ଫିଲିପ୍ପୀ ସହର୍ତା ଖ୍ରୀସ୍ତ୍ ମଣ୍ତ୍ଲୀର୍ଘି ନାମେନୁ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍କି ଚିଠି
ବହିଘି ପରିଚୟ
ଯୀଶୁ ଖ୍ରୀସ୍ତ୍କି ଖାସ୍ଚେଲାସ୍ ପାଉଲୁସ୍ ଫିଲିପ୍ପୀଆର୍ ଘି ନାମେନୁ ଚିଠି ଲେଖାଲ୍ଦାସ୍।
ପାଉଲୁସ୍କି ଜୀବନ୍ଘି ମୁଖ୍ୟା ଇଚ୍ଛା ଯୀଶୁ ଖ୍ରୀସ୍ତ୍କି ବାରେନୁ ଆଲାରିନ୍ ତେଙ୍ଗ୍ନାଦ୍। ପାଉଲୁସ୍ ଇ ଚିଠିନ୍ ଲେଖ୍ନାଘି ବାର ବଛର୍ଘି ଆଘ୍ଲି ଫିଲିପ୍ପୀ କେର୍କାଚାସ୍। ପାଉଲୁସ୍ ଯୀଶୁ ଖ୍ରୀସ୍ତ୍କି ବାରେନୁ ପ୍ରଚାର୍ କାମାଲିୟାସ୍, ହୁଦ୍ଘିଲାଗାନ୍ ଆଲାର୍ ଗୁଡ୍ଡେଇଚ୍କାଚାର୍। ପାଉଲୁସ୍ ଇ ଚିଠିବନ୍ ଯୀଶୁ ଖ୍ରୀସ୍ତ୍କି କେଚ୍ଚକା ପାଛ୍ଲି ଲାଗ୍ଭାଗ୍ ଏକ୍ତିରିଶ୍ ବଛର୍ଘି ପାଛ୍ଲି ଲେଖ୍ଚ୍କାଦାସ୍, ଲାଗ୍ଭାଗ୍ ଖ୍ରୀଷ୍ଟାଦ୍ଦ ୬୧-୬୨ ପାଉଲୁସ୍ ଯେତ୍କବାକେନ୍ ଇ ଚିଠିନ୍ ଲେଖ୍ଚ୍କାଚାସ୍, ହତ୍କବାକେନ୍ ଆସ୍ ଚାର୍ ବଛର୍ ଜେହେଲ୍ନୁ ରାଚାସ୍। ପଲ୍ଟନ୍ଜାମାର୍ ପାଉଲୁସ୍ସିନ୍ ଯେରୁଶାଲେମ୍ନୁ ବନ୍ଦୀ ବାନାବାଚାର୍। ଆନ୍ତିନ୍ ଆସ୍ ଦୁଇ ବଛର୍ କାଇସାରିଆନ୍ତା ଜେହେଲ୍ନୁ ରାଚାସ୍। ଆସ୍କି ଜେହେଲ୍ନୁ ରାନାଘି ତିସ୍ରା ବଛର୍ନୁ ଆସ୍ କାଇସାରିଆନ୍ତି ରୋମ୍ଗେ ବାର୍ଚାସ୍। ହତ୍କବାକେନ୍ ଆସ୍ ଇ ଚିଠିନ୍ ଲେଖ୍ଚ୍କାଦାସ୍। ଆଖ୍ରୀ ବଛର୍ ଆସ୍ ରୋମ୍ତା ଜେହେଲ୍ନୁ ରାଚାସ୍।
ଇ ଚିଠିନ୍ ଲେଖ୍ନାଘି ମତ୍ଲବ୍ ରାଚା, କା ଫିଲିପ୍ପୀନ୍ତା ବିଶ୍ୱାସୀ ଜାମାରିନ୍ ଧାନ୍ୟାବାଦ୍ ଚିନାଦ୍, ଆ ଭେଁଟ୍ଘି ଲାଗାନ୍ ଏକାନ୍ କା ପାଉଲୁସ୍କି ଦାର୍କାର୍ ବାକେନ୍ ଆବ୍ଡ଼ାର୍ ତାଏକାଚାର୍। ଆରୁ ଆବ୍ଡ଼ାରିନ୍ ଦିଲାସା ଚିଦାସ୍ କା ଆବ୍ଡ଼ାର୍ କଷଟ୍ ସାମାୟନୁ ସାହସ୍ ଆରୁ ଧିରାଜ୍ ଉଇୟର୍। ଆବ୍ଡ଼ାର୍ ନିଜର୍ ଇଚ୍ଛା ଆରୁ ବଡ଼୍ପଣୀବନ୍ ଆମ୍ବିକିରି ଯୀଶୁସ୍କି ନରମ୍ ଭାବ୍ବନ୍ ଗ୍ରହନ୍ କାମର୍। ପାଉଲୁସ୍ ଫିଲିପ୍ପୀଆ ଜାମାରିନ୍ ମନେ କାମ୍ତାଦାସ୍ କା, ଆବ୍ଡ଼ାର୍ ଖ୍ରୀସ୍ତ୍କି ଦ୍ୱାର୍ନୁ ଏକା ଜୀବନ୍ ହାକ୍କାନାଏ, ଆଦ୍ ପାର୍ମେଶ୍ୱାର୍ସ୍କି ଅଣ୍ଟା ବାର୍ଦାନ୍ଦ୍। ଏକାନ୍ କା ଆବ୍ଡ଼ାର୍ ବିଶ୍ୱାସ୍ତି ହାକ୍କାନାଏ। ୟାହୁଦୀ ଜାମାର୍ଘି ରିତୀନୀତି ତି ମାଲ୍ଲା।
ଖ୍ରୀସ୍ତ୍କିନୁ ବିଶ୍ୱାସ୍ ଆରୁ ଜୀବନ୍ନୁ ଖୁସୀ, ମେଲ୍ପ୍ରେମ୍ ଆରୁ ମଜ୍ବୁତ୍ଘି ମିଆଁ ଯୋର୍ ଚିନାଦ୍ ଇ ଚିଠିଘି ଅଣ୍ଟା ମୁଖ୍ୟା ଗୁଣ୍ଦ୍। ଇ ଚିଠିଦ୍ ଫିଲିପ୍ପୀନ୍ତା ମଣ୍ତ୍ଲୀଘି ମିଆଁ ପାଉଲୁସ୍କି ମୁରୁକ୍ ବାନେ ହାଖ୍ଖନାବନ୍ ଏଦିଦ୍।
ରୂପ୍-ରେଖା
ପାଉଲୁସ୍କି ବିନ୍ତି ଆରୁ ଧାନ୍ୟାବାଦ୍ ୧:୧-୧୧
ପାଉଲୁସ୍କି ତାଙ୍ଘା ନିଜର୍ ପରିସ୍ଥିତି ୧:୧୨-୨୬
ଖ୍ରୀସ୍ତ୍କିନୁ ଜୀବନ୍ ୧:୨୭—୨:୧୮
ତିମଥିଉସ୍ ଆରୁ ଇପଫ୍ରୁଦୀତୁସ୍କି ଲାଗାନ୍ ଉପାୟ ୨:୧୯-୩୦
ବିରୋଧି ଆରୁ ବିପଦ୍ଘି ବିରୁଦ୍ଧ ଚେତବାନୀ ୩:୧—୪:୯
ପାଉଲୁସ୍ ଆରୁ ଆସ୍କି ଫିଲିପ୍ପୀନ୍ତା ସାଙ୍ଗେର୍ ୪:୧୦-୨୦
ଆଖ୍ରୀ କାତ୍ଥା ୪:୨୧-୨୩
1ଯୋହାର୍
1ଏନ୍ ପାଉଲୁସ୍ ଆରୁ ତୀମଥିଉସ୍ ଖ୍ରୀସ୍ତ୍ ଯୀଶୁସ୍କି ଗୁତ୍ତିୟାମ୍। ଫିଲିପ୍ପୀ ସହର୍ନୁ ରାନାବାଲା ଜାମା ପାର୍ମେଶ୍ୱାର୍ସ୍କି ପାବିତାର୍ ଆଲାର୍ଘି ଖ୍ରୀସ୍ତ୍ ମଣ୍ଡ୍ଲୀନ୍ତା ମୁଖ୍ୟାର୍ ଆରୁ ସେବକ୍ ଜାମାର୍ଘି ନାମେନୁ ଚିଠି ଲେଖାଲ୍ଦାମ୍। 2ନାହ୍ମା ବାଙ୍ଗ୍ ପାର୍ମେଶ୍ୱାର୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍ ନିହ୍ମା ମିଆଁ କ୍ରିପା କାମ୍ନାଏ, ଆରୁ ଶାନ୍ତି ଚିନାଏ।
ପାଉଲୁସ୍ ମଣ୍ତ୍ଲୀଘି ଲାଗାନ୍ ବିନ୍ତି କାମାଲ୍ଦାସ୍
