା ବାତ୍ଥାନା ସାହର୍, ଆରୁ ଦୁଃଖୁ କଷଟ୍ ସାହର୍।
ଆଖ୍ରୀ ନ୍ୟାୟ
11ଆନ୍ତିନ୍ ଏନ୍ ଅଣ୍ଟା ବାଡ଼୍କା ଧୋବ୍ ରଙ୍ଗ୍ଘି ରାଜ୍ଗାଦୀ ଆରୁ ଆନ୍ନୁ ଅକ୍କାନ୍ ଏର୍କାନ୍, ଆସ୍କି ଚାହାନ୍ତି ଧାନ୍ତାରିଦ୍ ଆରୁ ଆକାଶ୍ଦ୍ ବୁଙ୍ଗାକେରା। ଆବ୍ଡ଼ାର୍ଘି ଆରୁ ପାତାହି ମା ଚାଲ୍ରା। 12ଆନ୍ତିନ୍ ଏନ୍ ଛୋଟେ ବାଡ଼୍କା ଜାମା କେଚ୍ଚକା ଆଲାରିନ୍ ରାଜ୍ଗାଦୀଘି ଆଘ୍ଲି ଇଜ୍ଜକାନ୍ ଏର୍କାନ୍। ଆରୁ ବହିଗୁଠିନ୍ ଖୋଲାକେରା; ଆରୁ ଅଣ୍ଟା ବହି ଖୋଲାକେରା ମତ୍ଲବ୍ ଜୀବନ୍ଘି ବହି, ଆରୁ ଆ ବହିନୁ ଏସ୍କେ ଲେଖ୍ଚ୍କାରାଚା, ହୋନ୍ନେନ୍ ଆବ୍ଡ଼ାର୍ଘି ନାଲ୍ଖୁଘି ଲେଖା କେଚ୍ଚ୍କା ଆଲାର୍ଘି ନ୍ୟାୟ କାମାକେରା। 13ଏକାର୍ କେଚ୍ଚ୍କା ସାମ୍ଧୁର୍ନୁ ରାଚାର୍, ଆବ୍ଡ଼ାରିନ୍ ସାମ୍ଧୁର୍ଦ୍ ଚିଚ୍ଚାଲାଗ୍ଗିୟା, ଚାହେ ଖେନା ଆରୁ ପାତାଲ୍ ଗାଡ୍ଡିଦ୍ ହି ନିଜର୍-ନିଜର୍ କେଚ୍ଚକାରିନ୍ ସୋଁପ୍ଚେଇଚାର୍। ଆରୁ ଜାମାର୍ଘି ନ୍ୟାୟ ତାହ୍ମା ନାଲ୍ଖୁଘି ଲେଖା କାମାକୋ। 14ଇଦ୍ଘି ପାଛ୍ଲି ମରନ୍ ଆରୁ ପାତାଲ୍ବନ୍ ଚିଚ୍ଚୁଘି ହଁସ୍ରାନୁ ଖେବ୍ଡ଼ାକେରା, ଇଦ୍ ଚିଚ୍ଚୁଘି ହଁସ୍ରାଘି ଦୁସ୍ରା ମରନ୍। 15ଆରୁ ନେଖା ନାମେ ଜୀବନ୍ ବହିନୁ ଲେଖ୍ଚ୍କା ମାଲ୍ଲାରୁଦ୍, ଆସିନ୍ହି ଚିଚ୍ଚୁଘି ହଁସ୍ରାନୁ ଖେବ୍ଡ଼ାଚାକେରା।
21ପୁନା ଆକାଶ୍ ଆରୁ ପୁନା ଦୁନିଆଁ
1ଆନ୍ତିନ୍ ଏନ୍ ଅଣ୍ଟା ପୁନା ଆକାଶ୍ ଆରୁ ପୁନା ଦୁନିଆଁନ୍ ଏର୍କାନ୍, ଏନ୍ଦେର୍ଗେକା ପହ୍ଲେ ଆକାଶ୍ ଆରୁ ଆଘ୍ଲିନ୍ତା ଦୁନିଆଁ ଲିଭ୍ରା କେର୍କିଚା, ଆରୁ ସାମ୍ଧୁର୍ହି ମାଲ୍ଲାରୁଦ୍। 