ମାତିସ୍

ମାତିସ୍‌କି ଲେଖ୍‌ଚ୍‌କା ସୁସାମାଚାର୍

ବହିଘି ପରିଚୟ

ମାତିସ୍‌କି ଲେଖ୍‌ଚ୍‌କା ସୁସାମାଚାର୍ ପୁନା ନିୟମ୍‌ଘି ପହ୍‌ଲେ ବହିଦ୍। ଇ ବହିନୁ ଯୀଶୁ ଖ୍ରୀସ୍ତ୍‌କି ଖୁସୀଘି ଖବର୍‌ଘି ବାରେ ଲେଖ୍‌ଚ୍‌କା ରାଇ। ଇ ବହିନ୍ ମାତିସ୍ ନାମେଘି ଅଣ୍ଟା ଆଲାସ୍ ଲେଖ୍‌ଚ୍‌କାଦାସ୍। ଆସ୍ ଯୀଶୁସ୍‌କି ଅଣ୍ଟା ଚେଲାସ୍ ରାଚାସ୍। ଆସ୍ ଅଣ୍ଟା ୟାହୁଦୀ ଆଲାସ୍ ରାଚାସ୍ ଆରୁ ମାଲ୍‌ଗୁଜାରୀ ଉକ୍‌ରୁ ରାଚାସ୍। ଆସ୍ ନିଜର୍ ଆଲାର୍‌ଘି ଲାଗାନ୍ ଇ ବହିନ୍ ଲେଖ୍‌ଚ୍‌କାଦାସ୍। ଆସ୍ ଆବ୍ଡ଼ାରିନ୍ ତେଙ୍ଗାଗେ ବେଦ୍ଦାଲିୟାସ୍ କା ପ୍ରାଭୁ ଯୀଶୁସ୍ ପାପ୍‌ତି ବାଛାବାନା ବାଲାସ୍। ପାର୍‌ମେଶ୍ୱାର୍‌ସ୍ ଇ ଦୁନିଆଁନ୍ତା ଜାମା ଆଲାରିନ୍ ପାପ୍‌ଘି ଦଣ୍ଡ୍‌ତି ବାଛାବାଗେ ବେଦ୍ଦାଲ୍‌ଦାସ୍, ପାର୍‌ମେଶ୍ୱାର୍‌ସ୍‌କି ବାଛାବାନାଘି ଉପାୟବନ୍ ଇ ବହିନୁ ପାଢ଼ା ଅଙ୍ଗର୍।

ମାତିସ୍‌କି ଲେଖ୍‌ଚ୍‌କା ସୁସାମାଚାର୍‌ଦ୍ ଇ ଖୁସୀଘି ଖବର୍ ଚିଇ କା ଯୀଶୁ ଖ୍ରୀସ୍ତ୍‌ସିନ୍ ଆ ବାଛାବୁ ଆଲାସ୍ ନେଖାଏ ବାର୍‌ନାଘି ଭବିଷତ୍ କାତ୍‌ଥା ତେଙ୍ଗାକେର୍‌କିଚା। ପାର୍‌ମେଶ୍ୱାର୍‌ସ୍ ପାଚ୍ଚା ନିୟମ୍‌ନୁ ହାଜାର୍-ହାଜାର୍ ବଛର୍‌ଘି ପହ୍‌ଲେ ନିଜର୍ ଆଲାର୍‌ଗେ କାମ୍‌ଚ୍‌କା କାତ୍‌ଥା ଚିଚ୍‌କାବନ୍ ଆ ବାଛାବୁ ଆଲାସ୍‌କି ଦ୍ୱାର୍‌ନୁ ପୁରା କାମ୍‌ଚାସ୍। ଇ ରୀଝୁଘି ଖବର୍ ୟାହୁଦୀୟାର୍‌ଗେ ଖାଲି ମାଲ୍ଲା। ଏକାସାନ୍ କା ଯୀଶୁସ୍ ଜନମ୍ ମାନ୍‌ଚାସ୍ ଆରୁ ତାଙ୍ଘା ଲାଲନ୍‌ପାଲନ୍ କାମାକେରା, ଲେକିନ୍ ପୁରା ଦୁନିଆଁଘି ଲାଗାନ୍।

ମାତିସ୍‌କି ଲେଖ୍‌ଚ୍‌କା ସୁସାମାଚାର୍‌ବନ୍ ବହୁତ୍ ସାବ୍‌ଧାନ୍‌ତି ବର୍ଣ୍ଣନା କାମା କେର୍‌କିଚି। ଇଦ୍‌ଘି ସୁରୁଦ୍ ଯୀଶୁ ଖ୍ରୀସ୍ତ୍‌ସ୍‌କି ଜନମ୍‌ତି ମାନିଦ୍, ଆନ୍ତିନ୍ ଆସ୍‌କି ଆସ୍ନାନ୍ ଆରୁ ପରୀକ୍ଷାଘି ବର୍ଣ୍ଣନା ରାଇ, ଆରୁ ଗାଲିଲୀ ପ୍ରଦେଶ୍‌ନୁ ପ୍ରଚାର୍, ଶିକ୍ଷା ଆରୁ ବାନେ କାମ୍‌ନାଘି ବର୍ଣ୍ଣନା କାମା କେର୍‌କିଚି। ଇଦ୍‌ଘି ପାଛ୍‌ଲି ଇ ସୁସାମାଚାର୍‌ନୁ ଯୀଶୁସ୍‌କି ଗାଲିଲୀନ୍ତି ଯେରୁଶାଲେମ୍‌ତକ୍ କାନା ଆରୁ ଯୀଶୁସ୍‌କି ଜୀବନ୍‌ଘି ଆଖ୍‌ରୀ ହାପ୍ତାଘି ଘାଟ୍‌ଣାଘି ବାରେନୁ ବର୍ଣ୍ଣନା କାମା କେର୍‌କିଚି। ଏକାଘି ଆଖ୍‌ରୀ କା ଆସ୍‌କି କ୍ରୁଶ୍‌ନୁ ଠୋକ୍‌ନାଦ୍ ଆରୁ ଉଜ୍ଜନାଦ୍।

ଇ ସୁସାମାଚାର୍‌ନୁ ଯୀଶୁସିନ୍ ଅଣ୍ଟା ମାହାନ୍ ଗୁରୁସ୍‌କି ରୂପ୍‌ନୁ ତେଙ୍ଗାକେର୍‌କିଚି। ଆସ୍‌କେ ପାର୍‌ମେଶ୍ୱାର୍‌ସ୍‌କି ନିୟମ୍‌ଘି ବ୍ୟାଖ୍ୟା କାମାଗେ ହକ୍ ରାଇ, ଆସ୍ ପାର୍‌ମେଶ୍ୱାର୍‌ସ୍‌କି ରାଜୀଘି ବାରେ ଶିକ୍ଷା ଚିଦାସ୍। ନିମ୍ ଇ ସୁସାମାଚାର୍‌ବନ୍ ବାନେକିରି ପାଢ଼ା ଆରୁ ଇ ସୁସାମାଚାର୍‌ନ୍ତା ଶିକ୍ଷାବନ୍ ମାନା ଆରୁ ବାନେକିରି ଉଜ୍ଜା ହାଲେ ପାର୍‌ମେଶ୍ୱାର୍‌ସ୍ ନିମାଗେ ଢେର୍ ଆଶୀର୍ବାଦ୍ ଚିୟସ୍।

ରୂପ୍-ରେଖା:

ବାଉଁଶାର୍ ଆରୁ ଯୀଶୁ ଖ୍ରୀସ୍ତ୍‌ସ୍‌କି ଜନମ୍ ୧:୧—୨:୨୩

ଆସ୍ନାନ୍ ଚିଉ ଯୋହାନ୍‌ସ୍‌କି ସେବା ନାଲ୍‌ଖୁ ୩:୧-୧୨

ଯୀଶୁସ୍‌କେ ଯୋହାନ୍‌ସ୍ ଆସ୍ନାନ୍ ଚିଆଲ୍‌ଦାସ୍ ୩:୧୩—୪:୧୧

ଗାଲିଲୀନୁ ଯୀଶୁସ୍‌କି ଆଲାରିନ୍ ସେବା କାମ୍‌ନା ୪:୧୨—୧୮:୨୫

ଗାଲିଲୀନ୍ତି ଯେରୁଶାଲେମ୍‌ତକ୍ କାନା ୧୯:୧—୨୦:୩୪

ଯେରୁଶାଲେମ୍‌ନୁ ଆଖ୍‌ରୀ ହାପ୍ତା ୨୧:୧—୨୭:୬୬

ପ୍ରାଭୁ ଯୀଶୁସ୍‌କି ଉଜ୍ଜନା ଆରୁ ଏଥ୍‌ର୍‌ନା ୨୮:୧-୨୦

ଯୀଶୁସ୍‌କି ବାଉଁଶାର୍

(ଲୁକାସ୍ ୩:୨୩-୩୮)

¹ଆବ୍ରାହାମ୍‌ସ୍‌କି ହାଦ୍ଦୁର୍ ଆରୁ ଦାଉଦ୍‌ସ୍‌କି ହାଦ୍ଦୁର୍ ଯୀଶୁ ଖ୍ରୀସ୍ତ୍‌କି ବାଉଁଶାର୍। ²ଆବ୍ରାହାମ୍‌ସ୍‌ତି ଇସାକ୍‌ସ୍ ଜନମ୍ ମାନ୍‌ଚାସ୍, ଇସାକ୍‌ସ୍‌ତି ୟାକୁବ୍‌ସ୍ ଜନମ୍ ମାନ୍‌ଚାସ୍, ୟାକୁବ୍‌ସ୍‌ତି ଯୁଦାସ୍ ଆରୁ ତାଙ୍ଘା ଭାଇଜାମାର୍ ଜନମ୍ ମାନ୍‌ଚାର୍। ³ଯୁଦାସ୍ ଆରୁ ତାମାର୍‌ସ୍‌ତି ଫେରସ୍ ଆରୁ ସେରହ ଜନମ୍ ମାନ୍‌ଚାର୍, ଫେରସ୍‌ତି ହିଷ୍ରୋଣ୍‌ସ୍ ଜନମ୍ ମାନ୍‌ଚାସ୍, ହେସ୍ରୋଣସ୍‌ତି ଅରାମ୍‌ସ୍ ଜନମ୍ ମାନ୍‌ଚାସ୍, ⁴ଅରାମ୍‌ସ୍‌ତି ଅମ୍ମୀନାଦାବ୍‌ସ୍ ଜନମ୍ ମାନ୍‌ଚାସ୍, ଅମ୍ମୀନାଦାବ୍‌ସ୍‌ତି ନହଶୋନ୍‌ ଆରୁ ନହ୍‌ଶୋନ୍ ସଲ୍‌ମୋନ୍‌ସ୍ ଜନମ୍ ମାନ୍‌ଚାସ୍। ⁵ସଲ୍‌ମୋନ୍ ଆରୁ ରାହବ୍‌ସ୍‌ତି ବୋୟାଜ୍‌ସ୍ ଜନମ୍ ମାନ୍‌ଚାସ୍, ବୋୟାଜ୍ ଆରୁ ରୁତ୍‌ସ୍‌ତି ଓବେଦ୍‌ସ୍ ଜନମ୍ ମାନ୍‌ଚାସ୍, ଆରୁ ଓବେଦ୍‌ସ୍‌ତି ଯିଶୟସ୍ ଜନମ୍ ମାନ୍‌ଚାସ୍। ⁶ଆରୁ ଯିଶୟସ୍‌ତି ଦାଉଦ୍ ରାଜାସ୍ ଜନମ୍ ମାନ୍‌ଚାସ୍।

ଆରୁ ଦାଉଦ୍‌ସ୍‌ତି ଶୁଲେମାନ୍‌ସ୍ ଜନମ୍ ମାନ୍‌ଚାସ୍, ଶୁଲେମାନ୍‌ସ୍‌କି ତାଙ୍ଗ୍ୟ ପହ୍‌ଲେ ଉରିୟସ୍‌କି ମାଏକିନିଆଁ ରାଚା। ⁷ଶୁଲେମାନ୍‌ସ୍‌ତି ରିହବିୟାମ୍‌ସ୍ ଜନମ୍ ମାନ୍‌ଚାସ୍, ରିହବିୟାମ୍‌ସ୍‌ତି ଅବୀୟାସ୍ ଜନମ୍ ମାନ୍‌ଚାସ୍। ⁸ଅବୀୟାସ୍‌ତି ଆସାସ୍ ଜନମ୍ ମାନ୍‌ଚାସ୍, ଆସାସ୍‌ତି ଯିହୋଶାଫଟ୍ ଜନମ୍ ମାନ୍‌ଚାସ୍, ଯିହୋଶାଫଟ୍‌ସ୍ତି ଯୋରାମ୍‌ସ୍ ଜନମ୍ ମାନ୍‌ଚାସ୍, ଆରୁ ଯୋରାମ୍‌ସ୍‌ତି ଉଜିୟସ୍ ଜନମ୍ ମାନ୍‌ଚାସ୍। ⁹ଉଜିୟସ୍‌ତି ଯୋଥମ୍‌ସ୍ ଜନମ୍ ମାନ୍‌ଚାସ୍, ଯୋଥମ୍‌ସ୍‌ତି ଆହସ୍ ଜନମ୍ ମାନ୍‌ଚାସ୍ ଆରୁ ଆହସ୍‌ତି ହିଜକୀୟସ୍ ଜନମ୍ ମାନ୍‌ଚାସ୍। ¹⁰ହିଜକୀୟସ୍‌ତି ମନଃଶିସ୍ ଜନମ୍ ମାନ୍‌ଚାସ୍, ମନଃଶିସ୍‌ତି ଆମୋନ୍‌ସ୍ ଜନମ୍ ମାନ୍‌ଚାସ୍ ଆରୁ ଆମୋନ୍‌ସ୍‌ତି ଯୋଶିୟସ୍ ଜନମ୍ ମାନ୍‌ଚାସ୍। ¹¹ଆରୁ ବନ୍ଦୀ ମାନିକିରି ବାବିଲନ୍ କାନା ସାମାୟନୁ ଯୋଶିୟସ୍‌ତି ଯିକନୀୟ, ଆରୁ ତାଙ୍ଘାଏ ଭାଇଜାମାର୍ ଜନମ୍ ମାନ୍‌ଚାର୍।

¹²ବନ୍ଦୀ ମାନିକିରି ବାବିଲନ୍ ଆଣ୍‌ସ୍‌କା ପାଛ୍‌ଲି ଯିକନୀୟସ୍ତି ଶଲ୍‌ଥୀଏଲସ୍ ଜନମ୍ ମାନ୍‌ଚାସ୍, ଆରୁ ଶଲ୍‌ଥୀଏଲସ୍‌ତି ଜିରୁବ୍‌ବାବେଲସ୍ ଜନମ୍ ମାନ୍‌ଚାସ୍, ¹³ଜିରୁବ୍‌ବାବେଲସ୍‌ତି ଅବୀହୁଦ୍‌ସ୍ ଜନମ୍ ମାନ୍‌ଚାସ୍, ଅବୀହୁଦ୍‌ସ୍‌ତି ଏଲୀୟାକିମ୍‌ସ୍ ଜନମ୍ ମାନ୍‌ଚାସ୍ ଆରୁ ଏଲୀୟାକିସ୍ତି ଆସୋରସ୍ ଜନମ୍ ମାନ୍‌ଚାସ୍। ¹⁴ଆସୋରସ୍‌ତି ସାଦୋକ୍‌ସ୍ ଜନମ୍ ମାନ୍‌ଚାସ୍, ସାଦୋକ୍‌ସ୍‌ତି ଆଖିମ୍‌ସ୍ ଜନମ୍ ମାନ୍‌ଚାସ୍ ଆରୁ ଆଖିମ୍‌ସ୍‌ତି ଏଲିହୁଦ୍‌ସ୍ ଜନମ୍ ମାନ୍‌ଚାସ୍। ¹⁵ଏଲିହୁଦ୍‌ସ୍‌ତି ଏଲିୟାଜାର୍‌ସ୍ ଜନମ୍ ମାନ୍‌ଚାସ୍, ଏଲିୟାଜାର୍‌ସ୍‌ତି ମାତ୍ତାନ୍‌ସ୍ ଜନମ୍ ମାନ୍‌ଚାସ୍ ଆରୁ ମାତ୍ତାନ୍‌ସ୍‌ତି ୟାକୁବ୍‌ସ୍ ଜନମ୍ ମାନ୍‌ଚାସ୍। ¹⁶ୟାକୁବ୍‌ସ୍‌ତି ଯୋଷେଫ୍‌ସ୍ ଜନମ୍ ମାନ୍‌ଚାସ୍, ଏକାସ୍ କା ମାରିୟାମ୍‌ଘି ଆଲାସ୍ ରାଚାସ୍, ଆରୁ ମାରିୟାମ୍‌ସ୍‌ତି ଯୀଶୁସ୍ ଜନମ୍ ମାନ୍‌ଚାସ୍, ଏକାସିନ୍ କା ଖ୍ରୀସ୍ତ୍‌ ବାନାଏ।

¹⁷ଏନ୍ନେନ୍ ଆବ୍ରାହାମ୍‌ସ୍‌ତି ଦାଉଦ୍‌ସ୍‌ତକ୍ ଚଉଦ ପିଢ଼ି ଆରୁ ଦାଉଦ୍‌ସ୍‌ତି ବାବିଲୋନ୍ ଦେଶ୍‌ଗେ ବନ୍ଦୀ ମାନିକିରି ଆଣ୍‌ସ୍‌ନାତକ୍ ଚଉଦ ପିଢ଼ି ଆରୁ ବନ୍ଦୀ ମାନିକିରି ବାବିଲନ୍ ଦେଶ୍‌ତି ଆଣ୍‌ସ୍‌ନାତକ୍ ଖ୍ରୀସ୍ତ୍‌ତକ୍ ଚଉଦ ପିଢ଼ି ମାନ୍‌ଚା।

ଯୀଶୁ ଖ୍ରୀସ୍ତ୍‌କି ଜନମ୍

(ଲୁକାସ୍ ୧:୨୬-୩୮; ୨:୧-୭)

¹⁸ଯୀଶୁ ଖ୍ରୀସ୍ତ୍‌ସ୍‌କି ଜନମ୍ ଏନ୍ନେ ମାନ୍‌ଚା, କା ଆସ୍‌କି ତାଙ୍ଗ୍ୟ ମାରିୟାମ୍‌ଘି ପିନ୍ଧେନ୍ ଯୋଷେଫ୍‌ସ୍‌ଗାନେ ମାନ୍‌ଚ୍‌କିଚା, ଆବ୍ଡ଼ାର୍‌ଘି ବେଞ୍ଜା ମାନ୍ନାଘି ଆଘ୍‌ଲିନ୍ ମାରିୟାମ୍‌ଦ୍ ପାବିତାର୍ ଆତ୍ମାତି ମେଦୁନୁ ରାଇ ବୁଲି ଆହ୍‌ତାରାଚା। ¹⁹ତାଙ୍ଘା ମାନ୍ନାବାଲା ଆଲାସ୍‌ ଯୋଷେଫ୍‌ସ୍ ଅଣ୍ଟା ଧାର୍ମିକ୍ ଆଲାସ୍ ରାଚାସ୍, ଆସ୍ ମାରିୟାମ୍‌ବନ୍ ବଦ୍‌ନାମ୍ କାମାଗେ ମା ଚାହାଁଲିୟାସ୍, ହୁଦ୍‌ଘିଲାଗାନ୍ ମାରିୟାମ୍‌ବନ୍ କାଡ଼େ-କାଡ଼େ ଆମ୍ବାଚାଗେ ସୋଚାଲିୟାସ୍। ²⁰ଯେତ୍‌କବାକେନ୍ ଯୋଷେଫ୍‌ସ୍ ଇ କାତ୍‌ଥାବନ୍ ସୋଚାଲିୟାସ୍‌ସିନ୍ କା ପ୍ରାଭୁସ୍‌କି ତାର୍‌ତି ତାଏକା ସରଗ୍‌ଦୂଁତ୍ ସାପାନ୍‌ନୁ ଏଥ୍‌ରିକିରି ତେଙ୍ଗିୟାଦ୍, “ହେ ଦାଉଦ୍‌ସ୍‌କି ବାଉଁଶାର୍ ଯୋଷେଫ୍! ମାରିୟାମ୍‌ବନ୍ ନିଜର୍ ମାଏକିନିଆଁ କାମାଗେ ଆମା ଏଲ୍‌ଚା, ଏନ୍ଦେର୍‌ଗେକା ଏକା ହାଦ୍ଦୁ ତାଙ୍ଘା ଗରଭ୍‌ନୁ ରାଇ ଆଦ୍ ପାବିତାର୍ ଆତ୍ମାତି ରାଇ। ²¹ଆଦ୍ ଅଣ୍ଟା କୁକ୍କହାଦ୍ଦୁ ଜନମ୍ କାମଦ୍ ଆରୁ ନିନ୍ ତାଙ୍ଘା ନାମେ ଯୀଶୁ ଉଇକେ, ଏନ୍ଦେର୍‌ଗେକା ଆସ୍ ନିଜର୍ ଆଲାରିନ୍ ତାହ୍ମା ପାପ୍‌ତି ବାଛାବସ୍।”

²²ଏକା ବଚନ୍‌ବନ୍ ପ୍ରାଭୁସ୍ ନାବୀଜାମାର୍‌ଘି ଦ୍ୱାର୍‌ନୁ ତେଙ୍କାଚାସ୍, ଆଦ୍ ପୁରା ମାନ୍ନାଘି ଲାଗାନ୍ ଇବ୍ଡ଼ା ଜାମାଦ୍ ଘାଟ୍‌ରା: ²³“ଏରା, ଅଣ୍ଟା କୁଆଁରୀଦ୍ ମେଦୁନୁ ରଦ୍ ଆରୁ ଅଣ୍ଟା କୁକ୍କହାଦ୍ଦୁ ଜନମ୍ କାମଦ୍, ଆରୁ ଆସ୍‌କି ନାମେ ଇମ୍ମାନୁଏଲ୍ ଉଇୟାକଦ୍,” ଇଦ୍‌ଘି ମତ୍‌ଲବ୍ ପାର୍‌ମେଶ୍ୱାର୍‌ସ୍ ନାହ୍ମାଗାନେ ରାଦାସ୍। ²⁴ଆନ୍ତିନ୍ ଯୋଷେଫ୍‌ସ୍ ହାନ୍ଦ୍‌ର୍‌ନାନ୍‌ତି ଏଜ୍ରିକିରି ପ୍ରାଭୁସ୍‌କି ଦୂଁତ୍‌ଘି ହୁକୁମ୍ ଲେଖା ମାରିୟାମ୍‌ବନ୍ ତାଙ୍ଘା ଆଲିଘି ରୂପ୍‌ନୁ ତାଙ୍ଘାସାନ୍ ଅନ୍ଦ୍ରାସ୍: ²⁵ଆରୁ ହାଦ୍ଦୁ ଜନମ୍ ମା ମାନ୍ନାତକ୍ ଆସ୍ ଆଦ୍‌ଘି ଚାହାଗେ ମା କେରାସ୍: ଆରୁ ଆସ୍ ଆ ହାଦ୍ଦୁସ୍‌କି ନାମେ ଯୀଶୁ ଉଇୟାସ୍।

ଜ୍ଞାନୀ ଜାମାର୍ ବାରାଲ୍‌ନାଏ

¹ହେରୋଦ୍ ରାଜାସ୍‌କି ସାମାୟନୁ ୟାହୁଦା ପ୍ରଦେଶ୍‌ଘି ବେତ୍‌ଲେହେମ୍ ପାଡ଼ାନୁ ଯୀଶୁସ୍‌କି ଜନମ୍ ମାନ୍‌ଚା। ତା ପୁରୁବ୍ ଦେଶ୍‌ତି ୟୋଁଲୋକ୍ ୨:୧ ଜ୍ଞାନୀ ଆଲାର୍ ବିନ୍‌କୋଘି ବାରେନୁ ବାଗ୍ଗେ ଆହ୍‌ନାଏଜ୍ଞାନୀ ଜାମାର୍ ଯେରୁଶାଲେମ୍ ସହର୍‌ଗେ ବାରିକିରି ମେନ୍‌ଚାର୍, ²“ୟାହୁଦୀ ଜାମାର୍‌ଘି ରାଜାସ୍ ଏକାସ୍‌କି ଜନମ୍ ମାନ୍‌ଚ୍‌କିଚି ଆସ୍ ଏକାସାନ୍ ରାଦାସ୍? ଏନ୍ଦେର୍‌ଗେକା ଏମ୍ ପୁରୁବ୍ ଦେଶ୍‌ନୁ ତାଙ୍ଘାଏ ବିନ୍‌କୋବନ୍ ଏରିକିରି ତାଙ୍ଗାନ୍ ଯୋହାର୍ କାମାଗେ ବାର୍‌ଚ୍‌କାଦାମ୍।” ³ଇବନ୍ ମେନିକିରି ହେରୋଦ୍ ରାଜାସ୍ ଆରୁ ତାଙ୍ଘାଗାନେ ଜାମା ଯେରୁଶାଲେମ୍ ତା ଆଲାର୍ ଘାବ୍‌ରାରାଚାର୍‌କେରାର୍। ⁴ଆନ୍ତିନ୍ ହେରୋଦ୍‌ସ୍ ଆଲାର୍‌ଘି ଜାମା ମୁଖ୍ୟା ପୁରୋହିତ୍‌ର୍‌ ଆରୁ ପଣ୍ତିତ୍ ଜାମାରିନ୍ ଅନ୍‌ଠାଣ୍ କାମିକିରି ଖ୍ରୀସ୍ତ୍‌ସ୍‌କି ଜନମ୍ ଏକାସାନ୍ ମାନଦ୍ ଆବ୍ଡ଼ାରିନ୍ ମେନ୍‌ଚାସ୍। ⁵ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ୟାହୁଦା ପ୍ରଦେଶ୍‌ନ୍ତା ବେତ୍‌ଲେହେମ୍ ପାଡ଼ାନୁ, ଏନ୍ଦେର୍‌ଗେକା ନାବୀଜାମାର୍‌ଘି ଦ୍ୱାର୍‌ନୁ ଏନ୍ନେ ଲେଖ୍‌ଚ୍‌କା ରାଇ:

⁶‘ହେ ୟାହୁଦା ପ୍ରଦେଶ୍‌ନ୍ତା ବେତ୍‌ଲେହେମ୍ ୟାହୁଦା ପ୍ରଦେଶ୍‌ନ୍ତା

ଜାମାର୍‌ଘିନ୍ତି ମାହାନ୍ ପାଡ଼ାଏ ନିନ୍ ଏନ୍ଦ୍ରିନ୍‌ହି ରିତୀତି ୟାହୁଦାଘି ଶାସନ୍ କାମୁର୍‌ସ୍‌ତି ଛୋଟେ ମାଲ୍‌ଦିନ୍;

ଏନ୍ଦେର୍‌ଗେକା ନିଙ୍ଘାସ୍ତି ଏନ୍ନେ ଅଣ୍ଟା ରାଜାସ୍ ଜନମ୍ ମାନସ୍,

ଏକାସ୍ କା ଏଙ୍ଘାଏ ପର୍‌ଜା ଇସ୍ରାଏଲୀରିନ୍ ଏରୋସ୍ ହଜସ୍।’”

⁷ଆନ୍ତିନ୍ ହେରୋଦ୍‌ସ୍ ଜ୍ଞାନୀ ଆଲାରିନ୍ କାଡ଼େ-କାଡ଼େ ମେହିଁକିରି ବିନ୍‌କୋ ଠିକ୍ କେତ୍‌କ ସାମାୟନୁ ଏଥ୍‌ରା ଆବନ୍ ମେନ୍‌ଚାସ୍, ⁸ଆନ୍ତିନ୍ ଆସ୍ ଆବ୍ଡ଼ାରିନ୍ ଏନ୍ନେ ତେଙ୍ଗିକିରି ବେତ୍‌ଲେହେମ୍ ତାଇୟାସ୍, “କାଲା, ଆ ହାଦ୍ଦୁସ୍‌କି ବାରେନୁ ଠିକ୍-ଠିକ୍ ପାତା ଲାଗାବାକେ ଆରୁ ହାଦ୍ଦୁସିନ୍ ହାକ୍କା ପାଛ୍‌ଲି ଏଙ୍ଗାନ୍ ଖବର୍ ଚିକେ ଏସ୍‌କେ କା ଏନ୍‌ହି କନ୍ ଆରୁ ଆସିନ୍ ହାଁଠୁୱାରିକିରି ଯୋହାର୍ କାମନ୍।”

⁹ଆବ୍ଡ଼ାର୍ ରାଜାସ୍‌କି କାତ୍‌ଥା ମେନିକିରି କେରାର୍ ଆରୁ ଏକା ବିନ୍‌କୋବନ୍ ପୁରୁବ୍‌ତାରା ଏର୍‌କାଚାର୍ ଆଦ୍ ତାହ୍ମା ଆଘ୍‌ଲି-ଆଘ୍‌ଲି କେରାଦ୍, ଆରୁ ଏକାସାନ୍ ହାଦ୍ଦୁସ୍ ରାଚାସ୍, ଆସାନ୍ ମିଆଁ ଇଜ୍ଜା କେରାଦ୍। ¹⁰ଆବ୍ଡ଼ାର୍ ଆ ବିନ୍‌କୋବନ୍ ଏରିକିରି ମୁରୁକ୍ ଖୁସୀ ମାନ୍‌ଚାର୍ କେରାର୍। ¹¹ଆବ୍ଡ଼ାର୍ ଆ ଆଡ଼୍‌ପା ଉଲା କର୍‌ଚାର୍ ଆରୁ ହାଦ୍ଦୁସିନ୍ ତାଙ୍ଗ୍ୟ ମାରିୟାମ୍ ଗାନେ ଏରିୟାର୍, ଆରୁ ହାଁଠୁୱାରିକିରି ହାଦ୍ଦୁସିନ୍ ଯୋହାର୍ କାମ୍‌ଚାର୍, ଆରୁ ନିଜର୍-ନିଜର୍ ଥାଇଲିବନ୍ ଖୋଲିକିରି ସୋନା, ୨:୧୧ ଲୋବାନ୍‌ଘି ମତ୍‌ଲବ୍ ଇଦ୍ ଅଣ୍ଟା ଦାମିକା ହୋପ୍ପା। ଇଦ୍‌ଘି ଜେର୍‌ରେବନ୍ ଆଲାର୍ ସୁଖା ପାଉଡର୍ କାମିକିରି ବେଭାର୍ କାମାଲିଆର୍। ଏକାଦ୍ କା ବାନେ ବାସ୍‌ନା ଚିଆଲିୟା। ଇସ୍ରାଏଲ୍‌ନୁ ଇବନ୍ ପୁରୋହିତ୍‌ଜାମାର୍ ବେଭାର୍ କାମାଲିଆର୍।ଲୋବାନ୍ ଆରୁ ୨:୧୧ ଗାନ୍ଧ୍‌ରାସ୍ ଘି ମତ୍‌ଲବ୍ ବାନେ ବାସ୍‌ନା ଚିନା ଜେର୍‌ରେବନ୍ ୟାହୁଦୀ ଆଲାର୍ ପାବିତାର୍ ଇସୁଙ୍ଗ୍ ଲେଖା ବେଭାର୍ କାମାଲିଆର୍, ହୁ ଇସୁଙ୍ଗ୍‌ତି ଆଲାରିନ୍ ଆଭିଷେକ୍ କାମାଲିଆର୍।ଗାନ୍ଧ୍‌ରାସ୍ ଭେଁଟ୍ କାମ୍‌ଚାର୍। ¹²ଆନ୍ତିନ୍ ହେରୋଦ୍ ରାଜାସ୍‌କି ଚାହାଗେ ମା କିର୍‌ରାଗେ, ସପନ୍‌ନୁ ଚେତାବାନୀ ହାଖ୍ଖୀକିରି ଆବ୍ଡ଼ାର୍ ଦୁସ୍‌ରା ପାବୁ ମାନିକିରି ତାହ୍ମା ଦେଶ୍‌ଗେ କିର୍‌ରିୟାର୍ କେରାର୍।

ଯୋଷେଫ୍‌ସ୍ ମାରିୟାମ୍ ଆରୁ ବଲୋ ଯୀଶୁସ୍‌ଗାନେ ମିଶର୍ ଦେଶ୍‌ଗେ କାଲ୍‌ଦାସ୍।

¹³ଜ୍ଞାନୀ ଜାମାର୍‌ଘି ବୁଙ୍କା ପାଛ୍‌ଲି ପ୍ରାଭୁସ୍‌କି ଅଣ୍ଟା ଦୂଁତ୍ ସାପାନ୍‌ନୁ ଯୋଷେଫ୍‌ସିନ୍ ଦର୍ଶନ୍ ଚିଇକିରି ତେଙ୍ଗିୟାଦ୍, “ଉସ୍‌କାରା, ହାଦ୍ଦୁସିନ୍ ଆରୁ ତାଙ୍ଗ୍ୟବନ୍ ହୋଇକିରି ମିଶର୍ ଦେଶ୍‌ଗେ ବୁଙ୍ଗାକାଲା; ଏନ୍ ଯେତ୍‌କତକ୍ ନିଙ୍ଗାନ୍ ମା ତେଙ୍ଗନ୍, ହତ୍‌କତକ୍ ନିନ୍ ଆସାନିନ୍ ରାକେ; ଏନ୍ଦେର୍‌ଗେକା ହେରୋଦ୍ ରାଜାସ୍ ହାଦ୍ଦୁସିନ୍ ପିଟାଗେ ବେଦ୍ଦାଲ୍‌ଦାସ୍।”

¹⁴ଆଙ୍ଗେନ୍ ଆସ୍ ଉସ୍‌କାରାଚାସ୍ ଆରୁ ମାଁହାନିନ୍ ହାଦ୍ଦୁସିନ୍ ଆରୁ ତାଙ୍ଗ୍ୟବନ୍ ହୋଇକିରି ମିଶର୍ ଦେଶ୍‌ଗେ ବୁଙ୍ଗିୟାସ୍ କେରାସ୍, ¹⁵ଆରୁ ହେରୋଦ୍‌ସ୍‌କି ଖିନାତକ୍ ଆସ୍ ଆସାନିନ୍ ରାଚାସ୍। ଏସ୍‌କେ କା ନାବୀଜାମାର୍‌ଘି ଦ୍ୱାର୍‌ନୁ ପ୍ରାଭୁସ୍‌କି ଇ ତେଙ୍କା କାତ୍‌ଥା ପୁରା ମାନ୍‌ଚା କା: “ଏନ୍ ଏଙ୍ଘା ହାଦ୍ଦୁସିନ୍ ମିଶର୍ ଦେଶ୍‌ତି ମେଁହ୍‌କାନ୍।”

¹⁶ଯେତ୍‌କବାକେନ୍ ହେରୋଦ୍‌ସ୍ ଏରିୟାସ୍ କା, ଜ୍ଞାନୀ ଜାମାର୍ ତାଙ୍ଗାନ୍ ଧୋଖା ଚିଚ୍‌କାନାଏ, ତା ଆସ୍ ମୁରୁକ୍ ଖୀସାରାଚାସ୍ କେରାସ୍ ଆରୁ ଜ୍ଞାନୀ ଜାମାର୍‌ଘି ତେଙ୍କା ଠିକ୍ ସାମାୟନୁ ବେତ୍‌ଲେହେମ୍ ଆରୁ ଚାହାଚାହାନ୍ତା ପାଡ଼ା ଗୁଠିନ୍ତା ଦୁଇ ବଛର୍‌ତା ଆରୁ ଦୁଇ ବଛର୍‌ସ୍‌ତି ଛୋଟେ ହାଦ୍ଦୁରିନ୍ ପିଟାଗେ ତାଙ୍ଘା ଆଲାରିନ୍ ହୁକୁମ୍ ଚିଚ୍ଚାସ୍। ¹⁷ହତ୍‌କବାକେନ୍ ଯିରିମୀୟା ନାବୀସ୍‌କି ଦ୍ୱାର୍‌ନୁ ତେଙ୍କା ଇ ବଚନ୍ ପୁରା ମାନ୍‌ଚା:

¹⁸“ରାମାନୁ ଅହ୍ଲନା ଆରୁ ମୁରୁକ୍ ଦୁଃଖୁ ମାନ୍ନାଘି ଅଣ୍ଟା ଶବଦ୍ ମେନ୍ଦ୍ରାଦ୍; ରାହେଲ୍ ତାଙ୍ଘା ହାଦ୍ଦୁର୍‌ଘି ଲାଗାନ୍ ଅହ୍ଲାଲିୟାଦ୍, ଆରୁ ଆଦ୍ କାଡ଼େ-କାଡ଼େ ରାଗେ ମା ବେଦ୍ଦାଲିୟା, ଏନ୍ଦେର୍‌ଗେକା ଆବ୍ଡ଼ାର୍ ଆକ୍କୁନ୍ ମାଲ୍‌କାରିନ୍।”

ଯୋଷେଫ୍‌ସ୍ ମାରିୟାମ୍ ଆରୁ ବଲୋ ଯୀଶୁସ୍‌ଗାନେ ମିଶର୍ ଦେଶ୍‌ତି କିର୍‌ରାଲ୍‌ଦାସ୍

¹⁹ହେରୋଦ୍ ରାଜାସ୍‌କି କେଚ୍ଚ୍‌କା ପାଛ୍‌ଲି, ପ୍ରାଭୁସ୍‌କି ଅଣ୍ଟା ଦୂଁତ୍ ମିଶର୍ ଦେଶ୍‌ନୁ ଯୋଷେଫ୍‌ସ୍‌କେ ସାପାନ୍‌ନୁ ଦର୍ଶନ୍ ଚିଇକିରି ତେଙ୍ଗିୟାଦ୍, ²⁰“ଉସ୍‌କାରା, ହାଦ୍ଦୁସିନ୍ ଆରୁ ତାଙ୍ଗ୍ୟବନ୍ ହୋଇକିରି ଇସ୍ରାଏଲ୍ ଦେଶ୍‌ଗେ କାଲା, ଏନ୍ଦେର୍‌ଗେକା ଏକାର୍ ହାଦ୍ଦୁସିନ୍ ପିଟା ବେଦ୍ଦାଲିୟାର୍, ଆର୍ କେଚ୍ଚାର୍ କେରାର୍।” ²¹ଆଙ୍ଗେନ୍ ଯୋଷେଫ୍‌ସ୍ ଉସ୍‌କାରାଚାସ୍ ଆରୁ ହାଦ୍ଦୁସିନ୍ ଆରୁ ତାଙ୍ଗ୍ୟବନ୍ ହୋଇକିରି ଇସ୍ରାଏଲ୍ ଦେଶ୍‌ଗେ ବାର୍‌ଚାସ୍। ²²ଲେକିନ୍ ଇବନ୍ ମେନିକିରିକା ଆର୍‌ଖିଲାଉସ୍ ତାହ୍ମା ବୁଆ ହେରୋଦ୍‌ସ୍‌କି ଆଡ୍ଡାନୁ ୟାହୁଦା ପ୍ରଦେଶ୍‌ନ୍ତା ରାଜା ମାନ୍‌ଚ୍‌କାଦାସ୍, ତା ଆସ୍ ଆସାନ୍ କାଲାଗେ ଏଲ୍‌ଚିୟାସ୍। ଲେକିନ୍ ସାପାନ୍‌ନୁ ପାର୍‌ମେଶ୍ଵାର୍‌ସ୍‌ତି ଚେତାବାନୀ ହାଖ୍ଖୀକିରି ଗାଲିଲୀ ପ୍ରଦେଶ୍‌ଗେ କେରାସ୍, ²³ଆରୁ ଆସାନ୍ ନାଜ୍‌ରେତ୍ ନାମେଘି ଅଣ୍ଟା ସହର୍‌ନୁ ରାଚାସ୍, ଏସ୍‌କେ କା ନାବୀଜାମାର୍‌ଘି ଦ୍ୱାର୍‌ନୁ ତେଙ୍କା ଇ କାତ୍‌ଥା ପୁରା ମାନ୍ନାଦ୍ କା, “ଆସ୍ ନାଜ୍‌ରେତ୍‌ତା ବୁଲି ଆହାକସ୍।”

ଆସ୍ନାନ୍ ଚିଉ ଯୋହାନ୍‌ସ୍‌କି ସେବା ନାଲ୍‌ଖୁ

(ମାର୍‌କୁସ୍ ୧:୧-୮; ଲୁକାସ୍ ୩:୧-୧୮; ଯୋହାନ୍ ୧:୬-୮,୧୫-୩୪)

¹ଯେତ୍‌କବାକେନ୍ ଯୀଶୁସ୍ ନାଜ୍‌ରେତ୍‌ନୁ ରାଲିୟାସ୍ ହୁ ଉଲ୍ଲାନୁ ଆସ୍ନାନ୍ ଚିଉ ଯୋହାନ୍‌ସ୍ ବାରିକିରି ୟାହୁଦା ପ୍ରଦେଶ୍‌ନ୍ତା ଶୁନ୍‌ଶାନ୍ ଆଡ୍ଡାନୁ ପ୍ରଚାର୍ କାମାଗେ ଲାଗ୍ଗିୟାସ୍: ²“ପାସ୍ତାରା, ଏନ୍ଦେର୍‌ଗେକା ସରଗ୍ ରାଜୀଦ୍ ଚାହାନୁ ବାର୍‌ଚା କେର୍‌କିଚି।” ³ଇସ୍ ଆସିନ୍ ଏକାସ୍‌କି ବାରେ କା ଇଶାୟାହ୍‌ସ୍ ନାବୀସ୍‌କି ଦ୍ୱାର୍‌ନୁ ତେଙ୍ଗାକେର୍‌କିଚା: “ଶୁନ୍‌ଶାନ୍ ଆଡ୍ଡାନୁ ଅଣ୍ଟା ଚିର୍‌ରାରୁ ଆଲାସ୍‌କି ଶବଦ୍ ମେନ୍ଦ୍ରା କା, ପ୍ରାଭୁସ୍‌କି ଲାଗାନ୍ ପାବୁ ତିୟାର୍ କାମା, ଆରୁ ଆସ୍‌କି ପାବୁ ସିଧା କାମା।”

⁴ଆରୁ ଆ ଯୋହାନ୍‌ସ୍ ଓଁଟ୍‌ଘି ଚୁଟ୍ଟିତି ତିୟାର୍ ମାନ୍‌ଚ୍‌କା ଚିଢ଼ା ଆତ୍ତାଲିୟାସ୍, ଆରୁ କାଡ଼୍‌ମାନୁ ଚାପ୍‌ଟାଘି କାସ୍‌ନା ହିଁରାଲିୟାସ୍। ଆସ୍ ବଖ୍ଖୋ ମହାଁଲିୟାସ୍ ଆରୁ ଜଙ୍ଗଲ୍ ତା ତିନିରାସେ ହାପ୍ପାଲିୟାସ୍। ⁵ହତ୍‌କବାକେନ୍ ଯେରୁଶାଲେମ୍ ଆରୁ ଗୋଟା ୟାହୁଦା ପ୍ରଦେଶ୍‌, ଆରୁ ଯାର୍‌ଦାନ୍ ଯୋଡ଼ୁଘି ଚାହାଚାହାନ୍ତା ଆରୁ ଜାମା ଆଡ୍ଡାନ୍ତା ଆଲାର୍ ଉର୍‌ଖିକିରି ଯୋହାନ୍‌ସ୍‌କି ଚାହାଗେ ବାରାଗେ ଲାଗ୍ଗିୟାର୍। ⁶ଆରୁ ଆବ୍ଡ଼ାର୍ ନିଜର୍-ନିଜର୍ ପାପ୍‌ବନ୍ ସ୍ୱୀକାର୍ କାମ୍‌ଚାର୍ ଆରୁ ଯାର୍‌ଦାନ୍ ଯୋଡ଼ୁନୁ ଯୋହାନ୍‌ସ୍ ଆବ୍ଡ଼ାରିନ୍ ଆସ୍ନାନ୍ ଚିଚ୍ଚାସ୍।

⁷ଯେତ୍‌କବାକେନ୍ ଯୋହାନ୍‌ସ୍ ଏରିୟାସ୍ କା ଢେର୍ ୩:୭ ଫାରିସୀ ଆରୁ ସାଦ୍ଦୂକୀଜାମାର୍ ୟାହୁଦୀ ଧରମ୍‌ତା ଆଗୁୱା ରାଚାର୍ଫାରିସୀ ଆରୁ ସାଦ୍ଦୂକୀଜାମାର୍ ତାଙ୍ଘା ଚାହାଗେ ଆସ୍ନାନ୍ ହୁଆଗେ ବାରାଲ୍‌ନାଏ ତା, ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ହେ ବିଷ୍ ରୁ ୩:୭ ନେର୍‌ରୁଘି ହାଦ୍ଦୁ ମତ୍‌ଲବ୍ ଫାରିସୀ ଆରୁ ସାଦ୍ଦୂକୀରିନ୍ ନେର୍‌ରୁଗାନେ ତୁଲ୍‌ନା କାମା କେର୍‌କିଚି ଏସ୍‌କେ କା ନେର୍‌ରୁନୁ ବିଷ୍ ନିନ୍ଦିକିରି ହନ୍ନେନ୍ ଆବ୍ଡ଼ାର୍‌ଘି ମନ୍‌ନୁ କପଟ୍ ନିନ୍ଦିକିରିନେର୍‌ରୁଘି ହାଦ୍ଦୁରୋ, ବାର୍‌ନାବାଲା ଖୀସ୍‌ତି ବୁଙ୍ଗାଗେ ନିମାନ୍ ନେଦ୍ ଚେତାବାନୀ ଚିଚ୍ଚାର୍?” ⁸ହୁଦ୍‌ଘିଲାଗାନ୍ ପାସ୍ତାରା ଆରୁ ପାସ୍ତାରାଚ୍‌କା ଲେଖା ଉଜ୍ଜା। ⁹ଆରୁ ନିଜର୍-ନିଜର୍ ମନ୍‌ନୁ ଇବନ୍ ଆମା ସୋଚା କା ଆବ୍ରାହାମ୍‌ସ୍ ନାହ୍ମା ବୁଆସ୍; ଏନ୍ଦେର୍‌ଗେକା ଏନ୍ ନିମାନ୍ ତେଙ୍ଗାଲ୍‌ଦାନ୍ କା ପାର୍‌ମେଶ୍ଵାର୍‌ସ୍ ଇ ଚାଁଚାନ୍ତି ଆବ୍ରାହାମ୍‌ସ୍‌କି ଲାଗାନ୍ ହାଦ୍ଦୁବଚ୍ଚ କାମାଅଙ୍ଗସ୍। ¹⁰ଆରୁ ଆକ୍କୁନ୍ ମାନ୍ନୁଘି ମୂଲିନୁ ବୁଡ଼ିୟା ହୋତ୍‌କା ରାଇଦ୍, ହୁଦ୍‌ଘିଲାଗାନ୍ ଏକା ମାନ୍ନୁଦ୍ ବାନେ ଫାଡ଼ୁ ମା ହାଞ୍ଜି, ଆବନ୍ ଛପିକିରି ଚିଚ୍ଚୁନୁ ଖେବ୍ଡ଼ାଚାକୋ।

¹¹“ଏନ୍‌ତା ନିମାନ୍ ପାସ୍ତାରାନାଘି ଆସ୍ନାନ୍ ଆମ୍ମୁତି ଚିଆଲ୍‌ଦାନ୍, ଲେକିନ୍ ଏକାସ୍ ଏଙ୍ଘାଏ ପାଛ୍‌ଲି ବାର୍‌ନାବାଲା ରାଦାସ୍, ଆସ୍ ଏଙ୍ଘାସ୍‌ତି ବାଗ୍ଗେ ଶକ୍ତିଶାଲୀ ରାଦାସ୍; ଏନ୍ ଆସ୍‌କି ଜୁତା ଉଠାବାନାଘି ଲାଇଗ୍ ମାଲ୍‌ଦାନ୍। ଆସ୍ ନିମାଗେ ପାବିତାର୍ ଆତ୍ମା ଆରୁ ଚିଚ୍ଚୁତି ଆସ୍ନାନ୍ ଚସ୍। ¹²ଏସ୍‌କେ ଅଣ୍ଟା ଚାଷୀ ଆଲାସ୍ କେଁତେର୍‌ତି ଗହମ୍ ଆରୁ କୁଟ୍ଟାବନ୍ ଭିନେ କାମ୍‌ଦାସ୍, ଆନ୍ନେନ୍ ଆସ୍ ବାନେ ଆଲାରିନ୍ ଖାରାପ୍ ଆଲାର୍‌ସ୍‌ତି ଭିନେ କାମସ୍ ଆରୁ ଏସ୍‌କେ ବାନେ ଗହମ୍‌ବନ୍ ମଁଣା ବାଖ୍‌ରାନୁ ଉଇୟା କାଇ, ଆନ୍ନେ ଆସ୍ ବାନେ ଆଲାରିନ୍ ତାଙ୍ଗାଗେ ଚାଜସ୍ ଆରୁ ଏସ୍‌କେ କୁଟ୍ଟାବନ୍ ମା ତେବ୍‌ର୍‌ନା ଚିଚ୍ଚୁନୁ ବାସ୍‌ସା କାଇ, ଆନ୍ନେ ଆସ୍ ଖାରାପ୍ ଆଲାରିନ୍ ଚିଚ୍ଚୁନୁ ବାସ୍‌ସଚସ୍।”

ଯୀଶୁସ୍‌କେ ଯୋହାନ୍‌ସ୍ ଆସ୍ନାନ୍ ଚିଆଲ୍‌ଦାସ୍

(ମାର୍‌କୁସ୍ ୧:୯-୧୧; ଲୁକାସ୍ ୩:୨୧,୨୨; ଯୋହାନ୍ ୧:୩୧-୩୪)

¹³ହତ୍‌କବାକେନ୍ ଯୀଶୁସ୍ ଗାଲିଲୀନ୍ତି ଯାର୍‌ଦାନ୍ ଯୋଡ଼ୁଗେ ଯୋହାନ୍‌ସ୍‌ତି ଆସ୍ନାନ୍ ହୁଆଗେ ବାର୍‌ଚାସ୍। ¹⁴ଲେକିନ୍ ଯୋହାନ୍‌ସ୍ ଏନ୍ନେ ତେଙ୍ଗିକିରି ଆସିନ୍ ମାନା କାମାଗେ ଲାଗ୍ଗିୟାସ୍, “ଏଙ୍ଗାଗେ ତା ନିହ୍ମା ହେଖ୍ଖାନ୍ତି ପାବିତାର୍ ଆତ୍ମାତି ଆସ୍ନାନ୍ ହୋନାଘି ଦାର୍‌କାର୍ ରାଇ, ଆରୁ ନିମ୍ ଏଙ୍ଘା ଚାହାଗେ ବାର୍‌ଚ୍‌କାଦାର୍?” ¹⁵ଲେକିନ୍ ଯୀଶୁସ୍ ଆସିନ୍ ଯାବାବ୍ ଚିଚ୍ଚାସ୍, “ଆକ୍କୁନ୍ ତା ଏନ୍ନେନିନ୍ ମାନାଗେ ଚିଆ, ଏନ୍ଦେର୍‌ଗେକା ନାମାଗେ ଏନ୍ନେନିନ୍ ଜାମା ଧରମ୍‌ଘି ନିୟମ୍‌ବନ୍ ପୁରା କାମ୍‌ନା ଉଚିତ୍ ରାଇ।” ଆଙ୍ଗେନ୍ ଯୋହାନ୍‌ସ୍ ଆସ୍‌କି କାତ୍‌ଥାନୁ ରାଜୀ ମାନ୍‌ଚାସ୍। ¹⁶ଆରୁ ଯୀଶୁସ୍ ଆସ୍ନାନ୍ ହୋଇକିରି ହୁଙ୍ଗେନିନ୍ ଆମ୍ମୁନ୍ତି ଉର୍‌ଖିୟାସ୍, ଆରୁ ଏରା, ଆକାଶ୍ ଖୋଲ୍‌ରା କେରା, ଆରୁ ଆସ୍ ପାର୍‌ମେଶ୍ଵାର୍‌ସ୍‌କି ଆତ୍ମାବନ୍ ପେର୍‌ୱାଁଘି ରୂପ୍‌ନୁ ଏତ୍ତନାନ୍ ଆରୁ ତାଙ୍ଘା ମିଆଁ ବାର୍‌ନାନ୍ ଏରିୟାସ୍। ¹⁷ଆରୁ ଏରା, ଆକାଶ୍‌ତି ଅଣ୍ଟା ଶବଦ୍ ମେନ୍ଦ୍ରା: “ଇସ୍ ଏଙ୍ଘାଏ ଦୁଲାଡ଼ି ହାଦ୍ଦୁସ୍, ଇସ୍‌କି ମିଆଁ ଏନ୍ ମୁରୁକ୍ ଖୁସ୍ ରାଦାନ୍।”

ଶାଏତାନ୍ ଯୀଶୁସିନ୍ ବିଡ଼୍‌ଚେ ଏରାଲିଦ୍

(ମାର୍‌କୁସ୍ ୧:୧୨-୧୩; ଲୁକାସ୍ ୪:୧-୧୩)

¹ଆନ୍ତିନ୍ ଯୀଶୁସ୍ ପାବିତାର୍ ଆତ୍ମାତି ଭାର୍‌ପୁର୍ ମାନିକିରି ଯାର୍‌ଦାନ୍ ଯୋଡ଼ୁନ୍ତି କିର୍‌ରିୟାସ୍। ହତ୍‌କବାକେନ୍ ଆତ୍ମାଦ୍ ଯୀଶୁସିନ୍ ଶୁନ୍‌ଶାନ୍ ଆଡ୍ଡାଗେ ଅଚ୍ଚାକେରା, ଏନ୍ଦେର୍‌ଗେକା ଶାଏତାନ୍‌ଦ୍ ଆସିନ୍ ବିଡ଼୍‌ଚେ ଏରିୟାଦ୍। ²ଆରୁ ଆସ୍ ଉଲ୍ଲାନ୍ ମାଁହାନ୍ ଚାଲିଶ୍ ଦିନ୍‌ତକ୍, ଏନ୍ଦେର୍‌ହି ମାଲ୍ଲା ଅନୁସ୍ ମହୁଁସ୍, ଆରୁ ଇଦ୍‌ଘି ପାଛ୍‌ଲି ଆସ୍‌କେ କିଡ଼ା ଲାଗ୍ଗିୟାଦ୍। ³ଆଙ୍ଗେନ୍ ଶାଏତାନ୍ ଆସ୍‌କି ଚାହାଗେ ବାରିକିରି ତେଙ୍ଗିୟାଦ୍, “ଯଦି ନିନ୍ ପାର୍‌ମେଶ୍ଵାର୍‌ସ୍‌କି ହାଦ୍ଦୁୟ, ହାଲେ ହୁକୁମ୍ ଚିଆ କା ଇ ଚାଁଚାଦ୍ ଆସ୍‌ମା ମାନକୋ।” ⁴ଲେକିନ୍ ଯୀଶୁସ୍ ଯାବାବ୍ ଚିଚ୍ଚାସ୍: “ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇଦ୍ କା, ‘ଆଲାର୍ ଆସ୍‌ମାତି ଖାଲି ମା ଉଜ୍ଜନାଏ, ଲେକିନ୍ ପାର୍‌ମେଶ୍ଵାର୍‌ସ୍‌କି ଥୁମ୍‌ଣାନ୍ତି ଉର୍‌କା ଅଣ୍ଟା-ଅଣ୍ଟା ବଚନ୍‌ତି ଉଜ୍ଜନାଏ।’”

⁵ଆନ୍ତିନ୍ ଶାଏତାନ୍‌ଦ୍ ଯୀଶୁସିନ୍ ପାବିତାର୍ ସହର୍ ଯେରୁଶାଲେମ୍‌ଗେ ଅଚ୍ଚା କେରାଦ୍ ଆରୁ ମନ୍ଦିର୍‌ତା ଛାତ୍ ମିଆଁ ଇଲ୍‌ତିକିରି ତେଙ୍ଗିୟାଦ୍, ⁶“ଯଦି ନିନ୍ ପାର୍‌ମେଶ୍ଵାର୍‌ସ୍‌କି ହାଦ୍ଦୁୟ, ହାଲେ ଇସ୍‌ତି କିୟାଁ ଡେଗାଚା; ଏନ୍ଦେର୍‌ଗେକା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇଦ୍: ‘ଆସ୍ ନିଙ୍ଘା ବାରେନୁ ତାଙ୍ଘା ଦୂଁତ୍‌ଜାମାରିନ୍ ହୁକୁମ୍ ଚିୟସ୍ କା, ନିଙ୍ଘା ହେଡ୍ଡୁ ଚାଁଚାତି ଚୋଟ୍ ମା ଲାଗ୍ଗବୁଲି ଆବ୍ଡ଼ାର୍ ନିଙ୍ଗାନ୍ ହେଖ୍ଖାତି ପାଣ୍‌ସର୍।’” ⁷ଯୀଶୁସ୍ ଶାଏତାନ୍‌ବନ୍ ତେଙ୍ଗିୟାସ୍, “ପାବିତାର୍ ଶାସ୍ତ୍ରନୁ ଆରୁହି ଲେଖ୍‌ଚ୍‌କା ରାଇଦ୍ କା: ‘ନିନ୍ ନିଙ୍ଘାଏ ପ୍ରାଭୁ ପାର୍‌ମେଶ୍ଵାର୍‌ସିନ୍ ବିଡ଼୍‌ଚେ ଆମୁ ଏରୁ।’”

⁸ଇଦ୍‌ଘି ପାଛ୍‌ଲି ଶାଏତାନ୍‌ଦ୍ ଯୀଶୁସିନ୍ ଅଣ୍ଟା ମେଚ୍ଛା ପାର୍ତ୍ତା ମିଆଁ ଅଚ୍ଚାକେରା ଆରୁ ଦୁନିଆଁନ୍ତା ଜାମା ରାଜୀନ୍ ଆରୁ ଆଦ୍‌ଘି ଶୋଭା ଗୁଠିନ୍ ଏଦିକିରି ତେଙ୍ଗିୟାଦ୍, ⁹“ଯଦି ନିନ୍ ଏଙ୍ଗାନ୍ ହାଠୁୱାରିକିରି ଯୋହାର୍ କାମୟ ହାଲେ, ଏନ୍ ଇବ୍ଡ଼ା ଜାମାନ୍ ନିଙ୍ଗାଗେ ଚିଅନ୍‌ଲାଗନ୍।” ¹⁰ଆଙ୍ଗେନ୍ ଯୀଶୁସ୍ ଶାଏତାନ୍‌ବନ୍ ତେଙ୍ଗିୟାସ୍, “ହେ ଶାଏତାନ୍ ଏଙ୍ଘାସ୍‌ତି ବୁଙ୍ଗୁ କାଲ୍, ଏନ୍ଦେର୍‌ଗେକା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇଦ୍: ‘ନିନ୍ ନିଙ୍ଘା ପ୍ରାଭୁ ପାର୍‌ମେଶ୍ଵାର୍‌ସିନ୍ ଯୋହାର୍ କାମୟ, ଆରୁ ଖାଲି ଆସ୍‌କି ସେବା କାମୟ।’”

¹¹ଆଙ୍ଗେନ୍ ଶାଏତାନ୍‌ଦ୍ ଆସିନ୍ ଆମ୍ବିକିରି ବୁଙ୍ଗିୟା କେରା, ଆରୁ ଏରା, ସରଗ୍‌ଦୂଁତ୍‌ଜାମାର୍ ବାରିକିରି ଆସ୍‌କି ସେବା କାମାଗେ ଲାଗ୍ଗିୟାର୍।

ଗାଲିଲୀନୁ ଯୀଶୁସ୍ ସେବା ନାଲ୍‌ଖୁ କାମାଗେ ସୁରୁ କାମାଲ୍‌ଦାସ୍

(ମାର୍‌କୁସ୍ ୧:୧୪,୧୫; ଲୁକାସ୍ ୪:୧୪,୧୫,୩୧)

¹²ଯେତ୍‌କବାକେନ୍ ଯୀଶୁସ୍ ମେନ୍‌ଚାସ୍ କା ଯୋହାନ୍‌ସିନ୍ ବନ୍ଦୀ କାମ୍‌ଚେଇଚିଚ୍‌କାନାଏ, ତା ଆସ୍ ଗାଲିଲୀଗେ କେରାସ୍। ¹³ଆରୁ ଆସ୍ ନାଜ୍‌ରେତ୍ ସହର୍‌ବନ୍ ଆମ୍ବିକିରି କାଫାର୍‌ନାହୁମ୍ ସହର୍‌ନୁ ରାଗେ ଲାଗ୍ଗିୟାସ୍, ଏକାଦ୍ କା ଯୁବୁଲୁନ୍ ଆରୁ ନାପ୍‌ତାଲି ଏରିୟାଘି ହଁସ୍‌ରା ଖାଁଣିନୁ ରାଇଦ୍। ¹⁴ଏସ୍‌କେ କା ଇଶାୟାହ୍‌ସ୍ ନାବୀସ୍‌କି ଦ୍ୱାର୍‌ନୁ ତେଙ୍କା, ଇ କାତ୍‌ଥା ପୁରା ମାନ୍ନାଦ୍:

¹⁵“ଯୁବୁଲୁନ୍ ଦେଶ୍ ଆରୁ ନାପ୍‌ତାଲି ଦେଶ୍ ସାମ୍‌ଧୁର୍ ଚାହାନ୍ତା ଆରୁ ଯାର୍‌ଦାନ୍ ଯୋଡ଼ୁଘି ହାପାଖାନ୍ତା, ଦୁସ୍‌ରା ଜାତିୟାର୍‌ଘି ଗାଲିଲୀ ରାଚା। ¹⁶ଉହାନୁ ଅକ୍କୁ ଆଲାର୍, ଅଣ୍ଟା ବାଡ଼୍‌କା ବିଲ୍ଲୀ ଏରିୟାର୍; ଆରୁ ମରନ୍‌ଘି ଏଲ୍‌ଚ୍‌କାନୁ ନେଦ୍ ରାନାଏ, ଆବ୍ଡ଼ାର୍‌ଘି ମିଆଁ ବିଲ୍ଲୀ ଚାମ୍‌କାରାଚା।”

¹⁷ହୁ ସାମାୟନ୍ତିନ୍ ଯୀଶୁସ୍ ପ୍ରଚାର୍ କାମାଗେ ସୁରୁ କାମିକିରି ତେଙ୍ଗାଗେ ଲାଗ୍ଗିୟାସ୍, “ପାସ୍ତାରା ଏନ୍ଦେର୍‌ଗେକା ସରଗ୍ ରାଜୀଦ୍ ଚାହାନୁ ବାର୍‌ଚା କେର୍‌କିଚି।”

ଯୀଶୁସ୍ ତାଙ୍ଘା ପହେଲା ଚେଲାରିନ୍ ମେହାଁଲ୍‌ଦାସ୍

(ମାର୍‌କୁସ୍ ୧:୧୬-୨୦; ଲୁକାସ୍ ୫:୧-୧୧; ଯୋହାନ୍ ୧:୩୫-୪୨)

¹⁸ଯୀଶୁସ୍ ଗାଲିଲୀ ହଁସ୍‌ରା ଖାଁଣିନୁ କୁଦ୍ଦନାବାକେନ୍ ଦୁଇ ଭାଇରିନ୍ ଏରିୟାସ୍। ଶିମୋନ୍ ଏକାସିନ୍ କା ପାତ୍ରାସ୍ ବାଲିୟାର୍, ଆରୁ ତାଙ୍ଘା ଭାଇ ଆନ୍ଧ୍ରିୟାସ୍‌ସିନ୍ ଆବ୍ଡ଼ାର୍ ହଁସ୍‌ରାନୁ ଫିକା ଜାଲ୍ଲି ଆଚ୍ଛାଲିୟାର୍, ଏନ୍ଦେର୍‌ଗେକା ଆବ୍ଡ଼ାର୍ କେଉଁଟା ରାଚାର୍। ¹⁹ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏଙ୍ଘା ପାଛ୍‌ଲି ବାରା, ଏନ୍ ନିମାନ୍ କେଉଁଟାର୍‌ଘି ଲେଖା ବାନାବନ୍ ଏକାର୍ କା ଆଲାରିନ୍ ଏଙ୍ଘା ପାଛ୍‌ଲି-ପାଛ୍‌ଲି ଗୁଡ଼ିଆନା ବାଲା ବାନାବର୍।” ²⁰ହୁଙ୍ଗେନିନ୍ ଆବ୍ଡ଼ାର୍ ଜାଲ୍ଲିବନ୍ ଆମ୍ବିକିରି ଯୀଶୁସ୍‌କି ପାଛ୍‌ଲି-ପାଛ୍‌ଲି କେରାର୍।

²¹ଆସ୍‌ତି କାଟେ ଗେଚ୍ଛା ଆଘ୍‌ଲି କେର୍‌କାନ୍‌ତିନ୍, ଯୀଶୁସ୍ ଆରୁ ଦୁଇ ଭାଇରିନ୍ ଏରିୟାସ୍। ଆବ୍ଡ଼ାର୍ ଜେବେଦୀସ୍‌କି ହାଦ୍ଦୁର୍ ୟାକୁବ୍ ଆରୁ ତାଙ୍ଘା ଭାଇ ଯୋହାନ୍‌ସ୍ ରାଚାର୍। ଆବ୍ଡ଼ାର୍ ତାହ୍ମା ବୁଆ ଜେବେଦୀସ୍ ଗାନେ ଡଙ୍ଗାନୁ ତାହ୍ମା ଜାଲ୍ଲିନ୍ ସାଜାବାଲିୟାର୍, ଯୀଶୁସ୍ ଆବ୍ଡ଼ାରିନ୍‌ହି ମେହିଁୟାସ୍। ²²ଆଖାନେନ୍ ଆବ୍ଡ଼ାର୍ ଡଙ୍ଗା ଆରୁ ତାହ୍ମା ବୁଆସିନ୍ ଆମ୍ବିକିରି ଯୀଶୁସ୍‌କି ପାଛ୍‌ଲି-ପାଛ୍‌ଲି କେରାର୍।

ଯୀଶୁସ୍ ବେହ୍ମରିୟାରିନ୍ ବାନେ କାମାଲ୍‌ଦାସ୍

(ଲୁକାସ୍ ୬:୧୭-୧୯)

²³ଯୀଶୁସ୍ ଗାଲିଲୀ ରାଜୀନୁ କୁଦ୍ଦ୍‌ତେ ରାଚାସ୍, ଆରୁ ଆବ୍ଡ଼ାର୍‌ଘି ସାଭା ଆଡ଼୍‌ପାଗୁଠିନୁ ଉପ୍‌ଦେଶ୍ ଚିଆଲିୟାସ୍, ଆରୁ ପାର୍‌ମେଶ୍ଵାର୍‌ସ୍‌କି ରାଜୀଘି ସୁସାମାଚାର୍ ଶୁଣାବାଲିୟାସ୍ ଆରୁ ଆଲାର୍‌ଘି ଜାମା ରକମ୍‌ଘି ବେମାର୍ ଆରୁ ତାହ୍ମା କମ୍‌ଜୋର୍‌ବନ୍ ବାନେ କାମାଲିୟାସ୍। ²⁴ଆରୁ ଗୋଟା ସିରିଆ ରାଜୀନୁ ତାଙ୍ଘା କାତ୍‌ଥା ଫାଏଲାରାଚା କେରା; ଆଲାର୍ ଜାମା ରକମ୍ ବେହ୍ମରିୟା, ଆରୁ ଦୁଃଖୁ ସାହୁ ଆଲାରିନ୍ ଯୀଶୁସ୍‌କି ଚାହାଗେ ଅନ୍ଦ୍ରାର୍। ଆଲାର୍ ଭୁତ୍ତୁଲାକ୍କା ଆଲାରିନ୍, ଆରୁ ମିର୍‌ଗି ବେହ୍ମରିୟାରିନ୍ ଆରୁ ଏକ୍ଆଙ୍ଗିୟା ବେହ୍ମରିୟାରିନ୍ ଯୀଶୁସ୍‌କି ଚାହାଗେ ଅନ୍ଦ୍ରାର୍ ଆରୁ ଯୀଶୁସ୍ ଆବ୍ଡ଼ାରିନ୍ ବାନେ କାମ୍‌ଚାସ୍। ²⁵ଆରୁ ଗାଲିଲୀ ଦେକାପଲି, ଯେରୁଶାଲେମ୍, ୟାହୁଦା ପ୍ରଦେଶ୍‌ ଆରୁ ଯାର୍‌ଦାନ୍ ଯୋଡ଼ୁ ହା ପାଖାନ୍ତି ଢେର୍ ଆଲାର୍ ତାଙ୍ଘା ପାଛ୍‌ଲି-ପାଛ୍‌ଲି ବାର୍‌ଚାର୍।

ଯୀଶୁସ୍ ପାର୍ତ୍ତା ମିଆଁ ଉପ୍‌ଦେଶ୍ ଚିଆଲ୍‌ଦାସ୍

(ଲୁକାସ୍ ୬:୨୦-୨୩)

¹ଯୀଶୁସ୍ ଆଲାର୍‌ଘି ଭିଡ଼୍‌ବନ୍ ଏରିକିରି ପାର୍ତ୍ତା ମିଆଁ ଆର୍‌ଗିୟାସ୍ କେରାସ୍, ଆରୁ ଯେତ୍‌କବାକେନ୍ ଅକ୍କିୟାସ୍‌ତା ଆସ୍‌କି ଚେଲାଜାମାର୍ ଆସ୍‌କି ଚାହାଗେ ବାର୍‌ଚାର୍, ²ଆରୁ ଯୀଶୁସ୍ ଆବ୍ଡ଼ାରିନ୍ ଉପ୍‌ଦେଶ୍ ଚିୟାଗେ ଲାଗ୍ଗିୟାସ୍;

³“ଧଏନ୍ ରାନାଏ ଆବ୍ଡ଼ାର୍ ଏକାର୍ କା, ପାର୍‌ମେଶ୍ୱାର୍‌ସ୍‌କି ମଦେତ୍ ଜାମାବାକେନ୍ ଚାହ୍‌ନାଏ

ଏନ୍ଦେର୍‌ଗେକା ସରଗ୍ ରାଜୀଦ୍ ଆବ୍ଡ଼ାର୍‌ଘି ଲାଗାନ୍ ରାଇଦ୍।”

⁴“ଧଏନ୍ ରାନାଏ ଆବ୍ଡ଼ାର୍ ଏକାର୍ କା ଶୋକ୍ କାମ୍‌ନାଏ, ଏନ୍ଦେର୍‌ଗେକା ଆବ୍ଡ଼ାର୍‌ଗେ ପାର୍‌ମେଶ୍ୱାର୍‌ସ୍ ଦିଲାସା ଚିୟସ୍।”

⁵“ଧଏନ୍ ରାନାଏ ଆବ୍ଡ଼ାର୍ ଏକାର୍‌ଘି ମନ୍ ନରମ୍ ରାଇ, ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ପୁରା ଦୁନିଆଁନ୍ତା ଅଧିକାରୀ ବାନାବସ୍।”

⁶“ଧଏନ୍ ରାନାଏ ଆବ୍ଡ଼ାର୍, ଏକାର୍ କା ପାର୍‌ମେଶ୍ୱାର୍‌ସ୍‌କି ନଜର୍‌ନୁ ଏକାଦ୍ ସତ୍ତୁ ରାଇ ଆବନ୍ କାମାଗେ ମୁରୁକ୍ ଇଚ୍ଛା କାମ୍‌ନାଏ, ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଆବ୍ଡ଼ାର୍‌ଘି ଇଚ୍ଛାବନ୍ ପୁରା କାମସ୍।”

⁷“ଧଏନ୍ ରାନାଏ ଆବ୍ଡ଼ାର୍ ଏକାର୍ କା ଦାୟାଲୁ ରାନାଏ, ଏନ୍ଦେର୍‌ଗେକା ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ଦାୟା କାମସ୍।”

⁸“ଧଏନ୍ ରାନାଏ ଆବ୍ଡ଼ାର୍ ଏକାର୍‌ଘି ମନ୍ ସାଫା ରାଇଦ୍, ଆବ୍ଡ଼ାର୍ ପାର୍‌ମେଶ୍ଵାର୍‌ସିନ୍ ଏରର୍।”

⁹“ଧଏନ୍ ରାନାଏ ଆବ୍ଡ଼ାର୍, ଏକାର୍ କା ମେଲ୍‌ମିଲାପ୍ କାମ୍‌ତାନାଏ, ଆବ୍ଡ଼ାର୍ ପାର୍‌ମେଶ୍ଵାର୍‌ସ୍‌କି ହାଦ୍ଦୁବଚ୍ଚର୍ ବୁଲି ଆହାକର୍।”

¹⁰“ଧଏନ୍ ରାନାଏ ଆବ୍ଡ଼ାର୍ ଏକାର୍ କା ପାର୍‌ମେଶ୍ୱାର୍‌ସ୍‌କି ନଜର୍‌ନୁ ଏକାଦ୍ ସତ୍ତୁ ରାଇ ଆବନ୍ କାମ୍‌ନାଘି ଲାଗାନ୍ ସାତାବାକାନାଏ, ସରଗ୍ ରାଜୀଦ୍ ଆବ୍ଡ଼ାର୍‌ଘି ଲାଗାନ୍ ରାଇଦ୍।”

¹¹“ଧଏନ୍ ରାଦାର୍ ନିମ୍, ଯେତ୍‌କବାକେନ୍ ଆଲାର୍ ଏଙ୍ଘାଲାଗାନ୍ ନିହ୍ମା ନିନ୍ଦା କାମର୍, ଆରୁ ସାତାବର୍ ଆରୁ ଝୁଟ୍ଟୁ ତେଙ୍ଗିକିରି ନିହ୍ମାଏ ବିରୁଦ୍ଧ୍‌ନୁ ଜାମା ରକମ୍‌ଘି ଖାରାପ୍ କାତ୍‌ଥା ତେଙ୍ଗର୍।” ¹²ଆଙ୍ଗେନ୍ ଲୀଝ୍‌ରା ଆରୁ ଖୁସୀମାନାବା, ଏନ୍ଦେର୍‌ଗେକା ନିହ୍ମା ଲାଗାନ୍ ସରଗ୍‌ନୁ ବାଡ଼୍‌କା ଫଲ୍ ହାଖ୍ଖର। ହନ୍ନେନ୍ ତା ଆବ୍ଡ଼ାର୍ ନିହ୍ମାଏ ଆଘ୍‌ଲିନ୍ତା ନାବୀରିନ୍ ସାତାବାଚ୍‌କାଚାର୍।

ବେକୁ ଆରୁ ବିଲ୍ଲୀଘି ନମୁନା

(ମାର୍‌କୁସ୍ ୯:୫୦; ଲୁକାସ୍ ୧୪:୩୪,୩୫)

¹³“ନିମ୍ ଦୁନିଆଁନ୍ତା ବେକୁର୍; ଲେକିନ୍ ଯଦି ବେକୁଘି ଏମ୍ବାଦ୍ ବାଗ୍‌ଡ଼ାରକୋ ହାଲେ, ଆବନ୍ ଆରୁ ଏନ୍ଦେର୍ ଜିନିଷ୍‌ତି ଏମ୍ବା କାମାକୋ? ଆଦ୍ ଏନ୍ଦେର୍‌ହି ନାଲ୍‌ଖୁନୁ ମା ବାରି, ହୁଦ୍‌ଘିଲାଗାନ୍ ଇବନ୍ ବାହ୍‌ରି ଖେବ୍ଡ଼ାକୋ ଆରୁ ଆଲାର୍‌ଘି ହେଡ୍ଡୁ କିୟାଁ ତିର୍‌ହା ନାବାକୋ।” ¹⁴ନିମ୍ ଦୁନିଆଁନ୍ତା ବିଲ୍ଲୀର୍। ଏକା ସହର୍ ପାର୍ତ୍ତା ମିଆଁ ରାଇଦ୍ ଆଦ୍ ନୁହୁରା ପଲ୍ଲୀ। ¹⁵ଆରୁ ଆଲାର୍ ବିଲ୍ଲୀ ଦାଗିକିରି ଆଉଡ଼୍‌କା କିୟାଁ ଡାବିକିରି ମା ଉଇନାଏ ଲେକିନ୍ ବିଲ୍ଲୀନ୍ ବାଚ୍ଛିନୁ ଉଇୟା କାଇ, ହାଲେ ଆଡ଼୍‌ପାନ୍ତା ଜାମା ଆଲାର୍‌ଘି ଲାଗାନ୍ ବିଲ୍ଲୀ ଏଥ୍‌ରି। ¹⁶ହନ୍ନେନିନ୍ ନିହ୍ମାଏ ବାନେ ନାଲ୍‌ଖୁଦ୍ ଆଲାର୍‌ଘି ଆଘ୍‌ଲି ଏଥ୍‌ର୍‌ନାଦ୍ ଏସ୍‌କେ କା ଆବ୍ଡ଼ାର୍ ନିହ୍ମାଏ ବାନେ ନାଲ୍‌ଖୁନ୍ ଏରିକିରି ନିହ୍ମାଏ ସରଗ୍‌ତା ବାଙ୍ଗ୍‌ସ୍‌କି ସ୍ତୁତି ମାହିମା କାମର୍।

ନିୟମ୍‌ଘି ବାରେନୁ ଶିକ୍ଷା

¹⁷“ଇବନ୍ ଆମା ସୋଚା କା, ଏନ୍ ନିୟମ୍ ଚାହେ ନାବୀଜାମାର୍‌ଘି ପାବିତାର୍ ଶାସ୍ତ୍ରବନ୍ ନାଶ୍ କାମାଗେ ବାର୍‌ଚ୍‌କାଦାନ୍, ଆବ୍ଡ଼ାନ୍ ନାଶ୍ କାମାଗେ ମାଲ୍ଲା, ଲେକିନ୍ ପୁରା କାମାଗେ ବାର୍‌ଚ୍‌କାଦାନ୍।” ¹⁸ଏନ୍ଦେର୍‌ଗେକା ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା, ଯେତ୍‌କତକ୍ ଆକାଶ୍ ଆରୁ ଧାନ୍ତାରୀ ରଦ୍, ହତ୍‌କତକ୍ ପାର୍‌ମେଶ୍ୱାର୍‌ସ୍‌କି ଜାମା ନିୟମ୍‌ଦ୍‌ହି ରଦ୍ ଆଦ୍ କାଟେହି ମା ବାଦ୍‌ଲାରିଦ୍, ପାର୍‌ମେଶ୍ୱାର୍‌ସ୍‌କି ନିୟମ୍ ଦ୍ୱାର୍‌ନୁ ଆସ୍ ଏକାନ୍ କାମା ବେଦ୍ଦାଲ୍‌ଦାସ୍ ଆବନ୍ ପାର୍‌ମେଶ୍ୱାର୍‌ସ୍ ପୁରା କାମସ୍, ହତ୍‌କତକ୍ ପାର୍‌ମେଶ୍ୱାର୍‌ସ୍‌କି ନିୟମ୍‌ଦ୍ ରଦ୍। ¹⁹ହୁଦ୍‌ଘିଲାଗାନ୍ ନେଦିନ୍ ପାର୍‌ମେଶ୍ୱାର୍‌ସ୍‌କି ହୁକୁମ୍‌ସ୍‌ତି ଛୋଟେନ୍ତି ଛୋଟେ ହୁକୁମ୍‌ବନ୍ ହି ତୋଡ଼ର୍ ଆରୁ ହନ୍ନେନ୍ ଆଲାରିନ୍ ଶିଖାବର୍, ଆବ୍ଡ଼ାର୍ ସରଗ୍ ରାଜୀନୁ ଜାମାର୍‌ଘିନ୍ତି ଛୋଟେ ବୁଲି ତେଙ୍ଗାକର୍; ଲେକିନ୍ ନେଦ୍ ଆ ହୁକୁମ୍‌ବନ୍ ମାନର୍ ଆରୁ ଆଲାରିନ୍ ଆବନ୍ ଶିଖାବର୍, ଆବ୍ଡ଼ାର୍ ସରଗ୍ ରାଜୀନୁ ବାଡ଼୍‌କା ବୁଲି ତେଙ୍ଗାକର୍। ²⁰ଏନ୍ଦେର୍‌ଗେକା ଏନ୍ ନିମାନ୍ ତେଙ୍ଗାଲ୍‌ଦାନ୍ କା, ଯଦି ନିହ୍ମାଏ ଧାର୍ମିକ୍‌ତା ପଣ୍ତିତ୍ ଆରୁ ଫାରିସୀ ଜାମାର୍‌ଘି ଧାର୍ମିକ୍‌ତାନ୍ତି ବାଗ୍ଗେ ମା ମାନଦ୍‌ତା, ନିମ୍ ସରଗ୍ ରାଜୀନୁ ଏକ୍‌ଲାହି କରାଗେ ପଲ୍ଲଦାର୍।

ଖୀସାରାନା ଆରୁ ପିଟ୍ଟନା

²¹“ନିମ୍ ମେନ୍‌ଚ୍‌କାଦାର୍ କା, ଆଘ୍‌ଲି ଯୁଗ୍‌ତା ଆଲାରିନ୍ ତେଙ୍ଗାକେର୍‌କିଚା ଆଲାରିନ୍ ଆମା ପିଟା, ଆରୁ ନେଦିନ୍ ଆଲାରିନ୍ ପିଟର୍ ଆବ୍ଡ଼ାର୍ କୋଟ୍ କାଚେରୀନୁ ଦଣ୍ଡ୍‌ଘି ହକ୍‌ଦାର୍ ମାନର୍, ²²ଲେକିନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ କା, ଏକାସ୍ ନିଜର୍ ଭାଇସିନ୍ ଖୀସାରସ୍, ଆସ୍‌କେ ପାର୍‌ମେଶ୍ୱାର୍‌ସ୍ ଦଣ୍ଡ୍ ଚିୟସ୍, ଆରୁ ଏକାସ୍ ନିଜର୍ ଭାଇସିନ୍ ବୋକାବସ୍ ଆସ୍ ପାର୍‌ମେଶ୍ୱାର୍‌ସ୍‌କି ମାହାସାଭାନୁ ଦଣ୍ଡ୍‌ଘି ଲାଇଗ୍ ମାନସ୍; ଆରୁ ଏକାସ୍ ତେଙ୍ଗସ୍ ‘ଆରେ ମୁରୁଖ୍’ ଆସ୍ ନରକ୍ ଗାଡ୍ଡିନ୍ତା ଚିଚ୍ଚୁନୁ ଦଣ୍ଡ୍‌ଘି ଲାଇଗ୍ ମାନସ୍।”