3ଏନ୍ ଯେତ୍କଥର୍ ନିମାନ୍ ମନେ କାମ୍ଦାନ୍, ହତ୍କ ଥର୍ ଏନ୍ ଏଙ୍ଘା ପାର୍ମେଶ୍ୱାର୍ସ୍ସିନ୍ ଧାନ୍ୟାବାଦ୍ ଚିଦାନ୍। 4ଆରୁ ଏକ୍ରିନ୍ ବାକେନ୍ ଏନ୍ ଆର୍ଜୀବିନ୍ତି କାମ୍ଦାନ୍, ତା ନିହ୍ମା ଜାମାର୍ଘି ଲାଗାନ୍ ଖୁସୀତି ଆର୍ଜୀବିନ୍ତି କାମ୍ଦାନ୍। 5ଏନ୍ଦେର୍ଗେକା ନିମ୍ ଯେତ୍କବାକେନ୍ ପହ୍ଲେ ଥର୍ ସୁସାମାଚାର୍ବନ୍ ମେନ୍ଚ୍କାର୍ ଆରୁ ମାନ୍ଚ୍କାର୍ ଆ ଉଲ୍ଲାନ୍ତି ହୋଇକିରି ଇନ୍ନାତକ୍ ଯୀଶୁସ୍ ଖ୍ରୀସ୍ତ୍କି ବାରେନୁ ସୁସାମାଚାର୍ ଶୁଣାବାନାନୁ ଏନ୍ଦ୍ରିନ୍ ପ୍ରକାର୍ତିନିନ୍ ଏଙ୍ଗାନ୍ ମଦେତ୍ କାମ୍ଚ୍କାଦାର୍। 6ଏକା ପାର୍ମେଶ୍ୱାର୍ସ୍ ନିହ୍ମାଏନୁ ବାନେ ନାଲ୍ଖୁ ସୁରୁ କାମ୍ଚ୍କାଦାସ୍, ଆସିନ୍ ଆବନ୍ ଖ୍ରୀସ୍ତ୍ ଯୀଶୁସ୍କି ଆରୁଅହନ୍ ବାର୍ନା ଉଲ୍ଲାତକ୍ ପୁରା କାମସ୍। ଇବନ୍ ଏନ୍ ପୁରା ବିଶ୍ୱାସ୍ କାମାଲ୍ଦାନ୍। 7ନିହ୍ମା ଜାମାର୍ଘି ବାରେନୁ ଏନ୍ନେନିନ୍ ଏଙ୍ଘାଏ ସୋଚ୍ନାଦ୍ ଠିକ୍ଦ୍। ଏନ୍ଦେର୍ଗେକା ଏନ୍ ନିମାନ୍ ମୁରୁକ୍ ବାନେ ହାଖ୍ଖଦାନ୍। ଜେହେଲ୍ନୁ ରାନାବାକେନ୍ ଖାଲି ମାଲ୍ଲା, କୋଟ୍ କାଚେରୀନୁ ଯେତ୍କବାକେନ୍ ଏନ୍ ସୁସାମାଚାର୍ଘି ସତ୍ତୁଘି ସାକ୍ଷୀ ଚିଦାନ୍, ତା ପାର୍ମେଶ୍ୱାର୍ସ୍ ନାମା ଜାମାରିନ୍ ସାଙ୍ଗେନ୍ ମେଶ୍ରିକିରି ନାଲ୍ଖୁ କାମାଗେ କ୍ରିପା କାମ୍ଦାସ୍। 8ପାର୍ମେଶ୍ୱାର୍ସ୍ ଆହ୍ଦାସ୍ କା ଯୀଶୁ ଖ୍ରୀସ୍ତ୍ ଏସ୍କେ ନିମାନ୍ ବାନେ ହାଖ୍ଖଦାସ୍, ହୋନ୍ନେନ୍ ଏନ୍ହି ନିମାନ୍ ବାନେ ହାଖ୍ଖଦାନ୍, ହୁଦ୍ଘିଲାଗାନ୍ ନିମାନ୍ ମୁରୁକ୍ ଏରାଗେ ବେଦ୍ଦାଲ୍ଦାନ୍। 9ଆରୁ ଏନ୍ ବିନ୍ତି କାମାଲ୍ଦାନ୍ କା ନିମ୍ ଏକ୍ ଦୁସ୍ରାରିନ୍ ବାଗ୍ଗେ ସେ ବାଗ୍ଗେ ବାନେ ହାଖ୍ଖା, ଆରୁ ନିହ୍ମାଏ ବାନେ ଆତ୍ମିକ ଜ୍ଞାନ୍ ଆରୁ ବାନେ ଆରୁ ଖାରାପ୍ବନ୍ ବୁଝ୍ର୍ନାଘି ଶକ୍ତି ବାଢ଼୍ର୍ନାଦ୍। 10ଏସ୍କେ କା ନିମ୍ ଜାମାର୍ଘିନ୍ତି ବାନେ ନାଲ୍ଖୁ କାମର୍ ଆରୁ ଯୀଶୁ ଖ୍ରୀସ୍ତ୍କି ଆରୁଅହନ୍ ବାର୍ନାତକ୍ ସତ୍ତୁ ଆରୁ ବିନାଦୋଷୀ ରର୍। 11ଖ୍ରୀସ୍ତ୍ ଯୀଶୁସ୍କି କ୍ରିପାତି ପାର୍ମେଶ୍ୱାର୍ସ୍ଗାନେ ନିହ୍ମା ସମ୍ବନ୍ଧ ବାନେ ରାଇ, ଖ୍ରୀସ୍ତ୍ସ୍ ନିମାନ୍ ବାନେ ନାଲ୍ଖୁ କାମ୍ନାଘି ଲାଗାନ୍ ମଦେତ୍ କାମସ୍ ଆରୁ ଆସ୍କି ଦ୍ୱାର୍ନୁ ଆବନ୍ ଏରିକିରି ଆଲାର୍ ପାର୍ମେଶ୍ୱାର୍ସ୍କି ମାହିମା ଆରୁ ସ୍ତୁତି କାମର୍।
ସୁସାମାଚାର୍ଘି ଲାଗାନ୍ ପାଉଲୁସ୍ ଜେହେଲ୍ନୁ ରାଦାସ୍
12ହେ ଭାଇ ବୁହୁଣୀଜାମାରୋ, ଏନ୍ ନିମାନ୍ ତେଙ୍ଗାଗେ ବେଦ୍ଦାଲ୍ଦାନ୍ କା ଏଙ୍ଘାଗାନେ ଯେତ୍କ ଘାଟ୍ର୍କିଚି, ଆତ୍ତିହି ସୁସାମାଚାର୍ ଫାଏଲାନାନୁନିନ୍ ମଦେତ୍ ମାନ୍ଚ୍କିଚି। 13ଏତ୍କତକ୍ କା ଜାମା କାଇସର୍ସ୍କି ରାଜ୍ମହଲ୍ ତା ଜାଗୁର୍, ଆରୁ ଜାମା ଦୁସ୍ରା ଆଲାର୍ହି ଆଖ୍ଖାର୍ କେରାର୍ କା ଏନ୍ ଖ୍ରୀସ୍ତ୍ସ୍କି ବାରେନୁ ପ୍ରଚାର୍ କାମ୍ନାଘି ଲାଗାନ୍ ଜେହେଲ୍ନୁ ରାଦାନ୍; 14ଆରୁହି ଢେର୍ ଭାଇଜାମାର୍ ଏଙ୍ଘା ଜେହେଲ୍ନୁ ରାନାଘି ଲାଗାନ୍ ଆବ୍ଡ଼ାର୍ ପ୍ରାଭୁସ୍କି ମିଆଁ ଭାର୍ଷା ଉଇୟିକିରି ଆରୁ ବାଗ୍ଗେ ସାହସ୍ତି ଆରୁ ବିନାଏଲ୍ଚିକିରି ପାର୍ମେଶ୍ୱାର୍ସ୍କି ବଚନ୍ବନ୍ ଶୁଣାବାଲ୍ନାଏ।
15ପାଉଲୁସ୍ ଏକାନ୍ କାମ୍ଚ୍କାଚାସ୍ ଆବନ୍ ଏରିକିରି କେତ୍କ ଲୋକ୍ ହିସ୍ଙ୍ଗା କାମ୍ଚାର୍ ଆରୁ କେତ୍କ ଲୋକ୍ ଖୀସାରାଇକିରି ଖ୍ରୀସ୍ତ୍କି ବାରେ ପ୍ରଚାର୍ କାମ୍ଚାର୍। ଇଦ୍ ସତ୍ତୁଦ୍, ଲେକିନ୍ ଆରୁ କେତ୍କ ଲୋକ୍ ବାନେ ମତ୍ଲବ୍ତି ପ୍ରଚାର୍ କାମାଲ୍ନାଏ। 16ଏକାର୍ ବାନେ ମତ୍ଲବ୍ତି ପ୍ରଚାର୍ କାମାଲ୍ନାଏ ଆବ୍ଡ଼ାର୍ ଖ୍ରୀସ୍ତ୍ସିନ୍ ବାନେ ହାଖ୍ଖନାଏ, ଏନ୍ଦେର୍ଗେକା ଇବ୍ଡ଼ାର୍ ଆହ୍ନାଏ କା ସୁସାମାଚାର୍ଘି ସତ୍ତୁବନ୍ ବାଛାବାନାଘି ଚାଲ୍ତେ ଏନ୍ ଜେହେଲ୍ନୁ ରାଦାନ୍। 17୧:୧୭ ଢେର୍ ଆଲାର୍ ଖ୍ରୀସ୍ତ୍ସିନ୍ ମାନ୍ଚାର୍ ଇବନ୍ ଏରିକିରି ପାଉଲୁସ୍କେ ହିସ୍ଙ୍ଗା ଲାଗ୍ଗବୁଲି ଆବ୍ଡ଼ାର୍ ଭୁଲ୍ ମତ୍ଲବ୍ତି ସୋଚାଲିୟାର୍। ଆରୁ କେତ୍କ ଲୋକ୍ ବାନେ ମତ୍ଲବ୍ତି ପ୍ରଚାର୍ ମା କାମ୍ନାଏ। ଲେକିନ୍ ନିଜର୍ ଫାଏଦାଘି ଲାଗାନ୍ ଖ୍ରୀସ୍ତ୍କି ପ୍ରଚାର୍ କାମ୍ନାଏ। ଏଙ୍ଘା ଜେହେଲ୍ନୁ ରାନାବାକେନ୍ ଏଙ୍ଗାଗେ ଆବ୍ଡ଼ାର୍ ଆରୁହି ବାଗ୍ଗେ କଷଟ୍ ଏସ୍କେ ଚିୟାଅଙ୍ଗର୍। 18ଇଦ୍ଘି ଏନ୍ଦେର୍ହି ମତ୍ଲବ୍ ମାଲ୍ଲାଦିନ୍? ବାନେ ମତ୍ଲବ୍ତି ଚାହେ ଖାରାପ୍ ମତ୍ଲବ୍ତି ଏସ୍କିନ୍ ହାଲେହି ଆଲାର୍ ଖ୍ରୀସ୍ତ୍କି ବାରେ ଶୁଣାବା କାଲିଦ୍, ଆରୁ ଇତ୍ତି ଏନ୍ ଲୀଝ୍ରାଲ୍ଦାନ୍ ଆରୁ ଲୀଝ୍ରନ୍ହି।
