ଫିଲେମୋନ୍ସ୍କି ନାମେନୁ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍କି ଚିଠି
ବହିଘି ପରିଚୟ
ଖାସ୍ଚେଲା ପାଉଲୁସ୍ ଫିଲେମୋନ୍ସ୍କି ନାମେନୁ ଚିଠି ହତ୍କବାକେନ୍ ଲେଖ୍ଚ୍କାଦାସ୍। ଯେତ୍କବାକେନ୍ କା ଆସ୍ କୁଲୁସିୟୋ ଜାମାର୍ଗେ ଚିଠି ଲେଖ୍ଚ୍କାଚାସ୍। ଭାଏଲ୍ ପାଉଲୁସ୍ ରୋମ୍ତା ଜେହେଲ୍ନୁ ରାଚାସ୍। ଯୀଶୁ ଖ୍ରୀସ୍ତ୍କି କେଚ୍ଚକାଘି ପାଛ୍ଲି ଲାଗ୍ଭାଗ୍ ୩୦ ଚାହେ ୩୫ ବଛର୍ ରାଚା। ହତ୍କବାକେନ୍ ଆସ୍ ଇ ଯୋଡ଼େ ଚିଠିନ୍ ଲେଖ୍ଚ୍କାଚାସ୍। ପାଉଲୁସ୍ ଇ ଯୋଡ଼େ ଚିଠିନ୍ ଅନେସିମୁସ୍ ଆରୁ ତୁଖିକୁସ୍ଗେ କୁଲୁସିୟୋ ହୁଆଗେ ଚିଚ୍କାଚାସ୍।
ଇ ଚିଠିନ୍ ଖାସ୍ଚେଲା ପାଉଲୁସ୍ ଫିଲେମୋନ୍ସ୍କେ ଲେଖ୍ଚ୍କାଦାସ୍। ଇଦ୍ ପାଉଲୁସ୍କି ଚିଠିଗୁଠିନ୍ତି ଛୋଟେଦ୍ ଆରୁ ତାଙ୍ଘା ନିଜର୍ଦ୍। ଫିଲେମୋନ୍ସ୍ ଭାଏଲ୍ ଅଣ୍ଟା ଗ୍ରୀକ୍ ଆଲାସ୍ ରାଚାସ୍। ଆରୁ ଆସ୍ କଲସୀ ସହର୍ନୁ ରାଲିୟାସ୍। ଆସ୍ ଅଣ୍ଟା ଧନୀ ଆଲାସ୍ ରାଚାସ୍। ଆରୁ ଆସ୍ ଅଣ୍ଟା ଖ୍ରୀସ୍ତ୍ ବିଶ୍ୱାସୀ ରାଚାସ୍। ପାଉଲୁସ୍ ଆରୁ ଫିଲେମୋନ୍ସ୍ ବହୁତ୍ ବାନେ ସାଙ୍ଗେ ରାଚାର୍। ଫିଲେମୋନ୍ସ୍ ତାଙ୍ଘା ବାଡ଼୍କା ଆଡ଼୍ପାବନ୍ ମଣ୍ତ୍ଲୀଘି ଆରାଧାନାଘି ଲାଗାନ୍ ବେଭାର୍ କାମାଲିୟାସ୍।
ଫିଲେମୋନ୍ସ୍କି ଅଣ୍ଟା ଗୁତ୍ତିୟା ରାଚାସ୍, ଆସ୍କି ନାମେ ଅନେସିମୁସ୍ ରାଚା। ଆସ୍ ତାଙ୍ଘା ମାଲିକ୍ ଫିଲେମୋନ୍ସ୍କି ଆଡ଼୍ପାନ୍ତି ରୋମ୍ଗେ ବୁଙ୍ଗିଆସ୍ କେରାସ୍। ଆସାନ୍ ଆସ୍ ପାଉଲୁସ୍ସିନ୍ ଭେଁଟ୍ ମାନ୍ଚାସ୍। ପାଉଲୁସ୍ ଅନେସିମୁସ୍ସିନ୍ ବିଶ୍ୱାସୀ ମାନାଗେ ମଦେତ୍ କାମ୍ଚାସ୍। ଅନେସିମୁସ୍ ପ୍ରାଭୁସ୍କି ପାଛ୍ଲି-ପାଛ୍ଲି କାନାବାଲା ଆରୁ ପାଉଲୁସ୍କି ଅଣ୍ଟା ବାନେ ସାଙ୍ଗେ ମାନା ଅଙ୍କାଚାସ୍। ରୋମାନ୍ ନିୟମ୍ନୁ ଅଣ୍ଟା ବୁଙ୍କା ଗୁତ୍ତିୟାସିନ୍ ଯଦି ତାଙ୍ଘା ମାଲିକ୍ସ୍ ହାକ୍କୁନ୍ ପିଟାଚାଲିୟାସ୍। ପାଉଲୁସ୍କି ଲେଖ୍ଚ୍କା ଚିଠିଘି ମତ୍ଲବ୍ ଇଦ୍ କା ଆସ୍ ଅନେସିମୁସ୍ସିନ୍ ଫିଲେମୋନ୍ସ୍କି ଚାହାଗେ ତାଇୟାଲ୍ଦାସ୍ ଆରୁ ଫିଲେମୋନସ୍ସିନ୍ ଦିଲାସା ଚିଆଲ୍ଦାସ୍, ଏସ୍କେ କା ଆସ୍ ଅନେସିମୁସ୍ସିନ୍ ଅଣ୍ଟା ସାଙ୍ଗେ ଆରୁ ବିଶ୍ୱାସୀ ଭାଇସ୍ ଲେଖା ମାନସ୍।
ରୂପ୍-ରେଖା:
ଯୋହାର୍ ୧-୩
ଫିଲେମୋନ୍ସ୍କି ନାମେ କାମ୍ନା ୪-୭
ଅନେସିମୁସ୍କି ଲାଗାନ୍ ଆର୍ଜୀବିନ୍ତି ୮-୨୨
ଆଖ୍ରୀ କାତ୍ଥା ୨୩-୨୫
1ଯୋହାର୍
1ଏନ୍ ପାଉଲୁସ୍ ଆରୁ ଭାଇ ତୀମଥିଉସ୍ ଖ୍ରୀସ୍ତ୍ ଯୀଶୁସ୍କି ଲାଗାନ୍ ଜେହେଲ୍ନୁ ରାଦାମ୍। ଏନ୍ ଫିଲେମୋନ୍ସ୍କି ନାମେନୁ ଚିଠି ଲେଖାଲ୍ଦାନ୍, ଏକାସ୍ କା ନାହ୍ମାଏ ପ୍ୟାରା ଭାଇ ଆରୁ ସୁସାମାଚାର୍ ପ୍ରଚାର୍ କାମ୍ନା ନାଲ୍ଖୁନୁ ମଦେତ୍ କାମ୍ନାବାଲାସ୍। 2ଆରୁ ବୁହୁଣୀ ଆଫ୍ଫିୟା, ଆରୁ ନାହ୍ମାଗାନେ ସାହସ୍ତି ଖ୍ରୀସ୍ତ୍କି ସେବା କାମୁ ଆର୍ଖିପପ୍ସ୍ ଆରୁ ଫିଲେମୋନ୍ସ୍କି ଆଡ଼୍ପାନ୍ତା ମଣ୍ତ୍ଲୀଗେ: 3ନାହ୍ମାଏ ବାଙ୍ଗ୍ ପାର୍ମେଶ୍ୱାର୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ତାର୍ତି ନିମାଗେ କ୍ରିପା ଆରୁ ଶାନ୍ତି ହାଖ୍ର୍ତେ ରାନାଦ୍।
ପାଉଲୁସ୍କି ଧାନ୍ୟାବାଦ୍ ଆରୁ ବିନ୍ତି