2ଆନ୍ତିନ୍ ଏନ୍ ପାବିତାର୍ ସହର୍ ଯେରୁଶାଲେମ୍ବନ୍ ସରଗ୍ତି ପାର୍ମେଶ୍ୱାର୍ସ୍କି ଚାହାନ୍ତି ଏତ୍ତନାନ୍ ଏର୍କାନ୍। ଆଦ୍ ଆ କାନ୍ୟାକୁକାଏ ଲେଖା ରାଚା ଏକାଦ୍ କା ତାଙ୍ଘା ଆଲାସ୍କି ଲାଗାନ୍ ସିଙ୍ଗ୍ରା ରାଚ୍କିଚା। 3ଆନ୍ତିନ୍ ଏନ୍ ରାଜ୍ଗାଦୀନ୍ତି ଅର୍ତୁରିନ୍ ଜୋର୍ସେ ଏନ୍ନେ ତେଙ୍ଗ୍ନାନ୍ ମେନ୍ଚ୍କାନ୍, “ଏରା ପାର୍ମେଶ୍ୱାର୍ସ୍କି ଡେରା, ରାନା ଆଡ୍ଡା ଆଲାର୍ଘି ମାଝାନୁ ରାଇଦ୍, ଆସ୍ ଆବ୍ଡ଼ାର୍ ଗାନେ ଡେରା କାମସ୍, ଆରୁ ଆବ୍ଡ଼ାର୍ ଆସ୍କି ଆଲ୍ ମାନର୍ ଆରୁ ପାର୍ମେଶ୍ୱାର୍ସ୍ ନିଜେ ଆବ୍ଡ଼ାର୍ ଗାନେ ରସ୍। ଆରୁ ଆବ୍ଡ଼ାର୍ଘି ପାର୍ମେଶ୍ୱାର୍ ମାନସ୍। 4ଆସ୍ ଆବ୍ଡ଼ାର୍ଘି ହାନ୍ନୁନ୍ତି ଜାମା ହାଞ୍ଜାଲୋବନ୍ ଚିଁଚସ୍। ଆରୁ ଆସାନ୍ ଆକ୍କୁନ୍ ନା ଏକ୍ଲାହି ମରନ୍ ମାନଦ୍, ନା ଦୁଃଖୁଘି ଲାଗାନ୍ ନେରିନ୍ ଅହ୍ଲର୍ ଚିହଁର୍ ଆରୁ ନା କଷଟ୍ ହାଖ୍ଖର୍। ଏନ୍ଦେର୍ଗେକା ଇ ଜାମା ପାଚ୍ଚା କାତ୍ଥା ଆକ୍କୁନ୍ ମୁଞ୍ଜରା କେର୍କିଚି।”
5ଏକାସ୍ ରାଜ୍ଗାଦୀନୁ ଅକ୍କାଚାସ୍, ଆସ୍ ତେଙ୍ଗିୟାସ୍, “ଏରା ଏନ୍ ଜାମାକିଛିନ୍ ପୁନା କାମାଲ୍ଦାନ୍,” ଆନ୍ତିନ୍ ଆସ୍ ତେଙ୍ଗିୟାସ୍, “ଲେଖା ଉଇୟା ଏନ୍ଦେର୍ଗେକା ଇ ଜାମା ବଚନ୍ଦ୍ ବିଶ୍ୱାସ୍ କାମ୍ନାଘି ଲାଇଗ୍ ଆରୁ ସତ୍ତୁଦ୍।” 6ଆସ୍ ଏଙ୍ଗାନ୍ ଆରୁଅହନ୍ ତେଙ୍ଗିୟାସ୍, “ଜାମାଦ୍ ଆଖ୍ରୀ ମାନ୍ଚାକେର୍କିଚି। ଏନ୍ ଆଲ୍ଫା ଆରୁ ଓମେଗା, ସୁରୁ ଆରୁ ଆଖ୍ରୀନ୍। ଏକାସ୍ ଆମ୍ମୁକିଡ଼ା ସାରାଲ୍ଦାସ୍, ଆସ୍କେ ଏନ୍ ଜୀବନ୍ ରୂପି ଝାର୍ନାନ୍ତି ବିନା ଦାମ୍ନୁ ହାପ୍ପାଗେ ଚିଅନ୍। 7ଏକାସ୍ ଜିତସ୍ ଆସ୍ ଇବ୍ଡ଼ାଘି ହକ୍ଦାର୍ ମାନସ୍, ଏକାସ୍ ଜିତସ୍ ଆସ୍କେ ଇବ୍ଡ଼ା ଜାମାଦ୍ ହାଖ୍ଖରଦ୍। ଆରୁ ଏନ୍ ଆସ୍କି ପାର୍ମେଶ୍ୱାର୍ ମାନନ୍ ଆରୁ ଆସ୍ ଏଙ୍ଘା ହାଦ୍ଦୁସ୍ ମାନସ୍। 