19ଏନ୍ଦେର୍ଗେକା ଏନ୍ ଆହ୍ଦାନ୍ କା ନିହ୍ମା ବିନ୍ତି ଆରୁ ପାବିତାର୍ ଆତ୍ମା ଏକାନ୍ ଯୀଶୁ ଖ୍ରୀସ୍ତ୍ସ୍ ଏଙ୍ଗାଗେ ଚିଚ୍ଚକାଦାସ୍। ଇବ୍ଡ଼ା ଜାମାଘି ଫଲ୍ ଇଦ୍ ମାନଦ୍ କା ପାର୍ମେଶ୍ୱାର୍ସ୍ ଏଙ୍ଗାନ୍ ବାଛାବସ୍। 20ଏନ୍ତା ମୁରୁକ୍ ଚାହାଁଲ୍ଦାନ୍ ଆରୁ ଏଙ୍ଗା ଭାର୍ଷା ରାଇ କା ଏନ୍ ସୁସାମାଚାର୍ ତେଙ୍ଗାଗେ ମା ଏଲ୍ଚିକିରି ଆସ୍କି ବାରେ ଶୁଣାବନ୍ ଏଙ୍ଘା ସାହସ୍ତି ତେଙ୍ଗ୍ନା ଆରୁ କାମ୍ନାଘି ଲାଗାନ୍ ଖ୍ରୀସ୍ତ୍କି ମାଇନ୍ ଜାମାବାକେନ୍ ମାନ୍ଚ୍କିଚି, ହନ୍ନେନ୍ ଆକ୍କୁନ୍ହି ମାନଦ୍, ଚାହେ ଏନ୍ ଉଜ୍ଜନ୍ ଚାହେ ଖିଅନ୍କନ୍।
21ଏଙ୍ଘାଲାଗାନ୍ ତା ଉଜ୍ଜନା ମତ୍ଲବ୍ ଖ୍ରୀସ୍ତ୍କି ଲାଗାନ୍ ବାଗ୍ଗେ ବାନେ ନାଲ୍ଖୁ କାମାଅଙ୍ଗନ୍ ଲେକିନ୍ ଏନ୍ ଖିଅନ୍କନ୍ ତା ଖ୍ରୀସ୍ତ୍ଗାନେ ଜାମାବାକେନ୍ ରନ୍ ହୁଦ୍ଘିଲାଗାନ୍ ଏଙ୍ଗା ଖିନାକାନାଦ୍ ବାଗ୍ଗେ ବାନେଦ୍। 22ଲେକିନ୍ ଯଦି ଏନ୍ ଉଜ୍ଜନ୍ ତା ଖ୍ରୀସ୍ତ୍କି ଲାଗାନ୍ ବାଗ୍ଗେ ନାଲ୍ଖୁ କାମାଅଙ୍ଗନ୍, ହୁଦ୍ଘିଲାଗାନ୍ ଏନ୍ ଖିଅନ୍ କା ଉଜ୍ଜନ୍ ଏକାନ୍ ଚାଜନ୍ ଆବନ୍ ବାଲ୍ଦାନିନ୍। 23ହାଲେହି ଏନ୍ ଇ ଯୋଡ଼େନ୍ତି ଏକାନ୍ ଚାଜନ୍ ସୋଚା ପଲ୍ଲାଲ୍ଦାନ୍। ଏନ୍ ଇ ଦୁନିଆଁନ୍ତି ବିଦା ହୋଇକିରି ଖ୍ରୀସ୍ତ୍ସ୍ଗାନେ ରାଗେ ବେଦ୍ଦାଲ୍ଦାନ୍, ଏନ୍ଦେର୍ଗେକା ଇଦ୍ ଜାମାର୍ଘିନ୍ତି ବାନେଦ୍। 24ଲେକିନ୍ ଏଙ୍ଘା ଉଜ୍ଜନାଦ୍ ନିହ୍ମା ଲାଗାନ୍ ବାଗ୍ଗେ ଦାର୍କାର୍ ରାଇ। 25ହୁଦ୍ଘିଲାଗାନ୍ ଏଙ୍ଗାଗେ ପାକ୍କା ବିଶ୍ୱାସ୍ ରାଇ କା, ଏନ୍ ଉଜ୍ଜନ୍ ଆରୁ ଏନ୍ ନିହ୍ମା ଜାମାର୍ଗାନେ ରନ୍, ତାକା ନିମ୍ ଖ୍ରୀସ୍ତ୍କି ମିଆଁ ଆରୁ ବିଶ୍ୱାସ୍ କାମର୍ ଆରୁ ବାଗ୍ଗେ ଲୀଝ୍ରର୍। 26ଏନ୍ନେନ୍ ଏନ୍ ଯେତ୍କବାକେନ୍ ନିହ୍ମାସାନ୍ ଆରୁଅହନ୍ ବାରନ୍, ତା ନିମ୍ ଏଙ୍ଘାଲାଗାନ୍ ଯୀଶୁ ଖ୍ରୀସ୍ତ୍କି ଆରୁହି ବାଗ୍ଗେ ସ୍ତୁତି ମାହିମା କାମର୍।
27ଇ କାତ୍ଥାନ୍ ବିଶେଷ୍ ଧ୍ୟାନ୍ ଚିଆ କା ଖ୍ରୀସ୍ତ୍କି ସୁସାମାଚାର୍ଘି ଲାଇଗ୍ ମାନ୍ନାଘି ବାରେନୁ ଏକାନ୍ ଶିଖ୍ର୍କାଦାର୍ ଆଦ୍ଘି ଲେଖା ଚାଲ୍ରା। ଏନ୍ ବାରିକିରି ନିମାନ୍ ଏରନ୍ ଚାହେ ଏନ୍ ମାହି ବାରନ୍, ହାଲେହି ନିହ୍ମା ବାରେନୁ ଏନ୍ନେ ଆହନ୍ କା ନିମ୍ ଏକ୍ ଦୁସ୍ରାର୍ଗାନେ ମେଶ୍ରିକିରି ନାଲ୍ଖୁ କାମାଲ୍ଦାର୍, ଆରୁ ଖ୍ରୀସ୍ତ୍କି ସୁସାମାଚାର୍ଘି ବାରେ ଏକାର୍ ବିରୋଧ୍ କାମ୍ନାଏ ଆବନ୍ ଏକ୍ ଦୁସ୍ରାର୍ଗାନେ ମେଶ୍ରିକିରି ସାମ୍ନା କାମାଲ୍ଦାର୍। 28ଆରୁ ଏନ୍ଦ୍ରିନ୍ହି କାତ୍ଥାନୁ ବିରୋଧିରିନ୍ ମା ଏଲ୍ଚ୍ଦାର୍। ଇଦ୍ ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ନାଶ୍ କାମସ୍ ଅଣ୍ଟା ଚିହ୍ନା ଆରୁ ପାର୍ମେଶ୍ୱାର୍ସ୍ ନିମାନ୍ ମୁକ୍ତି ଚସ୍। 29ଏନ୍ଦେର୍ଗେକା ଖ୍ରୀସ୍ତ୍କି କାରଣ୍ତି ନିମାଗେ ଆସ୍କି ମିଆଁ ବିଶ୍ୱାସ୍ କାମାଗେ ଦାୟା ମାଲ୍ଲା ହାଖ୍ରୁ ଲେକିନ୍ ଖ୍ରୀସ୍ତ୍କି ଲାଗାନ୍ ଦୁଃଖୁ ସାହାଗେହି ଦାୟା ହାଖ୍ଖର୍କିଚି। 30ଏସ୍କେ ନିମ୍ ଏଙ୍ଗାନ୍ ସୁସାମାଚାର୍ଘି ବିରୋଧ୍ କାମୁର୍ଘି ସାମ୍ନା କାମ୍ତେ ଏର୍କାଦାର୍ ହନ୍ନେନ୍ ନିମ୍ହି ଆବ୍ଡ଼ାର୍ଘି ସାମ୍ନା କାମାଲ୍ଦାର୍ ଆରୁ ଆକ୍କୁନ୍ହି ଏନ୍ ଆବ୍ଡ଼ାର୍ଘି ସାମ୍ନା କାମାଲ୍ଦାର୍। ଆରୁ ନିମ୍ହି ଏନ୍ନେ କଷଟ୍ ସାହାଲ୍ଦାର୍, ଏସ୍କେ କା ନିମ୍ ମେନ୍ଦାର୍।
2ପାର୍ମେଶ୍ୱାର୍ସ୍ ଖ୍ରୀସ୍ତ୍ସିନ୍ ମାହାନ୍ କାମ୍ଚାସ୍
1ଖ୍ରୀସ୍ତ୍ ନାମାନ୍ ଉତ୍ସାହିତ୍ କାମ୍ଦାସ୍, ଆସ୍ ନାମାନ୍ ବାନେ ହାଖ୍ଖଦାସ୍ ଆରୁ ଦିଲାସା ଚିଦାସ୍, ନିହ୍ମାଏ ଆରୁ ଖ୍ରୀସ୍ତ୍ସ୍କି ଆତ୍ମାଘି ସଂଗତି ରାଇ ଆରୁ ଖ୍ରୀସ୍ତ୍ ନାମାନ୍ ଦାୟା କାମ୍ଦାସ୍, 2ହୁଦ୍ଘିଲାଗାନ୍ ଏନ୍ ନିମାନ୍ ଆର୍ଜୀ କାମାଲ୍ଦାନ୍ କା ଏକ୍ ଦୁସ୍ରାର୍ଗାନେ ଏକ୍ମତ୍ ରା ଏକ୍ ଦୁସ୍ରାରିନ୍ ବାନେ ହାଖ୍ଖା, ଅଣ୍ଟା ଜୀଆ ଆରୁ ଅଣ୍ଟା ଖାଲି ସୋଚ୍ଇଚ୍ଛା ଉଇୟା ଏନ୍ନେ କାମ୍ଚ୍କୁନ୍ ଏନ୍ ମୁରୁକ୍ ଲୀଝ୍ରନ୍। 3ଜାମାଦ୍ ଏଙ୍ଗାଗେ ମାନ୍ନା କାତ୍ଥା ଆରୁ ଝୁଟ୍ଟୁ ବଡ଼୍ପଣି ଏଦ୍ରାଗେ ଏନ୍ଦେର୍ହି ଆମା କାମା ବରନ୍ ନରମ୍ ମାନିକିରି ଏକ୍ ଦୁସ୍ରାରିନ୍ ନିହ୍ମାସ୍ତି ବାନେ ସୋଚା। 