ଲୁକାସ୍କି ଲେଖ୍ଚ୍କା ସୁସାମାଚାର୍
ବହିଘି ପରିଚୟ
ଲୁକାସ୍କି ଲେଖ୍ଚ୍କା ସୁସାମାଚାର୍ ଯୀଶୁସିନ୍ ଇସ୍ରାଏଲ୍ ଜାମାର୍ଘି କାତ୍ଥା ଚିଚ୍କା ବାଛାବୁ ଆଲାସ୍ ଆରୁ ଯେତ୍କ ମୁନୁଷ୍ ଜାତିରିନ୍ ବାଛାବୁ ଯୋଡ଼େ ରୂପ୍ନୁଇନ୍ ତେଙ୍ଗାକେର୍କିଚି। ଲୁକାସ୍ ଲେଖାଲ୍ଦାସ୍ କା ଯୀଶୁସିନ୍ “ଗରୀବ୍ ଆଲାର୍ଗେ ସୁସାମାଚାର୍ ଶୁଣାବାଗେ” ପ୍ରାଭୁସ୍କି ଆତ୍ମାଦ୍ ମେହଁକିଚା। ହୁଦ୍ଘିଲାଗାନ୍ ଇ ସୁସାମାଚାର୍ଦ୍ ଭିନେ-ଭିନେ ପ୍ରକାର୍ଘି ସମସ୍ୟାନୁ ଖାତ୍ର୍କା ଆଲାର୍ଘି ଚିନ୍ତାତି ନିନ୍ଦିଆ କେର୍କିଚି। ଲୁକାସ୍କି ଲେଖ୍ଚ୍କା ସୁସାମାଚାର୍ନୁ ଖୁସୀ ଭାବ୍ଘି ହି ମୁଖ୍ୟା ରାଇ, ବିଶେଷ୍କିରି ସୁରୁନ୍ତା ଅଧ୍ୟାୟନୁ, ଏକାନୁ କା ଯୀଶୁସ୍କି ବାର୍ନାଘି ତେଙ୍ଗାକେର୍କିଚି, ଆରୁ ଆଖ୍ରୀନୁ ହି ଏକାସାନ୍ ଯୀଶୁସ୍କି ସରଗ୍ ତାରା କାନାଘି ବର୍ଣ୍ଣନା କାମା କେର୍କିଚି। ଯୀଶୁସ୍କି ସରଗ୍ ତାରା କାନାଘି ପାଛ୍ଲି ଖ୍ରୀସ୍ତ୍ ବିଶ୍ଵାସୀର୍ ଘି ଉନ୍ନତି ଜାମାତାରା ଫାଏଲା ରାନାଘି ବାରେନୁ ଇ ଲେଖକସ୍କି ଦ୍ୱାର୍ନୁ “ପ୍ରେରିତ୍ ଜାମାର୍ଘି ନାଲ୍ଖୁ” ନାମେଘି ବହିନୁ ଚିଆ କେର୍କିଚି।
ଦୁସ୍ରା ଆରୁ ଛାଟ୍ୱାଁ ଭାଗ୍ନୁ (କିୟାଁ ଚିଚ୍କା ରୂପ୍-ରେଖାନ୍ ଏରା) ତେଙ୍କା ଢେର୍ କାତ୍ଥା ଖାଲି ଇ ସୁସାମାଚାର୍ନୁ ନିନ୍ ହାଖ୍ଖରିଦ୍। ନମୁନାଘି ମତ୍ଲବ୍, ଯୀଶୁସ୍କି ଜନମ୍ନୁ ସରଗ୍ ଦୂଁତ୍ଜାମାର୍ଘି ଗୀତୁ, ଚାର୍ୱାହ୍ର୍ଘି ଯୀଶୁସିନ୍ ଏରା କାନା, ଯେରୁଶାଲେମ୍ଘି ମନ୍ଦିର୍ନୁ ବଲୋ ଯୀଶୁସ୍, ଆରୁ ଦାୟାଲୁ ସାମାରୀ ଆରୁ ଏଫ୍ସ୍ର୍କା କେର୍କା ହାଦ୍ଦୁସ୍କି ନମୁନା ଗୁଠିଦ୍। ପୁରା ସୁସାମାଚାର୍ନୁ ବିନ୍ତି, ପାବିତାର୍ ଆତ୍ମା, ଯୀଶୁସ୍କି ଆଲାର୍ଘି ସେବାନୁ ମାଏକିନିଆଁର୍ଘି ଭୂମିକା, ଆରୁ ପାର୍ମେଶ୍ଵାର୍ସ୍କି ଦ୍ୱାର୍ନୁ ପାପ୍ ଛେମାଘି ଢେର୍ବାଗ୍ଗେ ଶକ୍ତି ଚିଆ କେର୍କିଚି।
ରୂପ୍-ରେଖା
ପରିଚୟ ୧:୧-୪
ଆସ୍ନାନ୍ ଚିଉ ଯୋହାନ୍ସ୍ ଆରୁ ଯୀଶୁସ୍କି ଜନମ୍ ଆରୁ ହାଦ୍ଦୁ ବାକେନ୍ତା କାତ୍ଥା ୧:୫; ୨:୫୨
ଆସ୍ନାନ୍ ଚିଉ ଯୋହାନ୍ସ୍କି ଆଲାରିନ୍ ସେବା କାମ୍ନା ୩:୧-୨୦
ଯୀଶୁସ୍କି ଆସ୍ନାନ୍ ଆରୁ ପରୀକ୍ଷା ୩:୨୧—୪:୧୩
ଗାଲିଲୀନୁ ଯୀଶୁସ୍କି ଆଲାରିନ୍ ସେବା କାମ୍ନା ୪:୧୪—୯:୫୦
ଗାଲିଲୀନ୍ତି ଯେରୁଶାଲେମ୍ତକ୍ କାନା ୯:୫୧—୧୯:୨୭
ଯେରୁଶାଲେମ୍ନୁ ଆଖ୍ରୀ ହାପ୍ତା ୧୯:୨୮—୨୩:୫୬
ପ୍ରାଭୁସ୍କି କେଚ୍ଚକା ପାଛ୍ଲି ଉଜ୍ଜନା, ଏଥ୍ର୍ନା, ଆରୁ ସରଗ୍ ତାରା କାନା ୨୪:୧-୫୩
1ପରିଚୟ
1ହେ ମାହାରାଜା, ଥୀୟଫିଲ୍, ଯୋହାର୍। 2କିଛି ଘାଟ୍ଣା ନାହ୍ମା ମାଝାନୁ ମାନ୍ଚା, ଇ ଘାଟ୍ଣାନ୍ ଏରୁ ଆଲାର୍ ଆରୁ ବଚନ୍ଘି ସେବକ୍ଜାମାର୍ ଆ ଘାଟ୍ଣାବନ୍ ଏମାନ୍ ତେଙ୍କାନାଏ, ଆ କାତ୍ଥାବନ୍ ଇତିହାସ୍ ଲେଖାଗେ ଢେର୍ ଆଲାର୍ କୋଶିଷ୍ କାମ୍ଚ୍କାନାଏ। 3ଏଙ୍ଗାଗେ ଇଦ୍ ଠିକ୍ ଲାଗ୍ଗିୟାଦ୍ କା ଜାମାହାଲ୍ ସାମାଚାର୍ ଠିକ୍ ସୁରୁନ୍ତି ଧ୍ୟାନ୍ସେ ଯାଞ୍ଚ୍ କାମିକିରି, କ୍ରମ ଅନୁସାର୍ ନିଙ୍ଗାଗେ ଲେଖନ୍। 4ଏନ୍ଦେର୍ଗେକା ନିମ୍ ଇବନ୍ ଆହର୍ କା ନେଖା ଶିକ୍ଷା ନିମ୍ ହାକ୍କାଦାର୍, ଆଦ୍ ଏକ୍ଲାହି ଡାଗ୍ମାଗ୍ର୍ନାବାଲା ମାଲ୍ଲିଦ୍।
ଆସ୍ନାନ୍ ଚିଉ ଯୋହାନ୍ସ୍କି ଜନମ୍ଘି ଖବର୍
5ୟାହୁଦା ଦେଶ୍ତା ହେରୋଦ୍ ରାଜାସ୍କି ସାମାୟନୁ ଆବିୟାସ୍ ପୁରୋହିତ୍ ଦଲ୍ତା ଜାକ୍ରିୟାସ୍ ନାମେଘି ଅଣ୍ଟା ପୁରୋହିତ୍ ରାଚାସ୍, ଜାକ୍ରିୟାସ୍କି ଆଲିଘି ନାମେ ଏଲିଜାବେତ୍ ରାଚା ଆରୁ ଆଦ୍ ହାରୁନ୍ ବାଁଉଶାନ୍ତା ରାଚା। 6ଆବ୍ଡ଼ାର୍ ଦୁହି ଲୋକ୍ ପାର୍ମେଶ୍ଵାର୍ସ୍କି ନଜର୍ନୁ ଧାର୍ମିକ୍ ରାଚାର୍, ଆବ୍ଡ଼ାର୍ ପ୍ରାଭୁ ପାର୍ମେଶ୍ଵାର୍ସ୍କି ହୁକୁମ୍ ଆରୁ ନିୟମ୍ବନ୍ ନିର୍ଦ୍ଦୋଷ୍ ଅନୁସାର୍ ଚାଲ୍ର୍ନାବାଲା ରାଚାର୍। 7ଆବ୍ଡ଼ାର୍ଘି ଅଣ୍ଟାହି ହାଦ୍ଦୁବଚ୍ଚ ମାଲ୍ଲାରୁର୍, ଏନ୍ଦେର୍ଗେକା ଏଲିଜାବେତ୍ ବାନ୍ଝୀ ରାଚା, ଆରୁ ଆବ୍ଡ଼ାର୍ ଦୁହି ଲୋକ୍ ପାଚ୍ଚ ପାଚ୍କି ମାନ୍ଚାର୍ କେର୍କାଚାର୍। 8ଜାକ୍ରିୟାସ୍ ତାହ୍ମା ଦଲ୍ତା ପାଡ଼ି ଅନୁସାର୍ ପାର୍ମେଶ୍ଵାର୍ସ୍କି ଆଘ୍ଲି ପୁରୋହିତ୍ ନାଲ୍ଖୁ କାମାଲିୟାସ୍, 9ପୁରୋହିତ୍ ଜାମାର୍ଘି ନିୟମ୍ ଅନୁସାର୍ ତାଙ୍ଘା ନାମେନୁ ଚିଠା ଉର୍ଖା କା ଆସ୍ ପ୍ରାଭୁସ୍କି ମନ୍ଦିର୍ନୁ କରସ୍ ଆରୁ ଧୁମ୍ମାଲୀ ବାସ୍ସସ୍। 10ଆରୁ ଧୁମ୍ମାଲୀ ବାସ୍ନାଗେ ବାହ୍ରି ଜାମା ଆଲାର୍ ଠୁଡ଼ିୟା ରାଇକିରି ବିନ୍ତି କାମାଲିୟାର୍। 11ହତ୍କବାକେନ୍ ପ୍ରାଭୁସ୍କି ଅଣ୍ଟା ଦୂଁତ୍ ଆସ୍କେ ଧୁମ୍ମାଲୀ ବାସ୍ନା ବେଦୀଘି ତିନାପାଖା ଇଲିକିରି ଦର୍ଶନ୍ ଚିଚ୍ଚାଦ୍। 12ସରଗ୍ ଦୂଁତ୍ବନ୍ ଏରିକିରି ଜାକ୍ରିୟାସ୍ ଏଲ୍ଚିୟାସ୍ ଆରୁ ଘାବ୍ରାରାଚାସ୍ କେରାସ୍। 13ଲେକିନ୍ ସରଗ୍ଦୂଁତ୍ ଆସିନ୍ ତେଙ୍ଗିୟା, “ଜାକ୍ରିୟାସ୍, ଆମା ଏଲ୍ଚା, ଏନ୍ଦେର୍ଗେକା ନିଙ୍ଘା ବିନ୍ତି ମେନା କେର୍କିଚି; ଆରୁ ନିଙ୍ଘା ଆଲି ଏଲିଜାବେତ୍ ନିହ୍ମା ଲାଗାନ୍ ଅଣ୍ଟା ହାଦ୍ଦୁସିନ୍ ଜନମ୍ ଚିଅଦ୍, ଆରୁ ନିନ୍ ଆ ହାଦ୍ଦୁସ୍କି ନାମେ ଯୋହାନ୍ ଚିକେ। 14ଆସ୍ ନିହ୍ମା ଖୁସୀ ଆରୁ ରୀଜ୍ଝୁଘି କାରଣ୍ ମାନସ୍: ଆରୁ ଆସ୍କି ଜନମ୍ ମାନ୍ଚ୍କାନ୍ତିନ୍ ଢେର୍ ଆଲାର୍ହି ଖୁସୀ ମାନାବର୍, 15ଆରୁ ଆସ୍ ପ୍ରାଭୁସ୍କି ନଜର୍ନୁ ମାହାନ୍ ମାନସ୍; ଆସ୍ ଅଙ୍ଗୁର୍ ରାସେ ଆରୁ ନାଶା ଏକ୍ଲାହି ବେଭାର୍ ମା କାମସ୍; ଆରୁ ଆସ୍ ତାଙ୍ଘା ଆୟାଙ୍ଗ୍ଘି ଗରଭ୍ନ୍ତିନିନ୍ ପାବିତାର୍ ଆତ୍ମାତି ଭାର୍ପୁର୍ ମାନସ୍କସ୍; 16ଆରୁ ଆସ୍ ଇସ୍ରାଏଲ୍ ଜାମାର୍ଘି ଭିତର୍ତି ଢେର୍ ଆଲାର୍ଘି ମନ୍ବନ୍ ତାହ୍ମା ପ୍ରାଭୁ ପାର୍ମେଶ୍ଵାର୍ସ୍ ତାରା କିର୍ତସ୍ ଅନ୍ଦ୍ରସ୍। 17ଆସ୍ ବାଙ୍ଗ୍ ଜାମାର୍ଘି ମନ୍ବନ୍ ହାଦ୍ଦୁର୍ଘି ପ୍ରତି ବାନେ ବେଭାର୍ କାମାଗେ; ଆରୁ ମନ୍ମର୍ଜୀ ଚାଲ୍ରୁରିନ୍ ଧାର୍ମିର୍ଘି ବାନେ ଗୁଣ୍ବନ୍ ଚିୟାଗେ; ଆରୁ ପ୍ରାଭୁସ୍କି ଲାଗାନ୍ ଅଣ୍ଟା ବାନେ ପର୍ଜା ତିୟାର୍ କାମାଗେ ଆସ୍ ଏଲିୟାସ୍କି ଆତ୍ମା ଆରୁ ଶକ୍ତିତି ଭାର୍ପୁର୍ ମାନିକିରି ପ୍ରାଭୁସ୍କି ସ୍ୱାଗାତ୍ କାମ୍ନାଘି ଲାଗାନ୍ ଆଲାରିନ୍ ତିୟାର୍ କାମାଗେ ପ୍ରାଭୁସ୍କି ଆଘ୍ଲି କସ୍।” 18ଆଙ୍ଗେନ୍ ଜାକ୍ରିୟାସ୍ ସରଗ୍ ଦୂଁତ୍ବନ୍ ତେଙ୍ଗିୟାସ୍, “ଇବନ୍ ଏନ୍ ଏସ୍କେ ଆହନ୍? ଏନ୍ଦେର୍ଗେକା ଏନ୍ ପାଚ୍କି ମାନ୍ଚ୍କାନ୍ କେର୍କାନିନ୍; ଆରୁ ଏଙ୍ଘା ଆଲିଦ୍ହି ପାଚ୍ଚ ମାନ୍ଚା କେରାଦିନ୍।” 19ସରଗ୍ ଦୂଁତ୍ସ୍ ତାଙ୍ଗାନ୍ ଯାବାବ୍ ଚିଚ୍ଚାସ୍, “ଏନ୍ ଗାବ୍ରିଏଲ୍, ଏନ୍ ପାର୍ମେଶ୍ଵାର୍ସ୍କି ଆଘ୍ଲି ଜାମାବାକେନ୍ ହାଜିର୍ ରାଦାନ୍; ଆରୁ ନିମାନ୍ ତେଙ୍ଗାଗେ ଆରୁ ଇ ସୁସାମାଚାର୍ ମେନ୍ତାଗେ ଏଙ୍ଗାନ୍ ତାଇୟା କେର୍କିଚି। 20ଏରା, ଯେତ୍କ ଉଲ୍ଲାତକ୍ ଇ କାତ୍ଥା ପୁରା ମା ମାନଦ୍ ଆତ୍କ ଉଲ୍ଲାତକ୍, ନିନ୍ କାଡ଼େ-କାଡ଼େ ରୟ ଆରୁ କାଚ୍ନେଖ୍ରା ପଲ୍ଲୟ, ଏନ୍ଦେର୍ଗେକା ଏକା ଜାମା କାତ୍ଥାଦ୍ ଠିକ୍ ସାମାୟନୁ ପୁରା ମାନଦ୍ ଆବ୍ଡ଼ା ଜାମାନ୍ ନିନ୍ ବିଶ୍ୱାସ୍ ମା କାମ୍ଚ୍କାଏ।” 21ଆରୁ ଆଲାର୍ ଜାକ୍ରିୟାସ୍ସିନ୍ ହୋଖାଲିୟାର୍ ଆରୁ ଆସ୍ ମନ୍ଦିର୍ନୁ ଏନ୍ଦେର୍ଗେ ଏତ୍କ ଡେରି କାମାଲ୍ଦାସ୍ ବୁଲି ସୋଚିକିରି ଆଚ୍ମିତ୍ ମାନାଲିୟାର୍। 22ଜାକ୍ରିୟାସ୍ ମନ୍ଦିର୍ତି ବାହ୍ରି ବାର୍ଚାସ୍, ହତ୍କବାକେନ୍ ଆସ୍ ଏନ୍ଦେର୍ହି ତେଙ୍ଗା ପଲ୍ଲିୟାସିନ୍: ଆଲାର୍ ଏନ୍ନେ ସୋଚାଲିୟାର୍ କା ମନ୍ଦିର୍ନୁ ଇସ୍କେ ଏନ୍ଦ୍ରିନ୍ ଦର୍ଶନ୍ ହାଖ୍ଖର୍କିରୋ; ଏନ୍ଦେର୍ଗେକା ଆସ୍ ହେଖ୍ଖାତି ଠାରିଆଲିୟାସ୍, ଆରୁ ଆସ୍ କନ୍ଦା ରାଚାସ୍କେରାସ୍। 23ଆସ୍କି ମନ୍ଦିର୍ନୁ ସେବା କାମ୍ନା ନାଲ୍ଖୁ ଉଲ୍ଲାଦ୍ ପୁରା ମାନ୍ଚ୍କାନ୍ତି, ଆସ୍ ତାଙ୍ଘା ଆଡ଼୍ପା କେରାସ୍। 24ୟୋଁ ଉଲ୍ଘି ପାଛ୍ଲି ତାଙ୍ଘା ଆଲି ଏଲିଜାବେତ୍ ମେଦୁନୁ ରାଚା; ଆରୁ ଆଦ୍ ପାଞ୍ଚ୍ ମାସ୍ତକ୍ ଆଡ଼୍ପାନୁନ୍ ରାଚା ଆରୁ ବାହ୍ରି ମାଲ୍ଲା ଉର୍ଖୁ ଆରୁ ତାଙ୍ଘା ମନ୍ନୁ ଏନ୍ନେ ସୋଚାଲିୟାଦ୍, 25“ଆଲାର୍ଘି ମାଝାନୁ ଏଙ୍ଗାନ୍ ଅପ୍ମାନ୍ତି ବାଛାବାଗେ, ପ୍ରାଭୁସ୍ ଏଙ୍ଘା ମିଆଁ ଦାୟା କାମିକିରି ଏନ୍ନେ କାମ୍ଚ୍କାଦାସ୍।”
ଯୀଶୁସ୍କି ଜନମ୍ଘି ଖବର୍
26ଏଲିଜାବେତ୍ଘି ଛ ମାସ୍ ତା ମେଦୁନୁ ରାନାବାକେନ୍ ପାର୍ମେଶ୍ଵାର୍ସ୍ ସରଗ୍ଦୂଁତ୍ ଗାବ୍ରିଏଲ୍ସିନ୍, ଗାଲିଲୀ ରାଜୀନ୍ତା ନାଜ୍ରେତ୍ ନାମେଘି ସହର୍ଗେ, ଅଣ୍ଟା କୁଆଁରୀସାନ୍ ତାଇୟାସ୍, 27ଆ କୁଆଁରୀଘି ନାମେ ମାରିୟାମ୍ ରାଚା, ଆଦ୍ଘି ପିନ୍ଧେନ୍ ଯୋଷେଫ୍ ନାମେଘି ଅଣ୍ଟା ଆଲାସ୍ ଗାନେ ମାନ୍ଚ୍କିଚା; ଯୋଷେଫ୍ସ୍ ଦାଉଦ୍ସ୍କି ବାଉଁଶାନ୍ତା ରାଚାସ୍। 28ସରଗ୍ଦୂଁତ୍ ତାଙ୍ଘା ଚାହାଗେ ବାର୍ଚାସ୍ ଆରୁ ତେଙ୍ଗିୟାସ୍, “ଯୋହାର୍ ମାରିୟାମ୍, କ୍ରିପାତି ଭାର୍ପୁର୍ ନିଙ୍ଘା ମିଆଁ ପ୍ରାଭୁସ୍ ବହୁତ୍ କ୍ରିପା କାମ୍ଚ୍କାଦାସ୍! ପ୍ରାଭୁସ୍ ନିଙ୍ଘାଗାନେ ରାଦାସ୍!” 29ଲେକିନ୍ ସରଗ୍ ଦୂଁତ୍ସ୍କି କାତ୍ଥା ମେନିକିରି ମାରିୟାମ୍ ମୁରୁକ୍ ଘାବ୍ରା ରାଚାକେରା, ଆରୁ ତାଙ୍ଘା ମନେମନ୍ ସୋଚ୍ଚା କା ଇ ଯୋହାର୍ଘି ଏନ୍ଦେର୍ ମତ୍ଲବ୍ ରଦ୍? 30ହୁଦ୍ଘିଲାଗାନ୍ ସରଗ୍ଦୂଁତ୍ ମାରିୟାମ୍ବନ୍ ତେଙ୍ଗିୟାସ୍, “ହେ ମାରିୟାମ୍, ଆମୁ ଏଲ୍ଚୁ, ଏନ୍ଦେର୍ଗେକା ନିଙ୍ଗାଗେ ପାର୍ମେଶ୍ଵାର୍ସ୍କି କ୍ରିପା ହାଖ୍ଖର୍କିଚି। 31ଆରୁ ଏରୁ, ନିନ୍ ମେଦୁନୁ ରୟ ଆରୁ ଅଣ୍ଟା କୁକ୍କ ହାଦ୍ଦୁସିନ୍ ଜନମ୍ ଚିଅୟ; ଆରୁ ନିନ୍ ଆସ୍କି ନାମେ ଯୀଶୁ ଚିକେ। 32ଆରୁ ଆସ୍ ଅଣ୍ଟା ମାହାନ୍ ଆଲ୍ ମାନସ୍ ଆରୁ ଆସ୍ ମାହାନ୍ ଧାର୍ମେ ବାଙ୍ଗ୍ସ୍କି ହାଦ୍ଦୁସ୍ ବୁଲି ଆହ୍ତାରୋସ୍; ପ୍ରାଭୁ ପାର୍ମେଶ୍ଵାର୍ସ୍ ଆସିନ୍ ଆସ୍କି ପୁର୍ଖା ବୁଆ ଦାଉଦ୍ସ୍କି ଲେଖା ରାଜା କାମଚସ୍, 33ଆସ୍ ୟାକୁବ୍ସ୍କି ବାଉଁଶାର୍ଘି ମିଆଁ ଯୁଗ୍ଯୁଗ୍ ରାଜୀ କାମସ୍; ଆରୁ ଆସ୍କି ରାଜୀଦ୍ ଏକ୍ଲାହି ମା ମୁଞ୍ଜର।” 34ଲେକିନ୍ ମାରିୟାମ୍ଦ୍ ସରଗ୍ ଦୂଁତ୍ସିନ୍ ତେଙ୍ଗିୟାଦ୍, “ଏନ୍ତା କୁଆଁରୀନ୍ ଇଦ୍ ଏସ୍କେ ମାନା ଅଙ୍ଗଦ୍?” 35ସରଗ୍ ଦୂଁତ୍ସ୍ ଆବନ୍ ଯାବାବ୍ ଚିଚ୍ଚାସ୍, “ପାବିତାର୍ ଆତ୍ମାଦ୍ ନିଙ୍ଘା ମିଆଁ ଏତ୍ତ, ଆରୁ ମାହାନ୍ ଧାର୍ମେ ବାଙ୍ଗ୍ସ୍କି ଶକ୍ତିଦ୍ ନିଙ୍ଗାନ୍ ଘେର ଉଇୟ; ହୁଦ୍ଘିଲାଗାନ୍ ଏକାସ୍ ନିଙ୍ଘାସ୍ତି ଜନମ୍ ମାନସ୍, ଆସ୍ ପାବିତାର୍ ରସ୍ ଆରୁ ଆସ୍ ପାର୍ମେଶ୍ଵାର୍ସ୍କି ହାଦ୍ଦୁସ୍ ବୁଲି ଆହାକସ୍। 36ଆରୁ ଏରୁ, ନିଙ୍ଘା ଜାତିବନ୍ଧୁ ଏଲିଜାବେତ୍ହି ପାଚ୍ଚବାକେନ୍ ଅଣ୍ଟା ହାଦ୍ଦୁସିନ୍ ଜନମ୍ ଚିନାବାଲା ରାଇ, ତାଙ୍ଗାନ୍ ଜାମାର୍ ବାନ୍ଝୀ ବୁଲି ତେଙ୍ଗାଲିୟାର୍, ଲେକିନ୍ ଆଦ୍ ଛ ମାସ୍ ତା ମେଦୁନୁ ରାଇଦ୍, 37ଏନ୍ଦେର୍ଗେକା ପାର୍ମେଶ୍ଵାର୍ସ୍କି ଲାଗାନ୍ ଏନ୍ଦେର୍ହି ଅସମ୍ଭବ୍ ମାଲ୍ଲିଦ୍।” 38ଆଙ୍ଗେନ୍ ମାରିୟାମ୍ ତେଙ୍ଗିୟାଦ୍, “ଏରା ଏନ୍ ପ୍ରାଭୁସ୍କି ଗୁତ୍ତିୟାନ୍। ନିମ୍ ଏସ୍କେ ତେଙ୍କାର୍ ଆନ୍ନେ ଏଙ୍ଗାଗେ ନିହ୍ମା ବଚନ୍ ଲେଖା ମାନ୍ନାଦ୍।” ଆରୁ ସରଗ୍ ଦୂଁତ୍ସ୍ ଆଦ୍ଘି ଚାହାନ୍ତି ବୁଙ୍ଗିୟାସ୍ କେରାସ୍।
ମାରିୟାମ୍ ଏଲିଜାବେତ୍ଗାନେ ଭେଁଟ୍ ମାନାଲିଦ୍
39ଆଖାନେନ୍ ମାରିୟାମ୍ ପାର୍ତ୍ତା ଆଡ୍ଡାନ୍ତା ୟାହୁଦା ପ୍ରଦେଶ୍ଘି ଅଣ୍ଟା ସହର୍ଗେ ଚାଁଣେନିନ୍ କେରା, 40ଆରୁ ଆଦ୍ ଜାକ୍ରିୟାସ୍କି ଆଡ଼୍ପା କରିକିରି ଏଲିଜାବେତ୍ବନ୍ ଯୋହାର୍ କାମ୍ଚା। 41ଏଲିଜାବେତ୍ ମାରିୟାମ୍ଘି ଯୋହାର୍ବନ୍ ମେନ୍ଚାଦ୍, ଆନ୍ନେନ୍ ତାଙ୍ଘା ଗରଭ୍ନୁ ରୁ ହାଦ୍ଦୁସ୍ ଉଛ୍ଲାରାଗେ ଲାଗ୍ଗିୟାସ୍, ଆରୁ ଏଲିଜାବେତ୍ ପାବିତାର୍ ଆତ୍ମାତି ଭାର୍ପୁର୍ ମାନ୍ଚାକେରା। 42ଆରୁ ଆଦ୍ ଜୋର୍ସେ ଚିର୍ରା ରାଇକିରି ତେଙ୍ଗିୟାଦ୍, “ଜାମା ମାଏକିନିଆଁର୍ସ୍ତି ପାର୍ମେଶ୍ଵାର୍ସ୍ ନିଙ୍ଘା ମିଆଁ କ୍ରିପା କାମ୍ଚ୍କାଦାସ୍, ଆରୁ ନିନ୍ ଏକା ହାଦ୍ଦୁସିନ୍ ଜନମ୍ ଚିଅୟ ଆ ହାଦ୍ଦୁସ୍କି ମିଆଁହି ପାର୍ମେଶ୍ଵାର୍ସ୍ କ୍ରିପା କାମସ୍! 43ଆରୁ ଏଙ୍ଘା ପ୍ରାଭୁସ୍କି ଆୟାଙ୍ଗ୍ ଯେ ଏଙ୍ଘାସାନ୍ ବାର୍ଚା ଇ ସଭାଗ୍ୟ ଏଙ୍ଗାଗେ ଏସ୍କେ ହାଖ୍ଖରା? 44ଏନ୍ଦେର୍ଗେକା ଏରୁ, ଏସ୍କେ ନିହ୍ମାଏ ଯୋହାର୍ ମେନ୍ଚାନ୍, ଆନ୍ନେନ୍ ହାଦ୍ଦୁସ୍ ଏଙ୍ଘା ଗରଭ୍ନୁ ଖୁସୀତି ଉଛ୍ଲାରାଗେ ଲାଗ୍ଗିୟାସ୍। 45ପ୍ରାଭୁସ୍କି ତାର୍ତି ଏକା କାତ୍ଥାନ୍ ତେଙ୍ଗାକେର୍କିଚି, ଆଦ୍ ପୁରା ମାନଦ୍ ଏନ୍ନେ ନେଦ୍ ବିଶ୍ୱାସ୍ କାମ୍ଚ୍କାନାଏ ଆବ୍ଡ଼ାର୍ ଧଏନ୍ ରାନାଏ!”
ମାରିୟାମ୍ ପ୍ରାଭୁସ୍କି ଗୁନ୍ଗାନ୍ କାମାଲିଦ୍
46ଆଙ୍ଗେନ୍ ମାରିୟାମ୍ ତେଙ୍ଗିୟାଦ୍, “ଏଙ୍ଘା ଜୀଆଦ୍ ପ୍ରାଭୁ ପାର୍ମେଶ୍ଵାର୍ସ୍କି ମାହିମା କାମାଲିଦ୍, 47ଆରୁ ଏଙ୍ଘାଏ ଆତ୍ମାଦ୍ ଏଙ୍ଘା ବାଛାବୁ ପାର୍ମେଶ୍ଵାର୍ସାନ୍ ଖୁସୀ ମାନାବାଲିଦ୍, 48ଏନ୍ଦେର୍ଗେକା ଆସ୍ ତାଙ୍ଘାଏ ଗରୀବ୍ ଗୁତ୍ତିୟାଘି ମିଆଁ କ୍ରିପା ଦୃଷ୍ଟି କାମ୍ଚ୍କାଦାସ୍; ଆରୁ ମେନା, ଆକ୍କୁନ୍ତି ଜାମା ପିଢ଼ିଦ୍ ଏଙ୍ଗାନ୍ ଧଏନ୍ ବୁଲି ତେଙ୍ଗଦ୍, 49ଏନ୍ଦେର୍ଗେକା ଜାମାର୍ଘିନ୍ତି ଶକ୍ତିଶାଲୀସ୍ ଏଙ୍ଘାଲାଗାନ୍ ମାହାନ୍ ନାଲ୍ଖୁ କାମ୍ଚ୍କାଦାସ୍। ଆସ୍କି ନାମେ ପାବିତାର୍ ମାନ୍ନାଦ୍, 50ଆରୁ ନେଦ୍ ଆସିନ୍ ଏଲ୍ଚ୍ନାଏ ଆର୍ଘି ମିଆଁ, ପଢ଼ିନ୍ତିପିଢ଼ି ଆସ୍କି ଦାୟା ରାଇଦ୍। 51ଆସ୍ ଅଦ୍ଭୁତ୍ ନାଲ୍ଖୁ କାମ୍ଚ୍କାଦାସ୍, ଆରୁ ନେଦ୍ ନିଜ୍କେନିଜ୍ ବାଡ଼୍କା ସୋଚ୍ନାଏ, ଆବ୍ଡ଼ାରିନ୍ ଛିଛିର୍ଛାନ୍ଦ୍ କାମ୍ଚେଇ ଚିଚ୍କାଦାସ୍। 52ଆସ୍ ଶକ୍ତିଶାଲୀରିନ୍ ରାଜ୍ପଦ୍ତି କିୟାଁ ହାଟାବାଚେଇଚାସ୍; ଆରୁ ନରମ୍ଭାବ୍ ଆଲାରିନ୍ ମାହାନ୍ କାମ୍ଚେଇ ଚିଚ୍କାଦାସ୍। 53ଆସ୍ କିଡ଼ା ଆଲାର୍ଗେ କୁଲୁଭର୍ ବାନେ-ବାନେ ଅନାମହାଗେ ଚିଚ୍ଚାସ୍, ଆରୁ ଧନୀ ଆଲାରିନ୍ ଖାଲି ହେଖ୍ଖା କିର୍ତେଇଚାସ୍। 54ଆସ୍ ନିଜର୍ ସେବକ୍ ଇସ୍ରାଏଲ୍ବନ୍ ସାମ୍ଭାଢ଼ାଚାସ୍ କା ନିଜର୍ ଆ ଦାୟାବନ୍ ମନେ କାମର୍। 55ତାଙ୍ଘା ଗୁତ୍ତିୟା ଇସ୍ରାଏଲ୍ ଜାମାରିନ୍ ଆସ୍ ଢେର୍ ସାମ୍ଭଢ଼ାଚ୍କାଦାସ୍, ଆରୁ ଆସ୍ ନାହ୍ମା ପୁର୍ଖାରିନ୍ କାତ୍ଥା ଚିଚ୍କାଦାସ୍, ଆଦ୍ଘି ଅନୁସାର୍ ଆବ୍ରାହାମ୍ ଆରୁ ଆସ୍କି ବାଉଁଶାର୍ଘି ମିଆଁ ଯୁଗ୍-ଯୁଗ୍ ଦାୟା କାମ୍ଚ୍କାଦାସ୍।” 56ଆରୁ ମାରିୟାମ୍ ଲାଗ୍ଭାଗ୍ ତିନ୍ ମାସ୍ ଏଲିଜାବେତ୍ଗାନେ ରାଇକିରି ତାଙ୍ଘା ଆଡ଼୍ପା କିର୍ୟା କେରା।
ଆସ୍ନାନ୍ ଚିଉ ଯୋହାନ୍ସ୍କି ଜନମ୍
57ଆନ୍ତିନ୍ ଏଲିଜାବେତ୍ଘି ହାଦ୍ମହଁର୍ନାଘି ସାମାୟ ଆଣ୍ସିୟା କେରା, ଆରୁ ଆଦ୍ ଅଣ୍ଟା କୁକ୍କ ହାଦ୍ଦୁସିନ୍ ଜନମ୍ ଚିଚ୍ଚାଦ୍। 58ଏଲିଜାବେତ୍ଘି ଆଡ଼୍ପା ଚାହା-ଚାହାନ୍ତା ଆରୁ ତାହ୍ମା ପାହିୟାର୍ ପ୍ରାଭୁସ୍କି ଏତ୍କ ବାଡ଼୍କା ଦାୟା ଏରିକିରି, ଖୁସୀ ମାନାବାଗେ ଲାଗ୍ଗିୟାର୍, 59ଆଠ୍ ଦିନ୍ନୁ ତାହ୍ମା ପାହିୟାର୍ ଆରୁ ପାଡ଼ୋଶୀର୍ ହାଦ୍ଦୁସ୍କି ଖାତ୍ନା1:59 ଖାତ୍ନା ମତଲବ୍ ଷଠି କାମାଗେ ବାର୍ଚାର୍, ଆବ୍ଡ଼ାର୍ ଆ ହାଦ୍ଦୁସ୍କି ନାମେ ତାମ୍ଵାସ୍କି ନାମେଲେଖା ଜାକ୍ରିୟାସ୍ ଚିଆ ବେଦ୍ଦାଲିୟାର୍। 60ଲେକିନ୍ ତାଙ୍ଗ୍ୟ ତେଙ୍ଗିୟାଦ୍, “ମାଲ୍ଲା; ଇସ୍କି ନାମେ ଯୋହାନ୍ ଉଇୟାକଦ୍।” 61ଆବ୍ଡ଼ାର୍ ଆବନ୍ ତେଙ୍ଗିୟାର୍, “ନିହ୍ମା ଜାତିକୁଟୁମ୍ଵ ଭିତର୍ନୁ ନେଖାହି ଏନ୍ନେ ନାମେ ମାଲ୍ଲାଦିନ୍!” 62ଆନ୍ତିନ୍ ଆବ୍ଡ଼ାର୍ ହାଦ୍ଦୁସ୍କି ତାମ୍ଵାସିନ୍ ଠାର୍ଇକିରି ମେନ୍ଚାର୍ କା ଆସ୍ ତାଙ୍ଗ୍ଦାସ୍କି ନାମେ ଏନ୍ଦେର୍ ଉଇୟାଗେ ବେଦ୍ଦାଲ୍ଦାସ୍? 63ଆଙ୍ଗେନ୍ ଆସ୍ ଅଣ୍ଟା ଲେଖ୍ନାବାଲା ପାଟା ନିକିରି ଇସ୍କି ନାମେ ଯୋହାନ୍ବୁଲି ଲେଖ୍ଚାସ୍, ଆଙ୍ଗେନ୍ ଜାମା ଆଲାର୍ ଆଚ୍ମିତ୍ ମାନ୍ଚାର୍ କେରାର୍। 64ଆରୁ ଆଖାନେନିନ୍ ଆସ୍କି ବାଇ ଫୁଟ୍କାରା କେରା; ଆରୁ ଆସ୍ କାଚ୍ନେଖ୍ରିକିରି ପାର୍ମେଶ୍ଵାର୍ସ୍କି ସ୍ତୁତି କାମାଗେ ଲାଗ୍ଗିୟାସ୍। 65ଆଙ୍ଗେନ୍ ଆବ୍ଡ଼ାର୍ଘି ଚାହା ଚାହାନ୍ତାର୍ ଏଲ୍ଚିୟାର୍ କେରାର୍; ଆରୁ ଇବ୍ଡ଼ା ଜାମା କାତ୍ଥାଦ୍ ୟାହୁଦା ପ୍ରଦେଶ୍ଘି ପାର୍ତ୍ତା ଆଡ୍ଡାନ୍ତା ଜାମା ପାଡ଼ାନୁ ହାଲ୍ଲା ମାନ୍ଚାକେରା, 66ଆରୁ ଜାମା ମେନୁ ଆଲାର୍ ତାହ୍ମା ଜୀଆ ଜୀଆନୁ ସୋଚ୍ଚାର୍, “ପାତା ମାଲ୍ଲା ଇ ହାଦ୍ଦୁସ୍ ଏସ୍କେ ମାନସ୍?” ଏନ୍ଦେର୍ଗେକା ହାଦ୍ଦୁସ୍କି ମିଆଁ ପ୍ରାଭୁସ୍କି ଶକ୍ତି ରାଚା।
ଜାକ୍ରିୟାସ୍ ପାର୍ମେଶ୍ଵାର୍ସ୍କି ଗୁନ୍ଗାନ୍ କାମାଲ୍ଦାସ୍
67ଆରୁ ହାଦ୍ଦୁସ୍କି ତାମ୍ବାସ୍ ଜାକ୍ରିୟାସ୍ ପାବିତାର୍ ଆତ୍ମାତି ଭାର୍ପୁର୍ ମାନିକିରି, ଏନ୍ନେ ତେଙ୍ଗିକିରି ଭବିଷତ୍ କାତ୍ଥା ତେଙ୍ଗିୟାସ୍: 68“ଧଏନ୍ ରାଦାସ୍ ପ୍ରାଭୁସ୍ ଇସ୍ରାଏଲ୍ ଜାମାର୍ଘି ପାର୍ମେଶ୍ଵାର୍ସ୍, ଏନ୍ଦେର୍ଗେକା ଆସ୍ ତାଙ୍ଘା ଆଲାରିନ୍ ଦାୟା କାମିକିରି ବାଛାବାଚ୍କାଦାସ୍, 69ଆସ୍ ତାଙ୍ଘା ଗୁତ୍ତିୟା ଦାଉଦ୍ସ୍କି ବାଉଁଶାନୁ ନାହ୍ମାଲାଗାନ୍ ଶକ୍ତିଶାଲୀ ମୁକ୍ତିଦାତାସିନ୍ ତାଏକାଦାସ୍, 70ଆସ୍ ପାବିତାର୍ ନାବୀଜାମାର୍ଘି ଥୁମ୍ଣାନ୍ତି ଆଘ୍ଲି ଯୁଗ୍ନ୍ତିନ୍ ଏସ୍କେ ତେଙ୍କାଚାସ୍, 71ହନ୍ନେନିନ୍ ଆସ୍ ନାହ୍ମା ବିରୋଧି ଜାମାର୍ସ୍ତି, ଆରୁ ନାହ୍ମା ଜାମା ହାଁଣୁ ତୁପ୍ଫୁର୍ସ୍ତି ନାମାନ୍ ଛାଡ଼ାବାଚ୍କାଦାସ୍, 72ଆରୁ ତାଙ୍ଘା ପାବିତାର୍ ନିୟମ୍ବନ୍ ମନେ କାମିକିରି ନାହ୍ମା ପୁର୍ଖା ଜାମାର୍ଘି ମିଆଁ ଦାୟା କାମ୍ଚ୍କାଦାସ୍, 73-75ନାହ୍ମାଏ ପୁର୍ଖା ବୁଆ ଆବ୍ରାହାମ୍ସିନ୍ ଆସ୍ ଏକା କାତ୍ଥା ଚିଚ୍କାଦାସ୍, ଆଦ୍ଘି ଅନୁସାର୍ ଆସ୍ ନାମାନ୍ ନାହ୍ମା ବିରୋଧିଜାମାର୍ଘି ହେଖ୍ଖାନ୍ତି ବାଛାବାଚ୍କାଦାସ୍, ଏସ୍କେ କା ନାମ୍ ଆସିନ୍ ମା ଏଲ୍ଚିକିରି ପାବିତାର୍ ଆରୁ ଧାର୍ମିକ୍ତାତି ନାହ୍ମା ଜୀବନ୍ଭର୍ ଆସ୍କି ସେବା କାମା ଅଙ୍ଗତ୍। 76ଆରୁ ହେ ହାଦ୍ଦୁ ନିନ୍, ମାହାନ୍ ଧାର୍ମେ ବାଙ୍ଗ୍ସ୍କି ନାବୀବୁଲି ଆହା କୟ, ଏନ୍ଦେର୍ଗେକା ପ୍ରାଭୁସ୍କି ପାବୁ ତିୟାର୍ କାମାଗେ ନିନ୍ ତାଙ୍ଘା ଆଘ୍ଲି-ଆଘ୍ଲି କୟ, 77ଏନ୍ଦେର୍ଗେକା ତାହ୍ମା ଆଲାରିନ୍ ତେଙ୍ଗୟ, ଏସ୍କେ ପାର୍ମେଶ୍ଵାର୍ସ୍ ଆବ୍ଡ଼ାରିନ୍ ପାପ୍ତି ଛେମା କାମସ୍ ଆରୁ ଆବ୍ଡ଼ାର୍ ବାଛ୍ରର୍। 78ଇଦ୍ ନାହ୍ମାଏ ପାର୍ମେଶ୍ୱାର୍ସ୍କି ଆ ବାଡ଼୍କା କ୍ରିପାତି ମାନଦ୍; ଏକାଘି କାରଣ୍ ମିଁତି ନାହ୍ମା ମିଆଁ ପାଇରିନ୍ତା ବିଲ୍ଲୀ ଏଥ୍ରଦ୍, 79ନାହ୍ମା ପାର୍ମେଶ୍ଵାର୍ସ୍ ବହୁତ୍ ଦାୟାଲୁସ୍; ହୁଦ୍ଘିଲାଗାନ୍ ନାହ୍ମା ବାଛାବୁ ଆଲାସିନ୍ ତାଇୟସ୍, ଆସ୍କି ବାର୍ନାଦ୍ ମିଁତି ବିଡ଼ିଦ୍ ଏସ୍କେ ବିଲ୍ଲୀ ଚିଇଦ୍ ଆଦ୍ଘି ଲେଖା ମାନଦ୍। ଆ ବିଲ୍ଲୀଦ୍ ଉହାନୁ ଆରୁ ମରନ୍ଘି ଏଲ୍ଚ୍କାତି ରୁ ଆଲାର୍ଗେ ବିଲ୍ଲୀ ଚିଅଦ୍। ଆରୁ ଶାନ୍ତିଘି ପାବୁନୁ କାଲାଗେ ନାମାଗେ ପାବୁ ଏଦସ୍।” 80ଆ ହାଦ୍ଦୁସ୍ ପାର୍ଦ୍ନାତେ କେରାସ୍ ଆରୁ ଆତ୍ମିକ୍ ଶକ୍ତିଶାଲୀ ମାନ୍ତେ କେରାସ୍, ଆରୁ ଇସ୍ରାଏଲ୍ ଆଲାର୍ଘି ଆଘ୍ଲି ମା ଏଥ୍ର୍ନା ଜୁଟି ଜଙ୍ଗଲ୍ନୁ ରାଚାସ୍।
2ଯୀଶୁସ୍କି ଜନମ୍ଘି ଖବର୍
1ହୁ ସାମାୟନୁ କାଇସର୍ ଆଗାସ୍ତୁସ୍ ରାଜାସ୍ ପୁରା ରୋମ୍ ଦେଶ୍ତା ଜାମା ଆଲାର୍ଘି ଘର୍ସମାରୀ କାମାଗେ ନିୟମ୍ ଅଥ୍ରାସ୍। 2ଯେତ୍କବାକେନ୍ କ୍ଵିରିନୀୟସ୍ ସିରିଆ ଦେଶ୍ତା ରାଜ୍ପାଲ୍ ରାଚାସ୍, ହୁ ସାମାୟନୁ ଇଦ୍ ପହିଲ୍ ଘର୍ସମାରୀ ରାଚା। 3ହୁଦ୍ଘିଲାଗାନ୍ ଜାମା ଆଲାର୍ ନାମେ ଲେଖ୍ତାଗେ ନିଜର୍-ନିଜର୍ ସହର୍ଗେ କାଲିୟାର୍। 4ଯୋଷେଫ୍ସ୍ ଦାଉଦ୍ସ୍କି ବାଉଁଶାନ୍ତା ରାଚାସ୍, ହୁଦ୍ଘିଲାଗାନ୍ ଆସ୍ ଗାଲିଲୀ ଜିଲ୍ଲାଘି ନାଜ୍ରେତ୍ ସହର୍ସ୍ତି, ୟାହୁଦା ପ୍ରଦେଶ୍ନ୍ତା ଦାଉଦ୍ସ୍କି ସହର୍ ବେତ୍ଲେହେମ୍ଗେ କେରାସ୍, 5ତାଙ୍ଘାଗାନେ ମାରିୟାମ୍ଘି ପିନ୍ଧେନ୍ ମାନ୍ଚ୍କିଚା ଆରୁ ଆଦ୍ ମେଦୁନୁ ରାଚା ଆରୁ ଆବ୍ଡ଼ାର୍ ନାମେ ଲେଖ୍ତାଗେ କେରାର୍। 6ଆବ୍ଡ଼ାର୍ ଆସାନିନ୍ ରାଚାରିନ୍ କା ମାରିୟାମ୍ଘି ହାଦ୍ମହଁର୍ନାଘି ସାମାୟ ଆଣ୍ସିଆକେରା, 7ଆରୁ ଆଦ୍ ତାଙ୍ଘା ପହିଲ୍ ହାଦ୍ଦୁସିନ୍ ଜନମ୍ ଚିଚ୍ଚାଦ୍ ଆରୁ ହାଦ୍ଦୁସିନ୍ ଚିଢ଼ାତି ଗୁଢ଼େଇଚା ଆରୁ ଡଙ୍ଗାନୁ୨:୭ ଡଙ୍ଗା ମତ୍ଲବ୍ ଅୟୁଗେ ଆମ୍ମୁ ଚିନା ଆଡ୍ଡା କିଦେଇଚା; ଏନ୍ଦେର୍ଗେକା ଆବ୍ଡ଼ାର୍ଗେ ଭାଡ଼ା ଆଡ଼୍ପାନୁ ଆଡ୍ଡା ମାଲ୍ଲାରୁଦ୍।
କେତ୍କ ଲୋକ୍ ଭେଡ଼ି ହାପୁର୍ଗେ ସରଗ୍ଦୂଁତ୍ ଖୁସୀଘି ଖବର୍ ଶୁଣାବାଲିଦ୍
8ବେତ୍ଲେହେମ୍ ସହର୍ତା ଚାହାଚାହାନ୍ତା ଆଡ୍ଡାଗୁଠିନୁ କେତ୍କ ଲୋକ୍ ଭେଡ଼ି ହାପୁର୍ ଗଡ୍ଡାନୁ ରାଲିୟାର୍, ଆବ୍ଡ଼ାର୍ ମାଁହାବାକେନ୍ ତାହ୍ମା ଭେଡ଼ିଗୁଠିନ୍ ଜାଗାଲିୟାର୍।9ପ୍ରାଭୁସ୍କି ଅଣ୍ଟା ଦୂଁତ୍ ଆବ୍ଡ଼ାର୍ଘି ଚାହାଗେ ବାର୍ଚା, ଆରୁ ପ୍ରାଭୁସ୍କି ମାହିମା ଆବ୍ଡ଼ାର୍ଘି ଚାରିହ୍ ପାଖା ବିଲ୍ଲୀ ମାନ୍ଚାକେରା, ହୁଦ୍ଘିଲାଗାନ୍ ଆବ୍ଡ଼ାର୍ ମୁରୁକ୍ ଏଲ୍ଚିୟାର୍ କେରାର୍। 10ଆଙ୍ଗେନ୍ ସରଗ୍ଦୂଁତ୍ ଆବ୍ଡ଼ାରିନ୍ ତେଙ୍ଗିୟା, “ଆମା ଏଲ୍ଚା; ଏରା, ଏନ୍ ଜାମା ଆଲାର୍ଘି ଲାଗାନ୍ ମୁରୁକ୍ ଖୁସୀଘି ସୁସାମାଚାର୍ ନିମାନ୍ ଶୁଣାବାଲେନ୍, 11ଏନ୍ଦେର୍ଗେକା ଇନ୍ନା ଦାଉଦ୍ସ୍କି ସହର୍ ବେତ୍ଲେହେମ୍ନୁ ନିହ୍ମା ଲାଗାନ୍ ମୁକ୍ତିଦାତା, ଖ୍ରୀସ୍ତ୍ ପ୍ରାଭୁସ୍କି ଜନମ୍ ମାନ୍ଚ୍କିଚି। 12ଆରୁ ନିହ୍ମା ଲାଗାନ୍ ଏନ୍ନେ ଚିହ୍ନା ମାନକା ନିମ୍ ଅଣ୍ଟା ହାଦ୍ଦୁସିନ୍ ଚିଢ଼ାନୁ ଗୁଢ଼ିୟାଚ୍କା ଆରୁ ଡଙ୍ଗାନୁ କିଦ୍କା ଏରର୍।” 13ଆରୁ ହୁଖାନେନିନ୍ ଆ ସରଗ୍ ଦୂଁତ୍ଗାନେ ଅନ୍ଗୁଟ୍ଠି ସରଗ୍ଦୂଁତ୍ଜାମାର୍ ଏଥ୍ରାର୍, ଆବ୍ଡ଼ାର୍ ପାର୍ମେଶ୍ଵାର୍ସ୍କି ସ୍ତୁତି କାମ୍ତେ ଏନ୍ନେ ତେଙ୍ଗିୟାର୍, 14“ସରଗ୍ନୁ ପାର୍ମେଶ୍ୱାର୍ସ୍କି ମାହିମା ମାନ୍ନାଦ୍ ଆରୁ ଦୁନିଆଁନୁ ଏକା ଆଲାର୍ଘି ମିଆଁ ପାର୍ମେଶ୍ଵାର୍ସ୍ ଖୁସ୍ ରାଦାସ୍, ଆବ୍ଡ଼ାର୍ଗେ ଶାନ୍ତି ମାନ୍ନାଦ୍।”
ଭେଡ଼ି ହାପୁର୍ ପ୍ରାଭୁସିନ୍ ଭେଁଟ୍ କାମାଲ୍ନାଏ
15ଯେତ୍କବାକେନ୍ ସରଗ୍ଦୂଁତ୍ଜାମାର୍ ଭେଡ଼ି ହାପୁର୍ସ୍ତି ବିଦା ମାନ୍ଚାର୍ ଆରୁ ସରଗ୍ଗେ କିର୍ୟାର୍ କେରାର୍, ଆଙ୍ଗେନ୍ ଭେଡ଼ି ହାପୁର୍ ତାମ୍-ତାମ୍ କାଚ୍ନେଖ୍ରାଗେ ଲାଗ୍ଗିୟାର୍, “ଗୁଚା, ନାମ୍ ବେତ୍ଲେହେମ୍ ଜୁଟି କତ୍ ଆରୁ ଆ ଘାଟ୍ଣାବନ୍ ଏରତ୍, ଏକାନ୍ କା ପ୍ରାଭୁସ୍ ନାମାନ୍ ତେଙ୍କାଦାସ୍।” 16ଆବ୍ଡ଼ାର୍ ଚାଁଣେ-ଚାଁଣେ କେରାର୍ ଆରୁ ମାରିୟାମ୍, ଯୋଷେଫ୍ ଆରୁ ଡଙ୍ଗାନୁ ହାଦ୍ଦୁସିନ୍ କିଦ୍କା ଏରିୟାର୍। 17ଆସିନ୍ ଏର୍କା ପାଛ୍ଲି ଆବ୍ଡ଼ାର୍ ଆ ହାଦ୍ଦୁସ୍କି ବାରେନୁ ତାମାନ୍ ଏକା କାତ୍ଥାନ୍ ତେଙ୍ଗାକେର୍କିଚା, ଆବନ୍ ତେଙ୍ଗିୟାର୍, 18ଭେଡ଼ି ହାପୁର୍ଘି ଇ ଜାମା କାତ୍ଥା ମେନିକିରି ଜାମା ମେନୁ ଆଲାର୍ ଆଚ୍ମିତ୍ ମାନାକାଲିୟାର୍। 19ଲେକିନ୍ ମାରିୟାମ୍ଦ୍ ଇବ୍ଡ଼ା ଜାମା କାତ୍ଥାଗୁଠିନ୍ ତାଙ୍ଘା ମନ୍ନୁ ଉଇୟା ଆରୁ ଇଦ୍ଘି ବାରେନୁ ସୋଚାଲିୟାଦ୍। 20ଆରୁ ଭେଡ଼ି ହାପୁରିନ୍ ଏସ୍କେ ତେଙ୍ଗାକେର୍କିଚା, ଆନ୍ନେନ୍ ଆବ୍ଡ଼ାର୍ ଏକା ଏକାନ୍ ଏରିୟାର୍ ଆରୁ ମେନ୍ଚାର୍ ଆବ୍ଡ଼ା ଜାମାଘି ଲାଗାନ୍ ଆବ୍ଡ଼ାର୍ ପାର୍ମେଶ୍ଵାର୍ସ୍କି ମାହିମା ଆରୁ ସ୍ତୁତି କାମ୍ତେ କିର୍ୟାର୍।
21ଆଠ୍ ଦିନ୍ନୁ ହାଦ୍ଦୁସ୍କି ଷଠି ଚିନାଘି ସାମାୟ ମାନ୍ଚା, ଆରୁ ଆବ୍ଡ଼ାର୍ ହାଦ୍ଦୁସ୍କି ନାମେ ଯୀଶୁ ଚିଚ୍ଚାର୍, ଗରଭ୍ନୁ ରାନାଘି ଆଘ୍ଲିନ୍ତିନ୍ ସରଗ୍ଦୂଁତ୍ ୨:୨୧ ପାର୍ମେଶ୍ୱାର୍ସ୍କି ତାର୍ତି ତାଏକା ଦୂଁତ୍ହାଦ୍ଦୁସ୍କି ଯୀଶୁ ନାମେ ଚିଚ୍କିଚା।
ଯୀଶୁସିନ୍ ମନ୍ଦିର୍ନୁ ସୋଁପା ଚିୟାଲ୍ନାଏ
22ଯେତ୍କବାକେନ୍ ମୁଶାସ୍କି ନିୟମ୍ ଅନୁସାର୍ ଶୁଦ୍ଧ୍ ମାନ୍ନାଘି ସାମାୟ ବାର୍ଚା, ତା ମାରିୟାମ୍ ଆରୁ ଯୋଷେଫ୍ସ୍ ହାଦ୍ଦୁସିନ୍ ପ୍ରାଭୁ ପାର୍ମେଶ୍ଵାର୍ସ୍କେ ସୋଁପାଗେ ଯେରୁଶାଲେମ୍ ଅଚ୍ଚାର୍, 23ଏସ୍କେ କା ପ୍ରାଭୁସ୍କି ନିୟମ୍ନୁ ଲେଖ୍ଚ୍କା ରାଇଦ୍: “ଜାମାର୍ଘି ପହିଲ୍ କୁକ୍କ ହାଦ୍ଦୁସିନ୍ ପ୍ରାଭୁସ୍କେ ସୋଁପାକଦ୍।” 24ଆରୁ ଇଦ୍ଘି ଲାଗାନ୍ହି କା ଆବ୍ଡ଼ାର୍ ପ୍ରାଭୁସ୍କି ନିୟମ୍ ଅନୁସାର୍: “ଅନ୍ ଯୋଡ଼ା ପେର୍ୱାଁ, ମାଲ୍ଲାହାଲେ ଯୋଡ଼େ ପୁର୍ରା ହାଦ୍ଦୁ” ବଲୀ ଚାଢ଼ାବାଗେ ଯେରୁଶାଲେମ୍ କେରାର୍।
ଶିମୋନ୍ସ୍ ପ୍ରାଭୁସ୍କି ସ୍ତୁତି କାମାଲ୍ଦାସ୍
25-26ହୁ ସାମାୟନୁ ଶିମୋନ୍ ନାମେଘି ଅଣ୍ଟା ଧାର୍ମିକ୍ ଆରୁ ଭକ୍ତ ଆଲାସ୍ ଯେରୁଶାଲେମ୍ନୁ ରାଲିୟାସ୍; ଆସ୍ ଇସ୍ରାଏଲ୍ ଜାମାର୍ଘି ଶାନ୍ତିଘି ଆଶ୍ରା ଏରାଲିୟାସ୍, ଆରୁ ପାବିତାର୍ ଆତ୍ମାତି ଭାର୍ପୁର୍ ରାଚାସ୍। ଆସ୍କେ ପାବିତାର୍ ଆତ୍ମାତି ଇ ସୁଚ୍ନା ହାଖ୍ଖର୍କିଚାକା ଆସ୍ ପ୍ରାଭୁ ଖ୍ରୀସ୍ତ୍ସିନ୍ ମା ଏର୍ନା ଜୁଟି, ଆସ୍କି ମରନ୍ ମା ମାନିଦ୍। 27ଆସ୍ ପାବିତାର୍ ଆତ୍ମାଘି ଶକ୍ତିତି ମନ୍ଦିର୍ଗେ ବାର୍ଚାସ୍; ବଲୋ ଯୀଶୁସ୍କି ଆୟାଙ୍ଗ୍ବାଙ୍ଗ୍ ନିୟମ୍ଘି ବିଧିବନ୍ ପୁରା କାମାଗେ ମନ୍ଦିର୍ଘି ଉଲା ଅନ୍ଦ୍ରାର୍, 28ଆରୁ ଶିମୋନ୍ସ୍ ବଲୋ ଯୀଶୁସିନ୍ ତାଙ୍ଘା କୋଡ଼ୁଗେ ଅଚ୍ଚାସ୍ ଆରୁ ପାର୍ମେଶ୍ଵାର୍ସ୍କି ମାହିମା କାମ୍ତେ ତେଙ୍ଗିୟାସ୍: 29“ହେ ପ୍ରାଭୁ, ନିହ୍ମା ବଚନ୍ଘି ଅନୁସାର୍ ଆକ୍କୁନ୍ନିନ୍ ନିହ୍ମା ସେବକ୍ସିନ୍ ଶାନ୍ତିତି ବିଦା ଚିଆ, 30ଏନ୍ଦେର୍ଗେକା ନାମାନ୍ ବାଛାବାଗେ ନିନ୍ ନେକାନ୍ ତାଏକାଦାଏ ଆସିନ୍ ଏନ୍ ଏର୍କାଦାନ୍। 31ନେକାନ୍ ନିନ୍ ଇ ଦୁନିଆଁନ୍ତା ଜାମା ଆଲାର୍ଘି ଆଘ୍ଲି ତିଆର୍ କାମ୍ଚ୍କାଦାଏ, 32ଆ ଆଲାସ୍ ଦୁସ୍ରା ଜାତିୟାରିନ୍ ବିଲ୍ଲୀ ଏଦସ୍, ଆରୁ ନିଜର୍ ଇସ୍ରାଏଲ୍ ଆଲାର୍ଘି ଲାଗାନ୍ ମାହିମା ଅନ୍ଦ୍ରସ୍।” 33ହାଦ୍ଦୁସ୍କି ବାରେନୁ ଇବ୍ଡ଼ା କାତ୍ଥାନ୍ ମେନିକିରି ଯୀଶୁସ୍କି ଆୟାଙ୍ଗ୍-ବାଙ୍ଗ୍ ଆଚ୍ମିତ୍ ମାନ୍ଚାର୍ କେରାର୍। 34ଆନ୍ତିନ୍ ଶିମୋନ୍ସ୍ ଆବ୍ଡ଼ାରିନ୍ ଆଶୀର୍ବାଦ୍ ଚିଚ୍ଚାସ୍ ଆରୁ ହାଦ୍ଦୁସ୍କି ତାଙ୍ଗ୍ୟ ମାରିୟାମ୍ବନ୍ ତେଙ୍ଗିୟାସ୍, “ଇ ହାଦ୍ଦୁସ୍କି ଦ୍ୱାର୍ନୁ ଇସ୍ରାଏଲ୍ତା ଢେର୍ ଆଲାର୍ ବାଛ୍ରର୍କର୍ ଆରୁ ଢେର୍ ଆଲାର୍ ନାଶ୍ ମାନର୍କର୍, ଆରୁ ଆ ହାଦ୍ଦୁସ୍ ପାର୍ମେଶ୍ଵାର୍ସ୍କି ତାର୍ତି ହାଖ୍ଖର୍କା ଅଣ୍ଟା ଚିହ୍ନାଦ୍ ଆରୁ ଆସିନ୍ ଢେର୍ ଆଲାର୍ ବିରୋଦ୍ଧ କାମର୍, 35ଆଙ୍ଗେନ୍ ଢେର୍ ଆଲାର୍ଘି ମନ୍ତା ବିଚାର୍ ଖୁଲା ମାନକୋ ଆରୁ ନିଙ୍ଘା ମନ୍ନୁ ଖଣ୍ଡାତି ଭସ୍ନା ଲେଖା ଦୁଃଖୁ ମାନଦ୍।”
ହାନ୍ନା ବଲୋ ଯୀଶୁସ୍କି ବାରେନୁ ତେଙ୍ଗିଦ୍
36ହାନ୍ନା ନାମେଘି ଅଣ୍ଟା ଭବିଷତ୍ କାତ୍ଥା ତେଙ୍ଗୁ ଆଲି ରାଚା, ଆଦ୍ ଆଶେର୍ ବାଁଉଶାନ୍ତା ଫିନୂଏଲ୍ସ୍କି ତାଙ୍ଗ୍ଦା ରାଚା। ଆଦ୍ ମୁରୁକ୍ ପାଚ୍ଚ ମାନ୍ଚା କେର୍କିଚା, ଆଦ୍ ବେଞ୍ଜର୍କା ପାଛ୍ଲି ସାତ୍ ବଛର୍ ଖାଲି ତାଙ୍ଘା ଆଲାସ୍ ଗାନେ ରାଚ୍କିଚା, ଆରୁ ଆଦ୍ ଚୋଉରାଅଶୀ ବଛର୍ତକ୍ ରାଣ୍ଡି ରାଚା। 37ଆଦ୍ ମନ୍ଦିର୍ବନ୍ ଏକ୍ଲାହି ମା ଆମ୍ଵାଲିୟାଦ୍, ଆଦ୍ ଉପାସ୍ ଆରୁ ବିନ୍ତି କାମିକିରି ଉଲ୍ଲାନ୍ ମାହାନ୍ ପାର୍ମେଶ୍ଵାର୍ସ୍କି ଆରାଧାନା କାମାଲିଆଦ୍। 38ଆଦ୍ ହୁଙ୍ଗେନିନ୍ ବାରିକିରି ପ୍ରାଭୁସ୍କି ସ୍ତୁତି କାମାଗେ ଲାଗ୍ଗିୟାଦ୍, ଆରୁ ଏକା ଆଲାର୍ ଯେରୁଶାଲେମ୍ଘି ମୁକ୍ତି ଲାଗାନ୍ ଆଶ୍ରା ଏରାଲିୟାର୍, ଆଦ୍ ଆ ଜାମା ଆଲାରିନ୍ ଆ ହାଦ୍ଦୁସ୍କି ବାରେନୁ ତେଙ୍ଗାଗେ ଲାଗ୍ଗିୟାଦ୍।
ନାଜ୍ରେତ୍ନୁ ଯୀଶୁସ୍କି ହାଦ୍ଦୁ ସାମାୟ
39ଆନ୍ତିନ୍ ଯୋଷେଫ୍ ଆରୁ ମାରିୟାମ୍ ପ୍ରାଭୁସ୍କି ନିୟମ୍ ଅନୁସାର୍ନୁ ଜାମା ନାଲ୍ଖୁ ପୁରା କାମ୍ଚ୍କା ପାଛ୍ଲି ଆବ୍ଡ଼ାର୍ ଗାଲିଲୀୟାଘି ନିଜର୍ ନାଜ୍ରେତ୍ ସହର୍ଗେ କିର୍ୟାର୍ କେରାର୍। 40ଆରୁ ଆ ହାଦ୍ଦୁସ୍ ପାର୍ଦ୍ତେ କେରାସ୍, ଆରୁ ବୁଦ୍ଧିତି ଭାର୍ପୁର୍ ମାନିକିରି ଶକ୍ତିଶାଲୀ ମାନ୍ଚାସ୍, ଆରୁ ତାଙ୍ଘା ମିଆଁ ପାର୍ମେଶ୍ଵାର୍ସ୍କି କ୍ରିପା ରାଚା।
ବାର ବଛର୍ତା ଯୀଶୁସ୍ ମନ୍ଦିର୍ନୁ ଶିକ୍ଷା ଚିଆଲ୍ଦାସ୍
41ଯୀଶୁସ୍କି ଆୟାଙ୍ଗ୍ବାଙ୍ଗ୍ ଜାମା ବଛର୍ ପାସ୍କାପରବ୍ ମାନାବାଗେ ଯେରୁଶାଲେମ୍ କାଲିୟାର୍। 42ଯେତ୍କବାକେନ୍ ଯୀଶୁସ୍ ବାର ବଛର୍ତା ମାନ୍ଚାସ୍, ତା ଆବ୍ଡ଼ାର୍ ପରବ୍ଘି ନିୟମ୍ ଅନୁସାର୍ ଯେରୁଶାଲେମ୍ କେରାର୍। 43ପରବ୍ ମୁଞ୍ଜର୍କା ପାଛ୍ଲି ଯୀଶୁସ୍କି ଆୟାଙ୍ଗ୍ବାଙ୍ଗ୍ ଯେତ୍କବାକେନ୍ ଆଡ଼୍ପା କିର୍ରା ବାରାଲିୟାର୍, ହତ୍କବାକେନ୍ ହାଦ୍ଦୁ ଯୀଶୁସ୍ ଯେରୁଶାଲେମ୍ନୁ ରାଚାସ୍କେରାସ୍; ଇବନ୍ ଯୀଶୁସ୍କି ତାଙ୍ଗ୍ୟ ତାମ୍ବାର୍ ବାଲ୍ଲାହାଚ୍ଚିୟାର୍। 44ଲେକିନ୍ ଆବ୍ଡ଼ାର୍ ସୋଚାଲିୟାର୍ କା ଯୀଶୁସ୍ ତାହ୍ମା ପାଛ୍ଲି ବାରୁ ଆଲାର୍ଘି ଭିଡ଼୍ନୁ ରାଲ୍କାରସ୍, ହୁଦ୍ଘିଲାଗାନ୍ ଆବ୍ଡ଼ାର୍ ଅନ୍ଦୁଲ୍ ତା ପାବୁ ଏକ୍କା ପାଛ୍ଲି: ଯୀଶୁସିନ୍ ତାହ୍ମା ଜାତିବନ୍ଧୁ ଆରୁ ଚିହ୍ନାର୍ ଆଲାର୍ସାନ୍ ବେଦ୍ଦାଗେ ଲାଗ୍ଗିୟାର୍। 45ଆରୁ ଆବ୍ଡ଼ାର୍ ଯୀଶୁସିନ୍ ମା ହାଖ୍ଖୀୟାର୍, ଆଙ୍ଗେନ୍ ଆସିନ୍ ବେଦ୍ଦତେ-ବେଦ୍ଦତେ ଯେରୁଶାଲେମ୍ଗେ କିର୍ୟାର୍, 46ତିନ୍ ଦିନ୍ଘି ପାଛ୍ଲି ଆବ୍ଡ଼ାର୍ ଯୀଶୁସିନ୍ ମନ୍ଦିର୍ନୁ ହାଖ୍ଖୀୟାର୍ ଆସ୍ ପଣ୍ଡିତ୍ଜାମାର୍ଘି ମାଝାନୁ ଅକ୍କାଚାସ୍, ଆରୁ ଆବ୍ଡ଼ାର୍ଘି କାତ୍ଥାନ୍ ମେନାଲିୟାସ୍ ଆରୁ ଆବ୍ଡ଼ାରିନ୍ ପ୍ରଶ୍ନ କାମାଲିୟାସ୍। 47ଜାମା ମେନୁ ଆଲାର୍, ଯୀଶୁସ୍କି ବୁଦ୍ଧି ଆରୁ ତାଙ୍ଘା ଯାବାବ୍ବନ୍ ମେନିକିରି ଆଚ୍ମିତ୍ ମାନାକାଲିୟାର୍। 48ଯୀଶୁସ୍କି ଆୟାଙ୍ଗ୍-ବାଙ୍ଗ୍ ତାଙ୍ଗାନ୍ ଏରିକିରି ଆଚ୍ମିତ୍ ମାନ୍ଚାର୍ କେରାର୍ ଆରୁ ଯୀଶୁସ୍କି ତାଙ୍ଗ୍ୟ ଆସିନ୍ ତେଙ୍ଗିୟା, “ବାବୁ, ନିନ୍ ଏହ୍ମା ଗାନେ ଏନ୍ଦେର୍ଗେ ଏନ୍ନେ କାମ୍ଚ୍କାଏ? ଏରା ତା ନିଙ୍ଘା ବୁଆସ୍ ଆରୁ ଏନ୍ ଗଡ଼୍ଗଡ଼ା ମାନିକିରି ନିଙ୍ଗାନ୍ ବେଦ୍ଦାଲ୍କାମ୍?” 49ଆଙ୍ଗେନ୍ ଆସ୍ ତାଙ୍ଘା ଆୟାଙ୍ଗ୍ ବାଙ୍ଗ୍ରିନ୍ ତେଙ୍ଗିୟାସ୍, “ନିମ୍ ଏଙ୍ଗାନ୍ ଏନ୍ଦେର୍ଗେ ବେଦ୍ଦାଲ୍କାର୍? ନିମ୍ ଇବନ୍ ବାଲ୍କାଚ୍କାର୍ କାଁଏ ଏନ୍ ଜରୁର୍ ଏଙ୍ଘା ବୁଆସ୍କି ଆଡ଼୍ପାନୁ ରନ୍?” 50ଲେକିନ୍ ଯୀଶୁସ୍ ଆବ୍ଡ଼ାରିନ୍ ଏକା କାତ୍ଥାନ୍ ତେଙ୍ଗିୟାସ୍, ଆବନ୍ ଆବ୍ଡ଼ାର୍ ବୁଝ୍ରା ପଲ୍ଲିୟାର୍। 51ଆଙ୍ଗେନ୍ ଯୀଶୁସ୍ ତାଙ୍ଗ୍ୟ ତାମ୍ବାର୍ ଗାନେ ନାଜ୍ରେତ୍ ସହର୍ କିର୍ୟାସ୍, ଆରୁ ଆବ୍ଡ଼ାର୍ଘି ଅଧିନ୍ନୁ ରାଚାସ୍; ଆରୁ ତାଙ୍ଗ୍ୟ ଇବ୍ଡ଼ା ଜାମା କାତ୍ଥାଗୁଠିନ୍ ତାଙ୍ଘା ମନ୍ନୁ ଉଇୟା। 52ଯୀଶୁସ୍ ବୁଦ୍ଧି ଆରୁ ମେଦୁତି ପାର୍ଦ୍ତେ କେରାସ୍, ଆରୁ ଆସ୍ ଆଲାର୍ଘି ଆରୁ ପାର୍ମେଶ୍ଵାର୍ସ୍କି ମାଝାନୁ ଏକା ନାଲ୍ଖୁନ୍ କାମାଲିୟାସ୍, ଆଦ୍ ଆଲାର୍ଗେ ଆରୁ ପାର୍ମେଶ୍ଵାର୍ସ୍କେ ପସନ୍ଦ୍ ରାଚା।
3ଆସ୍ନାନ୍ ଚିଉ ଯୋହାନ୍ସ୍କି ଖବର୍
(ମାତିସ୍ ୩:୧-୧୨; ମାର୍କୁସ୍ ୧:୧-୮; ଯୋହାନ୍ ୧:୧୯-୨୮)
1ତିବିରିଉସ୍ କାଇସର୍ସ୍କି ଶାସନ୍ ସାମାୟନ୍ତା ପନ୍ଦର ବଛର୍ନୁ ଯେତ୍କବାକେନ୍ ପନ୍ତୁସ୍ ପିଲାତୁସ୍ ୟାହୁଦା ପ୍ରଦେଶ୍ନ୍ତା ରାଜ୍ପାଲ୍ ରାଚାସ୍, ଆରୁ ହେରୋଦ୍ସ୍ ଗାଲିଲୀ ପ୍ରଦେଶ୍ତା ରାଜା ରାଚାସ୍, ତାଙ୍ଘା ଭାଇ ଫିଲିପ୍ପସ୍ ଇତୁରୀଆ ଆରୁ ତ୍ରାଖୋନୀତିସ୍ ପ୍ରଦେଶ୍ନ୍ତା ରାଜା ରାଚାସ୍, ଆରୁ ଲୁସାନିୟାସ୍ ଆବିଲେନ୍ତା ରାଜା ରାଚାସ୍, 2ହାନ୍ନା ଆରୁ କାଇଫାସ୍ ମାହାପୁରୋହିତ୍ ରାଚାର୍, ହତ୍କବାକେନ୍ ଜାକ୍ରିୟାସ୍କି ହାଦ୍ଦୁ ଯୋହାନ୍ସ୍କେ ଶୁନ୍ଶାନ୍ ଆଡ୍ଡାନୁ ପାର୍ମେଶ୍ଵାର୍ସ୍କି ବଚନ୍ ମେନ୍ଦ୍ରାଦ୍।3ଆସ୍ ଯାର୍ଦାନ୍ ଯୋଡ଼ୁଘି ଚାହାଚାହାନ୍ତା ଜାମା ରାଜୀଗେ କାଇକିରି ଉପ୍ଦେଶ୍ ଚିଆ ଲାଗ୍ଗିୟାସ୍ କା, “ନିମ୍ ପାସ୍ତାରା ଆରୁ ଆସ୍ନାନ୍ ହୁଆ ହାଲେ, ପାର୍ମେଶ୍ଵାର୍ସ୍ ନିହ୍ମା ପାପ୍ ଛେମା କାମଚସ୍।” 4ଏସ୍କେ ଇଶାୟାହ୍ସ୍ ନାବୀସ୍କି ବହିନୁ ଲେଖ୍ଚ୍କା ରାଇଦ୍: “ଶୁନ୍ଶାନ୍ ଆଡ୍ଡାନୁ ଅଣ୍ଟା ଆଲାସ୍ ଉଚ୍ଚା ଶବଦ୍ନୁ ଏନ୍ନେ ତେଙ୍ଗାଲ୍ଦାସ୍, ‘ପ୍ରାଭୁସ୍କି ଲାଗାନ୍ ପାବୁ ତିଆର୍ କାମା, ଆସ୍କି ପାବୁବନ୍ ସିଧା କାମା। 5ଆରୁ ଜାମା ଘାଟି ଗୁଠିନ୍ ଭାଟାଚାକୋ, ଆରୁ ଜାମା ପାର୍ତ୍ତା ଆରୁ ଘୁଟ୍ରାଗୁଠିନ୍ ନିଚା କାମା କୋଦ୍; ଆଡ୍ଡେ ପାବୁନ୍ ସିଧା କାମା କୋଦ୍, ଆରୁ ଗାଡ୍ଡି ଢିପ୍ପା ପାବୁନ୍ ସାମାନ୍ କାମାକୋ। 6ଆରୁ ଜାମା ଆଲାର୍ ପାର୍ମେଶ୍ଵାର୍ସ୍କି ମୁକ୍ତି ଯୋଜ୍ନାବନ୍ ଏରୋର୍’।” 7ଏକା ଆଲାର୍ ଯୋହାନ୍ସ୍ତି ଆସ୍ନାନ୍ ହୁଆଗେ ବାରାଲିୟାର୍, ଆବ୍ଡ଼ାରିନ୍ ଆସ୍ ତେଙ୍ଗାଲିୟାସ୍, “ହେ ବିଷ୍ ରୁ ନେର୍ରୁଘି ହାଦ୍ଦୁରୋ୩:୭ ନେର୍ରୁଘି ହାଦ୍ଦୁର୍ ମତ୍ଲବ୍ ଆଲାର୍ ନେର୍ରୁଘି ହାଦ୍ଦୁ ଲେଖା ଖାତାର୍ନାକ୍ ରାନାଏ।! ନେଦ୍ ନିମାନ୍ ଆଘ୍ଲି ବାର୍ନାବାଲା ପାର୍ମେଶ୍ଵାର୍ସ୍କି ଦଣ୍ଡ୍ତି ବାଛ୍ରାଗେ ଚେତାବାନୀ ଚିଚ୍ଚାର୍। 8ହୁଦ୍ଘିଲାଗାନ୍ ପାସ୍ତାରାଚ୍କା ପାଛ୍ଲି ପାସ୍ତାରାଚ୍କା ଲେଖା ଚାଲ୍ରା, ଆରୁ ଇବନ୍ ଏନ୍ନେ ଆମା ସୋଚା କା ନାହ୍ମା ଆବ୍ରାହାମ୍ସ୍ ନାହ୍ମା ବୁଆସ୍; ଏନ୍ ନିମାନ୍ ତେଙ୍ଗାଲ୍ଦାନ୍ କା ପାର୍ମେଶ୍ଵାର୍ସ୍ ଇ ଚାଁଚାନ୍ତି ଆବ୍ରାହାମ୍ସ୍କି ଲାଗାନ୍ ହାଦ୍ଦୁବଚ୍ଚ କାମା ଅଙ୍ଗ୍ଦାସ୍। 9ଆକ୍କୁନ୍ହି ମାନ୍ନୁଘି ମୁଲିନୁ ବୁଡ଼ିୟା ହୋତ୍କା ରାଇଦ୍, ଆରୁ ଏକା ମାନ୍ନୁନୁ ବାନେ ଫାଡ଼ୁ ମା ହାଞ୍ଜି, ଆବନ୍ ଛପିକିରି ଚିଚ୍ଚୁନୁ ଖେବ୍ଡ଼ାଚାକୋ।” 10ଆଙ୍ଗେନ୍ ଆଲାର୍ ଆସ୍ନାନ୍ ଚିଉ ଯୋହାନ୍ସିନ୍ ମେନାଗେ ଲାଗ୍ଗିୟାର୍, “ହାଲେ ଏମ୍ ଏନ୍ଦେର୍ କାମମ୍?” 11ଆସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ନେଖାସାନ୍ ଯୋଡ଼େ ମିର୍ଜୀ ରାଇଦ୍, ଆର୍ ନେଖାଏ ମାଲ୍ଲାଦିନ୍ ଆର୍ଗେ ଅଣ୍ଟା ମିର୍ଜୀନ୍ ଚିଅର୍ ଆରୁ ନେଖାସାନ୍ ଅନାମହାଗେ ରାଇଦ୍, ଆବ୍ଡ଼ାର୍ହି ଏନ୍ନେନ୍ କାମା।” 12ମାଲ୍ଗୁଜାରୀ ଉକ୍ରୁ ଆଲାର୍ହି ଆସ୍ନାନ୍ ହୁଆଗେ ବାର୍ଚାର୍, ଆରୁ ଆବ୍ଡ଼ାର୍ ଯୋହାନ୍ସିନ୍ ମେନ୍ଚାର୍ କା, “ହେ ଗୁରୁ, ଏମ୍ ଏନ୍ଦେର୍ କାମମ୍?” 13ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମାଗେ ଯେତ୍କ ଠାହ୍ରାଚ୍କା ରାଇଦ୍, ହୁଦ୍ଘିନ୍ତି ବାଗ୍ଗେ ଆମ୍କେ ହୁଆ।” 14ସିପାହୀ ଜାମାର୍ହି ଆସିନ୍ ମେନାଗେ ଲାଗ୍ଗିୟାର୍, “ଏମ୍ ଏନ୍ଦେର୍ କାମମ୍?” ଆସ୍ ଆବ୍ଡ଼ାରିନ୍ ତେଙ୍ଗିୟାସ୍ କା, “ନିମ୍ ଶକ୍ତିତି ଆରୁ ଠାକିକିରି ନେଖାହି ଧାନ୍ନୁନ୍ ଆମା ଲୁଟା, ଆରୁ ଝୁଟ୍ଟୁ ଦୋଷ୍ ଆମା ଚିଆ ଆରୁ ନିଜର୍ କମାଣିନ୍ତି ଖୁସ୍ ରା।” 15ଆରୁ ଆଲାର୍ ଖ୍ରୀସ୍ତ୍କି ଲାଗାନ୍ ପାବୁ ଏରାଲିୟାର୍, ଆରୁ ଯୋହାନ୍ସ୍କି ବାରେନୁ ଜାମାର୍ ମନେ-ମନେ ସୋଚାଲିୟାର୍ କା କାହିଁ ଇସ୍ତା ଖ୍ରୀସ୍ତ୍ ମାଲ୍ଦାସ୍, 16ହୁଦ୍ଘିଲାଗାନ୍ ଯୋହାନ୍ସ୍ ଜାମା ଆଲାରିନ୍ ଯାବାବ୍ ଚିଚ୍ଚାସ୍, “ଏନ୍ତା ନିମାନ୍ ଆମ୍ମୁତି ଆସ୍ନାନ୍ ଚିଆଲ୍ଦାନ୍, ଲେକିନ୍ ଅର୍ତୁ ବାର୍ନାବାଲା ରାନାଏ ଏକାସ୍ କା ଏଙ୍ଘାସ୍ତି ଢେର୍ ମାହାନ୍ ରାଦାସ୍; ଏନ୍ତା ତାଙ୍ଘା ଜୁତାଘି ଫିତା ଖୋଲ୍ନାଘିହି ଲାଇଗ୍ ମାଲ୍କାନିନ୍; ଆସ୍ ନିମା ଜାମାର୍ଗେ ପାବିତାର୍ ଆତ୍ମା ଆରୁ ଚିଚ୍ଚୁତି ଆସ୍ନାନ୍ ଚିୟସ୍। 17ଏସ୍କେ ଅଣ୍ଟା ଚାଷୀ ଆଲାସ୍ କେଁତେର୍ତି ଗହମ୍ ଆରୁ କୁଟ୍ଟାବନ୍ ଭିନେ କାମ୍ଦାସ୍, ଆନ୍ନେନ୍ ଆସ୍ ବାନେ ଆଲାରିନ୍ ଖାରାପ୍ ଆଲାର୍ସ୍ତି ଭିନେ କାମସ୍; ଆରୁ ଏସ୍କେ ବାନେ ଗହମ୍ବନ୍ ମଁଣା ବାଖ୍ରାନୁ ଉଇୟା କାଇ, ଆନ୍ନେ ଆସ୍ ବାନେ ଆଲାରିନ୍ ତାଙ୍ଗାଗେ ଚାଜସ୍ ଆରୁ ଏସ୍କେ କୁଟ୍ଟାବନ୍ ମା ତେବ୍ର୍ନା ଚିଚ୍ଚୁନୁ ବାସ୍ସା କାଇ ଆନ୍ନେ ଆସ୍ ଖାରାପ୍ ଆଲାରିନ୍ ଚିଚ୍ଚୁନୁ ବାସ୍ସଚସ୍।” 18ଯୋହାନ୍ସ୍ ଏନ୍ନେ ଆରୁହି ଢେର୍ ଦୁସ୍ରା ଉପ୍ଦେଶ୍ତି ଆଲାରିନ୍ ସୁସାମାଚାର୍ ଶୁଣାବାଲିୟାସ୍। 19ହେରୋଦ୍ସ୍ ତାଙ୍ଘା ଭାଇସ୍କି ମାଏକିନିଆଁନ୍ ତାଙ୍ଘା ଲାଗାନ୍ ଉଇକାଚାସ୍, ଆରୁ ଦୁସ୍ରା ଖାରାପ୍ ନାଲ୍ଖୁହି କାମାଲିୟାସ୍, ହୁଦ୍ଘିଲାଗାନ୍ ଯୋହାନ୍ସ୍ ହେରୋଦ୍ସିନ୍ ସୁଧ୍ରାଗେ ଶାସନ୍ କାମ୍ଚାସ୍, 20ଆଙ୍ଗେନ୍ ହେରୋଦ୍ସ୍ ଜାମାର୍ଘିନ୍ତି ବାଡ଼୍କା ଇ ଖାରାପ୍ ନାଲ୍ଖୁନ୍ହି କାମ୍ଚାସ୍ କା ଯୋହାନ୍ସିନ୍ ଜେହେଲ୍ନୁ ଗୁଡ୍ଡେଇଚାସ୍।