²³“ହୁଦ୍‌ଘିଲାଗାନ୍ ଯଦି ନିମ୍ ନିଜର୍ ଭେଁଟ୍‌ବନ୍ ବେଦୀସାନ୍ ଅନ୍ଦର୍‌ନା ବାକେନ୍, ଆସାନ୍ ନିହ୍ମାଏ ମନେ ଖାତ୍‌ରୋ କା ନିହ୍ମା ଭାଇସ୍‌କି ମନ୍‌ନୁ ନିହ୍ମା ଲାଗାନ୍ ଏନ୍ଦ୍ରିନ୍ ଖୀସ୍ ରାଇଦ୍, ²⁴ତା ନିହ୍ମା ଭେଁଟ୍‌ବନ୍ ଆସାନ୍ ବେଦୀଘି ଚାହାନୁ ଆମ୍ବାଚା, ଆରୁ କାଇକିରି ଆଘ୍‌ଲି ନିହ୍ମା ଭାଇସ୍ ଗାନେ ମେଲ୍‌ମିଲାପ୍ କାମା ଆନ୍ତିନ୍ ବାରିକିରି ନିଜର୍ ଭେଁଟ୍‌ବନ୍ ଚାଢ଼ାବା।” ²⁵“ଯେତ୍‌କବାକେନ୍ ନିମ୍ ନିଜର୍ ବିରୋଧିର୍‌ଘି ସାଙ୍ଗେ ପାବୁନୁ ରର୍‌ତା, ଆସ୍‌ଗାନେ ଚାଁଣେ ମେଲ୍‌ମିଲାପ୍ କାମା ଏକାସାନ୍ ଏନ୍ନେ ମା ମାନ୍ନାଦ୍ କା ନିହ୍ମା ବିରୋଧିସ୍ ନିମାନ୍ ନ୍ୟାୟ କାମୁର୍‌ଘି ହେଖ୍ଖାନୁ ସୋଁପଚସ୍, ଆରୁ ନ୍ୟାୟ କାମୁସ୍ ନିମାନ୍ ସିପାହୀଜାମାର୍‌ଘି ହେଖ୍ଖାନୁ ସୋଁପଚସ୍, ଆରୁ ନିମାନ୍ ଜେହେଲ୍‌ନୁ ଗୁଡ଼ର୍‌ଚର୍। ²⁶ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ଯେତ୍‌କତକ୍ ନିମ୍ କାଉଡ଼ି-କାଉଡ଼ି ମା ଛୁଟର୍ ଆତ୍‌କତକ୍ ଆସ୍‌ତି ଉର୍‌ଖା ପଲ୍ଲଦାର୍।”

ବେଭିଚାର୍‌ଘି ବାରେନୁ ଶିକ୍ଷା

²⁷“ପାର୍‌ମେଶ୍ୱାର୍‌ସ୍‌କି ଇ ହୁକୁମ୍ ନିମ୍ ମେନ୍‌ଚ୍‌କାଦାର୍ କା, ‘ବେଭିଚାର୍ ଆମା କାମା।’ ²⁸ଲେକିନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ କା, ଏକାସ୍ ଏକିନ୍ ମାଏକିନିଆଁବନ୍ ଖାରାପ୍ ନଜର୍‌ନୁ ଏରସ୍‌ତା ଆସ୍ ଆଦ୍‌ଘିଗାନେ ମନ୍‌ମନ୍‌ନୁ ବେଭିଚାର୍ କାମ୍‌ଚେଇ ଚିଚ୍‌କାଦାସ୍। ²⁹ଯଦି ନିଙ୍ଘାଏ ତିନା ହାନ୍ନୁଦ୍ ନିଙ୍ଘା ପାପ୍‌ଘି କାରଣ୍ ମାନଦ୍‌ତା, ଆବନ୍ ଅଥ୍‌ରା ଆରୁ ଖେବ୍ଡ଼ାଚା; ଏନ୍ଦେର୍‌ଗେକା ନିଙ୍ଘା ପୁରା ମେଦୁବନ୍ ନରକ୍‌ନୁ ଖେବ୍ଡ଼ାନ୍ତି ନିଙ୍ଗାଗେ ଇଦ୍ ବାନେ ମାନଦ୍‌ନେ କା ନିଙ୍ଘା ମେଦୁନ୍ତି ଅଣ୍ଟା ଅଙ୍ଗବଦ୍ ବର୍‌ବାଦ୍ ମାନକୋ। ³⁰ଯଦି ନିଙ୍ଘାଏ ତିନା ହେଖ୍ଖାଦ୍ ନିଙ୍ଘାଲାଗାନ୍ ପାପ୍‌ଘି କାରଣ୍ ମାନଦ୍‌ତା, ଆବନ୍ ଛପିକିରି ଖେବ୍ଡ଼ାଚିୟା; ଏନ୍ଦେର୍‌ଗେକା ନିଙ୍ଘା ପୁରା ମେଦୁବନ୍ ନରକ୍‌ନୁ ଖେବ୍ଡ଼ାନ୍ତି ନିଙ୍ଘା ମେଦୁନ୍ତା ଅଣ୍ଟା ଅଙ୍ଗବଦ୍ ବର୍‌ବାଦ୍ ମାନ୍ନାଦ୍ ନିହ୍ମା ଲାଗାନ୍ ବାନେ ମାନଦ୍‌ନେ।”

ଛାଡ଼୍‌ପତର୍‌ଘି ବାରେନୁ ଶିକ୍ଷା

(ମାତିସ୍ ୧୯:୯; ମାର୍‌କୁସ୍ ୧୦:୧୧,୧୨; ଲୁକାସ୍ ୧୬:୧୮)

³¹“ଏନ୍ନେହି ତେଙ୍କାରାଇ କା, ଏକାସ୍ ନିଜର୍ ମାଏକିନିଆଁବନ୍ ଆମ୍ବାଚାଗେ ବେଦ୍ଦସ୍ ତା ଆସ୍ ଆବନ୍ ଛାଡ଼୍‌ପତର୍ ଚିନାସ୍। ³²ଲେକିନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ କା ଏକାସ୍ ନିଜର୍ ମାଏକିନିଆଁନ୍ ବେଭିଚାର୍‌ବନ୍ ଆମ୍ବିକିରି ଆରୁ ନାନ୍ନା କାରଣ୍‌ତି ଛାଡ଼୍‌ପତର୍ ଚିଦାସ୍ ତା, ଆସ୍ ଆବନ୍ ବେଭିଚାର୍ କାମ୍‌ତାଦାସ୍; ଆରୁ ଏକାସ୍ ଛାଡ଼୍‌ପତର୍ ଚିଚ୍‌କା ମାଏକିନିଆଁବନ୍ ବେଞ୍ଜର୍‌ଦାସ୍ ତା ଆସ୍ ବେଭିଚାର୍ କାମ୍‌ଦାସ୍।”

କସମ୍ ମହଁନାଘି ବାରେନୁ ଶିକ୍ଷା

³³“ନିମ୍ ଆରୁହି ମେନ୍‌ଚ୍‌କାଦାର୍ କା ଆଘ୍‌ଲି ଯୁଗ୍‌ତା ଆଲାରିନ୍ ତେଙ୍ଗାକେର୍‌କିଚା ନିମ୍ ‘ଝୁଟ୍ଟୁ କସମ୍ ଆମା ମହାଁ, ଲେକିନ୍ ପ୍ରାଭୁସ୍‌କି ଲାଗାନ୍ ନିଜର୍ କସମ୍‌ବନ୍ ପୁରା କାମ୍‌କେ।’ ³⁴ଲେକିନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ କା ଏକ୍‌ଲାହି କସମ୍ ଆମ୍‌କେ ମହାଁ; ସରଗ୍‌ଘି କସମ୍ ଆମା ମହାଁ ଏନ୍ଦେର୍‌ଗେକା ଆଦ୍ ପାର୍‌ମେଶ୍ଵାର୍‌ସ୍‌କି ରାଜ୍‌ଗାଦୀଦ୍; ³⁵ଆରୁ ଦୁନିଆଁଘି କସମ୍ ଆମା ମହାଁ, ଏନ୍ଦେର୍‌ଗେକା ଆଦ୍ ପାର୍‌ମେଶ୍ଵାର୍‌ସ୍‌କି ହେଡ୍ଡୁ ଉଇନାଘି ଆଡ୍ଡାଦ୍; ଯେରୁଶାଲେମ୍‌ଘି କସମ୍ ଆମା ମହାଁ ଏନ୍ଦେର୍‌ଗେକା ଆଦ୍ ପାର୍‌ମେଶ୍ୱାର୍‌ସ୍ ଏକାସ୍ କା ମାହାରାଜାସ୍ ଆସ୍‌କି ସହର୍‌ଦ୍। ³⁶ନିଜର୍ କୁକ୍କୁଘି କସମ୍ ଆମା ମହାଁ ଏନ୍ଦେର୍‌ଗେକା ନିମ୍ କୁକ୍କୁନ୍ ତା ଅଣ୍ଟାହି ଚୁଟ୍ଟିବନ୍ ଧୋବ୍, ଚାହେ ମହଁରୋ କାମା ପଲ୍ଲଦାରିନ୍। ³⁷ହୁଦ୍‌ଘିଲାଗାନ୍ ଏନ୍ଦେର୍‌ହି କସମ୍ ଆମା ମହାଁ ଯଦି ନେଦିନ୍ ନିମାନ୍ ଏନ୍ଦ୍ରିନ୍ ମେନର୍ ଆରୁ ନିହ୍ମା ଯାବାବ୍ ହଁ ମାନଦ୍‌ନେ ତା ନିମ୍ ଖାଲି ହଁନିନ୍ ତେଙ୍କେ ଆରୁ ଯଦି ନିହ୍ମା ଯାବାବ୍ ମାଲ୍ଲା ମାନଦ୍‌ନେ ତା ନିମ୍ ଖାଲି ମାଲ୍ଲାନିନ୍ ତେଙ୍କେ; ଏନ୍ଦେର୍‌ଗେକା ଇଦ୍‌ଘିନ୍ତି ବାଗ୍ଗେ ମାନିତା ଆଦ୍ ଶାଏତାନ୍‌ତି ମାନିଦ୍।”

ନେଖାହି ବାଦ୍‌ଲା ଆମ୍‌କେ ହୁଆ

(ଲୁକାସ୍ ୬:୨୯,୩୦)

³⁸“ନିମ୍ ମେନ୍‌ଚ୍‌କାଦାର୍ କା ତେଙ୍ଗାକେର୍‌କିଚା, ‘ହାନ୍ନୁଘି ବାଦ୍‌ଲା ହାନ୍ନୁ ଆରୁ ପାଲ୍ଲୁଘି ବାଦ୍‌ଲା ପାଲ୍ଲୁ।’ ³⁹ଲେକିନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ କା ବଦ୍‌ମାସ୍‌ରିନ୍ ଆମା ରୋକା; ଆରୁ ନେଦିନ୍ ନିହ୍ମାଏ ତିନା ଗାଲ୍ଲେନ୍ ଚାପ୍‌ଡ଼ର୍‌ତା ନାନ୍ନା ଗାଲ୍ଲେନ୍‌ହି ଏଦାଚା। ⁴⁰ଆରୁ ଯଦି ନେଦିନ୍ ନିହ୍ମାଗାନେ ନ୍ୟାୟଘି ଆଡ୍ଡାନୁ ନ୍ୟାୟ କାମିକିରି ନିହ୍ମା ମିର୍‌ଜୀବନ୍ ହୁଆଗେ ବେଦ୍ଦନାଏ ତା, ନିହ୍ମା ଚାଦର୍‌ବନ୍‌ହି ଚିଆଲାଗା। ⁴¹ଆରୁ ଯଦି ନେଦିନ୍ ନିଙ୍ଗାନ୍ ଏକ୍ କିଲୋମିଟର୍ କାଲାଗେ ତେଙ୍ଗସ୍ ତା, ନିନ୍ ଆସ୍‌ଗାନେ ଦୁଇ କିଲୋମିଟର୍ କାଲା। ⁴²ଆରୁ ଏକାସ୍ ନିଙ୍ଘାସ୍ତି ନିଦାସ୍, ଆସ୍‌କେ ଚିଆ; ଆରୁ ଏକାସ୍ ନିଙ୍ଘାସ୍ତି ଉଧାର୍ ହୁଆଗେ ବେଦ୍ଦଦାସ୍, ଆସିନ୍ ମାନା ଆମା କାମା।”

ବିରୋଧିରିନ୍ ବାନେ ହାଖ୍ଖା

(ଲୁକାସ୍ ୬:୨୭,୨୮,୩୨-୩୬)

⁴³“ନିମ୍ ମେନ୍‌ଚ୍‌କାଦାର୍, ଆରୁ ତେଙ୍ଗାକେର୍‌କିଚା, ‘ନିଜର୍ ପାଡ଼ୋଶୀରିନ୍ ବାନେ ହାଖ୍ଖା, ଆରୁ ନିଜର୍ ବିରୋଧିରିନ୍ ହାଁଣା ତୁପ୍‌ଫା।’ ⁴⁴ଲେକିନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ କା ନିଜର୍ ବିରୋଧିରିନ୍ ବାନେ ହାଖ୍ଖା ଆରୁ ନେଦ୍ ନିମାନ୍ ସାଧ୍‌ନାଏ ଆବ୍ଡ଼ାର୍‌ଗେ ବିନ୍ତି କାମା, ⁴⁵ଏସ୍‌କେ କା ନିମ୍ ନିହ୍ମା ସରଗ୍‌ତା ବାଙ୍ଗ୍‌ସ୍‌କି ହାଦ୍ଦୁବଚ୍ଚ ମାନର୍‌କର୍, ଏନ୍ଦେର୍‌ଗେକା ଆସ୍ ଖାରାପ୍ ଆରୁ ବାନେ ଯୋଡ଼େର୍‌ଘି ଲାଗାନ୍ ତାଙ୍ଘାଏ ବିଡ଼ି ଆର୍‌ଗ୍‌ତାଦାସ୍, ଧାର୍ମିକ୍ ଆରୁ ଅଧର୍ମିୟାଁ ଦୁହି ଲୋକ୍‌ର୍‌ଘି ମିଆଁ ଚେପୁ ଚିଦାସ୍। ⁴⁶ଆରୁ ନେଦ୍ ନିମାନ୍ ବାନେ ହାଖ୍ଖନାଏ ଆବ୍ଡ଼ାରିନ୍ ଖାଲି ବାନେ ହାଖ୍ଖର୍, ହାଲେ ଏନ୍ଦେର୍ ଫଲ୍ ହାଖ୍ଖର୍? ମାଲ୍‌ଗୁଜାରୀ ଉକ୍‌ରୁ ଆଲାର୍ କାଁଏ ଏନ୍ନେ ମା କାମ୍‌ନାଏ?”

⁴⁷“ଯଦି ନିମ୍ ଖାଲି ନିହ୍ମା ଭାଇଜାମାରିନ୍ ଯୋହାର୍ କାମ୍‌ଦାର୍ ତା, ନିମ୍ ଏନ୍ଦେର୍ ବାଡ଼୍‌କା ନାଲ୍‌ଖୁ କାମ୍‌ଦାର୍? ଦୁସ୍‌ରା ଜାତିୟାର୍‌ହି କାଁଏ ଏନ୍ନେ ମା କାମ୍‌ନାଏ? ⁴⁸ହୁଦ୍‌ଘିଲାଗାନ୍ ନିହ୍ମାଏ ସରଗ୍‌ତା ବାଙ୍ଗ୍‌ସ୍‌ ଏସ୍‌କେ ସିଦ୍ଧ୍ ରାଦାସ୍, ଆନ୍ନେ ନିମ୍‌ହି ସିଦ୍ଧ୍ ରା।”

ଯୀଶୁସ୍ ଦାନ୍ ଚିନାଘି ବାରେନୁ ଶିକ୍ଷା ଚିଆଲ୍‌ଦାସ୍

¹ଯୀଶୁସ୍ ତାଙ୍ଘା ଉପ୍‌ଦେଶ୍‌ନୁ ତେଙ୍ଗିୟାସ୍ ହୁସିୟାର୍‌କିରି ରା! ନିମ୍ ଆଲାରିନ୍ ଏଦାଗେ ନିହ୍ମା ଲାଗାନ୍ ଧରମ୍ ନାଲ୍‌ଖୁ ଆମା କାମା, ମାଲ୍ଲାହାଲେ ନିହ୍ମା ସରଗ୍‌ତା ବାଙ୍ଗ୍‌ସ୍‌ତି ଏନ୍ଦେର୍‌ହି ଫଲ୍ ମା ହାଖ୍ଖଦାର୍।

²“ଯେତ୍‌କବାକେନ୍ ନିମ୍ ଗରୀବ୍ ଦୁଃଖିର୍‌ଗେ ଦାନ୍ ଚିଅର୍ ତା ନିହ୍ମା ଇ ବାନେ ନାଲ୍‌ଖୁଘି ବାରେନୁ ନାନ୍ନାର୍‌ଘି ଆଘ୍‌ଲି ଆମାତେଙ୍ଗା, ଏସ୍‌କେ କା ସାଭା ଆଡ଼୍‌ପା ଆରୁ ଗଲିନୁ କପ୍‌ଟୀ ଆଲାର୍ ବାଡ଼େଇ ହାଖ୍ଖାଗେ କାମ୍‌ନାଏ। ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ଆବ୍ଡ଼ାର୍‌ଗେ ଇଦ୍‌ଘି ପୁରା ଫଲ୍ ପହ୍‌ଲେନ୍ତି ଚିଆ କେର୍‌କିଚି। ³ଲେକିନ୍ ଯେତ୍‌କବାକେନ୍ ନିମ୍ ଦାନ୍ ଚିଅର୍ ତା, ନିହ୍ମା ତିନା ହେଖ୍ଖା ଏନ୍ଦେର୍ କାମାଲି ଆବନ୍ ନିହ୍ମା ଡେବ୍‌ବା ହେଖ୍ଖା ବାଲ୍‌ନା କାତ୍‌ଥା। ⁴ଏସ୍‌କେ କା ନିହ୍ମା ଦାନ୍ ନୁହୁର୍‌କା ରୋ, ହାଲେ ନିହ୍ମା ସରଗ୍‌ତା ବାଙ୍ଗ୍‌ସ୍‌ ଏକାନ୍ ନିମ୍ ନୁଡ଼ିକିରି କାମ୍‌ଦାର୍ ଆବନ୍‌ହି ଏର୍‌ଦାସ୍, ଆସ୍ ନିମାଗେ ଆଦ୍‌ଘି ଫଲ୍ ଚିୟସ୍।”

ବିନ୍ତି କାମ୍‌ନାଘି ବାରେନୁ ଉପ୍‌ଦେଶ୍

(ଲୁକାସ୍ ୧୧:୨-୪)

⁵“ଯେତ୍‌କବାକେନ୍ ନିମ୍ ବିନ୍ତି କାମର୍ ତା କପ୍‌ଟୀ ଜାମାର୍ ଲେଖା ଆମ୍‌କେ କାମା, ଏନ୍ଦେର୍‌ଗେକା ଆବ୍ଡ଼ାର୍ ଆଲାରିନ୍ ଏଦାଗେ ସାଭା ଆଡ଼୍‌ପା ଆରୁ ସଡ଼କ୍‌ତା ଛକ୍‌ଗୁଠିନୁ ବିନ୍ତି କାମାଗେ ବାନେ ହାଖ୍ଖନାଏ। ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ ଆବ୍ଡ଼ାର୍ ତାହ୍ମା ଫଲ୍ ପୁରା ହାଖ୍ଖୀୟାର୍ କେର୍‌କାନାଏ। ⁶ଲେକିନ୍ ଯେତ୍‌କବାକେନ୍ ନିମ୍ ବିନ୍ତି କାମର୍ ତା, ନିଜର୍ ବାଖ୍‌ରାଗେ କାଲା ଆରୁ ବାଲି ମୁଚ୍ଚିକିରି; କାଡ଼େ-କାଡ଼େ ନିହ୍ମା ସରଗ୍‌ତା ବାଙ୍ଗ୍‌ସାନ୍ ବିନ୍ତି କାମା, ନିହ୍ମା ସରଗ୍‌ତା ବାଙ୍ଗ୍‌ସ୍‌ ଏକାସ୍ କା ନିହ୍ମା ନୁଡ଼ିକିରି କାମ୍‌ଚ୍‌କା ନାଲ୍‌ଖୁନ୍ ଏର୍‌ଦାସ୍ ଆସ୍ ନିମାଗେ ଫଲ୍ ଚିୟସ୍। ⁷ଆରୁ ନିମ୍ ଯେତ୍‌କବାକେନ୍ ବିନ୍ତି କାମର୍ ତା ଦୁସ୍‌ରା ଜାତିୟାର୍‌ଘି ଲେଖା ବେକାର୍ କାତ୍‌ଥାବନ୍ ଧିୟାନ୍-ଧିୟାନ୍ ଆମ୍‌କେ ଦୋହ୍‌ରା, ଏନ୍ଦେର୍‌ଗେକା ଆବ୍ଡ଼ାର୍ ସୋଚ୍‌ନାଏ କା ଆବ୍ଡ଼ାର୍‌ଘି ବାଗ୍ଗେ ତେଙ୍କାନ୍ତି ଆବ୍ଡ଼ାର୍‌ଘି ବିନ୍ତି ମେନାକୋ। ⁸ହୁଦ୍‌ଘିଲାଗାନ୍ ନିମ୍ ଦୁସ୍‌ରା ଜାତିୟାର୍‌ଘି ଲେଖା ଆମ୍‌କେମାନା, ଏନ୍ଦେର୍‌ଗେକା ନିହ୍ମା ବାଙ୍ଗ୍‌ସ୍‌ ନିହ୍ମା ନିନାଘି ଆଘ୍‌ଲି ଆହ୍‌ଦାସ୍ କା ନିମାଗେ ଏନ୍ଦେର୍ ଦାର୍‌କାର୍ ରାଇଦ୍।”

⁹“ହୁଦ୍‌ଘିଲାଗାନ୍ ନିମ୍ ଏନ୍ନେ ବିନ୍ତି କାମ୍‌କେ।

‘ହେ ଏହ୍ମାଏ ବାଙ୍ଗ୍, ନିମ୍ ଯେ ସରଗ୍‌ନୁ ରାଦାର୍; ନିହ୍ମା ନାମେ ପାବିତାର୍ ମାନ୍ନାଦ୍।’

¹⁰‘ନିହ୍ମା ରାଜୀଦ୍ ବାର୍‌ନାଦ୍।’

‘ନିହ୍ମା ଇଚ୍ଛା ଏସ୍‌କେ ସରଗ୍‌ନୁ ରାଇଦ୍,’

‘ଆନ୍ନେନିନ୍ ଦୁନିଆଁନୁହି ପୁରା ମାନ୍ନାଦ୍।’

¹¹‘ଏମାଗେ ଇନ୍ନା ଉଲ୍ଲା ଅଣ୍ଟାନ୍ତା ଆହାର୍ ଚିଆ’

¹²‘ଆରୁ ଏମ୍ ଏସ୍‌କେ ଏହ୍ମା ଦୋଷୀରିନ୍ ଛେମା କାମ୍‌ଚ୍‌କାଦାମ୍,’

‘ଆନ୍ନେ ନିମ୍‌ହି ଏହ୍ମା ଦୋଷ୍‌ଗୁଠିନ୍ ଛେମା କାମା।’

¹³‘ଆରୁ ଏମାନ୍ ପରୀକ୍ଷାନୁ ଆମାଟିଡ଼ା, ଲେକିନ୍ ଏମାନ୍ ଜାମା ରକମ୍‌ଘି ଖାରାପ୍‌ତି ବାଛାବା,’

(‘ଏନ୍ଦେର୍‌ଗେକା ରାଜୀ, ଶକ୍ତି ଆରୁ ମାହିମା ଯୁଗ୍-ଯୁଗ୍ ନିହ୍ମାଏଦ୍।’ ଆମେନ୍।)”

¹⁴“ହୁଦ୍‌ଘିଲାଗାନ୍ ଯଦି ନିମ୍ ନିହ୍ମା ବିରୋଧିର୍‌ଘି ଦୋଷ୍‌ବନ୍ ଛେମା କାମର୍ ତା, ନିହ୍ମା ସରଗ୍‌ତା ବାଙ୍ଗ୍‌ସ୍‌ହି ନିମାନ୍ ଛେମା କାମସ୍। ¹⁵ଆରୁ ଯଦି ନିମ୍ ନିହ୍ମା ବିରୋଧିର୍‌ଘି ଦୋଷ୍‌ବନ୍ ଛେମା ମା କାମର୍ ତା, ନିହ୍ମା ସରଗ୍‌ତା ବାଙ୍ଗ୍‌ସ୍‌ହି ନିହ୍ମା ଦୋଷ୍‌ବନ୍ ଛେମା ମା କାମ୍‌ଦାସ୍।”

ଉପାସ୍‌ଘି ବାରେନୁ ଉପ୍‌ଦେଶ୍

¹⁶“ଯେତ୍‌କବାକେନ୍ ନିମ୍ ଉପାସ୍ କାମର୍ ତା, କପ୍‌ଟୀ ଜାମାର୍ ଲେଖା ଚେହେରା ଉଦାସ୍ ଆମ୍‌କେ କାମା, ଏନ୍ଦେର୍‌ଗେକା ଆବ୍ଡ଼ାର୍ ଉପାସ୍ କାମାଲ୍‌ଦାମ୍‌ବୁଲି ଆଲାର୍‌ସାନ୍ ଏଦ୍‌ରାଗେ ତାହ୍ମା ଚେହେରାନ୍ ଉଦାସ୍ ଉଇନାଏ। ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ଆବ୍ଡ଼ାର୍ ତାହ୍ମା ଫଲ୍ ପୁରା ହାଖ୍ଖୀୟାର୍ କେର୍‌କାନାଏ। ¹⁷ଲେକିନ୍ ଯେତ୍‌କବାକେନ୍ ନିମ୍ ଉପାସ୍ କାମର୍ ତା ନିହ୍ମା କୁକ୍କୁନୁ ଇସୁଙ୍ଗ୍ ଖାସ୍‌ରା ଆରୁ ଚେହେରାନ୍ ମୁଜ୍ଜରା, ¹⁸ତା ଆଲାର୍ ଇବନ୍ ମା ଆହର୍ କା ନିନ୍ ଉପାସ୍ କାମାଲ୍‌ଦାଏ, ଲେକିନ୍ ନିଙ୍ଘା ସରଗ୍‌ତା ବାଙ୍ଗ୍‌ସ୍‌ ନେକାନ୍ କା ନିନ୍ ଏରା ପଲ୍ଲଦାଇନ୍ ଆସ୍ ଏର୍‌ଦାସ୍ କା ନିନ୍ ଉପାସ୍ କାମାଲ୍‌ଦାଏ, ନିଙ୍ଘା ସରଗ୍‌ତା ବାଙ୍ଗ୍‌ସ୍‌ ଏକାସ୍ କା ନିଙ୍ଘା ନୁଡ଼ିକିରି କାମ୍‌ଚ୍‌କା ନାଲ୍‌ଖୁବନ୍ ଏର୍‌ଦାସ୍ ଆସ୍ ନିଙ୍ଗାଗେ ଫଲ୍ ଚିୟସ୍।”

ସରଗ୍‌ତା ଧାନ୍ନୁ

(ଲୁକାସ୍ ୧୨:୩୩,୩୪)

¹⁹“ନିଜର୍‌ଘି ଲାଗାନ୍ ଦୁନିଆଁନୁ ଧାନ୍ନୁ ଆମା ଠୁଡ଼ିୟା, ଏକାସାନ୍ କା ପୋକୁ ଆରୁ ମାର୍‌ଚା ମହିଁକିରି ବାଗ୍‌ଡ଼ିଚି ଆରୁ ଚର୍‌ହାର୍ କାଥି ତୋଡ଼ିକିରି ହୋନାଏକାନାଏ। ²⁰ଲେକିନ୍ ନିମ୍ ନିଜର୍‌ଘି ଲାଗାନ୍ ସରଗ୍‌ନୁ ଧାନ୍ନୁ ଠୁଡ଼ିୟା, ଏକାସାନ୍ କା ନା ପୋକୁ ଆରୁ ମାର୍‌ଚା ମହିଁକିରି ବାଗ୍‌ଡ଼ାରି ନା ଚର୍‌ହାର୍ କାଥି ତୋଡ଼ିକିରି ହୋନାଏକାନାଏ। ²¹ଏନ୍ଦେର୍‌ଗେକା ଏକାସାନ୍ ନିହ୍ମା ଧାନ୍ନୁ ରାଇଦ୍ ଆସାନିନ୍ ନିହ୍ମା ମନ୍‌ଦ୍‌ହି ରଦ୍।”

ହାନ୍ନୁଦ୍ ମେଦୁନ୍ତା ବିଲ୍ଲୀଦ୍

(ଲୁକାସ୍ ୧୧:୩୪-୩୬)

²²“ହାନ୍ନୁଦ୍ ମେଦୁନ୍ତା ବିଲ୍ଲୀଦ୍: ହୁଦ୍‌ଘିଲାଗାନ୍ ଯଦି ନିହ୍ମା ହାନ୍ନୁଦ୍ ସାଫା ରାଇଦ୍ ହାଲେ ନିହ୍ମା ପୁରା ମେଦୁଦ୍‌ହି ବିଲ୍ଲୀ ଲେଖା ମାନଦ୍। ²³ଲେକିନ୍ ଯଦି ନିହ୍ମା ହାନ୍ନୁ ଖାରାପ୍ ରାଇଦ୍ ତା ନିହ୍ମା ମେଦୁଦ୍ ପୁରା ଉହା ମାନକୋ; ହୁଦ୍‌ଘିଲାଗାନ୍ ନିହ୍ମାଏନୁ ରାନା ବିଲ୍ଲୀଦ୍ ଯଦି ଉହା ମାନିକାଇ ତା ଆ ଉହାଦ୍ କେତ୍‌କ ଭାୟାନାକ୍ ମାନଦ୍।”

ଏନ୍ଦେର୍‌ଗେହି ଚିନ୍ତା ଆମା କାମା ପାର୍‌ମେଶ୍ଵାର୍‌ସ୍ ଜାମାନ୍ ଚିୟସ୍

(ଲୁକାସ୍ ୧୬:୧୩; ୧୨:୨୨-୩୧)

²⁴“ଅଣ୍ଟା ଆଲାସ୍ ଯୋଡ଼େ ମାଲିକ୍‌ର୍‌ଘି ସେବା କାମା ପଲ୍ଲଦାସ୍। ଏନ୍ଦେର୍‌ଗେକା ଆସ୍ ଅଣ୍ଟାସିନ୍ ବାନେ ହାଖ୍ଖସ୍ ଆରୁ, ଆରୁ ଅଣ୍ଟାସିନ୍ ହାଁଣସ୍ ତୁପ୍‌ଫସ୍। ଚାହେ ଅଣ୍ଟାସ୍‌ଗାନେ ମେଲ୍‌ପ୍ରେମ୍‌ନୁ ରସ୍ ଆରୁ, ଆରୁ ଅଣ୍ଟାସିନ୍ ହିନିସ୍ତା କାମସ୍। ନିମ୍ ପାର୍‌ମେଶ୍ଵାର୍ ଆରୁ ଧାନ୍ନୁ ଯୋଡ଼େନିନ୍ ସେବା କାମା ପଲ୍ଲଦାର୍। ²⁵ହୁଦ୍‌ଘିଲାଗାନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ ନିଜର୍ ଜୀବନ୍‌ଘି ଲାଗାନ୍ ଚିନ୍ତା ଆମାକାମା କା, ଏମ୍ ଏନ୍ଦେର୍ ଅନମ୍ ମହମ୍ ଆରୁ ନା ନିଜର୍ ମେଦୁଘି ଲାଗାନ୍ କା ଏମ୍ ଏନ୍ଦେନ୍ ଆତ୍ତମ୍। ଜୀବନ୍‌ଦ୍ ଅନ୍ନା ମହଁନାସ୍‌ତି ଆରୁ ମେଦୁଦ୍ ଚିଢ଼ା ପାଟାସ୍‌ତି ବାଡ଼୍‌କା ମାଲ୍ଲିଦ୍ କାଁଏ? ²⁶ଆକାଶ୍ ତା ଓଡ଼ା ଗୁଠିନ୍ ଏରା! ଆବ୍ଡ଼ାଦ୍ ନା ତା ଚାହିଦ୍ ନା ହୋୟିଦ୍ ଆରୁ ନା ତା ଆବ୍ଡ଼ାଦ୍ ମଁଣା ବାଖ୍‌ରାନୁ ଠୁଡ଼୍‌ୟିଦ୍; ହାଲେହି ନିହ୍ମା ସରଗ୍‌ତା ବାଙ୍ଗ୍‌ସ୍‌ ଆବ୍ଡ଼ାଗେ ଅନାମହାଗେ ଚିଦାସ୍। ହାଲେ ନିମ୍ ଆବ୍ଡ଼ାସ୍‌ତି ବାଗ୍ଗେ ମୂଲ୍ୟବାନ୍ ମାଲ୍‌ଦାର୍ କାଁଏ? ²⁷ନିହ୍ମା ଭିତର୍‌ନୁ ନେଦ୍ ଏନ୍ନେ ରାଦାର୍ କା ଚିନ୍ତା କାମ୍‌ଚ୍‌କୁନ୍‌ହି କାଟେ ସାମାୟଘି ଲାଗାନ୍ ନିହ୍ମା ବୟସ୍‌ବନ୍ ବାଢ଼ାବାଗେ ଅଙ୍ଗର୍?”

²⁸“ଆରୁ ନିମ୍ ଚିଢ଼ା ପାଟାଗେ ଏନ୍ଦେର୍‌ଗେ ଚିନ୍ତା କାମ୍‌ଦାର୍? ଜଙ୍ଗଲ୍ ତା ପୁଁପୁଗୁଠିନ୍ ଏରା, ଆବ୍ଡ଼ାଦ୍ ଏସ୍‌କେ ପାର୍‌ଦିଦ୍, ଆବ୍ଡ଼ାଦ୍ ନା ମେହ୍ଁନତ୍ କାମିଦ୍, ନା ନିଜର୍‌ଲାଗାନ୍ ଚିଢ଼ା ତିଆର୍ କାମିଦ୍। ²⁹ହାଲେହି ଏନ୍ ନିମାନ୍ ତେଙ୍ଗାଲ୍‌ଦାନ୍ କା ଶୁଲେମାନ୍ ରାଜାସ୍ ତାଙ୍ଘା ଆତ୍ତନା ପୁନ୍ଦର୍‌ନାନୁ ଆବ୍ଡ଼ାସ୍‌ତି ଅଣ୍ଟାଗାନେହି ବାରାବୁରି କାମା ପଲ୍ଲିୟାସିନ୍। ³⁰ଲେକିନ୍ ଏକା ଘାଁସିଦ୍ ଇନ୍ନା ହାଲ୍ଲୁନୁ ରାଇଦ୍ ଆରୁ ନେଲା ଏକାଗଡ଼ାନୁ ବାସ୍‌ସା ଚିଆକାଇଦ୍, ଆବନ୍ ଯଦି ପାର୍‌ମେଶ୍ଵାର୍‌ସ୍ ଏନ୍ନେ ସାଜାବାଦାସ୍ ହାଲେ, ହେ କମ୍ ବିଶ୍ୱାସ୍ କାମୁ ଆଲାରୋ ଆସ୍ ନିମାଗେ ଇଦ୍‌ଘିନ୍ତି ଏନ୍ଦେର୍‌ଗେ ବାଗ୍ଗେ ଚିଢ଼ାପାଟା ମା ଚିୟସ୍?”

³¹“ହୁଦ୍‌ଘିଲାଗାନ୍ ନିମ୍ ଏନ୍ଦେନ୍ ଅନମ୍ ମହମ୍ ଆରୁ ଏନ୍ଦେନ୍ ଆତ୍ତମ୍ ବୁଲି ଚିନ୍ତା ଆମ୍‌କେ କାମା। ³²ଏନ୍ଦେର୍‌ଗେକା ଦୁସ୍‌ରା ଜାତିୟାର୍ ଇବ୍ଡ଼ା ଜାମା ଜିନିଷ୍‌ଘି ଖଜାର୍‌ନୁ ଲାକ୍କାରାନାଏ, ଲେକିନ୍ ନିହ୍ମା ସରଗ୍‌ତା ବାଙ୍ଗ୍‌ସ୍‌ ଆହ୍‌ଦାସ୍ କା ନିମାଗେ ଇ ଜାମା ଜିନିଷ୍‌ଘି ଦାର୍‌କାର୍ ରାଇଦ୍। ³³ହୁଦ୍‌ଘିଲାଗାନ୍ ପହ୍‌ଲେ ନିମ୍ ୬:୩୩ ନିମ୍ ନିଜର୍ ଜୀବନ୍‌ନୁ ପାର୍‌ମେଶ୍ୱାର୍‌ସିନ୍ ରାଜା ବାନାବା ଆରୁ ପାର୍‌ମେଶ୍ୱାର୍‌ସ୍ ଏସ୍‌କେ ଚାହ୍‌ଦାସ୍ ଆନ୍ନେ ପାବିତାର୍ ଜୀବନ୍ ଉଜ୍ଜା।ପାର୍‌ମେଶ୍ଵାର୍‌ସ୍‌କି ରାଜୀ ଆରୁ ତାଙ୍ଘା ଧରମ୍‌ଘି ଖୋଜ୍ କାମା ହାଲେ ଇ ଜାମା ଜିନିଷ୍‌ଦ୍‌ ହି ନିମାଗେ ହାଖ୍ଖରଦ୍ କଦ୍। ³⁴ହୁଦ୍‌ଘିଲାଗାନ୍ ନିମ୍ ନେଲାନ୍ତା ଚିନ୍ତା ଆମା କାମା। ଏନ୍ଦେର୍‌ଗେକା ନେଲାଦ୍ ନିଜର୍‌ଲାଗାନ୍ ନିଜେ ଚିନ୍ତା କାମୋ। ଇନ୍ନାନ୍ତା ଦୁଃଖୁ ଇନ୍ନାଘି ଲାଗାନ୍ ଢେର୍ ରାଇଦ୍।”

ଦୁସ୍‌ରାର୍‌ଘି ମିଆଁ ଦୋଷ୍ ଆମା ଲାଗାବା

(ଲୁକାସ୍ ୬:୩୭,୩୮,୪୧,୪୨)

¹ଯୀଶୁସ୍ ତାଙ୍ଘା ଉପ୍‌ଦେଶ୍‌ନୁ ତେଙ୍ଗିୟାସ୍, “ନେଖା ମିଆଁହି ଦୋଷ୍ ଆମା ଲାଗାବା ହାଲେ ନିହ୍ମା ମିଆଁହି ପାର୍‌ମେଶ୍ୱାର୍‌ସ୍ ଦୋଷ୍ ମା ଲାଗାବାଦାସ୍। ²ଏନ୍ଦେର୍‌ଗେକା ଏସ୍‌କେ ନିମ୍ ନାନ୍ନାରିନ୍ ଦୋଷ୍ ଚିଦାର୍ ଆନ୍ନେ ନିହ୍ମା ମିଆଁହି ଦୋଷ୍ ଚିଆକୋ; ଆରୁ ଏକା ନାପ୍‌ତି ନିମ୍ ନାପ୍‌ଦାର୍ ହୁ ନାପ୍‌ତିନିନ୍ ନିହ୍ମା ଲାଗାନ୍‌ହି ନାପାକୋ।”

³“ନିନ୍ ଏନ୍ଦେର୍‌ଗେ ନିଙ୍ଘା ଭାଇସ୍‌କି ହାନ୍ନୁନ୍‌ତା ଛୋଟେ କାଚ୍‌ରାବନ୍ ଏରାଲ୍‌ଦାଏ, ଆରୁ ନିଙ୍ଘା ହାନ୍ନୁନ୍‌ତା କୁଟ୍ଟାବନ୍ ନିଜେ ଏରା ପଲ୍ଲାଲ୍‌ଦାଏ? ⁴ଯଦି ନିଙ୍ଘା ହାନ୍ନୁନୁ ବାଡ଼୍‌କା କାଚ୍‌ରା ରାଇ ହାଲେ ନିନ୍ ଏସ୍‌କେ ନିଙ୍ଘା ଭାଇସିନ୍ ତେଙ୍ଗା ଅଙ୍ଗୟକା ଅନ୍ଦରା ଏନ୍ ନିଙ୍ଘା ହାନ୍ନୁନ୍‌ତା ଛୋଟେ କାଚ୍‌ରାବନ୍ ଅଥ୍‌ର୍‌ନ୍‌ଚନ୍? ⁵ହେ କପ୍‌ଟୀ, ନିନ୍ ପହ୍‌ଲେ ନିଙ୍ଘା ହାନ୍ନୁନ୍‌ତା ବାଡ଼୍‌କା କାଚ୍‌ରାବନ୍ ଅଥ୍‌ରା ହାଲେ, ନିନ୍ ବାନେକିରି ଏରୟ ଆରୁ ନିଙ୍ଘା ଭାଇସ୍‌କି ହାନ୍ନୁନ୍‌ତା ଛୋଟେ କାଚ୍‌ରାବନ୍ ଅଥ୍‌ରା ଅଙ୍ଗୟ।”

⁶“ପାବିତାର୍ ଜିନିଷ୍‌ଗୁଠିନ୍ ଆଲ୍ଲାଗେ ଆମା ଚିଆ, ଆରୁ ନିଜର୍ ସୋନା ରୂପାଗୁଠିନ୍ କିସ୍‌ସୁଘି ଆଘ୍‌ଲି ଆମ୍‌କେ ଖେବ୍ଡ଼ା, ଏକାସାନ୍ ଏନ୍ନେ ମା ମାନ୍ନାଦ୍ କା ଆବ୍ଡ଼ାର୍ ଆବନ୍ ହେଡ୍ଡୁ କିୟାଁ ତିର୍‌ହର୍ ନାବର୍ ଆରୁ ଉଲ୍‌ଟାରିକିରି ନିମାନ୍ ଚାର୍‌ରଚୋ।”

ପାର୍‌ମେଶ୍ଵାର୍‌ସାନ୍ ଧିୟାନ୍-ଧିୟାନ୍ ବିନ୍ତି କାମ୍‌ନା

(ଲୁକାସ୍ ୧୧:୯-୧୩)

⁷“ପାର୍‌ମେଶ୍ୱାର୍‌ସିନ୍ ନିତ୍ତେ ରା, ଆରୁ ନିମାଗେ ଚିଆକୋ; ବେଦ୍ଦତେ ରା, ହାଲେ ନିମାଗେ ହାଖ୍ଖରୋ; ଠୋକ୍-ଠୋକ୍ କାମ୍‌ତେ ରା, ହାଲେ ନିହ୍ମା ଲାଗାନ୍ ବାଲି ତିସ୍‌କାକୋ। ⁸ଏନ୍ଦେର୍‌ଗେକା ଏକାସ୍ ନିଦାସ୍, ଆସ୍‌କେ ହାଖ୍ଖରିଦ୍; ଆରୁ ଏକାସ୍ ବେଦ୍ଦଦାସ୍, ଆସ୍ ହାଖ୍ଖଦାସ୍; ଆରୁ ଏକାସ୍ ଠୋକ୍-ଠୋକ୍ କାମ୍‌ତେ ରାଦାସ୍, ଆସ୍‌କେ ବାଲି ତିସ୍‌କାକୋ।”

⁹“ନିହ୍ମା ଭିତର୍‌ନୁ ଏନ୍ନେ ଏକା ଆଲାସ୍ ରାଦାସ୍, କା ଯଦି ତାଙ୍ଘା ହାଦ୍ଦୁସ୍ ଆସ୍‌ମା ନିଅସ୍, ତା ଆସ୍ ଆସ୍‌କେ ଚାଁଚାନ୍ ଚସ୍? ମାଲ୍ଲା! ¹⁰ଚାହେ ଇଞ୍ଜୋ ନିଅସ୍, ହାଲେ ନେର୍‌ରୁନ୍ ଚିୟସ୍? ମାଲ୍ଲା! ¹¹ହାଲେ ନିମ୍ ଖାରାପ୍ ରାଇକିରିହି, ନିଜର୍ ହାଦ୍ଦୁର୍‌ଗେ ବାନେ ଜିନିଷ୍‌ଗୁଠିନ୍ ଚିୟାଗେ ଆହ୍‌ଦାର୍ ତା, ନିହ୍ମାଏ ସରଗ୍‌ତା ବାଙ୍ଗ୍‌ସ୍‌ ନିଜର୍ ନିନା ବାଲାର୍‌ଗେ ବାନେ-ବାନେ ଜିନିଷ୍‌ଗୁଠିନ୍ ଏନ୍ଦେର୍‌ଗେ ମା ଚିୟସ୍? ¹²ହୁଦ୍‌ଘିଲାଗାନ୍ ନିମ୍ ଆଲାର୍‌ସ୍‌ତି ଏସ୍‌କେ ବେଭାର୍ ବେଦ୍ଦଦାର୍, ଆନ୍ନେନ୍ ନିମ୍ ଆବ୍ଡ଼ାର୍ ଗାନେ ବେଭାର୍ କାମା; ଏନ୍ଦେର୍‌ଗେକା ଇଦ୍ ନିୟମ୍ ଆରୁ ନାବୀଜାମାର୍‌ଘି ଶିକ୍ଷାଘି ମତ୍‌ଲବ୍‌ଦ୍‌।”

ସାକ୍‌ଡ଼ି ଆରୁ ଚାଉଡ଼ା ପାବୁ

(ଲୁକାସ୍ ୧୩:୨୪)

¹³“ସାକ୍‌ଡ଼ି ଫାଟକ୍‌ନୁ କରା, ଏନ୍ଦେର୍‌ଗେକା ନାଶ୍‌ତାରା କାନା ଫାଟକ୍ ଓସାର୍ ରାଇଦ୍ ଆରୁ ପାବୁ ସହଜ୍ ରାଇଦ୍; ହୁଦ୍‌ଘିଲାଗାନ୍ ଢେର୍ ଆଲାର୍ ଆନ୍ନୁ କାନାଏ। ¹⁴ଲେକିନ୍ ସବୁଦିନ୍‌ତା ଜୀବନ୍ ତାରା କାନା ଫାଟକ୍ ସାକ୍‌ଡ଼ି ରାଇ ଆରୁ ପାବୁ କଠିନ୍ ରାଇଦ୍ ହୁଦ୍‌ଘିଲାଗାନ୍ ଥୋଡ଼େ ଆଲାର୍ ଇନ୍ନୁ କାନାଏ।”

ଏସ୍‌କେ ମାନ୍ନୁ ଆନ୍ନେ ଫାଡ଼ୁ

(ଲୁକାସ୍ ୬:୪୩,୪୪,୪୬; ୧୩:୨୫-୨୭)

¹⁵“ଝୁଟ୍ଟୁ ନାବୀର୍‌ସ୍‌ତି ହୁସିୟାର୍‌କିରି ରା, ଏକାର୍ କା ଭେଡ଼ିଘି ଭେସ୍‌ନୁ ନିହ୍ମା ଚାହାଗେ ବାର୍‌ନାଏ, ଲେକିନ୍ ଅସଲ୍‌ନୁ ଆବ୍ଡ଼ାର୍ ନୁକ୍‌ସାନ୍ କାମ୍‌ନାବାଲା ଡୁରୁର୍। ¹⁶ଆବ୍ଡ଼ାର୍‌ଘି ନାଲ୍‌ଖୁ ଦ୍ୱାର୍‌ନୁ ଆବ୍ଡ଼ାରିନ୍ ଚିହ୍ନର୍। ଆଲାର୍ ଆଚ୍ଚୁ ଝୁଁଣିନ୍ତି ଅଙ୍ଗୁର୍ ଫାଡ଼ୁ, ଚାହେ ପାନୁ ମାନ୍ନୁନ୍‌ତି ଡୁମାରି ଚହ୍‌ନାଏ କାଁଏ? ¹⁷ହନ୍ନେନ୍ ଜାମା ବାନେ ମାନ୍ନୁନୁ ବାନେ ଫାଡ଼ୁ ହାଞ୍ଜି ଆରୁ ଖାରାପ୍ ମାନ୍ନୁନୁ ଖାରାପ୍ ଫାଡ଼ୁ ହାଞ୍ଜି। ¹⁸ବାନେ ମାନ୍ନୁନୁ ଖାରାପ୍ ଫାଡ଼ୁ ମା ହାଞ୍ଜି, ଆରୁ ଖାରାପ୍ ମାନ୍ନୁନୁ ବାନେ ଫାଡ଼ୁ ମା ହାଞ୍ଜି। ¹⁹ଏକା ମାନ୍ନୁନୁ ବାନେ ଫାଡ଼ୁ ମା ହାଞ୍ଜି, ଆବନ୍ ଛପିକିରି ଚିଚ୍ଚୁନୁ ବାସ୍‌ସାଚା କାଇ। ²⁰ହନ୍ନେନ୍ ନିମ୍ ଆବ୍ଡ଼ାର୍‌ଘି ଫାଡ଼ୁତି ଆବ୍ଡ଼ାରିନ୍ ଚିହ୍ନା ଅଙ୍ଗର୍।”

²¹“ନେଦ୍ ଏଙ୍ଗାନ୍, ‘ହେ ପ୍ରାଭୁ! ହେ ପ୍ରାଭୁ!’ ବୁଲି ତେଙ୍ଗର୍, ଆବ୍ଡ଼ାର୍‌ଘି ଭିତର୍‌ନୁ ଜାମାର୍ ସରଗ୍ ରାଜୀନୁ କରା ପଲ୍ଲନାଏ, ଲେକିନ୍ ନେଦ୍ ଏଙ୍ଘାଏ ସରଗ୍‌ତା ବାଙ୍ଗ୍‌ସ୍‌କି ଇଚ୍ଛା ଲେଖା ଚାଲ୍‌ର୍‌ନାଏ ଆବ୍ଡ଼ାର୍ ଖାଲି କରାଅଙ୍ଗର୍। ²²ଆ ନ୍ୟାୟଘି ଉଲ୍ଲା ଢେର୍ ଆଲାର୍ ଏଙ୍ଗାନ୍ ତେଙ୍ଗର୍, ‘ହେ ପ୍ରାଭୁ, ହେ ପ୍ରାଭୁ, ଏମ୍ କାଁଏ ନିହ୍ମା ନାମେତି ଭବିଷତ୍ କାତ୍‌ଥା ମାଲ୍ଲା ତେଙ୍ଗୁମ୍, ଆରୁ ନିହ୍ମା ନାମେତି କାଁଏ ଭୁତ୍ତୁଗୁଠିନ୍ ମାଲ୍ଲା ଅଥ୍‌ରୁମ୍? ଆରୁ ନିହ୍ମା ନାମେତି ଢେର୍ ଅଦ୍‌ଭୁତ୍ ନାଲ୍‌ଖୁ ମାଲ୍ଲା କାମୁମ୍?’ ²³ହତ୍‌କବାକେନ୍ ଏନ୍ ସାଫା-ସାଫା ତେଙ୍ଗନ୍, ‘ଏନ୍ ଏକ୍‌ଲାହି ନିମାନ୍ ବାଲ୍ଲକାଦାନ୍। ହେ ଅଧର୍ମିଆରୋ, ଏଙ୍ଘା ଚାହାନ୍‌ନ୍ତି ବୁଙ୍ଗାକାଲା।’”

ଦୁଇ ଲୋକ୍ ଆଡ଼୍‌ପା କାମୁ ଆଲାର୍‌ଘି କାତ୍‌ଥା

(ଲୁକାସ୍ ୬:୪୭-୪୯)

²⁴“ଇଦ୍‌ଘିଲାଗାନ୍ ନେଦ୍ ଏଙ୍ଘା ଇ ଜାମା କାତ୍‌ଥାନ୍ ମେନ୍ନାଏ ଆରୁ ଆବନ୍ ମାନ୍ନାଏ, ଆର୍ ଆ ବୁଦ୍ଧିୟାର୍ ଆଲାସ୍ ଲେଖା, ଏକାସ୍ କା ତାଙ୍ଘା ଆଡ଼୍‌ପାନ୍ ଚାଟ୍‌ଣୀ ମିଆଁ କାମ୍‌ଚାସ୍। ²⁵ଆରୁ ଚେପୁ ବାର୍‌ଚା, ବାଢ଼ି ବାର୍‌ଚା, ଆନ୍ଧିଧୁକା ବାର୍‌ଚା, ଆରୁ ଆ ଆଡ଼୍‌ପା ଗାନେ ଧାକିୟାରାଚା, ହାଲେହି ଆ ଆଡ଼୍‌ପାଦ୍ ମା ଧାସ୍‌କାରାଚା, ଏନ୍ଦେର୍‌ଗେକା ଆଦ୍‌ଘି ନାହିଦ୍ ଚାଟ୍‌ଣୀ ମିଆଁ କାମ୍‌ଚ୍‌କା ରାଚା। ²⁶ଆରୁ ନେଦ୍ ଏଙ୍ଘା ଇ କାତ୍‌ଥାନ୍ ମେନ୍ନାଏ ଆରୁ ମାନ୍ନାଏ, ଆବ୍ଡ଼ାର୍ ଆ ମୁରୁଖ୍ ଆଲାସ୍ ଲେଖା ଏକାସ୍ କା ତାଙ୍ଘା ଆଡ଼୍‌ପାନ୍ ଚାଲ୍‌କ୍ରିନୁ କାମ୍‌ଚାସ୍। ²⁷ଆରୁ ଚେପୁ ବାର୍‌ଚା, ବାଢ଼ି ବାର୍‌ଚା, ଆନ୍ଧିଧୁକା ବାର୍‌ଚା, ଆରୁ ଆ ଆଡ଼୍‌ପା ଗାନେ ଧାକିୟାରାଚାଦ୍ ଆରୁ ଆ ଆଡ଼୍‌ପାଦ୍ ଧାସ୍‌କାରାଇକିରି ଛାର୍‌ଖାର୍ ମାନ୍‌ଚାକେରା।”

²⁸ଯେତ୍‌କବାକେନ୍ ଯୀଶୁସ୍ ଇ ଉପ୍‌ଦେଶ୍‌ବନ୍ ତେଙ୍ଗା ମୁଞ୍ଜିୟାସ୍ ତା, ଆଲାର୍ ତାଙ୍ଘା ଉପ୍‌ଦେଶ୍ ମେନିକିରି ଆଚ୍‌ମିତ୍ ମାନ୍‌ଚାର୍ କେରାର୍, ²⁹ଏନ୍ଦେର୍‌ଗେକା ଆସ୍ ତାହ୍ମା ପଣ୍ତିତ୍‌ଜାମାର୍‌ଘି ଲେଖା ଉପ୍‌ଦେଶ୍ ମା ଚିଇକିରି ଅଣ୍ଟା ହକ୍ ହାକ୍କା ଆଲାସ୍ ଲେଖା ଉପ୍‌ଦେଶ୍ ଚିଆଲିୟାସ୍।

ଯୀଶୁସ୍ ଅଣ୍ଟା କୋଢ଼୍‌ ବେହ୍ମରିୟାସିନ୍ ବାନେ କାମାଲ୍‌ଦାସ୍

(ମାର୍‌କୁସ୍ ୧:୪୦-୪୫; ଲୁକାସ୍ ୫:୧୨-୧୬)

¹ଯେତ୍‌କବାକେନ୍ ଯୀଶୁସ୍ ପାର୍ତ୍ତାନ୍ତି ଏତ୍ତିୟାସ୍ ତା, ଢେର୍ ଆଲାର୍ ଆସ୍‌କି ପାଛ୍‌ଲି-ପାଛ୍‌ଲି କେରାର୍। ²ଆରୁ ଏରା, ଅଣ୍ଟା କୋଢ଼୍‌ ବେହ୍ମରିୟାସ୍ ଯୀଶୁସ୍‌କି ଚାହାଗେ ବାର୍‌ଚାସ୍ ଆରୁ ଯୋହାର୍ କାମିକିରି ତେଙ୍ଗିୟାସ୍, “ହେ ପ୍ରାଭୁ, ଯଦି ନିମ୍ ଚାହଁର୍ ତା ଏଙ୍ଗାନ୍ ଶୁଦ୍ଧ୍ କାମା ଅଙ୍ଗର୍।” ³ଆଙ୍ଗେନ୍ ଯୀଶୁସ୍ ତାଙ୍ଘା ହେଖ୍ଖା ଲାମ୍ବାବାଇକିରି ଆସିନ୍ ଏସ୍‌ରାସ୍, ଆରୁ ତେଙ୍ଗିୟାସ୍, “ଏନ୍ ଚାହାଁଲ୍‌ଦାନ୍, ନିନ୍ ଶୁଦ୍ଧ୍ ମାନାକାଲା।” ଆରୁ ଆ କୋଢ଼୍‌ ବେହ୍ମରିୟାସ୍ ହୁଙ୍ଗେନିନ୍ ଶୁଦ୍ଧ୍ ମାନ୍‌ଚାସ୍‌କେରାସ୍। ⁴ଯୀଶୁସ୍ ଆସିନ୍ ତେଙ୍ଗିୟାସ୍, “ଏରା ଇବନ୍ ନେକାନ୍‌ହି ଆମ୍‌କେ ତେଙ୍ଗା, ଲେକିନ୍ କାଲା ଆରୁ ନିଜ୍‌କେନିଜ୍ ପୁରୋହିତ୍‌ଜାମାରିନ୍ ଏଦା, ଆରୁ ଏକା ନିୟମ୍‌ବନ୍ ମୁଶା ନାବୀସ୍ ଠାହ୍‌ରାଚ୍‌କାଦାସ୍ ଆଦ୍‌ଘି ଲେଖା ବଲୀ ଚାଢ଼ାବା ଏସ୍‌କେ କା ଆଲାର୍‌ଘି ଲାଗାନ୍ ଆଦ୍ ସାକ୍ଷୀ ମାନଦ୍।”

ସିପାହୀଜାମାର୍‌ଘି ଅଣ୍ଟା ମୁଖିଆସ୍‌କି ବିଶ୍ଵାସ୍

(ଲୁକାସ୍ ୭:୧-୧୦)

⁵ଯେତ୍‌କବାକେନ୍ ଯୀଶୁସ୍ କାଫାର୍‌ନାହୁମ୍ ସହର୍‌ଗେ ବାର୍‌ଚାସ୍ ତା ଅଣ୍ଟା ରୋମୀ ସିପାହୀସ୍ ଯୀଶୁସ୍‌କି ଚାହାଗେ ବାର୍‌ଚାସ୍ ଆରୁ ଆର୍‌ଜୀବିନ୍ତି କାମିକିରି ତେଙ୍ଗିୟାସ୍, ⁶“ହେ ପ୍ରାଭୁ, ଏଙ୍ଘା ଗୁତ୍ତିୟାସ୍ ଆଡ଼୍‌ପାନୁ ଏକ୍ଆଙ୍ଗିୟା ବେମାର୍‌ତି ଗଧାନୁ ରାଇକିରି ମୁରୁକ୍ ଦୁଃଖୁ ସାହାଲ୍‌ଦାସ୍।” ⁷ଯୀଶୁସ୍ ଆସିନ୍ ତେଙ୍ଗିୟାସ୍, “ଏନ୍ କାଇକିରି ଆସିନ୍ ବାନେ କାମନ୍।” ⁸ଲେକିନ୍ ଆ ରୋମୀ ସିପାହୀସ୍ ଯାବାବ୍ ଚିଚ୍ଚାସ୍, “ହେ ପ୍ରାଭୁ, ନିମ୍ ଏଙ୍ଘା ଆଡ଼୍‌ପା ବାରର୍, ଏନ୍ ଆଦ୍‌ଘି ଲାଇଗ୍ ମାଲ୍‌ଦାନ୍ ଲେକିନ୍ ନିମ୍ ପଦେ କାତ୍‌ଥା ତେଙ୍ଗାଚା ହାଲେ ଏଙ୍ଘା ଗୁତ୍ତିୟାସ୍ ବାନେ ମାନସ୍‌କସ୍। ⁹ଏନ୍ଦେର୍‌ଗେକା ଏନ୍‌ହି ଅଣ୍ଟାସ୍‌କି କିୟାଁ ରାଦାନ୍ ଆରୁ ଏଙ୍ଘା କିୟାଁ ସିପାହୀ ଜାମାର୍‌ହି ରାନାଏ। ଏନ୍ ଅର୍‌ତୁସିନ୍ ‘କାଲା!’ ବାଚ୍‌କୁନ୍ ଆସ୍ କାଦାସ୍; ଆରୁ ଅର୍‌ତୁସିନ୍, ‘ବାରା!’ ବାଚ୍‌କୁନ୍ ଆସ୍ ବାର୍‌ଦାସ୍! ଆରୁ ଏଙ୍ଘା ଗୁତ୍ତିୟାସିନ୍ ଇବନ୍ କାମା ବାଚ୍‌କୁନ୍ ଆସ୍ କାମ୍‌ଦାସ୍।”

¹⁰ଯୀଶୁସ୍ ଇବନ୍ ମେନିକିରି ଆଚ୍‌ମିତ୍ ମାନ୍‌ଚାସ୍ କେରାସ୍, ଆରୁ ତାଙ୍ଘା ପାଛ୍‌ଲି ବାରୁ ଆଲାରିନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ଏନ୍ ଇସ୍ରାଏଲ୍ ରାଜୀନୁ ନେଖାସାନ୍‌ହି ଏତ୍‌କ ବାଡ଼୍‌କା ବିଶ୍ୱାସ୍ ମାଲ୍ଲା ହାଖ୍ଖୁନ୍। ¹¹ଆରୁ ଏନ୍ ନିମାନ୍ ତେଙ୍ଗାଲ୍‌ଦାନ୍ କା ଏନ୍ନେନିନ୍ ପୁରୁବ୍ ଆରୁ ପଶ୍ଚିମ୍‌ତି ଢେର୍ ଆଲାର୍ ବାରିକିରି ଆବ୍ରାହାମ୍, ଇସାକ୍, ଆରୁ ୟାକୁବ୍‌ସ୍‌ଗାନେ ସରଗ୍ ରାଜୀନୁ ଭୋଜିନୁ ଅକ୍କର୍। ¹²ଲେକିନ୍ ରାଜୀନ୍ତା ହାଦ୍ଦୁବଚ୍ଚରିନ୍ ବାହ୍‌ରି ଉହାନୁ ତୁକ୍କାଚାକୋ: ଆସାନ୍ ଆବ୍ଡ଼ାର୍ ଅହ୍ଲର୍ ଆରୁ ପାଲ୍ଲୁନ୍ ପାର୍‌ମ୍‌ତେରର୍।” ¹³ଆନ୍ତିନ୍ ଯୀଶୁସ୍ ସିପାହୀସିନ୍ ତେଙ୍ଗିୟାସ୍, “କାଲା, ନିନ୍ ଏସ୍‌କେ ବିଶ୍ୱାସ୍ କାମାଲ୍‌ଦାଏ ଆନ୍ନେନ୍ ନିଙ୍ଘାଗାନେ ମାନ୍ନାଦ୍।” ଆରୁ ତାଙ୍ଘା ଗୁତ୍ତିୟାସ୍ ଆଖାନେନ୍ ବାନେ ମାନ୍‌ଚାସ୍‌କେରାସ୍।

ଯୀଶୁସ୍ ଢେର୍ ବେହ୍ମରିୟାରିନ୍ ବାନେ କାମାଲ୍‌ଦାସ୍

(ମାର୍‌କୁସ୍ ୧:୨୯-୩୪; ଲୁକାସ୍ ୪:୩୮-୪୧)

¹⁴ଯେତ୍‌କବାକେନ୍ ଯୀଶୁସ୍ ପାତ୍ରାସ୍‌କି ଆଡ଼୍‌ପା ବାର୍‌ଚାସ୍ ତା, ଆସ୍ ପାତ୍ରାସ୍‌କି ଶାଶ୍‌ବନ୍ ମୁରୁକ୍ ଯୋର୍ ନାଣିତି ଚୁତ୍‌କାନ୍ ଏରିୟାସ୍। ¹⁵ଯୀଶୁସ୍ ଆଦ୍‌ଘି ହେଖ୍ଖାନ୍ ଏଁସ୍‌ରାସ୍ ଆରୁ ଆଦ୍‌ଘି ନାଣିଦ୍ ଏତ୍ତିୟାକେରା, ଆରୁ ଆଦ୍ ଉସ୍‌କାରାଇକିରି ଆସ୍‌କି ସେବା କାମାଗେ ଲାଗ୍ଗିୟା। ¹⁶ବିଡ଼ି ଅକ୍କନାବାକେନ୍ ଆଲାର୍ ଢେର୍ ଭୁତ୍ତୁଲାକ୍କା ଆଲାରିନ୍ ଯୀଶୁସ୍‌କି ଚାହାଗେ ଅନ୍ଦ୍ରାର୍, ଆଙ୍ଗେନ୍ ଯୀଶୁସ୍ ତାଙ୍ଘା ବଚନ୍‌ତି ଭୁତ୍ତୁଗୁଠିନ୍ ଅଥ୍‌ରାସ୍; ଆରୁ ଜାମା ବେହ୍ମରିୟାରିନ୍ ବାନେ କାମ୍‌ଚାସ୍। ¹⁷ଏସ୍‌କେ କା ଏକା ବଚନ୍‌ବନ୍ ଇଶାୟାହ୍‌ସ୍ ନାବୀସ୍‌କି ଦ୍ୱାର୍‌ନୁ ତେଙ୍କାରାଚା ଆଦ୍ ପୁରା ମାନ୍ନାଦ୍: “ଆସ୍ ନିଜେ ନାହ୍ମାଏ କମ୍‌ଜୋରିବନ୍ ତାଙ୍ଘା ମିଆଁ ଅଚ୍ଚାସ୍ ଆରୁ ବେମାର୍‌ଗୁଠିନ୍ ଚେଡ୍ଡାସ୍।”

ଯୀଶୁସ୍‌କି ଚେଲା ମାନ୍ନାଘି ମୂଲ୍ୟ

(ଲୁକାସ୍ ୯:୫୭-୬୨)

¹⁸ଯେତ୍‌କବାକେନ୍ ଯୀଶୁସ୍ ତାଙ୍ଘା ଚାର୍‌ହି ପାଖା ଆଲାର୍‌ଘି ଭିଡ଼୍ ଏରିୟାସ୍ ତା, ହଁସ୍‌ରା ହାପାଖା କାଲାଗେ ତାଙ୍ଘା ଚେଲାରିନ୍ ହୁକୁମ୍ ଚିଚ୍ଚାସ୍। ¹⁹ହତ୍‌କବାକେନ୍ ଅଣ୍ଟା ପଣ୍ତିତ୍‌ସ୍ ଯୀଶୁସ୍‌କି ଚାହାଗେ ବାରିକିରି ତେଙ୍ଗିୟାସ୍, “ହେ ଗୁରୁ, ନିମ୍ ଏକାତାରା କର୍, ଏନ୍‌ହି ନିହ୍ମା ପାଛ୍‌ଲି-ପାଛ୍‌ଲି କନ୍।” ²⁰ଯୀଶୁସ୍ ଆସିନ୍ ତେଙ୍ଗିୟାସ୍, “ଡୁରୁଘି ତାଙ୍ଘା ଲାତା ରାଇ ଆରୁ ଆକାଶ୍‌ତା ଓଡ଼ାଗୁଠିଘି ତାପ୍ପା ରାଇ ଲେକିନ୍; ମୁନୁଷ୍ ହାଦ୍ଦୁସ୍‌କି ଲାଗାନ୍ କୁକ୍କୁ ଉୟାଗେ ହି ଆଡ୍ଡା ମାଲ୍ଲାଦିନ୍।” ²¹ଚେଲାଜାମାର୍‌ଘି ଭିତର୍‌ନୁ ଅର୍‌ତୁସ୍ ତେଙ୍ଗିୟାସ୍, “ହେ ପ୍ରାଭୁ, ଏଙ୍ଗାନ୍ ଆଘ୍‌ଲି ଏଙ୍ଘା ବୁଆସିନ୍ ମାଁଣାଗେ କାଲା ଚିଆ।” ²²ଲେକିନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ନିନ୍ ଏଙ୍ଘା ପାଛ୍‌ଲି ବାରା ଆରୁ ନେଦ୍ ଆତ୍ମିକ୍ ରୂପ୍‌ତି କେଚ୍ଚଚାର୍ କେର୍‌କାନାଏ ଆବ୍ଡ଼ାର୍ ନିଜର୍ କେଚ୍ଚକାରିନ୍ ମାଣର୍।”

ଯୀଶୁସ୍ ଆନ୍ଧି ଧୁକାବନ୍ ବନ୍ଦ୍ କାମାଲ୍‌ଦାସ୍

(ମାର୍‌କୁସ୍ ୪:୩୫-୪୧; ଲୁକାସ୍ ୮:୨୨-୨୫)

²³ଯେତ୍‌କବାକେନ୍ ଯୀଶୁସ୍ ଡଙ୍ଗାନୁ ଆର୍‌ଗିୟାସ୍ ତା, ତାଙ୍ଘା ଚେଲାଜାମାର୍ ତାଙ୍ଘା ପାଛ୍‌ଲି-ପାଛ୍‌ଲି କେରାର୍। ²⁴ଆରୁ ଏରା, ହଁସ୍‌ରାନୁ ଏତ୍‌କ ବାଡ଼୍‌କା ଆନ୍ଧିଧୁକା ବାର୍‌ଚା ଯେ ଡଙ୍ଗାଦ୍ ଲହ୍‌ଡ଼ିତି ନିନ୍ଦା କାଲିୟାଦ୍, ହତ୍‌କବାକେନ୍ ଯୀଶୁସ୍ ହାନ୍ଦ୍ରାଲିୟାସ୍। ²⁵ଆଙ୍ଗେନ୍ ଚେଲାଜାମାର୍ ଯୀଶୁସ୍‌କି ଚାହାଗେ ବାର୍‌ଚାର୍ ଆରୁ ତାଙ୍ଗାନ୍ ଉଠାବିକିରି ତେଙ୍ଗିୟାର୍, “ହେ ପ୍ରାଭୁ, ଏମାନ୍ ବାଛାବା, ଏମ୍ ମୁହ୍ଲା କାଲ୍‌ଦାମ୍।” ²⁶ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ହେ କମ୍ ବିଶ୍ୱାସ୍ କାମୁରୋ, ଏନ୍ଦେର୍‌ଗେ ଏଲ୍‌ଚାଲ୍‌ଦାର୍?” ଆନ୍ତିନ୍ ଆସ୍ ଉସ୍‌କାରାଇକିରି ଆନ୍ଧି ଧୁକାନ୍ ଆରୁ ଲହ୍‌ଡ଼ିନ୍‌ହି ଧାମ୍‌କାଚାସ୍ ଆରୁ ଜାମାଦ୍ ବନ୍ଦ୍ ମାନ୍‌ଚାକେରା। ²⁷ଆରୁ ଚେଲାଜାମାର୍ ଆଚ୍‌ମିତ୍ ମାନିକିରି ତେଙ୍ଗିୟାର୍, “ଇସ୍ ଏସ୍‌କେ ଆଲାସ୍ ଯେ ଧୁକା ଆରୁ ଲହଡ଼ିଦ୍‌ହି ତାଙ୍ଘା ହୁକୁମ୍‌ବନ୍ ମେନିଦ୍।”

ଯୀଶୁସ୍ ଦୁଇ ଲୋକ୍ ଭୁତ୍ତୁଲାକ୍କା ଆଲାରିନ୍ ବାନେ କାମାଲ୍‌ଦାସ୍

(ମାର୍‌କୁସ୍ ୫:୧-୨୦; ଲୁକାସ୍ ୮:୨୬-୩୯)

²⁸ଯେତ୍‌କବାକେନ୍ ଯୀଶୁସ୍ ହଁସ୍‌ରା ହାପାଖ୍‌ତା ଗାଦ୍‌ରେନିୟ ଜାମାର୍‌ଘି ପ୍ରଦେଶ୍‌ଗେ ଆଣ୍‌ସିୟାସ୍ ତା, ଭୁତ୍ତୁଲାକ୍କା ଦୁଇ ଲୋକ୍ ଆଲାର୍ ମାସ୍‌ଣା ତାର୍‌ତି ଉର୍‌ଖିଆର୍ ଆରୁ ଆସିନ୍ ଭେଁଟ୍ ମାନ୍‌ଚାର୍। ଆବ୍ଡ଼ାର୍ ଏତ୍‌କ ବିର୍‌ଝା ରାଚ୍‌କାଚାର୍ ଯେ ଆପାବୁନୁ ନେଦ୍‌ହି କାଲାବାରା ପଲ୍ଲାଲିୟାର୍। ²⁹ଆବ୍ଡ଼ାର୍ ଚିର୍‌ରା ରାଇକିରି ତେଙ୍ଗିୟାର୍, “ହେ ପାର୍‌ମେଶ୍ଵାର୍‌ସ୍‌କି ହାଦ୍ଦୁ, ଏହ୍ମା ଗାନେ ନିହ୍ମାଏ ଏନ୍ଦେର୍ ନାଲ୍‌ଖୁ ରାଇଦ୍? ନିମ୍ ଠାହ୍‌ରାଚ୍‌କା ସାମାୟନ୍ତି ପହ୍‌ଲେ ଏମାନ୍ ଦୁଃଖୁ ଚିୟାଗେ ଇସାନ୍ ବାର୍‌ଚ୍‌କାଦାର୍ କାଁଏ?” ³⁰ଆରୁ ଆବ୍ଡ଼ାର୍‌ସ୍‌ତି କାଟେ ଗେଚ୍ଛାନୁ ଅଣ୍ଟା ବାଡ଼୍‌କା କିସ୍‌ସୁଗୁଠି ମେନାଲିୟାଦ୍। ³¹ଭୁତ୍ତୁଗୁଠିଦ୍ ଆସିନ୍ ଆର୍‌ଜୀବିନ୍ତି କାମିକିରି ତେଙ୍ଗିୟାଦ୍, “ଯଦି ନିମ୍ ଏମାନ୍ ଅଥ୍‌ରାଗେ ବେଦ୍ଦାଲ୍‌ଦାର୍‌ତା, କିସ୍‌ସୁଗୁଠିନୁ କାଲାଗେ ଚିଆ।” ³²ଯୀଶୁସ୍ ଭୁତ୍ତୁଗୁଠିନ୍ ତେଙ୍ଗିୟାସ୍, “କାଲା!” ଆଙ୍ଗେନ୍ ଆବ୍ଡ଼ାଦ୍ ଉର୍‌ଖିକିରି କିସ୍‌ସୁଗୁଟ୍ଟଠିନୁ କର୍‌ଚା, ଆରୁ ଏରା, ପୁରା କିସ୍‌ସୁଗୁଠିଦ୍ ମୁରୁକ୍ ଜୋର୍‌ସେ କୁଦିୟାରିକିରି ଉତ୍‌ରେନ୍ ଆଡ୍ଡାନ୍ତି ସାମ୍‌ଧୁର୍‌ନୁ ଡେକ୍‌ଚା ଆରୁ ମୁହ୍ଲିଆ କେଚ୍ଚାକେରା। ³³ଆରୁ କିସ୍‌ସୁ ହାପୁର୍ ଇ ଘାଟ୍‌ଣାନ୍ ଏରିକିରି ବୁଙ୍ଗେଇଚାର୍, ଆରୁ ପାଡ଼ାଗୁଠିନୁ କାଇକିରି ଇବ୍ଡ଼ା ଜାମା କାତ୍‌ଥାନ୍ ଆରୁ ଭୁତ୍ତୁଲାକ୍କା ଆଲାର୍‌ଘିନୁ ଏସ୍‌କେ-ଏସ୍‌କେ ଘାଟ୍‌ରା ଆବ୍ଡ଼ାନ୍ ତେଙ୍ଗିୟାର୍। ³⁴ଆଙ୍ଗେନ୍ ସହର୍‌ତା ଆଲାର୍ ଯୀଶୁସ୍‌ଗାନେ ଭେଁଟ୍ ମାନାଗେ ବାର୍‌ଚାର୍, ଆରୁ ଆସିନ୍ ଏରିକିରି ତାହ୍ମା ପ୍ରଦେଶ୍‌ତି ବୁଙ୍ଗାକାଲା ବୁଲି ଆର୍‌ଜୀବିନ୍ତି କାମ୍‌ଚାର୍।

ଯୀଶୁସ୍ ଅଣ୍ଟା ଏକ୍ଆଙ୍ଗିୟା ବେହ୍ମରିୟାସିନ୍ ବାନେ କାମାଲ୍‌ଦାସ୍

(ମାର୍‌କୁସ୍ ୨:୧-୧୨; ଲୁକାସ୍ ୫:୧୭-୨୬)

¹ଆନ୍ତିନ୍ ଯୀଶୁସ୍ ଡଙ୍ଗାନୁ ଅକ୍କିକିରି ହଁସ୍‌ରା ପାର୍ ମାନ୍‌ଚାସ୍, ଆରୁ ତାଙ୍ଘା ସହର୍‌ଗେ ବାର୍‌ଚାସ୍। ²ଆରୁ ଏରା, କେତ୍‌କ ଲୋକ୍ ଆଲାର୍ ଅଣ୍ଟା ଏକ୍ଆଙ୍ଗିୟା ବେହ୍ମରିୟାସିନ୍ ନାଟ୍‌ରୁନୁ ଚେଡ଼ିକିରି ତାଙ୍ଘା ଚାହାଗେ ଅନ୍ଦ୍ରାର୍। ଆନ୍ତିନ୍ ଯୀଶୁସ୍ ଆବ୍ଡ଼ାର୍‌ଘି ବିଶ୍ୱାସ୍‌ବନ୍ ଏରିକିରି, ଏକ୍ଆଙ୍ଗିୟା ବେହ୍ମରିୟାସିନ୍ ତେଙ୍ଗିୟାସ୍, “ଏ ବାବୁ, ଧିରାଜ୍ ଧାରା; ନିଙ୍ଘା ଜାମା ପାପ୍‌ବନ୍ ଛେମା କାମାକେରା।” ³ଆରୁ ଏରା ପଣ୍ତିତ୍‌ଜାମାର୍‌ଘି ଭିତର୍‌ନୁ କେତ୍‌କ ଲୋକ୍ ତାହ୍ମା ମନ୍‌ନୁ ସୋଚ୍ଚାର୍, “ଇ ଆଲାସ୍‌ତା ପାର୍‌ମେଶ୍ଵାର୍‌ସ୍‌କି ନିନ୍ଦା କାମାଲ୍‌ଦାସ୍।” ⁴ଯୀଶୁସ୍ ଆବ୍ଡ଼ାର୍‌ଘି ମନ୍‌ତା କାତ୍‌ଥାବନ୍ ଆହିକିରି ତେଙ୍ଗିୟାସ୍, “ନିମ୍ ନିଜର୍-ନିଜର୍ ମନ୍‌ନୁ ଏନ୍ଦେର୍‌ଗେ ଖାରାପ୍ ବିଚାର୍ କାମାଲ୍‌ଦାର୍? ⁵ଏନ୍ଦେଦ୍ ସହଜ୍‌ଦ୍‌? ‘ନିଙ୍ଘାଏ ପାପ୍ ଛେମା ମାନ୍‌ଚାକେର୍‌କିଚି’ ବୁଲି ତେଙ୍ଗ୍‌ନାଦ୍ କା, ‘ଉସ୍‌କାରା ଆରୁ ଏକାଏକି କାମା’ ବୁଲି ତେଙ୍ଗ୍‌ନାଦ୍? ⁶ଲେକିନ୍ ନିମ୍ ଏତ୍‌କ ଆହା କା ମୁନୁଷ୍ ହାଦ୍ଦୁସ୍‌କେ ଦୁନିଆଁନୁ ପାପ୍ ଛେମା କାମାଗେ ହକ୍ ରାଇଦ୍।” ଆନ୍ତିନ୍ ଆସ୍ ଏକ୍ଆଙ୍ଗିୟା ବେହ୍ମରିୟାସିନ୍ ତେଙ୍ଗିୟାସ୍, “ଉସ୍‌କାରା, ଆରୁ ନିଙ୍ଘାଏ ନାଟ୍‌ରୁ ଉଠାବା ଆରୁ ଆଡ଼୍‌ପା କାଲା।” ⁷ଆଙ୍ଗେନ୍ ଆସ୍ ଉସ୍‌କାରାଚାସ୍ ଆରୁ ତାଙ୍ଘା ଆଡ଼୍‌ପା କେରାସ୍। ⁸ଆଲାର୍ ଇବନ୍ ଏରିକିରି ଏଲ୍‌ଚିୟାର୍ କେରାର୍ ଆରୁ ପାର୍‌ମେଶ୍ଵାର୍‌ସ୍‌କି ସ୍ତୁତି କାମାଗେ ଲାଗ୍ଗିୟାର୍, ଏକାସ୍ କା ଆଲାର୍‌ଗେ ଏନ୍ନେ ହକ୍ ଚିଚ୍‌କାଦାସ୍।

ଯୀଶୁସ୍ ମାତିଆସ୍‌ସିନ୍ ମେହାଁଲ୍‌ଦାସ୍

(ମାର୍‌କୁସ୍ ୨:୧୩-୧୭; ଲୁକାସ୍ ୫:୨୭-୩୨)

