ମାର୍କୁସ୍କି ଲେଖ୍ଚ୍କା ସୁସାମାଚାର୍
ବହିଘି ପରିଚୟ
ଇ ସୁସାମାଚାର୍ବନ୍ ମାର୍କୁସ୍ ନାମେଘି ଅଣ୍ଟା ଆଲାସ୍ ଲେଖ୍ଚ୍କାଦାସ୍। ଯେତ୍କବାକେନ୍ ଯୀଶୁସ୍ ଇ ଦୁନିଆଁନୁ ରାଚାସ୍ ହତ୍କବାକେନ୍ ବେହ୍ମରିୟା ଆଲାର୍ଘି ମିଆଁ ଦାୟା ଏଦିକିରି ଆସ୍ ଢେର୍ ଅଦ୍ଭୁତ୍ ନାଲ୍ଖୁ କାମ୍ଚାସ୍। ଆ ଅଦ୍ଭୁତ୍ ନାଲ୍ଖୁଘି ବର୍ଣ୍ଣନା ଇ ସୁସାମାଚାର୍ନୁ ପାଢ଼ା ଅଙ୍ଗର୍। ଆସ୍କି ହକ୍ ଆସ୍କି ଶିକ୍ଷାନୁ ଭୁତ୍ତୁଗୁଠି ଘି ମିଆଁ ତାଙ୍ଘା ହକ୍ ରାଚା, ଆରୁ ଆଲାର୍ଘି ପାପ୍ବନ୍ ଛେମା କାମାଗେ ବାର୍ଚ୍କାଦାସ୍। ଇନ୍ନୁ ଯୀଶୁସ୍ ନିଜ୍କେନିଜ୍ “ମୁନୁଷ୍କି ହାଦ୍ଦୁନ୍” ବୁଲି ତେଙ୍ଗ୍ର୍ଦାସ୍। ଆସ୍ ଇଦ୍ଘିଲାଗାନ୍ ବାର୍ଚାସ୍ କା ଆଲାରିନ୍ ପାପ୍ତି ବାଛାବାଗେ ତାଙ୍ଘା ନିଜର୍ ଜୀବନ୍ ଚିୟସ୍।
ମାର୍କୁସ୍ ଯୀଶୁସ୍କି ବଚନ୍ ଆରୁ ଶିକ୍ଷାଗୁଠିନ୍ ମାଲ୍ଲା ଲେକିନ୍ ତାଙ୍ଘା ନାଲ୍ଖୁନ୍ ଯୋର୍ ଚିଆଲ୍ଦାସ୍। ହୁଦ୍ଘିଲାଗାନ୍ ଆସ୍ ତାଙ୍ଘା କାତ୍ଥାବନ୍ ସିଧା, ସରଲ୍ ଆରୁ ପ୍ରଭାବ୍ଶାଲୀ ରୂପ୍ନୁ ବାତାବାଲ୍ଦାସ୍। ଆସ୍ନାନ୍ ଚିଉ ଯୋହାନ୍ସ୍ ଆରୁ ଯୀଶୁସ୍କି ଆସ୍ନାନ୍ ଆରୁ ଆସ୍କି ପରୀକ୍ଷାଘି ବାରେନୁ ଅଣ୍ଟା ଛୋଟେ ଭୂମିକାଘି ପାଛ୍ଲି, ଲେଖକସ୍ ହୁଙ୍ଗେନିନ୍ ଯୀଶୁସ୍କି ବାନେ କାମ୍ନା ଆରୁ ଶିକ୍ଷା ଚିନାଘି ସେବା ନାଲ୍ଖୁଘି ବର୍ଣ୍ଣନା କାମାଗେ ଲାଗ୍ଗଦାସ୍। ଏସ୍କେ-ଏସ୍କେ ସାମାୟ ବିତ୍ର୍ତେ କେରା ଆନ୍ନେ-ଆନ୍ନେ ଯୀଶୁସ୍କି ଅନୁସରଣ୍ କାମୁ ଆଲାର୍ ଆସିନ୍ ଆରୁ ବାନେକିରି ବୁଝ୍ର୍ନାତି କେରାର୍, ଲେକିନ୍ ଯୀଶୁସ୍କି ବିରୋଧି ଜାମାର୍ ଆରୁ ବାଗ୍ଗେ ଖୀସାରାତେ କେରାର୍। ଆଖ୍ରୀ ଅଧ୍ୟାୟନୁ ଯୀଶୁସ୍କି ଦୁନିଆଁନୁ ରାନାବାକେନ୍ ତା ଜୀବନ୍ଘି ଆଖ୍ରୀ ହାପ୍ତାଘି ଘାଟ୍ଣାଘି ବାରେନୁ ତେଙ୍ଗାଲ୍ଦାସ୍। ଏକାନୁ କା ମୁଖ୍ୟା-ମୁଖ୍ୟା ଘାଟ୍ଣା ରାଇଦ୍, ଆସ୍କି କ୍ରୁଶ୍ନୁ ଠୋକ୍ନାନ୍ ଆରୁ, ଆରୁଅହନ୍ ଉଜ୍ଜନା। ଆରୁ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ପୁରା ଦୁନିଆଁନୁ କାଇକିରି ଜାମା ମୁନୁଷ୍ ଜାତିୟାରିନ୍ ସୁସାମାଚାର୍ ଶୁଣାବା। ନେଦ୍ ବିଶ୍ଵାସ୍ କାମିକିରି ଆସ୍ନାନ୍ ହର୍ ଆବ୍ଡ଼ାର୍ ମୁକ୍ତି ହାଖ୍ଖର୍, ଲେକିନ୍ ନେଦ୍ ବିଶ୍ଵାସ୍ ମା କାମର୍ ଆବ୍ଡ଼ାରିନ୍ ଦୋଷୀ ଠାହ୍ରା କୋ, ଇଦ୍ଘି ଅନୁସାର୍ ଚେଲାଜାମାର୍ ଜାମାତାରା କାଇକିରି ସୁସାମାଚାର୍ ଶୁଣାବାଗେ ଲାଗ୍ଗିୟାର୍, ଆରୁ ପ୍ରାଭୁସ୍ ତାହ୍ମାଗାନେ ରାଚାସ୍, ଆରୁ ଆବ୍ଡ଼ାର୍ ଏନ୍ଦେର୍ ଏନ୍ଦେର୍ ଅଦ୍ଭୁତ୍ ନାଲ୍ଖୁ କାମ୍ଚାର୍, ଆବ୍ଡ଼ାର୍ଘି ଦ୍ୱାର୍ନୁ ଆଲାର୍ଗେ ପାତା ଚାଲ୍ରାକେରାକା ଆସ୍ ଏକା ସନ୍ଦେଶ୍ବନ୍ ତେଙ୍ଗାଲିୟାସ୍ ଆ ସନ୍ଦେଶ୍ ସତ୍ତୁ ରାଚା। ଆନ୍ନେନିନ୍ ନାମ୍ ସୁସାମାଚାର୍ବନ୍ ଦୁନିଆଁଘି ଜାମା ଜାତିୟାର୍ସାନ୍ ଶୁଣାବତ୍ ଆରୁ ଯୀଶୁସ୍ ନାହ୍ମାଗାନେ ରସ୍।”
ରୂପ୍-ରେଖା
ସୁସାମାଚାର୍ଘି ସୁରୁ ୧:୧-୧୩
ଗାଲିଲୀନୁ ଯୀଶୁସ୍କି ଆଲାରିନ୍ ସେବା କାମ୍ନା ୧:୧୪—୯:୫୦
ଗାଲିଲୀନ୍ତି ଯେରୁଶାଲେମ୍ତକ୍ କାନା ୧୦:୧-୫୨
ଯେରୁଶାଲେମ୍ନୁ ଆଖ୍ରୀ ହାପ୍ତା ୧୧:୧—୧୫:୪୭
ଯୀଶୁସ୍କି ଉଜ୍ଜନା ୧୬:୧-୮
ଉଜ୍ଜକା ପ୍ରାଭୁସ୍କି ଏଥ୍ର୍ନା ଆରୁ ସରଗ୍ ତାରା କାନା ୧୬:୯-୨୦
1ପ୍ରାଭୁ ଯୀଶୁସ୍କି ବାର୍ନାଘି ତିୟାରି
(ମାତିସ୍ ୩:୧-୧୨; ଲୁକାସ୍ ୩:୧-୧୮; ଯୋହାନ୍ ୧:୧୯-୨୮)
1ପାର୍ମେଶ୍ଵାର୍ସ୍କି ହାଦ୍ଦୁ ଯୀଶୁ ଖ୍ରୀସ୍ତ୍କି ସୁସାମାଚାର୍ଦ୍ ଏନ୍ନେ ପ୍ରକାର୍ଘି ସୁରୁ ମାନିଦ୍। 2ଇଶାୟାହ୍ସ୍ ନାବୀସ୍ ପାବିତାର୍ ଶାସ୍ତ୍ରନୁ ଲେଖ୍ଚ୍କାଦାସ୍, ପାର୍ମେଶ୍ଵାର୍ସ୍ ତେଙ୍ଗିୟାସ୍, “ଏରା ଏଙ୍ଘା ସନ୍ଦେଶ୍ ଚିଉସିନ୍ ନିଙ୍ଘା ଆଘ୍ଲି ତାଇୟାଲ୍ଦାନ୍, ଏକାସ୍ କା ନିଙ୍ଘା ବାର୍ନାଘି ଲାଗାନ୍ ପାବୁ ତିୟାର୍ କାମସ୍। 3ଆସ୍ ଶୁନ୍ଶାନ୍ ଆଡ୍ଡାନୁ ରାଇକିରି ଉଚ୍ଚା ଶବଦ୍ନୁ ତେଙ୍ଗସ୍ ଏସ୍କେ କା ବାଡ଼୍କା ଆଲାସ୍କି ବାର୍ନା ବାକେନ୍ ପାବୁ ତିୟାର୍ କାମ୍ଦାତ୍, ଆନ୍ନେ ନିଜର୍ ମନ୍ବନ୍ ତିୟାର୍ କାମା ଏନ୍ଦେର୍ଗେକା ପ୍ରାଭୁସ୍ ବାର୍ନାବାଲା ରାଦାସ୍।”
4ଇ ଭବିଷତ୍ କାତ୍ଥାଘି ଦ୍ୱାର୍ନୁ ଆସ୍ନାନ୍ ଚିଉ ଯୋହାନ୍ସ୍ ଶୁନ୍ଶାନ୍ ଆଡ୍ଡାନୁ ଇଜ୍ଜାସ୍ ଆରୁ ଆଲାର୍ଗେ ଉପ୍ଦେଶ୍ ଚିଚ୍ଚାସ୍ କା ନିମ୍ ନିହ୍ମା ପାପ୍ଘି ଲାଗାନ୍ ପାସ୍ତାରାଇକିରି ଆସ୍ନାନ୍ ହୁଆତା ପାର୍ମେଶ୍ଵାର୍ସ୍ ନିହ୍ମା ଜାମା ପାପ୍ବନ୍ ଛେମା କାମସ୍। 5ୟାହୁଦା ପ୍ରଦେଶ୍ତା ଆରୁ ଯେରୁଶାଲେମ୍ ସହର୍ତା ଢେର୍ ଆଲାର୍ ଯୋହାନ୍ସ୍କି ଚାହାଗେ ବାରାଲିୟାର୍ ଆରୁ ନିଜର୍ନିଜର୍ ପାପ୍ ଗ୍ରହନ୍ କାମିକିରି ଯାର୍ଦାନ୍ ଯୋଡ଼ୁନୁ ଆସ୍ନାନ୍ ହୁଆଲିୟାର୍। 6ଯୋହାନ୍ସ୍ ଉଁଟ୍ଘି ଚୁଟ୍ଟିତି ତିୟାର୍ ମାନ୍ଚ୍କା ଚିଢ଼ା ଆତ୍ତାଲିୟାସ୍ ଆରୁ କାଡ଼୍ମାନୁ ଚାପ୍ଟାଘି କାସ୍ନା ହିଁରାଲିୟାସ୍, ଆସ୍ ବଖ୍ଖୋ ମହାଁଲିୟାସ୍ ଆରୁ ଜଙ୍ଗଲ୍ ତା ତିନିରାସେ ହାପ୍ପାଲିୟାସ୍। 7ଆସ୍ ତାଙ୍ଘା ଉପ୍ଦେଶ୍ନୁ ତେଙ୍ଗାଲିୟାସ୍, “ଏକାସ୍ ଏଙ୍ଘା ପାଛ୍ଲି ବାର୍ନାବାଲା ରାଦାସ୍, ଆସ୍ ଏଙ୍ଘାସ୍ତି ଢେର୍ ମାହାନ୍ ରାଦାସ୍; ଏନ୍ତା ନୁହିଁକିରି ଆସ୍କି ଜୁତାଘି ଫିତା ଖୋଲ୍ନାଘିହି ଲାଇଗ୍ ମାଲ୍ଦାନ୍। 8ଏନ୍ ନିମାନ୍ ଆମ୍ମୁତି ଆସ୍ନାନ୍ ଚିଆଲ୍ଦାନ୍ ଲେକିନ୍ ଆସ୍ ନିମାନ୍ ପାବିତାର୍ ଆତ୍ମାତି ଆସ୍ନାନ୍ ଚିୟସ୍।”
ପ୍ରାଭୁ ଯୀଶୁସ୍କି ଆସ୍ନାନ୍ ଆରୁ ପରୀକ୍ଷା
(ମାତିସ୍ ୩:୧୩—୪:୧୧; ଲୁକାସ୍ ୩:୨୧,୨୨; ୪:୧-୧୩)
9ହୁ ସାମାୟନୁ ଯୀଶୁସ୍ ଗାଲିଲୀ ପ୍ରଦେଶ୍ତା ନାଜ୍ରେତ୍ ପାଡ଼ାନ୍ତି ବାରିକିରି ଆସ୍ ଯାର୍ଦାନ୍ ଯୋଡ଼ୁନୁ ଯୋହାନ୍ସ୍ତି ଆସ୍ନାନ୍ ଅଚ୍ଚାସ୍। 10ଆଖାନେନ୍ ଆସ୍ ଆମ୍ମୁତି ଉର୍ଖିୟାସ୍ ତା ଆକାଶ୍ ଖୋଲ୍ରା କେରା ଆରୁ ପାବିତାର୍ ଆତ୍ମାଦ୍ ପେର୍ୱାଁଘି ରୂପ୍ନୁ ତାଙ୍ଘା ମିଆଁ ଏତ୍ତନାନ୍ ଏରିୟାସ୍। 11ଆରୁ ଆକାଶ୍ତି ଏନ୍ନେ ଶବଦ୍ ମେନ୍ଦ୍ରାଦ୍ କା, “ନିନ୍ ଏଙ୍ଘାଏ ଦୁଲାଡ଼ି ହାଦ୍ଦୁୟ, ଏନ୍ ନିଙ୍ଘା ମିଆଁ ବହୁତ୍ ଖୁସ୍ ରାଦାନ୍।”
12ଆସ୍ନାନ୍ ଅଚ୍ଚକା ପାଛ୍ଲି ଆତ୍ମାଦ୍ ଯୀଶୁସିନ୍ ଶୁନ୍ଶାନ୍ ଆଡ୍ଡାଗେ ଅଚ୍ଚାକେରା। 13ଆସ୍ ଚାଲିଶ୍ ଦିନ୍ତକ୍ ଶୁନ୍ଶାନ୍ ଆଡ୍ଡାନୁ ରାଚାସ୍ ଆରୁ ଶାଏତାନ୍ଦ୍ ଆସିନ୍ ବିଡ଼୍ଚେ ଏରିୟାଦ୍; ଆସ୍ ହାର୍ବୁନ୍ତା ପଶୁର୍ଗାନେ ରାଲିୟାସ୍ ଆରୁ ସରଗ୍ଦୂଁତ୍ଜାମାର୍ ତାଙ୍ଘା ସେବା କାମାଲିୟାର୍।
ଯୀଶୁସ୍ ତାଙ୍ଘା ସେବା ନାଲ୍ଖୁ ସୁରୁ କାମାଲ୍ଦାସ୍
(ମାତିସ୍ ୪:୧୨-୧୭; ଲୁକାସ୍ ୪:୧୪,୧୫)
14ଯୋହାନ୍ସିନ୍ ହେରୋଦ୍ସ୍ ବନ୍ଦୀ କାମ୍ଚ୍କା ପାଛ୍ଲି ଯୀଶୁସ୍ ଗାଲିଲୀ ପ୍ରଦେଶ୍ଗେ ବାର୍ଚାସ୍ ଆରୁ ଏନ୍ନେ ତେଙ୍ଗିକିରି ପାର୍ମେଶ୍ଵାର୍ସ୍କି ସୁସାମାଚାର୍ ଶୁଣାବାଗେ ଲାଗ୍ଗିୟାସ୍। 15ଆରୁ ଆସ୍ ତେଙ୍ଗିୟାସ୍, “ପାର୍ମେଶ୍ଵାର୍ସ୍କି ସାମାୟ ପୁରା ମାନ୍ଚାକେର୍କିଚି, ଆରୁ ପାର୍ମେଶ୍ଵାର୍ସ୍କି ରାଜୀଦ୍ ଚାହାନୁ ବାର୍ଚା କେର୍କିଚି। ନିମ୍ ପାସ୍ତାରାଇକିରି ସୁସାମାଚାର୍ନୁ ବିଶ୍ୱାସ୍ କାମା।” 16ଅନ୍ଦୁଲ୍ ଯୀଶୁସ୍ ଗାଲିଲୀ ହଁସ୍ରା ଖାଁଣିନୁ କାନାବାକେନ୍ ଶିମୋନ୍ ଆରୁ ତାଙ୍ଘା ଭାଇ ଆନ୍ଧ୍ରିୟାସ୍ସିନ୍ ଏରିୟାସ୍। ଆବ୍ଡ଼ାର୍ ହଁସ୍ରାନୁ ଫିକା ଜାଲ୍ଲି ଆଚ୍ଛାଲିୟାର୍, ଏନ୍ଦେର୍ଗେକା ଆବ୍ଡ଼ାର୍ କେଉଁଟା ରାଚାର୍। 17ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏଙ୍ଘା ପାଛ୍ଲି ବାରା ଏନ୍ ନିମାନ୍ ଇଞ୍ଜୋ ଧାର୍ନାଘି ବାଦ୍ଲା ଆଲାରିନ୍ ଏସ୍କେ ଏଙ୍ଘା ଚେଲା କାମର୍ ଆବନ୍ ଶିଖାବନ୍।” 18ଆରୁ ହୁଙ୍ଗେନିନ୍ ଆବ୍ଡ଼ାର୍ ଜାଲ୍ଲିବନ୍ ଆମ୍ଵିକିରି ଆସ୍କି ପାଛ୍ଲି-ପାଛ୍ଲି କେରାର୍। 19କାଟେ ଆଘ୍ଲି କେର୍କାନ୍ତିନ୍, ଯୀଶୁସ୍ ଜେବେଦୀସ୍କି ଯୋଡ଼େ ହାଦ୍ଦୁ ୟାକୁବ୍ ଆରୁ ଯୋହାନ୍ସିନ୍ ଏରିୟାସ୍, ଆବ୍ଡ଼ାର୍ ତାହ୍ମା ଡଙ୍ଗାନୁ ଅକ୍କିକିରି ଜାଲ୍ଲିବନ୍ ସାଜାବାଲିୟାର୍ । 20ଯୀଶୁସ୍ ହୁଙ୍ଗେନିନ୍ ଆବ୍ଡ଼ାରିନ୍ ମେହିଁୟାସ୍ ଆରୁ ଆବ୍ଡ଼ାର୍ ତାମ୍ଵା ଜେବେଦୀସିନ୍ ଗୁତ୍ତିୟାର୍ଗାନେ ଡଙ୍ଗାନୁ ଆମ୍ଵିକିରି ଆସ୍କି ପାଛ୍ଲି-ପାଛ୍ଲି କେରାର୍।
ଯୀଶୁସ୍ ଭୁତ୍ତୁ ଲାକ୍କା ଆଲାସିନ୍ ବାନେ କାମାଲ୍ଦାସ୍
21ଯୀଶୁସ୍ ଆରୁ ତାଙ୍ଘା ଚେଲାଜାମାର୍ କାଫାର୍ନାହୁମ୍ ସହର୍ଗେ କେରାର୍। ଆରୁ ଯେତ୍କବାକେନ୍ ପାବିତାର୍ ଉଲ୍ଲା ବାର୍ଚାତା ଯୀଶୁସ୍ ସାଭା ଆଡ଼୍ପାଗେ କାଇକିରି ଉପ୍ଦେଶ୍ ଚିୟାଗେ ସୁରୁ କାମ୍ଚାସ୍। 22ଆଲାର୍ ଆସ୍କି ଉପ୍ଦେଶ୍ ମେନିକିରି ଆଚ୍ମିତ୍ ମାନାକାଲିୟାର୍; ଏନ୍ଦେର୍ଗେକା ଆସ୍ ୟାହୁଦୀ ପଣ୍ତିତ୍ଜାମାର୍ଘି ଲେଖା ଉପ୍ଦେଶ୍ ମାଲ୍ଲା ଚିଉସ୍, ଲେକିନ୍ ହକ୍ତି ଉପ୍ଦେଶ୍ ଚିଆଲିୟାସ୍। 23ଆ ସାଭା ଆଡ଼୍ପାନୁ ଭୁତ୍ତୁ ଲାକ୍କା ଅଣ୍ଟା ଆଲାସ୍ ରାଚାସ୍, ଆସ୍ ଜୋର୍ସେ ଚିର୍ରା ରାଇକିରି ତେଙ୍ଗିୟାସ୍, 24“ହେ ନାଜ୍ରେତ୍ ସହର୍ତା ଯୀଶୁ, ନିଙ୍ଘାଗାନେ ଏହ୍ମାଏ ଏନ୍ଦେର୍ ସମ୍ବନ୍ଧ ରାଇଦ୍? ନିନ୍ ଏମାନ୍ ସର୍ବନାଶ୍ କାମାଗେ ବାର୍ଚ୍କାଦାଏ କାଁଏ? ଏନ୍ ଆହାଲ୍ଦାନ୍ କା ନିନ୍ ନେଦ୍, ନିନ୍ ପାର୍ମେଶ୍ଵାର୍ସ୍କି ତାଏକା ଆ ପାବିତାର୍ ଆଲାଏ।” 25ଯୀଶୁସ୍ ଏନ୍ନେ ତେଙ୍ଗିକିରି ଆସିନ୍ ଧାମ୍କାଚାସ୍, “କାଡ଼େ-କାଡ଼େ ରା; ଇ ଆଲାସ୍ସ୍ତି ଉର୍ଖୁ କାଲ୍”। 26ଭୁତ୍ତୁଦ୍ ଆ ଆଲାସିନ୍ ଆଇଁଠିକିରି, ଜୋର୍ସେ ଚିର୍ରାରାତେ ଆସ୍ତି ଉର୍ଖିୟା କେରା। 27ଇବନ୍ ଏରିକିରି ଆସ୍ତା ରୁ ଜାମା ଆଲାର୍ ଆଚ୍ମିତ୍ ମାନ୍ଚାର୍ କେରାର୍, ଆରୁ ତାମ୍-ତାମ୍ କାଚ୍ନେଖ୍ରା ଲାଗ୍ଗିୟାର୍ କା, “ଇଦ୍ ଏସ୍କେ ମାନା ଅଙ୍ଗଦ୍ ଇଦ୍ ତା ଅଣ୍ଟା ପୁନା କାତ୍ଥାଦ୍। ଇସ୍ତା ହକ୍ତି ତେଙ୍ଗ୍ଦାସ୍ ଆରୁ ଭୁତ୍ତୁଗୁଠିନ୍ହି ହୁକୁମ୍ ଚିଦାସ୍ ଆରୁ ଆବ୍ଡ଼ାଦ୍ହି ତାଙ୍ଘା ହୁକୁମ୍ବନ୍ ମେନିଦ୍।” 28ଆରୁ ଯୀଶୁସ୍କି ଇ ନାଲ୍ଖୁଘି ସାମାଚାର୍ଦ୍ ଗାଲିଲୀ ପ୍ରଦେଶ୍ନୁ ଜାମାତାରା ଫାଏଲାରାଚା କେରା।
ଯୀଶୁସ୍ ଢେର୍ ଆଲାରିନ୍ ବାନେ କାମାଲ୍ଦାସ୍
(ମାତିସ୍ ୮:୧୪-୧୭; ଲୁକାସ୍ ୪:୩୮-୪୧)
29ଯୀଶୁସ୍ ହୁଙ୍ଗେନିନ୍ ସାଭା ଆଡ଼୍ପାନ୍ତି ଉର୍ଖିକିରି, ୟାକୁବ୍ ଆରୁ ଯୋହାନ୍ସ୍ଗାନେ ସିଧା ଶିମୋନ୍ ଆରୁ ଆନ୍ଧ୍ରିୟାସ୍କି ଆଡ଼୍ପାଗେ କେରାର୍। 30ଶିମୋନ୍ସ୍କି ଶାଶ୍ଦ୍ ନାଣିତି ଚୁତ୍କିଚା, ହୁଙ୍ଗେନିନ୍ ତାହ୍ମା ଆଡ଼୍ପାନ୍ତାର୍ ଆଦ୍ଘି ବାରେନୁ ଯୀଶୁସିନ୍ ତେଙ୍ଗିୟାର୍। 31ଯୀଶୁସ୍ ଆଦ୍ଘି ଚାହାଗେ କେରାସ୍ ଆରୁ ଆଦ୍ଘି ହେଖ୍ଖାନ୍ ଧାରିକିରି ଉଠାବାଚାସ୍; ଆରୁ ତାଙ୍ଘା ନାଣିଦ୍ ଏତ୍ତିୟାକେରା, ଆରୁ ଆଦ୍ ଆବ୍ଡ଼ାର୍ଘି ସେବା କାମାଗେ ଲାଗ୍ଗିୟାଦ୍।
32ବିଡ଼ି ଅକ୍କନାବାକେନ୍ ଆଲାର୍ ଜାମା ବେହ୍ମରିୟା ଆରୁ ଭୁତ୍ତୁ ଲାକ୍କା ଆଲାରିନ୍ ଯୀଶୁସ୍କି ଚାହାଗେ ଅନ୍ଦ୍ରାଗେ ଲାଗ୍ଗିୟାର୍। 33କାଫାର୍ନାହୁମ୍ତା ଢେର୍ ଆଲାର୍ ଆଡ଼୍ପାଘି ଘୁମାନୁ ଠୁଡ଼ିୟାରାଚାର୍। 34ଯୀଶୁସ୍ ନାନ୍ନା-ନାନ୍ନା ବେମାର୍ନୁ ରୁ ଢେର୍ ଆଲାରିନ୍ ବାନେ କାମ୍ଚାସ୍, ଆରୁ ଢେର୍ ଆଲାର୍ସ୍ତି ଭୁତ୍ତୁଗୁଠିନ୍ ଅଥ୍ରାସ୍, ଆସ୍ ଭୁତ୍ତୁଗୁଠିନ୍ କାଚ୍ନେଖ୍ରାଗେ ମାନା କାମାଲିୟାସ୍, ଏନ୍ଦେର୍ଗେକା ଭୁତ୍ତୁଗୁଠିଦ୍ ଆସିନ୍ ଚିହ୍ନାଲିୟାଦ୍। 35ଆଦ୍ଘି ନାନ୍ନୁ ଉଲ୍ଲା ଯୀଶୁସ୍ ଭୋର୍ ପାଇରିନ୍ ଉହା ରାତେ ଉସ୍କାରାଇକିରି ଆଡ଼୍ପାନ୍ତି ଉର୍ଖିୟାସ୍, ଆରୁ ଅଣ୍ଟା ଶୁନ୍ଶାନ୍ ଆଡ୍ଡା କେରାସ୍ ଆରୁ ଆସାନ୍ ବିନ୍ତି କାମା ଲାଗ୍ଗିୟାସ୍। 36ଯୀଶୁସିନ୍ ବେଦ୍ଦାଗେ ଶିମୋନ୍ ଆରୁ ତାଙ୍ଘା ସାଙ୍ଗେର୍ କେରାର୍। 37ଯେତ୍କବାକେନ୍ ଯୀଶୁସିନ୍ ହାଖ୍ଖୀୟାର୍ ତା ଆବ୍ଡ଼ାର୍ ତେଙ୍ଗିୟାର୍, “ଜାମାର୍ ନିମାନ୍ ବେଦ୍ଦାଲ୍ନାଏ”। 38ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଗୁଚା ନାମ୍ ଚାହାଚାହାନ୍ତା ପାଡ଼ାଗେ କତ୍ ଆସାନ୍ହି ଏଙ୍ଗାଗେ ସୁସାମାଚାର୍ ଶୁଣାବାନା ରାଇଦ୍, ହୁଦ୍ଘିଲାଗାନ୍ ତା ଏନ୍ ବାର୍ଚ୍କାଦାନ୍।” 39ଯୀଶୁସ୍ ଗାଲିଲୀ ପ୍ରଦେଶ୍ତା ପାଡ଼ାଗୁଠିନୁ କାଇକିରି ତାହ୍ମା ସାଭା ଆଡ଼୍ପାନୁ ସୁସାମାଚାର୍ ଶୁଣାବାଚାସ୍ ଆରୁ ଆଲାର୍ସ୍ତିହି ଭୁତ୍ତୁଗୁଠିନ୍ ଅଥ୍ରାସ୍।
ଅଣ୍ଟା କୋଢ଼୍ ବେହ୍ମରିୟାସିନ୍ ଯୀଶୁସ୍ ବାନେ କାମାଲ୍ଦାସ୍
(ମାତିସ୍ ୮:୧-୪; ଲୁକାସ୍ ୫:୧୨-୧୬)
40ଅଣ୍ଟା କୋଢ଼୍ ବେହ୍ମରିୟାସ୍ ଯୀଶୁସ୍କି ଚାହାଗେ ବାର୍ଚାସ୍, ଆରୁ ହାଁଠୁୱାରାଇକିରି ଆର୍ଜୀବିନ୍ତି କାମ୍ତେ ତେଙ୍ଗିୟାସ୍, “ନିମ୍ ଚାହଁର୍ ହାଲେ ଏଙ୍ଗାନ୍ ଶୁଦ୍ଧ୍ କାମା ଅଙ୍ଗର୍।” 41ଯୀଶୁସ୍କେ ଆସ୍କି ମିଆଁ ମୁରୁକ୍ ସୋଗ୍ଗେ ଲାଗ୍ଗିୟା। ଆସ୍ ହେଖ୍ଖା ଲାମ୍ଵାବାଇକିରି, ଆସିନ୍ ଏସ୍ରାସ୍ ଆରୁ ତେଙ୍ଗିୟାସ୍, “ଏନ୍ ଚାହାଁଲ୍ଦାନ୍ କା ନିନ୍ ଶୁଦ୍ଧ୍ ମାନାକାଲା।” 42ଆରୁ ଆଖାନେନ୍ ଆସ୍କି କୋଢ଼୍ ବେମାର୍ ଆସ୍ତି ହାଟ୍ରାକେରା, ଆରୁ ଆସ୍ ବାନେ ମାନ୍ଚାସ୍କେରାସ୍। 43ଇ ଘାଟ୍ଣାଘି ବାରେନୁ ନେକାନ୍ହି ମା ତେଙ୍ଗାଗେ ଯୀଶୁସ୍ ଆସିନ୍ ଚେତାବାନୀ ଚିଇକିରି ବିଦା କାମ୍ଚାସ୍। 44ଆରୁ ଆସିନ୍ ତେଙ୍ଗିୟାସ୍, “ଏନ୍ ଏକା ନାଲ୍ଖୁନ୍ କାମ୍ଚ୍କାଦାନ୍ ଆଦ୍ଘି ବାରେନୁ ନେକାନ୍ହି ଏନ୍ଦେର୍ହି ଆମ୍କେ ତେଙ୍ଗା, ଲେକିନ୍ କାଇକିରି ନିଜ୍କେ ପୁରୋହିତ୍ସିନ୍ ଏଦା, ଆରୁ ଶୁଦ୍ଧ୍ ମାନ୍ନାଘି ବାରେନୁ ମୁଶା ନାବୀସ୍ ପାବିତାର୍ ଶାସ୍ତ୍ରନୁ ଏକା ନିୟମ୍ବନ୍ ଲେଖ୍ଚ୍କାଦାସ୍ ଆବନ୍ ଚାଢ଼ାବା, ଏନ୍ଦେର୍ଗେକା ଆଦ୍ ଆଲାର୍ଘି ଆଘ୍ଲି ସାକ୍ଷୀ ମାନଦ୍ କା ନିନ୍ ବାନେ ମାନ୍ଚ୍କାଏ କେର୍କାଦାଏ।” 45ଲେକିନ୍ ଆସ୍ ହୁସ୍ତି ଉର୍ଖିକିରି ଯୀଶୁସ୍ ନିଙ୍ଘା ଲାଗାନ୍ ଏନ୍ଦେର୍ କାମ୍ଚ୍କାଦାସ୍, ଆଦ୍ଘି ବାରେନୁ ଜାମାରିନ୍ ତେଙ୍ଗିୟାସ୍ ଆରୁ ଇ ଖବର୍ ଜାମାତାରା ଫାଏଲାରାଚା କେରା ହୁଦ୍ଘିଲାଗାନ୍ ଏକା ସହର୍ଗେହି ଯୀଶୁସ୍ ଖୁଲାଖୁଲି କାଲା ପଲ୍ଲିୟାସ୍। ହୁଦ୍ଘିଲାଗାନ୍ ଯୀଶୁସ୍ ପାଡ଼ାନ୍ତି ଗେଚ୍ଛା ଶୁନ୍ଶାନ୍ ଆଡ୍ଡାନୁ ରାଗେ ଲାଗ୍ଗିୟାସ୍, ହାଲେହି ଚାର୍ହିପାଖାନ୍ତି ଆଲାର୍ ତାଙ୍ଘା ଚାହାଗେ ବାର୍ତେ ରାଚାର୍।
2ଯୀଶୁସ୍ ଅଣ୍ଟା ଏକ୍ଆଙ୍ଗିୟା ବେହ୍ମରିୟାସିନ୍ ବାନେ କାମାଲ୍ଦାସ୍
1ଆନ୍ତିନ୍ କେତ୍କ ଉଲ୍ଲାଘି ପାଛ୍ଲି ଗାଲିଲୀନ୍ତି ଯୀଶୁସ୍ ଆରୁଅହନ୍ କାଫାର୍ନାହୁମ୍ ସହର୍ଗେ କିର୍ରିୟାସ୍ ତା ଯୀଶୁସ୍ ଆଡ଼୍ପାନୁ ବାର୍ଚ୍କାଦାସ୍ ଆ ଖବର୍ ପାଡ଼ାନୁ ଫାଏଲାରାଚା କେରା। 2ଆରୁ ଆଲାର୍ଘି ଭିଡ଼୍ ଏତ୍କ ମାନ୍ଚାକେରା ଯେ ଘୁମାନୁ କରାଗେହି ଆଡ୍ଡା ମାଲ୍ଲାରୁଦ୍; ଯୀଶୁସ୍ ଆବ୍ଡ଼ାର୍ସାନ୍ ବଚନ୍ ପ୍ରଚାର୍ କାମାଗେ ଲାଗ୍ଗିୟାସ୍। 3ହତ୍କବାକେନ୍ ଚାର୍ ଲୋକ୍ ଆଲାର୍ ଅଣ୍ଟା ଏକ୍ଆଙ୍ଗିୟା ବେହ୍ମରିୟାସିନ୍ ଆସାନ୍ ଧାରିକିରି ଅନ୍ଦ୍ରାର୍। 4ଲେକିନ୍ ଭିଡ଼୍ଘି ଲାଗାନ୍ ଆବ୍ଡ଼ାର୍ ଯୀଶୁସ୍କି ଚାହାଗେ ହୁଆଗେ ପଲ୍ଲିୟାର୍, ହୁଦ୍ଘିଲାଗାନ୍ ଏକାସାନ୍ ଯୀଶୁସ୍ ରାଚାସ୍, ଆସ୍ତା ମିଁତା ଖାପ୍ରା ଆରୁ ବାତ୍ତାବନ୍ ପାଖିୟାଚାର୍; ଆରୁ ଆ ଭଙ୍କାନୁ ଏକ୍ଆଙ୍ଗିୟା ବେହ୍ମରିୟାସିନ୍ ନାଟ୍ରୁଗାନେ ଏତ୍ତାଚାର୍। 5ଯୀଶୁସ୍ ଆବ୍ଡ଼ାର୍ଘି ବିଶ୍ଵାସ୍ବନ୍ ଏରିକିରି ଆ ଏକ୍ଆଙ୍ଗିୟା ବେହ୍ମରିୟାସିନ୍ ତେଙ୍ଗିୟାସ୍, “ହେ ବାବୁ, ନିଙ୍ଘା ପାପ୍ ଛେମା ମାନ୍ଚାକେରା ।” 6ଆସାନ୍ କେତ୍କ ୟାହୁଦୀ ପଣ୍ତିତ୍ଜାମାର୍ ଅକ୍କାଚାର୍, ଆରୁ ଆବ୍ଡ଼ାର୍ ନିଜର୍-ନିଜର୍ ମନ୍ନୁ ସୋଚାଲିୟାର୍ କା, 7“ଇ ଆଲାସ୍ ଏନ୍ନେ ଏନ୍ଦେର୍ଗେ ତେଙ୍ଗାଲ୍ଦାସ୍? ଇସ୍ ପାର୍ମେଶ୍ଵାର୍ସ୍କି ନିନ୍ଦା କାମାଲ୍ଦାସ୍ ଏନ୍ଦେର୍ଗେକା ପାର୍ମେଶ୍ଵାର୍ସିନ୍ ଆମ୍ଵିକିରି ନେଦ୍ହି ପାପ୍ ଛେମା କାମା ପଲ୍ଲନାଏ?” 8ଯୀଶୁସ୍ ତାଙ୍ଘା ମନ୍ନୁ ଆହା ଅଙ୍ଗିୟାସ୍ କା ଆବ୍ଡ଼ାର୍ ମନେ-ମନେ ଏନ୍ଦେର୍ ସୋଚାଲିୟାର୍, ଆସ୍ ତେଙ୍ଗିୟାସ୍, “ନିମ୍ ନିହ୍ମା ମନ୍ନୁ ଏନ୍ନେ ଏନ୍ଦେର୍ଗେ ସୋଚାଲ୍ଦାର୍? 9ଏକାଦ୍ ବାଗ୍ଗେ ସହଜ୍?୨:୯ ଅଣ୍ଟା ଏକ୍ଆଙ୍ଗିୟା ବେହ୍ମରିୟାସିନ୍ ନିଙ୍ଘା ପାପ୍ ଛେମା ମାନ୍ଚାକେର୍କିଚି ହନ୍ନେ ତେଙ୍ଗ୍ନା ସହଜ୍ଦ୍, ଲେକିନ୍ ନିନ୍ ଉସ୍କାରା ଆରୁ ନାଟ୍ରୁ ଧାରିକିରି କାଲା ବୁଲି ତେଙ୍ଗ୍ନାଦ୍ ବହୁତ୍ କଠିନ୍। ଏକ୍ଆଙ୍ଗିୟା ବେହ୍ମରିୟାସିନ୍ ନିଙ୍ଘା ପାପ୍ଗୁଠିଦ୍ ଛେମା ମାନ୍ଚାକେର୍କିଚି ବୁଲି ତେଙ୍ଗ୍ନାଦ୍? କା ଉସ୍କାରା ଆରୁ ନିଙ୍ଘା ନାଟ୍ରୁ ଉଠାବିକିରି ଏକାଏକି କାମା ବୁଲି ତେଙ୍ଗ୍ନାଦ୍? 10ଲେକିନ୍ ନିମ୍ ଆକ୍କୁନ୍ ଆହାଅଙ୍ଗର୍ କା ଦୁନିଆଁନୁ ପାପ୍ ଛେମା କାମାଗେ ୨:୧୦ ଯୀଶୁସ୍ ନିଜ୍କେନିଜ୍ ମୁନୁଷ୍କି ହାଦ୍ଦୁସ୍ ବୁଲି ତେଙ୍ଗାଲ୍ଦାସ୍।ମୁନୁଷ୍ ହାଦ୍ଦୁସ୍କେ ହକ୍ ରାଇଦ୍।” ହୁଦ୍ଘିଲାଗାନ୍ ଯୀଶୁସ୍ ଏକ୍ଆଙ୍ଗିୟା ବେହ୍ମରିୟାସିନ୍ ତେଙ୍ଗିୟାସ୍, 11“ଏନ୍ ନିଙ୍ଗାନ୍ ତେଙ୍ଗାଲ୍ଦାନ୍ କା ନିନ୍ ଉସ୍କାରା ଆରୁ ନାଟ୍ରୁ ଧାରିକିରି ଆଡ଼୍ପା କାଲା।” 12ଆସ୍ ଆଖାନେନ୍ ଉସ୍କାରାଚାସ୍ ଆରୁ ତାଙ୍ଘା ନାଟ୍ରୁ ଧାରିକିରି ଜାମାର୍ଘି ଏର୍ତେ-ଏର୍ତେ ବାହ୍ରି ଉର୍ଖିୟାସ୍ କେରାସ୍। ଇବନ୍ ଏରିକିରି ଆସ୍ତା ରୁ ଜାମା ଆଲାର୍ ଆଚ୍ମିତ୍ ମାନ୍ଚାର୍ କେରାର୍ ଆରୁ ଆବ୍ଡ଼ାର୍ ପାର୍ମେଶ୍ଵାର୍ସ୍କି ମାହିମା ସ୍ତୁତି କାମ୍ତେ ତେଙ୍ଗିୟାର୍, “ଏମ୍ ଏନ୍ନେ ଅଦ୍ଭୁତ୍ ନାଲ୍ଖୁ ଏକ୍ଲାହି ମାଲ୍ଲା ଏର୍କାରୁମ୍।”
ଯୀଶୁସ୍ ଲେବୀସିନ୍ ମେହାଁଲ୍ଦାସ୍
(ମାତିସ୍ ୯:୯-୧୩; ଲୁକାସ୍ ୫:୨୭-୩୨)
13ଆରୁଅହନ୍ ଯୀଶୁସ୍ ହଁସ୍ରା ଖାଁଣିଗେ କେରାସ୍, ଆରୁ ଆଲାର୍ଘି ଭିଡ଼୍ ତାଙ୍ଘା ଚାହାଗେ କେରାଦ୍, ଆରୁ ଯୀଶୁସ୍ ଆବ୍ଡ଼ାରିନ୍ ଶିକ୍ଷା ଚିୟାଗେ ଲାଗ୍ଗିୟାସ୍। 14ଆନ୍ତିନ୍ ଯୀଶୁସ୍ ପାବୁନୁ କାନାବାକେନ୍ ଆଲ୍ଫିସ୍କି ହାଦ୍ଦୁ ଲେବୀସିନ୍ ମାଲ୍ଗୁଜାରୀ ଉକ୍ରାନା ଆଡ୍ଡାନୁ ଅକ୍କାନ୍ ଏରିୟାସ୍, ଯୀଶୁସ୍ ଆସିନ୍ ତେଙ୍ଗିୟାସ୍, “ଏଙ୍ଘା ପାଛ୍ଲି ବୁଙ୍ଗାବାରା।” ଆଙ୍ଗେନ୍ ଆସ୍ ଉସ୍କାରାଇକିରି ଆସ୍କି ପାଛ୍ଲି-ପାଛ୍ଲି କେରାସ୍। 15ଅନ୍ଦୁଲ୍ ଯୀଶୁସ୍ ତାଙ୍ଘା ଚେଲାର୍ଗାନେ ଲେବୀସ୍କି ଆଡ଼୍ପାନୁ ଅନାଲିୟାସ୍ ତା, ଢେର୍ ୨:୧୫ ମାଲ୍ଗୁଜାରୀ ଉଘାବୁ ଆଲାରିନ୍ ୟାହୁଦୀ ଧରମ୍ତା ମୁଖ୍ୟାଜାମାର୍ ପାପୀ ସୋଚାଲିୟାର୍।ମାଲ୍ଗୁଜାରୀ ଉକ୍ରୁ ଆଲାର୍ ଆରୁ ପାପୀ ଆଲାର୍ହି ସାଙ୍ଗେନ୍ ଅନାଲିୟାର୍; ଏନ୍ଦେର୍ଗେକା ଆବ୍ଡ଼ାର୍ ଯୁକ୍କୁ ରାଚାର୍, ଆରୁ ଯୀଶୁସ୍କି ପାଛ୍ଲି-ପାଛ୍ଲି ବାରାଲିୟାର୍। 16ଆସାନ୍ ୟୋଁଲୋକ୍ ଫାରିସୀ ଆଲାର୍ ଆରୁ ୟାହୁଦୀ ପଣ୍ତିତ୍ଜାମାର୍ହି ଅକ୍କାଚାର୍। ଯୀଶୁସିନ୍ ପାପୀ ଆରୁ ମାଲ୍ଗୁଜାରୀ ଉକ୍ରୁ ଆଲାର୍ ଗାନେ ଅନ୍ନାନ୍ ଏରିୟାର୍ ତା, ଆବ୍ଡ଼ାର୍ ଯୀଶୁସ୍କି ଚେଲାରିନ୍ ତେଙ୍ଗିୟାର୍, “ଆସ୍ ପାପୀ ଆରୁ ମାଲ୍ଗୁଜାରୀ ଉକ୍ରୁ ଆଲାର୍ ଗାନେ ଏନ୍ଦେର୍ଗେ ଅନାଲ୍ଦାସ୍?” 17ଆବ୍ଡ଼ାର୍ଘି ଇ କାତ୍ଥାବନ୍ ମେନିକିରି ଯୀଶୁସ୍ ତେଙ୍ଗିୟାସ୍, “ବାନେ ଆଲାର୍ଗେ ବଏଦ୍ସ୍କି ଦାର୍କାର୍ ମାଲ୍ଲା, ଲେକିନ୍ ବେହ୍ମରିୟାର୍ଗେ ବଏଦ୍ସ୍କି ଦାର୍କାର୍ ରାଇ। ଏନ୍ ଧାର୍ମିକ୍ ଆଲାରିନ୍ ମେହାଁଗେ ମାଲ୍ଲା ବାରୁନ୍ ଲେକିନ୍ ପାପୀ ଆଲାରିନ୍ ପାପ୍ତି ବାଛାବାଗେ ବାର୍ଚ୍କାଦାନ୍।”
ଯୀଶୁସ୍ ଉପାସ୍ଘି ବାରେନୁ ଉପ୍ଦେଶ୍ ଚିଆଲ୍ଦାସ୍
(ମାତିସ୍ ୯:୧୪-୧୭; ଲୁକାସ୍ ୫:୩୩-୩୯)