ଯୀଶୁସ୍କି ଆସ୍ନାନ୍
(ମାତିସ୍ ୩:୧୩-୧୭; ମାର୍କୁସ୍ ୧:୯-୧୧)
21ଜାମା ଆଲାର୍ଘି ଆସ୍ନାନ୍ ଅଚ୍ଚକା ପାଛ୍ଲି, ଯୀଶୁସ୍ହି ଆସ୍ନାନ୍ ଅଚ୍ଚାସ୍, ଆରୁ ବିନ୍ତି କାମ୍ନା ବାକେନ୍ ଆକାଶ୍ ଖୋଲ୍ରା କେରା, 22ଆରୁ ପାବିତାର୍ ଆତ୍ମାଦ୍ ଶରୀର୍ଘି ରୂପ୍ନୁ ପେର୍ୱାଁ ଲେଖା ତାଙ୍ଘା ମିଆଁ ଏତ୍ତିୟାଦ୍ ବାର୍ଚାଦ୍, ଆରୁ ଆକାଶ୍ତି ଏନ୍ନେ ଶବଦ୍ ମେନ୍ଦରାଦ୍ କା: “ନିନ୍ ଏଙ୍ଘାଏ ଦୁଲାଡ଼ି ହାଦ୍ଦୁୟ, ଏନ୍ ନିଙ୍ଘା ମିଆଁ ବହୁତ୍ ଖୁସ୍ ରାଦାନ୍।”
ଯୀଶୁସ୍କି ବାଉଁଶାର୍
23ଯୀଶୁସ୍ ଉପ୍ଦେଶ୍ ଚିୟାଗେ ସୁରୁ କାମ୍ନା ବାକେନ୍ ଆସ୍କେ ଲାଗ୍ଭାଗ୍ ତିରିଶ୍ ବଛର୍ ମାନ୍ଚ୍କିଚା, ଆଲାର୍ ଆସିନ୍ ଯୋଷେଫ୍ସ୍କି ହାଦ୍ଦୁସ୍ ବୁଲି ସୋଚାଲିୟାର୍। 24ଯୋଷେଫ୍ସ୍ ଏଲୀସ୍କି ହାଦ୍ଦୁସ୍ ରାଚାସ୍, ଏଲୀସ୍ ମତ୍ଥାତ୍ସ୍କି ହାଦ୍ଦୁସ୍, ମତ୍ଥାତ୍ସ୍ ଲେବୀସ୍କି ହାଦ୍ଦୁସ୍, ଲେବୀସ୍ ମଲ୍ଖୀସ୍କି ହାଦ୍ଦୁସ୍, ମଲ୍ଖୀସ୍ ଯନ୍ନୟସ୍କି ହାଦ୍ଦୁସ୍, ଯନ୍ନୟସ୍ ଯୋଷେଫ୍ସ୍କି ହାଦ୍ଦୁସ୍, 25ଯୋଷେଫ୍ସ୍ ମାତ୍ତିଥ୍ୟାସ୍କି ହାଦ୍ଦୁସ୍, ମାତ୍ତିଥ୍ୟାସ୍ ଆମୋସ୍କି ହାଦ୍ଦୁସ୍, ଆମୋସ୍ ନାହୁମ୍ସ୍କି ହାଦ୍ଦୁସ୍, ନାହୁମ୍ସ୍ ହେସ୍ଲୀସ୍କି ହାଦ୍ଦୁସ୍, ହେସ୍ଲୀସ୍ ନଗୟସ୍କି ହାଦ୍ଦୁସ୍, 26ନଗୟସ୍ ମହଥସ୍କି ହାଦ୍ଦୁସ୍, ମହଥସ୍ ମାତ୍ତିଥ୍ୟାସ୍କି ହାଦ୍ଦୁସ୍, ମାତ୍ତିଥ୍ୟାସ୍ ଶିମୟୀସ୍କି ହାଦ୍ଦୁସ୍, ଶିମୟୀସ୍ ଯୋସେଖ୍ସ୍କି ହାଦ୍ଦୁସ୍, ଯୋସେଖ୍ସ୍ ଯୋଦାସ୍କି ହାଦ୍ଦୁସ୍, 27ଯୋଦାସ୍ ଯୋହାନ୍ସ୍କି ହାଦ୍ଦୁସ୍, ଯୋହାନ୍ସ୍ ରେଷାସ୍କି ହାଦ୍ଦୁସ୍, ରେଷାସ୍ ଜିରୁବ୍ବାବେଲସ୍କି ହାଦ୍ଦୁସ୍, ଜିରୁବ୍ବାବେଲସ୍ ଶଲ୍ଥୀଏଲସ୍କି ହାଦ୍ଦୁସ୍, ଶଲ୍ଥୀଏଲସ୍ ନେରୀସ୍କି ହାଦ୍ଦୁସ୍, 28ନେରୀସ୍ ମଲ୍ଖୀସ୍କି ହାଦ୍ଦୁସ୍, ମଲ୍ଖୀସ୍ ଅଦ୍ଦୀସ୍କି ହାଦ୍ଦୁସ୍, ଅଦ୍ଦୀସ୍ କୋସାମସ୍କି ହାଦ୍ଦୁସ୍, କୋସାମସ୍ ଏଲ୍ମଦାନ୍ସ୍କି ହାଦ୍ଦୁସ୍, ଏଲ୍ମଦାନ୍ସ୍ ଏରସ୍କି ହାଦ୍ଦୁସ୍, 29ଏରସ୍ ଯିହୋଶୂୟସ୍କି ହାଦ୍ଦୁସ୍, ଯିହୋଶୂୟସ୍ ଏଲୀୟଜର୍ସ୍କି ହାଦ୍ଦୁସ୍, ଏଲୀୟଜର୍ସ୍ ଯୋରୀମ୍ସ୍କି ହାଦ୍ଦୁସ୍, ଯୋରୀମ୍ସ୍ ମତ୍ଥାତ୍ସ୍କି ହାଦ୍ଦୁସ୍, ମତ୍ଥାତ୍ସ୍ ଲେବୀସ୍କି ହାଦ୍ଦୁସ୍, 30ଲେବୀସ୍ ଶିମୀୟୋନ୍ସ୍କି ହାଦ୍ଦୁସ୍, ଶିମୀୟୋନ୍ସ୍ ଯୁଦାସ୍କି ହାଦ୍ଦୁସ୍, ଯୁଦାସ୍ ଯୋଷେଫ୍ସ୍କି ହାଦ୍ଦୁସ୍, ଯୋଷେଫ୍ସ୍ ଯୋନାମ୍ସ୍କି ହାଦ୍ଦୁସ୍, ଯୋନାମ୍ସ୍ ଏଲୀୟାକିମ୍ସ୍କି ହାଦ୍ଦୁସ୍, 31ଏଲିୟାକିମ୍ସ୍ ମଲାହସ୍କି ହାଦ୍ଦୁସ୍, ମଲାହସ୍ ମନ୍ନାସ୍କି ହାଦ୍ଦୁସ୍, ମନ୍ନାସ୍ ମତ୍ତଥାସ୍କି ହାଦ୍ଦୁସ୍, ମତ୍ତଥାସ୍ ନାଥନ୍ସ୍କି ହାଦ୍ଦୁସ୍, ନାଥନ୍ସ୍ ଦାଉଦ୍ସ୍କି ହାଦ୍ଦୁସ୍, 32ଦାଉଦ୍ସ୍ ଯିଶୟସ୍କି ହାଦ୍ଦୁସ୍, ଯିଶୟସ୍ ଓବେଦ୍ସ୍କି ହାଦ୍ଦୁସ୍, ଓବେଦ୍ସ୍ ବୋୟାଜ୍ସ୍କି ହାଦ୍ଦୁସ୍, ବୋୟାଜ୍ସ୍ ଶେଲ୍ହସ୍କି ହାଦ୍ଦୁସ୍, ଶେଲ୍ହସ୍ ନହଶୋନ୍ସ୍କି ହାଦ୍ଦୁସ୍, 33ନହଶୋନ୍ସ୍ ଅମ୍ମୀନାଦାବ୍ସ୍କି ହାଦ୍ଦୁସ୍, ଅମ୍ମୀନାଦାବ୍ସ୍ ଅଦ୍ମୀନ୍ସ୍କି ହାଦ୍ଦୁସ୍, ଅଦ୍ମୀନ୍ସ୍ ଅର୍ନୀସ୍କି ହାଦ୍ଦୁସ୍, ଅର୍ନୀସ୍ ହେସ୍ରୋଣସ୍କି ହାଦ୍ଦୁସ୍, ହେସ୍ରୋଣସ୍ ଫେରସ୍କି ହାଦ୍ଦୁସ୍, ଫେରସ୍ସ୍ ଯୁଦାସ୍ସ୍କି ହାଦ୍ଦୁସ୍, 34ଯୁଦାସ୍ ୟାକୁବ୍ସ୍କି ହାଦ୍ଦୁସ୍, ୟାକୁବ୍ସ୍ ଇସାକ୍ସ୍କି ହାଦ୍ଦୁସ୍, ଇସ୍ହାକ୍ସ୍ ଆବ୍ରାହାମ୍ସ୍କି ହାଦ୍ଦୁସ୍, ଅବ୍ରାହାମ୍ସ୍ ଥେରହ୍ସ୍କି ହାଦ୍ଦୁସ୍, ଥେରହ୍ସ୍ ନାହୋର୍ସ୍କି ହାଦ୍ଦୁସ୍, 35ନାହୋର୍ସ୍ ସରୁଗ୍ସ୍କି ହାଦ୍ଦୁସ୍, ସରୁଗ୍ସ୍ ରଗୁସ୍କି ହାଦ୍ଦୁସ୍, ରଗୁସ୍ ଫେଲଗ୍ସ୍କି ହାଦ୍ଦୁସ୍, ଫେଲଗ୍ସ୍ ଏବର୍ସ୍କି ହାଦ୍ଦୁସ୍, ଏବର୍ସ୍ ଶେଲହସ୍କି ହାଦ୍ଦୁସ୍, 36ଶେଲ୍ହସ୍ କେନାନ୍ସ୍କି ହାଦ୍ଦୁସ୍, କେନାନ୍ସ୍ ଅର୍ଫକ୍ଷଦ୍ସ୍କି ହାଦ୍ଦୁସ୍, ଅର୍ଫକ୍ଷଦ୍ସ୍ ଶେମ୍ସ୍କି ହାଦ୍ଦୁସ୍, ଶେମ୍ସ୍ ନୁଆସ୍କି ହାଦ୍ଦୁସ୍, ନୁଆସ୍ ଲେମଖ୍ସ୍କି ହାଦ୍ଦୁସ୍, 37ଲେମଖ୍ସ୍ ମିଥୂଶେଲହସ୍କି ହାଦ୍ଦୁସ୍, ମିଥୂଶେଲହସ୍ ହନୋକ୍ସ୍କି ହାଦ୍ଦୁସ୍, ହନୋକ୍ସ୍ ଯେର୍ଦ୍ସ୍କି ହାଦ୍ଦୁସ୍, ଯେର୍ଦ୍ସ୍ ମହଲଲେଲ୍ସ୍କି ହାଦ୍ଦୁସ୍, ମହଲଲେଲ୍ସ୍ କେନାନ୍ସ୍କି ହାଦ୍ଦୁସ୍, 38କେନାନ୍ସ୍ ଏନୋଶ୍ସ୍କି ହାଦ୍ଦୁସ୍, ଏନୋଶ୍ ଶେଥ୍ସ୍କି ହାଦ୍ଦୁସ୍, ଶେଥ୍ସ୍ ଆଦାମ୍ସ୍କି ହାଦ୍ଦୁସ୍ ଆରୁ ଆଦାମ୍ସ୍ ପାର୍ମେଶ୍ଵାର୍ସ୍କି ହାଦ୍ଦୁସ୍।
4ଶାଏତାନ୍ ଯୀଶୁସିନ୍ ବିଡ଼୍ଚେ ଏରାଲିଦ୍
(ମାତିସ୍ ୪:୧-୧୧; ମାର୍କୁସ୍ ୧:୧୨,୧୩)
1ଆସ୍ନାନ୍ ଅଚ୍ଚକା ପାଛ୍ଲି ଯୀଶୁସ୍ ପାବିତାର୍ ଆତ୍ମାତି ଭାର୍ପୁର୍ ମାନିକିରି ଯାର୍ଦାନ୍ ଯୋଡ଼ୁନ୍ତି କିର୍ୟାସ୍; ଆରୁ ଯୀଶୁସ୍ ଚାଲିଶ୍ ଦିନ୍ତକ୍ ଆତ୍ମାଘି ଆଗୁୱାତି ଶୁନ୍ଶାନ୍ ଆଡ୍ଡାଗେ କେରାସ୍; 2ଆରୁ ଶାଏତାନ୍ଦ୍ ତାଙ୍ଗାନ୍ ବିଡ଼୍ଚେ ଏରିୟାଦ୍। ଯୀଶୁସ୍ ହୁ ଉଲ୍ଲାନୁ ଏନ୍ଦେର୍ହି ମା ଅଣ୍ଡାସ୍ ମଖ୍ଖାସ୍, ଆରୁ ଆ ଉଲ୍ଲା ବିତ୍ର୍କା ପାଛ୍ଲି ତାଙ୍ଗାଗେ କିଡ଼ା ଲାଗ୍ଗିୟାଦ୍। 3ଆଙ୍ଗେନ୍ ଶାଏତାନ୍ ଯୀଶୁସିନ୍ ତେଙ୍ଗିୟାଦ୍, “ଯଦି ନିନ୍ ପାର୍ମେଶ୍ଵାର୍ସ୍କି ହାଦ୍ଦୁୟ, ହାଲେ ହୁକୁମ୍ ଚିଆ କା ଇ ଚାଁଚା ଗୁଠିଦ୍ ଆସ୍ମା ମାନକୋ।” 4ଲେକିନ୍ ଯୀଶୁସ୍ ଯାବାବ୍ ଚିଚ୍ଚାସ୍, “ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ କା ଆଲାର୍ ଆସ୍ମାତି ଖାଲି ମା ଉଜ୍ଜନାଏ,” 5ଇଦ୍ଘି ପାଛ୍ଲି ଶାଏତାନ୍ ଯୀଶୁସିନ୍ ମିଆଁ ଅଚ୍ଚାକେରା ଆରୁ ଆସାନ୍ କାଟେ ଡେରିନୁ ଦୁନିଆଁନ୍ତା ଜାମା ରାଜୀବନ୍ ଏଦିୟା। 6ଆରୁ ଶାଏତାନ୍ ଯୀଶୁସିନ୍ ତେଙ୍ଗିୟାଦ୍, “ଏନ୍ ନିଙ୍ଗାଗେ ଇ ଜାମା ରାଜୀଘି ହକ୍ ଆରୁ ଇଦ୍ଘି ଶୋଭାବନ୍ ଚିଅନ୍ଲାଗନ୍ ଏନ୍ଦେର୍ଗେକା ଇବ୍ଡ଼ା ଜାମାନ୍ ଏଙ୍ଗାଗେ ଚିଆ କେର୍କିଚି ଆରୁ ଏନ୍ ନେକାଗେ ଚାହଁନ୍ ଆବ୍ଡ଼ାର୍ଗେ ଇବ୍ଡ଼ାନ୍ ଚିୟାଗେ ଅଙ୍ଗନ୍। 7ଯଦି ନିନ୍ କୁକ୍କୁ ନୁହିଁକିରି ଏଙ୍ଗାନ୍ ଯୋହାର୍ କାମୟ ହାଲେ ଇବ୍ଡ଼ା ଜାମାଦ୍ ନିଙ୍ଘାଏ ମାନକଦ୍।” 8ଲେକିନ୍ ଯୀଶୁସ୍ ଆବନ୍ ଯାବାବ୍ ଚିଚ୍ଚାସ୍, “ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍ଚ୍କା ରାଇ କା ନିଜର୍ ପ୍ରାଭୁ ପାର୍ମେଶ୍ଵାର୍ସିନ୍ ଖାଲି ଯୋହାର୍ କାମା ଆରୁ ଆସ୍କି ଖାଲି ସେବା କାମା।” 9ଆନ୍ତିନ୍ ଶାଏତାନ୍ ଯୀଶୁସିନ୍ ଯେରୁଶାଲେମ୍ ସହର୍ ଅଚ୍ଚାକେରା ଆରୁ ମନ୍ଦିର୍ଘି ଚୁନ୍ଦଲୁନୁ ଇଲ୍ତିକିରି ଯୀଶୁସିନ୍ ତେଙ୍ଗିୟାଦ୍, “ଯଦି ନିନ୍ ପାର୍ମେଶ୍ଵାର୍ସ୍କି ହାଦ୍ଦୁୟ, ହାଲେ ଇସ୍ତି କିୟାଁ ଡେଗାଚା; 10ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇଦ୍, ବାଙ୍ଗ୍ ପାର୍ମେଶ୍ଵାର୍ସ୍ ତାଙ୍ଘା ଦୂଁତ୍ଜାମାରିନ୍ ନିଙ୍ଘା ବାରେନୁ ହୁକୁମ୍ ଚିନାସ୍ କା ଆବ୍ଡ଼ାର୍ ନିଙ୍ଗାନ୍ ବାଛାବର୍। 11ଆରୁ ଆବ୍ଡ଼ାର୍ ନିଙ୍ଗାନ୍ ତାହ୍ମା ହେଖ୍ଖାତି ପାଣ୍ସର୍ ଏକାସାନ୍ ଚାଁଚାତି ନିଙ୍ଘା ହେଡ୍ଡୁନ୍ ଚଟ୍ ମା ଲାଗ୍ଗଦ୍।” 12ଆରୁ ଯୀଶୁସ୍ ତାଙ୍ଗାନ୍ ଯାବାବ୍ ଚିଚ୍ଚାସ୍, “ପାବିତାର୍ ଶାସ୍ତ୍ରନୁ ଏନ୍ନେ ତେଙ୍ଗାକେର୍କିଚି କା ନିନ୍ ପ୍ରାଭୁ ନିଜର୍ ପାର୍ମେଶ୍ୱାର୍ସିନ୍ ବିଡ଼୍ଚେ ଆମ୍କେ ଏରା।” 13ଏନ୍ନେ ଜାମା ରକମ୍ଘି ବିଡ଼୍ଚେ ଏର୍କା ପାଛ୍ଲି, ଥୋଡ଼େ ସାମାୟଘି ଲାଗାନ୍ ଶାଏତାନ୍ ଯୀଶୁସ୍କି ଚାହାନ୍ତି ବୁଙ୍ଗିୟା କେରା।
ଯୀଶୁସ୍ ତାଙ୍ଘା ସେବା ନାଲ୍ଖୁ ସୁରୁ କାମାଲ୍ଦାସ୍
(ମାତିସ୍ ୪:୧୨-୧୭; ମାର୍କୁସ୍ ୧:୧୪,୧୫)
14ଇଦ୍ଘି ପାଛ୍ଲିଘି ଶକ୍ତିତି ଭାର୍ପୁର୍ ମାନିକିରି ଯୀଶୁସ୍ ଗାଲିଲୀ ଜିଲ୍ଲାଗେ ବାର୍ଚାସ୍ ଆରୁ ତାଙ୍ଘା ନାମେଦ୍ ଆସ୍ତା ଚାହାଚାହାନ୍ତା ରାଜୀନୁ ଫାଏଲାରାଚା କେରା। 15ଆରୁ ଯୀଶୁସ୍ ୟାହୁଦୀ ଜାମାର୍ଘି ସାଭା ଆଡ଼୍ପାନୁ ଉପ୍ଦେଶ୍ ଚିଆଲିୟାସ୍ ଆରୁ ଆସ୍କି ଜାମା ଆଲାର୍ ମାହିମା କାମାଲିଆର୍।
ଯୀଶୁସିନ୍ ନାଜ୍ରେତ୍ତା ଆଲାର୍ ଗ୍ରହନ୍ ମା କାମାଲ୍ନାଏ
(ମାତିସ୍ ୧୩:୫୩-୫୮; ମାର୍କୁସ୍ ୬:୧-୬)
16ଯୀଶୁସ୍ ନାଜ୍ରେତ୍ ସହର୍ଗେ ବାର୍ଚାସ୍, ଏକାସାନ୍ କା ତାଙ୍ଗାନ୍ ପୋସିୟାର୍ ପାର୍ତାଚାର୍। ପାବିତାର୍ ଉଲ୍ଲାନୁ ଯୀଶୁସ୍ ତାଙ୍ଘା ରୀତି ଅନୁସାର୍ ସାଭା ଆଡ଼୍ପାନୁ କର୍ଚାସ୍ କେରାସ୍। ଆରୁ ଆସ୍ ପାବିତାର୍ ଶାସ୍ତ୍ରବନ୍ ପାଢ଼ାଗେ ଉସ୍କାରାଚାସ୍, 17ଆରୁ ଆସ୍କେ ଇଶାୟାହ୍ସ୍ ନାବୀସ୍କି ବହିନ୍ ଚିୟାକେରା, ଆରୁ ଯୀଶୁସ୍ ବହିବନ୍ ଖୋଲ୍ଚାସ୍ ଏକାସାନ୍ କା ଲେଖ୍ଚ୍କା ରାଇଦ୍: 18ପ୍ରାଭୁସ୍କି ଆତ୍ମାଦ୍ ଏଙ୍ଘା ମିଆଁ ରାଇଦ୍, ଏନ୍ଦେର୍ଗେକା ଏନ୍ ଗରୀବ୍ ଆଲାରିନ୍ ସୁସାମାଚାର୍ ଶୁଣାବାନାଘି ଲାଗାନ୍ ଏଙ୍ଘାଏ ଆଭିଷେକ୍ କାମ୍ଚାସ୍, ଗୁଡ୍ଡକାରିନ୍ ଛାଡ଼ାବାନାଘି ଆରୁ କାଁଣାରିନ୍ ଏରାଗେ ଶକ୍ତି ଚିନାଘି ସୁସାମାଚାର୍ ଶୁଣାବାଗେ, ଆସ୍ ଏଙ୍ଗାନ୍ ଖାସ୍ ଚାଜିକିରି ଆରୁ ହକ୍ ଚିକିରି ତାଏକାଦାସ୍ 19ଏକା ଆଲାର୍ ଦୁଃଖୁ ସାହ୍ନାଏ ଆବ୍ଡ଼ାର୍ଗେ ଏନ୍ ମୁକ୍ତି ଚିୟାଗେ ଆରୁ ପ୍ରାଭୁସ୍କି ଦାୟା କାମ୍ନାଘି ବଛର୍ ଘୋଷ୍ଣା କାମାଗେ ପାର୍ମେଶ୍ଵାର୍ସ୍ ଏଙ୍ଗାନ୍ ତାଏକାଦାସ୍। 20ଆନ୍ତିନ୍ ଯୀଶୁସ୍ ବହିବନ୍ ବନ୍ଦ କାମିକିରି ଆ ବହିବନ୍ ସେବକ୍ସ୍କେ ଚିଇକିରି ଅକ୍କିୟାସ୍। ସାଭା ଆଡ଼୍ପାନ୍ତା ଜାମା ଆଲାର୍ଘି ନଜର୍ ଆସ୍କି ମିଆଁ ରାଚାଦ୍। 21ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗାଗେ ଲାଗ୍ଗିୟାସ୍, “ଇନ୍ନା ପାବିତାର୍ ଶାସ୍ତ୍ରନୁ ଇ କାତ୍ଥାଦ୍ ନିହ୍ମା ଆଘ୍ଲି ପୁରା ମାନ୍ଚାଦ୍।” 22ଆରୁ ଜାମା ଆଲାର୍ ଯୀଶୁସ୍କି ମାହିମା କାମ୍ଚାର୍। ଆବ୍ଡ଼ାର୍ ଯୀଶୁସ୍କି ତେଙ୍କା ବାନେ-ବାନେ କାତ୍ଥାଗୁଠିନ୍ ମେନିକିରି ଆଚ୍ମିତ୍ ମାନାକାଲିୟାର୍ ଆରୁ ଆବ୍ଡ଼ାର୍ ତେଙ୍ଗାଗେ ଲାଗ୍ଗିୟାର୍, “ଇସ୍ ଯୋଷେଫ୍ସ୍କି ହାଦ୍ଦୁ ମାଲ୍ଦାସ୍ କାଁଏ?” 23ଆଙ୍ଗେନ୍ ଆବ୍ଡ଼ାରିନ୍ ଯୀଶୁସ୍ ତେଙ୍ଗିୟାସ୍, “ନିମ୍ ଜାମାର୍ ଜରୁର୍ ଇ ତେଙ୍କା କାତ୍ଥାନ୍ ଏଙ୍ଗାନ୍ ଶୁଣାବର୍ କା ବଏଦ୍ ନିଜ୍କେନିଜ୍ ବାନେ କାମସ୍। କାଫାର୍ନାହୁମ୍ନୁ ଏକାଦ୍-ଏକାଦ୍ ମାନ୍ଚ୍କିଚି, ଏମ୍ ଆଦ୍ଘି ବାରେନୁ ମେନ୍ଚ୍କାଦାମ୍ ଆବ୍ଡ଼ା ଜାମାନ୍ ନିଙ୍ଘାଏ ନିଜର୍ ଜନମ୍ ଆଡ୍ଡାନୁ କାମା ଆରୁ ଏଦା।” 24ଆରୁ ଯୀଶୁସ୍ ଆରୁଅହନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ନିଜର୍ ଜନମ୍ ଆଡ୍ଡାନୁ ଏକିନ୍ ନାବୀର୍ଘି ଆଦର୍ମାଇନ୍ ମା ମାନିଦ୍। 25ଲେକିନ୍ ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଏଲିୟାସ୍କି ସାମାୟନୁ ଯେତ୍କବାକେନ୍ ସାଢ଼େତିନ୍ ବଛର୍ତକ୍ ଚେପୁ ମା ବାର୍ଚା ଆରୁ ଜାମା ରାଜୀନୁ ମୁରୁକ୍ ବାଡ଼୍କା ଆକାଲ୍ ମାନ୍ଚା, ତା ହୁ ସାମାୟନୁ ଇସ୍ରାଏଲ୍ନୁ ଢେର୍ ରାଣ୍ତିର୍ ରାଚାର୍, 26ହାଲେହି ଏଲିୟାସ୍ ଆବ୍ଡ଼ାର୍ଘିନ୍ତି ନେଖାସାନ୍ହି ମା ତାଇୟା କେରାସ୍ ଲେକିନ୍ ଆସିନ୍ ଖାଲି ସିଦୋନ୍ ସହର୍ତା ସାରିଫତ୍ଘି ଅଣ୍ଟା ରାଣ୍ଡି ଆଲିସାନ୍ ତାଇୟାକେରା। 27ଆରୁ ଇଲୀଶା ନାବୀସ୍କି ସାମାୟନୁ ଇସ୍ରାଏଲ୍ ରାଜୀନୁ ଢେର୍ କୋଢ଼୍ ବେହ୍ମରିୟାର୍ ରାଚାର୍, ହାଲେହି ଆବ୍ଡ଼ାର୍ଘି ଭିତର୍ନୁ ନେଦ୍ହି ମାଲ୍ଲା, ଲେକିନ୍ ସିରିଆନ୍ତା ନାମାନ୍ସିନ୍ ଖାଲି ଶୁଦ୍ଧ୍ କାମିକିରି ବାନେ କାମାକେର୍କିଚା।” 28ଇ କାତ୍ଥାନ୍ ମେନିକିରି ସାଭା ଆଡ଼୍ପାନୁ ରୁ ଜାମା ଆଲାର୍ ମୁରୁକ୍ ଖୀସାରାଚାର୍ କେରାର୍। 29ଆରୁ ଆବ୍ଡ଼ାର୍ ଉସ୍କାରିକିରି ଯୀଶୁସିନ୍ ସହର୍ତି ବାହ୍ରି ଅଥ୍ରେଇଚାର୍ ଆରୁ ଆବ୍ଡ଼ାର୍ଘି ସହର୍ଦ୍ ଏକା ପାର୍ତ୍ତା ମିଆଁ ରାଚା, ଆବ୍ଡ଼ାର୍ ଯୀଶୁସିନ୍ ପାର୍ତ୍ତାଘି ଚୁନ୍ଦଲୁତକ୍ ଅଚ୍ଚାର୍ କେରାର୍, ଏନ୍ଦେର୍ଗେକା ଆସିନ୍ କିୟାଁ ତୁକ୍କାଗେ ବେଦ୍ଦାଲିୟାର୍। 30ଲେକିନ୍ ଯୀଶୁସ୍ ଆବ୍ଡ଼ାର୍ଘି ମାଝାନ୍ତି ଉର୍ଖିୟାସ୍ ଆରୁ ବୁଙ୍ଗେଇଚାସ୍।
ଯୀଶୁସ୍ ଅଣ୍ଟା ଆଲାସ୍କି ମେଦୁନ୍ତି ଭୁତ୍ତୁଗୁଠିନ୍ ଅଥ୍ରାଲ୍ଦାସ୍
31ଯୀଶୁସ୍ ଗାଲିଲୀ ପ୍ରଦେଶ୍ତା କାଫାର୍ନାହୁମ୍ ସହର୍ଗେ ବାର୍ଚାସ୍ ଆରୁ ପାବିତାର୍ ଉଲ୍ଲାନୁ ଆଲାରିନ୍ ଶିକ୍ଷା ଚିୟାଗେ ଲାଗ୍ଗିୟାସ୍। 32ଆରୁ ଆବ୍ଡ଼ାର୍ ଆସ୍କି ଶିକ୍ଷା ମେନିକିରି ଆଚ୍ମିତ୍ ମାନାକାଲିୟାର୍, ଏନ୍ଦେର୍ଗେକା ଆସ୍ ହକ୍ତି ତେଙ୍ଗାଲିୟାସ୍। 33ଅନ୍ଦୁଲ୍ ସାଭା ଆଡ଼୍ପାନୁ ଅଣ୍ଟା ଭୁତ୍ତୁ ଲାକ୍କା ଆଲାସ୍ ରାଚାସ୍। ଆସ୍ ଜୋର୍ସେ ଚିର୍ରାରାଚାସ୍, 34“ହେ ନାଜ୍ରେତ୍ତା ଯୀଶୁ! ନିନ୍ ଏଙ୍ଘାଗାନେ ଏନ୍ଦେର୍ କାମା ବେଦ୍ଦାଲ୍ଦାଏ, ନିନ୍ ଏହ୍ମାଏ ସର୍ବନାଶ୍ କାମା ବାର୍ଚ୍କାଦାଏ କାଁଏ? ଏନ୍ ଆହାଲ୍ଦାନ୍ କା ନିନ୍ ନେଦ୍ ନିନ୍ ପାର୍ମେଶ୍ଵାର୍ସ୍କି ତାଏକା ଆ ପାବିତାର୍ ଆଲାଏ।” 35ଯୀଶୁସ୍ ଆସିନ୍ ଧାମ୍କିକିରି ତେଙ୍ଗିୟାସ୍, “କାଡ଼େ-କାଡ଼େ ରା, ଇ ଆଲାସ୍ସ୍ତି ବାହ୍ରି ଉର୍ଖୁ କାଲ୍।” ଆଙ୍ଗେନ୍ ଭୁତ୍ତୁଦ୍ ଜାମା ଆଲାର୍ଘି ଏର୍ତେ-ଏର୍ତେ ଆ ଆଲାସ୍ସିନ୍ ହେଁହ୍ଲାନୁ କାଚ୍ଡ଼େଇଚା ଆରୁ ଆସ୍କି ଏନ୍ଦେର୍ହି ନୁକ୍ସାନ୍ ମା କାମିକିରି ଆ ଆଲାସ୍ସ୍ତି ଉର୍ଖିଆ କେରା। 36ଇବନ୍ ଏରିକିରି ଜାମା ଆଲାର୍ ଆଚ୍ମିତ୍ ମାନ୍ଚାର୍ କେରାର୍ ଆରୁ ତାମ୍-ତାମ୍ କାଚ୍ନେଖ୍ର୍ତେ ରାଚାର୍, “ଇଦ୍ ଏସ୍କେ କାତ୍ଥାଦ୍! ଆସ୍ ହକ୍ ଆରୁ ଶକ୍ତିତି ଭୁତ୍ତୁଗୁଠିନ୍ ହୁକୁମ୍ ଚିଦାସ୍ ଆରୁ ଆବ୍ଡ଼ାଦ୍ ଉର୍ଖି କାଇଦ୍।” 37ଇଦ୍ଘି ପାଛ୍ଲି ଯୀଶୁସ୍କି ବାରେନୁ ହୁ ରାଜୀଘି ଚାରିହ୍ ପାଖା ଫାଏଲାରାଚା କେରା।
ଯୀଶୁସ୍ ଢେର୍ ଆଲାରିନ୍ ବାନେ କାମାଲ୍ଦାସ୍
(ମାତିସ୍ ୮:୧୪-୧୭; ମାର୍କୁସ୍ ୧:୨୯-୩୪,୩୫-୩୯)
38ଆନ୍ତିନ୍ ଯୀଶୁସ୍ ସାଭା ଆଡ଼୍ପାନ୍ତି ଉର୍ଖିୟାସ୍ ଆରୁ ଶିମୋନ୍ସ୍କି ଆଡ଼୍ପାଗେ କେରାସ୍। ଶିମୋନ୍ସ୍କି ଶାଶ୍ଗେ ମୁରୁକ୍ ଯୋର୍ ନାଣି ଧାର୍ଚ୍କିଚା, ଆରୁ ଆଲାର୍ ଆ ଆଲିଘିଲାଗାନ୍ ଯୀଶୁସିନ୍ ଆର୍ଜୀବିନ୍ତି କାମ୍ଚାର୍। 39ଆଙ୍ଗେନ୍ ଯୀଶୁସ୍ ଆଦ୍ଘି ଚାହାଗେ କେରାସ୍ ଆରୁ ନାଣିବନ୍ ଧାମ୍କାଚାସ୍ ଆରୁ ନାଣିଦ୍ ଏତ୍ତିୟାକେରା, ଆଦ୍ ଆଖାନେନ୍ ଉସ୍କାରାଇକିରି ଆବ୍ଡ଼ାର୍ଘି ସେବା କାମା ଲାଗ୍ଗିୟାଦ୍। 40ବିଡ଼ି ଅକ୍କନାବାକେନ୍, ଆଲାର୍ ନାନା ରକମ୍ଘି ବେମାର୍ନୁ ରୁ ଆଲାରିନ୍ ଯୀଶୁସ୍କି ଚାହାଗେ ଅନ୍ଦରାର୍, ଆରୁ ଯୀଶୁସ୍ ଅର୍ତୁ ଅର୍ତୁର୍ଘି ମିଆଁ ହେଖ୍ଖା ଉଇକିରି ଆବ୍ଡ଼ାରିନ୍ ବାନେ କାମ୍ଚାସ୍। 41ଆରୁ ଢେର୍ ଆଲାର୍ଘି ମେଦୁନ୍ତି ଭୁତ୍ତୁଗୁଠିଦ୍ହି ଏନ୍ନେ ଚିର୍ରାରାତେ ଉର୍ଖା, “ନିନ୍ ପାର୍ମେଶ୍ଵାର୍ସ୍କି ହାଦ୍ଦୁୟ ଆରୁ ଆସ୍ ଭୁତ୍ତୁଗୁଠିନ୍ ଧାମ୍କିକିରି କାଚ୍ନେଖ୍ରା ମା ଚିଚ୍ଚାସ୍ ଏନ୍ଦେର୍ଗେକା ଆସ୍ ଖ୍ରୀସ୍ତ୍ ଆବନ୍ ଆବ୍ଡ଼ାର୍ ଆକ୍କାଚାର୍,” 42ଯୀଶୁସ୍ ପାଇରି ବିଜ୍ଜକାନ୍ତି ଉର୍ଖିକିରି ଅଣ୍ଟା ଶୁନ୍ଶାନ୍ ଆଡ୍ଡାଗେ କେରାସ୍। ଆଲାର୍ ଯୀଶୁସିନ୍ ବେଦ୍ଦତେ-ବେଦ୍ଦତେ ତାଙ୍ଘା ଚାହାଗେ ବାର୍ଚାର୍ ଆରୁ ତାମାନ୍ ଆମ୍ବିକିରି ମା କସ୍ ବୁଲି ଆସିନ୍ ଆର୍ଜୀବିନ୍ତି କାମ୍ଚାର୍। 43ଲେକିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏଙ୍ଗାଗେ ଦୁସ୍ରା ସହର୍ ଗୁଠିନୁହି ପାର୍ମେଶ୍ଵାର୍ସ୍କି ରାଜୀଘି ବାରେନୁ ସୁସାମାଚାର୍ ଶୁଣାବାଗେ ରାଇଦ୍ ହୁଦ୍ଘିଲାଗାନ୍ ଏଙ୍ଗାନ୍ ତାଏକା ରାଇ।” 44ଆରୁ ଆସ୍ ୟାହୁଦା ପ୍ରଦେଶ୍ଘି ସାଭା ଆଡ଼୍ପାଗୁଠିନୁ ସୁସାମାଚାର୍ ଚିତେ ରାଚାସ୍।
5ପହିଲ୍ ଚେଲାରିନ୍ ଯୀଶୁସ୍ ମେହାଁଲ୍ଦାସ୍
(ମାତିସ୍ ୪:୧୮-୨୨; ମାର୍କୁସ୍ ୧:୧୬-୨୦)
1ଅନ୍ଦୁଲ୍ ଯୀଶୁସ୍ ଯେତ୍କବାକେନ୍ ଗେନ୍ନେସାରେତ୍ ହଁସ୍ରା ଖାଁଣିନୁ ଇଜ୍ଜକାଚାସ୍, ହତ୍କବାକେନ୍ ଆଲାର୍ ପାର୍ମେଶ୍ୱାର୍ସ୍କି ବଚନ୍ ମେନାଗେ ତାଙ୍ଘା ମିଆଁ ତିର୍ହାନେଖ୍ରାକାଲିୟାର୍, 2ଆରୁ ଯୀଶୁସ୍ ହଁସ୍ରା ଖାଁଣିନୁ ଯୋଡ଼େ ଡଙ୍ଗା ରାନାନ୍ ଏରିୟାସ୍, କେଉଁଟାର୍ ଡଙ୍ଗାନ୍ତିନ୍ ଏତ୍ତିୟାର୍ ଆରୁ ଜାଲ୍ଲି ନଣାଲିୟାର୍। 3ଆସାନ୍ ରୁ ଡଙ୍ଗା ଭିତର୍ନୁ, ଏକାଦ୍ କା ଶିମୋନ୍ସ୍କି ରାଚା, ଯୀଶୁସ୍ ଆନ୍ନୁ ଆର୍ଗିକିରି ହଁସ୍ରା ଖାଁଣିନ୍ନ୍ତି କାଟେ ଗେଚ୍ଛା ଆମ୍ମୁ ଉଲା ହୁଆଗେ ତେଙ୍ଗିୟାସ୍। ଆନ୍ତିନ୍ ଆସ୍ ଡଙ୍ଗାନୁ ଅକ୍କିକିରି ଆଲାରିନ୍ ଉପ୍ଦେଶ୍ ଚିଆ ଲାଗ୍ଗିୟାସ୍। 4ଉପ୍ଦେଶ୍ ମୁଞ୍ଜର୍କା ପାଛ୍ଲି ଯୀଶୁସ୍ ଶିମୋନ୍ସିନ୍ ତେଙ୍ଗିୟାସ୍, “ଡଙ୍ଗାନ୍ ଗାଡ୍ଡି ତାରା ହୁଆ, ଆରୁ ଇଞ୍ଜୋ ଧାରାଗେ ଜାଲ୍ଲିନ୍ ଆଚ୍ଛା।” 5ଆଙ୍ଗେନ୍ ଶିମୋନ୍ସ୍ ଯାବାବ୍ ଚିଚ୍ଚାସ୍, “ହେ ପ୍ରାଭୁ, ଏମ୍ ମାଁହାବିସ୍ତା ଖାଟ୍କାମ୍ ହାଲେହି ଅଣ୍ଟାହି ଇଞ୍ଜୋ ଧାରା ପଲ୍ଲକାମିନ୍; ଲେକିନ୍ ନିହ୍ମା ତେଙ୍କାତି ଏନ୍ ଆରୁଅହନ୍ ଜାଲ୍ଲି ଆଚ୍ଛନ୍।” 6ଯୀଶୁସ୍କି କାତ୍ଥା ମେନିକିରି ଆବ୍ଡ଼ାର୍ ଆରୁଅହନ୍ ଜାଲ୍ଲି ଆଚ୍ଛିୟାର୍ ଆରୁ ଜାଲ୍ଲିନୁ ଏତ୍କ ଇଞ୍ଜୋ ଲାଗ୍ଗିୟା ଯେ, ଜାଲ୍ଲିଦ୍ ଏଟ୍ର୍ନା ଲେଖା ମାନ୍ଚାକେରା। 7ହୁଦ୍ଘିଲାଗାନ୍ ଆବ୍ଡ଼ାର୍ ଦୁସ୍ରା ଡଙ୍ଗାନ୍ତା ତାହ୍ମା ସାଙ୍ଗେରିନ୍ ମଦେତ୍ କାମାଗେ ଠାରିଆଚାର୍ ଆରୁ ମେହିଁଆର୍, ଆବ୍ଡ଼ାର୍ ବାର୍ଚାର୍ ଆରୁ ଯୋଡ଼େ ଡଙ୍ଗାନ୍ ଇଞ୍ଜୋତି ନିନ୍ଦେଇଚାର୍ ଆରୁ ଡଙ୍ଗାଦ୍ ମୁଲ୍ହ୍ନା ଲେଖା ମାନ୍ଚାକେରା। 8ଇବନ୍ ଏରିକିରି ଶିମୋନ୍ ପାତ୍ରାସ୍ ଯୀଶୁସ୍କି ହେଡ୍ଡମୁଲିନୁ ଖାତ୍ରିକିରି ତେଙ୍ଗିୟାସ୍, “ହେ ପ୍ରାଭୁ, ଏଙ୍ଘାସ୍ତି ବୁଙ୍ଗାକାଲା, ଏନ୍ତା ଅଣ୍ଟା ପାପୀ ଆଲାନ୍!” 9ଜାଲ୍ଲିନୁ ଏତ୍କ-ଏତ୍କ ଇଞ୍ଜୋ ଲାଗ୍ଗନାନ୍ ଏରିକିରି ଶିମୋନ୍ସ୍ ଆରୁ ତାଙ୍ଘା ସାଙ୍ଗେର୍ ମୁରୁକ୍ ଆଚ୍ମିତ୍ ମାନ୍ଚାର୍ କେରାର୍, 10ଆରୁ ଜେବେଦୀସ୍କି ଯୋଡ଼େ ହାଦ୍ଦୁର୍ ୟାକୁବ୍ ଆରୁ ଯୋହାନ୍, ଏକାର୍ କା ଶିମୋନ୍ସ୍ଗାନେ ନାଲ୍ଖୁ କାମାଲିୟାର୍, ଆବ୍ଡ଼ାର୍ହି ଇବନ୍ ଏରିକିରି ଆଚ୍ମିତ୍ ମାନ୍ଚାର୍ କେରାର୍। ଆଙ୍ଗେନ୍ ଯୀଶୁସ୍ ଶିମୋନ୍ସିନ୍ ତେଙ୍ଗିୟାସ୍, “ଆମା ଏଲ୍ଚା; ଆକ୍କୁନ୍ନ୍ତି ନିନ୍ ଆଲାରିନ୍ ଏଙ୍ଘା ଚେଲା ବାନାବୟ।” 11ଆଙ୍ଗେନ୍ ଆବ୍ଡ଼ାର୍ ହଁସ୍ରା ଖାଁଣିନୁ ଡଙ୍ଗାନ୍ ଅନ୍ଦରାର୍ ଆରୁ ଜାମାନ୍ ଆମ୍ଵିକିରି ଯୀଶୁସ୍କି ପାଛ୍ଲି-ପାଛ୍ଲି କେରାର୍।
ଯୀଶୁସ୍ କୋଢ଼୍ ବେହ୍ମରିୟାସିନ୍ ବାନେ କାମାଲ୍ଦାସ୍
(ମାତିସ୍ ୮:୧-୪; ମାର୍କୁସ୍ ୧:୪୦-୪୫)
12ଯୀଶୁସ୍କି ଅଣ୍ଟା ସହର୍ନୁ ରାନାବାକେନ୍, ଅଣ୍ଟା କୋଢ଼୍ ବେହ୍ମରିୟାସ୍ ବାର୍ଚାସ୍ ଆସ୍କି ମେଦୁ ଗୋଟା ଜାମାତାରା ଖାଦି ନିନ୍ଦିଆ କେର୍କିଚା; ଆସ୍ ଯୀଶୁସିନ୍ ଏରିକିରି ତାଙ୍ଘା ହେଡ୍ଡମୁଲିନୁ ଖାତ୍ରାସ୍ ଆରୁ ଆର୍ଜୀବିନ୍ତି କାମିକିରି ତେଙ୍ଗିୟାସ୍, “ହେ ପ୍ରାଭୁ, ଯଦି ନିମ୍ ଚାହଁର୍ ହାଲେ ଏଙ୍ଗାନ୍ ଶୁଦ୍ଧ୍ କାମା ଅଙ୍ଗର୍।” 13ଆଙ୍ଗେନ୍ ଯୀଶୁସ୍ ହେଖ୍ଖା ଲାମ୍ବାବାଚାସ୍ ଆରୁ ଆସିନ୍ ଏସ୍ରିକିରି ତେଙ୍ଗିୟାସ୍, “ଏନ୍ ଚାହାଁଲ୍ଦାନ୍ କା ନିନ୍ ଶୁଦ୍ଧ୍ ମାନାକାଲା।” ଆଖାନେନ୍ ଆସ୍ କୋଢ଼୍ ବେମାର୍ତି ଶୁଦ୍ଧ୍ ମାନ୍ଚାସ୍କେରାସ୍। 14ଆରୁ ଯୀଶୁସ୍ ଆସିନ୍ ଚେତାବାନୀ ଚିଇକିରି ତେଙ୍ଗିୟାସ୍, “ଏନ୍ ଏକା ନାଲ୍ଖୁନ୍ କାମ୍ଚ୍କାଦାନ୍ ଆଦ୍ଘି ବାରେନୁ ନେକାନ୍ହି ଏନ୍ଦେର୍ହି ଆମ୍କେ ତେଙ୍ଗା, ଲେକିନ୍ କାଇକିରି ନିଜ୍କେ ପୁରୋହିତ୍ଜାମାରିନ୍ ଏଦା, ଆରୁ ଶୁଦ୍ଧ୍ ମାନ୍ନାଘି ବାରେନୁ ମୁଶା ନାବୀସ୍ ପାବିତାର୍ ଶାସ୍ତ୍ରନୁ ଏକା ବଲୀବନ୍ ଠାହ୍ରାଚ୍କାଦାସ୍ ଆବନ୍ ଚାଢ଼ାବା, ଏନ୍ଦେର୍ଗେକା ଆଦ୍ ଆଲାର୍ଘି ଆଘ୍ଲି ସାକ୍ଷୀ ମାନଦ୍ କା ନିନ୍ ବାନେ ମାନ୍ଚ୍କାଏ କେର୍କାଦାଏ।” 15ଯୀଶୁସ୍କି ନାମେଦ୍ ଫାଏଲାରାତେ କାଲିୟା, ଢେର୍ ଆଲାର୍ ତାଙ୍ଘା ଉପ୍ଦେଶ୍ ମେନାଗେ ଆରୁ ନିଜର୍-ନିଜର୍ ବେମାର୍ତି ବାନେ ମାନାଗେ ଠୁଡ଼ିୟାରାଗେ ଲାଗ୍ଗିୟାର୍। 16ଲେକିନ୍ ଯୀଶୁସ୍ ଶୁନ୍ଶାନ୍ ଆଡ୍ଡାଗେ ଅଥାସ୍ କାଇକିରି ବିନ୍ତି କାମାଲିୟାସ୍।
ଯୀଶୁସ୍ ଅଣ୍ଟା ଏକ୍ଆଙ୍ଗିୟା ବେହ୍ମରିୟାସିନ୍ ବାନେ କାମାଲ୍ଦାସ୍
(ମାତିସ୍ ୯:୧-୮; ମାର୍କୁସ୍ ୨:୧-୧୨)
17ଅନ୍ଦୁଲ୍ ଯୀଶୁସ୍ ଉପ୍ଦେଶ୍ ଚିଆଲିୟାସ୍, ହତ୍କବାକେନ୍ ଗାଲିଲୀ ଆରୁ ୟାହୁଦୀଆନ୍ତା ଜାମା ପାଡ଼ାନ୍ତି ଆରୁ ଯେରୁଶାଲେମ୍ତିହି ବାର୍ଚ୍କା ଫାରିସୀ ଆରୁ ପଣ୍ତିତ୍ଜାମାର୍ ଆସାନ୍ ଅକ୍କାଚାର୍, ଆରୁ ବାନେ କାମାଗେ ପ୍ରାଭୁସ୍କି ଶକ୍ତି ଆସ୍କି ମିଆଁ ରାଚା। 18ହତ୍କବାକେନ୍ କେତ୍କ ଆଲାର୍ ଅଣ୍ଟା ଏକ୍ଆଙ୍ଗିୟା ବେହ୍ମରିୟାସିନ୍ ନାଟ୍ରୁନୁ ଚେଡ଼ିକିରି ଅନ୍ଦରାର୍, ଆବ୍ଡ଼ାର୍ ଆସିନ୍ ଉଲା ହୁଆଗେ ଆରୁ ଯୀଶୁସ୍କି ଆଘ୍ଲି ଉଇୟାଗେ କୋଶିଷ୍ କାମାଲିଆର୍। 19ଲେକିନ୍ ଭିଡ଼୍ଘି ଲାଗାନ୍ ବେହ୍ମରିୟାସିନ୍ ଯୀଶୁସ୍କି ଚାହାଗେ ହୁଆଗେ ପାବୁ ମା ହାଖ୍ଖୀୟାର୍ ଆଙ୍ଗେନ୍ ଆବ୍ଡ଼ାର୍ ଆଡ଼୍ପା ମିଆଁ କାଇକିରି ଖାପ୍ରା ଆରୁ ବାତ୍ତାବନ୍ ପାଖିଇକିରି, ମିଁତି ଏକ୍ଆଙ୍ଗିୟା ବେହ୍ମରିୟାସିନ୍ ନାଟ୍ରୁଗାନେ ମାଝାନୁ ଯୀଶୁସ୍କି ଆଘ୍ଲି ଏତ୍ତାଚାର୍। 20ଯୀଶୁସ୍ ଆବ୍ଡ଼ାର୍ଘି ବିଶ୍ଵାସ୍ ଏରିକିରି ଆସିନ୍ ତେଙ୍ଗିୟାସ୍, “ହେ ଭାଇ ନିଙ୍ଘାଏ ପାପ୍ ଛେମା ମାନ୍ଚାକେର୍କିଚି।” 21ଇବନ୍ ଫାରିସୀ ଆରୁ ପଣ୍ତିତ୍ଜାମାର୍ ମେନ୍ଚାର୍ ଆରୁ ମନେ-ମନେ ସୋଚାଗେ ଲାଗ୍ଗିୟାର୍, “ପାର୍ମେଶ୍ଵାର୍ସ୍ସିନ୍ ନିନ୍ଦା କାମୁ ଇ ଆଲାସ୍ ନେଦ୍? ପାର୍ମେଶ୍ଵାର୍ସ୍ସିନ୍ ଆମ୍ବିକିରି ନେଦ୍ ପାପ୍ ଛେମା କାମା ଅଙ୍ଗର୍?” 22ଆବ୍ଡ଼ାର୍ଘି ସୋଚ୍ବନ୍ ଆହିକିରି, ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ମନେ-ମନେ ଏନ୍ଦେର୍ ସୋଚାଲ୍ଦାର୍? 23ଏକାଦ୍ ବାଗ୍ଗେ ସହଜ୍? ‘ନିଙ୍ଘା ପାପ୍ ଛେମା ମାନ୍ଚାକେରା ବୁଲି ତେଙ୍ଗ୍ନାଦ୍ କା ଉସ୍କାରା ଆରୁ ଏକାଏକି କାମା ବୁଲି ତେଙ୍ଗ୍ନାଦ୍!’ 24ଲେକିନ୍ ନିମ୍ ଏତ୍କ ଆହା ଯେ ମୁନୁଷ୍ ହାଦ୍ଦୁସ୍କେ ଦୁନିଆଁନୁ ପାପ୍ ଛେମା କାମାଗେ ହକ୍ ହାଖ୍ଖର୍କିଚି।” ଆନ୍ତିନ୍ ଆସ୍ ଏକ୍ଆଙ୍ଗିୟା ବେହ୍ମରିୟାସିନ୍ ତେଙ୍ଗିୟାସ୍, “ଏନ୍ ନିଙ୍ଗାନ୍ ତେଙ୍ଗାଲ୍ଦାନ୍, ଉସ୍କାରା ଆରୁ ନିଙ୍ଘା ନାଟ୍ରୁ ଉଠାବା ଆରୁ ଆଡ଼୍ପା କାଲା।” 25ହୁଙ୍ଗେନିନ୍ ଆସ୍ ଜାମାର୍ଘି ଆଘ୍ଲି ଉସ୍କାରାଚାସ୍, ଆରୁ ତାଙ୍ଘା ନାଟ୍ରୁ ଚେଡ୍ଡାସ୍, ଆରୁ ପାର୍ମେଶ୍ଵାର୍ସ୍କି ସ୍ତୁତି ମାହିମା କାମ୍ତେ ତାଙ୍ଘା ଆଡ଼୍ପା ବୁଙ୍ଗିୟାସ୍। 26ଆସାନ୍ ରୁ ଜାମା ଆଲାର୍ ଇବନ୍ ଏରିୟାର୍ ଆରୁ ଆଚ୍ମିତ୍ ମାନ୍ଚାର୍ କେରାର୍ ଆରୁ ପାର୍ମେଶ୍ଵାର୍ସ୍କି ସ୍ତୁତି ମାହିମା କାମ୍ତେ ରାଚାର୍ ଆବ୍ଡ଼ାର୍ ମୁରୁକ୍ ଏଲ୍ଚିୟାର୍ କେରାର୍ ଆରୁ ତେଙ୍ଗାଲିୟାର୍, “ଏମ୍ ଇନ୍ନା ଅଣ୍ଟା ଅଦ୍ଭୁତ୍ ନାଲଖୁ ଏର୍କାମ୍!”
ଯୀଶୁସ୍ ଲେବୀସିନ୍ ମେହାଁଲ୍ଦାସ୍
(ମାତିସ୍ ୯:୯-୧୩; ମାର୍କୁସ୍ ୨:୧୩-୧୭)
27ଇଦ୍ଘି ପାଛ୍ଲି ଯୀଶୁସ୍ ଆଡ଼୍ପାନ୍ତି ବାହ୍ରି ଉର୍ଖିୟାସ୍ ଆରୁ ଅଣ୍ଟା ମାଲ୍ଗୁଜାରୀ ଉକ୍ରୁ ଲେବୀ ନାମେଘି ଆଲାସିନ୍ ମାଲ୍ଗୁଜାରୀ ଉକ୍ରୁ ଆଡ୍ଡାନୁ ଏରିୟାସ୍, ଆରୁ ଆସିନ୍ ତେଙ୍ଗିୟାସ୍, “ଏଙ୍ଘା ପାଛ୍ଲି ବାରା।” 28ଆରୁ ଆସ୍ ଉସ୍କାରାଚାସ୍ ଆରୁ ତାଙ୍ଘା ଜାମାନ୍ ଆମ୍ବିକିରି ଯୀଶୁସ୍କି ପାଛ୍ଲି-ପାଛ୍ଲି କେରାସ୍। 29ଆରୁ ଲେବୀସ୍ ତାଙ୍ଘା ଆଡ଼୍ପାନୁ ଯୀଶୁସ୍କି ଲାଗାନ୍ ଅଣ୍ଟା ବାଡ଼୍କା ଭୋଜି ଚିଚ୍ଚାସ୍; ଲେକିନ୍ ଆସାନ୍ ମାଲ୍ଗୁଜାରୀ ଉକ୍ରୁ ଆରୁ ଢେର୍ ଆଲାର୍ଘି ଅଣ୍ଟା ବାଡ଼କା ଭିଡ଼୍ ଆ ଭୋଜିନୁ ଅକ୍କାଚାର୍। 30ଫାରିସୀ ଆରୁ ପଣ୍ତିତ୍ଜାମାର୍ ଯୀଶୁସ୍କି ଚେଲାଜାମାରିନ୍ କୁର୍ବୁର୍ରାଲିୟାର୍ ଆରୁ ଏନ୍ନେ ତେଙ୍ଗାଲିୟାର୍, “ନିମ୍ ମାଲ୍ଗୁଜାରୀ ଉକ୍ରୁ ଆରୁ ପାପୀର୍ଗାନେ ଏନ୍ଦେର୍ଗେ ଅନ୍ଦାର୍ ମହଁଦାର୍?” 31ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ବାନେ ଆଲାର୍ଗେ ବଏଦ୍ସ୍କି ଦାର୍କାର୍ ମାଲ୍ଲା, ଲେକିନ୍ ବେହ୍ମରିୟାର୍ଗେ ବଏଦ୍ସ୍କି ଦାର୍କାର୍ ମାନିଦ୍। 32ଏନ୍ ଧାର୍ମିକ୍ ଆଲାର୍ଗେ ମାଲ୍ଲା, ଲେକିନ୍ ପାପୀ ଜାମାର୍ଘି ମନ୍ବନ୍ ବାଦ୍ଲାଗେ ବାର୍ଚ୍କାଦାନ୍।”
ଉପାସ୍ଘି ବାରେନୁ ଉପ୍ଦେଶ୍
(ମାତିସ୍ ୯:୧୪-୧୭; ମାର୍କୁସ୍ ୨:୧୮-୨୨)
33ଆବ୍ଡ଼ାର୍ ଯୀଶୁସିନ୍ ତେଙ୍ଗିୟାର୍, “ଯୋହାନ୍ସ୍କି ଚେଲାଜାମାର୍ ଧିୟାନ୍-ଧିୟାନ୍ ବିନ୍ତି ଆରୁ ଉପାସ୍ କାମ୍ନାଏ, ଆରୁ ଫାରିସୀ ଜାମାର୍ଘି ଚେଲାର୍ହି ଏନ୍ନେନିନ୍ କାମ୍ନାଏ, ଲେକିନ୍ ନିହ୍ମା ଚେଲାଜାମାର୍ ଅନ୍ନାଏ ମହ୍ଁନାଏ।” 34ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯେତ୍କତକ୍ ବର୍କୁକ୍କସ୍ ବର୍ତିଆର୍ଗାନେ ରସ୍, ଆତ୍କତକ୍ ନିମ୍ ବର୍ତିଆର୍ରିନ୍ ଉପାସ୍ କାମ୍ତା ଅଙ୍ଗର୍ କାଁଏ? 35ଲେକିନ୍ ଆ ଉଲ୍ଲା ବାରଦ୍, ଏକ୍ଲା ବର୍କୁକ୍କସ୍ ବର୍ତିଆସ୍ତି ଭିନେ କାମା କସ୍, ହତ୍କବାକେନ୍ ଆବ୍ଡ଼ାର୍ ଉପାସ୍ କାମର୍।” 36ଯୀଶୁସ୍ ଆବ୍ଡ଼ାରିନ୍ ଆରୁ ଅଣ୍ଟା ନମୁନା ତେଙ୍ଗିୟାସ୍: “ନେଦ୍ହି ପୁନା ଚିଢ଼ାନ୍ ଚାର୍ରିକିରି ପାଚ୍ଚା ଚିଢ଼ାନୁ ମା ସାଟ୍ନାଏ, ମାଲ୍ଲାହାଲେ ପାଚ୍ଚା ଚିଢ଼ାଦ୍ ପୁନା ଚିଢ଼ାନ୍ ଏଟଚଦ୍ ଆରୁ ପୁନା ଚିଢ଼ାଦ୍ ପାଚ୍ଚା ଚିଢ଼ାଗାନେ ମା ଜୁମ୍ରି। 37ନେଦ୍ହି ପୁନା ଦାଖ୍ରାସ୍ବନ୍ ପାଚ୍ଚା ଚାମ୍ଡ଼ାତି ତିୟାର୍ କାମ୍ଚ୍କା କୁପାନୁ ମା ଉଇନାଏ, ମାଲ୍ଲାହାଲେ ଦାଖ୍ରାସ୍ କୁପାବନ୍ ଭଙ୍କା କାମଦ୍, ଆରୁ ଦାଖ୍ରାସ୍ ଆରୁ କୁପାଦ୍ ବର୍ବାଦ୍ ମାନଦ୍କଦ୍। 38ଲେକିନ୍ ପୁନା ଦାଖ୍ରାସ୍ବନ୍ ପୁନା କୁପାନୁ ଉଇନା କାତ୍ଥା। 39ନେଦ୍ହି ପାଚ୍ଚା ଦାଖ୍ରାସ୍ବନ୍ ହାପ୍ପିକିରି ପୁନା ଦାଖ୍ରାସ୍ବନ୍ ହାପ୍ପାଗେ ପସନ୍ଦ୍ ମା କାମ୍ନାଏ ଆରୁ ତେଙ୍ଗ୍ନାଏ, ପାଚ୍ଚାଦିନ୍ ବାନେଦ୍।”
6କେତ୍କ ଫାରିସୀଜାମାର୍ ଯୀଶୁସ୍କି ଭୁଲ୍ ଗାଲ୍ତି ଅଥ୍ରା ବେଦ୍ଦାଲ୍ନାଏ
(ମାତିସ୍ ୧୨:୧-୮; ମାର୍କୁସ୍ ୨:୨୩-୨୮)
1ଅନ୍ଦୁଲ୍ ପାବିତାର୍ ଉଲ୍ଲାନୁ ଯୀଶୁସ୍ ତାଙ୍ଘା ଚେଲାର୍ଗାନେ ଗହମ୍ ବାଟ୍କି ଉଜ୍ଗୋନ୍ କାନାବାକେନ୍, ତାଙ୍ଘା ଚେଲାଜାମାର୍ ଗହମ୍ ଚାନ୍ନୁବନ୍ ଉର୍ଇକିରି ହେଖ୍ଖାନୁ ରାମ୍ଦା-ରାମ୍ଦା ମହାଁଲିୟାର୍। 2ଲେକିନ୍ ଫାରିସୀ ଜାମାର୍ଘି ଭିତର୍ନୁ କେତ୍କ ଲୋକ୍ ତେଙ୍ଗିୟାର୍, “ପାବିତାର୍ ଉଲ୍ଲାନୁ ଏକା ନାଲ୍ଖୁନ୍ ମା କାମ୍ନା କାତ୍ଥା ଆ ନାଲ୍ଖୁନ୍ ନିମ୍ ଏନ୍ଦେର୍ଗେ କାମାଲ୍ଦାର୍?” 3ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ଦାଉଦ୍ସ୍ ଆରୁ ତାଙ୍ଘା ସାଙ୍ଗେର୍ଗେ କିଡ଼ା ଲାଗ୍ଗିୟାଦ୍, ଆଙ୍ଗେନ୍ ଦାଉଦ୍ସ୍ ଏନ୍ଦେର୍ କାମ୍ଚ୍କାଚାସ୍? ଆବନ୍ ନିମ୍ ପାବିତାର୍ ଶାସ୍ତ୍ରନୁ ମାଲ୍ଲା ପାଢ଼ୁର୍ କାଁଏ? 4ଆସ୍ ଏସ୍କେ ପାର୍ମେଶ୍ଵାର୍ସ୍କି ଆଡ଼୍ପାନୁ କରିକିରି, ଚାଢ଼ାବାଚ୍କା ଆସ୍ମାବନ୍ ଅଚ୍ଚାସ୍ ଆରୁ ତାନ୍ ନିଜେ ମଖ୍ଖାସ୍, ଆରୁ ତାଙ୍ଘା ସାଙ୍ଗେରିନ୍ହି ମହତାଚାସ୍? ଇବନ୍ ପୁରୋହିତ୍ଜାମାରିନ୍ ଆମ୍ବିକିରି ନେକାହି ମହାଁଗେ ହକ୍ ମାଲ୍ଲାଦ୍।” 5ଆରୁ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ମୁନୁଷ୍ ହାଦ୍ଦୁସ୍ ପାବିତାର୍ ଉଲ୍ଲାନ୍ତାହି ପ୍ରାଭୁସ୍।”
ହାଏକା ହେଖ୍ଖାବାଲା ଅଣ୍ଟା ଆଲାସିନ୍ ଯୀଶୁସ୍ ବାନେ କାମାଲ୍ଦାସ୍
(ମାତିସ୍ ୧୨:୯-୧୪; ମାର୍କୁସ୍ ୩:୧-୬)
6ଯୀଶୁସ୍ ଆରୁ ଅଣ୍ଟା ପାବିତାର୍ ଉଲ୍ଲାନୁ ସାଭା ଆଡ଼୍ପାନୁ କରିକିରି ଶିକ୍ଷା ଚିଆଲିୟାସ୍; ଆସାନ୍ ଅଣ୍ଟା ଆଲାସ୍ ରାଚାସ୍ ଆସ୍କି ତିନା ହେଖ୍ଖା ହାଇୟା କେର୍କିଚା। 7ପଣ୍ତିତ୍ ଆରୁ ଫାରିସୀଜାମାର୍ ମୋଉକା ବେଦ୍ଦାଲିୟାର୍ କା ଯୀଶୁସ୍ ପାବିତାର୍ ଉଲ୍ଲାନୁ ନେକିନିନ୍ ବାନେ କାମସ୍ ହାଲେ ନାମ୍ ତାଙ୍ଘା ମିଆଁ ଦୋଷ୍ ଚିଆଅଙ୍ଗତ୍। 8ଲେକିନ୍ ଆବ୍ଡ଼ାର୍ଘି ସୋଚ୍ବନ୍ ଆହିକିରି; ଯୀଶୁସ୍ ଆ ହାଏକା ହେଖ୍ଖାବାଲା ଆଲାସିନ୍ ତେଙ୍ଗିୟାସ୍, “ଉସ୍କାରା, ଆରୁ ମାଝାନୁ ଇଲା” ଆରୁ ଆସ୍ ଉସ୍କାରାଚାସ୍ ଆରୁ ଇଜ୍ଜାସ୍। 9ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ନିମାନ୍ ମେନାଲ୍ଦାନ୍ କା ୟାହୁଦୀ ଆଲାର୍ଘି ନିୟମ୍ନୁ ପାବିତାର୍ ଉଲ୍ଲାନୁ ଏନ୍ଦେର୍ କାମ୍ନା ବାନେଦ୍? ବାନେ ନାଲ୍ଖୁ କାମ୍ନାଦ୍ କା ଖାରାପ୍ ନାଲ୍ଖୁ କାମ୍ନାଦ୍; ଜୀବନ୍ ବାଛାବାନାଦ୍ କା ନୁକ୍ସାନ୍ କାମ୍ନାଦ୍?” 10ଆଙ୍ଗେନ୍ ଯୀଶୁସ୍ ଚାର୍ହି ପାଖା ଜାମାରିନ୍ ଏରିକିରି ଆ ହାଏକା ହେଖ୍ଖାବାଲା ଆଲାସ୍ସିନ୍ ତେଙ୍ଗିୟାସ୍, “ନିଙ୍ଘା ହେଖ୍ଖା ଲାମ୍ବାବା।” ଆଙ୍ଗେନ୍ ଆସ୍ ହନ୍ନେନ୍ କାମ୍ଚାସ୍, ଆରୁ ଆସ୍କି ହେଖ୍ଖା ବାନେ ମାନ୍ଚାକେରା। 11ଲେକିନ୍ ଆ ଫାରିସୀ ଆଲାର୍ ଏରିୟାର୍ ଆରୁ ମୁରୁକ୍ ଖୀସାରାର୍ କେରାର୍, ଆରୁ ଯୀଶୁସ୍କି ବିରୁଦ୍ଧ ଏନ୍ଦେର୍ ଦୋଷ୍ ଚିଅର୍ ଆବନ୍ ତାହ୍ମା-ତାହ୍ମା ଭିତ୍ରେ କାଚ୍ନେଖ୍ରା ଲାଗ୍ଗିୟାର୍।
ଯୀଶୁସ୍ ବାର ଲୋକ୍ ଖାସ୍ଚେଲାଜାମାରିନ୍ ଚାଜାଲ୍ଦାସ୍
(ମାତିସ୍ ୧୦:୧-୪; ମାର୍କୁସ୍ ୩:୧୩-୧୯)
12ହୁ ଉଲ୍ଲାଗୁଠିନୁ ଅନ୍ଦୁଲ୍ ଯୀଶୁସ୍ ବିନ୍ତି କାମାଗେ ଅଣ୍ଟା ପାର୍ତ୍ତାଗେ କେରାସ୍, ଆରୁ ଆସ୍ ମାଁହାବିସ୍ତା ପାର୍ମେଶ୍ୱାର୍ସାନ୍ ବିନ୍ତି କାମାଗେ ଲାଗ୍ଗିୟାସ୍। 13ପାଇରି ବିଜ୍ଜକାନ୍ତିନ୍ ଯୀଶୁସ୍ ଚେଲାରିନ୍ ତାଙ୍ଘା ଚାହାଗେ ମେହିଁୟାସ୍ ଆରୁ ଆବ୍ଡ଼ାର୍ସ୍ତି ବାର ଲୋକ୍ରିନ୍ ଚାଜ୍ଜିୟାସ୍, ଆସ୍ ଆବ୍ଡ଼ାରିନ୍ହି ଖାସ୍ଚେଲା ନାମେ ଚିଚ୍ଚାସ୍; 14ଆ ଖାସ୍ଚେଲାଜାମାର୍ଘି ନାମେ ଇସାନ୍ ଲେଖ୍ଚ୍କା ରାଇଦ୍: ଆବ୍ଡ଼ାର୍ଘି ଭିତର୍ନୁ ଶିମୋନ୍ସିନ୍, ଯୀଶୁସ୍ ଇସ୍କି ନାମେ ପାତ୍ରାସ୍ ଚିଚ୍ଚାସ୍, ଆରୁ ଆସ୍କି ଭାଇ ଆନ୍ଧ୍ରିୟାସ୍ସିନ୍, ୟାକୁବ୍ ଆରୁ ଯୋହାନ୍ସିନ୍, ଫିଲିପ୍ପସ୍ ଆରୁ ବାର୍ଥଲମୀସିନ୍, 15ମାତି ଆରୁ ଥୋମାସ୍ସିନ୍, ଆଲ୍ଫିସ୍କି ହାଦ୍ଦୁ ୟାକୁବ୍, ଆରୁ ଶିମୋନ୍ସିନ୍ ଏକାସିନ୍କା ଉଦ୍ଯୋଗୀ ବାଲିୟାର୍, 16ୟାକୁବ୍ସ୍କି ହାଦ୍ଦୁ ଯୁଦାସ୍, ଆରୁ ଯୁଦାସ୍ ଇସ୍କାରିୟତିସିନ୍ ଏକାସ୍ କା ଯୀଶୁସିନ୍ ବିରୋଧିଜାମାର୍ଘି ହେଖ୍ଖାନୁ ଧାର୍ତାଚେଇଚାସ୍।
ଯୀଶୁସ୍ ଉପ୍ଦେଶ୍ ଚିଆଲ୍ଦାସ୍ ଆରୁ ବାନେ କାମାଲ୍ଦାସ୍
17ଆରୁ ଯୀଶୁସ୍ ତାଙ୍ଘା ବାର ଖାସ୍ଚେଲାଜାମାର୍ଗାନେ ପାର୍ତ୍ତାନ୍ତି ଏତ୍ତିକିରି ଅଣ୍ଟା ମାଏଦାନ୍ନୁ ଇଜ୍ଜାସ୍, ଆରୁ ଆସାନ୍ ତାଙ୍ଘାଏ ଆରୁ ଢେର୍ ଚେଲାର୍ ରାଚାର୍, ଆରୁ ଜାମା ୟାହୁଦା ପ୍ରଦେଶ୍ନ୍ତା, ଯେରୁଶାଲେମ୍, ଆରୁ ହଁସ୍ରା ଖାଁଣିନ୍ ତା ସୋର୍ ଆରୁ ସିଦୋନ୍ ସହର୍ସ୍ତି ଆଲାର୍ଘି ବାଡ଼୍କା ଭିଡ଼୍ ବାର୍ଚାର୍। 18ଆବ୍ଡ଼ାର୍ ଯୀଶୁସ୍କି ଉପ୍ଦେଶ୍ ମେନାଗେ ଆରୁ ନିଜର୍-ନିଜର୍ ବେମାର୍ତି ବାନେ ମାନାଗେ ବାର୍ଚ୍କାଚାର୍। ଆରୁ ଭୁତ୍ତୁ ଲାକ୍କାଘି କାରଣ୍ ଏକା ଆଲାର୍ ମୁରୁକ୍ କଷଟ୍ ସାହାଲିୟାର୍ ଆବ୍ଡ଼ାରିନ୍ ବାନେ କାମାକେରା। 19ଆରୁ ଜାମା ଆଲାର୍ ଯୀଶୁସିନ୍ ଏସ୍ରାଗେ କୋଶିଷ୍ କାମାଲିଆର୍, ଏନ୍ଦେର୍ଗେକା ତାଙ୍ଘାସ୍ତି ଶକ୍ତି ଉର୍ଖିକିରି ଯେତ୍କରିନ୍ ବାନେ କାମାଲିଆ।
ଯୀଶୁସ୍ ଆଶିଷ୍ ବଚନ୍ ଚିଆଲ୍ଦାସ୍
20ହୁ ଉଲ୍ଲାନୁ ଯୀଶୁସ୍ ତାଙ୍ଘା ଚେଲାର୍ତାରା ଏରିକିରି ତେଙ୍ଗିୟାସ୍, “ଧଏନ୍ର୍ ନିମ୍ ନେଦ୍ ଗରୀବ୍ ରାଦାର୍, ପାର୍ମେଶ୍ଵାର୍ସ୍କି ରାଜୀଦ୍ ନିହ୍ମା ଲେଖା ଆଲାର୍ଘି ଲାଗାନ୍ ରାଇଦ୍।”
21“ଧଏନ୍ର୍ ନିମ୍ ନେଦ୍ ଆକ୍କୁନ୍ କିଡ଼ା ଖିଆଲ୍ଦାର୍, ଏନ୍ଦେର୍ଗେକା ନିମାଗେ ଭାର୍ପୁର୍ ଚିୟାକଦ୍। ଧଏନ୍ର୍ ନିମ୍ ଆକ୍କୁନ୍ ନେଦ୍ ଅହ୍ଲାଲ୍ଦାର୍, ଏନ୍ଦେର୍ଗେକା ନିମ୍ ଆଲ୍ଖର୍।”
22“ଧଏନ୍ ରାଦାର୍ ନିମ୍ ଯେତ୍କବାକେନ୍ ମୁନୁଷ୍ ହାଦ୍ଦୁସ୍କି ଲାଗାନ୍ ନିମାନ୍ ହାଁଣର୍ ତୁପ୍ଫର୍, ଆରୁ ନିମାନ୍ ଆଲାର୍ ନିନ୍ଦା କାମର୍, ନିମାନ୍ ଭିନେ କାମର୍, ଆରୁ ନିହ୍ମା ନାମେ ଖାରାପ୍ବୁଲି ଗ୍ରହନ୍ ମା କାମ୍ନାଏ।”
23“ହୁ ଉଲ୍ଲାନୁ ଖୁସୀ ମାନାବର୍ ଆରୁ ଲିଝ୍ରର୍, ଏନ୍ଦେର୍ଗେକା ନିହ୍ମା ଲାଗାନ୍ ସରଗ୍ନୁ ବାଡ଼୍କା ଫଲ୍ ହାଖ୍ଖର; ଆରୁ ହନ୍ନେନ୍ ତା ଆବ୍ଡ଼ାର୍ଘି ପୁର୍ଖାର୍ହି ପୁର୍ଖା ନାବୀଜାମାର୍ଗାନେ ଏନ୍ନେନ୍ କାମାଲିଆର୍।”
24“ନିହ୍ମା ଭିତର୍ନୁ ଧନୀ ରାଦାର୍ ନେଦ୍ ଆବ୍ଡ଼ାର୍ ଦଣ୍ଡ୍ଘି ହକ୍ଦାର୍, ଏନ୍ଦେର୍ଗେକା ନିମ୍ ନିହ୍ମା ଶାନ୍ତି ହାକ୍କାର୍କେର୍କାଦାର୍।”
25“ନିମ୍ ଦଣ୍ଡ୍ଘି ହକ୍ଦାର୍ ଏକାର୍ ଆକ୍କୁନ୍ ପୁରାପୁରୀ ସନ୍ତୁଷ୍ଟ୍ ଆତ୍ଲ୍ଦାର୍, ଏନ୍ଦେର୍ଗେକା ନିମ୍ କିଡ଼ାସାରର୍।”
“ନିମ୍ ଦଣ୍ଡ୍ଘି ହକ୍ଦାର୍, ଏନ୍ଦେର୍ଗେକା ନେଦ୍ ଆକ୍କୁନ୍ ଖୁସୀନୁ ଆତ୍ଲ୍ଦାର୍, ନିମ୍ ଦୁଃଖୁ ମାନର୍ ଆରୁ ଅହ୍ଲର୍।”
26“ନିମ୍ ଦଣ୍ଡ୍ଘି ହକ୍ଦାର୍, ଯେତ୍କବାକେନ୍ ଜାମାର୍ ନିମାନ୍ ବାନେ ବର୍, ଆବ୍ଡ଼ାର୍ଘି ପୁର୍ଖାର୍ହି ଝୁଟ୍ଟୁ ନାବୀର୍ଗାନେ ଏନ୍ନେନ୍ କାମାଲିୟାର୍।”
ବିରୋଧିରିନ୍ ବାନେ ହାଖ୍ଖା
27“ଲେକିନ୍ ଏନ୍ ନିମା ମେନୁରିନ୍ ତେଙ୍ଗାଲ୍ଦାନ୍ କା ନିମ୍ ନିହ୍ମା ବିରୋଧିରିନ୍ ବାନେ ହାଖ୍ଖା; ନେଦ୍ ନିମାନ୍ ହାଁଣ୍ନାଏ, ଆବ୍ଡ଼ାର୍ଘି ଭାଲାଇ କାମା। 28ନେଦ୍ ନିମାନ୍ ସାର୍ପାନାଏ, ଆବ୍ଡ଼ାରିନ୍ ଆଶୀର୍ବାଦ୍ ଚିଆ; ଆରୁ ନେଦ୍ ନିହ୍ମାଏ ବେଇଜ୍ଜତ୍ କାମ୍ନାଏ, ଆବ୍ଡ଼ାର୍ଘି ଲାଗାନ୍ ବିନ୍ତି କାମା। 29ଏକାର୍ ନିମାନ୍ ଅଣ୍ଟା ଗାଲ୍ଲେନ୍ ଥାପ୍ଡ଼ାନାଏ ଆବ୍ଡ଼ାର୍ଗେ ଆରୁ ଅଣ୍ଟା ଗାଲ୍ଲେନ୍ହି ଏଦାଚା; ଆରୁ ନେଦ୍ ନିହ୍ମାଏ ଚାଦର୍ବନ୍ ହୋନାଏକାନାଏ, ଆବ୍ଡ଼ାରିନ୍ ନିହ୍ମାଏ ଆତ୍ତ୍କା ମିର୍ଜୀନ୍ହି ହୁଆଗେ ମାନା ଆମା କାମା। 30ନେଦ୍ ନିମାନ୍ ନିନାଏ, ଆବ୍ଡ଼ାର୍ଗେ ଚିଆ; ଆରୁ ନେଦ୍ ନିହ୍ମାସ୍ତି ନିହ୍ମା ଜିନିଷ୍ବନ୍ ହୋନାଏକାନାଏ, ଆବନ୍ ଆବ୍ଡ଼ାର୍ସ୍ତି ଆରୁଅହନ୍ ଆମା ନିଆଁ। 31ଆଲାର୍ ନିହ୍ମାଗାନେ ଏସ୍କେ ବେଭାର୍ କାମର୍ବୁଲି ଚାହାଁଲ୍ଦାର୍, ନିମ୍ହି ଆବ୍ଡ଼ାର୍ ଗାନେ ହନ୍ନେନ୍ ବେଭାର୍ କାମା।”
32“ଆରୁ ନେଦ୍ ନିମାନ୍ ବାନେ ହାଖ୍ଖନାଏ ଆବ୍ଡ଼ାରିନ୍ ଖାଲି ବାନେ ହାଖ୍ଖଦାର୍, ତା ଏନ୍ଦେର୍ ବାନେ ନାଲ୍ଖୁ କାମ୍ଦାର୍? ଏନ୍ଦେର୍ଗେକା ପାପୀର୍ହି ତାମାନ୍ ବାନେ ହାଖ୍ଖୁରିନ୍ ବାନେ ହାଖ୍ଖନାଏ। 33ଆରୁ ନେଦ୍ ନିହ୍ମାଏ ଭାଲାଇ କାମ୍ନାଏ ଯଦି ନିମ୍ ଆବ୍ଡ଼ାର୍ଘି ଖାଲି ଭାଲାଇ କାମ୍ଦାର୍, ତା ନିମ୍ ଏନ୍ଦେର୍ ବାନେ ନାଲ୍ଖୁ କାମ୍ଦାର୍? ଏନ୍ଦେର୍ଗେକା ପାପୀର୍ହି ଏନ୍ନେନ୍ କାମ୍ନାଏ। 34ଆରୁ ଯଦି ନିମ୍ ଆବ୍ଡ଼ାର୍ଗେ ଉଧାର୍ ଚିଦାର୍ ନେଖାସ୍ତି କିର୍ତାନାଘି ଆସ୍ରା କାମ୍ଦାର୍, ତା ନିମ୍ ଏନ୍ଦେର୍ ବାନେ ନାଲ୍ଖୁ କାମ୍ଦାର୍? ପୁରା-ପୁରା କିର୍ତାନାଘି ଆସ୍ରା କାମିକିରି ପାପୀର୍ହି ପାପୀର୍ଗେ ଉଧାର୍ ଚିନାଏ। 35ଲେକିନ୍ ନିଜର୍ ବିରୋଧିରିନ୍ ବାନେ ହାଖ୍ଖା, ଆରୁ ଆବ୍ଡ଼ାର୍ଘି ଭାଲାଇ କାମା, ଆରୁ ହାଖ୍ର୍ନାଘି ଆସ୍ରା ମା ଉଇକିରି ଉଧାର୍ ଚିଆ; ହାଲେ ନିହ୍ମା ଲାଗାନ୍ ବାଡ଼୍କା ଫଲ୍ ହାଖ୍ଖରୋ, ଆରୁ ନିମ୍ ଜାମାର୍ ମାହାନ୍ ପାର୍ମେଶ୍ୱାର୍ସ୍କି ହାଦ୍ଦୁ ମାନର୍କର୍, ଏନ୍ଦେର୍ଗେକା ଆସ୍ ନେଦ୍ ଧାନ୍ୟାବାଦ୍ ମା ଚିନାଏ ଆରୁ ବଦ୍ମାସ୍ର୍ଘି ମିଆଁ ଦାୟା କାମ୍ଦାସ୍। 36ନିହ୍ମା ବାଙ୍ଗ୍ ପାର୍ମେଶ୍ଵାର୍ସ୍ ଏସ୍କେ ଦାୟାଲୁ ରାଦାସ୍, ଆନ୍ନେ ନିମ୍ହି ଦାୟାଲୁ ମାନା।”
ଦୋଷ୍ ଆମା ଚିଆ
