ଯୋହାନ୍ସ୍କି ଲେଖ୍ଚ୍କା ସୁସାମାଚାର୍
ବହିଘି ପରିଚୟ
ଯୀଶୁସ୍କି ବାର ଲୋକ୍ ଚେଲାର୍ଘି ଭିତର୍ନୁ ଅଣ୍ଟା ଚେଲା ରାଚାସ୍ ଆସ୍ ଯୋହାନ୍ସ୍, ଆରୁ ଆସ୍ ଇ ସୁସାମାଚାର୍ବନ୍ ଲେଖ୍ଚ୍କାଦାସ୍। ଆରୁ ଆସ୍ ଜାବେଦୀ ଆରୁ ଶାଲୋମୀଘି ହାଦ୍ଦୁ ରାଚାସ୍, ଆସ୍କି ଜନମ୍ ବେତ୍ସାଇଦା ସହର୍ନୁ ମାନ୍ଚ୍କିଚା। ଯେତ୍କବାକେନ୍ ଆସ୍ ବାଡ଼୍କା ମାନ୍ଚାସ୍, ତା ଆସ୍ ଗାଲିଲୀ ହଁସ୍ରାନୁ ଇଞ୍ଜୋ ଧାରାଗେ ସୁରୁ କାମ୍ଚାସ୍। ଆସ୍ନାନ୍ ଚିଉ ଯୋହାନ୍ସ୍ ଯେତ୍କବାକେନ୍ ୟାହୁଦାଘି ଶୁନ୍ଶାନ୍ ଆଡ୍ଡାନୁ ଉପ୍ଦେଶ୍ ଚିୟାଗେ ସୁରୁ କାମ୍ଚାସ୍, ତା ଯୋହାନ୍ସ୍ ଆରୁ ଦୁସ୍ରା ଆଲାର୍ ଆସ୍କି ଉପ୍ଦେଶ୍ ମେନାଲିୟାର୍। ଆସ୍ନାନ୍ ଚିଉ ଯୋହାନ୍ସ୍କି ଉପ୍ଦେଶ୍ଦ୍ ଯୋହାନ୍ସ୍କି ମିଆଁ ଆସାର୍ ମାନ୍ଚା। ଆନ୍ତିନ୍ ଯୀଶୁସ୍ ଯୋହାନ୍ସିନ୍ ମେହିଁୟାସ୍ ଆରୁ ଯୋହାନ୍ସ୍ ଯୀଶୁସ୍କି ଚେଲା ମାନ୍ଚାସ୍ କେରାସ୍।
ଯୋହାନ୍ସ୍କି ଲେଖ୍ଚ୍କା ସୁସାମାଚାର୍ନୁ ଯୀଶୁସିନ୍ ପାର୍ମେଶ୍ୱାରସ୍କି ସବୁଦିନ୍ତା ବଚନ୍ ବୁଲି ତେଙ୍ଗାକେର୍କିଚି। ଏକାସ୍ କା ମୁନୁଷ୍ ରୁପ୍ନୁ ଜନମ୍ ମାନିକିରି ନାହ୍ମା ମାଝାନୁ ବାର୍ଚ୍କାଚାସ୍। ଇ ବହିଦ୍ ସାଫା-ସାଫା ତେଙ୍ଗିଦ୍ କା ଇ ବହିନ୍ ପାଢ଼ୁର୍ ବିଶ୍ୱାସ୍ କାମର୍ କା ଯୀଶୁସିନ୍ ବାଛାବୁ ଆଲାସ୍ ପାର୍ମେଶ୍ୱାର୍ସ୍କି ହାଦ୍ଦୁସ୍। ଆରୁ ଆବ୍ଡ଼ାର୍ ବିଶ୍ୱାସ୍ କାମିକିରି ଜୀବନ୍ ହାଖ୍ଖା ଅଙ୍ଗର୍।
ସୁସାମାଚାର୍ଘି ପହିଲେ ଭାଗ୍ନୁ ସାତ୍ତେଟା ଅଦ୍ଭୁତ୍ ନାଲ୍ଖୁଘି ବାରେନୁ ତେଙ୍ଗାକେର୍କିଚି। ଦୁସ୍ରା ଭାଗ୍ନୁ ଉପ୍ଦେଶ୍ଘି ବାରେ ତେଙ୍ଗାକେର୍କିଚି। ଆରୁହି ତେଙ୍ଗାକେର୍କିଚି କା ଏସ୍କେ କେତ୍କ ଲୋକ୍ ଆଲାର୍ ଯୀଶୁସ୍କି ମିଆଁ ବିଶ୍ୱାସ୍ କାମ୍ଚାର୍ ଆରୁ ଆସ୍କି ଚେଲା ମାନ୍ଚାର୍ କେରାର୍। ଆରୁ କେତ୍କ ଲୋକ୍ ଆସ୍କି ବିରୁଦ୍ଧ୍ କାମ୍ଚାର୍ ଆରୁ ଆସ୍କି ମିଆଁ ବିଶ୍ୱାସ୍ ମା କାମ୍ଚାର୍। ୧୩-୧୭ ପାଠନୁ ଯୀଶୁସିନ୍ ଏକା ମାଁହାନୁ ଧାର୍ତାନାବାଲା ରାଚାର୍, ହୁ ମାଁହା ଯୀଶୁସ୍କି ଚେଲାଜାମାର୍ଗାନେ ଗେହ୍ରା ସମ୍ବନ୍ଧ ଆରୁ କ୍ରୁଶ୍ନୁ ଠୋକ୍ନାଘି ଆଘ୍ଲି ବିଡ଼୍ ଅକ୍କନାବାକେନ୍ ଚେଲାଜାମାରିନ୍ ତିଆର୍ କାମ୍ନା ଆରୁ ଦିଲାସା ଚିନାବାଲା ଯୀଶୁସ୍କି ବଚନ୍ବନ୍ ବାନେକିରି ତେଙ୍ଗାକେର୍କିଚି। ଆଖ୍ରୀ ପାଠନୁ ଯୀଶୁସିନ୍ ଧାର୍ନା ଆରୁ ତାଙ୍ଘା ନ୍ୟାୟ କାମ୍ନା, ଆସ୍କି କ୍ରୁଶ୍ନୁ ଠୋକ୍ନାନ୍, ମାଡ଼୍ନାନ୍, ଆରୁଅହନ୍ ଉଜ୍ଜନା ଆରୁ ଉଜ୍ଜକା ପାଛ୍ଲି ଚେଲାଜାମାର୍ଗେ ଦର୍ଶନ୍ ଚିନାଘି ବାରେନୁ ତେଙ୍ଗାକେର୍କିଚି।
ଯୋହାନ୍ସ୍ ଖ୍ରୀସ୍ତ୍ତି ହାଖ୍ଖନା ବାଲା ସବୁଦିନ୍ତା ଜୀବନ୍ଘି ମିଆଁ ଯୋର୍ ଚିଦାସ୍। ଇଦ୍ ଅଣ୍ଟା ଏନ୍ନେ ବାର୍ଦାନ୍ଦ୍, ଏକାଦ୍ ଆକ୍କୁନ୍ ସୁରୁ ମାନିଦ୍ ଆରୁ ଏକାଦ୍ ଯୀଶୁସ୍କି ପାବୁନ୍, ସତ୍ତୁ, ଆରୁ ଜୀବନ୍ଘି ରୂପ୍ନୁ ମାନ୍ନାଏ ଆବ୍ଡ଼ାର୍ଗେ ସବୁଦିନ୍ତା ଜୀବନ୍ ହାଖ୍ଖରିଦ୍। ଆତ୍ମିକ୍ କାତ୍ଥାଗୁଠିନ୍ ଏଦାଗେ ରୋଜ୍ଦିନ୍ତା ସାଧାରନ୍ ଜୀବନ୍ବନ୍ ଚିହ୍ନାଘି ରୂପ୍ନୁ ଏଦ୍ନା ଯୋହାନ୍ସ୍କି ଅଣ୍ଟା ମୁଖ୍ୟା ଗୁଣଦ୍, ଏସ୍କେ କା ଆମ୍ମୁ, ଆସ୍ମା, ବିଲ୍ଲୀ, ଭେଡ଼ି ହାପୁ, ଆରୁ ଆସ୍କି ଭେଡ଼ି, ଅଙ୍ଗୁର୍ ଲହ ଆରୁ ଆଦ୍ଘି ଫାଡ଼ୁ।
ରୂପ୍-ରେଖା:
ଯୀଶୁସ୍କି ବାର୍ନା ୧:୧-୧୮
ଆସ୍ନାନ୍ ଚିଉ ଯୋହାନ୍ସ୍ ଆରୁ ଯୀଶୁସ୍କି ପହେଲା ଚେଲା ୧:୧୯-୫୧
ଯୀଶୁସ୍କି ସେବା ନାଲ୍ଖୁ ୨:୧—୧୨:୫୦
ଯେରୁଶାଲେମ୍ନୁ ଆଖରୀନ୍ତା କେତ୍କ ଉଲ୍ଲା ୧୩:୧—୧୯:୪୨
ପ୍ରାଭୁସ୍କି ଆରୁଅହନ୍ ଉଜ୍ଜନା ଆରୁ ଆସ୍କି ଏଥ୍ର୍ନା ୨୦:୧୧-୩୧
ଆଖ୍ରୀ କାତ୍ଥା: ଗାଲିଲୀନୁ ଆରୁଅହନ୍ ଏଥ୍ର୍ନା ୨୧:୧-୨୫
1ପାର୍ମେଶ୍ୱାରସ୍କି ବଚନ୍ ମୁନୁଷ୍ଘି ରୂପ୍ ଅଚ୍ଚା
1ଦୁନିଆଁ ଆରୁ ଆକାଶ୍ଘି ସୁରୁ ମାନ୍ନାଘି ପହ୍ଲେନ୍ତିନିନ୍ ବଚନ୍ ରାଚା। ଆରୁ ବଚନ୍ଦ୍ ପାର୍ମେଶ୍ଵାର୍ସ୍ଗାନେ ରାଚା, ଆରୁ ଆ ବଚନ୍ ପାର୍ମେଶ୍ୱାର୍ସ୍ ରାଚାସ୍। 2ଇ ବଚନ୍ଦ୍ ଦୁନିଆଁଘି ସୁରୁ ମାନ୍ନାଘି ପହ୍ଲେ ପାର୍ମେଶ୍ଵାର୍ସ୍ଗାନେ ରାଚା। 3ଆରୁ ଇ ବଚନ୍ନ୍ତିନ୍ନିନ୍ ପାର୍ମେଶ୍ୱାର୍ସ୍ ଜାମାକିଛି ବଚନ୍ଘି ଦ୍ୱାର୍ନୁ ବାନାବାଚାସ୍, ଆରୁ ସତ୍ତୁନିନ୍ ପାର୍ମେଶ୍ୱାର୍ସ୍ ଜାମାକିଛି ବଚନ୍ଘି ଦ୍ୱାର୍ନୁନିନ୍ ବାନାବାଚାସ୍। 4ଆରୁ ଯେତ୍କ ବାନାବା କେରା, ଆ ଜାମାନ୍ ଆଦ୍ ଜୀବନ୍ ଚିଇଦ୍। ଆରୁ ବଚନ୍ ଜାମାର୍ଗେ ଜୀବନ୍ ଚିନାବାଲାସ୍, ଜାମା ଆଲାର୍ଘି ବିଲ୍ଲୀସ୍। 5ଆ ବିଲ୍ଲୀଦ୍ ଉହାନୁ ବିଲ୍ଚିଦ୍ ଆରୁ ଉହାଦ୍ ଆବନ୍ ତେବା ପଲ୍ଲିୟାଦିନ୍।
6ପାର୍ମେଶ୍ଵାର୍ସ୍ ଅଣ୍ଟା ଆଲାସିନ୍ ତାଇୟାସ୍। ଆସ୍କି ନାମେ୧:୬ ଇ ଯୋହାନ୍ସ୍ ଆସ୍ନାନ୍ ଚିଉ ଯୋହାନ୍ ରାଚାସ୍। ଯୋହାନ୍ ରାଚା। 7ଆରୁ ଆସ୍ ବିଲ୍ଲୀଘି ବାରେନୁ ଆଲାରିନ୍ ତେଙ୍ଗାଗେ ବାର୍ଚାସ୍, ତାକା ଆସ୍କି କାତ୍ଥା ସାକ୍ଷୀଘି ଦ୍ୱାର୍ନୁ ଜାମା ଆଲାର୍ ଆ ବିଲ୍ଲୀଘି ମିଆଁ ବିଶ୍ଵାସ୍ କାମା ଅଙ୍ଗର୍। 8ଆସ୍ ଖୁଦ୍ନିଜେ ବିଲ୍ଲୀ ମାଲ୍ଲାରୁସ୍, ଆ ବିଲ୍ଲୀଘି ବାରେ ସାକ୍ଷୀ ଚିୟାଗେ ବାର୍ଚ୍କାଚାସ୍।
9ଆ ସତ୍ତୁ ବିଲ୍ଲୀଦ୍ ଏକାଦ୍ କା ଜାମା ଆଲାର୍ଗେ ପାର୍ମେଶ୍ୱାର୍ସ୍କି ବାରେନୁ ଜାନ୍କାରି ଚିଇଦ୍, ଦୁନିଆଁନୁ ବାର୍ନାବାଲା ରାଚା।
10ଆ ବଚନ୍ଦ୍ ଇ ଦୁନିଆଁନୁନିନ୍ ରାଚା, ଆରୁ ଆଦ୍ଘି ଦ୍ୱାର୍ନୁ ଦୁନିଆଁନ୍ତା ଜାମାକିଛି ସିର୍ଜା କେର୍କିଚି, ହାଲେହି ଦୁନିଆଁନ୍ତା ଆଲାର୍ ଆବନ୍ ମା ଚିହ୍ନଚାର୍। 11ଆସ୍ ତାଙ୍ଘା ଆଲାର୍ଘି ଚାହାଗେ ବାର୍ଚାସ୍ ଲେକିନ୍ ତାଙ୍ଘା ୧:୧୧ ପାର୍ମେଶ୍ୱାର୍ସ୍ ପହିଲେ ୟାହୁଦୀ ଆଲାର୍ସାନ୍ ବାର୍ଚାସ୍, ହୁଦ୍ଘିଲାଗାନ୍ ୟାହୁଦୀରିନ୍ ନିଜର୍ ଆଲ୍ ତେଙ୍ଗାକାଇ।ନିଜର୍ ୟାହୁଦୀ ଆଲାର୍ ଆସିନ୍ ମା ମାନ୍ଚାର୍। 12ଲେକିନ୍ ଯେତ୍କର୍ ଆସିନ୍ ଗ୍ରହନ୍ କାମ୍ଚାର୍, ଆରୁ ଆସ୍କି ମିଆଁ ବିଶ୍ଵାସ୍ କାମ୍ଚାର୍, ଆସ୍ ଆବ୍ଡ଼ା ଜାମାରିନ୍ ପାର୍ମେଶ୍ଵାର୍ସ୍କି ହାଦ୍ଦୁ ମାନାଗେ ହକ୍ ଚିଚ୍ଚାସ୍। 13୧:୧୩ ଗ୍ରୀକ୍ନୁ ଏନ୍ନେ ଲେଖ୍ଚ୍କା ରାଇ, ଆବ୍ଡ଼ାର୍ ନା ତା ହେଁସୁତି ନା ତା ମେଦୁଘି ଇଚ୍ଛାତି ଆରୁ ନା ତା ଆଲାର୍ଘି ଇଚ୍ଛାତି ଜନମ୍ ମାନ୍ଚାର୍ ପାର୍ମେଶ୍ୱାର୍ସ୍ ନିଜର୍ ଇଚ୍ଛାତି ଆବ୍ଡ଼ାରିନ୍ ତାଙ୍ଘା ହାଦ୍ଦୁବଚ୍ଚ କାମ୍ଚାସ୍ ଆବ୍ଡ଼ାର୍ ନା ତା ପିଢ଼ିନ୍ତି ଆରୁ ନା ତା ଆଲାସ୍ ଆରୁ ଆଲିଘି ଇଚ୍ଛାତି ନା ତା ମୁନୁଷ୍ଘି ଇଚ୍ଛାତି ଜନମ୍ ମାନ୍ଚାର୍, ପାର୍ମେଶ୍ୱାର୍ସ୍ ଖୁଦ୍ ନିଜର୍ ଇଚ୍ଛାତି ଆବ୍ଡ଼ାରିନ୍ ତାଙ୍ଘା ହାଦ୍ଦୁବଚ୍ଚ ଲେଖା କାମ୍ଚାସ୍।
14ଆରୁ ଆ ବଚନ୍ଦ୍ ମୁନୁଷ୍ଘି ରୂପ୍ ହୋଇକିରି ଜନମ୍ ଅଚ୍ଚା; ଆରୁ ନାହ୍ମା ମାଝାନୁ ରାଚା। ଆଦ୍ କ୍ରିପା ଆରୁ ସତ୍ତୁତି ଭାର୍ପୁର୍ ରାଚା। ଆରୁ ଏହ୍ମାଏ ବାଙ୍ଗ୍ସ୍କି ଅଣ୍ଟା ଖାଲି ହାଦ୍ଦୁସ୍ କେତ୍କ ମାହାନ୍ସ୍, ଆ ମାହାନ୍ତାବନ୍ ଏମ୍ ଏର୍କାମ୍। 15ଯୋହାନ୍ସ୍ ଆସ୍କି ବାରେନୁ ସାକ୍ଷୀ ଚିଚ୍ଚାସ୍। ଆସ୍ ଚିର୍ରା ରାଇକିରି ତେଙ୍ଗିୟାସ୍ କା, “ଇସ୍, ଆସିନ୍, ଏକାସ୍କି ବାରେନୁ ଏନ୍ ତେଙ୍କାଚ୍କାନ୍ କା ଏକାସ୍ ଏଙ୍ଘା ପାଛ୍ଲି ବାରାଲ୍ଦାସ୍, ଆସ୍ ଏଙ୍ଘାସ୍ତିହି ମାହାନ୍ ରାଦାସ୍, ଏନ୍ଦେର୍ଗେକା ଆସ୍ ଏଙ୍ଘା ଜନମ୍ ମାନ୍ନାଘି ଆଘ୍ଲିନ୍ତି ରାଚାସ୍।” 16ଏନ୍ଦେର୍ଗେକା ପାର୍ମେଶ୍ୱାର୍ସ୍ ନାମାନ୍ ପୁରାପୁରୀ କ୍ରିପା କାମ୍ଦାସ୍ ହୁଦ୍ଘିଲାଗାନ୍ ଆସ୍ ନାହ୍ମା ମିଆଁ ଧିୟାନ୍-ଧିୟାନ୍ କ୍ରିପା କାମ୍ତେ ରାଦାସ୍। 17ପାର୍ମେଶ୍ୱାର୍ସ୍ ମୁଶାସ୍କି ଦ୍ୱାର୍ନୁ ନିୟମ୍ ଚିଚ୍ଚକାଦାସ୍ ଲେକିନ୍ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ପାର୍ମେଶ୍ୱାର୍ସ୍ ନାହ୍ମା ମିଆଁ କ୍ରିପା କାମ୍ଚାସ୍ ଆରୁ ନିଜର୍ ବାରେନୁ ସତ୍ତୁବନ୍ ତେଙ୍ଗିୟାସ୍। 18ପାର୍ମେଶ୍ଵାର୍ସିନ୍ ନେଦ୍ହି ଏକ୍ଲାହି ମାଲ୍ଲା ଏରୁର୍, ଲେକିନ୍ ଆସ୍କି ଅଣ୍ଟା ଖାଲି ହାଦ୍ଦୁସ୍, ଏକାସ୍ କା ଜାମାବାକେନ୍ ଯୋଡ଼୍ରିକିରି ରାଦାସ୍, ଆସ୍ ନିଜେ ପାର୍ମେଶ୍ୱାର୍ସ୍ ଆସ୍ ପାର୍ମେଶ୍ୱାର୍ସ୍ସିନ୍ ଆଲାର୍ଘି ମାଝାନୁ ଏଦିୟାସ୍।
ଆସ୍ନାନ୍ ଚିଉ ଯୋହାନ୍ସ୍କି ସାକ୍ଷୀ
(ମାତିସ୍ ୩:୧-୧୨; ମାର୍କୁସ୍ ୧:୧-୮; ଲୁକାସ୍ ୩:୧-୧୮)
19ଯେତ୍କବାକେନ୍ ଯେରୁଶାଲେମ୍ ସହର୍ତା ୟାହୁଦୀ ମୁଖ୍ୟାର୍, ପୁରୋହିତ୍ ଆରୁ ଲେବୀ ଜାମାରିନ୍ ଯୋହାନ୍ସ୍କି ଚାହାଗେ ଏନ୍ନେ ମେନାଗେ ତାଇୟାର୍ କା “ନିମ୍ ନେଦ୍?” 20ତା ଯୋହାନ୍ସ୍ ଏନ୍ନେ ସାକ୍ଷୀ ଚିଚ୍ଚାସ୍ ଆରୁ ଯାବାବ୍ ଚିୟାଗେ ମାନା ମା କାମ୍ଚାସ୍, ଲେକିନ୍ ଖୁଲାଖୁଲି ମାନ୍ଚାସ୍ ଆରୁ ତେଙ୍ଗିୟାସ୍ କା, “ଏନ୍ ଖ୍ରୀସ୍ତ୍ ମାଲ୍ଦାନ୍।” 21ଆଙ୍ଗେନ୍ ଆବ୍ଡ଼ାର୍ ଆସିନ୍ ମେନ୍ଚାର୍, “ତା ନିମ୍ ନେଦ୍? ନିମ୍ ଏଲିୟାସ୍ କାଁଏ ଏକାସ୍ କା ବାର୍ନାବାଲା ରାଚାସ୍?” ଯୋହାନ୍ସ୍ ତେଙ୍ଗିୟାସ୍, “ମାଲ୍ଲା! ଏନ୍ ମାଲ୍ଦାନ୍।” ଆବ୍ଡ଼ାର୍ ମେନ୍ଚାର୍, “ତା ନିମ୍ ଆ ମୁଶା ନାବୀର୍ କାଁଏ?” ଆସ୍ ତେଙ୍ଗିୟାସ୍, “ମାଲ୍ଲା ଏନ୍ ମାଲ୍ଦାନ୍।” 22ଆଙ୍ଗେନ୍ ଆବ୍ଡ଼ାର୍ ଆସିନ୍ ମେନ୍ଚାର୍, “ହାଲେ ତା ଏମାନ୍ ତେଙ୍ଗା କା ନିମ୍ ନେଦ୍? ତାକା ଏକା ୟାହୁଦୀ ମୁଖ୍ୟାର୍ ଏମାନ୍ ତାଏକାନାଏ ଆବ୍ଡ଼ାର୍ଗେ ଯାବାବ୍ ଚିଅମ୍। ନିମ୍ ନିହ୍ମା ବାରେନୁ ଏନ୍ଦେର୍ ତେଙ୍ଗାଲ୍ଦାର୍?” 23ଇଶାୟାହ୍ସ୍ ତେଙ୍ଗିୟାସ୍, “ଏସ୍କେ ଇଶାୟାହ୍ସ୍ ନାବୀସ୍ ତେଙ୍କାଚାସ୍: ଏକା ଆଡ୍ଡାନୁ ନେଦ୍ହି ମା ରାନାଏ ଆସାନ୍ ଚିର୍ରାରାନାବାଲାନ୍। ଜୋର୍ସେ ଚିର୍ରା ରାଇକିରି ତେଙ୍ଗ୍ନା ବାଲାନ୍। ପ୍ରାଭୁସ୍କି ବାର୍ନାଘି ଲାଗାନ୍ ନିଜ୍କେନିଜ୍ ତିଆର୍ କାମା।”
24ଇବ୍ଡ଼ାରିନ୍ ଫାରିସୀଜାମାର୍ ତାଏକାଚାର୍। 25ଆବ୍ଡ଼ାର୍ ଯୋହାନ୍ସିନ୍ ମେନ୍ଚାର୍, “ଯଦି ନିମ୍ ଖ୍ରୀସ୍ତ୍ ମାଲ୍ଦାର୍ ଆରୁ ନା ଏଲିୟାସ୍ ଆରୁ ନା ତା ନିମ୍ ଆ ନାବୀର୍, ହାଲେ ତା ନିମ୍ ଏନ୍ଦେର୍ଗେ ଆସ୍ନାନ୍ ଚିୟାଲ୍ଦାର୍?”
26ଯୋହାନ୍ସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ଏନ୍ତା ଆମ୍ମୁତି ଖାଲି ଆସ୍ନାନ୍ ଚିଆଲ୍ଦାନ୍, ଲେକିନ୍ ନିହ୍ମା ମାଝାନୁ ଅଣ୍ଟା ଆଲାସ୍ ରାଦାସ୍, ଏକାସିନ୍କା ନିମ୍ ମା ଚିହ୍ନଦାର୍। 27ଆସ୍ ଚାଁଣେନିନ୍ ତାଙ୍ଘା ସେବା ସୁରୁ କାମ୍ନାବାଲା ରାଦାସ୍। ଏନ୍ ଆସ୍କି ୧:୨୭ ୟାହୁଦୀ ରୀତି ନୀତିନୁ ଲାଗମ୍ ଲାକ୍କା ସେଣ୍ଡେଲ୍ବନ୍ ଗୁତ୍ତିୟାର୍ ଖୋଲାଲିୟାର୍ ଲାଗମ୍ ଲାକ୍କା ସେଣ୍ଡେଲ୍ଘି ଫିତା ଖୋଲ୍ନାଘିହି ଲାଇଗ୍ ମାଲ୍ଦାନ୍।”
28ଇବ୍ଡ଼ା ଜାମା କାତ୍ଥାଦ୍ ବେଥାନିୟା ସହର୍ନୁ ମାନ୍ଚା। ଇ ସହର୍ଦ୍ ଯାର୍ଦାନ୍ ହଁସ୍ରାଘି ହାପାଖା ପୁରୁବ୍ତାରା ରାଚା। ଏକାସାନ୍ କା ଯୋହାନ୍ସ୍ ଆସ୍ନାନ୍ ଚିଆଲିୟାସ୍।
ଯୀଶୁସ୍ ପାର୍ମେଶ୍ଵାର୍ସ୍କି ଭେଡ଼ିହାଦ୍ଦୁସ୍
29ନାନ୍ନୁ ଉଲ୍ଲା ଯୋହାନ୍ସ୍ ଯୀଶୁସିନ୍ ତାଙ୍ଘା ଚାହାଗେ ବାର୍ନାନ୍ ଏରିକିରି ତେଙ୍ଗିୟାସ୍, “ଏରା, ଇସ୍ ପାର୍ମେଶ୍ୱାର୍ସ୍କି ଚିଚ୍କା ଗାଡ୍ରା ହାଦ୍ଦୁ, ଏକାସ୍ କା ଦୁନିଆଁନ୍ତା ଆଲାର୍ଘି ପାପ୍ବନ୍ ଛେମା କାମ୍ଦାସ୍। 30ଇସ୍ ଆସିନ୍ ଏକାସ୍କି ବାରେନୁ ଏନ୍ ତେଙ୍କାଚ୍କାନ୍, ‘ଅଣ୍ଟା ଆଲାସ୍ ଏଙ୍ଘା ପାଛ୍ଲି ବାର୍ନାବାଲା ରାଦାସ୍, ଏକାସ୍ କା ଏଙ୍ଘାସ୍ତିହି ମାହାନ୍ ରାଦାସ୍, ଏନ୍ଦେର୍ଗେକା ଆସ୍ ଏଙ୍ଘାସ୍ତି ଜନମ୍ ମାନ୍ନାଘି ଆଘ୍ଲିନ୍ତିନ୍ ରାଚାସ୍।’ 31ଆସ୍ ଖ୍ରୀସ୍ତ୍ ବୁଲି ଏନ୍ ମାଲ୍ଲା ଚିହ୍ନଚ୍କାରୁନ୍ ଆରୁ ଆସ୍ ଇସ୍ରାଏଲ୍ ଜାମାର୍ସାନ୍ ପ୍ରକଟ୍ ମାନସ୍କସ୍, ହୁଦ୍ଘିଲାଗାନ୍ ଏନ୍ ଆମ୍ମୁତି ଆସ୍ନାନ୍ ଚିୟାଗେ ବାର୍ଚ୍କାଦାନ୍।”
32ଆରୁ ଯୋହାନ୍ସ୍ ଏନ୍ନେ ସାକ୍ଷୀ ଚିଚ୍ଚାସ୍ କା: “ଏନ୍ ପାବିତାର୍ ଆତ୍ମାବନ୍ ପେର୍ୱାଁଘି ରୂପ୍ନୁ ସରଗ୍ତି ଏତ୍ତନାନ୍ ଆରୁ ଆସ୍କି ମିଆଁ ଇଲ୍ନାନ୍ ଏର୍କାଦାନ୍। 33ଏନ୍ତା ଆସିନ୍ ମାଲ୍ଲା ଚିହ୍ନଚ୍କାରୁନ୍, ଲେକିନ୍ ଏକା ପାର୍ମେଶ୍ୱାର୍ସ୍ ଏଙ୍ଗାନ୍ ଆମ୍ମୁତି ଆସ୍ନାନ୍ ଚିୟାଗେ ତାଇୟାସ୍, ଆସିନ୍ ଏଙ୍ଗାନ୍ ତେଙ୍କାଚାସ୍, ‘ଏକାସ୍କି ମିଆଁ ନିନ୍ ପାବିତାର୍ ଆତ୍ମାବନ୍ ଏତ୍ତନାନ୍ ଆରୁ ଇଲ୍ନାନ୍ ଏରୟ, ଆସିନ୍, ଆଲାରିନ୍ ପାବିତାର୍ ଆତ୍ମାତି ଆସ୍ନାନ୍ ଚିନାବାଲାସ୍।’ 34ଆରୁ ଏନ୍ ଇବନ୍ ଏର୍କାନ୍, ଆରୁ ସାକ୍ଷୀ ଚିଚ୍କାନ୍ କା ଇସିନ୍ ପାର୍ମେଶ୍ଵାର୍ସ୍କି ହାଦ୍ଦୁସ୍।”
ଯୀଶୁସ୍କି ପହ୍ଲେ ଚେଲାର୍
35ନାନ୍ନୁ ଉଲ୍ଲା ଆରୁଅହନ୍ ଯୋହାନ୍ସ୍ ତାଙ୍ଘା ଚେଲାର୍ଘି ଭିତ୍ରୁ ଦୁଇ ଲୋକ୍ ଚେଲାର୍ଗାନେ ଇଜ୍ଜକାଚାସ୍। 36ଆରୁ ଆସ୍ ଯୀଶୁସିନ୍ ପାବୁନୁ କାନାନ୍ ଏରିକିରି ତାଙ୍ଘା ଚେଲାରିନ୍ ତେଙ୍ଗିୟାସ୍, “ଏରା, ୧:୩୬ ଏସ୍କେ ଇସ୍ରାଏଲ୍ ଆଲାର୍ ତାହ୍ମା ପାପ୍ଘି ଛେମାଘି ଲାଗାନ୍ ଗାଡ୍ରା ହାଦ୍ଦୁନ୍ ବଲୀ ଚିଆଇଲିୟାର୍ ହନ୍ନେନ୍ ଦୁନିଆଁନ୍ତା ଆଲାର୍ଘି ପାପ୍ତି ବାଛାବାଗେ ପାର୍ମେଶ୍ୱାର୍ସ୍ ଚାଜ୍ଜକାଦାସ୍। ଇସ୍ ପାର୍ମେଶ୍ଵାର୍ସ୍କି ଭେଡ଼ିହାଦ୍ଦୁସ୍।” 37ଯୋହାନ୍ସ୍କି ଇ କାତ୍ଥାନ୍ ମେନିକିରି ଆବ୍ଡ଼ା ଦୁଇ ଲୋକ୍ ଚେଲାର୍ ଯୀଶୁସ୍କି ପାଛ୍ଲି-ପାଛ୍ଲି କେରାର୍। 38ଯୀଶୁସ୍ ପାଛ୍ଲି କିର୍ରେ ଏରିକିରି ଆବ୍ଡ଼ାରିନ୍ ତାଙ୍ଘା ପାଛ୍ଲି-ପାଛ୍ଲି ବାର୍ନାନ୍ ଏରିକିରି ତେଙ୍ଗିୟାସ୍, “ନିମ୍ ନେକାନ୍ ବେଦ୍ଦାଲ୍ଦାର୍?” ଆବ୍ଡ଼ାର୍ ଆସିନ୍ ଯାବାବ୍ ଚିଚ୍ଚାର୍, “ହେ ରବ୍ବୀ” ମତ୍ଲବ୍ “ହେ ଗୁରୁ ନିମ୍ ଏକାସାନ୍ ରାଦାର୍?” 39ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏଙ୍ଘାଗାନେ ଗୁଚା ଏରୋର୍।” ଆନ୍ତିନ୍ ଆବ୍ଡ଼ାର୍ କାଇକିରି ଆସ୍କି ରାନା ଆଡ୍ଡାନ୍ ଏରିୟାର୍, ଆରୁ ହୁଙ୍ଗେନ୍ ଲାଗ୍ଭାଗ୍ ଆଡ଼୍ତି ବିଡ଼ିନ୍ତା ଚାର୍ବାଚ୍ଚା କେର୍କିଚା, ହୁଦ୍ଘିଲାଗାନ୍ ଆବ୍ଡ଼ାର୍ ହୁ ଉଲ୍ଲା ଆସ୍ଗାନେ ରାଚାର୍ କେରାର୍।
40ଏକା ଦୁଇ ଲୋକ୍ ଯୋହାନ୍ସ୍କି କାତ୍ଥା ମେନିକିରି ଯୀଶୁସ୍କି ପାଛ୍ଲି-ପାଛ୍ଲି କେରାର୍, ଆବ୍ଡ଼ାର୍ଘି ଭିତର୍ନୁ ଅଣ୍ଟାସ୍ ଶିମୋନ୍ ପାତ୍ରାସ୍କି ଭାଇ ଆନ୍ଧ୍ରିୟାସ୍ ରାଚାସ୍। 41ଆସ୍ ତାଙ୍ଘା ନିଜର୍ ଭାଇ ଶିମୋନ୍ସ୍ଗାନେ ଭେଁଟ୍ ମାନିକିରି ଆସିନ୍ ତେଙ୍ଗିୟାସ୍, “ଏମାଗେ ମାସିହ୍ ମତ୍ଲବ୍ ଖ୍ରୀସ୍ତ୍ ହାଖ୍ଖରାସ୍ କେରାସ୍।” 42ଆସ୍ ଶିମୋନ୍ସିନ୍ ଯୀଶୁସ୍କି ଚାହାଗେ ଅନ୍ଦ୍ରାସ୍। ଯୀଶୁସ୍ ଆସିନ୍ ଏରିକିରି ତେଙ୍ଗିୟାସ୍, “ନିନ୍ ଯୋହାନ୍ସ୍କି ହାଦ୍ଦୁ ଶିମୋନ୍: ଆକ୍କୁନ୍ତିନିନ୍ କେଇଫା ୧:୪୨ କାଇଫା ମତ୍ଲବ୍ ଚାଟ୍ଣୀ ମତ୍ଲବ୍ ପାତ୍ରାସ୍ ତେଙ୍ଗା କୋୟ।”
ଫିଲିପ୍ପସ୍ ଆରୁ ନାତାନାଏଲ୍ସ୍ ଯୀଶୁସ୍କି ଚେଲା ମାନାଲ୍ନାଏ
43ନାନ୍ନୁ ଉଲ୍ଲା ଯୀଶୁସ୍ ଗାଲିଲୀ ପ୍ରଦେଶ୍ କାଲାଗେ ସୋଚ୍ଚାସ୍। ଆସ୍ ଫିଲିପ୍ପସ୍ଗାନେ ଭେଁଟ୍ ମାନ୍ଚାସ୍ ଆରୁ ଆସିନ୍ ତେଙ୍ଗିୟାସ୍, “ଏଙ୍ଘା ପାଛ୍ଲି-ପାଛ୍ଲି ବାରା।” 44ଆନ୍ଧ୍ରିୟାସ୍ ଆରୁ ପାତ୍ରାସ୍କି ଲେଖା ଫିଲିପ୍ପସ୍ହି ବେତ୍ସାଇଦା ସହର୍ତା ରାଚାସ୍। 45ଫିଲିପ୍ପସ୍ ନାତାନାଏଲ୍ସିନ୍ ଭେଁଟ୍ ମାନ୍ଚାସ୍ ଆରୁ ଆସିନ୍ ତେଙ୍ଗିୟାସ୍, “ଏକାସ୍କି ବାରେ ପାବିତାର୍ ଶାସ୍ତ୍ରନୁ ମୁଶାସ୍ ଆରୁ ନାବୀର୍ ଲେଖ୍ଚ୍କାନାଏ, ଆସିନ୍ ଏମ୍ ଏର୍କାଦାମ୍, ଆସ୍ ନାଜ୍ରେତ୍ ସହର୍ତାସ୍ ଆରୁ ଯୋଷେଫ୍ସ୍କି ହାଦ୍ଦୁ ଯୀଶୁସ୍।” 46ନାତାନାଏଲ୍ସ୍ ଆସିନ୍ ତେଙ୍ଗିୟାସ୍, “ନାଜ୍ରେତ୍ ସହର୍ତି କେତ୍କ ବାନେ ଜିନିଷ୍ ଅଥ୍ରା ଅଙ୍ଗଦ୍ କାଁଏ?” ଫିଲିପ୍ପସ୍ ଆସିନ୍ ତେଙ୍ଗିୟାସ୍, “ବାରା ଏରା।” 47ଯୀଶୁସ୍ ନାତାନାଏଲ୍ସିନ୍ ତାଙ୍ଘା ଚାହାଗେ ବାର୍ନାନ୍, ଏରିକିରି ଆସ୍କି ବାରେନୁ ତେଙ୍ଗିୟାସ୍, “ଏରା ଇସ୍ ଅଣ୍ଟା ବାନେ ଇସ୍ରାଏଲୀ ଆଲାସ୍: ଆରୁ ଇସ୍କି ମନ୍ନୁ ଏନ୍ଦେର୍ହି କପଟ୍ ମାଲ୍ଲାଦିନ୍।” 48ନାତାନାଏଲ୍ସ୍ ଯୀଶୁସିନ୍ ମେନ୍ଚାସ୍, “ନିମ୍ ଏଙ୍ଗାନ୍ ଏସ୍କେ ଆହ୍ଦାର୍?” ଯୀଶୁସ୍ ଆସିନ୍ ଉତ୍ତର୍ ଚିଚ୍ଚାସ୍, “ଫିଲିପ୍ପସ୍ ନିଙ୍ଗାନ୍ ମେହେଁନାଘି ଆଘ୍ଲି, ଯେତ୍କବାକେନ୍ ନିନ୍ ଡୁମାରି ମାନ୍ନୁ କିୟାଁ ରାଚ୍କାଏ, ହୁବାକେନ୍ ଏନ୍ ନିଙ୍ଗାନ୍ ଏର୍କାଚ୍କାନ୍।” 49ନାତାନାଏଲ୍ ଆସିନ୍ ଉତ୍ତର୍ ଚିଚ୍ଚାସ୍, “ହେ ରାବ୍ବୀ, ନିମ୍ ପାର୍ମେଶ୍ଵାର୍ସ୍କି ହାଦ୍ଦୁର୍; ନିମ୍ ଇସ୍ରାଏଲ୍ ଜାମାର୍ଘି ମାହା ରାଜାର୍।” ନେଖା ପାବୁ ଏମ୍ ଏରାଲ୍ଦାମ୍। 50ଯୀଶୁସ୍ ଆସିନ୍ ଉତ୍ତର୍ ଚିଚ୍ଚାସ୍, “ଏନ୍ ନିଙ୍ଗାନ୍ ଡୁମାରି ମାନ୍ନୁ କିୟାଁ ଏର୍କାନ୍ ବୁଲି ତେଙ୍କାନ୍, ଆଦ୍ଘିଲାଗାନ୍ ନିନ୍ ବିଶ୍ଵାସ୍ କାମାଲ୍ଦାଏ କାଁଏ? ନିନ୍ ଇଦ୍ଘିନ୍ତି ହି ବାଡ଼୍କା-ବାଡ଼୍କା ନାଲ୍ଖୁ ଏରୟ।” 51ଆସ୍ ଆରୁହି ତେଙ୍ଗିୟାସ୍, “ଏନ୍ ନିମାନ୍ ସତ୍ତୁ-ସତ୍ତୁ ତେଙ୍ଗାଲ୍ଦାନ୍, କା ଅନ୍ଦୁଲ୍ ନିମ୍ ସରଗ୍ବନ୍ ଖୋଲ୍ର୍କା ଏରୋର୍, ଆରୁ ପାର୍ମେଶ୍ଵାର୍ସ୍କି ଦୂଁତ୍ଜାମାରିନ୍ ମୁନୁଷ୍ ହାଦ୍ଦୁସ୍କି ମିଆଁ ଏତ୍ତନାନ୍ ଆରୁ ଆରଗ୍ନାନ୍ ଏରର୍।”
2ଯୀଶୁସ୍ କାନା ପାଡ଼ାନୁ ଆମ୍ମୁନ୍ ଅଦ୍ଭୁତ୍ ରୂପ୍ନୁ ଅଙ୍ଗୁର୍ ରାସେ କାମାଲ୍ଦାସ୍
1ତିସ୍ରା ଉଲ୍ଲାନୁ ଗାଲିଲୀ ପ୍ରଦେଶ୍ଘି କାନା ପାଡ଼ାନୁ ଅଣ୍ଟା ବେଞ୍ଜା ରାଚା, ଯୀଶୁସ୍କି ତାଙ୍ଗ୍ୟଦ୍ହି ଆସାନ୍ ରାଚା। 2ଯୀଶୁସ୍ ଆରୁ ତାଙ୍ଘା ଚେଲାଜାମାର୍ହି ଆ ବେଞ୍ଜାନୁ ବର୍ନି ହାକ୍କାଚାର୍। 3ଯେତ୍କବାକେନ୍ ଅଙ୍ଗୁର୍ ରାସେ ଘାଟ୍ରାକେରା, ତା ଯୀଶୁସ୍କି ତାଙ୍ଗ୍ୟଦ୍ ଆସିନ୍ ତେଙ୍ଗିୟାଦ୍, “ଇବ୍ଡ଼ାର୍ସାନ୍ ଅଙ୍ଗୁର୍ ରାସେ ମୁଞ୍ଜରାକେରା।” 4ଆଙ୍ଗେନ୍ ଯୀଶୁସ୍ ଆବନ୍ ତେଙ୍ଗିୟାସ୍, “ଆୟାଙ୍ଗ୍, ନିନ୍ ଏଙ୍ଗାନ୍ ଏନ୍ଦେର୍ଗେ ଏନ୍ନେ ତେଙ୍ଗାଲ୍ଦିନ୍? ଏଙ୍ଘା ସାମାୟ ଆକ୍କୁନ୍ତକ୍ ମାଲ୍ଲା ବାରୁ।” (ଅଙ୍ଗୁର୍ ରାସେ ଘାଟ୍ରାକେରା ଇଦ୍ଘି ବାରେନୁ ଏନ୍ଦ୍ରିନ୍ କାମାଗେ ଏଙ୍ଘାଏ ଠିକ୍ ସାମାୟ ମାଲ୍ଲିଦ୍)। 5ଯୀଶୁସ୍କି ତାଙ୍ଗ୍ୟଦ୍ ଗୁତ୍ତିୟାରିନ୍ ତେଙ୍ଗିୟାଦ୍, “ଆସ୍ ନିମାନ୍ ଏକାନ୍ ତେଙ୍ଗସ୍ ଆବନ୍ କାମ୍କେ।” 6ଆରୁ ଆସାନ୍ ୟାହୁଦୀଜାମାର୍ ରୀତିନୀତିଘି ଲେଖା ଶୁଦ୍ଧ୍ ମାନାଗେ ଚାଁଚାଘି ସୁୟେଟା ଗାଣ୍ଠିୟା ରାଚା, ଅଣ୍ଟା-ଅଣ୍ଟା ଗାଣ୍ଠିୟାନୁ ଅଶୀ ଲିଟର୍ତି ଶୋଏ କୁଡ଼ିଏ ଲିଟର୍ ଆମ୍ମୁ ଧାରାଲିୟାଦ୍। 7ଯୀଶୁସ୍ ଗୁତ୍ତିୟାରିନ୍ ତେଙ୍ଗିୟାସ୍, “ଗାଣ୍ଠିୟାନୁ ଆମ୍ମୁ ନିନ୍ଦାଚା।” ଆଙ୍ଗେନ୍ ଆବ୍ଡ଼ାର୍ ଗାଣ୍ଠିୟାଗୁଠିନୁ ମୁଖାସ୍ତି ଆମ୍ମୁ ନିନ୍ଦେର୍ଚାର୍। 8ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଇବନ୍ ଅଥ୍ରିକିରି ସାର୍ତାଲିୟାସ୍କି ଚାହାଗେ ହୁଆ।” ଆଙ୍ଗେନ୍ ଆବ୍ଡ଼ାର୍ ଆବନ୍ ଅଚ୍ଚାର୍। 9ଯେତ୍କବାକେନ୍ ସାର୍ତାଲିୟାସ୍ ଆ ଆମ୍ମୁନ୍ ଟାଟ୍ଟେଚେ ଏରିୟାସ୍, ଏକାଦ୍ କା ଅଙ୍ଗୁର୍ ରାସେ ମାନ୍ଚା କେର୍କିଚା, ଲେକିନ୍ ଆସ୍ ବାଲ୍ଲକାଚାସ୍ କା ଅଙ୍ଗୁର୍ ରାସେ ଏକାସ୍ତି ବାର୍ଚା (ଲେକିନ୍ ଏକା ଗୁତ୍ତିୟାର୍ ଆମ୍ମୁ ଅଥର୍କାଚାର୍, ଆବ୍ଡ଼ାର୍ ଆହାଲିୟାର୍) ତା ସାର୍ତାଲିୟାସ୍ ବର୍କୁକ୍କୋସିନ୍ ମେହିଁକିରି ଆସିନ୍ ତେଙ୍ଗିୟାସ୍, 10“ଜାମା ଆଲାର୍ ପହ୍ଲେ ବାନେ ଅଙ୍ଗୁର୍ ରାସେବନ୍ ଚିନାଏ ଆରୁ ଯେତ୍କବାକେନ୍ ଆଲାର୍ ଉଙ୍ଖନାଏ କାନାଏ, ତା ସିଠା ଅଙ୍ଗୁର୍ ରାସେବନ୍ ଚିନାଏ; ଲେକିନ୍ ନିନ୍ ବାନେ ଅଙ୍ଗୁର୍ ରାସେବନ୍ ଆକ୍କୁନ୍ତକ୍ ଉଇକାଦାଇନ୍।” 11ଯୀଶୁସ୍ ଗାଲିଲୀ ପ୍ରଦେଶ୍ କାନା ପାଡ଼ାନୁ ଇ ପହେଲା ଅଦ୍ଭୁତ୍ ନାଲ୍ଖୁ କାମିକିରି ନିଜ୍କେନିଜ୍ ମାହାନ୍ ବୁଲି ଏଦିୟାସ୍ ଆରୁ ତାଙ୍ଘା ଚେଲାର୍ ତାଙ୍ଘା ମିଆଁ ବିଶ୍ଵାସ୍ କାମ୍ଚାର୍। 12ଆନ୍ତିନ୍ ଯୀଶୁସ୍ ତାଙ୍ଘା ଆୟାଙ୍ଗ୍ ତାଙ୍ଘା ଭାଇଜାମାର୍ ଆରୁ ତାଙ୍ଘା ଚେଲାର୍ଗାନେ କାଫାର୍ନାହୁମ୍ ସହର୍ଗେ କେରାର୍ ଆରୁ ଆସାନ୍ ଥୋଡ଼େ ଉଲ୍ ରାଚାର୍।
ଯୀଶୁସ୍ ଯେରୁଶାଲେମ୍ ତା ମନ୍ଦିର୍ନୁ ବେପ୍ରିୟାରିନ୍ ଖେଦାଲ୍ଦାସ୍
(ମାତିସ୍ ୨୧:୧୨,୧୩; ମାର୍କୁସ୍ ୧୧:୧୫-୧୭; ଲୁକାସ୍ ୧୯:୪୫,୪୬)
13ୟାହୁଦୀ ଜାମାର୍ଘି ପାସ୍କାପରବ୍ ୨:୧୩ ଇସ୍ରାଏଲ୍ ଆଲାର୍ ମିଶର୍ ଦେଶ୍ନୁ ଗୁତ୍ତିୟା ରାଚାର୍ ପାର୍ମେଶ୍ୱାର୍ସ୍ ଆ ଗୁତ୍ତିୟାନ୍ତି ଅଥ୍ରିକିରି କାନାନ୍ ଦେଶ୍ଗେ ଅନ୍ଦ୍ରାସ୍ ମିଶର୍ ଦେଶ୍ତି ଏକ୍ଲା ଆବ୍ଡ଼ାର୍ ଉର୍ଖିୟାର୍ ଆ ଉଲ୍ଲାନ୍ ମନେ କାମାଗେ ଇସ୍ରାଏଲ୍ ଆଲାର୍ ଇ ପାସ୍କାପରବ୍ ମାନାବାଲିୟାର୍। ପରବ୍ ଆଣସାଲିୟାଦ୍ ହୁଦ୍ଘିଲାଗାନ୍ ଯୀଶୁସ୍ ଯେରୁଶାଲେମ୍ଗେ କେରାସ୍। 14ଆରୁ ଆସ୍ ମନ୍ଦିର୍ନୁ ଓୟୁ, ଭେଡ଼ି ଆରୁ ପେର୍ୱାଁ ବିଁସୁରିନ୍ ଆରୁ୨:୧୪ ପାଏସା ବାଦ୍ଲୁ ମନ୍ଦିର୍ନୁ ଚାନ୍ଦା ଚିୟାଗେ ଦୁସ୍ରା ଦେଶ୍ତା ପାଏସାନ୍ ମନ୍ଦିର୍ତା ପାଏସାନୁ ବାଦ୍ଲାନା ବାଲାର୍। ପାଏସା ବାଦ୍ଲୁ ଆଲାରିନ୍ ଅକ୍କାନ୍ ଏରିୟାସ୍। 15ଆଙ୍ଗେନ୍ ଯୀଶୁସ୍ ଏପୁବନ୍ କୋଡ଼୍ରା କାମିକିରି, ଜାମା ଆଲାରିନ୍ ତାହ୍ମା ଭେଡ଼ି ଆରୁ ଓୟୁଗାନେ ମନ୍ଦିର୍ତି ଅଥ୍ରେଚାସ୍, ଆରୁ ପାଏସା ବାଦ୍ଲୁର୍ଘି ପାଏସାନ୍ ଛିଛିର୍ଛାନ୍ଦ୍ କାମ୍ଚେ ଚିଚ୍ଚାସ୍, ଆରୁ ଟେବୁଲ୍ଗୁଠିନ୍ ଉଲ୍ଟେ ଚିଚ୍ଚାସ୍। 16ଆରୁ ଯୀଶୁସ୍ ପେର୍ୱାଁ। ବିଁସୁରିନ୍ ତେଙ୍ଗିୟାସ୍, “ଇବ୍ଡ଼ାନ୍ ଇସ୍ତି ହୁଆ କାଲା। ଏଙ୍ଘା ବାଙ୍ଗ୍ସ୍କି ଆଡ଼୍ପାନ୍ ବେପ୍ରିୟାର୍ଘି ଆଡ଼୍ପା ଆମା କାମା।” 17ଆଙ୍ଗେନ୍ ତାଙ୍ଘା ଚେଲାଜାମାର୍ଗେ ପାବିତାର୍ଶାସ୍ତ୍ରନ୍ତା ଇ ଲେଖ୍ଚ୍କାବଦ୍ ମନେ ବାର୍ଚା କା “ନିଙ୍ଘା ମନ୍ଦିର୍ଘି ଲାଗାନ୍ ଏଙ୍ଘା ମୁରୁକ୍ ବାନେ ହାଖ୍ଖନାଦ୍ ଏଙ୍ଘା ଜୀଆ ହୋକୋ।”
18ଆଙ୍ଗେନ୍ ୟାହୁଦୀ ମୁଖ୍ୟାର୍ ଯୀଶୁସିନ୍ ମେନ୍ଚାର୍, “ନିନ୍ ଏମାନ୍ ଏନ୍ଦେର୍ ଅଦ୍ଭୁତ୍ ନାଲ୍ଖୁ ଏଦା ଅଙ୍ଗୟ, ଏସ୍କେ କା ଏମ୍ ଆହମ୍ କା ନିଙ୍ଗାଗେ ଇବ୍ଡ଼ା ନାଲ୍ଖୁ କାମାଗେ ହକ୍ ରାଇ?” 19ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “ଇ ମନ୍ଦିର୍ବନ୍ ଧାସ୍କାଚା, ଆରୁ ଏନ୍ ଇ ମନ୍ଦିର୍ବନ୍ ତିନ୍ ଦିନ୍ନୁ ଇଲ୍ତନ୍ଚନ୍।” 20ୟାହୁଦୀ ମୁଖ୍ୟାର୍ ତେଙ୍ଗିୟାର୍, “ଇ ମନ୍ଦିର୍ବନ୍ କାମାଗେ ଛୟାଲିସ୍ ବଛର୍ ଲାକ୍କିଚି, ଆରୁ ନିନ୍ ତିନ୍ ଦିନ୍ନୁ ଇ ମନ୍ଦିର୍ବନ୍ ଏସ୍କେ ଇଲ୍ତା ଅଙ୍ଗୟ?” 21ଲେକିନ୍ ଆସ୍ ଏକା ମନ୍ଦିର୍ଘି ବାରେ ତେଙ୍ଗାଲିୟାସ୍ ଆଦ୍ ତାଙ୍ଘା ନିଜର୍ ଶରୀର୍ ରାଚା। 22ପାଛ୍ଲି ଯେତ୍କବାକେନ୍ ଆସ୍ କେଚ୍ଚକାସ୍ତି ଉଜ୍ଜିୟାସ୍ ତା ଆସ୍କି ଚେଲାଜାମାର୍ଗେ ମନେ ବାର୍ଚା କା ଆସ୍ ଇ କାତ୍ଥାନ୍ ତେଙ୍କାଚାସ୍; ଆରୁ ଆବ୍ଡ଼ାର୍ ପାବିତାର୍ ଶାସ୍ତ୍ର ଆରୁ ଯୀଶୁସ୍କି ତେଙ୍କା କାତ୍ଥାନ୍ ବିଶ୍ୱାସ୍ କାମ୍ଚାର୍।
ଯୀଶୁସ୍ ଆଲାର୍ଘି ମନ୍ତା କାତ୍ଥାବନ୍ ଆହ୍ନା ବାଲାସ୍
23ପାସ୍କାପରବ୍ ବାକେନ୍ ଯୀଶୁସ୍ ଯେରୁଶାଲେମ୍ନୁ ରାଚାସ୍, ତା ଢେର୍ ଆଲାର୍ ଆସ୍କି ଅଦ୍ଭୁତ୍ ନାଲ୍ଖୁବନ୍ ଏରିକିରି ଆସ୍କି ମିଆଁ ବିଶ୍ଵାସ୍ କାମ୍ଚାର୍। 24ଲେକିନ୍ ଯୀଶୁସ୍ ଆବ୍ଡ଼ାର୍ଘି ମିଆଁ ଭାର୍ଷା ମା କାମ୍ଚାସ୍, ଏନ୍ଦେର୍ଗେକା ଆସ୍ ଜାମାରିନ୍ ଆହାଲିୟାସ୍; (ଯୀଶୁସ୍କେ ଏନ୍ଦେର୍ କାମ୍ନାକାତ୍ଥା ଆଦ୍ଘି ବାରେନୁ ତେଙ୍ଗ୍ନାଘି ଆଜାଦୀ ଯୀଶୁସ୍ ଆବ୍ଡ଼ାର୍ଗେ ମାଲ୍ଲା ଚିଉସ୍)। 25ଆରୁ ଆସ୍କେ ଆଲାର୍ଘି ବାରେନୁ ସାକ୍ଷୀଘି ଦାର୍କାର୍ ମାଲ୍ଲାରୁଦ୍ କା, ଏନ୍ଦେର୍ଗେକା ଆଲାର୍ଘି ମନ୍ନୁ ଏନ୍ଦେର୍ ରାଇ, ଆବନ୍ ଆସ୍ ଆହାଲିୟାସ୍।
3ଯୀଶୁ ଆରୁ ନୀକଦୀମୁସ୍
1୩:୧ ଫାରିସୀ ଆଲାର୍ ୟାହୁଦୀ ଜାମାର୍ଘି ଧାର୍ମିକ୍ ଆଲାର୍ ରାଚାର୍। ଏକାର୍ କା ମୁଶାସ୍କି ନିୟମ୍ବନ୍ ବାନେକିରି ମାନ୍ନାବାଲା ରାଚାର୍।ଫାରିସୀ ଜାମାର୍ଘି ଭିତର୍ନୁ ନୀକଦୀମୁସ୍ ନାମେଘି ଅଣ୍ଟା ଆଲାସ୍ ରାଚାସ୍, ଆସ୍ ୟାହୁଦୀ ଜାମାର୍ଘି ମୁଖିଆ ରାଚାସ୍। 2ଅନ୍ଦୁଲ୍ ଆସ୍ ମାଁହାବାକେନ୍ ଯୀଶୁସ୍କି ଚାହାଗେ ବାରିକିରି ଆସିନ୍ ତେଙ୍ଗିୟାସ୍, “ହେ ଗୁରୁ ନାମ୍ ଆହ୍ଦାତ୍ କା ନିମ୍ ଗୁରୁର୍ ନିମ୍ ପାର୍ମେଶ୍ୱାର୍ସ୍କି ତାର୍ତି ବାର୍ଚ୍କା ଗୁରୁର୍, ଏନ୍ଦେର୍ଗେକା ଏକା ଅଦ୍ଭୁତ୍ ନାଲ୍ଖୁ ନିମ୍ କାମାଲ୍ଦାର୍, ଆବନ୍ ପାର୍ମେଶ୍ୱାର୍ସ୍ଗାନେ ମା ରାଚ୍କୁନ୍, ନେଦ୍ହି କାମା ପଲ୍ଲନାଇନ୍।”
3ଯୀଶୁସ୍ ଆସିନ୍ ଯାବାବ୍ ଚିଚ୍ଚାସ୍, “ଏନ୍ ନିଙ୍ଗାନ୍ ସତ୍ତୁ-ସତ୍ତୁ ତେଙ୍ଗାଲ୍ଦାନ୍, ଯଦି ନେଦିନ୍ ଆରୁଅହନ୍ ଜନମ୍ ମା ମାନସ୍, ତା ପାର୍ମେଶ୍ୱାର୍ସ୍ ଏକାସାନ୍ ରାଜୀ କାମ୍ଦାସ୍ ଆବନ୍ ଏରା ପଲ୍ଲଦାସ୍।” 4ନୀକଦୀମୁସ୍ ଆସିନ୍ ତେଙ୍ଗିୟାସ୍, “ଯେତ୍କବାକେନ୍ ଅଣ୍ଟା ଆଲାସ୍ ପାଚ୍କି ମାନ୍ଦାସ୍କାଦାସ୍, ତା ଏସ୍କେ ଜନମ୍ ମାନାଅଙ୍ଗସ୍? ଆସ୍ ନିଜର୍ ଆୟାଙ୍ଗ୍ଘି ଗରଭ୍ନୁ ଆରୁଅହନ୍ କରିକିରି ଏସ୍କେ ଜନମ୍ ମାନାଅଙ୍ଗସ୍?” 5ଯୀଶୁସ୍ ଯାବାବ୍ ଚିଚ୍ଚାସ୍, “ଏନ୍ ନିଙ୍ଗାନ୍ ସତ୍ତୁ-ସତ୍ତୁ ତେଙ୍ଗାଲ୍ଦାନ୍, ଯେତ୍କବାକେନ୍ତକ୍ ଅଣ୍ଟା ଆଲାସ୍ ୩:୫ ପାସ୍ତାରାଇକିରି ଆସ୍ନାନ୍ ଅଚ୍ଚକା ବିନା ଆରୁ ଆସ୍କେ ପାବିତାର୍ ଆତ୍ମା ହାଖ୍ଖର୍ନା ବିନା ଆମ୍ମୁ ଆରୁ ଆତ୍ମାତି ଜନମ୍ ମା ମାନସ୍, ତା ଆସ୍ ପାର୍ମେଶ୍ଵାର୍ସ୍କି ରାଜୀନୁ କରା ପଲ୍ଲଦାସିନ୍। 6ଏନ୍ଦେର୍ଗେକା ଏକାସ୍ ଆୟାଙ୍ଗ୍ ବାଙ୍ଗ୍ସ୍ତି ଜନମ୍ ମାନ୍ଦାସ୍, ଆସ୍ ଶାରୀରିକ୍ ଜନମ୍ ମାନ୍ଦାସ୍; ଲେକିନ୍ ଆତ୍ମିକ ଜୀବନ୍ଘି ଜନମ୍ ପାବିତାର୍ ଆତ୍ମାତି ମାନିଦ୍। 7ଏନ୍ ନିଙ୍ଗାନ୍ ଏକାନ୍ ତେଙ୍କାନ୍ ଆଦ୍ଘି ବାରେ ଆଚ୍ମିତ୍ ଆମା ମାନା କା ‘ନିମା ଜାମାର୍ଗେ ଆରୁଅହନ୍ ଜନମ୍ ମାନାଇନ୍ ଖାତ୍ରୋ।’ 8ଧୁକାଦ୍ ଏକାତାରା ଚାଁହିଦ୍ ଆଇୟା କାଇଦ୍, ଆରୁ ନିନ୍ ଆଦ୍ଘି ଶବଦ୍ବନ୍ ମେନ୍ଦାଏ, ଲେକିନ୍ ନିନ୍ ବାଲ୍ଦାଇନ୍ କା ଧୁକାଦ୍ ଏକା ତାର୍ତି ବାରିଦ୍ ଆରୁ ଏକାତାରା କାଇଦ୍? ହନ୍ନେନ୍ ଏକାର୍ ପାର୍ମେଶ୍ୱାର୍ସିନ୍ ବାଲ୍ନାଇନ୍, ଆବ୍ଡ଼ା ଆଲାର୍ ଅଣ୍ଟା ଆଲାସ୍ ପାବିତାର୍ ଆତ୍ମାତି ଏସ୍କେ ଜନମ୍ ମାନ୍ଦାସ୍, ଆବନ୍ ଆବ୍ଡ଼ାର୍ ବାଲ୍ନାଇନ୍।”
9ନୀକଦୀମୁସ୍ ଆସିନ୍ ଯାବାବ୍ ଚିଚ୍ଚାସ୍, “ପାବିତାର୍ ଆତ୍ମାତି ପୁନା ଜନମ୍ ଏସ୍କେ ମାନା ଅଙ୍ଗିଦ୍?” 10ଇବନ୍ ମେନିକିରି ଯୀଶୁସ୍ ଆସିନ୍ ତେଙ୍ଗିୟାସ୍, “ନିନ୍ ଇସ୍ରାଏଲ୍ ଜାମାର୍ଘି ଗୁରୁୟ, ହାଲେହି ଇବ୍ଡ଼ା କାତ୍ଥାନ୍ ବାଲ୍ଦାଇନ୍? 11ଏନ୍ ନିଙ୍ଗାନ୍ ସତ୍ତୁ କାତ୍ଥାନ୍ ତେଙ୍ଗାଲ୍ଦାନ୍, ଏମ୍ ଏକାନ୍ ଆହ୍ଦାମ୍, ଆବନିନ୍ ତେଙ୍ଗ୍ଦାମ୍, ଆରୁ ଏକାନ୍ ଏମ୍ ଏର୍କାଦାମ୍, ଆଦ୍ଘି ବାରେ ସାକ୍ଷୀ ଚିଦାମ୍, ଲେକିନ୍ ନିମ୍ ଏହ୍ମା ସାକ୍ଷୀନ୍ ମା ମାନ୍ଦାର୍। 12ଯେତ୍କବାକେନ୍ ଏନ୍ ନିମାନ୍ ଦୁନିଆଁନ୍ତା କାତ୍ଥାନ୍ ତେଙ୍କାନ୍, ତା ନିମ୍ ମା ମାନ୍ଚ୍କାର୍, ତା ଯଦି ଏନ୍ ନିମାନ୍ ସରଗ୍ତା କାତ୍ଥାନ୍ ତେଙ୍ଗନ୍ ତା ନିମ୍ ଏସ୍କେ ବିଶ୍ୱାସ୍ କାମର୍? 13ଏନ୍ଦେର୍ଗେକା ଏକା ମୁନୁଷ୍ ହାଦ୍ଦୁସ୍ ସରଗ୍ସ୍ତିନ୍ ଏତ୍ତିୟାସ୍ ବାର୍ଚାସ୍, ଆସିନ୍ ଆମ୍ବିକିରି ଆରୁ ନେଦ୍ହି ସରଗ୍ଗେ ମାଲ୍ଲାକୁର୍। 14ଏସ୍କେ ମୁଶାସ୍ ଶୁନ୍ଶାନ୍ ଆଡ୍ଡାନୁ୩:୧୪ ଢେର୍ ଆଘ୍ଲି ଯେତ୍କବାକେନ୍ ପାର୍ମେଶ୍ୱାରସ୍କି ବିରୁଦ୍ଧ୍ନୁ ଶୁନ୍ଶାନ୍ ଆଡ୍ଡାନୁ ବିଦ୍ରୋହ୍ କାମ୍ଚାର୍ ତା ଆବ୍ଡ଼ାରିନ୍ ନାଶ୍ କାମାଗେ ପାର୍ମେଶ୍ୱାର୍ସ୍ ବିଷ୍ ରାନାବାଲା ନେର୍ରୁବନ୍ ତା ଏକ୍ତାଚାସ୍, ଲେକିନ୍ ଯେତ୍କବାକେନ୍ ଆବ୍ଡ଼ାର୍ ପାସ୍ତାରାଚାର୍ ତା ପାର୍ମେଶ୍ୱାର୍ସ୍କି ଅନୁସାର୍ ମୁଶାସ୍ ଅଣ୍ଟା ପିତ୍ତାଲିଘି ନେର୍ରୁବନ୍ ଅଣ୍ଟା ଠେଙ୍ଗାଘି ମିଆଁ ହିଁଇକିରି ମିଆଁ ଟେକ୍ଚାସ୍, ଇଦ୍ଘିଲାଗାନ୍ କା ନେଦ୍ ଆବନ୍ ଏରର୍ ଆବ୍ଡ଼ାର୍ ବାଛ୍ରର୍କର୍, ହନ୍ନେନ୍ ଏକାର୍ ଯୀଶୁସ୍କି ମିଆଁ ଭାରୋସା ଉଇନାଏ ଆବ୍ଡ଼ାର୍ହି ଅନନ୍ତ ଜୀବନ୍ଘି ଖିନାସ୍ତି ବାଛ୍ରର୍କର୍। ପିତ୍ତାଲିଘି ନେର୍ରୁନ୍ ମିଆଁ ଟେକ୍ଚ୍କାଚାସ୍, ହନ୍ନେନ୍ ଏସ୍କିନ୍ ହାଲେ ମୁନୁଷ୍ ହାଦ୍ଦୁସିନ୍ହି କ୍ରୁଶ୍ ମିଆଁ ଟେକାକୋ; 15ତାକା ଏକାସ୍ ଆସ୍କି ମିଆଁ ବିଶ୍ୱାସ୍ କାମ୍ଦାସ୍, ଆସ୍ ସବୁଦିନ୍ତା ଜୀବନ୍ ହାଖ୍ଖସ୍।”