8ଲେକିନ୍ ଏକାର୍ ଡାର୍ୱାହା, ଅବିଶ୍ୱାସ୍, ଖାରାପ୍ ନାଲ୍ଖୁ କାମ୍ନାବାଲା, ଆଲ୍ପିଟୁ, ଆରୁ ବେଭିଚାରି, ଯାଦୁଟୋନା ଆରୁ ମୂର୍ତ୍ତୀ ପୂଜା କାମୁ, ଆରୁ ଜାମା ଝୁଟ୍ଟୁର୍ ଚିଚ୍ଚୁ ଆରୁ ଗନ୍ଧକ୍ଘି ଲାଘ୍ର୍ନା ହଁସ୍ରାନୁ ଭାଗ୍ ହାଖ୍ଖର, ଆରୁ ଇଦିନ୍ ଦୁସ୍ରା ମରନ୍ଦ୍।”
ପୁନା ଯେରୁଶାଲେମ୍
9ଆନ୍ତିନ୍ ଆ ସାତ୍ତେଟା ସରଗ୍ଦୂଁତ୍ର୍ସ୍ତି ନେଖାସାନ୍ ଆଖ୍ରୀ ବିପଦ୍ତି ନିନ୍ଦ୍କା ସାତ୍ତେଟା ଗିନା ରାଚା, ଆବ୍ଡ଼ାର୍ସ୍ତି ଅଣ୍ଟାଦ୍ ଏଙ୍ଘାସାନ୍ ବାର୍ଚା, ଆରୁ ଏଙ୍ଗାନ୍ ତେଙ୍ଗିୟାଦ୍, “ଇୟା ବାରା, ଏନ୍ ନିଙ୍ଗାନ୍ କାନ୍ୟାକୁକାଏ ମତ୍ଲବ୍ ଭେଡ଼ି ହାଦ୍ଦୁସ୍କି ଆଲିନ୍ ଏଦୋନ୍।” 10ଆଙ୍ଗେନ୍ ଆଦ୍ ଏଙ୍ଗାନ୍ ପାବିତାର୍ ଆତ୍ମାନୁ ଅଣ୍ଟା ବାଡ଼୍କା ଆରୁ ମେଚ୍ଛା ପାର୍ତ୍ତାଗେ ଅଚ୍ଚା କେରା। ଆରୁ ପାବିତାର୍ ସହର୍ ଯେରୁଶାଲେମ୍ବନ୍ ସରଗ୍ତି ପାର୍ମେଶ୍ୱାର୍ସ୍କି ଚାହାନ୍ତି ଏତ୍ତନାନ୍ ଏଦିୟାଦ୍। 11ଆ ସହର୍ ପାର୍ମେଶ୍ୱାର୍ସ୍କି ମାହିମାତି ନିନ୍ଦ୍କା ରାଚା ଆରୁ ମୁରୁକ୍ ଦାମ୍ଘି ମୋତି ଆରୁ ୟାସାବ୍ ଲେଖା ରାଚା। 12ଆଦ୍ଘି ଚାର୍ହି ପାଖା ଅଣ୍ଟା ବାଡ଼୍କା ଆରୁ ମେଚ୍ଛା କାଥି ଘେରା ରାଚା, ଆରୁ ଆଦ୍ଘି ବାରଟା ଫାଟକ୍ ରାଚା ଆରୁ ଫାଟକ୍ସାନ୍ ବାର ଲୋକ୍ ସରଗ୍ ଦୂଁତ୍ର୍ ରାଚାର୍; ଆରୁ ଆ ଫାଟକ୍ନୁ ଇସ୍ରାଏଲୀର୍ଘି ବାର ବାଉଁଶାର୍ଘି ନାମେ ଲେଖ୍ଚ୍କାରାଚା। 13ପୁରୁବ୍ତାରା ମୁଣ୍ଟା ବାଲି, ଉତ୍ତର୍ତାରା ମୁଣ୍ଟା ବାଲି, ଦକ୍ଷିଣ୍ ତାରା ମୁଣ୍ଟା ବାଲି ଆରୁ ପଶ୍ଚିମ୍ ତାରା ମୁଣ୍ଟା ବାଲି ରାଚା। 