⁹ଆସ୍‌ତି ଆଘ୍‌ଲି ବାଢ଼୍‌ରିକିରି ଯୀଶୁସ୍ ମାତି ନାମେଘି ଅଣ୍ଟା ମାଲ୍‌ଗୁଜାରୀ ଉକ୍‌ରୁ ଆଲାସିନ୍ ମାଲ୍‌ଗୁଜାରୀ ଉକ୍‌ରାନା ଆଡ଼୍‌ପାନୁ ଅକ୍କାନ୍ ଏରିୟାସ୍, ଆରୁ ଆସିନ୍ ତେଙ୍ଗିୟାସ୍, “ଏଙ୍ଘା ପାଛ୍‌ଲି ବାରା।” ଆସ୍ ଉସ୍‌କାରାଚାସ୍ ଆରୁ ଯୀଶୁସ୍‌କି ପାଛ୍‌ଲି-ପାଛ୍‌ଲି କେରାସ୍।

¹⁰ଯେତ୍‌କବାକେନ୍ ମାତିସ୍‌କି ଆଡ଼୍‌ପାନୁ ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ଅନାଗେ ଅକ୍କାଚାର୍, ହତ୍‌କବାକେନ୍ ଢେର୍ ମାଲ୍‌ଗୁଜାରୀ ଉକ୍‌ରୁ ଆରୁ୯:୧୦ ପାପୀ ଆଲାର୍ ଆବ୍ଡ଼ାର୍ ସତ୍ତୁନିନ୍ ପାପୀ ମାଲ୍ଲାରୁର୍, ଲେକିନ୍ ୟାହୁଦୀ ଧାର୍ମିକ୍ ଆଲାର୍ ଆବ୍ଡ଼ାରିନ୍ ପାପୀ ବୁଲିକିରି ଆବ୍ଡ଼ାର୍‌ଘି ସମାଜ୍‌ତି ଭିନେ ଉଇୟାଲିୟାର୍ ଆବ୍ଡ଼ାର୍ ଗାନେ ସମ୍ବନ୍ଧ ମା ଉଇୟାଲିୟାର୍। ପାପୀ ଆଲାର୍‌ହି ତାହ୍ମାଗାନେ ଅନାଗେ ଅକ୍କିୟାର୍। ¹¹ଇବନ୍ ଏରିକିରି ଫାରିସୀଜାମାର୍ ଯୀଶୁସ୍‌କି ଚେଲାରିନ୍ ତେଙ୍ଗିୟାର୍, “ନିହ୍ମା ଗୁରୁସ୍ ମାଲ୍‌ଗୁଜାରୀ ଉକ୍‌ରୁ ଆରୁ ପାପୀ ଜାମାର୍‌ଗାନେ ଏନ୍ଦେର୍‌ଗେ ଅନ୍‌ଦାସ୍?” ¹²ଇବନ୍ ମେନିକିରି ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ବାନେ ଆଲାର୍‌ଗେ ବଏଦ୍‌ସ୍‌କି ଦାର୍‌କାର୍ ମାଲ୍ଲା, ଲେକିନ୍ ବେହ୍ମରିୟାର୍‌ଗେ ବଏଦ୍‌ସ୍‌କି ଦାର୍‌କାର୍ ରାଇ। ¹³ହୁଦ୍‌ଘିଲାଗାନ୍ ନିମ୍ କାଲା ଆରୁ ଇଦ୍‌ଘି ମତ୍‌ଲବ୍ ଶିଖ୍‌ରା: କା ‘ଏନ୍ ବଲୀଦାନ୍ ମାଲ୍ଲା ଲେକିନ୍ ଦାୟା ଚାହ୍ଁଦାନ୍’। ଏନ୍ଦେର୍‌ଗେକା ଏନ୍ ଧାର୍ମିକ୍ ଆଲାରିନ୍ ମେହାଁଗେ ମାଲ୍ଲା ବାରୁନ୍, ଲେକିନ୍ ପାପୀ ଆଲାରିନ୍ ପାପ୍‌ତି ବାଛାବାଗେ ବାର୍‌ଚ୍‌କାଦାନ୍।”

ଯୀଶୁସ୍ ଉପାସ୍‌ଘି ବାରେନୁ ଉପ୍‌ଦେଶ୍ ଚିଆଲ୍‌ଦାସ୍

(ମାର୍‌କୁସ୍ ୨:୧୮-୨୨; ଲୁକାସ୍ ୫:୩୩-୩୯)

¹⁴ଆନ୍ତିନ୍ ଯୋହାନ୍‌ସ୍‌କି ଚେଲାଜାମାର୍ ଯୀଶୁସ୍‌କି ଚାହାଗେ ବାର୍‌ଚାର୍ ଆରୁ ତେଙ୍ଗିୟାର୍, “ଫାରିସୀଜାମାର୍ ଆରୁ ଏମ୍ ଉପାସ୍ କାମ୍‌ଦାମ୍, ଲେକିନ୍ ନିହ୍ମା ଚେଲାଜାମାର୍ ଏନ୍ଦେର୍‌ଗେ ଉପାସ୍ ମା କାମ୍‌ନାଏ?” ¹⁵ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯେତ୍‌କତକ୍ ବର୍‌କୁକ୍କସ୍ ବର୍‌ତିଆର୍‌ଗାନେ ରସ୍, ଆତ୍‌କତକ୍ କାଁଏ ବର୍‌ତିୟାର୍ ଶୋକ୍ କାମା ଅଙ୍ଗର୍? ଲେକିନ୍ ଆ ଉଲ୍ଲାଦ୍ ବାର ଏକ୍‌ଲା ବର୍‌କୁକ୍କସ୍ ବର୍‌ତିଆ ଜାମାର୍‌ସ୍‌ତି ଭିନେ ମାନସ୍‌କସ୍, ଆଙ୍ଗେନ୍ ଆବ୍ଡ଼ାର୍ ଉପାସ୍ କାମର୍। ¹⁶ନେଦ୍‌ହି ପୁନା ଚିଢ଼ାନ୍ ଚାର୍‌ରିକିରି ପାଚ୍ଚା ଚିଢ଼ାନୁ ମା ସାଟ୍‌ନାଏ, ମାଲ୍ଲାହାଲେ ପାଚ୍ଚା ଚିଢ଼ାଦ୍ କକ୍‌ଣାରିକି ଆରୁ ବାଗ୍ଗେ ଏଟ୍‌ରି କାଇ। ¹⁷ଆରୁ ଆଲାର୍ ପୁନା ଦାଖ୍‌ରାସ୍‌ବନ୍ ଚାପ୍‌ଟାତି ତିଆର୍ ମାନ୍‌ଚ୍‌କା ପାଚ୍ଚା କୁପାନୁ ମା ଉଇନାଏ, ଏନ୍ଦେର୍‌ଗେକା କୁପାଦ୍ ହଟ୍‌ରିକାଇ, ଆରୁ ଦାଖ୍‌ରାସ୍ ବର୍‌ବାଦ୍ ମାନିକାଇ ଆରୁ କୁପାଦ୍ ନଷ୍ଟ ମାନିକାଇ; ଲେକିନ୍ ପୁନା ଦାଖ୍‌ରାସ୍‌ବନ୍ ପୁନା କୁପାନୁ ଉଇନା କାତ୍‌ଥା ହାଲେ ଯୋଡ଼େଦିନ୍ ବାଛ୍‌ରିଦ୍।”

ଯୀଶୁସ୍ ଅଣ୍ଟା କେଚ୍ଚକା କୁକାଏନ୍ ଉଜ୍ଜତାଲ୍‌ଦାସ୍ ଆରୁ ପାର୍‌ଦା ବେହ୍ମରିୟା ଆଲିନ୍ ବାନେ କାମାଲ୍‌ଦାସ୍

(ମାର୍‌କୁସ୍ ୫:୨୧-୪୩; ଲୁକାସ୍ ୮:୪୦-୫୬)

¹⁸ଯୀଶୁସ୍ ଆବ୍ଡ଼ାରିନ୍ ଏନ୍ନେ ତେଙ୍ଗାଲିୟାସିନ୍ କା ଏରା, ୟାହୁଦୀ ଜାମାର୍‌ଘି ଅଣ୍ଟା ମୁଖିଆ ଆଲାସ୍ ଯୀଶୁସ୍‌କି ଚାହାଗେ ବାର୍‌ଚାସ୍ ଆରୁ ହାଁଠୁୱାରାଇକିରି ଆର୍‌ଜୀବିନ୍ତି କାମ୍‌ଚାସ୍ ଆରୁ ତେଙ୍ଗିୟାସ୍, “ଏଙ୍ଘାଏ କୁକାଏ ହାଦ୍ଦୁ ଆକ୍କୁନ୍-ଆକ୍କୁନ୍ କେଚ୍ଚାକେରା, ଲେକିନ୍ ନିମ୍ ବାରା ଆରୁ ନିହ୍ମାଏ ହେଖ୍ଖାନ୍ ଆଦ୍‌ଘି ମିଆଁ ଉଇୟା ଆରୁ ଏଙ୍ଘା ହାଦ୍ଦୁ ଉଜ୍ଜକୋ।” ¹⁹ଆଙ୍ଗେନ୍ ଯୀଶୁସ୍ ଉସ୍‌କାରାଚାସ୍ ଆରୁ ତାଙ୍ଘା ଚେଲାଜାମାର୍‌ଗାନେ ଆ ମୁଖିଆସ୍‌କି ପାଛ୍‌ଲି-ପାଛ୍‌ଲି କେରାସ୍। ²⁰ଆରୁ ଏରା, ଅଣ୍ଟା ଆଲିଘି ବାର ବଛର୍‌ତି ପାର୍‌ଦା ବେମାର୍ ରାଚା, ଆ ଆଲିଦ୍ ପାଛ୍‌ଲି ତାର୍‌ତି ବାରିକିରି ଯୀଶୁସ୍‌କି ଆତ୍ତ୍‌କା ଚିଢ଼ାଘି ପାଣ୍‌ତୁନ୍ ଏସ୍‌ରା। ²¹ଏନ୍ଦେର୍‌ଗେକା ଆଦ୍ ତାଙ୍ଘା ମନ୍‌ନୁ ସୋଚାଲିୟାଦ୍, “ଯଦି ଏନ୍ ଯୀଶୁସ୍‌କି ଚିଢ଼ାବନ୍ ଖାଲି ଏସ୍‌ରନ୍ ହାଲେ ବାନେ ମାନନ୍‌କନ୍।” ²²ଯୀଶୁସ୍ ପାଛ୍‌ଲି କିର୍‌ରେଚେ ଏରିକିରି ଆ ଆଲିନ୍ ତେଙ୍ଗିୟାସ୍, “ଏ ହାଇ ଧିରାଜ୍ ଧାରୁ; ନିଙ୍ଘା ବିଶ୍ଵାସ୍ ନିଙ୍ଗାନ୍ ବାନେ କାମ୍‌ଚା।” ହୁଙ୍ଗେନିନ୍ ଆ ଆଲିଦ୍ ବାନେ ମାନ୍‌ଚାକେରା। ²³ଯେତ୍‌କବାକେନ୍ ଯୀଶୁସ୍ ଆ ମୁଖିଆ ଆଲାସ୍‌କି ଆଡ଼୍‌ପାଗେ ଆଣ୍‌ସିୟାସ୍ ତା ଆସାନ୍ ବାଇଁଶ୍‌ରି ଉରୁ ଆରୁ ହୋ ହାଲ୍ଲା କାମୁ ଆଲାରିନ୍ ଏରିୟାସ୍ ଆରୁ ତେଙ୍ଗିୟାସ୍, “ଉର୍‌ଖାକାଲା, ²⁴କୁକାଏ ମାଲ୍ଲା ଖିଉ, ଲେକିନ୍ ହାନ୍ଦ୍ରାଲି।” ଇବନ୍ ମେନିକିରି ଆବ୍ଡ଼ାର୍ ଯୀଶୁସ୍‌କି ମାଜାକ୍ ଉଡ଼ାବାଗେ ଲାଗ୍ଗିୟାର୍। ²⁵ଲେକିନ୍ ଯେତ୍‌କ ଆଲାର୍‌ଘି ଭିଡ଼୍ ରାଚା ଜାମାରିନ୍ ବାହ୍‌ରି ଅଥ୍‌ରାକେରା, ଆରୁ ଯୀଶୁସ୍ ଉଲା କାଇକିରି କୁକାଏଘି ହେଖ୍ଖାନ୍ ଧାର୍‌ଚାସ୍ ଆରୁ ଆଦ୍ ଉଜ୍ଜିୟାକେରା। ²⁶ଆରୁ ଇ ଘାଟ୍‌ଣାଘି ବାରେନୁ ହୁ ରାଜୀନୁ ଜାମାତାରା ଫାଏଲାରାଚା କେରା।

ଯୀଶୁସ୍ ଦୁଇ ଲୋକ୍ କାଁଣାରିନ୍ ଏରାଗେ ଶକ୍ତି ଚିଆଲ୍‌ଦାସ୍

²⁷ଯେତ୍‌କବାକେନ୍ ଯୀଶୁସ୍ ଆସ୍‌ତି ଆଘ୍‌ଲି କେରାସ୍ ତା, ଦୁଇ ଲୋକ୍ କାଁଣାର୍ ଆସ୍‌କି ପାଛ୍‌ଲି-ପାଛ୍‌ଲି କାଇକିରି ଜୋର୍‌ସେ ଚିର୍‌ରାରିକିରି ତେଙ୍ଗାଗେ ଲାଗ୍ଗିୟାର୍, “ହେ ଦାଉଦ୍‌ସ୍‌କି ହାଦ୍ଦୁ, ଏହ୍ମା ମିଆଁ ଦାୟା କାମା!” ²⁸ଆରୁ ଯେତ୍‌କବାକେନ୍ ଯୀଶୁସ୍ ଆଡ଼୍‌ପା ଉଲା କର୍‌ଚାସ୍ ତା, ଆ କାଁଣାର୍ ଯୀଶୁସ୍‌କି ଚାହାଗେ ବାର୍‌ଚାର୍ ଆରୁ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ଏନ୍ନେ କାମା ଅଙ୍ଗନ୍‌ବୁଲି ନିମ୍ ବିଶ୍ୱାସ୍ କାମାଲ୍‌ଦାର୍ କାଁଏ?” ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ହଁ, ପ୍ରାଭୁ!” ²⁹ଆନ୍ତିନ୍ ଆସ୍ ଆବ୍ଡ଼ାର୍‌ଘି ହାନ୍ନୁବନ୍ ଏସ୍‌ରିକିରି ତେଙ୍ଗିୟାସ୍, “ନିହ୍ମା ବିଶ୍ଵାସ୍‌ଘି ଲେଖା ନିହ୍ମା ଲାଗାନ୍ ମାନ୍ନାଦ୍।” ³⁰ଆରୁ ଆବ୍ଡ଼ାର୍ ଏରା ଅଙ୍ଗିୟାର୍ ଯୀଶୁସ୍ ଆବ୍ଡ଼ାରିନ୍ ଶକତ୍ ଚେତାବାନୀ ଚିଇକିରି ତେଙ୍ଗିୟାସ୍, “ଏରା, ଇ କାତ୍‌ଥାବନ୍ ନେଦ୍‌ହି ବାଲ୍‌ନା କାତ୍‌ଥା।” ³¹ଲେକିନ୍ ଆବ୍ଡ଼ାର୍ ଆସ୍‌ତି ଉର୍‌ଖିକିରି ଆ ରାଜୀନୁ ଯୀଶୁସ୍‌କି ବାରେନୁ ଫାଏଲାଚାର୍।

ଯୀଶୁସ୍ ଅଣ୍ଟା କୋନ୍ଦାସିନ୍ ବାନେ କାମାଲ୍‌ଦାସ୍

³²ଯେତ୍‌କବାକେନ୍ ଆବ୍ଡ଼ାର୍ ବାହ୍‌ରି ଉର୍‌ଖାଲିୟାର୍, ତା ଏରା ଆଲାର୍ ଅଣ୍ଟା ଭୁତ୍ତୁ ଲାକ୍କା କୋନ୍ଦାସିନ୍ ଆସ୍‌କି ଚାହାଗେ ଅନ୍ଦ୍ରାର୍; ³³ଆରୁ ଯେତ୍‌କବାକେନ୍ ଭୁତ୍ତୁନ୍ ଅଥ୍‌ରାକେରା, ତା ଆ କୋନ୍ଦାସ୍ କାଚ୍‌ନେଖ୍‌ରା ଲାଗ୍ଗିୟାସ୍। ଇବନ୍ ଏରିକିରି ଆଲାର୍ ଆଚ୍‌ମିତ୍ ମାନିକିରି ତେଙ୍ଗିୟାର୍, “ଇସ୍ରାଏଲ୍‌ନୁ ଏକ୍‌ଲାହି ଏନ୍ନେ ମାଲ୍ଲା ଏର୍‌କାରୁମ୍।” ³⁴ଲେକିନ୍ ଫାରିସୀଜାମାର୍ ତେଙ୍ଗିୟାର୍, “ଆସ୍ ଭୁତ୍ତୁର୍‌ଘି ମୁଖିଆସ୍‌କି ମଦେତ୍‌ତି ଭୁତ୍ତୁବନ୍ ଅଥ୍‌ର୍‌ଦାସ୍।”

ଯୀଶୁସ୍ ଆଲାର୍‌ଘି ମିଆଁ ସୋଗ୍ଗେ କାମାଲ୍‌ଦାସ୍

³⁵ଯୀଶୁସ୍ ଜାମା ସହର୍ ଆରୁ ପାଡ଼ାନୁ କୁଦ୍ଦାଲିୟାସ୍ ଆରୁ ଆସ୍ ଆବ୍ଡ଼ାର୍‌ଘି ସାଭା ଆଡ଼୍‌ପାନୁ ଉପ୍‌ଦେଶ୍ ଚିଆଲିୟାସ୍, ପାର୍‌ମେଶ୍ଵାର୍‌ସ୍‌କି ରାଜୀଘି ବାରେନୁ ସୁସାମାଚାର୍ ଶୁଣାବାଲିୟାସ୍ ଆରୁ ଜାମା ରକମ୍‌ଘି ବେହ୍ମରିୟା ଆରୁ ଜାମା ରକମ୍‌ଘି କମ୍‌ଜୋର୍‌ବନ୍ ବାନେ କାମାଲିୟାସ୍। ³⁶ଯେତ୍‌କବାକେନ୍ ଆସ୍ ଭିଡ଼୍‌ବନ୍ ଏରିୟାସ୍ ତା ଯୀଶୁସ୍‌କେ ଆଲାର୍‌ଘି ମିଆଁ ମୁରୁକ୍ ସୋଗ୍ଗେ ଲାଗ୍ଗିୟା, ଏନ୍ଦେର୍‌ଗେକା ଆବ୍ଡ଼ାର୍ ଚାର୍‌ୱାହା ମାଲ୍‌କା ଭେଡ଼ି ଲେଖା, ବାଣାଁ ମାନ୍‌ଚ୍‌କା ଆରୁ ଥାକ୍‌ର୍‌କା ଲେଖା ରାଚାର୍। ³⁷ହତ୍‌କବାକେନ୍ ଆସ୍ ତାଙ୍ଘା ଚେଲାରିନ୍ ତେଙ୍ଗିୟାସ୍, “ଫସଲ୍‌ତା ବାଗ୍ଗେ ରାଇ ଲେକିନ୍ ନାଲ୍‌ଖୁ କାମୁର୍ ଥୋଡ଼େ ରାନାଏ। ³⁸ହୁଦ୍‌ଘିଲାଗାନ୍ ହାଲ୍ଲୁଘି ମାଲିକ୍‌ସାନ୍ ଆର୍‌ଜୀ କାମା କା ଆସ୍ ନିଜର୍ ଫସଲ୍‌ବନ୍ ହୟାଗେ ଲାଗାନ୍ ନାଲ୍‌ଖୁ କାମୁରିନ୍ ତାଇୟ ଚିୟସ୍।”

ଯୀଶୁସ୍‌କି ବାର ଲୋକ୍ ଖାସ୍‌ଚେଲା

(ମାର୍‌କୁସ୍ ୩:୧୩-୧୯; ଲୁକାସ୍ ୬:୧୨-୧୬)

¹ଆନ୍ତିନ୍ ଯୀଶୁସ୍ ତାଙ୍ଘା ବାର ଲୋକ୍ ଖାସ୍‌ଚେଲାରିନ୍ ଚାହାଗେ ମେହିଁକିରି, ଆବ୍ଡ଼ାର୍‌ଗେ ଭୁତ୍ତୁଗୁଠିନ୍ ଅଥ୍‌ରାଗେ ହକ୍ ଚିଚ୍ଚାସ୍, ଆରୁ ଜାମା ଲେଖା ବେମାର୍‌ଗୁଠିନ୍ ଆରୁ ଜାମା ଲେଖା କମ୍‌ଜୋରିଗୁଠିନ୍ ବାନେ କାମାଗେ ହକ୍ ଚିଚ୍ଚାସ୍।

²ଆରୁ ଇ ବାର ଖାସ୍‌ଚେଲାର୍‌ଘି ନାମେ ଏନ୍ନେ: ପହେଲା ଶିମୋନ୍, ଏକାସିନ୍ କା ପାତ୍ରାସ୍ ବାନାଏ, ଆରୁ ଆସ୍‌କି ଭାଇ ଆନ୍ଧ୍ରିୟାସ୍‌; ଆରୁ ଜେବେଦୀସ୍‌କି ହାଦ୍ଦୁ ୟାକୁବ୍ ଆରୁ ତାଙ୍ଘା ଭାଇ ଯୋହାନ୍‌ସ୍; ³ଫିଲିପ୍ପସ୍, ଆରୁ ବାର୍ଥଲମୀ, ଥୋମାସ୍ ଆରୁ ମାଲ୍‌ଗୁଜାରୀ ଉକ୍‌ରୁ ମାତି, ଆଲ୍‌ଫିସ୍‌କି ହାଦ୍ଦୁ ୟାକୁବ୍‌ସ୍ ଆରୁ ଥାଦେଉସ୍, ⁴ଶିମୋନ୍ କାନାନୀ, ଆରୁ ଯୁଦାସ୍ ଇସ୍କାରିୟୋତିୟ ଏକାସ୍ କା ଯୀଶୁସିନ୍ ବିରୋଧିର୍‌ଘି ହେଖ୍ଖାନୁ ଧାର୍‌ତାଚାସ୍।

ବାର ଲୋକ୍ ଖାସ୍‌ଚେଲାରିନ୍ ତାଏନା

(ମାର୍‌କୁସ୍ ୬:୭-୧୩; ଲୁକାସ୍ ୯:୧-୬; ୧୦:୪-୧୨)

⁵ଯୀଶୁସ୍ ଇ ବାର ଲୋକ୍ ଖାସ୍‌ଚେଲାରିନ୍ ଏନ୍ନେ ହୁକୁମ୍ ଚିଇକିରି ତାଇୟାସ୍: “ଦୁସ୍‌ରା ଜାତିୟାର୍ ତାରା ଆମ୍‌କେକାଲା, ଆରୁ ସାମାରୀଆ ରାଜୀନ୍ତା ଏକା ସହର୍‌ନୁହି ଆମ୍‌କେକରା। ⁶ବରନ୍ ଇସ୍ରାଏଲ୍ ବାଉଁଶାର୍‌ଘି ଏଫ୍‌ସ୍‌ର୍‌କା କେର୍‌କା ଭେଡ଼ିଜାମାର୍ ତାରା କାଲା। ⁷ଆରୁ ନିମ୍ କାଇକିରି ‘ସରଗ୍ ରାଜୀ ଚାହାଗେ ଆଣ୍‌ସିୟା କେର୍‌କିଚି’ ବୁଲି ପ୍ରଚାର୍ କାମ୍‌କେ; ⁸ବେହ୍ମରିୟାରିନ୍ ବାନେ କାମ୍‌କେ, କେଚ୍ଚକା ଆଲାରିନ୍ ଉଜ୍ଜତାକେ, କୋଢ଼୍‌ ବେହ୍ମରିୟାରିନ୍ ଶୁଦ୍ଧ୍ କାମ୍‌କେ, ଭୁତ୍ତୁଗୁଠିନ୍ ଅଥ୍‌ର୍‌କେ। ନିମ୍ ବିନାମୁଲ୍ୟନୁ ହାକ୍କାଦାର୍, ବିନାମୁଲ୍ୟନୁ ଦାନ୍ କାମ୍‌କେ। ⁹ନିହ୍ମା ମୁଁଣାନୁ ସୋନା, ରୂପା, ଆରୁ ତାମ୍ଵା ଆମ୍‌କେ ଉଇୟା; ¹⁰ପାବୁନୁ କାନାଘି ଲାଗାନ୍ ମୁଁଣା ଆମ୍‌କେ ଧାରା, ଆରୁ ଯୋଡ଼େ ମିର୍‌ଜୀ ଆମ୍‌କେ ହୁଆ ଆରୁ ଜୁତା, ଆରୁ ଠେଙ୍ଗା ଆମ୍‌କେ ହୁଆ, ଏନ୍ଦେର୍‌ଗେକା ନାଲ୍‌ଖୁ କାମୁର୍‌ଗେ ଅନାଗେ ହକ୍ ରାଇ।”

¹¹“ଆରୁ ନିମ୍ ଏକିନ୍ ପାଡ଼ା ଚାହେ ସହର୍‌ଗେ କରର୍ ତା, ଆସାନ୍ ଏକା ଆଲାର୍ ଲାଇଗ୍ ରାନାଏ ଆବ୍ଡ଼ାର୍‌ଘି ପାତା ଲାଗାବା। ଆରୁ ଯେତ୍‌କବାକେନ୍‌ତକ୍ ଆସ୍‌ତି ମା ବୁଙ୍ଗର୍, ଆତ୍‌କତକ୍ ଆସାନିନ୍ ରା। ¹²ଆରୁ ଆଡ଼୍‌ପା କର୍‌ନା ବାକେନ୍ ଆଡ଼୍‌ପା ମାଲିକ୍‌ସ୍‌କେ ଆଶୀର୍ବାଦ୍ ଚିକେ। ¹³ଯଦି ଆ ଆଡ଼୍‌ପାନ୍ତା ଆଲାର୍ ଲାଇଗ୍ ରାନାଏ ତା ନିହ୍ମା ଶାନ୍ତିଘି ଆଶୀର୍ବାଦ୍ ଆବ୍ଡ଼ାର୍‌ଘି ମିଆଁ ମାନ୍ନାଦ୍, ଲେକିନ୍ ଯଦି ଆବ୍ଡ଼ାର୍ ଲାଇଗ୍ ମାଲ୍‌ନାଏ ହାଲେ ନିହ୍ମାଏ ଶାନ୍ତିଘି ଆଶୀର୍ବାଦ୍ ନିହ୍ମାସାନ୍ କିର୍‌ର ବାରଦ୍। ¹⁴୧୦:୧୪ୟାହୁଦୀ ଆଲାର୍‌ଘି ଅଣ୍ଟା ରୀତି ରାଚା। ହେଡ୍ଡୁନ୍ତା ଧୁଲିନ୍ ହେତ୍ତନାଘି ଦ୍ୱାର୍‌ନୁ ଦୁସ୍‌ରା ଜାତିୟାରିନ୍ ଚେତାବାନୀ ଚିୟାଲିୟାର୍ କା ପାର୍‌ମେଶ୍ୱାର୍‌ସ୍ ଆବ୍ଡ଼ାରିନ୍ ଦଣ୍ତ୍‌ ଚିୟସ୍ ଏନ୍ଦେର୍‌ଗେକା ତାଙ୍ଘା ସନ୍ଦେଶ୍‌ବନ୍ ଗ୍ରହନ୍ ମା କାମ୍‌ନାଏ ନେଦିନ୍ ନିମାନ୍ ଗ୍ରହନ୍ ମା କାମର୍ ଆରୁ ନିହ୍ମା କାତ୍‌ଥାନ୍ ମା ମେନର୍ ତା, ଆ ଆଡ଼୍‌ପା ଚାହେ ଆ ସହର୍‌ସ୍‌ତି ଉର୍‌ଖ୍‌ନା ବାକେନ୍ ନିହ୍ମା ହେଡ୍ଡୁନ୍ତା ଧୁଲିନ୍ ହେତ୍ତକେଚିକେ। ¹⁵ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ପାର୍‌ମେଶ୍ୱାର୍‌ସ୍ ଯେତ୍‌କବାକେନ୍ ଆଲାର୍‌ଘି ନ୍ୟାୟ କାମସ୍‌ତା ଢେର୍ ବଛର୍ ଆଘ୍‌ଲି ସଦୋମ୍ ଆରୁ ଗମୋରା ସହର୍‌ନୁ ରାନାବାଲା ଆଲାର୍‌ଗେ ହାଖ୍ଖର୍‌କା ଦଣ୍ଡ୍‌ତି ବାଗ୍ଗେ ଦଣ୍ଡ୍ ଆବ୍ଡ଼ାର୍‌ଗେ ହାଖ୍ଖର।”

ବାର୍‌ନାବାଲା ଦୁଃଖୁ

(ମାର୍‌କୁସ୍ ୧୩:୯-୧୩; ଲୁକାସ୍ ୨୧:୧୨-୧୭)

¹⁶“ଏରା, ଏନ୍ ନିମାନ୍ ଭେଡ଼ି ଲେଖା ଡୁରୁଘି ମାଝାନୁ ତାଇୟାଲ୍‌ଦାନ୍, ଇଦ୍‌ଘିଲାଗାନ୍ ନିମ୍ ନେର୍‌ରୁ ଲେଖା ବୁଦ୍ଧିୟାର୍ ଆରୁ ପେର୍‌ୱାଁ ଲେଖା ନିର୍ଦ୍ଦୋଷ୍ ମାନ୍‌କେ। ¹⁷ଲେକିନ୍ ଆଲାର୍‌ସ୍‌ତି ନିମ୍ ସାବ୍‌ଧାନ୍ ରା, ଏନ୍ଦେର୍‌ଗେକା ଆବ୍ଡ଼ାର୍ ନିମାନ୍ କୋଟ୍ କାଚେରୀନୁ ସୋଁପର୍ ଚିଅର୍, ଆରୁ ତାହ୍ମା ସାଭା ଆଡ଼୍‌ପାନୁ କୋଡ୍‌ରାତି ଡେମର୍। ¹⁸ନିମ୍ ଏଙ୍ଘା ଅନୁସରଣ୍ କାମ୍‌ନାବାଲାର୍, ହୁଦ୍‌ଘିଲାଗାନ୍ ନିମାନ୍ ହାକିମ୍ ଆରୁ ରାଜାର୍‌ଘି ଆଘ୍‌ଲି ହୁଆକୋ ହତ୍‌କବାକେନ୍ ନିମାନ୍ ଏଙ୍ଘା ବାରେନୁ ହାକିମ୍ ଆରୁ ଦୁସ୍‌ରା ଜାତିୟାରିନ୍ ବାତାବାଗେ ମୋଉକା ହାଖ୍ଖର ¹⁹ଲେକିନ୍ ଯେତ୍‌କବାକେନ୍ ଆବ୍ଡ଼ାର୍ ନିମାନ୍ ଧାର୍‌ତର୍ ଆରୁ ନ୍ୟାୟ କାମାଗେ ହୁଅର୍ ହତ୍‌କବାକେନ୍ ନିମ୍ ଏସ୍‌କେ ଆରୁ ଏନ୍ଦେନ୍ ତେଙ୍ଗମ୍ ବୁଲି ଚିନ୍ତା ଆମ୍‌କେ କାମା, ଏନ୍ଦେର୍‌ଗେକା ନିମାଗେ ଏନ୍ଦେନ୍ ତେଙ୍ଗ୍‌ନା ରାଇ, ଆବନ୍ ହୁଙ୍ଗେନିନ୍ ତେଙ୍ଗାକୋ। ²⁰ଏନ୍ଦେର୍‌ଗେକା ତେଙ୍ଗ୍‌ନାବାଲା ନିମ୍ ମାଲ୍‌ଦାର୍, ଲେକିନ୍ ନିହ୍ମାଏ ବାଙ୍ଗ୍‌ସ୍‌କି ଆତ୍ମାଦ୍ ନିହ୍ମା ଦ୍ୱାର୍‌ନୁ ତେଙ୍ଗଦ୍।”

²¹“ଭାଇସ୍ ତାଙ୍ଘା ଭାଇସିନ୍, ଆରୁ ବୁଆସ୍ ହାଦ୍ଦୁସିନ୍, ପିଟାଗେ ସୋଁପର୍ ଚିଅର୍, ଆରୁ ହାଦ୍ଦୁବଚ୍ଚର୍ ଆୟାଙ୍ଗ୍-ବାଙ୍ଗ୍‌ର୍‌ଘି ବିରୁଦ୍ଧ୍‌ନୁ ଉସ୍‌କାରାଇକିରି ଆବ୍ଡ଼ାରିନ୍ ପିଟର୍‌ଚର୍। ²²ଆରୁ ଏଙ୍ଘା ନାମେଘି ଲାଗାନ୍ ଜାମା ଆଲାର୍ ନିମାନ୍ ହାଁଣର୍ ତୁପ୍‌ଫର୍, ଲେକିନ୍ ନେଦ୍ ଆଖ୍‌ରୀତକ୍ ଧିରାଜ୍ ଧାରିକିରିରର୍ ଆବ୍ଡ଼ାର୍ ବାଛ୍‌ରର୍। ²³ଲେକିନ୍ ଯେତ୍‌କବାକେନ୍ ଆବ୍ଡ଼ାର୍ ନିମାନ୍ ଅଣ୍ଟା ସହର୍‌ନୁ ସାତାବର୍‌ତା, ନିମ୍ ଦୁସ୍‌ରା ସହର୍‌ଗେ ବୁଙ୍କେଚିକେ। ଏନ୍ଦେର୍‌ଗେକା ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା, ଇସ୍ରାଏଲ୍‌ତା ଜାମା ସହର୍‌ନୁ ନିମ୍ କୁଦ୍ଦାଗେ ମା ମୁଞ୍ଜକାରରିନ୍ କା ହତ୍‌କବାକେନ୍‌ତକ୍ ମୁନୁଷ୍ ହାଦ୍ଦୁସ୍ ବାରସ୍‌କସ୍।”

²⁴“ଚେଲାର୍ ନିଜର୍ ଗୁରୁସ୍‌ତି ବାଡ଼୍‌କା ମା ମାନ୍ନାଏ; ଆରୁ ଗୁତ୍ତିୟାର୍ ତାଙ୍ଘା ମାଲିକ୍‌ସ୍‌ତି ବାଡ଼୍‌କା ମା ମାନ୍ନାଏ। ²⁵ଚେଲାର୍‌ଗେ ଗୁରୁସ୍‌କି ବାରାବୁରି ମାନ୍ନାନୁ ଆରୁ ଗୁତ୍ତିୟାସ୍‌କେ ମାଲିକ୍‌ସ୍‌କି ବାରାବୁରି ମାନ୍ନାନୁ ଖୁସୀ ମାନ୍ନା କାତ୍‌ଥା। ଯେତ୍‌କବାକେନ୍ ଆବ୍ଡ଼ାର୍ ଆଡ଼୍‌ପାନ୍ତା ମାଲିକ୍‌ସ୍‌ସିନ୍‌ହି ବଦ୍‌ମାସ୍ ଜାମାର୍‌ଘି ମୁଖ୍ୟା ବେଲ୍‌ଜେବୁଲ୍ ବାନାଏତା ଆସ୍‌କି ଆଡ଼୍‌ପାନ୍ତା ଦୁସ୍‌ରା ଆଲାର୍ ଗାନେ ଆରୁହି ଖାରାପ୍ ବେଭାର୍ କାମର୍।”

ନେକାନ୍ ଏଲ୍‌ଚ୍‌ନା କାତ୍‌ଥା

(ଲୁକାସ୍ ୧୨:୨-୭)

²⁶“ହୁଦ୍‌ଘିଲାଗାନ୍ ଆଲାରିନ୍ ଆମା ଏଲ୍‌ଚା; ଏନ୍ଦେର୍‌ଗେକା ଆକ୍କୁନ୍ ଜାମାଦ୍ ନୁହୁର୍‌କା ରାଇ ଲେକିନ୍ ପାଛ୍‌ଲି ଇବ୍ଡ଼ା ଜାମାନ୍ ଆଲାର୍ ଜରୁର୍ ଆହର୍। ²⁷ଏନ୍ ନିମାନ୍ ଉହାନୁ ଏକାନ୍ ତେଙ୍ଗ୍‌ଦାନ୍, ଆବନ୍ ନିମ୍ ବିଲ୍ଲୀନୁ ତେଙ୍ଗା; ଆରୁ ନିମ୍ ଏକାନ୍ କାଡ଼େ-କାଡ଼େ ମେନ୍‌ଦାର୍, ଆବନ୍ ଛାତ୍ ମିଆଁ ପ୍ରଚାର୍ କାମା। ²⁸ଆରୁ ନେଦ୍ ମେଦୁନ୍ ପିଟ୍ଟନାଏ, ଲେକିନ୍ ଆତ୍ମାବନ୍ ପିଟା ପଲ୍ଲନାଏ, ଆବ୍ଡ଼ାରିନ୍ ଆମା ଏଲ୍‌ଚା; ଲେକିନ୍ ନେଦ୍ ମେଦୁ ଆରୁ ଆତ୍ମା ଯୋଡ଼େନିନ୍ ନରକ୍‌ନୁ ନାଶ୍ କାମା ଅଙ୍ଗ୍‌ଦାସ୍ ଆସିନ୍ ଖାଲି ଏଲ୍‌ଚା। ²⁹ଯୋଡ଼େ ଚରୋ ଓଡ଼ାନ୍ ଏକ୍ ପାଏସାନୁ ମା ବିଶ୍‌ନାଏ କାଁଏ? ଆରୁ ନିହ୍ମା ବାଙ୍ଗ୍‌ସ୍‌କି ଇଚ୍ଛାବିନା ଆନ୍ନୁନ୍ତିନ୍ ଅଣ୍ଟାହି କିୟାଁ ମା ଖାତ୍‌ରିଦ୍। ³⁰ଲେକିନ୍ ନିହ୍ମା କୁକ୍କୁନ୍ ତା ଜାମା ଚୁଟ୍ଟିନ୍‌ହି ଗନ୍ତି କାମା କେର୍‌କିଚି। ³¹ହୁଦ୍‌ଘିଲାଗାନ୍ ଆମା ଏଲ୍‌ଚା; ଏନ୍ଦେର୍‌ଗେକା ନିମ୍ ଢେର୍ ଚରୋ ଓଡ଼ାନ୍ତିନ୍ ବାଡ଼୍‌କା ରାଦାର୍।”

³²ଯୀଶୁସ୍ ଆରୁହି ତେଙ୍ଗିୟାସ୍, “ନେଦିନ୍ ଆଲାର୍‌ଘି ଆଘ୍‌ଲି ଏନ୍ ଯୀଶୁସ୍‌କି ଅନୁସରଣ୍ କାମ୍‌ନାବାଲାନ୍ ଏନ୍ନେ ପ୍ରକଟ୍ କାମସ୍‌ତା ଏନ୍‌ହି ସରଗ୍‌ତା ବାଙ୍ଗ୍‌ସ୍‌କି ଆଘ୍‌ଲି ତେଙ୍ଗନ୍ କା ଆସ୍ ଏଙ୍ଘା ଚେଲାସ୍ ³³ଆରୁ ନେଦ୍ ଆଲାର୍‌ଘି ଆଘ୍‌ଲି ଏଙ୍ଗାନ୍ ଗ୍ରହନ୍ ମା କାମ୍‌ନାଏ, ଆବ୍ଡ଼ାରିନ୍ ଏନ୍‌ହି ଏଙ୍ଘା ସରଗ୍‌ତା ବାଙ୍ଗ୍‌ସ୍‌କି ଆଘ୍‌ଲି ଗ୍ରହନ୍ ମା କାମ୍‌ଦାନ୍।”

ଯୀଶୁସ୍‌କି ପାଛ୍‌ଲି କାନାନୁ କଷଟ୍ ବାରା ଅଙ୍ଗିଦ୍

(ଲୁକାସ୍ ୧୨:୫୧-୫୩; ୧୪:୨୬,୨୭)

³⁴“ନିମ୍ ଏନ୍ନେ ଆମା ସୋଚା କା ଏନ୍ ଦୁନିଆଁନୁ ମେଲ୍‌ମିଲାପ୍ କାମାଗେ ବାର୍‌ଚ୍‌କାଦାନ୍; ଏନ୍ ଶାନ୍ତି ମାଲ୍ଲା, ବରନ୍ ଖଣ୍ତା ଧାରିକିରି ବାର୍‌ଚ୍‌କାଦାନ୍।

³⁵‘ଏଙ୍ଘାଲାଗାନ୍ ହାଦ୍ଦୁସ୍ ବୁଆସ୍‌କି ଆରୁ’

‘ହାଦ୍ଦୁଦ୍ ଆୟାଙ୍ଗ୍‌ଘି ଆରୁ ବହ ଶାଶ୍‌ଘି ବିରୁଦ୍ଧ ମାନର୍‌କର୍; ଆରୁ’

³⁶‘ଆଲାର୍‌ଘି ବିରୋଧି ନିଜର୍ ଆଡ଼୍‌ପାନ୍ତାରିନ୍ ମାନର୍।’”

³⁷“ଏକାସ୍ ଆୟାଙ୍ଗ୍ ଚାହେ ବାଙ୍ଗ୍‌ରିନ୍ ଏଙ୍ଘାସ୍‌ତି ବାଗ୍ଗେ ବାନେ ହାଖ୍ଖଦାସ୍ ଆସ୍ ଏଙ୍ଘା ଚେଲା ମାନ୍ନାଘି ଲାଇଗ୍ ମାଲ୍‌ଦାସ୍; ଆରୁ ଏକାସ୍ ନିଜର୍ ହାଦ୍ଦୁବଚ୍ଚରିନ୍ ଏଙ୍ଘାସ୍‌ତି ବାଗ୍ଗେ ବାନେ ହାଖ୍ଖଦାସ୍, ଆସ୍‌ହି ଏଙ୍ଘା ଲାଇଗ୍ ମାଲ୍‌ଦାସ୍; ³⁸ଆରୁ ଏକାସ୍ ନିଜର୍ କ୍ରୁଶ୍ ହୋଇକିରି ଦୁଃଖୁ ତକ୍‌ଲିବ୍ ସାହିକିରି ଏଙ୍ଘା ପାଛ୍‌ଲି ବାରାଗେ ତିଆର୍ ମା ମାନସ୍ ତା ଆସ୍ ଏଙ୍ଘା ଲାଇଗ୍ ମାଲ୍‌ଦାସ୍। ³⁹ଏକାସ୍ ନିଜର୍ ସାଂସାରିକ୍ ଜୀବନ୍‌ବନ୍ ବାଛାବାଦାସ୍‌ତା, ଆସ୍ ସବୁଦିନ୍‌ତା ଜୀବନ୍‌ବନ୍ ଏଫ୍‌ସଚସ୍; ଆରୁ ଏକାସ୍ ଏଙ୍ଘାଲାଗାନ୍ ନିଜର୍ ସାଂସାରିକ୍ ଜୀବନ୍‌ବନ୍ ଏଫ୍‌ସଚସ୍, ଆସ୍ ସବୁଦିନ୍‌ତା ଜୀବନ୍ ହାଖ୍ଖସ୍।”

ଯୀଶୁସ୍ ପୁରସ୍କାର୍ ହାଖ୍ଖନାଘି ବାରେନୁ ଉପ୍‌ଦେଶ୍ ଚିଆଲ୍‌ଦାସ୍

(ମାର୍‌କୁସ୍ ୯:୪୧)

⁴⁰“ଯୀଶୁସ୍ ଆରୁହି ଚେଲାରିନ୍ ତେଙ୍ଗିୟାସ୍ ଏକାସ୍ ନିମାନ୍ ଗ୍ରହନ୍ କାମ୍‌ଦାସ୍, ଆସ୍ ଏଙ୍ଗାନ୍ ଗ୍ରହନ୍ କାମ୍‌ଦାସ୍; ଆରୁ ଏକାସ୍ ଏଙ୍ଗାନ୍ ଗ୍ରହନ୍ କାମ୍‌ଦାସ୍, ଆସ୍ ଏଙ୍ଘାଏ ତାଇୟୁସିନ୍ ଗ୍ରହନ୍ କାମ୍‌ଦାସ୍। ⁴¹ଏକାସ୍ ନାବୀରିନ୍ ନାବୀବୁଲି ଗ୍ରହନ୍ କାମ୍‌ଦାସ୍, ଆସ୍ ନାବୀର୍‌ଘି ପୁରସ୍କାର୍ ହାଖ୍ଖସ୍; ଆରୁ ଏକାସ୍ ଧାର୍ମିକ୍‌ରିନ୍ ଧାର୍ମିକ୍ ବୁଲି ଗ୍ରହନ୍ କାମ୍‌ଦାସ୍, ଆସ୍ ଧାର୍ମିକ୍‌ର୍‌ଘି ପୁରସ୍କାର୍ ହାଖ୍ଖସ୍। ⁴²ଆରୁ ଏକାସ୍ ଏଙ୍ଘା ଇ ଛୋଟେ ଚେଲାର୍‌ସ୍‌ତି ନେକିନ୍ ଅର୍‌ତୁସିନ୍ ଏଙ୍ଘା ଚେଲା ବୁଲି ସୋଚସ୍ ଆରୁ ଖାଲି ଏକ୍‌ଗିନା ଥାଣ୍ଡା ଆମ୍ମୁତକ୍ ହାପ୍ପାଗେ ଚିଅସ୍ ତା, ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍, ଆସ୍ ଜରୁର୍ ତାଙ୍ଘା ପୁରସ୍କାର୍ ହାଖ୍ଖସ୍।”

ଯୀଶୁସ୍ ଆରୁ ଆସ୍ନାନ୍ ଚିଉ ଯୋହାନ୍‌ସ୍

(ଲୁକାସ୍ ୭:୧୮-୩୫)

¹ଯୀଶୁସ୍ ତାଙ୍ଘା ବାର ଲୋକ୍ ଚେଲାରିନ୍ ଏନ୍ନେ ହୁକୁମ୍ ଚିଚ୍ଚକା ପାଛ୍‌ଲି, ଆସ୍‌ତି ବୁଙ୍ଗିୟାସ୍ ଆରୁ ଗାଲିଲୀ ପ୍ରଦେଶ୍‌ତା ସହର୍‌ନୁ ସୁସାମାଚାର୍ ପ୍ରଚାର୍ କାମ୍‌ତେ କେରାସ୍।

²ଜେହେଲ୍‌ନୁ ରାଇକିରି ଯୋହାନ୍‌ସ୍ ଯେତ୍‌କବାକେନ୍ ଖ୍ରୀସ୍ତ୍‌ସ୍‌କି ନାଲ୍‌ଖୁଘି ବାରେନୁ ମେନ୍‌ଚାସ୍, ଆରୁ ତାଙ୍ଘା ଚେଲାରିନ୍ ଯୀଶୁସ୍‌କି ଚାହାଗେ ଇବନ୍ ମେନାଗେ ତାଇୟାସ୍, ³“ଏକାସ୍ ବାର୍‌ନାବାଲା ରାଦାସ୍, ନିମ୍ ଆ ଆଲାର୍ କାଁଏ କା ଏମ୍ ଆରୁ ନାନ୍ନାର୍‌ଘି ପାବୁ ଏରମ୍?” ⁴ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “କାଲା ନିମ୍ ଏକାନ୍ ଏର୍‌କାର୍ ଆରୁ ମେନ୍‌ଚ୍‌କାର୍, ଆବ୍ଡ଼ା ଜାମାନ୍ ଯୋହାନ୍‌ସିନ୍ ତେଙ୍କେ। ⁵କାଁଣାର୍ ଏର୍‌ନାଏ, ଲେଙ୍ଗ୍‌ଡ଼ାର୍ ଏକ୍‌ନାଏ, କୋଢ଼୍‌ ବେହ୍ମରିୟାର୍ ଶୁଦ୍ଧ୍ ମାନ୍ନାଏ, ଭାଇଁରାର୍ ମେନ୍ନାଏ, କେଚ୍ଚ୍‌କା ଆଲାର୍ ଉଜ୍ଜନାଏ, ଆରୁ ଗରୀବ୍ ଆଲାରିନ୍ ସୁସାମାଚାର୍ ମେନ୍ତାକାଇ। ⁶ଆରୁ ଧଏନ୍ ରାଦାସ୍ ଆସ୍, ଏକାସ୍ ଏଙ୍ଗାନ୍ ଗ୍ରହନ୍ କାମା ଅଙ୍ଗ୍‌ଦାସ୍ ଆରୁ ଏଙ୍ଘା ମିଆଁ ବିଶ୍ୱାସ୍ କାମ୍‌ତେ ରାଦାସ୍।”

⁷ଯୋହାନ୍‌ସ୍‌କି ତାଏକା ଚେଲାର୍‌ଘି ବୁଙ୍କା ପାଛ୍‌ଲି, ଯୀଶୁସ୍ ଯୋହାନ୍‌ସ୍‌କି ବାରେନୁ ଆଲାରିନ୍ ତେଙ୍ଗା ଲାଗ୍ଗିୟାସ୍, “ନିମ୍ ଜଙ୍ଗଲ୍‌ନୁ ଏନ୍ଦେନ୍ ଏରା କେର୍‌କାଚ୍‌କାର୍? ନିମ୍ ଧୁକାତି ନୁକର୍‌ନା ମୋଟା ମାସୁଁବନ୍ ଏରା କେର୍‌କାଚ୍‌କାର୍ କାଁଏ? ମାଲ୍ଲା! ⁸ତା ନିମ୍ ଏନ୍ଦେନ୍ ଏରା କେର୍‌କାଚ୍‌କାର୍? ଦାମିକାଚିଢ଼ା ଆତ୍ତୁ ଆଲାସିନ୍ କାଁଏ? ଏରା, ନେଦ୍ ମୁରୁକ୍ ଦାମ୍‌ଘି ଚିଢ଼ା ଆତ୍ତନାଏ, ଆବ୍ଡ଼ାର୍ ରାଜ୍‌ମହଲ୍‌ନୁ ରାନାଏ। ⁹ହାଲେ ନିମ୍ ଏନ୍ଦେନ୍ ଏରା କେର୍‌କାଚ୍‌କାର୍? ଏନ୍ଦେର୍ ଅଣ୍ଟା ନାବୀସିନ୍ ଏରାଗେ, ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ନାବୀସ୍‌ତିହି ବାଡ଼୍‌କା ଆଲାସିନ୍। ¹⁰ଇସ୍ ଆସିନ୍ ନେଖା ବାରେନୁ କା ଲେଖ୍‌ଚ୍‌କା ରାଇ:

‘ଏରା, ପାର୍‌ମେଶ୍ୱାର୍‌ସ୍ ତେଙ୍ଗାଲ୍‌ଦାସ୍ ଏନ୍ ଏଙ୍ଘାଏ ଦୂଁତ୍‌ବନ୍ ନିଙ୍ଘାସ୍ତି ଆଘ୍‌ଲି ତାଇୟାଲ୍‌ଦାନ୍

ଏକାସ୍ କା ନିଙ୍ଘା ଆଘ୍‌ଲି ନିଙ୍ଘାଏ ପାବୁ ତିୟାର୍ କାମସ୍।’

¹¹ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ଏକାର୍ ମାଏକିନିଆଁର୍‌ସ୍‌ତି ଜନମ୍ ମାନ୍‌ଚ୍‌କା ଆଲାର୍‌ଘି ଭିତର୍‌ତି, ଆସ୍ନାନ୍ ଚିଉ ଯୋହାନ୍‌ସ୍‌ତି ବାଡ଼୍‌କା ନେଦ୍‌ହି ମାଲ୍‌କାରିନ୍, ଲେକିନ୍ ସରଗ୍ ରାଜୀନୁ ଏକାସ୍ ଜାମାର୍‌ଘିନ୍ତି ଛୋଟେ ରାଦାସ୍, ଆସ୍ ଯୋହାନ୍‌ସ୍‌ତି ବାଡ଼୍‌କାସ୍। ¹²ଆସ୍ନାନ୍ ଚିଉ ଯୋହାନ୍‌ସ୍‌କି ସାମାୟନ୍ତି ଇନ୍ନାତକ୍ ଆଲାର୍ ସରଗ୍ ରାଜୀଘି ଲାଗାନ୍ ବହୁତ୍ କୋଶିଷ୍ କାମାନାଏ ଆରୁ ଏକାର୍‌ଘିନୁ ଇଚ୍ଛା ରାଇ, ଆବ୍ଡ଼ାର୍ ଆଦ୍‌ଘି ମିଆଁ ଅଧିକାର୍ କାମ୍‌ନାଏ। ¹³ଯୋହାନ୍‌ସ୍‌କି ବାର୍‌ନାତକ୍ ନାବୀଜାମାର୍ ସରଗ୍ ରାଜୀଘି ବାରେ ଭବିଷତ୍ କାତ୍‌ଥା ତେଙ୍କାଚାର୍ ଆରୁ ମୁଶାସ୍‌କି ନିୟମ୍‌ନୁହି ସରଗ୍ ରାଜୀଘି ବାରେନୁ ଲେଖ୍‌ଚ୍‌କାରାଚା ¹⁴ଯଦି ନିମ୍ ମୁଶାସ୍‌କି ନିୟମ୍ ଆରୁ ନାବୀଜାମାର୍ ଏକାନ୍ ତେଙ୍କାନାଏ ଆବନ୍ ଗ୍ରହନ୍ କାମାଗେ ତିଆର୍ ରାଦାର୍ ତା ନେଖାଏ ବାର୍‌ନାଘି ଭବିଷତ୍ କାତ୍‌ଥା ତେଙ୍ଗାକେର୍‌କିଚା ଇ ଯୋହାନ୍‌ସ୍ ଆ ନାବୀ ଏଲିୟାସ୍‌ସିନ୍। ¹⁵ନେଖାଏ ମେନ୍ନାଘି ମନ୍ ରାଇ ଆବ୍ଡ଼ାର୍ ମେନା।”

¹⁶“ଆକ୍କୁନ୍ ତା ଆଲାରିନ୍ ଏନ୍ ନେଖାଗାନେ ତୁଲ୍‌ନା କାମନ୍? ଆବ୍ଡ଼ାର୍ ହାଟ୍ଟେନୁ ଅକ୍କା ହାଦ୍ଦୁର୍ ଲେଖା ଏକାର୍ କା ଅଣ୍ଟାସ୍ ଆରୁ ଅଣ୍ଟାସିନ୍ ଚିର୍‌ରା ରାଇକିରି ତେଙ୍ଗ୍‌ଦାସ୍:

¹⁷‘ଏମ୍ ନିହ୍ମା ଲାଗାନ୍ ବାଇଁସିରି ଉର୍‌କାମ୍,’

‘ଆରୁ ନିମ୍ ମା ନାଡ୍‌କାର୍,’

‘ଏମ୍ ଗାତ୍‌ରାରା-ଗାତ୍‌ରାରା ଅହ୍ଲକାମ୍,’

‘ଆରୁ ନିମ୍ ମା ଅହ୍ଲକାର୍।’”

¹⁸“ଏନ୍ଦେର୍‌ଗେକା ଆସ୍ନାନ୍ ଚିଉ ଯୋହାନ୍‌ସ୍ ବାର୍‌ଚାସ୍ ଆରୁ ଏକାସ୍ ନା ହାପ୍ପଦାସ୍ ନା ଅନ୍ଦାସ୍, ଆରୁ ଆବ୍ଡ଼ାର୍ ତେଙ୍ଗ୍‌ନାଏ, ‘ଆସ୍‌କେ ଭୁତ୍ତୁ ଲାକ୍କିଚି।’ ¹⁹ମୁନୁଷ୍ ହାଦ୍ଦୁସ୍ ବାର୍‌ଚାସ୍, ଏକାସ୍ କା ହାପ୍ପଦାସ୍-ଅନ୍‌ଦାସ୍ ଆରୁ ଆବ୍ଡ଼ାର୍ ତେଙ୍ଗ୍‌ନାଏ ଏରା, ଇ ଆଲାସ୍ ପେଟୁ ଆରୁ ମାତ୍‌ୱାଡ଼୍‌ସ୍, ମାଲ୍‌ଗୁଜାରୀ ଉକ୍‌ରୁସ୍ ଆରୁ ପାପୀର୍‌ଘି ସାଙ୍ଗେସ୍। ଲେକିନ୍ ପାର୍‌ମେଶ୍ୱାର୍‌ସ୍‌କି ବୁଝ୍‌ର୍‌ନାଦ୍ ସତ୍ତୁଦ୍‌ବୁଲି ତେଙ୍ଗିକିରି ଆସ୍‌କି ତାର୍‌ତି ସାବୁତ୍ ମାନ୍‌ଚ୍‌କିଚି।”

ବିଶ୍ୱାସ୍ ମା କାମୁର୍‌ଗେ ଯୀଶୁସ୍‌କି ଚେତାବାନୀ

(ଲୁକାସ୍ ୧୦:୧୩-୧୫)

²⁰ଆନ୍ତିନ୍ ଯୀଶୁସ୍ ଆବ୍ଡ଼ା ସହର୍‌ଗୁଠିନ୍ ଧିକ୍କାର୍ କାମା ଲାଗ୍ଗିୟାସ୍, ଏକାସାନ୍ କା ଆସ୍ ଢେର୍ ଶକ୍ତିଘି ନାଲ୍‌ଖୁ କାମ୍‌ଚ୍‌କାଚାସ୍, ଏନ୍ଦେର୍‌ଗେକା ଆସ୍‌ତା ଆଲାର୍ ପାପ୍‌ବନ୍ ଆମ୍ବିକିରି ପାର୍‌ମେଶ୍ୱାର୍‌ସ୍‌କି ଚାହାଗେ ମା ବାର୍‌ଚାର୍। ²¹“ହାଏରେ, କୋରାଜୀନ୍! ହାଏରେ, ବେତ୍‌ସାଇଦା! ଏକା ଶକ୍ତିଘି ନାଲ୍‌ଖୁ ନିଙ୍ଘାସାନ୍ କାମାକେର୍‌କିଚା, ଯଦି ଆବ୍ଡ଼ାନ୍ ସୋର୍ ଆରୁ ସିଦୋନ୍‌ନୁ କାମାକେର୍‌କିରଦ୍‌ନେ, ହାଲେ ଆସ୍‌ତା ଆଲାର୍ ପାପ୍ ଆମ୍ବିକିରି ପାର୍‌ମେଶ୍ୱାର୍‌ସ୍‌କି ଚାହାଗେ ବାର୍‌ଚ୍‌କା ରନ୍‌ନେ। ²²ଲେକିନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ ପାର୍‌ମେଶ୍ୱାର୍‌ସ୍ ଆଲାର୍‌ଘି, ନ୍ୟାୟ କାମ୍‌ନାଘି ଉଲ୍ଲାନୁ ସୋର୍ ଆରୁ ସିଦୋନ୍ ତା ଆଲାର୍‌ସ୍‌ତି ବାଗ୍ଗେ ଦଣ୍ଡ୍ ପାର୍‌ମେଶ୍ୱାର୍‌ସ୍ ନିମାଗେ ଚସ୍। ²³ଆରୁ କାଫାର୍‌ନାହୁମ୍ ସହର୍‌ତା ଆଲାରୋ ନିମ୍ ଏନ୍ଦେର୍ ସୋଚାଲ୍‌ଦାର୍ କା ପାର୍‌ମେଶ୍ୱାର୍‌ସ୍ ନିମାନ୍ ସରଗ୍‌ତକ୍ ମିଆଁ ଉଠାବସ୍? ମାଲ୍ଲା, ପାର୍‌ମେଶ୍ୱାର୍‌ସ୍ ନିମାନ୍ କିୟାଁ ପାତାଲ୍‌ତକ୍ ଏତ୍ତଚସ୍, ଯଦି ଏନ୍ ନିହ୍ମା ସହର୍‌ନୁ ଏକା ଅଦ୍‌ଭୁତ୍ ନାଲ୍‌ଖୁ କାମ୍‌ଚ୍‌କାନ୍ ଆ ଅଦ୍‌ଭୁତ୍ ନାଲ୍‌ଖୁ ସଦୋମ୍‌ନୁ କାମାକେର୍‌କିରଦ୍‌ନେ ତା ଆ ସହର୍‌ତା ଆଲାର୍ ଇନ୍ନାତକ୍ ଉଜ୍ଜର୍‌ନେ। ²⁴ଲେକିନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ କା ପାର୍‌ମେଶ୍ୱାର୍‌ସ୍ ଆଲାର୍‌ଘି ନ୍ୟାୟ କାମ୍‌ନାଘି ଉଲ୍ଲାନୁ ନିହ୍ମା ସହର୍‌ତା ଆଲାର୍‌ଗେ ସଦୋମ୍ ତା ଆଲାର୍‌ସ୍‌ତିହି ବାଗ୍ଗେ ଦଣ୍ଡ୍ ହାଖ୍ଖର।”

ଅତ୍‌ଥାତି କାଜ୍‌ର୍‌କା ଆଲାର୍‌ଘି ଲାଗାନ୍ ଆରାମ୍

(ଲୁକାସ୍ ୧୦:୨୧,୨୨)

²⁵ହୁ ସାମାୟନୁ ଯୀଶୁସ୍ ତେଙ୍ଗିୟାସ୍, “ହେ ବାଙ୍ଗ୍, ସରଗ୍ ଆରୁ ଦୁନିଆଁନ୍ତା ପ୍ରାଭୁ, ଏନ୍ ନିମାନ୍ ଧାନ୍ୟାବାଦ୍ ଚିଆଲ୍‌ଦାନ୍ କା ନିମ୍ ଇବ୍ଡ଼ା ଜାମା କାତ୍‌ଥାଗୁଠିନ୍ ବୁଝ୍‌ର୍‌ନା ଆରୁ ବୁଦ୍ଧିୟାର୍ ଆଲାର୍‌ସ୍‌ତି ନୁଡ଼ିକିରି ଛୋଟେ ହାଦ୍ଦୁର୍ ଲେଖା ଆଲାର୍‌ସାନ୍ ପ୍ରକଟ୍ କାମ୍‌ଚ୍‌କାଦାର୍। ²⁶ହଁ, ବାଙ୍ଗ୍ ଇଦିନ୍ ନିମାଗେ ବାନେ ଲାଗ୍ଗିୟାଦ୍।”

²⁷“ଏଙ୍ଘା ବାଙ୍ଗ୍‌ସ୍‌ ଏଙ୍ଗାଗେ ଜାମାନ୍ ସୋଁପ୍‌ଚେଇ ଚିଚ୍‌କାଦାସ୍; ଆରୁ ପାର୍‌ମେଶ୍ଵାର୍‌ସ୍‌କି ହାଦ୍ଦୁସିନ୍ ନେଦ୍‌ହି ବାଲ୍‌ନାଇନ୍, ଖାଲି ବାଙ୍ଗ୍ ପାର୍‌ମେଶ୍ଵାର୍‌ସ୍ ଆହ୍‌ଦାସ୍; ଆରୁ ବାଙ୍ଗ୍ ପାର୍‌ମେଶ୍ଵାର୍‌ସିନ୍ ନେଦ୍‌ହି ବାଲ୍‌ନାଇନ୍, ଖାଲି ପାର୍‌ମେଶ୍ଵାର୍‌ସ୍‌କି ହାଦ୍ଦୁସ୍ ଆହ୍‌ଦାସ୍ ଆରୁ ଖାଲି ଆସ୍ ଆହ୍‌ଦାସ୍ ଏକାସ୍‌କି ମିଆଁ ପାର୍‌ମେଶ୍ଵାର୍‌ସ୍‌କି ହାଦ୍ଦୁସ୍ ଆହାଗେ କ୍ରିପା କାମ୍‌ଦାସ୍।”

²⁸“ହେ ଥାକ୍‌ର୍‌କା ଆରୁ ଅତ୍‌ଥାତି କାଜ୍‌ର୍‌କା ଆଲାରୋ, ଏଙ୍ଘା ଚାହାଗେ ବାରା; ଏନ୍ ନିମାଗେ ଆରାମ୍ ଚିୟନ୍। ²⁹ଏଙ୍ଘା ଭାର୍ ନିହ୍ମା ମିଆଁ ଉଠାବା ଆରୁ ଏଙ୍ଘାସ୍‌ତି ଶିଖ୍‌ରା; ଏନ୍ ମନ୍‌ତି ନରମ୍ ଆରୁ ସାଫା ରାଦାନ୍: ଇଦ୍‌ଘି ଲେଖା ନିମ୍ ନିଜର୍ ଆତ୍ମାଘି ଲାଗାନ୍ ଶାନ୍ତି ହାଖ୍ଖର୍। ³⁰ଏନ୍ଦେର୍‌ଗେକା ଏଙ୍ଘା ପାକ୍‌ସି ସହଜ୍ ଆରୁ ଏଙ୍ଘା ଭାର୍ ହାଲ୍‌କା ରାଇ।”

ଯୀଶୁସ୍ ପାବିତାର୍ ଉଲ୍ଲାଘି ପ୍ରାଭୁସ୍

(ମାର୍‌କୁସ୍ ୨:୨୩-୨୮; ଲୁକାସ୍ ୬:୧-୫)

¹ହୁ ସାମାୟନୁ ଯୀଶୁସ୍ ଆରୁ ତାଙ୍ଘା ଚେଲାର୍ ପାବିତାର୍ ଉଲ୍ଲାନୁ ଗହମ୍ ବାଟ୍‌କି ଚିଇକିରି କାଲିୟାର୍, ଆରୁ ଚେଲାଜାମାର୍‌ଗେ କିଡ଼ା ଲାଗ୍ଗିୟାତା ଆବ୍ଡ଼ାର୍ ଗହମ୍ ଚାନ୍ନୁନ୍ ହାଚ୍ଚିକିରି ମହାଁ ଲାଗ୍ଗିୟାର୍। ²ଇବନ୍ ଏରିକିରି ଫାରିସୀଜାମାର୍ ଯୀଶୁସିନ୍ ତେଙ୍ଗିୟାର୍, “ଏରା, ପାବିତାର୍ ଉଲ୍ଲାନୁ ଏକା ନାଲ୍‌ଖୁ କାମ୍‌ନା ଉଚିତ୍ ମାଲ୍ଲିଦ୍, ଆବନ୍ ନିହ୍ମା ଚେଲାଜାମାର୍ କାମାଲ୍‌ନାଏ।” ³ଯୀଶୁସ୍ ଫାରିସୀ ଜାମାରିନ୍ ତେଙ୍ଗିୟାସ୍, “ନିମ୍ କାଁଏ ମାଲ୍ଲା ପାଢ଼ୁର୍ କା, ଯେତ୍‌କବାକେନ୍ ଦାଉଦ୍‌ସ୍‌ଗେ ଆରୁ ତାଙ୍ଘା ସାଙ୍ଗେର୍‌ଗେ କିଡ଼ା ଲାଗ୍ଗାଲିୟାଦ୍ ତା ଏନ୍ଦେର୍ କାମ୍‌ଚ୍‌କାଚାସ୍? ⁴ଏସ୍‌କେ ଆସ୍ ପାର୍‌ମେଶ୍ଵାର୍‌ସ୍‌କି ମନ୍ଦିର୍‌ନୁ କରିକିରି ଏକା ଚାଢ଼ାବାଚ୍‌କା ଆସ୍‌ମାନ୍ ଖାଲି ପୁରୋହିତ୍ ଜାମାର୍‌ଗେ ମଁହାଗେ ଉଚିତ୍ ରାଚା, ଲେକିନ୍ ତାଙ୍ଗା ଆରୁ ତାଙ୍ଘା ସାଙ୍ଗେର୍‌ଗେ ମହଁନା ଉଚିତ୍ ମାଲ୍ଲା ରୁ, ଆବନ୍ ଆବ୍ଡ଼ାର୍ ମଖ୍ଖାର୍? ⁵ନିମ୍ କାଁଏ ମୁଶାସ୍‌କି ନିୟମ୍‌ନୁ ଏନ୍ନେ ମାଲ୍ଲା ପାଢ଼ୁର୍ କା ପୁରୋହିତ୍ ଜାମାର୍‌ହି ପାବିତାର୍ ଉଲ୍ଲାନ୍ତା ନିୟମ୍‌ବନ୍ ତୋଡ଼୍‌ନାଏ ହାଲେହି ନେଦ୍‌ହି ଆବ୍ଡ଼ାରିନ୍ ଦୋଷୀ ମା ଠାହ୍‌ରାନାଏ? ⁶ଲେକିନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ କା ଇସାନ୍ ଏକାଦ୍ ରାଇ ଆଦ୍ ମନ୍ଦିର୍‌ତି ହି ବାଡ଼୍‌କା ରାଇ। ⁷ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍‌ଚ୍‌କା ରାଇ ପାର୍‌ମେଶ୍ୱାର୍‌ସ୍ ତେଙ୍ଗ୍‌ଦାସ୍, ‘ଏନ୍ ଆଲାର୍‌ଘି ମାଝାନୁ ଦାୟା ଚାହଁଦାନ୍ ବଲୀଦାନ୍ ମା ଚାହଁଦାନ୍’ ଯଦି ନିମ୍ ଇଦ୍‌ଘି ମତ୍‌ଲବ୍ ଆହର୍‌ନେତା, ନିମ୍ ଆବ୍ଡ଼ାରିନ୍ ଦୋଷୀ ମା ଠାହ୍‌ରର୍‌ନେ ଏକାର୍ କା ନିର୍ଦ୍ଦୋଷ୍ ରାନାଏ। ⁸ମୁନୁଷ୍ ହାଦ୍ଦୁସ୍ ତା ପାବିତାର୍ ଉଲ୍ଲାନ୍ତାହି ପ୍ରାଭୁସ୍।”

ହାଏକା ହେଖ୍ଖାବାଲା ଅଣ୍ଟା ଆଲାସିନ୍ ଯୀଶୁସ୍ ବାନେ କାମାଲ୍‌ଦାସ୍

(ମାର୍‌କୁସ୍ ୩:୧-୬; ଲୁକାସ୍ ୬:୬-୧୧)

⁹ଯୀଶୁସ୍ ଆସ୍‌ତି ବୁଙ୍ଗିକିରି ଆବ୍ଡ଼ାର୍‌ଘି ସାଭା ଆଡ଼୍‌ପାଗେ ବାର୍‌ଚାସ୍। ¹⁰ଆସାନ୍ ଅଣ୍ଟା ଆଲାସ୍ ରାଚାସ୍, ଏକାସ୍‌କି କା ଅଣ୍ଟା ହେଖ୍ଖା ହାଇୟା କେର୍‌କିଚା। ଆବ୍ଡ଼ାର୍ ଯୀଶୁସ୍‌କି ମିଆଁ ଦୋଷ୍ ଚିୟାଗେ ଆସିନ୍ ମେନ୍‌ଚାର୍, “ପାବିତାର୍ ଉଲ୍ଲାନୁ ବାନେ କାମ୍‌ନା ଉଚିତ୍ କାଁଏ?” ¹¹ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ମନେ କାମା ନିହ୍ମା ଭିତର୍‌ନୁ ନେଖିନ୍ ଅଣ୍ଟିଟା ଭେଡ଼ି ରଦ୍, ଆରୁ ଆଦ୍ ପାବିତାର୍ ଉଲ୍ଲାନୁ ଗାଡ୍ଡିନୁ ଖାତ୍‌ରକ ତା ଆସ୍ ଆବନ୍ ଧାରିକିରି ମା ଅଥ୍‌ରସ୍? ¹²ଲେକିନ୍ ଭେଡ଼ିସ୍‌ତି ଆଲାର୍ କେତ୍‌କ ବାଡ଼୍‌କାର୍! ଇଦ୍‌ଘିଲାଗାନ୍ ପାବିତାର୍ ଉଲ୍ଲାନୁ ବାନେ କାମ୍‌ନାଦ୍ ଉଚିତ୍ ରାଇଦ୍।” ¹³ଆନ୍ତିନ୍ ଯୀଶୁସ୍ ଆ ଆଲାସିନ୍ ତେଙ୍ଗିୟାସ୍, “ନିଙ୍ଘା ହେଖ୍ଖା ଲାମ୍ବାବା।” ଆଙ୍ଗେନ୍ ଆସ୍ ତାଙ୍ଘା ହେଖ୍ଖା ଲାମ୍ବାବାଚାସ୍, ଆରୁ ଆ ହେଖ୍ଖାଦ୍ ଆରୁ ଅଣ୍ଟା ହେଖ୍ଖା ଲେଖା ବାନେ ମାନ୍‌ଚାକେରା। ¹⁴ଆଙ୍ଗେନ୍ ଫାରିସୀଜାମାର୍ ବାହ୍‌ରି ଉର୍‌ଖିକିରି, ଯୀଶୁସିନ୍ ଏସ୍‌କେ ପିଟର୍ ଆଦ୍‌ଘି ଲାଗାନ୍ ଉପାୟ କାମ୍‌ଚାର୍।

ପାର୍‌ମେଶ୍ଵାର୍‌ସ୍‌କି ଚାଜ୍ଜକା ସେବକ୍

¹⁵ଇବନ୍ ଆହିକିରି ଯୀଶୁସ୍ ଆସ୍‌ତି ବୁଙ୍ଗିୟାସ୍ କେରାସ୍, ଆରୁ ଢେର୍ ଆଲାର୍ ତାଙ୍ଘା ପାଛ୍‌ଲି-ପାଛ୍‌ଲି କେରାର୍, ଆରୁ ଯୀଶୁସ୍ ଆବ୍ଡ଼ା ଜାମାରିନ୍ ବାନେ କାମ୍‌ଚାସ୍। ¹⁶ଆରୁ ଯୀଶୁସ୍ ଆବ୍ଡ଼ାରିନ୍ ଶକତ୍ ଚେତାବାନୀ ଚିଇକିରି ତେଙ୍ଗିୟାସ୍, ନେକାନ୍‌ହି ଏଙ୍ଘା ବାରେନୁ ଆମ୍‌କେ ତେଙ୍ଗା, ¹⁷ଇଦ୍‌ଘି ଲେଖା ଇଶାୟାହ୍‌ସ୍ ନାବୀସ୍‌କି ଇ ତେଙ୍କା କାତ୍‌ଥା ପୁରା ମାନ୍‌ଚା:

¹⁸“ଏରା, ପାର୍‌ମେଶ୍ୱାର୍‌ସ୍ ତେଙ୍ଗ୍‌ଦାସ୍, ‘ଇସ୍ ଏଙ୍ଘାଏ ସେବକ୍‌ସ୍, ଏକାସିନ୍ କା ଏନ୍ ଚାଜ୍ଜକାଦାନ୍; ଏନ୍ ଇସିନ୍ ଜାମାର୍‌ଘିନ୍ତି ବାଗ୍ଗେ ବାନେ ହାଖ୍ଖଦାନ୍, ଇସ୍‌କି ମିଆଁ ଏନ୍ ମୁରୁକ୍ ଖୁସ୍ ରାଦାନ୍: ଆରୁ ଏନ୍ ଏଙ୍ଘା ଆତ୍ମାନ୍ ତାଙ୍ଘାଏନୁ ଚିଅନ୍, ଆରୁ ଆସ୍ ଦୁସ୍‌ରା ଜାତିୟାରିନ୍ ନ୍ୟାୟଘି ସାମାଚାର୍ ପ୍ରଚାର୍ କାମସ୍।’”

¹⁹“‘ଆରୁ ଆସ୍ ନା ଝାଗ୍‌ଡ଼ାଝାଟି କାମସ୍, ନା ଚିର୍‌ରାବର୍‌ରା କାମସ୍ ଆରୁ ନା ହାଟ୍ଟେଗୁଠିନୁ ନେଦ୍‌ହି ଇସ୍‌କି କାତ୍‌ଥାନ୍ ମେନର୍।’”

²⁰“‘ଏସ୍‌ର୍‌କା ମାସୁଁ ଲେଖା କମ୍‌ଜୋର୍ ଆଲାର୍‌ଘି ମିଆଁ ଏଙ୍ଘା ସେବକସ୍ ଦାୟା କାମସ୍, ଆରୁ ତେବ୍‌ର୍‌ନା ବିଲ୍ଲୀ ଲେଖା କମ୍‌ଜୋର୍ ଆଲାରିନ୍ ଏଙ୍ଘା ସେବକସ୍ ମଦେତ୍ କାମସ୍। ପାର୍‌ମେଶ୍ୱାର୍‌ସ୍ ଏକାନ୍ ତେଙ୍ଗ୍‌ଦାସ୍ ଆଦ୍ ସତ୍ତୁଦ୍। ଯେତ୍‌କତକ୍ ଜାମା ଆଲାର୍ ଇବନ୍ ଆହର୍‌କର୍ ହତ୍‌କତକ୍ ଏଙ୍ଘା ସେବକସ୍ ଏନ୍ନେ କାମସ୍।’”

²¹“‘ଇ ଦୁନିଆଁନ୍ତା ବିନାୟାହୁଦୀ ଆଲାର୍ ଏଙ୍ଘା ସେବକ୍‌ସ୍‌କି ମିଆଁ ଭାର୍‌ଷା ଉଇୟର୍।’”

ଯୀଶୁସ୍ ଆରୁ ବେଲ୍‌ଜେବୁଲ୍

(ମାର୍‌କୁସ୍ ୩:୩୦; ଲୁକାସ୍ ୧୧:୧୪-୨୩)

²²ଆନ୍ତିନ୍ ଆଲାର୍ ଅଣ୍ଟା ଭୁତ୍ତୁଲାକ୍କା କାଁଣା ଆରୁ କନ୍ଦା ଆଲାସିନ୍ ଯୀଶୁସ୍‌କି ଚାହାଗେ ଅନ୍ଦ୍ରାର୍; ଆରୁ ଯୀଶୁସ୍ ଆସିନ୍ ବାନେ କାମ୍‌ଚାସ୍, ଆଙ୍ଗେନ୍ ଆସ୍ କାଚ୍‌ନେଖ୍‌ରା ଅଙ୍ଗିୟାସ୍ ଆରୁ ଏରାଗେ ଲାଗ୍ଗିୟାସ୍। ²³ଜାମା ଆଲାର୍ ଆଚ୍‌ମିତ୍ ମାନିକିରି ତେଙ୍ଗା ଲାଗ୍ଗିୟାର୍, “ଇସ୍ ଦାଉଦ୍‌ସ୍‌କି ହାଦ୍ଦୁସ୍ ତା ମାଲ୍‌ଦାସ୍?” ²⁴ଲେକିନ୍ ଫାରିସୀଜାମାର୍ ଇବନ୍ ମେନିକିରି ତେଙ୍ଗିୟାର୍, “ଇ ଆଲାସ୍‌ତା ଭୁତ୍ତୁର୍‌ଘି ମୁଖିଆ ବେଲ୍‌ଜେବୁଲ୍‌ଘି ମଦେତ୍‌ତି ଭୁତ୍ତୁଗୁଠିନ୍ ଅଥ୍‌ର୍‌ଦାସ୍।” ²⁵ଆବ୍ଡ଼ାର୍‌ଘି ସୋଚ୍‌ବନ୍ ଆହିକିରି ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏକା ରାଜୀଦ୍ ଭାଗ୍ ମାନିକିରି ନିଜର୍‌ନିଜର୍ ଭିତ୍‌ରେ ଝାଗ୍‌ଡ଼ା ମାନିଦ୍, ଆଦ୍ ମା ଟିକ୍‌ରିଦ୍; ଆରୁ ଏକା ସହର୍ ଚାହେ ଆଡ଼୍‌ପାନୁ ଝାଗ୍‌ଡ଼ା ମାନିଦ୍, ଆଦ୍ ଟିକ୍‌ରା ପଲ୍ଲୀ। ²⁶ଆରୁ ଯଦି ଶାଏତାନ୍‌ଦ୍ ଶାଏତାନ୍‌ବନ୍‌ନିନ୍ ଅଥ୍‌ରୋତା ଆଦ୍ ତାଙ୍ଘା ବିରୁଦ୍ଧନୁ କେରା; ହାଲେ ଆଦ୍‌ଘି ରାଜୀଦ୍ ଏସ୍‌କେ ଟିକ୍‌ରା ଅଙ୍ଗଦ୍? ²⁷ଆରୁ ଯଦି ଏନ୍ ବେଲ୍‌ଜେବୁଲ୍ ଭୁତ୍ତୁଘି ମଦେତ୍‌ତି ଭୁତ୍ତୁଗୁଠିନ୍ ଅଥ୍‌ର୍‌ଦାନ୍ ତା, ନିହ୍ମା ବାଉଁଶାର୍ ନେଖା ମଦେତ୍‌ତି ଅଥ୍‌ର୍‌ନାଏ? ହୁଦ୍‌ଘିଲାଗାନ୍ ଆବ୍ଡ଼ାରିନ୍ ନିହ୍ମା ନ୍ୟାୟ କାମର୍। ²⁸ଆରୁ ଯଦି ଏନ୍ ପାର୍‌ମେଶ୍ଵାର୍‌ସ୍‌କି ଆତ୍ମାଘି ମଦେତ୍‌ତି ଭୁତ୍ତୁଗୁଠିନ୍ ଅଥ୍‌ର୍‌ଦାନ୍ ତା, ପାର୍‌ମେଶ୍ଵାର୍‌ସ୍‌କି ରାଜୀଦ୍ ନିହ୍ମା ମାଝାନୁ ବାର୍‌ଚା କେର୍‌କିଚି। ²⁹ଏକିନ୍ ଆଲାସ୍ ଏକିନ୍ ତାକତ୍‌ବାଲା ଆଲାସ୍‌କି ଆଡ଼୍‌ପା କରିକିରି ଆସ୍‌କି ସମ୍ପତ୍ତି ହାଡ଼ା ବେଦ୍ଦସ୍ ତା ପହ୍‌ଲେ ଆ ତାକତ୍‌ବାଲା ଆଲାସିନ୍ ହିଁଆ ଖାତ୍‌ରୋ ତା ଆସ୍ ତାକତ୍ ବାଲାସ୍‌କି ଆଡ଼୍‌ପାନ୍ ଲୁଟା ଅଙ୍ଗସ୍ ³⁰ଏକାର୍ ଏଙ୍ଘାଗାନେ ମାଲ୍‌କାରିନ୍ ଆବ୍ଡ଼ାର୍ ଏଙ୍ଘା ବିରୁଦ୍ଧ୍‌ନୁ ରାନାଏ ଆରୁ ଏକାର୍ ଏଙ୍ଘାଗାନେ ମା ଠୁଡ଼୍‌ୟାନାଏ ଆବ୍ଡ଼ାର୍ ଛିଛିର୍‌ଛାନ୍ଦ୍ କାମ୍‌ନାଏ। ³¹ଇଦ୍‌ଘିଲାଗାନ୍ ଏନ୍ ତେଙ୍ଗାଲ୍‌ଦାନ୍ କା, ଆଲାର୍‌ଘି ଆରୁ ପାର୍‌ମେଶ୍ୱାର୍‌ସ୍‌କି ବିରୁଦ୍ଧତା ଜାମା ଲେଖା ପାପ୍ ଆରୁ ନିନ୍ଦା ଛେମା କାମାକୋ, ଲେକିନ୍ ପାବିତାର୍ ଆତ୍ମାଘି ବିରୁଦ୍ଧ ନିନ୍ଦା ଛେମା କାମା ମା କାଇ। ³²ନେଦିନ୍ ମୁନୁଷ୍ ହାଦ୍ଦୁସ୍‌କି ବିରୁଦ୍ଧ୍‌ନୁ ଏନ୍ଦ୍ରିନ୍ ତେଙ୍ଗର୍, ଆସ୍‌କି ପାପ୍‌ବନ୍ ଛେମା କାମାକଦ୍, ଲେକିନ୍ ନେଦ୍ ପାବିତାର୍ ଆତ୍ମାଘି ବିରୁଦ୍ଧ୍‌ନୁ ଏନ୍ଦ୍ରିନ୍ ତେଙ୍ଗର୍, ଆସ୍‌କି ପାପ୍‌ବନ୍ ଇ ଦୁନିଆଁନୁ ଚାହେ ସେପୁର୍‌ନୁ ଛେମା କାମା ମା କାଇ।”