4ଜାମାର୍ ନିଜର୍-ନିଜର୍ ବାନେଘି ଲାଗାନ୍ ଖାଲି ମାଲ୍ଲା ବରନ୍ ଦୁସ୍ରାର୍ଘି ବାନେଘି ଲାଗାନ୍ହି ଚିନ୍ତା କାମା। 5ଏସ୍କେ ଯୀଶୁ ଖ୍ରୀସ୍ତ୍ସ୍କି ସାଭାବ୍ ରାଚା, ହନ୍ନେନ୍ ନିହ୍ମାଏହି ସାଭାବ୍ ମାନ୍ନାଦ୍। 6ଆସ୍କିନୁ ପାର୍ମେଶ୍ୱାର୍ସ୍କି ସାଭାବ୍ ରାଚା, ହାଲେହି ପାର୍ମେଶ୍ୱାର୍ସ୍କି ବାରାବୁରି ମାନିକିରି ଏକା ହକ୍ ହାଖ୍ଖରିଦ୍ ଆବନ୍ ଆସ୍ ତାଙ୍ଘା ଚାହାନୁ ମା ଉଇୟାସ୍। 7ଆସ୍ ପାର୍ମେଶ୍ୱାର୍ସ୍ ଆସ୍କେ ଏକା ବାଡ଼୍କା ପଦ୍ ଚିଚ୍କାଚାସ୍ ଆବନ୍ ଆମ୍ୱେଇଚାସ୍। ତାଙ୍ଘା ଆରୁ ଆସ୍ ମୁନୁଷ୍ ରୂପ୍ନୁ ଜନମ୍ ମାନ୍ଚାସ୍, ଆସ୍ ଗୁତ୍ତିୟାସ୍ ଲେଖା ମାନ୍ଚାସ୍ କେରାସ୍। 8ଆରୁ ମୁନୁଷ୍ ଲେଖା ରାଇକିରି ନିଜ୍କେନିଜ୍ ନରମ୍ କାମ୍ଚାସ୍, ଆରୁ ପାର୍ମେଶ୍ୱାର୍ସ୍କି ହୁକୁମ୍ ମାନ୍ଚାସ୍ ଆରୁ ଏତ୍କତକ୍ କା କ୍ରୁଶ୍ନୁ ତାଙ୍ଘା ଜୀଆ ଚିଚ୍ଚାସ୍ ଲାଗ୍ଗିୟାସ୍। 9ଇଦ୍ଘିଲାଗାନ୍ ପାର୍ମେଶ୍ୱାର୍ସ୍ ଆସିନ୍ ବହୁତ୍ ମାହାନ୍ ବାନାବାଚାସ୍। ଆରୁ ଆସ୍ ଆସ୍କେ ଆ ବାଡ଼୍କା ପଦ୍ ଚିଚ୍ଚାସ୍ ଏକାଦ୍ କା ଜାମା ପଦ୍ଘିନ୍ତି ବାଡ଼୍କାଦ୍। 10ହୁଦ୍ଘିଲାଗାନ୍ ସରଗ୍, ଦୁନିଆଁ ଆରୁ ପାତାଲ୍ନୁ ରୁ ଜାମାର୍ ହାଁଠୁୱାରାଇକିରି ଯୀଶୁସ୍କି ଆରାଧାନା କାମର୍; 11ଆରୁ ଜାମା ଆଲାର୍ ସ୍ତୁତି ମାହିମା କାମର୍ କା ଯୀଶୁସିନ୍ ପ୍ରାଭୁସ୍ ଆରୁ ଇଦ୍ଘି ଲେଖା ଆବ୍ଡ଼ାର୍ ବାଙ୍ଗ୍ ପାର୍ମେଶ୍ୱାର୍ସ୍କି ମାଇନ୍ କାମର୍।
ପାର୍ମେଶ୍ୱାର୍ସ୍କି ଇଚ୍ଛା ଲେଖା ଚାଲ୍ରା
12ହୁଦ୍ଘିଲାଗାନ୍ ହେ ଏଙ୍ଘାଏ ପ୍ୟାରେ ଭାଇ ଆରୁ ବୁହୁଣୀରୋ, ଏସ୍କେ ନିମ୍ ଜାମାବାକେନ୍ ଏଙ୍ଘା ହୁକୁମ୍ ମାନ୍ତେ ବାରାଲ୍ଦାର୍, ଏଙ୍ଘାଗାନେ ରାନାବାକେନ୍ ଖାଲି ମାଲ୍ଲା, ଆକ୍କୁନ୍ ଏନ୍ ନିହ୍ମାଗାନେ ମାଲ୍ଲକାନିନ୍, ହାଲେହି ନିମ୍ ଆବନ୍ ଆରୁହି ବାଗ୍ଗେ ମାନ୍ତେ ରା। ନିମ୍ ପାର୍ମେଶ୍ୱାର୍ସିନ୍ ଏଲ୍ଚିକିରି ଆରୁ ଆସ୍କି ଆଦର୍ମାଇନ୍ କାମିକିରି ନିଜ୍କେନିଜ୍ ମୁକ୍ତିଘି ନାଲ୍ଖୁବନ୍ ପୁରା କାମା ଏନ୍ନେ ଜୀବନ୍ ବିତାବା ଏସ୍କେ କା ଆହ୍ତାରୋ ପାର୍ମେଶ୍ୱାର୍ସ୍ ନିମାନ୍ ବାଛାବାଚ୍କାଦାସ୍। 13ନିମ୍ ଏନ୍ନେ ଜୀବନ୍ ବିତାବା ଅଙ୍ଗର୍ ଏନ୍ଦେର୍ଗେକା ପାର୍ମେଶ୍ୱାର୍ସ୍ ନିଜେନିନ୍ ତାଙ୍ଘା ଇଚ୍ଛା ଲେଖା କାମାଗେ ଇଚ୍ଛା ଖାଲି ମା ଚିଦାସ୍, ଲେକିନ୍ ଆବନ୍ ପୁରା କାମାଗେ ଶକ୍ତିହି ଚିଦାସ୍।
14ବିନା କୁର୍ବୁର୍ରିକିରି ଆରୁ ବିନାକାଁଟ୍ଛାଁଟ୍ କାମିକିରି ଜାମା ନାଲ୍ଖୁନ୍ କାମା। 15ତାକା ନିମ୍ ପୁରାପୁରୀ ବିନାଦୋଷୀ ମାନିକିରି ରୀତିନୀତି ଅନୁସାର୍ ମୁରୁକ୍ ଖାରାପ୍ ରାନାଏ ଆରୁ ଖାରାପ୍ ନାଲ୍ଖୁ କାମ୍ନାଏ। ଆବ୍ଡ଼ା ଆଲାର୍ଘି ମାଝାନୁ ପାର୍ମେଶ୍ୱାର୍ସ୍କି ଦୋଷ୍ ମାଲ୍କା ହାଦ୍ଦୁ ଲେଖା ମାନା ଆରୁ ନିମ୍ ଆସ୍କି ଚାହାନୁ ଜୀବନ୍ ଚିନାବାଲା ବଚନ୍ବନ୍ ଶୁଣାବାତେ ଆକାଶ୍ ତା ବିନ୍କୋ ଲେଖା ବିଲ୍ଲୀ ଚିନା ଲେଖା ନିହ୍ମା ଚାଲିଚଲନ୍ଦ୍ ବାନେ ମାନ୍ନାଦ୍। 16ଏନ୍ନେନ୍ ଏନ୍ ଖ୍ରୀସ୍ତ୍ସ୍କି ବାର୍ନାଘି ଉଲ୍ଲାନୁ ଇ କାତ୍ଥାନୁ ମୁରୁକ୍ ଲିଝ୍ର୍ନାନ୍ ଏଦା ଅଙ୍ଗନ୍ କା ଏଙ୍ଘାଏ କୁଦ୍ଦିଆରାନା ଆରୁ ମେହ୍ନତ୍ ବେକାର୍ ମାଲ୍ଲା ମାନୁଦ୍। 17ନିହ୍ମା ବିଶ୍ୱାସ୍ କାମ୍ନା ଲାଇଗ୍ ସେବାଦ୍ ଅଣ୍ଟା ବଲୀ ଲେଖା ରାଇ, ଆରୁ ଯଦି ଏଙ୍ଘା ହେଁସୁ ବାହାବାଇକିରି ଖିଆହି ଖାତ୍ରୋ, ହାଲେହି ଏନ୍ ନିହ୍ମା ଜାମାର୍ଗାନେ ମୁରୁକ୍ ଲୀଝ୍ରନ୍। 18ହନ୍ନେନ୍ ନିମ୍ହି ଖୁସୀମାନାବା ଆରୁ ଏଙ୍ଘାଗାନେ ଲୀଝ୍ରା।
ତିମଥିଉସ୍ ଆରୁ ଇପ୍ଫ୍ରୁଦୀତୁସ୍କି ସେବା ନାଲ୍ଖୁ