14ସହର୍ଘି କାଥିଘି ବାରଟା ନାହି ରାଚା, ଆରୁ ଆନ୍ନୁ ଭେଡ଼ି ହାଦ୍ଦୁସ୍କି ବାର ଲୋକ୍ ଖାସ୍ଚେଲାଘି ନାମେ ଲେଖ୍ଚ୍କାରାଚା। 15ଏକା ଦୂଁତ୍ ଏଙ୍ଘାଗାନେ କାଚ୍ନେଖ୍ରାଲିୟାଦ୍, ଆଦ୍ଘି ଚାହାନୁ ସହର୍ ଆରୁ, ଆଦ୍ ଫାଟକ୍, ଆଦ୍ଘି କାଥିନ୍ ନାପାଗେ ଲାଗାନ୍ ଅଣ୍ଟା ସୋନାଘି ଠେଙ୍ଗା ରାଚା। 16ଆ ସହର୍ଦ୍ ଚାର୍ଖୁଟିଆ ରାଚା, ଆରୁ ଆଦ୍ଘି ଲାମ୍ବା ଆରୁ ଚାଉଡ଼ା ଆତ୍ତକରିନ୍ ରାଚା, ଆରୁ ଆଦ୍ ଆ ଠେଙ୍ଗାତି ସହର୍ବନ୍ ନାପ୍ଚା ତା ସାଢ଼େ ସାତ୍ ଶହ୍ କୋଶ୍ ମାନ୍ଚା: ଆଦ୍ଘି ଲାମ୍ବା, ଚାଉଡ଼ା, ଆରୁ ମେଚ୍ଛା ଆତ୍ତକରିନ୍ ବାରାବୁରି ରାଚା। 17ଆଦ୍ ଆସ୍କି କାଥିନ୍ ନାପ୍ଚା, ତା ଆଦ୍ ଆଲାର୍ଘି ନାପଚ୍କା ଅନୁସାର୍ ଏକାର୍ଘି ସରଗ୍ଦୂଁତ୍ ବେଭାର୍ କାମ୍ଚା ଏକ୍ ଶହ୍ ଚଉରାଲିଶ୍ ହାତ୍ ମାନ୍ଚା। 18ଆଦ୍ଘି କାଥିଦ୍ ହୀରା ମୋତିତି ତିୟାର୍ କାମ୍ଚ୍କା ରାଚା। ଆରୁ ସହର୍ଦ୍ ଖାଣ୍ଟି ସୋନାତି କାମ୍ଚ୍କା ରାଚା। ଏକାଦ୍ କା କାଁଚୁ ଲେଖା ଚାମ୍କାରାଲିୟା। 19ଆ କାଥିଘି ନାହିଦ୍ ଜାମା ରକମ୍ଘି ଦାମିକା ମୋତିତି ତିୟାର୍ କାମ୍ଚ୍କା ରାଚା; ପହ୍ଲେ ନାହିଦ୍ ହୀରାତି, ଦୁସ୍ରାଦ୍ ନୀଲ୍ ମଣିତି, ତିସ୍ରାଦ୍ ଲାଡ଼୍ଲିତି, ଚୋଉଥାଦ୍ ମର୍କତ୍ତି, 20ପାଞ୍ଚୱାଦ୍ ଗୋମେଦକ୍ତି, ଛାଟ୍ୱାଁଦ୍ ମାଣିକଘି, ସାତ୍ୱାଁ ପିତ୍ମଣିତି, ଆଠ୍ୱାଁ ପେରୋଜ୍ତି, ନାୱାଁ ପୁଖ୍ରାଜତି, ଦାଶ୍ୱାଁଦ୍ ଲହସାନିଏତି, ଏଗାର୍ୱାଁଦ୍ ଧୁମକାନ୍ତିତି, ଆରୁ ବାର୍ୱାଁଦ୍ ୟାକୁତ୍ତି କାମ୍ଚ୍କା ରାଚା। 21ବାରଟା ଫାଟକ୍ ବାରଟା ମୋତିତି ତିୟାର୍ କାମ୍ଚ୍କା ରାଚା; ଅଣ୍ଟା-ଅଣ୍ଟା ଫାଟକ୍ ବାଲି ଅଣ୍ଟା-ଅଣ୍ଟା ମୋତିତି କାମ୍ଚ୍କା ରାଚା ଆରୁ ସହର୍ତା ସଡ଼କ୍ଦ୍ ପୁରା ସାଫା କାଁଚୁ ଲେଖା ଖାଣ୍ଟି ସୋନାଘି ରାଚା।