18ଅନ୍ଦୁଲ୍ ଯୋହାନ୍ସ୍କି ଚେଲାଜାମାର୍ ଆରୁ ଫାରିସୀଜାମାର୍ ଉପାସ୍ କାମାଲିୟାର୍, ଆବ୍ଡ଼ାର୍ଘି ଭିତର୍ନୁ କେତ୍କ ଲୋକ୍ ଯୀଶୁସ୍କି ଚାହାଗେ ବାରିକିରି ତାଙ୍ଗାନ୍ ମେନ୍ଚାର୍, “ଯୋହାନ୍ସ୍କି ଚେଲାର୍ ଆରୁ ଫାରିସୀ ଜାମାର୍ଘି ଚେଲାର୍ ଉପାସ୍ କାମ୍ନାଏ। ଲେକିନ୍ ନିହ୍ମା ଚେଲାଜାମାର୍ ଏନ୍ଦେର୍ଗେ ଉପାସ୍ ମା କାମ୍ନାଏ?” 19ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ଯେତ୍କବାକେନ୍ତକ୍ ବର୍କୁକ୍କସ୍ ସାଙ୍ଗେନ୍ ରାଦାସ୍ତା ବର୍ତିୟାର୍ କାଁଏ ଉପାସ୍ କାମାଅଙ୍ଗ୍ନାଏ? ଯେତ୍କତକ୍ ବର୍କୁକ୍କସ୍ ଆବ୍ଡ଼ାର୍ ଗାନେ ରସ୍, ହତ୍କତକ୍ ଆବ୍ଡ଼ାର୍ ଉପାସ୍ କାମା ପଲ୍ଲନାଏ। 20ଲେକିନ୍ ଏନ୍ନେ ଉଲ୍ଲା ବାରଦ୍ ଯେତ୍କବାକେନ୍ ବର୍କୁକ୍କସ୍ ଆବ୍ଡ଼ାର୍ସ୍ତି ଭିନେ ମାନସ୍କସ୍; ହୁ ସାମାୟନୁ ଆବ୍ଡ଼ାର୍ ଉପାସ୍ କାମର୍। 21ନେଦ୍ହି ପାଚ୍ଚା ଚିଢ଼ାଗାନେ ପୁନା ଚିଢ଼ାଘି ଟୁକ୍ଡ଼ାନ୍ ମା ସାଟ୍ନାଏ; ଏନ୍ନେ କାମ୍ଚ୍କୁନ୍ ପୁନା ଚିଢ଼ାଘି ଟୁକ୍ଡ଼ାଦ୍ ପାଚ୍ଚା ଚିଢ଼ାନ୍ ବାଗ୍ଗେ ଟାଣଚୋ ଆରୁ ଏଟ୍ର୍କାବଦ୍ ଆରୁହି ବାଡ଼୍କା ଏଟ୍ରକଦ୍। 22ଆରୁ ନେଦ୍ହି ପୁନା ଅଙ୍ଗୁର୍ ରାସେବନ୍ ଚାପ୍ଟାତି ତିୟାର୍ ମାନ୍ଚ୍କା ପାଚ୍ଚା କୁପାନୁ ମା ଉଇନାଏ, ଏନ୍ଦେର୍ଗେକା ଉଇକୁନ୍ ଆଦ୍ କୁପାନ୍ ହଟ୍ଟଚୋ, ଆରୁ କୁପାଦ୍ ଆରୁ ଅଙ୍ଗୁର୍ ରାସେଦ୍ ଯୋଡ଼େଦିନ୍ ଖାରାପ୍ ମାନଦ୍କଦ୍; ହୁଦ୍ଘିଲାଗାନ୍ ପୁନା ଅଙ୍ଗୁର୍ ରାସେବନ୍ ପୁନା କୁପାନୁ ଉଇନା କାତ୍ଥା ।”
ଯୀଶୁସ୍ ପାବିତାର୍ ଉଲ୍ଲାନ୍ତା ପ୍ରାଭୁସ୍
23ଅନ୍ଦୁଲ୍ ପାବିତାର୍ ଉଲ୍ଲାନୁ ଯୀଶୁସ୍ ଗହମ୍ ବାଟ୍କି ମାନିକିରି କାଲିୟାସ୍ ତାଙ୍ଘା ଚେଲାଜାମାର୍ ପାବୁନୁ ଏକ୍ତେ-ଏକ୍ତେ ଗହମ୍ଘି ଚାନ୍ନୁନ୍ ହାଚ୍ଚାଗେ ଲାଗ୍ଗିୟାର୍। 24ଇବନ୍ ଏରିକିରି ଫାରିସୀ ଆଲାର୍ ଯୀଶୁସିନ୍ ତେଙ୍ଗିୟାର୍, “ଏରା; ପାବିତାର୍ ଉଲ୍ଲାନୁ ଏକା ନାଲ୍ଖୁ କାମ୍ନା ଉଚିତ୍ ମାଲ୍ଲିଦ୍, ଆବନ୍ ନିଙ୍ଘା ଚେଲାଜାମାର୍ ଏନ୍ଦେର୍ଗେ କାମାଲ୍ନାଏ?” 25ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଏକ୍ଲାହି ଇବନ୍ ମାଲ୍ଲା ପାଢ଼ୁର୍ କା ଯେତ୍କବାକେନ୍ ଦାଉଦ୍ସ୍ ଆରୁ ତାଙ୍ଘା ସାଙ୍ଗେର୍ଗେ କିଡ଼ା ଲାଗ୍ଗାଲିୟାଦ୍, ଆରୁ ତାହ୍ମାସାନ୍ ମହାଁଗେ ଏନ୍ଦେର୍ହି ମାଲ୍ଲାରୁଦ୍ ତା ଦାଉଦ୍ସ୍ ଏନ୍ଦେର୍ କାମ୍ଚ୍କାଚାସ୍? 26ଏସ୍କେ ମାହାପୁରୋହିତ୍ ଆବୀୟାଥର୍ସ୍କି ସାମାୟନୁ, ଦାଉଦ୍ସ୍ ପାର୍ମେଶ୍ଵାର୍ସ୍କି ଆଡ଼୍ପାନୁ କରିକିରି ପାର୍ମେଶ୍ଵାର୍ସ୍କେ ଭେଁଟ୍ ଚାଢ଼ାବାଚ୍କା ଆସ୍ମାବନ୍ ମଖ୍ଖାସ୍ ଆରୁ ତାଙ୍ଘା ସାଙ୍ଗେର୍ଗେହି ଚିଚ୍ଚାସ୍। ଏକାନ୍ ଖାଲି ପୁରୋହିତ୍ଜାମାର୍ ମହ୍ଁନାଏ?” 27ଆରୁ ଯୀଶୁସ୍ ଫାରିସୀ ଜାମାରିନ୍ ତେଙ୍ଗିୟାସ୍, “ପାବିତାର୍ ଉଲ୍ଲାଦ୍ ଆଲାର୍ଘି ଲାଗାନ୍ ମାନ୍ଚ୍କିଚି, ଲେକିନ୍ ଆଲାର୍ ପାବିତାର୍ ଉଲ୍ଲାଘି ଲାଗାନ୍ ମାଲ୍ଲା ମାନୁର୍। 28ହୁଦ୍ଘିଲାଗାନ୍, ମୁନୁଷ୍ ହାଦ୍ଦୁସ୍ ପାବିତାର୍ ଉଲ୍ଲାନ୍ତାହି ପ୍ରାଭୁସ୍।”
3ଯୀଶୁସ୍ ଅଣ୍ଟା ହାଏକା ହେଖ୍ଖାବାଲା ଆଲାସିନ୍ ବାନେ କାମାଲ୍ଦାସ୍
(ମାତିସ୍ ୧୨:୯-୧୪; ଲୁକାସ୍ ୬:୬-୧୧)
1ଆନ୍ତିନ୍ ଯୀଶୁସ୍ ଆରୁଅହନ୍ ସାଭା ଆଡ଼୍ପାଗେ କେରାସ୍। ଆସାନ୍ ଅଣ୍ଟା ଆଲାସ୍ ରାଚାସ୍, ଆସ୍କି ଅଣ୍ଟା ହେଖ୍ଖା ହାଇୟା କେର୍କିଚା। 2କେତ୍କ ଲୋକ୍ ଆଲାର୍ ଯୀଶୁସ୍କି ମିଆଁ ଦୋଷ୍ ଲାଗାବାଗେ ବେଦ୍ଦାଲିୟାର୍, ହୁଦ୍ଘିଲାଗାନ୍ ଆବ୍ଡ଼ାର୍ ଧ୍ୟାନ୍ସେ ଏରାଲିୟାର୍ କା ଯୀଶୁସ୍ ଆ ଆଲାସିନ୍ ପାବିତାର୍ ଉଲ୍ଲାନୁ ବାନେ କାମାଲ୍ଦାସ୍ କା ମାଲ୍ଲା। 3ଆରୁ ଏକା ଆଲାସ୍କି ହେଖ୍ଖା ହାଇୟା କେର୍କିଚା ଯୀଶୁସ୍ ଆ ଆଲାସିନ୍ ତେଙ୍ଗିୟାସ୍, “ବାରା ମାଝାନୁ ଇଲା”। 4ଆରୁ ଏକାର୍ ଯୀଶୁସ୍କି ମିଆଁ ଦୋଷ୍ ଲାଗାବାଗେ ବେଦ୍ଦାଲିୟାର୍, ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍ କା, “ପାବିତାର୍ ଉଲ୍ଲାନୁ ୟାହୁଦୀ ନିୟମ୍ଘି ଲେଖା ବାନେ ନାଲ୍ଖୁ କାମ୍ନା ଉଚିତ୍ କା ଖାରାପ୍ ନାଲ୍ଖୁ କାମ୍ନା ଉଚିତ୍? ଜୀଆ ବାଛାବାନା ଠିକ୍ଦ୍କା ନୁକ୍ସାନ୍ କାମ୍ନା ଠିକ୍ଦ୍?” ଲେକିନ୍ ଆବ୍ଡ଼ାର୍ କାଡ଼େ-କାଡ଼େ ରାଚାର୍। 5ଯୀଶୁସ୍ ଖୀସ୍ତି ଚାର୍ହି ପାଖାନ୍ତା ଇଜ୍ଜକା ଆଲାରିନ୍ ଏରିୟାସ୍, ଆବ୍ଡ଼ାର୍ଘି କାଠୋର୍ ମନ୍ବନ୍ ଏରିକିରି ଦୁଃଖୁ ମାନ୍ଚାସ୍ ଆରୁ ଆ ଆଲାସିନ୍ ତେଙ୍ଗିୟାସ୍, “ନିଙ୍ଘା ହେଖ୍ଖାନ୍ ଲାମ୍ବାବା” ଆରୁ ଆସ୍ ତାଙ୍ଘା ହେଖ୍ଖାନ୍ ଲମ୍ଵାବାଚାସ୍, ଆରୁ ଆଖାନେନ୍ ତାଙ୍ଘା ହେଖ୍ଖା ବାନେ ମାନ୍ଚାକେରା। 6ଇବନ୍ ଏରିକିରି ଫାରିସୀଜାମାର୍ ହୁଙ୍ଗେନିନ୍ ବାହ୍ରି ଉର୍ଖିୟାର୍ ଆରୁ ଯୀଶୁସ୍କି ବିରୁଦ୍ଧ୍ନୁ ହେରୋଦୀୟା ଜାମାର୍ଗାନେ ବିଚାର୍ କାମ୍ଚାର୍ କା ଆସିନ୍ ଏସ୍କେ ନାଶ୍ କାମର୍।
ଆଲାର୍ଘି ଅଣ୍ଟା ବାଡ଼୍କା ଭିଡ଼୍ ଯୀଶୁସ୍କି ପାଛ୍ଲି କାଲିଦ୍
7ଇଦ୍ଘି ପାଛ୍ଲି ଯୀଶୁସ୍ ତାଙ୍ଘା ଚେଲାର୍ଗାନେ ହଁସ୍ରା ଖାଁଣିଗେ କେରାସ୍: ଆରୁ ଗାଲିଲୀନ୍ତା ଆଲାର୍ଘି ଅଣ୍ଟା ବାଡ଼୍କା ଭିଡ଼୍ ତାଙ୍ଘା ପାଛ୍ଲି-ପାଛ୍ଲି ବାର୍ଚାର୍ ଆରୁ ୟାହୁଦା, 8ଯେରୁଶାଲେମ୍ ସହର୍ତା ଆରୁ, ୟାହୁଦୀଆ, ଇଦୁମିୟା ରାଜୀ ଆରୁ ଯାର୍ଦାନ୍ ଯୋଡ଼ୁଘି ହାପାଖ୍ତା ଆରୁ ସୋର୍ ଆରୁ ସିଦୋନ୍ ସହର୍ଘି ଚାର୍ହି ପାଖ୍ତି ଢେର୍ ଆଲାର୍ ଯୀଶୁସ୍କି ଚାହାଗେ ବାର୍ଚାର୍; ଏନ୍ଦେର୍ଗେକା ଆବ୍ଡ଼ାର୍ ଆସ୍କି ଅଦ୍ଭୁତ୍ ନାଲ୍ଖୁଘି ବାରେନୁ ମେନ୍ଚ୍କାଚାର୍। 9ଢେର୍ ଭିଡ଼୍ ମାନ୍ନାଘି ଲାଗାନ୍ ତାଙ୍ଗାନ୍ ମା ତିର୍ହର୍ ନାବର୍ ବୁଲି ଯୀଶୁସ୍ ତାଙ୍ଘା ଚେଲାରିନ୍ ଅଣ୍ଟା ଛୋଟେ ଡଙ୍ଗା ଯୋଗାଡ଼୍ କାମିକିରି ଉଇକାରା ବୁଲି ତେଙ୍ଗିୟାସ୍ । 10ଏନ୍ଦେର୍ଗେକା ଆସ୍ ଢେର୍ ଆଲାରିନ୍ ବାନେ କାମ୍ଚ୍କାଚାସ୍, ହୁଦ୍ଘିଲାଗାନ୍ ଯେତ୍କ ବେହ୍ମରିୟାର୍ ବାନେ ମାନାଗେ ତୁକ୍କାତୁକ୍କି ମାନିକିରି ଯୀଶୁସିନ୍ ଏସ୍ରାଗେ କୋଶିଷ୍ କାମାଲିୟାର୍। 11ଆରୁ ଏକା ଆଲାର୍ଘି ମେଦୁନୁ ଭୁତ୍ତୁ ରାଚା ଆଦ୍ ଯେତ୍କବାକେନ୍ ଯୀଶୁସିନ୍ ଏରିୟାଦ୍ ତା ଆବ୍ଡ଼ାଦ୍ ତାଙ୍ଘା ଆଘ୍ଲି କାଚ୍ଡ଼ାରାଇକିରି ଆରୁ, ଚିର୍ରା ରାଇକିରି ତେଙ୍ଗାଗେ ଲାଗ୍ଗିୟାଦ୍, ନିନ୍ ପାର୍ମେଶ୍ଵାର୍ସ୍କି ହାଦ୍ଦୁୟ; 12ଲେକିନ୍ ଯୀଶୁସ୍ ଭୁତ୍ତୁବନ୍ ଶକତ୍ ହୁକୁମ୍ ଚିଚ୍ଚାସ୍ କା ଆବ୍ଡ଼ାର୍ ମା ତେଙ୍ଗ୍ର୍ନାର୍ କା ଯୀଶୁସ୍ ନେଦ୍।
ଯୀଶୁସ୍ ବାର ଲୋକ୍ ଖାସ୍ଚେଲାଜାମାରିନ୍ ଚାଜାଲ୍ଦାସ୍
(ମାତିସ୍ ୧୦:୧-୪; ଲୁକାସ୍ ୬:୧୨-୧୬)
13ଆନ୍ତିନ୍ ଯୀଶୁସ୍ ଅଣ୍ଟା ପାର୍ତ୍ତା ମିଆଁ ଆର୍ଗିୟାସ୍ ଆରୁ ଆସ୍ ନେକାନ୍ ଚାହଁଚାସ୍ ଆବ୍ଡ଼ାରିନ୍ ତାଙ୍ଘା ଚାହାଗେ ମେହିଁୟାସ୍ ଆରୁ ଆବ୍ଡ଼ାର୍ ତାଙ୍ଘା ଚାହାଗେ ବାର୍ଚାର୍। 14ଆରୁ ଆବ୍ଡ଼ାର୍ସ୍ତି ବାର ଲୋକ୍ ଆଲାରିନ୍ ଚାଜ୍ଜିୟାସ୍ ଏସ୍କେ କା ଆବ୍ଡ଼ାର୍ ତାଙ୍ଘା ସାଙ୍ଗେନ୍ ରର୍। ଆରୁ ଆସ୍ ଆବ୍ଡ଼ାରିନ୍ ସୁସାମାଚାର୍ ପ୍ରଚାର୍ କାମାଗେ ତାଇୟସ୍। 15ଆରୁ ଆବ୍ଡ଼ାର୍ଗେ ଭୁତ୍ତୁଗୁଠିନ୍ ଅଥ୍ରାଗେ ହକ୍ ହାଖ୍ଖର୍। 16ଯୀଶୁସ୍ ଇବ୍ଡ଼ା ବାର ଲୋକ୍ରିନ୍ ଚାଜ୍ଜିୟାସ୍; ଇସ୍ ରାଚାସ୍ ଶିମୋନ୍, ଯୀଶୁସ୍ ଆସ୍କି ନାମେ ପାତ୍ରାସ୍ ଉଇୟାସ୍। 17ଜେବେଦୀସ୍କି ହାଦ୍ଦୁ ୟାକୁବ୍ ଆରୁ ଆସ୍କି ଭାଇ ଯୋହାନ୍ସିନ୍ ନେଖା ନାମେ କା ଯୀଶୁସ୍ ବିନେରିଗୋସ୍ ଉଇୟାସ୍ ଇଦ୍ଘି ମତ୍ଲବ୍ ବାଦ୍ଲି ଗାର୍ଜାରାନାଘି ହାଦ୍ଦୁ। 18ଆନ୍ଧ୍ରିୟାସ୍, ଫିଲିପ୍ପ, ବାର୍ଥଲମୀ, ମାତି, ଥୋମାସ୍, ଆଲ୍ଫିସ୍କି ହାଦ୍ଦୁ ୟାକୁବ୍, ଥାଦେଉସ୍ ଆରୁ ଶିମୋନ୍ କାନାନୀ୩:୧୮ ଶିମୋନ୍ କିଣାନିୟ ମତ୍ଲବ୍ ଦେଶ୍ଘି ଭକ୍ତ।। 19ଆରୁ ଯୁଦାସ୍ ଇସ୍କୋରିୟତୀ ଏକାସ୍ କା ଯୀଶୁସିନ୍ ବିରୋଧିର୍ଘି ହେଖ୍ଖାନୁ ଧାର୍ତାଚାସ୍।
ଯୀଶୁସ୍କି ମିଆଁ ୟାହୁଦୀ ପଣ୍ଡିତ୍ଜାମାର୍ ଝୁଟ୍ଟୁ ଦୋଷ୍ ଲାଗାବାଲ୍ନାଏ
(ମାତିସ୍ ୧୨:୨୨-୩୨; ଲୁକାସ୍ ୧୧:୧୪-୨୩; ୧୨:୧୦)
20ଆନ୍ତିନ୍ ଯୀଶୁସ୍ ତାଙ୍ଘା ଚେଲାର୍ଗାନେ ଅଣ୍ଟା ଆଡ଼୍ପା କେରାସ୍, ଆରୁଅହନ୍ ଆଲାର୍ଘି ଭିଡ଼୍ ଏତ୍କ ମାନ୍ଚାକେରା ଯେ ଆବ୍ଡ଼ାର୍ଗେ ଅନାଗେହି ଫୁର୍ସତ୍ ମା ହାଖ୍ଖରା। 21ଯେତ୍କବାକେନ୍ ଯୀଶୁସ୍କି କୁଟୁମ୍ବର୍ ମେନ୍ଚାର୍ କା ଯୀଶୁସ୍କେ ଅନାଗେହି ଫୁର୍ସତ୍ ମାଲ୍ଲାତା ଆଲାର୍ ତେଙ୍ଗିୟାର୍ ଇସ୍ ବାଏହା ମାନ୍ଚାସିନ୍, ଆରୁ ଆବ୍ଡ଼ାର୍ ଯୀଶୁସିନ୍ ହୁଆଗେ ବାର୍ଚାର୍। 22ଯେରୁଶାଲେମ୍ତି ବାର୍ଚ୍କା ୟାହୁଦୀ ପଣ୍ତିତ୍ଜାମାର୍ ଆସାନ୍ ରାଚାର୍, ଆବ୍ଡ଼ାର୍ ତେଙ୍ଗିୟାର୍, “ଯୀଶୁସ୍କିନୁ ଭୁତ୍ତୁଘି ମୁଖ୍ୟା ବେଲ୍ଜେବୁଲ୍ ଭୁତ୍ତୁ କର୍ଚ୍କିଚି,” ଆରୁ “ଆଦ୍ଘି ମଦେତ୍ତି ଭୁତ୍ତୁଗୁଠିନ୍ ଅଥ୍ରାଲ୍ଦାସ୍।” 23ଯୀଶୁସ୍ ଆବ୍ଡ଼ାରିନ୍ ଚାହାଗେ ମେହିଁକିରି ଇ ନମୁନାନ୍ ଶୁଣାବାଚାସ୍, “ଶାଏତାନ୍ଦ୍ ଏସ୍କେ ଶାଏତାନ୍ବନ୍ ଅଥ୍ରା ଅଙ୍ଗଦ୍? 24ଅଣ୍ଟା ଏକିନ୍ ରାଜୀନୁ ତାହ୍ମା-ତାହ୍ମା ଭିତ୍ରେ ଝାଗ୍ଡ଼ାଝାଟି ମାନିଦ୍ ତା ଆ ରାଜୀଦ୍ ମା ଟିକ୍ରିଦ୍। 25ଯଦି ଏକିନ୍ ପରିବାର୍ଦ୍ ଝାଗ୍ଡ଼ାଝାଟି ମାନିଦ୍ ତା ଆ ପରିବାର୍ଦ୍ ଛିଛିର୍ଛାନ୍ଦ୍ ମାନିକାଇ। 26ଆରୁ ଯଦି ଶାଏତାନ୍ଦ୍ ତାଙ୍ଘା ବିରୁଦ୍ଧ୍ନୁ ଝାଗ୍ଡ଼ା ମାନିଦ୍ ତା ଆଦ୍ ଟିକ୍ରା ପଲ୍ଲୀ ଆରୁ ଆଦ୍ଘି ନାଶ୍ ମାନିକାଇ। 27ଅଣ୍ଟା ଚୋର୍ହାସ୍ ଅଣ୍ଟା ହାଟ୍ଟାକାଟ୍ଟା ଧନୀ ଆଲାସ୍ସାନ୍ ହାଡ଼ାଗେ କୋରସ୍, ହାଲେ ଯେତ୍କତକ୍ ଆ ହାଟ୍ଟାକାଟ୍ଟା ଆଲାସ୍ସିନ୍ ମା ହିଁୟସ୍ ଆତ୍କତକ୍ ଆଡ଼୍ପାନ୍ତି ଏନ୍ଦେର୍ହି ଜିନିଷ୍ପତର୍ ହୁଆ ପଲ୍ଲଦାସ୍, ଲେକିନ୍ ହିଁଚ୍କା ପାଛ୍ଲି ଆସ୍ ଜାମା ଜିନିଷ୍ପତର୍ ହୁଆ ଅଙ୍ଗସ୍। 28ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ମୁନୁଷ୍ ଜାମାର୍ଘି ଜାମା ପାପ୍ ଆରୁ ପାର୍ମେଶ୍ଵାର୍ସ୍ସିନ୍ ନିନ୍ଦା କାମର୍ ହାଲେହି ଆବ୍ଡ଼ାର୍ଗେ ଛେମା ହାଖ୍ଖର। 29ଲେକିନ୍ ନେଦ୍ ପାବିତାର୍ ଆତ୍ମାଘି ବିରୁଦ୍ଧ୍ ନିନ୍ଦା କାମ୍ନାର୍ ଆବ୍ଡ଼ାର୍ଗେ ଏକ୍ଲାହି ଛେମା ମା ହାଖ୍ଖରିଦ୍। ଆରୁ ଆବ୍ଡ଼ାର୍ ସବୁଦିନ୍ଘି ଲାଗାନ୍ ପାପ୍ଘି ଭାଗିଦାର୍ ମାନର୍।” 30ଯୀଶୁସ୍ ଇ କାତ୍ଥାବନ୍ ଇଦ୍ଘିଲାଗାନ୍ ତେଙ୍ଗିୟାସ୍ କା କେତ୍କ ଲୋକ୍ ଆଲାର୍ ତେଙ୍ଗାଲିୟାର୍ କା ଯୀଶୁସ୍କେ ଭୁତ୍ତୁ ଲାକ୍କିଚି।
ଯୀଶୁସ୍କି ଭାଇବୁହୁଣୀ ଆରୁ ଆୟାଙ୍ଗ୍ ନେଦ୍
(ମାତିସ୍ ୧୨:୪୬-୫୦; ଲୁକାସ୍ ୮:୧୯-୨୧)
31ହୁ ସାମାୟନୁ ଯୀଶୁସ୍କି ଆୟାଙ୍ଗ୍ ଆରୁ ଭାଇଜାମାର୍ ବାର୍ଚାର୍ ଆରୁ ଆଡ଼୍ପାଘି ବାହ୍ରି ଇଜ୍ଜାର୍ ଆରୁ ଆସିନ୍ ମେହାଁ ତାଇୟାର୍। 32ଆଲାର୍ ଯୀଶୁସ୍କି ଚାର୍ହି ପାଖା ଅକ୍କାଚାର୍ ଆବ୍ଡ଼ାର୍ ତାଙ୍ଗାନ୍ ତେଙ୍ଗିୟାର୍ “ଏରା ନିହ୍ମା ଆୟାଙ୍ଗ୍ ଆରୁ ନିହ୍ମା ଭାଇର୍ ବାହ୍ରି ରାନାଏ ଆର୍ ନିମାନ୍ ବେଦ୍ଦାଲ୍ନାଏ।” 33ଯୀଶୁସ୍ ଆବ୍ଡ଼ାରିନ୍ ମେନ୍ଚାସ୍, “ନେଦ୍ ଏଙ୍ଘା ଆୟାଙ୍ଗ୍ ଆରୁ ନେଦ୍ ଏଙ୍ଘା ଭାଇର୍?” 34ଆରୁ ଯୀଶୁସ୍ ତାଙ୍ଘା ଚାର୍ହି ପାଖା ଅକ୍କା ଆଲାରିନ୍ ଏରିକିରି ତେଙ୍ଗିୟାସ୍, “ଇବ୍ଡ଼ାର୍ ଏଙ୍ଘା ଆୟାଙ୍ଗ୍ ଆରୁ ଭାଇଜାମାର୍। 35ନେଦ୍ ପାର୍ମେଶ୍ଵାର୍ସ୍କି ଇଚ୍ଛାନ୍ ପୁରା କାମ୍ନାଏ, ଆବ୍ଡ଼ାର୍ ଏଙ୍ଘା ଭାଇ, ବୁହୁଣୀ ଆରୁ ଏଙ୍ଘା ଆୟାଙ୍ଗ୍।”
4ବିହ୍ନି ଚାହୁ ଆଲାସ୍କି ନମୁନା
1ଅନ୍ଦୁଲ୍ ଯୀଶୁସ୍ ଗାଲିଲୀ ହଁସ୍ରା ଖାଁଣିନୁ ଆରୁଅହନ୍ ଶିକ୍ଷା ଚିୟାଗେ ଲାଗ୍ଗିୟାସ୍: ଆରୁ ତାଙ୍ଘା ଚାର୍ହି ପାଖାନ୍ ଆଲାର୍ ଏତ୍କ ଭିଡ଼୍ ମାନ୍ଚାର୍ କେରାର୍ କା ଯୀଶୁସ୍ ହଁସ୍ରାନୁ ରାନା ଅଣ୍ଟା ଡଙ୍ଗାନୁ କାଇକିରି ଅକ୍କିୟାସ୍, ଆରୁ ଆଲାର୍ ହଁସ୍ରା ଖାଁଣିନୁ ଇଜ୍ଜକାଚାର୍। 2ଆଙ୍ଗେନ୍ ଯୀଶୁସ୍ ନମୁନା ଚିଇକିରି ଢେର୍ ବିଷୟନୁ ଆବ୍ଡ଼ାରିନ୍ ଶିଖାବାଗେ ଲାଗ୍ଗିୟାସ୍, ଆରୁ ଉପ୍ଦେଶ୍ ଚିତେ ଆସ୍ ତେଙ୍ଗିୟାସ୍, 3“ଏରା, ଅଣ୍ଟା ଚାଷୀ ଆଲାସ୍ ବିହ୍ନି ଚାହାଗେ ଉର୍ଖିୟାସ୍। 4ଆରୁ ଆସ୍ ବିହ୍ନି ଚାହ୍ତେ-ଚାହ୍ତେ କେତ୍କ ବିହ୍ନିଦ୍ ପାବୁ ଖାଁଣିନୁ ଖାତ୍ରା ଆରୁ ଆବନ୍ ଓଡ଼ାଗୁଠିଦ୍ ବାର୍ଚା ଆରୁ ଚାଜ୍ଜା ମଖ୍ଖା। 5ଆରୁ କେତ୍କ ବିହ୍ନିଦ୍ କମ୍ ହାଜ୍ଜୁ ରାନା ଚାଁଚା ଆଡ୍ଡାନୁ ଖାତ୍ରା, ଆରୁ କମ୍ ହାଜ୍ଜୁ ରାନାଘି ଲାଗାନ୍ ବିହ୍ନିଦ୍ ଚାଁଣେ ଗାଜା ମାନ୍ଚାକେରା। 6ଲେକିନ୍ ବିଡ଼୍ନାଘି ଲାଗାନ୍ ଆ ଗାଜାଦ୍ ମୁର୍ଝାରାଚା କେରାଦ୍, ଆରୁ ଚେରୁ ମା ରାନାଘି ଲାଗାନ୍ ହାଇୟାକେରା। 7ଆରୁ କେତ୍କ ବିହ୍ନିଦ୍ ଆଚ୍ଚୁ ଝୁଁଣିନୁ ଖାତ୍ରାଦ୍, ଆଚ୍ଚୁ ଝୁଁଣିଦ୍ ପାର୍ଦିକିରି ଗାଜାବନ୍ ଦାବାବାଚେଇଚା, ହୁଦ୍ଘିଲାଗାନ୍ ଆଦ୍ ଫାଡ଼ୁ ମା ଚିଚ୍ଚା। 8ଲେକିନ୍ ଆରୁ କେତ୍କ ବିହ୍ନିଦ୍ ବାନେ ଆଡ୍ଡାନୁ ଖାତ୍ରାଦ୍, ଆରୁ ଗାଜା ମାନ୍ଚା ଆରୁ ପାର୍ଦିକିରି ତିରିଶ୍ ଗୁଣ୍, ଷାଠିଏ ଗୁଣ୍ ଆରୁ ଶୋଏ ଗୁଣ୍ତକ୍ ଫାଡ଼ୁ ଚିଚ୍ଚା।” 9ଆନ୍ତିନ୍ ଯୀଶୁସ୍ ତେଙ୍ଗିୟାସ୍, “ଇ କାତ୍ଥାନ୍ ଧ୍ୟାନ୍ ଚିଇକିରି ମେନା ଆରୁ ବୁଝ୍ରା।”
ଇ ନମୁନାଘି ମତ୍ଲବ୍
(ମାତିସ୍ ୧୩:୧୦-୧୭; ଲୁକାସ୍ ୮:୯,୧୦; ମାତିସ୍ ୧୩:୧୮-୨୩; ଲୁକାସ୍ ୮:୧୧-୧୫)
10ଯେତ୍କବାକେନ୍ ଯୀଶୁସ୍ ଅଥାସ୍ ରାଚାସ୍, ହତ୍କବାକେନ୍ ତାଙ୍ଘା ବାର ଚେଲାର୍ ଆରୁ କେତ୍କ ଲୋକ୍ ଆଲାର୍ ଇ ନମୁନାଘି ମତ୍ଲବ୍ ମେନାଗେ ଲାଗ୍ଗିୟାର୍। 11ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମାଗେ ପାର୍ମେଶ୍ଵାର୍ସ୍କି ରାଜୀନ୍ତା ଭେଦ୍ଦୁବନ୍ ଆହାଗେ ବାର୍ଦାନ୍ ଚିଚ୍ଚକା ରାଇଦ୍। ଲେକିନ୍ ବାହ୍ରିନ୍ତା ଆଲାର୍ଗେ ନମୁନାତି ଖାଲି ତେଙ୍ଗାକାଇ। 12ଏସ୍କେ କା
‘ଆବ୍ଡ଼ାର୍ ଏର୍ନାଏ ଲେକିନ୍ ସତ୍ତୁବନ୍ ଚିହ୍ନା ପଲ୍ଲନାଏ,
ମେନ୍ନାଏ ଲେକିନ୍ ବୁଝ୍ରା ପଲ୍ଲନାଏ;
ଏକାସାନ୍ ଏନ୍ନେ ମା ମାନ୍ନା କା ଆବ୍ଡ଼ାର୍ ତାହ୍ମାଏ ପାପ୍ବନ୍ ଆମ୍ବିକିରି ପାର୍ମେଶ୍ୱାର୍ସାନ୍ କିର୍ରର୍ ବାରର୍
ଆରୁ ଏନ୍ ଆବ୍ଡ଼ାରିନ୍ ଛେମା କାମନ୍।’”
13ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଇ ନମୁନାବନ୍ ମା ବୁଝ୍ର୍ଦାର୍? ହାଲେ ଦୁସ୍ରା ନମୁନାଗୁଠିନ୍ ଏସ୍କେ ବୁଝ୍ରର୍? 14ଇ ନମୁନାଘି ମତ୍ଲବ୍ ଇଦ୍ କା ପାର୍ମେଶ୍ଵାର୍ସ୍କି ବଚନ୍ ଶୁଣାବୁସ୍ ବିହ୍ନି ଚାହୁ ଆଲାସ୍ ଲେଖା। 15ବଚନ୍ବନ୍ ମେନୁ କେତ୍କ ଲୋକ୍ ଆଲାର୍ ବଚନ୍ ମେନ୍ନାଏ, ଲେକିନ୍ ଶାଏତାନ୍ ହୁଖାନେନ୍ ବାରିକିରି ଆବ୍ଡ଼ାର୍ଘି ମେନ୍ଚ୍କା ବଚନ୍ବନ୍ ତାହ୍ମା ମନ୍ତି ହାଟାବାଇଚି, ଇବ୍ଡ଼ାର୍ ହାଲ୍ଲୁଘି ବାହ୍ରିନ୍ତା ପାବୁନୁ ଖାତ୍ର୍କା ବିହ୍ନି ଲେଖା। 16ଇଦ୍ଘି ଲେଖା ଏକାନ୍ ଚାଁଚା ଜାଗାନୁ ଚାହାକାଇ: ଇବ୍ଡ଼ାର୍ ଆ ଆଲାର୍, ଏକାର୍ ବଚନ୍ ମେନ୍ତେହି ଆବନ୍ ଖୁସୀତି ଗ୍ରହନ୍ କାମ୍ନାଏ; 17ଲେକିନ୍ ଆବ୍ଡ଼ାର୍ଘିନୁ ଚେରୁ ମାଲ୍ଲାଦିନ୍ ଆରୁ ଆବ୍ଡ଼ାର୍ ଥୋଡ଼େ ସାମାୟ ସ୍ଥିର୍ ରାନାଏ। ବଚନ୍ଘି ଲାଗାନ୍ କଷଟ୍ ଚାହେ ଆତ୍ୟାଚାର୍ ବାରିଦ୍ ତା, ଆବ୍ଡ଼ାର୍ ହୁଖାନେନ୍ ଡାଗ୍ମାଗ୍ର୍ନାଏ କାନାଏ। 18ଦୁସ୍ରା ବିହ୍ନି ଆଚ୍ଚୁନୁ ଚାହାକାଇ: ଇବ୍ଡ଼ାର୍ ଇ ଆଲାର୍, ଏକାର୍ ବଚନ୍ ମେନ୍ନାଏ, 19ଲେକିନ୍ ଦୁନିଆଁଘି ଚିନ୍ତା, ଧାନ୍ନୁଘି ଲୋଭ୍ ଆରୁ ଦୁସ୍ରା କାତ୍ଥାଘି ଲାଲ୍ସା ଆବ୍ଡ଼ାର୍ଘିନୁ କରିକିରି ବଚନ୍ବନ୍ ଦାବାବାଇଚି ଆରୁ ଆଦ୍ ଫାଡ଼ୁ ମା ଅନ୍ଦ୍ରିଦ୍। 20ଆରୁ ବଚନ୍ ମେନୁ ବାକି ଆଲାର୍ ବାନେ ହାଲ୍ଲୁ ଲେଖା, ଆବ୍ଡ଼ାର୍ ବଚନ୍ବନ୍ ମେନ୍ନାଏ ଆରୁ ଗ୍ରହନ୍ କାମ୍ନାଏ, ଆରୁ ତିରିଶ୍ ଗୁଣ୍, ଷାଠିଏ ଗୁଣ୍ ଆରୁ ଶୋଏ ଗୁଣ୍ ଫାଡ଼ୁ ଚିନାଏ।”
ବିଲ୍ଲୀଘି ନମୁନା
21ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଆଲାର୍ ବିଲ୍ଲୀନ୍ ଦାଗିକିରି ଆଉଡ଼୍କା କିୟାଁ ଚାହେ ନାଟ୍ରୁ କିୟାଁ ଉଇନାଏ କାଁଏ? ବିଲ୍ଲୀନ୍ ଖୁଟାନୁ ଆବ୍ଡ଼ାର୍ ମା ଉଇନାଏ କାଁଏ? 22ହନ୍ନେନ୍ ଏକା ସତ୍ତୁବନ୍ ପାର୍ମେଶ୍ଵାର୍ସ୍ ଆଲାର୍ସ୍ତି ଆକ୍କୁନ୍ଜୁଟି ନୁଡ୍ଡାସ୍ ଉଇକାଦାସ୍, ଆବନ୍ ପାର୍ମେଶ୍ଵାର୍ସ୍ ପ୍ରକଟ୍ କାମସ୍, ମତ୍ଲବ୍ ଏକା ସତ୍ତୁବନ୍ ଜାମାର୍ ବାଲ୍ନାଏ ପାର୍ମେଶ୍ଵାର୍ସ୍କି ଉଚିତ୍ ସାମାୟ ବାରୋ ହତ୍କବାକେନ୍ ଆଲାର୍ ଆହର୍କର୍। 23ଇ କାତ୍ଥାନ୍ ଧ୍ୟାନ୍ ଚିଇକିରି ମେନା ଆରୁ ବୁଝ୍ରା। 24ଧ୍ୟାନ୍ ଚିଇକିରି ଏଙ୍ଘା ଇ କାତ୍ଥାନ୍ ମେନା ଆରୁ ବିଚାର୍ କାମା, ଏଙ୍ଘା କାତ୍ଥାନ୍ ଯେତ୍କ ଧ୍ୟାନ୍ ଚିୟର୍ ହତ୍କ ବୁଝ୍ରା ଅଙ୍ଗର୍ ଆରୁ ଆରୁହି ନିମ୍ ବାଗ୍ଗେ ବୁଝ୍ରା ଅଙ୍ଗର୍। 25ନେଦ୍ ଏଙ୍ଘା କାତ୍ଥାନ୍ ଧ୍ୟାନ୍ ଚିୟର୍ ଆରୁ ଆବନ୍ ବୁଝ୍ରର୍, ଆବ୍ଡ଼ାର୍ଗେ ପାର୍ମେଶ୍ଵାର୍ସ୍ ଆରୁ ବାଗ୍ଗେ ବୁଝ୍ରାଗେ ଶକ୍ତି ଚିୟସ୍, ଲେକିନ୍ ନେଦ୍ ଧ୍ୟାନ୍ ଚିଇକିରି ବୁଝ୍ରାଗେ କୋଶିଷ୍ ମା କାମ୍ନାଏ, ଆବ୍ଡ଼ାର୍ ଯେତ୍କ ଆହାଲ୍ନାଏ ଆବନ୍ହି ମଦ୍ରର୍ଚର୍।”
ପାର୍ଦ୍କା ବିହ୍ନିମାଞ୍ଜିଘି ନମୁନା
26ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ପାର୍ମେଶ୍ଵାର୍ସ୍କି ରାଜୀଦ୍ ଆ ଆଲାସ୍କି ଲେଖା ରାଇଦ୍, ଏକାସ୍ କା ତାଙ୍ଘା ହାଲ୍ଲୁନୁ ବିହ୍ନି ମାଞ୍ଜି ଚାହ୍ଦାସ୍, 27ଆରୁ ଆସ୍ ମାଁହାବାକେନ୍ ହାନ୍ଦ୍ର୍ଦାସ୍ ଆରୁ ପାଇରି ଉସ୍କାରାଦାସ୍, ଆସ୍ ବାଲ୍ଦାସିନ୍ କା ବିହ୍ନିଦ୍ ଏସ୍କେ ଗାଜା ମାନିଦ୍ ଆରୁ ପାର୍ଦିଦ୍। 28ହାଲ୍ଲୁନୁ ତାଙ୍ଘାସୁଖେନ୍ ଫସଲ୍ ମାନିଦ୍ ପହିଲେନୁ ଗାଜା ମାନିଦ୍ ଆନ୍ତିନ୍ ଆଥା ହୋରି, ଆନ୍ତିନ୍ ଡାହିଁ କାଇ ଆରୁ ଆନ୍ନୁ ପୁରା ଫାଡ଼ୁ ହାଞ୍ଜି, 29ଫସଲ୍ ପାଞ୍ଜକାନ୍ତି ଆସ୍ ତାଁତାର୍ ଧାରିକିରି ହୋଏଦାସ୍। ଏନ୍ଦେର୍ଗେକା ହୋଏନାଘି ସାମାୟ ମାନ୍ଚାକେର୍କିଚି।”
ମାନି ମାଞ୍ଜିଘି ନମୁନା
(ମାତିସ୍ ୧୩:୩୧,୩୨,୩୪; ଲୁକାସ୍ ୧୩:୧୮,୧୯)
30ଆନ୍ତିନ୍ ଯୀଶୁସ୍ ତେଙ୍ଗିୟାସ୍, “ନାମ୍ ପାର୍ମେଶ୍ଵାର୍ସ୍କି ରାଜୀନ୍ ନେଖାଗାନେ ତୁଲ୍ନା କାମତ୍? ଚାହେ ପାର୍ମେଶ୍ଵାର୍ସ୍କି ରାଜୀନ୍ ଏକା ନମୁନାତି ବୁଝାବତ୍? 31ପାର୍ମେଶ୍ଵାର୍ସ୍କି ରାଜୀଦ୍ ମାନି ମାଞ୍ଜି ଲେଖା ରାଇଦ୍: ଚାହ୍ନାଗେ ଜାମାର୍ଘିନ୍ତି ଛୋଟେ ମାଞ୍ଜିଦ୍, 32ଲେକିନ୍ ଆ ମାନି ମାଞ୍ଜିଦ୍ ପାର୍ଦିକିରି ଜାମା ହୋପ୍ପାନ୍ତି ବାଡ଼୍କା ମାନିକାଇଦ୍, ଆରୁ ଏତ୍କ ବାଡ଼୍କା-ବାଡ଼୍କା ଡାହିଁ ମାନିଦ୍ ଯେ ଆକାଶ୍ ତା ଓଡ଼ାଗୁଠିଦ୍ ଆଦ୍ଘି ଅଁଠୁନୁ ଡେରା କାମା ଅଙ୍ଗି।” 33ଯୀଶୁସ୍ ଏନ୍ନେ ଢେର୍ ନମୁନା ଦ୍ୱାର୍ନୁ ଆଲାର୍ଘି ବୁଝ୍ର୍ନାଘି ଅନୁସାର୍ ଆବ୍ଡ଼ାର୍ଘି ଆଘ୍ଲି ଉପ୍ଦେଶ୍ ଚିଆଲିୟାସ୍, 34ଆସ୍ ବିନା ନମୁନାତି ଆଲାରିନ୍ ଏନ୍ଦେର୍ହି ମା ତେଙ୍ଗାଲିୟାସ୍, ଲେକିନ୍ ଯେତ୍କବାକେନ୍ ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ଖାଲି ରାଲିୟାର୍, ହତ୍କବାକେନ୍ ଯୀଶୁସ୍ ଜାମା ନମୁନାଘି ମତ୍ଲବ୍ ବୁଝାବାଲିୟାସ୍।
ଯୀଶୁସ୍ ଆନ୍ଧି ଧୁକାନ୍ ବନ୍ଦ୍ କାମାଲ୍ଦାସ୍
(ମାତିସ୍ ୮:୨୩-୨୭; ଲୁକାସ୍ ୮:୨୨-୨୫)
35ହୁ ଉଲ୍ଲାନ୍ ବିଡ଼ି ଅକ୍କନାବାକେନ୍ ଯୀଶୁସ୍ ତାଙ୍ଘା ଚେଲାରିନ୍ ତେଙ୍ଗିୟାସ୍, “ଗୁଚା ନାମ୍ ଗାଲିଲୀ ହଁସ୍ରା ହାପାଖା କତ୍।” 36ଆରୁ ଆଲାରିନ୍ ବିଦା କାମ୍ଚ୍କା ପାଛ୍ଲି ଯୀଶୁସ୍ ଏକା ଡଙ୍ଗାନୁ ଅକ୍କାଚାସ୍, ହୁନ୍ନୁନିନ୍ ଅକ୍କିୟାସ୍ ଆରୁ ଦୁସ୍ରା ଡଙ୍ଗାଗୁଠିଦ୍ ହି ଆ ଡଙ୍ଗାଗାନେ ରାଚା। 37ଆରୁ ଅହ୍ନାସାରେନ୍ ମୁରୁକ୍ ଜୋର୍ସେ ଆନ୍ଧିଧୁକା ବାର୍ଚାଦ୍ ଆରୁ ଲହ୍ଡ଼ୀଦ୍ ଏତ୍କ ଜୋର୍ସେ ବାଜ୍ଡାରାଲିୟା କା ଡଙ୍ଗାଘି ଉଲା ଆମ୍ମୁଦ୍ ନିନ୍ଦା କାଲିୟାଦ୍। 38ହତ୍କବାକେନ୍ ଯୀଶୁସ୍ ଡଙ୍ଗାଘି ପାଛ୍ଲି ତାରା ତାକିୟା ଚିଇକିରି ହାନ୍ଦ୍ରାଲିୟାସ୍, ଚେଲାଜାମାର୍ ତାଙ୍ଗାନ୍ ଉଠାବାଇକିରି ତେଙ୍ଗିୟାର୍, “ହେ ଗୁରୁ! ନାମ୍ ମୁହ୍ଲା କାଲ୍ଦାତ୍! ନିମାଗେ ଚିନ୍ତା ମାଲ୍ଲାଦ୍ କାଁଏ?” 39ଆସ୍ ଉସ୍କାରାଚାସ୍ ଆରୁ ଧୁକାନ୍ ଆରୁ ହଁସ୍ରାନ୍ ତା ଲହ୍ଡ଼ୀନ୍ ଧାମ୍କିକିରି ତେଙ୍ଗିୟାସ୍, “ଶାନ୍ତ୍ ମାନୁକାଲ୍!” ଧୁକାଦ୍ ବନ୍ଦ୍ ମାନ୍ଚାକେରା ଆରୁ ହଁସ୍ରାନ୍ ତା ଲହ୍ଡ଼ୀଦ୍ ଶାନ୍ତ୍ ମାନ୍ଚାକେରା; 40ଯୀଶୁସ୍ ତାଙ୍ଘା ଚେଲାରିନ୍ ତେଙ୍ଗିୟାସ୍, “ନିମ୍ ଏନ୍ଦେର୍ଗେ ଏତ୍କ ଏଲ୍ଚାଲ୍ଦାର୍? ନିମାଗେ ଆକ୍କୁନ୍ଜୁଟି ଏନ୍ଦେର୍ଗେ ଏଙ୍ଘା ମିଆଁ ବିଶ୍ଵାସ୍ ମାଲ୍ଲାଦିନ୍?” 41ଆବ୍ଡ଼ାର୍ ମୁରୁକ୍ ଏଲ୍ଚିୟାର୍ କେର୍କାଚାର୍ ଆରୁ ତାମ୍-ତାମ୍ କାଚ୍ନେଖ୍ରା ଲାଗ୍ଗିୟାର୍, “ଆଖୀର୍ନୁ ଇସ୍ ନେଦ୍ ଇସ୍କି ହୁକୁମ୍ବନ୍ ଧୁକା ଆରୁ ହଁସ୍ରାନ୍ ତା ଲହଡ଼ିଦ୍ହି ମେନିଦ୍?”