4ଏନ୍ ଏଙ୍ଘା ବିନ୍ତିନୁ ନିଙ୍ଗାନ୍ ମନେ କାମ୍ଦାନ୍ ଆରୁ ଏନ୍ ଜାମାବାକେନ୍ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଦାନ୍, 5ଏନ୍ଦେର୍ଗେକା ଏନ୍ ଜାମା ପାବିତାର୍ ଆଲାର୍ଘି ଲାଗାନ୍ ନିଙ୍ଘାଏ ବାନେ ହାଖ୍ଖନା ଆରୁ ପ୍ରାଭୁ ଯୀଶୁସ୍କି ମିଆଁ ନିଙ୍ଘାଏ ବିଶ୍ୱାସ୍ଘି ବାରେ ମେନାଲ୍ଦାନ୍। 6ଏନ୍ ବିନ୍ତି କାମାଲ୍ଦାନ୍ କା ନିନ୍ ନିଙ୍ଘା ବିଶ୍ୱାସ୍ଘି ବାରେ ତେଙ୍ଗାଗେ ଫୁର୍ତ୍ତୀ ରା, ହାଲେ ନିନ୍ ଜାମା ବାନେ-ବାନେ ଜିନିଷ୍ବନ୍ ପୁରାପୁରୀ ବୁଝ୍ରା ଅଙ୍ଗୟ, ଏକାଦ୍ କା ଖ୍ରୀସ୍ତ୍କି ଇଚ୍ଛାନ୍ ଆଘ୍ଲି ବାଢ଼ାବାଗେ ନାହ୍ମା ମାଝାନୁ ଘାଟ୍ରାଲିଦ୍। 7ଏନ୍ଦେର୍ଗେକା ହେ ଭାଇ, ନିଙ୍ଘାଏ ଦ୍ୱାର୍ନୁ ପାର୍ମେଶ୍ୱାର୍ସ୍କି ଆଲାର୍ଘି ମନ୍ଦ୍ ଖୁସୀ ମାନ୍ଚାକେର୍କିଚି, ହୁଦ୍ଘିଲାଗାନ୍ ଏଙ୍ଗା ନିଙ୍ଘାଏ ବାନେ ହାଖ୍ଖନାନୁ ବହୁତ୍ ଖୁସୀ ଆରୁ ଦିଲାସା ହାଖ୍ର୍କିଚି।
ପାଉଲୁସ୍ ଅନେସିମୁସ୍କି ଲାଗାନ୍ ଆର୍ଜୀବିନ୍ତି କାମାଲ୍ଦାସ୍
8ଇଦ୍ଘିଲାଗାନ୍ ଏକା କାତ୍ଥାଦ୍ ଠିକ୍ ରାଇଦ୍, ଆଦ୍ଘି ବାରେନୁ ନିଙ୍ଗାନ୍ ହୁକୁମ୍ ଚିୟାଗେ ଖ୍ରୀସ୍ତ୍ସ୍କି ଖାସ୍ଚେଲା ମାନ୍ନାଘି ଲାଗାନ୍ ଏଙ୍ଘାଏ ବହୁତ୍ ସାହସ୍ ରାଇ, 9ହାଲେହି ଏନ୍ ପାଉଲୁସ୍ ଆକ୍କୁନ୍ ପାଚ୍କି ମାନା କାଲ୍ଦାନ୍ ଆରୁ ଆକ୍କୁନ୍ ଖ୍ରୀସ୍ତ୍ ଯୀଶୁକି ଲାଗାନ୍ ଜେହେଲ୍ନୁ ରାଦାନ୍, ହାଲେହି ଇଦ୍ ଏଙ୍ଗା ଆରୁହି ବାନେ ଆହ୍ତାରାଚା କା ଏନ୍ ପ୍ୟାର୍ତି ନିଙ୍ଗାନ୍ ଆର୍ଜୀବିନ୍ତି କାମନ୍। 10ଏନ୍ ନିଙ୍ଗାନ୍ ଅନୀସିମସ୍କି ଲାଗାନ୍ ଆର୍ଜୀବିନ୍ତି କାମାଲ୍ଦାନ୍, ଏକାସ୍ କା ବିଶ୍ୱାସ୍ନୁ ଏଙ୍ଘା ନିଜର୍ ହାଦ୍ଦୁସ୍ ଲେଖା ରାଚାସ୍, ଯେତ୍କବାକେନ୍ ଏନ୍ ଜେହେଲ୍ନୁ ରାଚ୍କାନ୍। 