19ଏଙ୍ଗାଗେ ପ୍ରାଭୁ ଯୀଶୁସ୍କି ମିଆଁ ଭାର୍ଷା ରାଇ କା ଏନ୍ ତୀମଥିଉସ୍ସିନ୍ ନିହ୍ମା ଚାହାଗେ ଚାଁଣେ ତାଇୟନ୍, ତାକା ନିହ୍ମା ବାରେ ଖବର୍ ହାଖ୍ଖୀକିରି ଏନ୍ହି ମୁରୁକ୍ ଲୀଝ୍ରନ୍। 20ଏନ୍ଦେର୍ଗେକା ଏଙ୍ଘାସାନ୍ ଏନ୍ନେ ନେଦ୍ହି ମାଲ୍କାରିନ୍, ଏକାର୍ କା ତିମଥିଉସ୍ ଲେଖା ସତ୍ତୁ ମନ୍ତି ନିହ୍ମା ବାନେଘି ଲାଗାନ୍ ସୋଚ୍ନାଏ। 21ଏନ୍ଦେର୍ଗେକା ଜାମାର୍ ନିଜର୍-ନିଜର୍ ଫାଏଦାଘି ଲାଗାନ୍ ସୋଚ୍ନାଏ, ନେଦ୍ହି ଯୀଶୁ ଖ୍ରୀସ୍ତ୍କି ବାରେନୁ ମା ସୋଚ୍ନାଏ। 22ଲେକିନ୍ ଆସ୍କି ସାଭାବ୍ବନ୍ ତା ନିମ୍ ଆହ୍ଦାର୍ କା ଏସ୍କେ ହାଦ୍ଦୁସ୍ ବୁଆସ୍କି କାତ୍ଥାନ୍ ମାନ୍ଦାସ୍, ହନ୍ନେନ୍ ଆସ୍ହି ସୁସାମାଚାର୍ ଫାଏଲାନାନୁ ଏଙ୍ଘାଗାନେ ସେବା ନାଲ୍ଖୁ କାମ୍ଦାସ୍। 23ହୁଦ୍ଘିଲାଗାନ୍ ଏଙ୍ଘାଗାନେ ଏନ୍ଦେର୍ ମାନୋ, ଆବନ୍ ଆହାଖାନେନ୍ ତିମଥିଉସ୍ସିନ୍ ନିହ୍ମାସାନ୍ ତାଇୟନ୍ବୁଲି ଆଶ୍ରା କାମାଲ୍ଦାନ୍। 24ଆରୁ ଏଙ୍ଘାଏ ପ୍ରାଭୁସ୍କି ମିଆଁ ଭାର୍ଷା ରାଇ କା ଏନ୍ ନିଜେହି ଚାଁଣେନିନ୍ ନିହ୍ମାସାନ୍ କନ୍।
25ଏପାଫ୍ରାଦିତସ୍ ଏଙ୍ଘା ଭାଇସ୍ ଲେଖା ରାଦାସ୍। ଏଙ୍ଘା ସାଙ୍ଗେ ନାଲ୍ଖୁ କାନାବାଲା, ଏଙ୍ଘାଗାନେ ଆସ୍ ଅଣ୍ଟା ପଲ୍ଟନ୍ସ୍କି ଲେଖା ଯୀଶୁ ଖ୍ରୀସ୍ତ୍କି ସେବା କାମ୍ଚାସ୍। ଏଙ୍ଘା ଦାର୍କାର୍ବନ୍ ମଦେତ୍ କାମ୍ନାବାଲା ଦୂଁତ୍ ଲେଖା ନିମ୍ ଆସିନ୍ ଏଙ୍ଘାସାନ୍ ତାଏକାଚ୍କାର୍ ଏନ୍ ଆସିନ୍ ଆରୁଅହନ୍ ନିହ୍ମାସାନ୍ ତାଇୟାଗେ ସୋଚାଲ୍ଦାନ୍। 26ଏନ୍ଦେର୍ଗେକା ଆସ୍ ନିମା ଜାମାରିନ୍ ମୁରୁକ୍ ଏରା ବେଦ୍ଦାଲ୍ଦାସ୍। ଆରୁ ନିମ୍ ଆସ୍କି ବେମାର୍ ରାନାଘି ଖବର୍ ମେନ୍ଚ୍କାଦାର୍, ହୁଦ୍ଘିଲାଗାନ୍ ଆସ୍ ମୁରୁକ୍ ଦୁଃଖୁନୁ ରାଦାସ୍। 27ଆସ୍ ଜରୁର୍ ବେମାର୍ ରାଚାସ୍, ଆରୁ ଖିନା ଲେଖା ମାନ୍ଚାସ୍ କେର୍କାଚାସ୍, ଲେକିନ୍ ପାର୍ମେଶ୍ୱାର୍ସ୍ ଆସ୍କି ମିଆଁ ଦାୟା କାମ୍ଚାସ୍, ଆରୁ ଆସିନ୍ ଖାଲି ମାଲ୍ଲା ଏସ୍କେ କା ଏଙ୍ଗାଗେ ଦୁଃଖୁଘି ମିଆଁ ଦୁଃଖୁ ସାହା ମା ଖାତ୍ରୋ, ହୁଦ୍ଘିଲାଗାନ୍ ଏଙ୍ଘା ମିଆଁହି ଦାୟା କାମ୍ଚାସ୍। 28ଇଦ୍ଘିଲାଗାନ୍ ଏନ୍ ଆସିନ୍ ତାଇୟାଗେ ବାଗ୍ଗେ କୋଶିଷ୍ କାମ୍ଚ୍କାନ୍ କା ନିମ୍ ଆସିନ୍ ଆରୁଅହନ୍ ଏରର୍ ଆରୁ ଲୀଝ୍ରର୍ ଆରୁ ଏଙ୍ଘାଏହି ଦୁଃଖୁ କମ୍ରକୋ। 29ହୁଦ୍ଘିଲାଗାନ୍ ଇପ୍ଫ୍ରୁଦୀତୁସ୍କି ମୁରୁକ୍ ଖୁସୀତି ମାଇନ୍ କାମା ଆରୁ ଆସ୍କି ଲେଖା ଦୁସ୍ରା ଆଲାର୍ଘି ସ୍ୱାଗାତ୍ କାମା ଆରୁ ମାଇନ୍ କାମା। 30ଏନ୍ଦେର୍ଗେକା ଯୀଶୁ ଖ୍ରୀସ୍ତ୍କି ସେବା କାମାଗେ ଏତ୍କତକ୍ ଦୁଃଖୁ ସାହାଚାସ୍କା ଆସ୍ ଖିନା ଲେଖା ମାନ୍ଚାସ୍ କେର୍କାଚାସ୍ ଆରୁ ଏଙ୍ଘାଲାଗାନ୍ ନିମାଗେ ଏକା ସେବା ନାଲ୍ଖୁନ୍ ପୁରା କାମ୍ଚ୍କାଚାସ୍ ଆ ଘାଟିବନ୍ ପୁରା କାମ୍ନାଘି ଲାଗାନ୍ ତାଙ୍ଗା ଜୀବନ୍ବନ୍ହି ବିପଦ୍ନୁ ଟିଡ୍ଡେଇଚାସ୍।
3ପାର୍ମେଶ୍ୱାର୍ସ୍କି ନଜର୍ନୁ ଦୋଷୀ ମା ରାନା
1ଆଖ୍ରୀନୁ ହେ ଏଙ୍ଘାଏ ଭାଇ ଆରୁ ବୁହୁଣୀଜାମାରୋ, ନିମ୍ ପ୍ରାଭୁସ୍କି ଆଲାର୍, ହୁଦ୍ଘିଲାଗାନ୍ ଖୁସୀନୁ ରା। ଆ କାତ୍ଥାନିନ୍ ନିମାଗେ ଧିୟାନ୍-ଧିୟାନ୍ ଲେଖ୍ନାନୁ ଏଙ୍ଗାଗେ ଏନ୍ଦେର୍ହି ତକ୍ଲିବ୍ ମା ଲାଗ୍ଗଦ୍, ଆରୁ ଇଦ୍ ନିହ୍ମା ବାନେଘି ଲାଗାନ୍ ରାଇ। 2ଏକାର୍ ଖାରାପ୍ ନାଲ୍ଖୁ କାମ୍ନାଏ ଆବ୍ଡ଼ାର୍ ଆଲ୍ଲା ଲେଖା ରାନାଏ ଆବ୍ଡ଼ାର୍ସ୍ତି ବାଛ୍ରିକିରି ରା, ନିମ୍ ଏକାର୍ ବିଶ୍ୱାସୀ ମାଲ୍ନାଏ, ଆବ୍ଡ଼ାର୍ସ୍ତି ସାବ୍ଧାନ୍ ରା। ଖାରାପ୍ ନାଲ୍ଖୁ କାମୁର୍ସ୍ତି ସାବ୍ଧାନ୍ ରା। ଆରୁ ଖାତ୍ନା କାମୁର୍ସ୍ତି ସାବ୍ଧାନ୍ ରା। 3ଏନ୍ଦେର୍ଗେକା ଅସଲ୍ନୁ ଖାତ୍ନାବାଲାତ୍ ତା ନାମ୍। ନାମ୍ ପାର୍ମେଶ୍ୱାର୍ସ୍କି ଆତ୍ମାଘି ମଦେତ୍ତି, ସେବା ଆରାଧାନା କାମ୍ଦାତ୍। ଆରୁ ଯୀଶୁ ଖ୍ରୀସ୍ତ୍କି କାମ୍ଚ୍କା ନାଲ୍ଖୁଘି ଲାଗାନ୍ ଆସ୍କି ସ୍ତୁତି କାମ୍ଦାତ୍, ଲେକିନ୍ ଆଲାର୍ଘି ରୀତିନୀତିଘି ମିଆଁ ନାମ୍ ଭାର୍ଷା ମା କାମ୍ଦାତ୍। 4ଲେକିନ୍ ଏନ୍ହି ଦୁସ୍ରା ଆଲାନ୍ ଏଙ୍ଘା ମେଦୁନୁ ଏକା ଖାତ୍ନା କାମ୍ଚ୍କାନାଏ ଆଦ୍ଘି ମିଆଁ ଭାର୍ଷା ଉଇୟା ଅଙ୍ଗନ୍ନେ, ଯଦି ନେଦିନ୍ ନିଜର୍ ମେଦୁନୁ ଖାତ୍ନା କାମ୍ଚ୍କାଘି ମିଆଁ ଭାର୍ଷା ଉଇୟା ଅଙ୍ଗନ୍ବୁଲି ସୋଚ୍ଦାସ୍, ହାଲେ ତା ଏନ୍ ଆରୁହି ବାଗ୍ଗେ ଏନ୍ନେ କାମା ଅଙ୍ଗନ୍ନେ। 