16ଏନ୍ଦେର୍ଗେକା ପାର୍ମେଶ୍ଵାର୍ସ୍ ଦୁନିଆଁନ୍ତା ଆଲାରିନ୍ ଏତ୍କ ବାନେ ହାଖ୍ଖୀୟାସ୍ କା, ଆସ୍ ତାଙ୍ଘାଏ ଅଣ୍ଟା ଖାଲି ହାଦ୍ଦୁସିନ୍ ଚିଚ୍ଚାସ୍ ଲାଗ୍ଗିୟାସ୍, ତାକା ଏକାସ୍ ଆସ୍କି ମିଆଁ ବିଶ୍ଵାସ୍ କାମ୍ଦାସ୍, ଆସ୍ ଆତ୍ମିକ୍ ରୂପ୍ତି ନାଶ୍ ମା ମାନ୍ଦାସ୍, ବରନ୍ ସବୁଦିନ୍ତା ଜୀବନ୍ ହାଖ୍ଖଦାସ୍। 17ଏନ୍ଦେର୍ଗେକା ଦୁନିଆଁନ୍ତା ଆଲାରିନ୍ ଦୋଷୀ ଠାହ୍ରାଗେ ପାର୍ମେଶ୍ଵାର୍ସ୍ ତାଙ୍ଘା ହାଦ୍ଦୁସିନ୍ ଦୁନିଆଁନୁ ମାଲ୍ଲା ତାଇୟୁସ୍, ଦୁନିଆଁନ୍ତା ଆଲାର୍ ଆସ୍କି ଦ୍ୱାର୍ନୁ ପାପ୍ତି ବାଛ୍ରାଗେ ଆସିନ୍ ତାଏକାଦାସ୍। 18ଏକାସ୍ ଆସ୍କି ମିଆଁ ବିଶ୍ଵାସ୍ କାମ୍ଦାସ୍, ଆସିନ୍ ଦୋଷୀ ଠାହ୍ରିକିରି ଦଣ୍ଡ୍ ମା ଚିଆକାଇ, ଲେକିନ୍ ଏକାସ୍ ଆସ୍କି ମିଆଁ ବିଶ୍ୱାସ୍ ମା କାମ୍ଦାସ୍, ଆସିନ୍ ଦୋଷୀ ଠାହ୍ରିକିରି ଦଣ୍ଡ୍ ଚିଆ କେର୍କିଚି; ଏନ୍ଦେର୍ଗେକା ଆସ୍ ପାର୍ମେଶ୍ୱାର୍ସ୍କି ଅଣ୍ଟା ଖାଲି ହାଦ୍ଦୁସ୍କି ମିଆଁ ବିଶ୍ୱାସ୍ ମା କାମ୍ଚାସ୍। 19ଏକାସ୍ ବିଲ୍ଲୀ ଲେଖା ରାଦାସ୍ ଆସ୍ ଦୁନିଆଁନୁ ବାର୍ଚାସ୍ କେର୍କାଦାସ୍ ଲେକିନ୍ ଆଲାର୍ ଏକାସ୍ ବିଲ୍ଲୀ ଲେଖା ରାଦାସ୍ ଆସିନ୍ ପସନ୍ଦ୍ ମା କାମ୍ଚାର୍। ଲେକିନ୍ ଉହା ଲେଖା ଖାରାପ୍ ନାଲ୍ଖୁନ୍ ବାଗ୍ଗେ ପସନ୍ଦ୍ କାମ୍ଚାର୍, ଏନ୍ଦେର୍ଗେକା ଆବ୍ଡ଼ାର୍ଘି ନାଲ୍ଖୁଦ୍ ଖାରାପ୍ ରାଚା। 20ଏନ୍ଦେର୍ଗେକା ଏକାସ୍ ଖାରାପ୍ ନାଲ୍ଖୁ କାମ୍ଦାସ୍, ଆସ୍ ବିଲ୍ଲୀବନ୍ ପସନ୍ଦ୍ ମା କାମ୍ଦାସ୍, ଆରୁ ବିଲ୍ଲୀଘି ଚାହାନୁ ମା ବାର୍ଦାସ୍, ଏନ୍ଦେର୍ଗେକା ଆସ୍କି ଖାରାପ୍ ନାଲ୍ଖୁ ଏଥ୍ରକୋ। 21ଲେକିନ୍ ପାର୍ମେଶ୍ୱାର୍ସ୍କି ସତ୍ତୁନୁ ଚାଲ୍ର୍ନା ବାଲାସ୍, ବିଲ୍ଲୀଘି ଚାହାଗେ ବାର୍ଦାସ୍, ତାକା ଆସ୍କି ନାଲ୍ଖୁଦ୍ ପାର୍ମେଶ୍ଵାର୍ସ୍କି ଇଚ୍ଛା ଲେଖା କାମା କେର୍କିଚି ବୁଲି ଏଥ୍ରୋଦ୍।
ଆସ୍ନାନ୍ ଚିଉ ଯୋହାନ୍ସ୍ ଯୀଶୁସ୍କି ବାରେ ସାକ୍ଷୀ ଚିଆଲ୍ଦାସ୍
22ହୁଦ୍ଘିପାଛ୍ଲି ଯୀଶୁସ୍ ଆରୁ ତାଙ୍ଘା ଚେଲାର୍ ୟାହୁଦା ପ୍ରଦେଶ୍ କେରାର୍; ଯୀଶୁସ୍ ଆରୁ ଚେଲାର୍ ଆସାନ୍ ଆବ୍ଡ଼ାର୍ ଗାନେ ରାଇକିରି ଆଲାର୍ଗେ ଆସ୍ନାନ୍ ଚିୟାଗେ ଲାଗ୍ଗିୟାସ୍। 23ଯୋହାନ୍ସ୍ହି ଶାଲେମ୍ ସହର୍ଘି ଚାହା ଏନୋନ୍ ପାଡ଼ାନୁ ଆଲାର୍ଗେ ଆସ୍ନାନ୍ ଚିଆଲିୟାସ୍, ଏନ୍ଦେର୍ଗେକା ଆସାନ୍ ବାଗ୍ଗେ ଆମ୍ମୁ ରାଚା। ଆରୁ ଆଲାର୍ ଆସାନ୍ କାଇକିରି ଆସ୍ନାନ୍ ହୁଆଲିୟାର୍। 24ଯୋହାନ୍ସିନ୍ ହୁ ସାମାୟତକ୍ ଜେହେଲ୍ନୁ ମାଲ୍ଲା ଗୁଡ୍ଡକାରୁର୍। 25ଆସାନ୍ ଯୋହାନ୍ସ୍କି ଚେଲାର୍ଘି ଅଣ୍ଟା ୟାହୁଦୀସ୍ ଗାନେ୩:୨୫ ୟାହୁଦୀଜାମାର୍ ତାହ୍ମା ନୀତି ନିୟମ୍ ଅନୁସାର୍ ଧାର୍ମିକ୍ ନୋଡର୍ନାଘି ନିୟମ୍ ପାଲନ୍ କାମାଲିୟାର୍। ପାର୍ମେଶ୍ୱାର୍ସ୍କି ଆରାଧାନା କାମ୍ନାଘି ଆଘ୍ଲି ଚାହେ ଅନ୍ନାଘି ଆଘ୍ଲି ଆବ୍ଡ଼ାର୍ ଶରୀର୍ତା କେତ୍କ ଭାଗ୍ ନୋଡର୍ନା ଆବ୍ଡ଼ାର୍ଘି ରୀତି ରାଚା। ଶୁଦ୍ଧିଘି ବାରେ କାଁଟ୍ଛାଁଟ୍ ମାନ୍ଚା। 26ହୁଦ୍ଘିଲାଗାନ୍ ଚେଲାଜାମାର୍ ଯୋହାନ୍ସ୍କି ଚାହାଗେ କାଇକିରି ଆସିନ୍ ତେଙ୍ଗିୟାର୍, “ହେ ଗୁରୁ, ଏକା ଆଲାସ୍ ଯାର୍ଦାନ୍ ହଁସ୍ରାଘି ହାପାଖା ପୁରୁବ୍ତାରା ନିହ୍ମାଗାନେ ରାଚାସ୍, ଆରୁ ଏକାସ୍କି ବାରେ ନିମ୍ ତେଙ୍କାଚ୍କାର୍; ଏରା, ଆସ୍ ଆଲାର୍ଗେ ଆସ୍ନାନ୍ ଚିଆଲ୍ଦାସ୍ ଆରୁ ଜାମା ଆଲାର୍ ଆସ୍କି ଚାହାଗେ କାଲ୍ନାଏ।” 27ଯୋହାନ୍ସ୍ ଯାବାବ୍ ଚିଚ୍ଚାସ୍, “ଯେତ୍କବାକେନ୍ତକ୍ ପାର୍ମେଶ୍ୱାର୍ସ୍ ନେକିନ୍ ଅଣ୍ଟା ଖାସ୍ ଆଲ୍ ମା କାମ୍ଦାସ୍, ହତ୍କତକ୍ ଆସ୍ ଖାସ୍ ଆଲ୍ ମାନା ପଲ୍ଲଦାସ୍। 28ନିମ୍ତା ନିଜେ ଏଙ୍ଘା ତେଙ୍ଗ୍ନାନ୍ ମେନ୍ଚ୍କାଦାର୍, ‘କା ଏନ୍ ଖ୍ରୀସ୍ତ୍ ମାଲ୍ଦାନ୍, ଲେକିନ୍ ଆସ୍ତି ଆଘ୍ଲି ପାର୍ମେଶ୍ୱାର୍ସ୍ ଏଙ୍ଗାନ୍ ପ୍ରାଭୁସ୍କି ପାବୁ ତିଆର୍ କାମାଗେ ତାଏକାଦାସ୍।’ 29ଅଣ୍ଟା ନମୁନା ତେଙ୍ଗାଲ୍ଦାନ୍ ଯୀଶୁସ୍ ଅଣ୍ଟା ବର୍କୁକ୍କସ୍କି ଲେଖା ରାଦାସ୍ ଆରୁ ଏନ୍ ତାଙ୍ଘା ସାଙ୍ଗେସ୍ ଲେଖା ରାଦାନ୍; ଆରୁ ବର୍କୁକ୍କସ୍କି ସାଙ୍ଗେସ୍ ଇଲିକିରି ଆସିନ୍ ହଖାଲ୍କାର୍ଦାସ୍। ଆରୁ ଯେତ୍କବାକେନ୍ ଆସ୍ ବର୍କୁକ୍କସ୍କି ବାର୍ନାଘି ଶବଦ୍ବନ୍ ମେନ୍ଦାସ୍, ତା ଆସ୍ ମୁରୁକ୍ ଖୁସୀ ମାନ୍ଦାସ୍କାଦାସ୍: ହୋନ୍ନେନ୍ ଏନ୍ହି ମୁରୁକ୍ ଖୁସ୍ ରାଦାନ୍। 30ଜରୁରୀ ରାଇ କା ଆସ୍ ମାହାନ୍ ମାନସ୍ ଆରୁ ଏନ୍ ଛୋଟେ ମାନନ୍।
ଯୀଶୁସ୍ ସରଗ୍ସ୍ତି ବାର୍ଚାସ୍
31ଯୀଶୁସ୍ ସରଗ୍ସ୍ତି ବାର୍ଚାସ୍ ଆସ୍ ଜାମାର୍ଘିନ୍ତି ମାହାନ୍ ରାଦାସ୍; ଏକାର୍ ଇ ଦୁନିଆଁନୁ ଜନମ୍ ମାନ୍ଚ୍କାନାଏ ଆବ୍ଡ଼ାର୍ ଇ ଦୁନିଆନ୍ତାର୍, ହୁଦ୍ଘିଲାଗାନ୍ ଆବ୍ଡ଼ାର୍ ଖାଲି ଦୁନିଆଁନ୍ତା କାତ୍ଥା କାମ୍ନାଏ: ଲେକିନ୍ ଏକାସ୍ ସରଗ୍ସ୍ତି ବାର୍ଚାସ୍ ଆସ୍ ଜାମାର୍ଘିନ୍ତି ମାହାନ୍ସ୍। 32ଏକାନ୍ ଆସ୍ ସରଗ୍ନୁ ଏର୍କାଦାସ୍ ଆରୁ ମେନ୍ଚ୍କାଦାସ୍, ଆଦ୍ଘି ବାରେ ସାକ୍ଷୀ ଚିଦାସ୍; ହାଲେହି ନେଦ୍ହି ଆସ୍କି ସାକ୍ଷୀନ୍ ଗ୍ରହନ୍ ମା କାମ୍ନାଏ। 33ଲେକିନ୍ ଏକାର୍ ଆସ୍କି ସାକ୍ଷୀବନ୍ ମାନ୍ନାଏ ଆବ୍ଡ଼ାର୍ ସାକ୍ଷୀ ଚିନାଏ କା ପାର୍ମେଶ୍ୱାର୍ସ୍କି ତେଙ୍କା ବଚନ୍ଦ୍ ସତ୍ତୁଦ୍। 34ଏନ୍ଦେର୍ଗେକା ନେକାନ୍ ପାର୍ମେଶ୍ୱାର୍ସ୍ ତାଏକାଦାସ୍, ଆସ୍ ପାର୍ମେଶ୍ଵାର୍ସ୍କି କାତ୍ଥାଗୁଠିନ୍ ତେଙ୍ଗ୍ଦାସ୍; ଆରୁ ପାର୍ମେଶ୍ୱାର୍ସ୍ ଆସ୍କେ ପାବିତାର୍ ଆତ୍ମାଘି ଶକ୍ତି ପୁରାପୁରୀ ଚିଦାସ୍। 35ବାଙ୍ଗ୍ସ୍ ହାଦ୍ଦୁସିନ୍ ବାନେ ହାଖ୍ଖଦାସ୍, ଆରୁ ଆସ୍ ଆସ୍କି ହେଖ୍ଖାନୁ ଜାମା ଅଧିକାର୍ ସୋଁପେଚିଚ୍କାଦାସ୍। 36ଏକାସ୍ ହାଦ୍ଦୁସ୍କି ମିଆଁ ବିଶ୍ଵାସ୍ କାମ୍ଦାସ୍, ଆସ୍କେ ସବୁଦିନ୍ତା ଜୀବନ୍ ହାଖ୍ଖର୍କିଚି; ଲେକିନ୍ ଏକାସ୍ ହାଦ୍ଦୁସ୍କି କାତ୍ଥାବନ୍ ମା ମାନ୍ଦାସ୍, ଆସ୍କେ ଏକ୍ଲାହି ସବୁଦିନ୍ତା ଜୀବନ୍ ମା ହାଖ୍ଖରିଦ୍, ଲେକିନ୍ ପାର୍ମେଶ୍ଵାର୍ସ୍କି ଖୀସ୍ ଆସ୍କି ମିଆଁ ରଦ୍ ଆରୁ ଆସ୍ ଆସ୍କେ ଜରୁର୍ ଦଣ୍ଡ୍ ଚିୟସ୍।”
4ଯୀଶୁସ୍ ଆରୁ ସାମାରୀଆ ଆଲି
1ଯେତ୍କବାକେନ୍ ଯୀଶୁସ୍ ଯୋହାନ୍ସ୍ତି ବାଗ୍ଗେ ଚେଲା ବାନାବାଲ୍ଦାସ୍ ଆରୁ ଆସ୍ନାନ୍ ଚିଆଲ୍ଦାସ୍ ବୁଲି ଫାରିସୀଜାମାର୍ ମେନ୍ଚାର୍। 2ଯଦିଭି ଯୀଶୁସ୍ ନିଜେ ମାଲ୍ଲା ଲେକିନ୍ ଆସ୍କି ଚେଲାର୍ ଆସ୍ନାନ୍ ଚିଆଲିୟାର୍। 3ଯେତ୍କବାକେନ୍ ପ୍ରାଭୁସ୍ ଇ କାତ୍ଥାନ୍ ଆଖ୍ଖାସ୍ ହୁଦ୍ଘିଲାଗାନ୍ ଆସ୍ ୟାହୁଦୀଆ ପ୍ରଦେଶ୍ ଆମ୍ଵିକିରି ଆରୁଅହନ୍ ଗାଲିଲୀଗେ କିର୍ରିୟାସ୍, 4ଆରୁ ଯୀଶୁସ୍ଗେ ସାମାରିଆ ପ୍ରଦେଶ୍ ଚିଇକିରି କାଲା ଖାତ୍ରା। 5ଆଦ୍ଘିଲାଗାନ୍ ଆସ୍ ସାମାରିଆନ୍ତା ସୁଖାର୍ ନାମେଘି ଅଣ୍ଟା ସହର୍ଗେ ଆଣ୍ସିୟାସ୍, ଇ ସହର୍ଦ୍ ଆ ଆଡ୍ଡାଘି ଚାହାନୁ ରାଚା। ଏକାନ୍ କା ଇସ୍ରାଏଲ୍ ଜାମାର୍ଘି ପୁର୍ଖା ବୁଆ ୟାକୁବ୍ସ୍ ତାଙ୍ଘାଏ ହାଦ୍ଦୁ ଯୋଷେଫ୍ସ୍ଗେ ଚିଚ୍କାଦାସ୍; 6-8ଆରୁ ୟାକୁବ୍ସ୍କି ତୁଷାଦ୍ହି ଆସାନିନ୍ ରାଚା। ଯୀଶୁସ୍ ପାବୁ ଏକ୍ତେ-ଏକ୍ତେ ଥାକ୍ରା କେର୍କାଚାସ୍, ଆସ୍କି ଚେଲାର୍ ତା ସହର୍ଗେ ଅନ୍ନାମହ୍ନା ହେନ୍ଦାଗେ କେର୍କାଚାର୍। ଆଦ୍ଘିଲାଗାନ୍ ଆସ୍ ଆ ତୁଷାସାନ୍ ଅକ୍କିୟାସ୍। ହତ୍କବାକେନ୍ କୁଚ୍ଚାପନ୍ତା ଲାଗ୍ଭାଗ୍ ବାର ବାଚ୍କିଚା।
ହତ୍କବାକେନ୍ ଅଣ୍ଟା ସାମାରୀ ଆଲିଦ୍ ଆମ୍ମୁ ହୁଆଗେ ବାର୍ଚା। ଯୀଶୁସ୍ ଆବନ୍ ତେଙ୍ଗିୟାସ୍, “ଏଙ୍ଗାଗେ ଆମ୍ମୁ କାଟେ ହାପ୍ତୁ।” 9ଆ ସାମାରୀ ଆଲିଦ୍ ଆଚ୍ମିତ୍ ମାନିକିରି ଯୀଶୁସିନ୍ ତେଙ୍ଗିୟାଦ୍, “ନିମ୍ ୟାହୁଦୀ ଜାତିୟାର୍ ହାଲେହି ଏଙ୍ଗାନ୍ ଏନ୍ଦେର୍ଗେ ଆମ୍ମୁ ନିଆଁଲ୍ଦାର୍? ଏନ୍ତା ଅଣ୍ଟା ସାମାରୀ ଆଲିନ୍!” ଏନ୍ଦେର୍ଗେକା ୟାହୁଦୀର୍ ସାମାରୀଆର୍ ଗାନେ ଏନ୍ଦେର୍ହି ସମ୍ୱନ୍ଧ ମା ଉଇନାଏ। 10ଯୀଶୁସ୍ ଉତ୍ତର୍ ଚିଚ୍ଚାସ୍, “ଯଦି ପାର୍ମେଶ୍ୱାର୍ସ୍ ଏକା ବାର୍ଦାନ୍ ନିଙ୍ଗାଗେ ଚିଆ ବେଦ୍ଦାଲ୍ଦାସ୍ ଆବନ୍ ନିନ୍ ବାଲ୍ଦିନିନ୍ ଆରୁ ନିଙ୍ଘାସ୍ତି ନିନାବାଲା ଏଙ୍ଗାନ୍ହି ବାଲ୍ଦିନିନ୍, ମାଲ୍ଲାହାଲେ ନିନ୍ ଏଙ୍ଗାନ୍ ନିଅୟନେ, ଆରୁ ଏନ୍ ନିଙ୍ଗାଗେ ଜୀବନ୍ ଚିନାବାଲା ଆମ୍ମୁ ଚିଅନ୍ନେ।” 11ଆ ଆଲିଦ୍ ଆସିନ୍ ତେଙ୍ଗିୟାଦ୍, “ହେ ଆଜ୍ଞା, ନିହ୍ମାସାନ୍ ତା ଆମ୍ମୁ ମୁହ୍ଲାଗେ ଏନ୍ଦେର୍ହି ମାଲ୍ଲାଦିନ୍ ଆରୁ ତୁଷାଦ୍ ଢେର୍ ଗାଡ୍ଡି ରାଇ; ତା ଜୀବନ୍ ଚିନାବାଲା ଆମ୍ମୁଦ୍ ନିମାଗେ ଏକାସ୍ତି ହାଖ୍ଖର? 12ନିମ୍ ଏହ୍ମା ପୁର୍ଖା ବୁଆ ୟାକୁବ୍ସ୍ତିହି ବାଡ଼୍କାର୍ କାଁଏ, ଏକାସ୍ କା ଏମାଗେ ଇ ତୁଷାନ୍ ଚିଚ୍କାଦାସ୍; ଆରୁ ତାନ୍ ନିଜେ ଆରୁ ତାଙ୍ଘାଏ ହାଦ୍ଦୁବଚ୍ଚର୍, ଆରୁ ତାଙ୍ଘା ପୋଶ୍କା ପଶୁର୍ହି ଇ ତୁଷାନ୍ତା ଆମ୍ମୁନ୍ ହାପ୍ପକାଚାର୍?” 13ଯୀଶୁସ୍ ଆ ଆଲିନ୍ ଉତ୍ତର୍ ଚିଚ୍ଚାସ୍, “ଏକାସ୍ ଇ ଆମ୍ମୁନ୍ ହାପ୍ପସ୍ ତା ଆସ୍କେ ଆରୁ ଆମ୍ମୁକିଡ଼ା ଲାଗ୍ଗ, 14ଲେକିନ୍ ଏକା ଆମ୍ମୁନ୍ ଏନ୍ ଚିଅନ୍ ଆବନ୍ ଏକାସ୍ ହାପ୍ପସ୍, ଆସ୍କେ ଏକ୍ଲାହି ଆମ୍ମୁକିଡ଼ା ମା ଲାଗ୍ଗ; ଏକା ଆମ୍ମୁନ୍ ଏନ୍ ଚନ୍, ଆଦ୍ ଆସ୍କିନୁ ଝାର୍ନା ଆମ୍ମୁ ମାନକୋ ଆରୁ ପାଝ୍ରାରୋ ଏକାଦ୍ କା ଆସ୍କେ ସବୁଦିନ୍ତା ଜୀବନ୍ ଚିଅଦ୍।”
15ଆ ଆଲିଦ୍ ଉତ୍ତର୍ ଚିଚ୍ଚାଦ୍, “ହେ ପ୍ରାଭୁ, ଆ ଆମ୍ମୁନ୍ ଏଙ୍ଗାଗେ ଚିଆ ହାଲେ ଏଙ୍ଗା ଆରୁ ଆମ୍ମୁକିଡ଼ା ମା ଲାଗ୍ଗ ଆରୁ ଏଙ୍ଗାଗେ ଏତ୍କ ଗେଚ୍ଛା ଆମ୍ମୁ ହୁଆଗେ ବାରା ମା ଖାତ୍ରୋ।”
16ଯୀଶୁସ୍ ଆବନ୍ ତେଙ୍ଗିୟାସ୍, “କାଲ୍, ନିଙ୍ଘା ଆଲାସିନ୍ ଇସାନ୍ ମେଁହୁ ଅନ୍ଦ୍ରୁ।” 17ଆ ଆଲିଦ୍ ଯାବାବ୍ ଚିଚ୍ଚାଦ୍, “ଏଙ୍ଘା ଆଲାସ୍ ମାଲ୍କାସିନ୍।” ଯୀଶୁସ୍ ଆବନ୍ ତେଙ୍ଗିୟାସ୍, “ନିନ୍ ଠିକ୍ନିନ୍ ତେଙ୍କିନ୍, ‘ନିଙ୍ଘା ଆଲାସ୍ ମାଲ୍କାସିନ୍।’ 18ଏନ୍ଦେର୍ଗେକା ନିନ୍ ପାଞ୍ଚେଟା ଆଲାରିନ୍ ନିଜର୍ କାମା ମୁଞ୍ଜକିଦିନ୍ ଆରୁ ଆକ୍କୁନ୍ନିନ୍ ନେଖାଗାନେ ରାଦିନ୍ ଆସ୍ହି ନିଙ୍ଘାଏ ଆଲାସ୍ ମାଲ୍ଦାସ୍। ଇବନ୍ ନିନ୍ ସତ୍ତୁନ୍ ତେଙ୍କିନ୍।”
19ଆ ଆଲିଦ୍ ଆସିନ୍ ତେଙ୍ଗିୟାଦ୍, “ହେ ପ୍ରାଭୁ, ଏଙ୍ଗା ଲାଗ୍ଗାଲି କା ନିମ୍ ଅଣ୍ଟା ନାବୀର୍। 20ଏହ୍ମାଏ ପୁର୍ଖାର୍ ଇ ପାର୍ତ୍ତାନୁ ଆରାଧାନା କାମ୍ଚାର୍, ଆରୁ ନିମ୍ ୟାହୁଦୀ ଆଲାର୍ ତେଙ୍ଗାଲ୍ଦାର୍ କା ଯେରୁଶାଲେମ୍ଦ୍ ଆରାଧାନା କାମ୍ନାଘି ଆଡ୍ଡାଦ୍।” 21ଯୀଶୁସ୍ ଆବନ୍ ତେଙ୍ଗିୟାସ୍, “ହେ ଆଲି, ଏଙ୍ଘା କାତ୍ଥାନ୍ ବିଶ୍ୱାସ୍ କାମୁ କା ଏନ୍ନେ ଅଣ୍ଟା ସାମାୟ ବାରୋ ଯେତ୍କବାକେନ୍ ନିମ୍ ବାଙ୍ଗ୍ସ୍କି ଆରାଧାନା ନା ତା ଇ ପାର୍ତ୍ତାନୁ କାମର୍ ଆରୁ ନା ତା ଯେରୁଶାଲେମ୍ନୁ କାମର୍। 22ନିମ୍ ସାମାରୀ ଆଲାର୍ ନେକାନ୍ ବାଲ୍ଦାରିନ୍, ଆସ୍କି ଆରାଧାନା କାମ୍ଦାର୍; ଲେକିନ୍ ଏମ୍ ୟାହୁଦୀ ଆଲାମ୍ ନେକାନ୍ ଆହ୍ଦାମ୍ ଆସ୍କି ଆରାଧାନା କାମ୍ଦାମ୍; ଏନ୍ଦେର୍ଗେକା ଆଲାର୍ଘି ପାପ୍ତି ବାଛାବୁ ବାଲାସ୍ ୟାହୁଦୀ ଜାମାର୍ସ୍ତିନିନ୍ ବାରସ୍। 23ଲେକିନ୍ ଆ ସାମାୟ ବାରାଲି, ଆକ୍କୁନ୍ହି ରାଇ କା ଯେତ୍କବାକେନ୍ ସତ୍ତୁ ଭକ୍ତର୍ ପାର୍ମେଶ୍ୱାର୍ସ୍କି ଆରାଧାନା, ଆତ୍ମା ଆରୁ ପାର୍ମେଶ୍ୱାର୍ସ୍କି ବାରେ ଏକାଦ୍ ସତ୍ତୁ ଆବନ୍ କାମର୍, ଏନ୍ଦେର୍ଗେକା ବାଙ୍ଗ୍ସ୍ ତାଙ୍ଘା ଲାଗାନ୍ ଏନ୍ନେନିନ୍ ଆରାଧାନା କାମୁରିନ୍ ଚାହଁଦାସ୍। 24ପାର୍ମେଶ୍ଵାର୍ସ୍ ଆତ୍ମାସ୍ ଆରୁ ହୁଦ୍ଘିଲାଗାନ୍ ଆସ୍କି ଆରାଧାନା କାମ୍ନା ବାଲାର୍ଗେ ପାର୍ମେଶ୍ୱାର୍ସ୍କି ଆତ୍ମା ଆରୁ ପାର୍ମେଶ୍ୱାର୍ସ୍କି ବାରେ ଏକାଦ୍ ସତ୍ତୁ ଆସ୍କି ଆରାଧାନା କାମା ଖାତ୍ରୋ।”
25ଆ ଆଲିଦ୍ ଯୀଶୁସିନ୍ ତେଙ୍ଗିୟାଦ୍, “ଏନ୍ ଆହାଲେନ୍ କା ମାସିହ୍ ଏକାସିନ୍କା ଖ୍ରୀସ୍ତ୍ ବାନାଏ ବାର୍ନାବାଲା ରାଦାସ୍; ଆରୁ ଯେତ୍କବାକେନ୍ ଆସ୍ ବାରସ୍ ତା ଆସ୍ ଜାମାକିଛି ଏମାନ୍ ତେଙ୍ଗସ୍।” 26ଯୀଶୁସ୍ ଆ ଆଲିନ୍ ତେଙ୍ଗିୟାସ୍, “ଏନିନ୍ ଖ୍ରୀସ୍ତ୍ ଏକାନ୍ କା ନିଙ୍ଘାଗାନେ କାଚ୍ଚନେଖ୍ରାଲ୍ଦାନ୍।”
ଚେଲାଜାମାର୍ଘି କିର୍ନା
27ଏନ୍ନେ ତେଙ୍ଗାଲିୟାସିନ୍ କା ଯୀଶୁସ୍କି ଚେଲାର୍ ବାର୍ଚାର୍ କେରାର୍, ଆରୁ ଆବ୍ଡ଼ାର୍ ଇବନ୍ ଏରିକିରି ଆଚ୍ମିତ୍ ମାନ୍ଚାର୍ କେରାର୍ କା ଆସ୍ ଅଣ୍ଟା ଆଲିଗାନେ କାଚ୍ନେଖ୍ରାଲ୍ଦାସ୍; ହାଲେହି ନେଦ୍ହି ଆସିନ୍ ମା ମେନ୍ଚାର୍ କା, “ନିମ୍ ଏନ୍ଦେର୍ ଚାହଁଦାର୍? ଆରୁ ଇଦ୍ଘିଗାନେ ଏନ୍ଦେର୍ଗେ କାଚ୍ନେଖ୍ରାଲ୍ଦାର୍?” 28ଆଙ୍ଗେନ୍ ଆ ଆଲିଦ୍ ତାଙ୍ଘାଏ ଭାଣ୍ଡାନ୍ ଆମ୍ଵିକିରି ସହର୍ଗେ ବୁଙ୍ଗାକେରା, ଆରୁ ଆଲାରିନ୍ ତେଙ୍ଗାଗେ ଲାଗ୍ଗିୟା, 29“ବାରା ଆରୁ ଅଣ୍ଟା ଆଲାସିନ୍ ଏରା, ଏକାସ୍ କା ଏନ୍ ଯେତ୍କୋଭି କାମ୍ଚ୍କିନ୍ଚେନ୍, ଆବ୍ଡ଼ା ଜାମାନ୍ ଏଙ୍ଗାନ୍ ତେଙ୍ଗେଇଚାସ୍। ଇସ୍ ଖ୍ରୀସ୍ତ୍ତା ମାଲ୍ଦାସ୍?” 30ଆଙ୍ଗେନ୍ ଆଲାର୍ ସହର୍ତି ଉର୍ଖିକିରି ଆସ୍କି ଚାହାଗେ ବାରାଗେ ଲାଗ୍ଗିୟାର୍।
31ହତ୍କବାକେନ୍ ଆସ୍କି ଚେଲାର୍ ଯୀଶୁସ୍ସିନ୍ ଆର୍ଜୀବିନ୍ତି କାମାଗେ ଲାଗ୍ଗିୟାର୍, “ହେ ଗୁରୁ, ଏନ୍ଦ୍ରିନ୍ ଅନା ମହା।” 32ଲେକିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏଙ୍ଘାସାନ୍ ଅନାମହାଗେ ଏନ୍ନେ ଅନ୍ନାମହ୍ନା ରାଇ ଏକାନ୍ କା ନିମ୍ ବାଲ୍ଦାରିନ୍।” 33ଆଙ୍ଗେନ୍ ଚେଲାଜାମାର୍ ତାମ୍ତାମ୍ କାଚ୍ନେଖ୍ରା ଲାଗ୍ଗିୟାର୍, “ନେଦିନ୍ ଆସ୍କେ ଏନ୍ଦ୍ରିନ୍ ଅନାମହାଗେ ଅନ୍ଦ୍ରେ ଚିଚ୍ଚକାନାଏ କାଁଏ?” 34ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏଙ୍ଘା ଅନ୍ନାମହ୍ନାଦ୍ ଇଦ୍ କା ଏକାସ୍ ଏଙ୍ଗାନ୍ ତାଏକାଦାସ୍ ଆସ୍କି ଇଚ୍ଛା ଲେଖା କାମ୍ନାଦ୍ ଆରୁ ଏକା ନାଲ୍ଖୁନ୍ ଏଙ୍ଗାଗେ ସୋଁପାକେର୍କିଚି ଆବନ୍ ପୁରା କାମ୍ନାଦ୍। 35ନିମ୍ ଏନ୍ନେ ମା ତେଙ୍ଗ୍ଦାର୍ କାଁଏ, ‘ହୟାଗେ ଆରୁହି ଚାର୍ ମାହିନା ବାକି ରାଇ।’ ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା ବାନେକିରି ଆଲାରିନ୍ ଏରା ଏକାର୍ ହାଲ୍ଲୁ ଲେଖା ରାନାଏ ଆବ୍ଡ଼ାର୍ ଏଙ୍ଘା ମିଆଁ ବିଶ୍ୱାସ୍ କାମାଗେ ତିଆର୍ ରାନାଏ ଏସ୍କେ ଫସଲ୍ ହୟାଗେ ପାଞ୍ଜାକେର୍କିଚି। 36ହୟୁର୍ଗେ ମଜ୍ରୀ ହାଖ୍ଖରି ଆରୁ ଆଲାରିନ୍ ସବୁଦିନ୍ତା ଜୀବନ୍ନୁ ଅନ୍ଦର୍ନାଦିନ୍ ଆବ୍ଡ଼ାର୍ଘି ଫସଲ୍ ଠୁଡ଼ିୟାନାଦ୍, ତାକା ଚାହୁସ୍ ଆରୁ ହୟୁସ୍ ଦୁହି ଲୋକ୍ ମେଶ୍ରିକିରି ଖୁସୀ ମାନାବର୍। 37ଏନ୍ନେନ୍ ଅସଲ୍ନୁ: ‘ଅଣ୍ଟା ଆଲାସ୍ ଚାହ୍ଦାସ୍ ଆରୁ ଦୁସ୍ରା ଆଲାସ୍ ହଏଦାସ୍।’ 38୪:୩୮ ହଏନା ବାଲାର୍ ଚେଲାର୍ ଆରୁ ଚାହ୍ନା ବାଲାର୍ ନିୟମ୍, ନାବୀର୍। ନିମ୍ ଏକା ଫସଲ୍ଘି ଲାଗାନ୍ ମେହ୍ନତ୍ ମାଲ୍ଲା କାମୁର୍: ଆବନ୍ ହୟାଗେ ଏନ୍ ନିମାନ୍ ତାଇୟାଲ୍ଦାନ୍। ଦୁସ୍ରାର୍ ମେହ୍ନତ୍ କାମ୍ଚ୍କାନାଏ ଆରୁ ନିମ୍ ଆବ୍ଡ଼ାର୍ଘି ମେହ୍ନତ୍ଘି ଫଲ୍ ହାଖ୍ଖାଲ୍ଦାର୍।”
ସାମାରୀ ଆଲାର୍ ଯୀଶୁସ୍କି ମିଆଁ ବିଶ୍ଵାସ୍ କାମାଲ୍ନାଏ
39ଆ ସହର୍ତା ଢେର୍ ସାମାରୀ ଆଲାର୍ ଆ ଆଲିଘି ତେଙ୍କାତି ଯୀଶୁସ୍କି ମିଆଁ ବିଶ୍ଵାସ୍ କାମ୍ଚାର୍; ଏନ୍ଦେର୍ଗେକା ଆଦ୍ ଏନ୍ନେ ସାକ୍ଷୀ ଚିଚ୍ଚକିଚା: “ଏନ୍ ଏକାନ୍-ଏକାନ୍ କାମ୍ଚ୍କିନ୍ଚେନ୍ ଆବ୍ଡ଼ା ଜାମାନ୍ ଆସ୍ ଏଙ୍ଗାନ୍ ତେଙ୍ଗେଇଚାସ୍।” 40ଇଦ୍ଘିଲାଗାନ୍ ଆ ସାମାରୀ ଆଲାର୍ ଯୀଶୁସ୍କି ଚାହାଗେ ବାରିକିରି ଆବ୍ଡ଼ାର୍ ଗାନେ ରାଗେ ଆର୍ଜୀବିନ୍ତି କାମ୍ଚାର୍, ଆଙ୍ଗେନ୍ ଆସ୍ ଆସାନ୍ ଦୁଇ ଦିନ୍ ରାଚାସ୍କେରାସ୍। 41ଆରୁ ଯୀଶୁସ୍କି ବଚନ୍ ମେନିକିରି ଆରୁହି ଢେର୍ ଆଲାର୍ ଆସ୍କି ମିଆଁ ବିଶ୍ଵାସ୍ କାମ୍ଚାର୍। 42ଆରୁ ଆବ୍ଡ଼ାର୍ ଆ ଆଲିନ୍ ତେଙ୍ଗିୟାର୍, “ଆକ୍କୁନ୍ ଏମ୍ ନିଙ୍ଘାଏ ତେଙ୍କାତି ଖାଲି ବିଶ୍ଵାସ୍ ମା କାମ୍ଦାମ୍; ଏନ୍ଦେର୍ଗେକା ଏମ୍ ନିଜେ ମେନ୍ଚ୍କାଦାମ୍। ଆରୁ ଏମ୍ ଆହ୍ଦାମ୍ କା ଅସଲ୍ନୁ ଇସିନ୍ ଦୁନିଆଁନ୍ତା ଆଲାରିନ୍ ତାହ୍ମା ପାପ୍ତି ବାଛାବୁ ଆଲାସ୍।”
43ସାମାରୀ ଆଲାର୍ ଗାନେ ଦୁଇ ଦିନ୍ ରାଚ୍କା ପାଛ୍ଲି ଯୀଶୁସ୍ ଆରୁ ତାଙ୍ଘା ଚେଲାର୍ ଆସ୍ତି ଉର୍ଖିକିରି ଗାଲିଲୀ ପ୍ରଦେଶ୍ କେରାର୍, 44ଏନ୍ଦେର୍ଗେକା ଯୀଶୁସ୍ ଖୁଦ୍ନିଜେ ତେଙ୍କାଚାସ୍ କା ନାବୀର୍ ନିଜର୍ ସହର୍ନୁ ମାଇନ୍ ମା ହାଖ୍ଖନାଏ। 45ଯେତ୍କବାକେନ୍ ଯୀଶୁସ୍ ଗାଲିଲୀଗେ ବାର୍ଚାସ୍, ତା ଗାଲିଲୀନ୍ତା ଆଲାର୍ ଖୁସୀତି ଆସ୍ଗାନେ ସ୍ୱାଗାତ୍ କାମ୍ଚାର୍; ଏନ୍ଦେର୍ଗେକା ଯେତ୍କ ନାଲ୍ଖୁ ଆସ୍ ଯେରୁଶାଲେମ୍ନୁ ପରବ୍ଘି ସାମାୟନୁ କାମ୍ଚ୍କାଚାସ୍, ଆ ଜାମାନ୍ ଆବ୍ଡ଼ାର୍ ଏର୍କାଚାର୍, ଏନ୍ଦେର୍ଗେକା ଆବ୍ଡ଼ା ଆଲାର୍ହି ପରବ୍ନୁ କେର୍କାଚାର୍।
ପଲ୍ଟନ୍ଜାମାର୍ଘି ଅଧିକାରିସ୍କି ହାଦ୍ଦୁସିନ୍ ଯୀଶୁସ୍ ବାନେ କାମାଲ୍ଦାସ୍
46ଆନ୍ତିନ୍ ଯୀଶୁସ୍ ଆରୁଅହନ୍ ଗାଲିଲୀନ୍ତା କାନା ସହର୍ଗେ କେରାସ୍, ଏକାସାନ୍ କା ଆସ୍ ଆମ୍ମୁବନ୍ ଅଙ୍ଗୁର୍ ରାସେ ବାନାବାଚ୍କାଚାସ୍। ରାଜାସ୍କି ଅଣ୍ଟା ସିପାହୀସ୍ ରାଚାସ୍ ଆସ୍ କାଫାର୍ନାହୁମ୍ ସହର୍ନୁ ରାଲିୟାସ୍। ଆସ୍କି ହାଦ୍ଦୁସ୍ ମୁରୁକ୍ ବେମାର୍ ରାଚାସ୍। 47ଆସ୍ ଇବନ୍ ମେନିକିରିକା ଯୀଶୁସ୍ ୟାହୁଦୀଆନ୍ତି ଗାଲିଲୀଗେ ବାର୍ଚ୍କାଦାସ୍, ତା ଆସ୍ ଯୀଶୁସ୍କି ଚାହାଗେ ବାର୍ଚାସ୍ ଆରୁ ଆସ୍ କାଫାର୍ନାହୁମ୍ କାଇକିରି ଏସ୍କେ ତାଙ୍ଘା ହାଦ୍ଦୁସିନ୍ ବାନେ କାମ ଚିୟସ୍, ହୁଦ୍ଘିଲାଗାନ୍ ଯୀଶୁସିନ୍ ଆର୍ଜୀବିନ୍ତି କାମାଗେ ଲାଗ୍ଗିୟାସ୍, ଏନ୍ଦେର୍ଗେକା ଆସ୍କି ହାଦ୍ଦୁସ୍ ଖିନା ଲେଖା ମାନ୍ଚାସ୍ କେର୍କାଚାସ୍। 48ଯୀଶୁସ୍ ଆସିନ୍ ତେଙ୍ଗିୟାସ୍, “ଯେତ୍କତକ୍ ନିମ୍ ଚିହ୍ନା ଆରୁ ଅଦ୍ଭୁତ୍ ନାଲ୍ଖୁନ୍ ମା ଏରର୍ ହତ୍କତକ୍ ଏଙ୍ଘା ମିଆଁ ବିଶ୍ଵାସ୍ ମା କାମ୍ଦାର୍।” 49ପଲ୍ଟନ୍ଜାମାର୍ଘି ମୁଖ୍ୟାସ୍ ଯୀଶୁସିନ୍ ତେଙ୍ଗିୟାସ୍, “ହେ ପ୍ରାଭୁ, ଏଙ୍ଘାଏ ହାଦ୍ଦୁସ୍କି ଖିନାଘି ଆଘ୍ଲି ଗୁଚା।” 50ଯୀଶୁସ୍ ଆସିନ୍ ତେଙ୍ଗିୟାସ୍, “କାଲା, ନିଙ୍ଘାଏ ହାଦ୍ଦୁସ୍ ବାନେ ମାନ୍ଚାସ୍ କେରାସ୍।” ଆ ପଲ୍ଟନ୍ସ୍ ଯୀଶୁସ୍କି ତେଙ୍କା କାତ୍ଥାନ୍ ବିଶ୍ୱାସ୍ କାମିକିରି ବୁଙ୍ଗିୟାସ୍ କେରାସ୍। 51ନାନ୍ନୁ ଉଲ୍ଲା ଆସ୍ ପାବୁନୁନିନ୍ ରାଚାସିନ୍କା ଆସ୍କି ଗୁତ୍ତିୟାର୍ ଆସ୍ଗାନେ ଭେଁଟ୍ ମାନ୍ଚାର୍ ଆରୁ ତେଙ୍ଗିୟାର୍, “ନିହ୍ମାଏ ହାଦ୍ଦୁସ୍ ବାନେ ମାନ୍ଚାସ୍ କେରାସ୍।” 52ପଲ୍ଟନ୍ଜାମାର୍ଘି ମୁଖ୍ୟାସ୍ ତାଙ୍ଘା ଗୁତ୍ତିୟାରିନ୍ ମେନ୍ଚାସ୍, “ଏକା ବାକେନ୍ ଆସ୍ ବାନେ ମାନ୍ଚାସ୍?” ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ଚେରୋ ଆଡ଼୍ତି ବିଡ଼ିନ୍ତା ଏକ୍ ବାଜେଗେ ଆସ୍କି ନାଣି ଛାଡ଼୍ଚା କେରା।” 53ଆଙ୍ଗେନ୍ ଆ ହାଦ୍ଦୁସ୍କି ତାମ୍ବାସ୍ ଆଖ୍ୟାସ୍ କେରାସ୍ କା ଇଦ୍ ଆ ସାମାୟନୁ ମାନ୍ଚା ଯେତ୍କବାକେନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ନିଙ୍ଘାଏ ହାଦ୍ଦୁସ୍ ବାନେ ମାନ୍ଚାସ୍ କେରାସ୍।” ଆରୁ ଆସ୍ ଆରୁ ଆସ୍କି ଆଡ଼୍ପାନ୍ତାର୍ ଜାମାର୍ ଯୀଶୁସ୍କି ମିଆଁ ବିଶ୍ଵାସ୍ କାମ୍ଚାର୍। 54ଇଦ୍ ଦୁସ୍ରା ଅଦ୍ଭୁତ୍ ନାଲ୍ଖୁ ରାଚା ଏକାନ୍ କା ଯୀଶୁସ୍ ୟାହୁଦୀଆନ୍ତି ଗାଲିଲୀନୁ ବାରିକିରି କାମ୍ଚାସ୍।
5ଯୀଶୁସ୍ ପୋଖ୍ରା ଖାଁଣିନୁ ଅଣ୍ଟା ବେହ୍ମରିୟାସିନ୍ ବାନେ କାମାଲ୍ଦାସ୍
1ଆ ସାମାୟଘି ପାଛ୍ଲି ଯୀଶୁସ୍ ୟାହୁଦୀ ଜାମାର୍ଘି ଅଣ୍ଟା ପରବ୍ ମାନାବାଗେ ଯେରୁଶାଲେମ୍ଗେ କେରାସ୍। 2ଯେରୁଶାଲେମ୍ନୁ ୫:୨ ଭେଡ଼ି ଫାଟକ୍ ଅଣ୍ଟା ଆଡ୍ଡାଘି ନାମେଦ୍: ଯେରୁଶାଲେମ୍ ସହର୍ଘି ଚାରିପାଖା ଚାଁଚାଘି ଘେରାରାଚା ଆରୁ ଆନ୍ନୁ ବହୁତ୍ ଫାଟକ୍ ରାଚା। ଜାମା ଫାଟକ୍ଘି ନାମେ ରାଚା। ଆରୁ ଭେଡ଼ି ଫାଟକ୍ ଆବ୍ଡ଼ାନ୍ତି ଅଣ୍ଟା ରାଚା। ଇ ଫାଟକ୍ଦ୍ ଭେଡ଼ି ଆରୁ ଦୁସ୍ରା-ଦୁସ୍ରା ପଶୁର୍ଘି ହାଟ୍ଟେଘି ଚାହାନୁ ରାଚା, ହୁଦ୍ଘିଲାଗାନ୍ ଭାଏଲ୍ ଆଦ୍ଘି ନାମେ ଭେଡ଼ି ଫାଟକ୍ ଉଇକାରାଚା। ଇ ଫାଟକ୍ଦ୍ ସହର୍ଘି ଉତ୍ତର୍ ପୁରୁବ୍ତାରା ରାଚା।ଭେଡ଼ି ନାମେଘି ଫାଟକ୍ ଚାହାନୁ ଅଣ୍ଟା ପୋଖ୍ରା ରାଇଦ୍, ଇବ୍ରାନୀ ଭାଷାନୁ ଇବନ୍ ବେଥେସ୍ଦା ବାନାଏ; ଆରୁ ଆଦ୍ଘି ପାଞ୍ଚେଟା ମଣ୍ଡପ୍ ରାଇଦ୍। 3ଇନ୍ନୁ ବହୁତ୍ ରୋଗୀର୍ କାଁଣାର୍, ଲେଙ୍ଗ୍ଡ଼ାର୍, ଆରୁ ଏକ୍ଆଙ୍ଗିୟା ବେହ୍ମରିୟାର୍ ଆମ୍ମୁଘି ହାଲ୍କାରାନାଘି ଆଶ୍ରାନୁ ଆସାନ୍ ହୋଖାଲିୟାର୍। 4(ଏନ୍ଦେର୍ଗେକା ଏକା-ଏକା ବାକେନ୍ ପ୍ରାଭୁସ୍କି ଦୂଁତ୍ ଏତ୍ତିକିରି ଆମ୍ମୁବନ୍ ହାଲ୍କାଲିୟାଦ୍, ଆରୁ ଆମ୍ମୁ ହାଲ୍କାରାତ୍ରି ଆଙ୍ଗେନିନ୍ ଏକା ବେହ୍ମେରିୟାର୍ ଆମ୍ମୁନୁ କରାଲିୟାର୍ ଆବ୍ଡ଼ାର୍ ଚାହେ ଏନ୍ଦ୍ରିନ୍ ବେହ୍ମରିୟା ରାଚ୍କୁନ୍ହି ବାନେ ମାନାକାଲିୟାର୍)। 5ଆସାନ୍ ଅଣ୍ଟା ଆଲାସ୍ ରାଚାସ୍, ଏକାସ୍ କା ଅଠ୍ତିରୀଶ୍ ବଛର୍ତି ବେମାର୍ ରାଚାସ୍। 6ଯୀଶୁସ୍ ଆସିନ୍ ଆସାନ୍ ରାନାନ୍ ଏରିୟାସ୍ ଆରୁ ଢେର୍ ଉଲ୍ତା ବେହ୍ମରିୟାସ୍ ବୁଲି ଆଖ୍ଖାସ୍ ଆରୁ ଆସିନ୍ ମେନ୍ଚାସ୍, “ନିନ୍ ବାନେ ମାନାଗେ ଚାହାଁଲ୍ଦାଏ କାଁଏ?” 7ଆ ବେହ୍ମରିୟାସ୍ ଆସିନ୍ ଉତ୍ତର୍ ଚିଚ୍ଚାସ୍, “ହେ ଗୁରୁ, ଆମ୍ମୁ ହାଲ୍କାରାନା ବାକେନ୍ ଏଙ୍ଗାନ୍ ପୋଖ୍ରା ଉଲା ହୁଆଗେ ଏଙ୍ଘାଏ ନେଦ୍ହି ମାଲ୍କାରିନ୍; ଆରୁ ଏଙ୍ଘା ଆଣ୍ସ୍ନାଘି ଆଘ୍ଲି ଆରୁ ଅର୍ତୁସ୍ ଏଙ୍ଘା ଆଘ୍ଲି କର୍ଦାସ୍ କାଦାସ୍।” 8ଯୀଶୁସ୍ ଆସିନ୍ ତେଙ୍ଗିୟାସ୍, “ଉସ୍କାରା ଆରୁ ନିଙ୍ଘା ପିଟ୍ରି ଉଠାବା ଆରୁ ଏକା।” 9ହୁଙ୍ଗେନିନ୍ ଆ ଆଲାସ୍ ବାନେ ମାନ୍ଚାସ୍ କେରାସ୍, ଆରୁ ତାଙ୍ଘା ପିଟ୍ରି ଉଠାବିକିରି ଏକାଗେ ଲାଗ୍ଗିୟାସ୍।
10ହୁ ଉଲ୍ଲାନୁ ଆରାମ୍ ଉଲ୍ଲାଦ୍ ରାଚାଦ୍। ହୁଦ୍ଘିଲାଗାନ୍ ୟାହୁଦୀ ଆଲାର୍ଘି ନିୟମ୍ବନ୍ ଜାମାର୍ ଆ ବାନେ ମାନ୍ଚ୍କା ଆଲାସ୍ସିନ୍ ତେଙ୍ଗିୟାର୍, “ଇନ୍ନା ଆରାମ୍ ଉଲ୍ଲାଦ୍ ଆରୁ ଇନ୍ନାନ୍ତା ଉଲ୍ଲାନୁ ନିଙ୍ଗାଗେ ପିଟ୍ରି ଉଠାବାଇକିରି ମା ଏକ୍ନା କାତ୍ଥା। ଏନ୍ଦେର୍ଗେକା ଇଦ୍ ନାହ୍ମା ୟାହୁଦୀ ନିୟମ୍ଘି ବିରୁଦ୍ଧ।” 11ଲେକିନ୍ ଆସ୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାସ୍, “ଏକାସ୍ ଏଙ୍ଗାନ୍ ବାନେ କାମ୍ଚାସ୍, ଆସିନ୍ ଏଙ୍ଗାନ୍ ତେଙ୍ଗିୟାସ୍ କା, ‘ନିଙ୍ଘା ପିଟ୍ରି ଉଠାବିକିରି ଏକା’।” 12ଆବ୍ଡ଼ାର୍ ଆସିନ୍ ମେନ୍ଚାର୍, “ଏକା ଆ ଆଲାସ୍, ଏକାସ୍ କା ନିଙ୍ଗାନ୍ ‘ପିଟ୍ରି ଉଠାବିକିରି, କାଲା ବୁଲି ତେଙ୍ଗିୟାସ୍’?” 13ଲେକିନ୍ ଆସ୍ ନେଦ୍ ଆବନ୍ ଆ ବାନେ ମାନ୍ଚ୍କା ଆଲାସ୍ ବାଲ୍ଲକାଚାସ୍, କା ତାଙ୍ଗାନ୍ ନେଦ୍ ବାନେ କାମ୍ଚ୍କାଚାର୍ ଏନ୍ଦେର୍ଗେକା ଆସାନ୍ ମୁରୁକ୍ ଭିଡ଼୍ ରାଚାର୍, ହୁଦ୍ଘିଲାଗାନ୍ ଯୀଶୁସ୍ ଆସ୍ତି କାଟେ ପାଖିୟା ରାଚ୍କାଚାସ୍। 14ଇଦ୍ଘି ପାଛ୍ଲି ଯୀଶୁସ୍ ଆସିନ୍ ମନ୍ଦିର୍ନୁ ଭେଁଟ୍ ମାନ୍ଚାସ୍ ଆରୁ ଆସିନ୍ ତେଙ୍ଗିୟାସ୍, “ମେନା, ନିନ୍ ବାନେ ମାନ୍ଚ୍କାଏ କେର୍କାଦାଏ: ଏକାସାନ୍ ଏନ୍ନେ ମା ମାନ୍ନାଦ୍ କା ନିଙ୍ଗାଗେ ଇଦ୍ଘିନ୍ତି ଆରୁହି ବାଗ୍ଗେ ଦୁଃଖୁ ସାହା ଖାତ୍ରୋ ଇଦ୍ଘିଲାଗାନ୍ ନିମ୍ ଆରୁ ପାପ୍ ଆମ୍କେ କାମା।” 15ଆ ଆଲାସ୍ କାଇକିରି ୟାହୁଦୀ ଆଲାରିନ୍ ତେଙ୍ଗିୟାସ୍ କା ଏକାସ୍ ଏଙ୍ଗାନ୍ ବାନେ କାମ୍ଚାସ୍ ଆସ୍ ଯୀଶୁସ୍। 16ଯୀଶୁସ୍ ଆରାମ୍ଘି ଦିନ୍ନୁ ଏନ୍ନେ ନାଲଖୁ କାମାଲାସ୍ ଇଦ୍ଘିଲାଗାନ୍ ୟାହୁଦୀ ଆଲାର୍ ସାତାବାଗେ ଲାଗ୍ଗିୟାର୍। 17ଯୀଶୁସ୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାସ୍, “ଏଙ୍ଘା ବାଙ୍ଗ୍ସ୍, ଆକ୍କୁନ୍ତକ୍ ନାଲ୍ଖୁ କାମାଲ୍ଦାସ୍ ଆରୁ ଏନ୍ହି କାମାଲ୍ଦାନ୍।” 18ଆକ୍କୁନ୍ ୟାହୁଦୀ ଆଲାର୍ ଆସିନ୍ ପିଟାଗେ ଏସ୍କ୍ରିନ୍ଭି ଆରୁହି ମଜ୍ବୁତ୍ ମାନ୍ଚାର୍ କେରାର୍, ଏନ୍ଦେର୍ଗେକା ଆସ୍ ନା ତା ଆରାମ୍ ଉଲ୍ଲାନ୍ତା ନିୟମ୍ବନ୍ ତୋଡ଼ିୟାସ୍, ପାର୍ମେଶ୍ୱାର୍ସିନ୍ ନିଜର୍ ବାଙ୍ଗ୍ସିନ୍ ତେଙ୍ଗିକିରି ଆସ୍କି ବାରାବୁରି ମାନାଗେ ଦାବି କାମାଲିୟାସ୍।
ଖ୍ରୀସ୍ତ୍ସ୍କି ହକ୍
19ଯୀଶୁସ୍ ଆବ୍ଡ଼ାରିନ୍ ଏନ୍ନେ ଉତ୍ତର୍ ଚିଚ୍ଚାସ୍, “ଏନ୍ ନିମାନ୍ ସତ୍ତୁ-ସତ୍ତୁ ତେଙ୍ଗାଲ୍ଦାନ୍, କା ଏନ୍ ଖୁଦ୍ନିଜେ ଏନ୍ଦେର୍ହି କାମା ପଲ୍ଲଦାନିନ୍। ଏନ୍ ଖାଲି ଆ ନାଲ୍ଖୁବନ୍ କାମ୍ଦାନ୍ ଏକାନ୍ କା ବାଙ୍ଗ୍ସ୍କି କାମ୍ନା ନାଲ୍ଖୁବନ୍ ଏର୍ଦାନ୍। ବାଙ୍ଗ୍ସ୍ ଏକା-ଏକା ନାଲ୍ଖୁନ୍ କାମ୍ଦାସ୍ ଆବନ୍ ଏନ୍ହି ଆନ୍ନେନ୍ କାମ୍ଦାନ୍। 20ଏନ୍ ଇଦ୍ଘିସ୍ତିହି ଆରୁ ବାଡ଼୍କା ବାଡ଼୍କା ନାଲ୍ଖୁ ଏଦନ୍। ହତ୍କବାକେନ୍ ନିମ୍ ଆଚ୍ମିତ୍ ମାନ୍ଚ୍କାର୍। ଏନ୍ଦେର୍ଗେକା ବାଙ୍ଗ୍ସ୍ ଏଙ୍ଗାନ୍ ବାନେ ହାଖ୍ଖଦାସ୍, ଏନ୍ ଏନ୍ଦେର୍-ଏନ୍ଦେର୍ କାମ୍ଦାନ୍, ଆବନ୍ ଆସିନ୍ ଏର୍ଦାନ୍। 21ଏସ୍କେ କା ବାଙ୍ଗ୍ସ୍ କେଚ୍ଚକା ଆଲାରିନ୍ ଉଠାବାଦାସ୍ ଆରୁ ଉଜ୍ଜତାଦାସ୍, ହନ୍ନେନ୍ ଏନ୍ହି ନେକାନ୍ ଚାହଁଦାନ୍ ଆବ୍ଡ଼ାରିନ୍ ଉଜ୍ଜତନ୍। 22ଲେକିନ୍ ନ୍ୟାୟ କାମ୍ନାଘି ଜାମା ହକ୍ ଏଙ୍ଗାଗେ ସୋଁପ୍ଚେଇଚ୍କାଦାସ୍, ଆରୁ ବାଙ୍ଗ୍ସ୍ ନେଖାଏହି ନ୍ୟାୟ ମା କାମ୍ଦାସ୍। 23ଏକାର୍ ହାଦ୍ଦୁସ୍କି ମାଇନ୍ ମା କାମ୍ନାଏ, ଆବ୍ଡ଼ାର୍ ଆସ୍କି ତାଏକା ବାଙ୍ଗ୍ସିନ୍ହି ମାଇନ୍ ମା କାମ୍ନାଏ। ଏସ୍କେ କା ଜାମା ଆଲାର୍ ବାଙ୍ଗ୍ସିନ୍ ମାଇନ୍ କାମ୍ନାଏ, ହନ୍ନେନ୍ ଏଙ୍ଗାନ୍ହି ମାଇନ୍ କାମର୍। 24ଏନ୍ ନିମାରିନ୍ ସତ୍ତୁ-ସତ୍ତୁ ତେଙ୍ଗାଦାନ୍ କା ଏକାର୍ ଏଙ୍ଘା ବଚନ୍ବନ୍ ମେନ୍ନାଏ ଆରୁ ଏଙ୍ଘାଏ ତାଏନାବାଲାସ୍କି ମିଆଁ ବିଶ୍ୱାସ୍ କାମ୍ନାଏ ଆବ୍ଡ଼ାରିନ୍ ଦୋଷୀ ମା ଠାହ୍ରସ୍, ଲେକିନ୍ ଆସିନ୍ ମରନ୍ତି ଅଥ୍ରିକିରି ସବୁଦିନ୍ତା ଜୀବନ୍ନୁ କର୍ତସ୍।”
25“ଏନ୍ ନିମାନ୍ ସତ୍ତୁ-ସତ୍ତୁ ତେଙ୍ଗାଲ୍ଦାନ୍ କା ଏନ୍ନେ ସାମାୟ ବାରାଲିଦ୍, ଆକ୍କୁନ୍ହି ରାଇଦ୍, ଯେତ୍କବାକେନ୍ କେଚ୍ଚକା ଆଲାର୍ ପାର୍ମେଶ୍ଵାର୍ସ୍କି, ଏଙ୍ଘା ଶବଦ୍ ମେନ୍ନାଏ ଆରୁ ଏକାର୍ ମେନର୍ ଆବ୍ଡ଼ାର୍ ଉଜ୍ଜର୍। 26ଏନ୍ଦେର୍ଗେକା ଜୀବନ୍ ଚିନାବାଲା ବାଙ୍ଗ୍ସ୍, ଆସ୍ ଏଙ୍ଗାଗେହି ଜୀବନ୍ ଚିନାଘି ହକ୍ ଚିଚ୍କାଦାସ୍। 27ଆରୁ ଆସ୍ ମୁନୁଷ୍ ହାଦ୍ଦୁସ୍ ହୁଦ୍ଘିଲାଗାନ୍ ଆସ୍କେ ନ୍ୟାୟ କାମାଗେ ହକ୍ ଚିଚ୍କାଦାସ୍। 28ଇଦ୍ଘିଲାଗାନ୍ ଆଚ୍ମିତ୍ ଆମାମାନା; ଏନ୍ଦେର୍ଗେକା ଏନ୍ନେ ସାମାୟ ବାରାଲିଦ୍ କା ଯେତ୍କ ଲୋକ୍ ମାସ୍ଣାନୁ ରାନାଏ ଆବ୍ଡ଼ାର୍ ଆସ୍କି ଶବଦ୍ ମେନିକିରି ମାସ୍ଣାତି ଉର୍ଖର୍ ବାରର୍। 29ଏକାର୍ ବାନେ ନାଲ୍ଖୁ କାମ୍ଚ୍କାନାଏ ଆବ୍ଡ଼ାର୍ ସବୁଦିନ୍ତା ଜୀବନ୍ଘି ଲାଗାନ୍ ଆରୁଅହନ୍ ଉଜ୍ଜର୍ ଆରୁ ଏକାର୍ ଖାରାପ୍ ନାଲଖୁ କାମ୍ଚ୍କାନାଏ, ଆବ୍ଡ଼ାର୍ ଦଣ୍ତ୍ଘି ଲାଗାନ୍ ଆରୁଅହନ୍ ଉଜ୍ଜର୍।”
ଯୀଶୁସ୍କି ସାକ୍ଷୀ
30“ଏନ୍ ନିଜେ ଏନ୍ଦେର୍ହି କାମା ପଲ୍ଲଦାନ୍; ଏଙ୍ଘା ବାଙ୍ଗ୍ସ୍ ଏକାନ୍ ତେଙ୍ଗ୍ଦାସ୍ ଆବନ୍ ମେନିକିରି ଏନ୍ ଆଲାର୍ଗେ ନ୍ୟାୟ କାମ୍ଦାନ୍, ଏନ୍ଦେର୍ଗେକା ଏନ୍ ଏଙ୍ଘା ଇଚ୍ଛା ଲେଖା ମାଲ୍ଲା ଏଙ୍ଘା ତାଇୟୁସ୍କି ଇଚ୍ଛା ଚାହଁଦାନ୍। 31ଯଦି ଏନ୍ ନିଜ୍କେନିଜ୍ ଏଙ୍ଘା ବାରେ ସାକ୍ଷୀ ଚିଅନ୍ ହାଲେ ତା ଆଲାର୍ ଆବନ୍ ମା ମାନର୍। 32ଆରୁ ଅର୍ତୁସ୍ ରାଦାସ୍ ଏକାସ୍ କା ଏଙ୍ଘା ବାରେନୁ ସାକ୍ଷୀ ଚିଦାସ୍, ଆରୁ ଏନ୍ ଆହ୍ଦାନ୍ କା ଏଙ୍ଘା ବାରେନୁ ଆସ୍ ଏକା ସାକ୍ଷୀ ଚିଦାସ୍ ଆସ୍ ସତ୍ତୁଦ୍। 33ନିମ୍ ଆଲାରିନ୍ ଯୋହାନ୍ସ୍କି ଚାହାଗେ ମେନାଗେ ତାଏକାର୍ ଆରୁ ଆସ୍ ସତ୍ତୁଘି ବାରେନୁ ସାକ୍ଷୀ ଚିଚ୍କାଦାସ୍। 34ଲେକିନ୍ ଏନ୍ ଏଙ୍ଘା ବାରେନୁ ଆଲାର୍ସ୍ତି ସାକ୍ଷୀ ମା ଚାହଁଦାନ୍; ହାଲେହି ଯୋହାନ୍ସ୍ ସାକ୍ଷୀଘି ବାରେନୁ ନିମାନ୍ ଇଦ୍ଘିଲାଗାନ୍ ତେଙ୍ଗ୍ଦାସ୍ କା ନିମ୍ ଆବନ୍ ମେନିକିରି ମୁକ୍ତି ହାଖ୍ଖା ଅଙ୍ଗର୍।”
35“ଯୋହାନ୍ସ୍ ଅଣ୍ଟା ଚାମ୍କାରାନା ବିଲ୍ଲୀ ଲେଖା ରାଚାସ୍ ଏକାଦ୍ କା ଲାଘ୍ରିଦ୍ ଆରୁ ବିଲ୍ଲୀ ଏଥ୍ରିଦ୍ ଆରୁ ନିମାଗେ କାଟେ ଡେରିଘି ଲାଗାନ୍ ଆସ୍କି ବିଲ୍ଲୀନୁ ଖୁସୀ ମାନାଗେ ବାନେ ଲାଗ୍ଗିୟା। 36ଲେକିନ୍ ଏଙ୍ଘାସାନ୍ ଏକା ସାକ୍ଷୀ ରାଇଦ୍ ଆଦ୍ ଯୋହାନ୍ସ୍କି ସାକ୍ଷୀନ୍ତି ବାଡ଼୍କା ରାଇଦ୍; ଏନ୍ଦେର୍ଗେକା ବାଙ୍ଗ୍ସ୍ ଏକା ନାଲ୍ଖୁନ୍ ପୁରା କାମାଗେ ଏଙ୍ଗାନ୍ ତେଙ୍କାଦାସ୍ ଆ ନାଲ୍ଖୁନ୍ ଏନ୍ କାମାଲ୍ଦାନ୍ ଆରୁ ଇବ୍ଡ଼ା ଜାମା ନାଲ୍ଖୁଦ୍ ସାକ୍ଷୀ ଚିୟାଲିଦ୍ କା ବାଙ୍ଗ୍ସ୍ ଏଙ୍ଗାନ୍ ତାଏକାଦାସ୍। 37ଆରୁ ବାଙ୍ଗ୍ସ୍ ଏକାସ୍ ଏଙ୍ଗାନ୍ ତାଏକାଦାସ୍, ଆସ୍ ଏଙ୍ଘା ବାରେନୁ ସାକ୍ଷୀ ଚିଚ୍କାଦାସ୍। ଲେକିନ୍ ନିମ୍ ଏକ୍ଲାହି ଆସ୍କି ବଚନ୍ବନ୍ ମାଲ୍ଲା ମେନୁର୍, ଆରୁ ଆସ୍କି ରୂପ୍ବନ୍ ମାଲ୍ଲା ଏରୁର୍। 38ଆରୁ ଆସ୍କି ବଚନ୍ବନ୍ ନିହ୍ମା ମନ୍ନୁ ସ୍ଥିର୍ ମା ଉଇକାର୍, ଏନ୍ଦେର୍ଗେକା ଆସ୍ ଏକାସିନ୍ ତାଏକାଦାସ୍ ଆସ୍କି ମିଆଁ ନିମ୍ ବିଶ୍ଵାସ୍ ମା କାମ୍ଦାର୍। 39ନିମ୍ ପାବିତାର୍ ଶାସ୍ତ୍ରବନ୍ ଧିୟାନ୍ କାମ୍ଦାର୍, ଏନ୍ଦେର୍ଗେକା ନିମ୍ ସୋଚ୍ଦାର୍ କା ନିମାଗେ ଆନ୍ନୁ ସବୁଦିନ୍ତା ଜୀବନ୍ ହାଖ୍ଖରଦ୍; ଲେକିନ୍ ଇ ଜାମାଦ୍ ପାବିତାର୍ ବାରେନୁ ସାକ୍ଷୀ ଚିଇଦ୍; 40ହାଲେହି ନିମ୍ ସବୁଦିନ୍ତା ଜୀବନ୍ ହାଖ୍ଖାଗେ ଏଙ୍ଘା ଚାହାଗେ ବାରା ମା ବେଦ୍ଦଦାର୍।”
41“ଏନ୍ ଆଲାର୍ସ୍ତି ମାଇନ୍ ମା ଚାହଁଦାନ୍। 42ଲେକିନ୍ ଏନ୍ ଆହ୍ଦାନ୍ କା ନିହ୍ମାଏନୁ ପାର୍ମେଶ୍ଵାର୍ସ୍କି ବାନେ ହାଖ୍ଖନାଦ୍ ମାଲ୍ଲାଦିନ୍। 43ଏନ୍ ଏଙ୍ଘା ବାଙ୍ଗ୍ସ୍କି ନାମେତି ବାର୍ଚ୍କାଦାନ୍ ଲେକିନ୍ ନିମ୍ ଏଙ୍ଗାନ୍ ମା ମାନ୍ଚ୍କାର୍; ଯଦି ଦୁସ୍ରା ନେଦିନ୍ ନିଜର୍ ନାମେତି ବାରର୍ନେ, ତା ନିମ୍ ଆସିନ୍ ଗ୍ରହନ୍ କାମର୍ନେ। 44ନିମ୍ ଏକ୍ ଦୁସ୍ରାର୍ସ୍ତି ମାଇନ୍ ବେଦ୍ଦଦାର୍ ଆରୁ ଆ ମାଇନ୍ ମା ଚାହଁଦାର୍, ଏକାଦ୍ କା ଅଣ୍ଟା ଖାଲି ପାର୍ମେଶ୍ୱାର୍ସ୍ତି ବାରିଦ୍। ତା ନିମ୍ ଏସ୍କେ ବିଶ୍ୱାସ୍ କାମର୍?”