37“ଆରୁ ନିମ୍ ନ୍ୟାୟ ଆମା କାମା, ଆରୁ ନିହ୍ମା ବିରୁଦ୍ଧନୁହି ନ୍ୟାୟ କାମା ମା କାଇଦ୍। ନିମ୍ ଦୋଷ୍ ଆମା ଚିଆ, ହାଲେ ନିମାଗେହି ଦୋଷ୍ ଚିଆ ମା କାଇ। ନିମ୍ ଛେମା କାମା, ଆରୁ ନିମାନ୍ହି ଛେମା କାମାକୋ। 38ଦାନ୍ ଚିଆ, ଆରୁ ନିମାଗେହି ଦାନ୍ ଚିଆ କୋଦ୍। ଆଲାର୍ ଆଉଡ଼କାନୁ ଆର୍ବା-ଆର୍ବା, ନୁକା-ନୁକା ନିନ୍ଦ୍କା, ଉଛ୍ଲାରାନା ଜୁଟି ପୁରାଘି ପୁରା ନାପିକିରି ନିହ୍ମା ପାଁଣ୍ତୁନ୍ ଚିଅର୍, ଏନ୍ଦେର୍ଗେକା ଏକା ନାପ୍ତି ନିମ୍ ନାପ୍ଦାର୍, ଆତ୍ତିନ୍ ନିମାଗେହି ନାପା କୋଦ୍।” 39ଯୀଶୁସ୍ ଆବ୍ଡ଼ାରିନ୍ ଅଣ୍ଟା ନମୁନା ଶୁଣାବାଚାସ୍: “କାଁଣାସ୍ ଆରୁ ଅଣ୍ଟା କାଁଣାସିନ୍ ପାବୁ ଏଦା ଅଙ୍ଗସ୍ କାଁଏ? ଆବ୍ଡ଼ାର୍ ଦୁହି ଲୋକ୍ ଗାଡ୍ଡିନୁ ମା ଖାତ୍ରର୍ କାଁଏ? 40ଚେଲାସ୍ ଗୁରୁସ୍ତି ବାଡ଼୍କା ମା ମାନ୍ଦାସ୍, ଲେକିନ୍ ଜାମା ଚେଲାର୍ ପୁରାପୁରୀ ଶିକ୍ଷା ହାକ୍କା ପାଛ୍ଲି, ତାଙ୍ଘା ଗୁରୁସ୍ ଲେଖା ମାନାଅଙ୍ଗର୍। 41ଆରୁ ଏନ୍ଦେର୍ଗେ ନିଙ୍ଘାଏ ନିଜର୍ ହାନ୍ନୁନ୍ତା ବାଡ଼୍କା କାଚ୍ରାବନ୍ ମା ଏର୍ଦାଏ, ଲେକିନ୍ ନିନ୍ ନିଙ୍ଘାଏ ଭାଇସ୍କି ହାନ୍ନୁନ୍ତା ଛୋଟେ କାଚ୍ରାନ୍ ଏର୍ଦାଏ? 42ନିନ୍ ନିଙ୍ଘାଏ ହାନ୍ନୁନ୍ତା ବାଡ଼୍କା କାଚ୍ରାବନ୍ ଏରା ପଲ୍ଲଦାଏ, ହାଲେ ନିନ୍ ନିଙ୍ଘାଏ ଭାଇସିନ୍ ଏସ୍କେ ତେଙ୍ଗା ଅଙ୍ଗୟକା, ‘ଭାଇ; ବାରା ଏନ୍ ନିଙ୍ଘା ହାନ୍ନୁନ୍ତା ଛୋଟେ କାଚ୍ରାନ୍ ଅଥରନ୍ ଚନ୍’? ଏ କପ୍ଟୀଆୟ, ନିନ୍ ପହ୍ଲେ ନିଙ୍ଘାଏ ହାନ୍ନୁନ୍ତା ବାଡ଼୍କା କାଚ୍ରାନ୍ ଅଥ୍ରା, ହାଲେ ନିନ୍ ନିଙ୍ଘାଏ ଭାଇସ୍କି ହାନ୍ନୁନ୍ତା କାଚ୍ରାନ୍, ଅଥ୍ରାଗେ ବାନେକିରି ଏରା ଅଙ୍ଗୟ।”
ଫାଡ଼ୁତି ମାନ୍ନୁବନ୍ ଚିହ୍ନା
43“ଏନ୍ନେ ଏକାଦ୍ହି ବାନେ ମାନ୍ନୁ ମାଲ୍ଲାଦିନ୍ ଏକାଦ୍ କା ଖାରାପ୍ ଫାଡ଼ୁ ହାଞ୍ଜିଦ୍, ଆରୁ ଏନ୍ନେ ଏକାଦ୍ହି ଖାରାପ୍ ମାନ୍ନୁ ମାଲ୍ଲାଦ୍ ଏକାଦ୍ କା ବାନେ ଫାଡ଼ୁ ହାଞ୍ଜିଦ୍। 44ଏନ୍ଦେର୍ଗେକା ଜାମା ମାନ୍ନୁଦ୍ ତାଙ୍ଘା ନିଜର୍ ଫାଡ଼ୁତି ଚିହ୍ନରିଦ୍; ଆଚ୍ଚୁ ମାନ୍ନୁନ୍ତିତା ଆଲାର୍ ଡୁମାରି ମା ଚହ୍ନାଏ ଆରୁ ଆଚ୍ଚୁ ହପ୍ପାନ୍ତି ଅଙ୍ଗୁର୍ ମା ଚହ୍ନାଏ।45ବାନେ ଆଲାସ୍ ତାଙ୍ଘାଏ ଜୀଆ ଉଲ୍ତା ବାନେ ଭାଣ୍ଡାର୍ତି ବାନେ ସୋଚ୍ବିଚାର୍ ପ୍ରକଟ୍ କାମ୍ଦାସ୍, ଆରୁ ଖାରାପ୍ ଆଲାସ୍, ତାଙ୍ଘା ଜୀଆ ଉଲ୍ତା ଖାରାପ୍ ଭାଣ୍ଡାର୍ତି ଖାରାପ୍ ସୋଚ୍ବିଚାର୍ ପ୍ରକଟ୍ କାମ୍ଦାସ୍; ଏନ୍ଦେର୍ଗେକା ଏକାଦ୍ ତାଙ୍ଘା ଜୀଆନୁ ନିନ୍ଦକିଚି ଆଦିନ୍ତା ଥୁମ୍ଣାନ୍ତି ବାହ୍ରି ଉର୍ଖିଦ୍।”
ଆଡ଼୍ପା କାମୁ ଦୁଇ ଲୋକ୍ ଆଲାର୍ଘି ନମୁନା
46“ଆରୁ ନିମ୍ ଏଙ୍ଘାଏ ତେଙ୍ଗ୍ନା ଲେଖା ମା ଚାଲ୍ର୍ଦାର୍ ତା ଏନ୍ଦେର୍ଗେ ଏଙ୍ଗାନ୍ ପ୍ରାଭୁ, ପ୍ରାଭୁ, ବୁଲିକିରି ମେହଁଦାର୍? 47ଏକାର୍ ଏଙ୍ଘାଏ ଚାହାଗେ ବାର୍ନାଏ ଆରୁ ଏଙ୍ଘା କାତ୍ଥା ମେନିକିରି ଆଦ୍ଘି ଲେଖା ଚାଲ୍ର୍ନାଏ, ଆବ୍ଡ଼ାର୍ ନେଖା ଲେଖା ଆବନ୍ ଏନ୍ ନିମାନ୍ ତେଙ୍ଗନ୍: 48ଆସ୍ ଆ ଆଲାସ୍ ଲେଖା, ଏକାସ୍ କା ଆଡ଼୍ପା କାମ୍ନା ସାମାୟନୁ ବାଗ୍ଗେ ଗାଡ୍ଡି ଆର୍ହିକିରି ନାହିବନ୍ ଚାଟ୍ଣୀ ମିଆଁ କାମ୍ଦାସ୍, ବାଢ଼ି ବାରିଦ୍ ଆରୁ ବାଢ଼ି ଆମ୍ମୁଦ୍ ଆଡ଼୍ପା ଗାନେ ବାଜ୍ଡ଼ାରାଇଦ୍ ଲେକିନ୍ ଆଦ୍ ଆ ଆଡ଼୍ପାବନ୍ ଧାସ୍କା ପଲ୍ଲିଦ୍; ଏନ୍ଦେର୍ଗେକା ଆ ଆଡ଼୍ପାଦ୍ ମଜ୍ବୁତ୍ କାମ୍ଚ୍କା ରାଇଦ୍। 49ଲେକିନ୍ ଏକାର୍ ଏଙ୍ଘାଏ ବଚନ୍ ମେନ୍ନାଏ ଆରୁ ଆଦ୍ଘି ଲେଖା ମା ଚାଲର୍ନାଏ, ଆର୍ ଆ ଆଲାସ୍ ଲେଖା, ଏକାସ୍ କା ବିନା ନାହିଗାଡ୍ଡି ଆର୍ହିକିରି ହାଜ୍ଜୁ ମିଆଁ ଆଡ଼୍ପା କାମ୍ଦାସ୍। ଆରୁ ବାଢ଼ି ଆମ୍ମୁଦ୍ ଆଡ଼୍ପା ଗାନେ ବାଜ୍ଡ଼ାରାଇ ଆରୁ ଆ ଆଡ଼୍ପାଦ୍ ଧାସ୍କାରାଇଦ୍ ଆରୁ ଚୁର୍ମାର୍ ମାନିକାଇ।”
7ପଲ୍ଟନ୍ଜାମାର୍ଘି ମୁଖ୍ୟାସ୍କି ଗୁତ୍ତିୟାସିନ୍ ଯୀଶୁସ୍ ବାନେ କାମାଲ୍ଦାସ୍
(ମାତିସ୍ ୮:୫-୧୩; ଯୋହାନ୍ ୪:୪୩-୫୪)
1ଆଲାରିନ୍ ଇବ୍ଡ଼ା ଜାମା ଉପ୍ଦେଶ୍ ଶୁଣାବାଚ୍କା ପାଛ୍ଲି, ଯୀଶୁସ୍ କାଫାର୍ନାହୁମ୍ ସହର୍ଗେ ବାର୍ଚାସ୍। 2ହୁ ସାମାୟନୁ ପଲ୍ଟନ୍ଜାମାର୍ ମୁଖ୍ୟାସ୍କି ଅଣ୍ଟା ଗୁତ୍ତିୟାସ୍ ରାଚାସ୍ ଏକାସିନ୍କା ଆସ୍ ମୁରୁକ୍ ବାନେ ହାଖ୍ଖାଲିୟାସ୍, ଆ ଗୁତ୍ତିୟାସ୍ ବେମାର୍ତି ଖିନା ଲେଖା ମାନ୍ଚାସ୍ କେର୍କାଚାସ୍। 3ପଲ୍ଟନ୍ଜାମାର୍ଘି ମୁଖ୍ୟାସ୍ ଯୀଶୁସ୍କି ବାରେନୁ ମେନିକିରି ଆସ୍ ୟାହୁଦୀର୍ଘି କେତ୍କ ପୁର୍ଖା ଆଲାର୍ଘି ହେଖ୍ଖାନୁ ତାଙ୍ଘାଏ ଗୁତ୍ତିୟାସ୍କି ଲାଗାନ୍ ଯୀଶୁସ୍ସାନ୍ ଆର୍ଜୀବିନ୍ତି ତାଇୟାସ୍ କା ବାରସ୍ ଆରୁ ଏଙ୍ଘାଏ ଗୁତ୍ତିୟାସିନ୍ ବାନେ କାମସ୍। 4ଆବ୍ଡ଼ାର୍ ଯୀଶୁସ୍କି ଚାହାଗେ ବାରିକିରି, ଆସିନ୍ ମୁରୁକ୍ ଆର୍ଜୀବିନ୍ତି କାମାଗେ ଲାଗ୍ଗିୟାର୍ କା, “ନିମ୍ ନିଙ୍ଘା ଲାଗାନ୍ ଏନ୍ନେ କାମର୍ ଏନ୍ଦେର୍ଗେକା ଆସ୍ ଇଦ୍ଘି ଲାଇଗ୍ ରାଦାସ୍, 5ଏନ୍ଦେର୍ଗେକା ଆସ୍ ଏହ୍ମା ଜାତିବନ୍ ବାନେ ହାଖ୍ଖଦାସ୍, ଆରୁ ଆସ୍ ଏହ୍ମାଲାଗାନ୍ ଅଣ୍ଟା ସାଭା ଆଡ଼୍ପା କାମ୍ତାଚ୍କାଦାସ୍।” 6ଆଙ୍ଗେନ୍ ଯୀଶୁସ୍ ଆବ୍ଡ଼ାର୍ ଗାନେ କେରାସ୍, ଆରୁ ଯୀଶୁସ୍ ପଲ୍ଟନ୍ଜାମାର୍ଘି ମୁଖ୍ୟାସ୍କି ଆଡ଼୍ପାଘି କାଟେ ଗେଚ୍ଛାନୁ ରାଚାସିନ୍କା, ପଲ୍ଟନ୍ଜାମାର୍ଘି ମୁଖ୍ୟାସ୍ ତାଙ୍ଘା ସାଙ୍ଗେରିନ୍ ଯୀଶୁସ୍କି ଚାହାଗେ ଏନ୍ନେ ତେଙ୍ଗା ତାଇୟାସ୍ କା, “ହେ ପ୍ରାଭୁ, ନିମ୍ କଷଟ୍ ଆମା କାମା, ଏନ୍ଦେର୍ଗେକା ଏନ୍ ଇଦ୍ଘି ଲାଇଗ୍ ମାଲ୍ଦାନ୍ କା ନିମ୍ ଏଙ୍ଘା ଆଡ଼୍ପା ବାରର୍। 7ହୁଦ୍ଘିଲାଗାନ୍ ଏନ୍ ନିଜ୍କେନିଜ୍ ନିହ୍ମା ଚାହାଗେ କାଲାଗେ ଲାଇଗ୍ ମାଲ୍ଦାନ୍, ଲେକିନ୍ ନିମ୍ ପଦେ ହୁକୁମ୍ ଚିଆ କା ଏଙ୍ଘା ଗୁତ୍ତିୟାସ୍ ବାନେ ମାନସ୍କସ୍। 8ଏନ୍ଦେର୍ଗେକା ଏନ୍ହି ଅଣ୍ଟା ଛୋଟେ ମୋଟେ ମାଲିକ୍ ଏଙ୍ଘା ଅଧିନ୍ନୁ ପଲ୍ଟନ୍ଜାମାର୍ ରାନାଏ; ଯେତ୍କବାକେନ୍ ଏନ୍ ଅର୍ତୁସିନ୍ ତେଙ୍ଗ୍ଦାନ୍, ‘କାଲା’, ତା ଆସ୍ କାଦାସ୍; ଆରୁ, ଆରୁ ଅର୍ତୁସିନ୍ ତେଙ୍ଗ୍ଦାନ୍, ‘ବାରା’ ତା ଆସ୍ ବାର୍ଦାସ୍; ଆରୁ ଏଙ୍ଘା ଗୁତ୍ତିୟାସିନ୍ ‘ଏନ୍ ଏକାନ୍ କାମା’ ତେଙ୍ଗ୍ଦାନ୍ ତା ଆସ୍ ଆବନ୍ କାମ୍ଦାସ୍।” 9ଯୀଶୁସ୍ ଆସ୍କି ବାରେ ଇବ୍ଡ଼ା ଜାମା କାତ୍ଥାଗୁଠିନ୍ ମେନିକିରି ଆଚ୍ମିତ୍ ମାନ୍ଚାସ୍କେରାସ୍ ଆରୁ ତାଙ୍ଘା ପାଛ୍ଲି ବାରୁ ଆଲାରିନ୍ କିର୍ରେ ଏରିକିରି ତେଙ୍ଗିୟାସ୍, “ଏନ୍ ନିମାନ୍ ତେଙ୍ଗାଲ୍ଦାନ୍ ଇସ୍ରାଏଲ୍ ଦେଶ୍ନୁହି ଏନ୍ ଏତ୍କ ବାଡ଼୍କା ବିଶ୍ଵାସ୍ କାମୁରିନ୍ ଏକ୍ଲାହି ମାଲ୍ଲା ଏରୁନ୍।” 10ଆରୁ ଆ ତାଇକା ଆଲାର୍ ଆଡ଼୍ପା କିର୍ରିକିରି ଆ ବେହ୍ମରିୟା ଗୁତ୍ତିୟାସିନ୍ ବାନେ ମାନ୍ଚ୍କା ଏରିୟାର୍।
ଯୀଶୁସ୍ ରାଣ୍ଡି ଆଲିଘି ତାଙ୍ଗ୍ଦାସିନ୍ ଉଜ୍ଜତାଲ୍ଦାସ୍
11ଇଦ୍ଘି ପାଛ୍ଲି ଯୀଶୁସ୍ ନାଇନ୍ ସହର୍ଗେ କେରାସ୍। ତାଙ୍ଘା ଚେଲାର୍ ଆରୁ ଅଣ୍ଟା ବାଡ଼୍କା ଆଲ୍ଭିଡ଼୍ ଆସ୍ଗାନେ କାଲିୟାଦ୍। 12ଯେତ୍କବାକେନ୍ ଯୀଶୁସ୍ ସହର୍ତା ଫାଟକ୍ ଚାହାଗେ ଆଣ୍ସିୟାସ୍, ତା ଏରା, ଆଲାର୍ ଅଣ୍ଟା କେଚ୍ଚକା କୁକ୍କସିନ୍ ଚେଡ଼ିକିରି ବାହ୍ରି ହୁଆଲିୟାର୍; ଆସ୍ ତାଙ୍ଗ୍ୟଘି ଅଣ୍ଟା ଖାଲି ହାଦ୍ଦୁ ରାଚାସ୍, ଆରୁ ଆ ଆଲି ରାଣ୍ଡି ରାଚା; ସହର୍ତା ଢେର୍ ଆଲାର୍ ଆଦ୍ଘିଗାନେ ରାଚାର୍। 13ଆବନ୍ ଏରିକିରି ପ୍ରାଭୁସ୍କେ ଆଦ୍ଘି ମିଆଁ ସଗ୍ଗେ ଲାଗ୍ଗିୟା, ଆରୁ ଆସ୍ ଆବନ୍ ତେଙ୍ଗିୟାସ୍, “ଆମୁ ଅହ୍ଲୁ।” 14ଆରୁ ଆସ୍ ଚାହା କାଇକିରି ନାଟ୍ରୁବନ୍ ଏସ୍ରାସ୍, ଆଙ୍ଗେନ୍ ଚେଡ଼ୁର୍ ଇଜ୍ଜାର୍କେରାର୍। ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ହେ ଯୁୱାନ୍ କୁକ୍କ, ଏନ୍ ନିଙ୍ଗାନ୍ ତେଙ୍ଗାଲ୍ଦାନ୍ ଉସ୍କାରା!” 15ଆଙ୍ଗେନ୍ ଖିଉ କୁକ୍କସ୍ ଉସ୍କାରାଇକିରି ଅକ୍କିୟାସ୍, ଆରୁ କାଚ୍ନେଖ୍ରାଗେ ଲାଗ୍ଗିୟାସ୍। ଯୀଶୁସ୍ ଆସିନ୍ ତାଙ୍ଗ୍ୟଘି ହେଖ୍ଖାନୁ ସୋଁପ୍ଚେଇ ଚିଚ୍ଚାସ୍। 16ଜାମା ଆଲାର୍ ଏଲ୍ଚିୟାର୍ କେରାର୍, ଆରୁ ପାର୍ମେଶ୍ଵାର୍ସ୍କି ସ୍ତୁତି ମାହିମା କାମ୍ତେ ତେଙ୍ଗିୟାର୍, “ନାହ୍ମା ମାଝାନୁ ଅଣ୍ଟା ମାହାନ୍ ନାବୀସ୍ ବାର୍ଚ୍କାଦାସ୍, ଆରୁ ପାର୍ମେଶ୍ଵାର୍ସ୍ ନିଜର୍ ଆଲାର୍ଘି ମିଆଁ କ୍ରିପା ଦୃଷ୍ଟି କାମ୍ଚ୍କାଦାସ୍।” 17ଯୀଶୁସ୍କି ବାରେନୁ ଇବ୍ଡ଼ା କାତ୍ଥା ଜାମା ୟାହୁଦୀଆ ପ୍ରଦେଶ୍ନ୍ତା ଚାହାଚାହାନ୍ତା ଆଡ୍ଡାଗୁଠିନୁ ଚାର୍ହି ପାଖା ଫାଏଲାରାଚା କେରା।
ଆସ୍ନାନ୍ ଚିଉ ଯୋହାନ୍ସ୍ ତାଙ୍ଘା ଚେଲାରିନ୍ ଯୀଶୁସ୍କି ଚାହାଗେ ତାଇୟାଲ୍ଦାସ୍
18ଆନ୍ତିନ୍ ଯୋହାନ୍ସ୍କି ଚେଲାଜାମାର୍ ଯୋହାନ୍ସିନ୍ ଇ ଜାମା ଖବର୍ ଶୁଣାବାଚାର୍। 19ଆଙ୍ଗେନ୍ ଯୋହାନ୍ସ୍ ତାଙ୍ଘା ଚେଲାଜାମାର୍ଘି ଭିତର୍ନୁ ଦୁଇ ଲୋକ୍ ଚେଲାରିନ୍ ଚାହାଗେ ମେହିଁକିରି ପ୍ରାଭୁସ୍ସାନ୍ ଇବନ୍ ମେନାଗେ ତାଇୟାସ୍, “ଖ୍ରୀସ୍ତ୍ ଏକାସ୍ ବାର୍ନାବାଲା ରାଦାସ୍ ଆ ଆଲାର୍ ନିମ୍ କାଁଏ, କା ଏମ୍ ଆରୁ ଦୁସ୍ରାର୍ଘି ଆଶ୍ରାନୁ ରମ୍?” 20ଆବ୍ଡ଼ା ଦୁଇ ଲୋକ୍ ଚେଲାର୍ ଯୀଶୁସ୍ସାନ୍ ବାରିକିରି ତେଙ୍ଗିୟାର୍, “ଆସ୍ନାନ୍ ଚିଉ ଯୋହାନ୍ସ୍ ଏମାନ୍ ନିହ୍ମା ଚାହାଗେ ଏନ୍ନେ ତେଙ୍ଗିକିରି ମେନାଗେ ତାଏକାଦାସ୍ କା ଏକା ଆଲାସ୍ ବାର୍ନାବାଲା ରାଦାସ୍ ଆ ଆଲାର୍ ନିମ୍ କାଁଏ, କା ଏମ୍ ଦୁସ୍ରାର୍ଘି ଆଶ୍ରାନୁ ରମ୍?” 21ହୁ ସାମାୟନୁ ଯୀଶୁସ୍ ଢେର୍ ବେହ୍ମରିୟାରିନ୍, ବାଥାପିଢ଼ା ଆଲାରିନ୍, ଆରୁ ଭୁତ୍ତୁ ଲାକ୍କା ଆଲାରିନ୍ ବାନେ କାମାଲିୟାସ୍; ଆରୁ ଢେର୍ କାଁଣାର୍ଗେ ଏରାଗେ ଶକ୍ତି ଚିଆଲିୟାସ୍; 22ଆସ୍ ଯୋହାନ୍ସ୍କି ଚେଲାରିନ୍ ଯାବାବ୍ ଚିଚ୍ଚାସ୍, “କାଲା, ନିମ୍ ଏକାନ୍ ଏର୍କାର୍ ଆରୁ ମେନ୍ଚ୍କାର୍, ଆବନ୍ ଯୋହାନ୍ସିନ୍ ତେଙ୍ଗା; କାଁଣାର୍ ଏର୍ନାଏ, ଲେଙ୍ଗ୍ଡ଼ାର୍ ଏକ୍ନାଏ, କୋଢ଼୍ ବେହ୍ମରିୟାର୍ ବାନେ ମାନ୍ନାଏ, ଭାଁଏରାର୍ ମେନ୍ନାଏ, କେଚ୍ଚ୍କା ଆଲାର୍ ଉଜ୍ଜନାଏ ଆରୁ ଗରୀବ୍ ଆଲାର୍ସାନ୍ ସୁସାମାଚାର୍ ଶୁଣାବା କାଇ। 23ଧଏନ୍ ରାନାଏ ଆବ୍ଡ଼ାର୍ ଏକାର୍ କା ଏଙ୍ଘା ବାରେନୁ ଶାକ୍ ମା କାମ୍ନାଏ।” 24ଯୋହାନ୍ସ୍କି ତାଏକା ଚେଲାଜାମାର୍ଘି ବୁଙ୍କା ପାଛ୍ଲି ଯୀଶୁସ୍ ଯୋହାନ୍ସ୍କି ବାରେନୁ ଆଲାରିନ୍ ତେଙ୍ଗାଗେ ଲାଗ୍ଗିୟାସ୍, “ନିମ୍ ଶୁନ୍ଶାନ୍ ଆଡ୍ଡାନୁ ଏନ୍ଦେନ୍ ଏରାଗେ କେର୍କାଚ୍କାର୍? ନିମ୍ ଧୁକାନୁ ନୁକ୍ର୍ନା ଅଣ୍ଟା ମୋଟା ଘାଁସିନ୍ ଏରା କେର୍କାଚ୍କାର୍ କାଁଏ? 25ମାଲ୍ଲାହାଲେ ନିମ୍ ଏନ୍ଦେନ୍ ଏରାଗେ କେର୍କାଚ୍କାର୍? ନିମ୍ ପୁନା ଚିଢ଼ା ଆତ୍ତ୍କା ଆଲାସିନ୍ ଏରା କେର୍କାଚ୍କାର୍ କାଁଏ? ଏରା ଏକାର୍ ମୁରୁକ୍ ଦାମ୍ଘି ଚିଢ଼ା ଆତ୍ତ୍ନାଏ ଆବ୍ଡ଼ା ଆଲାର୍ ମଉଜ୍ମଜ୍ଲିସ୍ନୁ ଉଲ୍ଲା ବିତାବାନାଏ, ଆରୁ ରାଜ୍ମହଲ୍ନୁ ରାନାଏ। 26ମାଲ୍ଲାହାଲେ ଏନ୍ଦେନ୍ ଏରାଗେ କେର୍କାଚ୍କାର୍? ଅଣ୍ଟା ନାବୀସିନ୍ ନିମ୍ ଏରା କେର୍କାଚ୍କାର୍ କାଁଏ? ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍, ନାବୀର୍ସ୍ତିହି ବାଡ଼୍କା ଆଲାସିନ୍। 27ନେଖା ବାରେନୁ ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍ଚ୍କା ରାଇଦ୍ କା ‘ଏରା, ଏନ୍ ଏଙ୍ଘା ଦୂଁତ୍ବନ୍ ନିଙ୍ଘା ଆଘ୍ଲି ତାଇୟାଲ୍ଦାନ୍, ଆସ୍ ନିଙ୍ଘା ଆଘ୍ଲି ନିଙ୍ଘାଲାଗାନ୍ ପାବୁ ତିୟାର୍ କାମସ୍, ଇସ୍ ଆ ଆଲାସିନ୍।’ 28ଏନ୍ ନିମାନ୍ ତେଙ୍ଗାଲ୍ଦାନ୍ ମାଏକିନିଆଁର୍ସ୍ତି ଜନମ୍ ମାନ୍ଚ୍କା, ଆଲାର୍ଘି ଭିତର୍ନୁ ଯୋହାନ୍ସ୍ତି ବାଡ଼୍କା ନେଦ୍ହି ମାଲ୍କାରିନ୍: ହାଲେହି ପାର୍ମେଶ୍ଵାର୍ସ୍କି ରାଜୀନୁ ଏକାସ୍ ଜାମାର୍ଘିନ୍ତି ଛୋଟେସ୍, ଆସ୍ ଯୋହାନ୍ସ୍ତି ବାଡ଼୍କାସ୍।” 29ଯୀଶୁସ୍କି ଇ କାତ୍ଥାନ୍ ମେନିକିରି ଜାମା ଆଲାର୍ ଆରୁ ମାଲ୍ଗୁଜାରୀ ଉକ୍ରୁ ଆଲାର୍ହି ଯୋହାନ୍ସ୍ତି ଆସ୍ନାନ୍ ଅଚ୍ଚାର୍ ଆରୁ ଆବ୍ଡ଼ାର୍ ପାର୍ମେଶ୍ଵାର୍ସିନ୍ ସତ୍ତୁ ବୁଲି ଗ୍ରହନ୍ କାମ୍ଚାର୍। 30ଲେକିନ୍ ଫାରିସୀ ଆରୁ ପଣ୍ଡିତ୍ଜାମାର୍ ଯୋହାନ୍ସ୍ତି ଆସ୍ନାନ୍ ହୁଆଗେ ମାନା କାମ୍ଚେଇଚାର୍ ଆରୁ ତାହ୍ମା ବାରେନୁ ପାର୍ମେଶ୍ଵାର୍ସ୍କି ଏକା ଯୋଜ୍ନା ରାଚା ଆବନ୍ ଆବ୍ଡ଼ାର୍ ଗ୍ରହନ୍ ମା କାମ୍ଚାର୍। 31ଯୀଶୁସ୍ ଆରୁହି ତେଙ୍ଗିୟାସ୍, “ଏନ୍ ଇ ପିଢ଼ିନ୍ତା ଆଲାରିନ୍ ନେଖାଗାନେ ତୁଲ୍ନା କାମନ୍ ଆରୁ ଆବ୍ଡ଼ାର୍ ନେଖା ଲେଖା ରାନାଏ? 32ଆବ୍ଡ଼ାର୍ ଆ ହାଦ୍ଦୁର୍ ଲେଖା ଏକାର୍ କା ହାଟ୍ଟେଗୁଠିନୁ ଅକ୍କିକିରି ତାମ୍-ତାମ୍ ମେହିଁକିରି ତେଙ୍ଗ୍ନାଏ, ‘ଏମ୍ ନିହ୍ମା ଲାଗାନ୍ ବାଇଁଶ୍ରି ଉର୍କାମ୍, ଲେକିନ୍ ନିମ୍ ମା ନାଡ୍କାର୍; ଏମ୍ ଦୁଃଖୁ କାମ୍ଚ୍କାମ୍, ଲେକିନ୍ ନିମ୍ ମା ଅହ୍ଲକାର୍!’ 33ଏନ୍ଦେର୍ଗେକା ଆସ୍ନାନ୍ ଚିଉ ଯୋହାନ୍ସ୍ ବାର୍ଚାସ୍ ଆସ୍ ଆସ୍ମା ମା ମଖ୍ଖାସ୍, ଆରୁ ଦାଖ୍ରାସ୍ ମା ହାପ୍ପିୟାସ୍, ୭:୩୩ ଯୋହାନ୍ସ୍ ସାଧାରନ୍ ଅନା ମହାଁଲିୟାସ୍ ଆରୁ ଏକା-ଏକା ବାକେନ୍ ଉପାସ୍ ରାଲିୟାସ୍। ଆରୁ ନିମ୍ ତେଙ୍ଗ୍ଦାର୍, ‘ଆସ୍କେ ଭୁତ୍ତୁ ଲାକ୍କିଚି।’ 34ମୁନୁଷ୍ ହାଦ୍ଦୁସ୍ ବାର୍ଚାସ୍, ଆସ୍ ହାପ୍ପଦାସ୍ ଅନ୍ଦାସ୍, ଆରୁ ନିମ୍ ତେଙ୍ଗ୍ଦାର୍, ‘ଏରା, ଇ ଆଲାସ୍ ପେଟୁ ଆରୁ ମାତ୍ୱାଡ଼୍ସ୍, ମାଲ୍ଗୁଜାରୀ ଉକ୍ରୁ ଆରୁ ପାପୀ ଜାମାର୍ଘି ସାଙ୍ଗେସ୍।’ 35ଜ୍ଞାନ୍ଘି ଅନୁସାର୍ ନେଦ୍ ଜୀବନ୍ ବିତାବାନାଏ ଆବ୍ଡ଼ାର୍ଘି ଜୀବନ୍ ଦ୍ୱାର୍ନୁ ଜ୍ଞାନ୍ଦ୍ ସତ୍ତୁ ବୁଲି ଏନ୍ନେ ପାତା ଚାଲ୍ରଦ୍।”
ଅଣ୍ଟା ପାପୀ ଆଲିଦ୍ ଯୀଶୁସ୍କି ହେଡ୍ଡୁନୁ ବାସ୍ନା ଇସୁଙ୍ଗ୍ ଲାଗାବାଲିଦ୍
36ଆରୁ ଫାରିସୀ ଜାମାର୍ସ୍ତି ଅର୍ତୁସ୍ ଯୀଶୁସିନ୍ ତାଙ୍ଘାଗାନେ ଅନାଗେ ମେହିଁୟାସ୍, ଯୀଶୁସ୍ ଆ ଫାରିସୀସ୍କି ଆଡ଼୍ପା ବାରିକିରି ଅନାଗେ ଅକ୍କିୟାସ୍। 37ଆରୁ ଏରା ହୁ ସହର୍ତା ଅଣ୍ଟା ପାପୀ ଆଲିଦ୍ ଆଖ୍ଖାଦ୍ କା ଯୀଶୁସ୍ ଫାରିସୀସ୍କି ଆଡ଼୍ପାନୁ ଅନାଗେ ଅକ୍କାଦାସ୍, ତା ଆ ଆଲିଦ୍ ସାଙ୍ଗ୍ ମାର୍-ମାର୍ (ଇଦ୍ ଅଣ୍ଟା ଦାମିକା ଚାଁଚା) ଘି ଡାବାନୁ ବାସ୍ନା ଇସୁଙ୍ଗ୍ ଅନ୍ଦ୍ରା ଆରୁ ବାର୍ଚା, 38ଆରୁ ଆଦ୍ ଯୀଶୁସ୍କି ପାଛ୍ଲି ତାରା ଇଜ୍ଜା ଆରୁ ହେଡ୍ଡମୁଲିନୁ ଖାତ୍ରିକିରି ଅହ୍ଲାଗେ ଲାଗ୍ଗିୟାଦ୍, ଆଦ୍ଘି ହାଞ୍ଜାଲୋ ଆମ୍ମୁତି ଯୀଶୁସ୍କି ହେଡ୍ଡୁଦ୍ ଚେଦ୍ରାଗେ ଲାଗ୍ଗିୟା, ହୁଦ୍ଘିଲାଗାନ୍ ଆ ଆଲିଦ୍ ତାଙ୍ଘା ଚୁଟ୍ଟିତି ହେଡ୍ଡୁବନ୍ ଚିଁଇଚିକିରି ଯୀଶୁସ୍କି ହେଡ୍ଡୁବନ୍ ଚୋଙ୍ଖା-ଚୋଙ୍ଖା ବାସ୍ନା ଇସୁଙ୍ଗ୍ ଲାଗାବାଗେ ଲାଗ୍ଗିୟା। 39ଇବନ୍ ଏରିକିରି ଏକା ଫାରିସୀସ୍ ଯୀଶୁସିନ୍ ମେଁହ୍କାଚାସ୍, ଆସ୍ ମନେ-ମନେ ସୋଚ୍ଚାସ୍, “ଯଦି ଇସ୍ ନାବୀ ରସ୍ନେ ହାଲେ ଜରୁର୍ ଆହସ୍ନେକା ଏକା ଆଲିଦ୍ ତାଙ୍ଗାନ୍ ଏସରାଲିଦ୍, ଆଦ୍ ନେଦ୍ ଆରୁ ଏସ୍କେ ଆଲିଦ୍, ଏନ୍ଦେର୍ଗେକା ଆଦ୍ତା ପାପୀଦ୍।” 40ଆସ୍କି ସୋଚ୍ବନ୍ ଆହିକିରି ଯୀଶୁସ୍ ଆସିନ୍ ଯାବାବ୍ ଚିଚ୍ଚାସ୍, “ଶିମୋନ୍, ନିଙ୍ଗାନ୍ ଏଙ୍ଗାଗେ ଏନ୍ଦ୍ରିନ୍ ତେଙ୍ଗ୍ନା ରାଇଦ୍।” ଆସ୍ ତେଙ୍ଗିୟାସ୍, “ହେ ଗୁରୁ, ତେଙ୍ଗା।” 41“ଅଣ୍ଟା ମହାଜନ୍ସ୍କି ଦୁଇ ଲୋକ୍ ଉଧାର୍ ମହୁଁ ଆଲାର୍ ରାଚାର୍, ଅଣ୍ଟାସ୍ ପାଞ୍ଚ୍ ଶହ୍ ଦିନ୍ତା ମଜ୍ରୀନ୍ତା ଯେତ୍କ ରୁପିୟା ମାନିଦ୍ ହତ୍କ ଆରୁ ଦୁସ୍ରାର୍ ପଚାଶ୍ ଦିନ୍ତା ମଜ୍ରୀନ୍ତା ଯେତ୍କ ରୁପିୟା ମାନିଦ୍ ହତ୍କ ଉଧାର୍ ଅଚ୍ଚକାଚାର୍। 42ଆବ୍ଡ଼ାର୍ସାନ୍ ଉଧାର୍ ଛୁଟାଗେ ଏନ୍ଦେର୍ହି ମାଲ୍ଲାରୁଦ୍, ହୁଦ୍ଘିଲାଗାନ୍ ମହାଜନ୍ସ୍ ଦୁହି ଲୋକ୍ର୍ଘି ଉଧାର୍ବନ୍ ଛେମା କାମ୍ଚେଇଚାସ୍। ହାଲେ ଆବ୍ଡ଼ା ଦୁଇ ଲୋକ୍ ଭିତର୍ନୁ ଆସିନ୍ ନେଦ୍ ବାଗ୍ଗେ ବାନେ ହାଖ୍ଖର୍?” 43ଶିମୋନ୍ସ୍ ଯାବାବ୍ ଚିଚ୍ଚାସ୍, “ଏଙ୍ଘା ସୋଚ୍ନାନୁ ତା ଆସ୍, ଏକାସ୍କି ବାଗ୍ଗେ ଉଧ୍ରାଦ୍ ଛେମା ମାନ୍ଚାଦ୍।” ଯୀଶୁସ୍ ଆସିନ୍ ତେଙ୍ଗିୟାସ୍, “ନିନ୍ ଠିକ୍ ବିଚାର୍ କାମ୍ଚ୍କାଏ।” 44ଆଙ୍ଗେନ୍ ଯୀଶୁସ୍ ଆ ଆଲିତାରା ଏରିକିରି ଶିମୋନ୍ସିନ୍ ତେଙ୍ଗିୟାସ୍, “ଇ ଆଲିନ୍ ଏରାଲ୍ଦାଏ, ଏନ୍ ନିଙ୍ଘା ଆଡ଼୍ପା ବାର୍ଚ୍କାନ୍, ନିନ୍ ଏଙ୍ଘା ହେଡ୍ଡୁ ନଣ୍ଡ୍ରାଗେ ଆମ୍ମୁ ମା ଚିଚ୍କାଏ, ଲେକିନ୍ ଇ ଆଲିଦ୍ ଏଙ୍ଘା ହେଡ୍ଡୁନ୍ ତାଙ୍ଘା ହାଞ୍ଜାଲୋ ଆମ୍ମୁତି ନୋଣିୟାଦ୍ ଆରୁ ତାଙ୍ଘା ଚୁଟ୍ଟିତି ଚିଁଚ୍ୟାଦ୍। 45ଏଙ୍ଗାନ୍ ନିନ୍ ମା ଚୋଙ୍ଖକାଏ, ଲେକିନ୍ ଏନ୍ ଯେତ୍କବାକେନ୍ତି ଉଲା ବାର୍ଚ୍କାଦାନ୍ ହୁଙ୍ଗେନ୍ତିନ୍ ଇଦ୍ ଏଙ୍ଘା ହେଡ୍ଡୁନ୍ ଚୋଙ୍ଖାଲିଦ୍। 46ନିନ୍ ଏଙ୍ଘା କୁକ୍କୁନୁ ଇସୁଙ୍ଗ୍ ମାଲ୍ଲା ଲାଗାବୁୟ, ଲେକିନ୍ ଇଦ୍ ଏଙ୍ଘା ହେଡ୍ଡୁନୁ ବାସ୍ନା ଇସୁଙ୍ଗ୍ ଲାଗାବାଚ୍କିଚି। 47ଇଦ୍ଘିଲାଗାନ୍ ଏନ୍ ନିଙ୍ଗାନ୍ ତେଙ୍ଗାଲ୍ଦାନ୍ ଇଦ୍ଘି ଢେର୍ ପାପ୍ ଛେମା ମାନ୍ଚାକେର୍କିଚି, ଏନ୍ଦେର୍ଗେକା ଇଦ୍ ଢେର୍ ବାନେ ହାଖ୍ଖନାନ୍ ଏଦ୍କିଚି; ଲେକିନ୍ ନେଖାଏ କମ୍ ଛେମା ମାନ୍ଚ୍କିରି ଆବ୍ଡ଼ାର୍ କମ୍ ବାନେ ହାଖ୍ଖ୍ର୍।” 48ଆନ୍ତିନ୍ ଯୀଶୁସ୍ ଆ ଆଲିନ୍ ତେଙ୍ଗିୟାସ୍, “ନିଙ୍ଘାଏ ପାପ୍ଗୁଠିଦ୍ ଛେମା ମାନ୍ଚାକେରା।” 49ଆଙ୍ଗେନ୍ ତାଙ୍ଘା ସାଙ୍ଗେନ୍ ଅନୁର୍ ମନେ-ମନେ ତେଙ୍ଗା ଲାଗ୍ଗିୟାର୍, “ଇସ୍ ନେଦ୍ ଯେ ପାପ୍ବନ୍ହି ଛେମା କାମ୍ଦାସ୍?” 50ଲେକିନ୍ ଯୀଶୁସ୍ ଆ ଆଲିବନ୍ ତେଙ୍ଗିୟାସ୍, “ନିଙ୍ଘା ବିଶ୍ଵାସ୍ ନିଙ୍ଗାନ୍ ବାଛାବାଚ୍କିଚି, ଶାନ୍ତିନୁ କାଲ୍।”
8ଯୀଶୁସ୍ ଆଲାର୍ଗେ ଶିକ୍ଷା ଚିଆଲ୍ଦାସ୍
1ଇଦ୍ଘି ପାଛ୍ଲି ଯୀଶୁସ୍ ସହର୍ ସହର୍ନୁ ଆରୁ ପାଡ଼ା-ପାଡ଼ାନୁ କୁଦ୍ଦା-କୁଦ୍ଦା, ପାର୍ମେଶ୍ଵାର୍ସ୍କି ରାଜୀଘି ସୁସାମାଚାର୍ ଶୁଣାବାଲିୟାସ୍ ଆରୁ ତାଙ୍ଘାଗାନେ ବାର ଖାସ୍ଚେଲାର୍ହି ରାଚାର୍, 2ଆରୁ କେତ୍କ ମାଏକିନିଆଁର୍ହି ଯୀଶୁସ୍ଗାନେ ରାଚାର୍ ଏକାର୍ କା ଭୁତ୍ତୁ ଲାକ୍କା ଆରୁ ବେମାର୍ତି ବାନେ ମାନ୍ଚ୍କାଚାର୍, ଆବ୍ଡ଼ାର୍ଘି ଭିତର୍ତି: ମାରିୟାମ୍ ମାଗ୍ଦାଲୀନୀ, ନେଖାସ୍ତି ସାତ୍ତେଟା ଭୁତ୍ତୁ ଉର୍କିଚା, 3ହେରୋଦ୍ସ୍କି ମୁନ୍ସୀ ଖୂଜାସ୍କି ମାଏକିନିଆଁ ଯୋହାନ୍ନା, ଶୁଶାନ୍ନା ଆରୁ ଢେର୍ ଦୁସ୍ରା ମାଏକିନିଆଁର୍ହି ରାଚାର୍, ଏକାର୍ କା ତାହ୍ମା ସମ୍ପତ୍ତିତି ଯୀଶୁ ଆରୁ ତାଙ୍ଘା ଖାସ୍ଚେଲାର୍ଘି ସେବା କାମାଲିଆର୍।
ବିହ୍ନି ଚାହୁସ୍କି ନମୁନା
(ମାତିସ୍ ୧୩:୧-୯; ମାର୍କୁସ୍ ୪:୧-୯)
4ଅଣ୍ଟା ବାଡ଼୍କା ଆଲାର୍ଘି ଭିଡ଼୍ ଆରୁ ସହର୍ ସହର୍ତି ଆଲାର୍ ଯୀଶୁସ୍କି ଚାହାଗେ ବାରାଲିୟାର୍, ହତ୍କବାକେନ୍ ଯୀଶୁସ୍ ଅଣ୍ଟା ନମୁନା ଚିଇକିରି ତେଙ୍ଗିୟାସ୍: 5“କା ଅଣ୍ଟା ବିହ୍ନି ଚାହୁ ଆଲାସ୍ ବିହ୍ନି ଚାହାଗେ ଉର୍ଖିୟାସ୍। ଆସ୍ ଚାହ୍ତେ-ଚାହ୍ତେ କେତ୍କ ବିହ୍ନିଦ୍ ପାବୁ ଖାଁଣିନୁ ଖାତ୍ରାଦ୍, ଆରୁ ଆଦ୍ ହେଡ୍ଡୁତି ତିର୍ହା ନାବାକେରା, ଆରୁ ଆକାଶ୍ ତା ଓଡ଼ାଗୁଠିଦ୍ ଆବ୍ଡ଼ାନ୍ ମଖ୍ଖେଇଚା। 6ଆରୁ କେତ୍କ ବିହ୍ନିଦ୍ ଚାଁଚା ଆଡ୍ଡାନୁ ଖାତ୍ରାଦ୍, ଆରୁ ଆଦ୍ ଗାଜା ମାନ୍ଚା ଲେକିନ୍ ଆମ୍ମୁ ମା ହାଖ୍ଖର୍ନାତି ଆ ଗାଜାଦ୍ ହାଇୟାକେରା। 7ଆରୁ କେତ୍କ ବିହ୍ନିଦ୍ ଆଚ୍ଚୁ ଝୁଁଣିନୁ ଖାତ୍ରାଦ୍, ଆ ବିହ୍ନିଦ୍ ଆଚ୍ଚୁ ହପ୍ପାଗାନେ ସାଙ୍ଗେନ୍ ପାର୍ଦ୍ତେ କେରା ଆରୁ ଆବନ୍ ଆଚ୍ଚୁ ହପ୍ପାଦ୍ ଡାପ୍ଚେଇଚା। 8ଆରୁ କେତ୍କ ବିହ୍ନିଦ୍ ବାନେ ଆଡ୍ଡାନୁ ଖାତ୍ରାଦ୍, ଆଦ୍ ପାର୍ଦିକିରି ଶୋଏ ଗୁଣ୍ ଫାଡ଼ୁ ଚିଚ୍ଚା।” ଏତ୍କ ତେଙ୍କା ପାଛ୍ଲି ଯୀଶୁସ୍ ଚିର୍ରା ରାଇକିରି ତେଙ୍ଗିୟାସ୍, “ନେଖାଏ ମେନାଗେ ମନ୍ ରାଇ ଆବ୍ଡ଼ାର୍ ମେନା।”
ନମୁନାଘି ମତ୍ଲବ୍
(ମାତିସ୍ ୧୩:୧୦-୧୭; ମାର୍କୁସ୍ ୪:୧୦-୧୨)
9ତାଙ୍ଘା ଖାସ୍ଚେଲାଜାମାର୍ ଯୀଶୁସିନ୍ ଇ ନମୁନାଘି ମତ୍ଲବ୍ ଏନ୍ଦେର୍ ବୁଲି ମେନ୍ଚାର୍? 10ଆଙ୍ଗେନ୍ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମାଗେ ପାର୍ମେଶ୍ଵାର୍ସ୍କି ରାଜୀଘି ବାରେନୁ ଆହାଗେ ଶକ୍ତି ଚିଆ କେର୍କିଚି, ଲେକିନ୍ ଦୁସ୍ରାରିନ୍ ନମୁନାତି ତେଙ୍ଗାକାଇ, ଏସ୍କେ କା ‘ଆବ୍ଡ଼ାର୍ ଏର୍ନାଏ ହାଲେହି ମା ଏର୍ନା ଲେଖା ମାନ୍ନାଏ, ଆରୁ ମେନ୍ନାଏ ହାଲେହି ମା ବୁଝ୍ର୍ନା ଲେଖା ମାନ୍ନାଏ।’”
ବିହ୍ନି ମାଞ୍ଜି ଚାହୁସ୍କି ନମୁନାଘି ମତ୍ଲବ୍
(ମାତିସ୍ ୧୩:୧୮-୨୩; ମାର୍କୁସ୍ ୪:୧୩-୨୦)
11“ଇ ନମୁନାଘି ମତ୍ଲବ୍ ଇଦ୍ କା: ବିହ୍ନିଦ୍ ପାର୍ମେଶ୍ଵାର୍ସ୍କି ବଚନ୍ଦ୍। 12ପାବୁ ଖାଁଣିନ୍ ତା ଖାତ୍ର୍କା ବିହ୍ନି ଲେଖା ଆବ୍ଡ଼ାର୍, ଏକାର୍ ବଚନ୍ ମେନ୍ନାଏ; ଲେକିନ୍ ଶାଏତାନ୍ ବାରିକିରି ଆବ୍ଡ଼ାର୍ଘି ମେନ୍ଚ୍କା ବଚନ୍ବନ୍ ତାହ୍ମା ମନ୍ତି ହାଟାବାଇଚିକା ଆଲାର୍ ବିଶ୍ୱାସ୍ ମା କାମର୍ ଆରୁ ମୁକ୍ତି ମା ହାଖ୍ଖର୍। 13ଆରୁ ଚାଁଚା ଆଡ୍ଡାନୁ ଖାତ୍ର୍କା ବିହ୍ନି ଲେଖା ଆବ୍ଡ଼ାର୍ ଏକାର୍ କା ବଚନ୍ବନ୍ ମେନ୍ନାଏ, ଆରୁ ଖୁସୀତି ଗ୍ରହନ୍ କାମ୍ନାଏ ଲେକିନ୍ ଆବ୍ଡ଼ାର୍ଘି ଜୀବନ୍ନୁ ବଚନ୍ ଚେରୁ ମା ଧାର୍ନାଘି କାରଣ୍ତି ଆବ୍ଡ଼ାର୍ କାଟେ ସାମାୟତକ୍ ବିଶ୍ୱାସ୍ କାମ୍ନାଏ ଆରୁ ଯେତ୍କବାକେନ୍ ଦୁଃଖୁ ତକ୍ଲିପ୍ ବାରି ଆଙ୍ଗେନ୍ ଆବ୍ଡ଼ାର୍ ବିଶ୍ୱାସ୍ ଆମ୍ବନାଏ ଚିନାଏ। 14ଆରୁ ଆଚ୍ଚୁ ଝୁଁଣିନୁ ଖାତ୍ର୍କା ବିହ୍ନି ଲେଖା ଆବ୍ଡ଼ାର୍, ଏକାର୍ କା ବଚନ୍ବନ୍ ମେନ୍ନାଏ, ଲେକିନ୍ ନିଜର୍ ଜୀବନ୍ନୁ ନାନା ରକମ୍ଘି ଚିନ୍ତା ମାନ୍ଚ୍କୁନ୍ ଧାନ୍ନୁ, ଆରୁ ଏନ୍ଦ୍ରିନ୍ ଜିନିଷ୍ ଲାଲଚ୍ କାମ୍ଚ୍କୁନ୍ ମନ୍ନୁ ଚାହ୍କା ବଚନ୍ ଦାବ୍ରି କାଇ ମା ହାଞ୍ଜିଦ୍। 15ଆରୁ ବଚନ୍ ମେନୁ ବାକି ଆଲାର୍ ବାନେ ହାଲ୍ଲୁ ଲେଖା ଆବ୍ଡ଼ାର୍, ବାନେକିରି ଆରୁ ନରମ୍ ମନ୍ତି ବଚନ୍ବନ୍ ମେନ୍ନାଏ, ଆରୁ ଗ୍ରହନ୍ କାମ୍ନାଏ ଆରୁ ଧିରାଜ୍ ଧାରିକିରି ଫାଡ଼ୁ ଚିନାଏ।”
ବିଲ୍ଲୀଘି ନମୁନା
16“ନେଦ୍ହି ବିଲ୍ଲୀନ୍ ଦାଗିକିରି ଖୁରୀନୁ ମା ଡାବ୍ନାଏ, ଚାହେ ନାଟ୍ରୁ କିୟାଁ ମା ଉଇନାଏ, ଲେକିନ୍ ବାଚ୍ଛିନୁ ଉଇନାଏ ଏସ୍କେ କା ଉଲା କରୁର୍ ବିଲ୍ଲୀନ୍ ଏରା ଅଙ୍ଗର୍। 17ଏକାଦ୍ ନୁଡ୍କା ରାଇଦ୍ ଆବନ୍ ଖୁଲା କାମାକୋ ଆରୁ ଆବନ୍ ପାର୍ମେଶ୍ୱାର୍ସ୍ ଜାମାର୍ଘି ଆଘ୍ଲି ଖୁଲା କାମସ୍। 18ହୁଦ୍ଘିଲାଗାନ୍ ଏସ୍କେ ମେନାଲ୍ଦାର୍ ଆଦ୍ଘି ବାରେନୁ ସାବ୍ଧାନ୍ ରା? ଏନ୍ଦେର୍ଗେକା ନେଖାସାନ୍ ରାଇଦ୍ ଆସ୍କେ ଚିଆକୋ, ଆରୁ ନେଖାସାନ୍ ମାଲ୍ଲାଦିନ୍ ଆସ୍ତି ଆବନ୍ହି ହୁଆକୋ, ଏକାନ୍ କା ଆସ୍ ନିଜର୍ ବୁଲି ସୋଚ୍ଦାସ୍।”
ଯୀଶୁସ୍କି ଜାତି କୁଟୁମ୍ବ
(ମାତିସ୍ ୧୨:୪୬-୫୦; ମାର୍କୁସ୍ ୩:୩୧-୩୫)
19ଯୀଶୁସ୍କି ଆୟାଙ୍ଗ୍ ଆରୁ ତାଙ୍ଘା ଭାଇଜାମାର୍ ତାଙ୍ଘାସାନ୍ ବାର୍ଚାର୍, ଲେକିନ୍ ଭିଡ଼୍ଘି ଚାଲ୍ତେ ଆସିନ୍ ଭେଁଟ୍ ମାନାଗେ ପଲ୍ଲିୟାର୍। 20ଆଙ୍ଗେନ୍ ଆସାନ୍ ରୁ କେତ୍କ ଲୋକ୍ ଯୀଶୁସିନ୍ ତେଙ୍ଗିୟାର୍, “ନିହ୍ମା ଆୟାଙ୍ଗ୍ ଆରୁ ଭାଇଜାମାର୍ ବାହ୍ରି ଇଜ୍ଜକାନାଏ, ଆବ୍ଡ଼ାର୍ ନିମାନ୍ ଭେଁଟ୍ ମାନାଗେ ବେଦ୍ଦାଲ୍ନାଏ।” 21ଲେକିନ୍ ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ନେଦ୍ ପାର୍ମେଶ୍ଵାର୍ସ୍କି ବଚନ୍ବନ୍ ମେନ୍ନାଏ, ଆରୁ ଆଦ୍ଘି ଲେଖା ଚାଲ୍ର୍ନାଏ ଆବ୍ଡ଼ାର୍ ଏଙ୍ଘା ଆୟାଙ୍ଗ୍ ଆରୁ ଭାଇଜାମାର୍।”
ଯୀଶୁସ୍ ଆନ୍ଧି ଧୁକାବନ୍ ଶାନ୍ତ୍ କାମାଲ୍ଦାସ୍
(ମାତିସ୍ ୮:୨୩-୨୭; ମାର୍କୁସ୍ ୪:୩୫-୪୧)
22ଅନ୍ଦୁଲ୍ ଯୀଶୁସ୍ ତାଙ୍ଘା ଚେଲାର୍ଗାନେ ଅଣ୍ଟା ଡଙ୍ଗାନୁ ଅକ୍କିୟାର୍, ଆରୁ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଗୁଚା ନାମ୍ ହଁସ୍ରାଘି ହାପାଖା କତ୍।” ଆଙ୍ଗେନ୍ ଆବ୍ଡ଼ାର୍ ଡଙ୍ଗାନ୍ ଖୋଲ୍ଚାର୍। 23ଲେକିନ୍ ଆବ୍ଡ଼ାର୍ ଡଙ୍ଗା ବାହ୍ତେ କାଲିୟାର୍, ତା ଯୀଶୁସ୍ ଆସାନ୍ ହାନ୍ଦ୍ରାସ୍ କେରାସ୍: ହତ୍କବାକେନ୍ ହଁସ୍ରାନୁ ଆନ୍ଧିଧୁକା ବାର୍ଚା, ଆରୁ ଡଙ୍ଗାନୁ ଆମ୍ମୁ ନିନ୍ଦାଗେ ଲାଗ୍ଗିୟାଦ୍ ଆରୁ ଆବ୍ଡ଼ାର୍ ବିପଦ୍ନୁ ଖାତ୍ରାର୍ କେରାର୍। 24ଆଙ୍ଗେନ୍ ଚେଲାଜାମାର୍ ଯୀଶୁସ୍କି ଚାହାଗେ ବାରିକିରି ତାଙ୍ଗାନ୍ ଉଠାବାଚାର୍, ଆରୁ ତେଙ୍ଗିୟାର୍, “ହେ ଗୁରୁ! ହେ ଗୁରୁ! ନାମ୍ ମୁହ୍ଲାଲ୍ଦାତ୍।” ତା ଯୀଶୁସ୍ ଉସ୍କାରାଚାସ୍ ଆରୁ ଧୁକା ଆରୁ ଲହ୍ଡ଼ିବନ୍ ଧାମ୍କାଚାସ୍ ଆରୁ ଆଦ୍ ଠାହ୍ରାରାଇକିରି ଶାନ୍ତ୍ ମାନ୍ଚାକେରା। 25ଆନ୍ତିନ୍ ଆସ୍ ତାଙ୍ଘା ଚେଲାଜାମାରିନ୍ ତେଙ୍ଗିୟାସ୍, “ନିହ୍ମା ବିଶ୍ଵାସ୍ ଏକାତାରା କେରାଦ୍?” ଲେକିନ୍ ଆବ୍ଡ଼ାର୍ ଏଲ୍ଚିୟାର୍ କେରାର୍ ଆରୁ ଆଚ୍ମିତ୍ ମାନିକିରି ତାମ୍-ତାମ୍ କାଚ୍ନେଖ୍ରା ଲାଗ୍ଗିୟାର୍, “ହାଲେ ଇସ୍ ନେଦ୍ ଇସ୍ତା ଧୁକା ଆରୁ ଲହ୍ଡ଼ିବନ୍ ହୁକୁମ୍ ଚିଦାସ୍, ଆରୁ ଇବ୍ଡ଼ାଦ୍ ହି ତାଙ୍ଘା ହୁକୁମ୍ବନ୍ ମାନିଦ୍?”
ଯୀଶୁସ୍ ଅଣ୍ଟା ଆଲାସ୍ସ୍ତି ଭୁତ୍ତୁ ଅଥ୍ରାଲ୍ଦାସ୍
(ମାତିସ୍ ୮:୨୮-୩୪; ମାର୍କୁସ୍ ୫:୧-୨୦)
26ଆନ୍ତିନ୍ ଆବ୍ଡ଼ାର୍ ଗାଲିଲୀଘି ହଁସ୍ରା ହାପାଖ୍ତା, ଗେରେସାନିଆ ଜାମାର୍ଘି ରାଜୀଗେ ଆଣସିୟାର୍। 27ଯୀଶୁସ୍ ଏସ୍କେ ଡଙ୍ଗାନ୍ତି ଏତ୍ତିୟାସ୍, ହୁଙ୍ଗେନିନ୍ ହୁ ସହର୍ନ୍ତା ଅଣ୍ଟା ଭୁତ୍ତୁ ଲାକ୍କା ଆଲାସ୍ ତାଙ୍ଘା ଚାହାଗେ ବାର୍ଚାସ୍। ଆ ଆଲାସ୍ ଢେର୍ଉଲ୍ତି ଚିଢ଼ା ମା ଆତ୍ତାଲିୟାସ୍ ଆରୁ ଆଡ଼୍ପାନୁ ମାଲ୍ଲା ଲେକିନ୍ ମାସ୍ଣା ଆଡ୍ଡାନୁ ରାଲିୟାସ୍। 28ଯୀଶୁସିନ୍ ଏରିକିରି ଆ ଆଲାସ୍ ଚିର୍ରାରାଚାସ୍ ଆରୁ ତାଙ୍ଘା ହେଡ୍ଡମୁଲିନୁ ଖାତ୍ରିକିରି ଜୋର୍ସେ ଚିର୍ରା ରାଇକିରି ତେଙ୍ଗିୟାସ୍, “ହେ ଯୀଶୁ ମାହାନ୍ ଧାର୍ମେ ବାଙ୍ଗ୍ସ୍କି ହାଦ୍ଦୁ! ନିନ୍ ଏଙ୍ଘାଗାନେ ଏନ୍ଦେର୍ କାମା ବେଦ୍ଦାଲ୍ଦାଏ? ଏନ୍ ନିମାନ୍ ଆର୍ଜୀ କାମାଲ୍ଦାନ୍, କା ଏଙ୍ଗାନ୍ କଷଟ୍ ଆମା ଚିଆ।” 29ଏନ୍ଦେର୍ଗେକା ଯୀଶୁସ୍ ଭୁତ୍ତୁନ୍ ଆ ଆଲାସ୍ସ୍ତି ଉର୍ଖାଗେ ହୁକୁମ୍ ଚିଚ୍ଚାସ୍, ଆ ଆଲାସ୍କିନୁ ଭୁତ୍ତୁ ଲାକ୍କିଚା ଆରୁ ଆଲାର୍ ଆସିନ୍ କାବୁନୁ ଉଇୟାଗେ ସିକ୍ଡ଼ି ଆରୁ ବେଢ଼ିତି ହିଁଆ ଉଇୟାଲିୟାର୍ ଲେକିନ୍ ଆସ୍ ହିଁଚ୍କାନ୍ ହାଚ୍ଚା ଚାଲିଆସ୍, ଆରୁ ଭୁତ୍ତୁଦ୍ ତାଙ୍ଗାନ୍ ଶୁନ୍ଶାନ୍ ଆଡ୍ଡାଗେ ହୁଆ କାଲିୟାଦ୍। 30ଯୀଶୁସ୍ ଭୁତ୍ତୁ ଲାକ୍କା ଆଲାସିନ୍ ମେନ୍ଚାସ୍, “ନିଙ୍ଘା ନାମେ ଏନ୍ଦେର୍?” ଆସ୍ ତେଙ୍ଗିୟାସ୍, “ଦଲ୍,” ଏନ୍ଦେର୍ଗେକା ଆ ଆଲାସ୍କିନୁ ଯୁକ୍କୁ ଭୁତ୍ତୁ କର୍ଚା କେର୍କିଚା। 31ଆରୁ ଆବ୍ଡ଼ାର୍ ଯୀଶୁସିନ୍ ଆର୍ଜୀବିନ୍ତି କାମ୍ତେ ରାଚାର୍ କା ତାମାନ୍ ହଞ୍ଜ୍ ହଞ୍ଜୋ ଗାଡ୍ଡି କିୟାଁ କାଲାଗେ ହୁକୁମ୍ ମା ଚିୟସ୍। 32ଆସାନ୍ ପାର୍ତ୍ତାନୁ କିସ୍ସୁଘି ଅଣ୍ଟା ବାଡ଼୍କା ଗୁଟ୍ଟଠି ମେନାଲିୟାଦ୍, ଆରୁ ଭୁତ୍ତୁଗୁଠିଦ୍ ଯୀଶୁସିନ୍ ଆର୍ଜୀବିନ୍ତି କାମ୍ଚାକା ଆସ୍ ଆବ୍ଡ଼ାନ୍ କିସ୍ସୁନୁ କରାଗେ ଛୁଟି ଚିୟସ୍। ଯୀଶୁସ୍ ଭୁତ୍ତୁଗୁଠିନ୍ ଛୁଟି ଚିଚ୍ଚାସ୍ ଲାଗ୍ଗିୟାସ୍। 33ଆସ୍ ଆବ୍ଡ଼ାରିନ୍ ଛୁଟି ଚିଚ୍ଚାସ୍ ଆଙ୍ଗେନ୍ ଭୁତ୍ତୁଗୁଠିଦ୍ ଆ ଆଲାସ୍ସ୍ତି ଉର୍ଖିକିରି କିସ୍ସୁନୁ କର୍ଚା ଆରୁ ଆ କିସ୍ସୁଗୁଠିଦ୍ ମୁରୁକ୍ ଜୋର୍ସେ କୁଦିୟାରାତେ କାଇକିରି ଉତ୍ରେନ୍ ଆଡ୍ଡାନ୍ତି ହଁସ୍ରାନୁ ଖାତ୍ରିକିରି ମୁହ୍ଲିଆ କେଚ୍ଚାକେରା। 34ଇବନ୍ ଏରିକିରି କିସ୍ସୁ ହାପୁର୍ କାଇକିରି, ସହର୍ ଆରୁ ପାଡ଼ାନୁ ଇ ଖବର୍ବନ୍ ହାଲ୍ଲା କାମ୍ଚେଇଚାର୍। 35ଆଙ୍ଗେନ୍ ଆଲାର୍ ଇବ୍ଡ଼ାଗୁଠିନ୍ ଏରାଗେ କେରାର୍, ତା ଆସାନ୍ ଆବ୍ଡ଼ାର୍ ଯୀଶୁସ୍ ଏକା ଆଲାସ୍ସ୍ତି ଭୁତ୍ତୁଗୁଠିନ୍ ଅଥ୍ର୍କାଚାସ୍, ଆ ଆଲାସ୍ ଚିଢ଼ା ଆତ୍ତିକିରି କାଡ଼େ-କାଡ଼େ ଯୀଶୁସ୍କି ହେଡ୍ଡୁସାନ୍ ଅକ୍କାନ୍ ଏରିୟାର୍ ତା ଆବ୍ଡ଼ାର୍ ଏଲ୍ଚିୟାର୍ କେରାର୍; 36ଆରୁ ଏକା ଆଲାର୍ ଇବ୍ଡ଼ା ଜାମାନ୍ ଏର୍କାଚାର୍ ଆବ୍ଡ଼ାର୍ ଆଲାରିନ୍ ତେଙ୍ଗିୟାର୍ କା ଭୁତ୍ତୁ ଲାକ୍କା ଆଲାସିନ୍ ଏସ୍କେ ବାନେ କାମାକେରା। 37ଆଙ୍ଗେନ୍ ଗେରେସାନିଆ ରାଜୀନ୍ତା ଚାହାଚାହାନ୍ତା ଆଲାର୍ ମୁରୁକ୍ ଏଲ୍ଚିୟାର୍ କେରାର୍, ଆରୁ ଯୀଶୁସିନ୍ ତାହ୍ମା ରାଜୀନ୍ତି ବୁଙ୍ଗାଗେ ଆର୍ଜୀବିନ୍ତି କାମ୍ଚାର୍; ଆରୁ ଯୀଶୁସ୍ ଅଣ୍ଟା ଡଙ୍ଗାନୁ ଅକ୍କିକିରି କିର୍ରିୟାସ୍ ବାର୍ଚାସ୍। 38ଲେକିନ୍ ଏକା ଆଲାସ୍ସ୍ତି ଭୁତ୍ତୁଗୁଠିଦ୍ ଉର୍କିଚା ଆ ଆଲାସ୍ ଯୀଶୁସିନ୍ ଆର୍ଜୀବିନ୍ତି କାମ୍ଚାସ୍ କା ଏଙ୍ଗାନ୍ ନିହ୍ମାଗାନେ ରାଗେ ଚିଆ, ଲେକିନ୍ ଯୀଶୁସ୍ ଆସିନ୍ ବିଦା କାମ୍ତେ ତେଙ୍ଗିୟାସ୍, 39“ନିଙ୍ଘା ଆଡ଼୍ପା କିର୍ରା କାଲା ଆରୁ ପାର୍ମେଶ୍ଵାର୍ସ୍ ନିଙ୍ଘାଲାଗାନ୍ ଏନ୍ଦେର୍ ଏନ୍ଦେର୍ ନାଲ୍ଖୁ କାମ୍ଚ୍କାଦାସ୍ ଆବ୍ଡ଼ାନ୍ ଜାମା ଆଲାରିନ୍ ତେଙ୍କେ।” ଆସ୍ କାଇକିରି ସହର୍ ଗୋଟା କୁଦ୍ଦା-କୁଦ୍ଦା ଆସ୍କି ଲାଗାନ୍ ଯୀଶୁସ୍ ଏନ୍ଦେର୍-ଏନ୍ଦେର୍ ନାଲ୍ଖୁ କାମ୍ଚ୍କାଚାସ୍ ଆବନ୍ ତେଙ୍ଗିୟାସ୍।
ଯୀଶୁସ୍ ଅଣ୍ଟା କେଚ୍ଚକା କୁକାଏବନ୍ ଉଜ୍ଜତାଲ୍ଦାସ୍ ଆରୁ ଅଣ୍ଟା ବେହ୍ମରିୟା ଆଲିନ୍ ବାନେ କାମାଲ୍ଦାସ୍
(ମାତିସ୍ ୯:୧୮-୨୬; ମାର୍କୁସ୍ ୫:୨୧-୪୩)
40ଯେତ୍କବାକେନ୍ ଗେରେସାନିଆଁ ରାଜୀଗେ ଯୀଶୁସ୍ କିର୍ରିୟାସ୍ ବାର୍ଚାସ୍ ତା ଆଲାର୍ ତାଙ୍ଗାନ୍ ଖୁସୀତି ସ୍ୱାଗାତ୍ କାମ୍ଚାର୍, ଏନ୍ଦେର୍ଗେକା ଜାମା ଆଲାର୍ ତାଙ୍ଗାନ୍ ହୋଖାଲିୟାର୍। 41ଆରୁ ହତ୍କବାକେନ୍ ଯାଇରସ୍ ନାମେଘି ଅଣ୍ଟା ଆଲାସ୍ ବାର୍ଚାସ୍ ଆସ୍ ସାଭା ଆଡ଼୍ପାନ୍ତା ମୁଖ୍ୟାସ୍ ରାଚାସ୍, ଆସ୍ ଯୀଶୁସ୍କି ହେଡ୍ଡମୁଲିନୁ ଖାତ୍ରିକିରି ତାଙ୍ଘା ଆଡ଼୍ପା ବାରାଗେ ଆର୍ଜୀବିନ୍ତି କାମ୍ଚାସ୍, 42ଏନ୍ଦେର୍ଗେକା ତାଙ୍ଘା ଲାଗ୍ଭାଗ୍ ବାର ବଛର୍ତା ଅଣ୍ଟା ଖାଲି କୁକାଏ ହାଦ୍ଦୁ ରାଚା, ଆରୁ ଆଦ୍ ଖିନା ଲେଖା ମାନ୍ଚା କେର୍କିଚା। ଲେକିନ୍ ଯୀଶୁସ୍କି କାନାବାକେନ୍, ପାବୁନୁ ଆଲାର୍ଘି ଏତ୍କ ଭିଡ଼୍ ରାଚା ଯେ ଆଲାର୍ ତାଙ୍ଗାନ୍ ତିର୍ହା ନାବାଚାଲିୟାର୍। 43ହତ୍କବାକେନ୍ ଅଣ୍ଟା ଆଲି ବାର୍ଚା ଆଦ୍ଘି ବାର ବଛର୍ତି ପାର୍ଦା ବେମାର୍ ରାଚା, ଆରୁ ଆବନ୍ ନେଦ୍ହି ବାନେ କାମା ପଲ୍ଲକାଚାର୍, 44ଆ ବେହ୍ମରିୟା ଆଲିଦ୍ ପାଛ୍ଲି ତାର୍ତି ବାରିକିରି ଯୀଶୁସ୍କି ଝାପ୍ର୍କା ଚାଦର୍ଘି ପାଣ୍ତୁନ୍ ଏସ୍ରିୟାଦ୍, ଆରୁ ଆଖାନେନ୍ ତାଙ୍ଘା ପାର୍ଦା ବେମାର୍ ଛୁଟ୍ରାକେରା। 45ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ନେଦ୍ ଏଙ୍ଗାନ୍ ଏସ୍ରାର୍?” ହତ୍କବାକେନ୍ ଜାମାର୍ଘି ମାନା କାମ୍ଚ୍କା ପାଛ୍ଲି, ପାତ୍ରାସ୍ ତେଙ୍ଗିୟାସ୍, “ହେ ଗୁରୁ, ନିହ୍ମାଏ ଚାର୍ହି ପାଖ୍ତି ଆଲାର୍ଘି ଭିଡ଼୍ ରାଇଦ୍ ଆରୁ ଆବ୍ଡ଼ାର୍ ନିମାନ୍ ତିର୍ହା ନାବାଚାଲ୍ନାଏ।” 46ଲେକିନ୍ ଯୀଶୁସ୍ ତେଙ୍ଗିୟାସ୍, “ନେଦ୍ ଅର୍ତୁ ଏଙ୍ଗାନ୍ ଏସ୍ରାର୍ ଏନ୍ଦେର୍ଗେକା ଏଙ୍ଘାସ୍ତି ଶକ୍ତି ଉର୍ଖା ବୁଲି ଅକ୍କାନ୍।” 47ଯେତ୍କବାକେନ୍ ଆ ଆଲିଦ୍ ଏରିୟା କା ତାନ୍ ନୁହୁରା ପଲ୍ଲିଦ୍, ହତ୍କବାକେନ୍ ଆଦ୍ ଥାର୍ଥାର୍ନାତି ବାର୍ଚାଦ୍ ଆରୁ ଯୀଶୁସ୍କି ହେଡ୍ଡମୁଲିନୁ ଖାତ୍ରିକିରି ଏନ୍ଦେର୍ଗେ ଯୀଶୁସିନ୍ ଏସ୍ରିୟାଦ୍, ଆରୁ ଏସ୍କେ ଆଖାନେନ୍ ବାନେ ମାନ୍ଚାକେରା ଆବନ୍ ଜାମାର୍ଘି ଆଘ୍ଲି ବାତାବାଚା। 48ଆଙ୍ଗେନ୍ ଯୀଶୁସ୍ ଆ ଆଲିନ୍ ତେଙ୍ଗିୟାସ୍, “ହାଇ, ନିଙ୍ଘା ବିଶ୍ୱାସ୍ ନିଙ୍ଗାନ୍ ବାନେ କାମ୍ଚା, ଶାନ୍ତିନୁ କିର୍ରୁ କାଲ୍।” 49ଯୀଶୁସ୍ ଇ କାତ୍ଥା ତେଙ୍ଗ୍ନାବାକେନ୍ ସାଭା ଆଡ଼୍ପାନ୍ତା ମୁଖିଆସ୍କି ଆଡ଼୍ପାନ୍ତି ଅର୍ତୁସ୍ ବାରିକିରି ତେଙ୍ଗିୟାସ୍, “ନିଙ୍ଗ୍ଦାଦ୍ କେଚ୍ଚାକେରାଦ୍: ନିମ୍ ଗୁରୁସିନ୍ କଷଟ୍ ଆମା ଚିଆ।” 50ଲେକିନ୍ ଇବନ୍ ମେନିକିରି ଯୀଶୁସ୍ ଆସିନ୍ ଯାବାବ୍ ଚିଚ୍ଚାସ୍, “ଆମା ଏଲ୍ଚା; ଖାଲି ବିଶ୍ୱାସ୍ କାମା, ଆରୁ ଆଦ୍ ଉଜ୍ଜଦ୍।” 51ଆରୁ ଯାଇରୁସ୍କି ଆଡ଼୍ପା ବାରିକିରି ଯୀଶୁସ୍ ପାତ୍ରାସ୍, ଯୋହାନ୍, ଆରୁ ୟାକୁବ୍, ଆରୁ ଆ କୁକାଏଘି ତାଙ୍ଗ୍ୟ-ତାମ୍ବାରିନ୍ ଆମ୍ବିକିରି ନେକାନ୍ହି ତାଙ୍ଘାଗାନେ ଉଲା କରାଗେ ମା ଚିଚ୍ଚାସ୍। 52ଲେକିନ୍ ଆସାନ୍ ରୁ ଜାମା ଆଲାର୍ ତାଙ୍ଘା ଲାଗାନ୍ ଏହୁ ଡେମ୍ରା-ଡେମ୍ରା ଅହ୍ଲାଲିୟାର୍, ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ଆମା ଅହ୍ଲା; ଇଦ୍ ମାଲ୍ଲା ଖିଉଦ୍ ଲେକିନ୍ ହାନ୍ଦ୍ରାଲିଦ୍।”53ଲେକିନ୍ ଆବ୍ଡ଼ାର୍ ବାନେକିରି ଆକ୍କାଚାର୍ କା ଆ କୁକାଏ କେଚ୍ଚା କେର୍କିଚି ହୁଦ୍ଘିଲାଗାନ୍ ଆବ୍ଡ଼ାର୍ ଯୀଶୁସ୍କି ମାଜାକ୍ ଉଡ଼ାବାଚାର୍। 54ଲେକିନ୍ ଯୀଶୁସ୍ ଆଦ୍ଘି ହେଖ୍ଖା ଧାରିକିରି ତେଙ୍ଗିୟାସ୍, “ଏ କୁକାଏ, ଉସ୍କାରୁ!” 55ଆଙ୍ଗେନ୍ ଆଦ୍ଘି ଜୀଆ କିର୍ୟା ବାର୍ଚା ଆରୁ ଆଦ୍ ଆଖାନେନିନ୍ ଉସ୍କାରାଚା ଆରୁ ଯୀଶୁସ୍ ଆଦ୍ଗେ ଏନ୍ଦ୍ରିନ୍ ମହ୍ଁତାଗେ ହୁକୁମ୍ ଚିଚ୍ଚାସ୍। 56ଆଙ୍ଗେନ୍ ତାଙ୍ଗ୍ୟ-ତାମ୍ଵାର୍ ଆଚ୍ମିତ୍ ମାନ୍ଚାର୍ କେରାର୍, ଲେକିନ୍ ଯୀଶୁସ୍ ଇ ଘାଟ୍ଣାଘି ବାରେନୁ ନେକାନ୍ହି ମା ତେଙ୍ଗାଗେ ହୁକୁମ୍ ଚିଚ୍ଚାସ୍।
9ଯୀଶୁସ୍ ବାର ଖାସ୍ଚେଲାଜାମାରିନ୍ ତାଇୟାଲ୍ଦାସ୍
(ମାତିସ୍ ୧୦:୫-୧୫; ମାର୍କୁସ୍ ୬:୭-୧୩)
1ଯୀଶୁସ୍ ତାଙ୍ଘା ବାର ଖାସ୍ଚେଲାରିନ୍ ଅନ୍ଠାଣ୍ସାନ୍ ମେହିଁକିରି ଆବ୍ଡ଼ାର୍ଗେ ଭୁତ୍ତୁଗୁଠିନ୍ ଅଥ୍ରାଗେ ଆରୁ ବେମାର୍ତି ବାନେ କାମାଗେ ଶକ୍ତି ଆରୁ ହକ୍ ଚିଚ୍ଚାସ୍, 2ଆନ୍ତିନ୍ ଆବ୍ଡ଼ାରିନ୍ ଯୀଶୁସ୍ ପାର୍ମେଶ୍ଵାର୍ସ୍କି ରାଜୀଘି ବାରେନୁ ଶୁଣାବାଗେ ଆରୁ ବେହ୍ମରିୟାରିନ୍ ବାନେ କାମାଗେ ତାଇୟାସ୍। 3ଆରୁ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିହ୍ମା ପାବୁଘି ଲାଗାନ୍ ଏନ୍ଦେର୍ହି ଆମାହୁଆ ନା ଠେଙ୍ଗା, ନା ମୁଁଣା, ନା ଆସ୍ମା, ନା ପାଏସାକାଉଡ଼ି ଆରୁ ନିହ୍ମା ଲାଗାନ୍ ଯୋଡ଼େ ମିର୍ଜୀହି ଆମାହୁଆ। 4ନିମ୍ ଏକା ଆଡ଼୍ପାନୁ ରାଗେ କର୍, ନିମ୍ ଆ ସହର୍ତି ବିଦା ମା ମାନ୍ନାଜୁଟି ଆ ଆଡ଼୍ପାନୁ ରାକେ। 5ଯଦି ଆଲାର୍ ନିମାନ୍ ମାଇନ୍ ମା କାମର୍, ହାଲେ ଯେତ୍କବାକେନ୍ ନିମ୍ ଆସ୍ତି ଉର୍ଖର୍ ତା ପ୍ରାଭୁସ୍ ଆବ୍ଡ଼ାର୍ଘି ମିଆଁ ନାରାଜ୍ ରାଦାସ୍ ଆରୁ ଆବ୍ଡ଼ାରିନ୍ ଦଣ୍ଡ୍ ଚିୟସ୍ ଆବନ୍ ତେଙ୍ଗାଗେ ନିହ୍ମା ହେଡ୍ଡୁନ୍ତା ଧୁଲିନ୍ ହେତ୍ତକେଚିକେ।” 6ଆଙ୍ଗେନ୍ ଆବ୍ଡ଼ାର୍ ବୁଙ୍ଗିୟାର୍କେରାର୍ ଆରୁ ପାଡ଼ା-ପାଡ଼ାନୁ କୁଦ୍ଦା-କୁଦ୍ଦା ସୁସାମାଚାର୍ ଶୁଣାବାଲିୟାର୍ ଆରୁ ବେହ୍ମରିୟାରିନ୍ ବାନେ କାମାଲିୟାର୍।
ହେରୋଦ୍ ରାଜା ଆରୁ ଯୀଶୁସ୍
(ମାତିସ୍ ୧୪:୧-୧୨; ମାର୍କୁସ୍ ୬:୧୪-୨୯)
7ହେରୋଦ୍ ରାଜାସ୍ ଇବ୍ଡ଼ା ଜାମା ଘାଟ୍ଣାନ୍ ମେନିକିରି ଚିନ୍ତାନୁ ଖାତ୍ରାସ୍ କେରାସ୍, ଏନ୍ଦେର୍ଗେକା କେତ୍କ ଆଲାର୍ ତେଙ୍ଗାଲିୟାର୍ କା ଯୋହାନ୍ସ୍ କେଚ୍ଚକା ଆଲାର୍ଘି ଭିତର୍ନୁ ଉଜ୍ଜିୟାସ୍ କେର୍କାଦାସ୍, 8ଆରୁ କେତ୍କ ଆଲାର୍ ତେଙ୍ଗାଲିୟାର୍ କା ଏଲିୟାସ୍ ଦର୍ଶନ୍ ଚିଆଲ୍ଦାସ୍, ଆରୁ କେତ୍କ ଆଲାର୍ ତେଙ୍ଗାଲିୟାର୍ ପୁର୍ଖା ଯୁଗ୍ତା ନାବୀଜାମାର୍ଘି ଭିତର୍ନୁ ଅର୍ତୁ ଉଜ୍ଜକାନାଏ। 9ହେରୋଦ୍ସ୍ ତେଙ୍ଗିୟାସ୍, “ଯୋହାନ୍ସ୍କି କୁକ୍କୁନ୍ ତା ଏନ୍ ପୁଜ୍ତାଜ୍କାଚ୍କାନ୍, ହାଲେ ଇସ୍ ନେଦ୍ ନେଖା ବାରେନୁ କା ଏନ୍ ଏନ୍ନେ କାତ୍ଥା ମେନାଲ୍ଦାନ୍?” ଆରୁ ଆସ୍ ଯୀଶୁସିନ୍ ଏରାଗେ ବେଦ୍ଦାଲିୟାସ୍।
ଯୀଶୁସ୍ ପାଞ୍ଚ୍ ହାଜାର୍ ଆଲାରିନ୍ ମହଁତାଲ୍ଦାସ୍
(ମାତିସ୍ ୧୪:୧୩-୨୧; ମାର୍କୁସ୍ ୬:୩୦-୪୪; ଯୋହାନ୍ ୬:୧-୧୪)