5ଯୀଶୁସ୍ ଅଣ୍ଟା ଭୁତ୍ତୁଲାକ୍କା ଆଲାସିନ୍ ବାନେ କାମାଲ୍ଦାସ୍
(ମାତିସ୍ ୮:୨୮-୩୪; ଲୁକାସ୍ ୮:୨୬-୩୪)
1ଆନ୍ତିନ୍ ଆବ୍ଡ଼ାର୍ ହଁସ୍ରା ହାପାଖ୍ତା ଗେରେସାନିଆ ଜାମାର୍ଘି ଦେଶ୍ଗେ ଆଣସିୟାର୍, 2ଯୀଶୁସ୍ ଏସ୍କେ ଡଙ୍ଗାନ୍ତି ଏତ୍ତିୟାସିନ୍ କା ଅଣ୍ଟା ଭୁତ୍ତୁଲାକ୍କା ଆଲାସ୍ ମାସ୍ଣା ଆଡ୍ଡାସ୍ତି ଉର୍ଖିକିରି ଯୀଶୁସିନ୍ ଭେଁଟ୍ ମାନ୍ଚାସ୍। 3ଆସ୍ ମାସ୍ଣା ଆଡ୍ଡାନୁ ରାଲିୟାସ୍ ଆରୁ ଆସିନ୍ ନେଦ୍ହି ସିକ୍ଡ଼ିତିହି ହିୟାଁ ପଲ୍ଲାଲିୟାର୍, 4ଏନ୍ଦେର୍ଗେକା ଆସିନ୍ ୟୋଁଥର୍ ମଜ୍ବୁତ୍ ସିକ୍ଡ଼ିତି ହିୟାଁ କେର୍କିଚା, ଲେକିନ୍ ଆସ୍ ଧିୟାନ୍-ଧିୟାନ୍ ସିକ୍ଡ଼ିବନ୍ ହାଚ୍ଚାଚାଲିୟାସ୍, ଆରୁ ଆସିନ୍ ନେଦ୍ହି କାବୁ କାମାଗେ ପଲ୍ଲାଲିୟାର୍। 5ଆସ୍ ଉଲ୍ଲାନ୍ ମାଁହାନ୍ ହୁର୍ମିବାକେନ୍ ମାସ୍ଣା ଆଡ୍ଡା ଆରୁ ପାର୍ତ୍ତାଗୁଠିନୁ ଚିର୍ରାରାଲିୟାସ୍, ଆରୁ ନିଜ୍କେନିଜ୍ ଚାଁଚାତି ଡେମ୍ରିକିରି ଖାଦିଛେଦେ କାମାଲିୟାସ୍।6ଆସ୍ ଯୀଶୁସିନ୍ ଗେଚ୍ଛାନ୍ତି ଏରିକିରି କୁଦ୍ୟାରାତେ ବାର୍ଚାସ୍, ଆରୁ ଯୀଶୁସ୍କି ହେଡ୍ଡମୁଲିନୁ ଖାତ୍ରିକିରି ଯୋହାର୍ କାମ୍ଚାସ୍, 7-8ଯୀଶୁସ୍ ଆସିନ୍ ତେଙ୍ଗିୟାସ୍, “ହେ ଭୁତ୍ତୁ! ଇ ଆଲାସ୍ସ୍ତି ଉର୍ଖୁ କାଲ୍!” ଆଙ୍ଗେନ୍ ଭୁତ୍ତୁଦ୍ ଜୋର୍ସେ ଚିର୍ରା ରାଇକିରି ତେଙ୍ଗିୟାଦ୍, “ହେ ମାହାନ୍ ଧାର୍ମେ ବାଙ୍ଗ୍ସ୍କି ହାଦ୍ଦୁ ଯୀଶୁ! ନିନ୍ ଏଙ୍ଘାସ୍ତି ଏନ୍ଦେର୍ ଚାହାଁଲ୍ଦାଏ? ପାର୍ମେଶ୍ଵାର୍ସ୍କି ନାମେତି କସମ୍ ମଁହା କା ନିନ୍ ଏଙ୍ଗାନ୍ ଆମ୍ବୟ ସାତାବା।” 9ଯୀଶୁସ୍ ଆସିନ୍ ମେନ୍ଚାସ୍, “ନିଙ୍ଘା ନାମେ ଏନ୍ଦେର୍?” ଆସ୍ ତେଙ୍ଗିୟାସ୍, “ଏଙ୍ଘାଏ ନାମେ ଦଲ୍୫:୯ ସେନା ମତ୍ଲବ୍ ଯୁକ୍କୁ ଗୁଡ଼େ। ଏନ୍ଦେର୍ଗେକା ଏମ୍ ଯୁକ୍କୁ ରାଦାମ୍।” 10ଆନ୍ତିନ୍ ଆସ୍ ଯୀଶୁସିନ୍ ଆର୍ଜୀବିନ୍ତି କାମାଗେ ଲାଗ୍ଗିୟାସ୍ କା, “ଏମାନ୍ ଇ ରାଜୀନ୍ତି ଆମାତାଇୟା।”
11ଆସାନ୍ ପାର୍ତ୍ତାନୁ କିସ୍ସୁଘି ଅଣ୍ଟା ବାଡ଼୍କା ଭିଡ଼୍ ମେନାଲିୟାଦ୍। 12ଭୁତ୍ତୁଦ୍ ଯୀଶୁସିନ୍ ଏନ୍ନେ ତେଙ୍ଗିକିରି ଆର୍ଜୀବିନ୍ତି କାମାଗେ ଲାଗ୍ଗିୟାଦ୍, “ଏମାନ୍ ହୁବ୍ଡ଼ା କିସ୍ସୁଗୁଟ୍ଟଠିନୁ କରାଗେ ଛୁଟି ଚିଆ।” 13ଯୀଶୁସ୍ ଆବ୍ଡ଼ାରିନ୍ ଛୁଟି ଚିଚ୍ଚାସିନ୍ କା ଭୁତ୍ତୁଗୁଠିଦ୍ ଆ ଆଲାସ୍ସ୍ତି ଉର୍ଖିକିରି କିସ୍ସୁଗୁଟ୍ଟଠିନୁ କର୍ଚା ଆରୁ ପୁରା ଭିଡ଼୍ଦ୍, ମୁରୁକ୍ ଜୋର୍ସେ କୁଦିୟାରାଇକିରି ଉତ୍ରେନ୍ ଆଡ୍ଡାନ୍ତି ହଁସ୍ରାନୁ ଡେକ୍ଚା ଆରୁ ହୁନ୍ନୁ ମୁହ୍ଲିଆ କେଚ୍ଚାକେରା, ଆଦ୍ ଲାଗ୍ଭାଗ୍ ଦୁଇ ହାଜାର୍ ରାଚା।
14କିସ୍ସୁ ହାପୁ ଆଲାର୍ ବୁଙ୍ଗିୟାର୍କେରାର୍। ଆବ୍ଡ଼ାର୍ ସହର୍ନୁ ଆରୁ ଚାହାଚାହାନ୍ତା ପାଡ଼ାଗୁଠିନୁ ଇ ଘାଟ୍ଣାଘି ବାରେନୁ ତେଙ୍ଗିୟାର୍, ଆରୁ ଆଲାର୍ ଇବ୍ଡ଼ା ଜାମାନ୍ ଏରାଗେ ଉର୍ଖିୟାର୍ ବାର୍ଚାର୍। 15ଆବ୍ଡ଼ାର୍ ଯୀଶୁସ୍କି ଚାହାଗେ ବାର୍ଚାର୍ ଆରୁ ଆ ବାଗ୍ଗେ ଭୁତ୍ତୁଲାକ୍କା ଆଲାସିନ୍ ଚିଢ଼ା ଆତ୍ତିକିରି କାଡ଼େ-କାଡ଼େ, ଶାନ୍ତ ମନ୍ନୁ ଅକ୍କାନ୍ ଏରିକିରି ଆଲାର୍ ଏଲ୍ଚିୟାର୍ କେରାର୍। 16ଏକାର୍ ଇବ୍ଡ଼ା ଜାମା ଘାଟ୍ଣାନ୍ ତାହ୍ମା ହାନ୍ନୁତି ଏର୍କାଚାର୍, ଆବ୍ଡ଼ାର୍ ଆଲାରିନ୍ ଭୁତ୍ତୁ ଲାକ୍କା ଆଲାସ୍ ଗାନେ, ଆରୁ କିସ୍ସୁ ଗୁଟ୍ଟଠିଘି ମିଆଁ ଏନ୍ଦେର୍ ମାନ୍ଚ୍କିଚା ଆବନ୍ ତେଙ୍ଗିୟାର୍। 17ଆଙ୍ଗେନ୍ ଗେରେସାନିୟାର୍ ଯୀଶୁସିନ୍ ଆର୍ଜୀବିନ୍ତି କାମ୍ଚାର୍ କା ଆସ୍ ଆବ୍ଡ଼ାର୍ଘି ସୀମାନ୍ତି ବୁଙ୍ଗୋସ୍।
18ଯେତ୍କବାକେନ୍ ଯୀଶୁସ୍ ଡଙ୍ଗାନୁ ଆର୍ଗାଲିୟାସ୍ ହତ୍କବାକେନ୍ ଏକା ଆଲାସ୍କି ମେଦୁନୁ ଆଘ୍ଲି ଭୁତ୍ତୁ ଲାକ୍କିଚା, ଆସ୍ ତାଙ୍ଘା ସାଙ୍ଗେନ୍ କାଲାଗେ ଧ୍ୟାନ୍-ଧ୍ୟାନ୍ ଆର୍ଜୀ କାମ୍ଚାସ୍। 19ଲେକିନ୍ ଯୀଶୁସ୍ ଆସିନ୍ ମାନା କାମିକିରି ତେଙ୍ଗିୟାସ୍, “ନିଙ୍ଘା ଆଡ଼୍ପାଗେ ଆରୁ ନିଙ୍ଘା ପରିବାର୍ସାନ୍ କାଲା ଆରୁ ନିଙ୍ଘାଲାଗାନ୍ ଦାୟା କାମିକିରି ପ୍ରାଭୁସ୍ ଏକା ନାଲ୍ଖୁନ୍ କାମ୍ଚ୍କାଦାସ୍ ଆବନ୍ ଆବ୍ଡ଼ାରିନ୍ ତେଙ୍ଗା।” 20ଯୀଶୁସ୍କି କାତ୍ଥା ମେନିକିରି ଆସ୍ ତାଙ୍ଘାଏ ଆଡ଼୍ପା କିର୍ରିୟାସ୍, ଆରୁ ଯୀଶୁସ୍ ଆସ୍କି ଲାଗାନ୍ ଏକା ନାଲ୍ଖୁନ୍ କାମ୍ଚ୍କାଚାସ୍; ଆବନ୍ ପୁରା ଦେକାପଲି ରାଜୀନୁ କୁଦ୍ଦା-କୁଦ୍ଦା ତେଙ୍ଗାଲିୟାସ୍, ଆରୁ ତାଙ୍ଘାଏ କାତ୍ଥା ମେନିକିରି ଆଲାର୍ ଆଚ୍ମିତ୍ ମାନାକାଲିୟାର୍।
ଯୀଶୁସ୍ ଅଣ୍ଟା କେଚ୍ଚକା କୁକାଏବନ୍ ଉଜ୍ଜତାଲ୍ଦାସ୍ ଆରୁ ଅଣ୍ଟା ବେହ୍ମରିୟା ଆଲିନ୍ ବାନେ କାମାଲ୍ଦାସ୍
(ମାତିସ୍ ୯:୧୮-୨୬; ଲୁକାସ୍ ୮:୪୦-୫୬)
21ଯେତ୍କବାକେନ୍ ଯୀଶୁସ୍ ଡଙ୍ଗାନୁ ପାର୍ ମାନିକିରି ହଁସ୍ରା ହାପାଖା ଆଣ୍ସିୟାସ୍ ତା, ତାଙ୍ଘା ଚାହା ଅଣ୍ଟା ବାଡ଼୍କା ଆଲାର୍ଘି ଭିଡ଼୍ ହପ୍ରା କେରା। ଆରୁ ଯୀଶୁସ୍ ହଁସ୍ରା ଖାଁଣିନୁ ରାଚାସ୍। 22ହତ୍କବାକେନ୍ ସାଭା ଆଡ଼୍ପାନ୍ତା ଅଣ୍ଟା ଯାଇରସ୍ ନାମେଘି ମୁଖ୍ୟାସ୍ ବାର୍ଚାସ୍, ଆରୁ ଆସ୍ ଯୀଶୁସିନ୍ ଏରାଖାନେନ୍ ଆସ୍କି ହେଡ୍ଡମୁଲିନୁ ଖାତ୍ରାସ୍, 23ଆରୁ ମୁରୁକ୍ ଆର୍ଜୀବିନ୍ତି କାମିକିରି ତେଙ୍ଗିୟାସ୍, “ଏଙ୍ଘା କୁକାଏ ହାଦ୍ଦୁଦ୍ ଖିନାବାଲା ରାଇଦ୍: ଦାୟା କାମିକିରି ଏଙ୍ଘାଗାନେ ଗୁଚା ଆରୁ ଆଦ୍ଘି ମିଆଁ ନିଙ୍ଘା ହେଖ୍ଖାନ୍ ଉଇୟା, ଏସ୍କେ କା ଆଦ୍ ବାନେ ମାନଦ୍ ଆରୁ ଆଦ୍ ଉଜ୍ଜକୋ।” 24ଆଙ୍ଗେନ୍ ଯୀଶୁସ୍ ଆସ୍ଗାନେ କେରାସ୍; ଆରୁ ଅଣ୍ଟା ବାଡ଼୍କା ଆଲାର୍ଘି ଭିଡ଼୍ ତାହ୍ମା ପାଛ୍ଲି-ପାଛ୍ଲି କାଲାଗେ ଲାଗ୍ଗିୟାଦ୍, ଆରୁ ଭିଡ଼୍ଘି ଚାଲ୍ତେ ଆଲାର୍ ଯୀଶୁସିନ୍ ତିର୍ହା ନାବାଚାଲିୟାର୍।
25ହୁ ଭିଡ଼୍ନୁ ଅଣ୍ଟା ଆଲିଦ୍ ରାଚା, ଆରୁ ଆଦ୍ଘି ବାର ବଛର୍ତିନ୍ ପାର୍ଦା ବେମାର୍ ରାଚା। 26ଆଦ୍ ଢେର୍ ବଏଦ୍ ଜାମାର୍ସ୍ତି ମାନ୍ଦାର୍ ମକ୍କିଚା, ଆରୁ ତାଙ୍ଘା ଜାମା ପାଏସାହି ମୁଞ୍ଜରା କେର୍କିଚା ହାଲେହି ବାନେ ମାନାଗେ ପଲ୍ଲିୟାଦ୍, ଉଲ୍ଟା ଆଦ୍ ଆରୁହି ବେହ୍ମରିୟା ମାନ୍ଚା କେର୍କିଚା। 27ଆଦ୍ ଯୀଶୁସ୍କି ବାରେ ମେନିକିରି ଭିଡ଼୍ନ୍ତି ଯୀଶୁସ୍କି ପାଛ୍ଲି ତାର୍ତି ବାର୍ଚା ଆରୁ ଆସ୍କି ଚିଢ଼ାନ୍ ଏସ୍ରା, ଏନ୍ଦେର୍ଗେକା ଆଦ୍ ମନେମନ୍ ସୋଚାଲିୟାଦ୍, 28“ଏନ୍ ଯୀଶୁସ୍କି ଚିଢ଼ାନ୍ ଖାଲି ଏସ୍ରନ୍ ହାଲେହି ବାନେ ମାନନ୍କନ୍।” 29ହତ୍କବାକେନିନ୍ ତାଙ୍ଘା ପାର୍ଦା ବେମାର୍ ଛୁଟ୍ରାକେରା। ଆରୁ ଆଦ୍ ନିଜର୍ ଶରୀର୍ନୁ ଅନୁଭବ୍ କାମ୍ଚାକା ଏଙ୍ଘା ବେମାର୍ ଦୁର୍ ମାନ୍ଚାକେର୍କିଚି। 30ଲେକିନ୍ ଯୀଶୁସ୍ ଆଖ୍ଖାସ୍ କେରାସ୍ କା ତାଙ୍ଘା ମେଦୁନ୍ତି ଶକ୍ତି ଉର୍ଖିୟା, ଆଙ୍ଗେନ୍ ଆସ୍ ଭିଡ଼୍ବନ୍ କିର୍ରେଚେ ଏରିୟାସ୍ ଆରୁ ମେନ୍ଚାସ୍, “ଏଙ୍ଘା ଚିଢ଼ାନ୍ ନେଦ୍ ଏସ୍ରାର୍?” 31ଆସ୍କି ଚେଲାଜାମାର୍ ଆସିନ୍ ତେଙ୍ଗିୟାର୍, “ନିମ୍ତା ଏରାଲ୍ଦାର୍ କା ଭିଡ଼୍ଦ୍ ନିମାନ୍ ତିର୍ହା ନାବାଚାଲିଦ୍, ହାଲେହି ନିମ୍ ତେଙ୍ଗାଲ୍ଦାର୍ କା ଏଙ୍ଗାନ୍ ନେଦ୍ ଏସ୍ରାର୍?” 32ଲେକିନ୍ ନେଦ୍ ତାଙ୍ଗାନ୍ ଏସ୍ରାର୍, ଆବ୍ଡ଼ାରିନ୍ ଏରାଗେ ଯୀଶୁସ୍ ଚାର୍ହି ପାଖା ନାଜ୍ରାଚାସ୍। 33ହତ୍କବାକେନ୍ ଆ ଆଲିଦ୍ ତାଙ୍ଘା ମିଆଁ ଯାହା ଘାଟ୍ର୍କିଚା, ଆବନ୍ ଆହିକିରି ଏଲ୍ଚ୍କାତି ଥାର୍ଥାର୍ତେ ବାର୍ଚା, ଆରୁ ଯୀଶୁସ୍କି ହେଡ୍ଡମୁଲିନୁ ଖାତ୍ରିକିରି ଜାମା ସତ୍ତୁ କାତ୍ଥାନ୍ ତେଙ୍ଗିୟାଦ୍। 34ଯୀଶୁସ୍ ଆବନ୍ ତେଙ୍ଗିୟାସ୍, “ହାଇ ନିଙ୍ଘା ବିଶ୍ଵାସ୍ଦ୍ ନିଙ୍ଗାନ୍ ବାନେ କାମ୍ଚା। ଶାନ୍ତିନୁ ବୁଙ୍ଗୁଚି ଆରୁ ନିଙ୍ଘା ଇ ବେମାର୍ ଆରୁ ମା ମାନ୍ନାଦ୍।”
35ଯୀଶୁସ୍କି ଇ କାତ୍ଥା ତେଙ୍ଗ୍ନାବାକେନ୍ ଆ ସାଭା ଆଡ଼୍ପାନ୍ତା ମୁଖ୍ୟାସ୍କି ଆଡ଼୍ପାନ୍ତି କେତ୍କ ଲୋକ୍ ଆଲାର୍ ବାର୍ଚାର୍ ଆରୁ ତେଙ୍ଗିୟାର୍, “ନିଙ୍ଘାଏ ହାଦ୍ଦୁ କେଚ୍ଚା କେରାଦିନ୍ ଆକ୍କୁନ୍ ଗୁରୁସିନ୍ ଏନ୍ଦେର୍ଗେ କଷଟ୍ ଚିୟାଲ୍ଦାର୍?” 36ଲେକିନ୍ ଯୀଶୁସ୍ ଆବ୍ଡ଼ାର୍ଘି କାତ୍ଥାନ୍ ଧ୍ୟାନ୍ ମା ଚିଚ୍ଚାସ୍, ଆରୁ ଆ ସାଭା ଆଡ଼୍ପାନ୍ତା ମୁଖିଆସିନ୍ ତେଙ୍ଗିୟାସ୍, “ଆମା ଏଲ୍ଚା, ବିଶ୍ଵାସ୍ କାମା।” 37ଆନ୍ତିନ୍ ଯୀଶୁସ୍ ପାତ୍ରାସ୍, ୟାକୁବ୍ ଆରୁ ଆସ୍କି ଭାଇ ଯୋହାନ୍ସିନ୍ ଆମ୍ଵିକିରି, ଆରୁ ନେକାନ୍ହି ତାଙ୍ଘା ସାଙ୍ଗେନ୍ କାଲା ମା ଚିଚ୍ଚାସ୍। 38ଯେତ୍କବାକେନ୍ ଆବ୍ଡ଼ାର୍ ସାଭା ଆଡ଼୍ପାନ୍ତା ମୁଖ୍ୟାସ୍କି ଆଡ଼୍ପାଗେ ଆଣସିୟାର୍ ତା, ଆସାନ୍ ଆଲାର୍ଘି ଚିର୍ରାବର୍ରା ଆରୁ ମୁରୁକ୍ ଜୋର୍ସେ ଅହ୍ଲନାନ୍ ଯୀଶୁସ୍ ଏରିୟାସ୍। 39ଯୀଶୁସ୍ ଉଲା କାଇକିରି ଆଲାରିନ୍ ତେଙ୍ଗିୟାସ୍, “ଏନ୍ଦେର୍ଗେ ନିମ୍ ଚିର୍ରାବର୍ରା ମାନାଲ୍ଦାର୍ ଆରୁ ଅହ୍ଲାଲ୍ଦାର୍? କୁକାଏ ମାଲ୍ଲା ଖିଉ, ଲେକିନ୍ ହାନ୍ଦ୍ରାଲିଦ୍।” 40ଇବନ୍ ମେନିକିରି ଆଲାର୍ ତାଙ୍ଘାଏ ମାଜାକ୍ ଉଡ଼ାବାଚାର୍, ଲେକିନ୍ ଯୀଶୁସ୍ ଜାମାରିନ୍ ବାହ୍ରି ଉର୍ଖାଗେ ତେଙ୍ଗିୟାସ୍ ଆରୁ ଆ କୁକାଏଘି ତାଙ୍ଗ୍ୟ-ତାମ୍ଵା ଆରୁ ତାଙ୍ଘାଏ ସାଙ୍ଗେ ଜାମାର୍ଗାନେ ଆସାନ୍ କେରାସ୍, ଏକାସାନ୍ ଆ କୁକାଏ ରାଚା। 41ଆରୁ ଯୀଶୁସ୍ ଆ କୁକାଏଘି ହେଖ୍ଖାବନ୍ ଧାର୍ଚାସ୍ ଆରୁ ତେଙ୍ଗିୟାସ୍, “ଟଲିଥା କୁମ୍!” ଇଦ୍ଘି ମତ୍ଲବ୍ “ଏ କୁକାଏ ଏନ୍ ନିଙ୍ଗାନ୍ ତେଙ୍ଗାଲ୍ଦାନ୍, ଉସ୍କାରୁ!” 42ଆଖାନେନ୍ ଆ କୁକାଏ ଉସ୍କାରାଚା ଆରୁ ଏକାଗେ ଲାଗ୍ଗିୟାଦ୍; ଏନ୍ଦେର୍ଗେକା ଆଦ୍ ବାର ବଛର୍ତା ରାଚାଦ୍। ଇବନ୍ ଏରିକିରି ଆଲାର୍ ମୁରୁକ୍ ଆଚ୍ମିତ୍ ମାନ୍ଚାର୍ କେରାର୍। 43ଯୀଶୁସ୍ ଏରୁ ଆଲାରିନ୍ ହୁକୁମ୍ ଚିଇକିରି ଇ କାତ୍ଥାଘି ବାରେନୁ ନେକାନ୍ହି ଆମ୍କେ ତେଙ୍ଗା ବୁଲି ତେଙ୍ଗିୟାସ୍, ଆନ୍ତିନ୍ ଆସ୍ ଆ କୁକାଏଗେ ଅନାମହାଗେ ଚିଆ ବୁଲି ତେଙ୍ଗିୟାସ୍।
6ଯୀଶୁସିନ୍ ନିଜର୍ ପାଡ଼ାନ୍ତା ଆଲାର୍ ବିଶ୍ୱାସ୍ ମା କାମାଲ୍ନାଏ
(ମାତିସ୍ ୧୩:୫୩-୫୮; ଲୁକାସ୍ ୪:୧୬-୩୦)
1ଯୀଶୁସ୍ ସାଭା ଆଡ଼୍ପାନ୍ତା ମୁଖ୍ୟା ଯାଇରୁସ୍କି ଆଡ଼୍ପାନ୍ତି ଉର୍ଖିକିରି ତାଙ୍ଘା ଚେଲାଜାମାର୍ଗାନେ ତାଙ୍ଘା ସହର୍ଗେ କେରାସ୍। 2ଯେତ୍କବାକେନ୍ ପାବିତାର୍ ଉଲ୍ଲା ବାର୍ଚାତା ସାଭା ଆଡ଼୍ପାନୁ ଯୀଶୁସ୍ ପାର୍ମେଶ୍ଵାର୍ସ୍କି ବଚନ୍ବନ୍ ଶିଖାବାଗେ ଲାଗ୍ଗିୟାସ୍, ଇବନ୍ ମେନିକିରି ଆଲାର୍ ମୁରୁକ୍ ଆଚ୍ମିତ୍ ମାନ୍ଚାର୍ କେରାର୍, ଆରୁ ଆବ୍ଡ଼ାର୍ ତାମ୍-ତାମ୍ କାଚ୍ନେଖ୍ରା ଲାଗ୍ଗିୟାର୍, “ଇ ଆଲାସ୍ ଏକାସ୍ତି ଏନ୍ନେ କାତ୍ଥା ଶିଖ୍ରାସ୍? ଏକାସ୍ତି ଏତ୍କ ବୁଦ୍ଧି ଆରୁ ଅଦ୍ଭୁତ୍ ନାଲ୍ଖୁ କାମାଗେ ଇସ୍କେ ଏତ୍କ ଶକ୍ତି ହାଖ୍ଖରା? 3ଇସ୍ ଆ ବଢ଼େଇ ମାଲ୍ଦାସ୍ କାଁଏ? ଏକାସ୍ କା ମାରିୟାମ୍ଘି ହାଦ୍ଦୁସ୍, ଆରୁ ୟାକୁବ୍, ଯୋସି, ଯୁଦାସ୍ ଆରୁ ଶିମୋନ୍ସ୍କି ଭାଇସ୍ ମାଲ୍ଦାସ୍? ଆରୁ ଇସ୍କି ବୁହୁଣୀର୍ ନାହ୍ମାଗାନେ ମାଲ୍କାର୍ କାଁଏ?” ହୁଦ୍ଘିଲାଗାନ୍ ଆବ୍ଡ଼ାର୍ଗେ ଖୀସ୍ ଲାଗ୍ଗିୟାଦ୍ ଆରୁ ଯୀଶୁସ୍କି ମିଆଁ ବିଶ୍ଵାସ୍ ମା କାମ୍ଚାର୍। 4ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ପାର୍ମେଶ୍ୱାର୍ସ୍କି ଉପ୍ଦେଶ୍ ଚିଉରିନ୍, ନିଜର୍ ପାଡ଼ାନ୍ତାର୍, ଜାତିକୁଟୁମ୍ଵ ଆରୁ ନିଜର୍ ଆଡ଼୍ପାନ୍ତାର୍ ଆଦର୍ମାଇନ୍ ମା କାମ୍ନାଏ। ଲେକିନ୍ ଦୁସ୍ରା ଜାମା ଆଲାର୍ ଆଦର୍ମାଇନ୍ କାମ୍ନାଏ।” 5ଯୀଶୁସ୍ ଆସାନ୍ ଖାଲି କେତ୍କ ବେହ୍ମରିୟା ଆଲାର୍ଘି ମିଆଁ ହେଖ୍ଖା ଉଇକିରି ବାନେ କାମ୍ଚାସ୍, ଆରୁ ଆସ୍ ଆସାନ୍ ଏନ୍ଦେର୍ହି ଅଦ୍ଭୁତ୍ ନାଲ୍ଖୁ କାମା ପଲ୍ଲିୟାସିନ୍। 6ପାଡ଼ାନ୍ତାର୍ଘି ବିଶ୍ଵାସ୍ ମା କାମ୍ନାନ୍ ଏରିକିରି ଯୀଶୁସ୍ ମୁରୁକ୍ ଆଚ୍ମିତ୍ ମାନ୍ଚାସ୍ କେରାସ୍।
ଯୀଶୁସ୍ ବାର ଲୋକ୍ ଚେଲାରିନ୍ ପ୍ରଚାର୍ କାମାଗେ ତାଇୟାଲ୍ଦାସ୍
(ମାତିସ୍ ୧୦:୫-୧୫; ଲୁକାସ୍ ୯:୧-୬)
7ଆନ୍ତିନ୍ ଯୀଶୁସ୍ ପାର୍ମେଶ୍ଵାର୍ସ୍କି ବଚନ୍ ଉପ୍ଦେଶ୍ ଚିତେ ପାଡ଼ା-ପାଡ଼ାନୁ କୁଦ୍ଦାଲିୟାସ୍। ଆସ୍ ବାର ଲୋକ୍ ଚେଲାରିନ୍ ତାଙ୍ଘାସାନ୍ ମେହିଁୟାସ୍, ଆରୁ ଆବ୍ଡ଼ାର୍ଗେ ଭୁତ୍ତୁ ଅଥ୍ର୍ନାଘି ହକ୍ ଚିଇକିରି ଦୁଇ-ଦୁଇ ଲୋକ୍ରିନ୍ ତାଇୟାସ୍। 8ଯୀଶୁସ୍ ଚେଲାରିନ୍ ହୁକୁମ୍ ଚିଚ୍ଚାସ୍, “ନିମ୍ କାନାବାକେନ୍ ଅଣ୍ଟା ଲାଠି ଛଡ଼ା ଏନ୍ଦେର୍ହି ଆମାହୁଆ, ନା ଆସ୍ମା, ନା ଥାଇଲି, ନା ପାଏସା ମୁଁଣା। 9ଜୁତା ଆତ୍ତିକିରି କାଲା, ଲେକିନ୍ ଅଣ୍ଟା ଖାଲି ମିର୍ଜୀ ଆତ୍ତା ଆରୁ ଦୁସ୍ରା ମିର୍ଜୀ ହୋଇକିରି ଆମାକାଲା” 10ଆରୁ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏକା ଆଡ଼୍ପାନୁ ନିମ୍ ରାଗେ କର୍ ପାଡ଼ାନ୍ତି ବିଦା ମା ମାନ୍ନାଜୁଟି ଆ ଆଡ଼୍ପାନୁନ୍ ରର୍। 11ଯଦି ଏକିନ୍ ଆଡ୍ଡାନୁ ଆଲାର୍ ନିମାନ୍ ସ୍ୱାଗାତ୍ ମା କାମ୍ନାଏ ଆରୁ ପାର୍ମେଶ୍ଵାର୍ସ୍କି ବଚନ୍ ମା ମେନ୍ନାଏ, ତା ଆ ପାଡ଼ାନ୍ତି ଉର୍ଖ୍ନା ବାକେନ୍ ନିହ୍ମା ପାଦୁନ୍ତା ଧୁଲିବନ୍ ଆବ୍ଡ଼ାର୍ଘି ଆଘ୍ଲି ହେତ୍ତାଚା, ହୁଦ୍ ଆ କାତ୍ଥାଘି ଲାଗାନ୍ ଚିହ୍ନା ରଦ୍କା ପାର୍ମେଶ୍ଵାର୍ସ୍କି ଦଣ୍ଡ୍ଘି ଲାଇଗ୍ ମାନର୍।” 12ଆନ୍ତିନ୍ ଆ ବାର ଲୋକ୍ ଚେଲାଜାମାର୍ କାଇକିରି ଆଲାରିନ୍ ତାହ୍ମା ପାପ୍ତି ପାସ୍ତାରାଗେ ଆରୁ ନିଜର୍ ପାପ୍ବନ୍ ଆମ୍ଵିକିରି ପାର୍ମେଶ୍ଵାର୍ସ୍କି ତାରା କିର୍ରାବାରାବୁଲି ପ୍ରଚାର୍ କାମ୍ଚାର୍। 13ଆରୁ କେତ୍କ ଲୋକ୍ ଆଲାର୍ସ୍ତି ଭୁତ୍ତୁଗୁଠିନ୍ ଅଥରାର୍, ଆରୁ କେତ୍କ ବେହ୍ମରିୟା ଆଲାର୍ଘି କୁକ୍କୁନୁ ଇସୁଙ୍ଗ୍ ଲାଗାବାଇକିରି ଆବ୍ଡ଼ାରିନ୍ ବାନେ କାମ୍ଚାର୍।
ହେରୋଦ୍ ରାଜାସ୍ ଆସ୍ନାନ୍ ଚିଉ ଯୋହାନ୍ସ୍କି କୁକ୍କୁନ୍ ମୁର୍କ୍ତାଚାସ୍
(ମାତିସ୍ ୧୪:୧-୧୨; ଲୁକାସ୍ ୯:୭-୯)
14ହେରୋଦ୍ ରାଜାସ୍ ଯୀଶୁସ୍କି ବାରେ ମେନ୍ଚାସ୍, ଏନ୍ଦେର୍ଗେକା ଜାମାତାରା ଆଲାର୍ ଯୀଶୁସ୍କି ଆରୁ ତାଙ୍ଘା ନାଲ୍ଖୁଘି ବାରେନୁ କାଚ୍ନେଖ୍ରାଲିୟାର୍, କେତ୍କ ଆଲାର୍ ତେଙ୍ଗାଲିୟାର୍, “କା ଯୀଶୁସ୍ ତା ଆସ୍ନାନ୍ ଚିଉ ଯୋହାନ୍ସ୍ ଆକ୍କୁନ୍ ଆରୁଅହନ୍ ଉଜ୍ଜିୟାସ୍ କେର୍କାଦାସ୍, ହୁଦ୍ଘିଲାଗାନ୍ ଯୀଶୁସ୍ ଅଦ୍ଭୁତ୍ ନାଲ୍ଖୁ କାମାଲ୍ଦାସ୍।” 15କେତ୍କ ଆଲାର୍ ତେଙ୍ଗାଲିୟାର୍, “ଯୀଶୁସ୍ ପାର୍ମେଶ୍ୱାର୍ସ୍କି ବଚନ୍ ଶୁଣାବୁ ଏଲିୟାସ୍।” ଆରୁ କେତ୍କ ଲୋକ୍ ଆଲାର୍ ତେଙ୍ଗାଲିୟାର୍, “ଇସ୍ତା ଆ ନାବୀଜାମାର୍ଘି ଭିତର୍ନୁ ଅର୍ତୁସ୍, ଏକାର୍ କା ଢେର୍ ଆଘ୍ଲି ରାଲିୟାର୍।” 16ଲେକିନ୍ ହେରୋଦ୍ ରାଜାସ୍ ଇ କାତ୍ଥାନ୍ ମେନିକିରି ତେଙ୍ଗିୟାସ୍, “ଯୋହାନ୍ସ୍, ନେଖା କୁକ୍କୁନ୍ ଏନ୍ ମୁର୍କ୍ତେ ଚିଚ୍କାଚ୍କାନ୍, ଆସ୍ ଉଜ୍ଜିୟାସ୍ କେର୍କାଦାସ୍!” 17ହେରୋଦ୍ ରାଜାସ୍କି ହୁକୁମ୍ ଲେଖା, ତାଙ୍ଘା ସିପାହୀଜାମାର୍ ଯୋହାନ୍ସିନ୍ ବନ୍ଦୀ କାମ୍ଚାର୍ ଆରୁ ଜେହେଲ୍ନୁ ଗୁଡ୍ଡେଇଚାର୍। ହେରୋଦ୍ସ୍ ଇ ହୁକୁମ୍ବନ୍ ହେରୋଦିଆଘି ତେଙ୍କାତି ଚିଚ୍କାଦାସ୍। ହେରୋଦିଆଦ୍ ତାଙ୍ଘା ଭାଇ ଫିଲିପ୍ପସ୍କି ମାଏକିନିଆଁ ରାଚା, ଆରୁ ଆସ୍କି ଉଜ୍ଜତେ, ହେରୋଦ୍ସ୍ ଆସ୍କି ମାଏକିନିଆଁନ୍ ବେଞ୍ଜରାସ୍। 18ଆସ୍ନାନ୍ ଚିଉ ଯୋହାନ୍ସ୍ ହେରୋଦ୍ସିନ୍ ତେଙ୍ଗାଲିୟାସ୍, “କା ହନ୍ନେନ୍ ନିଙ୍ଘା ଭାଇସ୍କି ମାଏକିନିଆଁନ୍ ବେଞ୍ଜେର୍ନାଦ୍ ପାର୍ମେଶ୍ଵାର୍ସ୍କି ନିୟମ୍ଘି ବିରୁଦ୍ଧ୍।” 19ଇଦ୍ଘିଲାଗାନ୍ ହେରୋଦିଆଘି ମନ୍ନୁ ଯୋହାନ୍ସ୍କି ମିଆଁ ଖୀସ୍ ରାଚା, ଆରୁ ଆସିନ୍ ପିଟାଗେ ବେଦ୍ଦାଲିୟା; ଲେକିନ୍ ଆଦ୍ ଏନ୍ନେ କାମାଗେ ପଲ୍ଲାଲିୟାଦ୍। 20ଏନ୍ଦେର୍ଗେକା ହେରୋଦ୍ସ୍ ଯୋହାନ୍ସିନ୍ ଧାର୍ମିକ୍ ଆରୁ ପାବିତାର୍ ଆଲାସ୍ବୁଲି ସୋଚାଲିୟାସ୍ ହୁଦ୍ଘିଲାଗାନ୍ ଆସିନ୍ ଏଲ୍ଚାଲିୟାସ୍, ଆରୁ ଆସ୍କି ରକ୍ଷା କାମାଲିୟାସ୍। ଆରୁ ଆସ୍କି କାତ୍ଥା ମେନିକିରି ମୁରୁକ୍ ଘାବ୍ରାରା କାଲିୟାର୍ ଲେକିନ୍ ଖୁସୀତି ମେନାଲିୟାସ୍। 21ଯୋହାନ୍ସ୍ତି ବାଦ୍ଲା ହୁନାଘି ସାମାୟ ବାର୍ଚା ଯେତ୍କବାକେନ୍ ହେରୋଦ୍ସ୍ ତାଙ୍ଘା ନିଜର୍ ଜନମ୍ ଉଲ୍ଲାନୁ ଗାଲିଲୀନ୍ତା ନେତା ଜାମାର୍ଗେ, ପଲ୍ଟନ୍ଜାମାର୍ଘି ଅଫିସର୍ ଜାମାର୍ଗେ, ଆରୁ କୋଟ୍କାଚେରୀଘି ଅଫିସର୍ ଆଲାର୍ଗେ ଭୋଜି ଚିଚ୍ଚାସ୍। 22ହୁ ଭୋଜି ଉଲ୍ଲାନୁ ହେରୋଦିଆଘି ତାଙ୍ଗ୍ଦାଦ୍ ନାଲିକିରି, ହେରୋଦ୍ ରାଜାସିନ୍ ଆରୁ ଭୋଜିନୁ ବାରୁ ଆଲାରିନ୍ ଖୁସ୍ କାମ୍ଚା, ହୁଦ୍ଘିଲାଗାନ୍ ରାଜାସ୍ କୁକାଏନ୍ ତେଙ୍ଗିୟାସ୍, “ନିନ୍ ଏନ୍ଦେର୍ ଚାହାଁଲ୍ଦିନ୍ ଆବନ୍ ନିୟୁ। ଏନ୍ ଆବନ୍ ଚିୟନ୍।” 23ଆରୁ ରାଜାସ୍ କସମ୍ ମହିଁକିରି ତେଙ୍ଗିୟାସ୍, “ନିନ୍ ଏନ୍ଦ୍ରିନ୍ହି ନିଅୟ ଏତ୍କତକ୍ କା ଏଙ୍ଘା ରାଜୀନ୍ତା ଆଧା ଭାଗୁହି ନିଅୟ ହାଲେହି ଚନ୍।” 24କୁକାଏ ବାହ୍ରି କାଇକିରି ତାଙ୍ଗ୍ୟ ହେରୋଦିଆବନ୍ ମେନ୍ଚାଦ୍, “ଏନ୍ ଏନ୍ଦେର୍ ନିୟନ୍?” ଆଦ୍ ତେଙ୍ଗିୟାଦ୍, “ଆସ୍ନାନ୍ ଚିଉ ଯୋହାନ୍ସ୍କି କୁକ୍କୁନ୍ ନିୟୁ।” 25କୁକାଏ ରାଜାସାନ୍ ଚାଁଣେନିନ୍ କୁଦ୍ୟାରାନାନ୍ତି ବାର୍ଚା ଆରୁ ଏନ୍ନେ ତେଙ୍ଗିୟାଦ୍, “ନିମ୍ ଆକ୍କୁନ୍ନିନ୍ ଏଙ୍ଗାଗେ ଆସ୍ନାନ୍ ଚିଉ ଯୋହାନ୍ସ୍କି କୁକ୍କୁନ୍ ମୁର୍କିକିରି ଅଣ୍ଟା ଥାଡ଼ିନୁ ଉଇକିରି ଚିଆ।” 26ରାଜାସ୍କେ ଇବନ୍ ମେନିକିରି ମୁରୁକ୍ ଦୁଃଖୁ ଲାଗ୍ଗିୟା, ଲେକିନ୍ ରାଜାସ୍ ତାଙ୍ଘାଏ ପାହିୟାର୍ଘି ଆଘ୍ଲି କସମ୍ ମକ୍କାଚାସ୍ ହୁଦ୍ଘିଲାଗାନ୍ ଆସ୍ ମାନା କାମା ପଲ୍ଲିୟାସ୍। 27ହୁଙ୍ଗେନିନ୍ ରାଜାସ୍ ତାଙ୍ଘାଏ ପଲ୍ଟନ୍ସିନ୍ ଯୋହାନ୍ସ୍କି କୁକ୍କୁନ୍ ଅନ୍ଦ୍ରାଗେ ହୁକୁମ୍ ଚିଚ୍ଚାସ୍। ହୁଙ୍ଗେନ୍ ଆସ୍ ଜେହେଲ୍ଗେ କାଇକିରି ଆସ୍ନାନ୍ ଚିଉ ଯୋହାନ୍ସ୍କି କୁକ୍କୁନ୍ ମୁର୍କିୟାସ୍ ଅନ୍ଦରାସ୍। 28ଆରୁ ଆବନ୍ ଥାଡ଼ିନୁ ଅନ୍ଦ୍ରିକିରି କୁକାଏଗେ ଚିଚ୍ଚାସ୍, ଆରୁ କୁକାଏ ଆବନ୍ ତାଙ୍ଗ୍ୟଗେ ଚିଚ୍ଚା। 29ଯେତ୍କବାକେନ୍ ଯୋହାନ୍ସ୍କି ଚେଲାଜାମାର୍ ଇବନ୍ ଆଖ୍ଖାର୍ ତା ଆବ୍ଡ଼ାର୍ ବାରିକିରି, ଯୋହାନ୍ସ୍କି ମାଁଣାନ୍ ଅଚ୍ଚାର୍ ଆରୁ ଅଣ୍ଟା ମାସ୍ଣାନୁ ଉଇଏଚାର୍।
ଯୀଶୁସ୍ ପାଞ୍ଚ୍ ହାଜାର୍ ଆଲାରିନ୍ ଅଦ୍ଭୁତ୍ ନାଲ୍ଖୁ କାମିକିରି ମହଁତାଲ୍ଦାସ୍
(ମାତିସ୍ ୧୪:୧୩-୨୧; ଲୁକାସ୍ ୯:୧୦-୧୭; ଯୋହାନ୍ ୬:୧-୧୪)
30ଖାସ୍ଚେଲାଜାମାର୍ ଯୀଶୁସ୍କି ଚାହାନୁ ବାରିକିରି ଅକ୍କିୟାର୍, ଆରୁ ଆବ୍ଡ଼ାର୍ ଏନ୍ଦେର୍-ଏନ୍ଦେର୍ କାମ୍ଚ୍କାଚାର୍, ଆରୁ ଏନ୍ଦେର୍-ଏନ୍ଦେର୍ ଶିଖାବାଚ୍କାଚାର୍ ଆଦ୍ଘି ବାରେ ତେଙ୍ଗିୟାର୍। 31ଢେର୍ ଆଲାର୍ କାଲିୟାର୍ ବାରାଲିୟାର୍, ହୁଦ୍ଘିଲାଗାନ୍ ଯୀଶୁସ୍ ଆରୁ ତାଙ୍ଘା ଖାସ୍ଚେଲା ଜାମାର୍ଗେ ଅନାଗେହି ଫୁର୍ସତ୍ ମା ହାଖ୍ଖରାଦ୍। ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏଙ୍ଘାଗାନେ ଗୁଚା ଅଣ୍ଟା ଶୁନ୍ଶାନ୍ ଆଡ୍ଡାଗେ କାଇକିରି ଆରାମ୍ କାମତ୍।” 32ହୁଦ୍ଘିଲାଗାନ୍ ଆବ୍ଡ଼ାର୍ ଅଣ୍ଟା ଡଙ୍ଗାନୁ ଅକ୍କିକିରି, ଶୁନ୍ଶାନ୍ ଆଡ୍ଡାଗେ ଉର୍ଖିୟାର୍ କେରାର୍। 33ଲେକିନ୍ କେତ୍କ ଲୋକ୍ ଆବ୍ଡ଼ାର୍ଘି ଡଙ୍ଗାନୁ ଅକ୍କିକିରି କାନାନ୍ ଏରିୟାର୍ ଆରୁ ଆବ୍ଡ଼ାରିନ୍ ଚିହ୍ନଚେଇଚାର୍, ଆନ୍ତିନ୍ ଜାମା ସହ୍ର୍ତି ଢେର୍ ଆଲାର୍ ହଁସ୍ରା ଖାଁଣିଗେ ବାତ୍କାରାଇକିରି ଯୀଶୁ ଆରୁ ତାଙ୍ଘା ଚେଲାଜାମାର୍ଘିନ୍ତି ଆଘ୍ଲି ଆସାନ୍ ଆଣ୍ସିୟାର୍ କେରାର୍। 34ଏସ୍କେ ଯୀଶୁସ୍ ଆଣ୍ସିୟାସ୍ ଆରୁ ଡଙ୍ଗାନ୍ତି ଏତ୍ତିୟାସ୍ ଆନ୍ନେନ୍ ଆଲାର୍ଘି ଅଣ୍ଟା ବାଡ଼୍କା ଭିଡ଼୍ ଏରିୟାସ୍। ଆସ୍କେ ଆବ୍ଡ଼ାର୍ଘି ମିଆଁ ମୁରୁକ୍ ସୋଗ୍ଗେ ଲାଗ୍ଗିୟା, ଏନ୍ଦେର୍ଗେକା ଆବ୍ଡ଼ାର୍ ବିନା ଚାର୍ୱାହ୍ର୍ଘି ଭେଡ଼ି ଲେଖା ରାଚାର୍; ହୁଦ୍ଘିଲାଗାନ୍ ଯୀଶୁସ୍ ଆବ୍ଡ଼ାର୍ଗେ ଢେର୍ କାତ୍ଥାଗୁଠିନ୍ ଶିଖାବାଗେ ଲାଗ୍ଗିୟାସ୍। 35ଯେତ୍କବାକେନ୍ ଢେର୍ ଡେରି ମାନାକାଲିୟାଦ୍ ତା, ଯୀଶୁସ୍କି ଚେଲାଜାମାର୍ ତାଙ୍ଘା ଚାହାଗେ ବାରିକିରି ତେଙ୍ଗିୟାର୍, “ଇଦ୍ ଶୁନ୍ଶାନ୍ ଆଡ୍ଡାଦ୍, ଆରୁ ଢେର୍ ଡେରି ମାନ୍ଚା କେରାଦିନ୍। 36ଆଲାରିନ୍ କାଲାଗେ ଚିଆ, ଏସ୍କେ କା ଆବ୍ଡ଼ାର୍ ଚାହାଚାହାନ୍ତା ବସ୍ତି ଆରୁ ପାଡ଼ାଗେ କାଇକିରି ନିଜର୍ଲାଗାନ୍ ଅନାମହାଗେ ଏନ୍ଦ୍ରିନ୍ ହେନ୍ଦର୍।” 37ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ନିମ୍ ଇବ୍ଡ଼ାର୍ଗେ ଅନାମହାଗେ ଚିଆ।” ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ଇ ଭିଡ଼୍ବନ୍ ଅନ୍ତାଗେ ଦୁଇ ଶହ୍ ଦିନାର୍6:37 ଦୁଇ ଶହ୍ ଦିନାର୍ଘି ମତ୍ଲବ୍ ଆ ଜାମାନାନ୍ତା ହିସାବ୍ତି ଅଣ୍ଟା ମଜ୍ରୀସ୍କି ଆଠ୍ ମାହିନାଘି ମଜ୍ରୀ ଲାଗ୍ଗିଦ୍ ଘି ଆସ୍ମା ହେନ୍ଦା ଆରୁ ଆବନ୍ ଆଲାର୍ଗେ ମହାଗେ ଚିଆ।” 38ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିହ୍ମାସାନ୍ ୟୋଁଟା ଆସ୍ମା ରାଇ କାଇକିରି ଏରା?” ଆବ୍ଡ଼ାର୍ ପାତା ଲାଗାବାଚାର୍ ଆରୁ ତେଙ୍ଗିୟାର୍, “ପାଞ୍ଚେଟା ଆସ୍ମା ଆରୁ ଯୋଡ଼େ ଇଞ୍ଜୋ ଆତ୍ଲି।” 39ଆନ୍ତିନ୍ ଯୀଶୁସ୍ ଜାମାରିନ୍ ଧାଡ଼ି-ଧାଡ଼ି ମାନିକିରି ବଲୋ ଘାଁସିଘି ମିଆଁ ଅକ୍କାଗେ ତେଙ୍ଗିୟାସ୍। 40ଆଲାର୍ ଶୋଏ-ଶୋଏ ଆରୁ ପଚାଶ୍-ପଚାଶ୍ ଲୋକ୍ ମାନିକିରି ଧାଡ଼ିନୁ ଅକ୍କିୟାର୍। 41ଯୀଶୁସ୍ ଆ ପାଞ୍ଚେଟା ଆସ୍ମା ଆରୁ ଯୋଡ଼େ ଇଞ୍ଜୋନ୍ ଅଚ୍ଚାସ୍, ଆରୁ ଆକାଶ୍ତାରା ଏରିକିରି ପାର୍ମେଶ୍ଵାର୍ସିନ୍ ଧାନ୍ୟାବାଦ୍ ଚିଇକିରି, ଆ ଆସ୍ମାବନ୍ ଖିଣ୍ଡିୟାସ୍ ଆନ୍ତିନ୍ ଆଲାର୍ଗେ ହାଟ୍ଟାଗେ ତାଙ୍ଘା ଚେଲାଜାମାର୍ଗେ ଚିଚ୍ଚାସ୍। ହନ୍ନେନ୍ ଆ ଯୋଡ଼େ ଇଞ୍ଜୋନ୍ହି ଜାମାର୍ଗେ ହାଟ୍ଟେଇଚାସ୍। 42ଯେତ୍କବାକେନ୍ ଜାମାର୍ ମଖ୍ଖାର୍ ଆରୁ ମହିଁକିରି ଉଚ୍ଛିୟାର୍ କେରାର୍, 43ଆରୁ ଚେଲାଜାମାର୍ ଆସ୍ମା ଆରୁ ଇଞ୍ଜୋଘି ବାଛ୍ର୍କା ଟୁକ୍ଡ଼ାନ୍ ବାର ଡାଲା ନିନ୍ଦିୟାର୍। 44ଆସ୍ମା ମହୁଁ ଆଲାର୍ ପାଞ୍ଚ୍ ହାଜାର୍ ମାର୍ଦ୍ନାର୍ ରାଚାର୍।
ଯୀଶୁସ୍ ଆମ୍ମୁ ମିଆଁ ଏକାଲ୍ଦାସ୍
(ମାତିସ୍ ୧୪:୨୨-୩୩; ଯୋହାନ୍ ୬:୧୫-୨୧)