22ଏନ୍ ଆ ସହର୍ନୁ ଅଣ୍ଟାହି ମନ୍ଦିର୍ ମା ଏର୍କାନ୍, ଏନ୍ଦେର୍ଗେକା ଜାମାର୍ଘିନ୍ତି ଶକ୍ତିଶାଲୀ ପ୍ରାଭୁ ପାର୍ମେଶ୍ୱାର୍ସ୍ ଆରୁ ଭେଡ଼ିହାଦ୍ଦୁସ୍ ଆସ୍ତା ମନ୍ଦିର୍ସ୍ 23ହୁ ସହର୍ନୁ ବିଡ଼ି ଚାହେ ଚାନ୍ଦୋଘି ବିଲ୍ଲୀଘି ଦାର୍କାର୍ ମାଲ୍ଲାଦିନ୍, ଏନ୍ଦେର୍ଗେକା ପାର୍ମେଶ୍ୱାର୍ସ୍କି ମାହିମାତି ଆଦ୍ ବିଲ୍ଲୀ ମାନା କାଲିୟା, ଆରୁ ଭେଡ଼ିହାଦ୍ଦୁସ୍ ଆଦ୍ଘି ବିଲ୍ଲୀସ୍। 24ଆରୁ ଜାମା ଜାତିନ୍ତା ଆଲାର୍ ଆସ୍କି ବିଲ୍ଲୀନୁ ଏକାଏକି କାମର୍, ଆରୁ ଦୁନିଆଁନ୍ତା ରାଜାର୍ ତାହ୍ମା ଧାନ୍ନୁ, ମାହିମାନ୍ ଇନ୍ନୁ ଅନ୍ଦ୍ରର୍। 25ଆଦ୍ଘି ଫାଟକ୍ ଉଲ୍ଲା ବାକେନ୍ ଏକ୍ଲାହି ବନ୍ଦ ମା ମାନିଦ୍, ଏନ୍ଦେର୍ଗେକା ଆସାନ୍ ମାଁହା ମା ମାନିଦ୍। 26ଜାମା ଜାତିନ୍ତା ଆଲାର୍ ତାହ୍ମା ଧାନ୍ନୁ, ମାହିମା ଆରୁ ମାଇନ୍ ଆନ୍ନୁ ଅନ୍ଦ୍ରର୍। 27ଲେକିନ୍ ଆନ୍ନୁ ନା ତା ନେରିନ୍ ଆ ଅଶୁଦ୍ଧ୍ ଜିନିଷ୍ଦ୍ ଚାହେ ହାଁଣ୍ନା ନାଲ୍ଖୁ କାମ୍ନାବାଲାର୍, ଚାହେ ଝୁଟ୍ଟୁ ତେଙ୍ଗୁ ଆଲାର୍ ଏକ୍ରିନ୍ ରୀତିତି କରା ପଲ୍ଲର୍, ଲେକିନ୍ ଖାଲି ଆବ୍ଡ଼ାର୍ ଆଲାର୍ କରାଅଙ୍ଗର୍ ଏକାର୍ଘି ନାମେ ଭେଡ଼ି ହାଦ୍ଦୁସ୍କି ଜୀବନ୍ ବହିନୁ ଲେଖ୍ଚ୍କା ରାଇ।
221ଆନ୍ତିନ୍ ଆ ସରଗ୍ଦୂଁତ୍ ଏଙ୍ଗାନ୍ ଜୀବନ୍ ଚିନାବାଲା ଅଣ୍ଟା ହଁସ୍ରା ଏଦିୟା। ଆ ହଁସ୍ରାଦ୍ କାଁଚ୍ ଲେଖା ସାଫା ରାଚା। ଆଦ୍ ପାର୍ମେଶ୍ୱାର୍ସ୍କି ଆରୁ ଭେଡ଼ି ହାଦ୍ଦୁଘି ରାଜ୍ଗାଦୀନ୍ତି ଉର୍ଖିକିରି ସହର୍ଘି ଗଲି ଚିଇକିରି ବାହାଲିଆଦ୍। 