10ଖାସ୍ଚେଲାଜାମାର୍ କିର୍ରିକିରି ଏନ୍ଦେର୍-ଏନ୍ଦେର୍ କାମ୍ଚ୍କାଚାର୍, ଆବ୍ଡ଼ାନ୍ ଯୀଶୁସିନ୍ ତେଙ୍ଗିୟାର୍; ଯୀଶୁସ୍ ତାଙ୍ଘା ଚେଲାଜାମାରିନ୍ ତାଙ୍ଘା ସାଙ୍ଗେନ୍ ହୋଇକିରି ବେତ୍ସାଇଦା ପାଡ଼ାଗେ କେରାସ୍। 11ଲେକିନ୍ ଆଲାର୍ଗେ ଇଦ୍ଘି ପାତା ଚାଲ୍ରାକେରା ଆରୁ ଆବ୍ଡ଼ାର୍ ଆର୍ଘି ପାଛ୍ଲି-ପାଛ୍ଲି କେରାର୍, ଯୀଶୁସ୍ ଆବ୍ଡ଼ାରିନ୍ ଖୁସୀତି ଗ୍ରହନ୍ କାମ୍ଚାସ୍, ଆରୁ ପାର୍ମେଶ୍ଵାର୍ସ୍କି ରାଜୀଘି ବାରେନୁ ଶିକ୍ଷା ଚିଚ୍ଚାସ୍, ଆରୁ ଏକାର୍ ବାନେ ମାନାଗେ ବେଦ୍ଦାଲିୟାର୍ ଆବ୍ଡ଼ାରିନ୍ ବାନେ କାମ୍ଚାସ୍। 12ଆରୁ ହତ୍କବାକେନ୍ ବିଡ଼ିଅକ୍କା ବେଦ୍ଦାଲିୟା ଆଙ୍ଗେନ୍ ବାର ଖାସ୍ଚେଲାଜାମାର୍ ଯୀଶୁସ୍କି ଚାହାଗେ ବାରିକିରି ତେଙ୍ଗିୟାର୍, “ଆଲାରିନ୍ ବିଦା କାମାଚା ଏନ୍ଦେର୍ଗେକା ଆବ୍ଡ଼ାର୍ ଚାହାଚାହାନ୍ତା ପାଡ଼ା ଆରୁ ବସ୍ତି ଗୁଠିଗେ କାଇକିରି ଅନାମହାଗେ ଆରୁ ରାଗେ ଯୋଗାଡ଼୍ କାମାଗେ ଅଙ୍ଗର୍, ଏନ୍ଦେର୍ଗେକା ନାମ୍ ଇସାନ୍ ଶୁନ୍ଶାନ୍ ଆଡ୍ଡାନୁ ରାଦାତ୍।” 13ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ନିମ୍ ଇବ୍ଡ଼ାର୍ଗେ ଅନାମହାଗେ ଚିଆ।” ଆବ୍ଡ଼ାର୍ ତେଙ୍ଗିୟାର୍, “ଏହ୍ମାସାନ୍ନ୍ତା ଖାଲି ପାଞ୍ଚେଟା ଆସ୍ମା ଆରୁ ଯୋଡ଼େ ଇଞ୍ଜୋ ରାଇଦ୍; ନିମ୍ ଚାହାଁଲ୍ଦାର୍ କା ଏମ୍ ନିଜେ କାଇକିରି ଆବ୍ଡ଼ା ଜାମାର୍ଘି ଲାଗାନ୍ ଅନ୍ନାମହ୍ନା ହେନ୍ଦମ୍ ଅନ୍ଦ୍ରମ୍ କାଁଏ?” 14ଆସାନ୍ ଲାଗ୍ଭାଗ୍ ପାଞ୍ଚ୍ ହାଜାର୍ ମାର୍ଦ୍ନାର୍ ରାଚାର୍। ଯୀଶୁସ୍ ତାଙ୍ଘା ଚେଲାଜାମାରିନ୍ ତେଙ୍ଗିୟାସ୍, “ଆବ୍ଡ଼ାରିନ୍ ପଚାଶ୍ ପଚାଶ୍ ଲୋକ୍ କାମିକିରି ଧାଡ଼ି-ଧାଡ଼ି ଅକ୍ତା।” 15ଆବ୍ଡ଼ାର୍ ଏନ୍ନେନ୍ କାମିକିରି, ଜାମାରିନ୍ ଅକ୍ତାଚାର୍। 16ଆନ୍ତିନ୍ ଯୀଶୁସ୍ ଆ ପାଞ୍ଚେଟା ଆସ୍ମା ଆରୁ ଯୋଡ଼େ ଇଞ୍ଜୋନ୍ ଅଚ୍ଚାସ୍, ଆରୁ ସରଗ୍ ତାରା ଏରିକିରି ଆଶିଷ୍ ବିନ୍ତି କାମ୍ଚାସ୍, ଆରୁ ଖିଣ୍ଡିକିରି ତାଙ୍ଘା ଚେଲାର୍ଗେ ଚିଚ୍ଚାସ୍ ଏନ୍ଦେର୍ଗେକା ଆବ୍ଡ଼ାର୍ ଆବନ୍ ଆଲାର୍ଗେ ହାଟ୍ଟର୍। 17ଆରୁ ଜାମାର୍ ମଖ୍ଖାର୍ ଆରୁ ଉଚ୍ଛିୟାର୍ କେରାର୍, ଆରୁ ଚେଲାଜାମାର୍ ଏଙ୍ଗ୍ର୍କା ଟୁକ୍ଡ଼ାବନ୍ ବାର ଡାଲା ଠୁଡ଼ିୟାଚାର୍।
ପାତ୍ରାସ୍ ଯୀଶୁସିନ୍ ଖ୍ରୀସ୍ତ୍ ବୁଲି ସ୍ଵୀକାର୍ କାମାଲ୍ଦାସ୍
(ମାତିସ୍ ୧୬:୧୩-୧୯; ମାର୍କୁସ୍ ୮:୨୭-୨୯)
18ଅନ୍ଦୁଲ୍ ଯୀଶୁସ୍ ଅଣ୍ଟା ଶୁନ୍ଶାନ୍ ଆଡ୍ଡାନୁ ବିନ୍ତି କାମାଲିୟାସ୍ ଆରୁ ତାଙ୍ଘା ଚେଲାଜାମାର୍ହି ତାଙ୍ଘାଗାନେ ରାଚାର୍, ତା ଯୀଶୁସ୍ ଆବ୍ଡ଼ାରିନ୍ ମେନ୍ଚାସ୍, “ଏନ୍ ନେଦ୍ ଇଦ୍ଘି ବାରେନୁ ଆଲାର୍ ଏନ୍ଦେର୍ ତେଙ୍ଗ୍ନାଏ?” 19ଆବ୍ଡ଼ାର୍ ଯାବାବ୍ ଚିଚ୍ଚାର୍ କା, “କେତ୍କ ଆଲାର୍ ଆସ୍ନାନ୍ ଚିଉ ଯୋହାନ୍ସ୍ ବୁଲି ତେଙ୍ଗ୍ନାଏ, ଆରୁ କେତ୍କର୍ ଏଲିୟାସ୍, ଆରୁ କେତ୍କ ଲୋକ୍ ତେଙ୍ଗ୍ନାଏ ଯେ ପୁର୍ଖା ନାବୀର୍ସ୍ତି ନେଦିନ୍ ଅର୍ତୁ ଉଜ୍ଜିୟାର୍ କେର୍କାନାଏ।” 20ଯୀଶୁସ୍ ଆବ୍ଡ଼ାରିନ୍ ମେନ୍ଚାସ୍, “ନିମ୍ ଏନ୍ଦେର୍ ବାଲ୍ଦାର୍ କା ଏନ୍ ନେଦ୍?” ପାତ୍ରାସ୍ ଯାବାବ୍ ଚିଚ୍ଚାସ୍, “ନିମ୍ ପାର୍ମେଶ୍ଵାର୍ସ୍କି ତାଏକା ଖ୍ରୀସ୍ତ୍।” 21ହୁଦ୍ଘିଲାଗାନ୍ ଯୀଶୁସ୍ ତାଙ୍ଘା ଚେଲାରିନ୍ ଇ କାତ୍ଥାନ୍ ଦୁସ୍ରା ଆଲାରିନ୍ ମା ତେଙ୍ଗାଗେ ଶକତ୍ ଚେତାବାନୀ ଚିଚ୍ଚାସ୍।
ଯୀଶୁସ୍ ତାଙ୍ଘା ଦୁଃଖୁ ଆରୁ ମରନ୍ଘି ବାରେନୁ ତେଙ୍ଗାଲ୍ଦାସ୍
(ମାତିସ୍ ୧୬:୨୦-୨୮; ମାର୍କୁସ୍ ୮:୩୦—୯:୧)
22ଯୀଶୁସ୍ ତେଙ୍ଗିୟାସ୍, “ମୁନୁଷ୍ ହାଦ୍ଦୁସ୍କେ ମୁରୁକ୍ ଦୁଃଖୁ ସାହା ଖାତ୍ରୋ, ଆସ୍କେ ମୁଖ୍ୟା ପୁରୋହିତ୍, ପଣ୍ତିତ୍ ଆରୁ ପୁର୍ଖା ଜାମାର୍ସ୍ତି ଠକର୍ ମହାଁ ଖାତ୍ରୋ ଆବ୍ଡ଼ାର୍ ଆସିନ୍ ପିଟର୍ଚର୍, ଲେକିନ୍ ଆସ୍ ତିନ୍ ଦିନ୍ନୁ ଉଜ୍ଜସ୍କସ୍।” 23ହତ୍କବାକେନ୍ ଆସ୍ ଜାମାରିନ୍ ତେଙ୍ଗିୟାସ୍, “ନେଦିନ୍ ଏଙ୍ଘା ଚେଲା ମାନା ବେଦ୍ଦାଲ୍ଦାର୍, ତା ଆବ୍ଡ଼ାର୍ ନିଜର୍ ଜୀବନ୍ତି ଏଙ୍ଗାନ୍ ବାନେ ହାଖ୍ଖନା କାତ୍ଥା ଆରୁ ରୋଜ୍ ଆବ୍ଡ଼ାର୍ଗେ ନିଜର୍ କ୍ରୁଶ୍ ଚେଡ଼ିକିରି ଏଙ୍ଘାଲାଗାନ୍ ଦୁଃଖୁ ସାହାଗେହି ତିୟାର୍ ମାନିକିରି ଏଙ୍ଘା ପାଛ୍ଲି ବାର୍ନା କାତ୍ଥା। 24ଏନ୍ଦେର୍ଗେକା ଏକାସ୍ ନିଜର୍ ଜୀବନ୍ବନ୍ ବାଛାବାଗେ ବେଦ୍ଦଦାସ୍ ଆବନ୍ ଏଫ୍ସଚସ୍, ଆରୁ ଏକାର୍ ଏଙ୍ଘାଲାଗାନ୍ ନିଜର୍ ଜୀବନ୍ବନ୍ ଏଫ୍ସ୍ନାଏ ଚିନାଏ ଆର୍ ଆବନ୍ ବାଛାବର୍। 25ଆରୁ ଯଦି ଅଣ୍ଟା ଆଲାସ୍ ଦୁନିଆଁନ୍ତା। ଜାମା ଧନ୍ସମ୍ପତ୍ତି ହାଖ୍ଖୀକିରି ଯଦି ସବୁଦିନ୍ତା ଜୀବନ୍ ମା ଉଜ୍ଜସ୍, ତା ଆସ୍କି ଏନ୍ଦେର୍ ଫାଏଦା? 26ଏକାସ୍ ଏଙ୍ଗାନ୍ ଆରୁ ଏଙ୍ଘା ଶିକ୍ଷାବନ୍ ଗ୍ରହନ୍ କାମାଗେ ଲାଜରସ୍, ଆସିନ୍ ମୁନୁଷ୍ ହାଦ୍ଦୁସ୍ହି ଗ୍ରହନ୍ କାମାଗେ ଲାଜରସ୍, ଯେତ୍କବାକେନ୍ ଆସ୍ ନିଜର୍ ଆରୁ ବାଙ୍ଗ୍ସ୍କି ଆରୁ ପାବିତାର୍ ସରଗ୍ ଦୂଁତ୍ଜାମାର୍ଘି ମାହିମାନୁ ବାରସ୍। 27ଲେକିନ୍ ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍, କା ଇସାନ୍ ଇଜ୍ଜକା ଆଲାର୍ଘି ଭିତର୍ନୁ ୟୋଁଲୋକ୍ ଏନ୍ନେ ଆଲାର୍ ରାନାଏ, ଏକାର୍ କା ଯେତ୍କବାକେନ୍ତକ୍ ପାର୍ମେଶ୍ଵାର୍ସ୍କି ରାଜୀନ୍ ମା ଏରର୍, ହତ୍କତକ୍ହି ମା ଖିନାଏ।”
ଯୀଶୁସ୍କି ରୂପ୍ ବାଦ୍ଲାରାନା
(ମାତିସ୍ ୧୭:୧-୮; ମାର୍କୁସ୍ ୯:୨-୮)
28ଇ କାତ୍ଥାଘି ଲାଗ୍ଭାଗ୍ ଆଠ୍ ନଅ ଦିନ୍ଘି ପାଛ୍ଲି ଯୀଶୁସ୍ ପାତ୍ରାସ୍, ଯୋହାନ୍ ଆରୁ ୟାକୁବ୍ସିନ୍ ତାଙ୍ଘାଗାନେ ଅଚ୍ଚାସ୍ ଆରୁ ବିନ୍ତି କାମାଗେ ଅଣ୍ଟା ପାର୍ତ୍ତା ମିଆଁ ଆର୍ଗିୟାସ୍। 29ବିନ୍ତି କାମ୍ନା ବାକେନ୍, ଯୀଶୁସ୍କି ଚେହେରାଘି ରୂପ୍ ବାଦ୍ଲାରାଚା କେରା, ଆରୁ ତାଙ୍ଘା ଆତ୍ତ୍କା ଚିଢ଼ାଦ୍ ଧୋବ୍ ମାନ୍ଚାକେରା ଆରୁ ବିଲ୍ଲୀ ଲେଖା ବିଲ୍ଚାଗେ ଲାଗ୍ଗିୟାଦ୍। 30ଆରୁ ଏରା, ମୁଶା ନାବୀସ୍ ଆରୁ ଏଲିୟାସ୍, ଇବ୍ଡ଼ା ଦୁଇ ଲୋକ୍ ଆଲାର୍ ତାଙ୍ଘାଗାନେ କାଚ୍ନେଖ୍ରାଲିୟାର୍। 31ଆବ୍ଡ଼ାର୍ ସରଗ୍ତା ମାହିମାତି ଦର୍ଶନ୍ ଚିଇକିରି, ଯେରୁଶାଲେମ୍ନୁ ମାନ୍ନାବାଲା ଯୀଶୁସ୍କି ମରନ୍ଘି ବାରେନୁ କାଚ୍ନେଖ୍ରାଲିୟାର୍। 32ପାତ୍ରାସ୍ ଆରୁ ତାଙ୍ଘା ସାଙ୍ଗେର୍ ଏକାର୍ କା ହାନ୍ଦ୍ରାଲିୟାର୍, ଆବ୍ଡ଼ାର୍ ପୁରାପୁରୀ ଏଜ୍ରାର୍ କେରାର୍, ତା ଆବ୍ଡ଼ାର୍ ଯୀଶୁସ୍କି ମାହିମାବନ୍ ଆରୁ ତାଙ୍ଘାଗାନେ ଆ ଦୁଇ ଲୋକ୍ ଆଲାରିନ୍ ଇଜ୍ଜକାନ୍ ଏରିୟାର୍। 33ଆବ୍ଡ଼ାର୍ ଆ ଆଡ୍ଡାନ୍ତି ବିଦା ମାନା ବେଦ୍ଦାଲିୟାରିନ୍, କା ପାତ୍ରାସ୍ ଯୀଶୁସିନ୍ ତେଙ୍ଗିୟାସ୍, “ହେ ଗୁରୁ, ଇସାନ୍ ରାଗେ ନାହ୍ମାଲାଗାନ୍ କେତ୍କ ବାନେ ମାନଦ୍ନେ: ଇସାନ୍ ନାମ୍ ମୁନ୍ଟା ତାମ୍ଵୁ ଗାଡ଼ତ୍ନେ, ନିମାଗେ ଅଣ୍ଟା, ମୁଶାସ୍କେ ଅଣ୍ଟା, ଆରୁ ଏଲିୟାସ୍କେ ଅଣ୍ଟା।” ଆସ୍ ବାଲ୍ଲାଲିୟାସ୍ କା ଏନ୍ଦେର୍ ତେଙ୍ଗାଲ୍ଦାସ୍। 34ଆସ୍ ତେଙ୍ଗାଲିୟାସ୍ କା ଅଣ୍ଟା ବାଦ୍ଲି ବାରିକିରି ଆବ୍ଡ଼ାରିନ୍ କୁଲ୍ଲେଇଚା, ଆରୁ ଆବ୍ଡ଼ାର୍ ବାଦ୍ଲିଘି କୁଲ୍ଲନାନ୍ ଏରିକିରି ଏଲ୍ଚିୟାର୍ କେରାର୍। 35ଆରୁ ଆ ବାଦ୍ଲିନ୍ତି ଶବଦ୍ ମେନ୍ଦ୍ରାଦ୍, “ଇସ୍ ଏଙ୍ଘା ହାଦ୍ଦୁସ୍ ଏନ୍ ଇସିନ୍ ଚାଜ୍ଜକାଦାନ୍, ଇସ୍କି ବଚନ୍ବନ୍ ମେନା।” 36ଇ ଶବଦ୍ ମେନ୍ଦର୍କା ପାଛ୍ଲି ଯୀଶୁସ୍ ଅଥାସ୍ ରାଚାସ୍କେରାସ୍; ଚେଲାଜାମାର୍ ଇଦ୍ଘି ବାରେନୁ କାଡ଼େ-କାଡ଼େ ରାଚାର୍, ଆରୁ ଆବ୍ଡ଼ାର୍ ଏକାନ୍ ଏର୍କାଚାର୍ ଆଦ୍ଘି ବାରେନୁ ହୁ ସାମାୟନୁ ନେକାନ୍ହି ମା ତେଙ୍ଗିୟାର୍।
ଯୀଶୁସ୍ ଭୁତ୍ତୁ ଲାକ୍କା ଅଣ୍ଟା କୁକ୍କସିନ୍ ବାନେ କାମାଲ୍ଦାସ୍
(ମାତିସ୍ ୧୭:୧୪-୧୮; ମାର୍କୁସ୍ ୯:୧୪-୨୭)
37ନାନ୍ନୁ ଉଲ୍ଲା ଯେତ୍କବାକେନ୍ ଆବ୍ଡ଼ାର୍ ପାର୍ତ୍ତାନ୍ତି କିୟାଁ ଏତ୍ତିୟାର୍ ହତ୍କବାକେନ୍ ଆଲାର୍ଘି ଅଣ୍ଟା ବାଡ଼୍କା ଭିଡ଼୍ ଯୀଶୁସିନ୍ ଭେଁଟ୍ ମାନାଗେ ବାର୍ଚା। 38ଆରୁ ଏରା ଭିଡ଼୍ନ୍ତି ଅଣ୍ଟା ଆଲାସ୍ ଚିର୍ରା ରାଇକିରି ତେଙ୍ଗିୟାସ୍, “ହେ ଗୁରୁ, ଏନ୍ ନିମାନ୍ ଆର୍ଜୀବିନ୍ତି କାମାଲ୍ଦାନ୍ କା ନିମ୍ ଏଙ୍ଗ୍ଦାସ୍କି ମିଆଁ ଦାୟା କାମା; ଏନ୍ଦେର୍ଗେକା ଆସ୍ ଏଙ୍ଘାଏ ଅଣ୍ଟା ଖାଲି ହାଦ୍ଦୁସ୍। 39ଆରୁ ଏରା, ଏକା-ଏକା ବାକେନ୍ ଆସିନ୍ ଭୁତ୍ତୁ ଧାରି, ଆଙ୍ଗେନ୍ ଆସ୍ ହଠାତ୍ ଚିର୍ରାରାଦାସ୍; ଆରୁ ଆସ୍କି ମେଦୁନ୍ ଏନ୍ନେ ଆଇଁଠିଚିକା ଆସ୍କି ଥୁମ୍ଣାନ୍ତି ବଟ୍ଟେ ଉର୍ଖି; ଆରୁ ଆଦ୍ ଆସିନ୍ ଖାଦିଛେଦେ କାମିକିରି ୟୋଁ ତର୍ସର୍ତି ଉର୍ଖି। 40ଏନ୍ ନିହ୍ମା ଚେଲାରିନ୍ ଆବନ୍ ଅଥ୍ରାଗେ ଆର୍ଜୀବିନ୍ତି କାମ୍ଚ୍କାନ୍, ଲେକିନ୍ ଆବ୍ଡ଼ାର୍ ଅଥ୍ରା ପଲ୍ଲିୟାର୍।” 41ଯୀଶୁସ୍ ଯାବାବ୍ ଚିଚ୍ଚାସ୍, “ହେ ବିଶ୍ୱାସ୍ ମା କାମୁ ଆରୁ ବଦ୍ମାସ୍ ପିଢ଼ିରୋ, ଏନ୍ ୟୋଁ ଦିନ୍ତକ୍ ନିହ୍ମାଗାନେ ରନ୍? ୟୋଁ ଦିନ୍ତକ୍ ନିମାନ୍ ସାହନ୍ ଆରୁ ରନ୍?” ଆନ୍ତିନ୍ ଯୀଶୁସ୍ ଆ ଆଲାସିନ୍ ତେଙ୍ଗିୟାସ୍, ନିଙ୍ଗ୍ଦାସିନ୍ ଇସାନ୍ ଅନ୍ଦ୍ରା। 42ଆ କୁକ୍କସ୍ ଚାହାଗେ ବାରାଲିୟାସିନ୍ କା ଭୁତ୍ତୁଦ୍ ଆସିନ୍ ହେଁହ୍ଲାନୁ କାଚ୍ଡ଼ିକିରି ଆଏଁଠେଇଚା, ଲେକିନ୍ ଯୀଶୁସ୍ ଆ ଭୁତ୍ତୁନ୍ ଧାମ୍କାଚାସ୍ ଆରୁ କୁକ୍କସିନ୍ ବାନେ କାମିକିରି ତାମ୍ଵାସ୍କେ ସୋଁପ୍ଚେଇଚାସ୍। 43ପାର୍ମେଶ୍ଵାର୍ସ୍କି ଇ ମାହାନ୍ ନାଲ୍ଖୁନ୍ ଏରିକିରି ହୁସାନ୍ ରୁ ଜାମା ଆଲାର୍ ଆଚ୍ମିତ୍ ମାନ୍ଚାର୍ କେରାର୍।
ଯୀଶୁସ୍ ତାଙ୍ଘା ଦୁଃଖୁ ଆରୁ ମରନ୍ଘି ବାରେନୁ ଦୁସ୍ରାଥର୍ ତେଙ୍ଗାଲ୍ଦାସ୍
(ମାତିସ୍ ୧୭:୨୨,୨୩; ମାର୍କୁସ୍ ୯:୩୦-୩୨)
ଜାମା ଆଲାର୍ ଯୀଶୁସ୍କି ନାଲ୍ଖୁନ୍ ଏରିକିରି ଆଚ୍ମିତ୍ ମାନାକାଲିୟାର୍, ତା ଆସ୍ ତାଙ୍ଘା ଚେଲାଜାମାରିନ୍ ତେଙ୍ଗିୟାସ୍, 44“ନିମ୍ ଏଙ୍ଘା ଇ କାତ୍ଥାନ୍ ବାନେକିରି ମନେ ଉଇୟା, କା ମୁନୁଷ୍ ହାଦ୍ଦୁସିନ୍ ତାଙ୍ଘା ବିରୋଧିର୍ଘି ହେଖ୍ଖାନୁ ସୋଁପାଚା କାଲିଦ୍।” 45ଲେକିନ୍ ଆବ୍ଡ଼ାର୍ ଇ କାତ୍ଥାବନ୍ ବୁଝ୍ରା ପଲ୍ଲିୟାର୍, ଇଦ୍ଘି ମତ୍ଲବ୍ ଆବ୍ଡ଼ାର୍ଘି ଲାଗାନ୍ ନୁହୁର୍କା ରାଚାକେରା ଆରୁ ଆବ୍ଡ଼ାର୍ ଇବନ୍ ବୁଝ୍ରା ପଲ୍ଲାଲିୟାର୍ ଆରୁ ଇଦ୍ଘି ବାରେନୁ ଯୀଶୁସିନ୍ ମେନାଗେ ଆବ୍ଡ଼ାର୍ ଏଲ୍ଚାଲିୟାର୍।
ପାର୍ମେଶ୍ଵାର୍ସ୍କି ରାଜୀନୁ ନେଦ୍ ବାଡ଼୍କାର୍
(ମାତିସ୍ ୧୮:୧-୫; ମାର୍କୁସ୍ ୯:୩୩-୩୭)
46ଚେଲାଜାମାର୍ଘି ମାଝାନୁ ଇ କାତ୍ଥାଘି ଲାଗାନ୍ କାଁଟ୍ଛାଁଟ୍ ମାନ୍ଚା କା ନାହ୍ମା ଭିତର୍ନୁ ନେଦ୍ ବାଡ଼୍କାର୍। 47ଯୀଶୁସ୍ ଆବ୍ଡ଼ାର୍ଘି ସୋଚ୍ବନ୍ ଆହିକିରି, ଅଣ୍ଟା ହାଦ୍ଦୁସିନ୍ ମେହିଁୟାସ୍ ଆରୁ ଆସିନ୍ ତାଙ୍ଘା ଚାହାନୁ ଇଲ୍ତିକିରି, 48ଆବ୍ଡ଼ାରିନ୍ ତେଙ୍ଗିୟାସ୍, “ନେଦ୍ ଏଙ୍ଘା ନାମେନୁ ଇ ହାଦ୍ଦୁସିନ୍ ଗ୍ରହନ୍ କାମ୍ନାଏ, ଆବ୍ଡ଼ାର୍ ଏଙ୍ଗାନ୍ ଗ୍ରହନ୍ କାମ୍ନାଏ; ଆରୁ ନେଦ୍ ଏଙ୍ଗାନ୍ ଗ୍ରହନ୍ କାମ୍ନାଏ, ଆବ୍ଡ଼ାର୍ ଆସିନ୍ହି ଗ୍ରହନ୍ କାମ୍ନାଏ ଏକାସ୍ କା ଏଙ୍ଗାନ୍ ତାଏକାଦାସ୍, ଏନ୍ଦେର୍ଗେକା ନିହ୍ମା ଜାମାର୍ଘି ଭିତର୍ନୁ ନେଦ୍ ଜାମାର୍ଘିନ୍ତି ଛୋଟେର୍, ଆବ୍ଡ଼ାରିନ୍ ନିହ୍ମା ଭିତର୍ନୁ ଜାମାର୍ଘିନ୍ତି ବାଡ଼୍କାର୍।” 49ଆଙ୍ଗେନ୍ ଯୋହାନ୍ସ୍ ତେଙ୍ଗିୟାସ୍, “ହେ ଗୁରୁ, ଏମ୍ ଅର୍ତୁସିନ୍ ନିହ୍ମା ନାମେ ହୋଇକିରି ଭୁତ୍ତୁନ୍ ଅଥ୍ର୍ନାନ୍ ଏର୍କାମ୍, ଆରୁ ଏମ୍ ଆସିନ୍ ମାନା କାମାଗେ କୋଶିଷ୍ କାମ୍ଚ୍କାମ୍, ଏନ୍ଦେର୍ଗେକା ଆସ୍ ଏହ୍ମା ଦଲ୍ତା ମାଲ୍ଦାସ୍।” 50ଲେକିନ୍ ଯୀଶୁସ୍ ତେଙ୍ଗିୟାସ୍, “ଆସିନ୍ ମାନା ଆମା କାମା; ଏନ୍ଦେର୍ଗେକା ଏକାର୍ ନିହ୍ମା ବିରୁଦ୍ଧ୍ନୁ ମାଲ୍କାରିନ୍, ଆବ୍ଡ଼ାର୍ ନିହ୍ମାଗାନେ ରାନାଏ।”
ସାମାରୀଆ ପାଡ଼ାନୁ ଯୀଶୁସ୍କି ବିରୋଧ୍ କାମାଲ୍ନାଏ
51ଯେତ୍କବାକେନ୍ ଯୀଶୁସ୍କି ସରଗ୍ କାଲାଗେ ସାମାୟ ଆଣ୍ସିଆକେରା, ହତ୍କବାକେନ୍ ଆସ୍ ଯେରୁଶାଲେମ୍ ସହର୍ କାଲାଗେ ସୋଚ୍ଚାସ୍। 52ଆରୁ ଖବର୍ ଚିଉ ଆଲାରିନ୍ ତାଙ୍ଘା ଆଘ୍ଲି ତାଇୟାସ୍। ଆବ୍ଡ଼ାର୍ କେରାର୍ ଆରୁ ଯୀଶୁସ୍କି ଲାଗାନ୍ ଆଡ୍ଡା ଯୋଗାଡ଼୍ କାମାଗେ ସାମାରୀ ଜାମାର୍ଘି ଅଣ୍ଟା ପାଡ଼ାଗେ କେରାର୍। 53ଆଲାର୍ ଯୀଶୁସିନ୍ ଗ୍ରହନ୍ ମା କାମ୍ଚାର୍, ଏନ୍ଦେର୍ଗେକା ଆସ୍ ଯେରୁଶାଲେମ୍ କାଲିୟାସ୍। 54ଯୀଶୁସ୍କି ଚେଲାର୍ ୟାକୁବ୍ ଆରୁ ଯୋହାନ୍ସ୍ ଇବନ୍ ଏରିକିରି ତେଙ୍ଗିୟାର୍, “ହେ ପ୍ରାଭୁ, ନିମ୍ କାଁଏ ଚାହଁର୍ ତା ଏରା ଏନ୍ନେ ତେଙ୍ଗମ୍, କା ଆକାଶ୍ତି ଚିଚ୍ଚୁ ଖାତ୍ର୍ନାଦ୍ ଆରୁ ଇବ୍ଡ଼ା ଆଲାରିନ୍ ବାସ୍ନା ଚିନାଦ୍?” 55ଲେକିନ୍ ଯୀଶୁସ୍ କିର୍ରେ ଏରିକିରି ଆବ୍ଡ଼ାରିନ୍ ଧାମ୍କାଚାସ୍, [ଆରୁ ତେଙ୍ଗିୟାସ୍, “ନିମ୍ ଏକା ଆତ୍ମାତି ଏନ୍ନେ ତେଙ୍ଗ୍ଦାର୍ ଆବନ୍ ନିମ୍ ବାଲ୍ଦାରିନ୍। ଏନ୍ଦେର୍ଗେକା ମୁନୁଷ୍ ହାଦ୍ଦୁସ୍ ଆଲାର୍ଘି ଜୀଆନ୍ ନାଶ୍ କାମାଗେ ମାଲ୍ଲା ବାରୁସ୍ ଲେକିନ୍ ବାଛାବାଗେ ବାର୍ଚ୍କାଦାସ୍।”] 56ଆନ୍ତିନ୍ ଆବ୍ଡ଼ାର୍ ଆରୁ ଅଣ୍ଟା ନାନ୍ନା ପାଡ଼ାଗେ କେରାର୍।
ଯୀଶୁସ୍କି ଚେଲା ଏସ୍କେ ମାନ୍ନା କାତ୍ଥା
57ଯୀଶୁସ୍ ତାଙ୍ଘା ଚେଲାର୍ଗାନେ ପାବୁନୁ କାଲିୟାସିନ୍ କା, ନେଦ୍ ଅର୍ତୁ ତାଙ୍ଗାନ୍ ତେଙ୍ଗିୟାର୍, “ନିମ୍ ଏକାତାରା କର୍, ଏନ୍ହି ନିହ୍ମା ପାଛ୍ଲି-ପାଛ୍ଲି କନ୍।” 58ଯୀଶୁସ୍ ଆସିନ୍ ତେଙ୍ଗିୟାସ୍, “ଡୁରୁଘି ତାଙ୍ଘାଏ ଲାତା ରାଇଦ୍ ଆରୁ ଆକାଶ୍ ତା ଓଡ଼ାଘି ତାପ୍ପା ରାଇଦ୍, ଲେକିନ୍ ମୁନୁଷ୍ ହାଦ୍ଦୁସ୍କି ଲାଗାନ୍ କୁକ୍କୁ ଉଇୟାଗେହି ଆଡ୍ଡା ମାଲ୍ଲାଦିନ୍।” 59ଆନ୍ତିନ୍ ଆସ୍ ଆରୁ ଦୁସ୍ରାସିନ୍ ତେଙ୍ଗିୟାସ୍, “ଏଙ୍ଘା ପାଛ୍ଲି ବୁଙ୍ଗାବାରା।” ଲେକିନ୍ ଆସ୍ ତେଙ୍ଗିୟାସ୍, “ହେ ପ୍ରାଭୁ, ଏଙ୍ଗାନ୍ ଆଘ୍ଲି ଏଙ୍ଘା ବୁଆସିନ୍ ମାଁଣାଗେ କାଲା ଚିଆ।” 60ଯୀଶୁସ୍ ଆସିନ୍ ତେଙ୍ଗିୟାସ୍, “ନେଦ୍ ଆତ୍ମିକ୍ତି କେଚ୍ଚାର୍ କେର୍କାନାଏ ଆବ୍ଡ଼ାରିନ୍ ନିଜର୍ କେଚ୍ଚକାରିନ୍ ମାଁଣାଗେ ଚିଆ, ଲେକିନ୍ ନିନ୍ କାଲା ଆରୁ ପାର୍ମେଶ୍ଵାର୍ସ୍କି ରାଜୀଘି ବାରେନୁ ପ୍ରଚାର୍ କାମା।” 61ହତ୍କବାକେନ୍ ଆରୁ ଅଣ୍ଟା ଆଲାସ୍ ତେଙ୍ଗିୟାସ୍, “ହେ ପ୍ରାଭୁ, ଏନ୍ ନିହ୍ମା ପାଛ୍ଲି କନ୍; ଲେକିନ୍ ଏଙ୍ଗାନ୍ ଏଙ୍ଘା ଆଡ଼୍ପାନ୍ତା ଆଲାର୍ସ୍ତି ବିଦା ହୁଆଗେ ଛୁଟି ଚିଆ।” 62ଯୀଶୁସ୍ ଆସିନ୍ ତେଙ୍ଗିୟାସ୍, “ନେଦ୍ ଗହ୍ଲାନ୍ ହେଖ୍ଖାନୁ ଧାରିକିରି ପାଛ୍ଲି କିର୍ରେଚେ ଏର୍ନାଏ, ଆବ୍ଡ଼ାର୍ ପାର୍ମେଶ୍ଵାର୍ସ୍କି ରାଜୀଘି ଲାଇଗ୍ ମାଲ୍ନାଏ।”
10ଯୀଶୁସ୍ ସତୁର୍ ଲୋକ୍ ଚେଲାରିନ୍ ତାଇୟାଲ୍ଦାସ୍
1ଇଦ୍ଘି ପାଛ୍ଲି ପ୍ରାଭୁସ୍ ସତୁର୍ ଲୋକ୍ରିନ୍ ଚାଜ୍ଜିୟାସ୍, ଆରୁ ଏକା-ଏକା ସହର୍ ଆରୁ ଆଡ୍ଡା ଗୁଠିଗେ ନିଜେ କାନାବାଲା ରାଚାସ୍, ଆବ୍ଡ଼ା ଆଡ୍ଡା ଗୁଠିଗେ ଦୁଇ-ଦୁଇ ଲୋକ୍ କାମିକିରି ଆବ୍ଡ଼ାରିନ୍ ତାଙ୍ଘା ଆଘ୍ଲି ତାଇୟାସ୍। 2ଆରୁ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଫସଲ୍ ବାଗ୍ଗେ ରାଇଦ୍, ଲେକିନ୍ ଭୁତ୍ତିୟାର୍ ଥୋଡ଼େ ରାନାଏ; ହୁଦ୍ଘିଲାଗାନ୍ ଫସଲ୍ଘି ମାଲିକ୍ସିନ୍ ଆର୍ଜୀ କାମା କା ଆସ୍ ବାଗ୍ଗେ ଭୁତ୍ତିୟାର୍ରିନ୍ ଫସଲ୍ ହୟାଗେ ତାଇୟଚସ୍। 3ନିମ୍ କାଲା; ଏରା, ଏନ୍ ନିମାନ୍ ଲାକ୍ଡ଼ାଘି ମାଝାନୁ ଭେଡ଼ିହାଦ୍ଦୁ ଲେଖା ତାଇୟାଲ୍ଦାନ୍। 4ନିମ୍ ନିହ୍ମା ପାବୁଗେ ଏନ୍ଦେର୍ହି ଆମ୍କେ ହୁଆ। ଏନ୍ନେକା ମୁଁଣା, ପାଏସା ମୁଁଣା, ଆରୁ ଜୁତାହି ଆମ୍କେ ହୁଆ; ଆରୁ ନିମ୍ ପାବୁନୁ ନେକାନ୍ହି ଯୋହାର୍ ଆମ୍କେ କାମା। 5ଆରୁ ଏକା ଆଡ଼୍ପାନୁ ନିମ୍ କରର୍, ଆସାନ୍ ପହ୍ଲେ ତେଙ୍କେ, ‘ଇ ଆଡ଼୍ପାନୁ ଶାନ୍ତି ମାନ୍ନାଦ୍।’ 6ଆରୁ ଯଦି ଆସାନ୍ ଅର୍ତୁହି ଶାନ୍ତି ହାଖ୍ଖନାଘି ଲାଇଗ୍ ରର୍, ହାଲେ ନିହ୍ମା ଶାନ୍ତି ଆବ୍ଡ଼ାର୍ଘି ମିଆଁ ରଦ୍, ଆରୁ ଯଦି ଅର୍ତୁହି ଶାନ୍ତିଘି ଲାଇଗ୍ ମା ରାନାଏ ହାଲେ ଶାନ୍ତି ନିହ୍ମାସାନ୍ କିର୍ର ବାରୋ। 7ଆରୁ ଆ ଆଡ଼୍ପାନୁନ୍ ରାକେ, ଆସାନ୍ ଏନ୍ଦେର୍ ଅନା ମହାଁଗେ ଚର୍, ଆବନ୍ ଅନ୍କେ ମହ୍ଁକେ, ଏନ୍ଦେର୍ଗେକା ଭୁତ୍ତିୟାର୍ ଜାମାର୍ ଭୁତ୍ତି ହାଖ୍ଖନାଘି ଲାଇଗ୍ ରାନାଏ; ଆରୁ ଅଣ୍ଟା ଆଡ଼୍ପାନ୍ତି ଆରୁ ଅଣ୍ଟା ଆଡ଼୍ପାଗେ ଆମ୍କେକାଲା। 8ଆରୁ ଏକିନ୍ ସହର୍ନୁ ନିମ୍ କରର୍, ଆରୁ ଆସ୍ତା ଆଲାର୍ ନିମାନ୍ ଗ୍ରହନ୍ କାମର୍, ତା ଆସାନ୍ ନିମାଗେ ଏକାନ୍ ଚିଅର୍ ଆବନ୍ ଅନ୍କେ ମହ୍ଁକେ। 9ଆ ଆଡ୍ଡାନୁ ରୁ ବେହ୍ମରିୟାରିନ୍ ବାନେ କାମ୍କେ ଆରୁ ଆବ୍ଡ଼ାରିନ୍ ତେଙ୍କେ, ‘କା ପାର୍ମେଶ୍ଵାର୍ସ୍କି ରାଜୀଦ୍ ନିହ୍ମା ଚାହାଗେ ବାର୍ଚା କେର୍କିଚି।’ 10ଲେକିନ୍ ଏକିନ୍ ସହର୍ଗେ କରର୍, ଆରୁ ଆସ୍ତା ଆଲାର୍ ନିମାନ୍ ଗ୍ରହନ୍ ମା କାମ୍ନାଏ, ହାଲେ ଆସ୍ତି ବାହ୍ରି ଉର୍ଖ୍ନା ବାକେନ୍ ହାଟ୍ଟେଗୁଠିନୁ ଏନ୍ନେ ତେଙ୍କେ ଚିକେ, 11‘ନିହ୍ମା ସହର୍ତା ଏକା ଧୁଲି, ଏହ୍ମା ହେଡ୍ଡୁନୁ ଲାଠ୍କିଚି, ଆବନ୍ହି ନିହ୍ମା ଲାଗାନ୍ ହେତ୍ତା ଚାଲ୍ଦାମ୍; ହାଲେହି ନିମ୍ ଆହା କା ପାର୍ମେଶ୍ଵାର୍ସ୍କି ରାଜୀଦ୍ ନିହ୍ମା ଚାହାଗେ ବାର୍ଚା କେର୍କିଚି।’ 12ଏନ୍ ନିମାନ୍ ତେଙ୍ଗାଲ୍ଦାନ୍ ପାର୍ମେଶ୍ଵାର୍ସ୍ ଆଲାର୍ଘି ନ୍ୟାୟ କାମ୍ନାଘି ହୁ ଉଲ୍ଲାନୁ ଢେର୍ ବଛର୍ଘି ଆଘ୍ଲି ସଦୋମ୍ ସହର୍ନୁ ରାନାବାଲା ଆଲାର୍ଗେ ଏକା ଦଣ୍ଡ୍ ହାଖ୍ଖର୍କିଚା ଆବ୍ଡ଼ାର୍ଘିନ୍ତି ବାଗ୍ଗେ ଦଣ୍ଡ୍ ଆବ୍ଡ଼ା ଆଲାର୍ଗେ ହାଖ୍ଖର।”
ଅବିଶ୍ୱାସୀ ସହର୍
13“ହେ କୋରାଜୀନ୍! ସହର୍ତା ଆଲାରୋ ନିହ୍ମା ମିଆଁ ମୁରୁକ୍ ଦୁଃଖୁ ବାର୍ନାବାଲା ରାଇ ହେ ବେତ୍ସାଇଦା! ସହର୍ତା ଆଲାରୋ ନିହ୍ମା ମିଆଁ ମୁରୁକ୍ ଦୁଃଖୁ ବାର୍ନାବାଲା ରାଇ ଏନ୍ଦେର୍ଗେକା ପାର୍ମେଶ୍ଵାର୍ସ୍ ନିହ୍ମା ସହର୍ନୁ ଏକା ଅଦ୍ଭୁତ୍ ନାଲ୍ଖୁ କାମ୍ଚ୍କାଦାସ୍, ଆ ଅଦ୍ଭୁତ୍ ନାଲ୍ଖୁନ୍ ସୋର୍ ଆରୁ ସିଦୋନ୍ ସହର୍ନୁ କାମ୍ଚ୍କା ରର୍ନେ ହାଲେ ତା ଆସ୍ତା ଆଲାର୍ ଢେର୍ ବଛର୍ ଆଘ୍ଲିନ୍ତି ଅଖା ଚିଢ଼ା୧୦:୧୩ ଅଖା ଚିଢ଼ା ମତ୍ଲବ୍ ଯୀଶୁସ୍କି ସାମାୟନୁ ଆଲାର୍ ନିଜର୍ ପାପ୍ତି ମନ୍ ପରିବର୍ତ୍ତନ୍ କାମ୍ଚ୍କାମ୍ ବୁଲି ଏଦାଗେ ପଶୁଘି ଚୁଟ୍ଟିତି ତିଆର୍ ମାନ୍ଚ୍କା ଚିଢ଼ା ଆତ୍ତାଲିୟାର୍ ଆରୁ ଚିନ୍ଦୁନୁ ଅକ୍କାଲିୟାର୍ ଆବ୍ଡ଼ାର୍ଘି ଇଦ୍ ଅଣ୍ଟା ରୀତି ରାଚା ଝାପ୍ରିକିରି ଆରୁ ଚିନ୍ଦୁନୁ ଅକ୍କିକିରି ଆବ୍ଡ଼ାର୍ ପାସ୍ତାରାଚ୍କାମ୍ ବୁଲି ଏଦାଗେ ଏନ୍ନେ କାମାଲିଆର୍। 14ପାର୍ମେଶ୍ଵାର୍ସ୍ ଆଲାର୍ଘି ନ୍ୟାୟ କାମ୍ନା ଉଲ୍ଲାନୁ ସୋର୍ ଆରୁ ସିଦୋନ୍ ସହର୍ତା ଆଲାର୍ସ୍ତି ନିମାଗେ ବାଗ୍ଗେ ଦଣ୍ଡ୍ ହାଖ୍ଖର। 15ଆରୁ ହେ କାଫାର୍ନାହୁମ୍ ସହର୍ତା ଆଲାରୋ, ପାର୍ମେଶ୍ଵାର୍ସ୍ ନିମାନ୍ ସରଗ୍ ଜୁଟି ମିଆଁ କାମସ୍ ନିମ୍ କାଁଏ ଏନ୍ନେ ସୋଚ୍ଦାର୍? ମାଲ୍ଲା ଲେକିନ୍ ପାର୍ମେଶ୍ଵାର୍ସ୍ ନିମାନ୍ ପାତାଲ୍ ଜୁଟି କିୟାଁ କାମସ୍।”
16ଇଦ୍ଘି ପାଛ୍ଲି ଯୀଶୁସ୍ ଚେଲାଜାମାରିନ୍ ତେଙ୍ଗିୟାସ୍, “ନେଦ୍ ନିହ୍ମା କାତ୍ଥା ମେନ୍ନାଏ, ଆବ୍ଡ଼ାର୍ ଏଙ୍ଘା କାତ୍ଥାନ୍ ମେନ୍ନାଏ; ଆରୁ ନେଦ୍ ନିମାନ୍ ଗ୍ରହନ୍ ମା କାମ୍ନାଏ, ଆବ୍ଡ଼ାର୍ ଏଙ୍ଗାନ୍ ଗ୍ରହନ୍ ମା କାମ୍ନାଏ; ଆରୁ ଏଙ୍ଗାନ୍ ନେଦ୍ ଗ୍ରହନ୍ ମା କାମ୍ନାଏ, ଆବ୍ଡ଼ାର୍ ଏଙ୍ଘା ତାଇୟୁସିନ୍ ଗ୍ରହନ୍ ମା କାମ୍ନାଏ।”
ସତୁର୍ ଲୋକ୍ ଚେଲାର୍ କିର୍ରାଲ୍ନାଏ
17ଇଦ୍ଘି ପାଛ୍ଲି ଆବ୍ଡ଼ା ସତୁର୍ ଲୋକ୍ ଚେଲାଜାମାର୍ କିର୍ରିୟାର୍ ବାର୍ଚାର୍ ଆରୁ ଖୁସୀତି ତେଙ୍ଗିୟାର୍, “ହେ ପ୍ରାଭୁ, ନିହ୍ମା ନାମେତି ଭୁତ୍ତୁଗୁଠିଦ୍ହି ଏହ୍ମା ଅଧିନ୍ନୁ ରାନାଏ।” 18ଲେକିନ୍ ଆବ୍ଡ଼ାରିନ୍ ଯୀଶୁସ୍ ତେଙ୍ଗିୟାସ୍, “ଏନ୍ ସରଗ୍ତି ଶାଏତାନ୍ବନ୍ ବିଜ୍ଲି ଲେଖା ଖାତ୍ର୍ନାନ୍ ଏରାଲ୍କାନ୍। 19ଏରା, ଏନ୍ ନିମାନ୍ ନେର୍ରୁ ଆରୁ ବିଚ୍ଛି ଗୁଠିଘି ମିଆଁ ଏକାଗେ ହକ୍ ଚିଚ୍କାଦାନ୍, ଆରୁ ବିରୋଧିଜାମାର୍ଘି ଶକ୍ତି ମିଆଁହି ହକ୍ ଚିଚ୍କାଦାନ୍; ଆରୁ ଏନ୍ଦେଦ୍ହି ନିହ୍ମାଏ ନୁକ୍ସାନ୍ କାମା ପଲ୍ଲିଦ୍। 20ହାଲେହି ଆତ୍ମାଗୁଠିଦ୍ ନିହ୍ମା ଅଧିନ୍ନୁ ରାଇ ଇଦ୍ଘିଲାଗାନ୍ ଆମା ଲୀଝ୍ରା, ଲେକିନ୍ ନିମ୍ ଇଦ୍ଘିଲାଗାନ୍ ଲୀଝ୍ରା କା ନିହ୍ମା ନାମେଦ୍ ସରଗ୍ନୁ ଲେଖ୍ଚ୍କା ରାଇଦ୍।”
ଯୀଶୁସ୍ ବାଙ୍ଗ୍ ପାର୍ମେଶ୍ଵାର୍ସିନ୍ ଧାନ୍ୟାବାଦ୍ ଚିଇକିରି ବିନ୍ତି କାମାଲ୍ଦାସ୍
21ହୁ ସାମାୟନୁ ଯୀଶୁସ୍ ପାବିତାର୍ ଆତ୍ମାତି ଭାର୍ପୁର୍ ମାନିକିରି ଖୁସୀତି ତେଙ୍ଗିୟାସ୍, “ହେ ବାଙ୍ଗ୍, ସରଗ୍ ଆରୁ ଦୁନିଆଁନ୍ତା ପ୍ରାଭୁ, ଏନ୍ ନିହ୍ମାଏ ମାହିମା କାମାଲ୍ଦାନ୍ ଏନ୍ଦେର୍ଗେକା ନିମ୍ ଇବ୍ଡ଼ା ଜାମା କାତ୍ଥାଗୁଠିନ୍ ଜ୍ଞାନୀ ଆରୁ ବୁଦ୍ଧିୟାର୍ ଜାମାର୍ସ୍ତି ନୁଡ଼ିକିରି, ଛୋଟେ ହାଦ୍ଦୁର୍ ଲେଖା ଆଲାର୍ସାନ୍ ଶୁଣାବାଚ୍କାଦାର୍। ହଁ, ହେ ବାଙ୍ଗ୍, ଏନ୍ଦେର୍ଗେକା ଇଦ୍ ନିମାଗେ ବାନେ ଲାଗ୍ଗିୟା। 22ଏଙ୍ଘା ବାଙ୍ଗ୍ସ୍ ଏଙ୍ଗାଗେ ଜାମାନ୍ ସୋଁପ୍ଚେଇ ଚିଚ୍କାଦାସ୍; ବାଙ୍ଗ୍ସିନ୍ ଆମ୍ବିକିରି ନେଦ୍ହି ବାଲ୍ନାଇନ୍ କା ହାଦ୍ଦୁସ୍ ନେଦ୍ ଆରୁ ହାଦ୍ଦୁସିନ୍ ଆମ୍ବିକିରି ଇବନ୍ ନେଦ୍ହି ବାଲ୍ନାଇନ୍ କା ବାଙ୍ଗ୍ସ୍ ନେଦ୍, ଆରୁ ନେକାନ୍ ହାଦ୍ଦୁସ୍ ଚାଜିକିରି ପ୍ରକଟ୍ କାମ୍ଚ୍କାଦାସ୍ ଆସ୍ ଆହ୍ଦାସ୍।” 23ଆନ୍ତିନ୍ ଯୀଶୁସ୍ ତାଙ୍ଘା ଚେଲାର୍ତାରା କିର୍ରେ ଏରିକିରି ଆବ୍ଡ଼ାରିନ୍ ଖାଲି ତେଙ୍ଗିୟାସ୍, “ନିମ୍ ଏକାନ୍-ଏକାନ୍ ଏରାଲ୍ଦାର୍ ଆବ୍ଡ଼ାଗୁଠିନ୍ ନେଦ୍ ଏର୍କାନାଏ, ଆବ୍ଡ଼ାର୍ ଧଏନ୍ ରାନାଏ। 24ଏନ୍ଦେର୍ଗେକା ଏନ୍ ନିମାନ୍ ତେଙ୍ଗାଲ୍ଦାନ୍ ନିମ୍ ଏକାନ୍-ଏକାନ୍ ଏରାଲ୍ଦାର୍ ଆବ୍ଡ଼ାନ୍ ଢେର୍ ନାବୀର୍ ଆରୁ ରାଜାର୍ ଏରାଗେ ବେଦ୍ଦାଲିୟାର୍ ଲେକିନ୍ ଆବ୍ଡ଼ାର୍ ଏରା ପଲ୍ଲିୟାର୍, ଆରୁ ନିମ୍ ଏକା କାତ୍ଥାଗୁଠିନ୍ ମେନାଲ୍ଦାର୍ ଆବ୍ଡ଼ାଗୁଠିନ୍ହି ଆବ୍ଡ଼ାର୍ ମେନା ବେଦ୍ଦାଲିୟାର୍ ଲେକିନ୍ ମେନା ପଲ୍ଲିୟାର୍।”
ବାନେ ସାମାରୀସ୍କି ନମୁନା
25ଆରୁ ଏରା, ଅଣ୍ଟା ଧରମ୍ ପଣ୍ଡିତ୍ସ୍ ଉସ୍କାରାଚାସ୍ ଆରୁ ଯୀଶୁସିନ୍ ବିଡ଼୍ଚେ ଏରାଗେ ମେନ୍ଚାସ୍, “ହେ ଗୁରୁ, ଏଙ୍ଗାଗେ ସବୁଦିନ୍ତା ଜୀବନ୍ ହାଖ୍ଖାଗେ ଏନ୍ଦେର୍ କାମ୍ନାକାତ୍ଥା?” 26ଆଙ୍ଗେନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ପାବିତାର୍ ଶାସ୍ତ୍ରନୁ ଏନ୍ଦେର୍ ଲେଖ୍ଚ୍କା ରାଇଦ୍? ନିନ୍ ଏସ୍କେ ପାଢ଼୍ଦାଏ?” 27ଆସ୍ ଯାବାବ୍ ଚିଚ୍ଚାସ୍, “ନିନ୍ ନିଜର୍ ପ୍ରାଭୁ ପାର୍ମେଶ୍ଵାର୍ସିନ୍ ନିଜର୍ ପୁରା ମନ୍ତି ନିଜର୍ ପୁରା ଜୀଆତି ନିଜର୍ ପୁରା ଶକ୍ତିତି ଆରୁ ନିଜର୍ ପୁରା ବୁଦ୍ଧିତି ବାନେ ହାଖ୍ଖା; ଆରୁ ନିଜର୍ ପାଡ଼ୋଶୀରିନ୍ ନିଜର୍ ଲେଖା ବାନେ ହାଖ୍ଖା।” 28ଆଙ୍ଗେନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ନିନ୍ ଠିକ୍ ଯାବାବ୍ ଚିଚ୍କାଏ, ଏନ୍ନେନ୍ କାମା ହାଲେ ନିନ୍ ସବୁଦିନ୍ତା ଜୀବନ୍ ହାଖ୍ଖୟ।” 29ଲେକିନ୍ ଆସ୍ ନିଜ୍କେନିଜ୍ ଧାର୍ମିକ୍ ଏଦ୍ରାଗେ ଯୀଶୁସିନ୍ ମେନ୍ଚାସ୍, “ହାଲେ ଏଙ୍ଘା ପାଡ଼ୋଶୀର୍ ନେଦ୍?” 30ଯୀଶୁସ୍ ଯାବାବ୍ ଚିଚ୍ଚାସ୍, “ଅଣ୍ଟା ଆଲାସ୍ ଯେରୁଶାଲେମ୍ତି ଯେରିଖୋ କାଲିୟାସ୍ ଆରୁ ଆସିନ୍ ଡାକୁର୍ ପାବୁନୁ ଛେକ୍ଚାର୍ ଆରୁ ଆବ୍ଡ଼ାର୍ ଆସ୍କି ଚିଢ଼ାପାଟାନ୍ ଯବର୍ଜସ୍ତି ଖଲ୍ଚାର୍, ମାର୍ପିଟ୍ କାମ୍ଚାର୍ ଆରୁ ଆସିନ୍ ଦାର୍ମାରା ଆମ୍ବିକିରି ବୁଙ୍ଗେଇଚାର୍। 31ହତ୍କବାକେନ୍ ଅଣ୍ଟା ପୁରୋହିତ୍ସ୍ ହୁ ପାବୁନୁ କାଲିୟାସ୍, ଆରୁ ଆସ୍ ଆସିନ୍ ଏରିକିରି ପାଖିୟା ରାନାତି ପାବୁଘି ହା ପାଖ୍ତି ମାନିକିରି ବୁଙ୍ଗିୟାସ୍। 32ହନ୍ନେନ୍ ଅଣ୍ଟା ଲେବୀ ଆଲାସ୍ ଆ ଆଡ୍ଡାଗେ ବାର୍ଚାସ୍, ଆରୁ ଆସ୍ହି ଆସିନ୍ ଏରିକିରି ପାଖିଆରାନାତି ବୁଙ୍ଗିୟାସ୍। 33ଲେକିନ୍ ଇଦ୍ଘି ପାଛ୍ଲି ହୁ ପାବୁନୁ ଅଣ୍ଟା ସାମାରୀ ଆଲାସ୍ ବାର୍ଚାସ୍, ଆସିନ୍ ଏରିକିରି ସାମାରୀ ଆଲାସ୍କେ ସଗ୍ଗେ ଲାଗ୍ଗିୟା। 34ଆ ସାମାରୀ ଆଲାସ୍ ଆସ୍କି ଚାହାଗେ କେରାସ୍ ଆରୁ ଆସ୍କି ଖାଦିନୁ ଅଙ୍ଗୁର୍ ରାସେ ଆରୁ ଇସୁଙ୍ଗ୍ ଲାଗାବାଇକିରି ପଟି ହିଁଚାସ୍, ଆରୁ ଆସ୍ ଆସିନ୍ ତାଙ୍ଘା ଗାଧାନୁ ଅକ୍ତିକିରି ଅଣ୍ଟା ଭାଡ଼ା ଆଡ଼୍ପାଗେ ଅଚ୍ଚାସ୍, ଆରୁ ତାଙ୍ଘା ସେବା କାମ୍ଚାସ୍। 35ଆଦ୍ଘି ନାନ୍ନୁ ଉଲ୍ଲା ଆସ୍ ଦୁଇ ଦିନ୍ତା ମଜ୍ରୀ ଯେତ୍କ ମାନିଦ୍ ଆତ୍କ ପାଏସା ଆ ଆଡ଼୍ପାନ୍ତା ମାଲିକ୍ସ୍କେ ଚିଚ୍ଚାସ୍, ଆରୁ ଆସିନ୍ ତେଙ୍ଗିୟାସ୍, ‘ନିମ୍ ଇସ୍କି ସେବା କାମ୍କେ ଯଦି ଆରୁ ବାଗ୍ଗେ ଖାର୍ଚ୍ଚା ମାନଦ୍ ହାଲେ, ଏନ୍ କିର୍ନାବାକେନ୍ ନିମାଗେ ଚିଅନ୍ଲାଗନ୍।’ 36ନିଙ୍ଘା ସୋଚ୍ନାନୁ ଆବ୍ଡ଼ା ତିନ୍ ଲୋକ୍ ଭିତର୍ନୁ, ଡାକୁର୍ଘି ହାବୁଡ଼ନୁ ଖାତ୍ର୍କା ଆଲାସ୍କି ପାଡ଼ୋଶୀ ନେଦ୍?” 37ଆ ଧରମ୍ ପଣ୍ଡିତ୍ସ୍ ଯାବାବ୍ ଚିଚ୍ଚାସ୍, “ଆସ୍ ଏକାସ୍ କା ଆସ୍କି ମିଆଁ ଦାୟା କାମ୍ଚାସ୍।” ଯୀଶୁସ୍ ଆସିନ୍ ତେଙ୍ଗିୟାସ୍, “କାଲା, ନିନ୍ହି ଏନ୍ନେନ୍ କାମ୍କେ।”
ମାର୍ଥା ଆରୁ ମାରିୟାମ୍ଘି ଆଡ଼୍ପାଗେ ଯୀଶୁସ୍ କାଲ୍ଦାସ୍
38ଯେତ୍କବାକେନ୍ ଯୀଶୁସ୍ ତାଙ୍ଘା ଚେଲାର୍ଗାନେ କୁଦ୍ଦତେ-କୁଦ୍ଦତେ ଅଣ୍ଟା ପାଡ଼ାଗେ ବାର୍ଚାସ୍, ଆରୁ ମାର୍ଥା ନାମେଘି ଅଣ୍ଟା ଆଲିଦ୍ ତାଙ୍ଘା ଆଡ଼୍ପାଗେ ପାହି ମେହିଁୟାଦ୍। 39ଆଦ୍ଘି ମାରିୟାମ୍ ନାମେଘି ଅଣ୍ଟା ବୁହୁଣୀ ରାଚା। ଆଦ୍ ପ୍ରାଭୁସ୍କି ହେଡ୍ଡମୁଲିନୁ ଅକ୍କିକିରି ବଚନ୍ ମେନାଲିୟା। 40ଲେକିନ୍ ମାର୍ଥାଦ୍ ସେବା କାମ୍ନାଘି ତିୟାରିନୁ ବ୍ୟସ୍ତ୍ ରାଚା, ହୁଦ୍ଘିଲାଗାନ୍ ଆଦ୍ ଯୀଶୁସ୍କି ଚାହା ବାରିକିରି ତେଙ୍ଗିୟାଦ୍, “ହେ ପ୍ରାଭୁ, ଏଙ୍ଗ୍ଡ଼ିଦ୍ ଯେ ଏଙ୍ଘା ମିଆଁ ଜାମା ନାଲ୍ଖୁଘି ଭାର୍ ଚିଚ୍ଚା ଲାକ୍କିଚି ନିମାଗେ ଏନ୍ଦେର୍ହି ଚିନ୍ତା ମାଲ୍ଲା କାଁଏ? ଇବନ୍ ତେଙ୍ଗା କା ଏଙ୍ଗାନ୍ ମଦେତ୍ କାମଦ୍।” 41ଲେକିନ୍ ପ୍ରାଭୁସ୍ ମାର୍ଥାନ୍ ଯାବାବ୍ ଚିଚ୍ଚାସ୍, “ଏ ମାର୍ଥା, ଏ ମାର୍ଥା; ନିନ୍ ଢେର୍ କାତ୍ଥାଘି ବାରେନୁ ଚିନ୍ତା କାମାଲ୍ଦିନ୍ ଆରୁ ବ୍ୟସ୍ତ୍ ଆତ୍ଲ୍ଦି। 42ଲେକିନ୍ ଅଣ୍ଟା କାତ୍ଥା ଖାଲି ଦାର୍କାର୍ ରାଇଦ୍, ମାରିୟାମ୍ଦ୍ ଜାମାର୍ଘିନ୍ତି ବାନେ ଭାଗ୍ବନ୍ ଚାଜ୍ଜକିଚି ଆବନ୍ ଇଦ୍ଘିସ୍ତି ହୁଆ ମା କାଇ।”
11ଯୀଶୁସ୍ ବିନ୍ତି କାମାଗେ ଶିଖାବାଲ୍ଦାସ୍
1ଅହନ୍ ଯୀଶୁସ୍ ଏକିନ୍ ଅଣ୍ଟା ଆଡ୍ଡାନୁ ବିନ୍ତି କାମାଲିୟାସ୍। ଆସ୍ ବିନ୍ତି ମୁଞ୍ଜକା ପାଛ୍ଲି, ତାଙ୍ଘାଏ ଚେଲାର୍ଘି ଭିତର୍ନୁ ଅର୍ତୁସ୍ ତାଙ୍ଗାନ୍ ତେଙ୍ଗିୟାସ୍, “ହେ ପ୍ରାଭୁ, ଯୋହାନ୍ସ୍ ଏସ୍କେ ତାଙ୍ଘା ଚେଲାରିନ୍ ବିନ୍ତି କାମାଗେ ଶିଖାବାଚାସ୍ ଆନ୍ନେ ନିମ୍ହି ଏମାନ୍ ବିନ୍ତି କାମାଗେ ଶିଖାବା।”
2ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯେତ୍କବାକେନ୍ ନିମ୍ ବିନ୍ତି କାମର୍ ହତ୍କବାକେନ୍ ତେଙ୍କେ:
‘ହେ ବାଙ୍ଗ୍, ନିହ୍ମା ନାମେ ପାବିତାର୍ ମାନ୍ନାଦ୍, ନିହ୍ମା ରାଜୀଦ୍ ବାର୍ନାଦ୍।’
3‘ଏହ୍ମାଏ ରୋଜ୍ଦିନ୍ ଘି ଆହାର୍ ଏମାଗେ ଚିଆ’,
4‘ଏହ୍ମା ପାପ୍ ଗୁଠିନ୍ ଛେମା କାମା,
ଏନ୍ ଏନ୍ଦେର୍ଗେକା ଏମ୍ହି ନିଜର୍ ଜାମା ଦୋଷୀରିନ୍ ଛେମା କାମ୍ଦାମ୍, ଆନ୍ନେ ଏହ୍ମା ଦୋଷ୍ଗୁଠିନ୍ ଛେମା କାମା ଆରୁ ପରୀକ୍ଷାନୁ ଏମାନ୍ ଆମାଟିଡ଼ା’।”
5ଆରୁ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିହ୍ମା ଭିତର୍ନୁ ନେଖିନ୍ ଏନ୍ନେ ସାଙ୍ଗେ ଆତ୍ଲ୍ନାଏ, କା ନେଖାସାନ୍ ଆଦ୍ମାଁହା କାଇକିରି ତେଙ୍ଗସ୍, ‘ହେ ସାଙ୍ଗେ; ଏଙ୍ଗାଗେ ମୁନ୍ଟା ଆସ୍ମା ଉଧାର୍ ଚିଆ। 6ଏନ୍ଦେର୍ଗେକା ଏଙ୍ଘାଏ ଅଣ୍ଟା ସାଙ୍ଗେସ୍ ଏଙ୍ଘାସାନ୍ ବାର୍ଚ୍କାଦାସ୍, ଆରୁ ଏଙ୍ଘାସାନ୍ ଅନ୍ତା ମହଁତାଗେ ଏନ୍ଦେର୍ହି ମାଲ୍ଲାଦିନ୍।’ 7ଆରୁ ଆସ୍ ଆଡ଼୍ପା ଉଲ୍ତି ଏନ୍ନେ ଯାବାବ୍ ଚିୟସ୍, ‘ଏଙ୍ଗାନ୍ ପାରେସାନ୍ ଆମା କାମା; ଆକ୍କୁନ୍ ବାଲି ମୁଚ୍ଚକାମିନ୍ ଆରୁ ଏଙ୍ଘା ହାଦ୍ଦୁର୍ ଏଙ୍ଘାଗାନେ ଚୁତ୍କାନାଏ, ଏନ୍ ଆକ୍କୁନ୍ ଉସ୍କାରା ଆରୁ ଆସ୍ମା ଚିୟାଗେ ପଲ୍ଲଦାନିନ୍?’ 8ଏନ୍ ନିମାନ୍ ତେଙ୍ଗାଲ୍ଦାନ୍, ଆସ୍ ତାଙ୍ଘାଏ ସାଙ୍ଗେସ୍ ହାଲେହି ଆସ୍ ମା ଉସ୍କାରସ୍, ହାଲେହି ତାଙ୍ଘା ସାଙ୍ଗେସ୍ ଧିୟାନ୍-ଧିୟାନ୍ ନିଅସ୍ ହାଲେ ଆସ୍ ଉସ୍କାରାଇକିରି ତାଙ୍ଗା ଯେତ୍କ ଦାର୍କାର୍ ଆସ୍କେ ଆତ୍କୋ ଚିୟସ୍। 9ହୁଦ୍ଘିଲାଗାନ୍ ଏନ୍ ନିମାନ୍ ତେଙ୍ଗାଲ୍ଦାନ୍, ନିଆଁ ଆରୁ ଆଦ୍ ନିମାଗେ ଚିୟାକଦ୍; ବେଦ୍ଦା, ଆଦ୍ ନିମାଗେ ହାଖ୍ଖରଦ୍; ଆରୁ ନିମ୍ ବାଲିନ୍ ଠୋକ୍ ଠୋକ୍ କାମା, ଆରୁ ଆଦ୍ ନିହ୍ମା ଲାଗାନ୍ ତିସ୍କାକୋ। 10ଏନ୍ଦେର୍ଗେକା ନେଦ୍ ନିନାଏ, ଆବ୍ଡ଼ାର୍ ହାଖ୍ଖନାଏ; ନେଦ୍ ବେଦ୍ଦନାଏ, ଆବ୍ଡ଼ାର୍ଗେ ହାଖ୍ଖରି; ଆରୁ ନେଦ୍ ବାଲିବନ୍ ଠୋକ୍-ଠୋକ୍ କାମ୍ନାଏ, ଆବ୍ଡ଼ାର୍ଗେ ବାଲି ତିସ୍କାକୋଦ୍। 11ଆରୁ ନିହ୍ମା ଭିତର୍ନୁ ଏନ୍ନେ ଏକା ବୁଆସ୍ ରାଦାସ୍, ନେକାନ୍ କା ତାଙ୍ଗ୍ଦାସ୍ ଆସ୍ମା ନିଅସ୍, ତା ଆସ୍କେ ଚାଁଚା ଚିୟସ୍; ଇଞ୍ଜୋ ନିଅସ୍, ହାଲେ ଇଞ୍ଜୋଘି ବାଦ୍ଲା ନେର୍ରୁ ଚିୟସ୍; 12ମାଲ୍ଲାହାଲେ ଆଣ୍ଡା ନିଚ୍କୁନ୍ ଆଣ୍ଡାଘି ବାଦ୍ଲା ବିଚ୍ଛି ଚିୟସ୍ କାଁଏ? 13ଆରୁ ନିମ୍ ଯେତ୍କହି ଖାରାପ୍ ରାଦାର୍ ହାଲେହି ନିମ୍ ନିହ୍ମାଏ ହାଦ୍ଦୁ ବଚ୍ଚର୍ଗେ ବାନେ-ବାନେ ଜିନିଷ୍ପତର୍ ଚିଦାର୍, ତା ସରଗ୍ନୁ ରୁ ବାଙ୍ଗ୍ସ୍ ନିଜର୍ ନିଉର୍ଗେ ଢେର୍ବାଗ୍ଗେ ପାବିତାର୍ ଆତ୍ମା ଚିୟସ୍।”
କେତ୍କ ଆଲାର୍ ତେଙ୍ଗ୍ନାଏ ଯୀଶୁସ୍କିନୁ ବେଲ୍ଜେବୁଲ୍ ଭୁତ୍ତୁ ଲାକ୍କିଚି
(ମାତିସ୍ ୧୨:୨୨-୩୦; ମାର୍କୁସ୍ ୩:୨୦-୨୭)
14ଅନ୍ଦୁଲ୍ ଯୀଶୁସ୍ ଅଣ୍ଟା ଆଲାସ୍ସ୍ତି ଭୁତ୍ତୁନ୍ ଅଥ୍ରାସ୍। ଆ ଭୁତ୍ତୁଦ୍ ଆସିନ୍ କୋନ୍ଦା କାମ୍ଚେଇ ଚିଚ୍କିଚା। ଯୀଶୁସ୍ ଏସ୍କେ ଆଲାସ୍ସ୍ତି ଭୁତ୍ତୁନ୍ ଅଥ୍ରାସ୍ ହନ୍ନେନ୍ ଆସ୍ କାଚ୍ନେଖ୍ରା ଲାଗ୍ଗିୟାସ୍; ଆଙ୍ଗେନ୍ ଆଲାର୍ ଆଚ୍ମିତ୍ ମାନ୍ଚାର୍ କେରାର୍। 15ଲେକିନ୍ ଆସାନ୍ ରୁ ଆଲାର୍ଘି ଭିତର୍ନୁ କେତ୍କ ଆଲାର୍ ତେଙ୍ଗିୟାର୍, “ଇସ୍ ଭୁତ୍ତୁଗୁଠିନ୍ ଭୁତ୍ତୁଘି ମୁଖ୍ୟା ବେଲ୍ଜେବୁଲ୍ଘି ମଦେତ୍ତି ଅଥ୍ର୍ଦାସ୍।” 16ଆରୁ, ଆରୁ କେତ୍କ ଆଲାର୍ ଯୀଶୁସିନ୍ ବିଡ଼୍ଚେ ଏରାଗେ ଆସିନ୍ ଆକାଶ୍ତି ଏନ୍ଦ୍ରିନ୍ ଅଣ୍ଟା ଚିହ୍ନା ନିଆଲିୟାର୍। 17ଲେକିନ୍ ଯୀଶୁସ୍ ଆବ୍ଡ଼ାର୍ଘି ମନ୍ତା କାତ୍ଥାନ୍ ଆହିକିରି ଆବ୍ଡ଼ାରିନ୍ ତେଙ୍ଗିୟାସ୍, “ଏକିନ୍ ରାଜୀଦ୍ ଭାଗ୍ ମାନିକିରି ନିଜର୍ ବିରୁଦ୍ଧନୁ ଉସ୍କାରାଇ, ଆଦ୍ ନାଶ୍ ମାନିକାଇ; ଆରୁ ଏକା ଆଡ଼୍ପାନୁ ଝାଗ୍ଡ଼ା ମାନିଦ୍, ଆ ପରିବାର୍ ଛିଛିର୍ଛାନ୍ଦ୍ ମାନିକାଇ। 18ଆରୁ ଯଦି ଶାଏତାନ୍ହି ତାହ୍ମା ଭିତ୍ରେ ଭାଗ୍ ମାନିକିରି ନିଜର୍ ବିରୁଦ୍ଧନୁ ଉସ୍କାରାଇ, ହାଲେ ତାଙ୍ଘା ରାଜୀ ଏସ୍କେ ଟିକ୍ରା ଅଙ୍ଗଦ୍? ଆରୁ ନିମ୍ ତେଙ୍ଗ୍ଦାର୍ କା ଏନ୍ ବେଲ୍ଜେବୁଲ୍ ଶାଏତାନ୍ଘି ମଦେତ୍ତି ଭୁତ୍ତୁଗୁଠିନ୍ ଅଥ୍ର୍ଦାନ୍। 19ଲେକିନ୍ ଯଦି ଏନ୍ ବେଲ୍ଜେବୁଲ୍ ଶାଏତାନ୍ଘି ମଦେତ୍ତି ଭୁତ୍ତୁଗୁଠିନ୍ ଅଥର୍ଦାନ୍, ହାଲେ ନିହ୍ମା ହାଦ୍ଦୁର୍ ନେଖା ମଦେତ୍ତି ଭୁତ୍ତୁଗୁଠିନ୍ ଅଥ୍ର୍ନାଏ? ହୁଦ୍ଘିଲାଗାନ୍ ଆବ୍ଡ଼ାର୍ ନିହ୍ମାଏ ନ୍ୟାୟ କାମର୍। 20ଲେକିନ୍ ଏରା ଏନ୍ ଯଦି ପାର୍ମେଶ୍ଵାର୍ସ୍କି ଶକ୍ତିତି ଭୁତ୍ତୁଗୁଠିନ୍ ଅଥର୍ଦାନ୍, ହାଲେ ସତ୍ତୁନିନ୍ ପାର୍ମେଶ୍ଵାର୍ସ୍କି ରାଜୀ ନିହ୍ମା ମାଝାନୁ ବାର୍ଚା କେର୍କିଚି। 21ଯେତ୍କବାକେନ୍ ଅଣ୍ଟା ତାକତ୍ବାଲା ଆଲାସ୍ ହାଥିଆର୍ ଧାରିକିରି ନିଜର୍ ଆଡ଼୍ପାନ୍ ଜାଗ୍ଦାସ୍, ହତ୍କବାକେନ୍ତକ୍ ତାଙ୍ଘା ଧନ୍-ସମ୍ପତ୍ତି ବାଛ୍ରିକିରି ରାଇଦ୍। 22ଲେକିନ୍ ଆସ୍ତି ଯଦି ବାଗ୍ଗେ ତାକତ୍ବାଲା ଆଲାସ୍ ଆକ୍ରମଣ୍ କାମ୍ଦାସ୍ ଆରୁ ଆସିନ୍ ହାରାବାଦାସ୍, ତା ଏକା ହାଥିଆର୍ ଘି ମିଆଁ ତାଙ୍ଘା ଭାର୍ଷା ରାଚା, ଆବନ୍ହି ତାଙ୍ଘାସ୍ତି ବାଗ୍ଗେ ତାକତ୍ବାଲା ଆଲାସ୍ ଲୁଟସ୍ ହସ୍କସ୍ ଆରୁ ଆସ୍କି ଧନ୍ସମ୍ପତ୍ତିବନ୍ ହାଟ୍ଟଚସ୍। 23ନେଦ୍ ଏଙ୍ଘାଗାନେ ମାଲ୍କାରିନ୍ ଆବ୍ଡ଼ାର୍ ଏଙ୍ଘା ବିରୁଦ୍ଧ୍ନୁ ରାନାଏ, ଆରୁ ନେଦ୍ ଏଙ୍ଘାଗାନେ ମା ଠୁଡ଼ିୟାନାଏ ଆବ୍ଡ଼ାର୍ ଛିଛିର୍ଛାନ୍ଦ୍ କାମ୍ନାଏଚିନାଏ।”
24“ଯେତ୍କବାକେନ୍ ଭୁତ୍ତୁଦ୍ ଅଣ୍ଟା ଆଲାସ୍ସ୍ତି ଉର୍ଖିକାଇ ଆରୁ ତାଙ୍ଘା ଆରାମ୍ ଲାଗାନ୍ ହାଏକା ଆଡ୍ଡାଗୁଠିନ୍ ବେଦ୍ଦି, ଆରୁ ଆବନ୍ ମା ହାଖ୍ଖୀକିରି ତେଙ୍ଗି, ‘ଏନ୍ ଏକା ଆଡ଼୍ପାନ୍ତି ଉର୍କିଚେନ୍ ଆ ଆଡ଼୍ପାଗେ କିର୍ରନ୍କନ୍।’ 25ଆରୁ କିର୍କାନ୍ତି ଆଦ୍ ଆ ଆଡ଼୍ପାନ୍ ସାଫା ସୁତ୍ରା ଆରୁ ସାଜାବାଚ୍କା ହାଖ୍ଖୀ। 26ହତ୍କବାକେନ୍ ଆଦ୍ କାଇକିରି ତାଙ୍ଘାଗାନେ ଆରୁ ସାତ୍ତେଟା ଖାରାପ୍ ଭୁତ୍ତୁନ୍ ଅନ୍ଦ୍ରି, ଆରୁ ଆବ୍ଡ଼ାର୍ ଆ ଆଡ଼୍ପାନୁ କରିକିରି ଆଡ଼୍ପାନୁ ରାନାଏ କାନାଏ, ଆରୁ ଆ ଆଲାସ୍ଘି ଆଘ୍ଲିନ୍ତା ଦାଶାନ୍ତିହି ପାଛ୍ଲିନ୍ତା ଦାଶାଦ୍ ବାଗ୍ଗେ ଖାରାପ୍ ମାନିକାଇ।”
27ଯୀଶୁସ୍ ଇବ୍ଡ଼ା କାତ୍ଥା ତେଙ୍ଗାଲିଆସିନ୍ କା ଆଲାର୍ଘି ଭିଡ଼ନ୍ତା ଅଣ୍ଟା ଆଲି ଜୋର୍ସେ ଚିର୍ରା ରାଇକିରି ତେଙ୍ଗିୟାଦ୍, “ଧଏନ୍ ରାଇଦ୍ ଆ ଆଲିଦ୍ ଏକାଦ୍ କା ତାଙ୍ଘା ଗରଭ୍ନୁ ନିମାନ୍ ଉଇୟା ଆରୁ ଗୁରସ୍ ହାପ୍ପତାଚା।” 28ଲେକିନ୍ ଯୀଶୁସ୍ ତେଙ୍ଗିୟାସ୍, “ହଁ; ଇବ୍ଡ଼ାଦ୍ ତା ଠିକ୍ ରାଇଦ୍, ଲେକିନ୍ ଏକାର୍ ପାର୍ମେଶ୍ଵାର୍ସ୍କି ବଚନ୍ ମେନ୍ନାଏ ଆରୁ ଆବନ୍ ମାନ୍ନାଏ ଆବ୍ଡ଼ାର୍ ଆଦ୍ଘିନ୍ତିହି ବାଗ୍ଗେ ଧଏନ୍ ରାନାଏ।”
ଯୁନାସ୍ ନାବୀକିସ୍ ଚିହ୍ନା
29ଯୀଶୁସ୍କି ଚାର୍ହି ପାଖା ଆଲାର୍ଘି ଭିଡ଼୍ ମାନ୍ତେ କାଲିୟାଦ୍ ହତ୍କବାକେନ୍ ଯୀଶୁସ୍ ଉପ୍ଦେଶ୍ ଚିଆ ଲାଗ୍ଗିୟାସ୍ ଆରୁ ତେଙ୍ଗିୟାସ୍, “ଇ ପିଢ଼ିନ୍ତା ଆଲାର୍ ଖାରାପ୍ ରାନାଏ; ଇବ୍ଡ଼ାର୍ ଚିହ୍ନା ବେଦ୍ଦନାଏ; ଲେକିନ୍ ଯୁନାସ୍ ନାବୀସ୍କି ଚିହ୍ନା ଆମ୍ଵିକିରି ଏନ୍ଦେର୍ହି ଚିହ୍ନା ଇବ୍ଡ଼ାର୍ଗେ ମା ଚିଆକାଇଦ୍। 30ଏନ୍ଦେର୍ଗେକା ଯୁନାସ୍ ନାବୀସ୍ ଏସ୍କେ ନୀନିବୀ ଆଲାର୍ଘି ଲାଗାନ୍ ଅଣ୍ଟା ଚିହ୍ନା ମାନ୍ଚାସ୍, ହନ୍ନେନ୍ ମୁନୁଷ୍ ହାଦ୍ଦୁସ୍ହି ଇ ପିଢ଼ିନ୍ତା ଆଲାର୍ଘି ଲାଗାନ୍ ଅଣ୍ଟା ଚିହ୍ନା ମାନସ୍। 31ନ୍ୟାୟଘି ଉଲ୍ଲାନୁ ଦକ୍ଷିଣ୍ତା ରାନୀ ଇ ପିଢ଼ିନ୍ତା ଆଲାର୍ଘି ବିରୁଦ୍ଧ ଉସ୍କାରୋ ଆରୁ ଇବ୍ଡ଼ାରିନ୍ ଦୋଷୀ ଠାହ୍ରାବର୍, ଏନ୍ଦେର୍ଗେକା ଆଦ୍ ଶୁଲେମାନ୍ସ୍ତି ବୁଦ୍ଧିଘି ବଚନ୍ ମେନାଗେ ଢେର୍ ଗେଚ୍ଛାନ୍ତି ବାର୍ଚ୍କିଚା, ଆରୁ ଏରା, ଇସାନ୍ ଏକା ଆଲାସ୍ ରାଦାସ୍ ଆସ୍ ଶୁଲେମାନ୍ସ୍ତିହି ବାଡ଼୍କା ରାଦାସ୍। 32ନ୍ୟାୟଘି ଉଲ୍ଲାନୁ ନୀନିବୀ ଆଲାର୍ ଇ ପିଢ଼ିନ୍ତା ଆଲାର୍ଘି ବିରୁଦ୍ଧ ଉସ୍କାରର୍, ଆରୁ ଇବ୍ଡ଼ାରିନ୍ ଦୋଷୀ ଠାହ୍ରାବଦ୍; ଏନ୍ଦେର୍ଗେକା ଆବ୍ଡ଼ାର୍ ଯୁନାସ୍ ନାବୀସ୍କି ଉପ୍ଦେଶ୍ ମେନିକିରି ପାସ୍ତାରାଚ୍କାଚାର୍, ଆରୁ ଏରା, ଇସାନ୍ ଏକା ଆଲାସ୍ ରାଦାସ୍ ଆସ୍ ଯୁନାସ୍ ନାବୀସ୍ତିହି ବାଡ଼୍କା ରାଦାସ୍।”
ବିଲ୍ଲୀଘି ନମୁନା
(ମାତିସ୍ ୫:୧୫; ୬:୨୨,୨୩)
33“ନେଦ୍ହି ବିଲ୍ଲୀ ଦାଗିକିରି ମା ଏଥ୍ର୍ନା ଆଡ୍ଡାନୁ ଆରୁ ଆଉଡ଼୍କା କିୟାଁ ମା ଉଇନାଏ, ଲେକିନ୍ ବିଲ୍ଲୀ ଉଇନା ବାଚ୍ଛିନୁ ଉଇନାଏ ଏନ୍ଦେର୍ଗେକା ଉଲା କରୁ ଆଲାର୍ ବିଲ୍ଲୀନ୍ ଏରା ଅଙ୍ଗର୍। 34ନିହ୍ମା ହାନ୍ନୁଦ୍ ନିହ୍ମା ମେଦୁନ୍ନ୍ତା ବିଲ୍ଲୀଦ୍, ଯଦି ନିହ୍ମା ହାନ୍ନୁ ବାନେ ରାଇ ହାଲେ ନିହ୍ମା ପୁରା ମେଦୁଗେ ବିଲ୍ଲୀ ଏଥ୍ରଦ୍; ଲେକିନ୍ ହାନ୍ନୁଦ୍ ଯଦି ଖାରାପ୍ ରାଇଦ୍ ହାଲେ ନିହ୍ମା ପୁରା ମେଦୁଦ୍ ଉହା ମାନକୋ। 35ହୁଦ୍ଘିଲାଗାନ୍ ନିମ୍ ଚେତ୍ରିକିରି ରାକେ, ଏକା ବିଲ୍ଲୀ ନିହ୍ମା ଉଲା ରାଇଦ୍ ଆଦ୍ ଉହା ମା ମାନ୍ନାଦ୍। 36ଯଦି ନିହ୍ମା ପୁରା ମେଦୁ ବିଲ୍ଲୀନୁ ରଦ୍ ଆରୁ ମେଦୁଘି ଏକା ଭାଗୁହି ଉହାନୁ ମା ରୋତା ଆଦ୍ ଜାମାବାକେନ୍ ବିଲ୍ଲୀନୁ ରଦ୍, ଏସ୍କେ ବିଲ୍ଲୀନ୍ତି ରଶ୍ନୀ ବାରି ହନ୍ନେନ୍ ନିହ୍ମା ପୁରା ମେଦୁ ବିଲ୍ଲୀ ମାନକୋ।”
ଯୀଶୁସ୍ ଫାରିସୀ ଜାମାର୍ଘି ବିରୁଦ୍ଧ କାମାଲ୍ଦାସ୍
(ମାତିସ୍ ୨୩:୧-୩୬; ମାର୍କୁସ୍ ୧୨:୩୮-୪୦)