5ଆଠ୍ୱାଁ ଉଲ୍ଲାନୁ ଏଙ୍ଘାଏ ଖାତ୍ନା ମାନ୍ଚା, ଏନ୍ ଅଣ୍ଟା ଇସ୍ରାଏଲୀନ୍ ଆରୁ ବିନ୍ୟାମୀନ୍ସ୍କି ବାଉଁଶାନ୍ତାନ୍; ଏଙ୍ଘା ଆୟାଙ୍ଗ୍ ବାଙ୍ଗ୍ର୍ ଇବ୍ରାନୀର୍, ହୁଦ୍ଘିଲାଗାନ୍ ଏନ୍ହି ଇବ୍ରାନୀନ୍। ଏନ୍ ଅଣ୍ଟା ଫାରିସୀ ରାଚ୍କାନ୍, ଆରୁ ଏନ୍ ମୁଶାସ୍କି ନିୟମ୍ବନ୍ ବାନେକିରି ମାନାଲ୍କାନ୍। 6ପାର୍ମେଶ୍ୱାର୍ସ୍କି ମୁରୁକ୍ ଇଚ୍ଛାଘି ବାରେ ତେଙ୍ଗର୍ ତା ଏନ୍ ବିଶ୍ୱାସୀରିନ୍ ସାତାବାନାବାଲା ରାଚ୍କାନ୍ ଆରୁ ମୁଶାସ୍କି ନିୟମ୍ ମାନ୍ନାଘି ବାରେ ନେଦ୍ହି ଏଙ୍ଗାନ୍ ଏନ୍ନେ ତେଙ୍ଗା ପଲ୍ଲନାଇନ୍ କା ଏନ୍ ନିୟମ୍ବନ୍ ପୁରା ମାଲ୍ଲା ମାନ୍ନା। 7ଲେକିନ୍ ଏକାଦ୍ ଏଙ୍ଘାଲାଗାନ୍ ବିଶେଷ୍ ରାଚା, ଆବ୍ଡ଼ା ଜାମାନ୍ ଏନ୍ ଆକ୍କୁନ୍ ଖ୍ରୀସ୍ତ୍ସିନ୍ ଆହାଗେ ଲାଗାନ୍ ବିଶେଷ୍ ମା ରାଚା ବୁଲି ସୋଚାଲ୍ଦାନ୍। 8ହଁ ଅସଲ୍ନୁ ଏନ୍ ଏଙ୍ଘା ପ୍ରାଭୁ ଯୀଶୁ ଖ୍ରୀସ୍ତ୍ସିନ୍ ଆହ୍ନାଦିନ୍ ଜାମାର୍ଘିନ୍ତି ବାଡ଼୍କା କାତ୍ଥାଦ୍। ଆରୁ ଇ ବୁଦ୍ଧିଘି ତୁଲ୍ନାନୁ ଏନ୍ ଜାମା ଜିନିଷ୍ବନ୍ ବିଶେଷ୍ ମା ରାଚା ବୁଲି ସୋଚ୍ଦାନ୍। ଆସ୍କି ଲାଗାନ୍ ଏନ୍ ଜାମାକିଛିନ୍ ଆମ୍ବେଇ ଚିଚ୍କାଦାନ୍। ଆରୁ ଏନ୍ ଆବ୍ଡ଼ା ଜାମାନ୍ କାଚ୍ରା ଲେଖା ଏନ୍ଦେର୍ହି ନାଲ୍ଖୁଘି ମାଲ୍ଲି ବୁଲି ସୋଚ୍ଦାନ୍, ତାକା ଏନ୍ ପୁରାପୁରୀ ଖ୍ରୀସ୍ତ୍କିନିନ୍ ମାନନ୍କନ୍ ଆରୁ ଆସ୍ଗାନେନ୍ ରନ୍। 9ଏନ୍ ମୁଶାସ୍କି ନିୟମ୍ବନ୍ ମାନ୍ଚ୍କୁନ୍ ପାର୍ମେଶ୍ୱାର୍ସ୍ଗାନେ ଏଙ୍ଘା ଠିକ୍ ସମ୍ବନ୍ଧ ମାନୋବୁଲି ସୋଚାଲ୍କାନ୍, ଲେକିନ୍ ଖ୍ରୀସ୍ତ୍କି ମିଆଁ ବିଶ୍ୱାସ୍ କାମ୍ଚ୍କୁନ୍ନିନ୍ ପାର୍ମେଶ୍ୱାର୍ସ୍ଗାନେ ଏଙ୍ଘା ଠିକ୍ ସମ୍ବନ୍ଧ ମାନିଦ୍। 10ଏନ୍ ଖ୍ରୀସ୍ତ୍ସିନ୍ ଆରୁ ବାଗ୍ଗେ ଆହାଗେ ବେଦ୍ଦାଲ୍ଦାନ୍, ପାର୍ମେଶ୍ୱାର୍ସ୍ ଯୀଶୁସିନ୍ କେଚ୍ଚକାସ୍ତି ଉଜ୍ଜତାଚାସ୍, ଆ ଶକ୍ତିନ୍ ଅନୁଭବ୍ କାମାଗେ ଶକ୍ତିନ୍ ଆହାଗେ ବେଦ୍ଦାଲ୍ଦାନ୍। ଏସ୍କେ ଖ୍ରୀସ୍ତ୍ ନାହ୍ମା ପାପ୍ଘି ଲାଗାନ୍ କେଚ୍ଚାସ୍କେରାସ୍, ହନ୍ନେନ୍ ଖ୍ରୀସ୍ତ୍କି ଲାଗାନ୍ ପୁରା ଇଚ୍ଛାତି ଏନ୍ ଖିଆ ବେଦ୍ଦାଲ୍ଦାନ୍। 11ତାକା ଏନ୍ ଏସ୍କ୍ରିନ୍ହି କେଚ୍ଚକାର୍ସ୍ତି ଆରୁଅହନ୍ ଉଜ୍ଜାଅଙ୍ଗନ୍।
ପାଉଲୁସ୍ ଫିଲିପ୍ପୀଆ ଜାମାରିନ୍ ତାଙ୍ଘା ଲେଖା ଚାଲ୍ରାଗେ ତେଙ୍ଗାଲ୍ଦାସ୍
12ଏନ୍ ଏନ୍ନେ ମାଲ୍ଲା ତେଙ୍ଗ୍ନା କା ଏନ୍ ପୁରାପୁରୀ ଖ୍ରୀସ୍ତ୍ ଯୀଶୁସ୍କି ଲେଖା ମାନ୍ଚ୍କାନ୍ କେର୍କାଦାନ୍ ଲେକିନ୍ ଏନ୍ନେ ମାନାଗେ ଲାଗାତାର୍ କୋଶିଷ୍ କାମାଲ୍ଦାନ୍। 13ହେ ଭାଇ ଆରୁ ବୁହୁଣୀ ଜାମାରୋ, ଏନ୍ ଆକ୍କୁନ୍ତକ୍ ପୁରାପୁରୀ ଯୀଶୁ ଖ୍ରୀସ୍ତ୍କି ଲେଖା ମାନ୍ଚ୍କାନ୍ କେର୍କାଦାନ୍ ବୁଲି ମାଲ୍ଲା ସୋଚ୍ନା; ଲେକିନ୍ ଅଣ୍ଟା ନାଲ୍ଖୁ କାମାଲ୍ଦାନ୍। ଆଘ୍ଲିନ୍ତା କାତ୍ଥାଗୁଠିନ୍ ମଦ୍ରିକିରି ପାଛ୍ଲିନ୍ତା କାତ୍ଥାଗୁଠିନ୍ ଏରିକିରି 14ଏନ୍ ଖ୍ରୀସ୍ତ୍ସ୍କି ଲେଖା ମାନ୍ନାନୁନିନ୍ ଧ୍ୟାନ୍ ଚିତେ ରାଦାନ୍। ତାକା ଆ ପୁର୍ସ୍କାର୍ ଏଙ୍ଗା ସରଗ୍ନୁ ହାଖ୍ଖର, ଏକାଘି ଲାଗାନ୍ ପାର୍ମେଶ୍ୱାର୍ସ୍ ନାମାନ୍ ଖ୍ରୀସ୍ତ୍ ଯୀଶୁସ୍କି ଦ୍ୱାର୍ନୁ ମେହ୍କାଦାସ୍। 15ହୁଦ୍ଘିଲାଗାନ୍ ବାରା, ଯେତ୍କ ଲୋକ୍ ନାମ୍ ଖ୍ରୀସ୍ତ୍ ବିଶ୍ୱାସ୍ନୁ ପୁରାପୁରୀ ମଜ୍ବୁତ୍ ରାଦାତ୍, ଏନ୍ନେ ସୋଚ୍ବିଚାର୍ ଉଇୟତ୍ ଆରୁ ଯଦି ଏନ୍ଦ୍ରିନ୍ କାତ୍ଥାଘି ବାରେ ନିହ୍ମାଏ ସୋଚ୍ବିଚାର୍ ଭିନେ ରାଇ ତା ଇବନ୍ହି ପାର୍ମେଶ୍ୱାର୍ସ୍ ନିହ୍ମାସାନ୍ ଏଦୋସ୍। 16ଖାସ୍ କାତ୍ଥାଦ୍ ତା ଇଦ୍ କା ନାମ୍ ଏକା ସତ୍ତୁବନ୍ ଆଘ୍ଲିନ୍ତି ଆକ୍କାଦାତ୍, ଆଦ୍ଘି ଲେଖା ଚାଲ୍ରତ୍। 17ହେ ଭାଇ ଆରୁ ବୁହୁଣୀ ଜାମାରୋ, ନିମ୍ ଜାମାର୍ ମେଶ୍ରିକିରି ଏଙ୍ଘା ଲେଖା ଚାଲ୍ରା। ଆରୁ ଏକା ନମୁନାନ୍ ନିମ୍ ଏଙ୍ଘାସ୍ତି ଏରାଲ୍ଦାର୍, ଆବ୍ଡ଼ାର୍ଘି ଲେଖା ଚାଲ୍ରାଗେ ଧିୟାନ୍ ଚିଆ। 18ଏନ୍ଦେର୍ଗେକା ବହୁତ୍ ଆଲାର୍ ଏନ୍ନେ ରାନାର୍ ଏକାର୍ଘି ଚାଲିଚଲନ୍ଘି ବାରେ ଏନ୍ ନିମାନ୍ ଧିୟାନ୍-ଧିୟାନ୍ ତେଙ୍କାଦାନ୍, ଆରୁ ଆକ୍କୁନ୍ନିନ୍ ଅହ୍ଲା-ଅହ୍ଲା ତେଙ୍ଗାଲ୍ଦାନ୍, କେତ୍କ ଲୋକ୍ ଏନ୍ନେ ଉଜ୍ଜନାଏ କା ଆବ୍ଡ଼ାର୍ ଖ୍ରୀସ୍ତ୍ସ୍କି କ୍ରୁଶ୍ନୁ ଖିନାଘି ବିରୋଧିର୍। 