ମାନ୍ନୁ ବାନେ ରାଇ ତା ଫାଡ଼ୁହି ବାନେ ରାଇ

(ଲୁକାସ୍ ୬:୪୩-୪୫)

³³“ଯଦି ଅଣ୍ଟା ମାନ୍ନୁନ୍ ବାନେ ବର୍‌ତା, ଆଦ୍‌ଘି ଫାଡ଼ୁନ୍‌ହି ବାନେ ବର୍, ଆରୁ ମାନ୍ନୁନ୍ ଖାରାପ୍ ବର୍‌ତା, ତାଙ୍ଘା ଫାଡ଼ୁନ୍‌ହି ଖାରାପ୍ ବର୍; ଏନ୍ଦେର୍‌ଗେକା ମାନ୍ନୁ ତାଙ୍ଘା ଫାଡ଼ୁତିନିନ୍ ଚିହ୍ନରିଦ୍। ³⁴ହେ ନେର୍‌ରୁଘି ହାଦ୍ଦୁରୋ, ନିମ୍ ଖାରାପ୍ ରାଇକିରି ଏସ୍‌କେ ବାନେ କାତ୍‌ଥା ତେଙ୍ଗା ଅଙ୍ଗର୍? ଏନ୍ଦେର୍‌ଗେକା ଏକାଦ୍ ମନ୍‌ନୁ ନିନ୍ଦ୍‌କିରାଇଦ୍, ଆଦିନ୍ ଥୁମ୍‌ଣାନୁ ବାରିଦ୍। ³⁵ବାନେ ଆଲାସ୍ ତାଙ୍ଘାଏ ମନ୍‌ଘି ଭାଣ୍ଡାର୍‌ତି ବାନେ ସୋଚ୍‌ବିଚାର୍ କାତ୍‌ଥା ଅଥ୍‌ର୍‌ଦାସ୍, ଆରୁ ଖାରାପ୍ ଆଲାସ୍ ଖାରାପ୍ ଭାଣ୍ଡାର୍‌ତି ଖାରାପ୍ ସୋଚ୍‌ବିଚାର୍ କାତ୍‌ଥା ଅଥ୍‌ର୍‌ଦାସ୍। ³⁶ଏନ୍ ନିମାନ୍ ତେଙ୍ଗାଲ୍‌ଦାନ୍ କା ପାର୍‌ମେଶ୍ୱାର୍‌ସ୍ ଆଲାର୍‌ଘି ନ୍ୟାୟ କାମ୍‌ନାଘି ଉଲ୍ଲାନୁ ଜାମା ଆଲାର୍‌ଗେ ନିଜର୍ ଜାମା ବେକାର୍ ତେଙ୍କା କାତ୍‌ଥାଘି ହିସାବ୍ ଚିଆ ଖାତ୍‌ରୋ। ³⁷ଏନ୍ଦେର୍‌ଗେକା ନିମ୍ ନିହ୍ମା କାତ୍‌ଥାତିନିନ୍ ଦୋଷୀ ଠାହ୍‌ରାରର୍, ଆରୁ ନିହ୍ମା କାତ୍‌ଥାତିନିନ୍ ନିର୍ଦ୍ଦୋଷ୍ ଠାହ୍‌ରାରର୍।”

ଯୀଶୁସିନ୍ ସରଗ୍‌ତା ଚିହ୍ନା ନିନା

(ମାର୍‌କୁସ୍ ୮:୧୧,୧୨; ଲୁକାସ୍ ୧୧:୨୯-୩୨)

³⁸ହତ୍‌କବାକେନ୍ କେତ୍‌କ ଲୋକ୍ ପଣ୍ତିତ୍ ଆରୁ ଫାରିସୀଜାମାର୍ ଯୀଶୁସିନ୍ ତେଙ୍ଗିୟାର୍, “ହେ ଗୁରୁ, ଏମ୍ ନିହ୍ମାସ୍‌ତି ଅଣ୍ଟା ଚିହ୍ନା ଏରା ବେଦ୍ଦାଲ୍‌ଦାମ୍।” ³⁹ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ଇ ଯୁଗ୍‌ତା ବଦ୍‌ମାସ୍ ଆରୁ ପାର୍‌ମେଶ୍ୱାର୍‌ସ୍‌କି ବଚନ୍ ମା ମାନ୍ନାବାଲା ଆଲାର୍ ଚିହ୍ନା ବେଦ୍ଦନାଏ, ଲେକିନ୍ ଯୁନାସ୍ ନାବୀସ୍‌କି ଚିହ୍ନାବନ୍ ଆମ୍ବିକିରି ଦୁସ୍‌ରା ଆରୁ ଏନ୍ଦେର୍‌ହି ଚିହ୍ନା ଆବ୍ଡ଼ାର୍‌ଗେ ମା ଚିଆକାଇ। ⁴⁰ଏନ୍ଦେର୍‌ଗେକା ଯୁନାସ୍ ଏସ୍‌କେ ତିନ୍ ଦିନ୍ ଆରୁ ତିନ୍ ମାଁହା ଅଣ୍ଟା ବାଡ଼୍‌କା ଇଞ୍ଜୋଘି କୁଲୁନୁ ରାଚାସ୍, ଆନ୍ନେନ୍ ମୁନୁଷ୍ ହାଦ୍ଦୁସ୍ ତିନ୍ ଦିନ୍ ଆରୁ ତିନ୍ ମାଁହା ଧାନ୍ତାରୀ କିୟାଁ ରସ୍। ⁴¹ନ୍ୟାୟ ଉଲ୍ଲାନୁ ନୀନିବୀ ସହର୍‌ତା ଆଲାର୍ ଇ ଯୁଗ୍‌ତା ଆଲାର୍ ଗାନେ ଉସ୍‌କାରିକିରି ଆବ୍ଡ଼ାରିନ୍ ଦୋଷୀ ଠାହ୍‌ରାବର୍, ଏନ୍ଦେର୍‌ଗେକା ଆବ୍ଡ଼ାର୍ ଯୁନାସ୍‌କି ଉପ୍‌ଦେଶ୍ ମେନିକିରି ତାହ୍ମା ପାପ୍ ଆମ୍ବିକିରି ପାର୍‌ମେଶ୍ୱାର୍‌ସ୍‌କି ଚାହାଗେ ବାର୍‌ଚ୍‌କାଚାର୍; ଆରୁ ଏରା, ଇସାନ୍ ଆସ୍ ରାଦାସ୍ ଏକାସ୍ କା ଯୁନାସ୍‌ତିହି ବାଡ଼୍‌କାସ୍। ⁴²ଆରୁ ଦକ୍ଷିଣ୍ ରାଜୀନ୍ତା ରାନୀ ନ୍ୟାୟଘି ଉଲ୍ଲା ଇ ଯୁଗ୍‌ତା ଆଲାର୍ ଗାନେ ଉସ୍‌କାରିକିରି ଆବ୍ଡ଼ାରିନ୍ ଦୋଷୀ ଠାହ୍‌ରାବଦ୍, ଏନ୍ଦେର୍‌ଗେକା ଆଦ୍ ଶୁଲେମାନ୍‌ସ୍‌କି ବୁଦ୍ଧିଘି କାତ୍‌ଥା ମେନାଗେ ଦୁନିଆଁନ୍ତା ଖାଁଣିସ୍‌ତି ବାର୍‌ଚ୍‌କିଚା; ଆରୁ ଏରା, ଇସାନ୍ ଆସ୍ ରାଦାସ୍ ଏକାସ୍ କା ଶୁଲେମାନ୍‌ସ୍‌ତିହି ବାଡ଼୍‌କାସ୍।”

ଖାରାପ୍ ଆତ୍ମାଘି ପହେଲା ଆଡ୍ଡାନୁ କିର୍‌ର୍‌ନା

(ଲୁକାସ୍ ୧୧:୨୪-୨୬)

⁴³“ଯେତ୍‌କବାକେନ୍ ଭୁତ୍ତୁଦ୍ ଅଣ୍ଟା ଆଲାସ୍‌ସ୍ତି ଉର୍‌ଖି ତା, ଆଦ୍ ଆରାମ୍ ଆଡ୍ଡାଗୁଠିନ୍ ବେଦ୍ଦାଲାଗ୍ଗି, ଲେକିନ୍ ଆଦ୍ ମା ହାଖ୍ଖୀ। ⁴⁴ଆଙ୍ଗେନ୍ ଆଦ୍ ତେଙ୍ଗି, ‘ଏନ୍ ଏକା ଆଡ଼୍‌ପାନ୍ତି ଉର୍‌କିଚାନ୍, ଆ ଆଡ଼୍‌ପାଗେ କିର୍‌ରନ୍‌କନ୍।’ ଆରୁ କିର୍‌କାନ୍ତି ଆଦ୍ ଆ ଆଡ଼୍‌ପାବନ୍ ସାଫା ସୁତ୍‌ରା ଆରୁ ସାଜାବାଚ୍‌କା ହାଖ୍ଖୀଦ୍। ⁴⁵ଆଙ୍ଗେନ୍ ଆଦ୍ ତାଙ୍ଘାଗାନେ ଆରୁ ସାତ୍ତେଟା ଭୁତ୍ତୁବନ୍ ଅନ୍ଦ୍ରି, ଆରୁ ଆବ୍ଡ଼ାର୍ ଆସାନ୍ କର୍‌ନାଏ ଆରୁ ଆସାନିନ୍ ରାନାଏ କାନାଏ ଆରୁ ଆ ଆଲାସ୍‌କି ଆଘ୍‌ଲିନ୍ତା ଦାଶାନ୍ତି ପାଛ୍‌ଲିନ୍ତା ଦାଶା ବାଗ୍ଗେ ଖାରାପ୍ ମାନିଦ୍। ଇ ଯୁଗ୍‌ତା ଖାରାପ୍ ଆଲାର୍‌ଘି ଦାଶା ଏନ୍ନେନ୍ ମାନଦ୍।”

ଯୀଶୁସ୍‌କି ଅନୁସରଣ୍ କାମୁ ଆଲାରିନ୍ ତାଙ୍ଘା ଆଡ଼୍‌ପାନ୍ତାର୍

(ମାର୍‌କୁସ୍ ୩:୩୧-୩୫; ଲୁକାସ୍ ୮:୧୯-୨୧)

⁴⁶ଯେତ୍‌କବାକେନ୍ ଯୀଶୁସ୍ ଆଲାର୍‌ଘି ମାଝାନୁ କାଚ୍‌ନେଖ୍‌ରାଲିୟାସ୍, ହତ୍‌କବାକେନ୍ ତାଙ୍ଘା ଆୟାଙ୍ଗ୍ ଆରୁ ଭାଇଜାମାର୍ ବାହ୍‌ରି ଇଜ୍ଜକାଚାର୍ ଆରୁ ଆସ୍‌ଗାନେ କାଚ୍‌ନେଖ୍‌ରା ବେଦ୍ଦାଲିୟାର୍। ⁴⁷ଆଙ୍ଗେନ୍ ଅଣ୍ଟା ଆଲାସ୍ ଯୀଶୁସିନ୍ ତେଙ୍ଗିୟାସ୍, “ଏରା, ନିହ୍ମା ଆୟାଙ୍ଗ୍ ଆରୁ ଭାଇଜାମାର୍ ବାହ୍‌ରି ଇଜ୍ଜକାନାଏ, ଆରୁ ଆବ୍ଡ଼ାର୍ ନିହ୍ମାଗାନେ କାଚ୍‌ନେଖ୍‌ରା ବେଦ୍ଦାଲ୍‌ନାଏ।” ⁴⁸ଇବନ୍ ମେନିକିରି ଆସ୍ ତେଙ୍ଗୁ ଆଲାସିନ୍ ଯାବାବ୍ ଚିଚ୍ଚାସ୍, “ନେଦ୍ ଏଙ୍ଘା ଆୟାଙ୍ଗ୍? ଆରୁ ନେଦ୍ ଏଙ୍ଘା ଭାଇଜାମାର୍?” ⁴⁹ଆରୁ ନିଜର୍ ଚେଲାର୍‌ତାରା ହେଖ୍ଖା ଲାମ୍ବାବାଇକିରି ତେଙ୍ଗିୟାସ୍, “ଏରା, ଇବ୍ଡ଼ାର୍ ଏଙ୍ଘା ଆୟାଙ୍ଗ୍ ଆରୁ ଭାଇର୍। ⁵⁰ଏନ୍ଦେର୍‌ଗେକା ନେଦ୍ ଏଙ୍ଘା ସରଗ୍‌ତା ବାଙ୍ଗ୍‌ସ୍‌କି ଇଚ୍ଛା ଲେଖା ଚାଲ୍‌ର୍‌ନାଏ, ଆବ୍ଡ଼ାର୍ ଏଙ୍ଘା ଆୟାଙ୍ଗ୍ ଆରୁ ଭାଇ ବୁହୁଣୀର୍।”

ଅଣ୍ଟା ଚାଷୀ ଆଲାସ୍‌କି ନମୁନା

(ମାର୍‌କୁସ୍ ୪:୧-୯; ଲୁକାସ୍ ୮:୪-୮)

¹ହୁ ଉଲ୍ଲାନ୍ ଯୀଶୁସ୍ ଆଡ଼୍‌ପାନ୍ତି ଉର୍‌ଖିୟାସ୍ ଆରୁ ହଁସ୍‌ରା ଖାଁଣିନୁ ଅକ୍କାଚାସ୍। ²ଆରୁ ଆସ୍‌କି ଚାହା ଏନ୍ନେ ବାଡ଼୍‌କା ଆଲାର୍‌ଘି ଭିଡ଼୍ ମାନ୍‌ଚାକେରା କା ଆସ୍ ଡଙ୍ଗାନୁ ଅକ୍କିୟାସ୍ ଆରୁ ଭିଡ଼୍‌ଦ୍‌ ଖାଁଣିନୁ ଇଜ୍ଜକିଚା। ³ଆରୁ ଆସ୍ ଆବ୍ଡ଼ାରିନ୍ ନମୁନାତି ଢେର୍ କାତ୍‌ଥା ତେଙ୍ଗିୟାସ୍: ଆନ୍ନୁନ୍ତି ଅଣ୍ଟା ନମୁନା ଇଦ୍ “ଅଣ୍ଟା ଚାଷୀ ଆଲାସ୍ ବିହ୍‌ନି ଚାହାଗେ ଉର୍‌ଖିୟାସ୍। ⁴ଚାହ୍‌ନା ବାକେନ୍ କେତ୍‌କ ବିହ୍‌ନିଦ୍ ପାବୁ ଖାଁଣିନୁ ଖାତ୍‌ରା ଆରୁ ଓଡ଼ାଦ୍ ବାରିକିରି ଆବନ୍ ମଖ୍ଖା। ⁵ଆରୁ କେତ୍‌କ ବିହ୍‌ନିଦ୍ ଚାଁଚା ଆଡ୍ଡାନୁ ଖାତ୍‌ରା, ଆରୁ ଆସାନ୍ ବାଗ୍ଗେ ହାଜ୍ଜୁ ମା ହାଖ୍‌ର୍‌ନାଘି ଲାଗାନ୍ ଆବ୍ଡ଼ାଦ୍ ଚାଁଣେ ଗାଜା ମାନ୍‌ଚାକେରା। ⁶ଲେକିନ୍ ବିଡ଼୍‌ନାଘି ଲାଗାନ୍ ଆବ୍ଡ଼ାଦ୍ ଅଲ୍ଲିୟା କେରା, ଆରୁ ଚେରୁ ମା ରାନାଘି ଲାଗାନ୍ ହାଇୟାକେରା। ⁷ଆରୁ କେତ୍‌କ ବିହ୍‌ନିଦ୍ ଆଚ୍ଚୁ ଝୁଁଣିନୁ ଖାତ୍‌ରା ଆରୁ ଆଚ୍ଚୁ ଝୁଁଣିଦ୍ ପାର୍‌ଦିକିରି ଆବ୍ଡ଼ାନ୍ ଡାବ୍‌ଚେଇଚା। ⁸ଲେକିନ୍ ଆରୁ କେତ୍‌କ ବିହ୍‌ନିଦ୍ ବାନେ ଆଡ୍ଡାନୁ ଖାତ୍‌ରା ଆରୁ ବାନେ ଫାଡ଼ୁ ଚିଚ୍ଚା, କେତ୍‌କଦ୍ ଶୋଏ ଗୁଣ୍, କେତ୍‌କଦ୍ ଷାଠିଏ ଗୁଣ୍, ଆରୁ କେତ୍‌କୋଦ୍ ତିରିଶ୍ ଗୁଣ୍। ⁹ନେଖାଏ ମେନାଗେ ମନ୍ ରାଇ ଆବ୍ଡ଼ାର୍ ମେନା।”

ନମୁନାଗୁଠିଘି ମତ୍‌ଲବ୍

(ମାର୍‌କୁସ୍ ୪:୧୦-୧୨; ଲୁକାସ୍ ୮:୯,୧୦)

¹⁰ଯୀଶୁସ୍‌କି ଚାହାଗେ ବାରିକିରି ଚେଲାଜାମାର୍ ଆସିନ୍ ମେନ୍‌ଚାର୍, “ନିମ୍ ଆଲାରିନ୍ ଏନ୍ଦେର୍‌ଗେ ନମୁନାତି କାତ୍‌ଥା କାମ୍‌ଦାର୍?” ¹¹ଯୀଶୁସ୍ ଯାବାବ୍ ଚିଚ୍ଚାସ୍, “ନିମାନ୍ ସରଗ୍ ରାଜୀଘି ଭେଦ୍ଦୁବନ୍ ବୁଝ୍‌ରାଗେ ଶକ୍ତି ଚିଆ କେର୍‌କିଚି, ଲେକିନ୍ ଆବ୍ଡ଼ାର୍‌ଗେ ମାଲ୍ଲା ଚିଆକୁ। ¹²ଏନ୍ଦେର୍‌ଗେକା ନେଖାସାନ୍ ରାଇ, ଆସ୍‌କେ ଚିଆକୋ ଆରୁ ଆସ୍‌କି ବାଗ୍ଗେ ମାନକୋ; ଲେକିନ୍ ନେଖାସାନ୍ ଏନ୍ଦେର୍‌ହି ମାଲ୍ଲାଦିନ୍, ତାଙ୍ଘାସାନ୍ ଏନ୍ଦ୍ରିନ୍‌ହି ରାଇ ଆବନ୍‌ହି ତାଙ୍ଘାସ୍ତି ହୁଆକୋ। ¹³ଏନ୍ ଆବ୍ଡ଼ାରିନ୍ ନମୁନାତି ଇଦ୍‌ଘିଲାଗାନ୍ କାତ୍‌ଥା କାମ୍‌ଦାନ୍ ଏନ୍ଦେର୍‌ଗେକା ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍‌ଚ୍‌କା ରାଇ ଆବ୍ଡ଼ାର୍ ଏର୍‌ତେହି ମା ଏର୍‌ନାଏ ଆରୁ ମେନ୍ତେହି ମା ମେନ୍ନାଏ, ଆରୁ ମା ବୁଝ୍‌ର୍‌ନାଏ। ¹⁴ଆବ୍ଡ଼ାର୍‌ଘି ବାରେନୁ ଇଶାୟାହ୍‌ସ୍ ନାବୀସ୍‌କି ଇ ଭବିଷତ୍ କାତ୍‌ଥା ପୁରାମାନାଲି:

‘ନିମ୍ ହେବ୍‌ଦାତିନିନ୍ ମେନର୍, ଲେକିନ୍ ମା ବୁଝ୍‌ର୍‌ଦାର୍; ଆରୁ ହାନ୍ନୁତି ତା ଏରର୍, ଲେକିନ୍ ନିମାଗେ ମା ଏଥ୍‌ରି।’

¹⁵‘ଏନ୍ଦେର୍‌ଗେକା ଇ ଆଲାର୍‌ଘି ମନ୍‌ଦ୍ ବୁଝ୍‌ର୍‌ନାନୁ ଧିରାରାଇ, ଆରୁ ଆବ୍ଡ଼ାର୍ ହେବ୍‌ଦାତି ଏନ୍ଦେର୍‌ହି ମା ମେନ୍ନାଏ ଆରୁ ଆବ୍ଡ଼ାର୍ ନିଜର୍ ହାନ୍ନୁବନ୍ ପୁରା ବନ୍ଦ୍ କାମ୍‌ଚେଚ୍‌କାନାଏ; ଏକାସାନ୍ ଏନ୍ନେ ମା ମାନ୍ନାଦ୍ କା ଆବ୍ଡ଼ାର୍ ହାନ୍ନୁତି ଏରର୍ ଆରୁ ହେବ୍‌ଦାତି ମେନର୍ ଆରୁ ମନ୍‌ତି ବୁଝ୍‌ରର୍, ଆରୁ ଏଙ୍ଘା ଚାହା କିର୍‌ରର୍ ବାରର୍ ଆରୁ ଏନ୍ ଆବ୍ଡ଼ାରିନ୍ ବାନେ କାମନ୍।’

¹⁶ଲେକିନ୍ ଧଏନ୍ ନିହ୍ମା ହାନ୍ନୁ ଏନ୍ଦେର୍‌ଗେକା ଆଦ୍ ଏରିଦ୍; ଆରୁ ଧଏନ୍ ନିହ୍ମା ହେବ୍‌ଦାଦ୍ ଏନ୍ଦେର୍‌ଗେକା ଆଦ୍ ମେନିଦ୍। ¹⁷ଏନ୍ଦେର୍‌ଗେକା ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ନିମ୍ ଏକାନ୍-ଏକାନ୍ ଏରାଲ୍‌ଦାର୍, ଆବ୍ଡ଼ା ଜାମାନ୍ ଢେର୍ ନାବୀର୍ ଆରୁ ଧାର୍ମିକ୍‌ର୍ ଏରା ବେଦ୍ଦାଲିୟାର୍, ଲେକିନ୍ ଏରା ପଲ୍ଲିୟାରିନ୍; ଆରୁ ନିମ୍ ଏକାନ୍-ଏକାନ୍ ମେନାଲ୍‌ଦାର୍, ଆବ୍ଡ଼ା ଜାମାନ୍ ମେନାଗେ ବେଦ୍ଦିୟାର୍ ଲେକିନ୍ ମା ମେନ୍‌ଚାର୍।”

ଚାଷୀ ଆଲାସ୍‌କି ନମୁନାଘି ମତ୍‌ଲବ୍

(ମାର୍‌କୁସ୍ ୪:୧୩-୨୦; ଲୁକାସ୍ ୮:୧୧-୧୫)

¹⁸“ଆକ୍କୁନ୍ ନିମ୍ ଚାଷୀ ଆଲାସ୍‌କି ନମୁନାଘି ମତ୍‌ଲବ୍‌ବନ୍ ମେନା: ¹⁹ନେଦ୍ ପାର୍‌ମେଶ୍ୱାର୍‌ସ୍‌କି ରାଜୀନ୍ତା ବଚନ୍‌ବନ୍ ମେନିକିରି ମା ବୁଝ୍‌ର୍‌ନାଏ, ଆସ୍‌କି ମନ୍‌ନୁ ଏନ୍ଦ୍ରିନ୍ କାତ୍‌ଥା ତେଙ୍ଗାକେର୍‌କିଚି, ଆବନ୍ ଶାଏତାନ୍ ବାରିକିରି ହୋଇକି। ଇଦ୍ ଆଦିନ୍ ଏକାଦ୍ କା ପାବୁ ଖାଁଣିନୁ ଚାହା କେର୍‌କିଚା। ²⁰ଆରୁ ଏକାଦ୍ ଚାଁଚା ଆଡ୍ଡାନୁ ଚାହା କେର୍‌କିଚା, ଇଦ୍ ଆଦିନ୍ ଏକାର୍ ବଚନ୍‌ବନ୍ ମେନିକିରି ଚାଁଣେନିନ୍ ଖୁସୀତି ଗ୍ରହନ୍ କାମ୍‌ନାଏ। ²¹ହୁଦ୍‌ଘିଲାଗାନ୍ ନିଜର୍‌ନୁ ଚେରୁ ମା ରାନାଘି ଲାଗାନ୍ ଆଦ୍ ଥୋଡ଼େ ସାମାୟତକ୍ ରାଇଦ୍, ଆରୁ ଯେତ୍‌କବାକେନ୍ ବଚନ୍‌ଘି ଲାଗାନ୍ ଦୁଃଖୁ ଆରୁ ସାତାୱାଟ୍ ମାନିତା, ପାର୍‌ମେଶ୍ୱାର୍‌ସ୍‌କି ବଚନ୍‌ଘି ବିଶ୍ୱାସ୍ ଆମ୍ବ୍‌ନାଏ ଚିନାଏ। ²²ଆଚ୍ଚୁ ଝୁଁଣିନୁ ଖାତ୍‌ର୍‌କା ବିହ୍‌ନିଘି ମତ୍‌ଲବ୍, ଆ ଆଲାସ୍ ଏକା ବଚନ୍‌ବନ୍ ମେନ୍‌ଦାସ୍ ଲେକିନ୍ ଦୁନିଆଁନ୍ତା ଚିନ୍ତା ଆରୁ ଧାନ୍ନୁଘି ଲୋଭ୍ ଲାଲଚ୍‌ତି ବଚନ୍‌ବନ୍ ଦାବାବାଦାସ୍ ଚିଦାସ୍, ଆରୁ ଆ ଆଲାସ୍ ସଫଲ୍ ମାନା ପଲ୍ଲଦାସ୍। ²³ଏକାନ୍ ବାନେ ଆଡ୍ଡାନୁ ଚାହା କେର୍‌କିଚା, ଇଦ୍ ଆଦ୍ ଏକାର୍ ବଚନ୍‌ବନ୍ ମେନିକିରି ବୁଝ୍‌ର୍‌ନାଏ, ଆରୁ ବାନେ ଫାଡ଼ୁ ଅନ୍ଦ୍‌ର୍‌ନାଏ; ଏକାର୍ ଶୋଏ ଗୁଣ୍, ଏକାର୍ ଷାଠିଏ ଗୁଣ୍ ଆରୁ ଏକାର୍ ତିରିଶ୍ ଗୁଣ୍।”

ଲାଟ୍ଟାଗାନେ ବିହ୍‌ନିଘି ନମୁନା

²⁴ଯୀଶୁସ୍ ଆବ୍ଡ଼ାରିନ୍ ଆରୁ ଅଣ୍ଟା ନମୁନା ଶୁଣାବାଚାସ୍: “ସରଗ୍ ରାଜୀଦ୍ ଆ ଆଲାସ୍‌କି ଲେଖା ରାଇ, ଏକାସ୍ କା ତାଙ୍ଘା ହାଲ୍ଲୁନୁ ବାନେ ବିହ୍‌ନି ଚାହିୟାସ୍। ²⁵ଲେକିନ୍ ଯେତ୍‌କବାକେନ୍ ଆଲାର୍ ହାନ୍ଦ୍ରାଲିୟାର୍ ତା ଆସ୍‌କି ବିରୋଧିସ୍ ବାରିକିରି ଗହମ୍ ବିହ୍‌ନିନୁ ଲାଟ୍ଟାଗାନେ ବିହ୍‌ନି ଚାହିୟାସ୍ ଆରୁ ବୁଙ୍ଗେଇଚାସ୍। ²⁶ଯେତ୍‌କବାକେନ୍ ଗହମ୍‌ଦ୍ କୁନ୍ଦିଆ ଆରୁ ଫାଡ଼ୁ ମାନାଗେ ଲାଗ୍ଗିୟା, ହତ୍‌କବାକେନ୍ ଲାଟ୍ଟାଗାନେ ବିହ୍‌ନିଘି ହୋପ୍ପାଦ୍ ହି ଏଥ୍‌ରାଗେ ଲାଗ୍ଗିୟା। ²⁷ଆଙ୍ଗେନ୍ ମାଲିକ୍‌ସ୍‌କି ଗୁତ୍ତିୟାର୍ ବାର୍‌ଚାର୍ ଆରୁ ଆସିନ୍ ତେଙ୍ଗିୟାର୍, ‘ହେ ମାଲିକ୍, ନିମ୍ କାଁଏ ନିହ୍ମା ହାଲ୍ଲୁନୁ ବାନେ ବିହ୍‌ନି ମାଲ୍ଲା ଚାହୁର୍? ହାଲେ ଲାଟ୍ଟା ହୋପ୍ପା ହାଲ୍ଲୁନୁ ଏକାସ୍‌ତି ବାର୍‌ଚା?’ ²⁸ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, ‘ଇଦ୍ ଏକିନ୍ ବିରୋଧିସ୍‌କି ନାଲ୍‌ଖୁଦ୍।’ ଗୁତ୍ତିୟାର୍ ଆସିନ୍ ତେଙ୍ଗିୟାର୍, ‘ନିମ୍ କାଁଏ ଚାହାଁଲ୍‌ଦାର୍ କା ଏମ୍ ଆସାନ୍ କାଇକିରି ଆବନ୍ ଚାଡ଼ିକିରି ଅନ୍‌ଠାଣ୍ ଉଇୟମ୍?’ ²⁹ଆସ୍ ତେଙ୍ଗିୟାସ୍, ‘ମାଲ୍ଲା, ଏନ୍ନେ ମା ମାନ୍ନାଦ୍ କା ଲାଟ୍ଟା ହୋପ୍ପାନ୍ ଚାଡ଼୍‌ନା ବାକେନ୍ ନିମ୍ ଆଦ୍‌ଘିଗାନେ ଗହମ୍‌ବନ୍‌ହି ଚାଡ଼ର୍‌ଚର୍। ³⁰ହୋଏନାତକ୍ ଯୋଡ଼େନିନ୍ ଅନ୍‌ଠାଣ୍ ପାର୍‌ଦାଗେ ଚିଆ, ଆରୁ ହୋଏନା ବାକେନ୍ ଏନ୍ ହୋୟୁରିନ୍ ତେଙ୍ଗନ୍ କା ଆଘ୍‌ଲି ଲାଟ୍ଟା ହୋପ୍ପାବନ୍ ହୋଇକିରି ବାସ୍‌ସାଗେ ବିଡ଼ା ହିଁଆ, ଆରୁ ଗହମ୍‌ବନ୍ ଏଙ୍ଘାଏ ମଁଣା ବାଖ୍‌ରାନୁ ଉଇୟାଚିଆ।’”

ମାନି ମାଞ୍ଜିଘି ନମୁନା

(ମାର୍‌କୁସ୍ ୪:୩୦-୩୨; ଲୁକାସ୍ ୧୩:୧୮,୧୯)

³¹ଯୀଶୁସ୍ ଆବ୍ଡ଼ାରିନ୍ ଆରୁ ଅଣ୍ଟା ନମୁନା ଚିଇକିରି ତେଙ୍ଗିୟାସ୍: “ସରଗ୍ ରାଜୀଦ୍ ଅଣ୍ଟା ମାନି ମାଞ୍ଜି ଲେଖା ରାଇ, ଆଦିନ୍ ଅଣ୍ଟା ଆଲାସ୍ ଅଚ୍ଚାସ୍ ଆରୁ ତାଙ୍ଘା ହାଲ୍ଲୁନୁ ଚାହିୟାସ୍। ³²ଆଦ୍ ଜାମା ମାଞ୍ଜିସ୍ତି ଛୋଟେତା ରାଇଦ୍ ଲେକିନ୍ ଯେତ୍‌କବାକେନ୍ ପାର୍‌ଦି କାଇ; ତା ଜାମା ଆଢ଼ା ଚେହଁଲାଘି ହୋପ୍ପାନ୍ତି ବାଡ଼୍‌କା ମାନିଦ୍ କାଇଦ୍, ଆରୁ ଏନ୍ନେ ମାନ୍ନୁ ମାନିକାଇଦ୍ କା ଆକାଶ୍ ତା ଓଡ଼ାଦ୍ ବାରିକିରି ଆଦ୍‌ଘି ଡାହିଁନୁ ଡେରା କାମି।”

ଖାମୀର୍‌ଘି ନମୁନା

(ଲୁକାସ୍ ୧୩:୨୦,୨୧)

³³ଯୀଶୁସ୍ ଆବ୍ଡ଼ାରିନ୍ ଆରୁ ଅଣ୍ଟା ନମୁନା ଶୁଣାବାଚାସ୍: “ସରଗ୍ ରାଜୀଦ୍ ଖାମୀର୍ ଲେଖା ରାଇଦ୍, ଆଦିନ୍ ଅଣ୍ଟା ମାଏକିନିଆଁଦ୍ ତିନ୍‌ସେର୍ ଆଟା ହୋଇକିରି ମିଲାବାଚା ଆରୁ ଆଦ୍ ଜାମାଦ୍ ଫୁଲ୍‌ରିକିରି ଖାମୀର୍ ମାନ୍‌ଚାକେରା।”

ନମୁନାଘି ବେଭାର୍

(ମାର୍‌କୁସ୍ ୪:୩୩,୩୪)

³⁴ଇ ଜାମା କାତ୍‌ଥାବନ୍ ଯୀଶୁସ୍ ନମୁନାତି ଆଲାରିନ୍ ତେଙ୍ଗିୟାସ୍, ଆରୁ ବିନା ନମୁନାତି ଆସ୍ ଆବ୍ଡ଼ାରିନ୍ ଏନ୍ଦେର୍‌ହି ମା ତେଙ୍ଗାଲିୟାସ୍, ³⁵ଏସ୍‌କେ କା ପାର୍‌ମେଶ୍ୱାର୍‌ସ୍ ଏକା ବଚନ୍‌ବନ୍ ନାବୀଜାମାର୍‌ଘି ଦ୍ୱାର୍‌ନୁ ତେଙ୍କାଚାସ୍ ଆଦ୍ ପୁରା ମାନ୍ନାଦ୍:

“ଏନ୍ ନିଜର୍ ଥୁମ୍‌ଣା ଖୋଲିକିରି ନମୁନାତି କାତ୍‌ଥା ତେଙ୍ଗନ୍: ଏନ୍ ଆ କାତ୍‌ଥାବନ୍ ଏକାଦ୍ କା ଦୁନିଆଁଘି ସୁରୁନ୍ତିନ୍ ନୁହୁର୍‌କା ରାଇ ଆଦିନ୍ ପ୍ରକଟ୍ କାମନ୍।”

ଲାଟ୍ଟା ବିହ୍‌ନି ନମୁନାଘି ମତ୍‌ଲବ୍

³⁶ଆନ୍ତିନ୍ ଯୀଶୁସ୍ ଭିଡ଼୍‌ବନ୍ ଆମ୍ବିକିରି ଆଡ଼୍‌ପାଗେ ବାର୍‌ଚାସ୍, ଆରୁ ଆସ୍‌କି ଚେଲାଜାମାର୍ ଆସ୍‌କି ଚାହାଗେ ବାର୍‌ଚାର୍ ଆରୁ ତେଙ୍ଗିୟାର୍, “ହାଲ୍ଲୁନ୍ତା ଲାଟ୍ଟା ବିହ୍‌ନିଘି ନମୁନାବନ୍ ଏମାନ୍ ବୁଝାବା।” ³⁷ଆସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ବାନେ ବିହ୍‌ନି ଚାହ୍‌ନାବାଲାସ୍ ମୁନୁଷ୍ ହାଦ୍ଦୁସ୍। ³⁸ହାଲ୍ଲୁଦ୍ ଦୁନିଆଁଦ୍, ବାନେ ମାଞ୍ଜିଦ୍ ରାଜୀଘି ହାଦ୍ଦୁବଚ୍ଚର୍, ଆରୁ ଲାଟ୍ଟା ବିହ୍‌ନିଦ୍ ଶାଏତାନ୍‌ଘି ହାଦ୍ଦୁଦ୍। ³⁹ଏକା ବିରୋଧିସ୍ ଆବନ୍ ଚାହିୟାସ୍, ଆଦ୍ ଶାଏତାନ୍‌ଦ୍; ଫସଲ୍‌ବନ୍ ହୋଏନାଘି ମତ୍‌ଲବ୍ ଦୁନିଆଁଘି ଆଖ୍‌ରୀ, ଆରୁ ହୋୟୁ ଆଲାର୍ ସରଗ୍‌ଦୂଁତ୍‌ଜାମାର୍। ⁴⁰ଏସ୍‌କେ ଲାଟ୍ଟା ବିହ୍‌ନିବନ୍ ଠୁଡ଼ିୟା କାଇ ଆରୁ ବାସ୍‌ସାଚାକାଇ ଆନ୍ନେନ୍ ଦୁନିଆଁଘି ଆଖ୍‌ରୀନୁ ମାନଦ୍। ⁴¹ମୁନୁଷ୍ ହାଦ୍ଦୁସ୍ ତାଙ୍ଘା ସରଗ୍‌ଦୂଁତ୍ ଜାମାରିନ୍ ତାଇୟସ୍, ଆରୁ ଆବ୍ଡ଼ାର୍ ଆସ୍‌କି ରାଜୀନ୍ତିନିନ୍ ଜାମା ଠୋକର୍‌ଘି କାରଣ୍‌ବନ୍ ଆରୁ ଖାରାପ୍ ନାଲ୍‌ଖୁ କାମୁ ଆଲାରିନ୍ ଅନ୍‌ଠାଣ୍ କାମର୍। ⁴²ଆରୁ ଆବ୍ଡ଼ାରିନ୍ ଚିଚ୍ଚୁ ଭାଠାନୁ ତୁକ୍କାଚାକୋ, ଏକାସାନ୍ କା ଅହ୍ଲନା ଆରୁ ପାଲ୍ଲୁ ଚାବ୍‌ର୍‌ନା ମାନଦ୍। ⁴³ହତ୍‌କବାକେନ୍ ପାର୍‌ମେଶ୍ୱାର୍‌ସ୍‌କି ଆଲାର୍ ନିଜର୍ ବାଙ୍ଗ୍‌ସ୍‌କି ରାଜୀନୁ ବିଡ଼ି ଲେଖା ବିଲ୍‌ଚର୍। ନେଖାଏ ମେନାଗେ ମନ୍ ରାଇ ଆବ୍ଡ଼ାର୍ ମେନା।”

ନୁଡ୍‌କା ଧନ୍‌ସମ୍ପତ୍ତିଘି ନମୁନା

⁴⁴“ସରଗ୍ ରାଜୀଦ୍ ହାଲ୍ଲୁନୁ ନୁଡ୍‌କା ଧନ୍‌ସମ୍ପତ୍ତି ଲେଖା ରାଇ, ଏକାନ୍ କା ଅଣ୍ଟା ଆଲାସ୍ ହାଖ୍ଖୀୟାସ୍ ଆରୁ ନୁଡେଇଚାସ୍, ଆରୁ ଖୁସୀ ମାନିକିରି ନିଜର୍ ଜାମା ଜିନିଷ୍‌ବନ୍ ବିଁସେଇଚାସ୍ ଆରୁ ଆ ହାଲ୍ଲୁବନ୍ ହେନ୍ଦିୟାସ୍।”

ମୁରୁକ୍ ଦାମ୍‌ଘି ମୋତିଘି ନମୁନା

⁴⁵“ଆରୁ ସରଗ୍ ରାଜୀଦ୍ ଅଣ୍ଟା ବେପ୍‌ରିୟାସ୍ ଲେଖା ଏକାସ୍ କା ବାନେ ମୋତି ବେଦ୍ଦାଲିୟାସ୍। ⁴⁶ଯେତ୍‌କବାକେନ୍ ଆସ୍‌କେ ଅଣ୍ଟା ବାଗ୍ଗେ ଦାମ୍‌ଘି ମୋତି ହାଖ୍‌ରାତା ଆସ୍ କାଇକିରି ତାଙ୍ଘାଏ ଜାମା ଜିନିଷ୍‌ବନ୍ ବିଁସେଇଚାସ୍ ଆରୁ ଆ ମୋତିବନ୍ ହେନ୍ଦିୟାସ୍।”

ଜାଲ୍ଲିଘି ନମୁନା

⁴⁷“ଆରୁ ସରଗ୍ ରାଜୀଦ୍ ଅଣ୍ଟା ବାଡ଼୍‌କା ଜାଲ୍ଲି ଲେଖା ଏକାଦ୍ କା ସାମ୍‌ଧୁର୍‌ନୁ ଆଚ୍ଛାକେରା, ଆରୁ ଜାମା ରକମ୍‌ଘି ଇଞ୍ଜୋନ୍ ସାଉଁଟାଚା ଅନ୍ଦ୍ରା। ⁴⁸ଆରୁ ଯେତ୍‌କବାକେନ୍ ଜାଲ୍ଲି ନିନ୍ଦିକିତା, କେଉଁଟାର୍ ଆଦିନ୍ ଖାଁଣିଗେ ଟାଣିକିରି ଅନ୍ଦ୍‌ର୍‌ନାଏ ବାର୍‌ନାଏ, ଆରୁ ଅକ୍କିକିରି ବାନେ ଇଞ୍ଜୋନ୍ ଥାଡ଼ିନୁ ଉଇନାଏ ଆରୁ ଖାରାପ୍ ଇଞ୍ଜୋନ୍ ଖେବ୍‌ଡ଼୍‌ନାଏ ଚିନାଏ। ⁴⁹ଦୁନିଆଁଘି ଆଖ୍‌ରୀନୁ ଏନ୍ନେନ୍ ମାନ, ସରଗ୍‌ଦୂଁତ୍‌ଜାମାର୍ ବାରିକିରି ବଦ୍‌ମାସ୍ ଜାମାରିନ୍ ଧାର୍ମିର୍‌ସ୍‌ତି ଭିନେ କାମର୍। ⁵⁰ଆରୁ ଆବ୍ଡ଼ାରିନ୍ ଚିଚ୍ଚୁ ଭାଠାନୁ ଖେବ୍ଡ଼ର୍ ଚିଅର୍। ଏକାସାନ୍ କା ଅହ୍ଲନାଘି ଆରୁ ପାଲ୍ଲୁ ଚାବ୍‌ର୍‌ତେରାନା ମାନଦ୍।”

ପାଚ୍ଚା ଆରୁ ପୁନା ଶିକ୍ଷାଘି ବିଶେଷ୍

⁵¹ଯୀଶୁସ୍ ଆବ୍ଡ଼ାରିନ୍ ମେନ୍‌ଚାସ୍ “ନିମ୍ ଇ ଜାମା କାତ୍‌ଥାନ୍ ବୁଝ୍‌ର୍‌କାର୍ କାଁଏ?” ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ହଁ”। ⁵²ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଆଦ୍‌ଘିଲାଗାନ୍ ଯେତ୍‌କ ପଣ୍ତିତ୍‌ଜାମାର୍ ଏକାର୍ ସରଗ୍ ରାଜୀଘି ଚେଲା ମାନ୍‌ଚ୍‌କାନାଏ, ଆର୍ ଆ ମାଲିକ୍‌ସ୍‌କି ଲେଖା ରାନାଏ ଏକାସ୍ କା ନିଜର୍ ମଁଣା ବାଖ୍‌ରାନ୍ତି ପୁନା ଆରୁ ପାଚ୍ଚା ଜିନିଷ୍‌ବନ୍ ଅଥ୍‌ର୍‌ଦାସ୍।”

ନାଜ୍‌ରେତ୍‌ନୁ ଯୀଶୁସିନ୍ ଆଦର୍‌ମାଇନ୍ ମା କାମ୍‌ଚାର୍

(ମାର୍‌କୁସ୍ ୬:୧-୬; ଲୁକାସ୍ ୪:୧୬-୩୦)

⁵³ଯେତ୍‌କବାକେନ୍ ଯୀଶୁସ୍ ଇ ଜାମା ନମୁନା ତେଙ୍ଗା ମୁଞ୍ଜିୟାସ୍ ତା, ଆସ୍‌ତି ବୁଙ୍ଗେଇ ଚିଚ୍ଚାସ୍। ⁵⁴ଆରୁ ତାଙ୍ଘା ସହର୍‌ନୁ ବାରିକିରି ତାହ୍ମା ସାଭା ଆଡ଼୍‌ପାନୁ ଏନ୍ନେ ଉପ୍‌ଦେଶ୍ ଚିୟାଗେ ଲାଗ୍ଗିୟାସ୍ କା ଆବ୍ଡ଼ାର୍ ଆଚ୍‌ମିତ୍ ମାନିକିରି ତେଙ୍ଗାଗେ ଲାଗ୍ଗିୟାର୍, “ଇସ୍‌କେ ଇ ବୁଦ୍ଧି ଆରୁ ଶକ୍ତିଘି ନାଲ୍‌ଖୁ ଏକାସ୍‌ତି ହାଖ୍‌ରା? ⁵⁵ଇସ୍ ବଢ଼େଇସ୍‌କି ହାଦ୍ଦୁ ମାଲ୍‌ଦାସ୍ କାଁଏ? ଆରୁ ଇସ୍‌କି ଆୟାଙ୍ଗ୍‌ଘି ନାମେ ମାରିୟାମ୍ ମାଲ୍ଲିଦ୍ କାଁଏ ଆରୁ ଇସ୍‌କି ଭାଇ ଜାମାର୍‌ଘି ନାମେ ୟାକୁବ୍, ଯୋଷେଫ୍, ଶିମୋନ୍, ଯୁଦାସ୍ ମାଲ୍ଲିଦ୍ କାଁଏ? ⁵⁶ଆରୁ ଇସ୍‌କି ଜାମା ବୁହୁଣୀଜାମାର୍ ନାହ୍ମାଗାନେ ମା ରାନାଏ କାଁଏ? ତା ଇସ୍‌କେ ଇ ଜାମା ଏକାସ୍‌ତି ହାଖ୍‌ରା?”

⁵⁷ଆବ୍ଡ଼ାର୍ ଯୀଶୁସିନ୍ ଗ୍ରହନ୍ ମା କାମ୍‌ଚାର୍, ଲେକିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନାବୀସ୍‌କେ ନିଜର୍ ସହର୍ ଆରୁ ନିଜର୍ ଆଡ଼୍‌ପାବନ୍ ଆମ୍ବିକିରି ଜାମା ଆଲାର୍ ଆଦର୍‌ମାଇନ୍ କାମ୍‌ନାଏ।” ⁵⁸ଆରୁ ଆସ୍ ଆସାନ୍ ଆବ୍ଡ଼ାର୍‌ଘି ଅବିଶ୍ୱାସ୍‌ଘି ଲାଗାନ୍ ଢେର୍ ଶକ୍ତିଘି ନାଲ୍‌ଖୁ ମା କାମ୍‌ଚାସ୍।

ଆସ୍ନାନ୍ ଚିଉ ଯୋହାନ୍‌ସ୍‌କି ମରନ୍

(ମାର୍‌କୁସ୍ ୬:୧୪-୨୯; ଲୁକାସ୍ ୯:୭-୯)

¹ହୁ ସାମାୟନୁ ଗାଲିଲୀ ରାଜୀନ୍ତା ରାଜା ହେରୋଦ୍‌ସ୍ ଯୀଶୁସ୍‌କି ବାରେନୁ ଖବର୍ ମେନ୍‌ଚାସ୍, ²ଆରୁ ତାଙ୍ଘା ସେବକ୍‌ରିନ୍ ତେଙ୍ଗିୟାସ୍, “ଇସ୍ ଆସ୍ନାନ୍ ଚିଉ ଯୋହାନ୍‌ସ୍! ଆସ୍ ଖିଉ ଆଲାର୍‌ସ୍‌ତି ଉଜ୍ଜିୟାସ୍ କେର୍‌କାଦାସ୍, ହୁଦ୍‌ଘିଲାଗାନ୍ ତାଙ୍ଘାସାନ୍ ଇ ଜାମା ଶକ୍ତିଘି ନାଲ୍‌ଖୁଦ୍ ପ୍ରକଟ୍ ମାନି।”

³ଏନ୍ଦେର୍‌ଗେକା ହେରୋଦ୍‌ସ୍ ତାଙ୍ଘା ଭାଇ ଫିଲିପ୍ପସ୍‌କି ଆଲି ହେରୋଦିଆଘି ଲାଗାନ୍, ଯୋହାନ୍‌ସିନ୍ ଧାରିକିରି ହିଁଚାସ୍ ଆରୁ ଜେହେଲ୍‌ନୁ ଗୁଡ୍ଡେଇ ଚିଚ୍‌କାଚାସ୍। ⁴ଏନ୍ଦେର୍‌ଗେକା ଯୋହାନ୍‌ସ୍ ଆସିନ୍ ତେଙ୍ଗିୟାସ୍ କା ଇ ଆଲିବନ୍ ଉଇନା ନିଙ୍ଗାଗେ ଉଚିତ୍ ମାଲ୍ଲିଦ୍। ⁵ହୁଦ୍‌ଘିଲାଗାନ୍ ହେରୋଦ୍‌ସ୍ ଯୋହାନ୍‌ସିନ୍ ପିଟା ବେଦ୍ଦାଲିୟାସ୍; ଲେକିନ୍ ଆସ୍ ଆଲାରିନ୍ ଏଲ୍‌ଚାଲିୟାସ୍, ଏକାର୍ କା ଯୋହାନ୍‌ସିନ୍ ନାବୀବୁଲି ମାନାଲିୟାର୍।

⁶ଲେକିନ୍ ହେରୋଦ୍‌ସ୍‌କି ଜନମ୍ ଉଲ୍ଲାନୁ, ହେରୋଦିଆଘି ତାଙ୍ଗ୍‌ଦାଦ୍ ପାହିୟାର୍‌ଘି ଆଘ୍‌ଲି ନାଲିକିରି ହେରୋଦ୍‌ସିନ୍ ଖୁସ୍ କାମ୍‌ଚା। ⁷ଆଙ୍ଗେନ୍ ଆସ୍ କସମ୍ ମହିଁକିରି ତେଙ୍ଗିୟାସ୍, “ନିନ୍ ଏକାନ୍ ନିଅୟ, ଏନ୍ ଆବନ୍ ନିଙ୍ଗାଗେ ଚିଅନ୍।” ⁸ଆରୁ ଆଦ୍ ତାଙ୍ଗ୍ୟଘି କାତ୍‌ଥାନ୍ ମେନିକିରି ତେଙ୍ଗିୟାଦ୍, “ଆସ୍ନାନ୍ ଚିଉ ଯୋହାନ୍‌ସ୍‌କି କୁକ୍କୁନ୍ ଏଙ୍ଗାଗେ ଅଣ୍ଟା ଥାଡ଼ିନୁ ଇସାନ୍ ଚିଆ।” ⁹ଇବନ୍ ମେନିକିରି ରାଜାସ୍ ଦୁଃଖୁ ମାନ୍‌ଚାସ୍, ଲେକିନ୍ ନିଜର୍ କସମ୍‌ଘି ଲାଗାନ୍ ଆରୁ ତାଙ୍ଘାଗାନେ ଆସାନ୍ ରୁ ଆଲାର୍‌ଘି ଲାଗାନ୍ ହୁକୁମ୍ ଚିଚ୍ଚାସ୍ କା ଆବନ୍ ଚିଆକୋ। ¹⁰ଆରୁ ହେରୋଦ୍‌ସ୍ ଆଲାରିନ୍ ଜେହେଲ୍‌ଗେ ତାଇୟିକିରି ଯୋହାନ୍‌ସ୍‌କି କୁକ୍କୁନ୍ ପୁଜ୍‌ତାଚାଷ୍; ¹¹ଆରୁ ଆସ୍‌କି କୁକ୍କୁନ୍ ଅଣ୍ଟା ଥାଡ଼ିନୁ ଅନ୍ଦ୍ରାର୍ ଆରୁ ଆ କୁକାଏଗେ ଚିଚ୍ଚାର୍, ଆରୁ ଆଦ୍ ତାଙ୍ଗ୍ୟଘି ଚାହାଗେ ଅଚ୍ଚାକେରା। ¹²ଆଙ୍ଗେନ୍ ଯୋହାନ୍‌ସ୍‌କି ଚେଲାର୍ ବାର୍‌ଚାର୍ ଆରୁ ତାଙ୍ଘା ମାଁଣାବନ୍ ହୋଇକିରି ମାଣେଇଚାର୍, ଆରୁ କାଇକିରି ଯୀଶୁସ୍‌କେ ଖବର୍ ଚିଚ୍ଚାର୍।

ଯୀଶୁସ୍ ପାଞ୍ଚ୍ ହାଜାର୍ ଆଲାରିନ୍ ମହତାଚାସ୍

(ମାର୍‌କୁସ୍ ୬:୩୨-୪୪; ଲୁକାସ୍ ୯:୧୦-୧୭; ଯୋହାନ୍ ୬:୧-୧୪)

¹³ଯେତ୍‌କବାକେନ୍ ଯୀଶୁସ୍ ଯୋହାନ୍‌ସ୍‌କି ବାରେନୁ ମେନ୍‌ଚାସ୍ ତା, ଆସ୍ ଡଙ୍ଗାନୁ ଅକ୍କିକିରି ଆ ଆଡ୍ଡାସ୍ତି ଅଣ୍ଟା ଶୁନ୍‌ଶାନ୍ ଆଡ୍ଡାଗେ କେରାସ୍, ଇବନ୍ ମେନିକିରି ଆଲାର୍ ସହର୍‌ଗୁଠିନ୍ତି ଏକ୍‌ତେ ତାଙ୍ଘା ପାଛ୍‌ଲି-ପାଛ୍‌ଲି କେରାର୍। ¹⁴ଆରୁ ଆସ୍ ଡଙ୍ଗାନ୍ତି ଏତ୍ତିକିରି ଆଲାର୍‌ଘି ଅଣ୍ଟା ବାଡ଼୍‌କା ଭିଡ଼୍ ଏରିୟାସ୍ ଆରୁ ଆସ୍‌କେ ଆବ୍ଡ଼ାର୍‌ଘି ମିଆଁ ମୁରୁକ୍ ସୋଗ୍ଗେ ଲାଗ୍ଗିୟା, ଆରୁ ଆସ୍ ଆବ୍ଡ଼ାର୍‌ଘି ବେମାର୍‌ଗୁଠିନ୍ ବାନେ କାମ୍‌ଚାସ୍।

¹⁵ବିଡ଼ି ଅକ୍କାନ୍ତି ତାଙ୍ଘା ଚେଲାଜାମାର୍ ତାଙ୍ଘାସାନ୍ ବାରିକିରି ତେଙ୍ଗିୟାର୍, “ଇଦ୍ ତା ଶୁନ୍‌ଶାନ୍ ଆଡ୍ଡାଦ୍ ଆରୁ ବିଡ଼ିହି ଅକ୍କିୟା କେରାଦ୍; ହୁଦ୍‌ଘିଲାଗାନ୍ ଆଲାରିନ୍ ପାଡ଼ାତାରା କାଲାଗେ ଚିଆ, ଏସ୍‌କେ କା ଆବ୍ଡ଼ାର୍ ତାହ୍ମାଲାଗାନ୍ ଅନାମହାଗେ ହେନ୍ଦର୍।” ¹⁶ଲେକିନ୍ ଯୀଶୁସ୍ ତାଙ୍ଘା ଚେଲାଜାମାରିନ୍ ତେଙ୍ଗିୟାସ୍, “ଆବ୍ଡ଼ାର୍‌ଘି କାନା ଦାର୍‌କାର୍ ମାଲ୍ଲାଦ୍! ନିମିନ୍ ଇବ୍ଡ଼ାର୍‌ଗେ ଅନାମହାଗେ ଚିଆଲାଗା।” ¹⁷ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ଇସାନ୍ ଏହ୍ମାସାନ୍ ଖାଲି ପାଞ୍ଚେଟା ଆସ୍‌ମା ଆରୁ ଯୋଡ଼େ ଇଞ୍ଜୋ ରାଇ।” ¹⁸ଯୀଶୁସ୍ ତେଙ୍ଗିୟାସ୍, “ଆବ୍ଡ଼ାନ୍ ଇସାନ୍ ଏଙ୍ଘା ଚାହାଗେ ଅନ୍ଦ୍ରା।” ¹⁹ଆନ୍ତିନ୍ ଆସ୍ ଆଲାରିନ୍ ଘାଁସି ମିଆଁ ଅକ୍କାଗେ ହୁକୁମ୍ ଚିଚ୍ଚାସ୍, ଆରୁ ଆସ୍ ଆ ପାଞ୍ଚେଟା ଆସ୍‌ମାନ୍ ଆରୁ ଯୋଡ଼େ ଇଞ୍ଜୋନ୍ ଧାର୍‌ଚାସ୍; ଆରୁ ସରଗ୍ ତାରା ଏରିକିରି ଧାନ୍ୟାବାଦ୍ ଚିଚ୍ଚାସ୍ ଆରୁ ଆସ୍‌ମାଗୁଠିନ୍ ଖିଣ୍ଡା-ଖିଣ୍ଡା ଚେଲାଜାମାର୍‌ଗେ ଚିଚ୍ଚାସ୍, ଆରୁ ଚେଲାଜାମାର୍ ଆଲାର୍‌ଗେ ଚିଚ୍ଚାର୍। ²⁰ଆରୁ ଜାମା ଆଲାର୍ କୁଲୁଭର୍ ମଖ୍ଖାର୍ ଆରୁ ଉଚ୍ଛିୟାର୍ କେରାର୍, ଆରୁ ଯେତ୍‌କ ଟୁକ୍‌ଡ଼ା ଆସ୍‌ମା ଏଙ୍ଗ୍‌ରା ଆବନ୍ ଚେଲାଜାମାର୍ ଠୁଡ଼ିୟାଚାର୍ ଆଦ୍ ବାର ଡାଲା ମାନ୍‌ଚା। ²¹ଆରୁ ମହୁଁ ଆଲାର୍‌ଘି ଭିତର୍‌ନୁ ମାଏକିନିଆଁ ଆରୁ ହାଦ୍ଦୁରିନ୍ ଆମ୍ବିକିରି, ଲାଗ୍‌ଭାଗ୍ ପାଞ୍ଚ୍ ହାଜାର୍ ମାର୍‌ଦ୍‌ନାର୍ ରାଚାର୍।

ଯୀଶୁସ୍‌କି ଆମ୍ମୁନୁ ଏକ୍‌ନା

(ମାର୍‌କୁସ୍ ୬:୪୫-୫୨; ଯୋହାନ୍ ୬:୧୫-୨୧)

²²ହୁଙ୍ଗେନିନ୍ ଯୀଶୁସ୍ ତାଙ୍ଘା ଚେଲାଜାମାରିନ୍ ଡଙ୍ଗାନୁ ଅକ୍କିକିରି ତାଙ୍ଘାଏନ୍ତି ଆଘ୍‌ଲି ହାପାଖା କାଲାଗେ ତେଙ୍ଗିୟାସ୍, ହତ୍‌କତକ୍ ଆସ୍ ଆଲାରିନ୍ ବିଦା କାମଚସ୍। ²³ଆସ୍ ଆଲାରିନ୍ ବିଦା କାମ୍‌ଚ୍‌କା ପାଛ୍‌ଲି, ବିନ୍ତି କାମାଗେ ଦୁସ୍‌ରା ଅଣ୍ଟା ପାର୍ତ୍ତାଗେ କେରାସ୍; ଆରୁ ବିଡ଼ି ଅକ୍କାନ୍ତି ଆସ୍ ଆସାନ୍ ଅଥାସ୍ ରାଚାସ୍। ²⁴ଲେକିନ୍ ହତ୍‌କବାକେନ୍ ଡଙ୍ଗାଦ୍ ହଁସ୍‌ରା ଖାଁଣିନ୍ତି ଢେର୍ ଗେଛାନୁ ରାଚା ଆରୁ ଡଙ୍ଗାଦ୍ ଲହ୍‌ଡ଼ିତି ଡାଗ୍‌ମାଗ୍‌ରାଲିୟାଦ୍, ଏନ୍ଦେର୍‌ଗେକା ଧୁକାଦ୍ ଡଙ୍ଗାଘି ଆଘ୍‌ଲିତାର୍‌ତି ବାରାଲିୟାଦ୍। ²⁵ଆରୁ ଯୀଶୁସ୍ ବିଜ୍ଜନାଘି ଲାଗ୍‌ଭାଗ୍ ତିନ୍‌ଚାର୍ ବାଜେ ହଁସ୍‌ରାନୁ ଏକ୍‌ତେ-ଏକ୍‌ତେ ଚେଲାଜାମାର୍‌ଘି ଚାହାଗେ ବାର୍‌ଚାସ୍। ²⁶ଆରୁ ଚେଲାଜାମାର୍ ଯୀଶୁସିନ୍ ହଁସ୍‌ରାନୁ ଏକ୍‌ନାନ୍ ଏରିକିରି ଘାବ୍‌ରାରାଚାର୍ କେରାର୍ ଆରୁ ତେଙ୍ଗା ଲାଗ୍ଗିୟାର୍, “ଇଦ୍ ତା ଭୁତ୍ତୁଦ୍!” ଆରୁ ଆବ୍ଡ଼ାର୍ ଏଲ୍‌ଚ୍‌କାତି ଚିର୍‌ରାରାଗେ ଲାଗ୍ଗିୟାର୍। ²⁷ଲେକିନ୍ ଯୀଶୁସ୍ ହୁଙ୍ଗେନିନ୍ କାଚ୍‌ନେଖ୍‌ରାସ୍ ଆରୁ ତେଙ୍ଗିୟାସ୍, “ଧିରାଜ୍ ଧାରା! ଆମା ଏଲ୍‌ଚା! ଏନିନ୍।” ²⁸ଆଙ୍ଗେନ୍ ପାତ୍ରାସ୍ ଯୀଶୁସିନ୍ ଯାବାବ୍ ଚିଚ୍ଚାସ୍, “ହେ ପ୍ରାଭୁ, ଯଦି ନିମିନ୍ ହାଲେ ଏଙ୍ଗାନ୍ ନିହ୍ମା ଚାହାଗେ ଆମ୍ମୁନୁ ଏକା ଆରୁ କାଲାଗେ ହୁକୁମ୍ ଚିଆ।” ²⁹ଆସ୍ ତେଙ୍ଗିୟାସ୍, “ବାରା!” ଆଙ୍ଗେନ୍ ପାତ୍ରାସ୍ ଡଙ୍ଗାନ୍ତି ଏତ୍ତିକିରି ଆମ୍ମୁନୁ ଯୀଶୁସ୍‌କି ଚାହା କାଲାଗେ ଲାଗ୍ଗିୟାସ୍। ³⁰ଲେକିନ୍ ପାତ୍ରାସ୍ ଧୁକାବନ୍ ଏରିକିରି ଏଲ୍‌ଚିୟାସ୍ କେରାସ୍, ଆରୁ ଯେତ୍‌କବାକେନ୍ ମୁହ୍ଲା ବେଦ୍ଦାଲିୟାସ୍ ତା ଚିର୍‌ରା ରାଇକିରି ତେଙ୍ଗିୟାସ୍, “ହେ ପ୍ରାଭୁ, ଏଙ୍ଗାନ୍ ବାଛାବା!” ³¹ଯୀଶୁସ୍ ହୁଙ୍ଗେନିନ୍ ହେଖ୍ଖା ଲାମ୍ବାବାଇକିରି ଆସିନ୍ ଧାର୍‌ଚାସ୍ ଆରୁ ତେଙ୍ଗିୟାସ୍, “ହେ କମ୍ ବିଶ୍ଵାସୀୟ, ନିନ୍ ଏନ୍ଦେର୍‌ଗେ ଶାକ୍ କାମ୍‌ଚ୍‌କାଏ?” ³²ଯେତ୍‌କବାକେନ୍ ଆବ୍ଡ଼ାର୍ ଡଙ୍ଗାନୁ ଅକ୍କିୟାର୍ ତା, ଧୁକା ବନ୍ଦ୍ ମାନ୍‌ଚାକେରା। ³³ଆଙ୍ଗେନ୍ ଡଙ୍ଗାନୁ ରୁ ଆଲାର୍, ଆସିନ୍ ହାଁଠୁୱାରାଇକିରି ଯୋହାର୍ କାମ୍‌ଚାର୍ ଆରୁ ତେଙ୍ଗିୟାର୍, “ସତ୍ତୁନିନ୍, ନିମ୍ ପାର୍‌ମେଶ୍ଵାର୍‌ସ୍‌କି ହାଦ୍ଦୁର୍।”

ଯୀଶୁସ୍ ଗେନ୍ନେସାରେତ୍ ରାଜୀନ୍ତା ବେହ୍ମରିୟାରିନ୍ ବାନେ କାମାଲ୍‌ଦାସ୍

(ମାର୍‌କୁସ୍ ୬:୫୩-୫୬)

³⁴ଆବ୍ଡ଼ାର୍ ହଁସ୍‌ରା ପାର୍ ମାନିକିରି ଗେନ୍ନେସାରେତ୍ ରାଜୀଗେ ଆଣସିୟାର୍। ³⁵ଆରୁ ଆସ୍‌ତା ଆଲାର୍ ଯୀଶୁସିନ୍ ଚିହ୍ନେଚେଇଚାର୍ ଆରୁ ଚାହାଚାହାନ୍ତା ପାଡ଼ାଗୁଠିଗେ ଖବର୍ ଚିଚ୍ଚାର୍, ଆରୁ ଆଲାର୍ ଜାମା ବେହ୍ମରିୟାରିନ୍ ତାଙ୍ଘା ଚାହାଗେ ଅନ୍ଦ୍ରାର୍, ³⁶ଆରୁ ଆବ୍ଡ଼ାର୍ ଏସ୍‌କେ ତାଙ୍ଘା ଚିଢ଼ାଘି ପାଣ୍‌ତୁନ୍ ଖାଲି ଏସ୍‌ରର୍; ହୁଦ୍‌ଘିଲାଗାନ୍ ତାଙ୍ଗାନ୍ ଆର୍‌ଜୀବିନ୍ତି କାମାଗେ ଲାଗ୍ଗିୟାର୍ ଆରୁ ଯେତ୍‌କ ଲୋକ୍ ଏସ୍‌ରାର୍, ଆବ୍ଡ଼ାର୍‌ଜାମାର୍ ବାନେ ମାନ୍‌ଚାର୍ କେରାର୍।

ନିୟମ୍‌ବନ୍ ମାନ୍ନାଘି ପ୍ରଶ୍ନ

(ମାର୍‌କୁସ୍ ୭:୧-୧୩)

¹ଇଦ୍‌ଘି ପାଛ୍‌ଲି ଯେରୁଶାଲେମ୍ ତା କେତ୍‌କ ଫାରିସୀ ଆରୁ ପଣ୍ତିତ୍‌ଜାମାର୍ ଯୀଶୁସ୍‌କି ଚାହାଗେ ବାରିକିରି ତେଙ୍ଗାଗେ ଲାଗ୍ଗିୟାର୍, ²“ନିଙ୍ଘାଏ ଚେଲାର୍ ପୁର୍‌ଖାର୍‌ଘି ନିୟମ୍‌ବନ୍ ଏନ୍ଦେର୍‌ଗେ ମା ମାନ୍ନାଏ, ଏନ୍ଦେର୍‌ଗେ ଆବ୍ଡ଼ାର୍ ୟାହୁଦୀ ନିୟମ୍‌ଘି ଅନୁସାର୍ ହେଖ୍ଖା ମା ନଣ୍ଡ୍‌ରିକିରି ଆସ୍‌ମା ମହ୍ଁନାଏ?” ³ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ନିମ୍‌ହି ନିଜର୍ ରୀତିନୀତିଘି ଲାଗାନ୍ ଏନ୍ଦେର୍‌ଗେ ପାର୍‌ମେଶ୍ଵାର୍‌ସ୍‌କି ନିୟମ୍‌ବନ୍ ମା ମାନ୍‌ଦାର୍? ⁴ଏନ୍ଦେର୍‌ଗେକା ପାର୍‌ମେଶ୍ଵାର୍‌ସ୍ ତେଙ୍କାଦାସ୍, ‘ନିଜର୍ ଆୟାଙ୍ଗ୍-ବାଙ୍ଗ୍‌ରିନ୍ ଆଦର୍‌ମାଇନ୍ କାମ୍‌କେ’, ଆରୁ ‘ନେଦିନ୍ ଆୟାଙ୍ଗ୍-ବାଙ୍ଗ୍‌ରିନ୍ ସାର୍‌ପାନାଏ, ଆବ୍ଡ଼ାରିନ୍ ପିଟାଚାକୋ।’ ⁵ଲେକିନ୍ ନିମ୍ ଆୟାଙ୍ଗ୍-ବାଙ୍ଗ୍‌ରିନ୍ ଏନ୍ନେ ତେଙ୍ଗର୍, ‘ଏକାନ୍ ଏଙ୍ଗା ନିମାଗେ ଚିନାରାଇ ଆବ୍ଡ଼ା ଜାମାନ୍ ପାର୍‌ମେଶ୍ଵାର୍‌ସ୍‌କେ ଭେଁଟ୍ ଚାଢ଼ାବାଚେଚ୍‌କାଦାନ୍, ହୁଦ୍‌ଘିଲାଗାନ୍ ନିହ୍ମାଏ ମଦେତ୍ କାମା ପଲ୍ଲଦାନ୍’, ⁶ତା ଆବ୍ଡ଼ାର୍ ତାଙ୍ଘାଏ ବାଙ୍ଗ୍‌ସ୍‌କି ଆଦର୍‌ମାଇନ୍ ମା କାମ୍‌ନାଏ, ଏନ୍ନେନିନ୍ ନିମ୍ ନିଜର୍ ରୀତିନୀତିଘି ଲାଗାନ୍ ପାର୍‌ମେଶ୍ୱାର୍‌ସ୍‌କି ବଚନ୍‌ବନ୍ ମା ମାନ୍‌ଦାର୍। ⁷ହେ କପ୍‌ଟୀରୋ, ନିହ୍ମା ବାରେନୁ ପାର୍‌ମେଶ୍ୱାର୍‌ସ୍ ଇଶାୟାହ୍‌ସ୍ ନାବୀସ୍‌କି ଦ୍ୱାର୍‌ନୁ ତେଙ୍କାଦାସ୍:

⁸‘ଇବ୍ଡ଼ା ଆଲାର୍ ତା ଥୁମ୍‌ଣାତି ଏଙ୍ଘାଏ ଆଦର୍‌ମାଇନ୍ କାମ୍‌ନାଏ, ଲେକିନ୍ ଇବ୍ଡ଼ାର୍‌ଘି ମନ୍‌ଦ୍ ଏଙ୍ଘାସ୍‌ତି ଗେଚ୍ଛା ରାଇଦ୍।

⁹ଆରୁ ଇବ୍ଡ଼ାର୍ ବେକାର୍‌ନୁ ଏଙ୍ଘାଏ ସେବା ଆରାଧାନା କାମ୍‌ନାଏ, ଏନ୍ଦେର୍‌ଗେକା ଆଲାର୍‌ଘି ନିୟମ୍‌ବନ୍ ଧରମ୍ ଉପ୍‌ଦେଶ୍ ବାଣୀ ବୁଲି ଶିଖାବାନାଏ।’”

ଅଶୁଦ୍ଧ୍ କାମ୍‌ନାବାଲା କାତ୍‌ଥା

(ମାର୍‌କୁସ୍ ୭:୧୪-୨୩)

¹⁰ଆନ୍ତିନ୍ ଯୀଶୁସ୍ ଆଲାରିନ୍ ତାଙ୍ଘା ଚାହା ମେହିଁକିରି ଆବ୍ଡ଼ାରିନ୍ ତେଙ୍ଗିୟାସ୍, “ମେନା ଆରୁ ବୁଝ୍‌ରା: ¹¹ଏକାଦ୍ ଥୁମ୍‌ଣାନୁ କାଇ, ଆଦ୍ ଆଲାରିନ୍ ଅଶୁଦ୍ଧ୍ ମା କାମି, ଲେକିନ୍ ଏକାଦ୍ ଥୁମ୍‌ଣାନ୍ତି ଉର୍‌ଖି, ଆଦ୍ ଆଲାରିନ୍ ଅଶୁଦ୍ଧ୍ କାମି।” ¹²ଆନ୍ତିନ୍ ଚେଲାର୍ ବାରିକିରି ଆସିନ୍ ତେଙ୍ଗିୟାର୍, “ନିମ୍ କାଁଏ ଆହ୍‌ଦାର୍ କା ଫାରିସୀଜାମାର୍ ଇ ବଚନ୍‌ବନ୍ ମେନିକିରି ଖୀସାରାଚାର୍ କେରାର୍?” ¹³ଆଙ୍ଗେନ୍ ଯୀଶୁସ୍ ଯାବାବ୍ ଚିଚ୍ଚାସ୍, “ଆ ଜାମା ହୋପ୍ପାନ୍ ଏକାନ୍ ଏଙ୍ଘାଏ ସରଗ୍‌ତା ବାଙ୍ଗ୍‌ସ୍‌ ମାଲ୍ଲା ଇଦୁସ୍, ଆଦିନ୍ ଚାଡ଼ାକୋ। ¹⁴ଆବ୍ଡ଼ାରିନ୍ କାଲା ଚିଆ; ଆବ୍ଡ଼ାର୍ କାଁଣାରିନ୍ ପାବୁ ଏଦୁ କାଁଣାର୍ ଆରୁ କାଁଣାସ୍ ଯଦି କାଁଣାସିନ୍ ପାବୁ ଏଦସ୍, ହାଲେ ଦୁହି ଲୋକ୍ ଗାଡ୍ଡିନୁ ଖାତ୍‌ରର୍।”

¹⁵ଇବନ୍ ମେନିକିରି ପାତ୍ରାସ୍ ଆସିନ୍ ତେଙ୍ଗିୟାସ୍, “ଇ ନମୁନାବନ୍ ଏମାନ୍ ବୁଝାବା।” ¹⁶ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ନିମ୍‌ହି ଆକ୍କୁନ୍‌ତକ୍ ମାଲ୍ଲା ବୁଝ୍‌ରୁର୍ କାଁଏ? ¹⁷ନିମ୍ କାଁଏ ବାଲ୍‌ଦାରିନ୍ କା ଏକାଦ୍ ଥୁମ୍‌ଣାନୁ କାଇ ଆଦ୍ କୁଲୁନୁ କାଇ, ଆରୁ ଆଦ୍ ଶରୀର୍‌ତି ବାହ୍‌ରି ଉର୍‌ଖି? ¹⁸ଲେକିନ୍ ଏକାଦ୍ ଥୁମ୍‌ଣାନ୍ତି ଉର୍‌ଖି, ଆଦ୍ ମନ୍‌ନ୍ତି ଉର୍‌ଖି, ଆରୁ ଆଦିନ୍ ଆଲାସିନ୍ ଅଶୁଦ୍ଧ୍ କାମି। ¹⁹ଏନ୍ଦେର୍‌ଗେକା ଖାରାପ୍ ସୋଚ୍‌, ପିଟ୍ଟନା, ବେଭିଚାର୍, ରାଣ୍ଡିବାଜି ନାଲ୍‌ଖୁ କାମ୍‌ନା, ହାଡ଼୍‌ନା, ଝୁଟ୍ଟୁ ସାକ୍ଷୀ ଚିନା, ଠାକ୍‌ନା ଆରୁ ନିନ୍ଦା କାମ୍‌ନା ମନ୍‌ତି ଉର୍‌ଖି। ²⁰ଇଦିନ୍ ଆଲାରିନ୍ ଅଶୁଦ୍ଧ୍ କାମି, ଲେକିନ୍ ହେଖ୍ଖା ମା ନଣ୍ଡ୍‌ରିକିରି ମାଣ୍ଡି ଅଣ୍ଡ୍‌କୁନ୍ ଆଲାରିନ୍ ଅଶୁଦ୍ଧ୍ ମା କାମି।”

କାନାନୀ ଜାତିନ୍ତା ମାଏକିନିଆଁଘି ବିଶ୍ଵାସ୍

(ମାର୍‌କୁସ୍ ୭:୨୪-୩୦)

²¹ଯୀଶୁସ୍ ଆସ୍‌ତି ଉର୍‌ଖିକିରି, ସୋର୍ ଆରୁ ସିଦୋନ୍ ପ୍ରଦେଶ୍‌ଗେ ବୁଙ୍ଗାସ୍ କେରାସ୍। ²²ଆ ପ୍ରଦେଶ୍‌ତା ଅଣ୍ଟା କାନାନୀ ମାଏକିନିଆଁ ବାର୍‌ଚା, ଆରୁ ଚିର୍‌ରା ରାଇକିରି ତେଙ୍ଗାଗେ ଲାଗ୍ଗିୟା, “ହେ ପ୍ରାଭୁ! ଦାଉଦ୍‌ସ୍‌କି ହାଦ୍ଦୁ, ଏଙ୍ଘା ମିଆଁ ଦାୟା କାମା! ଏଙ୍ଘା ହାଦ୍ଦୁନ୍ ଭୁତ୍ତୁଦ୍ ମୁରୁକ୍ ସାତାବାଲି।” ²³ଲେକିନ୍ ଆସ୍ ଆଦିନ୍ ଏନ୍ଦେର୍‌ହି ଯାବାବ୍ ମା ଚିଚ୍ଚାସ୍। ଆନ୍ତିନ୍ ଆସ୍‌କି ଚେଲାର୍ ବାରିକିରି ଆସିନ୍ ଆର୍‌ଜୀବିନ୍ତି କାମିକିରି ତେଙ୍ଗିୟାର୍, “ଇଦିନ୍ ବିଦା କାମା ଏନ୍ଦେର୍‌ଗେକା ଆଦ୍ ନାହ୍ମା ପାଛ୍‌ଲି-ପାଛ୍‌ଲି ଚିର୍‌ରାରାତେ ବାରାଲି।” ²⁴ଆସ୍ ଯାବାବ୍ ଚିଚ୍ଚାସ୍, “ଏନ୍ ଇସ୍ରାଏଲ୍ ବାଉଁଶାର୍‌ଘି ଏଫ୍‌ସ୍‌ର୍‌କା କେର୍‌କା ଭେଡ଼ିନ୍ ଆମ୍ବିକିରି ଆରୁ ନାନ୍ନାର୍‌ଘି ଲାଗାନ୍ ମାଲ୍ଲା ବାରୁନ୍।” ²⁵ଲେକିନ୍ ଆଦ୍ ବାର୍‌ଚା, ଆରୁ ଯୀଶୁସିନ୍ ଯୋହାର୍ କାମିକିରି ତେଙ୍ଗାଗେ ଲାଗ୍ଗିୟା, “ହେ ପ୍ରାଭୁ, ଏଙ୍ଗାନ୍ ଦାୟା କାମା।” ²⁶ଇସ୍ରାଏଲ୍ ଆଲାରିନ୍ ହାଦ୍ଦୁର୍ ଗାନେ ଆରୁ ବିନାୟାହୁଦୀ ଆଲାରିନ୍ ଆଲ୍ଲାଘି ରୂପ୍‌ନୁ ତୁଲ୍‌ନା କାମିକିରି ଯୀଶୁସ୍ ଯାବାବ୍ ଚିଚ୍ଚାସ୍, “ହାଦ୍ଦୁର୍‌ଘି ଆସ୍‌ମାବନ୍ ହୋଇକିରି ଆଲ୍ଲାଘି ଆଘ୍‌ଲି ଚିନା ବାନେ ମାଲ୍ଲିଦ୍।” ²⁷ଆଦ୍ ତେଙ୍ଗିୟାଦ୍, “ହଁ ପ୍ରାଭୁ ସତ୍ତୁନ୍, ଲେକିନ୍ ଆଲ୍ଲାଦ୍ ନିଜର୍ ମାଲିକ୍‌ସ୍‌କି ଟେବୁଲ୍ କିୟାଁ ଖାତ୍‌ର୍‌କା ଟୁକ୍‌ଡ଼ାଗୁଠିନ୍ ମହିଁଦ୍।” ²⁸ଆଙ୍ଗେନ୍ ଯୀଶୁସ୍ ଆବନ୍ ଯାବାବ୍ ଚିଚ୍ଚାସ୍, “ହେ ଆଲି, ନିଙ୍ଘାଏ ବିଶ୍ୱାସ୍‌ଦ୍‌ ବାଡ଼୍‌କାଦ୍। ଏସ୍‌କେ ନିନ୍ ଚାହଁଦିନ୍, ହନ୍ନେନ୍ ନିଙ୍ଘାଲାଗାନ୍ ମାନ୍ନାଦ୍।” ଆରୁ ଆଦ୍‌ଘି ହାଦ୍ଦୁଦ୍ ଆଖାନେନ୍ ବାନେ ମାନ୍‌ଚାକେରା।