37ଯୀଶୁସ୍କି ଉପ୍ଦେଶ୍ ଚିନାବାକେନ୍ ଅଣ୍ଟା ଫାରିସୀ ଆଲାସ୍ ଆସିନ୍ ତାଙ୍ଘାଏ ଆଡ଼୍ପା ପାହି କାମାଗେ ମେହିଁୟାସ୍ ଆରୁ ଯୀଶୁସ୍ ଆସ୍କି ଆଡ଼୍ପା କାଇକିରି ଅନାଗେ ଅକ୍କିୟାସ୍। 38ଲେକିନ୍ ଅନ୍ନାଘି ଆଘ୍ଲି ଯୀଶୁସ୍ ତାଙ୍ଘା ହେଖ୍ଖା ମାଲ୍ଲା ନଣ୍ତରୁସ୍ ଇବନ୍ ଏରିକିରି ଆ ଫାରିସୀସ୍ ଆଚ୍ମିତ୍ ମାନ୍ଚାସ୍କେରାସ୍। 39ଆସ୍କି ଆଚ୍ମିତ୍ ମାନ୍ନାନ୍ ଏରିକିରି ପ୍ରାଭୁସ୍ ଆସିନ୍ ତେଙ୍ଗିୟାସ୍, “ନିମ୍ ଫାରିସୀ ଆଲାର୍, ଥାଡ଼ିଗିନାବନ୍ ଏସ୍କେ ବାହ୍ରି ଖାଲି ମାଞ୍ଜଦାର୍, ଆନ୍ନେନ୍ ନିମ୍ ବାହ୍ରି ତାର୍ତି ସାଫା ଏଦ୍ର୍ଦାର୍ ଲେକିନ୍ ନିହ୍ମା ମନ୍ନୁ ଲାଲଚ୍ ଆରୁ ଖାରାପ୍ ଗୁଣ୍ଗୁଠି ନିନ୍ଦିଆ କେର୍କିଚି। 40ହେ ନିର୍ବୁଦ୍ଧିଆରୋ, ଏକାସ୍ ବାହ୍ରିନ୍ତା ସୃଷ୍ଟି କାମ୍ଚାସ୍, ଆସ୍ ଉଲ୍ତାନ୍ହି ସୃଷ୍ଟି ମାଲ୍ଲା କାମୁସ୍ କାଁଏ? 41ନିହ୍ମାସାନ୍ ଏନ୍ଦେର୍ ରାଇ ଆବନ୍ ଗରୀବ୍ ଆଲାର୍ଗେ ଦାନ୍ ଚିଆଲାଗା, ହାଲେ ନିହ୍ମା ଲାଗାନ୍ ଜାମାଦ୍ ଶୁଦ୍ଧ୍ ମାନକୋ।”
42“ଫାରିସୀ ଆଲାରୋ, ନିମାଗେ ବାଗ୍ଗେ ଦଣ୍ଡ୍ ହାଖ୍ଖର୍ନାବାଲା ରାଇ! ଏନ୍ଦେର୍ଗେକା ନିମ୍ ହେସ୍ସୁ ତିହ୍ଲା ଆରୁ ନିହ୍ମା ହାଲ୍ଲୁନ୍ତା ଫସଲ୍ଘି ଦଶ୍ଭାଗ୍ ପାର୍ମେଶ୍ଵାର୍ସ୍କି ଲାଗାନ୍ ଦାନ୍ ଚିଦାର୍, ଲେକିନ୍ ନ୍ୟାୟ ଆରୁ ପାର୍ମେଶ୍ଵାର୍ସ୍କି ବାନେ ହାଖ୍ଖନାବନ୍ ଧ୍ୟାନ୍ ମା ଚିଦାର୍; ନିମ୍ ଏସ୍କେ ହେସ୍ସୁ ତିହ୍ଲା ଆରୁ ହାଲ୍ଲୁନ୍ତା ଫସଲ୍ଘି ଦଶ୍ଭାଗ୍ ଚିଦାର୍ ଆନ୍ନେନ୍ ପାର୍ମେଶ୍ଵାର୍ସ୍କି ଲାଗାନ୍ ନ୍ୟାୟ ଆରୁ ବାନେ ହାଖ୍ଖନାବନ୍ ଧ୍ୟାନ୍ ଚିନା କାତ୍ଥା।”
43“ଫାରିସୀ ଆଲାରୋ, ନିମାଗେ ବାଗ୍ଗେ ଦଣ୍ଡ୍ ହାଖ୍ଖର୍ନାବାଲା ରାଇ! ଏନ୍ଦେର୍ଗେକା ନିମ୍ ସାଭା ଆଡ଼୍ପାଗୁଠିନୁ ମୁଖ୍ୟା ଆଡ୍ଡାନୁ ଅକ୍କାଗେ ବେଦ୍ଦଦାର୍ ଆରୁ ହାଟ୍ଟେଗୁଠିନୁ ଆଲାର୍ସ୍ତି ଯୋହାର୍ ବେଦ୍ଦଦାର୍।”
44“ଫାରିସୀ ଆଲାରୋ ନିମାଗେ ବହୁତ୍ ଦଣ୍ଡ୍ ହାଖ୍ଖର୍ନାବାଲା ରାଇ! ଏନ୍ଦେର୍ଗେକା ନିମ୍ ମା ଏଥ୍ର୍ନା ମାସ୍ଣା ଲେଖା ରାଦାର୍, ଆଦ୍ଘି ମିଆଁ ଏକୁ ଆଲାର୍ ଆଦ୍ ମାସ୍ଣାଦ୍ ବୁଲି ବାଲ୍ନାଇନ୍।”
45ଇବନ୍ ମେନିକିରି ପଣ୍ଡିତ୍ଜାମାର୍ଘି ଭିତର୍ନୁ ଅର୍ତୁସ୍ ଯୀଶୁସିନ୍ ଯାବାବ୍ ଚିଚ୍ଚାସ୍, “ହେ ଗୁରୁ, ନିମ୍ ଏନ୍ନେ ତେଙ୍ଗିକିରି ଏହ୍ମାଏ ଅପ୍ମାନ୍ କାମାଲ୍ଦାର୍।” 46ଯୀଶୁସ୍ ତେଙ୍ଗିୟାସ୍, “ପଣ୍ଡିତ୍ ଆଲାରୋ, ନିମାଗେ ବାଗ୍ଗେ ଦଣ୍ଡ୍ ହାଖ୍ଖର୍ନାବାଲା ରାଇ! ଏନ୍ଦେର୍ଗେକା ନିମ୍ ଆଲାର୍ଘି ମିଆଁ ଢେର୍ ବାଡ଼୍କା ଭାର୍ ଲାଦ୍ଦଦାର୍ ଚିଦାର୍ ଏକାନ୍ କା ଉଠାବା ମା କାଇ, ଲେକିନ୍ ନିମ୍ ନିଜେ ଆବନ୍ ଉଠାବାଗେ କାଟେହି ମଦେତ୍ ମା କାମ୍ଦାର୍। 47ନିମାଗେ ବାଗ୍ଗେ ଦଣ୍ଡ୍ ହାଖ୍ଖର୍ନାବାଲା ରାଇ! ଏନ୍ଦେର୍ଗେକା ନିମ୍ ନାବୀଜାମାର୍ଘି ଲାଗାନ୍ ମାସ୍ଣା ତିୟାର୍ କାମ୍ଦାର୍, ଲେକିନ୍ ନିହ୍ମା ପୁର୍ଖାଜାମାର୍ ଆବ୍ଡ଼ାରିନ୍ ଡେମ୍ଚାର୍ ଆରୁ ପିଟ୍ଟେଇଚାର୍। 48ନିହ୍ମା ପୁର୍ଖାର୍ ଏକା ନାଲ୍ଖୁନ୍ କାମ୍ଚାର୍ ଆ ନାଲ୍ଖୁନ୍ ନିମ୍ ଆହ୍ଦାର୍, ନିହ୍ମା ପୁର୍ଖାର୍ ଏକା ନାଲ୍ଖୁନ୍ କାମ୍ଚାର୍ ଆ ନାଲ୍ଖୁଦ୍ ଠିକ୍ଦ୍ ଏନ୍ନେ ନିମ୍ ତେଙ୍ଗ୍ଦାର୍; ଏନ୍ଦେର୍ଗେକା ନିହ୍ମା ପୁର୍ଖାର୍ ଏକା ନାବୀରିନ୍ ପିଟ୍ଟେଇଚାର୍ ଆବ୍ଡ଼ାର୍ଘି ମାସ୍ଣାନ୍ ନିମ୍ ବାନା ବାଦାର୍। 49ହୁଦ୍ଘିଲାଗାନ୍ ପାର୍ମେଶ୍ଵାର୍ସ୍କି ବଚନ୍ ତେଙ୍ଗି କା, ‘ଏନ୍ ଆବ୍ଡ଼ାର୍ଘି ଚାହାଗେ ନାବୀ ଆରୁ ଖାସ୍ଚେଲାଜାମାରିନ୍ ତାଇୟନ୍, ଆବ୍ଡ଼ାର୍ଘି ଭିତ୍ର୍ତି ନେକାନ୍-ନେକାନ୍ ଆବ୍ଡ଼ାର୍ ପିଟର୍ଚର୍, ଆରୁ ନେକାନ୍ ନେକାନ୍ ସାତାବର୍।’ 50-51ହୁଦ୍ଘିଲାଗାନ୍ ଦୁନିଆଁଘି ସୁରୁନ୍ତି ଯେତ୍କ ନାବୀଜାମାର୍ଘି ହେଁସୁ ବାହାବା କେର୍କିଚି, ହାବିଲ୍ସ୍କି ହେଁସୁତି ହୋଇକିରି ଜାକ୍ରିୟାସ୍କି ହେଁସୁତକ୍, ଏକାର୍ ମନ୍ଦିର୍ଘି ବେଦୀ ଆରୁ ପାବିତାର୍ ଆଡ୍ଡାଘି ମାଝାନୁ ପିଟ୍ଟକାଚାର୍; ହୁଦ୍ଘି ଜିମାବାରୀ ଇ ପିଢ଼ିନ୍ତା ଆଲାର୍ଗେ ଉଠାବା ଖାତ୍ରୋ, ହଁ ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ ଇବ୍ଡ଼ା ଜାମାଘି ବାଦ୍ଲା ଇ ପିଢ଼ିନ୍ତା ଆଲାର୍ସ୍ତି ହୁଆକୋ। 52ପାବିତାର୍ ଶାସ୍ତ୍ରନୁ ପାର୍ମେଶ୍ୱାର୍ସ୍କି ବାରେନୁ ଏକାଦ୍ ଲେଖ୍ଚ୍କା ରାଇଦ୍, ଆବ୍ଡ଼ା ଜାମାନ୍ ନିମ୍ ଆହ୍ଦାର୍ ଲେକିନ୍ ନିମ୍ ଆବନ୍ ମା ମାନ୍ଦାର୍, ଆ କାତ୍ଥାନ୍ ନିମ୍ ଦୁସ୍ରା ଆଲାରିନ୍ ମା ଶିଖାବାଦାର୍ ଆରୁ ଦୁସ୍ରା ଆଲାରିନ୍ ଆବନ୍ ମାନାଗେହି ମା ଚିଦାର୍, ହୁଦ୍ଘିଲାଗାନ୍ ନିମା ଜାମାର୍ଗେ ଦଣ୍ଡ୍ ହାଖ୍ଖର୍ନାବାଲା ରାଇଦ୍।” 53-54ଆରୁ ଯୀଶୁସ୍ ଆସ୍ତି ଉର୍ଖିୟାସ୍, ହତ୍କବାକେନ୍ ଫାରିସୀ ଆରୁ ପଣ୍ତିତ୍ଜାମାର୍ ବହୁତ୍ ବିରୁଦ୍ଧ କାମା ଲାଗ୍ଗିୟାର୍ ଆରୁ ଯୀଶୁସ୍କି ଥୁମ୍ଣାନ୍ତି ଏନ୍ଦ୍ରିନ୍ ଭୁଲ୍ କାତ୍ଥା ଧାରାଗେ ଆସିନ୍ ଢେର୍ ପ୍ରଶ୍ନ ମେନାଗେ ଲାଗ୍ଗିୟାର୍।
12କପ୍ଟୀଆର୍ଘି ବିରୁଦ୍ଧନୁ ଚେତାବାନୀ
(ମାତିସ୍ ୧୦:୨୬,୨୭,୨୮-୩୧,୩୨,୩୩; ୧୨:୩୨; ୧୦:୧୯,୨୦)
1ହୁ ସାମାୟନୁ ଆଲାର୍ଘି ଏତ୍କ ଭିଡ଼୍ ମାନ୍ଚାକେରା, ଯେ ଆଲାର୍ ତାମ୍-ତାମ୍ ତିର୍ହାନେଖ୍ରାକାଲିୟାର୍, ଯୀଶୁସ୍ ବିଶେଷ୍କିରି ତାଙ୍ଘା ଚେଲାରିନ୍ ତେଙ୍ଗା ଲାଗ୍ଗିୟାସ୍ କା “ଫାରିସୀ ଜାମାର୍ଘି କପଟ୍ ରୂପି ଖାମୀର୍ସ୍ତି ୧୨:୧ ଖାମୀର୍ ମତ୍ଲବ୍ ଆସ୍ମା ଫୁଲାବୁ ଅଣ୍ଟା ଜିନିଷ୍ଘି ନାମେ, ୟାହୁଦୀ ଆଲାର୍ ଆସ୍ମା ତିୟାର୍ କାମାଗେ ବେଭାର୍ କାମାଲିୟାର୍ ମତ୍ଲବ୍ ଆବ୍ଡ଼ାର୍ଘି କପ୍ଟ୍ତି ୧୨:୧ କପ୍ଟୀ ଘି ମତ୍ଲବ୍ନେଦ୍ ପାର୍ମେଶ୍ଵାର୍ସିନ୍ ବିଶ୍ୱାସ୍ ଆରୁ ବାନେ ହାଖ୍ଖନା କାମ୍ଦାମ୍ବୁଲି ଏଦ୍ର୍ନାଏ ଲେକିନ୍ ପ୍ରକୃତ୍ନୁ ପାର୍ମେଶ୍ୱାର୍ସିନ୍ ବାନେ ହାଖ୍ଖନା ଆରୁ ବିଶ୍ଵାସ୍ ମା କାମ୍ନାଏ ସାବ୍ଧାନ୍ ରା। 2ଏନ୍ନେ ଏନ୍ଦେର୍ହି ନୁହୁର୍କା ମାଲ୍ଲାଦିନ୍, ଏକାଦ୍ କା ବିଲ୍ଲୀନୁ ଅନ୍ଦ୍ରା ମା କାଇ; ଆରୁ ଏନ୍ନେ ଏନ୍ଦେର୍ହି ନୁହୁର୍କା ମାଲ୍ଲାଦିନ୍, ଏକାଦ୍ କା ପ୍ରକଟ୍ ମା ମାନିଦ୍। 3ହୁଦ୍ଘିଲାଗାନ୍ ନିମ୍ ଏକାନ୍ ଉହାନୁ ତେଙ୍କାଦାର୍, ଆଦ୍ ବିଲ୍ଲୀନୁ ଶୁଣାବାକୋ; ଆରୁ ନିମ୍ ଏକାନ୍ ଆଡ଼୍ପା ଉଲା ଫୁସୁର୍-ଫୁସୁର୍ ଆରୁ କାଡ଼େ-କାଡ଼େ ତେଙ୍କାଦାର୍, ଆବନ୍ ଯୋର୍ ଯୋର୍ସେ ଆଡ଼୍ପାନ୍ତା ଛାତ୍ ମିଁତି ପ୍ରଚାର୍ କାମାକୋ। 4ଲେକିନ୍ ନିମ୍ ଏଙ୍ଘା ସାଙ୍ଗେର୍ ହୁଦ୍ଘିଲାଗାନ୍ ଏନ୍ ନିମାନ୍ ତେଙ୍ଗାଲ୍ଦାନ୍ ଏକା ଆଲାର୍ ମେଦୁନ୍ ଡେମ୍ନାଏ ପିଟ୍ଟନାଏ ଚିନାଏ ଲେକିନ୍ ଆଦ୍ଘି ପାଛ୍ଲି ଏନ୍ଦେର୍ହି କାମା ପଲ୍ଲନାଏ, ଆବ୍ଡ଼ାରିନ୍ ଆମା ଏଲ୍ଚା। 5ଏନ୍ ନିମାନ୍ ତେଙ୍ଗାଲ୍ଦାନ୍ କା ନେକାନ୍ ଏଲ୍ଚ୍ନା କାତ୍ଥା, ଆସିନ୍ ଏଲ୍ଚା; ଏକାସ୍କେ କା କେଚ୍ଚକା ପାଛ୍ଲି ନରକ୍ନୁ ଟିଡ଼୍ନାଘି ହକ୍ ରାଇ, ହଁ, ଏନ୍ ନିମାନ୍ ତେଙ୍ଗାଲ୍ଦାନ୍, ଆବ୍ଡ଼ାରିନ୍ ଏଲ୍ଚା। 6ପାଞ୍ଚେଟା ଚରୋ ଓଡ଼ା ଦୁଇ ପାଏସାନୁ ମା ବିଁସ୍ରିଦ୍ କାଁଏ? ହାଲେହି ପାର୍ମେଶ୍ଵାର୍ସ୍ ଆବ୍ଡ଼ାର୍ଘି ଭିତର୍ନୁ ଅଣ୍ଟାନ୍ ହି ମା ମଦ୍ର୍ଦାସ୍। 7ହଁ, ନିହ୍ମା କୁକ୍କୁନ୍ ତା ଚୁଟ୍ଟିଗୁଠିନ୍ହି ଗନ୍ତି କାମା କେର୍କିଚି, ହୁଦ୍ଘିଲାଗାନ୍ ନିମ୍ ଆମା ଏଲ୍ଚା, ନିମ୍ ଢେର୍ବାଗ୍ଗେ ଚରୋ ଓଡ଼ାନ୍ତି ମୂଲ୍ୟବାନ୍ ରାଦାର୍।”
8“ଏନ୍ ନିମାନ୍ ତେଙ୍ଗାଲ୍ଦାନ୍ କା ନେଦ୍ ଏଙ୍ଗାନ୍ ଆଲାର୍ଘି ଆଘ୍ଲି ଗ୍ରହନ୍ କାମର୍ ଆରିନ୍ ମୁନୁଷ୍ ହାଦ୍ଦୁସ୍ ପାର୍ମେଶ୍ଵାର୍ସ୍କି ଦୂଁତ୍ଜାମାର୍ଘି ଆଘ୍ଲି ଗ୍ରହନ୍ କାମସ୍। 9ଲେକିନ୍ ନେଦ୍ ଏଙ୍ଗାନ୍ ଆଲାର୍ଘି ଆଘ୍ଲି ଗ୍ରହନ୍ ମା କାମ୍ନାଏ ଆବ୍ଡ଼ାରିନ୍ ପାର୍ମେଶ୍ଵାର୍ସ୍କି ଦୂଁତ୍ଜାମାର୍ଘି ଆଘ୍ଲି ଗ୍ରହନ୍ ମା କାମାକାଇ। 10ନେଦ୍ ମୁନୁଷ୍ ହାଦ୍ଦୁସ୍କି ବିରୁଦ୍ଧ ଏନ୍ଦ୍ରିନ୍ ତେଙ୍ଗର୍, ତା ଆର୍ଗେ ଛେମା ହାଖ୍ଖର, ଲେକିନ୍ ପାବିତାର୍ ଆତ୍ମାଘି ବିରୁଦ୍ଧ ନିନ୍ଦା କାମୁ ଆଲାର୍ଗେ ଛେମା ମା ହାଖ୍ଖରି।”
11“ଯେତ୍କବାକେନ୍ ଆବ୍ଡ଼ାର୍ ନିମାନ୍ ସାଭା ଆଡ଼୍ପାନୁ, ନ୍ୟାୟ କାମୁ ଆଲାର୍ଘି ଆରୁ ଶାସନ୍ କାମୁ ଆଲାର୍ଘି ଆଘ୍ଲି ଟାଣର୍ ହର୍, ହତ୍କବାକେନ୍ ନିହ୍ମା ତାର୍ତି ଏସ୍କେ ତେଙ୍ଗର୍, ଆବନ୍ ଆମ୍କେ ସୋଚା, 12ଏନ୍ଦେର୍ଗେକା ହତ୍କବାକେନ୍ ପାବିତାର୍ ଆତ୍ମା ନିମାନ୍ ଶିଖାବଦ୍କା ନିମାଗେ ଏନ୍ଦେର୍-ଏନ୍ଦେର୍ ତେଙ୍ଗ୍ନା କାତ୍ଥା।”
ଅଣ୍ଟା ମୁରୁକ୍ ଧନୀ ଆଲାସ୍କି ନମୁନା
13ଭିଡ଼୍ତି ଅର୍ତୁସ୍ ଯୀଶୁସିନ୍ ତେଙ୍ଗିୟାସ୍, “ହେ ଗୁରୁ, ଏଙ୍ଘା ଭାଇସିନ୍ ତେଙ୍ଗାଚା କା ଆସ୍ ଏମ୍ବାସ୍କି ସମ୍ପତ୍ତିବନ୍ ଏଙ୍ଘାଲାଗାନ୍ ଭାଗ୍ କାମଚସ୍।” 14ଯୀଶୁସ୍ ଆସିନ୍ ଯାବାବ୍ ଚିଚ୍ଚାସ୍, “ହେ ଭାଇ, ନେଦ୍ ଏଙ୍ଗାନ୍ ନିହ୍ମା ମାଝାନୁ ନ୍ୟାୟ କାମୁ ଚାହେ ଭାଗ୍ କାମୁ ଆଲ୍ବୁଲି ଚାଜ୍ଜକାନାଏ?” 15ଆରୁ ଯୀଶୁସ୍ ଆଲାରିନ୍ ତେଙ୍ଗିୟାସ୍, “ସାବ୍ଧାନ୍ ରା, ଆରୁ ଜାମା ରକମ୍ଘି ଲୋଭ୍ ଲାଲଚ୍ତି ବାଛ୍ରିକିରି ରା; ଏନ୍ଦେର୍ଗେକା ନେଖିନ୍ସାନ୍ ଯେତ୍କହି ଧନ୍ସମ୍ପତ୍ତି ରାଚ୍କୁନ୍ହି ହୁ ଧନ୍ ସମ୍ପତ୍ତିତି ତାଙ୍ଘା ଜୀବନ୍ ମା ବାଛ୍ରି।” 16ଆରୁ ଯୀଶୁସ୍ ଆବ୍ଡ଼ାରିନ୍ ଇ ନମୁନା ଶୁଣାବାଚାସ୍: “ଅଣ୍ଟା ଧନୀ ଆଲାସ୍କି ହାଲ୍ଲୁନୁ ଢେର୍ ଫସଲ୍ ମାନ୍ଚ୍କିଚା। 17ଆଙ୍ଗେନ୍ ଆସ୍ ତାଙ୍ଘା ମନ୍ନୁ ଏନ୍ନେ ସୋଚା ଲାଗ୍ଗିୟାସ୍, ‘ଏନ୍ ଆକ୍କୁନ୍ ଏନ୍ଦେର୍ କାମନ୍? ଏଙ୍ଘାସାନ୍ ଫସଲ୍ବନ୍ ଉୟାଗେ ଆଡ୍ଡାହି ମାଲ୍ଲାଦିନ୍।’ 18ଆଙ୍ଗେନ୍ ଆସ୍ ତେଙ୍ଗିୟାସ୍, ‘ଏନ୍ ଏନ୍ନେ କାମନ୍: ଏନ୍ ଏଙ୍ଘା ବାଖ୍ରାନ୍ ତୋଡ଼ିକିରି ଆଦ୍ଘିନ୍ତି ବାଡ଼୍କା ବାଖ୍ରା କାମନ୍; ଆରୁ ହୁ ବାଖ୍ରାନୁ ଏନ୍ ଏଙ୍ଘା ଜାମା ଧନ୍ ସମ୍ପତ୍ତିନ୍ ଉଇୟନ୍; 19ଆରୁ ଏନ୍ ଏଙ୍ଘା ଜୀଆନ୍ ତେଙ୍ଗନ୍ ହେ ଜୀଆ, ନିଙ୍ଘାସାନ୍ ଢେର୍ ବଛର୍ଘି ଲାଗାନ୍ ଧନ୍ସମ୍ପତ୍ତି ଉଇକା ରାଇ; ହୁଦ୍ଘିଲାଗାନ୍ ଆରାମ୍ କାମୁ, ଅନୁ ମହୁଁ ଆରୁ ମୋଉଜ୍ ଉଡ଼ାବୁ।’ 20ଲେକିନ୍ ପାର୍ମେଶ୍ଵାର୍ସ୍ ଆସିନ୍ ତେଙ୍ଗିୟାସ୍, ‘ଆରେ ମୁରୁଖ୍! ଇନ୍ନା ମାଁହା ନିଙ୍ଘା ଜୀଆ ନିଙ୍ଘାସ୍ତି ହୁଆକୋ; ହାଲେ ଇ ଠୁଡ଼ିୟାଚ୍କା ଧନ୍ସମ୍ପତ୍ତିଦ୍ ନେଖାଏ ମାନଦ୍?’ 21ଏନ୍ନେ ଦାଶା ଆବ୍ଡ଼ାର୍ଘି ମାନଦ୍ ଏକାର୍ ନିଜର୍ଘି ଲାଗାନ୍ ଧନ୍ସମ୍ପତ୍ତି ଠୁଡ଼ିୟାନାଏ, ଲେକିନ୍ ପାର୍ମେଶ୍ଵାର୍ସ୍କି ନଜର୍ନୁ ଆବ୍ଡ଼ାର୍ ଧନୀ ମାଲ୍ନାଏ।”
ପାର୍ମେଶ୍ଵାର୍ସ୍କି ମିଆଁ ଭାରୋସା
22ଯୀଶୁସ୍ ତାଙ୍ଘା ଚେଲାରିନ୍ ତେଙ୍ଗିୟାସ୍, “ହୁଦ୍ଘିଲାଗାନ୍ ଏନ୍ ନିମାନ୍ ତେଙ୍ଗାଲ୍ଦାନ୍, କା ଏନ୍ଦେନ୍ ଅନମ୍ ମହମ୍; ଏନ୍ନେ ଚିନ୍ତା କାମିକିରି ନିହ୍ମା ଜୀବନ୍ଘି ଲାଗାନ୍, ଆରୁ ଏନ୍ଦେନ୍ ଆତ୍ତମ୍ ଏନ୍ନେ ସୋଚିକିରି ନିହ୍ମା ମେଦୁଘି ଲାଗାନ୍ହି ଚିନ୍ତା ଆମା କାମା। 23ଏନ୍ଦେର୍ଗେକା ଜୀବନ୍ଦ୍ ଅନ୍ନାମହ୍ନା, ଆରୁ ମେଦୁଦ୍ ଚିଢ଼ାସ୍ତି ମୂଲ୍ୟବାନ୍। 24କାଉଗୁଠିନ୍ ଏରା; ଆବ୍ଡ଼ାଦ୍ ନା ତା ଚାହିଦ୍, ନା ହୋଇଦ୍; ନା ଆବ୍ଡ଼ାର୍ଘି ଧନ୍ସମ୍ପତ୍ତିଘି ବାଖ୍ରା ରାଇଦ୍; ହାଲେହି ପାର୍ମେଶ୍ଵାର୍ସ୍ ଆବ୍ଡ଼ାଗେ ଅନାମହାଗେ ଚିଦାସ୍। ନିମ୍ ଓଡ଼ାଘିନ୍ତି ବାଗ୍ଗେ ମୂଲ୍ୟବାନ୍ ରାଦାର୍! 25ଆରୁ ଚିନ୍ତା କାମ୍ଚ୍କୁନ୍ହି ନିହ୍ମା ଭିତର୍ନୁ ନେଦ୍ ନିହ୍ମାଏ ବୟସ୍ବନ୍ କାଟେ ବାଢ଼ାବା ଅଙ୍ଗର୍? 26ଯଦି ନିମ୍ ଛୋଟେନ୍ତି ଛୋଟେ ବିଷୟବନ୍ କାମା ପଲ୍ଲଦାର୍, ତା ନିମ୍ ଏନ୍ଦେର୍ଗେ ଆରୁ ଦୁସ୍ରା କାତ୍ଥାଗୁଠିନ୍ ଚିନ୍ତା କାମ୍ଦାର୍? 27ପୁଁପୁଗୁଠିନ୍ ଏରା ଆବ୍ଡ଼ାଦ୍ ଏସ୍କେ ପାର୍ଦିଦ୍: ଆବ୍ଡ଼ାଦ୍ ନା ମେହ୍ନତ୍ କାମିଦ୍, ଆରୁ ନା ତା ତାହ୍ମାଲାଗାନ୍ ଚିଢ଼ା ତିୟାର୍ କାମି; ହାଲେହି ଏନ୍ ନିମାନ୍ ତେଙ୍ଗାଲ୍ଦାନ୍ କା ଶୁଲେମାନ୍ସ୍ହି ତାଙ୍ଘା ଆତ୍ତନା ପୁନ୍ଦର୍ନା ଆରୁ ଧନ୍ ସମ୍ପତ୍ତିତିହି, ଆବ୍ଡ଼ାର୍ସ୍ତି ଅର୍ତୁର୍ଘିହି ବାରାବୁରି ମାନା ପଲ୍ଲିୟାସ୍। 28ଲେକିନ୍ ଏକା ଘାଁସିଦ୍, ଇନ୍ନା ହାଲ୍ଲୁନୁ ରାଇ ଆରୁ ନେଲା ଏକାଗଡ଼ାନୁ ବାସ୍ସାଚାକୋ, ଆବନ୍ହି ଯଦି ପାର୍ମେଶ୍ଵାର୍ସ୍ ଏନ୍ନେ ସାଜାବାଦାସ୍; ତା ହେ କମ୍ ବିଶ୍ୱାସ୍ କାମୁ ଆଲାରୋ, ଆସ୍ ନିମାଗେ ଏନ୍ଦେର୍ଗେ ବାଗ୍ଗେ ମା ଆତ୍ତତସ୍? 29ହୁଦ୍ଘିଲାଗାନ୍ ନିମ୍ ଅନ୍ନାମହ୍ନାନ୍ ଆମା ବେଦ୍ଦା ଆରୁ ଚିନ୍ତା ଆମା କାମା। 30ଏନ୍ଦେର୍ଗେକା ନେଦ୍ ପାର୍ମେଶ୍ଵାର୍ସିନ୍ ବିଶ୍ଵାସ୍ ମା କାମ୍ନାଏ ଆବ୍ଡ଼ାର୍ ଇ ଜାମାନ୍ ବେଦ୍ଦନାଏ: ଲେକିନ୍ ଇବ୍ଡ଼ା ଜାମାଘି ନିମାଗେ ଦାର୍କାର୍ ରାଇ ଆବନ୍ ନିହ୍ମା ବାଙ୍ଗ୍ସ୍ ଆହ୍ଦାସ୍। 31ହୁଦ୍ଘିଲାଗାନ୍ ପାର୍ମେଶ୍ଵାର୍ସ୍କି ରାଜୀଘି ଖୋଜାର୍ନୁ ଲାକ୍କାରା, ଆରୁ ଇବ୍ଡ଼ା ଜାମାଦ୍ ନିମାଗେ ହନ୍ନେନ୍ ହାଖ୍ଖରକୋ।”
ସରଗ୍ତା ଧାନ୍ନୁ
32“ଏଙ୍ଘା ଛୋଟେ ଚେଲାର୍ଘି ଦଲ୍, ଆମା ଏଲ୍ଚା; ଏନ୍ଦେର୍ଗେକା ନିହ୍ମା ବାଙ୍ଗ୍ ପାର୍ମେଶ୍ଵାର୍ସ୍ ନିମାଗେ ତାଙ୍ଘା ରାଜୀନ୍ ଚିୟାଗେ ଖୁସ୍ ରାଦାସ୍।”
33“ନିଜର୍ ଧନ୍ସମ୍ପତ୍ତିବନ୍ ବିଁଶିକିରି ଗରୀବ୍ ଆଲାର୍ଗେ ଦାନ୍ କାମାଚା; ଆରୁ ନିମାଗେ ଏନ୍ନେ ମୁଁଣା ତିୟାର୍ କାମା କା ଏକାଦ୍ ଏକ୍ଲାହି ନଷ୍ଟ ମା ମାନିଦ୍, ନିମ୍ ନିଜର୍ଘି ଲାଗାନ୍ ସରଗ୍ନୁ ନଷ୍ଟ ମା ମାନ୍ନା ଧାନ୍ନୁ ଠୁଡ଼ିୟା ଏନ୍ଦେର୍ଗେକା ଆସାନ୍ ନା ତା ଚୋର୍ହାର୍ ଆଣ୍ସ୍ନାଏ, ନା ତା ପଚ୍କୋ ମହିଁଦ୍। 34ଏନ୍ଦେର୍ଗେକା ଏକାସାନ୍ ନିହ୍ମା ଧାନ୍ନୁ ରାଇଦ୍, ଆସାନିନ୍ ନିହ୍ମା ମନ୍ଦ୍ହି ଲାକ୍କି ରାଇଦ୍।”
ଚେତ୍ରିକିରି ରା
35“ନିହ୍ମା କାଡ଼୍ମା ଶାକ୍ତିକିରି ଉଇୟା ଆରୁ ନିହ୍ମା ବିଲ୍ଲୀ ଲାଘ୍ର୍ତେ ରାନାଦ୍, 36ଏହ୍ମା ମାଲିକ୍ସ୍ ଏକା ବାକେନ୍ କିର୍ରସ୍ ବାରସ୍ ଏନ୍ନେ ସୋଚିକିରି ରୁ ଆଲାର୍ ଲେଖା ନିମ୍ ମାନା, ଏନ୍ନେ ରର୍ ହାଲେ ଯେତ୍କବାକେନ୍ ମାଲିକ୍ସ୍ ବାରିକିରି, ବାଲିନ୍ ଠୋକ୍-ଠୋକ୍ କାମସ୍ ଆଙ୍ଗେନ୍ ଚାଁଣେନିନ୍ ଉସ୍କାରାଇକିରି ବାଲିନ୍ ତିସ୍କା ଅଙ୍ଗର୍। 37ମାଲିକ୍ସ୍ ବାରିକିରି ଏକା ଗୁତ୍ତିୟାରିନ୍ ଚେତ୍ର୍କା ଏରସ୍; ଆବ୍ଡ଼ାର୍ ଧଏନ୍ ରାନାଏ ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ ଆସ୍ କାଡ଼୍ମାନ୍ ହିଁଇକିରି ଅନାଗେ ଅକ୍ତସ୍, ଆରୁ ଚାହା କାଇକିରି ଆସ୍କି ସେବା କାମସ୍। 38ଯଦି ଆ ମାଲିକ୍ସ୍ ଆଦ୍ ମାଁହାଗେ ଚାହେ ଭୋର୍ ପାଇରି ବାରସ୍ ହାଲେହି ଆସ୍ ଏକା ଗୁତ୍ତିୟାରିନ୍ ଚେତ୍ର୍କା ହାଖ୍ଖସ୍, ଆ ଗୁତ୍ତିୟାର୍ ଧଏନ୍ ରାନାଏ। 39ଲେକିନ୍ ଇବନ୍ ବାନେକିରି ବୁଝ୍ରା କା ଯଦି ଆଡ଼୍ପାନ୍ତା। ମାଲିକ୍ସ୍ ଆହସ୍ନେକା ଚୋରାହାସ୍ ଏକା ବାକେନ୍ ବାରସ୍, ତା ଆସ୍ ତାଙ୍ଘା ଆଡ଼୍ପାନ୍ତା କାଥିନ୍ ହଟ୍ଟାଗେ ମା ଚିଦାସ୍ନେ। 40ନିମ୍ହି ତିୟାର୍ ରା; ଏନ୍ଦେର୍ଗେକା ଯେତ୍କବାକେନ୍ ନିମ୍ ମା ସୋଚ୍କାରର୍, ହତ୍କବାକେନ୍ ମୁନୁଷ୍ ହାଦ୍ଦୁସ୍ ବାରସ୍।”
ବିଶ୍ଵାସୀ ଆରୁ ଅବିଶ୍ୱାସୀ ଗୁତ୍ତିୟା
41ଯୀଶୁସ୍କି ଇ କାତ୍ଥାନ୍ ମେନିକିରି ପାତ୍ରାସ୍ ତେଙ୍ଗିୟାସ୍, “ହେ ପ୍ରାଭୁ, ନିମ୍ ଇ ନମୁନାବନ୍ ଏମାଗେ ଖାଲି ତେଙ୍ଗାଲ୍ଦାର୍ କାଁଏ? କା ଜାମାର୍ଘି ଲାଗାନ୍ ତେଙ୍ଗାଲ୍ଦାର୍?” 42ପ୍ରାଭୁସ୍ ଉତ୍ତର୍ ଚିଚ୍ଚାସ୍ “ବିଶ୍ୱାସ୍ କାମ୍ନାଘି ଲାଇଗ୍ ଆରୁ ବୁଦ୍ଧିୟାର୍ ମୁନ୍ସୀ ଏକାସ୍ ରାଦାସ୍, ନେଖା ମାଲିକ୍ସ୍ ଆସିନ୍ ନିଜର୍ ଗୁତ୍ତିୟାର୍ଘି ମାଲିକ୍ କାମସ୍ ଏକାସ୍ କା ଆବ୍ଡ଼ାର୍ଗେ ଠିକ୍ ସାମାୟନୁ ଅନାମହାଗେ ଚିୟସ୍, ଆସ୍ ନେଦ୍ ଏନ୍ ନିମାନ୍ ତେଙ୍ଗନ୍। 43ଯେତ୍କବାକେନ୍ ମାଲିକ୍ସ୍ ବାରସ୍ ହତ୍କବାକେନ୍ତକ୍ ଗୁତ୍ତିୟାସ୍ ମାଲିକ୍ସ୍କି ନାଲ୍ଖୁ କାମ୍ତେ ରସ୍, ତା ଆ ଗୁତ୍ତିୟାସ୍ ଧଏନ୍ ରାଦାସ୍। 44ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍, ଆ ମାଲିକ୍ସ୍ ଏନ୍ନେ ଗୁତ୍ତିୟାସ୍କେ ତାଙ୍ଘା ଜାମା ଧନ୍ସମ୍ପତ୍ତିଘି ମାଲିକ୍ କାମସ୍। 45ଲେକିନ୍ ଯଦି ଆ ଗୁତ୍ତିୟାସ୍ ତାଙ୍ଘା ମନ୍ନୁ ସୋଚ୍ଦାସ୍ ଏଙ୍ଘା ମାଲିକ୍ସ୍ ବାରାଗେ ଡେରି କାମ୍ଦାସ୍, ଆରୁ ଆସ୍ ଦୁସ୍ରା ଗୁତ୍ତିୟାରିନ୍ ମାର୍ଧର୍ କାମ୍ଦାସ୍, ଅନ୍ଦାସ୍ ମହ୍ଁଦାସ୍ ଆରୁ ନିଶା ବାଜି କାମ୍ଦାସ୍। 46ହାଲେ ଏକ୍ଲା ମା ହଖାଲ୍କାରସ୍, ଆରୁ ଏକା ସାମାୟବନ୍ ବାଲ୍ଲକାରସ୍, ହୁ ଉଲ୍ଲା ଆରୁ ହୁ ସାମାୟନୁ ଆସ୍କି ମାଲିକ୍ସ୍ ବାରସ୍, ଆରୁ ଆସ୍କେ ଦଣ୍ଡ୍ ଚିୟସ୍ ଆରୁ ନେଦ୍ ବିଶ୍ଵାସ୍ ମା କାମ୍ନାଏ ଆବ୍ଡ଼ାର୍ ଗାନେ ଆସିନ୍ ଉଇୟସ୍। 47ଏକା ଗୁତ୍ତିୟାସ୍ ତାଙ୍ଘା ମାଲିକ୍ସ୍କି ଇଚ୍ଛାନ୍ ଆହିକିରିହି, ଏନ୍ଦେର୍ହି ତିୟାର୍ ମା କାମ୍ଦାସ୍ ଆରୁ ଆସ୍କି ଇଚ୍ଛା ଲେଖା ନାଲ୍ଖୁ ମା କାମ୍ଦାସ୍, ଆସ୍ ବାଗ୍ଗେ ମାର୍ ହାଖ୍ଖସ୍। 48ଲେକିନ୍ ଏକାସ୍ ମାଲିକ୍ସ୍କି ମାର୍ଜୀ ବାଲ୍ଲିକିରି ନାଲ୍ଖୁ କାମ୍ଦାସ୍ ଆସ୍ ଥୋଡ଼େ ମାର୍ ହାଖ୍ଖସ୍। ନେକାଗେ ବାଗ୍ଗେ ଚିଆ କେର୍କିଚି, ଆସ୍ତି ବାଗ୍ଗେ ହୁଆକୋ; ଆରୁ ନେକାଗେ ବାଗ୍ଗେ ସୋଁପାକେର୍କିଚି, ଆସ୍ତି ବାଗ୍ଗେ ନିଆଁକଦ୍।”
ଯୀଶୁସ୍କି ଚାଲ୍ତେ ଆଲାର୍ ଭାଗ୍ ମାନ୍ନାଏ
49ଯୀଶୁସ୍ ଆରୁହି ତେଙ୍ଗିୟାସ୍, “ଏନ୍ ଦୁନିଆଁନୁ ଚିଚ୍ଚୁ ଲାଗାବାଗେ ବାର୍ଚ୍କାଦାନ୍; ଆରୁ ଏନ୍ ଚାହାଁଲ୍ଦାନ୍ କା ଆ ଚିଚ୍ଚୁଦ୍ ଆକ୍କୁନ୍ ଲାଘ୍ରକଦ୍ନେ! 50ଏଙ୍ଗା ଆସ୍ନାନ୍ ହୁନା ରାଇ, ଆରୁ ଯେତ୍କତକ୍ ଆଦ୍ ପୁରା ମା ମାନଦ୍ ଆତ୍କତକ୍ ଏନ୍ ଦୁଃଖୁନୁ ରନ୍!
51ନିମ୍ ଏନ୍ଦେର୍ ସୋଚାଲ୍ଦାର୍ କା ଏନ୍ ଦୁନିଆଁନୁ ଶାନ୍ତି ହୋଇକିରି ବାର୍ଚ୍କାଦାନ୍? ଏନ୍ ନିମାନ୍ ତେଙ୍ଗାଲ୍ଦାନ୍; ଏନ୍ନେ ମାଲ୍ଲିଦ୍, ଏନ୍ ଝାଗ୍ଡ଼ା କାମ୍ତାଗେ ବାର୍ଚ୍କାଦାନ୍। 52ଏନ୍ଦେର୍ଗେକା ଯଦି ଅଣ୍ଟା ଆଡ଼୍ପାନୁ ପାଞ୍ଚ ଲୋକ୍ ରର୍ ହାଲେ ଆବ୍ଡ଼ାର୍ଘି ଭିତର୍ନୁ ଝାଗ୍ଡ଼ା ମାନଦ୍, ଆରୁ ତିନ୍ ଲୋକ୍ ଦୁଇ ଲୋକ୍ଘି ବିରୁଦ୍ଧ ଆରୁ ଦୁଇ ଲୋକ୍ ତିନ୍ଲୋକ୍ଘି ବିରୁଦ୍ଧ ମାନର୍। 53ବୁଆସ୍ ହାଦ୍ଦୁସ୍କି ବିରୁଦ୍ଧ, ଆରୁ ହାଦ୍ଦୁସ୍ ବୁଆସ୍କି ବିରୁଦ୍ଧ ମାନସ୍; ଆରୁ ଆୟାଙ୍ଗ୍ ତାଙ୍ଘା ହାଦ୍ଦୁଘି ବିରୁଦ୍ଧ ଆରୁ ହାଦ୍ଦୁଦ୍ ତାଙ୍ଘା ଆୟାଙ୍ଗ୍ଘି ବିରୁଦ୍ଧ ମାନଦ୍, ଆରୁ ଶାଶ୍ଘି ବିରୁଦ୍ଧ ବହ ଆରୁ ବହଘି ବିରୁଦ୍ଧ୍ନୁ ଶାଶ୍ ମାନଦ୍।”
ସାମାୟଘି ଚିହ୍ନା
(ମାତିସ୍ ୧୬:୨,୩; ୫:୨୫,୨୬)
54ଆରୁ ଯୀଶୁସ୍ ଭିଡ଼୍ବନ୍ହି ତେଙ୍ଗିୟାସ୍, “ଯଦି ନିମ୍ ପଶ୍ଚିମ୍ ତାର୍ତି ବାଦ୍ଲି ଆର୍ଗ୍ନାନ୍ ଏର୍ଦାର୍ ତା ହୁଙ୍ଗେନିନ୍ ନିମ୍ ତେଙ୍ଗ୍ଦାର୍ ଚେପୁ ବାରଦ୍, ଆରୁ ହନ୍ନେନ୍ ମାନି; 55ଆରୁ ଯେତ୍କବାକେନ୍ ଦକ୍ଷିଣ୍ତାର୍ତି ଧୁକା ବାର୍ନାନ୍ ଏର୍ଦାର୍ ତା ନିମ୍ ତେଙ୍ଗ୍ଦାର୍ ଗରମ୍ ଧୁକା ବାରଦ୍, ଆରୁ ହନ୍ନେନ୍ ମାନି। 56ହେ କପ୍ଟୀଆରୋ, ଯଦି ନିମ୍ ଆକାଶ୍ ଆରୁ ଦୁନିଆଁନ୍ତା ରଙ୍ଗ୍ ଢଙ୍ଗ୍ବନ୍ ଆହା ଅଙ୍ଗ୍ଦାର୍, ଲେକିନ୍ ଇ ସାମାୟଘି ଚିହ୍ନାବନ୍ ଏନ୍ଦେର୍ଗେ ବାଲ୍ଦାରିନ୍?”
57“ଏକାଦ୍ ଠିକ୍ଦ୍ ଆବନ୍ ବୁଝ୍ରାଗେ ଇଦ୍ ନିହ୍ମାସ୍ତି ଏନ୍ଦେର୍ଗେ ମା ମାନିଦ୍? 58ଏନ୍ଦେର୍ଗେକା ଯେତ୍କବାକେନ୍ ନିଙ୍ଘା ବିରୋଧିସ୍ଗାନେ କୋଟ୍ କାଚେରୀଗେ କାଲ୍ଦାର୍ ତା ପାବୁନୁ ଆସ୍ଗାନେ ମାନାବୁଝା କାମାଗେ କୋଶିଷ୍ କାମା, ଏକାସାନ୍ ଏନ୍ନେ ମା ମାନଦ୍ କା ଆସ୍ ବିଚାର୍ କାମୁସ୍କି ଚାହାଗେ ଟାଣସ୍ ହସ୍, ଆରୁ ବିଚାର୍ କାମୁସ୍ ନିଙ୍ଗାନ୍ ସିପାହୀର୍ଘି ହେଖ୍ଖାନୁ ସୋଁପଚସ୍ ଆରୁ ସିପାହୀସ୍ ନିଙ୍ଗାନ୍ ଜେହେଲ୍ନୁ ଗୁଡ଼ଚସ୍। 59ଏନ୍ ନିମାନ୍ ତେଙ୍ଗାଲ୍ଦାନ୍ ଯେତ୍କତକ୍ କାଉଡ଼ି-କାଉଡ଼ି ମା ଛୁଟର୍ ଆତ୍କତକ୍ ଆସ୍ତି ଉର୍ଖା ପଲ୍ଲଦାର୍।”
13ପାସ୍ତାରାଇକିରି ପାର୍ମେଶ୍ଵାର୍ସ୍କି ଚାହାଗେ ବାରା
1ହୁ ସାମାୟନୁ କେତ୍କ ଲୋକ୍ ଆଲାର୍ ଯୀଶୁସ୍କି ଚାହାଗେ ବାରିକିରି, ଗାଲିଲୀ ପ୍ରଦେଶ୍ତା କେତ୍କ ଲୋକ୍ ଆଲାର୍ ପାର୍ମେଶ୍ଵାର୍ସ୍କି ମନ୍ଦିର୍ନୁ ବଲୀ ଚାଢ଼ାବାଲିୟାର୍, ଆଙ୍ଗେନ୍ ପିଲାତୁସ୍ ଆବ୍ଡ଼ାରିନ୍ ପିଟ୍ଟତାଚାସ୍ ଆଦ୍ଘି ବାରେନୁ ଯୀଶୁସିନ୍ ତେଙ୍ଗିୟାର୍। 2ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ନିମ୍ କାଁଏ ସୋଚାଲ୍ଦାର୍ କା ଏକା ଆଲାର୍ କେଚ୍ଚାର୍ କେରାର୍ ଆବ୍ଡ଼ା ଆଲାର୍ ବାକି ଜାମା ଗାଲିଲୀନ୍ତା ଆଲାର୍ସ୍ତି ବାଗ୍ଗେ ପାପୀ ରାଚାର୍ କା ଆବ୍ଡ଼ାର୍ଗେ ଏନ୍ନେ ଦୁଃଖୁ ବାର୍ଚା? 3ଏନ୍ ନିମାନ୍ ତେଙ୍ଗାଲ୍ଦାନ୍ କା ଏନ୍ନେ ମାଲ୍ଲିଦ୍; ଲେକିନ୍ ଯଦି ନିମ୍ ମା ପାସ୍ତାରର୍ ହାଲେ, ନିମ୍ ଜାମାର୍ହି ହନ୍ନେନ୍ ନାଶ୍ ମାନର୍କର୍। 4ସିଲୋହ୍ ସହର୍ନୁ ବାଡ଼୍କା ଆଡ଼୍ପା ଖାତ୍ରା, ଆଙ୍ଗେନ୍ ଅଠର ଲୋକ୍ ଆଲାର୍ କେଚ୍ଚାର୍ କେରାର୍: ଯେରୁଶାଲେମ୍ ସହର୍ନୁ ରାନାବାଲା ଆଲାର୍ସ୍ତି ଏକା ଆଲାର୍ କେଚ୍ଚାର୍ କେରାର୍ ଆବ୍ଡ଼ାର୍ ବାଗ୍ଗେ ଦୋଷୀ ରାଚାର୍, ଏନ୍ନେ ନିମ୍ ସୋଚ୍ଦାର୍ କାଁଏ? 5ଏନ୍ ନିମାନ୍ ତେଙ୍ଗାଲ୍ଦାନ୍ ଏନ୍ନେ ମାଲ୍ଲିଦ୍; ଲେକିନ୍ ଯଦି ନିମ୍ ମା ପାସ୍ତାରର୍ ହାଲେ ନିମ୍ ଜମାର୍ହି ହନ୍ନେନ୍ ନାଶ୍ ମାନର୍କର୍।”
6ଆଙ୍ଗେନ୍ ଯୀଶୁସ୍ ଇ ନମୁନା ଶୁଣାବାଚାସ୍: “ଅଣ୍ଟା ଆଲାସ୍କି ଅଙ୍ଗୁର୍ ବାଟ୍କିନୁ ଅଣ୍ଟା ଡୁମାରି ମାନ୍ନୁ ଇଦ୍ଦକା ରାଚା। ଆସ୍ ଆ ମାନ୍ନୁତା ଫାଡ଼ୁନ୍ ବେଦ୍ଦାଗେ ବାର୍ଚାସ୍, ଲେକିନ୍ ଆସ୍କେ ଅଣ୍ଟାହି ମା ହାଖ୍ଖରା। 7ଆଙ୍ଗେନ୍ ଆସ୍ ଅଙ୍ଗୁର୍ ବାଟ୍କିନ୍ ତା ମାଲିସିନ୍ ତେଙ୍ଗିୟାସ୍, ‘ଏରା, ଏନ୍ ତିନ୍ବଛର୍ତି ଇ ଡୁମାରି ମାନ୍ନୁନ୍ତା ଫାଡ଼ୁ ବେଦ୍ଦା ବାର୍ଦାନ୍, ଲେକିନ୍ ଏଙ୍ଗା ଅଣ୍ଟାହି ମା ହାଖ୍ଖରି ଇବନ୍ ଛପାଚା, ଇଦ୍ ହେଁହ୍ଲାନୁ ଏନ୍ଦେର୍ଗେ ଛେକ୍ଚା ଉଇକିଚି?’ 8ଲେକିନ୍ ମାଲିସ୍ ଆସିନ୍ ଯାବାବ୍ ଚିଚ୍ଚାସ୍, ‘ହେ ମାଲିକ୍, ଇ ବଛର୍ହି ଏନ୍ନେନ୍ ରାଗେ ଚିଆ ଏନ୍ ଇଦ୍ଘି ଚାର୍ହି ପାଖା ଆର୍ହନ୍ ଆରୁ ଖାତୁ ଚିଅନ୍। 9ଯଦି ଇଦ୍ ବାର୍ନା ବଛର୍ ହାଞ୍ଜଦ୍ ହାଲେ ତା ବାନେ, ମାଲ୍ଲାହାଲେ ଇବନ୍ ଛପର୍ ଚିଅର୍’।”
ଯୀଶୁସ୍ ସାଭା ଆଡ଼୍ପାନୁ ଅଣ୍ଟା କୁବ୍ଡ଼ି ଆଲିବନ୍ ବାନେ କାମାଲ୍ଦାସ୍
10ଅହନ୍ ଯୀଶୁସ୍ ପାବିତାର୍ ଉଲ୍ଲାନୁ ଅଣ୍ଟା ସାଭା ଆଡ଼୍ପାନୁ ଉପ୍ଦେଶ୍ ଚିଆଲିୟାସ୍। 11ଆସାନ୍ ଅଣ୍ଟା ଆଲି ରାଚା, ଆ ଆଲିଘିନୁ ଅଠର ବଛର୍ତି ଅଣ୍ଟା ଭୁତ୍ତୁ କର୍ଚ୍କିଚା, ହୁଦ୍ଘିଲାଗାନ୍ ଆ ଆଲିଦ୍ କୁବ୍ଡ଼ି ମାନ୍ଚା କେର୍କିଚା ଆରୁ ଆଦ୍ ଏସ୍କିନ୍ହି ସିଧା ମାନା ପଲ୍ଲାଲିୟା। 12ଯୀଶୁସ୍ ଆ ଆଲିନ୍ ଏରିକିରି ତାଙ୍ଘା ଚାହାଗେ ମେହିଁୟାସ୍ ଆରୁ ଆବନ୍ ତେଙ୍ଗିୟାସ୍, “ଏ ଆଲି, ନିନ୍ ନିଙ୍ଘା କମ୍ଜୋରିତି ଛୁଟ୍କାରା ହାକ୍କିନ୍ କେର୍କିନ୍।” 13ଆରୁ ଯୀଶୁସ୍ ଆଦ୍ଘି ମିଆଁ ହେଖ୍ଖା ଉଇୟାସ୍, ଆଖାନେନ୍ ଆଦ୍ ସିଧା ମାନ୍ଚାକେରା ଆରୁ ପାର୍ମେଶ୍ଵାର୍ସ୍କି ସ୍ତୁତି ମାହିମା କାମାଗେ ଲାଗ୍ଗିୟାଦ୍। 14ଲେକିନ୍ ସାଭା ଆଡ଼୍ପାନ୍ତା ମାଲିକ୍ସ୍ ଖୀସାରାଚାସ୍ କେରାସ୍, ଏନ୍ଦେର୍ଗେକା ଯୀଶୁସ୍ ପାବିତାର୍ ଉଲ୍ଲାନୁ ଆ ଆଲିନ୍ ବାନେ କାମ୍ଚାସ୍, ମାଲିକ୍ସ୍ ଆଲାରିନ୍ ତେଙ୍ଗିୟାସ୍, “ନାଲ୍ଖୁ କାମାଗେ ଛଦିନ୍ ରାଇ, ହୁଦ୍ଘିଲାଗାନ୍ ନିମ୍ ହୁବ୍ଡ଼ା ଉଲ୍ଲାନୁ ବାନେ ମାନାଗେ ବାରା, ପାବିତାର୍ ଉଲ୍ଲାନୁ ମାଲ୍ଲା।” 15ଲେକିନ୍ ପ୍ରାଭୁସ୍ ଆସିନ୍ ଯାବାବ୍ ଚିଚ୍ଚାସ୍, “ହେ କପ୍ଟୀଆରୋ, ନିହ୍ମା ଭିତର୍ନୁ ଜାମାର୍ ପାବିତାର୍ ଉଲ୍ଲାନୁ ନିହ୍ମାଏ ଓୟୁ ଚାହେ ଗାଧାନ୍ ଗସ୍ଲେନ୍ତି କଲ୍ଲିକିରି ଆମ୍ମୁ ହାପ୍ପତାଗେ ମା ହୋଦାର୍ କାଁଏ? 16ଏନ୍ନେ ମାନଦ୍ତା ଆବ୍ରାହାମ୍ସ୍କି ଇ ତାଙ୍ଗ୍ଦାନ୍ ଶାଏତାନ୍ଦ୍ ଅଠର ବଛର୍ତି ହିଁଚାଦ୍ ଉଇକିଚା, ହାଲେ ଇ ଆଲିନ୍ ପାବିତାର୍ ଉଲ୍ଲାନୁ ବନ୍ଧନ୍ତି ଛାଡ଼ାବାନା ଉଚିତ୍ ମାଲ୍ଲା ରୁ କାଁଏ?” 17ଯେତ୍କବାକେନ୍ ଯୀଶୁସ୍ ଇ କାତ୍ଥାନ୍ ତେଙ୍ଗିୟାସ୍, ତାଙ୍ଘା ଜାମା ବିରୋଧି ଆଲାର୍ ଲାଜରାର୍କେରାର୍, ଲେକିନ୍ ଜାମା ଆଲାର୍ ଯୀଶୁସ୍କି ଇ ଅଦ୍ଭୁତ୍ ନାଲ୍ଖୁନ୍ ଏରିକିରି ଖୁସୀ ମାନାବାଗେ ଲାଗ୍ଗିୟାର୍।
ମାନି ମାଞ୍ଜି ଆରୁ ଖାମୀର୍ଘି ନମୁନା
(ମାତିସ୍ ୧୩:୩୧,୩୨; ମାର୍କୁସ୍ ୪:୩୦-୩୨)
18ଯୀଶୁସ୍ ତେଙ୍ଗିୟାସ୍, “ପାର୍ମେଶ୍ଵାର୍ସ୍କି ରାଜୀ ନେଖା ଲେଖା ରାଇଦ୍? ଏନ୍ ଇଦ୍ଘି ତୁଲ୍ନା ନେଖାଗାନେ କାମନ୍? 19ଆଦ୍ ଆ ମାନି ମାଞ୍ଜି ଲେଖା ରାଇଦ୍, ଏକାନ୍ କା ଅଣ୍ଟା ଆଲାସ୍ ହୋଇକିରି ତାଙ୍ଘା ବାଟ୍କିନୁ ଚାହିୟାସ୍: ଆଦ୍ ପାର୍ଦିକିରି ମାନ୍ନୁ ମାନ୍ଚା; ଆରୁ ଆକାଶ୍ ତା ଓଡ଼ାଗୁଠିଦ୍ ତାଙ୍ଘା ଡାହିଁନୁ ଡେରା କାମାଗେ ବାର୍ଚା।”
20ଯୀଶୁସ୍ ଆରୁହି ତେଙ୍ଗିୟାସ୍, “ଏନ୍ ପାର୍ମେଶ୍ଵାର୍ସ୍କି ରାଜୀଘି ତୁଲ୍ନା ଏନ୍ଦେର୍ଗାନେ କାମନ୍? 21ଆଦ୍ ଆ ଖାମୀର୍ ଲେଖା, ଏକାନ୍ କା ଅଣ୍ଟା ଆଲି ହୋଇକିରି ଯୁକ୍କୁ ଆଟାନୁ ମିଲାବାଚା, ଆରୁ ଜାମା ଆଟାଦ୍ ଖାମୀର୍ ମାନ୍ଚାକେରା।”
ମୁକ୍ତି ହାଖ୍ଖାଗେ ମୁରୁକ୍ କଠିନ୍
22ଇଦ୍ଘି ପାଛ୍ଲି ଯୀଶୁସ୍ ସହର୍-ସହର୍, ଆରୁ ପାଡ଼ା-ପାଡ଼ା ଉପ୍ଦେଶ୍ ଚିତେ ଯେରୁଶାଲେମ୍ ସହର୍ ତାରା କାଲିୟାସ୍, 23ନେଦ୍ ଅର୍ତୁ ତାଙ୍ଗାନ୍ ମେନ୍ଚାର୍, “ହେ ପ୍ରାଭୁ, ଥୋଡ଼େ ଆଲାର୍ ଖାଲି ମୁକ୍ତି ହାଖ୍ଖନାଏ କାଁଏ?” ଆଙ୍ଗେନ୍ ଯୀଶୁସ୍ ଆସିନ୍ ତେଙ୍ଗିୟାସ୍, 24“ସାକ୍ଡ଼ି ପାବୁନୁ କରାଗେ ପୁରାପୁରୀ କୋଶିଷ୍ କାମା, ଏନ୍ଦେର୍ଗେକା ଏନ୍ ନିମାନ୍ ତେଙ୍ଗାଲ୍ଦାନ୍ ଢେର୍ ଆଲାର୍ ଆପାବୁନୁ କରାଗେ ବେଦ୍ଦର୍, ଲେକିନ୍ କରା ପଲ୍ଲନାଇନ୍। 25ଯେତ୍କବାକେନ୍ ଆଡ଼୍ପାନ୍ତା ମୁଖ୍ୟାସ୍ ଉସ୍କାରାଇକିରି ବାଲି ମୁଚ୍ଚକାରସ୍, ଆରୁ ନିମ୍ ବାହ୍ରି ଇଲିକିରି ବାଲି ଠକ୍ ଠକ୍ କାମର୍ ଆରୁ ତେଙ୍ଗର୍, ‘ହେ ପ୍ରାଭୁ, ଏହ୍ମାଲାଗାନ୍ ବାଲି ତିସ୍କାଚା,’ ଆଙ୍ଗେନ୍ ଆସ୍ ଯାବାବ୍ ଚିୟସ୍, ‘ଏନ୍ ବାଲ୍ଦାନ୍, କା ନିମ୍ ଏକାସ୍ତି ବାର୍ଚ୍କାଦାର୍?’ 26ଆଙ୍ଗେନ୍ ନିମ୍ ତେଙ୍ଗାଗେ ଲାଗ୍ଗର୍, ‘ଏମ୍ ନିହ୍ମାଗାନେ ଅଣ୍ଡକାମ୍ ମକ୍କାଦାମ୍ ଆରୁ ନିମ୍ ଏହ୍ମା ଗଲିଗୁଠିନୁ ଉପ୍ଦେଶ୍ ଚିଆଲ୍କାର୍।’ 27ଲେକିନ୍ ଆସ୍ ନିମାନ୍ ତେଙ୍ଗସ୍, ‘ଏନ୍ ବାଲ୍ଦାନ୍ କା ନିମ୍ ଏକାସ୍ ତା ଆଲାର୍ ହେ ପାପୀରୋ, ନିମ୍ ଜାମାର୍ ଏଙ୍ଘାସ୍ତି ଗେଚ୍ଛା ବୁଙ୍ଗା।’ 28ଯେତ୍କବାକେନ୍ ନିମ୍ ଆବ୍ରାହାମ୍, ଇସାକ୍, ୟାକୁବ୍ ଆରୁ ଯେତ୍କ ନାବୀରିନ୍ ପାର୍ମେଶ୍ଵାର୍ସ୍କି ରାଜୀନୁ ରାନାନ୍ ଏରର୍, ଲେକିନ୍ ନିମ୍ ନିଜ୍କେ ବାହ୍ରି ହାଖ୍ଖର୍; ହତ୍କବାକେନ୍ ଆସାନ୍ ଅହ୍ଲନା ଆରୁ ପାଲ୍ଲୁ ଚାବ୍ର୍ନା ମାନ; 29ଆରୁ ପୁରୁବ୍ ଆରୁ ପଶ୍ଚିମ୍; ଉତ୍ତର୍ ଆରୁ ଦକ୍ଷିଣ୍ତାର୍ତି ଆଲାର୍ ବାରର୍ ଆରୁ ପାର୍ମେଶ୍ଵାର୍ସ୍କି ରାଜୀନୁ ଭୋଜିନୁ ଅକ୍କର୍। 30ନେକାନ୍ ଇ ଦୁନିଆଁଦ୍ ବାଡ଼୍କା ସୋଚି ଆବ୍ଡ଼ାର୍ଘିନ୍ତି କେତ୍କ ଲୋକ୍ରିନ୍ ବାର୍ନାବାଲା ଯୁଗ୍ନୁ ପାର୍ମେଶ୍ଵାର୍ସ୍ ଛୋଟେ କାମସ୍, ଆରୁ ନେକାନ୍ ଇ ଦୁନିଆଁଦ୍ ଛୋଟେ ସୋଚି ଆବ୍ଡ଼ାର୍ଘିନ୍ତି କେତ୍କ ଲୋକ୍ରିନ୍ ବାର୍ନାବାଲା ଯୁଗ୍ନୁ ପାର୍ମେଶ୍ଵାର୍ସ୍ ବାଡ଼୍କା କାମସ୍।”
31ହତ୍କବାକେନ୍ କେତ୍କ ଲୋକ୍ ଫାରିସୀର୍ ଯୀଶୁସ୍କି ଚାହାଗେ ବାରିକିରି ତାଙ୍ଗାନ୍ ତେଙ୍ଗିୟାର୍, “ଇ ଆଡ୍ଡାନ୍ ଆମ୍ଵିକିରି ବୁଙ୍ଗାକାଲା, ଏନ୍ଦେର୍ଗେକା ହେରୋଦ୍ ରାଜାସ୍ ନିମାନ୍ ପିଟା ବେଦ୍ଦାଲ୍ଦାସ୍।” 32ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “କାଲା ଆରୁ ଆ କପ୍ଟୀସିନ୍ ତେଙ୍ଗା, ‘ଏନ୍ ଇନ୍ନା ଆରୁ ନେଲା ଭୁତ୍ତୁଗୁଠିନ୍ ଅଥରାଲ୍ଦାନ୍ ଆରୁ ବେହ୍ମରିୟାରିନ୍ ବାନେ କାମାଲ୍ଦାନ୍, ଆରୁ ତିସ୍ରା ଉଲ୍ଲା ଏଙ୍ଘା ନାଲ୍ଖୁ ଆଖ୍ରୀ ମାନକୋ।’ 33ଇନ୍ନା ନେଲା ଆରୁ ନେଲ୍ବେଞ୍ଜା ଜୁଟି ଏକ୍ତେ ରାନା ଆତ୍ଲି, ଏନ୍ଦେର୍ଗେକା ଏନ୍ନେ ମାନ୍ନା ପଲ୍ଲିଦ୍ କା ଯେରୁଶାଲେମ୍ଘି ବାହ୍ରି ଏକିନ୍ ନାବୀଜାମାର୍ ଖିଅର୍।”
ଯୀଶୁସ୍ ଯେରୁଶାଲେମ୍ଘି ଲାଗାନ୍ ଦୁଃଖୁ ମାନାଲ୍ଦାସ୍
34ଯୀଶୁସ୍ ଆରୁହି ତେଙ୍ଗିୟାସ୍, “ହେ ଯେରୁଶାଲେମ୍! ହେ ଯେରୁଶାଲେମ୍! ନିନ୍ ନାବୀଜାମାରିନ୍ ପିଟ୍ଟଦିନ୍, ଆରୁ ନିଙ୍ଘା ଚାହାଗେ ତାଏକା ଆଲାରିନ୍ ଚାଁଚାତି ପିଟ୍ଟଦିଚିଦି ଏନ୍ ୟଁଥର୍ ଚାହଁଚ୍କାନ୍ କା ନିଙ୍ଘା ହାଦ୍ଦୁରିନ୍ ଅନ୍ଠାଣ୍ କାମନ୍, ଏସ୍କେ କା ହେରୁଦ୍ ତାଙ୍ଘା ହାଦ୍ଦୁନ୍ ତାଙ୍ଘା ଡେଣା କିୟାଁ ଠୁଡ଼ିଇଦ୍, ଲେକିନ୍ ନିମ୍ ମାନା କାମ୍ଚେଇ ଚିଚ୍କାର୍। 35ଏରା, ନିହ୍ମା ଆଡ଼୍ପାନ୍ ନିହ୍ମା ଲାଗାନ୍ ଉଝ୍ଡ଼ାଚ୍କା ଆମ୍ଵାଚା କାଲି, ଏନ୍ ନିମାନ୍ ତେଙ୍ଗାଲ୍ଦାନ୍: ‘ପ୍ରାଭୁସ୍କି ନାମେତି ନେଦ୍ ବାର୍ନାଏ, ଆର୍ ଧଏନ୍ ରାନାଏ’ ଏକ୍ଲା ଇ କାତ୍ଥାନ୍ ତେଙ୍ଗର୍, ଆ ଉଲ୍ଲା ମା ବାର୍ନାତକ୍ ନିମ୍ ଏଙ୍ଗାନ୍ ଆରୁ ଏକ୍ଲାହି ଏରା ପଲ୍ଲଦାର୍।”
14ଯୀଶୁସ୍ ଅଣ୍ଟା ବେହ୍ମରିୟା ଆଲାସିନ୍ ବାନେ କାମାଲ୍ଦାସ୍
1ଅନ୍ଦୁଲ୍ ପାବିତାର୍ ଉଲ୍ଲାନୁ ଯୀଶୁସ୍ ଅଣ୍ଟା ଫାରିସୀ ଜାମାର୍ଘି ମୁଖିଆସ୍କି ଆଡ଼୍ପା ଅନାଗେ କେରାସ୍; ଆରୁ ଆସ୍ତା ରୁ ଆଲାର୍ ଯୀଶୁସ୍କି ଭୁଲ୍ ଗଲ୍ତି ଅଥ୍ରାଗେ ବେଦ୍ଦାଲିୟାର୍। 2ଆସାନ୍ ଯୀଶୁସ୍କି ଆଘ୍ଲି ଅଣ୍ଟା ଫୁଲାଫୁଲି ବେହ୍ମରିୟାସ୍ ଅକ୍କାଚାସ୍। 3ଯୀଶୁସ୍ ଆସିନ୍ ଏରିକିରି ପଣ୍ଡିତ୍ ଆରୁ ଫାରିସୀ ଜାମାରିନ୍ ମେନ୍ଚାସ୍, “ପାବିତାର୍ ଉଲ୍ଲାନୁ ବାନେ କାମ୍ନାଦ୍ ୟାହୁଦୀ ଜାମାର୍ଘି ନିୟମ୍ଘି ଅନୁସାର୍ ଉଚିତ୍ ରାଇ କାଁଏ?” 4ଆବ୍ଡ଼ାର୍ କାଡ଼େ-କାଡ଼େ ରାଚାର୍। ଆଙ୍ଗେନ୍ ଯୀଶୁସ୍ ଆ ଫୁଲାଫୁଲି ବେହ୍ମରିୟାସ୍କି ହେଖ୍ଖାନ୍ ଧାରିକିରି ଆସିନ୍ ବାନେ କାମ୍ଚାସ୍ ଆରୁ ତାଇଏଚାସ୍, 5ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯଦି ପାବିତାର୍ ଉଲ୍ଲାନୁ ନିହ୍ମା ହାଦ୍ଦୁସ୍ ଚାହେ ଓୟୁଦ୍ ତୁଷାନୁ ଖାତ୍ରଦ୍ ହାଲେ ନିହ୍ମା ଭିତର୍ନୁ ନେଦ୍ ଏନ୍ନେ ରାଦାର୍, ଏକାର୍ କା ଚାଁଣେ ବାହ୍ରି ମା ଅଥ୍ରର୍?” 6ଆରୁ ଆବ୍ଡ଼ାର୍ ଯୀଶୁସିନ୍ ଏନ୍ଦେର୍ହି ଯାବାବ୍ ଚିଆ ପଲ୍ଲିଆରିନ୍।
ନରମ୍ ମନ୍ତି ରା
7ଭୋଜିନୁ ବର୍ନି ହାକ୍କା ଆଲାର୍ ମୁଖ୍ୟା-ମୁଖ୍ୟା ଆଡ୍ଡାଗୁଠିନ୍ ଚାଜ୍ଜନାଏ ଇବନ୍ ଏରିକିରି ଯୀଶୁସ୍ ଅଣ୍ଟା ନମୁନା ଶୁଣାବାଚାସ୍, 8“ଯେତ୍କବାକେନ୍ ନିମ୍ ଏକିନ୍ ଆଲାସ୍କି ଦ୍ୱାର୍ନୁ ବେଞ୍ଜା ଭୋଜିଗେ ବର୍ନି ହାକ୍କାରର୍, ହତ୍କବାକେନ୍ ନିମ୍ ମୁଖ୍ୟା-ମୁଖ୍ୟା ଆଡ୍ଡାନୁ ଆମ୍କେ ଅକ୍କା, ଏନ୍ଦେର୍ଗେକା ନିହ୍ମାସ୍ତିହି ଏକିନ୍ ବାଡ଼୍କା ଆଲାରିନ୍ ଆ ଭୋଜିନୁ ମେହଁକାରସ୍, 9ଆରୁ ଏକାସ୍ ନିଙ୍ଗାନ୍ ଆରୁ ଆସିନ୍ ମେହଁକାରସ୍, ତା ଆସ୍ ବାରସ୍ ଆରୁ ନିଙ୍ଗାନ୍ ତେଙ୍ଗସ୍, ‘ନିଙ୍ଘା ଆଡ୍ଡାନ୍ ଇସ୍କେ ଚିଆଲାଗା,’ ଆରୁ ନିଙ୍ଗାଗେ ଲାଜ୍ଜେତି ଜାମାର୍ଘିନ୍ତି ପାଛ୍ଲି ଆଡ୍ଡାନୁ ଅକ୍କା ଖାତ୍ରୋ। 10ଲେକିନ୍ ନିଙ୍ଗାନ୍ ମେହ୍କୁନ୍ ଜାମାର୍ଘିନ୍ତି ପାଛ୍ଲି ଆଡ୍ଡାନୁ ଅକ୍କୟ, ତା ନିଙ୍ଗାନ୍ ମେହୁଁ ଆଲାସ୍ ବାରସ୍, ଆରୁ ତେଙ୍ଗସ୍, ‘ବନ୍ଧୁ, ଆଘ୍ଲିତାରା ଅକ୍କା,’ ଏନ୍ନେନ୍ ଜାମା ପାହିୟାର୍ଘି ଆଘ୍ଲି ନିଙ୍ଘାଏ ଇଜ୍ଜତ୍ ମାନଦ୍। 11ଏନ୍ଦେର୍ଗେକା ଏକାର୍ ନିଜ୍କେନିଜ୍ ବାଡ଼୍କା ସୋଚ୍ନାଏ, ଆରିନ୍ ଛୋଟେ କାମାକଦ୍; ଆରୁ ନେଦ୍ ନିଜ୍କେନିଜ୍ ଛୋଟେ ସୋଚ୍ନାଏ, ଆବ୍ଡ଼ାରିନ୍ ବାଡ଼୍କା କାମାକଦ୍।”
12ଆନ୍ତିନ୍ ଯୀଶୁସ୍ ପାହି ମେହୁଁ ଆଲାସିନ୍ହି ତେଙ୍ଗିୟାସ୍, “ଯେତ୍କବାକେନ୍ ନିନ୍ ଉଲ୍ଲା ଚାହେ ମାଁହା ଭୋଜି ଚିଅୟ, ତା ନିନ୍ ନିଜର୍ ବନ୍ଧୁରିନ୍, ନିଙ୍ଘାଏ ଭାଇଜାମାରିନ୍, ନିଙ୍ଘା ଜାତି ବନ୍ଧୁରିନ୍ ଆରୁ ଧନୀ ପାଡ଼ୋଶୀରିନ୍ ଆମ୍କେ ମେହାଁ, ଏକାସାନ୍ ଏନ୍ନେ ମା ମାନଦ୍ କା ଆବ୍ଡ଼ାର୍ହି ନିଙ୍ଗାନ୍ ମେହଁର୍, ଆରୁ ଆଦ୍ଘି ବାଦ୍ଲା ଚୁକାବର୍। 13ଲେକିନ୍ ନିନ୍ ଯେତ୍କବାକେନ୍ ଭୋଜି ଚିଅୟ ତା ଗରୀବ୍, ଲୁହ୍ଲାରିନ୍, ଲେଙ୍ଗ୍ଡ଼ାରିନ୍ ଆରୁ କାଁଣାରିନ୍ ମେହାଁ। 14ହାଲେ ନିନ୍ ଧଏନ୍ ମାନୟ, ଏନ୍ଦେର୍ଗେକା ବାଦ୍ଲା କିର୍ତାଗେ ଆବ୍ଡ଼ାର୍ସାନ୍ ଏନ୍ଦେର୍ହି ମାଲ୍ଲାଦିନ୍, ଏନ୍ଦେର୍ଗେକା ଧାର୍ମିକ୍ ଆଲାର୍ଘି ଉଜ୍ଜ୍ନା ସାମାୟନୁ ନିଙ୍ଘା ବାଦ୍ଲା କିର୍ତାକୋ।”
ବାଡ଼୍କା ଭୋଜିଘି ନମୁନା
15ଇବନ୍ ମେନିକିରି ସାଙ୍ଗେନ୍ ଅନାଗେ ଅକ୍କୁ ଆଲାର୍ଘି ଭିତର୍ନୁ ଅର୍ତୁସ୍ ଯୀଶୁସିନ୍ ତେଙ୍ଗିୟାସ୍, “ଆ ଆଲାସ୍ ଧଏନ୍ସ୍ ଏକାସ୍ କା ପାର୍ମେଶ୍ଵାର୍ସ୍କି ରାଜୀନୁ ଭୋଜିନୁ ଅକ୍କସ୍।” 16ଯୀଶୁସ୍ ଆସିନ୍ ତେଙ୍ଗିୟାସ୍, “ଅନ୍ଦୁଲ୍ ଅଣ୍ଟା ଆଲାସ୍ ବାଡ଼୍କା ଭୋଜି ଚିୟାଗେ ଯୋଗାଡ଼୍ କାମ୍ଚାସ୍ ଆରୁ ଢେର୍ ଆଲାରିନ୍ ମେହିଁୟାସ୍। 17ଅନ୍ନା ସାମାୟନୁ ଆସ୍ ତାଙ୍ଘା ଗୁତ୍ତିୟାସିନ୍ ପାହି ମେହୁଁ ଆଲାର୍ସାନ୍ ଏନ୍ନେ ତେଙ୍ଗିୟାସ୍ ଆରୁ ତାଇୟାସ୍, ‘କା ବାରା, ଆକ୍କୁନ୍ ଜାମାକିଛି ତିୟାର୍ ମାନ୍ଚାକେର୍କିଚି।’ 18ଲେକିନ୍ ଆବ୍ଡ଼ାର୍ଜାମାର୍ ବାହ୍ନା କାମା ଲାଗ୍ଗିୟାର୍, ପହିଲ୍ ଆଲାସ୍ ତେଙ୍ଗିୟାସ୍, ‘ଏନ୍ ହାଲ୍ଲୁ ହେନ୍ଦକାଦାନ୍, ଆରୁ ଏଙ୍ଗାଗେ ଆବନ୍ ଏରା କାନାରାଇ; ନିଙ୍ଗାନ୍ ଏନ୍ ଆର୍ଜୀବିନ୍ତି କାମାଲ୍ଦାନ୍, କା ଏଙ୍ଗାନ୍ ଛେମା କାମାଚା।’ 19ଦୁସ୍ରାର୍ ତେଙ୍ଗିୟାସ୍, ‘ଏନ୍ ପାଞ୍ଚ୍ ଯୋଡ଼ା ଓୟୁ ହେନ୍ଦକାଦାନ୍, ଆରୁ ଆବନ୍ ଦାମାଗେ କାଲ୍ଦାନ୍; ଏନ୍ ନିଙ୍ଗାନ୍ ଆର୍ଜୀବିନ୍ତି କାମାଲ୍ଦାନ୍ କା ଏଙ୍ଗାନ୍ ଛେମା କାମାଚା।’ 20ଆରୁ, ଆରୁ ଅଣ୍ଟାସ୍ ତେଙ୍ଗିୟାସ୍, ‘ଏନ୍ ଆକ୍କୁନ୍ ଆକ୍କୁନ୍ ବେଞ୍ଜର୍କାଦାନ୍, ହୁଦ୍ଘିଲାଗାନ୍ ଏନ୍ କାଲା ପଲ୍ଲଦାନ୍।’ 21ଗୁତ୍ତିୟାସ୍ କିର୍ରିକିରି ଇବ୍ଡ଼ା ଜାମା କାତ୍ଥାଗୁଠିନ୍ ତାଙ୍ଘା ମାଲିକ୍ସିନ୍ ତେଙ୍ଗିୟାସ୍। ଆଙ୍ଗେନ୍ ଆଡ଼୍ପାନ୍ତା ମାଲିକ୍ସ୍ ଖୀସାରାଇକିରି ତାଙ୍ଘା ଗୁତ୍ତିୟାସିନ୍ ତେଙ୍ଗିୟାସ୍, ‘ଚାଁଣେ ସହର୍ତା ହାଟ୍ଟେଗୁଠିନୁ ଆରୁ ଗଲିନୁ କାଇକିରି ଗରୀବ୍ରିନ୍, ଲୁହ୍ଲାରିନ୍, ଲେଙ୍ଗ୍ଡ଼ାରିନ୍ ଆରୁ କାଁଣାରିନ୍ ଇସାନ୍ ମେହାଁଅନ୍ଦ୍ରା।’ 22ଗୁତ୍ତିୟାସ୍ ମାଲିକ୍ସିନ୍ ତେଙ୍ଗିୟାସ୍, ‘ହେ ପ୍ରାଭୁ, ନିହ୍ମା ହୁକୁମ୍ ଅନୁସାର୍, ଆବ୍ଡ଼ା ଜାମାରିନ୍ ମେହଁକାନ୍; ହାଲେହି ଆରୁ ଆଡ୍ଡା ବାଛ୍ରା କେର୍କିଚି।’ 23ଆଙ୍ଗେନ୍ ମାଲିକ୍ସ୍ ଗୁତ୍ତିୟାସିନ୍ ତେଙ୍ଗିୟାସ୍, ‘ସଡ଼କ୍ ଗୁଠିନ୍ତି ଆରୁ ପାଡ଼ାନୁ କାଇକିରି ଆଲାରିନ୍ ଉଲା ବାରାଗେ ଯବର୍ଜସ୍ତି କାମା ଏସ୍କେ କା ଏଙ୍ଘା ଆଡ଼୍ପା ନିନ୍ଦ୍କୋ। 24ଏନ୍ଦେର୍ଗେକା ଏନ୍ ନିମାନ୍ ତେଙ୍ଗାଲ୍ଦାନ୍ କା ଆ ପାହି ମେହ୍କା ଆଲାର୍ଘି ଭିତର୍ନୁ ନେଦ୍ହି ଏଙ୍ଘା ଭୋଜିଘି ଏମ୍ବା ଚାଖା ପଲ୍ଲନାଏ’।”
ଯୀଶୁସ୍କି ଚେଲା ନେଦ୍ ମାନାଅଙ୍ଗର୍
(ମାତିସ୍ ୧୦:୩୭,୩୮; ୫:୧୩; ମାର୍କୁସ୍ ୯:୫୦)
25ଯୀଶୁସ୍କି ସାଙ୍ଗେନ୍, ଆଲାର୍ଘି ଅଣ୍ଟା ବାଡ଼କା ଭିଡ଼୍ କାଲିୟା, ଆସ୍ କିର୍ରେ ଏରିକିରି ଆବ୍ଡ଼ା ଆଲାରିନ୍ ତେଙ୍ଗିୟାସ୍, 26“ଯଦି ନେଦିନ୍ ଏଙ୍ଘା ଚେଲା ମାନାଗେ ବେଦ୍ଦନାଏ ତା, ଆବ୍ଡ଼ାର୍ ନିଜର୍ ଆୟାଙ୍ଗ୍-ବାଙ୍ଗ୍, ମାଏକିନିଆଁ, ହାଦ୍ଦୁବଚ୍ଚ, ଭାଇ-ବୁହୁଣୀ ଆବ୍ଡ଼ାର୍ସ୍ତି ଏଙ୍ଗାନ୍ ବାଗ୍ଗେ ବାନେ ହାଖ୍ଖନା କାତ୍ଥା। ଆରୁ ନିଜର୍ ଜୀବନ୍ତିହି ଏଙ୍ଗାନ୍ ବାଗ୍ଗେ ବାନେ ହାଖ୍ଖନା କାତ୍ଥା। ଏନ୍ନେ ମା କାମର୍ ତା, ଆବ୍ଡ଼ାର୍ ଏଙ୍ଘା ଚେଲା ମାନା ପଲ୍ଲନାଏ; 27ନେଦ୍ ନିଜର୍ କ୍ରୁଶ୍ ଚେଡ଼ିକିରି ଦୁଃଖୁ ସାହିକିରି, ଏଙ୍ଘା ପାଛ୍ଲି ମା କାନାଏ, ଆର୍ ଏଙ୍ଘା ଚେଲା ମାନା ପଲ୍ଲନାଏ।”
28“ମନେ କାମା କା ନିହ୍ମା ଭିତର୍ନୁ ଅଣ୍ଟା ଆଲାସ୍ ଆଡ଼୍ପା କାମାଗେ ବେଦ୍ଦଦାସ୍ ଆରୁ ପହେଲା ଅକ୍କିକିରି ଖାର୍ଚ୍ଚାବାର୍ଚାଘି ହିସାବ୍ କିତାବ୍ ମା କାମସ୍ ଆରୁ ଇବନ୍ ମା ଏରସ୍କା ଆଡ଼୍ପାନ୍ ପୁରା କାମାଗେ ତାଙ୍ଘାସାନ୍ ପୁଞ୍ଜି ରାଇ କା ମାଲ୍ଲା? 29ଏକାସାନ୍ ଏନ୍ନେ ମା ମାନ୍ନାଦ୍ କା ଯେତ୍କବାକେନ୍ ନାହିଗାଡ୍ଡି ଆର୍ହିକିରି ଆବନ୍ ତିୟାର୍ କାମା ପଲ୍ଲଦାସ୍, ତା ଜାମା ଏରୁ ଆଲାର୍ ଆସ୍କି ମାଜାକ୍ ଉଡ଼ାବର୍ ଆରୁ ତେଙ୍ଗର୍, 30‘ଇ ଆଲାସ୍ ଆଡ଼୍ପା କାମାଗେତା ସୁରୁ କାମ୍ଚାସ୍ ଲେକିନ୍ ମୁଞ୍ଜା ପଲ୍ଲିୟାସ୍?’”