19ଆଖ୍ରୀନୁ ତା ଆବ୍ଡ଼ାର୍ ନରକ୍ନୁ କର୍, ଶରୀର୍ଘି ଇଚ୍ଛାବନ୍ ପୁରା କାମ୍ନାଦ୍ହି ଆବ୍ଡ଼ାର୍ଘି ଲାଗାନ୍ ଦେବ୍ତା ଲେଖା ମାନ୍ଚାର୍ କେରାର୍। ଆବ୍ଡ଼ାର୍ଘି କୁଲୁଦ୍ହି ଆବ୍ଡ଼ାର୍ଘି ପାର୍ମେଶ୍ୱାର୍ସ୍। ଆରୁ ଏକା କାତ୍ଥାନୁ ଲାଜ୍ର୍ନା କାତ୍ଥା, ଆବ୍ଡ଼ାର୍ ଏନ୍ନେ କାତ୍ଥାନୁ ଘମଣ୍ଡ୍ କାମ୍ନାଏ। ଆବ୍ଡ଼ାର୍ଘି ମନ୍ ଦୁନିଆଁଘି ଜିନିଷ୍ଘି ମିଆଁ ଲାକ୍କି ରାଇ। 20ଲେକିନ୍ ନାହ୍ମାଏ ରାଜୀତା ସରଗ୍ନୁ ରାଇ ବାର୍ନାବାଲା ଉଦ୍ଧାର୍କାର୍ତ୍ତା ପ୍ରାଭୁ ଯୀଶୁ ଖ୍ରୀସ୍ତ୍କି ପାବୁ ଖୁସୀତି ଏର୍ତେ ରାଦାମ୍। 21ଆସ୍ ନିଜର୍ ଏକା ଶକ୍ତିତି ଜାମା ଜିନିଷ୍ଗୁଠିନ୍ ନିଜର୍ ଅଧିନ୍ କାମା ଅଙ୍ଗର୍, ଆ ଶକ୍ତିତି ଆସ୍ ନାହ୍ମାଏ ଖିନାଘି ଲାଇଗ୍ ଶରୀର୍ବନ୍ କମ୍ଜୋର୍ ଶରୀର୍ଘି ରୁପ୍ ବାଦ୍ଲିକିରି ନିଜର୍ ମାହିମାତି ଭର୍ପୁର୍ ଶରୀର୍ଘି ଲେଖା କାମ୍ଚାର୍।
41ହୁଦ୍ଘିଲାଗାନ୍ ହେ ଏଙ୍ଘା ଭାଇ ଆରୁ ବୁହୁଣୀ ଜାମାରୋ, ଏନ୍ ନିମାନ୍ ମୁରୁକ୍ ବାନେ ହାଖ୍ଖଦାନ୍ ଆରୁ ଏରାଗେ ତାଡ଼୍ପାରାଲ୍ଦାନ୍। ଏନ୍ ନିହ୍ମା ଲାଗାନ୍ ଲୀଝ୍ରାଲ୍ଦାନ୍, ନିମ୍ ପ୍ରାଭୁସିନ୍ ବିଶ୍ୱାସ୍ କାମ୍ଚ୍କାର୍, ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ଏଙ୍ଗାଗେ ପୁରସ୍କାର୍ ଚିଚ୍ଚାସ୍। ହେ ଏଙ୍ଘା ଭାଇ ଆରୁ ବୁହୁଣୀ ଜାମାରୋ, ଏନ୍ନେନ୍ ପ୍ରାଭୁ ଯୀଶୁସ୍କି ମିଆଁ ବାଗ୍ଗେ ବିଶ୍ୱାସ୍ କାମ୍ତେ ରା।
ପାଉଲୁସ୍ ଫିଲିପ୍ପୀଆରିନ୍ ସାଲାହ୍ ଚିଆଲ୍ଦାସ୍
2ଏନ୍ ବୁହୁଣୀ, ୟୁଅଦିୟା ଆରୁ ସୁନ୍ତୁଖେ ଦୁହି ଲୋକ୍ରିନ୍ ଆର୍ଜୀବିନ୍ତି କାମାଲ୍ଦାନ୍ କା, ନିମ୍ ପ୍ରାଭୁସ୍କି ଆଲାର୍, ହୁଦ୍ଘିଲାଗାନ୍ ଝାଗ୍ଡ଼ା ଆମ୍ବିକିରି ଏକ୍ ଦୁସ୍ରାର୍ଗାନେ ରାଜୀ ମାନିକିରି ଶାନ୍ତିବାଲା ସମ୍ବନ୍ଧ ଉଇକେ। 3ହେ ଏଙ୍ଘାଗାନେ ବିଶ୍ୱାସ୍ କାମ୍ନାଘି ଲାଇଗ୍, ନାଲ୍ଖୁ କାମୁୟ, ଏନ୍ ନିଙ୍ଗାନ୍ ଆର୍ଜୀବିନ୍ତି କାମାଲ୍ଦାନ୍ କା ନିନ୍ ଆବ୍ଡ଼ା ମାଏକିନିଆଁରିନ୍ ମେଶ୍ରିକିରି ରାଗେ ମଦେତ୍ କାମା। ଏନ୍ଦେର୍ଗେକା ଆବ୍ଡ଼ାର୍ ଏଙ୍ଘାଗାନେ ସୁସାମାଚାର୍ ଫାଏଲାନାନୁ ମଦେତ୍ କାମ୍ଚ୍କାଚାର୍। କ୍ଲେମେଣ୍ଟ ଆରୁ, ଆରୁ ଦୁସ୍ରାର୍ ଏକାର୍ ଏଙ୍ଘାଗାନେ ନାଲ୍ଖୁ କାମାଲିୟାର୍ ଆବ୍ଡ଼ାର୍ହି ମେହ୍ନତ୍ କାମ୍ଚାର୍। ଏକା ଆଲାର୍ ସୁସାମାଚାର୍ ପ୍ରଚାର୍ କାମ୍ନାନୁ ଏଙ୍ଗାନ୍ ମଦେତ୍ କାମ୍ଚ୍କାନାଏ ଆବ୍ଡ଼ା ଜାମାର୍ଘି ନାମେ ଜୀବନ୍ ବହିନୁ ଲେଖ୍ଚ୍କା ରାଇ।
4ନିମ୍ ପ୍ରାଭୁସ୍କି ଆଲାର୍, ହୁଦ୍ଘିଲାଗାନ୍ ଜାମାବାକେନ୍ ଖୁସ୍ନୁ ରା; ଏନ୍ ଆରୁଅହନ୍ ତେଙ୍ଗାଲ୍ଦାନ୍ କା ଖୁସ୍ନୁ ରା। 5ନିହ୍ମା ନରମ୍ ମନ୍ବନ୍ ଜାମା ଆଲାର୍ଗେ ଆହାଗେ ଚିଆ। ପ୍ରାଭୁସ୍ ଚାଁଣେ ବାର୍ନାବାଲା ରାଦାସ୍। 6ଏନ୍ଦେର୍ହି କାତ୍ଥାନୁ ଚିନ୍ତା ଆମ୍କେ କାମା, ଲେକିନ୍ ଜାମା ପରିସ୍ଥିତିନୁ ନିହ୍ମା ଦାର୍କାର୍ଘି ଲାଗାନ୍ ବିନ୍ତି କାମା ଆରୁ ଧାନ୍ୟାବାଦ୍ ଚିଇକିରି ନିହ୍ମାଏ ଆର୍ଜୀ ବିନ୍ତିବନ୍ ପାର୍ମେଶ୍ୱାର୍ସିନ୍ ତେଙ୍ଗା। 7ଆରୁ ପାର୍ମେଶ୍ୱାର୍ସ୍ ନିହ୍ମାଏ ଏନ୍ନେ ମଦେତ୍ କାମସ୍କା ନିମ୍ ଏନ୍ଦ୍ରିନ୍ହି ଜିନିଷ୍ଘି ବାରେନୁ ଚିନ୍ତା ଆମ୍ବତ୍ କାମା। ଶାନ୍ତି ଏକାଦ୍ କା ଆଲାର୍ଘି ବୁଝୁର୍ନାଘି ବାହାରି ରାଇ, ଆ ଶାନ୍ତି ନିହ୍ମା ଜୀଆ ଆରୁ ମନ୍ବନ୍ ବାଛାବିକିରି ଉଇୟଦ୍। ଏନ୍ଦେର୍ଗେକା ନିମ୍ ଖ୍ରୀସ୍ତ୍ ଯୀଶୁସ୍କି ଆଲାର୍।
8ଆଖ୍ରୀନୁ ହେ ଭାଇ ଆରୁ ବୁହୁଣୀ ଜାମାରୋ, ଏକାଦ୍ ସତ୍ତୁଦ୍, ଏକାଦ୍ ଆଦର୍ମାଇନ୍ ହାଖ୍ଖନାଘି ଲାଇଗ୍ ରାଇଦ୍, ଏକାଦ୍ ଠିକ୍ଦ୍, ଏକାଦ୍ ପାବିତାର୍, ଏକାଦ୍ ଖୁସୀ ଚିଇଦ୍, ଆରୁ ଏକାଦ୍ ମୁରୁକ୍ ବାନେଦ୍, ମତ୍ଲବ୍ ଏକାଦ୍ ବାନେ ଗୁଣ୍ ଆରୁ ଏକାଘି ବାରେ ଆଲାର୍ ବାନେ-ବାନେ କାଚ୍ନେଖ୍ର୍ନାଏ, ଆବ୍ଡ଼ା ଜାମାନ୍ ସୋଚ୍ତେରାକେ। 9ନିମ୍ ଏକା-ଏକା କାତ୍ଥାନ୍ ଏଙ୍ଘାସ୍ତି ଶିଖ୍ର୍କାଦାର୍ ଆରୁ ଏଙ୍ଘା ତାର୍ତି ହାଖ୍ଖଦାର୍, ଏଙ୍ଘାସ୍ତି ମେନ୍ଚ୍କାଦାର୍ ଆରୁ ଏକାନ୍ ଏନ୍ କାମ୍ଚ୍କାଦାନ୍, ଆବନ୍ ନିମ୍ ଏର୍କାଦାର୍, ଆଦ୍ଘି ଲେଖା କାମା; ହାଲେ ଶାନ୍ତି ଚିନାବାଲା ପାର୍ମେଶ୍ୱାର୍ସ୍ ନିହ୍ମାଗାନେ ରସ୍।