ଯୀଶୁସ୍ ଢେର୍ ବେହ୍ମରିୟାରିନ୍ ବାନେ କାମାଲ୍‌ଦାସ୍

²⁹ଯୀଶୁସ୍ ଆସ୍‌ତି ଗାଲିଲୀ ହଁସ୍‌ରା ଚାହାଗେ ବାର୍‌ଚାସ୍, ଆରୁ ପାର୍ତ୍ତାନୁ ଆର୍‌ଗିକିରି ଆସାନ୍ ଅକ୍କିୟାସ୍। ³⁰ଆଙ୍ଗେନ୍ ଢେର୍ ଆଲାର୍ ଆସ୍‌କି ଚାହାଗେ ବାର୍‌ଚାର୍। ଆବ୍ଡ଼ାର୍ ତାହ୍ମାଗାନେ ଲେଙ୍ଗ୍‌ଡ଼ାରିନ୍, କାଁଣାରିନ୍, ଲୁହ୍ଲାରିନ୍, କୋନ୍ଦାରିନ୍ ଆରୁ ଦୁସ୍‌ରା ଢେର୍ ବେହ୍ମରିୟାରିନ୍ ଆସ୍‌କି ଚାହାଗେ ଅନ୍ଦ୍ରାର୍, ଆରୁ ଆବ୍ଡ଼ାର୍ ଆସ୍‌କି ହେଡ୍ଡମୁଲିନୁ ଅକ୍କତେଇଚାର୍, ଆରୁ ଆସ୍ ଆବ୍ଡ଼ାରିନ୍ ବାନେ କାମ୍‌ଚାସ୍। ³¹ଯେତ୍‌କବାକେନ୍ ଆଲାର୍ ଏରିୟାର୍ କା କୋନ୍ଦାର୍ କାତ୍‌ଥା କାମାଲ୍‌ନାଏ, ଆରୁ ଲୁହ୍ଲାର୍ ବାନେ ମାନାଲ୍‌ନାଏ, ଆରୁ ଲେଙ୍ଗ୍‌ଡ଼ାର୍ ଏକାଲ୍‌ନାଏ, ଆରୁ କାଁଣାର୍ ଏରାଲ୍‌ନାଏ ତା ଆବ୍ଡ଼ାର୍ ଆଚ୍‌ମିତ୍ ମାନିକିରି ଇସ୍ରାଏଲୀର୍‌ଘି ପାର୍‌ମେଶ୍ଵାର୍‌ସ୍‌କି ସ୍ତୁତି କାମ୍‌ଚାର୍।

ଯୀଶୁସ୍ ଚାର୍‌ହାଜାର୍ ଆଲାରିନ୍ ମହଁତାନା

(ମାର୍‌କୁସ୍ ୮:୧-୧୦)

³²ଯୀଶୁସ୍ ତାଙ୍ଘା ଚେଲାଜାମାରିନ୍ ମେହିଁୟାସ୍ ଆରୁ ତେଙ୍ଗିୟାସ୍, “ଏଙ୍ଗା ଇ ଭିଡ଼୍‌ବନ୍ ଏରିକିରି ସୋଗ୍ଗେ ଲାଗ୍ଗାଲି, ଏନ୍ଦେର୍‌ଗେକା ଇବ୍ଡ଼ାର୍ ତିନ୍ ଦିନ୍ ମାନ୍‌ଚାଦିନ୍ ଏଙ୍ଘାଗାନେ ରାନାଏ, ଆରୁ ଇବ୍ଡ଼ାର୍‌ସାନ୍ ମହାଁଗେ ଏନ୍ଦେର୍‌ହି ମାଲ୍ଲାଦିନ୍। ଏନ୍ ଇବ୍ଡ଼ାରିନ୍ କିଡ଼ାତି ବିଦା କାମାଗେ ମା ଚାହଁଦାନ୍, ଏକାସାନ୍ ଏନ୍ନେ ମା ମାନ୍ନାଦ୍ କା ପାବୁନୁ ଥାକ୍‌ରିକିରି ବେହସ୍ ମାନର୍‌କର୍।” ³³ଚେଲାଜାମାର୍ ଆସିନ୍ ତେଙ୍ଗିୟାର୍, “ନାମାଗେ ଇ ଶୁନ୍‌ଶାନ୍ ଆଡ୍ଡାନୁ ଏକାସ୍‌ତି ଏତ୍‌କ ଆସ୍‌ମା ହାଖ୍‌ରୋକା ନାମ୍ ଏତ୍‌କ ବାଡ଼୍‌କା ଭିଡ଼୍‌ବନ୍ ଉଡ଼୍‌ତା ଅଙ୍ଗତ୍?” ³⁴ଯୀଶୁସ୍ ଆବ୍ଡ଼ାରିନ୍ ମେନ୍‌ଚାସ୍, “ନିହ୍ମାସାନ୍ ୟୋଁଟା ଆସ୍‌ମା ରାଇ?” ଆବ୍ଡ଼ାର୍ ତେଙ୍ଗିୟାର୍, “ସାତ୍ତେଟା, ଆରୁ ଥୋଡ଼େ ଛୋଟେ ଇଞ୍ଜୋ ରାଇ।” ³⁵ଆଙ୍ଗେନ୍ ଆସ୍ ଆଲାରିନ୍ କିୟାଁ ଅକ୍କାଗେ ହୁକୁମ୍ ଚିଚ୍ଚାସ୍। ³⁶ଆରୁ ଆ ସାତ୍ତେଟା ଆସ୍‌ମା ଆରୁ ଇଞ୍ଜୋନ୍ ଅଚ୍ଚାସ୍, ଆରୁ ଧାନ୍ୟାବାଦ୍ ଚିଇକିରି ଖିଣ୍ଡିୟାସ୍, ଆରୁ ତାଙ୍ଘାଏ ଚେଲାର୍‌ଗେ ଚିତେକେରାସ୍, ଆରୁ ଚେଲାର୍ ଆଲାର୍‌ଗେ ଚିତେକେରାର୍। ³⁷ଏନ୍ନେନିନ୍ ଜାମାର୍ ମହିଁକିରି ଉଚ୍ଛିୟାର୍ କେରାର୍ ଆରୁ ଚେଲାଜାମାର୍ ଏଙ୍ଗ୍‌ର୍‌କା ଟୁକ୍‌ଡ଼ାଗୁଠିନ୍ ସାତ୍ତେଟା ଡାଲାନୁ ଉଇୟାର୍। ³⁸ମହୁଁର୍‌ଘି ଭିତର୍‌ନୁ ମାଏକିନିଆଁ ଆରୁ ହାଦ୍ଦୁରିନ୍ ଆମ୍ବିକିରି ଚାର୍‌ହାଜାର୍ ମାର୍‌ଦ୍‌ନାର୍ ରାଚାର୍। ³⁹ଆନ୍ତିନ୍ ଯୀଶୁସ୍ ଭିଡ଼୍‌ବନ୍ ବିଦା କାମିକିରି ଡଙ୍ଗାନୁ ଆର୍‌ଗିୟାସ୍, ଆରୁ ମାଗ୍‌ଦାନ୍ ପ୍ରାଦେଶ୍ ତା ସୀମାଗେ ବାର୍‌ଚାସ୍।

ଫାରିସୀଜାମାର୍ ଯୀଶୁସିନ୍ ସରଗ୍‌ତା ଚିହ୍ନା ନିଆଁଲ୍‌ନାଏ

(ମାର୍‌କୁସ୍ ୮:୧୧-୧୩; ଲୁକାସ୍ ୧୨:୫୪-୫୬)

¹ଫାରିସୀ ଆରୁ ସାଦ୍ଦୂକୀଜାମାର୍ ଯୀଶୁସ୍‌କି ଚାହାଗେ ବାରିକିରି ଆସିନ୍ ବିଡ଼୍‌ଚେ ଏରାଗେ ମେନ୍‌ଚାର୍, “ଏମାଗେ ସରଗ୍‌ତା ଏନ୍ଦ୍ରିନ୍ ଅଣ୍ଟା ଚିହ୍ନା ଏଦା।” ²ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ବିଡ଼ି ଅକ୍କନାବାକେନ୍ ନିମ୍ ତେଙ୍ଗ୍‌ଦାର୍, ‘ପାଗ୍ ବାନେ ରଅ, ଏନ୍ଦେର୍‌ଗେକା ଆକାଶ୍ ଲାଲ୍ ରାଇ’ ³ଆରୁ ଭୋର୍ ପାଇରି ତେଙ୍ଗ୍‌ଦାର୍, ‘ଇନ୍ନା ଆନ୍ଧିଧୁକା ବାରଦ୍, ଏନ୍ଦେର୍‌ଗେକା ଆକାଶ୍ ଲାଲ୍ ଆରୁ ବାଦ୍‌ଲି କୁଲ୍ଲେଇଚ୍‌କିଚି।’ ଯଦି ନିମ୍ ଆକାଶ୍ ତା ରଙ୍ଗ୍‌ଢଙ୍ଗ୍ ଏରିକିରି ଆଦ୍‌ଘି ଭେଦ୍ଦୁ ତେଙ୍ଗ୍‌ଦାର୍, ଲେକିନ୍ ସାମାୟଘି ଭେଦ୍ଦୁନ୍ ଏନ୍ଦେର୍‌ଗେ ତେଙ୍ଗା ପଲ୍ଲଦାର୍? ⁴ଇ ଯୁଗ୍‌ତା ଖାରାପ୍ ଆରୁ ପାର୍‌ମେଶ୍ୱାର୍‌ସ୍‌କି ବଚନ୍ ମା ମାନ୍ନାବାଲା ଆଲାର୍ ଚିହ୍ନା ବେଦ୍ଦ୍‌ନାଏ, ଲେକିନ୍ ଯୁନାସ୍ ନାବୀସ୍‌କି ଚିହ୍ନାବନ୍ ଆମ୍ବିକିରି ଇବ୍ଡ଼ାର୍‌ଗେ ଆରୁ ଏନ୍ଦେର୍‌ହି ଚିହ୍ନା ଚିଆ ମା କାଇ।” ଆରୁ ଯୀଶୁସ୍ ଆବ୍ଡ଼ାରିନ୍ ଆମ୍ବିକିରି ବୁଙ୍ଗେଇଚାସ୍।

ଫାରିସୀ ଆରୁ ସାଦ୍ଦୂକୀ ଜାମାର୍‌ସ୍‌ତି ହୁସିୟାର୍ ରା

(ମାର୍‌କୁସ୍ ୮:୧୪-୨୧)

⁵ଚେଲାର୍ ହଁସ୍‌ରାଘି ହାପାଖା ଆଣସିୟାର୍, ତା ଏରିୟାର୍ କା ଆବ୍ଡ଼ାର୍ ଆସ୍‌ମା ହୁଆଗେ ମଦ୍‌ରେ ଚିଚ୍ଚକାନାଏ। ⁶ହୁଦ୍‌ଘିଲାଗାନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏରା, ଫାରିସୀ ଆରୁ ସାଦ୍ଦୂକୀ ଜାମାର୍‌ଘି ଖାମୀର୍‌ସ୍‌ତି ହୁସିୟାର୍ ରାକେ।” ⁷ଆବ୍ଡ଼ାର୍ ତାମ୍-ତାମ୍ ବିଚାର୍ କାମାଗେ ଲାଗ୍ଗିୟାର୍, “ନାମ୍ ଆସ୍‌ମା ମାଲ୍ଲା ଅନ୍ଦ୍ରୁତ୍ ହୁଦ୍‌ଘିଲାଗାନ୍ ଆସ୍ ଏନ୍ନେ ବାଲ୍‌ଦାସ୍।” ⁸ଇବନ୍ ଆହିକିରି ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ହେ କମ୍ ବିଶ୍ୱାସ୍ କାମୁରୋ, ନିମ୍ ନିହ୍ମା ମାଝାନୁ ନାହ୍ମାସାନ୍ ଆସ୍‌ମା ମାଲ୍ଲାଦିନ୍ ବୁଲି ଏନ୍ଦେର୍‌ଗେ ତେଙ୍ଗାତେଙ୍ଗି ମାନାଲ୍‌ଦାର୍? ⁹ନିମ୍ ଆକ୍କୁନ୍‌ତକ୍ ମାଲ୍ଲା ବୁଝ୍‌ରୁର୍ କାଁଏ? ଏନ୍ଦେର୍ ନିମାଗେ ଆ ପାଞ୍ଚ୍ ହାଜାର୍ ଆଲାର୍‌ଗେ ପାଞ୍ଚେଟା ଆସ୍‌ମା ମନେ ମାଲ୍ଲାଦିନ୍, ଆରୁ ମନେ ମାଲ୍ଲା କା ନିମ୍ କେତ୍‌କ ଟୋପା ଆସ୍‌ମାବନ୍ ଠୁଡ଼ିୟାଚ୍‌କାଚ୍‌କାର୍? ¹⁰ଆରୁ ଚାର୍‌ହାଜାର୍ ଆଲାର୍‌ଗେ ସାତ୍ତେଟା ଆସ୍‌ମାନ୍, ଆରୁ ନିମ୍ କେତ୍‌କ ଟୋପା ଠୁଡ଼ିୟାଚ୍‌କାଚ୍‌କାର୍? ¹¹ନିମ୍ ଏନ୍ଦେର୍‌ଗେ ମା ବୁଝ୍‌ର୍‌ଦାର୍ କା ଏନ୍ ନିମାନ୍ ଆସ୍‌ମାଘି ବାରେନୁ ମାଲ୍ଲା ତେଙ୍ଗୁନ୍, ଲେକିନ୍ ଫାରିସୀ ଆରୁ ସାଦ୍ଦୂକୀ ଜାମାର୍‌ଘି ଖାମୀର୍‌ସ୍‌ତି ସାବ୍‌ଧାନ୍ ରାକେ।” ¹²ଆଙ୍ଗେନ୍ ଚେଲାର୍ ବୁଝ୍‌ରା ଅଙ୍ଗିୟାର୍ କା ଯୀଶୁସ୍ ଆସ୍‌ମାଘି ଖାମୀର୍‌ସ୍‌ତି ମାଲ୍ଲା, ଲେକିନ୍ ଫାରିସୀ ଆରୁ ସାଦ୍ଦୂକୀ ଜାମାର୍‌ଘି ଶିକ୍ଷାତି ସାବ୍‌ଧାନ୍ ରାଗେ ତେଙ୍କାଚାସ୍।

ପାତ୍ରାସ୍‌କି ବିଶ୍ୱାସ୍

(ମାର୍‌କୁସ୍ ୮:୨୭-୩୦; ଲୁକାସ୍ ୯:୧୮-୨୧)

¹³ଯୀଶୁସ୍ କାଇସିରିଆ ଫିଲିପ୍ପୀ ପ୍ରଦେଶ୍‌ଗେ ବାର୍‌ଚାସ୍, ଆରୁ ତାଙ୍ଘା ଚେଲାଜାମାରିନ୍ ମେନାଗେ ଲାଗ୍ଗିୟାସ୍, “ଆଲାର୍ ମୁନୁଷ୍ ହାଦ୍ଦୁସିନ୍ ନେଦ୍‌ବୁଲି ବାନାଏ?” ¹⁴ଆବ୍ଡ଼ାର୍ ତେଙ୍ଗିୟାର୍, “କେତ୍‌କ ଲୋକ୍ ଆଲାର୍ ଆସ୍ନାନ୍ ଚିଉ ଯୋହାନ୍‌ସ୍ ବୁଲି ତେଙ୍ଗ୍‌ନାଏ, ଆରୁ କେତ୍‌କ ଲୋକ୍ ଆଲାର୍ ଏଲିୟାସ୍ ବାନାଏ ଆରୁ କେତ୍‌କ ଲୋକ୍ ଆଲାର୍ ଯିରିମିୟା ଚାହେ ନାବୀର୍‌ସ୍‌ତି ନେଦିନ୍ ଅର୍‌ତୁ ବୁଲି ତେଙ୍ଗ୍‌ନାଏ।” ¹⁵ଯୀଶୁସ୍ ଆବ୍ଡ଼ାରିନ୍ ମେନ୍‌ଚାସ୍, “ଆରୁ ନିମ୍ ଏନ୍ଦେର୍ ବାଦାର୍ କା ଏନ୍ ନେଦ୍?” ¹⁶ଶିମୋନ୍ ପାତ୍ରାସ୍ ଯାବାବ୍ ଚିଚ୍ଚାସ୍, “ନିମ୍ ଖ୍ରୀସ୍ତ୍‌ ଉଜ୍ଜୁ ପାର୍‌ମେଶ୍ଵାର୍‌ସ୍‌କି ହାଦ୍ଦୁର୍।” ¹⁷ଆଙ୍ଗେନ୍ ଯୀଶୁସ୍ ଆସିନ୍ ଯାବାବ୍ ଚିଚ୍ଚାସ୍, “ହେ ଶିମୋନ୍, ଯୁନାସ୍‌କି ହାଦ୍ଦୁ ନିନ୍ ଧଏନ୍; ଏନ୍ଦେର୍‌ଗେକା ମୁନୁଷ୍ ନିଙ୍ଘାସାନ୍ ଇବନ୍ ପ୍ରକଟ୍ ମାଲ୍ଲା କାମୁସ୍ ବରନ୍ ଏଙ୍ଘାଏ ସରଗ୍‌ତା ବାଙ୍ଗ୍‌ସ୍‌, ଇ କାତ୍‌ଥାବନ୍ ନିଙ୍ଘାଏନୁ ପ୍ରକଟ୍ କାମ୍‌ଚ୍‌କାଦାସ୍। ¹⁸ଏନ୍‌ହି ନିଙ୍ଗାନ୍ ତେଙ୍ଗାଲ୍‌ଦାନ୍ କା ନିନ୍ ପାତ୍ରାସ୍, ଆରୁ ଇ ଚାଟ୍‌ଣୀଘି ମିଆଁ ଏନ୍ ଏଙ୍ଘାଏ ମଣ୍ତ୍‌ଲୀ ବାନାବନ୍, ଆରୁ ନରକ୍‌ତା ଶକ୍ତି ଆବନ୍ ଜିତା ପଲ୍ଲିଦ୍। ¹⁹ଏନ୍ ନିଙ୍ଗା ସରଗ୍ ରାଜୀନ୍ତା ଚାଭିବନ୍ ଚିଅନ୍: ଆରୁ ଏନ୍ଦ୍ରିନ୍‌ହି ନିନ୍ ଧାନ୍ତାରିନୁ ବନ୍ଦ୍ କାମୟ, ଆଦ୍ ସରଗ୍‌ନୁହି ବନ୍ଦ୍ ରୋ; ଆରୁ ଧାନ୍ତାରିନୁ ନିନ୍ ଏକାନ୍ ଖୋଲୟ, ଆଦ୍ ସରଗ୍‌ନୁହି ଖୋଲ୍‌ରୋ।” ²⁰ଆନ୍ତିନ୍ ଆସ୍ ଚେଲାରିନ୍ ଶକତ୍ ଚେତାବାନୀ ଚିଇକିରି ତେଙ୍ଗିୟାସ୍ ନେକାନ୍‌ହି ଆମ୍‌କେ ତେଙ୍ଗା କା ଏନ୍ ଖ୍ରୀସ୍ତ୍‌।

ଯୀଶୁସ୍ ତାଙ୍ଘା ମରନ୍‌ଘି ବାରେନୁ ଭବିଷତ୍ କାତ୍‌ଥା ତେଙ୍ଗାଲ୍‌ଦାସ୍

(ମାର୍‌କୁସ୍ ୮:୩୧-୩୩; ଲୁକାସ୍ ୯:୨୨)

²¹ହୁ ସାମାୟନ୍ତି ଯୀଶୁସ୍ ନିଜର୍ ଚେଲାଜାମାରିନ୍ ତେଙ୍ଗାଗେ ଲାଗ୍ଗିୟାସ୍, “ଏଙ୍ଗାଗେ ଜରୁରୀ ରାଇ କା ଏନ୍ ଯେରୁଶାଲେମ୍ କନ୍, ଆରୁ ପୁର୍‌ଖାର୍, ମୁଖ୍ୟା ପୁରୋହିତ୍ ଆରୁ ପଣ୍ତିତ୍‌ଜାମାର୍‌ଘି ହେଖ୍ଖାସ୍‌ତି ମୁରୁକ୍ ଦୁଃଖୁ ସାହନ୍; ଆରୁ ଡେମା ପିଟାକୋ; ଆରୁ ତିନ୍ ଦିନ୍‌ନୁ ଉଜ୍ଜନ୍‌କନ୍।” ²²ଆଙ୍ଗେନ୍ ପାତ୍ରାସ୍ ଆସିନ୍ ଭିନେ ତାରା ହୋଇକିରି କେବ୍‌ନା ଲେଖା ତେଙ୍ଗିୟାସ୍, “ପ୍ରାଭୁ, ପାର୍‌ମେଶ୍ୱାର୍‌ସ୍ ଏନ୍ନେ ମା କାମ୍‌ନାସ୍! କା ନିହ୍ମାଗାନେ ଏନ୍ନେ ଏକ୍‌ଲାହି ମା ମାନ୍ନାଦ୍।” ²³ଯୀଶୁସ୍ କିର୍‌ରେଚେ ଏରିକିରି ପାତ୍ରାସ୍‌ସିନ୍ ତେଙ୍ଗିୟାସ୍, “ହେ ଶାଏତାନ୍, ଏଙ୍ଘା ଚାହାସ୍ତି ବୁଙ୍ଗାକାଲା! ନିନ୍ ଏଙ୍ଗାନ୍ ରୋକ୍‌ଟୋକ୍ କାମାଲ୍‌ଦାଏ; ଏନ୍ଦେର୍‌ଗେକା ନିନ୍ ପାର୍‌ମେଶ୍ଵାର୍‌ସ୍‌କି କାତ୍‌ଥାନ୍ ମାଲ୍ଲା ସୋଚୁୟ, ଲେକିନ୍ ଆଲାର୍‌ଘି କାତ୍‌ଥାବନ୍ ସୋଚ୍‌ଦାଏ।”

ଯୀଶୁସ୍‌କି ପାଛ୍‌ଲି ଏକ୍‌ନାଘି ମତ୍‌ଲବ୍

(ମାର୍‌କୁସ୍ ୮:୩୪—୯:୧; ଲୁକାସ୍ ୯:୨୩-୨୭)

²⁴ହତ୍‌କବାକେନ୍ ଯୀଶୁସ୍ ତାଙ୍ଘା ଚେଲାଜାମାରିନ୍ ତେଙ୍ଗିୟାସ୍, “ନେଦିନ୍ ଏକ୍‌ଲା ଏଙ୍ଘା ପାଛ୍‌ଲି ବାରାଗେ ବେଦ୍ଦଦାସ୍ ତା, ନିଜ୍‌କେନିଜ୍ ଅସ୍ଵୀକାର୍ କାମସ୍ ଆରୁ ନିଜର୍ କ୍ରୁଶ୍‌ବନ୍ ଚେଡ଼ସ୍, ଆରୁ ଏଙ୍ଘା ପାଛ୍‌ଲି-ପାଛ୍‌ଲି ବାରସ୍। ²⁵ଏନ୍ଦେର୍‌ଗେକା ନେଦିନ୍ ନିଜର୍ ଜୀଆନ୍ ବାଛାବାଗେ ବେଦ୍ଦ୍‌ନାଏ, ଆବନ୍ ଆବ୍ଡ଼ାର୍ ଏଫ୍‌ସୋଚର୍; ଆରୁ ନେଦିନ୍ ଏଙ୍ଘାଲାଗାନ୍ ନିଜର୍ ଜୀଆନ୍ ଚିଅର୍, ଆବ୍ଡ଼ାର୍ ସବୁଦିନ୍‌ତା ଜୀବନ୍ ହାଖ୍ଖର୍। ²⁶ମୁନୁଷ୍‌ଗେ ଇତ୍ତି ଏନ୍ଦେର୍ ଫାଏଦା, ଯଦି ଆସ୍ ଦୁନିଆଁନ୍ତା ଜାମାନ୍ ହାଖ୍ଖସ୍, ଲେକିନ୍ ନିଜର୍ ଜୀବନ୍‌ବନ୍‌ହି ଏଫ୍‌ସଚସ୍? ନିଜର୍ ଜୀବନ୍‌ଘି ବାଦ୍‌ଲା ମୁନୁଷ୍ ଏନ୍ଦେର୍ ଚିଆ ଅଙ୍ଗସ୍? ²⁷ମୁନୁଷ୍ ହାଦ୍ଦୁସ୍ ତାଙ୍ଘା ସରଗ୍‌ଦୂଁତ୍‌ଜାମାର୍ ଗାନେ ତାଙ୍ଘା ବାଙ୍ଗ୍ ପାର୍‌ମେଶ୍ଵାର୍‌ସ୍‌କି ମାହିମାନୁ ବାରସ୍, ହତ୍‌କବାକେନ୍, ‘ଆସ୍ ଜାମା ଆଲାର୍‌ଗେ ତାହ୍ମା ନାଲ୍‌ଖୁଘି ଅନୁସାର୍ ଫଲ୍ ଚିୟସ୍।’ ²⁸24 ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ ମୁନୁଷ୍ ହାଦ୍ଦୁସିନ୍ ନିଜର୍ ରାଜୀନୁ ବାର୍‌ନାନ୍ ମା ଏର୍‌ନାତକ୍, ଇସାନ୍ ଇଜ୍ଜକା ଆଲାର୍‌ଘି ଭିତର୍‌ନୁ କେତ୍‌କ ଲୋକ୍ ମା ଖିନାଏ।”

ଯୀଶୁସ୍‌କି ରୂପ୍ ବାଦ୍‌ଲାରାନା

(ମାର୍‌କୁସ୍ ୯:୨-୧୩; ଲୁକାସ୍ ୯:୨୮-୩୬)

¹ଛଦିନ୍‌ଘି ପାଛ୍‌ଲି ଯୀଶୁସ୍ ପାତ୍ରାସ୍ ଆରୁ ୟାକୁବ୍ ଆରୁ ଆସ୍‌କି ଭାଇ ଯୋହାନ୍‌ସିନ୍ ସାଙ୍ଗେନ୍ ଅଚ୍ଚାସ୍, ଆରୁ ଆବ୍ଡ଼ାରିନ୍ ଭିନେ ତାରା ହୋଇକିରି ଅଣ୍ଟା ମେଚ୍ଛା ପାର୍ତ୍ତା ମିଆଁ ଅଚ୍ଚାସ୍ କେରାସ୍। ²ଆସାନ୍ ଆବ୍ଡ଼ାର୍‌ଘି ଚାହାନୁ ଯୀଶୁସ୍‌କି ରୂପ୍ ବାଦ୍‌ଲାରାଚା କେରା ଆରୁ ଆସ୍‌କି ଚେହେରା ବିଡ଼ି ଲେଖା ବିଲ୍‌ଚାଗେ ଲାଗ୍ଗିୟା ଆରୁ ଆସ୍‌କି ଚିଢ଼ା ବିଲ୍ଲୀ ଲେଖା ପାଣ୍ତ୍‌ରୁ ମାନ୍‌ଚାକେରା। ³ଆରୁ ଏରା ମୁଶା ଆରୁ ଏଲିୟାସ୍‌ଗାନେ ଯୀଶୁସ୍‌କି କାଚ୍‌ନେଖ୍‌ର୍‌ନାଦ୍ ଚେଲାଜାମାର୍‌ଗେ ଏଥ୍‌ରାଦ୍।

⁴ଆନ୍ତିନ୍ ପାତ୍ରାସ୍ ଯୀଶୁସିନ୍ ତେଙ୍ଗିୟାସ୍, “ହେ ପ୍ରାଭୁ, ନାମାଗେ ଇସାନ୍ ରାନାଦ୍ କେତ୍‌କ ବାନେ ମାନଦ୍‌ନେ। ଯଦି ନିମ୍ ଚାହଁର୍ ହାଲେ ଏନ୍ ଇସାନ୍ ମୁନ୍‌ଟା ତାମ୍ବୁ ଗାଡ଼ନ୍‌ନେ; ଅଣ୍ଟା ନିମାଗେ, ଅଣ୍ଟା ମୁଶାସ୍‌କେ, ଆରୁ ଅଣ୍ଟା ଏଲିୟାସ୍‌କେ।” ⁵ଆସ୍ ତେଙ୍ଗାଲିୟାସିନ୍ କା ଆଖାନେନ୍ ଅଣ୍ଟା ବିଲ୍‌ଚ୍‌ନା ବାଦ୍‌ଲିଦ୍ ଆବ୍ଡ଼ାରିନ୍ କୁଲ୍ଲେଇଚା, ଆରୁ ଆ ବାଦ୍‌ଲିନ୍‌ନ୍ତି ଅଣ୍ଟା ଶବଦ୍ ମେନ୍ଦ୍ରା: “ଇସ୍ ଏଙ୍ଘାଏ ଦୁଲାଡ଼ି ହାଦ୍ଦୁସ୍, ଇସ୍‌କି ମିଆଁ ଏନ୍ ମୁରୁକ୍ ଖୁସ୍ ରାଦାନ୍: ଇସ୍‌କି କାତ୍‌ଥାନ୍ ମେନା।” ⁶ଇବନ୍ ମେନିକିରି ଚେଲାଜାମାର୍ ହୁମ୍‌କୁଡ଼ିଆ ମାନିକିରି ଖାତ୍‌ରାର୍ କେରାର୍ ଆରୁ ମୁରୁକ୍ ଏଲ୍‌ଚିୟାର୍ କେରାର୍। ⁷ଯୀଶୁସ୍ ଚାହାଗେ ବାରିକିରି ଆବ୍ଡ଼ାରିନ୍ ଏସ୍‌ରିୟାସ୍ ଆରୁ ତେଙ୍ଗିୟାସ୍, “ଉସ୍‌କାରା, ଆମା ଏଲ୍‌ଚା।” ⁸ଆନ୍ତିନ୍ ଆବ୍ଡ଼ାର୍ ମିଆଁ ଏରିକିରି ଆସାନ୍ ଯୀଶୁସିନ୍ ଆମ୍ବିକିରି ଆରୁ ନେକାନ୍‌ହି ମା ଏରିୟାର୍।

⁹ଯେତ୍‌କବାକେନ୍ ଆବ୍ଡ଼ାର୍ ପାର୍ତ୍ତାନ୍ତିନ୍ କିୟାଁ ଏତ୍ତାଲିୟାର୍ ହତ୍‌କବାକେନ୍ ଯୀଶୁସ୍ ଆବ୍ଡ଼ାରିନ୍ ହୁକୁମ୍ ଚିଇକିରି ତେଙ୍ଗିୟାସ୍, “ଯେତ୍‌କତକ୍ ମୁନୁଷ୍ ହାଦ୍ଦୁସ୍ କେଚ୍ଚକାସ୍ତି ମା ଉଜ୍ଜସ୍ ହତକ୍‌ତକ୍ ନିମ୍ ଇ ଦର୍ଶନ୍‌ଘି କାତ୍‌ଥାନ୍ ନେକାନ୍‌ହି ଆମ୍‌କେ ତେଙ୍ଗା।” ¹⁰ଆଙ୍ଗେନ୍ ଚେଲାଜାମାର୍ ଆସିନ୍ ମେନ୍‌ଚାର୍, “ହାଲେ ପଣ୍ତିତ୍‌ଜାମାର୍ ଏନ୍ଦେର୍‌ଗେ ତେଙ୍ଗ୍‌ନାଏ କା ଖ୍ରୀସ୍ତ୍‌ସ୍‌କି ଆଘ୍‌ଲି ଏଲିୟାସ୍ ନାବୀସ୍‌କି ବାର୍‌ନା ଦାର୍‌କାର୍ ରାଇ?” ¹¹ଯୀଶୁସ୍ ଯାବାବ୍ ଚିଚ୍ଚାସ୍, “ଏଲିୟାସ୍ ନାବୀସ୍ ଜରୁର୍ ବାରସ୍ ଆରୁ ଜାମାନ୍ ସୁଧ୍‌ରସ୍। ¹²ଲେକିନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ କା, ଏଲିୟାସ୍ ନାବୀସ୍ ତା ବାର୍‌ଚାସ୍ କେର୍‌କାଦାସ୍, ଆରୁ ଆଲାର୍ ଆସିନ୍ ମା ଚିହ୍ନିକିରି ଆସ୍‌କି ମିଆଁ ଏସ୍‌କେ ମନ୍ ଆନ୍ନେ କାମ୍‌ଚାର୍; ଏନ୍ନେନିନ୍ ମୁନୁଷ୍ ହାଦ୍ଦୁସ୍ ଆବ୍ଡ଼ାର୍‌ଘି ହେଖ୍ଖାନ୍‌ନ୍ତି ଦୁଃଖୁ ସାହସ୍।” ¹³ଆଙ୍ଗେନ୍ ଚେଲାଜାମାର୍ ବୁଝ୍‌ରାର୍ କେରାର୍ କା ଯୀଶୁସ୍ ଆସ୍ନାନ୍ ଚିଉ ଯୋହାନ୍‌ସ୍‌କି ବାରେନୁ ତେଙ୍ଗାଲ୍‌ଦାସ୍।

ଯୀଶୁସ୍ ଭୁତ୍ତୁଲାକ୍କା ହାଦ୍ଦୁସିନ୍ ବାନେ କାମାଲ୍‌ଦାସ୍

(ମାର୍‌କୁସ୍ ୯:୧୪-୨୯; ଲୁକାସ୍ ୯:୩୭-୪୩)

¹⁴ଯେତ୍‌କବାକେନ୍ ଆବ୍ଡ଼ାର୍ ଭିଡ଼୍‌ଘି ଚାହାନୁ ଆଣସିୟାର୍, ତା ଅଣ୍ଟା ଆଲାସ୍ ଯୀଶୁସ୍‌କି ଚାହାଗେ ବାର୍‌ଚାସ୍, ଆରୁ ହାଁଠୁୱାରାଇକିରି ତେଙ୍ଗାଗେ ଲାଗ୍ଗିୟାସ୍, ¹⁵“ହେ ପ୍ରାଭୁ, ଏଙ୍ଘା ହାଦ୍ଦୁସ୍‌କି ମିଆଁ ଦାୟା କାମା! ଏନ୍ଦେର୍‌ଗେକା ଆସ୍ ଘୋଣ ହାପୁ ବେମାର୍‌ତି ଦୁଃଖୁ ସାହାଲ୍‌ଦାସ୍; ଆରୁ ଆସ୍ ଧିୟାନ୍-ଧିୟାନ୍ ଚିଚ୍ଚୁନୁ ଆରୁ ଧିୟାନ୍-ଧିୟାନ୍ ଆମ୍ମୁନୁ ଖାତ୍‌ର୍‌ଦାସ୍। ¹⁶ଏନ୍ ଆସିନ୍ ନିହ୍ମା ଚେଲାଜାମାର୍‌ଘି ଚାହାଗେ ଅନ୍ଦ୍‌ର୍‌କାଚ୍‌କାନ୍, ଲେକିନ୍ ଆବ୍ଡ଼ାର୍ ଆସିନ୍ ବାନେ କାମା ପଲ୍ଲିଆରିନ୍।” ¹⁷ଯୀଶୁସ୍ ଯାବାବ୍ ଚିଚ୍ଚାସ୍, “ହେ ଅବିଶ୍ୱାସୀ ଆରୁ ବଦ୍‌ମାସ୍ ପିଢ଼ି, ଏନ୍ ନିହ୍ମାଗାନେ କେତ୍‌କ ଉଲ୍ ରନ୍? କେତ୍‌କ ଉଲ୍ ନିମାନ୍ ସାହ୍‌ତେ ରନ୍? ଆସିନ୍ ଏଙ୍ଘା ଚାହାଗେ ଅନ୍ଦ୍ରା।” ¹⁸ଯୀଶୁସ୍ ଭୁତ୍ତୁବନ୍ ଧାମ୍‌କାଚାସ୍ ଆରୁ ଆଦ୍ ଆସ୍‌ତି ଉର୍‌ଖାକେରା; ଆରୁ ଆ ହାଦ୍ଦୁସ୍ ଆଖାନେନିନ୍ ବାନେ ମାନ୍‌ଚାସ୍‌କେରାସ୍।

¹⁹ଆନ୍ତିନ୍ ଚେଲାଜାମାର୍ କାଡ଼େ-କାଡ଼େ ଯୀଶୁସ୍‌କି ଚାହାଗେ ବାରିକିରି ତେଙ୍ଗିୟାର୍, “ଏମ୍ ଆବନ୍ ଏନ୍ଦେର୍‌ଗେ ଅଥ୍‌ରା ପଲ୍ଲକାମ୍?” ²⁰ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିହ୍ମା ବିଶ୍ଵାସ୍‌ଘି ଘାଟିଘି ଲାଗାନ୍, ଏନ୍ଦେର୍‌ଗେକା ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍। ଯଦି ନିହ୍ମା ବିଶ୍ଵାସ୍ ମାନିଘି ଅଣ୍ଟା ମାଞ୍ଜି ଲେଖା ରୋତା, ଇ ପାର୍ତ୍ତାବନ୍‌ହି ତେଙ୍ଗା ଅଙ୍ଗର୍, ‘ଇସ୍‌ତି ହାପାଖା ଘୁଚ୍‌ରୁ କାଲ୍’, ତା ଆଦ୍ ଘୁଚ୍‌ରକୋ; ଆରୁ ଏନ୍ଦେର୍ କାତ୍‌ଥାହି ନିମାଗେ ମୁସ୍‌କିଲ୍ ମା ମାନି। ²¹(ଲେକିନ୍ ବିନ୍ତି ଆରୁ ଉପାସ୍ ବିନାଦୁସ୍‌ରା ଏନ୍ଦ୍ରିନ୍ ଉପାୟତି ଇବ୍ଡ଼ା ଭୁତ୍ତୁଗୁଠିଦ୍ ମା ଉର୍‌ଖି।)”

ଯୀଶୁସ୍ ତାଙ୍ଘାଏ ମରନ୍‌ଘି ବାରେନୁ ଆରୁଅହନ୍ ଭବିଷତ୍ କାତ୍‌ଥା କାମାଲ୍‌ଦାସ୍

(ମାର୍‌କୁସ୍ ୯:୩୦-୩୨; ଲୁକାସ୍ ୯:୪୩-୪୫)

²²ଯେତ୍‌କବାକେନ୍ ଯୀଶୁସ୍ ଗାଲିଲୀନୁ ରାଚାସ୍ ତା, ଆସ୍ ଚେଲାରିନ୍ ତେଙ୍ଗିୟାସ୍, “ମୁନୁଷ୍ ହାଦ୍ଦୁସ୍ ଆଲାର୍‌ଘି ହେଖ୍ଖାନୁ ଧାର୍‌ତାଚା କୋସ୍; ²³ଆବ୍ଡ଼ାର୍ ଆସିନ୍ ପିଟର୍, ଆରୁ ଆସ୍ ତିନ୍ ଦିନ୍‌ନୁ ଉଜ୍ଜସ୍‌କସ୍।” ଇବନ୍ ମେନିକିରି ଚେଲାଜାମାର୍ ବହୁତ୍‌ ଦୁଃଖୁ ମାନ୍‌ଚାର୍ କେରାର୍।

ୟାହୁଦୀ ମନ୍ଦିର୍‌ଘି ଲାଗାନ୍ ମାଲ୍‌ଗୁଜାରୀ ଚିନା

²⁴ଯେତ୍‌କବାକେନ୍ ଯୀଶୁସ୍ ତାଙ୍ଘା ଚେଲାର୍‌ଗାନେ କାଫାର୍‌ନାହୁମ୍ ସହର୍‌ଗେ ଆଣ୍‌ସିୟାସ୍ ତା, ମନ୍ଦିର୍‌ତା ମାଲ୍‌ଗୁଜାରୀ ଉକ୍‌ରୁ ଆଲାର୍ ପାତ୍ରାସ୍‌କି ଚାହାଗେ ବାରିକିରି ମେନ୍‌ଚାର୍, “ନିହ୍ମା ଗୁରୁସ୍ ମନ୍ଦିର୍‌ଗେ ମାଲ୍‌ଗୁଜାରୀ ମା ଚିଦାସ୍ କାଁଏ?” ²⁵ଆସ୍ ତେଙ୍ଗିୟାସ୍, “ହଁ, ଚିଦାସ୍।” ଯେତ୍‌କବାକେନ୍ ପାତ୍ରାସ୍ ଆଡ଼୍‌ପାଗେ ବାର୍‌ଚାସ୍ ତା, ଯୀଶୁସ୍ ଆସିନ୍ ପହ୍‌ଲେ ତେଙ୍ଗିୟାସ୍, “ହେ ଶିମୋନ୍, ନିନ୍ ଏନ୍ଦେର୍ ସୋଚ୍‌ଦାଏ? ଦୁନିଆଁନ୍ତା ରାଜାଜାମାର୍ ନେଖାସ୍ତି ମାଲ୍‌ଗୁଜାରୀ ହୋନାଏ? ନିଜର୍ ହାଦ୍ଦୁର୍‌ସ୍‌ତିକା ପର୍‌ଦେଶୀୟାର୍‌ସ୍‌ତି?” ²⁶ପାତ୍ରାସ୍ ଯୀଶୁସିନ୍ ଯାବାବ୍ ଚିଚ୍ଚାସ୍, “ପର୍‌ଦେଶୀୟାର୍‌ସ୍‌ତି।” ଆଙ୍ଗେନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ତା ହାଦ୍ଦୁର୍ ମାଲ୍‌ଗୁଜାରୀ ଚିନାନ୍‌ତି ବାଛ୍‌ରାର୍ କେରାର୍। ²⁷ନାମ୍ ଆବ୍ଡ଼ାର୍‌ଘି ରୋକ୍‌ଟୋକ୍‌ଘି କାରଣ୍ ମା ମାନତ୍, ଆଦ୍‌ଘି ଲାଗାନ୍ ନିନ୍ ହଁସ୍‌ରା ଖାଁଣିଗେ କାଇକିରି ବାନ୍‌ଶି ଆଚ୍ଛା, ଆରୁ ପହ୍‌ଲେ ଏକା ଇଞ୍ଜୋ ବାଝ୍‌ରୋ, ଆ ଇଞ୍ଜୋଘି ଥୁମ୍‌ଣାନ୍ ଆଙ୍ଗ୍‌ଲ୍‌ତୟ ହାଲେ ଅଣ୍ଟା ରୂପା ପାଏସା ହାଖ୍ଖୟ, ଆବନ୍ ହୋଇକିରି ଏଙ୍ଘା ତାର୍‌ତି ଆରୁ ନିହ୍ମା ତାର୍‌ତି ଆବ୍ଡ଼ାର୍‌ଗେ ଚିଆ।”

ସରଗ୍ ରାଜୀନୁ ନେଦ୍ ବାଡ଼୍‌କାର୍

(ମାର୍‌କୁସ୍ ୯:୩୩-୩୭; ଲୁକାସ୍ ୯:୪୬-୪୮)

¹ହତ୍‌କବାକେନ୍ ଚେଲାର୍ ଯୀଶୁସ୍‌କି ଚାହାଗେ ବାରିକିରି ମେନାଗେ ଲାଗ୍ଗିୟାର୍, “ସରଗ୍ ରାଜୀନୁ ନେଦ୍ ଜାମାର୍‌ଘିନ୍ତି ବାଡ଼୍‌କାର୍?” ²ଆଙ୍ଗେନ୍ ଆସ୍ ଅଣ୍ଟା ଛୋଟେ ହାଦ୍ଦୁସିନ୍ ଚାହାଗେ ମେଁହିୟାସ୍ ଆରୁ ଆବ୍ଡ଼ାର୍‌ଘି ମାଝାନୁ ଇଲ୍‌ତିକିରି ତେଙ୍ଗିୟାସ୍, ³“ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍, ଯଦି ନିମ୍ ଆରୁଅହନ୍ କିର୍‌ରିକିରି ଇ ଛୋଟେ ହାଦ୍ଦୁର୍ ଲେଖା ମା ମାନର୍ ତା, ନିମ୍ ସରଗ୍ ରାଜୀନୁ କରା ପଲ୍ଲଦାରିନ୍। ⁴ନେଦିନ୍ ନିଜେ ଇ ହାଦ୍ଦୁସ୍‌କି ଲେଖା ନିଜ୍‌କେବନ୍ ନରମ୍ କାମର୍, ଆବ୍ଡ଼ାର୍ ସରଗ୍ ରାଜୀନୁ ଜାମାର୍‌ଘିନ୍ତି ବାଡ଼୍‌କା ମାନର୍। ⁵ଆରୁ ନେଦିନ୍ ଏଙ୍ଘା ନାମେତି ଏନ୍ନେ ଅଣ୍ଟା ଛୋଟେ ହାଦ୍ଦୁସିନ୍ ଗ୍ରହନ୍ କାମ୍‌ନାଏ ଆବ୍ଡ଼ାର୍ ଏଙ୍ଗାନ୍ ଗ୍ରହନ୍ କାମ୍‌ନାଏ।”

ପାପ୍ କାମ୍‌ନାଘି ପରୀକ୍ଷା

(ମାର୍‌କୁସ୍ ୯:୪୨-୪୮; ଲୁକାସ୍ ୧୭:୧,୨)

⁶“ଲେକିନ୍ ନେଦିନ୍ ଏଙ୍ଗାନ୍ ବିଶ୍ଵାସ୍ କାମ୍‌ନାବାଲାର୍ ଏଙ୍ଘାଏ ଏକ୍ରିନ୍ ଏନ୍ନେ ନରମ୍ ସେବକ୍‌ସ୍‌କି ପାବୁଘି ରୋକ୍‌ଟୋକ୍ ମାନ୍‌ଦାସ୍ ତା, ବାନେ ମାନକା ଆସ୍‌କି ହଁଟନୁ ଅଣ୍ଟା ଜାତ୍‌ରି ଚାଁଚାନ୍ ଟାଙ୍ଗିକିରି ଆସିନ୍ ସାମ୍‌ଧୁର୍‌ଘି ଗାଡ୍ଡିନୁ ମୁହ୍ଲଥାଚିଆକୋ। ⁷ନେଦିନ୍ ଦୁସ୍‌ରାରିନ୍ ପାପ୍ କାମ୍‌ତାନାଏ ଆବ୍ଡ଼ାର୍‌ଗେ ପାର୍‌ମେଶ୍ୱାର୍‌ସ୍ ଦଣ୍ଡ୍ ଚିୟସ୍, ପାପ୍ କାମ୍‌ନାଘି ବିଚାର୍ ଆଲାର୍‌ଘି ମନ୍‌ନୁ ଜରୁର୍ ବାରଦ୍ ଲେକିନ୍ ନେଦିନ୍ ଦୁସ୍‌ରାରିନ୍ ପାପ୍ କାମ୍‌ତାନାଏ ଆବ୍ଡ଼ାରିନ୍ ପାର୍‌ମେଶ୍ୱାର୍‌ସ୍ ବହୁତ୍ ଦଣ୍ଡ୍ ଚିୟସ୍।”

⁸“ଯଦି ନିହ୍ମା ହେଖ୍ଖା ଚାହେ ନିହ୍ମା ପାଦୁଦ୍ ନିହ୍ମା ଲାଗାନ୍ ପାପ୍‌ଘି କାରଣ୍ ମାନଦ୍‌ତା ଆବନ୍ ଛୋପିକିରି ଖେବ୍ଡ଼ାଚା; ଯୋଡ଼େ ହେଖ୍ଖା ଆରୁ ଯୋଡ଼େ ହେଡ୍ଡୁ ରାଇକିରି ମା ତେବ୍‌ର୍‌ନା ଚିଚ୍ଚୁନୁ ଖେବ୍‌ଡ଼୍‌ନା ସତ୍ତୁ ଲୁହ୍ଲା ଚାହେ ଲେଙ୍ଗ୍‌ଡ଼ା ରାଇକିରି ସବୁଦିନ୍‌ତା ଜୀବନ୍‌ନୁ କର୍‌ନା ନିହ୍ମା ଲାଗାନ୍ ବାନେଦ୍। ⁹ଯଦି ନିହ୍ମା ହାନ୍ନୁଦ୍ ନିହ୍ମା ଲାଗାନ୍ ପାପ୍‌ଘି କାରଣ୍ ମାନଦ୍‌ତା, ଆବନ୍ ଅଥ୍‌ରିକିରି ଖେବ୍ଡ଼ାଚା; ଯୋଡ଼େ ହାନ୍ନୁ ରାଇକିରି ନରକ୍‌ଘି ଚିଚ୍ଚୁନୁ ଖେବ୍‌ଡ଼୍‌ନା ସତ୍ତୁ ନିହ୍ମା ଲାଗାନ୍ ବାନେ ମାନଦ୍‌ନେ କା ନିମ୍ ଅଣ୍ଟା ହାନ୍ନୁ ରାଇକିରି ସବୁଦିନ୍‌ତା ଜୀବନ୍‌ନୁ କରର୍।”

ଏଫ୍‌ସ୍‌ର୍‌କା କେର୍‌କା ଭେଡ଼ିଘି ନମୁନା

(ଲୁକାସ୍ ୧୫:୩-୭)

¹⁰“ଏରା, ନିମ୍ ଇବ୍ଡ଼ା ଛୋଟେର୍‌ସ୍‌ତି ଅର୍‌ତୁରିନ୍‌ହି ତୁଚ୍ଛ ଆମ୍‌କେ ସୋଚା, ଏନ୍ଦେର୍‌ଗେକା ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ସରଗ୍ ରାଜୀନୁ ଆବ୍ଡ଼ାର୍‌ଘି ଦୂଁତ୍‌ଜାମାର୍ ଜାମାବାକେନ୍ ଏଙ୍ଘା ସରଗ୍‌ତା ବାଙ୍ଗ୍‌ସ୍‌କି ଚେହେରାବନ୍ ଏର୍‌ନାଏ। ¹¹[ଏନ୍ଦେର୍‌ଗେକା ଏକାଦ୍ ଏଫ୍‌ସ୍‌ରା କେର୍‌କିଚି, ଆବନ୍ ବାଛାବାଗେ ମୁନୁଷ୍ ହାଦ୍ଦୁସ୍ ବାର୍‌ଚ୍‌କାଦାସ୍।]”

¹²“ନିମ୍ ଏନ୍ଦେର୍ ସୋଚ୍‌ଦାର୍? ଯଦି ଅଣ୍ଟା ଆଲାସ୍‌କି ଶୋଏଟା ଭେଡ଼ି ରାଇ, ଆରୁ ଆନ୍ନୁନ୍ତି ଅଣ୍ଟାଦ୍ ଏଫ୍‌ସ୍‌ରି କାଇଦ୍ ତା, ଆସ୍ କାଁଏ ଅନେଶ୍ଵତ୍ ଭେଡ଼ିବନ୍ ପାର୍ତ୍ତା ମିଆଁ ଆମ୍ବିକିରି ଆ ଏଫ୍‌ସ୍‌ର୍‌କା ଭେଡ଼ିବନ୍ ମା ବେଦ୍ଦସ୍? ¹³ଆରୁ ଯଦି ଆସ୍ ଆ ଭେଡ଼ିବନ୍ ହାଖ୍ଖସ୍ ତା, ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ଆସ୍ ଏଫ୍‌ସ୍‌ର୍‌କା ଭେଡ଼ିବନ୍ ହାକ୍କାନ୍ତି, ଯେତ୍‌କ ଖୁସୀ ମାନସ୍ ଇ ଅନେଶ୍ଵତ୍ ଭେଡ଼ିଘି ଲାଗାନ୍ ଏକାଦ୍ କା ମାଲ୍ଲା ଏଫ୍‌ସ୍‌ରୁଦ୍, ହତ୍‌କ ଖୁସୀ ମା ମାନ୍‌ଦାସ୍। ¹⁴ହନ୍ନେନ୍ ନିହ୍ମା ସରଗ୍‌ତା ବାଙ୍ଗ୍‌ସ୍‌ ମା ଚାହଁଦାସ୍ କା ଇବ୍ଡ଼ା ଛୋଟେର୍‌ସ୍‌ତି ଅର୍‌ତୁହି ମା ଭାଟ୍‌କାରର୍।”

ଦୋଷୀଦାର୍ ଭାଇସିନ୍ ସୁଧ୍‌ରାନା

¹⁵“ଯଦି ନିଙ୍ଘା ଭାଇସ୍ ନିଙ୍ଘା ବିରୁଦ୍ଧ୍‌ନୁ ଏନ୍ଦ୍ରିନ୍ ଦୋଷ୍ କାମସ୍‌ତା, କାଲା ଆରୁ ନିନ୍ ଅଥାଏ ଆସିନ୍ ବୁଝାବା; ଆରୁ ଯଦି ଆସ୍ ନିଙ୍ଘା କାତ୍‌ଥାନ୍ ମେନସ୍ ତା ନିନ୍ ନିଙ୍ଘା ଭାଇସିନ୍ ହାଖ୍ଖୟ। ¹⁶ଲେକିନ୍ ଯଦି ଆସ୍ ନିଙ୍ଘା କାତ୍‌ଥାନ୍ ମା ମେନସ୍ ତା, ନିଙ୍ଘାଗାନେ ଅର୍‌ତୁ ମାଲ୍ଲାହାଲେ ଦୁଇ ଲୋକ୍‌ରିନ୍ ହୁଆ, ଏସ୍‌କେ କା ‘ଦୁଇ ଲୋକ୍ ଚାହେ ତିନ୍ ଲୋକ୍‌ର୍‌ଘି ସାକ୍ଷୀତି ଜାମା କାତ୍‌ଥାନ୍ ସ୍ଥିର୍ କାମାକୋ।’ ¹⁷ଆରୁ ଯଦି ଆସ୍ ଆବ୍ଡ଼ାର୍‌ଘି କାତ୍‌ଥାବନ୍ ମା ମେନସ୍ ତା, ମଣ୍ତ୍‌ଲୀବନ୍ ତେଙ୍ଗା, ଆରୁ ଯଦି ଆସ୍ ମଣ୍ତ୍‌ଲୀଘି କାତ୍‌ଥାନ୍‌ହି ମା ମେନସ୍ ତା ନିନ୍ ଆସିନ୍ ଦୁସ୍‌ରା ଜାତିୟାର୍ ଆରୁ ମାଲ୍‌ଗୁଜାରୀ ଉକ୍‌ରୁସ୍ ଲେଖା ସୋଚା।”

ଏକ୍‌ଜୁଟ୍ ମାନିକିରି ବିନ୍ତି କାମ୍‌ନା

¹⁸“ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ନିମ୍ ଦୁନିଆଁନୁ ଏକାନ୍ ବନ୍ଦ୍ କାମର୍, ସରଗ୍‌ନୁ ଆବ୍ଡ଼ା ଜାମାଦ୍ ବନ୍ଦ୍, ଆରୁ ଦୁନିଆଁନୁ ଏକାନ୍ ନିମ୍ ଖୋଲର୍ ସରଗ୍‌ନୁହି ଆବ୍ଡ଼ାଦ୍ ଖୋଲ୍‌ରଦ୍। ¹⁹ଆରୁ ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ଦୁନିଆଁନୁ ଯଦି ନିହ୍ମା ଭିତର୍‌ନୁ ଦୁଇ ଲୋକ୍ ଏକ୍‌ମତ୍ ମାନିକିରି ଏନ୍ଦ୍ରିନ୍‌ହି ନିଅର୍, ହାଲେ ଏଙ୍ଘା ସରଗ୍‌ତା ବାଙ୍ଗ୍‌ସ୍‌କି ତାର୍‌ତି ଆଦ୍ ଆବ୍ଡ଼ାର୍‌ଗେ ହାଖ୍‌ରୋ। ²⁰ଏନ୍ଦେର୍‌ଗେକା ଏକାସାନ୍ ଏଙ୍ଘା ନାମେନୁ ଦୁଇ ଚାହେ ତିନ୍ ଲୋକ୍ ଠୁଡ଼ିୟାରାନାଏ, ଆସାନ୍ ଏନ୍ ଆବ୍ଡ଼ାର୍‌ଘି ମାଝାନୁ ରାଦାନ୍।”

ଛେମା ମା ଚିଉ ଅଣ୍ଟା ଗୁତ୍ତିୟାସ୍‌କି ନମୁନା

²¹ହତ୍‌କବାକେନ୍ ପାତ୍ରାସ୍ ଯୀଶୁସ୍‌କି ଚାହାଗେ ବାରିକିରି ଆସିନ୍ ମେନ୍‌ଚାସ୍, “ହେ ପ୍ରାଭୁ, ଯଦି ଏଙ୍ଘା ଭାଇସ୍ ଏଙ୍ଘା ବିରୁଦ୍ଧ୍‌ନୁ ଦୋଷ୍ କାମସ୍‌ତା, ଏନ୍ ଆସିନ୍ ୟୋଁଥର୍ ଛେମା କାମନ୍? ସାତ୍‌ଥର୍‌ତକ୍ କାଁଏ?” ²²ଯୀଶୁସ୍ ଆସିନ୍ ତେଙ୍ଗିୟାସ୍, “ଏନ୍ ନିଙ୍ଗାନ୍ ଏନ୍ନେ ମାଲ୍ଲା ତେଙ୍ଗୁନ୍ କା ସାତ୍‌ଥର୍‌ତକ୍ ଲେକିନ୍ ସତୁର୍ ଗୁଣା ସାତ୍‌ଥର୍‌ତକ୍।”

²³“ହୁଦ୍‌ଘିଲାଗାନ୍ ସରଗ୍ ରାଜୀଦ୍ ଆ ରାଜାସ୍ ଲେଖା, ଏକାସ୍ କା ତାଙ୍ଘା ଗୁତ୍ତିୟାର୍‌ସ୍‌ତି ହିସାବ୍ ହୁଆଗେ ବେଦ୍ଦିୟାସ୍। ²⁴ଯେତ୍‌କବାକେନ୍ ଆସ୍ ହିସାବ୍ ହୁଆଗେ ଲାଗ୍ଗିୟାସ୍‌ତା, ଦଶ୍‌ହାଜାର୍ ଉଧାର୍ ଅଚ୍ଚକା ଅଣ୍ଟା ଗୁତ୍ତିୟାସିନ୍ ତାଙ୍ଘା ଚାହାଗେ ଅନ୍ଦ୍ରାକେରା। ²⁵ଲେକିନ୍ ତାଙ୍ଘାସାନ୍ ଉଧାର୍ ଛୁଟାଗେ ଏନ୍ଦେର୍‌ହି ମାଲ୍ଲାରୁତା, ଆସ୍‌କି ମାଲିକ୍‌ସ୍ ତେଙ୍ଗିୟାସ୍, ‘ତାଙ୍ଗାନ୍ ଆରୁ ତାଙ୍ଘା ମାଏକିନିଆଁ ଆରୁ ତାଙ୍ଘା ହାଦ୍ଦୁବଚ୍ଚରିନ୍ ଆରୁ ତାଙ୍ଘାଏ ଯେତ୍‌କ ରାଇ ଆବନ୍ ବିଁଶିକିରି, ଏଙ୍ଘାଏ ଉଧାର୍‌ବନ୍ ଛୁଟାଚାକୋ।’ ²⁶ଆଙ୍ଗେନ୍ ଆ ଗୁତ୍ତିୟାସ୍ ଆ ମାଲିକ୍‌ସ୍‌କି ହେଡ୍ଡମୁଲିନୁ ଖାତ୍‌ରିକିରି ଆର୍‌ଜୀବିନ୍ତି କାମ୍‌ଚାସ୍, ଆରୁ ତେଙ୍ଗିୟାସ୍, ‘ହେ ମାଲିକ୍ ଧିରାଜ୍ ଧାରା, ଏନ୍ ଜାମାନ୍ ଛୁଟନ୍‌ଚିଅନ୍।’ ²⁷ଆଙ୍ଗେନ୍ ଆ ଗୁତ୍ତିୟାସ୍‌କି ମାଲିକ୍‌ସ୍ ଆସ୍‌କି ମିଆଁ ସୋଗ୍ଗେ କାମିକିରି ଆସିନ୍ ଆମ୍ବେଇଚାସ୍, ଆରୁ ଆସ୍‌କି ଉଧାର୍‌ବନ୍‌ହି ଛେମା କାମ୍‌ଚେଇଚାସ୍।”

²⁸“ଲେକିନ୍ ଯେତ୍‌କବାକେନ୍ ଆ ଗୁତ୍ତିୟାସ୍ ବାହ୍‌ରି ଉର୍‌ଖିୟାସ୍ ତା, ତାଙ୍ଘା ସାଙ୍ଗେସିନ୍ ଅଣ୍ଟା ହାଖ୍ଖୀୟାସ୍ ଏକାସ୍ କା ତାଙ୍ଘାସ୍ତି ଶୋଏ ରୂପିୟା ଉଧାର୍ ଅଚ୍ଚକାଚାସ୍; ଆସ୍ ଆସିନ୍ ଧାର୍‌ଚାସ୍ ଆରୁ ହଁଟନ୍ ପେଧିକିରି ତେଙ୍ଗିୟାସ୍, ‘ଯେତ୍‌କ ଉଧାର୍ ରାଇ ଆବନ୍ ଛୁଟାଚା।’ ²⁹ଆଙ୍ଗେନ୍ ଆସ୍ ଆସ୍‌କି ହେଡ୍ଡମୁଲିନୁ ଖାତ୍‌ରିକିରି ଆର୍‌ଜୀବିନ୍ତି କାମାଗେ ଲାଗ୍ଗିୟାସ୍, ‘ଧିରାଜ୍ ଧାରା, ଏନ୍ ନିଙ୍ଘାଏ ଜାମାନ୍ ଛୁଟନ୍‌ଚନ୍।’ ³⁰ଲେକିନ୍ ଆସ୍ ରାଜୀ ମା ମାନ୍‌ଚାସ୍, ଆରୁ କାଇକିରି ଆସିନ୍ ଉଧାର୍ ମା ଛୁଟ୍‌ନାତକ୍, ଜେହେଲ୍‌ନୁ ଗୁଡ୍ଡେଇଚାସ୍। ³¹ଆସ୍‌କି ସାଙ୍ଗେର୍ ଇ ଘାଟ୍‌ଣାନ୍ ଏରିକିରି ମୁରୁକ୍ ଦୁଃଖୁ ମାନ୍‌ଚାର୍, ଆରୁ କାଇକିରି ତାହ୍ମା ମାଲିକ୍‌ସିନ୍ ଜାମା କାତ୍‌ଥାନ୍ ତେଙ୍ଗିୟାର୍।”

³²“ଆଙ୍ଗେନ୍ ଆସ୍‌କି ମାଲିକ୍‌ସ୍ ଆସିନ୍ ମେହିଁକିରି ତେଙ୍ଗିୟାସ୍, ‘ହେ ବଦ୍‌ମାସ୍ ଗୁତ୍ତିଆୟ, ନିନ୍ ଏଙ୍ଗାନ୍ ଆର୍‌ଜୀବିନ୍ତି କାମ୍‌ଚ୍‌କାଏ, ଆଙ୍ଗେନ୍ ଏନ୍ ନିଙ୍ଘାଏ ଜାମା ଉଧାର୍‌ବନ୍ ଛେମା କାମ୍‌ଚେଇଚ୍‌କାନ୍। ³³ହୁଦ୍‌ଘିଲାଗାନ୍ ଏନ୍ ଏସ୍‌କେ ନିଙ୍ଘା ମିଆଁ ଦାୟା କାମ୍‌ଚ୍‌କାନ୍, ହନ୍ନେନ୍ ନିଙ୍ଗା କାଁଏ ନିଙ୍ଘା ସାଙ୍ଗେ ଗୁତ୍ତିୟାସିନ୍ ଦାୟା କାମ୍‌ନା ଉଚିତ୍ ମାଲ୍ଲାରୁଦ୍?’ ³⁴ଆରୁ ଆସ୍‌କି ମାଲିକ୍‌ସ୍ ଖୀସାରାଇକିରି ଜାମା ଉଧାର୍‌ବନ୍ ମା ଛୁଟ୍‌ନାତକ୍, ଆସିନ୍ ଦଣ୍ଡ୍‌ଚିଉ ଆଲାର୍‌ଘି ହେଖ୍ଖାନୁ ସୋଁପ୍‌ଚେଇଚାସ୍।”

³⁵“ହନ୍ନେନ୍ ଯଦି ନିହ୍ମା ଭିତର୍‌ନୁ ଜାମାର୍ ନିଜର୍ ଭାଇସିନ୍ ମନ୍‌ତି ଛେମା ମା କାମର୍ ହାଲେ, ଏଙ୍ଘା ସରଗ୍‌ତା ବାଙ୍ଗ୍‌ସ୍‌ହି ନିହ୍ମାଗାନେ ହନ୍ନେନ୍ କାମସ୍।”

ଛାଡ଼୍‌ପତର୍‌ଘି ବାରେନୁ ଯୀଶୁସ୍ ଉପ୍‌ଦେଶ୍ ଚିଆଲ୍‌ଦାସ୍

(ମାର୍‌କୁସ୍ ୧୦:୧-୧୨)

¹ଯେତ୍‌କବାକେନ୍ ଯୀଶୁସ୍ ଇବ୍ଡ଼ା ଜାମା କାତ୍‌ଥାନ୍ ତେଙ୍ଗା ମୁଞ୍ଜିୟାସ୍ ତା, ଆସ୍ ଗାଲିଲୀନ୍‌ନ୍ତି ବୁଙ୍ଗିୟାସ୍; ଆରୁ ଯାର୍‌ଦାନ୍ ଯୋଡ଼ୁଘି ହାପାଖ୍‌ତା ୟାହୁଦା ପ୍ରଦେଶ୍‌ଗେ କେରାସ୍। ²ଆରୁ ଢେର୍ ଆଲାର୍ ତାଙ୍ଘା ପାଛ୍‌ଲି-ପାଛ୍‌ଲି କେରାର୍, ଆରୁ ଆସ୍ ଆସାନ୍ ଆବ୍ଡ଼ାରିନ୍ ବାନେ କାମ୍‌ଚାସ୍।

³ଆଙ୍ଗେନ୍ ଫାରିସୀଜାମାର୍ ଯୀଶୁସ୍‌କି ଚାହାଗେ ବାରିକିରି ତାଙ୍ଗାନ୍ ବିଡ଼୍‌ଚେ ଏରାଗେ ତେଙ୍ଗିୟାର୍, “ଏନ୍ଦ୍ରିନ୍ କାରଣ୍‌ତି ନିଜର୍ ମାଏକିନିଆଁନ୍ ଆମ୍ବନାଦ୍ ଠିକ୍‌ଦ୍‌ କାଁଏ?” ⁴ଯୀଶୁସ୍ ଯାବାବ୍ ଚିଚ୍ଚାସ୍, “ପାବିତାର୍ ଶାସ୍ତ୍ରନୁ ଏକାଦ୍ ଲେଖ୍‌ଚ୍‌କା ରାଇ ଆବନ୍ ନିମ୍ ମାଲ୍ଲା ପାଢ଼ୁର୍ କାଁଏ କା ସୃଷ୍ଟି କାମୁସ୍ ପହ୍‌ଲେନ୍‌ନ୍ତିନ୍ ଆବ୍ଡ଼ାରିନ୍ ମାର୍‌ଦ୍‌ନା ଆରୁ ମାଏକିନିଆଁନ୍ କାମ୍‌ଚାସ୍,

⁵ଆରୁ ତେଙ୍ଗିୟାସ୍, ‘ଇଦ୍‌ଘିଲାଗାନ୍ ମାର୍‌ଦ୍‌ନାସ୍ ନିଜର୍ ଆୟାଙ୍ଗ୍ ବାଙ୍ଗ୍‌ର୍‌ସ୍‌ତି ଭିନେ ମାନିକିରି ନିଜର୍ ମାଏକିନିଆଁଗାନେ ରସ୍, ଆରୁ ଆବ୍ଡ଼ାର୍ ଦୁହି ଲୋକ୍ ଅଣ୍ଟା ମେଦୁ ମାନର୍‌କର୍।’ ⁶ହନ୍ନେନ୍ ଆବ୍ଡ଼ାର୍ ଦୁଇ ଲୋକ୍ ମାଲ୍ଲା, ଲେକିନ୍ ଅଣ୍ଟା ଆଲ୍ ଲେଖା ମାନ୍ନାଏକାନାଏ। ହୁଦ୍‌ଘିଲାଗାନ୍ ପାର୍‌ମେଶ୍ଵାର୍‌ସ୍ ନେକାନ୍ ଯୋଡ଼୍‌କାଦାସ୍, ଆବ୍ଡ଼ାରିନ୍ ଆଲାର୍ ଭିନେ ମା କାମ୍‌ନାକାତ୍‌ଥା।” ⁷ଫାରିସୀଜାମାର୍ ଯୀଶୁସିନ୍ ତେଙ୍ଗିୟାର୍, “ହାଲେ ମୁଶା ନାବୀସ୍ ଏନ୍ଦେର୍‌ଗେ ଛାଡ଼୍‌ପତର୍ ଚିଇକିରି ନିଜର୍ ମାଏକିନିଆଁନ୍ ଆମ୍ବାଗେ ହୁକୁମ୍ ଚିଚ୍ଚାସ୍?” ⁸ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ମୁଶା ନାବୀସ୍ ନିହ୍ମା ମନ୍‌ତା କାଠୋର୍‌ବନ୍ ଏରିକିରି ନିମାନ୍ ନିଜର୍-ନିଜର୍ ମାଏକିନିଆଁନ୍ ଆମ୍ବାଗେ ଛୁଟି ଚିଚ୍ଚାସ୍, ଲେକିନ୍ ପହ୍‌ଲେନ୍‌ନ୍ତି ଏନ୍ନେ ମାଲ୍ଲାରୁଦ୍। ⁹ଲେକିନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ କା, ନେଦିନ୍ ନିଜର୍ ମାଏକିନିଆଁଘି ବେଭିଚାର୍‌ବନ୍ ଆମ୍ବିକିରି ଆରୁ ଦୁସ୍‌ରା ଏନ୍ଦ୍ରିନ୍‌ଘି ଲାଗାନ୍ ଆମ୍ବର୍‌ଚର୍ ଆରୁ ନାନ୍ନା ମାଏକିନିଆଁଗାନେ ରର୍‌ତା, ଆସ୍ ବେଭିଚାର୍ କାମ୍‌ଦାସ୍! (ଆରୁ ନେଦ୍ ଆମ୍ବକା ମାଏକିନିଆଁବନ୍ ବେଞ୍ଜର୍‌ନାଏ, ଆବ୍ଡ଼ାର୍‌ହି ବେଭିଚାର୍ କାମ୍‌ନାଏ।”)

¹⁰ଚେଲାଜାମାର୍ ଯୀଶୁସିନ୍ ତେଙ୍ଗିୟାର୍, “ଯଦି ମାର୍‌ଦ୍‌ନାସ୍‌କି ମାଏକିନିଆଁଗାନେ ଏନ୍ନେ ସମ୍ଵନ୍ଧ୍ ରାଇ ତା, ବେଞ୍ଜର୍‌ନାଦ୍ ବାନେ ମାଲ୍ଲିଦ୍।” ¹¹ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଇ ବଚନ୍‌ବନ୍ ଜାମାର୍ ଗ୍ରହନ୍ କାମା ପଲ୍ଲନାଏ, ଖାଲି ଆବ୍ଡ଼ାର୍ ଏକାର୍‌ଗେକା ଇବ୍ଡ଼ାନ୍ ଗ୍ରହନ୍ କାମ୍‌ନାଘି ବାର୍‌ଦାନ୍ ଚିଆ କେର୍‌କିଚି। ¹²ଏନ୍ଦେର୍‌ଗେକା ନେଦ୍-ନେଦ୍ ଆୟାଙ୍ଗ୍‌ଘି ଗରଭ୍‌ନ୍ତି ଗାୟା ମାନିକିରି ଜନମ୍ ମାନ୍ନାଏ; ଆରୁ ନେକା-ନେକାନ୍ ଆଲାର୍ ଗାୟା ବାନାବାନାଏ, ୧୯:୧୨ ଆରୁ ନେଦ୍-ନେଦ୍ ସରଗ୍ ରାଜୀଘି ଲାଗାନ୍ ନିଜ୍‌କେନିଜ୍ ନପୁଂସକ୍ କାମ୍‌ଚ୍‌କାନାଏ। ଆରୁ ନେଦ୍-ନେଦ୍ ସରଗ୍ ରାଜୀଘି ଲାଗାନ୍ ମା ବେଞ୍ଜରାଗେ ସ୍ଥିର୍ କାମ୍‌ନାଏ, ନେଦ୍ ଇବନ୍ ଗ୍ରହନ୍ କାମା ଅଙ୍ଗର୍ ଆବ୍ଡ଼ାର୍ ଗ୍ରହନ୍ କାମର୍।”

ଯୀଶୁସ୍ ଛୋଟେ ହାଦ୍ଦୁରିନ୍ ଆଶୀର୍ବାଦ୍ ଚିଦାସ୍

(ମାର୍‌କୁସ୍ ୧୦:୧୩-୧୬; ଲୁକାସ୍ ୧୮:୧୫-୧୭)

¹³ହତ୍‌କବାକେନ୍ ଆଲାର୍ ହାଦ୍ଦୁରିନ୍ ଯୀଶୁସ୍‌କି ଚାହାଗେ ଅନ୍ଦରାର୍ ଏନ୍ଦେର୍‌ଗେକା ଆସ୍ ଆବ୍ଡ଼ାର୍‌ଘି ମିଆଁ ହେଖ୍ଖା ଉଇକିରି ବିନ୍ତି କାମସ୍, ଲେକିନ୍ ଚେଲାଜାମାର୍ ଆବ୍ଡ଼ାରିନ୍ ଧାମ୍‌କାଚାର୍। ¹⁴ଲେକିନ୍ ଯୀଶୁସ୍ ତେଙ୍ଗିୟାସ୍, “ହାଦ୍ଦୁରିନ୍ ଏଙ୍ଘା ଚାହା ବାରାଗେ ଚିଆ, ଆରୁ ଆବ୍ଡ଼ାରିନ୍ ମାନା ଆମା କାମା, ଏନ୍ଦେର୍‌ଗେକା ସରଗ୍ ରାଜୀଦ୍ ଏନ୍ନେ ଆଲାର୍‌ଘିଦ୍।” ¹⁵ଆରୁ ଆସ୍ ଆବ୍ଡ଼ାର୍‌ଘି ମିଆଁ ହେଖ୍ଖା ଉଇୟାସ୍ ଆରୁ ଆସ୍‌ତି ବୁଙ୍ଗିୟାସ୍ କେରାସ୍।

ଅଣ୍ଟା ଧନୀ କୁକ୍କୋସ୍

(ମାର୍‌କୁସ୍ ୧୦:୧୭-୩୧; ଲୁକାସ୍ ୧୮:୧୮-୩୦)

¹⁶ଅଣ୍ଟା କୁକ୍କୋସ୍ ଯୀଶୁସ୍‌କି ଚାହାଗେ ବାରିକିରି ମେନ୍‌ଚାସ୍, “ହେ ଗୁରୁ, ସବୁଦିନ୍‌ତା ଜୀବନ୍ ହାଖ୍ଖାଗେ ଏନ୍ ଏନ୍ଦେର୍ ବାନେ ନାଲ୍‌ଖୁ କାମନ୍?” ¹⁷ଯୀଶୁସ୍ ଆସିନ୍ ତେଙ୍ଗିୟାସ୍, “ନିନ୍ ଏଙ୍ଗାନ୍ ଭାଲାଇଘି ବାରେନୁ ଏନ୍ଦେର୍‌ଗେ ମେନାଲ୍‌ଦାଏ? ଭାଲାଇ କାମୁସ୍ ଖାଲି ଅର୍‌ତୁସ୍ ରାଦାସ୍, ଲେକିନ୍ ନିନ୍ ଯଦି ସବୁଦିନ୍‌ତା ଜୀବନ୍‌ନୁ କରାଗେ ବେଦ୍ଦାଲ୍‌ଦାଏତା ପାର୍‌ମେଶ୍ୱାର୍‌ସ୍‌କି ନିୟମ୍‌ଗୁଠିନ୍ ମାନା।” ¹⁸ଆସ୍ ଯୀଶୁସିନ୍ ମେନ୍‌ଚାସ୍, “ଏନ୍ଦେର୍-ଏନ୍ଦେର୍ ନିୟମ୍?” ଯୀଶୁସ୍ ତେଙ୍ଗିୟାସ୍, “ଇବ୍ଡ଼ା ଜାମାଦ୍ କା,

ଆମା ପିଟା, ବେଭିଚାର୍ ଆମା କାମା, ଆମାହାଡ଼ା, ଝୁଟ୍ଟୁ ସାକ୍ଷୀ ଆମା ଚିଆ,

¹⁹ନିଜର୍ ଆୟାଙ୍ଗ୍-ବାଙ୍ଗ୍‌ରିନ୍ ଆଦର୍‌ମାଇନ୍ କାମା ଆରୁ ନିଜର୍ ପାଡ଼ୋଶୀରିନ୍ ନିଜର୍ ଲେଖା ବାନେ ହାଖ୍ଖା।” ²⁰ଆ କୁକ୍କୋସ୍ ଯୀଶୁସିନ୍ ତେଙ୍ଗିୟାସ୍, “ଇବ୍ଡ଼ା ଜାମାନ୍ ଏନ୍ ମାନାଲ୍‌ଦାନ୍; ଆରୁ ଏଙ୍ଘାଏନୁ ଏନ୍ଦେର୍ କାତ୍‌ଥାଘି ଘାଟି ରାଇ?” ²¹ଯୀଶୁସ୍ ଆସିନ୍ ତେଙ୍ଗିୟାସ୍, “ଯଦି ନିନ୍ ସିଦ୍ଧ୍ ମାନାଗେ ବେଦ୍ଦାଲ୍‌ଦାଏତା କାଲା ଆରୁ ନିଙ୍ଘାଏ ଜାମା ସମ୍ପତ୍ତିବନ୍ ବିଁଶିକିରି ଗରୀବ୍ ଆଲାର୍‌ଗେ ଦାନ୍ ଚିଆଲାଗା ଆରୁ ଏଙ୍ଘା ପାଛ୍‌ଲି ବାରାତା ନିଙ୍ଗାଗେ ସରଗ୍‌ନୁ ଧାନ୍ନୁ ହାଖ୍ଖର।” ²²ଲେକିନ୍ ଆ କୁକ୍କୋସ୍ ଇ କାତ୍‌ଥାନ୍ ମେନ୍‌ଚାସ୍ ଆରୁ ଦୁଃଖୁ ମାନିକିରି ବୁଙ୍ଗେଇଚାସ୍, ଏନ୍ଦେର୍‌ଗେକା ଆସ୍ ମୁରୁକ୍ ଧାନ୍ନୁବାଲା ରାଚାସ୍।

²³ଆଙ୍ଗେନ୍ ଯୀଶୁସ୍ ତାଙ୍ଘା ଚେଲାରିନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ଧନୀ ଆଲାର୍‌ଗେ ସରଗ୍ ରାଜୀନୁ କର୍‌ନା ବହୁତ୍ କଠିନ୍ ରାଇଦ୍। ²⁴ଏନ୍ ଇବନ୍‌ହି ତେଙ୍ଗ୍‌ଦାନ୍ କା ସୁଇଁଘି ଭଙ୍କାନ୍ତି ମାନିକିରି ଉଁଟ୍‌ଘି ପାର୍ ମାନ୍ନା ବାଗ୍ଗେ ସହଜ୍ ରାଇ, ଲେକିନ୍ ଧନୀ ଆଲାର୍‌ଗେ ପାର୍‌ମେଶ୍ଵାର୍‌ସ୍‌କି ରାଜୀନୁ କର୍‌ନା କଠିନ୍ ରାଇ।” ²⁵ଇବନ୍ ମେନିକିରି ଚେଲାଜାମାର୍ ମୁରୁକ୍ ଆଚ୍‌ମିତ୍ ମାନ୍‌ଚାର୍ କେରାର୍ ଆରୁ ତେଙ୍ଗିୟାର୍, “ହାଲେ ନେଦ୍ ବାଛ୍‌ରା ଅଙ୍ଗର୍?” ²⁶ଯୀଶୁସ୍ ଆବ୍ଡ଼ାରିନ୍ ଏକ୍ ନଜର୍ ଏରିକିରି ତେଙ୍ଗିୟାସ୍, “ଇଦ୍ ଆଲାର୍‌ଘି ଲାଗାନ୍ ମୁସ୍‌କିଲ୍‌ଦ୍, ଲେକିନ୍ ପାର୍‌ମେଶ୍ଵାର୍‌ସ୍‌କି ଲାଗାନ୍ ଜାମାଦ୍ ସମ୍ଭବଦ୍।” ²⁷ଆଙ୍ଗେନ୍ ପାତ୍ରାସ୍ ଯୀଶୁସିନ୍ ତେଙ୍ଗିୟାସ୍, “ଏରା, ଏମ୍ ଜାମାନ୍ ଆମ୍ବିକିରି ନିଙ୍ଘା ପାଛ୍‌ଲି ବାର୍‌ଚ୍‌କାଦାମ୍: ହାଲେ ଏମାଗେ ଏନ୍ଦେଦ୍ ହାଖ୍ଖରଦ୍?” ²⁸ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ପୁନା ଯୁଗ୍‌ନୁ ଯେତ୍‌କବାକେନ୍ ମୁନୁଷ୍ ହାଦ୍ଦୁସ୍ ନିଜର୍ ମାହିମାଘି ରାଜ୍‌ଗାଦୀନୁ ଅକ୍କସ୍, ହତ୍‌କବାକେନ୍ ନିମ୍ ଏଙ୍ଘା ପାଛ୍‌ଲି ବାର୍‌ଚ୍‌କାଦାର୍, ନିମ୍‌ହି ବାରଟା ରାଜ୍‌ଗାଦୀନୁ ଅକ୍କିକିରି ଇସ୍ରାଏଲ୍ ଜାମାର୍‌ଘି ବାର ବାଉଁଶାରିନ୍ ଶାସନ୍ କାମର୍। ²⁹ଆରୁ ନେଦିନ୍ ଏଙ୍ଘାଲାଗାନ୍ ଆଡ଼୍‌ପା, ଭାଇର୍, ଚାହେ ବୁହୁଣୀର୍, ଚାହେ ବୁଆ, ଚାହେ ଆୟାଙ୍ଗ୍, ଚାହେ ହାଦ୍ଦୁବଚ୍ଚ୍, ଚାହେ ହାଲ୍ଲୁ ଗଡ୍ଡାନ୍ ଆମ୍ବେଇଚ୍‌କାନାଏ, ହାଲେ ଆବ୍ଡ଼ାର୍‌ଗେ ଶୋଏ ଗୁଣ୍ ହାଖ୍ଖର, ଆରୁ ଆବ୍ଡ଼ାର୍ ସବୁଦିନ୍‌ତା ଜୀବନ୍‌ଘି ଅଧିକାରୀ ମାନର୍। ³⁰ଲେକିନ୍ ଢେର୍ ଆଲାର୍ ଏକାର୍ କା ଆଘ୍‌ଲି ରାନାଏ, ଆବ୍ଡ଼ାର୍ ପାଛ୍‌ଲି ମାନର୍‌କର୍; ଆରୁ ଏକାର୍ ପାଛ୍‌ଲି ରାନାଏ ଆବ୍ଡ଼ାର୍ ଆଘ୍‌ଲି ମାନର୍‌କର୍।”