31“ଅଣ୍ଟା ରାଜାସ୍ ଦୁସ୍ରା ରାଜାସ୍ଗାନେ ଲାଡ଼ାଇ କାମାଗେ କାନାଘି ଆଘ୍ଲି, ଏନ୍ନେ ବିଚାର୍ କାମସ୍କା ନେଦ୍ ଏଙ୍ଘାଗାନେ ଲାଡ଼ାଇ କାମାଗେ ବାର୍ନାବାଲାସାନ୍ କୁଡ଼ିଏ ହାଜାର୍ ପଲ୍ଟନ୍ ରର୍ତା, ତାଙ୍ଘା ସାମ୍ନାନୁ ଦଶ୍ହାଜାର୍ ପଲ୍ଟନ୍ଜାମାର୍ଗାନେ କସ୍ ତା ଜିତା ଅଙ୍ଗସ୍କା ପଲ୍ଲସ୍? 32ଯଦି ଆସ୍ ସାମ୍ନା କାମା ପଲ୍ଲଦାସ୍ ତା ଯେତ୍କବାକେନ୍ ଦୁସ୍ରା ରାଜାସ୍ ଗେଚ୍ଛାନୁନ୍ ରସ୍ ଆସ୍ ଖବର୍ ଚିଉସିନ୍ ତାଇକିରି ମେଲ୍ମିଲାପ୍ କାମାଗେ ଆର୍ଜୀ କାମସ୍। 33ଏନ୍ନେନ୍ ନିହ୍ମା ଭିତର୍ନୁ ନେଦିନ୍ ନିଜର୍ ଜାମାନ୍ ମା ଆମ୍ବର୍, ଆବ୍ଡ଼ାର୍ ଏଙ୍ଘା ଚେଲା ମାନା ପଲ୍ଲଦାର୍।”
34“ବେକୁଦ୍ ବାନେ ଜିନିଷ୍, ଲେକିନ୍ ଯଦି ବେକୁଘି ଏମ୍ବାଦ୍ ବାଗ୍ଡ଼ାରକୋ ହାଲେ, ଆବନ୍ ଆରୁ ଏନ୍ଦେର୍ ଜିନିଷ୍ତି ଏମ୍ବା କାମାକୋ। 35ନା ତା ଆଦ୍ ହାଲ୍ଲୁଘି ଲାଗାନ୍ ନା ତା ଖାତୁଘି ଲାଗାନ୍ ନାଲ୍ଖୁନୁ ବାରା ଅଙ୍ଗ: ଆଲାର୍ ଆବନ୍ ବାହ୍ରି ଖେବ୍ଡ଼୍ନାଏ ଚିନାଏ। ନେଖାଏ ମେନ୍ନାଘି ମନ୍ ରାଇ ଆବ୍ଡ଼ାର୍ ମେନା।”
15ଏଫ୍ସ୍ର୍କା କେର୍କା ଭେଡ଼ିଘି ନମୁନା
1ଯୀଶୁସ୍କି ଉପ୍ଦେଶ୍ ମେନାଗେ ମାଲ୍ଗୁଜାରୀ ଉକ୍ରୁ ଆଲାର୍ ଆରୁ ପାପୀ ଆଲାର୍ହି ତାଙ୍ଘା ଚାହାଗେ ବାରାଲିୟାର୍। 2ଲେକିନ୍ ଫାରିସୀ ଆରୁ ପଣ୍ତିତ୍ଜାମାର୍ ତାହ୍ମା ମାଝାନୁ କୁର୍ବୁର୍ରାଲିୟାର୍, କା “ଇ ଆଲାସ୍ ପାପୀ ଆଲାରିନ୍ ଗ୍ରହନ୍ କାମ୍ଦାସ୍ ଆରୁ ଆବ୍ଡ଼ାର୍ ଗାନେ ଅନ୍ଦାସ୍ ମହଁଦାସ୍।” 3ଆଙ୍ଗେନ୍ ଯୀଶୁସ୍ ଅଣ୍ଟା ନମୁନା ଶୁଣାବାଚାସ୍: 4“ମନେ କାମା କା ନିହ୍ମା ଭିତର୍ନୁ ଅଣ୍ଟା ଆଲାସ୍କି ଶୋଏଟା ଭେଡ଼ି ରଦ୍ନେ ଆରୁ ଆଦ୍ଘି ଭିତର୍ନୁ ଅଣ୍ଟା ଭେଡ଼ି ଏଫ୍ସ୍ରି କାଇ ତା ଆ ଆଲାସ୍ ତାଙ୍ଘା ଅନେଶ୍ଵତ୍ ଭେଡ଼ିନ୍ ହାର୍ବୁନୁ ଆମ୍ଵିକିରି ଆ ଏଫ୍ସ୍ର୍କା ଭେଡ଼ିନ୍ ଯେତ୍କତକ୍ ମା ହାଖ୍ଖରିଦ୍ ଆତ୍କତକ୍ ମା ବେଦ୍ଦସ୍ କାଁଏ? 5ଭେଡ଼ିଦ୍ ହାଖ୍ଖର୍କୁନ୍ କେର୍କୁନ୍, ମୁରୁକ୍ ଲୀଝ୍ର୍ଦାସ୍ ଆରୁ ତାଙ୍ଘା ହେଁସେର୍ନୁ ଚେଡ଼ିକିରି ଅନ୍ଦ୍ରାସ୍;6ଆରୁ ଆଡ଼୍ପା ବାରିକିରି ତାଙ୍ଘା ପାଡ଼ୋଶୀ ଆରୁ ସାଙ୍ଗେରିନ୍ ମେହିଁକିରି ଆବ୍ଡ଼ାରିନ୍ ତେଙ୍ଗସ୍, ‘ଏଙ୍ଘାଗାନେ ଖୁସୀମାନାବା, ଏନ୍ଦେର୍ଗେକା ଏନ୍ ଏଙ୍ଘା ଏଫ୍ସ୍ର୍କା ଭେଡ଼ିନ୍ ହାକ୍କାନ୍ କେର୍କାନ୍।’ 7ଆନ୍ତିନ୍ ଯୀଶୁସ୍ ତେଙ୍ଗିୟାସ୍ ଏନ୍ ନିମାନ୍ ତେଙ୍ଗାଲ୍ଦାନ୍ ହନ୍ନେନ୍ ଏକାର୍ଗେ ପାସ୍ତାରାନାଘି ଦାର୍କାର୍ ମାଲ୍ଲା, ଏନ୍ନେ ସୋଚୁ ଅନେଶ୍ଵତ୍ ଧାର୍ମିକ୍ ଆଲାର୍ଘିନ୍ତି ନେଦ୍ ପାସ୍ତାରାନାଏ, ଏନ୍ନେ ଅଣ୍ଟା ପାପୀ ଆଲାସ୍କି ଲାଗାନ୍ ସରଗ୍ନୁ ବାଗ୍ଗେ ଖୁସୀମାନାବା କୋଦ୍।”
ଏଫ୍ସ୍ର୍କା କେର୍କା ପାଏସାଘି ନମୁନା
8ଇଦ୍ଘି ପାଛ୍ଲି ଯୀଶୁସ୍ ଆରୁ ଅଣ୍ଟା ନମୁନା ତେଙ୍ଗିୟାସ୍, “ମନେ କାମା କା ଅଣ୍ଟା ଆଲିସାନ୍ ଦଶେଟା ରୂପା ପାଏସା୧୫:୮ ଅଣ୍ଟା ରୁପା ପାଏସାଦ୍ ଅଣ୍ଟା ଆଲାସ୍କି ଅନ୍ଦୁଲ୍ ତା ମଜ୍ରୀଦ୍ ରାଚା, ଆରୁ ହୁନ୍ନୁନ୍ତି ଅଣ୍ଟା ଏଫ୍ସ୍ରି କାଇ, ତା ଆଦ୍ ଏନ୍ଦେର୍ କାମଦ୍? ଆଦ୍ ବିଲ୍ଲୀ ଦାଗିକିରି ମା ହାଖ୍ଖନା ଜୁଟି, ବାନେକିରି ଆଡ଼୍ପାଘି ଜାମାତାରା ହେତ୍ତା-ହେତ୍ତା ମା ବେଦ୍ଦଦ୍ କାଁଏ? 9ଆ ରୂପା ପାଏସା ହାକ୍କାନ୍ତି, ଆଦ୍ ତାଙ୍ଘା ସାଙ୍ଗେ ଜାମାରିନ୍ ଆରୁ ପାଡ଼ୋଶୀ ଜାମାରିନ୍ ଠୁଡ଼ିଇକିରି ତେଙ୍ଗଦ୍, ‘ଏଙ୍ଘାଗାନେ ଖୁସୀମାନାବା, ଏନ୍ଦେର୍ଗେକା ଏନ୍ ଏକା ରୂପା ପାଏସାନ୍ ଏଫ୍ସେଇ ଚିଚ୍କିନ୍ଚାନ୍ ଆବନ୍ ହାଖ୍ଖୀୟାନ୍ କେରାନ୍।’ 10ଏନ୍ ନିମାନ୍ ତେଙ୍ଗାଲ୍ଦାନ୍ ହନ୍ନେନ୍ ଅଣ୍ଟା ପାସ୍ତାରୁ ପାପୀ ଆଲାସ୍କି ଲାଗାନ୍ ପାର୍ମେଶ୍ଵାର୍ସ୍କି ଦୂଁତ୍ଜାମାର୍ଘି ଆଘ୍ଲି ଖୁସୀ ମାନାବର୍।”
ଭାଟ୍କାରାଚ୍କା କେର୍କା ହାଦ୍ଦୁସ୍କି ନମୁନା
11ଇ ନମୁନା ତେଙ୍କା ପାଛ୍ଲି ଯୀଶୁସ୍ ଆଲାରିନ୍ ଆରୁ ଅଣ୍ଟା ନମୁନା ଶୁଣାବାଚାସ୍, “ଅଣ୍ଟା ଆଲାସ୍କି ଯୋଡ଼େ ହାଦ୍ଦୁ ରାଚାର୍। 12ଅନ୍ଦୁଲ୍ ଛୋଟେ ହାଦ୍ଦୁସ୍ ତାମ୍ବାସ୍ସାନ୍ ବାରିକିରି ତେଙ୍ଗିୟାସ୍, ‘ବୁଆ ଏଙ୍ଘା ଭାଗୁ ସମ୍ପତ୍ତିବନ୍ ଏଙ୍ଗାଗେ ଚିଆଲାଗା।’ ଆଙ୍ଗେନ୍ ତାମ୍ବାସ୍ ତାଙ୍ଘା ସମ୍ପତ୍ତିବନ୍ ଦୁହି ଭାଇର୍ଗେ ହାଟ୍ଟେଇଚାସ୍। 13ଆନ୍ତିନ୍ ଥୋଡ଼େ ଉଲ୍ଲାଘି ପାଛ୍ଲି ଛୋଟେ ହାଦ୍ଦୁସ୍ ତାଙ୍ଘା ଭାଗୁ ସମ୍ପତ୍ତିବନ୍ ଠୁଡ଼ିଇକିରି ପର୍ଦେଶ୍ ବୁଙ୍ଗିୟାସ୍ କେରାସ୍, ଆରୁ ଆସାନ୍ ତାଙ୍ଘା ସମ୍ପତ୍ତିନ୍ ଖାରାପ୍ ନାଲ୍ଖୁନୁ ମୁଞ୍ଜେଇଚାସ୍। 14ଲେକିନ୍ ତାଙ୍ଘା ସମ୍ପତ୍ତିଦ୍ ମୁଞ୍ଜରାକେରା, ହତ୍କବାକେନ୍ ହୁ ଦେଶ୍ନୁ ଅଣ୍ଟା ବାଡ଼୍କା ଆକାଲ୍ ମାଞ୍ଚା, ଆରୁ ଆସ୍ ଅଭାବ୍ନୁ ଖାତ୍ରାସ୍। 15ଆଙ୍ଗେନ୍ ଆସ୍ ହୁ ଦେଶ୍ତା ଅଣ୍ଟା ଆଲାସ୍କି ଗୁତ୍ତିୟା ମାନ୍ଚାସ୍କେରାସ୍। ଆରୁ କିସ୍ସୁଗୁଠିନ୍ ହାପାଗେ ଆସ୍ ତାଙ୍ଘା ହାଲ୍ଲୁଗେ ତାଇୟାସ୍। 16ଲେକିନ୍ ତାଙ୍ଘା ମାଲିକ୍ସ୍ ତାଙ୍ଗାଗେ ବାନେ ଅନାମହାଗେ ମା ଚିଆଲିୟାସ୍, ଆରୁ ଆସ୍ କିଡ଼ା ଖିଆଲିୟାସ୍। ହୁଦ୍ଘିଲାଗାନ୍ ଆସ୍ କିସ୍ସୁଗେ ଚିନା ଉଙ୍କୁନ୍ହି ମହାଁଗେ ବେଦ୍ଦାଲିୟାସ୍; ଲେକିନ୍ ଆଦ୍ହି ତାଙ୍ଗାଗେ ମା ହାଖ୍ଖରାଲିୟାଦ୍। 17ଆଙ୍ଗେନ୍ ଆସ୍କେ ହୋସ୍ କର୍ଚା ଆରୁ ଆସ୍ ତେଙ୍ଗିୟାସ୍ କା ତାମ୍ବାସ୍କି ଆଡ଼୍ପାନୁ ନାଲ୍ଖୁ କାମୁ ଗୁତ୍ତିୟାର୍ କୁଲୁଭର୍ ଅନାଗେ ହାଖ୍ଖାଲ୍କାରର୍ ଆରୁ ଏନ୍ ଇସାନ୍ କିଡ଼ା ଖିଆଲ୍ଦାନ୍। 18ଆସ୍ ସୋଚ୍ଚାସ୍ ଏନ୍ ଏମ୍ବାସ୍କି ଚାହାଗେ କିର୍ରନ୍କନ୍ ଆରୁ ତାଙ୍ଗାନ୍ ତେଙ୍ଗନ୍, ‘ବୁଆ ଏନ୍ ପାର୍ମେଶ୍ଵାର୍ସ୍କି ଆରୁ ନିହ୍ମା ବିରୁଦ୍ଧ୍ନୁ ପାପ୍ କାମଚ୍କାଦାନ୍। 19ଏନ୍ ନିହ୍ମା ହାଦ୍ଦୁ ବୁଲି ତେଙ୍ଗ୍ନାଘିହି ଲାଇଗ୍ ମାଲ୍କାନିନ୍। ଏଙ୍ଗାନ୍ ଦାୟା କାମିକିରି ନିହ୍ମା ଅଣ୍ଟା ଗୁତ୍ତିୟାର୍ ଲେଖା ଉଇୟା।’ 20ଆଙ୍ଗେନ୍ ଆସ୍ ଉସ୍କାରାଇକିରି, ହୁଙ୍ଗେନିନ୍ ତାମ୍ବାସ୍କି ଚାହାଗେ କିର୍ରିୟାସ୍: ଲେକିନ୍ ତାମ୍ବାସ୍ ତାଙ୍ଗ୍ଦାସ୍କି ବାର୍ନାନ୍ ଗେଚ୍ଛାନ୍ତି ଏରିୟାସ୍ ଆରୁ ଦାୟାତି ପିଘ୍ଲାରାଇକିରି, କୁଦିଆରାନାତି କେରାସ୍ ଆରୁ ତାଙ୍ଗ୍ଦାସ୍ସିନ୍ ହୋଇଚିକିରି, ଚୋଙ୍ଖିଆସ୍। 21ତାଙ୍ଗ୍ଦାସ୍ ତାମ୍ଵାସିନ୍ ତେଙ୍ଗିୟାସ୍, ‘ବୁଆ, ଏନ୍ ପାର୍ମେଶ୍ଵାର୍ସ୍କି ଆରୁ ନିହ୍ମା ବିରୁଦ୍ଧ୍ ପାପ୍ କାମ୍ଚ୍କାଦାନ୍; ଏନ୍ ନିହ୍ମା ହାଦ୍ଦୁ ବୁଲି ତେଙ୍ଗ୍ର୍ନାଘି ଲାଇଗ୍ ମାଲ୍କାନିନ୍।’ 22ଲେକିନ୍ ତାମ୍ବାସ୍ ତାଙ୍ଘା ଗୁତ୍ତିୟାରିନ୍ ତେଙ୍ଗିୟାସ୍, ‘ଏଙ୍ଘା ହାଦ୍ଦୁସ୍କେ ଚାଁଣେ ପୁନା ଚିଢ଼ା ଅନ୍ଦ୍ରା ଆରୁ ଆତ୍ତତା, ଆରୁ ତାଙ୍ଘା ହେଖ୍ଖାଘି ଆଙ୍ଗ୍ଠିନୁ ମୁଦ୍ଦି ଆତ୍ତତା, ଆରୁ ହେଡ୍ଡୁନୁ ଜୁତା ଆତ୍ତତା। 23ଆରୁ ଅଣ୍ଟା ବାଡ଼୍କା ଭେଡ଼ିହାଦ୍ଦୁ ପିଟା, ବାରା ନାମ୍ ଅନତ୍ ମହତ୍ ଆରୁ ଖୁସୀ ମାନାବତ୍। 24ଏନ୍ଦେର୍ଗେକା ଏଙ୍ଘା ଇ ହାଦ୍ଦୁସ୍ କେଚ୍ଚାସ୍ କେର୍କାଚାସ୍, ଆରୁଅହନ୍ ଉଜ୍ଜିୟାସ୍ କେର୍କାଦାସ୍: ଏଫ୍ସ୍ରାସ୍ କେର୍କାଚାସ୍, ଆରୁ ଆକ୍କୁନ୍ ହାଖ୍ଖରାସ୍ କେର୍କାଦାସ୍।’ ହୁଦ୍ଘିଲାଗାନ୍ ଆବ୍ଡ଼ାର୍ ଖୁସୀ ମାନାବାଗେ ଲାଗ୍ଗିୟାର୍।”
25“ହୁ ସାମାୟନୁ ତାଙ୍ଘା ବାଡ଼୍କା ହାଦ୍ଦୁସ୍ ହାଲ୍ଲୁନୁ ରାଚାସ୍। ଯେତ୍କବାକେନ୍ ଆସ୍ ଆଡ଼୍ପା ଚାହା ଆଣସାଲିୟାସ୍ ହତ୍କବାକେନ୍, ବାଜା, ନାଲ୍ନା ଆରୁ ଗୀତୁ ପାଡ଼୍ନାଘି ଶବଦ୍ ମେନ୍ଚାସ୍। 26ଆଙ୍ଗେନ୍ ଗୁତ୍ତିୟାର୍ଘି ଭିତର୍ନୁ ଅର୍ତୁସିନ୍ ଚାହାଗେ ମେହିଁକିରି, ‘ଏନ୍ଦେର୍ ମାନାଲି ବୁଲି ମେନ୍ଚାସ୍?’ 27ଆ ଗୁତ୍ତିୟାସ୍ ଯାବାବ୍ ଚିଚ୍ଚାସ୍, ‘ନିଙ୍ଗଡ଼ିସ୍ ଭାଲା ଚାଙ୍ଗା କିର୍ରିୟାସ୍ ବାର୍ଚ୍କାଦାସ୍, ହୁଦ୍ଘିଲାଗାନ୍ ନିହ୍ମା ବୁଆସ୍ ଅଣ୍ଟା ବାଡ଼୍କା ଭେଡ଼ିହାଦ୍ଦୁ ପିଟ୍ଟତାଚ୍କାଦାସ୍।’ 28ଇବନ୍ ମେନିକିରି ବାଡ଼୍କା ହାଦ୍ଦୁସ୍ ମୁରୁକ୍ ଖୀସାରାଚାସ୍ କେରାସ୍ ଆରୁ ଆଡ଼୍ପା ଉଲା କରା ମା ବେଦ୍ଦିୟାସ୍, ଆଙ୍ଗେନ୍ ତାମ୍ବାସ୍ ବାହ୍ରି ଉର୍ଖିକିରି ତାଙ୍ଗାନ୍ ବୁଝାବାଗେ ଲାଗ୍ଗିୟାସ୍। 29ଲେକିନ୍ ଆସ୍ ତାମ୍ବାସିନ୍ ଯାବାବ୍ ଚିଚ୍ଚାସ୍, ‘ଏରା, ବୁଆ ଏନ୍ ଏତ୍କ ବଛର୍ତକ୍ ନିହ୍ମା ସେବା କାମ୍ତେ ବାରାଲ୍ଦାନ୍ ଆରୁ ନିହ୍ମା ହୁକୁମ୍ ପୁରା ମାନ୍ତେ ବାରାଲ୍ଦାନ୍, ଲେକିନ୍ ଏକ୍ଲାହି ଏଙ୍ଘା ସାଙ୍ଗେର୍ ଗାନେ ଖୁସୀ ମାନାବାଗେ ଛୋଟେ ଭେଡ଼ି ହାଦ୍ଦୁହି ମାଲ୍ଲା ଚୁୟ। 30ଲେକିନ୍ ନିହ୍ମା ଇ ହାଦ୍ଦୁସ୍, ଖାରାପ୍ ନାଲ୍ଖୁନୁ ନିହ୍ମା ଜାମା ସମ୍ପତ୍ତିନ୍ ମୁଞ୍ଜେଇଚାସ୍, ହାଲେହି ନିମ୍ ଇସ୍କି ଲାଗାନ୍ ବାଡ଼୍କା ଭେଡ଼ିହାଦ୍ଦୁ ପିଟ୍ଟତାଚ୍କାଦାର୍।’ 31ଆଙ୍ଗେନ୍ ତାମ୍ଵାସ୍ ଆସିନ୍ ତେଙ୍ଗିୟାସ୍, ‘ନିମ୍ତା ବାବୁ, ଏଙ୍ଘାଗାନେ ଜାମାବାକେନ୍ ରାଦାଏ; ଆରୁ ଏକାଦ୍ ଏଙ୍ଘା ସମ୍ପତ୍ତି ଆଦ୍ ନିଙ୍ଘାଏ। 32ଲେକିନ୍ ଇ ନିଙ୍ଘା ଭାଇସ୍ କେଚ୍ଚାସ୍ କେର୍କାଚାସ୍, ଆରୁଅହନ୍ ଉଜ୍ଜିୟାସ୍; ଏଫ୍ସ୍ରାସ୍ କେର୍କାଚାସ୍, ଆରୁ ଆକ୍କୁନ୍ ହାଖ୍ଖରାସ୍ କେର୍କାଦାସ୍, ହୁଦ୍ଘିଲାଗାନ୍ ଖୁସୀ ମାନାବାନା ଉଚିତ୍ ରାଚା’।”
16ବଇମାନ୍ ମୁନ୍ସୀସ୍କି ନମୁନା
1ଆନ୍ତିନ୍ ଯୀଶୁସ୍ ତାଙ୍ଘା ଚେଲାରିନ୍ହି ତେଙ୍ଗିୟାସ୍, “ଅଣ୍ଟା ଧନୀ ଆଲାସ୍ସାନ୍ ଅଣ୍ଟା ମୁନ୍ସୀସ୍ ନାଲ୍ଖୁ କାମାଲିୟାସ୍, ଆଲାର୍ ଆ ଧନୀ ଆଲାସ୍ସାନ୍ କାଇକିରି ମୁନ୍ସୀସ୍କି ମିଆଁ ଦୋଷ୍ ଚିଚ୍ଚାର୍ କା ଆସ୍ ନିହ୍ମା ସମ୍ପତ୍ତିନ୍ ଉଡ଼ା ବାଲ୍ଦାସ୍। 2ଆଙ୍ଗେନ୍ ମାଲିକ୍ସ୍ ମୁନ୍ସୀସିନ୍ ମେହିଁକିରି ତେଙ୍ଗିୟାସ୍, ‘ଏନ୍ ନିଙ୍ଘା ବାରେ ଏନ୍ଦେର୍ କାତ୍ଥାନ୍ ମେନାଲ୍ଦାନ୍? ନିନ୍ ମୁନ୍ସୀ ନାଲ୍ଖୁଘି ହିସାବ୍ ଚିଆ ଏନ୍ଦେର୍ଗେକା ନିନ୍ ଆକ୍କୁନ୍ତି ମୁନ୍ସୀ ରା ପଲ୍ଲଦାଏ।’ 3ଆଙ୍ଗେନ୍ ମୁନ୍ସୀସ୍ ତାଙ୍ଘା ମନ୍ନୁ ସୋଚ୍ଚାସ୍, ‘ଆକ୍କୁନ୍ ଏନ୍ ଏନ୍ଦେର୍ କାମନ୍? ଏଙ୍ଘା ମାଲିକ୍ସ୍ ଏଙ୍ଗାନ୍ ମୁନ୍ସୀ ନାଲ୍ଖୁନ୍ତି ଅଥ୍ରା ଚାଲ୍ଦାସ୍। ହାଜ୍ଜୁ ଆର୍ହାଗେ ଏଙ୍ଘାଏ ପାୟା ମାଲ୍ଲାଦିନ୍; ଆରୁ ଭିଖ୍ ନିଆଁଗେ ଏଙ୍ଗାଗେ ଲାଜ୍ଜେ ଲାଗ୍ଗଦ୍। 4ଏନ୍ ଆକ୍କୁନ୍ ଆକ୍କାନ୍ କା ଏଙ୍ଗା ଏନ୍ଦେର୍ କାମା ଖାତ୍ରଦ୍, ଏସ୍କେ କା ମୁନ୍ସୀ ନାଲ୍ଖୁନ୍ତି ଉର୍କା ପାଛ୍ଲି ଆଲାର୍ ଏଙ୍ଗାନ୍ ତାହ୍ମା ଆଡ଼୍ପାନୁ ମାଇନ୍ କାମର୍।’ 5ଆରୁ ଆସ୍ ତାଙ୍ଘା ମାଲିକ୍ସ୍ତି ଉଧାର୍ ହୁ ଆଲାରିନ୍ ଅର୍ତୁ-ଅର୍ତୁରିନ୍ ମେହିଁକିରି ପହ୍ଲେ ଆଲାସିନ୍ ତେଙ୍ଗିୟାସ୍, ‘ନିଙ୍ଘାସାନ୍ ଏଙ୍ଘା ମାଲିକ୍ସ୍କି କେତ୍କ ଉଧାର୍ ରାଇଦ୍?’ 6ଆସ୍ ଯାବାବ୍ ଚିଚ୍ଚାସ୍, ‘ଶୋଏ ମାନ୍ ଇସୁଙ୍ଗ୍’। ମୁନ୍ସୀସ୍ ତେଙ୍ଗିୟାସ୍, ‘ନିଙ୍ଘାଏ ରାଜୀନାମା ହୁଆ ଆରୁ ଚାଁଣେ ପଚାଶ୍ ଲେଖା।’ 7ଆନ୍ତିନ୍ ମୁନ୍ସୀସ୍ ଆରୁ ଅଣ୍ଟାସିନ୍ ମେନ୍ଚାସ୍, ‘ନିଙ୍ଘାସାନ୍ କେତ୍କ ଉଧାର୍ ରାଇଦ୍?’ ଆସ୍ ତେଙ୍ଗିୟାସ୍, ‘ଶୋଏ ମାନ୍ ଗହମ୍,’ ଆଙ୍ଗେନ୍ ଆ ମୁନ୍ସୀସ୍ ଆସିନ୍ ତେଙ୍ଗିୟାସ୍, ‘ନିଙ୍ଘା ରାଜୀନାମା ହୁଆ ଆରୁ ଅଶୀ ଲେଖାଚା।’ 8ମାଲିକ୍ସ୍ ଆ ବଇମାନ୍ ମୁନ୍ସୀସିନ୍ ଇଦ୍ଘିଲାଗାନ୍ ପ୍ରଶଂସା କାମ୍ଚାସ୍ କା ଆସ୍ ବୁଦ୍ଧିମାନିତି ନାଲ୍ଖୁ କାମ୍ଚାସ୍। ଏନ୍ଦେର୍ଗେକା ଦୁନିଆଁନ୍ତା ହାଦ୍ଦୁବଚ୍ଚର୍ ତାହ୍ମା ମାଝାନ୍ତା କାର୍ବାର୍ନୁ ବିଲ୍ଲୀନ୍ତା ହାଦ୍ଦୁ ବଚ୍ଚର୍ସ୍ତି ବାଗ୍ଗେ ଚତୁର୍ ରାନାଏ।”
9“ହୁଦ୍ଘିଲାଗାନ୍ ଏନ୍ହି ନିମାନ୍ ତେଙ୍ଗାଲ୍ଦାନ୍ ବଇମାନ୍ ଧନ୍ ସମ୍ପତ୍ତିତି ନିଜର୍ଲାଗାନ୍ ସାଙ୍ଗେ କାମା, ଏସ୍କେ କା ଆବ୍ଡ଼ାଦ୍ ମୁଞ୍ଜର୍କା ପାଛ୍ଲି ଆବ୍ଡ଼ାର୍ ସେପୁର୍ନୁ ନିମାନ୍ ମାଇନ୍ କାମର୍। 10ଏକାର୍ ଛୋଟେନ୍ତି ଛୋଟେ କାତ୍ଥାନୁ ଇମାନ୍ଦାର୍ ରାନାଏ, ଆବ୍ଡ଼ାର୍ ବାଡ଼୍କାନ୍ତି ବାଡ଼୍କା କାତ୍ଥାନୁହି ଇମାନ୍ଦାର୍ ରାନାଏ: ଆରୁ ଏକାର୍ ଛୋଟେନ୍ତି ଛୋଟେ କାତ୍ଥାନୁ ବଇମାନ୍ ରାନାଏ, ଆବ୍ଡ଼ାର୍ ବାଡ଼୍କାନ୍ତି ବାଡ଼୍କା କାତ୍ଥାନୁହି ବଇମାନ୍ ରାନାଏ। 11ଯଦି ନିମ୍ ଦୁନିଆଁନ୍ତା ଧାନ୍ନୁନୁ ଇମାନ୍ଦାର୍ ମା ମାନର୍, ତା ନିମାନ୍ ବିଶ୍ୱାସ୍ କାମିକିରି ସତ୍ତୁ ଧାନ୍ନୁବନ୍ ନେଦ୍ ସୋଁପର୍। 12ଆରୁ ଯଦି ନିମ୍ ଦୁସ୍ରାର୍ଘି ଧାନ୍ନୁତି ଇମାନ୍ଦାର୍ ମା ରର୍, ହାଲେ ଏକାଦ୍ ନିହ୍ମାଏ ଆବନ୍ ନିମାଗେ ନେଦ୍ ଚିଅର୍? 13ଅଣ୍ଟା ଗୁତ୍ତିୟାସ୍ ଦୁଇ ଲୋକ୍ ମାଲିକ୍ର୍ଘି ସେବା କାମା ପଲ୍ଲଦାସ୍: ଏନ୍ଦେର୍ଗେକା ଆସ୍ ଅର୍ତୁସିନ୍ ବାନେ ହାଖ୍ଖସ୍ ଆରୁ ଦୁସ୍ରାସିନ୍ ହାଁଣସ୍ ତୁପ୍ଫସ୍; ଆରୁ ଅଣ୍ଟାସିନ୍ ଆଦର୍ମାଇନ୍ କାମସ୍ ଆରୁ ଦୁସ୍ରାସିନ୍ ଆଦର୍ମାଇନ୍ ମା କାମସ୍। ନିମ୍ ପାର୍ମେଶ୍ୱାର୍ସ୍ ଆରୁ ଧନ୍ସମ୍ପତ୍ତି ଇ ଯୋଡ଼େନିନ୍ ସେବା କାମା ପଲ୍ଲଦାର୍।”
ଫାରିସୀ ଜାମାର୍ଘି ଲୋଭ୍
(ମାତିସ୍ ୧୧:୧୨,୧୩; ୫:୩୧,୩୨; ମାର୍କୁସ୍ ୧୦:୧୧,୧୨)
14ଇ ଜାମା କାତ୍ଥା ମେନିକିରି ଫାରିସୀଜାମାର୍ ଏକାର୍ ଧାନ୍ନୁଘି ଲୁଭି ରାଚାର୍, ଇ କାତ୍ଥାନ୍ ମେନିକିରି ଯୀଶୁସ୍କି ମାଜାକ୍ ଉଡ଼ାବାଚାର୍। 15ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏକା ଆଲାର୍ ନିଜ୍କେନିଜ୍ ଆଲାର୍ଘି ଆଘ୍ଲି ଧାର୍ମିକ୍ ବୁଲି ଏଦ୍ର୍ନାଏ, ନିମ୍ ହନ୍ନେ ଆଲାର୍ ଲେକିନ୍ ପାର୍ମେଶ୍ଵାର୍ସ୍ ନିହ୍ମା ମନ୍ବନ୍ ଆହ୍ଦାସ୍, ଏନ୍ଦେର୍ଗେକା ଏକାଦ୍ ଆଲାର୍ଘି ନଜର୍ନୁ ମାହାନ୍ଦ୍, ଆଦ୍ ପାର୍ମେଶ୍ଵାର୍ସ୍କି ନଜର୍ନୁ ତୁଚ୍ଛ।”
16“ମୁଶାସ୍କି ନିୟମ୍ ଆରୁ ନାବୀର୍ ଏକାନ୍ ଲେଖ୍ଚ୍କାନାଏ ଆବ୍ଡ଼ା ଜାମାଦ୍ ଯୋହାନ୍ସ୍କି ସାମାୟତକ୍ ରାଚା; ହୁ ସାମାୟନ୍ତି ପାର୍ମେଶ୍ଵାର୍ସ୍କି ରାଜୀଘି ବାରେନୁ ସୁସାମାଚାର୍ ଶୁଣାବାକେରା, ଆରୁ ଜାମାର୍ ଆସାନ୍ କରାଗେ ମୁରୁକ୍ କୋଶିଷ୍ କାମ୍ନାଏ। 17ଆକାଶ୍ ଆରୁ ଧାନ୍ତାରୀଘି ଲୋପ୍ ମାନ୍ନାଦ୍ ନିୟମ୍ଘି ଏକ୍ ବିନ୍ଦୁଘି ଲୋପ୍ ମାନ୍ନାନ୍ତି ସହଜ୍ ରାଇଦ୍।” 18“ନେଦ୍ ନିଜର୍ ମାଏକିନିଆଁନ୍ ଆମ୍ବନାଏ ଚିନାଏ ଆରୁ ଦୁସ୍ରା ମାଏକିନିଆଁନ୍ ବେଞ୍ଜର୍ନାଏ, ଆବ୍ଡ଼ାର୍ ବେଭିଚାର୍ କାମ୍ନାଏ, ଆରୁ ନେଦ୍ ନିଜର୍ ଆଲାସ୍କି ଦ୍ୱାର୍ନୁ ଆମ୍ବକା ମାଏକିନିଆଁନ୍ ବେଞ୍ଜର୍ନାଏ, ଆବ୍ଡ଼ାର୍ ବେଭିଚାର୍ କାମ୍ନାଏ।”
ଧନୀ ଆଲାସ୍ ଆରୁ ଲାଜ୍ରୁସ୍କି ନମୁନା
19“ଅଣ୍ଟା ଧନୀ ଆଲାସ୍ ରାଚାସ୍, ଆସ୍ ମୁରୁକ୍ ଦାମ୍ଘି ଚିଢ଼ା ଆତ୍ତାଲିୟାସ୍ ଆରୁ ରୋଜ୍ ମୋଉଜ୍ ମଜ୍ଲିସ୍ନୁ ଉଜ୍ଜାଲିୟାସ୍। 20ଆସ୍କି ଫାଟକ୍ସାନ୍ ଲାଜ୍ରୁସ୍ ନାମେଘି ଅଣ୍ଟା ଭିଖ୍ ନିଉ ଆଲାସ୍ ଖାତ୍ର୍କା ରାଲିୟାସ୍, ଆସ୍କି ମେଦୁନୁ ଖାଦି ନିନ୍ଦିଆ କେର୍କିଚା। 21ଆସ୍ ଆ ଧନୀ ଆଲାସ୍କି ଅନ୍ନାଗେ ଖାତ୍ର୍କା ଜୁଠାଗୁଠିନ୍ ମହାଗେ ଅକ୍କା ରାଲିୟାସ୍; ଆରୁ ଆଲ୍ଲାଦ୍ ଆସ୍କି ଖାଦିଗୁଠିନ୍ ଟାଟାଲିଆଦ୍। 22ଅନ୍ଦୁଲ୍ ଆ ଭିଖ୍ ନିଉସ୍ କେଚ୍ଚାସ୍କେରାସ୍, ଆରୁ ସରଗ୍ଦୂଁତ୍ଜାମାର୍ ଆସିନ୍ ହୋଇକିରି ଆବ୍ରାହାମ୍ସ୍କି କୋଡ଼ୁନୁ ଅକ୍ତାଚାର୍। ଆରୁ ଆ ଧନୀ ଆଲାସ୍ କେଚ୍ଚାସ୍କେରାସ୍ ଆରୁ ଆସିନ୍ ମାଡ଼ାକେରା, 23ଆରୁ ଆସ୍ ନରକ୍ ଗାଡ୍ଡିନୁ ଦୁଃଖୁ ସାହାଲିୟାସ୍ ଆରୁ ତାଙ୍ଘା ହାନ୍ନୁନ୍ ଉଠାବିକିରି, ଗେଚ୍ଛାନ୍ନ୍ତି ଆବ୍ରାହାମ୍ସିନ୍ ଏରିୟାସ୍ ଆରୁ ତାଙ୍ଘା କୋଡ଼ୁନୁ ଲାଜ୍ରୁସ୍ସିନ୍ ଏରିୟାସ୍। 24ଆଙ୍ଗେନ୍ ଆସ୍ ଚିର୍ରା ରାଇକିରି ତେଙ୍ଗିୟାସ୍, ‘ହେ ବୁଆ ଆବ୍ରାହାମ୍, ଏଙ୍ଘା ମିଆଁ ଦାୟା କାମା ଆରୁ ଲାଜ୍ରୁସ୍ସିନ୍ ତାଇୟା, ଏସ୍କେ କା ଆସ୍ ତାଙ୍ଘା ଆଙ୍ଗ୍ଠିଘି ଆଗ୍ଗିବନ୍ ଆମ୍ମୁନୁ ମୁହ୍ଲତସ୍ ଆରୁ ଏଙ୍ଘା ତାଥାନ୍ ଥାଣ୍ଡା କାମସ୍, ଏନ୍ଦେର୍ଗେକା ଏନ୍ ଇସାନ୍ ଚିଚ୍ଚୁନୁ ତାଡ଼୍ପାରାଲ୍ଦାନ୍।’ 25ଆବ୍ରାହାମ୍ସ୍ ଆସିନ୍ ତେଙ୍ଗିୟାସ୍, ‘ବାବୁ, ମନେ କାମା କା ନିଙ୍ଗାଗେ ଜୀବନ୍ନୁ ସୁଃଖୁହି ସୁଃଖୁ ହାଖ୍ଖରାଦ୍, ଆରୁ ଲାଜ୍ରୁସ୍କେ ଦୁଃଖୁହି ଦୁଃଖୁ; ଆରୁ ଇସାନ୍ ଆସ୍କେ ସୁଃଖୁ ହାଖ୍ଖରାଲିଦ୍, ଆରୁ ନିଙ୍ଗାଗେ ଦୁଃଖୁ। 26ଇବନ୍ ଆମ୍ବିକିରି ଏହ୍ମା ଆରୁ ନିହ୍ମା ମାଝାନୁ ଅଣ୍ଟା ବାଡ଼୍କା ଗାଡ୍ଡି ରାଇଦ୍, ହୁଦ୍ଘିଲାଗାନ୍ ଯଦି ନେଦ୍ ନିଙ୍ଘା ଚାହାଗେ କାଲା ବେଦ୍ଦର୍, ଆବ୍ଡ଼ାର୍ କାଲା ପଲ୍ଲନାଏ; ଆରୁ ନେଦିନ୍ ହୁସ୍ତି ଇସାନ୍ଗେ ବାରାଗେ ବେଦ୍ଦନାଏ ଆବ୍ଡ଼ାର୍ ବାରା ପଲ୍ଲନାଏ।’ 27ଆସ୍ ତେଙ୍ଗିୟାସ୍, ‘ହେ ବୁଆ, ନିହ୍ମାସାନ୍ ଅଣ୍ଟା ଆର୍ଜୀ କାମାଗେ ରାଇଦ୍। ନିମ୍ ଲାଜ୍ରୁସ୍ସିନ୍ ଏହ୍ମା ବୁଆସ୍କି ଆଡ଼୍ପା ତାଇୟାଚା, 28ଏନ୍ଦେର୍ଗେକା ଏଙ୍ଘାଏ ପାଞ୍ଚ୍ ଭାଇ ରାନାଏ; ଲାଜ୍ରୁସ୍ ଆବ୍ଡ଼ାରିନ୍ ଚେତାବାନୀ ଚିୟସ୍, ଏକାସାନ୍ ଏନ୍ନେ ମା ମାନଦ୍ କା ଆବ୍ଡ଼ାର୍ହି ଇ କଷଟ୍ ଆଡ୍ଡାଗେ ବାରର୍।’ 29ଲେକିନ୍ ଆବ୍ରାହାମ୍ସ୍ ଆସିନ୍ ତେଙ୍ଗିୟାସ୍, ‘ମୁଶା ନାବୀ ଆରୁ ଦୁସ୍ରା-ଦୁସ୍ରା ନାବୀର୍ଘି ପାବିତାର୍ ଶାସ୍ତ୍ର ଆବ୍ଡ଼ାର୍ସାନ୍ ରାଇଦ୍, ଆର୍ଘି କାତ୍ଥାନ୍ ମେନର୍।’ 30ଆ ଧନୀ ଆଲାସ୍ ତେଙ୍ଗିୟାସ୍, ‘ହେ ବୁଆ ଆବ୍ରାହାମ୍; ଆବ୍ଡ଼ାର୍ ଆବ୍ଡ଼ାର୍ଘି କାତ୍ଥାନ୍ ମା ମେନ୍ନାଏ! ଲେକିନ୍ କେଚ୍ଚକା ଆଲାର୍ସ୍ତି ନେଦିନ୍ ଅର୍ତୁ ତାହ୍ମାସାନ୍ କର୍, ତା ଆବ୍ଡ଼ାର୍ ପାସ୍ତାରର୍।’ 31ଲେକିନ୍ ଆବ୍ରାହାମ୍ସ୍ ଆସିନ୍ ତେଙ୍ଗିୟାସ୍, ‘ଯଦି ଆବ୍ଡ଼ାର୍ ମୁଶା ନାବୀ ଆରୁ ଦୁସ୍ରା ନାବୀର୍ଘି କାତ୍ଥାନ୍ ମା ମେନ୍ନାଏ, ତା ଯଦି କେଚ୍ଚକା ଭିତର୍ନୁ ନେଦିନ୍ ଅର୍ତୁ ଉଜ୍ଜର୍, ହାଲେହି ଆବ୍ଡ଼ାର୍ ଆସ୍କି କାତ୍ଥାନ୍ ମା ମେନ୍ନାଏ’।”
17ଛେମା ଆରୁ ବିଶ୍ଵାସ୍ଘି ନମୁନା
(ମାତିସ୍ ୧୮:୬,୭,୨୧,୨୨; ମାର୍କୁସ୍ ୯:୪୨)
1ଅନ୍ଦୁଲ୍ ଯୀଶୁସ୍ ତାଙ୍ଘା ଚେଲାରିନ୍ ତେଙ୍ଗିୟାସ୍, “ଆଲାର୍ଘି ଜୀବନ୍ନୁ ପାପ୍ କାମାଗେ ପରୀକ୍ଷା ଜରୁର୍ ବାରଦ୍, ଲେକିନ୍ ନେଦ୍ ଦୁସ୍ରାରିନ୍ ପାପ୍ କାମ୍ତାନାଏ ଆବ୍ଡ଼ାର୍ଗେ ପାର୍ମେଶ୍ୱାର୍ସ୍ ଜରୁର୍ ଦଣ୍ଡ୍ ଚିୟସ୍! 2ଏଙ୍ଘା ମିଆଁ ବିଶ୍ଵାସ୍ କାମ୍ନାବାଲା ଆଲାରିନ୍ ଆସ୍ ଏତ୍କ ଖାସ୍ ଆଲାସ୍ ମାଲ୍ଦାସ୍ ହାଲେହି ନେଦିନ୍ ଆସିନ୍ ପାପ୍ କାମ୍ତାନାଏ, ତା ଆସ୍କି ହଁଟନୁ ଜାତ୍ରିଘି ଚାଁଚାନ୍ ହିଁଇକିରି ସାମ୍ଧୁର୍ନୁ ଖେବ୍ଡ଼ାଚାକୋ ଆଦ୍ଘିନ୍ତିହି ବାଗ୍ଗେ ଦଣ୍ଡ୍ ପାର୍ମେଶ୍ଵାର୍ସ୍ ଆସ୍କେ ଚିୟସ୍। 3ହୁଦ୍ଘିଲାଗାନ୍ ସାବ୍ଧାନ୍ ରା; ଯଦି ନିଙ୍ଘା ଭାଇସ୍ ଏନ୍ଦ୍ରିନ୍ ଦୋଷ୍ କାମ୍ଦାସ୍ ତା ଆସିନ୍ ଧାମ୍କା, ଯଦି ଆସ୍ ପାସ୍ତାରସ୍ ତା ଆସିନ୍ ଛେମା କାମା। 4ଉଲ୍ଲା ଅଣ୍ଟାନୁ ଯଦି ଆସ୍ ନିଙ୍ଘା ବିରୁଦ୍ଧ ସାତ୍ଥର୍ ଦୋଷ୍ କାମସ୍ ଆରୁ ସାତ୍ଥର୍ ବାରିକିରି ତେଙ୍ଗସ୍ କା, ‘ଏନ୍ ପାସ୍ତାରାଲ୍ଦାନ୍ ଏଙ୍ଗାନ୍ ଛେମା କାମାଚାତା ନିମ୍ ଆସିନ୍ ଛେମା କାମ୍ତେ କାଲା।’” 5ପ୍ରେରିତ୍ ଜାମାର୍ ପ୍ରାଭୁସିନ୍ ତେଙ୍ଗିୟାର୍, “ଏହ୍ମା ବିଶ୍ଵାସ୍ବନ୍ ବାଢ଼ାବା।” 6ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯଦି ଅଣ୍ଟା ମାନି ମାଞ୍ଜିଘି ହତ୍କ ନିହ୍ମା ବିଶ୍ଵାସ୍ ରାଇଦ୍, ତା ନିମ୍ ଇ ତୁତ୍ ମାନ୍ନୁନ୍ ତେଙ୍ଗା କା ଇଦ୍ ମୁଲିନ୍ତି ଚାଡ୍ରିକିରି ସାମ୍ଧୁର୍ନୁ ଇଦ୍ରୋକୋ”, ତା ଆଦ୍ ନିହ୍ମା କାତ୍ଥାନ୍ ମେନଦ୍।
7“ଯଦି ନିହ୍ମା ଗୁତ୍ତିୟାସ୍ ଗହ୍ଲା ପୁନ୍ଦିକିରି ହାଲ୍ଲୁ ତାର୍ତି ବାରସ୍ ଚାହେ ଓୟୁ ହାପିକିରି ବାରସ୍, ତା ନିହ୍ମା ଭିତର୍ନୁ ଏନ୍ନେ ନେଦ୍ ରାଦାର୍, କା ଆସିନ୍ ବାରାଖାନେନ୍ ତେଙ୍ଗ୍ଦାର୍ ବାରା ଅନାଗେ ଅକ୍କା? 8ମାଲିକ୍ସ୍ କାଁଏ ଗୁତ୍ତିୟାସିନ୍ ଏନ୍ନେ ମା ତେଙ୍ଗସ୍ କା, ‘ଏଙ୍ଗା ଅନାଗେ ଯୋଗାଡ଼୍ କାମା। ଯେତ୍କତକ୍ ଏନ୍ ମା ଅନନ୍ ମହନ୍ ଆତ୍କତକ୍ ନିନ୍ ଏଙ୍ଗାଗେ ବେୱତା; ଆନ୍ତିନ୍ ନିନ୍ହି ଅନୟ ମହଁୟ?’ 9ଗୁତ୍ତିୟାସ୍ ମାଲିକ୍ସ୍କି ହୁକୁମ୍ ଅନୁସାର୍ ନାଲ୍ଖୁ କାମ୍ଦାସ୍ ଇଦ୍ଘିଲାଗାନ୍ ଆସ୍ ଗୁତ୍ତିୟାସିନ୍ ଧାନ୍ୟାବାଦ୍ ଚିଦାସ୍ କାଁଏ? 10ନିମ୍ହି ଏନ୍ନେନ୍ ରାଦାର୍। ଜାମା ହୁକୁମ୍ବନ୍ ମାନ୍ଚ୍କା ପାଛ୍ଲି ନିମାଗେ ତେଙ୍ଗ୍ନା କାତ୍ଥା କା, ‘ଏମ୍ ନାଲାଏକ୍ ଗୁତ୍ତିୟାମ୍; ଏମ୍ ଏହ୍ମା କର୍ତ୍ତବ୍ୟନ୍ ଖାଲି ପୁରା କାମ୍ଚ୍କାଦାମ୍’।”
ଯୀଶୁସ୍ ଦଶ୍ଲୋକ୍ କୋଢ଼୍ ବେହ୍ମରିୟାରିନ୍ ବାନେ କାମାଲ୍ଦାସ୍
11ଯୀଶୁସ୍ ଯେରୁଶାଲେମ୍ କାନାବାକେନ୍ ସାମାରିଆ ଆରୁ ଗାଲିଲୀ ଜିଲ୍ଲା ସୀମା ଚିଇକିରି କାଲିୟାସ୍। 12ଅଣ୍ଟା ପାଡ଼ା କର୍ଚ୍କାନ୍ତି ଯୀଶୁସ୍ ଦଶ୍ଲୋକ୍ କୋଢ଼୍ ବେହ୍ମରିୟାରିନ୍ ହାଖ୍ଖଦାସ୍। 13ଆବ୍ଡ଼ାର୍ ଗେଚ୍ଛାନୁ ଇଜ୍ଜାର୍ ଆରୁ ଜୋର୍ସେ ଚିର୍ରା ରାଇକିରି ତେଙ୍ଗିୟାର୍, “ହେ ଯୀଶୁ, ହେ ଗୁରୁ, ଏହ୍ମା ମିଆଁ ଦାୟା କାମା।” 14ଯୀଶୁସ୍ ଆବ୍ଡ଼ାରିନ୍ ଏରିୟାସ୍ ଆରୁ ତେଙ୍ଗିୟାସ୍, “କାଲା, ଆରୁ ନିମ୍ ନିଜ୍କେନିଜ୍ ପୁରୋହିତ୍ଜାମାରିନ୍ ଏଦ୍କେ।” ଯେତ୍କବାକେନ୍ ଆବ୍ଡ଼ାର୍ କାଲିୟାର୍ ତା ପାବୁନୁନ୍ ବାନେ ମାନିକିରି ଶୁଦ୍ଧ୍ ମାନ୍ଚାର୍ କେରାର୍। 15ଯେତ୍କବାକେନ୍ ଦଶ୍ଲୋକ୍ ଭିତର୍ନୁ ଅଣ୍ଟାସ୍ ଏରିୟାସ୍ କା ଆସ୍ ବାନେ ମାନ୍ଚାସ୍ କେର୍କାଦାସ୍, ତା ଆସ୍ ଜୋର୍ସେ ଚିର୍ରା ରାଇକିରି ପାର୍ମେଶ୍ଵାର୍ସ୍କି ସ୍ତୁତି କାମ୍ତେ କିର୍ରିୟାସ୍; 16ଆସ୍ ଯୀଶୁସ୍କି ହେଡ୍ଡମୁଲିନୁ ଖାତ୍ରିକିରି ଧାନ୍ୟାବାଦ୍ ଚିଆ ଲାଗ୍ଗିୟାସ୍। ଆସ୍ ସାମାରୀ ରାଜୀନ୍ତା ରାଚାସ୍। 17ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ଦଶ୍ ଲୋକ୍ରିନ୍ କାଁଏ ବାନେ ମାଲ୍ଲା ମାନୁର୍ ହାଲେ ଆରୁ ନଅ ଲୋକ୍ ଏକାସାନ୍ ରାନାଏ? 18ପାର୍ମେଶ୍ଵାର୍ସ୍ସିନ୍ ଧାନ୍ୟାବାଦ୍ ଚିୟାଗେ ଇ ପର୍ଦେଶୀୟାସିନ୍ ଆମ୍ବିକିରି ଆରୁ ନେଦ୍ହି ମାଲ୍ଲା ବାରୁର୍?” 19ଆନ୍ତିନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ଉସ୍କାରା ଆରୁ କାଲା, ନିଙ୍ଘା ବିଶ୍ଵାସ୍ଦ୍ ନିଙ୍ଗାନ୍ ବାନେ କାମ୍ଚା।”
ପାର୍ମେଶ୍ଵାର୍ସ୍କି ରାଜୀଘି ବାର୍ନା
20ଯେତ୍କବାକେନ୍ ଫାରିସୀଜାମାର୍ ଯୀଶୁସିନ୍ ମେନ୍ଚାର୍ କା ପାର୍ମେଶ୍ଵାର୍ସ୍କି ରାଜୀ ଏକ୍ଲା ବାରୋଦ୍, ତା ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ପାର୍ମେଶ୍ଵାର୍ସ୍କି ରାଜୀଦ୍ ଏଥ୍ର୍ନା ଲେଖା ମା ବାରିଦ୍। 21ଆଲାର୍ ତେଙ୍ଗା ପଲ୍ଲନାଏ କା ଏରା ଇସାନ୍ ରାଇଦ୍ ଚାହେ ତା ହାସାନ୍ ରାଇଦ୍; ଏନ୍ଦେର୍ଗେକା ଏରା, ପାର୍ମେଶ୍ଵାର୍ସ୍କି ରାଜୀଦ୍ ନିହ୍ମା ମାଝାନୁନ୍ ରାଇଦ୍।”
22ଲେକିନ୍ ଯୀଶୁସ୍ ତାଙ୍ଘା ଚେଲାଜାମାରିନ୍ ତେଙ୍ଗିୟାସ୍, “ଏନ୍ନେ ସାମାୟ ବାରୋଦ୍, ଯେତ୍କବାକେନ୍ ନିମ୍ ମୁନୁଷ୍ ହାଦ୍ଦୁସ୍କି ଉଲ୍ଲା ଭିତର୍ନୁ ଅଣ୍ଟା ଉଲ୍ଲାନ୍ହି ଏରାଗେ ବେଦ୍ଦର୍, ଲେକିନ୍ ଆବନ୍ ଏରା ପଲ୍ଲଦାର୍। 23ଆଲାର୍ ନିମାନ୍ ଏନ୍ନେ ତେଙ୍ଗର୍ ‘ଏରା, ଖ୍ରୀସ୍ତ୍ ଇସାନ୍ ରାଦାସ୍, ଖ୍ରୀସ୍ତ୍ ହାସାନ୍ ରାଦାସ୍!’ ଲେକିନ୍ ନିମ୍ ଇ କାତ୍ଥାନ୍ ବିଶ୍ଵାସ୍ ଆମ୍କେ କାମା। 24ଏନ୍ଦେର୍ଗେକା ଏସ୍କେ ବିଜ୍ଲି ମାର୍ଚ୍କୁନ୍ ଆକାଶ୍ଘି ଅଣ୍ଟା ପାଖ୍ତି ଉର୍ଖିକିରି ଆକାଶ୍ଘି ଦୁସ୍ରା ପାଖ୍ତି ବିଲ୍ଚିଦ୍ ହନ୍ନେନ୍ ମୁନୁଷ୍ ହାଦ୍ଦୁସ୍ହି ତାଙ୍ଘା ଉଲ୍ଲାନୁ ପ୍ରକଟ୍ ମାନସ୍। 25ଲେକିନ୍ ପହ୍ଲେ ଆସ୍କେ ମୁରୁକ୍ ଦୁଃଖୁ ସାହା ଖାତ୍ରଦ୍, ଆରୁ ଇ ପିଢ଼ିଦ୍ ତାଙ୍ଗାନ୍ ତୁଚ୍ଛ କାମର୍। 26ଏସ୍କେ ନୁଆସ୍କି ସାମାୟନୁ ମାନ୍ଚ୍କିଚା, ହନ୍ନେନ୍ ମୁନୁଷ୍ ହାଦ୍ଦୁସ୍କି ସାମାୟନୁହି ମାନଦ୍। 27ନୁଆସ୍କି ଜାହାଜ୍ନୁ ଆର୍ଗ୍ନା ଜୁଟି, ଆଲାର୍ ଅନ୍ନାମହ୍ନା, ଆରୁ ବେଞ୍ଜାକାଜ୍ କାମ୍ତେ ରାଚାର୍। ଆଙ୍ଗେନ୍ ଜୋର୍ସେ ବାଢ଼ି ବାର୍ଚା ଆରୁ ଜାମାରିନ୍ ନାଶ୍ କାମ୍ଚେଇଚା। 28ଲୋଟ୍ସ୍କି ସାମାୟନୁହି ଏନ୍ନେନ୍ ମାନ୍ଚ୍କିଚା ଆଲାର୍ ଅନାମହାଲିୟାର୍, ହେନ୍ଦନା ବିସଁନା କାମାଲିୟାର୍, ମାନ୍ନୁ ଇଦାଲିୟାର୍ ଆରୁ ଆଡ଼୍ପା କାମ୍ତେ ରାଲିୟାର୍; 29ଲେକିନ୍ ଏକ୍ଲା ଲୋଟ୍ସ୍ ସଦୋମ୍ ସହର୍ ଆମ୍ବିୟାସ୍, ହୁ ଉଲ୍ଲା ଆକାଶ୍ତି ଚିଚ୍ଚୁ ଆରୁ ଗନ୍ଧକ୍ ଟିଡ୍ଡାସ୍ ଆରୁ ଜାମାର୍ ନାଶ୍ ମାନ୍ଚାର୍ କେରାର୍। 30ମୁନୁଷ୍ ହାଦ୍ଦୁସ୍କି ଏଥ୍ର୍ନା ଉଲ୍ଲା ହନ୍ନେନ୍ ମାନଦ୍।”
31“ହୁ ଉଲ୍ଲାନୁ ଏକାର୍ ଛାତ୍ ମିଆଁ ରର୍ ଆର୍ ଆଡ଼୍ପା ଉଲା ରୁ, ତାହ୍ମା ଜିନିଷ୍ପତର୍ ଅଥ୍ରାଗେ ଆମ୍ନାର୍ ଏତ୍ତନାର୍; ଆରୁ ନେଦ୍ ହାଲ୍ଲୁନୁ ରର୍ ଆବ୍ଡ଼ାର୍ ଆମ୍ବର୍ କିର୍ରା। 32ଲୋଟ୍ସ୍କି ମାଏକିନିଆଁନ୍ ମନେ କାମା! 33ନେଦିନ୍ ନିଜର୍ ଜୀବନ୍ବନ୍ ବାଛାବାଗେ ବେଦ୍ଦନାଏ ତା ଆର୍ ତାହ୍ମା ଜୀବନ୍ବନ୍ ଏଫ୍ସର୍ଚର୍, ଆରୁ ନେଦ୍ ନିଜର୍ ଜୀବନ୍ବନ୍ ଏଫ୍ସର୍ଚର୍ ଆର୍ ଆବନ୍ ବାଛାବର୍ ଉଇୟର୍। 34ଏନ୍ ନିମାନ୍ ତେଙ୍ଗାଲ୍ଦାନ୍, କା ହୁ ମାଁହାନ୍ ଅଣ୍ଟା ନାଟ୍ରୁନୁ ଦୁଇ ଲୋକ୍ ଚୁତ୍କାରର୍; ତା ଅଣ୍ଟାସିନ୍ ହୁଆକଦ୍ ଆରୁ ଦୁସ୍ରାସିନ୍ ଆମ୍ବାକଦ୍। 35ଦୁଇ ଲୋକ୍ ମାଏକିନିଆଁର୍ ସାଙ୍ଗେନ୍ ଜାତ୍ରି ରାଗ୍ଡ଼ାଲ୍କାରର୍, ତା ଅଣ୍ଟାନ୍ ହୁଆକଦ୍ ଆରୁ ଦୁସ୍ରାନ୍ ଆମ୍ବାକଦ୍। 36(ଦୁଇ ଲୋକ୍ ହାଲ୍ଲୁନୁ ରର୍ତା ଅଣ୍ଟାସିନ୍ ହୁଆକଦ୍ ଆରୁ ଦୁସ୍ରାସିନ୍ ଆମ୍ବାକଦ୍।)” 37ଇବନ୍ ମେନିକିରି ଆବ୍ଡ଼ାର୍ ଯୀଶୁସିନ୍ ମେନ୍ଚାର୍, “ହେ ପ୍ରାଭୁ ଏକାସାନ୍?” ଆସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ଏକାସାନ୍ ଗିଧିଦ୍ ଠୁଡ଼ିୟାରାଇ ଆସାନ୍ ମାଁଣା ରାଇ, ବୁଲି ଆହା ଅଙ୍ଗ୍ଦାର୍ ଇବ୍ଡ଼ା ଜାମା ଚିହ୍ନାଗୁଠିନ୍ ଏରର୍ ତା ନିମାଗେ ଆହ୍ନା କାତ୍ଥା କା ମୁନୁଷ୍ ହାଦ୍ଦୁସ୍କି ଉଲ୍ଲା ଢେର୍ ଚାହାନୁ ଆଣ୍ସିୟା କେର୍କିଚି।”
18ବିନ୍ତି କାମାଗେ ଆମା ଥାକ୍ରା
1ଯୀଶୁସ୍ ଇବନ୍ ବୁଝାବାଗେକା ଜାମାବାକେନ୍ ବିନ୍ତି କାମ୍ନା କାତ୍ଥା ଆରୁ ଏକ୍ଲାହି ଧିରାଜ୍ ମା ଆମ୍ଵନା କାତ୍ଥା, ଆସ୍ ଆବ୍ଡ଼ାରିନ୍ ଅଣ୍ଟା ନମୁନା ଶୁଣାବାଚାସ୍: 2“ଏକିନ୍ ଅଣ୍ଟା ସହର୍ନୁ ଅଣ୍ଟା ନ୍ୟାୟ କାମୁ ଆଲାସ୍ ରାଚାସ୍, ଆସ୍ ପାର୍ମେଶ୍ଵାର୍ସ୍ସିନ୍ ମା ଏଲ୍ଚାଲିୟାସ୍, ଆରୁ ଆଲାରିନ୍ହି ଖାତିର୍ ମା କାମାଲିୟାସ୍। 3ହୁ ସହର୍ନୁନିନ୍ ଅଣ୍ଟା ରାଣ୍ଡି ଆଲି ରାଲିଆ, ଆଦ୍ ଜାମାବାକେନ୍ ଆ ନ୍ୟାୟ କାମୁ ଆଲାସ୍ସାନ୍ ବାରିକିରି ତେଙ୍ଗାଲିୟାଦ୍, ‘ଏଙ୍ଘା ବିରୋଧିସ୍କି ବିରୁଦ୍ଧ୍ନୁ ଏଙ୍ଗାଗେ ନ୍ୟାୟ ଚିଆ।’ 4ଆରୁ ଢେର୍ ଉଲ୍ଲାତକ୍ ଆସ୍ ରାଜୀ ମା ମାନାଲିୟାସ୍, ଲେକିନ୍ ପାଛ୍ଲି ଆସ୍ ତାଙ୍ଘା ମନେମନ୍ ତେଙ୍ଗ୍ରାସ୍, ‘ଯଦିଭି ଏନ୍ ପାର୍ମେଶ୍ଵାର୍ସ୍ସିନ୍ ମା ଏଲ୍ଚ୍ଦାନ୍, ଆରୁ ଆଲାରିନ୍ ଖାତିର୍ ମା କାମ୍ଦାନ୍; 5ହାଲେହି ଇ ରାଣ୍ଡି ଆଲିଦ୍ ଏଙ୍ଗାନ୍ ପାରେସାନ୍ କାମ୍ତେ ରାଇ, ଇଦ୍ଘିଲାଗାନ୍ ଏନ୍ ଆଦ୍ଗେ ନ୍ୟାୟଘି ବ୍ୟବସ୍ଥା କାମନ୍, ଏସ୍କେ କା ଆଦ୍ ଜାମାବାକେନ୍ ବାରିକିରି ଏଙ୍ଗାନ୍ ପାରେସାନ୍ ମା କାମଦ୍’।” 6ଆନ୍ତିନ୍ ପ୍ରାଭୁସ୍ ତେଙ୍ଗିୟାସ୍, “ମେନା, କା ଇ ଅଧାର୍ମିୟାଁ ନ୍ୟାୟ କାମୁସ୍ ଏନ୍ଦେର୍ ତେଙ୍ଗାଲ୍ଦାସ୍? 7ତା କାଁଏ ପାର୍ମେଶ୍ଵାର୍ସ୍ ତାଙ୍ଘାଏ ଚାଜ୍ଜକା ଆଲାର୍ଘି ଲାଗାନ୍ ଏକାର୍ କା ଉଲ୍ଲାନ୍ ମାଁହାନ୍ ଆସ୍କି ଦୁହାଇ ଚିତେ ରାନାର୍, ଆବ୍ଡ଼ାର୍ଘି ଲାଗାନ୍ ନ୍ୟାୟଘି ବ୍ୟବସ୍ଥା ମା କାମସ୍? ଆସ୍ ତାହ୍ମାଲାଗାନ୍ ଡେରି କାମସ୍ କାଁଏ? 8ଏନ୍ ନିମାନ୍ ତେଙ୍ଗାଲ୍ଦାନ୍, ଆସ୍ ଚାଁଣେନିନ୍ ଆବ୍ଡ଼ାର୍ଘି ଲାଗାନ୍ ନ୍ୟାୟଘି ବିଚାର୍ କାମସ୍। ହାଲେହି ମୁନୁଷ୍ ହାଦ୍ଦୁସ୍ ବାରସ୍, ତା ଆସ୍ ଦୁନିଆଁନୁ ବିଶ୍ଵାସ୍ବନ୍ ଏରସ୍ କାଁଏ?”
ଫାରିସୀ ଆରୁ ମାଲ୍ଗୁଜାରୀ ଉକ୍ରୁ ଆଲାର୍ଘି ନମୁନା
9କେତ୍କ ଲୋକ୍ ଆଲାର୍ ନିଜର୍ ମିଆଁ ବିଶ୍ୱାସ୍ ଉଇକିରି, ନିଜ୍କେନିଜ୍ ଧାର୍ମିକ୍ ସୋଚାଲିୟାର୍, ଆରୁ ଦୁସ୍ରାରିନ୍ ତୁଚ୍ଛ କାମାଲିଆର୍, ଯୀଶୁସ୍ ଏନ୍ନେ ଆଲାର୍ଘି ଲାଗାନ୍ ଇ ନମୁନା ଶୁଣାବାଚାସ୍: 10“ଦୁଇ ଲୋକ୍ ଆଲାର୍ ବିନ୍ତି କାମାଗେ ମନ୍ଦିର୍ଗେ କେରାର୍; ଅଣ୍ଟାସ୍ ଫାରିସୀ ରାଚାସ୍ ଆରୁ, ଆରୁ ଅଣ୍ଟାସ୍ ମାଲ୍ଗୁଜାରୀ ଉକ୍ରୁସ୍ ରାଚାସ୍। 11ଫାରିସୀସ୍ ଇଜ୍ଜାସ୍ ଆରୁ ତାଙ୍ଘା ମନ୍ନୁ ଏନ୍ନେ ବିନ୍ତି କାମାଗେ ଲାଗ୍ଗିୟାସ୍, ‘ହେ ପାର୍ମେଶ୍ଵାର୍, ଏନ୍ ନିଙ୍ଗାନ୍ ଧାନ୍ୟାବାଦ୍ ଚିଆଲ୍ଦାନ୍ କା ଏନ୍ ଦୁସ୍ରା ଆଲାର୍ ଲେଖା ଅଧର୍ମିୟାଁ, ଅନ୍ୟାଇ, ବେଭିଚାରୀ ଆରୁ ଇ ମାଲ୍ଗୁଜାରୀ ଉକ୍ରୁ ଆଲାସ୍ ଲେଖାହି ମାଲ୍ଦାନ୍। 12ଏନ୍ ହାପ୍ତାନୁ ଦୁଇ ଥର୍ ଉପାସ୍ କାମ୍ଦାନ୍; ଆରୁ ଏଙ୍ଘାଏ ଜାମା ସମ୍ପତ୍ତିନ୍ତି ଦଶ୍ଭାଗ୍ ନିଙ୍ଘାଲାଗାନ୍ ଚାଢ଼ାବାଦାନ୍ ଚିଦାନ୍।’” 13“ଲେକିନ୍ ମାଲ୍ଗୁଜାରୀ ଉକ୍ରୁ ଆଲାସ୍ କାଟେ ଗେଚ୍ଛାନୁ ଇଜ୍ଜାସ୍, ଆରୁ ଆସ୍ ସରଗ୍ ତାରା ନଜର୍ ଟେକାଗେହି ସାହସ୍ ମା କାମାଲିୟାସ୍, ଲେକିନ୍ ଆସ୍ ତାଙ୍ଘାଏ ଏହୁ ଡେମ୍ରା-ଡେମ୍ରାକିରି ତେଙ୍ଗାଗେ ଲାଗ୍ଗିୟାସ୍, ‘ହେ ପାର୍ମେଶ୍ଵାର୍ ଏନ୍ ପାପୀନ୍ ଏଙ୍ଘା ମିଆଁ ଦାୟା କାମା!’”