45“ଏନ୍ନେ ଆମା ସୋଚା କା ଏନ୍ ବାଙ୍ଗ୍ସ୍କି ଆଘ୍ଲି ନିହ୍ମା ମିଆଁ ଦୋଷ୍ ଲାଗାବନ୍; ଲେକିନ୍ ନିହ୍ମା ମିଆଁ ଦୋଷ୍ ଲାଗାବାନାବାଲାସ୍ତା ମୁଶା ନାବୀସ୍, ଏକାସ୍କି ମିଆଁ ନିମ୍ ଭାର୍ଷା ଉଇକାଦାର୍। 46ଏନ୍ଦେର୍ଗେକା ଯଦି ନିମ୍ ପ୍ରକୃତ୍ନୁ ମୁଶା ନାବୀସିନ୍ ବିଶ୍ଵାସ୍ କାମର୍ନେ, ତା ଏଙ୍ଗାନ୍ହି ବିଶ୍ୱାସ୍ କାମର୍ନେ। ଏନ୍ଦେର୍ଗେକା ମୁଶାସ୍ ଏଙ୍ଘା ବାରେନୁ ଲେଖ୍ଚ୍କାଦାସ୍। 47ଲେକିନ୍ ଯଦି ନିମ୍ ମୁଶାସ୍କି ଲେଖ୍ଚ୍କା କାତ୍ଥାନ୍ ବିଶ୍ୱାସ୍ ମା କାମ୍ଦାର୍, ତା ଏଙ୍ଘା କାତ୍ଥାନ୍ ଏସ୍କେ ବିଶ୍ୱାସ୍ କାମର୍?”
6ଯୀଶୁସ୍ ପାଞ୍ଚ୍ ହାଜାର୍ତି ବାଗ୍ଗେ ଆଲାରିନ୍ ମହ୍ଁତାଲ୍ଦାସ୍
(ମାତିସ୍ ୧୪:୧୩-୨୧; ମାର୍କୁସ୍ ୬:୩୦-୪୪; ଲୁକାସ୍ ୯:୧୦-୧୭)
1ଇଦ୍ଘି ପାଛ୍ଲି ଯୀଶୁସ୍ ଗାଲିଲୀ ମତ୍ଲବ୍ ତିବିରୀୟା ହଁସ୍ରାଘି ହାପାଖା କେରାସ୍। 2ଆରୁ ଯୀଶୁସ୍ ବେହ୍ମରିୟାର୍ଘି ଲାଗାନ୍ ଅଦ୍ଭୁତ୍ ନାଲ୍ଖୁ କାମ୍ଚ୍କାଚାସ୍ ଆବନ୍ ଆବ୍ଡ଼ାର୍ ଏର୍କାଚାର୍। ହୁଦ୍ଘିଲାଗାନ୍ ଆଲାର୍ଘି ଅଣ୍ଟା ବାଡ଼୍କା ଭିଡ଼୍ ଯୀଶୁସ୍କି ପାଛ୍ଲି-ପାଛ୍ଲି କେରାର୍। 3ଆଙ୍ଗେନ୍ ଯୀଶୁସ୍ ପାର୍ତ୍ତା ମିଆଁ ଆର୍ଗିକିରି ତାଙ୍ଘା ଚେଲାର୍ଗାନେ ଆସାନ୍ ଅକ୍କିୟାସ୍। 4ହୁ ସାମାୟନୁ ୟାହୁଦୀ ଜାମାର୍ଘି ପାସ୍କାପରବ୍ ଆଣସାଲିୟାଦ୍।
5ଯେତ୍କବାକେନ୍ ଯୀଶୁସ୍ ଏରିୟାସ୍ କା ଆଲାର୍ଘି ଅଣ୍ଟା ବହୁତ୍ ବାଡ଼୍କା ଭିଡ଼୍ ତାଙ୍ଘା ଚାହାଗେ ବାର୍ଲ୍ନାଏ, ତା ଫିଲିପ୍ପସିନ୍ ତେଙ୍ଗିୟାସ୍ କା “ନାମ୍ ଇବ୍ଡ଼ାର୍ଗେ ମହାଁଗେ ଏକାସ୍ତି ଆସ୍ମା ହେନ୍ଦତ୍ ଅନ୍ଦରତ୍?” 6ଯୀଶୁସ୍ ଆସିନ୍ ବିଡ଼୍ଚେ ଏରାଗେ ଏନ୍ନେ ତେଙ୍ଗିୟାସ୍ ଏନ୍ଦେର୍ଗେକା ଆସ୍ ନିଜେ ଆହାଲିୟାସ୍ କା ଆସ୍ ଏନ୍ଦେର୍ କାମସ୍। 7ଫିଲିପ୍ପସ୍ ଆସିନ୍ ଉତ୍ତର୍ ଚିଚ୍ଚାସ୍, “ଦୁଇ ଶହ୍ ଦିନାର୍୬:୭ ଦିନାର୍ ରୋମୀ ଜାମାର୍ଘି ଚାନ୍ଦିଘି ପାଏସା ରାଚା। ଏକ୍ଦିନାର୍ ଅଣ୍ଟା ମଜୁରୀ ଆସ୍କି ଅନ୍ଦୁଲ୍ ତା ମଜ୍ରୀଘି ବାରାବୁରି ରାଚା। ଦୁଇ ଶହ୍ ଦିନାର୍ ଅଣ୍ଟା ମଜୁରୀ ଆସ୍କି ଲାଗ୍ଭାଗ୍ ଆଠ୍ ମାସ୍ ତା ମଜ୍ରୀଘି ବାରାବୁରି ରାଚା। ଘି ଆସ୍ମାଦ୍ହି ଇବ୍ଡ଼ାର୍ଘି ଭିତର୍ନୁ ଜାମାର୍ଗେ କାଟେ-କାଟେହି ମା ପୁରିଦ୍।” 8ଯୀଶୁସ୍କି ଚେଲାଜାମାର୍ଘି ଭିତର୍ନୁ ଶିମୋନ୍ ପାତ୍ରାସ୍କି ଭାଇ ଆନ୍ଧ୍ରିୟାସ୍ ଆସିନ୍ ତେଙ୍ଗିୟାସ୍, 9“ଇସାନ୍ ଅଣ୍ଟା କୁକ୍କୋସ୍ ରାଦାସ୍। ଆସ୍କିସାନ୍ ଯାଉଘି ପାଞ୍ଚେଟା ଆସ୍ମା ଆରୁ ଯୋଡ଼େ ଇଞ୍ଜୋ ରାଇଦ୍; ଲେକିନ୍ ଏତ୍କ ଆଲାର୍ଗେ ଇଦ୍ ଏନ୍ଦେର୍ ମାନଦ୍?” 10ଯୀଶୁସ୍ ତେଙ୍ଗିୟାସ୍, “ଆଲାରିନ୍ ଅକ୍ତା।” ଆସାନ୍ ବହୁତ୍ ଘାଁସି ରାଚା: ହୁଦ୍ଘିଲାଗାନ୍ ଆବ୍ଡ଼ାର୍ ଘାଁସିନୁ ଅକ୍କିୟାର୍ ଆରୁ ଆସାନ୍ ମାର୍ଦ୍ନାର୍ ଖାଲି ଲାଗ୍ଭାଗ୍ ପାଞ୍ଚ୍ ହାଜାର୍ ରାଚାର୍। 11ଯୀଶୁସ୍ ଆସ୍ମାବନ୍ ଅଚ୍ଚାସ୍, ଆରୁ ଧାନ୍ୟାବାଦ୍ଘି ବିନ୍ତିନ୍ କାମ୍ଚାସ୍ ଆରୁ ଅକ୍କୁ ଆଲାର୍ଗେ ଆସ୍ ତାଙ୍ଘା ଇଚ୍ଛାତକ୍ ହାଟ୍ତାଚାସ୍। ଆସ୍ ଇଞ୍ଜୋବନ୍ହି ହୁଦ୍ଘି ଲେଖା ହାଟ୍ତାଚାସ୍। 12ଯେତ୍କବାକେନ୍ ଆବ୍ଡ଼ାର୍ ମହିଁକିରି ଉଚ୍ଛିୟାର୍ କେରାର୍ ତା ଯୀଶୁସ୍ ତାଙ୍ଘା ଚେଲାଜାମାରିନ୍ ତେଙ୍ଗିୟାସ୍, “ଯେତ୍କ ଟୁକ୍ଡ଼ାଦ୍ ଏଙ୍ଗ୍ରାଲି ଆବନ୍ ଠୁଡ଼ିୟା ଏସ୍କେ କା ଏନ୍ଦେଦ୍ହି ମା ଖେବ୍ଡ଼ା ରୋ।” 13ଆଙ୍ଗେନ୍ ଚେଲାଜାମାର୍ ଆସ୍ମାବନ୍ ଠୁଡ଼ିୟାଚାର୍। ଆଲାର୍ଘି ମକ୍କା ପାଛ୍ଲି ଯାଉଘି ଆ ପାଞ୍ଚେଟା ଆସ୍ମାନ୍ତି ଏକା ଟୁକ୍ଡ଼ାବଦ୍ ଏଙ୍ଗ୍ରା କେର୍କିଚା ଆଦ୍ ବାର ଡାଲା ନିନ୍ଦିଆ କେର୍କିଚା। 14ଆଙ୍ଗେନ୍ ଆଲାର୍ ଆସ୍କି କାମ୍ଚ୍କା ଅଦ୍ଭୁତ୍ ନାଲ୍ଖୁନ୍ ଏରିକିରି ତେଙ୍ଗାଗେ ଲାଗ୍ଗିୟାର୍ କା, “ଏକା ନାବୀସ୍ ଦୁନିଆଁନୁ ବାର୍ନାବାଲା ରାଚାସ୍ ଆସ୍ ଜରୁର୍ ଇସିନ୍।”
15ଯୀଶୁସ୍ ଇବନ୍ ଆହିକିରିକା ଆଲାର୍ ବାର୍ନାବାଲା ରାନାଏ ଆରୁ ଆସିନ୍ ଯବର୍ଜସ୍ତି ହୋଇକିରି ରାଜା ବାନାବାଗେ ବେଦ୍ଦାଲ୍ନାଏ ହୁଦ୍ଘିଲାଗାନ୍ ଯୀଶୁସ୍ ଅଥାସ୍ ପାର୍ତ୍ତାଗେ ବୁଙ୍ଗେଇଚାସ୍।
ଯୀଶୁସ୍ ଆମ୍ମୁଘି ମିଆଁ ଏକାଲ୍ଦାସ୍
(ମାତିସ୍ ୧୪:୨୨-୩୩; ମାର୍କୁସ୍ ୬:୪୫-୫୨)
16ବିଡ଼ି ଅକ୍କାନ୍ତି ଯୀଶୁସ୍କି ଚେଲାଜାମାର୍ ହଁସ୍ରା ଖାଁଣିଗେ କେରାର୍। 17ଆରୁ ଡଙ୍ଗାନୁ ଅକ୍କିକିରି ହଁସ୍ରା ହାପାଖାନ୍ନ୍ତା କାଫାର୍ନାହୁମ୍ ସହର୍ଗେ କାଲାଗେ ଲାଗ୍ଗିୟାର୍। ହତ୍କବାକେନ୍ ଉହା ମାନ୍ଚା କେର୍କିଚା ଆରୁ ଯୀଶୁସ୍ ହତ୍କବାକେନ୍ତକ୍ ତାହ୍ମା ଚାହାଗେ ମାଲ୍ଲା ବାରଚ୍କାରୁସ୍। 18ଆରୁ ଜୋର୍ସେ ଧୁକା ବାରାଲିୟାଦ୍ ଆଦ୍ଘି ଲାଗାନ୍ ହଁସ୍ରାନୁ ଲହ୍ଡ଼ି ଉସ୍କାରାଗେ ଲାଗ୍ଗିୟାଦ୍। 19ଯେତ୍କବାକେନ୍ ଆବ୍ଡ଼ାର୍ ଡଙ୍ଗା ବାହ୍ତେ-ବାହ୍ତେ ଲାଗ୍ଭାଗ୍ ତିନ୍ଚାର୍ କୋଶ୍ ଗେଚ୍ଛା ଆଣସ୍କାଚାର୍, ହତ୍କବାକେନ୍ ଆବ୍ଡ଼ାର୍ ଏରିୟାର୍ କା ଯୀଶୁସ୍ ଆମ୍ମୁଘି ମିଆଁ ହଁସ୍ରାନୁ ଏକା-ଏକା ଡଙ୍ଗାତାରା ବାରାଲ୍ଦାସ୍। ଆଙ୍ଗେନ୍ ଆବ୍ଡ଼ାର୍ ଏଲ୍ଚିୟାର୍ କେରାର୍। 20ଲେକିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ଯୀଶୁନ୍; ଆମା ଏଲ୍ଚା।” 21ଆଙ୍ଗେନ୍ ଆବ୍ଡ଼ାର୍ ଆସିନ୍ ଡଙ୍ଗାନୁ ଅକ୍ତାଗେ ରାଜି ମାନ୍ଚାର୍ କେରାର୍ ଆରୁ ହୁଙ୍ଗେନିନ୍ ଡଙ୍ଗାଦ୍ ଆ ଆଡ୍ଡାଗେ ଆଣ୍ସିୟାଦ୍ ଏକାସାନ୍ କା ଆବ୍ଡ଼ାର୍ କାଲିୟାର୍।
ଆଲାର୍ ଯୀଶୁସିନ୍ ବେଦ୍ଦାଲ୍ନାଏ
22ନାନ୍ନୁ ଉଲ୍ଲା ଆଲାର୍ଘି ବାଡ଼୍କା ଭିଡ଼୍ ଏକାର୍ କା ହଁସ୍ରାଘି ହାପାଖା ରାଚାର୍ କେର୍କାଚାର୍। ଆବ୍ଡ଼ାର୍ ଏର୍କାଚାର୍ କା ଆସାନ୍ ଅଣ୍ଟିଟା ଡଙ୍ଗା ରାଚା; ଆରୁ ଆ ଡଙ୍ଗାନୁ ଅକ୍କିକିରି ଯୀଶୁସ୍କି ଚେଲାଜାମାର୍ ଖାଲି କେର୍କାଚାର୍, ଲେକିନ୍ ଯୀଶୁସ୍ ଆବ୍ଡ଼ାର୍ ଗାନେ ମାଲ୍ଲାକୁସ୍। 23ଆଙ୍ଗେନ୍ ତିବିରୀୟା ସହର୍ତି କେତ୍କଟା ଦୁସ୍ରା ଡଙ୍ଗାଗୁଠିଦ୍ ଆ ଆଡ୍ଡାଗେ ବାର୍ଚା, ଏକା ଆଡ୍ଡାନୁ କା ପ୍ରାଭୁସ୍ ଧାନ୍ୟାବାଦ୍ ଚିଚ୍ଚକା ପାଛ୍ଲି ଆଲାର୍ ଆସ୍ମାନ୍ ମକ୍କାଚାର୍। 24ହୁଦ୍ଘିଲାଗାନ୍ ଯେତ୍କବାକେନ୍ ଆଲାର୍ ଏରିୟାର୍ କା ଆସାନ୍ ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ମାଲ୍ଲାରୁର୍, ତା ଆବ୍ଡ଼ାର୍ହି ହୁ ଡଙ୍ଗାନୁ ଅକ୍କିକିରି ଯୀଶୁସିନ୍ ବେଦ୍ଦତେ-ବେଦ୍ଦତେ କାଫାର୍ନାହୁମ୍ ସହର୍ଗେ ଆଣ୍ସିୟାର୍ କେରାର୍।
ଯୀଶୁସ୍ ଜୀବନ୍ ଚିନାବାଲା ଆସ୍ମାସ୍
25ହଁସ୍ରା ହାପାଖା ଯେତ୍କବାକେନ୍ ଆବ୍ଡ଼ାର୍ ଯୀଶୁସିନ୍ ହାଖ୍ଖୀୟାର୍ ତା ଆସିନ୍ ମେନ୍ଚାର୍, “ହେ ଗୁରୁ, ନିମ୍ ଏକା ବାକେନ୍ ଇସାନ୍ ବାର୍ଚ୍କାର୍?” 26ଯୀଶୁସ୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍, ଅଦ୍ଭୁତ୍ ନାଲ୍ଖୁ ଏରିକିରି ନିମ୍ ଏଙ୍ଗାନ୍ ମାଲ୍ଲା ବେଦ୍ଦୁର୍ ଲେକିନ୍ ଆସ୍ମା ମହିଁକିରି ଉଚ୍ଛକାର୍ କେର୍କାର୍ ହୁଦ୍ଘିଲାଗାନ୍ ଏଙ୍ଗାନ୍ ବେଦ୍ଦାଲ୍ଦାର୍। 27ନାଶ୍ ମାନ୍ନାବାଲା ଅନ୍ନାମହ୍ନାଘି ଲାଗାନ୍ ମାଲ୍ଲା, ଲେକିନ୍ ଆ ଅନ୍ନାମହ୍ନାଘି ଲାଗାନ୍ ମେହ୍ନତ୍ କାମା, ଏକାଦ୍ ସବୁଦିନ୍ତା ଜୀବନ୍ଘି ଲାଗାନ୍ ରାଇଦ୍ ଆରୁ ଏକା ମୁନୁଷ୍ ହାଦ୍ଦୁସ୍ ଚିୟସ୍; ଏନ୍ଦେର୍ଗେକା ବାଙ୍ଗ୍ସ୍କେ ଇ ହକ୍ ଚିୟାକେରା।” 28ଆଙ୍ଗେନ୍ ଆବ୍ଡ଼ାର୍ ଆସିନ୍ ମେନ୍ଚାର୍, “ପାର୍ମେଶ୍ଵାର୍ସ୍କି ନାଲ୍ଖୁଗୁଠିନ୍ କାମାଗେ ଏମ୍ ଏନ୍ଦେର୍ କାମମ୍?” 29ଯୀଶୁସ୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାସ୍, “ପାର୍ମେଶ୍ଵାର୍ସ୍ ନେକାନ୍ ତାଏକାଦାସ୍, ଆସ୍କି ମିଆଁ ବିଶ୍ୱାସ୍ କାମ୍ନାଦିନ୍ ପାର୍ମେଶ୍ୱାର୍ସ୍କି ନାଲ୍ଖୁଦ୍।” 30ଆଙ୍ଗେନ୍ ଆବ୍ଡ଼ାର୍ ଆସିନ୍ ମେନ୍ଚାର୍, “ନିନ୍ ଏନ୍ଦେର୍ ଅଦ୍ଭୁତ୍ ନାଲ୍ଖୁ ଏଦ୍ଦାଏ କା ଆବନ୍ ଏରିକିରି ଏମ୍ ନିଙ୍ଘା ମିଆଁ ବିଶ୍ଵାସ୍ କାମମ୍? ନିନ୍ ଏନ୍ଦେର୍ କାମୟ? 31ନାହ୍ମାଏ ପୁର୍ଖାର୍ ଶୁନ୍ଶାନ୍ ଆଡ୍ଡାନୁ ୬:୩୧ ମାନ୍ନା: ମିଶର୍ ଦେଶ୍ ଆମ୍ବକା ପାଛ୍ଲି ଇସ୍ରାଏଲ୍ ଆଲାର୍ଗେ ପାର୍ମେଶ୍ୱାର୍ସ୍ ଏକା ଅନ୍ନାମହ୍ନା ଚିଚ୍କାଚାସ୍। ମାନ୍ନା ମଖ୍ଖାର୍ ଏସ୍କେ କା ପାବିତାର୍ ଶାସ୍ତ୍ରନୁ ଲେଖଚ୍କା ରାଇ, ‘ମଁହାଗେ ଆସ୍ ଆବ୍ଡ଼ାର୍ଗେ ସରଗ୍ସ୍ତି ଏତ୍ତକା ଆସ୍ମା ଚିଚ୍ଚାସ୍’।” 32ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁ-ସତ୍ତୁ କାତ୍ଥାନ୍ ତେଙ୍ଗାଲ୍ଦାନ୍, ମୁଶା ନାବୀସ୍ ନିମାଗେ ସରଗ୍ସ୍ତି ଏତ୍ତକା ଆସ୍ମା ମାଲ୍ଲା ଚିଉସ୍, ବରନ୍ ଏଙ୍ଘା ବାଙ୍ଗ୍ସ୍ ନିମାଗେ ସରଗ୍ତି ଏତ୍ତକା ସତ୍ତୁ ଆସ୍ମା ଚିଦାସ୍। 33ଏକା ଆସ୍ମା ସରଗ୍ସ୍ତି ଏତ୍ତିକିରି ଦୁନିଆଁନ୍ତା ଆଲାର୍ଗେ ଜୀବନ୍ ଚିଚ୍ଚା। ଆଦିନ୍ ପାର୍ମେଶ୍ୱାର୍ସ୍କି ଚିଚ୍ଚକା ଆ ସତ୍ତୁ ଆସ୍ମାଦ୍।” 34ଆଙ୍ଗେନ୍ ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ହେ ପ୍ରାଭୁ, ଏମାଗେ ଜାମାବାକେନ୍ ଏନ୍ନେ ଆସ୍ମା ଚିଅୟ।”
35ଆଙ୍ଗେନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ଏନ୍ ଜୀବନ୍ ଚିନାବାଲା ଆସ୍ମାନ୍: ଏକାସ୍ ଏଙ୍ଘା ଚାହାଗେ ବାର୍ଦାସ୍ ଆସ୍କେ ଏକ୍ଲାହି କିଡ଼ା ମା ଲାଗ୍ଗି ଆରୁ ଏକାସ୍ ଏଙ୍ଘା ମିଆଁ ବିଶ୍ୱାସ୍ କାମ୍ଦାସ୍ ଆସ୍କେ ଏକ୍ଲାହି ଆମ୍ମୁକିଡ଼ା ମା ଲାଗ୍ଗି। 36ବରନ୍ ଏନ୍ ନିଙ୍ଗାନ୍ ତେଙ୍କାଚ୍କାନ୍ କା ନିନ୍ ଏଙ୍ଗାନ୍ ଏର୍କାଚ୍କାଏ ହାଲେହି ବିଶ୍ଵାସ୍ ମା କାମ୍ଚ୍କାଏ। 37ଏକା ଆଲାସିନ୍ ବାଙ୍ଗ୍ସ୍ ଏଙ୍ଗାଗେ ସୋଁପଚ୍କାଦାସ୍ ଆସ୍ ଏଙ୍ଘା ଚାହାଗେ ବାରସ୍, ଆରୁ ଏକାସ୍ ଏଙ୍ଘା ଚାହାଗେ ବାର୍ଦାସ୍ ଆସିନ୍ ଏନ୍ ଏକ୍ଲାହି ମା ଅଥର୍ଦାନ୍। 38ଏନ୍ଦେର୍ଗେକା ଏନ୍ ଏଙ୍ଘା ଇଚ୍ଛା ମାଲ୍ଲା ଏକାସ୍ ଏଙ୍ଗାନ୍ ତାଏକାଦାସ୍ ଆସ୍କି ଇଚ୍ଛା ପୁରା କାମାଗେ ସରଗ୍ତି ଏତ୍ତକାଦାନ୍; 39ଆରୁ ଏକାସ୍ ଏଙ୍ଗାନ୍ ତାଏକାଦାସ୍ ଆସ୍କି ଇଚ୍ଛା ଇଦ୍ କା ନେକାନ୍ ଆସ୍ ଏଙ୍ଗାଗେ ସୋଁପ୍ଚେଇଚ୍କାଦାସ୍ ଆସ୍କି ଭିତର୍ତି ଅର୍ତୁସିନ୍ହି ଏନ୍ ମା ଏଫ୍ସନ୍, ଆସିନ୍ ଆଖ୍ରୀ ଉଲ୍ଲାତକ୍ ଉଜ୍ଜତନ୍। 40ଏନ୍ଦେର୍ଗେକା ଏଙ୍ଘା ବାଙ୍ଗ୍ସ୍କି ଇଚ୍ଛା ଇଦ୍ କା ନେଦିନ୍ ହାଦ୍ଦୁସିନ୍ ଏରିକିରି ଆବ୍ଡ଼ାର୍ଘି ମିଆଁ ବିଶ୍ଵାସ୍ କାମ୍ନାଏ ଆବ୍ଡ଼ାର୍ ସବୁଦିନ୍ତା ଜୀବନ୍ ହାଖ୍ଖନାଏ; ଆରୁ ଏନ୍ ଆବ୍ଡ଼ାରିନ୍ ଆଖ୍ରୀ ଉଲ୍ଲାତକ୍ ଉଜ୍ଜତନ୍।”
41ଆସ୍ ତେଙ୍କାଚାସ୍ କା “ସରଗ୍ସ୍ତି ଏତ୍ତିକିରି ବାର୍ଚ୍କା ଆ ଆସ୍ମାନ୍ ଏନିନ୍” ଇଦ୍ଘିଲାଗାନ୍ ୟାହୁଦୀଜାମାର୍ ତାଙ୍ଘା ମିଆଁ କୁର୍ବୁର୍ରାଗେ ଲାଗ୍ଗିୟାର୍। 42ଆରୁ ଆବ୍ଡ଼ାର୍ ତେଙ୍ଗିୟାର୍, “ଇସ୍ ଯୋଷେଫ୍ସ୍କି ତାଙ୍ଗ୍ଦାସ୍ ଯୀଶୁସ୍ ମାଲ୍ଦାସ୍ କାଁଏ? ଆରୁ ନାମ୍ ତାଙ୍ଘାଏ ଆୟାଙ୍ଗ୍ ବାଙ୍ଗ୍ରିନ୍ ବାଲ୍ଦାତ୍ କାଁଏ? ହାଲେ ଏନ୍ ସରଗ୍ସ୍ତି ବାର୍ଚ୍କାଦାନ୍ ବୁଲି ଇସ୍ ଏସ୍କେ ତେଙ୍ଗା ଅଙ୍ଗସ୍?” 43ଯୀଶୁସ୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାସ୍, “ନିମ୍ ନିହ୍ମା-ନିହ୍ମା ଭିତ୍ର୍ନୁ ଆମା କୁର୍ବୁର୍ରା। 44ଏଙ୍ଘା ଚାହାଗେ ଏକାସିନ୍କା ଟାଣିକିରି ଯେତ୍କତକ୍ ବାରା ପଲ୍ଲନାଏ ହତ୍କତକ୍ ଏଙ୍ଘା ବାଙ୍ଗ୍ସ୍ ଏକାସ୍ କା ଏଙ୍ଗାନ୍ ତାଏକାଦାସ୍, ଆସିନ୍ ମା ଅନ୍ଦ୍ରସ୍; ଆରୁ ଏନ୍ ଆସିନ୍ ଆଖ୍ରୀ ଉଲ୍ଲାତକ୍ ଉଜ୍ଜତନ୍। 45ନାବୀର୍ଘି ଲେଖ୍ଚ୍କାନୁ ରାଇଦ୍ କା: ‘ଆବ୍ଡ଼ାର୍ଜାମାର୍ ପାର୍ମେଶ୍ଵାର୍ସ୍ତି ଶିଖ୍ର୍କାରର୍।’ ନେରିନ୍କା ଏଙ୍ଘା ବାଙ୍ଗ୍ସ୍ତି ମେନିକିରି ଶିଖ୍ର୍କାନାଏ ଆବ୍ଡ଼ାର୍ ଏଙ୍ଘା ଚାହାଗେ ବାର୍ନାଏ। 46ନେଦ୍ହି ପାର୍ମେଶ୍ୱାର୍ସିନ୍ ମାଲ୍ଲା ଏରୁର୍। ଯୀଶୁସ୍ ଖାଲି ବାଙ୍ଗ୍ ପାର୍ମେଶ୍ଵାର୍ସିନ୍ ଏର୍କାଦାସ୍, ଏକାସ୍ କା ପାର୍ମେଶ୍ୱାର୍ସ୍କି ତାର୍ତି ବାର୍ଚ୍କାଦାସ୍। 47ଏନ୍ ନିମାନ୍ ସତ୍ତୁ-ସତ୍ତୁ ତେଙ୍ଗାଲ୍ଦାନ୍ କା ଏକାର୍ ବିଶ୍ଵାସ୍ କାମ୍ନାଏ, ଆବ୍ଡ଼ାର୍ଗେ ସବୁଦିନ୍ତା ଜୀବନ୍ ହାଖ୍ଖର୍କିଚି। 48ଏନିନ୍ ଜୀବନ୍ ଚିନାବାଲା ଆସ୍ମାନ୍। 49ନିହ୍ମାଏ ପୁର୍ଖାଜାମାର୍ ଶୁନ୍ଶାନ୍ ଆଡ୍ଡାନୁ ମାନ୍ନା ମକ୍କାଚାର୍ ହାଲେହି କେଚ୍ଚାର୍ କେରାର୍। 50ସରଗ୍ସ୍ତି ଏତ୍ତିକିରି ବାର୍ଚ୍କା ଇ ଆସ୍ମାନ୍ ଏକା ଆଲାର୍ ମହ୍ଁନାଏ ଆବ୍ଡ଼ାର୍ ମା ଖିନାଏ। 51ଏନ୍ ସରଗ୍ସ୍ତି ଏତ୍ତିକିରି ବାର୍ଚ୍କା ଆ ଉଜ୍ଜନାବାଲା ଆସ୍ମାନ୍। ଯଦି ନେଦିନ୍ ଆ ଆସ୍ମାନ୍ ମଁହର୍, ଆବ୍ଡ଼ାର୍ ସବୁଦିନ୍ଘି ଲାଗାନ୍ ଉଜ୍ଜର୍; ଆରୁ ଆ ଆସ୍ମାନ୍ ଏକାନ୍ ଏନ୍ ଚିଦାନ୍ ଆଦ୍ ଏଙ୍ଘା ଶରୀର୍। ଆରୁ ଇତ୍ତି ଦୁନିଆଁନ୍ତା ଆଲାର୍ଗେ ଜୀବନ୍ ହାଖ୍ଖର।”
52ଇବନ୍ ମେନିକିରି ୟାହୁଦୀ ଆଲାର୍ ତାହ୍ମା-ତାହ୍ମା ଭିତର୍ନୁ ତେଙ୍ଗାତେଙ୍ଗି ମାନିକିରି ଝାଗ୍ଡ଼ା ମାନ୍ଚାର୍ କା “ଇ ଆଲାସ୍ ଏସ୍କେ ନାମାଗେ ତାଙ୍ଘା ଶରୀର୍ବନ୍ ମଁହାଗେ ଚିଆ ଅଙ୍ଗସ୍?” 53ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁ-ସତ୍ତୁ ତେଙ୍ଗାଲ୍ଦାନ୍ କା ଯେତ୍କବାକେନ୍ତକ୍ ନିମ୍ ମୁନୁଷ୍ ହାଦ୍ଦୁସ୍କି ଶରୀର୍ ମା ମଁହର୍ ଆରୁ ଆସ୍କି ହେଁସୁନ୍ ମା ହାପ୍ପର୍ ତା ନିହ୍ମାଏନୁ ଜୀବନ୍ ମାଲ୍ଲାଦିନ୍। 54ଏକାସ୍ ଏଙ୍ଘା ଶରୀର୍ ମହ୍ଁଦାସ୍ ଆରୁ ଏଙ୍ଘା ହେଁସୁ ହାପ୍ପଦାସ୍, ଆସ୍ ସବୁଦିନ୍ତା ଜୀବନ୍ ହାଖ୍ଖଦାସ୍; ଆରୁ ଏନ୍ ଆସିନ୍ ଆଖ୍ରୀ ଉଲ୍ଲାତକ୍ ଉଜ୍ଜତନ୍। 55ଏନ୍ଦେର୍ଗେକା ଏଙ୍ଘା ଶରୀର୍ଦ୍ ଅସଲ୍ ମହ୍ଁନାଦ୍ ଆରୁ ଏଙ୍ଘା ହେଁସୁଦ୍ ଅସଲ୍ ହାପ୍ପନାଦ୍। 56ଏକାସ୍ ଏଙ୍ଘା ଶରୀର୍ବନ୍ ମହ୍ଁଦାସ୍ ଆରୁ ଏଙ୍ଘା ହେଁସୁବନ୍ ହାପ୍ପଦାସ୍ ଆସିନ୍ ଏଙ୍ଘାଏନୁ ରାଦାସ୍, ଆରୁ ଏନ୍ ଆସ୍କିନୁ ରାଦାନ୍। 57ଏସ୍କେ କା ଉଜ୍ଜୁ ବାଙ୍ଗ୍ସ୍ ଏଙ୍ଗାନ୍ ତାଏକାଦାସ୍ ଆରୁ ଏନ୍ ଏଙ୍ଘା ବାଙ୍ଗ୍ସ୍କି ଲାଗାନ୍ ଉଜ୍ଜାଲ୍ଦାନ୍, ହନ୍ନେନ୍ ଏକାସ୍ ଏଙ୍ଘା ଶରୀର୍ବନ୍ ମହ୍ଁଦାସ୍ ଆସ୍ ଏଙ୍ଘାଲାଗାନ୍ ଜୀବିତ୍ ରସ୍। 58ଏକା ଆସ୍ମାଦ୍ ସରଗ୍ସ୍ତି ଏତ୍ତିକିରି ବାର୍ଚ୍କିଚି ଆଦ୍, ଇ ଆସ୍ମା ଲେଖା ମାଲ୍ଲା ଏକାନ୍ କା ନିହ୍ମା ପୁରୁଖାର୍ ମଖ୍ଖାର୍ ଆରୁ କେଚ୍ଚାର୍ କେରାର୍; ନେରିନ୍ ଇ ଆସ୍ମାନ୍ ମଁହର୍ ଆବ୍ଡ଼ାର୍ ସବୁଦିନ୍ତକ୍ ଉଜ୍ଜର୍।” 59ଯୀଶୁସ୍ ଇବ୍ଡ଼ା ଜାମା କାତ୍ଥାନ୍ କାଫାର୍ନାହୁମ୍ତା ୟାହୁଦୀ ଆଲାର୍ଘି ଅଣ୍ଟା ସାଭା ଆଡ଼୍ପାନୁ ଉପ୍ଦେଶ୍ ଚିନାବାକେନ୍ ତେଙ୍ଗିୟାସ୍।
ସବୁଦିନ୍ତା ଜୀବନ୍ଘି ବଚନ୍
60ଇବନ୍ ମେନିକିରି ତାଙ୍ଘା ଚେଲାର୍ଘି ଭିତର୍ନୁ ଢେର୍ ଆଲାର୍ ତେଙ୍ଗିୟାର୍, “ଇଦ୍ ତା ମୁରୁକ୍ କଠିନ୍ କାତ୍ଥା; ଇବନ୍ ନେଦ୍ ମାନାଅଙ୍ଗର୍?” 61ଯୀଶୁସ୍ ତାଙ୍ଘା ମନ୍ନୁ ଆଖ୍ଖୀୟାସ୍ କା ତାଙ୍ଘା ଚେଲାଜାମାର୍ ଇ କାତ୍ଥାଘି ବାରେନୁ କୁର୍ବୁର୍ରାଲ୍ନାଏ, ତା ଆସ୍ ମେନ୍ଚାସ୍, “ଇ କାତ୍ଥାଘି ଲାଗାନ୍ ନିହ୍ମାଏ ଏଙ୍ଘା ମିଆଁ ଠୋକର୍ ଲାକ୍କିଚା କାଁଏ? 62ଯଦି ନିମ୍ ମୁନୁଷ୍ ହାଦ୍ଦୁସିନ୍ ପହ୍ଲେ ଏକା ଆଡ୍ଡାନୁ ରାଚାସ୍ ଆ ଆଡ୍ଡାଗେ କାନାନ୍ ଏରର୍ ତା ଏନ୍ଦେର୍ କାମର୍? 63ଆତ୍ମାତା ଜୀବନ୍ ଚିଇଦ୍, ଲେକିନ୍ ଶରୀର୍ତି ଏନ୍ଦେର୍ହି ଫାଏଦା ମାଲ୍ଲାଦିନ୍; ଏନ୍ ନିମାନ୍ ଏକା କାତ୍ଥାନ୍ ତେଙ୍କାଦାନ୍ ଆଦ୍ ଆତ୍ମାଦ୍ ଆରୁ ଆଦ୍ ଜୀବନ୍ ଚିଇଦ୍। 64ଲେକିନ୍ ନିହ୍ମା ଭିତର୍ନୁ କେତ୍କ ଲୋକ୍ ରାନାଏ ଏକାର୍ କା ବିଶ୍ଵାସ୍ ମା କାମ୍ନାଏ।” ଏନ୍ଦେର୍ଗେକା ଏକା ଆଲାର୍ ବିଶ୍ଵାସ୍ ମା କାମାଲିୟାର୍ ଆରୁ ନେଦ୍ ତାଙ୍ଗାନ୍ ଦୁଶ୍ମାନ୍ ଜାମାର୍ଗେ ସୋଁପର୍ଚର୍ ଆବନ୍ ଯୀଶୁସ୍ ଆଘ୍ଲିନ୍ତି ଆକ୍କାଚାସ୍। 65ଆରୁ ଯୀଶୁସ୍ ତେଙ୍ଗିୟାସ୍, “ହୁଦ୍ଘିଲାଗାନ୍ ଏନ୍ ନିମାନ୍ ତେଙ୍କାଚ୍କାନ୍ କା ବାଙ୍ଗ୍ସ୍କି ବାର୍ଦାନ୍ ମା ମାନ୍ଚ୍କୁନ୍ ନେଦ୍ହି ଏଙ୍ଘା ଚାହାଗେ ବାରା ପଲ୍ଲନାଏ।”
66ହୁଦ୍ଘିଲାଗାନ୍ ତାଙ୍ଘା ଚେଲାଜାମାର୍ସ୍ତି ଢେର୍ ଆଲାର୍ ଯୀଶୁସିନ୍ ଆମ୍ବିକିରି ବୁଙ୍ଗେର୍ଚାର୍ ଆରୁ ତାଙ୍ଘାଗାନେ ମା କେରାର୍। 67ଆଙ୍ଗେନ୍ ଯୀଶୁସ୍ ଆ ବାର ଲୋକ୍ ଖାସ୍ଚେଲାଜାମାରିନ୍ ମେନ୍ଚାସ୍, “ନିମ୍ହି ବୁଙ୍ଗା ବେଦ୍ଦାଲ୍ଦାର୍ କାଁଏ?” 68ଶିମୋନ୍ ପାତ୍ରାସ୍ ଆସିନ୍ ଉତ୍ତର୍ ଚିଚ୍ଚାସ୍, “ହେ ପ୍ରାଭୁ ଏମ୍ ନେଖାସାନ୍ କମ୍? ନିଙ୍ଘାସାନ୍ ତା ସବୁଦିନ୍ତା ଜୀବନ୍ଘି ବଚନ୍ ରାଇ; 69ନିମିନ୍ ପାର୍ମେଶ୍ୱାର୍ସ୍କି ଆ ପାବିତାର୍ ହାଦ୍ଦୁୟ ଇବନ୍ ଏମ୍ ବିଶ୍ଵାସ୍ କାମ୍ଦାମ୍, (ଆରୁ ଆକ୍କାମ୍ କେର୍କାଦାମ୍ କା ନିମିନ୍ ପାର୍ମେଶ୍ଵାର୍ସ୍କି ପାବିତାର୍ ଆଲାଏ।)” 70ଯୀଶୁସ୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାସ୍, “ଏନ୍ ନିହ୍ମା ବାର ଲୋକ୍ରିନ୍ ମାଲ୍ଲା ଚାଜୁନ୍ କାଁଏ? ହାଲେହି ନିହ୍ମା ଭିତର୍ନୁ ଅର୍ତୁସ୍ ଶାଏତାନ୍ ରାଦାସ୍।” 71ଇବନ୍ ଆସ୍ ଶିମୋନ୍ ଇସ୍କୋରିୟତିସ୍କି ହାଦ୍ଦୁ ଯୁଦାସ୍କି ବାରେନୁ ତେଙ୍କାଚାସ୍। ଆସ୍ ଏକାସ୍ କା ଯୁଦାସ୍ ଯୀଶୁସିନ୍ ଦୁଶ୍ମାନ୍ ଜାମାର୍ଘି ହେଖ୍ଖାନୁ ସୋଁପ୍ନାଚିନାବାଲା ରାଚାସ୍। ଏକାସ୍ କା ବାର ଲୋକ୍ର୍ନ୍ତି ଅଣ୍ଟା ରାଚାସ୍।
7ଯୀଶୁସ୍ ଆରୁ ତାଙ୍ଘା ଭାଇଜାମାର୍
1ଇଦ୍ଘି ପାଛ୍ଲି ଯୀଶୁସ୍ ଗାଲିଲୀନୁନ୍ କୁଦ୍ଦାଲିୟାସ୍; ଆରୁ ଆସ୍ ୟାହୁଦାଗେ କାଲାଗେ ମା ବେଦ୍ଦାଲିୟାସ୍ ଏନ୍ଦେର୍ଗେକା ୟାହୁଦୀ ମୁଖ୍ୟାର୍ ଆସିନ୍ ପିଟାଗେ ତାକ୍ତୁକ୍ ବେଦ୍ଦାଲିୟାର୍। 2ୟାହୁଦୀ ଆଲାର୍ଘି୭:୨ ଇ ପରବ୍ନୁ ୟାହୁଦୀ ଆଲାର୍ ଝୁପ୍ଡ଼ି ବାନାବାଇକିରି ଆନ୍ନୁ ରାଲିୟାର୍। ଝୁପ୍ଡ଼ି ପରବ୍ ଆଣସାଲିୟାଦ୍। 3ଯୀଶୁସ୍କି ଭାଇର୍ ଆସିନ୍ ତେଙ୍ଗିୟାର୍, ଏକା ନାଲ୍ଖୁନ୍ ନିନ୍ କାମ୍ଦାଏ ଆବନ୍ ନିଙ୍ଘା ଚେଲାର୍ହି ଏରର୍, ହୁଦ୍ଘିଲାଗାନ୍ “ଇ ଆଡ୍ଡାନ୍ ଆମ୍ବିକିରି ୟାହୁଦା ପ୍ରଦେଶ୍ଗେ ବୁଙ୍ଗାକାଲା। 4ଏନ୍ଦେର୍ଗେକା ନେର୍ହି ଏନ୍ନେ ମାଲ୍କାରିନ୍ ଏକାର୍ କା ନାମେ କାମାବାଗେ ବେଦ୍ଦନାଏ, ଆରୁ ନୁଡ଼ିକିରି ନାଲ୍ଖୁ କାମ୍ନାଏ। ଯଦି ନିମ୍ ଇ ନାଲ୍ଖୁନ୍ କାମ୍ଦାର୍, ତା ପୁରା ଦୁନିଆଁନ୍ତା ଆଲାରିନ୍ ନିହ୍ମା ବାରେନୁ ଆହାଗେ ଚିଆ।” 5ଏନ୍ଦେର୍ଗେକା ତାଙ୍ଘା ଭାଇ ଜାମାର୍ହି ଆସ୍କି ମିଆଁ ବିଶ୍ଵାସ୍ ମା କାମାଲିୟାର୍। 6ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏଙ୍ଘାଏ ସାମାୟ ଆକ୍କୁନ୍ତକ୍ ଆର୍ଗି ଆଣସା, ଲେକିନ୍ ନିହ୍ମା ଲାଗାନ୍ ସାମାୟଦ୍ ଜାମାବାକେନ୍ ଠିକ୍ ରାଇଦ୍। 7ଇ ଦୁନିଆଁନ୍ତା ଆଲାର୍ ନିମାନ୍ ହାଁଣା ତୁପ୍ଫା ପଲ୍ଲନାଇନ୍। ଲେକିନ୍ ଆବ୍ଡ଼ାର୍ ଏଙ୍ଗାନ୍ ହାଁଣ୍ନାଏ ତୁଫ୍ନାଏ ଏନ୍ଦେର୍ଗେକା ଏନ୍ ତେଙ୍ଗ୍ଦାନ୍ କା ଆବ୍ଡ଼ାର୍ଘି ନାଲ୍ଖୁଦ୍ ଖାରାପ୍ଦ୍। 8ନିମ୍ ଇ ପରବ୍ଗେ କାଲା; ଏନ୍ ଆକ୍କୁନ୍ ଇ ପରବ୍ଗେ ମା କାଦାନ୍, ଏନ୍ଦେର୍ଗେକା ଆକ୍କୁନ୍ତକ୍ ଏଙ୍ଘା ସାମାୟ ପୁରା ଆର୍ଗି ମାନା।” 9ଯୀଶୁସ୍ ଆବ୍ଡ଼ାରିନ୍ ଏନ୍ନେ ତେଙ୍ଗିକିରି ଗାଲିଲୀନୁନ୍ ରାଚାସ୍କେରାସ୍।
ଝୁପ୍ଡ଼ି ପରବ୍ନୁ ଯୀଶୁସ୍କି ଉପ୍ଦେଶ୍
10ଯେତ୍କବାକେନ୍ ଯୀଶୁସ୍କି ଭାଇର୍ ପରବ୍ଗେ ବୁଙ୍ଗେଇଚାର୍ ତା ଆସ୍ହି କେରାସ୍ ଲେକିନ୍ ଆସ୍ ଏଥ୍ରିକିରି ମାଲ୍ଲା ନୁହୁରିକିରି କେର୍କାଚାସ୍। 11ୟାହୁଦୀ ନେତାର୍ ପରବ୍ନୁ ଆସିନ୍ ଏନ୍ନେ ତେଙ୍ଗିକିରି ବେଦ୍ଦାଗେ ଲାଗ୍ଗିୟାର୍, “ଆସ୍ ଏକାତାରା କେରାସ୍?” 12ଆରୁ ଆଲାର୍ ଆସ୍କି ବାରେ ତାହ୍ମା ତାହ୍ମା ଭିତ୍ରେ କାଡ଼େ-କାଡ଼େ କାଚ୍ନେଖ୍ରାଗେ ଲାଗ୍ଗିୟାର୍: କେତ୍କ ଲୋକ୍ ତେଙ୍ଗାଲିୟାର୍ କା, “ଆସ୍ ବାନେ ଆଲାସ୍।” ଆରୁ କେତକର୍ ତେଙ୍ଗାଲିୟାର୍ କା, “ମାଲ୍ଲା, ଆସ୍ ଆଲାରିନ୍ ଫୁସ୍ଲାଲ୍ଦାସ୍।” 13ହାଲେହି ୟାହୁଦୀ ମୁଖ୍ୟା ଜାମାର୍ଘି ଏଲ୍ଚ୍କାତି ଏକା ଆଲାର୍ହି ଆସ୍କି ବାରେନୁ ଖୁଲାଖୁଲି ମା ତେଙ୍ଗାଲିୟାର୍।
14ପରବ୍ଘି ଆଧା ଉଲ୍ଲା ବିତ୍ର୍କା ପାଛ୍ଲି; ଯୀଶୁସ୍ ମନ୍ଦିର୍ନୁ କାଇକିରି ଉପ୍ଦେଶ୍ ଚିୟାଗେ ଲାଗ୍ଗିୟାସ୍। 15ଆଙ୍ଗେନ୍ ୟାହୁଦୀ ମୁଖ୍ୟାଜାମାର୍ ଆଚ୍ମିତ୍ ମାନିକିରି ତେଙ୍ଗିୟାର୍, “ଇ ଆଲାସ୍ତା ମାଲ୍ଲା ପାଢ଼ୁସ୍, ହାଲେହି ଇସ୍କେ ଏତ୍କ ବୁଦ୍ଧି ଏକାସ୍ତି ବାର୍ଚା। ଆରୁ ଇସ୍ ଏସ୍କେ ଏତ୍କ ଆହାଲ୍ଦାସ୍?” 16ଯୀଶୁସ୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାସ୍, “ଏଙ୍ଘା ଉପ୍ଦେଶ୍ଦ୍ ଏଙ୍ଘା ନିଜର୍ ମାଲ୍ଲିଦ୍; ଲେକିନ୍ ଏକାସ୍ ଏଙ୍ଗାନ୍ ତାଏକାଦାସ୍ ଆସ୍କିଦ୍। 17ଯଦି ନେଦିନ୍ ପାର୍ମେଶ୍ୱାର୍ସ୍କି ଇଚ୍ଛା ଲେଖା ଚାଲ୍ରା ବେଦ୍ଦଦାସ୍, ତା ଆହସ୍କସ୍ କା ଏକା ଉପ୍ଦେଶ୍ ଏନ୍ ଚିଆଲ୍ଦାନ୍ ଆଦ୍ ପାର୍ମେଶ୍ଵାର୍ସ୍କି ତାର୍ତି ରାଇ କା ଏନ୍ ଏଙ୍ଘା ନିଜର୍ ତାର୍ତି ତେଙ୍ଗାଲ୍ଦାନ୍। 18ଏକାସ୍ ନିଜର୍ ତାର୍ତି ଏନ୍ଦ୍ରିନ୍ ତେଙ୍ଗ୍ଦାସ୍, ଆସ୍ ନିଜର୍ ମାଇନ୍ ଚାହଁଦାସ୍; ଲେକିନ୍ ଏକାସ୍ ନିଜର୍ ତାଏନାବାଲାସ୍କି ମାଇନ୍ ଚାହ୍ଦାସ୍ ଆସ୍ ସତ୍ତୁ ତେଙ୍ଗ୍ଦାସ୍, ଆରୁ ଆସ୍କିନୁ ଏନ୍ଦେର୍ହି କପଟ୍ ମାଲ୍ଲାଦିନ୍ ଆରୁ ଏକ୍ଲାହି ମା ଠାକ୍ଦାସ୍। 19ମୁଶାସ୍ ନିମାଗେ ନିୟମ୍ ମାଲ୍ଲା ଚିଉସ୍ କାଁଏ? ହାଲେହି ତା ନିହ୍ମା ଭିତର୍ନୁ ନେଦ୍ହି ନିୟମ୍ବନ୍ ମା ମାନ୍ଦାର୍। ତା ନିମ୍ ଏଙ୍ଗାନ୍ ଏନ୍ଦେର୍ଗେ ପିଟା ବେଦ୍ଦାଲ୍ଦାର୍?” 20ଆଲାର୍ ଉତ୍ତର୍ ଚିଚ୍ଚାର୍, “ନିଙ୍ଘାଏନୁ ଭୁତ୍ତୁ କର୍ଚ୍କିଚି! ନେଦ୍ ନିଙ୍ଗାନ୍ ପିଟାଗେ ତାକ୍ତୁକ୍ ବେଦ୍ଦାଲ୍ନାଏ?” 21ଯୀଶୁସ୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାସ୍, “ଏନ୍ ଅଣ୍ଟା ଅଦ୍ଭୁତ୍ ନାଲ୍ଖୁ କାମ୍ଚ୍କାନ୍, ଆରୁ ନିମ୍ ଜାମାର୍ ଆଚ୍ମିତ୍ ମାନ୍ଚ୍କାର୍ କେର୍କାର୍। 22ମୁଶାସ୍ ନିମାଗେ ଖାତ୍ନାଘି ନିୟମ୍ ଚିଚ୍କାଦାସ୍ (ଖାତ୍ନା ମୁଶାସ୍କି ତାର୍ତି ମାଲ୍ଲା ନିହ୍ମା ପୁର୍ଖାସ୍ତି ଚାଲ୍ର୍ତେ ବାରାଲି) ହୁଦ୍ଘିଲାଗାନ୍ ନିମ୍ ଆରାମ୍ ଉଲ୍ଲାନୁହି ନିହ୍ମା ହାଦ୍ଦୁସ୍କି ଖାତ୍ନା କାମ୍ଦାର୍। 23ଆରୁ ମୁଶାସ୍କି ଦ୍ୱାର୍ନୁ ଚିଚ୍ଚକା ନିୟମ୍ ମା ତଡ଼୍ରୋ, ଆଦ୍ଘି ଲାଗାନ୍ ନିମ୍ ଆରାମ୍ ଉଲ୍ଲାନୁ ଆଲାର୍ଘି ଖାତ୍ନା କାମ୍ଦାର୍ ଯେତ୍କବାକେନ୍ ଏନ୍ ଆରାମ୍ ଉଲ୍ଲାନୁ ଅଣ୍ଟା ଆଲାସିନ୍ ପୁରାପୁରୀ ବାନେ କାମ୍ଚ୍କାନ୍ ତା ନିମ୍ ଏଙ୍ଗାନ୍ ଏନ୍ଦେର୍ଗେ ଖୀସାରାଲ୍ଦାର୍। 24ନିମ୍ ଖାଲି ବାହ୍ରିନ୍ତା ଏରିକିରି ନ୍ୟାୟ ଆମା କାମା, ଏକାଦ୍ ସତ୍ତୁଦ୍ ଆବନ୍ ବୁଝରିକିରି ନ୍ୟାୟ କାମା।”
ଯୀଶୁସିନ୍ ଖ୍ରୀସ୍ତ୍ କାଁଏ
25ହତ୍କବାକେନ୍ ଯେରୁଶାଲେମ୍ ତା କେତ୍କ୍ ଲୋକ୍ ଆଲାର୍ ତେଙ୍ଗାଗେ ଲାଗ୍ଗିୟାର୍, “ଇସ୍ କାଁଏ ଆ ଆଲାସ୍ ମାଲ୍ଦାସ୍ ଏକାସିନ୍କା ପିଟାଗେ ବେଦ୍ଦାଲ୍ନାଏ? 26ଲେକିନ୍ ଏରା, ଇସ୍ତା ଖୁଲାଖୁଲି ଶିଖାବାଦାସ୍ ଆରୁ ନେଦ୍ହି ଇସିନ୍ ଏନ୍ଦେର୍ହି ମା ବାନାଏ। ୟାହୁଦୀ ମୁଖ୍ୟାଜାମାର୍ ସତ୍ତୁନିନ୍ ଆଖ୍ଖାର୍ କେରାର୍ କା ଇସିନ୍ ଖ୍ରୀସ୍ତ୍? 27ଇସିନ୍ତା ଏମ୍ ଆହ୍ଦାମ୍ କା ଇସ୍ ଏକାସ୍ତାସ୍; ଲେକିନ୍ ଯେତ୍କବାକେନ୍ ଖ୍ରୀସ୍ତ୍ ବାରସ୍ ତା ନେଦ୍ହି ବାଲ୍ଲରିନ୍ କା ଆସ୍ ଏକାସ୍ତି ବାର୍ଚ୍କାଦାସ୍।” 28ଯେତ୍କବାକେନ୍ ଯୀଶୁସ୍ ମନ୍ଦିର୍ନୁ ଉପ୍ଦେଶ୍ ଚିଆଲିୟାସ୍, ଆସ୍ ଜୋର୍ସେ ଚିର୍ରା ରାଇକିରି ତେଙ୍ଗିୟାସ୍, “ନିମ୍ ଏଙ୍ଗାନ୍ ଆହ୍ଦାର୍, ଆରୁ ଇବନ୍ହି ଆହ୍ଦାର୍ କା ଏନ୍ ଏକାସ୍ତି ବାର୍ଚ୍କାଦାନ୍। ଏନ୍ ଏଙ୍ଘା ତାର୍ତି ମାଲ୍ଲା ବାରୁନ୍, ଲେକିନ୍ ନେଦ୍ ଏଙ୍ଗାନ୍ ତାଏକାନାଏ ଆସ୍ ସତ୍ତୁସ୍, ଆସିନ୍ ନିମ୍ ବାଲ୍ଦାରିନ୍। 29ଏନ୍ ଆସିନ୍ ଆହ୍ଦାନ୍ ଏନ୍ଦେର୍ଗେକା ଏନ୍ ପାର୍ମେଶ୍ୱାର୍ସ୍କି ତାର୍ତି ବାର୍ଚ୍କାଦାନ୍, ଆରୁ ଆସିନ୍ ଏଙ୍ଗାନ୍ ତାଏକାଦାସ୍।” 30ଆବ୍ଡ଼ାର୍ ଆସିନ୍ ଧାରାଗେ ବେଦ୍ଦାଲିୟାର୍, ହାଲେହି ନେଦ୍ହି ଆସିନ୍ ହେଖ୍ଖା ମା ଲାଗାବାଚାର୍ ଏନ୍ଦେର୍ଗେକା ଆକ୍କୁନ୍ତକ୍ ଆସ୍କି ସାମାୟ ମାଲ୍ଲା ବାର୍ଚ୍କିରୁ। 31ହାଲେହି ଭିଡ଼୍ ଭିତର୍ନୁ ଢେର୍ ଆଲାର୍ ଆସ୍କି ମିଆଁ ବିଶ୍ଵାସ୍ କାମ୍ଚାର୍, ଆରୁ ତେଙ୍ଗାଗେ ଲାଗ୍ଗିୟାର୍, “ଖ୍ରୀସ୍ତ୍ ଯେତ୍କବାକେନ୍ ବାରସ୍ ତା ଇସ୍ତିହି କାଁଏ ବାଗ୍ଗେ ଅଦ୍ଭୁତ୍ ନାଲ୍ଖୁ ଏଦସ୍ ଏକାନ୍ କା ଇସ୍ ଏଦିୟାସ୍?”
ଯୀଶୁସିନ୍ ଧାରାଗେ ସୋଚ୍ନା
32ଫାରିସୀଜାମାର୍ ଆଲାରିନ୍ ଯୀଶୁସ୍କି ବାରେନୁ ଏନ୍ନେ କାତ୍ଥାନ୍ କାଡ଼େ-କାଡ଼େ କାଚ୍ନେଖେର୍ନାନ୍ ମେନ୍ଚାର୍; ଆରୁ ମୁଖ୍ୟା ପୁରୋହିତ୍ ଆରୁ ଫାରିସୀଜାମାର୍ ଆସିନ୍ ଧାରାଗେ ମନ୍ଦିର୍ତା ଦାର୍ୱାନ୍ ଜାମାରିନ୍ ତାଇୟାର୍। 33ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ଏନ୍ ଆରୁ ଥୋଡ଼େ ଡେରିତକ୍ ନିହ୍ମା ସାଙ୍ଗେନୁ ରନ୍, ଆନ୍ତିନ୍ ଏଙ୍ଘାଏ ତାଏନାବାଲାସ୍କି ଚାହାଗେ କନ୍। 34ନିମ୍ ଏଙ୍ଗାନ୍ ବେଦ୍ଦର୍, ଲେକିନ୍ ମା ହାଖ୍ଖଦାର୍; ଆରୁ ଏନ୍ ଏକାସାନ୍ ରାଦାନ୍, ଆସାନ୍ ନିମ୍ ବାରା ପଲ୍ଲଦାରିନ୍।” 35ଆଙ୍ଗେନ୍ ୟାହୁଦୀଜାମାର୍ ତାହ୍ମା-ତାହ୍ମା ଭିତ୍ରେ କାଚ୍ନେଖ୍ରାଗେ ଲାଗ୍ଗିୟାର୍, “ଇସ୍ ଏକାସାନ୍ କସ୍ କା ନାମ୍ ଇସିନ୍ ମା ହାଖ୍ଖଦାତ୍? ଇସ୍ ନାହ୍ମା ରାଜୀଘି ବାହ୍ରି ସହର୍ନୁ କାଇକିରି, ଆସାନ୍ ନାହ୍ମା ୟାହୁଦୀ ଆଲାର୍ ୟୁନାନୀ ଜାମାର୍ଗାନେ ରାନାଏ, ଆସ୍ ଆବ୍ଡ଼ାର୍ଘି ଚାହାଗେ କାଲ୍ଦାସ୍ କାଁଏ? ଆସ୍ ୟୁନାନୀ ଜାମାରିନ୍ହି ଉପ୍ଦେଶ୍ ଚିୟସ୍ କାଁଏ? 36ଇଦ୍ ଏନ୍ଦେର୍ କାତ୍ଥା ମାନ୍ନା ଅଙ୍ଗିଦ୍କା ଏକାନ୍ ଆସ୍ ତେଙ୍ଗିୟାସ୍ କା, ‘ନିମ୍ ଏଙ୍ଗାନ୍ ବେଦ୍ଦର୍, ଲେକିନ୍ ମା ହାଖ୍ଖଦାର୍; ଆରୁ ଏକାସାନ୍ ଏନ୍ ରନ୍ ଆସାନ୍ ନିମ୍ କାଲା ପଲ୍ଲଦାର୍’?”