ପାଉଲୁସ୍ ଫିଲିପିଆ ବିଶ୍ୱାସୀ ଜାମାରିନ୍ ଦାନ୍ଘି ଲାଗାନ୍ ଧାନ୍ୟାବାଦ୍ ଚିଆଲ୍ଦାନ୍
10ନିମ୍ ଜରୁର୍ ପହ୍ଲେନ୍ତି ଏଙ୍ଘା ଦାର୍କାର୍ବନ୍ ପୁରା କାମ୍ନାଘି ବାରେନୁ ଆଘ୍ଲିନ୍ତିନ୍ ସୋଚାଲ୍କାର୍, ଲେକିନ୍ ଆବନ୍ ଏଦାଗେ ନିମାଗେ ମୋଉକା ମା ହାଖ୍ଖରା। ଲେକିନ୍ ଆକ୍କୁନ୍ ଏତ୍କ ଉଲ୍ଲାଘି ପାଛ୍ଲି ଏଙ୍ଘାଲାଗାନ୍ ନିମ୍ ଆରୁଅହନ୍ ସୋଚାଲ୍ଦାର୍; ହୁଦ୍ଘିଲାଗାନ୍ ଏନ୍ ମୁରୁକ୍ ଖୁସୀ ମାନିକିରି ପ୍ରାଭୁସିନ୍ ଧାନ୍ୟାବାଦ୍ ଚିଆଲ୍ଦାନ୍। 11ଏଙ୍ଗା ଏନ୍ଦ୍ରିନ୍ ଜିନିଷ୍ଘି ଦାର୍କାର୍ ରାଇ ହୁଦ୍ଘିଲାଗାନ୍ ଏନ୍ ଏନ୍ନେ ମାଲ୍ଲା ତେଙ୍ଗୁନ୍; ଏନ୍ଦେର୍ଗେକା ଏକ୍ରିନ୍ ଦାଶାନୁ ରାଚ୍କୁନ୍ହି, ଆନ୍ନୁ ଖୁସ୍ ରାଗେ ଶିଖ୍ର୍କାଦାନ୍। 12ଏନ୍ ଘାଟି-ବାଢ଼ିନୁ ରାନାନ୍ହି ଆହ୍ଦାନ୍ ଆରୁ ଭାର୍ପୁର୍ନୁ ରାନାନ୍ହି ଆହ୍ଦାନ୍। ଏକିନ୍ ସାମାୟ ଆରୁ ଏସ୍କିନ୍ ଦାଶାନୁ କୁଲୁଭର୍ ଅନ୍ନାମହ୍ନା ଚାହେ କିଡ଼ାଖିନାନୁ, ଚାହେ ଘାଟି-ବାଢ଼ିନୁ ଏନ୍ ଖୁସ୍ରାନା ଶିଖ୍ର୍କାଦାନ୍। 13ଏନ୍ ଜାମା ପରିସ୍ଥିତିଘି ସାମ୍ନା କାମା ଅଙ୍ଗ୍ଦାନ୍ ଏନ୍ଦେର୍ଗେକା ଖ୍ରୀସ୍ତ୍ ଏଙ୍ଗାଗେ ଶକ୍ତି ଚିଦାସ୍। 14ହାଲେହି ନିମ୍ ଏଙ୍ଘା ଦୁଃଖୁ କଷଟ୍ ବାକେନ୍ ଏଙ୍ଗାନ୍ ମଦେତ୍ କାମିକିରି ବାନେ କାମ୍ଚ୍କାର୍।
15ହେ ଏଙ୍ଘାଏ ପ୍ୟାରେ ଫିଲିପ୍ପୀୟା ଜାମାରୋ, ନିମ୍ ନିଜେତା ଆହ୍ଦାର୍ କା ସୁସାମାଚାର୍ ଶୁଣାବାନାଘି ସୁରୁନୁ ଯେତ୍କବାକେନ୍ ଏନ୍ ମାକିଦୁନିଆଁନ୍ତି ବୁଙ୍କାନ୍ତା ଖାଲି ନିହ୍ମା ମଣ୍ତ୍ଲୀଦିନ୍ ଏଙ୍ଘା ମଦେତ୍ କାମ୍ଚା ଦୁସ୍ରା ଏକିନ୍ ମଣ୍ତ୍ଲୀଧି ଏଙ୍ଗାଗେ ପାଏସା ମା ଚିଚ୍ଚାର୍। 16ଏନ୍ନେନ୍ ଯେତ୍କବାକେନ୍ ଏନ୍ ୪:୧୬ ମାକିଦୁନିଆଁଘି ଜିଲ୍ଲାନୁ ଥେସ୍ଲୁନୀକୀ ସହର୍ଦ୍ ରାଇ।ଥେସ୍ଲୁନୀକୀ ସହର୍ନୁ ରାଚ୍କାନ୍, ହତ୍କବାକେନ୍ହି ନିମ୍ ଏଙ୍ଘାଏ ଦାର୍କାର୍ବନ୍ ପୁରା କାମାଗେ ଅହନ୍ ଖାଲି ମାଲ୍ଲା, ଲେକିନ୍ ଦୁଇ ଥର୍ ମଦେତ୍ କାମ୍ଚ୍କାଚ୍କାର୍। 17ନିହ୍ମାସ୍ତି ଏନ୍ ମଦେତ୍ ହାଖ୍ଖାଗେ ଇଚ୍ଛା କାମାଲ୍ଦାନ୍ ଏନ୍ନେ ମାଲ୍ଲା ଲେକିନ୍ ଏନ୍ନେ ଇଚ୍ଛା କାମାଲ୍ଦାନ୍ କା ଏଙ୍ଗାଗେ ନିମ୍ ଏକା ମଦେତ୍ କାମ୍ଚ୍କାଦାର୍ ଆଦ୍ଘି ଲାଗାନ୍ ପାର୍ମେଶ୍ୱାର୍ସ୍ ନିମାଗେ ବାନେ ଫଳ୍ ଚିୟସ୍। 18ଏନ୍ ନିହ୍ମାସ୍ତି ବହୁତ୍କିଛି ହାକ୍କାଦାନ୍ ହୁଦ୍ଘିଲାଗାନ୍ ଏଙ୍ଘାସାନ୍ ବାଗ୍ଗେ ରାଇ। ଏକା ଜିନିଷ୍ଗୁଠିନ୍ ନିମ୍ ଏପାଫ୍ରାଦିତସ୍କି ହେଖ୍ଖାନୁ ତାଏକାଚ୍କାର୍, ଆଦ୍ ଏଙ୍ଘାଲାଗାନ୍ ଢେର୍ଦ୍। ଇବ୍ଡ଼ା ଜିନିଷ୍ଦ୍ ଅଣ୍ଟା ବାନେ ବାସ୍ନା ଆରୁ ଗ୍ରହନ୍ କାମ୍ନାଘି ଲାଇଗ୍ ବଲି ଲେଖା ରାଇଦ୍, ଏକାଦ୍ କା ପାର୍ମେଶ୍ୱାର୍ସ୍କେ ବାନେ ଲାଗ୍ଗଦ୍। 19ଆରୁ ହୁଦ୍ଘିଲାଗାନ୍ ଏନ୍ ଏଙ୍ଘା ପାର୍ମେଶ୍ୱାର୍ସ୍କି ଆରାଧାନା କାମ୍ଦାନ୍, ଆସାନ୍ ଜାମାକିଛିଦ୍ ଭାର୍ପୁର୍ ରାଇ ହୁଦ୍ଘିଲାଗାନ୍ ଖ୍ରୀସ୍ତ୍ ଯୀଶୁସ୍କି ମିଆଁ ଏକା ବିଶ୍ୱାସ୍ ନିମ୍ କାମ୍ଚ୍କାଦାର୍ ଆଦ୍ଘି କାରଣ୍ତି ନିହ୍ମା ଜାମା ଦାର୍କାର୍ବନ୍ ପୁରା କାମସ୍। 20ନାହ୍ମା ବାଙ୍ଗ୍ ପାର୍ମେଶ୍ୱାର୍ସ୍କି ମାହିମା ଯୁଗ୍-ଯୁଗ୍ ମାନ୍ନାଦ୍। ଆମେନ୍।
ଆଖ୍ରୀ ଯୋହାର୍
21ଖ୍ରୀସ୍ତ୍ ଯୀଶୁସ୍ଗାନେ ଆବ୍ଡ଼ାର୍ଘି ସମ୍ବନ୍ଧଘି କାରଣ୍ତି ଆସାନ୍ ଏକାର୍ ପାର୍ମେଶ୍ୱାର୍ସ୍କି ଆଲାର୍ ରାନାଏ ଆବ୍ଡ଼ା ଜାମାରିନ୍ ଏଙ୍ଘାଏ ଯୋହାର୍ ତେଙ୍କେ ପାର୍ମେଶ୍ୱାର୍ସ୍କି ଅର୍ତୁ-ଅର୍ତୁ ଆଲାରିନ୍ ଯୋହାର୍ ତେଙ୍ଗା। ଏକା ଭାଇଜାମାର୍ ଏଙ୍ଘାଗାନେ ରାନାଏ, ଆବ୍ଡ଼ାର୍ ନିମାନ୍ ଯୋହାର୍ ତେଙ୍ଗାଲ୍ନାଏ। 22ଇସ୍ତା ପାର୍ମେଶ୍ୱାର୍ସ୍କି ଜାମା ଆଲାର୍, କା ବିଶେଷ୍କିରି ଏକାର୍ ବହୁତ୍ ବାଡ଼୍କା କାଇସର୍ସ୍କି ରାଜ୍ମହଲ୍ନୁ ରାନାଏ, ଆବ୍ଡ଼ାର୍ ନିମାନ୍ ଯୋହାର୍ ତେଙ୍ଗାଲ୍ନାଏ।
23ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍ ନିହ୍ମା ମିଆଁ ଦାୟା କାମ୍ନାସ୍।