14“ଏନ୍ ନିମାନ୍ ତେଙ୍ଗାଲ୍ଦାନ୍ ଆ ଫାରିସୀ ଆଲାସ୍ ମାଲ୍ଲା, ଲେକିନ୍ ଇ ମାଲ୍ଗୁଜାରୀ ଉକ୍ରୁ ଆଲାସ୍ ପାର୍ମେଶ୍ଵାର୍ସ୍କି ନଜର୍ନୁ ଧାର୍ମିକ୍ ବୁଲି ଗନ୍ତି ମାନିକିରି ତାଙ୍ଘା ଆଡ଼୍ପା କିର୍ରିୟାସ୍ କେରାସ୍; ଏନ୍ଦେର୍ଗେକା ଏକାର୍ ନିଜ୍କେ ବାଡ଼୍କା ସୋଚ୍ନାଏ, ଆବ୍ଡ଼ାରିନ୍ ଛୋଟେ କାମାକୋ; ଆରୁ ଏକାର୍ ନିଜ୍କେନିଜ୍ ଛୋଟେ ସୋଚ୍ନାଏ, ଆବ୍ଡ଼ାରିନ୍ ବାଡ଼୍କା କାମାକୋ।”
ଯୀଶୁସ୍ ହାଦ୍ଦୁରିନ୍ ଆଶୀର୍ବାଦ୍ ଚିଆଲ୍ଦାସ୍
(ମାତିସ୍ ୧୯:୧୩-୧୫; ମାର୍କୁସ୍ ୧୦:୧୩-୧୬)
15ଆନ୍ତିନ୍ ଆଲାର୍ ତାହ୍ମାଏ ହାଦ୍ଦୁରିନ୍ହି ଯୀଶୁସ୍କି ଚାହାଗେ ଅନ୍ଦ୍ରାଗେ ଲାଗ୍ଗିୟାର୍ ଏନ୍ଦେର୍ଗେକା ଯୀଶୁସ୍ ତାହ୍ମା ହାଦ୍ଦୁରିନ୍ ଆଶୀର୍ବାଦ୍ ଚିୟସ୍; ଲେକିନ୍ ଚେଲାଜାମାର୍ ଆବ୍ଡ଼ାରିନ୍ ଏରିକିରି ଧାମ୍କା ଲାଗ୍ଗିୟାର୍। 16ଲେକିନ୍ ଯୀଶୁସ୍ ଆବ୍ଡ଼ାରିନ୍ ତାଙ୍ଘାଏ ଚାହାଗେ ମେହିଁକିରି ତେଙ୍ଗିୟାସ୍, “ହାଦ୍ଦୁରିନ୍ ଏଙ୍ଘା ଚାହା ବାରାଗେ ଚିଆ, ଆରୁ ଆବ୍ଡ଼ାରିନ୍ ମାନା ଆମା କାମା: ଏନ୍ଦେର୍ଗେକା ପାର୍ମେଶ୍ଵାର୍ସ୍କି ରାଜୀଦ୍ ଏନ୍ନେ ହାଦ୍ଦୁର୍ ଲେଖା ଆଲାର୍ଘି ରାଇ। 17ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ନେଦିନ୍ ପାର୍ମେଶ୍ଵାର୍ସ୍କି ରାଜୀନ୍ ହାଦ୍ଦୁର୍ ଲେଖା ଗ୍ରହନ୍ ମା କାମର୍, ହାଲେ ଆବ୍ଡ଼ାର୍ ଏକ୍ଲାହି ଆନ୍ନୁ କରା ପଲ୍ଲନାଏ।”
ଅଣ୍ଟା ଧନୀ କୁକ୍କ
(ମାତିସ୍ ୧୯:୧୬-୩୦; ମାର୍କୁସ୍ ୧୦:୧୭-୩୧)
18ଅଣ୍ଟା ୟାହୁଦୀ ଜାମାର୍ଘି ମୁଖ୍ୟାସ୍ ଯୀଶୁସିନ୍ ମେନ୍ଚାସ୍, “ହେ ବାନେ ଗୁରୁ, ସବୁଦିନ୍ତା ଜୀବନ୍ ହାଖ୍ଖାଗେ ଏନ୍ ଏନ୍ଦେର୍ କାମନ୍?” 19ଆଙ୍ଗେନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ଏଙ୍ଗାନ୍ ବାନେ ବୁଲି ଏନ୍ଦେର୍ଗେ ତେଙ୍ଗାଲ୍ଦାଏ? ପାର୍ମେଶ୍ଵାର୍ସ୍ସିନ୍ ଆମ୍ବିକିରି, ନେଦ୍ହି ବାନେ ମାଲ୍ଲକାରିନ୍। 20ନିନ୍ ନିୟମ୍ବନ୍ ତା ଆହ୍ଦାଏ: ‘ବେଭିଚାର୍ ଆମା କାମା, ଆମା ପିଟା, ଆରୁ ଆମାହାଡ଼ା, ଝୁଟ୍ଟୁ ସାକ୍ଷୀ ଆମା ଚିଆ, ନିଙ୍ଘାଏ ଆୟାଙ୍ଗ୍ ବାଙ୍ଗ୍ରିନ୍ ଆଦର୍ମାଇନ୍ କାମା’।” 21ଆସ୍ ତେଙ୍ଗିୟାସ୍, “ଇ ଜାମାନ୍ ତା ଏନ୍ ଯୁୱାନ୍ ବାକେନ୍ତିନ୍ ମାନ୍ତେ ବାରାଲ୍ଦାନ୍।” 22ତାଙ୍ଘା କାତ୍ଥା ମେନିକିରି ଯୀଶୁସ୍ ତେଙ୍ଗିୟାସ୍, “ନିଙ୍ଘାସାନ୍ ଆରୁ ଅଣ୍ଟା କାତ୍ଥାଘି ଘାଟି ରାଇ, ନିନ୍ ନିଙ୍ଘାଏ ଜାମା ଧାନ୍ନୁବନ୍ ବିଁଶିକିରି ଗରୀବ୍ ଆଲାର୍ଗେ ହାଟ୍ଟାଚା; ଆରୁ ବାରିକିରି ଏଙ୍ଗାନ୍ ଅନୁସରଣ୍ କାମା, ହାଲେ ନିଙ୍ଗାଗେ ସରଗ୍ନୁ ଧାନ୍ନୁ ହାଖ୍ଖର।” 23ଲେକିନ୍ ଇ ଜାମା କାତ୍ଥାନ୍ ମେନିକିରି ଆସ୍ ମୁରୁକ୍ ଦୁଃଖୁ ମାନ୍ଚାସ୍କେରାସ୍, ଏନ୍ଦେର୍ଗେକା ଆସ୍ ମୁରୁକ୍ ଧନୀ ରାଚାସ୍। 24ଆଙ୍ଗେନ୍ ଯୀଶୁସ୍ ଆସିନ୍ ଏରିକିରି ତେଙ୍ଗିୟାସ୍, “ଧନୀ ଆଲାର୍ଗେ ପାର୍ମେଶ୍ଵାର୍ସ୍କି ରାଜୀନୁ କରାଗେ ମୁରୁକ୍ କଠିନ୍ ରାଇଦ୍! 25ଧନୀ ଆଲାର୍ଗେ ପାର୍ମେଶ୍ଵାର୍ସ୍କି ରାଜୀନୁ କର୍ନାନ୍ତି, ସୁଇଁଘି ଭଙ୍କାନ୍ତି ଓଁଟ୍ଘି ଉର୍ଖ୍ନା ସହଜ୍ ରାଇଦ୍।” 26ଏକାର୍ ଇବ୍ଡ଼ା କାତ୍ଥାନ୍ ମେନ୍ଚାର୍ ଆବ୍ଡ଼ାର୍ ତେଙ୍ଗିୟାର୍, “ହାଲେ ନେଦ୍ ବାଛ୍ରା ଅଙ୍ଗର୍?” 27ଲେକିନ୍ ଯୀଶୁସ୍ ତେଙ୍ଗିୟାସ୍, “ଏକାଦ୍ ଆଲାର୍ଗେ ଅସମ୍ଭବ୍ ଆଦ୍ ପାର୍ମେଶ୍ୱାର୍ସ୍କେ ସମ୍ଭବଦ୍।” 28ପାତ୍ରାସ୍ ତେଙ୍ଗିୟାସ୍, “ଏରା ଏମ୍ତା ଆଡ଼୍ପା ପାଲିନ୍ ଆମ୍ବିକିରି ନିଙ୍ଘା ପାଛ୍ଲି-ପାଛ୍ଲି ବାର୍ଚ୍କାଦାମ୍।” 29ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ ଏନ୍ନେ ନେଦ୍ହି ମାଲ୍କାରିନ୍ ଏକାର୍ ପାର୍ମେଶ୍ୱାର୍ସ୍କି ରାଜୀଘି ଲାଗାନ୍ ଆଡ଼୍ପାପାଲି, ମାଏକିନିଆଁ ଭାଇଜାମାରିନ୍, ଆୟାଙ୍ଗ୍-ବାଙ୍ଗ୍, ଆରୁ ହାଦ୍ଦୁବଚ୍ଚରିନ୍ ଆମ୍ଵେଇ ଚିଚ୍ଚକାରର୍; 30ଆ ଆଲାସ୍କେ ଇ ଦୁନିଆଁନୁ ଢେର୍ବାଗ୍ଗେ ହାଖ୍ଖରଦ୍ ଆରୁ ସେପୁର୍ନୁ ସବୁଦିନ୍ତା ଜୀବନ୍ହି ଜରୁର୍ ହାଖ୍ଖର।”
ଯୀଶୁସ୍ ତାଙ୍ଘା ମରନ୍ଘି ବାରେନୁ ଭବିଷତ୍ କାତ୍ଥା ତେଙ୍ଗାଲ୍ଦାସ୍
(ମାତିସ୍ ୨୦:୧୭-୧୯; ମାର୍କୁସ୍ ୧୦:୩୨-୩୪)
31ଆନ୍ତିନ୍ ଯୀଶୁସ୍ ବାର ଚେଲାଜାମାରିନ୍ ଭିନେ ତାରା ହୋଇକିରି ଆବ୍ଡ଼ାରିନ୍ ତେଙ୍ଗିୟାସ୍, “ଏରା, ନାମ୍ ଯେରୁଶାଲେମ୍ କାଲ୍ଦାତ୍, ମୁନୁଷ୍ ହାଦ୍ଦୁସ୍କି ବାରେନୁ ନାବୀଜାମାର୍ ଏକାନ୍ ଲେଖ୍ଚ୍କାନାଏ, ଆବ୍ଡ଼ା ଜାମାଦ୍ ପୁରା ମାନ୍ନାବାଲା ରାଇଦ୍। 32ଏନ୍ଦେର୍ଗେକା ଆସ୍ ଦୁସ୍ରା ଜାତିୟାର୍ଘି ହେଖ୍ଖାନୁ ସୋଁପାଚାକସ୍, ଆରୁ ଆବ୍ଡ଼ାର୍ ଆସ୍କି ମାଜାକ୍ ଉଡ଼ାବର୍; ଆସିନ୍ ସାତାବର୍, ଆରୁ ଆସ୍କି ମିଆଁ ତୁପ୍ଫର୍, 33ଆସିନ୍ କୋଡ୍ରାତି ଡେମର୍, ଆରୁ ପିଟର୍ଚର୍; ଲେକିନ୍ ଆସ୍ ତିସ୍ରା ଉଲ୍ଲା ଉଜ୍ଜସ୍କସ୍।” 34ଲେକିନ୍ ଆ ବାର ଖାସ୍ଚେଲାଜାମାର୍ ଇବ୍ଡ଼ା କାତ୍ଥାନ୍ ମା ବୁଝ୍ରାର୍; ଇ କାତ୍ଥାଦ୍ ତାହ୍ମାସାନ୍ ନୁହ୍ରାଦ୍ ଆରୁ ରାଚା, ଆରୁ ଏକାନ୍-ଏକାନ୍ ତେଙ୍ଗାକେର୍କିଚା ଆବ୍ଡ଼ାର୍ ଆବନ୍ ବୁଝ୍ରା ପଲ୍ଲିୟାର୍।
ଯୀଶୁସ୍ ଅଣ୍ଟା କାଁଣାସିନ୍ ବାନେ କାମାଲ୍ଦାସ୍
(ମାତିସ୍ ୨୦:୨୯-୩୪; ମାର୍କୁସ୍ ୧୦:୪୬-୫୨)
35ଅନ୍ଦୁଲ୍ ଯୀଶୁସ୍ ଯେରିଖୋ ସହର୍ ଚାହାନୁ ଆଣସାଲିୟାସ୍, ଅଣ୍ଟା କାଁଣାସ୍ ସଡ଼କ୍ଘି ଖାଁଣିନୁ ଅକ୍କିକିରି ଭିଖ୍ ନିଆଲିୟାସ୍। 36ଆସ୍ ଭିଡ଼୍ଘି ଏକ୍ନା ଶବଦ୍ ମେନିକିରି ମେନ୍ଚାସ୍, “ଇଦ୍ ଏନ୍ଦେର୍ ମାନାଲି?” 37ଆଲାର୍ ଆସିନ୍ ତେଙ୍ଗିୟାର୍, “ନାଜ୍ରେତ୍ତା ଯୀଶୁସ୍ ଇ ପାବୁନୁ କାଲ୍ଦାସ୍,” 38ଆଙ୍ଗେନ୍ ଆସ୍ ଚିର୍ରା ରାଇକିରି ତେଙ୍ଗିୟାସ୍, “ହେ ଯୀଶୁ, ଦାଉଦ୍ସ୍କି ହାଦ୍ଦୁ, ଏଙ୍ଘା ମିଆଁ ଦାୟା କାମା।” 39ଲେକିନ୍ ଆଘ୍ଲି କାଲୁ ଆଲାର୍ ଆସିନ୍ କାଡ଼େ-କାଡ଼େ ରାଗେ ଧାମ୍କାଗେ ଲାଗ୍ଗିୟାର୍ ହାଲେହି ଆସ୍ ଆରୁହି ଜୋର୍ସେ ଚିର୍ରାରାଗେ ଲାଗ୍ଗିୟାସ୍, “ହେ ଦାଉଦ୍ସ୍କି ହାଦ୍ଦୁ, ଏଙ୍ଘା ମିଆଁ ଦାୟା କାମା।” 40ଆଙ୍ଗେନ୍ ଯୀଶୁସ୍ ଇଜ୍ଜାସ୍ ଆରୁ ଆସିନ୍ ତାଙ୍ଘା ଚାହାଗେ ଅନ୍ଦ୍ରାଗେ ହୁକୁମ୍ ଚିଚ୍ଚାସ୍, ଆରୁ ଆସ୍ ଚାହା ବାର୍ଚାସ୍ ତା ଯୀଶୁସ୍ ଆସିନ୍ ମେନ୍ଚାସ୍, ଏନ୍ଦେର୍ ବେଦ୍ଦାଲ୍ଦାଏ? 41“ଏନ୍ ନିଙ୍ଗାଗେ ଏନ୍ଦେର୍ କାମନ୍ବୁଲି ଚାହାଁଲ୍ଦାଏ?” ଆସ୍ ତେଙ୍ଗିୟାସ୍, “ହେ ପ୍ରାଭୁ, ଏନ୍ ଏରା ଅଙ୍ଗନ୍।” 42ଯୀଶୁସ୍ ଆସିନ୍ ତେଙ୍ଗିୟାସ୍, “ଏରା; କାଲା, ନିଙ୍ଘାଏ ବିଶ୍ଵାସ୍ ନିଙ୍ଗାନ୍ ବାନେ କାମ୍ଚା।” 43ଆଖାନେନ୍ ଆସ୍ ଏରା ଅଙ୍ଗିୟାସ୍ ଆରୁ ପାର୍ମେଶ୍ଵାର୍ସ୍କି ସ୍ତୁତି କାମ୍ତେ ଯୀଶୁସ୍କି ପାଛ୍ଲି-ପାଛ୍ଲି କାଲା ଲାଗ୍ଗିୟାସ୍; ଆରୁ ଜାମା ଆଲାର୍ ଇବନ୍ ଏରିକିରି ପାର୍ମେଶ୍ଵାର୍ସ୍କି ସ୍ତୁତି ମାହିମା କାମ୍ଚାର୍।
19ଜଖିୟସ୍ ଯୀଶୁସିନ୍ ଗ୍ରହନ୍ କାମାଲ୍ଦାସ୍
1ଅନ୍ଦୁଲ୍ ଯୀଶୁସ୍ ଯେରିଖୋ ସହର୍ କର୍ଚାସ୍ ଆରୁ ଆଘ୍ଲି କାଲିୟାସ୍। 2ଆରୁ ଏରା ଆସାନ୍ ଜଖିୟ ନାମେଘି ଅଣ୍ଟା ଆଲାସ୍ ରାଚାସ୍ ଆରୁ ଆସ୍ ଅଣ୍ଟା ମୁଖ୍ୟା ମାଲ୍ଗୁଜାରୀ ଉକ୍ରୁ ଆରୁ ଧନୀ ଆଲାସ୍ ରାଚାସ୍। 3ଯୀଶୁସ୍ ଏସ୍କେ ରାଦାସ୍ ଆବନ୍ ଆସ୍ ଏରା ବେଦ୍ଦାଲିୟାସ୍, ଲେକିନ୍ ଆଲାର୍ଘି ଭିଡ଼୍ଘି ଚାଲ୍ତେ ଏରା ପଲ୍ଲାଲିୟାସ୍, ଏନ୍ଦେର୍ଗେକା ଆସ୍ ଠେପ୍ନା ରାଚାସ୍। 4ଆଙ୍ଗେନ୍ ଆସ୍ ଆଘ୍ଲିତାରା କୁଦ୍ୟାରାନାତି କେରାସ୍ ଆରୁ ଯୀଶୁସିନ୍ ଏରାଗେ ଅଣ୍ଟା ବାଡ଼୍କା ଡୁମାରି ମାନ୍ନୁନୁ ଆର୍ଗିୟାସ୍, ଏନ୍ଦେର୍ଗେକା ଯୀଶୁସ୍ ହୁ ପାବୁନୁନ୍ କାନାବାଲା ରାଚାସ୍। 5ଯେତ୍କବାକେନ୍ ଯୀଶୁସ୍ ଆ ମାନ୍ନୁ ଚାହାଗେ ଆଣ୍ସିୟାସ୍, ତା ମିଆଁ ଏରିକିରି ଜଖିୟସିନ୍ ତେଙ୍ଗିୟାସ୍, “ଏ ଜଖିୟ! ଚାଁଣେ କିୟାଁ ଏତ୍ତାବାରା; ଏନ୍ଦେର୍ଗେକା ଇନ୍ନା ଏଙ୍ଗାଗେ ଜରୁର୍ ନିଙ୍ଘା ଆଡ଼୍ପାନୁ ରାନା ଆତ୍ତଲି।” 6ଆଙ୍ଗେନ୍ ଆସ୍ ଚାଁଣେ କିୟାଁ ଏତ୍ତିୟାସ୍ ଆରୁ ମୁରୁକ୍ ଖୁସୀମନ୍ତି ଯୀଶୁସିନ୍ ତାଙ୍ଘା ଆଡ଼୍ପା ଅଚ୍ଚାସ୍। 7ଇବନ୍ ଏରିକିରି ଜାମା ଆଲାର୍ କୁର୍ବୁର୍ରିକିରି ତେଙ୍ଗା ଲାଗ୍ଗିୟାର୍, “ଆସ୍ ଅଣ୍ଟା ପାପୀ ଆଲାସ୍କି ଆଡ଼୍ପାନୁ ରାଗେ କେର୍କାଦାସ୍।” 8ଲେକିନ୍ ଜଖିୟସ୍ ଇଜ୍ଜାସ୍ ଆରୁ ପ୍ରାଭୁସିନ୍ ତେଙ୍ଗିୟାସ୍, “ହେ ପ୍ରାଭୁ, ଏରା, ଏନ୍ ଏଙ୍ଘା ଆଧା ସମ୍ପତ୍ତିବନ୍ ଗରୀବ୍ ଆଲାର୍ଗେ ଚିଆ ଲାଗ୍ଗାଲ୍ଦାନ୍, ଆରୁ ଯଦି ବଇମାନ୍ତି ନେଖ୍ରିନ୍ସ୍ତି ଏନ୍ଦ୍ରିନ୍ ଅଚ୍କାରନ୍ ହାଲେ ଆଦ୍ଘି ଚାର୍ ଗୁଣ୍ କିର୍ତାଚାଲ୍ଦାନ୍।” 9ଆଙ୍ଗେନ୍ ଯୀଶୁସ୍ ଜଖିୟସିନ୍ ତେଙ୍ଗିୟାସ୍, “ଇନ୍ନା ଇ ଆଡ଼୍ପାନୁ ମୁକ୍ତି ବାର୍ଚ୍କିଚି, ଏନ୍ଦେର୍ଗେକା ଇସ୍ହି ଆବ୍ରାହାମ୍ସ୍କି ଅଣ୍ଟା ହାଦ୍ଦୁସ୍। 10ଏନ୍ଦେର୍ଗେକା ଏକାର୍ ଏଫ୍ସ୍ରାର୍ କେର୍କାନାଏ ଆବ୍ଡ଼ାରିନ୍ ବେଦ୍ଦାଗେ ଆରୁ ବାଛାବାଗେ ମୁନୁଷ୍ ହାଦ୍ଦୁସ୍ ବାର୍ଚ୍କାଦାସ୍।”
ସୋନା ପାଏସାଘି ନମୁନା
11ଯେତ୍କବାକେନ୍ ଆଲାର୍ ଇ କାତ୍ଥାଗୁଠିନ୍ ମେନାଲିୟାର୍, ତା ଯୀଶୁସ୍ ଆରୁ ଅଣ୍ଟା ନମୁନା ଶୁଣାବାଚାସ୍, ଏନ୍ଦେର୍ଗେକା ଆସ୍ ଯେରୁଶାଲେମ୍ଘି ଚାହାନୁ ରାଚାସ୍, ଆରୁ ଆବ୍ଡ଼ାର୍ ସୋଚାଲିୟାର୍ କା ପାର୍ମେଶ୍ଵାର୍ସ୍କି ରାଜୀ ଢେର୍ ଚାଁଣେ ବାର୍ନାବାଲା ରାଇଦ୍। 12ଆଙ୍ଗେନ୍ ଆସ୍ ତେଙ୍ଗିୟାସ୍, “ଅଣ୍ଟା ଧନୀ ଆଲାସ୍ ରାଜା ମାନିକିରି କିର୍ନା ବାର୍ନାଘି ସୋଚ୍ବନ୍ ହୋଇକିରି ପର୍ଦେଶ୍ ବୁଙ୍ଗିୟାସ୍ କେରାସ୍। 13ଆସ୍ ତାଙ୍ଘାଏ ଦଶ୍ଲୋକ୍ ଗୁତ୍ତିୟାରିନ୍ ମେହିଁୟାସ୍ ଆରୁ ଅଣ୍ଟା-ଅଣ୍ଟା ସୋନାଘି ପାଏସା ଚିଇକିରି ତେଙ୍ଗିୟାସ୍, ‘ଏଙ୍ଘା କିର୍ନାତକ୍ ଇବନ୍ ବେପାର୍ କାମା।’ 14ଲେକିନ୍ ଆସ୍ ଦେଶ୍ବାସୀର୍ ଆସିନ୍ ହାଁଣାଲିୟାର୍, ଆରୁ ଆବ୍ଡ଼ାର୍ ଆସ୍କି ପାଛ୍ଲି ଖବର୍ ଚିଉ ଆଲାରିନ୍ ତେଙ୍ଗା ତାଇଆର୍, ‘ଏମ୍ ମା ଚାହଁଦାମ୍ କା ଇ ଆଲାସ୍ ଏହ୍ମା ମିଆଁ ଶାସନ୍ କାମ୍ନାସ୍।’”
15“ଯେତ୍କବାକେନ୍ ଆ ଧନୀ ଆଲାସ୍ ରାଜା ମାନିକିରି ନିଜର୍ ଦେଶ୍ କିର୍ରିୟାସ୍ ବାର୍ଚାସ୍, ତା ଆସ୍ ଏକା ଗୁତ୍ତିୟାର୍ଗେ ସୋନା ପାଏସା ଚିଚ୍କାଦାସ୍, ଆବ୍ଡ଼ାର୍ କେତ୍କ-କେତ୍କ ବେପାର୍ନୁ କାମାବାଚ୍କାନାଏ ଆବନ୍ ଆହାଗେ ତାଙ୍ଘା ଚାହାଗେ ଆବ୍ଡ଼ାରିନ୍ ମେହାଁ ତାଇୟାସ୍। 16ଆଙ୍ଗେନ୍ ପହ୍ଲେ ଗୁତ୍ତିୟାସ୍ ବାରିକିରି ତେଙ୍ଗିୟାସ୍, ‘ହେ ମାଲିକ୍, ନିହ୍ମା ଅଣ୍ଟା ସୋନାଘି ପାଏସାନ୍ତି ଦଶେଟା ସୋନାଘି ପାଏସା କାମାବାଚ୍କାଦାନ୍।’ 17ମାଲିକ୍ସ୍ ଆସିନ୍ ତେଙ୍ଗିୟାସ୍, ‘ସାବାସ୍, ନିନ୍ ବାନେ ଗୁତ୍ତିଆୟ! ନିନ୍ ଛୋଟେ-ଛୋଟେ କାତ୍ଥାନୁ ଇମାନ୍ଦାର୍ ଉର୍କାଏ, ହୁଦ୍ଘିଲାଗାନ୍ ନିଙ୍ଗାଗେ ଦଶେଟା ସହର୍ଘି ମିଆଁ ହକ୍ ହାଖ୍ଖରଦ୍।’ 18ଆରୁ ଦୁସ୍ରା ଗୁତ୍ତିୟାସ୍ ବାରିକିରି ତେଙ୍ଗିୟାସ୍, ‘ହେ ମାଲିକ୍, ନିହ୍ମା ଅଣ୍ଟା ସୋନାଘି ପାଏସାନ୍ତି ପାଞ୍ଚେଟା ସୋନାଘି ପାଏସା କାମାବାଚ୍କାଦାନ୍।’ 19ଆରୁ ମାଲିକ୍ସ୍ ଆସିନ୍ହି ତେଙ୍ଗିୟାସ୍, ‘ନିଙ୍ଗାଗେହି ପାଞ୍ଚେଟା ସହର୍ଘି ମିଆଁ ହକ୍ ହାଖ୍ଖରଦ୍।’ 20ତିସ୍ରା ଗୁତ୍ତିୟାସ୍ ବାରିକିରି ତେଙ୍ଗିୟାସ୍, ‘ହେ ମାଲିକ୍, ଏରା ଇଦ୍ ନିହ୍ମା ସୋନାଘି ପାଏସା, ଏନ୍ ଇବନ୍ ଗାମ୍ଛାନୁ ହିଁଇକିରି ଉଇକାନ୍ ଚିଚ୍କାଦାନ୍। 21ଏନ୍ ନିମାନ୍ ଏଲ୍ଚାଲ୍କାନ୍, ଏନ୍ଦେର୍ଗେକା ନିମ୍ କାଠୋର୍ ଆଲାର୍: ନିମ୍ ଏକାନ୍ ମା ଠୁଢ଼ିୟାଦାର୍ ଆବନ୍ ଅଥର୍ଦାର୍, ଆରୁ ଏକାନ୍ ମା ଚାହ୍ଦାର୍ ଆବନ୍ ହଏଦାର୍।’”
22“ମାଲିକ୍ସ୍ ଆସିନ୍ ତେଙ୍ଗିୟାସ୍, ‘ହେ ବଦ୍ମାସ୍ ଗୁତ୍ତିଆୟ, ଏନ୍ ନିଙ୍ଘାଏ ତେଙ୍କା କାତ୍ଥାନ୍ତି ନିନ୍ ନିଙ୍ଗାନ୍ ଦୋଷୀ କାମାଲ୍ଦାନ୍। ନିନ୍ ଆହାଲ୍କାଏକା ଏନ୍ କାଠୋର୍ ରାଦାନ୍, ଏକାନ୍ ଏନ୍ ମା ଠୁଡ଼ିୟାଦାନ୍ ଆବନ୍ ଅଥର୍ଦାନ୍, ଆରୁ ଏକାନ୍ ମା ଚାହ୍ଦାନ୍ ଆବନ୍ ହଏଦାନ୍; 23ହାଲେ ନିନ୍ ଏଙ୍ଘା ପାଏସାବନ୍ ବ୍ୟାଙ୍କ୍ନୁ ଏନ୍ଦେର୍ଗେ ମା ଉଇକାଏ? ଉଇକାରୟନେ ହାଲେ ଏନ୍ କିର୍ରିକିରି ଆବନ୍ ସୁଧ୍ ମୂଲ୍ନୁ ଅଚ୍କାରନ୍ନେ।’ 24ଆରୁ ମାଲିକ୍ସ୍ ଚାହାନୁ ଇଜ୍ଜକା ଆଲାରିନ୍ ତେଙ୍ଗିୟାସ୍, ‘ଇସ୍ତି ଆ ସୋନାଘି ପାଏସାବନ୍ ହୋଇକିରି, ନେଖାସାନ୍ ଦଶେଟା ସୋନାଘି ପାଏସା ରାଇଦ୍ ଆସ୍କେ ନିନ୍ ଚିଆଲାଗା।’ 25ଆଙ୍ଗେନ୍ ଆବ୍ଡ଼ାର୍ ମାଲିକ୍ସିନ୍ ତେଙ୍ଗିୟାର୍, ‘ଏ ମାଲିକ୍, ଇସ୍ସାନ୍ତା ଦଶେଟା ସୋନାଘି ପାଏସା ରାଇଦ୍।’ 26ମାଲିକ୍ସ୍ ତେଙ୍ଗିୟାସ୍, ‘ଏନ୍ ନିମାନ୍ ତେଙ୍ଗାଲ୍ଦାନ୍ ନେଖାସାନ୍ ରାଇ, ଆସ୍କେ ଚିଆକୋ; ଲେକିନ୍ ନେଖାସାନ୍ ମାଲ୍ଲାଦିନ୍, ଆସ୍ତି ଆବନ୍ହି ହୁଆକଦ୍ ଏକାଦ୍ କା ତାଙ୍ଘାସାନ୍ ରାଇଦ୍। 27ଲେକିନ୍ ଏଙ୍ଘା ଆ ବିରୋଧି ଜାମାରିନ୍ ଏକାର୍ ମା ଚାହାଁଲିୟାର୍ କା ଏନ୍ ତାହ୍ମା ମିଆଁ ଶାସନ୍ କାମନ୍, ଆବ୍ଡ଼ାରିନ୍ ଇୟା ଅନ୍ଦ୍ରିକିରି ଏଙ୍ଘା ଆଘ୍ଲି ପିଟାଚା’।” 28ଏତ୍କ ତେଙ୍ଗିକିରି ଯୀଶୁସ୍ ତାଙ୍ଘା ନମୁନା ବନ୍ଦ କାମ୍ଚାସ୍ ଆରୁ ଯେରୁଶାଲେମ୍ ତାରା କାଲା ଲାଗ୍ଗିୟାସ୍।
ଯେରୁଶାଲେମ୍ନୁ ଯୀଶୁସ୍କି କର୍ନା
(ମାତିସ୍ ୨୧:୧-୧୧; ମାର୍କୁସ୍ ୧୧:୧-୧୧; ଯୋହାନ୍ ୧୨:୧୨-୧୯)
29ଯେତ୍କବାକେନ୍ ଯୀଶୁସ୍ ଆରୁ ତାଙ୍ଘା ଚେଲାର୍ ଜାଇତୁନ୍ ପାର୍ତ୍ତାଘି ବେତ୍ଫାଗେ ଆରୁ ବେଥାନିୟା ପାଡ଼ା ଚାହାଗେ ଆଣସିୟାର୍, ତା ଯୀଶୁସ୍ ତାଙ୍ଘା ଦୁଇ ଲୋକ୍ ଚେଲାରିନ୍ ଏନ୍ନେ ତେଙ୍ଗିକିରି ତାଇୟାସ୍, 30“ଆଘ୍ଲିନ୍ତା ପାଡ଼ାଗେ କାଲା; ଆସାନ୍ ଆଣ୍ସ୍କାନ୍ନ୍ତି ନିମ୍ ଅଣ୍ଟା ଗାଧାହାଦ୍ଦୁ ହିଁଚ୍କା ହାଖ୍ଖର୍ ଆଦ୍ଘି ମିଆଁ ଇନ୍ନାତକ୍ ନେଦ୍ହି ମାଲ୍ଲା ଅକ୍କୁର୍, ଆବନ୍ କୋଲ୍ଲିକିରି ଇସାନ୍ ଅନ୍ଦ୍ରକେ ବାର୍କେ। 31ଯଦି ନେଦିନ୍ ନିମାନ୍ ମେନର୍ କା ନିମ୍ ଇବନ୍ ଏନ୍ଦେର୍ଗେ କଲ୍ଲାଲ୍ଦାର୍, ତା ନିମ୍ ତେଙ୍କେ ପ୍ରାଭୁସ୍କେ ଇଦ୍ଘି ଦାର୍କାର୍ ରାଇଦ୍।” 32ଏକାରିନ୍ ତାଏକା ରାଚା, ଆବ୍ଡ଼ାର୍ କାଇକିରି ଯୀଶୁସ୍ ଏସ୍କେ ତେଙ୍କାଚାସ୍ ଆନ୍ନେନ୍ ହାଖ୍ଖୀୟାର୍। 33ଯେତ୍କବାକେନ୍ ଆବ୍ଡ଼ାର୍ ଗାଧାହାଦ୍ଦୁବନ୍ କଲ୍ଲାଲିୟାର୍, ତା ଆ ଗାଧାଘି ମାଲିକ୍ ଜାମାର୍ ଆବ୍ଡ଼ାରିନ୍ ମେନ୍ଚାର୍, “ଇ ଗାଧାହାଦ୍ଦୁନ୍ ଏନ୍ଦେର୍ଗେ କଲ୍ଲାଲ୍ଦାର୍?” 34ଆବ୍ଡ଼ାର୍ ତେଙ୍ଗିୟାର୍, “ପ୍ରାଭୁସ୍କେ ଇଦ୍ଘି ଦାର୍କାର୍ ରାଇ।” 35ଆଙ୍ଗେନ୍ ଆବ୍ଡ଼ାର୍ ଆ ଗାଧାହାଦ୍ଦୁବନ୍ ଯୀଶୁସ୍କି ଚାହାଗେ ଅନ୍ଦ୍ରାର୍, ଆରୁ ଗାଧାହାଦ୍ଦୁଘି ମିଆଁ ତାହ୍ମା ଚିଢ଼ାନ୍ ଆଟ୍ଟେଇଚାର୍ ଯୀଶୁସ୍ ଆଦ୍ଘି ମିଆଁ ଅକ୍କିୟାସ୍। 36ଯେତ୍କବାକେନ୍ ଯୀଶୁସ୍ କାଲିୟାସ୍, ତା ଆସିନ୍ ସ୍ୱାଗାତ୍ କାମାଗେ ଆବ୍ଡ଼ାର୍ ପାବୁନୁ ତାହ୍ମା ଚିଢ଼ାବନ୍ ଆଟ୍ଟେଇଚାର୍। 37ଆରୁ ଯେତ୍କବାକେନ୍ ଆସ୍ ଜାଇତୁନ୍ ପାର୍ତ୍ତାଘି ଉତ୍ରେନ୍ଗେ ଆଣ୍ସିୟାସ୍, ହତ୍କବାକେନ୍ ଜାମା ଚେଲାଜାମାର୍ ଆବ୍ଡ଼ା ଜାମା ଶକ୍ତିଘି ନାଲ୍ଖୁଘି ଲାଗାନ୍ ଏକାନ୍ କା ଆବ୍ଡ଼ାର୍ ଏର୍କାଚାର୍ ଖୁସୀ ମାନାବାଇକିରି ଜୋର୍ସେ ଚିର୍ରା ରାଇକିରି ପାର୍ମେଶ୍ଵାର୍ସ୍କି ସ୍ତୁତି କାମ୍ତେ ତେଙ୍ଗିୟାର୍, 38“ପ୍ରାଭୁସ୍କି ନାମେନୁ ଏକା ରାଜାସ୍ ବାରାଲ୍ଦାସ୍, ଆସ୍ ଧଏନ୍ ରାଦାସ୍! ସରଗ୍ନୁ ଶାନ୍ତି ଆରୁ ଜାମାର୍ଘିନ୍ତି ମିଆଁ ରୁ ପାର୍ମେଶ୍ଵାର୍ସ୍କି ମାହିମା ମାନ୍ନାଦ୍!” 39ଆ ଆଲାର୍ଘି ଭିଡ଼୍ନୁ କେତ୍କ ଲୋକ୍ ଫାରିସୀ ଜାମାର୍ହି ରାଚାର୍ ଆବ୍ଡ଼ାର୍ ଯୀଶୁସିନ୍ ତେଙ୍ଗିୟାର୍, “ହେ ଗୁରୁ, ନିହ୍ମା ଚେଲାଜାମାରିନ୍ ଧାମ୍କା।” 40ଲେକିନ୍ ଯୀଶୁସ୍ ଯାବାବ୍ ଚିଚ୍ଚାସ୍, “ଏନ୍ ନିମାନ୍ ତେଙ୍ଗାଲ୍ଦାନ୍, ଯଦି ଇବ୍ଡ଼ାର୍ କାଡ଼େ-କାଡ଼େ ରର୍ତା ଚାଚାଦ୍ହି ଚିର୍ରାରାଗେ ଲାଗ୍ଗ।”
ଯୀଶୁସ୍ ଯେରୁଶାଲେମ୍ଘି ମିଆଁ ଦୁଃଖୁ ମାନ୍ଚାସ୍
41ଯେତ୍କବାକେନ୍ ଯୀଶୁସ୍ ଯେରୁଶାଲେମ୍ଗେ ଆଣ୍ସିୟାସ୍ ତା ଆସ୍ ସହର୍ବନ୍ ଏରିକିରି ଅହ୍ଲା ଲାଗ୍ଗିୟାସ୍, 42ଆରୁ ତେଙ୍ଗିୟାସ୍, “ଇ ଉଲ୍ଲାନୁ ନିନ୍ ଶାନ୍ତିଘି କାତ୍ଥାନ୍ ଆହୟନେ, ତା ଆଦ୍ ବାନେ ମାନଦ୍ନେ ଲେକିନ୍ ଆକ୍କୁନ୍ ଆଦ୍ ନିଙ୍ଘା ହାନ୍ନୁସ୍ତି ନୁହୁରା କେର୍କିଚି। 43ଏନ୍ନେ ସାମାୟ ନିଙ୍ଘା ମିଆଁ ବାରଦ୍ ଯେତ୍କବାକେନ୍ ନିଙ୍ଘା ବିରୋଧି ଜାମାର୍ ନିଙ୍ଘା ଚାର୍ହି ପାଖା ଗାଡ୍ଡି ଆର୍ହର୍ ଆରୁ ନିଙ୍ଗାନ୍ ଛେକର୍ଚର୍, ଆରୁ ନିଙ୍ଘା ମିଆଁ ଚାର୍ହି ପାଖାତି ଚିପର୍; 44ଆବ୍ଡ଼ାର୍ ଜାମା ସହର୍ବନ୍ ଧାସ୍କର୍ଚର୍, ଆରୁ ଆଲାରିନ୍ ପିଟର୍ଚର୍। ନିଙ୍ଘା ସହର୍ନୁ ଅଣ୍ଟା ଚାଁଚାଘି ମିଆଁ ଆରୁ ଅଣ୍ଟା ଚାଁଚାବନ୍ ମା ଉଇନାଏ; ଏନ୍ଦେର୍ଗେକା ନିନ୍ ନିଜର୍ ପ୍ରାଭୁସ୍କି ବାର୍ନାଘି ସାମାୟବନ୍ ମା ଚିହ୍ନଚ୍କିନ୍।”
ଯୀଶୁସ୍ ମନ୍ଦିର୍ନୁ ବିଁଶୁ ଆଲାରିନ୍ ଅଥ୍ରାଲ୍ଦାସ୍
(ମାତିସ୍ ୨୧:୧୨-୧୭; ମାର୍କୁସ୍ ୧୧:୧୫-୧୯; ଯୋହାନ୍ ୨:୧୩-୨୨)
45ଆନ୍ତିନ୍ ଯୀଶୁସ୍ ମନ୍ଦିର୍ଗେ କାଇକିରି ବିଁଶୁ ଆଲାରିନ୍ ଏନ୍ନେ ତେଙ୍ଗିୟାସ୍, ଆରୁ ବାହ୍ରି ଅଥ୍ରେଇଚାସ୍ 46ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍ଚ୍କା ମାଲ୍ଲାଦିନ୍ କାଁଏ? ‘ଏଙ୍ଘା ଆଡ଼୍ପା ଜାମା ଆଲାର୍ଘି ଲାଗାନ୍ ବିନ୍ତିଘି ଆଡ଼୍ପା ତେଙ୍ଗାକୋ, ଲେକିନ୍ ନିମ୍ ଆବନ୍ ଡାକୁ ଜାମାର୍ଗେ ନୁହୁରାଗେ ଆଡ୍ଡା କାମ୍ଚ୍ଚେଇ ଚିଚ୍କାଦାର୍।’”
47ଯୀଶୁସ୍ ରୋଜ୍ ମନ୍ଦିର୍ନୁ ଉପ୍ଦେଶ୍ ଚିଆଲିୟାସ୍; ଲେକିନ୍ ମୁଖ୍ୟା ପୁରୋହିତ୍ଜାମାର୍, ପଣ୍ତିତ୍ଜାମାର୍ ଆରୁ ଆଲାର୍ଘି ପୁର୍ଖାଜାମାର୍ ଯୀଶୁସିନ୍ ପିଟାଗେ ଉପାୟ ବେଦ୍ଦାଲିୟାର୍। 48ଲେକିନ୍ ଆବ୍ଡ଼ାର୍ ଯୀଶୁସିନ୍ ପିଟାଗେ ଉପାୟ ସୋଚା ପଲ୍ଲାଲିୟାର୍, ଏନ୍ଦେର୍ଗେକା ଜାମା ଆଲାର୍ ମନ୍ ଧିୟାନ୍ସେ ଯୀଶୁସ୍କି ଉପ୍ଦେଶ୍ ମେନାଲିୟାର୍।
20ଯୀଶୁସ୍କି ହକ୍ଘି ମିଆଁ ପ୍ରଶ୍ନ
(ମାତିସ୍ ୨୧:୨୩-୨୭; ମାର୍କୁସ୍ ୧୧:୨୭-୩୩)
1ଅନ୍ଦୁଲ୍ ଯୀଶୁସ୍ ମନ୍ଦିର୍ନୁ ଆଲାରିନ୍ ଉପ୍ଦେଶ୍ ଚିଆଲିୟାସ୍ ଆରୁ ସୁସାମାଚାର୍ ଶୁଣାବାଲିୟାସ୍, ଆଙ୍ଗେନ୍ ମୁଖ୍ୟା ପୁରୋହିତ୍ ଆରୁ ପଣ୍ତିତ୍ଜାମାର୍ ପୁର୍ଖାର୍ଗାନେ ଯୀଶୁସ୍କି ଚାହାଗେ ବାରିକିରି ତେଙ୍ଗିୟାର୍, 2“ଏମାନ୍ ତେଙ୍ଗା, କା ନିନ୍ ଏନ୍ଦେର୍ ହକ୍ତି ଇ ଜାମାନ୍ କାମାଲ୍ଦାଏ, ଆରୁ ନେଦ୍ ନିଙ୍ଗାଗେ ଇ ହକ୍ ଚିଚ୍ଚାର୍?” 3ଲେକିନ୍ ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ଏନ୍ହି ନିମାନ୍ ଅଣ୍ଟା ପ୍ରଶ୍ନ ମେନାଗେ ବେଦ୍ଦାଲ୍ଦାନ୍। 4ନିମ୍ ଏଙ୍ଗାନ୍ ତେଙ୍ଗା, କା ଆସ୍ନାନ୍ ଚିୟାଗେ ଯୋହାନ୍ସ୍କେ ନେଦ୍ ହକ୍ ଚିଚ୍ଚାର୍ ପାର୍ମେଶ୍ୱାର୍ସ୍ ଚିଚ୍ଚାସ୍ କା ଆଲାର୍ ଚିଚ୍ଚାର୍?” 5ଆବ୍ଡ଼ାର୍ ତାମ୍-ତାମ୍ କାଚ୍ନେଖ୍ରା ଲାଗ୍ଗିୟାର୍, “ଯଦି ନାମ୍ ପାର୍ମେଶ୍ଵାର୍ସ୍ ହକ୍ ଚିଚ୍ଚକାଦାସ୍ ବୁଲି ତେଙ୍ଗତ୍ ତା ଆସ୍ ମେନସ୍ ନିମ୍ ଏନ୍ଦେର୍ଗେ ଆସ୍କି ମିଆଁ ବିଶ୍ୱାସ୍ ମା କାମ୍ଚ୍କାର୍? 6ଲେକିନ୍ ଯଦି ନାମ୍ ତେଙ୍ଗତ୍, ଆଲାର୍ ହକ୍ ଚିଚ୍କାନାଏ ତା ଆଲାର୍ ନାମାନ୍ ଚାଁଚାତି ଡେମର୍ ଏନ୍ଦେର୍ଗେକା ସତ୍ତୁନିନ୍ ଆହାଲିୟାର୍ କା ଯୋହାନ୍ସ୍ ନାବୀ ରାଚାସ୍।” 7ହୁଦ୍ଘିଲାଗାନ୍ ଆବ୍ଡ଼ାର୍ ଯାବାବ୍ ଚିଚ୍ଚାର୍, “ଯୋହାନ୍ସ୍କେ ନେଦ୍ ହକ୍ ଚିଚ୍ଚାର୍ ଏମ୍ ବାଲ୍ଦାମିନ୍।” 8ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ହାଲେ ଏନ୍ହି ନିମାନ୍ ମା ତେଙ୍ଗ୍ଦାନ୍ କା ଏନ୍ଦେର୍ ହକ୍ତି ଇବ୍ଡ଼ା ଜାମାନ୍ କାମାଲ୍ଦାନ୍।”
ଖାରାପ୍ ଚାଷୀ ଆଲାର୍ଘି ନମୁନା
(ମାତିସ୍ ୨୧:୩୩-୪୬; ମାର୍କୁସ୍ ୧୨:୧-୧୨)
9ଇଦ୍ଘି ପାଛ୍ଲି ଯୀଶୁସ୍ ଆଲାରିନ୍ ଇ ନମୁନା ଶୁଣାବାଚାସ୍: “ଅଣ୍ଟା ଆଲାସ୍ ତାଙ୍ଘା ବାଟ୍କିନୁ ଅଙ୍ଗୁର୍ ଇଦ୍ଦାସ୍, ଆରୁ ଆବନ୍ ଚାଷୀ ଆଲାର୍ଗେ ଠିକା ଚିଚ୍ଚାସ୍ ଆରୁ ଢେର୍ ଉଲ୍ଲାଘି ଲାଗାନ୍ ଆସ୍ ପର୍ଦେଶ୍ ବୁଙ୍ଗିୟାସ୍ କେରାସ୍। 10ଆରୁ ଯେତ୍କବାକେନ୍ ଅଙ୍ଗୁର୍ ଚହ୍ନାଘି ସାମାୟ ବାର୍ଚା, ତା ଆସ୍ ତାଙ୍ଘା ଭାଗୁନ୍ତା ଅଙ୍ଗୁର୍ବନ୍ ଅନ୍ଦ୍ରାଗେ ତାଙ୍ଘା ଅଣ୍ଟା ଗୁତ୍ତିୟାସିନ୍ ଆ ଚାଷୀ ଆଲାର୍ସାନ୍ ତାଇୟାସ୍। ଲେକିନ୍ ଚାଷୀ ଆଲାର୍ ଆ ଗୁତ୍ତିୟାସିନ୍ ଧାରିକିରି ମାର୍ପିଟ୍ କାମ୍ଚାର୍ ଆରୁ ଖାଲି ହେଖ୍ଖା କିର୍ତେଇଚାର୍। 11ଆନ୍ତିନ୍ ଆସ୍ ଆରୁ ଅଣ୍ଟା ଦୁସ୍ରା ଗୁତ୍ତୟାସିନ୍ ତାଇୟାସ୍, ଲେକିନ୍ ଆବ୍ଡ଼ାର୍ ଆସିନ୍ହି ମାର୍ପିଟ୍ ଆରୁ ବେଜ୍ଜତ୍ କାମିକିରି ଖାଲି ହେଖ୍ଖା କିର୍ତେଇଚାର୍। 12ଆରୁ ଆସ୍ ତିସ୍ରା ଗୁତ୍ତିୟାସିନ୍ ତାଇୟାସ୍, ଆରୁ ଆବ୍ଡ଼ାର୍ ଆସିନ୍ହି ଡେମ୍ଚାର୍ ଆରୁ ଦାର୍ମାରା କାମିକିରି ବାଟ୍କିଘି ବାହ୍ରି ଖେବ୍ଡ଼େଇଚାର୍।”
13“ଆଙ୍ଗେନ୍ ଅଙ୍ଗୁର୍ ବାଟ୍କିନ୍ ତା ମାଲିକ୍ସ୍ ତେଙ୍ଗିୟାସ୍, ‘ଏନ୍ ଏନ୍ଦେର୍ କାମନ୍? ଏନ୍ ଏଙ୍ଘାଏ ଦୁଲାଡ଼ି ହାଦ୍ଦୁସିନ୍ ତାଇୟନ୍, ଭାଏଲ୍ ଆବ୍ଡ଼ାର୍ ଆସ୍କି ମାଇନ୍ କାମର୍।’ 14ଲେକିନ୍ ଆସିନ୍ ଏରିୟାର୍ ତା ଚାଷୀଜାମାର୍ ଏନ୍ନେ ତେଙ୍ଗିକିରି ତାହ୍ମା ମାଝାନୁ ବିଚାର୍ କାମାଗେ ଲାଗ୍ଗିୟାର୍, ‘ଇସ୍ତା ବୁଆସ୍କି ସମ୍ପତ୍ତିଘି ହକ୍ଦାର୍ସ୍; ଗୁଚା, ନାମ୍ ଇସିନ୍ ପିଟ୍ଟତ୍ଚତ୍ ଏସ୍କେ କା ଇସ୍କି ସମ୍ପତ୍ତି ନାହ୍ମାଏ ମାନକୋ।’ 15ଆରୁ ଆବ୍ଡ଼ାର୍ ଆସିନ୍ ଅଙ୍ଗୁର୍ ବାଟ୍କିଘି ବାହ୍ରି ଅଚ୍ଚାର୍ ଆରୁ ପିଟ୍ଟେଇ ଚିଚ୍ଚାର୍।”
“ଆଙ୍ଗେନ୍ ଅଙ୍ଗୁର୍ ବାଟ୍କିନ୍ ତା ମାଲିକ୍ସ୍ ଆବ୍ଡ଼ାରିନ୍ ଏନ୍ଦେର୍ କାମସ୍? 16ଆସ୍ ବାରିକିରି ଆ ଚାଷୀ ଜାମାର୍ଘି ନାଶ୍ କାମସ୍, ଆରୁ ତାଙ୍ଘାଏ ଅଙ୍ଗୁର୍ ବାଟ୍କିନ୍ ଦୁସ୍ରାର୍ଗେ ଚିୟସ୍ ଲାଗ୍ଗସ୍।” ଇବନ୍ ମେନିକିରି ଆବ୍ଡ଼ାର୍ ତେଙ୍ଗିୟାର୍, “ଏନ୍ନେ ଏକ୍ଲାହି ମା ମାନ୍ନା କାତ୍ଥା।” 17ଲେକିନ୍ ଯୀଶୁସ୍ ଆବ୍ଡ଼ାର୍ ତାରା ଏରିକିରି ତେଙ୍ଗିୟାସ୍, “ହାଲେ ପାବିତାର୍ ଶାସ୍ତ୍ରନୁ ଏନ୍ଦେର୍ଗେ ଏନ୍ନେ ଲେଖ୍ଚ୍କା ରାଇ: ‘ରାଜ୍ମିସ୍ତ୍ରୀଜାମାର୍ ଏକା ଚାଁଚାନ୍ ବାଉନିକିରି ପାଖେଇ ଚିଚ୍କାଚାର୍, ଆଦ୍ କୋଣାନ୍ତା ଅସ୍ଲି ଚାଁଚା ମାନ୍ଚାକେରା।’ 18ନେଦିନ୍ ଆ ଚାଁଚା ମିଆଁ ଖାତ୍ରୋର୍ ଆବ୍ଡ଼ାର୍ ଟୁକ୍ଡ଼ା-ଟୁକ୍ଡ଼ା ମାନର୍କର୍, ଆରୁ ନେଖା ମିଆଁ ଆ ଚାଁଚାଦ୍ ଖାତ୍ରୋ, ଆବ୍ଡ଼ାରିନ୍ ଗୁଣ୍ଡା-ଗୁଣ୍ଡା କାମଚୋ।” 19ପଣ୍ତିତ୍ ଆରୁ ମୁଖ୍ୟା ପୁରୋହିତ୍ଜାମାର୍ ହୁ ସାମାୟନୁ ଆସିନ୍ ଧାର୍ତା ବେଦ୍ଦାଲିୟାର୍, ଏନ୍ଦେର୍ଗେକା ଆବ୍ଡ଼ାର୍ ବାନେକିରି ବୁଝ୍ରାର୍ କା ଯୀଶୁସ୍ ଇ ନମୁନାବନ୍ ନାହ୍ମା ବାରେନୁ ତେଙ୍ଗାଲ୍ଦାସ୍, ଲେକିନ୍ ଆର୍ ଆବ୍ଡ଼ାରିନ୍ ଏଲ୍ଚାଲିୟାର୍।
କାଇସର୍ ରାଜାସ୍କେ ମାଲ୍ଗୁଜାରୀ ଚିନା ଠିକ୍ଦ୍କା ମାଲ୍ଲିଦ୍?
(ମାତିସ୍ ୨୨:୧୫-୨୨; ମାର୍କୁସ୍ ୧୨:୧୩-୧୭)
20ଆରୁ ୟାହୁଦୀ ମୁଖ୍ୟାଜାମାର୍ ଯୀଶୁସିନ୍ ଫାସାବାଗେ ମୋଉକା ବେଦ୍ଦାଲିୟାର୍, ଆଦ୍ଘିଲାଗାନ୍ ଆବ୍ଡ଼ାର୍ ଆଲ୍ ଲାଗାବାଇକିରି ତାଇୟାର୍, ଏସ୍କେ କା ଆବ୍ଡ଼ାର୍ କପଟ୍ତି ନିଜ୍କେନିଜ୍ ଧାର୍ମିକ୍ ତେଙ୍ଗିକିରି ଯୀଶୁସିନ୍ ତାଙ୍ଘା କାତ୍ଥାଘି ଫାନ୍ଦାନୁ ଫାସାବର୍, ଆରୁ ଆସିନ୍ ରାଜା ଦେୱାନ୍ର୍ଘି ହେଖ୍ଖା ଆରୁ ଅଧିନ୍ନୁ ଚିଆ ଅଙ୍ଗର୍। 21ଆବ୍ଡ଼ାର୍ ଯୀଶୁସିନ୍ ମେନ୍ଚାର୍, “ହେ ଗୁରୁ, ଏମ୍ ଆହ୍ଦାମ୍ କା ନିମ୍ ଠିକ୍ ତେଙ୍ଗ୍ଦାର୍ ଆରୁ ଠିକ୍ ଶିଖାବାଦାର୍, ନିମ୍ ଅନ୍ପାଖିଆ ମାନିକିରି ମା କାଚ୍ନେଖ୍ର୍ଦାର୍, ଲେକିନ୍ ଜାମାରିନ୍ ସାମାନ୍ ଏର୍ଦାର୍ ଆରୁ ପାର୍ମେଶ୍ଵାର୍ସ୍କି ପାବୁନ୍ ସତ୍ତୁନ୍ ବାତାବାଦାର୍। 22କାଇସର୍ସ୍କେ ମାଲ୍ଗୁଜାରୀ ଚିନାଦ୍ ଠିକ୍ କା ମାଲ୍ଲିଦ୍?” 23ଯୀଶୁସ୍ ଆବ୍ଡ଼ାର୍ଘି ଚାଲାକ୍ବନ୍ ଏରିକିରି ତେଙ୍ଗିୟାସ୍, 24“ଏଙ୍ଗା ଅଣ୍ଟା ରୋମାନ୍ ସାର୍କାର୍ଘି ସିକ୍କା ଏଦା। ଇଦ୍ଘି ମିଆଁ ନେଖାଏ ଛାପା ଆରୁ ନେଖାଏ ନାମେଲେଖା ରାଇ?” ଆବ୍ଡ଼ାର୍ ତେଙ୍ଗିୟାର୍, “ରୋମ୍ ରାଜୀନ୍ ଶାସନ୍ କାମୁ କାଇସର୍ସ୍କି।” 25ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ତା ଏକାଦ୍ କାଇସ୍ର୍ସ୍କି, ଆବନ୍ କାଇସର୍ସ୍କେ ଚିଆ; ଆରୁ ଏକାଦ୍ ପାର୍ମେଶ୍ଵାର୍ସ୍କି, ଆବନ୍ ପାର୍ମେଶ୍ଵାର୍ସ୍କେ ଚିଆ।” 26ଆବ୍ଡ଼ାର୍ ଆଲାର୍ଘି ଆଘ୍ଲି ଯୀଶୁସ୍କି କାତ୍ଥାନୁ ଏନ୍ଦେର୍ହି ଦୋଷ୍ ଅଥ୍ରାଗେ ପଲ୍ଲିଆରିନ୍, ଆରୁ ଆସ୍କି କାତ୍ଥା ମିଆଁ ଆଚ୍ମିତ୍ ମାନ୍ଚାର୍ ଆରୁ ଆବ୍ଡ଼ାର୍ କାଡ଼େ-କାଡ଼େ ରାଚାର୍ କେରାର୍।
କେଚ୍ଚକା ଆଲାର୍ଘି ଆରୁଅହନ୍ ଉଜ୍ଜନାଘି ନମୁନା
(ମାତିସ୍ ୨୨:୨୩-୩୩; ମାର୍କୁସ୍ ୧୨:୧୮-୨୭)
27ଇଦ୍ଘି ପାଛ୍ଲି ସାଦ୍ଦୂକୀଜାମାର୍ ଆସାନ୍ ବାର୍ଚାର୍, ଆବ୍ଡ଼ାର୍ଘି ବିଶ୍ଵାସ୍ ଆତ୍ଲି କା କେଚ୍ଚକା ଆଲାର୍ଘି ଆରୁଅହନ୍ ଉଜ୍ଜନା ମା ମାନିଦ୍, ଆବ୍ଡ଼ାର୍ ଯୀଶୁସ୍କି ଚାହାଗେ ବାରିକିରି ମେନ୍ଚାର୍, 28“ହେ ଗୁରୁ, ମୁଶା ନାବୀସ୍ ଏମାଗେ ଏନ୍ନେ ନିୟମ୍ ଚିଚ୍ଚକାଦାସ୍: ‘ଯଦି ଅଣ୍ଟା ଆଲାସ୍ ବିନା ହାଦ୍ଦୁବଚ୍ଚନୁ ଖିଅସ୍କସ୍, ଆରୁ ତାଙ୍ଘା ମାଏକିନିଆଁ ର କୋ ତା ଆ କେଚ୍ଚକା ଆଲାସ୍କି ଭାଇସ୍ ଆ ମାଏକିନିଆଁବନ୍ ବେଞ୍ଜରିକିରି, ଆସ୍କି ଲାଗାନ୍ ହାଦ୍ଦୁବଚ୍ଚ ଜନମ୍ କାମସ୍।’ 29ମନେ କାମା ସାତ୍ଭାଇ ରାଚାର୍, ପହ୍ଲେ ଭାଇସ୍ ବେଞ୍ଜରାସ୍ ଆରୁ ବିନା ହାଦ୍ଦୁବଚ୍ଚ ମାନିକିରି କେଚ୍ଚାସ୍କେରାସ୍। 30ଦୁସ୍ରା ଭାଇସ୍, ଆସ୍କି ଭାଇସ୍କି ରାଣ୍ଡିବନ୍ ବେଞ୍ଜରାସ୍ ଆରୁ ବିନା ହାଦ୍ଦୁବଚ୍ଚନୁ କେଚ୍ଚାସ୍କେରାସ୍। 31ତିସ୍ରା ଭାଇସ୍ ଗାନେହି ଏନ୍ନେନ୍ ମାନ୍ଚା, ଅଣ୍ଟାସ୍କି ପାଛ୍ଲି ଅଣ୍ଟାସ୍ ଆ ଆଲିନ୍ ବେଞ୍ଜରାର୍ ଆରୁ ସାତ୍ ଭାଇରିନ୍ ବିନା ହାଦ୍ଦୁବଚ୍ଚନୁ କେଚ୍ଚାର୍ କେରାର୍। 32ଆରୁ ଜାମାର୍ସ୍ତି ଆଖ୍ରୀନୁ ଆ ମାଏକିନିଆଁଦ୍ହି କେଚ୍ଚାକେରା। 33ଖିଉ ଆଲାର୍ ଉଜ୍ଜକାନ୍ତି ଆ ଆଲିଦ୍ ଆବ୍ଡ଼ାର୍ଘି ଭିତର୍ନୁ ନେଖା ମାଏକିନିଆଁ ମାନୋ, ଏନ୍ଦେର୍ଗେକା ଆଦ୍ ସାତ୍ ଲୋକ୍ର୍ଘି ମାଏକିନିଆଁ ମାନ୍ଚା କେର୍କିଚା।” 34ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଇ ଯୁଗ୍ନୁ ମାର୍ଦ୍ନାର୍ ଆରୁ ମାଏକିନିଆଁର୍ ଏକ୍ ଦୁସ୍ରାରିନ୍ ବେଞ୍ଜର୍ନାଏ। 35ଲେକିନ୍ ବାର୍ନାବାଲା ଯୁଗ୍ନୁ ଖିଉ ଆଲାର୍ସ୍ତି ଉଜ୍ଜକା ପାଛ୍ଲି, ମାର୍ଦ୍ନାର୍ ଆରୁ ମାଏକିନିଆଁର୍ ଏକ୍ ଦୁସ୍ରାରିନ୍ ମା ବେଞ୍ଜର୍ନାଏ। 36ଆରୁ ଏକ୍ଲାହି ମା ଖିନାଏ; ଏନ୍ଦେର୍ଗେକା ଆବ୍ଡ଼ାର୍ ସରଗ୍ ଦୂଁତ୍ଜାମାର୍ଘି ଲେଖା ମାନର୍କର୍, ଆରୁ ଆବ୍ଡ଼ାର୍ କେଚ୍ଚକାନ୍ତି ଉଜ୍ଜନାଏ କାନାଏ ହୁଦ୍ଘିଲାଗାନ୍ ପାର୍ମେଶ୍ଵାର୍ସ୍କି ହାଦ୍ଦୁବଚ୍ଚ ମାନର୍କର୍। 37କେଚ୍ଚକାର୍ସ୍ତି ଉଜ୍ଜନାଘି ବାରେନୁ ମୁଶା ନାବୀସ୍ହି ଲାଘ୍ର୍ନା ହପ୍ପାଘି କାତ୍ଥାନୁ ପ୍ରକଟ୍ କାମ୍ଚ୍କାଦାସ୍ କା, ‘ଆସ୍ ପ୍ରାଭୁସିନ୍ ଆବ୍ରାହାମ୍ସ୍କି ପାର୍ମେଶ୍ୱାର୍, ଇସାକ୍ସ୍କି ପାର୍ମେଶ୍ୱାର୍ସ୍, ଆରୁ ୟାକୁବ୍ସ୍କି ପାର୍ମେଶ୍ଵାର୍ସ୍’ ବୁଲି ତେଙ୍ଗ୍ଦାସ୍। 38ପାର୍ମେଶ୍ଵାର୍ସ୍ ଖିଉ ଆଲାର୍ଘି ମାଲ୍ଲା ଲେକିନ୍ ଉଜ୍ଜୁ ଆଲାର୍ଘି ପାର୍ମେଶ୍ଵାର୍ସ୍: ଏନ୍ଦେର୍ଗେକା ଆସ୍କି ଚାହାନୁ ଜାମାର୍ ଉଜ୍ଜନାଏ।” 39ଆଙ୍ଗେନ୍ ପଣ୍ତିତ୍ଜାମାର୍ଘି ଭିତର୍ନୁ କେତ୍କ ଲୋକ୍ ଆସିନ୍ ତେଙ୍ଗିୟାର୍, “ହେ ଗୁରୁ, ନିମ୍ ବାନେଇନ୍ ତେଙ୍କାର୍।” 40ଇଦ୍ଘି ପାଛ୍ଲି ଆବ୍ଡ଼ାର୍ ଯୀଶୁସିନ୍ ଏନ୍ଦେର୍ହି ପ୍ରଶ୍ନ କାମାଗେ ସାହସ୍ ମା କାମ୍ଚାର୍।
ଖ୍ରୀସ୍ତ୍ ନେଖାଏ ହାଦ୍ଦୁସ୍
(ମାତିସ୍ ୨୨:୪୧-୪୬; ମାର୍କୁସ୍ ୧୨:୩୫-୩୭)
41ଆରୁଅହନ୍ ଯୀଶୁସ୍ ଆବ୍ଡ଼ାରିନ୍ ମେନ୍ଚାସ୍, “ଖ୍ରୀସ୍ତ୍ ଦାଉଦ୍ସ୍କି ହାଦ୍ଦୁସ୍ ବୁଲି ଏସ୍କେ ତେଙ୍ଗ୍ନାଏ? 42ଏନ୍ଦେର୍ଗେକା ଗୀତୁ ସଂହିତାନୁ ଦାଉଦ୍ସ୍ ନିଜ୍କେ ନିନ୍ ତେଙ୍କାଦାସ୍: ‘ପ୍ରାଭୁସ୍ ଏଙ୍ଘାଏ ପ୍ରାଭୁସିନ୍ ତେଙ୍ଗିୟାସ୍, 43ଯେତ୍କବାକେନ୍ତକ୍ ଏମ୍ ନିହ୍ମା ବିରୋଧିରିନ୍ ନିଙ୍ଘାଏ ହେଡ୍ଡୁ କିୟାଁ ମା କାମ୍ଦାନ୍ ଚିଦାନ୍, ହତ୍କବାକେନ୍ତକ୍ ନିନ୍ ଏଙ୍ଘାଏ ତିନାତାରା ଅକ୍କାରା।’ 44ଦାଉଦ୍ସ୍ ଖ୍ରୀସ୍ତ୍ସିନ୍ ପ୍ରାଭୁ ବାଦାସ୍; ତା ଆସ୍ ଏସ୍କେ ତାଙ୍ଘାଏ ହାଦ୍ଦୁ ମାନାଗେ ଅଙ୍ଗସ୍?”
ପଣ୍ଡିତ୍ ଜାମାର୍ସ୍ତି ସାବ୍ଧାନ୍ ରା
(ମାତିସ୍ ୨୩:୧-୩୬; ମାର୍କୁସ୍ ୧୨:୩୮-୪୦)
45ଯେତ୍କବାକେନ୍ ଜାମା ଆଲାର୍ ମେନାଲିୟାର୍, ତା ଯୀଶୁସ୍ ତାଙ୍ଘା ଚେଲାରିନ୍ ତେଙ୍ଗିୟାସ୍, 46“ପଣ୍ତିତ୍ ଜାମାର୍ସ୍ତି ସାବ୍ଧାନ୍ ରାକେ, ଆବ୍ଡ଼ାର୍ ଲାମ୍ଵା ମିର୍ଜୀ ଆତ୍ତନା ଆରୁ ହାଟ୍ଟେନୁ କୁଦ୍ଦନା ଆରୁ ଯୋହାର୍ ହାଖ୍ଖନା, ସାଭା ଆଡ଼୍ପା ଆରୁ ଭୋଜି ଆଡ଼୍ପାଗୁଠିନୁ ମୁଖ୍ୟା-ମୁଖ୍ୟା ଆଡ୍ଡାନୁ ଅକ୍କାଗେ ବାଗ୍ଗେ ଇଚ୍ଛା କାମ୍ନାଏ। 47ଆବ୍ଡ଼ାର୍ ରାଣ୍ଡି ମାଏକିନିଆଁର୍ଘି ସମ୍ପତ୍ତିବନ୍ ଲୁଟ୍ନାଏ, ଆରୁ ଏଦ୍ରାଗେ ଲାମ୍ବା-ଲାମ୍ବା ବିନ୍ତି କାମ୍ନାଏ: ଆବ୍ଡ଼ାର୍ ବାଗ୍ଗେ ଦଣ୍ଡ୍ ହାଖ୍ଖର୍।”
21ଅଣ୍ଟା ଗରୀବ୍ ରାଣ୍ଡି ଆଲିଘି ଦାନ୍
1ଆନ୍ତିନ୍ ଯୀଶୁସ୍ ନଜର୍ ଟେକିକିରି ଧନୀ ଆଲାର୍ ମନ୍ଦିର୍ତା ଦାନ୍ବାକ୍ସାନୁ ତାହ୍ମା ଦାନ୍ ଚିନାନ୍ ଏରିୟାସ୍। 2ଆରୁ ଯୀଶୁସ୍ ଅଣ୍ଟା ଗରୀବ୍ ରାଣ୍ଡି ଆଲିନ୍ ଦୁଇ ପାଏସା ଚିନାନ୍ ଏରିୟାସ୍, ଆରୁ ତେଙ୍ଗିୟାସ୍, 3“ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ ଇ ଗରୀବ୍ ବିଧ୍ବାଦ୍ ଜାମାର୍ସ୍ତି ବାଗ୍ଗେ ଚିଚ୍ଚକିଚି। 4ଏନ୍ଦେର୍ଗେକା ଯେତେର୍ ନିଜର୍ ସମ୍ପତ୍ତିତି କାଟେ ଚିଚ୍ଚାର୍, ଲେକିନ୍ ଇ ରାଣ୍ଡି ଆଲିଦ୍ ମୁରୁକ୍ ଗରୀବ୍ ରାତେହି ତାଙ୍ଘା ଜୀବନ୍ ବାଛାବାଗେ ତାଙ୍ଘାସାନ୍ ଯେତ୍କ ରାଚା ଆବନ୍ ଜାମାନ୍ ଚିଚ୍ଚାଲାଗ୍ଗିୟା।”
ମନ୍ଦିର୍ ନାଶ୍ ମାନ୍ନାଘି ଭବିଷତ୍ କାତ୍ଥା
(ମାତିସ୍ ୨୪:୧,୨; ମାର୍କୁସ୍ ୧୩:୧,୨)
5କେତ୍କ ଆଲାର୍ ମନ୍ଦିର୍ଘି ବାରେ କାଚ୍ଚନେଖ୍ରାଲିୟାର୍ କା ଇ ମନ୍ଦିର୍ଦ୍ କେତ୍କ ଚିକ୍କଣ୍-ଚିକ୍କଣ୍ ଚାଁଚା ଆରୁ ପାର୍ମେଶ୍ଵାର୍ସ୍କେ ଦାନ୍ ଚିଚ୍କା ଜିନିଷ୍ତି ସାଜାବାଚ୍କା ରାଇ, ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, 6“ଆ ଉଲ୍ଲା ବାରଦ୍, ଯେତ୍କବାକେନ୍ କା ନିମ୍ ଇବ୍ଡ଼ା ଜାମାନ୍ ଏରାଲ୍ଦାର୍, ଇଦ୍ ଅଣ୍ଟା ଚାଁଚାଘି ମିଆଁ ଆରୁ ଅଣ୍ଟା ଚାଁଚା ମା ରାଇଦ୍ ଜାମାଦ୍ ଗୁଣ୍ଡା-ଗୁଣ୍ଡା ମାନକୋ।”
ଦୁଃଖୁଘି ସୁରୁ
(ମାତିସ୍ ୨୪:୩-୧୪; ମାର୍କୁସ୍ ୧୩:୩-୧୩)
7ଆଙ୍ଗେନ୍ ଆବ୍ଡ଼ାର୍ ଯୀଶୁସିନ୍ ମେନ୍ଚାର୍, “ହେ ଗୁରୁ, ହାଲେ ଇଦ୍ ଏକ୍ଲା ମାନଦ୍? ଆରୁ ଇ ଘାଟ୍ଣାଦ୍ ଏକ୍ଲା ପୁରା ମାନ୍ନା ରାଇ, ଏକା ଚିହ୍ନାତି ଆହା ଅଙ୍ଗମ୍?” 8ଆଙ୍ଗେନ୍ ଆସ୍ ତେଙ୍ଗିୟାସ୍, “ସାବ୍ଧାନ୍ ରା ନିମାନ୍ ନେଦ୍ହି ମା ଫୁସ୍ଲର୍, ଏନ୍ଦେର୍ଗେକା ଢେର୍ ଆଲାର୍ ଏଙ୍ଘାଏ ନାମେତି ବାରର୍ ଆରୁ ତେଙ୍ଗର୍, ‘ଏନ୍ ଖ୍ରୀସ୍ତ୍ ବୁଲି’ ଆରୁ ‘ଆ ସାମାୟ ବାର୍ଚା କେର୍କିଚି,’ ତା ନିମ୍ ଆବ୍ଡ଼ାର୍ଘି ପାଛ୍ଲି ଆମ୍କେକାଲା। 9ଯେତ୍କବାକେନ୍ ନିମ୍ ଲାଡ଼ାଇଘି ଚାର୍ଚା ଆରୁ ଚାହାନ୍ତା ଲାଡ଼ାଇଘି ଶବଦ୍ ଆରୁ ଗେଚ୍ଛାନ୍ତା ଲାଡ଼ାଇଘି ଖବର୍ ମେନର୍ ତା ଆମ୍କେ ଘାବ୍ରାରା, ଏନ୍ଦେର୍ଗେକା ପହ୍ଲେ ଏନ୍ନେ ମାନ୍ନା ଜରୁରୀ ରାଇ; ଲେକିନ୍ ଚାଁଣେ ଆଖ୍ରୀ ମା ମାନିଦ୍।” 10ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଜାତିଘି ବିରୁଦ୍ଧ ଜାତି ଆରୁ ଦେଶ୍ଘି ବିରୁଦ୍ଧ ଦେଶ୍ ମାନୋ, 11ଜୋର୍ସେ ଭୁଇଁଡୋଲ୍ ମାନୋ ଆଡ୍ଡା ଆଡ୍ଡାନୁ ମାହାମାରି ଆରୁ ଆକାଲ୍ ମାନଦ୍, ଆରୁ ଆକାଶ୍ନୁ ଭାୟାନାକ୍ ଦୃଶ୍ୟ ଏଥ୍ରୋ ଆରୁ ବାଡ଼୍କା-ବାଡ଼୍କା ଚିହ୍ନା ଏଥ୍ରୋ।”
12“ଲେକିନ୍ ଇ ଜାମା ଘାଟ୍ଣା ମାନ୍ନାଘି ଆଘ୍ଲି ଆଲାର୍ ନିମାନ୍ ଏଙ୍ଘା ନାମେଘି କାର୍ଣତି ଧାରର୍, ଆରୁ ସାତାବର୍, ସାଭା ଆଡ଼୍ପାନୁ ଆରୁ ଜେହେଲ୍ନୁ ସୋଁପର୍ଚର୍, ଆରୁ ରାଜା ଆରୁ ଶାସନ୍ କାମୁର୍ଘି ଆଘ୍ଲି ଟାଣର୍ ହର୍। 13ଆଙ୍ଗେନ୍ ନିମାଗେ ଏଙ୍ଘା ବାରେନୁ ତାହ୍ମା ଆଘ୍ଲି ସାକ୍ଷୀ ଚିୟାଗେ ମୋଉକା ହାଖ୍ଖର। 14ଆରୁ ନିଜର୍-ନିଜର୍ ମନ୍ନୁ ପହ୍ଲେ ଏନ୍ଦେର୍ ଯାବାବ୍ ଚମ୍ ଏନ୍ନେ ସୋଚିକିରି ଚିନ୍ତା ଆମ୍କେ କାମା। 15ଏନ୍ଦେର୍ଗେକା ଏନ୍ ନିମାଗେ ଏନ୍ନେ ବଚନ୍ ଆରୁ ବୁଦ୍ଧି ଚିଅନ୍ କା ନିମାନ୍ ନିହ୍ମା ବିରୋଧି ଜାମାର୍ ନିହ୍ମା ବିରୁଦ୍ଧ ଏନ୍ଦେର୍ହି କାମା ପଲ୍ଲନାଏ। 16ନିହ୍ମା ଆୟାଙ୍ଗ୍-ବାଙ୍ଗ୍, ଭାଇ, ଜାତିବନ୍ଧୁ ଆରୁ ସାଙ୍ଗେ ସାଥୀର୍ହି ନିମାନ୍ ଧାର୍ତର୍ଚର୍, ଆରୁ ନିହ୍ମା ଭିତର୍ନୁ କେତ୍କ ଲୋକ୍ରିନ୍ ପିଟର୍ଚର୍। 17ଆରୁ ଏଙ୍ଘା ନାମେଘି ଲାଗାନ୍ ଜାମା ଆଲାର୍ ନିମାନ୍ ହାଁଣର୍ ତୁପ୍ଫର୍। 18ଲେକିନ୍ ନିହ୍ମାଏ କୁକ୍କୁନ୍ ତା ଅଣ୍ଟା ଚୁଟ୍ଟିଦ୍ହି ନଷ୍ଟ ମା ମାନି। 19ନିହ୍ମା ଧିରାଜ୍ଘି ଚାଲ୍ତେ ନିମ୍ ନିହ୍ମା ଜୀବନ୍ ବାଛାବର୍ ଉଇୟର୍।”
ଯେରୁଶାଲେମ୍ଘି ନାଶ୍ ମାନ୍ନାଘି ଭବିଷତ୍ କାତ୍ଥା
(ମାତିସ୍ ୨୪:୧୫-୨୧; ମାର୍କୁସ୍ ୧୩:୧୪-୧୯)
20“ଯେତ୍କବାକେନ୍ ନିମ୍ ଯେରୁଶାଲେମ୍ବନ୍ ପଲ୍ଟନ୍ଜାମାର୍ଘି ଦ୍ୱାର୍ନୁ ଘେର୍ଚ୍କାନ୍ ଏରୋର୍, ହତ୍କବାକେନ୍ ନିମ୍ ଆହର୍ କା ଆଦ୍ଘି ନାଶ୍ବଦ୍ ଆଣ୍ସିୟା କେର୍କିଚି। 21ହତ୍କବାକେନ୍ ନେଦ୍ ୟାହୁଦୀଆ ପ୍ରଦେଶ୍ନୁ ରର୍ ଆବ୍ଡ଼ାର୍ ପାର୍ତ୍ତାତାରା ବୁଙ୍ଗ୍ନାର୍କାନାର୍; ଆରୁ ନେଦ୍ ଯେରୁଶାଲେମ୍ନୁ ରର୍ ଆବ୍ଡ଼ାର୍ ବାହ୍ରି ଉର୍ଖ୍ନାର୍ କାନାର୍; ଆରୁ ନେଦ୍ ପାଡ଼ାନୁ ରର୍ ଆବ୍ଡ଼ାର୍ ସହର୍ଗେ ଆମ୍ଵର୍କାଲା। 22ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଏକାଦ୍ ଲେଖ୍ଚ୍କା ରାଇ, ଆଦ୍ଘି ଅନୁସାର୍ ବାଦ୍ଲା ହୋନାଘି ସାମାୟ ବାର୍ଚ୍କିଚି। 23ହୁ ସାମାୟନୁ ନେଦ୍ ମେଦୁନୁ ରର୍ ଆରୁ ଏକା ମାଏକିନିଆଁର୍ଘି ଗୁରସ୍ ହାପ୍ପୁ ହାଦ୍ଦୁ ରର୍, ଆବ୍ଡ଼ାର୍ଗେ ମୁରୁକ୍ ଦୁଃଖୁ ବାରଦ୍! ଏନ୍ଦେର୍ଗେକା ଦେଶ୍ନୁ ମହା ବିପଦ୍ ବାରୋ ଆରୁ ଇ ଜାତିଘି ମିଆଁ ପାର୍ମେଶ୍ଵାର୍ସ୍କି ଖୀସ୍ ବାରୋ। 24ଢେର୍ ଆଲାରିନ୍ ଖଣ୍ଡାତି ପିଟାକୋ ଆରୁ ଢେର୍ ଆଲାରିନ୍ ହିଁଇକିରି ଦୁସ୍ରା ଜାତିୟାର୍ ହର୍କର୍; ଯେତ୍କବାକେନ୍ତକ୍ ଦୁସ୍ରା ଜାତିୟାର୍ଘି ସାମାୟ ପୁରା ମା ମାନଦ୍, ହତ୍କବାକେନ୍ତକ୍ ଯେରୁଶାଲେମ୍ବନ୍ ଦୁସ୍ରା ଜାତିୟାର୍ ପୁରାପୁରୀ ଅଧିକାର୍ କାମର୍।”
ମୁନୁଷ୍ ହାଦ୍ଦୁସ୍କି ଆରୁଅହନ୍ ବାର୍ନା
(ମାତିସ୍ ୨୪:୨୯-୩୧; ମାର୍କୁସ୍ ୧୩:୨୪-୨୭)
25“ଆରୁ ବିଡ଼ି, ଚାନ୍ଦୋ, ଆରୁ ବିନ୍କୋନୁ ଚିହ୍ନା ଏଥ୍ରୋ; ଆରୁ ଦୁନିଆଁନ୍ତା ଜାମା ଜାତିୟାର୍ଘି ମାଝାନୁ ବିପଦ୍ ବାରଦ୍, ସାମ୍ଧୁର୍ଘି ଶବଦ୍ ଆରୁ ଲହ୍ଡ଼ିଘି ଗାର୍ଜାରାନାନ୍ ମେନିକିରି ଦୁନିଆଁନ୍ତା ଆଲାର୍ ଘାବ୍ରାରର୍କର୍। 26ଆଲାର୍ ଦୁନିଆଁନ୍ତା ବାର୍ନା ଦୁଃଖୁଘି ଏଲ୍ଚ୍କାତି ବେହସ୍ ମାନର୍କର୍, ଏନ୍ଦେର୍ଗେକା ଆକାଶ୍ନୁ ରୁ ବିଡ଼ି, ଚାନ୍ଦୋ ଆରୁ ବିନ୍କୋଦ୍ ଇୟାନ୍ତି ହାଇୟା ମାନକୋ। 27ଆରୁ ହତ୍କବାକେନ୍ ମୁନୁଷ୍ ହାଦ୍ଦୁସ୍ ରାଜାସ୍ ଲେଖା ବାଦ୍ଲିନୁ ବାରସ୍ ହତ୍କବାକେନ୍ ତାଙ୍ଘା ଶକ୍ତି ଆରୁ ମହିମାଦ୍ ଜାମା ଆଲାର୍ଗେ ଆହ୍ତାରକୋ। 28ଯେତ୍କବାକେନ୍ ଇ କାତ୍ଥା ମାନାଗେ ଲାଗ୍ଗ, ହତ୍କବାକେନ୍ ଉସ୍କାରା; ଆରୁ ଏରା ଏନ୍ଦେର୍ଗେକା ନିହ୍ମାଏ ମୁକ୍ତି ଚାହାନୁ ରାଇ।”
ଡୁମାରି ମାନ୍ନୁଘି ନମୁନା
(ମାତିସ୍ ୨୪:୩୨-୩୫; ମାର୍କୁସ୍ ୧୩:୨୮-୩୧)
29ଯୀଶୁସ୍ ଆବ୍ଡ଼ାରିନ୍ ଅଣ୍ଟା ନମୁନା ତେଙ୍ଗିୟାସ୍: “ଡୁମାରି ଆରୁ ଦୁସ୍ରା ମାନ୍ନୁ ଗୁଠିନ୍ ଏରା। 30ଯେତ୍କବାକେନ୍ ମାନ୍ନୁନୁ ଆଥା ହରାଗେ ଲାଗ୍ଗ, ହତ୍କବାକେନ୍ ନିମ୍ ଆହ୍ଦାର୍ କା ବିଡ଼୍ନା ଉଲ୍ଲା ଆଣ୍ସିୟାଦିନ୍। 31ହନ୍ନେନ୍ ଇବ୍ଡ଼ାଗୁଠିନ୍ ମାନ୍ନାନ୍ ଏରୋର୍, ତା ନିମ୍ ଆହର୍ କା ପାର୍ମେଶ୍ଵାର୍ସ୍କି ରାଜୀ ଚାହାନୁ ରାଇ। 32ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଇବ୍ଡ଼ା ଜାମାଦ୍ ମା ମାନ୍ନାଜୁଟି, ଇ ପିଢ଼ିନ୍ତା ଆଲାର୍ ମା ଖିନାଏ। 33ଆକାଶ୍ ଆରୁ ଦୁନିଆଁ ନୁହ୍ରକୋ, ଲେକିନ୍ ଏଙ୍ଘାଏ ତେଙ୍କା ବଚନ୍ ଏକ୍ଲାହି ମା ନୁହ୍ରି।”
ଜାମାବାକେନ୍ ଚେତ୍ରିକିରି ରାକେ
(ମାତିସ୍ ୨୪:୩୬-୪୪; ମାର୍କୁସ୍ ୧୩:୩୨-୩୭)
34“ଲେକିନ୍ ନିମ୍ ନିଜର୍-ନିଜର୍ ବାରେ ହୁସିୟାର୍ ରାକେ, ଏନ୍ନେ ମା ମାନ୍ନାଦ୍ କା ନିହ୍ମା ମନ୍ ମାୟାମୋହ୍, ମାତ୍ୱାଡ଼୍, ଆରୁ ଦୁନିଆଁଦାରିଘି ଚିନ୍ତାନୁ ମାତ୍ରର୍କର୍ ଆରୁ ହୁ ଉଲ୍ଲାଦ୍ ହଠାତ୍ ଫାନ୍ଦା ଲେଖା ନିହ୍ମା ମିଆଁ ଖାତ୍ରୋ। 35ଏନ୍ଦେର୍ଗେକା ହୁ ଉଲ୍ଲାନ୍ତା ଦୁଃଖୁ ଦୁନିଆଁନ୍ତା ଜାମା ଆଲାର୍ଘି ମିଆଁ ଚିଚ୍ଚୁଘି ଝାଞ୍ଜ୍ ଲେଖା ଖାତ୍ରୋ। 36ହୁଦ୍ଘିଲାଗାନ୍ ଚେତ୍ରିକିରି ରା ଆରୁ ଜାମାବାକେନ୍ ବିନ୍ତି କାମ୍ତେ ରା ଏସ୍କେ କା ନିମ୍ ଇ ଜାମା ବାର୍ନାବାଲା ଦୁଃଖୁନ୍ତି ବାଛ୍ରା ଅଙ୍ଗର୍ ଆରୁ ମୁନୁଷ୍ ହାଦ୍ଦୁସ୍କି ଆଘ୍ଲି ଇଲ୍ନାଘି ଲାଇଗ୍ ମାନର୍କର୍।”
37ଯୀଶୁସ୍ ଉଲ୍ଲା ବାକେନ୍ ମନ୍ଦିର୍ନୁ ଶିକ୍ଷା ଚିଆଲିୟାସ୍, ଆରୁ ମାଁହାବାକେନ୍ ଉର୍ଖିକିରି ଜାଇତୁନ୍ ପାର୍ତ୍ତା ମିଆଁ ରାଲିୟାସ୍; 38ଆରୁ ଜାମା ଆଲାର୍ ଯୀଶୁସ୍କି ଉପ୍ଦେଶ୍ ମେନାଗେ ଭୋର୍ପାଇରି ମନ୍ଦିର୍ଗେ ବାରାଲିୟାର୍।
22ଯୀଶୁସ୍କି ବିରୁଦ୍ଧନୁ ଷଡ଼ଯନ୍ତ୍ର
(ମାତିସ୍ ୨୬:୧-୫; ମାର୍କୁସ୍ ୧୪:୧,୨; ଯୋହାନ୍ ୧୧:୪୫-୫୩)
1ୟାହୁଦୀ ଜାମାର୍ଘି ମା ଫୁଲ୍ର୍ନା ଆସ୍ମାଘି ପରବ୍ ଏକାନ୍ କା ପାସ୍କାପରବ୍ ବାଲିୟାର୍, ଆଦ୍ ଆଣସାଲିୟାଦ୍; 2ମୁଖ୍ୟା ପୁରୋହିତ୍ ଆରୁ ପଣ୍ତିତ୍ଜାମାର୍ ଯୀଶୁସିନ୍ ଧାରିକିରି ପିଟାଗେ ତାହ୍ମା-ତାହ୍ମା ଭିତ୍ରେ ଉପାୟ ବେଦ୍ଦାଲିୟାର୍, ଲେକିନ୍ ଆବ୍ଡ଼ାର୍ ଆଲାରିନ୍ ଏଲ୍ଚାଲିୟାର୍। 3ଆନ୍ତିନ୍ ଶାଏତାନ୍ ଯୁଦାସ୍କିନୁ କର୍ଚା, ଯୁଦାସ୍ସିନ୍ ଇସ୍କୋରିୟତି ବାଲିୟାର୍ ଆରୁ ଆସ୍ ଯୀଶୁସ୍କି ବାର ଖାସ୍ଚେଲା ଜାମାର୍ସ୍ତି ଅଣ୍ଟା ରାଚାସ୍। 4ଯୁଦାସ୍ ମୁଖ୍ୟା ପୁରୋହିତ୍ ଆରୁ ମନ୍ଦିର୍ବନ୍ ପାହ୍ରା ଚିଉର୍ଘି ମୁଖ୍ୟାସାନ୍ କାଇକିରି ଆବ୍ଡ଼ାର୍ ସାଙ୍ଗେ ସାଲାହ୍ କାମ୍ଚାସ୍ କା ଆସ୍ ଏସ୍କେ ଯୀଶୁସିନ୍ ଆବ୍ଡ଼ାର୍ଗେ ସୋଁପଚସ୍। 5ଆବ୍ଡ଼ାର୍ ମୁରୁକ୍ ଖୁସ୍ ମାନ୍ଚାର୍ କେରାର୍, ଆରୁ ଯୁଦାସ୍କେ ପାଏସା ଚିୟାଗେ ବଚନ୍ ଚିଚ୍ଚାର୍। 6ଯୁଦାସ୍ ରାଜୀ ମାନ୍ଚାସ୍କେରାସ୍, ଆରୁ ମୋଉକା ବେଦ୍ଦାଲିୟାସ୍ କା ଯେତ୍କବାକେନ୍ ଭିଡ଼୍ ମା ରଦ୍ ଆଙ୍ଗେନ୍ ଯୀଶୁସିନ୍ ଆବ୍ଡ଼ାର୍ଗେ ଧାର୍ତୋଚସ୍।
ଯୀଶୁସ୍ ତାଙ୍ଘା ଚେଲାର୍ଗାନେ ପାସ୍କାଘି ଆଖ୍ରୀ ଭୋଜି କାମାଲ୍ଦାସ୍
(ମାତିସ୍ ୨୬:୧୭-୨୫; ମାର୍କୁସ୍ ୧୪:୧୨-୨୧; ଯୋହାନ୍ ୧୩:୨୧-୩୦; ମାତିସ୍ ୨୬:୧୪-୧୬; ମାର୍କୁସ୍ ୧୪:୧୦,୧୧)
7ମା ଫୁଲ୍ର୍ନା ଆସ୍ମାଘି ପରବ୍ ବାର୍ଚା, ଆ ପାସ୍କାପରବ୍ନୁ ଭେଡ଼ିହାଦ୍ଦୁ ବଲୀ ଚାଢ଼ାବାନାଦ୍ ୟାହୁଦୀ ଜାମାର୍ଘି ନିୟମ୍ ରାଚା। 8ଯୀଶୁସ୍ ପାତ୍ରାସ୍ ଆରୁ ଯୋହାନ୍ସିନ୍ ଏନ୍ନେ ତେଙ୍ଗିୟାସ୍ ଆରୁ ତାଇୟାସ୍, “କାଲା ଆରୁ ନାମାଗେ ପାସ୍କା ଭୋଜିଘି ତିଆର୍ କାମା।” 9ଆବ୍ଡ଼ାର୍ ଯୀଶୁସିନ୍ ମେନ୍ଚାର୍, “ନିମ୍ ଏକାସାନ୍ ଚାହାଁଲ୍ଦାର୍ କା ଏମ୍ ପାସ୍କାପରବ୍ଘି ଭୋଜି ତିଆର୍ କାମମ୍।” 10ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏରା, ନିମ୍ ସହର୍ନୁ କରର୍ରିନ୍କା ଆମ୍ମୁ ଚେଡ୍କା ଅଣ୍ଟା ଆଲାସ୍ ହାଖ୍ଖରସ୍; ଆସ୍କି ପାଛ୍ଲି-ପାଛ୍ଲି କାଲ୍କେ ଆରୁ ଆସ୍ ଏକା ଆଡ଼୍ପାନୁ କରସ୍ ଆସାନ୍ କର୍କେ, 11ଆରୁ ଆ ଆଡ଼୍ପାନ୍ତା ମାଲିକ୍ସିନ୍ ତେଙ୍କେ: ‘ଗୁରୁସ୍ ନିମାନ୍ ତେଙ୍ଗା ତାଏକାଦାସ୍ କା ପାହି ଆଡ଼୍ପା ଏକାତାରା ରାଇ, ଏକାସାନ୍ ଏନ୍ ଏଙ୍ଘା ଚେଲାଜାମାର୍ଗାନେ ପାସ୍କାଘି ଭୋଜି କାମନ୍?’ 12ଆଙ୍ଗେନ୍ ଆସ୍ ନିମାଗେ ସାଜାବାଚ୍କା ଆରୁ ତିୟାର୍ କାମ୍ଚ୍କା ଅଣ୍ଟା ମିଁତା ବାଡ଼୍କା ବାଖ୍ରାନ୍ ଏଦଚିଅସ୍; ଆସାନ୍ ନାହ୍ମାଲାଗାନ୍ ତିୟାର୍ କାମା।” 13ଆବ୍ଡ଼ାର୍ କାଇକିରି, ଯୀଶୁସ୍ ଏସ୍କେ ତେଙ୍କାଚାସ୍, ଆବ୍ଡ଼ାର୍ ହନ୍ନେନିନ୍ ଜାମାକିଛି ହାଖ୍ଖୀୟାର୍ ଆରୁ ପାସ୍କାପରବ୍ଘି ତିଆରି କାମ୍ଚାର୍।
ପାସ୍କାଘି ଭୋଜି
(ମାତିସ୍ ୨୬:୨୬-୩୦; ମାର୍କୁସ୍ ୧୪:୨୨-୨୬; ୧ କୁରିନ୍ଥୀ ୧୧:୨୩-୨୫)
14ପାସ୍କାପରବ୍ଘି ମହଁନା ସାମାୟ ଆଣ୍ସିଆ, ବାକେନ୍ ଯୀଶୁସ୍ ତାଙ୍ଘା ଖାସ୍ଚେଲାଜାମାର୍ଗାନେ ମହାଁଗେ ଅକ୍କିୟାସ୍। 15ଆରୁ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ୟୋଁ ସାପ୍ଡ଼ାରାଲ୍କାନ୍ କା ଦୁଃଖୁ ସାହ୍ନାଘି ଆଘ୍ଲି ପାସ୍କାଘି ଇ ଭୋଜି ନିହ୍ମାଗାନେ କାମନ୍। 16ଏନ୍ ନିମାନ୍ ତେଙ୍ଗାଲ୍ଦାନ୍ ଯେତ୍କତକ୍ ପାର୍ମେଶ୍ଵାର୍ସ୍କି ରାଜୀନୁ ଆଦ୍ ପୁରା ମା ମାନ ହତ୍କତକ୍ ଏନ୍ ଇବନ୍ ଆରୁ ମା ମହଁଦାନ୍।” 17ଆଙ୍ଗେନ୍ ଯୀଶୁସ୍ କାଟୋରା ଅଚ୍ଚାସ୍ ଆରୁ ଧାନ୍ୟାବାଦ୍ ଚିଇକିରି ତେଙ୍ଗିୟାସ୍, “ଇବନ୍ ହୁଆ ଆରୁ ନିହ୍ମା ମାଝାନୁ ହାଟ୍ରା। 18ଏନ୍ଦେର୍ଗେକା ଏନ୍ ନିମାନ୍ ତେଙ୍ଗାଲ୍ଦାନ୍ ପାର୍ମେଶ୍ଵାର୍ସ୍କି ରାଜୀ ମା ବାର୍ନାତକ୍ ଏନ୍ ଅଙ୍ଗୁର୍ ରାସେବନ୍ ଆରୁ ଏକ୍ଲାହି ମା ହାପ୍ପଦାନ୍।” 19ଆରୁ ଆସ୍ ଆସ୍ମା ଅଚ୍ଚାସ୍, ଆରୁ ଧାନ୍ୟାବାଦ୍ଘି ବିନ୍ତି କାମ୍ଚାସ୍ ଆରୁ ଆବନ୍ ଖିଣ୍ଡିୟାସ୍, ଆରୁ ଚିଇକିରି ତେଙ୍ଗିୟାସ୍, “ଇଦ୍ ଏଙ୍ଘାଏ ମେଦୁଦ୍ ଏକାଦ୍ ନିହ୍ମା ଲାଗାନ୍ ଚିଆକାଲି: ଏଙ୍ଗାନ୍ ମନେ କାମାଗେ ଇବନ୍ କାମ୍ତେ ରା।” 20ଆରୁ ମକ୍କା ପାଛ୍ଲି ଯୀଶୁସ୍ କାଟୋରା ହୋଇକିରି ତେଙ୍ଗିୟାସ୍, “ଇ ରାସେଦ୍ ଏଙ୍ଘା ହେଁସୁଦ୍ ଇଦ୍ ଜାମା ଆଲାର୍ଗେ ବାହାବା କେର୍କିଚି ଇ ହେଁସୁତି ପାର୍ମେଶ୍ଵାର୍ସ୍ ଜାମା ଆଲାରିନ୍ ବାଛାବାଗେ ଅଣ୍ଟା ପୁନା କାତ୍ଥା ଚିଚ୍କାଦାସ୍।”
21“ଲେକିନ୍ ଏରା, ଏକା ଆଲାସ୍ ଏଙ୍ଗାନ୍ ଧାରିକିରି ବିରୋଧି ଜାମାର୍ଗେ ଚିନାବାଲା ରାଦାସ୍ ଆସ୍ ଏଙ୍ଘାଗାନେ ଅକ୍କାଦାସ୍। 22ଏନ୍ଦେର୍ଗେକା ମୁନୁଷ୍ ହାଦ୍ଦୁସ୍କି ବାରେନୁ ପାବିତାର୍ ଶାସ୍ତ୍ରନୁ ଏସ୍କେ ଲେଖ୍ଚ୍କା ରାଇ ହନ୍ନେନ୍ ମାନଦ୍ ଆଦ୍ ସତ୍ତୁଦ୍, ଲେକିନ୍ ଏକା ଆଲାସ୍କି ଦ୍ୱାର୍ନୁ ମୁନୁଷ୍ ହାଦ୍ଦୁସ୍ ବିରୋଧିଜାମାର୍ଘି ହେଖ୍ଖାନୁ ସୋଁପାଚା କାଲ୍ଦାସ୍ ହାୟ, ଆସ୍ ଦଣ୍ଡ୍ଘି ହକ୍ଦାର୍ସ୍!” 23ଆବ୍ଡ଼ାର୍ ତାମ୍-ତାମ୍ କାଚ୍ନେଖ୍ରା ଲାଗ୍ଗିୟାର୍ କା ନାହ୍ମା ଭିତର୍ନୁ ନେଦ୍, ଯୀଶୁସିନ୍ ଧାରିକିରି ବିରୋଧି ଜାମାର୍ଗେ ଚିଅର୍।
ଜାମାର୍ସ୍ତି ବାଡ଼୍କା ନେଦ୍?