45ଇଦ୍ଘି ପାଛ୍ଲି ଯୀଶୁସ୍ ତାଙ୍ଘା ଚେଲାରିନ୍ ଡଙ୍ଗାନୁ ଅକ୍ତିକିରି ଗାଲିଲୀ ହଁସ୍ରା ହାପାଖାନ୍ତା ବେତ୍ସାଇଦା ପାଡ଼ାଗେ ତାଙ୍ଘାସ୍ତି ଆଘ୍ଲି ତାଇଏଚାସ୍, ଆରୁ ଆ ଭିଡ଼୍ବନ୍ ତାହ୍ମା ଆଡ୍ଡା ତାଇଏଚାସ୍। 46ଯୀଶୁସ୍ ଆଲାରିନ୍ ବିଦା କାମ୍ଚ୍କା ପାଛ୍ଲି ବିନ୍ତି କାମାଗେ ଅଣ୍ଟା ପାର୍ତ୍ତାଗେ ଆର୍ଗିୟାସ୍। 47ଯେତ୍କବାକେନ୍ ବିଡ଼ି ଅକ୍କାଲିୟା, ହତ୍କବାକେନ୍ ଡଙ୍ଗାଦ୍ ହଁସ୍ରା ମାଝାନୁ ଆଣ୍ସିୟା କେର୍କିଚା, ଆରୁ ଯୀଶୁସ୍ ହଁସ୍ରା ଖାଁଣିନୁ ଅଥାସ୍ ରାଚାସ୍। 48ଯୀଶୁସ୍ ଚେଲାଜାମାର୍ଘି ମୁରୁକ୍ ମେହ୍ଁନେତ୍ତି ଡଙ୍ଗାନ୍ ବାହ୍ନାନ୍ ଏରିୟାସ୍, ଏନ୍ଦେର୍ଗେକା ଧୁକାଦ୍ ତାହ୍ମା ଆଘ୍ଲିତାର୍ତି ବାରାଲିୟା। ବିଜ୍ଜନାଘି ଲାଗ୍ଭାଗ୍ ତିନ୍ବାଜେଗେ ଯୀଶୁସ୍ ଆମ୍ମୁ ମିଆଁ ଏକ୍ତେ ଆବ୍ଡ଼ାର୍ଘି ଚାହାଗେ କେରାସ୍; ଆରୁ ଆସ୍ ଚେଲାଜାମାର୍ସ୍ତି ଆଘ୍ଲି ପାର୍କାଟ୍ଟା ବେଦ୍ଦାଲିୟାସ୍। 49ଲେକିନ୍ ଯେତ୍କବାକେନ୍ ଚେଲାଜାମାର୍ ଯୀଶୁସିନ୍ ଆମ୍ମୁନୁ ଏକ୍ନାନ୍ ଏରିୟାର୍। ଆବ୍ଡ଼ାର୍ ସୋଚ୍ଚାର୍ କା ଇଦ୍ ଅଣ୍ଟା ଭୁତ୍ତୁ ରାଲ୍କିରୋ, ଆରୁ ଆବ୍ଡ଼ାର୍ ଚିର୍ରାରାଚାର୍; 50ଏନ୍ଦେର୍ଗେକା ଯେତ୍କବାକେନ୍ ଚେଲାଜାମାର୍ ଆସିନ୍ ଏରିୟାର୍ ତା, ଆବ୍ଡ଼ାର୍ ମୁରୁକ୍ ଏଲ୍ଚିୟାର୍ କେରାର୍, ଲେକିନ୍ ଯୀଶୁସ୍ ହୁଙ୍ଗେନିନ୍ ଆବ୍ଡ଼ାରିନ୍ ବାଇ ଚିଇକିରି ତେଙ୍ଗିୟାସ୍, “ଧିରାଜ୍ ଧାରା: ଆମା ଏଲ୍ଚା! ଏନ୍।” 51ଆନ୍ତିନ୍ ଯୀଶୁସ୍ ତାହ୍ମା ଡଙ୍ଗା ମିଆଁ ଆର୍ଗିୟାସ୍, ଆରୁ ଆଖାନେନ୍ ଧୁକାଦ୍ ବନ୍ଦ୍ ମାନ୍ଚାକେରା: ଇବନ୍ ଏରିକିରି ଚେଲାଜାମାର୍ ଆଚ୍ମିତ୍ ମାନ୍ଚାର୍ କେରାର୍। 52ପାଞ୍ଚେଟା ଆସ୍ମାଘି ଅଦ୍ଭୁତ୍ ନାଲ୍ଖୁନ୍ ଏର୍କା ପାଛ୍ଲି ହି ଚେଲାଜାମାର୍ ବୁଝ୍ରା ପଲ୍ଲିୟାର୍ କା, ଯୀଶୁସ୍କି କେତ୍କ ଶକ୍ତି ରାଇ ଏନ୍ଦେର୍ଗେକା ଆବ୍ଡ଼ାର୍ଘି ମନ୍ଦ୍ କାଠୋର୍ ମାନ୍ଚା କେର୍କିଚା।
ଯୀଶୁସ୍ ଗେନ୍ନେସାରେତ୍ନୁ ବେହ୍ମରିୟାରିନ୍ ବାନେ କାମାଲ୍ଦାସ୍
53ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ହଁସ୍ରା ପାର୍ ମାନିକିରି ଗେନ୍ନେସାରେତ୍ ରାଜୀଗେ ଆଣସିୟାର୍, ଆରୁ ହଁସ୍ରା ଖାଁଣିନୁ ଡଙ୍ଗାନ୍ ହିଁଚାର୍। 54ଏସ୍କେ ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ଡଙ୍ଗାନ୍ତି ଏତ୍ତିୟାର୍, ଆସ୍ତା ଆଲାର୍ ଯୀଶୁସିନ୍ ଚିହ୍ନଚାର୍, 55ଆରୁ ହୁ ଏରିଆନୁ ଆଲାର୍ ଆଡ୍ଡା-ଆଡ୍ଡା କାଇକିରି, ଆରୁ ବେହ୍ମରିୟାରିନ୍ ନାଟ୍ରୁନୁ ଚେଡ଼ିକିରି ଯୀଶୁସ୍ ଏକା ଆଡ୍ଡାଗେ କେର୍କାଦାସ୍ ଆବନ୍ ମେନ୍ଚାର୍ ଆରୁ ଆ ଆଡ୍ଡା ଗୁଠିଗେ କେରାର୍। 56ଏକାସାନ୍ ଯୀଶୁସ୍ କେରାସ୍ ଚାହେ ପାଡ଼ା ରାନାଦ୍ ଚାହେ ସହର୍ ରାନାଦ୍, ଚାହେ ପାଡ଼ାନ୍ତି ବାହ୍ରି, ଆଲାର୍ ବେହ୍ମରିୟାରିନ୍ ଅନ୍ଦ୍ରିକିରି ହାଟ୍ଟେ ଗୁଠିନୁହି କିଦାଚାଲିୟାର୍, ଆବ୍ଡ଼ାର୍ ଯୀଶୁସିନ୍ ଆର୍ଜୀବିନ୍ତି କାମିକିରି ତେଙ୍ଗିୟାର୍ କା ଯୀଶୁସ୍ ତାଙ୍ଘା ଆତ୍ତ୍କା ଚିଢ଼ାଘି ପାଁଣ୍ତୁନ୍ କାଟେ ଏସ୍ରାଗେ ଛୁଟି ଚିୟସ୍: ଆରୁ ନେଦ୍ ତାଙ୍ଗାନ୍ ଏସ୍ରାର୍ ଆବ୍ଡ଼ାର୍ ବାନେ ମାନ୍ଚାର୍ କେରାର୍।
7ପାର୍ମେଶ୍ଵାର୍ସ୍କି ନଜର୍ନୁ ଶୁଦ୍ଧ୍ ମାନ୍ନାଘି ବାରେନୁ ଯୀଶୁସ୍ ତେଙ୍ଗାଲ୍ଦାସ୍
1ଅହନ୍ ଯେରୁଶାଲେମ୍ତି ବାର୍ଚ୍କା ଫାରିସୀଜାମାର୍ ଆରୁ ୟାହୁଦୀ ପଣ୍ତିତ୍ଜାମାର୍ ଯୀଶୁସ୍ସାନ୍ ଠୁଡ଼ିୟାରାଚାର୍। 2ଆବ୍ଡ଼ାର୍ ଏରିୟାର୍ କା ଯୀଶୁସ୍କି କେତ୍କ ଲୋକ୍ ଚେଲାଜାମାର୍ ୟାହୁଦୀ ନିୟମ୍ଘି ଲେଖା ହେଖ୍ଖାନ୍ ମା ନଣ୍ଡ୍ରିକିରି ଅନାଲ୍ନାଏ, ଏସ୍କେ କା ଅଶୁଦ୍ଧ୍ ମାନାଲିୟାର୍। 3ୟାହୁଦୀ ଆଲାର୍ ବିଶେଷ୍କିରି ଫାରିସୀଜାମାର୍, ଅନ୍ନାଘି ଆଘ୍ଲି ଆବ୍ଡ଼ାର୍ ପୁର୍ଖା ଜାମାର୍ଘି ଶିଖାବାଚ୍କା ନିୟମ୍ ଅନୁସାର୍ ନିଜର୍ ହେଖ୍ଖାନ୍ ନଣ୍ଡ୍ରିକିରି ଅନ୍ନାଏ। 4ଯେତ୍କବାକେନ୍ ଆବ୍ଡ଼ାର୍ ହାଟ୍ଟେନ୍ତି ଆଡ଼୍ପା ବାର୍ନାଏ ତା, ଆବ୍ଡ଼ାର୍ ପୁର୍ଖାର୍ଘି ନିୟମ୍ ଲେଖା ମା ଏମ୍ଚ୍କୁନ୍ ମା ଅନ୍ନାଏ। ଖୁରୀ, ଗାଡ଼ୁୱା ଆରୁ କାସାଘି ଖୁରୀଗିନାନ୍ ଆମ୍ମୁନୁ ନଣ୍ନାଏ ଆରୁ ପୁର୍ଖାର୍ଘି ତେଙ୍କା ନିୟମ୍ବନ୍ ମାନାଲିୟାର୍ । 5ହୁଦ୍ଘିଲାଗାନ୍ ଫାରିସୀଜାମାର୍ ଆରୁ ୟାହୁଦୀ ପଣ୍ତିତ୍ଜାମାର୍ ଯୀଶୁସିନ୍ ମେନ୍ଚାର୍, “ନିହ୍ମା ଚେଲାଜାମାର୍ ଏନ୍ଦେର୍ଗେ ନିୟମ୍ଘି ଅନୁସାର୍ ଶୁଦ୍ଧ୍ ହେଖ୍ଖାନୁ ମା ଅନ୍ନାଏ? ଏନ୍ଦେର୍ଗେ ପୁର୍ଖାର୍ଘି ନିୟମ୍ ଲେଖା ମା ଚାଲ୍ର୍ନାଏ।” 6ଆବ୍ଡ଼ାରିନ୍ ଯୀଶୁସ୍ ଯାବାବ୍ ଚିଚ୍ଚାସ୍, “ନିମ୍ କପ୍ଟୀ ଆଲାର୍ ଲେଖା, ନିହ୍ମା ବାରେନୁ ଇଶାୟାହ୍ସ୍ ନାବୀସ୍ ଏନ୍ନେ ଲେଖ୍ଚ୍କାଦାସ୍: ‘ଇବ୍ଡ଼ାର୍ କାତ୍ଥାତି ଖାଲି ଏଙ୍ଘା ଆଦର୍ମାଇନ୍ କାମ୍ନାଏ, ଲେକିନ୍ ସତ୍ତୁନିନ୍ ଏଙ୍ଗାନ୍ ମା ମାନ୍ନାଏ, ଲେକିନ୍ ଆବ୍ଡ଼ାର୍ଘି ମନ୍ ଏଙ୍ଘାସ୍ତି ଗେଚ୍ଛାନୁ ରାଇଦ୍। 7ଆବ୍ଡ଼ାର୍ ଏଙ୍ଘା ଆରାଧାନା କାମ୍ନାଏ; ଆଦ୍ଘି ଏନ୍ଦେର୍ହି ଫାଏଦା ମାଲ୍ଲା, ଆବ୍ଡ଼ାର୍ ଏକାନ୍ ଶିଖାବାନାଏ ଆଦ୍ ଆଲାର୍ଘି କାମ୍ଚ୍କା ନିୟମ୍ଦ୍।’ 8ନିମ୍ ପାର୍ମେଶ୍ଵାର୍ସ୍କି ହୁକୁମ୍ବନ୍ ମେନାଗେ ଆମ୍ଵେଇ ଚିଚ୍କାର୍ ଆରୁ ଆଲାର୍ଘି କାମ୍ଚ୍କା ନିୟମ୍ବନ୍ ଧାର୍ଚ୍କାର୍ ଉଇକାଦାର୍।” 9ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ନିଜର୍ ରୀତିନୀତିବନ୍ ମାନ୍ନାଘି ଲାଗାନ୍ ପାର୍ମେଶ୍ଵାର୍ସ୍କି ନିୟମ୍ବନ୍ ମୁରୁକ୍ ଚାଲାକ୍ତି ହାଟାବାଦାର୍ ଚିଦାର୍! 10ମୁଶା ନାବୀସ୍ ପାର୍ମେଶ୍ଵାର୍ସ୍କି ଇ ନିୟମ୍ବନ୍ ଶିଖାବାଚ୍କାଚାସ୍ କା, ‘ନିହ୍ମା ନିଜର୍ ଆୟାଙ୍ଗ୍-ବାଙ୍ଗ୍ରିନ୍ ଆଦର୍ମାଇନ୍ କାମା, ଆରୁ ମୁଶା ନାବୀସ୍ ଇବନ୍ହି ଶିଖାବାଚ୍କାଚାସ୍ କା, ନେଦ୍ ନିଜର୍ ଆୟାଙ୍ଗ୍-ବାଙ୍ଗ୍ରିନ୍ ଆଦର୍ମାଇନ୍ ମା କାମ୍ନାଏ ଆବ୍ଡ଼ାର୍ଗେ ମରନ୍ଘି ଦଣ୍ଡ୍ ଚିଆକୋ।’ 11ନିମ୍ ନାନ୍ନାରିନ୍ ଏନ୍ନେ ଶିଖାବାଦାର୍ କା, ‘ନିମ୍ କାଇକିରି ନିଜର୍ ଆୟାଙ୍ଗ୍ ବାଙ୍ଗ୍ରିନ୍ ତେଙ୍ଗ୍ଦାର୍ କା, ଏକାନ୍ ନିମାଗେ ମଦେତ୍ କାମାଗେ ଚିନାରାଇ ଆବନ୍ ଏନ୍ ପାର୍ମେଶ୍ଵାର୍ସ୍କେ ଚିଚ୍କାଦାନ୍।’ 12ଏନ୍ନେ ଶିଖାବାଇକିରି ନିମ୍ ନାନ୍ନାରିନ୍ ତାହ୍ମା ଆୟାଙ୍ଗ୍-ବାଙ୍ଗ୍ର୍ଘି ଏନ୍ଦେର୍ହି ଭାଲାଇ କାମା ମା ଚିଦାର୍। 13ହନ୍ନେନ୍ ନିମ୍ ନିହ୍ମା ପୁର୍ଖାର୍ଘି ରୀତିନୀତିନ୍ ନାନ୍ନାରିନ୍ ଶିଖାବାଦାର୍ ଆରୁ ପାର୍ମେଶ୍ଵାର୍ସ୍କି ନିୟମ୍ବନ୍ ଆମ୍ଵଦାର୍ ଚିଦାର୍; ନିମ୍ ଏନ୍ନେ ବହୁତ୍କିଛି କାମ୍ତେ ରାଦାର୍।”
ଆଲାରିନ୍ ଅଶୁଦ୍ଧ୍ କାମ୍ନାବାଲା କାତ୍ଥା
14ଆନ୍ତିନ୍ ଯୀଶୁସ୍ ଆଲାର୍ଘି ଭିଡ଼୍ବନ୍ ତାଙ୍ଘାସାନ୍ ମେହିଁୟାସ୍ ଆରୁ ତେଙ୍ଗିୟାସ୍, “ନିମ୍ ଏଙ୍ଘା କାତ୍ଥାନ୍ ଧ୍ୟାନ୍ସେ ମେନା, ଆରୁ ବୁଝ୍ରା। 15ବାହ୍ରିନ୍ତି ଅଣ୍ଟା ଆଲାସ୍କି ଅନ୍ନାନୁ ଏକାଦ୍ ଉଲା କାଇ ଆଦ୍ ଆସିନ୍ ପାର୍ମେଶ୍ଵାର୍ସ୍କି ନଜର୍ନୁ ଅଶୁଦ୍ଧ୍ ମା କାମିଦ୍; ଲେକିନ୍ ଅଣ୍ଟା ଆଲାସ୍କି ମନ୍ ଉଲ୍ତି ଖାରାପ୍ କାତ୍ଥା ଉର୍ଖିଦ୍, ଆଦ୍ ଅଣ୍ଟା ଆଲାସିନ୍ ପାର୍ମେଶ୍ଵାର୍ସ୍କି ନଜର୍ନୁ ଅଶୁଦ୍ଧ୍ କାମିଚି। 16(ଇ କାତ୍ଥାନ୍ ଧ୍ୟାନ୍ସେ ମେନା, ଆରୁ ବୁଝ୍ରା।)” 17ଯେତ୍କବାକେନ୍ ଯୀଶୁସ୍ ଆଲାରିନ୍ ଆମ୍ଵିକିରି ଅଣ୍ଟା ଆଡ଼୍ପାନୁ କର୍ଚାସ୍, ହତ୍କବାକେନ୍ ଚେଲାର୍ ଆ ନମୁନାଘି ମତ୍ଲବ୍ବନ୍ ମେନ୍ଚାର୍। 18ଯୀଶୁସ୍ ଚେଲାଜାମାରିନ୍ ତେଙ୍ଗିୟାସ୍, “ନିମ୍ ଏତ୍କ ସହଜ୍ କାତ୍ଥାନ୍ହି ବୁଝ୍ରା ପଲ୍ଲଦାର୍, ଏକାଦ୍ ଆଲାର୍ଘି ଥୁମ୍ଣାତାର୍ତି ଉଲା କରି, ଆଦ୍ ପାର୍ମେଶ୍ଵାର୍ସ୍କି ନଜର୍ନୁ ଅଶୁଦ୍ଧ୍ ମାଲ୍ଲିଦ୍। 19ଏନ୍ଦେର୍ଗେକା ଆଦ୍ ଆଲାର୍ଘି ମନ୍ନୁ ମା କରି, ଖାଲି ଆସ୍କି କୁଲୁନୁ କରି ଆରୁ ମେଦୁନ୍ତି ଉର୍ଖିକାଇ। ହନ୍ନେନ୍ ଜାମା ଅନ୍ନାମହ୍ନାଦ୍ ‘ଶୁଦ୍ଧ୍’ ରାଇଦ୍, ଇବନ୍ ମା ବୁଝ୍ରାଲ୍ଦାର୍ କାଁଏ?” 20ଯୀଶୁସ୍ ଆରୁହି ତେଙ୍ଗିୟାସ୍, “ଆଲାର୍ଘି ମନ୍ ଉଲ୍ତି ଏକାଦ୍ ଉର୍ଖିଦ୍, ଆଦିନ୍ ଆବ୍ଡ଼ାରିନ୍ ପାର୍ମେଶ୍ଵାର୍ସ୍କି ନଜର୍ନୁ ଅଶୁଦ୍ଧ୍ କାମିଚି। 21ଏନ୍ଦେର୍ଗେକା ଆଲାର୍ଘି ମନ୍ ଉଲ୍ତି ଖାରାପ୍-ଖାରାପ୍ ବିଚାର୍ ଉର୍ଖି, ଏସ୍କେ କା ଖାରାପ୍ ଚିନ୍ତା, ରାଣ୍ଡିବାଜି ନାଲ୍ଖୁ କାମ୍ନା, ହାଡ଼୍ନା, ପିଟ୍ନା, ବେଭିଚାର୍। 22ଲୋଭ୍, ଖାରାପ୍ ନାଲ୍ଖୁ କାମ୍ନା, ଠାକ୍ନା, ଖାରାପ୍ ନଜର୍ନୁ ଏର୍ନା, ହିସ୍ଙ୍ଗା, ନିନ୍ଦା କାମ୍ନା, ଘମଣ୍ଡି ଏଦ୍ର୍ନା, ନିର୍ବୁଦ୍ଧିଆ। 23ଇବ୍ଡ଼ା ଜାମା ଖାରାପ୍ଦ୍ ଆଲାର୍ଘି ମନ୍ ଉଲ୍ତି ଉର୍ଖି ଆରୁ ଆଲାରିନ୍ ଅଶୁଦ୍ଧ୍ କାମିଚି।”
ଅଣ୍ଟା ବିନାୟାହୁଦୀ ଆଲିଦ୍ ଯୀଶୁସ୍କି ମିଆଁ ବିଶ୍ଵାସ୍ କାମାଲିଦ୍
24ଯୀଶୁସ୍ ଗାଲିଲୀ ରାଜୀନ୍ତି ବିଦା ମାନିକିରି ସୋର୍ ଆରୁ ସିଦୋନ୍ ସହ୍ର୍ଗେ କେରାସ୍; ଆସାନ୍ ଆସ୍ ଅଣ୍ଟା ଆଡ଼୍ପାନୁ ରାଚାସ୍। ଯୀଶୁସ୍କି ବାର୍ନା କାତ୍ଥାନ୍ ଏକାର୍ହି ମା ଆହ୍ନାର୍ବୁଲି ଆସ୍ ସୋଚାଲିୟାସ୍; ଲେକିନ୍ ଆସ୍ ଆସାନ୍ ନୁହୁରିକିରି ରା ପଲ୍ଲିୟାସ୍। 25ହୁଙ୍ଗେନିନ୍ ଅଣ୍ଟା ଆଲିଦ୍ ବାର୍ଚା, ନେଖା ଛୋଟେ କୁକାଏ ହାଦ୍ଦୁଗେ କା ଭୁତ୍ତୁ ଲାକ୍କିଚା, ଆ ଆଲିଦ୍ ଯୀଶୁସ୍କି ବାରେନୁ ମେନ୍ଚା ଆରୁ ଆସ୍କି ହେଡ୍ଡମୁଲିନୁ ଖାତ୍ରା। 26ଆଦ୍ ଅଣ୍ଟା ବିନାୟାହୁଦୀ ଆଲି ରାଚା, ଆରୁ ସିରିଆ ଦେଶ୍ତା ଫିନୀକୀୟା ରାଜୀନ୍ତା ରାଚା, ଆରୁ ତାଙ୍ଗ୍ଦାଘି ମେଦୁନ୍ତା ଭୁତ୍ତୁନ୍ ଅଥ୍ରାଗେ ଯୀଶୁସିନ୍ ଆର୍ଜୀବିନ୍ତି କାମାଗେ ଲାଗ୍ଗିୟାଦ୍। 27ଆନ୍ତିନ୍ ଯୀଶୁସ୍ ଆଲିନ୍ ତେଙ୍ଗିୟାସ୍, “ଆଘ୍ଲି ହାଦ୍ଦୁରିନ୍ କୁଲ୍ ଉଡ଼୍ନାଜୁଟି ମହାଁଗେ ଚିଆ, ଏନ୍ଦେର୍ଗେକା ହାଦ୍ଦୁର୍ଘି ଆସ୍ମା ହୋଇକିରି ଆଲ୍ଲାଘି ଆଘ୍ଲି ଆଚ୍ଛନା ବାନେ ମାଲ୍ଲିଦ୍୭:୨୭ ୟାହୁଦୀ ଜାମାରିନ୍ ହାଦ୍ଦୁର୍ ଗାନେ ତୁଲ୍ନା କାମା କେର୍କିଚି ଆରୁ ବିନାୟାହୁଦୀ ଜାମାରିନ୍ ଆଲ୍ଲା ଗାନେ ତୁଲ୍ନା କାମା କେର୍କିଚି। ।” 28ଆ ଆଲିଦ୍ ଯୀଶୁସିନ୍ ଯାବାବ୍ ଚିଚ୍ଚା, “ଲେକିନ୍ ପ୍ରାଭୁ; ଆଡ଼୍ପାନ୍ତା ଆଲ୍ଲାଦ୍ ହାଦ୍ଦୁର୍ଘି ଥାଡ଼ିନ୍ତି ଖାତ୍ର୍କା ଟୁକ୍ଡ଼ାଟୁକ୍ଡ଼ି ଆସ୍ମାଗୁଠିନ୍ ମହିଁଦ୍।” 29ଇବନ୍ ମେନିକିରି ଯୀଶୁସ୍ ଆବନ୍ ତେଙ୍ଗିୟାସ୍, “ନିନ୍ ଏତ୍କ ବାନେ ଯାବାବ୍ ଚିଚ୍ଚକି ହୁଦ୍ଘିଲାଗାନ୍ କାଲାଅଙ୍ଗ୍ଦି; ନିଙ୍ଘା ହାଦ୍ଦୁନ୍ତି ଭୁତ୍ତୁ ଉର୍ଖିୟା କେର୍କିଚି।” 30ଯେତ୍କବାକେନ୍ ଆଦ୍ ତାଙ୍ଘା ଆଡ଼୍ପା କିର୍ରିୟାଦ୍ ତା ଏରିୟା କା ତାଙ୍ଗ୍ଦାଦ୍ ନାଟ୍ରୁନୁ ଚୁତ୍କିଚି, ଆରୁ ଆଦ୍ଘିସ୍ତି ଭୁତ୍ତୁଦ୍ ଉର୍ଖିୟା କେର୍କିଚି।
ଯୀଶୁସ୍ ଭାଏଁରା ଆରୁ କନ୍ଦା ଆଲାସିନ୍ ବାନେ କାମାଲ୍ଦାସ୍
31ଆନ୍ତିନ୍ ଯୀଶୁସ୍ ସୋର୍ ସହର୍ ଆମ୍ଵିକିରି ସିଦୋନ୍ ସହର୍ ଚିଇକିରି ଦେକାପଲି ଜିଲ୍ଲା ଚିଇକିରି ଗାଲିଲୀ ହଁସ୍ରା ଖାଁଣିଗେ ଆଣ୍ସିୟାସ୍। 32ଆସ୍ତା କେତ୍କ ଲୋକ୍ ଆଲାର୍ ଅଣ୍ଟା ଭାଏଁରା ଆରୁ କନ୍ଦା ଆଲାସିନ୍ ତାଙ୍ଘା ଚାହାଗେ ଅନ୍ଦ୍ରାର୍, ଆରୁ ଏନ୍ନେ ଆର୍ଜୀବିନ୍ତି କାମ୍ଚାର୍ କା ଆସ୍କି ମିଆଁ ଯୀଶୁସ୍ ହେଖ୍ଖା ଉଇୟସ୍ ଆରୁ ଆସ୍ ବାନେ ମାନସ୍କସ୍। 33ଯୀଶୁସ୍ ଆସିନ୍ ଭିଡ଼୍ସ୍ତି ଭିନେ ତାରା ହୋଇକିରି, ଆସ୍କି ହେବ୍ଦାନୁ ତାଙ୍ଘା ଆଙ୍ଗ୍ଠିଗୁଠିନ୍ ସାଜ୍ଜାସ୍, ଆରୁ ଆସ୍କି ତାଥାନୁ ତାଙ୍ଘା ତୁପ୍ଫାଲୋ ଆମ୍ମୁ ଚିଇକିରି ଏସ୍ରାସ୍; 34ଆନ୍ତିନ୍ ଆସ୍ ଆକାଶ୍ତାରା ଏରିକିରି ଲାମ୍ବା ନିନାଶ୍ ହୋଇକିରି ତାଙ୍ଗାନ୍ ତେଙ୍ଗିୟାସ୍, “ଇପ୍ପଥଃ!” ମତ୍ଲବ୍ “ଖୋଲ୍ରୁକାଲ୍”। 35ହତ୍କବାକେନିନ୍ ତାଙ୍ଘା ହେବ୍ଦା ଖୋଲ୍ରା କେରା ଆରୁ ଥୁମ୍ଣାନ୍ତା ଗାଗ୍ଗା ହାଚ୍ରା କେରା, ଆରୁ ଆସ୍ ସାଫା-ସାଫା କାଚ୍ନେଖ୍ରା ଲାଗ୍ଗିୟାସ୍। 36ଯୀଶୁସ୍ ଆଲାରିନ୍ ହୁକୁମ୍ ଚିଚ୍ଚାସ୍ କା ଆବ୍ଡ଼ାର୍ ଇ ଘାଟ୍ଣାଘି ବାରେ ନେକାନ୍ହି ମା ତେଙ୍ଗର୍। ଲେକିନ୍ ଆସ୍ ଯେତ୍କ ମାନା କାମାଲିୟାସ୍ ଆଲାର୍ ହତ୍କ ଡିବ୍ଡିବି ଠୋକାଲିୟାର୍। 37ଆଲାର୍ ମୁରୁକ୍ ଆଚ୍ମିତ୍ ମାନ୍ଚାର୍ କେରାର୍ ଆରୁ ତେଙ୍ଗିୟାର୍, “ଯୀଶୁସ୍ ଏକାନ୍ କାମ୍ଦାସ୍ ବାନେନିନ୍ କାମ୍ଦାସ୍; ଆସ୍କି ତେଙ୍ଗ୍ନାତି ଭାଁଏରାର୍ହି ମେନାଗେ ଲାଗ୍ଗନାଏ, ଆରୁ କନ୍ଦାର୍ହି କାଚ୍ନେଖ୍ରା ଲାଗ୍ଗନାଏ।”
8ଯୀଶୁସ୍ ଚାର୍ହାଜାର୍ ଆଲାରିନ୍ ମହଁତାଲ୍ଦାସ୍
1ହୁ ସାମାୟନୁ ଯୁକ୍କୁ ଆଲାର୍ ଆରୁଅହନ୍ ଠୁଡ଼ିୟାରାଚାର୍, ଆରୁ ଆବ୍ଡ଼ାର୍ସାନ୍ ଅନାମହାଗେ ଏନ୍ଦେର୍ହି ମାଲ୍ଲାରୁଦ୍, ହୁଦ୍ଘିଲାଗାନ୍ ଯୀଶୁସ୍ ତାଙ୍ଘା ଚେଲାରିନ୍ ତାଙ୍ଘାସାନ୍ ମେହିକିରି ତେଙ୍ଗିୟାସ୍, 2“ଏଙ୍ଗା ଇ ଆଲାର୍ଘି ମିଆଁ ମୁରୁକ୍ ସୋଗ୍ଗେ ଲାଗ୍ଗାଲି, ଏନ୍ଦେର୍ଗେକା ଇବ୍ଡ଼ାର୍ ତିନ୍ ଦିନ୍ତି ଏଙ୍ଘାଗାନେ ରାନାଏ, ଆରୁ ଇବ୍ଡ଼ାର୍ସାନ୍ ଅନାମହାଗେ ଏନ୍ଦେର୍ହି ମାଲ୍ଲାଦିନ୍। 3ଯଦି ଏନ୍ ଇବ୍ଡ଼ାରିନ୍ ବିନା ଅନ୍ତିମହ୍ତିକିରି ତାହ୍ମା ଆଡ଼୍ପା ତାଇୟନ୍ ତା, ଇବ୍ଡ଼ାର୍ ପାବୁନୁ ବେହସ୍ ମାନର୍କର୍; ଇବ୍ଡ଼ାର୍ଘିନ୍ତି କେତ୍କ ଆଲାର୍ ମୁରୁକ୍ ଗେଚ୍ଛାନ୍ତି ବାର୍ଚ୍କାନାଏ।” 4ଯୀଶୁସ୍କି ଚେଲାର୍ ଯାବାବ୍ ଚିଚ୍ଚାର୍, “ଇସାନ୍ ଇ ଶୁନ୍ଶାନ୍ ଆଡ୍ଡାନୁ ଏତ୍କ-ଏତ୍କ ଆଲାର୍ଗେ ମହ୍ଁତାଗେ ଆସ୍ମା ହାଖ୍ଖର୍ନାଦ୍ ସମ୍ଭବ୍ ମାଲ୍ଲିଦ୍?” 5ଯୀଶୁସ୍ ଆବ୍ଡ଼ାରିନ୍ ମେନ୍ଚାସ୍, “ନିହ୍ମାସାନ୍ ୟୋଁଟା ଆସ୍ମା ରାଇଦ୍?” ଆବ୍ଡ଼ାର୍ ତେଙ୍ଗିୟାର୍, “ଏହ୍ମାସାନ୍ ସାତ୍ତେଟା ଖାଲି ଆସ୍ମା ରାଇଦ୍।” 6ଯୀଶୁସ୍ ଆବ୍ଡ଼ାରିନ୍ ହେଁହ୍ଲାନୁ ଅକ୍କାଗେ ହୁକୁମ୍ ଚିଚ୍ଚାସ୍ ଆରୁ ଆ ସାତ୍ତେଟା ଆସ୍ମା ହୋଇକିରି ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଚ୍ଚାସ୍, ଆରୁ ଆସ୍ମାବନ୍ ଖିଣ୍ଡିକିରି ତାହ୍ମା ଚେଲାର୍ଗେ ଚିଚ୍ଚାସ୍ ଆରୁ ଚେଲାର୍ ଆଲାର୍ଗେ ଚିଚ୍ଚାର୍। 7କେତ୍କୋଟା ଛୋଟେ ଇଞ୍ଜୋହି ରାଚା; ଯୀଶୁସ୍ ଆ ଇଞ୍ଜୋଗେହି ପାର୍ମେଶ୍ଵାର୍ସିନ୍ ଧାନ୍ୟାବାଦ୍ ଚିଚ୍ଚାସ୍ ଆରୁ ଆବନ୍ହି ଚେଲାଜାମାରିନ୍ ହାଟ୍ଟାଗେ ହୁକୁମ୍ ଚିଚ୍ଚାସ୍। 8ଆଲାର୍ କୁଲୁଭର୍ ମଖ୍ଖାର୍ ଆରୁ ଉଚ୍ଛିୟାର୍ କେରାର୍ ଆରୁ ଚେଲାଜାମାର୍ ଏଙ୍ଗ୍ର୍କା ଟୁକ୍ଡ଼ା ଆସ୍ମାବନ୍ ସାତ୍ଡାଲା ଠୁଡ଼ିୟାଚାର୍। 9ଆସାନ୍ ଲାଗ୍ଭାଗ୍ ଚାର୍ହାଜାର୍ ଆଲାର୍ ରାଚାର୍; ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ଆଡ଼୍ପା ତାଇଏଚାସ୍। 10ଆନ୍ତିନ୍ ଯୀଶୁସ୍ ହୁଙ୍ଗେନିନ୍ ତାଙ୍ଘା ଚେଲାର୍ଗାନେ ଡଙ୍ଗାନୁ ଅକ୍କିକିରି ଦଲ୍ମନୂଥା ପ୍ରଦେଶ୍ଗେ କେରାସ୍।
ଯୀଶୁସିନ୍ ଫାରିସୀଜାମାର୍ ସରଗ୍ତା ଅଣ୍ଟା ଚିହ୍ନା ନିଆଁଲ୍ନାଏ
11ଆନ୍ତିନ୍ କେତ୍କ ଲୋକ୍ ଫାରିସୀଜାମାର୍ ଯୀଶୁସ୍ସାନ୍ ବାରିକିରି, ତାଙ୍ଘାଗାନେ କାଁଟ୍ଛାଁଟ୍ କାମାଗେ ଲାଗ୍ଗିୟାର୍, ଆରୁ ଆବ୍ଡ଼ାର୍ ଯୀଶୁସିନ୍ ବିଡ଼୍ଚେ ଏରାଗେ ତେଙ୍ଗିୟାର୍ ଏମାଗେ ସରଗ୍ତା ଏନ୍ଦ୍ରିନ୍ ଚିହ୍ନା ଅଣ୍ଟା ଚିଆ। 12ଯୀଶୁସ୍ ଜୋର୍ସେ ନିନାଶ୍ ହୋଇକିରି ତେଙ୍ଗିୟାସ୍, “ଇ ପିଢ଼ିନ୍ତା ଆଲାର୍ ଏନ୍ଦେର୍ଗେ ଚିହ୍ନା ନିଆଁଲ୍ନାଏ? ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍, କା ଇ ପିଢ଼ିନ୍ତା ଆଲାର୍ଗେ ଏନ୍ଦେର୍ହି ଚିହ୍ନା ଚିଆ ମା କାଇ।” 13ଆରୁ ଯୀଶୁସ୍ ଆବ୍ଡ଼ାରିନ୍ ଆମ୍ଵିକିରି ଆରୁଅହନ୍ ଡଙ୍ଗାନୁ ଅକ୍କିକିରି ତାଙ୍ଘା ଚେଲାର୍ଗାନେ ହଁସ୍ରା ହାପାଖା କେରାସ୍।
ଫାରିସୀ ଆରୁ ହେରୋଦିଆ ଜାମାର୍ଘି ଖାମୀର୍
14ଚେଲାଜାମାର୍ ଆସ୍ମା ଧାରାଗେ ମଦ୍ରେ ଚିଚ୍କାଚାର୍, ଆରୁ ଡଙ୍ଗାନୁ ଆବ୍ଡ଼ାର୍ସାନ୍ ଅଣ୍ଟା ଖାଲି ଆସ୍ମା ରାଚା। 15ଆନ୍ତିନ୍ ଯୀଶୁସ୍ ଚେଲାରିନ୍ ଚେତାବାନୀ ଚିଇକିରି ତେଙ୍ଗିୟାସ୍, “ଫାରିସୀ ଆରୁ ହେରୋଦ୍ ଜାମାର୍ଘି ଖାମୀର୍ସ୍ତି ହୁସିୟାର୍ ରା।” 16ଚେଲାଜାମାର୍ ଇଦ୍ଘି ମତ୍ଲବ୍ ମା ବୁଝ୍ରାର୍ ଆଙ୍ଗେନ୍ ଆବ୍ଡ଼ାର୍ ତାମ୍-ତାମ୍ କାଁଟ୍ଛାଁଟ୍ କାମାଗେ ଲାଗ୍ଗିୟାର୍, “ଇସ୍ ଏନ୍ନେ ଇଦ୍ଘିଲାଗାନ୍ ନାମାନ୍ ତେଙ୍ଗାଲ୍ଦାସ୍ କା ନାହ୍ମାସାନ୍ ଆସ୍ମା ମାଲ୍ଲାଦିନ୍।” 17ଯୀଶୁସ୍ ଆବ୍ଡ଼ାର୍ଘି ସୋଚ୍ବନ୍ ଆହିକିରି ଆବ୍ଡ଼ାରିନ୍ ତେଙ୍ଗିୟାସ୍, “ନିହ୍ମାସାନ୍ ଆସ୍ମା ମାଲ୍ଲାଦ୍ ବୁଲି ଏନ୍ଦେର୍ଗେ ନିମ୍ ନିଜେ-ନିଜେ କାଁଟ୍ଛାଁଟ୍ କାମାଲ୍ଦାର୍? ନିମ୍ ଏନ୍ଦେର୍ଗେ ଆକ୍କୁନ୍ଜୁଟି ବୁଝ୍ରା ପଲ୍ଲାଲ୍ଦାର୍? ନିହ୍ମା ବୁଦ୍ଧିଦ୍ ବାଣାଁ ମାନ୍ଚାକେର୍କିଚି କାଁଏ? ନିହ୍ମା ମନ୍ କାଠୋର୍ ମାନ୍ଚାକେର୍କିଚି କାଁଏ? 18ହୁଦ୍ଘିଲାଗାନ୍ ନିମ୍ ନିଜର୍ ହାନ୍ନୁତି ଏକାନ୍ ଏର୍ଦାର୍, ଆରୁ ହେବ୍ଦାତି ଏକାନ୍ ମେନ୍ଦାର୍ ଆଦ୍ଘି ମତ୍ଲବ୍ ମା ବୁଝ୍ର୍ଦାର୍ ଆରୁ ଏକାନ୍ ହାନ୍ନୁତି ଏର୍ଦାର୍, ଆରୁ ହେବ୍ଦାତି ମେନ୍ଦାର୍ ଆବନ୍ ମଦ୍ର୍ଦାର୍ ଚିଦାର୍। 19ଯେତ୍କବାକେନ୍ ଆ ପାଞ୍ଚେଟା ଆସ୍ମାବନ୍ ଖିଣ୍ଡିକିରି ପାଞ୍ଚ୍ ହାଜାର୍ ଆଲାର୍ଗେ ମହଁତାଚ୍କାଚ୍କାନ୍, ନିମ୍ ଆ ଏଙ୍ଗ୍ର୍କା ଟୁକ୍ଡ଼ାବନ୍ ୟୋଁ ଡାଲା ଠୁଡ଼ିୟାଚ୍କାଚ୍କାର୍?” ଚେଲାର୍ ଯାବାବ୍ ଚିଚ୍ଚାର୍, “ବାର ଡାଲା।” 20ଆନ୍ତିନ୍ ଯୀଶୁସ୍ ଆରୁହି ତେଙ୍ଗିୟାସ୍, “ଯେତ୍କବାକେନ୍ ଚାର୍ହାଜାର୍ ଆଲାର୍ଗେ ସାତ୍ତେଟା ଆସ୍ମାବନ୍ ଖିଣ୍ଡିକିରି ମହଁତାଚ୍କାନ୍ ତା, ନିମ୍ ଏଙ୍ଗ୍ର୍କା ଟୁକ୍ଡ଼ାନ୍ ୟୋଁ ଡାଲା ନିନ୍ଦକାର୍?” ଚେଲାଜାମାର୍ ଯାବାବ୍ ଚିଚ୍ଚାର୍ “ସାତ୍ଡାଲା।” 21ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ହାଲେ ନିମ୍ ଏନ୍ଦେର୍ଗେ ଆକ୍କୁନ୍ତକ୍ ମା ବୁଝ୍ରାଲ୍ଦାର୍?”
ଯୀଶୁସ୍ ବେତ୍ସାଇଦା ପାଡ଼ାନ୍ତା ଅଣ୍ଟା କାଁଣାସିନ୍ ବାନେ କାମାଲ୍ଦାସ୍
22ଯେତ୍କବାକେନ୍ ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ବେତ୍ସାଇଦା ପାଡ଼ାଗେ ଆଣସିୟାର୍; ତା ଆଲାର୍ ଅଣ୍ଟା କାଁଣାସିନ୍ ଯୀଶୁସ୍କି ଚାହାଗେ ଅନ୍ଦରାର୍ ଆରୁ ତାଙ୍ଘା ମିଆଁ ହେଖ୍ଖା ଉଇକିରି ଏସ୍ରାଗେ ତାଙ୍ଗାନ୍ ଆର୍ଜୀବିନ୍ତି କାମ୍ଚାର୍। 23ଆନ୍ତିନ୍ ଯୀଶୁସ୍ କାଁଣା ଆଲାସ୍କି ହେଖ୍ଖା ଧାରିକିରି ଆସିନ୍ ପାଡ଼ାଘି ବାହ୍ରି ଅଚ୍ଚାସ୍ କେରାସ୍, ଆସାନ୍ ଆସ୍କି ହାନ୍ନୁନୁ ତାଙ୍ଘା ତୁପ୍ଫାଲୋନ୍ ଲାଗାବାଚାସ୍ ଆରୁ ଆସ୍କି ମିଆଁ ହେଖ୍ଖା ଉଇକିରି ମେନ୍ଚାସ୍, “ନିଙ୍ଗାଗେ ଏନ୍ଦ୍ରିନ୍ ଏଥ୍ରାଲିଦ୍ କାଁଏ?” 24ଆସ୍ ମିଆଁ ଏରିକିରି ତେଙ୍ଗିୟାସ୍, “ଏନ୍ ଆଲାରିନ୍ ଏରା ଅଙ୍ଗାଲ୍ଦାନ୍; ଆବ୍ଡ଼ାର୍ ଇୟାହୁଇୟା ଏକ୍ନା ମାନ୍ନୁ ଲେଖା ଏଥ୍ରାଲ୍ନାଏ।” 25ଆନ୍ତିନ୍ ଯୀଶୁସ୍ ଆରୁଅହନ୍ ଆ କାଁଣା ଆଲାସ୍କି ହାନ୍ନୁନୁ ହେଖ୍ଖା ଉଇୟାସ୍, ଆରୁ ଆସ୍ ବାନେକିରି ଏରା ଅଙ୍ଗିୟାସ୍। ଆରୁ ଆସ୍ ବାନେ ମାନ୍ଚାସ୍ କେରାସ୍, ଆରୁ ଜାମାକିଛିନ୍ ବାନେକିରି ଏରା ଅଙ୍ଗିୟାସ୍। 26ଆନ୍ତିନ୍ ଯୀଶୁସ୍ ଆସିନ୍ ତାହ୍ମା ଆଡ଼୍ପା ତାଇୟାସ୍, ଆରୁ ତେଙ୍ଗିୟାସ୍, “ଇ ପାଡ଼ାତାରାହି ଆମ୍କେକାଲା।”
ପାତ୍ରାସ୍ ଯୀଶୁସିନ୍ ଖ୍ରୀସ୍ତ୍ ବୁଲି ଘୋଷ୍ଣା କାମାଲ୍ଦାସ୍
(ମାତିସ୍ ୧୬:୧୩-୨୦; ଲୁକାସ୍ ୯:୧୮-୨୧)
27ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ଗାଲିଲୀ ପ୍ରଦେଶ୍ଘି କାଇସିରିଆ ଫିଲିପ୍ପୀ ସହର୍ ଚାହାଚାହାନ୍ତା ପାଡ଼ାଗୁଠିଗେ କେରାର୍। କାନାବାକେନ୍ ପାବୁନୁ ଯୀଶୁସ୍ ତାଙ୍ଘା ଚେଲାରିନ୍ ମେନ୍ଚାସ୍, “ଏନ୍ ନେଦ୍? ଏଙ୍ଘା ବାରେନୁ ଆଲାର୍ ଏନ୍ଦେର୍ ବାନାଏ?” 28ଆବ୍ଡ଼ାର୍ ଯାବାବ୍ ଚିଚ୍ଚାର୍, “କେତ୍କ ଆଲାର୍ ତେଙ୍ଗ୍ନାଏ ଆସ୍ନାନ୍ ଚିଉ ଯୋହାନ୍ସ୍; ଆରୁ କେତ୍କ ଆଲାର୍ ତେଙ୍ଗ୍ନାଏ ଏଲିୟାସ୍ ଆରୁ କେତ୍କ ଆଲାର୍ ତେଙ୍ଗ୍ନାଏ, ଇ ଦୁଇ ଲୋକ୍ରିନ୍ ଆମ୍ଵିକିରି ପାର୍ମେଶ୍ଵାର୍ସ୍କି ବଚନ୍ ଶୁଣାବୁ ଭିତର୍ନୁ ଅର୍ତୁସ୍।” 29ଆଙ୍ଗେନ୍ ଯୀଶୁସ୍ ମେନ୍ଚାସ୍, “ଆରୁ ନିମ୍ ଏନ୍ଦେର୍ ବାଲ୍ଦାର୍ କା ଏନ୍ ନେଦ୍?” ପାତ୍ରାସ୍ ଯାବାବ୍ ଚିଚ୍ଚାସ୍, “ନିମ୍ ଖ୍ରୀସ୍ତ୍।” 30ଆଙ୍ଗେନ୍ ଯୀଶୁସ୍ ତାଙ୍ଘା ଚେଲାରିନ୍ ଚେତାବାନୀ ଚିଇକିରି ତେଙ୍ଗିୟାସ୍ କା, ନିମ୍ ଏଙ୍ଘା ବାରେନୁ ନେକାନ୍ହି ଏନ୍ଦେର୍ହି ଆମ୍କେ ତେଙ୍ଗା।
ଯୀଶୁସ୍ ତାଙ୍ଘା ମରନ୍ ଆରୁ ଜୀଉଠ୍ର୍ନାଘି ବାରେନୁ ତେଙ୍ଗାଲ୍ଦାସ୍
(ମାତିସ୍ ୧୬:୨୧-୨୩; ଲୁକାସ୍ ୯:୨୨)
31ଆନ୍ତିନ୍ ଯୀଶୁସ୍ ତାଙ୍ଘା ଚେଲାରିନ୍ ଶିକ୍ଷା ଚିୟାଗେ ଲାଗ୍ଗିୟାସ୍ କା ମୁନୁଷ୍ ହାଦ୍ଦୁସ୍କେ ମୁରୁକ୍ ଦୁଃଖୁ ସାହା ଖାତ୍ରଦ୍, ସମାଜ୍ ତା ବାଡ଼୍କା-ବାଡ଼୍କା ଆଲାର୍, ପୁର୍ଖାର୍, ମୁଖ୍ୟା ପୁରୋହିତ୍ଜାମାର୍, ଆରୁ ପଣ୍ତିତ୍ଜାମାର୍ ଆସିନ୍ ଖ୍ରୀସ୍ତ୍ ବୁଲି ସ୍ୱୀକାର୍ ମା କାମ୍ନାଏ ଆରୁ ଆଲାର୍ ଆସିନ୍ ଡେମର୍ ପିଟର୍ଚିୟର୍, ଆରୁ ତିନ୍ ଦିନ୍ନୁ ଉଜ୍ଜସ୍। 32ଇ କାତ୍ଥାନ୍ ଯୀଶୁସ୍ ତାଙ୍ଘା ଚେଲାରିନ୍ ଖୁଲାମ୍ଖୁଲା ତେଙ୍ଗିୟାସ୍। ଆଙ୍ଗେନ୍ ପାତ୍ରାସ୍ ଯୀଶୁସିନ୍ ଭିନେ ତାରା ହୋଇକିରି ଧାମ୍କାଚାସ୍, 33ଲେକିନ୍ ଯୀଶୁସ୍ ତାଙ୍ଘା ଚେଲାର୍ତାରା କିର୍ରେ ଏରିୟାସ୍, ଆରୁ ପାତ୍ରାସ୍ସିନ୍ ଧାମ୍କିକିରି ତେଙ୍ଗିୟାସ୍, “ହେ ଶାଏତାନ୍, ଏଙ୍ଘାସ୍ତି ବୁଙ୍ଗାକାଲା; ଏସ୍କେ ପାର୍ମେଶ୍ଵାର୍ସ୍ ସୋଚ୍ଦାସ୍, ଆନ୍ନେନିନ୍ ମା ସୋଚ୍ଦାଏ, ଲେକିନ୍ ଆଲାର୍ଘି ସୋଚ୍ନା ଲେଖା ସୋଚ୍ଦାଏ।”
ଯୀଶୁସ୍କି ପାଛ୍ଲି କାନାଘି ମତ୍ଲବ୍
34ଆନ୍ତିନ୍ ତାଙ୍ଘା ଚେଲାର୍ଗାନେ ଆଘ୍ଲି ଭିଡ଼୍ବନ୍ହି ଚାହାଗେ ମେହିଁକିରି ତେଙ୍ଗିୟାସ୍, “ଯଦି ନେଦିନ୍ ଏଙ୍ଘା ପାଛ୍ଲି କାଲା ବେଦ୍ଦନାଏ, ଆବ୍ଡ଼ାର୍ ପହ୍ଲେ ନିଜର୍ ଇଚ୍ଛାନ୍ ଆମ୍ଵିକିରି ଦୁଃଖୁ ତକ୍ଲିପ୍ ସାହର୍, ଆରୁ କ୍ରୁଶ୍ ଚେଡ଼ର୍, ଆନ୍ତିନ୍ ଏଙ୍ଘା ପାଛ୍ଲି ଆର୍ଗେ କାଲାଖାତ୍ରୋ, 35ଏନ୍ଦେର୍ଗେକା ନେଦିନ୍ ଦୁନିଆଁନୁ ନିଜର୍ ଜୀବନ୍ବନ୍ ବାଛାବା ବେଦ୍ଦନାଏ ଆର୍ ଆବନ୍ ଏଫ୍ସର୍ ଚିୟର୍, ଲେକିନ୍ ନେଦିନ୍ ଏଙ୍ଘା ଆରୁ ସୁସାମାଚାର୍ଘି ଲାଗାନ୍ ନିଜର୍ ଜୀବନ୍ବନ୍ ଏଫ୍ସ୍ନାଏ ଚିନାଏ, ଆବ୍ଡ଼ାର୍ଗେ ସବୁଦିନ୍ତା ଜୀବନ୍ ହାଖ୍ଖରିଦ୍। 36ଆରୁ ଯଦି ଅଣ୍ଟା ଆଲାସ୍ ଦୁନିଆଁନ୍ତା ଜାମା ଧନ୍ସମ୍ପତ୍ତି ଆରୁ ପାଏସାକାଉଡ଼ି ହାଖ୍ଖୀକିରି ଯଦି ସବୁଦିନ୍ତା ଜୀବନ୍ ମା ଉଜ୍ଜସ୍ ତା, ଆସ୍କି ଏନ୍ଦେର୍ ଫାଏଦା? 37ସବୁଦିନ୍ତା ଜୀବନ୍ ହାଖ୍ଖାଗେ ମୁନୁଷ୍ ଏନ୍ଦେର୍ହି ଚିଆ ପଲ୍ଲଦାସ୍? 38ନେଦ୍ ଇ ଅଧାର୍ମିକ୍ ଆରୁ ପାପୀ ପିଢ଼ିଘି ଆଘ୍ଲି ଏଙ୍ଗାନ୍ ଚାହେ ଏଙ୍ଘା ଶିକ୍ଷାବନ୍ ଗ୍ରହନ୍ କାମାଗେ ଲାଜରସ୍ ତା, ମୁନୁଷ୍ ହାଦ୍ଦୁସ୍ହି ଯେତ୍କବାକେନ୍ ଆସ୍ ସରଗ୍ଦୂଁତ୍ଜାମାର୍ ଗାନେ ନିଜର୍ ବାଙ୍ଗ୍ସ୍କି ମାହିମାନୁ ବାରସ୍ ଆସିନ୍ ଗ୍ରହନ୍ କାମାଗେ ଲାଜରସ୍।”
91ଆନ୍ତିନ୍ ଯୀଶୁସ୍ ତାଙ୍ଘା ଚେଲାରିନ୍ ଆରୁ ଆଲ୍ ଭିଡ଼୍ବନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଇସାନ୍ ରୁ, ଆଲାର୍ଘି ଭିତର୍ନୁ କେତ୍କ ଲୋକ୍ ଯେତ୍କତକ୍ ପାର୍ମେଶ୍ଵାର୍ସ୍କି ରାଜୀନ୍ ମାହିମାତି ବାର୍ନାନ୍ ମା ଏରର୍, ହତ୍କତକ୍ ମା ଖିନାଏ।”
ଯୀଶୁସ୍କି ରୂପ୍ ବାଦ୍ଲାରାଲି
(ମାତିସ୍ ୧୭:୧-୧୩; ଲୁକାସ୍ ୯:୨୮-୩୬)