ଅଙ୍ଗୁର୍ ବାଟ୍‌କିନ୍ ତା ମଜ୍‌ରୀୟାର୍‌ଘି ନମୁନା

¹“ସରଗ୍ ରାଜୀଦ୍ ଅଣ୍ଟା ଗାଉଁଟିୟାସ୍‌କି ଲେଖା, ଏକାସ୍ କା ଭୋର୍ ପାଇରି ମାନିଦ୍ କା ନିଜର୍ ଅଙ୍ଗୁର୍ ବାଟ୍‌କିନୁ ମଜ୍‌ରୀ ଲାଗାବାଗେ ମଜ୍‌ରୀୟାରିନ୍ ଅନ୍ଦ୍ରାଗେ ଉର୍‌ଖିୟାସ୍। ²ଆରୁ ଆସ୍ ମଜୁରୀୟାର୍‌ଗେ ଅନ୍ଦୁଲ୍‌ନୁ ଅନ୍ଦୁଲ୍ ତା ମଜ୍‌ରୀ ଚିୟାଗେ ଠିକ୍ କାମ୍‌ଚାସ୍ ଆରୁ ଆବ୍ଡ଼ାରିନ୍ ତାଙ୍ଘାଏ ଅଙ୍ଗୁର୍ ବାଟ୍‌କିଗେ ତାଇୟାସ୍। ³ଆନ୍ତିନ୍ ପାଇରି ବିଡ଼ି ନଅ ବାଜେ ଆସ୍ ଉର୍‌ଖିକିରି ଆରୁ ଦୁସ୍‌ରା ଆଲାରିନ୍ ହାଟ୍ଟେନୁ ବେକାର୍ ଇଜ୍ଜକା ଏରିକିରି ଆବ୍ଡ଼ାରିନ୍‌ହି ତେଙ୍ଗିୟାସ୍, ⁴‘ନିମ୍‌ହି ଅଙ୍ଗୁର୍ ବାଟ୍‌କିଗେ କାଲା, ଆରୁ ଏକାଦ୍ ଠିକ୍ କାମ୍‌ଚ୍‌କାରାଇ ଆବନ୍ ନିମାଗେ ଚିଅନ୍।’ ଆରୁ ଆବ୍ଡ଼ାର୍ କେରାର୍। ⁵ଆରୁ ଆସ୍ ବାର ବାଜେ ଆରୁ ତିନ୍‌ବାଜେଗେ ଉର୍‌ଖିକିରି ହନ୍ନେନିନ୍ କାମ୍‌ଚାସ୍। ⁶ଆରୁ ଲାଗ୍‌ଭାଗ୍ ପାଞ୍ଚବାଜେ ଆସ୍ ଉର୍‌ଖିକିରି ଆରୁ ୟୋଁଲୋକ୍ ଆଲାରିନ୍ ଇଜ୍ଜକା ଏରିୟାସ୍, ଆରୁ ଆବ୍ଡ଼ାରିନ୍ ମେନ୍‌ଚାସ୍, ‘ନିମ୍ ଏନ୍ଦେର୍‌ଗେ ଇସାନ୍ ବେକାର୍‌ନୁ ଉଲ୍ଲାଅଣ୍ଟା ଇଜ୍ଜକାଦାର୍?’ ⁷ଆବ୍ଡ଼ାର୍ ଆସିନ୍ ତେଙ୍ଗିୟାର୍, ‘ଏନ୍ଦେର୍‌ଗେକା ନେଦ୍‌ହି ଏମାନ୍ ମଜ୍‌ରୀ ମାଲ୍ଲା ଲାଗାବୁର୍।’ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, ‘ନିମ୍‌ହି ଅଙ୍ଗୁର୍ ବାଟ୍‌କିନୁ ନାଲ୍‌ଖୁ କାମାଗେକାଲା।’”

⁸“ବିଡ଼ି ଅକ୍କାନ୍ତି ଅଙ୍ଗୁର୍ ବାଟ୍‌କିନ୍‌ନ୍ତା ମାଲିକ୍‌ସ୍ ତାଙ୍ଘାଏ ମୁନ୍‌ସୀସିନ୍ ତେଙ୍ଗିୟାସ୍, ‘ମଜ୍‌ରୀୟାଜାମାରିନ୍ ମେହାଁ ଆରୁ ପାଛ୍‌ଲି ବାର୍‌ଚ୍‌କା ଆଲାର୍‌ସ୍‌ତି, ସୁରୁ କାମିକିରି ପହ୍‌ଲେ ବାର୍‌ଚ୍‌କା ଆଲାର୍‌ଗେ ମଜ୍‌ରୀ ଚିଆଲାଗା।’ ⁹ଆଙ୍ଗେନ୍ ଏକାର୍ ପାଞ୍ଚ୍ ବାଜ୍‌ନା ବାକେନ୍ ମଜ୍‌ରୀ ଲାଗାବା କେର୍‌କାଚାର୍, ଆବ୍ଡ଼ାର୍ ଅନ୍ଦୁଲ୍ ତା ମଜ୍‌ରୀ ହାଖ୍ଖୀୟାର୍। ¹⁰ଆରୁ ଏକାର୍ ଆଘ୍‌ଲି ବାର୍‌ଚ୍‌କାଚାର୍ ଆବ୍ଡ଼ାର୍ ସୋଚାଲିୟାର୍ କା ଏମାଗେ ବାଗ୍ଗେ ହାଖ୍‌ରୋ, ଲେକିନ୍ ଆବ୍ଡ଼ାର୍‌ଗେହି ଅନ୍ଦୁଲ୍ ତା ମଜ୍‌ରୀ ହାଖ୍ଖରା। ¹¹ଲେକିନ୍ ଆବ୍ଡ଼ାର୍ ଆବନ୍ ହାଖ୍ଖୀକିରି ହାଲ୍ଲୁଘି ମାଲିକ୍‌ସ୍‌କି ମିଆଁ କୁର୍‌ବୁର୍‌ରିକିରି ତେଙ୍ଗା ଲାଗ୍ଗିୟାର୍, ¹²‘ଇ ପାଛ୍‌ଲିନ୍‌ନ୍ତା ଆଲାର୍ ଅନ୍‌ଘାଣ୍ଟା ଖାଲି ନାଲ୍‌ଖୁ କାମ୍‌ଚାର୍, ଆରୁ ଏମ୍ ଉଲ୍ଲାଅଣ୍ଟା ବିଡ଼୍‌ନା ସାହିକିରି ନାଲ୍‌ଖୁ କାମ୍‌ଚ୍‌କାମ୍ ହାଲେହି ନିମ୍ ଆବ୍ଡ଼ାରିନ୍ ଏହ୍ମା ଗାନେ ସାମାନ୍ କାମ୍‌ଚ୍‌କାର୍?’ ¹³ଲେକିନ୍ ଆସ୍ ଆବ୍ଡ଼ାର୍‌ଘି ଭିତର୍‌ନୁ ଅର୍‌ତୁସିନ୍ ଯାବାବ୍ ଚିଚ୍ଚାସ୍, ‘ହେ ଭାଇ, ଏନ୍ ନିଙ୍ଘାଗାନେ ଅନ୍ୟାୟ ମାଲ୍ଲା କାମୁନ୍। ଏନ୍ଦେର୍ ନିନିନ୍ ଏଙ୍ଘାଗାନେ ଅଣ୍ଟାଦିନାର୍ ଠିକ୍ ମାଲ୍ଲା କାମୁୟ? ¹⁴ଏକାଦ୍ ନିଙ୍ଘାଏ, ଆଦିନ୍ ଧାରା ଆରୁ କାଲା; ଲେକିନ୍ ଇ ପାଛ୍‌ଲି ବାରୁ ଆଲାସ୍‌କେହି ନିଙ୍ଘା ହତ୍‌କ ଚିୟାଗେ ଏଙ୍ଘା ଇଚ୍ଛା। ¹⁵ନିଜର୍ ସମ୍ପତ୍ତିବନ୍ ନିଜର୍ ଇଚ୍ଛା ଲେଖା ବେଭାର୍ କାମାଗେ ଏଙ୍ଘାଏ ହକ୍ ମାଲ୍ଲାଦିନ୍ କାଁଏ? କା ଏନ୍ ଦାନ୍ ଚିଆଲ୍‌ଦାନ୍ ଆଦ୍‌ଘି ଲାଗାନ୍ ଏନ୍ଦେର୍‌ଗେ ହିସ୍‌ଙ୍ଗା କାମାଲ୍‌ଦାଏ?’ ¹⁶ଏନ୍ନେନିନ୍ ଏକା ଆଲାର୍ ପାଛ୍‌ଲି ରାନାଏ ଆବ୍ଡ଼ାର୍ ଆଘ୍‌ଲି ମାନର୍‌କର୍; ଆରୁ ଏକାର୍ ଆଘ୍‌ଲି ରାନାଏ, ଆବ୍ଡ଼ାର୍ ପାଛ୍‌ଲି ମାନର୍‌କର୍।”

ଯୀଶୁସ୍‌କି ଦୁଃଖ୍‌ଭୋଗ୍ ଆରୁ ଉଜ୍ଜନାଘି ତିସ୍‌ରା ଭବିଷତ୍ କାତ୍‌ଥା

(ମାର୍‌କୁସ୍ ୧୦:୩୨-୩୪; ଲୁକାସ୍ ୧୮:୩୧-୩୪)

¹⁷ଯୀଶୁସ୍ ଯେରୁଶାଲେମ୍ କାନାବାକେନ୍ ବାର ଚେଲାରିନ୍ ଭିନେ ତାରା ଅଚ୍ଚାସ୍ ଆରୁ ପାବୁନୁ ଆବ୍ଡ଼ାରିନ୍ ତେଙ୍ଗିୟାସ୍, ¹⁸“ଏରା, ନାମ୍ ଯେରୁଶାଲେମ୍‌ଗେ କାଲ୍‌ଦାତ୍; ଆରୁ ମୁନୁଷ୍ ହାଦ୍ଦୁସ୍ ମୁଖ୍ୟା ପୁରୋହିତ୍ ଆରୁ ପଣ୍ତିତ୍‌ଜାମାର୍‌ଘି ହେଖ୍ଖାନୁ ସୋଁପାଚାକସ୍। ¹⁹ଆରୁ ଆବ୍ଡ଼ାର୍ ଆସିନ୍ ମରନ୍‌ଘି ଦଣ୍ଡ୍ ଚିଇକିରି ମାଜାକ୍ ଉଡ଼ାବର୍, କୋଡ୍‌ରାତି ଡେମର୍ ଆରୁ କ୍ରୁଶ୍‌ନୁ ଖିଆଗେ, ବିନାୟାହୁଦୀର୍‌ଘି ହେଖ୍ଖାନୁ ସୋଁପର୍‌ଚର୍ ଆରୁ ତିସ୍‌ରା ଉଲ୍ଲାନୁ ଆସ୍ ଉଜ୍ଜସ୍‌କସ୍।”

ଅଣ୍ଟା ଆୟାଙ୍ଗ୍‌ଘି ଆର୍‌ଜୀବିନ୍ତି

(ମାର୍‌କୁସ୍ ୧୦:୩୫-୪୫)

²⁰ଯେତ୍‌କବାକେନ୍ ଜେବେଦୀସ୍‌କି ଆଲି, ତାଙ୍ଘା ହାଦ୍ଦୁର୍ ଗାନେ ଯୀଶୁସ୍‌କି ଚାହାଗେ ବାରିକିରି ଯୋହାର୍ କାମ୍‌ଚା, ଆରୁ ଆସିନ୍ ଏନ୍ଦ୍ରିନ୍ ନିଆଁଗେ ଲାଗ୍ଗିୟା। ²¹ଯୀଶୁସ୍ ଆବନ୍ ମେନ୍‌ଚାସ୍, “ନିନ୍ ଏନ୍ଦେର୍ ବେଦ୍ଦାଲ୍‌ଦିନ୍?” ଆଦ୍ ଆସିନ୍ ତେଙ୍ଗିୟା, “ଏନ୍ନେ ବଚନ୍ ଚିଆ କା ଏଙ୍ଘାଏ ଇ ଯୋଡ଼େ ହାଦ୍ଦୁର୍ ନିହ୍ମା ରାଜୀନୁ ଅଣ୍ଟାସ୍ ତିନାତାରା ଆରୁ, ଆରୁ ଅଣ୍ଟାସ୍ ଡେବ୍‌ବାତାରା ଅକ୍କର୍।” ²²ଯୀଶୁସ୍ ଯାବାବ୍ ଚିଚ୍ଚାସ୍, “ନିନ୍ ବାଲ୍‌ଦିନ୍‌ନିନ୍ କା ନିନ୍ ଏନ୍ଦେର୍ ନିଆଁଲ୍‌ଦିନ୍। ଏନ୍ ଏକା ଦୁଃଖୁ ସାହା କାଲ୍‌ଦାନ୍, ନିମ୍ ସାହା ଅଙ୍ଗର୍ କାଁଏ?” ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ସାହା ଅଙ୍ଗମ୍।” ²³ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଏଙ୍ଘାଏ ଦୁଃଖୁ ସାହା ଅଙ୍ଗର୍, ଲେକିନ୍ ଏଙ୍ଘାଏ ତିନା ଆରୁ ଡେବ୍‌ବାତାରା ଅକ୍ତାଗେ ଏଙ୍ଘାଏ ହକ୍ ମାଲ୍ଲାଦିନ୍, ବରନ୍ ନେକାଗେ ଏଙ୍ଘା ବାଙ୍ଗ୍‌ସ୍‌କି ଦ୍ୱାର୍‌ନୁ ଆଡ୍ଡା କାମା କେର୍‌କିଚି, ଆବ୍ଡ଼ାର୍ ଅକ୍କର୍।”

²⁴ଇବନ୍ ମେନିକିରି ଦଶ୍‌ଲୋକ୍ ଚେଲାର୍ ଆ ଦୁଇ ଭାଇର୍‌ଘି ମିଆଁ ଖୀସାରାଚାର୍ କେରାର୍। ²⁵ଯୀଶୁସ୍ ତାଙ୍ଘା ଚେଲାଜାମାରିନ୍ ଚାହାନୁ ମେହିଁକିରି ତେଙ୍ଗିୟାସ୍, “ନିମ୍ ଆହ୍‌ଦାର୍ କା ବିନାୟାହୁଦୀର୍‌ଘି ଶାସନ୍ କାମୁର୍ ବିନାୟାହୁଦୀର୍‌ଘି ମିଆଁ ମନ୍‌ମର୍‌ଜୀ ଶାସନ୍ କାମ୍‌ନାଏ; ଆରୁ ନେଦ୍ ସାର୍‌କାରୀ ଅଫିସର୍‌ଜାମାର୍, ଆବ୍ଡ଼ାର୍ ହୁବ୍ଡ଼ାର୍‌ଘି ମିଆଁ ହକ୍ ଜାମାବାନାଏ। ²⁶ଲେକିନ୍ ନିହ୍ମା ମାଝାନୁ ଏନ୍ନେ ମା ମାନି; ଲେକିନ୍ ନିହ୍ମା ଭିତର୍‌ନୁ ନେଦ୍ ବାଡ଼୍‌କା ମାନାଗେ ବେଦ୍ଦନାଏ, ଆବ୍ଡ଼ାର୍ ଦୁସ୍‌ରାର୍‌ଘି ସେବକ୍ ମାନର୍; ²⁷ଆରୁ ନେଦିନ୍ ମୁଖିଆ ମାନାଗେ ବେଦ୍ଦନାଏ, ଆବ୍ଡ଼ାର୍ ଦୁସ୍‌ରାର୍‌ଘି ଗୁତ୍ତିୟା ମାନର୍; ²⁸ଏସ୍‌କେ ମୁନୁଷ୍ ହାଦ୍ଦୁସ୍‌ହି ସେବା କାମ୍‌ତାଗେ ମାଲ୍ଲା ବାରୁସ୍ ଲେକିନ୍ ଆସ୍ ସେବା କାମାଗେ, ଆରୁ ତାଙ୍ଘା ଜୀଆ ଚିଇକିରି ଢେର୍ ଆଲାରିନ୍ ତାହ୍ମା ପାପ୍‌ଘି ଦଣ୍ଡ୍‌ତି ବାଛାବାଗେ ବାର୍‌ଚ୍‌କାଦାସ୍।”

ଯୀଶୁସ୍ ଦୁଇ ଲୋକ୍ କାଁଣାରିନ୍ ଏରାଗେ ଶକ୍ତି ଚିଆଲ୍‌ଦାସ୍

(ମାର୍‌କୁସ୍ ୧୦:୪୬-୫୨; ଲୁକାସ୍ ୧୮:୩୫-୪୩)

²⁹ଯେତ୍‌କବାକେନ୍ ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ଯେରିଖୋ ସହର୍‌ତି ଉର୍‌ଖାଲିୟାର୍ ହତ୍‌କବାକେନ୍, ଢେର୍ ଆଲାର୍ ତାଙ୍ଘା ପାଛ୍‌ଲି-ପାଛ୍‌ଲି କେରାର୍। ³⁰ଆରୁ ଦୁଇ ଲୋକ୍ କାଁଣାର୍, ପାବୁ ଖାଁଣିନୁ ଅକ୍କାଚାର୍, ହତ୍‌କବାକେନ୍ ଯୀଶୁସ୍ ହୁ ପାବୁ ଚିଇକିରି କାଲ୍‌ଦାସ୍‌ବୁଲି ମେନ୍‌ଚାର୍ ଆରୁ ଜୋର୍‌ସେ ଚିର୍‌ରା ରାଇକିରି ତେଙ୍ଗିୟାର୍, “ହେ ପ୍ରାଭୁ, ଦାଉଦ୍‌ସ୍‌କି ହାଦ୍ଦୁ, ଏହ୍ମା ମିଆଁ ଦାୟା କାମା।” ³¹ଲେକିନ୍ ଆଲାର୍ ଆବ୍ଡ଼ାରିନ୍ କାଡ଼େ-କାଡ଼େ ରାଗେ ଧାମ୍‌କାଚାର୍; ଲେକିନ୍ ଆବ୍ଡ଼ାର୍ ଆରୁହି ଜୋର୍‌ସେ ଚିର୍‌ରା ରାଇକିରି ତେଙ୍ଗିୟାର୍, “ହେ ପ୍ରାଭୁ, ଦାଉଦ୍‌ସ୍‌କି ହାଦ୍ଦୁ, ଏହ୍ମା ମିଆଁ ଦାୟା କାମା।” ³²ଆଙ୍ଗେନ୍ ଯୀଶୁସ୍ ଇଜ୍ଜାସ୍ ଆରୁ ଆବ୍ଡ଼ାରିନ୍ ମେହିଁକିରି ମେନ୍‌ଚାସ୍, “ଏନ୍ ନିମାଗେ ଏନ୍ଦେର୍ କାମନ୍‌ବୁଲି ନିମ୍ ସୋଚାଲ୍‌ଦାର୍?” ³³ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ହେ ପ୍ରାଭୁ, ଏସ୍‌କେ କା ଏମ୍ ଏରା ଅଙ୍ଗମ୍।” ³⁴ଆରୁ, ଯୀଶୁସ୍ ଦାୟାତି ପିଘ୍‌ଲାରାଇକିରି ଆବ୍ଡ଼ାର୍‌ଘି ହାନ୍ନୁବନ୍ ଏସ୍‌ରାସ୍, ଆରୁ ଆବ୍ଡ଼ାର୍ ହୁଙ୍ଗେନିନ୍ ଏରାଗେ ଅଙ୍ଗିୟାର୍; ଆରୁ ତାଙ୍ଘା ପାଛ୍‌ଲି-ପାଛ୍‌ଲି କେରାର୍।

ଯେରୁଶାଲେମ୍‌ନୁ ଯୀଶୁସ୍‌କି କର୍‌ନା

(ମାର୍‌କୁସ୍ ୧୧:୧-୧୧; ଲୁକାସ୍ ୧୯:୨୮-୪୦; ଯୋହାନ୍ ୧୨:୧୨-୧୯)

¹ଯେତ୍‌କବାକେନ୍ ଯୀଶୁସ୍ ଆରୁ ତାଙ୍ଘା ଚେଲାର୍ ଯେରୁଶାଲେମ୍‌ଘି ଚାହାନ୍ତା ଜାଇତୁନ୍ ପାର୍ତ୍ତାଘି ବେତ୍‌ଫାଗେ ପାଡ଼ା ଚାହାନୁ ଆଣସିୟାର୍ ତା, ଯୀଶୁସ୍ ଦୁଇ ଲୋକ୍ ଚେଲାରିନ୍ ଏନ୍ନେ ତେଙ୍ଗିକିରି ତାଇୟାସ୍, ²“ନିହ୍ମା ଆଘ୍‌ଲିନ୍ତା ହୁ ପାଡ଼ାଗେ କାଲା ଆସାନ୍ ଆଣ୍‌ସ୍‌କାନ୍‌ନ୍ତି ଅଣ୍ଟା ଗାଧା ହିଁଚ୍‌କା, ଆରୁ ଆଦ୍‌ଘିଗାନେ ନିମାଗେ ହାଦ୍ଦୁ ଅଣ୍ଟା ହାଖ୍‌ରୋ। ଆଦିନ୍ କଲ୍ଲିକିରି ଏଙ୍ଘା ଚାହାଗେ ଅନ୍ଦ୍ରା ବାରା। ³ଆରୁ ଯଦି ନିମାନ୍ ନେଦିନ୍ ଏନ୍ଦ୍ରିନ୍ ବର୍‌ତା, ତେଙ୍କେ କା ପ୍ରାଭୁସ୍‌କେ ଇଦ୍‌ଘି ଦାର୍‌କାର୍ ରାଇ, ଆଙ୍ଗେନ୍ ହୁଙ୍ଗେନିନ୍ ଆବ୍ଡ଼ାରିନ୍ ତାଇୟଚସ୍।” ⁴ଇଦ୍ ଇଦ୍‌ଘିଲାଗାନ୍ ମାନ୍‌ଚା କା ଏକା ବଚନ୍ ନାବୀର୍‌ଘି ଦ୍ୱାର୍‌ନୁ ତେଙ୍ଗାକେର୍‌କିଚା, ଆଦ୍ ପୁରା ମାନ୍ନାଦ୍:

⁵“କା ଯେରୁଶାଲେମ୍ ତା ଆଲାରିନ୍ ତେଙ୍ଗା, ‘ଏରା, ନିଙ୍ଘା ରାଜାସ୍ ବହୁତ୍ ନରମ୍ ମାନିକିରି, ନିଙ୍ଘା ଚାହାଗେ ବାରାଲ୍‌ଦାସ୍; ଏନ୍ଦେର୍‌ଗେକା ଆସ୍ ଗାଧିନୁ ଆରୁ ଗାଧାହାଦ୍ଦୁଘି ମିଆଁ ଅକ୍କିକିରି ନିଙ୍ଘା ଚାହାଗେ ବାରାଲ୍‌ଦାସ୍।’” ⁶ଆଙ୍ଗେନ୍ ଚେଲାଜାମାର୍ କେରାର୍, ଆରୁ ଏସ୍‌କେ ଯୀଶୁସ୍ ତେଙ୍କାଚାସ୍ ଆନ୍ନେନ୍ କାମ୍‌ଚାର୍। ⁷ଆରୁ ଗାଧି ଆରୁ ହାଦ୍ଦୁବନ୍ ଅନ୍ଦ୍ରିକିରି, ଆଦ୍‌ଘି ମିଆଁ ଚିଢ଼ା ଡାବ୍‌ଚାର୍, ଆରୁ ଯୀଶୁସ୍ ଆଦ୍‌ଘି ମିଆଁ ଅକ୍କିୟାସ୍। ⁸ଆଙ୍ଗେନ୍ ଢେର୍ ଆଲାର୍ ନିଜର୍-ନିଜର୍ ଚିଢ଼ାବନ୍ ପାବୁନୁ ଆଟ୍ଟିୟାର୍, ଆରୁ ଦୁସ୍‌ରା ଆଲାର୍ ମାନ୍ନୁନ୍‌ତା ଡାଡ଼ାନ୍ ଛୋପିକିରି ପାବୁନୁ ଆଟ୍ଟିୟାର୍। ⁹ଆରୁ ତାଙ୍ଘା ଆଘ୍‌ଲି ଆରୁ ପାଛ୍‌ଲି-ପାଛ୍‌ଲି ବାରୁ ଆଲାର୍, ଜୋର୍‌ସେ ଚିର୍‌ରା ରାଇକିରି ତେଙ୍ଗାଲିୟାର୍, “ଦାଉଦ୍‌ସ୍‌କି ହାଦ୍ଦୁସ୍‌କି୨୧:୯ ହୋଶାନ୍ନା ହିବ୍ରୁ ଶବ୍ଦଦ୍ ଇଦ୍‌ଘି ମତ୍‌ଲବ୍ ବାଛାବା, ପ୍ରାଭୁସ୍‌କି ସ୍ତୁତି ମାହିମା କାମ୍‌ନା ବାକେନ୍ ଇ ଶବ୍ଦନ୍ ତେଙ୍ଗ୍‌ନାଏ। ହୋଶାନ୍ନା, ଧଏନ୍ ରାଦାସ୍ ଆସ୍ ଏକାସ୍ କା ପ୍ରାଭୁସ୍‌କି ନାମେନୁ ବାରାଲ୍‌ଦାସ୍, ଆକାଶ୍‌ନୁ ହୋଶାନ୍ନା।” ¹⁰ଯେତ୍‌କବାକେନ୍ ଯୀଶୁସ୍ ଯେରୁଶାଲେମ୍‌ନୁ କର୍‌ଚାସ୍ ତା, ଜାମା ସହର୍‌ନୁ ହାଲ୍ଲା ମାନ୍‌ଚାକେରା, ଆରୁ ଆଲାର୍ ତେଙ୍ଗାଗେ ଲାଗ୍ଗିୟାର୍, “ଇସ୍, ନେଦ୍?” ¹¹ଆଙ୍ଗେନ୍ ଆଲାର୍ ତେଙ୍ଗିୟାର୍, “ଇସ୍ ଗାଲିଲୀ ପ୍ରଦେଶ୍‌ତା ନାଜ୍‌ରେତ୍ ସହର୍‌ତା ନାବୀ ଯୀଶୁସ୍।”

ୟାହୁଦୀ ମନ୍ଦିର୍‌ତି ବେପ୍‌ରିୟାରିନ୍ ଅଥ୍‌ର୍‌ନା

(ମାର୍‌କୁସ୍ ୧୧:୧୫-୧୯; ଲୁକାସ୍ ୧୯:୪୫-୪୮; ଯୋହାନ୍ ୨:୧୩-୨୨)

¹²ଯୀଶୁସ୍ ପାର୍‌ମେଶ୍ଵାର୍‌ସ୍‌କି ମନ୍ଦିର୍‌ନୁ କାଇକିରି ଆ ବେପ୍‌ରିୟାରିନ୍, ଏକାର୍ କା ମନ୍ଦିର୍‌ନୁ ହେନ୍ଦ୍‌ନା ବିଁସ୍‌ନା କାମାଲିୟାର୍, ଆବ୍ଡ଼ାରିନ୍ ଅଥ୍‌ରେଇଚାସ୍, ଆରୁ ଆସ୍ ପାଏସା ବାଦ୍‌ଲୁର୍‌ଘି ଟେବୁଲ୍ ଆରୁ ପେର୍‌ୱାଁ ବିଁସୁର୍‌ଘି ଚୋଉକି ଉଲ୍‌ଟେ ଚିଚ୍ଚାସ୍; ¹³ଆରୁ ଆବ୍ଡ଼ାରିନ୍ ତେଙ୍ଗିୟାସ୍, “ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ, ‘ଏଙ୍ଘା ଆଡ଼୍‌ପାଦ୍ ବିନ୍ତିଘି ଆଡ଼୍‌ପା ତେଙ୍ଗାକୋ; ଲେକିନ୍ ନିମ୍ ଆଦିନ୍ ଡାକୁର୍‌ଗେ ନୁହ୍‌ରାଗେ ଆଡ୍ଡା କାମ୍‌ଚେଇ ଚିଚ୍‌କାଦାର୍।’”

¹⁴ଆରୁ କାଁଣାର୍ ଆରୁ ଲେଙ୍ଗ୍‌ଡ଼ାର୍, ମନ୍ଦିର୍‌ନୁ ଯୀଶୁସ୍‌କି ଚାହାଗେ ବାର୍‌ଚାର୍, ଆରୁ ଆସ୍ ଆବ୍ଡ଼ାରିନ୍ ବାନେ କାମ୍‌ଚାସ୍। ¹⁵ଲେକିନ୍ ଯେତ୍‌କବାକେନ୍ ମୁଖ୍ୟା ପୁରୋହିତ୍ ଆରୁ ପଣ୍ତିତ୍‌ଜାମାର୍ ଇ ଅଦ୍‌ଭୁତ୍ ନାଲ୍‌ଖୁବନ୍, ଏକାନ୍ ଆସ୍ କାମ୍‌ଚାସ୍, ଆରୁ ହାଦ୍ଦୁରିନ୍ ମନ୍ଦିର୍‌ନୁ “ଦାଉଦ୍‌ସ୍‌କି ହାଦ୍ଦୁସ୍‌କି ହୋଶାନ୍ନା” ବୁଲି ଚିର୍‌ରାରାନାନ୍ ଏରିୟାର୍ ତା, ଆବ୍ଡ଼ାର୍ ଖୀସାରାଚାର୍ କେରାର୍। ¹⁶ଆରୁ ଆବ୍ଡ଼ାର୍ ଆସିନ୍ ମେନାଗେ ଲାଗ୍ଗିୟାର୍, “ନିନ୍ କାଁଏ ମେନାଲ୍‌ଦାଏ କା ଇବ୍ଡ଼ାର୍ ହାଦ୍ଦୁର୍ ଏନ୍ଦେର୍ ବାଲ୍‌ନାଏ?” ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ହଁ; ନିମ୍ ପାବିତାର୍ ଶାସ୍ତ୍ରନୁ ଇଦିନ୍ ଏକ୍‌ଲାହି ମାଲ୍ଲା ପାଢ଼ୁର୍ କାଁଏ: ‘ହାଦ୍ଦୁର୍ ଆରୁ ଗୁରସ୍ ହାପ୍ପୁ ହାଦ୍ଦୁର୍‌ଘି ଥୁମ୍‌ଣାନ୍‌ନ୍ତି ନିଙ୍ଘା ସ୍ତୁତି କାମ୍‌ତାଲ୍‌ଦାଏ?’” ¹⁷ଆନ୍ତିନ୍ ଆସ୍ ଆବ୍ଡ଼ାରିନ୍ ଆମ୍ବିକିରି ସହର୍‌ଘି ବାହ୍‌ରି ବେଥାନିୟା କାଇକିରି ଆସାନ୍ ମାଁହା ବିତାବାଚାସ୍।

ବିଶ୍ୱାସ୍‌ଘି ଶକ୍ତି

(ମାର୍‌କୁସ୍ ୧୧:୧୨-୧୪,୨୦-୨୪)

¹⁸ଭୋର୍ ପାଇରି ଯେତ୍‌କବାକେନ୍ ଯୀଶୁସ୍ ସହର୍‌ଗେ କିର୍‌ରାଲିୟାସ୍ ତା ଆସ୍‌କେ କିଡ଼ା ଲାଗ୍ଗିୟାଦ୍। ¹⁹ସଡ଼କ୍ ଖାଁଣିନୁ ଅଣ୍ଟା ଡୁମାରି ମାନ୍ନୁନ୍ ଏରିୟାସ୍ ଆରୁ ଆଦ୍‌ଘି ଚାହାଗେ କେରାସ୍, ଆରୁ ଆଥାନ୍ ଆମ୍ବିକିରି ଆନ୍ନୁ ଏନ୍ଦେର୍‌ହି ମା ହାଖ୍ଖୀକିରି ଆଦିନ୍ ତେଙ୍ଗିୟାସ୍, “ଆକ୍କୁନ୍‌ନ୍ତି ନିଙ୍ଘାଏନୁ ଏକ୍‌ଲାହି ଫାଡ଼ୁ ମା ମାନ୍ନାଦ୍।” ଆରୁ ଡୁମାରି ମାନ୍ନୁଦ୍ ଆଖାନେନିନ୍ ହାଇୟାକେରା। ²⁰ଇବନ୍ ଏରିକିରି ଚେଲାର୍ ଆଚ୍‌ମିତ୍ ମାନ୍‌ଚାର୍ କେରାର୍ ଆରୁ ଆବ୍ଡ଼ାର୍ ତେଙ୍ଗିୟାର୍, “ଇ ଡୁମାରି ମାନ୍ନୁଦ୍ ଏତ୍‌କ ଚାଁଣେ ଏସ୍‌କେ ହାଇୟାକେରା?” ²¹ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍, ଯଦି ନିହ୍ମା ବିଶ୍ଵାସ୍ ରାଇ ଆରୁ ଶାକ୍ ମା କାମର୍ ତା, ଇ ଡୁମାରି ମାନ୍ନୁଗାନେ ଏସ୍‌କେ କାମାକେର୍‌କିଚା, ଖାଲି ଆନ୍ନେନ୍ ମାଲ୍ଲା ଲେକିନ୍ ଯଦି ଇ ପାର୍ତ୍ତାନ୍‌ହି ତେଙ୍ଗର୍ କା, ‘ଚାଡ଼୍‌ରୁ କାଲ୍, ଆରୁ ସାମ୍‌ଧୁର୍‌ନୁ ଖାତ୍‌ରୁ କାଲ୍’, ତା ଏନ୍ନେନ୍ ମାନଦ୍। ²²ଆରୁ ବିଶ୍ୱାସ୍ କାମିକିରି ବିନ୍ତିନୁ ଏନ୍ଦ୍ରିନ୍ ନିଅର୍ ଆବ୍ଡ଼ା ଜାମାନ୍ ନିମ୍ ହାଖ୍ଖର୍।”

ଯୀଶୁସ୍‌କି ହକ୍‌ଘି ମିଆଁ ପ୍ରଶ୍ନ

(ମାର୍‌କୁସ୍ ୧୧:୨୭-୩୩; ଲୁକାସ୍ ୨୦:୧-୮)

²³ଆସ୍ ମନ୍ଦିର୍‌ନୁ କାଇକିରି ଉପ୍‌ଦେଶ୍ ଚିଆଲିୟାସ୍ ତା, ମୁଖ୍ୟା ପୁରୋହିତ୍ ଆରୁ ଆଲାର୍‌ଘି ପୁର୍‌ଖାର୍ ଆବ୍ଡ଼ାର୍‌ଘି ଚାହାଗେ ବାରିକିରି ମେନ୍‌ଚାର୍, “ନିନ୍ ଇ ନାଲ୍‌ଖୁନ୍ ଏକା ହକ୍‌ତି କାମାଲ୍‌ଦାଏ? ଆରୁ ନିଙ୍ଗାଗେ ଇ ହକ୍‌ବନ୍ ନେଦ୍ ଚିଚ୍ଚାର୍?” ²⁴ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ଏନ୍‌ହି ନିମାନ୍ ଅଣ୍ଟା କାତ୍‌ଥା ମେନାଲ୍‌ଦାନ୍; ଯଦି ଆବନ୍ ଏଙ୍ଗାନ୍ ତେଙ୍ଗର୍ ତା, ଏନ୍‌ହି ନିମାନ୍ ତେଙ୍ଗନ୍ କା ଇ ନାଲ୍‌ଖୁନ୍ ଏକା ହକ୍‌ତି କାମାଲ୍‌ଦାନ୍: ²⁵ଆସ୍ନାନ୍ ଚିୟାଗେ ଯୋହାନ୍‌କେ ନେଦ୍ ହକ୍ ଚିଚ୍ଚାର୍? ପାର୍‌ମେଶ୍ୱାର୍‌ସ୍ ଚିଚ୍ଚାସ୍ କା ଆଲାର୍ ଚିଚ୍ଚାର୍?” ଆଙ୍ଗେନ୍ ଆବ୍ଡ଼ାର୍ ତାମ୍‌ତାମ୍ କାଁଟ୍‌ଛାଁଟ୍ କାମାଗେ ଲାଗ୍ଗିୟାର୍, “ଯଦି ନାମ୍ ତେଙ୍ଗତ୍ ‘ପାର୍‌ମେଶ୍ୱାର୍‌ସ୍ ଚିଚ୍ଚାସ୍’, ତା ଆସ୍ ନାମାନ୍ ତେଙ୍ଗସ୍, ‘ତା ନିମ୍ ଆସ୍‌କି ମିଆଁ ଏନ୍ଦେର୍‌ଗେ ବିଶ୍ୱାସ୍ ମା କାମ୍‌ଚ୍‌କାର୍?’ ²⁶ଆରୁ ଯଦି ତେଙ୍ଗତ୍ ‘ଆଲାର୍ ଚିଚ୍ଚାର୍’ ତା ନାମାଗେ ଭିଡ଼୍‌ଘି ଏଲ୍‌ଚ୍‌କା ରାଇ, ଏନ୍ଦେର୍‌ଗେକା ଆବ୍ଡ଼ାର୍‌ଜାମାର୍ ଯୋହାନ୍‌ସିନ୍ ନାବୀସ୍‌ବୁଲି ମାନ୍ନାଏ।” ²⁷ହୁଦ୍‌ଘିଲାଗାନ୍ ଆବ୍ଡ଼ାର୍ ଯୀଶୁସିନ୍ ଯାବାବ୍ ଚିଚ୍ଚାର୍, “ଏମ୍ ବାଲ୍‌ଦାମ୍।” ଯୀଶୁସ୍‌ହି ଆବ୍ଡ଼ାରିନ୍ ତେଙ୍ଗିୟାସ୍, “ତା ଏନ୍‌ହି ନିମାନ୍ ମା ତେଙ୍ଗ୍‌ଦାନ୍ କା ଇ ନାଲ୍‌ଖୁନ୍ ଏକା ହକ୍‌ତି କାମାଲ୍‌ଦାନ୍।”

ଦୁଇ ଲୋକ୍ କୁକ୍କୋ ହାଦ୍ଦୁର୍‌ଘି ନମୁନା

²⁸“ନିମ୍ ଏନ୍ଦେର୍ ସୋଚ୍‌ଦାର୍? ଅଣ୍ଟା ଆଲାସ୍‌କି ଯୋଡ଼େ କୁକ୍କୋ ହାଦ୍ଦୁ ରାଚାର୍; ଆସ୍ ପହିଲେସ୍‌କି ଚାହାଗେ କାଇକିରି ତେଙ୍ଗିୟାସ୍, ‘ଏ ବାବୁ, ଇନ୍ନା ଅଙ୍ଗୁର୍‌ଘି ବାଟ୍‌କିନୁ ନାଲ୍‌ଖୁ କାମାଗେକାଲା।’ ²⁹ଆସ୍ ଯାବାବ୍ ଚିଚ୍ଚାସ୍, ‘ଏନ୍ ମା କାଦାନ୍’, ଲେକିନ୍ ପାଛ୍‌ଲି ପାସ୍ତାରାଚାସ୍ ଆରୁ କେରାସ୍। ³⁰ଆନ୍ତିନ୍ ତାମ୍ବାସ୍ ଦୁସ୍‌ରା ହାଦ୍ଦୁସ୍‌କି ଚାହାଗେ କାଇକିରି ଏନ୍ନେନ୍ ତେଙ୍ଗିୟାସ୍, ଆସ୍ ଯାବାବ୍ ଚିଚ୍ଚାସ୍, ‘ହଁ କାଲ୍‌ଦାନ୍’, ଲେକିନ୍ ମା କେରାସ୍। ³¹ଇ ଦୁଇ ଲୋକ୍‌ସ୍‌ତି ନେଦ୍ ତାମ୍ଵାସ୍‌କି ଇଚ୍ଛାନ୍ ପୁରା କାମ୍‌ଚାର୍?” ଆବ୍ଡ଼ାର୍ ତେଙ୍ଗିୟାର୍, “ପହିଲ୍ ହାଦ୍ଦୁସ୍।” ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ମାଲ୍‌ଗୁଜାରୀ ଉକ୍‌ରୁର୍ ଆରୁ ରାଣ୍ଡିବାଜିର୍ ନିହ୍ମାସ୍‌ତି ଆଘ୍‌ଲି ପାର୍‌ମେଶ୍ଵାର୍‌ସ୍‌କି ରାଜୀନୁ କରର୍। ³²ଏନ୍ଦେର୍‌ଗେକା ଯୋହାନ୍‌ସ୍ ନିହ୍ମାସାନ୍ ପାର୍‌ମେଶ୍ଵାର୍‌ସ୍‌କି ବାନେ ପାବୁ ଏଦାଗେ ବାର୍‌ଚ୍‌କାଚାସ୍, ଆରୁ ନିମ୍ ଆସିନ୍ ବିଶ୍ୱାସ୍ ମା କାମ୍‌ଚ୍‌କାର୍; ଲେକିନ୍ ମାଲ୍‌ଗୁଜାରୀ ଉକ୍‌ରୁ ଆରୁ ରାଣ୍ଡିବାଜିର୍ ଆସିନ୍ ବିଶ୍ୱାସ୍ କାମ୍‌ଚାର୍: ଆରୁ ନିମ୍ ଇବନ୍ ଏରିକିରିହି ପାପ୍ କାମାଗେ ମା ଆମ୍ବକାର୍ ଆରୁ ଆସ୍‌କି ମିଆଁ ବିଶ୍ୱାସ୍ ମା କାମ୍‌ଚ୍‌କାର୍।”

ବଇମାନ୍ ଚାଷୀର୍‌ଘି ନମୁନା

(ମାର୍‌କୁସ୍ ୧୨:୧-୧୨; ଲୁକାସ୍ ୨୦:୯-୧୯)

³³“ଆରୁ ଅଣ୍ଟା ନମୁନା ମେନା: ଅଣ୍ଟା ଗାଉଁଟିୟାସ୍ ରାଚାସ୍, ଆସ୍ ହାଲ୍ଲୁନୁ ଅଙ୍ଗୁର୍ ଇଦ୍‌ଦାସ୍, ଆରୁ ଅନ୍‌ଭାଉଁରୀ ବାଟ୍‌କି କୁର୍‌ଗ୍ଗିୟାସ୍, ଆରୁ ଅଙ୍ଗୁର୍ ରାସେ ପିହାଁଗେ ହେଁହ୍‌ଲାନୁ ଗାଡ୍ଡି ଆର୍‌ହିକିରି ଟାଙ୍କି କାମ୍‌ଚାସ୍, ଆରୁ ଅଙ୍ଗୁର୍ ବାଟ୍‌କି ଜାଗାଗେ ଆସାନ୍ ଅଣ୍ଟା ମେଚ୍ଛା ଆଡ଼୍‌ପା କାମ୍‌ଚାସ୍ ଆରୁ ଚାଷୀ ଜାମାର୍‌ଗେ ସାଝା ଚିଚ୍ଚାସ୍ ଲାଗ୍ଗିୟାସ୍ ଆରୁ ପ୍ରଦେଶ୍‌ଗେ ବୁଙ୍ଗାସ୍। ³⁴ଯେତ୍‌କବାକେନ୍ ଫାଡ଼ୁ ଚହ୍‌ନାଘି ସାମାୟ ବାର୍‌ଚାତା, ଆସ୍ ତାଙ୍ଘାଏ ଗୁତ୍ତିୟାରିନ୍ ଫାଡ଼ୁନ୍ ଅନ୍ଦ୍ରାଗେ ଚାଷୀ ଜାମାର୍‌ସାନ୍ ତାଇୟାସ୍। ³⁵ଲେକିନ୍ ଚାଷୀର୍ ତାଙ୍ଘାଏ ଗୁତ୍ତିୟାରିନ୍ ଧାରିକିରି, ନେକା-ନେକାନ୍ ଡେମ୍‌ଚାର୍, ଆରୁ ନେକା-ନେକାନ୍ ପିଟ୍ଟେର୍‌ଚାର୍ ଆରୁ ନେକା-ନେକାନ୍ ଚାଁଚାତି ଲେବ୍‌ଡ଼ିୟାର୍ ପିଟ୍ଟେଇଚାର୍। ³⁶ଆନ୍ତିନ୍ ଆସ୍ ପହ୍‌ଲେନ୍‌ନ୍ତି ଆରୁ ବାଗ୍ଗେ ଗୁତ୍ତିୟାରିନ୍ ତାଇୟାସ୍, ଆରୁ ଆର୍ ଆବ୍ଡ଼ାରିନ୍‌ହି ଆନ୍ନେନିନ୍ କାମ୍‌ଚାର୍। ³⁷ଆଖ୍‌ରୀନୁ ଆସ୍ ତାଙ୍ଘାଏ ହାଦ୍ଦୁସିନ୍ ଆବ୍ଡ଼ାର୍‌ଘି ଚାହାଗେ ଏନ୍ନେ ସୋଚିକିରି ତାଇୟାସ୍ କା ଆବ୍ଡ଼ାର୍ ଏଙ୍ଘା ହାଦ୍ଦୁସିନ୍ ଆଦର୍‌ମାଇନ୍ କାମର୍। ³⁸ଲେକିନ୍ ଚାଷୀର୍ ହାଦ୍ଦୁସିନ୍ ଏରିକିରି ତାମ୍‌ତାମ୍ କାଚ୍‌ନେଖ୍‌ରା ଲାଗ୍ଗିୟାର୍, ‘ଇସ୍‌ତା! ବୁଆସ୍‌କି ସମ୍ପତ୍ତିଘି ହକ୍‌ଦାର୍‌ସ୍, ବାରା, ଇସିନ୍ ଡେମତ୍ ପିଟଚତ୍, ଆରୁ ତାଙ୍ଘାଏ ଧନ୍‌ସମ୍ପତ୍ତିବନ୍ ହୋତ୍‌କତ୍।’ ³⁹ଆରୁ ଆବ୍ଡ଼ାର୍ ଆସିନ୍ ଧାର୍‌ଚାର୍ ଆରୁ ଅଙ୍ଗୁର୍ ବାଟ୍‌କିଘି ବାହ୍‌ରି ଅଥ୍‌ରିକିରି ପିଟ୍ଟେଚିଚ୍ଚାର୍। ⁴⁰ହୁଦ୍‌ଘିଲାଗାନ୍ ଯେତ୍‌କବାକେନ୍ ଅଙ୍ଗୁର୍ ବାଟ୍‌କିଘି ମାଲିକ୍‌ସ୍ ବାରସ୍ ତା, ଆ ଚାଷୀର୍‌ଗାନେ ଏନ୍ଦେର୍ କାମସ୍?” ⁴¹ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ଆସ୍ ଆ ଖାରାପ୍ ଆଲାରିନ୍ ଏସ୍‌କିନ୍‌ହି ନାଶ୍ କାମସ୍; ଆରୁ ଅଙ୍ଗୁର୍ ବାଟ୍‌କିଘି ସାଝା ଦୁସ୍‌ରା ଚାଷୀସ୍‌କେ ଚୋସ୍, ଏକାର୍ କା ସାମାୟନୁ ଫାଡ଼ୁ ଚିୟର୍।” ⁴²ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଏକ୍‌ଲାହି ପାବିତାର୍ ଶାସ୍ତ୍ରନୁ ମାଲ୍ଲା ପାଢ଼ୁର୍ କାଁଏ:

‘ରାଜ୍‌ମିସ୍ତ୍ରୀଜାମାର୍ ଏକା ଚାଁଚାନ୍ ବାଉନିକିରି ପାଖିଏ ଚିଚ୍‌କାଚାର୍,

ଆଦ୍ କୋଣାନ୍‌ନ୍ତା ଅସ୍‌ଲି ଚାଁଚା ମାନ୍‌ଚାକେରା?

ଇଦ୍ ପ୍ରାଭୁସ୍‌କି ତାର୍‌ତି ମାନ୍‌ଚ୍‌କିଚି,

ଆରୁ ନାହ୍ମା ନଜର୍‌ନୁ ଇଦ୍ ଅଦ୍‌ଭୁତ୍ ନାଲ୍‌ଖୁଦ୍।’”

⁴³“ହୁଦ୍‌ଘିଲାଗାନ୍ ଏନ୍ ନିମାନ୍ ତେଙ୍ଗାଲ୍‌ଦାନ୍ କା ପାର୍‌ମେଶ୍ଵାର୍‌ସ୍‌କି ରାଜୀନ୍ ନିହ୍ମାସ୍‌ତି ହୁଆକୋଦ୍ ଆରୁ ଏନ୍ନେ ଅଣ୍ଟା ଜାତିଗେ ଚିଆକୋ ଏକାର୍ କା ଆଦ୍‌ଘି ଫାଡ଼ୁ ଚିୟର୍। ⁴⁴ନେଦ୍ ଇ ଚାଁଚାଘି ମିଆଁ ଖାତ୍‌ରର୍, ଆର୍ ଖଣ୍-ଖଣ୍ ମାନର୍‌କର୍; ଆରୁ ନେଖା ମିଆଁ ଇ ଚାଁଚାଦ୍ ଖାତ୍‌ରୋ, ଆବ୍ଡ଼ାରିନ୍ ଗୁଣ୍ଡା-ଗୁଣ୍ଡା କାମଚୋ।” ⁴⁵ମୁଖ୍ୟା ପୁରୋହିତ୍ ଆରୁ ଫାରିସୀଜାମାର୍ ଯୀଶୁସ୍‌କି ନମୁନାବନ୍ ମେନିକିରି ବୁଝ୍‌ରାର୍ କେରାର୍ କା ଆସ୍ ଆବ୍ଡ଼ାର୍‌ଘି ବାରେ ତେଙ୍ଗାଲ୍‌ଦାସ୍। ⁴⁶ଆରୁ ଆବ୍ଡ଼ାର୍ ଆସିନ୍ ଧାରାଗେ ସୋଚାଲିୟାର୍, ଲେକିନ୍ ଆବ୍ଡ଼ାର୍ ଆଲାରିନ୍ ଏଲ୍‌ଚିୟାର୍ କେରାର୍, ଏନ୍ଦେର୍‌ଗେକା ଆବ୍ଡ଼ାର୍ ଯୀଶୁସିନ୍ ନାବୀସ୍‌ବୁଲି ମାନାଲିୟାର୍।

ବେଞ୍ଜା ଭୋଜିଘି ନମୁନା

(ଲୁକାସ୍ ୧୪:୧୫-୨୪)

¹ସରଗ୍ ରାଜୀଦ୍ ଏସ୍‌କେ ରାଇ ଆବନ୍ ତେଙ୍ଗାଗେ ଯୀଶୁସ୍ ଇ ନମୁନା ତେଙ୍ଗିୟାସ୍, ²“ଅଣ୍ଟା ରାଜାସ୍ ରାଚାସ୍, ଆସ୍ ତାଙ୍ଘା ହାଦ୍ଦୁସ୍‌କି ବେଞ୍ଜା ଭୋଜି ତିୟାର୍ କାମ୍‌ଚାସ୍। ³ଆରୁ ଆ ବେଞ୍ଜା ଭୋଜିନୁ ବର୍‌ନି ଚିଚ୍‌କା ଆଲାରିନ୍ ମେହାଁଗେ ରାଜାସ୍ ନିଜର୍ ଗୁତ୍ତିୟାରିନ୍ ତାଇୟାସ୍; ଲେକିନ୍ ଆବ୍ଡ଼ାର୍ ବାରାଗେ ମା ବେଦ୍ଦିୟାର୍। ⁴ଆଙ୍ଗେନ୍ ଆସ୍ ତାଙ୍ଘା ଦୁସ୍‌ରା ଗୁତ୍ତିୟାରିନ୍ ଏନ୍ନେ ତେଙ୍ଗିକିରି ତାଇୟାସ୍, ‘ବର୍‌ନି ଚିଚ୍‌କା ଆଲାରିନ୍ ତେଙ୍ଗା: ଏରା, ଏନ୍ ଭୋଜି ତିୟାର୍ କାମ୍‌ଚେଇ ଚିଚ୍‌କାଦାନ୍, ଏଙ୍ଘା ମୋଟା-ମୋଟା ଏଡ଼ାନ୍ ପିଟା କେର୍‌କିଚି। ଆରୁ ଜାମାଦ୍ ତିୟାର୍ ରାଇ; ହୁଦ୍‌ଘିଲାଗାନ୍ ନିମ୍ ବେଞ୍ଜା ଭୋଜିନୁ ବାରା।’ ⁵ଲେକିନ୍ ଆବ୍ଡ଼ାର୍ ଗୁତ୍ତିୟାର୍‌ଘି କାତ୍‌ଥାନ୍ ଧ୍ୟାନ୍ ମା ଚିଇକିରି: ନେଦ୍-ନେଦ୍ ନିଜର୍ ହାଲ୍ଲୁଗେ ଆରୁ ନେଦ୍-ନେଦ୍ ନିଜର୍ ବେପାର୍ କାମାଗେ ବୁଙ୍ଗେଇଚାର୍। ⁶ଆରୁ ବାକି ଆଲାର୍ ଆସ୍‌କି ଗୁତ୍ତିୟାରିନ୍ ଧାର୍‌ଚାର୍ ଆରୁ ସାତାବାଇକିରି ପିଟ୍ଟେଇଚାର୍। ⁷ଆଙ୍ଗେନ୍ ରାଜାସ୍ ମୁରୁକ୍ ଖୀସାରାଚାସ୍ କେରାସ୍, ଆରୁ ତାଙ୍ଘା ସିପାହୀ ଜାମାରିନ୍ ତାୟିକିରି ଆ ପିଟୁରିନ୍ ପିଟେଇଚାଷ୍, ଆରୁ ଆବ୍ଡ଼ାର୍‌ଘି ସହର୍‌ଗୁଠିନ୍ ବାସ୍‌ସେଇଚାସ୍।” ⁸“ଆନ୍ତିନ୍ ଆସ୍ ତାଙ୍ଘା ଗୁତ୍ତିୟାରିନ୍ ତେଙ୍ଗିୟାସ୍, ‘ବେଞ୍ଜା ଭୋଜିତା ତିୟାର୍ ରାଇ, ଲେକିନ୍ ବର୍‌ନି ଚିଚ୍ଚକା ଆଲାର୍ ଲାଇଗ୍ ମାଲ୍‌ନାଏ। ⁹ହୁଦ୍‌ଘିଲାଗାନ୍ ସଡ଼କ୍‌ଘି ଛକ୍‌ଗୁଠିଗେ କାଲା ଆରୁ ଯେତ୍‌କ ଆଲାରିନ୍ ହାଖ୍ଖର୍, ଆବ୍ଡ଼ାରିନ୍ ବେଞ୍ଜା ଭୋଜିନୁ ମେଁହା ଅନ୍ଦ୍ରା।’ ¹⁰ଆଙ୍ଗେନ୍ ଆବ୍ଡ଼ା ଗୁତ୍ତିୟାର୍ ସଡ଼କ୍‌ଘି ଛକ୍‌ଗୁଠିଗେ କେରାର୍ ଆରୁ ଯେତ୍‌କ ଖାରାପ୍, ଆରୁ ବାନେ ଆଲାରିନ୍ ହାଖ୍ଖୀୟାର୍ ଆବ୍ଡ଼ା ଜାମାରିନ୍ ଅନ୍ଦ୍ରାର୍; ଆରୁ ବେଞ୍ଜା ଆଡ଼୍‌ପାଦ୍ ଆଲାର୍‌ସ୍‌ତି ନିନ୍ଦିୟାକେରା।”

¹¹“ଯେତ୍‌କବାକେନ୍ ରାଜାସ୍ ପାହିୟାରିନ୍ ଏରାଗେ ଉଲା କର୍‌ଚାସ୍ ତା, ଆସ୍ ଆସାନ୍ ବେଞ୍ଜା ଚିଢ଼ା ମା ଆତ୍ତ୍‌କା ଅଣ୍ଟା ଆଲାସିନ୍ ଏରିୟାସ୍। ¹²ରାଜାସ୍ ଆସିନ୍ ତେଙ୍ଗିୟାସ୍ ‘ହେ ବନ୍ଧୁ; ନିନ୍ ବେଞ୍ଜା ଚିଢ଼ା ମା ଆତ୍ତିକିରି ଏସ୍‌କେ ଇ ଆଡ୍ଡାଗେ ବାର୍‌ଚ୍‌କାଏ?’ ଲେକିନ୍ ଆସ୍ ଏନ୍ଦେର୍‌ହି ଯାବାବ୍ ମା ଚିଚ୍ଚାସ୍। ¹³ଆଙ୍ଗେନ୍ ରାଜାସ୍ ତାଙ୍ଘା ଗୁତ୍ତିୟାରିନ୍ ତେଙ୍ଗିୟାସ୍, ‘ଇସ୍‌କି ହେଖ୍ଖା ହେଡ୍ଡୁନ୍ ହିଁକିରି ବାହ୍‌ରି ଉହାନୁ ଖେବ୍ଡ଼ାଚା, ଆସାନ୍ ଆସ୍ ଅହ୍ଲସ୍ ଆରୁ ପାଲ୍ଲୁନ୍ ପାର୍‌ମ୍‌ତେରସ୍।’ ¹⁴ଏନ୍ଦେର୍‌ଗେକା ମେହ୍‌କା ଆଲାର୍ ବାଗ୍ଗେ ରାନାଏ, ଲେକିନ୍ ଚାଜ୍ଜକା ଆଲାର୍ ଥୋଡ଼େ ରାନାଏ।”

କାଇସର୍ ରାଜାସ୍‌କେ ମାଲ୍‌ଗୁଜାରୀ ଚିନା

(ମାର୍‌କୁସ୍ ୧୨:୧୩-୧୭; ଲୁକାସ୍ ୨୦:୨୦-୨୬)

¹⁵ଆନ୍ତିନ୍ ଫାରିସୀଜାମାର୍ କାଇକିରି ତାହ୍ମା ଭିତ୍‌ରେ ବିଚାର୍ କାମ୍‌ଚାର୍ କା ଯୀଶୁସିନ୍ ଏସ୍‌କେ କାତ୍‌ଥାତି ଫାସାବର୍। ¹⁶ଆରୁ ଆବ୍ଡ଼ାର୍ ହେରୋଦୀୟା ଜାମାର୍‌ଗାନେ ତାହ୍ମା ଚେଲାରିନ୍ ଯୀଶୁସ୍‌କି ଚାହାଗେ ଏନ୍ନେ ତେଙ୍ଗିକିରି ତାଇୟାର୍, “ହେ ଗୁରୁ, ଏମ୍ ଆହ୍‌ଦାମ୍ କା ନିମ୍ ସତ୍ତୁ ତେଙ୍ଗ୍‌ଦାର୍, ଆରୁ ପାର୍‌ମେଶ୍ଵାର୍‌ସ୍‌କି ସତ୍ତୁ ପାବୁନୁ କାଲାଗେ ଶିଖାବାଦାର୍, ଆରୁ ନେକାନ୍‌ହି ଖାତିର୍ ମା କାମ୍‌ଦାର୍, ଏନ୍ଦେର୍‌ଗେକା ନିମ୍ ଆଲାର୍‌ଘି ଚେହେରା ଏରିକିରି କାତ୍‌ଥା ମା କାମ୍‌ଦାର୍। ¹⁷ହାଲେ ଏମାନ୍ ତେଙ୍ଗା କା ନିମ୍ ଏନ୍ଦେର୍ ସୋଚ୍‌ଦାର୍? କାଇସର୍‌ସ୍‌କେ ମାଲ୍‌ଗୁଜାରୀ ଚିନାଦ୍ ଠିକ୍‌ଦ୍‌କା ମାଲ୍ଲିଦ୍।” ¹⁸ଲେକିନ୍ ଯୀଶୁସ୍ ଆବ୍ଡ଼ାର୍‌ଘି କପଟ୍‌ବନ୍ ଆହିକିରି ତେଙ୍ଗିୟାସ୍, “ହେ କପ୍‌ଟୀରୋ, ଏଙ୍ଗାନ୍ ଏନ୍ଦେର୍‌ଗେ ବିଡ଼୍‌ଚେ ଏରାଲ୍‌ଦାର୍? ¹⁹ନିମ୍ ଏଙ୍ଗା ମାଲ୍‌ଗୁଜାରୀଘି ପାଏସାବନ୍ ଏଦା।” ଆଙ୍ଗେନ୍ ଆବ୍ଡ଼ାର୍ ଯୀଶୁସ୍‌କି ଚାହାଗେ ରୋମାନ୍ ସାର୍‌କାର୍‌ଘି ଅଣ୍ଟାଦିନାର୍ ସିକ୍କା ଅନ୍ଦ୍ରାର୍। ²⁰ଯୀଶୁସ୍ ଆବ୍ଡ଼ାରିନ୍ ମେନ୍‌ଚାସ୍, “ଇଦ୍ ଛାପାଦ୍ ନେଖାଏଦ୍ ଆରୁ ନାମେଦ୍ ନେଖାଏଦ୍?” ²¹ଆବ୍ଡ଼ାର୍ ଯୀଶୁସିନ୍ ତେଙ୍ଗିୟାର୍, “କାଇସର୍‌ସ୍‌କି।” ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ଏକାଦ୍ କାଇସର୍‌ସ୍‌କିଦ୍, ଆବନ୍ କାଇସର୍‌ସ୍‌କେ ଚିଆ; ଆରୁ ଏକାଦ୍ ପାର୍‌ମେଶ୍ଵାର୍‌ସ୍‌କିଦ୍, ଆବନ୍ ପାର୍‌ମେଶ୍ଵାର୍‌ସ୍‌କେ ଚିଆ।” ²²ଇବନ୍ ମେନିକିରି ଆବ୍ଡ଼ାର୍ ଆଚ୍‌ମିତ୍ ମାନ୍‌ଚାର୍ କେରାର୍ ଆରୁ ଆସିନ୍ ଆମ୍ବିକିରି ବୁଙ୍ଗେଇଚାର୍।

ଉଜ୍ଜନାଘି ବାରେନୁ ପ୍ରଶ୍ନ

(ମାର୍‌କୁସ୍ ୧୨:୧୮-୨୭; ଲୁକାସ୍ ୨୦:୨୭-୪୦)

²³ହୁ ଉଲ୍ଲାନ୍ ସାଦ୍ଦୂକୀଜାମାର୍ ଏକାର୍ କା ଆରୁଅହନ୍ ଉଜ୍ଜନାନୁ ବିଶ୍ଵାସ୍ ମା କାମ୍‌ନାଏ, ଯୀଶୁସ୍‌କି ଚାହାଗେ ବାରିକିରି ଆସିନ୍ ମେନ୍‌ଚାର୍, ²⁴“ହେ ଗୁରୁ, ମୁଶା ନାବୀସ୍ ତେଙ୍କାଦାସ୍ କା ଯଦି ଏକିନ୍ ଆଲାସ୍ ବିନା ହାଦ୍ଦୁବଚ୍ଚନୁ ଖିଅସ୍‌କସ୍ ତା, ତାଙ୍ଘା ଭାଇସ୍ ତାଙ୍ଘା ମାଏକିନିଆଁବନ୍ ବେଞ୍ଜରସ୍ ଆରୁ ତାଙ୍ଘା ଭାଇସ୍‌କି ଲାଗାନ୍ ବାଉଁଶା ବାଢ଼ାବାଗେ ହାଦ୍ଦୁବଚ୍ଚ ଜନମ୍ କାମସ୍। ²⁵ଏରା ଏହ୍ମା ମାଝାନୁ ସାତ୍‌ଭାଇ ରାଚାର୍; ପହେଲା ଭାଇସ୍ ବେଞ୍ଜରାସ୍ ଆରୁ କେଚ୍ଚାସ୍‌କେରାସ୍, ଆରୁ ହାଦ୍ଦୁବଚ୍ଚ ମା ମାନ୍ନାଘି ଲାଗାନ୍ ତାଙ୍ଘା ମାଏକିନିଆଁବନ୍ ତାଙ୍ଘା ଭାଇସ୍‌କି ଲାଗାନ୍ ଆମ୍ଵେଇଚାସ୍। ²⁶ଏନ୍ନେନ୍ ଦୁସ୍‌ରା ଭାଇସ୍ ଆରୁ ତିସ୍‌ରା ଭାଇସ୍‌ହି ଆ ମାଏକିନିଆଁନ୍ ବେଞ୍ଜରାର୍ ଆରୁ ସାତ୍ ଭାଇରିନ୍ ଆ ମାଏକିନିଆଁନ୍ ବେଞ୍ଜରାର୍। ²⁷ଜାମାର୍‌ଘିନ୍ତି ପାଛ୍‌ଲି ଆ ମାଏକିନିଆଁଦ୍‌ହି କେଚ୍ଚାକେରାଦ୍। ²⁸ହାଲେ ଆରୁଅହନ୍ ଉଜ୍ଜନା ସାମାୟନୁ ଆଦ୍ ଆ ସାତ୍ ଲୋକ୍‌ର୍‌ଘି ଭିତର୍‌ନୁ ନେଖା ମାଏକିନିଆଁ ମାନଦ୍? ଏନ୍ଦେର୍‌ଗେକା ସାତ୍ ଭାଇରିନ୍ ଆ ମାଏକିନିଆଁନ୍ ବେଞ୍ଜର୍‌କାଚାର୍।” ²⁹ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ନିମ୍ ପାବିତାର୍ ଶାସ୍ତ୍ର ଆରୁ ପାର୍‌ମେଶ୍ଵାର୍‌ସ୍‌କି ଶକ୍ତିବନ୍ ବାଲ୍‌ଦାରିନ୍; ହୁଦ୍‌ଘିଲାଗାନ୍ ନିମ୍ ଭୁଲ୍‌ନୁ ଖାତ୍‌ରାଲ୍‌ଦାର୍। ³⁰ଏନ୍ଦେର୍‌ଗେକା ଆରୁଅହନ୍ ଉଜ୍ଜନା ସାମାୟନୁ ନା ମାର୍‌ଦ୍‌ନାର୍ ବେଞ୍ଜର୍‌ନାଏ ନା ମାଏକିନିଆଁରିନ୍ ବେଞ୍ଜାନୁ ଚିଆକାଇ ଲେକିନ୍ ଆବ୍ଡ଼ାର୍ ସରଗ୍‌ତା ଦୂଁତ୍‌ଜାମାର୍ ଲେଖା ମାନ୍ନାଏକାନାଏ। ³¹ଲେକିନ୍ କେଚ୍ଚକା ଆଲାର୍‌ଘି ଆରୁଅହନ୍ ଉଜ୍ଜନାଘି ବାରେନୁ ପାର୍‌ମେଶ୍ଵାର୍‌ସ୍ ନିମାନ୍ ଏକାନ୍ ତେଙ୍କାଦାସ୍: ଆବନ୍ ନିମ୍ ମାଲ୍ଲା ପାଢ଼ୁର୍ କାଁଏ? ³²‘କା ଏନ୍ ଆବ୍ରାହାମ୍‌ସ୍‌କି ପାର୍‌ମେଶ୍ଵାର୍‌ନ୍, ଇସାକ୍‌ସ୍‌କି ପାର୍‌ମେଶ୍ଵାର୍‌ନ୍, ଆରୁ ୟାକୁବ୍‌ସ୍‌କି ପାର୍‌ମେଶ୍ଵାର୍‌ନ୍।’ ଆସ୍ କେଚ୍ଚକା ଆଲାର୍‌ଘି ମାଲ୍ଲା ଲେକିନ୍, ଉଜ୍ଜୁର୍‌ଘି ପାର୍‌ମେଶ୍ଵାର୍‌ସ୍।” ³³ଇବନ୍ ମେନିକିରି ଆଲାର୍ ତାଙ୍ଘା ଶିକ୍ଷାତି ଆଚ୍‌ମିତ୍ ମାନ୍‌ଚାର୍ କେରାର୍।

ଜାମାର୍‌ଘିନ୍ତି ବାଡ଼୍‌କା ନିୟମ୍

(ମାର୍‌କୁସ୍ ୧୨:୨୮-୩୪; ଲୁକାସ୍ ୧୦:୨୫-୨୮)

³⁴ଯେତ୍‌କବାକେନ୍ ଫାରିସୀଜାମାର୍ ମେନ୍‌ଚାର୍ କା ଯୀଶୁସ୍ ସାଦ୍ଦୂକୀଜାମାରିନ୍ ଚୁପ୍ କାମ୍‌ଚେଚ୍‌କାଦାସ୍ ତା, ଆବ୍ଡ଼ାର୍ ଅନ୍‌ଠାଣ୍ ଠୁଡ଼ିୟାରାଚାର୍। ³⁵ଆବ୍ଡ଼ାର୍‌ଘି ଭିତର୍‌ନୁ ଅଣ୍ଟା ନିୟମ୍‌ଘି ଆଗୁୱାସ୍ ଯୀଶୁସିନ୍ ବିଡ଼୍‌ଚେ ଏରାଗେ ଆସିନ୍ ମେନ୍‌ଚାସ୍, ³⁶“ହେ ଗୁରୁ, ନିୟମ୍‌ଘି ଭିତର୍‌ନୁ, ଏକାଦ୍ ଜାମାର୍‌ଘିନ୍ତି ବାଡ଼୍‌କା ହୁକୁମ୍‌ଦ୍?” ³⁷ଯୀଶୁସ୍ ଆସିନ୍ ତେଙ୍ଗିୟାସ୍, “‘ନିନ୍ ପ୍ରାଭୁ ନିଙ୍ଘା ପାର୍‌ମେଶ୍ଵାର୍‌ସିନ୍ ନିଙ୍ଘା ପୁରା ମନ୍‌ତି, ନିଙ୍ଘା ପୁରା ଜୀଆତି ଆରୁ ନିଙ୍ଘା ପୁରା ବୁଦ୍ଧିତି ବାନେ ହାଖ୍ଖା’। ³⁸ଇଦିନ୍ ପହ୍‌ଲେ ଆରୁ ମୁଖ୍ୟା ହୁକୁମ୍‌ଦ୍। ³⁹ଆରୁ ଦୁସ୍‌ରା ହୁକୁମ୍‌ଦ୍‌ହି ଇଦ୍‌ଘି ଲେଖା ରାଇ, ‘ନିମ୍ ନିଜର୍ ପାଡ଼ୋଶୀରିନ୍ ନିଜର୍ ଲେଖା ବାନେ ହାଖ୍ଖା’। ⁴⁰ଇ ଯୋଡ଼େ ହୁକୁମ୍‌ଦ୍ ଜାମା ନିୟମ୍ ଆରୁ ନାବୀଜାମାର୍‌ଘି ପାବିତାର୍ ଶାସ୍ତ୍ରଘି ଅସ୍‌ଲି ମତ୍‌ଲବ୍।”

ଖ୍ରୀସ୍ତ୍‌ସ୍‌କି ବାରେନୁ ପ୍ରଶ୍ନ

(ମାର୍‌କୁସ୍ ୧୨:୩୫-୩୭; ଲୁକାସ୍ ୨୦:୪୧-୪୪)

⁴¹ଯେତ୍‌କବାକେନ୍ ଫାରିସୀର୍ ଅନ୍‌ଠାଣ୍ ରାଚାର୍ ତା, ଯୀଶୁସ୍ ଆବ୍ଡ଼ାରିନ୍ ମେନ୍‌ଚାସ୍, ⁴²“ଖ୍ରୀସ୍ତ୍‌ସ୍‌କି ବାରେନୁ ନିମ୍ ଏନ୍ଦେର୍ ସୋଚ୍‌ଦାର୍? କା ଆସ୍ ନେଖା ହାଦ୍ଦୁସ୍?” ଆବ୍ଡ଼ାର୍ ଯୀଶୁସିନ୍ ତେଙ୍ଗିୟାର୍, “ଦାଉଦ୍‌ସ୍‌କି।” ⁴³ଯୀଶୁସ୍ ଆବ୍ଡ଼ାରିନ୍ ମେନ୍‌ଚାସ୍, “ତା ଦାଉଦ୍‌ସ୍ ପାବିତାର୍ ଆତ୍ମାତି ଭାର୍‌ପୁର୍ ମାନିକିରି ଆସିନ୍ ପ୍ରାଭୁ ବୁଲି ଏସ୍‌କେ ତେଙ୍ଗ୍‌ଦାସ୍? ⁴⁴‘ଏନ୍ଦେର୍‌ଗେକା ଦାଉଦ୍‌ସ୍ ତେଙ୍ଗିୟାସ୍ ପାର୍‌ମେଶ୍ଵାର୍‌ସ୍, ଏଙ୍ଘା ପ୍ରାଭୁସିନ୍ ତେଙ୍ଗିୟାସ୍ ଏଙ୍ଘା ତିନାତାରା ଅକ୍କା, ଯେତ୍‌କବାକେନ୍‌ତକ୍ ଏନ୍ ନିଙ୍ଘା ବିରୋଧିରିନ୍ ନିଙ୍ଘା ହେଡ୍ଡମୁଲିନୁ ମା ଟିଡ଼ନ୍‌ଚନ୍।’ ⁴⁵ଦାଉଦ୍‌ସ୍‌ତା ନିଜେ ଖ୍ରୀସ୍ତ୍‌ସିନ୍ ପ୍ରାଭୁ ବୁଲି ତେଙ୍ଗ୍‌ଦାସ୍, ହୁଦ୍‌ଘିଲାଗାନ୍ ଖ୍ରୀସ୍ତ୍‌ସ୍‌ ଖାଲି ଦାଉଦ୍‌ସ୍‌କି ହାଦ୍ଦୁ ମାଲ୍‌ଦାସ୍ ଲେକିନ୍ ଆସ୍‌କି ପ୍ରାଭୁସ୍‌ହି।” ⁴⁶ଇଦ୍‌ଘି ଯାବାବ୍‌ନୁ ନେଦ୍‌ହି ଏନ୍ଦେର୍‌ହି ତେଙ୍ଗା ପଲ୍ଲିଆରିନ୍, ଆରୁ ହୁ ଉଲ୍‌ତି ନେଦ୍‌ହି ତାଙ୍ଗାନ୍ ଏନ୍ଦେର୍‌ହି ମେନାଗେ ସାହସ୍ ମା କାମ୍‌ଚାର୍।

ଯୀଶୁସ୍ ଫାରିସୀ ଆରୁ ପଣ୍ଡିତ୍ ଜାମାର୍‌ସ୍‌ତି ହୁସିୟାର୍ ରାଗେ ଚେତାବାନୀ ଚିଆଲ୍‌ଦାସ୍

(ମାର୍‌କୁସ୍ ୧୨:୩୮,୩୯; ଲୁକାସ୍ ୧୧:୪୩,୪୬; ୨୦:୪୫,୪୬)

¹ଯୀଶୁସ୍ ଆରୁଅହନ୍ ଆଲାରିନ୍ ଆରୁ ତାଙ୍ଘା ଚେଲାରିନ୍ ତେଙ୍ଗିୟାସ୍, ²“ପଣ୍ତିତ୍ ଆରୁ ଫାରିସୀଜାମାର୍ ମୁଶା ନାବୀସ୍‌କି ରାଜ୍‌ଗାଦୀନୁ ଅକ୍କାନାଏ; ³ହୁଦ୍‌ଘିଲାଗାନ୍ ଆବ୍ଡ଼ାର୍ ଏନ୍ଦେନ୍ ତେଙ୍ଗର୍ ଆବନ୍ ମାନ୍‌କେ, ଲେକିନ୍ ଆବ୍ଡ଼ାର୍ ଲେଖା ନାଲ୍‌ଖୁ ଆମ୍‌କେ କାମା; ଏନ୍ଦେର୍‌ଗେ ଆବ୍ଡ଼ାର୍ ଏକାନ୍ ତେଙ୍ଗ୍‌ନାଏ ଆଦ୍‌ଘି ଲେଖା ମା କାମ୍‌ନାଏ। ⁴ଆବ୍ଡ଼ାର୍ ଏନ୍ନେ ମୁରୁକ୍ ଅତ୍‌ଥାବନ୍, ଏକାନ୍ କା ଟେକାଗେ ମୁସ୍‌କିଲ୍ ରାଇଦ୍, ଆବନ୍ ହିଁକିରି ଆଲାର୍‌ଘି ହେଁସେର୍‌ନୁ ଉଇନାଏ; ଲେକିନ୍ ଆବ୍ଡ଼ାର୍ ନିଜେ ତାହ୍ମା ଆଙ୍ଗ୍‌ଠିତି ଟେକାଗେହି ମା ବେଦ୍ଦ୍‌ନାଏ। ⁵ଆବ୍ଡ଼ାର୍ ଆଲାରିନ୍ ଏଦାଗେ ତାହ୍ମା ନାଲ୍‌ଖୁଗୁଠିନ୍ କାମ୍‌ନାଏ: ଆରୁ ଆବ୍ଡ଼ାର୍ ପ୍ରାଭୁସ୍‌କି ବଚନ୍‌ବନ୍ ଚାପ୍‌ଟାତି ତିୟାର୍ ମାନ୍‌ଚ୍‌କା ତାବିଜ୍‌ନୁ ଉଇନାଏ ଆରୁ ଆ ତାବିଜ୍‌ବନ୍ କାପ୍‌ଡ଼େ ଆରୁ ବାହାଁନୁ ହିର୍‌ନାଏ ଆରୁ ତାହ୍ମା ଚିଢ଼ାଘି ପାଣ୍‌ତୁନ୍ ଚାଉଡ଼ା କାମ୍‌ନାଏ। ⁶ଭୋଜିନୁ ମୁଖ୍ୟା-ମୁଖ୍ୟା ଆଡ୍ଡାଗୁଠିନୁ ଆରୁ ସାଭା ଆଡ଼୍‌ପାନୁ ମୁଖ୍ୟା ଆଡ୍ଡାନୁ ଅକ୍କାଗେ ବେଦ୍ଦ୍‌ନାଏ, ⁷ଆରୁ ହାଟ୍ଟେଗୁଠିନୁ ଯୋହାର୍ ହାଖ୍ଖାଗେ ଆରୁ ଆଲାର୍‌ସ୍‌ତି ଗୁରୁବୁଲି ତେଙ୍ଗ୍‌ରାଗେ ବାନେ ବାନାଏ। ⁸ଲେକିନ୍ ନିମ୍ ଗୁରୁବୁଲି ଆମ୍‌କେ ତେଙ୍ଗ୍‌ରା, ଏନ୍ଦେର୍‌ଗେକା ନିହ୍ମାଏ ଅଣ୍ଟା ଖାଲି ଗୁରୁ ରାଦାସ୍, ଆରୁ ନିମ୍ ଜାମାର୍ ଭାଇ ଭାଇର୍। ⁹ଆରୁ ଦୁନିଆଁନୁ ନେକାନ୍‌ହି ବାଙ୍ଗ୍ ବୁଲି ଆମ୍‌କେ ତେଙ୍ଗା, ଏନ୍ଦେର୍‌ଗେକା ନିହ୍ମାଏ ଅଣ୍ଟା ଖାଲି ବାଙ୍ଗ୍‌ସ୍‌ ରାଦାସ୍, ଆସ୍ ସରଗ୍‌ନୁ ରାଦାସ୍। ¹⁰ଆରୁ ନିମ୍ ମାଲିକ୍‌ର୍‌ବୁଲି ଆମା ତେଙ୍ଗ୍‌ରା, ଏନ୍ଦେର୍‌ଗେକା ନିହ୍ମାଏ ଅଣ୍ଟା ଖାଲି ମାଲିକ୍ ରାଦାସ୍, ଆସ୍ ଖ୍ରୀସ୍ତ୍‌ସ୍‌। ¹¹ଲେକିନ୍ ନିହ୍ମା ଭିତର୍‌ନୁ ନେଦ୍ ଜାମାର୍‌ଘିନ୍ତି ବାଡ଼୍‌କାର୍, ଆର୍ ନିହ୍ମାଏ ଗୁତ୍ତିୟା ମାନର୍। ¹²ନେଦ୍ ନିଜ୍‌କେନିଜ୍ ବାଡ଼୍‌କା ବୁଲି ସୋଚ୍‌ନାଏ, ଆବ୍ଡ଼ାରିନ୍ ନରମ୍ କାମାକୋ: ଆରୁ ନେଦ୍ ନିଜ୍‌କେନିଜ୍ ନରମ୍ ସୋଚ୍‌ନାଏ, ଆବ୍ଡ଼ାରିନ୍ ବାଡ଼୍‌କା କାମାକୋ।”