ଜୀବନ୍ ଆମ୍ମୁଘି ଝାର୍ନା
37ପରବ୍ଘି ଆଖ୍ରୀ ଉଲ୍ଲା ଏକାଦ୍ କା ମୁଖ୍ୟା ଉଲ୍ଲା ରାଚା, ଯୀଶୁସ୍ ଇଜ୍ଜାସ୍ ଆରୁ ଜୋର୍ସେ ତେଙ୍ଗିୟାସ୍, ଯଦି ନେକାଗେ ଆମ୍ମୁକିଡ଼ା ଲାଗ୍ଗାଲିତା ଆବ୍ଡ଼ାର୍ ଏଙ୍ଘା ଚାହାଗେ ବାରା ଆରୁ ହାପ୍ପା। 38ନେଦ୍ ଏଙ୍ଘାଏ ମିଆଁ ବିଶ୍ଵାସ୍ କାମ୍ନାଏ, ଏସ୍କେ କା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଆବ୍ଡ଼ାର୍ଘି ଜୀଆନୁ ସବୁଦିନ୍ତା ଜୀବନ୍ ଚିନାବାଲା ଝାର୍ନା ଆମ୍ମୁ ପାଝ୍ରାରୋ।” 39ଆସ୍ ଇ ବଚନ୍ବନ୍ ପାବିତାର୍ ଆତ୍ମାଘି ବାରେନୁ ତେଙ୍ଗିୟାସ୍, ଏକାର୍ ଯୀଶୁସ୍କି ମିଆଁ ବିଶ୍ଵାସ୍ କାମ୍ନାଏ ଆବ୍ଡ଼ା ଆଲାର୍ଗେ ହାଖ୍ଖର୍ନାବାଲା ରାଚା; ଲେକିନ୍ ପାବିତାର୍ ଆତ୍ମା ଆକ୍କୁନ୍ତକ୍ ମାଲ୍ଲା ଚିଆକୁ, ଏନ୍ଦେର୍ଗେକା ଯୀଶୁସ୍ ଆକ୍କୁନ୍ତକ୍ ତାଙ୍ଘା ମାହିମାନୁ ମାଲ୍ଲା ଆଣ୍ସ୍କାରୁସ୍।
40ଆଙ୍ଗେନ୍ ଭିଡ଼୍ ଭିତର୍ନୁ ନେଦ୍ ନେଦ୍ ଇ କାତ୍ଥା ମେନିକିରି ତେଙ୍ଗିୟାର୍, “ସତ୍ତୁନିନ୍ ଇସ୍ ଆ ନାବୀସ୍।” 41ଆରୁ କେତ୍କ ଲୋକ୍ ତେଙ୍ଗିୟାର୍, “ଇସ୍ ଖ୍ରୀସ୍ତ୍ସ୍।” ଲେକିନ୍ ଏକାର୍-ଏକାର୍ ତେଙ୍ଗିୟାର୍, “ଏନ୍ଦେର୍ଗେ? ଖ୍ରୀସ୍ତ୍ସ୍ କାଁଏ ଗାଲିଲୀନ୍ତି ବାରସ୍? 42ପାବିତାର୍ ଶାସ୍ତ୍ରନୁ ଲେଖ୍ଚ୍କା ମାଲ୍ଲାଦିନ୍ କାଁଏ କା ଖ୍ରୀସ୍ତ୍ସ୍ ଦାଉଦ୍ ରାଜାସ୍କି ବାଉଁଶାନୁ ଆରୁ ବେତ୍ଲେହେମ୍ ପାଡ଼ାନୁ ଜନମ୍ ମାନସ୍, ଏକାସାନ୍ କା ଦାଉଦ୍ସ୍ ରାଲିୟାସ୍?” 43ହୁଦ୍ଘିଲାଗାନ୍ ଯୀଶୁସ୍କି ଚାଲ୍ତେ ଆଲାର୍ଘି ମାଝାନୁ ଭାଗ୍ଭାଗ୍ ମାନ୍ଚାର୍ କେରାର୍। 44ଆବ୍ଡ଼ାର୍ସ୍ତି କେତ୍କ ଲୋକ୍ ଆସିନ୍ ଧାରାଗେ ବେଦ୍ଦାଲିୟାର୍, ଲେକିନ୍ ନେଦ୍ହି ଆସିନ୍ ହେଖ୍ଖା ମା ଲାଗାବାଚାର୍।
ୟାହୁଦୀ ଆଗୁୱା ଜାମାର୍ଘି ବିଶ୍ଵାସ୍ ମା କାମ୍ନା
45ଆଙ୍ଗେନ୍ ମନ୍ଦିର୍ତା ଦାର୍ୱାନ୍ ଜାମାର୍ ମୁଖ୍ୟା ପୁରୋହିତ୍ ଆରୁ ଫାରିସୀ ଜାମାର୍ଘି ଚାହାଗେ କିର୍ୟାର୍ ବାର୍ଚାର୍; ଆରୁ ଆବ୍ଡ଼ାର୍ ଆବ୍ଡ଼ାରିନ୍ ମେନ୍ଚାର୍, “ନିମ୍ ଆସିନ୍ ଏନ୍ଦେର୍ଗେ ଧାର୍ଚ୍କାର୍ ଆରୁ ମା ଅନ୍ଦର୍କାର୍?” 46ଦାର୍ୱାନ୍ ଜାମାର୍ ଉତ୍ତର୍ ଚିଚ୍ଚାର୍, “ଇ ଆଲାସ୍ ଏସ୍କେ କାତ୍ଥା ତେଙ୍ଗାଲ୍ଦାସ୍ ନେଦ୍ହି ଏକ୍ଲାହି ଏନ୍ନେ କାତ୍ଥା ମାଲ୍ଲା ତେଙ୍ଗୁର୍।” 47ଫାରିସୀର୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାର୍, “ନିମ୍ହି ଫୁସ୍ଲାରାଚ୍କାର୍ କେର୍କାଦାର୍ କାଁଏ? 48ୟାହୁଦୀ ମୁଖ୍ୟା ଆରୁ ଫାରିସୀ ଜାମାର୍ଘି ଭିତର୍ନୁ ନେରିନ୍ ଆସିନ୍ ବିଶ୍ଵାସ୍ କାମ୍ଚାର୍ କାଁଏ? 49ଲେକିନ୍ ଏକା ଆଲାର୍ ନିୟମ୍ଘି ବାରେ ବାଲ୍ନାଇନ୍, ଆବ୍ଡ଼ାର୍ ପାର୍ମେଶ୍ୱାର୍ସ୍ତି ଦଣ୍ଡ୍ ହାକ୍କାନାଏ।” 50ନୀକଦୀମୁସ୍ ଏକାସ୍ କା ପହ୍ଲେ ଯୀଶୁସ୍କି ଚାହାଗେ ବାର୍ଚ୍କାଚାସ୍। ଆସ୍ ଫାରିସୀ ଜାମାର୍ସ୍ତି ଅର୍ତୁ ରାଚାସ୍, ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, 51“ନାହ୍ମା ନିୟମ୍ନୁ ଏକିନ୍ ଆଲାସ୍ସିନ୍ ଯେତ୍କତକ୍ ଆଘ୍ଲି ଆସ୍କି କାତ୍ଥାନ୍ ମା ମେନ୍ନାଏ ଆରୁ ଇବନ୍ ପାତା ମା ଲାଗାବାନାଏ କା ଆସ୍ ଏନ୍ଦେର୍ କାମ୍ଚ୍କାଦାସ୍ ହତ୍କତକ୍ ଆସିନ୍ ଦୋଷୀ ଠାହ୍ରାନାଏ କାଁଏ?” 52ଆବ୍ଡ଼ାର୍ ଆସିନ୍ ଉତ୍ତର୍ ଚିଚ୍ଚାର୍, “ନିନ୍ହି କାଁଏ ଗାଲିଲୀନ୍ତାଏ? ପାବିତାର୍ ଶାସ୍ତ୍ରବନ୍ ପାଢ଼ା ଆରୁ ଏରା ହାଲେ ନିଙ୍ଗାଗେ ପାତା ଚାଲ୍ରୋ କା ଗାଲିଲୀନ୍ତି ଏକା ନାବୀର୍ହି ମା ବାର୍ନାଏ।” 53(ଆରୁ ଆବ୍ଡ଼ାର୍ଜାମାର୍ ନିଜର୍-ନିଜର୍ ଆଡ଼୍ପାଗେ କିର୍ୟାର୍ କେରାର୍।)
8ଯୀଶୁସ୍ ଅଣ୍ଟା ବେଭିଚାରୀ ଆଲିବନ୍ ଛେମା କାମାଲ୍ଦାସ୍
1ଲେକିନ୍ ଯୀଶୁସ୍ ଜାଇତୁନ୍ ପାର୍ତ୍ତାଗେ କେରାସ୍। 2ପାଇରି ବାକେନ୍ ଆସ୍ ଆରୁଅହନ୍ ମନ୍ଦିର୍ଗେ ବାର୍ଚାସ୍; ଆରୁ ଜାମା ଆଲାର୍ ଆସ୍କି ଚାହାଗେ ବାର୍ଚାର୍ ଆରୁ ଆସ୍ ଅକ୍କିକିରି ଆବ୍ଡ଼ାରିନ୍ ଉପ୍ଦେଶ୍ ଚିୟାଗେ ଲାଗ୍ଗିୟାସ୍। 3ହତ୍କବାକେନ୍ ପଣ୍ତିତ୍ ଆରୁ ଫାରିସୀର୍ ଅଣ୍ଟା ଆଲିବନ୍ ଅନ୍ଦ୍ରାର୍ ଏକାଦ୍ କା ବେଭିଚାର୍ ପାପ୍ନୁ ଧାର୍ରା ରାଚ୍କିଚା, ଆରୁ ଆବନ୍ ଆଲାର୍ଘି ମାଝାନୁ ଇଲ୍ତିକିରି ଯୀଶୁସିନ୍ ତେଙ୍ଗିୟାର୍, 4“ହେ ଗୁରୁ, ଇ ଆଲିଦ୍ ବେଭିଚାର୍ ପାପ୍ କାମ୍ନା ବାକେନ୍ ଧାର୍ରା ରାଚ୍କିଚି। 5ମୁଶାସ୍କି ନିୟମ୍ନୁ ଏମାନ୍ ହୁକୁମ୍ ଚିଚ୍ଚକା ରାଇ କା ଏନ୍ନେ ଆଲିବନ୍ ଚାଁଚାତି ଲେବ୍ଡ଼ିକିରି ପିଟ୍ନା ଚିନା କାତ୍ଥା। ହାଲେ ନିନ୍ ଇ ଆଲିଘି ବାରେନୁ ଏନ୍ଦେର୍ ତେଙ୍ଗାଲ୍ଦାଏ?” 6ଆବ୍ଡ଼ାର୍ ଯୀଶୁସିନ୍ ଫାସାବାଗେ ଇ କାତ୍ଥାନ୍ ତେଙ୍ଗିୟାର୍ ଲେକିନ୍ ଆସ୍କି ମିଆଁ ଦୋଷ୍ ଲାଗାବାଗେ ଏନ୍ଦ୍ରିନ୍ କାତ୍ଥା ହାଖ୍ଖର୍। ଲେକିନ୍ ଯୀଶୁସ୍ ନୁହିଁକିରି ହେଖ୍ଖାତି ହେଁହ୍ଲାନୁ ଲେଖାଗେ ଲାଗ୍ଗିୟାସ୍। 7ଯେତ୍କବାକେନ୍ ଆବ୍ଡ଼ାର୍ ଆସିନ୍ ମେନ୍ତେ ରାଚାର୍, ତା ଆସ୍ ସିଧା ମାନିକିରି ଆବ୍ଡ଼ାରିନ୍ ତେଙ୍ଗିୟାସ୍, “ନିହ୍ମା ଭିତର୍ନୁ ନେଦ୍ ପାପ୍ ମାଲ୍ଲା କାମୁର୍, ଆବ୍ଡ଼ାର୍ ଆଘ୍ଲି ଆବନ୍ ଚାଁଚାତି ଲେବ୍ଡ଼ା।” 8ଆରୁ ଯୀଶୁସ୍ ଆରୁଅହନ୍ କିୟାଁ ନୁହିଁକିରି ଆଙ୍ଗ୍ଠିତି ଲେଖାଗେ ଲାଗ୍ଗିୟାସ୍। 9ଲେକିନ୍ ଇବନ୍ ମେନିକିରି ଆବ୍ଡ଼ାର୍ ବାଡ଼୍କାର୍ସ୍ତି ହୋଇକିରି ଛଟେତକ୍, ଅଣ୍ଟା-ଅଣ୍ଟା ବୁଙ୍ଗିୟାର୍କେରାର୍, ଆରୁ ଆସାନ୍ ଯୀଶୁସ୍ ଅଥାସ୍ ରାଚାସ୍କେରାସ୍, ଆରୁ ଆ ଆଲିଦ୍ ଆସାନିନ୍ ମାଝାନୁ ଇଜ୍ଜକା ରାଚାକେର୍କିଚା। 10ଯୀଶୁସ୍ ସିଧା ମାନିକିରି ଆବନ୍ ତେଙ୍ଗିୟାସ୍, “ହେ ଆଲି, ଆବ୍ଡ଼ାର୍ଜାମାର୍ ଏକାତାରା କେରାର୍? ନେଦ୍ହି ନିଙ୍ଗାଗେ ଦଣ୍ଡ୍ ମା ଚିଚ୍ଚାର୍ କାଁଏ?” 11ଆଦ୍ ତେଙ୍ଗିୟାଦ୍, “ହେ ପ୍ରାଭୁ, ନେଦ୍ହି ଏଙ୍ଗା ଦଣ୍ଡ୍ ମାଲ୍ଲା ଚୁର୍।” ଯୀଶୁସ୍ ତେଙ୍ଗିୟାସ୍, “ଏନ୍ହି ନିଙ୍ଗାଗେ ଦଣ୍ଡ୍ ମା ଚିଦାନ୍; କାଲ୍, ନିନ୍ ଆରୁ ପାପ୍ ଆମ୍କେ କାମା।”
ଯୀଶୁସ୍ ଦୁନିଆଁନ୍ତା ବିଲ୍ଲୀସ୍
12ଯୀଶୁସ୍ ଆରୁଅହନ୍ ଆଲାରିନ୍ ତେଙ୍ଗିୟାସ୍, “ଏନ୍ ଦୁନିଆଁନ୍ତା ବିଲ୍ଲୀନ୍; ଏକାସ୍ ଏଙ୍ଘାଏ ପାଛ୍ଲି-ପାଛ୍ଲି ବାର୍ଦାସ୍ ଆସ୍ ଉହାନୁ ମା ଏକ୍ଦାସ୍, ଆସ୍ ଜୀବନ୍ ଚିନାବାଲା ବିଲ୍ଲୀନ୍ ହାଖ୍ଖସ୍।” 13ଆଙ୍ଗେନ୍ ଫାରିସୀଜାମାର୍ ଆସିନ୍ ତେଙ୍ଗିୟାର୍, “ନିନ୍ ନିଜେ ନିଙ୍ଘାଏ ସାକ୍ଷୀ ଚିଦାଏ, ହୁଦ୍ଘିଲାଗାନ୍ ନିଙ୍ଘାଏ ସାକ୍ଷୀ ଠିକ୍ ମାଲ୍ଲିଦ୍।” 14ଯୀଶୁସ୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାସ୍, “ଏନ୍ ନିଜେ ଏଙ୍ଘାଏ ସାକ୍ଷୀ ଚିଦାନ୍, ହାଲେହି ଏଙ୍ଘାଏ ସାକ୍ଷୀଦ୍ ଠିକ୍ଦ୍ ଏନ୍ଦେର୍ଗେକା ଏନ୍ ଆହ୍ଦାନ୍ କା ଏନ୍ ଏକାସ୍ତି ବାର୍ଚ୍କାଦାନ୍ ଆରୁ ଏକାସାନ୍ କାଲ୍ଦାନ୍? ଲେକିନ୍ ନିମ୍ ବାଲ୍ଦାର୍ କା ଏନ୍ ଏକାସ୍ତି ବାର୍ଚ୍କାଦାନ୍ ଆରୁ ଏକାସାନ୍ କାଲ୍ଦାନ୍। 15ନିମ୍ ଆଲାର୍ ଲେଖା ନ୍ୟାୟ କାମ୍ଦାର୍; ଏନ୍ ନେଖାଏହି ନ୍ୟାୟ ମା କାମ୍ଦାନ୍। 16ଆରୁ ଯଦି ଏନ୍ ନ୍ୟାୟ କାମନ୍ହି, ତା ଏଙ୍ଘାଏ ନ୍ୟାୟ ଠିକ୍ଦ୍; ଏନ୍ଦେର୍ଗେକା ଏନ୍ ଅଥାନ୍ ମାଲ୍ଲକାନିନ୍, ଲେକିନ୍ ଏକାସ୍ କା ଏଙ୍ଗାନ୍ ତାଏକାଦାସ୍, ଆସ୍ ଏଙ୍ଘାଗାନେ ରାଦାସ୍। 17ନିହ୍ମା ନିୟମ୍ନୁହି ଲେଖ୍ଚ୍କା ରାଇ କା ଦୁହି ଲୋକର୍ଘି ତେଙ୍କା ସାକ୍ଷୀଦ୍ ସତ୍ତୁଦ୍। 18ଅଣ୍ଟାତା ଏନ୍ ନିଜେ ସାକ୍ଷୀ ଚିଦାନ୍ ଆରୁ ଦୁସ୍ରା ତା ବାଙ୍ଗ୍ସ୍ ଏଙ୍ଘାଏ ସାକ୍ଷୀ ଚିଦାସ୍ ଏକାସ୍ କା ଏଙ୍ଗାନ୍ ତାଏକାଦାସ୍।” 19ଆବ୍ଡ଼ାର୍ ଆସିନ୍ ମେନ୍ଚାର୍, “ନିଙ୍ଘାଏ ବାଙ୍ଗ୍ସ୍ ଏକାସାନ୍ ରାଦାସ୍?” ଯୀଶୁସ୍ ଉତ୍ତର୍ ଚିଚ୍ଚାସ୍, “ନା ତା ନିମ୍ ଏଙ୍ଗାନ୍ ଆହ୍ଦାର୍, ଆରୁ ନା ନିମ୍ ଏଙ୍ଘା ବାଙ୍ଗ୍ସିନ୍ ଆହ୍ଦାର୍, ଯଦି ନିମ୍ ଏଙ୍ଗାନ୍ ଆହର୍ନେତା ଏଙ୍ଘାଏ ବାଙ୍ଗ୍ସ୍ସିନ୍ହି ଆହର୍ନେ।” 20ଯୀଶୁସ୍ ଇ କାତ୍ଥାନ୍ ଆବ୍ଡ଼ାରିନ୍ ମନ୍ଦିର୍ନୁ ଉପ୍ଦେଶ୍ ଚିନାବାକେନ୍ ଦାନ୍ବାକ୍ସା ଉଇନା ବାଖ୍ରାନୁ ତେଙ୍ଗିୟାସ୍, ଆରୁ ନେଦ୍ହି ଆସିନ୍ ଧାରା ପଲ୍ଲିଆରିନ୍, ଏନ୍ଦେର୍ଗେକା ଆସ୍କି ସାମାୟ ଆକ୍କୁନ୍ତକ୍ ମାଲ୍ଲା ବାର୍ଚ୍କିରୁ।
ଯୀଶୁସ୍ ଅବିଶ୍ୱାସୀ ୟାହୁଦୀରିନ୍ ଚେତାବାନୀ ଚିଆଲ୍ଦାସ୍
21ଯୀଶୁସ୍ ଆବ୍ଡ଼ାରିନ୍ ଆରୁଅହନ୍ ତେଙ୍ଗିୟାସ୍, “ଏନ୍ କାଲ୍ଦାନ୍, ଆରୁ ନିମ୍ ଏଙ୍ଗାନ୍ ବେଦ୍ଦର୍ ଲେକିନ୍ ନିମ୍ ନିହ୍ମାଏ ପାପ୍ନୁ ଖିୟର୍ କର୍; ଏକାସାନ୍ ଏନ୍ କାଲ୍ଦାନ୍, ଆସାନ୍ ନିମ୍ ବାରା ପଲ୍ଲଦାର୍।” 22ଆଙ୍ଗେନ୍ ୟାହୁଦୀ ମୁଖ୍ୟାଜାମାର୍ ତେଙ୍ଗିୟାର୍, “ଆସ୍ ନିଜ୍କେନିଜ୍ ପିଟଚସ୍ କାଁଏ, ଏନ୍ଦେର୍ଗେକା ଆସ୍ ତେଙ୍ଗ୍ଦାସ୍, ‘ଏକାସାନ୍ ଏନ୍ କାଲ୍ଦାନ୍ ଆସାନ୍ ନିମ୍ ବାରା ପଲ୍ଲଦାରିନ୍’?” 23ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ କିତାର୍, ଆରୁ ଏନ୍ ମିଁତି ବାର୍ଚ୍କାଦାନ୍। ନିମ୍ ଦୁନିଆଁନ୍ତା ଆଲାର୍, ଏନ୍ ଦୁନିଆଁନ୍ତା ମାଲ୍ଦାନ୍। 24ଇଦ୍ଘିଲାଗାନ୍ ଏନ୍ ନିମାନ୍ ତେଙ୍କାନ୍ କା ନିମ୍ ନିଜର୍-ନିଜର୍ ପାପ୍ନୁ ଖିୟର୍। ଆରୁ ଏନିନ୍ ଖ୍ରୀସ୍ତ୍ ଏନ୍ନେ ତେଙ୍କାନ୍ ଆ କାତ୍ଥାନୁ ନିମ୍ ବିଶ୍ୱାସ୍ ମା କାମର୍ ତା ନିମ୍ ନିଜର୍-ନିଜର୍ ପାପ୍ନୁ ଖିୟର୍।” 25ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ନିନ୍ ନେଦ୍?” ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ଆ ଆଲାନିନ୍ ଏସ୍କେ କା ସୁରୁନ୍ତି ଏନ୍ ନିମାନ୍ ତେଙ୍ଗ୍ତେ ବାରାଲ୍ଦାନ୍। 26ନିହ୍ମା ବାରେନୁ ଏଙ୍ଗା ବହୁତ୍କିଛି ତେଙ୍ଗ୍ନା ରାଇ ଆରୁ ଦୋଷୀ ଠାହ୍ରାନା ରାଇ; ଆରୁ ଏକାସ୍ ଏଙ୍ଗାନ୍ ତାଏକାଦାସ୍ ଆସ୍ ସତ୍ତୁସ୍। ଏନ୍ ଏକାନ୍ ଏକାନ୍ ଆସ୍ତି ମେନ୍ଚ୍କାଦାନ୍ ଆବନିନ୍ ଦୁନିଆଁନୁ ତେଙ୍ଗ୍ଦାନ୍।” 27ଲେକିନ୍ ଆବ୍ଡ଼ାର୍ ଇବନ୍ ମା ବୁଝ୍ରାର୍ କା ଯୀଶୁସ୍ ଆବ୍ଡ଼ାରିନ୍ ବାଙ୍ଗ୍କି ବାରେ ତେଙ୍ଗାଲିୟାସ୍। 28ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ଯେତ୍କବାକେନ୍ ନିମ୍ ମୁନୁଷ୍ ହାଦ୍ଦୁସିନ୍ କ୍ରୁଶ୍ନୁ ଆର୍ଗ୍ତର୍ ଚିଅର୍, ତା ନିମ୍ ଆହର୍କର୍ କା ଏନ୍ ଆ ଆଲାନିନ୍; ଆରୁ ଏନ୍ ଖୁଦ୍ନିଜେ ଏନ୍ଦେର୍ହି ମା କାମ୍ଦାନ୍ ଏସ୍କେ ଏଙ୍ଘାଏ ବାଙ୍ଗ୍ସ୍ ଏଙ୍ଗାନ୍ ଶିଖାବାଚ୍କାଚାସ୍ ଆନ୍ନେନ୍ ଇ କାତ୍ଥାନ୍ ତେଙ୍ଗ୍ଦାନ୍। 29ଏଙ୍ଗାନ୍ ତାଇନା ବାଲାସ୍ ଏଙ୍ଘାଗାନେ ରାଦାସ୍; ଆସ୍ ଏଙ୍ଗାନ୍ ଏକ୍ଲାହି ଅଥାସିନ୍ ମାଲ୍ଲା ଆମ୍ବୁସ୍ ଏନ୍ଦେର୍ଗେକା ଏନ୍ ଜାମାବାକେନ୍ ଆ ନାଲ୍ଖୁନିନ୍ କାମ୍ଦାନ୍ ଏକା ନାଲଖୁନୁ କା ଆସ୍ ଖୁସ୍ ମାନ୍ଦାସ୍।” 30ଯୀଶୁସ୍ ଇ କାତ୍ଥାନ୍ ତେଙ୍ଗାଲିୟାସ୍ ତା ଢେର୍ ଆଲାର୍ ଆସ୍କି ମିଆଁ ବିଶ୍ଵାସ୍ କାମ୍ଚାର୍।
ପାପ୍ତି ବାଛ୍ର୍ନାଘି ବାରେ ଯୀଶୁସ୍ ତେଙ୍ଗାଲ୍ଦାସ୍
31ଆଙ୍ଗେନ୍ ଯୀଶୁସ୍ ଆ ୟାହୁଦୀ ଆଲାରିନ୍ ଏକାର୍ କା ଆସ୍କି ମିଆଁ ବିଶ୍ଵାସ୍ କାମ୍ଚ୍କାଚାର୍, ଆବ୍ଡ଼ାରିନ୍ ତେଙ୍ଗିୟାସ୍, “ଯଦି ନିମ୍ ଏଙ୍ଘା ବଚନ୍ନୁ ଚାଲ୍ର୍ତେ ରର୍ତା ସତ୍ତୁନିନ୍ ନିମ୍ ଏଙ୍ଘାଏ ଚେଲା ମାନର୍। 32ଆରୁ ନିମ୍ ସତ୍ତୁବନ୍ ଆହର୍, ଆରୁ ଆ ସତ୍ତୁଦ୍ ନିମାନ୍ ଆଜାଦ୍ କାମଦ୍।” 33ଆବ୍ଡ଼ାର୍ ଯୀଶୁସିନ୍ ଉତ୍ତର୍ ଚିଚ୍ଚାର୍, “ଏମ୍ତା ଆବ୍ରାହାମ୍ସ୍କି ବାଉଁଶାମ୍, ଆରୁ ଏକ୍ଲାହି ନେଖାଏହି ଗୁତ୍ତିୟା ମାଲ୍ଲା ମାନୁମ୍। ଆରୁ ନିମ୍ ଏସ୍କେ ତେଙ୍ଗାଲ୍ଦାର୍ କା ଏମ୍ ଆଜାଦ୍ ମାନମ୍କମ୍?”
34ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁ-ସତ୍ତୁ ତେଙ୍ଗାଲ୍ଦାନ୍ କା ଏକାସ୍ ପାପ୍ କାମ୍ତେ ରାଦାସ୍ତା ଆସ୍ ପାପ୍ଘି ଗୁତ୍ତିୟା ରାଦାସ୍। 35ଗୁତ୍ତିୟାସ୍ ଜାମାବାକେନ୍ ଆଡ଼୍ପାନୁ ମା ରାଦାସ୍; ଲେକିନ୍ ହାଦ୍ଦୁସ୍ ଜାମାବାକେନ୍ ଆଡ଼୍ପାନୁ ରାଦାସ୍। 36ଇଦ୍ଘିଲାଗାନ୍ ଯଦି ହାଦ୍ଦୁସ୍ ନିମାନ୍ ଆଜାଦ୍ କାମସ୍, ତା ନିମ୍ ସତ୍ତୁନିନ୍ ଆଜାଦ୍ ମାନର୍କର୍। 37ଏନ୍ ଆହ୍ଦାନ୍ କା ନିମ୍ ଆବ୍ରାହାମ୍ସ୍କି ବାଉଁଶାନ୍ତାର୍; ହାଲେହି ଏଙ୍ଘା ବଚନ୍ଘି ଲାଗାନ୍ ନିହ୍ମା ମନ୍ନୁ ଆଡ୍ଡା ମାଲ୍ଲାଦିନ୍, ହୁଦ୍ଘିଲାଗାନ୍ ନିମ୍ ଏଙ୍ଗାନ୍ ପିଟାଗେ ବେଦ୍ଦାଲ୍ଦାର୍। 38ଏନ୍ ଏଙ୍ଘା ବାଙ୍ଗ୍ସାନ୍ ଏକାନ୍-ଏକାନ୍ ଏର୍କାଦାନ୍ ଆବନ୍ ଏନ୍ ନିମାନ୍ ତେଙ୍ଗାଲ୍ଦାନ୍; ଆରୁ ନିମ୍ ନିହ୍ମା ବାଙ୍ଗ୍ସ୍ତି ଏକାନ୍-ଏକାନ୍ ମେନ୍ଚ୍କାଦାର୍ ଆବନ୍ ନିମ୍ କାମା।”
39ଆବ୍ଡ଼ାର୍ ଯୀଶୁସିନ୍ ଉତ୍ତର୍ ଚିଚ୍ଚାର୍, “ଆବ୍ରାହାମ୍ସ୍ ଏହ୍ମା ବୁଆସ୍।” ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯଦି ନିମ୍ ସତ୍ତୁନିନ୍ ଆବ୍ରାହାମ୍ସ୍କି ହାଦ୍ଦୁବଚ୍ଚ ରର୍ନେ, ତା ଆବ୍ରାହାମ୍ସ୍ ଲେଖା ନିମ୍ହି ନାଲ୍ଖୁ କାମର୍ନେ। 40ଏକା ସତ୍ତୁବନ୍ ଏନ୍ ପାର୍ମେଶ୍ୱାର୍ସ୍ତି ମେନ୍ଚ୍କାଦାନ୍ ଆବନିନ୍ ନିମାନ୍ ତେଙ୍ଗ୍ଦାନ୍; ଲେକିନ୍ ନିମ୍ ଏଙ୍ଘା ଲେଖା ଆଲାସିନ୍ ପିଟାଗେ ବେଦ୍ଦାଲ୍ଦାର୍। ଆବ୍ରାହାମ୍ସ୍ ଏକ୍ଲାହି ଏନ୍ନେ ମାଲ୍ଲା କାମୁସ୍। 41ନିମ୍ ନିହ୍ମାଏ ଅସ୍ଲି ବୁଆସ୍ ଏସ୍କେ ନାଲ୍ଖୁ କାମ୍ଦାସ୍ ଆନ୍ନେ ନିମ୍ହି କାମ୍ଦାର୍।” ଆବ୍ଡ଼ାର୍ ଯୀଶୁସିନ୍ ତେଙ୍ଗିୟାର୍, “ଏମ୍ ବେଭିଚାର୍ତି ଜନମ୍ ମାଲ୍ଲା ମାନୁମ୍, ଏହ୍ମାଏ ଅଣ୍ଟା ଖାଲି ବୁଆସ୍ ରାଦାସ୍ ଆସ୍ ପାର୍ମେଶ୍ଵାର୍ସ୍।” 42ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯଦି ପାର୍ମେଶ୍ଵାର୍ସ୍ ନିହ୍ମାଏ ବୁଆ ରସ୍ନେ, ତା ନିମ୍ ଏଙ୍ଗାନ୍ ବାନେ ହାଖ୍ଖର୍ନେ; ଏନ୍ଦେର୍ଗେକା ଏନ୍ ପାର୍ମେଶ୍ଵାର୍ସ୍କି ତାର୍ତି ବାର୍ଚ୍କାଦାନ୍। ଏନ୍ ନିଜେ ଏଙ୍ଘା ତାର୍ତି ମାଲ୍ଲା ବାରୁନ୍, ପାର୍ମେଶ୍ୱାର୍ସ୍ସିନ୍ ଏଙ୍ଗାନ୍ ତାଏକାଦାସ୍। 43ଏକା କାତ୍ଥାନ୍ ଏନ୍ ତେଙ୍ଗାଲ୍ଦାନ୍ ଆବନ୍ ନିମ୍ ଏନ୍ଦେର୍ଗେ ମା ବୁଝ୍ରାଲ୍ଦାର୍? ଇଦ୍ଘିଲାଗାନ୍ କା ନିମ୍ ଏଙ୍ଘାଏ ବଚନ୍ବନ୍ ଧ୍ୟାନ୍ ମା ଚିଦାର୍। 44ନିହ୍ମାଏ ବୁଆସ୍ ଶାଏତାନ୍ସ୍ ଆରୁ ନିମ୍ ଆସ୍କି ହାଦ୍ଦୁବଚ୍ଚର୍ ଆରୁ ଆସ୍ ଏକାନ୍ ଚାହଁଦାସ୍ ଆବନ୍ ନିମ୍ କାମ୍ଦାର୍। ଆସ୍ତା ସୁରୁନ୍ତିନିନ୍ ଆଲ୍ପିଟୁସ୍ ଆରୁ ଜାମାବାକେନ୍ ସତ୍ତୁ ବଚନ୍ଘି ବିରୋଧ୍ କାମ୍ଦାସ୍। ଏନ୍ଦେର୍ଗେକା ଆସ୍କିନୁ ଏନ୍ଦେର୍ହି ସତ୍ତୁ ମାଲ୍ଲାଦିନ୍। ଯେତ୍କବାକେନ୍ ଆସ୍ ଝୁଟ୍ଟୁ ତେଙ୍ଗ୍ଦାସ୍ ତା ଆସ୍ ତାଙ୍ଘା ସାଭାବ୍ ଲେଖା ଝୁଟ୍ଟୁ ତେଙ୍ଗ୍ଦାସ୍। ଏନ୍ଦେର୍ଗେକା ଆସ୍ ଠାକୁୱାସ୍ ଆରୁ ଠାକୁୱାର୍ଘି ବୁଆସ୍। 45ଲେକିନ୍ ଏନ୍ ଏକା ସତ୍ତୁ ତେଙ୍ଗ୍ଦାନ୍, ଆଦ୍ଘିଲାଗାନ୍ ନିମ୍ ଏଙ୍ଘା ମିଆଁ ବିଶ୍ୱାସ୍ ମା କାମ୍ଦାର୍। 46ନିହ୍ମା ଭିତର୍ନୁ ନେଦ୍ ଏଙ୍ଘା ପାପ୍ଘି ଦୋଷୀ କାମା ଅଙ୍ଗର୍? ଯଦି ଏନ୍ ସତ୍ତୁ ତେଙ୍ଗାଲ୍ଦାନ୍, ତା ନିମ୍ ଏନ୍ଦେର୍ଗେ ଏଙ୍ଗାନ୍ ବିଶ୍ୱାସ୍ ମା କାମାଲ୍ଦାର୍? 47ଏକାସ୍ ପାର୍ମେଶ୍ଵାର୍ସ୍କି ଆଲାସ୍, ଆସ୍ ପାର୍ମେଶ୍ୱାର୍ସ୍କି ବଚନ୍ବନ୍ ମେନ୍ଦାସ୍; ଲେକିନ୍ ନିମ୍ ପାର୍ମେଶ୍ୱାର୍ସ୍କି ଆଲ୍ ମାଲ୍ଦାର୍ ହୁଦ୍ଘିଲାଗାନ୍ ନିମ୍ ଆସ୍କି ବଚନ୍ବନ୍ ମା ମାନ୍ଦାର୍।”
ଯୀଶୁସ୍ ଆରୁ ଆବ୍ରାହାମ୍ସ୍
48ଇବନ୍ ମେନିକିରି ୟାହୁଦୀ ଆଲାର୍ ଯୀଶୁସିନ୍ ତେଙ୍ଗିୟାର୍ କା, “ଏମ୍ ଠିକେନିନ୍ ତେଙ୍ଗାଲ୍ଦାମ୍ କା ନିନ୍ ସାମାରୀଆ ଏରିୟା ତା ଆଲାଏ, ଆରୁ ନିଙ୍ଘାଏନୁ ଖାରାପ୍ ଆତ୍ମା ରାଇ?” 49ଯୀଶୁସ୍ ଉତ୍ତର୍ ଚିଚ୍ଚାସ୍, “ଏଙ୍ଘାଏନୁ ଖାରାପ୍ ଆତ୍ମା ମାଲ୍ଲା କୋରୁ, ଏନ୍ ଏଙ୍ଘାଏ ବାଙ୍ଗ୍ସ୍କି ମାଇନ୍ କାମ୍ଦାନ୍, ଆରୁ ନିମ୍ ଏଙ୍ଘାଏ ମାଇନ୍ ମା କାମ୍ଦାର୍। 50ଲେକିନ୍ ଏନ୍ ନିଜର୍ ମାଇନ୍ ମା ଚାହଁଦାନ୍; ହଁ, ଅଣ୍ଟାସ୍ ରାଦାସ୍ ଏକାସ୍ କା ପାର୍ମେଶ୍ୱାର୍ସ୍ ଏଙ୍ଘା ମାଇନ୍ ଚାହ୍ଦାସ୍ ଆରୁ ନ୍ୟାୟ କାମ୍ଦାସ୍। 51ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଯଦି ଏକିନ୍ ଆଲାସ୍ ଏଙ୍ଘା ବଚନ୍ ଲେଖା ଚାଲ୍ର୍ଦାସ୍, ତା ଆସ୍ ଏକ୍ଲାହି ତାଙ୍ଘା ମରନ୍ବନ୍ ମା ଏରସ୍।” 52ୟାହୁଦୀ ଆଲାର୍ ଆସିନ୍ ତେଙ୍ଗିୟାର୍, “ଆକ୍କୁନ୍ ଏମ୍ ଆକ୍କାମ୍ କେର୍କାମ୍ କା ନିଙ୍ଘାଏନୁ ଭୁତ୍ତୁ ରାଇ। ଏନ୍ଦେର୍ଗେକା ଆବ୍ରାହାମ୍ସ୍ ଆରୁ ନାବୀର୍ହି ଏକ୍ଲାନିନ୍ କେଚ୍ଚାର୍ କେର୍କାନାଏ; ଆରୁ ନିନ୍ ତେଙ୍ଗାଲ୍ଦାଏ, କା ‘ଯଦି ଏକିନ୍ ଆଲାସ୍ ଏଙ୍ଘାଏ ବଚନ୍ନୁ ଚାଲ୍ର୍ଦାସ୍, ତା ଆସ୍ ଏକ୍ଲାହି ତାଙ୍ଘା ମରନ୍ବନ୍ ମା ଏରସ୍।’ 53ଏହ୍ମାଏ ପୁର୍ଖା ବୁଆ ଆବ୍ରାହାମ୍ସ୍ ତା କେଚ୍ଚାସ୍କେରାସ୍। ନିନ୍ ଆସ୍ତି ବାଡ଼୍କାଏ କାଁଏ? ଆରୁ ନାବୀର୍ହି କେଚ୍ଚାର୍ କେରାର୍। ନିନ୍ ନିଜ୍କେନିଜ୍ ଏନ୍ଦେର୍ ସୋଚ୍ଦାଏ?” 54ଯୀଶୁସ୍ ଉତ୍ତର୍ ଚିଚ୍ଚାସ୍, “ଯଦି ଏନ୍ ନିଜ୍କେନିଜ୍ ଏଙ୍ଘା ମାହିମା କାମନ୍ ତା ଆ ମାହିମା ଏନ୍ଦେର୍ହି ମାଲ୍ଲିଦ୍; ଲେକିନ୍ ଏଙ୍ଘାଏ ମାହିମା କାମ୍ନାବାଲାସ୍ ଏଙ୍ଘାଏ ବାଙ୍ଗ୍ସ୍। ଏକାସ୍କି ବାରେନୁ ନିମ୍ ତେଙ୍ଗ୍ଦାର୍ କା ଆସ୍ ନିହ୍ମାଏ ପାର୍ମେଶ୍ଵାର୍ସ୍। 55ନିମ୍ତା ଆସିନ୍ ବାଲ୍ଦାରିନ୍: ଲେକିନ୍ ଏନ୍ ଆସିନ୍ ଆହ୍ଦାନ୍। ଯଦି ଏନ୍ ତେଙ୍ଗନ୍ କା ‘ଏନ୍ ଆସିନ୍ ବାଲ୍ଦାନିନ୍, ବୁଲିତା ଏନ୍ହି ନିହ୍ମା ଲେଖା ଝୁଟ୍ଟୁ ଠାହ୍ରାରନ୍; ଲେକିନ୍ ଏନ୍ ଆସିନ୍ ଆହ୍ଦାନ୍ ଆରୁ ଆସ୍କି ବଚନ୍ଘି ଲେଖା ଚାଲ୍ର୍ଦାନ୍।’ 56ନିହ୍ମାଏ ପୁର୍ଖା ବୁଆ ଆବ୍ରାହାମ୍ସ୍ ଏଙ୍ଘାଏ ଦୁନିଆଁନୁ ବାର୍ନାଘି ଉଲ୍ଲାନ୍ ଏରାଗେ ଆଶ୍ରା କାମିକିରି ବହୁତ୍ ଖୁସ୍ ରାଚାସ୍; ଆରୁ ଆସ୍ ଏରିୟାସ୍ ଆରୁ ଖୁସୀ ମାନ୍ଚାସ୍।” 57ୟାହୁଦୀ ଆଲାର୍ ଯୀଶୁସିନ୍ ତେଙ୍ଗିୟାର୍, “ଆକ୍କୁନ୍ତକ୍ ନିଙ୍ଘାଏ ପଚାଶ୍ ବଛର୍ ମାଲ୍ଲା ମାନୁଦ୍, ହାଲେ ନିନ୍ ଏସ୍କେ ଆବ୍ରାହାମ୍ସିନ୍ ଏର୍କାଦାଏ?” 58ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁସତ୍ତୁ ତେଙ୍ଗାଲ୍ଦାନ୍, କା ଆବ୍ରାହାମ୍ସ୍କି ଜନମ୍ଘି ପହ୍ଲେନ୍ତିନ୍ ଏନ୍ ରାଦାନ୍।” 59ଆଙ୍ଗେନ୍ ଆବ୍ଡ଼ାର୍ ଯୀଶୁସିନ୍ ଲେବ୍ଡ଼ାଗେ ଚାଁଚା ଧାର୍ଚାର୍, ଲେକିନ୍ ଯୀଶୁସ୍ ନୁହୁରିକିରି ମନ୍ଦିର୍ତି ବୁଙ୍ଗେଇ ଚିଚ୍ଚାସ୍।
9ଯୀଶୁସ୍ ଅଣ୍ଟା ଜନମ୍ତି କାଁଣାସିନ୍ ବାନେ କାମାଲ୍ଦାସ୍
1ଯୀଶୁସ୍ ପାବୁନୁ କାନାବାକେନ୍ ଅଣ୍ଟା ଆଲାସିନ୍ ଏରିୟାସ୍, ଏକାସ୍ କା ଜନମ୍ତି କାଣାଁ ରାଚାସ୍। 2୯:୨ ୟାହୁଦୀ ଗୁରୁ ଜାମାର୍ ଏନ୍ନେ ତେଙ୍ଗ୍ନାଏ କା ଦୁଃଖୁ ଚାହେ ବେମାର୍, କାଣାଁ, ଲେଙ୍ଗ୍ଡ଼ା ଚାହେ ଏନ୍ଦ୍ରିନ୍ଭି ଦୁଃଖୁ ନିଜର୍, ଆୟାଙ୍ଗ୍ବାଙ୍ଗ୍ ଚାହେ ଛୋଟେ ହାଦ୍ଦୁର୍ ଆୟାଙ୍ଗ୍ଘି କୁଲୁନୁ ରାନା ସାମାୟନୁ, ଆୟାଙ୍ଗ୍ ଚାହେ କୁଲୁ ଉଲା ହାଦ୍ଦୁଘି ପାପ୍ଘି କାରନ୍ତିହି ଦୁଃଖୁ ସାହା ଖାତ୍ରି। ଆଙ୍ଗେନ୍ ତାଙ୍ଘା ଚେଲାଜାମାର୍ ଆସିନ୍ ମେନ୍ଚାର୍, “ହେ ଗୁରୁ, ନେର୍ ପାପ୍ କାମ୍ଚ୍କାଚାର୍ ଇ ଆଲାସ୍କା ନିଜର୍ ତାଙ୍ଘା ଆୟାଙ୍ଗ୍ ବାଙ୍ଗ୍ଘି ପାପ୍ ଲାଗାନ୍?” 3ଯୀଶୁସ୍ ଉତ୍ତର୍ ଚିଚ୍ଚାସ୍, “ନା ତା ଇ ଆଲାସ୍ ପାପ୍ କାମ୍ଚ୍କାଦାସ୍, ନା ତାଙ୍ଗ୍ୟ ତାମ୍ବାର୍; ଲେକିନ୍ ପାର୍ମେଶ୍ଵାର୍ସ୍କି ଶକ୍ତିନ୍ ଇସ୍କିନୁ ଏରା ଅଙ୍ଗର୍, ହୁଦ୍ଘିଲାଗାନ୍ ଏନ୍ନେ ମାନ୍ଚା। 4ଯେତ୍କତକ୍ ଉଲ୍ଲା ରାଇଦ୍ ଆ ଉଲ୍ଲାନୁ ଏକାସ୍ ଏଙ୍ଗାନ୍ ତାଏକାଦାସ୍, ନାମାଗେ ଆସ୍କି ନାଲ୍ଖୁବନ୍ ଏସ୍କିନିନ୍ ହାଲେହି କାମା ଖାତ୍ରଦ୍; ଏନ୍ନେ ମାଁହା ବାର୍ନାବାଲା ରାଇ ଏକାନୁ କା ନେଦ୍ହି ନାଲ୍ଖୁ କାମା ପଲ୍ଲନାଏ। 5ଯେତ୍କବାକେନ୍ତକ୍ ଏନ୍ ଦୁନିଆଁନୁ ରାଦାନ୍, ହତ୍କବାକେନ୍ତକ୍ ଏନ୍ ଦୁନିଆଁନ୍ତା ବିଲ୍ଲୀନ୍।” 6ଏନ୍ନେ ତେଙ୍ଗିକିରି ଆସ୍ ହେଁହ୍ଲାନୁ ତୁଫ୍ୟାସ୍, ଆରୁ ଆ ତୁପ୍ଫାଲୋ ଆମ୍ମୁତି ହାଜ୍ଜୁବନ୍ ସାନ୍ଚାସ୍, ଆରୁ ଆ ହାଜ୍ଜୁବନ୍ ଆ କାଣାଁ ଆଲାସ୍କି ହାନ୍ନୁନୁ ଲାଗାବାଚାସ୍। 7ଆରୁ ଆସିନ୍ ତେଙ୍ଗିୟାସ୍, “କାଲା ଆରୁ ସିଲୋହ୍ ପୋଖ୍ରାନୁ ନିଙ୍ଘା ହାନ୍ନୁନ୍ ନଣା” (ସିଲୋହ୍ଘି ମତ୍ଲବ୍ “ତାଏକା”) ଆଙ୍ଗେନ୍ ଆସ୍ କାଇକିରି ନଣ୍ତ୍ରିୟାସ୍ ଆରୁ ଏର୍ତେ କିର୍ରିୟାସ୍ ବାର୍ଚାସ୍। 8ଆଙ୍ଗେନ୍ ତାଙ୍ଘା ଖୋଣେ ମୋଣେନ୍ତା ଆଲାର୍ ଆରୁ ଏକାର୍ ଆସିନ୍ ପହ୍ଲେ ଭିଖ୍ ନିନାନ୍ ଏର୍କାଚାର୍, ଆବ୍ଡ଼ାର୍ ତେଙ୍ଗିୟାର୍, “ଇସ୍ କାଁଏ ଆସ୍ ମାଲ୍ଦାସ୍ ଏକାସ୍ କା ଅକ୍କିକିରି ଭିଖ୍ ନିୟାଲିୟାସ୍?” 9କେତ୍କ ଲୋକ୍ ଆଲାର୍ ତେଙ୍ଗିୟାର୍, “ଇସ୍ ଆସିନ୍”, ଆରୁ ଦୁସ୍ରା ଆଲାର୍ ତେଙ୍ଗିୟାର୍, “ମାଲ୍ଲା, ଇସ୍ ଆସ୍ ଲେଖା ଏଥ୍ରାଲ୍ଦାସ୍।” ଲେକିନ୍ ଆ ଆଲାସ୍ ତେଙ୍ଗିୟାସ୍, “ଏନ୍ ଆ ଆଲାନିନ୍।” 10ଆଙ୍ଗେନ୍ ଆବ୍ଡ଼ାର୍ ଆସିନ୍ ମେନ୍ଚାର୍, “ନିନ୍ ଏସ୍କେ ଏରା ଅଙ୍କାଏ?” 11ଆସ୍ ଉତ୍ତର୍ ଚିଚ୍ଚାସ୍, “ଯୀଶୁ ନାମେଘି ଅଣ୍ଟା ଆଲାସ୍ ହାଜ୍ଜୁନ୍ ସାନ୍ଚାସ୍, ଆରୁ ଆ ହାଜ୍ଜୁବନ୍ ଏଙ୍ଘା ହାନ୍ନୁନୁ ଲାଗାବାଇକିରି ଏଙ୍ଗାନ୍ ତେଙ୍ଗିୟାସ୍, ‘ସିଲୋହ୍ ପୋଖ୍ରାନୁ କାଲା ଆରୁ ନଣ୍ତ୍ରା ଆଙ୍ଗେନ୍ ଏନ୍ କାଇକିରି ନଣ୍ତ୍ର୍କାନ୍’ ଆରୁ ଏରା ଅକ୍କାନ୍।” 12ଆବ୍ଡ଼ାର୍ ଆସିନ୍ ମେନ୍ଚାର୍, “ଆସ୍ ଏକାସାନ୍ ରାଦାସ୍?” ଆସ୍ ତେଙ୍ଗିୟାସ୍, “ଏନ୍ ବାଲ୍ଦାନିନ୍।”
ଫାରିସୀଜାମାର୍ ବାନେ ମାନ୍ଚ୍କାଘି ବାରେନୁ ଯାଞ୍ଚ କାମାଲ୍ନାଏ
13ଏକାସ୍ ପହ୍ଲେ କାଁଣା ରାଚାସ୍ ଆସିନ୍ ଆଲାର୍ ଫାରିସୀ ଜାମାର୍ଘି ଚାହାଗେ ଅନ୍ଦ୍ରାର୍। 14ଏକ୍ଲା ଯୀଶୁସ୍ ହାଜ୍ଜୁ ସାନିକିରି ଆସ୍କି ହାନ୍ନୁନ୍ ବାନେ କାମ୍ଚ୍କାଚାସ୍, ହୁ ଉଲ୍ଲାଦ୍ ଆରାମ୍ ଉଲ୍ଲା ରାଚାଦ୍। 15ଆରୁଅହନ୍ ଫାରିସୀଜାମାର୍ ଆସିନ୍ ମେନ୍ଚାର୍ କା ନିନ୍ ଏସ୍କେ ଏରା ଅଙ୍କାଏ। ଆଙ୍ଗେନ୍ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଆସ୍ ଏଙ୍ଘା ହାନ୍ନୁନୁ ତୁପ୍ଫାଲୋତି ସାନ୍ଚ୍କା ହାଜ୍ଜୁ ଲାଗାବାଚାସ୍, ଆନ୍ତିନ୍ ଏନ୍ ନଣ୍ତ୍ର୍କାନ୍ ଆରୁ ଆକ୍କୁନ୍ ଏରା ଅଙ୍ଗାଲ୍ଦାନ୍।” 16ଇବନ୍ ମେନିକିରି କେତ୍କ ଲୋକ୍ ଫାରିସୀର୍ ତେଙ୍ଗିୟାର୍, “ଇ ଆଲାସ୍ ପାର୍ମେଶ୍ଵାର୍ସ୍କି ତାର୍ତି ମାଲ୍ଲା ବାରୁସ୍, ଏନ୍ଦେର୍ଗେକା ଇସ୍ ଆରାମ୍ ଉଲ୍ଲାନ୍ ମା ମାନ୍ଦାସ୍।” ଆରୁ କେତ୍କ ଲୋକ୍ ତେଙ୍ଗିୟାର୍, “ପାପୀ ଆଲାସ୍ ଏସ୍କେ ଏନ୍ନେ ଅଦ୍ଭୁତ୍ ନାଲ୍ଖୁ କାମାଅଙ୍ଗସ୍?” ହୁଦ୍ଘିଲାଗାନ୍ ଆବ୍ଡ଼ାର୍ଘି ଭିତ୍ରେ କାତ୍ଥା ମା ଜୁମ୍ରା। 17ଆଙ୍ଗେନ୍ ଆବ୍ଡ଼ାର୍ ଆ କାଁଣା ଆଲାସିନ୍ ଆରୁଅହନ୍ ମେନ୍ଚାର୍, “ଏକାସ୍ ନିଙ୍ଘା ହାନ୍ନୁନ୍ ବାନେ କାମ୍ଚାସ୍ ଆସ୍କି ବାରେନୁ ନିନ୍ ଏନ୍ଦେର୍ ତେଙ୍ଗାଲ୍ଦାଏ?” ଆସ୍ ତେଙ୍ଗିୟାସ୍, “ଆସ୍ ଅଣ୍ଟା ନାବୀସ୍।”
18ଏକାସ୍ ପହ୍ଲେ କାଁଣା ରାଚାସ୍ ଆରୁ ଆକ୍କୁନ୍ ଏରା ଅଙ୍ଗାଲ୍ଦାସ୍, ଆସ୍କି ତାଙ୍ଗ୍ୟ ତାମ୍ବାରିନ୍ ମେହାଁ ଅନ୍ଦ୍ରାର୍ନାତକ୍ ଆସ୍ କାଁଣା ରାଚାସ୍ ଆରୁ ଆକ୍କୁନ୍ ଏରାଲ୍ଦାସ୍ ଆସିନ୍ ୟାହୁଦୀ ମୁଖ୍ୟାର୍ ବିଶ୍ୱାସ୍ ମା କାମର୍। 19ଆବ୍ଡ଼ାରିନ୍ ମେନ୍ଚାର୍, “ଇସ୍ ନିହ୍ମା ହାଦ୍ଦୁସ୍ କାଁଏ, ଏକାସ୍ କା ଜନମ୍ତି କାଁଣା ରାଚାସ୍ ବୁଲି ନିମ୍ ତେଙ୍ଗାଲ୍ଦାର୍? ଆରୁ ଆସ୍ ଆକ୍କୁନ୍ ଏସ୍କେ ଏରା ଅଙ୍ଗାଲ୍ଦାସ୍?” 20ଆସ୍କି ତାଙ୍ଗ୍ୟ-ତାମ୍ବାର୍ ଉତ୍ତର୍ ଚିଚ୍ଚାର୍, “ଏମ୍ତା ଆହ୍ଦାମ୍ କା ଇସ୍ ଏହ୍ମା ହାଦ୍ଦୁସ୍, ଆରୁ ଇସ୍ କାଁଣା ଜନମ୍ ମାନ୍ଚ୍କାଚାସ୍; 21ଲେକିନ୍ ଏମ୍ ବାଲ୍ଦାନିନ୍ କା ଆସ୍ ଆକ୍କୁନ୍ ଏସ୍କେ ଏରା ଅଙ୍ଗାଲ୍ଦାସ୍, ଆରୁ ଇବନ୍ହି ବାଲ୍ଦାମ୍ କା ନେଦ୍ ତାଙ୍ଘା ହାନ୍ନୁନ୍ ବାନେ କାମ୍ଚାର୍; ଆସ୍ ବାଡ଼୍କା ରାଦାସ୍ ଆସିନିନ୍ ମେନା; ଆସ୍ ତାଙ୍ଘା ବାରେନୁ ତାନ୍ ନିଜେ ତେଙ୍ଗା ଅଙ୍ଗସ୍।” 22ଆସ୍କି ତାଙ୍ଗ୍ୟ-ତାମ୍ଵାର୍ ୟାହୁଦୀ ମୁଖ୍ୟାଜାମାରିନ୍ ଏଲ୍ଚାଲିୟାର୍, ହୁଦ୍ଘିଲାଗାନ୍ ଏନ୍ନେ ତେଙ୍ଗିୟାର୍, ଏନ୍ଦେର୍ଗେକା ୟାହୁଦୀ ମୁଖ୍ୟାଜାମାର୍ ଏକ୍ଜୁଟ୍ ମାନିକିରି କାଚ୍ନେଖ୍କାଚାର୍ କା ଯଦି ନେଦିନ୍ ଯୀଶୁସିନ୍ ଖ୍ରୀସ୍ତ୍ ବୁଲି ମାନର୍ ତା, ଆବ୍ଡ଼ାରିନ୍ ସାଭା ଆଡ଼୍ପାନ୍ତି ଅଥ୍ରର୍ଚର୍। 23ହୁଦ୍ଘିଲାଗାନ୍ ତାଙ୍ଗ୍ୟ-ତାମ୍ଵାର୍ ତେଙ୍ଗିୟାର୍ “ଆସ୍ ବାଡ଼୍କା ରାଦାସ୍ ଆସିନିନ୍ ମେନା।”
24ଆଙ୍ଗେନ୍ ୟାହୁଦୀ ମୁଖ୍ୟାର୍ ପହ୍ଲେ କାଁଣା ରୁ ଆଲାସିନ୍ ଆରୁଅହନ୍ ମେହିଁକିରି ତେଙ୍ଗିୟାର୍, “ପାର୍ମେଶ୍ଵାର୍ସ୍କି କସମ୍ ମହିଁକିରି ତେଙ୍ଗା କା ନିନ୍ ସତ୍ତୁନ୍ ତେଙ୍ଗାଲ୍ଦାଏ। ଏମ୍ତା ଆହ୍ଦାମ୍ କା ଆସ୍ ଅଣ୍ଟା ପାପୀ ଆଲାସ୍।” 25ଆଙ୍ଗେନ୍ ଆସ୍ ଉତ୍ତର୍ ଚିଚ୍ଚାସ୍, “ଏନ୍ ବାଲ୍ଦାନ୍ କା ଆସ୍ ପାପୀସ୍କା ମାଲ୍ଦାସ୍; ଏନ୍ ଖାଲି ଅଣ୍ଟା କାତ୍ଥା ଆହ୍ଦାନ୍ କା ଏନ୍ କାଁଣା ରାଚ୍କାନ୍ ଆରୁ ଆକ୍କୁନ୍ ଏରା ଅଙ୍ଗାଲ୍ଦାନ୍।” 26ଆବ୍ଡ଼ାର୍ ଆସିନ୍ ଆରୁଅହନ୍ ମେନ୍ଚାର୍, “ଆସ୍ ନିଙ୍ଘାଗାନେ ଏନ୍ଦେର୍ କାମ୍ଚାସ୍? ଆରୁ ଆସ୍ ଏସ୍କେ ନିଙ୍ଘା ହାନ୍ନୁନ୍ ବାନେ କାମ୍ଚାସ୍?” 27ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ତା ନିମାନ୍ ତେଙ୍ଗା ମୁଞ୍ଜକାଦାନ୍, ଆରୁ ନିମ୍ ଧିୟାନ୍ ମା ଚିଚ୍କାର୍; ଆକ୍କୁନ୍ ଏନ୍ଦେର୍ଗେ ଆରୁଅହନ୍ ମେନା ବେଦ୍ଦାଲ୍ଦାର୍? ନିମ୍ହି ଆସ୍କି ଚେଲା ମାନା ବେଦ୍ଦାଲ୍ଦାର୍ କାଁଏ?” 28ଆଙ୍ଗେନ୍ ଆବ୍ଡ଼ାର୍ ଆସିନ୍ ଖାରାପ୍ କାତ୍ଥା ତେଙ୍ଗିୟାର୍, “ନିନିନ୍ ଆସ୍କି ଚେଲାଏ, ଏମ୍ତା ମୁଶାସ୍କି ଚେଲାମ୍। 29ଏମ୍ ଆହ୍ଦାମ୍ କା ପାର୍ମେଶ୍ଵାର୍ସ୍ ମୁଶାସ୍ଗାନେ କାଚ୍ନେଖ୍ର୍କାଚାସ୍; ଲେକିନ୍ ଏମ୍ ବାଲ୍ଦାମିନ୍ କା ଇ ଆଲାସ୍ ଏକାସ୍ତି ବାର୍ଚ୍କାଦାସ୍।” 30ଆସ୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାସ୍, “ଇଦ୍ ତା ଆଚ୍ମିତ୍ଘି କାତ୍ଥାଦ୍ କା ଆସ୍ ଏଙ୍ଗା ହାନ୍ନୁନ୍ ବାନେ କାମ୍ଚେଇ ଚିଚ୍ଚାସ୍ ହାଲେହି ନିମ୍ ବାଲ୍ଦାରିନ୍ କା ଆସ୍ ଏକାସ୍ତି ବାର୍ଚ୍କାଦାସ୍! 31ଏମ୍ ଆହ୍ଦାମ୍ କା ପାର୍ମେଶ୍ୱାର୍ସ୍ ପାପୀ ଆଲାର୍ଘି କାତ୍ଥାନ୍ ମା ମେନ୍ଦାସ୍, ଲେକିନ୍ ନେରିନ୍ ପାର୍ମେଶ୍ଵାର୍ସ୍କି ଆରାଧାନା କାମ୍ନାଏ ଆରୁ ଆସ୍କି ଇଚ୍ଛା ପୁରା କାମ୍ନାଏ, ତା ଆସ୍ ଆବ୍ଡ଼ାର୍ଘି କାତ୍ଥାନ୍ ମେନ୍ଦାସ୍। 32ଦୁନିଆଁଘି ସୁରୁନ୍ତି ଏକ୍ଲାହି ଏନ୍ନେ ମାଲ୍ଲା ମେନ୍ଦ୍ରୁ କା ନେଦ୍ହି ଜନମ୍ତି କାଣାଁ ରୁ ଆଲାସିନ୍ ବାନେ କାମ୍ଚ୍କାଚାର୍। 33ଯଦି ଇ ଆଲାସ୍ ପାର୍ମେଶ୍ଵାର୍ସ୍କି ତାର୍ତି ମା ବାର୍ଚ୍କାରସ୍ନେ ହାଲେ ତା ଏନ୍ଦେର୍ହି କାମା ପଲ୍ଲଦାସ୍ନେ।” 34ଆବ୍ଡ଼ାର୍ ଆସିନ୍ ଉତ୍ତର୍ ଚିଚ୍ଚାର୍, “ନିନ୍ ତା ପୁରାପୁରୀ ପାପ୍ନୁ ଜନମ୍ ମାନ୍ଚ୍କାଦାଏ, ଆରୁ ନିନ୍ ଏମାନ୍ ଏନ୍ଦେର୍ ଶିଖାବାଲ୍ଦାଏ?” ଆରୁ ଆବ୍ଡ଼ାର୍ ଆସିନ୍ ସାଭା ଆଡ଼୍ପାନ୍ତି ବାହାରି ଅଥରେଇ ଚିଚ୍ଚାର୍।
ଆତ୍ମିକ୍ ରୂପ୍ତି କାଣାଁ
35ଯୀଶୁସ୍ ମେନ୍ଚାସ୍ କା ୟାହୁଦୀ ମୁଖ୍ୟାର୍ ପହ୍ଲେ କାଣାଁ ରୁ ଆଲାସିନ୍ ବାହାରି ଅଥରେଇ ଚିଚ୍କାନାଏ, ତା ଯେତ୍କବାକେନ୍ ଯୀଶୁସ୍ ଆସିନ୍ ଭେଁଟ୍ ମାନ୍ଚାସ୍ ତା ଆସିନ୍ ମେନ୍ଚାସ୍, “ନିନ୍ ମୁନୁଷ୍ ହାଦ୍ଦୁସ୍କି ମିଆଁ ବିଶ୍ଵାସ୍ କାମ୍ଦାଏ କାଁଏ?” 36ଆସ୍ ଉତ୍ତର୍ ଚିଚ୍ଚାସ୍, “ହେ ପ୍ରାଭୁ, ଆସ୍ ନେଦ୍ ତେଙ୍ଗା ଏସ୍କେ କା ଏନ୍ ଆସ୍କି ମିଆଁ ବିଶ୍ଵାସ୍ କାମନ୍।” 37ଯୀଶୁସ୍ ଆସିନ୍ ତେଙ୍ଗିୟାସ୍, “ନିନ୍ ଆସିନ୍ ଏର୍କାଦାଏହି ଆରୁ ଏକାସ୍ ନିଙ୍ଘାଗାନେ କାଚ୍ନେଖ୍ରାଲ୍ଦାସ୍ ଆସ୍ ଆସିନ୍।” 38ଆସ୍ ତେଙ୍ଗିୟାସ୍, “ହେ ପ୍ରାଭୁ, ଏନ୍ ବିଶ୍ଵାସ୍ କାମ୍ଦାନ୍।” ଆରୁ ଆସ୍ ଯୀଶୁସିନ୍ ହାଁଠୁୱାରାଇକିରି ଯୋହାର୍ କାମ୍ଚାସ୍। 39ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ଏନ୍ ଇ ଦୁନିଆଁନୁ ନ୍ୟାୟ କାମାଗେ ବାର୍ଚ୍କାଦାନ୍, ଏସ୍କେ କା ନେଦ୍ ମା ଏର୍ନାଏ ଆବ୍ଡ଼ାର୍ ଏରର୍, ଆରୁ ନେଦ୍ ଏର୍ନାଏ ଆବ୍ଡ଼ାର୍ କାଣାଁ ମାନର୍କର୍।” 40ଏକା ଫାରିସୀର୍ ଯୀଶୁସ୍ଗାନେ ରାଚାର୍ ଆବ୍ଡ଼ାର୍ ଇ କାତ୍ଥା ମେନିକିରି ଆସିନ୍ ତେଙ୍ଗିୟାର୍, “ଏମ୍ହି କାଁଣାମ୍ କାଁଏ?” 41ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯଦି ନିମ୍ କାଣାଁ ରର୍ନେ ହାଲେ ନିମାଗେ ପାପ୍ ମା ଲାଗ୍ଗଦ୍ନେ; ଲେକିନ୍ ନିମ୍ ତେଙ୍ଗାଲ୍ଦାର୍ କା ଏମ୍ ଏରାଲ୍ଦାମ୍, ହୁଦ୍ଘିଲାଗାନ୍ ନିମ୍ ପାର୍ମେଶ୍ୱାର୍ସ୍କି ଆଘ୍ଲି ଦୋଷୀ ମାନର୍।”
10ଯୀଶୁସ୍ ନାହ୍ମାଏ ବାନେ ଭେଡ଼ି ହାପୁସ୍
1ଯୀଶୁସ୍ ତେଙ୍ଗିୟାସ୍ “ଏନ୍ ନିମାନ୍ ସତ୍ତୁସତ୍ତୁ ତେଙ୍ଗାଲ୍ଦାନ୍ କା ଏକାସ୍ ବାଲି ଘୁମା ଖୋଲିକିରି ଭେଡ଼ି ଗୁଡ଼ାନୁ ମା କର୍ଦାସ୍, ଲେକିନ୍ ଏକ୍ରିନ୍ ଦୁସ୍ରା ତାର୍ତି କର୍ଦାସ୍, ଆସ୍ ଚୋରାହାସ୍ ଆରୁ ଡାକୁସ୍। 2ଲେକିନ୍ ଏକାସ୍ ବାଲି ଖୋଲିକିରି ଉଲା କର୍ଦାସ୍ ଆସ୍ ଭେଡ଼ି ହାପୁସ୍। 3ଭେଡ଼ି ଗୁଡ଼ାନ୍ ଜାଗୁସ୍ ଆସ୍ ଭେଡ଼ି ହାପୁସ୍କି ଲାଗାନ୍ ଭେଡ଼ି ଗୁଡ଼ାନ୍ବନ୍ ଖୋଲ୍ଦାସ୍ ଚିଦାସ୍, ଆରୁ ଭେଡ଼ିଗୁଠିଦ୍ ଆସ୍କି ଶବଦ୍ ଚିହ୍ନିଦ୍, ଆରୁ ଆସ୍ ତାଙ୍ଘାଏ ଭେଡ଼ିଗୁଠିନ୍ ନାମେ ଧାରିକିରି ମେହଁଦାସ୍ ଆରୁ ବାହାରି ହଦାସ୍କାଦାସ୍। 4ଯେତ୍କବାକେନ୍ ଆସ୍ ତାଙ୍ଘାଏ ଜାମା ଭେଡ଼ିବନ୍ ଅଥ୍ରା ମୁଞ୍ଜଦାସ୍, ତା ଆବ୍ଡ଼ାଘି ଆଘ୍ଲି-ଆଘ୍ଲି କାଦାସ୍, ଆରୁ ଭେଡ଼ିଗୁଠିଦ୍ ଭେଡ଼ି ହାପୁସ୍କି ଶବଦ୍ବନ୍ ଚିହ୍ନିଦ୍ ହୁଦ୍ଘିଲାଗାନ୍ ଆସ୍କି ପାଛ୍ଲି-ପାଛ୍ଲି କାଇଦ୍। 5ଲେକିନ୍ ଭେଡ଼ିଦ୍୧୦:୫ ୟାହୁଦୀନୁ ଦୁସ୍ରା-ଦୁସ୍ରା ଆଲାର୍ ତାହ୍ମା ଭେଡ଼ିଗୁଠିନ୍ ଅଣ୍ଟା ଭେଡ଼ି ଗୁଦ୍ଡ଼ିନୁ ମାଁହାବାକେନ୍ ଉଇୟାଲିୟାର୍ ଆରୁ ପାଇରି ଜାମା ଚାର୍ୱାହାର୍ ବାରିକିରି ତାହ୍ମା ଭେଡ଼ିଘି ନାମେ ହୋଇକିରି ମେହାଁଲିୟାର୍, ଆଙ୍ଗେନ୍ ଭେଡ଼ିଗୁଠିଦ୍ ବାହ୍ରି ବାରାଲିୟାଦ୍। ଅଚିହ୍ନାର୍ ଆଲାସ୍କି ପାଛ୍ଲି-ପାଛ୍ଲି ମା କାଇ, ଆସ୍ତି ବୁଙ୍ଗିଦ୍, ଏନ୍ଦେର୍ଗେକା ଆଦ୍ ଅଚିହ୍ନାର୍ ଆଲାର୍ଘି ଶବଦ୍ବନ୍ ମା ଚିହ୍ନିଦ୍।” 6ଯୀଶୁସ୍ ଆବ୍ଡ଼ାରିନ୍ ଇ ନମୁନା ତେଙ୍ଗିୟାସ୍, ଲେକିନ୍ ଆବ୍ଡ଼ାର୍ ମା ବୁଝ୍ରାର୍ କା ଯୀଶୁସ୍ ଆବ୍ଡ଼ାରିନ୍ ଏନ୍ଦେର୍ କାତ୍ଥାନ୍ ତେଙ୍ଗାଲ୍ଦାସ୍।
7ଯୀଶୁସ୍ ଆରୁଅହନ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା, ଭେଡ଼ିଘି ବାଲିନ୍ ଏନିନ୍। 8ଏଙ୍ଘାସ୍ତି ଆଘ୍ଲି ଯେତ୍କ ବାର୍ଚ୍କାଚାର୍ ଆବ୍ଡ଼ାର୍ଜାମାର୍ ଚୋର୍ହାର୍ ଆରୁ ଡାକୁର୍, ଲେକିନ୍ ଭେଡ଼ିଦ୍ ଆବ୍ଡ଼ାର୍ଘି ଶବଦ୍ବନ୍ ମା ମେନ୍ଚାଦ୍। 9ଏନିନ୍ ବାଲିନ୍; ଯଦି ଏକାସ୍ ଏଙ୍ଘାସ୍ତି ମାନିକିରି ଉଲା କରସ୍, ତା ଆସ୍ ପାପ୍ତି ବାଛ୍ରସ୍, ଆରୁ ଆସ୍ ଉଲା କରା ଅଙ୍ଗସ୍ ଆରୁ ବାହ୍ରିହି ଉର୍ଖା ଅଙ୍ଗସ୍ ଆରୁ ଆସ୍କେ ହାପାଗେ ଆଡ୍ଡା ହାଖ୍ଖରଦ୍। 10ଚୋରାହାସ୍ ଖାଲି ହାଡ଼ାଗେ ଆରୁ ପିଟାଗେ ଆରୁ ନାଶ୍ କାମାଗେ ବାର୍ଦାସ୍; ଲେକିନ୍ ଏନ୍ତା ଜୀବନ୍ ଚିୟାଗେ ବାର୍ଚ୍କାଦାନ୍, ଏନ୍ ଭାର୍ପୁର୍ ଜୀବନ୍ ଚିଦାନ୍। 11ଏନ୍ ବାନେ ଚାର୍ୱାହାନ୍; ବାନେ ହାପୁସ୍ ତାଙ୍ଘା ଭେଡ଼ିଗୁଠିଘି ଲାଗାନ୍ ତାଙ୍ଘା ଜୀଆ ଚିଦାସ୍ ଲାଗ୍ଗଦାସ୍। 12ଭେଡ଼ି ହାପୁସ୍ ଏକାସ୍ ପାଏସା ହୋଇକିରି ଭେଡ଼ି ହାପ୍ଦାସ୍ ଆରୁ ଭେଡ଼ିଗୁଠିଦ୍ ଆସ୍କି ନିଜର୍ ମାଲ୍ଲିଦ୍, ଆସ୍ ଡୁରୁଘି ବାର୍ନାବନ୍ ଏରିକିରି ଭେଡ଼ିଗୁଠିନ୍ ଆମ୍ଵିକିରି ବୁଙ୍ଗ୍ଦାସ୍ ଚିଦାସ୍; ଆରୁ ଡୁରୁଦ୍ ଭେଡ଼ିଗୁଠିନ୍ ଧାରିକିରି ଛିଛିର୍ଛାନ୍ଦ୍ କାମିଚିଇଦ୍। 13ଆସ୍ ଭେଡ଼ିବନ୍ ଆମ୍ବିକିରି ବୁଙ୍ଗ୍ଦାସ୍ ଚିଦାସ୍ ଏନ୍ଦେର୍ଗେକା ଆସ୍ ଭେଡ଼ି ପାଏସାଘି ଲାଗାନ୍ ଭେଡ଼ି ହାପ୍ଦାସ୍ ଆରୁ ଆସ୍କେ ଭେଡ଼ିଘି ଚିନ୍ତା ମା ରାଇ। 14ଏନ୍ ବାନେ ହାପୁନ୍; ଏସ୍କେ କା ବାଙ୍ଗ୍ସ୍ ଏଙ୍ଗାନ୍ ଆହ୍ଦାସ୍, ଆରୁ ଏନ୍ହି ବାଙ୍ଗ୍ସିନ୍ ଆହ୍ଦାନ୍। 15ହନ୍ନେନ୍ ଏନ୍ ଏଙ୍ଘା ଭେଡ଼ିଗୁଠିନ୍ ଆହ୍ଦାନ୍ ଆରୁ ଏଙ୍ଘା ଭେଡ଼ିଦ୍ ଏଙ୍ଗାନ୍ ଆହିଦ୍। ଆରୁ ଏନ୍ ଭେଡ଼ିଘି ଲାଗାନ୍ ଏଙ୍ଘା ଜୀଆ ଚିଦାନ୍ ଲାଗ୍ଗଦାନ୍। 16୧୦:୧୬ ଏଙ୍ଘାଏ ଆରୁହି ଭେଡ଼ିଗୁଠିଦ୍ ରାଇ: ଇବ୍ଡ଼ାର୍ ବିନାୟାହୁଦୀର୍ଏଙ୍ଘାଏ ଆରୁହି ଭେଡ଼ିଗୁଠିଦ୍ ରାଇ, ଏକାଦ୍ କା ଇ ଭେଡ଼ି ଗୁଡ଼ାନ୍ତା ମାଲ୍ଲିଦ୍। ଏଙ୍ଗା ଆବ୍ଡ଼ାନ୍ହି ଅନ୍ଦ୍ରନା ଜରୁରୀ ରାଇ। ଆବ୍ଡ଼ାର୍ ଏଙ୍ଘାଏ ଶବଦ୍ବନ୍ ମେନର୍, ଆଙ୍ଗେନ୍ ଅଣ୍ଟା ଖାଲି ଗୁଟ୍ଟଠି ରଦ୍ ଆରୁ ଅଣ୍ଟା ହାପୁସ୍ ରସ୍। 17ବାଙ୍ଗ୍ସ୍ ଏଙ୍ଗାନ୍ ବାନେ ହାଖ୍ଖଦାସ୍ ହୁଦ୍ଘିଲାଗାନ୍ ଏନ୍ ଏଙ୍ଗା ଜୀଆ ଚିଦାନ୍ ଲାଗ୍ଗଦାନ୍ ଆରୁ ଏନ୍ ଆରୁଅହନ୍ ଉଜ୍ଜନ୍କନ୍। 18ନେଦ୍ହି ଏଙ୍ଘା ଜୀଆନ୍ ଏଙ୍ଘାସ୍ତି ମା ହନାଏ, ଏନ୍ ନିଜର୍ ଇଚ୍ଛାତି ଜୀଆ ଚିଦାନ୍। ଏଙ୍ଗାଗେ ଇବନ୍ ଚିୟାଗେ ହକ୍ ରାଇ, ଆରୁ ଇବନ୍ ଆରୁଅହନ୍ ହୁଆଗେହି ହକ୍ ରାଇଦ୍: ଇ ହୁକୁମ୍ ଏଙ୍ଗାଗେ ଏଙ୍ଘା ବାଙ୍ଗ୍ସ୍ତି ହାଖ୍ଖର୍କିଚି।”
19ଇ କାତ୍ଥାଘି କାରଣ୍ ୟାହୁଦୀ ଆଲାର୍ ଆରୁଅହନ୍ ଭାଗ୍-ଭାଗ୍ ମାନ୍ଚାର୍ କେରାର୍। 20ଆବ୍ଡ଼ାର୍ଘି ଭିତର୍ତି ଢେର୍ ଆଲାର୍ ତେଙ୍ଗାଗେ ଲାଗ୍ଗିୟାର୍, “ଇସ୍କିନୁ ଭୁତ୍ତୁ ରାଇ, ଆରୁ ଇସ୍ ବାୟହାସ୍; ଏନ୍ଦେର୍ଗେ ଇସ୍କି କାତ୍ଥାନ୍ ମେନାଲ୍ଦାର୍?” 21ଆରୁ ଦୁସ୍ରା ଆଲାର୍ ତେଙ୍ଗିୟାର୍, “ଇ କାତ୍ଥାଦ୍ ଏନ୍ନେ ଆଲାସ୍କି ମାଲ୍ଲିଦ୍ ଏକାସ୍କିନୁ କା ଭୁତ୍ତୁ ରାଇ। ଭୁତ୍ତୁଦ୍ କାଁଏ କାଁଣାସିନ୍ ବାନେ କାମା ଅଙ୍ଗିଦ୍?”