2ଆନ୍ତିନ୍ ଛଦିନ୍ଘି ପାଛ୍ଲି ଯୀଶୁସ୍ ପାତ୍ରାସ୍, ୟାକୁବ୍ ଆରୁ ଯୋହାନ୍ସିନ୍ ତାଙ୍ଘାଗାନେ ଭିନେ ହୋଇକିରି ଅଣ୍ଟା ମେଚ୍ଛା ପାର୍ତ୍ତାଗେ ଅଚ୍ଚାସ୍ କେରାସ୍, 3ଆରୁ ଆବ୍ଡ଼ାର୍ଘି ଆଘ୍ଲି ଯୀଶୁସ୍କି ରୂପ୍ଦ୍ ବାଦ୍ଲାରାଚା କେରା। ତାଙ୍ଘାଏ ଚିଢ଼ାଦ୍ ଏନ୍ନେ ବିଲ୍ଚାଲିୟା ଆରୁ ପୁରା ଧୋବ୍ ମାନ୍ଚାକେରା, ଯେ ଦୁନିଆଁନ୍ତା ଏକା ଧୋବ୍ବାର୍ହି ହନ୍ନେ ଧୋବ୍ କାମା ପଲ୍ଲନାଇନ୍।4ଆରୁ ଚେଲାର୍ଗେ ଏଲିୟାସ୍ ଆରୁ ମୁଶା ନାବୀର୍ ଏଥ୍ରାର୍; ଆବ୍ଡ଼ାର୍ ଯୀଶୁସ୍ଗାନେ କାଚ୍ନେଖ୍ରାଲିୟାର୍। 5ହତ୍କବାକେନ୍ ପାତ୍ରାସ୍ ଯୀଶୁସିନ୍ ତେଙ୍ଗିୟାସ୍, “ହେ ଗୁରୁ, ନାମ୍ ଇସାନ୍ ରତ୍ନେ ହାଲେ କେତ୍କ ବାଣିହାଁ ମାନଦ୍ନେ: ଏମ୍ ମୁଣ୍ଟା ତାମ୍ବୁ ଗାଡ଼ମ୍ନେ; ନିମାଗେ ଅଣ୍ଟା, ମୁଶା ନାବୀସ୍କେ ଅଣ୍ଟା ଆରୁ ଏଲିୟାସ୍କେ ଅଣ୍ଟା।” 6ପାତ୍ରାସ୍ ବାଲ୍ଲକାଚାସ୍ କା ଯୀଶୁସିନ୍ ଏନ୍ଦେର୍ ତେଙ୍ଗସ୍, ଏନ୍ଦେର୍ଗେକା ଆବ୍ଡ଼ାର୍ ମୁରୁକ୍ ଏଲ୍ଚିୟାର୍ କେର୍କାଚାର୍। 7ଆନ୍ତିନ୍ ଅଣ୍ଟା ବାଦ୍ଲି ବାର୍ଚା ଆରୁ ଆବ୍ଡ଼ାରିନ୍ କୁଲ୍ଲେଇଚା, ଆରୁ ଆ ବାଦ୍ଲିନ୍ତି ପାର୍ମେଶ୍ଵାର୍ସ୍କି ଶବଦ୍ ମେନ୍ଦ୍ରାଦ୍, “ଇସ୍ ଏଙ୍ଘା ଦୁଲାଡ଼ି ହାଦ୍ଦୁସ୍, ଇସ୍କି କାତ୍ଥାନ୍ ମେନା।” 8ଆନ୍ତିନ୍ ହଠାତ୍ ଯେତ୍କବାକେନ୍ ଚେଲାଜାମାର୍ ଚାର୍ହି ପାଖା ଏରିୟାର୍ ତା, ଯୀଶୁସିନ୍ ଆମ୍ଵିକିରି ଆରୁ ନେଦ୍ହି ମା ଏଥ୍ରାର୍। 9ଆବ୍ଡ଼ାର୍ ପାର୍ତ୍ତାନ୍ତି କିୟାଁ ଏତ୍ତନା ବାକେନ୍ ଯୀଶୁସ୍ ଚେଲାରିନ୍ ହୁକୁମ୍ ଚିଚ୍ଚାସ୍ କା ଯେତ୍କତକ୍ ମୁନୁଷ୍ ହାଦ୍ଦୁସ୍ କେଚ୍ଚକାନ୍ତି ମା ଉଜ୍ଜସ୍, ଆତ୍କତକ୍ ନିମ୍ ଏକାନ୍ ଏର୍କାର୍ ଆବନ୍ ନେକାନ୍ହି ଆମ୍କେ ତେଙ୍ଗା। 10ଆବ୍ଡ଼ାର୍ ଯୀଶୁସ୍କି ଇ କାତ୍ଥାନ୍ ମନ୍ନୁ ଉଇୟାର୍; ଆରୁ ଆଦ୍ଘି ବାରେନୁ ଆବ୍ଡ଼ାର୍ ତାମ୍-ତାମ୍ ତେଙ୍ଗାତେଙ୍ଗି ମାନ୍ଚାର୍ କା, “କେଚ୍ଚକାନ୍ତି ଉଜ୍ଜନାଘି ମତ୍ଲବ୍ ଏନ୍ଦେର୍ ମାନା ଅଙ୍ଗିଦ୍?” 11ଆନ୍ତିନ୍ ଆବ୍ଡ଼ାର୍ ଯୀଶୁସିନ୍ ମେନ୍ଚାର୍, “ପଣ୍ତିତ୍ଜାମାର୍ ଏନ୍ନେ ଏନ୍ଦେର୍ଗେ ତେଙ୍କାନାଏ କା ପହ୍ଲେ ଏଲିୟାସ୍କି ବାର୍ନା ଜରୁରୀ ରାଇଦ୍?” 12ଯୀଶୁସ୍ ଯାବାବ୍ ଚିଚ୍ଚାସ୍, “ସତ୍ତୁନିନ୍! ଏଲିୟାସ୍ ପହ୍ଲେ ଜାମାନ୍ ଠିକ୍ କାମାଗେ ବାରସ୍, ଆରୁ ମୁନୁଷ୍ ହାଦ୍ଦୁସ୍କି ବାରେନୁ ଏନ୍ଦେର୍ଗେ ଏନ୍ନେ ଲେଖ୍ଚ୍କା ରାଇ କା ଆସ୍ ମୁରୁକ୍ ଦୁଃଖୁ ସାହସ୍, ଆରୁ ତାଙ୍ଘା ମାଜାକ୍ ଉଡ଼ାବାକୋ? 13ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା, ଏଲିୟାସ୍ ପହ୍ଲେନ୍ତିନିନ୍ ବାର୍ଚ୍କାଦାସ୍, ଆରୁ ଆସ୍କି ବାରେନୁ ଏସ୍କେ ଲେଖ୍ଚ୍କା ରାଇଦ୍ ଆବ୍ଡ଼ାର୍ ଆସ୍ଗାନେ ହନ୍ନେନ୍ ମନ୍ମର୍ଜୀ ବେଭାର୍ କାମ୍ଚାର୍।”
ଯୀଶୁସ୍ ଅଣ୍ଟା ଭୁତ୍ତୁ ଲାକ୍କା କୁକ୍କୋସିନ୍ ବାନେ କାମାଲ୍ଦାସ୍
(ମାତିସ୍ ୧୭:୧୪-୨୧; ଲୁକାସ୍ ୯:୩୭-୪୩)
14ଯେତ୍କବାକେନ୍ ଆବ୍ଡ଼ାର୍ ଆରୁ ଆଧା ଚେଲାର୍ସାନ୍ କିର୍ରିୟାର୍ ତା, ଆବ୍ଡ଼ାର୍ ଏରିୟାର୍ କା କେତ୍କ ଲୋକ୍ ଆଲାର୍ ଚେଲାର୍ଘି ଚାର୍ହି ପାଖା ରାନାଏ ଆରୁ କେତ୍କ ଲୋକ୍ ପଣ୍ତିତ୍ଜାମାର୍ ଚେଲାର୍ଗାନେ କାଁଟ୍ଛାଁଟ୍ କାମାଲିୟାର୍। 15ଯୀଶୁସିନ୍ ଏରିକିରି ଆଲାର୍ ଆଚ୍ମିତ୍ ମାନ୍ଚାର୍ କେରାର୍, ଆରୁ କୁଦ୍ୟାରାତେ ବାରିକିରି ଆସିନ୍ ଯୋହାର୍ କାମ୍ଚାର୍। 16ହୁଙ୍ଗେନ୍ ଯୀଶୁସ୍ ଆ ଆଲାରିନ୍ ମେନ୍ଚାସ୍, “ଇବ୍ଡ଼ାର୍ ଗାନେ ନିମ୍ ଏନ୍ଦେର୍ କାଁଟ୍ଛାଁଟ୍ କାମାଲ୍ଦାର୍?” 17ଭିଡ଼୍ନ୍ନ୍ତି ଅଣ୍ଟା ଆଲାସ୍ ଯାବାବ୍ ଚିଚ୍ଚାସ୍, “ହେ ଗୁରୁ, ଏଙ୍ଘା ହାଦ୍ଦୁସିନ୍ କନ୍ଦା ଭୁତ୍ତୁ ଲାକ୍କିଚି, ଏନ୍ ଇସିନ୍ ନିଙ୍ଘା ଚାହାଗେ ଅନ୍ଦ୍ରକାଚ୍କାନ୍। 18ଏଙ୍ଗ୍ଦାସିନ୍ ଇ ଭୁତ୍ତୁଦ୍ ଏକାସାନ୍ ଧାରି ଆସାନିନ୍ କାଚ୍ଡ଼ିଚି, ଆରୁ କୁକ୍କସ୍କି ଥୁମ୍ଣାନୁ ବଟ୍ଟେ ଉର୍ଖି, ଆରୁ ପାଲ୍ଲୁନ୍ କାଟ୍କାଟ୍ରା ପାର୍ମ୍ର୍ଦାସ୍, ଆରୁ ତାଙ୍ଘା ମେଦୁବଦ୍ ଟାଡ଼୍ଙ୍ଗା ମାନିକାଇ। ଏନ୍ ନିହ୍ମା ଚେଲାରିନ୍ ଆ ଭୁତ୍ତୁନ୍ ଅଥ୍ରାଗେ ତେଙ୍କାନ୍, ଲେକିନ୍ ଆବ୍ଡ଼ାର୍ ଅଥ୍ରା ପଲ୍ଲିଆରିନ୍।” 19ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ହେ ବିଶ୍ଵାସ୍ ମା କାମୁ ପିଢ଼ିରୋ, ଏନ୍ ନିହ୍ମାଗାନେ ୟୋଁ ଦିନ୍ତକ୍ ରନ୍? ୟୋଁ ଦିନ୍ତକ୍ ନିମାନ୍ ସାହନ୍? ହୁ କୁକ୍କୋସିନ୍ ଏଙ୍ଘାସାନ୍ ଅନ୍ଦ୍ରା।” 20ଆବ୍ଡ଼ାର୍ ଆ କୁକ୍କସିନ୍ ଯୀଶୁସ୍କି ଚାହାଗେ ଅନ୍ଦ୍ରାର୍: ଯୀଶୁସିନ୍ ଏରାଖାନେନ୍ ଭୁତ୍ତୁଦ୍ କୁକ୍କସିନ୍ ଜୋର୍ସେ ଆଇଁଠିକିରି; କିୟାଁ କାଚ୍ଡ଼େଇଚା, ଆରୁ ଆସ୍ ହେଁହ୍ଲାନୁ ଖାତ୍ରାସ୍ ଆରୁ ଗର୍ଣ୍ତାରାତେ ଥୁମ୍ଣାନ୍ତି ବଟ୍ଟେ ଅଥ୍ରାଗେ ଲାଗ୍ଗିୟାସ୍। 21ଯୀଶୁସ୍ ଆ କୁକ୍କସ୍କି ତାମ୍ଵାସିନ୍ ମେନ୍ଚାସ୍, “ଇସ୍ ଏକ୍ଲାନ୍ତିନ୍ ଏନ୍ନେ ମାନାଲ୍ଦାସ୍?” ଆସ୍ ଯାବାବ୍ ଚିଚ୍ଚାସ୍, “ହାଦ୍ଦୁ ବାକେନ୍ତିନିନ୍।” 22“ଭୁତ୍ତୁଦ୍ ଇସ୍କି ଜୀବନ୍ ହୁଆଗେ ଇସିନ୍ ଧିୟାନ୍-ଧିୟାନ୍ ଚିଚ୍ଚୁ ଆରୁ ଆମ୍ମୁନୁ ଟିଡ଼ିଦ୍; ଯଦି ନିମ୍ ଏନ୍ଦ୍ରିନ୍ କାମା ଅଙ୍ଗର୍ ତା, ଏମାନ୍ ଦାୟା କାମିକିରି ମଦେତ୍ କାମା।” 23ଯୀଶୁସ୍ ଆସିନ୍ ତେଙ୍ଗିୟାସ୍, “ଏନ୍ନେ ଶାକ୍ତି ଏନ୍ଦେର୍ଗେ ତେଙ୍ଗାଲ୍ଦାର୍! ଯଦି ନିମ୍ ଏନ୍ଦ୍ରିନ୍ କାମା ଅଙ୍ଗର୍ନେ? ନେଦ୍ ବିଶ୍ଵାସ୍ କାମ୍ନାଏ ଆବ୍ଡ଼ାର୍ଗେ ଜାମାକିଛି ମାନା ଅଙ୍ଗଦ୍।” 24ହୁଙ୍ଗେନିନ୍ କୁକ୍କସ୍କି ତାମ୍ଵାସ୍ ଚିର୍ରା ରାଇକିରି ତେଙ୍ଗିୟାସ୍, “ଏନ୍ ବିଶ୍ଵାସ୍ କାମାଲ୍ଦାନ୍, ଏଙ୍ଘା ଇ ବିଶ୍ଵାସ୍ଘି ଘାଟିବନ୍ ପୁରା କାମା।” 25ଯୀଶୁସ୍ ଏରିୟାସ୍ କା ଭିଡ଼୍ ବାଗ୍ଗେ ମାନ୍ନାତି କାଲି, ହୁଦ୍ଘିଲାଗାନ୍ ଆସ୍ ଆ ଅଶୁଦ୍ଧ୍ ଆତ୍ମାବନ୍ ଧାମ୍କିକିରି ତେଙ୍ଗିୟାସ୍, “ହେ ଭାଏଁରା ଆରୁ କନ୍ଦା ଭୁତ୍ତୁ, ଏନ୍ ନିଙ୍ଗାନ୍ ହୁକୁମ୍ ଚିଆଲ୍ଦାନ୍ ଇସ୍ତି ଉର୍ଖୁ କାଲ୍, ଆରୁ କୁକ୍କସ୍କିନୁ ଏକ୍ଲାହି ଆମ୍କେକରା।” 26ଭୁତ୍ତୁଦ୍ ଚିର୍ରା ରାଇକିରି ଆରୁ କୁକ୍କସିନ୍ ଆଇଁଠିକିରି ଆସ୍ତି ଉର୍ଖିୟା କେରା; ଆରୁ କୁକ୍କସ୍ ଖିନା ଲେଖା ମାନ୍ଚାସ୍ କେରାସ୍, ହୁଦ୍ଘିଲାଗାନ୍ ଢେର୍ ଆଲାର୍ ତେଙ୍ଗିୟାର୍ କା ଇସ୍ କେଚ୍ଚାସ୍କେରାସ୍। 27ଲେକିନ୍ ଯୀଶୁସ୍ ଆସ୍କି ହେଖ୍ଖା ଧାରିକିରି ଉଠାବାଚାସ୍, ଆରୁ ଆ କୁକ୍କସ୍ ଇଜ୍ଜାସ୍। 28ଯେତ୍କବାକେନ୍ ଯୀଶୁସ୍ ଆଡ଼୍ପା ଆଣ୍ସିୟାସ୍ ତା, ତାଙ୍ଘା ଚେଲାର୍ ଭିନେ ତାରା ହୋଇକିରି ତାଙ୍ଗାନ୍ ମେନ୍ଚାର୍, “ଏମ୍ ଭୁତ୍ତୁନ୍ ଏନ୍ଦେର୍ଗେ ଅଥ୍ରା ପଲ୍ଲକାମ୍?” 29ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ବିନ୍ତି ଆମ୍ଵିକିରି ଆରୁ ନାନ୍ନା ଉପାୟତି ଏନ୍ନେ ଭୁତ୍ତୁନ୍ ଅଥ୍ରା ପଲ୍ଲନାଏ।”
ଯୀଶୁସ୍ ଆରୁଅହନ୍ ତାଙ୍ଘା ମରନ୍ଘି ବାରେନୁ ତେଙ୍ଗାଲ୍ଦାସ୍
(ମାତିସ୍ ୧୭:୨୨,୨୩; ଲୁକାସ୍ ୯:୪୩-୪୫)
30ଆନ୍ତିନ୍ ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ଆସ୍ତି ବୁଙ୍ଗିୟାର୍, ଆରୁ ଗାଲିଲୀ ପ୍ରଦେଶ୍ ଚିଇକିରି କେରାର୍, ଯୀଶୁସ୍ ଚାହାଁଲିୟାସ୍ କା ନେକାହି ପାତା ମା ଚାଲ୍ର୍ନାଦ୍ କା ତାନ୍ ଏକାସାନ୍ ରାଦାସ୍, 31ଏନ୍ଦେର୍ଗେକା ଆସ୍ ତାଙ୍ଘା ଚେଲାରିନ୍ ଶିକ୍ଷା ଚିଆଲିୟାସ୍, ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ପାର୍ମେଶ୍ଵାର୍ସ୍କି ତାର୍ତି ବାର୍ଚ୍କା ମୁନୁଷ୍ ହାଦ୍ଦୁସ୍, ଆଲାର୍ଘି ହେଖ୍ଖାନୁ ସୋଁପାଚାକସ୍, ଆବ୍ଡ଼ାର୍ ଆସିନ୍ ଡେମର୍ ପିଟର୍ଚିୟର୍; ଆରୁ ଡେମ୍ଚ୍କା ପିଟ୍ଟକାଘି ତିନ୍ ଦିନ୍ନୁ ଉଜ୍ଜସ୍କସ୍।” 32ଲେକିନ୍ ଚେଲାଜାମାର୍ ଇ କାତ୍ଥାନ୍ ବୁଝ୍ରା ପଲ୍ଲାଲିୟାର୍, ଆରୁ ଯୀଶୁସିନ୍ ଇ କାତ୍ଥାନ୍ ମେନାଗେ ଆବ୍ଡ଼ାର୍ ଏଲ୍ଚାଲିୟାର୍।
ଜାମାର୍ଘିନ୍ତି ବାଡ଼୍କା ନେଦ୍
(ମାତିସ୍ ୧୮:୧-୫; ଲୁକାସ୍ ୯:୪୬-୪୮)
33ଆନ୍ତିନ୍ ଆବ୍ଡ଼ାର୍ କାଫାର୍ନାହୁମ୍ ସହର୍ଗେ ବାର୍ଚାର୍; ଆଡ଼୍ପା ଆଣସିକିରି ଯୀଶୁସ୍ ତାଙ୍ଘା ଚେଲାରିନ୍ ମେନ୍ଚାସ୍, “ନିମ୍ ପାବୁନୁ ଏନ୍ଦେର୍ଘି ବାରେନୁ କାଁଟ୍ଛାଁଟ୍ କାମାଲ୍କାର୍?” 34ଲେକିନ୍ ଆବ୍ଡ଼ାର୍ କାଡ଼େ-କାଡ଼େ ରାଚାର୍, ଏନ୍ଦେର୍ଗେକା ପାବୁନୁ ଆବ୍ଡ଼ାର୍ ତାହ୍ମା-ତାହ୍ମା ଭିତର୍ନୁ ନେଦ୍ ବାଡ଼୍କା ବୁଲି କାଁଟ୍ଛାଁଟ୍ କାମାଲିୟାର୍। 35ଯୀଶୁସ୍ ଅକ୍କିକିରି ତାଙ୍ଘା ବାର ଲୋକ୍ ଚେଲାରିନ୍ ମେହିଁୟାସ୍ ଆରୁ ଆବ୍ଡ଼ାରିନ୍ ତେଙ୍ଗିୟାସ୍, “ଯଦି ନେଦିନ୍ ପାର୍ମେଶ୍ଵାର୍ସ୍କି ନଜର୍ନୁ ଜାମାର୍ଘିନ୍ତି ବାଡ଼୍କା ମାନାଗେ ବେଦ୍ଦଦାସ୍ ଆସ୍, ନିଜ୍କେନିଜ୍ ଜାମାର୍ଘିନ୍ତି ଛୋଟେ ସୋଚ୍ନା କାତ୍ଥା, ଆରୁ ଜାମାର୍ଘି ସେବା କାମ୍ନାକାତ୍ଥା।” 36ଯୀଶୁସ୍ ଅଣ୍ଟା ଛୋଟେ ହାଦ୍ଦୁସିନ୍ ଚେଲାର୍ଘି ମାଝାନୁ ଇଲ୍ତାଚାସ୍, ଆରୁ ଆସିନ୍ ହୋଇଚିକିରି ଆବ୍ଡ଼ାରିନ୍ ତେଙ୍ଗିୟାସ୍, 37“ନେଦ୍ ଏଙ୍ଘା ନାମେତି ଇ ଛୋଟେ ହାଦ୍ଦୁର୍ଘି ଭିତର୍ନୁ ଅଣ୍ଟା ଏକିନ୍ ହାଦ୍ଦୁରିନ୍ ଗ୍ରହନ୍ କାମ୍ନାଏ, ଆବ୍ଡ଼ାର୍ ଏଙ୍ଗାନ୍ ଗ୍ରହନ୍ କାମ୍ନାଏ ଆରୁ ନେଦ୍ ଏଙ୍ଗାନ୍ ଗ୍ରହନ୍ କାମ୍ନାଏ; ଆବ୍ଡ଼ାର୍ ଏଙ୍ଗାନ୍ ଖାଲି ମାଲ୍ଲା, ଲେକିନ୍ ପାର୍ମେଶ୍ଵାର୍ସିନ୍ ଗ୍ରହନ୍ କାମ୍ନାଏ, ଏକାସ୍ ଏଙ୍ଗାନ୍ ତାଏକାଦାସ୍।”
ନେଦ୍ ନାହ୍ମା ବିରୁଦ୍ଧ୍ନୁ ମାଲ୍କାର୍ ଆବ୍ଡ଼ାର୍ ନାହ୍ମାଗାନେ ରାନାଏ
38ଯୋହାନ୍ସ୍ ଯୀଶୁସିନ୍ ତେଙ୍ଗିୟାସ୍, “ହେ ଗୁରୁ, ଏମ୍ ନେକାନ୍ ଅର୍ତୁ ନିହ୍ମା ନାମେ ଧାରିକିରି ଖାରାପ୍ ଆତ୍ମାନ୍ ଅଥ୍ର୍ନାନ୍ ଏର୍କାମ୍ ଆରୁ ଏମ୍ ଆସିନ୍ ମାନା କାମ୍ଚ୍କାମ୍, ଏନ୍ଦେର୍ଗେକା ଆସ୍ ଏହ୍ମା ଭିତର୍ନୁ ମାଲ୍ଲାରୁସ୍।” 39ଲେକିନ୍ ଯୀଶୁସ୍ ତେଙ୍ଗିୟାସ୍, “ଆସିନ୍ ଆମା ରୋକା; ଏନ୍ଦେର୍ଗେକା ନେଦ୍ହି ଏନ୍ନେ ମାଲ୍କାରିନ୍ ଏକାର୍ କା ଏଙ୍ଘା ନାମେ ଧାରିକିରି ଅଦ୍ଭୁତ୍ ନାଲ୍ଖୁ କାମର୍, ଆରୁ ପାଛ୍ଲି ଆଖାନେନ୍ ଏଙ୍ଘା ନିନ୍ଦା କାମର୍, 40ଏନ୍ଦେର୍ଗେକା ନେଦ୍ ନାହ୍ମା ବିରୁଦ୍ଧ୍ନୁ ମାଲ୍କାର୍, ଆବ୍ଡ଼ାର୍ ନାହ୍ମାଗାନେ ରାନାଏ। 41ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍, ନିମ୍ ଖ୍ରୀସ୍ତ୍କି ଆଲାର୍ବୁଲି ନେଦିନ୍ ନିମାଗେ ଅନ୍ଗିନା ଆମ୍ମୁ ହାପ୍ପାଗେ ଚିଅର୍ ତା, ଆବ୍ଡ଼ାର୍ ଏସ୍କିନ୍ହି ତାହ୍ମା ଫଲ୍ ମା ଏଫ୍ସ୍ନାଏ।”
ପାପ୍ତି ବାଛ୍ରା
(ମାତିସ୍ ୧୮:୬-୯; ଲୁକାସ୍ ୧୭:୧,୨)
42ଆନ୍ତିନ୍ ଆବ୍ଡ଼ାରିନ୍ ଯୀଶୁସ୍ ଆରୁହି ତେଙ୍ଗିୟାସ୍, “ଯଦି ନେଦିନ୍ ବିଶ୍ଵାସ୍ କାମୁ ଇ ଛୋଟେର୍ଘି ଭିତର୍ନୁ ଅର୍ତୁର୍ଘି ଲାଗାନ୍ ପାପ୍ଘି କାରଣ୍ ମାନର୍ ତା, ଆବ୍ଡ଼ାର୍ଘି ହଁଟନୁ ବାଡ଼୍କା ଜାତ୍ରି ଚାଁଚା ହିଁକିରି ଆବ୍ଡ଼ାରିନ୍ ସାମ୍ଧୁର୍ନୁ ଖେବ୍ଡ଼େଚ୍କୁଚ୍କୁନ୍ ବାନେ ମାନ୍ଚ୍କିରଦ୍ନେ। 43ଆରୁ ଯଦି ନିହ୍ମା ହେଖ୍ଖାଦ୍ ନିହ୍ମା ଲାଗାନ୍ ପାପ୍ଘି କାରଣ୍ ମାନତା ଆବନ୍ ଛପାଚା। ଠୁଠା ମାନିକିରି ଜୀବନ୍ନୁ କର୍ନା ନିଙ୍ଘାଲାଗାନ୍ ଇଦ୍ ବାନେଦ୍ କା ଯୋଡ଼େ ହେଖ୍ଖା ରାତେହି ନରକ୍ତା ଏକ୍ଲାହି ମା ତେବ୍ର୍ନାବାଲା ଚିଚ୍ଚୁନୁ ଡାଲାକୋଦ୍। 44(ଏନ୍ଦେର୍ଗେକା ନରକ୍ନୁ ଆବ୍ଡ଼ାର୍ଘି ପଚ୍କୋ ମା ଖିଇଦ୍ ଆରୁ ଚିଚ୍ଚୁ ମା ତେବ୍ରି) 45ଆରୁ ଯଦି ନିହ୍ମା ହେଡ୍ଡୁଦ୍ ନିହ୍ମା ଲାଗାନ୍ ପାପ୍ଘି କାରଣ୍ ମାନଦ୍ତା ଆବନ୍ ଛପାଚା। ଅଣ୍ଟା ହେଡ୍ଡୁ ରାଇକିରି ସରଗ୍ନୁ କାନାଦ୍, ଯୋଡ଼େ ହେଡ୍ଡୁ ରାଇକିରି ନରକ୍ନୁ କାନାନ୍ତି ବାନେଦ୍। 46(ଏନ୍ଦେର୍ଗେକା ନରକ୍ନୁ ଆବ୍ଡ଼ାର୍ଘି ପଚ୍କୋ ମା ଖିଇଦ୍ ଆରୁ ଚିଚ୍ଚୁ ମା ତେବ୍ରି)। 47ଆରୁ ଯଦି ନିହ୍ମା ହାନ୍ନୁଦ୍ ନିହ୍ମା ଲାଗାନ୍ ପାପ୍ଘି କାରଣ୍ ମାନଦ୍ତା ହାନ୍ନୁନ୍ ଅଥ୍ରାଚା। ଅଣ୍ଟା ହାନ୍ନୁରାତେ ସରଗ୍ନୁ କାନାଦ୍, ଯୋଡ଼େ ହାନ୍ନୁରାତେ ନରକ୍ନୁ କାନାନ୍ତି ବାନେଦ୍। 48ଏନ୍ଦେର୍ଗେକା ନରକ୍ନୁ ଆବ୍ଡ଼ାର୍ଘି ପଚ୍କୋ ମା ଖିଇଦ୍ ଆରୁ ଚିଚ୍ଚୁ ମା ତେବ୍ରି। 49ଜାମା ଆଲାର୍ଘି ଜୀବନ୍ନୁ ମୁରୁକ୍ ଦୁଃଖୁ କଷଟ୍ ବାରଦ୍ ଏସ୍କେ କା ଆବ୍ଡ଼ାର୍ ଶୁଦ୍ଧ୍ ମାନର୍କର୍।”
50“ବେକୁଦ୍ ବାନେ ଜିନିଷ୍, ଲେକିନ୍ ଯଦି ବେକୁଘି ଏମ୍ବାଦ୍ ବାଗ୍ଡ଼ାରକୋ ହାଲେ, ଆବନ୍ ଆରୁ ଏନ୍ଦେର୍ ଜିନିଷ୍ତି ଏମ୍ବା କାମାକୋ? ହନ୍ନେନ୍ ନିମ୍ ନିଜର୍ ଉଲା ବାନେ ଗୁଣ୍ ଉଇୟା, ଆରୁ ଏକ୍ ଦୁସ୍ରାର୍ଗାନେ ମେଲ୍ପ୍ରେମ୍ନୁ ରା।”
10ଛାଡ଼୍ପତର୍ଘି ବାରେନୁ ଯୀଶୁସ୍ ଶିଖାବାଲ୍ଦାସ୍
(ମାତିସ୍ ୧୯:୧-୧୨; ଲୁକାସ୍ ୧୬:୧୮)
1ଆନ୍ତିନ୍ ଯୀଶୁସ୍ କାଫାର୍ନାହୁମ୍ ସହର୍ ଆମ୍ବିକିରି ୟାହୁଦା ରାଜୀ ଆରୁ ଯାର୍ଦାନ୍ ଯୋଡ଼ୁ ହାପାଖା ବାର୍ଚାସ୍। ଆଲାର୍ଘି ଅଣ୍ଟା ବାଡ଼୍କା ଭିଡ଼୍ ଆସାନ୍ ଠୁଡ଼ିୟା ରାଚାକେରା, ଆରୁ ଆସ୍ ନିଜେ ରୋଜ୍ଦିନ୍ ଏସ୍କେ କାମାଲିୟାସ୍ ଆନ୍ନେନ୍ ଆଲାରିନ୍ ଶିଖାବାତେ ରାଚାସ୍। 2ହତ୍କବାକେନ୍ କେତ୍କ ଲୋକ୍ ଫାରିସୀଜାମାର୍ ଯୀଶୁସ୍ସାନ୍ ବାର୍ଚାର୍ ଆରୁ ଆସିନ୍ ଫାନ୍ଦାନୁ ଫାସାବାଗେ ଏନ୍ନେ ପ୍ରଶ୍ନ ମେନ୍ଚାର୍, “ଅଣ୍ଟା ଆଲାସ୍କି ତାଙ୍ଘା ମାଏକିନିଆଁନ୍ ଛାଡ଼୍ପତର୍ ଚିନାଦ୍ ୟାହୁଦୀ ନିୟମ୍ଘି ଅନୁସାର୍ ଉଚିତ୍ କାଁଏ?” 3ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ମୁଶା ନାବୀସ୍ ନିମାଗେ ଏନ୍ଦେର୍ ହୁକୁମ୍ ଚିଚ୍ଚକାଦାସ୍?” 4ଆବ୍ଡ଼ାର୍ ତେଙ୍ଗିୟାର୍, “ମୁଶା ନାବୀସ୍ ଅଣ୍ଟା ଆଲାସିନ୍ ଛାଡ଼୍ପତର୍ ଲେଖିକିରି ତାଙ୍ଘା ମାଏକିନିଆଁନ୍ ଆମ୍ଵାଗେ ଛୁଟି ଚିଚ୍ଚକାଦାସ୍।” 5ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଆସ୍ ନିମାନ୍ ନିହ୍ମା କାଠୋର୍ ମନ୍ଘି ଚାଲ୍ତେ ଏନ୍ନେ ଲେଖ୍ଚ୍କାଦାସ୍। 6ଲେକିନ୍ ପାର୍ମେଶ୍ଵାର୍ସ୍ ଦୁନିଆଁଘି ସୁରୁନ୍ତି ମାର୍ଦ୍ନା ଆରୁ ମାଏକିନିଆଁନ୍ ବାନାବାଚ୍କାଦାସ୍। 7ଇଦ୍ଘିଲାଗାନ୍ ମାର୍ଦ୍ନାସ୍ ତାଙ୍ଘା ଆୟାଙ୍ଗ୍ ବାଙ୍ଗ୍ରିନ୍ ଆମ୍ଵଚସ୍ ଆରୁ ତାଙ୍ଘା ମାଏକିନିଆଁଗାନେ ରସ୍, 8ଆବ୍ଡ଼ାର୍ ଅଣ୍ଟା ମେଦୁର୍; ହୁଦ୍ଘିଲାଗାନ୍ ଆବ୍ଡ଼ାର୍ ଦୁଇ ଲୋକ୍ ମାଲ୍ଲା ଲେକିନ୍ ଅଣ୍ଟା ମେଦୁର୍। 9ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ନେକାନ୍ ଯୋଡ଼୍କାଦାସ୍, ଆବ୍ଡ଼ାରିନ୍ ଆଲାର୍ ଭିନେ ଆମା କାମା।” 10ଯେତ୍କବାକେନ୍ ଯୀଶୁସ୍ ଆଡ଼୍ପାନୁ ରାଚାସ୍ ହତ୍କବାକେନ୍ ଚେଲାର୍ ଯୀଶୁସିନ୍ ଛାଡ଼୍ପତର୍ଘି ବାରେନୁ ଆରୁଅହନ୍ ମେନ୍ଚାର୍। 11ଆଙ୍ଗେନ୍ ଆସ୍ ତେଙ୍ଗିୟାସ୍, “ଏକାସ୍ ତାଙ୍ଘାଏ ଆଲିବନ୍ ଛାଡ଼୍ପତର୍ ଚିୟସ୍ ଆରୁ ନାନ୍ନା ଆଲିନ୍ ବେଞ୍ଜରସ୍ ତା ଆସ୍ ପହ୍ଲେ ଆଲିଘି ବିରୁଦ୍ଧ୍ ବେଭିଚାର୍ କାମ୍ଦାସ୍; 12ଆରୁ ଯଦି ଅଣ୍ଟା ଆଲିଦ୍ ତାଙ୍ଘାଏ ଆଲାସିନ୍ ଛାଡ଼୍ପତର୍ ଚିଇକିରି ନାନ୍ନା ଆଲାସ୍ ଗାନେ ବେଞ୍ଜରଦ୍ ହାଲେ ଆଦ୍ ବେଭିଚାର୍ କାମିଦ୍।”
ଯୀଶୁସ୍ ହାଦ୍ଦୁରିନ୍ ଆଶୀର୍ବାଦ୍ ଚିଆଲ୍ଦାସ୍
(ମାତିସ୍ ୧୯:୧୩-୧୫; ଲୁକାସ୍ ୧୮:୧୫-୧୭)
13ଆଲାର୍ ଯୀଶୁସ୍କି ଚାହାଗେ ହାଦ୍ଦାରିନ୍ ଅନ୍ଦ୍ରାଲିୟାର୍ ଏସ୍କେ କା ଆସ୍ ଆବ୍ଡ଼ାର୍ଘି ମିଆଁ ହେଖ୍ଖା ଉଇୟସ୍ ଆରୁ ଆଶୀର୍ବାଦ୍ ଚିୟସ୍, ଲେକିନ୍ ଚେଲାଜାମାର୍ ଆଲାରିନ୍ ଧାମ୍କାଲିୟାର୍। 14ଇବନ୍ ଏରିକିରି ଯୀଶୁସ୍ ଖୀସାରାଚାସ୍ ଆରୁ ତେଙ୍ଗିୟାସ୍, “ହାଦ୍ଦାରିନ୍ ଏଙ୍ଘା ଚାହା ବାରାଗେ ଚିଆ। ଆବ୍ଡ଼ାରିନ୍ ମାନା ଆମା କାମା, ଏନ୍ଦେର୍ଗେକା ପାର୍ମେଶ୍ଵାର୍ସ୍କି ରାଜୀଦ୍ ଏନ୍ନେ ଆଲାର୍ଘି ଲାଗାନ୍ ରାଇଦ୍। 15ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ ଏକାର୍ ପାର୍ମେଶ୍ଵାର୍ସ୍କି ରାଜୀନ୍ ହାଦ୍ଦାର୍ ଲେଖା ଗ୍ରହନ୍ ମା କାମର୍, ଆବ୍ଡ଼ାର୍ ଆନ୍ନୁ ଏକ୍ଲାହି କରାଗେ ପଲ୍ଲନାଏ।” 16ଆନ୍ତିନ୍ ଯୀଶୁସ୍ ହାଦ୍ଦାରିନ୍ କୋଡ଼ୁନୁ ଅଚ୍ଚାସ୍, ଆରୁ ଆବ୍ଡ଼ାର୍ଘି ମିଆଁ ହେଖ୍ଖା ଉଇୟାସ୍ ଆରୁ ଆଶୀର୍ବାଦ୍ ଚିଚ୍ଚାସ୍।
ଅଣ୍ଟା ଧାନ୍ନୁବାଲା ଯୁୱାନ୍ କୁକ୍କସ୍କି ନମୁନା
(ମାତିସ୍ ୧୯:୧୬-୩୦; ଲୁକାସ୍ ୧୮:୧୮-୩୦)
17ଯେତ୍କବାକେନ୍ ଯୀଶୁସ୍ ଆସ୍ତି ଉର୍ଖିକିରି ପାବୁନୁ କାଲିୟାସ୍ ତା, ଅଣ୍ଟା ଯୁୱାନ୍ କୁକ୍କସ୍ କୁଦ୍ୟାରାନାତି ବାର୍ଚାସ୍, ଆରୁ ଯୀଶୁସ୍କି ଆଘ୍ଲି ହାଁଠୁୱାରାଇକିରି ମେନ୍ଚାସ୍, “ହେ ବାନେ ଗୁରୁ, ସବୁଦିନ୍ତା ଜୀବନ୍ ହାଖ୍ଖାଗେ ଏଙ୍ଗା ଏନ୍ଦେର୍ କାମାଗେ ଖାତ୍ରୋ?” 18ଆଙ୍ଗେନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ଏଙ୍ଗାନ୍ ଏନ୍ଦେର୍ଗେ ବାନେ ବାଲ୍ଦାଏ? ପାର୍ମେଶ୍ଵାର୍ସିନ୍ ଆମ୍ଵିକିରି ନେଦ୍ହି ବାନେ ମାଲ୍ନାଏ। 19ନିନ୍ ତା ନିୟମ୍ଗୁଠିନ୍ ଆହ୍ଦାଏ: ‘ଆଲାରିନ୍ ଆମା ପିଟା, ବେଭିଚାର୍ ଆମା କାମା, ଆମାହାଡ଼ା, ଝୁଟ୍ଟୁ ସାକ୍ଷୀ ଆମା ଚିଆ, ନେକାନ୍ହି ଆମାଠାକା, ନିଜର୍ ଆୟାଙ୍ଗ୍-ବାଙ୍ଗ୍ରିନ୍ ଆଦର୍ମାଇନ୍ କାମା’।” 20ଆସ୍ ଯାବାବ୍ ଚିଚ୍ଚାସ୍, “ହେ ଗୁରୁ, ଇ ଜାମାନ୍ ତା ଏନ୍ ଯୁୱାନ୍ ବାକେନ୍ତିନିନ୍ ମାନ୍ତେ ବାରାଲ୍ଦାନ୍।” 21ଇବନ୍ ମେନିକିରି ଯୀଶୁସ୍ ଆ କୁକ୍କସିନ୍ ବାନେ ହାଖ୍ଖନା ନଜର୍ତି ଏରିୟାସ୍, ଆରୁ ଆସିନ୍ ତେଙ୍ଗିୟାସ୍, “ନିଙ୍ଘାଏନୁ ଅଣ୍ଟା ଘାଟି ରାଇଦ୍। କାଲା, ନିଙ୍ଘା ଜାମାନ୍ ବିଁଶିକିରି ଗରୀବ୍ ଆଲାର୍ଗେ ଚିୟାଲାଗା, ଆନ୍ତିନ୍ ବାରିକିରି ଏଙ୍ଗାନ୍ ଗୁଡ଼ିଆବା ହାଲେ ସରଗ୍ନୁ ନିଙ୍ଗାଗେ ଧାନ୍ନୁ ଚିଆକୋ।” 22ଯୀଶୁସ୍କି କାତ୍ଥା ମେନିକିରି ଆ ଯୁୱାନ୍ କୁକ୍କସ୍ ତାଙ୍ଘା ଚେହେରାନ୍ ଏତ୍ତେଇଚାସ୍, ଆରୁ ଦୁଃଖୁ ମାନିକିରି ବୁଙ୍ଗେଇଚାସ୍, ଏନ୍ଦେର୍ଗେକା ଆସ୍ ମୁରୁକ୍ ବାଡ଼୍କା ଧନୀ ରାଚାସ୍। 23ଆଙ୍ଗେନ୍ ଯୀଶୁସ୍ ଚାର୍ହି ପାଖା ଏରିକିରି ତାଙ୍ଘାଏ ଚେଲାଜାମାରିନ୍ ତେଙ୍ଗିୟାସ୍, “ପାର୍ମେଶ୍ଵାର୍ସ୍କି ରାଜୀନୁ ଧନୀ ଆଲାର୍ଗେ କର୍ନାଦ୍ ମୁରୁକ୍ କଠିନ୍!” 24ଚେଲାଜାମାର୍ ଯୀଶୁସ୍କି କାତ୍ଥାନ୍ ମେନିକିରି ଆଚ୍ମିତ୍ ମାନ୍ଚାର୍ କେରାର୍। ଲେକିନ୍ ଯୀଶୁସ୍ ଆରୁଅହନ୍ ତେଙ୍ଗିୟାସ୍, “ଏକାର୍ ଧନ୍ଘି ମିଆଁ ଭାର୍ଷା ଉଇନାଏ, ଆବ୍ଡ଼ାର୍ଘି ଲାଗାନ୍ ପାର୍ମେଶ୍ଵାର୍ସ୍କି ରାଜୀନୁ କର୍ନା ବହୁତ୍ କଠିନ୍! 25ଧନୀ ଆଲାର୍ଗେ ପାର୍ମେଶ୍ଵାର୍ସ୍କି ରାଜୀନୁ କର୍ନାନ୍ତି, ସୁଇଁଘି ଭଙ୍କାନୁ ଉଁଟ୍ଘି ଉର୍ଖ୍ନାଦ୍ ସହଜ୍ ରାଇଦ୍!” 26ଚେଲାଜାମାର୍ ଆଚ୍ମିତ୍ ମାନ୍ଚାର୍ କେରାର୍ ଆରୁ ତାମ୍-ତାମ୍ କାଚ୍ନେଖ୍ରା ଲାଗ୍ଗିୟାର୍, “ତା ନେଦ୍ ବାଛ୍ରା ଅଙ୍ଗର୍?” 27ଯୀଶୁସ୍ ଆବ୍ଡ଼ାରିନ୍ ଏକ୍ ନଜର୍ତି ଏର୍ତେ ତେଙ୍ଗିୟାସ୍, “ଆଲାର୍ଘି ଲାଗାନ୍ ଆଦ୍ ମୁସ୍କିଲ୍ଦ୍; ଲେକିନ୍ ପାର୍ମେଶ୍ଵାର୍ସ୍କେ ମାଲ୍ଲା, ଏନ୍ଦେର୍ଗେକା ପାର୍ମେଶ୍ଵାର୍ସ୍କି ଲାଗାନ୍ ଜାମାଦ୍ ସମ୍ଭବଦ୍।” 28ପାତ୍ରାସ୍ ଯୀଶୁସିନ୍ ତେଙ୍ଗାଗେ ଲାଗ୍ଗିୟାସ୍, “ନିହ୍ମା ପାଛ୍ଲି କାଲାଗେ ଏମ୍ ଜାମାନ୍ ଆମ୍ଵେଇ ଚିଚ୍ଚକାଦାମ୍।” 29ଯୀଶୁସ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍, ଏକାର୍ ଏଙ୍ଘାଏ ଆରୁ ସୁସାମାଚାର୍ଘି ଲାଗାନ୍ ଆଡ଼୍ପାପାଲି, ନିଜର୍ ଆୟାଙ୍ଗ୍ବାଙ୍ଗ୍, ଭାଇବୁହୁଣୀ, ହାଦ୍ଦୁବଚ୍ଚ ଆରୁ ହାଲ୍ଲୁଗୋଡ୍ଡାନ୍ ଆମ୍ଵେଇ ଚିଚ୍ଚକାନାଏ, 30ଆରୁ ଇ ଦୁନିଆଁନୁ ଶୋଏ ଗୁଣ୍, ଆଡ଼୍ପା, ଭାଇବୁହୁଣୀ, ଆୟାଙ୍ଗ୍, ହାଦ୍ଦୁବଚ୍ଚ ଆରୁ ହାଲ୍ଲୁଗୋଡ୍ଡା ହାଖ୍ଖର ଆଦ୍ଘି ସାଙ୍ଗେ ସାତାବାହିକୋ ଆରୁ ସେପୁର୍ନୁ ସବୁଦିନ୍ତା ଜୀବନ୍ ଜରୁର୍ ହାଖ୍ଖର, ଏନ୍ନେ ଆଲ୍ ନେଦ୍ହି ମାଲ୍କାରିନ୍। 31ଲେକିନ୍ ଏକା ଆଲାର୍ ଆଘ୍ଲି ରାନାଏ, ଆବ୍ଡ଼ାର୍ ପାଛ୍ଲି ମାନର୍; ଆରୁ ଏକାର୍ ପାଛ୍ଲି ରାନାଏ, ଆବ୍ଡ଼ାର୍ ଆଘ୍ଲି ମାନର୍କର୍।”
ଯୀଶୁସ୍ ତାଙ୍ଘା ମରନ୍ଘି ବାରେନୁ ଭବିଷତ୍ କାତ୍ଥା ତେଙ୍ଗାଲ୍ଦାସ୍
(ମାତିସ୍ ୨୦:୧୭-୧୯; ଲୁକାସ୍ ୧୮:୩୧-୩୪)
32ଚେଲାଜାମାର୍ ଯେରୁଶାଲେମ୍ କାନା ପାବୁନୁ ରାଚାର୍, ଆରୁ ଯୀଶୁସ୍ ଚେଲାଜାମାର୍ଘି ଆଘ୍ଲି-ଆଘ୍ଲି କାଲିୟାସ୍: ଚେଲାଜାମାର୍ ବହୁତ୍ ଘାବ୍ରାରାଚାର୍ କେର୍କାଚାର୍ ଆରୁ ତାଙ୍ଘାଏ ପାଛ୍ଲି ବାରୁ ଆଲାର୍ହି ଏଲ୍ଚିୟାର୍ କେର୍କାଚାର୍, ହୁଦ୍ଘିଲାଗାନ୍ ଯୀଶୁସ୍ ବାର ଲୋକ୍ ଚେଲାରିନ୍ ଭିନେ ମେହିଁକିରି ତେଙ୍ଗାଗେ ଲାଗ୍ଗିୟାସ୍ କା, ତାଙ୍ଘା ମିଆଁ ଏନ୍ଦେର୍-ଏନ୍ଦେର୍ ଘାଟ୍ର୍ନାବାଲା ରାଇ। 33ଯୀଶୁସ୍ ତେଙ୍ଗିୟାସ୍, “ଏରା ନାମ୍ ଯେରୁଶାଲେମ୍ଗେ କାଲ୍ଦାତ୍, ମୁନୁଷ୍ ହାଦ୍ଦୁସିନ୍ ମୁଖ୍ୟା ପୁରୋହିତ୍ଜାମାର୍ ଆରୁ ପଣ୍ତିତ୍ଜାମାର୍ଘି ହେଖ୍ଖାନୁ ସୋଁପାଚିଆକୋ, ଆବ୍ଡ଼ାର୍ ଆସିନ୍ ମରନ୍ ଦଣ୍ଡ୍ଘି ହୁକୁମ୍ ଚିୟର୍, ଆରୁ ନାନ୍ନା ଜାତିୟାର୍ଘି ହେଖ୍ଖାନୁ ସୋଁପର୍ଚର୍। 34ଏକାର୍ କା ତାଙ୍ଘାଏ ମାଜାକ୍ ଉଡ଼ାବର୍, ତାଙ୍ଘା ମିଆଁ ତୁପ୍ଫର୍, କୋଡ୍ରାତି ଡେମର୍ ଆରୁ ତାଙ୍ଗାନ୍ ପିଟର୍ଚିୟର୍, ଲେକିନ୍ ଆସ୍ ତିନ୍ ଦିନ୍ନୁ ଉଜ୍ଜସ୍କସ୍।”
ୟାକୁବ୍ ଆରୁ ଯୋହାନ୍ସ୍ ଯୀଶୁସିନ୍ ଆର୍ଜୀବିନ୍ତି କାମାଲ୍ନାଏ
35ଆନ୍ତିନ୍ ଜେବେଦୀସ୍କି ହାଦ୍ଦୁର୍ ୟାକୁବ୍ ଆରୁ ଯୋହାନ୍ସ୍ ଯୀଶୁସ୍କି ଚାହାଗେ ବାର୍ଚାର୍ ଆରୁ ତେଙ୍ଗିୟାର୍, “ହେ ଗୁରୁ, ଏହ୍ମାଏ ଅଣ୍ଟା ଆର୍ଜୀ ରାଇ ଆବନ୍ ପୁରା କାମାଚା।” 36ଯୀଶୁସ୍ ମେନ୍ଚାସ୍, “ନିମ୍ ଏଙ୍ଘାସ୍ତି ଏନ୍ଦେର୍ ବେଦ୍ଦାଲ୍ଦାର୍? ଏନ୍ ନିହ୍ମା ଲାଗାନ୍ ଏନ୍ଦେର୍ କାମାଅଙ୍ଗନ୍?” 37ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ହେ ପ୍ରାଭୁ, ନିମ୍ ଏକ୍ଲା ନିହ୍ମାଏ ସରଗ୍ ରାଜୀନ୍ତା ରାଜ୍ଗାଦୀନୁ ଅକ୍କର୍, ହତ୍କବାକେନ୍ ଏହ୍ମା ଭିତର୍ନୁ ଅର୍ତୁରିନ୍ ନିହ୍ମା ତିନାପାଖା ଆରୁ ଅର୍ତୁରିନ୍ ନିହ୍ମା ଡେବ୍ବା ପାଖା ଅକ୍କତର୍ ଏମାନ୍ ବଚନ୍ ଚିଆ।” 38ଲେକିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ବାଲ୍ଦାର୍ କା, ନିମ୍ ଏନ୍ଦେର୍ ନିଆଁଲ୍ଦାର୍? ଏକା କାଟୋରାନୁ ଏନ୍ ହାପ୍ପନାବାଲା ରାଦାନ୍, ନିମ୍ ହାପ୍ପା ଅଙ୍ଗର୍ କାଁଏ? ଆରୁ ଏକା ଆସ୍ନାନ୍ ଏଙ୍ଗା ହୁଆଗେ ରାଇ, ନିମ୍ ଆବନ୍ ହୁଆ ଅଙ୍ଗର୍ କାଁଏ?” ୧୦:୩୮ କାଟୋରା ଆରୁ ଆସ୍ନାନ୍ ମତ୍ଲବ୍ ଯୀଶୁସ୍ ଏକା ଦୁଃଖୁ ସାହସ୍ ଆଦ୍ଘି ଚିହ୍ନାଦ୍। 39ଆବ୍ଡ଼ାର୍ ଯୀଶୁସିନ୍ ତେଙ୍ଗିୟାର୍, “ଏମ୍ କାମାଅଙ୍ଗମ୍।” ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏକା କାଟୋରାନୁ ଏନ୍ ହାପ୍ପନାବାଲା ରାଦାନ୍, ନିମ୍ ହାପ୍ପର୍; ଆରୁ ଏକା ଆସ୍ନାନ୍ ଏନ୍ ହୋନାବାଲା ରାଦାନ୍ ଆବନ୍ ହର୍। 40ଲେକିନ୍ ନିମାନ୍ ଏଙ୍ଘାଏ ତିନା ଆରୁ ଡେବ୍ବାତାରା ଅକ୍କତାଗେ ଏଙ୍ଘା ହକ୍ନୁ ମାଲ୍ଲାଦିନ୍, ଲେକିନ୍ ଆ ଆଡ୍ଡାଦ୍ ଆବ୍ଡ଼ାର୍ଘି ଲାଗାନ୍ ରାଇଦ୍, ଏକାନ୍ କା ବାଙ୍ଗ୍ ପାର୍ମେଶ୍ଵାର୍ସ୍ ତାହ୍ମାଲାଗାନ୍ କାମ୍ଚ୍କାଦାସ୍।” 41ଯେତ୍କବାକେନ୍ ୟାକୁବ୍ ଆରୁ ଯୋହାନ୍ସ୍କି କାତ୍ଥାନ୍ ଆରୁ ଦଶ୍ଲୋକ୍ ଚେଲାର୍ ମେଞ୍ଚାର୍ ତା, ଆବ୍ଡ଼ାର୍ଘି ମିଆଁ ଖୀସାରାଗେ ଲାଗ୍ଗିୟାର୍। 42ଯୀଶୁସ୍ ଆବ୍ଡ଼ାରିନ୍ ତାଙ୍ଘା ଚାହା ମେହିଁକିରି ତେଙ୍ଗିୟାସ୍, “ନିମ୍ ଆହ୍ଦାର୍ କା ବିନାୟାହୁଦୀ ଆଲାର୍ଘି ମିଆଁ ଶାସନ୍ କାମୁ ଆଲାର୍ ଆବ୍ଡ଼ାରିନ୍ ଦାବାବାଇକିରି ଶାସନ୍ କାମ୍ନାଏ, ଆରୁ ଆବ୍ଡ଼ାର୍ଘି ଭିତର୍ନୁ ନେଦ୍ ମୁଖ୍ୟାର୍ ଆବ୍ଡ଼ାର୍-ଆବ୍ଡ଼ାର୍ଘି ମିଆଁ ହକ୍ ଚାଲାବାନାଏ। 43ନିମ୍ ହୁବ୍ଡ଼ାର୍ଘି ଲେଖା ମା ମାନ୍ନା କାତ୍ଥା, ନେଦ୍ ନିହ୍ମାସ୍ତି ବାଡ଼୍କା ମାନାଗେ ବେଦ୍ଦନାଏ ଆର୍ ନିହ୍ମାଏ ଗୁତ୍ତିୟା ମାନ୍ନା କାତ୍ଥା; 44ଆରୁ ନେଦ୍ ନିହ୍ମା ଭିତର୍ନୁ ମୁଖ୍ୟା ମାନାଗେ ବେଦ୍ଦନାଏ, ଆବ୍ଡ଼ାର୍ ଜାମାର୍ଘି ଗୁଲାମ୍ ମାନର୍। 45ଏନ୍ଦେର୍ଗେକା ମୁନୁଷ୍ ହାଦ୍ଦୁସ୍ହି ତାଙ୍ଘାଏ ସେବା କାମ୍ତାଗେ ମାଲ୍ଲା ବାରୁସ୍, ଲେକିନ୍ ସେବା କାମାଗେ ଆରୁ ନିଜର୍ ଜୀଆ ଚିଇକିରି ଢେର୍ ଆଲାରିନ୍ ତାହ୍ମା ପାପ୍ଘି ଦଣ୍ଡ୍ନ୍ତି ବାଛାବାଗେ ବାର୍ଚ୍କାଦାସ୍।”