2ହଁସ୍ରାଘି ଇ ପାଖା ହାପାଖା ଜୀବନ୍ଘି ମାନ୍ନୁ ରାଚା। ଆନ୍ନୁ ଜାମା ବଛର୍ ବାର ରକମ୍ଘି ଫାଡ଼ୁ ହାଞ୍ଜାଲିୟାଦ୍। ଆରୁ ଆଦ୍ ଜାମା ମାସ୍ ହାଞ୍ଜାଲିୟାଦ୍, ଆରୁ ଆ ମାନ୍ନୁଘି ଆଥାତି ଢେର୍ ଜାତିନ୍ତା ଆଲାର୍ ବାନେ ମାନାଲିୟାର୍। 3ଆରୁ ଆସାନ୍ ଏନ୍ଦେର୍ହି ସାରାପ୍ ମା ରାଇ। ଆରୁ ପାର୍ମେଶ୍ୱାର୍ ଆରୁ ଭେଡ଼ି ହାଦ୍ଦୁଘି ରାଜ୍ଗାଦୀ ଆ ସହର୍ନୁନିନ୍ ମାନଦ୍, ଆରୁ ଆସ୍କି ସେବକର୍ ଆସ୍କି ସେବା କାମର୍। 4ଆରୁ ଆବ୍ଡ଼ାର୍ ଆସ୍କି ଚେହେରାନ୍ ଏରର୍, ଆରୁ ଆସ୍କି ନାମେ ଆବ୍ଡ଼ାର୍ଘି କାପ୍ଡ଼େନୁ ଲେଖ୍ଚ୍କାରଦ୍। 5ଆସାନ୍ ଏକ୍ଲାହି ମାଁହା ମା ମାନିଦ୍, ଆରୁ ନା ଆବ୍ଡ଼ାର୍ଗେ ଲାଲ୍ଟେନ୍ ତା ବିଲ୍ଲୀ ଆରୁ ବିଡ଼ିଘି ବିଲ୍ଲୀ ଦାର୍କାର୍ ମା ମାନିଦ୍। ଏନ୍ଦେର୍ଗେକା ପ୍ରାଭୁ ପାର୍ମେଶ୍ୱାର୍ସ୍ ଆବ୍ଡ଼ାର୍ଗେ ବିଲ୍ଲୀ ଚୋସ୍, ଆରୁ ଆବ୍ଡ଼ାର୍ ଯୁଗ୍-ଯୁଗ୍ ରାଜୀ କାମର୍।
ଯୀଶୁସ୍କି ଆରୁଅହନ୍ ବାର୍ନା
6ଆରୁଅହନ୍ ଆ ସରଗ୍ଦୂଁତ୍ ଏଙ୍ଗାନ୍ ତେଙ୍ଗିୟାଦ୍, “ଇ ବଚନ୍ଦ୍ ବିଶ୍ୱାସ୍ କାମ୍ନାଘି ଲାଇଗ୍ ଆରୁ ସତ୍ତୁଦ୍। ଏକାସ୍ ନାବୀର୍ରିନ୍ ଖାସ୍ଚେଲା କାମ୍ଦାସ୍ ଆ ପ୍ରାଭୁ ପାର୍ମେଶ୍ୱାର୍ସ୍; ତାଙ୍ଘା ସରଗ୍ ଦୂଁତ୍ବନ୍ ତାଏକାଦାସ୍ ଏକାତି ତାଙ୍ଘା ସେବକ୍ ଜାମାରିନ୍ ଚାଁଣେ ମାନ୍ନାବାଲା ରାଇ ଆବନ୍ ତେଙ୍ଗସ୍।
7ମେନା, ଏନ୍ ଚାଁଣେ ବାର୍ନାବାଲା ରାଦାନ୍! ଧଏନ୍ର୍ ଆବ୍ଡ଼ାର୍, ଏକାର୍ ଇ ବହିନ୍ତା ଭବିଷତ୍ କାତ୍ଥାନ୍ ମାନ୍ନାଏ।”