ୟାହୁଦୀ ଆଲାର୍ ଯୀଶୁସିନ୍ ବିଶ୍ୱାସ୍ ମା କାମାଲ୍ନାଏ
22ଯେରୁଶାଲେମ୍ନୁ ମନ୍ଦିର୍ଘି ପ୍ରତିଷ୍ଟା ପରବ୍ ମାନ୍ଚା ଆରୁ ହତ୍କବାକେନ୍ ପାଇଁୟା ଉଲ୍ଲା ରାଚା। 23ଯୀଶୁସ୍ ମନ୍ଦିର୍ଘି ବାହ୍ରି୧୦:୨୩ ଇ ମଣ୍ଡପ୍ଦ୍ ଶୁଲେମାନ୍ସ୍କି ମାଲ୍ଲାରୁଦ୍, ଲେକିନ୍ ଶୁଲେମାନ୍ସିନ୍ ସମ୍ମାନ୍ ଚିୟାଗେ ଆ ମଣ୍ଡପ୍ବନ୍ ତାଙ୍ଘା ନାମେ ଚିଆ କେର୍କିଚା। ଶୁଲେମାନ୍ ନାମେଘି ମଣ୍ଡପ୍ନୁ କୁଦ୍ଦାଲିୟାସ୍। 24ଆନ୍ତିନ୍ ୟାହୁଦୀ ଆଲାର୍ ଆସିନ୍ ଚାରି ପାଖାନ୍ତି ଘେରିକିରି ମେନାଗେ ଲାଗ୍ଗିୟାର୍, “ଆରୁ କେତ୍କ ଉଲ୍ଲାତକ୍ ଏମାନ୍ ଶାକ୍ନୁ ଉଇୟୋ? ଯଦି ନିମ୍ ଖ୍ରୀସ୍ତ୍ତା ଏମାନ୍ ସାଫା-ସାଫା ତେଙ୍ଗାଚା।” 25ଯୀଶୁସ୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାସ୍, “ଏନ୍ ନିମାନ୍ ଆଘ୍ଲିନ୍ତି ତେଙ୍କାନ୍ଚ୍କାନ୍, ଲେକିନ୍ ନିମ୍ ବିଶ୍ଵାସ୍ହି ମା କାମ୍ଦାର୍। ଏକା ନାଲ୍ଖୁନ୍ ଏନ୍ ଏଙ୍ଘାଏ ବାଙ୍ଗ୍ସ୍କି ନାମେତି କାମ୍ଦାନ୍ ଆବ୍ଡ଼ାଦ୍ ଏଙ୍ଘା ସାକ୍ଷୀ ଚିଇଦ୍। 26ଲେକିନ୍ ନିମ୍ ବିଶ୍ଵାସ୍ ମା କାମ୍ଦାର୍, ଏନ୍ଦେର୍ଗେକା ନିମ୍ ଏଙ୍ଘା ଭେଡ଼ି ମାଲ୍ଦାର୍। 27ଏଙ୍ଘା ଭେଡ଼ିଦ୍ ଏଙ୍ଘା ଶବଦ୍ବନ୍ ମେନିଦ୍; ଆରୁ ଏନ୍ ଆବ୍ଡ଼ାନ୍ ଆହ୍ଦାନ୍, ଆରୁ ଆବ୍ଡ଼ାଦ୍ ଏଙ୍ଘା ପାଛ୍ଲି-ପାଛ୍ଲି ବାରିଦ୍; 28ଆରୁ ଏନ୍ ଆବ୍ଡ଼ାର୍ଗେ ସବୁଦିନ୍ତା ଜୀବନ୍ ଚିଦାନ୍। ଆବ୍ଡ଼ାର୍ ଏକ୍ଲାହି ନାଶ୍ ମା ମାନ୍ନାଏ, ଆରୁ ନେଦ୍ହି ଆବ୍ଡ଼ାରିନ୍ ଏଙ୍ଘାସ୍ତି ଲୁଟା ହୁଆ ପଲ୍ଲନାଇନ୍। 29ଏଙ୍ଘା ବାଙ୍ଗ୍ସ୍, ଆବ୍ଡ଼ାରିନ୍ ଏକାରିନ୍ କା ଏଙ୍ଗାଗେ ଚିଚ୍କାଦାସ୍, ଆସ୍ ଜାମାର୍ଘିନ୍ତି ମାହାନ୍ସ୍ ଆରୁ ନେଦ୍ହି ଆବ୍ଡ଼ାରିନ୍ ଏଙ୍ଘା ବାଙ୍ଗ୍ସ୍କି ହେଖ୍ଖାସ୍ତି ଲୁଟା ହୁଆ ପଲ୍ଲନାଇନ୍। 30୧୦:୩୦ ଯୀଶୁସ୍ ଆରୁ ତାଙ୍ଘା ବାଙ୍ଗ୍ସ୍ ଏନ୍ନେ ମିଶ୍ରିକିରି ରାନାଏ ଏକାଦ୍ କା ନାହ୍ମା ବୁଝ୍ର୍ନାଘି ବାହ୍ରି ରାଇ। ଅଣ୍ଟା ପାର୍ମେଶ୍ୱାର୍ ରାନାଏ ଆରୁ ଯୀଶୁ ଆରୁ ତାଙ୍ଘା ବାଙ୍ଗ୍ସ୍ ଦୁହି ଲୋକ୍ ପାର୍ମେଶ୍ୱାର୍। ଲେକିନ୍ ଆବ୍ଡ଼ାର୍ ଭିନେ-ଭିନେ ଆଲାର୍। ଆବ୍ଡ଼ା ଦୁହି ଲୋକ୍ଘି ଅଣ୍ଟାନିନ୍ ସାଭାବ୍, ଅଣ୍ଟାଇନ୍ ଇଚ୍ଛା, ଅଣ୍ଟାନିନ୍ ଶକ୍ତି, ଅଣ୍ଟା ବଚନ୍ ଆରୁ ଅଣ୍ଟାଇନ୍ ନାଲ୍ଖୁ ରାଇ।ଏନ୍ ଆରୁ ବାଙ୍ଗ୍ସ୍ ଅଣ୍ଟାମିନ୍।”
31ୟାହୁଦୀ ଆଲାର୍ ଯୀଶୁସିନ୍ ପିଟାଗେ ଆରୁଅହନ୍ ଚାଁଚାତି ଲେବ୍ଡ଼ାଚାର୍। 32ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ଏଙ୍ଘା ବାଙ୍ଗ୍ସ୍କି ଶକ୍ତିତି ଢେର୍ ବାନେ-ବାନେ ନାଲ୍ଖୁ କାମ୍ଚ୍କାଦାନ୍ ଆରୁ ନିମ୍ ଏର୍କାଦାର୍; ଆରୁ ଆବ୍ଡ଼ାସ୍ତି ଏକା ନାଲ୍ଖୁଘି ଲାଗାନ୍ ନିମ୍ ଏଙ୍ଗାନ୍ ଚାଁଚାତି ଲେବ୍ଡ଼ା ପିଟା ବେଦ୍ଦାଲ୍ଦାର୍?” 33ୟାହୁଦୀ ଆଲାର୍ ଆସିନ୍ ଉତ୍ତର୍ ଚିଚ୍ଚାର୍, “ଏନ୍ଦ୍ରିନ୍ ବାନେ ନାଲ୍ଖୁଘି ଲାଗାନ୍ ଏମ୍ ନିଙ୍ଗାନ୍ ଚାଁଚାତି ମା ଲେବ୍ଡ଼ାଲ୍ଦାମ୍ ଲେକିନ୍ ନିନ୍ ପାର୍ମେଶ୍ଵାର୍ସ୍କି ନିନ୍ଦା କାମାଲ୍ଦାଏ; ଆରୁ ନିନ୍ ଅଣ୍ଟା ମୁନୁଷ୍ ହୋଇକିରି ନିଜ୍କେନିଜ୍ବନ୍ ପାର୍ମେଶ୍ଵାର୍ ବୁଲି ତେଙ୍ଗାଲ୍ଦାଏ।” 34ଯୀଶୁସ୍ ଆବ୍ଡ଼ାରିନ୍ ଉତ୍ତର୍ ଚିଚ୍ଚାସ୍, “ନିହ୍ମାଏ ପାବିତାର୍ ଶାସ୍ତ୍ରନୁ ଲେଖ୍ଚ୍କା ମାଲ୍ଲାଦିନ୍ କାଁଏ, ‘ଏନ୍ ତେଙ୍କାନ୍ କା ନିମ୍ ଜାମାର୍ ଦେବ୍ତାର୍’? 35ଏକା ଆଲାର୍ଗେ ପାର୍ମେଶ୍ଵାର୍ସ୍କି ବଚନ୍ ହାଖ୍ଖର୍କିଚି, ଆବ୍ଡ଼ାରିନ୍ ଯଦି ଆସ୍, ତେଙ୍ଗିୟାସ୍ ନିମ୍ ଜାମାର୍ ଦେବ୍ତାର୍ (ଆରୁ ପାର୍ମେଶ୍ୱାର୍ସ୍କି ବଚନ୍ବନ୍ ଏକ୍ଲାହି ବାଦ୍ଲା ପଲ୍ଲଦାରିନ୍), 36ହାଲେ ନେକାନ୍ ପାର୍ମେଶ୍ୱାର୍ସ୍ ପାବିତାର୍ କାମିକିରି ଦୁନିଆଁନୁ ତାଇୟାସ୍, ଆସିନ୍ ନିମ୍ ପାର୍ମେଶ୍ୱାର୍ସ୍କି ନିନ୍ଦା କାମାଲ୍ଦାସ୍ ବୁଲି ତେଙ୍କାଲ୍ଦାର୍, ଏନ୍ଦେର୍ଗେକା, ‘ଏନ୍ ପାର୍ମେଶ୍ୱାର୍ସ୍କି ହାଦ୍ଦୁନ୍ ବୁଲି ତେଙ୍କାନ୍’? 37ଯଦି ଏନ୍ ଏଙ୍ଘା ବାଙ୍ଗ୍ସ୍ଘି ନାଲ୍ଖୁ ମା କାମ୍ଦାନ୍, ତା ଏଙ୍ଗାନ୍ ବିଶ୍ଵାସ୍ ଆମା କାମା। 38ଲେକିନ୍ ଯଦି ଏନ୍ କାମ୍ଦାନ୍, ହାଲେହି ଯଦି ନିମ୍ ଏଙ୍ଗାନ୍ ବିଶ୍ଵାସ୍ ମା କାମ୍ଦାର୍, ଏନ୍ ଏକା ନାଲ୍ଖୁନ୍ କାମ୍ଦାନ୍ ଆବନ୍ତା ବିଶ୍ୱାସ୍ କାମା, ହାଲେ ନିମ୍ ଆହର୍ ଆରୁ ବୁଝ୍ରର୍ କା ବାଙ୍ଗ୍ସ୍ ଏଙ୍ଘାଏନୁ ରାଦାସ୍ ଆରୁ ଏନ୍ ବାଙ୍ଗ୍ସ୍କିନୁ ରାଦାନ୍।” 39ଆଙ୍ଗେନ୍ ଆବ୍ଡ଼ାର୍ ଆସିନ୍ ଧାରାଗେ ଆରୁଅହନ୍ କୋଶିଷ୍ କାମାଗେ ଲାଗ୍ଗିୟାର୍, ଲେକିନ୍ ଯୀଶୁସ୍ ଆବ୍ଡ଼ାର୍ଘି ହେଖ୍ଖାନ୍ତି ବାଛ୍ରାସ୍ କେରାସ୍।
40ଇଦ୍ଘି ପାଛ୍ଲି ଯୀଶୁସ୍ ଆରୁଅହନ୍ ଯାର୍ଦାନ୍ ଯୋଡ଼ୁଘି ହାପାଖା ବୁଙ୍ଗିୟାସ୍ କେରାସ୍, ଏକାସାନ୍ କା ଯୋହାନ୍ସ୍ ଆଘ୍ଲି ଆସ୍ନାନ୍ ଚିଆଲିୟାସ୍, ଆରୁ ଆସାନିନ୍ ରାଚାସ୍। 41ଆରୁ ଢେର୍ ଆଲାର୍ ଯୀଶୁସ୍କି ଚାହାଗେ ବାରିକିରି କାଚ୍ଚନେଖ୍ରାଲିୟାର୍, “ଆସ୍ନାନ୍ ଚିଉ ଯୋହାନ୍ସ୍ ତା ଏନ୍ଦେର୍ହି ଅଦ୍ଭୁତ୍ ନାଲ୍ଖୁ ମାଲ୍ଲା କାମୁସ୍, ଲେକିନ୍ ଇ ଆଲାସ୍କି ବାରେନୁ ଯୋହାନ୍ସ୍ ଏକା କାତ୍ଥା ତେଙ୍କାଚାସ୍, ଆ ଜାମାଦ୍ ସତ୍ତୁଦ୍।” 42ଆରୁ ଆସାନ୍ ଢେର୍ ଆଲାର୍ ଯୀଶୁସ୍କି ମିଆଁ ବିଶ୍ଵାସ୍ କାମ୍ଚାର୍।
11ଲାଜ୍ରୁସ୍କି ଖିନା
1-2ବେଥାନିୟା ପାଡ଼ାନୁ ଲାଜ୍ରୁସ୍ ନାମେଘି ଅଣ୍ଟା ଆଲାସ୍ ବେମାର୍ ରାଚାସ୍। ଆସ୍କି ଯୋଡ଼େ ବୁହୁଣୀ ରାଚାର୍ ମାରିୟାମ୍ ଆରୁ ମାର୍ଥା। ଆଦ୍ ଆ ମାରିୟାମ୍ ଏକାଦ୍ କା ପ୍ରାଭୁସ୍କି ହେଡ୍ଡୁନୁ ବାସ୍ନା ଇସୁଙ୍ଗ୍ ତୁନ୍ଦିୟା ଆରୁ ନିଜର୍ ଚୁଟ୍ଟିତି ନିଡ଼୍ଗିୟାଦ୍। 3ହୁଦ୍ଘିଲାଗାନ୍ ଆସ୍କି ବୁହୁଣୀଜାମାର୍ ଯୀଶୁସ୍କି ଚାହାଗେ ତେଙ୍ଗା ତାଇୟାର୍, “ହେ ପ୍ରାଭୁ, ମେନା, ନେକାନ୍ ନିନ୍ ମୁରୁକ୍ ବାନେ ହାଖ୍ଖଦାଏ, ଆସ୍ ବେମାର୍ ରାଦାସ୍।” 4ଇବନ୍ ମେନିକିରି ଯୀଶୁସ୍ ତେଙ୍ଗିୟାସ୍, “ଇ ବେମାର୍ଦ୍ ଖିନାଘି ଲାଗାନ୍ ମାଲ୍ଲିଦ୍; ଲେକିନ୍ ଇଦ୍ ପାର୍ମେଶ୍ଵାର୍ସ୍କି ମାହିମା ମାନ୍ନାଘି ଲାଗାନ୍ ରାଇ, ଆରୁ ଇ ବେମାର୍ଘି ଦ୍ୱାର୍ନୁ ପାର୍ମେଶ୍ଵାର୍ସ୍ ତାଙ୍ଘା ହାଦ୍ଦୁସ୍କି ମାହାନ୍ତାବନ୍ ଏଦୋସ୍।”
5ଯୀଶୁସ୍ ମାର୍ଥା ଆରୁ ତାଙ୍ଘା ବୁହୁଣୀ ଆରୁ ଲାଜ୍ରୁସ୍ସିନ୍ ବାନେ ହାଖ୍ଖାଲିୟାସ୍। 6ହାଲେହି ଯେତ୍କବାକେନ୍ ଆସ୍ ମେନ୍ଚାସ୍ କା ଲାଜ୍ରୁସ୍ ବେମାର୍ ରାଦାସ୍ତା, ଆସ୍ ଏକା ଆଡ୍ଡାସାନ୍ ରାଚାସ୍, ଆସାନିନ୍ ଆରୁ ଦୁଇ ଦିନ୍ ରାଚାସ୍କେରାସ୍। 7ହୁଦ୍ଘିପାଛ୍ଲି ଯୀଶୁସ୍ ଚେଲାଜାମାରିନ୍ ତେଙ୍ଗିୟାସ୍, “ଗୁଚା, ନାମ୍ ଆରୁଅହନ୍ ୟାହୁଦୀଆ ପ୍ରଦେଶ୍ଗେ କତ୍।” 8ଚେଲାଜାମାର୍ ଆସିନ୍ ତେଙ୍ଗିୟାର୍, “ହେ ଗୁରୁ, କେତ୍କ ଉଲ୍ଘି ଆଘ୍ଲି ୟାହୁଦୀ ମୁଖ୍ୟାଜାମାର୍ ନିମାନ୍ ଚାଁଚାତି ଲେବ୍ଡ଼ା ପିଟା ବେଦ୍ଦାଲିୟାର୍, ଆରୁ ନିମ୍ ଏନ୍ଦେର୍ଗେ ଆରୁହି ଆସାନ୍ କାଲା ବେଦ୍ଦାଲ୍ଦାର୍?” 9ଯୀଶୁସ୍ ଉତ୍ତର୍ ଚିଚ୍ଚାସ୍, “ଅନ୍ଦୁଲ୍ନୁ ବାର ଘାଣ୍ଟା ମା ମାନିଦ୍ କାଁଏ? ଯଦି ଏକାସ୍ ଉଲ୍ଲା ବାକେନ୍ ଏକ୍ଦାସ୍ ତା ଠୋକର୍ ମା ମହ୍ଁଦାସ୍, ଏନ୍ଦେର୍ଗେକା ଆସ୍ ଇ ଦୁନିଆଁନ୍ତା ବିଲ୍ଲୀନ୍ ଏର୍ଦାସ୍। 10ଲେକିନ୍ ଏକାସ୍ ମାଁହାବାକେନ୍ ଏକ୍ଦାସ୍ ତା ଆସ୍ ଠୋକର୍ ମହ୍ଁଦାସ୍, ଏନ୍ଦେର୍ଗେକା ମାଁହାବାକେନ୍ ବିଲ୍ଲୀ ମା ରାଇ।” 11ଯୀଶୁସ୍ ଇ କାତ୍ଥାନ୍ ତେଙ୍ଗିୟାସ୍, ଆରୁ ଆଦ୍ଘି ପାଛ୍ଲି ଆସ୍ ତେଙ୍ଗାଗେ ଲାଗ୍ଗିୟାସ୍, “ନାହ୍ମାଏ ସାଙ୍ଗେସ୍ ଲାଜ୍ରୁସ୍ ହାନ୍ଦ୍ରାସ୍ କେର୍କାଦାସ୍, ଲେକିନ୍ ଏନ୍ ଆସିନ୍ ଏଜାଗେ କାଲ୍ଦାନ୍।” 12ଆନ୍ତିନ୍ ଚେଲାର୍ ଆସିନ୍ ତେଙ୍ଗିୟାର୍, “ହେ ପ୍ରାଭୁ, ଯଦି ଆସ୍ ହାନ୍ଦ୍ରାଲ୍ଦାସ୍, ତା ଆସ୍ ବାନେ ମାନସ୍କସ୍।” 13ଯୀଶୁସ୍ ତା ଲାଜ୍ରୁସ୍କି କେଚ୍ଚକାଘି ବାରେନୁ ତେଙ୍ଗାଲିୟାସ୍, ଲେକିନ୍ ଆବ୍ଡ଼ାର୍ ବୁଝ୍ରାର୍ କା ଆସ୍ ହାନ୍ଦ୍ରାର୍ନାଘି ବାରେନୁ ତେଙ୍ଗାଲ୍ଦାସ୍। 14ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ସାଫା-ସାଫା ତେଙ୍ଗେଚିଚ୍ଚାସ୍ କା, “ଲାଜ୍ରୁସ୍ କେଚ୍ଚାସ୍ କେର୍କାଦାସ୍; 15ଏନ୍ ନିହ୍ମା ଲାଗାନ୍ ଖୁସ୍ ରାଦାନ୍ କା ଏନ୍ ଆସାନ୍ ମାଲ୍ଲା ରୁନ୍ ଏନ୍ଦେର୍ଗେକା ଇଦ୍ଘିଲାଗାନ୍ ନିମ୍ ଏଙ୍ଘା ମିଆଁ ବିଶ୍ଵାସ୍ କାମର୍। ଲେକିନ୍ ଆକ୍କୁନ୍ ବାରା, ନାମ୍ ଆସ୍କି ଚାହାଗେ କତ୍।” 16ଆନ୍ତିନ୍ ଥୋମାସ୍ ଏକାସିନ୍କା ଯାଅଁଣା ବାଲିୟାର୍, ତାଙ୍ଘା ସାଙ୍ଗେ ଚେଲାରିନ୍ ତେଙ୍ଗିୟାସ୍, “ନାମ୍ହି ଆସ୍ଗାନେ ଖିଆଗେ କତ୍।”
ଯୀଶୁସ୍ ଆରୁଅହନ୍ ଲାଜ୍ରୁସ୍ସିନ୍ ଉଜ୍ଜତାଚାସ୍
17୧୧:୧୭ ଏକିନ୍ ଆଲାର୍ କେଚ୍ଚକା ପାଛ୍ଲି ଆସ୍କି ଶରୀର୍ଘି ଚାହାନୁ ଆସ୍କି ଆତ୍ମାଦ୍ ତିନ୍ ଦିନ୍ତକ୍ ରାଇଦ୍, ଆଦ୍ଘି ପାଛ୍ଲି ଆସିନ୍ ଆମ୍ବିକିରି ସବୁଦିନ୍ଘି ଲାଗାନ୍ ବୁଙ୍ଗିଚି, ତା ଚାର୍ଦିନ୍ତି ଅଣ୍ଟା ଆଲାସ୍ ପୁରାପୁରୀ ଖିଦାସ୍କାଦାସ୍ ବୁଲିକିରି ୟାହୁଦୀ ଜାମାର୍ଘି ଗୁରୁର୍ ଅଣ୍ଟା ତେଙ୍କାରାଇ। ଆସାନ୍ ଆଣ୍ସ୍କାନ୍ତି ଯୀଶୁସ୍ ଆଖ୍ଖାସ୍ କା ଲାଜ୍ରୁସ୍ସିନ୍ ମାସ୍ଣାନୁ ଉଇକାଦ୍ ଚାର୍ଦିନ୍ ମାନ୍ଚା କେର୍କିଚା। 18ବେଥାନିୟା ପାଡ଼ାଦ୍ ଯେରୁଶାଲେମ୍ ସହର୍ସ୍ତି ଲାଗ୍ଭାଗ୍ ତିନ୍ କିଲୋମିଟର୍ ଗେଚ୍ଛାନୁ ରାଚା। 19ମାର୍ଥା ଆରୁ ମାରିୟାମ୍ଘି ଭାଇସ୍କି ଖିନାନ୍ ମେନିକିରି ଢେର୍ ୟାହୁଦୀର୍ ଆବ୍ଡ଼ାର୍ଘି ଚାହାଗେ ଆବ୍ଡ଼ାରିନ୍ ଦିଲାସା ଚିୟାଗେ ବାର୍ଚ୍କାଚାର୍। 20୧୧:୨୦ ଯେତ୍କବାକେନ୍ ଅଣ୍ଟା ଆଲାସ୍ ଖିଦାସ୍ ତା ତାଙ୍ଘା ଚାହାନ୍ତା ଜାତି କୁଟୁମ୍ବର୍ ଏକ୍ ହାଟ୍ଟେତକ୍ ହେଁହ୍ଲାନୁ ଅକ୍କିକିରି ଅହ୍ଲାଲିୟାର୍। ଇଦ୍ ୟାହୁଦୀ ଜାମାର୍ଘି ଅଣ୍ଟା ରୀତିଦ୍। ଆକ୍କୁନ୍ହି ଆଲାର୍ ଇ ରୀତିବନ୍ ପାଲନ୍ କାମ୍ନାଏ। ଯେତ୍କବାକେନ୍ ମାର୍ଥାଦ୍ ଯୀଶୁସ୍କି ବାର୍ନାନ୍ ମେନ୍ଚା ତା ଆସିନ୍ ଭେଁଟ୍ ମାନାଗେ କେରାଦ୍, ମାରିୟାମ୍ଦ୍ ଆଡ଼୍ପାନୁନିନ୍ ଅକ୍କିଚା। 21ମାର୍ଥାଦ୍ ଯୀଶୁସିନ୍ ତେଙ୍ଗିୟାଦ୍, “ହେ ପ୍ରାଭୁ, ଯଦି ନିମ୍ ଇସାନ୍ ରାଚ୍କାରର୍ନେ ତା, ଏଙ୍ଗା ଭାଇସ୍ ମା ଖିୟସ୍ନେ। 22ଆରୁ ଆକ୍କୁନ୍ହି ଏନ୍ ଆହେନ୍କା ନିମ୍ ପାର୍ମେଶ୍ଵାର୍ସ୍ତି ଏନ୍ଦ୍ରିନ୍ଭି ନିଅଁର୍, ପାର୍ମେଶ୍ଵାର୍ସ୍ ନିମାଗେ ଚିୟସ୍।” 23ଯୀଶୁସ୍ ମାର୍ଥାବନ୍ ତେଙ୍ଗିୟାସ୍, “ନିଙ୍ଘା ଭାଇସ୍ ଆରୁଅହନ୍ ଉଜ୍ଜସ୍।” 24ମାର୍ଥାଦ୍ ଯୀଶୁସିନ୍ ତେଙ୍ଗିୟାଦ୍, “ଏନ୍ ଆହେନ୍କା ଆଖ୍ରୀ ଉଲ୍ଲାନୁ ଆରୁଅହନ୍ ଉଜ୍ଜନାଘି ସାମାୟନୁ ଆସ୍ ଉଜ୍ଜସ୍।” 25ଯୀଶୁସ୍ ଆବନ୍ ତେଙ୍ଗିୟାସ୍, “ଏନିନ୍ ଆରୁଅହନ୍ ଉଜ୍ଜତାନା ବାଲା ଆରୁ ଜୀବନ୍ ଚିନାବାଲାନ୍; ଏକାସ୍ ଏଙ୍ଘା ମିଆଁ ବିଶ୍ଵାସ୍ କାମ୍ଦାସ୍ ଆସ୍ ଯଦି ଖିଅସ୍କସ୍ ହାଲେହି ଉଜ୍ଜସ୍, 26ଆରୁ ଏକାର୍ ଉଜ୍ଜାଲ୍ନାଏ ଆରୁ ଏଙ୍ଘା ମିଆଁ ବିଶ୍ଵାସ୍ କାମ୍ନାଏ, ଆବ୍ଡ଼ାର୍ ଏକ୍ଲାହି ମା ଖିନାଏ। ଇ କାତ୍ଥାନ୍ ନିନ୍ ବିଶ୍ୱାସ୍ କାମାଲ୍ଦି କାଁଏ?” 27ମାର୍ଥାଦ୍ ତେଙ୍ଗିୟାଦ୍, “ହଁ ହେ ପ୍ରାଭୁ, ଏନ୍ ବିଶ୍ୱାସ୍ କାମେନ୍ କା ନିମ୍ ପାର୍ମେଶ୍ଵାର୍ସ୍କି ହାଦ୍ଦୁ ଖ୍ରୀସ୍ତ୍, ଏକାସ୍ କା ଦୁନିଆଁନୁ ବାର୍ନାବାଲା ରାଚାସ୍ ଆସ୍ ନିନିନ୍।”
ଯୀଶୁସ୍ ଲାଜ୍ରୁସ୍କି ଲାଗାନ୍ ଅହ୍ଲାଲିୟାସ୍
28ଏତ୍କ ତେଙ୍ଗିକିରି ଆଦ୍ ବୁଙ୍ଗାକେରା, ଆରୁ ତାଙ୍ଘା ବୁହୁଣୀ ମାରିୟାମ୍ବନ୍ କାଡ଼େ-କାଡ଼େ ମେହିଁକିରି ତେଙ୍ଗିୟା, “ଗୁରୁସ୍ ଇସାନ୍ ରାଦାସ୍ ଆରୁ ନିଙ୍ଗାନ୍ ମେହାଁଲ୍ଦାସ୍।” 29ଇବନ୍ ମେନିକିରି ମାରିୟାମ୍ଦ୍ ହୁଙ୍ଗେନିନ୍ ଉସ୍କାରିକିରି ଯୀଶୁସ୍କି ଚାହାଗେ କେରା। 30ଯୀଶୁସ୍ ଆକ୍କୁନ୍ତକ୍ ପାଡ଼ାଗେ ମାଲ୍ଲା ଆଣ୍ସ୍କାରୁସ୍ ଲେକିନ୍ ଏକାସାନ୍ ମାର୍ଥାଦ୍ ଆସିନ୍ ଭେଁଟ୍ ମାନ୍ଚ୍କିଚା ଆ ଆଡ୍ଡାନୁ ରାଚାସ୍। 31ଆଙ୍ଗେନ୍ ଏକା ୟାହୁଦୀର୍ ମାରିୟାମ୍ ଗାନେ ଆଡ଼୍ପାନୁ ରାଚାର୍ ଆରୁ ଆଦ୍ଗେ ଦିଲାସା ଚିଆଲିୟାର୍, ଆବ୍ଡ଼ାର୍ ଏରିୟାର୍ କା ମାରିୟାମ୍ଦ୍ ହୁଙ୍ଗେନିନ୍ ଉସ୍କାରିକିରି ବାହ୍ରି ଉର୍ଖା ତା ଆବ୍ଡ଼ାର୍ ସୋଚ୍ଚାର୍ କା ଆଦ୍ ମାସ୍ଣାସାନ୍ ଅହ୍ଲାଗେ କାଲିଦ୍, ଆରୁ ଆଦ୍ଘି ପାଛ୍ଲି-ପାଛ୍ଲି କେରାର୍। 32ଯେତ୍କବାକେନ୍ ମାରିୟାମ୍ଦ୍ ଆସାନ୍ ଆଣ୍ସିଆଦ୍ ଏକାସାନ୍ କା ଯୀଶୁସ୍ ରାଚାସ୍ ତା, ଆସିନ୍ ଏର୍ୟାଦିନ୍ କା ଆସ୍କି ହେଡ୍ଡମୁଲିନୁ ଖାତ୍ରିକିରି ତେଙ୍ଗିୟା, “ହେ ପ୍ରାଭୁ, ଯଦି ନିନ୍ ଇସାନ୍ ରାଚ୍କା ରୟନେ ତା ଏଙ୍ଘାଏ ଭାଇସ୍ ମା ଖିଦାସ୍ନେ।” 33ଯେତ୍କବାକେନ୍ ଯୀଶୁସ୍ ମାରିୟାମ୍ବନ୍ ଆରୁ ତାଙ୍ଘାଗାନେ ବାର୍ଚ୍କା ୟାହୁଦୀର୍ଘି ଅହ୍ଲନାନ୍ ଏରିୟାସ୍ ତା, ତାଙ୍ଘା ମନ୍ନୁ ବହୁତ୍ ଦୁଃଖୁ ମାନ୍ଚାସ୍ କେରାସ୍, 34ଆରୁ ମନ୍ନୁ ବହୁତ୍ ଦୁଃଖିତ୍ ମାନିକିରି ମେନ୍ଚାସ୍, “ନିମ୍ ଆସିନ୍ ଏକାସାନ୍ ଉଇକାଦାର୍?” ଆବ୍ଡ଼ାର୍ ଯୀଶୁସିନ୍ ତେଙ୍ଗିୟାର୍, “ହେ ପ୍ରାଭୁ, ଗୁଚା ଏରୋୟ।” 35ଯୀଶୁସ୍ ଅହ୍ଲିୟାସ୍। 36ଆଙ୍ଗେନ୍ ୟାହୁଦୀ ଆଲାର୍ ତେଙ୍ଗାଗେ ଲାଗ୍ଗିୟାର୍, “ଏରା, ଇସ୍ ଲାଜ୍ରୁସ୍ସିନ୍ କେତ୍କ ବାନେ ହାଖ୍ଖାଲିୟାସ୍।” 37ଲେକିନ୍ ଆବ୍ଡ଼ାର୍ଘି ଭିତର୍ତି କେତ୍କ ଲୋକ୍ ତେଙ୍ଗିୟାର୍, “ଇ ଆଲାସ୍ ଏକାସ୍ କା କାଁଣାସିନ୍ ବାନେ କାମ୍ଚାସ୍, ତା ଇ ଆଲାସ୍ସିନ୍ ଖିନାନ୍ତି ବାଛାବା ପଲ୍ଲକାରସ୍ନେ କାଁଏ?”
38ଯୀଶୁସ୍ ଆରୁଅହନ୍ ତାଙ୍ଘା ମନ୍ନୁ ବହୁତ୍ ଦୁଃଖୁ ମାନିକିରି ମାସ୍ଣାସାନ୍ ବାର୍ଚାସ୍। ଇଦ୍ ଅଣ୍ଟା ଗୁମ୍ଫା ରାଚା ଆରୁ ଆଦ୍ଘି ଘୁମାନୁ ଅଣ୍ଟା ଚାଁଚା ଉଇକାରାଚା। 39ଯୀଶୁସ୍ ତେଙ୍ଗିୟାସ୍, “ଚାଁଚାବନ୍ ପାଖିୟାଚା।” ଆଙ୍ଗେନ୍ ଆ ଖିଉସ୍କି ବୁହୁଣୀ ମାର୍ଥାଦ୍ ଯୀଶୁସିନ୍ ତେଙ୍ଗିୟାଦ୍, “ହେ ପ୍ରାଭୁ, ଲାଜ୍ରୁସ୍ କେଚ୍ଚାସ୍ କେର୍କାଦାସ୍ ଯେ ଚାର୍ଦିନ୍ ମାନାଲିଦ୍। ଆକ୍କୁନ୍ ତା ଆସ୍ ବାସାଲ୍କାରସ୍।” 40ଯୀଶୁସ୍ ଆବନ୍ ତେଙ୍ଗିୟାସ୍, “ଏନ୍ ନିଙ୍ଗାନ୍ ମାଲ୍ଲା ତେଙ୍ଗୁନ୍ କାଁଏ ଯଦି ନିନ୍ ବିଶ୍ଵାସ୍ କାମୟ, ହାଲେ ପାର୍ମେଶ୍ଵାର୍ସ୍କି ମାହିମା ଏରୟ।” 41ଆନ୍ତିନ୍ ଆବ୍ଡ଼ାର୍ ଆ ଚାଁଚାବନ୍ ପାଖିୟାଚାର୍। ଆଙ୍ଗେନ୍ ଯୀଶୁସ୍ ମିଆଁ ଏରିକିରି ତେଙ୍ଗିୟାସ୍, “ହେ ବାଙ୍ଗ୍, ଏନ୍ ନିଙ୍ଗାନ୍ ଧାନ୍ୟାବାଦ୍ ଚିଆଲ୍ଦାନ୍ କା ନିନ୍ ଏଙ୍ଘା କାତ୍ଥାନ୍ ମେନ୍ଚ୍କାଏ। 42ଏନ୍ ଆହାଲ୍କାନ୍ କା ନିନ୍ ଜାମାବାକେନ୍ ଏଙ୍ଘା କାତ୍ଥାନ୍ ମେନ୍ଦାଏ, ଲେକିନ୍ ଚାର୍ହି ପାଖା ଇଜ୍ଜକା ଆଲାର୍ଘି ଲାଗାନ୍ ଏନ୍ ଏନ୍ନେ ତେଙ୍କାନ୍, ଏସ୍କେ କା ନିନ୍ ଏଙ୍ଗାନ୍ ତାଏକାଦାଏ ବୁଲି ଇବ୍ଡ଼ାର୍ ବିଶ୍ୱାସ୍ କାମର୍।” 43ଏନ୍ନେ ତେଙ୍କା ପାଛ୍ଲି ଆସ୍ ଜୋର୍ସେ ତେଙ୍ଗିୟାସ୍, “ହେ ଲାଜ୍ରୁସ୍ ଉର୍ଖା ବାରା!” 44ଏକାସ୍ କେଚ୍ଚାସ୍ କେର୍କାଚାସ୍ ଆସ୍ ବାହ୍ରି ଉର୍ଖିୟାସ୍ ବାର୍ଚାସ୍। ଆସ୍କି ହେଖ୍ଖା ହେଡ୍ଡୁନ୍ ଚିଢ଼ାତି ହିଁଚ୍କା ରାଚା। ଆରୁ ଆସ୍କି ଚେହେରାନୁ ଖାଁଣେ ଗାମ୍ଛା ଗୁଢ଼ିଆଚ୍କା ରାଚା। ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଆସିନ୍ ଖୋଲା ଚିଆ ଆରୁ କାଲାଗେ ଚିଆ।” 45ଆଙ୍ଗେନ୍ ଏକା ୟାହୁଦୀ ଆଲାର୍ ମାରିୟାମ୍ ଗାନେ ବାର୍ଚ୍କାଚାର୍ ଆରୁ ଯୀଶୁସ୍କି ଇ ନାଲ୍ଖୁନ୍ ଏର୍କାଚାର୍, ଆବ୍ଡ଼ାର୍ଘି ଭିତର୍ତି ଢେର୍ ଆଲାର୍ ଆସ୍କି ମିଆଁ ବିଶ୍ଵାସ୍ କାମ୍ଚାର୍। 46ଆବ୍ଡ଼ାର୍ଘି ଭିତର୍ତି କେତ୍କ ଲୋକ୍ ଫାରିସୀ ଜାମାର୍ଘି ଚାହା କାଇକିରି ଯୀଶୁସ୍କି ନାଲଖୁଘି ବାରେ ଖବର୍ ଚିଚ୍ଚାର୍।
ଯୀଶୁସିନ୍ ପିଟାଗେ ଉପାୟ କାମାଲ୍ନାଏ
(ମାତିସ୍ ୨୬:୧-୫; ମାର୍କୁସ୍ ୧୪:୧,୨; ଲୁକାସ୍ ୨୨:୧,୨)
47ଆଙ୍ଗେନ୍ ମୁଖ୍ୟା ପୁରୋହିତ୍ଜାମାର୍ ଆରୁ ଫାରିସୀର୍ ମାହାସାଭାନ୍ତା ଆଲାରିନ୍ ମେହିଁୟାର୍ ଆରୁ ତେଙ୍ଗିୟାର୍, “ନାମାଗେ ଏନ୍ଦେର୍ କାମ୍ନା କାତ୍ଥା? ଇ ଆଲାସ୍ତା ବହୁତ୍ ଆଚ୍ମିତ୍ ନାଲ୍ଖୁ କାମାଲ୍ଦାସ୍। 48ଯଦି ନାମ୍ ଆସିନ୍ ଏନ୍ନେନ୍ ଆମ୍ଵଚତ୍, ତା ଜାମାର୍ ଆସ୍କି ମିଆଁ ବିଶ୍ଵାସ୍ କାମର୍, ଆରୁ ରୋମୀ ଆଲାର୍ ବାରିକିରି ନାହ୍ମାଏ ପାବିତାର୍ ଆଡ୍ଡାନ୍ ଆରୁ ନାହ୍ମା ରାଜୀନ୍ ଲୁଟର୍ ହର୍କର୍।” 49ଆଙ୍ଗେନ୍ ଆବ୍ଡ଼ାର୍ସ୍ତି କାଇଫା ନାମେଘି ଅଣ୍ଟା ଆଲାସ୍ ଏକାସ୍ କା ହୁ ବଛର୍ତା ମାହାପୁରୋହିତ୍ ରାଚାସ୍, ଆସ୍ ତେଙ୍ଗିୟାସ୍, “ନିମ୍ ଏନ୍ଦେର୍ହି ବାଲ୍ଦାରିନ୍; 50ଆରୁ ନିମ୍ ଏନ୍ଦେର୍ଗେ ମା ବୁଝୁର୍ଦାର୍ କା ନାହ୍ମା ରାଜୀଘି ଜାମା ଆଲାର୍ଘି ନାଶ୍ ମାନ୍ନାଘି ବାଦ୍ଲା ନିହ୍ମା ଲାଗାନ୍ ଅଣ୍ଟା ଆଲାସ୍କି ଖିନାଦ୍ ବାନେଦ୍।” 51ଇ କାତ୍ଥାନ୍ ଆସ୍ ତାଙ୍ଘା ମନ୍ତି ମାଲ୍ଲା ତେଙ୍ଗୁସ୍, ଲେକିନ୍ ଆସ୍ ହୁ ବଛର୍ତା ମାହାପୁରୋହିତ୍ ରାଚାସ୍, ହୁଦ୍ଘିଲାଗାନ୍ ଆସ୍ ଭବିଷତ୍ କାତ୍ଥା କାମ୍ଚାସ୍, କା ଯୀଶୁସ୍ ଜାମା ୟାହୁଦୀ ଆଲାର୍ଘି ଲାଗାନ୍ ଖିଅସ୍; 52ଆରୁ ଆସ୍ ଖାଲି ୟାହୁଦୀ ଆଲାର୍ଗେ ମାଲ୍ଲା, ଜାମା ଦୁନିଆଁନୁ ଯେତ୍କଭି ପାର୍ମେଶ୍ୱାର୍ସ୍କି ଆଲାର୍ ଛିଛିର୍ଛାନ୍ଦ୍ ମାନିକିରି ରାନାଏ, ଆବ୍ଡ଼ାରିନ୍ ଅନ୍ଠାଣ୍ କାମାଗେ ଆସ୍ ଖିନାବାଲା ରାଦାସ୍। 53ହୁଦ୍ଘିଲାଗାନ୍ ଆବ୍ଡ଼ା ହୁ ଉଲ୍ଲାନ୍ତିନିନ୍ ଯୀଶୁସିନ୍ ପିଟାଗେ ଉପାୟ କାମାଗେ ଲାଗ୍ଗିୟାର୍।
54ହୁଦ୍ଘିଲାଗାନ୍ ଯୀଶୁସ୍ ହୁ ସାମାୟନ୍ତି ୟାହୁଦୀ ଆଲାର୍ଘି ମାଝାନୁ ଖୁଲାଖୁଲି ମା କୁଦ୍ଦିୟାସ୍, ଲେକିନ୍ ତାଙ୍ଘା ଚେଲାଜାମାର୍ଗାନେ ଇଫ୍ରାଇମ୍ ନାମେଘି ଅଣ୍ଟା ସହର୍ଗେ ବୁଙ୍ଗାସ୍ କେରାସ୍; ଆରୁ ଆସାନିନ୍ ରାଚାର୍ କେରାର୍। ଆ ସହର୍ଦ୍ ଏନ୍ନେ ଶୁନ୍ଶାନ୍ ଆଡ୍ଡାଘି ଚାହାନୁ ରାଚା ଏକାସାନ୍ କା ଆଲାର୍ ମା ରାଲିୟାର୍।
55ୟାହୁଦୀ ଆଲାର୍ଘି ପାସ୍କାପରବ୍ ଆଣସାଲିୟାଦ୍, ଆରୁ ଢେର୍ ଆଲାର୍ ପାସ୍କାପରବ୍ଘି ଆଘ୍ଲି ୧୧:୫୫ ପାର୍ମେଶ୍ୱାର୍ସ୍କି ନଜର୍ନୁ ଶୁଦ୍ଧ୍ ମାନିକିରି ପାସ୍କାପରବ୍ ମାନାବାଗେ କେତ୍କଦିନ୍ ଘି ଆଘ୍ଲିନ୍ତି ଆଲାର୍ ଯେରୁଶାଲେମ୍ ସହର୍ତା ମନ୍ଦିର୍ଗେ କାଇକିରି ନିଜ୍କେନିଜ୍ ନିୟମ୍ଘି ଅନୁସାର୍ ଶୁଦ୍ଧ୍ କାମାଲିୟାର୍।ନିଜ୍କେନିଜ୍ ଶୁଦ୍ଧ୍ କାମାଗେ ପାଡ଼ାଗୁଠିନ୍ତି ଯେରୁଶାଲେମ୍ଗେ କେରାର୍। 56ଆରୁ ଆବ୍ଡ଼ାର୍ ଯୀଶୁସିନ୍ ବେଦ୍ଦାଗେ ଲାଗ୍ଗିୟାର୍ ଆରୁ ମନ୍ଦିର୍ନୁ ଇଲିକିରି ତାମ୍-ତାମ୍ ତେଙ୍ଗାଗେ ଲାଗ୍ଗିୟାର୍, “ନିମ୍ ଏନ୍ଦେର୍ ସୋଚାଲ୍ଦାର୍? ଆସ୍ ପରବ୍ନୁ ମା ବାର୍ଦାସ୍ କାଁଏ?” 57ମୁଖ୍ୟା ପୁରୋହିତ୍ର୍ ଆରୁ ଫାରିସୀଜାମାର୍ ଇ ଆଦେଶ୍ ଚିଚ୍କାଚାର୍ କା ଯଦି ନେଦିନ୍ ଆହର୍ କା ଯୀଶୁସ୍ ଏକାସାନ୍ ରାଦାସ୍ତା ତେଙ୍ଗର୍, ତାକା ଆବ୍ଡ଼ାର୍ ଆସିନ୍ ଧାରା ଅଙ୍ଗର୍।
12ମାରିୟାମ୍ ଯୀଶୁସ୍କି ହେଡ୍ଡୁନୁ ବାସ୍ନା ଇସୁଙ୍ଗ୍ ତୁନ୍ଦିକିରି ମାଇନ୍ କାମାଲିଦ୍
(ମାତିସ୍ ୨୬:୬-୧୩; ମାର୍କୁସ୍ ୧୪:୩-୯)
1ଯୀଶୁସ୍ ପାସ୍କାପରବ୍ଘି ଛଦିନ୍ଘି ଆଘ୍ଲି ବେଥାନିୟା ପାଡ଼ାଗେ ବାର୍ଚାସ୍। ଇ ପାଡ଼ାନୁ ଲାଜ୍ରୁସ୍ ରାଲିୟାସ୍, ଏକାସିନ୍ କା ଯୀଶୁସ୍ କେଚ୍ଚକାସ୍ତି ଉଜ୍ଜତାଚ୍କାଚାସ୍। 2ଆସାନ୍ ଯୀଶୁସ୍କି ଲାଗାନ୍ ମାଁହାନ୍ତା ଅନ୍ନାମହ୍ନା ତିୟାର୍ କାମାକେରା; ଆରୁ ମାର୍ଥାଦ୍ ଅନ୍ନାମହ୍ନାନ୍ ହାଟ୍ଟାଲିୟା, ଆରୁ ଲାଜ୍ରୁସ୍ହି ଆବ୍ଡ଼ାର୍ ଗାନେ ଅନାଗେ ଅକ୍କାଚାସ୍। 3ହତ୍କବାକେନ୍ ମାରିୟାମ୍ ଲାଗ୍ଭାଗ୍ ଆଧା ଲିଟର୍ ଜାଟାମାଂସିତି ତିଆର୍ ମାନ୍ଚ୍କା ବହୁତ୍ ଦାମିକା ଶୁଦ୍ଧ୍ ବାସ୍ନା ଇସୁଙ୍ଗ୍ ଅନ୍ଦ୍ରିକିରି ଯୀଶୁସ୍କି ହେଡ୍ଡୁନୁ ତୁନ୍ଦିୟା, ଆରୁ ତାଙ୍ଘା ଚୁଟ୍ଟିତି ଆସ୍କି ହେଡ୍ଡୁବନ୍ ଚିଁଚ୍ୟାଦ୍। ଆଙ୍ଗେନ୍ ଆ ଇସୁଙ୍ଗ୍ଘି ବାସ୍ନାତି ଏଡ଼୍ପାଦ୍ ମାହ୍କାରା କେରା। 4ଲେକିନ୍ ଆସ୍କି ଚେଲାର୍ଘି ଭିତର୍ନୁ ଯୁଦାସ୍ ଇସ୍କାରିୟୋତି ନାମେଘି ଅଣ୍ଟା ଚେଲାସ୍ ଆସାନ୍ ରାଚାସ୍ ଏକାସ୍ କା ଯୀଶୁସିନ୍ ଦୁଶ୍ମାନ୍ ଜାମାର୍ଘି ହେଖ୍ଖାନୁ ଧାର୍ତାନାବାଲା ରାଚାସ୍, ଆସ୍ ତେଙ୍ଗିୟାସ୍, 5“ଇ ବାସ୍ନା ଇସୁଙ୍ଗ୍ଘି ଦାମ୍ ଅଣ୍ଟା ଆଲାସ୍ ଏକ୍ ବଛର୍ନୁ ଯେତ୍କ ପାଏସା କାମାବାଦାସ୍ ହତ୍କ ପାଏସା ମାନଦ୍ନେ। ଆବନ୍ ବିଁଶିକିରି ଆ ପାଏସାବନ୍ ଗରୀବ୍ ଜାମାର୍ଗେ ଏନ୍ଦେର୍ଗେ ଚିଆ ମା କଦ୍ନେ?” 6ଆସ୍ ଗରୀବ୍ ଲାଗାନ୍ ଚିନ୍ତା କାମାଲିୟାସ୍ ବୁଲି ଏନ୍ନେ ତେଙ୍ଗିୟାସ୍, ଏନ୍ନେ ମାଲ୍ଲିଦ୍, ଲେକିନ୍ ଆସ୍ ଅଣ୍ଟା ଚୋର୍ହା ରାଚାସ୍, ଆରୁ ତାଙ୍ଘାସାନ୍ ପାଏସା ଥାଇଲି ରାଲିୟାଦ୍, ଆରୁ ଆ ପାଏସା ଥାଇଲିନୁ ଯେତ୍କ ପାଏସା ଉଇୟା କାଲିୟାଦ୍, ଆଦିନ୍ ଆସ୍ ତାଙ୍ଘା ଲାଗାନ୍ ଅଥ୍ରା ହୁଆ କାଲିୟାସ୍। 7ଆଙ୍ଗେନ୍ ଯୀଶୁସ୍ ତେଙ୍ଗିୟାସ୍, “ଇବନ୍ ରା ଚିଆ। ଇଦ୍ ଏଙ୍ଘାଏ ଶରୀର୍ବନ୍ ମାଡ଼୍ନାଘି ଲାଗାନ୍ ଏନ୍ନେ କାମ୍ଚା। 8ଏନ୍ଦେର୍ଗେକା ଗରୀବ୍ ଜାମାର୍ ତା ନିହ୍ମାଗାନେ ଜାମାବାକେନ୍ ରାନାଏ, ଲେକିନ୍ ଏନ୍ ନିହ୍ମାଗାନେ ଜାମାବାକେନ୍ ମା ରାଦାନ୍।”
ଲାଜ୍ରୁସ୍ସିନ୍ ପିଟାଗେ ଉପାୟ କାମାଲ୍ନାଏ
9ଯେତ୍କବାକେନ୍ ୟାହୁଦୀ ଆଲାର୍ ଆଖ୍ଖାର୍ କା ଯୀଶୁସ୍ ବେଥାନିୟା ପାଡ଼ାନୁ ରାଦାସ୍, ତା ଆବ୍ଡ଼ାର୍ ଯୀଶୁସିନ୍ ଖାଲି ଏରାଗେ ମାଲ୍ଲା ବାରୁର୍ ଆ ଲାଜ୍ରୁସ୍ସିନ୍ହି ଏରାଗେ ବାର୍ଚ୍କାଚାର୍, ଏକାସିନ୍କା ଯୀଶୁସ୍ କେଚ୍ଚକାନ୍ତି ଉଜ୍ଜତାଚ୍କାଚାସ୍। 10ଏନ୍ଦେର୍ଗେକା ଆସ୍କି କାରଣ୍ ଢେର୍ ୟାହୁଦୀ ଆଲାର୍ ତାହ୍ମା ମୁଖ୍ୟାଜାମାରିନ୍ ଆମ୍ବିକିରି ଯୀଶୁସ୍ତାରା ବୁଙ୍ଗାର୍ କେରାର୍ ଆରୁ ଯୀଶୁସ୍କି ମିଆଁ ବିଶ୍ଵାସ୍ କାମ୍ଚାର୍। 11ଆଙ୍ଗେନ୍ ମୁଖ୍ୟା ପୁରୋହିତ୍ଜାମାର୍ ଲାଜ୍ରୁସ୍ସିନ୍ହି ପିଟାଗେ ଉପାୟ କାମ୍ଚାର୍।
ଯୀଶୁସ୍ ରାଜାସ୍କି ଲେଖା ଯେରୁଶାଲେମ୍ ବାର୍ଚାସ୍
(ମାତିସ୍ ୨୧:୧-୧୧; ମାର୍କୁସ୍ ୧୧:୧-୧୧; ଲୁକାସ୍ ୧୯:୨୮-୪୦)
12ନାନ୍ନୁ ଉଲ୍ଲା ଢେର୍ ଆଲାର୍, ଏକାର୍ କା ପାସ୍କାପରବ୍ ମାନାବାଗେ ବାର୍ଚାକାଚାର୍ ଆବ୍ଡ଼ାର୍ ମେନ୍ଚାର୍ କା ଯୀଶୁସ୍ ରାଜାସ୍କି ଲେଖା ଯେରୁଶାଲେମ୍ନୁ ବାରାଲ୍ଦାସ୍। 13ଆଦ୍ଘିଲାଗାନ୍ ଆବ୍ଡ଼ାର୍ ୧୨:୧୩ ଖିଜ୍ରୀ ମାନ୍ନୁଦ୍ ଯୀରୁଶାଲେମ୍ନୁ ବହୁତ୍ ରାଚା। ଖିଜ୍ରୀ ଡାଡ଼ାଦ୍ ୟାହୁଦୀ ଜାମାର୍ଗେ ଜିତ୍ନା, ଆଜାଦୀଘି ଚିହ୍ନାଦ୍।ଖିଜ୍ରୀଘି ଡାଡ଼ାଗୁଠିନ୍ ଧାରିକିରି ଆସିନ୍ ପାର୍ଘାଗେ ବାର୍ଚାର୍, ଆରୁ ଚିର୍ରାରାଗେ ଲାଗ୍ଗିୟାର୍, “ହୋଶାନ୍ନା୧୨:୧୩ ଇଦ୍ ପାର୍ମେଶ୍ୱାରସ୍କି ସ୍ତୁତି କାମ୍ନାଘି ତାରିକା। ଆରାମି ଶବଦ୍ ଏକାଘି ମତ୍ଲବ୍ କା ଆକ୍କୁନ୍ ଏମାନ୍ ବାଛାବା, ଲେକିନ୍ ପାଛ୍ଲି ଇ ଶବଦ୍ ଆଲାରିନ୍ ସ୍ୱାଗାତ୍ ଚାହେ ସ୍ତୁତି କାମାଗେ ବେଭାର୍ ମାନାଗେ ଲାଗ୍ଗିୟା।! ଇସ୍ରାଏଲ୍ ଜାମାର୍ଘି ରାଜାସ୍ ଧଏନ୍ ରାଦାସ୍, ଏକାସ୍ କା ପ୍ରାଭୁସ୍କି ନାମେତି ବାରାଲ୍ଦାସ୍।”
14ହତ୍କବାକେନ୍ ଯୀଶୁସ୍ଗେ ଅଣ୍ଟା ଗାଧାହାଦ୍ଦୁ ହାଖ୍ଖରା; ତା ଆସ୍ ଆଦ୍ଘି ମିଆଁ ଅକ୍କିକିରି କାଲାଗେ ଲାଗ୍ଗିୟାସ୍, ଏସ୍କେ କା ପାବିତାର୍ ଶାସ୍ତ୍ରନୁ ଏକାଦ୍ ଲେଖ୍ଚ୍କା ରାଇ ଆଦ୍ ପୁରା ମାନ୍ଚା, 15କା “ହେ ସିୟୋନ୍ ତା ହାଇ, ଆମୁ ଏଲ୍ଚୁ; ଲେକିନ୍ ଏରୁ, ନିଙ୍ଘା ରାଜାସ୍ ଗାଧାହାଦ୍ଦୁଘି ମିଆଁ ଅକ୍କିକିରି ବାରାଲ୍ଦାସ୍।” 16ହତ୍କବାକେନ୍ ଆସ୍କି ଚେଲାଜାମାର୍ ଇ କାତ୍ଥାଘି ବାରେନୁ ମାଲ୍ଲା ବୁଝ୍ର୍କାରୁର୍, ଲେକିନ୍ ଯୀଶୁସ୍କି ମାହିମା ମାନ୍ଚ୍କା ପାଛ୍ଲି ଆବ୍ଡ଼ାର୍ଗେ ମନେ ବାର୍ଚା ଆରୁ ବୁଝ୍ରାର୍ କା ଇ କାତ୍ଥାଦ୍ ଆସ୍କି ବାରେନୁ ଲେଖା ରାଚା ଆରୁ ଆଲାର୍ ଆସ୍ଗାନେ ଏନ୍ନେ ବେଭାର୍ କାମ୍ଚ୍କାଚାର୍। 17ଯେତ୍କବାକେନ୍ ଯୀଶୁସ୍ ଲାଜ୍ରୁସ୍ସିନ୍ ମାସ୍ଣାନ୍ତି ମେହିଁକିରି କେଚ୍ଚକାସ୍ତି ଉଜ୍ଜତାଚ୍କାଚାସ୍ ହତ୍କବାକେନ୍ ଭିଡ଼୍ତା କେତ୍କ ଲୋକ୍ ଆଲାର୍ ଏକାର୍ ଆସ୍ଗାନେ ଆସାନ୍ ରାଚାର୍, ଆବ୍ଡ଼ାର୍ ଆସ୍କି ବାରେ ଦୁସ୍ରାରିନ୍ ବାତାବାଚାର୍। 18ଯୀଶୁସ୍ ଇ ଆଚ୍ମିତ୍ ନାଲ୍ଖୁ କାମ୍ଚ୍କାଚାସ୍ ବୁଲି ଆବ୍ଡ଼ାର୍ ମେନ୍ଚ୍କାଚାର୍ ହୁଦ୍ଘିଲାଗାନ୍ ଆଲାର୍ ଆସିନ୍ ପାର୍ଘାଗେ ବାର୍ଚାର୍। 19ଆଙ୍ଗେନ୍ ଫାରିସୀଜାମାର୍ ତାମ୍ତାମ୍ କାଚ୍ନେଖ୍ରାଗେ ଲାଗ୍ଗିୟାର୍, “ଏରାଲ୍ଦାର୍ ତା, ନିହ୍ମା ଜାମା କୋଶିଷ୍ଦ୍ ବେକାର୍ ମାନା କାଲିଦ୍। ଜାମା ଆଲାର୍ ଯୀଶୁସ୍କି ପାଖା ମାନ୍ଚାର୍ କେରାର୍।”
ୟୁନାନୀ ଆଲାର୍ ଯୀଶୁସିନ୍ ବେଦ୍ଦାଲ୍ନାଏ
20ଏକା ଆଲାର୍ ପରବ୍ନୁ ଆରାଧାନା କାମାଗେ ବାର୍ଚ୍କାଚାର୍ ଆବ୍ଡ଼ାର୍ସ୍ତି କେତ୍କ ଲୋକ୍ ୟୁନାନୀ ରାଚାର୍। 21ଆବ୍ଡ଼ାର୍ ଗାଲିଲୀନ୍ତା ବେତ୍ସାଇଦା ସହର୍ତା ଫିଲିପ୍ପସ୍କି ଚାହାଗେ ବାରିକିରି ଆସିନ୍ ଆର୍ଜୀ କାମିକିରି ତେଙ୍ଗିୟାର୍, “ଗୁରୁ, ଏମ୍ ଯୀଶୁସିନ୍ ଭେଁଟ୍ ମାନାଗେ ବେଦ୍ଦାଲ୍ଦାମ୍।” 22ଫିଲିପ୍ପସ୍ ବାରିକିରି ଆନ୍ଧ୍ରିୟାସ୍ସିନ୍ ତେଙ୍ଗିୟାସ୍ ଆନ୍ତିନ୍ ଆନ୍ଧ୍ରିୟାସ୍, ଆରୁ ଫିଲିପ୍ପସ୍ ଯୀଶୁସ୍କି ଚାହାଗେ କାଇକିରି ଯୀଶୁସିନ୍ ତେଙ୍ଗିୟାର୍। 23ଆଙ୍ଗେନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଆ ସାମାୟ ବାର୍ଚା କେର୍କିଚି କା ମୁନୁଷ୍ ହାଦ୍ଦୁସ୍କି ମାହିମା ମାନଦ୍। 24ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଯେତ୍କତକ୍ ଗହମ୍ଘି ବିହ୍ନି ହେଁହ୍ଲାନୁ ଖାତ୍ରିକିରି ମା ଖିଇକାଇ, ତା ଆଦ୍ ଅଣ୍ଟା ଖାଲି ରାଇଦ୍; ଲେକିନ୍ ଯେତ୍କବାକେନ୍ ଖିଇକାଇ, ତା ଢେର୍ ଫାଡ଼ୁ ଚିଇଦ୍। 25ଏକାସ୍ ନିଜର୍ ଜୀଆବନ୍ ବାନେ ହାଖ୍ଖଦାସ୍, ଆସ୍ ଆବନ୍ ଏଫ୍ସଚସ୍; ଆରୁ ଏକାସ୍ ଇ ଦୁନିଆଁନୁ ନିଜର୍ ଜୀଆବନ୍ ବାନେ ମା ହାଖ୍ଖଦାସ୍, ଆସ୍ ସବୁଦିନ୍ତା ଜୀବନ୍ଘି ଲାଗାନ୍ ଆବନ୍ ବାଛାବସ୍। 26ଯଦି ଏକାସ୍ ଏଙ୍ଘା ସେବା କାମ୍ଦାସ୍, ତା ଆସ୍ ଏଙ୍ଘା ପାଛ୍ଲି-ପାଛ୍ଲି ବାର୍ନାସ୍; ଆରୁ ଏକାସାନ୍ ଏନ୍ ରାଦାନ୍, ଆସାନ୍ ଏଙ୍ଘାଏ ସେବକସ୍ ହି ରସ୍। ଯଦି ଏକାସ୍ ଏଙ୍ଘା ସେବା କାମ୍ଦାସ୍, ତା ବାଙ୍ଗ୍ସ୍ ଆସ୍କି ମାଇନ୍ କାମସ୍।”
ଯୀଶୁସ୍ ତାଙ୍ଘାଏ ଖିନାଘି ବାରେନୁ ତେଙ୍ଗାଲ୍ଦାସ୍
27“ଆକ୍କୁନ୍ ଏଙ୍ଘାଏ ମନ୍ଦ୍ ଆକ୍ବାକ୍ରା କାଲିଦ୍, ଇଦ୍ଘିଲାଗାନ୍ ଆକ୍କୁନ୍ ଏନ୍ ଏନ୍ଦେର୍ ତେଙ୍ଗନ୍? ‘ହେ ବାଙ୍ଗ୍, ଏଙ୍ଗାନ୍ ଇ ବାର୍ନାବାଲା ଦୁଃଖୁଘି ସାମାୟନ୍ତି ବାଛାବା ବୁଲି ତେଙ୍ଗନ୍ କାଁଏ?’ ମାଲ୍ଲା, ଏନ୍ଦେର୍ଗେକା ଇଦ୍ଘିଲାଗାନ୍ ତା ଏନ୍ ଇ ସାମାୟନୁ ବାର୍ଚ୍କାଦାନ୍। 28ହେ ବାଙ୍ଗ୍, ନିଙ୍ଘା ନାମେଘି ମାହିମା କାମା।” ଆଙ୍ଗେନ୍ ଆକାଶ୍ତି ଅଣ୍ଟା ଶବଦ୍ ମେନ୍ଦ୍ରାଦ୍, “ଏନ୍ ଆସ୍କି ମାହିମା କାମ୍ଚ୍କାଦାନ୍, ଆରୁ-ଆରୁହି ମାହିମା କାମନ୍।” 29ଆଙ୍ଗେନ୍ ଏକା ଆଲାର୍ ଇଜ୍ଜକାଚାର୍ ଆରୁ ମେନାଲିୟାର୍, ଆବ୍ଡ଼ାର୍ ତେଙ୍ଗିୟାର୍ କା ବାଦ୍ଲି ଗାର୍ଜାରାଚାଦ୍। ଆରୁ ଦୁସ୍ରାର୍ ତେଙ୍ଗିୟାର୍ କା, “ଅଣ୍ଟା ସରଗ୍ଦୂଁତ୍ ଆସ୍ଗାନେ କାଚ୍ନେଖ୍ରାଦ୍।” 30ଆଙ୍ଗେନ୍ ଯୀଶୁସ୍ ଯାବାବ୍ ଚିଚ୍ଚାସ୍, “ଇ ଶବଦ୍ ଏଙ୍ଘାଲାଗାନ୍ ମାଲ୍ଲା ମାନ୍ନୁ, ଲେକିନ୍ ନିହ୍ମା ଲାଗାନ୍ ମାନ୍ଚାଦ୍। 31ଆକ୍କୁନ୍ ଇ ଦୁନିଆଁନ୍ତା ନ୍ୟାୟଘି ସାମାୟ ବାର୍ଚା କେର୍କିଚି, ଆକ୍କୁନ୍ ଇ ଦୁନିଆଁନ୍ ଶାସନ୍ କାମ୍ନାବାଲା ଶାଏତାନ୍ବନ୍ ଅଥ୍ରାଚାକୋ; 32ଆରୁ ଏନ୍ ଯଦି ହେଁହ୍ଲାନ୍ତି ମିଆଁ କ୍ରୁଶ୍ନୁ ଆର୍ଗ୍ତା କନ୍, ତା ଜାମା ଆଲାରିନ୍ ଏଙ୍ଘା ଚାହାଗେ ଟାଣନ୍ ଅନ୍ଦରନ୍।” 33ଏନ୍ନେ ତେଙ୍ଗିକିରି ଆସ୍ ଏସ୍କେ ଖିଅସ୍ ଆବନ୍ ତେଙ୍ଗେଇ ଚିଚ୍ଚାସ୍। 34ଆଦ୍ଘିଲାଗାନ୍ ଆଲାର୍ ଆସିନ୍ ତେଙ୍ଗିୟାର୍, “ଏମ୍ ନିୟମ୍ନୁ ଇ କାତ୍ଥାନ୍ ମେଞ୍ଚକାଦାମ୍ କା ଖ୍ରୀସ୍ତ୍ ଏକ୍ଲାହି ମା ଖିଦାସ୍, ଆରୁ ମୁନୁଷ୍ ହାଦ୍ଦୁସିନ୍ ପିଟାଗେ କ୍ରୁଶ୍ନୁ ଠୋକ୍ନା ଜରୁରୀ ରାଇ ବୁଲି ନିନ୍ ଏସ୍କେ ତେଙ୍ଗାଲ୍ଦାଏ? ଇ ମୁନୁଷ୍ ହାଦ୍ଦୁସ୍ ନେଦ୍?” 35ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ବିଲ୍ଲୀଦ୍ ଆକ୍କୁନ୍ ଥୋଡ଼େ ସାମାୟତକ୍ ନିହ୍ମାଏ ମାଝାନୁ ରଦ୍। ଯେତ୍କତକ୍ ବିଲ୍ଲୀଦ୍ ନିହ୍ମାଗାନେ ରାଇଦ୍ ହତ୍କତକ୍ ନିମ୍ ଏକ୍ତେ ରା, ତାକା ଉହାଦ୍ ନିମାନ୍ ମା ଘେର ଉଇୟଦ୍; ଏନ୍ଦେର୍ଗେକା ଏକାସ୍ ଉହାନୁ ଏକ୍ଦାସ୍ ଆସ୍ ବାଲ୍ଦାସିନ୍ କା ଏକାତାରା କାଲ୍ଦାସ୍। 36ଯେତ୍କତକ୍ ବିଲ୍ଲୀ ନିହ୍ମାଗାନେ ରାଇଦ୍, ନିମ୍ ବିଲ୍ଲୀଘି ମିଆଁ ବିଶ୍ଵାସ୍ କାମା ତା ନିମ୍ ବିଲ୍ଲୀଘି ହାଦ୍ଦୁବଚ୍ଚ ମାନର୍କର୍।” ଯୀଶୁସ୍ ଇ ଜାମା କାତ୍ଥା ତେଙ୍ଗିକିରି ବୁଙ୍ଗାସ୍ କେରାସ୍ ଆରୁ ଆବ୍ଡ଼ାର୍ସ୍ତି ନୁହୁରିକିରି ରାଚାସ୍।
ୟାହୁଦୀ ଆଲାର୍ ଯୀଶୁସ୍କି ମିଆଁ ବିଶ୍ୱାସ୍ ମା କାମାଲ୍ନାଏ
37ଯୀଶୁସ୍ ୟାହୁଦୀ ଜାମାର୍ଘି ଆଘ୍ଲି ଏତ୍କ-ଏତ୍କ ଆଚ୍ମିତ୍ ନାଲ୍ଖୁ କାମ୍ଚ୍କାଚାସ୍, ହାଲେହି ଆବ୍ଡ଼ାର୍ ଆସ୍କି ମିଆଁ ବିଶ୍ଵାସ୍ ମା କାମ୍ଚାର୍; 38ହୁଦ୍ଘିଲାଗାନ୍ ଇଶାୟାହ୍ସ୍ ନାବୀସ୍କି ବଚନ୍ବଦ୍ ପୁରା ମାନଦ୍, ଏକାନ୍ କା ଆସ୍ ଲେଖ୍ଚ୍କାଚାସ୍: “ହେ ପ୍ରାଭୁ, ଏକାର୍ ନାହ୍ମା ଖବର୍ବନ୍ ବିଶ୍ୱାସ୍ କାମ୍ଚାର୍? ଆରୁ ପ୍ରାଭୁସ୍କି ଶକ୍ତିବନ୍ ଏକାର୍ ଏରିୟାର୍?”