ଯୀଶୁସ୍ କାଁଣା ବାର୍ତିମିଉସିନ୍ ବାନେ କାମାଲ୍ଦାସ୍
(ମାତିସ୍ ୨୦:୨୯-୩୪; ଲୁକାସ୍ ୧୮:୩୫-୪୩)
46ଆନ୍ତିନ୍ ଯୀଶୁସ୍ ଆରୁ ତାଙ୍ଘା ଚେଲାର୍ ଯେରିଖୋ ସହର୍ଗେ ଆଣସିୟାର୍, ଯେତ୍କବାକେନ୍ ଯୀଶୁସ୍ ତାଙ୍ଘାଏ ଚେଲା, ଆରୁ ଆଲାର୍ଘି ଅଣ୍ଟା ବାଡ଼୍କା ଭିଡ଼୍ଦ୍ ଯେରିଖୋ ସହର୍ତି ଉର୍ଖାଲିୟା। ତା ତିମାଉସ୍କି ହାଦ୍ଦୁ ବାର୍ତିମିଉସ୍ ନାମେଘି ଅଣ୍ଟା କାଁଣା ଆଲାସ୍, ସଡ଼କ୍ଘି ପାଖି ଅକ୍କିକିରି ଭିଖ୍ ନିଆଲିୟାସ୍। 47ଯେତ୍କବାକେନ୍ ଆସ୍ ଆଖ୍ଖାସ୍ କା ଇସ୍ ନାଜ୍ରେତ୍ତା ଯୀଶୁସ୍ ବୁଲିତା, ଆସ୍ ଜୋର୍ସେ ଚିର୍ରା ରାଇକିରି ତେଙ୍ଗାଗେ ଲାଗ୍ଗିୟାସ୍, “ହେ ଯୀଶୁ, ଦାଉଦ୍ସ୍କି ହାଦ୍ଦୁ, ଏଙ୍ଘା ମିଆଁ ଦାୟା କାମା!” 48ଢେର୍ ଆଲାର୍ ଆସିନ୍ କାଡ଼େ-କାଡ଼େ ରାଗେ ଧାମ୍କାଲିୟାର୍, ଲେକିନ୍ ଆସ୍ ଆରୁ ଜୋର୍ସେ ଚିର୍ରାରାଗେ ଲାଗ୍ଗିୟାସ୍, “ହେ ଦାଉଦ୍ସ୍କି ହାଦ୍ଦୁ, ଏଙ୍ଘା ମିଆଁ ଦାୟା କାମା!” 49ଆଙ୍ଗେନ୍ ଯୀଶୁସ୍ ଇଜ୍ଜାସ୍ ଆରୁ ତେଙ୍ଗିୟାସ୍, “ଆସିନ୍ ମେହାଁ।” ଆଲାର୍ ଆ କାଁଣାସିନ୍ ମେହିଁୟାର୍ ଆରୁ ତେଙ୍ଗିୟାର୍, “ଧିରାଜ୍ ଧାରା! ଉସ୍କାରା! ଆସ୍ ନିଙ୍ଗାନ୍ ମେହାଁଲ୍ଦାସ୍।” 50ଆଙ୍ଗେନ୍ ଆସ୍ ତାଙ୍ଘାଏ ଚାଦର୍ବନ୍ ଆଚ୍ଛିକିରି ଚାଁଣେନିନ୍ ଯୀଶୁସ୍କି ଚାହାଗେ ବାର୍ଚାସ୍। 51ଯୀଶୁସ୍ ଆସିନ୍ ମେନ୍ଚାସ୍, “ନିନ୍ ଏଙ୍ଘାସ୍ତି ଏନ୍ଦେର୍ ବେଦ୍ଦାଲ୍ଦାଏ? ଏନ୍ ନିଙ୍ଗାଗେ ଏନ୍ଦେର୍ କାମନ୍?” ଆ କାଁଣା ଆଲାସ୍ ତେଙ୍ଗିୟାସ୍, “ହେ ଗୁରୁ, ଏସ୍କେ କା ଏନ୍ ଏରା ଅଙ୍ଗନ୍।” 52ଯୀଶୁସ୍ ଆସିନ୍ ତେଙ୍ଗିୟାସ୍, “କାଲା, ନିଙ୍ଘା ବିଶ୍ଵାସ୍ଦ୍ ନିଙ୍ଗାନ୍ ବାନେ କାମ୍ଚା।” ଆଖାନେନ୍ ଆସ୍ ଏରା ଅଙ୍ଗିୟାସ୍, ଆରୁ ଆସ୍ ଯୀଶୁସ୍କି ପାଛ୍ଲି-ପାଛ୍ଲି କେରାସ୍।
11ଯୀଶୁସ୍ ଯେରୁଶାଲେମ୍ନୁ କରାଲ୍ଦାସ୍
(ମାତିସ୍ ୨୧:୧-୧୧; ଲୁକାସ୍ ୧୯:୨୮-୪୦; ଯୋହାନ୍ ୧୨:୧୨-୧୯)
1ଯେତ୍କବାକେନ୍ ଯୀଶୁସ୍ ଆରୁ ତାଙ୍ଘା ଚେଲାର୍ ଯେରୁଶାଲେମ୍ ସହର୍ଘି ଚାହାନ୍ତା ଜାଇତୁନ୍ ପାର୍ତ୍ତାଘି ବେତ୍ଫାଗେ ଆରୁ ବେଥାନିୟା ପାଡ଼ାଗେ ଆଣସିୟାର୍ ତା ଆସ୍ ତାଙ୍ଘା ଚେଲାଜାମାର୍ଘି ଭିତର୍ନୁ ଦୁଇ ଲୋକ୍ ଚେଲାରିନ୍ ଏନ୍ନେ ତେଙ୍ଗିକିରି ତାଇୟାସ୍, 2“ନିହ୍ମା ଆଘ୍ଲିନ୍ତା ହୁ ପାଡ଼ାଗେ କାଲା, ଆସାନ୍ କର୍ଚ୍କାନ୍ତି ନିମାଗେ ଅଣ୍ଟା ଗାଧାହାଦ୍ଦୁ, ହିଁଚ୍କା ହାଖ୍ଖର, ନେଖା ମିଆଁ ଇନ୍ନାଜୁଟି ନେଦ୍ହି ମାଲ୍ଲା ଅକ୍କୁର୍, ଆବନ୍ କଲ୍ଲିକିରି ଅନ୍ଦର୍କେ ବାର୍କେ। 3ଆରୁ ଯଦି ନିମାନ୍ ନେଦିନ୍ ଏନ୍ନେ ତେଙ୍ଗର୍, କା ନିମ୍ ‘ଏନ୍ନେ ଏନ୍ଦେର୍ଗେ କାମାଲ୍ଦାର୍?’ ତା ତେଙ୍କେ, ‘ପ୍ରାଭୁସ୍କେ ଇଦ୍ଘି ଦାର୍କାର୍ ରାଇଦ୍’, ଆରୁ ଆସ୍ ଚାଁଣେନ୍ ଇବନ୍ ଆରୁଅହନ୍ ଇସାନ୍ ତାଇୟ ଚିୟସ୍।” 4ଆନ୍ତିନ୍ ଚେଲାର୍ ବୁଙ୍ଗିୟାର୍କେରାର୍ ଆରୁ ଆଡ଼୍ପାଘି ଚାହାନୁ ହିଁଚ୍କା, ଗାଧାହାଦ୍ଦୁବନ୍ ଗଲିନୁ ଏରିକିରି ଆବନ୍ କଲ୍ଲାଗେ ଲାଗ୍ଗିୟାର୍। 5ଆଙ୍ଗେନ୍ ଆସାନ୍ ଇଜ୍ଜକା ଆଲାର୍ଘି ଭିତର୍ନୁ ଏକାର୍-ଏକାର୍ ଆବ୍ଡ଼ାରିନ୍ ମେନ୍ଚାର୍, “ନିମ୍ ଗାଧାହାଦ୍ଦୁବନ୍ ଏନ୍ଦେର୍ଗେ କଲ୍ଲାଲ୍ଦାର୍?” 6ଯୀଶୁସ୍ ଏସ୍କେ ତେଙ୍କାଚାସ୍, ଚେଲାର୍ ଆନ୍ନେନ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାର୍; ଆଙ୍ଗେନ୍ ଆବ୍ଡ଼ା ଆଲାର୍ ଚେଲାଜାମାରିନ୍ ଗାଧାହାଦ୍ଦୁନ୍ କଲ୍ଲା ହୁଆଗେ ଛୁଟି ଚିଚ୍ଚାର୍। 7ଆବ୍ଡ଼ାର୍ ଗାଧାହାଦ୍ଦୁନ୍ ଯୀଶୁସ୍କି ଚାହାଗେ ଅନ୍ଦ୍ରିକିରି ଆଦ୍ଘି ମିଆଁ ନିଜର୍-ନିଜର୍ ଚିଢ଼ାନ୍ ଆଟ୍ଟିୟାର୍ ଆରୁ ଯୀଶୁସ୍ ଆଦ୍ଘି ମିଆଁ ଅକ୍କିୟାସ୍। 8ଢେର୍ ଆଲାର୍ ନିଜର୍-ନିଜର୍ ଚିଢ଼ାନ୍ ପାବୁନୁ ଆଟ୍ଟେଇର୍ଚାର୍। ଆରୁ କେତ୍କ ଲୋକ୍ ହାଲ୍ଲୁନ୍ତା ଡାହିଁନ୍ ଛପିକିରି ପାବୁନୁ ଆଟ୍ଟେଇର୍ଚାର୍।9ଯୀଶୁସ୍କି ଆଘ୍ଲି ଆରୁ ପାଛ୍ଲି କାଲୁ ଆଲାର୍, ଜୋର୍ସେ ତେଙ୍ଗାଗେ ଲାଗ୍ଗିୟାର୍, “ହୋଶାନ୍ନା୧୧:୯ ହୋଶାନ୍ନା ଘି ମତ୍ଲବ୍ ଏମାନ୍ ବାଛାବା।! ଆସ୍ ଧଏନ୍ ରାଦାସ୍ ଏକାସ୍ କା ପ୍ରାଭୁସ୍କି ନାମେତି ବାରାଲ୍ଦାସ୍! 10ଦାଉଦ୍ ରାଜାସ୍କି ବାଉଁଶାନ୍ତି ଏକାସ୍ ରାଜା ମାନ୍ନାବାଲା ରାଦାସ୍, ଆସ୍ ଧଏନ୍ସ୍! ଜାମାର୍ଘିନ୍ତି ମିଆଁ ରୁ ପାର୍ମେଶ୍ଵାର୍ସ୍କି ହୋଶାନ୍ନା!” 11ଆନ୍ତିନ୍ ଯୀଶୁସ୍ ଯେରୁଶାଲେମ୍ ବାରିକିରି ମନ୍ଦିର୍ନୁ କର୍ଚାସ୍, ଆରୁ ଚାର୍ହି ପାଖାନ୍ତା ଜାମା ଜିନିଷ୍ବନ୍ ଏରିକିରି ବିଡ଼ି ଅକ୍କିୟା କେର୍କିଚା ହୁଦ୍ଘିଲାଗାନ୍ ଯୀଶୁସ୍ ବାର ଲୋକ୍ ଚେଲାର୍ଗାନେ ବେଥାନିୟାଗେ ଉର୍ଖିୟାସ୍ କେରାସ୍।
ଯୀଶୁସ୍ ଅଣ୍ଟା ଡୁମାରି ମାନ୍ନୁନ୍ ସାରାପ୍ ଚିଆଲ୍ଦାସ୍
12ନାନ୍ନୁ ଉଲ୍ଲା ଯେତ୍କବାକେନ୍ ଆବ୍ଡ଼ାର୍ ବେଥାନିୟାସ୍ତି କିର୍ରାଲିଆର୍ ହତ୍କବାକେନ୍ ଯୀଶୁସ୍କେ କିଡ଼ା ଲାଗ୍ଗିୟା। 13ଆସ୍କେ କାଟେ ଗେଚ୍ଛାନୁ ଆଥା ରୁ ଅଣ୍ଟା ଡୁମାରି ମାନ୍ନୁ ଏଥ୍ରା, ଆସ୍ ଆ ମାନ୍ନୁ ଚାହାଗେ, ଏନ୍ନେ ସୋଚିକିରି କେରାସ୍ କା ଆ ମାନ୍ନୁନୁ ଫାଡ଼ୁ ହାଞ୍ଜକିରୋ: ଲେକିନ୍ ଆଦ୍ଘି ଚାହା କେର୍କାନ୍ତି ଆନ୍ନୁ ଖାଲି ଆଥା ରାନାନ୍ ଏରିୟାସ୍; ଏନ୍ଦେର୍ଗେକା ଆଦ୍ ଡୁମାରି ଫାଡ଼ୁ ହାଞ୍ଜନାଘି ସାମାୟ ମାଲ୍ଲାରୁଦ୍। 14ଆଙ୍ଗେନ୍ ଯୀଶୁସ୍ ମାନ୍ନୁନ୍ ତେଙ୍ଗିୟାସ୍, “ଆରୁ ଏକ୍ଲାହି ନିଙ୍ଘା ଫାଡ଼ୁନ୍ ନେଦ୍ହି ଆମ୍ନାର୍ ମହାଁ!” ଆସ୍କି ଚେଲାର୍ ତାଙ୍ଘାଏ ଏନ୍ନେ ତେଙ୍ଗ୍ନାନ୍ ମେନାଲିୟାର୍।
ଯୀଶୁସ୍ ମନ୍ଦିର୍ତି ବେପ୍ରିୟାରିନ୍ ଅଥ୍ରାଲ୍ଦାସ୍
(ମାତିସ୍ ୨୧:୧୨-୧୭; ଲୁକାସ୍ ୧୯:୪୫-୪୮; ଯୋହାନ୍ ୨:୧୩-୨୨)
15ଆନ୍ତିନ୍ ଆବ୍ଡ଼ାର୍ ଯେରୁଶାଲେମ୍ ସହର୍ଗେ ଆଣସିୟାର୍, ଯୀଶୁସ୍ ମନ୍ଦିର୍ନୁ କରିକିରି; ବିଁଶୁ ଆରୁ ହେନ୍ଦୁ ଆଲାରିନ୍ ବାହ୍ରି ଅଥ୍ରାଗେ ଲାଗ୍ଗିୟାସ୍, ଆସ୍ ପାଏସା ଭାଞ୍ଜାବୁ୧୧:୧୫ ପାଏସା ଭାଞ୍ଜାବାନା ମତ୍ଲବ୍ ୟାହୁଦୀ ଆଲାର୍ ରୋମ୍ ସାର୍କାର୍ଘି ପାଏସାବନ୍ ଦାନ୍ ଭାଣ୍ଡାର୍ନୁ ଦାନ୍ ମା ଚିୟାଲିୟାର୍ ଆରୁ ରୋମାନ୍ ପାଏସାନ୍ତି ପଶୁଗୁଠିନ୍ ହେନ୍ଦିକିରି ବଲୀ ହି ମା ଚାଢ଼ାବାଲିୟାର୍ ହୁଦ୍ଘିଲାଗାନ୍ ରୋମାନ୍ ସାର୍କାର୍ଘି ପାଏସାବନ୍ ବାଦ୍ଲା କାମିକିରି ମନ୍ଦିର୍ନୁ କାଲିୟାର୍। ଆଲାର୍ଘି ଟେବୁଲ୍ ଆରୁ ପାରା ବିଁଶୁ ଆଲାର୍ଘି ଚୋଉକିଗୁଠିନ୍ ଉଲ୍ଟେଇଚାସ୍ , 16ଆରୁ ମନ୍ଦିର୍ ଉଲା ନେକାନ୍ହି ଏନ୍ଦେର୍ହି ଜିନିଷ୍ଗୁଠିନ୍ ବେପାର୍ କାମାଗେ ମା ଚିଚ୍ଚାସ୍। 17ଯୀଶୁସ୍ ଆଲାରିନ୍ ଶିକ୍ଷା ଚିତେ ତେଙ୍ଗିୟାସ୍, “ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍ଚ୍କା ମାଲ୍ଲାଦିନ୍ କାଁଏ କା ଏଙ୍ଘା ଆଡ଼୍ପା ଜାମା ଜାତିୟାର୍ଘି ଲାଗାନ୍ ବିନ୍ତିଘି ଆଡ଼୍ପା ମାନଦ୍? ଲେକିନ୍ ନିମ୍ ଆବନ୍ ଡାକୁ ଜାମାର୍ଗେ ନୁହ୍ରାଗେ ଆଡ୍ଡା କାମ୍ଚେଇ ଚିଚ୍କାଦାର୍।” 18ଯୀଶୁସ୍କି ଇ କାତ୍ଥାବନ୍ ମେନିକିରି ମୁଖ୍ୟା ପୁରୋହିତ୍ଜାମାର୍ ଆରୁ ପଣ୍ତିତ୍ଜାମାର୍ ଆସିନ୍ ଏସ୍କେ ନାଶ୍ କାମା ଅଙ୍ଗର୍ ଆଦ୍ଘି ଉପାୟ ବେଦ୍ଦାଗେ ଲାଗ୍ଗିୟାର୍; ଆବ୍ଡ଼ାର୍ ଯୀଶୁସିନ୍ ଏଲ୍ଚାଲିୟାର୍, ଏନ୍ଦେର୍ଗେକା ଆଲାର୍ ଆସ୍କି ଉପ୍ଦେଶ୍ ମେନିକିରି ଆଚ୍ମିତ୍ ମାନାକାଲିୟାର୍। 19ରୋଜ୍ ବିଡ଼ି ଅକ୍କନାବାକେନ୍ ଆବ୍ଡ଼ାର୍ ସହର୍ସ୍ତି ବାହ୍ରି ଉର୍ଖା କାଲିୟାର୍।
ହାଏକା ଡୁମାରି ମାନ୍ନୁ
20ପାଇରି ବାକେନ୍ ଆବ୍ଡ଼ାର୍ ଆପାବୁନୁ କାଲିୟାର୍ ହତ୍କବାକେନ୍ ଚେଲାର୍ ମୁଲିନ୍ତି ହାଏକା ଆ ଡୁମାରି ମାନ୍ନୁନ୍ ଏରିୟାର୍। 21ଯୀଶୁସ୍ ଆ ମାନ୍ନୁନ୍ ଏକା କାତ୍ଥାନ୍ ତେଙ୍କାଚାସ୍ ପାତ୍ରାସ୍କେ ଆ କାତ୍ଥା ମନେ ବାର୍ଚା, ଆରୁ ଆସ୍ ଯୀଶୁସିନ୍ ତେଙ୍ଗିୟାସ୍, “ହେ ଗୁରୁ, ଏରା! ତା ଏକା ମାନ୍ନୁନ୍ ନିମ୍ ସାରାପ୍ ଚିଚ୍ଚକାଚ୍କାର୍, ଆଦ୍ ହାଇୟା କେର୍କିଚି।” 22ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ପାର୍ମେଶ୍ଵାର୍ସ୍କି ମିଆଁ ବିଶ୍ଵାସ୍ କାମା। 23ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍, ଯଦି ନେଦିନ୍ ଇ ପାର୍ତ୍ତାନ୍ ତେଙ୍ଗର୍ କା, ‘ଏ ପାର୍ତ୍ତା ଇସ୍ତି ହାଟ୍ଟରୁ, ଆରୁ ସାମ୍ଧୁର୍ନୁ ଖାତ୍ରୁ କାଲ୍’, ଆରୁ ମନ୍ନୁ କାଟେହି ଶାକ୍ ମା ଉଇୟସ୍, ଲେକିନ୍ ଇ ବିଶ୍ୱାସ୍ କାମସ୍କା ଏନ୍ ଏକାନ୍ ତେଙ୍ଗାଲ୍ଦାନ୍ ଆଦ୍ ପୁରା ମାନଦ୍ ତା, ଆସ୍କି ଲାଗାନ୍ ଆନ୍ନେନ୍ ମାନକୋ। 24ହୁଦ୍ଘିଲାଗାନ୍ ଏନ୍ ନିମାନ୍ ତେଙ୍ଗାଲ୍ଦାନ୍ ବିନ୍ତିନୁ ନିମ୍ ଏକାନ୍ ନିଦାର୍, ବିଶ୍ୱାସ୍ କାମା କା ଆଦ୍ ହାଖ୍ଖରା କେର୍କିଚି, ଆରୁ ଆବନ୍ ନିମାଗେ ଚିଆକୋ। 25ଆରୁ ଯେତ୍କବାକେନ୍ ନିମ୍ ବିନ୍ତି କାମାଗେ ଇଜ୍ଜକାରର୍ ଆରୁ ଯଦି ନିହ୍ମାଏ ନେକ୍ରିନ୍ ବିରୁଦ୍ଧ୍ନୁ ଏନ୍ଦ୍ରିନ୍ ମାନ୍ଚ୍କିରୋ ତା, ଆବ୍ଡ଼ାରିନ୍ ଛେମା କାମ୍କେଚିକେ ହାଲେ: ନିହ୍ମା ସରଗ୍ତା ବାଙ୍ଗ୍ ପାର୍ମେଶ୍ଵାର୍ସ୍ହି ନିହ୍ମା ଦୋଷ୍ବନ୍ ଛେମା କାମଚସ୍। 26(ଲେକିନ୍ ନିମ୍ ଯଦି ଛେମା ମା କାମର୍ ହାଲେ ନିହ୍ମା ସରଗ୍ତା ବାଙ୍ଗ୍ ପାର୍ମେଶ୍ଵାର୍ସ୍ହି ନିହ୍ମା ଦୋଷ୍ବନ୍ ଛେମା ମା କାମ୍ଦାସ୍।”)
ଯୀଶୁସ୍କି ହକ୍ଘି ବାରେନୁ ପ୍ରଶ୍ନ
(ମାତିସ୍ ୨୧:୨୩-୨୭; ଲୁକାସ୍ ୨୦:୧-୮)
27ଆନ୍ତିନ୍ ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ଆରୁଅହନ୍ ଯେରୁଶାଲେମ୍ ସହର୍ଗେ ବାର୍ଚାର୍, ଯେତ୍କବାକେନ୍ ଯୀଶୁସ୍ ମନ୍ଦିର୍ନୁ କୁଦ୍ଦାଲିୟାସ୍, ହତ୍କବାକେନ୍ ମୁଖ୍ୟା ପୁରୋହିତ୍ଜାମାର୍, ପଣ୍ତିତ୍ ଆରୁ ମୁଖ୍ୟାଜାମାର୍ ଆସ୍କି ଚାହାଗେ ବାର୍ଚାର୍ ଆରୁ ମେନ୍ଚାର୍, 28“ନିନ୍ ଏକା ହକ୍ତି ଇବ୍ଡ଼ା ଜାମାନ୍ କାମାଲ୍ଦାଏ? ଆରୁ ଇବ୍ଡ଼ା ଜାମାନ୍ କାମାଗେ ନିଙ୍ଗାଗେ ନେଦ୍ ହକ୍ ଚିଚ୍ଚାର୍?” 29ଲେକିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ହି ନିମାନ୍ ଅଣ୍ଟା କାତ୍ଥା ମେନନ୍; ଯଦି ନିମ୍ ଏଙ୍ଗାଗେ ଇଦ୍ଘି ଯାବାବ୍ ଚିଅର୍ ତା, ଏନ୍ ଇବ୍ଡ଼ା ଜାମାନ୍ ଏକା ହକ୍ତି କାମାଲ୍ଦାନ୍ ଆବନ୍ ତେଙ୍ଗନ୍। 30ଏଙ୍ଗାଗେ ଯାବାବ୍ ଚିଆ କା ଆସ୍ନାନ୍ ଚିଉ ଯୋହାନ୍ସ୍କି ଆସ୍ନାନ୍ଦ୍ ପାର୍ମେଶ୍ଵାର୍ସ୍ତି ମାନ୍ଚ୍କିଚା କା ଆଲାର୍ସ୍ତି?” 31ଆରୁ ଇବନ୍ ମେନିକିରି ଆବ୍ଡ଼ାର୍ ତାମ୍-ତାମ୍ ତେଙ୍ଗାତେଙ୍ଗି ମାନିକିରି ତେଙ୍ଗାଗେ ଲାଗ୍ଗିୟାର୍ କା, “ଯଦି ପାର୍ମେଶ୍ଵାର୍ସ୍ ଆସ୍କେ ହକ୍ ଚିଚ୍କାଦାସ୍ବୁଲି ନାମ୍ ତେଙ୍ଗତ୍ ତା ଆସ୍ ମେନସ୍, ହାଲେ ନିମ୍ ଆସ୍କି ମିଆଁ ଏନ୍ଦେର୍ଗେ ବିଶ୍ୱାସ୍ ମା କାମ୍ଚ୍କାର୍? 32ଆରୁ ଯଦି ନାମ୍ ଆଲାର୍ ହକ୍ ଚିଚ୍ଚକାନାଏ ବୁଲି ତେଙ୍ଗତ୍ ତା, ଆଲାର୍ ଏନ୍ଦ୍ରିନ୍ ନା ଏନ୍ଦ୍ରିନ୍ କାମର୍ ହନ୍ନେ, ଆବ୍ଡ଼ାର୍ଘି ମନ୍ନୁ ଏଲ୍ଚ୍କା ବାର୍ଚା, ଏନ୍ଦେର୍ଗେକା ଜାମା ଆଲାର୍ ଯୋହାନ୍ସିନ୍ ସତ୍ତୁନିନ୍ ନାବୀସ୍ବୁଲି ବିଶ୍ଵାସ୍ କାମାଲିୟାର୍।” 33ହୁଦ୍ଘିଲାଗାନ୍ ଆବ୍ଡ଼ାର୍ ଯୀଶୁସିନ୍ ଯାବାବ୍ ଚିଚ୍ଚାର୍, “ଏମ୍ ବାଲ୍ଦାମ୍।” ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ହାଲେ ଏନ୍ହି ମା ତେଙ୍ଗ୍ଦାନ୍ କା ଏନ୍ ଏକା ହକ୍ତି ଇବ୍ଡ଼ା ଜାମାନ୍ କାମାଲ୍ଦାନ୍।”
12ସାଝା ଅଚ୍ଚକା ଆଲାର୍ଘି ନମୁନା
(ମାତିସ୍ ୨୧:୩୩-୪୬; ଲୁକାସ୍ ୨୦:୯-୧୯)
1ଇଦ୍ଘି ପାଛ୍ଲି ଯୀଶୁସ୍ ଆଲାରିନ୍ ଇ ନମୁନାତି ଉପ୍ଦେଶ୍ ଚିୟାଗେ ଲାଗ୍ଗିୟାସ୍: “ଅଣ୍ଟା ଆଲାସ୍ ତାଙ୍ଘା ହାଲ୍ଲୁନୁ ଅଙ୍ଗୁର୍ ଇଦ୍ଦାସ୍, ଆରୁ ଆ ହାଲ୍ଲୁଘି ଚାର୍ହି ପାଖା ବାଟ୍କି କୁର୍ଗ୍ଗିୟାସ୍, ଆରୁ ଅଙ୍ଗୁର୍ ରାସେ ପିହାଁଗେ ହେଁହ୍ଲାନୁ ଗାଡ୍ଡି ଆର୍ହିକିରି ଟାଙ୍କି କାମ୍ଚାସ୍, ଆରୁ ଅଙ୍ଗୁର୍ ବାଟ୍କିନ୍ ଜାଗାଗେ ଆସାନ୍ ଅଣ୍ଟା ମେଚ୍ଛା ଆଡ଼୍ପା କାମ୍ଚାସ୍; ଆନ୍ତିନ୍ ଆସ୍ ଚାଷୀ ଆଲାର୍ଗେ ଆ ହାଲ୍ଲୁନ୍ ସାଝା ଚିଇକିରି ପର୍ଦେଶ୍ କେରାସ୍। 2ଆରୁ ଯେତ୍କବାକେନ୍ ଅଙ୍ଗୁର୍ ଚହ୍ନାଘି ସାମାୟ ବାର୍ଚାତା, ଆସ୍ ତାଙ୍ଘା ଭାଗୁନ୍ତା ଅଙ୍ଗୁର୍ବନ୍ ଅନ୍ଦ୍ରାଗେ ତାଙ୍ଘା ଅଣ୍ଟା ଗୁତ୍ତିୟାସିନ୍ ଆ ସାଝା ହୁ ଆଲାର୍ସାନ୍ ତାଇୟାସ୍। 3ଲେକିନ୍ ସାଝା ହୁ ଆଲାର୍ ଆ ଗୁତ୍ତିୟାସିନ୍ ଧାରିକିରି ମାର୍ପିଟ୍ କାମ୍ଚାର୍, ଆରୁ ଖାଲି ହେଖ୍ଖା କିର୍ତେଇଚାର୍। 4ଆଙ୍ଗେନ୍ ଆସ୍ ତାଙ୍ଘା ଆରୁ ଅଣ୍ଟା ଗୁତ୍ତିୟାସିନ୍ ଆବ୍ଡ଼ାର୍ଘି ଚାହାଗେ ତାଇୟାସ୍; ଲେକିନ୍ ଆବ୍ଡ଼ାର୍ ଆସ୍କି କୁକ୍କୁନ୍ ହଟ୍ଟେଇଚାର୍ ଆରୁ ଆସ୍କି ମାଜାକ୍ ଉଡ଼ାବାଚାର୍। 5ଆଙ୍ଗେନ୍ ଆସ୍ ଆରୁ ଅଣ୍ଟା ଗୁତ୍ତିୟାସିନ୍ ତାଇୟାସ୍; ଲେକିନ୍ ଆବ୍ଡ଼ାର୍ ଆସିନ୍ହି ପିଟେଇଚାର୍। ଇଦ୍ଘି ପାଛ୍ଲି ଆସ୍ ଆରୁ ଯୁକ୍କୁ ତାଙ୍ଘା ଗୁତ୍ତିୟାରିନ୍ ତାଇୟାସ୍; ଆବ୍ଡ଼ାର୍ଘି ଭିତର୍ନୁ କେତ୍କ ଲୋକ୍ରିନ୍ ଆବ୍ଡ଼ାର୍ ଡେମ୍ଚାର୍, ଆରୁ କେତ୍କ ଲୋକ୍ରିନ୍ ପିଟ୍ଟେଇଚାର୍। 6ଜାମାରିନ୍ ତାଏକା ପାଛ୍ଲି ଅର୍ତୁ ଖାଲି ତାଙ୍ଘା ନିଜର୍ ଦୁଲାଡ଼ି ହାଦ୍ଦୁସ୍ ବାଛ୍ରାସ୍; ଆଖ୍ରୀନୁ ଆସ୍ ତାଙ୍ଗ୍ଦାସିନ୍ ଏନ୍ନେ ସୋଚିକିରି ତାଇୟାସ୍ କା ଆବ୍ଡ଼ାର୍ ଏଙ୍ଗ୍ଦାସ୍ସିନ୍ ମାଇନ୍ କାମର୍। 7ଲେକିନ୍ ଆ ସାଝା ହୁ ଆଲାର୍ ତାମ୍-ତାମ୍ କାଚ୍ଚନେଖ୍ରାର୍ କା, ‘ଇସ୍ତା ତାମ୍ଵାସ୍କି ଧନ୍ସମ୍ପତ୍ତିଘି ହକ୍ଦାର୍ସ୍; ଗୁଚା, ନାମ୍ ଇସିନ୍ ପିଟଚତ୍, ଆରୁ ଇସ୍କି ଜାମା ଧନ୍ସମ୍ପତ୍ତିଦ୍ ନାହ୍ମାଏ ମାନଦ୍କଦ୍।’ 8ଆଙ୍ଗେନ୍ ଆବ୍ଡ଼ାର୍ ଆସିନ୍ ଧାରିକିରି ପିଟ୍ଟେଇଚାର୍, ଆରୁ ଅଙ୍ଗୁର୍ ବାଟ୍କିଘି ବାହ୍ରି ଖେବ୍ଡ଼େଇଚାର୍।”
9“ଆଙ୍ଗେନ୍ ଆ ଅଙ୍ଗୁର୍ ବାଟ୍କିନ୍ନ୍ତା ମାଲିକ୍ସ୍ ଏନ୍ଦେର୍ କାମସ୍? ଆସ୍ ବାରିକିରି ଆ ସାଝା ହୁ ଆଲାରିନ୍ ନାଶ୍ କାମସ୍, ଆରୁ ତାଙ୍ଘା ଅଙ୍ଗୁର୍ ବାଟ୍କିନ୍ ନାନ୍ନା ଆଲାର୍ଗେ ଚିୟସ୍। 10ନିମ୍ ପାବିତାର୍ ଶାସ୍ତ୍ରନୁ ଇବନ୍ ମାଲ୍ଲା ପାଢ଼ୁର୍ କାଁଏ? ‘ରାଜ୍ମିସ୍ତ୍ରୀଜାମାର୍ ଏକା ଚାଁଚାନ୍ ବାଉନିକିରି ପାଖିଏଚିଚ୍ଚକାଚାର୍, ଆଦ୍ କୋଣାନ୍ନ୍ତା ଅସ୍ଲି ଚାଁଚା ମାନ୍ଚାକେରା; 11ଇ ଜାମାଦ୍ ପ୍ରାଭୁସ୍କି ତାର୍ତି ମାନ୍ଚା, ଆରୁ ଇଦ୍ ନାହ୍ମା ନଜର୍ନୁ ଅଦ୍ଭୁତ୍ ନାଲ୍ଖୁଦ୍!’”
12ଆବ୍ଡ଼ାର୍ ଆଖ୍ଖାର୍ କା ଯୀଶୁସ୍ ଇ ନମୁନାନ୍ ତାହ୍ମା ବାରେନୁ ତେଙ୍ଗାଲ୍ଦାସ୍, ଆଙ୍ଗେନ୍ ଆବ୍ଡ଼ାର୍ ଯୀଶୁସିନ୍ ଧାରାଗେ ଉପାୟ ବେଦ୍ଦାଲିୟାର୍; ଲେକିନ୍ ଆବ୍ଡ଼ାର୍ ଆଲାରିନ୍ ଏଲ୍ଚାଲିୟାର୍, ହୁଦ୍ଘିଲାଗାନ୍ ଯୀଶୁସିନ୍ ଆମ୍ଵିକିରି ବୁଙ୍ଗିୟାର୍କେରାର୍।
ୟାହୁଦୀ ପଣ୍ଡିତ୍ଜାମାର୍ ମାଲ୍ଗୁଜାରୀ ଚିନାଘି ବାରେନୁ ଯୀଶୁସିନ୍ ପ୍ରଶ୍ନ ମେନାଲ୍ନାଏ
(ମାତିସ୍ ୨୨:୧୫-୨୨; ଲୁକାସ୍ ୨୦:୨୦-୨୬)
13ଆନ୍ତିନ୍ ମୁଖ୍ୟା ପୁରୋହିତ୍ଜାମାର୍, ୟାହୁଦୀ ପଣ୍ଡିତ୍ଜାମାର୍, ଆରୁ ପୁର୍ଖାର୍ କେତ୍କ ଲୋକ୍ ଫାରିସୀ ଆରୁ ହେରୋଦୀୟା ଜାମାରିନ୍ ଯୀଶୁସ୍କି ଚାହାଗେ ତାଇୟାର୍। ଏସ୍କେ କା ଆବ୍ଡ଼ାର୍ ତାଙ୍ଘା କାତ୍ଥାନ୍ତିନ୍ ତାଙ୍ଘା ଭୁଲ୍ ଧାରର୍। 14ଆବ୍ଡ଼ାର୍ ବାରିକିରି ଯୀଶୁସିନ୍ ତେଙ୍ଗିୟାର୍, “ହେ ଗୁରୁ! ଏମ୍ ଆହ୍ଦାମ୍, କା ନିମ୍ ସତ୍ତୁନ୍ ତେଙ୍ଗ୍ଦାର୍, ଆରୁ ନେକାନ୍ହି ମା ଏଲ୍ଚ୍ଦାର୍; ନିମ୍ ଅନ୍ ପାଖିୟା ମାନିକିରି ମା କାଚ୍ନେଖ୍ର୍ଦାର୍, ଲେକିନ୍ ଜାମାରିନ୍ ସାମାନ୍ ଏର୍ଦାର୍, ଲେକିନ୍ ସତ୍ତୁନ୍ ପାର୍ମେଶ୍ଵାର୍ସ୍କି ପାବୁନୁ କାଲାଗେ ଶିଖାବାଦାର୍। ହାଲେ କାଇସର୍ ରାଜାସ୍କେ ମାଲ୍ଗୁଜାରୀ ଚିନାଦ୍ ଠିକ୍ଦ୍ କା ମାଲ୍ଲିଦ୍? 15ଏମ୍ ମାଲ୍ଗୁଜାରୀ ଚିୟମ୍, କା ମାଲ୍ଲା?” ଯୀଶୁସ୍ ଆବ୍ଡ଼ାର୍ଘି କପଟ୍ବନ୍ ଆହିକିରି ତେଙ୍ଗିୟାସ୍, “ନିମ୍ ଏଙ୍ଗାନ୍ ଏନ୍ଦେର୍ଗେ ଫାନ୍ଦାନୁ ଫାସାବାଗେ ବେଦ୍ଦାଲ୍ଦାର୍? ଏଙ୍ଗା ଅଣ୍ଟା ରୋମାନ୍ ସାର୍କାର୍ଘି ସିକ୍କା ଅନ୍ଦ୍ରା, ଆରୁ ଏଦା।” 16ଆଙ୍ଗେନ୍ ଆବ୍ଡ଼ାର୍ ଅଣ୍ଟା ରୋମାନ୍ ସାର୍କାର୍ଘି ସିକ୍କା ଅନ୍ଦ୍ରାର୍, ଆରୁ ଯୀଶୁସ୍ ଆବ୍ଡ଼ାରିନ୍ ମେନ୍ଚାସ୍, “ଇ ଛାପାଦ୍ ଆରୁ ନାମେଦ୍ ନେଖାଏ?” ଆବ୍ଡ଼ାର୍ ଯାବାବ୍ ଚିଚ୍ଚାର୍, “କାଇସର୍ ରାଜାସ୍କିଦ୍।” 17ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏକାଦ୍ କାଇସର୍ସ୍କିଦ୍, ଆବନ୍ କାଇସର୍ସ୍କେ ଚିଆ; ଆରୁ ଏକାଦ୍ ପାର୍ମେଶ୍ଵାର୍ସ୍କିଦ୍, ଆବନ୍ ପାର୍ମେଶ୍ଵାର୍ସ୍କେ ଚିଆ।” ଆଙ୍ଗେନ୍ ଆବ୍ଡ଼ାର୍ ମୁରୁକ୍ ଆଚ୍ମିତ୍ ମାନ୍ଚାର୍ କେରାର୍।
ଖିଉର୍ସ୍ତି ଉଜ୍ଜନାଘି ବାରେନୁ ପ୍ରଶ୍ନ
(ମାତିସ୍ ୨୨:୨୩-୩୩; ଲୁକାସ୍ ୨୦:୨୭-୪୦)
18ଇଦ୍ଘି ପାଛ୍ଲି କେତ୍କ ଲୋକ୍ ସାଦ୍ଦୂକୀ୧୨:୧୮ ସାଦ୍ଦୂକୀ ମତ୍ଲବ୍ ୟାହୁଦୀ ଧରମ୍ନୁ ଚାଲ୍ର୍ନାବାଲା ଅଣ୍ଟା ଦଲ୍। ଜାମାର୍ ଯୀଶୁସ୍କି ଚାହାଗେ ବାର୍ଚାର୍, ଏକାର୍ କା କେଚ୍ଚକାର୍ସ୍ତି ଉଜ୍ଜନାବନ୍ ବିଶ୍ଵାସ୍ ମା କାମାଲିୟାର୍, ଆବ୍ଡ଼ାର୍ ଯୀଶୁସିନ୍ ମେନାଗେ ଲାଗ୍ଗିୟାର୍, 19“ହେ ଗୁରୁ, ମୁଶା ନାବୀସ୍ ଏହ୍ମାଲାଗାନ୍ ଇ ନିୟମ୍ବନ୍ ଲେଖ୍ଚ୍କାଦାସ୍ କା ଯଦି ନେଖିନ୍ ଭାଇସ୍ ତାଙ୍ଘା ମାଏକିନିଆଁଘି ରାତେ-ରାତେ, ବିନା ହାଦ୍ଦୁବଚ୍ଚନୁ ଖିଅସ୍କସ୍ ତା ଆସ୍କି ଭାଇସ୍ ଆ ରାଣ୍ଡି ମାଏକିନିଆଁନ୍ ବେଞ୍ଜର୍ନା କାତ୍ଥା, ଆରୁ ତାଙ୍ଘା ଭାଇସ୍କି ଲାଗାନ୍ ବାଉଁଶା ବାଢ଼ାବାଗେ ହାଦ୍ଦୁବଚ୍ଚ ଜନମ୍ କାମସ୍। 20ମନେ କାମା, ସାତ୍ଭାଇ ରାଚାର୍; ପହ୍ଲେ ଭାଇସ୍ ଅଣ୍ଟା ମାଏକିନିଆଁନ୍ ବେଞ୍ଜରାସ୍, ଆରୁ ବିନା ହାଦ୍ଦୁବଚ୍ଚନୁ କେଚ୍ଚାସ୍କେରାସ୍; 21ଆଙ୍ଗେନ୍ ଦୁସ୍ରା ଭାଇସ୍ ଆ ରାଣ୍ଡିନ୍ ଗ୍ରହନ୍ କାମ୍ଚାସ୍ ଆରୁ ଆସ୍ହି ବିନା ହାଦ୍ଦୁବଚ୍ଚନୁ କେଚ୍ଚାସ୍କେରାସ୍ ଆରୁ ତିସ୍ରା ଭାଇସ୍ହି ହନ୍ନେନ୍ କାମ୍ଚାସ୍। 22ଆରୁ ସାତ୍ ଭାଇରିନ୍ ବିନା ହାଦ୍ଦୁବଚ୍ଚନୁ କେଚ୍ଚାର୍ କେରାର୍, ଆରୁ ଜାମାର୍ଘିନ୍ତି ପାଛ୍ଲି ଆ ମାଏକିନିଆଁଦ୍ହି କେଚ୍ଚାକେରାଦ୍। 23ହାଲେ ଯେତ୍କବାକେନ୍ ଉଜ୍ଜର୍ ତା ଆଦ୍ ନେଖା ମାଏକିନିଆଁ ମାନଦ୍? ଏନ୍ଦେର୍ଗେକା ଆଦ୍ତା ସାତ୍ ଭାଇର୍ଘିନିନ୍ ମାଏକିନିଆଁ ରାଚା।” 24ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ପାବିତାର୍ ଶାସ୍ତ୍ରନୁ ଏକାଦ୍ ଲେଖ୍ଚ୍କା ରାଇ ଆବନ୍ ବାଲ୍ଦାରିନ୍, ଆରୁ ପାର୍ମେଶ୍ଵାର୍ସ୍ କେତ୍କ ଶକ୍ତିଶାଲୀସ୍ ଆବନ୍ହି ନିମ୍ ବାଲ୍ଦାରିନ୍। ହୁଦ୍ଘିଲାଗାନ୍ ନିମ୍ ମୁରୁକ୍ ଭୁଲ୍ କାମ୍ଦାର୍? 25ଆଲାର୍ ଯେତ୍କବାକେନ୍ କେଚ୍ଚକା ପାଛ୍ଲି ଉଜ୍ଜର୍, ହତ୍କବାକେନ୍ ମାର୍ଦ୍ନାର୍ ଆରୁ ମାଏକିନିଆଁର୍ ଏକ୍ ଦୁସ୍ରାରିନ୍ ମା ବେଞ୍ଜର୍ନାଏ, ଏନ୍ଦେର୍ଗେକା ହତ୍କବାକେନ୍ ଆବ୍ଡ଼ାର୍ ସରଗ୍ଦୂଁତ୍ଜାମାର୍ ଲେଖା ମାନର୍କର୍। 26ଆଲାର୍ କେଚ୍ଚକା ପାଛ୍ଲି ଉଜ୍ଜନାଘି ବାରେନୁ ମୁଶା ନାବୀସ୍କି ବହିନୁ ଏକାଦ୍ ଲେଖ୍ଚ୍କା ରାଇଦ୍ ଆବନ୍ ନିମ୍ ମାଲ୍ଲା ପାଢ଼ୁର୍ କାଁଏ? ଲାଘ୍ର୍ନା ହପ୍ପାଘି ବାରେନୁ ମୁଶା ନାବୀସ୍ ଏକା ବହିନୁ ଲେଖ୍ଚ୍କାଦାସ୍ ଆ ବହିନୁ ଏନ୍ନେ ଲେଖ୍ଚ୍କା ରାଇଦ୍ କା ପାର୍ମେଶ୍ୱାର୍ସ୍ ତେଙ୍ଗାଲ୍ଦାସ୍, ‘ଏନ୍ ଆବ୍ରାହାମ୍ସ୍କି ପାର୍ମେଶ୍ଵାର୍ନ୍, ଇସାକ୍ସ୍କି ପାର୍ମେଶ୍ଵାର୍ନ୍, ଆରୁ ୟାକୁବ୍ସ୍କି ପାର୍ମେଶ୍ଵାର୍ନ୍’? 27ଆସ୍ କେଚ୍ଚକାର୍ଘି ମାଲ୍ଲା ଲେକିନ୍ ଉଜ୍ଜୁର୍ଘି ପାର୍ମେଶ୍ଵାର୍ସ୍; ହୁଦ୍ଘିଲାଗାନ୍ ନିମ୍ ବହୁତ୍ ବାଡ଼୍କା ଭୁଲ୍ନୁ ଖାତ୍ରାଲ୍ଦାର୍।”
ଜାମାର୍ଘିନ୍ତି ମୁଖ୍ୟା ହୁକୁମ୍
(ମାତିସ୍ ୨୨:୩୪-୪୦; ଲୁକାସ୍ ୧୦:୨୫-୨୮)
28ହତ୍କବାକେନ୍ ପଣ୍ତିତ୍ଜାମାର୍ଘି ଭିତର୍ନୁ ଅର୍ତୁସ୍ ଯୀଶୁସ୍କି ଚାହାଗେ ବାର୍ଚାସ୍, ଆସ୍ ଯୀଶୁସ୍କି ଆରୁ ସାଦ୍ଦୁକୀ ଜାମାର୍ଘି କାଁଟ୍ଛାଁଟ୍ବନ୍ ମେନ୍ଚାସ୍, ଆରୁ ଇବନ୍ ଏରିକିରି କା ଯୀଶୁସ୍ ସାଦ୍ଦୁକୀଜାମାରିନ୍ ଠିକ୍ ଯାବାବ୍ ଚିଚ୍କାଦାସ୍, ଆଙ୍ଗେନ୍ ଆସ୍ ଯୀଶୁସିନ୍ ମେନ୍ଚାସ୍, “ଜାମା ହୁକୁମ୍ ଭିତର୍ନୁ ଏକାଦ୍ ଜାମାର୍ଘିନ୍ତି ମୁଖ୍ୟା ହୁକୁମ୍ଦ୍?” 29ଯୀଶୁସ୍ ଯାବାବ୍ ଚିଚ୍ଚାସ୍, “ଜାମାର୍ଘିନ୍ତି ମୁଖ୍ୟା ହୁକୁମ୍ ଇଦ୍ କା: ‘ଇସ୍ରାଏଲ୍ ଦେଶ୍ତା ଆଲାରୋ ନିମ୍ ମେନା! ପ୍ରାଭୁ ନାହ୍ମାଏ ପାର୍ମେଶ୍ୱାର୍ସ୍ ଅଣ୍ଟା ଖାଲି ପ୍ରାଭୁ ରାଦାସ୍, 30ନିମ୍ ନିଜର୍ ପ୍ରାଭୁ ପାର୍ମେଶ୍ଵାର୍ସ୍ସିନ୍ ନିଜର୍ ପୁରା ମନ୍ତି, ନିଜର୍ ପୁରା ଆତ୍ମାତି, ନିଜର୍ ପୁରା ବୁଦ୍ଧିତି, ଆରୁ ପୁରା ଶକ୍ତିତି ବାନେ ହାଖ୍ଖା।’ 31ଆରୁ ଦୁସ୍ରା ହୁକୁମ୍ ଇଦ୍ କା, ‘ନିଜର୍ ପାଡ଼ୋଶୀରିନ୍ ନିଜର୍ ଲେଖା ବାନେ ହାଖ୍ଖା’ ଇଦ୍ଘିନ୍ନ୍ତି ଆରୁ ମୁଖ୍ୟା ହୁକୁମ୍ ଏନ୍ଦେଦ୍ହି ମାଲ୍ଲାଦିନ୍।” 32ଆ ପଣ୍ତିତ୍ସ୍ ଯୀଶୁସିନ୍ ତେଙ୍ଗିୟାସ୍, “ହେ ଗୁରୁ, ବାନେ କାତ୍ଥା! ନିମ୍ ସତ୍ତୁନ୍ ତେଙ୍ଗାଲ୍ଦାର୍। ଅଣ୍ଟା ଖାଲି ପାର୍ମେଶ୍ଵାର୍ସ୍ ରାଦାସ୍, ଆରୁ ଆସିନ୍ ଆମ୍ଵିକିରି ନେଦ୍ହି ମାଲ୍କାରିନ୍। 33ପାର୍ମେଶ୍ଵାର୍ସିନ୍ ନିଜର୍ ପୁରା ମନ୍ତି, ନିଜର୍ ପୁରା ବୁଦ୍ଧିତି, ଆରୁ ନିଜର୍ ପୁରା ଶକ୍ତିତି, ବାନେ ହାଖ୍ଖନାଦ୍ ଆରୁ ନିଜର୍ ପାଡ଼ୋଶୀରିନ୍ ନିଜର୍ ଲେଖା ବାନେ ହାଖ୍ଖନାଦ୍; ଜାମା ରକମ୍ଘି ପଶୁଗୁଠିନ୍ ବାସ୍ସିକିରି ପାର୍ମେଶ୍ଵାର୍ସ୍କେ ବଲୀ ଚାଢ଼ାବାନା ଆରୁ ଦୁସ୍ରା ବଲୀଦାନ୍ତି ମୁଖ୍ୟାଦ୍।” 34ଯୀଶୁସ୍ ଆସ୍କି ବୁଦ୍ଧିମାନ୍ଘି ଯାବାବ୍ ମେନିକିରି ଆସିନ୍ ତେଙ୍ଗିୟାସ୍, “ନିନ୍ ପାର୍ମେଶ୍ଵାର୍ସ୍କି ରାଜୀଘି ଢେର୍ ଚାହାନୁ ରାଦାଏ।” ଆରୁ ଇଦ୍ଘି ପାଛ୍ଲି ନେଦ୍ହି ଆସିନ୍ ଏନ୍ଦେର୍ହି ପ୍ରଶ୍ନ ମେନାଗେ ସାହସ୍ ମା କାମ୍ଚାର୍।
ଯୀଶୁସ୍ ଦାଉଦ୍ ରାଜାସ୍ତି ମାହାନ୍ସ୍
(ମାତିସ୍ ୨୨:୪୧-୪୬; ଲୁକାସ୍ ୨୦:୪୧-୪୪)
35ଲେକିନ୍ ଯୀଶୁସ୍ ମନ୍ଦିର୍ନୁ ଉପ୍ଦେଶ୍ ଚିନାବାକେନ୍ ଇ ପ୍ରଶ୍ନ ମେନ୍ଚାସ୍ କା, “ପଣ୍ତିତ୍ଜାମାର୍ ଏସ୍କେ ତେଙ୍ଗା ଅଙ୍ଗ୍ନାଏ କା ଖ୍ରୀସ୍ତ୍ ଦାଉଦ୍ସ୍କି ବାଉଁଶାନ୍ତାସ୍ ବୁଲି? 36ଦାଉଦ୍ସ୍ ନିଜେ ପାବିତାର୍ ଆତ୍ମାତି ଭାର୍ପୁର୍ ମାନିକିରି ତେଙ୍ଗିୟାସ୍: ‘ପ୍ରାଭୁ ପାର୍ମେଶ୍ଵାର୍ସ୍ ଏଙ୍ଘା ପ୍ରାଭୁସିନ୍ ତେଙ୍ଗିୟାସ୍, “ଏଙ୍ଘା ତିନାତାରା୧୨:୩୬ ତିନାତାରା ମତ୍ଲବ୍ ସମ୍ମାନ୍ଘି ଆଡ୍ଡା। ଅକ୍କା, ଯେତ୍କତକ୍ ଏନ୍ ନିଙ୍ଘାଏ ବିରୋଧିରିନ୍ ପୁରାପୁରୀ ମା ହାରାବନ୍ ଚିୟନ୍।”’ 37ଦାଉଦ୍ସ୍ ନିଜେ ଖ୍ରୀସ୍ତ୍ସିନ୍ ପ୍ରାଭୁ ବୁଲି ତେଙ୍ଗ୍ଦାସ୍ ତା, ଆସ୍, ଏସ୍କେ ଆସ୍କି ହାଦ୍ଦୁ ମାନାଅଙ୍ଗସ୍?” ଆଲାର୍ଘି ଅଣ୍ଟା ବାଡ଼୍କା ଭିଡ଼୍ଦ୍ ଯୀଶୁସ୍କି ଇ କାତ୍ଥାନ୍ ମୁରୁକ୍ ଖୁସୀତି ମେନାଲିୟାଦ୍।