8ଏନ୍ ଆ ଯୋହାନ୍ନିନ୍, ଏନ୍ ଇ କାତ୍ଥାନ୍ ମେଞ୍ଚକାନ୍ ଆରୁ ଏରାଲ୍କାନ୍। ଯେତ୍କବାକେନ୍ ଏନ୍ ଏର୍କାନ୍ ଆରୁ ମେଞ୍ଚକାନ୍, ଏକାନ୍ ସରଗ୍ଦୂଁତ୍ ଏଙ୍ଗାନ୍ ଏଦିୟାଦ୍ ତା ଏନ୍ ଆରାଧାନା କାମାଗେ ହେଡ୍ଡମୁଲିନୁ ଖାତ୍ର୍କାନ୍ କେର୍କାନ୍। 9ଆଦ୍ ଏଙ୍ଗାନ୍ ତେଙ୍ଗିୟା, “ସାବ୍ଧାନ୍ ନିନ୍ ଏନ୍ନେ ଆମା କାମା। ଏନ୍ଦେର୍ଗେକା ଏନ୍ହି ନିଙ୍ଘାଏ, ଆରୁ ନିଙ୍ଘା ଭାଇ ନାବୀର୍ ଏକାର୍ ଇ ବହିନ୍ତା ଲେଖ୍ଚ୍କା ବଚନ୍ବନ୍ ମାନ୍ନାଏ, ଆବ୍ଡ଼ାର୍ ଗାନେ ସାଙ୍ଗେନ୍ ନାଲ୍ଖୁ କାମୁ ସେବକ୍ନ୍। ନିନ୍ ଖାଲି ପାର୍ମେଶ୍ୱାର୍ସ୍କି ସେବା ଆରାଧାନା କାମା।”
10ଆସ୍ ଏଙ୍ଗାନ୍ ଆରୁଅହନ୍ ତେଙ୍ଗିୟାସ୍, “ଇବହିଘି ଭବିଷତ୍ ବାଣୀଘି କାତ୍ଥାବନ୍ ବନ୍ଦ୍ ଆମା କାମା; ଏନ୍ଦେର୍ଗେକା ସାମାୟଦ୍ ଚାହାନୁ ରାଇଦ୍। 11ଏକାସ୍ ଖାରାପ୍ ନାଲ୍ଖୁ କାମ୍ଦାସ୍ ଆସ୍ ଖାରାପ୍ ନାଲ୍ଖୁ କାମ୍ତେ ରସ୍; ଆରୁ ଏକାସ୍ ଅଶୁଦ୍ଧ୍ ରସ୍ ଆସ୍ ଅଶୁଦ୍ଧ୍ ନାଲ୍ଖୁ କାମ୍ତେ ରସ୍; ଆରୁ ଏକାସ୍ ବାନେ ନାଲ୍ଖୁ କାମ୍ଦାସ୍ ଆସ୍ ବାନେ ନାଲ୍ଖୁ କାମ୍ତେ ରସ୍ ଏକାସ୍ ପାବିତାର୍ସ୍ ଆସ୍ ଆରୁହି ପାବିତାର୍ ମାନସ୍।”
12“ମେନା, ଏନ୍ ଜାଲ୍ଦି ବାର୍ନାବାଲା ରାଦାନ୍; ଆରୁ ଜାମା ହାରେକ୍ ଅଣ୍ଟା-ଅଣ୍ଟା ନାଲ୍ଖୁଘି ଆନୁସାର୍ ବାଦ୍ଲା ଚିୟାଗେ ଏଙ୍ଘାସାନ୍ ପ୍ରତିଫଳ୍ ରାଇ। 13ଏନ୍ ଆଲ୍ଫା ଆରୁ ଅମେଗାନ୍ ପହ୍ଲେ ଆରୁ ଆଖ୍ରୀ, ଆଦି ଆରୁ ଆଖ୍ରୀ।”
14“ଧଏନ୍ ରର୍ ଆବ୍ଡ଼ାର୍ ଏକାର୍ ନିଜର୍ ଚିଢ଼ାନ୍ ନଣ୍ନାଏ, ଏନ୍ଦେର୍ଗେକା ଆବ୍ଡ଼ାର୍ ଜୀବନ୍ ମାନ୍ନୁଘି ହକ୍ଦାର୍ ମାନର୍ ଆରୁ ଫାଟକ୍ ମାନିକିରି ସହର୍ନୁ କରର୍। 15ଲେକିନ୍ ଆଲ୍ଲା ଲେଖା ମା ବୁଝ୍ରୁ ଆଲାର୍, ଆରୁ ଟଣ୍ହାଁଏର୍, ବେଭିଚାର୍ କାମ୍ନାବାଲାର୍ ଆଲାର୍, ଆଲ୍ ପିଟୁର୍, ଏକା ଆଲାର୍ ମୂର୍ତ୍ତୀବନ୍ ପୂଜା କାମ୍ନାଏ, ଜାମା ଅଣ୍ଟା-ଅଣ୍ଟା ଝୁଟ୍ଟୁବନ୍ ସୋଚୁର୍ ଆରୁ ଗାଢ଼୍ନାବାଲାର୍ ସହର୍ଘି ବାହ୍ରି ରର୍।”