39ଇଦ୍ଘିଲାଗାନ୍ ଆବ୍ଡ଼ାର୍ଗେ ବିଶ୍ୱାସ୍ ମା ଲାଗ୍ଗିୟା, ଏନ୍ଦେର୍ଗେକା ଇଶାୟାହ୍ସ୍ ନାବୀସ୍ ଏନ୍ନେହି ତେଙ୍କାଚାସ୍: 40“ପାର୍ମେଶ୍ୱାର୍ସ୍ ଆବ୍ଡ଼ାର୍ଘି ହାନ୍ନୁବନ୍ କାଣାଁ, ଆରୁ ଆବ୍ଡ଼ାର୍ଘି ଜୀଆବନ୍ କାଠୋର୍ କାମ୍ଚେଇଚ୍କାଦାସ୍; ଏକାସାନ୍ ଏନ୍ନେ ମା ମାନ୍ନାଦ୍ କା ଆବ୍ଡ଼ାର୍ ହାନ୍ନୁତି ଏରର୍, ଆରୁ ମନ୍ତି ବୁଝ୍ରର୍, ଆରୁ ଏଙ୍ଘାତାରା କିର୍ରର୍ ବାରର୍ ଆରୁ ଏନ୍ ଆବ୍ଡ଼ାରିନ୍ ବାନେ କାମନ୍।” 41ଇଶାୟାହ୍ସ୍ ନାବୀସ୍ ଇ କାତ୍ଥାନ୍ ଇଦ୍ଘିଲାଗାନ୍ ତେଙ୍ଗିୟାସ୍ କା ଆସ୍ ଯୀଶୁସ୍କି ମାହିମା ଏର୍କାଚାସ୍, ଆରୁ ଆସ୍କି ବାରେନୁ କାତ୍ଥା କାମ୍ଚ୍କାଚାସ୍। 42ହାଲେହି ୟାହୁଦୀ ମୁଖ୍ୟା ଜାମାର୍ସ୍ତି ଢେର୍ ମୁଖ୍ୟାର୍ ଆସ୍କି ମିଆଁ ବିଶ୍ଵାସ୍ କାମ୍ଚାର୍, ଲେକିନ୍ ଫାରିସୀ ଜାମାର୍ଘି ଲାଗାନ୍ ଆବ୍ଡ଼ାର୍ ଖୁଲାଖୁଲି ମା ତେଙ୍ଗାଲିୟାର୍, ଏନ୍ଦେର୍ଗେକା ଆବ୍ଡ଼ାରିନ୍ ସାଭା ଆଡ଼୍ପାନ୍ତି ଅଥ୍ରନାଘି ଏଲ୍ଚ୍କା ରାଚା: 43ଆବ୍ଡ଼ାର୍ଗେ ପାର୍ମେଶ୍ଵାର୍ସ୍କି ତାର୍ତି ଚିଚ୍କା ମାଇନ୍ତି ବାଗ୍ଗେ ଆଲାର୍ଘି ଚିଚ୍କା ମାଇନ୍ଦ୍ ବାଗ୍ଗେ ବାନେ ଲାଗ୍ଗାଲିୟା।
ଯୀଶୁସ୍କି ବଚନ୍ଦ୍ ନ୍ୟାୟଘି ଆଧାର୍
44ଯୀଶୁସ୍ ଜୋର୍ସେ ତେଙ୍ଗିୟାସ୍, “ଏକାସ୍ ଏଙ୍ଘା ମିଆଁ ବିଶ୍ଵାସ୍ କାମ୍ଦାସ୍, ଆସ୍ ଏଙ୍ଘା ମିଆଁ ଖାଲି ମାଲ୍ଲା ଏକାସ୍ ଏଙ୍ଗାନ୍ ତାଏକାଦାସ୍ ଆସ୍କି ମିଆଁହି ବିଶ୍ଵାସ୍ କାମ୍ଦାସ୍। 45ଆରୁ ଏକାସ୍ ଏଙ୍ଗାନ୍ ଏର୍ଦାସ୍, ଆସ୍ ଏଙ୍ଘା ତାଏନା ବାଲାସିନ୍ ଏର୍ଦାସ୍। 46ଏକାସ୍ ଏଙ୍ଘା ମିଆଁ ବିଶ୍ଵାସ୍ କାମ୍ଦାସ୍ ଆସ୍ ଉହାନୁ ମା ରାଦାସ୍, ହୁଦ୍ଘିଲାଗାନ୍ ଏନ୍ ଦୁନିଆଁନୁ ବିଲ୍ଲୀ ଲେଖା ବାର୍ଚ୍କାଦାନ୍। 47ଆରୁ ଯଦି ଏକାସ୍ ଏଙ୍ଘାଏ ବଚନ୍ ମେନିକିରି ମା ମାନ୍ଦାସ୍, ତା ଏନ୍ ଆସିନ୍ ଦୋଷୀ ମା ଠାହ୍ରାଦାନ୍, ଏନ୍ଦେର୍ଗେକା ଏନ୍ ଦୁନିଆଁନ୍ ଦୋଷୀ ଠାହ୍ରାଗେ ମାଲ୍ଲା ବାରୁନ୍; ଲେକିନ୍ ଦୁନିଆଁନ୍ତା ଆଲାରିନ୍ ବାଛାବାଗେ ବାର୍ଚାକାଦାନ୍। 48ଏକାସ୍ ଏଙ୍ଘା ମାଇନ୍ ମା କାମ୍ଦାସ୍, ଆରୁ ଏଙ୍ଘା ଶିକ୍ଷାବନ୍ ଗ୍ରହନ୍ ମା କାମ୍ଦାସ୍ ଆସ୍ ଏସ୍କ୍ରିନ୍ହି ଦୋଷୀ ଠାହ୍ରାରସ୍। ଆରୁ ଏକା ଶିକ୍ଷା ଏନ୍ ଚିଚ୍କାଦାନ୍, ଆଦ୍ ଆସିନ୍ ଆଖ୍ରୀ ଉଲ୍ଲାନୁ ନ୍ୟାୟ କାମାକୋ। 49ଏନ୍ଦେର୍ଗେକା ଏନ୍ ଏଙ୍ଘା ତାର୍ତି ମାଲ୍ଲା ତେଙ୍ଗୁନ୍, ଲେକିନ୍ ବାଙ୍ଗ୍ସ୍ ଏକାସ୍ କା ଏଙ୍ଗାନ୍ ତାଏକାଦାସ୍, ଆସିନ୍ ଏଙ୍ଗାନ୍ ହୁକୁମ୍ ଚିଚ୍କାଦାସ୍ କା ଏନ୍ ଏନ୍ଦେର୍-ଏନ୍ଦେର୍ ତେଙ୍ଗନ୍ ଆରୁ ଏସ୍କେ ତେଙ୍ଗନ୍? 50ଆରୁ ଏନ୍ ଆହାଲ୍ଦାନ୍ କା ଆସ୍କି ଆଦେଶ୍ଦ୍ ସବୁଦିନ୍ତା ଜୀବନ୍ ଚିନା ବାଲାଦ୍। ଆଦ୍ଘିଲାଗାନ୍ ଏକା କାତ୍ଥାନ୍ ଏନ୍ ତେଙ୍ଗ୍ଦାନ୍, ଆବନ୍ ଏସ୍କେ ବାଙ୍ଗ୍ସ୍ ଏଙ୍ଗାନ୍ ତେଙ୍କାଦାସ୍ ଆନ୍ନେନିନ୍ ଏନ୍ ତେଙ୍ଗ୍ଦାନ୍।”
13ଯୀଶୁସ୍ ତାଙ୍ଘା ଚେଲାର୍ଘି ହେଡ୍ଡୁ ନଣାଲ୍ଦାସ୍
1ପାସ୍କାପରବ୍ଘି ଆଘ୍ଲି, ଯେତ୍କବାକେନ୍ ଯୀଶୁସ୍ ଆଖ୍ଖାସ୍ କା ଦୁନିଆଁବନ୍ ଆମ୍ବିକିରି ତାଙ୍ଘା ବାଙ୍ଗ୍ସାନ୍ କାନାଘି ସାମାୟ ଆଣ୍ସିୟା କେର୍କିଚି, ତା ଆସ୍ ତାଙ୍ଘା ଆଲାରିନ୍ ଏକାର୍ କା ଦୁନିଆଁନୁ ରାଚାର୍, ଆବ୍ଡ଼ାରିନ୍ ଯେତ୍କ ବାନେ ହାଖ୍ଖାଲିୟାସ୍, ଆଖ୍ରୀତକ୍ ହି ଆତ୍କନିନ୍ ଆସ୍ ବାନେ ହାଖ୍ଖୀୟାସ୍। 2ହତ୍କବାକେନ୍ ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ମାଁହାବାକେନ୍ ଅନା ମହାଁଲିୟାର୍ ଆରୁ ଶାଏତାନ୍ ଶିମୋନ୍ସ୍କି ହାଦ୍ଦୁ ଯୁଦାସ୍ ଇସ୍କାରିୟୋତିସ୍କି ମନ୍ନୁ ଏନ୍ନେ ସୋଚ୍ ନିନ୍ଦେଇ ଚିଚ୍କିଚା କା ଆସ୍ ଯୀଶୁସିନ୍ ତାଙ୍ଘା ଦୁଶ୍ମାନ୍ ଜାମାର୍ଘି ହେଖ୍ଖାନୁ ଧାର୍ତଚସ୍। 3ଯୀଶୁସ୍ ଆହାଲିୟାସ୍ କା ବାଙ୍ଗ୍ସ୍ ଜାମାକିଛିଘି ମିଆଁ ତାଙ୍ଗାଗେ ହକ୍ ଚିଚ୍କାଦାସ୍ ଆରୁ ଆସ୍ ପାର୍ମେଶ୍ଵାର୍ସ୍କି ତାର୍ତି ବାର୍ଚ୍କାଦାସ୍ ଆରୁ ପାର୍ମେଶ୍ଵାର୍ସ୍କି ଚାହାଗେ କାଲ୍ଦାସ୍। 4ହୁଦ୍ଘିଲାଗାନ୍ ଯୀଶୁସ୍ ଅନ୍ନା ଆଡ୍ଡାନ୍ତି ଉସ୍କାରିକିରି ତାଙ୍ଘା ଆତ୍ତ୍କା ମିଁତା ମିର୍ଜୀବନ୍ ଇଚ୍ଚେଇଚାସ୍, ଆରୁ ଗାମ୍ଛାତି କାଡ଼୍ମାବନ୍ ହିଁଚାସ୍। 5ଆନ୍ତିନ୍ ଥାଡ଼ିନୁ ଆମ୍ମୁ ହୋଇକିରି ଚେଲାଜାମାର୍ଘି ହେଡ୍ଡୁନ୍ ନଣୀୟାସ୍ ଆରୁ୧୩:୫ ୟାହୁଦୀଆନୁ ଗୁତ୍ତିୟାର୍ ପାହିୟାର୍ଘି ହେଡ୍ଡୁନ୍ ନୋଣିକିରି ତାହ୍ମା କାଡ଼୍ମାନୁ ହିଁଚ୍କା ଗାମ୍ଛା ଏହୁ ଚିଁଚ୍ନାଘି ରୀତି ରାଚା। କାଡ଼୍ମାନୁ ହିଁଚ୍କା ଗାମ୍ଛାତି ହେଡ୍ଡୁନ୍ ଚିଁଚାଗେ ଲାଗ୍ଗିୟାସ୍। 6ଯେତ୍କବାକେନ୍ ଯୀଶୁସ୍ ଶିମୋନ୍ ପାତ୍ରାସ୍କି ଚାହାଗେ ବାର୍ଚାସ୍, ଆଙ୍ଗେନ୍ ପାତ୍ରାସ୍ ଆସିନ୍ ତେଙ୍ଗିୟାସ୍, “ହେ ପ୍ରାଭୁ, ନିମ୍ ଏଙ୍ଘା ହେଡ୍ଡୁ ନଣାଲ୍ଦାର୍ କାଁଏ?” 7ଯୀଶୁସ୍ ଆସିନ୍ ଉତ୍ତର୍ ଚିଚ୍ଚାସ୍, “ଏନ୍ ଏକାନ୍ କାମାଲ୍ଦାନ୍, ଆବନ୍ ନିନ୍ ଆକ୍କୁନ୍ ବାଲ୍ଲାଲ୍ଦାଏ, ଲେକିନ୍ ପାଛ୍ଲି ବୁଝ୍ରୟ।” 8ପାତ୍ରାସ୍ ଆସିନ୍ ତେଙ୍ଗିୟାସ୍, “ନିମ୍ ଏକ୍ଲାହି ଏଙ୍ଘା ହେଡ୍ଡୁନ୍ ମା ନଣ୍ନା କାତ୍ଥା!” ଆଙ୍ଗେନ୍ ଯୀଶୁସ୍ ଆସିନ୍ ଉତ୍ତର୍ ଚିଚ୍ଚାସ୍, “ଯଦି ଏନ୍ ନିଙ୍ଗାନ୍ ମା ନଣନ୍, ହାଲେ ନିଙ୍ଘାଗାନେ ଏଙ୍ଘାଏ ଏନ୍ଦେର୍ହି ସମ୍ବନ୍ଧ ମାଲ୍ଲାଦିନ୍।” 9ଶିମୋନ୍ ପାତ୍ରାସ୍ ଯୀଶୁସିନ୍ ତେଙ୍ଗିୟାସ୍, “ହେ ପ୍ରାଭୁ, ହାଲେ ଏଙ୍ଘା ହେଡ୍ଡୁ ଖାଲି ମାଲ୍ଲା, ଏଙ୍ଘା ହେଖ୍ଖା ଆରୁ କୁକ୍କୁନ୍ ହି ନଣାଚା।” 10ଯୀଶୁସ୍ ଆସିନ୍ ତେଙ୍ଗିୟାସ୍, “ଏକାସ୍ ଏମ୍ଚ୍କାଦାସ୍, ଆସ୍କେ ହେଡ୍ଡୁନ୍ ଆମ୍ଵିକିରି ଏନ୍ଦେନ୍ହି ନଣ୍ତ୍ର୍ନାଘି ଦାର୍କାର୍ ମାଲ୍ଲାଦିନ୍। ଲେକିନ୍ ଆସ୍ ପୁରାପୁରୀ ଶୁଦ୍ଧ୍ ରାଦାସ୍; ଆରୁ ନିମ୍ ଶୁଦ୍ଧ୍ ରାଦାର୍ ଲେକିନ୍ ଜାମାର୍ ଶୁଦ୍ଧ୍ ମାଲ୍କାର୍।” 11ଏନ୍ଦେର୍ଗେକା ଏକାସ୍ ତାଙ୍ଗାନ୍ ଦୁଶ୍ମାନ୍ ଜାମାର୍ଘି ହେଖ୍ଖାନୁ ଧାର୍ତସ୍, ଆବନ୍ ଆସ୍ ଆହାଲିୟାସ୍ ହୁଦ୍ଘିଲାଗାନ୍ ଆସ୍ ତେଙ୍ଗିୟାସ୍, “ନିମ୍ ଜାମାର୍ ଶୁଦ୍ଧ୍ ମାଲ୍କାରିନ୍।”
12ଯେତ୍କବାକେନ୍ ଆସ୍ ଆବ୍ଡ଼ାର୍ଘି ହେଡ୍ଡୁ ନଣା ମୁଞ୍ଜିୟାସ୍, ଆରୁ ତାଙ୍ଘା ଚିଢ଼ା ଆତ୍ତିକିରି ଆରୁଅହନ୍ ଅକ୍କିୟାସ୍, ତା ଆବ୍ଡ଼ାରିନ୍ ମେନ୍ଚାସ୍, “ଏନ୍ ନିହ୍ମା ଲାଗାନ୍ ଏନ୍ଦେର୍ କାମ୍ଚ୍କାଦାନ୍, ଆବନ୍ ନିମ୍ ବୁଝ୍ରାଲ୍ଦାର୍ କାଁଏ? 13ନିମ୍ ଏଙ୍ଗାନ୍ ଗୁରୁ ଆରୁ ପ୍ରାଭୁ ବୁଲି ତେଙ୍ଗ୍ଦାର୍, ଆରୁ ନିମ୍ ଠିକେନିନ୍ ତେଙ୍ଗ୍ଦାର୍ ଏନ୍ଦେର୍ଗେକା ଏନ୍ତା ଆ ଆଲାନିନ୍। 14ଯଦି ଏନ୍ ପ୍ରାଭୁ ଆରୁ ଗୁରୁ ମାନିକିରି ହି ନିହ୍ମା ହେଡ୍ଡୁନ୍ ନୋଣକାନ୍, ତା ନିମ୍ହି ଆନ୍ନେନ୍ ଏକ୍ ଦୁସ୍ରାର୍ଘି ହେଡ୍ଡୁନ୍ ନଣ୍ନା କାତ୍ଥା। 15ଏନ୍ ନିହ୍ମାଗାନେ ଏସ୍କେ କାମ୍ଚ୍କାନ୍, ଆନ୍ନେ ନିମ୍ହି କାମା ହୁଦ୍ଘିଲାଗାନ୍ ଏନ୍ ନିମାଗେ ଅଣ୍ଟା ନମୁନା ଏଦ୍କାଦାନ୍। 16ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍, ଗୁତ୍ତିୟାସ୍ ତାଙ୍ଘାଏ ମାଲିକ୍ସ୍ତି ବାଡ଼୍କା ମାଲ୍ଦାସ୍, ଆରୁ ନା ତାଏକା ଆଲାସ୍ ତାଙ୍ଘାଏ ତାଏକା ବାଲାସ୍ସ୍ତି ବାଡ଼୍କାସ୍। 17ଯଦି ଇ କାତ୍ଥାନ୍ ନିମ୍ ଆହ୍ଦାର୍, ଆରୁ ନିମ୍ ହୋନ୍ନେନ୍ କାମର୍ ତା ପାର୍ମେଶ୍ୱାର୍ସ୍ ନିମାଗେ ଆଶୀର୍ବାଦ୍ ଚିୟସ୍। 18ଏନ୍ ନିହ୍ମାଏ ଜାମାର୍ଘି ବାରେନୁ ମାଲ୍ଲା ତେଙ୍ଗୁନ୍; ଏନ୍ଦେର୍ଗେକା ଏକାରିନ୍ ଏନ୍ ଚାଜ୍ଜକାଦାନ୍ ଆବ୍ଡ଼ାରିନ୍ ଏନ୍ ଆହ୍ଦାନ୍, ଲେକିନ୍ ଇଦ୍ ଇଦ୍ଘିଲାଗାନ୍ ମାନ୍ଚା କା ପାବିତାର୍ ଶାସ୍ତ୍ରନୁ ଏକାଦ୍ ଲେଖ୍ଚ୍କା ରାଇ ଆଦ୍ ପୁରା ମାନ୍ନାଦ୍, କା ‘ଏକାସ୍ ଏଙ୍ଘାଏ ଆସ୍ମାବନ୍ ମହଁଦାସ୍, ଆସ୍ ଏଙ୍ଘା ବିରୁଦ୍ଧ୍ନୁ ଗୁଢ଼ିନ୍ ଉଠାବାଚାସ୍।’ 19ଯେତ୍କବାକେନ୍ ଇଦ୍ ଘାଟ୍ରୋ ହତ୍କବାକେନ୍ ନିମ୍ ବିଶ୍ୱାସ୍ କାମର୍ କା୧୩:୧୯ ଏନ୍ ଆନିନ୍: ଏନ୍ନେ ତେଙ୍ଗିକିରି ଯୀଶୁସ୍ ପାର୍ମେଶ୍ୱାର୍ ମାନ୍ନାଘି ଦାବି କାମ୍ଦାସ୍। ପାର୍ମେଶ୍ୱାର୍ସ୍ହି ଏନ୍ନେନ୍ ନିଜର୍ ପରିଚୟ ଚିଦାସ୍। ପାର୍ମେଶ୍ୱାରସ୍କି ବ୍ୟକ୍ତିଗତ୍ ନାମେ ୟୋହବା, ନେଖା ମତ୍ଲବ୍ “ଏନିନ୍” ଏକାନ୍ ପାର୍ମେଶ୍ୱାର୍ସ୍ ମୁଶାସିନ୍ ପ୍ରକଟ୍ କାମ୍ଚ୍କାଚାସ୍। ଏନ୍ ଆ ଆଲାନିନ୍, ହୁଦ୍ଘିଲାଗାନ୍ ଆକ୍କୁନ୍ ଏନ୍ନେ ଘାଟ୍ର୍ନାଘି ଆଘ୍ଲି ଏନ୍ ନିମାନ୍ ତେଙ୍ଗେଇ ଚିଚ୍କାଦାନ୍। 20ଏନ୍ ନିମାନ୍ ସତ୍ତୁ-ସତ୍ତୁ ତେଙ୍ଗାଲ୍ଦାନ୍ କା ଏଙ୍ଘା ତାଏକା ଆଲାରିନ୍ ଏକାସ୍ ଗ୍ରହନ୍ କାମ୍ଦାସ୍, ଆସ୍ ଏଙ୍ଗାନ୍ହି ଗ୍ରହନ୍ କାମ୍ଦାସ୍; ଆରୁ ଏକାସ୍ ଏଙ୍ଗାନ୍ ଗ୍ରହନ୍ କାମ୍ଦାସ୍, ଆସ୍ ଏଙ୍ଘା ତାଏକାସିନ୍ ହି ଗ୍ରହନ୍ କାମ୍ଦାସ୍।”
ଯୁଦାସ୍ ଯୀଶୁସିନ୍ ଧୋଖା ଚିୟସ୍ ଆ ଭବିଷତ୍ କାତ୍ଥା ତେଙ୍ଗାଲ୍ଦାସ୍
(ମାତିସ୍ ୨୬:୨୦-୨୫; ମାର୍କୁସ୍ ୧୪:୧୭-୨୧; ଲୁକାସ୍ ୨୨:୨୧-୨୩)
21ଇ କାତ୍ଥାନ୍ ତେଙ୍ଗିକିରି ଯୀଶୁସ୍ ତାଙ୍ଘା ମନ୍ନୁ ବହୁତ୍ ଆକ୍ବାକ୍ରାସ୍ କେରାସ୍ ଆରୁ ତେଙ୍ଗେଇ ଚିଚ୍ଚାସ୍ କା, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ନିହ୍ମାସ୍ତି ଅର୍ତୁସ୍ ଏଙ୍ଗାନ୍ ଦୁଶ୍ମାନ୍ ଜାମାର୍ଘି ହେଖ୍ଖାନୁ ଧାର୍ତସ୍।” 22ଆଙ୍ଗେନ୍ ଚେଲାଜାମାର୍ ଏକ୍ ଦୁସ୍ରାରିନ୍ ଅଣ୍ଟା ନଜର୍ତି ଏରାଗେ ଲାଗ୍ଗିୟାର୍। ଆବ୍ଡ଼ାର୍ ସୋଚା ପଲ୍ଲାଲିୟାର୍, କା ଆସ୍ ନେଖା ବାରେନୁ ତେଙ୍ଗାଲିୟାସ୍। 23ଆସ୍କି ଚେଲାର୍ଘିନ୍ତି ଅଣ୍ଟାସ୍୧୩:୨୩ ବିଧି ଘି ଅନୁସାର୍ ଯୋହାନ୍ସ୍ ଏକାସ୍ କା ଇ ସୁସାମାଚାର୍ଘି ଲେଖକସ୍ ଆସ୍ ଚେଲା ରାଚାସ୍, ନେଖା ମିଆଁ କା ଯୀଶୁସ୍ ବାଗ୍ଗେ ବାନେ ହାଖ୍ଖାଲିୟାସ୍।ଏକାସିନ୍ କା ଯୀଶୁସ୍ ବାନେ ହାଖ୍ଖାଲିୟାସ୍, ଆସ୍ ଯୀଶୁସ୍କି ଏହୁ ତାରା ନୁହିଁକିରି ଅକ୍କାଚାସ୍। 24ଶିମୋନ୍ ପାତ୍ରାସ୍ ଆସ୍ତାରା ଠାର୍ଇକିରି ତେଙ୍ଗିୟାସ୍, “ଯୀଶୁସିନ୍ ମେନାତା, ଆସ୍ ନେଖା ବାରେ ତେଙ୍ଗାଲ୍ଦାସ୍?” 25ଆଙ୍ଗେନ୍ ଆସ୍ ହନ୍ନେନ୍ ଯୀଶୁସ୍କି ଏହୁ ତାରା ନୁହିଁକିରି ଆସିନ୍ ମେନ୍ଚାସ୍, “ହେ ପ୍ରାଭୁ, ଆସ୍ ନେଦ୍?” 26ଯୀଶୁସ୍ ଉତ୍ତର୍ ଚିଚ୍ଚାସ୍, “ଏକାସ୍କେ ଏନ୍ ଇ ଆସ୍ମାଘି ଟୁକ୍ଡ଼ାବନ୍ ବଥିକିରି ଚୋନ୍ ଆସ୍ ଆସିନ୍।” ଆରୁ ଯୀଶୁସ୍ ଟୁକ୍ଡ଼ାବନ୍ ବଥିକିରି ଶିମୋନ୍ ଇସ୍କୋରିୟତିସ୍କି ହାଦ୍ଦୁ ଯୁଦାସ୍କେ ଚିଚ୍ଚାସ୍। 27ଆରୁ ଯୁଦାସ୍ ଟୁକ୍ଡ଼ାବନ୍ ଅଚ୍ଚାସ୍ ଆଦ୍ଘି ପାଛ୍ଲି ଶାଏତାନ୍ଦ୍ ଆସ୍କିନୁ କର୍ଚା। ଆଙ୍ଗେନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ଏକାନ୍ ନିନ୍ କାମାଲ୍ଦାଏ, ଆବନ୍ ଚାଁଣେ କାମା।” 28ଲେକିନ୍ ଆସାନ୍ ଅକ୍କୁ ଆଲାର୍ଘି ଭିତର୍ତି ନେଦ୍ହି ବାଲ୍ଲୟାରିନ୍ କା ଯୀଶୁସ୍ ଇ କାତ୍ଥାନ୍ ଯୁଦାସ୍ସିନ୍ ଏନ୍ଦେର୍ଗେ ତେଙ୍ଗିୟାସ୍। 29ଯୁଦାସ୍ସାନ୍ ପାଏସା ଥାଇଲି ରାଲିୟାଦ୍, ଆଦ୍ଘିଲାଗାନ୍ ଏକା-ଏକା ଚେଲାର୍ ସୋଚ୍ଚାର୍ କା ପାସ୍କାପରବ୍ନୁ ନାମାଗେ ଏକାଦ୍ ଦାର୍କାର୍ ରାଇଦ୍ ଆବନ୍ ହେନ୍ଦାଗେ, ଚାହେ ୧୩:୨୯ ପାସ୍କାପରବ୍ଘି ମାଁହା ଗରୀବ୍ ଆଲାର୍ଗେ ଦାନ୍ ଚିନା ୟାହୁଦୀ ଜାମାର୍ଘି ରୀତି ରାଚା। ଆ ମାଁହା ମନ୍ଦିର୍ତା ଫାଟକ୍ବନ୍ ଖୋଲା ଚିଆଲିୟାର୍ ଆରୁ ଗରୀବ୍ ଆରୁ ଭିଖାରିର୍ ଆସାନ୍ ଜୁମ୍ରାଲିୟାର୍ ଆରୁ ଦାନ୍ ହୁଆଲିୟାର୍।ଗରୀବ୍ ଆଲାର୍ଗେ ଏନ୍ଦ୍ରିନ୍ ଦାନ୍ ଚିନାଘି ବାରେ ଯୀଶୁସ୍ ଯୁଦାସ୍ସିନ୍ ତେଙ୍ଗାଲ୍ଦାସ୍। 30ହୁଦ୍ଘିଲାଗାନ୍ ଯୁଦାସ୍ ଆସ୍ମା ଟୁକ୍ଡ଼ା ଅଚ୍ଚକା ପାଛ୍ଲି ହୁଙ୍ଗେନିନ୍ ବାହାରି ଉର୍ଖାସ୍ କେରାସ୍; ଆରୁ ହତ୍କବାକେନ୍ ମାଁହା ରାଚା।
ଯୀଶୁସ୍ ଚେଲାର୍ଗେ ପୁନା ହୁକୁମ୍ ଚିଆଲ୍ଦାସ୍
31ଯେତ୍କବାକେନ୍ ଯୁଦାସ୍କି ବାହାରି ଉର୍କା ପାଛ୍ଲି ଯୀଶୁସ୍ ତେଙ୍ଗିୟାସ୍, “ଆକ୍କୁନ୍ ମୁନୁଷ୍ ହାଦ୍ଦୁସ୍କି ମାହିମା ମାନ୍ଚ୍କିଚି, ଆରୁ ଆସ୍କି ଦ୍ୱାର୍ନୁ ପାର୍ମେଶ୍ୱାର୍ସ୍କି ମାହିମା ମାନ୍ଚ୍କିଚି। 32ଯଦି ମୁନୁଷ୍ ହାଦ୍ଦୁସ୍କି ଦ୍ୱାର୍ନୁ ପାର୍ମେଶ୍ଵାର୍ସ୍କି ମାହିମା ମାନ୍ଚ୍କିଚି ତା ପାର୍ମେଶ୍ୱାର୍ସ୍ହି ତାଙ୍ଘା ଦ୍ୱାର୍ନୁ ଆସ୍କି ମାହିମା କାମସ୍। ଆରୁ ଆସ୍ ଆବନ୍ ଚାଁଣେନିନ୍ ମାହିମା କାମସ୍।”
33“ହେ ଏଙ୍ଘାଏ ଦୁଲାଡ଼ି ହାଦ୍ଦୁରୋ, ଏନ୍ କାଟେ ଡେରିଘି ଲାଗାନ୍ ନିହ୍ମାଗାନେ ରାଦାନ୍: ଆନ୍ତିନ୍ ନିମ୍ ଏଙ୍ଗାନ୍ ବେଦ୍ଦର୍, ଆରୁ ଏନ୍ ଏସ୍କେ ୟାହୁଦୀ ମୁଖ୍ୟାଜାମାରିନ୍ ତେଙ୍କାଚ୍କାନ୍ ହନ୍ନେନ୍ ନିମାନ୍ହି ତେଙ୍ଗାଲ୍ଦାନ୍ କା ‘ଏକାସାନ୍ ଏନ୍ କାଲ୍ଦାନ୍ ଆସାନ୍ ନିମ୍ ବାରା ପଲ୍ଲଦାରିନ୍।’ 34ଏନ୍ ନିମାଗେ ଅଣ୍ଟା ପୁନା ହୁକୁମ୍ ଚିଆଲ୍ଦାନ୍ କା ଏକ୍ ଦୁସ୍ରାସିନ୍ ବାନେ ହାଖ୍ଖା; ଏସ୍କେ ଏନ୍ ନିମାନ୍ ବାନେ ହାଖ୍ଖଦାନ୍, ଆନ୍ନେନ୍ ନିମ୍ହି ଏକ୍ ଦୁସ୍ରାରିନ୍ ବାନେ ହାଖ୍ଖା। 35ଯଦି ନିମ୍ ଏକ୍ ଦୁସ୍ରାରିନ୍ ବାନେ ହାଖ୍ଖର୍, ତା ଇତ୍ତି ଜାମାର୍ ଆହର୍ କା ନିମ୍ ଏଙ୍ଘାଏ ଚେଲାର୍।”
ପାତ୍ରାସ୍ ମାନା କାମସ୍ ଏନ୍ନେ ଭବିଷତ୍ କାତ୍ଥା ଯୀଶୁସ୍ ତେଙ୍ଗାଲ୍ଦାସ୍
(ମାତିସ୍ ୨୬:୩୧-୩୫; ମାର୍କୁସ୍ ୧୪:୨୭-୩୧; ଲୁକାସ୍ ୨୨:୩୧-୩୪)
36ଶିମୋନ୍ ପାତ୍ରାସ୍ ଯୀଶୁସିନ୍ ମେନ୍ଚାସ୍, “ହେ ପ୍ରାଭୁ, ନିନ୍ ଏକାତାରା କାଲ୍ଦାଏ?” ଯୀଶୁସ୍ ଉତ୍ତର୍ ଚିଚ୍ଚାସ୍, “ଏକାସାନ୍ ଏନ୍ କାଲ୍ଦାନ୍ ଆସାନ୍ ନିନ୍ ଆକ୍କୁନ୍ ଏଙ୍ଘାଏ ପାଛ୍ଲି ବାରା ପଲ୍ଲଦାଇନ୍; ୧୩:୩୬ ଇସାନ୍ ଯୀଶୁସ୍ ପାତ୍ରାସ୍କି ଖିନାଘି ବାରେନୁ ଭବିଷତ୍ କାତ୍ଥା କାମାଲ୍ଦାସ୍। ନିନ୍ ଆସାନ୍ ପାଛ୍ଲି ବାରୟ।” 37ପାତ୍ରାସ୍ ଆସିନ୍ ମେନ୍ଚାସ୍, “ହେ ପ୍ରାଭୁ, ଆକ୍କୁନ୍ ଏନ୍ ନିହ୍ମା ପାଛ୍ଲି ଏନ୍ଦେର୍ଗେ ବାରା ପଲ୍ଲଦାନିନ୍? ଏନ୍ତା ନିହ୍ମା ଲାଗାନ୍ ଏଙ୍ଘା ଜୀଆ ହି ଚିଅନ୍ ଲାଗ୍ଗନ୍।” 38ଯୀଶୁସ୍ ଉତ୍ତର୍ ଚିଚ୍ଚାସ୍, “ନିନ୍ ସତ୍ତୁନିନ୍ ଏଙ୍ଘାଲାଗାନ୍ ନିଙ୍ଘା ଜୀଆ ଚିଅୟ ଲାଗୟ କାଁଏ? ଏନ୍ ନିଙ୍ଗାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ହେରୁ ଅହ୍ଲନାଘି ଆଘ୍ଲି ନିନ୍ ତିନ୍ ଥର୍ ଏଙ୍ଗାନ୍ ମାନା କାମୟ।”
14ପାର୍ମେଶ୍ଵାର୍ସ୍କି ଚାହା କାଲାଗେ ଯୀଶୁସିନ୍ ପାବୁସ୍
1“ନିହ୍ମାଏ ମନ୍ଦ୍ ମା ଘାବ୍ରାରାନା କାତ୍ଥା; ନିମ୍ ପାର୍ମେଶ୍ଵାର୍ସ୍କି ମିଆଁ ବିଶ୍ଵାସ୍ ଉୟା ଆରୁ ଏଙ୍ଘା ମିଆଁହି ବିଶ୍ଵାସ୍ କାମା। 2ଏଙ୍ଘାଏ ବାଙ୍ଗ୍ସ୍କି ଆଡ଼୍ପାନୁ ରାଗେ ଢେର୍ ଆଡ୍ଡା ଆତ୍ଲି, ଯଦି ମା ରଦ୍ନେ ତା ଏନ୍ ନିମାନ୍ ତେଙ୍ଗନ୍ଚନ୍ନେ; ଏନ୍ଦେର୍ଗେକା ଏନ୍ ନିମାଗେ ଆଡ୍ଡା ତିୟାର୍ କାମାଗେ କାଲ୍ଦାନ୍। 3ଏନ୍ (ଯୀଶୁସ୍) ଆସାନ୍ କାଇକିରି ନିହ୍ମା ଲାଗାନ୍ ଆଡ୍ଡା ତିଆର୍ କାମ୍ନାଘି ପାଛ୍ଲି ଆରୁଅହନ୍ ବାରନ୍ ଆରୁ ନିମାରିନ୍ ଆସାନ୍ ହନ୍କନ୍ ଏକାସାନ୍ କା ଏନ୍ ରାଦାନ୍ ଆସାନ୍ ନିମ୍ହି ରର୍। 4ଆରୁ ଏନ୍ ଏକାସାନ୍ କାଲ୍ଦାନ୍ ଆସ୍ତା ପାବୁନ୍ ନିମ୍ ଆହ୍ଦାର୍।” 5ଥୋମାସ୍ ଆସିନ୍ ତେଙ୍ଗିୟାସ୍, “ହେ ପ୍ରାଭୁ, ଏମ୍ ବାଲ୍ଦାନିନ୍ କା ନିମ୍ ଏକାତାରା କାଲ୍ଦାର୍; ତା ଆସ୍ତା ପାବୁନ୍ ଏସ୍କେ ଆହମ୍?” 6ଯୀଶୁସ୍ ଆସିନ୍ ତେଙ୍ଗିୟାସ୍, “ଏନ୍ ପାବୁ ଆରୁ ସତ୍ତୁ ଆରୁ ଜୀବନ୍ ଚିନାବାଲାନ୍; ଏନିନ୍, ଏଙ୍ଘା ଦ୍ୱାରା ନେଦ୍ହି ବାଙ୍ଗ୍ସ୍କି ଚାହାଗେ ବାରା ପଲ୍ଲନାଇନ୍। 7ଯଦି ନିମ୍ ଏଙ୍ଗାନ୍ ଆହର୍ନେ, ତା ଏଙ୍ଘା ବାଙ୍ଗ୍ସିନ୍ହି ଆହର୍ନେ; ଲେକିନ୍ ଆକ୍କୁନ୍ ନିମ୍ ଆସିନ୍ ଆହ୍ଦାର୍, ଆରୁ ଆସିନ୍ ଏର୍କାଦାର୍ ହି।”
8ଫିଲିପ୍ପସ୍ ଆସିନ୍ ତେଙ୍ଗିୟାସ୍, “ହେ ପ୍ରାଭୁ, ବାଙ୍ଗ୍ସିନ୍ ଏମାନ୍ ଏଦାଚା, ଇଦିନ୍ ଏହ୍ମାଲାଗାନ୍ ବହୁତ୍।” 9ଯୀଶୁସ୍ ଆସିନ୍ ତେଙ୍ଗିୟାସ୍, “ହେ ଫିଲିପ୍ପ, ଏତ୍କ ଉଲ୍ ଏନ୍ ନିହ୍ମାଗାନେ ରାଦାନ୍, ଆରୁ ନିନ୍ ଏଙ୍ଗାନ୍ ବାଲ୍ଦାଇନ୍? ଏକାସ୍ ଏଙ୍ଗାନ୍ ଏର୍କାଦାସ୍ ଆସ୍ ବାଙ୍ଗ୍ସିନ୍ହି ଏର୍କାଦାସ୍। ଆରୁ ନିନ୍ ଏନ୍ଦେର୍ଗେ ତେଙ୍ଗାଲ୍ଦାଏ କା ‘ଏମାନ୍ ବାଙ୍ଗ୍ସିନ୍ ଏଦାଚା’? 10ନିନ୍ ଏନ୍ଦେର୍ଗେ ବିଶ୍ୱାସ୍ ମା କାମ୍ଦାଏ କା ଏନ୍ ବାଙ୍ଗ୍ସ୍କିନୁ ରାଦାନ୍ ଆରୁ ବାଙ୍ଗ୍ସ୍ ଏଙ୍ଘାଏନୁ ରାଦାସ୍? ଇ କାତ୍ଥାନ୍ ଏକାନ୍ କା ଏନ୍ ନିମାନ୍ ତେଙ୍ଗାଲ୍ଦାନ୍, ଏଙ୍ଘା ତାର୍ତି ମା ତେଙ୍ଗ୍ଦାନ୍, ଲେକିନ୍ ବାଙ୍ଗ୍ସ୍ ଏଙ୍ଘାଏନୁ ରାଇକିରି ତାଙ୍ଘା ନାଲ୍ଖୁନ୍ କାମ୍ଦାସ୍। 11ଏଙ୍ଘା ମିଆଁ ବିଶ୍ୱାସ୍ କାମା କା ଏନ୍ ବାଙ୍ଗ୍ସ୍କିନୁ ରାଦାନ୍ ଆରୁ ବାଙ୍ଗ୍ସ୍ ଏଙ୍ଘାଏନୁ ରାଦାସ୍; ମାଲ୍ଲାହାଲେ ତା ଏନ୍ ଏକା-ଏକା ନାଲ୍ଖୁନ୍ କାମ୍ଚ୍କାଦାନ୍ ଆ ନାଲ୍ଖୁନ୍ ଏରିକିରି ଏଙ୍ଘା ମିଆଁ ବିଶ୍ଵାସ୍ କାମା।”
12“ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଏକାସ୍ ଏଙ୍ଘା ମିଆଁ ବିଶ୍ଵାସ୍ କାମ୍ଦାସ୍, ଆସ୍ ଏକା-ଏକା ନାଲ୍ଖୁନ୍ ଏନ୍ କାମାଲ୍ଦାନ୍ ଆ ନାଲ୍ଖୁନ୍ହି କାମସ୍, ଆରୁ ଇଦ୍ଘିନ୍ତି ହି ବାଡ଼୍କା-ବାଡ଼୍କା ନାଲ୍ଖୁ କାମସ୍, ଏନ୍ଦେର୍ଗେକା ଏନ୍ ବାଙ୍ଗ୍ସ୍କି ଚାହାଗେ କାଲ୍ଦାନ୍। 13ହାଦ୍ଦୁସ୍କି ଦ୍ୱାର୍ନୁ ବାଙ୍ଗ୍ସ୍କି ମାହିମା ମାନ୍ନାଦ୍ ହୁଦ୍ଘିଲାଗାନ୍ ନିମ୍ ଏଙ୍ଘା ନାମେତି ଏନ୍ଦ୍ରିନ୍ହି ନିଅର୍, ଆବନ୍ ଏନ୍ କାମନ୍। 14ଯଦି ନିମ୍ ଏଙ୍ଘାଏ ନାମେତି ଏଙ୍ଗାନ୍ ଏନ୍ଦ୍ରିନ୍ହି ନିଅର୍, ତା ଏନ୍ ଆବନ୍ କାମନ୍।”
ଯୀଶୁସ୍ ପାବିତାର୍ ଆତ୍ମା ଚିୟାଗେ କାତ୍ଥା ଚିଆଲ୍ଦାସ୍
15“ଯଦି ନିମ୍ ଏଙ୍ଗାନ୍ ବାନେ ହାଖ୍ଖଦାର୍, ତା ଏଙ୍ଘା ହୁକୁମ୍ବନ୍ ମାନର୍। 16ଏନ୍ ବାଙ୍ଗ୍ସାନ୍ ଆର୍ଜୀବିନ୍ତି କାମନ୍, ଆରୁ ଆସ୍ ନିମାଗେ ଆରୁ ଅଣ୍ଟା ମଦେତ୍ କାମ୍ନା ବାଲାସିନ୍ ଚସ୍ ତାକା ଆସ୍ ଜାମାବାକେନ୍ ନିହ୍ମାଗାନେ ରସ୍। 17ମତ୍ଲବ୍ ସତ୍ତୁଘି ଆତ୍ମାଦ୍, ଏକାନ୍ କା ଦୁନିଆଁଦ୍ ଗ୍ରହନ୍ କାମା ପଲ୍ଲୀଦ୍, ଏନ୍ଦେର୍ଗେକା ଇ ଦୁନିଆଁଦ୍ ଆବନ୍ ଏରା ପଲ୍ଲୀଦ୍ ଆରୁ ବାଲ୍ଲିଦିନ୍; ନିମ୍ ଆବନ୍ ଆହ୍ଦାର୍ ଏନ୍ଦେର୍ଗେକା ଆଦ୍ ନିହ୍ମାଗାନେ ରାଇଦ୍, ଆରୁ ନିହ୍ମାଏନୁ ରଦ୍।”
18“ଏନ୍ ନିମାନ୍ ଟୁରା ମା ଆମ୍ବଦାନ୍; ଏନ୍ ନିହ୍ମାସାନ୍ ବାରନ୍। 19ଆରୁ ଥୋଡ଼େ ସାମାୟଘି ପାଛ୍ଲି ରାଇ କା ଦୁନିଆଁଦ୍ ଏଙ୍ଗାନ୍ ଆରୁ ମା ଏରିଦ୍ ଲେକିନ୍ ନିମ୍ ଏଙ୍ଗାନ୍ ଏରର୍; ଆରୁ ଏନ୍ ଉଜ୍ଜାଲ୍ଦାନ୍, ହୁଦ୍ଘିଲାଗାନ୍ ନିମ୍ହି ଉଜ୍ଜର୍। 20ହୁ ଉଲ୍ଲା ନିମ୍ ଆହର୍ କା ଏନ୍ ଏଙ୍ଘା ବାଙ୍ଗ୍ସ୍କିନୁ ରାଦାନ୍, ଆରୁ ନିମ୍ ଏଙ୍ଘାଏନୁ ରାଦାର୍ ଆରୁ ଏନ୍ ନିହ୍ମାଏନୁ ରାଦାନ୍। 21ଏକାସ୍ ଏଙ୍ଘା ହୁକୁମ୍ବନ୍ ମାନିକିରି ଆଦ୍ଘି ଲେଖା ଚାଲ୍ର୍ଦାସ୍, ଆସିନ୍ ଏଙ୍ଗାନ୍ ବାନେ ହାଖ୍ଖଦାସ୍; ଏକାସ୍ ଏଙ୍ଗାନ୍ ବାନେ ହାଖ୍ଖଦାସ୍ ଆସିନ୍ ଏଙ୍ଘା ବାଙ୍ଗ୍ସ୍ ବାନେ ହାଖ୍ଖସ୍। ଏନ୍ହି ଆସିନ୍ ବାନେ ହାଖ୍ଖନ୍, ଆରୁ ନିଜ୍କେନିଜ୍ ଆସ୍କିନୁ ଏଦୋନ୍।”
22ଆ ଯୁଦାସ୍ ଏକାସ୍ କା ଯୁଦାସ୍ ଇସ୍କାରିୟତି ମାଲ୍ଲାରୁସ୍, ଆସ୍ ତେଙ୍ଗିୟାସ୍, “ହେ ପ୍ରାଭୁ, ଏନ୍ଦେର୍ କାତ୍ଥା ରାଇ କା ନିମ୍ ଦୁନିଆଁନ୍ ମାଲ୍ଲା, ଲେକିନ୍ ଖାଲି ଏମାନ୍ ବାତାବାଗେ ବେଦ୍ଦାଲ୍ଦାର୍?” 23ଯୀଶୁସ୍ ଆସିନ୍ ଉତ୍ତର୍ ଚିଚ୍ଚାସ୍, “ଯଦି ଏକାସ୍ ଏଙ୍ଗାନ୍ ବାନେ ହାଖ୍ଖଦାସ୍ ତା ଆସ୍ ଏଙ୍ଘା ବଚନ୍ବନ୍ ମାନସ୍, ଆରୁ ଏଙ୍ଘାଏ ବାଙ୍ଗ୍ସ୍ ଆସିନ୍ ବାନେ ହାଖ୍ଖସ୍, ଆରୁ ଏମ୍ ଆସ୍କି ଚାହାଗେ ବାରମ୍ ଆରୁ ଆସ୍ଗାନେ ରମ୍। 24ଏକାସ୍ ଏଙ୍ଗାନ୍ ବାନେ ମା ହାଖ୍ଖଦାସ୍, ଆସ୍ ଏଙ୍ଘାଏ ବଚନ୍ବନ୍ ମା ମାନ୍ଦାସ୍; ଆରୁ ଏକା ବଚନ୍ବନ୍ ନିମ୍ ମେନ୍ଦାର୍ ଆଦ୍ ଏଙ୍ଘାଏ ମାଲ୍ଲା ଲେକିନ୍ ବାଙ୍ଗ୍ସ୍କିଦ୍, ଏକାସ୍ ଏଙ୍ଗାନ୍ ତାଏକାଦାସ୍।”
25“ଇ କାତ୍ଥାନ୍ ଏନ୍ ନିହ୍ମାଗାନେ ରାନାବାକେନ୍ ନିମାନ୍ ତେଙ୍କାଚ୍କାନ୍। 26ଲେକିନ୍ ବାଙ୍ଗ୍ସ୍ ମଦେତ୍ କାମୁ ପାବିତାର୍ ଆତ୍ମାବନ୍ ଏଙ୍ଘା ନାମେନୁ ତାଇୟସ୍। ଆଦ୍ ନିମାନ୍ ଜାମା କାତ୍ଥାନ୍ ଶିଖାବଦ୍, ଆରୁ ଏକାନ୍-ଏକାନ୍ ଏନ୍ ନିମାନ୍ ତେଙ୍କାଦାନ୍, ଆବ୍ଡ଼ା ଜାମାନ୍ ଆଦ୍ ନିମାନ୍ ମନେ କାମ୍ତଦ୍। 27ଏନ୍ ନିମାଗେ ଶାନ୍ତି ଚିଇକିରି କାଲ୍ଦାନ୍। ଏନ୍ ଏଙ୍ଘା ଶାନ୍ତିବନ୍ ନିମାଗେ ଚିଆଲ୍ଦାନ୍; ଦୁନିଆଁଦ୍ ଏସ୍କେ ଚିଇଦ୍ ଆନ୍ନେ ଏନ୍ ମା ଚିଦାନ୍: ନିହ୍ମାଏ ମନ୍ଦ୍ ମା ଘାବ୍ରାରାନା ଆରୁ ମା ଏଲ୍ଚ୍ନା କାତ୍ଥା।”
28“ନିମ୍ ଏଙ୍ଘା ତେଙ୍ଗ୍ନାନ୍ ମେନ୍ଚ୍କାଦାର୍ କା, ‘ଏନ୍ କାଲ୍ଦାନ୍, ଆରୁ ନିହ୍ମା ଚାହାଗେ ଆରୁଅହନ୍ ବାରନ୍।’ ଯଦି ନିମ୍ ଏଙ୍ଗାନ୍ ବାନେ ହାଖ୍ଖର୍ନେ, ତା ଇ କାତ୍ଥାନୁ ଖୁସୀ ମାନର୍ନେ କା ଏନ୍ ବାଙ୍ଗ୍ସ୍କି ଚାହାଗେ କାଲ୍ଦାନ୍, ଏନ୍ଦେର୍ଗେକା ବାଙ୍ଗ୍ସ୍ ଏଙ୍ଘାଏସ୍ତି ବାଡ଼୍କା ରାଦାସ୍। 29ଯେତ୍କବାକେନ୍ ଇଦ୍ ଘାଟ୍ରଦ୍ତା, ନିମ୍ ବିଶ୍ୱାସ୍ କାମର୍, ହୁଦ୍ଘିଲାଗାନ୍ ଆକ୍କୁନ୍ ଇ ଘାଟ୍ର୍ନାଘି ଆଘ୍ଲିନିନ୍ ଏନ୍ ନିମାନ୍ ତେଙ୍ଗେଚିଚ୍କାଦାନ୍। 30ଏନ୍ ନିହ୍ମାଗାନେ ବାଗ୍ଗେ ଡେରି କାଚ୍ନେଖରା ପଲ୍ଲଦାନିନ୍, ଏନ୍ଦେର୍ଗେକା ଇ ଦୁନିଆଁନ୍ତା ରାଜାସ୍ ମତ୍ଲବ୍ ଶାଏତାନ୍ ବାରାଲ୍ଦାସ୍। ଏଙ୍ଘା ମିଆଁ ଆସ୍କି ଏନ୍ଦେର୍ହି ହକ୍ ମାଲ୍ଲାଦିନ୍; 31ଲେକିନ୍ ଇଦ୍ ଇଦ୍ଘିଲାଗାନ୍ ମାନାଲିଦ୍ ଏସ୍କେ କା ଦୁନିଆଁଦ୍ ଆହଦ୍ କା ଏନ୍ ବାଙ୍ଗ୍ସିନ୍ ବାନେ ହାଖ୍ଖଦାନ୍। ଆରୁ ଏସ୍କେ ବାଙ୍ଗ୍ସ୍ ଏଙ୍ଗାଗେ ହୁକୁମ୍ ଚିଚ୍କାଦାସ୍ ଆନ୍ନେନିନ୍ କାମ୍ଦାନ୍। ଆକ୍କୁନ୍ ଉସ୍କାରା, ନାମ୍ ଇସ୍ତିଲେ କତ୍।”
15ଯୀଶୁସ୍ ସତ୍ତୁ ଅଙ୍ଗୁର୍ ଲହସ୍
1“ଯୀଶୁସ୍ ତେଙ୍ଗିୟାସ୍, ସତ୍ତୁ ଅଙ୍ଗୁର୍ ଲହନ୍ ଏନିନ୍। ଆରୁ ଏଙ୍ଘାଏ ବାଙ୍ଗ୍ସ୍ ଏର୍ନା ହଜ୍ନା କାମ୍ନାବାଲା ମାଲିସ୍। 2ଏକା ଡାହିଁଦ୍ ଏଙ୍ଘାଏନୁ ରାଇଦ୍ ଆରୁ ମା ହାଞ୍ଜିଦ୍, ଆବନ୍ ଆସ୍ ଛୋପ୍ଦାସ୍ ଚିଦାସ୍; ଆରୁ ଏକା ଡାହିଁ ହାଞ୍ଜିଦ୍, ଆବନ୍ ଆସ୍ ଛାଟ୍ଦାସ୍ ଏନ୍ଦେର୍ଗେକା ଆଦ୍ ଆରୁହି ବାଗ୍ଗେ ହାଞ୍ଜାଦ୍। 3ଏକା ବଚନ୍ ଏନ୍ ନିମାଗେ ଚିଚ୍କାଦାନ୍, ଆଦ୍ଘି ଲାଗାନ୍ ନିମ୍ ଆଘ୍ଲିନ୍ତିନ୍ ଶୁଦ୍ଧ୍ ମାନ୍ଚ୍କାର୍ କେର୍କାଦାର୍। 4ଯଦି ନିମ୍ ଏଙ୍ଘାଏନୁ ରର୍, ତା ଏନ୍ହି ନିହ୍ମାଏନୁ ରନ୍। ଏସ୍କେ କା ଡାହିଁଦ୍ ଯଦି ଲହନୁ ଲାଗିକିରି ମା ରାଇ ତା ତାଙ୍ଘାସୁଖେନ୍ ମା ହାଞ୍ଜିଦ୍, ଆନ୍ନେନ୍ ନିମ୍ହି ଯଦି ଏଙ୍ଘାଏନୁ ମା ରର୍ତା ନିମ୍ ହାଞ୍ଜା ପଲ୍ଲଦାରିନ୍।”
5“ଏନ୍ ଅଙ୍ଗୁର୍ ଲହନ୍: ଆରୁ ନିମ୍ ଡାହିଁର୍। ଏକାସ୍ ଏଙ୍ଘାଏନୁ ରାଦାସ୍ ଆରୁ ଏନ୍ ଆସ୍କିନୁ ରାଦାନ୍, ଆସ୍ ବହୁତ୍ ଫାଡ଼ୁ ହାଖ୍ଖସ୍, ଏନ୍ଦେର୍ଗେକା ଏଙ୍ଘାସ୍ତି ଭିନେ ମାନିକିରି ନିମ୍ ଫାଡ଼ୁ ହାଖ୍ଖା ପଲ୍ଲଦାରିନ୍। 6ଯଦି ନେଦିନ୍ ଏଙ୍ଘାଏନୁ ମା ରର୍, ତା ଆସିନ୍ ଡାହିଁଘି ଲେଖା ଖେବ୍ଡ଼ା ଚିଆକାଇ, ଆରୁ ଆଦ୍ ହାଇକାଇ; ଆରୁ ଆଲାର୍ ଆବନ୍ ଠୁଡ଼୍ୟିକିରି ଚିଚ୍ଚୁନୁ ବାସ୍ନାଏ ଚିନାଏ ଆରୁ ଆଦ୍ ଅଲି କାଇ। 7ଯଦି ନିମ୍ ଏଙ୍ଘାଏନୁ ରାଦାର୍, ଆରୁ ଏଙ୍ଘା ବଚନ୍ଦ୍ ନିହ୍ମାଏନୁ ରାଇ ତା ନିମ୍ ଏକାନ୍ ଚାହଁଦାର୍ ଆବନ୍ ନିଆଁ ଆଦ୍ ନିମାଗେ ଚିଆକୋ। 8ଆରୁ ନିମ୍ ବହୁତ୍ ଫଲ୍ ହାଖ୍ଖର୍ ହାଲେ ଏଙ୍ଘାଏ ବାଙ୍ଗ୍ସ୍କେ ବାଗ୍ଗେ ମାଇନ୍ ହାଖ୍ଖରଦ୍। ଆରୁ ନିମ୍ ସତ୍ତୁନିନ୍ ଏଙ୍ଘାଏ ଚେଲା ମାନର୍।”