ପଣ୍ଡିତ୍ ଜାମାର୍ସ୍ତି ହୁସିୟାର୍ ରା
(ମାତିସ୍ ୨୩:୧-୩୬; ଲୁକାସ୍ ୨୦:୪୫-୪୭)
38ଯୀଶୁସ୍ ଉପ୍ଦେଶ୍ ଚିନାବାକେନ୍ ତେଙ୍ଗିୟାସ୍, “ପଣ୍ତିତ୍ ଜାମାର୍ସ୍ତି ହୁସିୟାର୍ ରା, ଆବ୍ଡ଼ାର୍ ଲାମ୍ବା-ଲାମ୍ବା ଚିଢ଼ା ଆତ୍ତିକିରି କୁଦ୍ଦନାଏ, ଆରୁ ହାଟ୍ଟେଗୁଠିନୁ ଆଲାର୍ ତାମାନ୍ ଯୋହାର୍ କାମର୍ବୁଲି ସୋଚ୍ନାଏ, 39ଆରୁ ଆବ୍ଡ଼ାର୍ ସାଭା ଆଡ଼୍ପାନୁ ଆରୁ ଭୋଜିଗୁଠିନୁ ମୁଖ୍ୟା-ମୁଖ୍ୟା ଆଡ୍ଡାନୁ ଅକ୍କାଗେ ପସନ୍ଦ୍ କାମ୍ନାଏ। 40ଆରୁ ଆବ୍ଡ଼ାର୍ ରାଣ୍ଡି ମାଏକିନିଆଁର୍ଘି ଧନ୍ସମ୍ପତ୍ତିବନ୍ ଲୁଟ୍ନାଏ, ଆରୁ ତାମ୍ ନିଜ୍କେ ଧାର୍ମିକ୍ ଏଦ୍ରାଗେ ଲାମ୍ବା-ଲାମ୍ବା ବିନ୍ତି କାମ୍ନାଏ। ଏନ୍ନେ ଆଲାର୍ଗେ ପାର୍ମେଶ୍ଵାର୍ସ୍ ବହୁତ୍ ବାଡ଼୍କା ଦଣ୍ଡ୍ ଚିୟସ୍।”
ଅଣ୍ଟା ଗରୀବ୍ ରାଣ୍ଡି ଆଲିଘି ଦାନ୍
41ଆନ୍ତିନ୍ ଯୀଶୁସ୍ ମନ୍ଦିର୍ଘି ଦାନ୍ବାକ୍ସା ଚାହାନୁ ଅକ୍କାଚାସ୍। ଆରୁ ଆଲାର୍ଘି ଆ ଦାନ୍ବାକ୍ସାନୁ ପାଏସା ଚିନାନ୍ ଏରାଲିୟାସ୍, ଢେର୍ ଧାନ୍ନୁ ଆଲାର୍ ଆନ୍ନୁ ବାଗ୍ଗେ-ବାଗ୍ଗେ ଦାନ୍ ଚିଆଲିୟାର୍। 42ଅଣ୍ଟା ଗରୀବ୍ ରାଣ୍ଡି ଆଲିଦ୍ ବାର୍ଚା ଆରୁ ଆ ଦାନ୍ବାକ୍ସାନୁ ଦୁଇଆଣା ଡାଲ୍ଚାଦ୍, ଏକାଘି ଦାମ୍ କା ଢେର୍ କମ୍ ରାଚା। 43ଇବନ୍ ଏରିକିରି ଯୀଶୁସ୍ ତାଙ୍ଘା ଚେଲାରିନ୍ ମେହିଁୟାସ୍, ଆରୁ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ ଇ ଦାନ୍ବାକ୍ସାନୁ ପାଏସା ଚିଚ୍ଚାର୍ ଆ ଭିତର୍ନୁ ଇ ଗରୀବ୍ ରାଣ୍ଡି ଆଲିଦ୍ ଜାମାର୍ଘିନ୍ତି ବାଗ୍ଗେ ଚିଚ୍ଚକିଚି; 44ଏନ୍ଦେର୍ଗେକା ଜାମା ଆଲାର୍ ନିଜର୍-ନିଜର୍ ସମ୍ପତ୍ତିନ୍ନ୍ତି ଚିଚ୍ଚାର୍, ଲେକିନ୍ ଇ ରାଣ୍ଡି ଆଲିଦ୍ ଗଡ଼୍ଗଡ଼ା ରାଇକିରିହି, ତାଙ୍ଗା ଉଜ୍ଜାଗେ ତାଙ୍ଘାସାନ୍ ଯେତ୍କ ରାଚା ଆବନ୍ ଜାମାନ୍ ଚିଚ୍ଚାଲାଗ୍ଗିୟା।”
13ଯୀଶୁସ୍ ମନ୍ଦିର୍ ନାଶ୍ ମାନ୍ନାଘି ଭବିଷତ୍ କାତ୍ଥା ତେଙ୍ଗାଲ୍ଦାସ୍
(ମାତିସ୍ ୨୪:୧,୨; ଲୁକାସ୍ ୨୧:୫,୬)
1ଯେତ୍କବାକେନ୍ ଯୀଶୁସ୍ ମନ୍ଦିର୍ତି ଉର୍ଖାଲିୟାସ୍ ତା, ତାଙ୍ଘାଏ ଚେଲାଜାମାର୍ସ୍ତି ଅର୍ତୁସ୍ ଆସିନ୍ ତେଙ୍ଗିୟାସ୍, “ହେ ଗୁରୁ, ଏରା, କେତ୍କ ସୁନ୍ଦର୍-ସୁନ୍ଦର୍ ମାହ୍ଲା ଆଡ଼୍ପା ରାଇ ଆରୁ କେତ୍କ ସୁନ୍ଦର୍-ସୁନ୍ଦର୍ ଚାଁଚାତି ତିୟାର୍ ମାନ୍ଚ୍କିଚି!” 2ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ନିମ୍ ଇ ସୁନ୍ଦର୍-ସୁନ୍ଦର୍ ମାହ୍ଲାନ୍ ଏରାଲ୍ଦାର୍ ତା: ଇସାନ୍ ଅଣ୍ଟା ଚାଁଚାଘି ମିଆଁ ଆରୁ ଅଣ୍ଟା ଚାଁଚା ମା ରାଇ ଜାମାଦ୍ ଛାର୍ଖାର୍ ମାନକୋ ।”
ଯୀଶୁସ୍ ଚେଲାରିନ୍ ବାର୍ନାବାଲା ଦୁଃଖୁ ଆରୁ କଷଟ୍ଘି ବାରେ ତେଙ୍ଗାଲ୍ଦାସ୍
(ମାତିସ୍ ୨୪:୩-୧୪; ଲୁକାସ୍ ୨୧:୭-୧୯)
3ଯେତ୍କବାକେନ୍ ଯୀଶୁସ୍ ଜାଇତୁନ୍ ପାର୍ତ୍ତା ମିଆଁ ମନ୍ଦିର୍ ସାମ୍ନାନୁ ଅକ୍କାଚାସ୍, ହତ୍କବାକେନ୍ ପାତ୍ରାସ୍, ୟାକୁବ୍, ଯୋହାନ୍ସ୍ ଆରୁ ଆନ୍ଧ୍ରିୟାସ୍ ଭିନେ ତାରା ଆସିନ୍ ମେନ୍ଚାର୍, 4“ଏମାନ୍ ତେଙ୍ଗା, ଇଦ୍ ଏକ୍ଲା ମାନୋ? ଆରୁ ଇ ଜାମା କାତ୍ଥା ପୁରା ମାନ୍ନାବାଲା ରାଇ ଆବନ୍ ଏମ୍ ଏସ୍କେ ଆହା ଅଙ୍ଗମ୍?” 5ଆଙ୍ଗେନ୍ ଯୀଶୁସ୍ ତାଙ୍ଘା ଚେଲାଜାମାରିନ୍ ତେଙ୍ଗାଗେ ଲାଗ୍ଗିୟାସ୍, “ହୁସିୟାର୍ ରା କା ନିମାନ୍ ନେଦ୍ହି ମା ଫୁସ୍ଲର୍; 6ଏନ୍ଦେର୍ଗେକା ଢେର୍ ଆଲାର୍ ଏଙ୍ଘାଏ ନାମେତି ବାରିକିରି ତେଙ୍ଗର୍, ‘ଏନ୍ ଖ୍ରୀସ୍ତ୍!’ ବୁଲି ଆରୁ ଏନ୍ନେ ତେଙ୍ଗିକିରି ଢେର୍ ଆଲାରିନ୍ ଫୁସ୍ଲର୍। 7ଯେତ୍କବାକେନ୍ ନିମ୍ ଲାଡ଼ାଇଘି ଚାର୍ଚା, ଆରୁ ଚାହାନ୍ତା ଲାଡ଼ାଇଘି ଶବଦ୍ ଆରୁ ଗେଚ୍ଛାନ୍ତା ଲାଡ଼ାଇଘି ଖବର୍ ମେନର୍ ତା ଆମ୍କେ ଘାବ୍ରାରା; ଏନ୍ଦେର୍ଗେକା ଏନ୍ନେ ମାନ୍ନା ଜରୁରୀ ରାଇ, ଲେକିନ୍ ଇଦିନ୍ ଆଖ୍ରୀ ମାଲ୍ଲିଦ୍। 8ଏନ୍ଦେର୍ଗେକା ଦେଶ୍ଘି ବିରୁଦ୍ଧ୍ନୁ ଦେଶ୍, ଆରୁ ଜାତିଘି ବିରୁଦ୍ଧ୍ନୁ ଜାତି ଉସ୍କାରୋ ଏକା ଏକାସାନ୍ ଭୁଇଁଡୋଲ୍ ମାନ, ଆରୁ ଆକାଲ୍ ମାନ୍ତେ ରୋ। ଇ ଜାମାଦ୍ ମୁରୁକ୍ ବାଡ଼୍କା ଦୁଃଖୁଘି ସୁରୁଦ୍।”
9“ଲେକିନ୍ ନିମ୍ ନିଜର୍ ବାରେନୁ ହୁସିୟାର୍ ରା; ଆଲାର୍ ନିମାନ୍ କୋଟ୍ କାଚେରୀନୁ ସୋଁପର୍ଚର୍ ଆରୁ ସାଭା ଆଡ଼୍ପାଗୁଠିନୁ ନିମାନ୍ କୋଡ୍ରାତି ଡେମର୍, ନିମ୍ ଏଙ୍ଘା ଚେଲାର୍ ହୁଦ୍ଘିଲାଗାନ୍ ନିମାନ୍ ରାଜା ଆରୁ ରାଜ୍ କାମୁ ଆଲାର୍ଘି ଚାହାନୁ ଇଲ୍ତାକୋ, ଆଙ୍ଗେନ୍ ନିମାଗେ ଏଙ୍ଘା ବାରେନୁ ତାହ୍ମା ଆଘ୍ଲି ସାକ୍ଷୀ ଚିୟାଗେ ମୋଉକା ହାଖ୍ଖର। 10ଏନ୍ଦେର୍ଗେକା ଏନ୍ନେ ମାନ୍ନା ଜରୁରୀ ରାଇ କା ଜାମା ଜାତିୟାର୍ଘି ମାଝାନୁ ସୁସାମାଚାର୍ ପ୍ରଚାର୍ କାମା ଖାତ୍ରୋ। 11ଯେତ୍କବାକେନ୍ ଆବ୍ଡ଼ାର୍ ନିମାନ୍ କୋଟ୍ କାଚେରୀନୁ ସୋଁପର୍ଚର୍ ତା, ନିମ୍ ଆଘ୍ଲିନ୍ତି ଏନ୍ନେ ଚିନ୍ତା ଆମ୍କେ କାମା କା ଏମ୍ ଏନ୍ଦେର୍ ତେଙ୍ଗମ୍; ସାମାୟ ବାର୍ଚ୍କାନ୍ତି ଏକା ବଚନ୍ ନିମାଗେ ଚିଆକୋ ଆବନ୍ ନିମ୍ ତେଙ୍ଗର୍; ଏନ୍ଦେର୍ଗେକା ତେଙ୍ଗ୍ନାବାଲା ନିମ୍ ମାଲ୍ଦାର୍, ଲେକିନ୍ ପାବିତାର୍ ଆତ୍ମାଦ୍। 12ଅଣ୍ଟା ଭାଇସ୍ ତାଙ୍ଘା ଭାଇସିନ୍ ପିଟାଗେ ସୋଁପ୍ଚସ୍, ଆରୁ ତାମ୍ଵାସ୍ହି ତାଙ୍ଘା ହାଦ୍ଦୁସିନ୍ ପିଟାଗେ ସୋଁପଚସ୍, ଆରୁ ହାଦ୍ଦୁବଚ୍ଚର୍ ତାହ୍ମା ନିଜର୍ ଆୟାଙ୍ଗ୍-ବାଙ୍ଗ୍ର୍ଘି ବିରୁଦ୍ଧ୍ନୁ ଉସ୍କାରର୍ ଆରୁ ଆବ୍ଡ଼ାରିନ୍ ପିଟ୍ଟତର୍ଚର୍। 13ନିମ୍ ଏଙ୍ଘା ଚେଲାର୍ ହୁଦ୍ଘିଲାଗାନ୍ ଜାମା ଆଲାର୍ ନିମାନ୍ ହାଁଣର୍ ତୁପ୍ଫର୍; ଲେକିନ୍ ନେଦ୍ ଆଖ୍ରୀତକ୍ ଧିରାଜ୍ ଧାରର୍, ଆବ୍ଡ଼ାର୍ ବାଛ୍ରର୍।”
ଜାମାର୍ଘିନ୍ତି ବାଡ଼୍କା ଦୁଃଖୁ
(ମାତିସ୍ ୨୪:୧୫-୨୮; ଲୁକାସ୍ ୨୧:୨୦-୨୪)
14“ଏନ୍ ଆକ୍କୁନ୍ ଏକାନ୍ ଲେଖାଲ୍ଦାନ୍ ଆବନ୍ ପାଢ଼ୁର୍ ବାନେକିରି ପାଢ଼ିକିରି ଆଦ୍ଘି ଅର୍ଥ ବୁଝ୍ରା। ଅନ୍ଦୁଲ୍ ନିମ୍ ପାର୍ମେଶ୍ଵାର୍ସ୍କି ମନ୍ଦିର୍ବନ୍ ଆପାବିତାର୍ କାମ୍ନାବାଲା ଅଣ୍ଟା ଜିନିଷ୍ ମନ୍ଦିର୍ନୁ ଇଲ୍ତାଚ୍କାନ୍ ଏରର୍, ହୁଦ୍ଘିଲାଗାନ୍ ଜାମା ଆଲାର୍ ମନ୍ଦିର୍ବନ୍ ଆମ୍ଵିକିରି ବୁଙ୍ଗର୍ଚର୍,” ଆଙ୍ଗେନ୍ ୟାହୁଦା ପ୍ରଦେଶ୍ନୁ ରାନାବାଲା ଆଲାର୍, ପାର୍ତ୍ତାତାରା ବୁଙ୍ଗ୍ନାର୍କାନାର୍; 15ଏକାର୍ ଆଡ଼୍ପା ମିଆଁ ରର୍, ଆବ୍ଡ଼ାର୍ କିୟାଁ ଏତ୍ତିକିରି ତାହ୍ମା ସାମାନ୍ ହୁଆଗେ ଆଡ଼୍ପା ଉଲା ଆମ୍ବର୍କରା; 16ଆରୁ ଯଦି ଏକାର୍ ହାଲ୍ଲୁନୁ ରର୍, ଆବ୍ଡ଼ାର୍ ତାହ୍ମା ଚାଦର୍ ହୁଆଗେ ଆମ୍ନାର୍ କିର୍ରା। 17ହୁ ସାମାୟନୁ ନେଦ୍ ମେଦୁନୁ ରର୍ ଆରୁ ଏକା ମାଏକିନିଆଁର୍ଘି ଗୁରସ୍ ହାପ୍ପୁ ହାଦ୍ଦୁ ରର୍, ଆବ୍ଡ଼ାର୍ଗେ ମୁରୁକ୍ ଦୁଃଖୁ ବାରୋ! 18ଲେକିନ୍ ନିମ୍ ବିନ୍ତି କାମ୍ତେ ରା କା ଇଦ୍ ପାୟାଁ ଉଲ୍ଲାନୁ ମା ମାନ୍ନାଦ୍। 19ଏନ୍ଦେର୍ଗେକା ଆ ଦୁଃଖୁ ଉଲ୍ଲାଗୁଠିନୁ ଆଲାର୍ଗେ ଏତ୍କ ଦୁଃଖୁ ମାନଦ୍ ଏସ୍କେ କା ଇ ଦୁନିଆଁଘି ସୁରୁନ୍ନ୍ତି, ଯେତ୍କବାକେନ୍ ପାର୍ମେଶ୍ଵାର୍ସ୍ ଦୁନିଆଁନ୍ ସୃଷ୍ଟି କାମ୍ଚାସ୍, ଆଙ୍ଗେନ୍ତିନ୍ ଇନ୍ନାତକ୍ ଏକ୍ଲାହି ଏନ୍ନେ ଦୁଃଖୁ ମାଲ୍ଲା ମାନୁଦ୍ ଆରୁ ଭବିଷତ୍ନୁ ଏକ୍ଲାହି ମା ମାନିଦ୍। 20ଲେକିନ୍ ପ୍ରାଭୁସ୍ ଆ ଉଲ୍ଲାଗୁଠିନ୍ ମା ଘାଟାବାଚ୍କା ରସ୍ନେ ତା ନେଦ୍ହି ମା ବାଛ୍ରର୍ନେ; ଲେକିନ୍ ଆସ୍ ତାଙ୍ଘାଏ ଚାଜ୍ଜକା ଆଲାର୍ଘି କାରଣ୍ନ୍ତି, ଆ ଉଲ୍ଲାଗୁଠିନ୍ କମାବାଚ୍କାଦାସ୍। 21ହୁ ସାମାୟନୁ ନେଦିନ୍ ନିମାନ୍ ତେଙ୍ଗର୍ କା, “ଏରା, ଇସାନ୍ ଖ୍ରୀସ୍ତ୍ ବାର୍ଚାସିନ୍, ଆସ୍ ଇସାନ୍ ଚାହେ ହାସାନ୍ ରାଦାସ୍”, ତା ଆ କାତ୍ଥାବନ୍ ନିମ୍ ବିଶ୍ୱାସ୍ ଆମ୍କେ କାମା; 22ଏନ୍ଦେର୍ଗେକା ଝୁଟ୍ଟୁ ଖ୍ରୀସ୍ତ୍ ଆରୁ ଝୁଟ୍ଟୁ ନାବୀଜାମାର୍ ଏଥ୍ରର୍, ଆରୁ ଏନ୍ନେ ଚିହ୍ନା ଆରୁ ଅଦ୍ଭୁତ୍ ନାଲ୍ଖୁ ଏଦର୍ ଆରୁ ମାନାଅଙ୍ଗତା ଆବ୍ଡ଼ାର୍ ଚାଜ୍ଜକା ଆଲାରିନ୍ହି ଫୁସ୍ଲର୍। 23ହୁଦ୍ଘିଲାଗାନ୍ ନିମ୍ ସାବ୍ଧାନ୍ ରା; ଏନ୍ଦେର୍ଗେକା ଏନ୍ ନିମାନ୍ ଆଘ୍ଲିନ୍ନ୍ତି ଜାମା କାତ୍ଥାନ୍ ତେଙ୍କାଦାନ୍।
ମୁନୁଷ୍ ହାଦ୍ଦୁସ୍କି ଆରୁଅହନ୍ ବାର୍ନାଘି କାତ୍ଥା
(ମାତିସ୍ ୨୪:୨୯-୩୧; ଲୁକାସ୍ ୨୧:୨୫-୨୮)
24“‘ଲେକିନ୍ ବିପଦ୍ଘି ଆ ଉଲ୍ଲା ପାଛ୍ଲି, ବିଡ଼ିଦ୍ ଆରୁ ଚାନ୍ଦୋଦ୍ ବିଲ୍ଲୀ ଚିନା ବନ୍ଦ୍ କାମଚୋ, 25ଆରୁ ବିନ୍କୋ ଆକାଶ୍ତି ଖାତ୍ରକୋ; ଆରୁ ଏନ୍ଦ୍ରିନ୍ହି ଆକାଶ୍ନୁ ରାଇ ଆଦ୍ ଇୟାନ୍ତି ହାଇୟା ମାନକୋ’। 26ଆରୁ ଯେତ୍କବାକେନ୍ ମୁନୁଷ୍ ହାଦ୍ଦୁସ୍ ରାଜାସ୍ ଲେଖା ବାଦ୍ଲିନୁ ବାରସ୍, ହତ୍କବାକେନ୍ ତାଙ୍ଘା ଶକ୍ତି ଆରୁ ମହିମାଦ୍ ଜାମା ଆଲାର୍ଗେ ପାତା ଚାଲ୍ରକୋ। 27ହୁ ସାମାୟନୁ ଆସ୍ ତାଙ୍ଘାଏ ଦୂଁତ୍ଜାମାରିନ୍ ତାଇୟସ୍, ଆରୁ ଦୁନିଆଁନ୍ତା ଚାର୍ହିପାଖାନ୍ତି ତାଙ୍ଘାଏ ଚାଜ୍ଜକା ଆଲାରିନ୍ ଠୁଡ଼ିୟସ୍।”
ଡୁମାରି ମାନ୍ନୁଘି ନମୁନା
(ମାତିସ୍ ୨୪:୩୨-୩୫; ଲୁକାସ୍ ୨୧:୨୯-୩୩)
28“ଡୁମାରି ମାନ୍ନୁନ୍ନ୍ତି ଅଣ୍ଟା ନମୁନା ଶିଖ୍ରା: ଯେତ୍କବାକେନ୍ ଡୁମାରି ମାନ୍ନୁନ୍ତା ଡାହିଁଗୁଠିଦ୍ ନରମ୍ ମାନିକିରି ଆନ୍ନୁନ୍ତି ଆଥା ହରି; ତା ନିମ୍ ଆହ୍ଦାର୍ କା ବିଡ଼୍ନା ଉଲ୍ଲା ଆଣ୍ସିୟାଦିନ୍। 29ଯେତ୍କବାକେନ୍ ନିମ୍ ଇବ୍ଡ଼ା କାତ୍ଥାଗୁଠିନ୍ ମାନ୍ନାନ୍ ଏରର୍ ତା, ଆହା କା ମୁନୁଷ୍ ହାଦ୍ଦୁସ୍ ବହୁତ୍ ଚାଁଣେ ବାର୍ନାବାଲା ରାଦାସ୍। 30ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଇବ୍ଡ଼ା ଜାମାଦ୍ ମା ମାନ୍ନାଜୁଟି ଇ ପିଢ଼ିନ୍ତା ଆଲାର୍ ମା ଖିନାଏ। 31ଆକାଶ୍ ଆରୁ ଦୁନିଆଁଦ୍ ନୁହ୍ରକୋ, ଲେକିନ୍ ଏଙ୍ଘାଏ ତେଙ୍କା ବଚନ୍ ଜାମାବାକେନ୍ ସତ୍ତୁଇନ୍ ରଦ୍। 32ଇବ୍ଡ଼ା ଜାମା କାତ୍ଥା ଏକ୍ଲା ମାନ୍ନାବାଲା ରାଇ ଆଦ୍ଘି ବାରେନୁ ନେଦ୍ହି ବାଲ୍ନାଇନ୍, ସରଗ୍ଦୂଁତ୍ ଆରୁ ମୁନୁଷ୍ ହାଦ୍ଦୁସ୍ହି ବାଲ୍ଦାସିନ୍; ଖାଲି ବାଙ୍ଗ୍ ପାର୍ମେଶ୍ଵାର୍ସ୍ ଆହ୍ଦାସ୍। 33ନିମ୍ ସାବ୍ଧାନ୍ ରା, ଚେତ୍ରିକିରି ରା; ଏନ୍ଦେର୍ଗେକା ନିମ୍ ବାଲ୍ଦାର୍ କା ଆ ସାମାୟ ଏକ୍ଲା ବାରୋ। 34ମୁନୁଷ୍ ହାଦ୍ଦୁସ୍କି ବାର୍ନାବାଲାଦ୍ ଏସ୍କେ ମାନଦ୍ ଆବନ୍ ବୁଝ୍ରାଗେ ଅଣ୍ଟା ନମୁନା ତେଙ୍ଗନ୍, ଅଣ୍ଟା ଆଲାସ୍ ରାଚାସ୍, ଅନ୍ଦୁଲ୍ ଆସ୍ ତାଙ୍ଘା ଆଡ଼୍ପାନ୍ ଆମ୍ଵିକିରି ପର୍ଦେଶ୍ କେରାସ୍, କାନାବାକେନ୍ ତାଙ୍ଘା ଗୁତ୍ତିୟାର୍ଗେ ନାଲ୍ଖୁ ସୋଁପିକିରି କେରାସ୍: ଆରୁ ଚୋଉକିଦାର୍ସିନ୍ ଏନ୍ନେ ହୁକୁମ୍ ଚିଚ୍ଚାସ୍ କା ନିନ୍ ଚେତ୍ରିକିରି ରାକେ ଆରୁ ଜାମାରିନ୍ ସାମ୍ଭଡ଼ାକେ। 35ଆ ଆଡ଼୍ପାନ୍ତା ମାଲିକ୍ସ୍ ଏକ୍ଲା ବାରସ୍ ଆବନ୍ ନେଦ୍ହି ବାଲ୍ଲନାଇନ୍, ଆସ୍ ବିଡ଼ି ଅକ୍କନାବାକେନ୍, ଆଦ୍ ମାଁହାଗେ, ଆସ୍ ହେରୁ ଅହ୍ଲନାବାକେନ୍, ଭୋର୍ପାଇରିହି ବାରା ଅଙ୍ଗ୍ଦାସ୍, ମୁନୁଷ୍ ହାଦ୍ଦୁସ୍କିହି ବାର୍ନାବାଲାଦ୍ ଏନ୍ନେନ୍ ରାଇ ହୁଦ୍ଘିଲାଗାନ୍ ନିମ୍ ଚେତ୍ରିକିରି ରା। 36ଏନ୍ନେ ମା ମାନ୍ନାଦ୍ କା ଆସ୍ ହଠାତ୍ ବାରିକିରି ନିମାନ୍ ଚୁତ୍କା ମା ଏର୍ନା କାତ୍ଥା। 37ଆରୁ ଏକାନ୍ ଏନ୍ ନିମାନ୍ ତେଙ୍ଗାଲ୍ଦାନ୍, ଆବନ୍ ଜାମାରିନ୍ ତେଙ୍ଗାଲ୍ଦାନ୍: ନିମ୍ ଜାମାର୍ ଚେତ୍ରିକିରି ରା!”
14ଯୀଶୁସିନ୍ ପିଟ୍ଟନାଘି ଉପାୟ
(ମାତିସ୍ ୨୬:୧-୫; ଲୁକାସ୍ ୨୨:୧,୨; ଯୋହାନ୍ ୧୧:୪୫-୫୩)
1ୟାହୁଦୀଜାମାର୍ ପାସ୍କାପରବ୍ଘି ସାମାୟନୁ ମା ଫୁଲ୍ର୍ନା ଆସ୍ମା ତିୟାର୍ କାମିକିରି ମହାଲିୟାର୍। ଆ ପରବ୍ ଦୁଇ ଦିନ୍ଘି ପାଛ୍ଲି ମାନ୍ନାବାଲା ରାଚା। ମୁଖ୍ୟା ପୁରୋହିତ୍ଜାମାର୍ ଆରୁ ପଣ୍ତିତ୍ଜାମାର୍ ଯୀଶୁସିନ୍ ଧାରିକିରି ଡେମା ପିଟାଗେ ତାହ୍ମା-ତାହ୍ମା ଭିତ୍ରେ ଉପାୟ ସୋଚ୍ଚାର୍; 2ଏନ୍ଦେର୍ଗେକା ଆବ୍ଡ଼ାର୍ ସୋଚାଲିୟାର୍, “ପାସ୍କାପରବ୍ ଉଲ୍ଲାନୁ ଯୀଶୁସିନ୍ ଆମ୍ବତ୍ ଧାରା, ଏନ୍ଦେର୍ଗେକା ଆଲାର୍ ଖୀସାରାଇକିରି ଗଣ୍ଡଗଲ୍ କାମର୍।”
ଅଣ୍ଟା ଆଲିଦ୍ ଯୀଶୁସ୍କି କୁକ୍କୁନୁ ବାସ୍ନା ଇସୁଙ୍ଗ୍ ତୁନ୍ଦାଲି
(ମାତିସ୍ ୨୬:୬-୧୩; ଯୋହାନ୍ ୧୨:୧-୮)
3ଯେତ୍କବାକେନ୍ ଯୀଶୁସ୍ ବେଥାନିୟା ପାଡ଼ାନ୍ତା ଶିମୋନ୍ସ୍କି ଆଡ଼୍ପାନୁ ଅନାଗେ ଅକ୍କାଚାସ୍, ଏକାସ୍ କା ଆଘ୍ଲି କୋଢ଼୍ ବେହ୍ମରିୟା ରାଚାସ୍, ହତ୍କବାକେନ୍ ଅଣ୍ଟା ଆଲିଦ୍ ପାଣ୍ତ୍ରୁ ଚାଁଚାଘି ଚୁକାନୁ ମୁରୁକ୍ ଦାମ୍ଘି ଶୁଦ୍ଧ୍ ବାସ୍ନା ଇସୁଙ୍ଗ୍ ଅନ୍ଦ୍ରିକିରି ବାର୍ଚା; ଆ ଆଲିଦ୍ ଆ ଚୁକାଘି ମୁଖାବନ୍ ହଟ୍ଟିକିରି ଇସୁଙ୍ଗ୍ବନ୍ ଯୀଶୁସ୍କି କୁକ୍କୁନୁ ତୁନ୍ଦେଇଚା। 4ଇବନ୍ ଏରିକିରି ଆସାନ୍ ଅକ୍କୁ ଆଲାର୍ଘି ଭିତର୍ନୁ ଏକାର୍-ଏକାର୍ ଖୀସାରାଇକିରି ତାମ୍-ତାମ୍ କାଚ୍ନେଖ୍ରା ଲାଗ୍ଗିୟାର୍, “ଇ ଆଲିଦ୍ ମୁରୁକ୍ ଦାମ୍ଘି ବାସ୍ନା ଇସୁଙ୍ଗ୍ବନ୍ ଏନ୍ଦେର୍ଗେ ବର୍ବାଦ୍ କାମାଲିଦ୍? 5ଏନ୍ଦେର୍ଗେକା ଇ ବାସ୍ନା ଇସୁଙ୍ଗ୍ବନ୍ ଅଣ୍ଟା ଆଲାସ୍କି ବଛର୍ନ୍ତା ମଜ୍ରୀନ୍ତି ବାଗ୍ଗେ ଦାମ୍ତି ବିଁଶିକିରି ଇ ପାଏସାବନ୍ ଗରୀବ୍ ଆଲାର୍ଗେ ଚିୟା କେର୍କିରଦ୍ନେ।” ଆରୁ ଆବ୍ଡ଼ାର୍ ଖୀସାରାଇକିରି ଆବନ୍ କେବ୍ଚାର୍ ଧାମ୍କାଚାର୍। 6ଲେକିନ୍ ଯୀଶୁସ୍ ତେଙ୍ଗିୟାସ୍, “ଇ ଆଲିନ୍ ରା ଚିଆ; ଏନ୍ଦେର୍ଗେ ଇଦିନ୍ ପାରେସାନ୍ କାମାଲ୍ଦାର୍? ଇଦ୍ ଏଙ୍ଘାଲାଗାନ୍ ବାନେ ନାଲ୍ଖୁ କାମ୍ଚ୍କିଚି। 7ଗରୀବ୍ ଆଲାର୍ ତା ହୁର୍ମିବାକେନ୍ ନିହ୍ମାଗାନେ ରାନାଏ, ନିମ୍ ଯେତ୍କବାକେନ୍ ଚାହଁର୍ ଆବ୍ଡ଼ାର୍ଘି ଭାଲାଇ କାମା ଅଙ୍ଗର୍; ଲେକିନ୍ ଏନ୍ ହୁର୍ମିବାକେନ୍ ନିହ୍ମାଗାନେ ମା ରାଦାନ୍। 8ଆଦ୍ ଯେତ୍କ କାମା ଅଙ୍ଗିୟାଦ୍, ତାନ୍ କାମ୍ଚା; ଇଦ୍ ଏଙ୍ଘା ମାଡ଼୍ନାଘି ଲାଗାନ୍ ଆଘ୍ଲିନ୍ତିନ୍ ଏଙ୍ଘା ମେଦୁନୁ ବାସ୍ନା ଇସୁଙ୍ଗ୍ ଖାସ୍ସା। 9ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ପୁରା ଦୁନିଆଁନୁ ଏକିନ୍ସାନ୍ ସୁସାମାଚାର୍ ପ୍ରଚାର୍ କାମାକୋ, ଆସାନ୍ ଇ ଆଲିଦ୍ ଏକାନ୍ କାମ୍ଚ୍କିଚି ଆବନ୍ହି ତେଙ୍ଗାକୋ ଆରୁ ଜାମା ଆଲାର୍ ତାଙ୍ଗାନ୍ ମନେ କାମର୍।”
ଯୁଦାସ୍ ଯୀଶୁସ୍ଗାନେ ଧୋଖା କାମାଲ୍ଦାସ୍
(ମାତିସ୍ ୨୬:୧୪-୧୬; ଲୁକାସ୍ ୨୨:୩-୬)
10ଆନ୍ତିନ୍ ଯୀଶୁସ୍କି ବାର ଲୋକ୍ ଚେଲାଜାମାର୍ସ୍ତି ଅର୍ତୁସ୍ ନେଖା ନାମେ କା ଯୁଦାସ୍ ଇସ୍କୋରିୟତୀ ରାଚା, ଆସ୍ ମୁଖ୍ୟା ପୁରୋହିତ୍ ଜାମାର୍ଘି ଚାହାଗେ କେରାସ୍ ଆରୁ ଯୀଶୁସିନ୍ ଆବ୍ଡ଼ାର୍ଗେ ସୋଁପାଗେ କାତ୍ଥା କାମ୍ଚାସ୍। 11ଇ କାତ୍ଥାନ୍ ମେନିକିରି ଆବ୍ଡ଼ାର୍ ମୁରୁକ୍ ଖୁସୀ ମାନ୍ଚାର୍ କେରାର୍, ଆରୁ ଆବ୍ଡ଼ାର୍ ଆସ୍କେ ପାଏସା ଚିୟାଗେ କାତ୍ଥା ଚିଚ୍ଚାର୍; ଆରୁ ଯୀଶୁସିନ୍ ଧାର୍ତାଗେ ଯୁଦାସ୍ ମୋଉକା ବେଦ୍ଦାଲିୟାସ୍।
ଯୀଶୁସ୍ ତାଙ୍ଘା ଚେଲାର୍ଗାନେ ପାସ୍କାଘି ଆଖ୍ରୀ ଭୋଜି କାମାଲ୍ଦାସ୍
(ମାତିସ୍ ୨୬:୧୭-୨୫; ଲୁକାସ୍ ୨୨:୭-୧୪,୨୧-୨୩; ଯୋହାନ୍ ୧୩:୨୧-୩୦)
12ମା ଫୁଲ୍ର୍ନା ଆସ୍ମାଘି ପରବ୍ଘି ପହ୍ଲେ ଉଲ୍ଲା, ପାସ୍କାପରବ୍ନୁ ଭେଡ଼ିହାଦ୍ଦୁ ବଲୀ ଚାଢ଼ାବାନାଦ୍ ୟାହୁଦୀ ଜାମାର୍ଘି ନିୟମ୍ ରାଚା, ହୁ ଉଲ୍ଲାନ୍ ଚେଲାଜାମାର୍ ଯୀଶୁସିନ୍ ମେଞ୍ଚାର୍, “ଏମ୍ ଏକାସାନ୍ କାଇକିରି ନିହ୍ମା ଲାଗାନ୍ ପାସ୍କାଘି ଭୋଜି ତିୟାର୍ କାମମ୍ବୁଲି ନିମ୍ ସୋଚାଲ୍ଦାର୍?” 13ଆଙ୍ଗେନ୍ ଯୀଶୁସ୍ ତାଙ୍ଘା ଦୁଇ ଲୋକ୍ ଚେଲାରିନ୍ ଏନ୍ନେ ତେଙ୍ଗିୟାସ୍ ଆରୁ ତାଇୟାସ୍, “ନିମ୍ ସହର୍ଗେ କାଲା, ଆସାନ୍ ନିମାଗେ ଆମ୍ମୁ ଭାଣ୍ଡା ଚେଡ୍କା ଅଣ୍ଟା ଆଲାସ୍ ହାଖ୍ଖରସ୍। ଆସ୍କି ପାଛ୍ଲି-ପାଛ୍ଲି କାଲ୍କେ; 14ଆରୁ ଆସ୍ ଏକା ଆଡ଼୍ପାନୁ କରସ୍, ଆ ଆଡ଼୍ପାନ୍ତା ମାଲିକ୍ସିନ୍ ଏନ୍ନେ ତେଙ୍କେ, ‘ଗୁରୁସ୍ ମେନାଲ୍ଦାସ୍ ଏନ୍ ଏଙ୍ଘା ଚେଲାର୍ଗାନେ ଏକାସାନ୍ ପାସ୍କା ଭୋଜି କାମନ୍ ଆ ବାଖ୍ରାଦ୍ ଏକାସାନ୍ ରାଇଦ୍?’ 15ଆଙ୍ଗେନ୍ ଆସ୍ ନିମାଗେ ସାଜାବାଚ୍କା, ଆରୁ ତିୟାର୍ କାମ୍ଚ୍କା ଅଣ୍ଟା ମିଁତା ବାଡ଼୍କା ବାଖ୍ରାନ୍ ଏଦସ୍ ଚିୟସ୍, ଆସାନ୍ ନାହ୍ମାଲାଗାନ୍ ତିୟାର୍ କାମା।” 16ଆଙ୍ଗେନ୍ ଚେଲାର୍ ସହର୍ ତାରା କେରାର୍ ଆରୁ ସହର୍ନୁ କର୍ଚାର୍, ଆରୁ ଯୀଶୁସ୍ ତାମାନ୍ ଏସ୍କେ ତେଙ୍କାଚାସ୍, ହନ୍ନେନ୍ ଏରିକିରି ପାସ୍କାପରବ୍ଘି ଭୋଜି ତିୟାର୍ କାମ୍ଚାର୍। 17ବିଡ଼ି ଅକ୍କାନ୍ତି, ଯୀଶୁସ୍ ତାଙ୍ଘା ବାର ଲୋକ୍ ଚେଲାର୍ଗାନେ ବାର୍ଚାସ୍। 18ଆବ୍ଡ଼ାର୍ ଅକ୍କିକିରି ମହାଲିୟାର୍, ହୁଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ନିହ୍ମା ଭିତର୍ନୁନିନ୍ ଅର୍ତୁସ୍, ଏକାସ୍ କା ଏଙ୍ଘାଗାନେ ମହାଁଲ୍ଦାସ୍, ଆସ୍ ଏଙ୍ଗାନ୍ ବିରୋଧିର୍ଘି ହେଖ୍ଖାନୁ ସୋଁପଚସ୍।” 19ଆଙ୍ଗେନ୍ ଆବ୍ଡ଼ାର୍ ଦୁଃଖୁ ମାନିକିରି ଅର୍ତୁ-ଅର୍ତୁ ଆସିନ୍ ମେନାଗେ ଲାଗ୍ଗିୟାର୍, “ଆ ଆଲାନ୍ ଏନ୍ କାଁଏ?” 20ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ବାର ଲୋକ୍ ଭିତର୍ନୁ ଅର୍ତୁସ୍, ଏକାସ୍ କା ଏଙ୍ଘା ସାଙ୍ଗେନ୍ ଥାଡ଼ିନୁ ହେଖ୍ଖା ବୋଥାଲ୍ଦାସ୍। 21ମୁନୁଷ୍ ହାଦ୍ଦୁସ୍କି ବାରେନୁ ପାବିତାର୍ ଶାସ୍ତ୍ରନୁ ଏସ୍କେ ଲେଖ୍ଚ୍କା ରାଇ, ହନ୍ନେନ୍ ମାନଦ୍ ଆଦ୍ ସତ୍ତୁଦ୍; ଲେକିନ୍ ଏକା ଆଲାସ୍କି ଦ୍ୱାର୍ନୁ ମୁନୁଷ୍ ହାଦ୍ଦୁସ୍ ବିରୋଧିର୍ଘି ହେଖ୍ଖାନୁ ସୋଁପାଚା କାଲ୍ଦାସ୍ ହାୟ! ଆସ୍ ଦଣ୍ଡ୍ଘି ହକ୍ଦାର୍ସ୍, ଆ ଆଲାସ୍କି ଜନମ୍ ମା ମାନ୍ଚ୍କିରଦ୍ନେ, ହାଲେ ତାଙ୍ଘା ଲାଗାନ୍ ବାନେ ମାନ୍ଚ୍କିରଦ୍ନେ।”
ଯୀଶୁସ୍କି ଚେଲାଜାମାର୍ଗାନେ ଆଖ୍ରୀ ଭୋଜି
(ମାତିସ୍ ୨୬:୨୬-୩୦; ଲୁକାସ୍ ୨୨:୧୪-୨୦; ୧ କୁରିନ୍ଥୀ ୧୧:୨୩-୨୫)
22ଆବ୍ଡ଼ାର୍ଘି ମହଁନା ବାକେନ୍, ଯୀଶୁସ୍ ଆସ୍ମା ଅଚ୍ଚାସ୍, ଆରୁ ଆଶିଷ୍ଘି ବିନ୍ତି କାମ୍ଚାସ୍, ଆରୁ ଆ ଆସ୍ମାବନ୍ ଖିଣ୍ଡିକିରି ତାଙ୍ଘା ଚେଲାର୍ଗେ ଚିଚ୍ଚାସ୍ ଆରୁ ତେଙ୍ଗିୟାସ୍, “ଇବନ୍ ହୁଆ ଇଦ୍ ଏଙ୍ଘା ମେଦୁଦ୍।” 23ଆନ୍ତିନ୍ ଯୀଶୁସ୍ କାଟୋରା ଅଚ୍ଚାସ୍ ଆରୁ ଧାନ୍ୟାବାଦ୍ ଚିଇକିରି, ତାଙ୍ଘା ଚେଲାର୍ଗେ ଚିଚ୍ଚାସ୍; ଆରୁ ଜାମାର୍ ଆନ୍ନୁନ୍ତିନ୍ ହାପ୍ପିୟାର୍। 24ଆରୁ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଇଦ୍ ଏଙ୍ଘା ନିୟମ୍ଘି ହେଁସୁଦ୍, ଢେର୍ ଆଲାର୍ଘି ଲାଗାନ୍ ବାହାବା କାଲିଦ୍। 25ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ ଏକ୍ଲା ଏନ୍ ପାର୍ମେଶ୍ଵାର୍ସ୍କି ରାଜୀନୁ ପୁନା ଅଙ୍ଗୁର୍ ରାସେନ୍ ହାପ୍ପନ୍, ଆ ଉଲ୍ଲାତକ୍ ଇ ରାସେନ୍ ଏନ୍ ଆରୁ ଏକ୍ଲାହି ମା ହାପ୍ପଦାନ୍।” 26ଆନ୍ତିନ୍ ଆବ୍ଡ଼ାର୍ ଭଜନ୍ ଗୀତୁ ପାଡ଼୍କା ପାଛ୍ଲି ଜାଇତୁନ୍ ପାର୍ତ୍ତାତାରା ଉର୍ଖିୟାର୍ କେରାର୍ ।
ପାତ୍ରାସ୍କି ଅସ୍ଵୀକାର୍ କାମ୍ନାଘି ଭବିଷତ୍ କାତ୍ଥା ଯୀଶୁସ୍ ତେଙ୍ଗାଲ୍ଦାସ୍
(ମାତିସ୍ ୨୬:୩୧-୩୫; ଲୁକାସ୍ ୨୨:୩୧-୩୪; ଯୋହାନ୍ ୧୩:୩୬-୩୮)
27ହତ୍କବାକେନ୍ ଯୀଶୁସ୍ ଚେଲାଜାମାରିନ୍ ତେଙ୍ଗିୟାସ୍, “ନିମ୍ ଜାମାର୍ ଏଙ୍ଗାନ୍ ଆମ୍ଵିକିରି ବୁଙ୍ଗର୍ଚର୍, ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇଦ୍: କା ପାର୍ମେଶ୍ୱାର୍ସ୍ ତେଙ୍ଗାଲ୍ଦାସ୍, ‘ଏନ୍ ଭେଡ଼ି ହାପୁସିନ୍ ଡେମନ୍ ପିଟନ୍ଚନ୍, ଆରୁ ଭେଡ଼ିଗୁଠିଦ୍ ଛିଛିର୍ଛାନ୍ଦ୍ ମାନଦ୍କଦ୍।’ 28ଲେକିନ୍ ଏନ୍ ଉଜ୍ଜକା ପାଛ୍ଲି ନିହ୍ମାସ୍ତି ଆଘ୍ଲି ଗାଲିଲୀଗେ କନ୍।” 29ଲେକିନ୍ ପାତ୍ରାସ୍ ତେଙ୍ଗିୟାସ୍, “ଜାମାର୍ ନିମାନ୍ ଆମ୍ଵର୍ ବୁଙ୍ଗର୍ଚର୍ ହାଲେହି, ଏନ୍ ମା ବୁଙ୍ଗ୍ଦାନ୍।” 30ଯୀଶୁସ୍ ଆସିନ୍ ତେଙ୍ଗିୟାସ୍, “ଏନ୍ ନିଙ୍ଗାନ୍ ସତ୍ତୁନ୍ ତେଙ୍ଗାଲ୍ଦାନ୍ ଇନ୍ନା ଇ ମାଁହାନୁ ହେରୁଦ୍ ଦୁଇ ଥର୍ ଅହ୍ଲନାଘି ଆଘ୍ଲି, ନିନ୍ ଏଙ୍ଗାନ୍ ତିନ୍ ଥର୍ ଅସ୍ଵୀକାର୍ କାମୟ।” 31ଲେକିନ୍ ଆସ୍ ଆରୁ ଯୋର୍ ଚିଇକିରି ତେଙ୍ଗିୟାସ୍, “ଏଙ୍ଗାଗେ ଯଦି ନିହ୍ମାଗାନେ ଖିଆହି ଖାତ୍ରଦ୍, ହାଲେହି ଏନ୍ ନିମାନ୍ ଏକ୍ଲାହି ଅସ୍ଵୀକାର୍ ମା କାମ୍ଦାନ୍।” ଆରୁ ଜାମା ଚେଲାର୍ହି ଏନ୍ନେନ୍ ତେଙ୍ଗିୟାର୍।
ଯୀଶୁସ୍ ଗେତ୍ଶେମାନୀ ଆଡ୍ଡାନୁ ବିନ୍ତି କାମାଲ୍ଦାସ୍
(ମାତିସ୍ ୨୬:୩୬-୪୬; ଲୁକାସ୍ ୨୨:୩୯-୪୬)
32ଆନ୍ତିନ୍ ଆବ୍ଡ଼ାର୍ ଗେତ୍ଶେମାନୀ ନାମେଘି ଅଣ୍ଟା ଆଡ୍ଡାଗେ ବାର୍ଚାର୍, ଆରୁ ଯୀଶୁସ୍ ତାଙ୍ଘା ଚେଲାଜାମାରିନ୍ ତେଙ୍ଗିୟାସ୍, “ଏଙ୍ଘା ବିନ୍ତି କାମ୍ନାତକ୍ ନିମ୍ ଇସାନ୍ ଅକ୍କାରା।” 33ଆନ୍ତିନ୍ ଯୀଶୁସ୍ ପାତ୍ରାସ୍, ୟାକୁବ୍, ଆରୁ ଯୋହାନ୍ସିନ୍ ତାଙ୍ଘାଗାନେ ଅଚ୍ଚାସ୍; ଆରୁ ଆସ୍କି ମନ୍ନୁ ବହୁତ୍ ଦୁଃଖୁ ମାନ୍ଚା ଆରୁ ଆସ୍ ଆକ୍ବାକ୍ରାକାଲିୟାସ୍, 34ଆରୁ ଆବ୍ଡ଼ାରିନ୍ ତେଙ୍ଗିୟାସ୍, “ଏଙ୍ଘା ଜୀଆଦ୍ ଏତ୍କ ଦୁଃଖୁ ରାଇଦ୍, ଯେ ଏଙ୍ଗା ଖିନା ଲେଖା ଲାଗ୍ଗାଲି: ନିମ୍ ଇସାନିନ୍ ଚେତ୍ରିକିରି ରା।” 35ଆରୁ ଆସ୍ କାଟେ ଗେଚ୍ଛା ଆଘ୍ଲି କେରାସ୍ ଆରୁ ହେଁହ୍ଲାନୁ ହୁମ୍କୁଡ଼ିଆ ମାନ୍ଚାସ୍ ଆରୁ ଏନ୍ନେ ବିନ୍ତି କାମ୍ତେ ରାଚାସ୍ କା ଯଦି ମାନାଅଙ୍ଗତା, ଇ ଦୁଃଖୁ ସାମାୟଦ୍ ଏଙ୍ଘାସ୍ତି ହାଟ୍ରକୋ, 36ଆରୁ ଆସ୍ ତେଙ୍ଗିୟାସ୍, “ହେ ବୁଆ, ହେ ବାଙ୍ଗ୍, ନିଙ୍ଘାଲାଗାନ୍ ଜାମାଦ୍ ସମ୍ଭବଦ୍; ଇ ଦୁଃଖୁନ୍ ଏଙ୍ଘାସ୍ତି ହାଟାବାଚା: ହାଲେହି ଏଙ୍ଘା ଇଚ୍ଛା ମାଲ୍ଲା, ଲେକିନ୍ ନିଙ୍ଘା ଇଚ୍ଛା ପୁରା ମାନ୍ନାଦ୍।” 37ଆସ୍ ଚେଲାଜାମାର୍ଘି ଚାହା ବାର୍ଚାସ୍ ଆରୁ ଆବ୍ଡ଼ାର୍ଘି ହାନ୍ଦ୍ର୍ନାନ୍ ଏରିକିରି ପାତ୍ରାସ୍ସିନ୍ ତେଙ୍ଗିୟାସ୍, “ହେ ଶିମୋନ୍, ହାନ୍ଦ୍ରାଲ୍ଦାଏ କାଁଏ? କାଟେ ଡେରିହି ଚେତ୍ରା ପଲ୍ଲକାଇନ୍? 38ଚେତ୍ରିକିରି ରା ଆରୁ ବିନ୍ତି କାମ୍ତେ ରା କା, ନିମ୍ ପରୀକ୍ଷାନୁ ମା ଖାତ୍ରର୍। ଆତ୍ମାଦ୍ ତା ତିୟାର୍ ରାଇଦ୍, ଲେକିନ୍ ମେଦୁଦ୍ କମ୍ଜୋର୍ ରାଇଦ୍।” 39ଆନ୍ତିନ୍ ଯୀଶୁସ୍ ଆରୁଅହନ୍ କାଇକିରି ଆଘ୍ଲିନ୍ତା ଲେଖା ବିନ୍ତି କାମ୍ଚାସ୍। 40ଆନ୍ତିନ୍ ଯୀଶୁସ୍ ଆରୁଅହନ୍ ବାରିକିରି ଆବ୍ଡ଼ାର୍ଘି ହାନ୍ଦ୍ର୍ନାନ୍ ଏରିୟାସ୍, ଏନ୍ଦେର୍ଗେକା ଆବ୍ଡ଼ାର୍ଘି ହାନ୍ନୁଦ୍ ମିଁଙ୍ଖରା କାଲିୟାଦ୍; ଆରୁ ଆବ୍ଡ଼ାର୍ ଆସିନ୍ ଏନ୍ଦେର୍ ଯାବାବ୍ ଚିୟର୍ ଆବନ୍ ବାଲ୍ଲକାଚାର୍। 41ଯୀଶୁସ୍ ତିସ୍ରା ଥର୍ ବାରିକିରି ଆବ୍ଡ଼ାରିନ୍ ତେଙ୍ଗିୟାସ୍, “କାଟେ ଡେରି ଢାଲ୍ଙ୍ଗାରାଇକିରି ଆରାମ୍ କାମା, ଢେର୍ ମାନ୍ଚାଦିନ୍, ଆ ସାମାୟ ବାର୍ଚା କେର୍କିଚି; ଏରା ମୁନୁଷ୍ ହାଦ୍ଦୁସ୍ ପାପୀ ଜାମାର୍ଘି ହେଖ୍ଖାନୁ ସୋଁପାଚାକସ୍। 42ଉସ୍କାରା, ଗୁଚା ନାମ୍ କତ୍! ଏରା, ଏକାସ୍ ଏଙ୍ଗାନ୍ ବିରୋଧିଜାମାର୍ଘି ହେଖ୍ଖାନୁ ସୋଁପଚସ୍ ଆସ୍ ଚାହା ଆଣ୍ସିୟାସ୍ କେରାସିନ୍!”