¹³“ହେ କପ୍‌ଟୀ ଫାରିସୀ ଆରୁ ପଣ୍ତିତ୍‌ଜାମାରୋ, ନିମ୍ ଦଣ୍ତ୍‌ଘି ହକ୍‌ଦାର୍ ରାଦାର୍! ଏନ୍ଦେର୍‌ଗେକା ନିମ୍ ଆଲାର୍‌ଗେ ସରଗ୍ ରାଜୀନ୍ତା ବାଲିବନ୍ ମୁଚ୍ଚଦାର୍ ଚିଦାର୍। ନିମ୍‌ତା ନିଜେ ମା କର୍‌ଦାର୍, ଆରୁ ନେଦ୍ କରାଗେ ବେଦ୍ଦନାଏ ଆବ୍ଡ଼ାରିନ୍‌ହି କରାଗେ ମା ଚିଦାର୍। ¹⁴[ହେ, କପ୍‌ଟୀ ପଣ୍ଡିତ୍ ଆରୁ ଫାରିସୀଜାମାରୋ, ନିମ୍ ଦଣ୍ଡ୍‌ଘି ହକ୍‌ଦାର୍! ଏନ୍ଦେର୍‌ଗେକା ନିମ୍ ରାଣ୍ଡି ମାଏକିନିଆଁର୍‌ଘି ଆଡ଼୍‌ପା ଗୁଠିନ୍ ଲୁଟ୍‌ଦାର୍, ଆରୁ ଏଦ୍‌ରାଗେ ବହୁତ୍ ଡେରି ଜୁଟି ବିନ୍ତି କାମ୍‌ଦାର୍: ହୁଦ୍‌ଘିଲାଗାନ୍ ନିମାଗେ ବାଗ୍ଗେ ଦଣ୍ଡ୍ ହାଖ୍ଖରଦ୍।]”

¹⁵“ହେ କପ୍‌ଟୀ ପଣ୍ତିତ୍ ଆରୁ ଫାରିସୀଜାମାରୋ, ନିମ୍ ଦଣ୍ଡ୍‌ଘି ହକ୍‌ଦାର୍ ରାଦାର୍! ଏନ୍ଦେର୍‌ଗେକା ନିମ୍ ଅର୍‌ତୁସିନ୍ ନିହ୍ମା ଚେଲା କାମାଗେ ପୁରା ଦୁନିଆଁନ୍ତା ସାମ୍‌ଧୁର୍ ଆରୁ ଧାନ୍ତାରି ଜାମାତାରା କୁଦ୍ଦ୍‌ଦାର୍, ଆରୁ ଯେତ୍‌କବାକେନ୍ ଆସ୍ ନିହ୍ମା ଚେଲା ମାନ୍‌ଦାସ୍‌କାଦାସ୍ ତା ଆସିନ୍ ନିମ୍ ନିହ୍ମାସ୍‌ତିହି ଦୁଇଗୁଣ୍ ନରକ୍‌ଘି ଲାଇଗ୍ କାମ୍‌ଦାର୍ ଚିଦାର୍।”

¹⁶“ହେ କାଁଣା ଆଗୁୱାରୋ, ନିମ୍ ଦଣ୍ଡ୍‌ଘି ହକ୍‌ଦାର୍! ଏନ୍ଦେର୍‌ଗେକା ନିମ୍ ତେଙ୍ଗ୍‌ଦାର୍ କା ନେଦ୍ ମନ୍ଦିର୍‌ଘି କସମ୍ ମହଁନାଏ ତା ଆଦ୍ ଏନ୍ଦେର୍‌ହି ମାଲ୍ଲିଦ୍, ଲେକିନ୍ ଯଦି ଏକାସ୍ ମନ୍ଦିର୍‌ତା ସୋନାଘି କସମ୍ ମହ୍ଁଦାସ୍ ତା ଆସ୍ ଆତ୍ତିନ୍ ହିର୍‌ଦାସ୍‌କାଦାସ୍। ¹⁷ହେ ମୁରୁଖ୍ ଆରୁ କାଁଣାରୋ, ଏକାଦ୍ ବାଡ଼୍‌କାଦ୍; ସୋନାଦ୍ କା ଆ ମନ୍ଦିର୍‌ଦ୍ ଏକାତି କା ସୋନାଦ୍ ପାବିତାର୍ ମାନିଦ୍? ¹⁸ଆରୁହି ନିମ୍ ତେଙ୍ଗ୍‌ଦାର୍ କା, ଯଦି ନେଦ୍ ବେଦୀଘି କସମ୍ ମହଁର୍ ତା ଏନ୍ଦେର୍‌ହି ମାଲ୍ଲିଦ୍ ଲେକିନ୍ ନେଦ୍ ଆ ବେଦୀନୁ ଚାଢ଼ାବାଚ୍‌କା ଭେଁଟ୍‌ଘି କସମ୍ ମହଁର୍ ତା ଆର୍ ଆତ୍ତିନ୍ ହିଁରର୍‌କର୍। ¹⁹ହେ କାଁଣାରୋ, ଏକାଦ୍ ବାଡ଼୍‌କାଦ୍; ଭେଁଟ୍‌କା ବେଦୀଦ୍ ଏକାତି କା ଭେଁଟ୍‌ଦ୍ ପାବିତାର୍ ମାନିଦ୍? ²⁰ହୁଦ୍‌ଘିଲାଗାନ୍ ନେଦ୍ ବେଦୀଘି କସମ୍ ମହ୍ଁନାଏ, ଆର୍ ବେଦୀଘି ଆରୁ ବେଦୀନୁ ରୁ ଜିନିଷ୍‌ଘି କସମ୍ ମହ୍ଁନାଏ। ²¹ଆରୁ, ନେଦ୍ ପାର୍‌ମେଶ୍ୱାର୍‌ସ୍‌କି ମନ୍ଦିର୍‌ଘି କସମ୍ ମହ୍ଁନାଏ, ଆର୍ ମନ୍ଦିର୍ ଆରୁ ଆନ୍ନୁ ରୁର୍‌ଘିହି କସମ୍ ମହ୍ଁନାଏ। ²²ଆରୁ, ନେଦ୍ ସରଗ୍‌ଘି କସମ୍ ମହ୍ଁନାଏ, ଆର୍ ପାର୍‌ମେଶ୍ଵାର୍‌ସ୍‌କି ରାଜ୍‌ଗାଦୀ ଆରୁ ଆନ୍ନୁ ଅକ୍କୁସ୍‌କିହି କସମ୍ ମହ୍ଁନାଏ।”

²³“ହେ କପ୍‌ଟୀ ପଣ୍ତିତ୍ ଆରୁ ଫାରିସୀ ଜାମାରୋ, ନିମାଗେ ବହୁତ୍ ଦଣ୍ଡ୍ ହାଖ୍ଖର୍‌ନାବାଲା ରାଇ! ଏନ୍ଦେର୍‌ଗେକା ନିମ୍ ପୁଦିନା, ସୋଁପ୍, ଆରୁ ଜିରାଘି ଦଶ୍‌ଭାଗ୍ ଚିଦାର୍, ଲେକିନ୍ ନିମ୍ ନିୟମ୍‌ଘି ମୁଖ୍ୟା ବିଷୟଗୁଠିନ୍ ଏସ୍‌କେ କା ନ୍ୟାୟ, ଦାୟା ଆରୁ ବିଶ୍ଵାସ୍ ଇବ୍ଡ଼ାଗୁଠିନ୍ ଆମ୍ବେଇ ଚିଚ୍‌କାଦାର୍; ଲେକିନ୍ ଇବ୍ଡ଼ା ଜାମାନ୍ ମାନ୍ନା ଆରୁ ଆବ୍ଡ଼ାଗୁଠିନ୍‌ହି ମା ଆମ୍ବନା କାତ୍‌ଥା। ²⁴ହେ, କାଁଣା ଆଗୁୱାରୋ, ନିମ୍ ଗୁଣିଆବନ୍ ଛାଣ୍‌ଦାର୍, ଲେକିନ୍ ଉଁଟ୍‌ବନ୍ ଗିଡ଼୍‌ଦାର୍ ଚିଦାର୍।”

²⁵“ହେ, କପ୍‌ଟୀ ପଣ୍ତିତ୍ ଆରୁ ଫାରିସୀଜାମାରୋ, ନିମାଗେ ବହୁତ୍ ଦଣ୍ଡ୍ ହାଖ୍ଖର୍‌ନାବାଲା ରାଇ! ଏନ୍ଦେର୍‌ଗେକା ନିମ୍ ଥାଡ଼ି ଆରୁ ଗିନାଘି ବାହ୍‌ରି-ବାହ୍‌ରିତା ମାଞ୍ଜଦାର୍, ହନ୍ନେନ୍ ନିମ୍ ବାହ୍‌ରି ତାର୍‌ତି ସାଫା ଏଥ୍‌ର୍‌ଦାର୍ ଲେକିନ୍ ନିହ୍ମାଏନୁ ଲୁଟ୍‌ପାଟ୍ ଆରୁ ଲୋଭ୍ ଲାଲଚ୍‌ତି ନିନ୍ଦ୍‌କା ରାଇଦ୍। ²⁶ହେ କାଁଣା ଫାରିସୀଜାମାରୋ, ଆଘ୍‌ଲି ଗିନା ଆରୁ ଥାଡ଼ିଘି ଉଲା ସାଫା କାମା ଏସ୍‌କେ କା ଆଦ୍‌ଘି ବାହ୍‌ରିହି ସାଫା ମାନଦ୍।”

²⁷“ହେ କପ୍‌ଟୀ ପଣ୍ତିତ୍ ଆରୁ ଫାରିସୀଜାମାରୋ; ନିମାଗେ ବହୁତ୍ ଦଣ୍ଡ୍ ହାଖ୍ଖର୍‌ନାବାଲା ରାଇ! ଏନ୍ଦେର୍‌ଗେକା ନିମ୍ ଚୁନ୍ନେ ଲାଗାବାଚ୍‌କା ମାସ୍‌ଣା ଲେଖା ରାଦାର୍ ଏକାଦ୍ କା ବାହ୍‌ରିନ୍ତିତା ସୁନ୍ଦର୍ ଏଥ୍‌ରି, ଲେକିନ୍ ଉଲା କେଚ୍ଚ୍‌କା ଆଲାର୍‌ଘି ହଁଚଲ୍ ଆରୁ କେଚ୍ଚକେଚା ମାଏଲାତି ନିନ୍ଦ୍‌କା ରାଇଦ୍। ²⁸ହନ୍ନେନ୍ ନିମ୍‌ହି ବାହ୍‌ରିନ୍ତି ଆଲାର୍‌ଘି ନଜର୍‌ନୁ ଧାର୍ମିକ୍ ଏଥ୍‌ର୍‌ଦାର୍, ଲେକିନ୍ ନିହ୍ମା ମନ୍‌ନୁ କପଟ୍ ଆରୁ ଅଧର୍ମି ନିନ୍ଦକିଚି।”

²⁹“ହେ କପ୍‌ଟୀ ଫାରିସୀ ଆରୁ ପଣ୍ତିତ୍‌ଜାମାରୋ, ନିମାଗେ ବହୁତ୍ ଦଣ୍ଡ୍ ହାଖ୍ଖର୍‌ନାବାଲା ରାଇ! ଏନ୍ଦେର୍‌ଗେକା ନିମ୍ ନାବୀଜାମାର୍‌ଘି ମାସ୍‌ଣା ତିୟାର୍ କାମ୍‌ଦାର୍ ଆରୁ ଧାର୍ମିକ୍ ଜାମାର୍‌ଘି ମାସ୍‌ଣାନ୍ ସାଜାବାଦାର୍। ³⁰ଆରୁ ତେଙ୍ଗ୍‌ଦାର୍, ‘ଯଦି ଏମ୍ ଏହ୍ମା ପୁର୍‌ଖା ଜାମାର୍‌ଘି ସାମାୟନୁ ରାଚ୍‌କାରମ୍‌ନେ ତା ନାବୀଜାମାରିନ୍ ଡେମ୍‌ନା, ପିଟ୍ଟନାନୁ ଆବ୍ଡ଼ାର୍‌ଗେ ସାଙ୍ଗେ ମା ଚିଚ୍‌କାରମ୍‌ନେ।’ ³¹ହନ୍ନେନ୍ ତା ନିମ୍ ନିଜେ ନିହ୍ମା ବାରେନୁ ସାକ୍ଷୀ ଚିୟାଲ୍‌ଦାର୍ କା ନିମ୍ ନାବୀଜାମାରିନ୍ ପିଟୁର୍‌ଘି ହାଦ୍ଦୁବଚ୍ଚର୍। ³²ତା ନିମ୍ ନିହ୍ମା ପୁର୍‌ଖାର୍ ଏକାନ୍ ସୁରୁ କାମ୍‌ଚାର୍ ଆବନ୍ ନିମ୍ ମୁଞ୍ଜା। ³³ହେ ନେର୍‌ରୁ ଗୁଠିରୋ, ଆରୁ ହେ ବିଷ୍ ରୁ ନେର୍‌ରୁଘି ହାଦ୍ଦୁବଚ୍ଚର୍, ନିମ୍ ନରକ୍‌ଘି ଦଣ୍ଡ୍‌ନ୍ତିନ୍ ଏସ୍‌କେ ବାଛ୍‌ରା ଅଙ୍ଗର୍? ³⁴ହୁଦ୍‌ଘିଲାଗାନ୍ ଏରା, ଏନ୍ ନିହ୍ମା ଚାହାଗେ ନାବୀରିନ୍, ଜ୍ଞାନୀରିନ୍ ଆରୁ ପଣ୍ତିତ୍ ଜାମାରିନ୍ ତାଇୟାଲ୍‌ଦାନ୍; ଆବ୍ଡ଼ାର୍‌ଘି ଭିତର୍‌ନୁ ନେକା-ନେକାନ୍ ନିମ୍ ପିଟର୍‌ଚର୍ ଆରୁ କ୍ରୁଶ୍‌ନୁ ଠୋକର୍‌ଚର୍, ଆରୁ ନେକା-ନେକାନ୍ ନିହ୍ମା ସାଭା ଆଡ଼୍‌ପାନୁ କୋଡ୍‌ରାତି ଡେମର୍ ଆରୁ ସହର୍ ସହର୍‌ନୁ ସାତାବର୍। ³⁵ଏସ୍‌କେ କା ଧାର୍ମିକ୍ ହାବିଲ୍‌ସ୍‌କି ହେଁସୁତି ହୋଇକିରି ବେରିଖିୟସ୍‌କି ହାଦ୍ଦୁ ଜାକ୍ରିୟାସ୍‌ତକ୍, ନେକାନ୍ କା ନିମ୍ ପାର୍‌ମେଶ୍ୱାର୍‌ସ୍‌କି ମନ୍ଦିର୍ ଆରୁ ବେଦୀଘି ମାଝାନୁ ପିଟ୍ଟକାଚ୍‌କାର୍, ଆବ୍ଡ଼ାର୍‌ଘି ହେଁସୁ ଆରୁ ଯେତ୍‌କ ଧାର୍ମିର୍‌ଘି ହେଁସୁ ଦୁନିଆଁନୁ ବାହାବା କେର୍‌କିଚି, ଆବ୍ଡ଼ା ଜାମାଦ୍ ନିହ୍ମା ମିଆଁ ଖାତ୍‌ରଦ୍। ³⁶ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍, ଇବ୍ଡ଼ା ଜାମାଦ୍ ଇ ଯୁଗ୍ଗନ୍ତା ଆଲାର୍‌ଘି ମିଆଁ ଖାତ୍‌ରଦ୍।”

ଯୀଶୁସ୍ ଯେରୁଶାଲେମ୍‌ଘି ଲାଗାନ୍ ଦୁଃଖୁ ମାନ୍‌ଚାସ୍

(ଲୁକାସ୍ ୧୩:୩୪,୩୫)

³⁷“ହେ ଯେରୁଶାଲେମ୍, ହେ ଯେରୁଶାଲେମ୍! ନିନ୍ ନାବୀଜାମାରିନ୍ ପିଟ୍ଟଦିନ୍ ଚିଇଦିନ୍ ଆରୁ ନେକାନ୍ ନିଙ୍ଘା ଚାହାଗେ ତାଏୟା କାଇ, ଆବ୍ଡ଼ାରିନ୍ ଚାଁଚାତି ଡେମ୍‌ଦିନ୍। ୟୋଁଥର୍ ଏନ୍ ଚାହଁଚ୍‌କାନ୍ କା ଏସ୍‌କେ ହେରୁଦ୍ ତାଙ୍ଘା ହାଦ୍ଦୁବନ୍ ତାଙ୍ଘା ଡେଣା କିଆଁ ଠୁଡ଼ିୟିଦ୍, ହନ୍ନେନ୍ ଏନ୍‌ହି ନିଙ୍ଘା ହାଦ୍ଦୁରିନ୍ ଠୁଡ଼ିୟନ୍, ଲେକିନ୍ ନିନ୍ ମା ଚାହଁଚ୍‌କିନ୍। ³⁸ଏରା, ନିହ୍ମା ଆଡ଼୍‌ପାଦ୍ ନିହ୍ମା ଲାଗାନ୍ ଆମ୍ବାଚା କାଲିଦ୍। ³⁹ଏନ୍ଦେର୍‌ଗେକା ଏନ୍ ନିମାନ୍ ତେଙ୍ଗାଲ୍‌ଦାନ୍, ‘ପ୍ରାଭୁସ୍‌କି ନାମେନୁ ନେର୍ ବାରାଲ୍‌ନାଏ, ଆବ୍ଡ଼ାର୍ ଧଏନ୍ ରାନାଏ’, ନିମ୍ ଇ କାତ୍‌ଥାନ୍ ମା ତେଙ୍ଗ୍‌ନାତକ୍ ଏଙ୍ଗାନ୍ ପ୍ରକୃତ୍‌ନୁ ଆରୁ ଏରା ପଲ୍ଲିୟାରିନ୍।”

ପାର୍‌ମେଶ୍ୱାର୍‌ସ୍‌କି ମନ୍ଦିର୍‌ଘି ନାଶ୍ ମାନ୍ନାଘି ଭବିଷତ୍ କାତ୍‌ଥା

(ମାର୍‌କୁସ୍ ୧୩:୧,୨; ଲୁକାସ୍ ୨୧:୫,୬)

¹ଯେତ୍‌କବାକେନ୍ ଯୀଶୁସ୍ ମନ୍ଦିର୍‌ତି ଉର୍‌ଖିକିରି କାଲିୟାସ୍ ତା, ତାଙ୍ଘା ଚେଲାର୍ ମନ୍ଦିର୍‌ଘି ମହଲ୍‌ବନ୍ ଏଦାଗେ ତାଙ୍ଘା ଚାହାଗେ ବାର୍‌ଚାର୍। ²ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଜାମାର୍ ଇବନ୍ ମା ଏରାଲ୍‌ଦାର୍ କାଁଏ? ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍, ଇସାନ୍ ଅଣ୍ଟା ଚାଁଚାଘି ମିଆଁ ଆରୁ ଅଣ୍ଟା ଚାଁଚା ମା ରାଇ ଜାମାନ୍ ଧାସ୍‌କାଚା କୋ।”

ଦୁଃଖୁ ଆରୁ ତକ୍‌ଲିପ୍

(ମାର୍‌କୁସ୍ ୧୩:୩-୧୩; ଲୁକାସ୍ ୨୧:୭-୧୯)

³ଯେତ୍‌କବାକେନ୍ ଯୀଶୁସ୍ ଜାଇତୁନ୍ ପାର୍ତ୍ତାନୁ ଅକ୍କାଚାସ୍‌ତା, ଚେଲାଜାମାର୍ ଭିନେ ତାରା ଆସ୍‌କି ଚାହାନୁ ବାରିକିରି ମେନ୍‌ଚାର୍, “ଏମାନ୍ ତେଙ୍ଗା କା ଇ କାତ୍‌ଥାଦ୍ ଏକ୍‌ଲା ଘାଟ୍‌ରୋ? ନିହ୍ମା ବାର୍‌ନାଘି ଆରୁ ଦୁନିଆଁ ଆଖ୍‌ରୀ ମାନ୍ନାଘି ଏନ୍ଦେର୍ ଚିହ୍ନା ମାନଦ୍?” ⁴ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ହୁସିୟାର୍ ରା! ନେଦ୍‌ହି ନିମାନ୍ ମା ଫୁସ୍‌ଲର୍, ⁵ଏନ୍ଦେର୍‌ଗେକା ଢେର୍ ଆଲାର୍ ଏଙ୍ଘା ନାମେନୁ ବାରର୍ ଆରୁ ତେଙ୍ଗର୍, ‘ଏନ୍ ଖ୍ରୀସ୍ତ୍‌ନ୍‌’, ଆରୁ ଢେର୍ ଆଲାରିନ୍ ଫୁସ୍‌ଲର୍। ⁶ଯେତ୍‌କବାକେନ୍ ନିମ୍ ଲାଡ଼ାଇଘି ଚାର୍‌ଚା, ଆରୁ ଚାହାନ୍ତା ଲାଡ଼ାଇଘି ଶବଦ୍ ଆରୁ ଗେଚ୍ଛାନ୍ତା ଲାଡ଼ାଇଘି ଖବର୍ ମେନର୍ ତା ଆମ୍‌କେ ଘାବ୍‌ରାରା; ଏନ୍ଦେର୍‌ଗେକା ଏନ୍ନେ ମାନ୍ନା ଜରୁରୀ ରାଇ, ଲେକିନ୍ ଇଦିନ୍ ଆଖ୍‌ରୀ ମାଲ୍ଲିଦ୍। ⁷ଏନ୍ଦେର୍‌ଗେକା ଜାତିଘି ବିରୁଦ୍ଧ୍ ଜାତି ଆରୁ ରାଜୀଘି ବିରୁଦ୍ଧ୍ ରାଜୀ ଉସ୍‌କାରୋ ଆରୁ ଆଡ୍ଡା ଆଡ୍ଡାନୁ ଆକାଲ୍ ମାନଦ୍ ଆରୁ ଭୁଇଁଡୋଲ୍ ମାନଦ୍। ⁸ଇ ଜାମା କାତ୍‌ଥାଦ୍ ମୁରୁକ୍ ଦୁଃଖୁଘି ସୁରୁଦ୍। ⁹ଆନ୍ତିନ୍ ଆବ୍ଡ଼ାର୍ ଦୁଃଖୁ ଚିୟାଗେ ନିମାନ୍ ଧାର୍‌ତର୍, ଆରୁ ନିମାନ୍ ପିଟର୍‌ଚର୍, ଆରୁ ଏଙ୍ଘାଲାଗାନ୍ ଜାମା ଜାତିନ୍ତା ଆଲାର୍ ନିମାନ୍ ହାଁଣର୍ ତୁପ୍‌ଫର୍। ¹⁰ହୁ ସାମାୟନୁ ଢେର୍ ଆଲାର୍ ଏଙ୍ଘା ମିଆଁ ବିଶ୍ୱାସ୍ ଆମ୍ବିକିରି ବୁଙ୍ଗର୍‌ଚର୍, ଆର୍ ଏକ୍ ଦୁସ୍‌ରାରିନ୍ ଧାର୍‌ତର୍, ଆରୁ ଏକ୍ ଦୁସ୍‌ରାରିନ୍ ହାଁଣର୍ ତୁପ୍‌ଫର୍। ¹¹ଢେର୍ ଠାକୁୱା ନାବୀର୍ ଉର୍‌ଖର୍ ଆରୁ ଢେର୍ ଆଲାରିନ୍ ଫୁସ୍‌ଲର୍। ¹²ଅଧର୍ମିୟାଁ ଆଲାର୍‌ଘି ବାଢ଼୍‌ର୍‌ନାତି ଢେର୍ ଆଲାର୍‌ଘି ବାନେ ହାଖ୍ଖନାଦ୍ ଘାଟ୍‌ରିକି, ¹³ଲେକିନ୍ ନେଦ୍ ଆଖ୍‌ରୀତକ୍ ଧିରାଜ୍ ଧାରିକିରିରର୍, ଆବ୍ଡ଼ାର୍ ମୁକ୍ତି ହାଖ୍ଖର୍। ¹⁴ଆରୁ ଜାମା ଜାତିୟାର୍‌ସାନ୍ ସାକ୍ଷୀ ଚିୟାଗେ, ରାଜୀନ୍ତା ଇ ସୁସାମାଚାର୍ ଜାମା ଦୁନିଆଁନୁ ପ୍ରଚାର୍ କାମାକଦ୍, ଆନ୍ତିନ୍ ଆଖ୍‌ରୀ ମାନଦ୍।”

ବାଡ଼୍‌କା ବିପଦ୍‌ଘି ସୁରୁ

(ମାର୍‌କୁସ୍ ୧୩:୧୪-୨୩; ଲୁକାସ୍ ୨୧:୨୦-୨୪)

¹⁵“ଏନ୍ ଆକ୍କୁନ୍ ଏକାନ୍ ଲେଖାଲ୍‌ଦାନ୍ ଆବନ୍ ପାଢ଼ୁର୍ ବାନେକିରି ପାଢ଼ିକିରି ଆଦ୍‌ଘି ମତ୍‌ଲବ୍ ବୁଝ୍‌ରା। ଦାନିଏଲ୍ ନାବୀସ୍‌କି ଦ୍ୱାର୍‌ନୁ ତେଙ୍ଗାକେର୍‌କିଚା କା ଅନ୍ଦୁଲ୍ ନିମ୍ ପାର୍‌ମେଶ୍ଵାର୍‌ସ୍‌କି ମନ୍ଦିର୍‌ବନ୍ ଆପାବିତାର୍ କାମ୍‌ନାବାଲା ଅଣ୍ଟା ଜିନିଷ୍ ମନ୍ଦିର୍‌ନୁ ଇଲ୍‌ତାଚ୍‌କାନ୍ ଏରର୍, ¹⁶ହତ୍‌କବାକେନ୍ ଏକାର୍ ୟାହୁଦୀଆନୁ ରର୍ ଆବ୍ଡ଼ାର୍ ପାର୍ତ୍ତାଗେ ବୁଙ୍ଗାକାଲା। ¹⁷ଆରୁ ଏକାର୍ ଆଡ଼୍‌ପା ମିଆଁ ରର୍, ଆବ୍ଡ଼ାର୍ ନିଜର୍ ଆଡ଼୍‌ପାନ୍ତି ଏନ୍ଦେର୍‌ହି ହୁଆଗେ କିୟାଁ ଆମା ଏତ୍ତା; ¹⁸ଆରୁ ଏକାର୍ ହାଲ୍ଲୁନୁ ରର୍, ଆବ୍ଡ଼ାର୍ ନିଜର୍ ଚାଦର୍ ହୁଆଗେ ପାଛ୍‌ଲି ଆମ୍ବର୍ କିର୍‌ରା।”

¹⁹“ହୁ ସାମାୟନୁ ନେଦ୍ ମେଦୁନୁ ରର୍ ଆରୁ ଏକା ମାଏକିନିଆଁର୍‌ଘି ଗୁରସ୍ ହାପ୍ପୁ ହାଦ୍ଦୁ ରର୍ ଆବ୍ଡ଼ାର୍‌ଗେ ମୁରୁକ୍ ଦୁଃଖୁ ବାରୋ। ²⁰ବିନ୍ତି କାମ୍‌ତେ ରା କା ନିମାଗେ ପାୟାଁ ଉଲ୍ଲାନୁ ଆରୁ ପାବିତାର୍ ଉଲ୍ଲାନୁ ବୁଙ୍ଗାଗେ ମା ଖାତ୍‌ରୋ। ²¹ଏନ୍ଦେର୍‌ଗେକା ହୁ ସାମାୟନୁ ମୁରୁକ୍ ଦୁଃଖୁ ତକ୍‌ଲିପ୍ ମାନଦ୍, ଏସ୍‌କେ କା ଦୁନିଆଁଘି ସୁରୁନ୍ତି ନା ଆକ୍କୁନ୍‌ତକ୍ ମାନ୍‌ଚ୍‌କିଚି ଆରୁ ନା ଏକ୍‌ଲାହି ମାନଦ୍। ²²ଯଦି ଆ ଉଲ୍ଲାନ୍ କମାବା ମା କେର୍‌କିରଦ୍‌ନେ ତା ଏକା ଆଲାର୍‌ହି ମା ବାଛ୍‌ର୍‌କା ରର୍‌ନେ, ଲେକିନ୍ ଚାଜ୍ଜକା ଆଲାର୍‌ଘି ଲାଗାନ୍ ଆ ଉଲ୍ଲାନ୍ କମାବା କୋ। ²³ଆ ସାମାୟନୁ ଯଦି ନେଦିନ୍ ନିମାନ୍ ତେଙ୍ଗ୍‌ନାଏ, ‘ଏରା, ଖ୍ରୀସ୍ତ୍‌ସ୍‌ ଇସାନ୍ ରାଦାସ୍!’ ଚାହେ ‘ଆସାନ୍ ରାଦାସ୍!’ ହାଲେ ବିଶ୍ୱାସ୍ ଆମ୍‌କେ କାମା।”

²⁴“ଏନ୍ଦେର୍‌ଗେକା ଝୁଟ୍ଟୁ ଖ୍ରୀସ୍ତ୍ ଆରୁ ଝୁଟ୍ଟୁ ନାବୀର୍ ବାରର୍, ଆରୁ ବାଡ଼୍‌କା ଚିହ୍ନା, ଆରୁ ଅଦ୍‌ଭୁତ୍ ନାଲ୍‌ଖୁ ଏଦିକିରି ଯଦି ମାନଦ୍‌ନେ ତା, ଆବ୍ଡ଼ାର୍ ଚାଜ୍ଜକା ଆଲାରିନ୍‌ହି ଫୁସ୍‌ଲର୍ ଚର୍‌ନେ। ²⁵ଏରା, ଏନ୍ ଆଘ୍‌ଲିନ୍ତିନ୍ ନିମାନ୍ ଇ ଜାମାନ୍ ତେଙ୍ଗେଚ୍‌କାଦାନ୍। ²⁶ହୁଦ୍‌ଘିଲାଗାନ୍ ଯଦି ଆବ୍ଡ଼ାର୍ ନିମାନ୍ ତେଙ୍ଗ୍‌ନାଏ, ‘ଏରା, ଖ୍ରୀସ୍ତ୍‌ସ୍‌ ହାର୍‌ବୁନୁ ରାଦାସ୍’, ତା ବାହ୍‌ରି ଆମ୍‌କେ ଉର୍‌ଖାକାଲା; ଆରୁ ‘ଏରା, ଖ୍ରୀସ୍ତ୍‌ସ୍‌ ବାଖ୍‌ରାନୁ ରାଦାସ୍’, ତା ବିଶ୍ୱାସ୍ ଆମ୍‌କେ କାମା।

²⁷ଏନ୍ଦେର୍‌ଗେକା ଏସ୍‌କେ ବିଜ୍‌ଲିଦ୍ ପୁରୁବ୍‌ତି ଉର୍‌ଖିକିରି ପଶ୍ଚିମ୍‌ତକ୍ ବିଲ୍‌ଚିଦ୍, ଆନ୍ନେନିନ୍ ମୁନୁଷ୍ ହାଦ୍ଦୁସ୍‌କିହି ବାର୍‌ନାଦ୍ ମାନଦ୍। ²⁸ଏକାସାନ୍ ମାଁଣା ରାଇ, ଆସାନ୍ ଗିଧିଦ୍ ଠୁଡ଼ିୟାରିଦ୍ ଆନ୍ନେନ୍ ଇବ୍ଡ଼ା ଚିହ୍ନାନ୍ ଏରିକିରି ବୁଝର୍‌କେ କାଲ୍‌କେ କା ପାର୍‌ମେଶ୍ୱାର୍‌ସ୍‌କି ହାଦ୍ଦୁସ୍ ବାର୍‌ନାବାଲାସ୍ ରାଦାସ୍।”

ମୁନୁଷ୍ ହାଦ୍ଦୁସ୍‌କି ଆରୁଅହନ୍ ବାର୍‌ନା

(ମାର୍‌କୁସ୍ ୧୩:୨୪-୨୭; ଲୁକାସ୍ ୨୧:୨୫-୨୮)

²⁹“ଲେକିନ୍ ଦୁଃଖୁଘି ଆ ଉଲ୍ଲା ପାଛ୍‌ଲି, ହୁଙ୍ଗେନିନ୍ ବିଡ଼ିଦ୍ ଆରୁ ଚାନ୍ଦୋଦ୍ ବିଲ୍ଲୀ ଚିନା ବନ୍ଦ୍ କାମଚୋ, ଆରୁ ବିନ୍‌କୋ ଆକାଶ୍‌ତି ଖାତ୍‌ରକୋ ଆରୁ ଏନ୍ଦ୍ରିନ୍‌ହି ଆକାଶ୍‌ନୁ ରାଇ ଆଦ୍ ଇୟାନ୍ତି ହାଇୟା ମାନକୋ। ³⁰ଆନ୍ତିନ୍ ମୁନୁଷ୍ ହାଦ୍ଦୁସ୍‌କି ଚିହ୍ନା ଆକାଶ୍‌ନୁ ଏଥ୍‌ରୋଦ୍, ଆଙ୍ଗେନ୍ ଦୁନିଆଁନ୍ତା ଜାମା ଜାତିନ୍ତା ଆଲାର୍ ଏହୁବନ୍ ଡେମ୍‌ରର୍; ଆରୁ ମୁନୁଷ୍ ହାଦ୍ଦୁସିନ୍ ମାହା ଶକ୍ତିତି ଆରୁ ମାହିମାତି ଆକାଶ୍‌ଘି ବାଦ୍‌ଲିନୁ ବାର୍‌ନାନ୍ ଏରର୍। ³¹ଆସ୍ ତୂରୀବାଜାଘି ସାଙ୍ଗେନୁ ତାଙ୍ଘା ଦୂଁତ୍‌ଜାମାରିନ୍ ତାଇୟସ୍, ଆରୁ ଆବ୍ଡ଼ାର୍ ଆକାଶ୍‌ଘି ଇ ମୁଡ଼ିନ୍‌ନ୍ତି ହା ମୁଡ଼ିତକ୍ ଚାର୍‌ହିପାଖାନ୍ତି, ତାଙ୍ଘାଏ ଚାଜ୍ଜକା ଆଲାରିନ୍ ଅନ୍‌ଠାଣ୍ କାମର୍।”

ଡୁମାରି ମାନ୍ନୁଘି ନମୁନା

(ମାର୍‌କୁସ୍ ୧୩:୨୮-୩୧; ଲୁକାସ୍ ୨୧:୨୯-୩୩)

³²“ଡୁମାରି ମାନ୍ନୁନ୍‌ନ୍ତି ଇ ନମୁନାନ୍ ଶିଖ୍‌ରା: ଯେତ୍‌କବାକେନ୍ ଡୁମାରି ମାନ୍ନୁନ୍‌ତା ଡାହିଁଗୁଠିଦ୍ ନରମ୍ ମାନିକିରି ଆନ୍ନୁନ୍ତି ଆଥା ହରିତା, ନିମ୍ ଆହ୍‌ଦାର୍ କା ବିଡ଼୍‌ନା ଉଲ୍ଲା ଆଣ୍‌ସିୟାଦିନ୍। ³³ଏନ୍ନେନିନ୍ ଯେତ୍‌କବାକେନ୍ ନିମ୍ ଇବ୍ଡ଼ା କାତ୍‌ଥାଗୁଠିନ୍ ମାନ୍ନାନ୍ ଏରର୍ ତା, ଆହର୍ କା ମୁନୁଷ୍ ହାଦ୍ଦୁସ୍ ମୁରୁକ୍ ଚାଁଣେ ବାର୍‌ନାବାଲା ରାଦାସ୍। ³⁴ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ଯେତ୍‌କତକ୍ ଇ ଜାମା କାତ୍‌ଥା ପୁରା ମା ମାନଦ୍, ଆତ୍‌କତକ୍ ଇ ପିଢ଼ିଘି ଆଖ୍‌ରୀ ମା ମାନିଦ୍। ³⁵ଆକାଶ୍ ଆରୁ ଦୁନିଆଁଦ୍ ଇୟାହୁଇୟା ମାନକୋ, ଲେକିନ୍ ଏଙ୍ଘା ତେଙ୍କା ବଚନ୍ ଇୟାହୁଇୟା ମା ମାନିଦ୍।”

ଜାମାବାକେନ୍ ଚେତ୍‌ରିକିରି ରା

(ମାର୍‌କୁସ୍ ୧୩:୩୨-୩୭; ଲୁକାସ୍ ୧୭:୨୬-୩୦,୩୪-୩୬)

³⁶“ଇବ୍ଡ଼ା ଜାମା କାତ୍‌ଥା ଏକ୍‌ଲା ମାନ୍ନାବାଲା ରାଇ ଆଦ୍‌ଘି ବାରେନୁ ନେଦ୍‌ହି ବାଲ୍‌ନାଇନ୍, ସରଗ୍‌ଦୂଁତ୍ ଆରୁ ହାଦ୍ଦୁସ୍‌ହି ବାଲ୍‌ଦାସିନ୍, ଖାଲି ବାଙ୍ଗ୍‌ସ୍‌ ଆହ୍‌ଦାସ୍। ³⁷ଏସ୍‌କେ ନୁଆସ୍‌କି ସାମାୟନୁ ମାନ୍‌ଚ୍‌କିଚା, ଆନ୍ନେନ୍ ମୁନୁଷ୍ ହାଦ୍ଦୁସ୍‌କିହି ବାର୍‌ନା ମାନଦ୍। ³⁸ଏନ୍ଦେର୍‌ଗେକା ଏସ୍‌କେ ବାଢ଼ି ବାର୍‌ନାଘି ପହ୍‌ଲେ ଉଲ୍ଲାନୁ, ନୁଆସ୍‌କି ଜାହାଜ୍‌ନୁ ମା ଆର୍‌ଗ୍‌ନାତକ୍ ଆଲାର୍ ଅନାମହାଲିୟାର୍, ଆରୁ ବେଞ୍ଜାକାଜ୍ କାମ୍‌ତେ ରାଲିୟାର୍। ³⁹ଆରୁ ଯେତ୍‌କତକ୍ ବାଢ଼ି ବାରିକିରି ଆବ୍ଡ଼ା ଜାମାରିନ୍ ମା ବାହାବାଚା, ଆତ୍‌କତକ୍ ଆବ୍ଡ଼ାର୍ ଏନ୍ଦେର୍‌ହି ବାଲ୍ଲୟାରିନ୍; ମୁନୁଷ୍ ହାଦ୍ଦୁସ୍‌କି ବାର୍‌ନା ସାମାୟନୁ ଆନ୍ନେନିନ୍ ମାନଦ୍। ⁴⁰ହୁ ସାମାୟନୁ ଦୁଇ ଲୋକ୍ ହାଲ୍ଲୁନୁ ରର୍, ଅଣ୍ଟାସିନ୍ ହୁଆକୋ ଆରୁ ଦୁସ୍‌ରାସିନ୍ ଆମ୍ବାକୋ। ⁴¹ଦୁଇ ଲୋକ୍ ମାଏକିନିଆଁର୍ ଜାତ୍‌ରି ରାଗ୍‌ଡ଼ାଲ୍‌କାରର୍, ଅଣ୍ଟାନ୍ ହୁଆକୋ ଆରୁ ଦୁସ୍‌ରାନ୍ ଆମ୍ବା ଚିଆକୋ। ⁴²ଆଦ୍‌ଘିଲାଗାନ୍ ଚେତ୍‌ରିକିରି ରା, ଏନ୍ଦେର୍‌ଗେକା ନିମ୍ ବାଲ୍‌ଦାର୍ କା ନିହ୍ମା ପ୍ରାଭୁସ୍ ଏକ୍‌ଲା ବାରସ୍। ⁴³ଲେକିନ୍ ଇବନ୍ ଆହା କା ଯଦି ଆଡ଼୍‌ପାନ୍‌ନ୍ତା ମାଲିକ୍‌ସ୍ ଆହସ୍‌ନେକା ଚୋର୍‌ହାସ୍ ଏକା ସାମାୟନୁ ବାରସ୍ ତା ଚେତ୍‌ରିକିରି ରସ୍‌ନେ, ଆରୁ ତାଙ୍ଘା ଆଡ଼୍‌ପାନୁ କାଥି ହଟ୍ଟାଗେ ମା ଚିଅସ୍‌ନେ। ⁴⁴ହୁଦ୍‌ଘିଲାଗାନ୍ ନିମ୍‌ହି ତିୟାର୍ ରା, ଏନ୍ଦେର୍‌ଗେକା ଏକା ସାମାୟନୁ ନିମ୍ ମା ସୋଚ୍‌କାରର୍, ଆ ସାମାୟନୁ ମୁନୁଷ୍ ହାଦ୍ଦୁସ୍ ବାରସ୍‌କସ୍।”

ବାନେ ଗୁତ୍ତିୟା ଆରୁ ଖାରାପ୍ ଗୁତ୍ତିୟା

(ଲୁକାସ୍ ୧୨:୪୧-୪୮)

⁴⁵“ଏନ୍ନେ ବିଶ୍ୱାସୀ ଆରୁ ବୁଦ୍ଧିୟାର୍ ଗୁତ୍ତିୟା ନେଦ୍ ରାନାଏ, ନେକାନ୍ କା ମାଲିକ୍‌ସ୍ ତାଙ୍ଘାଏ ଗୁତ୍ତିୟାର୍‌ଘି ମିଆଁ ଭାର୍ ଚିଚ୍ଚାସ୍ କା ଠିକ୍ ସାମାୟନୁ ତାମାଗେ ଅନାଗେ ଚିୟସ୍? ⁴⁶ଧଏନ୍ ଆ ଗୁତ୍ତିୟାସ୍, ନେକାନ୍ କା ତାଙ୍ଘା ମାଲିକ୍‌ସ୍ ବାରିକିରି ଏନ୍ନେନ୍ କାମ୍‌ନାନ୍ ଏରସ୍। ⁴⁷ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍, ଆସ୍ ଆସିନ୍ ତାଙ୍ଘା ଜାମା ସମ୍ପତ୍ତିଘି ମିଆଁ ହକ୍ ଚିୟସ୍। ⁴⁸ଲେକିନ୍ ଯଦି ଆ ଖାରାପ୍ ଗୁତ୍ତିୟାସ୍ ସୋଚାଗେ ଲାଗ୍ଗଦାସ୍ କା ଏଙ୍ଘା ମାଲିକ୍‌ସ୍‌ଘି ବାର୍‌ନା ଡେରି ରାଇ, ⁴⁹ଆରୁ ତାଙ୍ଘାଏ ସାଙ୍ଗେ ଗୁତ୍ତିୟାରିନ୍ ଡେମାଗେ ଲାଗ୍ଗଦାସ୍, ଆରୁ ମାତୁୱାଡ଼୍ ଜାମାର୍‌ଗାନେ ହାପ୍ପାଗେ ଲାଗ୍ଗଦାସ୍। ⁵⁰ତା ଆ ଗୁତ୍ତିୟାସ୍‌କି ମାଲିକ୍‌ସ୍ ଏନ୍ନେ ଉଲ୍ଲାନୁ ବାରସ୍, ଯେତ୍‌କବାକେନ୍ ଆସ୍ ଆସ୍‌କି ପାବୁ ମା ଏରାଲ୍‌କାରୋସ୍, ଆରୁ ଏନ୍ନେ ସାମାୟନୁ ଏକାନ୍ କା ଆସ୍ ବାଲ୍ଲକାରସ୍, ⁵¹ଆଙ୍ଗେନ୍ ଆସ୍ ଆସିନ୍ ବାଗ୍ଗେ କଷଟ୍ ଚିୟସ୍ ଆରୁ ଆସ୍‌କି ଭାଗ୍ କପ୍‌ଟୀ ଜାମାର୍‌ଗାନେ ଦଣ୍ଡ୍ ଚିୟସ୍: ଆସାନ୍ ଆବ୍ଡ଼ାର୍ ଅହ୍ଲର୍ ଆରୁ ପାଲ୍ଲୁ ପାର୍‌ମ୍‌ତେରର୍।”

ଦଶ୍‌ଲୋକ୍ କୁଆଁରୀର୍‌ଘି ନମୁନା

¹“ହୁ ସାମାୟନୁ ସରଗ୍ ରାଜୀଦ୍ ଆ ଦଶ୍‌ଲୋକ୍ କୁଆଁରୀର୍‌ଘି ଲେଖା ମାନଦ୍ ଏକାର୍ କା ନିଜର୍-ନିଜର୍ ଡିବ୍‌ରୀ ହୋଇକିରି ବର୍‌କୁକ୍କୋସିନ୍ ଭେଁଟ୍ ମାନାଗେ ଉର୍‌ଖିୟାର୍। ²ଆବ୍ଡ଼ାର୍‌ଘି ଭିତର୍‌ନୁ ପାଞ୍ଚ୍ ଲୋକ୍ ନିର୍‌ବୁଦ୍ଧିୟାର୍ ଆରୁ ପାଞ୍ଚ ଲୋକ୍ ବୁଦ୍ଧିୟାର୍ ରାଚାର୍। ³ନିର୍‌ବୁଦ୍ଧିୟାର୍ ତାହ୍ମାଗାନେ ଡିବ୍‌ରୀତା ଅଚ୍ଚାର୍, ଲେକିନ୍ ଇସୁଙ୍ଗ୍ ମାଲ୍ଲା ହୁର୍; ⁴ଲେକିନ୍ ବୁଦ୍ଧିୟାର୍ ଜାମାର୍ ନିଜର୍-ନିଜର୍ ଡିବ୍‌ରୀ ଗାନେ ଡାବାନୁ ଇସୁଙ୍ଗ୍ ଅଚ୍ଚାର୍। ⁵ବର୍ କୁକ୍କସ୍‌କେ ବାର୍‌ନାନୁ ଡେରି ମାନ୍‌ଚାତା, ଆବ୍ଡ଼ାର୍ କୁଗ୍‌ତେ-କୁଗ୍‌ତେ ହାନ୍ଦ୍ରାର୍ କେରାର୍।”

⁶“ଏରା ଆଦ୍‌ମାଁହା ବାକେନ୍ ଚିର୍‌ରାବର୍‌ରା ମେନ୍ଦ୍ରାଦ୍: ‘ଏରା, ବର୍ କୁକ୍କୋସ୍ ବାରାଲ୍‌ଦାସ୍! ଆସିନ୍ ଭେଁଟ୍ କାମାଗେ ଗୁଚା।’ ⁷ହତ୍‌କବାକେନ୍ ଆବ୍ଡ଼ା ଜାମା କୁଆଁରୀର୍ ଉସ୍‌କାରାଇକିରି ନିଜର୍-ନିଜର୍ ଡିବ୍‌ରୀ ସାଜାବାଗେ ଲାଗ୍ଗିୟାର୍। ⁸ଲେକିନ୍ ନିର୍‌ବୁଦ୍ଧିୟାର୍ ବୁଦ୍ଧିୟାର୍ ଜାମାରିନ୍ ତେଙ୍ଗିୟାର୍, ‘ନିହ୍ମା ଇସୁଙ୍ଗ୍‌ତି ଏମାଗେ କାଟେ ଚିଆ, ଏନ୍ଦେର୍‌ଗେକା ଏହ୍ମା ଡିବ୍‌ରୀ ତେବ୍‌ରା କାଲି।’ ⁹ଲେକିନ୍ ବୁଦ୍ଧିୟାର୍ ଜାମାର୍ ଯାବାବ୍ ଚିଚ୍ଚାର୍, ‘ମାଲ୍ଲା-ମାଲ୍ଲା, ନିହ୍ମା ଆରୁ ଏହ୍ମାଲାଗାନ୍ ପୁରୋକା ମାଲ୍ଲା; ବାନେ ମାନଦ୍‌ନେ କା ନିମ୍ ଦୁକାନ୍ କାଇକିରି ନିହ୍ମା ଲାଗାନ୍ ଇସୁଙ୍ଗ୍ ହେନ୍ଦା ଅନ୍ଦ୍ରା।’ ¹⁰ଲେକିନ୍ ଆବ୍ଡ଼ାର୍ ହେନ୍ଦା କାଲିୟାରିନ୍ କା ବର୍ କୁକ୍କୋସ୍ ବାର୍‌ଚାସ୍, ଆରୁ ଏକାର୍ ତିୟାର୍ ରାଚାର୍, ଆବ୍ଡ଼ାର୍ ବର୍ କୁକ୍କସ୍‌ଗାନେ ବେଞ୍ଜା ଆଡ଼୍‌ପାନୁ କର୍‌ଚାର୍ ଆରୁ ବାଲି ମୁଚ୍ଚାକେରା। ¹¹ଆନ୍ତିନ୍ ଆ ଦୁସ୍‌ରା କୁଆଁରୀର୍‌ହି ବାରିକିରି ତେଙ୍ଗିୟାର୍, ‘ହେ ପ୍ରାଭୁ, ହେ ପ୍ରାଭୁ, ଏହ୍ମାଲାଗାନ୍ ବାଲି ତିସ୍‌କା!’ ¹²ଲେକିନ୍ ବର୍ କୁକ୍କୋସ୍ ଯାବାବ୍ ଚିଚ୍ଚାସ୍, ‘ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା, ଏନ୍ ନିମାନ୍ ବାଲ୍‌ଦାନ୍।’ ¹³ହୁଦ୍‌ଘିଲାଗାନ୍ ନିମ୍ ଚେତ୍‌ରିକିରି ରା, ଏନ୍ଦେର୍‌ଗେକା ନିମ୍ ଆ ଉଲ୍ଲାନ୍ କା ଆ ସାମାୟନ୍ ବାଲ୍‌ଦାର୍।”

ତିନ୍ ଲୋକ୍ ଗୁତ୍ତିୟାର୍‌ଘି ନମୁନା

(ଲୁକାସ୍ ୧୯:୧୧-୨୭)

¹⁴“ସରଗ୍ ରାଜୀଦ୍ ଏସ୍‌କେ ରାଇ, ଆବନ୍ ତେଙ୍ଗାଗେ ଯୀଶୁସ୍ ଆରୁ ଅଣ୍ଟା ନମୁନା ଶୁଣାବାଚାସ୍, ଅଣ୍ଟା ଆଲାସ୍ ରାଚାସ୍, ଅନ୍ଦୁଲ୍ ଆସ୍ ପର୍‌ଦେଶ୍ କାଲାଗେ ତିୟାର୍ ମାନ୍‌ଚାସ୍, ଆସ୍ କାନାଘି ଆଘ୍‌ଲି ତାଙ୍ଘା ଗୁତ୍ତିୟାରିନ୍ ମେହିଁକିରି ତାଙ୍ଘା ସମ୍ପତ୍ତିବନ୍ ସୋଁପ୍‌ଚେଇଚାସ୍। ¹⁵ଆସ୍ ଅର୍‌ତୁସ୍‌କେ ଚାନ୍ଦିଘି ସିକ୍କାତି ନିନ୍ଦ୍‌କା ପାଞ୍ଚେଟା ଥାଇଲି ଚିଚ୍ଚାସ୍। ଦୁସ୍‌ରାସ୍‌କେ ଯୋଡ଼େ ଆରୁ ତିସ୍‌ରାସ୍‌କେ ଅଣ୍ଟା। ଆସ୍ ଅର୍‌ତୁ ଅର୍‌ତୁର୍‌ଗେ ଆସ୍‌କି ଲାଇଗ୍ ଅନୁସାର୍ ଚିକିରି ଆସ୍ ପର୍‌ଦେଶ୍ ବୁଙ୍ଗେଇଚାସ୍। ¹⁶ଏକାସ୍‌କେ ଚାନ୍ଦିଘି ସିକ୍କାତି ନିନ୍ଦ୍‌କା ପାଞ୍ଚେଟା ଥାଇଲି ହାଖ୍‌ର୍‌କିଚା, ଆସ୍ ହୁଙ୍ଗେନିନ୍ ଆ ସିକ୍କାନ୍ ହୋଇକିରି ବେପାର୍ କାମ୍‌ଚାସ୍, ଆରୁ, ଆରୁହି ଚାନ୍ଦିଘି ସିକ୍କାତି ନିନ୍ଦ୍‌କା ପାଞ୍ଚେଟା ଥାଇଲି କାମାବାଚାସ୍। ¹⁷ହନ୍ନେନ୍ ଏକାସ୍ ଦୁଇ ଥାଇଲି ସିକ୍କା ହାକ୍କାଚାସ୍ ଆସ୍ ଆରୁ ଦୁଇ ଥାଇଲି ସିକ୍କା କାମାବାଚାସ୍। ¹⁸ଲେକିନ୍ ନେକାଗେ ଅଣ୍ଟା ଥାଇଲି ସିକ୍କା ହାଖ୍‌ର୍‌କିଚା, ଆସ୍ କେରାସ୍ ଆରୁ ଗାଡ୍ଡି ଆର୍‌ହିକିରି ତାଙ୍ଘା ମାଲିକ୍‌ସ୍‌କି ସିକ୍କାନ୍ ନୁଡ୍ଡେଇଚାସ୍।”

¹⁹“ଢେର୍ ଦିନ୍‌ଘି ପାଛ୍‌ଲି ଆ ଗୁତ୍ତିୟାର୍‌ଘି ମାଲିକ୍‌ସ୍ ବାର୍‌ଚାସ୍ ଆରୁ ଆବ୍ଡ଼ାର୍‌ସ୍‌ତି ହିସାବ୍ ଅଚ୍ଚାସ୍। ²⁰ନେକାଗେ ଚାନ୍ଦିଘି ସିକ୍କାତି ନିନ୍ଦ୍‌କା ପାଞ୍ଚେଟା ଥାଇଲି ହାଖ୍ଖର୍‌କିଚା, ଆସ୍ ଆରୁ ଚାନ୍ଦିଘି ସିକ୍କାତି ନିନ୍ଦ୍‌କା ପାଞ୍ଚେଟା ଥାଇଲି ଅନ୍ଦ୍ରିକିରି ତେଙ୍ଗିୟାସ୍, ‘ହେ ମାଲିକ୍, ନିମ୍ ଏଙ୍ଗାଗେ ଚାନ୍ଦିଘି ସିକ୍କାତି ନିନ୍ଦ୍‌କା ପାଞ୍ଚେଟା ଥାଇଲି ଚିଚ୍‌କାଚ୍‌କାର୍, ଆରୁ ଏରା, ଏନ୍ ଆରୁ ଚାନ୍ଦିଘି ସିକ୍କାତି ନିନ୍ଦ୍‌କା ପାଞ୍ଚେଟା ଥାଇଲି କାମାବାଚ୍‌କାଦାନ୍।’ ²¹ଆସ୍‌କି ମାଲିକ୍‌ସ୍ ଆସିନ୍ ତେଙ୍ଗିୟାସ୍, ‘ସାବାସ୍, ହେ ବାନେ ଆରୁ ବିଶ୍ୱାସ୍ କାମ୍‌ନାଘି ଲାଇଗ୍ ଗୁତ୍ତିୟା, ନିନ୍ ଥୋଡ଼େନୁ ବିଶ୍ୱାସ୍ କାମ୍‌ନାଘି ଲାଇଗ୍ ରାଦାଏ; ଏନ୍ ନିଙ୍ଗାଗେ ବାଗ୍ଗେଘି ମିଆଁ ହକ୍ ଚିୟନ୍। ନିଜର୍ ମାଲିକ୍‌ସ୍‌କି ଖୁସୀନୁ ଭାଗିଦାର୍ ମାନା।’”

²²“ଆନ୍ତିନ୍ ଏକାସ୍‌କେ ଦୁଇ ଥାଇଲି ସିକ୍କା ହାଖ୍‌ର୍‌କିଚା, ଆସ୍‌ହି ବାରିକିରି ତେଙ୍ଗିୟାସ୍, ‘ହେ ମାଲିକ୍, ନିମ୍ ଏଙ୍ଗାଗେ ଦୁଇ ଥାଇଲି ସିକ୍କା ଚିଚ୍‌କାଚ୍‌କାର୍, ଆରୁ ଏରା, ଏନ୍ ଆରୁ ଦୁଇ ଥାଇଲି ସିକ୍କା କାମାବାଚ୍‌କାଦାନ୍।’ ²³ଆସ୍‌କି ମାଲିକ୍‌ସ୍ ଆସିନ୍ ତେଙ୍ଗିୟାସ୍, ‘ସାବାସ୍, ହେ ବାନେ ଆରୁ ବିଶ୍ୱାସ୍ କାମ୍‌ନାଘି ଲାଇଗ୍ ଗୁତ୍ତିୟା, ନିନ୍ ଥୋଡ଼େନୁ ବିଶ୍ୱାସ୍ କାମ୍‌ନାଘି ଲାଇଗ୍ ରାଦାଏ; ଏନ୍ ନିଙ୍ଗାଗେ ବାଗ୍ଗେଘି ମିଆଁ ହକ୍ ଚିୟନ୍। ନିଜର୍ ମାଲିକ୍‌ସ୍‌କି ଖୁସୀନୁ ଭାଗିଦାର୍ ମାନା।’”

²⁴“ଆନ୍ତିନ୍ ଏକାସ୍‌କେ ଅନ୍ ଥାଇଲି ସିକ୍କା ହାଖ୍‌ର୍‌କିଚା, ଆସ୍‌ହି ବାରିକିରି ତେଙ୍ଗିୟାସ୍, ‘ହେ ମାଲିକ୍, ଏନ୍ ଆହାଲ୍‌କାନ୍ କା ନିମ୍ କାଠୋର୍ ଆଲାର୍: ନିମ୍ ଏକାସାନ୍ ମା ଚାହ୍‌ଦାର୍ ଆସାନ୍ ହୋଏଦାର୍, ଆରୁ ଏକାସାନ୍ ମା ଧୁକ୍‌ଦାର୍ ଆସାନ୍ ଠୁଡ଼ିୟାଦାର୍। ²⁵ହୁଦ୍‌ଘିଲାଗାନ୍ ଏନ୍ ଏଲ୍‌ଚ୍‌କାତି କାଇକିରି ନିହ୍ମା ସିକ୍କାନ୍ ଗାଡ୍ଡି ଆର୍‌ହିକିରି ନୁଡ୍ଡେଇଚ୍‌କାନ୍। ଏରା, ଇ ନିହ୍ମା ସିକ୍କାବନ୍ କିର୍‌ତାଚାଲ୍‌ଦାନ୍।’ ²⁶ଆସ୍‌କି ମାଲିକ୍‌ସ୍ ଆସିନ୍ ଯାବାବ୍ ଚିଚ୍ଚାସ୍, ‘ହେ ବଦ୍‌ମାସ୍ ଆରୁ କୁଢ଼ିୟା ଗୁତ୍ତିୟା, ନିନ୍ ତା ଆହାଲ୍‌କାଏକା ଏନ୍ ଏକାସାନ୍ ମା ଚାହ୍‌ଦାନ୍ ଆସାନ୍ ହୋଏଦାନ୍, ଆରୁ ଏକାସାନ୍ ମା ଧୁକ୍‌ଦାନ୍ ଆସାନ୍ ଠୁଡ଼ିୟାଦାନ୍; ²⁷ତା ନିଙ୍ଗାଗେ ଏଙ୍ଘା ସିକ୍କାବନ୍ ବ୍ୟାଙ୍କ୍‌ ବାଲାର୍‌ଗେ ଚିନା କାତ୍‌ଥା, ହାଲେ ଏନ୍ ବାରିକିରି ସୁଧ୍‌ଗାନେ ଏଙ୍ଘା ସିକ୍କାବନ୍ ହାକ୍କାରନ୍‌ନେ।’ ²⁸ହୁଦ୍‌ଘିଲାଗାନ୍ ଇସ୍‌ତି ଇ ସିକ୍କା ହୋଇକିରି, ନେଖାସାନ୍ ଦଶ୍ ଥାଇଲି ସିକ୍କା ରାଇ, ଆସ୍‌କେ ଚିୟାଲାଗା। ²⁹ଏନ୍ଦେର୍‌ଗେକା ନେଖାସାନ୍ ରାଇଦ୍, ଆବ୍ଡ଼ାର୍‌ଗେ ଆରୁ ଚିୟାକଦ୍; ଆରୁ ଆବ୍ଡ଼ାର୍‌ସାନ୍ ବାଗ୍ଗେ ମାନକୋ: ଲେକିନ୍ ନେଖାସାନ୍ ମାଲ୍ଲାଦିନ୍ ଆବ୍ଡ଼ାର୍‌ସ୍‌ତି ଏକାଦ୍ ରାଇ ଆବନ୍‌ହି ହୁଆକୋ। ³⁰ଆରୁ ଇ ବେକାର୍ ଗୁତ୍ତିୟାସିନ୍ ବାହ୍‌ରି ଉହାନୁ ଖେବ୍ଡ଼ାଚା, ଆସାନ୍ ଆସ୍ ଅହ୍ଲସ୍ ଆରୁ ପାଲ୍ଲୁ ପାର୍‌ମ୍‌ତେରସ୍।”

ଯୀଶୁସ୍ ନ୍ୟାୟଘି ଉଲ୍ଲାଘି ବାରେନୁ ତେଙ୍ଗାଲ୍‌ଦାସ୍

³¹“ଯେତ୍‌କବାକେନ୍ ମୁନୁଷ୍ ହାଦ୍ଦୁସ୍ ଜାମା ଦୂଁତ୍‌ଜାମାର୍ ଗାନେ ନିଜର୍ ମାହିମାନୁ ବାରସ୍, ହତ୍‌କବାକେନ୍ ଆସ୍ ନିଜର୍ ମାହିମାଘି ରାଜ୍‌ଗାଦୀନୁ ଅକ୍କସ୍। ³²ଆରୁ ତାଙ୍ଘା ଆଘ୍‌ଲି ଜାମା ଜାତିୟାରିନ୍ ଠୁଡ଼ିୟାକୋ; ଆରୁ ଏସ୍‌କେ ଭେଡ଼ି ହାପୁର୍ ଭେଡ଼ିନ୍ ଏଡ଼ାସ୍‌ତି ଭିନେ କାମ୍‌ନାଏ, ହନ୍ନେନ୍ ଆସ୍ ଆବ୍ଡ଼ାରିନ୍ ଏକ୍ ଦୁସ୍‌ରାର୍‌ସ୍‌ତି ଭିନେ କାମସ୍। ³³ଆରୁ ଆସ୍ ଧାର୍ମିକ୍ ଆଲାରିନ୍ ତାଙ୍ଘା ତିନାପାଖା ଆରୁ ଦୁସ୍‌ରାରିନ୍ ତାଙ୍ଘା ଡେବ୍‌ବା ପାଖା ଇଲ୍‌ତସ୍। ³⁴ହତ୍‌କବାକେନ୍ ରାଜାସ୍ ତାଙ୍ଘା ତିନା ପାଖ୍‌ତା ଆଲାରିନ୍ ତେଙ୍ଗସ୍, ‘ହେ ଏଙ୍ଘା ବାଙ୍ଗ୍‌ସ୍‌କି କ୍ରିପା ହାଖ୍ଖୁରୋ, ଏକାଦ୍ ଦୁନିଆଁଘି ସୁରୁନ୍ତି ନିହ୍ମା ଲାଗାନ୍ ତିୟାର୍ କାମା କେର୍‌କିଚି, ବାରା, ଆ ରାଜୀଘି ହକ୍‌ଦାର୍ ମାନା। ³⁵ଏନ୍ଦେର୍‌ଗେକା ଏନ୍ କିଡ଼ା ଖିଆଲ୍‌କାନ୍, ଆରୁ ନିମ୍ ଏଙ୍ଗାଗେ ଅନାଗେ ଚିଚ୍‌କାର୍; ଆରୁ ଏନ୍ ଆମ୍ମୁକିଡ଼ା ସାରାଲ୍‌କାନ୍ ଆରୁ ନିମ୍ ଏଙ୍ଗାଗେ ଆମ୍ମୁ ହାପ୍ପତାଚ୍‌କାର୍; ଏନ୍ ପର୍‌ଦେଶୀୟା ରାଚ୍‌କାନ୍, ଆରୁ ନିମ୍ ଏଙ୍ଗାନ୍ ନିହ୍ମା ଆଡ଼୍‌ପାନୁ ଆଡ୍ଡା ଚିଚ୍‌କାର୍; ³⁶ଏନ୍ ଚିଢ଼ା ମାଲ୍ଲା ଆତ୍ତୁନ୍, ଆରୁ ନିମ୍ ଏଙ୍ଗାନ୍ ଚିଢ଼ା ଆତ୍ତତାଚ୍‌କାର୍; ଏନ୍ ବେମାର୍ ରାଚ୍‌କାନ୍, ଆରୁ ନିମ୍ ଏଙ୍ଗାନ୍ ସେବା କାମ୍‌ଚ୍‌କାର୍; ଏନ୍ ଜେହେଲ୍‌ନୁ ରାଚ୍‌କାନ୍ ଆରୁ ନିମ୍ ଏଙ୍ଗାନ୍ ଏରାଗେ ବାର୍‌ଚ୍‌କାର୍।’”

³⁷“ଆଙ୍ଗେନ୍ ଧାର୍ମିକ୍ ଆଲାର୍ ରାଜାସିନ୍ ଯାବାବ୍ ଚର୍, ‘ହେ ପ୍ରାଭୁ, ଏମ୍ ଏକ୍‌ଲା ନିମାନ୍ କିଡ଼ା ଖିନାନ୍ ଏରିକିରି ଅନାମହାଗେ ଚିଚ୍‌କାମ୍? ଆରୁ ଏକ୍‌ଲା ଆମ୍ମୁକିଡ଼ା ସାର୍‌ନାନ୍ ଏରିକିରି ହାପ୍ପାଗେ ଆମ୍ମୁ ଚିଚ୍‌କାମ୍? ³⁸ଏମ୍ ଏକ୍‌ଲା ନିମାନ୍ ପର୍‌ଦେଶୀୟା ଏର୍‌କାମ୍ ଆରୁ ଏହ୍ମା ଆଡ଼୍‌ପାନୁ ଆଡ୍ଡା ଚିଚ୍‌କାମ୍? ଆରୁ ଚିଢ଼ା ମା ଆତ୍ତ୍‌କା ଏରିକିରି ଚିଢ଼ା ଆତ୍ତାଚ୍‌କାମ୍? ³⁹ଆରୁ ଏମ୍ ଏକ୍‌ଲା ନିମାନ୍ ବେମାର୍ ଆରୁ ଜେହେଲ୍‌ନୁ ଏର୍‌କାମ୍ ଆରୁ ନିହ୍ମାଗାନେ ଭେଁଟ୍ ମାନାଗେ ବାର୍‌ଚ୍‌କାମ୍?’ ⁴⁰ଆଙ୍ଗେନ୍ ରାଜାସ୍ ଆବ୍ଡ଼ାରିନ୍ ଯାବାବ୍ ଚିୟସ୍, ‘ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ନିମ୍ ଏଙ୍ଘା ଛୋଟେନ୍ତି ଛୋଟେ ଭାଇ ଜାମାର୍‌ଘି ଭିତର୍‌ନୁ ନେକିନ୍ ଅର୍‌ତୁସ୍‌କି ଲାଗାନ୍ କାମ୍‌ଚ୍‌କାର୍, ଆବ୍‌ଡ଼ାନ୍‌ ଏଙ୍ଘାଲାଗାନ୍ ନିମ୍‌ କାମ୍‌ଚ୍‌କାର୍।’”

⁴¹“ଆନ୍ତିନ୍ ଆସ୍ ତାଙ୍ଘା ଡେବ୍‌ବା ପାଖା ରୁ ଆଲାରିନ୍ ତେଙ୍ଗସ୍, ‘ହେ ସାର୍‌ପାରାଚ୍‌କା ଆଲାରୋ, ଏଙ୍ଘା ଚାହାନ୍‌ନ୍ତି ଗେଚ୍ଛା ବୁଙ୍ଗାକାଲା, ଆରୁ ଶାଏତାନ୍ ଆରୁ ତାଙ୍ଘା ଦୂଁତ୍‌ର୍‌ଘି ଲାଗାନ୍ ତିୟାର୍ କାମ୍‌ଚ୍‌କା ଏକ୍‌ଲାହି ମା ତେବ୍‌ର୍‌ନା ଚିଚ୍ଚୁନୁ କାଲା। ⁴²ଏନ୍ଦେର୍‌ଗେକା ଏନ୍ କିଡ଼ା ଖିଆଲ୍‌କାନ୍, ଆରୁ ନିମ୍ ଏଙ୍ଗାଗେ ଅନାମହାଗେ ମା ଚିଚ୍‌କାର୍; ଆରୁ ଏନ୍ ଆମ୍ମୁକିଡ଼ା ସାରାଲ୍‌କାନ୍, ଆରୁ ନିମ୍ ଏଙ୍ଗାନ୍ ଆମ୍ମୁ ମା ହାପ୍ପତାଚ୍‌କାର୍। ⁴³ଏନ୍ ପର୍‌ଦେଶୀୟା ରାଚ୍‌କାନ୍, ଆରୁ ନିମ୍ ଏଙ୍ଗାନ୍ ନିହ୍ମା ଆଡ଼୍‌ପାନୁ ଆଡ୍ଡା ମା ଚିଚ୍‌କାର୍; ଏନ୍ ଚିଢ଼ା ମାଲ୍ଲା ଆତ୍ତୁନ୍ ଆରୁ ନିମ୍ ଏଙ୍ଗାନ୍ ଚିଢ଼ା ମା ଆତ୍ତତାଚ୍‌କାର୍; ଏନ୍ ବେମାର୍ ଆରୁ ଜେହେଲ୍‌ନୁ ରାଚ୍‌କାନ୍, ଆରୁ ନିମ୍ ଏଙ୍ଗାନ୍ ଭେଁଟ୍ ମାନାଗେ ମା ବାର୍‌ଚ୍‌କାର୍।’”

⁴⁴“ଆଙ୍ଗେନ୍ ଆବ୍ଡ଼ାର୍ ଯାବାବ୍ ଚର୍, ‘ହେ ପ୍ରାଭୁ, ଏମ୍ ଏକ୍‌ଲା ନିମାନ୍ କିଡ଼ା ଖିନାନ୍, ଚାହେ ଆମ୍ମୁକିଡ଼ା ସାର୍‌ନାନ୍, ଚାହେ ପର୍‌ଦେଶୀୟା, ଚାହେ ଚିଢ଼ା ମା ଆତ୍ତକାନ୍, ଚାହେ ବେମାର୍, ଚାହେ ଜେହେଲ୍‌ନୁ ଏର୍‌କାମ୍, ଆରୁ ନିହ୍ମା ସେବା ମା କାମ୍‌ଚ୍‌କାମ୍?’ ⁴⁵ଆଙ୍ଗେନ୍ ଆସ୍ ଆବ୍ଡ଼ାରିନ୍ ଯାବାବ୍ ଚସ୍, ‘ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ନିମ୍ ଇ ଛୋଟେନ୍ତି ଛୋଟେର୍‌ଘି ଭିତର୍‌ନୁ ନେକା ଅର୍‌ତୁସ୍‌କି ଲାଗାନ୍‌ହି ମା କାମ୍‌ଚ୍‌କାର୍, ଆରୁ ଏଙ୍ଘା ଲାଗାନ୍‌ହି ମା କାମ୍‌ଚ୍‌କାର୍।’ ⁴⁶ଆରୁ ଇବ୍ଡ଼ାର୍ ସବୁଦିନ୍‌ତା ଦଣ୍ଡ୍ ଭୋଗାଗେ କର୍, ଲେକିନ୍ ଧାର୍ମିକ୍ ଆଲାର୍ ସବୁଦିନ୍‌ତା ଜୀବନ୍‌ନୁ କରର୍।”

ଯୀଶୁସିନ୍ ପିଟ୍ଟନାଘି ଉପାୟ

(ମାର୍‌କୁସ୍ ୧୪:୧,୨; ଲୁକାସ୍ ୨୨:୧,୨; ଯୋହାନ୍ ୧୧:୪୫-୫୩)

¹ଯେତ୍‌କବାକେନ୍ ଯୀଶୁସ୍ ଇବ୍ଡ଼ା କାତ୍‌ଥାନ୍ ତେଙ୍ଗା ମୁଞ୍ଜିୟାସ୍ ତା ତାଙ୍ଘା ଚେଲାରିନ୍ ତେଙ୍ଗାଗେ ଲାଗ୍ଗିୟାସ୍, ²“ନିମ୍ ଆହ୍‌ଦାର୍ କା ଦୁଇ ଦିନ୍‌ଘି ପାଛ୍‌ଲି ପାସ୍କାପରବ୍ ମାନ୍ନାବାଲା ରାଇ, ଆରୁ ମୁନୁଷ୍ ହାଦ୍ଦୁସିନ୍ କ୍ରୁଶ୍‌ନୁ ଠୋକାଗେ ସୋଁପାଚା କୋ।”

³ଆନ୍ତିନ୍ ମୁଖ୍ୟା ପୁରୋହିତ୍‌ର୍‌ ଆରୁ ୟାହୁଦୀ ଆଲାର୍‌ଘି ମୁଖ୍ୟା କାଇଫା ନାମେଘି ମାହାପୁରୋହିତ୍‌ସ୍‌କି ଚାଲିନୁ ଠୁଡ଼ିୟାରାଚାର୍, ⁴ଆରୁ ତାହ୍ମା-ତାହ୍ମା ଭିତ୍‌ରେ ବିଚାର୍ କାମାଗେ ଲାଗ୍ଗିୟାର୍ କା ଯୀଶୁସିନ୍ କାଡ଼େ-କାଡ଼େ ଏସ୍‌କେ ଧାରର୍ ଆରୁ ପିଟର୍। ⁵ଲେକିନ୍ ଆବ୍ଡ଼ାର୍ ତେଙ୍ଗାଲିୟାର୍, “ପରବ୍‌ଗେ ମାଲ୍ଲା, ମାଲ୍ଲାହାଲେ ଆଲାର୍‌ଘି ମାଝାନୁ ଗଣ୍ଡଗଲ୍ ମାନକୋ।”

ବେଥାନିୟା ପାଡ଼ାନୁ ଅଣ୍ଟା ଆଲିଦ୍ ଯୀଶୁସ୍‌କି କୁକ୍କୁନୁ ବାସ୍‌ନା ଇସୁଙ୍ଗ୍ ତୁନ୍ଦାଲି

(ମାର୍‌କୁସ୍ ୧୪:୩-୯; ଯୋହାନ୍ ୧୨:୧-୮)

⁶ଯେତ୍‌କବାକେନ୍ ଯୀଶୁସ୍ ବେଥାନିୟା ପାଡ଼ାନ୍ତା ଶିମୋନ୍‌ସ୍‌କି ଆଡ଼୍‌ପାନୁ ରାଚାସ୍, ଏକାସ୍ କା ଆଘ୍‌ଲି କୋଢ଼୍‌ ବେହ୍ମରିୟା ରାଚାସ୍, ⁷ହତ୍‌କବାକେନ୍ ଅଣ୍ଟା ଆଲିଦ୍ ପାଣ୍ତ୍‌ରୁ ଚାଁଚାଘି ଚୁକାନୁ ମୁରୁକ୍ ଦାମ୍‌ଘି ବାସ୍‌ନା ଇସୁଙ୍ଗ୍ ଧାରିକିରି ଯୀଶୁସ୍‌କି ଚାହାଗେ ବାର୍‌ଚା, ଆରୁ ଯେତ୍‌କବାକେନ୍ ଅନାଗେ ଅକ୍କାଚାସ୍‌ତା ଆସ୍‌କି କୁକ୍କୁନୁ ଆ ବାସ୍‌ନା ଇସୁଙ୍ଗ୍‌ବନ୍ ତୁନ୍ଦାଗେ ଲାଗ୍ଗିୟା। ⁸ଇବନ୍ ଏରିକିରି ଯୀଶୁସ୍‌କି ଚେଲାଜାମାର୍ ଖିସାରାଇକିରି ତେଙ୍ଗାଗେ ଲାଗ୍ଗିୟାର୍, “ଏନ୍ଦେର୍‌ଗେ ଇବନ୍ ବର୍‌ବାଦ୍ କାମାକେରା? ⁹ଇବନ୍‌ତା ବାଗ୍ଗେ ଦାମ୍‌ତି ବିଁଶିକିରି ଗରୀବ୍ ଆଲାର୍‌ଗେ ଚିଆ କେର୍‌କିରଦ୍‌ନେ।” ¹⁰ଇବନ୍ ଆହିକିରି ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଇ ଆଲିନ୍ ନିମ୍ ଏନ୍ଦେର୍‌ଗେ ସାତାବାଲ୍‌ଦାର୍? ଇଦ୍ ଏଙ୍ଘାଲାଗାନ୍ ବାନେ ନାଲ୍‌ଖୁ କାମ୍‌ଚ୍‌କିଚି। ¹¹ଗରୀବ୍ ଜାମାର୍ ତା ନିହ୍ମାଗାନେ ହୁର୍‌ମିବାକେନ୍ ରାନାଏ, ଲେକିନ୍ ଏନ୍ ନିହ୍ମାଗାନେ ହୁର୍‌ମିବାକେନ୍ ମା ରାଦାନ୍। ¹²ଇ ଆଲି ଏଙ୍ଘା ମେଦୁନୁ ଇ ଇସୁଙ୍ଗ୍‌ବନ୍ ତୁନ୍ଦ୍‌କିଚି, ଆଦ୍ ଏଙ୍ଘାଏ ମାଡ଼୍‌ନାଘି ତିଆର୍‌ଘି ଲାଗାନ୍ କାମ୍‌ଚ୍‌କିଚି। ¹³ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା, ପୁରା ଦୁନିଆଁନୁ ଏକିନ୍ ଆଡ୍ଡାନୁହି ଇ ସୁସାମାଚାର୍ ପ୍ରଚାର୍ କାମାକୋ ତା, ଆସାନ୍ ଇ ଆଲିଦ୍ ଏକା ନାଲ୍‌ଖୁନ୍ କାମ୍‌ଚ୍‌କିଚି ଆବନ୍‌ହି ତେଙ୍ଗାକୋ ଆରୁ ଜାମା ଆଲାର୍ ତାଙ୍ଗାନ୍ ମନେ କାମର୍।”

ଯୁଦାସ୍ ଯୀଶୁସିନ୍ ଧୋଖା ଚିଆଲ୍‌ଦାସ୍

(ମାର୍‌କୁସ୍ ୧୪:୧୦,୧୧; ଲୁକାସ୍ ୨୨:୩-୬)

¹⁴ଆନ୍ତିନ୍ ଯୁଦାସ୍ ଇସ୍କାରିୟତିସ୍, ଏକାସ୍ କା ବାର ଲୋକ୍ ଚେଲାର୍‌ଘି ଭିତର୍‌ନୁ ଅର୍‌ତୁ ରାଚାସ୍, ମୁଖ୍ୟା ପୁରୋହିତ୍‌ର୍‌ଘି ଚାହାଗେ କାଇକିରି ତେଙ୍ଗିୟାସ୍, ¹⁵“ଯଦି ଏନ୍ ଆସିନ୍ ନିମାଗେ ସୋଁପ୍‌ନ୍‌ଚନ୍ ତା ଏଙ୍ଗାଗେ ଏନ୍ଦେର୍ ଚିୟର୍?” ଆବ୍ଡ଼ାର୍ ଆସ୍‌କେ ତିରିଶ୍‌ଟା ରୂପାଘି ସିକ୍କା ନାପିକିରି ଚିଚ୍ଚାର୍। ¹⁶ଆରୁ ଯୁଦାସ୍ ହୁବାକେନ୍‌ନ୍ତିନ୍ ଆସିନ୍ ଧାର୍‌ତାଗେ ମୋଉକା ବେଦ୍ଦାଗେ ଲାଗ୍ଗିୟାସ୍।

ଯୀଶୁସ୍ ଚେଲାଜାମାର୍‌ଗାନେ ପାସ୍କାଘି ଆଖ୍‌ରୀ ଭୋଜି କାମାଲ୍‌ଦାସ୍

(ମାର୍‌କୁସ୍ ୧୪:୧୨-୨୧; ଲୁକାସ୍ ୨୨:୭-୧୩,୨୧-୨୩; ଯୋହାନ୍ ୧୩:୨୧-୩୦)

¹⁷ମା ଫୁଲ୍‌ର୍‌ନା ଆସ୍‌ମାଘି ପରବ୍‌ଘି ପହେଲା ଉଲ୍ଲା, ଚେଲାର୍ ଯୀଶୁସ୍‌କି ଚାହାଗେ ବାରିକିରି ମେନ୍‌ଚାର୍, “ଏମ୍ ଏକାସାନ୍ କାଇକିରି ନିହ୍ମା ଲାଗାନ୍ ପାସ୍କାଘି ଭୋଜି ତିୟାର୍ କାମମ୍‌ବୁଲି ନିମ୍ ସୋଚାଲ୍‌ଦାର୍?” ¹⁸ଯୀଶୁସ୍ ତେଙ୍ଗିୟାସ୍, “ସହର୍‌ଘି ଫାଲ୍‌ନା ଆଲାସ୍‌ସାନ୍ କାଇକିରି ଆସିନ୍ ତେଙ୍ଗା, ‘ଗୁରୁସ୍ ତେଙ୍କାଦାସ୍ କା ଏଙ୍ଘା ସାମାୟ ଆଣ୍‌ସିୟା କେରାଦିନ୍। ଏନ୍ ଏଙ୍ଘା ଚେଲାର୍‌ଗାନେ ନିଙ୍ଘାସାନ୍ ପାସ୍କାପରବ୍ ମାନାବନ୍’।” ¹⁹ଆଙ୍ଗେନ୍ ଚେଲାର୍ ଯୀଶୁସ୍‌କି ହୁକୁମ୍ ମାନିକିରି ପାସ୍କାପରବ୍‌ଘି ଭୋଜି ତିୟାର୍ କାମ୍‌ଚାର୍।