24ଆରୁ ଚେଲାଜାମାର୍ଘି ଭିତ୍ରେ ନେଦ୍ ବାଡ଼୍କାର୍ ଇ କାତ୍ଥାଘି ବାରେନୁ କାଁଟ୍ଛାଁଟ୍ ମାନ୍ଚା। 25ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏକା ରାଜାର୍ ପର୍ଜାତିୟାର୍ଘି ମିଆଁ ଶାସନ୍ କାମ୍ନାଏ; ଆରୁ ଆବ୍ଡ଼ାର୍ଘି ମିଆଁ ହକ୍ ଉଇନାଏ, ଆରିନ୍ ଭାଲାଇ କାମୁବୁଲି ତେଙ୍ଗାକାଇ। 26ଲେକିନ୍ ନିମ୍ ଏନ୍ନେ ଆମ୍କେମାନା; ନେଦ୍ ନିହ୍ମା ମାଝାନୁ ବାଡ଼୍କାର୍, ଆର୍ ଛୋଟେ ଲେଖା ମାନର୍ ଆରୁ ନେଦ୍ ଆଗୁୱାର୍, ଆବ୍ଡ଼ାର୍ ଗୁତ୍ତିୟାର୍ ଲେଖା ମାନର୍। 27ଏନ୍ଦେର୍ଗେକା ବାଡ଼୍କା ନେଦ୍, ନେଦ୍ ଅନ୍ନା ଆଡ୍ଡାନୁ ଅକ୍କନାଏ, କା ନେଦ୍ ସେବା କାମ୍ନାଏ? ଆସ୍ ମାଲ୍ଲା କାଁଏ? ଏକାସ୍ କା ଅନାଗେ ଅକ୍କଦାସ୍, ଲେକିନ୍ ଏନ୍ ନିହ୍ମା ମାଝାନୁ ଗୁତ୍ତିୟାର୍ ଲେଖା ରାଦାନ୍।”
28“ନିମ୍ ଏଙ୍ଘାଏ ଦୁଃଖୁ ତକ୍ଲିପ୍ନୁ ଏଙ୍ଘା ସାଙ୍ଗେ ଚିତେ ବାରାଲ୍ଦାର୍; 29ଏସ୍କେ ଏଙ୍ଘାଏ ବୁଆସ୍ ଏଙ୍ଗାଗେ ଅଣ୍ଟା ରାଜୀ ଚିଚ୍କାଦାସ୍, ହୁଦ୍ଘି ଲେଖା ଏନ୍ ନିମାଗେ ଅଣ୍ଟା ରାଜୀ ଚିଆଲ୍ଦାନ୍, 30ଆରୁ ନିମ୍ ଏଙ୍ଘା ରାଜୀନୁ ଏଙ୍ଘାଏ ଅନ୍ନାବାକେନ୍ ହାପ୍ପର୍ଅନର୍, ଆରୁ ରାଜ୍ଗାଦୀନୁ ଅକ୍କିକିରି ଇସ୍ରାଏଲ୍ ଜାମାର୍ଘି ବାର ଦଲ୍ଘି ବିଚାର୍ କାମର୍।”
ପାତ୍ରାସ୍କି ମାନା କାମ୍ନାଘି ଭବିଷତ୍ କାତ୍ଥା
(ମାତିସ୍ ୨୬:୩୧-୩୫; ମାର୍କୁସ୍ ୧୪:୨୭-୩୧; ଯୋହାନ୍ ୧୩:୩୬-୩୮)
31“ଶିମୋନ୍, ହେ ଶିମୋନ୍! ଏରା, ଗହମ୍ବନ୍ ଚାଲ୍ନିନୁ ଚାଲାବାନା ଲେଖା ଶାଏତାନ୍ଦ୍ ନିମାନ୍ ଚାଲାବାଗେ ଛୁଟି ହାକ୍କିଚି, 32ଲେକିନ୍ ଏନ୍ ନିଙ୍ଗାଗେ ବିନ୍ତି କାମଚ୍କାଦାନ୍, ଏସ୍କେ କା ନିଙ୍ଘା ବିଶ୍ଵାସ୍ ମା ତୋଡ଼ର୍ନାଦ୍; ଯେତ୍କବାକେନ୍ ନିନ୍ ବାନେ ପାବୁନୁ କିର୍ରୟ ବାରୟ, ତା ନିଙ୍ଘାଏ ଭାଇଜାମାରିନ୍ ମଜ୍ବୁତ୍ କାମୟ।” 33ପାତ୍ରାସ୍ ଯୀଶୁସିନ୍ ତେଙ୍ଗିୟାସ୍, “ହେ ପ୍ରାଭୁ, ଏନ୍ ନିହ୍ମା ସାଙ୍ଗେ ଜେହେଲ୍ କାଲାଗେ, ଆରୁ ଖିଆଗେହି ତିୟାର୍ ରାଦାନ୍।” 34ଆନ୍ତିନ୍ ଯୀଶୁସ୍ ତେଙ୍ଗିୟାସ୍, “ହେ ପାତ୍ରାସ୍, ଏନ୍ ନିଙ୍ଗାନ୍ ତେଙ୍ଗାଲ୍ଦାନ୍ କା ଇନ୍ନା ହେରୁ ଅହ୍ଲନାଘି ଆଘ୍ଲି ନିନ୍ ତିନ୍ ଥର୍ ଅସ୍ଵୀକାର୍ କାମୟ କା ନିନ୍ ଏଙ୍ଗାନ୍ ବାଲ୍ଦାଏ।”
35ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯେତ୍କବାକେନ୍ ଏନ୍ ନିମାନ୍ ବିନାପାଏସା, ମୁଁଣା, ଆରୁ ବିନାଜୁତାନୁ ତାଏକାଚ୍କାନ୍, ହୁବାକେନ୍ ନିମାଗେ ଏନ୍ଦ୍ରିନ୍ ଜିନିଷ୍ଘି ଘାଟି ମାନ୍ଚ୍କିଚା କାଁଏ?” ଆଙ୍ଗେନ୍ ଯୀଶୁସିନ୍ ଆବ୍ଡ଼ାର୍ ତେଙ୍ଗିୟାର୍, “ଏକା ଜିନିଷ୍ଘି ଘାଟି ମାଲ୍ଲା ମାନୁଦ୍।” 36ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଲେକିନ୍ ଆକ୍କୁନ୍ ନେଖାସାନ୍ ପାଏସା ମୁଁଣା ଆତ୍ଲି ଆବ୍ଡ଼ାର୍ ଆବନ୍ ହୁଆ ଆରୁ ହନ୍ନେନ୍ ମୁଁଣାହି ହୁଆ ଆରୁ ନେଖାସାନ୍ ଖଣ୍ଡା ମାଲ୍ଲାଦ୍ ଆବ୍ଡ଼ାର୍ ନିଜର୍ ଚିଢ଼ାନ୍ ବିଁଶିକିରି ଖଣ୍ଡା ହେନ୍ଦର୍ 37ଏନ୍ଦେର୍ଗେକା ଏନ୍ ନିମାନ୍ ତେଙ୍ଗାଲ୍ଦାନ୍ କା, ପାବିତାର୍ ଶାସ୍ତ୍ରନୁ ଏକାଦ୍ ଏଙ୍ଘା ବାରେନୁ ଲେଖ୍ଚ୍କା ରାଇ କା ‘ଆସ୍ ଦୋଷୀର୍ ଗାନେ ଗନ୍ତି ମାନ୍ଚାସ୍,’ ଆଦ୍ ଏଙ୍ଘାଏନୁ ପୁରା ମାନଦ୍ ଏନ୍ଦେର୍ଗେକା ଏଙ୍ଘାଏ ବାରେନୁ ପାବିତାର୍ ଶାସ୍ତ୍ରନୁ ଏକାଦ୍ ଲେଖ୍ଚ୍କା ରାଇ; ଆଦ୍ ପୁରା ମାନ୍ନା ଜରୁରୀ ରାଇଦ୍।” 38ଚେଲାଜାମାର୍ ତେଙ୍ଗିୟାର୍, “ହେ ପ୍ରାଭୁ, ଏରା, ଇସାନ୍ ଯୋଡ଼େ ଖଣ୍ଡା ଆତ୍ଲି।” ଲେକିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ହତ୍କ ମାନ୍ଚା-ମାନ୍ଚା।”
ଜାଇତୁନ୍ ପାର୍ତ୍ତା ମିଆଁ ଯୀଶୁସ୍ ବିନ୍ତି କାମାଲ୍ଦାସ୍
(ମାତିସ୍ ୨୬:୩୬-୪୬; ମାର୍କୁସ୍ ୧୪:୩୨-୪୨)
39ଯୀଶୁସ୍ ରୋଜ୍ଦିନ୍ ଏସ୍କେ କାମାଲିୟାସ୍ ଆନ୍ନେନ୍ ଜାଇତୁନ୍ ପାର୍ତ୍ତାଗେ କେରାସ୍, ଆରୁ ଆସ୍କି ଚେଲାର୍ହି ତାଙ୍ଘାଗାନେ କେରାର୍। 40ଯୀଶୁସ୍ ଆସାନ୍ ଆଣସିକିରି ଆବ୍ଡ଼ାରିନ୍ ତେଙ୍ଗିୟାସ୍, “ବିନ୍ତି କାମ୍ତେ ରା ଏସ୍କେ କା ନିମ୍ ପରୀକ୍ଷାନୁ ମା ଖାତ୍ରୋର୍।” 41ଆନ୍ତିନ୍ ଆସ୍ ଆବ୍ଡ଼ାର୍ସ୍ତି କାଟେ ଗେଚ୍ଛାନୁ କାଇକିରି, ଆରୁ ହାଁଠୁୱାରାଇକିରି ବିନ୍ତି କାମାଗେ ଲାଗ୍ଗିୟାସ୍, 42“ହେ, ବୁଆ, ଯଦି ନିନ୍ ଚାହଁୟ ହାଲେ ଇ ଏଙ୍ଘାଏ ଏକା ଦୁଃଖୁ ବାର୍ନାବାଲା ରାଇ ଆବନ୍ ଏଙ୍ଘାସ୍ତି ହାଟାବାଚା, ହାଲେହି ଏଙ୍ଘାଏ ଇଚ୍ଛା ମାଲ୍ଲା ଲେକିନ୍ ନିଙ୍ଘାଏ ଇଚ୍ଛା ପୁରା ମାନ୍ନାଦ୍।” 43ଆନ୍ତିନ୍ ଆସ୍କେ ସରଗ୍ନ୍ତିନ୍ ଅଣ୍ଟା ଦୂଁତ୍ ଏଥ୍ରା, ଏକାଦ୍ କା ଆସ୍କେ ଶକ୍ତି ଚିଚ୍ଚା। 44ଆସ୍ ମୁରୁକ୍ ଦୁଃଖୁତି ଆକ୍ବାକ୍ରିକିରି ମନ୍ ଧିୟାନ୍ନୁ ବିନ୍ତି କାମାଗେ ଲାଗ୍ଗିୟାସ୍; ଆରୁ ଆସ୍କି ଗର୍ମାରାଚ୍କା ଆମ୍ମୁଦ୍ ହେଁସୁ ଲେଖା ହେଁହ୍ଲାନୁ ଟିପ୍ପାଗେ ଲାଗ୍ଗିୟା। 45ଆଙ୍ଗେନ୍ ଯୀଶୁସ୍ ବିନ୍ତି କାମ୍ନାସ୍ତି ଉସ୍କାରାଇକିରି ତାଙ୍ଘା ଚେଲାଜାମାର୍ଘି ଚାହା କେରାସ୍ ଆରୁ ଏରିୟାସ୍ କା ଦୁଃଖୁତି ଆବ୍ଡ଼ାର୍ ହାନ୍ଦ୍ରାର୍ କେର୍କାନାଏ। 46ଆସ୍ ଚେଲାଜାମାରିନ୍ ତେଙ୍ଗିୟାସ୍, “ନିମ୍ ଏନ୍ଦେର୍ଗେ ହାନ୍ଦ୍ରାଲ୍ଦାର୍? ଉସ୍କାରା, ଆରୁ ବିନ୍ତି କାମା ଏସ୍କେ କା ନିମ୍ ପରୀକ୍ଷାନୁ ମା ଖାତ୍ର୍ଦାର୍।”
ଧୋଖା ଚିଉ ଯୁଦାସ୍ ଯୀଶୁସିନ୍ ଧାରାବାଲ୍ଦାସ୍
(ମାତିସ୍ ୨୬:୪୭-୫୬; ମାର୍କୁସ୍ ୧୪:୪୩-୫୦; ଯୋହାନ୍ ୧୮:୩-୧୨)
47ଯୀଶୁସ୍ ଏନ୍ନେ ତେଙ୍ଗାଲିଆସିନ୍ କା ଆଲାର୍ଘି ଅଣ୍ଟା ଭିଡ଼୍ ବାର୍ଚା, ଆରୁ ବାର ଲୋକ୍ ଚେଲା ଭିତର୍ନୁ ନେଖା ନାମେ ଯୁଦାସ୍ ରାଚା ଆସ୍ ଆ ଭିଡ଼୍ଘି ଆଘ୍ଲି-ଆଘ୍ଲି ବାର୍ଚାସ୍। ଯୁଦାସ୍ ଯୀଶୁସ୍କି ଚାହାଗେ ଚୋଙ୍ଖାଗେ କେରାସ୍। 48ଲେକିନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ହେ ଯୁଦାସ୍, ନିନ୍ ଚୋଙ୍ଖିକିରି ମୁନୁଷ୍ ହାଦ୍ଦୁସିନ୍୨୨:୪୮ ମୁନୁଷ୍ ହାଦ୍ଦୁସ୍ ମତଲବ୍ ଯୀଶୁସିନ୍ ତେଙ୍ଗାକାଇ ବିରୋଧିଜାମାର୍ଘି ହେଖ୍ଖାନୁ ସୋଁପାଲ୍ଦାଏ କାଁଏ?” 49ଯୀଶୁସ୍କି ସାଙ୍ଗେଜାମାର୍ ଇବନ୍ ଏରିୟାର୍ କା ଏନ୍ଦେର୍ ମାନ୍ନାବାଲା ରାଇଦ୍, ତା ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ହେ ପ୍ରାଭୁ, ଏମ୍ ଖଣ୍ଡା ଚାଲାବମ୍ କାଁଏ?” 50ଆରୁ ଆବ୍ଡ଼ାର୍ସ୍ତି ଅର୍ତୁସ୍ ମାହାପୁରୋହିତ୍ସ୍କି ଗୁତ୍ତିୟାସ୍କି ତିନା ହେବ୍ଦାନ୍ ଛିନ୍ଚେଇଚାସ୍। 51ଲେକିନ୍ ଯୀଶୁସ୍ ତେଙ୍ଗିୟାସ୍, “ରା ଚିଆ, ଢେର୍ ମାନ୍ଚା।” ଆରୁ ଯୀଶୁସ୍ ଆସ୍କି ହେବ୍ଦାନ୍ ଏସ୍ରିକିରି ବାନେ କାମ୍ଚାସ୍। 52ଏକା ମୁଖ୍ୟା ପୁରୋହିତ୍, ମନ୍ଦିର୍ ଜାଗୁର୍ଘି ଆଗୁୱାର୍ ଆରୁ ପୁର୍ଖାଜାମାର୍ ଯୀଶୁସିନ୍ ଧାରାଗେ ବାର୍ଚ୍କାଚାର୍, ଆବ୍ଡ଼ାରିନ୍ ଯୀଶୁସ୍ ତେଙ୍ଗିୟାସ୍, “ନିମ୍ ଏଙ୍ଗାନ୍ ଡାକୁ ସୋଚିକିରି ଖଣ୍ଡା ଆରୁ ଠେଙ୍ଗା ଧାରିକିରି ଉର୍କାଦାର୍? 53ଏନ୍ ମନ୍ଦିର୍ନୁ ରୋଜ୍ ନିହ୍ମାଗାନେ ରାଚ୍କାନ୍, ଆରୁ ନିମ୍ ଏଙ୍ଘା ମିଆଁ ହେଖ୍ଖା ମା ଉଠାବାଚ୍କାର୍; ଲେକିନ୍ ଇ ସାମାୟ ନିହ୍ମାଏ, ଆରୁ ଆକ୍କୁନ୍ ଉହାଦ୍ ରାଜୀ କାମାଲି।”
ପାତ୍ରାସ୍କି ମାନା କାମ୍ନା
(ମାତିସ୍ ୨୬:୫୭,୫୮,୬୯-୭୫; ମାର୍କୁସ୍ ୧୪:୫୩,୫୪,୬୬-୭୨; ଯୋହାନ୍ ୧୮:୧୨-୧୮,୨୫-୨୭)
54ଆନ୍ତିନ୍ ଯୀଶୁସିନ୍ ହିଁଚାର୍ ଆରୁ ଆସିନ୍ ହୋଇକିରି, ମାହାପୁରୋହିତ୍ସ୍କି ମହଲ୍ନୁ ଆଣ୍ସ୍ତାଚାର୍। ପାତ୍ରାସ୍ ଗେଚ୍ଛାନୁ ରାଇକିରି ଆସ୍କି ପାଛ୍ଲି-ପାଛ୍ଲି କେରାସ୍; 55ଆରୁ ଆବ୍ଡ଼ାର୍ ଚାଲି ମାଝାନୁ ଚିଚ୍ଚୁ ଅଦିକିରି ଅନ୍ ଭାଉଁରି ଅକ୍କାଚାର୍, ତା ପାତ୍ରାସ୍ହି ଆବ୍ଡ଼ାର୍ ଗାନେ ଅକ୍କିୟାସ୍। 56ଆଙ୍ଗେନ୍ ଅଣ୍ଟା ଗୁତ୍ତିୟାଦ୍ ପାତ୍ରାସ୍ସିନ୍ ଚିଚ୍ଚୁଘି ବିଲ୍ଲୀତି ଅକ୍କନାବନ୍ ଏରିୟାଦ୍ ଆରୁ ଆସିନ୍ ଏକ୍ନଜର୍ନୁ ଏରିକିରି ତେଙ୍ଗିୟାଦ୍, “ଇ ଆଲାସ୍ହି ଆସ୍ଗାନେ ରାଚାସ୍।” 57ଲେକିନ୍ ପାତ୍ରାସ୍ ମାନା କାମ୍ଚାସ୍ ଆରୁ ତେଙ୍ଗିୟାସ୍, “ହେ ଆଲି, ଏନ୍ ଆସିନ୍ ବାଲ୍ଦାନ୍।” 58କାଟେ ଡେରି ପାଛ୍ଲି ଅଣ୍ଟା ଦୁସ୍ରାର୍ ପାତ୍ରାସ୍ସିନ୍ ଏରିକିରି ତେଙ୍ଗିୟାସ୍, “ନିନ୍ହି ଆବ୍ଡ଼ାର୍ସ୍ତି ଅର୍ତୁୟ।” ପାତ୍ରାସ୍ ତେଙ୍ଗିୟାସ୍, “ମାଲ୍ଲା ଭାଇ, ଏନ୍ ମାଲ୍ଦାନ୍।” 59ଆନ୍ତିନ୍ ଲାଗ୍ଭାଗ୍ ଏକ୍ ଘାଣ୍ଟାଘି ପାଛ୍ଲି ଅଣ୍ଟା ଦୁସ୍ରା ଆଲାସ୍ ଏରିକିରି ଆରୁ ଯୋର୍ ଚିଇକିରି ତେଙ୍ଗା ଲାଗ୍ଗିୟାସ୍, “ଇ ଆଲାସ୍ହି ଜରୁର୍ ଆସ୍ଗାନେ ରାଚାସ୍, ଏନ୍ଦେର୍ଗେକା ଇସ୍ହି ଗାଲିଲୀ ଜୀଲ୍ଲାନ୍ତାସ୍।” 60ଲେକିନ୍ ପାତ୍ରାସ୍ ତେଙ୍ଗିୟାସ୍, “ଆରେ ଭାଇ, ଏନ୍ ବାଲ୍ଦାନ୍ କା ନିନ୍ ଏନ୍ଦେର୍ ତେଙ୍ଗାଲ୍ଦାଏ!” ଆସ୍ ତେଙ୍ଗାଲିଆସିନ୍ କା ହୁଙ୍ଗେନିନ୍ ହେରୁଦ୍ ଅହ୍ଲିୟାଦ୍। 61ଆଙ୍ଗେନ୍ ପ୍ରାଭୁସ୍ କିର୍ରେ ଏରିୟାସ୍ ଆରୁ ପାତ୍ରାସ୍ସିନ୍ ଏକ୍ନଜର୍ନୁ ଏରିୟାସ୍, ଆଙ୍ଗେନ୍ ପାତ୍ରାସ୍କେ ପ୍ରାଭୁସ୍କି ତେଙ୍କା କାତ୍ଥା ମନେ ବାର୍ଚା କା: “ଇନ୍ନା ହେରୁ ଅହ୍ଲନାଘି ଆଘ୍ଲି, ନିନ୍ ଏଙ୍ଗାନ୍ ତିନ୍ ଥର୍ ମାନା କାମୟ।” 62ଆରୁ ଆସ୍ ବାହ୍ରି ଉର୍ଖିକିରି ନିହ୍ଚାରା-ନିହ୍ଚାରା ଅହ୍ଲାଗେ ଲାଗ୍ଗିୟାସ୍।
ପଲ୍ଟନ୍ଜାମାର୍ ଯୀଶୁସ୍କି ଅପ୍ମାନ୍ କାମାଲ୍ନାଏ
(ମାତିସ୍ ୨୬:୬୭,୬୮; ମାର୍କୁସ୍ ୧୪:୬୫)
63ଆରୁ ଯୀଶୁସିନ୍ ଏକାର୍ ଧାର୍ଚ୍କାଚାର୍, ଆବ୍ଡ଼ାର୍ ଆସ୍କି ମାଜାକ୍ ଉଡ଼ାବାଇକିରି ଡେମାଗେ ଲାଗ୍ଗିୟାର୍; 64ଆରୁ ଆବ୍ଡ଼ାର୍ ଯୀଶୁସ୍କି ହାନ୍ନୁବନ୍ ହିଁଇକିରି ଆସିନ୍ ମେନାଗେ ଲାଗ୍ଗିୟାର୍, “ନିନ୍ ଭବିଷତ୍ କାତ୍ଥା ତେଙ୍ଗା ଆରୁ ଏମାନ୍ ତେଙ୍ଗା କା ନେଦ୍ ନିଙ୍ଗାନ୍ ଡେମ୍ଚାର୍!” 65ଆରୁ ଆବ୍ଡ଼ାର୍ ଢେର୍ କାତ୍ଥା ତାଙ୍ଘା ବିରୁଦ୍ଧ୍ନୁ ତେଙ୍ଗିକିରି ତାଙ୍ଘା ଅପ୍ମାନ୍ କାମାଗେ ଲାଗ୍ଗିୟାର୍।
ଯୀଶୁସ୍ସିନ୍ ମାଜାକ୍ ଆରୁ ଡେମାଲ୍ଦାଏ
(ମାତିସ୍ ୨୬:୫୯-୬୬; ମାର୍କୁସ୍ ୧୪:୫୫-୬୪; ଯୋହାନ୍ ୧୮:୧୯-୨୪)
66ପାଇରି ବିଜ୍ଜିଆତା ଆଲାର୍ଘି ପୁର୍ଖାର୍, ମୁଖ୍ୟା ପୁରୋହିତ୍ ଆରୁ ପଣ୍ତିତ୍ଜାମାର୍ ଠୁଡ଼ିୟାରାଚାର୍, ଆରୁ ଆବ୍ଡ଼ାର୍ ଯୀଶୁସିନ୍ ତାହ୍ମା ମାହାସାଭାନୁ ଅନ୍ଦ୍ରାର୍ ଆରୁ ମେନ୍ଚାର୍, 67“ଯଦି ନିନ୍ ଖ୍ରୀସ୍ତ୍, ହାଲେ ନିନ୍ ଏମାନ୍ ତେଙ୍ଗାଚା!” ଲେକିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯଦି ଏନ୍ ନିମାନ୍ ତେଙ୍ଗନ୍, ହାଲେ ନିମ୍ ବିଶ୍ୱାସ୍ ମା କାମ୍ଦାର୍; 68ଆରୁ ଏନ୍ ନିମାନ୍ ପ୍ରଶ୍ନ ମେନନ୍, ତା ନିମ୍ ଯାବାବ୍ ମା ଚିଦାର୍। 69ଲେକିନ୍ ଆକ୍କୁନ୍ନ୍ତି ମୁନୁଷ୍ ହାଦ୍ଦୁସ୍ ଜାମାର୍ଘିନ୍ତି ଶକ୍ତିଶାଲୀ ପାର୍ମେଶ୍ଵାର୍କି ତିନାତାରା ଅକ୍କାରୋସ୍।” 70ଆଙ୍ଗେନ୍ ଜାମା ଆଲାର୍ ମେନ୍ଚାର୍, “ହାଲେ ନିନ୍ ପାର୍ମେଶ୍ଵାର୍ସ୍କି ହାଦ୍ଦୁୟ କାଁଏ?” ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଠିକେନ୍ ତେଙ୍ଗାଲ୍ଦାର୍, ଏନ୍ ଆ ଆଲାନିନ୍।” 71ଆନ୍ତିନ୍ ଆବ୍ଡ଼ାର୍ ତେଙ୍ଗିୟାର୍, “ଆକ୍କୁନ୍ ଏମାଗେ ସାକ୍ଷୀଘି ଆରୁ ଏନ୍ଦେର୍ ଦାର୍କାର୍ ରାଇଦ୍? ଏନ୍ଦେର୍ଗେକା ଏମ୍ତା ଖୁଦ୍ ତାଙ୍ଘା ଥୁମ୍ଣାନ୍ତି ମେନ୍ଚ୍କାଦାମ୍।”
23ପିଲାତୁସ୍ଘି ଆଘ୍ଲି ଯୀଶୁସ୍
(ମାତିସ୍ ୨୭:୧,୨; ୨୭:୧୧-୧୪; ମାର୍କୁସ୍ ୧୫:୧-୫; ଯୋହାନ୍ ୧୮:୨୮-୩୮)
1ଆନ୍ତିନ୍ ସାଭାନ୍ତା ଜାମା ଆଲାର୍ ଉସ୍କାରାଚାର୍ ଆରୁ ଯୀଶୁସିନ୍ ପିଲାତୁସ୍କି ଚାହାଗେ ଅଚ୍ଚାର୍। 2ଆରୁ ଆବ୍ଡ଼ାର୍ ଯୀଶୁସ୍କି ବିରୁଦ୍ଧ୍ନୁ ତେଙ୍ଗା ଲାଗ୍ଗିୟାର୍ କା: “ଏମ୍ ଆହାଲ୍ଦାମ୍ କା ଇ ଆଲାସ୍ ନାହ୍ମା ଆଲାର୍ଘି ମାଝାନୁ ଝାଗ୍ଡ଼ା କାମ୍ତାଲ୍ଦାସ୍, କାଇସର୍ ରାଜାସ୍କେ ମାଲ୍ଗୁଜାରୀ ଚିୟାଗେ ଆଲାରିନ୍ ମାନା କାମାଲ୍ଦାସ୍, ଆରୁ ନିଜ୍କେନିଜ୍ ଖ୍ରୀସ୍ତ୍, ରାଜା ବୁଲି ତେଙ୍ଗାଲ୍ଦାସ୍।” 3ପିଲାତୁସ୍ ଯୀଶୁସିନ୍ ମେନ୍ଚାସ୍, “ନିନ୍ ୟାହୁଦୀ ଜାମାର୍ଘି ରାଜାଏ କାଁଏ?” ଯୀଶୁସ୍ ଆସିନ୍ ଯାବାବ୍ ଚିଚ୍ଚାସ୍, “ନିମ୍ ଏନ୍ନେ ତେଙ୍ଗାଲ୍ଦାର୍।” 4ଆଙ୍ଗେନ୍ ପିଲାତୁସ୍ ମୁଖ୍ୟା ପୁରୋହିତ୍ ଆରୁ ଆଲାର୍ଘି ଭିଡ଼୍ବନ୍ ତେଙ୍ଗିୟାସ୍, “ଏନ୍ ଇ ଆଲାସ୍କିନୁ ଏନ୍ଦେର୍ହି ଦୋଷ୍ ମାଲ୍ଲା ହାଖ୍ଖୁନ୍।” 5ଲେକିନ୍ ଆବ୍ଡ଼ାର୍ ଆରୁହି ଯୋର୍ ଚିଇକିରି ତେଙ୍ଗା ଲାଗ୍ଗିୟାର୍, “ଇ ଆଲାସ୍ ଜାମା ୟାହୁଦା ପ୍ରଦେଶ୍ନୁ ଉପ୍ଦେଶ୍ ଚିଆଲିୟାସ୍, ଆରୁ ଗାଲିଲୀ ରାଜୀନ୍ତି ହୋଇକିରି ଇସାନ୍ତକ୍ ଆଲାରିନ୍ ତାଙ୍ଘା ଉପ୍ଦେଶ୍ତି ଚାଢ଼ାବାଲିୟାସ୍।” 6ଆବ୍ଡ଼ାର୍ଘି କାତ୍ଥାନ୍ ମେନିକିରି ପିଲାତୁସ୍ ଆବ୍ଡ଼ାରିନ୍ ମେନ୍ଚାସ୍, “ଇ ଆଲାସ୍ ଗାଲିଲୀ ପ୍ରଦେଶ୍ତାସ୍ କାଁଏ?” 7ଯେତ୍କବାକେନ୍ ପିଲାତୁସ୍ ଆଖ୍ଖାସ୍ କା ଯୀଶୁସ୍ ହେରୋଦ୍ସ୍କି ଜିଲ୍ଲାନ୍ତାସ୍, ତା ଆସ୍ ଯୀଶୁସ୍ସିନ୍ ହେରୋଦ୍ ରାଜାସ୍କି ଚାହାଗେ ତାଇଏଚାସ୍, ହୁ ସାମାୟନୁ ହେରୋଦ୍ସ୍ ଯେରୁଶାଲେମ୍ନୁ ରାଚାସ୍।
8ଯୀଶୁସିନ୍ ଏରିକିରି ହେରୋଦ୍ସ୍ ମୁରୁକ୍ ଖୁସୀ ମାନ୍ଚାସ୍ କେରାସ୍, ଆସ୍ ଢେର୍ଉଲ୍ତି ଆସିନ୍ ଏରା ବେଦ୍ଦାଲିୟାସ୍; ଏନ୍ଦେର୍ଗେକା ଆସ୍ ଯୀଶୁସ୍କି ବାରେନୁ ମେନ୍ଚ୍କାଚାସ୍, ହୁଦ୍ଘିଲାଗାନ୍ ଯୀଶୁସ୍କି ଏନ୍ଦ୍ରିନ୍ ଅଦ୍ଭୁତ୍ ନାଲ୍ଖୁ ଏରା ବେଦ୍ଦାଲିୟାସ୍। 9ହେରୋଦ୍ସ୍ ଯୀଶୁସିନ୍ ଢେର୍ ପ୍ରଶ୍ନ ମେନ୍ଚାସ୍, ଲେକିନ୍ ଆସ୍ ଆସିନ୍ ଏନ୍ଦେର୍ହି ଯାବାବ୍ ମା ଚିଚ୍ଚାସ୍। 10ଆସାନ୍ ରୁ ମୁଖ୍ୟା ପୁରୋହିତ୍ ଆରୁ ପଣ୍ତିତ୍ଜାମାର୍ଘି ଗୁରୁର୍ ଯୀଶୁସ୍କି ମିଆଁ ଯୋର୍ ଦୋଷ୍ ଚିତେ ରାଚାର୍। 11ଆନ୍ତିନ୍ ହେରୋଦ୍ସ୍ ଆରୁ ତାଙ୍ଘା ପଲ୍ଟନ୍ଜାମାର୍ ଯୀଶୁସ୍କି ଅପ୍ମାନ୍ କାମିକିରି ମାଜାକ୍ ଉଡ଼ାବାଚାର୍, ଆରୁ ଆବ୍ଡ଼ାର୍ ଯୀଶୁସିନ୍ ବିଲ୍ଚ୍ନା ଚିଢ଼ା ଆତ୍ତ୍ତିକିରି ଆରୁଅହନ୍ ପିଲାତୁସ୍ ରାଜାସ୍କି ଚାହାଗେ ତାଇଏର୍ଚାର୍। 12ହୁ ଉଲ୍ଲାନ୍ତି ହେରୋଦ୍ସ୍ ଆରୁ ପିଲାତୁସ୍ ସାଙ୍ଗେ ମାନ୍ଚାର୍ କେରାର୍; ଇଦ୍ଘି ଆଘ୍ଲି ଆବ୍ଡ଼ାର୍ ବିରୋଧି ରାଚାର୍।
ପିଲାତୁସ୍ ଯୀଶୁସିନ୍ ମରନ୍ ଦଣ୍ଡ୍ ଶୁଣାବାଲ୍ଦାସ୍
(ମାତିସ୍ ୨୭:୧୫-୨୬; ମାର୍କୁସ୍ ୧୫:୬-୧୫; ଯୋହାନ୍ ୧୮:୩୯—୧୯:୧୬)
13ଇଦ୍ଘି ପାଛ୍ଲି ପିଲାତୁସ୍ ମୁଖ୍ୟା ପୁରୋହିତ୍ରିନ୍ ମୁଖିଆରିନ୍, ଆରୁ ଆଲାରିନ୍ ମେଁହିକିରି ତେଙ୍ଗିୟାସ୍, 14“ଇ ଆଲାସ୍ ଆଲାରିନ୍ ଚାଢ଼ାବାଇକିରି ଝାଗ୍ଡ଼ା କାମ୍ତାଲ୍ଦାସ୍ ବୁଲି ନିମ୍ ଇସିନ୍ ଏଙ୍ଘା ଚାହାଗେ ଅନ୍ଦର୍କାଦାର୍, ଆରୁ ଏରା, ଏନ୍ ଇସିନ୍ ନିହ୍ମା ଆଘ୍ଲି ପ୍ରଶ୍ନ ମେନ୍ଚ୍କାନ୍, ଲେକିନ୍ ତାଙ୍ଘା ବିରୁଦ୍ଧ୍ନୁ ଅନ୍ଦର୍କା ଦୋଷ୍ଘି ଏନ୍ଦେର୍ହି କାରଣ୍ ମା ହାକ୍କାନ୍; 15ଆରୁ ହେରୋଦ୍ସ୍ ହି ଇସ୍କିନୁ ଏନ୍ଦେର୍ହି ଦୋଷ୍ ମା ହାଖ୍ଖୀୟାସ୍, ହୁଦ୍ଘିଲାଗାନ୍ ଆସ୍ ଯୀଶୁସିନ୍ ଏଙ୍ଘାସାନ୍ ଆରୁଅହନ୍ ତାଇଏଚାସ୍: ନିମ୍ ଏରା ଅଙ୍ଗାଲ୍ଦାର୍କା ଇସ୍ ମରନ୍ ଦଣ୍ଡ୍ଘି ଲାଇଗ୍ ଏନ୍ଦେର୍ହି ଦୋଷ୍ ମାଲ୍ଲା କାମୁସ୍। 16ହୁଦ୍ଘିଲାଗାନ୍ ଏନ୍ ଇସିନ୍ ଦଣ୍ଡ୍ ଚିଇକିରି ଆମ୍ବନ୍ ଚିଅନ୍।” 17(ପରବ୍ଘି ସାମାୟନୁ ପିଲାତୁସ୍ ୟାହୁଦୀ ଜାମାର୍ଘି ଲାଗାନ୍ ଅଣ୍ଟା ବନ୍ଦୀସିନ୍ ଆମ୍ବାଲିୟାସ୍।) 18ଲେକିନ୍ ଆସାନ୍ ରୁ ଯେତ୍କ ଆଲାର୍ ଅହ୍ନାସାରେନ୍ ଚିର୍ରାରାଗେ ଲାଗ୍ଗିୟାର୍, “ଯୀଶୁସିନ୍ ମରନ୍ଘି ଦଣ୍ଡ୍ ଚିଆ, ଆରୁ ଏହ୍ମାଲାଗାନ୍ ବାରାବ୍ବାସିନ୍ ଆମ୍ବାଚା!” 19ସହର୍ନୁ ମାନ୍ଚ୍କା ଲାଡ଼ାଇ ଝାଗ୍ଡ଼ାଘି ଲାଗାନ୍ ଆରୁ ଆଲାରିନ୍ ପିଟ୍ଟକାଘି ଲାଗାନ୍, ବାରାବ୍ବାସିନ୍ ଜେହେଲ୍ନୁ ଗୁଡ୍ଡକାଚାର୍ 20ଲେକିନ୍ ପିଲାତୁସ୍ ଯୀଶୁସିନ୍ ଆମ୍ବାଚାଗେ ବେଦ୍ଦାଲିୟାସ୍ ହୁଦ୍ଘିଲାଗାନ୍ ଆଲାରିନ୍ ଆରୁଅହନ୍ ବୁଝାବାଗେ ଲାଗ୍ଗିୟାସ୍, 21ଲେକିନ୍ ଆବ୍ଡ଼ାର୍ ଜୋର୍ସେ ଚିର୍ରାରାଗେ ଲାଗ୍ଗିୟାର୍, “ଇସିନ୍ କ୍ରୁଶ୍ନୁ ଠୋକା, ଇସିନ୍ କ୍ରୁଶ୍ନୁ ଠୋକା!” 22ଆଙ୍ଗେନ୍ ପିଲାତୁସ୍ ତିସ୍ରା ଥର୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ଦେର୍ଗେ, ଇସିନ୍ କ୍ରୁଶ୍ନୁ ଠୋକର୍? ଇ ଆଲାସ୍ ଏନ୍ଦେର୍ ଦୋଷ୍ କାମ୍ଚ୍କାଦାସ୍? ଏନ୍ ଇସ୍କିନୁ ମରନ୍ ଦଣ୍ଡ୍ଘି ଲାଇଗ୍ ଏନ୍ଦେର୍ହି ଦୋଷ୍ ମାଲ୍ଲା ହାଖ୍ଖୁନ୍। ହୁଦ୍ଘିଲାଗାନ୍ ଏନ୍ ଇସିନ୍ ଦଣ୍ଡ୍ ଚିଇକିରି ଆମ୍ବନ୍ ଚିଅନ୍।” 23ଲେକିନ୍ ଆବ୍ଡ଼ାର୍ ଜୋର୍ସେ ଚିର୍ରା ରାଇକିରି ଜିଧା କାମାଗେ ଲାଗ୍ଗିୟାର୍ କା ଇସିନ୍ କ୍ରୁଶ୍ନୁ ଠୋକା, ଆରୁ ଆବ୍ଡ଼ାର୍ଘି ଚିର୍ରାରାନାଦ୍ ବାଢ଼ର୍ତେ କାଲିୟାଦ୍। 24ଆରୁ ପିଲାତୁସ୍ ହୁକୁମ୍ ଚିଚ୍ଚାସ୍ କା ଆବ୍ଡ଼ାର୍ଘି ଆର୍ଜୀ ଲେଖା କାମାକୋ। 25ଲେକିନ୍ ଏକା ଆଲାସ୍ ଲାଡ଼ାଇ ଝାଗ୍ଡ଼ା କାମ୍ଚ୍କାଚାସ୍, ଆଲ୍ ପିଟ୍ଟକାଚାସ୍ ଆରୁ ଜେହେଲ୍ନୁ ରାଚାସ୍, ଆରୁ ନେକାନ୍ କା ଆବ୍ଡ଼ାର୍ ଛାଡ଼ାବାଗେ ବେଦ୍ଦାଲିୟାର୍, ଆସିନ୍ ପିଲାତୁସ୍ ଆମ୍ଵେଇଚାସ୍; ଆରୁ ଯୀଶୁସିନ୍ ଆଲାର୍ଘି ଇଚ୍ଛା ଲେଖା ତାମାଗେ ସୋଁପ୍ଚେଇଚାସ୍।
ଯୀଶୁସିନ୍ କ୍ରୁଶ୍ନୁ ଠୋକାଲ୍ନାଏ
(ମାତିସ୍ ୨୭:୩୨-୪୪; ମାର୍କୁସ୍ ୧୫:୨୧-୩୨; ଯୋହାନ୍ ୧୯:୧୭-୨୭)
26ଯେତ୍କବାକେନ୍ ପଲ୍ଟନ୍ଜାମାର୍ ଯୀଶୁସିନ୍ ହୁଆଲିୟାର୍, ହତ୍କବାକେନ୍ କୂରୀଣୀ ପାଡ଼ାନ୍ତା ଶିମୋନ୍ସିନ୍ ହାଖ୍ଖୀୟାର୍ ଆସ୍ ପାଡ଼ାତାର୍ତି ବାରାଲିୟାସ୍, ଆରୁ ଆବ୍ଡ଼ାର୍ ଆସିନ୍ ଧାର୍ଚାର୍ ଆରୁ ତାଙ୍ଘା ମିଆଁ କ୍ରୁଶ୍ବନ୍ ତେଙ୍ଗ୍ଡ଼େଇଚାର୍, କା ଆସ୍ କ୍ରୁଶ୍ବନ୍ ଚେଡ଼ିକିରି ଯୀଶୁସ୍କି ପାଛ୍ଲି-ପାଛ୍ଲି କସ୍। 27ଆଲାର୍ଘି ଅଣ୍ଟା ବାଡ଼୍କା ଭିଡ଼୍ ଆବ୍ଡ଼ାର୍ଘି ପାଛ୍ଲି-ପାଛ୍ଲି କାଲିୟାଦ୍ ଆରୁ ଆବ୍ଡ଼ାର୍ଘି ଭିତର୍ନୁ ଢେର୍ ମାଏକିନିଆଁର୍ହି ରାଚାର୍ ଏକାର୍ କା ଆସ୍କି ଲାଗାନ୍ ଏହୁ ଡେମ୍ରା-ଡେମ୍ରା ଅହ୍ଲାଲିୟାର୍। 28ଲେକିନ୍ ଯୀଶୁସ୍ ଆବ୍ଡ଼ାର୍ ତାରା କିର୍ରେଚେ ଏରିକିରି ତେଙ୍ଗିୟାସ୍, “ହେ ଯେରୁଶାଲେମ୍ ତା ହାଇ ଗୁଠିଆରୋ, ଏଙ୍ଘାଲାଗାନ୍ ଆମା ଅହ୍ଲା; ଲେକିନ୍ ନିମା ଆରୁ ନିହ୍ମା ହାଦ୍ଦୁବଚ୍ଚର୍ଘି ଲାଗାନ୍ ଅହ୍ଲା। 29ଏନ୍ଦେର୍ଗେକା ଏରା, ଆ ଉଲ୍ଲାଦ୍ ବାରାଲିଦ୍, ଯେତ୍କବାକେନ୍ ଆଲାର୍ ତେଙ୍ଗର୍, ‘କା ଧଏନ୍ ରାନାଏ ଆ ମାଏକିନିଆଁର୍ ବାନ୍ଝୀ ରାନାଏ ଆରୁ ନେଦ୍ ଏକ୍ଲାହି ମେଦୁନୁ ମାଲ୍ଲାରୁର୍ ଆରୁ ଗୁରସ୍ ମାଲ୍ଲା ହାପ୍ପତୁର୍।’ 30ହୁ ସାମାୟନୁ ଆଲାର୍ ପାର୍ତ୍ତାବନ୍ ତେଙ୍ଗାଗେ ଲାଗ୍ଗର୍, ‘ଏହ୍ମା ମିଆଁ ଖାତ୍ରୁ କାଲ୍, ଆରୁ ଘୁଟ୍ରାଗୁଠିନ୍ ତେଙ୍ଗାଗେ ଲାଗ୍ଗର୍ ଏମାନ୍ ଡାବୁଚି।’ 31ଏନ୍ଦେର୍ଗେକା ଯଦି ହାରା ମାନ୍ନୁଘି ହାଲ୍ ଏନ୍ନେ ମାନଦ୍, ତା ହାଏକାଘି ଏନ୍ଦେର୍ ମାନଦ୍।” 32ଆରୁ ଆବ୍ଡ଼ାର୍ ଯୀଶୁସ୍ଗାନେ ଆରୁ ଦୁଇ ଲୋକ୍ ଡାକୁରିନ୍ ମରନ୍ ଦଣ୍ଡ୍ଘି ଲାଗାନ୍ ହୁଆଲିୟାର୍। 33ଯେତ୍କବାକେନ୍ ଆବ୍ଡ଼ାର୍ ଖୋପ୍ଡ଼ି ନାମେଘି ଆଡ୍ଡାନୁ ଆଣସିୟାର୍, ତା ଆସାନ୍ ଆବ୍ଡ଼ାର୍ ଯୀଶୁସିନ୍ ଆରୁ ଆ ଦୁଇ ଲୋକ୍ ଡାକୁରିନ୍ହି, କ୍ରୁଶ୍ନୁ ଠୋକ୍ଚାର୍। ଆ ଡାକୁର୍ଘି ଭିତର୍ନୁ ଅଣ୍ଟାସିନ୍ ଯୀଶୁସ୍କି ତିନାତାରା ଆରୁ ଅଣ୍ଟାସିନ୍ ଡେବ୍ବାତାରା। 34ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ହେ ବାଙ୍ଗ୍, ଇବ୍ଡ଼ାରିନ୍ ଛେମା କାମା, ଏନ୍ଦେର୍ଗେକା ଇବ୍ଡ଼ାର୍ ବାଲ୍ନାଇନ୍ କା ଏନ୍ଦେର୍ କାମାଲ୍ନାଏ।” ଆନ୍ତିନ୍ ଆବ୍ଡ଼ାର୍ ଚିଠା ଅଥ୍ରିକିରି ଯୀଶୁସ୍କି ଚିଢ଼ାନ୍ ହାଟ୍ରାର୍।
35ଆଲାର୍ ଇଜ୍ଜାର୍ ଆରୁ ଇବ୍ଡ଼ା ଜାମାନ୍ ଏରାଲିୟାର୍, ଆସାନ୍ ରୁ ମୁଖିଆଜାମାର୍ ଏନ୍ନେ ତେଙ୍ଗିକିରି ଯୀଶୁସ୍କି ମାଜାକ୍ ଉଡ଼ାବାଗେ ଲାଗ୍ଗିୟାର୍ କା, “ଇସ୍ ଦୁସ୍ରାରିନ୍ ବାଛାବାଚାସ୍, ଯଦି ଇସ୍ ପାର୍ମେଶ୍ଵାର୍ସ୍କି ଚାଜ୍ଜକା ଖ୍ରୀସ୍ତ୍, ତା ଆସ୍ ନିଜ୍କେନିଜ୍ ବାଛାବାନାସ୍।” 36ପଲ୍ଟନ୍ ଜାମାର୍ହି ଆସ୍କି ଚାହାଗେ ବାରିକିରି ହାଡ଼୍ଖା ଅଙ୍ଗୁର୍ ରାସେନ୍ ଚିଇକିରି ମାଜାକ୍ ଉଡ଼ାବାଚାର୍, 37“ଯଦି ନିନ୍ ୟାହୁଦୀ ଜାମାର୍ଘି ରାଜାଏ, ତା ନିନ୍ ନିଜ୍କେନିଜ୍ ବାଛାବା!” 38ଆରୁ ଯୀଶୁସ୍କି କ୍ରୁଶ୍ ମିଆଁ ଦୋଷୀବାଲା ଅଣ୍ଟା ପାଟା ଲାଗାବାଚ୍କା ରାଚା ଆନ୍ନୁ ଲେଖ୍ଚ୍କାରାଚା, “ଇସ୍ ୟାହୁଦୀ ଜାମାର୍ଘି ରାଜାସ୍।”
ପାସ୍ତାରୁ ଡାକୁ
39ଆରୁ କ୍ରୁଶ୍ନୁ ଠୋକ୍ଚ୍କା ଡାକୁର୍ଘି ଭିତର୍ନୁ, ଅଣ୍ଟାସ୍ ଯୀଶୁସ୍କି ନିନ୍ଦା କାମ୍ତେ ଏନ୍ନେ ତେଙ୍ଗିୟାସ୍, “ନିନ୍ ଖ୍ରୀସ୍ତ୍ ମାଲ୍ଦାଏ କାଁଏ? ହାଲେ ନିନ୍ ନିଜ୍କେନିଜ୍ ବାଛାବା ଆରୁ ଏମାନ୍ହି ବାଛାବା!” 40ଲେକିନ୍ ଆରୁ ଅଣ୍ଟାସ୍ ଆସିନ୍ ଧାମ୍କିକିରି ତେଙ୍ଗିୟାସ୍, “ନିନ୍ ପାର୍ମେଶ୍ଵାର୍ସିନ୍ହି ମା ଏଲ୍ଚ୍ଦାଏ କାଁଏ? ନିନ୍ହି ତା ଆ ଦଣ୍ଡ୍ନିନ୍ ଭୋଗାଲ୍ଦାଏ, 41ନାମ୍ ତା ନ୍ୟାୟ ଅନୁସାର୍ ଦଣ୍ଡ୍ ହାଖ୍ଖାଲ୍ଦାତ୍, ଏନ୍ଦେର୍ଗେକା ନାମ୍ ନାହ୍ମା କାମ୍ଚ୍କା ନାଲ୍ଖୁଘି ଲାଗାନ୍ ଦଣ୍ଡ୍ ହାଖ୍ଖାଲ୍ଦାତ୍; ଲେକିନ୍ ଇ ଆଲାସ୍ ଏନ୍ଦେର୍ହି ଦୋଷ୍ ମାଲ୍ଲା କାମୁସ୍।” 42ଆନ୍ତିନ୍ ଆ ଡାକୁସ୍ ତେଙ୍ଗିୟାସ୍, “ହେ ଯୀଶୁ, ଯେତ୍କବାକେନ୍ ନିମ୍ ନିହ୍ମା ରାଜୀଗେ କୟ, ତା ଏଙ୍ଗାନ୍ହି ମନେ କାମ୍କେ।” 43ଯୀଶୁସ୍ ଆସିନ୍ ତେଙ୍ଗିୟାସ୍, “ଏନ୍ ନିଙ୍ଗାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ନିନ୍ ଇନ୍ନାନିନ୍ ଏଙ୍ଘାଗାନେ ସରଗ୍ନୁ ରୟ।”
ଯୀଶୁସ୍କି ଖିନା
(ମାତିସ୍ ୨୭:୪୫-୫୬; ମାର୍କୁସ୍ ୧୫:୩୩-୪୧; ଯୋହାନ୍ ୧୯:୨୮-୩୦)
44ହୁଙ୍ଗେନ୍ ଲାଗ୍ଭାଗ୍ ବାର ବାଚ୍ଚା କେର୍କିଚା ଆରୁ ଲାଗ୍ଭାଗ୍ ତିନ୍ବାଜେଜୁଟି ପୁରା ଦେଶ୍ ଉହା ମାନ୍ଚାକେରା, 45ହତ୍କବାକେନ୍ ବିଡ଼ିଦ୍ ବିଲ୍ଲୀ ଚିନା ବନ୍ଦ୍ କାମ୍ଚେଇଚା, ଆରୁ ମନ୍ଦିର୍ତା ପାର୍ଦାଦ୍ ମାଝାନ୍ତି ଏଟ୍ରିକିରି ଦୁଇ ଭାଗ୍ ମାନ୍ଚାକେରା, 46ଆରୁ ଯୀଶୁସ୍ ଜୋର୍ସେ ଚିର୍ରା ରାଇକିରି ତେଙ୍ଗିୟାସ୍, “ହେ ବାଙ୍ଗ୍, ଏନ୍ ଏଙ୍ଘା ଆତ୍ମାନ୍ ନିଙ୍ଘା ହେଖ୍ଖାନୁ ସୋଁପାଚାଲ୍ଦାନ୍।” ଆରୁ ଏତ୍କ ତେଙ୍ଗିକିରି ଯୀଶୁସ୍କି ଜୀଆଦ୍ ଉର୍ଖିଆ କେରା। 47ପଲ୍ଟନ୍ଜାମାର୍ଘି ମୁଖ୍ୟାସ୍ ଇବ୍ଡ଼ା ଜାମାନ୍ ଏରିକିରି ପାର୍ମେଶ୍ଵାର୍ସ୍କି ସ୍ତୁତି କାମ୍ତେ ତେଙ୍ଗିୟାସ୍, “ସତ୍ତୁନ୍ନିନ୍ ଇ ଆଲାସ୍ ଧାର୍ମିକ୍ ରାଚାସ୍।” 48ଆରୁ ଯୁକ୍କୁ ଆଲାର୍ ଇ ଘାଟ୍ଣାନ୍ ଏରାଗେ ଠୁଡ଼ିୟା ରାଚ୍କାଚାର୍, ଆବ୍ଡ଼ାର୍ ଇ ଘାଟ୍ଣାନ୍ ଏରିକିରି ଏହୁନ୍ ଡେମ୍ର୍ତେ କିର୍ରିଆର୍। 49ଲେକିନ୍ ଯୀଶୁସ୍କି ଚିହ୍ନାର୍ ଆଲାର୍, ଆରୁ ଗାଲିଲୀନ୍ତି ତାଙ୍ଘା ସାଙ୍ଗେନ୍ ବାରୁ ମାଏକିନିଆଁର୍ ଗେଚ୍ଛାନୁ ଇଜ୍ଜାର୍ ଆରୁ ଇବ୍ଡ଼ା ଜାମାନ୍ ଏରାଲିୟାର୍।
ଯୀଶୁସ୍କି ମାଡ଼୍ନା
(ମାତିସ୍ ୨୭:୫୭-୬୧; ମାର୍କୁସ୍ ୧୫:୪୨-୪୭; ଯୋହାନ୍ ୧୯:୩୮-୪୨)
50-51ଆରୁ ଏରା ୟାହୁଦୀ ଜାମାର୍ଘି ହାରାମାଥିୟା ପାଡ଼ାନ୍ତା ଯୋଷେଫ୍ ନାମେଘି ଅଣ୍ଟା ଆଲାସ୍ ମାହାସାଭାନ୍ତା ସଦସ୍ୟ ରାଚାସ୍ ଆସ୍ ଅଣ୍ଟା ସାଧାସିଧା ଆରୁ ଧାର୍ମିକ୍ ରାଚାସ୍; ଆରୁ ଆସ୍ ସାଭାଘି ଫାଏସ୍ଲା ଆରୁ ନାଲ୍ଖୁତି ରାଜୀ ମାଲ୍ଲାରୁସ୍। ଆରୁ ଆସ୍ ପାର୍ମେଶ୍ଵାର୍ସ୍କି ରାଜୀଘି ପାବୁ ଏରାଲିୟାସ୍। 52ଆସ୍ ପିଲାତୁସ୍କି ଚାହାଗେ କେରାସ୍ ଆରୁ ଯୀଶୁସ୍କି ମାଁଣାନ୍ ନିଚାସ୍। 53ଆରୁ ଆସ୍ ଯୀଶୁସିନ୍ କ୍ରୁଶ୍ତି ଏତ୍ତତିକିରି ଅଣ୍ଟା ଛିଟ୍ ଚିଢ଼ାନୁ ଗୁଢ଼େଇଚାସ୍, ଆରୁ ଅଣ୍ଟା ମାସ୍ଣାନୁ ଉଇୟାସ୍, ଏକାଦ୍ କା ଚାଟ୍ଣୀନୁ ଖୋଲ୍ର୍କା ରାଚା; ଆରୁ ଆନ୍ନୁ ଏକ୍ଲାହି ନେକାନ୍ହି ମାଲ୍ଲା ଉଇୟୁର୍। 54ପାବିତାର୍ ଉଲ୍ଲାଘି ଆଘ୍ଲି ଉଲ୍ଲାଦ୍ ତିୟାରିଘି ଉଲ୍ଲା ରାଚା, ଆରୁ ପାବିତାର୍ ଉଲ୍ଲାଦ୍ ଚାହା ଆଣସାଲିୟାଦ୍। 55ଏକା ମାଏକିନିଆଁର୍ ଯୀଶୁସ୍ଗାନେ ଗାଲିଲୀନ୍ତି ବାର୍ଚ୍କାଚାର୍, ଆବ୍ଡ଼ାର୍ ଯୋଷେଫ୍ସ୍କି ପାଛ୍ଲି-ପାଛ୍ଲି କାଇକିରି ମାସ୍ଣାନ୍ ଏରିୟାର୍, ଆରୁ ଇବନ୍ହି ଏରିୟାର୍ କା ଯୀଶୁସ୍କି ମାଁଣାନ୍ ଏସ୍କେ ଉଇକା ରାଇଦ୍। 56ଆନ୍ତିନ୍ ଆବ୍ଡ଼ାର୍ କିର୍ରିକିରି ବାସ୍ନା ଜିନିଷ୍ ଆରୁ ବାସ୍ନା ଇସୁଙ୍ଗ୍ ତିୟାର୍ କାମ୍ଚାର୍; ଆରୁ ନିୟମ୍ ଅନୁସାର୍ ପାବିତାର୍ ଉଲ୍ଲାନୁ ଆରାମ୍ କାମ୍ଚାର୍।
24ଯୀଶୁସ୍କି ଉଜ୍ଜନା
(ମାତିସ୍ ୨୮:୧-୧୦; ମାର୍କୁସ୍ ୧୬:୧-୮; ଯୋହାନ୍ ୨୦:୧-୧୦)
1ଆରୁ ହାପ୍ତାଘି ପହିଲ୍ ଉଲ୍ଲା ଭୋର୍ପାଇରି ଆବ୍ଡ଼ା ମାଏକିନିଆଁର୍ ତିୟାର୍ କାମ୍ଚ୍କା, ବାସ୍ନା ଜିନିଷ୍ ଧାର୍ଚାର୍ ଆରୁ ମାସ୍ଣାସାନ୍ କେରାର୍। 2ଆବ୍ଡ଼ାର୍ ମାସ୍ଣାନ୍ତା ଚାଁଚାନ୍ ଦୁସ୍ରା ତାରା ଢୁଲିୟାରାଚ୍କା ଏରିୟାର୍, 3ଲେକିନ୍ ଉଲା କାଇକିରି ଆବ୍ଡ଼ାର୍ଗେ ପ୍ରାଭୁ ଯୀଶୁସ୍କି ମାଁଣାଦ୍ ମା ହାଖ୍ଖରା। 4ହତ୍କବାକେନ୍ ଆବ୍ଡ଼ାର୍ ଆଚ୍ମିତ୍ ମାନିକିରି ଇଦ୍ଘି ବାରେ କାଚ୍ନେଖ୍ରାଲିୟାର୍ ତା, ଆଖାନେନ୍ ମୁରୁକ୍ ବିଲ୍ଚ୍ନା ଚିଢ଼ା ଆତ୍ତ୍କା ଦୁଇ ଲୋକ୍ ଆଲାର୍ ଆବ୍ଡ଼ାର୍ଘି ଚାହାନୁ ବାର୍ଚାର୍ ଆରୁ ଇଜ୍ଜାର୍। 5ଆଙ୍ଗେନ୍ ଆ ମାଏକିନିଆଁର୍ ଏଲ୍ଚ୍କାତି କିୟାଁ କୁକ୍କୁନ୍ ନୁହେଁଇଚାର୍ ଆଙ୍ଗେନ୍ ଆ ଆଲାର୍ ଆବ୍ଡ଼ାରିନ୍ ତେଙ୍ଗିୟାର୍, “ନିମ୍ ଉଜ୍ଜକାରିନ୍ ଏନ୍ଦେର୍ଗେ ଖିଉର୍ଘି ମାଝାନୁ ବେଦ୍ଦାଲ୍ଦାର୍? 6ଆସ୍ ଇସାନ୍ ମାଲ୍କାସ୍, ଲେକିନ୍ ଉଜ୍ଜିୟାସ୍ କେର୍କାଦାସ୍। ମନେ କାମା କା ଗାଲିଲୀନୁ ନିହ୍ମାଗାନେ ରାନାବାକେନ୍ ଆସ୍ ନିମାନ୍ ଏନ୍ଦେର୍ ତେଙ୍କାଚାସ୍, 7‘ଜରୁର୍ ମୁନୁଷ୍ ହାଦ୍ଦୁସିନ୍ ପାପୀ ଜାମାର୍ଘି ହେଖ୍ଖାନୁ ସୋଁପର୍ଚର୍, ଆରୁ କ୍ରୁଶ୍ ମିଆଁ ଠୋକର୍, ଆରୁ ତିସ୍ରା ଉଲ୍ଲା ଉଜ୍ଜସ୍’।” 8ଆଙ୍ଗେନ୍ ଆ ମାଏକିନିଆଁର୍ ଯୀଶୁସ୍କି କାତ୍ଥାନ୍ ମନେ କାମ୍ଚାର୍, 9ଆରୁ ମାସ୍ଣା ତାର୍ତି କିର୍ରିକିରି ଆବ୍ଡ଼ାର୍ ଇ କାତ୍ଥାଗୁଠିନ୍ ଏଗାର ଲୋକ୍ ଚେଲାରିନ୍, ଆରୁ ଦୁସ୍ରା ଜାମା ଆଲାରିନ୍ ତେଙ୍ଗିୟାର୍। 10ଆବ୍ଡ଼ାର୍ ମାରିୟାମ୍ ମାଗ୍ଦାଲୀନୀ, ଯୋହାନ୍ ଆରୁ ୟାକୁବ୍ସ୍କି ତାଙ୍ଗ୍ୟ ମାରିୟାମ୍ ରାଚାର୍। ଆବ୍ଡ଼ାର୍ ଗାନେ ଆରୁ ଦୁସ୍ରା ମାଏକିନିଆଁର୍ହି ରାଚାର୍ ଆବ୍ଡ଼ାର୍ହି ଚେଲାଜାମାରିନ୍ ତେଙ୍ଗିୟାର୍। 11ଲେକିନ୍ ଆ ଜାମା କାତ୍ଥାଦ୍ ଆବ୍ଡ଼ାର୍ଗେ ମାଜାକ୍ ଲେଖା ବୁଝ୍ରା ରାଚା, ଆରୁ ଆବ୍ଡ଼ାର୍ ମାଏକିନିଆଁର୍ଘି ମିଆଁ ବିଶ୍ଵାସ୍ ମା କାମ୍ଚାର୍। 12ଆଙ୍ଗେନ୍ ପାତ୍ରାସ୍ ଉସ୍କାରାଇକିରି ମାସ୍ଣା ତାରା କୁଦିଆରାନାତି କେରାସ୍ ଆରୁ ନୁହିଁକିରି ଆସାନ୍ ଚିଢ଼ା ଖାତ୍ର୍କାନ୍ ଖାଲି ଏରିୟାସ୍, ଆରୁ ଆସ୍ ଇ ଘାଟ୍ଣାଘି ବାରେନୁ ଆଚ୍ମିତ୍ ମାନିକିରି ଆଡ଼୍ପା କିର୍ରିୟାସ୍ କେରାସ୍।
ଯୀଶୁସ୍ ଦୁଇ ଲୋକ୍ ଚେଲାରିନ୍ ଦର୍ଶନ୍ ଚିଚ୍ଚାସ୍
13ହୁ ଉଲ୍ଲା ଯୀଶୁସ୍କି ଦୁଇ ଲୋକ୍ ଚେଲାର୍ ଇମ୍ମାଉସ୍ ନାମେଘି ଅଣ୍ଟା ପାଡ଼ାଗେ କାଲିୟାର୍, ଆଦ୍ ଯେରୁଶାଲେମ୍ତି ଲାଗ୍ଭାଗ୍ ସାତ୍ କୋଶ୍ ଗେଚ୍ଛା ରାଇଦ୍। 14ଆରୁ ଆବ୍ଡ଼ାର୍ ପାବୁନୁ ଇ ଜାମା ଘାଟ୍ଣାଘି ବାରେନୁ କାଚ୍ନେଖ୍ର୍ତେ କାଲିୟାର୍, 15ଆରୁ ଆବ୍ଡ଼ାର୍ କାତ୍ଥାବାର୍ତ୍ତା, ଆରୁ କାଁଟ୍ଛାଁଟ୍ କାମ୍ନା ସାମାୟନୁ ଯୀଶୁସ୍ ଖୁଦ୍ ଆବ୍ଡ଼ାର୍ଘି ଚାହା ବାରିକିରି ଆବ୍ଡ଼ାର୍ଘି ସାଙ୍ଗେନ୍ ଏକାଗେ ଲାଗ୍ଗିୟାସ୍। 16ଲେକିନ୍ ଆବ୍ଡ଼ା ଚେଲାର୍ଘି ହାନ୍ନୁବନ୍ ଏନ୍ନେ ବନ୍ଦ କାମାକେର୍କିଚା ଯେ ଆବ୍ଡ଼ାର୍ ଯୀଶୁସିନ୍ ଚିହ୍ନା ପଲ୍ଲିୟାର୍। 17ଯୀଶୁସ୍ ଆବ୍ଡ଼ାରିନ୍ ମେନ୍ଚାସ୍, “ନିମ୍ ଏକ୍ତେ-ଏକ୍ତେ ଏନ୍ଦେର୍ ବାରେନୁ କାଚ୍ଚନେଖ୍ରାଲ୍ଦାର୍?” ଆବ୍ଡ଼ାର୍ଘି ଚେହେରା ଉଦାସ୍ ମାନ୍ଚାକେରା ଆରୁ ଆବ୍ଡ଼ାର୍ ଇଜ୍ଜାର୍କେରାର୍। 18ଆବ୍ଡ଼ାର୍ଘି ଭିତର୍ନୁ କ୍ଲେୟପାସ୍ ନାମେଘି ଅଣ୍ଟା ଆଲାସ୍ ଯାବାବ୍ ଚିଚ୍ଚାସ୍, “ଯେରୁଶାଲେମ୍ନୁ ନିନିନ୍ ଅଣ୍ଟା ଏନ୍ନେ ପର୍ଦେଶୀୟା ଆଲାଏ ରାଦାଏ, କା ଇ ଉଲ୍ଲାନୁ ଇସାନ୍ ଏନ୍ଦେର୍-ଏନ୍ଦେର୍ ମାନ୍ଚ୍କିଚି ଆବନ୍ ବାଲ୍ଦାଇନ୍।” 19ଆସ୍ ଆବ୍ଡ଼ାରିନ୍ ମେନ୍ଚାସ୍, “ଏନ୍ଦେର୍ ମାନ୍ଚ୍କିଚି?” ଆବ୍ଡ଼ାର୍ ଯାବାବ୍ ଚିଚ୍ଚାର୍, “ଇ କାତ୍ଥାଦ୍ ନାଜ୍ରେତ୍ତା ଯୀଶୁସ୍କି ବାରେନୁ ଆସ୍ ଅଣ୍ଟା ନାବୀ ରାଚାସ୍, ଆସ୍ ପାର୍ମେଶ୍ଵାର୍ସ୍କି ଆରୁ ଜାମା ଆଲାର୍ଘି ନଜର୍ନୁ ଢେର୍ ଶକ୍ତିତି କାଚ୍ନେଖ୍ରାଲିୟାସ୍ ଆରୁ ନାଲ୍ଖୁହି କାମାଲିୟାସ୍, 20ଆରୁ ମୁଖ୍ୟା ପୁରୋହିତ୍ ଆରୁ ଏହ୍ମା ମୁଖ୍ୟାଜାମାର୍ ଆସାନ୍ ଧାର୍ତେଇଚାର୍ ଆରୁ ମରନ୍ ଦଣ୍ଡ୍ଘି ହୁକୁମ୍ ଚିଇକିରି; ଆସିନ୍ କ୍ରୁଶ୍ନୁ ଠୋକ୍ଚେଇଚାର୍। 21ଲେକିନ୍ ନେଦ୍ ଇସ୍ରାଏଲ୍ ଜାମାରିନ୍ ବାଛାବର୍, ଆସ୍ ଯେ ଇ ଆଲାସିନ୍ ଏନ୍ନେ ଏମ୍ ସୋଚାଲ୍କାମ୍ ଲେକିନ୍ ଇବନ୍ ଆମ୍ଵିକିରି ଇ ଜାମା ଘାଟ୍ଣା ଘାଟ୍ର୍କାଘି ଇନ୍ନାଗାନେ ତିନ୍ ଦିନ୍ ମାନ୍ଚା, 22ଆରୁ ଏହ୍ମା ଭିତର୍ନୁ କେତ୍କ ଲୋକ୍ ମାଏକିନିଆଁର୍ହି ଏମାନ୍ ଆଚ୍ମିତ୍ନୁ ଟିଡ୍ଡେଇଚାର୍, ଆବ୍ଡ଼ାର୍ ଭୋର୍ ପାଇରିନ୍ ମାସ୍ଣାସାନ୍ କେର୍କାଚାର୍; 23ଲେକିନ୍ ଆବ୍ଡ଼ାର୍ ଆସ୍କି ମାଁଣାନ୍ ମା ହାଖ୍ଖୀୟାର୍, ଆରୁ କିର୍ରିଆର୍ ଆରୁ ତେଙ୍ଗିୟାର୍ କା ତାମାଗେ ସରଗ୍ଦୂଁତ୍ ଏଥ୍ରାଦ୍ ଆଦ୍ ତେଙ୍ଗିୟାଦ୍ କା ଆସ୍ ଉଜ୍ଜିୟାସ୍ କେର୍କାଦାସ୍। 24ଆରୁ ଏହ୍ମାଏ କେତ୍କ ଲୋକ୍ ସାଙ୍ଗେ ଭିତର୍ନୁ ଅର୍ତୁ ମାସ୍ଣା ଉଲା କେରାର୍, ଆରୁ ଆବ୍ଡ଼ାର୍ ହନ୍ନେନ୍ ଜାମାକିଛି ହାଖ୍ଖୀୟାର୍; ଏସ୍କେ କା ମାଏକିନିଆଁର୍ ତେଙ୍କାଚାର୍।” ଲେକିନ୍ ଆସିନ୍ ମା ଏରିୟାର୍। 25ଆଙ୍ଗେନ୍ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଆରେ ମୁରୁଖ୍ରୋ, ନାବୀଜାମାର୍ ଏକାନ୍ ତେଙ୍କାନାଏ ଆବନ୍ ନିମ୍ ବିଶ୍ୱାସ୍ କାମ୍ନାନୁ କେତ୍କ କମ୍ଜୋର୍ ରାଦାର୍! 26ଇଦ୍ କାଁଏ ଜରୁରୀ ମାଲ୍ଲାରୁଦ୍ କା ଖ୍ରୀସ୍ତ୍ ଇବ୍ଡ଼ା ଜାମା ଦୁଃଖୁନ୍ ସାହିକିରି ତାଙ୍ଘା ମାହିମାନୁ କରସ୍?” 27ଆଙ୍ଗେନ୍ ଆସ୍ ମୁଶା ଆରୁ ଜାମା ନାବୀର୍ସ୍ତି ସୁରୁ କାମିକିରି ଜାମା ପାବିତାର୍ଶାସ୍ତ୍ରନ୍ତା ନିଜର୍ ବାରେନୁ ଲେଖ୍ଚ୍କା କାତ୍ଥାଗୁଠିନ୍, ଆସ୍ ଆବ୍ଡ଼ାରିନ୍ ବୁଝାବାଚାସ୍। 28ଏତ୍କନୁ ଆବ୍ଡ଼ାର୍ ଆ ପାଡ଼ା ଚାହାଗେ ଆଣ୍ସାଲିୟାର୍ ଏକାସାନ୍ ଆବ୍ଡ଼ାର୍ କାଲିୟାର୍, ଏନ୍ନେ ଲାଗ୍ଗାଲିୟାଦ୍କା ଆସ୍ ଆଘ୍ଲି କାଲା ବେଦ୍ଦାଲିୟାସ୍। 29ଲେକିନ୍ ଚେଲାଜାମାର୍ ମୁରୁକ୍ ଆର୍ଜୀବିନ୍ତି କାମିକିରି ତେଙ୍ଗିୟାର୍, “ଏହ୍ମା ଗାନେ ରା କାଲା ଏନ୍ଦେର୍ଗେକା ଆକ୍କୁନ୍ ବିଡ଼ି ଅକ୍କାଲି ଆରୁ ଉହା ମାନା ବେଦ୍ଦାଲିଦ୍।” ଆଙ୍ଗେନ୍ ଆସ୍ ଆବ୍ଡ଼ାର୍ ଗାନେ ରାଗେ ଆଡ଼୍ପା ଉଲା କର୍ଚାସ୍। 30ଆରୁ ଆବ୍ଡ଼ାର୍ ଗାନେ ଅନାମହାଗେ ଅକ୍କିୟାସ୍, ଆରୁ ଆସ୍ମା ହୋଇକିରି ଆଶିଷ୍ ଚିଚ୍ଚାସ୍ ଆରୁ ଆବନ୍ ଖିଣ୍ଡିକିରି ଆବ୍ଡ଼ାର୍ଗେ ଚିଆ ଲାଗ୍ଗିୟାସ୍। 31ଆଙ୍ଗେନ୍ ଚେଲାର୍ଘି ହାନ୍ନୁ ଖୋଲ୍ରା କେରା; ଆରୁ ଯୀଶୁସିନ୍ ଆବ୍ଡ଼ାର୍ ଚିହ୍ନଚେଇଚାର୍, ଲେକିନ୍ ଯୀଶୁସ୍ ଆବ୍ଡ଼ାର୍ଘି ନଜର୍ତି ଲିଭ୍ରାସ୍ କେରାସ୍। 32ଲେକିନ୍ ଚେଲାଜାମାର୍ ତାମ୍-ତାମ୍ କାଚ୍ନେଖ୍ରା ଲାଗ୍ଗିୟାର୍, “ଯେତ୍କବାକେନ୍ ଆସ୍ ନାହ୍ମାଗାନେ ପାବୁନୁ କାଚ୍ନେଖ୍ରାଲିୟାସ୍ ଆରୁ ନାହ୍ମାଲାଗାନ୍ ପାବିତାର୍ ଶାସ୍ତ୍ରଘି ବାରେନୁ ବୁଝାବାଲିୟାସ୍, ହତ୍କବାକେନ୍ ନାହ୍ମା ମନ୍ଦ୍ ମୁରୁକ୍ ଉତ୍ସାହିତ୍ ମା ମାନାଲିୟାଦ୍ କାଁଏ?” 33ଆବ୍ଡ଼ାର୍ ଆଖାନେନ୍ ଉସ୍କାରାଚାର୍ ଆରୁ ଯେରୁଶାଲେମ୍ଗେ କିର୍ରିଆର୍, ଆସାନ୍ ଆବ୍ଡ଼ାର୍ ଏଗାର ଲୋକ୍ ଚେଲା ଆରୁ ତାହ୍ମା ସାଙ୍ଗେରିନ୍ ଠୁଡ଼ିୟା ରାଚ୍କା ହାଖ୍ଖୀୟାର୍। 34ଆବ୍ଡ଼ାର୍ ତେଙ୍ଗାଲିୟାର୍ କା, “ପ୍ରାଭୁସ୍ ସତ୍ତୁନିନ୍ ଉଜ୍ଜକାଦାସ୍, ଆରୁ ଶିମୋନ୍ସ୍କେ ଦର୍ଶନ୍ ଚିଚ୍ଚକାଦାସ୍।” 35ଆରୁ ଆବ୍ଡ଼ାର୍ ପାବୁନୁ ଘାଟ୍ର୍କା ଜାମା ଘାଟ୍ଣାଘି ବାରେନୁ ଆରୁ ଯେତ୍କବାକେନ୍ ଆସ୍ ଆସ୍ମାବନ୍ ଖିଣ୍ଡାଲିୟାସ୍, ହତ୍କବାକେନ୍ ଆବ୍ଡ଼ାର୍ ଯୀଶୁସିନ୍ ଚିହ୍ନା ଅଙ୍ଗିୟାର୍, ଇ କାତ୍ଥାନ୍ ଆବ୍ଡ଼ାର୍ ଜାମାରିନ୍ ତେଙ୍ଗିୟାର୍।
ଯୀଶୁସ୍ ଚେଲାଜାମାର୍ଗେ ଏଥ୍ରାଲ୍ଦାସ୍
(ମାତିସ୍ ୨୮:୧୬-୨୦; ମାର୍କୁସ୍ ୧୬:୧୪-୧୮; ଯୋହାନ୍ ୨୦:୧୯-୨୩; ପ୍ରେରିତ୍ ୧:୬-୮)
36ଆବ୍ଡ଼ାର୍ଜାମାର୍ ଇ ଘାଟ୍ଣାଘି ବାରେ କାଚ୍ନେଖ୍ରାଲିୟାର୍ କା ଯୀଶୁସ୍ ଆବ୍ଡ଼ାର୍ଘି ମାଝାନୁ ବାର୍ଚାସ୍ ଆରୁ ଇଜ୍ଜାସ୍, ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମାଗେ ଶାନ୍ତି ହାଖ୍ଖର୍ନାଦ୍।” 37ଲେକିନ୍ ଆବ୍ଡ଼ାର୍ ଆଚ୍ମିତ୍ ମାନିକିରି ଏଲ୍ଚିୟାର୍ କେରାର୍, ଆରୁ ଏନ୍ନେ ସୋଚ୍ଚାର୍ କା ଆବ୍ଡ଼ାର୍ ଭୁତ୍ତୁନ୍ ଏରାଲ୍ନାଏ। 38ଆଙ୍ଗେନ୍ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଏନ୍ଦେର୍ଗେ ଘାବ୍ରାରାଲ୍ଦାର୍? ନିହ୍ମା ମନ୍ନୁ ଏନ୍ଦେର୍ଗେ ଶାକ୍ କାମାଲ୍ଦାର୍? 39ଏଙ୍ଘା ହେଖ୍ଖା ଆରୁ ଏଙ୍ଘା ହେଡ୍ଡୁବନ୍ ଏରା ଏନ୍ ଯୀଶୁନ୍। ଏଙ୍ଗାନ୍ ଏସ୍ରିକିରି ଏରା, ଏନ୍ଦେର୍ଗେକା ଭୁତ୍ତୁଘି ଏଙ୍ଘା ଲେଖା ଆହ୍ଡ଼ା ଆରୁ ହଁଚଲ୍ ମା ରାଇଦ୍।” 40ଆରୁ ଆସ୍ ଏନ୍ନେ ତେଙ୍ଗିକିରି ଆବ୍ଡ଼ାରିନ୍ ତାଙ୍ଘା ହେଖ୍ଖା ଆରୁ ହେଡ୍ଡୁଗୁଠିନ୍ ଏଦିୟାସ୍। 41ଏତ୍କ ତେଙ୍କା ପାଛ୍ଲି ହି ଆରୁଅହନ୍ ଚେଲାଜାମାର୍ ଖୁସୀଘି ଚାଲ୍ତେ ବିଶ୍ଵାସ୍ ମା କାମାଲିୟାର୍, ଆରୁ ଆବ୍ଡ଼ାର୍ ଆଚ୍ମିତ୍ ମାନ୍ଚାର୍ କେର୍କାଚାର୍, ଆଙ୍ଗେନ୍ ଆସ୍ ଆବ୍ଡ଼ାରିନ୍ ମେନ୍ଚାସ୍, “ନିହ୍ମାସାନ୍ ଏନ୍ଦ୍ରିନ୍ ମହାଁଗେ ରାଇଦ୍ କାଁଏ?” 42ଆବ୍ଡ଼ାର୍ ଆସ୍କେ ଇଡ଼ିଆଚ୍କା ଅଣ୍ଟା ଟୁକ୍ଡ଼ା ଇଞ୍ଜୋ ଚିଚ୍ଚାର୍। 43ଆସ୍ ଆବନ୍ ହୋଇକିରି ଆବ୍ଡ଼ାର୍ଘି ଆଘ୍ଲି ମଖ୍ଖାସ୍। 44ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯେତ୍କବାକେନ୍ ଏନ୍ ନିହ୍ମାଗାନେ ରାଚ୍କାନ୍ ହତ୍କବାକେନ୍ ତେଙ୍କାଚ୍କାନ୍ କା, ମୁଶାସ୍କି ନିୟମ୍ ଆରୁ ନାବୀର୍ଘି ବହିନୁ ଆରୁ ଗୀତୁ ସଂହିତାନୁ ଏଙ୍ଘାଏ ବାରେ ଏକାଦ୍ ଲେଖ୍ଚ୍କା ରାଇଦ୍, ଆବ୍ଡ଼ା ଜାମାଦ୍ ପୁରା ମାନ୍ନା ଜରୁରୀ ରାଇ।” 45ହତ୍କବାକେନ୍ ଯୀଶୁସ୍ ପାବିତାର୍ ଶାସ୍ତ୍ରନୁ ତାଙ୍ଘା ବାରେନୁ ଏକାଦ୍ ଲେଖ୍ଚ୍କା ରାଇଦ୍ ଆବ୍ଡ଼ା ଜାମା କାତ୍ଥାନ୍ ଆବ୍ଡ଼ାର୍ଗେ ବୁଝ୍ରାଗେ ଶକ୍ତି ଚିଚ୍ଚାସ୍, 46ଆରୁ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ପାବିତାର୍ ଶାସ୍ତ୍ରନୁ ଏନ୍ନେହି ଲେଖ୍ଚ୍କା ରାଇଦ୍ କା ଖ୍ରୀସ୍ତ୍ ଦୁଃଖୁ ସାହସ୍, ଆରୁ ତିସ୍ରା ଉଲ୍ଲାନୁ କେଚ୍ଚ୍କାସ୍ତି ଉଜ୍ଜସ୍, 47ଆରୁ ଯେରୁଶାଲେମ୍ତି ସୁରୁ କାମିକିରି ଜାମା ଜାତିୟାର୍ଘି ମାଝାନୁ ଏନ୍ନେ କାତ୍ଥା ଖ୍ରୀସ୍ତ୍କି ନାମେନୁ ତେଙ୍ଗ୍ନା ରାଇ କା ଜାମାର୍ ପାସ୍ତାରାଇକିରି, ପାର୍ମେଶ୍ଵାର୍ସ୍ ତାରା କିର୍ନା ବାର୍ନା ରାଇ ତା ପାର୍ମେଶ୍ୱାର୍ସ୍ ଆବ୍ଡ଼ାର୍ଘି ପାପ୍ବନ୍ ଛେମା କାମଚସ୍। 48ନିମ୍ ଇବ୍ଡ଼ା ଜାମା କାତ୍ଥାଘି ସାକ୍ଷୀର୍। 49ଆରୁ ଏରା, ଏଙ୍ଘା ବାଙ୍ଗ୍ସ୍ ଏକା କାତ୍ଥା ଚିଚ୍କାଚାସ୍, ଆବନ୍ ଏନ୍ ନିହ୍ମା ଚାହାଗେ ତାଇୟନ୍, ଲେକିନ୍ ସରଗ୍ସ୍ତି ଶକ୍ତି ମା ହାଖ୍ଖର୍ନାଜୁଟି ନିମ୍ ଇ ସହର୍ନୁନ୍ ରା।”
ଯୀଶୁସ୍ ସରଗ୍ କାଲ୍ଦାସ୍
(ମାର୍କୁସ୍ ୧୬:୧୯,୨୦; ପ୍ରେରିତ୍ ୧:୯-୧୧)
50ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ବେଥାନିୟା କାନା ପାବୁଜୁଟି ଅଚ୍ଚାସ୍ କେରାସ୍, ଆରୁ ଆବ୍ଡ଼ାର୍ଗେ ତାଙ୍ଘା ହେଖ୍ଖାନ୍ ଉଠାବିକିରି ଆଶୀର୍ବାଦ୍ ଚିଚ୍ଚାସ୍; 51ଆଶୀର୍ବାଦ୍ ଚିତେ-ଚିତେ ଆସ୍ ଆବ୍ଡ଼ାର୍ସ୍ତି ଲିଭ୍ରାସ୍ କେରାସ୍ ଆରୁ ସରଗ୍ ତାରା କେରାସ୍। 52ଆରୁ ଆବ୍ଡ଼ାର୍ ଆସିନ୍ ହାଁଠୁୱାରାଇକିରି ଆରାଧାନା କାମ୍ଚାର୍ ଆରୁ ମୁରୁକ୍ ରୀଜ୍ଝୁତି ଯେରୁଶାଲେମ୍ଗେ କିର୍ରିଆର୍; 53ଆନ୍ତିନ୍ ଆବ୍ଡ଼ାର୍ ଲାଗାତାର୍ ମନ୍ଦିର୍ନୁ ରାଇକିରି ପାର୍ମେଶ୍ଵାର୍ସ୍କି ସ୍ତୁତି ମାହିମା କାମ୍ତେ ରାଲିୟାର୍।