ଯୀଶୁସିନ୍ ଧାର୍ନା ଆରୁ ହିଁଇକିରି ହୋନା କାନା
(ମାତିସ୍ ୨୬:୪୭-୫୬; ଲୁକାସ୍ ୨୨:୪୭-୫୩; ଯୋହାନ୍ ୧୮:୩-୧୨)
43ଯୀଶୁସ୍ ଏନ୍ନେ ତେଙ୍ଗାଲିୟାସିନ୍ କା ବାର ଲୋକ୍ ଚେଲା ଭିତର୍ନୁ ଅର୍ତୁସ୍, ଯୁଦାସ୍ ବାର୍ଚାସ୍ ତାଙ୍ଘାଗାନେ ଅନ୍ ଗୁଟ୍ଟଠି ଆଲାର୍ ଖଣ୍ଡା ଆରୁ ଲାଠି ଧାରିକିରି ବାର୍ଚାର୍, ଇବ୍ଡ଼ାରିନ୍ ମୁଖ୍ୟା ପୁରୋହିତ୍, ପଣ୍ତିତ୍ ଆରୁ ମୁଖ୍ୟାଜାମାର୍ ତାଏକାଚାର୍। 44ଧୋଖା ଚିଉ ଆଲାସ୍ ଆବ୍ଡ଼ାରିନ୍ ଏନ୍ନେ ଚିହ୍ନା ଚିଇକିରି ତେଙ୍କାଚାସ୍ କା, “ଏକାସିନ୍ ଏନ୍ ଚଙ୍ଖନ୍, ଆ ଆଲାସିନ୍ ଧାରିକିରି ସାବ୍ଧାନ୍ତି ହୋକେ।” 45ଆସ୍ ସିଧା ଯୀଶୁସ୍କି ଚାହାଗେ ବାରିକିରି ତେଙ୍ଗିୟାସ୍, “ହେ ଗୁରୁ!” ଆରୁ ଆସିନ୍ ଚଙ୍ଖିୟାସ୍, 46ଆଙ୍ଗେନ୍ ଆଲାର୍ ଯୀଶୁସିନ୍ ଧାର୍ଚାର୍ ଆରୁ ହିଁଚାର୍। 47ଇବନ୍ ଏରିକିରି ଯୀଶୁସ୍କି ଚାହାନୁ ଇଜ୍ଜକା ଆଲାର୍ଘି ଭିତର୍ନୁ ଅର୍ତୁସ୍ ତାଙ୍ଘା ଖଣ୍ଡା ଅଥ୍ରାସ୍, ଆରୁ ମାହା ଗୁତ୍ତିୟାସ୍କି ହେବ୍ଦାନ୍ ମୁର୍କେଇଚାସ୍, 48ଯୀଶୁସ୍ ଭିଡ଼୍ବନ୍ ତେଙ୍ଗିୟାସ୍, “ନିମ୍ ଏଙ୍ଗାନ୍ ଡାକୁ ସୋଚାଲ୍ଦାର୍ ଯେ ଏଙ୍ଗାନ୍ ଧାରାଗେ ଖଣ୍ଡା ଲାଠି ଧାର୍ଚ୍କାର୍ ଆରୁ ବାର୍ଚ୍କାଦାର୍ କାଁଏ? 49ଏନ୍ତା ରୋଜ୍ଦିନ୍ ନିହ୍ମା ଆଘ୍ଲି ମନ୍ଦିର୍ନୁ ଉପ୍ଦେଶ୍ ଚିୟାଲ୍କାନ୍, ହାଲେହି ନିମ୍ ଏଙ୍ଗାନ୍ ମା ଧାର୍ଚ୍କାର୍: ଲେକିନ୍, ଇଦ୍ ଇଦ୍ଘିଲାଗାନ୍ ମାନାଲିଦ୍ କା ପାବିତାର୍ ଶାସ୍ତ୍ରନୁ ଏକାଦ୍ ଲେଖ୍ଚ୍କା ରାଇଦ୍, ଆଦ୍ ପୁରା ମାନ୍ନା କାତ୍ଥା।” 50ଆଙ୍ଗେନ୍ ଜାମା ଚେଲାର୍ ଯୀଶୁସିନ୍ ଆମ୍ବିୟାର୍ ଆରୁ ବୁଙ୍ଗେଇଚାର୍। 51ଅଣ୍ଟା ଯୁୱାନ୍ କୁକ୍କସ୍, ତାଙ୍ଘା ଡୁଡ଼୍ଙ୍ଗୁ ମେଦୁନୁ ଅଣ୍ଟା ଚାଦର୍ ଝାପ୍ରାସ୍ ଆରୁ ଯୀଶୁସ୍କି ପାଛ୍ଲି-ପାଛ୍ଲି କେରାସ୍; ଆଲାର୍ ଆସିନ୍ ଧାର୍ଚାର୍, 52ଲେକିନ୍ ଆସ୍ ଚାଦର୍ ଆମ୍ବିୟାସ୍ ଆରୁ ଡୁଡ଼୍ଙ୍ଗୁଇନ୍ ବୁଙ୍ଗେଇଚାସ୍।
ମାହାସାଭାଘି ଆଘ୍ଲି ଯୀଶୁସିନ୍ ଅନ୍ଦ୍ରାଲ୍ନାଏ
(ମାତିସ୍ ୨୬:୫୭-୬୮; ଲୁକାସ୍ ୨୨:୫୪,୫୫,୬୩-୭୧; ଯୋହାନ୍ ୧୮:୧୩,୧୪,୧୯-୨୪)
53ଆନ୍ତିନ୍ ଆବ୍ଡ଼ାର୍ ଯୀଶୁସିନ୍ ମାହା ପୁରୋହିତ୍ସାନ୍ ଅଚ୍ଚାର୍; ଆସାନ୍ ଜାମା ମୁଖ୍ୟା ପୁରୋହିତ୍ଜାମାର୍, ପଣ୍ତିତ୍, ଆରୁ ମୁଖ୍ୟାର୍ଗୁଠି ଠୁଡ଼ିୟା ରାଚ୍କାଚାର୍। 54ପାତ୍ରାସ୍ ଗେଚ୍ଛାନୁ ରାଇକିରି ଯୀଶୁସ୍କି ପାଛ୍ଲି-ପାଛ୍ଲି କେରାସ୍, ଆସ୍ ମାହାପୁରୋହିତ୍ସ୍କି ମହଲ୍ଘି ଚାଲି ଉଲା କର୍ଚାସ୍ ଆରୁ ଚୋଉକିଦାର୍ ଜାମାର୍ଗାନେ ଅକ୍କିକିରି ଚିଚ୍ଚୁ ଆହ୍ରା ଲାଗ୍ଗିୟାସ୍। 55ଯୀଶୁସିନ୍ ଡେମା ପିଟାଚାଗେ ମୁଖ୍ୟା ପୁରୋହିତ୍ଜାମାର୍ ଆରୁ ମାହାସାଭାନୁ ରୁ ଜାମା ଆଲାର୍ ତାଙ୍ଘା ବିରୁଦ୍ଧ୍ନୁ ସାକ୍ଷୀ ବେଦ୍ଦାଲିୟାର୍, ଲେକିନ୍ ଆବ୍ଡ଼ାର୍ ଏନ୍ଦେର୍ହି ମା ହାଖ୍ଖୀୟାର୍। 56ଆରୁ ଢେର୍ ଆଲାର୍ ଯୀଶୁସ୍କି ବିରୁଦ୍ଧ୍ନୁ ଝୁଟ୍ଟୁ ସାକ୍ଷୀ ଚିଚ୍ଚାର୍, ଲେକିନ୍ ଆର୍ଘି ସାକ୍ଷୀଦ୍ ମା ଜୁମ୍ରାଲିୟାଦ୍। 57ଆନ୍ତିନ୍ ଆସ୍ତା ରୁ କେତ୍କ ଲୋକ୍ ଆଲାର୍ ଇଜ୍ଜାର୍ ଆରୁ ତାଙ୍ଘା ବିରୁଦ୍ଧ୍ନୁ ଝୁଟ୍ଟୁ ସାକ୍ଷୀ ଚିଚ୍ଚାର୍, 58“ଏମ୍ ଇ ଆଲାସ୍କି ଏନ୍ନେ ତେଙ୍ଗ୍ନାନ୍ ମେନ୍ଚ୍କାଦାମ୍ କା, ‘ଏନ୍ ଆଲାର୍ଘି ତିୟାର୍ କାମ୍ଚ୍କା ଇ ମନ୍ଦିର୍ବନ୍ ଧାସ୍କନ୍ଚନ୍ ଆରୁ ତିନ୍ ଦିନ୍ଘି ଭିତ୍ରେ ଦୁସ୍ରା ଆରୁ ଅଣ୍ଟା ମନ୍ଦିର୍ କାମନ୍, ଏକାଦ୍ କା ଆଲାର୍ଘି ଦ୍ୱାର୍ନୁ ତିୟାର୍ ମା ମାନ୍ଚ୍କିରୋ।’” 59ଲେକିନ୍ ଇଦ୍ଘି ବାରେନୁହି ଆବ୍ଡ଼ାର୍ଘି ସାକ୍ଷୀଦ୍ ମା ଜୁମ୍ରାଲିୟାଦ୍। 60ଆଙ୍ଗେନ୍ ମାହାପୁରୋହିତ୍ସ୍ ଆଲାର୍ଘି ମାଝାନୁ ଇଜ୍ଜାସ୍ ଆରୁ ଯୀଶୁସିନ୍ ମେନ୍ଚାସ୍, “ଇବ୍ଡ଼ା ଆଲାର୍ ନିଙ୍ଘା ବିରୁଦ୍ଧ୍ନୁ ଏକାନ୍ ତେଙ୍ଗାଲ୍ନାଏ, ନିଙ୍ଘାସାନ୍ ଇଦ୍ଘି ଏନ୍ଦେର୍ହି ଯାବାବ୍ ମାଲ୍ଲାଦିନ୍ କାଁଏ?” 61ଲେକିନ୍ ଯୀଶୁସ୍ କାଡ଼େ-କାଡ଼େ ରାଚାସ୍, ଆରୁ ଏନ୍ଦେର୍ହି ଯାବାବ୍ ମା ଚିଚ୍ଚାସ୍। ହୁଦ୍ଘିଲାଗାନ୍ ମାହାପୁରୋହିତ୍ସ୍ ଯୀଶୁସିନ୍ ଆରୁଅହନ୍ ମେନ୍ଚାସ୍, “ନିନ୍ ଜାମାନ୍ କାମ୍ନାବାଲା ଆ ପାର୍ମେଶ୍ଵାର୍ସ୍କି ହାଦ୍ଦୁୟ ଖ୍ରୀସ୍ତ୍ କାଁଏ?” 62ଯୀଶୁସ୍ ଯାବାବ୍ ଚିଚ୍ଚାସ୍, “ଏନ୍ ଆ ଆଲାନିନ୍: ନିମ୍ ପାର୍ମେଶ୍ୱାର୍ସ୍କି ହାଦ୍ଦୁସିନ୍ ଜାମାର୍ଘିନ୍ତି ଶକ୍ତିଶାଲୀ ପାର୍ମେଶ୍ଵାର୍ସ୍କି ତିନାତାରା ଅକ୍କା, ଆରୁ ଆକାଶ୍ ତା ବାଦ୍ଲିନୁ ବାର୍ନାନ୍ ଏରୋର୍।” 63ଯୀଶୁସ୍କି ଇ କାତ୍ଥାନ୍ ମେନିକିରି ମାହାପୁରୋହିତ୍ସ୍ ମୁରୁକ୍ ଖୀସ୍ତି ତାଙ୍ଘା ଆତ୍ତ୍କା ଚିଢ଼ାନ୍ ଏଟିକିରି ତେଙ୍ଗିୟାସ୍, “ଆକ୍କୁନ୍ ନାମାଗେ ସାକ୍ଷୀଘି ଏନ୍ଦେର୍ ଦାର୍କାର୍ ରାଇଦ୍? 64ନିମ୍ ଜାମାର୍ ତା ପାର୍ମେଶ୍ଵାର୍ସ୍କି ନିନ୍ଦା କାମ୍ନାନ୍ ମେଞ୍ଚକାର୍ ଲେକିନ୍ ନିହ୍ମାଏ ବିଚାର୍ ଏନ୍ଦେର୍ ରାଇ?” ଆରୁ ଜାମାର୍ଘି ଫାଏସ୍ଲା ଇଦ୍ ମାଞ୍ଚା କା ଯୀଶୁସ୍ ମରନ୍ ଦଣ୍ତ୍ଘି ହକ୍ଦାର୍ ରାଦାସ୍। 65ଆରୁ କେତ୍କ ଲୋକ୍ ଆଲାର୍ ଯୀଶୁସ୍କି ମିଆଁ ତୁପ୍ଫାଗେ ଲାଗ୍ଗିୟାର୍, ଆରୁ ତାଙ୍ଘା ହାନ୍ନୁନୁ ପଟି ହିଁଚାର୍ ଆରୁ ଆସିନ୍ ଘୁସା ମାରିକିରି ତେଙ୍ଗା ଲାଗ୍ଗିୟାର୍, “ଯଦି ନିନ୍ ସତ୍ତୁନିନ୍ ପାର୍ମେଶ୍ଵାର୍ସ୍କି ତାର୍ତି ବାର୍ଚ୍କାଦାଏ ହାଲେ ତେଙ୍ଗା କା ନିଙ୍ଗାନ୍ ନେଦ୍ ଡେମ୍ଚାର୍?” ଆରୁ ଦାର୍ୱାନ୍ ଜାମାର୍ହି ତାଙ୍ଗାନ୍ ଧାରିକିରି ଥାପ୍ଡ଼ାଲିୟାର୍।
ପାତ୍ରାସ୍ ଯୀଶୁସିନ୍ ଅସ୍ଵୀକାର୍ କାମାଲ୍ଦାସ୍
(ମାତିସ୍ ୨୬:୬୯-୭୫; ଲୁକାସ୍ ୨୨:୫୬-୬୨; ଯୋହାନ୍ ୧୮:୧୫-୧୮,୨୫-୨୭)
66ହତ୍କବାକେନ୍ ପାତ୍ରାସ୍ କିୟାଁ ଚାଲିନୁ ରାଚାସ୍, ମାହାପୁରୋହିତ୍ସ୍କି ଅଣ୍ଟା ଗୁତ୍ତିୟାଦ୍ ଆସାନ୍ ବାର୍ଚାଦ୍, 67ଯେତ୍କବାକେନ୍ ପାତ୍ରାସ୍କି ଚିଚ୍ଚୁ ଆହ୍ର୍ନାନ୍ ଏରିୟାଦ୍ ତା ଆସିନ୍ ଏକ୍ନଜର୍ନୁ ଏରିକିରି ତେଙ୍ଗିୟାଦ୍, “ନିନ୍ହି ନାଜ୍ରେତ୍ତା ଯୀଶୁସ୍ ଗାନେ ସାଙ୍ଗେନ୍ ରାଚ୍କାଏ।” 68ଲେକିନ୍ ଆସ୍ ଅସ୍ଵୀକାର୍ କାମିକିରି ତେଙ୍ଗିୟାସ୍, “ଏନ୍ ଆସିନ୍ ବାଲ୍ଦାନ୍ ଆରୁ ନିନ୍ ଏନ୍ଦେର୍ ତେଙ୍ଗାଲ୍ଦିନ୍ ଆବନ୍ ଏନ୍ ମା ବୁଝ୍ରାଲ୍ଦାନ୍।” ଇଦ୍ଘି ପାଛ୍ଲି ପାତ୍ରାସ୍ ଫାଟକ୍ ତାରା ଉର୍ଖିୟାସ୍; ଆରୁ ଆଖାନେନ୍ ହେରୁଦ୍ ଅହ୍ଲିୟାଦ୍। 69ଆରୁ ଆ ଗୁତ୍ତିୟାଦ୍ ଆସିନ୍ ଏରିକିରି ଆସ୍ତା ଚାହାନୁ ଇଜ୍ଜକା ଆଲାରିନ୍, ଆରୁହି ତେଙ୍ଗା ଲାଗ୍ଗିୟାଦ୍, “ଇ ଆଲାସ୍ ଆବ୍ଡ଼ାର୍ଘି ଭିତର୍ନୁ ଅର୍ତୁସ୍।” 70ଲେକିନ୍ ଆସ୍ ଆରୁହି ଅସ୍ଵୀକାର୍ କାମ୍ଚାସ୍, ଇଦ୍ଘି କାଟେ ଡେରି ପାଛ୍ଲି ଆସ୍ତା ଇଜ୍ଜକା ଆଲାର୍ ପାତ୍ରାସ୍ସିନ୍ ତେଙ୍ଗିୟାର୍, “ଜରୁର୍ ନିନ୍ ହୁବ୍ଡ଼ାର୍ଘି ଭିତର୍ନୁ ଅର୍ତୁୟ; ଏନ୍ଦେର୍ଗେକା ନିନ୍ହି ତା ଗାଲିଲୀନ୍ତା ଆଲାଏ।” 71ଆଙ୍ଗେନ୍ ପାତ୍ରାସ୍ ତେଙ୍ଗିୟାସ୍ ଯଦି ଏନ୍ ଝୁଟ୍ଟୁ ତେଙ୍ଗାଲ୍ଦାନ୍ ତା ଏଙ୍ଗାଗେ ସାରାପ୍ ଲାଗ୍ଗଦ୍ ଆରୁ କସମ୍ ମହିଁକିରି ତେଙ୍ଗା ଲାଗ୍ଗିୟାସ୍ କା, “ନିମ୍ ଏକା ଆଲାସ୍କି ବାରେନୁ ତେଙ୍ଗାଲ୍ଦାର୍, ଏନ୍ ଆସିନ୍ ବାଲ୍ଦାନ୍।” 72ଠିକ୍ ହୁଙ୍ଗେନିନ୍ ହେରୁଦ୍ ଦୁସ୍ରାଥର୍ ଅହ୍ଲିୟାଦ୍ ଆଙ୍ଗେନ୍ ପାତ୍ରାସ୍କେ ଯୀଶୁସ୍କି ତେଙ୍କା ଇ କାତ୍ଥାଦ୍ ମନେ ଖାତ୍ରାଦ୍ କା, “ହେରୁଘି ଦୁଇ ଥର୍ ଅହ୍ଲନାଘି ଆଘ୍ଲି ନିନ୍ ଏଙ୍ଗାନ୍ ତିନ୍ ଥର୍ ଅସ୍ଵୀକାର୍ କାମୟ।” ଆରୁ ଆସ୍ ଯୀଶୁସ୍କି କାତ୍ଥାନ୍ ସୋଚିକିରି ନିହ୍ଚାରା-ନିହ୍ଚାରା ଅହ୍ଲାଗେ ଲାଗ୍ଗିୟାସ୍।
15ଯୀଶୁସିନ୍ ପିଲାତୁସ୍କି ଆଘ୍ଲି ଅନ୍ଦ୍ରାଲ୍ନାଏ
(ମାତିସ୍ ୨୭:୧,୨; ୨୭:୧୨-୧୪; ଲୁକାସ୍ ୨୩:୧-୫; ଯୋହାନ୍ ୧୮:୨୮-୩୮)
1ଭୋର୍ ପାଇରିନ୍ ମୁଖ୍ୟା ପୁରୋହିତ୍, ପଣ୍ତିତ୍, ମୁଖ୍ୟାର୍ ଆରୁ ସାଭାନ୍ତା ଜାମା ଆଲାର୍ ବିଚାର୍ କାମ୍ଚାର୍, ଇଦ୍ଘି ପାଛ୍ଲି ଆବ୍ଡ଼ାର୍ ଯୀଶୁସିନ୍ ହିଁଇକିରି, ପିଲାତୁସ୍କି ହେଖ୍ଖାନୁ ସୋଁପ୍ଚେଇଚାର୍। 2ପିଲାତୁସ୍ ଯୀଶୁସିନ୍ ମେନ୍ଚାସ୍, “ନିନ୍ ୟାହୁଦୀ ଜାମାର୍ଘି ରାଜାଏ କାଁଏ?” ଯୀଶୁସ୍ ଯାବାବ୍ ଚିଚ୍ଚାସ୍, “ନିମ୍ ଠିକେନ୍ ତେଙ୍ଗାଲ୍ଦାର୍।” 3ଆଙ୍ଗେନ୍ ମୁଖ୍ୟା ପୁରୋହିତ୍ଜାମାର୍ ଯୀଶୁସ୍କି ମିଆଁ ଢେର୍ ଦୋଷ୍ ଚିୟାଗେ ଲାଗ୍ଗିୟାର୍। 4ଆଙ୍ଗେନ୍ ପିଲାତୁସ୍ ଆରୁଅହନ୍ ଯୀଶୁସିନ୍ ମେନ୍ଚାସ୍, “ଏରା ଇବ୍ଡ଼ାର୍ ନିଙ୍ଘା ମିଆଁ କେତ୍କ ବାଡ଼୍କା ଦୋଷ୍ ଚିୟାଲ୍ନାଏ, ଇଦ୍ଘି ନିଙ୍ଘାସାନ୍ ଏନ୍ଦେର୍ହି ଯାବାବ୍ ମାଲ୍ଲାଦିନ୍ କାଁଏ?” 5ଲେକିନ୍ ଯୀଶୁସ୍ ଏନ୍ଦେର୍ହି ଯାବାବ୍ ମା ଚିଚ୍ଚାସ୍; ଇବନ୍ ଏରିକିରି ପିଲାତୁସ୍ ମୁରୁକ୍ ଆଚ୍ମିତ୍ ମାନ୍ଚାସ୍କେରାସ୍।
ଯୀଶୁସ୍କେ ମରନ୍ ଦଣ୍ଡ୍ଘି ହୁକୁମ୍ ଚିୟାଲ୍ନାଏ
(ମାତିସ୍ ୨୭:୧୫-୨୬; ଲୁକାସ୍ ୨୩:୧୩-୨୫; ଯୋହାନ୍ ୧୮:୩୯—୧୯:୧୬)
6ଲେକିନ୍ ପରବ୍ଘି ସାମାୟନୁ ଆଲାର୍ ନେକାନ୍ ନିଆଲିୟାର୍ ଆବ୍ଡ଼ାରିନ୍ ପିଲାତୁସ୍ ଆମ୍ଵା ଚାଲିୟାସ୍, ଇଦ୍ ଅଣ୍ଟା ନିୟମ୍ ରାଚା। 7ହୁ ସାମାୟନୁ ବାରାବ୍ବାସ୍ ନାମେଘି ଅଣ୍ଟା ଆଲାସ୍ ଜେହେଲ୍ନୁ ରାଚାସ୍। ଆସ୍ ସାର୍କାର୍ଘି ବିରୁଦ୍ଧ୍ ଅଣ୍ଟା ଲାଡ଼ାଇନୁ ଭାଗ୍ ଅଚ୍ଚକାଚାସ୍ ଆରୁ ଆସ୍ କେତ୍କ ଆଲାରିନ୍ ପିଟ୍ଟକାଚାସ୍। 8ଆଙ୍ଗେନ୍ ଆଲାର୍ଘି ଭିଡ଼୍ଦ୍ ମିଆଁ କାଇକିରି ପିଲାତୁସ୍ ରାଜାସ୍ସାନ୍ ବାର୍ଚାର୍ ଆରୁ ଆର୍ଜୀ କାମାଗେ ଲାଗ୍ଗିୟାର୍ କା, ଏସ୍କେ ନିମ୍ କାମ୍ତେଲେ ବାରାଲ୍ଦାର୍ ଆନ୍ନେନ୍ ଇଥ୍ରହି କାମା। 9ଆଙ୍ଗେନ୍ ପିଲାତୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ନିମ୍ ଏନ୍ଦେର୍ ଚାହାଁଲ୍ଦାର୍? ଏନ୍ ନିହ୍ମା ଲାଗାନ୍ ୟାହୁଦୀ ଜାମାର୍ଘି ରାଜାସିନ୍ ଆମ୍ଵନ୍ଚନ୍ କାଁଏ?” 10ଆସ୍ ଆହାଲିୟାସ୍ କା ମୁଖ୍ୟା ପୁରୋହିତ୍ଜାମାର୍ ହିସ୍ଙ୍ଗାତି ଯୀଶୁସିନ୍ ଧାର୍ତାଚ୍କାଚାର୍। 11ଲେକିନ୍ ମୁଖ୍ୟା ପୁରୋହିତ୍ଜାମାର୍ ଆଲାରିନ୍ ଚାଢ଼ାବାଗେ ଲାଗ୍ଗିୟାର୍ କା ଆବ୍ଡ଼ାର୍ ବାରାବ୍ବାସିନ୍ନିନ୍ ଆମ୍ଵାଗେ ଦାବି କାମର୍। 12ଲେକିନ୍ ପିଲାତୁସ୍ ଆଲାର୍ଘି ଭିଡ଼୍ବନ୍ ଆରୁଅହନ୍ ମେନ୍ଚାସ୍, “ହାଲେ ନିମ୍ ନେକାନ୍ ୟାହୁଦୀ ଜାମାର୍ଘି ରାଜା ବୁଲି ତେଙ୍ଗାଲ୍ଦାର୍, ଆସ୍ଗାନେ ଏନ୍ ଏନ୍ଦେର୍ କାମନ୍?” 13ଆବ୍ଡ଼ାର୍ ଆରୁ ଜୋର୍ସେ ଚିର୍ରାରାଚାର୍ ଆରୁ ତେଙ୍ଗିୟାର୍, “ଇସିନ୍ କ୍ରୁଶ୍ନୁ ଠୋକା!” 14ଆଙ୍ଗେନ୍ ପିଲାତୁସ୍ ଆବ୍ଡ଼ାରିନ୍ ମେନ୍ଚାସ୍, “ଏନ୍ଦେର୍ଗେ, ଇସ୍ ଏନ୍ଦେର୍ ଦୋଷ୍ କାମ୍ଚ୍କାଦାସ୍?” ଲେକିନ୍ ଆବ୍ଡ଼ାର୍ ଆରୁ ଜୋର୍ସେ ଚିର୍ରାରାଗେ ଲାଗ୍ଗିୟାର୍, “ଇସିନ୍ କ୍ରୁଶ୍ନୁ ଠୋକା!” 15ଆଙ୍ଗେନ୍ ପିଲାତୁସ୍ ଭିଡ଼୍ବନ୍ ଖୁସୀ କାମାଗେ ବିଚାର୍ କାମ୍ଚାସ୍, ଆରୁ ଆସ୍ ଆବ୍ଡ଼ାର୍ଘି ଲାଗାନ୍ ବାରାବ୍ବାସ୍ସିନ୍ ଆମ୍ବେଇଚାସ୍, ଆରୁ ଯୀଶୁସିନ୍ କୋଡ୍ରାତି ଡେମ୍ତିକିରି କ୍ରୁଶ୍ନୁ ଠୋକାଗେ ସୋଁପ୍ଚେଇଚାସ୍।
ପଲ୍ଟନ୍ଜାମାର୍ ଯୀଶୁସିନ୍ ବେଜ୍ଜତ୍ କାମାଲ୍ନାଏ
(ମାତିସ୍ ୨୭:୨୭-୩୧; ଯୋହାନ୍ ୧୯:୨,୩)
16ଇଦ୍ଘି ପାଛ୍ଲି ପଲ୍ଟନ୍ଜାମାର୍ ଯୀଶୁସିନ୍ ରାଜାସ୍କି ରାଜ୍ମହଲ୍ ଉଲ୍ତା ଚାଲିନୁ ହୋଇକିରି, ଆସାନ୍ ପଲ୍ଟନ୍ଜାମାର୍ଘି ଜାମା ଦଲ୍ବନ୍ ଠୁଡ଼ିୟାଚାର୍। 17ଆବ୍ଡ଼ାର୍ ଯୀଶୁସିନ୍ ବାଇଗଣୀ ରଙ୍ଗ୍ଘି ଚିଢ଼ା ଆତ୍ତ୍ତାଚାର୍ ଆରୁ ଆଚ୍ଚୁଘି ମୁକୁଟ୍ ଗଥିକିରି ତାଙ୍ଘା କୁକ୍କୁନୁ ଆତ୍ତ୍ତାଚାର୍, 18ଆରୁ ଆବ୍ଡ଼ାର୍ ଏନ୍ନେ ତେଙ୍ଗିକିରି ବେଜ୍ଜତ୍ କାମାଗେ ଲାଗ୍ଗିୟାର୍, “ହେ ୟାହୁଦୀ ଜାମାର୍ଘି ରାଜା, ଯୋହାର୍!” 19ଆରୁ ଆବ୍ଡ଼ାର୍ ଯୀଶୁସ୍କି କୁକ୍କୁନ୍ ଠେଙ୍ଗାତି ଡେମାଲିୟାର୍, ତାଙ୍ଘା ମିଆଁ ତୁପ୍ଫାଲିୟାର୍, ଆରୁ ତାଙ୍ଘା ଆଘ୍ଲି ହାଁଠୁୱାରାଇକିରି ତାଙ୍ଗାନ୍ ଯୋହାର୍ କାମାଲିୟାର୍। 20ଆସ୍କି ବେଜ୍ଜତ୍ କାମ୍ଚ୍କା ପାଛ୍ଲି, ଆବ୍ଡ଼ାର୍ ଆ ବାଇଗଣୀ ଚିଢ଼ାନ୍ ଇଁଚିୟାର୍ ଆରୁ ଅଚ୍ଚାର୍ କେରାର୍ ଆରୁ ତାଙ୍ଘା ନିଜର୍ ଚିଢ଼ାନ୍ ଆତ୍ତ୍ତାଚାର୍; ଆରୁ ଆବ୍ଡ଼ାର୍ ଯୀଶୁସିନ୍ କ୍ରୁଶ୍ନୁ ଠୋକାଗେ ବାହ୍ରି ଅଚ୍ଚାର୍ କେରାର୍।
ଯୀଶୁସିନ୍ କ୍ରୁଶ୍ନୁ ଠୋକାଲ୍ନାଏ
(ମାତିସ୍ ୨୭:୩୧-୪୪; ଲୁକାସ୍ ୨୩:୨୭-୪୩; ଯୋହାନ୍ ୧୯:୧୭-୨୭)
21କୂରୀଣୀ ସହର୍ନୁ ଶିମୋନ୍ ନାମେଘି ଅଣ୍ଟା ଆଲାସ୍ ରାଚାସ୍, ଆସ୍ ଆଲେକ୍ଜାଣ୍ଡାର୍ ଆରୁ ରୁଫସ୍କି ତାମ୍ବାସ୍ ରାଚାସ୍, ଆସ୍ ହାଲ୍ଲୁ ତାର୍ତି ବାରାଲିୟାସ୍; ଆବ୍ଡ଼ାର୍ ଆସିନ୍ ଯୀଶୁସ୍କି କ୍ରୁଶ୍ବନ୍ ଚେଡ଼ାଗେ ଯବର୍ଜସ୍ତି କାମ୍ଚାର୍। 22ଆରୁ ଆବ୍ଡ଼ାର୍ ଯୀଶୁସିନ୍ ଗୋଲ୍ଗାଥା ନାମେଘି ଆଡ୍ଡାଗେ ଅଚ୍ଚାର୍, ଇଦ୍ଘି ମତ୍ଲବ୍ “ଖୋପ୍ଡ଼ି ଆଡ୍ଡା”, 23ଆବ୍ଡ଼ାର୍ ଯୀଶୁସ୍କେ ମୁର୍ହ୍ ନାମେଘି ଅଣ୍ଟା ମାନ୍ଦାର୍ ଅଙ୍ଗୁର୍ ରାସେନୁ ମେଶାବାଇକିରି ହାପ୍ପାଗେ ଚିଚ୍ଚାର୍, ଲେକିନ୍ ଆସ୍ ଆବନ୍ ମା ହାପ୍ପିୟାସ୍। 24ଆନ୍ତିନ୍ ଆବ୍ଡ଼ାର୍ ଯୀଶୁସିନ୍ କ୍ରୁଶ୍ ମିଆଁ ଠୋକ୍ଚାର୍ ଆରୁ ତାଙ୍ଘା ଚିଢ଼ାବନ୍ ଆଘ୍ଲି ଆବ୍ଡ଼ାର୍ ଭିନେ-ଭିନେ ଭାଗ୍ କାମ୍ଚେଇଚାର୍, ଆରୁ ନେକାଗେ ଏକାଦ୍ ହାଖ୍ଖରଦ୍, ଆବନ୍ ଆହାଗେ ଚିଠା ଅଥ୍ରିକିରି, ତାହ୍ମା ଭିତ୍ରେ ହାଟ୍ରାର୍। 25ପାଇରିନ୍ତା ଲାଗ୍ଭାଗ୍ ନଅ ବାଜେ ସାମାୟଗେ ଆବ୍ଡ଼ାର୍ ଯୀଶୁସିନ୍ କ୍ରୁଶ୍ନୁ ଠୋକ୍ଚାର୍, 26ଆରୁ ଯୀଶୁସ୍କି କ୍ରୁଶ୍ ମିଆଁ ଦୋଷୀବାଲା ଅଣ୍ଟା ପାଟା ଲାଗାବାଚ୍କା ରାଚା ଆନ୍ନୁ ଲେଖ୍ଚ୍କାରାଚା, “ୟାହୁଦୀ ଜାମାର୍ଘି ରାଜାସ୍”। 27ଆରୁ ଯୀଶୁସ୍ଗାନେ ଆରୁ ଦୁଇ ଲୋକ୍ ଡାକୁରିନ୍ କ୍ରୁଶ୍ନୁ ଠୋକ୍ଚାର୍, ଅଣ୍ଟାସିନ୍ ତାଙ୍ଘା ଡେବ୍ବାତାରା ଆରୁ ଅଣ୍ଟାସିନ୍ ତାଙ୍ଘା ତିନାତାରା ଠୋକ୍ଚାର୍। 28(ଏନ୍ନେନ୍ ପାବିତାର୍ଶାସ୍ତ୍ରନ୍ତା ଇ କାତ୍ଥାବଦ୍ ପୁରା ମାନ୍ଚା କା, ଆସିନ୍ ବଦ୍ମାସ୍ ଆଲାର୍ ଗାନେ ଗନ୍ତି କାମାକେରାଦ୍।) 29ଆପାବୁନୁ କାଲୁ ଆଲାର୍ ନିଜର୍-ନିଜର୍ କୁକ୍କୁନ୍ ନୁକା-ନୁକା ଯୀଶୁସ୍କି ଅପ୍ମାନ୍ କାମିକିରି ତେଙ୍ଗାଗେ ଲାଗ୍ଗିୟାର୍, “ବାଃ! ମନ୍ଦିର୍ ଧାସ୍କୁସ୍ ଆରୁ ତିନ୍ ଦିନ୍ ଭିତ୍ରେ କାମୁ ଆଲାସ୍! 30ନିନ୍ କ୍ରୁଶ୍ତି ଏତ୍ତା ଆରୁ ନିଜ୍କେନିଜ୍ ବାଛାବା।” 31ମୁଖ୍ୟା ପୁରୋହିତ୍ଜାମାର୍, ଆରୁ ପଣ୍ତିତ୍ଜାମାର୍ହି ଆସ୍କି ମାଜାକ୍ ଉଡ଼ାବାଲିୟାର୍, ଆରୁ ତାମ୍-ତାମ୍ ଏନ୍ନେ କାଚ୍ନେଖ୍ରା ଲାଗ୍ଗିୟାର୍, “ଇସ୍ ଦୁସ୍ରାରିନ୍ ତା ବାଛାବାଚାସ୍, ଲେକିନ୍ ଇସ୍ ନିଜ୍କେ ବାଛାବାଗେ ପଲ୍ଲାଲ୍ଦାସ୍। 32ଇସ୍ରାଏଲ୍ ଜାମାର୍ଘି ରାଜା ଖ୍ରୀସ୍ତ୍, ଆକ୍କୁନିନ୍ କ୍ରୁଶ୍ତି ଏତ୍ତାବାରା ଏସ୍କେ କା ଏମ୍ ଇବନ୍ ଏରିକିରି ବିଶ୍ଵାସ୍ କାମମ୍।” ଆରୁ ଏକାର୍ ଯୀଶୁସ୍ଗାନେ କ୍ରୁଶ୍ନୁ ଠୋକ୍ଚ୍କାରାଚାର୍ ଆବ୍ଡ଼ାର୍ହି ଆସ୍କି ଅପ୍ମାନ୍ କାମାଗେ ଲାଗ୍ଗିୟାର୍।
ଯୀଶୁସ୍କି ମରନ୍
(ମାତିସ୍ ୨୭:୪୫-୫୬; ଲୁକାସ୍ ୨୩:୪୪-୪୯; ଯୋହାନ୍ ୧୯:୨୮-୩୦)
33ବାର ବାଜେନ୍ତି ଆଡ଼୍ତି ବିଡ଼ିନ୍ତା ତିନ୍ବାଜେତକ୍ ପୁରା ଦେଶ୍ନୁ ଉହା ମାନ୍ଚାକେରା, 34ଲାଗ୍ଭାଗ୍ ତିନ୍ବାଜେଗେ ଯୀଶୁସ୍ ଜୋର୍ସେ ଚିର୍ରା ରାଇକିରି ତେଙ୍ଗିୟାସ୍, “ଏଲୋଇ, ଏଲୋଇ, ଲାମା ସାବାଖ୍ତାନୀ?” ଇଦ୍ଘି ମାନେ, “ହେ ଏଙ୍ଘା ପାର୍ମେଶ୍ୱାର୍, ହେ ଏଙ୍ଘା ପାର୍ମେଶ୍ୱାର୍, ନିନ୍ ଏଙ୍ଗାନ୍ ଏନ୍ଦେର୍ଗେ ଆମ୍ବେଇଚ୍କାଏ?” 35ଇବନ୍ ମେନିକିରି ଚାହାନୁ ଇଜ୍ଜକା ଆଲାର୍ଘି ଭିତର୍ନୁ, ଏକାର୍-ଏକାର୍ ତେଙ୍ଗିୟାର୍, “ଏରା, ଇସ୍ ଏଲିୟାସ୍ସିନ୍ ମେହାଁଲ୍ଦାସ୍।” 36ଆରୁ ଅର୍ତୁସ୍ କୁଦିୟାରାଇକିରି କେରାସ୍ ଆରୁ ସ୍ପଞ୍ଜବନ୍ ହାଡ଼୍ଖା ଅଙ୍ଗୁର୍ ରାସେନୁ ବୋତ୍ଥାସ୍, ଆରୁ ଆବନ୍ ଠେଙ୍ଗାନୁ ଲାଗାବାଚାସ୍ ଆରୁ ଯୀଶୁସ୍କେ ହାପ୍ପାଗେ ଚିଚ୍ଚାସ୍ ଆରୁ ତେଙ୍ଗିୟାସ୍, “ରା ତା! ଏର୍ଦାତ୍, ଏଲିୟାସ୍ ଇସିନ୍ ଏତ୍ତତାଗେ ବାରାଲ୍ଦାସ୍ କା ମାଲ୍ଲା।” 37ଲେକିନ୍ ଯୀଶୁସ୍ ଜୋର୍ସେ ଚିର୍ରା ରାଇକିରି କେଚ୍ଚାସ୍କେରାସ୍। 38ଆରୁ ମନ୍ଦିର୍ତା ପାର୍ଦାଦ୍ ମିଁତି କିୟାଁଜୁଟି ଏଟ୍ରିକିରି ଦୁଇଖଣ୍ ମାନ୍ଚାକେରା। 39ତାଙ୍ଘା ଆଘ୍ଲି ପଲ୍ଟନ୍ଜାମାର୍ଘି ଅଣ୍ଟା ମୁଖ୍ୟାସ୍ ଇଜ୍ଜକାଚାସ୍, ଯୀଶୁସ୍କି ଏନ୍ନେ ରକମ୍ ଖିନାନ୍ ଏରିକିରି ତେଙ୍ଗିୟାସ୍, “ସତ୍ତୁନିନ୍ ଇ ଆଲାସ୍, ପାର୍ମେଶ୍ଵାର୍ସ୍କି ହାଦ୍ଦୁ ରାଚାସ୍!” 40ୟୋଁଲୋକ୍ ମାଏକିନିଆଁର୍ହି ଗେଚ୍ଛାନ୍ତି ଏରାଲିୟାର୍: ଆବ୍ଡ଼ାର୍ଘି ଭିତର୍ନୁ ମାରିୟାମ୍ ମାଗ୍ଦାଲୀନୀ, ଛୋଟେ ୟାକୁବ୍, ଆରୁ ଯୋଷେସ୍କି ତାଙ୍ଗ୍ୟ ମାରିୟାମ୍, ଆରୁ ଶାଲୋମୀ ରାଚାର୍। 41ଯେତ୍କବାକେନ୍ ଯୀଶୁସ୍ ଗାଲିଲୀନୁ ରାଚାସ୍ ହତ୍କବାକେନ୍ ଆବ୍ଡ଼ାର୍ ଆସ୍କି ପାଛ୍ଲି କାଇକିରି ସେବା କାମାଲିୟାର୍; ଆରୁ ଯେରୁଶାଲେମ୍ସ୍ତି ତାଙ୍ଘାଗାନେ ବାର୍ଚ୍କା, ଆରୁ ଢେର୍ ମାଏକିନିଆଁର୍ହି ଏରାଲିୟାର୍ ।
ଯୀଶୁସିନ୍ ମାଡ଼୍ନା
(ମାତିସ୍ ୨୭:୫୭-୬୧; ଲୁକାସ୍ ୨୩:୫୦-୫୬; ଯୋହାନ୍ ୧୯:୩୮-୪୨)
42ପାବିତାର୍ ଉଲ୍ଲାଘି ଆଘ୍ଲି ଉଲ୍ଲାଦ୍ ତିୟାରିଘି ଉଲ୍ଲା ରାଚା, ହୁ ଉଲ୍ଲା ବିଡ଼ି ଅକ୍କିୟାକେରା, 43ହାରାମାଥିୟା ପାଡ଼ାନୁ ଯୋଷେଫ୍ ନାମେଘି ଅଣ୍ଟା ଆଲାସ୍ ରାଚାସ୍, ଆସ୍ ୟାହୁଦୀ ଜାମାର୍ଘି ସାଭାନ୍ତା ଅଣ୍ଟା ସଦସ୍ୟ ରାଚାସ୍। ଆସ୍ ନିଜେ ପାର୍ମେଶ୍ଵାର୍ସ୍କି ରାଜୀଘି ଆଶ୍ରା ଏରାଲିୟାସ୍, ଆସ୍ ସାହସ୍ ଧାରିକିରି ପିଲାତୁସ୍କି ଚାହାଗେ କେରାସ୍ ଆରୁ ଆସିନ୍ ଯୀଶୁସ୍କି ମାଁଣାନ୍ ନିଚାସ୍। 44ଲେକିନ୍ ଆସ୍ କେଚ୍ଚାସ୍ କେରାସିନ୍ ଇବନ୍ ମେନିକିରି ପିଲାତୁସ୍ ଆଚ୍ମିତ୍ ମାନ୍ଚାସ୍କେରାସ୍; ଆରୁ ପଲ୍ଟନ୍ଜାମାର୍ଘି ମୁଖିଆସିନ୍ ଚାହାଗେ ମେଁହିକିରି ଆସିନ୍ ମେନ୍ଚାସ୍ କା, “ଆସ୍ କାଁଏ ଢେର୍ ଡେରି ମାନ୍ଚାଦିନ୍ କେଚ୍ଚାସ୍ କେରାସିନ୍ ଯେ?” 45ଆରୁ ଆ ପଲ୍ଟନ୍ର୍ଘି ମୁଖ୍ୟାସ୍ତି ପିଲାତୁସ୍ ଖବର୍ ହାଖ୍ଖୀକିରି, ଯୋଷେଫ୍ସ୍କେ ମାଁଣାନ୍ ଚିଚ୍ଚାସ୍। 46ଯୋଷେଫ୍ସ୍ ଅଣ୍ଟା ଛିଟ୍ଚିଢ଼ା ହେନ୍ଦିକିରି ଅନ୍ଦ୍ରାସ୍, ଆରୁ ଯୀଶୁସିନ୍ କ୍ରୁଶ୍ତି ଏତ୍ତାଚାସ୍ ଆରୁ ଆ ଚିଢ଼ାତି ଆସିନ୍ ଗୁଢ଼ିୟାଚାସ୍, ଆରୁ ପାର୍ତ୍ତାନୁ ଖୋଲ୍କା ଅଣ୍ଟା ମାସ୍ଣାନୁ ଆସିନ୍ ଉଇଏଚାସ୍, ଆରୁ ମାସ୍ଣାଘି ଘୁମାନୁ ଅଣ୍ଟା ଚାଁଚା ଢୁଲେଇଚିଚ୍ଚାସ୍। 47ଯୀଶୁସିନ୍ ଏକା ଆଡ୍ଡାନୁ ଉଇୟା କେରା ଆବନ୍ ମାରିୟାମ୍ ମାଗ୍ଦାଲୀନୀ ଆରୁ ଯୋଷେସ୍କି ତାଙ୍ଗ୍ୟ ମାରିୟାମ୍ ଏରିୟାର୍।
16ଯୀଶୁସ୍ କେଚ୍ଚକାନ୍ତି ଉଜ୍ଜାଲ୍ଦାସ୍
(ମାତିସ୍ ୨୮:୧-୮; ଲୁକାସ୍ ୨୪:୧-୧୨; ଯୋହାନ୍ ୨୦:୧-୧୦)
1ପାବିତାର୍ ଉଲ୍ଲାଘି ପାଛ୍ଲି, ମାରିୟାମ୍ ମାଗ୍ଦାଲୀନୀ, ୟାକୁବ୍ସ୍କି ତାଙ୍ଗ୍ୟ ମାରିୟାମ୍, ଆରୁ ଶାଲୋମୀ ବାସ୍ନା ଇସୁଙ୍ଗ୍ ହେନ୍ଦିୟାର୍, ଏସ୍କେ କା ଆବ୍ଡ଼ାର୍ କାଇକିରି ଯୀଶୁସ୍କି ମେଦୁନୁ ଖାସାଗେ ଅଙ୍ଗର୍। 2ଆରୁ ହାପ୍ତାଘି ପହ୍ଲେ ଉଲ୍ଲା ଭୋର୍ ପାଇରିନ୍, ଆବ୍ଡ଼ାର୍ ମାସ୍ଣାସାନ୍ କେରାର୍ ହତ୍କବାକେନ୍ ବିଡ଼ି ଆର୍ଗ୍କିଚା, 3ଆବ୍ଡ଼ାର୍ ତାମ୍-ତାମ୍ କାଚ୍ଚନେଖ୍ରାଲିୟାର୍, “ନେଦ୍ ନାମାଗେ ମାସ୍ଣା ଘୁମାନ୍ତି ଚାଁଚାନ୍ ଢୁଲିୟର୍ଚର୍?” ଏନ୍ଦେର୍ଗେକା ଆଦ୍ ଢେର୍ ବାଡ଼୍କା ରାଚା। 4ହତ୍କବାକେନ୍ ଆବ୍ଡ଼ାର୍ ଏରିୟାର୍ କା, ଆସ୍ତା ବାଡ଼୍କା ଚାଁଚା ଢୁଲିୟାରାଚା କେର୍କିଚି। 5ଆବ୍ଡ଼ାର୍ ମାସ୍ଣା ଉଲା କର୍ଚାର୍ ଆରୁ ଧୋବ୍ ଚିଢ଼ା ଆତ୍ତ୍କା ଅଣ୍ଟା ଯୁୱାନ୍ କୁକ୍କସିନ୍ ତିନାତାରା ଅକ୍କାନ୍ ଏରିକିରି, ମୁରୁକ୍ ଆଚ୍ମିତ୍ ମାନ୍ଚାର୍ କେରାର୍। 6ଆଙ୍ଗେନ୍ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଆଚ୍ମିତ୍ ଆମାମାନା, ନିମ୍ କ୍ରୁଶ୍ନୁ କେଚ୍ଚକା ନାଜ୍ରେତ୍ତା ଯୀଶୁସିନ୍ ବେଦ୍ଦାଲ୍ଦାର୍। ଏନ୍ଦେର୍ଗେକା ଆସ୍ ଉଜ୍ଜିୟାସ୍ କେର୍କାଦାସ୍, ଆସ୍ ଇସାନ୍ ମାଲ୍କାସିନ୍; ଏରା, ଇ ଆଡ୍ଡାନୁ, ଆବ୍ଡ଼ାର୍ ତାଙ୍ଗାନ୍ ଉଇକାଚାର୍। 7ଲେକିନ୍ ନିମ୍ କାଇକିରି, ତାଙ୍ଘା ଚେଲାଜାମାରିନ୍ ଆରୁ ପାତ୍ରାସ୍ସିନ୍ ତେଙ୍ଗା କା, ଆସ୍ ନିହ୍ମାସ୍ତି ଆଘ୍ଲି ଗାଲିଲୀଗେ କାଲ୍ଦାସ୍। ଆସ୍ ନିମାନ୍ ଏସ୍କେ ତେଙ୍କାଚାସ୍, ଆନ୍ନେନ୍ ନିମ୍ ଆସିନ୍ ଆସାନ୍ ଏରର୍।” 8ଆଙ୍ଗେନ୍ ଆବ୍ଡ଼ାର୍ ମାସ୍ଣାସ୍ତି ଉର୍ଖିକିରି କୁଦିୟାରାତେ ବୁଙ୍ଗିୟାର୍କେରାର୍; ଏନ୍ଦେର୍ଗେକା ଆବ୍ଡ଼ାର୍ ଏଲ୍ଚ୍କାତି ଥାର୍ଥାର୍ରାଲିୟାର୍ ଆରୁ ଆଚ୍ମିତ୍ ମାନିକିରି ଘାବ୍ରାରା କାଲିୟାର୍; ଆରୁ ଆବ୍ଡ଼ାର୍ ନେକାନ୍ହି ଏନ୍ଦେର୍ହି ମା ତେଙ୍ଗିୟାର୍, ଏନ୍ଦେର୍ଗେକା ଆବ୍ଡ଼ାର୍ ଏଲ୍ଚିୟାର୍ କେର୍କାଚାର୍।
ମାରିୟାମ୍ ମାଗ୍ଦାଲୀନୀଗେ ଯୀଶୁସ୍ ଦର୍ଶନ୍ ଚିଆଲ୍ଦାସ୍
(ମାତିସ୍ ୨୮:୯,୧୦; ଯୋହାନ୍ ୨୦:୧୧-୧୮)
9ଯୀଶୁସ୍ ହାପ୍ତାଘି ପହ୍ଲେ ଉଲ୍ଲା ଭୋର୍ ପାଇରିନ୍ କେଚ୍ଚକାନ୍ନ୍ତି ଉଜ୍ଜିୟାସ୍, ଆସ୍ ଜାମାର୍ଘିନ୍ତି ଆଘ୍ଲି ମାରିୟାମ୍ ମାଗ୍ଦାଲୀନୀଗେ ଦର୍ଶନ୍ ଚିଚ୍ଚାସ୍, ନେଖାସ୍ତି କା ଆସ୍ ସାତ୍ତେଟା ଭୁତ୍ତୁନ୍ ଅଥ୍ର୍କାଚାସ୍। 10ଆଦ୍ କାଇକିରି ଯୀଶୁସ୍କି ସାଙ୍ଗେ ସାଥୀରିନ୍ ଖବର୍ ଚିଚ୍ଚାଦ୍ ଆବ୍ଡ଼ାର୍ ଦୁଃଖୁତି ଅହ୍ଲାଲିୟାର୍। 11ଆରୁ ଯେତ୍କବାକେନ୍ ଆବ୍ଡ଼ାର୍ ଆଦ୍ଘି କାତ୍ଥାବନ୍ ମେନ୍ଚାର୍ କା ଯୀଶୁସ୍ ଉଜ୍ଜିୟାସ୍ କେର୍କାଦାସ୍ ଆରୁ ତାଙ୍ଗାନ୍ ଦର୍ଶନ୍ ଚିଚ୍ଚକାଦାସ୍, ଇବନ୍ ମେନିକିରି ଆବ୍ଡ଼ାର୍ ବିଶ୍ଵାସ୍ ମା କାମ୍ଚାର୍।
ଦୁଇ ଲୋକ୍ ଚେଲାରିନ୍ ଯୀଶୁସ୍ ଦର୍ଶନ୍ ଚିଆଲ୍ଦାସ୍
12ଇ ଘାଟ୍ଣାଘି ପାଛ୍ଲି ଚେଲାର୍ଘି ଭିତର୍ନୁ ଦୁଇ ଲୋକ୍ ଅଣ୍ଟା ପାଡ଼ାତାରା କାଲିୟାର୍, ହତ୍କବାକେନ୍ ଆସ୍ ଦୁସ୍ରା ରୂପ୍ନୁ ଆବ୍ଡ଼ାର୍ଗେ ଦର୍ଶନ୍ ଚିଚ୍ଚାସ୍। 13ଆରୁ ଆବ୍ଡ଼ାର୍ କାଇକିରି ବାକି ଚେଲାଜାମାରିନ୍ ଇ ଖବର୍ ଶୁଣାବାଚାର୍, ଲେକିନ୍ ଚେଲାଜାମାର୍ ଆବ୍ଡ଼ାର୍ଘି କାତ୍ଥାନ୍ହି ବିଶ୍ୱାସ୍ ମା କାମ୍ଚାର୍।
ଯୀଶୁସ୍କି ଚେଲାଜାମାର୍ଗେ ଏନ୍ଦେର୍ କାମ୍ନା କାତ୍ଥା
(ମାତିସ୍ ୨୮:୧୬-୨୦; ଲୁକାସ୍ ୨୪:୩୬-୪୯; ଯୋହାନ୍ ୨୦:୧୯-୨୩; ପ୍ରେରିତ୍ ୧:୬-୮)
14ଇଦ୍ଘି ପାଛ୍ଲି ଏଗାର ଲୋକ୍ ଚେଲାର୍, ଅନାଗେ ଅକ୍କାଚାର୍ ବାକେନ୍ ଆସ୍ ଆବ୍ଡ଼ାର୍ଗେ ଦର୍ଶନ୍ ଚିଚ୍ଚାସ୍, ଆରୁ ଆବ୍ଡ଼ାର୍ଘି ଅବିଶ୍ୱାସ୍ ଆରୁ ମନ୍ଘି କାଠୋର୍ବନ୍ ଏରିକିରି ଧାମ୍କାଚାସ୍, ଏନ୍ଦେର୍ଗେକା ଏକାର୍ ଯୀଶୁସିନ୍ ଉଜ୍ଜକା ପାଛ୍ଲି ଏର୍କାଚାର୍, ଆବ୍ଡ଼ାର୍ଘି କାତ୍ଥାନ୍ ଚେଲାଜାମାର୍ ବିଶ୍ୱାସ୍ ମା କାମ୍ଚାର୍। 15ଆରୁ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ପୁରା ଦୁନିଆଁନୁ କାଇକିରି ଜାମା ମୁନୁଷ୍ ଜାତିୟାରିନ୍ ସୁସାମାଚାର୍ ଶୁଣାବା। 16ନେଦ୍ ବିଶ୍ଵାସ୍ କାମିକିରି ଆସ୍ନାନ୍ ହର୍ ଆବ୍ଡ଼ାର୍ ମୁକ୍ତି ହାଖ୍ଖର୍, ଲେକିନ୍ ନେଦ୍ ବିଶ୍ଵାସ୍ ମା କାମର୍ ଆବ୍ଡ଼ାରିନ୍ ଦୋଷୀ ଠାହ୍ରା କୋ; 17ଆରୁ ନେଦ୍ ବିଶ୍ଵାସ୍ କାମ୍ନାଏ ଆବ୍ଡ଼ାର୍ ଅଦ୍ଭୁତ୍ ନାଲ୍ଖୁ କାମା ଅଙ୍ଗର୍, ଆବ୍ଡ଼ାର୍ ଏଙ୍ଘା ନାମେ ହୋଇକିରି ଭୁତ୍ତୁଗୁଠିନ୍ ଅଥ୍ରର୍, ଆରୁ ପୁନା-ପୁନା ଭାଷାନୁ କାତ୍ଥା ତେଙ୍ଗର୍, 18ଆବ୍ଡ଼ାର୍ ନେର୍ରୁଗୁଠିନ୍ ହେଖ୍ଖାତି ଧାରର୍, ଆରୁ ଆବ୍ଡ଼ାର୍ ଜୀବନ୍ ହୁନା ଜିନିଷ୍ହି ହାପ୍ପର୍ ହାଲେହି ଆବ୍ଡ଼ାର୍ଘି ଏନ୍ଦେର୍ହି କ୍ଷତି ମା ମାନିଦ୍; ଆବ୍ଡ଼ାର୍ ବେହ୍ମରିୟାର୍ଘି ମିଆଁ ହେଖ୍ଖା ଉଇୟର୍, ଆରୁ ଆବ୍ଡ଼ାର୍ ବାନେ ମାନର୍କର୍।”
ଯୀଶୁସ୍କି ସରଗ୍ତାରା କାନା
(ଲୁକାସ୍ ୨୪:୫୦-୫୩; ପ୍ରେରିତ୍ ୧:୯-୧୧)
19ଏନ୍ନେନ୍ ପ୍ରାଭୁ ଯୀଶୁସ୍ ତାଙ୍ଘାଏ ଚେଲାଜାମାର୍ଗାନେ କାଚ୍ନେଖ୍ର୍କାଘି ପାଛ୍ଲି ସରଗ୍ ତାରା ହୁଆକେରାସ୍, ଆରୁ ପାର୍ମେଶ୍ଵାର୍ସ୍କି ତିନାପାଖା ଅକ୍କିୟାସ୍। 20ଲେକିନ୍ ଚେଲାଜାମାର୍ ଜାମାତାରା କାଇକିରି ସୁସାମାଚାର୍ ଶୁଣାବାଗେ ଲାଗ୍ଗିୟାର୍, ଆରୁ ପ୍ରାଭୁସ୍ ତାହ୍ମାଗାନେ ରାଚାସ୍, ଆରୁ ଆବ୍ଡ଼ାର୍ ଏନ୍ଦେର୍ ଏନ୍ଦେର୍ ଅଦ୍ଭୁତ୍ ନାଲ୍ଖୁ କାମ୍ଚାର୍, ଆବ୍ଡ଼ାର୍ଘି ଦ୍ୱାର୍ନୁ ଆଲାର୍ଗେ ପାତା ଚାଲ୍ରାକେରା କା ଆସ୍ ଏକା ସନ୍ଦେଶ୍ବନ୍ ତେଙ୍ଗାଲିୟାସ୍ ଆ ସନ୍ଦେଶ୍ ସତ୍ତୁ ରାଚା।