9“ଆରୁ ଏସ୍କେ ବାଙ୍ଗ୍ସ୍ ଏଙ୍ଗାନ୍ ବାନେ ହାଖ୍ଖଦାସ୍, ଆନ୍ନେନ୍ ଏନ୍ ନିମାନ୍ ବାନେ ହାଖ୍ଖଦାନ୍; ଏଙ୍ଘାଏ ବାନେ ହାଖ୍ଖନାନୁ ମଜ୍ବୁତ୍ ରା। 10ଯଦି ନିମ୍ ଏଙ୍ଘାଏ ହୁକୁମ୍ବନ୍ ମାନର୍, ତା ନିମ୍ ଏଙ୍ଘାଏ ବାନେ ହାଖ୍ଖନାନୁ ମଜ୍ବୁତ୍ ରର୍; ଏସ୍କେ କା ଏନ୍ ଏଙ୍ଘାଏ ବାଙ୍ଗ୍ସ୍କି ହୁକୁମ୍ବନ୍ ମାନ୍ଦାନ୍ ଆରୁ ଆସ୍କି ବାନେ ହାଖ୍ଖନାନୁ ମଜ୍ବୁତ୍ ରାଦାନ୍। 11ଏନ୍ ନିମାନ୍ ଇ ଜାମା କାତ୍ଥାନ୍ ଇଦ୍ଘିଲାଗାନ୍ ତେଙ୍କାନ୍, କା ଏଙ୍ଘାଏନୁ ଏକା ଖୁସୀ ରାଇ, ଆଦ୍ ନିହ୍ମାଏନୁ ରାନାଦ୍, ଆରୁ ନିହ୍ମାଏ ଖୁସୀ ଭାର୍ପୁର୍ ମାନ୍ନା କାନାଦ୍।”
12“ଏଙ୍ଘାଏ ହୁକୁମ୍ଦ୍ ଇଦ୍, କା ଏସ୍କେ ଏନ୍ ନିମାନ୍ ବାନେ ହାଖ୍ଖଦାନ୍, ଆନ୍ନେନ୍ ନିମ୍ହି ଏକ୍ ଦୁସ୍ରାରିନ୍ ବାନେ ହାଖ୍ଖା। 13ନିଜର୍ ସାଙ୍ଗେର୍ଗେ ନିଜର୍ ଜୀଆ ଚିନାନ୍ତି ବାଡ଼୍କା ନେଖାଏହି ବାନେ ହାଖ୍ଖନା ମାଲ୍ଲାଦିନ୍। 14ହୁଦ୍ଘିଲାଗାନ୍ ଏକା ହୁକୁମ୍ବନ୍ ନିମାଗେ ଚିଆଲ୍ଦାନ୍, ଯଦି ଆବନ୍ ମାନ୍ଦାର୍ ତା ନିମ୍ ଏଙ୍ଘାଏ ସାଙ୍ଗେର୍। 15ଆକ୍କୁନ୍ନ୍ତିନ୍ ଏନ୍ ନିମାନ୍ ଗୁତ୍ତିୟା ବୁଲି ମା ତେଙ୍ଗ୍ଦାନ୍, ଏନ୍ଦେର୍ଗେକା ଗୁତ୍ତିୟାସ୍ ବାଲ୍ଦାସିନ୍ କା ତାଙ୍ଘା ମାଲିକ୍ସ୍ ଏନ୍ଦେର୍ କାମ୍ଦାସ୍; ଏନ୍ ନିମାନ୍ ସାଙ୍ଗେ ବାଚ୍କାଦାନ୍, ଏନ୍ଦେର୍ଗେକା ଏନ୍ ଏଙ୍ଘାଏ ବାଙ୍ଗ୍ସ୍ତି ଏକା କାତ୍ଥାନ୍ ମେନ୍ଚ୍କାଦାନ୍, ଆଦିନ୍ ଜାମାନ୍ ନିମାନ୍ ତେଙ୍ଗେଚିଚ୍କାଦାନ୍। 16ନିମ୍ ଏଙ୍ଗାନ୍ ମାଲ୍ଲା ଚାଜୁର୍ ଲେକିନ୍ ଏନ୍ ନିମାନ୍ ଚାଜ୍ଜକାଦାନ୍ କା ନିମ୍ କାଇକିରି ଫାଡ଼ୁ ଅନ୍ଦ୍ରା ଆରୁ ନିହ୍ମା ଫାଡ଼ୁ ଜାମାବାକେନ୍ ରଦ୍ ଇଦ୍ଘିଲାଗାନ୍ ନିମାରିନ୍ ପେସ୍କାଦାନ୍, ଆରୁ ନିମ୍ ଏଙ୍ଘାଏ ନାମେନୁ ଏନ୍ଦ୍ରିନ୍ହି ବାଙ୍ଗ୍ସିନ୍ ନିଅଁର୍, ଆବନ୍ ନିମାଗେ ଚିୟସ୍। 17ଏନ୍ ନିମାଗେ ଏନ୍ନେ ହୁକୁମ୍ ଚିଆଲ୍ଦାନ୍ କା ନିମ୍ ଏକ୍ ଦୁସ୍ରାରିନ୍ ବାନେ ହାଖ୍ଖା।”
ଯୀଶୁସ୍ ତେଙ୍ଗାଲ୍ଦାସ୍ କା ଆଲାର୍ ଚେଲାଜାମାରିନ୍ ହାଁଣର୍ ତୁପ୍ଫର୍
18“ଯଦି ଦୁନିଆଁନ୍ତା ଆଲାର୍ ନିମାନ୍ ହାଁଣ୍ନାଏ ତୁଫ୍ନାଏ, ତା ନିମ୍ ଆହା କା ଆବ୍ଡ଼ାର୍ ନିହ୍ମାସ୍ତି ଆଘ୍ଲି ଏଙ୍ଗାନ୍ହି ହାଁଣିୟାର୍ ତୁପ୍ଫିୟାର୍। 19ଯଦି ନିମ୍ ଦୁନିଆଁନ୍ତା ରର୍ନେ, ତା ଦୁନିଆଁଦ୍ ନିମାନ୍ ନିଜର୍ ସୋଚିକିରି ନିମାନ୍ ବାନେ ହାଖ୍ଖଦ୍ନେ; ଲେକିନ୍, ଏନ୍ ନିମାନ୍ ଦୁନିଆଁନ୍ତି ଚାଜ୍ଜକାଦାନ୍, ଇଦ୍ଘିଲାଗାନ୍ ଦୁନିଆଁଦ୍ ନିମାନ୍ ହାଁଣି ତୁପ୍ଫିଦ୍। 20ଏକା କାତ୍ଥାନ୍ ଏନ୍ ନିମାନ୍ ତେଙ୍କାଚ୍କାନ୍ ଆବନ୍ ମନେ କାମା କା ଅଣ୍ଟା ଗୁତ୍ତିୟାସ୍ ତାଙ୍ଘା ମାଲିକ୍ସ୍ତିନ୍ ବାଡ଼୍କା ମା ମାନ୍ଦାସ୍। ହୁଦ୍ଘିଲାଗାନ୍ ଯଦି ଆବ୍ଡ଼ାର୍ ଏଙ୍ଗାନ୍ ସାତାବାଚାର୍ ତା ନିମାନ୍ହି ସାତାବର୍; ଆରୁ ଆବ୍ଡ଼ାର୍ ଏଙ୍ଘାଏ କାତ୍ଥାନ୍ ମାନ୍ଚାର୍, ତା ନିହ୍ମା କାତ୍ଥାବନ୍ ହି ମାନର୍। 21ଏକାସ୍ ଏଙ୍ଗାନ୍ ତାଏକାଦାସ୍, ଆସିନ୍ ଆବ୍ଡ଼ାର୍ ବାଲ୍ନାଇନ୍, ହୁଦ୍ଘିଲାଗାନ୍ ଆବ୍ଡ଼ାର୍ ଇବ୍ଡ଼ା ଜାମାନ୍ ନିହ୍ମାଗାନେ କାମର୍। 22ଯଦି ଏନ୍ ମା ବାର୍ଚ୍କା ରନ୍ନେ ଆରୁ ଆବ୍ଡ଼ାରିନ୍ ମା ଶିଖାବାଚ୍କା ର୍ନ୍ନେ ତା, ଆବ୍ଡ଼ାର୍ଗେ ପାପ୍ ମା ଲାଗ୍ଗିଦ୍ନେ; ଲେକିନ୍ ଆକ୍କୁନ୍ ଆବ୍ଡ଼ାର୍ ତାହ୍ମା ପାପ୍ଘି ଲାଗାନ୍ ଏନ୍ଦେର୍ହି ବାହାନା କାମା ପଲ୍ଲନାଇନ୍। 23ଏକାସ୍ ଏଙ୍ଗାନ୍ ହାଁଣଦାସ୍ ତୁଫ୍ଦାସ୍, ଆସ୍ ଏଙ୍ଘାଏ ବାଙ୍ଗ୍ସିନ୍ହି ହାଁଣ୍ଦାସ୍ ତୁଫ୍ଦାସ୍। 24ଆରୁ ଏକା ନାଲ୍ଖୁନ୍ ନେଦ୍ହି ମାଲ୍ଲା କାମୁର୍, ଆବନ୍ ଏନ୍ ଆବ୍ଡ଼ାର୍ସାନ୍ ମା କାମ୍ଚ୍କା ରର୍ନେ, ତା ଆବ୍ଡ଼ାର୍ଗେ ପାପ୍ ମା ଲାଗ୍ଗଦ୍ନେ; ଲେକିନ୍ ଆକ୍କୁନ୍ ଆବ୍ଡ଼ାର୍ ଏର୍କାନାଏ ହାଲେହି ଏଙ୍ଗାନ୍ ଆରୁ ଏଙ୍ଘାଏ ବାଙ୍ଗ୍ ଦୁଇ ଲୋକ୍ରିନ୍ ହାଁଣ୍ନାଏ ତୁଫ୍ନାଏ। 25ଇଦ୍ ଇଦ୍ଘିଲାଗାନ୍ ମାନ୍ଚା କା ପାବିତାର୍ ଶାସ୍ତ୍ରନୁ ଏକା ବଚନ୍ ଲେଖ୍କ୍ଚ୍ କା ରାଇ ଆଦ୍ ପୁରା ମାନ୍ନାଦ୍ କା, ‘ବିନା କାରଣ୍ତି ଆବ୍ଡ଼ାର୍ ଏଙ୍ଗାନ୍ ହାଁଣ୍ୟାର୍ ତୁପ୍ଫିୟାର୍।’”
26“ଲେକିନ୍ ବାଙ୍ଗ୍ସ୍କି ତାର୍ତି ଅଣ୍ଟା ମଦେତ୍ କାମୁସିନ୍ ଏନ୍ ନିହ୍ମା ଚାହାଗେ ତାଇୟନ୍। ଆଦ୍ ବାଙ୍ଗ୍ସ୍ତି ବାର୍ନାବାଲା ସତ୍ତୁ ଆତ୍ମାଦ୍। ଆ ମଦେତ୍ କାମୁ ବାରିକିରି ଏଙ୍ଘା ବାରେନୁ ନିମାନ୍ ସାକ୍ଷୀ ଚିଅଦ୍। 27ଆରୁ ନିମ୍ହି ଏଙ୍ଘାଏ ସାକ୍ଷୀ ଚିଅର୍ ଏନ୍ଦେର୍ଗେକା ନିମ୍ ସୁରୁନ୍ତିନିନ୍ ଏଙ୍ଘାଗାନେ ରାଚ୍କାଦାର୍।”
16ଆଲାର୍ ଖ୍ରୀସ୍ତ୍ ବିଶ୍ୱାସୀରିନ୍ ସାତାବର୍
1“ନିହ୍ମା ବିଶ୍ୱାସ୍ ମା ଡାଗ୍ମାଗ୍ର୍ନା କାତ୍ଥା ହୁଦ୍ଘିଲାଗାନ୍ ଇ କାତ୍ଥାନ୍ ଏନ୍ ନିମାନ୍ ତେଙ୍କାନ୍। 2ଆବ୍ଡ଼ାର୍ ନିମାନ୍ ସାଭା ଆଡ଼୍ପାନ୍ତି ଅଥ୍ରର୍ ଚିୟର୍, ଲେକିନ୍ ଆ ସାମାୟ ବାରଦ୍, ଯେତ୍କବାକେନ୍ କା ନେଦିନ୍ ନିମାନ୍ ପିଟର୍ ଚିଅର୍ ଆରୁ ଆବ୍ଡ଼ାର୍ ସୋଚର୍ କା ଏନ୍ ପାର୍ମେଶ୍ଵାର୍ସ୍କି ସେବା କାମାଲ୍ଦାନ୍। 3ଆବ୍ଡ଼ାର୍ ଇଦ୍ଘିଲାଗାନ୍ ଏନ୍ନେ କାମର୍ କା ଆବ୍ଡ଼ାର୍ ବାଙ୍ଗ୍ସିନ୍ ବାଲ୍ନାଏ ଆରୁ ଏଙ୍ଗାନ୍ହି ବାଲ୍ନାଏ। 4ଲେକିନ୍ ଇ କାତ୍ଥାନ୍ ଏନ୍ ନିମାନ୍ ଇଦ୍ଘିଲାଗାନ୍ ତେଙ୍କାନ୍ କା, ଯେତ୍କବାକେନ୍ ଇବ୍ଡ଼ା ଘାଟ୍ର୍ନାଘି ସାମାୟଦ୍ ବାର୍ଚ୍କୁନ୍ ନିମାଗେ ମନେ ଖାତ୍ରୋ କା ଏନ୍ ନିମାନ୍ ଆଘ୍ଲିନ୍ନ୍ତି ଆଦ୍ଘି ବାରେ ତେଙ୍ଗେ ଚିଚ୍କାଚ୍କାନ୍।”
ପାବିତାର୍ ଆତ୍ମାଘି ନାଲ୍ଖୁ
“ସୁରୁନ୍ତି ଏନ୍ ନିମାନ୍ ଇ କାତ୍ଥାନ୍ ମାଲ୍ଲା ତେଙ୍ଗ୍ନା ଏନ୍ଦେର୍ଗେକା ଏନ୍ ନିହ୍ମାଗାନେ ରାଚ୍କାନ୍। 5ଲେକିନ୍ ଆକ୍କୁନ୍ ଏନ୍ ଏକାସ୍ ଏଙ୍ଗାନ୍ ତାଏକାଦାସ୍ ଆସ୍କି ଚାହାଗେ କାଲ୍ଦାନ୍; ଆରୁ ନିହ୍ମାସ୍ତି ନେଦ୍ହି ଆକ୍କୁନ୍ ଏଙ୍ଗାନ୍ ମା ମେନ୍ଦାର୍ କା, ‘ନିମ୍ ଏକାସାନ୍ କାଲ୍ଦାର୍?’ 6ଲେକିନ୍ ଏନ୍ ନିମାନ୍ ଏକା ଇ ଜାମା କାତ୍ଥାନ୍ ନିମାନ୍ ତେଙ୍କାଦାନ୍, ଇଦ୍ଘିଲାଗାନ୍ ନିହ୍ମାଏ ମନ୍ଦ୍ ଦୁଃଖୁତି ନିନ୍ଦିଆ କେର୍କିଚି। 7ହାଲେହି ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଏଙ୍ଘାଏ କାନାଦ୍ ନିହ୍ମା ଲାଗାନ୍ ବାନେଦ୍, ଏନ୍ଦେର୍ଗେକା ଏନ୍ ମା କନ୍ ତା ଆ ମଦେତ୍ କାମୁସ୍ ନିହ୍ମା ଚାହାଗେ ମା ବାର୍ଦାସ୍; ଲେକିନ୍ ଏନ୍ କନ୍, ତା ଆସିନ୍ ନିହ୍ମା ଚାହାଗେ ତାଇୟନ୍ଚନ୍। 8ଆସ୍ ବାରିକିରି ଦୁନିଆଁନ୍ତା ଆଲାରିନ୍ ପାପ୍ଘି ବାରେ ଆରୁ ସତ୍ତୁ ଧରମ୍ଘି ବାରେ ଆରୁ ନ୍ୟାୟଘି ବାରେନୁ ସାକ୍ଷୀ ଚସ୍, ଆରୁ ଦୁନିଆଁନ୍ତା ସଂନ୍ଦେହ୍ବନ୍ ହାଟାବଚସ୍। 9ପାପ୍ଘି ବାରେନୁ ଏନ୍ନେ ସାକ୍ଷୀ ଚସ୍ କା ଦୁନିଆଁନ୍ତା ଆଲାର୍ ଏଙ୍ଘା ମିଆଁ ବିଶ୍ଵାସ୍ ମା କାମ୍ନାଏ; 10ଆରୁ ସତ୍ତୁ ଧରମ୍ଘି ବାରେନୁ ଏନ୍ନେ ସାକ୍ଷୀ ଚସ୍ କା ଏନ୍ ବାଙ୍ଗ୍ସ୍କି ଚାହାଗେ କାଲ୍ଦାନ୍, ଆରୁ ନିମ୍ ଏଙ୍ଗାନ୍ ଆରୁଅହନ୍ ମା ଏର୍ଦାର୍; 11ନ୍ୟାୟଘି ବାରେନୁ ଏନ୍ନେ ସାକ୍ଷୀ ଚସ୍ କା ଦୁନିଆଁନ୍ତା ରାଜା ଶାଏତାନ୍ଦ୍ ଦୋଷୀଦାର୍ ମାନ୍ଚାକେର୍କିଚି।”
12“ଏଙ୍ଗାଗେ ନିମାନ୍ ଆରୁହି ଢେର୍ କାତ୍ଥା ତେଙ୍ଗ୍ନା ରାଇ, ଲେକିନ୍ ଆକ୍କୁନ୍ ନିମ୍ ଆବ୍ଡ଼ାନ୍ ସାହା ପଲ୍ଲଦାରିନ୍। 13ଲେକିନ୍ ଯେତ୍କବାକେନ୍ ସତ୍ତୁ ଆତ୍ମା ବାର, ତା ନିମାନ୍ ଜାମା ସତ୍ତୁଘି ବାରେ ତେଙ୍ଗ, ଏନ୍ଦେର୍ଗେକା ତାଙ୍ଘା ତାର୍ତି ମା ତେଙ୍ଗ ଲେକିନ୍ ଏକାନ୍ ମେନ ଆବନ୍ ତେଙ୍ଗ, ଆରୁ ଏକା ମାନ୍ନାବାଲା ରାଇ ଆବନ୍ ନିମାନ୍ ତେଙ୍ଗ। 14ସତ୍ତୁ ଆତ୍ମା ଏଙ୍ଘାଏ ମାହିମା କାମ, ଏନ୍ଦେର୍ଗେକା ଏକାନ୍ ଏଙ୍ଘାସ୍ତି ମେନ୍ଚ୍କିଚା ଆବନ୍ନିନ୍ ନିମାନ୍ ତେଙ୍ଗ। 15ଏନ୍ଦ୍ରିନ୍ଦ୍ହି ବାଙ୍ଗ୍ସ୍କି ଆବ୍ଡ଼ା ଜାମାଦ୍ ଏଙ୍ଘାଏଦ୍; ଇଦ୍ଘିଲାଗାନ୍ ଏନ୍ ତେଙ୍କାନ୍ କା ଆ ସତ୍ତୁ ଆତ୍ମା ଏଙ୍ଘା କାତ୍ଥାନ୍ ହୋଇକିରି ନିମାନ୍ ତେଙ୍ଗ।”
ଦୁଃଖୁଦ୍ ସୁଖୁନୁ ବାଦ୍ଲାରକୋ
16“କାଟେ ଡେରିଘି ପାଛ୍ଲି ନିମ୍ ଏଙ୍ଗାନ୍ ମା ଏର୍ଦାର୍, ଆରୁ କାଟେ ଡେରିଘି ପାଛ୍ଲି ନିମ୍ ଏଙ୍ଗାନ୍ ଆରୁଅହନ୍ ଏରର୍।” 17ଆଙ୍ଗେନ୍ ଆସ୍କି ଚେଲାର୍ସ୍ତି କେତ୍କ ଲୋକ୍ ତାହ୍ମା-ତାହ୍ମା ଭିତ୍ରେ ତେଙ୍ଗାଗେ ଲାଗ୍ଗିୟାର୍ କା, “ଇଦ୍ ଏନ୍ଦେର୍ କାତ୍ଥାଦ୍ ଏକାନ୍ କା ଆସ୍ ନାମାନ୍ ତେଙ୍ଗାଲ୍ଦାସ୍, ‘କାଟେ ଡେରିଘି ପାଛ୍ଲି ନିମ୍ ଏଙ୍ଗାନ୍ ମା ଏର୍ଦାର୍, ଆରୁ କାଟେ ଡେରିଘି ପାଛ୍ଲି ନିମ୍ ଏଙ୍ଗାନ୍ ଆରୁଅହନ୍ ଏରର୍?’ ଆରୁ ‘ହୁଦ୍ଘିଲାଗାନ୍ ଏନ୍ ବାଙ୍ଗ୍ସ୍କି ଚାହାଗେ କାଲ୍ଦାନ୍’?” 18ଆନ୍ତିନ୍ ଆବ୍ଡ଼ାର୍ ତେଙ୍ଗିୟାର୍, “ଇଦ୍ କାଟେ ଡେରିଘି ପାଛ୍ଲି ଏକାନ୍ କା ଆସ୍ ତେଙ୍ଗାଲ୍ଦାସ୍, ଆଦ୍ ଏନ୍ଦେର୍ କାତ୍ଥାଦ୍? ଏମ୍ ବାଲ୍ଦାମିନ୍ କା ଆସ୍ ଏନ୍ଦେର୍ ତେଙ୍ଗାଲ୍ଦାସ୍।” 19ଯୀଶୁସ୍ ଇବନ୍ ଆହିକିରି ଆବ୍ଡ଼ାର୍ ତାଙ୍ଗାନ୍ ମେନାଗେ ବେଦ୍ଦାଲ୍ନାଏ ତା ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “କାଟେ ଡେରିଘି ପାଛ୍ଲି ନିମ୍ ଏଙ୍ଗାନ୍ ମା ଏର୍ଦାର୍, ଆରୁ କାଟେ ଡେରିଘି ପାଛ୍ଲି ନିମ୍ ଏଙ୍ଗାନ୍ ଆରୁଅହନ୍ ଏରର୍? ବୁଲି ଏନ୍ ଏକାନ୍ ତେଙ୍କାନ୍ ଆ କାତ୍ଥାଘି ବାରେନୁ ନିହ୍ମା-ନିହ୍ମା ଭିତ୍ରେ କାଚ୍ନେଖ୍ରାଲ୍ଦାର୍ କାଁଏ? 20ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ନିମ୍ ନିଃଚାରା-ନିଃଚାରା ଅହ୍ଲର୍, ଲେକିନ୍ ଦୁନିଆଁଦ୍ ଖୁସୀ ମାନାବଦ୍; ନିମ୍ ଦୁଃଖୁ ମାନର୍, ଲେକିନ୍ ନିହ୍ମା ଦୁଃଖୁଦ୍ ଖୁସୀନୁ ବାଦ୍ଲାରକୋ। 21ଯେତ୍କବାକେନ୍ ଅଣ୍ଟା ଆଲିଘି ହାଦ୍ମହଁର୍ନାଘି ସାମାୟ ଆଣସି ତା ଆଦ୍ଗେ ଦୁଃଖୁ ଲାଗ୍ଗ, ଏନ୍ଦେର୍ଗେକା ଆଦ୍ଘି ଦୁଃଖୁଘି ସାମାୟ ବାର୍ଚା କେର୍କିଚି, ଲେକିନ୍ ଯେତ୍କବାକେନ୍ ଆଦ୍ ହାଦ୍ଦୁସିନ୍ ଜନମ୍ ଚିଇ, ତା ଆଦ୍ ଖୁସୀ ମାନିକାଇ ଏନ୍ଦେର୍ଗେକା ଦୁନିଆଁନୁ ଅଣ୍ଟା ଆଲାସ୍ ଜନମ୍ ମାନ୍ଚାସ୍, ଆରୁ ହୁଦ୍ଘିଲାଗାନ୍ ଦୁଃଖୁ ତକ୍ଲିପ୍ବନ୍ ମଦ୍ରିଚି। 22ହନ୍ନେନ୍ ନିମ୍ହି ଆକ୍କୁନ୍ ତା ଦୁଃଖୁନୁ ରାଦାର୍, ଲେକିନ୍ ଏନ୍ ନିହ୍ମାଗାନେ ଆରୁଅହନ୍ ମିଲ୍ରନ୍ ଆରୁ ନିହ୍ମାଏ ମନ୍ଦ୍ ରିଝରର୍କୋ; ଆରୁ ନେଦ୍ହି ନିହ୍ମା ରୀଝୁବନ୍ ଲୁଟା ହୁଆ ପଲ୍ଲନାଇନ୍। 23ହୁ ଉଲ୍ଲା ନିମ୍ ଏଙ୍ଗାନ୍ ଏନ୍ଦେର୍ହି ଆମ୍କେ ମେନା। ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍, ଯଦି ନିମ୍ ଏଙ୍ଘା ବାଙ୍ଗ୍ସ୍ତି ଏନ୍ଦ୍ରିନିନ୍ ନିଅର୍, ତା ଆସ୍ ଏଙ୍ଘା ନାମେତି ନିମାଗେ ଚିୟସ୍। 24ଆକ୍କୁନ୍ତକ୍ ନିମ୍ ଏଙ୍ଘା ନାମେତି ଏନ୍ଦେର୍ହି ମାଲ୍ଲା ନିଉର୍; ନିଅର୍, ତା ହାଖ୍ଖର୍ ଆରୁ ନିହ୍ମା ରୀଜ୍ଝୁଦ୍ ଭାର୍ପୁର୍ ମାନକୋ।”
ଦୁନିଆଁନୁ ଜିତ୍ନା
25“ଏନ୍ ଇ କାତ୍ଥାନ୍ ନିମାନ୍ ନମୁନା ଚିଇକିରି ତେଙ୍କାନ୍, ଲେକିନ୍ ଆ ସାମାୟଦ୍ ବାରାଲି କା ଏନ୍ ନିମାନ୍ ଆରୁ ନମୁନା ଚିଇକିରି ମା ତେଙ୍ଗ୍ଦାନ୍, ଖୁଲାଖୁଲି ନିମାନ୍ ବାଙ୍ଗ୍ସ୍କି ବାରେନୁ ତେଙ୍ଗନ୍। 26ହୁ ଉଲ୍ଲା ନିମ୍ ଏଙ୍ଘାଏ ନାମେତି ନିଅର୍; ଆରୁ ଏନ୍ ନିହ୍ମାସ୍ତି ଏନ୍ନେ ମାଲ୍ଲା ତେଙ୍ଗୁନ୍ କା ନିହ୍ମା ତାର୍ତି ଏନ୍ ବାଙ୍ଗ୍ସାନ୍ ବିନ୍ତି କାମନ୍। 27ଏନ୍ଦେର୍ଗେକା ବାଙ୍ଗ୍ସ୍ ତା ନିଜେ ନିମାନ୍ ବାନେ ହାଖ୍ଖଦାସ୍, ଇଦ୍ଘିଲାଗାନ୍ କା ନିମ୍ ଏଙ୍ଗାନ୍ ବାନେ ହାଖ୍ଖଦାର୍ ଆରୁ ଇବନ୍ହି ବିଶ୍ୱାସ୍ କାମ୍ଦାର୍ କା ଏନ୍ ବାଙ୍ଗ୍ସ୍କି ତାର୍ତି ବାର୍ଚ୍କାଦାନ୍। 28ଏନ୍ ବାଙ୍ଗ୍ସ୍କି ତାର୍ତି ଦୁନିଆଁନୁ ବାର୍ଚ୍କାଦାନ୍; ଆରୁ ଏନ୍ ଆକ୍କୁନ୍ ଦୁନିଆଁବନ୍ ଆମ୍ଵିକିରି ବାଙ୍ଗ୍ସ୍କି ଚାହାଗେ କାଲ୍ଦାନ୍।”
29ଆନ୍ତିନ୍ ଯୀଶୁସ୍କି ଚେଲାର୍ ତେଙ୍ଗିୟାର୍, “ଏରା, ଆକ୍କୁନ୍ ତା ନିମ୍ ଏନ୍ଦେର୍ହି ନମୁନା ଚିଇକିରି ମାଲ୍ଲା ତେଙ୍ଗୁର୍, ଲେକିନ୍ ଖୁଲାଖୁଲି ତେଙ୍ଗାଲ୍ଦାର୍। 30ଆକ୍କୁନ୍ ଏମ୍ ଆକ୍କାମ୍ କେର୍କାମ୍ କା ନିମ୍ ଜାମାନ୍ ଆହ୍ଦାର୍, ଆରୁ ନେଦ୍ହି ନିମାନ୍ ଏନ୍ଦ୍ରିନ୍ ମେନ୍ନାଘି ଦାର୍କାର୍ ମାଲ୍ଲାଦିନ୍; ଇତ୍ତି ଏମ୍ ବିଶ୍ୱାସ୍ କାମ୍ଦାମ୍ କା ନିମ୍ ପାର୍ମେଶ୍ଵାର୍ସ୍କି ତାର୍ତି ବାର୍ଚ୍କାଦାର୍।” 31ଇବନ୍ ମେନିକିରି ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଆକ୍କୁନ୍ ବିଶ୍ୱାସ୍ କାମାଲ୍ଦାର୍ କାଁଏ? 32ଏରା, ଆ ସାମାୟବଦ୍ ବାରାଲି ବାର୍ଚା କେର୍କିଚି କା ନିମ୍ ଜାମାର୍ ଛିଛିର୍ଛାନ୍ଦ୍ ମାନିକିରି ନିଜର୍-ନିଜର୍ ଆଡ଼୍ପା ବୁଙ୍ଗର୍ଚର୍, ଆରୁ ଏଙ୍ଗାନ୍ ଅଥାସିନ୍ ଆମ୍ଵର୍ ଚିଅର୍; ହାଲେହି ଏନ୍ ଅଥାନ୍ ମାଲ୍ଲକାନ୍ ଏନ୍ଦେର୍ଗେକା ବାଙ୍ଗ୍ସ୍ ଏଙ୍ଘାଗାନେ ରାଦାସ୍। 33ଏନ୍ ଇ କାତ୍ଥାନ୍ ନିମାନ୍ ଇଦ୍ଘିଲାଗାନ୍ ତେଙ୍କାନ୍ କା ଏଙ୍ଘାଲାଗାନ୍ ନିମାଗେ ଶାନ୍ତି ହାଖ୍ଖର। ଦୁନିଆଁନୁ ନିମାଗେ ଦୁଃଖୁ ହାଖ୍ର୍କିଚି, ଲେକିନ୍ ଧିରାଜ୍ ଉଇୟା, ଏନ୍ ଦୁନିଆଁବନ୍ ଜିତ୍କାଦାନ୍।”
17ଯୀଶୁସ୍ ତାଙ୍ଘା ଲାଗାନ୍ ବିନ୍ତି କାମାଲ୍ଦାସ୍
1ଯୀଶୁସ୍ ଇବ୍ଡ଼ା ଜାମା କାତ୍ଥା ତେଙ୍ଗିୟାସ୍ ଆରୁ ଆକାଶ୍ତାରା ଏରିକିରି ବିନ୍ତି କାମ୍ଚାସ୍, “ହେ ବାଙ୍ଗ୍ ସାମାୟ ବାର୍ଚା କେର୍କିଚି, ନିଙ୍ଘା ହାଦ୍ଦୁସ୍କି ମାହିମା କାମା ଏସ୍କେ କା ହାଦ୍ଦୁସ୍ ନିଙ୍ଘା ମାହିମା ପ୍ରକଟ୍ କାମସ୍। 2ଏକା ଆଲାରିନ୍ ନିନ୍ ଆସ୍କି ହେଖ୍ଖାନୁ ଚିଚ୍କାଦାଏ, ଆସ୍ ଆବ୍ଡ଼ା ଜାମାର୍ଗେ ସବୁଦିନ୍ତା ଜୀବନ୍ ଚିନାସ୍, ହୁଦ୍ଘିଲାଗାନ୍ ନିନ୍ ଜାମା ଆଲାର୍ଘି ମିଆଁ ଆସ୍କେ ହକ୍ ଚିଚ୍କାଦାଏ। 3ଆରୁ ନିନିନ୍ ଅଣ୍ଟା ଖାଲି ସତ୍ତୁ ପାର୍ମେଶ୍ଵାର୍, ନିଙ୍ଗାନ୍ ଆରୁ ନିଙ୍ଘା ତାଏକା ଯୀଶୁ ଖ୍ରୀସ୍ତ୍ସିନ୍, ଆହ୍ନାଦିନ୍ ସବୁଦିନ୍ତା ଜୀବନ୍। 4ନିନ୍ ଏଙ୍ଗାନ୍ ଏକା ନାଲ୍ଖୁ କାମାଗେ ଚିଚ୍କାଚ୍କାଏ, ଆଦିନ୍ ଏନ୍ ପୁରା କାମିକିରି ଦୁନିଆଁନୁ ନିଙ୍ଘାଏ ମାହିମା କାମ୍ଚ୍କାଦାନ୍। 5ଆରୁ ଆକ୍କୁନ୍ ହେ ବାଙ୍ଗ୍, ଦୁନିଆଁଘି ସୁରୁ ମାନ୍ନାଘି ଆଘ୍ଲିନ୍ତି, ଯେତ୍କବାକେନ୍ ଏନ୍ ନିଙ୍ଘାଗାନେ ରାଚ୍କାନ୍, ହତ୍କବାକେନ୍ ଏଙ୍ଗା ଏସ୍କେ ମାହିମା ହାଖ୍ଖର୍କିଚା, ଆକ୍କୁନ୍ ଯେତ୍କବାକେନ୍ ଏନ୍ ନିଙ୍ଘାଗାନେ ରନ୍, ତା ଆ ମାହିମା କାମା।”
ଯୀଶୁସ୍ ତାଙ୍ଘା ଚେଲାଜାମାର୍ଗେହି ବିନ୍ତି କାମାଲ୍ଦାସ୍
6“ହେ ବାଙ୍ଗ୍ ଇ ଦୁନିଆଁନ୍ତି ଏକା ଆଲାରିନ୍ ନିନ୍ ଏଙ୍ଗାଗେ ଚିଚ୍କାଏ, ଆବ୍ଡ଼ାରିନ୍ ଏନ୍ ନିଙ୍ଘା ବାରେନୁ ବାତାବାଚ୍କାନ୍। ଆବ୍ଡ଼ାର୍ ନିଙ୍ଘା ଆଲାର୍ ଆରୁ ନିନ୍ ଆବ୍ଡ଼ାରିନ୍ ଏଙ୍ଗାଗେ ଚିଚ୍କାଏ, ଆରୁ ଆବ୍ଡ଼ାର୍ ନିଙ୍ଘାଏ ବଚନ୍ବନ୍ ମାନ୍ଚ୍କାନାଏ।” 7ଆକ୍କୁନ୍ ଆବ୍ଡ଼ାର୍ ଆଖ୍ଖାର୍ କେର୍କାନାଏ କା ନିନ୍ ଏକାନ୍-ଏକାନ୍ ଏଙ୍ଗାଗେ ଚିଚ୍କାଦାଏ ଆବ୍ଡ଼ା ଜାମାନ୍ ନିଙ୍ଘାତାର୍ତି ଚିଚ୍କାଦାଏ; 8ଏନ୍ଦେର୍ଗେକା ଏକା ବଚନ୍ ନିନ୍ ଏଙ୍ଗାଗେ ଚିଚ୍କାଚ୍କାଏ, ଏନ୍ ଆ ବଚନ୍ବନ୍ ଆବ୍ଡ଼ାର୍ଗେ ମେନ୍ତେଇ ଚିଚ୍କାଦାନ୍; ଆରୁ ଆବ୍ଡ଼ାର୍ ଆବନ୍ ଗ୍ରହନ୍ କାମ୍ଚାର୍, ଆରୁ ସତ୍ତୁନ୍ ଆଖ୍ଖାର୍ କେରାର୍ କା ଏନ୍ ନିଙ୍ଘାତାର୍ତି ବାର୍ଚ୍କାଦାନ୍, ଆରୁ ବିଶ୍ୱାସ୍ କାମ୍ଚାର୍ କା ନିନ୍ ଏଙ୍ଗାନ୍ ତାଏକାଦାଏ। 9ଏନ୍ ଆବ୍ଡ଼ାର୍ଘି ଲାଗାନ୍ ବିନ୍ତି କାମାଲ୍ଦାନ୍; ଲେକିନ୍ ଏନ୍ ଦୁନିଆଁଘି ଲାଗାନ୍ ବିନ୍ତି ମାଲ୍ଲା କାମୁନ୍, ଆବ୍ଡ଼ାର୍ଗେ ଖାଲି ବିନ୍ତି କାମାଲ୍ଦାନ୍, ଏକାରିନ୍ କା ନିନ୍ ଏଙ୍ଗାଗେ ଚିଚ୍କାଦାଏ, ଏନ୍ଦେର୍ଗେକା ଆବ୍ଡ଼ାର୍ ନିଙ୍ଘା ଆଲାର୍; 10ଆରୁ “ଏକାଦ୍ ଏଙ୍ଘାଏଦ୍ ଆବ୍ଡ଼ା ଜାମାଦ୍ ନିଙ୍ଘାଏଦ୍, ଆରୁ ଏକାଦ୍ ନିଙ୍ଘାଏଦ୍ ଆବ୍ଡ଼ାଦ୍ ଏଙ୍ଘାଏଦ୍, ଆରୁ ଆବ୍ଡ଼ାର୍ଘି ଦ୍ୱାର୍ନୁ ଏଙ୍ଗା ମାହିମା ହାଖ୍ଖର୍କିଚି।”
11“ଏନ୍ ଆକ୍କୁନ୍ ଦୁନିଆଁନୁ ମା ରାଦାନ୍, ଲେକିନ୍ ଇବ୍ଡ଼ାର୍ ଦୁନିଆଁନୁ ରର୍, ଆରୁ ଏନ୍ ନିଙ୍ଘା ଚାହାଗେ ବାରାଲ୍ଦାନ୍। ହେ ବାଙ୍ଗ୍ ନିନ୍ ପାବିତାର୍ ରାଦାଏ, ଏକା ନାମେ ନିନ୍ ଏଙ୍ଗାଗେ ଚିଚ୍କାଦାଏ, ଆ ନାମେତି ଆବ୍ଡ଼ାରିନ୍ ବାଛାବା ତାକା ଏସ୍କେ ନାମ୍ ଅଣ୍ଟା ରାଦାତ୍, ଆନ୍ନେନ୍ ଆବ୍ଡ଼ାର୍ହି ଅଣ୍ଟା ମାନିକିରି ରର୍।” 12ପାବିତାର୍ ଶାସ୍ତ୍ରନୁ ଲେଖ୍ଚ୍କା ବଚନ୍ ପୁରା ମାନ୍ନାଦ୍। ହୁଦ୍ଘିଲାଗାନ୍ ଏନ୍ ଆବ୍ଡ଼ାର୍ ଗାନେ ରାଚ୍କାନ୍, ତା ଏନ୍ ନିଙ୍ଘା ନାମେତି ଆବ୍ଡ଼ାରିନ୍ ବାଛାବାଚ୍କାନ୍, ଏକା ନାମେନ୍ କା ନିନ୍ ଏଙ୍ଗାଗେ ଚିଚ୍କାଚ୍ଦାଏ। ଆରୁ ଏନ୍ ଆବ୍ଡ଼ାରିନ୍ ବାଛାବାଚ୍କାନ୍ ଆରୁ ନାଶ୍ଘି ହାଦ୍ଦୁସିନ୍ ଆମ୍ବିକିରି ଆବ୍ଡ଼ାର୍ଘି ଭିତ୍ର୍ତି ନେଦ୍ହି ନାଶ୍ ମା ମାନ୍ଚାର୍। 13ଲେକିନ୍ ଆକ୍କୁନ୍ ଏନ୍ ନିଙ୍ଘା ଚାହାଗେ ବାରାଲ୍ଦାନ୍। ଏନ୍ ଏସ୍କେ ଖୁସୀ ରାଦାନ୍ ଆବ୍ଡ଼ାର୍ ନିଜର୍ ଜୀଆନୁ ଏଙ୍ଘା ଖୁସୀନ୍ ଭାର୍ପୁର୍ ହାଖ୍ଖା ଅଙ୍ଗର୍, ହୁଦ୍ଘିଲାଗାନ୍ ଇ କାତ୍ଥାନ୍ ଏନ୍ ଦୁନିଆଁନୁ ରାଇକିରି ତେଙ୍ଗାଲ୍ଦାନ୍। 14ଏନ୍ ନିଙ୍ଘା ବଚନ୍ ଆବ୍ଡ଼ାର୍ସାନ୍ ମେନ୍ତେଇ ଚିଚ୍କାଦାନ୍, ଆରୁ ଦୁନିଆଁଦ୍ ଆସିନ୍ ହାଁଣିୟା ତୁଫ୍ୟାଦ୍, ଏନ୍ଦେର୍ଗେକା ଏସ୍କେ ଏନ୍ ଇ ଦୁନିଆଁନ୍ତା ମାଲ୍ଦାନ୍, ଆନ୍ନେନ୍ ଆବ୍ଡ଼ାର୍ହି ଇ ଦୁନିଆଁନ୍ତା ମାଲ୍ନାଏ। 15ନିନ୍ ଆବ୍ଡ଼ାରିନ୍ ଦୁନିଆଁନ୍ତି ହୁଆ କାଲା ବୁଲି ଏନ୍ ବିନ୍ତି ମାଲ୍ଲା କାମୁନ୍; ଲେକିନ୍ ଆବ୍ଡ଼ାରିନ୍ ଖାରାପ୍ ଶାଏତାନ୍ତି ବାଛାବା ବୁଲି ବିନ୍ତି କାମାଲ୍ଦାନ୍। 16ଏସ୍କେ ଏନ୍ ଦୁନିଆଁନ୍ତା ମାଲ୍ଦାନ୍, ଆନ୍ନେନ୍ ଆବ୍ଡ଼ାର୍ହି ଦୁନିଆଁନ୍ତା ମାଲ୍ନାଏ। 17ନିଙ୍ଘା ବଚନ୍ଦ୍ ସତ୍ତୁ ବଚନ୍ଦ୍, ହୁଦ୍ଘିଲାଗାନ୍ ନିଙ୍ଘା ସତ୍ତୁ ବଚନ୍ଘି ଦ୍ୱାର୍ନୁ ଆବ୍ଡ଼ାରିନ୍ ନିଙ୍ଘା ନାଲ୍ଖୁ କାମାଗେ ସୋଁପାଚା। 18ଏସ୍କେ ନିନ୍ ଏଙ୍ଗାନ୍ ଦୁନିଆଁନୁ ତାଏକାଦାଏ, ଆନ୍ନେ ଏନ୍ହି ଇବ୍ଡ଼ାରିନ୍ ଦୁନିଆଁନୁ ତାଏକାଦାନ୍; 19ଆରୁ ଇବ୍ଡ଼ାର୍ଘି ଲାଗାନ୍ ଏନ୍ ନିଜ୍କେନିଜ୍ବନ୍ ପାବିତାର୍ କାମ୍ଦାନ୍, ତାକା ଆବ୍ଡ଼ାର୍ହି ସତ୍ତୁଘି ଦ୍ୱାର୍ନୁ ପାବିତାର୍ ମାନାଅଙ୍ଗର୍।
ଜାମା ବିଶ୍ଵାସୀ ଆଲାର୍ଗେ ଯୀଶୁସ୍ ବିନ୍ତି କାମାଲ୍ଦାସ୍
20-21“ଆବ୍ଡ଼ାର୍ଜାମାର୍ ଅଣ୍ଟା ମାନର୍; ଏସ୍କେ ହେ ବାଙ୍ଗ୍ ନିନ୍ ଏଙ୍ଘାଏନୁ ରାଦାଏ ଆରୁ ଏନ୍ ନିଙ୍ଘାଏନୁ ରାଦାନ୍, ହୋନ୍ନେନ୍ ଆବ୍ଡ଼ାର୍ହି ନାହ୍ମାଏନୁ ରର୍, ହୁଦ୍ଘିଲାଗାନ୍ ଦୁନିଆଁଦ୍ ବିଶ୍ୱାସ୍ କାମଦ୍ କା ନିନିନ୍ ଏଙ୍ଗାନ୍ ତାଏକାଦାଏ, ହୁଦ୍ଘିଲାଗାନ୍ ଏନ୍ ଖାଲି ଚେଲାର୍ଘି ଲାଗାନ୍ ବିନ୍ତି ମା କାମାଲ୍ଦାନ୍, ଆବ୍ଡ଼ାର୍ଘି ଲାଗାନ୍ହି ବିନ୍ତି କାମାଲ୍ଦାନ୍ ଏକାର୍ କା ଇବ୍ଡ଼ାର୍ଘି ବଚନ୍ଘି ଦ୍ୱାର୍ନୁ ଏଙ୍ଘା ମିଆଁ ବିଶ୍ଵାସ୍ କାମର୍।” 22ଏସ୍କେ ନାମ୍ ଦୁହି ଲୋକ୍ ଅଣ୍ଟାତିନ୍, ହୋନ୍ନେନ୍ ଆବ୍ଡ଼ାର୍ହି ଅଣ୍ଟା ମାନିକିରି ରର୍, ହୁଦ୍ଘିଲାଗାନ୍ ଏକା ମାହିମା ନିନ୍ ଏଙ୍ଗାଗେ ଚିଚ୍କାଦାଏ, ଆ ମାହିମା ଏନ୍ ଆବ୍ଡ଼ାର୍ଗେହି ଚିଚ୍କାଦାନ୍। 23ଆବ୍ଡ଼ାର୍ ପୁରାପୁରୀ ଅଣ୍ଟା ମାନର୍କର୍, ଆରୁ ଦୁନିଆଁନ୍ତା ଆଲାର୍ ଆହାଅଙ୍ଗର୍ କା ନିନ୍ ଏଙ୍ଗାନ୍ ତାଏକାଦାଏ, ଆରୁ ନିନ୍ ଏଙ୍ଗାନ୍ ଏସ୍କେ ବାନେ ହାଖ୍ଖଦାଏ, ଆନ୍ନେ ଆବ୍ଡ଼ାରିନ୍ହି ବାନେ ହାଖ୍ଖଦାଏ, ହୁଦ୍ଘିଲାଗାନ୍ ଏନ୍ ଆବ୍ଡ଼ାର୍ଘିନୁ ରନ୍, ଆରୁ ନିନ୍ ଏଙ୍ଘାଏନୁ ରୟ। 24ହେ ବାଙ୍ଗ୍, ଏନ୍ ଚାହାଁଲ୍ଦାନ୍ କା ଏକାରିନ୍ ନିନ୍ ଏଙ୍ଗାଗେ ଚିଚ୍କାଦାଏ, ଆବ୍ଡ଼ାର୍ହି ଏନ୍ ଏକାସାନ୍ ରାଦାନ୍ ଆସାନ୍ ଏଙ୍ଘାଗାନେ ରର୍, ହୁଦ୍ଘିଲାଗାନ୍ ଏକା ମାହିମା ନିନ୍ ଏଙ୍ଗାଗେ ଚିଚ୍କାଦାଏ, ଆବନ୍ ଆବ୍ଡ଼ାର୍ହି ଏରର୍। ଏନ୍ଦେର୍ଗେକା ଦୁନିଆଁଘି ସିର୍ଜାରାନାଘି ଆଘ୍ଲିନ୍ତିନିନ୍ ଏଙ୍ଗାନ୍ ବାନେ ହାଖ୍ଖଦାଏ। 25ହେ ଧାର୍ମିକ୍ ବାଙ୍ଗ୍, ଦୁନିଆଁନ୍ତା ଆଲାର୍ ନିଙ୍ଗାନ୍ ବାଲ୍ନାଇନ୍, ଲେକିନ୍ ଏନ୍ ନିଙ୍ଗାନ୍ ଆହ୍ଦାନ୍; ଆରୁ ଏଙ୍ଘା ଚେଲାର୍ ଆହାନାଏ କା ନିନ୍ ଏଙ୍ଗାନ୍ ତାଏକାଦାଏ। 26ନିନ୍ ଏକା ବାନେ ହାଖ୍ଖନା ଏଙ୍ଗାଗେ ଚିଚ୍ଚକାଦାଏ ଆ ବାନେ ହାଖ୍ଖନାଦ୍ ଆବ୍ଡ଼ାର୍ଘିନୁ ରାନାଦ୍ ଆରୁ ଏନ୍ହି ଆବ୍ଡ଼ାର୍ଘିନୁ ରନ୍, ହୁଦ୍ଘିଲାଗାନ୍ ଏନ୍ ଆବ୍ଡ଼ାର୍ସାନ୍ ନିଙ୍ଘା ବାନେ ହାଖ୍ଖନା ପ୍ରକଟ୍ କାମ୍ଚ୍କାନ୍ ଆରୁ ପ୍ରକଟ୍ କାମ୍ତେ ରନ୍।
18ଯୀଶୁସିନ୍ ଧାର୍ତାନା
(ମାତିସ୍ ୨୬:୪୭-୫୬; ମାର୍କୁସ୍ ୧୪:୪୩-୫୦; ଲୁକାସ୍ ୨୨:୪୭-୫୩)
1ଯୀଶୁସ୍ ଇବ୍ଡ଼ା କାତ୍ଥାନ୍ ତେଙ୍କା ପାଛ୍ଲି ଯୀଶୁସ୍ ତାଙ୍ଘା ଚେଲାର୍ଗାନେ କିଦ୍ରୋନ୍ ନାଲା ଘି ହା ପାଖାଗେ କେରାସ୍। ଆସାନ୍ ଅଣ୍ଟା ଜାଇତୁନ୍ ମାନ୍ନୁଘି ବାଟ୍କି ରାଚା, ଯୀଶୁସ୍ ଆରୁ ତାଙ୍ଘା ଚେଲାର୍ ଆନ୍ନୁ କର୍ଚାର୍। 2ଧୋଖାତି ଧାର୍ତାନାବାଲା ଯୁଦାସ୍ ହି ଆ ଆଡ୍ଡାନ୍ ଆହାଲିୟାସ୍, ଏନ୍ଦେର୍ଗେକା ଯୀଶୁସ୍ ତାଙ୍ଘା ଚେଲାର୍ଗାନେ ବହୁତ୍ଥର୍ ଆ ଆଡ୍ଡାଗେ କାଲିୟାସ୍। 3ହୁଦ୍ଘିଲାଗାନ୍ ଯୁଦାସ୍, ପଲ୍ଟନ୍ର୍ଘି ଅଣ୍ଟା ଦଲ୍ବନ୍ ଆରୁ ମୁଖ୍ୟା ପୁରୋହିତ୍ଜାମାରିନ୍ ଆରୁ ଫାରିସୀ ଜାମାର୍ସ୍ତି ତାଏକା ଦାର୍ୱାନ୍ ଜାମାରିନ୍ ଅନ୍ଦ୍ରିକିରି ଆସାନ୍ ବାର୍ଚାର୍। ଆବ୍ଡ଼ାର୍ସାନ୍ ବିଲ୍ଲୀ, ମାସାଲ୍ ଆରୁ ହାଥିଆର୍ ରାଚା। 4ଆନ୍ତିନ୍ ଯୀଶୁସ୍, ଜାମା କାତ୍ଥାନ୍ ଏକାଦ୍ କା ଆସ୍କି ମିଆଁ ମାନ୍ନାବାଲା ରାଚା ଆଖ୍ଖାସ୍ ଆରୁ, ଆଘ୍ଲି କାଇକିରି ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ନେକାନ୍ ବେଦ୍ଦାଲ୍ଦାର୍?” 5ଆବ୍ଡ଼ାର୍ ଆସିନ୍ ଉତ୍ତର୍ ଚିଚ୍ଚାର୍, “ନାଜ୍ରେତ୍ତା ଯୀଶୁସିନ୍।” ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ଆ ଆଲାନିନ୍।” ଆସିନ୍ ଧାର୍ତାନାବାଲା ଯୁଦାସ୍ ହି ଆବ୍ଡ଼ାର୍ ଗାନେ ଇଜ୍ଜକାଚାସ୍। 6ଯେତ୍କବାକେନ୍ ଯୀଶୁସ୍ ତେଙ୍ଗିୟାସ୍ କା, “ଏନ୍ ଆ ଆଲାନିନ୍” ତା ଆବ୍ଡ଼ାର୍ ପାଛ୍ଲି ତାରା କିର୍ରିକିରି ହେହଁଲାନୁ ଖାତ୍ରାର୍ କେରାର୍। 7ଆନ୍ତିନ୍ ଯୀଶୁସ୍ ଆରୁଅହନ୍ ଆବ୍ଡ଼ାରିନ୍ ମେନ୍ଚାସ୍, “ନିମ୍ ନେକାନ୍ ବେଦ୍ଦାଲ୍ଦାର୍।” ଆବ୍ଡ଼ାର୍ ତେଙ୍ଗିୟାର୍, “ନାଜ୍ରେତ୍ତା ଯୀଶୁସିନ୍।” 8ଯୀଶୁସ୍ ଉତ୍ତର୍ ଚିଚ୍ଚାସ୍, “ଏନ୍ତା ନିମାନ୍ ତେଙ୍କାନ୍ କା ଏନ୍ ଆ ଆଲାନିନ୍, ଯଦି ନିମ୍ ଏଙ୍ଗାନ୍ ବେଦ୍ଦାଲ୍ଦାର୍ତା ଇବ୍ଡ଼ାରିନ୍ କାଲାଗେ ଚିଆ।” 9ଇଦ୍ ଇଦ୍ଘିଲାଗାନ୍ ମାନ୍ଚା କା ଆ ବଚନ୍ବଦ୍ ପୁରା ମାନ୍ନାଦ୍ ଏକାନ୍ କା ଆସ୍ ତେଙ୍କାଚାସ୍: “ନିନ୍ ଏକାରିନ୍ ଏଙ୍ଗାଗେ ଚିଚ୍କାଏ ଆବ୍ଡ଼ାର୍ଘି ଭିତର୍ତି ଏନ୍ ଅଣ୍ଟାହି ମାଲ୍ଲା ଏପ୍ସୁନ୍।” 10ଆନ୍ତିନ୍ ଶିମୋନ୍ ପାତ୍ରାସ୍ ନେଖାସାନ୍ କା ତାଲ୍ୱାର୍ ରାଚା, ଅଥ୍ରାସ୍ ଆରୁ ମାହାପୁରୋହିତ୍ସ୍କି ଗୁତ୍ତିୟାସ୍କି ତିନା ପାଖ୍ତା ହେବ୍ଦାନ୍ ଛିନ୍ଚେଇଚାସ୍। ଆ ଗୁତ୍ତିୟାସ୍କି ନାମେ ମାଲ୍ଖୁସ୍ ରାଚା। 11ଆନ୍ତିନ୍ ଯୀଶୁସ୍ ପାତ୍ରାସ୍ସିନ୍ ତେଙ୍ଗିୟାସ୍, “ନିଙ୍ଘା ତାଲ୍ୱାର୍ବନ୍ ଖୋଲ୍ନୁ ଉଇୟା ଏଙ୍ଘା ବାଙ୍ଗ୍ସ୍ ଏଙ୍ଗାଗେ ଏକା ଦୁଃଖୁଘି କାଟୋରା ହାପ୍ପାଗେ ଚିଚ୍କାଦାସ୍, ଆବନ୍ ଏନ୍ ମା ହାପ୍ପନ୍ କାଁଏ?”