16“ଏଙ୍ଗାନ୍ ଯୀଶୁସ୍ ନିଜର୍ ସରଗ୍ ଦୂଁତ୍ବନ୍ ଇଦ୍ଘିଲାଗାନ୍ ତାଇୟାସ୍ କା ନିହ୍ମା ଆଘ୍ଲି ମଣ୍ତ୍ଲୀଘି ବିଷୟନୁ ଇ କାଥାଘି ସାକ୍ଷୀ ଚିୟସ୍, ଏନ୍ ଦାଉଦ୍ସ୍କି ମୂଲିନ୍ ଆରୁ ବାଉଁଶାନ୍, ଆରୁ ପାଇରିନ୍ତା ବିଲ୍ଚ୍ନାବାଲା ବିନ୍କୋ।”
17ପାବିତାର୍ ଆତ୍ମା ଆରୁ ବର୍କୁକ୍କସ୍ ଦୁହି ଲୋକ୍ ତେଙ୍ଗ୍ନାଏ, “ବାରା!” ଆରୁ ମେନୁର୍ହି ତେଙ୍ଗର୍, “ବାରା!” ନେଦ୍ ଆମ୍ମୁକିଡ଼ା ସାରାଲ୍ଦାର୍ ଆବ୍ଡ଼ାର୍ ବାରର୍, ଆରୁ ଏକାସ୍ ଇଚ୍ଛା କାମ୍ଦାସ୍, ଆସ୍ ଜୀବନ୍ ଆମ୍ମୁନ୍ ବିନାଦାମ୍ତି ଗ୍ରହନ୍ କାମସ୍।
ଆଖ୍ରୀ କାତ୍ଥା
18ଏକା ଆଲାର୍ ଇବହିଘି ଭବିଷତ୍ ବାଣୀଘି କାତ୍ଥା ମେନ୍ନାଏ, ଏନ୍ ଆବ୍ଡ଼ାରିନ୍ ଇ ଚେତାବନୀ ଚିଦାନ୍ ଯଦି ନେଦିନ୍ ଇନ୍ନୁ ଏନ୍ଦ୍ରିନ୍ହି ମେଶାବର୍ ତା ପାର୍ମେଶ୍ୱାର୍ସ୍ ଇ ବହିନୁ ଲେଖ୍ଚ୍କା ବିପଦ୍ବନ୍ ଆସ୍କି ମିଆଁ ଖାତ୍ରୋ। 19ଆରୁ ଯଦି ନେଦିନ୍ ଇ ଭବିଷତ୍ ବାଣୀ ବହିଘି କାତ୍ଥାନ୍ତି ଏନ୍ଦ୍ରିନ୍ ଅଥ୍ରର୍, ତା ପାର୍ମେଶ୍ୱାର୍ସ୍ ଇ ବହିନୁ ଲେଖ୍ଚ୍କା ଜୀବନ୍ଘି ମାନ୍ନୁ ଆରୁ ପାବିତାର୍ ସହର୍ନ୍ତି ଆସ୍କି ଭାଗୁନ୍ ଅଥ୍ରଚସ୍।
20ଇ କାତ୍ଥାଘି ବାରେନୁ ସାକ୍ଷୀ ଚିନାବାଲା ଚାହେ ଯୀଶୁ ଖ୍ରୀସ୍ତ୍ ଇବନ୍ ତେଙ୍ଗ୍ଦାସ୍ କା “ହଁ, ଏନ୍ ଚାଁଣେନିନ୍ ବାର୍ନାବାଲା ରାଦାନ୍। ଆନ୍ତିନ୍ ଯୋହାନ୍ ତେଙ୍ଗାଲ୍ଦାନ୍” ଆମେନ୍, ହେ ପ୍ରାଭୁ ଯୀଶୁ ବାରା।
21ପ୍ରାଭୁ ଯୀଶୁସ୍କି କ୍ରିପା ନାହ୍ମା ଜାମାର୍ଗାନେ ରାନାଦ୍। ଆମେନ୍!