11ଆସ୍ତା ପହ୍ଲେ ନିଙ୍ଘାଏ ଏନ୍ଦେର୍ହି ନାଲ୍ଖୁଘି ମାଲ୍ଲାରୁସ୍, ଆକ୍କୁନ୍ ନିଙ୍ଘାଏ ଆରୁ ଏଙ୍ଘାଏ ନାହ୍ମା ଦୁଇ ଲୋକ୍ର୍ଘି ବହୁତ୍ ନାଲ୍ଖୁନୁ ବାରସ୍। 12ଏନ୍ ଅନେସିମୁସ୍ସିନ୍ ନିଙ୍ଘାସାନ୍ ତାଇୟାଲ୍ଦାନ୍ ଏକାସିନ୍ କା ଏନ୍ ମୁରୁକ୍ ବାନେ ହାଖ୍ଖଦାନ୍। 13ଆସିନ୍ ଏନ୍ ଏଙ୍ଘାସାନ୍ ଉଇୟାଗେ ସୋଚାଲ୍କାନ୍ କା ଯେତ୍କବାକେନ୍ ଏନ୍ ସୁସାମାଚାର୍ଘି ଲାଗାନ୍ ଜେହେଲ୍ନୁ ରାଚ୍କାନ୍, ତାକା ଆସ୍ ନିଙ୍ଘାଏ ବାଦ୍ଲା ଏଙ୍ଘା ସେବା କାମ୍ନାସ୍। 14ଲେକିନ୍ ଏନ୍ ନିଙ୍ଘା ବିନା ଇଚ୍ଛାତି ଏନ୍ଦେର୍ହି କାମାଗେ ମାଲ୍ଲା ଚାହୁଁନ୍, ତାକା ନିଙ୍ଘା ଏନ୍ଦ୍ରିନ୍ ବାନେ ନାଲ୍ଖୁ ଯବର୍ଜସ୍ତି ମାଲ୍ଲା ନିଜର୍ ଖୁସୀତି ମାନ୍ନାଦ୍।
15ଏନ୍ଦେର୍ଗେକା ମାନା ଅଙ୍ଗିକା ଅନେସିମୁସ୍ କେତ୍କ ଉଲ୍ଲାଘି ଲାଗାନ୍ତା ନିଙ୍ଘାସ୍ତି ଭିନେ ମାନ୍ଚାସ୍ କା ଆସ୍ ଜାମାବାକେନ୍ ନିଙ୍ଘାସାନ୍ ରସ୍। 16ଲେକିନ୍ ଆକ୍କୁନ୍ନ୍ତି ଗୁତ୍ତିୟାସ୍କି ଲେଖା ମାଲ୍ଲା ଗୁତ୍ତିୟାସ୍ତିହି ବାଢ଼୍ରିକିରି, ମତ୍ଲବ୍ ପ୍ୟାରା ଭାଇସ୍କି ଲେଖା ରାନାସ୍। ଏନ୍ ଆସିନ୍ ବହୁତ୍ ବାନେ ହାଖ୍ଖଦାନ୍, ଲେକିନ୍ ନିନ୍ ଆସିନ୍ ଆରୁ ବାଗ୍ଗେ ବାନେ ହାଖ୍ଖୟ। ଅଣ୍ଟା ଗୁତ୍ତିୟାସ୍ ଲେଖା ଖାଲି ମାଲ୍ଲା ଅଣ୍ଟା ଖ୍ରୀସ୍ତ୍ ବିଶ୍ୱାସୀ ଭାଇସ୍ ଲେଖା ବାନେ ହାଖ୍ଖୟ। 17ହୁଦ୍ଘିଲାଗାନ୍ ଯଦି ନିନ୍ ଏଙ୍ଗାନ୍ ନିଜର୍ ଭାଗିଦାର୍ ସୋଚ୍ଦାଏ, ତା ଏଙ୍ଗାନ୍ ଏସ୍କେ ଗ୍ରହନ୍ କାମ୍ଚ୍କାଏ ଆନ୍ନେ ଆସିନ୍ହି ଗ୍ରହନ୍ କାମା। 18ଆରୁ ଯଦି ଆସ୍ ନିଙ୍ଘାଏ ଏନ୍ଦ୍ରିନ୍ହି ହାନି କାମ୍ଚ୍କାଦାସ୍, ଚାହେ ଆସ୍କି ନିଙ୍ଗାଗେ ଏନ୍ଦ୍ରିନ୍ ଚିନାରାଇ, ତା ଏଙ୍ଘା ଖାତାନୁ ଲେଖାଚା। 