ଯୀଶୁସିନ୍ ମାହାପୁରୋହିତ୍ ହାନ୍ନାସ୍କି ଆଘ୍ଲି ଅନ୍ଦ୍ରାଲ୍ନାଏ
12ଆଙ୍ଗେନ୍ ପଲ୍ଟନ୍ଜାମାର୍ ଆରୁ ପଲ୍ଟନ୍ଜାମାର୍ଘି ମୁଖ୍ୟାସ୍ ଆରୁ ୟାହୁଦୀର୍ଘି ମନ୍ଦିର୍ତା ଜାଗୁୱାର୍ ଯୀଶୁସିନ୍ ଧାରିକିରି ହିଁଚାର୍ ଅଚ୍ଚାର୍। 13ଆରୁ ଆସିନ୍ ହିଁଇକିରି ପହ୍ଲେ ହାନ୍ନାସ୍କି ଚାହାଗେ ଅଚ୍ଚାର୍, ଏନ୍ଦେର୍ଗେକା ଆସ୍ ଆ ବଛର୍ତା ମାହାପୁରୋହିତ୍ କାଇଫାସ୍କି ଶଶୁର୍ ରାଚାସ୍। 14ଇସ୍ ଆ କାଇଫାସ୍ ରାଚାସ୍, ଏକାସ୍ କା ୟାହୁଦୀ ମୁଖ୍ୟାରିନ୍ ସାଲାହ୍ ଚିଚ୍କାଚାସ୍ କା ଜାମା ଆଲାର୍ଘି ଲାଗାନ୍ ଅଣ୍ଟା ଆଲାସ୍କି ଖିନାଦ୍ ବାନେଦ୍।
ପାତ୍ରାସ୍ ଯୀଶୁସିନ୍ ମାନା କାମାଲ୍ଦାସ୍
(ମାତିସ୍ ୨୬:୬୯,୭୦; ମାର୍କୁସ୍ ୧୪:୬୬-୬୮; ଲୁକାସ୍ ୨୨:୫୫-୫୭)
15ଶିମୋନ୍ ପାତ୍ରାସ୍ ଆରୁ-ଆରୁ ଅଣ୍ଟା ଦୁସ୍ରା ଚେଲାସ୍ ହି ଯୀଶୁସ୍କି ପାଛ୍ଲି-ପାଛ୍ଲି କାଲିୟାର୍। ଇ ଚେଲାସ୍ ମାହାପୁରୋହିତ୍ସ୍କି ଚିହ୍ନାର୍ଜାହ୍ନାର୍ ରାଚାସ୍, ହୁଦ୍ଘିଲାଗାନ୍ ଆସ୍ ଯୀଶୁସ୍ଗାନେ ମାହାପୁରୋହିତ୍ସ୍କି ଚାଲିଗେ କରା ଅଙ୍ଗିୟାସ୍। 16ଲେକିନ୍ ପାତ୍ରାସ୍ ବାହ୍ରିନ୍ତା ଘୁମାସାନ୍ ଇଜ୍ଜକାଚାସ୍। ଆନ୍ତିନ୍ ଆ ଦୁସ୍ରା ଚେଲାସ୍ ଏକାସ୍ କା ମାହାପୁରୋହିତ୍ସ୍କି ଚିହ୍ନାର୍ଜାହ୍ନାର୍ ରାଚାସ୍, ଆସ୍ ବାହାରି ଉର୍ଖିକିରି ଦାର୍ୱାନ୍ବନ୍ ତେଙ୍ଗିକିରି ପାତ୍ରାସ୍ସିନ୍ ଉଲାଗେ ଅନ୍ଦ୍ରାସ୍। 17ଆ ଗୁତ୍ତିୟାଦ୍ ଏକାଦ୍ କା ଦାର୍ୱାନ୍ ରାଚା, ଆଦ୍ ପାତ୍ରାସ୍ସିନ୍ ତେଙ୍ଗିୟାଦ୍, “ଏକାସାନ୍ ନିନ୍ହି ଇ ଆଲାସ୍କି ଚେଲାଜାମାର୍ଘି ଭିତ୍ରୁ ତା ମାଲ୍ଦାଏ?” ପାତ୍ରାସ୍ ତେଙ୍ଗିୟାସ୍, “ମାଲ୍ଲା ଏନ୍ ମାଲ୍ଦାନ୍।” 18ହୁଙ୍ଗେନ୍ ମୁରୁକ୍ ପାୟାଁ ଲାଗ୍ଗାଲିୟା ହୁଦ୍ଘିଲାଗାନ୍ ଗୁତ୍ତିୟାର୍ ଆରୁ ମନ୍ଦିର୍ତା ଦାର୍ୱାନ୍ ଜାମାର୍ ଚିଚ୍ଚୁ ଅଦିକିରି ଆସାନ୍ ଇଜ୍ଜାର୍, ଆରୁ ଚିଚ୍ଚୁ ଆହାରାଲିୟାର୍। ପାତ୍ରାସ୍ହି ଆବ୍ଡ଼ାର୍ ଗାନେ ଇଜ୍ଜାସ୍ ଆରୁ ଚିଚ୍ଚୁ ଆହ୍ରାଲିୟାସ୍।
ମାହାପୁରୋହିତ୍ସ୍ ଯୀଶୁସିନ୍ ମେନାମେନି କାମାଲ୍ଦାସ୍
(ମାତିସ୍ ୨୬:୫୯-୬୬; ମାର୍କୁସ୍ ୧୪:୫୫-୬୪; ଲୁକାସ୍ ୨୨:୬୬-୭୧)
19ଆନ୍ତିନ୍ ମାହାପୁରୋହିତ୍ସ୍ ଯୀଶୁସିନ୍ ତାଙ୍ଘା ଚେଲାଜାମାର୍ଘି ବାରେ ଆରୁ ତାଙ୍ଘା ଉପ୍ଦେଶ୍ଘି ବାରେ ମେନ୍ଚାସ୍। 20ଯୀଶୁସ୍ ଆସିନ୍ ଉତ୍ତର୍ ଚିଚ୍ଚାସ୍, “ଏନ୍ ଦୁନିଆଁନ୍ତା ଆଲାର୍ଘି ମାଝାନୁ ଖୁଲାଖୁଲି କାତ୍ଥା କାମ୍ଚ୍କାଦାନ୍; ଏନ୍ ଜାମାବାକେନ୍ ସାଭା ଆଡ଼୍ପା ଆରୁ ମନ୍ଦିର୍ନୁ, ଏକାସାନ୍ ଜାମା ୟାହୁଦୀ ଆଲାର୍ ଅନ୍ଠାଣ୍ ଠୁଡ଼ିୟା ରାଲିୟାର୍, ଆସାନ୍ ଉପ୍ଦେଶ୍ ଚିଚ୍କାଦାନ୍, ଏନ୍ ନୁଡ଼ିକିରି ଏନ୍ଦେର୍ହି କାତ୍ଥା ମାଲ୍ଲା ତେଙ୍ଗୁନ୍। 21ନିନ୍ ଏଙ୍ଗାନ୍ ଏନ୍ଦେର୍ଗେ ମେନାଲ୍ଦାଏ? ଏନ୍ ଏନ୍ଦେର୍-ଏନ୍ଦେର୍ ତେଙ୍କାଦାନ୍ ଆବନ୍ ଏକାର୍ ଏଙ୍ଘା କାତ୍ଥାନ୍ ମେନ୍ଚ୍କାନାଏ ଆବ୍ଡ଼ାରିନ୍ ମେନା। ଏରା, ଏନ୍ ଏନ୍ଦେର୍-ଏନ୍ଦେର୍ ତେଙ୍କାଦାନ୍, ଆବ୍ଡ଼ା ଜାମାନ୍ ଆବ୍ଡ଼ାର୍ ଆହ୍ନାଏ।” 22ଯେତ୍କବାକେନ୍ ଯୀଶୁସ୍ ଏନ୍ନେ ତେଙ୍ଗିୟାସ୍ ତା, ମନ୍ଦିର୍ତା ଦାର୍ୱାନ୍ ଜାମାର୍ଘି ଭିତର୍ନୁ ଅର୍ତୁସ୍ ଏକାସ୍ କା ଚାହାନୁ ଇଜ୍ଜକାଚାସ୍, ଆସ୍ ଯୀଶୁସିନ୍ ଥାପ୍ଡ଼ିକିରି ତେଙ୍ଗିୟାସ୍, “ନିନ୍ ମାହା ପୁରୋହିତ୍ସିନ୍ ଏନ୍ନେ ଉତ୍ତର୍ ଚିଆଲ୍ଦାଏ କାଁଏ?” 23ଯୀଶୁସ୍ ଆସିନ୍ ଉତ୍ତର୍ ଚିଚ୍ଚାସ୍, “ଯଦି ଏନ୍ ଏନ୍ଦ୍ରିନ୍ ଭୁଲ୍ ତେଙ୍କାନ୍, ତା ଏନ୍ଦେର୍ ଭୁଲ୍ ତେଙ୍କାନ୍ ଆବନ୍ ଏଙ୍ଗାନ୍ ବାତାବା; ଲେକିନ୍ ଯଦି ଠିକ୍ ତେଙ୍କାନ୍, ତା ନିନ୍ ଏନ୍ଦେର୍ଗେ ଏଙ୍ଗାନ୍ ଡେମାଲ୍ଦାଏ?” 24ଆନ୍ତିନ୍ ହାନ୍ନାସ୍ ଯୀଶୁସିନ୍ ହିଁଚ୍କା ରାଙ୍ଗେନ୍ ମାହାପୁରୋହିତ୍ କାଇଫାସ୍କି ଚାହାଗେ ତାଇୟେ ଚିଚ୍ଚାସ୍।
ପାତ୍ରାସ୍କି ଆରୁଅହନ୍ ମାନା କାମ୍ନା
(ମାତିସ୍ ୨୬:୭୧-୭୫; ମାର୍କୁସ୍ ୧୪:୬୯-୭୨; ଲୁକାସ୍ ୨୨:୫୮-୬୨)
25ଶିମୋନ୍ ପାତ୍ରାସ୍ ଇଜ୍ଜାସ୍ ଆରୁ ଚିଚ୍ଚୁ ଆହ୍ରାଲିୟାସ୍। ଆଙ୍ଗେନ୍ ଆସାନ୍ ଇଜ୍ଜକା ଆଲାର୍ ଆସିନ୍ ମେନ୍ଚାର୍, “ଏକାସାନ୍ ନିନ୍ହି ଆସ୍କି ଚେଲାଜାମାର୍ଘି ଭିତର୍ନୁ ଅର୍ତୁ ତା ମାଲ୍ଦାଏ?” ଆସ୍ ମାନା କାମିକିରି ତେଙ୍ଗିୟାସ୍, “ମାଲ୍ଲା ଏନ୍ ମାଲ୍ଦାନ୍।” 26ଆଙ୍ଗେନ୍ ମାହାପୁରୋହିତ୍ସ୍କି ଗୁତ୍ତିୟାର୍ଘି ଭିତର୍ନୁ ଅର୍ତୁସ୍, ଆ ଆଲାସ୍କି ଜାତି କୁଟୁମ୍ବ ରାଚାସ୍ ଏକାସ୍କି ହେବ୍ଦାନ୍ କା ପାତ୍ରାସ୍ ଛିନ୍ଚେଇ ଚିଚ୍କାଦାସ୍, ଆସ୍ ତେଙ୍ଗିୟାସ୍, “ଏନ୍ ନିଙ୍ଗାନ୍ ଯୀଶୁସ୍ଗାନେ ଜାଇତୁନ୍ ମାନ୍ନୁଘି ବାଟ୍କିନୁ ମାଲ୍ଲା ଏର୍ନା କାଁଏ?” 27ପାତ୍ରାସ୍ ଆରୁଅହନ୍ ମାନା କାମ୍ଚାସ୍, ଆରୁ ହୁଙ୍ଗେନିନ୍ ହେରୁଦ୍ ଅହ୍ଲିୟା।
ପିଲାତୁସ୍କି ସାମ୍ନାନୁ ଯୀଶୁସ୍
(ମାତିସ୍ ୨୭:୧,୨,୧୧-୧୪; ମାର୍କୁସ୍ ୧୫:୧-୫; ଲୁକାସ୍ ୨୩:୧-୫)
28ଆନ୍ତିନ୍ ୟାହୁଦୀଜାମାର୍ ଯୀଶୁସିନ୍ କାଇଫାସ୍କି ଚାହାନ୍ନ୍ତି ରାଜ୍ପାଲ୍ସ୍କି (ରାଜୀନ୍ତା ମୁଖ୍ୟାସ୍) ମହଲ୍ଗେ ଅଚ୍ଚାର୍ କେରାର୍। ହତ୍କବାକେନ୍ ଭୋର୍ ପାଇରି ମାନ୍ଚ୍କିଚା। ଆରୁ ୟାହୁଦୀ ମୁଖ୍ୟାଜାମାର୍ ରାଜ୍ପାଲ୍ସ୍କି ମହଲ୍ ଉଲା ମା କର୍ଚାର୍ ଏନ୍ଦେର୍ଗେକା ଅଶୁଦ୍ଧ୍ ମା ମାନ୍ନାର୍ ଲେକିନ୍ ପାସ୍କାଘି ଭୋଜି ଅନା ଅଙ୍ଗର୍। 29ଆନ୍ତିନ୍ ପିଲାତୁସ୍ ଆବ୍ଡ଼ାର୍ଘି ଚାହାଗେ ଉର୍ଖିୟାସ୍ ବାର୍ଚାସ୍ ଆରୁ ତେଙ୍ଗିୟାସ୍, “ନିମ୍ ଇ ଆଲାସ୍କି ମିଆଁ ଏକା କାତ୍ଥାଘି ଦୋଷ୍ ଲାଗାବାଲ୍ଦାର୍?” 30ଆବ୍ଡ଼ାର୍ ଆସିନ୍ ଉତ୍ତର୍ ଚିଚ୍ଚାର୍, “ଯଦି ଇସ୍ ଦୋଷୀ ମା ରସ୍ନେ ହାଲେ ତା ଏମ୍ ଇସିନ୍ ନିହ୍ମା ହେଖ୍ଖାନୁ ମା ସୋଁପ୍ଦାମ୍ନେ।” 31ପିଲାତୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମିନ୍ ଇସିନ୍ ହୋଇକିରି ନିହ୍ମା ନିୟମ୍ଘି ଲେଖା ଆସ୍କି ନ୍ୟାୟ କାମା।” ୟାହୁଦୀଜାମାର୍ ଆସିନ୍ ତେଙ୍ଗିୟାର୍, “ଏମାଗେ ନେକାନ୍ହି ମରନ୍ଘି ଦଣ୍ଡ୍ ଚିୟାଗେ ହକ୍ ମାଲ୍ଲାଦିନ୍।” 32ଇଦ୍ ଇଦ୍ଘିଲାଗାନ୍ ମାନ୍ଚା କା ଯୀଶୁସ୍କି ଆ କାତ୍ଥାଦ୍ ପୁରା ମାନ୍ଚା ଏକାନ୍ ଆସ୍ ଆଘ୍ଲିନ୍ତି ତେଙ୍ଗ୍ତେ ବାରାଲିୟାସ୍। କା ଆସ୍କି ମରନ୍ ଏସ୍କେ ମାନଦ୍।
33ଆଙ୍ଗେନ୍ ପିଲାତୁସ୍ ଆରୁଅହନ୍ ମହଲ୍ଘି ଉଲା କେରାସ୍, ଆରୁ ଯୀଶୁସିନ୍ ମେହିଁକିରି ଆସିନ୍ ମେନ୍ଚାସ୍, “ନିନ୍ ୟାହୁଦୀ ଜାମାର୍ଘି ରାଜାଏ କାଁଏ?” 34ଯୀଶୁସ୍ ଉତ୍ତର୍ ଚିଚ୍ଚାସ୍, “ଇ କାତ୍ଥାନ୍ ନିମ୍ ନିହ୍ମା ତାର୍ତି ତେଙ୍ଗାଲ୍ଦାର୍ କାଁଏ, କା ଦୁସ୍ରାର୍ ଏଙ୍ଘା ବାରେନୁ ନିମାନ୍ ଏନ୍ନେ ତେଙ୍କାନାଏ?” 35ପିଲାତୁସ୍ ଉତ୍ତର୍ ଚିଚ୍ଚାସ୍, “ଏନ୍ ୟାହୁଦୀନ୍ କାଁଏ? ନିଙ୍ଘାଏ ରାଜୀନ୍ତା ଆଲାର୍ ଆରୁ ମୁଖ୍ୟା ପୁରୋହିତ୍ଜାମାର୍ ନିଙ୍ଗାନ୍ ଏଙ୍ଘା ହେଖ୍ଖାନୁ ସୋଁପ୍ଚ୍କାନାଏ। ନିନ୍ ଏନ୍ଦେର୍ କାମ୍ଚ୍କାଦାଏ?” 36ଯୀଶୁସ୍ ଉତ୍ତର୍ ଚିଚ୍ଚାସ୍, “ଏଙ୍ଘା ରାଜୀଦ୍ ଇ ଦୁନିଆଁନ୍ତା ମାଲ୍ଲିଦ୍; ଯଦି ଏଙ୍ଘାଏ ରାଜୀଦ୍ ଇ ଦୁନିଆଁନ୍ତା ରଦ୍ନେ, ତା ଏଙ୍ଘା ସେବକ୍ଜାମାର୍ ଲାଡ଼ର୍ନେ ଆରୁ ଏନ୍ ୟାହୁଦୀ ଜାମାର୍ଘି ହେଖ୍ଖାନୁ ମା ଧାର୍ରନ୍ନେ: ଲେକିନ୍ ଏଙ୍ଘା ରାଜୀଦ୍ ଇସ୍ତା ମାଲ୍ଲିଦ୍।” 37ପିଲାତୁସ୍ ଯୀଶୁସିନ୍ ତେଙ୍ଗିୟାସ୍, “ତା ନିନ୍ ରାଜାଏ କାଁଏ?” ଯୀଶୁସ୍ ଉତ୍ତର୍ ଚିଚ୍ଚାସ୍, “ନିମିନ୍ ତା ତେଙ୍ଗାଲ୍ଦାର୍ କା ଏନ୍ ରାଜାନ୍ ବୁଲି। ଏନ୍ ଇଦ୍ଘିଲାଗାନ୍ ଜନମ୍ ମାନ୍ଚ୍କାନ୍ ଆରୁ ଇଦ୍ଘିଲାଗାନ୍ ଦୁନିଆଁନୁ ବାର୍ଚ୍କାନ୍ କା ସତ୍ତୁଘି ବାରେ ସାକ୍ଷୀ ଚିଅନ୍। ଏକାର୍ ସତ୍ତୁ ଶିକ୍ଷାନୁ ଚାଲ୍ର୍ନାଏ, ଆବ୍ଡ଼ାର୍ ଏଙ୍ଘାଏ କାତ୍ଥାନ୍ ମେନ୍ନାଏ।” 38ପିଲାତୁସ୍ ଆସିନ୍ ତେଙ୍ଗିୟାସ୍, “ସତ୍ତୁଦ୍ ଏନ୍ଦେଦ୍?” ଏନ୍ନେ ତେଙ୍ଗିକିରି ଆସ୍ ଆରୁଅହନ୍ ୟାହୁଦୀ ଜାମାର୍ଘି ଚାହାଗେ ବାରିକିରି ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ଇସ୍କିନୁ ଏନ୍ଦେର୍ହି ଦୋଷ୍ ମା ହାଖ୍ଖାଲ୍ଦାନ୍।
ଯୀଶୁସ୍କି ମରନ୍ ଦଣ୍ଡ୍ଘି ହୁକୁମ୍
(ମାତିସ୍ ୨୭:୧୫-୩୧; ମାର୍କୁସ୍ ୧୫:୬-୨୦; ଲୁକାସ୍ ୨୩:୧୩-୨୫)
39ଲେକିନ୍ ନିହ୍ମାଏ ଇ ରୀତିଦ୍ ରାଇ କା ଏନ୍ ପାସ୍କାପରବ୍ନୁ ନିମାଗେ ଅଣ୍ଟା ଆଲାସିନ୍ ଆମ୍ବତେ ବାରାଲ୍ଦାନ୍ ହାଲେ ନିମ୍ ଚାହାଁଲ୍ଦାର୍ କା ଏନ୍ ନିମାଗେ ୟାହୁଦୀ ଜାମାର୍ଘି ରାଜାସିନ୍ ଆମ୍ଵନ୍ଚନ୍ କାଁଏ?” 40ଆଙ୍ଗେନ୍ ଆବ୍ଡ଼ାର୍ ଆରୁଅହନ୍ ଚିର୍ରା ରାଇକିରି ତେଙ୍ଗିୟାର୍, “ଇସିନ୍ ମାଲ୍ଲା, ଲେକିନ୍ ଏହ୍ମାଲାଗାନ୍ ବାରାବ୍ବାସିନ୍ ଆମ୍ଵାଚା।” ବାରାବ୍ବାସ୍ ଅଣ୍ଟା। ଡାକୁ ରାଚାସ୍।
19ଯୀଶୁସ୍କି ମରନ୍ ଦଣ୍ଡ୍ଘି ହୁକୁମ୍
1ଆଙ୍ଗେନ୍ ପିଲାତୁସ୍ ଯୀଶୁସିନ୍ କୋଡ୍ରାତି ଡେମାଗେ ପଲ୍ଟନ୍ ଜାମାର୍ଗେ ସୋଁପ୍ଚେଇଚାସ୍। 2ସିପାହୀଜାମାର୍ ଆଚ୍ଚୁଘି ମୁକୁଟ୍ ଗଥିକିରି ଆସ୍କି କୁକ୍କୁନୁ ଆତ୍ତତାଚାର୍, ଆରୁ ଆସିନ୍ ବାଇଗଣୀ ରଙ୍ଗ୍ଘି ଲାମ୍ବା ମିର୍ଜୀ ଆତ୍ତତାଚାର୍, 3ଆରୁ ଯୀଶୁସ୍କି ଚାହାଗେ ବାରିକିରି ତେଙ୍ଗାଗେ ଲାଗ୍ଗିୟାର୍, “ହେ ୟାହୁଦୀ ଜାମାର୍ଘି ରାଜା, ଯୋହାର୍!” ଆରୁ ଆସିନ୍ ଥାପ୍ଡ଼ାଗେ ଲାଗ୍ଗିୟାର୍। 4ପିଲାତୁସ୍ ଆରୁଅହନ୍ ବାହାରି ଉର୍ଖିକିରି ଆଲାରିନ୍ ତେଙ୍ଗିୟାସ୍, “ନିମ୍ ଆହର୍ କା ଏନ୍ ଆସ୍କିନୁ ଏନ୍ଦେର୍ହି ଦୋଷ୍ ମାଲ୍ଲା ହାଖ୍ଖୁନ୍, ହୁଦ୍ଘିଲାଗାନ୍ ଏରା, ଏନ୍ ଆସିନ୍ ନିହ୍ମା ଚାହାଗେ ଆରୁଅହନ୍ ବାହାରି ଅନ୍ଦର୍କାଦାନ୍।” 5ଆନ୍ତିନ୍ ଯୀଶୁସ୍ ଆଚ୍ଚୁଘି ମୁକୁଟ୍ ଆରୁ ବାଇଗଣୀ ରଙ୍ଗ୍ଘି ଚିଢ଼ା ଆତ୍ତକାରାଙ୍ଗେନ୍ ବାହ୍ରି ଉର୍ଖିୟାସ୍; ଆରୁ ପିଲାତୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏରା, ଇସ୍ ଆ ଆଲାସ୍!” 6ଯେତ୍କବାକେନ୍ ମୁଖ୍ୟା ପୁରୋହିତ୍ ଆରୁ ମନ୍ଦିର୍ତା ଦାର୍ୱାନ୍ ଜାମାର୍ ଆସିନ୍ ଏରିୟାର୍, ତା ଚିର୍ରା ରାଇକିରି ତେଙ୍ଗିୟାର୍ “ଇସିନ୍ କ୍ରୁଶ୍ନୁ ଠୋକା, କ୍ରୁଶ୍ନୁ ଠୋକା!” ପିଲାତୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମିନ୍ ଇସିନ୍ ହୋଇକିରି କ୍ରୁଶ୍ନୁ ଠୋକା, ଏନ୍ଦେର୍ଗେକା ଏନ୍ ଇସ୍କିନୁ ଏନ୍ଦେର୍ହି ଦୋଷ୍ ମା ହାଖ୍ଖାଲ୍ଦାନ୍।” 7ୟାହୁଦୀ ମୁଖ୍ୟାର୍ ଆସିନ୍ ଉତ୍ତର୍ ଚିଚ୍ଚାର୍, “ଏହ୍ମାଏ ହି ନିୟମ୍ ରାଇ ଆରୁ ଆ ନିୟମ୍ଘି ଲେଖା ଇସ୍ ଖିନାଘି ଲାଇଗ୍ ରାଦାସ୍, ଏନ୍ଦେର୍ଗେକା ଇସ୍ ନିଜ୍କେନିଜ୍ ପାର୍ମେଶ୍ଵାର୍ସ୍କି ହାଦ୍ଦୁସ୍ ବୁଲି ତେଙ୍କାଦାସ୍।” 8ଯେତ୍କବାକେନ୍ ପିଲାତୁସ୍ ଇ କାତ୍ଥାନ୍ ମେନ୍ଚାସ୍ ତା ଆସ୍ ଆରୁହି ଏଲ୍ଚିୟାସ୍ କେରାସ୍। 9ଆରୁ-ଆରୁଅହନ୍ ମହଲ୍ଘି ଉଲା କେରାସ୍ ଆରୁ ଯୀଶୁସିନ୍ ମେନ୍ଚାସ୍, “ନିନ୍ ଏକାସ୍ତି ବାର୍ଚ୍କାଦାଏ?” ଲେକିନ୍ ଯୀଶୁସ୍ ଆସିନ୍ ଏନ୍ଦେର୍ହି ଉତ୍ତର୍ ମା ଚିଚ୍ଚାସ୍। 10ଆଙ୍ଗେନ୍ ପିଲାତୁସ୍ ଆସିନ୍ ତେଙ୍ଗିୟାସ୍, “ନିନ୍ ଏଙ୍ଘାଗାନେ ଏନ୍ଦେର୍ଗେ ମା କାଚ୍ନେଖ୍ରାଲ୍ଦାଏ? ନିନ୍ ବାଲ୍ଦାଇନ୍ କାଁଏ ନିଙ୍ଗାନ୍ ଆମ୍ବନା ଚିନାଘିହି ହକ୍ ଏଙ୍ଘାଏ ରାଇ, ଆରୁ ନିଙ୍ଗାନ୍ କ୍ରୁଶ୍ନୁ ଠୋକ୍ନାଘିହି ହକ୍ ଏଙ୍ଘାଏ ରାଇ।” 11ଯୀଶୁସ୍ ଉତ୍ତର୍ ଚିଚ୍ଚାସ୍, “ଯଦି ନିମାଗେ ମିଁତି ତାର୍ତି ହକ୍ ମା ହାଖ୍ଖରଦ୍ନେ ତା, ଏଙ୍ଘା ମିଆଁ ନିହ୍ମାଏ ଏନ୍ଦେର୍ହି ହକ୍ ମା ରଦ୍ନେ; ହୁଦ୍ଘିଲାଗାନ୍ ଏକାସ୍ ଏଙ୍ଗାନ୍ ନିହ୍ମା ହେଖ୍ଖାନୁ ଧାର୍ତାଚ୍କାଦାସ୍ ଆସ୍ ବାଗ୍ଗେ ପାପୀ ରାଦାସ୍।”
12ଆଙ୍ଗେନ୍ ପିଲାତୁସ୍ ଯୀଶୁସିନ୍ ଆମ୍ଵାଗେ ସୋଚ୍ଚାସ୍, ଲେକିନ୍ ୟାହୁଦୀଜାମାର୍ ଚିର୍ରା ରାଇକିରି ତେଙ୍ଗିୟାର୍, “ଯଦି ନିମ୍ ଇସିନ୍ ଆମ୍ଵର୍ଚର୍, ତା ନିମ୍ କାଇସର୍ସ୍କି ସାଙ୍ଗେ ମାଲ୍ଦାର୍। ଲେକିନ୍ ଏକାସ୍ ନିଜ୍କେନିଜ୍ ରାଜା ବାନାବାଦାସ୍ ତା ଆସ୍ କାଇସର୍ସ୍କି ବିରୋଧିସ୍।” 13ଇ କାତ୍ଥାନ୍ ମେନିକିରି ପିଲାତୁସ୍ ଯୀଶୁସିନ୍ ବାହାରି ଅନ୍ଦ୍ରାସ୍ ଆରୁ ଚାବୁତାରା୧୯:୧୩ ଚାବୁତାରା ଚାଁଚା ଆଟ୍କା ଆଡ୍ଡା ନାମେଘି ଅଣ୍ଟା ଆଡ୍ଡାନୁ ଏକାନ୍ କା ଇବ୍ରାନୀ ଭଷାନୁ “ଗବ୍ବତା” ବାନାଏ, ଆସାନ୍ ନ୍ୟାୟ ଗାଦିନୁ ଅକ୍କିୟାସ୍। 14ଇଦ୍ ପାସ୍କାଘି ତିଆର୍ଘି ଉଲ୍ଲା ରାଚା, ଆରୁ ହତ୍କବାକେନ୍ ଲାଗ୍ଭାଗ୍ ବାର ବାଚ୍କିଚା। ଆଙ୍ଗେନ୍ ପିଲାତୁସ୍ ୟାହୁଦୀ ଜାମାରିନ୍ ତେଙ୍ଗିୟାସ୍, “ଏରା ଇସ୍ ନିହ୍ମାଏ ରାଜାସ୍!” 15ଲେକିନ୍ ଆବ୍ଡ଼ାର୍ ଚିର୍ରାରାଚାର୍ “ଇସିନ୍ ହୁଆ କାଲା! ଇସିନ୍ ହୁଆ କାଲା! ଇସିନ୍ କ୍ରୁଶ୍ନୁ ଠୋକା!” ପିଲାତୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଚାହାଁଲ୍ଦାର୍ କା ଏନ୍ ନିହ୍ମା ରାଜାସିନ୍ କ୍ରୁଶ୍ନୁ ଠୋକନ୍ଚନ୍ କାଁଏ?” ଆଙ୍ଗେନ୍ ମୁଖ୍ୟା ପୁରୋହିତ୍ଜାମାର୍ ଉତ୍ତର୍ ଚିଚ୍ଚାର୍, “କାଇସର୍ସିନ୍ ଆମ୍ବିକିରି ଏହ୍ମାଏ ଆରୁ ନେଦ୍ହି ରାଜା ମାଲ୍କାରିନ୍।” 16ଆଙ୍ଗେନ୍ ପିଲାତୁସ୍ ଯୀଶୁସିନ୍ କ୍ରୁଶ୍ନୁ ଠୋକାଗେ ଆବ୍ଡ଼ାର୍ଘି ହେଖ୍ଖାନୁ ସୋଁପେଇ ଚିଚ୍ଚାସ୍।
ଯୀଶୁସିନ୍ କ୍ରୁଶ୍ନୁ ଠୋକାଲ୍ନାଏ
(ମାତିସ୍ ୨୭:୩୨-୪୪; ମାର୍କୁସ୍ ୧୫:୨୧-୩୨; ଲୁକାସ୍ ୨୩:୨୬-୪୩)
17ଆନ୍ତିନ୍ ସିପାହୀଜାମାର୍ ଯୀଶୁସିନ୍ ତାହ୍ମା କାବ୍ଜାନୁ ଅଚ୍ଚାର୍ କେରାର୍, ଆରୁ ଯୀଶୁସ୍ ତାଙ୍ଘାଏ କ୍ରୁଶ୍ ଚେଡ଼ିକିରି ଅଣ୍ଟା ଆଡ୍ଡାଗେ କେରାସ୍, “ଆ ଆଡ୍ଡାଘି ନାମେ” ଖୋପ୍ଡ଼ିଘି ଆଡ୍ଡା ରାଚା। ଆରୁ ଇବ୍ରାନୀ ଭାଷାନୁ ଆ ଆଡ୍ଡାନ୍ “ଗୋଲ୍ଗାଥା” ବାଲିୟାର୍। 18ଆସାନ୍ ଆବ୍ଡ଼ାର୍ ଯୀଶୁସ୍ଗାନେ ଆରୁ ଦୁଇ ଲୋକ୍ ଆଲାରିନ୍ କ୍ରୁଶ୍ନୁ ଠୋକ୍ଚାର୍ ଆରୁ ଆସାନ୍ ଅଣ୍ଟାସିନ୍ ଇ ପାଖା ଆରୁ-ଆରୁ ଅଣ୍ଟାସିନ୍ ହାପାଖା, ଆରୁ ମାଝାନୁ ଯୀଶୁସିନ୍ ଠୋକ୍ଚାର୍। 19ପିଲାତୁସ୍ ଅଣ୍ଟା ଦୋଷୀ ଚିଠି ଲେଖିକିରି କ୍ରୁଶ୍ ମିଆଁ ଲାଗାବାଚାସ୍, ଆରୁ ଆନ୍ନୁ ଏନ୍ନେ ଲେଖ୍ଚ୍କାରାଚା, “ନାଜ୍ରେତ୍ତା ଯୀଶୁସ୍, ୟାହୁଦୀ ଜାମାର୍ଘି ରାଜାସ୍।” 20ଇ ଦୋଷୀ ଚିଠିବନ୍ ବହୁତ୍ ୟାହୁଦୀଜାମାର୍ ପାଢ଼୍ଚାର୍, ଏନ୍ଦେର୍ଗେକା ଆ ଆଡ୍ଡାଦ୍ ଏକାସାନ୍ କା ଯୀଶୁସିନ୍ କ୍ରୁଶ୍ନୁ ଠୋକ୍ଚ୍କାଚାର୍ ଆଦ୍ ସହର୍ଘି ଚାହାନୁ ରାଚା; ଆରୁ ଚିଠିଦ୍ ଇବ୍ରାନୀ ଆରୁ ଲାଟିନ୍ ଆରୁ ଗ୍ରୀକ୍ ଭାଷାନୁ ଲେଖ୍ଚ୍କାରାଚା। 21ଆଙ୍ଗେନ୍ ୟାହୁଦୀର୍ଘି ମୁଖ୍ୟା ପୁରୋହିତ୍ଜାମାର୍ ପିଲାତୁସ୍ସିନ୍ ତେଙ୍ଗିୟାର୍, “ୟାହୁଦୀ ଜାମାର୍ଘି ରାଜା ଆମା ଲେଖା ଲେକିନ୍ ଏନ୍ନେ ଲେଖା କା, ‘ଆସ୍ ତେଙ୍ଗାଲ୍ଦାସ୍, ଏନ୍ ୟାହୁଦୀ ଜାମାର୍ଘି ରାଜାନ୍।’” 22ପିଲାତୁସ୍ ଉତ୍ତର୍ ଚିଚ୍ଚାସ୍, “ଏନ୍ ଏକାନ୍ ଲେଖ୍ଚେଇ ଚିଚ୍କାନ୍, ତା ଲେଖ୍ଚେଇ ଚିଚ୍ଚକାନ୍।”
23ଯୀଶୁସିନ୍ କ୍ରୁଶ୍ନୁ ଠୋକ୍ଚ୍କା ପାଛ୍ଲି ପଲ୍ଟନ୍ଜାମାର୍ ଆସ୍କି ଚିଢ଼ାନ୍ ହୋଇକିରି ଚାର୍ଭାଗ୍ କାମ୍ଚାର୍। ଜାମା ସିପାହୀର୍ଗେ ଅଣ୍ଟା-ଅଣ୍ଟା ଭାଗ୍, ଆରୁ ଲାମ୍ବା ମିର୍ଜୀବନ୍ ଅଚ୍ଚାର୍, ଲେକିନ୍ ଆ ମିର୍ଜୀନ୍ ସିଲେଇ ମା କାମିକିରି ମିତ୍ତିଲେ କିୟାଁତକ୍ କାମ୍ଚ୍କା ରାଚା। 24ଇଦ୍ଘିଲାଗାନ୍ ଆବ୍ଡ଼ାର୍ ତାମ୍-ତାମ୍ ତେଙ୍ଗିୟାର୍, “ନାମ୍ ଇବନ୍ ଆମ୍ବତ୍ ଚାର୍ରା, ଲେକିନ୍ ଇବନ୍ ଚିଠା ଅଥ୍ରିକିରି ଏରତ୍ କା ଇଦ୍ ନେଖାଏ ମାନଦ୍।” ଇଦ୍ ଇଦ୍ଘିଲାଗାନ୍ ମାନ୍ଚା କା ପାବିତାର୍ଶାସ୍ତ୍ରନ୍ତା କାତ୍ଥାଦ୍ ପୁରା ମାନ୍ନାଦ୍, “କା ଆବ୍ଡ଼ାର୍ ଏଙ୍ଘାଏ ଚିଢ଼ାନ୍ ତାହ୍ମା-ତାହ୍ମା ଭିତ୍ରେ ହାଟ୍ଟରାର୍ ଆରୁ ଏଙ୍ଘାଏ ଲାମ୍ବା ମିର୍ଜୀନ୍ ହାଖ୍ଖାଗେ ଚିଠା ଡାଲ୍ଚାର୍।” ହୁଦ୍ଘିଲାଗାନ୍ ସିପାହୀଜାମାର୍ ଏନ୍ନେ କାମ୍ଚାର୍।
25ଯୀଶୁସ୍କି କ୍ରୁଶ୍ଘି ଚାହାନୁ ତାଙ୍ଘାଏ ଆୟାଙ୍ଗ୍, ଆରୁ ତାଙ୍ଘାଏ ମୋସୀ, କ୍ଲୋପାସ୍କି ଆଲି ମାରିୟାମ୍ ଆରୁ ମାରିୟାମ୍ ମାଗ୍ଦାଲୀନୀ ଇଜ୍ଜକିଚା। 26ଆରୁ ଏକା ଚେଲାସିନ୍ ଯୀଶୁସ୍ ବାଗ୍ଗେ ବାନେ ହାଖ୍ଖାଲିୟାସ୍ ଆସ୍ହି ଆସାନ୍ ଇଜ୍ଜକାଚାସ୍। ଆଙ୍ଗେନ୍ ଯୀଶୁସ୍ ତାଙ୍ଘାଏ ଆୟାଙ୍ଗ୍ ତାରା ଏରିକିରି ତେଙ୍ଗିୟାସ୍, “ହେ ଆୟାଙ୍ଗ୍, ଏରୁ, ଇନ୍ନାନ୍ତି ଇସ୍ ନିଙ୍ଘାଏ ହାଦ୍ଦୁସ୍।” 27ଆନ୍ତିନ୍ ଆସ୍ ଆ ଚେଲାସିନ୍ ତେଙ୍ଗିୟାସ୍, “ଇଦ୍ ନିଙ୍ଘାଏ ଆୟାଙ୍ଗ୍ଦ୍।” ଆଙ୍ଗେନ୍ ଆ ସାମାୟନ୍ତି ଚେଲାସ୍ ଆବନ୍ ତାଙ୍ଘା ଆଡ଼୍ପା ଅଚ୍ଚାସ୍ କେରାସ୍।
ଯୀଶୁସ୍କି ଖିନା
(ମାତିସ୍ ୨୭:୪୫-୫୬; ମାର୍କୁସ୍ ୧୫:୩୩-୪୧; ଲୁକାସ୍ ୨୩:୪୪-୪୯)
28ଇଦ୍ଘି ପାଛ୍ଲି ଯୀଶୁସ୍ ଇବନ୍ ଆହିକିରିକା ଆକ୍କୁନ୍ ଜାମାଦ୍ ପୁରା ମାନ୍ଚାକେରା, ଆରୁ ଇଦ୍ଘିଲାଗାନ୍ କା ପାବିତାର୍ ଶାସ୍ତ୍ରନୁ ଏକାଦ୍ ଲେଖ୍ଚ୍କା ରାଇ ଆଦ୍ ପୁରା ମାନ୍ନାଦ୍, ହୁଦ୍ଘିଲାଗାନ୍ ଯୀଶୁସ୍ ତେଙ୍ଗିୟାସ୍, “ଏଙ୍ଗା ଆମ୍ମୁକିଡ଼ା ଲାଗ୍ଗାଲି।” 29ଆସାନ୍ ତିସ୍ସା ରାସେ ନିନ୍ଦ୍କା ଅଣ୍ଟା ଖୁରୀ ରାଚା, ଆଙ୍ଗେନ୍ ଆବ୍ଡ଼ାର୍ ନିନ୍ଦ୍କା ଖୁରୀନୁ ସ୍ପଞ୍ଜବନ୍ ବଥିକିରି ଜୁଫେ ହୋପ୍ପା ଘି ଠେଙ୍ଗାନୁ ହିଁଇକିରି ଯୀଶୁସ୍କି ଥୁମ୍ଣାନୁ ଚିଚ୍ଚାର୍। 30ଯେତ୍କବାକେନ୍ ଯୀଶୁସ୍ ଆ ତିସ୍ସା ରାସେନ୍ ଟାଟ୍ଟେଚେ ଏରିୟାସ୍, ତା ତେଙ୍ଗିୟାସ୍, “ପୁରା ମାନ୍ଚା”, ଆରୁ କୁକ୍କୁନ୍ ନୁହିଁକିରି ତାଙ୍ଘା ଜୀଆ ଚିଚ୍ଚାସ୍ ଲାଗ୍ଗିୟାସ୍।
ଯୀଶୁସ୍କି ଏହୁବନ୍ ଯୋବ୍ଚାର୍
31ଇଦ୍ ପାସ୍କାପରବ୍ଘି ତିୟାରିଘି ଉଲ୍ଲା ରାଚା। ଆରୁ ଆ ପାବିତାର୍ଘି ଉଲ୍ଲାଦ୍ ବହୁତ୍ ଖାସ୍ ରାଚା। ହୁଦ୍ଘିଲାଗାନ୍ ୟାହୁଦୀ ମୁଖ୍ୟାର୍ ମା ଚାହାଁଲିୟାର୍ କା ଯୀଶୁସ୍କି ମାଁଣା ପାବିତାର୍ଘି ଉଲ୍ଲାନୁ କ୍ରୁଶ୍ନୁ ମା ରୋଦ୍, ହୁଦ୍ଘିଲାଗାନ୍ ଆବ୍ଡ଼ାର୍ ପିଲାତୁସ୍ସିନ୍ ଆର୍ଜୀବିନ୍ତି କାମ୍ଚାର୍ କା ଆବ୍ଡ଼ାର୍ଘି ହେଡ୍ଡୁନ୍ ଏସାଚାକୋ ଆରୁ ଶରୀର୍ବନ୍ ଆସ୍ତି ପାଖିଆଚାକୋ। 32ଆଙ୍ଗେନ୍ ସିପାହୀର୍ ବାରିକିରି ଏକା ଆଲାରିନ୍ ଯୀଶୁସ୍ଗାନେ କ୍ରୁଶ୍ନୁ ଠୋକ୍ଚ୍କାଚାର୍ ଆ ଆଲାର୍ସ୍ତି ପହ୍ଲେ ଆଲାସ୍କି ହେଡ୍ଡୁନ୍ ଏସ୍ସାର୍ ଚିଚ୍ଚାର୍ ଆନ୍ତିନ୍ ଦୁସ୍ରାସ୍କି ହେଡ୍ଡୁନ୍ହି ଏସ୍ସେର୍ ଚିଚ୍ଚାର୍। 33ଲେକିନ୍ ଆବ୍ଡ଼ାର୍ ଯୀଶୁସ୍କି ଚାହାଗେ ବାରିକିରି ଏରିୟାର୍ କା ଆସ୍ କେଚ୍ଚାସ୍ କେର୍କାଦାସ୍, ତା ଆସ୍କି ହେଡ୍ଡୁନ୍ ମା ଏସ୍ସାର୍। 34ଲେକିନ୍ ସିପାହୀର୍ସ୍ତି ଅଣ୍ଟା ସିପାହୀସ୍ ଯୀଶୁସ୍କି ପାଞ୍ଜରାବନ୍ ବାର୍ଚ୍ଛାତି ଏହୁନ୍ ଯୋବ୍ଚାସ୍, ଆରୁ ଆସ୍ତି ହୁଙ୍ଗେନିନ୍ ହେଁସୁ ଆରୁ ଆମ୍ମୁ ଉର୍ଖିୟା। 35ଏକାସ୍ ଇବନ୍ ଏରିୟାସ୍, ଆସ୍ ସାକ୍ଷୀ ଚିଚ୍ଚାସ୍, ଆରୁ ଆସ୍କି ସାକ୍ଷୀଦ୍ ସତ୍ତୁଦ୍; ଏନ୍ଦେର୍ଗେକା ଆସ୍ ଆହ୍ଦାସ୍ କା ଆସ୍ ସତ୍ତୁନ୍ ତେଙ୍ଗାଲ୍ଦାସ୍ ତାକା ନିମ୍ହି ବିଶ୍ଵାସ୍ କାମର୍। 36ଇ କାତ୍ଥାଦ୍ ଇଦ୍ଘିଲାଗାନ୍ ମାନ୍ଚା କା ପାବିତାର୍ ଶାସ୍ତ୍ରନୁ ଏକାଦ୍ ଲେଖଚ୍କା ରାଇ ଆଦ୍ ପୁରା ମାନ୍ନାଦ୍, “କା ଆସ୍କି ଅଣ୍ଟା ହଁଚଲ୍ହି ଏସା ମା କାଇ।” 37ପାବିତାର୍ ଶାସ୍ତ୍ରନୁ ଆରୁ ଅଣ୍ଟା ଆଡ୍ଡାନୁ ଏନ୍ନେ ଲେଖ୍ଚ୍କା ରାଇ କା, “ଏକାର୍ ଆସିନ୍ ବାର୍ଚ୍ଛାତି ଏହୁନ୍ ଯୋବ୍ଚାର୍, ଆବ୍ଡ଼ା ଆଲାର୍ ଆସ୍ତାରା ଏରର୍।”
ଯୀଶୁସିନ୍ ମାଣ୍ନା
(ମାତିସ୍ ୨୭:୫୭-୬୧; ମାର୍କୁସ୍ ୧୫:୪୨-୪୭; ଲୁକାସ୍ ୨୩:୫୦-୫୬)
38ଇବ୍ଡ଼ା ଜାମା ଘାଟ୍ଣାଘି ପାଛ୍ଲି, ଯୋଷେଫ୍ ନାମେଘି ଅଣ୍ଟା ଆଲାସ୍ ଏକାସ୍ କା ହାରାମାଥିୟା ସହର୍ତା ରାଚାସ୍। ଆସ୍ ଯୀଶୁସ୍କି ଚେଲା ରାଚାସ୍, ଲେକିନ୍ ଆସ୍ ୟାହୁଦୀ ମୁଖ୍ୟା ଜାମାର୍ଘି ଏଲ୍ଚ୍କାତି ଇବ୍ଡ଼ା କାତ୍ଥାଗୁଠିନ୍ ନୁଡ୍ଡାସ୍ ଉଇକାଚାସ୍। ଆସ୍ ଯୀଶୁସ୍କି ଶରୀର୍ବନ୍ ହୁଆଗେ ପିଲାତୁସ୍ସିନ୍ ଆର୍ଜୀ କାମ୍ଚାସ୍, ପିଲାତୁସ୍ ଛୁଟି ଚିଚ୍ଚାସ୍, ଆଙ୍ଗେନ୍ ଆସ୍ ବାରିକିରି ଯୀଶୁସ୍କି ଶରୀର୍ବନ୍ ଅଚ୍ଚାସ୍। 39ଆରୁ ନୀକଦୀମୁସ୍ ହି, ଏକାସ୍ କା ଆଘ୍ଲି ଅହନ୍ ମାଁହାବାକେନ୍ ଯୀଶୁସ୍କି ଚାହାଗେ ବାର୍ଚ୍କାଚାସ୍। ଆସ୍ହି ଲାଗ୍ଭାଗ୍ ତିରିଶ୍ କେଜି ଗାନ୍ଧ୍ରାସ୍ ଆରୁ ଏଲ୍ୱା ନାମେଘି ବାସ୍ନା ଜିନିଷ୍ ମେଶାବାଇକିରି ଅନ୍ଦ୍ରକାଚାସ୍। 40ଆବ୍ଡ଼ାର୍ ଯୀଶୁସ୍କି ଶରୀର୍ବନ୍ ହୋଇକିରି, ୟାହୁଦୀ ଜାମାର୍ଘି ମାଣ୍ନାଘି ରୀତି ଲେଖା ଆବନ୍ ବାସ୍ନା ଜିନିଷ୍ ଗାନେ ପାଣ୍ଡରୁ ଚିଢ଼ାତି ଗୁଢେଇଚାର୍। 41ଏକାସାନ୍ ଯୀଶୁସିନ୍ କ୍ରୁଶ୍ନୁ ଠୋକ୍ଚ୍କାଚାର୍, ଆ ଆଡ୍ଡାନୁ ଅଣ୍ଟା ବାଟ୍କି ରାଚା ଆରୁ ଆ ବାଟ୍କିନୁ ଅଣ୍ଟା ପୁନା ମାସ୍ଣା ରାଚା, ଆନ୍ନୁ ନେକାନ୍ହି ଏକ୍ଲାହି ମାଲ୍ଲା ଉଇକାରୁର୍। 42ଏନ୍ଦେର୍ଗେକା ଆଦ୍ ୟାହୁଦୀ ଜାମାର୍ଘି ଆରାମ୍ ଉଲ୍ଲାଘି ତିଆରୀଘି ଉଲ୍ଲା ରାଚା ଆରୁ ଆ ମାସ୍ଣାଦ୍ ଚାହାନୁ ରାଚା, ହୁଦ୍ଘିଲାଗାନ୍ ଆବ୍ଡ଼ାର୍ ଯୀଶୁସିନ୍ ଆନ୍ନୁ ଉୟେର୍ଚାର୍।
20ଯୀଶୁସ୍ ଜିଉ ଉଠ୍ରାସ୍
(ମାତିସ୍ ୨୮:୧-୮; ମାର୍କୁସ୍ ୧୬:୧-୮; ଲୁକାସ୍ ୨୪:୧-୧୨)
1ହାପ୍ତା। ଘି ପହ୍ଲେ ଉଲ୍ଲା ମାରିୟାମ୍ ମାଗ୍ଦାଲୀନୀ ଭୋର୍ ପାଇରି ମାଁହା ରାତେହି ମାସ୍ଣାସାନ୍ କେରାଦ୍, ଆରୁ ଏରିୟା କା ମାସ୍ଣାସ୍ତି ଚାଁଚାବଦ୍ ପାଖିଆରାଚା କେର୍କିଚି। 2ଆଙ୍ଗେନ୍ ଆଦ୍ କୁଦିୟାରାତେ ଶିମୋନ୍ ପାତ୍ରାସ୍ ଆରୁ-ଆରୁ ଅଣ୍ଟା ଚେଲାସ୍କି ଚାହାଗେ କେରାଦ୍ ଏକାସିନ୍କା ଯୀଶୁସ୍ ବାଗ୍ଗେ ବାନେ ହାଖ୍ଖାଲିୟାସ୍, ଆରୁ ତେଙ୍ଗିୟାଦ୍, “ଆବ୍ଡ଼ାର୍ ପ୍ରାଭୁସ୍କି ଶରୀର୍ବନ୍ ମାସ୍ଣାସ୍ତି ଅଥ୍ରିକିରି ଅଚ୍ଚାର୍ କେର୍କାନାଏ, ଆରୁ ଏମ୍ ବାଲ୍ଲଦାମିନ୍ କା ଆସିନ୍ ଏକାସାନ୍ ଉଇକାନାଏ।” 3ଆଙ୍ଗେନ୍ ପାତ୍ରାସ୍ ଆରୁ-ଆରୁ ଦୁସ୍ରା ଚେଲାସ୍ ଉର୍ଖିକିରି ମାସ୍ଣା ତାରା କେରାର୍। 4ଆ ଦୁଇ ଲୋକ୍ ସାଙ୍ଗେନ୍ କୁଦ୍ୟାରାଲିୟାର୍, ଲେକିନ୍ ଆରୁ ଦୁସ୍ରା ଚେଲାସ୍ ପାତ୍ରାସ୍ତି ଆଘ୍ଲି ବାଢ଼ରିକିରି ମାସ୍ଣାସାନ୍ ଆଘ୍ଲି ଆଣ୍ସିୟାସ୍; 5ଆରୁ ନୁହିଁକିରି ଚିଢ଼ା ଖାତ୍ର୍କାନ୍ ଏରିୟାସ୍, ହାଲେହି ଆସ୍ ଉଲାଗେ ମା କେରାସ୍। 6ଆନ୍ତିନ୍ ଶିମୋନ୍ ପାତ୍ରାସ୍ ଆସ୍କି ପାଛ୍ଲି ଆଣ୍ସିୟାସ୍, ଆରୁ ମାସ୍ଣାଘି ଉଲାଗେ କେରାସ୍ ଆରୁ ଚିଢ଼ା ଖାତ୍ର୍କାନ୍ ଏରିୟାସ୍; 7ଆରୁ ଆ ପାଚିଦ୍ ଏକାଦ୍ କା ଯୀଶୁସ୍କି କୁକ୍କୁନୁ ହିଁଚ୍କା ରାଚା, ଚିଢ଼ାଗାନେ ମାଲ୍ଲା ଖାତ୍ରୁ, ଭିନେ ଅଣ୍ଟା ଆଡ୍ଡାନୁ ଗୁଢ଼ିୟାଚ୍କା ଉଇକାନ୍ ଏରିୟାସ୍। 8ଆନ୍ତିନ୍ ଦୁସ୍ରା ଚେଲାସ୍ ହି ଏକାସ୍ ମାସ୍ଣାସାନ୍ ଆଘ୍ଲି ଆଣ୍ସ୍କାଚାସ୍, ଆସ୍ହି ଉଲା କେରାସ୍ ଆରୁ ଏରିକିରି ବିଶ୍ଵାସ୍ କାମ୍ଚାସ୍। 9ଆବ୍ଡ଼ାର୍ ତା ଆକ୍କୁନ୍ତକ୍ ପାବିତାର୍ ଶାସ୍ତ୍ରନୁ ଏକାଦ୍ ଲେଖ୍ଚ୍କା ରାଇ ଆବନ୍ ମା ବୁଝର୍କାଚାର୍ କା ଆସ୍କେ କେଚ୍ଚକାର୍ସ୍ତି ଉଜ୍ଜନା ମାନଦ୍। 10ଆନ୍ତିନ୍ ଆବ୍ଡ଼ା ଚେଲାର୍ ତାହ୍ମା ଆଡ଼୍ପାଗେ କିର୍ୟାର୍ କେରାର୍।
ଯୀଶୁସ୍ ମାରିୟାମ୍ ମାଗ୍ଦାଲୀନୀଗେ ଦର୍ଶନ୍ ଚିଆଲ୍ଦାସ୍
(ମାତିସ୍ ୨୮:୯,୧୦; ମାର୍କୁସ୍ ୧୬:୯-୧୧)
11ଲେକିନ୍ ମାରିୟାମ୍ ମାସ୍ଣାଘି ଚାହାନୁ ବାହାରି ଇଜ୍ଜାଦ୍ ଆରୁ ଅହ୍ଲାଲିୟାଦ୍। ଆରୁ ଅହ୍ଲତେ-ଅହ୍ଲତେ ମାସ୍ଣା ଉଲା ଏରାଗେ ନୁହିୟାଦ୍। 12ଏକାସାନ୍ ଯୀଶୁସ୍କି ଶରୀର୍ବନ୍ ଉଇକାରାଚା ଆସାନ୍ ପାଣ୍ଡୁରୁ ଚିଢ଼ା ଆତ୍ତ୍କା ଦୁଇ ଲୋକ୍ ସରଗ୍ଦୂଁତ୍ ଜାମାରିନ୍ ଅଣ୍ଟାନ୍ ଯୀଶୁସ୍କି କୁକ୍କୁ ତାରା, ଆରୁ ଅଣ୍ଟାନ୍ ହେଡ୍ଡୁ ତାରା ଅକ୍କାନ୍ ଏରିୟାଦ୍। 13ସରଗ୍ଦୂଁତ୍ଜାମାର୍ ଆବନ୍ ତେଙ୍ଗିୟାର୍, “ହେ ଆଲି, ନିନ୍ ଏନ୍ଦେର୍ଗେ ଅହ୍ଲାଲ୍ଦିନ୍?” ଆଦ୍ ଆବ୍ଡ଼ାରିନ୍ ତେଙ୍ଗିୟାଦ୍, “ଆବ୍ଡ଼ାର୍ ଏଙ୍ଘା ପ୍ରାଭୁସିନ୍ ଅଚ୍ଚାର୍ କେର୍କାନାଏ ଆରୁ ଏନ୍ ବାଲ୍ଲେନିନ୍ କା ଆସିନ୍ ଏକାସାନ୍ ଉଇକାନାଏ।” 14ଏନ୍ନେ ତେଙ୍ଗିକିରି ଆଦ୍ ପାଛ୍ଲି କିର୍ରେଚେ ଏରିୟା ଆରୁ ଯୀଶୁସିନ୍ ଇଜ୍ଜକାନ୍ ଏରିୟା, ଲେକିନ୍ ଆଦ୍ ମା ଚିହ୍ନଚାଦ୍ କା ଆସ୍ ଯୀଶୁସ୍। 15ଯୀଶୁସ୍ ଆଦିନ୍ ତେଙ୍ଗିୟାସ୍, “ହେ ଆଲି, ନିନ୍ ଏନ୍ଦେର୍ଗେ ଅହ୍ଲାଲ୍ଦି? ନେକାନ୍ ବେଦ୍ଦାଲ୍ଦି?” ଆଦ୍ ବାଟ୍କିଘି ଦେଖ୍ଭାଲ୍ କାମୁସ୍ ବୁଲି ସୋଚିକିରି ତେଙ୍ଗିୟାଦ୍, “ହେ ମାହାରାଜା, ଯଦି ନିନ୍ ଆସିନ୍ ଅଚ୍କାଦାଏ ତା ଏଙ୍ଗାନ୍ ତେଙ୍ଗା କା ଆସିନ୍ ଏକାସାନ୍ ଉଇକାଦାଏ, ଆରୁ ଏନ୍ ଆସିନ୍ ହୋନ୍କୋନ୍।” 16ଯୀଶୁସ୍ ମାରିୟାମ୍ବନ୍ ତେଙ୍ଗିୟାସ୍, “ମାରିୟାମ୍!” ଆଙ୍ଗେନ୍ ଆଦ୍ ପାଛ୍ଲି କିର୍ରେଚେ ଏରିକିରି ଇବ୍ରାନୀ ଭାଷାତି ତେଙ୍ଗିୟାଦ୍, “ହେ ରାବ୍ବୁନୀ!” ମତ୍ଲବ୍ “ହେ ଗୁରୁ”। 17ଯୀଶୁସ୍ ମାରିୟାମ୍ବନ୍ ତେଙ୍ଗିୟାସ୍, “ଏଙ୍ଗାନ୍ ଧାରୁ ଆରୁ ଆମୁ ଉଇୟୁ, ଏନ୍ଦେର୍ଗେକା ଏନ୍ ଆକ୍କୁନ୍ତକ୍ ବାଙ୍ଗ୍ସାନ୍ ମିଆଁ ଆର୍ଗାନ୍ କାଲା, ଏଙ୍ଘାଏ ଭାଇର୍ସାନ୍ କାଇକିରି ଆବ୍ଡ଼ାରିନ୍ ତେଙ୍ଗୁ କା, ଏନ୍ ଏଙ୍ଘା ବାଙ୍ଗ୍ ଆରୁ ନିହ୍ମା ବାଙ୍ଗ୍ ଆରୁ ଏଙ୍ଘାଏ ପାର୍ମେଶ୍ୱାର୍ସ୍ ଆରୁ ନିହ୍ମାଏ ପାର୍ମେଶ୍ୱାର୍ସ୍କି ଚାହାଗେ ମିଆଁ କାଲ୍ଦାନ୍।” 18ମାରିୟାମ୍ ମାଗ୍ଦାଲୀନୀ କାଇକିରି ଚେଲାରିନ୍ ତେଙ୍ଗିୟାଦ୍, “ଏନ୍ ପ୍ରାଭୁସିନ୍ ଏରିୟାନ୍, ଆରୁ ଆସ୍ ଏଙ୍ଗାନ୍ ଇ କାତ୍ଥାନ୍ ତେଙ୍ଗିୟାସ୍।”
ଯୀଶୁସ୍ ଚେଲାରିନ୍ ଦର୍ଶନ୍ ଚିଆଲ୍ଦାସ୍
(ମାତିସ୍ ୨୮:୧୬-୨୦; ମାର୍କୁସ୍ ୧୬:୧୪-୧୮; ଲୁକାସ୍ ୨୪:୩୬-୪୯)
19ହୁ ଉଲ୍ଲା ଏକାଦ୍ କା ହାପ୍ତାଘି ପହ୍ଲେ ଉଲ୍ଲା ରାଚା, ଆରୁ ବିଡ଼ି ଅକ୍କନା ସମୟ ଯେତ୍କବାକେନ୍ ଚେଲାର୍ ଆସାନ୍ ଅନ୍ଠାଣ୍ ରାଚାର୍, ଆରୁ ଆବ୍ଡ଼ାର୍ ୟାହୁଦୀ ନେତା ଜାମାର୍ଘି ଏଲ୍ଚ୍କାତି ବାଲି ମୁଚ୍ଚେଇ ଚିଚ୍କାଚାର୍। ହତ୍କବାକେନ୍ ଯୀଶୁସ୍ ବାର୍ଚାସ୍ ଆରୁ ଆବ୍ଡ଼ାର୍ଘି ମାଝାନୁ ଇଜ୍ଜାସ୍ ଆରୁ ଆବ୍ଡ଼ାରିନ୍ ତେଙ୍ଗିୟାସ୍, “ନିମାଗେ ଶାନ୍ତି ହାଖ୍ଖର୍ନାଦ୍।” 20ଆରୁ ଏନ୍ନେ ତେଙ୍ଗିକିରି ଆସ୍ ତାଙ୍ଘାଏ ହେଖ୍ଖା ଆରୁ ତାଙ୍ଘାଏ ପାଞ୍ଜରାବନ୍ ଆବ୍ଡ଼ାରିନ୍ ଏଦିୟାସ୍। ଆଙ୍ଗେନ୍ ଚେଲାର୍ ପ୍ରାଭୁସିନ୍ ଏରିକିରି ଖୁସୀ ମାନ୍ଚାର୍ କେରାର୍। 21ଯୀଶୁସ୍ ଆରୁଅହନ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମାଗେ ଶାନ୍ତି ହାଖ୍ଖର୍ନାଦ୍; ଏସ୍କେ ବାଙ୍ଗ୍ସ୍ ଏଙ୍ଗାନ୍ ତାଏକାଦାସ୍, ଆନ୍ନେନ୍ ଏନ୍ହି ନିମାନ୍ ତାଇୟାଲ୍ଦାନ୍।” 22ଏନ୍ନେ ତେଙ୍ଗିକିରି ଆସ୍ ଆବ୍ଡ଼ାର୍ଘି ମିଆଁ ନିନାଶ୍ ଉରିୟାସ୍ ଆରୁ ଆବ୍ଡ଼ାରିନ୍ ତେଙ୍ଗିୟାସ୍, “ପାବିତାର୍ ଆତ୍ମାନ୍ ଗ୍ରହନ୍ କାମା। 23ନେଖା ପାପ୍ ଗୁଠିନ୍ ନିମ୍ ଛେମା କାମର୍, ଆବ୍ଡ଼ାର୍ଘି ପାପ୍ ଛେମା ମାନୋଦ୍; ଆରୁ ଯଦି ନେଖା ପାପ୍ବନ୍ ନିମ୍ ଛେମା ମା କାମର୍, ହାଲେ ଆବ୍ଡ଼ାର୍ଘି ପାପ୍ ଛେମା ମା ମାନୋଦ୍।”
ଥୋମାସ୍ ଯୀଶୁସିନ୍ ଏରାଲ୍ଦାସ୍
24ଲେକିନ୍ ଯୀଶୁସ୍ ଯେତ୍କବାକେନ୍ ଚେଲାଜାମାର୍ଗେ ଦର୍ଶନ୍ ଚିଚ୍କାଚାସ୍, ହତ୍କବାକେନ୍ ବାର ଚେଲାର୍ଘି ଭିତର୍ନୁ ଅର୍ତୁସ୍ ଥୋମାସ୍, ଏକାସିନ୍କା ଦିଦୁମୁସ୍ ବାଲିୟାର୍, ଆସ୍ ଆବ୍ଡ଼ାର୍ ଗାନେ ମାଲ୍ଲାରୁସ୍। 25ଯେତ୍କବାକେନ୍ ଦୁସ୍ରା ଚେଲାର୍ ଆସିନ୍ ତେଙ୍ଗାଗେ ଲାଗ୍ଗିୟାର୍, “କା ଏମ୍ ଯୀଶୁସିନ୍ ଏର୍କାଦାମ୍।” ଆଙ୍ଗେନ୍ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯେତ୍କତକ୍ ଏନ୍ ଆସ୍କି ହେଖ୍ଖାନୁ କାଣ୍ଟିଘି ଚିହ୍ନାଗୁଠିନ୍ ମା ଏରନ୍, ଆରୁ କାଣ୍ଟିଘି ଚିହ୍ନାନୁ ଏଙ୍ଘାଏ ଆଙ୍ଗ୍ଠି ମା ଉଇୟନ୍, ଆରୁ ଆସ୍କି ପାଞ୍ଜରାନ୍ ଏଙ୍ଘାଏ ହେଖ୍ଖାତି ମା ଏସ୍ରନ୍, ଆତ୍କତକ୍ ଏନ୍ ବିଶ୍ଵାସ୍ ମା କାମ୍ଦାନ୍।”
26ଆଠ୍ ଦିନ୍ଘି ପାଛ୍ଲି ଯୀଶୁସ୍ ଚେଲାର୍ ଆରୁହନ୍ ଆଡ଼୍ପା ଉଲ୍ଲା ରାଚାର୍, ଆରୁ ଥୋମାସ୍ ହି ଆବ୍ଡ଼ାର୍ ଗାନେ ରାଚାସ୍; ଆରୁ ବାଲି ବନ୍ଦ ରାଚା। ଆଙ୍ଗେନ୍ ଯୀଶୁସ୍ ବାର୍ଚାସ୍ ଆରୁ ତାହ୍ମା ମାଝାନୁ ତେଙ୍ଗିୟାସ୍, “ନିମାଗେ ଶାନ୍ତି ହାଖ୍ଖର୍ନାଦ୍।” 27ଆଙ୍ଗେନ୍ ଯୀଶୁସ୍ ଥୋମାସ୍ସିନ୍ ତେଙ୍ଗିୟାସ୍, “ନିଙ୍ଘାଏ ଆଙ୍ଗ୍ଠି ଅନ୍ଦ୍ରିକିରି ଏଙ୍ଘାଏ ହେଖ୍ଖାନ୍ ଏରା ଆରୁ ନିଙ୍ଘାଏ ହେଖ୍ଖାନ୍ ଅନ୍ଦ୍ରିକିରି ଏଙ୍ଘାଏ ପାଞ୍ଜରାନ୍ ଏସ୍ରା, ଆରୁ ଶାକ୍ ଆମା କାମା ଲେକିନ୍ ବିଶ୍ୱାସ୍ କାମା।” 28ଇବନ୍ ମେନିକିରି ଥୋମାସ୍ ଉତ୍ତର୍ ଚିଚ୍ଚାସ୍, “ହେ ଏଙ୍ଘାଏ ପ୍ରାଭୁ, ହେ ଏଙ୍ଘାଏ ପାର୍ମେଶ୍ୱାର୍!” 29ଯୀଶୁସ୍ ଆସିନ୍ ତେଙ୍ଗିୟାସ୍, “ନିନ୍ ଏଙ୍ଗାନ୍ ଏର୍କାଦାଏ, ଆଦ୍ଘିଲାଗାନ୍ ବିଶ୍ଵାସ୍ କାମ୍ଦାଏ? ଲେକିନ୍ ଏକାର୍ ବିନା ଏରିକିରି ବିଶ୍ଵାସ୍ କାମ୍ନାଏ ଆବ୍ଡ଼ାର୍ଗେ ଆଶୀର୍ବାଦ୍ ହାଖ୍ଖର।”
ଇବହିଘି ଉଦ୍ଦେଶ୍ୟ
30ଯୀଶୁସ୍ ଆରୁହି ବହୁତ୍ ଆଚ୍ମିତ୍ ନାଲ୍ଖୁ ଚେଲାର୍ଘି ମାଝାନୁ ଏଦିୟାସ୍, ଏକାଦ୍ କା ଇ ବହିନୁ ଲେଖ୍ଚ୍କା ମାଲ୍ଲାଦିନ୍। 31ଲେକିନ୍ ଇଦ୍ ଇଦ୍ଘିଲାଗାନ୍ ଲେଖାକେରା କା ନିମ୍ ବିଶ୍ୱାସ୍ କାମା କା ଯୀଶୁସିନ୍ ପାର୍ମେଶ୍ଵାର୍ସ୍କି ହାଦ୍ଦୁସ୍ ଖ୍ରୀସ୍ତ୍ସ୍, ଆରୁ ବିଶ୍ଵାସ୍ କାମିକିରି ଆସ୍କି ନାମେନୁ ଜୀବନ୍ ହାଖ୍ଖା।
21ତିବିରିୟା ହଁସ୍ରାଘି ଖାଁଣିନୁ ଯୀଶୁସ୍ ଚେଲାରିନ୍ ଦର୍ଶନ୍ ଚିଆଲ୍ଦାସ୍
1ଇଦ୍ଘି ପାଛ୍ଲି ଯୀଶୁସ୍ ତିବିରୀୟା ହଁସ୍ରାଘି ଖାଁଣିନୁ ଚେଲାଜାମାରିନ୍ ଆରୁଅହନ୍ ଦର୍ଶନ୍ ଚିଚ୍ଚାସ୍। ଆସ୍ ଏନ୍ନେ ଦର୍ଶନ୍ ଚିଚ୍ଚାସ୍; 2ଶିମୋନ୍ ପାତ୍ରାସ୍, ଥୋମାସ୍, ଏକାସିନ୍କା ଦିଦୁମୁସ୍ ବାଲିୟାର୍, ଆରୁ ଗାଲିଲୀନ୍ତା କାନା ସହର୍ତା ନାତାନାଏଲ୍, ଜେବେଦୀସ୍କି ହାଦ୍ଦୁର୍ ଆରୁ ଯୀଶୁସ୍କି ଚେଲାଜାମାର୍ଘି ଭିତର୍ନୁ ଆରୁ ଦୁଇ ଲୋକ୍ ଆସାନ୍ ରାଚାର୍। 3ଶିମୋନ୍ ପାତ୍ରାସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ଇଞ୍ଜୋ ଧାରାଗେ କାଲ୍ଦାନ୍।” ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ଏମ୍ହି ନିଙ୍ଘାଗାନେ କମ୍।” ଆବ୍ଡ଼ାର୍ ଉର୍ଖିକିରି ଡଙ୍ଗାନୁ ଆର୍ଗିୟାର୍ ଆରୁ କେରାର୍ ଲେକିନ୍ ହୁ ମାଁହାନୁ ଆବ୍ଡ଼ାର୍ ଅଣ୍ଟାହି ଧାରା ପଲ୍ଲିଆରିନ୍।
4ପାଇରି ବିଜ୍ଜକାନ୍ତି ଯୀଶୁସ୍ ଖାଁଣିନୁ ଇଜ୍ଜକାଚାସ୍; ହାଲେହି ଚେଲାଜାମାର୍ ଯୀଶୁସିନ୍ ମା ଚିହ୍ନଚାର୍ କା ଇସିନ୍ ଯୀଶୁସ୍। 5ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ହେ ହାଦ୍ଦୁରୋ, ନିହ୍ମାସାନ୍ ମହାଁଗେ ଏନ୍ଦ୍ରିନ୍ ଆତ୍ଲି କାଁଏ?” ଆବ୍ଡ଼ାର୍ ଆସିନ୍ ଉତ୍ତର୍ ଚିଚ୍ଚାର୍, “ମାଲ୍ଲାଦିନ୍।” 6ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଡଙ୍ଗାଘି ତିନା ପାଖ୍ତି ଜାଲ୍ଲିବନ୍ ଆଚ୍ଛା ଆରୁ ନିମ୍ ହାଖ୍ଖର୍।” ହୁଦ୍ଘିଲାଗାନ୍ ଆବ୍ଡ଼ାର୍ ଜାଲ୍ଲି ଆଚ୍ଛିୟାର୍, ଆରୁ ଏତ୍କ ଇଞ୍ଜୋ ବାଝ୍ରାକା ଆବ୍ଡ଼ାର୍ ଜାଲ୍ଲିନ୍ ଟାଣା ପଲ୍ଲିଆରିନ୍। 7ଆଙ୍ଗେନ୍ ଯୀଶୁସ୍ ଏକା ଚେଲାସିନ୍ ବାଗ୍ଗେ ବାନେ ହାଖ୍ଖାଲିୟାସ୍, ଆସ୍ ପାତ୍ରାସ୍ସିନ୍ ତେଙ୍ଗିୟାସ୍, “ଇସ୍ତା ପ୍ରାଭୁସ୍!” ଶିମୋନ୍ ପାତ୍ରାସ୍ ଇସ୍ ପ୍ରାଭୁସ୍ ବୁଲି ମେନିକିରି, ତାଙ୍ଘା କାଣ୍ମାନୁ ଚିଢ଼ାବନ୍ ଆତ୍ତିୟାସ୍ ଏନ୍ଦେର୍ଗେକା ଆସ୍ ଖାଲି ମେଦୁନୁ ରାଚାସ୍ ଆଙ୍ଗେନ୍ ହଁସ୍ରାନୁ ଡେଗ୍ଚେଇଚାସ୍। 8ଲେକିନ୍ ଦୁସ୍ରା ଚେଲାଜାମାର୍ ଇଞ୍ଜୋତି ନିନ୍ଦ୍କା ଜାଲ୍ଲିବନ୍ ଟାଣନାତି ଟାଣ୍ନାତି ଡଙ୍ଗାନୁ ଖାଁଣିଗେ ବାର୍ଚାର୍, ଏନ୍ଦେର୍ଗେକା ଆବ୍ଡ଼ାର୍ ଖାଁଣିଘି ବାଗ୍ଗେ ଗେଚ୍ଛାନୁ ମାଲ୍ଲାରୁର୍, ଲେକିନ୍ ଖାଲି ଶୋଏ ମିଟର୍ ଗେଚ୍ଛାନୁ ରାଚାର୍।
9ଆବ୍ଡ଼ାର୍ ଖାଁଣିନୁ ଏତ୍ତିକିରି ଆସାନ୍ ନିଉର୍ଘି ଚିଚ୍ଚୁ ଆରୁ ଆଦ୍ଘି ମିଆଁ ଇଞ୍ଜୋ ଆରୁ ଆସ୍ମା ଉଇକା ଏରିୟାର୍। 10ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଆକ୍କୁନ୍ ଏକା ଇଞ୍ଜୋ ଧାର୍ଚ୍କାଦାର୍, ଆସ୍ତି ଥୋଡ଼େ ଅନ୍ଦ୍ରା।” 11ଶିମୋନ୍ ପାତ୍ରାସ୍ ଡଙ୍ଗାନୁ ଅକ୍କିକିରି ଏକ୍ ଶହ୍ ତେପ୍ପନ୍ଟା ବାଡ଼୍କା ଇଞ୍ଜୋତି ନିନ୍ଦ୍କା ଜାଲ୍ଲିବନ୍ ଖାଁଣିଗେ ଟାଣ୍ଚାର୍, ଆରୁ ଏତ୍କ-ଏତ୍କ ଇଞ୍ଜୋ ରାଇକିରିହି ଜାଲ୍ଲିଦ୍ ମା ଏଟ୍ରାଦ୍। 12ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ମହାଁଗେ ବାରା।” ଚେଲାଜାମାର୍ସ୍ତି ନେଦ୍ହି ଆସିନ୍ ମେନାଗେ ସାହସ୍ ମା କାମ୍ଚାର୍ କା, “ନିନ୍ ନେଦ୍?” ଏନ୍ଦେର୍ଗେକା ଆବ୍ଡ଼ାର୍ ଆହାଲିୟାର୍ କା ଇସିନ୍ ପ୍ରାଭୁସ୍। 13ଯୀଶୁସ୍ ବାର୍ଚାସ୍ ଆରୁ ଆସ୍ମାବନ୍ ହୋଇକିରି ଆବ୍ଡ଼ାର୍ଗେ ଚିଚ୍ଚାସ୍, ଆରୁ ଆନ୍ନେନ୍ ଇଞ୍ଜୋନ୍ହି ଚିଚ୍ଚାସ୍। 14ଇଦ୍ ତିସ୍ରା ଥର୍ ରାଚା, କା ଯୀଶୁସ୍ କେଚ୍ଚକାସ୍ତି ଉଜ୍ଜକାଘି ପାଛ୍ଲି ଚେଲାରିନ୍ ଦର୍ଶନ୍ ଚିଚ୍ଚାସ୍।
ଯୀଶୁସ୍ ଆରୁ ପାତ୍ରାସ୍ କାତ୍ଥାବାର୍ତ୍ତା କାମାଲ୍ନାଏ
15ଆବ୍ଡ଼ାର୍ଘି ଅଣ୍ତ୍କା ମକ୍କା ପାଛ୍ଲି ଯୀଶୁସ୍ ଶିମୋନ୍ ପାତ୍ରାସ୍ସିନ୍ ମେନ୍ଚାସ୍, “ହେ ଶିମୋନ୍, ଯୋହାନ୍ସ୍କି ହାଦ୍ଦୁ, ନିନ୍ ଏଙ୍ଗାନ୍ ଇବ୍ଡ଼ା ଚେଲାର୍ସ୍ତି ବାଗ୍ଗେ ବାନେ ହାଖ୍ଖଦାଏ କାଁଏ?” ଶିମୋନ୍ ପାତ୍ରାସ୍ ଯୀଶୁସିନ୍ ତେଙ୍ଗିୟାସ୍, “ହଁ, ପ୍ରାଭୁ; ନିମ୍ତା ଆହ୍ଦାର୍ କା ଏନ୍ ନିମାନ୍ ବାନେ ହାଖ୍ଖଦାନ୍।” ଯୀଶୁସ୍ ଆସିନ୍ ତେଙ୍ଗିୟାସ୍, “ନିନ୍ ଏଙ୍ଘାଏ ଭେଡ଼ି ହାଦ୍ଦୁରିନ୍ ହାପା।” 16ଯୀଶୁସ୍ ଆରୁଅହନ୍ ଆସିନ୍ ମେନ୍ଚାସ୍, “ହେ ଶିମୋନ୍, ଯୋହାନ୍ସ୍କି ହାଦ୍ଦୁ, ନିନ୍ ଏଙ୍ଗାନ୍ ବାନେ ହାଖ୍ଖଦାଏ କାଁଏ?” ଆସ୍ ଆସିନ୍ ଉତ୍ତର୍ ଚିଚ୍ଚାସ୍, “ହଁ, ପ୍ରାଭୁ; ନିମ୍ତା ଆହ୍ଦାର୍ କା ଏନ୍ ନିମାନ୍ ବାନେ ହାଖ୍ଖଦାନ୍।” ଯୀଶୁସ୍ ଆସିନ୍ ତେଙ୍ଗିୟାସ୍, “ନିନ୍ ଏଙ୍ଘା ଭେଡ଼ିନ୍ ହାପା।” 17ଆନ୍ତିନ୍ ଯୀଶୁସ୍ ତିସ୍ରା ଥର୍ ଆସିନ୍ ମେନ୍ଚାସ୍, “ହେ ଶିମୋନ୍, ଯୋହାନ୍ସ୍କି ହାଦ୍ଦୁ, ନିନ୍ ଏଙ୍ଗାନ୍ ବାନେ ହାଖ୍ଖଦାଏ କାଁଏ?” ପାତ୍ରାସ୍ ବହୁତ୍ ଦୁଃଖୁ ମାନ୍ଚାସ୍ କେରାସ୍ କା ଯୀଶୁସ୍ ଆସିନ୍ ତିସ୍ରା ଥର୍ ଏନ୍ନେ ମେନ୍ଚାସ୍, “ନିନ୍ ଏଙ୍ଗାନ୍ ବାନେ ହାଖ୍ଖଦାଏ କାଁଏ?” ଆରୁ ଶିମୋନ୍ସ୍ ଯୀଶୁସିନ୍ ତେଙ୍ଗିୟାସ୍, “ହେ ପ୍ରାଭୁ, ନିମ୍ତା ଜାମାକିଛିନ୍ ଆହ୍ଦାର୍; ନିମ୍ ଇବନ୍ହି ଆହ୍ଦାର୍ କା ଏନ୍ ନିଙ୍ଗାନ୍ ବାନେ ହାଖ୍ଖଦାନ୍।” ଯୀଶୁସ୍ ଆସିନ୍ ତେଙ୍ଗିୟାସ୍, “ନିନ୍ ଏଙ୍ଘା ଭେଡ଼ିରିନ୍ ହାପା। 18ଏନ୍ ନିଙ୍ଗାନ୍ ସତ୍ତୁନ୍ ତେଙ୍ଗାଲ୍ଦାନ୍, ଯେତ୍କବାକେନ୍ ନିନ୍ ଯୁୱାନ୍ ରାଚ୍କାଏ ତା ନିଜେ ତିଆର୍ ମାନିକିରି ଏକାତାରା ଅଙ୍ଗାଲ୍କାଏ ଆଇୟା କାଲ୍କାଏ; ଲେକିନ୍ ଯେତ୍କବାକେନ୍ ନିନ୍ ପାଚ୍କି ମାନୟକୟ ତା ନିଜର୍ ହେଖ୍ଖା ଲାମ୍ବାବଏ, ଆରୁ ଦୁସ୍ରାର୍ ନିଙ୍ଗାନ୍ ତିଆର୍ କାମିକିରି ଏକାସାନ୍ ନିନ୍ ମା ଚାହାଁଲ୍କାରୟ ଆସାନ୍ ନିଙ୍ଗାନ୍ ହର୍କର୍।” 19ଇ କାତ୍ଥାତି ଯୀଶୁସ୍ ତେଙ୍ଗେଚିଚ୍ଚାସ୍ କା ପାତ୍ରାସ୍ ଏସ୍କେ ଖିଇକିରି ପାର୍ମେଶ୍ଵାର୍ସ୍କି ମାହିମା କାମସ୍। ଆରୁ ଏନ୍ନେ ତେଙ୍ଗିକିରି ଯୀଶୁସ୍ ଆସିନ୍ ତେଙ୍ଗିୟାସ୍, “ଏଙ୍ଘା ପାଛ୍ଲି-ପାଛ୍ଲି ବାରା।”
ଯୀଶୁସ୍ ଆରୁ ତାଙ୍ଘା ମୁରୁକ୍ ବାନେ ଚେଲାସ୍
20ଆଙ୍ଗେନ୍ ପାତ୍ରାସ୍ ପାଛ୍ଲି କିର୍ରେ ଏରିକିରି ଏରିୟାସ୍ କା, ଏକା ଚେଲାସିନ୍ ଯୀଶୁସ୍ ବାନେ ହାଖ୍ଖାଲିୟାସ୍, ଆସ୍ ତାଙ୍ଘା ପାଛ୍ଲି ବାରାଲିୟାସ୍। ଆରୁ ଏକାସ୍ ମାଁହା ଅନ୍ନାବାକେନ୍ ଯୀଶୁସ୍କି ଏହୁ ତାରା ନୁହିଁକିରି ମେନ୍ଚ୍କାଚାସ୍ କା, “ହେ ପ୍ରାଭୁ, ନିମାନ୍ ଧାର୍ତାନା ବାଲାସ୍ ନେଦ୍?” 21ଆସିନ୍ ଏରିକିରି ପାତ୍ରାସ୍ ଯୀଶୁସିନ୍ ତେଙ୍ଗିୟାସ୍, “ହେ ପ୍ରାଭୁ, ଇସ୍କି ଏନ୍ଦେର୍ ମାନୋଦ୍?” 22ଯୀଶୁସ୍ ଆସିନ୍ ତେଙ୍ଗିୟାସ୍, “ଯଦି ଏନ୍ ଚାହଁଦାନ୍ କା ଇସ୍ ଏଙ୍ଘାଏ ବାର୍ନାତକ୍ ଇସ୍ ରସ୍ ବୁଲି, ତା ନିନ୍ ଏନ୍ଦେର୍ଗେ ଇଦ୍ଘି ବାରେନୁ ସୋଚାଲ୍ଦାଏ? ନିନ୍ ଏଙ୍ଘା ପାଛ୍ଲି-ପାଛ୍ଲି ବାରା।” 23ଇଦ୍ଘିଲାଗାନ୍ ବିଶ୍ୱାସୀ ଜାମାର୍ଘି ମାଝାନୁ ଇ କାତ୍ଥାଦ୍ ଫାଇଲାରାଚାକେରା କା, ଆ ଚେଲାସ୍ ଏକ୍ଲାହି ମା ଖିଦାସ୍; ଲେକିନ୍ ଯୀଶୁସ୍ ଆସିନ୍ ଏନ୍ନେ ମାଲ୍ଲା ତେଙ୍ଗୁସ୍ କା ଆସ୍ ମା ଖିଦାସ୍, ଏନ୍ନେ ତେଙ୍ଗିୟାସ୍ କା, “ଯଦି ଏନ୍ ଚାହଁଦାନ୍ କା ଆସ୍ ଏଙ୍ଘା ବାର୍ନାତକ୍ ରସ୍, ତା ନିନ୍ ଏନ୍ଦେର୍ଗେ ଇଦ୍ଘି ବାରେନୁ ସୋଚାଲ୍ଦାଏ?”
ଆଖ୍ରୀ କାତ୍ଥା
24ଇସ୍ ଆ ଚେଲାସିନ୍ ଏକାସ୍ କା ଇ କାତ୍ଥାଘି ସାକ୍ଷୀ ଚିଦାସ୍ ଆରୁ ଏକାସ୍ କା ଇ କାତ୍ଥାବନ୍ ଲେଖ୍ଚ୍କାଦାସ୍, ଆରୁ ଏମ୍ ଆହ୍ଦାମ୍ କା ଆସ୍କି ସାକ୍ଷୀଦ୍ ସତ୍ତୁଦ୍। 25ଯୀଶୁସ୍ ଆରୁହି ଢେର୍ ନାଲ୍ଖୁ କାମ୍ଚାସ୍, ଏକାଦ୍ କା ଇ ବହିନୁ ଲେଖ୍ଚ୍କା ମାଲ୍ଲାଦିନ୍। ଯଦି ଆବ୍ଡ଼ା ଜାମାନ୍ ଅଣ୍ଟା-ଅଣ୍ଟା କାମିକିରି ଲେଖାକଦ୍ନେ ତା, ଏନ୍ ସୋଚ୍ଦାନ୍ କା ଏତ୍କ ବହି ମାନ କୋଦ୍ନେ କା ଆବନ୍ ଉଇୟାଗେ ଦୁନିଆଁନୁହି ଆଡ୍ଡା ମା ମାନଦ୍ନେ।