²⁰ଯେତ୍‌କବାକେନ୍ ବିଡ଼ି ଅକ୍କିୟାତା ଯୀଶୁସ୍ ବାର ଚେଲାର୍‌ଗାନେ ମହାଁଗେ ଅକ୍କିୟାସ୍। ²¹ଯେତ୍‌କବାକେନ୍ ଆବ୍ଡ଼ାର୍ ମହାଁଲିୟାର୍‌ତା ଆସ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ନିହ୍ମା ଭିତର୍‌ତିନିନ୍ ଅର୍‌ତୁସ୍ ଏଙ୍ଗାନ୍ ବିରୋଧିର୍‌ଘି ହେଖ୍ଖାନୁ ସୋଁପଚସ୍।” ²²ଆଙ୍ଗେନ୍ ଆବ୍ଡ଼ାର୍ ମୁରୁକ୍ ଦୁଃଖୁ ମାନ୍‌ଚାର୍ ଆରୁ ଜାମାର୍ ଅର୍‌ତୁ-ଅର୍‌ତୁ ଆସିନ୍ ମେନାଗେ ଲାଗ୍ଗିୟାର୍, “ହେ ପ୍ରାଭୁ, ଆ ଆଲାନ୍ ଏନ୍ କାଁଏ?” ²³ଯୀଶୁସ୍ ଯାବାବ୍ ଚିଚ୍ଚାସ୍, “ଏକାସ୍ ଏଙ୍ଘାଗାନେ ଥାଡ଼ିନୁ ହେଖ୍ଖା ବୋଥ୍‌କାଦାସ୍ ଆସ୍ ଏଙ୍ଗାନ୍ ବିରୋଧିର୍‌ଘି ହେଖ୍ଖାନୁ ସୋଁପଚସ୍। ²⁴ମୁନୁଷ୍ ହାଦ୍ଦୁସ୍‌କି ବାରେନୁ ପାବିତାର୍ ଶାସ୍ତ୍ରନୁ ଏସ୍‌କେ ଲେଖ୍‌ଚ୍‌କା ରାଇ, ହନ୍ନେନ୍ ମାନଦ୍ ଆଦ୍ ସତ୍ତୁଦ୍; ଲେକିନ୍ ଏକା ଆଲାସ୍‌କି ଦ୍ୱାର୍‌ନୁ ମୁନୁଷ୍ ହାଦ୍ଦୁସ୍ ବିରୋଧିର୍‌ଘି ହେଖ୍ଖାନୁ ସୋଁପାଚା କାଲ୍‌ଦାସ୍; ଆସ୍ ଦଣ୍ଡ୍‌ଘି ହକ୍‌ଦାର୍‌ସ୍, ଯଦି ଆସ୍‌କି ଜନମ୍ ମା ମାନ୍‌ଚ୍‌କିରଦ୍‌ନେ ତା, ଆସ୍‌କି ଲାଗାନ୍ ବାନେ ମାନଦ୍‌ନେ।” ²⁵ଆନ୍ତିନ୍ ଯୀଶୁସିନ୍ ଧାର୍‌ତାନାବାଲା ଯୁଦାସ୍ ତେଙ୍ଗିୟାସ୍, “ହେ ଗୁରୁ, ଆ ଆଲାନ୍ ଏନ୍ କାଁଏ?” ଯୀଶୁସ୍ ଆସିନ୍ ତେଙ୍ଗିୟାସ୍, “ନିନ୍ ଠିକେନ୍ ତେଙ୍କାଏ।”

ପ୍ରାଭୁଭୋଜ୍

(ମାର୍‌କୁସ୍ ୧୪:୨୨-୨୬; ଲୁକାସ୍ ୨୨:୧୪-୨୦; ୧ କୁରିନ୍ଥୀ ୧୧:୨୩-୨୫)

²⁶ଯେତ୍‌କବାକେନ୍ ଆବ୍ଡ଼ାର୍ ମହାଁଲିୟାର୍‌ତା ଯୀଶୁସ୍ ଆସ୍‌ମା ଅଚ୍ଚାସ୍, ଆରୁ ଧାନ୍ୟାବାଦ୍‌ଘି ବିନ୍ତି କାମିକିରି ଖିଣ୍ଡିୟାସ୍, ଆରୁ ଚେଲାଜାମାର୍‌ଗେ ଚିଇକିରି ତେଙ୍ଗିୟାସ୍, “ଇବନ୍ ହୁଆ, ଆରୁ ମହାଁ; ଇଦ୍ ଏଙ୍ଘାଏ ମେଦୁଦ୍।” ²⁷ଆନ୍ତିନ୍ ଆସ୍ କାଟୋରା ହୋଇକିରି ଧାନ୍ୟାବାଦ୍ ଚିଚ୍ଚାସ୍, ଆରୁ ଆବ୍ଡ଼ାର୍‌ଗେ ଚିଇକିରି ତେଙ୍ଗିୟାସ୍, “ନିମ୍ ଜାମାର୍ ଇନ୍ନୁନ୍‌ନ୍ତି ହାପ୍ପା, ²⁸ଏନ୍ଦେର୍‌ଗେକା ଇଦ୍ ନିୟମ୍‌ଘି ଏଙ୍ଘାଏ ଆ ହେଁସୁଦ୍, ଏକାଦ୍ କା ଢେର୍ ଆଲାର୍‌ଗେ ପାପ୍ ଛେମାଘି ଲାଗାନ୍ ବାହାବା କାଲିଦ୍। ²⁹ଏନ୍ ନିମାନ୍ ତେଙ୍ଗାଲ୍‌ଦାନ୍ କା ଅଙ୍ଗୁର୍‌ଘି ଇ ରାସେ ଆ ଉଲ୍ଲାତକ୍ ଏକ୍‌ଲାହି ମା ହାପ୍ପଦାନ୍, ଯେତ୍‌କତକ୍ ନିହ୍ମାଗାନେ ଏଙ୍ଘା ବାଙ୍ଗ୍‌ସ୍‌କି ରାଜୀନୁ ପୁନା ଅଙ୍ଗୁର୍ ରାସେ ମା ହାପ୍ପଦାନ୍।”

³⁰ଆନ୍ତିନ୍ ଆବ୍ଡ଼ାର୍ ଭଜନ୍ ଗୀତୁ ପାଡ଼ିକିରି ଜାଇତୁନ୍ ପାର୍ତ୍ତାଗେ ଉର୍‌ଖିୟାର୍ କେରାର୍।

ପାତ୍ରାସ୍‌କି ଅସ୍ଵୀକାର୍ କାମ୍‌ନାଘି ଭବିଷତ୍ କାତ୍‌ଥା

(ମାର୍‌କୁସ୍ ୧୪:୨୭-୩୧; ଲୁକାସ୍ ୨୨:୩୧-୩୪; ଯୋହାନ୍ ୧୩:୩୬-୩୮)

³¹ଆନ୍ତିନ୍ ଯୀଶୁସ୍ ଚେଲାଜାମାରିନ୍ ତେଙ୍ଗିୟାସ୍, “ନିମ୍ ଜାମାର୍ ଇନ୍ନା ମାଁହା ଏଙ୍ଗାନ୍ ଆମ୍ବିକିରି ବୁଙ୍ଗର୍‌ଚର୍, ଏନ୍ଦେର୍‌ଗେକା ପାବିତାର୍ ଶାସ୍ତ୍ରନୁ ଲେଖ୍‌ଚ୍‌କା ରାଇ: ‘ଏନ୍ ଭେଡ଼ି ହାପୁସିନ୍ ଡେମନ୍ ଆରୁ ଗୁଟ୍‌ଠିନ୍ତା ଭେଡ଼ିଦ୍ ଛିଛିର୍‌ଛାନ୍ଦ୍ ମାନ କୋଦ୍।’ ³²ଲେକିନ୍ ଏନ୍ ଉଜ୍ଜକା ପାଛ୍‌ଲି ନିହ୍ମାସ୍‌ତି ଆଘ୍‌ଲି ଗାଲିଲୀଗେ କନ୍।” ³³ଆଙ୍ଗେନ୍ ପାତ୍ରାସ୍ ଆସିନ୍ ତେଙ୍ଗିୟାସ୍, “ଯଦି ଜାମାର୍ ନିମାନ୍ ଆମ୍ବର୍ ବୁଙ୍ଗର୍‌ଚର୍, ହାଲେହି ଏନ୍ ମା ବୁଙ୍ଗ୍‌ଦାନ୍।” ³⁴ଯୀଶୁସ୍ ଆସିନ୍ ତେଙ୍ଗିୟାସ୍, “ଏନ୍ ନିଙ୍ଗାନ୍ ସତ୍ତୁନ୍ ତେଙ୍ଗାଲ୍‌ଦାନ୍ କା ଇନ୍ନା ମାଁହା ହେରୁ ଅଲ୍‌ହ୍ନାଘି ଆଘ୍‌ଲି, ନିନ୍ ଏଙ୍ଗାନ୍ ତିନ୍ ଥର୍ ମାନା କାମୟ।” ³⁵ପାତ୍ରାସ୍ ଆସିନ୍ ତେଙ୍ଗିୟାସ୍, “ଯଦି ଏଙ୍ଗା ନିହ୍ମାଗାନେ ଖିଆଗେହି ଖାତ୍‌ରଦ୍, ହାଲେହି ଏନ୍ ନିମାନ୍ ଏକ୍‌ଲାହି ମାନା ମା କାମ୍‌ଦାନ୍।” ଆରୁ ଜାମା ଚେଲାର୍‌ହି ଏନ୍ନେନ୍ ତେଙ୍ଗିୟାର୍।

ଯୀଶୁସ୍ ଗେତ୍‌ଶେମାନୀ ଆଡ୍ଡାନୁ ବିନ୍ତି କାମାଲ୍‌ଦାସ୍

(ମାର୍‌କୁସ୍ ୧୪:୩୨-୪୨; ଲୁକାସ୍ ୨୨:୩୯-୪୬)

³⁶ଆନ୍ତିନ୍ ଯୀଶୁସ୍ ତାଙ୍ଘା ଚେଲାର୍‌ଗାନେ ଗେତ୍‌ଶେମାନୀ ନାମେଘି ଅଣ୍ଟା ଆଡ୍ଡାଗେ ବାର୍‌ଚାସ୍ ଆରୁ ତାଙ୍ଘା ଚେଲାଜାମାରିନ୍ ତେଙ୍ଗିୟାସ୍, “ଏନ୍ ଆସାନ୍ କାଇକିରି ବିନ୍ତି କାମ୍‌ନାତକ୍ ନିମ୍ ଇସାନିନ୍ ଅକ୍କାରାକେ।” ³⁷ଆସ୍ ପାତ୍ରାସ୍ ଆରୁ ଜେବେଦୀସ୍‌କି ଦୁଇ ଲୋକ୍ ହାଦ୍ଦୁରିନ୍ ସାଙ୍ଗେନ୍ ଅଚ୍ଚାସ୍, ଆରୁ ଆସ୍ ଉଦାସ୍ ଆରୁ ଆକ୍‌ବାକ୍‌ରାକାଲିୟାସ୍। ³⁸ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏଙ୍ଘା ଜୀଆ ମୁରୁକ୍ ଉଦାସ୍ ରାଇ, ଏତ୍‌କତକ୍ କା ଏଙ୍ଘା ଜୀଆ ଉର୍‌ଖାକାଲିଦ୍, ନିମ୍ ଇସାନିନ୍ ରା ଆରୁ ଏଙ୍ଘାଗାନେ ଚେତ୍‌ରିକିରି ରା।” ³⁹ଆନ୍ତିନ୍ ଆସ୍ କାଟେ ଗେଚ୍ଛା ଆଘ୍‌ଲି କେରାସ୍ ଆରୁ ହୁମ୍‌କୁଡ଼ିଆ ମାନିକିରି ବିନ୍ତି କାମ୍‌ଚାସ୍, “ହେ ଏଙ୍ଘାଏ ବାଙ୍ଗ୍, ଯଦି ମାନଦ୍‌ତା ଇ ଦୁଃଖୁ ଏଙ୍ଘାସ୍‌ତି ହାଟାବାଚା, ହାଲେହି ଏସ୍‌କେ ଏନ୍ ଚାହଁଦାନ୍ ହନ୍ନେ ମାଲ୍ଲା, ଲେକିନ୍ ନିନ୍ ଏସ୍‌କେ ଚାହଁଦାଏ ଆନ୍ନେନ୍ ମାନ୍ନାଦ୍।” ⁴⁰ଆନ୍ତିନ୍ ଆସ୍ ଚେଲାର୍‌ଘି ଚାହାନୁ ବାରିକିରି ଆବ୍ଡ଼ାର୍‌ଘି ହାନ୍ଦ୍‌ର୍‌ନାନ୍ ଏରିୟାସ୍ ଆରୁ ପାତ୍ରାସ୍‌ସିନ୍ ତେଙ୍ଗିୟାସ୍, “ନିମ୍ କାଁଏ ଏଙ୍ଘାଗାନେ କାଟେ ଡେରିହି ଚେତ୍‌ରା ପଲ୍ଲକାର୍? ⁴¹ଚେତ୍‌ରିକିରି ରା, ଆରୁ ବିନ୍ତି କାମ୍‌ତେ ରା କା ନିମ୍ ପରୀକ୍ଷାନୁ ମା ଖାତ୍‌ରର୍: ଆତ୍ମାତା ତିୟାର୍ ରାଇ, ଲେକିନ୍ ମେଦୁଦ୍ କମ୍‌ଜୋର୍ ରାଇ।” ⁴²ଆନ୍ତିନ୍ ଆସ୍ ଦୁସ୍‌ରାଥର୍ କାଇକିରି ଏନ୍ନେ ବିନ୍ତି କାମ୍‌ଚାସ୍ କା, “ହେ ଏଙ୍ଘାଏ ବାଙ୍ଗ୍, ଇ ଦୁଃଖୁ ଏନ୍ ସାହ୍‌ନାଘି ଲାଗାନ୍ ଯଦି ନିମ୍ ଚାହଁର୍ ତା ନିହ୍ମା ଇଚ୍ଛାଘି ଲେଖା କାମା।” ⁴³ଆରୁ ଆସ୍ ବାରିକିରି ଆବ୍ଡ଼ାରିନ୍ ଆରୁଅହନ୍ ହାନ୍ଦ୍‌ର୍‌ନାନ୍ ଏରିୟାସ୍, ଏନ୍ଦେର୍‌ଗେକା ଆବ୍ଡ଼ାର୍‌ଘି ହାନ୍ନୁଦ୍ ମିଁଙ୍ଖରା କାଲିୟାଦ୍। ⁴⁴ଆଙ୍ଗେନ୍ ଆସ୍ ଆବ୍ଡ଼ାରିନ୍ ଆମ୍ବିକିରି ଆରୁଅହନ୍ ବୁଙ୍ଗାସ୍ କେରାସ୍ ଆରୁ ପହ୍‌ଲେ ଲେଖା ଆନ୍ନେନ୍ ତିସ୍‌ରା ଥର୍ ବିନ୍ତି କାମାଗେ ଲାଗ୍ଗିୟାସ୍। ⁴⁵ଆନ୍ତିନ୍ ଆସ୍ ଚେଲାର୍‌ଘି ଚାହାଗେ ବାରିକିରି ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଆକ୍କୁନ୍‌ତକ୍ ଆରାମ୍ ସେ ହାନ୍ଦ୍ରାଲ୍‌ଦାର୍ କାଁଏ? ଏରା, ଆ ସାମାୟ ଆଣ୍‌ସିୟା କେର୍‌କିଚି ଆରୁ ମୁନୁଷ୍ ହାଦ୍ଦୁସ୍ ପାପୀ ଜାମାର୍‌ଘି ହେଖ୍ଖାନୁ ସୋଁପାଚା କାଲ୍‌ଦାସ୍। ⁴⁶ଉସ୍‌କାରା ଆରୁ ଗୁଚା; ଏରା, ଏଙ୍ଗାନ୍ ଧାର୍‌ତାନା ବାଲାସ୍ ଏଙ୍ଘା ଚାହାଗେ ଆଣ୍‌ସିୟାସ୍ କେରାସିନ୍।”

ଯୀଶୁସିନ୍ ଧାର୍‌ନା ଆରୁ ହିଁଇକିରି ହୋନା କାନା

(ମାର୍‌କୁସ୍ ୧୪:୪୩-୫୦; ଲୁକାସ୍ ୨୨:୪୭-୫୩; ଯୋହାନ୍ ୧୮:୩-୧୨)

⁴⁷ଯୀଶୁସ୍ ଏନ୍ନେ ତେଙ୍ଗାଲିୟାସିନ୍ କା ଯୁଦାସ୍ ଏକାସ୍ କା ବାର ଚେଲାର୍‌ସ୍‌ତି ଅର୍‌ତୁ ରାଚାସ୍ ବାର୍‌ଚାସ୍, ଆରୁ ତାଙ୍ଘାଗାନେ ମୁଖ୍ୟା ପୁରୋହିତ୍‌ଜାମାର୍ ଆରୁ ଆଲାର୍‌ଘି ମୁଖ୍ୟାର୍‌ଘି ତାର୍‌ତି ତାଏକା ଆଲାର୍‌ଘି ବାଡ଼୍‌କା ଭିଡ଼୍, ଖଣ୍ଡା ଆରୁ ଲାଠି ଧାରିକିରି ବାର୍‌ଚାର୍। ⁴⁸ଯୀଶୁସ୍‌କି ଧାର୍‌ତାନା ବାଲାସ୍ ଆବ୍ଡ଼ାରିନ୍ ଇସାରା ଚିଚ୍ଚକାଦାସ୍: “କା ଏକାସିନ୍ ଏନ୍ ଚଙ୍ଖନ୍ ଆସିନ୍ ରସ୍; ଆସିନ୍ ଧାର୍‌କେ।” ⁴⁹ଆରୁ ଆସ୍ ହୁଙ୍ଗେନିନ୍ ଯୀଶୁସ୍‌କି ଚାହାଗେ ବାରିକିରି ତେଙ୍ଗିୟାସ୍, “ହେ ଗୁରୁ, ଯୋହାର୍!” ଆରୁ ଆସିନ୍ ଚଙ୍ଖାଗେ ଲାଗ୍ଗିୟାସ୍। ⁵⁰ଯୀଶୁସ୍ ଆସିନ୍ ତେଙ୍ଗିୟାସ୍, “ହେ ବନ୍ଧୁ, ଏକା ନାଲ୍‌ଖୁଗେ ନିନ୍ ବାର୍‌ଚ୍‌କାଦାଏ, ଆଦିନ୍ କାମା।” ଆନ୍ତିନ୍ ଆବ୍ଡ଼ାର୍ ଯୀଶୁସ୍‌କି ଚାହାଗେ ବାରିକିରି ଆସିନ୍ ବନ୍ଦୀ କାମିକିରି ଅଚ୍ଚାର୍ କେରାର୍। ⁵¹ଯୀଶୁସ୍‌ଗାନେ ରୁ ଆଲାର୍‌ସ୍‌ତି ଅର୍‌ତୁସ୍ ହେଖ୍ଖା ବାଢ଼ାବାଇକିରି ତାଙ୍ଘା ଖଣ୍ଡାନ୍ ଅଥ୍‌ରାସ୍ ଆରୁ ମାହାପୁରୋହିତ୍‌ସ୍‌କି ଗୁତ୍ତିୟାସ୍‌କି ମିଆଁ ଖଣ୍ଡା ଚାଲାବାଇକିରି ଆସ୍‌କି ହେବ୍‌ଦାନ୍ ମୁର୍‌କେଇଚାସ୍। ⁵²ଆଙ୍ଗେନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ନିଙ୍ଘା ଖଣ୍ଡାନ୍ ଏକାସାନ୍ ଆଘ୍‌ଲି ରାଚା ଆସାନ୍ ବାନେକିରି ଉଇୟା ଏନ୍ଦେର୍‌ଗେକା ନେଦ୍ ଖଣ୍ଡା ଚାଲାବାନାଏ ଆବ୍ଡ଼ାର୍‌ଜାମାର୍ ଖଣ୍ଡାତି ନାଶ୍ ମାନର୍‌କର୍। ⁵³ନିମ୍ ବାଲ୍‌ଦାର୍ କାଁଏ କା, ଏନ୍ ଏଙ୍ଘାଏ ବାଙ୍ଗ୍‌ସାନ୍ ବିନ୍ତି କାମା ଅଙ୍ଗ୍‌ଦାନ୍ ଆରୁ ଆସ୍ ସରଗ୍ ଦୂଁତ୍‌ଜାମାର୍‌ଘି ବାର ସେନାସ୍‌ତି ବାଗ୍ଗେ ଏଙ୍ଘା ଚାହାଗେ ଆକ୍କୁନ୍ ତାଇୟଚସ୍? ⁵⁴ଲେକିନ୍ ପାବିତାର୍‌ଶାସ୍ତ୍ରନ୍ତା ଇ କାତ୍‌ଥାଦ୍ ପୁରା ମାନ୍ନାଦ୍ ଜରୁରୀ ରାଇ, ଆଦ୍ ଏସ୍‌କେ ପୁରା ମାନଦ୍?” ⁵⁵ହୁ ସାମାୟନୁ ଯୀଶୁସ୍ ଭିଡ଼୍‌ବନ୍ ତେଙ୍ଗିୟାସ୍, “ନିମ୍ କାଁଏ ଏଙ୍ଗାନ୍ ଡାକୁର୍ ଲେଖା ଖଣ୍ଡା ଆରୁ ଠେଙ୍ଗା ହୋଇକିରି ଧାରାଗେ ଉର୍‌କାଦାର୍? ଏନ୍ ଜାମା ଉଲ୍ଲା ମନ୍ଦିର୍‌ନୁ ଅକ୍କିକିରି ଉପ୍‌ଦେଶ୍ ଚିୟାଲ୍‌କାନ୍, ଆରୁ ନିମ୍ ଏଙ୍ଗାନ୍ ମା ଧାର୍‌ଚ୍‌କାର୍। ⁵⁶ଲେକିନ୍ ଇ ଜାମାଦ୍ ଇଦ୍‌ଘିଲାଗାନ୍ ମାନ୍‌ଚା କା ନାବୀର୍‌ଘି ତେଙ୍କା ବଚନ୍‌ବଦ୍ ପୁରା ମାନ୍ନାଦ୍।” ଆଙ୍ଗେନ୍ ଜାମା ଚେଲାର୍ ଆସିନ୍ ଆମ୍ବିକିରି ବୁଙ୍ଗେଇଚିଚ୍ଚାର୍।

ମାହାସାଭାଘି ଆଘ୍‌ଲି ଯୀଶୁସିନ୍ ଅନ୍ଦ୍ରାଲ୍‌ନାଏ

(ମାର୍‌କୁସ୍ ୧୪:୫୩-୬୫; ଲୁକାସ୍ ୨୨:୫୪,୫୫,୬୩-୭୧; ଯୋହାନ୍ ୧୮:୧୩,୧୪,୧୯-୨୪)

⁵⁷ଆନ୍ତିନ୍ ଯୀଶୁସିନ୍ ଧାର୍‌ନାବାଲାର୍ ଆସିନ୍ କାଇଫା ନାମେଘି ମାହାପୁରୋହିତ୍‌ସ୍‌କି ଚାହାଗେ ଅଚ୍ଚାର୍ କେରାର୍, ଏକାସାନ୍ କା ପଣ୍ତିତ୍‌ଜାମାର୍ ଆରୁ ମୁଖ୍ୟାର୍ ଅନ୍‌ଠାଣ୍‌ସାନ୍ ଠୁଡ଼ିୟା ରାଚ୍‌କାଚାର୍। ⁵⁸ପାତ୍ରାସ୍ ଗେଚ୍ଛାନୁ ରାଇକିରି ଆସ୍‌କି ପାଛ୍‌ଲି-ପାଛ୍‌ଲି ମାହାପୁରୋହିତ୍‌ସ୍‌କି ଘୁମାତକ୍ କେରାସ୍, ଆରୁ ଉଲା କାଇକିରି ଆଖ୍‌ରୀନୁ ଏନ୍ଦେର୍ ମାନ ବୁଲି ଏରାଗେ ଚଉକିଦାର୍ ଜାମାର୍‌ଗାନେ ଅକ୍କିୟାସ୍। ⁵⁹ମୁଖ୍ୟା ପୁରୋହିତ୍‌ଜାମାର୍ ଆରୁ ଜାମା ମାହାସାଭା ଯୀଶୁସିନ୍ ପିଟାଗେ ଆସ୍‌କି ବିରୁଦ୍ଧ୍‌ନୁ ଝୁଟ୍ଟୁ ସାକ୍ଷୀ ବେଦ୍ଦାଗେ ଲାଗ୍ଗିୟାର୍। ⁶⁰ଲେକିନ୍ ଢେର୍ ଝୁଟ୍ଟୁ ସାକ୍ଷୀ ବାର୍‌ଚ୍‌କାନ୍‌ତିହି ମା ହାଖ୍ଖୀୟାର୍। ଆଖ୍‌ରୀନୁ ଦୁଇ ଲୋକ୍ ବାରିକିରି ତେଙ୍ଗିୟାର୍, ⁶¹“ଇସ୍ ତେଙ୍କାଦାସ୍ କା, ଏନ୍ ପାର୍‌ମେଶ୍ଵାର୍‌ସ୍‌କି ମନ୍ଦିର୍‌ବନ୍ ତୋଡ଼ିକିରି ତିନ୍ ଦିନ୍‌ଘି ଭିତ୍‌ରେ କାମା ଅଙ୍ଗ୍‌ଦାନ୍।”

⁶²ଆଙ୍ଗେନ୍ ମାହାପୁରୋହିତ୍‌ସ୍ ଇଲିକିରି ଯୀଶୁସିନ୍ ତେଙ୍ଗିୟାସ୍, “ଏନ୍ଦେର୍‌ଗେ ନିନ୍ ଏନ୍ଦେର୍‌ହି ଯାବାବ୍ ମା ଚିୟାଲ୍‌ଦାଏ? ଇବ୍ଡ଼ା ଆଲାର୍ ନିଙ୍ଘା ବିରୁଦ୍ଧ୍‌ନୁ ଏନ୍ଦେର୍ ସାକ୍ଷୀ ଚିୟାଲ୍‌ନାଏ?” ⁶³ଲେକିନ୍ ଯୀଶୁସ୍ କାଡ଼େ-କାଡ଼େ ରାଚାସ୍। ଆଙ୍ଗେନ୍ ମାହାପୁରୋହିତ୍‌ସ୍ ଆସିନ୍ ତେଙ୍ଗିୟାସ୍, “ଏନ୍ ନିଙ୍ଗାନ୍ ଉଜ୍ଜୁ ପାର୍‌ମେଶ୍ଵାର୍‌ସ୍‌କି କସମ୍ ଚିଆଲ୍‌ଦାନ୍ କା ଯଦି ନିନ୍ ପାର୍‌ମେଶ୍ଵାର୍‌ସ୍‌କି ହାଦ୍ଦୁୟ ଖ୍ରୀସ୍ତ୍‌ତା, ଏମାନ୍ ତେଙ୍ଗାଚା।” ⁶⁴ଯୀଶୁସ୍ ଆସିନ୍ ତେଙ୍ଗିୟାସ୍, “ନିନିନ୍ ତେଙ୍କେଇଚ୍‌କାଏ; ଲେକିନ୍ ଏନ୍ ନିଙ୍ଗାନ୍ ଏନ୍ନେ ତେଙ୍ଗାଲ୍‌ଦାନ୍ କା ଆକ୍କୁନ୍‌ତିନିନ୍ ମୁନୁଷ୍ ହାଦ୍ଦୁସିନ୍ ଜାମାର୍‌ଘିନ୍ତି ଶକ୍ତିଶାଲୀସ୍‌କି ତିନାତାରା ଅକ୍କାନ୍ ଆରୁ ଆକାଶ୍ ତା ବାଦ୍‌ଲିନୁ ବାର୍‌ନାନ୍ ଏରୟ।” ⁶⁵ଆଙ୍ଗେନ୍ ମାହାପୁରୋହିତ୍‌ସ୍ ତାଙ୍ଘା ଚିଢ଼ାନ୍ ଏଟିକିରି ତେଙ୍ଗିୟାସ୍, “ଇସ୍‌ତା ପାର୍‌ମେଶ୍ଵାର୍‌ସ୍‌କି ନିନ୍ଦା କାମ୍‌ଚ୍‌କାଦାସ୍, ଆକ୍କୁନ୍ ନାମାଗେ ସାକ୍ଷୀଘି ଏନ୍ଦେର୍ ଦାର୍‌କାର୍ ରାଇ? ଏରା, ନିମ୍ ଆକ୍କୁନିନ୍ ପାର୍‌ମେଶ୍ୱାର୍‌ସ୍‌କି ନିନ୍ଦା ମେନ୍‌ଚ୍‌କାର୍! ⁶⁶ନିମ୍ ଏନ୍ଦେର୍ ସୋଚାଲ୍‌ଦାର୍?” ଆବ୍ଡ଼ାର୍ ଯାବାବ୍ ଚିଚ୍ଚାର୍, “ଇସ୍ ମରନ୍ ଦଣ୍ଡ୍‌ଘି ଲାଇଗ୍ ରାଦାସ୍।” ⁶⁷ଆନ୍ତିନ୍ ଆବ୍ଡ଼ାର୍ ଆସ୍‌କି ଥୁମ୍‌ଣାନୁ ତୁପ୍‌ଫିୟାର୍ ଆରୁ ଆସିନ୍ ଘୁସା ମାର୍‌ଚାର୍, ଆରୁ ଆରୁଦୁସ୍‌ରାର୍ ଥାପ୍‌ଡ଼ାଚାର୍ ଆରୁ ତେଙ୍ଗିୟାର୍, ⁶⁸“ହେ ଖ୍ରୀସ୍ତ୍, ଏମାନ୍ ଭବିଷତ୍ କାତ୍‌ଥା କାମିକିରି ତେଙ୍ଗା କା ନିଙ୍ଗାନ୍ ନେଦ୍ ଡେମ୍‌ଚାର୍?”

ପାତ୍ରାସ୍ ଯୀଶୁସିନ୍ ମାନା କାମାଲ୍‌ଦାସ୍

(ମାର୍‌କୁସ୍ ୧୪:୬୬-୭୨; ଲୁକାସ୍ ୨୨:୫୬-୬୨; ଯୋହାନ୍ ୧୮:୧୫-୧୮,୨୫-୨୭)

⁶⁹ପାତ୍ରାସ୍ ବାହ୍‌ରି ଚାଲିନୁ ଅକ୍କାଚାସ୍‌ତା ଅଣ୍ଟା ଗୁତ୍ତିୟାଦ୍ ଆସ୍‌କି ଚାହାଗେ ବାରିକିରି ତେଙ୍ଗିୟା, “ନିନ୍‌ହି ଗାଲିଲୀନ୍ତା ଯୀଶୁସ୍‌ଗାନେ ରାଚ୍‌କାଏ।” ⁷⁰ଲେକିନ୍ ଆସ୍ ଜାମାର୍‌ଘି ଆଘ୍‌ଲି ମାନା କାମିକିରି ତେଙ୍ଗିୟାସ୍, “ଏନ୍ ବାଲ୍‌ଦାନିନ୍ କା ନିନ୍ ଏନ୍ଦେର୍ ତେଙ୍ଗାଲ୍‌ଦି।” ⁷¹ଯେତ୍‌କବାକେନ୍ ଆସ୍ ବାହ୍‌ରି ଫାଟକ୍‌ଘି ଚାହାଗେ କେରାସ୍ ତା, ଦୁସ୍‌ରା ଗୁତ୍ତିୟାଦ୍ ଆସିନ୍ ଏରିକିରି ଆସ୍‌ତା ରୁ ଆଲାରିନ୍ ତେଙ୍ଗିୟା, “ଇସ୍‌ହିତା ନାଜ୍‌ରେତ୍‌ତା ଯୀଶୁସ୍‌ଗାନେ ରାଚାସ୍।” ⁷²କସମ୍ ମହିଁକିରି ଆରୁଅହନ୍ ମାନା କାମିକିରି ଆସ୍ ତେଙ୍ଗିୟାସ୍: “ଏନ୍ ଆ ଆଲାସିନ୍ ବାଲ୍‌ଦାନିନ୍” ⁷³କାଟେ ଡେରିଘି ପାଛ୍‌ଲି ଏକା ଆଲାର୍ ଆସାନ୍ ଇଜ୍ଜକାଚାର୍, ଆବ୍ଡ଼ାର୍ ପାତ୍ରାସ୍‌କି ଚାହାଗେ ବାରିକିରି ତେଙ୍ଗିୟାର୍, “ସତ୍ତୁନିନ୍ ନିନ୍‌ହି ଆବ୍ଡ଼ାର୍‌ସ୍‌ତି ଅର୍‌ତୁୟ, ଏନ୍ଦେର୍‌ଗେକା ନିଙ୍ଘା କାତ୍‌ଥାନୁତା ଆହ୍‌ତାରାଲି।” ⁷⁴ଆଙ୍ଗେନ୍ ଆସ୍ ସାର୍‌ପାରାଇକିରି ଆରୁ କସମ୍ ମହିଁକିରି ତେଙ୍ଗାଗେ ଲାଗ୍ଗିୟାସ୍, “ଏନ୍ ଆ ଆଲାସିନ୍ ବାଲ୍‌ଦାନିନ୍।” ଆରୁ ଆଖାନେନ୍ ହେରୁଦ୍ ଅହ୍ଲିୟାଦ୍। ⁷⁵ଆଙ୍ଗେନ୍ ଯୀଶୁସ୍‌କି ତେଙ୍କା କାତ୍‌ଥା ପାତ୍ରାସ୍‌କେ ମନେ ବାର୍‌ଚା: “ହେରୁ ଅହ୍ଲନାଘି ଆଘ୍‌ଲି ନିନ୍ ଏଙ୍ଗାନ୍ ତିନ୍ ଥର୍ ମାନା କାମୟ।” ଆରୁ ଆସ୍ ବାହ୍‌ରି କାଇକିରି ନିହ୍‌ଚାରା-ନିହ୍‌ଚାରା ଅହ୍ଲାଗେ ଲାଗ୍ଗିୟାସ୍।

ଯୀଶୁସିନ୍ ପିଲାତୁସ୍‌କି ଆଘ୍‌ଲି ଅନ୍ଦ୍ରାଲ୍‌ନାଏ

(ମାର୍‌କୁସ୍ ୧୫:୧; ଲୁକାସ୍ ୨୩:୧,୨; ଯୋହାନ୍ ୧୮:୨୮-୩୨)

¹ଯେତ୍‌କବାକେନ୍ ଭୋର୍ ପାଇରି ମାନ୍‌ଚାତା, ଜାମା ମୁଖ୍ୟା ପୁରୋହିତ୍‌ର୍‌ ଆରୁ ଆଲାର୍‌ଘି ମୁଖ୍ୟାର୍ ଯୀଶୁସିନ୍ ପିଟାଗେ ଉପାୟ କାମ୍‌ଚାର୍। ²ଆବ୍ଡ଼ାର୍ ଆସିନ୍ ହିଁଇକିରି ଅଚ୍ଚାର୍ ଆରୁ ପିଲାତୁସ୍ ରାଜ୍‌ପାଲ୍‌ସ୍‌କି ହେଖ୍ଖାନୁ ସୋଁପ୍‌ଚେଇଚାର୍।

ଯୁଦାସ୍ ତାନ୍ ନିଜେ ଫାଶୀ ମାନାଲ୍‌ଦାସ୍

(ପ୍ରେରିତ୍ ୧:୧୮,୧୯)

³ଯେତ୍‌କବାକେନ୍ ଯୀଶୁସ୍‌କି ବିଶ୍ୱାସ୍‌ଘାତ୍ କାମୁ ଆଲାସ୍ ଯୁଦାସ୍ ଏରିୟାସ୍ କା ଯୀଶୁସ୍ ଦୋଷୀ ଠାହ୍‌ରାରା କେର୍‌କାଦାସ୍ ତା ଆସ୍ ପାସ୍ତାରାଚାସ୍ ଆରୁ ଆସ୍ ତିରିଶ୍‌ଟା ରୂପାଘି ସିକ୍କାନ୍ ମୁଖ୍ୟା ପୁରୋହିତ୍‌ର୍‌ ଆରୁ ମୁଖ୍ୟାର୍‌ଘି ଚାହାଗେ କିର୍‌ତାଚାସ୍ ଅନ୍ଦ୍ରାସ୍ ⁴ଆରୁ ତେଙ୍ଗିୟାସ୍, “ଏନ୍ ବିନା ଦୋଷୀସିନ୍ ପିଟାଗେ ଧାର୍‌ତିକିରି ପାପ୍ କାମ୍‌ଚ୍‌କାଦାନ୍!” ଲେକିନ୍ ଆବ୍ଡ଼ାର୍ ତେଙ୍ଗିୟାର୍, “ହୁନ୍ନୁ ଏହ୍ମାଏ ଏନ୍ଦେର୍ ରାଇ? ନିନିନ୍ ବୁଝ୍‌ରା।” ⁵ଆଙ୍ଗେନ୍ ଆସ୍ ଆ ରୂପାଘି ସିକ୍କାବନ୍ ପାର୍‌ମେଶ୍ୱାର୍‌ସ୍‌କି ମନ୍ଦିର୍‌ନୁ ଖେବ୍ଡ଼େଇଚାସ୍ ଆରୁ ବୁଙ୍ଗିୟାସ୍, ଆରୁ କାଇକିରି ତାନିନ୍ ଫାଶୀ ମାନ୍‌ଚାସ୍।

⁶ମୁଖ୍ୟା ପୁରୋହିତ୍‌ଜାମାର୍ ଆ ରୂପାଘି ସିକ୍କାନ୍ ହୋଇକିରି ତେଙ୍ଗିୟାର୍, ଇଦ୍ ହେଁସୁଘି ଦାମ୍‌ଦ୍ “ଇଦିନ୍, ଭାଣ୍ଡାର୍ ବାଖ୍‌ରାନୁ ଉଇନା ବାନେ ମାଲ୍ଲିଦ୍।” ⁷ଆନ୍ତିନ୍ ଆବ୍ଡ଼ାର୍ ବିଚାର୍ କାମିକିରି ଆ ରୂପାଘି ସିକ୍କାତି ପର୍‌ଦେଶୀୟାରିନ୍ ମାଁଣାଗେ କୁମ୍ଭରାସ୍‌କି ହାଲ୍ଲୁନ୍ ହେନ୍ଦିୟାର୍। ⁸ହୁଦ୍‌ଘିଲାଗାନ୍ ହୁ ହାଲ୍ଲୁଦ୍ ଇନ୍ନାଜୁଟି ହେଁସୁଘି ହାଲ୍ଲୁ ବୁଲି ତେଙ୍ଗାକାଇ। ^9-10ହୁଦ୍‌ଘିଲାଗାନ୍ ଏକା ବଚନ୍‌ଦ୍ ଯିରିମିୟା ନାବୀସ୍‌କି ଦ୍ୱାର୍‌ନୁ ତେଙ୍ଗାକେର୍‌କିଚା ଆଦ୍ ପୁରା ମାନ୍‌ଚା: “ଆବ୍ଡ଼ାର୍ ତିରିଶ୍‌ଟା ରୂପା ସିକ୍କାନ୍ ଅଚ୍ଚାର୍ ଏକା ସିକ୍କାନ୍ ଇସ୍ରାଏଲ୍‌ତା ଆଲାର୍ ଆସ୍‌କେ ଚିଚ୍ଚକା ଦାମ୍‌ ରାଚା ଆରୁ ପ୍ରାଭୁସ୍‌କି ଦ୍ୱାର୍‌ନୁ ଏଙ୍ଗା ଚିଚ୍ଚକା ହୁକୁମ୍‌ଘି ଲେଖା ଆତ୍ତି କୁମ୍ଭରାସ୍‌କି ହାଲ୍ଲୁନ୍ ହେନ୍ଦିୟାର୍।”

ପିଲାତୁସ୍ ଯୀଶୁସିନ୍ ପ୍ରଶ୍ନ ମେନାଲ୍‌ଦାସ୍

(ମାର୍‌କୁସ୍ ୧୫:୨-୫; ଲୁକାସ୍ ୨୩:୩-୫; ଯୋହାନ୍ ୧୮:୩୩-୩୮)

¹¹ଯେତ୍‌କବାକେନ୍ ଯୀଶୁସ୍ ରାଜ୍‌ପାଲ୍‌ସ୍‌କି ଚାହାନୁ ଇଜ୍ଜକାଚାସ୍ ତା ରାଜ୍‌ପାଲ୍‌ସ୍ ଆସିନ୍ ମେନ୍‌ଚାସ୍, “ନିନ୍ ୟାହୁଦୀ ଜାମାର୍‌ଘି ରାଜାଏ କାଁଏ?” ଯୀଶୁସ୍ ଆସିନ୍ ତେଙ୍ଗିୟାସ୍, “ନିନିନ୍ ତେଙ୍ଗାଲ୍‌ଦାଏ।” ¹²ଯେତ୍‌କବାକେନ୍ ମୁଖ୍ୟା ପୁରୋହିତ୍‌ଜାମାର୍ ଆରୁ ମୁଖ୍ୟାଜାମାର୍ ଯୀଶୁସିନ୍ ଦୋଷ୍ ଚିଆଲିୟାର୍ ତା, ଆସ୍ ଏନ୍ଦେର୍‌ହି ଯାବାବ୍ ମା ଚିଚ୍ଚାସ୍। ¹³ଆନ୍ତିନ୍ ପିଲାତୁସ୍ ଯୀଶୁସିନ୍ ତେଙ୍ଗିୟାସ୍, “ନିନ୍ ମାଲ୍ଲା ମେନୁୟ କାଁଏ କା ଇବ୍ଡ଼ାର୍ ନିଙ୍ଘା ବିରୁଦ୍ଧ୍‌ନୁ କେତ୍‌କ ସାକ୍ଷୀ ଚିୟାଲ୍‌ନାଏ?” ¹⁴ଲେକିନ୍ ଯୀଶୁସ୍ ଆସିନ୍ ଅଣ୍ଟା କାତ୍‌ଥାଘିହି ଯାବାବ୍ ମା ଚିଚ୍ଚାସ୍, ଆଙ୍ଗେନ୍ ରାଜ୍‌ପାଲ୍‌ସ୍ ମୁରୁକ୍ ଆଚ୍‌ମିତ୍ ମାନ୍‌ଚାସ୍ କେରାସ୍।

ଯୀଶୁସ୍‌କେ ମରନ୍ ଦଣ୍ଡ୍‌ଘି ହୁକୁମ୍ ଚିୟାଲ୍‌ନାଏ

(ମାର୍‌କୁସ୍ ୧୫:୬-୧୫; ଲୁକାସ୍ ୨୩:୧୩-୨୫; ଯୋହାନ୍ ୧୮:୩୯—୧୯:୧୬)

¹⁵ଲେକିନ୍ ପରବ୍ ସାମାୟନୁ ଆଲାର୍‌ଘି ଇଚ୍ଛା ଲେଖା ଅଣ୍ଟା ବନ୍ଦୀସିନ୍ ଆବ୍ଡ଼ାର୍‌ଘି ଲାଗାନ୍ ଆମ୍ବାଚାଲିୟାସ୍ ଇଦ୍ ରାଜ୍‌ପାଲ୍‌ସ୍‌କି ରୀତି ରାଚା। ¹⁶ହୁ ସାମାୟନୁ ବାରାବ୍ବାସ୍ ନାମେଘି ଅଣ୍ଟା ଆଲାସ୍‌ସିନ୍ ଜେହେଲ୍‌ନୁ ଗୁଡ୍ଡକାଚାର୍ ଆସ୍ ଢେର୍ ଖାରାପ୍ ନାଲ୍‌ଖୁ କାମାଲିୟାସ୍। ¹⁷ଆନ୍ତିନ୍ ଯେତ୍‌କବାକେନ୍ ଆଲାର୍‌ଘି ଭିଡ଼୍ ଅନ୍‌ଠାଣ୍ ଠୁଡ଼ିୟା ରାଚ୍‌କାଚାର୍ ତା, ପିଲାତୁସ୍ ଆବ୍ଡ଼ାରିନ୍ ମେନ୍‌ଚାସ୍, “ନିମ୍ ନେକାନ୍ ଚାହାଁଲ୍‌ଦାର୍ କା ଏନ୍ ନିହ୍ମା ଲାଗାନ୍ ଆମ୍ବନ୍‌ଚନ୍? ବାରାବ୍ବାସ୍‌ସିନ୍ କା, ଯୀଶୁସିନ୍ ନେକାନ୍ କା ଖ୍ରୀସ୍ତ୍‌ ବାନାଏ?” ¹⁸ଏନ୍ଦେର୍‌ଗେକା ପିଲାତୁସ୍ ଆହାଲିୟାସ୍ କା ଆବ୍ଡ଼ାର୍ ଯୀଶୁସିନ୍ ହିସ୍‌ଙ୍ଗାତି ଧାର୍‌ତାଚ୍‌କାଚାର୍। ¹⁹ଯେତ୍‌କବାକେନ୍ ଆସ୍ ନ୍ୟାୟଘି ରାଜ୍‌ଗାଦୀନୁ ଅକ୍କାଚାସ୍‌ତା ତାଙ୍ଘା ମାଏକିନିଆଁ ତାଙ୍ଘା ଚାହାଗେ ତେଙ୍ଗା ତାଇୟା କା, “ନିନ୍ ଇ ଧାର୍ମିକ୍ ଆଲାସ୍‌କି ମାମ୍‌ଲାନୁ ଆମ୍‌କେ କରା, ଏନ୍ଦେର୍‌ଗେକା ଏନ୍ ଇନ୍ନା ସାପାନ୍‌ନୁ ଆସ୍‌କି କାରଣ୍‌ତି ମୁରୁକ୍ ଦୁଃଖୁ ହାକ୍କିରେନ୍।”

²⁰ଲେକିନ୍ ମୁଖ୍ୟା ପୁରୋହିତ୍‌ର୍‌ ଆରୁ ମୁଖ୍ୟା ଆଲାର୍ ବାରାବ୍ବାସ୍‌ସିନ୍ ନିଆଁଗେ ଆରୁ ଯୀଶୁସିନ୍ ପିଟାଗେ ଆଲାରିନ୍ ଚାଢ଼ାବାଚାର୍। ²¹ଲେକିନ୍ ରାଜ୍‌ପାଲ୍‌ସ୍ ଆବ୍ଡ଼ାରିନ୍ ମେନ୍‌ଚାସ୍, “ଇ ଦୁଇ ଲୋକ୍‌ସ୍‌ତି ନେକାନ୍ ଚାହ୍‌ଦାର୍ କା ଏନ୍ ନିମାଗେ ଆମ୍ବନ୍‌ଚନ୍?” ଆବ୍ଡ଼ାର୍ ତେଙ୍ଗିୟାର୍, “ବାରାବ୍ବାସ୍‌ସିନ୍।” ²²ପିଲାତୁସ୍ ଆବ୍ଡ଼ାରିନ୍ ମେନ୍‌ଚାସ୍, “ତା ଯୀଶୁସିନ୍ ଏକାସ୍ କା ଖ୍ରୀସ୍ତ୍‌ସ୍‌ ବୁଲି ତେଙ୍ଗ୍‌ର୍‌ନାଏ, ଆସ୍‌କି ଏନ୍ଦେର୍ କାମନ୍?” ଜାମାର୍ ଆସିନ୍ ତେଙ୍ଗିୟାର୍, “ଆସିନ୍ କ୍ରୁଶ୍‌ନୁ ଠୋକାକୋ!” ²³ରାଜ୍‌ପାଲ୍‌ସ୍ ତେଙ୍ଗିୟାସ୍, “ଏନ୍ଦେର୍‌ଗେ, ଇସ୍ ଏନ୍ଦେର୍ ଦୋଷ୍ କାମ୍‌ଚ୍‌କାଦାସ୍?” ଲେକିନ୍ ଆବ୍ଡ଼ାର୍ ଆରୁହି ଚିର୍‌ରାରାକିରି ତେଙ୍ଗାଗେ ଲାଗ୍ଗିୟାର୍, “ଇସିନ୍ କ୍ରୁଶ୍ ମିଆଁ ଠୋକାକୋ।” ²⁴ଯେତ୍‌କବାକେନ୍ ପିଲାତୁସ୍ ଏରିୟାସ୍ କା ଆସ୍ ଏନ୍ଦେର୍‌ହି କାମା ପଲ୍ଲାଲ୍‌ଦାସ୍ ଆରୁ ଜୋର୍‌ସେ ଆଲାର୍‌ଘି ଚିର୍‌ରାରାନାଦ୍ ଆରୁ ବାଢ଼୍‌ରାଗେ ଲାଗ୍ଗିୟାତା, ଆସ୍ ଆମ୍ମୁ ଅନ୍ଦ୍ରିକିରି ଭିଡ଼୍‌ଘି ମାଝାନୁ ତାଙ୍ଘା ହେଖ୍ଖାନ୍ ନୋଣ୍ଡ୍‌ରାସ୍ ଆରୁ ତେଙ୍ଗିୟାସ୍, “ଏନ୍ ଇ ଧାର୍ମିକ୍ ଆଲାସ୍‌କି ହେଁସୁନ୍ତି ବିନାଦୋଷୀ ରାଦାନ୍; ଇବ୍ଡ଼ା ଜାମାଦ୍ ନିହ୍ମାଏ ଜିମାବାରୀଦ୍।” ²⁵ଜାମା ଆଲାର୍ ଯାବାବ୍ ଚିଚ୍ଚାର୍, “ଇସ୍‌କି ହେଁସୁଦ୍ ନାହ୍ମା ମିଆଁ ଆରୁ ନାହ୍ମା ହାଦ୍ଦୁର୍‌ଘି ମିଆଁ ମାନ୍ନାଦ୍!” ²⁶ଆଙ୍ଗେନ୍ ଆସ୍ ବାରାବ୍ବାସ୍‌ସିନ୍ ଆବ୍ଡ଼ାର୍‌ଗେ ଆମ୍ବେଇଚାସ୍, ଆରୁ ଯୀଶୁସିନ୍ କୋଡ୍‌ରାତି ଡେମ୍‌ତିକିରି କ୍ରୁଶ୍‌ନୁ ଠୋକାଗେ ସୋଁପ୍‌ଚେଇଚାସ୍।

ସିପାହୀଜାମାର୍ ଯୀଶୁସ୍‌କି ଆପ୍‌ମାନ୍ କାମାଲ୍‌ନାଏ

(ମାର୍‌କୁସ୍ ୧୫:୧୬-୨୦; ଯୋହାନ୍ ୧୯:୨,୩)

²⁷ହୁଦ୍‌ଘିପାଛ୍‌ଲି ରାଜ୍‌ପାଲ୍‌ସ୍‌କି ପଲ୍‌ଟନ୍‌ଜାମାର୍ ଯୀଶୁସିନ୍ ମହଲ୍‌ନୁ ହୋଇକିରି ଜାମା ପଲ୍‌ଟନ୍‌ରିନ୍ ଆସ୍‌କି ଚାହାନୁ ଠୁଡ଼ିୟାଚାର୍, ²⁸ଆରୁ ଯୀଶୁସ୍‌କି ଚିଢ଼ାନ୍ ଏତ୍‌ତିକିରି ଆସିନ୍ ଲାଲ୍ ରଙ୍ଗ୍‌ଘି ଚିଢ଼ା ଆତ୍‌ତ୍ତାଚାର୍, ²⁹ଆରୁ ଆଚ୍ଚୁଘି ମୁକୁଟ୍ ଗଥିକିରି ଆସ୍‌କି କୁକ୍କୁନୁ ଆତ୍‌ତ୍ତାଚାର୍, ଆରୁ ତାଙ୍ଘାଏ ତିନା ହେଖ୍ଖାନୁ ଅଣ୍ଟା ଠେଙ୍ଗା ଧାର୍‌ତାଚାର୍ ଆରୁ ଆବ୍ଡ଼ାର୍ ତାଙ୍ଘା ଆଘ୍‌ଲି ହାଁଠୁୱାରାଇକିରି, “ହେ ୟାହୁଦୀ ଜାମାର୍‌ଘି ରାଜା, ଯୋହାର୍!” ଏନ୍ନେ ତେଙ୍ଗିକିରି ଆସ୍‌କି ମାଜାକ୍ ଉଡ଼ାବାଗେ ଲାଗ୍ଗିୟାର୍, ³⁰ଆରୁ ଆସ୍‌କି ମିଆଁ ତୁପ୍‌ଫିୟାର୍; ଆରୁ ଆ ଠେଙ୍ଗାନ୍ ହୋଇକିରି ଆସ୍‌କି କୁକ୍କୁନ୍ ଡେମାଗେ ଲାଗ୍ଗିୟାର୍। ³¹ଯେତ୍‌କବାକେନ୍ ଆବ୍ଡ଼ାର୍ ଆସ୍‌କି ମାଜାକ୍ ଉଡ଼ାବା ମୁଞ୍ଜିୟାର୍ ତା, ଆ ଚିଢ଼ାନ୍ ଆସ୍‌ତି ଏତ୍‌ତ୍ତାଚାର୍ ଆରୁ ଆରୁଅହନ୍ ତାଙ୍ଘା ଚିଢ଼ାନ୍ ଆତ୍ତତାଚାର୍; ଆରୁ କ୍ରୁଶ୍‌ନୁ ଠୋକାଗେ ଅଚ୍ଚାର୍ କେରାର୍।

ଯୀଶୁସିନ୍ କ୍ରୁଶ୍‌ନୁ ଠୋକାଲ୍‌ନାଏ

(ମାର୍‌କୁସ୍ ୧୫:୨୧-୩୨; ଲୁକାସ୍ ୨୩:୨୬-୪୩; ଯୋହାନ୍ ୧୯:୧୭-୨୭)

³²ଆବ୍ଡ଼ାର୍ ବାହ୍‌ରି ଉର୍‌ଖ୍‌ନା ବାକେନ୍ କୂରୀଣୀ ସହର୍‌ତା ଶିମୋନ୍ ନାମେଘି ଅଣ୍ଟା ଆଲାସିନ୍ ଏରିୟାର୍ ଆରୁ ଯୀଶୁସ୍‌କି କ୍ରୁଶ୍‌ବନ୍ ଚେଡ଼ାଗେ ଆସିନ୍ ଯବର୍‌ଜସ୍‌ତି କାମ୍‌ଚାର୍। ³³ଆ ଆଡ୍ଡାନୁ ଏକାଦ୍ କା ଗୋଲ୍‌ଗାଥା ମାନେ ଖୋପ୍‌ଡ଼ି ଆଡ୍ଡା ତେଙ୍ଗାକାଇ, ଆଣସିକିରି, ³⁴ଆବ୍ଡ଼ାର୍ ପିତ୍ ମେଶାବାଚ୍‌କା ଦାଖ୍‌ରାସ୍‌ବନ୍ ଯୀଶୁସ୍‌କେ ହାପ୍ପାଗେ ଚିଚ୍ଚାର୍, ଲେକିନ୍ ଆସ୍ ଟାଟ୍ଟେ ଏରିକିରି ହାପ୍ପାଗେ ମା ବେଦ୍ଦିୟାସ୍। ³⁵ଆନ୍ତିନ୍ ଆବ୍ଡ଼ାର୍ ଯୀଶୁସ୍‌ସିନ୍ କ୍ରୁଶ୍‌ନୁ ଠୋକ୍‌ଚେଇଚାର୍ ଆରୁ ଚିଠା ଅଥ୍‌ରିକିରି ଆସ୍‌କି ଚିଢ଼ାନ୍ ହାଟ୍ଟରାର୍, ³⁶ଆରୁ ଆସାନ୍ ଅକ୍କିକିରି ଆସିନ୍ ଜାଗାଗେ ଲାଗ୍ଗିୟାର୍। ³⁷ଆରୁ ଆବ୍ଡ଼ାର୍ ଯୀଶୁସ୍‌କି କ୍ରୁଶ୍ ମିଆଁ ଦୋଷୀବାଲା ଅଣ୍ଟା ପାଟା ଲାଗାବାଚାର୍ ଆରୁ ଆନ୍ନୁ ଲେଖ୍‌ଚ୍‌କାଚାର୍, “ଇସ୍ ୟାହୁଦୀ ଜାମାର୍‌ଘି ରାଜା ଯୀଶୁସ୍”। ³⁸ଆନ୍ତିନ୍ ଯୀଶୁସ୍‌ଗାନେ ଆରୁ ଦୁଇ ଲୋକ୍ ଡାକୁରିନ୍ ଅଣ୍ଟାସିନ୍ ତିନାତାରା, ଆରୁ ଆରୁ ଅଣ୍ଟାସିନ୍ ଡେବ୍‌ବାତାରା କ୍ରୁଶ୍ ମିଆଁ ଠୋକାକେରା। ³⁹କାଲୁ ବାରୁ ଆଲାର୍ କୁକ୍କୁ ନୁକା-ନୁକା ଆସ୍‌କି ନିନ୍ଦା କାମାଲିୟାର୍, ⁴⁰ଆରୁ ଏନ୍ନେ ତେଙ୍ଗାଲିୟାର୍, “ହେ ମନ୍ଦିର୍‌ବନ୍ ଧାସ୍‌କାନାବାଲା ଆରୁ ତିନ୍ ଦିନ୍‌ନୁ କାମ୍‌ନାବାଲା! ଯଦି ନିନ୍ ପାର୍‌ମେଶ୍ଵାର୍‌ସ୍‌କି ହାଦ୍ଦୁୟ ତା ନିଜ୍‌କେନିଜ୍ ବାଛାବା ଆରୁ କ୍ରୁଶ୍‌ତି ଏତ୍ତାବାରା।” ⁴¹ଏନ୍ନେନିନ୍ ମୁଖ୍ୟା ପୁରୋହିତ୍‌ଜାମାର୍, ପଣ୍ତିତ୍ ଆରୁ ମୁଖ୍ୟାର୍‌ଗାନେ ମାଜାକ୍ ଉଡ଼ାବାଇକିରି ତେଙ୍ଗାଗେ ଲାଗ୍ଗିୟାର୍, ⁴²“ଇସ୍ ଦୁସ୍‌ରାରିନ୍ ତା ବାଛାବାଚାସ୍, ଲେକିନ୍ ନିଜ୍‌କେନିଜ୍ ବାଛାବା ପଲ୍ଲାଲ୍‌ଦାସ୍। ଇସ୍‌ତା ଇସ୍ରାଏଲ୍‌ତା ରାଜାସ୍। ଆକ୍କୁନ୍ କ୍ରୁଶ୍‌ତି ଏତ୍ତନାସ୍ ବାର୍‌ନାସ୍ ତା ଏମ୍ ତାଙ୍ଘା ମିଆଁ ବିଶ୍ଵାସ୍ କାମମ୍। ⁴³ଆସ୍ ପାର୍‌ମେଶ୍ଵାର୍‌ସ୍‌କି ମିଆଁ ଭାର୍‌ଷା ଉଇକାଦାସ୍; ଯଦି ଆସ୍ ଇସିନ୍ ଚାହଁଦାସ୍ ତା ଆକ୍କୁନ୍‌ନିନ୍ ଇସିନ୍ ବାଛାବାନାସ୍ ଏନ୍ଦେର୍‌ଗେକା ଇସ୍ ତେଙ୍ଗାଚାସ୍, ‘ଏନ୍ ପାର୍‌ମେଶ୍ଵାର୍‌ସ୍‌କି ହାଦ୍ଦୁନ୍’।” ⁴⁴ଏନ୍ନେନ୍ ଡାକୁର୍‌ହି ଏକାର୍ କା ଆସ୍‌ଗାନେ କ୍ରୁଶ୍‌ନୁ ଠୋକା କେର୍‌କାଚାର୍, ଆସ୍‌କି ନିନ୍ଦା କାମାଲିୟାର୍।

ଯୀଶୁସ୍‌କି ମରନ୍

(ମାର୍‌କୁସ୍ ୧୫:୩୩-୪୧; ଲୁକାସ୍ ୨୩:୪୪-୪୯; ଯୋହାନ୍ ୧୯:୨୮-୩୦)

⁴⁵ଆନ୍ତିନ୍ ବାର ବାଜେନ୍‌ନ୍ତି ତିନ୍‌ବାଜେତକ୍ ଜାମା ଦେଶ୍‌ନୁ ଉହା ମାନ୍‌ଚାକେରା। ⁴⁶ଆରୁ ଲାଗ୍‌ଭାଗ୍ ତିନ୍‌ବାଜେଗେ ଯୀଶୁସ୍ ଜୋର୍‌ସେ ଚିର୍‌ରା ରାଇକିରି ତେଙ୍ଗିୟାସ୍, “ଏଲୋଇ, ଏଲୋଇ, ଲାମା ସବାଖ୍‌ତାନୀ?” ଇଦ୍‌ଘି ମାନେ “ହେ ଏଙ୍ଘାଏ ପାର୍‌ମେଶ୍ୱାର୍, ହେ ଏଙ୍ଘାଏ ପାର୍‌ମେଶ୍ୱାର୍! ନିମ୍ ଏଙ୍ଗାନ୍ ଏନ୍ଦେର୍‌ଗେ ଆମ୍ବେଚ୍‌କାର୍?” ⁴⁷ଇବନ୍ ମେନିକିରି ଆସ୍‌ତା ଇଜ୍ଜକା ଆଲାର୍‌ଘି ଭିତର୍‌ନୁ ନେଦ୍-ନେଦ୍ ତେଙ୍ଗିୟାର୍, “ଇ ଆଲାସ୍ ଏଲିୟାସ୍‌ସିନ୍ ମେହାଁଲ୍‌ଦାସ୍।” ⁴⁸ଆରୁ ହୁଙ୍ଗେନିନ୍ ଆବ୍ଡ଼ାର୍‌ଘି ମାଝାନ୍‌ନ୍ତି ଅର୍‌ତୁସ୍ କୁଦିୟାରାତେ କାଇକିରି ଅଣ୍ଟା ସ୍ପଞ୍ଜ ଧାରିକିରି ଆବନ୍ ହାଡ଼୍‌ଖା ରାସେନୁ ମୁହ୍ଲଥାଚାସ୍, ଆରୁ ଆଦିନ୍ ଅଣ୍ଟା ଠେଙ୍ଗାନୁ ଲାଗାବିକିରି ଯୀଶୁସ୍‌କେ ହାପ୍ପାଗେ ଚିଚ୍ଚାସ୍। ⁴⁹ଲେକିନ୍ ଦୁସ୍‌ରାର୍ ତେଙ୍ଗିୟାର୍, “ରା ତା, ଏରୋତ୍, ଏଲିୟାସ୍ ଇସିନ୍ ବାଛାବାଗେ ବାରାଲ୍‌ଦାସ୍ କା ମାଲ୍ଲା।” ⁵⁰ଲେକିନ୍ ଯୀଶୁସ୍ ଆରୁଅହନ୍ ଜୋର୍‌ସେ ଚିର୍‌ରା ରାଇକିରି କେଚ୍ଚାସ୍‌କେରାସ୍। ⁵¹ଆରୁ ଏରା, ପାର୍‌ମେଶ୍ୱାର୍‌ସ୍‌କି ମନ୍ଦିର୍‌ତା ପାର୍‌ଦାଦ୍ ମିଁତି କିୟାଁଜୁଟି ଏଟ୍‌ରିକିରି ଦୁଇଖଣ୍ ମାନ୍‌ଚାକେରା: ଆରୁ ଭୁଇଁଡୋଲ୍ ମାନ୍‌ଚା ଆରୁ ଚାଟ୍‌ଣୀଗୁଠିଦ୍ ଫାଡ଼ା ମାନ୍‌ଚାକେରା, ⁵²ଆରୁ ମାସ୍‌ଣାଗୁଠିଦ୍ ଖୋଲ୍‌ରା କେରାଦ୍, ଆରୁ ଢେର୍ କେଚ୍ଚକା ପାବିତାର୍ ଆଲାର୍ ଉଜ୍ଜିୟାର୍, ⁵³ଆରୁ ଯୀଶୁସ୍ ଉଜ୍ଜକା ପାଛ୍‌ଲି ମାସ୍‌ଣାସ୍‌ତି ଉର୍‌ଖିକିରି ପାବିତାର୍ ସହର୍‌ଗେ କେରାସ୍ ଆରୁ ଢେର୍ ଆଲାରିନ୍ ଦର୍ଶନ୍ ଚିଚ୍ଚାସ୍। ⁵⁴ଆଙ୍ଗେନ୍ ପଲ୍‌ଟନ୍‌ଜାମାର୍‌ଘି ମୁଖ୍ୟାସ୍ ଆରୁ ଏକାର୍ ଆସ୍‌ଗାନେ ଯୀଶୁସିନ୍ ଜାଗାଲିୟାର୍, ଭୁଇଁଡୋଲ୍ ଆରୁ ଏନ୍ଦ୍ରିନ୍‌ହି ମାନ୍‌ଚ୍‌କିଚା ଆବନ୍ ଏରିକିରି ମୁରୁକ୍ ଏଲ୍‌ଚିୟାର୍ କେରାର୍ ଆରୁ ତେଙ୍ଗିୟାର୍, “ସତ୍ତୁନିନ୍ ଇସ୍ ପାର୍‌ମେଶ୍ଵାର୍‌ସ୍‌କି ହାଦ୍ଦୁସ୍ ରାଚାସ୍!” ⁵⁵ଢେର୍ ମାଏକିନିଆଁର୍ ଆସାନ୍ ରାଚାର୍ ଏକାର୍ କା ଗେଚ୍ଛାନ୍‌ନ୍ତି ଏରାଲିୟାର୍। ଆବ୍ଡ଼ାର୍ ଗାଲିଲୀନ୍‌ନ୍ତି ଯୀଶୁସ୍‌କି ସେବା କାମ୍‌ତେ-କାମ୍‌ତେ ଆସ୍‌ଗାନେ ବାର୍‌ଚ୍‌କାଚାର୍। ⁵⁶ଆବ୍ଡ଼ାର୍‌ଘି ଭିତର୍‌ନୁ, ମାରିୟାମ୍ ମାଗ୍‌ଦାଲୀନୀ, ଆରୁ ୟାକୁବ୍ ଆରୁ ଯୋଷେଫ୍‌ସ୍‌କି ଆୟାଙ୍ଗ୍ ମାରିୟାମ୍, ଆରୁ ଜେବେଦୀସ୍‌କି ଦାଦ୍ଦୁର୍‌ଘି ଆୟାଙ୍ଗ୍ ରାଚା।

ଯୀଶୁସିନ୍ ମାଡ଼୍‌ନା

(ମାର୍‌କୁସ୍ ୧୫:୪୨-୪୭; ଲୁକାସ୍ ୨୩:୫୦-୫୬; ଯୋହାନ୍ ୧୯:୩୮-୪୨)

⁵⁷ଯେତ୍‌କବାକେନ୍ ବିଡ଼ି ଅକ୍କିୟାତା ଯୋଷେଫ୍ ନାମେଘି ହାରାମାଥିୟାନ୍ତା ଅଣ୍ଟା ଧନୀ ଆଲାସ୍ ବାର୍‌ଚାସ୍, ଏକାସ୍ କା ଯୀଶୁସ୍‌କି ଚେଲା ମାନ୍‌ଚାସ୍ କେର୍‌କାଚାସ୍। ⁵⁸ଆସ୍ ପିଲାତୁସ୍‌କି ଚାହାଗେ କାଇକିରି ଯୀଶୁସ୍‌କି ମାଁଣାନ୍ ନିଚାସ୍। ଆଙ୍ଗେନ୍ ପିଲାତୁସ୍ ଚିୟାଲାଗାଗେ ହୁକୁମ୍ ଚିଚ୍ଚାସ୍। ⁵⁹ଯୋଷେଫ୍‌ସ୍ ମାଁଣାନ୍ ଅଚ୍ଚାସ୍, ଆରୁ ଆବନ୍ ପାଣ୍ତ୍‌ରୁ ଚାଦର୍‌ନୁ ଗୁଢ଼ିୟାଚାସ୍, ⁶⁰ଆରୁ ଆସିନ୍ ତାଙ୍ଘା ପୁନା ମାସ୍‌ଣାନୁ ଉଇୟାସ୍, ଏକାଦ୍ କା ଚାଟ୍‌ଣୀନୁ ଖୋଲ୍‌କା ରାଚା, ଆରୁ ମାସ୍‌ଣାଘି ଘୁମାନୁ ବାଡ଼୍‌କା ଚାଁଚା ଢୁଲ୍ଇକିରି ବୁଙ୍ଗିୟାସ୍। ⁶¹ମାରିୟାମ୍ ମାଗ୍‌ଦାଲୀନୀ ଆରୁ ଦୁସ୍‌ରା ମାରିୟାମ୍ ଆସାନ୍ ମାସ୍‌ଣା ଆଘ୍‌ଲି ଅକ୍କାଚାର୍।

ଯୀଶୁସ୍‌କି ମାସ୍‌ଣାବନ୍ ଜାଗ୍‌ନା

⁶²ନାନ୍ନୁ ଉଲ୍ଲା ଏକାଦ୍ କା ପାବିତାର୍ ଉଲ୍ଲା ରାଚା, ମୁଖ୍ୟା ପୁରୋହିତ୍‌ର୍‌ ଆରୁ ଫାରିସୀଜାମାର୍ ପିଲାତୁସ୍‌କି ଚାହାନୁ ଠୁଡ଼ିୟା ରାଇକିରି ତେଙ୍ଗିୟାର୍, ⁶³“ହେ ମାହାରାଜ୍, ଏହ୍ମାଏ ମନେ ରାଇ କା ଆ ଠାକୁୱା ଆଲାସ୍ ଯେତ୍‌କବାକେନ୍ ଉଜ୍ଜାଲିୟାସ୍ ତା, ତେଙ୍କାଚାସ୍ କା, ‘ଏନ୍ ତିନ୍ ଦିନ୍‌ନୁ ଉଜ୍ଜନ୍।’ ⁶⁴ହାଲେ ହୁକୁମ୍ ଚିଆ କା ତିନ୍ ଦିନ୍‌ତକ୍ ମାସ୍‌ଣାନ୍‌ହି ଜାଗାକୋ, ଏନ୍ନେ ମା ମାନ୍ନାଦ୍ କା ଆସ୍‌କି କେଚ୍ଚକା ଶରୀର୍‌ବନ୍ ଚେଲାର୍ ବାରିକିରି ଆସିନ୍ ହାଡ଼ର୍ ହର୍‌କର୍, ଆରୁ ଆଲାରିନ୍ ତେଙ୍ଗାଗେ ଲାଗ୍ଗର୍ କା, ‘ଆସ୍ କେଚ୍ଚକାର୍‌ସ୍‌ତି ଉଜ୍ଜକାଦାସ୍।’ ତା ଆଘ୍‌ଲିନ୍ତା ଧୋଖାନ୍ତି ପାଛ୍‌ଲିନ୍ତା ଧୋଖାଦ୍ ବହୁତ୍ ଖାରାପ୍ ମାନ।” ⁶⁵ପିଲାତୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିହ୍ମା ଚାହାନୁ ଜାଗୁୱାର୍ ତା ରାନାଏ କାଲା, ନିମ୍ ଯେତ୍‌କ କାମା ଅଙ୍ଗର୍ ଆତ୍‌କ କାମା।” ⁶⁶ଆନ୍ତିନ୍ ଆବ୍ଡ଼ାର୍ ଜାଗୁୱାର୍‌ଗାନେ କାଇକିରି, ଆରୁ ଚାଁଚାନୁ ମହଁର୍ ଲାଗାବାଇକିରି ମାସ୍‌ଣାନ୍ ଜାଗ୍‌ଚାର୍।

ଯୀଶୁସ୍‌କି ଉଜ୍ଜନା

(ମାର୍‌କୁସ୍ ୧୬:୧-୧୦; ଲୁକାସ୍ ୨୪:୧-୧୨; ଯୋହାନ୍ ୨୦:୧-୧୦)

¹ପାବିତାର୍ ଉଲ୍ଲାଘି ପାଛ୍‌ଲି, ହାପ୍ତାଘି ପହ୍‌ଲେ ଉଲ୍ଲା ଭୋର୍ ପାଇରିନ୍ ମାରିୟାମ୍ ମାଗ୍‌ଦାଲୀନୀ ଆରୁ ଦୁସ୍‌ରା ମାରିୟାମ୍ ମାସ୍‌ଣାବନ୍ ଏରାଗେ ବାର୍‌ଚାର୍। ²ଆରୁ ଏରା, ଅଣ୍ଟା ବାଡ଼୍‌କା ଭୁଇଁଡୋଲ୍ ମାନ୍‌ଚା, ଏନ୍ଦେର୍‌ଗେକା ପ୍ରାଭୁସ୍‌କି ଅଣ୍ଟା ଦୂଁତ୍ ସରଗ୍‌ତି ଏତ୍ତିୟା ଆରୁ ଚାହା ବାରିକିରି ଆଦ୍ ଆ ଚାଁଚାନ୍ ପାଖିୟାଚା, ଆରୁ ଆଦ୍‌ଘି ମିଆଁ ଅକ୍କିୟା। ³ଆଦ୍‌ଘି ରୂପ୍‌ଦ୍ ବିଜ୍‌ଲି ଲେଖା ଆରୁ ଆଦ୍‌ଘି ଚିଢ଼ାଦ୍ ବରଫ୍ ଲେଖା ଧୋବ୍ ରାଚା। ⁴ଆଦ୍‌ଘି ଏଲ୍‌ଚ୍‌କାତି ଜାଗୁୱାର୍ ଥାର୍‌ଥାରାର୍‌କେରାର୍, ଆରୁ କେଚ୍ଚକାଘି ସାମାନ୍ ମାନ୍‌ଚାର୍ କେରାର୍। ⁵ଲେକିନ୍ ସରଗ୍‌ଦୂଁତ୍ ମାଏକିନିଆଁରିନ୍ ତେଙ୍ଗିୟା, “ଆମା ଏଲ୍‌ଚା, ଏନ୍ ଆହାଲେନ୍ କା ନିମ୍ କ୍ରୁଶ୍‌ନୁ ଠୋକ୍‌ଚ୍‌କା ଯୀଶୁସିନ୍ ବେଦ୍ଦାଲ୍‌ଦାର୍। ⁶ଆସ୍ ଇସାନ୍ ମାଲ୍‌କାସିନ୍, ଲେକିନ୍ ତାଙ୍ଘା ବଚନ୍‌ଘି ଲେଖା ଉଜ୍ଜକାଦାସ୍। ବାରା, ଇ ଆଡ୍ଡାନ୍ ଏରା, ଏକାସାନ୍ କା ପ୍ରାଭୁସିନ୍ ଉଇକାଚାର୍, ⁷ଆରୁ ଚାଁଣେ କାଲା ତାଙ୍ଘା ଚେଲାରିନ୍ ତେଙ୍ଗା କା ଆସ୍ କେଚ୍ଚକାର୍‌ସ୍‌ତି ଉଜ୍ଜକାଦାସ୍, ଆରୁ ଯୀଶୁସ୍ ନିହ୍ମାସ୍‌ତି ଆଘ୍‌ଲି ଗାଲିଲୀଗେ କାଲ୍‌ଦାସ୍, ଆସାନ୍ ଆସ୍‌କି ଦର୍ଶନ୍ ହାଖ୍ଖର୍! ଏରା, ଏନ୍ ନିମାନ୍ ତେଙ୍ଗେଇନ୍‌ଚାନ୍।”

⁸ଆଙ୍ଗେନ୍ ଆବ୍ଡ଼ା ମାଏକିନିଆଁର୍ ଏଲ୍‌ଚ୍‌କା ଆରୁ ମୁରୁକ୍ ରୀଜ୍‌ଝୁତି ମାସ୍‌ଣାସ୍‌ତି ଚାଁଣେନ୍ କିର୍‌ରିକିରି ତାଙ୍ଘା ଚେଲାରିନ୍ ଖବର୍ ଚିୟାଗେ କୁଦିୟାରାଚାର୍। ⁹ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ଭେଁଟ୍ ମାନ୍‌ଚାସ୍ ଆରୁ ତେଙ୍ଗିୟାସ୍, “ନିମାଗେ ଶାନ୍ତି ମାନ୍ନାଦ୍”। ଆଙ୍ଗେନ୍ ଆବ୍ଡ଼ାର୍ ଚାହା ବାରିକିରି ଆସ୍‌କି ହେଡ୍ଡୁବନ୍ ଏସ୍‌ରିକିରି ଆସିନ୍ ଯୋହାର୍ କାମ୍‌ଚାର୍। ¹⁰ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଆମା ଏଲ୍‌ଚା; ଏଙ୍ଘା ଭାଇର୍‌ସାନ୍ କାଇକିରି ତେଙ୍ଗା କା ଆବ୍ଡ଼ାର୍ ଗାଲିଲୀଗେ କର୍, ଆସାନ୍ ଏଙ୍ଗାନ୍ ଏରର୍।”

ଜାଗୁୱାର୍‌ଘି ୟାହୁଦୀ ମୁଖ୍ୟାରିନ୍ ଖବର୍ ଚିନା

¹¹ଆବ୍ଡ଼ା ମାଏକିନିଆଁର୍ କାଲିୟାରିନ୍ କା ମୁଖ୍ୟାର୍‌ସ୍‌ତି କେତ୍‌କ ଲୋକ୍ ସହର୍‌ନୁ ବାରିକିରି ପୁରା ଘାଟ୍‌ଣାନ୍ ମୁଖ୍ୟା ପୁରୋହିତ୍‌ଜାମାରିନ୍ ଶୁଣାବାଚାର୍। ¹²ଆଙ୍ଗେନ୍ ଆବ୍ଡ଼ାର୍ ମୁଖ୍ୟା ଜାମାର୍‌ଗାନେ ମେଶ୍‌ରିକିରି ଉପାୟ କାମ୍‌ଚାର୍ ଆରୁ ପଲ୍‌ଟନ୍ ଜାମାର୍‌ଗେ ବାଗ୍ଗେ ପାଏସା ଚିଇକିରି ତେଙ୍ଗିୟାର୍, ¹³“ଏନ୍ନେ ତେଙ୍ଗର୍ କା ମାଁହା ଯେତ୍‌କବାକେନ୍ ଏମ୍ ହାନ୍ଦ୍ରାଲ୍‌କାମ୍ ତା, ଯୀଶୁସ୍‌କି ଚେଲାର୍ ବାରିକିରି ଆସିନ୍ ହାଡ୍ଡାର୍ ଅଚ୍ଚାର୍ କେରାର୍। ¹⁴ଆରୁ ଯଦି ଇ କାତ୍‌ଥାଦ୍ ରାଜ୍‌ପାଲ୍‌ସ୍‌କି ହେବ୍‌ଦାଗେ ମେନ୍ଦ୍ରଦ୍ ତା, ଏମ୍ ଆସିନ୍ ବୁଝାବମ୍ ଆରୁ ନିମାନ୍ ଚିନ୍ତାତି ବାଛାବମ୍।” ¹⁵ଆନ୍ତିନ୍ ଜାଗୁର୍ ପାଏସା ହୋଇକିରି ଏସ୍‌କେ ଶିଖାବାକେର୍‌କିଚା, ଆନ୍ନେନ୍ କାମ୍‌ଚାର୍। ଇ କାତ୍‌ଥାଦ୍ ଇନ୍ନାତକ୍ ୟାହୁଦୀ ଆଲାର୍‌ଘି ମାଝାନୁ ଚାଲ୍‌ର୍‌ତେ ବାରାଲି।

ଯୀଶୁସ୍ ଚେଲାଜାମାର୍‌ଗେ ଦର୍ଶନ୍ ଚିଆଲ୍‌ଦାସ୍

(ମାର୍‌କୁସ୍ ୧୬:୧୪-୧୮; ଲୁକାସ୍ ୨୪:୩୬-୪୯; ଯୋହାନ୍ ୨୦:୧୯-୨୩; ପ୍ରେରିତ୍ ୧:୬-୮)

¹⁶ଆରୁ ଏଗାର ଚେଲାର୍ ଗାଲିଲୀଘି ଆ ପାର୍ତ୍ତାଗେ କେରାର୍, ଏକାସାନ୍ କା ଯୀଶୁସ୍ ଆବ୍ଡ଼ାରିନ୍ ତେଙ୍କାଚାସ୍। ¹⁷ଆବ୍ଡ଼ାର୍ ଯୀଶୁସିନ୍ ଏରିକିରି ଯୋହାର୍ କାମ୍‌ଚାର୍, ଲେକିନ୍ ନେକା-ନେକାଗେ ଶାକ୍ ମାନ୍‌ଚା। ¹⁸ଯୀଶୁସ୍ ଆବ୍ଡ଼ାର୍‌ଘି ଚାହାଗେ ବାରିକିରି ତେଙ୍ଗିୟାସ୍, “ସରଗ୍ ଆରୁ ଦୁନିଆଁନ୍ତା ଜାମା ହକ୍ ଏଙ୍ଗାଗେ ଚିଆ କେର୍‌କିଚି। ¹⁹ହୁଦ୍‌ଘିଲାଗାନ୍ ନିମ୍ କାଲା, ଜାମା ଜାତିନ୍ତା ଆଲାରିନ୍ ଚେଲା କାମା; ଆରୁ ଆବ୍ଡ଼ାରିନ୍ ବାଙ୍ଗ୍ ଆରୁ ହାଦ୍ଦୁ ଆରୁ ପାବିତାର୍ ଆତ୍ମାଘି ନାମେତି ଆସ୍ନାନ୍ ଚିଆ, ²⁰ଆରୁ ଆବ୍ଡ଼ାରିନ୍ ଜାମା କାତ୍‌ଥାନ୍ ଏକାନ୍ ଏନ୍ ନିମାନ୍ ହୁକୁମ୍ ଚିଚ୍‌କାଦାନ୍, ଆଦିନ୍ ମାନାଗେ ଶିଖାବା: ଆରୁ ଏରା, ଏନ୍ ଦୁନିଆଁଘି ଆଖ୍‌ରୀତକ୍ ଜାମାବାକେନ୍ ନିହ୍ମାଗାନେ ଆତ୍‌ଲ୍‌ଦାନ୍।”