19ଏନ୍ ପାଉଲୁସ୍ ଏଙ୍ଘା ହେଖ୍ଖାତି ଲେଖାଲ୍ଦାନ୍ କା ଏନ୍ ନିଜେ ଭାରନ୍ ଚିଅନ୍; ଆରୁ ନିନ୍ ମନେ କାମା କା ଏଙ୍ଘା ତାର୍ତି ବହୁତ୍ ବାଡ଼୍କା ଆର୍ଶୀବାଦ୍ ହାକ୍କାଦାଏ ଆରୁ ଏଙ୍ଘା ଦ୍ୱାର୍ନୁ ଖ୍ରୀସ୍ତ୍ ବିଶ୍ୱାସ୍ନୁ ବାର୍ଚ୍କାଦାଏ ଆରୁ ନିଙ୍ଗାଗେ ସବୁଦିନ୍ତା ଜୀବନ୍ ହାଖ୍ଖର୍କିଚି ହୁଦ୍ଘିଲାଗାନ୍ ଏନ୍ ନିଙ୍ଗାଗେ ଏନ୍ନେ ଲେଖ୍ଚ୍କାଦାନ୍। 20ହେ ଭାଇ, ଯୀଶୁ ଖ୍ରୀସ୍ତ୍କି ନାମେତି ଏଙ୍ଗାଗେ ନିଙ୍ଘାତାର୍ତି ଏନ୍ନେ ମଦେତ୍ କାମା ଆରୁ ଏଙ୍ଘା ମନ୍ବନ୍ ଉତ୍ସାହିତ୍ କାମା।
21ଏନ୍ ନିଙ୍ଘାଏ ହୁକୁମ୍ ମାନ୍ନାଘି ମିଆଁ ଭାର୍ଷା ଉଇୟିକିରି ନିଙ୍ଗାଗେ ଲେଖାଲ୍ଦାନ୍, ଆରୁ ଏନ୍ ଆହ୍ଦାନ୍ କା ନିଙ୍ଗାନ୍ ଏନ୍ ଯେତ୍କ ତେଙ୍ଗାଲ୍ଦାନ୍, ନିନ୍ ଆସ୍ତିହି, ବାଢ଼୍ରିକିରି କାମୟ, 22ଆରୁ ଇଦ୍ଘି ସାଙ୍ଗେ-ସାଙ୍ଗେ ଏଙ୍ଗାଗେ ରାଗେ ଆଡ୍ଡା ଯୋଗାଡ଼୍ କାମା। ଏନ୍ଦେର୍ଗେକା ଏଙ୍ଗା ଭାର୍ଷା ରାଇ କା ନିହ୍ମାଏ ବିନ୍ତିତି ଏନ୍ ନିହ୍ମାସାନ୍ ବାନେକିରି କନ୍।
ଇ ଚିଠିନୁ ଆଖ୍ରୀ ଯୋହାର୍
23ଏପାଫ୍ରାସ୍, ଏକାସ୍ କା ଖ୍ରୀସ୍ତ୍ ଯୀଶୁସ୍କି ଲାଗାନ୍ ଏଙ୍ଘାଗାନେ ଜେହେଲ୍ନୁ ରାଦାସ୍, ଆସ୍ ନିଙ୍ଗାନ୍ ଯୋହାର୍ ତେଙ୍ଗାଲ୍ଦାସ୍। 24ଆରୁ ମାର୍କୁସ୍ ଆରୁ ଆରିସ୍ତାର୍ଖସ୍ ଆରୁ ଦେମାସ୍ ଆରୁ ଲୁକାସ୍ ଏକାର୍ କା ଏଙ୍ଘାଗାନେ ନାଲ୍ଖୁ କାମ୍ନାଏ, ଆବ୍ଡ଼ାର୍ ନିଙ୍ଗାନ୍ ଯୋହାର୍ ବାଲ୍ନାଏ।
25ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍କି କ୍ରିପା ନିହ୍ମା ଜାମାର୍ଘି ଆତ୍ମାନୁ ମାନ୍ନାଦ୍। ଆମେନ୍।